നെയ്യാറ്റിന്കര : കമുകിന്കോട് വിശുദ്ധ അന്തോണീസ് ദേവാലയ തിരുനാള് ഏഴു മുതല് 19 വരെ നടക്കും. പത്തു നാളത്തെ തീര്ഥാടന തിരുനാളിന്റെ ഒരുക്കങ്ങള് പൂര്ത്തിയായതായി ഇടവക വികാരി ഫാ. സജി തോമസ് അറിയിച്ചു. ഏഴിന് രാവിലെ ആറിന് പ്രഭാത ദിവ്യബലിയോടെ തിരുനാള് കര്മങ്ങള് ആരംഭിക്കും. 7.30 ന് കൊച്ചുപള്ളിയില് തീര്ഥാടന സമാരംഭ സമൂഹ ദിവ്യബലിക്ക് വികാരി ജനറാള് മോണ്. ജി. ക്രിസ്തുദാസ് മുഖ്യകാര്മികത്വം വഹിക്കും. ഫാ. ജോണി പുത്തന്വീട്ടില് വചനസന്ദേശം നല്കും. തിരുസ്വരൂപത്തിന് കിരീടം ചാര്ത്തലിനു ശേഷം നടക്കുന്ന സമൂഹ ദിവ്യബലിയില് രൂപതാ ശുശ്രൂഷ കോ-ഒാർഡിനേറ്റര് മോണ്. വി.പി.ജോസ് മുഖ്യകാര്മികനാകും.
ഫാ. യേശുദാസ് പ്രകാശ് വചന സന്ദേശം നല്കും. വൈകുന്നേരം 3.30 ന് കൊച്ചുപളളിയിലേയ്ക്ക് ആഘോഷമായ തീര്ഥാടന പ്രയാണം. 4.30 ന് ഇടവക ദേവാലയത്തിലേയ്ക്ക് വിശുദ്ധ അന്തോണീസിന്റെ അത്ഭുത തിരുസ്വരൂപ പ്രദക്ഷിണം. രാത്രി ഏഴിന് കെ. ആന്സലന് എംഎല്എ യുടെ അധ്യക്ഷതയില് ചേരുന്ന തിരുനാള് സൗഹൃദ സന്ധ്യ മന്ത്രി പി. പ്രസാദ് ഉദ്ഘാടനം ചെയ്യും. ഡോ. ശശി തരൂര് എംപി മുഖ്യപ്രഭാഷണം നടത്തും. 11 ന് തിരുനാള് കൊടിയേറ്റ് കര്മം ഇടവക വികാരി ഫാ. സജി തോമസ് നിര്വഹിക്കും.
തീര്ഥാടന ദിനങ്ങളിലെ തിരുകര്മങ്ങള്ക്ക് നെയ്യാറ്റിന്കര, തിരുവനന്തപുരം രൂപതകളിലെ വിവിധ വൈദികര് നേതൃത്വം നല്കും. 17 ന് നടക്കുന്ന ദിവ്യകാരുണ്യ ദിനത്തില് തിരുവനന്തപുരം ലത്തീൻ അതിരൂപതാ ആര്ച്ച് ബിഷപ് ഡോ. തോമസ് ജെ. നെറ്റോയും 18 ന് നടക്കുന്ന സന്ധ്യാവന്ദന പ്രാര്ഥനയ്ക്ക് പാറശാല രൂപത ബിഷപ് തോമസ് മാര് യൗസേബിയോസും മുഖ്യകാര്മികത്വം വഹിക്കും.19 ന് രാവിലെ 9.30 ന് നടക്കുന്ന തിരുനാള് പൊന്തിഫിക്കല് സമൂഹ ദിവ്യബലിയില് നെയ്യാറ്റിന്കര ബിഷപ് ഡോ. വിന്സന്റ് സാമുവല് മുഖ്യകാര്മികനാകും.
തീര്ഥാടന ദിനങ്ങളിലെ വിവിധ സമ്മേളനങ്ങളില് ഗോവ ഗവര്ണര് പി.എസ്. ശ്രീധരന്പിള്ള, മന്ത്രിമാരായ വീണാ ജോര്ജ്, ആന്റണി രാജു, പ്രതിപക്ഷ നേതാവ് വി.ഡി. സതീശന്, എംഎല്എമാരായ കെ. ആന്സലന് , എം.വിന്സന്റ്, ഐ.ബി. സതീഷ്, സി.കെ. ഹരീന്ദ്രന്, കടകംപള്ളി സുരേന്ദ്രന്, മോന്സ് ജോസഫ്, മാത്യു കുഴല്നാടന്, കെ.കെ. രമ, ജി. സ്റ്റീഫന്, വി.കെ. പ്രശാന്ത്, ജില്ലാ പഞ്ചായത്ത് പ്രസിഡന്റ് അഡ്വ. ഡി. സുരേഷ് കുമാര് എന്നിവര് പങ്കെടുക്കും.