സിഎസ്‌ഐ സെന്‍റ് മോണിക്കാസ് ദിനാഘോഷം

കോട്ടയം: വിശ്വാസ ജീവിത ശക്തീകരണത്തിലൂടെ വനിതകള്‍ ക്രിസ്തുവിന്‍റെ ചാലകങ്ങളായി മാറേണ്ടത് കാലഘട്ടത്തിന്‍റെ ആവശ്യമെന്ന് ബിഷപ് മലയില്‍ സാബു കോശി ചെറിയാന്‍. സിഎസ്‌ഐ സെന്‍റ് മോണിക്കാസ് ദിനാഘോഷവും സ്ത്രീ ജനസഖ്യ വാര്‍ഷിക സമ്മേളനവും ഉദ്ഘാടനം ചെയ്യുകയായിരുന്നു ബിഷപ്.

സ്ത്രീ ജനസഖ്യം പ്രസിഡന്‍റ് ഡോ. ജെസി സാറാ കോശി അധ്യക്ഷത വഹിച്ചു. ഡോ. മ്യൂസ് മേരി ജോര്‍ജ്, മഹായിടവക ട്രഷറര്‍ ഫാ. ജിജി ജോണ്‍ ജേക്കബ്, വൈദിക ജില്ലാ ചെയര്‍മാന്‍ ഫാ. ജേക്കബ് ജോണ്‍സണ്‍ തുടങ്ങിയവർ പ്രസംഗിച്ചു.

ADVERTISEMENT

ഫൊറോന കലോത്സവം: തുരുത്തിക്ക് ഒന്നാംസ്ഥാനം

തുരുത്തി: തുരുത്തി ഫൊറോന ബൈബിള്‍ കലോത്സവത്തില്‍ തുരുത്തി മര്‍ത്ത് മറിയം സണ്‍ഡേ സ്‌കൂള്‍ ഓവറോള്‍ ഒന്നാം സ്ഥാനം കരസ്ഥമാക്കി. കൈനടി വ്യാകുലമാതാ പള്ളിയില്‍ നടന്ന കലോത്സവത്തില്‍ രണ്ടാം സ്ഥാനം ഇത്തിത്താനം സെന്‍റ് മേരീസ് സണ്‍ഡേ സ്‌കൂളും മൂന്നാം സ്ഥാനം കുറിച്ചി സെന്‍റ് ജോസഫ് സണ്‍ഡേ സ്‌കൂളും കരസ്ഥമാക്കി.

റെസിഡന്‍റ്സ് അസോസിയേഷൻ താലൂക്ക് മാനവമൈത്രി സംഗമം

ചങ്ങനാശേരി: റെസിഡന്‍റ്സ് അസോസിയേഷന്‍ ചങ്ങനാശേരി താലൂക്ക് കമ്മിറ്റി മാനവമൈത്രി കുടുംബ സംഗമം നടത്തി. മുനിസിപ്പല്‍ മിനി ഓഡിറ്റോറിയത്തില്‍ നടന്ന സംഗമം കൊടിക്കുന്നില്‍ സുരേഷ് എംപി ഉദ്ഘാടനം ചെയ്തു. പ്രസിഡന്‍റ് സാലി അനൂപ് അധ്യക്ഷത വഹിച്ചു. എസ്എന്‍ഡിപി താലൂക്ക് യൂണിയന്‍ പ്രസിഡന്‍റ് ഗിരീഷ് കോനാട്ട്, പ്രത്യാശ ഡയറക്ടര്‍ ഫാ. സെബാസ്റ്റ്യന്‍ പുന്നശേരി, പുതൂര്‍പള്ളി ഇമാം ഇ.പി. ഷിഫാര്‍ കൗസരി, വൈസ് പ്രസിഡന്‍റ് ശ്രീനിവാസന്‍ കക്കുഴി, ജനറൽസെക്രട്ടറി ജി. ലക്ഷ്മണന്‍, നിര്‍വാഹക സമിതിയംഗം സിബിച്ചന്‍ പ്ലാമൂട്ടില്‍ എന്നിവര്‍ പ്രസംഗിച്ചു. വിവിധ മേഖലകളില്‍ മികവു തെളിയിച്ച പ്രതിഭകളെയും വിദ്യാഭ്യാസരംഗത്ത് ഉന്നതവിജയം നേടിയവരെയും സംഗമത്തില്‍ ആദരിച്ചു. കലാഭവന്‍ താജും സംഘവും നയിച്ച കലാസന്ധ്യയും ഗാനമേളയും നടന്നു.

എംസിഎഫിന് തീയിട്ടു

നെടുംകുന്നം: ഹരിതകർമസേന ശേഖരിച്ച പ്ലാസ്റ്റിക് മാലിന്യങ്ങൾ സൂക്ഷിച്ചിരുന്ന എംസിഎഫ് കത്തിനശിച്ചു. ഇന്നലെ പുലർച്ചെ നാലിന് ദേവഗിരി-കോവേലി റോഡിൽ സ്വകാര്യാശുപത്രിക്ക് സമീപമായിരുന്നു സംഭവം. റോഡരികിൽ സ്ഥാപിച്ചിരുന്ന എംസിഎഫിൽനിന്നു തീയുയരുന്നത് ആശുപത്രിയിലെ സെക്യൂരിറ്റിയാണ് ആദ്യം കണ്ടത്. ഇദ്ദേഹമാണ് വിവരം നാട്ടുകാരെയും പഞ്ചായത്ത് അധികൃതരെയും അറിയിച്ചത്. എംസിഎഫിനുള്ളിലും പുറത്തും നിറയെ മാലിന്യ ചാക്കുകളുണ്ടായിരുന്നു. ആരോ തീയിട്ടതാണെന്നു സംശയിക്കുന്നു. മുക്കാൽ മണിക്കൂറോളം മാലിന്യങ്ങൾ കത്തിയെരിഞ്ഞു. വിവരമറിഞ്ഞ് പാമ്പാടിയിൽനിന്നും അഗ്നിരക്ഷാസേന എത്തിയാണ് തീയണച്ചത്. സംഭവത്തിൽ കറുകച്ചാൽ പോലീസിൽ പരാതി നൽകുമെന്നു പഞ്ചായത്ത് വൈസ് പ്രസിഡന്‍റ് വി.എം. ഗോപകുമാർ പറഞ്ഞു.

അതിരൂപതയിലെ മുഴുവന്‍ അംഗങ്ങള്‍ക്കും "സ്വന്തം ബൈബിള്‍' ചരിത്ര പദ്ധതിക്കു തുടക്കം

നൂറുമേനി വചനപഠന പദ്ധതി സീസണ്‍ നാലിലേക്ക് ചങ്ങനാശേരി: ലോകത്തിലെ ഏറ്റവും വലിയ വചന പഠന പദ്ധതിയെന്നു വിശേഷിപ്പിക്കപ്പെടുന്ന നൂറുമേനി വചനപഠന മത്സരം ചരിത്രംകുറിച്ച് സീസണ്‍- നാലിലേക്കു കടന്നു. വചനവും ബൈബിളും അതിരൂപതയിലെ മുഴുവന്‍ അംഗങ്ങൾക്കും എത്തിക്കുന്ന പദ്ധതിക്ക് ഈ വര്‍ഷം അതിരൂപത പ്രാധാന്യം നല്‍കും. ഇതിനായി പത്തുലക്ഷം രൂപ അതിരൂപത നീക്കിവയ്ക്കും. എസ്ബി കോളജിലെ മാര്‍ കാവുകാട്ട് ഹാളില്‍ ചേര്‍ന്ന മഹാസംഗമത്തില്‍ അതിരൂപതയിലെ എല്ലാ കുടുംബങ്ങളിലേയും മുഴുവന്‍ അംഗങ്ങള്‍ക്കും സ്വന്തമായി ബൈബിള്‍ ലഭ്യമാക്കുന്ന എന്‍റെ സ്വന്തം ബൈബിള്‍ പദ്ധതിക്ക് തുടക്കമായി. പുതിയ നിയമവും 150 സങ്കീര്‍ത്തനങ്ങളും ഉള്‍പ്പെടുത്തി ആകര്‍ഷകമായി തയാറാക്കിയ പ്രത്യേക എഡീഷന്‍ ബൈബിളാണ് വിതരണം ചെയ്യുന്നത്. 119-ാം സങ്കീര്‍ത്തനം മനഃപാഠമാക്കിയ രണ്ടാം ക്ലാസ് വിദ്യാര്‍ഥികളായ ലൂക്കാ രാകേഷ്, ഇവാന്‍ വി. ബിജോയ് എന്നിവര്‍ക്ക് പേഴ്‌സണല്‍ ബൈബിള്‍ നല്‍കി ചങ്ങനാശേരി അതിരൂപതാധ്യക്ഷന്‍ ആര്‍ച്ച്ബിഷപ് മാര്‍ തോമസ് തറയില്‍ പദ്ധതി ഉദ്ഘാടനം ചെയ്തു. സീസണ്‍-മൂന്ന് നൂറുമേനി മഹാസംഗമം തിരുവല്ല ആര്‍ച്ച്ബിഷപ് ഡോ. തോമസ് മാര്‍ കൂറിലോസ് ദീപം തെളിച്ച് ഉദ്ഘാടനം ചെയ്തു. സീസണ്‍-1ൽ കാല്‍ ലക്ഷത്തോളം പേരാണ് പങ്കെടുത്തത്. സീസണ്‍-2ല്‍ അമ്പതിനായിരംപേര്‍ പങ്കെടുത്തപ്പോള്‍ സീസണ്‍-3ല്‍ ഒരു ലക്ഷത്തോളം അതിരൂപതാംഗങ്ങളാണ് പങ്കാളികളായത്. ചലച്ചിത്ര നടന്‍ സിജോയ് വര്‍ഗീസ് നൂറുമേനി സീസണ്‍ -4 ന്‍റെ ഉദ്ഘാടനവും പഠനപുസ്തക പ്രകാശനവും നിര്‍വഹിച്ചു. കാന്‍റിക്കിള്‍സ് വര്‍ഷിപ്പ് ബാൻഡ് ഇമ്പകരമായ ഗാനങ്ങള്‍ ആലപിച്ചു. അതിരൂപത ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, വചനപഠന പദ്ധതി ചെയര്‍മാന്‍ സണ്ണി തോമസ് ഇടിമണ്ണിക്കല്‍ എന്നിവരുടെ നേതൃത്വത്തിലുള്ള ടീമാണ് നൂറുമേനിക്കു നേതൃത്വം നല്‍കുന്നത്. ആന്‍റണി മലയില്‍, ഡോ. സോണി കണ്ടങ്കേരില്‍, അഡ്വ. ഡെന്നീസ് ജോസഫ്, ജോസി കടന്തോട്, ജോബി തൂമ്പുങ്കല്‍, ഷിജി ജോണ്‍സണ്‍, ബിനു വെളിയനാട്, ലാലി ഇളപ്പുങ്കല്‍, ജോസുകുട്ടി കുട്ടംപേരൂര്‍, സൈബി അക്കര, ജോഷി കൊല്ലാപുരം, സീന തൂമ്പുങ്കല്‍, റോയി വേലിക്കാട്ട്, ജോണിക്കുട്ടി സ്‌കറിയ, ആന്‍റണി അമിക്കുളം, ജോസഫ് ഇളപ്പുങ്കല്‍, സിബി മുക്കാടന്‍, റെന്നി മാത്യു, ടോമിച്ചന്‍ പുല്ലങ്കാവുങ്കല്‍, ജോസ് സെബാസ്റ്റ്യന്‍, ലാലപ്പന്‍ എന്നിവര്‍ പരിപാടിക്ക് നേതൃത്വം നല്‍കി.

നായർ സമ്മേളനം സമാപിച്ചു

വൈക്കം: ഒരു വ്യാഴവട്ടത്തിനു ശേഷം വൈക്കത്ത് നടന്ന നായര്‍ മഹാസമ്മേളനം സമാപിച്ചു. ക്ഷേത്ര നഗരിക്ക് സിന്ദൂരം ചാര്‍ത്തി തങ്ക വര്‍ണ്ണ പതാകകള്‍ ഉയര്‍ന്നുപൊങ്ങിയ സാംസ്‌കാരിക ഘോഷയാത്ര എന്‍എസ്എസിന്‍റെ ശക്തി വിളിച്ചറിയിക്കുന്നതായിരുന്നു. വൈക്കം താലൂക്ക് എന്‍.എസ്.എസ് യൂണിയന്‍റെ നേതൃത്വത്തില്‍ ഒരു വര്‍ഷമായി നടത്തിവരുന്ന മന്നം നവോത്ഥാന സൂര്യന്‍ എന്ന പരിപാടിയുടെ സമാപനവും നവതി ആഘോഷങ്ങളുടെ ആരംഭവും കുറിച്ചുകൊണ്ടു നടന്ന മഹാ സമ്മേളനത്തില്‍ യൂണിയനിലെ 14 മേഖലകളിലെ 97 കരയോഗങ്ങളില്‍ നിന്ന് ഏകദേശം 25000 അംഗങ്ങള്‍ പങ്കെടുത്തു. മേഖലകളില്‍നിന്നു വന്ന അംഗങ്ങള്‍ വൈക്കം വലിയ കവലയില്‍ സംഗമിച്ചതോടെ സാംസ്‌കാരിക ഘോഷയാത്ര ആരംഭിച്ചു. വലിയ കവലയിലെ മന്നം പ്രതിമയില്‍ പുഷ്പാര്‍ച്ചനയ്ക്കു ശേഷം നടന്ന ഘോഷയാത്രയ്ക്ക് യൂണിയന്‍ പ്രസിഡന്‍റ് പി.ജി.എം. നായര്‍ കാരിക്കോട്, വൈസ് പ്രസിഡന്‍റ് പി. വേണുഗോപാല്‍, സെക്രട്ടറി അഖില്‍ ആര്‍. നായര്‍, ഇന്‍സ്പെക്ടര്‍ എസ്. മുരുകേശ്, ഭാരവാഹികൾ തുടങ്ങിയവർ നേതൃത്വം നൽകി. വൈക്കം, ഉദയനാപുരം, ചെമ്പ്, മറവന്‍തുരുത്ത്, ടി.വി. പുരം, തലയാഴം, വെച്ചൂര്‍, കല്ലറ, മാഞ്ഞൂര്‍, കടുത്തുരുത്തി, ഞീഴൂര്‍, മുളക്കുളം, വെള്ളൂര്‍, തലയോലപ്പറമ്പ് മേഖലകള്‍ ക്രമമനുസരിച്ച് ഘോഷയാത്രയില്‍ അണിചേര്‍ന്നു. എന്‍എസ്എസ് വൈസ് പ്രസിഡന്‍റ് എം. സംഗീത കുമാര്‍ ഉദ്ഘാടനം ചെയ്തു. യൂണിയന്‍ ചെയര്‍മാന്‍ പി.ജി.എം. നായര്‍ കാരിക്കോട് അധ്യക്ഷത വഹിച്ച ചടങ്ങില്‍ എൻ.എസ്.എസ്. സെക്രട്ടറി ഹരികുമാര്‍ കോയിക്കല്‍, ഡയറക്ടര്‍ ബോര്‍ഡ് അംഗം ഇലഞ്ഞിയില്‍ രാധാകൃഷ്ണന്‍, രജിസ്ട്രാര്‍ വി.വി. ശശിധരന്‍ നായര്‍, കോട്ടയം യൂണിയന്‍ പ്രസിഡന്‍റ് ബി. ഗോപകുമാര്‍ തുടങ്ങിയവർ പ്രസംഗിച്ചു. ചടങ്ങില്‍ യൂണിയന്‍റെ വെബ്‌സൈറ്റ് ഉദ്ഘാടനവും സോവിനീറിന്‍റെ പ്രകാശനവും നടന്നു. സുരക്ഷാ ക്രമീകരണങ്ങളും ഗ്രീന്‍ പ്രോട്ടോക്കോളും പാലിച്ചാണ് ഘോഷയാത്ര നടത്തിയത്. കുടിവെളളം, ലഘു ഭക്ഷണം, ആരോഗ്യ വകുപ്പ്, ആംബുലന്‍സ്, വോളന്‍റിയേഴ്‌സ് എന്നിവരുടെ സേവനവും ഉണ്ടായിരുന്നു. സമ്മേളനത്തില്‍ പങ്കെടുക്കുവാനെത്തിയവരുടെ വാഹനം പാര്‍ക്കു ചെയ്യുന്നതിനും സൗകര്യമൊരുക്കിയിരുന്നു. വൈക്കം പോലിസിന്‍റെ നേതൃത്വത്തില്‍ ഗതാഗത നിയന്ത്രണവും നടത്തി.

വേമ്പനാട്ടുകായൽ നീന്തിക്കടന്ന് 10 ഭിന്നശേഷി കുരുന്നുകൾ

വൈക്കം: കേരള സർക്കാർ നടപ്പിലാക്കുന്ന ഭിന്നശേഷി സൗഹൃദ പ്രവർത്തനങ്ങളുടെ ഭാഗമായി സ്വിമ്മിംഗ് തെറാപ്പി കോഴ്‌സ് വിജയകരമായി പൂർത്തിയാക്കിയ കുട്ടികൾക്കായി വേമ്പനാട്ട് കായലിൽ ലോക റിക്കാർഡിനായി നീന്തൽ മത്സരം സംഘടിപ്പിച്ചു. കേരളത്തിൽ ആദ്യമായാണ് ഭിന്നശേഷിയുള്ള 10 കുട്ടികൾ വേൾഡ് റിക്കാർഡ് സ്വിമ്മിംഗ് നടത്തിയത്. ജലദുരന്തങ്ങളുടെ ആഘാതം കുറച്ച് ഭിന്നശേഷിക്കാരെ സമൂഹത്തിന്‍റെ മുഖ്യ ധാരയിലെത്തിക്കുന്നതിനാണ് മത്സരം നടത്തിയതെന്ന് അക്കാഡമി അധികൃതർ പറഞ്ഞു. കേരളത്തിലെ ദുരന്തനിവാരണ പരിശീലന പ്രവർത്തനങ്ങളിൽ വിദഗ്‌ധ സേവനം ചെയ്യുന്നവരുടെ പാനലാണ് ജീവൻ രക്ഷാ സ്വിമ്മിംഗ് അക്കാഡമി. എമർജിങ് വൈക്കവും ജെ.ആർ.എസ് അക്കാഡമിയും സംയുക്തമായി സുരക്ഷാ മുൻകരുതലുകൾ പാലിച്ചു വേമ്പനാട്ട് കായലിൽ നടത്തിയ നീന്തൽ ഇന്നലെ രാവിലെ 7.30ന് അമ്പലക്കടവിൽനിന്ന് ആരംഭിച്ച് വൈക്കം ബീച്ചിൽ സമാപിച്ചു. മൂന്നര വയസുകാരി മുതൽ 10 വയസുകാരൻ വരെ മത്സരത്തിൽ പങ്കെടുത്തു. എ. മനാഫിന്‍റെ അധ്യക്ഷതയിൽ നടന്ന അനുമോദനയോഗം മോൻസ് ജോസഫ് എംഎൽഎ ഉദ്ഘാടനം ചെയ്തു. ചീഫ് കോ-ഓർഡിനേറ്റർ അബ്ദുൾ കലാം ആസാദ്, ചലച്ചിത്ര പിന്നണിഗായകൻ ദേവാനന്ദ് അബ്ദുൾ കലാം ആസാദ്, കെ.എം.എ സലിം, ഫാ. അലൻ തുടങ്ങിയവർ സംബന്ധിച്ചു.

‘കരുണയും കാവലും’ ചിത്രീകരണം പൂര്‍ത്തിയായി

വൈക്കം: ഭക്തിസാന്ദ്രമായ ‘കരുണയും കാവലും’ എന്ന നൊവേനയുടെ ചിത്രീകരണം വൈക്കം സെന്‍റ് ജോസഫ് ഫൊറോന പള്ളിയില്‍ പൂര്‍ത്തിയായി. ‘പിതൃഹൃദയത്തോടെ’ എന്ന അപ്പൊസ്‌തലിക ലേഖനത്തിൽ ഫ്രാന്‍സിസ് മാര്‍പാപ്പ യൗസേപ്പിതാവിന്‍റെ ചില പ്രത്യേക ഗുണങ്ങള്‍ രേഖപ്പെടുത്തിയതില്‍നിന്നുള്ള ചൈതന്യം ഉള്‍ക്കൊണ്ട് റവ.ഡോ. ബര്‍ക്കുമാന്‍സ് കൊടയ്ക്കല്‍ രചിച്ച നൊവേനയാണ് “കരുണയും കാവലും’’. ഓസ്‌ട്രേലിയന്‍ ചലച്ചിത്ര രംഗത്ത് പ്രവർത്തിക്കുന്ന നടനും എഴുത്തുകാരനും നിർമാതാവും സംവിധായകനും ലോക റെക്കോര്‍ഡ് ജേതാവുമായ ജോയ് കെ. മാത്യു സംവിധാനം നിര്‍വഹിച്ച “കരുണയും കാവലും’’ ജിഎംസിയുടെ ബാനറിൽ കെ.ജെ. മാത്യു കണിയാംപറമ്പിലാണ് നിർമിച്ചത്. സാലി മൊയ്ദീന്‍ (ഛായാഗ്രഹണം), ലിൻസൺ റാഫേൽ (എഡിറ്റിംഗ്), ജോസ് വരാപ്പുഴ (പ്രൊഡക്‌ഷൻ കൺട്രോളർ), ജേക്കബ് ആന്‍റണി (പ്രൊഡക്‌ഷൻ മാനേജർ), ജുബിൻ രാജ് (സൗണ്ട് ഡിസൈനർ), ഫ്രോളിന്‍ (അസോസിയേറ്റ് കാമറമാൻ)എന്നിവരാണ് മറ്റ് അണിയറ പ്രവർത്തകർ. പള്ളി കൈക്കാരന്മാരായ ജോര്‍ജ് പൗലോസ് ആവള്ളില്‍, ഡെന്നി ജോസഫ് മംഗലശേരി, കുടുംബ യൂണിറ്റുകളുടെ വൈസ് ചെയര്‍മാന്‍ മാത്യു ജോസഫ് കൂടല്ലി, ക്ലാര്‍ക്ക് ചാക്കപ്പന്‍ പുല്ലരുത്തില്‍, കപ്യാര്‍ ബേബി തെക്കേമുട്ടുമന, ഗായകന്‍ ജോണി ഉണ്ണിത്തുരുത്തില്‍, കീ ബോര്‍ഡിസ്റ്റ് സിബി അടാത്തറ എന്നിവര്‍ ചിത്രീകരണ നിര്‍വഹണത്തിനു നേതൃത്വം നല്‍കി. ഇടവകാംഗങ്ങളുടെ പൂര്‍ണ സഹകരണത്തോടെയായിരുന്നു ചിത്രീകരണം. ജനുവരി 23ന് വൈക്കം സെന്‍റ് ജോസഫ് ഫൊറോന പള്ളിയിലെ വിശുദ്ധ യൗസേപ്പിതാവിന്‍റെ തിരുനാളിനോടനുബന്ധിച്ച് റിലീസ് ചെയ്യുമെന്ന് കൈക്കാരന്മാരായ ജോര്‍ജ് പൗലോസ് ആവള്ളില്‍, ഡെന്നി ജോസഫ് മംഗലശേരി, കുടുംബയൂണിറ്റുകളുടെ വൈസ്ചെയര്‍മാൻ മാത്യു ജോസഫ് കൂടല്ലി എന്നിവര്‍ അറിയിച്ചു.

വാട്ടര്‍ അഥോറിറ്റിയുടെ പൈപ്പ് പൊട്ടി വെള്ളം പാഴാകുന്നു

കടുത്തുരുത്തി: വാട്ടര്‍ അഥോറിറ്റിയുടെ പൈപ്പ് പൊട്ടി വെള്ളം പാഴാകുന്നു. ശാന്തിപുരം ജംഗ്ഷനു സമീപമാണ് സംഭവം. വെള്ളം ചീറ്റിയൊഴുകി ഇതുവഴി നടന്നുപോകുന്നവരുടെ ദേഹത്തേക്ക് തെറിക്കുന്നതിനാല്‍ കാല്‍നടയാത്രക്കാരും ദുരിതത്തിലാണ്. വാട്ടര്‍ അഥോറിറ്റി ജീവനക്കാരെ അറിയിച്ചെങ്കിലും തുടര്‍ നടപടികളൊന്നുമുണ്ടായിട്ടില്ല. വേനല്‍ രൂക്ഷമായതോടെ പലയിടത്തും കുടിവെള്ളക്ഷാമം അനുഭവപ്പെട്ടുതുടങ്ങിയതോടെ പമ്പിംഗ് ശക്തമാക്കേണ്ടി വരുന്നതു കൂടുതല്‍ വെള്ളം നഷ്ടപ്പെടാനിടയാക്കും. ഉയരത്തില്‍ ചീറ്റിത്തെറിക്കുന്ന അവസ്ഥയിലാണ് വെള്ളം റോഡിലേക്കെത്തുന്നത്.

കടുത്തുരുത്തി ഫൊറോന കുടുംബസംഗമം

കടുത്തുരുത്തി: ക്‌നാനായ കത്തോലിക്കാ കോണ്‍ഗ്രസ് കടുത്തുരുത്തി ഫൊറോനയുടെ കുടുബ സംഗമവും ഓണാഘോഷവും ഇന്നു 2.30 ന് കടുത്തുരുത്തി വലിയപള്ളി പാരിഷ് ഹാളില്‍ നടക്കും. ആഘോഷ പരിപാടികള്‍ കോട്ടയം അതിരൂപത വികാരി ജനറാള്‍ ഫാ. തോമസ് ആനിമൂട്ടില്‍ ഉദ്ഘാടനം ചെയ്യും. ഫൊറോന പ്രസിഡന്‍റ് ഏബ്രഹാം കുരീക്കോട്ടില്‍ അധ്യക്ഷത വഹിക്കും. ഫൊറോന വികാരി ഫാ. ജോണ്‍സണ്‍ നീലനിരപ്പേല്‍, കെസിസി രൂപത ഭാരവാഹികളായ ബാബു പറന്പടത്തുമലയില്‍, ബേബി മുളവേലിപ്പുറം തുടങ്ങിയവര്‍ പ്രസംഗിക്കും. ഫൊറോനയിലെ 12 കെസിസി യൂണിറ്റുകളില്‍നിന്നുള്ള 500 ഓളം പേര്‍ കുടുബസംഗമത്തില്‍ പങ്കെടുക്കുമെന്ന് ഫൊറോന പ്രസിഡന്‍റ് ഏബ്രഹാം കുരീക്കോട്ടിലും പ്രോഗ്രാം കണ്‍വീനര്‍ ജോമോന്‍ പുന്നൂസും അറിയിച്ചു.

പെരുവയിലെ ഗതാഗത പ്രശ്‌നങ്ങള്‍ക്ക് പരിഹാരം കാണണമെന്ന്

പെരുവ: പെരുവയിലെ ഗതാഗത പ്രശ്‌നങ്ങള്‍ക്ക് പരിഹാരം കാണണമെന്ന ആവശ്യം ശക്തം. വാനഹത്തിരക്കേറിയ പെരുവ ടൗണില്‍ ഗതാഗത നിയന്ത്രണത്തിനായി യാതൊരു സംവിധാനങ്ങളുമില്ല. തോന്നുംപടിയുള്ള ഡ്രൈവിംഗും അനധികൃത വാഹന പാര്‍ക്കിംഗും പെരുവയില്‍ ഗതാഗത പ്രശ്നങ്ങള്‍ രൂക്ഷമാക്കുകയാണ്. പെരുവ ജംഗ്ഷനില്‍നിന്ന് കടുത്തുരുത്തി, പിറവം, കൂത്താട്ടുകുളം, തലയോലപ്പറമ്പ് എന്നീ ഭാഗങ്ങളിലേക്ക് പോകുന്ന റോഡരികുകളിലെല്ലാം വാഹനങ്ങളുടെ അനധികൃത പാര്‍ക്കിംഗ് ഗതാഗത പ്രതിസന്ധി രൂക്ഷമാക്കുന്നു. വാഹനത്തിരക്കേറിയ നാല്‍ക്കവലയാണ് പെരുവ ജംഗ്ഷനെന്നതും കുരുക്ക് വര്‍ധിപ്പിക്കുന്നു. മുമ്പ് പഞ്ചായത്ത് ഭരണസമിതിയുടെ നേതൃത്വത്തില്‍ ജംഗ്ഷനില്‍ നോ പാര്‍ക്കിംഗ് ബോര്‍ഡ് സ്ഥാപിക്കുകയും ജഗ്ഷനിലെ സ്റ്റാന്‍ഡിലെ ഓട്ടോറിക്ഷകള്‍ പുറകോട്ടിറക്കി പാര്‍ക്ക് ചെയ്യിക്കുകയും ബസ് സ്റ്റോപ്പുകള്‍ പുനഃക്രമീകരിക്കുകയും ചെയ്തിരുന്നു. പിന്നീട് ഇതെല്ലാം അവഗണിച്ചു ബസുകള്‍ പഴയപടിതന്നെ സ്റ്റോപ്പുകളാക്കി. ബസ് നിര്‍ത്താന്‍ മുളക്കുളം പഞ്ചായത്തും ആര്‍ടിഒയും നിര്‍ദേശിച്ച സ്ഥലങ്ങളില്‍ മറ്റു വാഹനങ്ങള്‍ പാര്‍ക്ക് ചെയ്യുന്നതാണ് ഗതാഗതക്കുരുക്കിന് കാരണമാകുന്നതെന്നും ആക്ഷേപമുണ്ട്. ഗതാഗതം പുനഃക്രമീകരണം പിറവം റോഡില്‍ നിലവില്‍ ബസുകള്‍ നിര്‍ത്തുന്നത് നാഗാര്‍ജുന ഫാര്‍മസിക്ക് മുന്നിലാണ്. ഇത് മുന്നോട്ട് മാറ്റി സെന്‍ട്രല്‍ ബാങ്കിന്‍റെ വാതിക്കലേക്ക് ബസ് സ്റ്റോപ്പ് ക്രമീകരിക്കണം. കൂത്താട്ടുകുളം റോഡില്‍ ആലിന്‍ചുവടിന് സമീപം കാത്തിരിപ്പ് കേന്ദ്രത്തിനു മുന്നിലാണ് ബസുകള്‍ നിര്‍ത്തുന്നത്. ഇവിടുത്തെ സ്റ്റോപ്പ് കേരളാ ബാങ്കിന് സമീപത്തേക്ക് മാറ്റണം. വൈക്കം റോഡില്‍ പ്രസന്ന ബേക്കറിയുടെ മുന്‍വശമുള്ള ബസ്‌സ്റ്റോപ്പ് സ്നേഹ ജൂവലറിയുടെ ഭാഗത്തേക്കും മാറ്റി പുനഃസ്ഥാപിക്കണം. നടപടിവേണം കെഎസ്ആര്‍ടിസി ഉള്‍പ്പെടെ 40തിലധികം ബസുകള്‍ ദിനംപ്രതി പെരുവ കവലയിലൂടെ സര്‍വീസ് നടത്തുന്നുണ്ട്. സ്റ്റോപ്പുകളെല്ലാം ജംഗ്ഷനിലായതിനാല്‍ ബസുകള്‍ നിര്‍ത്തുന്ന സമയത്ത് മറ്റ് വാഹനങ്ങള്‍ക്കു കടന്നുപോകാന്‍ കഴിയാതെവരുന്നതോടെ ഗതാഗതം കുരുങ്ങുന്നതായി യാത്രക്കാര്‍ പറയുന്നു. സ്‌കൂള്‍ ബസുകളടക്കം കുരുക്കില്‍ അകപ്പെടാറുണ്ട്. രാവിലെയും വൈകുന്നേരവുമാണ് പ്രധാനമായും ഗതാഗതം കുരുങ്ങുന്നത്. ജംഗ്ഷനിലെ അനധികൃത പാര്‍ക്കിംഗ് ഒഴിവാക്കാന്‍ നടപടി സ്വീകരിക്കണമെന്നും വാഹനഗതാഗതം മറ്റു യാത്രക്കാര്‍ക്കും വ്യാപാരികള്‍ക്കും തടസങ്ങള്‍ ഉണ്ടാക്കാത്തവിധം പുനഃക്രമീകരിക്കണമെന്നും യാത്രക്കാർ പറയുന്നു.

കോട്ടയം വൈഎംസിഎ

കോട്ടയം: കോട്ടയം വൈഎംസിഎ പബ്ലിക് ഹെല്‍ത്ത് ആന്‍ഡ് കമ്യൂണിറ്റി സര്‍വീസ് കമ്മിറ്റിയുടെ നേതൃത്വത്തില്‍ താഴത്തങ്ങാടി എംഡി എല്‍പി സ്‌കൂളില്‍ "അമീബിക് മസ്തിഷ്‌ക ജ്വരം: മുന്‍കരുതലുകള്‍ എന്തെല്ലാം'എന്ന വിഷയത്തില്‍ ബോധവത്കരണ പരിപാടി സംഘടിപ്പിച്ചു. കോട്ടയം ഭാരത് ഹോസ്പിറ്റലിലെ ശിശുരോഗ വിദഗ്ധന്‍ ഡോ. എ. അനൂപ് കുമാര്‍ ക്ലാസിനു നേതൃത്വം നല്‍കി. പബ്ലിക് ഹെല്‍ത്ത് ആന്‍ഡ് കമ്യൂണിറ്റി സര്‍വീസ് കമ്മിറ്റി ചെയര്‍മാന്‍ ടോം കോര അഞ്ചേരില്‍ അധ്യക്ഷത വഹിച്ചു. ഹെഡ്മിസ്ട്രസ് ഷീല ഉമ്മന്‍, വൈഎംസിഎ വൈസ് പ്രസിഡന്‍റ് എബി പുഞ്ചിരി, അനൂപ് സി. ജോണ്‍, ഷൈജു വര്‍ഗീസ്, നവീന്‍ സണ്ണി അലക്‌സ് എന്നിവര്‍ പ്രസംഗിച്ചു.

വികസന സദസ്: യുഡിഎഫ് വിയോജനം രേഖപ്പെടുത്തി

നീണ്ടൂർ: കേരള സർക്കാരിന്‍റെ വികസന നേട്ടങ്ങൾ ജനങ്ങൾക്കു മുന്നിൽ അവതരിപ്പിക്കാൻ തദ്ദേശ സ്വയംഭരണ സ്ഥാപനങ്ങൾ വികസന സദസ് നടത്തണമെന്ന നിർദേശത്തിന്‍റെ അടിസ്ഥാനത്തിൽ ഒക്‌ടോബർ 10ന് നവകേരള സദസ് നടത്താനുള്ള നീണ്ടൂർ പഞ്ചായത്ത് കമ്മിറ്റിയുടെ തീരുമാനത്തിൽ യുഡിഎഫ് വിയോജനം രേഖപ്പെടുത്തി. പ്രതിപക്ഷ നേതാവ് എം. മുരളി വിയോജനക്കുറിപ്പ് നൽകി. യുഡിഎഫ് അംഗങ്ങളായ ലൂക്കോസ് തോമസ് തോട്ടുങ്കൽ, സിനു ജോൺ, മരിയ ഗൊരേത്തി, സൗമ്യ വിനീഷ് എന്നിവർ വിയോജനക്കുറിപ്പിനെ പിന്തുണച്ചു.

ബസേലിയസ് ട്രോഫി ഫുട്‌ബോള്‍: ബസേലിയസും നിര്‍മലയും സെമിയില്‍

കോട്ടയം: 19-ാമത് ഉപ്പൂട്ടില്‍ കുര്യന്‍ ഏബ്രഹാം മെമ്മോറിയല്‍ ഇന്‍റര്‍കൊളീജിയറ്റ് ബസേലിയസ് ട്രോഫി ഫുട്‌ബോള്‍ സെമിഫൈനല്‍ മത്സരങ്ങള്‍ നാളെ കോളജ് മൈതാനത്ത് നടക്കും. ഇന്നലെ നടന്ന ആദ്യമത്സരത്തില്‍ പെനാല്‍റ്റി ഷൂട്ടൗട്ടില്‍ ചങ്ങനാശേരി എസ്ബി കോളജിനെ രണ്ടിനെതിരേ മൂന്നു ഗോളുകള്‍ക്ക് മൂവാറ്റുപുഴ നിര്‍മല കോളജ് പരാജയപ്പെടുത്തി (2-3). രണ്ടാം മത്സരത്തില്‍ കൊല്ലം എസ്എന്‍ കോളജിനെ പരാജയപ്പെടുത്തി തേവര എസ്.എച്ച്. വിജയിച്ചു (0-1). മൂന്നാം മത്സരത്തില്‍ മൂലമറ്റം സെന്‍റ് ജോസഫ് അക്കാഡമിയെ പരാജയപ്പെടുത്തി ബസേലിയസ് കോളജ് വിജയിച്ചു(0-1). നാലാം മത്സരത്തില്‍ മൂന്നാര്‍ ഗവണ്‍മെന്‍റ് കോളജിനെ പരാജയപ്പെടുത്തി പഴഞ്ഞി എംഡി കോളജ് വിജയിച്ചു(0-2). അഞ്ചാം മത്സരത്തില്‍ ഗുരുവായൂര്‍ ശ്രീകൃഷ്ണ കോളജിനെ പരാജയപ്പെടുത്തി നിര്‍മല കോളജ് മൂവാറ്റുപുഴ വിജയിച്ചു(0-1). നാളെ രാവിലെ എട്ടിന് നടക്കുന്ന ആദ്യസെമിയില്‍ എസ്എച്ച് തേവരയും ബസേലിയസ് കോളജും തമ്മില്‍ ഏറ്റുമുട്ടും. രണ്ടാം സെമിയില്‍ എംഡി കോളജ് പഴഞ്ഞിയും നിര്‍മല കോളജ് മൂവാറ്റുപുഴയും തമ്മില്‍ ഏറ്റുമുട്ടും. ഫൈനല്‍ മത്സരം 16ന് രാവിലെ 8.30ന് നടക്കും.

പനച്ചിക്കാട് ദക്ഷിണമൂകാംബിയിൽ നവരാത്രി മഹോത്സവം

കോട്ടയം: പനച്ചിക്കാട് ദക്ഷിണമുകാംബിയിലെ നവരാത്രി മഹോത്സവം 18 മുതല്‍ ഒക്‌ടോബര്‍ രണ്ടു വരെ ആഘോഷിക്കും. 18 രാവിലെ എട്ടിന് കലോപാസനയുടെയും 22നു രാത്രി 7ന് ദേശീയ സംഗീത നൃത്തോത്സവത്തിന്‍റെയും ദീപപ്രകാശനം നടക്കും. 29ന് 6.30ന് ഗ്രന്ഥം എഴുന്നള്ളത്ത്, പൂജവയ്പ്. 30ന് ദുര്‍ഗാഷ്ടമി, ഒക്‌ടോബര്‍ ഒന്നിന് മഹാനവമി ദര്‍ശനം, ദക്ഷിണമൂകാംബി സംഗീതോത്സവം, ഒക്‌ടോബര്‍ രണ്ടിന് വിജയദശമി, രാവിലെ 4ന് പൂജയെടുപ്പ് വിദ്യാരംഭം, ക്ഷേത്രാനുഷ്ഠാനങ്ങള്‍ക്കൊപ്പം വിശേഷാല്‍ പൂജകളായ മുറജപം, പുരുഷ സൂക്താര്‍ച്ചന, ചക്രാബ്ജ പൂജ, പുഷ്പാഭിഷേകം, നിറമാല, സാരസ്വത സൂക്താര്‍ച്ചന തുടങ്ങിയ പൂജകള്‍ തന്ത്രിമുഖ്യന്‍ പെരിഞ്ഞേരിമന വാസുദേവന്‍ നമ്പൂതിരിപ്പാടിന്‍റെ മുഖ്യകാര്‍മികത്വത്തില്‍ നടക്കും. പത്രസമ്മേളനത്തില്‍ കെ.എന്‍. നാരായണന്‍ നമ്പൂതിരി, കെ.എന്‍. വാസുദേവന്‍ നമ്പൂതിരി, കെ.എന്‍. നാരായണന്‍ നമ്പൂതിരി എന്നിവര്‍ പങ്കെടുത്തു.

പുഞ്ചകൃഷിക്ക് ഒരുക്കങ്ങളായി

കുമരകം: കുട്ടനാടൻ പാടശേഖരങ്ങളിൽ പുഞ്ചകൃഷിയിറക്കാനുള്ള നടപടികൾക്ക് തുടക്കമായി. ആദ്യ പടിയായി പാടങ്ങളിലെ വെള്ളം വറ്റിക്കാൻവേണ്ടിയുള്ള പുഞ്ച ലേലം പുഞ്ച സ്പെഷ്യൽ ഓഫീസിൽ ആരംഭിച്ചു. വൈദ്യുതി കണക്‌ഷൻ ലഭിച്ച പാടശേഖരങ്ങളിൽ മോട്ടോർ പ്രവർത്തിപ്പിച്ച് വെള്ളം വറ്റിച്ചുതുടങ്ങി. നീറ്റുകക്കായോ കുമ്മായമോ വിതറി നിലത്തെ പുളിരസം ഇല്ലാതാക്കാനുള്ള ശ്രമത്തിലാണ് കർഷകരിലേറയും. ട്രാക്ടറോ ട്രില്ലറോ ഉപയോഗിച്ചു നീലം ഉഴുതു നിരപ്പാക്കിയതിന് ശേഷമാണ് വിത. വിതയ്ക്കാനുള്ള വിത്ത് ലഭ്യമാക്കുന്നത് കൃഷിഭവനുകളും പഞ്ചായത്തുകളും ചേർന്നാണ്. കഴിഞ്ഞവർഷം തക്കസമയത്ത് വിത്ത് ലഭ്യമാക്കാൻ കഴിയാതെവന്നത് കൃഷി ഇറക്കുന്നതിൽ പ്രതിസന്ധി സൃഷ്ടിച്ചിരുന്നു. നാഷണൽ സ്വീഡ് കോർപറേഷനിൽനിന്നും കർണാടക സ്വീഡ് കോർപറേഷനിൽ നിന്നുമാണ് വിത്ത് വാങ്ങി കൃഷിഭവൻവഴി വിതരണം നടത്തുക. ഒരു കിലോ നെൽ വിത്തിന് (ഉമ ) 45 രൂപയാണ് ഇപ്പോൾ. അതിന്‍റെ 50 ശതമാനം പഞ്ചായത്തുകൾ സബ്സിഡിയായി നൽകും . ഒരേക്കറിന് 40 കിലോ വിത്താണ് സബ്സിഡി നിരക്കിൽ കർഷകന് ലഭിക്കുക. ജില്ലയിൽ കുമരകം, തിരുവാർപ്പ്, അയ്മനം, ആർപ്പൂക്കര, നാട്ടകം, നീണ്ടൂർ, ഏറ്റുമാനൂർ തുടങ്ങിയ പഞ്ചായത്തുകളിലെ പാടശേഖരങ്ങളാണ് പുഞ്ചകൃഷിയിറക്കുന്നത്. 1100 ടൺ നെൽവിത്ത് വേണ്ടിവരുമെന്നാണ് കൃഷിവകുപ്പിന്‍റെ കണക്കുകൂട്ടൽ. നവംബർ 30ന് മുമ്പ് വിത പൂർത്തിയാക്കണമെന്നാണ് കൃഷി വകുപ്പിന്‍റെ നിർദേശം. വിത വൈകിയാൽ തണ്ണീർമുക്കം ബണ്ട് തുറക്കുന്നതിനെ ബാധിക്കും. ഇത് കുട്ടനാടിന്‍റെ പാരിസ്ഥിതിക്ക് കൂടുതൽ ദോഷം ചെയ്യും.

ആർപ്പൂക്കര ജലോത്സവ വിജയികൾ

ആർപ്പൂക്കര: ആർപ്പൂക്കര ചുണ്ടൻവള്ള സമിതിയുടെ രണ്ടാമത് ജലോത്സവം നടന്നു. ഫ്രാൻസിസ് ജോർജ് എംപി ഉദ്ഘാടനവും കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി ഫ്ളാഗ് ഓഫും നടത്തി. ജലോത്സവ കമ്മിറ്റി ചെയർമാൻ എം.ബി. ജയപ്പൻ അധ്യക്ഷത വഹിച്ചു. നാലു പേരുടെ ഫൈബർ വള്ളംകളിയിൽ വാട്ടർ ജെറ്റ് ഒന്നാം സ്ഥാനവും പുന്നക്കാട്ടിൽ രണ്ടാം സ്ഥാനവും നേടി. അഞ്ചുപേരുടെ വനിതാ മത്സരത്തിൽ വടക്കൻ വള്ളം ഒന്നാം സ്ഥാനത്തും കാട്ടുകരി വള്ളം രണ്ടാം സ്ഥാനവും കരസ്ഥമാക്കി. അഞ്ചുപേരുടെ ഫൈബർ മത്സരത്തിൽ ദാവീദ് ഒന്നും സ്കൈലാൻഡ് രണ്ടും, ഏഴുപേരുടെ ഫൈബർ ദാവീദ് ഒന്നും തമ്പുരാൻ രണ്ടും, ഏഴുപേരുടെ തടിമത്സരത്തിൽ ആർപ്പൂക്കര ഒന്നും ശിവ രണ്ടും 11 ആളുകളുടെ തടി മത്സരത്തിൽ പടയാളി ഒന്നും ചീറ്റ രണ്ടും സ്ഥാനം കരസ്ഥമാക്കി. ഇരുട്ടുകുത്തി ബി ഗ്രേഡ് വള്ളങ്ങളുടെ മത്സരത്തിൽ താണിയൻ ഒന്നും ഗരുഡൻ രണ്ടും സ്ഥാനം നേടി.

താഴത്തങ്ങാടിയിലെ ഓണാഘോഷം കൗതുകമായി

താഴത്തങ്ങാടി: നാടിനെ തൊട്ടറിഞ്ഞ അനുഭവങ്ങളുമായി ജനകീയ കൂട്ടായ്മ വേറിട്ട ഓണാഘോഷ പരിപാടികൾ സംഘടിപ്പിച്ചു. താഴത്തങ്ങാടിയിലെ 50 വയസിനു മുകളിൽ പ്രായമുള്ളവരാണ് ഇങ്ങനെയൊരു വ്യത്യസ്ത ഓണാഘോഷം ഒരുക്കിയത്. പഴയകാല സ്മരണകൾ പുതുക്കിയും, ഓണപ്പാട്ടുകൾ പാടിയും, ഒരുമിച്ച് ഓണസദ്യ കഴിച്ചും അവർ ഓണത്തെ കൂടുതൽ കളറാക്കി. വാർധക്യ അവശത അനുഭവിക്കുന്ന മുറിയാനിക്കൽ ലീലാമ്മ അമ്മച്ചിയെ പൊന്നാടയണിയിച്ച് ആദരിച്ചു. പരിപാടികൾക്ക് ലിയോ മാത്യു, മാത്തൻ മാത്യു എന്നിവർ നേതൃത്വം നൽകി. സുനിൽ ഏബ്രഹാം, ഇ.ടി. തോമസ്, ഉനൈസ് പാലപ്പറമ്പിൽ, തോമസ് കെ. വട്ടുകളം, ഗണേശൻ തുടങ്ങിയവർ പ്രസംഗിച്ചു.

ഹൗസ് ബോട്ട് കത്തിനശിച്ചു

കുമരകം: വിനോദ സഞ്ചാരികളുമായി കായൽ സവാരി നടത്തവെ ഹൗസ് ബോട്ട് കത്തിനശിച്ചു. ചിത്തിര പള്ളിക്കു സമീപം വേമ്പനാട്ടുകായലിൽ ഇന്നലെ 3.30നായിരുന്നു സംഭവം. തീ പിടിത്തത്തിന്‍റെ കാരണം വ്യക്തമായിട്ടില്ല. ഹൗസ് ബോട്ടിൽ ഒരു കുടുംബത്തിലെ രണ്ടു പേരാണ് ഉണ്ടായിരുന്നത്. അവരെ ജീവനക്കാർ മറ്റൊരു ബോട്ടിലേക്കു കയറ്റി രക്ഷപ്പെടുത്തി. വൈക്കത്ത് നിന്ന് ഫയർഫോഴ്സ് എത്തിയെങ്കിലും ഹൗസ്ബോട്ട് പൂർണമായും കത്തിനശിച്ചു. കുമരകം പോലീസും പുളിങ്കുന്ന് പോലീസും സംഭവ സ്ഥലത്ത് എത്തിയിരുന്നു.

ഇന്ന് ശ്രീകൃഷ്ണ ജയന്തി, നാടും നഗരവും അമ്പാടിയാകും

കോട്ടയം: ഇന്ന് ശ്രീകൃഷ്ണ ജയന്തി, നാടും നഗരവും അമ്പാടിയാകും. ബാലഗോകുലത്തിന്‍റെ നേതൃത്വത്തില്‍ ജില്ലയില്‍ 1,100 ആഘോഷങ്ങളിലായി 2000 സ്ഥലങ്ങളില്‍ ശോഭാ യാത്രകള്‍ നടക്കും. ഉച്ചകഴിഞ്ഞ് മൂന്നു മുതല്‍ വൈകുന്നേരം അഞ്ചുവരെയാണ് ശോഭയാത്രകള്‍. നൂറുകണക്കിന് ഉണ്ണിക്കണ്ണന്‍മാരും ഗോപികമാരും നാടിനെ അമ്പാടിയാക്കുന്ന ശോഭായാത്ര നഗരങ്ങളെയും ഗ്രാമങ്ങളെയും വര്‍ണാഭമാക്കും. നിശ്ചല ദൃശ്യങ്ങള്‍, ഗോപിക നൃത്തം, ഉറിയടി, വെണ്ണ തീറ്റ തുടങ്ങിയവ ശോഭായാത്രകള്‍ക്ക് മിഴിവേകും. തിരുനക്കരയിലും സമീപ പ്രദേശങ്ങളില്‍നിന്നുമുള്ള ശോഭായാത്രകള്‍ കോട്ടയം സെന്‍ട്രല്‍ ജംഗ്ഷനില്‍ സംഗമിക്കും. തുടര്‍ന്നു മഹാശോഭായാത്ര തിരുനക്കര മഹാദേവ ക്ഷേത്രാങ്കണത്തില്‍ സമാപിക്കും. ശോഭാ യാത്രയില്‍ ബാലഗോകുലം സംസ്ഥാന ഉപാധ്യക്ഷന്‍ ഡോ.എന്‍. ഉണ്ണിക്കൃഷ്ണന്‍ മുഖ്യാതിഥിയായിരിക്കും. കഞ്ഞിക്കുഴി, ഇറഞ്ഞാല്‍, മണര്‍കാട്, പാമ്പാടി, കൂരോപ്പട, പള്ളിക്കത്തോട്, അയര്‍ക്കുന്നം, ഏറ്റുമാനൂര്‍, നീണ്ടൂര്‍, തിരുവാതുക്കല്‍, കുമ്മനം, കുമരകം എന്നിവിടങ്ങളിലും ശോഭയാത്രയുണ്ട്. ശ്രീകൃഷ്ണ ജയന്തിയോടനുബന്ധിച്ച് ക്ഷേത്രങ്ങളില്‍ അഷ്ടമി രോഹിണി പൂജയുമുണ്ട്.

എംഎല്‍എയ്ക്ക് ഓണ മത്സരത്തില്‍ ഒന്നാം സമ്മാനം

മണര്‍കാട്: നാലുമണിക്കാറ്റിലെ ഓണാഘോഷ പരിപാടികളുടെ ഭാഗമായി നടന്ന കലംതല്ലി പൊട്ടിക്കല്‍ മത്സരത്തില്‍ ചാണ്ടി ഉമ്മന്‍ എംഎല്‍എയ്ക്ക് ഒന്നാം സ്ഥാനം. 17 മത്സരാർഥികളെ പിന്തള്ളിയാണ് എംഎല്‍എ സമ്മാനം നേടിയത്. ഓണാഘോഷത്തിന്‍റെ ഭാഗമായി ട്രോപ്പിക്കല്‍ ഇന്‍സ്റ്റിറ്റ്യൂട്ട് ഓഫ് ഇക്കോളജിക്കല്‍ സയന്‍സസ് നാലുമണിക്കാറ്റില്‍ നടത്തിയ വന്യസസ്യ- പുഷ്പ-ഫല പ്രദര്‍ശനം ഉദ്ഘാടനം ചെയ്യാനെത്തിയപ്പോഴാണ് ചാണ്ടി ഉമ്മന്‍ നാട്ടുകാരോടൊപ്പം ഓണക്കളികളില്‍ പങ്കാളിയായത്. വന്യസസ്യ-പുഷ്പ-ഫല പ്രദര്‍ശനത്തില്‍ പങ്കെടുത്ത കുട്ടികള്‍ പഴമയും നാട്ടു പൈതൃകവും അനുഭവിച്ചറിയാന്‍ ഭാഗ്യം ലഭിച്ചവരാണെന്ന് എംഎൽഎ പറഞ്ഞു. കോട്ടയം സെന്‍റ് ജോസഫ് സ്‌കൂളിലെ വിദ്യാര്‍ഥികളാണ് പ്രദര്‍ശനമൊരുക്കിയത്. നാലുമണിക്കാറ്റിന്‍റെ ഗ്രാമ്യപശ്ചാത്തലത്തില്‍ നടന്ന കസേരകളി, റ്റാറ്റാപ്പഴം, സുന്ദരിക്കൊരു പൊട്ടുതൊടല്‍ തുടങ്ങിയ ഓണക്കളികളില്‍ ഒട്ടേറെപ്പേര്‍ പങ്കെടുത്തു. മണര്‍കാട് പഞ്ചായത്ത് പ്രസിഡന്‍റ് കെ.സി. ബിജു പൊതുസമ്മേളനം ഉദ്ഘാടനം ചെയ്തു. നാലുമണിക്കാറ്റ് പ്രസിഡന്‍റ് ഡോ. പുന്നന്‍ കുര്യന്‍ വേങ്കടത്ത് അധ്യക്ഷത വഹിച്ചു. മന്ത്രി വി.എന്‍. വാസവന്‍ മുഖ്യപ്രഭാഷണം നടത്തി. പഞ്ചായത്തംഗങ്ങളായ രാജീവ് രവീന്ദ്രന്‍, സന്ധു അനില്‍ കുമാര്‍, കെ.കെ. മാത്യു, എം.എ. മാത്യു എന്നിവര്‍ പ്രസംഗിച്ചു.

സിബിഎൽ മത്സരത്തിന് ജില്ലയിൽനിന്നു മൂന്നു ചുണ്ടനുകൾ

കുമരകം: വിനോദസഞ്ചാര വകുപ്പിന്‍റെ ഈ വർഷത്തെ ചാമ്പ്യൻസ് ബോട്ട് ലീഗിൽ മത്സരിക്കാൻ ജില്ലയിൽനിന്നും മൂന്നു ചുണ്ടനുകൾ യോഗ്യത നേടി. കുമരകം ടൗൺ ബോട്ട് ക്ലബ്ബിന്‍റെ പായിപ്പാടൻ, കുമരകം ഇമ്മാനുവേൽ ബോട്ട് ക്ലബ്ബിന്‍റെ നടുവിലേപ്പറമ്പൻ, ചങ്ങനാശേരി ബോട്ട് ക്ലബ്ബിന്‍റെ ചമ്പക്കുളം എന്നീ ചുണ്ടനുകളാണ് ജില്ലയിൽനിന്നു സിബിഎലിൽ മത്സരിക്കുക. നെഹ്റു ട്രോഫിയിൽ ആദ്യ ഒമ്പതു സ്ഥാനങ്ങളിലെത്തിയ ചുണ്ടൻ വള്ളങ്ങൾക്കാണ് സിബിഎൽ യോഗ്യത ലഭിച്ചത്. സിബിഎൽ യോഗ്യത ലഭിച്ച ചുണ്ടനുകളും ക്ലബ്ബുകളും വീയപുരം- വില്ലേജ് ബോട്ട് ക്ലബ് കൈനകരി, നടുഭാഗം- പുന്നമട ബോട്ട് ക്ലബ്, മേൽപാടം- പള്ളാത്തുരുത്തി ബോട്ട് ക്ലബ്, നിരണം- നിരണം ബോട്ട് ക്ലബ്, പായിപ്പാടൻ 1- കുമരകം ടൗൺ ബോട്ട് ക്ലബ്, നടുവിലേപ്പറമ്പൻ- ഇമ്മാനുവൽ ബോട്ട് ക്ലബ് കുമരകം, കാരിച്ചാൽ- കാരിച്ചാൽ ചുണ്ടൻ ബോട്ട് ക്ലബ്, ചെറുതന- തെക്കേക്കര ബോട്ട് ക്ലബ് മങ്കൊമ്പ്, ചമ്പക്കുളം- ചങ്ങനാശേരി ബോട്ട് ക്ലബ്.

കേജരിവാളിന്‍റെ ചികിത്സ ഒരാഴ്ചകൂടി നീട്ടിയേക്കും

കോട്ടയം: ഡല്‍ഹി മുന്‍ മുഖ്യമന്ത്രിയും ആം ആദ്മി പാര്‍ട്ടി നേതാവുമായ അരവിന്ദ് കേജരിവാളിന്‍റെ കാഞ്ഞിരപ്പള്ളിയിലെ ആയുര്‍വേദ ചികിത്സ ഒരാഴ്ചകൂടി നീട്ടിയേക്കും. പാറത്തോട് മടുക്കക്കുഴി ആയുര്‍വേദ ആശുപത്രിയില്‍ ഒരാഴ്ചത്തെ ചികിത്സയ്ക്കാണ് എത്തിയതെങ്കിലും 14 ദിവസത്തെ ചികിത്സ നടത്താനാണ് നിലവിലെ ആലോചന. ഭാര്യ സുനിതയോടൊപ്പമാണ് കേജരിവാള്‍ ബുധനാഴ്ച എത്തിയത്. ചികിത്സയ്‌ക്കൊപ്പം യോഗയും പരിശീലിക്കുന്നുണ്ട്. സുരക്ഷയ്ക്കായി ഒരു എസ്എച്ച്ഒയും രണ്ട് എസ്‌ഐമാരും ഉള്‍പ്പെടെ 20 പോലീസുകാര്‍ ചുമതലയിലുണ്ട്. കൂടാതെ സ്‌പെഷല്‍ ബ്രാഞ്ചിലെ അഞ്ചു പോലീസ് ഉദ്യോഗസ്ഥരും സ്ഥലത്തുണ്ട്. മെഡിക്കല്‍ ഡയറക്ടര്‍ ഡോ. റോബിന്‍ മടുക്കക്കുഴിയുടെ നേതൃത്വത്തിലാണ് ചികിത്സ. ഇപ്പോള്‍ ജര്‍മനിയിലുള്ള ഡോ. ജോബിന്‍ മടുക്കക്കുഴി അടുത്തയാഴ്ച കാഞ്ഞിരപ്പള്ളിയിലെത്തി കേജരിവാളിന്‍റെ ചികിത്സ പൂര്‍ത്തിയാക്കും. ഒരു മാസമായി മടുക്കക്കുഴി ആശുപത്രിയിലെ ചികിത്സ സംബന്ധിച്ച് കേജരിവാള്‍ ആശയവിനിമയം നടത്തുന്നുണ്ടായിരുന്നു. 2016ല്‍ പ്രകൃതി ചികിത്സയുടെ ഭാഗമായി ഇദ്ദേഹം ബംഗളൂരുവില്‍ എത്തിയിരുന്നു. പ്രമേഹത്തിനും വിട്ടുമാറാത്ത ചുമക്കും പരിഹാരം തേടിയാണ് അവിടെ ചികിത്സ തേടിയത്. ഉയര്‍ന്ന പ്രമേഹവും ചുമയും കേജരിവാളിനെ അലട്ടുന്നുണ്ട്.

വചനമഹോത്സവമായി നൂറുമേനി മഹാസംഗമം

ബെന്നി ചിറയില്‍ ചങ്ങനാശേരി: ചങ്ങനാശേരി അതിരൂപത ബൈബിള്‍ അപ്പൊസ്തലറ്റും കുടുംബ കൂട്ടായ്മയും മാക് ടിവിയും സംയുക്തമായി അതിരൂപതയിലെ 250 ഇടവകകളില്‍ സംഘടിപ്പിച്ച നൂറുമേനി വചന മനഃപാഠം പദ്ധതിയിലെ വിജയികളുടെ സംഗമവും ‘എന്‍റെ സ്വന്തം ബൈബിള്‍’ പദ്ധതിയുടെ ഉദ്ഘാടനവും വചനമഹോത്സവമായി. എസ്ബി കോളജിലെ മാര്‍ കാവുകാട്ട് ഹാളില്‍ സംഘടിപ്പിച്ച മഹാസംഗമം തിരുവല്ല ആര്‍ച്ച്ബിഷപ് ഡോ. തോമസ് മാര്‍ കൂറിലോസ് ഉദ്ഘാടനം ചെയ്തു. ജീവിക്കുന്ന ക്രിസ്തുവിന്‍റെ പ്രതീകമാണു വചനമെന്നും വിശുദ്ധ കുര്‍ബാനയിലെന്നപോലെ വചനത്തിലൂടെയും ഈശോ ഹൃദയത്തിലേക്കു കടന്നുവരുന്നതായും ആര്‍ച്ച്ബിഷപ് പറഞ്ഞു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. സുവിശേഷം നന്മയുടെയും മാനവികതയുടെയും സ്‌നേഹസന്ദേശമായതിനാലാണ് സുവിശേഷം പ്രഘോഷിക്കുന്ന ക്രൈസ്തവര്‍ ഏറെ പീഡിപ്പിക്കപ്പെടുകയും വെല്ലുവിളികള്‍ നേരിടുകയും ചെയ്യുന്നതെന്ന് മാര്‍ തറയില്‍ പറഞ്ഞു. നൂറ്റിപ്പത്തൊന്‍പതാം സങ്കീര്‍ത്തനം മനഃപാഠമാക്കിയ രണ്ടാം ക്ലാസ് വിദ്യാര്‍ഥികളായ ലൂക്കാ രാകേഷ്, ഇവാന്‍ വി. ബിജോയ് എന്നിവര്‍ക്ക് പേഴ്സണല്‍ ബൈബിള്‍ നല്‍കി ‘എന്‍റെ സ്വന്തം ബൈബിള്‍’ പദ്ധതിയുടെ ഉദ്ഘാടനം മാര്‍ തോമസ് തറയില്‍ നിര്‍വഹിച്ചു. വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യപ്രഭാഷണം നടത്തി. ചലച്ചിത്രനടന്‍ സിജോയ് വര്‍ഗീസ് നൂറുമേനി സീസണ്‍ ഫോറിന്‍റെ ഉദ്ഘാടനവും പഠനപുസ്തക പ്രകാശനവും നിര്‍വഹിച്ചു. പ്രഫ. ജോസഫ് ടിറ്റോ, സിസ്റ്റര്‍ ചെറുപുഷ്പം, ജോസി കടന്തോട്, മറിയം ജോര്‍ജ്, സ്‌കറിയ വടക്കേല്‍ എന്നിവര്‍ പുസ്തകം ഏറ്റുവാങ്ങി. ചലച്ചിത്ര നിര്‍മാതാവും ഗാനരചയിതാവുമായ ലിസി ഫെര്‍ണാണ്ടസ്, അതിരൂപത ബൈബിള്‍ അപ്പൊസ്തലറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, മീഡിയ വില്ലേജ് മീഡിയ കോ-ഓര്‍ഡിനേറ്റര്‍ ഫാ. ജോജിന്‍ ഇലഞ്ഞിക്കല്‍, നൂറുമേനി വചനപഠന പദ്ധതി ചെയര്‍മാന്‍ സണ്ണി തോമസ് ഇടിമണ്ണിക്കല്‍, ബൈബിള്‍ അപ്പൊസ്തലറ്റ് അതിരൂപത പ്രസിഡന്‍റ് ഡോ. റൂബിള്‍ രാജ്, നൂറുമേനി ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം എന്നിവര്‍ പ്രസംഗിച്ചു. ഗ്രാന്‍ഡ് ഫിനാലെ വിജയികള്‍ക്കുള്ള സമ്മാനദാനവും നടന്നു.

സമഗ്ര മാലിന്യസംസ്‌കരണം; ഇക്കോ ബാങ്ക് റെഡിയാകുന്നു

കോട്ടയം: ജില്ലയില്‍ സമഗ്ര മാലിന്യ സംസ്‌കരണത്തിനായി തദ്ദേശസ്വയംഭരണ വകുപ്പിന്‍റെ നേതൃത്വത്തില്‍ ക്ലീന്‍ കേരള കമ്പനിയുടെ ഇക്കോ ബാങ്ക് പ്രവര്‍ത്തനമാരംഭിക്കുന്നു. സംസ്ഥാനത്ത് മാലിന്യ സംസ്‌കരണ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്തുന്നതിന്‍റെ ഭാഗമായി തദ്ദേശസ്വയംഭരണ വകുപ്പിന്‍റെ നേതൃത്വത്തില്‍ 14 ജില്ലകളിലും ക്ലീന്‍ കേരള കമ്പനി ഇക്കോ ബാങ്കുകള്‍ സ്ഥാപിച്ചു വരികയാണ്. ഇതിന്‍റെ ഭാഗമായിട്ടാണു ജില്ലയില്‍ കൂരോപ്പട മാക്കല്‍പടിയില്‍ ഇക്കോ ബാങ്കിന്‍റെ ഗോഡൗണ്‍ പ്രവര്‍ത്തനമാരംഭിക്കുന്നത്. ഇക്കോ ബാങ്കിന്‍റെ പ്രവര്‍ത്തനങ്ങളുടെ ഉദ്ഘാടനം ഉടന്‍ ഉണ്ടാകും. വീടുകളിലും സ്ഥാപനങ്ങളിലും വീട് മാറ്റം, കല്യാണം, നിര്‍മണങ്ങള്‍ തുടങ്ങി വിവിധ സന്ദര്‍ഭങ്ങളിലുണ്ടാകുന്ന അജൈവ മാലിന്യങ്ങളും പാഴ്‌വസ്തുക്കളും നേരിട്ട് കൈമാറുന്നതിനുള്ള കേന്ദ്രങ്ങളാണ് ഇക്കോ ബാങ്കുകള്‍. പുനഃചംക്രമണം ചെയ്യാന്‍ കഴിയുന്ന മാലിന്യങ്ങള്‍ മികച്ച വില നല്‍കിയും അജൈവ മാലിന്യങ്ങള്‍ക്ക് സംസ്‌കരണത്തിനുള്ള ചെറിയ ഫീസ് ഈടാക്കിയും പാഴ്‌വസ്തുക്കള്‍ ഇക്കോ ബാങ്കില്‍ ശേഖരിക്കും. അപകടകരമായ ഇ-മാലിന്യം, ചെരിപ്പ്, ബാഗ്, തെര്‍മോക്കോള്‍ തുടങ്ങിയവ, വീട് നവീകരണത്തിന്‍റെ ഭാഗമായി ഉണ്ടാകുന്ന ഇതര മാലിന്യം, സിമന്‍റ് ചാക്ക് തുടങ്ങിയുള്ള എല്ലാ അജൈവ പാഴ്‌വസ്തുക്കളും ഇക്കോ ബാങ്ക് ശേഖരിക്കും. പ്രതിമാസം 7,000 ടണ്ണില്‍ അധികം മാലിന്യം ശേഖരിക്കുകയും ശാസ്ത്രീയമായി സംസ്‌കരിക്കുകയും ചെയ്യുന്ന ക്ലീന്‍ കേരള കമ്പനിയുടെ മാലിന്യമുക്ത നവകേരളത്തിനുള്ള പുതിയ ചുവടുവയ്പാകുകയാണിത്. ബാങ്കുകളില്‍ വലിയ തോതില്‍ ശേഖരിക്കുന്ന മാലിന്യങ്ങള്‍ വേര്‍തിരിച്ചശേഷം കമ്പനിയുടെ ബന്ധപ്പെട്ട കേന്ദ്രങ്ങളില്‍ എത്തിച്ച് ശാസ്ത്രീയമായി നശിപ്പിക്കുകയാണു ചെയ്യുന്നത്. ഇക്കോ ബാങ്കുകളുടെ ആരംഭം സംസ്ഥാനത്തെ മാലിന്യസംസ്‌കരണ സംവിധാനത്തെ കൂടുതല്‍ ക്രമബദ്ധവും ജനകീയവുമായ രീതിയിലേക്ക് മാറ്റും. മാലിന്യശേഖരണത്തിനും സംസ്‌കരണത്തിനുമൊപ്പം പൊതുജനങ്ങളെ ഉത്തരവാദപ്പെട്ട ഇടപെടലിലേക്ക് പ്രേരിപ്പിക്കുന്നതിനും ഈ പദ്ധതി സഹായകരമാകും. 14 ജില്ലയിലും ഒരു ഇക്കോ ബാങ്ക് വീതമാണ് ആദ്യഘട്ടത്തില്‍ ആരംഭിച്ചിരിക്കുന്നത്. ആവശ്യകതക്ക് അനുസരിച്ച് കൂടുതല്‍ സ്ഥലങ്ങളിലേക്ക് വ്യാപിപ്പിക്കും.

സമുദായ ശക്തീകരണം രാഷ്‌ട്രപുരോഗതിക്ക്: മാര്‍ ജോസ് പുളിക്കല്‍

കാഞ്ഞിരപ്പള്ളി: രാജ്യത്തിന്‍റെ മതേതരത്വം സംരക്ഷിക്കാനും സാധാരണക്കാര്‍ക്ക് നീതി ലഭിക്കാനും കര്‍ഷകര്‍ക്കു ജീവിക്കാനുള്ള സാഹചര്യം ഒരുക്കാനും മൂല്യബോധമുള്ള തലമുറയെ ഭരണ, രാഷ്‌ട്രീയ രംഗത്തിറക്കാനുള്ള ഇടപെടലുകള്‍ ഉണ്ടാകണമെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. കാഞ്ഞിരപ്പള്ളി രൂപതയുടെ പന്ത്രണ്ടാമത് പാസ്റ്ററല്‍ കൗണ്‍സിലിന്‍റെ എട്ടാമത് സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. സഭ എന്ന കാഴ്ചപ്പാട് നമ്മുടെ നെഞ്ചിടിപ്പായി മാറുന്നുവെന്ന് ഉറപ്പുവരുത്താന്‍ നമ്മള്‍ ശ്രദ്ധിക്കണം. കരുത്തും കര്‍മശേഷിയുമുള്ള സമൂഹമായി സഭാമക്കള്‍ മാറണം. ശ്ലീഹന്മാരാകുന്ന അടിത്തറയില്‍ പണിയപ്പെട്ടിരിക്കുന്ന സഭയോടു ചേര്‍ന്നുനിന്നുകൊണ്ട് നമ്മുടെ ജീവിതം മുന്പോട്ടു കൊണ്ടുപോകണം. സീറോമലബാര്‍ സഭയുടെ സമുദായ സംഘടനയായ കത്തോലിക്ക കോണ്‍ഗ്രസ് കൂടുതല്‍ ശക്തിപ്പെടേണ്ടത് കാലഘട്ടത്തിന്‍റെ ആവശ്യമാണെന്നും മാര്‍ ജോസ് പുളിക്കല്‍ കൂട്ടിച്ചേർത്തു. ‘സമുദായ ശക്തീകരണം ആധുനിക കാലഘട്ടത്തിൽ’‍ എന്ന വിഷയത്തെ ആസ്പദമാക്കി ഫാ. ജസ്റ്റിന്‍ മതിയത്ത് ക്ലാസ് നയിച്ചു. പ്രോട്ടോ സിഞ്ചെല്ലൂസ് റവ.ഡോ. ജോസഫ് വെള്ളമറ്റം, വികാരി ജനറാള്‍മാരായ ഫാ. ബോബി അലക്‌സ് മണ്ണംപ്ലാക്കല്‍, റവ.ഡോ. സെബാസ്റ്റ്യന്‍ കൊല്ലംകുന്നേല്‍, ഷെവ.‍ അഡ്വ.വി.സി. സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. ചാന്‍സലര്‍ റവ.ഡോ. മാത്യു ശൗര്യാംകുഴി, പ്രൊക്കുറേറ്റര്‍ ഫാ. ഫിലിപ്പ് തടത്തില്‍, പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ പരിപാടികള്‍ക്ക് നേതൃത്വം നല്‍കി.

എരുമേലി ഫയർസ്റ്റേഷന് സ്ഥലം കണ്ടെത്താനായില്ല

എരുമേലി: ശബരിമല സീസൺ അടുത്തിരിക്കേ ടൗണിൽ അഗ്നിരക്ഷാനിലയം ആരംഭിക്കുന്നതിന് സ്ഥലം കണ്ടെത്താനുള്ള സർവകക്ഷിയോഗ തീരുമാനം നടപ്പിലായില്ല. നിലവിൽ മണിമലയാറിന്‍റെ തീരത്ത് ഓരുങ്കൽകടവിൽ പഞ്ചായത്ത്‌ വക പുറമ്പോക്ക് ഭൂമിയിൽ അഗ്നിരക്ഷാനിലയം സ്ഥാപിക്കാൻ നീക്കമുണ്ടായിരുന്നു. എന്നാൽ, നദീതീരത്ത് നിർമാണം പാടില്ലെന്ന വിലക്കുമൂലം ഇത് ഒഴിവാക്കേണ്ടി വന്നതോടെയാണ് അനുയോജ്യമായ സ്ഥലം ഏറ്റെടുക്കാൻ സർവകക്ഷിയോഗത്തിൽ തീരുമാനമായത്. കഴിഞ്ഞ ഏപ്രിലിലാണ് സെബാസ്റ്റ്യൻ കുളത്തുങ്കൽ എംഎൽഎയുടെ സാന്നിധ്യത്തിൽ പഞ്ചായത്ത്‌ ഹാളിൽ സർവകക്ഷിയോഗം ചേർന്ന് ഇക്കാര്യം തീരുമാനിച്ചത്. അനുയോജ്യമായ സ്ഥലം കണ്ടെത്താൻ പഞ്ചായത്തിനെയാണ് ചുമതലപ്പെടുത്തിയിരുന്നത്. സ്ഥലം കണ്ടെത്തിയാൽ സ്ഥിരം കെട്ടിടം നിർമിക്കുന്നതിന് ആവശ്യമായ തുക എംഎൽഎ ഫണ്ടിൽനിന്ന് നൽകുമെന്ന് എംഎൽഎ അറിയിച്ചിരുന്നു. ഇതിന് മുന്പ് താത്കാലികമായി അഗ്നിരക്ഷാനിലയം തുടങ്ങുന്നതിന് ആവശ്യമായ സ്ഥലം വാടകയ്ക്കെടുക്കാൻ യോഗത്തിൽ തീരുമാനിച്ചിരുന്നെങ്കിലും ഇക്കാര്യത്തിലും നടപടികളായിട്ടില്ല. എരുമേലിക്കടുത്ത് കൊരട്ടിയിൽ ജില്ലാ ടൂറിസം പ്രമോഷൻ കൗൺസിലിന്‍റെ സ്ഥലത്ത് അഗ്നിരക്ഷാ നിലയം സ്ഥാപിക്കാൻ അനുയോജ്യമാണെന്ന് സർവകക്ഷിയോഗം വിലയിരുത്തിയിരുന്നു. എന്നാൽ, ഇക്കാര്യത്തിലും തുടർ നടപടികളുണ്ടായിട്ടില്ല. ടൗണിൽ നേർച്ചപ്പാറ വാർഡിൽ ഹൗസിംഗ് ബോർഡിന്‍റെ സ്ഥലവും അഗ്നിരക്ഷാ നിലയത്തിന് അനുയോജ്യമാണെന്നും നിർദേശമുയർന്നിരുന്നു. എന്നാൽ, ഇക്കാര്യത്തിലും നടപടികൾ ഉണ്ടായിട്ടില്ല. മാസങ്ങൾ പിന്നിട്ടിട്ടും യോഗത്തിലെ തീരുമാനങ്ങളിൽ നടപടികൾ ഒന്നുമില്ല. അഗ്നിരക്ഷാസേനയ്ക്കും എക്സൈസ് വകുപ്പിനും സ്ഥലം കണ്ടെത്തുന്നതിനു പഞ്ചായത്ത് ഭരണസമിതിയുടെ നേതൃത്വത്തിൽ രാഷ്‌ട്രീയകക്ഷി പ്രതിനിധികളെ ഉൾപ്പെടുത്തി ഉപസമിതി രൂപീകരിക്കണമെന്ന് സർവകക്ഷിയോഗം നിർദേശിച്ചിരുന്നതാണ്. ഇക്കാര്യത്തിലും മെല്ലപ്പോക്ക് തുടരുകയാണ്. സ്ഥലം ഏറ്റെടുക്കാൻ കഴിയുന്നില്ലെങ്കിൽ ആവശ്യമായ സ്ഥലം സ്വന്തമായി വാങ്ങാൻ പഞ്ചായത്ത് വാർഷിക പദ്ധതിയിൽ ഉൾപ്പെടുത്തി പണം കണ്ടെത്തണമെന്ന യോഗത്തിലെ നിർദേശവും ഫയലിൽ ഉറങ്ങുകയാണ്. നിർദിഷ്‌ട ശബരി ഗ്രീൻഫീൽഡ് വിമാനത്താവളത്തിന്‍റെ നിർമാണം കണക്കിലെടുത്ത് അഗ്നിരക്ഷാ സേനയുടെ സ്ഥിരം യൂണിറ്റിന്‍റെ ആവശ്യകത എരുമേലിയിൽ അനിവാര്യമാണെന്നിരിക്കെയാണ് അനാസ്ഥ. അത്യാഹിതം ഉണ്ടായാൽ 15 കിലോമീറ്റർ ദൂരമുള്ള കാഞ്ഞിരപ്പള്ളിയിൽനിന്നോ റാന്നിയിൽനിന്നോ വേണം എരുമേലിയിൽ അഗ്നിരക്ഷാ യൂണിറ്റുകൾ എത്താൻ. എല്ലാ തീർഥാടന കാലത്തും രണ്ടര മാസത്തോളം അഗ്നിരക്ഷാനിലയം താത്കാലികമായി എരുമേലിയിൽ പ്രവർത്തിക്കാറുണ്ട്. 2012ലാണ് എരുമേലിയിൽ സ്ഥിരം ഫയർ സ്റ്റേഷൻ അനുവദിച്ച് ഉത്തരവിറങ്ങിയത്.

വീടിന് തീപിടിച്ച് വൻ നാശനഷ്ടം

കാഞ്ഞിരപ്പള്ളി: വീടിന് തീപിടിച്ച് വൻ നാശനഷ്ടം. കുന്നുംഭാഗം പന്തിരുവേലിൽ പി.സി. മാത്യുവിന്‍റെ വീടിനാണ് ഇന്നലെ ഉച്ചയ്ക്ക് ഒന്നോടെ തീപിടിച്ചത്. വീടിന്‍റെ മേൽക്കൂര പൂർണമായി കത്തിനശിച്ചു. വയറിംഗ്, റബർ ഷീറ്റുകൾ, കുരുമുളക്, വീട്ടുപകരണങ്ങൾ എന്നിവ‍യും കത്തിനശിച്ചു. അഞ്ചു ലക്ഷം രൂപയുടെ നാശനഷ്ടമാണ് ഉണ്ടായിരിക്കുന്നത്. വീട്ടുകാർ അറിയച്ചതിനെത്തുടർന്ന് കാഞ്ഞിരപ്പള്ളി ഫയർഫോഴ്സ് ഉദ്യോഗസ്ഥർ എത്തി തീ നിയന്ത്രിക്കുകയായിരുന്നു. വീടിന്‍റെ ചിമ്മിനിയിൽ റബർഷീറ്റ് ഉണക്കാനായി ഇട്ടിട്ടുണ്ടായിരുന്നുവെന്നും ചൂട് കൂടി ഷീറ്റ് ഉരുകിവീണാണ് തീപിടിത്തമുണ്ടായതെന്നും ഫയർഫോഴ്സ് ഉദ്യോഗസ്ഥർ പറഞ്ഞു. തൊഴിലാളികൾക്ക് വാടകയ്ക്ക് കൊടുത്തിരുന്ന വീട്ടിൽ ആളുകളില്ലാത്തപ്പോഴാണ് തീപിടിത്തമുണ്ടായത്. സ്റ്റേഷൻ ഓഫീസർ കെ.എസ്. ഓമനക്കുട്ടൻ, സീനിയർ ഫയർ ഓഫീസർ കെ.എസ്. സുദർശനൻ എന്നിവരുടെ നേതൃത്വത്തിലാണ് തീയണച്ചത്.

കപ്പാട് ഗവ. സ്കൂളിൽ നവീകരിച്ച കെട്ടിടങ്ങളുടെ ഉദ്ഘാടനം

കാഞ്ഞിരപ്പള്ളി: കപ്പാട് ഗവൺമെന്‍റ് സ്കൂളിൽ ജില്ലാ പഞ്ചായത്തിൽനിന്ന് അനുവദിച്ച ഫണ്ട് ഉപയോഗിച്ച് നവീകരിച്ച കെട്ടിടങ്ങളുടെ ഉദ്ഘാടനം ജില്ലാ പഞ്ചായത്തംഗം ജെസി ഷാജൻ നിർവഹിച്ചു. പിടിഎ പ്രസിഡന്‍റ് എൻ.ജെ. സാബു അധ്യക്ഷത വഹിച്ചു. ഹെഡ്മിസ്ട്രസ് ടി.എച്ച്. ഷീജാമോൾ, എസ്എംഡിസി അംഗം ജോയി നെല്ലിയാനി എന്നിവർ പ്രസംഗിച്ചു. യോഗത്തിൽ 2025-26 അധ്യയന വർഷത്തെ പിടിഎ പൊതുയോഗവും തെരഞ്ഞെടുപ്പും ഇംഗ്ലീഷ് ലാംഗ്വേജ് എന്‍‌റിച്ച്മെന്‍റ് പ്രോഗ്രാമിന്‍റെ ഉദ്ഘാടനവും എസ്എസ്എൽസി പരീക്ഷയിൽ ഫുൾ എ പ്ലസ് നേടിയ വിദ്യാർഥികളുടെ അനുമോദനവും നടത്തി.

ചേനപ്പാടി കരക്കാർ ആറന്മുള ക്ഷേത്രത്തിൽ പാളത്തൈര് സമർപ്പിച്ചു

പൊൻകുന്നം: ചേനപ്പാടി പാർഥസാരഥി ഭക്തജനസമിതി ആറന്മുള പാർഥസാരഥി ക്ഷേത്രത്തിൽ ജന്മാഷ്ടമി സദ്യയ്ക്കുള്ള പാളത്തൈര് ഇന്നലെ സമർപ്പിച്ചു. ഇന്ന് അഷ്ടമിരോഹിണി നാളിൽ ഭഗവാന്‍റെ സന്നിധിയിൽ ഭക്തർക്ക് വിളമ്പുന്ന സദ്യയിലെ പ്രധാനവിഭവമാണ് പാളത്തൈര്. വാഴൂർ തീർഥപാദാശ്രമ കാര്യദർശി സ്വാമി ഗരുഡധ്വജാനന്ദ തീർഥപാദർ രക്ഷാധികാരിയായ പാർഥസാരഥി ഭക്തജനസമിതി ഘോഷയാത്രയായി ആറന്മുള ക്ഷേത്രത്തിൽ തൈര് എത്തിച്ചു. പുലർച്ചെ ചേനപ്പാടിയിലെ ഇളങ്കാവ് ഭഗവതി ക്ഷേത്രം, ധർമശാസ്താ ക്ഷേത്രം, ഇടയാറ്റുകാവ് ദേവീക്ഷേത്രം, പൂതക്കുഴി ശ്രീകൃഷ്ണസ്വാമി ക്ഷേത്രം, കണ്ണമ്പള്ളിൽ ഭഗവതിക്ഷേത്രം, കുറ്റിക്കാട്ടുകാവ് ദേവീക്ഷേത്രം, കിഴക്കേക്കര ഭഗവതിക്ഷേത്രം, അഞ്ചുകുഴി പരാശക്തി ദേവസ്ഥാനം, മഹാലക്ഷ്മി കാണിക്കമണ്ഡപം എന്നിവിടങ്ങളിൽ വഴിപാടുകൾ നടത്തി ചേനപ്പാടി എസ്എൻഡിപി യോഗം ശാഖ, പരുന്തന്മല ശ്രീദേവി വിലാസം ഭജനസമിതി, വിഴിക്കിത്തോട് ഭജന സമിതി എന്നിവയുടെ സഹകരണത്തോടെ കിഴക്കേക്കര ഭഗവതിക്ഷേത്രത്തിൽ നിന്നാണ് പുറപ്പെട്ടത്. എരുമേലി പോലീസ് എസ്എച്ച്ഒ ഇ.ഡി. ബിജു ഘോഷയാത്ര ഉദ്ഘാടനം ചെയ്തു. പൂർവികരുടെ രീതിയിൽ പാളപ്പാത്രങ്ങളിലും തൈര് എത്തിച്ചു. വാഴൂർ ആശ്രമത്തിൽ തയറാക്കിയതുൾപ്പെടെ 1500 ലിറ്റർ തൈര് ഭഗവാന്‍റെ ജന്മാഷ്ടമി നാളിൽ സദ്യയിൽ വിളമ്പുന്നതിന് എത്തിച്ചു.

മൂക്കൻപെട്ടി പാലത്തിലെ ഊരിമാറ്റിയ കൈവരികൾ പുനഃസ്ഥാപിച്ചില്ല

കണമല: മൂക്കൻപെട്ടി പാലത്തിൽനിന്ന് ഇക്കഴിഞ്ഞ മഴക്കാലത്ത് ഊരിമാറ്റിയ കൈവരികൾ പുനഃസ്ഥാപിച്ചില്ലെന്ന് ആക്ഷേപം. കൈവരികൾ ഇല്ലാതെ പാലത്തിലൂടെയുള്ള വാഹനയാത്ര സുരക്ഷിതമല്ലാത്തതിനാൽ അപകടഭീതി വർധിക്കുകയാണ്. മഴക്കാലത്ത് നദിയിൽ വെള്ളപ്പൊക്കമുണ്ടാകുന്പോൾ പാലത്തിന്‍റെ കൈവരികൾ ഒഴുകിപ്പോകാതിരിക്കാനാണ് പഞ്ചായത്ത്‌ അധികൃതരുടെ നിർദേശപ്രകാരം കൈവരികൾ ഊരിമാറ്റാറുള്ളത്. വെള്ളത്തിൽ ഒഴുകിയെത്തുന്ന തടികൾ ഇടിച്ച് കൈവരികൾ തകരാറുമുണ്ട്. ഇത് ഒഴിവാക്കാൻ വേണ്ടി കൈവരികൾ ഊരിമാറ്റിയ ശേഷം മഴക്കാലം കഴിയുമ്പോൾ പുനഃസ്ഥാപിക്കും. ഇങ്ങനെ പലപ്പോഴായി കൈവരികൾ ഊരിമാറ്റിയത് മൂലം കൈവരികളിൽ പലതിനും കേടുപാടുകൾ സംഭവിക്കുന്നുമുണ്ട്. കൈവരികൾ പുനഃസ്ഥാപിക്കാൻ പഞ്ചായത്ത്‌ അധികൃതർ നടപടി സ്വീകരിക്കണമെന്നു നാട്ടുകാർ ആവശ്യപ്പെട്ടു.

പുഞ്ചവയൽ 504 ഉന്നതിയിൽ അംബേദ്കർ ഗ്രാമം പദ്ധതിക്ക് ഒരു കോടിയുടെ ഭരണാനുമതി

മുണ്ടക്കയം: പൂഞ്ഞാർ നിയോജകമണ്ഡലത്തിലെ ഏറ്റവും വലിയ പട്ടികജാതി ഉന്നതിയായ കോരുത്തോട് പഞ്ചായത്തിലെ പുഞ്ചവയൽ 504ൽ അടിസ്ഥാന സൗകര്യ വികസനത്തിന് അംബേദ്കർ ഗ്രാമം പദ്ധതിയിൽ പട്ടികജാതി വികസനവകുപ്പിൽനിന്ന് ഒരു കോടി രൂപയുടെ ഭരണാനുമതി ലഭിച്ചതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. മുന്നൂറിലധികം കുടുംബങ്ങൾ അധിവസിക്കുന്ന ഈ ഉന്നതിയിൽ പട്ടികജാതി വിഭാഗത്തിൽപ്പെട്ട ആളുകളുടെ സമഗ്ര പുരോഗതി ലക്ഷ്യംവച്ച് വിശദമായ പദ്ധതി റിപ്പോർട്ട് തയാറാക്കി ഗവൺമെന്‍റിൽ സമർപ്പിക്കുകയും തുടർന്ന് മന്ത്രി ഒ.ആർ. കേളുവുമായി ചർച്ച നടത്തി ഫണ്ട് അനുവദിപ്പിക്കുകയായിരുന്നുവെന്നും എംഎൽഎ പറഞ്ഞു. ഉന്നതിയിൽ ഭവന പുനരുദ്ധാരണം, വിവിധ സംരക്ഷണഭിത്തികളുടെ നിർമാണം, ഗതാഗത സൗകര്യം മെച്ചപ്പെടുത്തൽ, ജലവിതരണ പദ്ധതി, മറ്റ് അടിസ്ഥാന സൗകര്യ വികസനം തുടങ്ങി വിവിധ പ്രവൃത്തികളാണ് നടപ്പിലാക്കുന്നത്.

"കരുതല്‍' പരിശീലന പദ്ധതിക്കു തുടക്കം

പാലാ: എസ്എംവൈഎം പാലാ മാര്‍ സ്ലീവാ മെഡിസിറ്റിയുമായി സഹകരിച്ച് നടത്തുന്ന ബേസിക് ലൈഫ് സപ്പോര്‍ട്ട് പരിശീലന പദ്ധതി "കരുതലി'ന് തുടക്കമായി. ആദ്യ പരിശീലനം എസ്എംവൈഎം രാമപുരം ഫൊറോനയുടെയും ചക്കാമ്പുഴ യൂണിറ്റിന്‍റെയും ആഭിമുഖ്യത്തില്‍ ചക്കാമ്പുഴ ലൊരേത്ത് മാതാ പള്ളി ഹാളില്‍ നടത്തി. എസ്എംവൈഎം പാലാ രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ ഉദ്ഘാടനം ചെയ്തു. രാമപുരം ഫൊറോന പ്രസിഡന്‍റ് ജെഫിന്‍ റോയി അധ്യക്ഷത വഹിച്ചു. രൂപത ട്രഷറര്‍ എഡ്വിന്‍ ജെയ്‌സ്, സെക്രട്ടറി ബെനിസണ്‍ സണ്ണി, ചക്കാമ്പുഴ യൂണിറ്റ് പ്രസിഡന്‍റ് ജിബിന്‍ തോമസ്, നീതു ജോര്‍ജ്, ക്രിസ്റ്റി എന്നിവര്‍ പ്രസംഗിച്ചു.

നടപ്പാത തകര്‍ന്ന നിലയില്‍

പാലാ: നഗര ഹൃദയത്തിൽ സെന്‍റ് തോമസ് സ്‌കൂളിന് സമീപത്ത് നടപ്പാതയിലെ സ്ലാബ് തകര്‍ന്ന നിലയില്‍. സെന്‍റ് തോമസ് സ്‌കൂളിനു സമീപം ടിടിസി റോഡ് ആരംഭിക്കുന്ന ഭാഗത്താണ് സ്ലാബ് തകര്‍ന്നത്. സ്‌കൂള്‍ കുട്ടികളടക്കം നിരവധി ആളുകള്‍ ദിവസേന കാല്‍നടയായി യാത്ര ചെയ്യുന്ന നടപ്പാതയാണിത്. ആരെങ്കിലും തകര്‍ന്ന സ്ലാബിനിടയില്‍പ്പെട്ട് ദുരന്തമുണ്ടാകുംവരെ അധികൃതർ കാത്തിരിക്കുകയാണെന്നു സമീത്തെ വ്യാപാരികളും യാത്രക്കാരും പറയുന്നു.

വായനശാലകൾ നാട്ടിൻപുറങ്ങളിലെ അനൗദ്യോഗിക സർവകലാശാലകൾ: മന്ത്രി വി.എൻ. വാസവൻ

പനമറ്റം: എല്ലാ വിഭാഗത്തിലുമുള്ള അറിവുകൾ നൽകുന്ന ഗ്രന്ഥശാലകൾ നാട്ടിൻപുറങ്ങളിലെ അനൗദ്യോഗിക സർവകലാശാലകളാണെന്ന് മന്ത്രി വി.എൻ. വാസവൻ. പനമറ്റം വെളിയന്നൂർ ദേശാഭിമാനി വായനശാലയുടെ പ്ലാറ്റിനം ജൂബിലി ആഘോഷത്തോടൊപ്പം പുതിയ ഇരുനിലമന്ദിരം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. കുമാരനാശാൻ മുതൽ മുരുകൻ കാട്ടാക്കട വരെയുള്ളവരുടെ കവിതകൾ ചൊല്ലിയും സദസിനോട് അവാർഡ് നേടിയ വിവിധ പുസ്തകങ്ങളെക്കുറിച്ച് ചോദിച്ചും പുതിയ പുസ്തകങ്ങളെക്കുറിച്ച് പറഞ്ഞുമായിരുന്നു മന്ത്രിയുടെ പ്രസംഗം. മാണി സി. കാപ്പൻ എംഎൽഎ അധ്യക്ഷത വഹിച്ചു. ഫോട്ടോ അനാച്ഛാദനം പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയിയും ഓഡിറ്റോറിയം ഉദ്ഘാടനം ജില്ലാ പഞ്ചായത്തംഗം ജെസി ഷാജനും നടത്തി. ആദ്യകാല പ്രവർത്തകരെ എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് ആദരിച്ചു.

കിടങ്ങൂര്‍ പഞ്ചായത്ത് മാലിന്യമുക്തമാക്കാൻ പാന്പാടി ബ്ലോക്ക് പഞ്ചായത്ത് പദ്ധതി

കിടങ്ങൂര്‍: പഞ്ചായത്ത് മാലിന്യമുക്തമാക്കി സംരക്ഷിക്കാന്‍ പാമ്പാടി ബ്ലോക്ക് പഞ്ചായത്ത് കിടങ്ങൂര്‍ പഞ്ചായത്തിന്‍റെ സഹകരണത്തോടെ പദ്ധതികള്‍ നടപ്പാക്കി. വാര്‍ഡുകളിലെ തെരഞ്ഞെടുത്ത കേന്ദ്രങ്ങള്‍ മാലിന്യമുക്തമാക്കിയതിനു ശേഷം സിസിടിവി സ്ഥാപിച്ചു. ചേര്‍പ്പുങ്കല്‍ ഹൈവേ ജംഗ്ഷനിലും പാലത്തിനു സമീപവും കക്കൂസ് മാലിന്യം സ്ഥിരമായി തള്ളുന്ന മുത്തോലത്ത് ഹാളിന്‍റെ സമീപവും കട്ടച്ചിറ ചെക്ക്ഡാമിന്‍റെ സമീപവുമാണ് കാമറകള്‍ സ്ഥാപിച്ചത്. ബ്ലോക്ക് മെംബർ ഡോ. മേഴ്സി ജോണിന്‍റെ 2024-25 വര്‍ഷത്തെ പദ്ധതി വിഹിതമായ 5.3 ലക്ഷം രൂപ വിനിയോഗിച്ച് പഞ്ചായത്തിലെ പുതിയ ടിവി സ്‌ക്രീന്‍ ഉപയോഗിച്ച് നിരീക്ഷണം നടത്താനുള്ള ക്രമീകരണവും പൂര്‍ത്തിയായി. പൂര്‍ത്തീകരിച്ച നൂതന പദ്ധതികളുടെ ഉദ്ഘാടനം മോന്‍സ് ജോസഫ് എംഎല്‍എ നിര്‍വഹിച്ചു. പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി, ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടയ്ക്കല്‍, കിടങ്ങൂര്‍ പഞ്ചായത്ത് പ്രസിഡന്‍റ് ഇ.എം. ബിനു, ബ്ലോക്ക് മെംബര്‍ അശോകന്‍ പൂതമന തുടങ്ങിയവര്‍ പ്രസംഗിച്ചു.

അല്ലാപ്പാറ-പയപ്പാര്‍ റോഡ് നിര്‍മാണം ആരംഭിച്ചു

പ്രവിത്താനം: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്തംഗം രാജേഷ് വാളിപ്ലാക്കല്‍ അനുവദിച്ച പത്തുലക്ഷം രൂപ ഉപയോഗിച്ച് കരൂര്‍ പഞ്ചായത്തിലെ അല്ലാപ്പാറ-പയപ്പാര്‍ റോഡിന്‍റെ നവീകരണ പ്രവര്‍ത്തനങ്ങള്‍ ആരംഭിച്ചു. ഭരണങ്ങാനം, കരൂര്‍ പഞ്ചായത്തുകളിലൂടെ കടന്നുപോകുന്ന പ്രധാനപ്പെട്ട റോഡുകളില്‍ ഒന്നാണ് അല്ലാപ്പാറ-പയപ്പാര്‍ റോഡ്. സൈഡ് കോണ്‍ക്രീറ്റിംഗും റീടാറിംഗുമാണ് പദ്ധതിയില്‍ ഉള്‍പ്പെടുത്തിയിരിക്കുന്നത്. പഞ്ചായത്ത് മെംബര്‍ ലിന്‍റണ്‍ ജോസഫിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ ഉദ്ഘാടനം നിര്‍വഹിച്ചു. ബ്ലോക്ക് പഞ്ചായത്ത് മെംബര്‍ ലിസമ്മ ബോസ്, ബാബു കാവുകാട്ട്, ഷാജി വട്ടക്കുന്നേല്‍, സിബി പ്ലാത്തോട്ടം, ജോഷി കുടിലുമറ്റം,ജോസ് മഞ്ഞകുന്നേല്‍ തുടങ്ങിയവര്‍ പ്രസംഗിച്ചു.

യൂണിറ്റി വാൾ ശ്രദ്ധേയമായി

പൂഞ്ഞാർ: സർദാർ വല്ലഭായി പട്ടേലിന്‍റെ 150-ാമത് ജന്മദിനാഘോഷങ്ങളുടെ ഭാഗമായി ജില്ലാ പോലീസ് നേതൃത്വം നൽകി പാലാ സബ്ഡിവിഷൻ സംഘടിപ്പിച്ച പ്രത്യേക പ്രോഗ്രാം യൂണിറ്റി വാൾ പൂഞ്ഞാറിൽ നടത്തി. കുട്ടികളിലും പൊതുജനങ്ങളിലും ദേശീയ ഐക്യം വളർത്തുക എന്ന ലക്ഷ്യത്തോടെയാണ് ഈരാറ്റുപേട്ട ജനമൈത്രി പോലീസിന്‍റെയും പൂഞ്ഞാർ സെന്‍റ് ആന്‍റണീസ് ഹയർ സെക്കൻഡറി സ്കൂളിലെ എസ്പിസി യൂണിറ്റിന്‍റെയും സംയുക്താഭിമുഖ്യത്തിൽ യൂണിറ്റി വാൾ നടത്തിയത്. പാലാ ഡിവൈഎസ്പി കെ. സദൻ ഉദ്ഘാനം ചെയ്തു. പൂഞ്ഞാർ തെക്കേക്കര പഞ്ചായത്ത് വൈസ് പ്രസിഡന്‍റ് രാജമ്മ ഗോപിനാഥ് അധ്യക്ഷത വഹിച്ചു. ഈരാറ്റുപേട്ട ജനമൈത്രി പോലീസ് എസ്ഐ ബിനോയി തോമസ്, സ്കൂൾ പ്രിൻസിപ്പൽ വിൽസൺ ജോസഫ്, ഹെഡ്മിസ്ട്രസ് സിസ്റ്റർ സൂസി മൈക്കിൾ, ജനസമിതി അംഗം എബി പൂണ്ടിക്കുളം എന്നിവർ പ്രസംഗിച്ചു.

കടയിലെ ആക്രമണത്തിനു പിന്നില്‍ ഗൂഢാലോചനയെന്ന് ഉടമ

പാലാ: തിരുവോണനാളില്‍ കടയിലുണ്ടായ ആക്രമണത്തിനു പിന്നില്‍ ചിലരുടെ ഗൂഢാലോചനയാണെന്ന് കടഉടമ ടോമി കുറ്റിയാങ്കല്‍ ആരോപിച്ചു. തനിക്കെതിരായി നിരന്തരം കള്ളപ്പരാതികള്‍ നല്‍കിയും തന്‍റെ സ്ഥാപനത്തില്‍ വാടക ഗുണ്ടകളെ അയച്ചു നിരന്തരം പ്രശ്‌നമുണ്ടാക്കിയും ജീവനും സ്വത്തിനും ഇവര്‍ ഭീഷണി സൃഷ്ടിക്കുകയാണെന്നും പാലാ പോലീസ് ഇവര്‍ക്ക് കൂട്ടുനില്‍ക്കുകയാണെന്നും ഐശ്വര്യ ബേക്കറി ഉടമ ടോമി കുറ്റിയാങ്കല്‍ പത്രസമ്മേളനത്തില്‍ പറഞ്ഞു. തിരുവോണനാളില്‍ കടയിലെത്തി പ്രശ്‌നങ്ങള്‍ സൃഷ്ടിച്ച നേപ്പാള്‍ സ്വദേശികളെ നാട്ടുകാരാണ് തടഞ്ഞത്. പിന്നീട് ഇവരെ പിന്തുണച്ചുകൊണ്ട് എത്തിയ ആളെ സംഭവസ്ഥലത്തുണ്ടായിരുന്ന വഴിയാത്രക്കാരാണ് ചോദ്യം ചെയ്തത്. ഇയാളെ കടയില്‍ എത്തിച്ചതിനു പിന്നിലും ഗൂഢാലോചനയുണ്ട്. തനിക്കെതിരായ ഗൂഢാലോചനയില്‍ അന്വേഷണം ആവശ്യപ്പെട്ട് ടോമി കേസ് രജിസ്റ്റര്‍ ചെയ്തിട്ടുണ്ട്. കഴിഞ്ഞ ദിവസം കടയിലെത്തിയ വഴിയാത്രക്കാരനെ മര്‍ദിച്ചു എന്ന ആരോപണത്തില്‍ ടോമി കുറ്റിയാങ്കലിനെതിരേയും പാലാ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

അരുണാപുരം മുഖംമിനുക്കുന്നു

‌പാലാ: അരുണാപുരത്തിന്‍റെ മുഖംമിനുക്കാന്‍ വിവിധ പദ്ധതികളുമായി നഗരസഭ. നഗരസഭയിലെ 22-ാം വാര്‍ഡായ അരുണാപുരത്ത് ഹെല്‍ത്ത് ആൻഡ് വെല്‍നസ് സെന്‍റര്‍ ബൈപാസിൽ പൂര്‍ണശ്രീ ബില്‍ഡിംഗില്‍ 16ന് പ്രവര്‍ത്തനം ആരംഭിക്കും. രാവിലെ 11 മുതല്‍ വൈകുന്നേരം ആറുവരെയാണ് പ്രവര്‍ത്തനസമയം. ഡോക്ടര്‍, നഴ്‌സ്, ഫാര്‍മസി സേവനങ്ങള്‍ സൗജന്യമാണ്. നാഷണല്‍ ഹെല്‍ത്ത് മിഷന്‍ പദ്ധതിപ്രകാരമാണ് പദ്ധതി തുടങ്ങുന്നത്. 16ന് ഉച്ചകഴിഞ്ഞ് മൂന്നിന് ജോസ് കെ. മാണി എംപി ഉദ്ഘാടനം ചെയ്യും. അരുണാപുരം, മുത്തോലി, വെള്ളാപ്പാട് മേഖലയിലെ ജനങ്ങള്‍ക്ക് ആരോഗ്യപരിപാലനരംഗത്ത് ഇതു വലിയ നേട്ടമാണെന്ന് വാര്‍ഡ് കൗണ്‍സിലറും നഗരസഭാ വികസനകാര്യ സ്റ്റാൻഡിംഗ് കമ്മിറ്റി ചെയര്‍മാനുമായ സാവിയോ കാവുകാട്ട് പറഞ്ഞു. പുതിയ കിണറും പമ്പ്ഹൗസും കുടിവെള്ളക്ഷാമം പരിഹരിക്കുന്നതിന് മീനച്ചിലാറ്റില്‍ നഗരസഭയുടെ 75 ലക്ഷം രൂപ ഘട്ടംഘട്ടമായി മുടക്കി പുതിയ കിണറും പമ്പ്ഹൗസും ഫില്‍റ്റര്‍ സിസ്റ്റവും സ്ഥാപിച്ചു. ഉദ്ഘാടനം 16ന് ഉച്ചകഴിഞ്ഞ് 2.30ന് ജോസ് കെ. മാണി എംപി നിര്‍വഹിക്കും. വാട്ടര്‍ അഥോറിട്ടിയുടെ മേല്‍നോട്ടത്തിലാണ് കിണറും പമ്പ്ഹൗസും തീര്‍ത്തിട്ടുള്ളത്. ആധുനിക രീതിയില്‍ വെള്ളം ഫില്‍റ്റര്‍ ചെയ്യുന്നതിനുള്ള സംവിധാനവും ചെയ്തിട്ടുണ്ട്. സ്മാര്‍ട്ട് അങ്കണവാടി അരുണാപുരം കരേപ്പാറ അങ്കണവാടി പൂര്‍ണമായും നവീകരിച്ച് സ്മാര്‍ട്ട് അങ്കണവാടിയാക്കുന്ന ജോലികള്‍ പൂര്‍ത്തീകരിച്ചുവരികയാണ്. നഗരസഭയുടെ ജനകീയാസൂത്രണ പദ്ധതി പ്രകാരമാണ് നിര്‍മാണം.

എകെസിസി നേതൃത്വ പരിശീലന ശില്പശാല

പാലാ: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ പാലാ രൂപതയിലെ യൂണിറ്റ്, ഫൊറോന, രൂപത ഭാരവാഹികള്‍ക്കായി സമുദായ ശക്തീകരണം രാഷ്‌ട്രപുരോഗതിക്ക് എന്ന വിഷയം ആസ്പദമാക്കി നേതൃത്വ പരിശീലന ശില്പശാല നടത്തും. ഇന്ന് ഉച്ചകഴിഞ്ഞു രണ്ടിന് ഭരണങ്ങാനം മാതൃഭവനില്‍ നടക്കുന്ന സമ്മേളനം ഗ്ലോബല്‍ പ്രസിഡന്‍റ് രാജീവ് കൊച്ചുപറമ്പില്‍ ഉദ്ഘാടനം ചെയ്യും. രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിക്കും. രൂപത ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍ ആമുഖ സന്ദേശം നല്‍കും. തുടര്‍ന്ന് ക്ലാസുകളും ചര്‍ച്ചകളും നടക്കും. ഗ്ലോബല്‍ ഭാരവാഹികളായ ജോസുകുട്ടി ഒഴുകയില്‍, ടോണി പുഞ്ചക്കുന്നേല്‍, ആന്‍സമ്മ സാബു, ജോണ്‍സണ്‍ വീട്ടിയാങ്കല്‍, രൂപത ഭാരവാഹികളായ ജോസ് വട്ടുകുളം, ജോയി കെ. മാത്യു എന്നിവര്‍ പ്രസംഗിക്കും.

കുറവിലങ്ങാട് പള്ളിയിൽ ഇന്ന് വിശുദ്ധ കുരിശിന്‍റെ തിരുശേഷിപ്പ് പരസ്യവണക്കത്തിന്

കുറവിലങ്ങാട്: വിശുദ്ധ കുരിശിന്‍റെ തിരുശേഷിപ്പ് വണങ്ങി പ്രാർഥിക്കാൻ ഇന്ന് കുറവിലങ്ങാട് പള്ളിയിൽ അവസരം. വിശുദ്ധ കുരിശിന്‍റെ പുകഴ്ചയുടെ തിരുനാളിനോടനുബന്ധിച്ചാണ് വിശുദ്ധ കുരിശിന്‍റെ തിരുശേഷിപ്പ് പരസ്യവണക്കത്തിന് പ്രതിഷ്ഠിക്കുന്നത്. ഇന്ന് ഉച്ചകഴിഞ്ഞ് മൂന്നിനാണ് തിരുശേഷിപ്പ് പുറത്തെടുത്ത് പ്രതിഷ്ഠിക്കുന്നത്. ഇന്ന് മൂന്നുമുതൽ ആരാധന. 4.25ന് തിരുശേഷിപ്പ് തിരികെ പ്രതിഷ്ഠിക്കും. 4.30ന് വിശുദ്ധ കുർബാന. ആർച്ച്പ്രീസ്റ്റ് റവ.ഡോ. തോമസ് മേനാച്ചേരിയുടെ നേതൃത്വത്തിൽ പ്രാർഥനാ ശുശ്രൂഷകൾ നടത്തും. വിശുദ്ധ കുരിശിന്‍റെ തിരുശേഷിപ്പ് സ്വന്തമായുള്ള അത്യപൂർവം ദേവാലയങ്ങളിൽ ഒന്നാണ് കുറവിലങ്ങാട് തീർഥാടന പള്ളി. ജോസഫ് കരിയാറ്റി മല്പാന്‍റെയും പാറേമ്മാക്കൽ ഗോവർണദോരുടെയും റോമായാത്രയ്ക്ക് നൽകിയ പിന്തുണയ്ക്കുള്ള നന്ദിയെന്നോണമാണ് പാറേമ്മാക്കൽ ഗോവർണദോർ കുറവിലങ്ങാട് പള്ളിക്ക് വിശുദ്ധ കുരിശിന്‍റെ തിരുശേഷിപ്പ് സമ്മാനിച്ചത്. അക്കാലത്ത് പള്ളി വികാരിയായിരുന്ന പനങ്കുഴയ്ക്കൽ കുര്യേപ്പ് കത്തനാർക്ക് സമ്മാനിച്ച വിശുദ്ധ കുരിശിന്‍റെ തിരുശേഷിപ്പ് പള്ളിയുടെ നിക്ഷേപമുറിയിൽ സൂക്ഷിക്കുകയായിരുന്നു. പള്ളി നവീകരണത്തോടെ തിരുശേഷിപ്പ് പള്ളിയുടെ വടക്കേ സൈഡ് അൾത്താരയിലാണ് പൂജ്യമായി പ്രതിഷ്ഠിച്ചിട്ടുള്ളത്.

അരുവിത്തുറ കോളജിൽ ശ്രവണ പരിമിതിക്കാർക്കായി സോഫ്റ്റ്‌വേർ

അരുവിത്തുറ: ഇന്ത്യൻ സൈൻ ലാംഗ്വേജ് (ഐഎസ്എൽ) പഠനവും പ്രചാരവും ലക്ഷ്യമിട്ട് അരുവിത്തുറ സെന്‍റ് ജോർജ്‌ കോളജിലെ കംപ്യൂട്ടർ ആപ്ലിക്കേഷൻസ് വിഭാഗം വിദ്യാർഥികൾ നൂതന ബ്രൗസർ എക്സ്റ്റൻഷൻ പുറത്തിറക്കി. ഐഎസ്എൽ വേഡ് അസിസ്റ്റന്‍റ് എന്നു പേരിട്ടിട്ടുള്ള ഈ ടൂൾ ഗൂഗിൾ ക്രോം മോസില്ല ഫയർഫോക്സ്, ബ്രേവ് ബ്രൗസർ എന്നിവയിൽ ലഭിക്കും. ബിസിഎ വിഭാഗത്തിന്‍റെ സമ്മർ ഇന്‍റേൺഷിപ്പ് പ്രോഗ്രാമിന്‍റെ ഭാഗമായി അൽബിൻ മാത്യൂസ്, സഞ്ജയ് എസ്. നായർ, അലൻ വിൻസെന്‍റ് എന്നീ വിദ്യാർഥികളാണ് ഈ എക്സ്റ്റൻഷൻ വികസിപ്പിച്ചത്. ബധിര സമൂഹവുമായുള്ള ആശയവിനിമയത്തിലെ വിടവ് നികത്താൻ എക്സ്റ്റൻഷൻ സഹായിക്കുമെന്ന് പ്രിൻസിപ്പൽ ഡോ. സിബി ജോസഫ് പറഞ്ഞു. പുതിയ സംരംഭത്തെ കോളജ് മാനേജർ ഫാ. സെബാസ്റ്റ്യൻ വെട്ടുകല്ലേൽ, ബർസാർ ഫാ. ബിജു കുന്നക്കാട്ട്, വൈസ് പ്രിൻസിപ്പൽ ഡോ. ജിനു ആനി ജോൺ എന്നിവർ അഭിനന്ദിച്ചു.

ഒന്നും രണ്ടും സ്ഥാനങ്ങള്‍ ഡോക്ടര്‍ ദമ്പതിമാര്‍ക്ക്

ചങ്ങനാശേരി: ഒരുലക്ഷത്തോളം ആളുകള്‍ പങ്കെടുത്ത ബൈബിള്‍ വചന മനഃപാഠ പദ്ധതിയായ നൂറുമേനി സീസണ്‍ 3 മത്സരത്തിന്‍റെ ഗ്രാന്‍ഡ് ഫിനാലെയില്‍ 148 പോയിന്‍റ് നേടി തിരുവനന്തപുരം റീജണിലെ ഡോ. അഭിലാഷ് കെ. തോമസ്, ഡോ. റോണാ ജോസഫ് പി, സെബാസ്റ്റ്യന്‍ തോമസ് കുഴിക്കാട്ടില്‍ എന്നിവരടങ്ങിയ കുടുംബം ജേതാക്കളായി. 147 പോയിന്‍റ് നേടി കോട്ടയം റീജണിലെ ഡോ. സുജിത് ജോ മാത്യു, ഡോ. അനു വര്‍ഗീസ്, മരിയ റോസ് ജോ മണിയങ്ങാട്ട് എന്നിവരുടെ കുടുംബം രണ്ടാം സ്ഥാനവും 140 പോയിന്‍റ് നേടി കുട്ടനാട് റീജണിലെ മാത്യു തോമസ്, മേരിക്കുട്ടി തോമസ്, മെര്‍ലി ആന്‍ മാത്യു തറയില്‍ കാനാച്ചേരി എന്നിവരുടെ കുടുംബം മൂന്നാം സ്ഥാനവും 120 പോയിന്‍റ് നേടി ചങ്ങനാശേരി റീജണിലെ ജയിംസ് കെ. ജേക്കബ്, ഷൈനി സെബാസ്റ്റ്യന്‍ കോലോത്ത്, മരിയ ജോസഫ് എന്നിവരുടെ കുടുംബം നാലാം സ്ഥാനവും 101 പോയിന്‍റ് നേടി നെടുംകുന്നം റീജണിലെ സോജി ചാക്കോ, മരിയ മാത്യു കൂനാനിക്കല്‍ എന്നിവരുടെ കുടുംബം അഞ്ചാം സ്ഥാനവും നേടി. ആദ്യ രണ്ടു സ്ഥാനങ്ങള്‍ നേടിയ ടീമുകള്‍ തമ്മില്‍ ഒരു പോയിന്‍റിന്‍റെ വ്യത്യാസമേയുള്ളൂ. ജീസസ് യൂത്തില്‍ മെഡിക്കല്‍ കോളജ് പഠന കാലഘട്ടംമുതല്‍ത്തന്നെ സജീവമാണ് ഒന്നും രണ്ടും സമ്മാനങ്ങള്‍ നേടിയ ഡോക്ടര്‍ ദമ്പതികള്‍. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം വിജയികളെ പ്രഖ്യാപിച്ചു. നൂറുമേനി വചനപഠനം വചനം ലോകമെമ്പാടും എത്തിക്കുന്നതില്‍ വലിയ പങ്കാണ് വഹിക്കുന്നതെന്ന് മാര്‍ ജോസഫ് പെരുന്തോട്ടം അഭിപ്രായപ്പെട്ടു. ഡോ. റൂബിള്‍ രാജാണ് ഫിനാലെ ക്വിസ് നയിച്ചത്. ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, നൂറുമേനി ചെയര്‍മാന്‍ സണ്ണി തോമസ് ഇടിമണ്ണിക്കല്‍, ഫാ. ജോജിന്‍ ഇലഞ്ഞിക്കല്‍, ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പ്രഫ. ജോസഫ് ടിറ്റോ എന്നിവര്‍ പ്രസംഗിച്ചു.

നൂറുമേനി വിജയികളുടെ മഹാസംഗമം ഇന്ന്

ചങ്ങനാശേരി: ചങ്ങനാശേരി അതിരൂപത ബൈബിള്‍ അപ്പൊസ്തലേറ്റ്, കുടുംബ കൂട്ടായ്മ എന്നിവയുടെ സംയുക്താഭിമുഖ്യത്തില്‍ അതിരൂപതയിലെ 250 ഇടവകകളില്‍ നിന്നായി ഒരു ലക്ഷത്തോളം ആളുകള്‍ പങ്കെടുത്ത നൂറുമേനി വചനപഠന മത്സരവിജയികളുടെ മഹാസംഗമവും എന്‍റെ സ്വന്തം ബൈബിള്‍ പദ്ധതിയുടെ ഉദ്ഘാടനവും ഇന്ന് എസ്ബി കോളജ് കാവുകാട്ട് ഹാളില്‍ നടക്കും. രാവിലെ 10ന് ആര്‍ച്ച്ബിഷപ് മാര്‍ തോമസ് തറയിലിന്‍റെ അധ്യക്ഷതയില്‍ ചേരുന്ന സമ്മേളനം മലങ്കരസഭാ മേജര്‍ ആര്‍ച്ച്ബിഷപ് ബസേലിയോസ് മാര്‍ ക്ലീമിസ് കാതോലിക്ക ബാവ ഉദ്ഘാടനം ചെയ്യും. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണവും വികാരി ജനറാള്‍ മോണ്‍. ആന്‍റണി എത്തക്കാട്ട് മുഖ്യപ്രഭാഷണവും നടത്തും. ചലച്ചിത്ര നടന്‍ സിജോയ് വര്‍ഗീസ് വചന സാക്ഷ്യം നല്‍കും. ചലച്ചിത്ര നിര്‍മാതാവും ഗാനരചയിതാവുമായ ലിസി ഫെര്‍ണാണ്ടസ്, അതിരൂപത ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, മീഡിയ വില്ലേജ് കോ ഓര്‍ഡിനേറ്റര്‍ ഫാ. ജോജിന്‍ ഇലഞ്ഞിക്കല്‍, നൂറുമേനി വചന പഠനപദ്ധതി ചെയര്‍മാന്‍ സണ്ണി ഇടിമണ്ണിക്കല്‍, ബൈബിള്‍ അപ്പൊസ്തലേറ്റ് അതിരൂപത പ്രസിഡന്‍റ് ഡോ. റൂബിള്‍ രാജ്, ഡോ.പി.സി. അനിയന്‍കുഞ്ഞ്, ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പ്രഫ. ജോസഫ് ടിറ്റോ, സിസ്റ്റര്‍ ചെറുപുഷ്പം, ജോസി കടന്തോട്, മറിയം ജോര്‍ജ് എന്നിവര്‍ പ്രസംഗിക്കും. അയ്യായിരത്തിലേറെ പേര്‍ മഹാസംഗമത്തില്‍ പങ്കെടുക്കും. വചനപഠനം ലോകനന്മയ്ക്ക് യുദ്ധങ്ങളും സംഘര്‍ഷങ്ങളും ആകുലതയും സ്‌നേഹരാഹിത്യവും നിറഞ്ഞ ആധുനിക കാലഘട്ടത്തില്‍ വചനപഠനം സമാധാനത്തിനും സാമൂഹ്യനന്മയ്ക്കുമുള്ള പ്രധാന ഉപാധിയാണ്. ജീവിതത്തിന്‍റെ മുഴുവന്‍ പ്രശ്‌നങ്ങൾക്കും പ്രതിസന്ധികള്‍ക്കും വചനം ഉത്തരം നല്‍കുന്നുണ്ട്. അതിനാലാണ് ചങ്ങനാശേരി അതിരൂപതയില്‍ നൂറുമേനി വചനമനഃപാഠ മത്സരം സംഘടിപ്പിച്ചിരിക്കുന്നത്. ചങ്ങനാശേരി അതിരൂപതയിലെ എല്ലാ കുടുംബങ്ങളിലെയും മുഴുവന്‍ അംഗങ്ങള്‍ക്കും സ്വന്തമായി ബൈബിള്‍ ലഭ്യമാക്കുന്ന എന്‍റെ സ്വന്തം ബൈബിള്‍ പദ്ധതിക്കും നൂറുമേനി സീണണ്‍ നാലിനും ഇന്ന് തുടക്കമാകും. സണ്ണി തോമസ് ഇടിമണ്ണിക്കല്‍ (നൂറുമേനി അതിരൂപതാ ചെയര്‍മാന്‍)

ചങ്ങനാശേരി കെഎസ്ആര്‍ടിസി ബസ് സ്റ്റാന്‍ഡിന്‍റെ നിര്‍മാണം പുരോഗമിക്കുന്നു

ചങ്ങനാശേരി: ആധുനിക രീതിയില്‍ നവീകരിക്കുന്ന ചങ്ങനാശേരി കെഎസ്ആര്‍ടിസി ബസ് സ്റ്റാന്‍ഡിന്‍റെ നിര്‍മാണം പുരോഗമിക്കുന്നു. ജോബ് മൈക്കിള്‍ എംഎല്‍എയുടെ ആസ്തിവികസന ഫണ്ടില്‍നിന്നുള്ള 7.05 കോടി രൂപ വിനിയോഗിച്ചാണ് നിര്‍മാണം. പൊതുമരാമത്ത് വകുപ്പാണ് നിര്‍മാണം. 905 ചതുരശ്രമീറ്ററില്‍ രണ്ടുനിലകളിലായി ഓവല്‍ ആകൃതിയിലാണ് കെട്ടിടത്തിന്‍റെ രൂപകല്പന. ഒന്നാം നിലയുടെ കോണ്‍ക്രീറ്റിംഗ് ജോലികള്‍ നിലവില്‍ പുരോഗമിക്കുന്നു. എന്‍ക്വയറി ആന്‍ഡ് ടിക്കറ്റ് കൗണ്ടര്‍, പോലീസ് എയ്ഡ് പോസ്റ്റ്, കോഫി ബാര്‍, ഹെല്‍ത്ത് റൂം, സ്റ്റേഷന്‍ മാസ്റ്ററുടെ മുറി, കാത്തിരിപ്പ് മുറി, സെക്യൂരിറ്റി മുറി, ഇലക്‌ട്രിക്കല്‍ മുറി, മുലയൂട്ടല്‍ മുറി എന്നിവ താഴത്തെ നിലയില്‍ സജ്ജീകരിക്കും. കാലപ്പഴക്കത്തെത്തുടര്‍ന്ന് അപകട ഭീഷണിയിലായ പഴയ കെട്ടിടം പൊളിച്ചുമാറ്റിയാണ് നിലവിലെ കെട്ടിടം നിര്‍മിക്കുന്നത്. നിലവില്‍ യാത്രക്കാര്‍ക്കായി താത്കാലിക ബസ് കാത്തിരിപ്പ് കേന്ദ്രം ഒരുക്കിയിട്ടുണ്ട്. വിവിധ വര്‍ഷത്തെ എംഎല്‍എ ഫണ്ടുകള്‍ സംയോജിപ്പിച്ച് പ്രത്യേക അനുമതി വാങ്ങിയെടുത്താണു നിര്‍മാണം സാധ്യമാക്കിയതിതെന്നു എംഎല്‍എ പറഞ്ഞു.

സര്‍ക്കാര്‍ കര്‍ഷകരെ തകർക്കുന്നു: നെല്‍കര്‍ഷക സംരക്ഷണ സമിതി

ചങ്ങനാശേരി: കേരളത്തിലെ നെല്‍കര്‍ഷകരെ തകര്‍ക്കുന്ന സമീപനമാണ് സര്‍ക്കാര്‍ സ്വീകരിക്കുന്നതെന്ന് നെല്‍കര്‍ഷക സംരക്ഷണ സമിതി സംസ്ഥാന രക്ഷാധികാരി വി.ജെ. ലാലി. സര്‍ക്കാരിനെതിരേ ശക്തമായ സമരത്തിന് കര്‍ഷകര്‍ തയാറാവുമെന്നും അദ്ദേഹം കൂട്ടിച്ചേര്‍ത്തു. പായിപ്പാട് -പെരിങ്ങര മേഖലാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മേഖലാ പ്രസിഡന്‍റ് സോണി കളരിക്കല്‍ അധ്യക്ഷത വഹിച്ചു. സമിതി രക്ഷാധികാരിയും നടനുമായ കൃഷ്ണപ്രസാദ് മുഖ്യപ്രസംഗം നടത്തി. സംസ്ഥാന ജനറല്‍ സെക്രട്ടറി സോണിച്ചന്‍ പുളിങ്കുന്ന് സമര പ്രഖ്യാപനം നടത്തി. വര്‍ക്കിംഗ് പ്രസിഡന്‍റ് പി.ആര്‍. സതീശന്‍, വൈസ് പ്രസിഡന്‍റ് വിനോദ് കോവൂര്‍, സണ്ണി തോമസ്, വി.ജെ. സെബാസ്റ്റ്യന്‍, പി.പി. സേവ്യര്‍, എന്‍.കെ. കുര്യന്‍, പി.ടി. വര്‍ഗീസ് എന്നിവര്‍ പ്രസംഗിച്ചു. നെല്‍കര്‍ഷക സംരക്ഷണ സമിതി സംസ്ഥാന സമ്മേളനം 27, 28 തീയതികളില്‍ മാമ്പുഴക്കരിയില്‍ നടക്കും. സംസ്ഥാന പ്രചാരണ ജാഥയ്ക്ക് 19ന് സ്വീകരണം നല്‍കാനും യോഗം തീരുമാനിച്ചു.

പെരുന്ന മന്നം നഗര്‍ വാര്‍ഡിനോട് അവഗണന : വീടുകളിലെ ലൈറ്റുകളണച്ച് മെഴുകുതിരി തെളിച്ച് പ്രതിഷേധം

ചങ്ങനാശേരി: പെരുന്ന മന്നം നഗര്‍ മേഖലയോടു നഗരസഭ കാണിക്കുന്ന അവഗണനക്കെതിരേ മന്നം നഗര്‍ റെസിഡന്‍റ്സ് വെല്‍ഫെയര്‍ അസോസിയേഷന്‍റെ ആഭിമുഖ്യത്തില്‍ പ്രതിഷേധ ജ്വാല തെളിച്ചു. മേഖലയിലെ താറുമാറായ റോഡുകള്‍ നന്നാക്കാത്തതിലും വഴിവിളക്കുകള്‍ പ്രകാശിപ്പിക്കാത്തതിലും പ്രതിഷേധിച്ചാണ് ജ്വാല തെളിച്ചത്. ഇതുസംബന്ധിച്ച് നിരന്തരമായി നിവേദനങ്ങളും പരാതികളും നല്‍കിയിട്ടും ഒരു പരിഹാര നടപടികളും ഉണ്ടായിട്ടില്ലെന്നും അനുവദിച്ച റോഡ് വര്‍ക്കുകള്‍പോലും നടത്തിയില്ലെന്നും ഭാരവാഹികള്‍ ചൂണ്ടിക്കാട്ടി. ചെയര്‍പേഴ്‌സണ്‍ പ്രതിനിധാനം ചെയ്യുന്ന ഇരുപതാം വാര്‍ഡിലായിരുന്നു സമരപരിപാടി. കഴിഞ്ഞദിവസം രാത്രി ഏഴുമുതല്‍ പത്തു മിനിറ്റ് മന്നം നഗര്‍ മേഖലയിലെ എല്ലാ വീടുകളിലേയും ലൈറ്റുകളണച്ച് മെഴുകുതിരി കത്തിച്ചായിരുന്നു പ്രതിഷേധം. അസോസിയേഷന്‍ ഓഫീസിനു മുമ്പില്‍ ചേര്‍ന്ന യോഗത്തില്‍ അസോസിയേഷന്‍ പ്രസിഡന്‍റ് രാജീവ് മേച്ചേരി അധ്യക്ഷത വഹിച്ചു. രക്ഷാധികാരി നാരായണന്‍ നായര്‍ ഉദ്ഘാടനം ചെയ്തു. സെക്രട്ടറി മുരളീധരന്‍ ശാന്തി ഭവന്‍, രാമചന്ദ്രന്‍ പോറ്റി ഗൗരീശം, വിനോദ് കുമാര്‍ അട്ടിയില്‍, അനില്‍കുമാര്‍ ശരവണ ഭവന്‍, അജിത്കുമാര്‍ തോട്ടത്തില്‍, ചന്ദ്രസേനന്‍ നായര്‍ ശോഭാ വിഹാര്‍ എന്നിവര്‍ പ്രസംഗിച്ചു.

വാഴപ്പള്ളി ഗവ. വിഎച്ച്എസ്എസ് മൈതാനം കാടുകയറി; വിഷപ്പാന്പുകളുടെ താവളം

ചങ്ങനാശേരി: വാഴപ്പള്ളി ഗവൺമെന്‍റ് വൊക്കഷണല്‍ ഹയര്‍ സെക്കന്‍ഡറി സ്‌കൂള്‍ മൈതാനം കാടുകയറിയ നിലയില്‍. വിദൂരസ്ഥലങ്ങളില്‍നിന്നുപോലും ഈ മൈതാനത്ത് മാലിന്യം തള്ളുന്നു. കാടുമൂടിക്കിടക്കുന്ന ഈ സ്ഥലം കണ്ടാല്‍ വനത്തിന്‍റെ പ്രതീതിയാണ്. തെരുവുനായ്ക്കള്‍ പെറ്റുപെരുകിയ ഇവിടം ഇവറ്റകളുടെ വിഹാര കേന്ദ്രമാണ്. വിഷപ്പാമ്പുകളുടെ താവളംകൂടിയാണിവിടം. സാമൂഹ്യവിരുദ്ധരുടെ ശല്യവും വര്‍ധിച്ചിട്ടുണ്ട്. കുറ്റിച്ചെടികള്‍ക്കൊപ്പം മൈതാനത്തിന്‍റെ ഒരു ഭാഗത്ത് നെല്‍ച്ചെടികള്‍ കതിരണിഞ്ഞ കാഴ്ച കൗതുകകരമാണ്. നഗരസഭയുടെ ഒന്നാം വാര്‍ഡിലാണ് സ്‌കൂള്‍ സ്ഥിതിചെയ്യുന്നതെങ്കില്‍ ഏകദേശം ഇരൂനൂറ് മീറ്റര്‍ അകലെ 36-ാം വാര്‍ഡിലാണ് ഈ മൈതാനം. 2010ല്‍ ചങ്ങനാശേരി നഗരസഭാ ജനകീയാസൂത്രണ പദ്ധതി പ്രകാരം നവീകരണം നടത്തിയിരുന്നു. കഴിഞ്ഞദിവസം സ്‌കൂളിന്‍റെ നേതൃത്വത്തില്‍ നടന്ന കായികദിനാചരണം ലയണ്‍സ് ക്ലബ് ഗ്രൗണ്ടിലാണ് നടത്തിയത്. മഴക്കാലത്ത് ഈ സ്ഥലത്ത് വെള്ളക്കെട്ടുണ്ടാകുന്നതും പതിവാണ്. തോട്ടായിപ്പള്ളി ജനാര്‍ദനന്‍ എന്നയാള്‍ വര്‍ഷങ്ങള്‍ക്കുമുമ്പു സ്‌കൂളിന് സൗജന്യമായി നല്‍കിയ സ്ഥലമാണിത്. കരപ്രദേശവും ചതുപ്പുമായി ഒരേക്കറിലധികം സ്ഥലമാണുള്ളത്. മിക്കവര്‍ഷങ്ങളിലും നഗരസഭ ഹരിതകര്‍മ സേനയെക്കൊണ്ട് ഈ സ്ഥലത്തെ കാട് വെട്ടിത്തെളിക്കാറുണ്ടെങ്കിലും വീണ്ടും വളര്‍ന്നുകയറുകയാണ് പതിവ്. മൈതാനത്തിന്‍റെ സ്ഥലം കാടുപിടിച്ചു കിടക്കുന്നതിനാല്‍ വിദ്യാര്‍ഥികള്‍ക്ക് ഉപയോഗപ്പെടുന്നില്ലെന്നു മാത്രമല്ല സമീവാസികള്‍ക്കും ദുരിതമായി മാറുകയാണ് ചെയ്യുന്നത്. കൊയ്ത്തുകാലത്ത് സമീപ പാടശേഖരങ്ങളിലെ നെല്ല് ചാക്കുകള്‍ ഈ സ്ഥലത്തെത്തിച്ചാണ് ലോറിയില്‍ കയറ്റിക്കൊണ്ടു പോകുന്നത്. അപ്പോള്‍ ഇവിടെ വീണ നെല്ലാണ് ചെടികളായി വളർന്ന് ഇപ്പോള്‍ കതിരണിഞ്ഞു നില്‍ക്കുന്നത്. വിദ്യാര്‍ഥികള്‍ക്കും നാട്ടുകാര്‍ക്കും ഉപകാരപ്പെടുന്ന മൈതാനമാക്കണം ഈ മൈതാനത്ത് നവീകരണ പ്രവര്‍ത്തനങ്ങള്‍ നടത്തിയാല്‍ കോയിപ്രം സ്‌കൂളിലെ വിദ്യാര്‍ഥികളുടെ കായിക പ്രോത്സാഹനത്തിനൊപ്പം കോയിപ്രം, വാഴപ്പള്ളി കണ്ണേപേരൂര്‍, കുറ്റിശേരിക്കടവ് ഭാഗങ്ങളിലുള്ള കായികമ്രേികള്‍ക്കും ഗുണകരമാകുമെന്ന് ചൂണ്ടിക്കാണിക്കപ്പെടുന്നു. ഇതിനുള്ള പ്രോജക്ട് നഗരസഭ വിഭാവനം ചെയ്യണമെന്ന നിര്‍ദേശവും ഉയരുന്നുണ്ട്. അമ്പതു ലക്ഷത്തിന്‍റെ പദ്ധതി പരിഗണനയില്‍ സ്‌കൂള്‍ വിദ്യാര്‍ഥികള്‍ക്കും കായിക പ്രേമികള്‍ക്കും ഉപകരിക്കത്തക്കവിധം അമ്പത് ലക്ഷം രൂപയുടെ പദ്ധതി മൈതാനത്തിനായി ആവിഷ്‌കരിച്ചുവരികയാണ്. എസ്റ്റിമേറ്റ് എടുത്ത് തുടര്‍നടപടികളിലേക്കു നീങ്ങും. സ്മിതാ സുനില്‍ നഗരസഭ ഒന്നാംവാര്‍ഡ് കൗണ്‍സിലര്‍ കായികവകുപ്പുമായി ചേര്‍ന്നുള്ള പദ്ധതി നഗരസഭയുടെ മേല്‍നോട്ടത്തില്‍ സംസ്ഥാന കായിക വകുപ്പുമായി ചേര്‍ന്ന മൈതാനത്തിന്‍റെ വികസനത്തിനു വേണ്ടിയുള്ള പദ്ധതിയാണ് ആലോചനയിലുള്ളത്. ആര്‍. ശിവകുമാര്‍ 36-ാം വാര്‍ഡ് കൗണ്‍സിലര്‍.

വെട്ടിക്കാട്ടുമുക്ക് സർക്കാർ തടി ഡിപ്പോയിൽ തേക്ക് തടികളെത്തി

തലയോലപ്പറമ്പ്: വെട്ടിക്കാട്ട് മുക്ക് സർക്കാർ തടി ഡിപ്പോയിൽ തേക്ക് തടികളുടെ ചില്ലറ വിൽപ്പന ആരംഭിക്കുന്നു. ഒന്നര വർഷത്തിനു ശേഷമാണ് വെട്ടിക്കാട്ടുമുക്ക് ഡിപ്പോയിൽ തേക്കുതടികളുടെ ചില്ലറ വിൽപ്പന പുനരാരംഭിക്കുന്നത്. അയ്യപ്പൻകോവിൽ റേഞ്ച് ഓഫീസ് തേക്ക് പ്ലാന്‍റേഷനിൽനിന്നുള്ള 82 തേക്കുതടികളാണ് വിൽപനയ്ക്കായി എത്തിച്ചിരിക്കുന്നത്.71 വർഷം വളർച്ചയുള്ള ഈ തേക്കുതടികൾക്ക് വെള്ളയുണ്ടാകില്ലെന്നതാണു പ്രത്യേകത. ഹോൾസെയിൽ വിൽപ്പന നടക്കാറുണ്ടായിരുന്നെങ്കിലും വൻകിടക്കാർ പങ്കെടുക്കുന്ന ഇ-ലേലത്തിൽ സാധാരണക്കാർക്ക് പങ്കെടുക്കാൻ കഴിഞ്ഞിരുന്നില്ല. ചില്ലറ വിൽപന ആരംഭിക്കണമെന്ന ജനങ്ങളുടെ നിരന്തരമായ ആവശ്യത്തിനാണ് ഇപ്പോൾ പരിഹാരമാകുന്നത് . ചില്ലറവിൽപ്പന പ്രകാരം അഞ്ച് ക്യുബിക് മീറ്റർ (എകദേശം 35.3 ക്യുബിക് അടി ) തേക്ക് തടികൾ വീടുപണിക്കായി 19 മുതൽ മൂന്നു മാസത്തേക്ക് സ്റ്റോക്ക് തീരുന്നതുവരെ ലഭ്യമാണ്. ഇതിനുവേണ്ടി ആവശ്യക്കാർ ബന്ധപ്പെട്ട ലോക്കൽ ബോഡി അംഗീകരിച്ച ബിൽഡിംഗ് പ്ലാൻ, പെർമിറ്റ്, തിരിച്ചറിയൽ രേഖ എന്നിവ ഹാജരാക്കിയാൽ തടികൾ ലഭിക്കും. കൂടുതൽ വിവരങ്ങൾക്ക് ഓഫീസുമായി ബന്ധപ്പെടണമെന്ന് ഡിപ്പോ ഓഫീസർ വി.ആർ. നിഷാന്ത് അറിയിച്ചു. നമ്പർ: 8547601572.

വീട്ടിൽ കയറി അക്രമം; പ്രതി റിമാൻഡിൽ

ഉദയനാപുരം: വീട്ടിൽ അതിക്രമിച്ചു കയറി അക്രമം നടത്തിയ പ്രതി അറസ്റ്റിൽ. ഉദയനാപുരം ചെട്ടിമംഗലം ഇറത്തറ അജിയാണ് വൈക്കം പോലീസിന്‍റെ പിടിയിലായത്. പ്രതിയെ പരാതിക്കാരി വീട്ടിൽ നിന്നും ഇറക്കിവിട്ടതിലുളള വിരോധംമൂലം കഴിഞ്ഞ പത്തിന് ഉച്ചകഴിഞ്ഞ് 1.30ന് പരാതിക്കാരി കുടുംബമായി താമസിക്കുന്ന പാക്കുകണ്ടത്തിൽ വീട്ടുമുറ്റത്ത് അതിക്രമിച്ച് കയറി അസഭ്യം പറയുകയും കൈയിൽ കരുതിയിരുന്ന ആയുധം ഉപയോഗിച്ച് പരിക്കേൽപ്പിക്കുകയും ബലപ്രയോഗം നടത്തുകയും ചെയ്ത സംഭവത്തിലാണ് കേസടുത്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കളത്തൂര്‍ പള്ളിയില്‍ തിരുനാളിന് കൊടിയേറി

കടുത്തുരുത്തി: കളത്തൂര്‍ സെന്‍റ് മേരീസ് പള്ളിയില്‍ മാതാവിന്‍റെ ജനനത്തിരുനാളിന് കൊടിയേറി. വികാരി റവ.ഡോ. സൈറസ് വേലംപറമ്പില്‍ കാര്‍മികത്വം വഹിച്ചു. ഇന്നു രാവിലെ ആറിന് തിരുസ്വരൂപ പ്രതിഷ്ഠ. 6.15ന് വിശുദ്ധ കുര്‍ബാന, നൊവേന, അഞ്ചിന് ഫാ.ജോസഫ് ചൂരയ്ക്കല്‍ പാട്ടുകുര്‍ബാനയര്‍പ്പിച്ചു സന്ദേശം നല്‍കും. തുടർന്ന് വിശുദ്ധ റീത്താ കപ്പേളയിലേക്ക് പ്രദക്ഷിണം. ഏഴിന് കപ്പളയില്‍ ലദീഞ്ഞ്, തുടര്‍ന്ന് പള്ളിയിലേക്കു പ്രദക്ഷിണം, പള്ളിയില്‍ സമാപനാശീർവാദം, തിരുശേഷിപ്പ് വണക്കം. പ്രധാന തിരുനാള്‍ ദിനമായ നാളെ രാവിലെ 5.30 നും ഏഴിനും വിശുദ്ധ കുര്‍ബാന, പത്തിന് തിരുനാള്‍ പാട്ടുകുര്‍ബാന -ഫാ.അഗസ്റ്റിന്‍ കണ്ടെത്തിക്കുടിലില്‍, പ്രസംഗം - ഫാ.ആല്‍ബിന്‍ പുതുപ്പറമ്പില്‍, തുടര്‍ന്ന് പ്രദിക്ഷണം.

ജയിംസ് കുര്യൻ രാജിവച്ചു

ഏറ്റുമാനൂർ: ജനാധിപത്യ കേരള കോൺഗ്രസ് സംസ്ഥാന ജനറൽ സെക്രട്ടറി ജയിംസ് കുര്യൻ പാർട്ടിയിൽനിന്ന് രാജിവച്ചു. ഏറ്റുമാനൂർ ബ്ലോക്ക് പഞ്ചായത്ത് മെംബർ സ്ഥാനവും രാജിവച്ചു. ജനാധിപത്യ കേരള കോൺഗ്രസ് ഏറ്റുമാനൂർ നിയോജകമണ്ഡലം പ്രസിഡന്‍റ് പി.വി. വർക്കി പുതിയാപറമ്പിൽ, കർഷക യൂണിയൻ ജില്ലാ സെക്രട്ടറി സി.ജെ. മാത്യു ചാമക്കാലാ, ജനാധിപത്യ കേരള കോൺഗ്രസ് ജില്ലാ എക്സിക്യൂട്ടീവ് കമ്മിറ്റി മെംബർ ജോർജ് തലയണക്കുഴി, അതിരമ്പുഴ മണ്ഡലം പ്രസിഡന്‍റ് കെ.എ. ഷാജു കരിവേലിൽ, യൂത്ത്ഫ്രണ്ട് ജില്ലാ സെക്രട്ടറി സജിൻ കുര്യൻ, ജനാധിപത്യ കേരള കോൺഗ്രസ് നിയോജകമണ്ഡലം സെക്രട്ടറി ബിനോയ് കെ. ജോർജ് കുറുപ്പുംതുണ്ടം, ലൂക്കാ കുര്യൻ തോക്കനിയിൽ, വൈസ് പ്രസിഡന്‍റ് എ.ടി. തോമസ് ആനിത്തോട്ടത്തിൽ എന്നിവരും ജയിംസ് കുര്യനൊപ്പം രാജിവച്ചു. 13 അംഗ ബ്ലോക്ക് പഞ്ചായത്തിൽ ജയിംസ് കുര്യൻ ഉൾപ്പെടെ എൽഡിഎഫിന് ഒമ്പതും യുഡിഎഫിന് നാലും അംഗങ്ങ ളായിരുന്നു.

നായർ മഹാസമ്മേളനം ഇന്ന്

വൈക്കം: വൈക്കം താലൂക്ക് എൻഎസ്എസ് യൂണിയന്‍റെ നേതൃത്വത്തിൽ ഇന്നു വൈക്കത്ത് നായർ മഹാസമ്മേളനം നടക്കും.ഒരു വർഷമായി നടത്തിവരുന്ന മന്നം നവോത്ഥാന സൂര്യൻ എന്ന പരിപാടിയുടെ സമാപനവും നവതി ആഘോഷങ്ങളുടെ ആരംഭവും കുറിക്കുന്ന മഹാ സമ്മേളനത്തിൽ വൈക്കം യൂണിയനിലെ 97 കരയോഗങ്ങളിൽനിന്നായി 25,000 പങ്കെടുക്കും. മേഖലകളിൽനിന്നു വരുന്ന അംഗങ്ങൾ ഉച്ചയ്ക്കു രണ്ടിന് വലിയകവലയിൽ സംഗമിച്ച് സാംസ്കാരിക ഘോഷയാത്ര ആരംഭി ക്കും. വടക്കേനട, പടിഞ്ഞാറേനട, കച്ചേരിക്കവല ബോട്ടുജെട്ടി വഴി ബീച്ച് മൈതാനിയിൽ പ്രവേശിക്കുന്ന ഘോഷയാത്രയിൽ വാദ്യ മേളങ്ങളും നിശ്ചലദൃശ്യങ്ങളും കലാരൂപങ്ങളും നിലക്കാവടിയും അകമ്പടിയേകും.3.30ന് ബീച്ച് മൈതാനത്ത് നട ക്കുന്ന സമാപന യോഗം എൻ എസ്എസ് വൈസ് പ്രസിഡന്‍റ് എം.സംഗീത് കുമാർ ഉദ്ഘാടനം ചെയ്യും. യൂണിയൻ ചെയർമാൻ പി.ജി.എം.നായർ കാരിക്കോട് അധ്യക്ഷത വഹിക്കും. എൻഎസ്എസ് സെക്രട്ടറി ഹരികുമാർ കോയിക്കൽ മുഖ്യപ്രഭാഷണം നടത്തും. പാർക്കിംഗ് സംവിധാനം നഗരത്തിൽ വിപുലമായ പാർക്കിംഗ് സംവിധാനമാണ് ഒരുക്കുന്നത്. പാർക്കിംഗ് മൂന്ന് ഗ്രൂപ്പായി തിരിച്ചാണ് ക്രമീകരിക്കുന്നത്. വൈക്കം, ഉദയനാപുരം, ചെമ്പ്, മറവൻതുരുത്ത് മേഖല വലിയകവലയിൽ ഉദയനാപുരം റോഡിന്‍റെ കിഴക്കുഭാഗത്ത് ഘോഷയാത്രയ്ക്കായി അണിനിരക്കും. പ്രവർത്തകർ എത്തുന്ന വാഹനങ്ങൾ വലിയകവല, കൊച്ചുകവല റോഡിൽ ചിറമേൽഓഡിറ്റോറിയം, ആതുരാശ്രമം ഗ്രൗണ്ട്, ഉദയനാപുരം ക്ഷേത്രത്തിൻ്റെ തെക്കേനട എന്നിവിടങ്ങളിൽ പാർക്ക് ചെയ്യണം. ടിവിപുരം, തലയാഴം,വെച്ചൂർ,കല്ലറ മേഖലയിലെ പ്രവർത്തകർ വലിയകവല കൊച്ചുകവല റോഡിൽ തെക്ക് ഭാഗത്തായി അണി നിരക്കും.വാഹനങ്ങൾ ആശ്രമം സ്കൂളിൽ പാർക്ക് ചെയ്യണം. മാഞ്ഞൂർ, കടുത്തുരുത്തി,ഞീഴൂർ,മു ളക്കുളം, വെള്ളൂർ, തലയോലപ്പറമ്പ് മേഖലയിലെ പ്രവർത്തകർ ലിങ്ക് റോഡ് മുതൽ വല്ലകം വരെ റോഡിന്‍റെ വടക്കു ഭാഗത്ത് എത്തണം. വാഹനങ്ങൾ ലിങ്ക് റോഡ്, സ്മാർട്ട് ബസാർ, ഇളങ്കാവ് ദേവീക്ഷേത്രം, വാഴമന, ദളവാക്കുളം സ്റ്റാൻഡ്, ആശ്രമംസ്കൂൾ ഗ്രൗണ്ട് എന്നിവിടങ്ങളിൽ പാർക്ക് ചെയ്യണം.

കാറുകൾ കൂട്ടിയിടിച്ച് നാലുപേർക്ക് പരിക്ക്

തലയോലപ്പറമ്പ്: കാറുകൾ കൂട്ടിമുട്ടി നാലുപേർക്കു പരിക്ക്. അപകടത്തിൽ പരിക്കേറ്റ ഏറ്റുമാനൂർ പാലത്തിങ്കൽ പെട്രീഷ(60), അസ്മിൻ (35), തലയോലപ്പറമ്പ് കൂരാപ്പള്ളിൽ ബിനോയി (37), കൂരാപ്പള്ളിൽ രാജേന്ദ്ര ബാബു (70) എന്നിവരെ പൊതിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഗുരുതരമായി പരിക്കേറ്റ പെട്രീഷയെ വിദഗ്ധ ചികിൽസയ്ക്കായി കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചു.ഇന്നലെ ഉച്ചകഴിഞ്ഞ് 3.30ന് തലയോലപ്പറമ്പ് പള്ളിക്കവലയ്ക്കു സമീപമായിരുന്നു അപകടം.എറണാകുളത്തുനിന്നു തലയോലപ്പറമ്പിലേക്കു വന്ന ഏറ്റുമാനൂർ സ്വദേശികൾ സഞ്ചരിച്ച കാറും തലയോലപ്പറമ്പിൽനിന്നു തലപ്പാറയിലേക്കു വന്ന തലയോലപ്പറമ്പ് സ്വദേശികൾ സഞ്ചരിച്ച കാറും തമ്മിലാണു കൂട്ടിയിടിച്ചത്. അപകടത്തെത്തുടർന്ന് അരമണിക്കൂറോളം ഗതാഗതം തടസപ്പെട്ടു.പോലീസ് സ്ഥലത്തെത്തി ക്രെയിൻ ഉപയോഗിച്ച് കാറുകൾ നീക്കിയാണ് ഗതാഗതം പുനഃസ്ഥാപിച്ചത്.

ആർദ്രകേരളം പുരസ്‌കാരം: വാഴൂരും കാണക്കാരിയും വെളിയന്നൂരും ജേതാക്കൾ

കുറവിലങ്ങാട്: ആരോഗ്യ മേഖലയിൽ 2023-24 വർഷം മികച്ച പ്രവർത്തനങ്ങൾ നടത്തിയ ഗ്രാമപഞ്ചായത്തുകൾക്കുള്ള ആർദ്ര കേരളം പുരസ്‌കാരത്തിൽ കോട്ടയം ജില്ലാതല ജേതാക്കളായി വാഴൂരും കാണക്കാരിയും വെളിയന്നൂരും. ഒന്നാം സ്ഥാനം നേടിയ വാഴൂരിന് അഞ്ചു ലക്ഷം രൂപ പുരസ്കാരം ലഭിക്കും. കാണക്കാരിക്കു മൂന്നു ലക്ഷം രൂപയും വെളിയന്നൂരിനു രണ്ടു ലക്ഷം രൂപയും ലഭിക്കും. ഈ പഞ്ചായത്തുകൾ ആരോഗ്യ മേഖലയിൽ ചെലവഴിച്ച തുക, സാന്ത്വന പരിചരണ പരിപാടികൾ, കായകൽപ് സ്‌കോർ, ഹെൽത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവർത്തനങ്ങൾ എന്നിവയാണ് പ്രധാനമായും അവാർഡിനായി പരിഗണിച്ചത്. പ്രതിരോധ കുത്തിവയ്പ്, വാർഡുതല പ്രവർത്തനങ്ങൾ, പ്രാദേശിക ആരോഗ്യ ആവശ്യങ്ങൾക്കനുസൃതമായ നൂതന ഇടപെടലുകൾ, സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിതശൈലീ ക്രമീകരണത്തിനുള്ള ഭൗതിക സാഹചര്യങ്ങൾ ഒരുക്കൽ, മോഡേൺ മെഡിസിൻ, ആയുർവേദ-ഹോമിയോ മേഖലകളിലുള്ള ദേശീയ-സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും വിലയിരുത്തിയതിൽ ജില്ലയിൽ മുന്നേറ്റം നടത്താൻ വാഴൂരിനും കാണക്കാരിക്കും വെളിയന്നൂരിനും കഴിഞ്ഞു.

അന്ന മാണി സ്മാരക പ്രഭാഷണം

കോട്ടയം: ഇന്‍സ്റ്റിറ്റ്യൂട്ട് ഫോര്‍ ക്ലൈമറ്റ് ചേഞ്ച് സ്റ്റഡീസി (ഐസിസിഎസ്)ന്‍റെ ആഭിമുഖ്യത്തില്‍ അന്ന മാണി സ്മാരക പ്രഭാഷണം ആരംഭിച്ചു. എംജി സര്‍വകലാശാലാ കാമ്പസില്‍ നടന്ന ചടങ്ങില്‍ ബംഗളൂരു ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സിലെ ശാസ്ത്രജ്ഞ പ്രഫ. കുശല രാജേന്ദ്രന്‍ അന്ന മാണി സ്മാരക പ്രഭാഷണം നടത്തി. കേരള സയന്‍സ് ആന്‍ഡ് ടെക്‌നോളജി വകുപ്പ് എക്‌സ്-ഒഫീഷ്യോ പ്രിന്‍സിപ്പല്‍ സെക്രട്ടറിയും കെഎസ്‌സിഎസ്ടിഇ എക്‌സിക്യൂട്ടീവ് വൈസ് പ്രസിഡന്‍റുമായ പ്രഫ. കെ.പി. സുധീര്‍ ഉദ്ഘാടനം ചെയ്തു. എംജി സര്‍വകലാശാലാ വൈസ് ചാന്‍സലര്‍ പ്രഫ.സി.ടി. അരവിന്ദകുമാര്‍ അധ്യക്ഷത വഹിച്ചു. ഐസിസിഎസ് ഡയറക്ടര്‍ ഡോ.കെ. രാജേന്ദ്രന്‍, എംജി സര്‍വകലാശാല സ്‌കൂള്‍ ഓഫ് എന്‍വയോണ്‍മെന്‍റല്‍ സയന്‍സസ് ഡയറക്ടര്‍ ഡോ. മഹേഷ് മോഹന്‍, പ്രഫ.സി.എച്ച്. സുരേഷ് എന്നിവര്‍ പ്രസംഗിച്ചു.

യുഡിഎഫ് അനുശോചിച്ചു

പുതുപ്പള്ളി: യുഡിഎഫ് മുന്‍ കണ്‍വീനര്‍ പി.പി. തങ്കച്ചന്‍, കേരള കോണ്‍ഗ്രസ് നേതാവ് പ്രിന്‍സ് ലൂക്കോസ് എന്നിവരുടെ വേര്‍പാടില്‍ യുഡിഎഫ് നിയോജകമണ്ഡലം കമ്മിറ്റി അനുശോചിച്ചു. ചെയര്‍മാന്‍ സാജു എം. ഫിലിപ്പ് അധ്യക്ഷത വഹിച്ചു. ചാണ്ടി ഉമ്മന്‍ എംഎല്‍എ, കെപിസിസി നിര്‍വാഹക സമിതിയംഗം ജോഷി ഫിലിപ്, യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യുസ്, യുഡിഎഫ് നിയോജകമണ്ഡലം കണ്‍വീനര്‍ കുഞ്ഞ് പുതുശേരി, സെക്രട്ടറി ആന്‍റണി തുപ്പലഞ്ഞി, നേതാക്കളായ കെ.ബി. ഗിരീശന്‍, തമ്പി ചന്ദ്രന്‍, സാബു ഒഴുങ്ങാലില്‍, ഷേര്‍ലി തര്യന്‍, എന്‍.ഐ. മത്തായി തുടങ്ങിയവര്‍ പ്രസംഗിച്ചു.

കെഇ ട്രോഫി വോളി: ആദ്യജയം എസ്ഡിവിക്ക്

മാന്നാനം: മാന്നാനം കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂളിന്‍റെ ആതിഥേയത്വത്തിൽ നടത്തുന്ന കെഇ ട്രോഫി അഖിലേന്ത്യാ ഇന്‍റർസ്കൂൾ വോളിബോൾ ടൂർണമെന്‍റിൽ തൃശൂർ പേരാമംഗലം എസ്ഡിവി ഹയർ സെക്കൻഡറി സ്കൂളിന് ആദ്യ ജയം. കോഴിക്കോട് മുക്കം കെഎസ്എസ് സ്കൂളിനെ പരാജയപ്പെടുത്തിയാണ് വിജയം. (സ്കോർ: 25-26, 25-17, 25-15). കെഇ ട്രോഫിക്കു വേണ്ടിയുള്ള വോളിബോൾ, ബാസ്കറ്റ്ബോൾ ടൂർണമെന്‍റുകളുടെ ഉദ്ഘാടനം മുൻ ഇന്ത്യൻ ഫുട്ബോൾ താരം ജോ പോൾ അഞ്ചേരി നിർവഹിച്ചു. മന്ത്രി വി.എൻ. വാസവൻ അധ്യക്ഷത വഹിച്ചു. കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി സിഎംഐ ആമുഖ പ്രഭാഷണം നടത്തി. സ്കൂൾ സ്ഥാപക പ്രിൻസിപ്പൽ ഫാ. ഫിലിപ്പ് പഴയകരി സിഎംഐ, 1999ൽ കെഇ ട്രോഫി ടൂർണമെന്‍റിന് തുടക്കംകുറിച്ച പ്രിൻസിപ്പൽ ഫാ. മാത്യു അറേക്കളം സിഎംഐ എന്നിവരെ ആദരിച്ചു. കെഇ റെസിഡന്‍റ്സ് പ്രീഫെക്ട് ഫാ. ഷൈജു സേവ്യർ സിഎംഐ, ബർസാർ ഫാ. ബിബിൻ ഒറ്റത്താങ്കൽ സിഎംഐ, ജില്ലാ പഞ്ചായത്ത് മെംബർ ഡോ. റോസമ്മ സോണി, പഞ്ചായത്ത് മെംബർ ഷാജി ജോസഫ്, പിടിഎ പ്രസിഡന്‍റ് അഡ്വ. ജയ്സൺ ജോസഫ്, വൈസ് പ്രസിഡന്‍റ് ഇന്ദു പി. നായർ തുടങ്ങിയവർ പ്രസംഗിച്ചു. ബാസ്കറ്റ്ബോൾ മത്സരങ്ങളുടെ ഫൈനൽ നാളെയും വോളിബോൾ ഫൈനൽ 15നും നടക്കും.

മൂന്നരവയസുകാരി എസ്‌തേര്‍ ഇന്ന് വേമ്പനാട്ടു കായല്‍ നീന്തിക്കടക്കും

ചിങ്ങവനം: ഗിന്നസ് റെക്കോര്‍ഡ് കൈപ്പിടിയില്‍ ഒതുക്കാന്‍ മൂന്നരവയസുകാരി എസ്‌തേര്‍ ഇന്ന് വേമ്പനാട്ടു കായലില്‍ നീന്തും. ജീവന്‍ രക്ഷാ സ്വിമ്മിംഗ് അക്കാദമിയും എമെര്‍ജിംഗ് വൈക്കവും ചേര്‍ന്ന് ഗിന്നസ് വേള്‍ഡ് റെക്കോര്‍ഡ് എത്തിപ്പിടിക്കാനുള്ള ശ്രമത്തില്‍ പങ്കെടുക്കാന്‍ ഒരുങ്ങിയിരിക്കുകയാണ് അങ്കണവാടി കുട്ടിയായ ചിന്നു എന്നു വിളിക്കുന്ന കൊച്ചുമിടുക്കി എസ്‌തേറും. വൈക്കം ബോട്ട് ജെട്ടിക്കു സമീപം വേമ്പനാട്ട് കായലിലാണ് ലോക റിക്കാര്‍ഡിലേക്ക് നീന്തിക്കയറുന്നതിനുള്ള പ്രകടനം നടക്കുന്നത്. ഇതിന്‍റെ ഭാഗമായി അഞ്ചുകിലോമീറ്റര്‍ ദീര്‍ഘദൂര നീന്തലാണ് എസ്‌തേര്‍ നടത്തുന്നത്. കഴിഞ്ഞമാസം കൊല്ലത്തു വച്ചു നടന്ന ഫ്രീഡം ഫെസ്റ്റിനോടനുബന്ധിച്ച് അഷ്ടമുടിക്കായല്‍ നീന്തിക്കടന്ന വീഡിയോ ഒരു കോടിയിലധികം ആളുകളാണ് ഇന്‍സ്റ്റാഗ്രാമില്‍ കണ്ടുകഴിഞ്ഞത്. ഫ്രീഡം ഫെസ്റ്റില്‍ ബെസ്റ്റ് സ്വിമ്മര്‍ അവാര്‍ഡ് കരസ്ഥമാക്കിയാണ് എസ്‌തേര്‍ ഗിന്നസ് വേള്‍ഡ് റെക്കോര്‍ഡ് ശ്രമത്തിനായി വേമ്പനാട്ട് കായലില്‍ ഇറങ്ങുന്നത്. ചിങ്ങവനം സ്വദേശികളായ കൃഷ്ണകുമാര്‍ - ക്രിസ്റ്റീന ദമ്പതികളുടെ മകളാണ്. ഒരു വയസുള്ള സഹോദരന്‍ എസ്രയും ഉണ്ട്. കുമ്മനം മീനച്ചിലാറിലെ ജീവന്‍ രക്ഷാ അക്കാദമിയിലാണ് പരിശീലനം. അക്കാദമിയിലെ ഗ്രാന്‍ഡ് മാസ്റ്ററും തുറമുഖ വകുപ്പിനു കീഴിലുള്ള റെസ്‌ക്യൂ ടീം ലീഡറുമായ അബ്ദുള്‍ കലാം ആസാദാണ് പരിശീലകന്‍.

നീലംപേരൂര്‍ പടയണി പാറാവളയം എത്തി; ഇന്ന് കുടനിര്‍ത്തോടെ രണ്ടാംഘട്ടം അവസാനിക്കും

നീലംപേരൂര്‍: പള്ളി ഭഗവതി ക്ഷേത്രത്തിലെ പടയണി മഹോത്സവത്തോടനുബന്ധിച്ച് പടയണി കളത്തില്‍ പാറാവളയം എത്തി. ഇന്ന് കുടനിർത്തോടെ രണ്ടാംഘട്ടം അവസാനിക്കും. മൂന്നാം ഘട്ടത്തില്‍ നാളെ മുതല്‍ പ്ലാവിലക്കോലങ്ങള്‍ എഴുന്നെള്ളും. ചിങ്ങമാസത്തിലെ അവിട്ടം നാളില്‍ രാത്രി പത്തിന് ശ്രീകോവിലില്‍നിന്നും മേല്‍ശാന്തി പകര്‍ന്നു തരുന്ന അഗ്‌നി പടയണി ആചാര്യന്‍ പടയണിക്കളത്തിലേക്ക് ആവാഹിക്കും. തുടർന്ന് പ്രദേശത്തെ വീടുകളില്‍നിന്നു ഗൃഹനാഥന്മാര്‍ തെറുത്തുകൊണ്ട് വരുന്ന ചൂട്ടുകറ്റകളിലേക്ക് അഗ്നി പകരുകയും ഇവ കയ്യിലേന്തി ക്ഷേത്ര മതില്‍ക്കെട്ടിനു പുറത്തു പടിഞ്ഞാറു ഭാഗത്തുള്ള ചേരമാന്‍ പെരുമാള്‍ സ്മാരകത്തില്‍ചെന്ന് അനുവാദം ചോദിക്കുന്നതോടുകൂടിയാണ് പടയണിക്കാലത്തിന് തുടക്കമായത്. ഈ ചടങ്ങ് തുടര്‍ന്നുള്ള നാലു ദിവസങ്ങളില്‍ ഇതേസമയത്ത് നടത്തും. പിന്നീടുള്ള നാലു ദിവസങ്ങളില്‍ കുട പടയണിയാണ്. തെങ്ങോലയുടെ ഈറളില്‍നിന്നും ഉണ്ടാക്കുന്ന വാരിയില്‍ ചെത്തിപ്പൂകൊണ്ട് അലങ്കരിച്ചു കുടയുടെ രൂപത്തിലാക്കും. എട്ടാംദിവസം കുടംപൂജ കളിയോടുകൂടി കുടനിര്‍ത്തും ഉണ്ടാകും. അടുത്ത നാല് ദിവസങ്ങളില്‍ പ്ലാവിലകോലങ്ങള്‍ ആണ്. പന്ത്രണ്ടാം ദിവസം ഭീമന്‍, ഹനുമാന്‍, തപസ്വി തുടങ്ങിയ പ്ലാവിലകോലങ്ങള്‍ എല്ലാം എഴുന്നെള്ളിച്ചു ദേവിയുടെ തിരുമുമ്പില്‍കൊണ്ടുവന്നു കുടംപൂജ കളി, തോത്താ കളി എന്നിവയോടെ പ്ലാവില നിര്‍ത്ത് ആഘോഷിക്കുന്നു. പിന്നീടുള്ള രണ്ടു ദിവസങ്ങളില്‍ പിണ്ടിയും കുരുത്തോലയും ആണ്. അവസാന രണ്ടു ദിവസങ്ങളില്‍ കലാവിരുതിന്‍റെ മാസ്മരികതയോടെ അന്നങ്ങള്‍ നിര്‍മിക്കുന്നു. ആന, ഭീമന്‍, യക്ഷി, രാവണന്‍, അമ്പലക്കൊട്ട, സിംഹം തുടങ്ങിയവയും ത്രിമാന രൂപത്തില്‍ ഉണ്ടാക്കുന്നു. പൂരം നാളില്‍ രാത്രി പത്തിന് തുടങ്ങുന്ന പടയണിയില്‍ കാണികളെ ആവേശഭരിതരാക്കി ചൂട്ടു വെളിച്ചത്തിന്‍റെ പൊന്‍പ്രഭയില്‍ ചെറിയന്നങ്ങളും കോലങ്ങളും തുടര്‍ന്ന് ഇടത്തരം അന്നങ്ങളും വലിയന്നവും എഴുന്നെള്ളുന്നതോടെ പൂരം പരിസമാപ്തിയിലേക്കെത്തും. പതിനാറുദിവസം വ്രതം അനുഷ്ഠിക്കുന്ന പടയണി ആചാര്യന്‍ ഗുരുസി എന്ന കര്‍മം നിര്‍വഹിക്കുന്നതോടെ ആ വര്‍ഷത്തെ പടയണിക്കു സമാപനം കുറിക്കും.

ബസേലിയസ് ട്രോഫി ഫുട്ബോള്‍ മത്സരം ആരംഭിച്ചു

കോട്ടയം: കേരളത്തില്‍ ആരോഗ്യമുള്ള ജനതയെ സൃഷ്ടിക്കുക എന്നതാണ് സംസ്ഥാന സര്‍ക്കാരിന്‍റെ നയമെന്ന് തിരുവനന്തപുരം സ്‌പോര്‍ട്‌സ് കേരള ഫൗണ്ടേഷന്‍ ചീഫ് ഓപ്പറേറ്റിംഗ് ഓഫീസര്‍ ഡോ.കെ. അജയകുമാര്‍. 19-ാമത് ഉപ്പൂട്ടില്‍ കുര്യന്‍ ഏബ്രഹാം മെമ്മോറിയല്‍ ഇന്‍റര്‍കോളീജിയറ്റ് ബസേലിയസ് ട്രോഫി ഫുട്ബോള്‍ മത്സരം ഉദ്ഘാടനം ചെയ്യുകയായിരുന്നു അദ്ദേഹം. കോളജ് പ്രിന്‍സിപ്പല്‍ പ്രഫ.ഡോ. ബിജു തോമസ് അധ്യക്ഷത വഹിച്ചു. വൈസ് പ്രിന്‍സിപ്പല്‍ പ്രഫ.ഡോ.പി. ജ്യോതിമോള്‍, പ്രഫ.ടി.എം. മാത്യു, ഫാ. ദീപു ഫിലിപ്പ്, സന്തോഷ് ട്രോഫി ഫുട്‌ബോള്‍ താരവും പൂര്‍വ വിദ്യാര്‍ഥിയുമായ ജസ്റ്റിന്‍ ജോര്‍ജ്, ഏബ്രഹാം സി. ജേക്കബ്, അമിത് മാത്യു തോമസ്, ഫാ. ജിബി കെ. പോള്‍, ഓര്‍ഗനൈസിംഗ് സെക്രട്ടറി ശ്രാവണ്‍ ശശികുമാര്‍ എന്നിവര്‍ പ്രസംഗിച്ചു. ഇന്നലെ നടന്ന ആദ്യമത്സരത്തില്‍ ബസേലിയസ് കോളജ് ബ്ലൂ ടീമിനെ പരാജയപ്പെടുത്തി കൊല്ലം എസ്എന്‍ കോളജ് വിജയികളായി. ഇന്ന് രാവിലെ 8.30ന് നടക്കുന്ന മത്സരത്തില്‍ ചങ്ങനാശേരി എസ്ബി കോളജും മൂവാറ്റപുഴ നിര്‍മ്മല കോളജും തമ്മില്‍ ഏറ്റുമുട്ടും.

ആർദ്രകേരളം പുരസ്‌കാരം: വാഴൂരും കാണക്കാരിയും വെളിയന്നൂരും ജേതാക്കൾ

കുറവിലങ്ങാട്: ആരോഗ്യ മേഖലയിൽ 2023-24 വർഷം മികച്ച പ്രവർത്തനങ്ങൾ നടത്തിയ ഗ്രാമപഞ്ചായത്തുകൾക്കുള്ള ആർദ്ര കേരളം പുരസ്‌കാരത്തിൽ കോട്ടയം ജില്ലാതല ജേതാക്കളായി വാഴൂരും കാണക്കാരിയും വെളിയന്നൂരും. ഒന്നാം സ്ഥാനം നേടിയ വാഴൂരിന് അഞ്ചു ലക്ഷം രൂപ പുരസ്കാരം ലഭിക്കും. കാണക്കാരിക്കു മൂന്നു ലക്ഷം രൂപയും വെളിയന്നൂരിനു രണ്ടു ലക്ഷം രൂപയും ലഭിക്കും. ഈ പഞ്ചായത്തുകൾ ആരോഗ്യ മേഖലയിൽ ചെലവഴിച്ച തുക, സാന്ത്വന പരിചരണ പരിപാടികൾ, കായകൽപ് സ്‌കോർ, ഹെൽത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവർത്തനങ്ങൾ എന്നിവയാണ് പ്രധാനമായും അവാർഡിനായി പരിഗണിച്ചത്. പ്രതിരോധ കുത്തിവയ്പ്, വാർഡുതല പ്രവർത്തനങ്ങൾ, പ്രാദേശിക ആരോഗ്യ ആവശ്യങ്ങൾക്കനുസൃതമായ നൂതന ഇടപെടലുകൾ, സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിതശൈലീ ക്രമീകരണത്തിനുള്ള ഭൗതിക സാഹചര്യങ്ങൾ ഒരുക്കൽ, മോഡേൺ മെഡിസിൻ, ആയുർവേദ-ഹോമിയോ മേഖലകളിലുള്ള ദേശീയ-സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും വിലയിരുത്തിയതിൽ ജില്ലയിൽ മുന്നേറ്റം നടത്താൻ വാഴൂരിനും കാണക്കാരിക്കും വെളിയന്നൂരിനും കഴിഞ്ഞു.

കുടുംബശ്രീ വനിതാ ആര്‍ട്ട് ഫെസ്റ്റ് ഇന്നുമുതല്‍

കോട്ടയം: കുടുംബശ്രീ ജില്ലാ മിഷന്‍ ജെന്‍ഡര്‍ വിഭാഗവും സ്പീക്ക് മാക്കേയും ചേര്‍ന്ന് സംഘടിപ്പിക്കുന്ന വനിത ആര്‍ട്ട് ഫെസ്റ്റ് വാഴൂരില്‍ നടക്കും. ഇന്ന് വൈകുന്നേരം 4.30ന് അനുഗ്രഹ റിന്യൂവല്‍ സെന്‍ററില്‍ ചീഫ് വിപ്പ് ഡോ.എന്‍. ജയരാജ് ഉദ്ഘാടനം ചെയ്യും. വാഴൂര്‍ പഞ്ചായത്ത് പ്രസിഡന്‍റ് തോമസ് വെട്ടുവേലി അധ്യക്ഷത വഹിക്കും. സ്ത്രീകളുടെ കലാപ്രതിഭ വളര്‍ത്തുകയും സാമൂഹ്യ ഇടപെടലുകള്‍ ശക്തിപ്പെടുത്തുകയും ആത്മവിശ്വാസം വര്‍ധിപ്പിക്കുകയും ചെയ്യുകയെന്ന ലക്ഷ്യത്തോടെയാണ് ആര്‍ട്ട് ഫെസ്റ്റ് നടത്തുന്നത്. വിദഗ്ധരുടെ നേതൃത്വത്തില്‍ വിവിധ കലാരൂപങ്ങളുടെ പരിശീലനവും അവതരണവും അരങ്ങേറും. ഒഡീസി നൃത്തം, കഥക്, ഹിന്ദുസ്ഥാനി സംഗീതം, യോഗ, പനയോല നെയ്ത്ത്, കളിമണ്‍ ശില്പനിര്‍മാണം തുടങ്ങിയവയില്‍ ശില്പശാലകളും വിവിധ കലാപരിപാടികളും നടക്കും. 15ന് ഫെസ്റ്റ് സമാപിക്കും.

കോട്ടയം നഗരത്തില്‍ ഗതാഗത നിയന്ത്രണം

കോട്ടയം: നവീകരണ പ്രവര്‍ത്തനങ്ങള്‍ നടക്കുന്നതിനാല്‍ ഇന്നു രാവിലെ ആറു മുതല്‍ ലോഗോസ് ജംഗ്ഷന്‍ മുതല്‍ പോലീസ് പരേഡ് ഗ്രൗണ്ടു വരെയും ഗുഡ്‌ഷെപ്പേര്‍ഡ് ജംഗ്ഷന്‍ മുതല്‍ ലോഗോസ് ജംഗ്ഷന്‍ വരെയും ലോഗോസ് ജംഗ്ഷന്‍ മുതല്‍ അസെന്‍ഷന്‍ ജംഗ്ഷന്‍ വരെയും ഗതാഗതം പൂര്‍ണമായും തടസപ്പെടും. കോട്ടയം: നവീകരണ പ്രവൃത്തികള്‍ നടക്കുന്നതിനാല്‍ സെന്‍ട്രല്‍ ജംഗ്ഷന്‍ മുതല്‍ ശീമാട്ടി റൗണ്ട് വരെ ഇന്നു രാവിലെ ആറു മുതല്‍ ഗതാഗതം പൂര്‍ണമായും തടസപ്പെടും. വാഹനങ്ങള്‍ ടെമ്പിള്‍ റോഡ് വഴി തിരുനക്കര അമ്പലത്തിനു മുമ്പില്‍നിന്നും പോസ്റ്റ് ഓഫീസിനു പിന്‍വശത്തുള്ള വഴിയിലൂടെ ശീമാട്ടി റൗണ്ടില്‍ പ്രവേശിക്കണം.

അയ്മനത്ത് ആന്പൽവസന്തം ഫെസ്റ്റിന് തുടക്കം

അയ്മനം: അയ്മനം പുത്തൂക്കരിയില്‍ ആമ്പല്‍ വസന്തം കനാല്‍ ടൂറിസം ഫെസ്റ്റിന് തുടക്കം. പുത്തൂക്കരി പാടശേഖരത്തിനു സമീപം മന്ത്രി വി.എന്‍. വാസവന്‍ മൂന്നുദിവസം നീണ്ടുനില്‍ക്കുന്ന ടൂറിസം ഫെസ്റ്റ് ഉദ്ഘാടനം ചെയ്തു. അയ്മനം പഞ്ചായത്തില്‍ വാട്ടര്‍ തീം പാര്‍ക്ക് നിര്‍മിക്കുന്നതുസംബന്ധിച്ച ചര്‍ച്ചകള്‍ നടന്നുവരികയാണെന്നു മന്ത്രി പറഞ്ഞു. ഉദ്ഘാടനത്തിനു മുന്നോടിയായി മന്ത്രി വി.എന്‍. വാസവന്‍ വള്ളത്തില്‍ സഞ്ചരിച്ച് ആമ്പല്‍പാടത്തിന്‍റെ ഭംഗി ആസ്വദിച്ചു. പഞ്ചായത്തംഗം കെ.എം. മേരിക്കുട്ടി അധ്യക്ഷത വഹിച്ചു. സ്വാഗതസംഘം കണ്‍വീനര്‍ ബി.ജെ. ലിജീഷ്, പഞ്ചായത്ത് മുന്‍ പ്രസിഡന്‍റ് എ.കെ. ആലിച്ചന്‍, കുടമാളൂര്‍ സര്‍വീസ് സഹകരണ ബാങ്ക് പ്രസിഡന്‍റ് സി.എന്‍. ബാലചന്ദ്രന്‍, അയ്മനം സര്‍വീസ് സഹകരണ ബാങ്ക് മുന്‍ പ്രസിഡന്‍റ് കെ.കെ. ഭാനു എന്നിവര്‍ പ്രസംഗിച്ചു. ഉത്തരവാദിത്വ ടൂറിസം മിഷന്‍, പുത്തൂക്കരി പാടശേഖര സമിതി, അരങ്ങ് സാംസ്‌കാരിക വേദി, ഐക്യവേദി റെസിഡന്‍റ്സ് അസോസിയേഷന്‍, പുത്തൂക്കരി റെസിഡന്‍റ്സ് അസോസിയേഷന്‍ എന്നിവയുടെ സഹകരണത്തോടെ അയ്മനം പഞ്ചായത്തിന്‍റെ നേതൃത്വത്തിലാണ് ടൂറിസം ഫെസ്റ്റ് നടത്തുന്നത്. ഞായറാഴ്ച വരെ രാവിലെ ആറുമുതല്‍ 10 വരെ നടക്കുന്ന ഫെസ്റ്റിന്‍റെ ഭാഗമായി വിവിധ മത്സരങ്ങള്‍, ആമ്പല്‍ ജലയാത്ര, നാടന്‍ ഭക്ഷ്യമേള, റീല്‍സ്-ഫോട്ടോ ഷൂട്ട് മത്സരങ്ങള്‍ എന്നിവ നടക്കും.

ഹൃദയത്തിന് കരുതലായി സെന്‍റ് മേരീസ് ആശുപത്രി

തൊടുപുഴ: ഇടുക്കി ജില്ലയിൽ ഏറ്റവും കൂടുതൽ ആൻജിയോപ്ലാസ്റ്റികൾ നടക്കുന്ന സൂപ്പർ സ്പെഷാലിറ്റി ആശുപത്രിയെന്ന നേട്ടം കൈവരിച്ച് തൊടുപുഴ സെന്‍റ് മേരീസ് ആശുപത്രി. കോഴിക്കോട് കഴിഞ്ഞമാസം നടന്ന ഇന്‍റർവെൻഷണൽ കാർഡിയോളജി കൗണ്‍സിൽ ഓഫ് കേരളയുടെ സമ്മേളനത്തിലാണ് ഈ പ്രഖ്യാപനം ഉണ്ടായത്. കഴിഞ്ഞ ഏഴു പതിറ്റാണ്ടിലേറെയായി ആതുരസേവന രംഗത്ത് മുൻനിരയിലുള്ള ആശുപത്രിയിലെ ഹൃദ്രോഗ വിഭാഗത്തിന് നേതൃത്വം നൽകുന്നത് സംസ്ഥാനത്തെ സീനിയർ കാർഡിയോളജിസ്റ്റായ ഡോ. മാത്യു ഏബ്രഹാം, സീനിയർ ഇന്‍റർവെൻഷണൽ കാർഡിയോളജിസ്റ്റുമാരായ ഡോ. മുസ്ന ജമാൽ, ഡോ. ബിജോയി വി. ഏലിയാസ്, ക്ലിനിക്കൽ കാർഡിയോളജിസ്റ്റ് ഡോ. നിതിൻ പരീത് എന്നിവരാണ്. ഹൃദ്രോഗ നിർണയത്തിനായി എക്കോ കാർഡിയോഗ്രാഫി, സ്ട്രെസ് എക്കോകാർഡിയോഗ്രാഫി, കോണ്‍ട്രാസ്റ്റ് എക്കോകാർഡിയോഗ്രാഫി, ട്രെഡ്മിൽ ടെസ്റ്റ്, ഹോൾട്ടർ, ഇഎൽആർ, എബിപിഎം എന്നിവ സെന്‍റ് മേരീസ് ആശുപത്രിയിൽ ലഭ്യമാണ്. അത്യാധുനിക കാത്ത‌‌‌‌‌‌‌‌്‌ലാബും കൊറോണറി കെയർ യൂണിറ്റും 24 മണിക്കൂറും പ്രവർത്തന സജ്ജമാണ്. പ്രൈമറി ആൻജിയോപ്ലാസ്റ്റി, കോംപ്ലക്സ് കൊറോണറി ആൻജിയോപ്ലാസ്റ്റി, സിടിഒ, ബൈപ്യൂരിഫിക്കേഷൻ ആൻജിയോപ്ലാസ്റ്റി, ഒസിടി ഇമേജിംഗ്, ഐഎബിപി എന്നീ അതിനൂതനമായ ചികിത്സാസംവിധാനങ്ങളും ടെന്പററി ആന്‍ഡ് പെർമനന്‍റ് പേസ്മേക്കർ ഇന്‍സ്റ്റലേഷൻ സൗകര്യങ്ങളും ഇവിടെ ലഭ്യമാണ്. സൂപ്പർ സ്പെഷാലിറ്റി ചികിത്സ സാധാരണക്കാരിലേയ്ക്ക് എത്തിക്കുന്നതിനായി 1963-ൽ ഡോ. ഏബ്രഹാം തേക്കുംകാട്ടിൽ സ്ഥാപിച്ച സെന്‍റ് മേരീസ് ആശുപത്രി ഇന്ന് ഇടുക്കിയിലെയും സമീപ ജില്ലകളിലെയും ജനങ്ങൾക്ക് ആശ്രയകേന്ദ്രമാണ്.

കാനത്തിനു പിന്നാലെ കോട്ടയത്തുനിന്ന് സിപിഐക്ക് സംസ്ഥാന സെക്രട്ടറി

കോട്ടയം: കമ്യൂണിസ്റ്റ് പാര്‍ട്ടി ഓഫ് ഇന്ത്യയുടെ രൂപീകരണത്തിന്‍റെ ശതാബ്ദി വര്‍ഷത്തില്‍ പാര്‍ട്ടിയുടെ പ്രഥമ സെക്രട്ടറി പി. കൃഷ്ണപിള്ളയുടെ നാട്ടില്‍നിന്നും വീണ്ടും ഒരു സെക്രട്ടറികൂടി. പി.കെ. വാസുദേവന്‍ നായര്‍ക്കും കാനം രാജേന്ദ്രനും ശേഷം കമ്യൂണിസ്റ്റ് പാര്‍ട്ടി ഓഫ് ഇന്ത്യയുടെ കേരള ഘടകത്തെ നയിക്കാന്‍ വീണ്ടും ഒരു കോട്ടയംകാരന്‍. വൈക്കം സ്വദേശിയാണ് ബിനോയ് വിശ്വം. വൈക്കം മുന്‍ എംഎല്‍എ സി.കെ. വിശ്വനാഥന്‍റെയും ഓമനയുടെയും മകനായി 1955 നവംബര്‍ 25നാണ് ജനനം. വൈക്കം ഗവ. ബോയ്‌സ് ഹൈസ്‌കൂളില്‍ എഐഎസ്എഫ് യൂണിറ്റ് സെക്രട്ടറിയായി. തുടര്‍ന്ന് വിദ്യാര്‍ഥി സംഘടനയുടെ ദേശീയ പ്രസിഡന്‍റ് വരെയായി. വൈക്കത്തുനിന്ന് എറണാകുളത്തേക്കും പിന്നീട് കോഴിക്കോട്ടേക്കും താമസം മാറ്റിയ ബിനോയ് ഇപ്പോള്‍ തിരുവനന്തപുരത്താണ് താമസം. ബിനോയ്യുടെ നിരവധി ബന്ധുക്കള്‍ വൈക്കത്തും വെള്ളൂരിലുമുണ്ട്. 2023 ഡിസംബര്‍ 10ന് അന്തരിച്ച മുന്‍ സെക്രട്ടറി കാനം രാജേന്ദ്രന്‍റെ സംസ്‌കാരത്തിനുശേഷം കോട്ടയം സിപിഐ ജില്ലാ കൗണ്‍സില്‍ ഓഫീസില്‍ ദേശീയ സെക്രട്ടറി ഡി. രാജയുടെ അധ്യക്ഷതയില്‍ ചേര്‍ന്ന യോഗമാണ് ബിനോയ്യെ താത്കാലിക സെക്രട്ടറിയായി തെരഞ്ഞെടുത്തത്. തുടര്‍ന്ന് സംസ്ഥാന കൗണ്‍സില്‍ യോഗം സെക്രട്ടറിയായി തെരഞ്ഞെടുത്തു. ഇന്നലെ ആലപ്പുഴയില്‍ നടന്ന സംസ്ഥാന സമ്മേളനത്തില്‍ വീണ്ടും സെക്രട്ടറിയായി. 2001 മുതല്‍ 2011 വരെ കോഴിക്കോട് ജില്ലയിലെ നാദാപുരത്തുനിന്നുള്ള എംഎല്‍എയായിരുന്നു. സിപിഐ നിയമസഭാ കക്ഷി ഉപനേതാവായും 2006 മുതല്‍ 2011 വരെ വി.എസ്. അച്യുതാനന്ദന്‍ മന്ത്രിസഭയില്‍ വനം, ഭവന നിര്‍മാണ മന്ത്രിയായും പ്രവര്‍ത്തിച്ചു. സിപിഐ ദേശീയ എക്‌സിക്യൂട്ടീവംഗമായി തെരഞ്ഞെടുക്കപ്പെട്ട ബിനോയ് 2018 മുതല്‍ 2024 വരെ രാജ്യസഭാംഗവുമായിരുന്നു. നിരവധി ഗ്രന്ഥങ്ങളുടെ രചയിതാവും സിപിഐയുടെ മുഖപത്രം ജനയുഗത്തിന്‍റെ എഡിറ്ററായും പ്രവര്‍ത്തിച്ചിട്ടുണ്ട്. പരിസ്ഥതി പ്രവര്‍ത്തകന്‍കൂടിയായിരുന്ന ബിനോയ് വിശ്വം വനംമന്ത്രിയായിരുന്ന കാലത്ത് പരിസ്ഥിതി സൗഹൃദമായ നിരവധി പദ്ധതികൾ നടപ്പാക്കിയിരുന്നു. കമ്യൂണിസ്റ്റ് നേതാവായിരുന്ന കൂത്താട്ടുകുളം മേരിയുടെ മകള്‍ ഷൈല സി. ജോര്‍ജാണ് ഭാര്യ. മാധ്യമപ്രവര്‍ത്തകയായ രശ്മിയും അഭിഭാഷകയായ സൂര്യയുമാണ് മക്കള്‍. മുന്‍ മുഖ്യമന്ത്രിയും സിപിഐയുടെ ദീര്‍ഘകാല സെക്രട്ടറിയുമായിരുന്ന പി.കെ. വാസുദേവന്‍നായർ കിടങ്ങൂര്‍ സ്വദേശിയാണ്. ബിനോയ് വിശ്വത്തിനു മുമ്പ് സെക്രട്ടറിയായിരുന്ന കാനം രാജേന്ദ്രന്‍ വാഴൂര്‍ കാനം സ്വദേശിയായിരുന്നു. വാഴൂര്‍ നിയമസഭാ മണ്ഡലത്തില്‍നിന്ന് എംഎല്‍എയായി തെരഞ്ഞെടുക്കപ്പെട്ടിട്ടുള്ള കാനം രാജേന്ദ്രന്‍ ദീര്‍ഘകാലം എഐടിയുസി സംസ്ഥാന സെക്രട്ടറിയായും സിപിഐ സംസ്ഥാന നേതൃത്വത്തിലും പ്രവര്‍ത്തിച്ചിട്ടുണ്ട്. കാലങ്ങളായി വൈക്കം സംവരണ മണ്ഡലത്തില്‍ എംഎല്‍എ സിപിഐയുടേതാണ്. കൃഷ്ണപിള്ളയുടെ ജന്മഗൃഹം സിപിഐ അടുത്ത നാളില്‍ വാങ്ങി സ്മാരകമാക്കിയിരുന്നു. കൂടാതെ മഹാത്മാഗാന്ധി വൈക്കത്ത് എത്തിയപ്പോള്‍ സന്ദര്‍ശനം നടത്തിയ ഇണ്ടംതുരുത്തി മനയും പാര്‍ട്ടി നേതൃത്വം വിലയ്ക്കുവാങ്ങി. മന ഇപ്പോള്‍ ചെത്തുതൊഴിലാളി യൂണിയന്‍ ഓഫീസായി പ്രവര്‍ത്തിക്കുന്നു. അഞ്ച് സംസ്ഥാന കൗണ്‍സില്‍ അംഗങ്ങൾ ജില്ലയില്‍നിന്ന് കോട്ടയം: ജില്ലയില്‍നിന്ന് അഞ്ചു പേര്‍ സംസ്ഥാന കൗണ്‍സില്‍ അംഗങ്ങളായി. ജില്ലാ സെക്രട്ടറി വി.കെ. സന്തോഷ്‌കുമാര്‍, മുന്‍ ജില്ലാ സെക്രട്ടറിമാരായ സി.കെ. ശശിധരന്‍, വി.ബി. ബിനു, മഹിളാ സംഘം നേതാവ് ലീനമ്മ ഉദയകുമാര്‍, ജോണ്‍ വി. ജോസഫ് എന്നിവരാണ് സംസ്ഥാനകൗണ്‍സില്‍ അംഗങ്ങളായത്. കണ്‍ട്രോള്‍ കമ്മീഷന്‍ അംഗമായി ആര്‍. സുശീലനും തെരഞ്ഞെടുക്കപ്പെട്ടു. സംസ്ഥാന കൗണ്‍സില്‍ അംഗമായിരുന്ന ശുഭേഷ് സുധാകരനെ ഒഴിവാക്കിയ ഒഴിവിലാണ് ജോണ്‍ വി. ജോസഫ് അംഗമായത്.

ലോറി സ്കൂട്ടറിലിടിച്ച് ഗൃഹനാഥൻ മരിച്ചു

തൊടുപുഴ: ലോറി സ്കൂട്ടറിലിടിച്ച് ഗൃഹനാഥന് ദാരുണാന്ത്യം. കദളിക്കാട് പെരളിമറ്റം വട്ടപ്പറന്പിൽ വി.കെ. ഹരിദാസാണ് (58) മരിച്ചത്. ഇന്നലെ വൈകുന്നേരം 6.30ന് വെങ്ങല്ലൂർ സിഗ്നൽ ജംഗ്ഷനിലായിരുന്നു അപകടം. ഹരിദാസ് തൊടുപുഴയിൽനിന്ന് കദളിക്കാടിനു പോവുകയായിരുന്നു. ഇതിനിടെ വെങ്ങല്ലൂർ സിഗ്നൽ ജംഗ്ഷനിലെത്തിയപ്പോൾ പിന്നാലെയെത്തിയ ലോറി കോലാനി ഭാഗത്തേക്ക് തിരിയുന്നതിനിടെ സ്കൂട്ടറിൽ തട്ടി. ഇടിയുടെ ആഘാതത്തിൽ റോഡിൽ വീണ ഹരിദാസിന്‍റെ ദേഹത്തുകൂടി ലോറിയുടെ ചക്രങ്ങൾ കയറിയിറങ്ങി. ഹരിദാസിനെ ഉടൻ തന്നെ സമീപത്തെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: അജിത. മകൾ: അരുണിമ. തൊടുപുഴ പോലീസ് മേൽനടപടികൾ സ്വീകരിച്ചു. തൊടുപുഴയിലെ സ്വകാര്യആശുപത്രിയിൽ സൂക്ഷിച്ചിരിക്കുന്ന മൃതദേഹം ഇന്ന് പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകും. 2009 ഓഗസ്റ്റിൽ വീടിന് മുന്നിലെ തറയിൽ കിടന്നുറങ്ങുകയായിരുന്ന ഹരിദാസിന്‍റെ മക്കളായ അരുണ്‍ദാസും കൃഷ്ണദാസും ഇടിമിന്നലേറ്റ് മരിച്ചിരുന്നു.

കെഎസ്ആര്‍ടിസി ഡിപ്പോകള്‍ക്ക് റിക്കാര്‍ഡ് കളക്‌ഷന്‍

കോട്ടയം: ഓണാവധിക്കു ശേഷമുള്ള തിരക്കില്‍ റിക്കാര്‍ഡ് വരുമാനം നേടി ജില്ലയിലെ കെഎസ്ആര്‍ടിസി ഡിപ്പോകള്‍. ജില്ലയിലെ ഏഴു ഡിപ്പോകളും പ്രതീക്ഷിച്ചതിനേക്കാള്‍ 30 ശതമാനം അധിക വരുമാനം നേടി. കോട്ടയം ഡിപ്പോയാണ് ഏറ്റവും കൂടുതല്‍ വരുമാനം നേടി ഒന്നാമതെത്തിയത്. ഓണവധിക്കു ശേഷം കഴിഞ്ഞ എട്ടാം തീയതി ടാര്‍ഗറ്റ് നല്‍കിയാണ് പ്രവര്‍ത്തിച്ചത്. കോട്ടയം ഡിപ്പോയ്ക്ക് 16,89,000 രൂപയായിരുന്നു കളക്‌ഷന്‍ ടാര്‍ഗറ്റ്. ലഭിച്ചതാകട്ടെ 22,06,542 രൂപയും. പാലാ-19,60,083, ചങ്ങനാശേരി- 11,03,498, വൈക്കം-10,11,119, പൊന്‍കുന്നം-7,93,365, ഈരാറ്റുപേട്ട- 7,38,156, എരുമേലി-5,51,316 എന്നിങ്ങനെയായിരുന്നു കളക്‌ഷന്‍. ദീർഘദൂര ബസുകൾക്കും നേട്ടം കോട്ടയത്തുനിന്ന് ബംഗളൂരുവിലേക്കുള്ള പുതിയ എസി സ്ലീപ്പര്‍ ബസിനും ദീര്‍ഘദൂര സര്‍വീസുകള്‍ക്കും റിക്കാര്‍ഡ് കളക്‌ഷനാണ് ലഭിച്ചത്. കെഎസ്ആര്‍ടിസിയുടെ പുതിയ ഫാസ്റ്റ്, സൂപ്പര്‍ ഫാസ്റ്റ് ബസുകള്‍ വിവിധ ഡിപ്പോകളില്‍നിന്നു സര്‍വീസുകള്‍ ആംരഭിച്ചു. കോട്ടയം ഡിപ്പോയ്ക്ക് ബംഗളൂരുവിലേക്ക് സര്‍വീസ് നടത്താന്‍ രണ്ട് എസി ബസുകളാണ് ലഭിച്ചിരിക്കുന്നത്. പുതുതായി ലിങ്ക് ബസ് ഉഴവൂര്‍, തൊടുപുഴ വഴി ബൈസന്‍വാലിക്കാണ് സര്‍വീസ് നടത്തുന്നത്. പുതിയ രണ്ടു സൂപ്പര്‍ ഫാസ്റ്റ് ബസുകള്‍കൂടി എത്തുന്നുണ്ട്. ഇത് കൊന്നക്കാടിനുള്ള മലബാര്‍ സര്‍വീസിനായി ഉപയോഗിക്കും. പുതുതായി എത്തുന്ന ലിങ്ക് ബസ് കുമളിക്ക് സര്‍വീസ് നടത്തും. പാലാ ഡിപ്പോയ്ക്ക് ലഭിച്ച ബസ് മൈസൂരുവിലേക്കാണ് സ്‌പെഷല്‍ സര്‍വീസ് നടത്തിയത്. സ്‌പെഷല്‍ സര്‍വീസ് അവസാനിച്ചതോടെ തിരുവാമ്പാടിക്കു സര്‍വീസ് നടത്തും. ഈരാറ്റുപേട്ടയ്ക്കു ലഭിച്ച പുതിയ ഫാസ്റ്റ് ബസ് കോയമ്പത്തൂരിലേക്കാണ് സര്‍വീസ് നടത്തുന്നത്. പുതിയ ബസുകള്‍ക്ക് യാത്രക്കാര്‍ക്കിടയില്‍ വലിയ സ്വീകാര്യതയാണ് ലഭിച്ചിരിക്കുന്നത്. വൈക്കം, പൊന്‍കുന്നം, ഡിപ്പോകള്‍ക്കും പുതിയ ബസ് ഉടനെത്തും.

അളവുതൂക്ക വെട്ടിപ്പ്: 1,27,000 രൂപ പിഴ; 31 സ്ഥാപനങ്ങള്‍ക്കെതിരേ കേസ്

കോട്ടയം: ഓണക്കാലത്ത് അളവുതൂക്ക വെട്ടിപ്പ് തടയുന്നതിന്‍റെ ഭാഗമായി ലീഗല്‍ മെട്രോളജി വകുപ്പു ജില്ലയില്‍ നടത്തിയ പ്രത്യേക മിന്നല്‍ പരിശോധനയില്‍ 31 വ്യാപാരസ്ഥാപനങ്ങള്‍ക്കെതിരേ കേസെടുത്തു. 1,27, 000 രൂപ പിഴയും ഈടാക്കി. മുദ്ര ചെയ്യാത്ത അളവുതൂക്ക ഉപകരണങ്ങള്‍ ഉപയോഗിച്ചുള്ള വ്യാപാരം, പായ്ക്കര്‍ രജിസ്‌ട്രേഷന്‍ ഇല്ലാതെ ഉത്പന്നങ്ങളുടെ വില്‍പന, പായ്ക്കറ്റുകളില്‍ നിയമപ്രകാരമുള്ള പ്രഖ്യാപനങ്ങള്‍ രേഖപ്പെടുത്താതിരിക്കുക, രേഖപ്പെടുത്തിയതിലും കൂടിയവില ഈടാക്കുക തുടങ്ങിയ ക്രമക്കേടുകള്‍ക്കെതിരേയാണ് കേസെടുത്തത്. ഡെപ്യൂട്ടി കണ്‍ട്രോളര്‍മാരായ എം. സഫിയ, കെ. സുജാ ജോസഫ് എന്നിവരുടെ നേതൃത്വത്തില്‍ അസി. കണ്‍ട്രോളര്‍ ഷിന്‍റോ ഏബ്രഹാം, ഇന്‍സ്‌പെക്ടര്‍മാരായ കെ.എസ്. ബേബി, അപര്‍ണ എസ്. മേനോന്‍, അഖില്‍ സക്കറിയ, യു.വി. വിപിന്‍, പി.കെ. ബിനുമോന്‍ എന്നിവര്‍ പരിശോധനകളില്‍ പങ്കെടുത്തു.

കോട്ടയത്ത് 20ന് ട്രെയിന്‍ ഗതാഗത നിയന്ത്രണം

കോട്ടയം: ചിങ്ങവനം-കോട്ടയം സെക്‌ഷനില്‍ ട്രാക്ക് പണി നടക്കുന്നതിനാല്‍ 20ന് കോട്ടയം റൂട്ടില്‍ ട്രെയിന്‍ നിയന്ത്രണം. നിരവധി ട്രെയിനുകള്‍ വഴി തിരിച്ചുവിടും. ഏതാനും ട്രെയിനുകള്‍ ഭാഗികമായി റദ്ദാക്കും. ആലപ്പുഴ വഴി തിരിച്ചുവിടുന്ന ട്രെയിനുകള്‍ തിരുവനന്തപുരം-ചെന്നൈ സെന്‍ട്രല്‍ സൂപ്പര്‍ഫാസ്റ്റ് എക്സ്പ്രസിന് ആലപ്പുഴ, ചേര്‍ത്തല, എറണാകുളം എന്നിവിടങ്ങളില്‍ സ്റ്റോപ്പുകളുണ്ടാകും. തിരുവനന്തപുരം നോര്‍ത്ത്-ശ്രീ ഗംഗാനഗര്‍ എക്സ്പ്രസിന് ആലപ്പുഴ, എറണാകുളം ജംഗ്ഷന്‍ എന്നിവിടങ്ങളില്‍ സ്റ്റോപ്പ് അനുവദിക്കും. തിരുവനന്തപുരം നോര്‍ത്ത്-എസ്എംവിടി ബംഗളൂരു ഹംസഫര്‍ എക്സ്പ്രസിന് ആലപ്പുഴ, എറണാകുളം ജംഗ്ഷന്‍ എന്നിവിടങ്ങളില്‍ സ്റ്റോപ്പുണ്ടാകും. കന്യാകുമാരി-ഡിബ്രുഗഡ് വിവേക് എക്സ്പ്രസിന് ആലപ്പുഴ, എറണാകുളം ജംഗ്ഷന്‍ എന്നിവിടങ്ങളില്‍ സ്റ്റോപ്പുണ്ടാകും. തിരുവനന്തപുരം സെന്‍ട്രല്‍-മധുര അമൃത എക്സ്പ്രസിന് ആലപ്പുഴ, എറണാകുളം ജംഗ്ഷന്‍ എന്നിവിടങ്ങളില്‍ സ്റ്റോപ്പുണ്ടാകും. തിരുവനന്തപുരം സെന്‍ട്രല്‍-മംഗളൂരു സെന്‍ട്രല്‍ എക്സ്പ്രസിന് ഹരിപ്പാട്, അമ്പലപ്പുഴ, ആലപ്പുഴ, ചേര്‍ത്തല, എറണാകുളം എന്നിവിടങ്ങളില്‍ സ്റ്റോപ്പ് അനുവദിക്കും. ഭാഗികമായി റദ്ദാക്കുന്നത് ചെന്നൈ സെന്‍ട്രല്‍-തിരുവനന്തപുരം സെന്‍ട്രല്‍ സൂപ്പര്‍-ഫാസ്റ്റ് എക്സ്പ്രസ് കോട്ടയത്ത് സര്‍വീസ് അവസാനിപ്പിക്കും. മധുര-ഗുരുവായൂര്‍ എക്സ്പ്രസ് കൊല്ലത്ത് അവസാനിപ്പിക്കും. നാഗര്‍കോവില്‍-കോട്ടയം എക്സ്പ്രസ് ചങ്ങനാശേരിയില്‍ അവസാനിപ്പിക്കും. പുറപ്പെടുന്നതില്‍ മാറ്റം തിരുവനന്തപുരം സെന്‍ട്രല്‍-ചെന്നൈ സെന്‍ട്രല്‍ സൂപ്പര്‍ഫാസ്റ്റ് എക്സ്പ്രസ് 20ന് രാത്രി 8.05ന് കോട്ടയത്തു നിന്നായിരിക്കും പുറപ്പെടുക. ഗുരുവായൂര്‍-മധുര എക്സ്പ്രസ് 21ന് കോട്ടയത്തുനിന്ന് പകല്‍ 12.10നു പുറപ്പെടും.

നൂറുമേനി വിജയികളുടെ മഹാസംഗമം ഇന്ന്

ചങ്ങനാശേരി: ചങ്ങനാശേരി അതിരൂപത ബൈബിള്‍ അപ്പൊസ്തലേറ്റ്, കുടുംബ കൂട്ടായ്മ എന്നിവയുടെ സംയുക്താഭിമുഖ്യത്തില്‍ അതിരൂപതയിലെ 250 ഇടവകകളില്‍ നിന്നായി ഒരു ലക്ഷത്തോളം ആളുകള്‍ പങ്കെടുത്ത നൂറുമേനി വചനപഠന മത്സരവിജയികളുടെ മഹാസംഗമവും എന്‍റെ സ്വന്തം ബൈബിള്‍ പദ്ധതിയുടെ ഉദ്ഘാടനവും ഇന്ന് എസ്ബി കോളജ് കാവുകാട്ട് ഹാളില്‍ നടക്കും. രാവിലെ 10ന് ആര്‍ച്ച്ബിഷപ് മാര്‍ തോമസ് തറയിലിന്‍റെ അധ്യക്ഷതയില്‍ ചേരുന്ന സമ്മേളനം മലങ്കരസഭാ മേജര്‍ ആര്‍ച്ച്ബിഷപ് ബസേലിയോസ് മാര്‍ ക്ലീമിസ് കാതോലിക്ക ബാവ ഉദ്ഘാടനം ചെയ്യും. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണവും വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യപ്രഭാഷണവും നടത്തും. ചലച്ചിത്ര നടന്‍ സിജോയ് വര്‍ഗീസ് വചന സാക്ഷ്യം നല്‍കും. ചലച്ചിത്ര നിര്‍മാതാവും ഗാനരചയിതാവുമായ ലിസി ഫെര്‍ണാണ്ടസ്, അതിരൂപത ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, മീഡിയ വില്ലേജ് കോ ഓര്‍ഡിനേറ്റര്‍ ഫാ. ജോജിന്‍ ഇലഞ്ഞിക്കല്‍, നൂറുമേനി വചന പഠനപദ്ധതി ചെയര്‍മാന്‍ സണ്ണി ഇടിമണ്ണിക്കല്‍, ബൈബിള്‍ അപ്പൊസ്തലേറ്റ് അതിരൂപത പ്രസിഡന്‍റ് ഡോ. റൂബിള്‍ രാജ്, ഡോ.പി.സി. അനിയന്‍കുഞ്ഞ്, ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പ്രഫ. ജോസഫ് ടിറ്റോ, സിസ്റ്റര്‍ ചെറുപുഷ്പം, ജോസി കടന്തോട്, മറിയം ജോര്‍ജ് എന്നിവര്‍ പ്രസംഗിക്കും. അയ്യായിരത്തിലേറെ പേര്‍ മഹാസംഗമത്തില്‍ പങ്കെടുക്കും. ഒന്നും രണ്ടും സ്ഥാനങ്ങള്‍ ഡോക്ടര്‍ ദമ്പതിമാര്‍ക്ക് ചങ്ങനാശേരി: ഒരുലക്ഷത്തോളം ആളുകള്‍ പങ്കെടുത്ത ബൈബിള്‍ വചന മനഃപാഠ പദ്ധതിയായ നൂറുമേനി സീസണ്‍ 3 മത്സരത്തിന്‍റെ ഗ്രാന്‍ഡ് ഫിനാലെയില്‍ 148 പോയിന്‍റ് നേടി തിരുവനന്തപുരം റീജണിലെ ഡോ. അഭിലാഷ് കെ. തോമസ്, ഡോ. റോണാ ജോസഫ് പി, സെബാസ്റ്റ്യന്‍ തോമസ് കുഴിക്കാട്ടില്‍ എന്നിവരടങ്ങിയ കുടുംബം ജേതാക്കളായി. 147 പോയിന്‍റ് നേടി കോട്ടയം റീജണിലെ ഡോ. സുജിത് ജോ മാത്യു, ഡോ. അനു വര്‍ഗീസ്, മരിയ റോസ് ജോ മണിയങ്ങാട്ട് എന്നിവരുടെ കുടുംബം രണ്ടാം സ്ഥാനവും 140 പോയിന്‍റ് നേടി കുട്ടനാട് റീജണിലെ മാത്യു തോമസ്, മേരിക്കുട്ടി തോമസ്, ഡോ. മെര്‍ലി ആന്‍ മാത്യു തറയില്‍ കാനാച്ചേരി എന്നിവരുടെ കുടുംബം മൂന്നാം സ്ഥാനവും 120 പോയിന്‍റ് നേടി ചങ്ങനാശേരി റീജണിലെ ജയിംസ് കെ. ജേക്കബ്, ഷൈനി സെബാസ്റ്റ്യന്‍ കോലോത്ത്, മരിയ ജോസഫ് എന്നിവരുടെ കുടുംബം നാലാം സ്ഥാനവും 101 പോയിന്‍റ് നേടി നെടുംകുന്നം റീജണിലെ സോജി ചാക്കോ, മരിയ മാത്യു കൂനാനിക്കല്‍ എന്നിവരുടെ കുടുംബം അഞ്ചാം സ്ഥാനവും നേടി. ആദ്യ രണ്ടു സ്ഥാനങ്ങള്‍ നേടിയ ടീമുകള്‍ തമ്മില്‍ ഒരു പോയിന്‍റിന്‍റെ വ്യത്യാസമേയുള്ളൂ. ജീസസ് യൂത്തില്‍ മെഡിക്കല്‍ കോളജ് പഠന കാലഘട്ടംമുതല്‍ത്തന്നെ സജീവമാണ് ഒന്നും രണ്ടും സമ്മാനങ്ങള്‍ നേടിയ ഡോക്ടര്‍ ദമ്പതികള്‍. ആര്‍ച്ച്ബിഷപ് എമെരിറ്റസ് മാര്‍ ജോസഫ് പെരുന്തോട്ടം വിജയികളെ പ്രഖ്യാപിച്ചു. നൂറുമേനി വചനപഠനം വചനം ലോകമെമ്പാടും എത്തിക്കുന്നതില്‍ വലിയ പങ്കാണ് വഹിക്കുന്നതെന്ന് മാര്‍ ജോസഫ് പെരുന്തോട്ടം അഭിപ്രായപ്പെട്ടു. ഡോ. റൂബിള്‍ രാജാണ് ഫിനാലെ ക്വിസ് നയിച്ചത്. ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, നൂറുമേനി ചെയര്‍മാന്‍ സണ്ണി തോമസ് ഇടിമണ്ണിക്കല്‍, ഫാ. ജോജിന്‍ ഇലഞ്ഞിക്കല്‍, ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പ്രഫ. ജോസഫ് ടിറ്റോ എന്നിവര്‍ പ്രസംഗിച്ചു. വചനപഠനം ലോകനന്മയ്ക്ക് യുദ്ധങ്ങളും സംഘര്‍ഷങ്ങളും ആകുലതയും സ്‌നേഹരാഹിത്യവും നിറഞ്ഞ ആധുനിക കാലഘട്ടത്തില്‍ വചനപഠനം സമാധാനത്തിനും സാമൂഹ്യനന്മയ്ക്കുമുള്ള പ്രധാന ഉപാധിയാണ്. ജീവിതത്തിന്‍റെ മുഴുവന്‍ പ്രശ്‌നങ്ങൾക്കും പ്രതിസന്ധികള്‍ക്കും വചനം ഉത്തരം നല്‍കുന്നുണ്ട്. അതിനാലാണ് ചങ്ങനാശേരി അതിരൂപതയില്‍ നൂറുമേനി വചനമനഃപാഠ മത്സരം സംഘടിപ്പിച്ചിരിക്കുന്നത്. ചങ്ങനാശേരി അതിരൂപതയിലെ എല്ലാ കുടുംബങ്ങളിലെയും മുഴുവന്‍ അംഗങ്ങള്‍ക്കും സ്വന്തമായി ബൈബിള്‍ ലഭ്യമാക്കുന്ന "എന്‍റെ സ്വന്തം ബൈബിള്‍ പദ്ധതിക്കും നൂറുമേനി സീണണ്‍ നാലിനും' ഇന്ന് തുടക്കമാകും. സണ്ണി തോമസ് ഇടിമണ്ണിക്കല്‍ (നൂറുമേനി അതിരൂപതാ ചെയര്‍മാന്‍)

ഭരണങ്ങാനം ഡിവിഷനില്‍ 1.43 കോടിയുടെ ശുചിത്വ പദ്ധതികള്‍

വള്ളിച്ചിറ: ജില്ലാ പഞ്ചായത്ത് ഭരണങ്ങാനം ഡിവിഷനില്‍ 1.43 കോടി ലക്ഷം രൂപയുടെ ശുചിത്വ പദ്ധതികള്‍ നടപ്പിലാക്കിയതായി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍. ചെറുകര സെന്‍റ് ആന്‍റണീസ് യുപി സ്‌കൂളില്‍ 16 ലക്ഷം രൂപ ഉപയോഗിച്ച് നിര്‍മാണം പൂര്‍ത്തീകരിച്ച സാനിറ്റേഷന്‍ കോംപ്ലക്‌സിന്‍റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. സാനിറ്റേഷന്‍ ബ്ലോക്കുകള്‍, ജി-ബിന്‍, ബയോ കമ്പോസ്റ്റര്‍ ബിന്‍, റിംഗ് കമ്പോസ്റ്റ് തുടങ്ങിയവ ശുചിത്വപദ്ധതിയില്‍ രൂപം കൊടുത്തവയാണ്. പ്രവിത്താനം സെന്‍റ് മൈക്കിള്‍സ് ഹയര്‍ സെക്കന്‍ഡറി സ്‌കൂളിലും വിളക്കുമാടം സെന്‍റ് ജോസഫ് ഹയര്‍ സെക്കന്‍ഡറി സ്‌കൂളിലും സാനിറ്റേഷന്‍ ബ്ലോക്കുകള്‍ ഉടന്‍ പൂര്‍ത്തിയാക്കുമെന്നും കരൂര്‍ സെന്‍റ് ജോസഫ് സ്‌കൂളിലും ഭരണങ്ങാനം സേക്രഡ് ഹാര്‍ട്ട് ഗേള്‍സ് ഹൈസ്‌കൂളിലും സാനിറ്റേഷന്‍ കോംപ്ലക്‌സുകള്‍ ഉടന്‍ നിര്‍മാണം ആരംഭിക്കുമെന്നും രാജേഷ് വാളിപ്ലാക്കല്‍ പറഞ്ഞു. സ്‌കൂള്‍ മാനേജര്‍ ഫാ. ജോര്‍ജ് പുതുപ്പറമ്പില്‍ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് അനസ്യ രാമന്‍, ബ്ലോക്ക് പഞ്ചായത്ത് മെംബര്‍ ഷീല ബാബു, ഹെഡ്മിസ്ട്രസ് ബിന്‍സി ജോസഫ്, ബിനോയി ഇടയോടിയില്‍, പിടിഎ പ്രസിഡന്‍റ് സാജന്‍ സിറിയക്, സിന്‍സി ബൈജു, സിബി കുറ്റിയാനി, രഞ്ജിത്ത് തങ്കപ്പന്‍, ഷാജി കൊല്ലിത്തടം, ഷാജി വട്ടക്കുന്നേല്‍ തുടങ്ങിയവര്‍ പ്രസംഗിച്ചു.

മൂടാതെ കിടന്ന ഓടയിൽ വീണ് വീട്ടമ്മയ്ക്കു പരിക്ക്

പാലാ: തിരക്കേറിയ കിടങ്ങൂര്‍-പാദുവ റോഡ് സ്വകാര്യ മൊബൈല്‍ കമ്പനിക്കാര്‍ കേബിളിടാൻ കുത്തിപ്പൊളിച്ചിട്ട് മാസങ്ങള്‍. ദുരിതം പേറി നാട്ടുകാര്‍. മാന്താടിക്കവല മുതല്‍ പാദുവവരെയുള്ള മൂന്നു കിലോമീറ്റര്‍ ദൂരത്തിലാണ് റോഡിന്‍റെ വശം വെട്ടിപ്പൊളിച്ച് മാസങ്ങള്‍ക്കു മുമ്പ് കേബിളിടീല്‍ ആരംഭിച്ചത്. ചിലേടങ്ങളില്‍ മെഷീന്‍ ഉപയോഗിച്ചായിരുന്നു കേബിളിട്ടത്. എന്നാല്‍, പാറ മൂലം ഇതു ഭൂരിഭാഗം സ്ഥലത്തും സാധ്യമായില്ല. ഇതോടെ തൊഴിലാളികളെ ഉപയോഗിച്ച് ടാറിംഗ് ഉള്‍പ്പടെ വെട്ടിപ്പൊളിച്ചായിരുന്നു കുഴി തീര്‍ത്തത്. കുഴിച്ച കുഴിയിൽ കുഴി നിര്‍മിച്ച ശേഷം ആഴ്ചകള്‍ കഴിഞ്ഞാണ് ഇവിടെ കേബിളിട്ടത്. കേബിൾ ഇട്ട ശേഷം പൂര്‍ണമായി മൂടാതെ പിന്നീടും ആഴ്ചകള്‍ പിന്നിട്ടു. ഇതിനിടെ, കുഴിക്കു താഴ്ച കുറവാണെന്നു പറഞ്ഞ് ഇതിനു മുകളില്‍ കോണ്‍ക്രീറ്റ് ചെയ്യാന്‍ തുടങ്ങി. പലപ്പോഴായി കുറെ ഭാഗം ചെയ്തെങ്കിലും ഇതു പൂര്‍ണമാക്കിയിട്ടില്ല. പലേടത്തും ഓടയ്ക്കു മുകളില്‍ അശാസ്ത്രീയമായി ഇട്ട കോണ്‍ക്രീറ്റ് റോഡിനരികിൽ മൂന്ന് ഇഞ്ച് വരെ ഉയരത്തില്‍ കട്ടിംഗായി നില്‍ക്കുകയാണ്. യാതൊരു മാനദണ്ഡവും പാലിക്കാതെ വെറുതെ ഓടയ്ക്കു മുകളില്‍ അന്യസംസ്ഥാന തൊഴിലാളികളെ ഉപയോഗിച്ചു കോണ്‍ക്രീറ്റ് ഇട്ട് പോവുക മാത്രമാണ് ചെയ്തതെന്നു നാട്ടുകാര്‍ കുറ്റപ്പെടുത്തി. റോഡ് വക്കില്‍ ഉയര്‍ന്നു നില്‍ക്കുന്ന കോണ്‍ക്രീറ്റ് കട്ടിംഗ് വലിയ അപകടഭീഷണിയാണ് ഉയർത്തുന്നത്. ടയര്‍ കോണ്‍ക്രീറ്റ് കട്ടിംഗില്‍ ഇടിച്ചു പഞ്ചറാവാനും ഇരുചക്രവാഹനങ്ങള്‍ ഇതില്‍ കയറി അപകടത്തില്‍പ്പെടാനും സാധ്യത ഏറെ. രണ്ടു മാസം രണ്ടു മാസം മുമ്പു രണ്ടു വീടുകള്‍ക്കു മുന്നില്‍ നീളത്തില്‍ തുറന്നിട്ട ഓട ഇതുവരെ കോണ്‍ക്രീറ്റ് ചെയ്തിട്ടില്ല. ഒരു വീട്ടമ്മയ്ക്കു ഓടയില്‍ വീണു പരിക്കേല്‍ക്കുകയും ചെയ്തു. ഇവിടെയും കിടങ്ങൂര്‍ ശിവപുരം ക്ഷേത്രത്തിന് മുന്നിലും ബസ് സ്റ്റോപ്പ് കൂടിയാണ്. പലതവണ പൊതുമരാമത്ത് വകുപ്പ് ഉദ്യോഗസ്ഥരോടടക്കം നാട്ടുകാര്‍ പരാതി പറഞ്ഞെങ്കിലും കേബിള്‍ കരാറുകാര്‍ തോന്നിയപോലെ പ്രവര്‍ത്തിക്കുകയാണന്നു നാട്ടുകാര്‍ ആരോപിക്കുന്നു. വകുപ്പുമന്ത്രിക്കടക്കം പരാതി നൽകാനൊരുങ്ങുകയാണ് നാട്ടുകാർ.

പാടിയും പറഞ്ഞും പഠിച്ചും പഠിപ്പിച്ചും മുതിർന്ന പൗരന്മാർ

കുറവിലങ്ങാട്: ശാരീരിക ന്യൂനതകൾപോലും മറന്ന് മനസ് തുറന്ന് അവർ പാടുമ്പോൾ ശ്രേതാക്കളും സംഘാടകരുമായ ഇളംതലമുറയ്ക്ക് ആവേശം. പാടിയും പറഞ്ഞും ചിലപ്പോളൊക്കെ പഠിപ്പിച്ചും സംഗമിച്ച മുതിർന്ന തലമുറയും ആവേശത്തിന്‍റെ ആഘോഷത്തിലായിരുന്നു. ഉഴവൂർ ബ്ലോക്ക് പഞ്ചായത്തിൽ നടപ്പിലാക്കുന്ന സുന്ദരം സായാഹ്നം, സ്മാർട്ട് സീനിയേഴ്‌സ് എന്ന പേരിലുള്ള പദ്ധതിയുടെ ഉദ്ഘാടനത്തോടനുബന്ധിച്ചാണ് മുതിർന്ന പൗരന്മാരുടെ സംഗമം നടത്തിയത്. സംഗമത്തിന്‍റെ ഭാഗമായി ക്ലാസുകളും ആരോഗ്യ പരിശോധനയും കലാപരിപാടികളും ഉച്ചഭക്ഷണവുമൊക്കെ ക്രമീകരിച്ചിരുന്നു. ബ്ലോക്കിനെ വയോജനസൗഹൃദമാക്കുകയെന്ന ലക്ഷ്യത്തോടെ ആരംഭിച്ച പദ്ധതിയുടെ ഉദ്ഘാടനം ഫാ. ജോസഫ് പുത്തൻപുര നിർവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ ചിറ്റേത്ത് അധ്യക്ഷത വഹിച്ചു. കെ. രവികുമാർ, ഡോ. ഹരികൃഷ്ണൻ എന്നിവർ ക്ലാസിന് നേതൃത്വം നൽകി. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡോ. സിന്ധുമോൾ ജേക്കബ്, ജില്ലാ പഞ്ചായത്തംഗം പി.എം. മാത്യു, ബിജു കൊണ്ടൂക്കാലാ, കൊച്ചുറാണി സെബാസ്റ്റ്യൻ, പി.എൻ. രാമചന്ദ്രൻ, ആഷാമോൾ ജോബി, ജോൺസൺ പുളിക്കീൽ, സ്മിത അലക്‌സ്, ജീന സിറിയക്, സിൻസി മാത്യു, ആൻസി മാത്യു, സന്ധ്യ സജികുമാർ, ബിഡിഒ ശ്രീകുമാർ എസ്. കൈമൾ, സിഡിപിഒ എൽ. അംബിക എന്നിവർ പ്രസംഗിച്ചു.

രാമപുരം കോളജിന് ഐഎസ്ആര്‍ഒ അംഗീകാരം

രാമപുരം: മാര്‍ ആഗസ്തീനോസ് കോളജിന് ഐഎസ്ആര്‍ഒ അംഗീകാരം ലഭിച്ചു. ദേശീയ ബഹിരാകാശ ദിനാഘോഷങ്ങളോടനുബന്ധിച്ച് ഇന്ത്യന്‍ ബഹിരാകാശ ഗവേഷണ സംഘടന സംഘടിപ്പിച്ച മത്സര പരിപാടിയില്‍ മികച്ച പ്രകടനം കാഴ്ചവച്ചതിനാണ് അംഗീകാരം ലഭിച്ചത്. ഇതിനായി പ്രയത്നിച്ച സ്റ്റാഫ് അംഗങ്ങളായ വി. അഭിലാഷ്, ലിജിന്‍ ജോയി, ജാസ്മിന്‍ ആന്‍റണി, ജോമി ജോസഫ് എന്നിവരെ കോളജ് മാനേജര്‍ ഫാ. ബര്‍ക്കുമാന്‍സ് കുന്നുംപുറം, പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍, വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്ട്രേറ്റീവ് ഓഫീസര്‍മാരായ രാജീവ് ജോസഫ്, പ്രകാശ് ജോസഫ് തുടങ്ങിയവര്‍ അഭിനന്ദിച്ചു.

ഉഴവൂർ കോളജിൽ ഇന്‍റർ കൊളീജിയറ്റ് വോളി, ഫുട്‌ബോൾ, ബാഡ്മിന്‍റൺ മത്സരങ്ങൾ

ഉഴവൂർ: സെന്‍റ് സ്റ്റീഫൻസ് കോളജിൽ 15 മുതൽ 19 വരെ തീയതികളിലായി ഇന്‍റർ കൊളീജിയറ്റ് വോളിബോൾ, ഫുട്‌ബോൾ, ബാഡ്മിന്‍റൺ മത്സരങ്ങൾ നടക്കുമെന്ന് പ്രിൻസിപ്പൽ ഡോ. സിൻസി ജോസഫ്, വൈസ് പ്രിൻസിപ്പൽ ഡോ. കെ.സി തോമസ് , ടൂർണമെന്‍റ് കൺവീനർ ക്യാപ്റ്റൻ ജെയ്‌സ് കുര്യൻ, സെക്രട്ടറി ഡോ. മാത്യൂസ് ഏബ്രഹാം എന്നിവർ പത്രസമ്മേളനത്തിൽ അറിയിച്ചു. ഉദ്ഘാടനം 15ന് ഒൻപതിന് കേന്ദ്രമന്ത്രി ജോർജ് കുര്യൻ നിർവഹിക്കും. മാനേജർ ഫാ. ഏബ്രഹാം പറമ്പേട്ട് അധ്യക്ഷത വഹിക്കും. 35-മത് ബിഷപ്പ് തറയിൽ മെമ്മോറിയൽ പുരുഷ വോളിബോൾ, 34-ാമത് സിസ്റ്റർ ഗോരേത്തി മെമ്മോറിയൽ വനിതാ വോളിബോൾ, 18-ാമത് ബിഷപ് കുന്നശേരി പൗരോഹിത്യ സുവർണ ജൂബിലി മെമ്മോറിയൽ ഫുട്‌ബോൾ ടൂർണമെന്‍റ്, പത്താമത് ഗോൾഡൻ ജൂബിലി മെമ്മോറിയൽ ബാഡ്മിന്‍റൺ ടൂർണമെന്‍റ് എന്നിവയാണ് നടക്കുന്നത്. മുൻ ദേശീയ വോളിബോൾ താരവും പൂർവവിദ്യാർഥിയുമായ എസ്.എ. മധു, പാലാ നഗരസഭാധ്യക്ഷൻ തോമസ് പീറ്റർ, പാലാ ഡിവൈഎസ്പി പി. സദൻ എന്നിവർ വിവിധ ദിവസങ്ങളിൽ അതിഥികളായി പങ്കെടുക്കും.

കാർഷികോത്സവത്തിന് സമാപനം; വീണ്ടും കൃഷിഭൂമിയിലേക്ക്

മരങ്ങാട്ടുപിള്ളി: കാർഷിക മേഖലയോട് ആവേശം കുറയുന്നുവെന്ന കാഴ്ചപ്പാടുകൾ അടിസ്ഥാനരഹിതമെന്നു തെളിയിച്ച് പഞ്ചായത്തിലെ കാർഷികോത്സവത്തിന് സമാപനം. വേറിട്ട മത്സരങ്ങളും കൃഷി അറിവുകളും സമ്മാനിച്ച കാർഷികോത്സവം ഏറെ പുതുമകൾ നിറഞ്ഞതായിരുന്നു. പുതുതലമുറയെ കൃഷിയിലേക്ക് ആകർഷിക്കാൻ കഴിയുന്ന തരത്തിലുള്ള മത്സരങ്ങളും പരിപാടികളുമായിരുന്നു ഏറെയും. സാംസ്‌കാരിക ഘോഷയാത്രയും സമാപന സമ്മേളനവും സംഘാടക മികവിന്‍റെ തെളിവായി മാറി. മോൻസ് ജോസഫ് എംഎൽഎ സമാപന സമ്മേളനം ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ബെൽജി ഇമ്മാനുവൽ അധ്യക്ഷത വഹിച്ചു. സംസ്ഥാന ആസൂത്രണ സമിതി അംഗം സന്തോഷ് ജോർജ് കുളങ്ങര, ഫാ. ജോസഫ് തൈയ്യിൽ, ജില്ലാ പഞ്ചായത്ത് മെംബർ പി.എം. മാത്യു, ബ്ലോക്ക് പഞ്ചായത്ത് മെംബർ ജോൺസൺ പുളിക്കീൽ, സഹകരണ ബാങ്ക് പ്രസിഡന്‍റ് എം.എം. തോമസ്, റോബിൻ കല്ലോലിൽ, കൃഷി ഓഫീസർ മനു കൃഷ്ണൻ, നിഷ മേരി സിറിയക്, ലെൻസി തോമസ്, മിനി ജോർജ് തുടങ്ങിയവർ പ്രസംഗിച്ചു. ജില്ലാതല കാർഷിക ക്വിസ് മത്സരാർഥകളാൽ സമ്പന്നമായിരുന്നു. വിജയികൾക്ക് കോട്ടയം ജില്ലാ കൃഷി ഓഫീസർ ജോ ജോസ് സമ്മാനങ്ങൾ വിതരണം ചെയ്തു. ഡോ. വിമൽ ശർമ ക്വിസിന് നേതൃത്വം നൽകി. ഉത്പാദനോപാധികളുടെ വിതരണോദ്ഘാടനം കുമരകം കൃഷി വിജ്ഞാനകേന്ദ്രം പ്രോഗ്രാം കോ-ഓർഡിനേറ്റർ ആൻഡ് ഹെഡ് ഡോ. ജയലക്ഷ്മി നിർവഹിച്ചു. ആർഎടിടിസി ഡെപ്യൂട്ടി ഡയറക്ടർ ജോ പൈനാപ്പള്ളി വിജയികൾക്ക് സമ്മാനങ്ങൾ നൽകി.

അങ്കണവാടി ഉദ്ഘാടനം

കാഞ്ഞിരപ്പള്ളി: പഞ്ചായത്ത് ഇരുപതാം വാർഡ് പനച്ചേപ്പള്ളി 34-ാം നമ്പർ അങ്കണവാടിയുടെ ഉദ്ഘാടനം ചീഫ് വിപ്പ് ഡോ. എൻ. ജയരാജ് നിർവഹിച്ചു. പഞ്ചായത്ത് പ്രസിഡന്‍റ് കെ.ആർ. തങ്കപ്പൻ അധ്യക്ഷത വഹിച്ചു. ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, പഞ്ചായത്തംഗങ്ങളായ വി.പി. രാജൻ, റിജോ വാളന്തറ, ബിജു ചക്കാല, മഞ്ജു മാത്യു, പി.പി. രാജു, അജി കാലായിൽ, അജു പനയ്ക്കൽ, ജോഷി തോമസ്, കെ.കെ. ശശി, രമേശൻ പറമ്പിൽ, പി.കെ. ചെല്ലപ്പൻ എന്നിവർ പ്രസംഗിച്ചു. കെട്ടിടനിർമാണത്തിന് പഞ്ചായത്ത്‌ 16 ലക്ഷം രൂപയും ജില്ലാ പഞ്ചായത്ത് അഞ്ചു ലക്ഷം രൂപയും അനുവദിച്ചിരുന്നു.

ചേനപ്പാടിയുടെ പാളത്തൈര് സമർപ്പണം ഇന്ന്

പൊൻകുന്നം: ചേനപ്പാടി പാർഥസാരഥി ഭക്തജനസമിതി ആറന്മുള പാർഥസാരഥി ക്ഷേത്രത്തിൽ ജന്മാഷ്ടമി സദ്യയ്ക്കുള്ള പാളത്തൈര് ഇന്നു സമർപ്പിക്കും. നാളെ അഷ്ടമിരോഹിണി നാളിൽ ഭക്തർക്കു വിളമ്പുന്ന സദ്യയിലെ പ്രധാന വിഭവമാണ് പാളത്തൈര്. ഇന്നലെ വാഴൂർ തീർഥപാദാശ്രമത്തിൽ 1,500 ലിറ്റർ തൈരിനുള്ള പാലിൽ ഉറയൊഴിക്കൽ ആശ്രമകാര്യദർശി സ്വാമി ഗരുഡധ്വജാനന്ദ തീർഥപാദരുടെ കാർമികത്വത്തിൽ നടത്തി. ആശ്രമത്തിലെ ഗോശാലയിലെ പാൽ ഉപയോഗിച്ചുള്ള തൈരും ചേനപ്പാടിയിലെ ഭക്തർ വഴിപാടായി സമർപ്പിക്കുന്ന തൈരുമാണ് ആറന്മുളയിൽ എത്തിക്കുന്നത്. പൂർവികർ പാളപ്പാത്രങ്ങളിൽ തൈര് കൊണ്ടുപോയി ഭഗവാനു സമർപ്പിച്ചിരുന്നതിനാലാണ് പാളത്തൈര് എന്നറിയപ്പെടുന്നത്. പൂർവികരുടെ രീതിയിൽ പാളപ്പാത്രങ്ങളിലും തൈര് എത്തിക്കുന്നുണ്ട്. വാഴൂർ തീർഥപാദാശ്രമ കാര്യദർശി സ്വാമി ഗരുഡധ്വജാനന്ദ തീർഥപാദർ രക്ഷാധികാരിയായ പാർഥസാരഥി ഭക്തജനസമിതി ഘോഷയാത്രയായി തൈര് സമർപ്പണത്തിന് ഇന്നു രാവിലെ പുറപ്പെടും. പുലർച്ചെ ചേനപ്പാടിയിലെ ഇളങ്കാവ് ഭഗവതി ക്ഷേത്രം, ധർമശാസ്താ ക്ഷേത്രം, ഇടയാറ്റുകാവ് ദേവീക്ഷേത്രം, പൂതക്കുഴി ശ്രീകൃഷ്ണസ്വാമി ക്ഷേത്രം, കണ്ണമ്പള്ളിൽ ഭഗവതിക്ഷേത്രം, കുറ്റിക്കാട്ടുകാവ് ദേവീക്ഷേത്രം, കിഴക്കേക്കര ഭഗവതിക്ഷേത്രം, അഞ്ചുകുഴി പരാശക്തി ദേവസ്ഥാനം, മഹാലക്ഷ്മി കാണിക്കമണ്ഡപം എന്നിവിടങ്ങളിൽ വഴിപാടുകൾ നടത്തും. ചേനപ്പാടി എസ്എൻഡിപി യോഗം ശാഖ, പരുന്തന്മല ശ്രീദേവിവിലാസം ഭജനസമിതി, വിഴിക്കിത്തോട് ഭജനസമിതി എന്നിവയുടെയും സഹകരണത്തോടെ പ്രത്യേകം അലങ്കരിച്ച് തയാറാക്കിയ വാഹനത്തിൽ തീർഥപാദാശ്രമത്തിൽനിന്ന് തൈര് ചേനപ്പാടി കിഴക്കേക്കര ഭഗവതിക്ഷേത്ര സന്നിധിയിലെത്തിക്കും. തുടർന്നു രാവിലെ ഒന്പതിന് ഇവിടെനിന്നു നാമസങ്കീർത്തന ഘോഷയാത്രയായി ആറന്മുള ക്ഷേത്രത്തിലേക്കു പുറപ്പെടും. എരുമേലി പോലീസ് എസ്എച്ച്ഒ ഇ.ഡി. ബിജു ഘോഷയാത്ര ഉദ്ഘാടനം ചെയ്യും. രാവിലെ 11ന് പാർഥസാരഥി ക്ഷേത്രനടയിൽ തൈര് സമർപ്പണം നടത്തും. ഘോഷയാത്രയെ പാർഥസാരഥി പള്ളിയോട സമിതിയുടെ നേതൃത്വത്തിൽ വഞ്ചിപ്പാട്ട് പാടി സ്വീകരിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]