ADVERTISEMENT

ADVERTISEMENT

മദ്യപിച്ച് പോലീസുകാരെ മര്‍ദിച്ചയാൾ അറസ്റ്റിൽ

വെള്ളറട:വെളളറടയില്‍ മദ്യപിച്ച് പോലീസുകാരെ മര്‍ദിച്ച പ്രതി പിടിയിൽ. മദ്യപിച്ചു പരസ്യമായി പ്രശ്‌നം ഉണ്ടാക്കിയ പ്രതിയെ പിടികൂടാന്‍ എത്തിയപ്പോഴാണ് പോലീസിനെയും കൈയേറ്റം ചെയ്തത്.

കൂതാളി സ്വദേശിയായ ഷൈജു മോഹന്‍(35) നെയാണ് വെള്ളറട പൊലീസ് അറസ്റ്റ് ചെയ്തത്. നിരവധി അടിപിടി കേസിലും കഞ്ചാവ് കേസിലും പ്രതിയാണ് ഇയാള്‍. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ADVERTISEMENT

യുവാവ് വീടിനുള്ളിൽ തൂങ്ങിമരിച്ച നിലയിൽ

വിഴിഞ്ഞം : യുവാവിനെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. വിഴിഞ്ഞം പയറ്റുവിള തേരിവിള വീട്ടിൽ മണിയന്‍റെ മകൻ മനു (33)നെയാണ് മരിച്ച നിലയിൽ കണ്ടെത്തിയത്. വീട്ടിൽ ഒറ്റയ്ക്കായിരുന്നു താമസം. ഇന്നലെ വിടിനുള്ളിൽ നിന്ന് ദുർഗന്ധം വമിക്കുന്നത് ശ്രദ്ധയിൽപ്പെട്ട നാട്ടുകാർ പോലീസിൽ വിവരമറിയിക്കുകയായിരുന്നു. മൃതദേഹത്തിന് മൂന്നുദിവസത്തെ പഴക്കമുള്ളതായി പോലീസ് അറിയിച്ചു. ഫോറൻസിക് വിഭാഗം സ്ഥലത്ത് പരിശോധന നടത്തി. മൃതദേഹം പോസ്റ്റ് മോർട്ടത്തിനായി മെഡിക്കൽ കോളജിലേക്ക് മാറ്റി. വിഴിഞ്ഞം പോലീസ് കേസെടുത്തു.

മരിച്ചയാളെ ബന്ധുക്കള്‍ തിരിച്ചറിഞ്ഞു

മെഡിക്കല്‍കോളജ്: വഴിയരികില്‍ അവശനിലയില്‍ കണ്ടെത്തിയ, തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലിരിക്കെ മരിച്ചയാളെ ഒടുവില്‍ ബന്ധുക്കള്‍ തിരിച്ചറിഞ്ഞു. ആര്യശാല സ്വദേശി ബാബു (58) ആണ് മരിച്ചത്. ഇക്കഴിഞ്ഞ ഏപ്രില്‍ എട്ടിന് ഇയാളെ അവശനിലയില്‍ ആര്യശാല ഭാഗത്ത് നാട്ടുകാര്‍ കണ്ടെത്തിയിരുന്നു. തുടര്‍ന്ന് തിരുവനന്തപുരം മെഡിക്കല്‍കോളജ് ആശുപത്രിയിലെ രണ്ടാം വാര്‍ഡില്‍ പ്രവേശിപ്പിക്കുകയായിരുന്നു. ഇവിടെ ചികിത്സയിലിരിക്കെ കഴിഞ്ഞ ദിവസം ഉച്ചയ്ക്ക് 1.30നായിരുന്നു മരണം. വിവരമറിഞ്ഞ ബന്ധുക്കള്‍ മോര്‍ച്ചറിയിലെത്തി ഇദ്ദേഹത്തെ തിരിച്ചറിയുകയായിരുന്നു. വഴിയോരങ്ങളില്‍ അലഞ്ഞുതിരിഞ്ഞു നടക്കുന്നയാളായിരുന്നു ബാബുവെന്നു ഫോര്‍ട്ട് പോലീസ് അറിയിച്ചു.

കരമനയാറ്റില്‍ വയോധികന്‍റെ മൃതദേഹം കണ്ടെത്തി

പേരൂര്‍ക്കട: കരമനയാര്‍ ഒഴുകുന്ന മുടവന്‍മുകള്‍ ആറാട്ടുകടവില്‍ വയോധികന്‍റെ മൃതദേഹം കണ്ടെത്തി. പരേതനായ പത്മനാഭന്‍ നായരുടെ മകന്‍ ഗോപി എന്നുവിളിക്കുന്ന രാമചന്ദ്രന്‍ നായര്‍ (72) ആണ് മരിച്ചത്. ഇദ്ദേഹം കടവിനടുത്ത് ജീവിക്കുകയും അലഞ്ഞുതിരിഞ്ഞു നടക്കുകയും ചെയ്യുന്നയാളാണെന്നു പോലീസ് പറഞ്ഞു. കഴിഞ്ഞദിവസം ഉച്ചയ്ക്ക് 1.30നാണ് മൃതദേഹം കടവിനടുത്തുനിന്ന് നാട്ടുകാര്‍ കണ്ടെത്തുന്നത്. അബദ്ധത്തില്‍ ആറാട്ടുകടവിലേക്ക് വീണുപോയതാകാം മരണകാരണമെന്നാണ് പ്രാഥമിക നിഗമനം. പൂജപ്പുര പോലീസ് ഇന്‍ക്വസ്റ്റ് നടത്തി. മൃതദേഹം തിരുവനന്തപുരം മെഡിക്കല്‍കോളജ് ആശുപത്രി മോര്‍ച്ചറിയില്‍.

യുവതിയെ ആക്രമിച്ച ഗുണ്ട പിടിയിൽ

നെടുമങ്ങാട്: വട്ടപ്പാറ ചീരണിക്കര സ്വദേശിയായ സുരഭിയെ വീട്ടിൽ കയറി ദേഹോപദ്രവം ഏല്പിച്ച കേസിലെ പ്രതിയായ ചീരാണികര വെട്ടുപാറ കിഴക്കുംകര വീട്ടിൽ സംഗീതി (33)നെ അറസ്റ്റ് ചെയ്തു. ഗുണ്ടാ ലിസ്റ്റിൽ ഉൾപ്പെട്ട പ്രതിയുടെ പേരിൽ ആറോളം കേസുകൾ നിലവിലുണ്ട്. പരാതിക്കാരിയുടെ ഭർത്താവുമായുണ്ടായ തർക്കത്തെ തുടർന്നാന്നാണ് പ്രതിയും കൂട്ടാളിയായ ദിനേശും ചേർന്നു കഴിഞ്ഞ 28നു പരാതിക്കാരിയെ ദേഹോപദ്രവംഎല്പിച്ചത്. ദിനേഷിനെ പോലീസ് നേരത്തെ അറസ്റ്റ് ചെയ് തു റിമാൻഡ് ചെയ്തിരുന്നു. ഒളിവിലായിരുന്ന സംഗീതിനെ ബന്ധു വീട്ടിൽ നിന്നാണ് അറസ്റ്റ് ചെയ്തത്. പ്രതിയെ കോട തി റിമാൻഡ് ചെയ്തു.

എംബിഎ വിദ്യാർഥി 190 ഗ്രാം എംഡിഎംഎ സഹിതം പിടിയിൽ

പാറശാല: 190 ഗ്രാം എംഡിഎംഎയുമായി ടൂറിസ്റ്റ് ബസില്‍ യാത്ര ചെയ്യുകയായിരുന്ന എം ബിഎ വിദ്യാര്‍ഥിയെ അമരവിള ചെക്ക്‌പോസ്റ്റില്‍ എക്സൈസ് പിടികൂടി. ബാംഗ്ലൂരില്‍നിന്നു വര്‍ക്കലയിലേയ്ക്ക് ടൂറിസ്റ്റ് ബസില്‍ യാത്ര ചെയ്യുമ്പോഴാണ് പരിശോധനയ്ക്കിടയില്‍ അമരവിള ചെക്ക് പോസ്റ്റിലെ എക്‌സൈസ് ഉദ്യോഗസ്ഥര്‍ എംഡിഎംഎ പിടികൂടിയത്. ഇന്നലെ രാവിലെ 7:30 നായിരുന്നു സംഭവം. കൊല്ലം സ്വദേശി സുഹൈബ് നസീറാണ് (22 ) കിറ്റ് ബാഗില്‍ ഒളിപ്പിച്ച നിലയില്‍ 190 ഗ്രാം എംഡിഎംഎ കൊണ്ടുവന്നത്. ഇയാള്‍ കൊല്ലം സ്വദേശിയാണ്. സുഹൈബ് നസീര്‍ ഡല്‍ഹിയില്‍ എംബിഎ വിദ്യാര്‍ഥിയാണ്. കല്ലമ്പലത്തുള്ള ആവശ്യക്കാര്‍ക്ക് കൈമാറാനാണ് എംഡിഎംഎ കൊണ്ടുവന്നതെന്നു സംശയിക്കുന്നു. പ്ര തിയെ ചോദ്യം ചെയ്യുന്നു.

ടിപ്പര്‍ലോറി മറിഞ്ഞ് ഡ്രൈവർ ഉള്‍പ്പെടെ രണ്ടുപേര്‍ക്ക് പരിക്ക്

വെള്ളറട: വാഴിച്ചലില്‍ നിയന്ത്രണംവിട്ട ടിപ്പര്‍ ലോറി മറിഞ്ഞു ഡ്രൈവര്‍ ഉള്‍പ്പെടെ രണ്ടുപേര്‍ക്കു പരിക്കുപറ്റി. പരിക്കേറ്റവരെ ഉടനെ നെയ്യാറ്റിന്‍കര ജനറല്‍ ആശുപത്രിയില്‍ പ്രവേശിപ്പിച്ചു. വാഹനത്തിലെ ഡ്രൈവറായ കളിയിക്കവിള പൊന്നപ്പ നഗര്‍ സ്വദേശി ജിഷോ(39), ക്ലീനര്‍ ആകാശ് (41) എന്നിവര്‍ക്കാണ് പരിക്കേറ്റത്. ഗുരുതരമായി പരിക്കേറ്റ ജിഷോയെ വാഹനത്തിന്‍റെ ഗ്ലാസ് തകര്‍ത്തണ് നാട്ടുകാര്‍ പുറത്തെടുത്തത്. ഇന്നലെ ഉച്ചകഴിഞ്ഞു മൂന്നോടെ ആനപ്പാറയില്‍ നിന്നും കള്ളിക്കാട് ഭാഗത്തേക്കു പോവുകയായിരുന്നു ലോറി. ലോറിയുടെ അമിത വേഗമാണ് അപകടകാരണമെന്നു നാട്ടുകാര്‍ പറഞ്ഞു.

സ്ത്രീത്വത്തെ അപമാനിച്ച കേസ്: പ്രതികളായ യുവാക്കളെ കോടതി വിട്ടയച്ചു

വലിയതുറ: വര്‍ഷങ്ങള്‍ നീണ്ട വിചാരണക്കെടുവില്‍ പ്രതികളായ യുവാക്കളെ കോടതി വിട്ടയച്ചു. സ്ത്രീത്വത്തെ അപമാനിച്ചെന്ന കേസില്‍ അറസ്റ്റിലായ സനോഫര്‍ കബീര്‍ (32), സുലൈമാന്‍ സജീര്‍ (30) എന്നിവരെയാണ് തിരുവനന്തപുരം ചീഫ് ജുഡീഷ്യല്‍ മജിസ്‌ട്രേറ്റ് കോടതി വിട്ടയച്ചത്. 15 വര്‍ഷത്തോളംനീണ്ട വിചാരണക്കൊടുവിലായിരുന്നു നടപടി. കേസിനിടയായ സംഭവം നടന്നത് 2010 -ല്‍ ആയിരുന്നു. പരിചയക്കാരിയായ യുവതിയെ ഭീഷണിപ്പെടുത്തി ഫോട്ടോയെടുത്തശേഷം മോര്‍ഫ് ചെയ് ത് പ്രചരിപ്പിച്ചെന്നും വലിയതുക ആവശ്യപ്പെട്ടെന്നുമായിരുന്നു കേസ്. വലിയതുറ പോലീസ് അറസ്റ്റു ചെയ്ത പ്രതികളുടെ മൊബൈല്‍ ഫോണുകളുടെ ഫൊറന്‍സിക് പരിശോധനാഫലം ലഭിക്കാന്‍ വൈകിയാതാണു വിചാരണ നീളാന്‍ ഇടയായത്. ഫൊറന്‍സിക് പരിശോധനയില്‍ ഇരുവര്‍ക്കുമെതിരായ കുറ്റം തെളിയിക്കാനായില്ലെന്ന പ്രതിഭാഗത്തിന്‍റെ വാദം കോടതി അംഗീകരിക്കുകയായിരുന്നു. പ്രതികള്‍ക്കു വേണ്ടി അഭിഭാഷകരായ സാന്‍ടി ജോര്‍ജ്, ആര്‍. ചന്ദ്രപ്രവീണ്‍ എന്നിവര്‍ ഹാജരായി.

ഓട്ടോറിക്ഷയിൽ കറങ്ങിനടന്ന് മദ്യവില്പന: ഡ്രൈവർ പിടിയിൽ

നെടുമങ്ങാട്: വെള്ളനാട്‌, അരുവിക്കര, ഉഴമലയ്ക്കൽ പഞ്ചായത്തുകളിലെ വിവിധ പ്രദേശങ്ങളിൽ ഓട്ടോറിക്ഷയിൽ കറങ്ങിനടന്നു മദ്യവില്പന നടത്തിവന്ന ഉഴമലയ്ക്കൽ പുതുക്കുളങ്ങര വട്ടപ്പാറവിള ജിജോ ഭവനിൽ അനിയെ (48) എക്സൈസ് പിടികൂടി. പ്രതിയുടെ കൈവശം നിന്നും 20 കുപ്പി മദ്യവും (10 ലിറ്റർ), വില്പന നടത്തിക്കിട്ടിയ 4,900 രൂപയും വില്പന നടത്താൻ ഉപയോഗിച്ച ഓട്ടോറിക്ഷയും എക്സൈസ് അധികൃതർ കസ്റ്റഡിയിലെടുത്തു. ഡ്രൈഡേയുടെ ഭാഗമായുള്ള പ്രത്യേക പരിശോധനയ്ക്കിടെയാണ് പ്രതി പിടിയിലായത്. ഒന്നാം തീയതി വൈകുന്നേരം അഞ്ചരയോടെ കൂവക്കുടി പാലത്തിനു സമീപം ഓട്ടോറിക്ഷയിൽ മദ്യവില്പന നടത്തുന്നതിനിടെയാണ് ഇയാൾ പിടിയിലായത്. റേഞ്ച് ഇൻസ്പെക്ടർ എസ്. കുമാറിന്‍റെ നേതൃത്വത്തിൽ എക് സൈസ് അസിസ്റ്റന്‍റ് എക്സെെസ് ഇൻസ്‌പെക്ടർമാരായ ഏലിയാസ് റോയ്, വി. ഗിരീഷ്, പ്രീവൻറീവ് ഓഫീസർമാരായ ടി.വിനോദ്, എം.പി. ശ്രീകാന്ത് തുടങ്ങിയവരുടെ നേതൃത്വത്തിലാണു പ്രത്യേക ഡ്രൈ ഡേ പരിശോധന നടത്തിയത്.

മാട്രിമോണിയല്‍വഴി രണ്ടരലക്ഷം തട്ടിപ്പുനടത്തിയ യുവാവ് അറസ്റ്റില്‍

മെഡിക്കല്‍കോളജ്: ഒരു പ്രമുഖ പത്രത്തിന്‍റെ മാട്രിമോണിയല്‍ സൈറ്റുവഴി തട്ടിപ്പുനടത്തിയ ആളെ മെഡിക്കല്‍കോളജ് പോലീസ് അറസ്റ്റുചെയ്തു. തൃശൂര്‍ ചേലക്കര സെന്‍റ് ജോണ്‍സ് സ്‌കൂളിനു സമീപം കുടക്കാട്ടില്‍ വീട്ടില്‍ കെ. അജീഷ് (35) ആണ് അറസ്റ്റിലായത്. പരസ്യംകണ്ടു വിളിച്ച തിരുവനന്തപുരം സ്വദേശിനിയായ 44-കാരിയുമായി ഇയാള്‍ ചങ്ങാത്തം സ്ഥാപിക്കുകയും വിവാഹം കഴിക്കാന്‍ താല്‍പര്യമുണ്ടെന്ന് അറിയിക്കുകയും ചെയ്തു. തുടര്‍ന്ന് സ്ഥിരമായി ഫോണ്‍സംഭാഷണം നടത്തുകയും ചെയ്തു. യുവതിയെ കാണുന്നതിനു പ്രതി തിരുവനന്തപുരത്ത് എത്തുകയും വിവാഹ വാഗ്ദാനം നല്‍കി ഇവരില്‍നിന്ന് പലസമയത്തായി 2.5 ലക്ഷം രൂപ തട്ടിയെടുക്കുകയും ചെയ്തു. താന്‍ കബളിപ്പിക്കപ്പെട്ടുവെന്നു മനസിലായതോടെയാണു യുവതി പരാതിയുമായി എത്തിയത്. കഴക്കൂട്ടം എസി ജെ.കെ. ദിനിലിന്‍റെ നിര്‍ദേശപ്രകാരം മെഡിക്കല്‍കോളജ് സിഐ ബി.എം. ഷാഫി, എസ് ഐ ലഞ്ചുലാല്‍, സിപിഒമാരായ വിനോദ്, രാജേഷ്, ബിനു, ഫിറോസ് എന്നിവര്‍ തമ്പാനൂര്‍ കെഎസ്ആര്‍ടിസി ടെര്‍മിനലിനു സമീപത്തുവച്ചാണ് ഇയാളെ പിടികൂടിയത്. പ്രതിയെ കോടതി റിമാന്‍ഡ് ചെയ്തു.

ദേശീയ പണിമുടക്കിന് യുഡിഎഫ് പിന്തുണ: എം.എം. ഹസൻ

നെടുമങ്ങാട്: ഐഎൻടിയുസി ഉൾപ്പടെയുള്ള തൊഴിലാളി സംഘടനകൾ 20ന് രാജ്യവ്യാപകമായി നടത്തുന്ന ദേശീയ പണിമുടക്കിന് യുഡിഎഫ് സംസ്ഥാന കമ്മിറ്റി ഐക്യദാർഢ്യം പ്രഖ്യാപിക്കുന്നുവെന്നും പണിമുടക്കു ദിവസം യുഡിഎഫ് കരിദിനം ആചരിക്കുമെന്നും യുഡിഎഫ് കൺവീനർ എം.എം. ഹസൻ. ഐഎൻടിയുസിയുടെ 78-ാമത് സ്ഥാപക ദിനാഘോഷ പരിപാടികളുടെ ജില്ലാതല ഉദ്ഘാടനം കനകക്കുന്നിലെ ലീഡർ കെ. കരുണാകരൻ സ്ക്വയറിൽ സ്ഥാപകദിന ജ്വാല തെളിയിച്ച് നിർവ്വഹിക്കുകയായിരുന്നു അദ്ദേഹം. ഐഎൻടിയുസി ദേശീയ സെക്രട്ടറിയും ജില്ലാ പ്രസിഡണ്ടുമായ വി.ആർ. പ്രതാപൻ അധ്യക്ഷത വഹിച്ചു. ജില്ലയിലെ വിവിധ ഐഎൻടിയുസി യൂണിറ്റുകളുടെയും നിയോജക മണ്ഡലം, മണ്ഡലം കമ്മിറ്റികളുടെയും ആഭിമുഖ്യത്തിൽ പതാക ഉയർത്തുകയും തൊഴിലാളികൾ മധുര വിതരണം നടത്തുകയും യോഗങ്ങൾ ചേരുകയും ചെയ്തു. ഐഎൻടിയുസി സംസ്ഥാന ജനറൽ സെക്രട്ടറി വി.ജെ. ജോസഫ്, ഭാരവാഹികളായ പി. ബിജു, വെള്ളനാട് ശ്രീകണ്ഠൻ, എം. എസ്. താജുദ്ദീൻ, ഡി. ഷുബില, ജെ. സതികുമാരി, പുത്തൻപള്ളി നിസാർ, വെട്ടുറോഡ് സലാം, ജോണി ജോസ് നാലപ്പാട്ട്, എസ്. സുരേഷ് കുമാർ, താന്നിമൂട് ഷംസുദ്ദീൻ എന്നിവർ പങ്കെടുത്തു.

അയല്‍വാസിയെ കുത്തിപ്പരിക്കേൽപിച്ച കേസിൽ പിടിയില്‍

പേരൂര്‍ക്കട: അയല്‍വാസികള്‍ തമ്മിലുള്ള തര്‍ക്കം കൈയാങ്കളിയിലെത്തിയതോടെ ഒരാള്‍ക്ക് കുത്തേറ്റു. സംഭവവുമായി ബന്ധപ്പെട്ട് ഒരാള്‍ അറസ്റ്റിലായി. മണക്കാട് കാലടി മരുതൂര്‍ക്കടവ് വാഴവിളാകം മേലിട്ടവീട്ടിൽ രാഹുല്‍ (27) ആണ് അറസ്റ്റിലായത്. വെള്ളിയാഴ്ച രാത്രി 7.15നായിരുന്നു കേസിനാസ്പദമായ സംഭവം. കാലടി സ്വദേശി ഷാജി (58) ആണ് ആക്രമണത്തിന് ഇരയായത്. ഇരുവരും അയല്‍വാസികളാണ്. പ്രതിയുടെ ബന്ധുവിനെതിരേ ഷാജി പോലീസില്‍ പരാതി നല്‍കിയതിലുള്ള വിരോധമായിരുന്നു സംഭവങ്ങളുടെ തുടക്കം. ഷാജിയുടെ വീട്ടിലെത്തിയ പ്രതി ഇയാളെ കത്രിക ഉപയോഗിച്ച് കുത്തിപ്പരിക്കേല്‍പ്പിക്കുകയായിരുന്നു. ഷാജി ആശുപത്രിയില്‍ ചികിത്സ തേടി. കരമന സിഐ അനൂപ്, എസ്ഐമാരായ സന്ദീപ്, അജിത്ത്, കൃഷ്ണകുമാര്‍, അനില്‍, സിപിഒമാരായ സാജന്‍, ശരത്ത് എന്നിവരാണ് വീട്ടില്‍നിന്നും പ്രതിയെ പിടികൂടിയത്. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തു.

തോട്ടുമുക്ക് പാലം അപകടവസ്ഥയിൽ

നെടുമങ്ങാട്: പനവൂർ പഞ്ചായത്തിലെ പനയമുട്ടം വാർഡിൽ കഴിഞ്ഞ ദിവസം പെയ്ത അതിശക്തമായ മഴയിൽ തോട്ടുമുക്ക് പാലം കൂടുതൽ അപകടാവസ്ഥയിലായി. അതുവഴി സഞ്ചരിക്കുന്ന നാട്ടുകാർ ഭീതിയോട് കൂടിയാണ് സഞ്ചരിക്കുന്നത്. ഏകദേശം ഒരു വർഷത്തോളമായി ഈ പാലം അപകടാവസ്ഥയിൽ ആയിട്ട്. തുടർന്നു പനവൂർ പഞ്ചായത്തുമായി ബന്ധപ്പെട്ട് ഒരു പരാതി നൽകിയിട്ടും അധികൃതർ യാതൊരുവിധ നടപടി ഇതുവരെ കൈകൊണ്ടിട്ടില്ല. കഴിഞ്ഞ ദിവസം പെയ്ത മഴയിൽ പനവൂർ പഞ്ചായത്തിലെ പല ഭാഗങ്ങളിലും രൂക്ഷമായ വെള്ളക്കെട്ടുകളും വ്യാപകമായി കൃഷിനാശങ്ങളും സംഭവിക്കുകയുണ്ടായി. പനയമുട്ടം തോട്ടംമുക്ക് പാലം എത്രയും വേഗം സഞ്ചാരയോഗ്യമാക്കണമെന്നാവശ്യപ്പെട്ട് പ്രദേശവാസികളും നാട്ടുകാരും പനവൂർ യൂത്ത് കോൺഗ്രസ് മണ്ഡലം കമ്മിറ്റി ഭാരവാഹികൾ ഉൾപ്പെടെ പ്രക്ഷോഭം ശക്തമാക്കാൻ തീരുമാനിച്ചിട്ടുണ്ട്.

ആര്‍സിസിയിലെ വിഷയം; മുഖ്യമന്ത്രിക്കു പരാതി നൽകി

മെഡിക്കല്‍കോളജ്: തിരുവനന്തപുരം ആര്‍സിസിയിലെ വിഷയവുമായി ബന്ധപ്പെട്ടു വിശദമായ അന്വേഷണം ആവശ്യപ്പെട്ട് ആര്‍സിസി സംരക്ഷണ സമിതി ചെയര്‍മാന്‍ ശ്രീകാര്യം ശ്രീകുമാര്‍ മുഖ്യമന്ത്രിക്കു പരാതി നല്‍കി. ആര്‍സിസിയിലെ സര്‍ജനും ഓങ്കോളജി വിഭാഗം മേധാവിയുമായ ഡോക്ടര്‍ക്കെതിരേയാണ് ഗുരുതരമായ ആരോപണങ്ങള്‍ ഉയര്‍ന്നിട്ടുള്ളത്. ഡോക്ടര്‍ രോഗികളെ പരിശോധിക്കുന്നില്ലെന്നും ജൂണിയര്‍ ഡോക്ടര്‍മാരെ ഉപയോഗിച്ച് ശസ്ത്രക്രിയയ്ക്ക് കാലതാമസം ഉണ്ടെന്നും എത്രയും വേഗം ശസ്ത്രക്രിയ ചെയ്തില്ലെങ്കില്‍ രോഗം വര്‍ധിക്കുമെന്നും പറയിപ്പിച്ചു രോഗികളെ ഭയപ്പെടുത്തി ഇവരെ സ്വകാര്യാശുപത്രികളിലേക്കു പറഞ്ഞയയ്ക്കുന്നുവെന്നാണ് ആരോപണം. ഡോക്ടര്‍മാരുടെ സ്വകാര്യപ്രാക്ടീസ് ആര്‍സിസിയില്‍ നിരോധിച്ചിട്ടുള്ളതാണ്. ആരോപണവിധേയനായ ഡോക്ടര്‍ ഉള്‍പ്പെടെ ഡ്യൂട്ടി സമയത്ത് പുറത്തുപോകുന്നുണ്ടെന്നും സിസിടിവി കാമറകളിലൂടെ ഇതിന്‍റെ നിജസ്ഥിതി കണ്ടെത്തണമെന്നും ആവശ്യമുണ്ട്. കാന്‍സര്‍ രോഗബാധിതരായിട്ടുള്ള കേരളത്തിലെ ഒട്ടുമിക്ക പാവപ്പെട്ട രോഗികളും ചികിത്സയ്ക്കായി ആദ്യപരിഗണന നല്‍കുന്ന സ്ഥാപനമാണ് തിരുവനന്തപുരം ആര്‍സിസി. അതുകൊണ്ടുതന്നെ പുറത്തുവരുന്ന വാര്‍ത്തകള്‍ സത്യമാണെങ്കില്‍ അത് പാവപ്പെട്ട രോഗികളോടുള്ള കൊടുംക്രൂരതയും രോഗികള്‍ക്ക് ചികിത്സ നിഷേധിക്കലുമാണ്. അതുകൊണ്ടുതന്നെ കാര്യക്ഷമമായ അന്വേഷണം നടത്തി വസ്തുതകള്‍ വെളിച്ചത്തുകൊണ്ടുവരണമെന്നാണ് പരാതിയിലെ ആവശ്യം.

വേനല്‍ മഴ: മതിലിടിഞ്ഞു ചായക്കടയിലേക്കു പതിച്ചു

വെള്ളറട: മതില്‍ ഇടിഞ്ഞു ചായക്കടയില്‍ പതിച്ചു വന്‍ നാശ നഷ്ടം. കുറ്റിയാണിക്കാട്ടില്‍ കനാല്‍ ബണ്ടിനു സമീപത്തെ വിടവിലൂടെ ഉണ്ടായ വെള്ളമൊഴുക്കില്‍ സമീപത്തെ സ്വകാര്യ മതില്‍ ഇടിഞ്ഞു ചായക്കടയില്‍ പതിച്ച് വലിയ നാശ നഷ്ടംമുണ്ടായി. കുറ്റിയാണിക്കാട് വില്ലേജ് ഓഫീസിനു സമീപം മുരളീധരന്‍റെ ചായക്കടയിലാണു നാശ നഷ്ടം ഉണ്ടായത്. വെള്ളിയാഴ്ച രാത്രി ശക്തമായി പെയ്ത മഴയില്‍ ആണ് നാശ നഷ്ടം. കടയുടെ ഒരു വശം പൂര്‍ണമായി തകര്‍ന്നു. സാധനസാമഗ്രികളും മണ്ണിനടിയിലായി. കടയില്‍ ഉണ്ടായിരുന്നവര്‍ ഓടി മാറിയതിനാല്‍ വന്‍ ദുരന്തമാണ് ഒഴിവായത്. ലക്ഷം രൂപയില്‍ അധികം നാശ നഷ്ടം സംഭവിച്ചിട്ടുള്ളതായി ഉടമ പറഞ്ഞു. മതില്‍ ഇടിഞ്ഞു വീണതോടെ സമീപത്തെ അനിയുടെ വീടും തകര്‍ച്ചാഭീഷണിയില്‍ ആണ്. നെയ്യാര്‍ ഇടതുകര കനാലില്‍ നിന്നു വരുന്ന കൈച്ചാലില്‍ നിന്നാണ് ചോര്‍ച്ച ഉണ്ടായത്. കനാലിലെ വെള്ളം തുറന്നു വിടുന്നതിനുള്ള ഷട്ടര്‍ വെള്ളം തങ്ങിനിന്ന് കല്ലിനിടയിലൂടെയാണ് അമിതമായി വെള്ളം ഒഴുകി യെത്തിയതെന്നു നാട്ടുകാര്‍ പറഞ്ഞു. ഇവിടെ ഷട്ടര്‍ ജീര്‍ണിച്ച നിലയിലാണ്. കൂടാതെ സമീപത്തെ പാലവും അപകടാവസ്ഥയിലാണ്. ഇക്കാര്യം പല തവണ ബന്ധപെട്ട അധികാരികളുടെ ശ്രദ്ധയില്‍ പെടുത്തിയെങ്കിലും പരിഹാരമുണ്ടായില്ലെന്നും പരിസരവാസികള്‍ പറയുന്നു. സമീപവാസികളുടെ വീടുകളും അപകട ഭീഷണിയിലാണ് മഴ ശമനമില്ലാതെ തുടരുകയാണ്.

കുണ്ടും കുഴിയും നിറഞ്ഞ് കുടപ്പനക്കുന്ന് റോഡ്

കുഴിയില്‍വീണ് വാഹനയാത്ര ദുഷ്‌കരം പേരൂര്‍ക്കട: കുടപ്പനക്കുന്ന് റോഡ് കുണ്ടും കുഴിയുമായതോടെ കുഴയില്‍വീണു വാഹനയാത്രികര്‍ക്ക് പരിക്കേല്‍ക്കുന്നത് നിത്യസംഭവമായി. കുടപ്പനക്കുന്ന് ജംഗ്ഷനില്‍ നിന്ന് ഗവ. യുപിഎസ്സിനു സമീപത്തുകൂടി പേരൂര്‍ക്കടയിലേക്കു വന്നുചേരുന്ന റോഡാണ് തകര്‍ന്ന നിലയിലായത്. റോഡ് ടാര്‍ചെയ്തിട്ട് ഏകദേശം നാലുവര്‍ഷം കഴിഞ്ഞു. ഗവ. യുപിഎസ് പിന്നിടുന്ന വേളയിലാണ് കൊടുംവളവുള്ളത്. ഈ വളവു തിരിഞ്ഞാണു മേരിഗിരി സ്‌കൂളിലേക്കും പോകുന്നത്. ഇവിടമാണ് ടാര്‍ ഇളകി മെറ്റലുകള്‍ പുറത്തുകാണുന്ന അവസ്ഥയില്‍ ആയിട്ടുള്ളത്. വളവുതിരിഞ്ഞുവരുന്ന വാഹനങ്ങള്‍ എത്ര ശ്രമിച്ചാലും കുഴിയില്‍ വീഴാതെ കടന്നുപോകാന്‍ സാധിക്കില്ല. അതേസമയം റോഡിന്‍റെ ടാറിംഗുമായി ബന്ധപ്പെട്ടു ഫണ്ടു അനുവദിച്ചിട്ടുണ്ടെന്നാണ് കുടപ്പനക്കുന്ന് വാര്‍ഡ് കൗണ്‍സിലര്‍ എസ്. ജയചന്ദ്രന്‍ നായര്‍ പറയുന്നത്. എംഎല്‍എ ഫണ്ടാണ് ഇതിന് വകയിരുത്തിയിട്ടുള്ളതെന്നും വലിയൊരു പദ്ധതിയാണ് ഇതെന്നും അദ്ദേഹം പറഞ്ഞു. പേരൂര്‍ക്കട ബാപ്പുജി ഗ്രന്ഥശാലയ്ക്കു സമീപത്തുനിന്നു തുടങ്ങി ഹാര്‍വിപുരം, കൃഷ്ണാനഗര്‍ വഴി കുടപ്പനക്കുന്നിലേക്ക് ടാറിംഗ് നീളുമെന്നും ഘട്ടംഘട്ടമായാണ് ഇതിന് ഫണ്ട് അനുവദിക്കുന്നതെന്നും കൗണ്‍സിലര്‍ വ്യക്തമാക്കുന്നു. അതേസമയം ഒരുമാസംകൂടി പിന്നിടുമ്പോള്‍ മഴക്കാലമെത്തുമെന്നും മഴക്കാലം കഴിയുമ്പോള്‍ നഗരസഭാ ഭരണകാലാവധി അവസാനിക്കുമെന്നും പിന്നെ എന്തര്‍ത്ഥത്തിലാണ് ടാറിംഗ് ഉടനെ നടത്തുമെന്ന് അധികൃതര്‍ പറയുന്നതെന്നുമാണ് നാട്ടുകാരുടെ ചോദ്യം.

പ്രതീക്ഷകള്‍ അസ്തമിച്ചു; വേട്ടമുക്ക് പാര്‍ക്കിനു നവീകരണം ഇല്ല

പേരൂര്‍ക്കട: പാങ്ങോട് വാര്‍ഡില്‍ ഉള്‍പ്പെടുന്ന വേട്ടമുക്ക് പാര്‍ക്കിന്‍റെ നവീകരണം ഉണ്ടാകില്ലെന്ന് ഉറപ്പായി. ഇതോടെ ജനങ്ങളുടെ പ്രതീക്ഷയും അസ്ഥാനത്തായി. ഏകദേശം 30 വര്‍ഷത്തിനുമുമ്പാണ് പൂജപ്പുര-വേട്ടമുക്ക് റോഡില്‍ ജനങ്ങള്‍ക്കായി തിരുവനന്തപുരം നഗരസഭ പാര്‍ക്ക് ഒരുക്കിയത്. എന്നാല്‍ വര്‍ഷങ്ങളായി ഇവിടെ വികസനപ്രവര്‍ത്തനങ്ങളൊന്നും നടന്നില്ല. ഒരുവര്‍ഷം മുമ്പ് പാര്‍ക്കിനുള്ളില്‍ മെറ്റലുകള്‍ ഇറക്കുകയും ഇഷ്ടികകള്‍ അടുക്കിവയ്ക്കുകയും ചെയ്തപ്പോള്‍ ജനങ്ങളുടെ പ്രതീക്ഷയ്ക്കു ജീവന്‍ വച്ചിരുന്നു. കുട്ടികള്‍ക്കുള്ള പാര്‍ക്ക്, വയോധികര്‍ക്കുള്ള ഇരിപ്പിടങ്ങള്‍, ഫൗണ്ടന്‍, തെരുവുവിളക്കുകള്‍, ഇന്‍റര്‍ലോക്ക് നടപ്പാത എന്നിവയെല്ലാം സ്വപ്‌നം കണ്ടവര്‍ക്ക് അതു സ്വപ്‌നമായി തന്നെ അവശേഷിച്ചു. യാത്രികരും പ്രദേശവാസികളായ വയോധികരും അവഗണനയില്‍ക്കിടക്കുന്ന പാര്‍ക്കില്‍ ഇപ്പോഴും വന്നിരിക്കുന്നുണ്ടെങ്കിലും യാതൊരു അടിസ്ഥാന സൗകര്യവും ഇവിടെയില്ല. നഗരപരിധിയിലുള്ള മിക്ക പാര്‍ക്കുകളും തിരുവനന്തപുരം നഗരസഭ ഇടപെട്ട് മോടിപിടിപ്പിക്കുമ്പോഴാണ് വേട്ടമുക്ക് പാര്‍ക്കിന് ഈ ദുര്‍ഗതി.

നെഞ്ചിലെ അസ്ഥി അകത്തേക്ക് വളയുന്നു: നസ്സ് പ്രൊസീജ്യർ വിജയകരമാക്കി കിംസ്ഹെൽത്ത്

തിരുവനന്തപും: മാലിദ്വീപ് സ്വദേശിനിയായ 21 കാരിയിൽ നസ്സ് പ്രൊസീജ്യർ വിജയകരമാക്കി തിരുവനന്തപുരം കിംസ് ഹെൽത്തിലെ മെഡിക്കല് സംഘം. ശ്വാസതടസം നേരിട്ടതിനെത്തുടർന്നാണ് യുവതി കിംസ്ഹെൽത്തിൽ ചികിത്സ തേടിയത്. വിദഗ്ധ പരിശോധനയിൽ പെക്റ്റസ് എക്സ്കവേറ്റം അഥവ സങ്കൺ ചെസ്റ്റ് എന്ന രോഗാവസ്ഥ കണ്ടെത്തുകയായിരുന്നു. നെഞ്ചിന്‍റെ ഭിത്തിയിൽ ജന്മനാ ഉണ്ടാകുന്ന ഒരു വൈകല്യമാണിത്. ഇതുകാരണം ബ്രസ്റ്റ്ബോൺ അകത്തേക് വളയുകയും അതുവഴി ഹൃദയത്തിന്‍റെയും ശ്വാസകോശത്തിന്‍റെയും പ്രവര്ത്തനങ്ങൾ തടസപ്പെടുകയും ചെയ്യും. കാർഡിയോ തൊറാസിക് സർജറി വിഭാഗം സീനിയർ കൺസൽട്ടന്‍റ് ഡോ. ഷാജി പാലങ്ങാടൻ, കൺസൽട്ടന്‍റ് ഡോ. വിപിൻ ബി. നായർ എന്നിവരുടെ നേതൃത്വത്തിലുള്ള മെഡിക്കൽ സംഘമാണ് നസ്സ് പ്രൊസിജ്യറുമായി മുന്നോട്ടുപോയത്. കാർഡിയോ തൊറാസിക് വിഭാഗം അസോസിയേറ്റ് കൺസൾട്ടന്‍റ് ഡോ. സൈന സൈനുദ്ദീൻ, കാർഡിയോ തൊറാസിക് അനസ്തേഷ്യ വിഭാഗം കൺസൾട്ടന്‍റുമാരായ ഡോ. സുഭാഷ് എസ്, ഡോ. അനിൽ രാധാകൃഷ്ണ പിള്ള എന്നിവരും ശസ്ത്രക്രിയയുടെ ഭാഗമായി.

ശാന്തിഗിരിയില്‍ നവ‌ഒലി ജ്യോതിര്‍ദിനം ആറിന്

പോത്തൻകോട്: ശാന്തിഗിരി ആശ്രമം സ്ഥാപകഗുരു നവജ്യോതിശ്രീകരുണാകരഗുരു സമാധിയായതിന്‍റെ 26-ാമത് വാർഷികം "നവ‌ഒലി ജ്യോതിര്‍ദിനം' ആറിന് ആഘോഷിക്കും രാവിലെ 11നു പോത്തന്‍കോട് കേന്ദ്രാശ്രമത്തില്‍ നടക്കുന്ന നവ‌ഒലി ജ്യോതിര്‍ദിന സമ്മേളനം മന്ത്രി ജി. ആര്‍. അനില്‍ ഉദ്ഘാടനം ചെയ്യും. ഡോ. ശശി തരൂര്‍ എം.പി അധ്യക്ഷനാകും. ആശ്രമം പ്രസിഡന്‍റ് സ്വാമി ചൈതന്യ ജ്ഞാനതപസ്വി, ജനറൽ സെക്രട്ടറി സ്വാമി ഗുരുരത്നം ജ്ഞാന തപസ്വി, പാളയം ഇമാം ഡോ. വി.പി. ശുഹൈബ് മൗലവി, ചെമ്പഴന്തി ശ്രീനാരായണ ഗുരുകുലം മഠാധിപതി സ്വാമി അഭയാനന്ദ, ബിലീവേഴ്സ് ഈ സ്റ്റേണ്‍ ചര്‍ച്ച് ബിഷപ് മാത്യൂസ് മാര്‍ സില്‍വാനിയോസ് എപ്പിസ്കോപ്പ, സീറോ മലങ്കരസഭ സഹായമെത്രാൻ ബിഷപ്പ് ഡോ. മാത്യൂസ് മാര്‍ പോളി കാര്‍പസ്, ആക്ട്സ് പ്രസിഡന്‍റ് ഡോ. ബിഷപ്പ് ഉമ്മന്‍ ജോര്‍ജ്, തിരുവനന്തപുരം ലൂര്‍ദ് ഫെറാന പള്ളി വികാരി ജനറാൾ‍ ഫാ. ജോണ്‍ വര്‍ഗീസ് തെക്കേക്കര, സെന്‍റ് ജോണ്‍സ് മെഡിക്കല്‍ വില്ലേജ് മാനേജര്‍ ഫാ. ജോസ് കിഴക്കേടം എന്നിവര്‍ പങ്കെടുക്കും. രാവിലെ അഞ്ചു മണി മുതല്‍ പര്‍ണശാലയിലും പ്രാര്‍ഥനാലയത്തിലും പ്രത്യേക പുഷ്പാഞ് ജലി, ആറിനു പ്രത്യേക ആരാധന, ധ്വജം ഉയര്‍ത്തല്‍, പുഷ്പസമര്‍പ്പണം എന്നിവ നടക്കും. തുടര്‍ന്നു ഗുരുദര്‍ശനവും വിവിധ സമര്‍പ്പണങ്ങളും ഉണ്ടായിരിക്കും. ഉച്ചയ്ക്ക് അന്നദാനം നടത്തും. ഉച്ചകഴിഞ്ഞു രണ്ടിനു നടക്കുന്ന സംസ്കാരിക സമ്മേളനം മുന്‍ കേന്ദ്രമന്ത്രി വി. മുരളീധരന്‍ ഉദ്ഘാടനം ചെയ്യും. വൈകുന്നേരം ആറിന് ദീപപ്രദക്ഷിണം ഉണ്ടാകും. രാത്രി ഒന്പതു മുതല്‍ വിശ്വസംസ്കൃതികലാരംഗം അവതരിപ്പിക്കുന്ന വിവിധ കലാപരിപാടികള്‍ നടക്കും. മേയ് ഏഴിനു ദിവ്യപൂജാ സമര്‍പ്പണത്തോടെ ആഘോഷപരിപാടികള്‍ക്കു സമാപനമാകും.

നെയ്യാറ്റിന്‍കര ഗവ. ഗേള്‍സ് എച്ച്എസ്എസില്‍ കെട്ടിടസമുച്ചയ നിര്‍മാണത്തിനു തുടക്കം

നെയ്യാറ്റിന്‍കര : നെയ്യാറ്റിന്‍കര ഗവ. ഗേള്‍സ് ഹയര്‍സെക്കന്‍ഡറി സ്കൂളിലെ ഹയര്‍സെക്കന്‍ഡറി വിഭാഗത്തിനായുള്ള പുതിയ കെട്ടിട സമുച്ചയത്തിന്‍റെ നിര്‍മാണത്തിു തുടക്കമായി. കെ. ആന്‍സലന്‍ എംഎല്‍എ, നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്മാരായ ഡോ. എം.എ. സാദത്ത്, ആര്‍. അജിത, പിടിഎ പ്രസിഡന്‍റ് സതീഷ് എന്നിവര്‍ പങ്കെടുത്തു. മൂന്നു കോടി 90 ലക്ഷം രൂപ ചെലവഴിച്ചാണ് പുതിയ കെട്ടിട സമുച്ചയം യാഥാര്‍ഥ്യമാക്കുന്നത്. 4,740 സ്ക്വയര്‍ ഫീറ്റ് വിസ്തീര്‍ണമുള്ള മൂന്നുനില കെട്ടിടത്തില്‍ 12 ക്ലാസ് മുറികളുണ്ടാകും.ഐടി ലാബ്, സയന്‍സ് ലാബ്, സോഷ്യല്‍ സയന്‍സ് ലാബ്, മാത്തമറ്റിക്സ് ലാബ് എന്നിവയും വിദ്യാര്‍ഥികള്‍ക്ക് വിശ്രമിക്കാനുള്ള ഹാളും ഈ കെട്ടിടത്തില്‍ ഉള്‍പ്പെടുന്നുണ്ട്. മൂന്നു നിലകളിലും ടോയ്‌ലറ്റ് സൗകര്യങ്ങളുമുണ്ടാകും. കെട്ടിടത്തിന്‍റെ നിര്‍മാണം പൂര്‍ത്തിയാക്കി അടുത്ത അധ്യയന വര്‍ഷം ഉദ്ഘാടനം ചെയ്യാനാണ് നിലവില്‍ തീരുമാനിച്ചിട്ടുള്ളത്.

ഇലക്ട്രിക് ലൈനില്‍ പുളിമരം വീണു; പോസ്റ്റുവീണ് ഓട്ടോറിക്ഷ തകര്‍ന്നു

മെഡിക്കല്‍കോളജ്: ഇലക്ട്രിക് ലൈനിനു മുകളിലേക്കു വീണ പുളിമരം ഫയര്‍ഫോഴ്‌സ് എത്തി മുറിച്ചുനീക്കി. കുമാരപുരം ചെറുന്നിയൂര്‍ പൊതുജനം റോഡില്‍ ജിജി നഴ്‌സിംഗ് കോളജിനു സമീപത്തുനിന്ന പുളിമരമാണ് കടപുഴകിയത്. മരത്തിന്‍റെ ഭാരംമൂലം ഇലക്ട്രിക് പോസ്റ്റ് ഒടിഞ്ഞശേഷം സമീപത്ത് പാര്‍ക്ക് ചെയ്തിരുന്ന ഓട്ടോറിക്ഷയ്ക്കു മുകളിലേക്ക് വീഴുകയായിരുന്നു. ഓട്ടോയ്ക്ക് ചെറിയതോതില്‍ കേടുപാടുകള്‍ ഉണ്ടായി. മരം വീണതോടെ കുറച്ചുസമയം ഗതാഗതതടസം നേരിട്ടു. ചാക്ക ഫയര്‍‌സ്റ്റേഷനില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ആര്‍. രാജേഷിന്‍റെ നേതൃത്വത്തില്‍ ഓഫീസര്‍മാരായ സജി എസ്. നായര്‍, അരുണ്‍ ചന്ദ്, ആകാശ്, ഫയര്‍ആൻഡ് റസ്‌ക്യു ഡ്രൈവര്‍ ബൈജു എന്നിവര്‍ ചേര്‍ന്നാണ് ഏറെനേരത്തെ പരിശ്രമത്തിനുശേഷം മരം മുറിച്ചുനീക്കിയത്.

വെണ്ണിയൂർ പള്ളി കൂദാശയും പെരുന്നാളും ഇന്നു സമാപിക്കും

വിഴിഞ്ഞം: വെണ്ണിയൂർ സെന്‍റ് ജോസഫ് മലങ്കര സുറിയാനി കത്തോലിക്കാ പള്ളിയിൽ കൂദാശയും പെരുന്നാൾ മഹാമഹവുംഇന്നു സമാപിക്കും. ഇന്നലെ ഉച്ചയ്ക്ക് രണ്ടരക്ക് പാറശാല രൂപത മെത്രാൻ ഡോ. തോമസ് മാർ യൗസേബിയോസ് പിതാവിനു സ്വീകരണം നൽകി. തുടർന്നു പള്ളി കൂദാശ, സ്നേഹവിരുന്ന് എന്നിവ നടന്നു. ഇന്നു രാവിലെ ആറരക്ക് പ്രഭാത പ്രാർഥന നടത്തും. തുടർ ന്നു കൊടിമരം, പിയാത്ത കൂദാശകളുണ്ടാകും. ആഘോഷമായ പൊന്തിഫിക്കൽ കുർബാന യ്ക്കു പാറശാല ഭദ്രാസനാധ്യക്ഷൻ ഡോ. തോമസ് മാർ യൗസേബിയോസ് മുഖ്യകാർമ്മികനായിരിക്കും. തുടർന്ന് ആദ്യകുർബാന സ്വീകരണം, കൊടിയിറക്ക്, സ്നേഹഭോജനം.

കൊച്ചെടത്വ തീർഥാടനം ഇന്നു സമാപിക്കും

വിഴിഞ്ഞം : പ്രശസ്ത തീർഥാടനകേന്ദ്രമായ പുതിയതുറ (കൊച്ചെടത്വ) വിശുദ്ധ നിക്കോളാസ് ദേവാലയത്തിൽ വിശുദ്ധ ഗീവർഗീസ് സഹദായുടെ തിരുനാൾ ഇന്നു സമാപിക്കും. ഇന്നലെ രാവിലെ ആറിനും ഒൻതിനും ഉച്ചതിരി ഞ്ഞു മൂന്നിനും ദിവ്യബലി ഉണ്ടായിരുന്നു. തുടർന്ന് വൈകുന്നേരം അഞ്ചിനു മാർത്താണ്ഡം രൂപതാ മെത്രാൻ റവ. ഡോ. വിൻസന്‍റ് മാർ പൗലോസിന്‍റെ നേതൃത്വത്തിൽ സന്ധ്യാവന്ദന ശുഷ്രൂഷയും നടന്നു. അശ്വാരൂഡസേനയുടെ അകമ്പടിയോടെ വിശുദ്ധ ഗീവർഗീസിന്‍റെ തിരുരൂപവും വഹിച്ചുകൊണ്ട് പ്രദക്ഷിണവും നടന്നു. തിരുനാളാഘോഷങ്ങൾ അതിന്‍റെ സമാപന ദിവസങ്ങളിലേക്കു പ്രവേശിക്കുമ്പോൾ ഭക്തജനങ്ങളുടെ തിരക്ക് വർധിച്ചു വരുന്നു. സമാപന ദിവസമായ ഇന്നു രാവിലെ 4.30, 5.30, 7.30 സമയങ്ങളിൽ ദിവ്യബലി ഉണ്ടാകും. പതിനായിരക്കണക്കിനു തീർഥാടക വിശ്വാസി സമൂഹത്തിന് മുമ്പാകെ രാവിലെ ഒ ന്പതിനു കോട്ടാർ രൂപത മെത്രാൻ റവ. ഡോ. നസറൈൻ സൂസൈ തമിഴ് തിരുനാൾ സമൂഹ ദിവ്യബലിയർപ്പിക്കും. തുടർന്ന് പള്ളിയിൽ നിന്നും വിശുദ്ധന്‍റെ തേര് ഇറങ്ങി പുതിയതുറ ജംഗ്ഷൻ വരെയും അവിടെനിന്നു തിരിച്ച് പള്ളിയിലും എത്തും. വൈകുന്നേരം അഞ്ചിനു തിരുവനന്തപുരം ലത്തീൻ അതിരൂപത മെത്രാൻ റവ. ഡോ. തോമസ് ജെ. നെറ്റയു‌ടെ മുഖ്യകാർമികത്വത്തിൽ നടത്തുന്ന പൊന്തിഫിക്കൽ സമൂഹ ദിവ്യബലിയിൽ നിരവധി പേർ പ ങ്കെടുക്കും. തുടർന്നു കരിമരുന്നു പ്രയോഗത്തോടും കലാപരിപാടിയോടുംകൂടി തിരുനാൾ ആഘോഷങ്ങൾ സമാപിക്കും. 16നു കൊടിയിറക്കും.

ഓര്‍മകള്‍ പുതുക്കി അമ്മമാര്‍ വീണ്ടും കന്യാകുമാരി കണ്ടു

തിരുവനന്തപുരം: ഓര്‍മകള്‍ ഒരിക്കല്‍ കൂടി പുതുക്കുകയും പുതിയ ഓര്‍മകള്‍ കൂടെക്കൂട്ടു കയുംചെയ്ത് അവര്‍ എല്ലാം ഒത്തൊരുമിച്ചൊരു യാത്ര നടത്തി. ഓള്‍ ഇന്ത്യ വിമന്‍സ് കോണ്‍ഫറന്‍സിനു കീഴില്‍ പ്രവര്‍ത്തിക്കുന്ന ആശ്രയ വയോജന കേന്ദ്രത്തിലെ 42 അമ്മമാരാണു കന്യാകുമാരിയിലും മറ്റു തീര്‍ഥാടന കേന്ദ്രങ്ങളിലേക്കുമായി കഴിഞ്ഞ ദിവസം യാത്ര സംഘടിപ്പിച്ചത്. എഐഡബ്ല്യുസിയുടെ അ റുപതാം വാര്‍ഷികത്തോടനുബന്ധിച്ചാണ് അമ്മമാര്‍ക്കായുള്ള ഈ കന്യാകുമാരി യാത്ര സംഘടിപ്പിച്ചത്. പലരും വര്‍ഷങ്ങള്‍ക്കുമുന്‍പ് കന്യാകുമാരിയിലേക്കു യാത്രപോയിട്ടുണ്ടെന്നും ഒരിക്കല്‍ കൂടി പോകണമെന്ന് ആഗ്രഹം പ്രകടിപ്പിച്ചപ്പോള്‍ ഇതുവരെ പോകാത്ത ബാക്കിയുള്ളവരെക്കൂടി ചേര്‍ത്തു യാത്ര സംഘടിപ്പിക്കുകയായിരുന്നുവെന്നു എഐഡബ്ല്യുസി പ്രസിഡന്‍റ് ജലജ കുമാരി പറഞ്ഞു. കഴിഞ്ഞ വര്‍ഷം അമ്മമാരെയുംകൂട്ടി ലുലു മാള്‍ സന്ദര്‍ശനം നടത്തിയിരുന്നു. കേരള ട്രാവല്‍സാണ് ഈ യാത്രയ്ക്കുള്ള വാഹനം സ്‌പോണ്‍സര്‍ ചെയ്തത്. മുതിര്‍ന്ന സ്ത്രീകളുടെ ശാരീരിക, മാനസിക, വൈകാരിക ആരോഗ്യം ഉറപ്പുവരുത്താനുള്ള നിരവധി സേവനങ്ങള്‍ എഐഡബ്ല്യുസി എന്ന എന്‍ജിഒ കഴിഞ്ഞ 100 വര്‍ഷങ്ങളായി രാജ്യത്ത് ചെയ്തുവരുന്നു. തിരുവനന്തപുരം ബ്രാഞ്ച് നിലവില്‍ വന്നിട്ട് ഇക്കൊല്ലം 60 വര്‍ഷം പൂര്‍ത്തിയാവുകയാണ്. നിരവധി സൗജന്യ മെഡിക്കല്‍ ചെക്കപ്പുകള്‍, മരുന്നു വിതരണം, യോഗ പരിശീലനം, മാനസിക ആരോഗ്യത്തെ പരിപോഷിപ്പിക്കുന്ന തരത്തിലുള്ള നിരവധി സേവനങ്ങളും തീര്‍ത്തും സൗജന്യമായി നല്‍കി വരുന്നു. കുട്ടികള്‍ക്കും സ്ത്രീകള്‍ക്കും അവധിക്കാല കമ്പ്യൂട്ടര്‍, തയ്യല്‍ പരിശീലനം, വിവിധ ക്ലാസുകള്‍ എന്നിവയും നല്‍കി വരുന്നു. എഐഡബ്ല്യുസി തിരുവനന്തപുരം ബ്രാഞ്ച് പ്രസിഡന്റ് ജലജ കുമാരിയും സെക്രട്ടറി ഡോ. ജിബി ഗീവര്‍ഗീസുമാണ് ജില്ലയിലെ സന്നദ്ധ സേവന പ്രവര്‍ത്തനങ്ങള്‍ക്കു ചുക്കാന്‍ പിടിക്കുന്നത്.

നഷ്ടപരിഹാരം വൈകുന്നു : വിഴിഞ്ഞം-നവായിക്കുളം ഔട്ടർ റിംഗ്റോഡ്: സ്ഥലം വിട്ടുനൽകിയവർ പ്രതിഷേധത്തിൽ

വിഴിഞ്ഞം: വിഴിഞ്ഞം തുറമുഖത്തുനിന്നും കരമാർഗം ചരക്കുനീക്കം സാധ്യമാക്കുന്നതിലേക്ക് നിർമിക്കാൻ ഉദ്ദേശിക്കുന്ന വിഴിഞ്ഞം-നാവായിക്കുളം ഔട്ടർ റിംഗ് റോഡിനുവേണ്ടി സ്ഥലം വിട്ടുനൽകിയവർ പ്രക്ഷോഭത്തിനൊരുങ്ങുന്നു. സ്ഥലം ഏറ്റെടുത്ത് രണ്ടര വർഷം പിന്നിട്ടിട്ടും നഷ്ടപരിഹാരത്തുക അനുവദിക്കാത്തതിൽ പ്രതിഷേധിച്ചാണ് നാട്ടുകാ ർ രണ്ടാംഘട്ട പ്രക്ഷോഭത്തിന് ഒരുങ്ങുന്നത്. വിഴിഞ്ഞം-നാവായിക്കുളം ഔട്ടർ റിംഗ് റോഡ് ജനകീയ സമിതി നേതാക്കൾ കഴിഞ്ഞ ദിവസം നാഷണൽ ഹൈവേ അഥോ റിറ്റി ഓഫ് ഇന്ത്യ റീജണൽ ഓഫീസറുമായും പ്രോജക്ട് ഡയറക്ടറുമായും നടത്തിയ ചർച്ചകൾ പരാജയപ്പെട്ടിരുന്നു. ഈ സാഹചര്യത്തിൽ വിഴിഞ്ഞം മുതൽ നാവായിക്കുളം വരെയുള്ള 6,800 ഓളം വരുന്ന സ്ഥലം ഉടമകൾ വരും നാളുകളിൽ എൻഎച്ച് അഥോറിറ്റി അധികാരികളെ ഉപരോധിക്കുന്നത് ഉൾപ്പെടെയുള്ള പ്രക്ഷോഭ പരിപാടികളിലേക്കു നീങ്ങാൻ തീരുമാനിച്ചതായി ജനകീയ സമിതിനേതാക്കൾ അറിയിച്ചു. 2023 മാർച്ചിൽ സ്ഥലമുടമകളിൽനിന്നും രേഖകൾ അധികാരികൾ കൈപ്പറ്റിയിരുന്നു. നിർദിഷ്ട ഹൈവേക്ക് ഔദ്യോഗികമായ അനുമതി ലഭിക്കുന്നതിനു മുമ്പായിട്ടായിരുന്നു രേഖകൾ ഏറ്റുവാങ്ങിയത്. അന്തിമ അനുമതിക്കായി പ്രസ്തുത ഫയൽ കേന്ദ്രസർക്കാരിന്‍റെ കൈവശമാണെന്നാണു നാഷണൽ ഹൈവേ അഥോറിറ്റി ഓഫ് ഇന്ത്യ അധികാരികൾ ഇപ്പോൾ പറയുന്നത്. കേന്ദ്ര-സംസ്ഥാന സർക്കാരുകൾക്ക് ഇതിൽ ഗുരുതരമായ വീഴ്ച പറ്റിയതായി ജനകീയ സമരസമിതി നേതാക്കൾ ആരോപിച്ചു. സംസ്ഥാനത്തെയും കേന്ദ്രത്തെയും അധികാരികളെയും എംഎൽഎമാരെയും മന്ത്രിമാരെയും എംപിമാരെയും വിവിധ രാഷ്ട്രീയ പാർട്ടി നേതാക്കളെയും ഉദ്യോഗസ്ഥ പ്രമുഖരെയും കണ്ടു നിവേദനങ്ങൾ സമർപ്പിച്ച് രണ്ടര വർഷം കഴിഞ്ഞിട്ടും യാതൊരുവിധ നടപടികളും അധികാരികളുടെ ഭാഗത്തുനിന്നും ഉണ്ടാകുന്നില്ല. സംസ്ഥാന സർക്കാർ അവരുടെ വിഹിതം നൽകിയെന്നു പറയുന്നുണ്ടെങ്കിലുംകേന്ദ്ര അധികാരികൾ ഇപ്പോഴും മൗനത്തിലാണ്. കഴിഞ്ഞ മാസം നാഷണൽ ഹൈവേ അഥോറിറ്റി ഓഫ് ഇന്ത്യ റീജണൽ ഓഫീസറുടെ ഓഫീസ് ഉപരോധിച്ചപ്പോൾ ഏപ്രിൽ മാസം പത്താം തീയതിക്കുമുമ്പ് നഷ്ടപരിഹാര തുക നൽകിത്തുടങ്ങുമെന്ന് ഉറപ്പു നൽകിയിരുന്നു. എന്നാൽ യാതൊരുവിധ നടപടികളും ഉണ്ടായിട്ടില്ല എന്നാണ് കഴിഞ്ഞ ദിവസത്തെ ചർച്ചയിൽനിന്നും മനസിലാക്കാൻ കഴിഞ്ഞത്. വിഴിഞ്ഞം നാവായിക്കുളം ഔട്ടർ റിംഗ് റോഡ് ജനകീയ സമിതി കൺവീനർ സിസിലിപുരം പി. വിജയൻ, ചെയർമാൻ ചന്ദ്രമോഹനൻ നായർ, കോ-ഓർഡിനേറ്റർ ഹാഷിം, ജോയിന്‍റ് കൺവീനർ എസ്. സുരേഷ്കുമാർ, വടക്കേവിള രാജൻ, അഡ്വ. കെ. വി. അഭിലാഷ്, വിളപ്പിൽ അജിത തുടങ്ങിയവർ കഴിഞ്ഞ ദിവസം നടന്ന യോഗത്തിൽ പങ്കെടുത്തു.

ഇടിമിന്നലിൽ തെങ്ങിന് തീപിടിച്ചു

നെയ്യാറ്റിന്‍കര : കനത്ത മഴയിലും ഇടിമിന്നലിലും മരങ്ങള്‍ക്ക് നാശം.ഇന്നലെ വൈകുന്നേരം മൂന്നരയോടെ ഇരുന്പില്‍ തെക്കുനടയില്‍ സ്വകാര്യ പുരയിടത്തിലെ തെങ്ങിന് തീപിടിച്ചു നെയ്യാറ്റിന്‍കര ഫയര്‍ ആന്‍ഡ് റസ്ക്യൂ ടീം എത്തി തീയണച്ചു. വണ്ടന്നൂര്‍ സി.എസ്.ഐ ദേവാലയത്തിനു സമീപം തെങ്ങ് റോഡിലേയ്ക്ക് കടപുഴകി റോഡ് ബ്ലോക്കായി. നെയ്യാറ്റിന്‍കര ഫയര്‍ ആന്‍ഡ് റസ്ക്യൂ ടീം മരം മുറിച്ച് നീക്കി ഗതാഗത തടസം ഒഴിവാക്കി.

പെറ്റിയിൽ വലഞ്ഞ് റോബര്‍ട്ട്

വെള്ളറട: വിദേശത്ത് പോകുന്നതിന് മുമ്പ് വിറ്റ ബൈക്ക് തലവേദനയായി മാറി ഒരു സാധാരണക്കാരന്‍. 2023 -ല്‍ എഐകാമറകള്‍ സ്ഥാപിച്ചതോടെ മറ്റാരോ ഓടിക്കുന്ന ബൈക്കിന് വെള്ളറട സ്വദേശി റോബര്‍ട്ട് രാജിന് കിട്ടിയത് 35 പെറ്റികള്‍. 2013 ഓഗസ്റ്റിലാണ് വിദേശത്ത് പോകുന്നതിന്‍റെ തലേന്നാള്‍ കെഎല്‍ 19- 7963 എന്ന സ്പ്ലെണ്ടര്‍ ബൈക്ക് കച്ചവടക്കാര്‍ക്ക് വില്‍ക്കുന്നത്. ട്രാന്‍സ്ഫര്‍ ഫോം ഒപ്പിട്ട് ബൈക്ക് വാങ്ങുന്നയാളിന്‍റെ പേരിലേക്ക് വാഹനം മാറ്റാനുളള നടപടി ക്രമങ്ങള്‍ പൂര്‍ത്തിയാക്കിയാണ് വിദേശത്തേക്ക് പോയത് . റോബര്‍ട്ട് രാജ് 2019-ല്‍ വിദേശത്തു നിന്ന് മടങ്ങിയെത്തി. എന്നാല്‍ എഐ കാമറ സ്ഥാപിച്ചതോടെ പേര് മാറാതെ ഓടിയ ബൈക്കിന്‍റെ പെറ്റികള്‍ വന്ന് തുടങ്ങി. പെറ്റി കൈയില്‍ കിട്ടിയതോടെ പാറശാല ആർടി ഓഫീസിലെത്തി പരിശോധിക്കുമ്പോഴാണ് 35 ലധികം പെറ്റികള്‍ തന്‍റെ പേരില്‍ ഉള്ളതായി അറിയുന്നത്. നെയ്യാറ്റിന്‍കര ,ബാലരാമപരം പ്രദേശങ്ങളില്‍ ഓടുന്ന വണ്ടി 15 വര്‍ഷം മുമ്പ് വിറ്റ റോബര്‍ട്ട് രാജിന് തലവേദനയായി മാറുകയാണ നിലവില്‍ ബൈക്ക് ഓടിക്കുന്നയാളെ കണ്ടെത്തിയാല്‍ മാത്രമേ എന്തെങ്കിലും ചെയ്യാന്‍ സാധിക്കൂ. ഹെല്‍മറ്റില്ലാതെ കറങ്ങി നടക്കുന്നയാള്‍ വാഹനം അപകടത്തില്‍ പെട്ട് എന്തെങ്കിലും സംഭവിച്ചാലും ഉത്തരവാദി ബൈക്ക് ഉടമയായ റോബര്‍ട്ട് രാജായിരിക്കും. ബൈക്ക് ഇപ്പോൾ ഓടിക്കുന്നയാളെ എങ്ങനെയെങ്കിലും കണ്ടുപിടിക്കാനുള്ള നെട്ടോട്ടത്തിലാണ് റോബർട്ട്.

മലയോര മേഖലയിൽ കാട്ടുപോത്ത് ശല്യം രൂക്ഷമാകുന്നു

വിതുര: മലയോര മേഖലയിൽ കാട്ടുപോത്ത് ശല്യം രൂക്ഷമാകുന്നു. നേരത്തെ വനത്തിനോട് ചേർന്ന പ്രദേശങ്ങളിലാണ് കാട്ടുപോത്തിന്‍റെ സാന്നിധ്യമുണ്ടായിരുന്നതെങ്കിൽ ഇപ്പോൾ റോഡുകളിലും പ്രധാന ജംഗ്ഷനുകളിലും പോലും ഇവയെ കാണാം. നന്ദിയോട് വിതുര പഞ്ചായത്തുകളുടെ അതിർത്തിയായ കാലങ്കാവ്, കടുവാച്ചിറ, തൊളിക്കോട് നന്ദിയോട് പഞ്ചായത്തുകൾ ചേരുന്ന നാഗര,പൊരിയക്കാട്,പച്ചമല, വിതുര പേപ്പാറ,പട്ടൻ കുളിച്ചപാറ തുടങ്ങിയ സ്ഥലങ്ങളിൽ കാട്ടുപോത്ത് പതിവായി ഇറങ്ങുന്നുണ്ട്. ആദിവാസി മേഖലകളോട് ചേർന്ന വനപ്രദേശങ്ങളിൽ നിന്ന് പ്രധാന പാതയിൽ ഉൾപ്പെടെ കാട്ടുപോത്ത് ഇറങ്ങുന്നതിനാൽ വഴി നടക്കാൻ പോലും കഴിയാത്ത സ്ഥിതിയാണെന്ന് നാട്ടുകാർ പറയുന്നു. ഇരുചക്ര വാഹന യാത്രക്കാരേയും റബർ ടാപ്പിംഗ് തൊഴിലാളികളേയും ആക്രമിക്കാൻ ശ്രമിക്കുന്നതും പതിവാണ്. ചെറു മണലി സ്വദേശി രാജേന്ദ്രൻ നായരെ കാട്ടുപോത്ത് ആക്രമിച്ചത് ഒരാഴ്ച മുമ്പാണ്.

അങ്കണവാടി പ്രവർത്തകർക്ക് യാത്രയയപ്പ് നൽകി

നെടുമങ്ങാട് : വനിത ശിശുവികസന വകുപ്പ് നെടുമങ്ങാട് ഐസിഡിഎസിന്‍റെ ആഭിമുഖ്യത്തിൽ വിരമിച്ച അങ്കണവാടി പ്രവർത്തകരുടെ യാത്രയയപ്പ് സംഘടിപ്പിച്ചു. ബ്ലോക്ക് പഞ്ചായത്ത് പ്രസിഡന്‍റ് വി. അമ്പിളി ഉദ്ഘാടനം ചെയ്തു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ടി.ആർ. ചിത്രലേഖ അധ്യക്ഷതവഹിച്ചു. ശിശുവികസന പദ്ധതി ഓഫീസർ ഡോ.ആർ .പ്രീത കുമാരി,ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ആർ.ശ്രീമതി, ബ്ലോക്ക് ഡിവിഷൻ മെമ്പർമാരായ പി.സുഷ,ബീന അജിത്ത്, ടി.ശ്രീകുമാർ, വിജയൻ നായർ, കണ്ണൻ വേങ്കവിള തുടങ്ങിയവർ പ്രസംഗിച്ചു. ഔദ്യോഗിക ജീവിതത്തിൽ നിന്നും വിരമിക്കുന്ന എസ്.സുലകുമാരി, എസ്.തങ്കമണി, എസ്.കലാവതി, ലില്ലി ഭായി, ടി.വത്സല, വി.രാധാമണി എന്നി വരെ ചടങ്ങിൽ ആദരിച്ചു.

ബൈക്കും സ്കൂട്ടറും കൂട്ടിയിടിച്ച് ഒരാൾക്ക് പരിക്ക്

വെള്ളറട : ബൈക്കും സ്കൂട്ടറും കൂട്ടിയിടിച്ച് ഒരാൾക്ക് പരിക്ക്. കഴിഞ്ഞദിവസം രാവിലെയാണ് ആനപ്പാറ ജംഗ്ഷനില്‍ അപകടമുണ്ടായത്. ആനപ്പാറ ഓടല്‍വിള രാഘുല്‍ നിവാസില്‍ നെല്‍സണ്‍(72) സഞ്ചരിച്ചിരുന്ന സ്‌കൂട്ടറില്‍ ആതെദിശയില്‍ പുറകെ രണ്ടപേര്‍ സഞ്ചരിച്ച ബൈക്ക് വന്ന് അമിത വേഗത്തില്‍ ഇടിക്കുകയായിരുന്നു. ഇടിയുടെ ആഘാതത്തില്‍ നെല്‍സണ്‍ സഞ്ചരിച്ച സ്കൂട്ടറും നെല്‍സനും തെറിച്ചു വീണു. നെല്‍സണ്‍ സഞ്ചരിച്ച സ്‌കൂട്ടര്‍ തകരുകയും നെല്‍സന് ഗുരുതരമായ പരിക്കേൽക്കുകയും ചെയ്തു. നെല്‍സനെ ഉടന്‍ തന്നെ നാട്ടുകാര്‍ വെള്ളറട സര്‍ക്കാരാശു പത്രിയില്‍ പ്രവേശിപ്പിച്ചു. പ്രാഥമിക ചികിത്സകള്‍ നല്‍കിയ ശേഷം 108 ആംബുലന്‍സിൽ നെയ്യാറ്റിന്‍കര താലൂക്ക് ആശുപത്രിയില്‍ പ്രവേശിപ്പിച്ചു. അവിടെ നിന്ന് ഉച്ച കഴിയുന്ന സമയം വിദഗ്ധ ചികിത്സക്കായി വീണ്ടും തിരുവനന്തപുരം ജനറല്‍ ആശുപത്രിയില്‍ പ്രവേശിപ്പിച്ചു. ഇപ്പോള്‍ നെല്‍സണ്‍ തിരുവനന്തപുരം ജനറല്‍ ആശുപത്രിയില്‍ ചികിത്സയിലാണ്. ബൈക്കിന്‍റ അമിതവേഗതയാണ് അപകട കാരണമെന്ന് ദൃക്‌സാക്ഷികളായ ഓട്ടോ തൊഴിലാളികളും നാട്ടുകാരും പറഞ്ഞു.

പരുത്തിപ്പാറ-അമ്പലമുക്ക് ജംഗ്ഷന്‍ റോഡ് വീതികൂട്ടല്‍ പുതുക്കി നിശ്ചയിച്ചു

പേരൂര്‍ക്കട: പരുത്തിപ്പാറ-അമ്പലമുക്ക് ജംഗ്ഷന്‍ റോഡ് വീതികൂട്ടല്‍ പുതുക്കി നിശ്ചയിച്ചു. കിഫ്ബിയുമായി ബന്ധപ്പെട്ട സാമ്പത്തിക പ്രശ്‌നമാണ് ഇതിനു കാരണമെന്നു സൂചന. പരുത്തിപ്പാറ ജംഗ്ഷന്‍ മുതല്‍ അമ്പലമുക്ക് ജംഗ്ഷന്‍ വയെുള്ള വാഹനക്കുരുക്ക് ഒഴിവാക്കുന്നതിനാണ് റോഡ് വീതികൂട്ടല്‍ അനിവാര്യമായിരുന്നത്. റോഡിന്‍റെ ഇരുവശത്തുമായി മൊത്തം മൂന്നു മീറ്റര്‍ വീതി വര്‍ധിപ്പിക്കാനായിരുന്നു തീരുമാനം. അതിനിടെ സാന്ത്വന ജംഗ്ഷന്‍വരെ മാത്രം വീതികൂട്ടുകയും അമ്പലമുക്ക് ജംഗ്ഷന്‍വരെയുള്ള 160 മീറ്റര്‍ അതേപടി നിലനിര്‍ത്തുകയും ചെയ്യാനുള്ള തീരുമാനം പ്രതിഷേധത്തിന് ഇടയാക്കിയിരുന്നു. അതിനിടെയാണ് നിലവില്‍ അമ്പലമുക്ക് ജംഗ്ഷന്‍ മുതല്‍ ജലവിജ്ഞാനഭവന്‍ വരെയുള്ള അരകിലോമീറ്ററോളം വരുന്ന റോഡ് മാത്രം വീതികൂട്ടാന്‍ തത്ത്വത്തില്‍ തീരുമാനമായിരിക്കുന്നത്. ഇതുമായി ബന്ധപ്പെട്ട പാരിസ്ഥിതികാഘാത പഠനം ഇപ്പോള്‍ നടത്തിക്കൊണ്ടിരിക്കുകയാണെന്നു വി.കെ.പ്രശാന്ത് എംഎല്‍എ അറിയിച്ചു. തിരുവനന്തപുരം മെഡിക്കല്‍കോളജിനെയും എംസി റോഡിനെയും തിരുവനന്തപുരം നഗരവുമായി ബന്ധിപ്പിക്കുന്ന സുപ്രധാന റോഡാണ് പരുത്തിപ്പാറ-അമ്പലമുക്ക് റോഡ്. ഇത് ഏകദേശം മൂന്നരകിലോമീറ്റര്‍ ദൈര്‍ഘ്യം വരുന്നതാണ്. നിലവില്‍ പ്രസ്തുത റോഡ് റീടാര്‍ ചെയ്ത് പൂര്‍ത്തീകരിച്ചിരിക്കുകയാണ്. അതേസമയം പരുത്തിപ്പാറ മുതല്‍ മുട്ടട സബ്‌രജിസ്ട്രാര്‍ ഓഫീസ് റോഡ് വരെ ആവശ്യത്തിനു വീതിയുണ്ടെന്നും ബാക്കിയുള്ള ഭാഗത്തെ പ്രവൃത്തി പൂര്‍ത്തീകരിച്ചാല്‍ മതിയായിരുന്നുവെന്നും ഡിസിസി അംഗവും മുട്ടട സ്വദേശിയുമായ മുട്ടട അജിത്ത് പറഞ്ഞു. സാമ്പത്തിക പ്രശ്‌നത്തിന്‍റെ പേരുപറഞ്ഞ് റോഡ് വീതികൂട്ടല്‍ പ്രഹസനമാക്കാനുള്ള നടപടി അംഗീകരിക്കാനാവില്ലെന്നും അദ്ദേഹം വ്യക്തമാക്കി.

മെഡിക്കല്‍ കോളജ് ആശുപത്രിയില്‍ ഒപി ടിക്കറ്റിന് ഫീസ്; കോണ്‍ഗ്രസ് പ്രതിഷേധ സമരം നടത്തി

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ആദ്യമായി ഒപി ടിക്കറ്റിന് ഫീസ് ഏര്‍പ്പെടുത്തിയതിനെതിരേ കോണ്‍ഗ്രസ് ഉള്ളൂര്‍ ബ്ലോക്ക് കമ്മിറ്റി പ്രതിഷേധ സമരം നടത്തി. ഡിസിസി വൈസ്പ്രസിഡന്‍റ് കടകംപള്ളി ഹരിദാസ് ഉദ്ഘാടനം ചെയ്തു. ഒറ്റയടിക്കാണ് ഒപി ടിക്കറ്റിന് 10 രൂപ ചാര്‍ജ് ഏര്‍പ്പെടുത്തിയിരിക്കുന്നത്. ഇത് പാവപ്പെട്ട രോഗികളോടുള്ള വെല്ലുവിളിയാണെന്ന് അദ്ദേഹം പറഞ്ഞു. മെഡിക്കല്‍കോളജ് മണ്ഡലം പ്രസിഡന്‍റ് നജീവ് ബഷീര്‍ അധ്യക്ഷത വഹിച്ചു. ഉള്ളൂര്‍ ബ്ലോക്ക് പ്രസിഡന്‍റ് കുമാരപുരം രാജേഷ്, ഉള്ളൂര്‍ മണ്ഡലം പ്രസിഡന്‍റ് സുനില്‍ ബാബു, കടകംപള്ളി മണ്ഡലം പ്രസിഡന്‍റ് കടകംപള്ളി രാജേഷ്, മനു ചെന്നിലോട്, കെ.ആര്‍.ബാബു, ഷാജു കടകംപള്ളി, സതീശന്‍, അരുണ്‍രാജ്, ജോസ് വൈ. ദാസ്, ബെന്നി കൊച്ചേരി തുടങ്ങിയ പ്രകടനത്തിനു നേതൃത്വം നല്‍കി.

ആര്യനാട് പഞ്ചായത്ത് പ്രസിഡന്‍റിനെ അധിക്ഷേപിക്കുന്ന നടപടി പ്രതിഷേധാർഹം

നെടുമങ്ങാട് : ആര്യനാട് പഞ്ചായത്ത് പ്രസിഡന്‍റിനെതിരേ വ്യക്തിപരമായി അധിക്ഷേപിക്കുന്ന കോൺഗ്രസിന്‍റെ നടപടി പ്രതിഷേധാർഹമാണെന്ന് പഞ്ചായത്ത് പ്രസിഡന്‍റ് വി.വിജുമോഹൻ പത്ര സമ്മേളനത്തിൽ അറിയിച്ചു. 2018-19 കാലഘട്ടത്തിൽ കോൺഗ്രസ് പഞ്ചായത്ത് ഭരണ സമിതിയാണ് അർബൻ മിഷൻ ഫണ്ടുപയോഗിച്ച് ആനന്ദേശ്വരത്ത് അബ്ദുൾകലാം സ്റ്റേഡിയം പണിതത്. സ്വകാര്യ കമ്പനിയ്ക്ക് ‌ടെണ്ടർ നൽകാണ് അന്നത്തെ ഭരണ സമിതി സ്റ്റേഡിയം പണിതതെന്ന് പ്രസിഡന്‍റ് അറിയിച്ചു.അടിസ്ഥാന സൗകര്യം പോലും ഇല്ലാതെ പണിത സ്റ്റേഡിയം തുടർന്നുവന്ന എൽഡിഎഫ് പഞ്ചായത്ത് ഭരണസമിതി അപാകതകൾ പരിഹരിച്ചാണ് സ്റ്റേഡിയം പണി നടത്തിയത്. അപക്വമായി നടത്തുന്ന പ്രചരണങ്ങൾ കോൺഗ്രസ് അവസാനിപ്പിക്കണമെന്നും അല്ലാത്ത പക്ഷം നിയമപരമായ നടപടി സ്വീകരിക്കുമെന്നും പ്രസിഡന്റ് വി.വിജുമോൻ അറിയിച്ചു.

ഒന്പതുവയസുകാരിയെ പീഡിപ്പിച്ച മദ്രസ അധ്യാപകൻ അറസ്റ്റിൽ

കല്ലറ: പാങ്ങോട്ട് വട്ടക്കരിക്കകത്ത് പോക്സോ കേസിൽ മദ്രസ അധ്യാപകൻ അറസ്റ്റിൽ. മദ്രസ അധ്യാപകനായ പനവൂർ പുത്തൻപളളി പ്ലാവിള അർഷാദ് മൻസിലിൽ മുഹമ്മദ് അർഷാദ് (30 )നെയാണ് പാങ്ങോട് പോലീസ് അറസ്റ്റിലായത്. കഴിഞ്ഞ ദിവസം ഉച്ചയ്ക്ക് രണ്ടോടെ മദ്രസയിൽ ക്ലാസുണ്ടെന്ന് തെറ്റിദ്ധരിപ്പിച്ച് ഒന്പത് വയസുകാരിയെ വിളിച്ചു വരുത്തിയ ശേഷം കുട്ടിയോട് ലൈംഗിക അതിക്രമം കാട്ടുകയായിരുന്നു. പാങ്ങോട് പോലീസ് സ്റ്റേഷൻ സബ് ഇൻസ്പെക്ടർ വിജിത്ത് കെ.നായരുടെ നേതൃത്വത്തിൽ പ്രതിയെ ഇന്നലെ രാത്രി കസ്റ്റഡിയിലെടുത്തു. വീട്ടിൽ ചെന്ന് പെൺകുട്ടി മാതാവിനോട് കാര്യം പറഞ്ഞു. തുടർന്ന് മാതാപിതാക്കൾ പാങ്ങോട് പോലീസിൽ പരാതി നൽകിയതിന്‍റെ അടിസ്ഥാനത്തിലാണ് പോലീസ് ഇയാളെ കസ്റ്റഡിയിലെടുത്തത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

വൃത്തിഹീനമായ അന്തരീക്ഷം; വെഞ്ഞാറമൂട്ടിൽ ഹോട്ടല്‍ അടച്ചുപൂട്ടാന്‍ നോട്ടീസ്

വെഞ്ഞാറമൂട് : വൃത്തിഹീനമായ അന്തരീക്ഷത്തില്‍ പ്രവര്‍ത്തിക്കുന്ന ഹോട്ടല്‍ അടച്ചു പൂട്ടാന്‍ നോട്ടീസ് നല്കി. നെല്ലനാട് പഞ്ചായത്തില്‍ വെഞ്ഞാറമൂട് ജംഗ്ഷനില്‍ പ്രവര്‍ത്തിക്കുന്ന ശ്രീ ആര്യാസ് എന്ന ഹോട്ടലും ഇവരുടെ അനുബന്ധ സ്ഥാപനമായി മുക്കുന്നൂരില്‍ പ്രവര്‍ത്തിക്കുന്ന തട്ടുകടയുമാണ് അടച്ചിടാനായി പഞ്ചായത്ത് അധികൃതര്‍ നോട്ടീസ് നല്കിയത്. പഞ്ചായത്ത് അധികൃതരും വാമനപുരം കുടുംബാരോഗ്യ കേന്ദ്രത്തിലെ ആരോഗ്യ വിഭാഗവും ചേര്‍ന്ന് നടത്തിയ പരിശോധനയില്‍ പൊതുജന ആരോഗ്യത്തിന് ഹാനികരമാകുന്ന തരത്തിലാണ് ഹോട്ടല്‍ പ്രവര്‍ത്തിക്കുന്നതെന്ന് കണ്ടെത്തുകയും നോട്ടീസ് നല്കുകയുമായിരുന്നു.

ജാതി സെന്‍സസിന് വേണ്ടി രാഹുല്‍ ഗാന്ധി നടത്തിയ പോരാട്ടം കേന്ദ്രസര്‍ക്കാരിന്‍റെ കണ്ണു തുറപ്പിച്ചു: എം.ലിജു

തിരുവനന്തപുരം : ജാതി സെന്‍സസിന് വേണ്ടി രാഹുല്‍ ഗാന്ധി നടത്തിയ പോരാട്ടം കേന്ദ്ര സര്‍ക്കാരിന്‍റെ കണ്ണു തുറപ്പിച്ചെന്ന് കെപിസിസി ജനറല്‍ സെക്രട്ടറി എം.ലിജു. ജാതി സെന്‍സസ് നടത്താനുള്ള കേന്ദ്രസര്‍ക്കാരിന്‍റെ പ്രഖ്യാപനത്തിന്‍റെ പശ്ചാത്തലത്തില്‍ സാമൂഹ്യ നീതിക്കായി ജാതി സെന്‍സസ് നടപ്പാക്കണമെന്ന് നിരന്തരം ആവശ്യപ്പെട്ട രാഹുല്‍ ഗാന്ധിക്ക് അഭിവാദ്യമര്‍പ്പിച്ചുകൊണ്ട് ജില്ലാ കോണ്‍ഗ്രസ് കമ്മിറ്റിയുടെ ആഭിമുഖ്യത്തില്‍ ഏജീസ് ഓഫീസുമുന്നില്‍ നടന്ന പ്രകടനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഡിസിസി പ്രസിഡന്‍റ് പാലോട് രവി അധ്യക്ഷത വഹിച്ചു. വി.എസ്.ശിവകുമാര്‍, ജി.എസ്.ബാബു എന്നിവര്‍ പ്രസംഗിച്ചു. പാളയം രക്തസാക്ഷി മണ്ഡപത്തില്‍ നിന്നാരംഭിച്ച പ്രകടനത്തിന് ഡിസിസി ഭാരവാഹികളും ബ്ലോക്ക് പ്രസിഡന്‍റുമാരും നേതൃത്വം നല്‍കി.

സാമൂഹ്യവിരുദ്ധ ശല്യം : പേരൂര്‍ക്കട യമുനാ നഗര്‍ റോഡില്‍ മദ്യക്കുപ്പികളുടെ കൂമ്പാരം

പേരൂര്‍ക്കട: യമുനാ നഗര്‍ റോഡില്‍ സാമൂഹ്യവിരുദ്ധരുടെ ശല്യം രൂക്ഷമായി. ജംഗ്ഷനില്‍ നിന്ന് ഉള്ളിലേക്കു പോകുന്ന യമുനാ നഗര്‍ ജംഗ്ഷനു സമീപമാണ് സാമൂഹികവിരുദ്ധശല്യം വർധിച്ചിരിക്കുന്നത്. ഈ ഭാഗത്ത് മദ്യക്കുപ്പികളുടെ കൂമ്പാരമാണ് കണ്ടെത്താന്‍ സാധിക്കുന്നത്. മിനറല്‍ വാട്ടർ കുപ്പികളും ഇക്കൂട്ടത്തിലുണ്ട്. ആളൊഴിഞ്ഞ സ്ഥലത്തിരുന്ന് മദ്യപിച്ചശേഷം ചിതറിക്കിടക്കുന്ന മദ്യക്കുപ്പികള്‍ ഇവര്‍തന്നെ എടുത്ത് യമുനാ നഗറിലെ ഒഴിഞ്ഞ സ്ഥലത്തുകൊണ്ടിടുകയാണ് പതിവ്. രാത്രി 10 മുതല്‍ റോഡുവശത്ത് തമ്പടിക്കുന്ന ഇവര്‍ അഞ്ചും ആറും പേരടങ്ങുന്ന സംഘങ്ങളായാണ് ഒത്തുകൂടുന്നത്. കുറച്ചുനാളായി ഈ ഭാഗത്ത് മദ്യപാനികളുടെ ശല്യമുണ്ടെന്നും ഇടറോഡുകളില്‍ പോലീസ് പട്രോളിംഗ് ശക്തമാകാത്തതാണ് പ്രശ്‌നത്തിനു കാരണമെന്നുമാണ് നാട്ടുകാര്‍ പറയുന്നത്. ഒഴിഞ്ഞ മദ്യക്കുപ്പികള്‍ ചിതറിക്കിടക്കുന്നതില്‍ ചിലതില്‍ വാഹനങ്ങള്‍ കയറി കുപ്പിച്ചില്ലുകള്‍ പരന്നുകിടക്കുന്നതും അപൂര്‍വമല്ല. മിനറല്‍ വാട്ടറുകളുടെ കുപ്പികള്‍ കിടക്കുന്നത് റോഡിന്‍റെ മറുവശത്താണ്. ഇവ കുറച്ചുദിവസം കഴിയുമ്പോള്‍ ആക്രി പെറുക്കുന്നവര്‍ എടുത്തുകൊണ്ടു പോകുകയും ചെയ്യും. ബിവറേജസുകളില്‍ നിന്നും അല്ലാതെയും മദ്യം വാങ്ങുന്നവരാണ് കമ്പനികൂടി കുപ്പികള്‍ പാതയോരത്ത് തള്ളുന്നത്. സാമൂഹ്യവിരുദ്ധര്‍ സ്ഥലത്ത് തമ്പടിക്കുന്നത് അര്‍ദ്ധരാത്രിയോടടുത്ത അവസരങ്ങളില്‍ പ്രദേശവാസികള്‍ക്ക് അരോചകമാകുന്നുണ്ട്. ഉറക്കം കെടുത്തുന്ന വിധത്തിലുള്ള അട്ടഹാസങ്ങളും ബഹളങ്ങളും കേള്‍ക്കുന്നുണ്ടെന്ന പരാതിയും നാട്ടുകാര്‍ക്കുണ്ട്.

ഓടിക്കൊണ്ടിരുന്ന ഓട്ടോയ്ക്കു മുകളില്‍ മരം വീണു

പേരൂര്‍ക്കട: ഓടിക്കൊണ്ടിരുന്ന ഓട്ടോറിക്ഷയ്ക്കു മുകളില്‍ കൂറ്റന്‍ മാവ് വീണു. ശക്തമായ മഴയില്‍ തിരുമല അരയല്ലൂരില്‍ ഇന്നലെ വൈകുന്നേരം 4.30നാണ് സംഭവം. ഓട്ടോ തിരുമലയില്‍ നിന്ന് പേയാട് ഭാഗത്തേക്ക് പോകുകയായിരുന്നു. ഡ്രൈവറും ഒരു യാത്രക്കാരനുമാണ് ഓട്ടോറിക്ഷയില്‍ ഉണ്ടായിരുന്നത്. വാഹനം അരയല്ലൂരിലെത്തിയപ്പോള്‍ സമീപത്തെ വീടിന്‌റെ കോമ്പൗണ്ടില്‍ നിന്ന മാവാണ് വേരോടെ പിഴുത് ഓട്ടോയുടെ മുന്‍വശത്ത് വീണത്. ഡ്രൈവര്‍ക്കും യാത്രക്കാരനും നിസാര പരിക്കേറ്റു. ഇവര്‍ ആശുപത്രിയില്‍ പ്രാഥമിക ചികിത്സ തേടി. സംഭവത്തെ തുടര്‍ന്ന് മൂന്നുമണിക്കൂറാണ് ഗതാഗതം തടസപ്പെട്ടത്. ഫയര്‍ഫോഴ്‌സും നാട്ടുകാരും ചേര്‍ന്നാണ് മരശിഖരങ്ങള്‍ മുറിച്ചുനീക്കിയത്.

മേയ് ദിനാചരണം സംഘടിപ്പിച്ചു

നെയ്യാറ്റിൻകര : നെയ്യാറ്റിൻകര ഇന്‍റഗ്രൽ ഡവലപ്മെന്‍റ് സൊസൈറ്റി കേരള ലേബർ മൂവ്മെന്‍റിന്‍റെ (കെഎൽഎം ) നേതൃത്വത്തിൽ ലോഗോസ് പാസ്റ്ററൽ സെന്‍ററിൽ മേയ് ദിനാചരണം 2025 സംഘടിപ്പിച്ചു. രാവിലെ കൊറ്റാമം ലിറ്റിൽ ഫ്ലവർ പള്ളിയിൽ പ്രത്യേക ദിവ്യബലി അർപ്പിച്ചു. തുടർന്ന് കെഎൽഎം ഡയറക്‌ടർ ഫാ. ഡെന്നിസ് മണ്ണൂർ പതാക ഉയർത്തി. കമ്മീഷൻ സെക്രട്ടറി ഫാ.ക്ലീറ്റസ് അധ്യക്ഷത വഹിച്ചു. കെഎൽഎം നെയ്യാറ്റിൻകര രൂപത ഡയറക്‌ടർ ഫാ. ഡെന്നിസ് മണ്ണൂർ രൂപതാതല ഉദ്ഘാടനം നിർവഹിച്ചു. കെഎൽഎം രൂപത പ്രസിഡന്‍റ് ദേവരാജൻ, കെഎൽഎം വൈസ് പ്രസിഡന്‍റ് ലത, കമ്മീഷൻ സെക്രട്ടറി വത്സല ബാബു, പ്രോജക്‌ട് ഓഫിസർ മൈക്കിൾ, ഹൗസിംഗ് കോ-ഓർഡിനേറ്റർ ബിന്ദു,ഉണ്ടൻകോട് മേഖല ആനിമേറ്റർ പുഷ്പലത, അഗസ്റ്റീന, കെഎൽഎം ആനിമേറ്റർമാരായ ശശികുമാർ, ജയരാജ് എന്നിവർ പ്രസംഗിച്ചു. തൊഴിലാളികളെ പൊന്നാട അണിയിച്ച് ആദരിക്കുകയും മധുര വിതണം നടത്തുകയും ചെയ്തു. മേയ് ദിനത്തെ ആസ്പദമാക്കി സെമിനാർ സംഘടിപ്പിച്ചു. നാലിന് ഫൊറോന, യൂണിറ്റ് തലങ്ങളലിൽ മേയ് ദിനാചരണം സംഘടിപ്പിക്കും. നെയ്യാറ്റിന്‍കര: ഐഎൻടിയുസി പെരുമ്പഴുതൂർ മണ്ഡലം കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച മേയ് ദിനം നഗരസഭ പ്രതിപക്ഷ നേതാവ് ജെ. ജോസ് ഫ്രാങ്ക്ളിന്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് ഇളവനിക്കര സാം അധ്യക്ഷനായി. ഐഎൻടിയുസി ജില്ലാ സെക്രട്ടറി ടി.സുകുമാരൻ, വടകോട് അജി, ജി.ഗോപകുമാർ, മാമ്പഴക്കര രാജീവ്, പെരുമ്പഴുതൂർ ശ്രീകുമാർ, കളത്തുവിള സന്തോഷ്, അജയൻ കോട്ടൂർ, കളത്തുവിള സുനിൽ, യൂണിറ്റ് കൺവീനർ കെ. ജോസ് എന്നിവർ പങ്കെടുത്തു. നെടുമങ്ങാട് : മൂഴി ടിപ്പുകൾച്ചറൽ സൊസൈറ്റിയുടെയും ഗാന്ധിയൻ കർമവേദിയുടെയും ആഭിമുഖ്യത്തിൽ മേയ് ദിനാചരണവും മുതിർന്ന തൊഴിലാളികളെ ആദരിക്കലും സംഘടിപ്പിച്ചു. സൊസൈറ്റി ചെയർമാൻ മൂഴിയിൽ മുഹമ്മദ് ഷിബു അധ്യക്ഷതവഹിച്ചു. യോഗത്തിൽമേയ് ദിനാചരണവും ഡിസിസി ജനറൽ സെക്രട്ടറി ആനാട് ജയചന്ദ്രൻ ഉദ്ഘാടനം ചെയ്തു. മുൻ നഗരസഭാ ചെയർമാൻ കെ.സോമശേഖരൻ നായർ, നെടുമങ്ങാട് ശ്രീകുമാർ, മുഹമ്മദ് ഇല്യാസ്, നെടുമങ്ങാട് നസീർ, പുലിപ്പാറ യൂസഫ്, വേട്ടം പള്ളി രാജൻ, അനാൻ ഹാഫിസ് തുടങ്ങിയവർ പ്രസംഗിച്ചു. വെള്ളറട:പെരുങ്കടവിള പഞ്ചായത്തിലെ എഐടിയുസി ദേശീയ തൊഴിലുറപ്പ് തൊഴിലാളി യൂണിയന്‍, ചുമട്ട് തൊഴിലാളി യൂണിയന്‍ എന്നിവയുടെ സംയുക്ത ആഭിമുഖ്യത്തില്‍ സംഘടിപ്പിച്ച മേയ് ദിനാചരണം എഐടിയുസി തിരുവനന്തപുരം ജില്ലാ കമ്മിറ്റി അംഗം സി.സുന്ദ രേശന്‍ നായര്‍ പതാക ഉ യര്‍ത്തി ഉദ്ഘാടനം ചെയ്തു. സിപിഐ പാറശാലമണ്ഡലം സെക്രട്ടറി ആനാവൂര്‍ മണികണ്ഠന്‍, ലോക്കല്‍ കമ്മിറ്റി സെക്രട്ടറി കാനക്കോട് ബലരാജ്, ബിന്ദുലാല്‍,ജി.ജെയ്‌സന്‍ തുടങ്ങിയവര്‍ പ്രസംഗിച്ചു.

ഋഷിമംഗലം കൃഷ്ണൻ നായർ ഓർമദിനവും പുരസ്കാര സമർപ്പണവും അഞ്ചിന്

തിരുവനന്തപുരം: കേരളത്തിലെ ശബ്ദാനുകരണ കലയുടെ പിതാവ് ഋഷിമംഗലം കൃഷ്ണൻ നായരുടെ 50-ാമത് ഓർമ ദിനവും പുരസ്കാര സമർപ്പണവും ആദരം ചടങ്ങും അഞ്ചിന് വൈകുന്നേരം മൂന്നു മുതൽ തൈക്കാട് ഭാരത് ഭവൻ ശെമ്മാങ്കുടി സ്മൃതി ഹൈക്യൂ തിയറ്ററിൽ നടക്കും . ആറിന് ചലച്ചിത്ര നടൻ ജഗതി ശ്രീകുമാർ ചടങ്ങിന്‍റെ ഉദ്ഘാടനം നിർവഹിക്കുമെന്ന് ഋഷിമംഗലം കൃഷ്ണൻ നായർ ഫൗണ്ടേഷൻ ചെയർപേഴ്സൺ സോന എസ്.നായർ, സെക്രട്ടറി സാബുകൃഷ്ണ എന്നിവർ അറിയിച്ചു. നെയ്യാറ്റിൻകര നഗരസഭ ചെയർമാൻ പി.കെ.രാജമോഹനൻ അധ്യക്ഷനായിരിക്കും. വിവിധ മേഖലകളിൽ ശ്രദ്ധേയമായ പ്രവർത്തനങ്ങൾ നടത്തിയ ഡോ. പുനലൂർ സോമരാജൻ, ഡോ.എം.എസ്.ഫൈസൽഖാൻ, എം. ആർ.ഗോപകുമാർ, ദിനേശ് പണിക്കർ, വഞ്ചിയൂർ പ്രവീൺകുമാർ, അപർണ രാജീവ്‌, മധു പുന്നപ്ര, കെ.ആർ.അജയൻ, റഹിം പനവൂർ, രാഗീഷ് രാജ , എസ്.മഞ്ജുളാദേവി, അശോക് കരകുളം തുടങ്ങിയവർക്ക് കടകംപള്ളി സുരേന്ദ്രൻ എംഎൽഎ പുരസ്‌കാര സമർപ്പണം നടത്തുമെന്നും ഭാരവാഹികൾ അറിയിച്ചു. എംഎൽഎമാരായ കെ.ആൻസലൻ, സി.കെ.ഹരീന്ദ്രൻ എന്നിവർ മുഖ്യാതിഥികളായിരിക്കും. കവി വിനോദ് വൈശാഖി മുഖ്യ പ്രഭാഷണം നടത്തും. ജസ്റ്റിസ് എം.ആർ.ഹരിഹരൻ നായർ,ഭാരത് ഭവൻ മെമ്പർ സെക്രട്ടറി ഡോ. പ്രമോദ് പയ്യന്നൂർ, ഹാരിസ് ഡാനിയേൽ, പാളയം രാജൻ, വി.കെ. മോഹൻ, വാവ സുരേഷ്, അഡ്വ.ബി. ജയചന്ദ്രൻ നായർ, പ്രതാപൻ കിഴക്കേമഠം, സുരേഷ് തമ്പി തുടങ്ങിയവർ പ്രസംഗിക്കും. തുടർന്ന് മ്യൂസിക് നൈറ്റ് നടക്കും.

വിഴിഞ്ഞം പദ്ധതി സാക്ഷാത്കാരത്തിന് പിന്നിൽ ഉമ്മൻചാണ്ടി : എം.വിൻസന്‍റ് എംഎൽഎ

വിഴിഞ്ഞം : വിഴിഞ്ഞം പദ്ധതി സാക്ഷാത്കാരത്തിന് പിന്നിൽ ഒറ്റ പേരേയുള്ളു, അത് ഉമ്മൻ ചാണ്ടിയാണെന്ന് അഡ്വ. എം.വിൻസന്‍റ് എംഎൽഎ . വിഴിഞ്ഞം തുറമുഖവാടത്തിന് സമീപം വിഴിഞ്ഞം-മുക്കോല ജംഗ്ഷനിൽ ഇന്നലെരാവിലെ പൊതുജനങ്ങളെ അണിനിരത്തി കാഞ്ഞിരംകുളം ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ സംഘടിപ്പിച്ച ഉമ്മൻചാണ്ടി സ്മൃതി സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കാഞ്ഞിരകുളം ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് കരുംകുളം ജയകുമാർ അധ്യക്ഷത വഹിച്ചു. കെപിസിസി.അംഗം വിൻസന്‍റ് ഡി. പോൾ, ഡിസിസി ഭാരവാഹികളായ കെ.ബി.അഭിലാഷ്, പി.കെ.സാംദേവ്, സി.എസ്. ലെനിൻ, മണ്ഡലം പ്രസിഡന്‍റുമാരായ മുക്കോല ബിജു, വിഴിഞ്ഞം ആംബ്രോസ്, പരണിയം ഫ്രാൻസിസ്, ബാലരാമപുരം അർഷാദ്, പുന്നക്കുളം ബിനു, അനിൽ, ശശിധരൻ നാടാർ, അനിൽ വി. സലാം, രവീന്ദ്രൻ, വിഴിഞ്ഞം സക്കീർ, അനിൽകുമാർ, വിഴിഞ്ഞം യേശുദാസ്, ഫ്രീഡ സൈമൺ തുടങ്ങിയവർ പങ്കെടുത്തു.

വെയിലേറ്റ് തളർന്ന് നാട്ടുകാർ

വിഴിഞ്ഞം: വിഴിഞ്ഞം അന്താരാഷ്‌ട്ര തുറമുഖ കമ്മീഷനിംഗ് നാടിന്‍റെ ആഘോഷമായി മാറിയെങ്കിലും കനത്ത ചൂട് നാട്ടുകാരെ തളർത്തി. പ്രധാനമന്ത്രിയേയും കണ്ട് തുറമുഖവും കൂറ്റൻ കപ്പലും കണ്ടെയ്നർ ഇറക്കുന്നതുമെല്ലാം വീക്ഷിച്ച് മടങ്ങാമെന്ന് കരുതി കുട്ടികളും സ്ത്രീകളും മുതിർന്നവരും അടങ്ങുന്ന ആയിരങ്ങളാണ് ഇന്നലെ വിഴിഞ്ഞത്ത് എത്തിയത്. തുറമുഖ കവാടമായ മുല്ലൂർ കലുങ്ക് നടയിൽ വാഹനങ്ങളിൽ ഇറങ്ങിയവർക്ക് വേദിയിൽ കയറാൻ ഒരു കിലോമീറ്ററോളം നടക്കേണ്ടി വന്നു. തൊപ്പിയും കുടയും അനുവദിക്കില്ലെന്ന അധികൃതരുടെ നിർദേശം ജനത്തെ വലച്ചു. ഒരു കിലോമീറ്ററോളം നടന്ന് വിയർത്ത് കുളിച്ചെത്തിയവരെ എതിരേറ്റത് സുരക്ഷാ പരിശോധനയ്ക്കുള്ള നീണ്ട ക്യൂവായിരുന്നു. ഒരു മറപോലുമില്ലാതെ കടുത്ത വെയിലും കൊണ്ട് ഭൂരിഭാഗം പേരും തളർന്നു. ഒടുവിൽ സുരക്ഷാ പരിശോധനയെന്ന കടമ്പയും കടന്ന് വേദിയിൽ എത്തിയവരെ എതിരേറ്റത് പൊരിഞ്ഞ വെയിലായിരുന്നു. ശക്തമായി വെയിലടിക്കുന്ന തുറമുഖത്തായിരുന്നു ആയിരങ്ങൾക്ക് ഇരിപ്പിടമൊരുക്കിയുള്ള വേദി പണിതിരുന്നത്. മണിക്കൂറോളം വേദിക്കുള്ളിൽ ഇരുന്ന് തളർന്നവർ പ്രസംഗം കേൾക്കാൻ പോലും ക്ഷമ കാണിക്കാതെ വേദിവിട്ടു. പുറത്തിറങ്ങുന്നവർ ചുട്ടുപൊള്ളുന്ന വെയിലും താണ്ടിയാരുന്നു വാഹന പാർക്കിംഗ് സ്ഥലത്ത് തിരിച്ച് എത്തിയത്. ഒടുവിൽ വാഹനങ്ങൾ തേടിയുള്ള പരക്കംപാച്ചിലും ദയനീയമായിരുന്നു.

വിഴിഞ്ഞം തുറമുഖ കമ്മീഷനിംഗ് പാർട്ടി പരിപാടിയാക്കി മാറ്റി

എസ്. രാജേന്ദ്രകുമാർ വിഴിഞ്ഞം : കേരളത്തിന്‍റെ സ്വപ്ന പദ്ധതിയായ വിഴിഞ്ഞം അന്താരാഷ്‌ട്ര തുറമുഖ കമ്മീഷനിംഗ് അച്ചടക്കമില്ലാത്ത പരിപാടിയാക്കി പാർട്ടിക്കാർ മാറ്റി. പിതൃത്വവും വികസനവും അവകാശപ്പെട്ട് പ്രധാനമന്ത്രിയുടേയും മുഖ്യമന്ത്രിയുടേയും പ്രസംഗങ്ങൾ കത്തിക്കയറിയപ്പോൾ ബിജെപി, ഇടതുപക്ഷ പ്രവർത്തകരും നേതാക്കളും മുദ്രാവാക്യം വിളികളും ആർപ്പുവിളികളും കൈയടിയുമായി മുന്നേറി. വിവിഐപികൾ വരുമ്പോൾ വേണ്ട അച്ചടക്കപ്രോട്ടോക്കോളും ലംഘിച്ചായിരുന്നു മുന്നേറ്റം. വിഴിഞ്ഞം അന്താരാഷ്‌ട്ര തുറമുഖം കേന്ദ്ര സർക്കാരിന്‍റെ നേട്ടമാണെന്നും കേരള സർക്കാരിന്‍റെ നേട്ടമാണെന്നും വരുത്തിത്തീർക്കാൻ ബിജെപിക്കാരും സിപിഎമ്മുകാരും കഴിഞ്ഞ കുറെ ദിവസമായി ശ്രമം തുടങ്ങിയിരുന്നു. ഇതിനിടയിൽ തുറമുഖ നിർമാണത്തിന് കാരണക്കാരനായ ഉമ്മൻ ചാണ്ടിയെ എല്ലാവരും മറന്നു. ബിജെപിയും സിപിഎമ്മും അവകാശവാദവുമായി രംഗത്തിറങ്ങിയപ്പോൾ കോൺഗ്രസുകാർ പിൻവലിഞ്ഞു. വിഴിഞ്ഞത്തും ജില്ലയിൽ ഉടനീളവും ബിജെപി, ഇടതുപക്ഷ നേതാക്കൻമാരുടെ പടവും വച്ച് ഇവരാണ് വികസന നായകരെന്ന് അവകാശപ്പെട്ടുമുള്ള ഫ്ലക്സ് ബോർഡുകൾ നിരത്തി ആഘോഷിച്ചപ്പോൾ , ഒരിക്കലും മറക്കില്ലെന്ന് എഴുതിയ ഉമ്മൻ ചാണ്ടിയുടെ പടം വച്ചുള്ള ചുരുക്കം ഫ്ലാക്സ് ബോർഡുകൾ കോൺഗ്രസുകാരും നിരത്തി. കൊടി തോരണങ്ങൾ കൊണ്ട് വിഴിഞ്ഞം മുതൽ തുറമുഖ കവാടമായ മുല്ലൂർ വരെ അലങ്കരിച്ച് ശക്തി തെളിയിക്കാൻ ബിജെപിയും ഇടതുപക്ഷവും മത്സരിച്ചു. അത്തരം ശക്തി പ്രകടനം ഇന്നലെ ഉദ്ഘാനടവേദി നിറയ്ക്കാൻ ആൾക്കാരെ എത്തിക്കുന്നതിലും പ്രകടമായി. കാറുകളും മിനിവാഹനും ടൂറിസ്റ്റ് വാഹനങ്ങൾക്കുമുപരി തലസ്ഥാനത്ത് ഓടിയിരുന്ന പ്രൈവറ്റ് ബസുകളെയും ജനത്തെ എത്തിക്കാൻ ഇരുകൂട്ടരും രംഗത്തിറക്കി. ശക്തി അറിയിച്ച് കൊടികൾ കെട്ടിയുള്ള വാഹനങ്ങളുടെ വൻനിര തന്നെ വിഴിഞ്ഞം മുല്ലൂരിൽ അണിനിരന്നു. രാവിലെ എട്ടര മുതൽ തുടങ്ങിയ വാഹന മത്സരം പ്രധാനമന്ത്രി എത്തുന്ന പതിനൊന്ന് വരെ തുടർന്നു. ബിജെപിയും സിപിഎമ്മും മത്സരിച്ച് ആൾക്കാരെ എത്തിച്ചതോടെ രാവിലെ ഒൻപതര യോടെ പ്രവേശനം നിയന്ത്രിക്കുമെന്ന അധികൃതരുടെ തീരുമാനവും പാഴായി. നാടിന്‍റെ നാനാദിക്കിൽ നിന്ന് ഒഴുകിയെത്തിയ ജനക്കൂട്ടത്തെ കാര്യമായി പരിശോധനയ്ക്ക് പോലും നിൽക്കാതെ ഒടുവിൽ അധികൃതർക്ക് കയറ്റി വിടേണ്ട വന്നു. സദസിലെത്തിയ പ്രവർത്തകർ അച്ചടക്കം എന്ന പ്രോട്ടോക്കോൾ ലംഘിച്ചു. അതിനുള്ള വഴിമരുന്ന് സദസിലിരുന്ന നേതാക്കൾ തന്നെ ഇട്ടു നൽകി. സ്വാഗത പ്രാസംഗികനായ മന്ത്രി വി.എൻ.വാസവന്‍റെ സ്തുതി പാടലും എൽഡിഎഫ് സർക്കാരിന്‍റെ നിശ്ചയദാർഢ്യമാണ് വിഴിഞ്ഞം പദ്ധതിയെന്നും കേരളത്തിന്‍റെ വികസനവിജയമെന്നുമുള്ള മുഖ്യമന്ത്രിയുടെ പ്രസംഗവുമെല്ലാം കൈയടിച്ചും ആർപ്പുവിളിച്ചും മുദ്രാവാക്യം വിളിച്ചും ഇടതുപക്ഷക്കാർ ഏറ്റെടുത്തു. ഇത് ഏറ്റുപിടിച്ച ബിജെപിക്കാർ പ്രധാനമന്ത്രി പ്രസംഗിക്കാൻ എണീറ്റതു മുതൽ ആഘോഷം തുടങ്ങി.പരസ്പരം മത്സരിച്ചുള്ള പ്രവർത്തകരുടെ ആവേശം തണുപ്പിക്കാൻ ആരും ശ്രമിച്ചതുമില്ല.

മഴ തകർത്തു; നഗരം വെള്ളക്കെട്ടിലായി

തിരുവനന്തപുരം: ഒരിടവേളയ്ക്കു ശേഷം അപ്രതീക്ഷിതമായി പെയ്ത വേനൽ മഴയിൽ നഗരം വെള്ളക്കെട്ടിലായി. ഇന്നലെ വൈകുന്നേരം അഞ്ചോടെ പെയ്തു തുടങ്ങിയ അതിശക്തമായ മഴ ഒന്നര മണിക്കൂറോളം തുടർന്നതോടെയാണ് നഗരവാസികൾ ദുരിതത്തിലായത്. കനത്ത മഴയിൽ തന്പാനൂർ, ചാല, വഞ്ചിയൂർ, ഗൗരീശപട്ടം എന്നിവിടങ്ങളിൽ വെള്ളക്കെട്ടുകൾ രൂപപ്പെട്ടതിനെ തുടർന്ന് ഗതാഗത തടസമുണ്ടായി. താഴ്ന്ന പ്രദേശങ്ങളിലെ കടകളിലും വീടുകളിലും ഒഫീസുകളിലും വെള്ളം കയറിയതും ജനത്തെ ദുരിതത്തിലാക്കി. കനത്ത മഴയ്ക്കൊപ്പം ശക്തമായ ഇടിമിന്നലുമുണ്ടായതോടെ പലയിടത്തും വൈദ്യുതി ബന്ധവും തകരാറിലായി. നിരവധി സ്ഥലങ്ങളിൽ മരങ്ങൾ ഒടിഞ്ഞുവീണു. തന്പാനൂർ റെയിൽവേസ്റ്റേഷനിൽ വെള്ളം കയറിയത് ട്രെയിൻ ഗതാഗതത്തെ ബാധിച്ചു. മിക്ക ട്രെയിനുകളും വൈകിയാണ് സർവീസ് ആരംഭിച്ചത്. നന്തൻകോട് ക്ലിഫ് ഹൗസ് പരിസരത്തും കവടിയാർ, വലിയവിള, കമലേശ്വരം, മുടവൻമുകൾ, തിരുമല, മെഡിക്കൽ കോളേജ് ചാലക്കുഴി റോഡ്, കൈമനം തിരുവല്ലം എന്നിവിടങ്ങളിൽ റോഡരികിൽ നിന്നിരുന്ന മരം ഒടിഞ്ഞുവീണ് നാശനഷ്ടങ്ങളുണ്ടായി. നാലാഞ്ചിറ പാറോട്ടുകോണത്തും കുടപ്പനക്കുന്നിലും വീടുകളുടെ മുകളിലേക്കും മരം വീണു. മലയോര മേഖലയിൽ മണിക്കൂറുകൾ നീണ്ട കനത്ത മഴയാണുണ്ടായത്. അരുവിക്കര ഡാമിന്‍റെ വൃഷ്ടി പ്രദേശത്ത് മഴ തുടരുന്ന സാഹചര്യത്തിൽ അണക്കെട്ടിലെ ഷട്ടറുകൾ ഇന്നലെ വൈകുന്നേരം 10 സെന്‍റിമീറ്റർ ഉയർത്തിയിരുന്നു. തിരുവനന്തപുരം ചെങ്കോട്ട റോഡിൽ മിക്കയിടത്തും വെള്ളക്കെട്ട് രൂപപ്പെട്ടത് ഗതാഗതകുരുക്കിന് ഇടയാക്കി. ഇളവട്ടം, കുറുപുഴ ഭാഗങ്ങളിലാണ് വെള്ളക്കെട്ടുണ്ട ായത്. കുറുപുഴ വെന്പ് ക്ഷേത്രം ആലുംകുഴി ഇളവട്ടം റോഡിൽ കലുങ്ക് നിർമാണം നടക്കുന്നതിനാൽ ഗതാഗതപ്രശ്നം രൂക്ഷമാക്കി. വഴയില ഇളവട്ടം ഭാഗങ്ങളിലും വെള്ളക്കെട്ട് പ്രശ്നം രൂക്ഷമായി തുടരുകയാണ്. അതിനിടയിൽ മഴയ്ക്കൊപ്പം വീശയ ശക്തമായ കാറ്റിൽ പലയിടങ്ങളിലും മരങ്ങൾ കടപുഴകി വീണു. പേട്ട ആനയറ തെങ്ങ് വീണു ഗതാഗതം തടസപ്പെട്ടു. ചാക്ക ഫയർ ഫോഴസ് എത്തിയാണ് മരങ്ങൾ മുറിച്ച് മാറ്റി ഗതാഗതം പുനസ്ഥാപിച്ചത്. കല്ലുംമൂട് ഇലക്‌ട്രിക് ലൈനിലൂടെ വീണ തേക്കുമരം അഗ്നിരക്ഷാസേന മുറിച്ചു മാറ്റി.

ബസിനുള്ളില്‍ കഞ്ചാവ്; ഡ്രൈവര്‍ അറസ്റ്റില്‍

പേരൂര്‍ക്കട: പ്രാവച്ചമ്പലം-ആറ്റുകാല്‍ റൂട്ടില്‍ ഓടുന്ന സ്വകാര്യബസില്‍നിന്നു കഞ്ചാവ് കണ്ടെത്തി. സംഭവവുമായി ബന്ധപ്പെട്ട് ഡ്രൈവർ നെയ്യാറ്റിന്‍കര പെരുങ്കടവിള സ്വദേശി ഷീന്‍ രാജിനെ (30) പോലീസ് അറസ്റ്റുചെയ്തു. തമ്പാനൂര്‍ റെയില്‍വേ സ്റ്റേഷനുമുന്നില്‍ ബസ് എത്തിയപ്പോഴാണ് പോലീസ് പരിശോധന നടത്തിയത്. രണ്ടുഗ്രാം കഞ്ചാവ് ഷീന്‍രാജില്‍ നിന്ന് കണ്ടെടുത്തു. അറസ്റ്റിലായ ഇയാളെ പിന്നീട് ജാമ്യത്തില്‍ വിട്ടയച്ചു.

സേവാഭാരതി തുണയായി; സ്വന്തം വീടെന്ന സ്വപ്നം യാഥാര്‍ഥ്യമായി

പാറശാല: പാറശാല സ്വദേശിയായ സതീഷ്‌കുമാര്‍-മാലു ദമ്പതികളുടെയും രണ്ടു പെണ്‍മക്കളുടെയും വീടെന്ന സ്വപ്നം യാഥാര്‍ഥ്യമായി. സേവാഭാരതിയും കെ. ചിറ്റിലപ്പിള്ളി ഫൗണ്ടേഷനും തുണയായതോടെ ഇവര്‍ പുതിയ വീട്ടിലേയ്ക്ക് താമസമായി. സതീഷിന്‍റെ കുടുംബം വര്‍ഷങ്ങളായി കഴിഞ്ഞിരുന്നത് വാടക കെട്ടിടത്തിലായിരുന്നു. സ്വന്തമായി ഒരു വീട് എന്നതായിരുന്നു ഇവരുടെ സ്വപ്നം. സര്‍ക്കാരിന്‍റെ വിവിധ പദ്ധതികള്‍ ഉണ്ടെങ്കിലും പല കാരണങ്ങളാല്‍ സതീഷിന്‍റെ മുന്നില്‍ ആ വാതിലുകള്‍ അടഞ്ഞു. ഒടുവിലാണ് കെ. ചിറ്റിലപ്പള്ളി ഫൗണ്ടേഷന്‍റെ സഹായത്തോടെ സേവാഭാരതിയുടെ തല ചായ്ക്കാനൊരിടം പദ്ധതിയിലൂടെ സതീഷിന്‍റെയും കുടുംബത്തിന്‍റെയും വീടെന്ന സ്വപ്നത്തിനായുള്ള വഴി തെളിഞ്ഞത്. സതീഷിനും കുടുംബത്തിനും സേവാഭാരതിയും കെ. ചിറ്റിലപ്പള്ളി ഫൗണ്ടേഷനും നല്‍കുന്ന വിഷു കൈനീട്ടമാണ് ഈ പുതിയ വീട്. കഴിഞ്ഞ ദിവസം പാറശാല ഭാരതീയ വിദ്യാപീഠം സ്‌കൂളില്‍ നടന്ന ചടങ്ങില്‍ സതീഷിനും കുടുംബത്തിനും രാഷ്ട്രീയ സ്വയം സേവക സംഘം ദക്ഷിണ പ്രാന്ത സംഘചാലക് പ്രഫ. എം.എസ് രമേശന്‍ വീടിന്‍റെ താക്കോല്‍ കൈമാറി. സേവാഭാരതി സംസ്ഥാന ഉപാധ്യക്ഷന്‍ ഡി. വിജയന്‍ മംഗള പത്രം നല്‍കി. സേവാഭാരതി പാറശാല പഞ്ചായത്ത് പ്രസിഡന്‍റ് ഹേമ അധ്യക്ഷത വഹിച്ചു .രാഷ്ട്രീയ സ്വയംസേവക സംഘം പാറശാല ഖണ്ഡ് സംഘചാലക് അശോകന്‍ സന്ദേശ പ്രഭാഷണം നടത്തി. പാറശാല പഞ്ചായത്ത് സെക്രട്ടറി സ്വാഗതം പറഞ്ഞ ചടങ്ങില്‍ പ്രദീപ് നന്ദി പറഞ്ഞു.

ലഹരിവിരുദ്ധ സന്ദേശവുമായി ക്രിക്കറ്റ് ടൂര്‍ണമെന്‍റ്

നെയ്യാറ്റിന്‍കര : ലഹരിക്കെതിരെ ബോധവത്കരണസന്ദേശം വിളംബരം ‍ചെയ്ത് ക്രിക്കറ്റ് ടൂര്‍ണമെന്‍റുമായി ഫാ. ആന്‍റണി മെമ്മോറിയല്‍ ക്രിക്കറ്റ് ക്ലബ്. മൂന്നു പതിറ്റാണ്ടുകള്‍ക്ക് മുന്പ് കളിച്ച ബാലരാമപുരത്തെ പഴയ മൈതാനത്തില്‍ പ്രായത്തെ വെല്ലുന്ന മികവുമായി സുഹൃത്തുക്കള്‍ വിവിധ ടീമുകളെ പ്രതിനിധീകരിച്ചെത്തി. നേരത്തെ അവര്‍ക്കൊപ്പം കളിച്ചിരുന്ന ജോണി എന്ന സ്നേഹിതന്‍റെ സ്മരണാര്‍ഥമാണ് ടൂര്‍ണമെന്‍റ് സംഘടിപ്പിച്ചത്. പുതിയ കാലത്തു ലഹരി വല്ലാതെ പിടിമുറുക്കുന്ന സാഹചര്യം കണക്കിലെടുത്താണ് നോ ഡ്രഗ്സ്, ഒണ്‍ലി സ്പോര്‍ട്സ് എന്ന ആശയം ടൂര്‍ണമെന്‍റ് മുന്നോട്ടു വയ്ക്കുന്നതെന്ന് സംഘാടകര്‍ അറിയിച്ചു. ലജന്‍ററി ക്രിക്കറ്റ് ടൂര്‍ണമെന്‍റ് ആയതിനാല്‍ കളിക്കാരില്‍ മധ്യവയസ്കരാണ് നല്ലൊരു ശതമാനവും. അന്പതു വയസ് കഴിഞ്ഞ എണ്‍പതോളം പേര്‍ കളിക്കളത്തിലിറങ്ങുന്നുണ്ട്. ജേതാക്കള്‍ക്ക് ജോണി മെമ്മോറിയല്‍ ട്രോഫി നല്‍കും. മുന്‍ കേരള ക്രിക്കറ്റ് ടീം ക്യാപ്റ്റന്‍ രംഗനാഥന്‍, മുന്‍ രഞ്ജി താരം സതീഷ് കുമാര്‍ എന്നിവര്‍ ചേര്‍ന്ന് ടൂര്‍ണമെന്‍റ് ഉദ്ഘാടനം ചെയ്തു. പഴയ ക്രിക്കറ്റ് താരം കൂടിയായ അഡ്വ. എം. വിന്‍സെന്‍റ് എംഎല്‍എ, ഇടവക വികാരി, പഞ്ചായത്ത് അംഗങ്ങള്‍ മുതലായവരും ടൂര്‍ണമെന്‍റിന്‍റെ ഭാഗമായി.

നാട്ടിൻപുറങ്ങളിൽ വ്യാജ വെളിച്ചെണ്ണ റെഡി

കാട്ടാക്കട: നാട്ടിൻ പുറങ്ങളിൽ വ്യാജ വെളിച്ചെണ്ണ വ്യാപകമായി. ചെറുകിട വ്യാപാരികളും ഗ്രാമീണമേഖലയിലുള്ള വ്യാപാരികളും ഉൾപ്പെടെയുള്ളവർ ഇത് വിൽക്കേണ്ടുന്ന അവസ്ഥയാണ്. കിലോയ്ക്ക് 300 വരെ കിട്ടുന്ന വെളിച്ചെണ്ണ വ്യാജനായി എത്തുമ്പോൾ അത് 110നും 120നും കിട്ടും. ഹോട്ടൽ, തട്ടുകടകൾ എന്നിവിടങ്ങളിൽ വറുക്കാനുപയോഗിക്കുന്ന എണ്ണയുടെ ഗുണനിലവാരം കുറയുന്നെന്നും ആക്ഷേപമുണ്ട്. തെങ്ങിനുണ്ടാകുന്ന രോഗബാധയും തേങ്ങായിടാൻ ആളെ കിട്ടാത്തതുംമൂലം വീടുകളിൽ അധികം തേങ്ങലഭിക്കാത്ത സ്ഥിതിയാണ്. മുൻകാലങ്ങളെ അപേക്ഷിച്ചു തേങ്ങയുടെ ഉൽപ്പാദനം മൂന്നിലൊന്നായി കുറഞ്ഞെന്നു കർഷകർ പറയുന്നു. കാലാവസ്ഥാ വ്യതിയാനമാണ് ഇതിനു കാരണമായി പറയുന്ന്. തമിഴ്‌നാട്ടിൽനിന്നാണു പ്രധാനമായും തേങ്ങ വിപണിയിലെത്തുന്നത്. ജില്ലയിൽ പലയിടത്തും തമിഴ്‌നാട്ടിൽനിന്നു ലോഡുകണക്കിനു പച്ചത്തേങ്ങയെത്തുന്നുണ്ട്. ഇവരിൽനിന്നു ചെറുകിട കച്ചവടക്കാർ വാങ്ങിയാണു വിപണിയിലെത്തിക്കുന്നത്. എണ്ണക്കുറവുള്ള തേങ്ങയ്ക്കു രുചിക്കുറവ് സ്വാഭാവികമാണ്. ഇതുമൂലം കറിയുടെ രുചിയും കുറയുന്നു. അതിനിടെയാണ് വ്യാജ വെളിച്ചെണ്ണ സുലഭമായി കിട്ടുന്നു. പുതിയതും എന്നാൽ പ്രമുഖ കമ്പനികളുടെ അപരനാമത്തിലുള്ള വെളിച്ചെണ്ണകളാണ് കിട്ടുന്നത്. അതാകട്ടെ രോഗം പരത്തുന്നതും. തിരുവനന്തപുരം കേന്ദ്രീകരച്ചുള്ള ഒരു സംഘമാണ് പല പേരുകളിലും വെളിച്ചെണ്ണ നിർമിക്കുന്നതെന്നും സൂചനയുണ്ട്. സർക്കാരിന്‍റെ ഉടമസ്ഥതയിലുള്ള കേര വെളിച്ചെണ്ണയ്ക്കു പോലും അപരന്മാരുണ്ട്. നേരത്തേ പരിശോധന ശക്തമാക്കുകയും വ്യാജ ഉൽപ്പന്നങ്ങൾക്കെതിരേ കേസെടുക്കുകയും ചെയ്തിരുന്നു. എന്നാൽ ഇപ്പോൾ റെയിഡ് ഇല്ലാതെയായി. താൻസർ പോലുള്ള മാരക രോഗത്തിനിടവരുത്തിയേക്കാവുന്ന പാംകർണൽ ഓയിലും പാരഫിൻ ഓയിലും അമിത അളവിൽ ചേർത്ത വെളിച്ചെണ്ണയാണ് വിറ്റഴിക്കുന്നത്. കഴിഞ്ഞ വർഷം സർക്കാർ ലാബുകളിൽ അറുപതോളം കമ്പനികളുടെ വെളിച്ചെണ്ണ സാമ്പിളുകൾ പരിശോധനയ്ക്ക് വിധേയമാക്കിയിരുന്നു. വിപണിയിൽനിന്നു ശേഖരിച്ച സാമ്പിളുകളിൽ പതിനേഴ് ബ്രാൻഡുകളിൽ പാരാഫിന്‍റെയും പാം കർണൽ ഓയിലിന്‍റെയും അമിത സാന്നിധ്യം കണ്ടെത്തിയിരുന്നു. കച്ചവടക്കാർക്ക് ഒരു ലിറ്റർ വെളിച്ചെണ്ണ വിൽക്കുന്നത് 100 രൂപയ്ക്ക്. അതു വാങ്ങാൻ എത്തുന്നവർക്ക് വിൽക്കുന്നത് 175നും 180നും. ഇത്തരം വിൽപ്പന വ്യാപകമായിട്ടും ഒരു നടപടിയും ബന്ധപ്പെട്ടവർ എടുക്കുന്നില്ല.

കരിക്ക് വെട്ടുകാരനെ കുത്തിയ കേസിലെ പ്രതി പിടിയില്‍

വെള്ളറട: കരിക്കു വിലകുറച്ചു കൊടുത്തില്ലെന്നാരോപിച്ച് കരിക്കുവെട്ട് തൊഴിലാളിയുടെ കഴുത്തില്‍ കുത്തിയ പ്രതി പിടിയിലായി. അരുവിയോട് മേമല ജംഗ്ഷനില്‍ കരിക്ക് കച്ചവടം ചെയ്യുന്ന ജസ്റ്റസി(63)നെയാണ് കുത്തി പരിക്കേല്‍പ്പിച്ചത്. കഴുത്തിനു ഗുരുതരമായി പരിക്കേറ്റ ജസ്റ്റിസ് തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. പാലിയോട് കോട്ടയ്ക്കല്‍ ആറടിക്കര വീട്ടില്‍ ചെട്ടിക്കണ്ണന്‍ എന്ന കണ്ണ(37)നെ പോലീസ് പിടികൂടി. ആക്രമണം നടത്തിയ ശേഷം ഒളിവില്‍ പോയ പ്രതിയെ മാരയമുട്ടം പോലീസ് വളരെ പണിപട്ടാണ് പിടികൂടിയത്. സര്‍ക്കിള്‍ ഇന്‍സ്‌പെക്ടര്‍ ധനപാലന്‍റെ നേതൃത്വത്തിലുള്ള പോലീസ് അംഗമാണ് അക്രമിയെ പിടികൂടിയത്. പ്രതിയെ കോടതിയില്‍ ഹാജരാക്കി റിമാൻഡുചെയ്തു.

വഴയില കെപ്കോയിൽ ഓൺലൈൻ ബൂസ്റ്റര്‍ പമ്പ്ഹൗസ് നിർമാണം തുടങ്ങി

നെടുമങ്ങാട്: കേരള ജലഅഥോറിറ്റി നഗരസഞ്ചയ പദ്ധതിയിൽ ഉൾപ്പെടുത്തി വഴയില കെപ്കോയില്‍ രണ്ടു കോടി രൂപ ചെലവിൽ സ്ഥാപിക്കുന്ന ഓൺലൈൻ ബൂസ്റ്റര്‍ പമ്പ് ഹൗസിന്‍റെ നിര്‍മാണം തുടങ്ങി. എല്ലാ ഘട്ടത്തിലും കൃത്യമായ ധാരണയോടെ പ്രവര്‍ത്തനം നടക്കണമെന്നു മന്ത്രി ജി.ആർ. അനില്‍ ഉദ്യോഗസ്ഥര്‍ക്ക് നിര്‍ദേശം നല്‍കി. ആഴ്ച തോറും വിശകലന യോഗങ്ങള്‍ ചേര്‍ന്ന് പ്രവര്‍ത്തനം വിലയിരുത്തും. വഴയിലയില്‍നിന്നു് കല്ലയം ഉപരിതല ജല സംഭരണിയിലേയ്ക്ക് വെള്ളമെത്തിക്കുന്നതിനാണു ബൂസ്റ്റര്‍ പമ്പ് സ്ഥാപിക്കുന്നത്. കരകുളം പഞ്ചായത്തിലെ കുടിവെള്ള പ്രശ്‌നത്തിനു ശാശ്വത പരിഹാരത്തിനായി കേരള ജല അഥോറിറ്റി നഗര സഞ്ചയ പദ്ധതിയില്‍ ഉള്‍പ്പെടുത്തി 12.29 കോടി രൂപയുടെ 5 പ്രവൃത്തികളായാണ് ടെൻഡർ ചെയ്തിരുന്നത്. കല്ലയം ഉപരിതല ജലസംഭരണി (രണ്ടു ലക്ഷം ലിറ്റർ) - 1.4 കോടി, മൈലാടുംപാറയിൽ ഉപരിതല ജലസംഭരണി (1 ലക്ഷം ലിറ്റർ) - 77 ലക്ഷം, വഴയില കെപ്കോയിൽ ഓൺലൈൻ ബൂസ്റ്റർ പമ്പ് ഹൗസിന്‍റെ നിർമാണം-രണ്ടുകോടി, കെപ്കോ പമ്പ് ഹൗസ് മുതൽ കല്ലയം ജലസംഭരണി വരെയുള്ള പമ്പിംഗ് ലൈൻസ്ഥാപിക്കൽ - 2.67 കോടി, കല്ലയം മുതൽ തണ്ണീർപൊയ്ക വരെയുള്ള ട്രാൻസ്മിഷൻ ലൈൻ സ്ഥാപിക്കൽ- 3.11 കോടി എന്നിങ്ങനെയാണ് തുക ചെല വഴിക്കുക. ഇതിൽ പഞ്ചായത്തിലെ കല്ലയം, മൈലാടുംപാറ എന്നീ സ്ഥലങ്ങളിലെ ജലസംഭരണികളുടെ നിർമാണം പൂർത്തിയായിട്ടുണ്ട്. പൈപ്പ് ലൈനിന്‍റെ മറ്റനുബന്ധ പ്രവര്‍ത്തനങ്ങളും ഉടൻ തുടങ്ങും. പൂർത്തീകരിച്ചാൽ എം.സി. റോഡിൽ മണ്ണന്തല മുതൽ വട്ടപ്പാറ വരെയുള്ള ഭാഗങ്ങളിൽ 24 മണിക്കൂറും കുടിവെള്ള വിതരണം നടത്താൻ കഴിയും. ചടങ്ങില്‍ കരകുളം പഞ്ചായത്ത് പ്രസിഡന്‍റ് യു. ലേഖാറാണി, മെമ്പര്‍ വി. രാജീവ്, എക്‌സിക്യൂട്ടീവ് എന്‍ജിനീയര്‍ മനോജ് തുടങ്ങിയവര്‍ പങ്കെടുത്തു.

ഫ്‌ളക്‌സ് വേസ്റ്റിനു തീപിടിച്ചു

പേരൂര്‍ക്കട: പുതുതായി പണിയുന്ന മൂന്നുനില കടമുറിക്കു സമീപം കൂട്ടിയിട്ടിരുന്ന ഫ്‌ളക്‌സ് വേസ്റ്റുകള്‍ക്ക് തീപിടിച്ചു. ബുധനാഴ്ച പുലര്‍ച്ചെ ഒരുമണിയോടുകൂടി കവടിയാര്‍-അമ്പലമുക്ക് റോഡ് ബാങ്ക് ഓഫ് ബറോഡയ്ക്ക് എതിര്‍വശത്താണു സംഭവം. അമ്പലമുക്ക് സ്വദേശി മഹേഷിന്‍റെ ഉടമസ്ഥതയിലുള്ളതാണ് കടമുറി. ഉപയോഗശൂന്യമായ ഫ്‌ളക്‌സുകള്‍ കൂടിക്കിടന്നതിനാണ് തീ കത്തിയത്. തീയും പുകയും ഉയരുന്നതു കണ്ടവരാണ് വിവരം ഫയര്‍ഫോഴ്‌സില്‍ അറിയിച്ചത്. തിരുവനന്തപുരം നിലയത്തില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജിയുടെ നേതൃത്വത്തിലുള്ള സംഘമെത്തിയാണ് തീ കെടുത്തിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]