ഡോ. സിസ തോമസിന് ആനുകൂല്യങ്ങള്‍ അനുവദിച്ച് ഉത്തരവ്
Thursday, June 12, 2025 2:48 AM IST
തിരുവനന്തപുരം: കേരള സാങ്കേതിക സര്‍വകലാശാലാ മുന്‍ വൈസ് ചാന്‍സലര്‍ ഡോ. സിസ തോമസിനു പെന്‍ഷന്‍ അടക്കമുള്ള ആനുകൂല്യങ്ങള്‍ അനുവദിച്ച് സര്‍ക്കാര്‍ ഉത്തരവ്.
സിസ തോമസിന്‍റെ വിരമിക്കല്‍ ആനുകൂല്യങ്ങള്‍ രണ്ടു വര്‍ഷമായി സര്‍ക്കാര്‍ തടഞ്ഞുവച്ചിരിക്കുകയായിരുന്നു. രണ്ടാഴ്ചയ് ക്കുള്ളില്‍ എല്ലാ ആനുകൂല്യങ്ങളും സിസ തോമസിനു നല്‍കണമെന്നുള്ള ഹൈക്കോടതി ഉത്തരവിനെത്തുടര്‍ന്നാണ് നടപടി.
ബാര്‍ട്ടണ്‍ ഹില്‍ എന്‍ജിനിയറിംഗ് കോളജില്‍ പ്രിന്‍സിപ്പലായിരുന്ന സിസ തോമസ് വിരമിക്കുന്നത് 2023 മാര്‍ച്ച് 31 നാണ്. വിദ്യാഭ്യാസ വകുപ്പില്‍ ജോയിന്‍റ് സെക്രട്ടറിയായി പ്രവര്‍ത്തിക്കുന്നതിനിടയിലാണ് ചാന്‍സലറായിരുന്ന ആരിഫ് മുഹമ്മദ് ഖാന്‍ സിസ തോമസിനെ എപിജെ അബ്ദുല്‍ കലാം സാങ്കേതിക സര്‍വകലാശാലയുടെ വൈസ് ചാന്‍സലറായി നിയമിക്കുന്നത്.
സര്‍ക്കാര്‍ അനുമതി ലഭിക്കുന്നതിനു മുമ്പുതന്നെ സിസ പദവി ഏറ്റെടുത്തു എന്നാണ് സര്‍ക്കാരിന്‍റെ ആരോപണം. ഇതേത്തുടര്‍ന്നാണ് വിരമിക്കല്‍ ആനുകൂല്യങ്ങളടക്കം തടയുന്ന നടപടികളിലേക്ക് സര്‍ക്കാര്‍ നീങ്ങിയത്.