ADVERTISEMENT

ADVERTISEMENT

വാർഷികാഘോഷവും ഉന്നത വിജയികളെ ആദരിക്കലും നടത്തി

കുറ്റ്യാടി: മരുതോങ്കര സർവീസ് സഹകരണ ബാങ്കിന്‍റെ ഒന്നാം വാർഷികാഘോഷവും ഉന്നത വിജയം നേടിയ വിദ്യാർഥികളെ ആദരിക്കൽ ചടങ്ങും നടന്നു. ലാന്‍റ് ബോർഡ് മെന്പർ കെ.ടി. ജയിംസ് ഉദ്ഘാടനം ചെയ്തു. മരുതോങ്കര സർവീസ് സഹകരണ ബാങ്ക് പ്രസിഡന്‍റ് കെ.കെ. പാർഥൻ അധ്യക്ഷത വഹിച്ചു.

പഞ്ചായത്ത് അംഗങ്ങളായ ബീന കൂരാറ, അജിത പവിത്രൻ, വിവിധ രാഷ്ട്രീയ നേതാക്കളായ ടി. പവിത്രൻ, വി.കെ. അബ്ദുള്ള, കെ.ജെ. സെബാസ്റ്റ്യൻ, പി. ഭാസ്കരൻ, കെ. ജിഗേഷ്,

ഡയറക്ടർമാരായ പി.പി.കെ. നവാസ്, സനൽ വക്കത്ത്, ഷെർലി കെ. ജോർജ്, ജയ്സൽ കെ. സക്കറിയ, നസീമ ജമാൽ, അബിൻ ബാബു, വി.വി. വിൻസി, പി.എം. തോമസ്, അസിസ്റ്റന്‍റ് സെക്രട്ടറി ടി.ടി. ഷാജി, പി.പി. വിനോദൻ എന്നിവർ പ്രസംഗിച്ചു.

ADVERTISEMENT

അക്കൗണ്ട്‌സ് വിഭാഗത്തില്‍ തിരിമറി നടത്തിയയാളെ പിടികൂടി

കോഴിക്കോട്: മലബാര്‍ ഗ്രൂപ്പ് കമ്പനിയുടെ സഹസ്ഥാപനമായ കോഴിക്കോട് ആസ്ഥാനമായി പ്രവര്‍ത്തിക്കുന്ന എസ് 24x7 പ്രൈവറ്റ് ലിമിറ്റഡ് എന്ന കമ്പനിയുടെ അക്കൗണ്ട്‌സ് വിഭാഗത്തില്‍ തിരിമറി നടത്തിയ ആളെ പിടികൂടി. ഡെപ്യൂട്ടി മാനേജര്‍ ആയഞ്ചേരി മംഗലാട് പടിഞ്ഞാറേ തേരത്ത് ഹൗസിൽ റിനു രാജിനെ ( 37) യാണ് അറസ്റ്റ് ചെയ്തത്. ജോലി ചെയ്ത കാലയളവില്‍ കമ്പനി അക്കൗണ്ടിലെ പണം തിരിമറി നടത്തുകയും ഭീമമായ തുക തന്‍റെ സ്വന്തം അക്കൗണ്ടിലേക്കും മറ്റു ബന്ധുക്കളുടെ പേരിലുള്ള വിവിധ അക്കൗണ്ടുകളിലേക്കും വക മാറ്റി അയക്കുകയും ചെയ്തുവെന്ന കണ്ടെത്തലിനെ തുടര്‍ന്നാണ് നടപടി. റിനുരാജ് എന്നയാള്‍ കമ്പനിയുടെ പേര് ഉപയോഗിച്ച് നടത്തുന്ന യാതൊരു ഇടപാടുകള്‍ക്കും മലബാര്‍ ഗ്രൂപ്പിനോ എസ് 24x 7 പ്രൈവറ്റ് ലിമിറ്റഡ് എന്ന കമ്പനിക്കോ യാതൊരു ഉത്തരവാദിത്തവും ഉണ്ടായിരിക്കുന്നതല്ലെന്ന് മാനേജ്മെന്‍റ് അറിയിച്ചു.

മലയോര ഹൈവേ: കയ്യേറ്റക്കാരെ സഹായിക്കുന്നതിനെ നിയമപരമായി നേരിടുമെന്ന് ജനകീയ കർമ്മ സമിതി

ചക്കിട്ടപാറ: വ്യക്തമായ രേഖകൾ മറച്ച് വച്ച് ചക്കിട്ടപാറ ടൗണിൽ കയ്യേറ്റക്കാരെ സഹായിക്കുന്ന രീതിയിൽ വീതി നിർണയിച്ച് മലയോര ഹൈവേ നിർമിക്കാനുള്ള ചിലരുടെ നീക്കത്തെ നിയമത്തിലൂടെ നേരിടാൻ ജനകീയ കർമ്മ സമിതിയും ബിജെപി ചക്കിട്ടപാറ പഞ്ചായത്ത് കമ്മിറ്റിയും രംഗത്ത്. പെരുവണ്ണാമൂഴി മുതൽ ചെമ്പ്ര വരെയുള്ള അഞ്ച് കിലോ മീറ്ററിൽ ചക്കിട്ടപാറ ടൗണിലെ കേവലം 200 മീറ്റർ ഭാഗത്തിന്‍റെ ശരിയായ സർവേ രേഖകൾ കാണാനില്ലെന്ന അധികൃതരുടെ ഭാഗം ആടിനെ പട്ടിയാക്കുന്ന നയമാണ്. റോഡിന്‍റെ വീതി നിർണയിക്കാൻ ഇതുവരെ നാല് അളവുകളാണ് നടത്തിയത്. നാലും നാലു വിധത്തിലാണ് അളവ് രേഖപ്പെടുത്തിയിരിക്കുന്നത്. റോഡ് കയ്യേറ്റക്കാരെ സംരക്ഷിക്കാനാണിത്. ഇത് ജനം അംഗീകരിക്കില്ല. ഇതിന്‍റെ അടിസ്ഥാനത്തിൽ പ്രമുഖ അഭിഭാഷകരായ സുമിൻ എസ്. നെടുങ്ങാടൻ, ബെന്നി കാരിമറ്റം എന്നിവരുടെ സാന്നിധ്യത്തിൽ ചക്കിട്ടപാറ വ്യാപാരഭവൻ ഹാളിൽ റോഡിന്‍റെ വീതി അളവ് സംബന്ധിച്ച് ലഭ്യമായ രേഖകൾ പരിശോധിച്ചു. പരിശോധനയെത്തുടർന്ന് ഹൈക്കോടതിയുടെ നിയമ സഹായം തേടാൻ തീരുമാനിച്ചു. ജനകീയ കർമ്മ സമിതി കൺവീനർ രാജൻ വർക്കി, ബിജെപി നേതാക്കളായ ബാബു പുതുപ്പറമ്പിൽ, പത്മനാഭൻ പൊറോത്ത്, ശ്രീനിവാസൻ മനക്കൽ, വി.വി.രാജൻ, ചക്കിട്ടപാറയിലെ പ്രമുഖ വ്യവസായി സജി കാരിമറ്റം എന്നിവർ സംബന്ധിച്ചു.

ബാറ്ററി മോഷ്ടിച്ച പ്രതികൾ പിടിയിൽ

കൊയിലാണ്ടി: നന്തിയിൽ കരാർ കമ്പനി ലോറികളുടെ ബാറ്ററി മോഷണം പോയ സംഭവത്തിൽ പ്രതികൾ പോലീസ് പിടിയിൽ. തിക്കോടി കോറോത്ത് മുഹമ്മദ് ജിയാദ് (20), തച്ചൻകുന്ന് മനയത്ത് താഴെ മുഹമ്മദ് ജാബിർ (20) കടലൂർ മനയത്ത് മുഹമ്മദ് ഹിദാഷ് (19), തച്ചൻകുന്ന് ചേരിച്ചൽ താഴെ സഹീർ (20), കോടിക്കൽ നാഗപറമ്പിൽ ഷാമിൽ (20) തുടങ്ങിയവരെയാണ് അറസ്റ്റ് ചെയ്തത്. ജൂലായ് 19നാണ് കേസിനാസ്പദമായ സംഭവം. ദേശീയപാത കരാർ കമ്പനിയായ വാഗാഡിന്‍റെ ലോറികളുടെ ബാറ്ററികളാണ് മോഷ്ടിച്ചത്. ഇതുസംബന്ധിച്ച് സെക്യൂരിറ്റി ജീവനക്കാരൻ പരാതി നൽകുകയായിരുന്നു. വടകര ഡിവൈഎസ്പി ഹരി പ്രസാദിന്‍റെ നിർദേശപ്രകാരം സിഐ ശ്രീലാൽ ചന്ദ്രശേഖരൻ, എസ്ഐമാരായ ഗിരീഷ്, പ്രദീപ്, റൂറൽ സ്പെഷൽ സ്ക്വാഡ് എഎസ്ഐ ബീനീഷ് കുമാർ, ടി.കെ. ശോഭിത്ത്, എസ്.കെ. അഖിലേഷ്, ബി.എസ്. ശ്യാം ജിത്ത്, അതുൽ തുടങ്ങിയവരാണ് പ്രതികളെ പിടികൂടിയത്.

കുറ്റ്യാടി -കോഴിക്കോട് റൂട്ടിലെ ബസ് സർവീസ് പ്രശ്നം പരിഹരിക്കാൻ ഇടപെടണമെന്ന്

കോഴിക്കോട്: കോഴിക്കോട് -കുറ്റ്യാടി റൂട്ടിലെ സ്വകാര്യ ബസുകളുടെ മത്സരയോട്ടം കാരണം റോഡിൽ ജീവനുകൾ നഷ്ടപ്പെടുന്നത് ആവർത്തിക്കപ്പെടുന്ന സാഹചര്യത്തിൽ പ്രശ്ന പരിഹാരത്തിന് ജില്ലാ കളക്ടർ അടിയന്തരമായി സർവകക്ഷി യോഗം വിളിക്കണമെന്ന് കെഎസ്‌യു ജില്ലാ പ്രസിഡന്‍റ് വി.ടി സൂരജ് ആവശ്യപ്പെട്ടു. ഈ റൂട്ടിലോടുന്ന പല ബസുകളിലെയും ജീവനക്കാരായി പ്രവർത്തിക്കുന്നത് ലൈസൻസ് പോലുമില്ലാത്ത ക്രിമിനൽ സംഘമാണ്. ഇതിന് വേണ്ടരീതിയിലുള്ള പരിശോധനയോ നടപടികളോ മോട്ടോർ വാഹന വകുപ്പിന്‍റെ ഭാഗത്തുനിന്ന് ഉണ്ടാവാത്തതാണ് ഇത്തരം പ്രശ്നങ്ങൾ വീണ്ടും ആവർത്തിക്കപ്പെടാൻ കാരണം. കുറ്റ്യാടി- കോഴിക്കോട് റൂട്ടിൽ ബസുകൾക്ക് മതിയായ വേഗത്തിൽ സർവീസ് നടത്താനുള്ള സമയക്രമങ്ങൾ അനുവദിക്കണം. പേരാമ്പ്ര ഉള്ളിയേരി ബസ് സ്റ്റാൻഡുകളിൽ സ്വകാര്യ ബസുകൾ സർവീസ് നടത്തുമ്പോൾ സമയക്രമം പാലിക്കുന്നുണ്ടോയെന്ന് ഉറപ്പുവരുത്താൻ പോലീസ് എയിഡ് പോസ്റ്റുകൾ സ്ഥാപിക്കണമെന്നും ജില്ലാ കമ്മിറ്റി പ്രസ്താവനയിലൂടെ ആവശ്യപ്പെട്ടു.

അധികൃതരുടെ നിസംഗത; സമരം വ്യാപിപ്പിക്കാൻ യൂത്ത് കോൺഗ്രസ്

പേരാമ്പ്ര: കുറ്റ്യാടി- കോഴിക്കോട് റൂട്ടിലെ ബസുകളുടെ അമിതവേഗതയും മത്സരയോട്ടവും കാരണം നിരവധി ജീവനുകൾ നഷ്ടപ്പെടുകയും ദിനംപ്രതി ഉണ്ടാവുന്ന അപകടങ്ങളിൽ യാത്രക്കാർക്ക് പരിക്കേൽക്കുകയും ചെയ്യുന്ന സാഹചര്യത്തിൽ കളക്ടർ ഇടപെട്ട് ശാശ്വത പരിഹാരം ഉണ്ടാക്കണമെന്ന് യൂത്ത് കോൺഗ്രസ് ആവശ്യപ്പെട്ടു. വിദ്യാർഥിയുടെ അപകട മരണത്തിനു ശേഷം യൂത്ത് കോൺഗ്രസിന്‍റെ നേതൃത്വത്തിൽ പേരാമ്പ്രയിൽ ബസുകൾ തടഞ്ഞിരുന്നു. ചർച്ചയിൽ പരിഹാരമാവുന്നതിന് മുമ്പ് സ്വകാര്യ ബസുകൾ നിരത്തിലിറക്കിയാൽ കുറ്റ്യാടി- കോഴിക്കോട് റൂട്ടിലെ എല്ലായിടങ്ങളിലും ബസുകൾ തടയാനാണ് സംഘടനയുടെ തീരുമാനം. കോഴിക്കോട് പുതിയ സ്റ്റാൻഡ്, എരഞ്ഞിക്കൽ, തലക്കുളത്തൂർ, അത്തോളി, ഉള്ളിയേരി, നടുവണ്ണൂർ, പേരാമ്പ്ര, കടിയങ്ങാട്, കുറ്റ്യാടി എന്നിവിടങ്ങളിൽ നാളെ മുതൽ ബസുകൾ തടയുമെന്നും യൂത്ത് കോൺഗ്രസ് ജില്ലാ വൈസ് പ്രസിഡന്‍റ് എസ്. സുനന്ദ് പറഞ്ഞു.

യൂത്ത് ലീഗ് ആർടിഒ ഓഫീസ് മാർച്ച് നടത്തി

പേരാമ്പ്ര: കുറ്റ്യാടി -കോഴിക്കോട് റൂട്ടിൽ മനുഷ്യരെ കൊല്ലുന്ന പ്രൈവെറ്റ് ബസ് ഗുണ്ടകളെ അറസ്റ്റ് ചെയ്യണമെന്ന് ആവശ്യപ്പെട്ട് പേരാമ്പ്രയിൽ മുസ്ലിം യൂത്ത് ലീഗ് ആർടിഒ ഓഫീസ് മാർച്ച് നടത്തി. പേരാമ്പ്ര ബസ് സ്റ്റാൻഡ് പരിസരത്തിന് ആരംഭിച്ച് മാർച്ച് സിവിൽ സ്റ്റേഷൻ പരിസരത്ത് പോലീസ് തടഞ്ഞു. ദേശീയ സെക്രട്ടറി സാജിദ് നടുവണ്ണൂർ ഉദ്ഘാടനം ചെയ്തു. സി.കെ. ഹാഫിസ് അധ്യക്ഷത വഹിച്ചു. മിസ്ഹബ് കീഴരിയൂർ, ശിഹാബ് കന്നാട്ടി, ആർ.എം. നിഷാദ്, കെ.പി. റസാഖ്, കെ.സി. മുഹമ്മദ്, സഈദ് അയനിക്കൽ, സലീം മിലാസ്, ആർ.കെ. മുഹമ്മദ്, എ.കെ. ഫസലുറഹ്മാൻ എന്നിവർ പ്രസംഗിച്ചു. മാർച്ചിന് നിയാസ് കക്കാട്, ശംസുദീൻ മരുതേരി, യാസർ കക്കാട്, ഷബീർ ചാലിൽ, നജീബ് അരിക്കൽ, സിദീഖ് തൊണ്ടിയിൽ, പി.സി. സാദത്ത്, ഉബൈദ് കുട്ടോത്ത്, അഫ്നാസ് തുറയൂർ, ഗഫൂർ വാല്യക്കോട്, വി.വി. നസ്രുദ്ധീൻ, ആശിഖ് പുല്ല്യേട്ട്, ശുഹൈബ് അരിക്കുളം എന്നിവർ നേതൃത്വം നൽകി. photo: മാർച്ചിന് നേതൃത്വം കൊടുത്ത യൂത്ത് ലീഗ് നേതാക്കളെ പോലീസ് അറസ്റ്റ് ചെയ്ത് നീക്കുന്നു.

"ഞങ്ങൾക്കും ഇവിടെ ജീവിക്കണം' സമര കാഹളമുയർത്തി മലയോരം

ഓഗസ്റ്റ് രണ്ടിന് കർഷക അതിജീവന സാരി വേലി റാലി നടത്തും പേരാമ്പ്ര: ഞങ്ങൾക്കും ഇവിടെ ജീവിക്കണം എന്ന മുദ്രാവാക്യം ഉയർത്തി രൂക്ഷമായ വന്യമൃഗ ശല്യത്തിനെതിരേ താമരശേരി രൂപത കത്തോലിക്ക കോൺഗ്രസ് ഓഗസ്റ്റ് രണ്ടിന് നിലമ്പൂർ, താമരശേരി, പെരുവണ്ണാമൂഴി ഫോറസ്റ്റ് റെയിഞ്ച് ഓഫീസ് പരിസരങ്ങളിലേക്ക് കർഷക അതി ജീവന റാലി സംഘടിപ്പിക്കുന്നു. പെരുവണ്ണാമൂഴിയിൽ കൂരാച്ചുണ്ട് മരുതോങ്കര ഫൊറോനകളിലെ വിവിധ സംഘടനകളെ അണിനിരത്തിയാണ് സാരി വേലി റാലി നടത്തുന്നത്. ഇതിന്‍റെ ഭാഗമായി പെരുവണ്ണാമൂഴിയിൽ സംഘാടക സമിതി രൂപീകരിച്ചു. ഫാത്തിമ മാതാ പള്ളി പാരിഷ് ഹാളിൽ ചേർന്ന യോഗത്തിൽ മരുതോങ്കര ഫൊറോന വികാരി ഫാ. ആന്‍റോ മൂലയിൽ അധ്യക്ഷത വഹിച്ചു. കത്തോലിക്ക കോൺഗ്രസ് രൂപത പ്രസിഡന്‍റ് ഡോ. ചാക്കോ കാളാംപറമ്പിൽ ഉദ്ഘാടനം ചെയ്തു. കൂരാച്ചുണ്ട് ഫൊറോന വികാരി ഫാ. വിൻസെന്‍റ് കണ്ടത്തിൽ മുഖ്യ പ്രഭാഷണം നടത്തി. രൂപത സെക്രട്ടറി ഷാജി കണ്ടത്തിൽ, ഫാ. ഡൊമിനിക് മുട്ടത്തുകുടിയിൽ, ഫാ. റോയി കൂനാനിക്കൽ, ജോസ് ചെറുവള്ളിൽ, ജോഷി കറുകമാലിൽ, നിമ്മി പൊതിയിട്ടയിൽ എന്നിവർ പ്രസംഗിച്ചു. ഫാ. റെജി വള്ളോപ്പള്ളി സ്വാഗതവും ജോൺസൺ കക്കയം നന്ദിയും പറഞ്ഞു. താമരശേരി രൂപത വികാരി ജനറൽ റവ. ഫാ. ജോയ്സ് വയലിൽ മുഖ്യ രക്ഷാധികാരിയായി 151അംഗ സംഘാടക സമിതി രൂപീകരിച്ചു. ഫാ. വിൻസന്‍റ് കണ്ടത്തിൽ, ഫാ. ആന്‍റോ മൂലയിൽ എന്നിവർ രക്ഷാധികാരികളായും, ഫാ. റെജി വള്ളോപ്പള്ളി, ഫാ. ഡൊമിനിക് മുട്ടത്തുകുടിയിൽ, ഫാ. റോയി കൂനാനിക്കൽ, ഡോ. ചാക്കോ കാളാം പറമ്പിൽ, ഷാജി കണ്ടത്തിൽ എന്നിവർ സഹ രക്ഷാധികാരികളുമാണ്. ജോഷി കറുകമാലി (ചെയർമാൻ), ജോൺസൺ കക്കയം (ജന. കൺവീനർ), ജോസ് ചെറുവള്ളിൽ, ജോൺസൺ മാമൂട്ടിൽ എന്നിവർ കോ-ഓ ഡിനേറ്റർമാരും, സണ്ണി എമ്പ്രയിലിനെ ട്രഷററായും തെരഞ്ഞെടുത്തു.

കല്ലാനോട് വീടുകളിൽ കുരങ്ങുകൾ വിലസുന്നു

കൂരാച്ചുണ്ട്: ജനവാസ കേന്ദ്രങ്ങളിലെ കൃഷിയിടങ്ങളിൽ കുരങ്ങുകളുടെ ശല്യത്തോടൊപ്പം കുരങ്ങുകൾ വീടുകളിലും കയറി വിലസുന്നു. കഴിഞ്ഞദിവസം കല്ലാനോട് ടൗണിന് സമീപമുള്ള കർഷകനായ ചെമ്പനാനി കുര്യന്‍റെ വീട്ടിലാണ് പകൽ സമയത്ത് കുരങ്ങ് എത്തിയത്. വീട്ടിലുള്ള സാധനങ്ങളും മറ്റും ഇവ നശിപ്പിക്കുന്നതായും പറയുന്നു. സമീപ പ്രദേശങ്ങളായ കരിയാത്തുംപാറ, ഇരുപത്തെട്ടാംമൈലിലും കുരങ്ങു ശല്യം വ്യാപകമാണ്. ഈ മേഖലകളിൽ നാളീകേരത്തെ ആശ്രയിച്ചു കഴിയുന്ന നിരവധി കുടുംബങ്ങളാണ് ദുരിതത്തിലായത്. കല്ലാനോട് ടൗണിന് സമീപത്തെ വീടുകളിലും കുരങ്ങ് ശല്യം ആരംഭിച്ചതോടെ നാട്ടുകാർ ഏറെ ആശങ്കയിലാണ്. ഇവ അക്രമകാരികളാകുന്നതും പ്രദേശവാസികളിൽ ഏറെ ഭീതി ജനിപ്പിക്കുന്നുണ്ട്. ജനവാസ കേന്ദ്രങ്ങളിൽ കുരങ്ങുകൾ ഇറങ്ങുന്നതിന് ശാശ്വതമായ പരിഹാര നടപടികൾ വനം വകുപ്പ് സ്വീകരിക്കണമെന്നാണ് ഇവർ ആവശ്യപ്പെടുന്നത്.

പോക്സോ കേസിൽ യുവാവ് പിടിയിൽ

കോഴിക്കോട്: വിദ്യാർഥിനിക്കെതിരേ ലൈംഗികാതിക്രമം നടത്തിയ യുവാവ് പിടിയിൽ. കണ്ണൂർ മുഴക്കുന്ന് സ്വദേശി പുത്തൻപുര വീട്ടിൽ സജീർ (34) നെയാണ് ടൗൺ പോലീസ് പോക്സോ നിയമപ്രകാരം അറസ്റ്റ് ചെയ്തത്. 21നും അതിന് ഒരാഴ്ച മുമ്പും പ്രതി പെൺകൂട്ടിയെ ലൈംഗിക ഉദ്ദേശത്തോടുകൂടി പിന്തുടർന്ന് നിരീക്ഷിക്കുകയും കുറ്റിച്ചിറ വച്ച് പ്രതി അതിജീവിത കാണണമെന്ന ഉദ്ദേശത്തോടുകൂടി ഫ്ലയിംഗ് കിസ് നൽകുകയുമായിരുന്നു. അറസ്റ്റ് രേഖപ്പെടുത്തിയ ശേഷം പ്രതിയെ കോടതിയിൽ ഹാജരാക്കി.

കോൺഗ്രസ് പ്രതിഷേധിച്ചു

കുളത്തുവയൽ: കുളത്തുവയൽ സെന്‍റ് ജോർജ് തീർഥാടന കേന്ദ്രത്തിന്‍റെ കുരിശടിക്കു നേരെ നടന്ന ആക്രമണത്തിൽ ചക്കിട്ടപാറ പഞ്ചായത്ത് പതിമൂന്നാം വാർഡ് കമ്മിറ്റി ശക്തമായ പ്രതിഷേധം രേഖപ്പെടുത്തി. ആക്രമികൾക്കെതിരേ കർശന നടപടി സ്വീകരിക്കണമെന്ന് യോഗം ആവശ്യപ്പെട്ടു. സി.എം. അബൂബക്കർ അധ്യക്ഷത വഹിച്ചു. ജോർജ്ജ് മുക്കള്ളിൽ, ഉമ്മർ പുതുക്കുടി, അബ്ദുറഹിമാൻ, തങ്കച്ചൻ കളപ്പുര, യൂസുഫ്, മൂസ ആലോക്കണ്ടി തുടങ്ങിയവർ പ്രസംഗിച്ചു.

വി.എസ് നീതിമാനായ ഭരണാധികാരി: എം.പി. അഹമ്മദ്

കോഴിക്കോട്: നീതിമാനായ ഭരണാധികാരിയും രാഷ്ട്രീയ നേതാവുമായിരുന്നു വി.എസ്. അച്യുതാനന്ദനെന്ന് മലബാർ ഗ്രൂപ്പ് ചെയർമാൻ എം.പി. അഹമ്മദ് പറഞ്ഞു. മലബാർ ഗ്രൂപ്പിന്‍റെ ആവശ്യങ്ങളോട് എന്നും അനുഭാവപൂർണമായ സമീപനമാണ് അദ്ദേഹം പുലർത്തിയത്. ആരുടെ പ്രശ്നമായാലും ശ്രദ്ധിക്കാനും ന്യായമായ കാര്യങ്ങളിൽ ശക്തമായി ഇടപെടാനും അദ്ദേഹം തയാറായിരുന്നു. ആരോഗ്യപ്രശ്നങ്ങൾ കാരണം വീട്ടിൽ കഴിയുമ്പോൾ വി.എസിനെ സന്ദർശിച്ചിരുന്നു. വ്യവസായത്തിന്‍റെ കാര്യങ്ങൾ അദ്ദേഹം ചോദിച്ചറിഞ്ഞു. ഒരു പാട് പേർക്ക് തൊഴിൽ നൽകുന്ന മലബാർ ഗ്രൂപ്പ് വളർന്നു വികസിക്കണമെന്ന ഉറച്ച സമീപനം അദ്ദേഹത്തിനുണ്ടായിരുന്നു. അധഃസ്ഥിതരുടെ ഉന്നമനത്തിനു വേണ്ടി ജീവിതം മുഴുവൻ സമർപ്പിച്ച നേതാവായിരുന്നു വി.എസ്. കേരള ജനതയുടെ മനസിൽ അദ്ദേഹത്തിന് മായാത്ത സ്ഥാനമുണ്ടെന്നും അഹമ്മദ് പറഞ്ഞു.

വീടിന്‍റെ സംരക്ഷണഭിത്തി തകർന്നു

കൂരാച്ചുണ്ട്: കനത്ത മഴയിൽ വീടിന്‍റെ സംരക്ഷണ ഭിത്തി തകർന്ന് വീടിന് ഭീഷണി. കൂരാച്ചുണ്ട് പഞ്ചായത്ത് രണ്ടാം വാർഡ് നാലുസെന്‍റ് കോളനിയിൽ താമസിക്കുന്ന കുന്നേൽ ജോസിന്‍റെ വീടിന്‍റെ സംരക്ഷണഭിത്തിയുടെ ഒരു ഭാഗമാണ് തകർന്നത്. ഈ വീടിന്‍റെ പതിനഞ്ച് അടിയോളം താഴ്ഭാഗത്തും മൂന്ന് മീറ്ററോളം ദൂരത്തിലും താമസിക്കുന്ന കിഴക്കയിൽമീത്തൽ കുപ്പയുടെ വീടിനും മതിൽ തകർന്നത് ഭീഷണിയായിട്ടുണ്ട്

ബേപ്പൂർ ഫിഷിംഗ് ഹാർബർ നവീകരണം ഉടന്‍ പൂര്‍ത്തിയാക്കും

ട്രോളിംഗ് നിരോധനം അവസാനിക്കും മുമ്പേ പ്രവൃത്തി പൂർത്തിയാക്കാന്‍ ശ്രമം കോഴിക്കോട്: ട്രോളിംഗ് നിരോധന കാലയളവ് അവസാനിക്കും മുമ്പേ ബേപ്പൂർ ഫിഷിംഗ് ഹാർബർ നവീകരണം പൂർത്തിയാക്കാന്‍ ശ്രമം. ഹാർബർ വാർഫിലെയും പരിസരങ്ങളിലെയും എല്ലാ കേടുപാടുകളും തീർത്ത് മത്സ്യബന്ധനവും അനുബന്ധ പ്രവർത്തനങ്ങളും സുഗമമാക്കുന്നതിനാണ് സർക്കാർ 25 ലക്ഷം രൂപ ചെലവഴിച്ച്‌ ഹാർബർ അറ്റകുറ്റപ്പണി നടത്തുന്നത്. ഹാർബർ എൻജിനിയറിംഗ് വകുപ്പിന് കീഴിലാണ് പ്രവൃത്തി. പ്രവേശന കവാടത്തിനടുത്ത് വാഹനങ്ങൾ തമ്പടിക്കുന്ന സ്ഥലത്തും കയറ്റുമതി ലേലപ്പുരയ്ക്കടുത്ത്‌ പുതിയ വാർഫിന്‍റെ പ്രതലം 90 മീറ്ററും കോൺക്രീറ്റ് ചെയ്തു. ശുചീകരണം കൃത്യമായി നടക്കുന്നതിനും മലിനജലം ഉൾപ്പെടെ കെട്ടിനിൽക്കാതിരിക്കുന്നതിനുമായി ഓടകൾ ശരിയാക്കി 30 ഇടങ്ങളിൽ പുതിയ കോൺക്രീറ്റ് സ്ലാബുകൾ സ്ഥാപിച്ചു. കവാടത്തിനുനേരെയുള്ള പഴയ വാർഫിലും ഹാർബറിലെ മറ്റിടങ്ങളിലും പൊട്ടിപ്പൊളിഞ്ഞ പ്രതലങ്ങളെല്ലാം പുതുതായി കോൺക്രീറ്റ് ചെയ്തു. ഡീസൽ ബങ്കുകളുടെ പരിസരവും കോൺക്രീറ്റ് ചെയ്യുന്നതിനൊപ്പം കവാടവും കേടുപാടുകൾ തീർക്കുന്നുണ്ട്. 31ന് ട്രോളിംഗ് നിരോധനം അവസാനിക്കും മുമ്പെ പ്രവൃത്തികൾ പൂർത്തിയാക്കും. ഹാർബർ വാർഫ് ബേസിനും പരിസരവും ആഴം കൂട്ടുന്നതിന്‌ 5.94 കോടി ചെലവിൽ ഡ്രഡ്ജിംഗ് പ്രവൃത്തി കഴിഞ്ഞ ഏപ്രിലിൽ ആരംഭിച്ചിരുന്നു. കാലവർഷം ശക്തമായതിനാൽ താൽക്കാലികമായി നിർത്തിയ ഡ്രഡ്ജിംഗ് മഴ ശമിച്ചാൽ പുനരാരംഭിക്കും. ഹാർബാറിന്‌ വടക്ക് ഭാഗത്തെ ലോ ലെവൽ ജെട്ടി മുതൽ തെക്ക് സിൽക്ക് കപ്പൽ പൊളിശാല വരെ 450 മീറ്റർ നീളത്തിലും 100 മീറ്റർ വീതിയിലും 95,000 ക്യുബിക് മീറ്റർ പുഴയിലെ മണ്ണും ചെളിയും പാറയും നീക്കി ആഴംകൂട്ടുന്നതിനുള്ള പദ്ധതിയാണ്‌ നടപ്പാക്കുന്നത്. നിലവിൽ ഹാർബറിലും പരിസരത്തും നദിയിൽ മണ്ണടിഞ്ഞ് മത്സ്യബന്ധന യാനങ്ങൾ വന്നുപോകുന്നതിനും ഹാർബറിലടുപ്പിക്കുന്നതിനും പ്രയാസമുണ്ട്. വേലിയിറക്ക സമയങ്ങളിൽ ബോട്ടുകൾ ഹാർബറിൽ നങ്കൂരമിടുന്നതിനും മീൻപിടിത്തത്തിന്‌ പോകുന്നതിനും തടസ്സങ്ങളും പതിവാണ്.

മുക്കം പാലം നിർമാണം; ടെൻഡർ നടപടികൾ വേഗത്തിലായി

മുക്കം: കൊയിലാണ്ടി -എടവണ്ണ സംസ്ഥാന പാതയിലെ അന്പത് വർഷത്തിലേറെ പഴക്കമുള്ള മുക്കം പാലം പുനർ നിർമിക്കാൻ നടപടി വേണമെന്നാവശ്യം നിലനിൽക്കെ കടവിൽ പുതിയ പാലം നിർമിക്കാൻ നടപടികൾ ദ്രുതഗതിയിൽ പുരോഗമിക്കുന്നു. 7.25 കോടി രൂപയുടെ ഭരണാനുമതി നേരത്തെ പാലം നിർമാണത്തിന് ലഭിച്ചിരുന്നു. ഇപ്പോൾ ടെണ്ടർ നടപടികളിലേക്ക് കടന്നിരിക്കുകയാണ്. പിഎംആർ, പിടിഎസ് എന്നീ രണ്ട് കമ്പനികളാണ് ടെണ്ടറിൽ പങ്കെടുത്തതെന്നാണ് വിവരം. ടെണ്ടർ നടപടികൾ പൂർത്തിയാക്കി നിർമാണ ഘട്ടത്തിലേക്ക് കടക്കും. മുക്കം ടൗൺ സൗന്ദര്യവൽക്കരണത്തിന്‍റെ ഭാഗമായി നിർമിച്ച മിനി പാർക്ക് സംരക്ഷിച്ച് നിലവിലെ പാലം പൊളിക്കാതെ പാലത്തിന്‍റെ വലത് ഭാഗത്ത് പുതിയ മറ്റൊരു പാലം നിർമിക്കാനാണ് പദ്ധതി. ആറ് മീറ്റർ വീതിയിലാണ് പുതിയ പാലം നിർമിക്കുക. നിലവിലെ പാലത്തിന് 6.5 മീറ്റർ വീതിയാണ് ഉള്ളത്. നിലവിലെ പാലത്തിന് സുരക്ഷ ഭീഷണി ഇല്ലെന്നും ആവശ്യമായ അറ്റകുറ്റപണികൾ നടത്തുമെന്നും ലിന്‍റോ ജോസഫ് എംഎൽഎ അറിയിച്ചു. ഒരു മാസം കൊണ്ട് ടെണ്ടർ നടപടികൾ പൂർത്തിയാക്കി പ്രവൃത്തിയാരംഭിക്കാനാണ് ശ്രമം. അതേ സമയം നിലവിലെ പാലം കാലപ്പഴക്കം കാരണം സിമന്‍റ് അടർന്നുവീണ് കമ്പികൾ പുറത്ത് കാണുന്ന നിലയിലാണ്. ക്വാറി, ക്രഷർ യൂണിറ്റുകളിൽ നിന്ന് ടൺ കണക്കിന് ഭാരമുള്ള ലോഡുമായി ദിവസേന നൂറ് കണക്കിന് വാഹനങ്ങളാണ് ഇതുവഴി കടന്നു പോവുന്നത്. നിലവിൽ കിലോമീറ്ററിന് നാല് കോടിയോളം ചെലവഴിച്ച് സംസ്ഥാന പാത വീതികൂട്ടി നവീകരിക്കുന്ന പ്രവൃത്തി പൂർത്തിയായിട്ടുണ്ട്. ഈ പ്രവൃത്തിക്കൊപ്പം തന്നെ കാരശേരി പഞ്ചായത്തിനെയും മുക്കം മുൻസിപ്പാലിറ്റിയേയും ബന്ധിപ്പിക്കുന്ന ഈ പാലവും പുതുക്കിപ്പണിയുമെന്നായിരുന്നു കരുതിയിരുന്നത്. മാസങ്ങൾക്ക് മുമ്പ് പാലത്തിന്‍റെ കൈവരികൾ അറ്റകുറ്റ പ്രവൃത്തി നടത്തുകയും പെയിന്‍റടിച്ച് വൃത്തിയാക്കുകയും ചെയ്തിരുന്നു. പാലത്തിന്‍റെ അടിഭാഗം കോൺക്രീറ്റ് അടർന്ന് കമ്പികൾ പുറത്തു കണ്ടു തുടങ്ങിയതിന് പുറമെ രണ്ട് പ്രളയങ്ങളുടെ കുത്തൊഴുക്കിൽ കരകളുടെ കെട്ടുകൾക്കും ബലക്ഷയം വന്നിട്ടുണ്ട്. നിലവിലുള്ള റോഡിന്‍റെ പകുതി വീതിയാണ് പാലത്തിനുള്ളത്. രണ്ട് വലിയ വാഹനങ്ങൾക്ക് കഷ്ടിച്ചു കടന്നുപോകാനുള്ള വീതിയേയുള്ളു. ഇതു മൂലം പാലത്തിൽ അപകടങ്ങളും ഗതാഗതക്കുരുക്കും ഉണ്ടാവാറുണ്ട്. പുതിയ ഒരു പാലം കൂടി വരുന്നതോടെ ഈ പ്രശ്നങ്ങൾക്കെല്ലാം പരിഹാരമാവും. മാത്രമല്ല നിലവിലെ പാലം നിലനിർത്തുന്നതിനാൽ ഗതാഗതം വഴി തിരിച്ച് വിടേണ്ടിയും വരില്ല.

മലബാര്‍ റിവര്‍ ഫെസ്റ്റിവല്‍: ആവേശമായി ചുരം മഴയാത്ര

കോടഞ്ചേരി: മഴയെ അറിഞ്ഞും ചുരത്തിലെ പ്രകൃതിഭംഗി ആസ്വദിച്ചും നടന്നുനീങ്ങിയ ചുരം മഴയാത്ര ആവേശമായി. 24 മുതല്‍ 27 വരെ തുഷാരഗിരിയില്‍ ചാലിപ്പുഴയിലും ഇരുവഴഞ്ഞിപ്പുഴയിലും നടക്കുന്ന മലബാര്‍ റിവര്‍ ഫെസ്റ്റിവല്‍ പതിനൊന്നാം പതിപ്പിന്‍റെ ഭാഗമായാണ് ചുരം ഗ്രീന്‍ ബ്രിഗേഡിന്‍റെ നേതൃത്വത്തില്‍ മഴയാത്ര സംഘടിപ്പിച്ചത്. വിദ്യാര്‍ഥികളും അധ്യാപകരും പങ്കാളികളായ പരിപാടിയുടെ ഫ്‌ളാഗ് ഓഫ് ലക്കിടിയില്‍ ലിന്‍റോ ജോസഫ് എംഎല്‍എ നിര്‍വഹിച്ചു. പുതുപ്പാടി പഞ്ചായത്ത് പ്രസിഡന്‍റ് നജ്മുന്നിസ ഷെരീഫ്, അഡ്വഞ്ചര്‍ ടൂറിസം സിഇഒ ബിനു കുര്യാക്കോസ്, ഡിടിപിസി മാനേജര്‍ ഷെല്ലി മാത്യു, റിവര്‍ ഫെസ്റ്റിവല്‍ സംഘാടക സമിതി അംഗങ്ങളായ സി.എസ്. ശരത്, എം.എസ്. ഷെജിന്‍, ബെനീറ്റോ, ചുരം ഗ്രീന്‍ ബ്രിഗേഡ് അംഗങ്ങളായ മുഹമ്മദ് എരഞ്ഞോണ, ഷൗക്കത്ത് എലിക്കാട്, ഗഫൂര്‍ ഒതയോത്ത് എന്നിവര്‍ പ്രസംഗിച്ചു. ലക്കിടിയില്‍നിന്ന് തുടങ്ങി ചുരം രണ്ടാം വളവ് വരെ എട്ട് കിലോമീറ്ററോളം നടന്നെത്തിയ മഴയാത്രയുടെ സമാപനം കോടഞ്ചേരി പഞ്ചായത്ത് പ്രസിഡന്‍റ് അലക്‌സ് തോമസ് ചെമ്പകശേരി ഉദ്ഘാടനം ചെയ്തു. പുതുപ്പാടി പഞ്ചായത്ത് വൈസ് പ്രസിഡന്‍റ് ഷിജു ഐസക് മുഖ്യാതിഥിയായി. ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ഷംസു കുനിയില്‍ പ്രസംഗിച്ചു. മഴയാത്രയില്‍ പങ്കെടുത്ത മര്‍കസ് യൂനാനി കോളജ്, മര്‍കസ് ലോ കോളജ്, പുതുപ്പാടി ഗവ. ഹയര്‍ സെക്കന്‍ഡറി സ്‌കൂള്‍, ലിസ കോളജ് മണല്‍വയല്‍, ഗവ. ഹയര്‍ സെക്കന്‍ഡറി സ്‌കൂള്‍ കുറ്റിച്ചിറ, സി എം ആര്‍ട്‌സ് കോളജ് നടവയല്‍ തുടങ്ങിയവക്ക് ഉപഹാരം നല്‍കി. പങ്കെടുത്ത എന്‍എസ്എസ് വളണ്ടിയര്‍മാര്‍ക്ക് സര്‍ട്ടിഫിക്കറ്റുകളും വിതരണം ചെയ്തു.

വയോധിക ഷോക്കേറ്റ് മരിച്ച സംഭവം കെഎസ്ഇബിക്കെതിരേ കുടുംബം

കൊയിലാണ്ടി: കൊയിലാണ്ടിയില്‍ വയോധിക ഷോക്കേറ്റ് മരിച്ചതില്‍ കെഎസ്ഇബിക്കെതിരേ ആരോപണവുമായി കുടുംബം. വര്‍ഷങ്ങളായി വീടിനു മുകളിലൂടെ പോകുന്ന ഇലക്ട്രിക് ലൈനാണ് അപകടം ഉണ്ടാക്കിയതെന്നും ഈ ലൈന്‍ മാറ്റാന്‍ നേരത്തെ ആവശ്യപ്പെട്ടിട്ടും കെഎസ്ഇബി നടപടി എടുത്തില്ലെന്നുമാണ് പരാതി. രേഖാമൂലം പരാതി നല്‍കിയില്ലെങ്കിലും റീഡിംഗ് എടുക്കാനായി വരുന്ന ലൈന്‍മാൻ‌മാരോട് ഇക്കാര്യം പറയാറുണ്ടായിരുന്നു. ഫോട്ടോയെടുത്ത് പോകുകയല്ലാതെ മറ്റൊരു നടപടിയും എടുത്തില്ലെന്നും കുടുംബം പറയുന്നു. കഴിഞ്ഞ ദിവസമാണ് കൊയിലാണ്ടി കുറുവങ്ങാട് സ്വദേശി ഫാത്തിമ ഷോക്കേറ്റ് മരിച്ചത്. മരം വീണ് ഇലക്ട്രിക് ലൈന്‍ പൊട്ടി വീണതില്‍ നിന്ന് ഷോക്കേറ്റാണ് ഫാത്തിമ മരിച്ചത്. തൊട്ടടുത്ത വീട്ടിലെ പറമ്പില്‍ നിന്നും മരം കടപുഴകി വൈദ്യുതി ലൈനില്‍ വീഴുകയായിരുന്നു. ശബ്ദം കേട്ട് നോക്കാൻ പോയ ഫാത്തിമയ്ക്ക് ഷോക്ക് ഏല്‍ക്കുകയായിരുന്നു. ഉടന്‍ തന്നെ കൊയിലാണ്ടി താലൂക്ക് ആശുപത്രിയില്‍ പ്രവേശിപ്പിച്ചെങ്കിലും മരിച്ചിരുന്നു. രോഗിയായ ഭര്‍ത്താവും മരിച്ച ഫാത്തിമയും മാത്രമാണ് വീട്ടിലുള്ളത്. കെഎസ്ഇബിയുടെ ഉന്നതതല സംഘം സംഭവ സ്ഥലം സന്ദശിച്ച് റിപ്പോർട്ട് ബന്ധപ്പെട്ടവർക്ക് നൽകിയിട്ടുണ്ട്.

ചക്കിട്ടപാറ ടൗണിൽ റോഡ് വീതി നിർണയത്തിൽ കൃത്യത പാലിക്കണം: യുഡിഎഫ്

ചക്കിട്ടപാറ: കൃത്യമായ സർവേ രേഖകളുടെ അടിസ്ഥാനത്തിൽ റോഡിന്‍റെ അതിര് നിർണയിച്ച് മാത്രമെ ചക്കിട്ടപാറ ടൗണിൽ മലയോര ഹൈവേ നിർമാണം നടത്താൻ പാടുള്ളൂവെന്ന് യുഡിഎഫ് ചക്കിട്ടപാറ പഞ്ചായത്ത് കമ്മിറ്റി ആവശ്യപ്പെട്ടു. പല അളവു പ്രഹസനങ്ങൾ ഇതിനോടകം നടന്നു കഴിഞ്ഞു. കയ്യേറ്റക്കാരെ സഹായിക്കുന്ന നിലപാട് ആരുടെ ഭാഗത്തു നിന്നുമുണ്ടായാലും എതിർക്കും. നാടിന്‍റെ വികസനം മുന്നിൽ കണ്ടുള്ള നടപടികളാണ് അധികാരികളും ഉദ്യോഗസ്ഥരും സ്വീകരിക്കേണ്ടതെന്നും യോഗം ഓർമിപ്പിച്ചു. ജില്ലാ ചെയർമാൻ കെ. ബാലനാരായണൻ ഉദ്ഘാടനം ചെയ്തു. യുഡിഎഫ് പഞ്ചായത്ത് കമ്മിറ്റി പ്രസിഡന്‍റ് ജോസ് കാരിവേലി അധ്യക്ഷത വഹിച്ചു. നിയോജക മണ്ഡലം കൺവീനർ കെ.എ. ജോസ്‌ കുട്ടി, ഡിസിസി സെക്രട്ടറി പി. വാസു, ആവള ഹമീദ്, രാജീവ് തോമസ്, രാജൻ വർക്കി, ജോർജ് മുക്കള്ളിൽ, റെജി കോച്ചേരി, പാപ്പച്ചൻ കൂനന്തടം, ഹസൻകുട്ടി തുടങ്ങിയവർ പ്രസംഗിച്ചു.

ഹോട്ടല്‍ സ്പ്രിംഗ്‌വേയ്ക്ക് ശുചിത്വ മിഷന്‍ സര്‍ട്ടിഫിക്കറ്റ്

കുന്നമംഗലം: കേന്ദ്ര ടൂറിസം മന്ത്രാലയവും കുടിവെള്ള, ശുചിത്വ വകുപ്പും സംയുക്തമായി നടത്തിയ സ്വച്ഛത ഗ്രീന്‍ ലീഫ് റേറ്റിംഗ് സര്‍വ്വേയുടെ അടിസ്ഥാനത്തില്‍ കോഴിക്കോട് ജില്ലയിലെ ഫൈവ് സ്റ്റാര്‍ റേറ്റിംഗില്‍ ഏറ്റവും വൃത്തിയുള്ള ഹോട്ടലായി കുന്നമംഗലത്തെ ഹോട്ടല്‍ സ്പ്രിംഗ് വേ (എല്‍എല്‍പി) അര്‍ഹമായി. കോഴിക്കോട് ജില്ലാ കളക്ടര്‍ സ്‌നേഹില്‍ കുമാര്‍ സിംഗില്‍ നിന്നും ഹോട്ടല്‍ മാനേജര്‍ വിപിന്‍ ചാക്കോ ഫൈവ് സ്റ്റാര്‍ റേറ്റിംഗ് സര്‍ട്ടിഫിക്കറ്റും അനുമോദനവും ഏറ്റുവാങ്ങി.

പെൻഷൻകാരോടുള്ള അവഗണന അവസാനിപ്പിക്കണമെന്ന്

കൂരാച്ചുണ്ട്: പെൻഷൻകാരോടുള്ള സർക്കാർ അവഗണന അവസാനിപ്പിക്കണമെന്നും പന്ത്രണ്ടാം പെൻഷൻ പരിഷ്കരണ കമ്മീഷനെ ഉടൻ നിയമിക്കണമെന്നും കൂരാച്ചുണ്ടിൽ ചേർന്ന കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ കൂരാച്ചുണ്ട് മണ്ഡലം കമ്മിറ്റി വാർഷിക പൊതുയോഗം ആവശ്യപ്പെട്ടു. കെഎസ്എസ്പിഎ ജില്ലാ സെക്രട്ടറി ഒ.എം. രാജൻ ഉദ്ഘാടനം ചെയ്തു. കൂരാച്ചുണ്ട് മണ്ഡലം പ്രസിഡന്‍റ് കെ.എം ജോൺ കാപ്പിൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് വിൻസി തോമസ് മുഖ്യപ്രഭാഷണം നടത്തി. നിയോജക മണ്ഡലം പ്രസിഡന്‍റ് പി.കെ സുനിൽകുമാർ, സെക്രട്ടറി രമേശൻ ചെറിയപറമ്പത്ത്, ചെറിയാൻ അറയ്ക്കൽ, തോമസ് ജോസഫ്, ലൗലി സെബാസ്റ്റ്യൻ, എൻ.സി. ജോസഫ് നെല്ലിക്കൽ, തോമസ് ആഗസ്തി, ദേവസ്യ മഠത്തിൽപ്പറമ്പിൽ, എ.ജെ. ബേബി അനന്തക്കാട്ട്, സുജാത, ബേബി വണ്ടനാകര, ജോർജ് ദാസ് കാനാട്ട്, റോസമ്മ ആഗസ്തി, മോളി വല്ലയിൽ, റോയി ചെറിയാൻ എന്നിവർ പ്രസംഗിച്ചു. ചടങ്ങിനോടനുബന്ധിച്ച് നടന്ന കുടുംബ സംഗമത്തിൽ പുതിയ അംഗങ്ങൾക്ക് സ്വീകരണം നൽകി. പുതിയ ഭാരവാഹികളായി കെ.എം ജോൺ കാപ്പിൽ (പ്രസിഡന്‍റ്), ചെറിയാൻ അറയ്ക്കൽ (സെക്രട്ടറി), തോമസ് ജോസഫ് എടാട്ട് (ട്രഷറർ) എന്നിവരെ തെരഞ്ഞെടുത്തു.

മീഡിയേഷന്‍ ഫോര്‍ദി നേഷന്‍ കാമ്പയിന്‍

കോഴിക്കോട്: കോടതികളുടെ പരിഗണനയിലുള്ള കേസുകള്‍ മധ്യസ്ഥത വഴി തീര്‍പ്പാക്കുകയെന്ന ലക്ഷ്യത്തോടെ ദേശീയ നിയമ സേവന അഥോറിറ്റിയും സുപ്രീം കോടതിയുടെ മീഡിയേഷന്‍ ആന്‍ഡ് കണ്‍സിലിയേഷന്‍ പ്രോജക്റ്റ് കമ്മിറ്റിയും ചേര്‍ന്ന് രാജ്യവ്യാപകമായി സംഘടിപ്പിക്കുന്ന 90 ദിവസത്തെ "മീഡിയേഷന്‍ ഫോര്‍ ദി നേഷന്‍' കാമ്പയിന് ജില്ലയില്‍ തുടക്കം. വിവാഹസംബന്ധമായ തര്‍ക്കങ്ങള്‍, വാഹനാപകട നഷ്ടപരിഹാരങ്ങള്‍, ഗാര്‍ഹിക പീഡനക്കേസുകള്‍, ചെക്ക്, കൊമേഴ്സ്യല്‍, സ്വത്ത്, ഉപഭോക്ത്യ സേവന കേസുകള്‍, സിവില്‍, കോമ്പൗണ്ടബിള്‍ ക്രിമിനല്‍ കേസുകള്‍ എന്നിവയാണ് മധ്യസ്ഥതയിലൂടെ പരിഹരിക്കുക. 31 വരെ മീഡിയേഷന് അനുയോജ്യമായ കേസുകള്‍ തെരഞ്ഞെടുക്കുകയും കക്ഷികളെ അറിയിച്ച ശേഷം മധ്യസ്ഥ കേന്ദ്രങ്ങള്‍ക്ക് കൈമാറുകയും പരിചയസമ്പന്നരായ മുതിര്‍ന്ന അഭിഭാഷകര്‍, റിട്ട. ജഡ്ജിമാര്‍ തുടങ്ങിയവര്‍ ഉള്‍പ്പെടെയുള്ള മീഡിയേറ്റര്‍മാരുടെ മധ്യസ്ഥതയില്‍ തീര്‍പ്പാക്കല്‍ ശ്രമം നടത്തുകയും ചെയ്യും. നേരിട്ട് ഹാജരാകാന്‍ പ്രയാസമുള്ള കക്ഷികള്‍ക്കായി ഓണ്‍ലൈന്‍ സംവിധാനവും ഉപയോഗപ്പെടുത്തും. സേവനങ്ങള്‍ സൗജന്യമായിരിക്കും. മധ്യസ്ഥത വഴി തീരുന്ന കേസുകളില്‍ അടച്ച കോടതിഫീസ് പൂര്‍ണമായും തിരികെ നല്‍കും. ജൂലൈ ഒന്നിന് ആരംഭിച്ച ക്യാമ്പയിന്‍ സെപ്റ്റംബര്‍ 30ന് അവസാനിക്കും. കൂടുതല്‍ വിവരങ്ങള്‍ക്ക് ജില്ലാ കോടതിയിലെ മീഡിയേഷന്‍ സെന്‍ററുമായി ബന്ധപ്പെടാം.

നിഖ്യ സൂന്നഹദോസ് വാര്‍ഷികാഘോഷം

കോടഞ്ചേരി: യുണൈറ്റഡ് ക്രിസ്ത്യന്‍ ഫോറം കോടഞ്ചേരി മേഖലയുടെ ആഭിമുഖ്യത്തില്‍ നിഖ്യ സുന്നഹദോസിന്‍റെ 1700-ാം വാര്‍ഷികാഘോഷവും അനുസ്മരണവും സംഘടിപ്പിച്ചു. കോടഞ്ചേരി സെന്‍റ് മേരീസ് ഫൊറോന പാരിഷ് ഹാളില്‍ നടന്ന ചടങ്ങ് യാക്കോബായ സുറിയാനി സഭ കോഴിക്കോട് ഭദ്രാസനം മെത്രാപ്പോലീത്ത പൗലോസ് മോര്‍ ഐറേനിയോസ് ഉദ്ഘാടനം ചെയ്തു. താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍ അധ്യക്ഷത വഹിച്ചു. മലങ്കര ഓര്‍ത്തഡോക്‌സ് സുറിയാനി സഭ മലബാര്‍ ഭദ്രാസനം മെത്രാപ്പോലീത്ത ഗീവര്‍ഗീസ് മോര്‍ പക്കോമിയോസ് ചടങ്ങിൽ പങ്കെടുത്തു. യാക്കോബായ സുറിയാനി സഭ പെരുമ്പാവൂര്‍ മേഖല മെത്രാപ്പോലീത്ത മാത്യൂസ് മോര്‍ അഫ്രേം, കുന്നോത്ത് ഗുഡ് ഷെപ്പേഡ് മേജര്‍ സെമിനാരി പ്രഫ. ഫാ. ആന്‍റണി തറേക്കടവില്‍ എന്നിവര്‍ ക്ലാസുകള്‍ക്ക് നേതൃത്വം നല്‍കി.

ബഹിരാകാശ പതിപ്പുമായി വിദ്യാർഥികൾ

മുക്കം: കോടിക്കണക്കിന് ഇന്ത്യക്കാരുടെ അഭിമാനം ബഹിരാകാശത്തോളം ഉയർത്തി ചരിത്ര ദൗത്യം വിജയകരമായി പൂർത്തീകരിച്ച ശുഭാംഷു ശുക്ലക്ക് അഭിവാദ്യമർപ്പിച്ച് ചേന്ദമംഗലൂർ ഹയർ സെക്കൻഡറി സ്കൂൾ ജോഗ്രഫി ക്ലബ്ബിന്‍റെ ആഭിമുഖ്യത്തിൽ ബഹിരാകാശ പതിപ്പ് പുറത്തിറക്കി. രാകേഷ് ശർമ്മയ്ക്ക് ശേഷം ബഹിരാകാശത്ത് എത്തുന്ന ആദ്യ ഇന്ത്യക്കാരനായ ശുഭാംഷു ശുക്ലയെക്കുറിച്ചും ബഹിരാകാശത്തെ ഇന്ത്യൻ നേട്ടങ്ങളെ കുറിച്ചുമാണ് ബഹിരാകാശ പതിപ്പിൽ വിദ്യാർഥികൾ പ്രതിപാദിക്കുന്നത്. വിദ്യാർഥികൾ തയാറാക്കിയ പ്രത്യേക ബഹിരാകാശ പതിപ്പ് സ്കൂൾ പ്രിൻസിപ്പൽ ഇ. അബ്ദുൾ റഷീദ് പ്രകാശനം ചെയ്തു. ജ്യോഗ്രഫി അധ്യാപകൻ എൻ.കെ. സലീം അധ്യക്ഷത വഹിച്ചു. സ്റ്റാഫ് സെക്രട്ടറി ആർ. മൊയ്തു, പ്രജീഷ എന്നിവർ പ്രസംഗിച്ചു.

നോര്‍ക്ക റൂട്ട്‌സ് സാന്ത്വന അദാലത്തിന് തുടക്കം

കോഴിക്കോട്: നോര്‍ക്ക റൂട്ട്‌സിന്‍റെ പ്രവാസികള്‍ക്കുള്ള സാന്ത്വന പദ്ധതി അദാലത്തിന് ജില്ലയില്‍ തുടക്കം. കൊയിലാണ്ടി മുനിസിപ്പല്‍ ടൗണ്‍ ഹാളില്‍ നടന്ന അദാലത്തില്‍ മുന്‍കൂട്ടി രജിസ്റ്റര്‍ ചെയ്ത പ്രവാസികളില്‍നിന്ന് പെണ്‍മക്കളുടെ വിവാഹം, ചികിത്സ എന്നിവക്കും മരണപ്പെട്ട പ്രവാസിയുടെ കുടുംബത്തിനുള്ള ധനസഹായത്തിനുമുള്ള അപേക്ഷകള്‍ സ്വീകരിച്ചു. കൊയിലാണ്ടി മുനിസിപ്പല്‍ വൈസ് ചെയര്‍പേഴ്‌സണ്‍ അഡ്വ. കെ സത്യന്‍, മുന്‍ എംഎല്‍എ പി. വിശ്വന്‍, ലോക കേരള സഭാംഗം പി കെ കബീര്‍, പ്രവാസി സംഘം ജില്ലാ പ്രസിഡന്‍റ് കെ. സജീവന്‍, ജില്ലാ സെക്രട്ടറി സി.വി. ഇക്ബാല്‍, ജില്ലാ ട്രഷറര്‍ എം. സുരേന്ദ്രന്‍, ജനതാ പ്രവാസി സെന്‍റര്‍ സംസ്ഥാന സെക്രട്ടറി രാജന്‍ കൊളാവിപ്പാലം എന്നിവര്‍ അദാലത്തില്‍ പങ്കെടുത്തു. നോര്‍ക്ക റൂട്ട്‌സ് കോഴിക്കോട് സെന്‍റര്‍ മാനേജര്‍ സി. രവീന്ദ്രന്‍റെ നേതൃത്വത്തിലുള്ള ഉദ്യോഗസ്ഥരാണ് അപേക്ഷകള്‍ സ്വീകരിച്ചത്. അടുത്ത സാന്ത്വന അദാലത്ത് ആഗസ്റ്റ് 16ന് കുറ്റ്യാടി പഞ്ചായത്ത് കമ്യൂണിറ്റി ഹാളില്‍ നടക്കുമെന്ന് നോര്‍ക്ക റൂട്ട്‌സ് സെന്‍റര്‍ മാനേജര്‍ അറിയിച്ചു.

റേഷൻ മണ്ണെണ്ണ വിതരണം ചെയ്യണമെന്ന്

കൂരാച്ചുണ്ട്: റേഷൻ മൊത്തവ്യാപാരികളും ചെറുകിട വ്യാപാരികളുമായുള്ള തർക്കം അടിയന്തരമായി പരിഹരിച്ച് റേഷൻകട വഴി മണ്ണെണ്ണ വിതരണം ചെയ്യാൻ നടപടി സ്വീകരിക്കണമെന്ന് കല്ലാനോട് കോൺഗ്രസ് ആറ്, ഏഴ് വാർഡ് കമ്മിറ്റികൾ ആവശ്യപ്പെട്ടു. ഇതു സംബന്ധിച്ച് സർക്കാറിന് നിവേദനം നൽകുന്നതിന് യോഗം തീരുമാനിച്ചു. യോഗത്തിൽ വാർഡ് പ്രസിഡന്‍റ് കുര്യൻ ചെമ്പനാനി അധ്യക്ഷത വഹിച്ചു. പഞ്ചായത്ത് മെമ്പർമാരായ അരുൺ ജോസ്, സിമിലി ബിജു, നേതാക്കളായ സണ്ണി തുണ്ടിയിൽ, ജോൺസൺ എട്ടിയിൽ, സണ്ണി കോട്ടയിൽ, തോമസ് കുമ്പുക്കൽ, കെ.സി. തോമസ് കിഴക്കേവീട്ടിൽ, ജോസ് വട്ടുകുളം, സന്ദീപ് കളപ്പുരയ്ക്കൽ, ഷാജൻ കുടുകൻമാക്കൽ തുടങ്ങിയവർ പ്രസംഗിച്ചു.

വയോധികയെ രക്ഷപ്പെടുത്തി

കൊയിലാണ്ടി: ടോയ്‌ലറ്റ് ക്ലോസറ്റിൽ കാലുകുടിങ്ങിയ വയോധികയെ രക്ഷപ്പെടുത്തി. ഇന്നലെ ഉച്ചയ്ക്ക് ഒന്നോടെയാണ് സംഭവം. കൊയിലാണ്ടി വടക്കേകണ്ടി ക്ഷേത്രത്തിനു സമീപമുള്ള സ്ത്രീയുടെ കാൽ വഴുതി ടോയ്‌ലറ്റ് ക്ലോസറ്റിൽ കുടുങ്ങിയത്. കൊയിലാണ്ടിയിൽ നിന്നും അഗ്നി രക്ഷാസേന എത്തി ക്ലോസറ്റ് മുറിച്ച് കാൽ സുരക്ഷിതമായി പുറത്തെടുത്തു.

യൂത്ത് കോൺഗ്രസ് കെഎസ്ഇബി ഓഫീസ് ഉപരോധിച്ചു

കൊയിലാണ്ടി: കുറുവങ്ങാട് വൈദ്യുതി ലൈൻ പൊട്ടി വീണു സ്ത്രീ മരിച്ച സംഭവത്തിൽ യൂത്ത് കോൺഗ്രസ് കെഎസ്ഇബി ഓഫീസ് ഉപരോധിച്ചു. രണ്ട് തവണയായി ഗൃഹനാഥൻ പരാതിപ്പെട്ടിട്ടും തിരിഞ്ഞു നോക്കാത്ത കെഎസ്ഇബി ഉദ്യോഗസ്ഥരുടെ തികഞ്ഞ അനാസ്ഥയാണ് ഇത്ര ദാരുണമായ സംഭവത്തിന്‌ കാരണം. കെഎസ്ഇബിയുടെ അനാസ്ഥ കാരണം കേരളത്തിൽ മരണം തുടർക്കഥയാവുകയാണ്. ഇനിയും അനാസ്ഥ തുടരുകയാണെങ്കിൽ ശക്തമായ പ്രക്ഷോഭമായി മുന്നോട്ടു പോവുമെന്നും യൂത്ത് കോൺഗ്രസ് നിയോജകമണ്ഡലം പ്രസിഡന്‍റ് തൻഹീർ കൊല്ലം പറഞ്ഞു. ഉപരോധിച്ച യൂത്ത് കോൺഗ്രസ് പ്രവർത്തകരെ പോലീസ് അറസ്റ്റ് ചെയ്തു നീക്കി.

വന്യമൃഗശല്യം: എംഎൽഎ സർവകക്ഷി യോഗം വിളിക്കണമെന്ന്

തിരുവമ്പാടി: മലയോര മേഖലയിൽ കാട്ടാന, പുലി, കടുവ, പന്നി തുടങ്ങിയ വന്യമൃഗങ്ങളുടെ ശല്യം രൂഷമായ സാഹചര്യത്തിൽ എംഎൽഎ മുൻകൈ എടുത്ത് സർവകക്ഷിയോഗം വിളിച്ച് പ്രശനപരിഹാരത്തിന് നടപടി സ്വീകരിക്കണമെന്ന് കിസാൻ ജനത തിരുവമ്പാടി മണ്ഡലം കമ്മിറ്റി യോഗം ആവശ്യപ്പെട്ടു. വനം വകുപ്പിന്‍റെ പ്രവർത്തനം കാര്യക്ഷമമല്ലെന്നും യോഗം വിലയിരുത്തി. പ്രസിഡന്‍റ് ജോർജ് പ്ലാക്കാട്ട് അധ്യക്ഷത വഹിച്ചു. കിസാൻ ജനത സംസ്ഥാന ജനറൽ സെക്രട്ടറി ജോൺസൺ കുളത്തിങ്കൽ, ആർജെഡി നിയോജക മണ്ഡലം പ്രസിഡന്‍റ് ടാർസൻ ജോസ്, ആർജെഡി സംസ്ഥാന സമിതി അംഗം ജിമ്മി ജോസ് പൈമ്പിളളി, ജില്ലാ കമ്മിറ്റി മെമ്പർമാരായ വിത്സൻ പുല്ലുവേലി, ഗോൾഡൻ ബഷീർ, ജോസ് തോമസ് തുടങ്ങിയവർ പ്രസംഗിച്ചു.

തെരുവുനായ ശല്ല്യം; ജനങ്ങളുടെ ആവശ്യങ്ങളോട് മുഖം തിരിച്ച് പഞ്ചായത്ത്

കോഴിക്കോട്: കുപ്പായക്കോട്, ഈങ്ങാപ്പുഴ അങ്ങാടിയിലും പരിസരത്തും തെരുവ് നായ്ക്കൾ രാത്രികാലങ്ങളിൽ സ്വൈര്യ വികാരം നടത്തി യാത്രക്കാരെ വളഞ്ഞിട്ട് ആക്രമിക്കുന്നത് നിത്യസംഭവമാണ്. പുതുപ്പാടി പഞ്ചായത്ത് ഇതിനെതിരേ നടപടി എടുക്കുന്നില്ല. പഞ്ചായത്തിന്‍റെ നിസംഗതക്കെതിരേ കുപ്പായക്കോട് എകെസിസി, ഡിഎഫ്സി, ഇൻഫാം എന്നീ സംഘടനകളുടെ സംയുക്ത യോഗം പ്രതിഷേധിച്ചു. ഈ വിഷയത്തിൽ പുതുപ്പാടി പഞ്ചായത്ത് നിസംഗത തുടരുകയാണെങ്കിൽ ബഹുജനങ്ങളെ പങ്കെടുപ്പിച്ചു ശക്തമായ സമരപരിപാടിക്ക് നേതൃത്വം നൽകുവാനും യോഗം തീരുമാനിച്ചു. കുപ്പായക്കോട് സെന്‍റ് ജോസഫ്സ് പള്ളി വികാരി ഫാ. ജെയിംസ് കുഴിമറ്റത്തിൽ ഉദ്ഘാടനം ചെയ്തു. എകെസിസി യൂണിറ്റ് പ്രസിഡന്‍റ് രാജു ചോള്ളാ മഠത്തിൽ അധ്യക്ഷത വഹിച്ചു. ജോയ് കാളംപറമ്പിൽ, വിനോദ് കിഴക്കയിൽ, രാജു പുതിയാടം, ഫ്രാൻസിസ് കുറവങ്കര, മനോജ് കിഴക്കേക്കൂറ്റ്, അഭിലാഷ് ചുരത്തിൽ, ബിജു വെട്ടിത്താനം, ആന്‍റോ കിളിവേലി എന്നിവർ പ്രസംഗിച്ചു.

ആംബുലൻസ് വേണ്ടെന്നുവച്ച നടപടി പുനഃപരിശോധിക്കണം: യുഡിഎഫ്

പേരാമ്പ്ര: വടകര എംപി ഷാഫി പറമ്പിലിന്‍റെ ആസ്തി വികസന ഫണ്ടിൽ നിന്നും പേരാമ്പ്ര ഗവ. താലൂക്ക് ആശുപത്രിക്കു അനുവദിച്ച ആംബുലൻസ് ആവർത്തനച്ചിലവുകൾക്കു ഫണ്ടില്ല എന്ന കാരണം കണ്ടെത്തി ഫണ്ട് ലാപ്സാക്കുവാനുള്ള തീരുമാനം പിൻവലിക്കണമെന്ന് യുഡിഎഫ് പേരാമ്പ്ര നിയോജകമണ്ഡലം നേതൃയോഗം യോഗം ആവശ്യപ്പെട്ടു. ബ്ലോക്ക് പഞ്ചായത്ത് ഭരണ സമിതിയിലും എച്ച്എംസി മീറ്റിംഗിലും ചർച്ച ചെയ്യാതെ ആശുപത്രിക്കു എംപിയുടെ ആംബുലൻസ് വേണ്ട എന്ന തീരുമാനത്തിന് പിന്നിൽ രാഷ്ട്രീയ താല്പര്യങ്ങളാണ്. പാവപ്പെട്ട രോഗികളോടുള്ള വെല്ലു വിളിയാണിത്. പേരാമ്പ്ര താലൂക്കു ആശുപത്രിയിൽ ഇപ്പോൾ ആംബുലൻസ് സർവീസില്ല. നേരത്തെ എച്ച്എംസി നിയമിച്ച ആംബുലൻസ് ഡ്രൈവർ ഇപ്പോഴും ആശുപത്രിയിൽ നിലവിലുണ്ടെന്നിരിക്കെയാണ് ബ്ലോക്ക് പഞ്ചായത്ത് ഭരണ നേതൃത്വത്തിന്‍റെ ഈ നിഷേധാത്മക തീരുമാനം. ഇതിനെതിരേ ശക്തമായ സമരപരിപാടികൾ ആരംഭിക്കുവാനും യോഗം തീരുമാനിച്ചു. സംസ്ഥാന സർക്കാറിന്‍റെ ദുർഭരണത്തിനെതിരേ 23 ന് നടക്കുന്ന കളക്ട്രേറ്റ് ധർണയിൽ പേരാമ്പ്ര നിയോജകമണ്ഡലത്തിൽ നിന്നും 1000 പേരെ പങ്കെടുപ്പിക്കുവാനും തീരുമാനിച്ചു. യുഡിഎഫ് ജില്ലാ ചെയർമാൻ കെ. ബാലനാരായണൻ ഉദ്ഘാടനം ചെയ്തു. നിയോജക മണ്ഡലം ചെയർമാൻ ടി.കെ. ഇബ്രാഹിം അധ്യക്ഷനായിരുന്നു.

വിലങ്ങാട് കുറ്റല്ലൂർ ഉന്നതിയിൽ ഒറ്റയാൻ കൃഷി നശിപ്പിച്ചു

നാദാപുരം: ചിറ്റാരിയിൽ നിന്ന് കണ്ണവം വനത്തിലേക്ക് കാട് കയറ്റിവിട്ട ഒറ്റയാൻ ഉൾപ്പെട്ട കാട്ടാനകൾ കുറ്റല്ലൂർ ഉന്നതിയിൽ ഇറങ്ങി വ്യാപകമായി കാർഷിക വിളകൾ നശിപ്പിച്ചു. കണ്ണൂർ ജില്ലയിലെകണ്ണവം വനത്തോട് ചേർന്ന കോഴിക്കോട് ജില്ലയിലെ ജനവാസ മേഖലയായ കുറ്റല്ലുർ ആദിവാസി ഉന്നതിയിലാണ് ഒറ്റയാൻ ഇറങ്ങി ഭീതി പരത്തിയത്. ഞായറാഴ്ച്ച പുലർച്ചെ നാലോടെയാണ് ആനകൾ സർവ്വ നാശം വിതച്ചത്. 15 ലേറെ കുടുംബങ്ങളാണ് കുറ്റല്ലൂർ ഉന്നതിയിൽ താമസിക്കുന്നത്. മുള്ളൻ കല്ലിൽ ബാബു, ചന്തു എന്നീ കർഷകരുടെ തെങ്ങുകൾ, റബർ, കമുങ്ങുകൾ വ്യാപകമായി നശിപ്പിച്ചു. ഇരുപതും, മുപ്പത് വർഷം പ്രായമായതും കായ്ഫലം ഏറെയുള്ളതുമായ തെങ്ങുകൾ പിഴുതെറിഞ്ഞ നിലയിലാണ്. ടാപ്പിംഗ് നടത്തുന്ന അമ്പതിലേറെ റബർ മരങ്ങളും ഈ മേഖലയിൽ മാത്രം നശിപ്പിച്ചു. ശനിയാഴ്ച്ചയാണ് ചിറ്റാരിയിലും, പൂവത്താംകണ്ടിയിലും ജനവാസ കേന്ദ്രങ്ങളിൽ ഇറങ്ങി കൃഷി നശിപ്പിക്കുകയും ഭീതി പരത്തുകയും ചെയ്ത രണ്ട് കൂട്ടങ്ങളായി തമ്പടിച്ചിരുന്ന ആനകളെ വനം വകുപ്പ് അധികൃതർ വനത്തിലേക്ക് തുരത്തി ഓടിച്ചത്. എന്നാൽ ആനക്കൂട്ടം ഉൾവനത്തിലേക്ക് പോവാതെ കാടിറങ്ങി ചിറ്റാരി പ്രദേശത്തിന് മുകൾ ഭാഗം വഴി കുറ്റല്ലൂർ ഉന്നതിയിൽ ഇറങ്ങുകയായിരുന്നെന്ന് പ്രദേശവാസികൾ പറഞ്ഞു. ഈ മേഖലയിൽ വന മേഖലയോട് ചേർന്ന് ഫെൻസിംഗ് ലൈനുകൾ സ്ഥാപിച്ചിരുന്നില്ല. ഇത് കാരണം ആനകൾക്ക് കൃഷിയിടത്തിലിറങ്ങാൻ സൗകര്യം ലഭിച്ചെന്നും ഉന്നതി നിവാസികൾ പറഞ്ഞു. കാട് കയറിയ മറ്റൊരു കൂട്ടം ആനകൾ കമ്പിളി പ്പാറയ്ക്ക് സമീപം നുറുക്ക് കല്ലിലും എത്തി കാർഷിക വിളകൾ നശിപ്പിച്ചു. ചങ്ങളത്ത് പറമ്പിൽ സോജന്‍റെ കൃഷിയിടത്തിലാണ് ആനകൾ ഇറങ്ങി കാർഷിക നാശം വിതച്ചത്. ഇവിടെയും തെങ്ങുകളാണ് ഏറെയും നശിപ്പിച്ചത്. കൃഷിനാശവും, ആനകളിറങ്ങിയതുമെല്ലാം വനം വകുപ്പ് ഉദ്യോഗസ്ഥരെ അറിയിച്ചെങ്കിലും ആരും സ്ഥലത്ത് എത്തിയില്ലെന്ന് നാട്ടുകാർ ആരോപിച്ചു.

റോഡിൽ മാലിന്യം തള്ളി

നാദാപുരം: വിലങ്ങാട് ജനവാസ കേന്ദ്രത്തിൽ പ്ലാസ്റ്റിക് മാലിന്യം തള്ളി. നരിപ്പറ്റ പഞ്ചായത്ത് രണ്ടാം വാർഡിൽ വിലങ്ങാട് - കൈവേലി റോഡിൽ കൂളിക്കാവിലാണ് സംഭവം. ഞായറാഴ്ച്ച രാവിലെയാണ് റോഡിലും വീടുകൾക്ക് പരിസരങ്ങളിലും ചാക്ക് കണക്കിന് പ്ലാസ്റ്റിക് മാലിന്യങ്ങൾ തള്ളിയ നിലയിൽ കണ്ടെത്തിയത്. റോഡിൽ കെട്ടുകളാക്കി പരക്കെ ചിതറി കിടക്കുന്ന നിലയിലായിരുന്നു. സംഭവം അറിഞ്ഞ് നാട്ടുകാർ നടത്തിയ പരിശോധനയിലാണ് കക്കട്ട് ടൗണിലെ കടയിലേതാണ് മാലിന്യമെന്ന് കണ്ടെത്തിയത്. തുടർന്ന് നാട്ടുകാർ കട ഉടമയോട് സ്ഥലത്ത് എത്താൻ ആവശ്യപ്പെടുകയും മാലിന്യങ്ങൾ നീക്കം ചെയ്യിക്കുകയുമായിരുന്നു. കട ഉടമ പിക്കപ്പ് ലോറി എത്തിച്ച് വൈകുന്നേരത്തേടെ മാലിന്യം തിരികെ എടുത്തു.

ഉപയോഗശൂന്യമായ മരുന്ന് വിതരണം ചെയ്തത് അന്വേഷിക്കണം: കെ. പ്രവീൺ കുമാർ

താമരശേരി: താമരശേരി താലൂക്ക് ഹോസ്പിറ്റലിൽ ഉപയോഗശൂന്യമായ മരുന്ന് വിതരണം ചെയ്തത് അന്വേഷിക്കണമെന്ന് അഡ്വ. കെ. പ്രവീൺ കുമാർ പറഞ്ഞു. താമരശേരി മണ്ഡലം മഹിള കോൺഗ്രസ് സംഘടിപ്പിച്ച ഏകദിന ഉപവാസം ഉദ്ഘാടനം ചെയ്യുകയായിരുന്നു അദ്ദേഹം. മഹിള കോൺഗ്രസ് മണ്ഡലം പ്രസിഡന്‍റ് ഷീജ ദിലീപ് അധ്യക്ഷത വഹിച്ചു. കെപിസിസി മെമ്പർ പി.സി. ഹബീബ് തമ്പി മുഖ്യ പ്രഭാഷണം നടത്തി. മഹിള കോൺഗ്രസ് ജില്ലാ പ്രസിഡന്‍റ് ഗൗരി പുതിയേടത്ത്, ബാബു പൈക്കാട്ട്, നിജേഷ് അരവിന്ദ്, നവാസ് ഈർപ്പോണ, സി.ടി. ഭരതൻ, സി. മുഹ്സിൻ, യു.ആർ. ഗിരീഷ്, അൻഷാദ് മലയിൽ, സി. ഉസയിൻ, രാജേഷ് കുമാർ തുടങ്ങിയവർ പ്രസംഗിച്ചു. മഹിളാ കോൺഗ്രസ് നേതാക്കളായ കെ. സരസ്വതി, ഖദീജ സത്താർ, സോണിയ സുനിൽ, ലളിത തുടങ്ങിയവർ ഉപവസിച്ചു. സമാപന സമ്മേളനം ബ്ലോക്ക് കോൺഗ്രസ് പ്രസിഡന്‍റ് പി. ഗിരീഷ് കുമാർ ഉദ്ഘാടനം ചെയ്തു.

വലിയകൊല്ലി സെന്‍റ് അൽഫോൻസാ പള്ളി തിരുനാളിന് കൊടിയേറി

കോടഞ്ചേരി: വലിയകൊല്ലി സെന്‍റ് അൽഫോൻസാ തീർഥാടന കേന്ദ്രത്തിൽ വിശുദ്ധ അൽഫോൻസാമ്മയുടെ തിരുനാളിന് കൊടിയേറി. കൊടിയേറ്റ് കർമ്മം ഇടവക വികാരി ഫാ. ജിയോ പുതുശേരി പുത്തൻപുര നിർവഹിച്ചു. ഒന്പത് ദിവസമായി നടത്തുന്ന തിരുനാൾ 28ന് സമാപിക്കും. എല്ലാ ദിവസവും വൈകുന്നേരം അഞ്ചിന് വിശുദ്ധ കുർബാനയും തുടർന്ന് നൊവേനയും നടക്കും. സമാപന ദിവസമായ 28ന് രാവിലെ 9.30 ന് നൊവേനയും പത്തിന് ആഘോഷമായ വിശുദ്ധ കുർബാനയും തുടർന്ന് നേർച്ച ഭക്ഷണവും ഉണ്ടായിക്കും.

കൂരാച്ചുണ്ടിൽ യുവജന ഞായർ ആചരിച്ചു

കൂരാച്ചുണ്ട്: സെന്‍റ് തോമസ് ഫൊറോന ഇടവകയിലെ കെസിവൈഎം, എസ്എംവൈഎം യൂണിറ്റ് കമ്മിറ്റിയുടെ നേതൃത്വത്തിൽ "എലനോറ 2k25' യുവജന ഞായർ ആചരിച്ചു. കെസിവൈഎം രൂപത ഡയറക്ടർ ഫാ. ജോബിൻ തെക്കേക്കരമറ്റത്തിൽ ഉദ്ഘാടനം ചെയ്തു. കൂരാച്ചുണ്ട് യൂണിറ്റ് ഡയറക്ടർ ഫാ. മൈക്കിൾ നീലംപറമ്പിൽ അധ്യക്ഷത വഹിച്ചു. രൂപത പ്രസിഡന്‍റ് റിച്ചാർഡ് ജോൺ പന്തപ്ളാക്കൽ മുഖ്യപ്രഭാഷണം നടത്തി. ഡോണ കിരൺ തയ്യിൽ റിപ്പോർട്ട് അവതരിപ്പിച്ചു. സിസ്റ്റർ ഗ്രേസ് എസ്എച്ച്, ബ്രദർ ബിബിൻ കൊച്ചുപറമ്പിൽ, യൂണിറ്റ് പ്രസിഡന്‍റ് സെബിൻ പാഴുക്കുന്നേൽ, എയ്ബൽ ജോബി പനയ്ക്കവയൽ എന്നിവർ പ്രസംഗിച്ചു. അംഗത്വ സ്വീകരണവും നടന്നു.

നാല് റോഡുകള്‍ക്ക് 11 കോടിയുടെ ഭരണാനുമതി

കുറ്റ്യാടി: നിയോജകമണ്ഡലത്തിലെ നാല് റോഡുകള്‍ക്ക് 11 കോടി രൂപയുടെ ഭരണാനുമതി ലഭിച്ചതായി കെ.പി. കുഞ്ഞമ്മദ്കുട്ടി എംഎല്‍എ അറിയിച്ചു. തിരുവള്ളൂര്‍-ആയഞ്ചേരി റോഡിന് 1.5 കോടി, വില്യാപ്പള്ളി-ചെമ്മരത്തൂര്‍ റോഡിന് മൂന്ന് കോടി, എസ്മുക്ക്-വള്ളിയാട്-കോട്ടപ്പള്ളി-തിരുവള്ളൂര്‍ റോഡിന് 2.5 കോടി, ആയഞ്ചേരി തെരു-അരൂര്‍ കല്ലുംപുറം റോഡിന് നാല് കോടി എന്നിങ്ങനെയാണ് അനുമതി ലഭിച്ചത്. തിരുവള്ളൂര്‍-ആയഞ്ചേരി റോഡിന്‍റെ പൂര്‍ത്തീകരിക്കാനുള്ള 450 മീറ്റര്‍ ഭാഗം, വില്യാപ്പള്ളിയില്‍നിന്ന് ചെമ്മരത്തൂര്‍ വരെ പൂര്‍ത്തിയാക്കാനുള്ള 1.6 കിലോമീറ്റര്‍, എസ്മുക്ക്-വള്ളിയാട്-കോട്ടപ്പള്ളി-തിരുവള്ളൂര്‍ റോഡിലെ ശേഷിക്കുന്ന 2.21 കിലോമീറ്റര്‍ ഭാഗം, ആയഞ്ചേരി തെരു-അരൂര്‍ കല്ലുംപുറം റോഡിന്‍റെ നാല് കിലോമീറ്റര്‍ എന്നിവയാണ് ഉന്നത നിലവാരത്തില്‍ പൂര്‍ത്തീകരിക്കുക. കഴിഞ്ഞ ബജറ്റിലാണ് പ്രവൃത്തികള്‍ ഉള്‍പ്പെടുത്തിയത്. തുടര്‍ന്ന് പൊതുമരാമത്ത് വകുപ്പ് തോടന്നൂര്‍ സെക്ഷന്‍ മുഖേന എസ്റ്റിമേറ്റുകള്‍ തയാറാക്കി ചീഫ് എന്‍ജിനീയര്‍ വഴി സര്‍ക്കാരിന് സമര്‍പ്പിക്കുകയായിരുന്നു.

പൂവാറൻതോട് ഗവ. എൽപി സ്കൂളിന് വൈദ്യുതി ലൈൻ ഭീഷണി

കെട്ടിടത്തിന്‍റെ മേൽക്കൂരക്ക് ചോർച്ചയും കൂടരഞ്ഞി: പൂവാറൻതോട് ഗവ. എൽപി സ്കൂളിന് വൈദ്യുതി ലൈൻ ഭീഷണി. സ്കൂളിന്‍റെ ഗ്രൗണ്ടിലൂടെയാണ് വൈദ്യുതി ലൈൻ കടന്നുപോകുന്നത്. നിരവധി തവണ വൈദ്യുതി ലൈൻ മാറ്റി സ്ഫാപിക്കാൻ കെഎസ്‌ഇബി അധികൃതരോട് ആവശ്യപ്പെട്ടെങ്കിലും ഇതുവരെ ലൈൻ മാറ്റി സ്ഥാപിച്ചിട്ടില്ല. ഈ പ്രദേശത്ത് 2012 ലാണ് വൈദ്യുതി എത്തിയത്. അന്നുമുതൽ സ്കൂൾ ഗ്രൗണ്ടിലൂടെയാണ് കെഎസ്‌ഇബി വൈദ്യുതി ലൈൻ പോകുന്നത്. ഇതിന്‍റെ അപകടഭീഷണി നാട്ടുകാർ ഉദ്യോഗസ്ഥരുടെ ശ്രദ്ധയിൽപെടുത്തിയതാണ്. അന്ന് ഉദ്യോഗസ്ഥർ സാങ്കേതിക തടസം പറഞ്ഞപ്പോൾ വൈദ്യുതി തീരെ ഇല്ലാത്ത നാട്ടിൽ എങ്ങനെയെങ്കിലും വൈദ്യുതി ലഭിക്കട്ടെ എന്നതിനാൽ നാട്ടുകാർ സമ്മതിക്കുകയായിരുന്നു. എന്നാൽ കഴിഞ്ഞ അഞ്ച് വർഷം മുൻപ് സ്കൂൾ വാർഷികത്തോട് അനുബന്ധിച്ചു പന്തൽ ഇടുമ്പോൾ ലൈനിൽ തട്ടി അപകടം ഉണ്ടാകേണ്ടതായിരുന്നു. അന്ന് ബിജു എന്നയാൾ തലനാരിഴക്ക് രക്ഷപെടുകയായിരുന്നു. ഇതിന് ശേഷം നിരവധി തവണ പഞ്ചായത്ത് അതികൃതരോടും കെഎസ്‌ഇബി ഉദ്യോഗസ്ഥരോടും പരാതി പറഞ്ഞെങ്കിലും പരിഹാരം കണ്ടില്ല. കൂടാതെ 30 വർഷം പഴകിയ സ്കൂൾ കെട്ടിടത്തിന്‍റെ മേൽക്കൂരക്ക് ചോർച്ചയും ജനലുകൾ തകർന്നും ചുറ്റുമതിൽ ഇടിഞ്ഞും അപകട ഭീഷണിയുണ്ട്. മലയോര മേഖലയായതുകൊണ്ട് പ്രദേശത്ത് ശക്തമായ മഴയും കാറ്റും ഉണ്ടാവാറുണ്ട്. കെട്ടിടത്തിന്‍റെ അവസ്ഥ പഞ്ചായത്ത് അധികൃതരെ അറിയിച്ചിട്ട് യാതൊരു നടപടിയും ഉണ്ടയില്ലെന്നും പിടിഎ ഭാരവാഹികൾ പറഞ്ഞു. ഒരു കുട്ടിയുടെ ജീവൻ നഷ്ടമാകുന്നതിന് മുന്പ് പ്രശ്നത്തിന് പരിഹാരം കാണണമെന്നാണ് നാട്ടുകാരുടെ ആവശ്യം.

ചികിത്സയ്ക്കെത്തുന്നവരുടെ എണ്ണം കൂടി : ജില്ലയിൽ മഴക്കാലത്ത് ആശങ്കയായി പനി വ്യാപനം

കോഴിക്കോട്: മഴക്കാലത്ത് ജില്ലയില്‍ പനിച്ചൂട്.സർക്കാർ-സ്വകാര്യ ആശുപത്രികളിൽ പനി ബാധിച്ച് ചികിത്സക്കെത്തുന്നവരുടെ എണ്ണം വൻ തോതിൽ വർധിച്ചു. ആരോഗ്യവകുപ്പിന്‍റെ കണക്ക് പ്രകാരം ദിനംപ്രതി പനി ബാധിച്ച് ചികിത്സക്ക് എത്തുന്നവരുടെ എണ്ണം ആയിരത്തിന് മുകളിലാണ്. ജില്ലയിൽ 13,758 പേർ പനി ബാധിച്ച് സർക്കാർ ആശുപത്രികളിൽ ചികിത്സ തേടിയതായാണ് ആരോഗ്യവകുപ്പിന്‍റെ കണക്ക്. പനി കൂടി മുപ്പതോളം പേർ ദിനം കടത്തിച്ചികിത്സ തേടുന്നതായും കണക്കുകൾ വ്യക്തമാക്കുന്നു. സർക്കാർ, സ്വകാര്യ ആശുപത്രികളിൽ ജനറൽ വാർഡുകൾ പനി ബാധിതരെക്കൊണ്ട് നിറഞ്ഞ അവസ്ഥയിലാണ്. മെഡിക്കൽ കോളജ് അടക്കമുള്ള സർക്കാർ ആശുപത്രികളിൽ കിടക്ക കിട്ടാതെ വരാന്തകളിൽ വരെ രോഗികൾ കിടക്കുന്നുണ്ട്. സർക്കാർ ആശുപത്രികളിൽ ചികിത്സ തേടുന്നവരുടെ കണക്ക് മാത്രമാണ് ആരോഗ്യ വകുപ്പ് വെബ്സൈറ്റിൽ പറയുന്നത്. സ്വകാര്യ ആശുപത്രികളിലും ക്ലിനിക്കുകളിലും ചികിത്സക്കെത്തുന്നവരുടെ എണ്ണം കൂടി ലഭിച്ചാൽ പനി ബാധിതരുടെ കണക്ക് ഇനിയും വർധിക്കും. വൈറൽ പനിയോടൊപ്പം ഡെങ്കിപ്പനി, മഞ്ഞപ്പിത്തം, എലിപ്പനി, കോവിഡ് തുടങ്ങിയവയും പടർന്നു പിടിക്കുന്നുണ്ട്. തലവേദന, പനി, ചുമ, ജലദോശം തുടങ്ങിയ അസുഖങ്ങളും അസുഖ ലക്ഷണങ്ങളും അനുഭവപ്പെടുന്ന കുട്ടികളെ സ്കൂളുകളിലേക്ക് അയക്കരുതെന്ന് സ്കൂൾ അധികൃതർ നിർദേശം നൽകിയിട്ടുണ്ട്.

സാം തോമസിനെ ആദരിച്ചു

കോഴിക്കോട്: അര നൂറ്റാണ്ടിലേറെയായി മലയാള നാടകവേദിയിൽ സജീവ സാന്നിധ്യമായ സാം തോമസ് ദേവഗിരിയെ കോഴിക്കോട് താളിയോല സാംസ്കാരിക സമിതിയും ചാവറ കൾച്ചറൽ സെന്‍ററും സംയുക്തമായി സംഘടിപ്പിച്ച ചടങ്ങിൽ ആദരിച്ചു. നാടകരചയിതാവ്, നടൻ, സംവിധായകൻ, ഗായകൻ എന്നീ നിലകളിൽ കോഴിക്കോടൻ നാടകവേദിക്ക് സുപരിചിതനായ സാം തോമസ് ജീവിതം കലയാക്കിയ വ്യക്തിയാണെന്ന് ചടങ്ങ് ഉദ്ഘാടനം ചെയ്ത പ്രമുഖ മലയാള സിനിമാ സംവിധായകൻ വി.എം. വിനു പറഞ്ഞു. കലാഭവൻ പ്രസിഡന്‍റ് ഫാ. ചെറിയാൻ കുനിയന്തോടത്ത് സിഎംഐ പൊന്നാട അണിയിച്ചു. ചടങ്ങിൽ താളിയോല സാംസ്കാരിക സമിതി പ്രസിഡന്‍റ് പി.ഐ. അജയൻ, പ്രശസ്ത കവി പി.പി. ശ്രീധരനുണ്ണി, സെന്‍റ് ജോസഫ്സ് കോളജ് പ്രിൻസിപ്പൽ ഫാ. ഡോ. ബിജു ജോസഫ് സിഎംഐ , ചാവറ കൾച്ചറൽ സെന്‍റർ പ്രസിഡന്‍റ് ഫാ. ജോൺ മണ്ണാറത്തറ, വിൽസൻ സാമുവൽ, ഡോ റോഷൻ ബിജിലി , കെ.എഫ്. ജോർജ്, ഫാ. സിബി പൊൻപാറ, പി.പി. വൈരമണി എന്നിവർ പ്രസംഗിച്ചു. സാം തോമസ് മറുപടി പ്രസംഗം നടത്തി.

മോഡൽ സ്കൂളിലെ സുരക്ഷാ ഭീഷണി : മനുഷ്യാവകാശ കമ്മീഷൻ കേസെടുത്തു

കോഴിക്കോട് : മാനാഞ്ചിറ ഗവ. മോഡൽ ഹയർ ഹയര്‍ സെക്കന്‍ഡറി സ്‌കൂളിലെ പഴയ കെട്ടിടം തകർന്നു വീഴാറായിട്ടും സുരക്ഷാ നടപടികൾ സ്വീകരിച്ചില്ലെന്ന പരാതിയിൽ മനുഷ്യാവകാശ കമ്മീഷൻ സ്വമേധയാ കേസെടുത്തു. റീജണൽ ഡപ്യൂട്ടി ഡയറക്ടർ( വിദ്യാഭ്യാസം) , ജില്ലാ കളക്ടർ, കോർപറേഷൻ സെക്രട്ടറി എന്നിവർ 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് നിർദ്ദേശം നൽകി. ഓഗസ്റ്റ് 26 ന് കോഴിക്കോട് റസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തയുടെ അടിസ്ഥാനത്തിൽ രജിസ്റ്റർ ചെയ്ത കേസിലാണ് നടപടി.കെട്ടിടത്തിന് സമീപം ചെല്ലരുതെന്ന് സ്കൂൾ അധിക്യതർ കുട്ടികൾക്ക് നിർദ്ദേശം നൽകാറുണ്ടെങ്കിലും പ്രാവർത്തികമാകാറില്ല.

ഉമ്മൻ ചാണ്ടി അനുസ്മരണ യോഗംനടത്തി

ചെമ്പുകടവ്: ദേശീയ കർഷക തൊഴിലാളി ഫെഡറേഷന്‍റെ നേതൃത്വത്തിൽ ചെമ്പുകടവ് അങ്ങാടിയിൽ ഉമ്മൻ ചാണ്ടി അനുസ്മരണ യോഗംനടത്തി. ഡികെടിഎഫ് കോടഞ്ചേരി മണ്ഡലം സെക്രട്ടറി തങ്കമണി തീക്കുന്നേൽ അദ്ധ്യക്ഷത വഹിച്ചു. മണ്ഡലം പ്രസിഡന്‍റ് ബേബിച്ചൻ വട്ടുകുന്നേൽ യോഗം ഉദ്ഘാടനം ചെയ്തു. ബാലകൃഷ്ണൻ തീക്കുന്നേൽ, ജോസ് പെരുമ്പള്ളിൽ, മനോജ് തട്ടാരുപറമ്പിൽ, ജെയ്സൺ പുലിക്കുടിയിൽ, സി.സി. ചന്ദ്രൻ, പാപ്പച്ചൻ ഒരപ്പുഴിയ്ക്കൽ, കുഞ്ഞാപ്പു പറക്കോട്ടുപാലത്ത്, മാത്യു കാട്ടുപറമ്പിൽ തുടങ്ങിയവർ പ്രസംഗിച്ചു. കേരള സ്‌റ്റേറ്റ് പെൻഷനേഴ്സ് അസോസിയേഷൻ നാദാപുരം നിയോജകമണ്ഡലം നടത്തിയ ഉമ്മൻ ചാണ്ടി അനുസ്മരണം കെപിസിസി മെമ്പർ അച്യുതന്‍ പുതിയേടത്ത്ഉദ്ഘാടനം ചെയ്തു. മുകന്ദൻ ആധ്യക്ഷം വഹിച്ചു. സെക്രട്ടറി രാജീവ് പുതുശ്ശേരി, ട്രഷറർ ജോഷി ദാമോദരൻ മാസ്റ്റർ പവിത്രൻ , വിജയലക്ഷമി സുമിത ടീച്ചർ, കെ ടി രാജൻ കെ. അബുജാക്ഷൻ കെ.രാജൻ ഡൊമിനിക് എന്നിവര്‍ പ്രസംഗിച്ചു.

വിശുദ്ധ അൽഫോൻസാമ്മയുടെ തിരുനാള്‍

മഞ്ഞക്കുന്ന്: മഞ്ഞക്കുന്ന് സെന്‍റ് അൽഫോൻസാ ദേവാലയത്തിൽ ഇടവക മദ്ധ്യസ്ഥയായ വി.അൽഫോൻസാമ്മയുടെ നവനാൾ മധ്യസ്ഥാപേക്ഷയും തിരുനാളും തുടങ്ങി.ഇന്നലെ വൈകുന്നേരം 4.30 ന് മഞ്ഞക്കുന്ന് സെന്‍റ് അൽഫോൻസാ ഇടവക വികാരി ഫാ. ബോബി പൂവത്തിങ്കൽ തിരുനാൾ കൊടിയേറ്റ് നിർവഹിച്ചു. തുടർന്ന് നടന്ന വി.കുർബാന,വചന സന്ദേശം, നൊവേന എന്നിവക്ക് വിലങ്ങാട് സെന്‍റ്.ജോർജ് ഫൊറോന വികാരി റവ.ഫാ.വിൽസൺ മുട്ടത്തുകുന്നേൽ നേതൃത്വം നൽകി. 27 വരെ എല്ലാ ദിവസവും വൈകിട്ട് 4:15 ന് ജപമാല, 4:45 ന് വി.കുർബാന,നൊവേന എന്നിവ നടത്തപ്പെടുന്നതാണ്. പ്രധാന തിരുനാൾ ദിവസമായ 28 ന് രാവിലെ 10 ന് ആഘോഷമായ വിശുദ്ധകുർബാനയ്ക്ക് കെസിവൈഎംഎസ്എംവൈഎം താമരശ്ശേരി രൂപത ഡയറക്റ്റർ റവ.ഫാ.ജോബിൻ തെക്കേക്കരമറ്റത്തിൽ കാർമ്മികത്വം വഹിക്കും.തുടർന്ന് ലദീഞ്ഞ്,തിരുശേഷിപ്പ് വണക്കം,സ്നേഹവിരുന്ന് എന്നിവയുണ്ടാകും.

വന്യമൃഗ ആക്രമണത്തിനെതിരേ എകെസിസി പ്രതിഷേധറാലി

കൂരാച്ചുണ്ട്: വർധിച്ചു വരുന്ന വന്യമൃഗ ആക്രമണങ്ങൾ മൂലം മലയോര മേഖലകളിലെ ജനങ്ങളുടെ ജീവിതം വഴിമുട്ടിയ സാഹചര്യത്തിൽ "ഞങ്ങൾക്കിവിടെ ജീവിക്കണം' എന്ന മുദ്രാവാക്യം ഉയർത്തി താമരശേരി രൂപത കത്തോലിക്ക കോൺഗ്രസ്, കൂരാച്ചുണ്ട് മരുതോങ്കര ഫൊറോനകളിലെ വിവിധസംഘടനകളുടെ നേതൃത്വത്തിൽ ഓഗസ്റ്റ് രണ്ടിന് പെരുവണ്ണാമൂഴി ഫോറസ്റ്റ് റെയിഞ്ച് ഓഫീസിലേക്ക് മലയോര കർഷക അതിജീവന റാലി സംഘടിപ്പിക്കാൻ തീരുമാനിച്ചു. എകെസിസി കൂരാച്ചുണ്ട്, മരുതോങ്കര ഫൊറോന കമ്മിറ്റികളുടെ നേതൃത്വത്തിൽ ചേർന്ന യോഗത്തിലാണ് തീരുമാനം.ഓഗസ്റ്റ് രണ്ടിന് നടക്കുന്ന പ്രതിഷേധ റാലി താമരശേരി ബിഷപ് മാർ റെമീജിയോസ് ഇഞ്ചനാനിയിൽ ഉദ്ഘാടനം ചെയ്യും. വന്യമൃഗ ആക്രമണം മനുഷ്യാവകാശ ലംഘനമാണ്. ഇതിനെതിരേയുള്ള പോരാട്ടങ്ങൾ അനിവാര്യമാണ്. വന്യമൃഗ സംരക്ഷണത്തിന്‍റെ പേരിൽ കോടാനുകോടി രൂപയുടെ ഫണ്ടുകൾ ധൂർത്തടിക്കുന്ന വനം വകുപ്പ് നിഗൂഡമായ കർഷക കുടിയൊഴിപ്പിക്കലും, കർഷക ദ്രോഹവുമാണ് നടത്തുന്നതെന്ന് യോഗം ആരോപിച്ചു. എകെസിസി രൂപത പ്രസിഡന്‍റ് ഡോ.ചാക്കോ കാളംപറമ്പിൽ യോഗം ഉദ്ഘാടനം ചെയ്തു. മരുതോങ്കര ഫൊറോന ഡയറക്ടർ ഫാ. ആന്‍റോ മൂലയിൽ അധ്യക്ഷത വഹിച്ചു. കൂരാച്ചുണ്ട് ഫൊറോന ഡയറക്ടർ ഫാ. വിൻസെന്‍റ് കണ്ടത്തിൽ മുഖ്യപ്രഭാഷണം നടത്തി. ഡയറക്ടർമാരായ ഫാ. ഡൊമിനിക് മുട്ടത്തുകൂടി, ഫാ. ജോർജ് വരിക്കശേരി, ഫാ. എമ്മാനുവേൽ കുറൂർ, ഫാ. ജിനോ ചുണ്ടയിൽ, ഫാ. ജോസഫ് കൂനാനിക്കൽ, ഫാ. കുര്യാക്കോസ് കൊച്ചുകൈപ്പേൽ, ഫാ. ഏബ്രഹാം വള്ളോപ്പള്ളി ഭാരവാഹികളായ ജോൺസൺ കക്കയം, ജോഷി കറുകമാലില്‍, ഡോ. ജോൺ കട്ടക്കയം, നിമ്മി പൊതിയിട്ടേൽ, ജോസ് ചെറുവള്ളിൽ എന്നിവർ പ്രസംഗിച്ചു.

ഗതാഗത നിയന്ത്രണ ബോർഡുകൾ കൈമാറി

തിരുവമ്പാടി: തിരുവമ്പാടി - കൂടരഞ്ഞി റോഡിലെ ഗതാഗത നിയന്ത്രണത്തിന്‍റെ ഭാഗമായി നോ പാർക്കിംഗ് ബോർഡുകൾ കൈമാറി. ലിസ ഹോസ്പിറ്റൽ എംഡി ഡോ. പി.എം. മത്തായി തിരുവമ്പാടി സിഐ കെ. പ്രജീഷിന് ബോർഡുകൾ കൈമാറി. ചടങ്ങിൽ എസ്ഐമാരായ ഇ.കെ. രമ്യ, നിതിൻ, ലിസ ഹോസ്പിറ്റൽ ഡയറക്ടർ ഡോ. പ്രവീൺ മാത്യു, മാനേജർ അനുസ്മിത, ജമീഷ് ഇളംതുരുത്തിൽ എന്നിവർ പങ്കെടുത്തു.

അഞ്ച് സീനിയർ വിദ്യാർഥികളെ സസ്പെൻഡ് ചെയ്തു

നടുവണ്ണൂർ: വാകയാട് ഹയർ സെക്കൻഡറി സ്കൂളിൽ പ്ലസ് വൺ വിദ്യാർഥിയെ മർദിച്ച സംഭവത്തിൽ സ്കൂളിലെ അഞ്ച് സീനിയർ വിദ്യാർഥികളെ സസ്പെൻഡ് ചെയ്തു. പ്ലസ് വൺ സയൻസ് വിദ്യാർഥിയെയാണ് പ്ലസ് ടു സയൻസ് ബാച്ചിലെ വിദ്യാർഥികൾ മർദിച്ച് പരിക്കേൽപിച്ചത്. ജൂണിയര്‍ വിദ്യാർഥികൾ ഇൻസ്റ്റഗ്രാമിൽ പോസ്റ്റ് ചെയ്യരുതെന്ന് സീനിയർ വിദ്യാർഥികൾ ആവശ്യപ്പെട്ടിരുന്നു. ഇതുമായുണ്ടായ തർക്കമാണ് മർദനത്തിൽ കലാശിച്ചത്. വിദ്യാർഥിക്ക് ശരീരമാസകലം മർദനമേറ്റ പാടുണ്ട്. പ്രിൻസിപ്പലിന് ലഭിച്ച പരാതി പോലീസിന് കൈമാറിയതിനെ തുടർന്ന് കേസെടുത്തിരുന്നു. സ്കൂളിൽ അടിയന്തര സ്റ്റാഫ് യോഗവും പിടിഎയും ചേർന്നാണ് അക്രമത്തിൽ പങ്കെടുത്ത വിദ്യാർഥികളെ സസ്പെൻഡ് ചെയ്യാൻ തീരുമാനിച്ചത്.

8.48 കോടി ചെലവിൽ ലയൺസ്പാർക്ക് നവീകരിക്കുന്നു

കോഴിക്കോട്: കോഴിക്കോട് ലയൺസ് പാർക്ക് നവീകരണം ഉടൻ ആരംഭിക്കും. ഭരണാനുമതി ലഭിച്ച പദ്ധതിക്ക് സാങ്കേതികാനുമതി തേടാൻ കഴിഞ്ഞ ദിവസം നടന്ന കൗൺസിൽ യോഗത്തിൽ അംഗീകാരമായി. 8.48 കോടി ചെലവിൽ രണ്ടു പദ്ധതികളായാണ് പാർക്ക് നവീകരണം നടക്കുന്നത്. പദ്ധതിക്കായി 7.5 കോടി രൂപയാണ് ‘അടൽ മിഷൻ ഫോർ റിജുവനേഷൻ ആൻഡ് അർബൻ ട്രാൻസ്ഫർമേഷൻ’ (അമൃത്) പദ്ധതിയിൽനിന്ന് അനുവദിച്ചത്. കോർപറേഷൻ തനത് ഫണ്ടിൽനിന്ന് 98 ലക്ഷം രൂപയും അനുവദിച്ചു. ഒരേക്കറിലേറെ ഭൂമിയിൽ 34 സെന്‍റ് സ്ഥലത്ത് 5.25 കോടി ചെലവിൽ 1500 ചതുരശ്രമീറ്ററിൽ പുതിയ കുളവും 2.25 കോടി ചെലവിൽ ഉദ്യാനവും നിർമിക്കാനാണ് പദ്ധതി. ഉദ്യാനത്തിന് മാത്രമായി 7.5 കോടി രൂപ വകയിരുത്താൻ ബുദ്ധിമുട്ടുള്ളതായി അമൃത് മിഷൻ ഡയറകട്ർ അറിയിച്ചതിനെത്തുടർന്ന് പദ്ധതി രണ്ടായി വിഭജിച്ച് കുളവും അതിന് ചുറ്റുമുള്ള 5.2 കോടിയുടെ മോടിപിടിപ്പിക്കലുമടക്കം ജലാശയ നിർമാണത്തിനുള്ള വകയിൽ ഉൾപ്പെടുത്തുകയായിരുന്നു.

വീട്ടുമുറ്റത്തും ആനകളിറങ്ങി : വിലങ്ങാട് കാട്ടാനക്കൂട്ടം ഇറങ്ങി; വൻ കൃഷി നാശം

നാദാപുരം: വാണിമേൽ പഞ്ചായത്തിലെ മലയോര മേഖലകളായ ചിറ്റാരിയിലും, പൂവത്താം കണ്ടിയിലും കാട്ടാനകൂട്ടമിറങ്ങി വ്യാപക കൃഷി നാശം . ചിറ്റാരിയിൽ നിരവധി കർഷകരുടെ 30 ലേറെ തെങ്ങുകൾ, കമുങ്ങുകൾ, റബറുകൾ എന്നിവ കൂട്ടത്തോടെ ആനകൾ നശിപ്പിച്ചു. വാഴ, വള്ളികൾ എന്നിവയും ആനക്കൂട്ടം പിഴുതെറിഞ്ഞു. പൂവത്താം കണ്ടിയിലും വ്യാപകമായി കാർഷിക വിളകൾ നശിപ്പിച്ചതായി കർഷകർ പറഞ്ഞു. ഒരാഴ്ച്ചയിലേറെയായി ആനകൾ കൃഷിയിടത്തിൽ തന്നെ തമ്പടിച്ച് വിളകൾ നശിപ്പിക്കുകയായിരുന്നു. വെള്ളിയാഴ്ച്ച പുലർച്ചെ അഞ്ചോടെയാണ് മലയങ്ങാടിന് സമീപം പൂവത്താംകണ്ടിയിൽ വർക്കിയുടെ വീടിന്‍റെമുറ്റത്ത് കാട്ടാന ഇറങ്ങിയത്. ആനയുടെ സാന്നിധ്യം തിരിച്ചറിഞ്ഞ ഉന്നതി നിവാസികൾ ബഹളം ഉണ്ടാക്കുകയും വിവരം വനം വകുപ്പിൽ അറിയിക്കുകയും ആയിരുന്നു. ജനവാസ കേന്ദ്രമായ ചിറ്റാരി സുന്ദരി മുക്കിലും ഇന്നലെ പുലർച്ചെ നാലോടെ ആനകൾ ഇറങ്ങിയത് പ്രദേശവാസികളെ ഭീതിയിലാഴ്ത്തി. വിലങ്ങാട് നിന്ന് വനം വകുപ്പ് ഉദ്യോഗസ്ഥർ എത്തിയാണ് ആനകളെ വനത്തിലേക്ക് തുരത്തിയത്. കണ്ണൂർ ജില്ലയിലെ കണ്ണവം വനത്തിൽ നിന്നാണ് ആനകൾ കോഴിക്കോട് ജില്ലയിലെ കൃഷിയിടത്തിൽ ഇറങ്ങുന്നത്. ഒറ്റയാനും, കുട്ടി ആനകളും ഉൾപ്പെടുന്ന ആറ്, ഏഴ് ആനകൾ അടങ്ങുന്ന രണ്ട് കൂട്ടമാണ് മേഖലയിൽ കൃഷിയിടത്തിലും ജനവാസ കേന്ദ്രത്തിലും ഇറങ്ങുന്നത്. വന മേഖലയിൽ ഫെൻസിംഗ് ലൈനുകളുടെ പ്രവൃത്തി പൂർത്തിയാക്കാത്തതും, ലൈനുകൾ യഥാസമയം അറ്റകുറ്റ പ്രവൃത്തി നടത്താത്തതുമാണ് ആനകൾ കാടിറങ്ങാൻ കാരണമെന്ന് കർഷകർ പറയുന്നു. ചെക്യാട്, വാണിമേൽ, വളയം പഞ്ചായത്തുകളുടെ വന മേഖലകളോട് ചേർന്ന് നിൽക്കുന്ന കൃഷിയിടങ്ങളിൽ 20 ലേറെ ആനകൾ തമ്പടിച്ചതായായാണ് വനം വകുപ്പ് തന്നെ സ്ഥിതീകരിച്ചത്. കഴിഞ്ഞ ഒരു മാസത്തിനിടെ ലക്ഷങ്ങളുടെ കൃഷി നാശമാണ് ആനകൾ ഈ മേഖലയിൽ മാത്രം വരുത്തിയത്. വിലങ്ങാട് സെക്ഷൻ ഫോറസ്റ്റ് ഉദ്യോഗസ്ഥരും, ചിറ്റാരി കേന്രമായി അടുത്തിടെ രൂപീകരിച്ച ആറ് പേർ അടങ്ങുന്ന പിആർടി (പ്രൈമറി റസ്പോൺസ് ടീം) അംഗങ്ങളും ചേർന്ന് മണിക്കൂറുകൾ നീണ്ട കഠിന പ്രയത്നത്തിനൊടുവിൽ ആനക്കൂട്ടങ്ങളെ ചിറ്റാരി, പുവത്താം കണ്ടി മേഖലകളിൽ നിന്ന് കണ്ണവം വനത്തിലേക്ക് തുരത്തി ഓടിച്ചു. ഉൾവനത്തിലെ കനത്ത മഴയും, കോടയും കാരണം ഏറെ സാഹസികമായാണ് വനപാലകർ ആനകളെ തുരത്തി ഓടിച്ചത്.

സ്വകാര്യ ബസ് ഇടിച്ച് വയോധികന് ദാരുണാന്ത്യം

കോഴിക്കോട്: റോഡ് മുറിച്ചുകടക്കവേ സ്വകാര്യ ബസ് ഇടിച്ച് വയോധികന് ദാരുണാന്ത്യം. നെടുങ്ങാടി ബാങ്ക് റിട്ടയേര്‍ഡ് മാനേജര്‍ ഫറൂഖ് കോളജ് കുറ്റൂളങ്ങാടി കൊയ്യപ്പുറത്ത് ഗംഗാധര പണിക്കര്‍ (84) ആണ് മരിച്ചത്. ഇന്നലെ ഉച്ചയ്ക്ക് ഒന്നോടെയാണ് സംഭവം.രാമനാട്ടുകരയ്ക്കടുത്ത് അഴിഞ്ഞിലം തളി മഹാവിഷ്ണു ക്ഷേത്രത്തിലെ സപ്താഹത്തില്‍ പങ്കെടുത്ത് വീട്ടിലേക്ക് മടങ്ങുകയായിരുന്നു ഗംഗാധര പണിക്കര്‍. ക്ഷേത്രത്തിന്‍റെ മുന്നില്‍നിന്ന് ആറുവരി പാത മുറിച്ചു കടക്കുന്നതിനിടെ റൂട്ട് മാറി ആറുവരി പാതയിലൂടെ പാലക്കാട്ടേക്ക് പോയ സന എന്ന ബസ് ഇടിക്കുകയായിരുന്നു. ഇടിയുടെ ആഘാതത്തില്‍ ഗംഗാധര പണിക്കര്‍ അന്‍പതുമീറ്ററോളം ദൂരത്തേക്ക് തെറിച്ചുവീണു. ഉടന്‍ തന്നെ ആശുപത്രിയില്‍ എത്തിക്കാന്‍ ശ്രമിച്ചെങ്കിലും അപ്പോഴേക്കും മരിച്ചു.

ഇരുവഴിഞ്ഞിപ്പുഴയിൽ വയോധികയുടെ മൃതദേഹം

തിരുവമ്പാടി: കാണാതായ വയോധികയെ ഇരുവഴിഞ്ഞിപ്പുഴയിൽ മരിച്ച നിലയിൽ കണ്ടെത്തി. തോട്ടത്തിൻകടവ് കൂമുള്ളംകണ്ടി ആയിശുമ്മയുടെ (75) മൃതദേഹമാണ് അഗസ്ത്യാമുഴി പാലത്തിന് സമീപത്തുനിന്ന് ഇരുവഴിഞ്ഞിപ്പുഴയിൽ കണ്ടെത്തിയത്. ഇന്നലെ രാവിലെ മുതൽ ആയിശുമ്മയെ കാണാനില്ലായിരുന്നു. ബന്ധുക്കളും നാട്ടുകാരും നടത്തിയ തെരച്ചിലിനിടെയാണ് മൃതദേഹം കണ്ടെത്തിയത്. ഭർത്താവ് പരേതനായ ഉണ്ണിമോയി. മക്കൾ: കബീർ, ഉസ്മാൻ. മരുമക്കൾ: റുബീന, സജിറ. വിവരമറിഞ്ഞെത്തിയ മുക്കം ഫയർഫോഴ്‌സ് യൂണിറ്റ് മൃതദേഹം കരയ്‌ക്കെത്തിച്ചു. തുടർനടപടികൾക്കായി മൃതദേഹം കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റി. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.

വിദ്യാര്‍ഥി ഷോക്കേറ്റ് മരിച്ച സംഭവം: കൊലക്കുറ്റത്തിന് കേസെടുക്കണമെന്ന്

കോഴിക്കോട്: കൊല്ലത്തെ വിദ്യാലയത്തില്‍ മിഥുന്‍ എന്ന വിദ്യാര്‍ഥി ഷോക്കേറ്റ് മരിച്ച സംഭവത്തില്‍ കൊലക്കുറ്റത്തിനു കേസെടുക്കണമെന്ന് ബിജെപി കോഴിക്കോട് സിറ്റി ജില്ല ജനറല്‍ സെക്രട്ടറി ടി.വി. ഉണ്ണികൃഷ്ണന്‍. മന്ത്രി ചിഞ്ചുറാണി രാജിവയ്ക്കണമെന്നാവശ്യപ്പെട്ട് യുവമോര്‍ച്ച പ്രവര്‍ത്തകര്‍ നടത്തിയ മന്ത്രിയുടെ കോലം കത്തിക്കല്‍ പ്രതിഷേധം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വിദ്യാര്‍ഥിയുടെ ദാരുണമായ മരണം കേരള മനഃസാക്ഷിയെ ഞെട്ടിച്ചിരിക്കുകയാണ്. സംഭവത്തെക്കുറിച്ച് മന്ത്രി ചിഞ്ചുറാണി നടത്തിയ പ്രസ്താവനയും സുംബ നൃത്തവും കേരള സമൂഹത്തിന് അപമാനകരമാണ്. മന്ത്രി ചിഞ്ചുറാണി എത്രയും പെട്ടെന്ന് രാജിവച്ച് പുറത്തുപോകുന്നതാണ് ഉചിതമെന്ന് അദ്ദേഹം പറഞ്ഞു.വിജിത്ത് ബേപ്പൂര്‍, റിബിത്ത് മാങ്കാവ്, കെ.വി. യതുരാജ്, കെ. വൈഷ്ണവേഷ്, എ.കെ. സൂരജ്, കെ. സൂഷ്മ, മിഥുന്‍ മാനാരി എന്നിവര്‍ നേതൃത്വം നല്‍കി.

നരിനട പള്ളിയിൽ അൽഫോൻസാമ്മയുടെ തിരുനാൾ കൊടിയേറി

കൂരാച്ചുണ്ട്: നരിനട സെന്‍റ് അൽഫോൻസാ പള്ളിയിൽ വിശുദ്ധ അൽഫോൻസാമ്മയുടെ തിരുനാൾ ഇടവക വികാരി ഫാ. ജോസഫ് പുത്തൻപുരക്കൽ കൊടിയേറ്റി. തുടർന്ന് ജപമാല, വിശുദ്ധ കുർബാന, നൊവേന എന്നിവയ്ക്ക് ഫാ. സെബാസ്റ്റ്യൻ മറ്റപ്പള്ളി കാർമികത്വം വഹിച്ചു. നാളെ വൈകുന്നേരം അഞ്ചിന് ജപമാല, 5.30ന് ആഘോഷമായ വിശുദ്ധ കുർബാന, നൊവേന, ഫാ. മെൽബിൻ കുടിയിരിക്കൽ കാർമികത്വം വഹിക്കും. 20ന് വൈകുന്നേരം 4.30ന് ജപമാല, അഞ്ചിന് ആഘോഷമായ കുർബാന, നൊവേന, ഫാ. ജോസഫ് പുത്തൻപുരയ്ക്കൽ കാർമികത്വം വഹിക്കും. 21ന് വൈകുന്നേരം അഞ്ചിന് ജപമാല, 5.30ന് ആഘോഷമായ വിശുദ്ധ കുർബാന, നൊവേന, ഫാ. ജോബിൻ തെക്കേക്കര മറ്റത്തിൽ കാർമികനാകും. 22ന് വൈകുന്നേരം അഞ്ചിന് ജപമാല, 5.30ന് ആഘോഷമായ വിശുദ്ധ കുർബാന, ഫാ. മൈക്കിൾ നീലംപറമ്പിൽ കാർമികനാകും. 23ന് വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, നൊവേന, ഫാ. റിനു തിട്ടയിൽ കാർമികത്വം വഹിക്കും. 24ന് 5.30ന് ആഘോഷമായ വിശുദ്ധ കുർബാന, നൊവേന, ഫാ. മനു കുറൂർ കാർമികനാകും. 25ന് വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, ഫാ.ജോർജ് വെള്ളാരംകാലായിൽ കാർമികത്വം വഹിക്കും. 26ന് വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, ഫാ. ജിനോയ് പനക്കൽ കാർമികനാകും. സമാപന ദിവസമായ 27ന് രാവിലെ 10ന് ആഘോഷമായ വിശുദ്ധ കുർബാന, സന്ദേശം, ലദീഞ്ഞ്, വികാരി ജനറാൾ മോൺ. ഏബ്രഹാം വയലിൽ കാർമികത്വം വഹിക്കും. തുടർന്ന് സ്നേഹവിരുന്ന്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]