ADVERTISEMENT

ADVERTISEMENT

ജീവിതോത്സവവുമായി മാലോത്ത് കസബ സ്കൂൾ എൻഎസ്എസ് വോളന്‍റിയർമാർ

മാലോത്ത്: കൗമാരക്കാരുടെ ഊർജവും സർഗശേഷിയും അഭിലഷണീയമായ വഴികളിലേക്ക് കൊണ്ടുവരുന്നതിനും ലഹരിവസ്തുക്കളുടെ ഉപയോഗം, ഡിജിറ്റൽ അഡിക്ഷൻ, ആത്മഹത്യാ പ്രവണത, അപകടകരമായ അക്രമവാസന തുടങ്ങിയ വിപത്തുകളിൽനിന്ന് വഴിതിരിച്ചുവിടുന്നതിനുമായി മാലോത്ത് കസബ ഗവ. ഹയർ സെക്കൻഡറി സ്കൂളിലെ എൻഎസ്എസ് യൂണിറ്റിന്‍റെ നേതൃത്വത്തിൽ ആവിഷ്കരിച്ച ജീവിതോത്സവം 2025 പരിപാടിക്ക് വിജയകരമായ സമാപനം.

പരിപാടിയുടെ ഭാഗമായി 21 ദിവസത്തെ പ്രവർത്തനാധിഷ്ഠിത ചാലഞ്ചുകളാണ് വിദ്യാർഥികൾ പൂർത്തീകരിച്ചത്. കൊന്നക്കാട് ടൗണിൽ നടന്ന സമാപന പരിപാടി പിടിഎ പ്രസിഡന്‍റ് സനോജ് മാത്യു ഉദ്ഘാടനം ചെയ്തു. പ്രിൻസിപ്പൽ മിനി പോൾ അധ്യക്ഷത വഹിച്ചു.

ഡോ. വിലാസിനി, എസ്എംസി ചെയർമാൻ സി.സി. അരൂപ്, മദർ പിടിഎ പ്രസിഡന്‍റ് ദീപ മോഹൻ, ആർ.കെ. രാജേഷ്, എൻഎസ്എസ് പ്രോഗ്രാം ഓഫീസർ പി.ബി. ബാലാമണി എന്നിവർ പങ്കെടുത്തു. തുടർന്ന് എൻഎസ്എസ് വോളന്‍റിയർമാർ ലഹരിക്കെതിരായി ഫ്ലാഷ് മോബ് അവതരിപ്പിച്ചു.

ADVERTISEMENT

രൂപരേഖ മാറ്റിയത് അഞ്ചുതവണ; ജില്ലാ ആശുപത്രിയിൽ പുതിയ കെട്ടിടത്തിന്‍റെ ലിഫ്റ്റ് നിർമാണവും നീളുന്നു

കാഞ്ഞങ്ങാട്: പണി പൂർത്തിയായിട്ട് വർഷങ്ങളായെങ്കിലും ഇതുവരെ ഉപയോഗപ്പെടുത്താൻ കഴിയാത്ത ജില്ലാ ആശുപത്രിയുടെ പുതിയ അഞ്ചുനില കെട്ടിടത്തിൽ ലിഫ്റ്റ് നിർമാണവും നീളുന്നു. ലിഫ്റ്റ് സ്ഥാപിക്കാനുള്ള ചാനലിന്‍റെ നിർമാണത്തിന് ഒരു വർഷം മുമ്പേ കരാറായി പ്രവൃത്തികൾ തുടങ്ങിയതാണ്. എന്നാൽ പ്രവൃത്തികൾ നടക്കുന്നതിനിടയിൽ ഇതിന്‍റെ രൂപരേഖ അധികൃതർ അഞ്ചുതവണ മാറ്റിയതാണ് പണി പൂർത്തിയാക്കാൻ തടസമാകുന്നതെന്ന് കരാറുകാർ പറയുന്നു. ആദ്യം ലഭിച്ച രൂപരേഖ പ്രകാരം മൂന്നു മീറ്റർ നീളത്തിലും 2.40 മീറ്റർ വീതിയിലുമാണ് ലിഫ്റ്റിന്‍റെ അടിത്തറയ്ക്കായി കുഴിയെടുത്തത്. അടിത്തറയുടെ കോൺക്രീറ്റിംഗ് തുടങ്ങിയപ്പോഴാണ് വീതി 2.20 മീറ്ററായി കുറയ്ക്കണമെന്ന് ഉദ്യോഗസ്ഥർ ആവശ്യപ്പെട്ടത്. ഇതോടെ കുഴിക്കുള്ളിൽ കോൺക്രീറ്റ് പാർശ്വഭിത്തി നിർമിച്ച് വീതി കുറയ്ക്കേണ്ടിവന്നു. ഒടുവിൽ അടിത്തറ പൂർത്തിയാക്കി ലിഫ്റ്റിനായുള്ള ഇരുമ്പ് ചാനൽ സ്ഥാപിക്കാൻ തുടങ്ങിയപ്പോഴേക്കും ചാനലിന്‍റെയും വീതി കുറയ്ക്കാൻ ആവശ്യപ്പെട്ടു. വീതികുറച്ച് ചാനൽ സ്ഥാപിച്ചപ്പോൾ അതു മുഴുവൻ അഴിച്ചുമാറ്റി ഐ രൂപത്തിലുള്ള ചാനൽ സ്ഥാപിക്കാൻ ആവശ്യപ്പെട്ടു. അത് ഏതാണ്ട് സ്ഥാപിച്ചു കഴിഞ്ഞപ്പോഴേക്കും വീണ്ടും അഴിച്ചുമാറ്റി സി രൂപത്തിലുള്ള ചാനൽ സ്ഥാപിക്കാൻ ആവശ്യപ്പെട്ടിരിക്കുകയാണ്. പണിയാനും പൊളിക്കാനും സാമഗ്രികൾ മാറ്റാനുമൊക്കെയായി ഇതിനകംതന്നെ അഞ്ചുലക്ഷം രൂപ അധികം വേണ്ടിവന്നുവെന്ന് കരാറുകാരുടെ കണക്ക്. ചാനൽ പണിതുകഴിഞ്ഞാൽ അതിൽ ലിഫ്റ്റ് സ്ഥാപിക്കുന്നത് മറ്റൊരു കമ്പനിയാണ്. ഈ കമ്പനിയുടെ ആളുകൾ ലിഫ്റ്റ് ചാനലിന്‍റെ വീതിയും ആകൃതിയും പലതവണ മാറ്റിപ്പറഞ്ഞതാണ് പ്രശ്നമായതെന്നാണ് ജില്ലാ പഞ്ചായത്തിന്‍റെ എൻജിനിയർ പറയുന്നത്. സിവിൽ പ്രവൃത്തികളുടെ കരാർ ഒരാളിനും ലിഫ്റ്റ് സ്ഥാപിക്കാനുള്ള കരാർ മറ്റൊരു ഏജൻസിക്കും നല്കിയതാണ് പ്രശ്നമായതെന്നാണ് സൂചന. പക്ഷേ അതുമൂലം നഷ്ടമായത് ലക്ഷങ്ങളാണ്. പലതരം സാങ്കേതിക പ്രശ്നങ്ങളുടെ പേരിലാണ് പണി പൂർത്തിയായി വർഷങ്ങൾ കഴിഞ്ഞിട്ടും ജില്ലാ ആശുപത്രിയുടെ പുതിയ കെട്ടിടം ഉപയോഗപ്പെടുത്താൻ കഴിയാതിരുന്നത്. തൊട്ടടുത്തുള്ള സബ് ജയിൽ അധികൃതരുടെ തടസവാദമ്പെടെയുള്ള പ്രശ്നങ്ങൾ പരിഹരിച്ചു കഴിഞ്ഞപ്പോഴാണ് സുരക്ഷാ സംവിധാനങ്ങളും ലിഫ്റ്റമുൾപ്പെടെ സ്ഥാപിച്ച് കെട്ടിടം പ്രവർത്തനക്ഷമമാക്കാൻ വഴിയൊരുങ്ങിയത്. എന്നാൽ ഇപ്പോൾ ഈ പ്രവൃത്തികളും നീണ്ടുപോകുന്ന നിലയാണ്.

അവാർഡ് ജേതാവായ യുവകർഷകയുടെ നെൽവയലിൽ കനത്ത നാശം

കുണ്ടംകുഴി: ബേഡകം പഞ്ചായത്തിലെ കൊളത്തൂർ വയലിൽ വിളവെടുക്കാറായ നെൽകൃഷി കാട്ടുപന്നികൾ വ്യാപകമായി നശിപ്പിച്ചു. തൊട്ടുപിന്നാലെ കനത്ത മഴ കൂടി പെയ്തതോടെ പന്നികൾ ചവിട്ടിമെതിച്ച നെൽച്ചെടികളെല്ലാം ചെളിവെള്ളത്തിലമർന്നു. സംസ്ഥാന യുവകർഷക അവാർഡ് ജേതാവ് കൊളത്തൂർ നിടുവോട്ടെ എം. ശ്രീവിദ്യയുടെയും കുഞ്ഞമ്പുവിന്‍റെയും വയലുകളിലാണ് കനത്ത കൃഷിനാശം സംഭവിച്ചത്. കതിരുകൾ വിളഞ്ഞു തുടങ്ങിയതോടെ ദിവസങ്ങൾക്കകം കൊയ്ത്ത് നടത്താനുള്ള തയാറെടുപ്പിലായിരുന്നു കർഷകർ. ഇതിനിടയിലാണ് ചൊവ്വാഴ്ച രാത്രി കാട്ടുപന്നിക്കൂട്ടം വയലിലിറങ്ങിയത്. കനത്ത മഴയും ഉണ്ടായതോടെ പന്നിക്കൂട്ടമെത്തിയത് കർഷകർക്ക് പെട്ടെന്നറിയാൻ കഴിഞ്ഞില്ല. നേരം പുലർന്നപ്പോഴേക്കും കതിരണിഞ്ഞ നെൽച്ചെടികളിൽ നല്ലൊരു പങ്കും ചെളിവെള്ളത്തിലമർന്നിരുന്നു. മയിലുകളുടെ ശല്യംകൂടി അതിജീവിച്ചാണ് ഇത്രയുമെങ്കിലും നെൽകൃഷി വിളവെടുക്കാൻ പാകത്തിലെത്തിച്ചതെന്ന് കർഷകർ പറയുന്നു. ഒറ്റ രാത്രി കൊണ്ട് അതിൽ വലിയൊരു ഭാഗവും നശിച്ച നിലയിലാണ്. ബേഡകം കൃഷി ഓഫീസർ ലിൻഡ ഐസക്കിന്‍റെ നേതൃത്വത്തിൽ കൃഷിവകുപ്പ് ഉദ്യോഗസ്ഥർ സ്ഥലം സന്ദർശിച്ച് നാശനഷ്ടങ്ങൾ വിലയിരുത്തി.

സ്വകാര്യഭൂമി കൈയേറി ഖനനം നടത്തിയതായി പരാതി

പാണത്തൂർ: സ്ഥലമുടമയുടെ അറിവോ അനുമതിയോ ഇല്ലാതെ ക്രഷർ കമ്പനി സ്വകാര്യ ഭൂമി കൈയേറി ഖനനം നടത്തിയതായി പരാതി. പാണത്തൂരിലെ കളരിക്കൽ കെ.ജെ. ജോണിയാണ് വെള്ളരിക്കുണ്ട് പോലീസിൽ പരാതി നൽകിയത്. ബളാൽ മുത്തപ്പൻമലയിലെ സർവേ നമ്പർ 113 ൽ ഉൾപ്പെട്ട ഒന്നര ഏക്കർ സ്ഥലമാണ് ക്രഷർ കമ്പനി കൈയേറിയതായി പറയുന്നത്. വില്ലേജ് അധികൃതർ സ്റ്റോപ്പ് മെമ്മോ നൽകിയിട്ടു പോലും വകവയ്ക്കാതെ ഖനനം നടത്തുകയായിരുന്നുവെന്ന് പരാതിയിൽ പറയുന്നു. ഇതുമൂലം തന്‍റെ 25 സെന്‍റ് സ്ഥലവും കായ്ഫലമുള്ള നൂറോളം കമുകുകളും അഞ്ച് തെങ്ങുകളും ഇതിനകം നശിച്ചിട്ടുണ്ട്. അനധികൃത ഖനനം മൂലം കൃഷിസ്ഥലം നശിക്കുകയും തന്‍റെ ഭൂമിയിലെ കരിങ്കല്ലുകൾ കടത്തിക്കൊണ്ടുപോവുകയും ചെയ്തതുമായി ബന്ധപ്പെട്ട് 10 ലക്ഷത്തോളം രൂപയുടെയും കമുകുകളും തെങ്ങുകളും നശിപ്പിച്ച വകയിൽ അഞ്ച് ലക്ഷം രൂപയുടെയും നഷ്ടമുണ്ടായതായി ജോണിയുടെ പരാതിയിൽ പറയുന്നു.

പരമ്പര വിദ്യാപീഠം പുരസ്കാരം ടിവിജിക്കും ശിവമണിക്കും ശിവശ്രീക്കും

പെരിയ: ഗോകുലം ഗോശാലയിലെ ദീപാവലി സംഗീതോത്സവത്തിന്‍റെ ഭാഗമായി പരമ്പര വിദ്യാപീഠത്തിന്‍റെ ആഭിമുഖ്യത്തിൽ നൽകുന്ന ഈ വർഷത്തെ കലാപുരസ്കാരങ്ങൾ പ്രഖ്യാപിച്ചു. മുതിർന്ന സംഗീതജ്ഞനും വയലിൻ-മൃദംഗ വിദ്വാനുമായ ടിവിജി എന്നറിയപ്പെടുന്ന ടി.വി. ഗോപാലകൃഷ്ണന് പരമ്പര വിഭൂഷൺ പുരസ്കാരവും ഡ്രം മാന്ത്രികൻ ശിവമണിക്ക് പരമ്പര ശ്രീ പുരസ്കാരവും വീണ വിദ്വാൻ തൃശൂർ അനന്ത പദ്മനാഭന് ഗുരുരത്ന പുരസ്കാരവും നൽകും. യുവ സംഗീതജ്ഞ ശിവശ്രീ സ്കന്ദപ്രസാദിനാണ് യുവ പ്രതിഭ പുരസ്കാരം. മാൻഡലിനിൽ അദ്ഭുതം തീർക്കുന്ന സിംഗപ്പൂരിൽ നിന്നുള്ള രാഘവ് കൃഷ്ണയ്ക്കാണ് ബാലപ്രതിഭ പുരസ്കാരം. കാഷ് അവാർഡും താമ്ര ഫലകവും അടങ്ങുന്ന പുരസ്കാരം നവംബർ ഒന്നിന് പുരസ്കാരങ്ങൾ സമ്മാനിക്കും.

കായികപാരമ്പര്യത്തിന്‍റെ കരുത്തില്‍ ക്രിസ്റ്റോ തോമസ്

നീലേശ്വരം: വൈകുന്നേരം ട്രാക്കില്‍ ജൂണിയര്‍ വിഭാഗം ആണ്‍കുട്ടികളുടെ 800 മീറ്റര്‍ ഓട്ടമത്സരത്തിന്‍റെ ഫൈനലില്‍ ഇഞ്ചോടിഞ്ച് പോരാട്ടം നടക്കുന്നു. പിന്നിലായിപ്പോയ മകന് സുവര്‍ണ കുതിപ്പിന് ആവേശം പകരാനായി ട്രാക്കിനു വെളിയിലെ സ്റ്റേഡിയത്തിലൂടെ കൂടെയോടുന്ന പിതാവിനെ കണ്ട് കാണികളും ആവേശത്തിലായി. മത്സരം ഫിനിഷിംഗ് പോയിന്‍റിലെത്താന്‍ 100 മീറ്റര്‍ ദൂരം മാത്രം ബാക്കിയുള്ളപ്പോള്‍ വെള്ള നിറത്തിലുള്ള ഖദര്‍ ഷര്‍ട്ടും മുണ്ടും ധരിച്ച് കൈയിലുള്ള ജഴ്‌സി ആഞ്ഞുവീശി ആര്‍പ്പുവിളികളോടെ മകനൊപ്പം തോമസ് സെബാസ്റ്റ്യന്‍ ഓടിയപ്പോള്‍ മിന്നല്‍വേഗത്തില്‍ കുതിച്ച മകന്‍ ക്രിസ്റ്റോ തോമസ് തന്‍റെ രണ്ടാമത്തെ സ്വര്‍ണമെഡലാണ് കരസ്ഥമാക്കിയത്. മേളയിലെ ആദ്യയിനമായ 1500 മീറ്റര്‍ ഓട്ടത്തിലും ക്രിസ്‌റ്റോ സ്വര്‍ണമണിഞ്ഞു. കായികതാരങ്ങളായ മാതാപിതാക്കളുടെ പാരമ്പര്യം കരുത്താക്കിയാണ് തന്‍റെ ആദ്യ ജില്ലാകായികമേളയില്‍ തന്നെ ചട്ടഞ്ചാല്‍ സിഎച്ച്എസ്എസിലെ ഈ പത്താംക്ലാസ് വിദ്യാര്‍ഥി ഇരട്ടസ്വര്‍ണമണിഞ്ഞത്. പിതാവ് പൊയിനാച്ചി മയിലാട്ടിയിലെ ചേന്നാട്ട് തോമസ് സെബാസ്റ്റ്യന്‍ സ്‌കൂള്‍-കോളജ് കാലഘട്ടത്തില്‍ സംസ്ഥാനതലത്തില്‍ നിരവധി മെഡലുകള്‍ കരസ്ഥമാക്കിയിരുന്നു. 1989ലെ സംസ്ഥാനതല ഗ്രാമീണ കായികമേളയില്‍ 400, 800 മീറ്റര്‍ ഓട്ടത്തില്‍ സ്വര്‍ണമെഡലുകള്‍ കരസ്ഥമാക്കി. 1991ലെ കാലിക്കറ്റ് സര്‍വകലാശാല അത്‌ലറ്റിക് മീറ്റില്‍ 800, 1500 മീറ്റര്‍ ഓട്ടത്തില്‍ വെങ്കല മെഡലുകള്‍ കരസ്ഥമാക്കി. ബന്തടുക്ക ഗവ.സ്‌കൂളില്‍ പഠിക്കവെ ജില്ലാതലത്തില്‍ ചാമ്പ്യന്മാരായ ഹോക്കി ടീമിന്‍റെ ക്യാപ്റ്റനുമായിരുന്നു. നീന്തലില്‍ 100 മീറ്റര്‍ ഫ്രീസ്‌റ്റൈലില്‍ വെള്ളിയും കരസ്ഥമാക്കി. നിലവില്‍ ഐഎന്‍ടിയുസി ജില്ലാ ജനറല്‍ സെക്രട്ടറിയും സംസ്ഥാന കമ്മിറ്റിയംഗവും കള്ളുചെത്ത് തൊഴിലാളി ക്ഷേമനിധി ബോര്‍ഡ് മെംബറുമാണ് തോമസ് സെബാസ്റ്റ്യന്‍. അമ്മ സീമ മൈക്കിള്‍ മുന്‍ വോളിബോള്‍ താരവും നിലവില്‍ ബെദിര പിടിഎം എയുപി സ്‌കൂള്‍ അധ്യാപികയുമാണ്. ആദ്യദിനം അഞ്ചു റിക്കാര്‍ഡുകള്‍ മേളയുടെ ആദ്യ ദിനം അഞ്ചു മീറ്റ് റിക്കാര്‍ഡുകള്‍. ജൂണിയര്‍ വിഭാഗം ആണ്‍കുട്ടികളുടെ ലോംഗ്ജംപില്‍ കാഞ്ഞങ്ങാട് ദുര്‍ഗ എച്ച്എസ്എസിലെ ശ്രീരാഗ് കൃഷ്ണന്‍ 6.49 മീറ്റര്‍ ദൂരം താണ്ടിയാണ് റിക്കാര്‍ഡിട്ടത്. ആറു മീറ്റര്‍ ദൂരം എന്ന റിക്കാര്‍ഡാണ് ശ്രീരാഗ് തകര്‍ത്തത്. ജൂണിയര്‍ പെണ്‍കുട്ടികളുടെ ലോംഗ്ജംപിലും പുതിയ റിക്കാര്‍ഡ് പിറന്നു. പുല്ലൂര്‍ ഉദയനഗര്‍ എച്ച്എസിലെ ജി.എസ്. അമേയ 1.38 മീറ്റര്‍ ഉയരം താണ്ടിയാണ് റിക്കാര്‍ഡിട്ടത്. 1.37 എന്ന റിക്കാര്‍ഡാണ് അമേയ പഴങ്കഥയാക്കിയത്. സബ്ജൂണിയര്‍ ആണ്‍കുട്ടികളുടെ 600 മീറ്റര്‍ ഓട്ടത്തില്‍ മഞ്ചേശ്വരം എസ്എടിഎച്ച്എസിലെ പ്രഥ്വിന്‍ പ്രഭു 1.40.57 മിനുട്ട് കൊണ്ട് ഓടിയെത്തി. 1.41.81 എന്ന റിക്കാര്‍ഡാണ് തകര്‍ന്നത്. സബ്ജൂണിയര്‍ പെണ്‍കുട്ടികളുടെ ഹൈജംപില്‍ ചെര്‍ക്കള സെന്‍ട്രല്‍ ജിഎച്ച്എസ്എസിലെ കെ.ടി.അസ്ഹ ഷാ 1.35 മീറ്റര്‍ ഉയരം താണ്ടി പുതിയ റിക്കാര്‍ഡിട്ടു. 1.31 മീറ്റര്‍ എന്ന റിക്കാര്‍ഡാണ് പഴങ്കഥയായത്. സീനിയര്‍ ആണ്‍കുട്ടികളുടെ ഹൈജംപില്‍ പൈവളിഗെ നഗര്‍ ജിഎച്ച്എസ്എസിലെ സയ്യിദ് മുഹമ്മദ് സെയ്ദ് തങ്ങള്‍ 1.38 ഉയരം താണ്ടി റിക്കാര്‍ഡിട്ടു. 1.37 മീറ്റര്‍ എന്ന റിക്കാര്‍ഡാണ് തകര്‍ന്നത്.

കൗമാര കായികകുതിപ്പിന് തുടക്കം; ഹൊസ്ദുര്‍ഗും ദുര്‍ഗയും മുന്നില്‍

സ്വന്തം ലേഖകൻ നീലേശ്വരം: റവന്യു ജില്ലാ സ്‌കൂള്‍ കായികമേളയ്ക്ക് ബാനം ജിഎച്ച്എസിന്‍റെ ആതിഥേയത്വത്തില്‍ നീലേശ്വരം ഇഎംഎസ് സ്റ്റേഡിയത്തില്‍ തുടക്കമായി. ഒന്നാം ദിവസത്തെ മത്സരങ്ങള്‍ അവസാനിക്കുമ്പോള്‍ 15 സ്വര്‍ണവും എട്ടു വെള്ളിയും ഏഴു വെങ്കലവുമായി 124 പോയിന്‍റോടെ ഹൊസ്ദുര്‍ഗ് ഉപജില്ല ഒന്നാം സ്ഥാനത്തെത്തി. 10 വീതം സ്വര്‍ണവും വെള്ളിയും 12 വെങ്കലവും നേടി 99 പോയിന്‍റോടെ കാസര്‍ഗോഡ് ഉപജില്ലയാണ് രണ്ടാംസ്ഥാനത്തത്. ആറു സ്വര്‍ണവും ഏഴു വെള്ളിയും എട്ടു വെങ്കലവുമായി 70 പോയിന്‍റോടെ ചെറുവത്തൂര്‍ മുന്നാംസ്ഥാനത്തുണ്ട്. രണ്ടു സ്വര്‍ണം, ഏഴു വെള്ളി, നാലു വെങ്കലം എന്നിവയടക്കം 51 പോയിന്‍റാണ് നാലാംസ്ഥാനത്തുള്ള ചിറ്റാരിക്കാല്‍ ഉപജില്ലയുടെ സമ്പാദ്യം. സ്‌കൂളുകളില്‍ 56 പോയിന്‍റുമായി കാഞ്ഞങ്ങാട് ദുര്‍ഗ സ്‌കൂള്‍ എതിരാളികളേക്കാള്‍ ബഹുദൂരം മുന്നിലാണ്. ഒമ്പതു സ്വര്‍ണവും മൂന്നു വെള്ളിയും രണ്ടു വെങ്കലവുമാണ് ദുര്‍ഗയുടെ സമ്പാദ്യം. മൂന്നു സ്വര്‍ണവും ഒരു വെള്ളിയുമായി 18 പോയിന്‍റോടെ കുട്ടമത്ത് ജിഎച്ച്എസ്എസ് രണ്ടാംസ്ഥാനത്തുണ്ട്. രണ്ടു സ്വര്‍ണവും ഒരു വെള്ളിയും അടക്കം 13 പോയിന്‍റുകളോടെ കൊളത്തൂര്‍ ജിഎച്ച്എസ്, ചെമ്മനാട് സിജെഎച്ച്എസ്എസ്, ചട്ടഞ്ചാല്‍ സിഎച്ച്എസ്എസ് എന്നിവര്‍ മൂന്നാംസ്ഥാനത്തുണ്ട്. ഇ. ചന്ദ്രശേഖരന്‍ എംഎല്‍എ കായികമേള ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷതവഹിച്ചു. നഗരസഭ വൈസ്‌ചെയര്‍മാന്‍ പി.പി. മുഹമ്മദ് റാഫി മുഖ്യാതിഥിയായി. കോടോം-ബേളൂര്‍ പഞ്ചായത്ത് സ്ഥിരംസമിതി അധ്യക്ഷന്‍ പി. ഗോപാലകൃഷ്ണന്‍, വി.എസ്. ബിജുരാജ്, ടി. പ്രകാശന്‍, കെ. സുരേന്ദ്രന്‍, പി. രാജീവന്‍, പി. ദിവാകരന്‍, കെ.കെ. കുഞ്ഞിരാമന്‍, ഡിഡിഇ പി. സവിത, ബാനം ജിഎച്ച്എസ് മുഖ്യാധ്യാപിക സി. കോമളവല്ലി എന്നിവര്‍ പ്രസംഗിച്ചു. ഇവര്‍ വേഗതാരങ്ങള്‍ 100 മീറ്റര്‍ ഓട്ടമത്സരത്തിലെ സുവര്‍ണതാരങ്ങള്‍ സബ്ജൂണിയര്‍-സി.സൂരജ് (വെള്ളച്ചാല്‍ ജിഎംആര്‍എസ്), ശ്രീനിധി ആര്‍.നായര്‍ (കൊളത്തൂര്‍ ജിഎച്ച്എസ്) ജൂണിയര്‍-ഇബ്രാഹിം അഫ്‌നാസ് (പൈവളിഗെ നഗര്‍ ജിഎച്ച്എസ്എസ്), ആയിഷത്ത് സഹല (മഞ്ചേശ്വരം അല്‍സഖാഫ് ഇഎംഎസ്) സീനിയര്‍-അബ്ദുള്‍ ഖാദര്‍ അസ്‌നാന്‍ (എടനീര്‍ സ്വാമിജീസ് എച്ച്എസ്എസ്), എസ്.കെ.ശ്രീലക്ഷ്മി (കാഞ്ഞങ്ങാട് ദുര്‍ഗ എച്ച്എസ്എസ്)

വിദ്യാർഥികളെ അനുമോദിച്ചു

വെള്ളരിക്കുണ്ട്: ചിറ്റാരിക്കാൽ ഉപജില്ല സ്കൂൾ കായികമേളയിൽ ഹൈസ്കൂൾ, ഹയർ സെക്കൻഡറി വിഭാഗങ്ങളിൽ മികച്ച നേട്ടങ്ങൾ കൈവരിച്ച സെന്‍റ് ജൂഡ്സ് ഹയർ സെക്കൻഡറി സ്കൂളിലെ വിദ്യാർഥികളെ സ്കൂൾ മാനേജ്മെന്‍റിന്‍റെയും പിടിഎയുടെയും നേതൃത്വത്തിൽ അനുമോദിച്ചു. സ്കൂൾ മാനേജർ റവ.ഡോ. ജോൺസൺ അന്ത്യംകുളം ഉദ്ഘാടനം ചെയ്തു. പിടിഎ പ്രസിഡന്‍റ് പി.സി. ബിനോയ് അധ്യക്ഷത വഹിച്ചു. വെള്ളരിക്കുണ്ട് എഎസ്ഐ സി.കെ. സരിത, മുഖ്യാധ്യാപകൻ എം.യു. ജോസുകുട്ടി എന്നിവർ പ്രസംഗിച്ചു.

വെള്ളരിക്കുണ്ട് ബസ്‌സ്റ്റാൻഡ് ഷോപ്പിംഗ് കോംപ്ലക്സിന്‍റെ ശിലാസ്ഥാപനം നടത്തി

വെള്ളരിക്കുണ്ട്: ബളാൽ പഞ്ചായത്തിന്‍റെ ആഭിമുഖ്യത്തിൽ രണ്ടു കോടി രൂപ ചെലവിൽ വെള്ളരിക്കുണ്ടിൽ നിർമിക്കുന്ന ആധുനിക ബസ്‌സ്റ്റാൻഡ് കം ഷോപ്പിംഗ് കോപ്ലക്സിന്‍റെ ശിലാസ്ഥാപനം പ്രതിപക്ഷനേതാവ് വി.ഡി. സതീശൻ നിർവഹിച്ചു. തദ്ദേശസ്വയംഭരണ സ്ഥാപനങ്ങൾ സാമ്പത്തിക പ്രതിസന്ധിയിലൂടെ കടന്നുപോകുന്ന കാലത്തും വികസനപദ്ധതികൾക്കായി പണം കണ്ടെത്താൻ കഴിഞ്ഞ പഞ്ചായത്ത് ഭരണസമിതിയുടെ നിശ്ചയദാർഢ്യത്തെ അദ്ദേഹം അഭിനന്ദിച്ചു. പഞ്ചായത്ത് പ്രസിഡന്‍റ് രാജു കട്ടക്കയം അധ്യക്ഷത വഹിച്ചു. രാജ്മോഹൻ ഉണ്ണി ത്താൻ എംപി മുഖ്യാതിഥിയായിരുന്നു. ജില്ലാ പഞ്ചായത്ത് അംഗം ജോമോൻ ജോസ്, വെള്ളരിക്കുണ്ട് ചെറുപുഷ്പം ഫൊറോന വികാരി റവ.ഡോ. ജോൺസൺ അന്ത്യാംകുളം, ബ്ലോക്ക് പഞ്ചായത്ത് അംഗങ്ങളായ ഷോബി ജോസഫ്, സി. രേഖ, പഞ്ചായത്ത് വൈസ് പ്രസിഡന്‍റ് എം.രാധാമണി, അംഗങ്ങളായ അലക്സ് നെടിയകാല, ടി. അബ്ദുൾ ഖാദർ, മോൻസി ജോയ്, കെ.ആർ.വിനു, പഞ്ചായത്ത് ജോയിന്‍റ് ഡയറക്ടർ ആർ.ഷൈനി, ഹരീഷ് പി.നായർ, എം.പി. ജോസഫ്, അബ്ദുൾ ഗഫൂർ, പ്രിൻസ് ജോസഫ്, കെ. സതീശൻ, വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്‍റ് തോമസ് ചെറിയാൻ, വെള്ളരിക്കുണ്ട് വികസന സമിതി പ്രതിനിധി ബാബു കോഹിനൂർ എന്നിവർ പ്രസംഗിച്ചു.

ജില്ലാ സ്‌കൂള്‍ കായികമേളയ്ക്ക് ഇന്നു തുടക്കം

നീലേശ്വരം: റവന്യു ജില്ലാ സ്‌കൂള്‍ കായികമേളക്ക് ഇന്നു നീലേശ്വരം ഇഎംഎസ് സ്റ്റേഡിയത്തില്‍ തുടക്കമാവും. മൂന്നുദിവസങ്ങളിലായി നടക്കുന്ന മേളയില്‍ ഏഴ് ഉപജില്ലകളില്‍ നിന്നായി 98 ഇനങ്ങളില്‍ 1600 ഓളം കായികതാരങ്ങള്‍ മാറ്റുരയ്ക്കും. ബാനം ഗവ. ഹൈസ്‌കൂളാണ് ആതിഥേയത്വം വഹിക്കുന്നത്. രാവിലെ എട്ടിന് രജിസ്‌ട്രേഷന്‍ ആരംഭിച്ച് 8.30നു സീനിയര്‍ ബോയ്സിന്‍റെ 1500 മീറ്റര്‍ ഓട്ടത്തോടെ മത്സരങ്ങൾ ആരംഭിക്കും. 9.30ന് ഇ. ചന്ദ്രശേഖരന്‍ എംഎല്‍എ മേള ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷത വഹിക്കും. പങ്കെടുക്കുന്ന മുഴുവന്‍ കായികപ്രതിഭകള്‍ക്കും സംഘാടകര്‍ ഉച്ചഭക്ഷണം നല്‍കും. പത്രസമ്മേളനത്തില്‍ സംഘാടകസമിതി വൈസ് ചെയര്‍മാന്‍ പി.പി. മുഹമ്മദ് റാഫി, പരപ്പ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ. ഭൂപേഷ്, ബാനം കൃഷ്ണന്‍, മുഖ്യാധ്യാപിക സി. കോമളവല്ലി, പി. ഗോപാലകൃഷ്ണന്‍, പി. രാജീവന്‍, പി.കെ. ബാലചന്ദ്രന്‍, ടി.ആര്‍. പ്രീതിമോള്‍, ടി. മോഹനന്‍, ടി.കെ. റഹ്‌മത്ത് എന്നിവര്‍ പങ്കെടുത്തു. റവന്യൂ ജില്ലാ സ്‌കൂള്‍ കായികമേളയുടെ ദീപശിഖ പ്രയാണം നടത്തി. കഴിഞ്ഞവര്‍ഷത്തെ ആതിഥേയരായ ചായ്യോത്ത് ജിഎച്ച്എസ്എസില്‍ നിന്നും ദീപശിഖ ജില്ലാ പഞ്ചായത്ത് സ്ഥിരംസമിതി അധ്യക്ഷ കെ. ശകുന്തള ബാനം സ്‌കൂള്‍ അധികൃതരെ ഏല്‍പ്പിച്ചു. തുടര്‍ന്ന് കൂവാറ്റി, കാലിച്ചാനടുക്കം, ഇടത്തോട്, പരപ്പ തുടങ്ങിയ വിദ്യാലയങ്ങളിലെ സ്വീകരണത്തിനു ശേഷം ബാനം ഗവ. ഹൈസ്‌കൂളില്‍ എത്തിച്ചു. തുടര്‍ന്ന് നടന്ന ചടങ്ങില്‍ ദേശീയ വടംവലി താരം പി. അഭിനി ദീപശിഖ കായികതാരങ്ങള്‍ക്ക് കൈമാറി. വിവിധ സ്വീകരണ കേന്ദ്രങ്ങളില്‍ പരപ്പ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ. ഭൂപേഷ്, കോടോം ബേളൂര്‍ പഞ്ചായത്ത് സ്ഥിരംസമിതി അധ്യക്ഷന്‍ പി. ഗോപാലകൃഷ്ണന്‍, കിനാനൂര്‍- കരിന്തളം പഞ്ചായത്ത് സ്ഥിരംസമിതി അധ്യക്ഷ ഷൈജമ്മ ബെന്നി, വെള്ളരിക്കുണ്ട് താലൂക്ക് ലൈബ്രറി കൗണ്‍സില്‍ പ്രസിഡന്‍റ് എ.ആര്‍. വിജയകുമാര്‍, ബാനം കൃഷ്ണന്‍, പി. രാജീവന്‍, അജിത മോഹന്‍, സി. കോമളവല്ലി, പി.കെ. ബാലചന്ദ്രന്‍, അനൂപ് പെരിയല്‍, പ്രവീണ്‍ പൂങ്ങോട് എന്നിവര്‍ പ്രസംഗിച്ചു. ഇഎംഎസ് സ്റ്റേഡിയത്തില്‍ പി.പി.ബാബുരാജ്, നികേഷ് കുമാര്‍ മാടായി, കെ.അരുണ്‍കുമാര്‍ എന്നിവര്‍ ദീപശിഖയെ സ്വീകരിച്ചു.

മുള്ളൻപന്നി വന്നിടിച്ച് ബൈക്ക് മറിഞ്ഞു; കെഎസ്ആർടിസി ഡ്രൈവർക്ക് പരിക്ക്

കുന്നുംകൈ: മുള്ളൻപന്നി വന്നിടിച്ചതിനെ തുടർന്ന് ബൈക്ക് മറിഞ്ഞ് കെഎസ്ആർടിസി ഡ്രൈവർക്ക് ഗുരുതരമായി പരിക്കേറ്റു. കാഞ്ഞങ്ങാട് ഡിപ്പോയിലെ ഡ്രൈവറായ കുന്നുംകൈയിലെ സി.കെ. ബിജു(48) വിനാണ് പരിക്കേറ്റത്. ഇന്നലെ രാവിലെ ഡ്യൂട്ടിക്ക് പോകുമ്പോൾ പരപ്പച്ചാൽ ആശുപത്രിക്ക് സമീപമായിരുന്നു സംഭവം. വീഴ്ചയിൽ തോളെല്ല് പൊട്ടിയ നിലയിലാണ്. കാഞ്ഞങ്ങാട് ജില്ലാ ആശുപത്രിയിൽ പ്രവേശിപ്പിച്ച ബിജുവിനെ പിന്നീട് വിദഗ്ധ ചികിത്സയ്ക്കായി മംഗളൂരുവിലേക്ക് മാറ്റി. വനം വകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. ദിവസങ്ങൾക്കു മുമ്പ് കെഎസ്ആർടിസി ടൗൺ ടു ടൗൺ ബസിൽ കുഴഞ്ഞുവീണ യാത്രക്കാരനെ ഉടനടി പരിയാരത്തെ കണ്ണൂർ ഗവ. മെഡിക്കൽ കോളജ് ആശുപത്രിയിലെത്തിച്ച് അടിയന്തിര വൈദ്യസഹായം ലഭ്യമാക്കിയതുമായി ബന്ധപ്പെട്ട് ബിജുവിനും കണ്ടക്ടർ സി. രാജ്മോഹനും ഏറെ പ്രശംസയും അഭിനന്ദനവും ലഭിച്ചിരുന്നു. കാട്ടുപന്നിയും മുള്ളൻപന്നിയും വാഹനങ്ങൾക്ക് കുറുകെ ചാടുന്നതുമൂലമുള്ള അപകടങ്ങൾ ജില്ലയിൽ പതിവാകുകയാണ്. ഇരുചക്രവാഹനങ്ങൾക്ക് കുറുകേ പന്നി ചാടിയതുമൂലമുണ്ടായ അപകടങ്ങളിൽ മാലോത്തും കാറഡുക്ക കർമംതൊടിയിലുമായി രണ്ട് മരണങ്ങൾ സംഭവിച്ചിട്ടുണ്ട്. ഗുരുതരമായി പരിക്കേറ്റ നിരവധി പേർ ഇപ്പോഴും ചികിത്സയിൽ കഴിയുകയാണ്.

കർഷകസ്വരാജ് സത്യഗ്രഹത്തിന് അഭിവാദ്യമർപ്പിച്ച് പ്രതിപക്ഷ നേതാവ്

വെള്ളരിക്കുണ്ട്: വെള്ളരിക്കുണ്ടിൽ നടക്കുന്ന കർഷകസ്വരാജ് സത്യഗ്രഹ പന്തലിലെത്തി അഭിവാദ്യമർപ്പിച്ച് പ്രതിപക്ഷ നേതാവ് വി.ഡി. സതീശൻ. വന്യമൃഗശല്യം നേരിടാൻ ആധുനികവും പരസരാഗതവുമായ മാർഗങ്ങൾ ഒരുപോലെ അവലംബിക്കേണ്ടതുണ്ടെന്ന് അദ്ദേഹം പറഞ്ഞു. എന്നാൽ ഇന്ന് ഇതൊന്നും നടക്കുന്നില്ല. നിയമസഭയിൽ കഴിഞ്ഞ അഞ്ചു വർഷത്തിനിടയിൽ പ്രതിപക്ഷം ഏറ്റവുമധികം തവണ ഉന്നയിച്ച വിഷയങ്ങളിലൊന്നാണ് ഇത്. ഈ പ്രശ്നത്തിന് സുസ്ഥിരമായ പരിഹാരം കാണാതെ കേരളത്തിന് മുന്നോട്ടു പോകാനാവില്ലെന്നും അദ്ദേഹം പറഞ്ഞു. പ്രതിപക്ഷ നേതാവിനെ ജിമ്മി ഇടപ്പാടി ഷാൾ അണിയിച്ചു. രാജ്മോഹൻ ഉണ്ണിത്താൻ എംപി, ബളാൽ പഞ്ചായത്ത് പ്രസിഡന്‍റ് രാജു കട്ടക്കയം, ജില്ലാ പഞ്ചായത്തംഗം ജോമോൻ ജോസ്, ബ്ലോക്ക് പഞ്ചായത്തംഗം ഷോബി ജോസഫ്, പി.ജി. ദേവ്, ഫൊറോനാ വികാരി റവ.ഡോ. ജോൺസൺ അന്ത്യാകുളം എന്നിവരും പങ്കെടുത്തു.

പഞ്ചായത്തുകളിലെ സംവരണ വാർഡുകളുടെ പട്ടിക പൂര്‍ത്തിയായി

കാസർഗോഡ്: തദ്ദേശസ്വയംഭരണ സ്ഥാപനങ്ങളിലേക്കുള്ള പൊതു തെരഞ്ഞെടുപ്പിന് മുന്നോടിയായി ജില്ലയിലെ ഗ്രാമ പഞ്ചായത്തുകളിലെ സംവരണ വാര്‍ഡുകളുടെ നറുക്കെടുപ്പ് പൂര്‍ത്തിയായി. പരപ്പ, നീലേശ്വരം, കാസര്‍ഗോഡ് ബ്ലോക്ക് പഞ്ചായത്തുകളുടെ പരിധിയിലെ ഗ്രാമപഞ്ചായത്തുകളിലെ സംവരണ വാർഡുകളുടെ നറുക്കെടുപ്പാണ് ഇന്നലെ നടന്നത്. കാഞ്ഞങ്ങാട്, കാറഡുക്ക, മഞ്ചേശ്വരം ബ്ലോക്കുകളുടെ പരിധിയിലെ പഞ്ചായത്തുകളിലെ സംവരണ വാർഡുകളുടെ നറുക്കെടുപ്പ് തിങ്കളാഴ്ച നടന്നിരുന്നു. കളക്ടറേറ്റ് മിനി കോണ്‍ഫറന്‍സ് ഹാളില്‍ നടന്ന നറുക്കെടുപ്പിന് ജില്ലാ കളക്ടര്‍ കെ. ഇമ്പശേഖർ നേതൃത്വം നല്‍കി. തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടര്‍ ആര്‍. ഷൈനി, ഡെപ്യൂട്ടി ഡയറക്ടര്‍ കെ.വി. ഹരിദാസ്, ഇലക്ഷന്‍ ഡെപ്യൂട്ടി കളക്ടര്‍ എ.എന്‍. ഗോപകുമാര്‍, ഡിഎല്‍ആര്‍ജി ട്രെയിനര്‍മാരായ എല്‍.കെ. സുബൈര്‍, സി.വി. ജീവന്‍, കെ.വി. ബിജു എന്നിവരും വിവിധ തദ്ദേശ സ്വയംഭരണ സ്ഥാപനങ്ങളിലെ സെക്രട്ടറിമാരും രാഷ്ട്രീയകക്ഷി പ്രതിനിധികളും പങ്കെടുത്തു. വിവിധ പഞ്ചായത്തുകളിലെ സംവരണ വാർഡുകളുടെ പട്ടിക ഇനി പറയുംപ്രകാരമാണ്. ഈസ്റ്റ് എളേരി പട്ടികവര്‍ഗ സ്ത്രീ സംവരണം: അരിമ്പ (13). പട്ടികവര്‍ഗ സംവരണം: പൊങ്കല്‍ (12). സ്ത്രീ സംവരണ വാര്‍ഡുകൾ: ചിറ്റാരിക്കല്‍ ടൗണ്‍ (രണ്ട്), ചിറ്റാരിക്കല്‍ സൗത്ത് (മൂന്ന്), പള്ളിക്കുന്ന് (നാല്). തയ്യേനി (ആറ്), ഓടക്കൊല്ലി (എട്ട്), മുനയംകുന്ന്(11), കമ്പല്ലൂര്‍ (16), കാര (18). ബളാല്‍ പട്ടികവര്‍ഗ സ്ത്രീ സംവരണം: പുഞ്ച (ഏഴ്), കനകപ്പള്ളി (17). പട്ടികവര്‍ഗ സംവരണം: മരുതുംകുളം (നാല്), കൊന്നക്കാട് (ഒന്പത്). സ്ത്രീ സംവരണം: എടത്തോട് (ഒന്ന്), അത്തിക്കടവ് (രണ്ട്), ചുള്ളി (അഞ്ച്), ദര്‍ഘാസ് (ആറ്), മൈക്കയം (എട്ട്), മാലോം (11), കല്ലഞ്ചിറ (16). വെസ്റ്റ് എളേരി പട്ടികവര്‍ഗ സ്ത്രീ സംവരണം: കോട്ടമല (12), കമ്മാടം (16). പട്ടികവര്‍ഗ സംവരണം: ചെന്നടുക്കം (മൂന്ന്). സ്ത്രീ സംവരണം: പരപ്പച്ചാല്‍ (ഒന്ന്), ഭീമനടി (രണ്ട്), ചീര്‍ക്കയം (ഏഴ്), നാട്ടക്കല്‍ (എട്ട്), കരുവങ്കയം (ഒന്പത്), പറമ്പ (10), ചട്ടമല (11), പെരുമ്പട്ട (18). കിനാനൂര്‍-കരിന്തളം പട്ടികവര്‍ഗ സ്ത്രീ സംവരണം: പരപ്പ (എട്ട്). പട്ടികവര്‍ഗ സംവരണം: ചായ്യോത്ത് (ഒന്ന്). സ്ത്രീ സംവരണം: നെല്ലിയടുക്കം (മൂന്ന്), കാറളം (അഞ്ച്), കമ്മാടം (ഏഴ്), പെരിയങ്ങാനം (12), കുമ്പളപ്പള്ളി (13), കാലിച്ചാമരം (14), പുലിയന്നൂര്‍ (15), കൊല്ലംപാറ (17), കണിയാട (19) കോടോം-ബേളൂര്‍ പട്ടികവര്‍ഗ സ്ത്രീ സംവരണം: ബാനം (ഒന്പത്), ലാലൂര്‍ (19). പട്ടികവര്‍ഗ സംവരണം: അയറോട്ട് (3), അയ്യങ്കാവ് (16). സ്ത്രീ സംവരണം: എരുമക്കുളം (ഒന്ന്), ചുള്ളിക്കര (നാല്), ബേളൂര്‍ (ആറ്), എണ്ണപ്പാറ (ഏഴ്), അട്ടക്കണ്ടം (എട്ട്), ആലത്തടി (13), തായന്നൂര്‍ (14), പേരിയ (15), ആനക്കല്ല് (18). കള്ളാര്‍ പട്ടികവര്‍ഗ സ്ത്രീ സംവരണം: ആടകം (രണ്ട്), കൊട്ടോടി (14). പട്ടികവര്‍ഗ സംവരണം: കുടുംബൂര്‍ (ഒന്ന്). സ്ത്രീ സംവരണം: ചേടിക്കുണ്ട് (മൂന്ന്), മാലക്കല്ല് (ആറ്), കള്ളാര്‍ (എട്ട്), ചേറ്റുകല്ല് (12), പൂടംകല്ല് (13), മഞ്ഞങ്ങാനം (15). പനത്തടി പട്ടികവര്‍ഗ സ്ത്രീ സംവരണം: ചെറുപനത്തടി (15). പട്ടികവര്‍ഗ സംവരണം: പനത്തടി (14). സ്ത്രീ സംവരണം: പട്ടുവം (അഞ്ച്), പരിയാരം (ആറ്), കല്ലപ്പള്ളി (ഏഴ്), പാണത്തൂര്‍ (10), അരിപ്രോഡ് (11), ബളാന്തോട് (12), പ്രാന്തര്‍കാവ് (16), എരിഞ്ഞിലംകോട് (17). കയ്യൂര്‍-ചീമേനി പട്ടികജാതി സംവരണം: ചാനടുക്കം (ഒന്പത്). സ്ത്രീ സംവരണം: ക്ലായിക്കോട് (ഒന്ന്), കൂക്കോട്ട് (മൂന്ന്), പള്ളിപ്പാറ (ഏഴ്), പട്ടോളി (10), ചീമേനി (11), നിടുംബ (13), മുണ്ട (14), ചെമ്പ്രകാനം (15), നാലിലാംകണ്ടം(17). ചെറുവത്തൂര്‍ പട്ടികജാതി സംവരണം: നെല്ലിക്കാല്‍ (16). സ്ത്രീ സംവരണം: അച്ചാംതുരുത്തി (ഒന്ന്), കാരിയില്‍ (മൂന്ന്), വി.വി. നഗര്‍ (ഏഴ്), കുട്ടമത്ത് (ഒന്പത്), വെങ്ങാട്ട് (11), കണ്ണങ്കൈ (12), പയ്യങ്കി (13 ), തുരുത്തി (17 ), ഓര്‍ക്കുളം (18). വലിയപറമ്പ് പട്ടികജാതി സംവരണം: ഇടയിലക്കാട് സൗത്ത് (3). സ്ത്രീ സംവരണം: ഒരിയര (ഒന്ന്), ഇടയിലക്കാട് നോര്‍ത്ത് (രണ്ട്), തയ്യില്‍ കടപ്പുറം (അഞ്ച്), കന്നുവീട് കടപ്പുറം (ആറ്), വലിയപറമ്പ് സൗത്ത് (ഏഴ്), പടന്ന കടപ്പുറം (10), ബീച്ചാര കടപ്പുറം (11). പടന്ന പട്ടികജാതി സംവരണം: പടന്ന കാവുന്തല (മൂന്ന്). സ്ത്രീ സംവരണം: പടന്ന കാലിക്കടവ് (രണ്ട്), പടന്ന സെന്‍റര്‍ (നാല്), കിനാത്തില്‍ മുതിരകൊവ്വല്‍ (ഏഴ്), നടക്കാവ് പോട്ടച്ചാല്‍ (ഒന്പത്), പരത്തിച്ചാല്‍ ഉദിനൂര്‍ സെന്‍ട്രല്‍ (10), ഉദിനൂര്‍ തെക്കുംപുറം മുള്ളോട്ടുകടവ് (11), അരിവിരുത്തി മാച്ചിക്കാട് (12 ), പടന്ന ബസാര്‍ (16). പിലിക്കോട് പട്ടികജാതി സംവരണം: പൊള്ളപ്പൊയില്‍ (10). സ്ത്രീ സംവരണം: കണ്ണങ്കൈ (ഒന്ന്), പിലിക്കോട് (രണ്ട്), കുഞ്ഞിപ്പാറ(അഞ്ച്), വേങ്ങാപ്പാറ (ആറ്), പാടിക്കാല്‍ (ഏഴ്), കൊടക്കാട് (ഒന്പത്), വെള്ളച്ചാല്‍ (11) മാണിയാട്ട് (15), പിലിക്കോട് വയല്‍ (17). തൃക്കരിപ്പൂര്‍ പട്ടികജാതി സംവരണം: പേക്കടം (മൂന്ന്). സ്ത്രീ സംവരണം: ആയിറ്റി (ഒന്ന്), പെരിയോത്ത് (രണ്ട്), നടക്കാവ് (അഞ്ച്), ചൊവ്വേരി (ഒന്പത്), തങ്കയം (10), ഉളിയം (13), ഒളവറ (14), ഉടുമ്പുന്തല കിഴക്ക് (15), ഉടുമ്പുന്തല പടിഞ്ഞാറ് (16), വള്‍വക്കാട് (19), മധുരങ്കൈ (20), ബീരിച്ചേരി (21). കുമ്പള പട്ടികജാതി സംവരണം: കോട്ടേക്കാര്‍ (23). സ്ത്രീ സംവരണം: കുമ്പോല്‍ (ഒന്പത്), ആരിക്കാടി (രണ്ട്), ഉജാര്‍ (5), ഉളുവാര്‍ (6), നാരായണമംഗലം (12), കെ.കെ. പുറം (14), മൊഗ്രാല്‍ (15), കൊപ്പളം (16), കുമ്പള റെയില്‍വേ സ്റ്റേഷന്‍ (18), നടുപ്പളം (19), ശാന്തിപ്പളം (21), മാട്ടംകുഴി (22). ബദിയഡുക്ക പട്ടികജാതി സ്ത്രീ സംവരണം: ചര്‍ളടുക്ക (16). പട്ടികജാതി സംവരണം: കിളിംഗാര്‍ (രണ്ട്). സ്ത്രീ സംവരണം: ദേവര്‍മെട്ട് (നാല്), പള്ളത്തടുക്ക (ഏഴ്), മെഡിക്കല്‍ കോളജ് (എട്ട്), ബാരഡുക്ക (11), ബദിയടുക്ക (12), പെര്‍ഡാല (13), ചെടേക്കല്‍ (15), പുതുക്കോളി (18), തല്‍പ്പനാജെ(19), ബേള (20). മൊഗ്രാല്‍-പുത്തൂര്‍ പട്ടികജാതി സംവരണം: മൊഗര്‍ (ഒന്ന്). സ്ത്രീ സംവരണം: കമ്പാര്‍ (നാല്), ഉജ്ജിര്‍ക്കര മജല്‍ (അഞ്ച്), പെര്‍ണടുക്ക പായിച്ചാല്‍ (എട്ട്), ഗുവത്തടുക്ക (ഒന്പത്), ഏരിയാല്‍ (11), കുളങ്ങര (12), കല്ലങ്കൈ (15), ശാസ്താനഗര്‍ (16 ), മൊഗ്രാല്‍ പുത്തൂര്‍ (17). മധൂര്‍ പട്ടികജാതി സംവരണം: ഭഗവതി നഗര്‍ (23). സ്ത്രീ സംവരണം: ഏരിക്കള (മൂന്ന്), കൊല്ലങ്കാന (അഞ്ച്), ഉളിയ (ആറ്), ഹിദായത്ത് നഗര്‍ നോര്‍ത്ത് (എട്ട്), ഹിദായത്ത് നഗര്‍ സൗത്ത് (ഒന്പത്), ചെട്ടുങ്കുഴി (10), ചൂരി(14), സൂര്‍ളു(15), രാംദാസ് നഗര്‍ (18), പഞ്ചായത്ത് ഓഫീസ് (20), ഉളിയത്തടുക്ക (21), നാഷണല്‍ നഗര്‍ (22). ചെമ്മനാട് പട്ടികജാതി സംവരണം: കൊക്കാല്‍ (17). സ്ത്രീ സംവരണം: ചെമ്മനാട് (ഒന്ന്), ആലിച്ചേരി (രണ്ട്), പെരുമ്പള(മൂന്ന്), കോളിയടുക്കം (അഞ്ച്), കടപ്പളം (ആറ്), പുത്തരിയടുക്കം (എട്ട്), തെക്കില്‍ പറമ്പ (ഒന്പത്), പറമ്പ് (10), പൊയിനാച്ചി (11), മേല്‍പറമ്പ് (19), ചന്ദ്രഗിരി (22), പരവനടുക്കം (24). ചെങ്കള പട്ടികജാതി സംവരണം: പടിഞ്ഞാര്‍മൂല (21). സ്ത്രീ സംവരണം: കല്ലക്കട്ട (ഒന്ന്), അടുക്കം (രണ്ട്), നെല്ലിക്കട്ട (മൂന്ന്), നാരമ്പാടി (അഞ്ച്), അര്‍ളടുക്ക (ആറ്), എതിര്‍ത്തോട് (എട്ട്), എടനീര്‍ (ഒന്പത്), ചെര്‍ക്കള വെസ്റ്റ് (13), കണ്ടടുക്കം (16), ബേവിഞ്ച (17) ചെങ്കള(19), മാരാ പാണലം(20).

സംഘടിത ശക്തിയല്ലെങ്കിൽ തമസ്കരിക്കപ്പെടും: മാർ റെമിജിയോസ് ഇഞ്ചനാനിയിൽ

ചിറ്റാരിക്കാൽ: സംഘടിത ശക്തിയായി നിന്നാൽ മാത്രമേ അവകാശങ്ങൾ നേടിയെടുക്കാൻ കഴിയൂവെന്നും അല്ലാത്തപക്ഷം നാം തമസ്കരിക്കപ്പെടുമെന്നും താമരശേരി ബിഷപ് മാർ റെമിജിയോസ് ഇഞ്ചനാനിയിൽ. കത്തോലിക്ക കോൺഗ്രസ് അവകാശ സംരക്ഷണയാത്രയ്ക്ക് ചിറ്റാരിക്കാലിൽ നൽകിയ സ്വീകരണം ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. ഈ കാലഘട്ടത്തിന്‍റെ വെല്ലുവിളികളെ ഒരുമിച്ച് നിന്ന് നേരിടണം. അങ്ങനെ അവകാശങ്ങൾ നേടിയെടുക്കണം. അവകാശങ്ങൾ നേടിയെടുക്കാൻ എന്നും കത്തോലിക്ക കോൺഗ്രസ് സമരമുഖത്തുണ്ടാകും. പ്രതിസന്ധികളെ ആത്മധൈര്യത്തോടെ നേരിട്ട ഒരു തലമുറയാണ് നമുക്ക് മുൻപുണ്ടായിരുന്നത്. മലബാറിൽ വള്ളോപ്പള്ളി പിതാവിന്‍റെ ശക്തമായ നേതൃത്വമായിരുന്നു കുടിയേറ്റ ജനതയുടെ ശക്തി. കൂട്ടായ ആ പോരാട്ടങ്ങൾ വിജയം കണ്ടു. ആ പാത പിൻതുടർന്ന് സമുദായത്തിന്‍റെ അവകാശങ്ങൾ സംരക്ഷിക്കുവാൻ എപ്പോഴും ഒന്നായി നിന്ന് പ്രവർത്തിക്കണം. വന്യമൃഗശല്യം, റബറിന്‍റെ വിലയിടിവ്, കാർഷിക മേഖലയിലെ പ്രതിസന്ധികൾ, ജെ.ബി. കോശി കമ്മീഷൻ റിപ്പോർട്ട് എന്നിവയിലെല്ലാം ശാശ്വത പരിഹാരമാണ് വേണ്ടതെന്നും അതിനായാണ് യാത്ര നടത്തുന്നതെന്നും അദ്ദേഹം കൂട്ടിച്ചേർത്തു. കത്തോലിക്ക കോൺഗ്രസ് തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ ആമുഖ പ്രഭാഷണം നടത്തി. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ യാത്രാവിശകലനം നടത്തി. തോമാപുരം സെന്‍റ് തോമസ് ഫൊറോന വികാരി റവ.ഡോ. മാണിമേൽവെട്ടം മുഖ്യപ്രഭാഷണം നടത്തി. ജാഥാ ക്യാപ്റ്റൻ പ്രഫ. രാജീവ് കൊച്ചുപറമ്പിൽ, ഗ്ലോബൽ ട്രഷറർ അഡ്വ. ടോണി ജോസഫ് പുഞ്ചക്കുന്നേൽ, ഫാ. മാത്യു വളവനാൽ, ജിമ്മി ആയിത്തമറ്റം, സംഘാടക സമിതി ജനറൽ കൺവീനർ സാജു പടിഞ്ഞാറേട്ട്, അതിരൂപത സെക്രട്ടറി സെബാസ്റ്റ്യൻ ജാതികുളത്തിൽ എന്നിവർ പ്രസംഗിച്ചു. ചെറുപുഴ ഫൊറോന വികാരി ഫാ. ഫിലിപ്പ് ഇരുപ്പക്കാട്ട്, മാലോം ഫൊറോന വികാരി ഫാ. ജോസ് തൈക്കുന്നുംപുതത്, വെള്ളരിക്കുണ്ട് ഫൊറോന വികാരി റവ.ഡോ. ജോൺസൺ അന്ത്യാംകുളം, ഫാ. തോമസ് പൂവൻപുഴ, സാജു പുത്തൻപുര, ബെന്നി തുളുമ്പുംമാക്കൽ, ജിജി കുന്നപ്പള്ളി എന്നിവർ പങ്കെടുത്തു. അവകാശ സംരക്ഷണ ജാഥയ്ക്ക് കന്നുംകൈ ജംഗ്ഷനിൽ ഉജ്വല സ്വീകരണം നൽകി. തുടർന്ന് വാദ്യമേളങ്ങളുടെ അകമ്പടിയോടെ പ്രകടനമായി ചിറ്റാരിക്കാൽ കുരിശുപള്ളിക്കു സമീപം പ്രത്യേകം സജ്ജമാക്കിയ സമ്മേളന വേദിയിലെത്തി. വിവിധ ഫൊറോന കളിൽ നിന്നെത്തിയ ഇടവക യൂണിറ്റ് പ്രതിനിധികൾ ജാഥാ ക്യാപ്റ്റന് ഹാരാർപ്പണം നടത്തി. തോമാപുരം, വെള്ളരിക്കുണ്ട്, മാലോം, ചെറുപുഴ ഫൊറോനകളിൽ നിന്ന് വൈദികർ, കന്യാസ്ത്രീകൾ എന്നിവർ ഉൾപ്പെടെ ആയിരക്കണക്കിനാളുകൾ സ്വീകരണ യോഗത്തിൽ പങ്കെടുത്തു.

സ്കൗട്ട് ആൻഡ് ഗൈഡ് ഓപ്പൺ യൂണിറ്റ് തുടങ്ങി

വെള്ളരിക്കുണ്ട്: ലിറ്റിൽ ഫ്ലവർ സൺഡേ സ്കൂളിനോടനുബന്ധിച്ച് ഭാരത് സ്കൗട്ട് ആൻഡ് ഗൈഡ് കബ് ഓപ്പൺ യൂണിറ്റ് പ്രവർത്തനമാരംഭിച്ചു. വെളളരിക്കുണ്ട് സെഹിയോൻ ഹാളിൽ നടന്ന ചടങ്ങിൽ യൂണിറ്റിന്‍റെ ഉദ്ഘാടനം ഫൊറോന വികാരി റവ.ഡോ. ജോൺസൺ അന്ത്യാംകുളം നിർവഹിച്ചു. വരക്കാട് സ്കൂളിലെ ഗൈഡ് ക്യാപ്റ്റൻ ഷിജി ജോർജ് അധ്യക്ഷത വഹിച്ചു. ഓപ്പൺ യൂണിറ്റിലെ അംഗങ്ങളായ കുട്ടികൾക്കുള്ള ചിഹ്നദാന ചടങ്ങും നടന്നു. ഫാ. തോമസ് കുഴിപറമ്പിൽ , ലില്ലിക്കുട്ടി ഡെന്നി മൂലേത്തോട്ടത്തിൽ, സോണിയ ഇരുട്ടാണിയിൽ, കബ് മാസ്റ്റർ വി.എൽ. സൂസമ്മ, നിഷ സിജി ചൊവ്വാറ്റുകുന്നേൽ എന്നിവർ പ്രസംഗിച്ചു.

സ്ഥിരംസമിതി അധ്യക്ഷന്‍റെ വയലിൽ പഞ്ചായത്ത് അംഗങ്ങളുടെ കൊയ്ത്ത്

വെള്ളരിക്കുണ്ട്: ബളാൽ പഞ്ചായത്ത് സ്ഥിരം സമിതി അധ്യക്ഷൻ ടി. അബ്ദുൾ ഖാദറിന്‍റെ ഒരേക്കർ നെൽപ്പാടത്ത്‌ കൂട്ടായ്മയുടെ കൊയ്ത്തുത്സവത്തിനിറങ്ങി പഞ്ചായത്ത് അംഗങ്ങൾ. പഞ്ചായത്ത് പ്രസിഡന്‍റ് രാജു കട്ടക്കയം, വൈസ് പ്രസിഡന്‍റ് എം. രാധാമണി, അംഗങ്ങളായ പി.സി. രഘുനാഥൻ, പി. പദ്മാവതി, എം. അജിത, ബിൻസി ജെയിൻ, കൃഷി ഓഫീസർ ശ്രീഹരി, വ്യാപാരി വ്യവസായി ഏകോപനസമിതി യൂണിറ്റ് പ്രസിഡന്‍റ് എൽ.കെ. ബഷീർ എന്നിവരുടെ നേതൃത്വത്തിലാണ് കൊയ്ത്തുത്സവം നടന്നത്. പലയിടങ്ങളിലും വയലുകൾ തരിശിട്ട് നെൽകൃഷി അന്യം നിന്നുപോകുന്ന കാലത്ത് ജനപ്രതിനിധിയുടെ തിരക്കിനിടയിലും കൃഷി മുടക്കാത്ത പാരമ്പര്യമാണ് അബ്ദുൾ ഖാദറിന്‍റേത്. ഇപ്പോൾ പുതുതലമുറയുടെ പ്രതിനിധിയായി മകൻ ഹൈദരും കൂടെയുണ്ട്. ഉമ, ശ്രേയസ്, രക്തശാലി നെൽവിത്തുക്കൾ ഉപയോഗിച്ചാണ് ഇത്തവണ കൃഷിയിറക്കിയത്.

മോഷ്ടിച്ച മൊബൈൽ ഫോൺ വില്പന നടത്താൻ ശ്രമിക്കുന്നതിനിടെ പിടിയിൽ

കാസർഗോഡ്: മോഷ്ടിച്ച മൊബൈൽ ഫോൺ വില്പന നടത്താൻ ശ്രമിക്കുന്നതിനിടെ യുവാവ് പിടിയിലായി. ചട്ടഞ്ചാലിലെ സെലക്ഷൻ വേൾഡ് എന്ന കടയിൽ നിന്നും മോഷ്ടിച്ച ഫോൺ കാസർഗോഡ് പുതിയ ബസ്‌സ്റ്റാൻഡ് പരിസരത്തെ ഫോൺ വേൾഡ് എന്ന കടയിലെത്തി വില്പന നടത്താൻ ശ്രമിച്ച ചട്ടഞ്ചാൽ കനിയുംകുണ്ടിലെ അബ്ദുൾ ഖാദറിനെ (39) യാണ് മേൽപ്പറമ്പ് പോലീസ് പിടികൂടിയത്. എസ്ഐ സുരേഷ് കുമാറിന്‍റെ നേതൃത്വത്തിൽ സീനിയർ സിവിൽ പോലീസ് ഓഫീസർമാരായ സുഭാഷ്, ഗോവിന്ദൻ, പ്രമോദ്, രാജേഷ് എന്നിവരടങ്ങിയ സംഘമാണ് ഇയാളെ പിടിച്ചത്. പ്രതിയെ കോടതിയിൽ ഹാജരാക്കി 14 ദിവസത്തേക്ക് റിമാൻഡ് ചെയ്ത ു.

കാഞ്ഞങ്ങാട്, കാറഡുക്ക, മഞ്ചേശ്വരം ബ്ലോക്കുകളിലെ പഞ്ചായത്തുകളുടെ സംവരണ വാര്‍ഡുകള്‍ പ്രഖ്യാപിച്ചു

കാസർഗോഡ്: തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പിന് മുന്നോടിയായി ജില്ലയിലെ മൂന്ന് ബ്ലോക്ക് പഞ്ചായത്തുകളുടെ പരിധിയിലുള്ള ഗ്രാമ പഞ്ചായത്തുകളിലെ സംവരണ വാര്‍ഡുകളുടെ നറുക്കെടുപ്പ് പൂര്‍ത്തിയായി. കാഞ്ഞങ്ങാട്, കാറഡുക്ക, മഞ്ചേശ്വരം ബ്ലോക്കുകളിലെ പഞ്ചായത്ത് വാർഡുകളുടെ നറുക്കെടുപ്പാണ് ഇന്നലെ കളക്ടറേറ്റ് കോണ്‍ഫറന്‍സ് ഹാളില്‍ പൂർത്തിയായത്. നീലേശ്വരം, പരപ്പ, കാസര്‍ഗോഡ് ബ്ലോക്കുകൾക്ക് കീഴിലുള്ള ഗ്രാമ പഞ്ചായത്ത് സംവരണ വാര്‍ഡുകളുടെ നറുക്കെടുപ്പ് ഇന്നും ബ്ലോക്ക് പഞ്ചായത്ത് സംവരണ വാര്‍ഡുകളുടെ നറുക്കെടുപ്പ് 18 നും ജില്ലാ പഞ്ചായത്ത് സംവരണ വാര്‍ഡുകളുടെ നറുക്കെടുപ്പ് 21 നും നടക്കും. കാഞ്ഞങ്ങാട് ബ്ലോക്ക് പഞ്ചായത്ത് പരിധിയിലെ ഉദുമ പഞ്ചായത്തില്‍ 12ാം വാര്‍ഡായ കരിപ്പോടി പട്ടികജാതി സംവരണ സീറ്റായും ഉദുമ (2), മാങ്ങാട് (4) , മീത്തൽ മാങ്ങാട് (6) ബാര (7), വെടിക്കുന്ന് (8), പാക്യാര (11), ആറാട്ട് കടവ് ( 13), തിരുവക്കോളി (15), അങ്കക്കളരി (16), മലാംകുന്ന് (17), കോട്ടിക്കുളം (19) കൊപ്പല്‍ (22) എന്നിവ സ്ത്രീ സംവരണ വാര്‍ഡുകളായും പ്രഖ്യാപിച്ചു. പള്ളിക്കര പഞ്ചായത്തില്‍ 12ാം വാര്‍ഡായ ബംഗാട് പട്ടികജാതി സംവരണവും 15ാം വാര്‍ഡായ കരുവാക്കോട് പട്ടിക വര്‍ഗ സംവരണവുമാണ്. കോട്ടക്കുന്ന് (1), ബേക്കല്‍ (2), ഹദ്ദാദ് നഗര്‍ (3), മവ്വല്‍ ( 4), അരവത്ത് (6), തച്ചങ്ങാട് (7), പെരുംതട്ട (9), കരിച്ചേരി (10), കൂട്ടപ്പുന്ന (11), കൂട്ടക്കനി (18), കല്ലിങ്കാല്‍ (21), ചേറ്റുകുണ്ട് (24) എന്നിവ സ്ത്രീ സംവരണ വാര്‍ഡുകളായി പ്രഖ്യാപിച്ചു. അജാനൂര്‍ പഞ്ചായത്തില്‍ 13ാം വാര്‍ഡായ രാംനഗർ പട്ടികജാതി സംവരണമാണ്. മുക്കൂട് (1), പാടിക്കാനം (2), രാമഗിരി (4) മഡിയന്‍ (8), വെള്ളിക്കോത്ത് (9), മൂലക്കണ്ടം (10), പുതിയകണ്ടം (11), കാട്ടുകുളങ്ങര ( 12), കൊളവയല്‍ (18), ഇട്ടമ്മല്‍ (19), അജാനൂര്‍ കടപ്പുറം (20), പൊയ്യക്കര (22) എന്നിവ സ്ത്രീ സംവരണ വാര്‍ഡുകളായി പ്രഖ്യാപിച്ചു. മടിക്കൈ പഞ്ചായത്തില്‍ ഏഴാം വാര്‍ഡായ ചെരണത്തല പട്ടികവര്‍ഗ സംവരണമാണ്. സ്ത്രീ സംവരണ വാര്‍ഡുകളായി വാഴക്കോട് (1), ഏച്ചിക്കാനം (2), ആലമ്പാടി (3), മലപ്പച്ചേരി (6), ബങ്കളം (10), കക്കാട്ട് (11), ചാളക്കടവ് (14), അമ്പലത്തുകര (16) എന്നിവ പ്രഖ്യാപിച്ചു. പുല്ലൂര്‍ പെരിയ പഞചായത്തില്‍ 12-ാം വാര്‍ഡായ ഹരിപുരം പട്ടികവര്‍ഗ സ്ത്രീസംവരണ വാര്‍ഡായിരിക്കും. ആറാം വാര്‍ഡായ ഇരിയ പട്ടികവര്‍ഗ സംവരണ സീറ്റാണ്. സ്ത്രീ സംവരണ വാര്‍ഡുകളായി തന്നിത്തോട് ( 4), കുമ്പള (7), അമ്പലത്തറ (8), കൊടവലം (10), തട്ടുമ്മല്‍ (13), ചാലിങ്കാല്‍ (15), പെരിയോക്കി ( 16) പെരിയ (18), പെരിയ ബസാര്‍ (19) എന്നിവ പ്രഖ്യാപിച്ചു. കാറഡുക്ക ബ്ലോക്ക് പഞ്ചായത്ത് പരിധിയിലെ കുമ്പഡാജെ പഞ്ചായത്തിൽ എട്ടാം വാര്‍ഡ് ഒടമ്പള പട്ടികജാതി സംവരണ വാർഡായും എത്തടുക്ക (നാല്), ബെളിഞ്ച (ആറ്), ഗാഡിഗുഡ്ഡെ (ഏഴ്), ഗോസാട (10), ജയനഗര(11), അഗല്‍പ്പാടി(12), ഉബ്രംഗള (13) എന്നിവ സ്ത്രീ സംവരണവാര്‍ഡുകളായും പ്രഖ്യാപിച്ചു. കുറ്റിക്കോല്‍ പഞ്ചായത്തില്‍ പടുപ്പ് (5), നെല്ലിത്താവ് (14) എന്നിവ പട്ടികവര്‍ഗ വനിതാ സീറ്റുകളായും ബേത്തൂര്‍പാറ (1) പട്ടികവര്‍ഗ സീറ്റായും സംവരണം ചെയ്തു. സ്ത്രീ സംവരണവാര്‍ഡുകളായി ഒറ്റമാവുങ്കല്‍ (4), ബന്തടുക്ക (6), പാലാര്‍ (7), ബേത്തലം (8), ഏണിയാടി (10), കരിവേടകം (12), കുറ്റിക്കോല്‍ (17) എന്നിവ പ്രഖ്യാപിച്ചു. ദേലംപാടി പഞ്ചായത്തില്‍ മയ്യള (17) വാര്‍ഡ് പട്ടികജാതി സംവരണമായും ഉജംപാടി (1) പട്ടികവര്‍ഗ സംവരണമായും പ്രഖ്യാപിച്ചു. സത്രീ സംവരണ വാര്‍ഡുകളായി പരപ്പ (4), പുതിയമ്പലം (5), പയറടുക്ക (8), മല്ലംപാറ (9), കാട്ടിപ്പാറ (10), ബളവന്തടുക്ക (11), പാണ്ടി (12), എടപ്പറമ്പ് (14), മൊഗര്‍ (15) എന്നിവ പ്രഖ്യാപിച്ചു. മുളിയാര്‍ പഞ്ചായത്തില്‍ ബോവിക്കാനം (13) വാര്‍ഡ് പട്ടികജാതി സംവരണമാണ്. സ്ത്രീ സംവരണ വാര്‍ഡുകളായി ചൂരിമൂല (1), പൊവ്വല്‍ (2), ബെഞ്ച്‌കോര്‍ട്ട് (3), മല്ലം (4), പാണൂര്‍ (7), കോട്ടൂര്‍ (8), കാനത്തൂര്‍ (9), ആലൂര്‍ (15), നെല്ലിക്കാട് (17) എന്നിവ പ്രഖ്യാപിച്ചു. ബെള്ളൂര്‍ പഞ്ചായത്തില്‍ ബസ്തി (9) വാര്‍ഡ് പട്ടികജാതി സ്ത്രീ സംവരണവും പനയാല (13) വാര്‍ഡ് പട്ടികജാതി സംവരണവുമാണ്. സ്ത്രീ സംവരണ വാര്‍ഡുകളായി ബജ (2), കയര്‍പദവ് (5), നെട്ടണിഗെ (6), പള്ളപ്പാടി (7), ബെള്ളൂര്‍ (10), കിന്നിംഗാര്‍ (14) എന്നിവ പ്രഖ്യാപിച്ചു. കാറഡുക്ക പഞ്ചായത്തില്‍ പട്ടികജാതി സംവരണം ബേര്‍ളം (16) വാര്‍ഡിലാണ്. സ്ത്രീ സംവരണ വാര്‍ഡുകളായി മുള്ളേരിയ (3), ആലന്തടുക്ക(4), മുച്ചിലോട്ട് (5), മല്ലാവര (6), മീഞ്ചിപദവ് (7), പടിയത്തടുക്ക (9), മഞ്ഞംപാറ (10), ആദൂര്‍ (11) എന്നിവ പ്രഖ്യാപിച്ചു. ബേഡഡുക്ക പഞ്ചായത്തിലെ പതിനേഴാം വാര്‍ഡ് താരംതട്ട പട്ടികവര്‍ഗ സ്ത്രീ സംവരണവുംരണ്ടാം വാര്‍ഡ് കല്ലളി പട്ടികവര്‍ഗ സംവരണവുമായി പ്രഖ്യാപിച്ചു. സ്ത്രീ സംവരണ വാര്‍ഡുകളായി കൊളത്തൂര്‍ (3), കുണ്ടംകുഴി (5), ബേഡകം(7), അരിച്ചെപ്പ്(8), പായം (9), മുന്നാട്(11), വാവടുക്കം (14), അമ്പിലാടി (15),വേളാഴി (16) എന്നിവ പ്രഖ്യാപിച്ചു. മഞ്ചേശ്വരം ബ്ലോക്ക് പഞ്ചായത്ത് പരിധിയിലെ വോര്‍ക്കാടി പഞ്ചായത്തിൽ ഒന്നാം വാര്‍ഡ് പാവൂര്‍ പട്ടികജാതി സംവരണവും കെടുമ്പാടി (3), തവിടുഗോളി (4), പാവല (5), സുള്ള്യാമെ (7), പാത്തൂര്‍(8), ബോര്‍ക്കുള (11), ബദിയാര്‍ (13), ധര്‍മനഗര്‍ (14), നല്ലക്കി (16) എന്നിവ സ്ത്രീ സംവരണ വാര്‍ഡുകളായും പ്രഖ്യാപിച്ചു. മീഞ്ച പഞ്ചായത്തിൽ പതിനഞ്ചാം വാര്‍ഡ് തലക്കള പട്ടികജാതി സംവരണ സീറ്റായും കളിയൂര്‍ (1), കോളിയൂര്‍ (3), അരിയാള (6), ബാളിയൂര്‍ (8), കുളൂര്‍ (9), മൂടംബയല്‍ (10), പട്ടത്തുര്‍ (11), ബെജ്ജ(14), ഗാന്ധിനഗര്‍ (17) എന്നിവ സ്ത്രീ സംവരണ വാര്‍ഡുകളായും പ്രഖ്യാപിച്ചു. മംഗല്‍പാടി പഞ്ചായത്തിലെ പതിനേഴാം വാര്‍ഡ് ബന്തിയോട് പട്ടികജാതി സംവരണവും മുസോടി (ഒന്ന്), ഉപ്പള ടൗണ്‍ (4), കൊടിബയല്‍ (5), സോങ്കല്‍ (6), പച്ചമ്പള (10), ഹേരൂര്‍ (11), ഇച്ചിലങ്കോട് (12), മലന്തൂര്‍ (13), അഡ്ക (18), മള്ളങ്കൈ (19), പെരിങ്കടി (2), മണിമുണ്ട (24) എന്നിവ സ്ത്രീ സംവരണ വാര്‍ഡുകളുമായിരിക്കും. പുത്തിഗെ പഞ്ചായത്തില്‍ പട്ടികജാതി സംവരണം മുഖാരികണ്ട (13) വാര്‍ഡിനാണ്. സ്ത്രീ സംവരണ വാര്‍ഡുകളായി ചെന്നികേകൊടി (1), ദേരടുക്ക (3), മുണ്ടിത്തടുക്ക (5), മുഗു (7), ഉജംപദവ് (8), കണ്ണൂര്‍ (10), എടനാട് (12), കതീബ്‌നഗര്‍ (15) എന്നിവ പ്രഖ്യാപിച്ചു. എന്‍മകജെ പഞ്ചായത്തില്‍ പട്ടികജാതി സംവരണം ബജകുടലു (12) വാര്‍ഡിനാണ്. സ്ത്രീ സംവരണ വാര്‍ഡുകളായി സായ (1), കാട്ടുകുക്കെ (4), പെര്‍ള നോര്‍ത്ത് (5), പെര്‍ള ടൗണ്‍ (6), വാണിനഗര്‍ (9), കജംപാടി (10), പെര്‍ള സൗത്ത് (11), ഷേണി (15), ബേങ്കപദവ് (17) എന്നിവ പ്രഖ്യാപിച്ചു. പൈവളികെ പഞ്ചായത്തില്‍ പട്ടികജാതി സംവരണം പെര്‍വോടി (7) വാര്‍ഡിനാണ്. സ്ത്രീ സംവരണ വാര്‍ഡുകളായി കുരുഡപ്പദവ് (1), ചിപ്പാര്‍ (3), ആവള (5), കുടാല്‍ (13), പറംബള (15), കൊക്കെച്ചാല്‍ (16), കയ്യാര്‍ (17), അട്ടെഗോളി (18), പൈവളികെ (19), കളായി (20), കാടങ്കോടി (21) എന്നിവ പ്രഖ്യാപിച്ചു. മഞ്ചേശ്വരം പഞ്ചായത്തിലെ പതിനാറാം വാര്‍ഡ് ബങ്കര മഞ്ചേശ്വരം പട്ടികജാതി സംവരണ സീറ്റായും ഉദ്യാവര ബയല്‍ (3), സന്നടുക്ക (4), കുഞ്ചത്തൂര്‍ ബയല്‍ (5), ഉദ്യാവര ഗുഡ്ഡെ (8), ബഡാജെ (10), സത്യടുക്ക (11), കനില (13), വാമഞ്ചൂര്‍ ഗുഡ്ഡെ (14), ബാവുട്ടമൂല (19), ഉദ്യാവര സൗത്ത് (22), ഉദ്യാവര നോര്‍ത്ത് (23), ഉദ്യാവര മാഡ (24) എന്നിവ സ്ത്രീ സംവരണ വാര്‍ഡുകളായും പ്രഖ്യാപിച്ചു.

എൻ.എൻ. പിള്ള സിനിമാ പുരസ്കാരം നടി ഉർവശിക്ക്

ചെറുവത്തൂർ: മാണിയാട്ട് കോറസ് കലാസമിതിയുടെ ആഭിമുഖ്യത്തിൽ നൽകുന്ന സിനിമാ രംഗത്തെ സമഗ്ര സംഭാവനക്കുള്ള എൻ.എൻ. പിള്ള പുരസ്കാരം നടി ഉർവശിക്ക് സമ്മാനിക്കും. നാടക രംഗത്തെ സമഗ്ര സംഭാവനക്കുളള പുരസ്കാരം കെ.എം. ധർമനാണ്. നടൻ വിജയ രാഘവൻ ചെയർമാനും പി.വി. കുട്ടൻ, ജിനേഷ് കുമാർ, ടി.വി. ബാലൻ, ടി.വി. നന്ദകുമാർ എന്നിവരുമടങ്ങിയ ജൂറിയാണ് അവാർഡ് ജേതാക്കളെ തെരഞ്ഞെടുത്തത്. മാണിയാട്ട് നാടക ഗ്രാമം ആതിഥ്യമരുളുന്ന പന്ത്രണ്ടാമത് എൻ.എൻ. പിള്ള സ്മാരക സംസ്ഥാന നാടക മത്സരം നവംബർ 14 മുതൽ 23 വരെ നടക്കും. നാടക മത്സരത്തിന്‍റെ ഉദഘാടന ദിനത്തിൽ സിനിമാ താരവും അമ്മ താര സംഘടനയുടെ പ്രസിഡന്‍റുമായ ശ്വേത മേനോൻ കെ.എം. ധർമന് നാടക പുരസ്കാരം സമ്മാനിക്കും. സമാപന ദിവസമായ 23 ന് മന്ത്രി വി.എൻ. വാസവൻ ഉർവശിക്ക് സിനിമാ പുരസ്കാരം സമ്മാനിക്കും. ദേശീയ അവാർഡ് നേടിയ നടൻ വിജയരാഘവന് നാടകോത്സവത്തിന്‍റെ സമാപന ദിനത്തിൽ സ്വീകരണം നൽകും. ചരിത്രത്തിൽ സ്ഥാനംപിടിച്ച കൊടക്കാട് പന്തിഭോജനത്തിന്‍റെ ഓർമയ്ക്കായി പതിനായിരം പേർക്ക് സമൂഹസദ്യയും നൽകും. മുൻ മന്ത്രി ഇ.പി. ജയരാജൻ, എംഎൽഎമാരായ എം. രാജഗോപാലൻ, ടി.ഐ. മധുസൂദനൻ എന്നിവരും പരിപാടികളിൽ പങ്കെടുക്കും. പത്രസമ്മേളനത്തിൽ ജൂറി അംഗങ്ങളായ പി.വി. കുട്ടൻ, ടി.വി. ബാലൻ, സംഘാടക സമിതി ഭാരവാഹികളായ കെ. റിലേഷ്, സി. നാരായണൻ, സി. രാജേഷ്, ഇ. ഷിജോയ്, തമ്പാൻ കീനേരി, എ.വി. പ്രമോദ് എന്നിവർ പങ്കെടുത്തു.

ഗോകുലം ഗോശാലയിൽ ദീപാവലി സംഗീതോത്സവം 20 മുതൽ

പെരിയ: ഗോകുലം ഗോശാലയിൽ പതിമൂന്ന് ദിവസം നീണ്ടുനിൽക്കുന്ന ദീപാവലി സംഗീതോത്സവത്തിന് 20 ന് തുടക്കമാകും. ആദ്യദിനത്തിൽ ഉഡുപ്പി പവന ആചാറിന്‍റെ നേതൃത്വത്തിൽ അഞ്ച് വീണകൾ ചേർത്തുള്ള കച്ചേരി അവതരിപ്പിക്കും. എല്ലാ ദിവസവും രാവിലെ ഒമ്പതു മുതൽ രാത്രി 10 മണി വരെ തുടർച്ചയായി സംഗീതപരിപാടികൾ നടക്കും. കേരളം , കർണാടക, തമിഴ്നാട്, ആന്ധ്ര, തെലങ്കാന, മഹാരാഷ്ട്ര, സിംഗപ്പൂർ, ദുബായ് എന്നിവിടങ്ങളിൽ നിന്നായി നാന്നൂറോളം കലാകാരന്മാർ പങ്കെടുക്കും. സമാപനദിനത്തിൽ പത്മവിഭൂഷൺ ഡോ. പത്മാ സുബ്രഹ്മണ്യത്തിന്‍റെ നൃത്തവും ഡ്രംസ് മാന്ത്രികൻ ശിവമണിയുടെ താളമേളങ്ങളും അരങ്ങേറും. 93 കാരനായ ടി.വി. ഗോപാലകൃഷ്ണൻ, പട്ടാഭിരാമ പണ്ഡിറ്റ്, അഭിഷേക് രഘുറാം, എൻ.ജെ. നന്ദിനി, ശങ്കരൻ നമ്പൂതിരി, പിന്നണി ഗായകൻ അനൂപ് ശങ്കർ, വീണ വിദ്വാന്മാരായ അനന്ത പദ്മനാഭൻ, രാജേഷ് വൈദ്യ, രമണ ബാലചന്ദ്ര, കണ്ണൻ ചെന്നൈ എന്നിവരും വിവിധ ദിനങ്ങളിലായി സംഗീതോത്സവത്തിൽ പങ്കാളികളാകും.

ജസ്റ്റിസ് മോഹനന്‍ കമ്മീഷന്‍ തെളിവെടുപ്പും ഹിയറിംഗും നടത്തി

നീലേശ്വരം: താനൂര്‍ ബോട്ടപകടവുമായി ബന്ധപ്പെട്ട് അന്വേഷണം നടത്തുന്ന ജുഡീഷ്യല്‍ കമ്മീഷനായ റിട്ട. ജസ്റ്റിസ് വി.കെ. മോഹനന്‍ കോട്ടപ്പുറം ഹൗസ് ബോട്ട് ടെര്‍മിനലില്‍ തെളിവെടുപ്പും ഹിയറിംഗും നടത്തി. മത്സ്യബന്ധനത്തെ പ്രതികൂലമായി ബാധിക്കാത്ത രീതിയില്‍ ഹൗസ്‌ബോട്ടുകള്‍ക്കായി ഒരു കൃത്യമായ റൂട്ട് ചാനല്‍ ഉണ്ടാക്കണമെന്ന് ഹിയറിംഗില്‍ ആവശ്യമുയര്‍ന്നു. പുഴയുടെ ആഴം വര്‍ധിപ്പിക്കുക, മലബാര്‍ മേഖലയില്‍ ഒരു ബോട്ട് ലാസ്‌കര്‍ പരിശീലന കേന്ദ്രം അനുവദിക്കുക, ബോട്ട് ഹൗസിന്‍റെയും മത്സ്യബന്ധന ബോട്ടുകളുടെയും സഞ്ചാരത്തെ തടസപ്പെടുത്തുന്ന തരത്തിലുള്ള പുലിമുട്ടുകളിലെ ഇളകിയ കല്ലുകള്‍ നീക്കം ചെയ്യുക, ബോട്ടുകളുടെ അറ്റകുറ്റപ്പണികള്‍ക്ക് ആവശ്യമായ സംവിധാനം ജില്ലയില്‍ തന്നെ ഒരുക്കുക തുടങ്ങിയ നിര്‍ദേശങ്ങളും ഉയർന്നു. കോട്ടപ്പുറം ബോട്ട് ടെര്‍മിനലില്‍ വേലിയേറ്റസമയത്ത് ബോട്ടുകള്‍ക്ക് അടുക്കാന്‍ ആവശ്യമായ സംവിധാനങ്ങള്‍ ഉണ്ടാകണമെന്നും ടെര്‍മിനലിലേക്കുള്ള ഗതാഗത സൗകര്യങ്ങളും തെരുവ് വിളക്കുകളും മെച്ചപ്പെടുത്തണമെന്നും ആവശ്യമുയര്‍ന്നു. കുസാറ്റ് ഷിപ് ടെക്നോളജി വിഭാഗത്തിലെ മുൻ പ്രഫസര്‍ ഡോ. കെ.പി. നാരായണന്‍, കമ്മീഷന്‍ സെക്രട്ടറി അഡ്വ. രമേഷ് കുമാര്‍, കോര്‍ട്ട് ഓഫീസര്‍ ജി. ചന്ദ്രശേഖരന്‍, സ്റ്റാന്‍ഡിംഗ് കൗണ്‍സൽ ടി.പി. രമേശ്, നോഡല്‍ ഓഫീസര്‍ അന്‍സാരി, ഡിടിപിസി സെക്രട്ടറി ജെ.കെ. ജിജേഷ് എന്നിവരും പങ്കെടുത്തു.

ശാന്തമ്മ ഫിലിപ്പിന്‍റെ പരാതി: റിപ്പോർട്ട് നൽകിയത് രേഖകൾ പരിശോധിച്ചെന്ന് സഹകരണ വകുപ്പ്

ചിറ്റാരിക്കാൽ: ജില്ലാ റബർ മാർക്കറ്റിംഗ് സൊസൈറ്റിയുടെ ഡയറക്ടർ സ്ഥാനത്തുനിന്ന് അയോഗ്യത കല്പിച്ചതുമായി ബന്ധപ്പെട്ട് കെപിസിസി അംഗം ശാന്തമ്മ ഫിലിപ്പ് നൽകിയ പരാതിയിൽ വിശദീകരണവുമായി സഹകരണ വകുപ്പും ഈസ്റ്റ് എളേരി സർവീസ് സഹകരണ ബാങ്കും രംഗത്തെത്തി. സഹകരണ വകുപ്പിന്‍റെ ജില്ലാ ഓഫീസിൽ തപാലിൽ ലഭിച്ച പരാതിയുടെ അടിസ്ഥാനത്തിലാണ് അന്വേഷണം നടത്തിയതെന്ന് സഹകരണവകുപ്പ് വെള്ളരിക്കുണ്ട് താലൂക്ക് അസി. രജിസ്ട്രാറുടെ ഓഫീസ് അറിയിച്ചു. പരാതിയിൽ പറഞ്ഞ വസ്തുതകളുമായി ബന്ധപ്പെട്ട് സഹകരണവകുപ്പ് ഉദ്യോഗസ്ഥർ ബാങ്കിലെത്തി രേഖകൾ പരിശോധിച്ചതിന്‍റെയും ബാങ്കിന്‍റെ റിപ്പോർട്ടിന്‍റെയും അടിസ്ഥാനത്തിലാണ് ശാന്തമ്മ ഫിലിപ്പിന് അയോഗ്യത കൽപ്പിച്ചതെന്നും ഉദ്യോഗസ്ഥർ പറഞ്ഞു. ശാന്തമ്മ ഫിലിപ്പ് 2022 ഒക്ടോബർ 26 ന് ഈസ്റ്റ് എളേരി ബാങ്കിൽ നിന്നെടുത്ത 50,000 രൂപ വായ്പയുടെ തിരിച്ചടവ് കാലാവധി രണ്ടു വർഷമാണെന്നത് ശരിയാണെന്നും എന്നാൽ 25,000 രൂപയും പലിശയും 2023 ഒക്ടോബർ 26ന് തിരിച്ചടക്കണമെന്ന വ്യവസ്ഥയുണ്ടായിരുന്നതായും ബാങ്ക് സെക്രട്ടറി ആൻസിക്കുട്ടി അറിയിച്ചു. അത് അടക്കാതിരുന്നതുകൊണ്ടാണ് ഇവർക്ക് കുടിശികയുണ്ടെന്ന് സഹകരണ വകുപ്പിന്‍റെ കത്തിന് മറുപടി നൽകിയതെന്നും അവർ വിശദീകരിച്ചു. അതേസമയം തപാലിൽ ലഭിച്ച പരാതിയുമായി ബന്ധപ്പെട്ട് സഹകരണവകുപ്പ് ഹിയറിംഗ് പോലും നടത്താതിരുന്നതിനാലാണ് പരാതിക്കാരൻ വർഷങ്ങൾക്കുമുമ്പ് മരിച്ചുപോയ ആളാണെന്ന കാര്യം അറിയാതെ പോയതെന്ന ശാന്തമ്മ ഫിലിപ്പിന്‍റെ ആരോപണം നിഷേധിക്കാൻ സഹകരണവകുപ്പിന് കഴിഞ്ഞിട്ടില്ല. വായ്പയുടെ തിരിച്ചടവ് കാലാവധി രണ്ടുവർഷമായിരിക്കേ ഒരു വർഷം കഴിയുമ്പോൾ പകുതി തുകയും പലിശയും തിരിച്ചടയ്ക്കണമെന്ന വ്യവസ്ഥ ഉണ്ടായിരുന്നുവെന്ന ബാങ്കിന്‍റെ വാദവും ഇവർ ചോദ്യം ചെയ്യുകയാണ്.

കേന്ദ്രാവിഷ്കൃത പദ്ധതിയുടെ പ്രവൃത്തി ഉദ്ഘാടനം എംപിയെ അറിയിച്ചില്ലെന്ന് പരാതി

കാസർഗോഡ്: കേന്ദ്രാവിഷ്‌കൃത പദ്ധതിയായ പിഎം ഉഷയുടെ ഭാഗമായി ഉദുമ ഗവ. ആർട്‌സ് ആൻഡ് സയൻസ് കോളജിൽ നിർമിക്കുന്ന അക്കാദമിക് ആൻഡ് ഓഡിറ്റോറിയം കെട്ടിടത്തിന്‍റെ നിർമാണപ്രവൃത്തി ഉദ്ഘാടനം രാജ്മോഹൻ ഉണ്ണിത്താൻ എംപിയെ അറിയിക്കാതെ നടത്തിയതായി പരാതി. സി.എച്ച്. കുഞ്ഞമ്പു എംഎൽഎയാണ് പ്രവൃത്തി ഉദ്ഘാടനം നിർവഹിച്ചത്. ജില്ലയിൽ നടപ്പിലാക്കുന്ന എല്ലാ കേന്ദ്രാവിഷ്‌കൃത പദ്ധതികളുടെയും നടത്തിപ്പിന്‍റെയും മേൽനോട്ടത്തിന്‍റെയും ചുമതലയുള്ള എംപിയെ അറിയിക്കാതെ പ്രോട്ടോകോൾ ലംഘനം നടത്തുന്നതിന് കൂട്ടുനിന്ന ഉദ്യോഗസ്ഥർക്കെതിരേ നടപടി ആവശ്യപ്പെട്ട് ബന്ധപ്പെട്ടവർക്ക് പരാതി നൽകിയതായി എംപി അറിയിച്ചു. എംപിയുടെ ഓഫീസിൽ നിന്നും കോളജ് അധികൃതരെ ബന്ധപ്പെട്ടപ്പോൾ എംഎൽഎയുടെ ഓഫീസിലാണ് കാര്യങ്ങൾ തീരുമാനിച്ചതെന്ന മറുപടിയാണ് ലഭിച്ചത്. തെരഞ്ഞെടുപ്പുകൾ അടുത്തുകൊണ്ടിരിക്കുന്ന സമയത്ത് വികസനത്തിൽ രാഷ്ട്രീയം കലർത്തുന്ന ഇടതുപക്ഷ സംഘടനകളുടെ പതിവുരീതിയുടെ ഭാഗമാണ് ഇതെന്ന് ഉണ്ണിത്താൻ ആരോപിച്ചു. അടുത്തകാലത്ത് പൂർണമായും ഭാഗികമായും കേന്ദ്ര സർക്കാർ ഫണ്ട് ഉപയോഗിച്ച് നടപ്പിലാക്കിയ പല പദ്ധതികളുടെയും പേര് മാറ്റി സംസ്ഥാന സർക്കാർ പരിപാടിയായി അവതരിപ്പിച്ചതായി ശ്രദ്ധയിൽപെട്ടിട്ടുണ്ടെന്നും അദ്ദേഹം പറഞ്ഞു.

വെള്ളരിക്കുണ്ട് ബസ്‌സ്റ്റാൻഡ് ഷോപ്പിംഗ് കോംപ്ലക്സിന്‍റെ ശിലാസ്ഥാപനം ഇന്ന്

വെള്ളരിക്കുണ്ട്: ബളാൽ പഞ്ചായത്ത് രണ്ട് കോടി രൂപ ചെലവിൽ വെള്ളരിക്കുണ്ടിൽ നിർമിക്കുന്ന ബസ് സ്റ്റാൻഡ് കം ഷോപ്പിംഗ് കോപ്ലക്സ് കെട്ടിടത്തിന്റെ ശിലാസ്ഥാപനം ഇന്ന് ഉച്ചയ്ക്ക് രണ്ടിന് പ്രതിപക്ഷ നേതാവ് വി.ഡി.സതീശൻ നിർവഹിക്കും. ഇ.ചന്ദ്രശേഖരൻ എംഎൽഎ അധ്യക്ഷത വഹിക്കും. രാജ്മോഹൻ ഉണ്ണിത്താൻ എംപി മുഖ്യാതിഥിയാകും. ജില്ലാ പഞ്ചായത്ത് അംഗങ്ങളായ ജോമോൻ ജോസ്, ഷിനോജ് ചാക്കോ, പഞ്ചായത്ത് ജോയിന്റ് ഡയറക്റ്റർ ആർ.ഷൈനി എന്നിവർ പങ്കെടുക്കും. വെള്ളരിക്കുണ്ട് സബ് ട്രഷറി ജംഗ്ഷനടുത്താണ് 24 മുറികളുള്ള ഇരുനില ഷോപ്പിംഗ് കോംപ്ലക്സ് അടക്കമുള്ള ബസ് സ്റ്റാൻഡ് കെട്ടിടം നിർമിക്കുന്നത്. ഒരു വർഷം കൊണ്ടുതന്നെ നിർമാണം പൂർത്തീകരിക്കാൻ സാധിക്കുമെന്ന് ഭരണസമിതി അംഗങ്ങൾ അറിയിച്ചു. പത്രസമ്മേളനത്തിൽ പഞ്ചായത്ത് പ്രസിഡന്‍റ് രാജു കട്ടക്കയം, വൈസ് പ്രസിഡന്‍റ് എം. രാധാമണി, സ്ഥിരം സമിതി അധ്യക്ഷൻ ടി. അബ്‌ദുൾ ഖാദർ, സെക്രട്ടറി ഇൻ ചാർജ് എം. മധു എന്നിവർ പങ്കെടുത്തു.

മീന്‍ലോറി മറിഞ്ഞ് റോഡിലേക്ക് മലിനജലം ഒഴുകി

കാസര്‍ഗോഡ്: സംസ്ഥാനപാതയില്‍ മീന്‍ലോറി മറിഞ്ഞ് റോഡില്‍ മലിനജലമൊഴുകി. ഇന്നലെ ഉച്ചയ്ക്ക് 1.15ഓടെ മേല്‍പ്പറമ്പിലാണ് അപകടമുണ്ടായത്. മടക്കരയില്‍ നിന്ന് മംഗളൂരുവിലേക്ക് പോവുകയായിരുന്ന ലോറി ഓടിക്കൊണ്ടിരിക്കുമ്പോള്‍ ടയര്‍ പൊട്ടി റോഡില്‍ നിന്നും തെന്നിമാറി മറിയുകയായിരുന്നു. മീൻ വണ്ടിയില്‍ ഉണ്ടായിരുന്ന മീന്‍ പെട്ടികള്‍ റോഡിലേക്ക് വീഴുകയും മലിനജലം റോഡിലേക്ക് ഒഴുകുകയുമായിരുന്നു. ടൗണില്‍ അസഹ്യമായ ദുര്‍ഗന്ധം അനുഭവപ്പെട്ടതിനാല്‍ കാസര്‍ഗോഡ് അഗ്‌നിരക്ഷാ സേനയെ വിവരമറിയിക്കുകയായിരുന്നു. സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ സണ്ണി ഇമ്മാനുവലിന്‍റെ നേതൃത്വത്തില്‍ സേനയെത്തി റോഡില്‍ സോപ്പ് പൊടി വിതറി വെള്ളം പമ്പ് ചെയ്ത് റോഡ് കഴുകി വൃത്തിയാക്കുകയായിരുന്നു.

90,420 കുട്ടികള്‍ക്ക് പോളിയോ തുള്ളിമരുന്ന് നല്‍കി

പള്ളിക്കര: പോളിയോ ഇമ്മ്യൂണൈസേഷന്‍ പരിപാടിയുടെ ഭാഗമായി ജില്ലയിലെ 90,420 കുട്ടികള്‍ക്ക് പോളിയോ തുള്ളിമരുന്ന് നല്‍കി. ജില്ലാതല ഉദ്ഘാടനം പള്ളിക്കരയില്‍ സി.എച്ച്. കുഞ്ഞമ്പു എംഎല്‍എ നിര്‍വഹിച്ചു. പഞ്ചായത്ത് പ്രസിഡന്‍റ് എം. കുമാരന്‍ അധ്യക്ഷത വഹിച്ചു. ജില്ലാ മെഡിക്കല്‍ ഓഫീസ് ഡെപ്യൂട്ടി ഡിഎംഒ ഡോ. ബി. സന്തോഷ് മുഖ്യപ്രഭാഷണം നടത്തി. ജില്ലാ മെഡിക്കല്‍ ഓഫീസ്, ദേശീയ ആരോഗ്യ ദൗത്യം എന്നിവയുടെ സംയുക്താഭിമുഖ്യത്തില്‍, ഐഎംഎ, ഐഎപി, റോട്ടറി എന്നിവയുടെ സഹകരണത്തോടെ പള്ളിക്കര കുടുംബാരോഗ്യ കേന്ദ്രത്തിലാണ് പരിപാടി സംഘടിപ്പിച്ചത്. ജില്ലയിലെ അങ്കണവാടികള്‍, സ്‌കൂളുകള്‍, ആരോഗ്യകേന്ദ്രങ്ങള്‍, ബസ് സ്റ്റാന്‍ഡുകള്‍, റെയില്‍വേ സ്റ്റേഷനുകള്‍ തുടങ്ങിയ ജില്ലയിലെ എല്ലാ സ്ഥലത്തും ബൂത്തുകള്‍ സജ്ജീകരിച്ചിരുന്നു. ആരോഗ്യകാര്യ സ്ഥിരംസമിതി അധ്യക്ഷന്‍ എ. മണികണ്ഠന്‍, വാര്‍ഡ് മെംബര്‍ കെ. അനിത സംസ്ഥാന നിരീക്ഷകരായ എഡിഎച്ച്എസ് ഡോ. വിവേക് കുമാര്‍, യൂനിസെഫ് കണ്‍സള്‍ട്ടന്‍റ് ഡോ. സൗമ്യ, റോട്ടറി ക്ലബ് സോണല്‍ കോ-ഓര്‍ഡിനേറ്റര്‍ എം.ഡി. രാജേഷ് കാമത്ത്, ഐഎപി സെക്രട്ടറി ഡോ. മാഹിന്‍ പി. അബ്ദുള്ള, ഐഎംഎ പ്രസിഡന്‍റ് ഡോ. ഹരികിരണ്‍ ബംഗെര, ഫിസിഷന്‍ അസോസിയേഷന്‍ പ്രസിഡന്‍റ് ഡോ. സുന്ദര ആനമജല്‍, ബ്ലോക്ക് മെഡിക്കല്‍ ഓഫീസര്‍ ഡോ. ഡി.ജി. രമേശ്, ഡോ. ബേസില്‍ വര്‍ഗീസ്, മെഡിക്കല്‍ ഓഫീസര്‍ ഡോ. സി. വേണു, ഡെപ്യൂട്ടി ഡിസ്ട്രിക്ട് എഡ്യുക്കേഷന്‍ ആന്‍ഡ് മീഡിയ ഓഫീസര്‍ പി.പി. ഹസീബ്, ഐസിഡിഎസ് സൂപ്പര്‍വൈസര്‍ ടി. രമ, ജില്ലാ ആര്‍സിഎച്ച് ഓഫീസര്‍ ഡോ. കെ.കെ. ഷാന്‍റി, ഹെല്‍ത്ത് ഇന്‍സ്‌പെക്ടര്‍ പി.വി. സജീവന്‍ എന്നിവര്‍ പ്രസംഗിച്ചു.

ഭരണപക്ഷത്തിനും പ്രതിപക്ഷത്തിനും വനിതാ മുഖ്യമന്ത്രിയെ താത്പര്യമില്ല: എം.എൻ. കാരശേരി

പിലിക്കോട്: ജനസംഖ്യയിൽ സ്ത്രീകൾ ഏറ്റവും കൂടുതലുള്ള കേരളത്തിൽ ഇന്നും ഒരു വനിത മുഖ്യമന്ത്രിയായി ഉണ്ടായിട്ടില്ലെന്നും അതിനായി ഭരണ പ്രതിപക്ഷ ഭേദമന്യെ ആരും തയാറായിട്ടില്ല എന്നത് ഖേദകരമാണെന്നും പ്രഫ. എം.എൻ. കാരശേരി. പിലിക്കോട് ഫൈൻ ആർട്സ് സൊസൈറ്റി ഗാന്ധി -നെഹ്റു പഠന കേന്ദ്രത്തിന്‍റെ നേതൃത്വത്തിൽ ജനാധിപത്യവും ധനാധിപത്യവും എന്ന വിഷയത്തിൽ പ്രഭാഷണം നടത്തുകയായിരുന്നു അദ്ദേഹം. സ്ത്രീവിരുദ്ധനീക്കം പല മേഖലയിലുമുണ്ട്. രാഷ്ട്രീയ പാർട്ടികളും നേതാക്കളുമൊക്കെ കോർപറേറ്റുകളായി മാറിക്കൊണ്ടിരിക്കുകയാണ്. ജനാധിപത്യത്തിന്‍റെ താക്കോലാണ് വോട്ടവകാശം. അതുകൊണ്ട് തന്നെ ജനങ്ങൾ ജാഗരൂകരായിരിക്കണമെന്നും അദ്ദേഹം കൂട്ടിച്ചേർത്തു. ഫൈൻ ആർട്സ് സൊസൈറ്റി പ്രസിഡന്‍റ് വിനോദ് എരവിൽ അധ്യക്ഷത വഹിച്ചു. സെക്രട്ടറി എ.വി. ബാബു, ട്രഷറർ എ. രമേശൻ എന്നിവർ പ്രസംഗിച്ചു.

റോബോട്ടിക് ശില്പശാല നടത്തി

രാജപുരം: സെന്‍റ് പയസ് ടെൻത് കോളജിൽ കംപ്യൂട്ടർ സയൻസ് വിഭാഗത്തിന്‍റെ ആഭിമുഖ്യത്തിൽ അഞ്ചുദിവസം നീണ്ടു നിന്ന റോബോട്ടിക് ശില്പശാല നടത്തി. റോബോട്ടുകളുടെ പ്രവർത്തനം, നിർമാണ മേഖലയിലുള്ള സാങ്കേതിക വിവരങ്ങൾ എന്നിവ കുട്ടികൾക്ക് ഉളവാക്കി കൊടുക്കുക എന്ന ഉദ്ദേശത്തോടെയാണ് പരിപാടി സംഘടിപ്പിച്ചത്. കോളജ് ബർസാർ ഫാ. ജോബിൻ പ്ലാച്ചേരിപുറം ഉദ്ഘാടനം ചെയ്തു. പ്രിൻസിപ്പൽ ഡോ. ബിജു ജോസഫ് അധ്യക്ഷത വഹിച്ചു. കോളജ് യൂണിയൻ ചെയർമാൻ ആനന്ദ്, ജിടെക് പ്രതിനിധി കൃഷ്ണനുണ്ണി, സുനീഷ്, കംപ്യൂട്ടർ സയൻസ് വിഭാഗം മേധാവി ഡോ. തോമസ് സ്കറിയ, ഡോ. പി.എ. ബിബിൻ എന്നിവർ പ്രസംഗിച്ചു. അധ്യാപകരായ തോമസ് ചാക്കോ, ഡോ. ജിൻസിമോൾ ജോസഫ്, നവ്യ സി. ജോൺ, സിനോയ് ലുക്കോസ് എന്നിവർ നേതൃത്വം നൽകി.

കർഷകസ്വരാജ് സത്യഗ്രഹത്തിന് പിന്തുണയുമായി കെഎസ്പിപിഡബ്ല്യുഎ

വെള്ളരിക്കുണ്ട്: കർഷകസ്വരാജ് സത്യഗ്രഹത്തിന് പിന്തുണയുമായി പോലീസ് പെൻഷനേഴ്സ് വെൽഫേർ അസോസിയേഷൻ വെള്ളരിക്കുണ്ട് യൂണിറ്റ് കമ്മിറ്റിയുടെ നേതൃത്വത്തിൽ പ്രവർത്തകർ സമരപ്പന്തലിലെത്തി. ബസ്‌സ്റ്റാൻഡ് പരിസരത്തു നിന്നും പ്രകടനമായി എത്തിയ പ്രവർത്തകർ സമരസമിതി നേതാക്കൾക്ക് അഭിവാദ്യം അർപ്പിച്ച് ഷാൾ അണിയിച്ചു. മലയോരത്ത് വന്യജീവികളുടെ ആക്രമണങ്ങൾ നേരിടുന്ന കർഷകരുടെ കൂടെ നീതിക്കുവേണ്ടി പൊരുതാൻ സംഘടനയുടെ പിന്തുണ ഉറപ്പുനൽകി. പ്രസിഡന്‍റ് എം.ഡി. ദേവസ്യ , സെക്രട്ടറി സി.വി. ശ്രീധരൻ , ജോയിന്‍റ് സെക്രട്ടറി എം.എ. ജോസ് എന്നിവർ പ്രസംഗിച്ചു. എ.എം. ജോസഫ്, പി.സി. വേലായുധൻ, ഇ.വി. രാജശേഖരൻ, എം.എ. തോമസ്, കെ.വി. രാജീവ് കുമാർ, എം.ജെ. ഏബ്രഹാം, എൻ. യു. സൈമൺ, കെ. മുരളീധരൻ, ജോസി ജോസഫ് എന്നിവർ പങ്കെടുത്തു.

കാസർഗോഡിന് എയിംസ്: ജനകീയ പ്രചാരണവുമായി രാജപുരം കോളജിലെ എൻഎസ്എസ് വോളന്‍റിയർമാർ

രാജപുരം: ആരോഗ്യരംഗത്തെ പിന്നോക്കാവസ്ഥ പരിഗണിച്ച് കാസർഗോഡ് ജില്ലയിൽ തന്നെ എയിംസ് അനുവദിക്കണമെന്ന ആവശ്യവുമായി ജനകീയ പ്രചാരണ പരിപാടികൾക്ക് തുടക്കമിട്ട് രാജപുരം സെന്‍റ് പയസ് ടെൻത് കോളജിലെ എൻഎസ്എസ് വോളന്‍റിയർമാർ. എയിംസ് കാസർഗോഡ് ജനകീയ കൂട്ടായ്മയുമായി ചേർന്നാണ് ജില്ലയിലുടനീളം വിപുലമായ പ്രചാരണ പരിപാടികൾക്ക് തുടക്കം കുറിച്ചത്. വരുന്ന ഒരാഴ്ചയ്ക്കുള്ളിൽ പതിനായിരം ആളുകളെ നേരിൽ കണ്ട് എയിംസിന്‍റെ പ്രാധാന്യത്തെക്കുറിച്ച് വിശദീകരിക്കാനാണ് ലക്ഷ്യമിടുന്നത്. ഇതിലൂടെ എയിംസിനായുള്ള ജനകീയ സമരങ്ങൾക്ക് കൂടുതൽ ശക്തി നൽകാൻ കഴിയുമെന്നാണ് പ്രതീക്ഷ. എയിംസ് കാസർഗോഡിന് അനുവദിക്കണമെന്നാവശ്യപ്പെട്ട് നേരത്തേ കോളജ് എൻഎസ്എസ് യൂണിറ്റിന്‍റെ നേതൃത്വത്തിൽ പതിനായിരം പേർ ഒപ്പിട്ട നിവേദനം പ്രധാനമന്ത്രിക്കും മുഖ്യമന്ത്രിക്കും കേന്ദ്ര-സംസ്ഥാന ആരോഗ്യ മന്ത്രിമാർക്കും കേന്ദ്ര മന്ത്രി സുരേഷ് ഗോപിക്കും അയച്ചിരുന്നു. എൻഎസ്എസ് പ്രോഗ്രാം ഓഫീസർമാരായ അതുല്യ കുര്യാക്കോസ്, അഖിൽ തോമസ്, എയിംസ് കാസർഗോഡ് ജനകീയ കൂട്ടായ്മ ഭാരവാഹികളായ ഗണേഷ് അരമങ്ങാനം, മുരളിധരൻ പടന്നക്കാട്, സലീം സന്ദേശം ചൗക്കി, ശ്രീനാഥ് ശശി, സൂര്യനാരായണ ഭട്ട്, എൻഎസ്എസ് വോളണ്ടിയർ സെക്രട്ടറിമാരായ എൻ.എ.അനുശ്രീ, എം.ഗോപിക, എം.കൃഷ്ണേന്ദു, പി.വി.ഋഷികേഷ്, പി.റസീൻ, ദർശൻ ബാലൻ, എം.പ്രണവ് എന്നിവരാണ് പ്രചാരണ പരിപാടികൾക്ക് നേതൃത്വം നൽകുന്നത്.

ഫുട്ബോൾ: കാസർഗോഡിനെ ഭവിജിത്ത് നയിക്കും

തൃക്കരിപ്പൂർ: എറണാകുളം മഹാരാജാസ് സിന്തറ്റിക് സ്റ്റേഡിയത്തിൽ നാളെ ആരംഭിക്കുന്ന സംസ്ഥാന സീനിയർ ഫുട്ബോൾ ചാമ്പ്യൻഷിപ്പിനുള്ള കാസർഗോഡ് ജില്ലാ ടീമിനെ ടി.കെ. ഭവിജിത്ത് നയിക്കും. മറ്റു ടീം അംഗങ്ങൾ: അനൂപ് ആന്‍റണി, പി. അമൽ, അഭിനന്ദ് വാസുദേവ്, എം. അഭിജിത്, ആതിഷ്, ടി.കെ. മുഹമ്മദ് രിഹാദ്, എം.കെ. ആരോമൽ, എം.എൽ. അബൂബക്കർ ദിൽഷാദ്, എ. കൃഷ്‌ണരാജ്, ടി.എസ്. മുഹമ്മദ് ഷാഹിൽ, ടി.വി. പാർഥിവ്, അൽതാഫ് റഹ്മാൻ, അഹമദ് സഫ്‌വാൻ, കെ.പി. ഇനാസ്, വി.പി. മുഹമ്മദ്‌ സഫാദ്, കെ.പി. അഹമ്മദ് അൻഫാസ്, ജിതിൻ കുമാർ, കെ. ദേവനന്ദൻ, എം.ടി.പി. മഷൂക്. ടി.വി. ബിജുകുമാർ (പരിശീലകൻ), അർജുൻ മടിക്കൈ (സഹ പരിശീലകൻ), ടി.പി. അബ്ദുൾ സലാം(ടീം മാനേജർ). നാളെ രാവിലെ വയനാടുമായാണ് കാസർഗോഡിന്‍റെ ആദ്യ മത്സരം. ചരിത്രം കുറിച്ച നായകൻ ഇനി പരിശീലകൻ പിലിക്കോട്: സംസ്ഥാന സീനിയർ ഫുട്ബോൾ കിരീടം ജില്ലയിലേക്ക് ആദ്യമായി എത്തിച്ച ടീം നായകൻ 12 വർഷത്തിന് ശേഷം പരിശീലകനായാണ് ഇത്തവണ സീനിയർ ടീം നാളെ എറണാകുളം മഹാരാജാസിൽ ഇറങ്ങുന്നത്. എടാട്ടുമ്മൽ സ്വദേശി ടി.വി. ബിജുകുമാറിന്‍റെ ശിക്ഷണത്തിലാണ് ജില്ല ടീം സംസ്ഥാന സീനിയർ ഫുട്ബോൾ ടീം കിരീടം തേടി ഇറങ്ങുന്നത്. 2013 ൽ ചരിത്രത്തിൽ ആദ്യമായി സീനിയർ ഫുട്ബോൾ ചാമ്പ്യൻഷിപ്പിൽ കാസർഗോഡ് ജില്ല ജേതാക്കളായപ്പോൾ നായകനായിരുന്നു ബിജുകുമാർ. 2000 ൽ കേരള യൂത്ത് ഫുട്ബോളിൽ മികച്ച താരത്തിനുള്ള സ്വർണ മെഡലും നേടിയിരുന്നു. മിഡ്ഫീൽഡിലും പ്രതിരോധത്തിലും മാറി മാറി മികച്ച കളി പുറത്തെടുത്ത ബിജുകുമാർ സന്തോഷ് ട്രോഫി ഫുട്ബോളിൽ കേരളം 2001 ൽ ചാമ്പ്യൻമാരായപ്പോൾ ടീമിൽ അംഗമായിരുന്നു. തുടർന്ന് പത്തു വർഷം ഇന്ത്യയിലെ മുൻ നിര ടീമുകളിൽ പ്രഫഷണൽ ഫുട്ബോൾ ടീമുകളായ സാൽഗോക്കർ, ചർച്ചിൽ ബ്രദേഴ്സ്, വാസ്കോ ഗോവ, ബംഗളുരു എച്ച്എഎൽ എന്നീ ടീമുകൾക്കുവേണ്ടി ബൂട്ടണിഞ്ഞു. നിലവിൽ തൃക്കരിപ്പൂർ ഗവ. താലൂക്ക് ആശുപത്രിയിലെ ക്ലർക്കാണ്.

ജനപ്രതിനിധികളും ഉദ്യോഗസ്ഥരും കൈയൊഴിഞ്ഞു; ആര്‍ക്കും വേണ്ടാതെ ജില്ലാ സ്‌കൂള്‍ കായികമേള

നീലേശ്വരം: ഭാവിയിലെ കായികപ്രതിഭകളെ വാര്‍ത്തെടുക്കുന്നതില്‍ നിര്‍ണായക പങ്ക് വഹിക്കുന്ന റവന്യു ജില്ലാ സ്‌കൂള്‍ കായികമേളയെ പാടെ അവഗണിച്ച് ജനപ്രതിനിധികളും വിദ്യാഭ്യാസവകുപ്പ് ഉദ്യോഗസ്ഥരും. ഇതോടെ മേള നടത്തിപ്പിന്‍റെ ഭാരം പൂര്‍ണമായും ആതിഥേയരായ ബാനം ഗവ. ഹൈസ്‌കൂളിന്‍റെ ചുമലിലായിരിക്കുകയാണ്. നീലേശ്വരം ഇഎംഎസ് സ്റ്റേഡിയത്തില്‍ ഒക്ടോബര്‍ 15, 16, 17 തീയതികളിലാണ് മേള നടക്കുക. സിന്തറ്റിക് ട്രാക്കുള്ള ജില്ലയിലെ ഏക സ്‌റ്റേഡിയമായതിനാല്‍ ഇവിടം ജില്ലാ കായികമേളയുടെ സ്ഥിരംവേദിയായിരിക്കുകയാണ്. അതിനാല്‍ തന്നെ സമീപപ്രദേശത്തുള്ള സ്‌കൂളുകളെയാണ് ആതിഥേയരായി തെരഞ്ഞെടുക്കുക. ഇത്തവണ മടിക്കൈ മേക്കാട്ട് ഹയര്‍സെക്കന്‍ഡറി സ്‌കൂളിനെയായിരുന്നു ആതിഥേയരായി ആദ്യം നിശ്ചയിച്ചിരുന്നത്. എന്നാല്‍ അവസാനനിമിഷം അവര്‍ പിന്മാറി. ഇതേത്തുടര്‍ന്നാണ് സ്റ്റേഡിയത്തില്‍ നിന്നും 23.2 കിലോമീറ്റര്‍ അകലെയുള്ള ബാനം ഗവ. ഹൈസ്‌കൂളിനെ ആതിഥേയരായി തെരഞ്ഞെടുത്തത്. ഒക്ടോബര്‍ 10നു വൈകുന്നേരമാണ് ബാനം സ്‌കൂള്‍ മുഖ്യാധ്യാപികക്ക് ഇതുസംബന്ധിച്ച അറിയിപ്പ് അധികൃതര്‍ നല്‍കുന്നത്. 250 കുട്ടികള്‍ മാത്രം പഠിക്കുന്ന ചെറിയ സ്‌കൂളാണ് ബാനം ജിഎച്ച്എസ്. ഇതില്‍ ഭൂരിഭാഗം കുട്ടികളും പട്ടികവിഭാഗത്തില്‍ പെട്ടവരാണ്. മേള തുടങ്ങാന്‍ ഇനി ഒരാഴ്ച പോലും സമയമില്ലെന്നിരിക്കെ മേള നടത്തിപ്പിനായുള്ള പണം കണ്ടെത്തുക അസാധ്യമാണെന്ന് ബാനം സ്‌കൂള്‍ അധികൃതര്‍ ജില്ലാ പഞ്ചായത്ത് അധികൃതരെ അറിയിച്ചിരുന്നു. പണം മുന്‍കൂറായി തന്നെ ലഭ്യമാക്കാമെന്ന ഉറപ്പ് ലഭിച്ചതോടെയാണ് കായികമേള നടത്തിപ്പ് എന്ന വെല്ലുവിളിയേറ്റെടുക്കാന്‍ ബാനം സ്‌കൂള്‍ തയാറായത്. ശനിയാഴ്ച ഇഎംഎസ് സ്റ്റേഡിയത്തില്‍ ചേര്‍ന്ന സംഘാടകസമിതി രൂപീകരണയോഗത്തില്‍ നിന്നും ജനപ്രതിനിധികളും വിദ്യാഭ്യാസവകുപ്പ് ഉദ്യോഗസ്ഥരും വിട്ടുനിന്നത് ഏറെ വിമര്‍ശനത്തിന് ഇടയാക്കിയിരുന്നു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, നീലേശ്വരം നഗരസഭ ചെയര്‍പേഴ്‌സണ്‍ ടി.വി. ശാന്ത, വൈസ്‌ചെയര്‍മാന്‍ പി.പി. മുഹമ്മദ് റാഫി, സ്റ്റേഡിയത്തിനു തൊട്ടുമുന്നില്‍ സ്ഥിതിചെയ്യുന്ന നീലേശ്വരം ബ്ലോക്ക് പഞ്ചായത്തിന്‍റെ പ്രസിഡന്‍റ് മാധവന് മിയറ, ബാനം സ്‌കൂള്‍ സ്ഥിതിചെയ്യുന്ന പരപ്പ ബ്ലോക്ക് പഞ്ചായത്തിന്‍റെ പ്രസിഡന്‍റ് പി. ലക്ഷ്മി, വൈസ് പ്രസിഡന്‍റ് കെ. ഭൂപേഷ്, കോടോം-ബേളൂര്‍ പഞ്ചായത്ത് പ്രസിഡന്‍റ് പി. ശ്രീജ, വാര്‍ഡ് മെംബര്‍ പി. ഗോപാലകൃഷ്ണന്‍ എന്നിവര്‍ ആരും യോഗത്തിന് എത്തിയില്ല. യോഗം സംബന്ധിച്ച അറിയിപ്പ് തങ്ങള്‍ക്ക് ലഭിച്ചിരുന്നില്ലെന്ന് പരപ്പ ബ്ലോക്ക് പഞ്ചായത്ത്, കോടോം-ബേളൂര്‍ പഞ്ചായത്ത് അധികൃതര്‍ പറഞ്ഞു. യോഗം ഉദ്ഘാടനം ചെയ്ത ജില്ലാ പഞ്ചായത്തംഗം സി.ജെ. സജിത്ത്, അധ്യക്ഷത വഹിച്ച വിദ്യാഭ്യാസ സ്ഥിരംസമിതി അധ്യക്ഷ എസ്.എന്‍. സരിത എന്നിവര്‍ മാത്രമായിരുന്നു യോഗത്തിനെത്തിയ ജനപ്രതിനിധികള്‍. ആകെ 20ല്‍ താഴെ ആള്‍ക്കാര്‍ മാത്രമാണ് യോഗത്തില്‍ പങ്കെടുത്തത്. ജില്ലാ വിദ്യാഭ്യാസ ഡെപ്യൂട്ടി കുറേ നാളായി അവധിയിലാണ്. മുന്‍വര്‍ഷങ്ങളിലെ സ്‌കൂള്‍ മേള നടത്തിപ്പുകള്‍ വലിയ സാമ്പത്തികബാധ്യതയുണ്ടാക്കിയതിനാല്‍ ഇത്തവണ ആ റിസ്‌ക്ക് ഏറ്റെടുക്കാന്‍ വയ്യാത്തതുകൊണ്ടാണ് ഡിഡിഇ അവധിയില്‍ പ്രവേശിച്ചതെന്നാണ് സൂചന. കാസര്‍ഗോഡ് ഡിഇഒയ്ക്കാണ് ഇന്‍ചാര്‍ജ് നല്‍കിയിരുന്നത്. അദ്ദേഹമോ കാഞ്ഞങ്ങാട് ഡിഇഒയോ സംഘാടകസമിതി യോഗത്തില്‍ പങ്കെടുത്തിരുന്നില്ല. മാത്രമല്ല ഡിഡിഇ ചുമതലയില്‍ നിന്നും കാസര‍ഗോഡ് ഡിഇഒ ഇന്ന് ഒഴിയുമെന്നും സൂചനയുണ്ട്. അങ്ങനെയെങ്കില്‍ വിദ്യാസവകുപ്പ് വീണ്ടും നാഥനില്ലാകളരിയായി മാറും. കോണ്‍ഗ്രസ് അധ്യാപകസംഘടനയായ കെപിഎസ്ടിഎ ആയിരുന്നു സാധാരണഗതിയില്‍ ഭക്ഷണം തയാറാക്കിയിരുന്നത്. ഇത്തവണ അവര്‍ പിന്മാറിയിരിക്കുകയാണ്. ഒടുവില്‍ ഭക്ഷണം നല്‍കാനുള്ള ചുമതല ബാനം സ്‌കൂള്‍ സ്വമേധയാ ഏറ്റെടുത്തിരിക്കുകയാണ്. കായികമേള നടക്കുന്ന 16, 17 തീയതികളില്‍ തന്നെയാണ് ഹൊസ്ദുര്‍ഗ് ഉപജില്ല ശാസ്‌ത്രോത്സവവും നടക്കുന്നുണ്ട്. രണ്ട് മേളകളിലും പങ്കെടുക്കുന്ന കുട്ടികളുണ്ട്. വിദ്യാഭ്യാസവകുപ്പിന്‍റെ ഭാഗത്തുനിന്നും കൃത്യമായ ആസൂത്രണം ഇല്ലാത്തതിനാലാണ് കുട്ടികളുടെ അവസരങ്ങള്‍ ഇല്ലാതാക്കുന്ന ഇത്തരം പിഴവുകള്‍ സംഭവിക്കാന്‍ കാരണമാകുന്നതെന്നാണ് ആരോപണമുയരുന്നത്. പല ജില്ലകളിലും കായികാധ്യാപകരുടെ നിസഹകരണം മേളകളുടെ നടത്തിപ്പിനെ വലിയ തോതില്‍ ബാധിച്ചിരുന്നു. എന്നാല്‍ കാസര്‍ഗോട്ടെ ഉപജില്ല കായികമേളകളില്‍ കായികാധ്യാപകര്‍ സജീവമായിരുന്നതിനാല്‍ ജില്ലാ കായികമേളയിലും അതു തുടരുമെന്നാണ് പ്രതീക്ഷിക്കുന്നത്. പരിമിതിയിലും കായികമേളയുടെ വിജയത്തിനായി ബാനം ഒരുങ്ങി ബാനം: ബാനം ഗവ.ഹൈസ്‌കൂളിന്‍റെ ആതിഥേയത്വത്തില്‍ നീലേശ്വം ഇഎഎസ് സ്റ്റേഡിയത്തില്‍ നടക്കുന്ന റവന്യൂ ജില്ലാ കായികമേള വിജയിപ്പിക്കാന്‍ ബാനം ഗ്രാമം ഒരുങ്ങി. പരിമിതമായ സാഹചര്യങ്ങളിലും കായികമേളയുടെ നടത്തിപ്പ് കുറ്റമറ്റതാക്കാന്‍ ഇന്നലെ സ്‌കൂളില്‍ നടന്ന യോഗം തീരുമാനിച്ചു. നൂറോളം പേര്‍ യോഗത്തില്‍ പങ്കെടുത്തു. കായികമേളയ്ക്കു മുന്നോടിയായി നാളെ ദീപശിഖാ പ്രയാണം നടക്കും. കഴിഞ്ഞ വര്‍ഷത്തെ ആതിഥേയരായ ചായ്യോത്ത് ജിഎച്ച്എസ്എസില്‍ നിന്നും രാവിലെ കൊളുത്തി കൈമാറുന്ന ദീപശിഖ ബാനത്തെ ദേശീയ, സംസ്ഥാന കായികതാരങ്ങളുടെ നേതൃത്വത്തില്‍ ബാനം സ്‌കൂളില്‍ എത്തിക്കും. വഴിയില്‍ വിവിധ സ്‌കൂളുകളില്‍ ദീപശിഖയ്ക്ക് സ്വീകരണമൊരുക്കും. വൈകുന്നേരത്തോടെ മേള നടക്കുന്ന ഇഎംഎസ് സ്റ്റേഡിയത്തില്‍ ദീപശിഖാ പ്രയാണം എത്തിച്ചേരും. 115 ഇനങ്ങളിലായി വിവിധ വിഭാഗങ്ങളില്‍ പെടുന്ന 1500 ലധികം കായികതാരങ്ങള്‍ മേളയില്‍ മാറ്റുരയ്ക്കും. പിടിഎ പ്രസിഡന്റ് പി. രാജീവന്‍ അധ്യക്ഷതവഹിച്ചു. പരപ്പ ബ്ലോക്ക് പഞ്ചായത്ത് വൈസ്പ്രസിഡന്‍റ് കെ. ഭൂപേഷ്, വാര്‍ഡ് മെംബര്‍ പി. ഗോപാലകൃഷ്ണന്‍, പി. ദിവാകരന്‍, ബാനം കൃഷ്ണന്‍, കെ.കെ. കുഞ്ഞിരാമന്‍, കെ.എന്‍. ഭാസ്‌കരന്‍, വിജയന്‍ മുണ്ടാത്ത്, പി.കെ. ബാലചന്ദ്രന്‍, അനൂപ് പെരിയല്‍, മുഖ്യാധ്യാപിക സി. കോമളവല്ലി, അനിത മേലത്ത് എന്നിവര്‍ പ്രസംഗിച്ചു.

ദേശസ്‌നേഹത്തിന്‍റെ കഥ പറയുന്ന ദാരുശില്പങ്ങള്‍ കാണാന്‍ ചരിത്ര വിദ്യാര്‍ഥികള്‍ എത്തി

കാഞ്ഞങ്ങാട്: നെഹ്‌റു ആര്‍ട്‌സ് കോളജിലെ രണ്ടാം വര്‍ഷ ബിരുദ വിദ്യാർഥികള്‍ പ്രശസ്ത സ്വതന്ത്ര്യ സമരസേനാനി എ.സി. കണ്ണന്‍നായരുടെ ഓര്‍മകള്‍ നിറഞ്ഞുനില്‍ക്കുന്ന, അദ്ദേഹത്തിന്‍റെ സ്വാതന്ത്ര്യ സമര പ്രവര്‍ത്തനങ്ങളുടെ കേന്ദ്രമായിരുന്ന കാഞ്ഞങ്ങാട് അതിയാമ്പൂരിലെ പത്തായപ്പുര മാളിക സന്ദര്‍ശിച്ചു. ദേശീയതയുടെ പ്രതീകങ്ങള്‍ ദാരുശില്പങ്ങളായി കൊത്തിവച്ച പ്രധാന വാതിലിന്‍റെ കട്ടിലയും മുകള്‍ നിലയിലെ മേല്‍ക്കൂരയുടെ അടിഭാഗവും അദ്ഭുതത്തോടെയാണ് വിദ്യാർഥികള്‍ വീക്ഷിച്ചത്. മഹാത്മാഗാന്ധിയും സര്‍ദാര്‍ പട്ടേലും കെ. കേളപ്പനും ഭാരതാംബയും ദാരുശില്പങ്ങളായി ഇന്നും ജ്വലിച്ചു നില്‍ക്കുന്നതിലൂടെ എ.സി. കണ്ണന്‍ നായരുടെ ദേശസ്‌നേഹത്തിന്‍റെ ആഴം മനസിലാക്കുന്നതിന് വിദ്യാർഥികള്‍ക്ക് സാധിച്ചു. ദാരുശില്പങ്ങളോടൊപ്പം വരച്ചുവച്ച ചര്‍ക്കകളും ഉച്ചനീചത്വങ്ങള്‍ക്കെതിരെയുള്ള വരകളും രാജ്യസ്‌നേഹത്തിന്‍റെ തെളിവുകളായി ഇന്നും നിലനില്‍ക്കുന്നു. സ്വാതന്ത്ര്യസമര കാലഘട്ടത്തില്‍ എ.സി. കണ്ണന്‍ നായരുടെ നിര്‍ദേശപ്രകാരം പ്രശസ്ത ശില്‍പി കണ്ണന്‍ കേരളവര്‍മനാണ് ദാരുശില്പങ്ങള്‍ കൊത്തിവച്ചത്. ആയിരത്തിത്തൊള്ളായിരത്തി മുപ്പതുകളിലും നാല്പതുകളിലും കേരളത്തിലെ പ്രശസ്ത സ്വാതന്ത്ര്യസമര സേനാനികള്‍ക്കെല്ലാം അഭയകേന്ദ്രവും സമരകാലഘട്ടങ്ങളില്‍ കേരളത്തിലെ ദേശീയ നേതാക്കള്‍ ഒളിവില്‍ താമസിച്ചിരുന്ന കേന്ദ്രവും കൂടിയായിരുന്നു പിന്നീട് ഭവനമായി ഉപയോഗിച്ചു വരുന്ന ഈ പത്തായപ്പുര മാളിക. ചരിത്രാധ്യാപകരായ ഡോ. നന്ദകുമാര്‍ കോറോത്ത്, സി.പി. രാജീവന്‍ എന്നിവര്‍ ചരിത്ര സ്മാരകം വിദ്യാർഥികള്‍ക്ക് പരിചയപ്പെടുത്തികൊടുത്തു. എ.സി. കണ്ണന്‍ നായരുടെ ബന്ധുക്കളായ പി.കെ. ബാലഗോപാല്‍, കെ.ടി. പ്രവീണ്‍കുമാര്‍, കെ.കെ. ലക്ഷ്മി എന്നിവര്‍ കേഡറ്റുകളുമായി സംവദിച്ചു. എ.സി. കണ്ണന്‍ നായരുടെ ഭവനത്തില്‍ നിന്ന് ലഭിച്ച ഡല്‍ഹിയിലെ ജവഹര്‍ലാല്‍ നെഹ്‌റു സര്‍വകലാശാലയിലെ അമൂല്യ ഗ്രന്ഥമായി സൂക്ഷിച്ചിരിക്കുന്ന എ.സി. കണ്ണന്‍ നായരുടെ ഡയറിക്കുറിപ്പുകളില്‍ നിന്നും ലഭ്യമായ അറിവുകള്‍ കോര്‍ത്താണ് കേരളത്തിലെ ദേശീയ സ്വാതന്ത്ര്യ സമരത്തിന്‍റെ നിരവധി ചരിത്രഗ്രന്ഥങ്ങള്‍ തയാറാക്കിയിട്ടുള്ളത്.

പൾസ് പോളിയോ പ്രതിരോധമരുന്ന് വിതരണം ഇന്ന്

കാസർഗോഡ്: ജില്ലയിൽ ഈ വർഷത്തെ പൾസ്‌ പോളിയോ പ്രതിരോധമരുന്ന് വിതരണത്തിന്‍റെ ജില്ലാതല ഉദ്‌ഘാടനം ഇന്ന് രാവിലെ 8:30 ന് പള്ളിക്കര കുടുംബാരോഗ്യ കേന്ദ്രത്തിൽ സി.എച്ച്.കുഞ്ഞമ്പു എംഎൽഎ നിർവഹിക്കും. ജില്ലയിലെ അങ്കണവാടികൾ, സ്കൂളുകൾ, ആരോഗ്യകേന്ദ്രങ്ങൾ, ബസ്‌ സ്റ്റാൻഡുകൾ, റെയിൽവേ സ്റ്റേഷനുകൾ തുടങ്ങിയ ഇടങ്ങളിൽ ബൂത്തുകൾ സ്ഥാപിച്ച് പരീശീലനം ലഭിച്ച ആരോഗ്യ പ്രവർത്തകർ മുഖേന അഞ്ചു വയസിന് താഴെ പ്രായമുള്ള കുട്ടികൾക്ക് പോളിയോ പ്രതിരോധ തുള്ളിമരുന്ന് ലഭ്യമാക്കും. ജില്ലയിലെ 1,08,217 കുട്ടികൾക്കും അതിഥി തൊഴിലാളികളുടെ 922 കുട്ടികൾക്കും തുള്ളിമരുന്ന് നൽകുന്നതിനായി 1261 പോളിയോ ബൂത്തുകളാണ് സജ്ജീകരിച്ചിട്ടുള്ളത്. രാവിലെ എട്ടു മുതൽ വൈകിട്ട് അഞ്ചു വരെയാണ് ബൂത്തുകൾ പ്രവർത്തിക്കുക. ഏതെങ്കിലും കാരണവശാൽ ഇന്ന് വാക്സിൻ ലഭിക്കാത്ത കുട്ടികൾക്ക് വരുംദിവസങ്ങളിൽ വോളണ്ടിയർമാർ വീടുകളിലെത്തി പോളിയോ വാക്സിൻ നൽകും.

കോൺഗ്രസ് പ്രതിഷേധ പ്രകടനം നടത്തി

രാജപുരം: കെപിസിസി വർക്കിംഗ് പ്രസിഡന്‍റ് ഷാഫി പറമ്പിൽ എംപി ഉൾപ്പെടെയുള്ള കോൺഗ്രസ് നേതാക്കളെ മർദിച്ച പോലീസ് നടപടിക്കെതിരേ ബളാൽ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ കോളിച്ചാൽ ടൗണിൽ പ്രതിഷേധ പ്രകടനവും പൊതുയോഗവും നടത്തി. ബ്ലോക്ക് പ്രസിഡന്‍റ് മധുസൂദനൻ ബാലൂർ, കെപിസിസി അംഗം മീനാക്ഷി ബാലകൃഷ്ണൻ, ഡിസിസി വൈസ് പ്രസിഡന്‍റ് ബി.പി.പ്രദിപ് കുമാർ, ജനറൽ സെക്രട്ടറി ഹരീഷ് പി.നായർ , യൂത്ത് കോൺഗ്രസ് ജില്ലാ ജനറൽ സെക്രട്ടറി വിനോദ് കപ്പിത്താൻ, മണ്ഡലം പ്രസിഡന്‍റുമാരായ എം.എം സൈമൺ, കെ.ജെ ജെയിംസ്, വി.ബാലകൃഷ്ണൻ ബാലൂർ, ബ്ലോക്ക് ഭാരവാഹികളായ വി.മാധവൻ നായർ, സി.കൃഷ്ണൻ നായർ, എ.കുഞ്ഞിരാമൻ, വി.കെ.ബാലകൃഷ്ണൻ , പി.എ.ആലി, വിഘ്നേശ്വര ഭട്ട്, മധുസൂദനൻ റാണിപുരം, രാജീവ് തോമസ് എന്നിവർ നേതൃത്വം നൽകി. ഭീമനടി: ഷാഫി പറമ്പിൽ എംപി ഇൾപ്പെടെയുള്ള നേതാക്കളെ മർദിച്ച പോലീസ് നടപടിക്കെതിരേ പ്രതിഷേധിച്ച് എളേരി, ഭീമനടി മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ ഭീമനടി ടൗണിൽ പ്രതിഷേധ പ്രകടനം നടത്തി. എളേരി മണ്ഡലം പ്രസിഡന്‍റ് എ.വി.ഭാസ്കരൻ, ഭീമനടി മണ്ഡലം പ്രസിഡന്‍റ് സി.എ.ബാബു, യൂത്ത് കോൺഗ്രസ് ജില്ലാ വൈസ് പ്രസിഡന്‍റ് രാജേഷ് തമ്പാൻ, മുസ്ലിം ലീഗ് നേതാവ് അബ്ദുൾ റഹ്മാൻ, ബ്ലോക്ക് കോൺഗ്രസ് ജനറൽ സെക്രട്ടറി ജി.മുരളി, പി.ടി.ജോസഫ്, കെ.സി.കുഞ്ഞികൃഷ്ണൻ, യൂത്ത് കോൺഗ്രസ് മണ്ഡലം പ്രസിഡന്‍റ് ജോബിൻ ജോസ്, വെസ്റ്റ് എളേരി പഞ്ചായത്ത് അംഗം കെ.കെ.തങ്കച്ചൻ, ലോറൻസ് ജോസഫ്, എൽ.കെ.സമീർ, കെ.വി.രാജീവൻ, സെബാസ്റ്റ്യൻ പാരടിയിൽ, സുധാകരൻ തളാപ്പൻ, രാജൻ കോയിപുറത്ത് എന്നിവർ നേതൃത്വം നൽകി. തൃക്കരിപ്പൂർ: ഷാഫി പറമ്പിൽ എംപിക്ക് നേരെയുണ്ടായ പോലീസ് അതിക്രമത്തിൽ പ്രതിഷേധിച്ച് ബ്ലോക്ക് കോൺഗ്രസ്‌ കമ്മിറ്റിയുടെ നേതൃത്വത്തിൽ തൃക്കരിപ്പൂർ ടൗണിൽ പ്രകടനം നടത്തി. ഡിസിസി വൈസ് പ്രസിഡന്‍റ് കെ.കെ.രാജേന്ദ്രൻ, ബ്ലോക്ക് കോൺഗ്രസ്‌ പ്രസിഡന്റ് കെ.വി. വിജയൻ, കെപിസിസി അംഗം കെ.വി. ഗംഗാധരൻ, ഡികെടിഎഫ് സംസ്ഥാന ജനറൽ സെക്രട്ടറി സി. രവി, പി. കുഞ്ഞിക്കണ്ണൻ, പി.വി. കണ്ണൻ, കെ. ശ്രീധരൻ, കെ. സിന്ധു, എം. രജീഷ് ബാബു, കെ. സജീവൻ, കെ. അശോകൻ, എ.ജി.കമറുദീൻ, കെ.പി.ദിനേശൻ, കെ.വി.ജതീന്ദ്രൻ, കെ.പദ്മനാഭൻ, പി.വി. പദ്മജ, പി.കെ.താജുദ്ധീൻ, ഇ.രാജേന്ദ്രൻ, രാജു മുട്ടത്ത്, ഷാജി തൈക്കീൽ, വി.വി. അനിൽകുമാർ, എം. ലക്ഷ്മണൻ, സി. ശ്രീധരൻ, കെ. അശോകൻ എന്നിവർ നേതൃത്വം നൽകി.

കുടുംബശ്രീയുടെ ബാക്ക് ടു ഫാമിലി പദ്ധതിക്ക് തുടക്കം

മടിക്കൈ: ജില്ലാ പഞ്ചായത്തിന്‍റെ സഹകരണത്തോടെ കുടുംബശ്രീ ജില്ലാ മിഷൻ നടപ്പിലാക്കുന്ന ബാക്ക് ടു ഫാമിലി - അയൽക്കൂട്ടങ്ങളിലൂടെ കുടുംബങ്ങളിലേക്ക് പദ്ധതിക്ക് തുടക്കമായി. ജില്ലാതല ഉദ്ഘാടനം മടിക്കൈ ഗവ.വൊക്കേഷണൽ ഹയർ സെക്കൻഡറി സ്കൂളിൽ സംഗീതനാടക അക്കാദമി വൈസ് ചെയർപേഴ്സൺ പുഷ്പവതി നിർവഹിച്ചു. കാലഘട്ടത്തിനനുസരിച്ചുള്ള മാറ്റങ്ങൾ കുട്ടികളുടെ ലക്ഷ്യബോധത്തെ ബാധിക്കാതിരിക്കാനുള്ള ജാഗ്രത രക്ഷിതാക്കൾക്ക് ഉണ്ടാകണമെന്നും കുട്ടികളുടെ സൗഹൃദങ്ങളെ ജാഗ്രതയോടെ വീക്ഷിക്കണമെന്നും അവർ പറഞ്ഞു. എഴുത്തുകാരൻ സുറാബ് മുഖ്യാതിഥിയായി. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ അധ്യക്ഷത വഹിച്ചു. കുടുംബശ്രീ ജില്ലാ മിഷൻ കോ-ഓർഡിനേറ്റർ രതീഷ് പിലിക്കോട് പദ്ധതി വിശദീകരിച്ചു. എഴുത്തുകാരി ബിന്ദു മരങ്ങാട്, ബ്ലോക്ക് പഞ്ചായത്ത് പ്രസിഡന്‍റ് എം.കെ.വിജയൻ, ജില്ലാ പഞ്ചായത്ത് ആരോഗ്യ-വിദ്യാഭ്യാസ സ്ഥിരം സമിതി അധ്യക്ഷ എസ്.എൻ.സരിത, ജില്ലാ പഞ്ചായത്ത് അംഗം സി.ജെ.സജിത്ത്, ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.വി.ശ്രീലത, പഞ്ചായത്ത് വൈസ് പ്രസിഡന്‍റ് വി.പ്രകാശൻ എന്നിവർ പ്രസംഗിച്ചു. സ്ത്രീ ശാക്തീകരണം, സുരക്ഷിത ബാല്യം, മികവാർന്ന രക്ഷാകർതൃത്വം, കുടുംബാരോഗ്യം, കുട്ടികളുടെ അവകാശങ്ങൾ എന്നീ ലക്ഷ്യങ്ങൾ മുൻനിർത്തിയാണ് പദ്ധതി നടപ്പാക്കുന്നത്. അയൽക്കൂട്ടങ്ങളിലൂടെയും പൊതുവിദ്യാലയങ്ങളിലെ മദർ പിടിഎകളുടെ പങ്കാളിത്തത്തോടെയുമാണ് പദ്ധതി പ്രാവർത്തികമാക്കുക.

വനംവകുപ്പ് വാച്ചർക്ക് തെരുവുനായയുടെ കടിയേറ്റു

റാണിപുരം: വനംവകുപ്പ് വാച്ചർക്ക് വീടിനുള്ളിൽ കയറിയ തെരുവുനായയുടെ കടിയേറ്റു. റാണിപുരം ഇക്കോ ടൂറിസം കേന്ദ്രത്തിൽ ജോലിചെയ്യുന്ന പന്തിക്കാല്‍ സ്വദേശി പ്രദീപിനാണ് കടിയേറ്റത്. വെള്ളിയാഴ്ച രാവിലെ ജോലികഴിഞ്ഞ് വീട്ടിലെത്തി മുറിയില്‍ കിടന്നുറങ്ങുന്നതിനിടയിലാണ് തുറന്നുകിടന്ന വാതിലിലൂടെ അകത്തുകടന്ന നായ ആക്രമിച്ചത്. വലതുകൈയിൽ ആഴത്തില്‍ മുറിവേറ്റ് രക്തം വാര്‍ന്ന നിലയിൽ ഉടനടി കാഞ്ഞങ്ങാട് ജില്ലാ ആശുപത്രിയിലെത്തിക്കുകയായിരുന്നു.

ഫിലാറ്റലിക് എക്സിബിഷനും ആധാർ മേളയും നടത്തി

എളേരിത്തട്ട്: ലോക തപാൽ ദിനത്തോടനുബന്ധിച്ച് ഭാരതീയ തപാൽ വകുപ്പ് കാസർഗോഡ് ഡിവിഷന്‍റെയും എളേരിത്തട്ട് ഇകെഎൻഎം ഗവ.കോളജ് എൻഎസ്എസ് യൂണിറ്റിന്‍റെയും സംയുക്താഭിമുഖ്യത്തിൽ ഫിലാറ്റലിക് (സ്റ്റാബ്) എക്സിബിഷനും തപാൽ-ആധാർ മേളയും നടത്തി. കോളജ് പ്രിൻസിപ്പൽ ഡോ. മാത്യുസ് പ്ലാമൂട്ടിൽ ഉദ്ഘാടനം ചെയ്തു. പോസ്റ്റൽ സൂപ്രണ്ട് പി.ആർ.ഷീല മുഖ്യാതിഥിയായി. നീലേശ്വരം സബ ഡിവിഷൻ പോസ്റ്റൽ ഇൻസ്‌പെക്ടർ കെ.പി.റിജു, ഇന്ത്യ പോസ്റ്റ് പേയ്മെന്‍റ് ബാങ്ക് കാസർഗോഡ് ബ്രാഞ്ച് സീനിയർ മാനേജർ മാനുസ് സി ജോർജ്, പിഎൽഐ ഡെവലപ്മെന്‍റ് ഓഫീസർ വി.വി.ജയവല്ലി, ഫിലാറ്റലിസ്റ്റ് ബാലൻ അമ്പലത്തറ, കോളജ് എൻഎസ്എസ് പ്രോഗ്രാം ഓഫീസർമാരായ ഡി.എസ്.ചിഞ്ചുശ്രീ, കെ സുപ്രഭ എന്നിവർ പ്രസംഗിച്ചു. തപാൽ വകുപ്പിന്‍റെയും ഇന്ത്യാ പോസ്റ്റ് പയ്മെന്‍റ് ബാങ്കിന്‍റെയും വിവിധ സമ്പാദ്യ, ഇൻഷുറൻസ് പദ്ധതികളെക്കുറിച്ച് പരിപാടിയിൽ വിശദീകരിച്ചു. ഫിലാറ്റലിസ്റ്റ് ബാലൻ അമ്പലത്തറയുടെ ശേഖരത്തിലുള്ള സ്റ്റാമ്പുകളുടെ പ്രദർശനവും വിദ്യാർഥികൾക്കും പൊതുജനങ്ങൾക്കുമായി ആധാർ അപ്‌ഡേഷൻ ക്യാമ്പും നടത്തി.

തദ്ദേശസ്ഥാപനങ്ങളിലെ സംവരണ ‌ വാർഡുകളുടെ നറുക്കെടുപ്പ് നാളെ മുതൽ

കാസർഗോഡ്: തദ്ദേശ സ്വയംഭരണ സ്ഥാപനങ്ങളിലേക്കുളള തെരഞ്ഞെടുപ്പിനു മുന്നോടിയായി ഇത്തവണത്തെ സംവരണ വാർഡുകൾ നിശ്ചയിക്കുന്നതിനുള്ള നറുക്കെടുപ്പുകൾ നാളെ തുടങ്ങും. വിവിധ പാർട്ടികളിൽ സ്ഥാനാർഥിത്വം പ്രതീക്ഷിച്ച് കാത്തിരിക്കുന്ന പ്രാദേശിക നേതാക്കളെ സംബന്ധിച്ചേടത്തോളം നിർണായകമാണ് സംവരണ വാർഡുകളുടെ നറുക്കെടുപ്പ്. കാഞ്ഞങ്ങാട്,കാറഡുക്ക, മഞ്ചേശ്വരം ബ്ലോക്കുകൾക്ക് കീഴിലുളള ഗ്രാമ പഞ്ചായത്ത് സംവരണ വാർഡുകളുടെ നറുക്കെടുപ്പാണ് നാളെ നടക്കുക. നീലേശ്വരം, പരപ്പ, കാസർഗോഡ് ബ്ലോക്കുകൾക്ക് കീഴിലുള്ള ഗ്രാമ പഞ്ചായത്ത് സംവരണ വാർഡുകളുടെ നറുക്കെടുപ്പ് 14 നു നടക്കും. ബ്ലോക്ക് പഞ്ചായത്തുകളിലെ സംവരണ വാർഡുകളുടെ നറുക്കെടുപ്പ് 18 നും ജില്ലാ പഞ്ചായത്ത് സംവരണ വാർഡുകളുടെ നറുക്കെടുപ്പ് 21 നുമാണ്. രാവിലെ 10 മുതൽ കളക്ടറേറ്റ് കോൺഫറൻസ് ഹാളിൽ വച്ചാണ് നറുക്കെടുപ്പ് നടക്കുക. രാഷ്ട്രീയ കക്ഷികൾക്ക് ഒരു പഞ്ചായത്തിൽനിന്ന് പരമാവധി രണ്ട് പ്രതിനിധികളെ വീതം പങ്കെടുപ്പിക്കാം. നറുക്കെടുപ്പിനെത്തുന്നവർ അതത് കക്ഷികളുടെ ജില്ലാ പ്രസിഡന്‍റ്, സെക്രട്ടറി എന്നിവർ ചുമതലപ്പെടുത്തിയ സാക്ഷ്യപത്രം ഹാജരാക്കണമെന്നും ജില്ലാ കളക്ടർ അറിയിച്ചു.

തട്ടിപ്പുകാർ കൈക്കലാക്കിയ 50 ലക്ഷം രൂപ തിരികെ പിടിച്ച് സൈബർ പോലീസ്

കാഞ്ഞങ്ങാട്: വയോധികരായ ദമ്പതികളെ ഡിജിറ്റൽ അറസ്റ്റ് എന്നുപറഞ്ഞ് ഭീഷണിപ്പെടുത്തി തട്ടിപ്പുകാർ കൈക്കലാക്കിയ 50 ലക്ഷം രൂപ കാസർഗോഡ് സൈബർ പോലീസ് തിരികെ പിടിച്ചു. ആകെ 2.40 കോടി രൂപയാണ് സൈബർ തട്ടിപ്പുകാർ തട്ടിയെടുത്തത്. ഇൻഡസ് ഇൻഡ് ബാങ്കിന്‍റെ ബിഹാറിലെ സമ്പത്ചക്ക് ബ്രാഞ്ചിൽ നിന്നാണ് 50 ലക്ഷം രൂപ തിരികെ പിടിച്ചത്. കാഞ്ഞങ്ങാട് സ്വദേശികായ റിട്ട. മുഖ്യാധ്യാപകനും റിട്ട. ജില്ലാ ഹോമിയോ മെഡിക്കൽ ഓഫീസറായ ഭാര്യയുമാണ് സൈബർ തട്ടിപ്പിനിരയായത്. കഴിഞ്ഞ ഓഗസ്റ്റ് 12 മുതൽ 20 വരെ തീയതികളിൽ പല തവണയായിട്ടാണ് പണം തട്ടിയത്. ദമ്പതികൾ മണി ലോണ്ടറിംഗ് കേസിൽ ഉൾപ്പെട്ടതായി പറഞ്ഞു വിശ്വസിപ്പിച്ചാണ് ഡിജിറ്റൽ അറസ്റ്റ് ചെയ്യുകയാണെന്ന് പറഞ്ഞത്. തുടർന്ന് ഇവരുടെ അക്കൗണ്ടിലെ പണം മുഴുവനും തട്ടിപ്പുകാർ പറഞ്ഞ അക്കൗണ്ടിലേക്ക് അയപ്പിക്കുകയായിരുന്നു. പിന്നീട് പണം നഷ്ടമായതായി മനസിലായതോടെ കാസർഗോഡ് സൈബർ പോലീസിനെ സമീപിക്കുകയായിരുന്നു. പോലീസിന്‍റെ ഇടപെടലിലൂടെ ഇതുവരെ ബന്ധപ്പെട്ട അക്കൗണ്ടിൽനിന്ന് 57 ലക്ഷം രൂപ മരവിപ്പിക്കാൻ കഴിഞ്ഞിട്ടുണ്ട്. ഇതിൽ 50 ലക്ഷം രൂപയാണ് കോടതി മുഖേന ഡിഡി ആയി തിരിച്ചെത്തിച്ചത്. കാസർഗോഡ് സൈബർ പോലീസ് സ്റ്റേഷൻ എസ്എച്ച്ഒ യു.പി.വിപിന്‍റെ മേൽനോട്ടത്തിൽ എസ്ഐ രവീന്ദ്രൻ, കെ.ബി.ഷിനു, പ്രശാന്ത്, രഞ്ജിത്ത്, സുധേഷ്‌ എന്നിവരടങ്ങിയ സംഘമണ് കേസന്വേഷണം നടത്തിയത്.

കുറ്റിക്കോലിൽ വ്യാജരേഖകൾ ഉപയോഗിച്ച് വോട്ടർ പട്ടികയിൽ പേരുചേർത്തെന്ന ആരോപണവുമായി കോൺഗ്രസ്

കുറ്റിക്കോൽ: പഞ്ചായത്തിൽ വ്യാജരേഖകൾ ഉപയോഗിച്ച് വോട്ടർ പട്ടികയിൽ വ്യാപകമായ ക്രമക്കേട് നടത്തിയെന്ന ആരോപണവുമായി മണ്ഡലം കോൺഗ്രസ് കമ്മിറ്റി. 01-01-2007 ന് മുമ്പ് ജനിച്ചവർക്കു മാത്രമേ വോട്ടർ പട്ടികയിൽ പേര് ചേർക്കാൻ അവകാശമുള്ളൂ എന്നിരിക്കേ ജനന സർട്ടിഫിക്കറ്റും എസ്എസ്എൽസി ബുക്കിലെ ജനനതീയതിയും തിരുത്തി സിപിഎം കുടുംബങ്ങളിലെ പ്രായപൂർത്തിയാകാത്തവരുടെ പേരുകൾ വോട്ടർ പട്ടികയിൽ വ്യാപകമായി ഉൾപ്പെടുത്തിയതായാണ് ആരോപണം. പഞ്ചായത്ത് സെക്രട്ടറിയുടെ അറിവോടുകൂടിയാണ് ഇത് നടത്തിയതെന്ന് കോൺഗ്രസ് നേതാക്കളായ മുളിയാർ ബേ്ലാക്ക് കോൺഗ്രസ് പ്രസിഡന്‍റ് പവിത്രൻ സി. നായർ, കുറ്റിക്കോൽ മണ്ഡലം പ്രസിഡന്‍റ് സന്തോഷ് അരമന എന്നിവർ ആരോപിച്ചു. ശക്തമായ മത്സരങ്ങൾ നടക്കുന്ന വാർഡുകളിലാണ് അനർഹരെ ഉൾപ്പെടുത്തിയും വാർഡുകളുടെ അതിർത്തി മാപ്പുകൾ തിരുത്തിയും വ്യാപക ക്രമക്കേട് നടത്തിയിട്ടുള്ളതെന്ന് കോൺഗ്രസ് നേതാക്കൾ പറഞ്ഞു. കരിവേടകം പ്രദേശം ഉൾപ്പെടുന്ന 12-ാം വാർഡിൽ ഭാഗം 2 ക്രമനമ്പർ 100 ആയി നഴ്സിംഗ് വിദ്യാർഥിനിയുടെ പേരുൾപ്പെടുത്തിയത് വ്യാജരേഖ നിർമിച്ചാണ്. ഈ പെൺകുട്ടിയുടെ പിതാവ് പടുപ്പിലെ സിഐടിയു തൊഴിലാളി യൂണിയൻ നേതാവാണ്. പഞ്ചായത്ത് സെക്രട്ടറി സിപിഎം ലോക്കൽ സെക്രട്ടറിയുടെ കാറിൽ ചുറ്റിക്കറങ്ങിയാണ് ക്രമക്കേടുകൾക്ക് കൂട്ടുനിൽക്കുന്നത്. ഡിവൈഎഫ്ഐ കരിവേടകം വില്ലേജ് കമ്മിറ്റി പ്രസിഡന്‍റും പഞ്ചായത്തിലെ ടെക്നിക്കൽ അസിസ്റ്റന്‍റുമായ വ്യക്തിയുടെ നേതൃത്വത്തിലാണ് വോട്ടർപട്ടികയിൽ ക്രമക്കേടുകൾ നടത്തുന്നത്. ഇതുസംബന്ധിച്ച് പഞ്ചായത്ത് ജോയിന്‍റ് ഡയരക്ടർക്ക് നിരവധി തവണ പരാതികൾ നല്കിയിട്ടും യാതൊരുവിധ നടപടിയും നാളിതുവരെ സ്വീകരിച്ചിട്ടില്ല. വോട്ടർപട്ടികയിൽ പേരുൾപ്പെടുത്തുന്നതിനായി വ്യാജരേഖ നിർമിച്ചവർക്കെതിരേയും ഇതിന് ഒത്താശ ചെയ്തുകൊടുത്തവർക്കെതിരയും കേസെടുത്ത് നിയമനടപടികൾ സ്വീകരിക്കണമെന്നാവശ്യപ്പെട്ട് സംസ്ഥാന തെരഞ്ഞെടുപ്പ് കമ്മിഷൻ, ജില്ല കളക്ടർ, വിജിലൻസ് ഡിവൈഎസ്പി ബേഡകം പോലീസ് എന്നിവർക്ക് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പരാതി നല്കി.

വിവാദ മൈം: കുമ്പള ഉപജില്ലാ സ്കൂൾ കലോത്സവം ഏറ്റെടുക്കാൻ സ്കൂളുകൾക്ക് മടി

കാസർഗോഡ്: ജില്ലയിലെ മറ്റെല്ലാ ഉപജില്ലകളിലും സ്കൂൾ കലോത്സവങ്ങൾക്ക് വേദിയൊരുങ്ങിയിട്ടും കുമ്പള ഉപജില്ലയിലെ കലോത്സവം ഏറ്റെടുക്കാൻ സ്കൂളുകൾക്ക് മടി. പലസ്തീൻ വിഷയവുമായി ബന്ധപ്പെട്ട വിവാദ മൈം ഉപജില്ലാ കലോത്സവത്തിലും അവതരണത്തിനെത്തുമെന്ന ആശങ്കയാണ് സ്കൂളുകളെ പിന്നോട്ടു വലിക്കുന്നതെന്നാണ് സൂചന. ഇതിനു മറുപടിയായി ഒക്ടോബർ ഏഴിലെ ഹമാസ് ആക്രമണവും പഹൽഗാം സംഭവവുമൊക്കെ എതിർപക്ഷത്തുനിന്നും അവതരിപ്പിക്കപ്പെട്ടേക്കാമെന്നും അനിഷ്ടസംഭവങ്ങളെന്തെങ്കിലും ഉണ്ടായാൽ സ്കൂൾ അധികൃതരും അധ്യാപകരും ഉത്തരവാദിത്വം ഏറ്റെടുക്കേണ്ടിവരുമെന്നുമാണ് ആശങ്ക. കലോത്സവ നടത്തിപ്പിനെക്കുറിച്ച് ആലോചിക്കാൻ ഏതാനും ദിവസങ്ങൾക്കുമുമ്പ് ഉപജില്ലയിലെ മുഖ്യാധ്യാപകരുടെ യോഗം വിളിച്ചുചേർത്തപ്പോൾ ഇത്തവണ മുള്ളേരിയ ഗവ.ഹയർ സെക്കൻഡറി സ്കൂൾ കലോത്സവത്തിന് ആതിഥേയത്വം വഹിക്കണമെന്നായിരുന്നു വിദ്യാഭ്യാസവകുപ്പ് അധികൃതരുടെ നിർദേശം. എന്നാൽ ചില പ്രായോഗിക ബുദ്ധിമുട്ടുകളുള്ളതിനാൽ ഇത്തവണ കലോത്സവത്തിന്‍റെ ഉത്തരവാദിത്വത്തിൽ നിന്ന് ഒഴിവാക്കിത്തരണമെന്നായിരുന്നു മുള്ളേരിയ സ്കൂളിലെ മുഖ്യാധ്യാപകൻ നൽകിയ മറുപടി. എന്നിട്ടും മുള്ളേരിയ സ്കൂളിനെത്തന്നെ ആതിഥേയരായി നിശ്ചയിച്ചുകൊണ്ട് കഴിഞ്ഞദിവസം ജില്ലാ വിദ്യാഭ്യാസ ഉപഡയരക്ടറുടെ ഉത്തരവിറങ്ങി. ഇതിനു തൊട്ടുപിന്നാലെ സ്കൂൾ പിടിഎ യോഗം ചേർന്ന് ഇതിനെതിരായി വിദ്യാഭ്യാസ ഉപഡയരക്ടർക്ക് കത്തുനൽകാൻ തീരുമാനിച്ചിരിക്കുകയാണ്. സ്കൂൾ അധികൃതരുമായി ചർച്ച നടത്തി ആശങ്കകൾ ദൂരീകരിക്കാനാണ് ഇപ്പോൾ വിദ്യാഭ്യാസവകുപ്പ് അധികൃതരുടെ തീരുമാനം. ഉപജില്ലാ കലോത്സവത്തിന്‍റെ നടത്തിപ്പിനായി 12 ലക്ഷം രൂപയാണ് സർക്കാരിൽ നിന്ന് ആതിഥേയ വിദ്യാലയത്തിന് ലഭിക്കുക. എന്നാൽ ചുരുങ്ങിയത് 20 ലക്ഷം രൂപയെങ്കിലും ചെലവാകുമെന്നും ബാക്കി തുക പിടിഎയും നാട്ടുകാരും ചേർന്ന് വഹിക്കേണ്ടിവരുമെന്നും സ്പോൺസർമാരെ തേടി അലയേണ്ടിവരുമെന്നുമാണ് മിക്ക സ്കൂൾ അധികൃതരും പറയുന്നത്. ക്രമസമാധാന പ്രശ്നം സംബന്ധിച്ച ആശങ്ക ആരും പരസ്യമായി പറയുന്നില്ലെങ്കിലും കുമ്പള ഉപജില്ലയിൽ മാത്രം സാമ്പത്തിക ബാധ്യതയുടെ പേരിൽ സ്കൂളുകൾ ഒഴിഞ്ഞുനിൽക്കുന്നതിനു പിന്നിൽ മറ്റു കാരണങ്ങളുണ്ടെന്ന് വ്യക്തമാണ്. പ്രശ്നങ്ങളുണ്ടായാൽ അതിന്‍റെ ഉത്തരവാദിത്വം അധ്യാപകരുടെ മേൽ ചുമത്തി സർക്കാർ കൈയൊഴിയുമെന്ന ആശങ്കയാണ് അധ്യാപക സംഘടനകൾക്കും ഉള്ളത്.

യൂത്ത് കോൺഗ്രസ് ഡിവൈഎസ്പി ഓഫീസ് മാർച്ചിൽ സംഘർഷം

കാഞ്ഞങ്ങാട്: പേരാമ്പ്രയിൽ യുഡിഎഫ് പ്രതിഷേധത്തിനിടയിൽ കെപിസിസി വർക്കിംഗ് പ്രസിഡന്‍റ് ഷാഫി പറമ്പിൽ എംപിയെ പോലീസ് ക്രൂരമായി ആക്രമിച്ച് പരിക്കേൽപ്പിച്ചതിൽ പ്രതിഷേധിച്ച് യൂത്ത് കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ കാഞ്ഞങ്ങാട് ഡിവൈഎസ്പി ഓഫീസിലേക്ക് നടത്തിയ മാർച്ചിൽ സംഘർഷം. പഴയ ബസ് സ്റ്റാൻഡ് പരിസരത്തു നിന്നാരംഭിച്ച പ്രകടനം നഗരസഭാ ഓഫീസ് പരിസരത്ത് പോലീസ് തടഞ്ഞു. പ്രവർത്തകർ ബാരിക്കേഡ് മറിച്ചിടാൻ ശ്രമിച്ചതോടെ പോലീസ് ജലപീരങ്കി പ്രയോഗിക്കുകയായിരുന്നു. തുടർന്ന് പ്രവർത്തകർ പുതിയകോട്ട ജംഗ്ഷനിൽ റോഡ് ഉപരോധിച്ചതോടെ വീണ്ടും പോലീസുമായി ബലപ്രയോഗമായി. മണിക്കൂറുകളോളം നീണ്ട പ്രതിഷേധത്തിനൊടുവിൽ നേതാക്കൾ ഇടപെട്ട് പ്രവർത്തകരെ പിന്തിരിപ്പിക്കുകയായിരുന്നു. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ജോമോൻ ജോസ് പ്രതിഷേധ മാർച്ച് ഉദ്ഘാടനം ചെയ്തു ജില്ലാ പ്രസിഡന്‍റ് കെ.ആർ. കാർത്തികേയൻ അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് ബി.പി. പ്രദീപ്കുമാർ, മണ്ഡലം കോൺഗ്രസ് പ്രസിഡന്‍റ് പി.വി. ചന്ദ്രശേഖരൻ, യൂത്ത് കോൺഗ്രസ് സംസ്ഥാന സെക്രട്ടറി ഉനൈസ് ബേഡകം, ജില്ലാ ഭാരവാഹികളായ മാർട്ടിൻ ജോർജ്, വിനോദ് കപ്പിത്താൻ, രതീഷ് കാട്ടുമാടം,സുജിത്ത് തച്ചങ്ങാട്, റാഫി അടൂർ, ഗിരികൃഷ്ണൻ കൂടാല, ശിവപ്രസാദ് അറുവാത്ത്, അക്ഷയ എസ്.ബാലൻ, രേഖ രതീഷ്, അനൂപ് കല്ല്യോട്ട്, രജിത രാജൻ, നിയോജകമണ്ഡലം പ്രസിഡന്‍റുമാരായ ഷിബിൻ ഉപ്പിലിക്കൈ, ജുനൈദ് ഉറുമി, വസന്തൻ ബന്തടുക്ക, ജോബിൻ കമ്പല്ലൂർ, കെഎസ് യു സംസ്ഥാന ജനറൽ സെക്രട്ടറി പ്രവാസ് ഉണ്ണിയാടൻ, ജില്ലാ പ്രസിഡന്‍റ് ജവാദ് പുത്തൂർ, സ്വരാജ് കാനത്തൂർ, കെ.പി.ബാലകൃഷ്ണൻ, വി.വി.നിഷാന്ത് എന്നിവർ നേതൃത്വം നൽകി.

മാനസികാരോഗ്യദിനം ജില്ലാതല ഉദ്ഘാടനം

വെള്ളരിക്കുണ്ട്: ലോക മാനസികാരോഗ്യദിനത്തിന്‍റെ ജില്ലാതല ഉദ്ഘാടനം വെള്ളരിക്കുണ്ട് വ്യാപാരഭവന്‍ ഓഡിറ്റോറിയത്തില്‍ പഞ്ചായത്ത് പ്രസിഡന്‍റ് രാജു കട്ടക്കയം നിര്‍വഹിച്ചു. പരപ്പ ബ്ലോക്ക് പഞ്ചായത്തംഗം സി. രേഖ അധ്യക്ഷത വഹിച്ചു. ജില്ലാ സര്‍വെയ്‌ലന്‍സ് ഓഫീസര്‍ ഡോ. ബി. സന്തോഷ് മുഖ്യപ്രഭാഷണം നടത്തി. ജില്ലാശുപത്രി സൈക്യാട്രിസ്റ്റ് ഡോ. കെ.പി. അപര്‍ണ ക്ലാസെടുത്തു. ആരോഗ്യകാര്യ സ്ഥിരംസമിതി അധ്യക്ഷന്‍ ടി. അബ്ദുൾ ഖാദര്‍, അംഗങ്ങളായ ജെസി ചാക്കോ, വിന്‍സി ജെയിന്‍, ഇ. പദ്മാവതി, ബ്ലോക്ക് കുടുംബാരോഗ്യകേന്ദ്രം മെഡിക്കല്‍ ഓഫീസര്‍ ഡോ. വി. ഷിനില്‍, ടെക്നിക്കല്‍ അസിസ്റ്റന്‍റ് ബിമല്‍ ഭൂഷണ്‍, ജില്ലാ എഡ്യുക്കേഷന്‍ മീഡിയ ഓഫീസര്‍ അബ്ദുള്‍ ലത്തീഫ് മഠത്തില്‍, ഹെല്‍ത്ത് ഇന്‍സ്‌പെക്ടര്‍ സാജു സെബാസ്റ്റ്യന്‍ എന്നിവര്‍ പ്രസംഗിച്ചു.

തട്ടുകടകളില്‍ ശുചിത്വപരിശോധന നടത്തി

കാസര്‍ഗോഡ്: തട്ടുകടകളില്‍ ആരോഗ്യവകുപ്പും ഫുഡ് സേഫ്റ്റിയും നഗരസഭയും രാത്രികാല ശുചിത്വ പരിശോധന നടത്തി. കഴിഞ്ഞ രാത്രിയിലാണ് ഉദ്യോഗസ്ഥരുടെ സംഘം കാസര്‍ഗോഡ് നഗരസഭയിലെ തട്ടുകടകളിലെ ശുചിത്വ പരിശോധന നടത്തിയത്. പരിശോധിച്ച 12 കടകളില്‍ ഏഴെണ്ണത്തിനും ശുചിത്വനിലവാരമുയര്‍ത്താന്‍ വേണ്ട നോട്ടീസ് നല്‍കി. പുകയില നിയന്ത്രണ നിയമം ലംഘിച്ച നാലു കടകളില്‍ പിഴ ചുമത്തി. നഗരത്തിലെ തട്ടുകടകളെക്കുറിച്ച് നിരവധി പരാതികളാണ് ആരോഗ്യവകുപ്പിന് ലഭിക്കുന്നതെന്ന് ജില്ലാ മെഡിക്കല്‍ ഓഫീസര്‍ ഡോ. എ.വി. രാംദാസ് അറിയിച്ചു. ജില്ലയിലെ പലഭാഗത്തു നിന്നും ഇടയ്ക്കിടെ ഭക്ഷ്യവിഷബാധ റിപ്പോര്‍ട്ട് ചെയ്യുന്നതിനെ തുടര്‍ന്ന് കഴിഞ്ഞമാസം ജില്ലാകളക്ടര്‍ വിളിച്ചുചേര്‍ത്ത യോഗത്തിലാണ് തട്ടുകടകളിലെ രാത്രികാല പരിശോധനയ്ക്ക് തുടക്കമായത്. ജില്ലയിലെ നഗരസഭകളും മറ്റു പ്രധാന നഗരങ്ങളിലെ തട്ടുകടകളിലും ഹോട്ടലുകളിലും തുടര്‍ദിവസങ്ങളിലും പരിശോധനകളും നടപടികളും ഉണ്ടാവുമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു. കഴിഞ്ഞ ദിവസങ്ങളില്‍ പരിശോധനയ്ക്ക് ടെക്നിക്കല്‍ അസിസ്റ്റന്‍റ് ആര്‍. ബിമല്‍ഭൂഷണ്‍, ഫുഡ് സേഫ്റ്റി ഓഫീസര്‍ പി. ബി. ആദിത്യന്‍, ഹെല്‍ത്ത് സൂപ്പര്‍ വൈസര്‍ എന്‍.എ. ഷാജു, ക്ലീന്‍ സിറ്റി മാനേജര്‍ മധുസൂദനന്‍, ഹെല്‍ത്ത് ഇന്‍സ്‌പെക്ടര്‍മാരായ പി.വി. സജീവന്‍, കെ. മധു, ജെഎച്ച്‌ഐമാരായ കെ.ജി. രാധാകൃഷ്ണന്‍, ആശമേരി, ജി.ആര്‍. ജിബി, സുനില്‍കുമാര്‍, ജനാര്‍ദനന്‍ എന്നിവര്‍ പങ്കെടുത്തു.

പഴകിയ ഭക്ഷണം പിടികൂടി

കാഞ്ഞങ്ങാട്: ക്ലീന്‍ സ്വീപ് പ്രോഗ്രാമിന്‍റെ ഭാഗമായി കാഞ്ഞങ്ങാട് നഗരസഭ എന്‍ഫോഴ്സ്മെന്‍റ് സ്‌ക്വാഡ് പരിശോധന നടത്തിയതില്‍ വിവിധ സ്ഥാപനങ്ങളില്‍ നിന്നും ആറു കിലോ നിരോധിത പ്ലാസ്റ്റിക് ഉത്പന്നങ്ങള്‍ പിടിച്ചെടുക്കുകയും ആയതിന് 30,000 രൂപ പിഴ ചുമത്തുകയും ജൈവ,അജൈവ മാലിന്യം അലക്ഷ്യമായി കൈകാര്യം ചെയ്തവര്‍ക്ക് 6,000 രൂപ പിഴ ചുമത്തുകയും ചെയ്തു. കൂടാതെ ആവിക്കര ബ്രദേഴ്‌സ് സ്‌പോട്ട് എന്ന ഹോട്ടലില്‍ ഫ്രീസറില്‍ സൂക്ഷിച്ചിരുന്ന പഴകിയ ഭക്ഷണ സാധനങ്ങള്‍ പിടിച്ചെടുക്കുകയും തുടര്‍നടപടി സ്വീകരിക്കുകയും ചെയ്തു. പരിശോധനയില്‍ ക്ലീന്‍ സിറ്റി മാനേജര്‍ പി.പി. ബൈജു, പബ്ലിക് ഹെല്‍ത്ത് ഇന്‍സ്പെക്ടര്‍മാരായ ജോയസ് ജോസഫ്, കെ. നിമിഷ, കെ. സുജന എന്നിവര്‍ പങ്കെടുത്തു.

4500 പായ്ക്കറ്റ് പുകയില ഉത്പന്നങ്ങളുമായി രണ്ടുപേർ അറസ്റ്റിൽ

തൃക്കരിപ്പൂർ: മിനി ലോറിയില്‍ കടത്തുകയായിരുന്ന 4500 പായ്ക്കറ്റ് നിരോധിത പുകയില ഉത്പന്നങ്ങളുമായി രണ്ടു പേരെ ചന്തേര പോലീസ് അറസ്റ്റ് ചെയ്തു. കാസര്‍ഗോഡ് ഉളിയത്തടുക്ക നാഷണല്‍ നഗറിലെ എ.വി. ഷമീര്‍ (40), എ.എം. യൂസഫ്(68) എന്നിവരെയാണ് ചന്തേര പോലീസ് അറസ്റ്റു ചെയ്തത്. കാസര്‍ഗോഡ് നിന്നും കോഴിക്കോട്ടേക്ക് കൊണ്ടുപോകുകയായിരുന്ന പാൻ ഉത്പന്നങ്ങളാണ് പിടികൂടിയത്. ഇന്നലെ പുലര്‍ച്ചെ രണ്ടോടെ ഒളവറ മുണ്ട്യ പരിസരത്ത് ലോറി തടഞ്ഞുനിര്‍ത്തി പരിശോധിച്ചപ്പോഴാണ് പുകയില ഉത്പന്നങ്ങള്‍ കണ്ടെത്തിയത്.

ഓണ്‍ലൈന്‍ ട്രേഡിംഗിന്‍റെ പേരില്‍ തട്ടിയെടുത്തത് 20.13 ലക്ഷം; പ്രതി അറസ്റ്റില്‍

കാസര്‍ഗോഡ്: ഓണ്‍ലൈന്‍ ട്രേഡിംഗിന്‍റെ പേരില്‍ 20,13,000 രൂപ തട്ടിയെടുത്ത മുഖ്യപ്രതികളില്‍ ഒരാള്‍ അറസ്റ്റില്‍. ആലപ്പുഴ അമ്പലപ്പുഴ കാരൂര്‍ സ്വദേശി ജി. ബിജുകുമാറിനെയാണ്(54) കാസര്‍ഗോഡ് സൈബര്‍ പോലീസ് പിടികൂടിയത്. വലിയപറമ്പ് ഇടയിലക്കാട് സ്വദേശിയുടെ പരാതിയിലാണ് അറസ്റ്റ്. ഇന്‍സ്റ്റഗ്രാം, വാട്‌സ്ആപ് എന്നിവ വഴി ബന്ധപ്പെട്ട് ഷെയര്‍ മാര്‍ക്കറ്റ് സംബന്ധിച്ച് ക്ലാസുകള്‍ നല്‍കിയാണ് തട്ടിപ്പുകാര്‍ ഇരയെ വീഴ്ത്തിയത്. തുടര്‍ന്ന് ഐബിപിഐ എന്ന ഓണ്‍ലൈന്‍ ആപ്പ് വഴി ഷെയര്‍ ട്രേഡിംഗ് നടത്തുന്നതിന് എന്ന പേരിലും വന്ന ഡെബ്റ്റ് റീപേമെന്‍റ്, പണം പിൻവലിക്കുന്നതിനുള്ള ടാക്‌സ് എന്നീ പേരുകളിലും പരാതിക്കാരനെ കൊണ്ട് പ്രതികളുടെ വിവിധ ബാങ്ക് അക്കൗണ്ടുകളിലേക്ക് പല തവണകളിലായി 20,13,000 രൂപ അയപ്പിച്ച് തട്ടിയെടുത്തു. ഇതില്‍ മൂന്നുലക്ഷം രൂപ എത്തിച്ചേര്‍ന്ന അക്കൗണ്ടിന്‍റെ ഉടമയാണ് ബിജുകുമാര്‍. ഇയാളുടെ സ്ഥാപനമായ ബി.ജി. മേനോന്‍ ആന്‍ഡ് അസോസിയേറ്റ്‌സ് എന്ന സ്ഥാപനത്തിന്‍റെ പേരില്‍ ആലപ്പുഴ എച്ച്ഡിഎഫ്‌സി ബാങ്കിലുള്ള അക്കൗണ്ടിലേക്കാണ് പണമെത്തിയത്. എസ്‌ഐ രവീന്ദ്രന്‍റെ നേതൃത്വത്തില്‍ എഎസ്‌ഐ രഞ്ജിത് കുമാര്‍, പ്രശാന്ത്, സീനിയര്‍ സിവില്‍ പോലീസ് ഓഫീസര്‍ ദിലീഷ് എന്നിവര്‍ ചേര്‍ന്നാണ് പ്രതിയെ അമ്പലപ്പുഴയില്‍ നിന്നും പിടികൂടിയത്.

കെ. മുരളീധരന്‍ നയിക്കുന്ന ജാഥ 14 മുതല്‍

കാസര്‍ഗോഡ്: ശബരിമലയിലെ സ്വര്‍ണപ്പാളികള്‍ കൊള്ളയടിച്ചവരെ സംരക്ഷിക്കുന്ന ദേവസ്വം മന്ത്രി വി.എം. വാസവനെയും തിരുവിതാംകൂര്‍ ദേവസ്വം ബോര്‍ഡ് ചെയര്‍മാന്‍ വി.കെ. പ്രശാന്തിനെയും തല്‍സ്ഥാനത്ത് നിന്നു പുറത്താക്കണമെന്നും സ്വര്‍ണം വീണ്ടെടുത്ത് കുറ്റവാളികളെ തുറങ്കിലടക്കണമെന്നും ആവശ്യപ്പെട്ട് കോണ്‍ഗ്രസ് പമ്പയിലേക്ക് ജാഥ നടത്തും. മുന്‍ കെപിസിസി പ്രസിഡന്‍റ് കെ. മുരളീധരന്‍ നയിക്കുന്ന വടക്കന്‍ മേഖലജാഥ 14നു രാവിലെ 10നു കാഞ്ഞങ്ങാട്ട് പ്രതിപക്ഷനേതാവ് വി.ഡി. സതീശന്‍ ഉദ്ഘാടനം ചെയ്യും. ഉദ്ഘാടന പരിപാടിയില്‍ 5000 പ്രവര്‍ത്തകരെ പങ്കെടുപ്പിക്കാന്‍ ഡിസിസി ഓഫീസില്‍ ചേര്‍ന്ന ഡിസിസി നേതൃയോഗം തീരുമാനിച്ചു. കെപിസിസി ജനറല്‍ സെക്രട്ടറി സോണി സെബാസ്റ്റ്യന്‍ ഉദ്ഘടനം ചെയ്തു. ഡിസിസി പ്രസിഡന്‍റ് പി.കെ. ഫൈസല്‍ അധ്യക്ഷത വഹിച്ചു. എം.സി. പ്രഭാകരന്‍, എ. ഗോവിന്ദന്‍ നായര്‍, രമേശന്‍ കരുവാച്ചേരി, സാജിദ് മവ്വല്‍, പി.വി. സുരേഷ്, ടോമി പ്ലാച്ചേരി, എ. വാസുദേവന്‍, കെ.കെ. ബാബു, ദിവാകരന്‍ കരിച്ചേരി, അര്‍ജുനന്‍ തായലങ്ങാടി, എം.വി. ഉദേശ് കുമാര്‍, സിജോ അമ്പാട്ട് എന്നിവര്‍ പ്രസംഗിച്ചു.

ഇന്‍റർ കൊളീജിയറ്റ് വനിത കബഡി; കാസർഗോഡ് ഗവ. കോളജ് ജേതാക്കൾ

രാജപുരം: കണ്ണൂർ സർവകലാശാല ഇന്‍റർ കൊളീജിയറ്റ് വനിത കബഡി ചാമ്പ്യൻഷിപ്പിൽ കാസർഗോഡ് ഗവ. കോളജ് ജേതാക്കളായി. കാഞ്ഞങ്ങാട് നെഹ്റു കോളജാണ് റണ്ണേഴ്സ് അപ്പ്. മുന്നാട് പീപ്പിൾസ് ഇൻസ്റ്റിറ്റ്യൂട്ട് ഓഫ് മാനേജ്മെൻറ് സ്റ്റഡീസ് മൂന്നാം സ്ഥാനം നേടി. രാജപുരം സെന്‍റ് പയസ് ടെൻത് കോളജ് ഇൻഡോർ സ്റ്റേഡിയത്തിൽ നടന്ന മത്സരങ്ങൾ കോളജ് ബർസാർ ഫാ. ജോബിൻ പ്ലാച്ചേരിപുറത്ത് ഉദ്ഘാടനം ചെയ്തു. കായികാധ്യാപകൻ പി. രഘുനാഥ് അധ്യക്ഷത വഹിച്ചു. സമാപന ചടങ്ങിൽ പ്രിൻസിപ്പൽ ഡോ. ബിജു ജോസഫ്, ബർസാർ ഫാ. ജോബിൻ പ്ലാച്ചേരിപുറത്ത്, ഡോ. കെ.വി. അനുപ് എന്നിവർ സമ്മാനങ്ങൾ വിതരണം ചെയ്തു. നിഖിൽ മോഹൻ, ഡോ. ജിജി കുമാരി, അഭിജിത്ത് എന്നിവർ പ്രസംഗിച്ചു. 29 മുതൽ നവംബർ നാലു വരെ ചെന്നൈ വിനായക മിഷൻ യൂണിവേഴ്സിറ്റിയിൽ നടക്കുന്ന ദക്ഷിണേന്ത്യൻ അന്തർ സർവകലാശാല കബഡി ചാമ്പ്യൻഷിപ്പിനുള്ള കണ്ണൂർ സർവകലാശാല ടീമിനെ മത്സരങ്ങളിൽ നിന്നും തെരഞ്ഞടുത്തു.

അവകാശ സംരക്ഷണയാത്രയ്ക്ക് ചിറ്റാരിക്കാലിൽ സ്വീകരണമൊരുക്കും

ചിറ്റാരിക്കാൽ: കത്തോലിക്ക കോൺഗ്രസ് അവകാശ സംരക്ഷണയാത്രയ്ക്ക് 14നു രാവിലെ ഒന്പതിന് ചിറ്റാരിക്കാലിൽ ഉജ്വല വരവേൽപ് നൽകും. തോമാപുരം സെന്‍റ് തോമസ് ഫൊറോന പള്ളി വികാരി റവ.ഡോ. മാണി മേൽവെട്ടത്തിന്‍റെ നേതൃത്വത്തിൽ 201 അംഗ സംഘാടകസമിതി രൂപീകരിച്ച് പ്രവർത്തനം നടത്തിവരുന്നു. വെള്ളരിക്കുണ്ട്, മാലോം, തോമാപുരം, ചെറുപുഴ ഫൊറോനകളിൽ നിന്നായി പതിനായിരത്തോളം ആളുകൾ ചിറ്റാരിക്കാലിൽ നടക്കുന്ന സ്വീകരണ യോഗത്തിലും പ്രകടനത്തിലും പങ്കെടുക്കും. 14നു രാവിലെ ഒന്പതിന് ചിറ്റാരിക്കാൽ ടൗണിൽ എത്തിച്ചേരുന്ന ജാഥയെ വാദ്യഘോഷങ്ങളുടെ അകമ്പടിയോടെ കുന്നുംകൈ ജംഗ്ഷനിൽ നിന്നും സ്വീകരിച്ച് പ്രകടനമായി കുരിശുപള്ളി ജംഗ്ഷനിൽ പ്രത്യേകം സജ്ജമാക്കിയ പന്തലിലേക്ക് ആനയിക്കും. സ്വീകരണ യോഗം താമരശേരി രൂപത ബിഷപ്പ് മാർ റെമിജിയോസ് ഇഞ്ചനാനിയിൽ ഉദ്ഘാടനം ചെയ്യും. എകെസിസി ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ മുഖ്യാതിഥിയായിരിക്കും. പത്രസമ്മേളനത്തിൽ കത്തോലിക്ക കോൺഗ്രസ് തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത്, ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ, തോമാപുരം ഫൊറോന വികാരി റവ.ഡോ. മാണിമേൽവെട്ടം, എകെസിസി ഫൊറോന പ്രസിഡന്‍റ് സാജു പടിഞ്ഞാറേട്ട്, ഫൊറോന കൗൺസിൽ പ്രസിഡന്‍റ് രാജു മാത്യു പാഴൂർ, വർക്കി മടക്കാംപുറത്ത്, അസി. വികാരി ഫാ. ജൂബിൻ കണിപറമ്പിൽ, ഡീക്കൻ അമൽ പൂക്കുളത്തേൽ, ഡീക്കൻ ജോബിൻ മണവാളൻ എംസിബിഎസ്, ജോസഫ് കൊച്ചു കുന്നത്തുപറമ്പിൽ, തോമസ് മാത്യു മണ്ണനാനിക്കൽ, ആന്‍റോ തെരുവംകുന്നേൽ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]