ADVERTISEMENT

ADVERTISEMENT

തൃശൂര്‍ ജില്ലാ വനിതാ ഫുട്‌ബോള്‍ ലീഗ്; സെന്‍റ് ജോസഫ്‌സ് കോളജ് വിജയിച്ചു

ഇരിങ്ങാലക്കുട: തൃശൂര്‍ ജില്ലാ ഫുട്‌ബോള്‍ അസോസിയേഷന്‍റെ നേതൃത്വത്തില്‍ സെന്‍റ്് ജോസഫ്‌സ് കോളജിന്‍റെ സഹകരണത്തോടെ, ക്രൈസ്റ്റ് കോളജ് ഗ്രൗണ്ടില്‍ നടത്തുന്ന ജില്ലാ വനിതാ ഫുട്‌ബോള്‍ ലീഗ് മത്സരങ്ങളില്‍ സെന്‍റ്് ജോസഫ്‌സ് കോളജ് വിജയിച്ചു.

ഡിഎഫ്എ സെക്രട്ടറി ജോസ് പോള്‍ പൂകോടന്‍ ഉദ്ഘാടനം ചെയ്തു.
സ്റ്റാലിന്‍ റാഫല്‍, തോമസ് കാട്ടുകാരന്‍ കളിക്കാരെ പരിചയപെട്ടു.

ADVERTISEMENT

വെള്ളക്കെട്ട് പ്രദേശങ്ങൾ കളക്ടർ സന്ദർശിച്ചു

കയ്പമംഗലം: എടത്തിരുത്തി ഗ്രാമപഞ്ചായത്തിലെ വെള്ളക്കെട്ട് രൂക്ഷമായ പ്രദേശങ്ങളിൽ ജില്ലാ കളക്ടർ സന്ദർശനം നടത്തി. കാലവർഷത്തോടനുബന്ധിച്ച് മൂന്നുദിവസം നിർത്താതെ പെയ്ത മഴയിൽ രൂക്ഷമായ വെള്ളക്കെട്ട് രൂപപ്പെട്ട എടത്തിരുത്തി ഗ്രാമപഞ്ചായത്തിലെ പതിനഞ്ചാം വാർഡിലെ പപ്പടം നഗർ, ചെന്ത്രാപ്പിന്നി മേഖലകളിലാണ് ജില്ലാ കളക്ടർ അർജുൻ പാണ്ഡ്യൻ, ഇ.ടി. ടൈസൺ മാസ്റ്റർ എംഎൽഎയുടെ സാന്നിധ്യത്തിൽ സന്ദർശനം നടത്തിയത്. വെള്ളക്കെട്ട് മൂലം ഈ പ്രദേശങ്ങളിൽ ദുരിതമനുഭവിക്കുന്നത് ഇരുപതോളം വീട്ടുകാരാണ്. നാഷണൽ ഹൈവേയുടെ നിർമാണവുമായി ബന്ധപ്പെട്ട് തോടുകൾ നികത്തിയത് പെയ്ത വെള്ളത്തിന്‍റെ ഒഴുക്കിനെ ബാധിച്ചതു കൊണ്ടാണ് വെള്ളക്കെട്ട് രൂക്ഷമാകാനിടയായതെന്ന നാട്ടുകാരുടെ പരാതിയിൽ എൻഎച്ച്എഐ, റവന്യൂ ഉദ്യോഗസ്ഥർ, എടത്തിരുത്തി പഞ്ചായത്ത് ഉദ്യോഗസ്ഥർ, ജനപ്രതിനിധികൾ എന്നിവരെ ഉൾപ്പെടുത്തി വില്ലേജ് ഓഫീസിൽ യോഗം ചേർന്നു. യോഗത്തിൽ വെള്ളക്കെട്ട് ഒഴിവാക്കുന്നതിന് വേണ്ട പ്രവർത്തനങ്ങൾ വേഗത്തിൽ നടപ്പിലാക്കാനും വെള്ളം ഒഴുകിപ്പോകാൻ സ്ഥിരം സംവിധാനം ഒരുക്കാനുള്ള നടപടികൾ സ്വീകരിക്കാനും തോടുകൾ വൃത്തിയാക്കാനും എൻഎച്ച്എഐ ഉദ്യോഗസ്ഥർക്ക് കളക്ടർ നിർദ്ദേശം നൽകി. അസിസ്റ്റന്‍റ് കളക്ടർ സ്വാതി മോഹൻ റാത്തോഡും കളക്ടർക്കൊപ്പം ഉണ്ടായിരുന്നു.

കൊരട്ടി എംഎഎം ഹൈസ്കൂളിൽ പുതിയ കെട്ടിടസമുച്ചയം തുറന്നു

കൊരട്ടി: സെന്‍റ്് മേരീസ് ഫൊറോന പള്ളിയുടെ കീഴിലുള്ള എംഎഎം ഹൈസ്ക്കൂളിന് ആധുനിക സൗകര്യങ്ങളോടുകൂടിയ പുതിയ കെട്ടിടം തുറന്നു. ആയിരക്കണക്കിന് കുട്ടികളെ അക്ഷര ലോകത്തേക്ക് നയിച്ച ഹൈസ്കൂളിന്‍റെ കെട്ടിടം കാലപ്പഴക്കത്തിലെത്തിയ സാഹചര്യത്തിലാണ് പുതിയ കെട്ടിടത്തിന് വഴിതെളിഞ്ഞത്. നാടിന്‍റെ ചിരകാലാഭിലാഷമായ കെട്ടിടത്തിന്‍റെ വെഞ്ചരിപ്പ് കർമം സ്കൂൾ മാനേജറും ഫൊറോന വികാരിയുമായ ഫാ.ജോൺസൺ കക്കാട്ട് നിർവഹിച്ചു. തുടർന്ന് കെട്ടിടത്തിന്‍റെ താക്കോൽ പ്രധാനാധ്യാപിക സിനു കുര്യൻ ഏറ്റുവാങ്ങി. ഗ്രാമപഞ്ചായത്ത്‌ പ്രസിഡനന്‍റ്്‌ പി.സി. ബിജു ഉദ്ഘാടനം ചെയ്തു. വാർഡ് മെമ്പർ വർഗീസ് തച്ചുപറമ്പൻ, ഇടവക ട്രസ്റ്റിമാരായ ജൂലിയസ് വെളിയത്ത്, ജോമോൻ ജോസ്, കേന്ദ്രസമിതി വൈസ് ചെയർമാൻ ഡോ. ജോജോ നാൽപ്പാട്ട്, പ്രിൻസിപ്പൽ രതീഷ് ആർ. മേനോൻ, പിടിഎ പ്രസിഡന്‍റ് അഡ്വ. കെ.ആർ. സുമേഷ് എന്നിവർ പ്രസംഗിച്ചു. സ്കൂൾ മാനേജ്‌മെന്‍റ് കമ്മിറ്റി, പാരീഷ് കൗൺസിൽ, സെൻട്രൽ കമ്മിറ്റി, പിടിഎ, വിദ്യാർഥികൾ അടക്കം ഒട്ടേറെ പേർ ചടങ്ങിൽ പങ്കെടുത്തു.

ചരിത്രം വഴിമാറി; ഇരിങ്ങാലക്കുട ലിറ്റില്‍ ഫ്‌ളവര്‍ ഹൈസ്‌കൂളിൽ ഇനി ആണ്‍കുട്ടികളും

ഇരിങ്ങാലക്കുട: 81 വര്‍ഷത്തെ ചരിത്രം തിരുത്തിക്കുറിച്ച് ആണ്‍കുട്ടികള്‍ തിങ്കളാഴ്ച ഇരിങ്ങാലക്കുട ലിറ്റില്‍ ഫ്ലവര്‍ ഹൈസ്‌കൂളിന്‍റെ പടിചവിട്ടി. ഇതിനുമുമ്പ് ഒരുമിച്ചുള്ള പഠനത്തിന് ഇവിടെ അവസരമില്ലായിരുന്നു. 1944 ജൂണ്‍ ഏഴിനാണ് ഹൈസ്‌കൂള്‍ ആരംഭിച്ചത്. അന്നുമുതല്‍ പെണ്‍കുട്ടികള്‍ക്ക് മാത്രമായിരുന്നു പഠനത്തിന് അവസരമുണ്ടായിരുന്നത്. ഇന്നലെ അഞ്ചാം ക്ലാസില്‍ 240 പെണ്‍കുട്ടികളും 44 ആണ്‍കുട്ടികളുമാണ് പുതിയതായി പ്രവേശനത്തിന് എത്തിയത്. 1700 കുട്ടികളാണ് ഈ വിദ്യാലയത്തില്‍ പഠിക്കുന്നത്. പ്രവേശനോത്സവം നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് ഉദ്ഘാടനം ചെയ്തു. പിടിഎ പ്രസിഡന്‍റ് സിവിന്‍ കെ. വര്‍ഗീസ് അധ്യക്ഷത വഹിച്ചു. മുന്‍ പ്രധാന അധ്യാപിക സിസ്റ്റര്‍ നവീന സിഎംസി, വാര്‍ഡ് കൗണ്‍സിലര്‍ അഡ്വ. കെ.ആര്‍. വിജയ, ഹയര്‍ സെക്കൻഡറി പ്രിന്‍സിപ്പല്‍ ലിജോ വര്‍ഗീസ്, ഹൈസ്‌കൂള്‍ ഹെഡ്മിസ്ട്രസ് സിസ്റ്റര്‍ സുധീപ സിഎംസി എന്നിവര്‍ സംസാരിച്ചു. 103 വര്‍ഷം പിന്നിടുന്ന എല്‍പി വിഭാഗത്തില്‍ സ്‌കൂളിന്‍റെ തുടക്കം മുതല്‍ ആണ്‍കുട്ടികള്‍ക്കും പെണ്‍കുട്ടികള്‍ക്കു പഠനത്തിന് അവസരമുണ്ട്.

പുഴയ്ക്കലിൽ സുരക്ഷാജീവനക്കാരനെ കെട്ടിയിട്ടു മർദിച്ച് മോഷണശ്രമം

അയ്യന്തോൾ: പുഴയ്ക്കലിൽ സെക്യൂരിറ്റി ജീവനക്കാരനെ കെട്ടിയിട്ടു മോഷണശ്രമം. നാലംഗസംഘം വായിൽ തുണിതിരുകി മർദിച്ചു. ജീവനക്കാരന്‍റെ മൊബൈൽഫോണ്‍ തട്ടിയെടുത്തു സംഘം രക്ഷപ്പെട്ടു. പുഴയ്ക്കൽ ലുലു ജംഗ്ഷനു സമീപമുള്ള ഹൈസണ്‍ മോട്ടോഴ്സിലെ സെക്യൂരിറ്റി ജീവനക്കാരൻ സുരേഷിനെയാണ് ഇന്നലെ പുലർച്ചെ മുഖംമൂടിധരിച്ച് ഓട്ടോയിലെത്തിയ നാലംഗസംഘം മർദിച്ചു മോഷണത്തിനു ശ്രമിച്ചത്. തൃശൂർ വെസ്റ്റ് പോലീസ് അന്വേഷണം ആരംഭിച്ചു. സുരേഷിന്‍റെ ഉടുമുണ്ടഴിച്ചു പോസ്റ്റിൽ കെട്ടിയിട്ടശേഷം വായിൽ തുണിതിരുകി ഷോറൂമിന്‍റെ ചില്ലു തകർത്ത് അകത്തുകടന്നെങ്കിലും ഒന്നും ലഭിച്ചില്ല. പണംവച്ചിരുന്ന സ്ഥലവും ഇവർക്കു കണ്ടെത്താൻ കഴിഞ്ഞില്ല. തുടർന്നു ജീവനക്കാരന്‍റെ മൊബൈൽ ഫോണ്‍ കൈക്കലാക്കി ഓട്ടോയിൽ എറണാകുളം ഭാഗത്തേക്കു പോയി. തമിഴ് കലർന്ന മലയാളമാണു സംസാരിച്ചത്. പ്രതികൾ തമിഴ്നാട്ടുകാരാണെന്നു പോലീസ് സംശയിക്കുന്നു. സിസിടിവി ദൃശ്യങ്ങൾ പരിശോധിച്ച് ഓട്ടോയുടെ നന്പർ കണ്ടെത്തി അന്വേഷണം മുന്നോട്ടുപോകുകയാണ്. മർദനത്തിൽ പരിക്കേറ്റ സുരേഷ് ആശുപത്രിയിൽ ചികിത്സതേടി. സിറ്റി പോലീസ് അസിസ്റ്റന്‍റ് കമ്മീഷണറുടെ നേതൃത്വത്തിൽ പോലീസും വിരലടയാള വിദഗ്ധരും സ്ഥലത്തെത്തി പരിശോധന നടത്തി.

കിണറ്റിലകപ്പെട്ട കാട്ടുമൂരിയെ ഫയർഫോഴ്സ് രക്ഷപ്പെടുത്തി

വടക്കാഞ്ചേരി: കൊണ്ടാഴിയിൽ ആൾമറയില്ലാത്ത വീട്ടുകിണറ്റിൽ വീണ കാട്ടുമുരിയെ വടക്കാഞ്ചേരി ഫയർ ആൻഡ് റെസ്ക്യൂ ടീം നാട്ടുകാരുടെ സഹായത്തോടെ രക്ഷപ്പെടുത്തി. കേരകക്കുന്ന് ചെട്ടിയാന്തറ വീട്ടിൽ ബാബു വർഗീസിന്‍റെ കിണറ്റിലാണ് കാട്ടു മൂരി വിണത്. മായന്നൂർ ഫോറസ്റ്റ് സ്റ്റേഷനിലെ ഉദ്യോഗസ്ഥരും ആറുമണിക്കൂർനീണ്ടരക്ഷാപ്രവർത്തനത്തിൽ കണ്ണികളായി. വടക്കാഞ്ചേരി ഫയർ ആൻഡ് റെസ്ക്യൂ സ്റ്റേഷൻ ഓഫീസർ ടി.കെ. നിധീഷ്, മായന്നൂർ ഫോറസ്റ്റ് സ്റ്റേഷൻ ഡെപ്യൂട്ടി ഫോറസ്റ്റ് ഓഫീസർ എം.വി. ജയപ്രസാദ്, എന്നിവരുടെ നേതൃത്വത്തിലു ള്ള സംഘമാണ് രക്ഷാപ്രവർത്ത നം നടത്തിയത്.

കിള്ളിമംഗലം ഗവ. യുപി സ്കൂളിൽ കെട്ടിടം ഉദ്ഘാടനംചെയ്തു

പഴയന്നൂർ: കിള്ളിമംഗലം ഗവ. യുപി സ്കൂളിൽ പുതിയ കെട്ടിടത്തിന്‍റെ ഉദ്ഘാടനവും പഴയന്നൂർ ബ്ലോക്ക് തല പ്രവേശനോത്സവവും ഭരണച്ചുമരിന്‍റെ അനാച്ഛാദനവും ഒന്നിച്ച് "നിറമേളം 2025' എന്നപേരിൽ നടത്തി. കെട്ടിടോദ്ഘാടനം വിദ്യാഭ്യാസമന്ത്രി വി. ശിവൻകുട്ടി ഓൺലൈനിൽ നിർവഹിച്ചു. ബ്ലോക്ക്തല പ്രവേശനോത്സവവും ഭരണഘടനാച്ചുമരിന്‍റെ അനാച്ഛാദനവും കെ. രാധാകൃഷ്ണൻ എംപി ഉദ്ഘാടനം ചെയ്തു. യു.ആർ. പ്രദീപ് എംഎൽഎ അധ്യക്ഷത വഹിച്ചു. പഴയന്നൂർ ബ്ലോക്ക് പഞ്ചായത്ത് പ്രസിഡന്‍റ് കെ.എം. അഷറഫ്, പാഞ്ഞാൾ ഗ്രാമപഞ്ചായത്ത് പ്രസിഡന്‍റ് വി.തങ്കമ്മ, ജില്ലാപഞ്ചായത്ത് അംഗം കെ.ആർ. മായ എന്നിവർ മുഖ്യാതിഥികളായി. പാഞ്ഞാൾ പഞ്ചായത്ത് വൈസ് പ്രസിഡന്‍റ് പി. കൃഷ്ണൻകുട്ടി, സ്റ്റാൻഡിംഗ് കമ്മിറ്റി ചെയർപേഴ്സൺ നിർമല രവികുമാർ, വാർഡ് അംഗങ്ങളായ രാമദാസ് കാറാത്ത്, കെ.വി. സതീശൻ, എഇഒ ഷീജ കുനിയിൽ, പഴയന്നൂർ ബിപിസി കെ. പ്രമോദ്, കിള്ളിമംഗലം വായനശാല പ്രസിഡന്‍റ് കുഞ്ചു വാസുദേവൻ നമ്പൂതിരിപ്പാട്, പാഞ്ഞാൾ വായനശാല പ്രസിഡന്‍റ് കെ. വിജയാനന്ദ്, മുൻ പ്രധാനാധ്യാപിക ടി. ചന്ദ്രിക, വികസനസമിതി ചെയർമാൻ എ.കെ. സെയ്തലവി, കെ.ആർ. ബിന്ദു, കെ.ബി. ലക്ഷ് മി, കെ.എം. മോനിഷ എന്നിവർ ആശംസകളർപ്പിച്ചു. പ്രധാനാധ്യാപകൻ എം. എൻ. ബർജിലാൽ സ്വാഗതവും പിടിഎ പ്രസിഡന്‍റ്് ടി.ആർ. മണികണ്ഠൻ നന്ദിയും പറഞ്ഞു.

പുതുക്കാട് മണ്ഡലം എംഎൽഎ പ്രതിഭാപുരസ്കാര വിതരണം

പുതുക്കാട്: എസ്എസ്എൽസി, പ്ലസ്ടു പരീക്ഷകളിൽ മികച്ച വിജയംനേടിയ പുതുക്കാട് മണ്ഡലത്തിലെ വിദ്യാർഥികൾക്കുള്ള എംഎൽഎ വിദ്യാഭ്യാസ പ്രതിഭാപുരസ്കാര വിതരണവും നൂറുശതമാനം വിജയംനേടിയ സ്കൂളുകൾക്കുള്ള ആദരവും നടന്നു. പുതുക്കാട് പ്രജ്യോതിനികേതൻ കോളജ് ഓഡിറ്റോറിയത്തിൽ നടന്ന ചടങ്ങ് മന്ത്രി കെ. രാജൻ ഉദ്ഘാടനം ചെയ്തു. കെ.കെ. രാമചന്ദ്രൻ എംഎൽഎ, ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ്, കൊടകര ബ്ലോക്ക് പഞ്ചായത്ത് പ്രസിഡന്‍റ് കെ.എം. ചന്ദ്രൻ, സബ് കളക്ടർ അഖിൽ വി. മേനോൻ, പഞ്ചായത്ത് പ്രസിഡന്‍റുമാരായ ഇ.കെ. അനൂപ്, എൻ. മനോജ്, അശ്വതി വിബി, കലാപ്രിയ സുരേഷ്, ജില്ലാ പഞ്ചായത്തംഗം സരിത രാജേഷ്, കൊടകര ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ അൽജോ പുളിക്കൻ, പ്രജ്യോതിനികേതൻ കോളജ് ഡയറക്ടർ റവ.ഡോ. ഹർഷജൻ പഴയാറ്റിൽ, സിവിൽ സർവീസ് പരീക്ഷാവിജയി ഗംഗ ഗോപി എന്നിവർ പ്രസംഗിച്ചു. പത്താംക്ലാസ് പരീക്ഷയിൽ എല്ലാ വിഷയത്തിലും എ പ്ലസ് നേടിയ 540 വിദ്യാർത്ഥികളെയും ഹയർസെക്കൻഡറി പരീക്ഷയിൽ എല്ലാ വിഷയത്തിലും എ പ്ലസ് നേടിയ 245 വിദ്യാർഥികളെയുമാണ് അനുമോദിച്ചത്. 100 ശതമാനം വിജയം കൈവരിച്ച വിദ്യാലയങ്ങളെയും ആദരിച്ചു. ഈ വർഷം റിട്ടയർ ചെയ്ത പ്രധാന അധ്യാപകർക്കും പുരസ്കാരം നൽകി.

കണ്ണാറയിൽ ഒരുകോടി ചെലവിട്ട പദ്ധതി ഉദ്ഘാടനംചെയ്തു

കണ്ണാറ: ഉദയപുരം അംബേദ്കർ നഗറിൽ ഒരുകോടി രൂപ ചെലവഴിച്ചു നിർമാണം പൂർത്തീകരിച്ച പദ്ധതിയുടെ ഉദ്ഘാടനം റവന്യൂ മന്ത്രി കെ. രാജൻ നിർവഹിച്ചു. പട്ടികജാതി ക്ഷേമവകുപ്പിൽനിന്ന് അംബേദ്കർ വികസനപദ്ധതിപ്രകാരം റോഡ്, ഡ്രെയ്നേജ്, കോമ്പൗണ്ട് വാൾ തുടങ്ങിവയുടെ നിർമാണമാണ് പൂർത്തിയാക്കിയത്. പാണഞ്ചേരി ഗ്രാമപഞ്ചായത്ത് പ്രസിഡന്‍റ് പി.പി. രവീന്ദ്രൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രിസിഡന്‍റ് കെ.ആർ. രവി മുഖ്യാതിഥിയായിരുന്നു. വാർഡ് മെമ്പർ രേഷ്മ സജീഷ്, നിർമിതികേന്ദ്രം ഉദ്യോഗസ്ഥ സതീദേവി, പട്ടികജാതി വികസന ഓഫീസർ ടി.എം. സന്ധ്യ എന്നിവർ പ്രസംഗിച്ചു. പാണഞ്ചേരി ഗ്രാമപഞ്ചായത്ത് വൈസ്പ്രസിഡന്‍റ് സാവിത്രി സദാനന്ദൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ഫ്രാൻസീന ഷാജു, സ്ഥിരംസമിതി അധ്യക്ഷൻ ഇ.ടി. ജലജൻ, പഞ്ചായത്ത് അംഗങ്ങളായ ബാബു തോമസ്, ആരിഫ റാഫി, സ്വപ്ന രാധാകൃഷ്ണൻ തുടങ്ങിയവർ പങ്കെടുത്തു.

ഇടിയഞ്ചിറ: താത്കാലിക വളയം ബണ്ടുകൾ ഉടൻ പൊട്ടിച്ചുനീക്കും

പാവറട്ടി: ഇടിയഞ്ചിറ റെഗുലേറ്ററിനുസമീപത്തെ താത്കാലിക വളയം ബണ്ടുകൾ ഉടൻ പൊട്ടിച്ചുനീക്കാൻ തീരുമാനം. വെള്ളക്കെട്ട് ഒഴിവാക്കുന്നതിനു മണലൂർ എംഎൽഎയുടെ അധ്യക്ഷതയിൽ ജനപ്രതിനിധികളുടെയും ഉദ്യോഗസ്ഥരുടെയും അടിയന്തരയോഗം ചേർന്നാണ് തീരുമാനമെടുത്തത്. ഇന്നു രാവിലെമുതൽ ബണ്ട് പൊട്ടിച്ചുതുടങ്ങണമെന്നും ആവശ്യമായ യന്ത്രസാമഗ്രികൾ ഉടൻതന്നെ എത്തിക്കുമെന്നും എംഎൽഎ പറഞ്ഞു. താത്കാലിക ബണ്ട് പൊളിച്ചുനീക്കുന്നതുമായി ബന്ധപ്പെട്ട് സുരക്ഷാ മുൻകരുതൽ സ്വീകരിക്കാൻ പോലീസിനും അഗ്നിശമനസേനയ്ക്കും എംഎൽഎ നിർദേശം നൽകി. മുല്ലശേരി, വെങ്കിടങ്ങ് ഗ്രാമപഞ്ചായത്തുകളിൽ കഴിഞ്ഞദിവസം ഉണ്ടായ മഴയിൽ കനത്ത വെള്ളക്കെട്ട് രൂപപ്പെട്ടിരുന്നു. ഇടിയഞ്ചിറയിലെ താത്കാലിക വളയം ബണ്ട് പൊട്ടിക്കുന്നതിൽ ഉദ്യോഗസ്ഥർ വരുത്തിയ വീഴ്ചയാണ് വലിയ വെള്ളക്കെട്ട് രൂപപ്പെടുന്നതിന് ഇടയാക്കിയതെന്നു യോഗം വിലയിരുത്തി. തണ്ണീർക്കായൽ മേഖലയിലും തിരുനെല്ലൂർ പാടംമേഖലയിലും നിരവധി കുടുംബങ്ങൾ വെള്ളക്കെട്ടിലായ വാർത്ത ദീപിക പ്രസിദ്ധീകരിച്ചിരുന്നു. ഇടിയഞ്ചിറ റഗുലേറ്ററിന്‍റെ മുൻവശത്തും പിറകുവശത്തും നിർമിച്ചിട്ടുള്ള താൽക്കാലിക വളയം ബണ്ടുകൾ പൂർണമായി നീക്കംചെയ്താൽമാത്രമേ മുല്ലശേരി കനാലിൽനിന്നു പുഴയിലേക്കുള്ള വെള്ളത്തിന്‍റെ ഒഴുക്ക് സുഗമമാകുകയുള്ളൂ. കഴിഞ്ഞദിവസം നടന്ന ജില്ലാ വികസനസമിതി യോഗത്തിൽ മുരളി പെരുനെല്ലി എംഎൽഎ പ്രമേയംവഴി വിഷയം അവതരിപ്പിക്കുകയും പരിഹാരമുണ്ടാക്കാൻ നിർദേശം നൽകുകയും ചെയ്തെങ്കിലും ഇതുവരെയും ബണ്ട് പൂർണമായി നീക്കംചെയ്യാതിരുന്നതു വലിയ വീഴ്ചയാണെന്നു യോഗം വിലയിരുത്തി. മുല്ലശേരി ബ്ലോക്ക് പഞ്ചായത്ത് ഹാളിൽ ചേർന്ന യോഗത്തിൽ ബ്ലോക്ക് പഞ്ചായത്ത് പ്രസിഡന്‍റ് ലതി വേണുഗോപാൽ, വെങ്കിടങ്ങ്, മുല്ലശേരി ഗ്രാമപഞ്ചായത്ത് പ്രസിഡന്‍റുമാരായ കൊച്ചപ്പൻ വടക്കൻ, ദിൽന ധനേഷ്, ചാവക്കാട് തഹസിൽദാർ എം.കെ. കിഷോർ, മുല്ലശേരി ബിഡിഒ കെ.എസ്. സൂരജ്, വെങ്കിടങ്ങ്, മുല്ലശേരി വില്ലേജ് ഓഫീസർമാരായ സി.ആർ. പ്രിയ, പി.പി. പ്രവീൺകുമാർ, ഇറിഗേഷൻ എക്സി. എൻജിനീയർ പി. സിനി, അസി.എക്സി.എൻജിനീയർ പി.ബി. സുമ, മുല്ലശേരി കൃഷി അസി. ഡയറക്ടർ എ.പി. ദിവ, പാവറട്ടി എസ്ഐ കെ.ബി. സജീവൻ എന്നിവർ പങ്കെടുത്തു.

യുവാവിനെ ആക്രമിച്ച കേസിൽ നാലുപേർ‌ അറസ്റ്റിൽ

അന്തിക്കാട്: പണംകൊടുത്തുവാങ്ങിയ വളര്‌ത്തുനായ ചത്തതിനു വില്പന നടത്തിയ യുവാവിനെ ആക്രമിച്ച് പരിക്കേൽപ്പിച്ചു. കേസില്‌ യുവാവും പ്രായപൂർത്തിയാകാത്ത മൂന്നുപേരും അറസ്റ്റിൽ. അന്തിക്കാട് പാണപറമ്പിൽ അനന്തു(28)വും 16, 17 വയസുള്ള മറ്റു മൂന്നുപേരുമാണ് അറസ്റ്റിലായത്. ഊരകം ഞെരുവിശേരി സ്വദേശി മൂർക്കത്ത് വീട്ടിൽ പ്രണവി(25) നെയാണ് ഇവർ ആക്രമിച്ച് പരിക്കേൽപ്പിച്ചത്. പ്രണവ് അനന്തുവിനു വിറ്റ പോമറേനിയൻ ഡോഗ് ചത്തതിലുള്ള വൈരാഗ്യത്തിലാണ് ആക്രമണം. ശനിയാഴ്ച വൈകീട്ട് 6.15ന് സുഹൃത്തിന്‍റെ കെെ‌‌യിൽ റോട്ട്‌വീലർ ഡോഗിനെ വിൽക്കാനുണ്ടെന്നുപറഞ്ഞ് പ്രണവിനെ അന്തിക്കാട്ടേക്ക് വിളിച്ചുവരുത്തുകയായിരുന്നു. അന്തിക്കാട് ആലിനു കിഴക്കുഭാഗത്തുള്ള പാടത്ത് നാലുപേരുംചേർന്ന് ആക്രമിച്ച് പരിക്കേൽപ്പിച്ചു. തുടർന്ന് പ്രണവ് നൽകിയ പരാതിയിലാണ് അന്തിക്കാട് പോലീസ് പ്രതികളെ അറസ്റ്റുചെയ്തത്. സിഐ എ.എസ്. സരിൻ, എസ്ഐ സുബിന്ദ്, സുബിൻ, സിപിഒമാരായ ധനേഷ്, സജു എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

സർട്ടിഫിക്കറ്റ് നല്കിയ ഉദ്യോഗസ്ഥർക്കെതിരേ ക്രിമിനൽ കേസ് എടുക്കണം: രാജൻ പല്ലൻ

തൃശൂർ: അപകടാവസ്ഥയിലുള്ള കെട്ടിടങ്ങൾ പരിശോധിക്കാതെ സ്ട്രക്ച്ചറൽ സ്റ്റബിലിറ്റി സർട്ടിഫിക്കറ്റ് നൽകിയ ഗവ. എൻജിനീയറിംഗ് കോളജിലെ ഉദ്യോഗസ്ഥർക്കെതിരേ പോലീസ് ക്രിമിനൽ കേസ് എടുക്കണമെന്നും കെട്ടിടങ്ങൾ പൊളിച്ചുനീക്കാൻ ജില്ലാ കളക്ടർ ഉത്തരവിറക്കണമെന്നും പ്രതിപക്ഷ നേതാവ് രാജൻ ജെ. പല്ലൻ ആവശ്യപ്പെട്ടു. അപകടാവസ്ഥയിലുള്ള 271 കെട്ടിടങ്ങൾ പൊളിച്ചുനീക്കാൻ കൗൺസിൽ ഏകകണ്ഠമായി അനുമതി നൽകിയിരുന്നു. എന്നിട്ടും മേയറും എൽഡിഎഫ് ഭരണസമിതിയും നടപടി സ്വീകരിച്ചില്ല. അപകടാവസ്ഥയിലുള്ള കെട്ടിടങ്ങളുടെ പട്ടികയിൽ കഴിഞ്ഞദിവസം ഷീറ്റു വീണതും സ്വരാജ് റൗണ്ടിൽ വീണ കെട്ടിടവും ഉണ്ടായിരുന്നു. ഇനിയും പഴയ കെട്ടിടങ്ങൾ പൊളിക്കാൻ കാലതാമസമുണ്ടായാൽ ജനങ്ങളുടെ ജീവനും സ്വത്തിനും നാശങ്ങൾ ഉണ്ടാകും. വ്യാജസർട്ടിഫിക്കറ്റ് നൽകിയ ഉദ്യോഗസ്ഥരുടെ പേരിലും എംഒ റോഡിലേക്കു ഷീറ്റുവീണതിൽ കുറ്റക്കാരായ ഉദ്യോഗസ്ഥർക്കെതിരേയും കോർപറേഷൻ സെക്രട്ടറിക്കെതിരേയും ക്രിമിനൽ കേസ് എടുക്കണമെന്നും രാജൻ ജെ. പല്ലൻ ആവശ്യപ്പെട്ടു.

തെരഞ്ഞെടുപ്പുകൾ ശല്യമായി തോന്നുന്നതു ഫാസിസ്റ്റ് പ്രവണത: പി.കെ. രാജൻ

തൃശൂർ: തെരഞ്ഞെടുപ്പുകൾ ശല്യമായി തോന്നുന്നതു ഫാസിസ്റ്റ് പ്രവണതയുടെ പ്രത്യക്ഷലക്ഷണമാണെന്ന് എൻസിപി സംസ്ഥാന വർക്കിംഗ് പ്രസിഡന്‍റ് പി.കെ. രാജൻ. എൻസിപി -എസ് തൃശൂർ ബ്ലോക്ക് കമ്മിറ്റി സംഘടിപ്പിച്ച പ്രഫ. കെ.ബി. ഉണ്ണിത്താൻ അനുസ്മരണസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സുതാര്യവും നിഷ്പക്ഷവും സ്വതന്ത്രവുമായ തെരഞ്ഞെടുപ്പുസംവിധാനമാണ് ജനാധിപത്യത്തിന്‍റെ അടിത്തറയെന്നും അദ്ദേഹം പറഞ്ഞു.ബ്ലോക്ക് പ്രസിഡന്‍റ് മോഹൻദാസ് എടക്കാടൻ അധ്യക്ഷത വഹിച്ചു. കെ.ബി. ഉണ്ണിത്താൻ വിദ്യാഭ്യാസപുരസ്കാരം പ്രഫ. ജയലക്ഷ്മി ഉണ്ണിത്താൻ പ്ലസ് ടുവിന് ഉന്നതവിജയം നേടിയ പൂങ്കുന്നം ഗവ. ഹയർ സെക്കൻഡറി സ്കൂളിലെ ടി.പി അലനു നൽകി. സംസ്ഥാനസെക്രട്ടറിമാരായ അഡ്വ. രഘു കെ. മാരാത്ത്, വേണു വെണ്ണറ, സി.എൽ. ജോയ്, സി.ആർ. സജിത്ത്, വിജിത വിനുകുമാർ, ഇ.എ. ദിനമണി, ടി.ജി. സുന്ദർലാൽ, ഉല്ലാസ് കൃഷ്ണൻ, ഉണ്ണികൃഷ്ണൻ പുലരി തുടങ്ങിയവർ പ്രസംഗിച്ചു.

വീണ്ടും അപകടഭീഷണിയായി ഇരുന്പുമേൽക്കൂര

തൃശൂർ: നഗരത്തിൽ വീണ്ടും അപകടഭീഷണിയായി ഇരുന്പുമേൽക്കൂര. പുത്തൻപള്ളിക്കു മുൻവശത്തുള്ള കെട്ടിടത്തിനുമുകളിലെ തുരുന്പുപിടിച്ച മേൽക്കൂരയാണ് ഏതുനിമിഷവും നിലംപതിക്കാവുന്നനിലയിൽ തൂങ്ങിയാടുന്നത്. നേരത്തേ മോട്ടോർ നന്നാക്കുന്ന കടയായും സ്വർണാഭരണതൊഴിലാളികളുടെ സ്ഥാപനമായും പ്രവർത്തിച്ചിരുന്ന, പൂർണമായും ഷീറ്റുകൊണ്ട് നിർമിച്ച താത്കാലികമുറിയുടെ മേൽക്കൂരയാണ് ജനങ്ങൾക്ക് അപകടഭീഷണി ഉയർത്തുന്നത്. പുത്തൻപള്ളിയിലേക്കുള്ള വിശ്വാസികളും നിരവധി കച്ചവടക്കാരും ദിനംപ്രതി കടന്നുപോകുന്ന തിരക്കേറിയ വഴിയിലേക്കാണ് മേൽക്കൂര തൂങ്ങിനിൽക്കുന്നത്. കഴിഞ്ഞമാസം കോർപറേഷൻ കെട്ടിടത്തിൽനിന്നും ഭീമൻ ഇരുന്പുമേൽക്കൂര നിലത്തേക്കുവീണ് അപകടമുണ്ടായിരുന്നു. അന്നു തലനാരിഴയ്ക്കാണ് ആളപായം ഒഴിവായത്. വിഷയത്തിൽ അടിയന്തരനടപടി സ്വീകരിക്കണമെന്ന് ആവശ്യപ്പെട്ട് ഡിവിഷൻ കൗണ്‍സിലർ സിന്ധു ആന്‍റോ ചാക്കോള കോർപറേഷനു പരാതി സമർപ്പിച്ചിട്ടുണ്ട്. ശക്തമായ കാറ്റിൽ കീറിനശിച്ച കെട്ടിടത്തിലെതന്നെ കൂറ്റൻപരസ്യബോർഡും അപകടഭീഷണി ഉയർത്തുന്നുണ്ട്.

കുട്ടികളെ നേർവഴി നയിക്കാൻ പോലീസും എക്സൈസും

കളിചിരി മായാതിരിക്കാൻ കരുതൽ വേണം തൃശൂർ: വീണ്ടും ഒരു അവധിക്കാലം കഴിഞ്ഞ് കുട്ടികൾ വിദ്യാലയമുറ്റത്തേക്കു ചുവടുവച്ചിരിക്കുകയാണ്. പുത്തനുടുപ്പം പുതിയ ചങ്ങാതിമാരുമായി പഠിച്ചും കളിച്ചും വിദ്യാലയജീവിതം ആഘോഷമാക്കാൻ ഒരുങ്ങുന്പോൾ കുട്ടികൾക്കുമാത്രമല്ല മാതാപിതാക്കൾക്കും ചില നിർദേശങ്ങളുമായി രംഗത്തുവന്നിരിക്കുകയാണ് തൃശൂർ സിറ്റി പോലീസ്. റോഡു മുറിച്ചുകടക്കുന്പോൾ ഇരുഭാഗത്തുനിന്നും വാഹനം വരുന്നില്ല എന്ന് ഉറപ്പുവരുത്തുക, നിർത്തിയിട്ടിരിക്കുന്ന വാഹനത്തിന്‍റെ മുൻപിലൂടെയോ പിറകിലൂടെയോ റോഡ് മുറിച്ചുകടക്കാതിരിക്കുക, വാഹനം നിർത്തുന്നതിനുമുൻപ് ഇറങ്ങുകയോ കയറുകയോ അരുത്, റോഡിലൂടെ ഇറങ്ങിനടക്കാതെ ഫുട്പാത്തിലൂടെ നടക്കുക തുടങ്ങിയ ലളിതമായ സുരക്ഷാനിർദേശങ്ങൾ മനസിലാക്കിവയ്ക്കണമെന്നും പരസ്പരം സഹായിച്ചും കളിച്ചും ചിരിച്ചും വളരെ സുരക്ഷിതമായി പഠിച്ചുമുന്നേറണമെന്നുമാണ് പോലീസ് കുട്ടികൾക്കുനൽകുന്ന സന്ദേശം. മാതാപിതാക്കൾക്കും ചില നിർദേശങ്ങൾ പോലീസ് പങ്കുവയ്ക്കുന്നു. സുരക്ഷിതപാഠങ്ങൾ വീട്ടിൽനിന്ന് പലരും കുട്ടികളെ സ്കൂളുകളിലേക്കു വിടുന്നതോടെ തങ്ങളുടെ ഉത്തരവാദിത്വം കഴിഞ്ഞുവെന്നു കരുതുന്നുണ്ടെങ്കിൽ അതു മാത്രമല്ല ഉത്തരവാദിത്വം എന്നു പോലീസ് പറയുന്നു. വീട്ടിൽനിന്നു തുടങ്ങേണ്ട സുരക്ഷിതപാഠങ്ങൾ കുട്ടികൾക്കു വീട്ടിൽനിന്നും നൽകണം. സ്കൂളിലെ രക്ഷിതാക്കളുടെ യോഗങ്ങളിൽ നിർബന്ധമായും പങ്കെടുക്കണം. അതിലൂടെ രക്ഷിതാക്കൾക്കു പല ബോധവത്ക്കരണ ക്ലാസുകളും പോലീസും അധ്യാപകരും പകർന്നു നൽകുന്നുണ്ട്. അതൊരിക്കലും നഷ്ടപ്പടുത്തരുത്. കുട്ടികളെ അറിയാൻ, അവരോടു ചേർന്നുനിൽക്കാൻ കുടുംബത്തിൽ സന്തോഷവും സമാധാനവും നിലനിൽക്കുന്നതിനുള്ള സാഹചര്യവും ഒരുക്കിനൽകണം. ചതിക്കുഴിയിൽ വീഴരുത്... ലഹരിയുടെ ഉപയോഗവും വിപണനവും ക്രമാതീതമായി വർധിക്കുന്ന സാഹചര്യത്തിലാണ് കുട്ടികളെ നേർവഴിക്കു നയിക്കാൻ പോലീസിനുപുറമെ എക്സൈസും രംഗത്തുവന്നിട്ടുള്ളത്. പുതിയകാലത്തിന്‍റെ ചതിക്കുഴികളിൽപെടാതിരിക്കാൻ കുട്ടികൾക്ക് അറിവ് നൽകുന്നതിനോടൊപ്പംതന്നെ സ്കൂളിനകത്തോ പുറത്തോ ലഹരിയുടെ ഉപയോഗവും വിപണനവും ശ്രദ്ധയിൽപ്പെട്ടാൽ സ്കൂളുകളിലെ പരാതിപ്പെട്ടികളിൽകൂടി അവ ബന്ധപ്പെട്ടവരെ അറിയിക്കാനും സംവിധാനങ്ങൾ ഒരുക്കിയിട്ടുണ്ട്. ഇവയ്ക്കെല്ലാംപുറമെ കുട്ടികൾക്ക് എന്തെങ്കിലും മാനസിക ബുദ്ധിമുട്ടുകളോ പ്രശ്നങ്ങളോ നേരിടേണ്ടിവരുന്ന സന്ദർഭങ്ങളിൽ പോലീസിന്‍റെ 9497900200 എന്ന നന്പറിലേക്കോ കേന്ദ്രസർക്കാരിന്‍റെ മനസ് എന്ന പദ്ധതിയുടെ 1933 എന്ന നന്പരിലോ ബന്ധപ്പെടണമെന്നും ആവശ്യപ്പെടുന്നു. ഈ നന്പറുകൾ സേവ് ചെയ്തോളൂ... ലഹരിയുടെ ഉപയോഗം ശ്രദ്ധയിൽപ്പെട്ടാൽ ഈ നന്പറുകളിൽ ബന്ധപ്പെടാം. യോദ്ധാവ്: 9995966666 (വാട്സാപ്പ് നന്പർ) നാർക്കോട്ടിക് സെൽ 9497927797, സ്പെഷൽ നാർക്കോട്ടിക് സെൽ 9497979794. എക്സൈസ് വകുപ്പിന്‍റെ നേർവഴി 9656178000, 9447178000. അടിയന്തര സാഹചര്യങ്ങളിൽ 112.

ചിരിയുടെ ആഘോഷപ്പൂങ്കാറ്റ് വീശി പ്രവേശനോത്സവം അടിപൊളി

സ്വന്തം ലേഖകൻ തൃശൂർ: കരയുന്ന കുട്ടികൾ പൊതുവേ കുറവായിരുന്നു, തീരെ ഇല്ലെന്നല്ല. സ്കൂൾ തുറക്കുന്ന ആദ്യദിനത്തിലെ കുരുന്നുകളുടെ കണ്ണീർമഴ പൊതുവേ ദുർബലം. അങ്കണവാടികളിലും പ്ലേ സ്കൂളുകളിലും പോയതിന്‍റെ എക്സ്പീരിയൻസ് ഉള്ളതുകൊണ്ട് സ്കൂൾ പ്രവേശനോത്സവത്തിനു കരയുന്നതു പൊതുവേ കുട്ടികൾ നിർത്തി! ക്ലാസിൽ കൊണ്ടിരുത്തി അച്ഛനും അമ്മയും പതുക്കെ സ്ഥലംവിടാൻ ഒരുങ്ങിയപ്പോൾ കരച്ചിൽ സ്റ്റാർട്ട് ചെയ്ത കുറുന്പന്മാരും കുറുന്പികളും ഉണ്ടായിരുന്നു. ബലൂണും മധുരവും കടലാസുപൂക്കളും കിരീടവുമൊക്കെ കൊടുത്ത് അവരെ പാട്ടിലാക്കാൻ ടീച്ചർമാർ അപ്പോഴേക്കും ഓടിയെത്തി. ചില വിരുതന്മാർ ക്ലാസ് മുറിയിൽ കയറാൻ കൂട്ടാക്കാതെ വരാന്തയിൽതന്നെ കുത്തിയിരുന്നു. അവരെ ക്ലാസിലേക്കു കയറ്റാൻ ടീച്ചർമാരും രക്ഷിതാക്കളും പാടുപെട്ടു. കരയാതിരുന്നവർ മറ്റു കുട്ടികൾ കരയുന്നതുകണ്ട് കരച്ചിലിനു തുടക്കമിടുന്നതും കണ്ടു. കരയണ്ടാട്ടോ എന്നുപറഞ്ഞ് ആശ്വസിപ്പിക്കുന്നവരും ഉണ്ടായിരുന്നു. മിക്കയിടത്തും ഇന്നലെ ഉച്ചവരെമാത്രമേ ക്ലാസ് ഉണ്ടായിരുന്നുള്ളൂ. ഉച്ചയ്ക്കു പലയിടത്തും കുട്ടികൾക്കു ഭക്ഷണവും നൽകി. ആദ്യദിനത്തിൽ എല്ലാ സ്കൂളുകൾക്കുമുന്നിലും തിക്കുംതിരക്കും നിയന്ത്രിക്കുന്നതിനു പോലീസിന്‍റെ സാന്നിധ്യവും സഹകരണവും ഉണ്ടായിരുന്നു. ചിലയിടത്തു മയക്കുമരുന്നിനെതിരായ സന്ദേശവുമായി നെയിംസ്ലിപ് വിതരണവും. മനോഹരമായ അലങ്കരിച്ച സ്കൂൾ അങ്കണത്തിലേക്കാണ് എല്ലായിടത്തും വിദ്യാർഥികൾ എത്തിയത്. ഞായറാഴ്ച വൈകുന്നേരംമുതൽതന്നെ സ്കൂളുകൾ അലങ്കരിക്കാൻ അധ്യാപകരം പിടിഎ ഭാരവാഹികളുമെല്ലാം എത്തിയിരുന്നു. ബലൂണുകളും വർണക്കടലാസുകളും കുട്ടികൾക്കിഷ്ടമുള്ള കാർട്ടൂണ്‍ കഥാപാത്രങ്ങളുടെ ചിത്രങ്ങളും എല്ലാമായപ്പോൾ കുരുന്നുകൾക്ക് ഒരു ചിൽഡ്രൻസ് പാർക്കിൽ എത്തിയ അനുഭവമായി. കുട്ടികൾക്കായി ബാക്ക് ടു സ്കൂൾ എന്നു കളർഫുള്ളായി അലങ്കരിച്ച സെൽഫി കോർണറിൽനിന്ന് ഫോട്ടോയെടുക്കാനുള്ള സൗകര്യവും തൃശൂരിലെ സ്കൂളിൽ ഒരുക്കിയിരുന്നു. നവാഗതർ ചിരിച്ചും ചിണുങ്ങിയുമിരുന്നപ്പോൾ സീനിയർ ചേട്ടന്മരും ചേച്ചിമാരും രണ്ടുമാസത്തെ അവധിക്കുശേഷം പഴയ കൂട്ടുകാരെ കണ്ട ത്രില്ലിലായിരുന്നു. രാവിലെ തെളിഞ്ഞ കാലാവസ്ഥയായിരുന്നെങ്കിലും സ്കൂൾസമയം ആയതോടെ പലയിടത്തും മഴ തിമർത്തുപെയ്തതു പ്രവേശനോത്സവത്തെ വലച്ചെങ്കിലും, ആർത്തലച്ച് ആകെ നനച്ച മഴ പിന്നെ ശമിച്ചു വെയിൽ പരന്നു.. ജില്ലാതല പ്രവേശനോത്സവം ആവേശമായി പുത്തൂർ: ആവേശംപകര്‌ന്ന് ജില്ലാതല സ്കൂൾ പ്രവേശനോത്സവം. പുത്തൂർ ഗവ.സ്കൂളിൽനടന്ന ജില്ലാ തല പ്രവേശനോത്സവം റവന്യുമന്ത്രി കെ. രാജൻ ഉദ്ഘാടനംചെയ്തു. സമൂഹത്തിൽ പർശ്വവത്കരിക്കപ്പെട്ട ജനതയുടെ വികാരങ്ങൾകൂടി ഏറെടുക്കാൻ കഴിയുന്ന വിശാലമായ മനസ് കേരളത്തിന്‍റെ പുതിയ തലമുറയ്ക്ക് ഉണ്ടാകണമെന്ന് കെ. രാജൻ പറഞ്ഞു. ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് അധ്യക്ഷതവഹിച്ചു. ജില്ലാ പഞ്ചായത്ത് വിദ്യാഭ്യാസ സ്റ്റാന്‌ഡിംഗ്കമ്മിറ്റി ചെയർമാൻ റഹീം വീട്ടി പറമ്പിൽ, എസ്എസ്കെ ഡിപിസി ഡോ.എൻ.ജെ. ബിനോയ്, കളക്ടർ അർജുൻ പാണ്ഡ്യൻ, ഒല്ലൂർ ബ്ലോക്ക് പഞ്ചായത്ത് പ്രസിഡന്‍റ് കെ.ആർ. രവി, ജില്ലാ പഞ്ചായത്ത് വൈസ് പ്രസിഡന്‍റ് ലതാ ചന്ദ്രൻ, പുത്തൂർ പഞ്ചായത്ത് പ്രസിഡന്‍റ് മിനി ഉണ്ണികൃഷ്ണൻ തുടങ്ങിയവർ പങ്കെടുത്തു. വാദ്യമേളങ്ങളുടെ അകമ്പടിയോടെ ഘോഷയാത്രയുമുണ്ടായി.

തട്ടുകട നടത്തി സ്വരൂപിച്ച തുകകൊണ്ട് സഹപാഠിക്ക് പഠനോപകരണങ്ങള്‍ വാങ്ങി നല്‍കി

കോടാലി: വേനലവധിക്കാലത്ത് തട്ടുകട നടത്തി സ്വരൂപിച്ച തുകകൊണ്ട് സഹപാഠിക്ക് പഠനോപകരണങ്ങള്‍ വാങ്ങി നല്‍കി ഒരു കൂട്ടം വിദ്യാര്‍ഥികള്‍ മാതൃകയായി. ഇഞ്ചക്കുണ്ട് ലൂര്‍ദ്ദുപുരം ഗവ.യുപിസ്‌കൂള്‍ വിദ്യാര്‍ഥികളും പത്തുകുളങ്ങര സ്വദേശികളുമായ ഒമ്പതുപേരാണ് അവധിക്കാലത്ത് തട്ടുകട നടത്തിയത്. ഇവരുടെ അമ്മമാര്‍ വീടുകളില്‍ നിന്ന് ഉണ്ടാക്കി കൊടുത്തയച്ച വിഭവങ്ങളാണ് പത്തുകുളങ്ങര കുന്നത്ത് തുറന്ന തട്ടുകടയിലൂടെ വിറ്റഴിച്ചത്. ഇതിലൂടെ സ്വരൂപിച്ച തുക കൊണ്ട് നിര്‍ധന കുടുംബാംഗമായ സഹപാഠിക്ക് ഒരു വര്‍ഷത്തേക്കാവശ്യമായ പുസ്തകങ്ങള്‍ ഇവര്‍ വാങ്ങി . പഞ്ചായത്തംഗം ലിന്റോ പള്ളിപറമ്പന്റെ സാന്നിധ്യത്തിലാണ് പുസ്തകങ്ങള്‍ സഹപാഠിക്ക് കൈമാറിയത്.

യാത്രയയപ്പും ആദരിക്കലും നടത്തി

ഇരിങ്ങാലക്കുട: കേരള അര്‍ബന്‍ ബാങ്ക് സ്റ്റാഫ് ഓര്‍ഗനൈസേഷന്‍ (കെയുബിഎസ്ഒ) ഐടിയു ബാങ്ക് യൂണിറ്റ് കമ്മിറ്റിയുടെ അഭിമുഖ്യത്തില്‍ ഐടിയു ബാങ്ക് ജീവനക്കാരനായ കെ.പി. സെബാസ്റ്റ്യന്‍ യാത്രയയപ്പും മുകുന്ദപുരം സര്‍ക്കിള്‍ സഹകരണ യൂണിയന്‍ തെരഞ്ഞെടുപ്പില്‍ വിജയിച്ച കെയുബിഎസ്ഒ അംഗമായ ജോസഫ് ചാക്കോയേ ആദരിക്കലും എസ്എസ്എല്‍സി പരീക്ഷയില്‍ ഉന്നതവിജയം നേടിയ കെയുബിഎസ്ഒ അംഗങ്ങളുടെ മക്കള്‍ക്ക് അനുമോദനവും ക്യാഷ് അവാര്‍ഡും നല്കി. കെയുബിഎസ്ഒ ഐടിയു ബാങ്ക് യൂണിറ്റ് വൈസ് പ്രസിഡന്‍റ് സി.ജെ. റീനിയുടെ അധ്യക്ഷത വഹിച്ചു. ഐടിയു ബാങ്ക് ചെയര്‍മാനും കേരള പ്രദേശ് കോണ്‍ഗ്രസ് കമ്മിറ്റി മുന്‍ ജനറല്‍ സെക്രട്ടറിയുമായിരുന്ന എം.പി. ജാക്‌സണ്‍ ഉദ്ഘാടനം ചെയ്തു. കെയുബിഎസ്ഒ മുന്‍ സംസ്ഥാന വര്‍ക്കിംഗ് പ്രസിഡന്‍റ് ടി.വി. ചാര്‍ളി മുഖ്യപ്രഭാഷണം നടത്തി. ബോര്‍ഡ് ഓഫ് മാനേജ്‌മെന്‍റ് ചെയര്‍മാന്‍ അഡ്വ. പി.ജെ. തോമസ്, ഐടിയു ബാങ്ക് ഡയറക്ടര്‍ കെ.കെ. ചന്ദ്രന്‍, കെയുബിഎസ്ഒ സംസ്ഥാന ഓര്‍ഗനൈസിംഗ് ജനറല്‍ സെക്രട്ടറിമാരായ എന്‍.ജെ. ജോയ് എന്നിവര്‍ ആശംസകള്‍ അറിയിച്ചു സംസാരിച്ചു. ഈ യോഗത്തില്‍ പുതിയ കെയുബിഎസ്ഒ അംഗങ്ങള്‍ക്ക് മെമ്പര്‍ഷിപ്പ് സര്‍ട്ടിഫിക്കറ്റുകളും വിതരണം ചെയ്തു. സമ്മേളനത്തില്‍ കെയുബിഎസ്ഒ ഐടിയു ബാങ്ക് യൂണിറ്റ് സെക്രട്ടറി എം.ജെ. ടോം സ്വാഗതവും കെയുബിഎസ്ഒ ഐടിയു ബാങ്ക് യൂണിറ്റ് ട്രഷറര്‍ എം.കെ. കലേഷ് നന്ദിയും പറഞ്ഞു.

െവള്ളിക്കുളങ്ങരയില്‍ കുട്ടികളെ വരവേല്‍ക്കാന്‍ റോഡുനിറയെ കുഴികളും തെരുവുനായ്ക്കളും

വെള്ളിക്കുളങ്ങര: ഇന്ന് വിദ്യാലയങ്ങള്‍ തുറക്കുമ്പോള്‍ വെള്ളിക്കുളങ്ങരയിലെ രണ്ട് വിദ്യാലയങ്ങളിലേക്ക് വരുന്ന കുട്ടികളെ വരവേല്‍ക്കുന്നത് റോഡിലെ കുഴികളും തെരുവുനായ്ക്കളുമാകും. പൊതുമരാമത്ത് വകുപ്പിനു കീഴിലുള്ള വെള്ളിക്കുളങ്ങര-ചാലക്കുടി റോഡിലെ വെള്ളിക്കുളങ്ങര ജംഗ്ഷന്‍ മുതല്‍ സ്‌കൂള്‍ ജംഗ്ഷന്‍ വരെയുള്ള ഭാഗം തകര്‍ന്ന് കുഴികള്‍ രൂപപ്പെട്ടത് ഇതിവഴിയുള്ള യാത്ര ദുരിതമാക്കിയിട്ടുണ്ട്. ബസ് സ്റ്റാന്‍ഡ്, പെട്രോള്‍ പമ്പ് പരിസരം എന്നിവിടങ്ങളിലെല്ലാം റോഡ് തകര്‍ന്നു കിടക്കുകയാണ്. വെള്ളിക്കുളങ്ങര-തൃശൂര്‍, വെള്ളിക്കുളങ്ങര-ഇരിങ്ങാലക്കുട, വെള്ളിക്കുളങ്ങര -ചാലക്കുടി എന്നീ റൂട്ടുകളിലായി സര്‍വിസ് നടത്തുന്ന അമ്പതോളം ബസുകള്‍ കടന്നുപോകുന്ന റോഡിലാണ് കുഴികള്‍ നിറഞ്ഞിട്ടുള്ളത്. മഴ തുടങ്ങിയതോടെ കുഴികളില്‍ വെള്ളം കെട്ടിക്കിടന്ന് വാഹനങ്ങൾ‍ കടന്നുപോകുമ്പോള്‍ യാത്രക്കാരുടേ ദേഹത്തേക്ക് തെറിക്കുകയാണ്. പ്രസന്‍റേഷന്‍ ഹൈസ്‌കൂള്‍, ഗവ. യുപി സ്‌കൂള്‍ എന്നിവിടങ്ങളിലേക്കുള്ള കുട്ടികള്‍ ഈ ചളിക്കുഴികള്‍ താണ്ടി പോകേണ്ട ഗതികേടാണ്. റോഡില്‍ അലഞ്ഞുതിരിയുന്ന തെരുവുനായ്ക്കളും കുട്ടികള്‍ക്ക് ഭീഷണിയാണ്.

ദേശീയപാത നിർമാണം: കെടുകാര്യസ്ഥത തുടരുന്നു

കൊരട്ടി: വേനൽക്കാല അവധിക്കുശേഷം സ്കൂളുകൾ ഇന്നു മുതൽ സജീവമാകുമ്പോൾ ആശങ്കയിലാകുന്നത് മാതാപിതാക്കളും സ്കൂൾ അധികൃതരും അധ്യാപകരുമാണ്. ദേശീയപാത വികസനത്തിന്‍റെ ഭാഗമായി മുരിങ്ങൂർ, കൊരട്ടി, ചിറങ്ങര മേഖലകളിൽ നടക്കുന്ന നിർമാണ പ്രവർത്തികളിലും ഏകോപനത്തിലും നടന്നുകൊണ്ടിരിക്കുന്ന കെടുകാര്യസ്ഥതയാണ് കാരണം. കേവലം അര മണിക്കൂർ മാത്രം പെയ്താൽ പോലും രൂക്ഷമാകുന്ന കൊരട്ടി ജംഗ്ഷനിലെ വെള്ളക്കെട്ടിനെ മറികടന്ന് ഇന്ന് മുതൽ കുട്ടികളെങ്ങനെ സ്കൂളുകളിലെത്തുമെന്ന ചിന്തയും ഇവരെ അലട്ടുന്നുണ്ട്. മുരിങ്ങൂരിലെയും ചിറങ്ങരയിലെയും സ്ഥിതി വ്യത്യസ്ഥമല്ല. സ്കൂളുകൾ പ്രവർത്തനസജ്ജമാകുന്നതോടെ സ്കൂൾ ബസുകളും നിരത്തിലിറങ്ങും. സ്വാഭാവികമായും മുരിങ്ങൂർ മുതൽ പൊങ്ങം വരെ മാസങ്ങളായി തുടരുന്ന ഗതാഗതക്കുരുക്ക് ഇനിയും രൂക്ഷമാകുമെന്നാണ് വിലയിരുത്തൽ. കാലവർഷവും ശക്തമാകുന്നതോടെ കൊരട്ടിയിലെയും മുരിങ്ങൂരിലെയും ചിറങ്ങരയിലെയും സ്കൂളുകളിലെത്താൻ ദേശീയപാത മുറിച്ചുകടക്കുക കുട്ടികൾക്ക് ഏറെ ദുഷ്കരമാകും. സുരക്ഷയൊരുക്കാൻ അധികൃതരുടെ ഭാഗത്ത് കാര്യക്ഷമമായ ഇടപെടൽ ഉണ്ടാകണം. ദേശീയപാതയിലെ തിരക്കൊഴിവാക്കാൻ ഗ്രാമീണ റോഡുകളിലൂടെ വഴി തിരിച്ചുവിടുമ്പോൾ ഈ പാതയിലും വാഹനങ്ങൾ നിറയും. ഗ്രാമീണ റോഡുകളിലൂടെ സ്കൂളുകളിലേക്കും തിരിച്ചും സൈക്കിളിൽ പോകുന്ന കുട്ടികളുടെ സുരക്ഷിത യാത്ര ഉറപ്പുവരുത്താനും ഫലപ്രദമായ ഇടപെടലും അധികൃതരുടെ ഭാഗത്ത് നിന്ന് ഉണ്ടാകണമെന്ന ആവശ്യവും ഉയരുന്നുണ്ട്. മേഖലയിൽ മണിക്കൂറുകളോളം രൂപപ്പെടുന്ന ഗതാഗതകുരക്ക് ഒഴിവാക്കാനും ദീർഘദൂര യാത്ര സുഗമമാക്കാനും പദ്ധതികളും നിർദേശങ്ങളും ആവീഷ്കരിക്കാൻ ആഴ്ചതോറും ഉന്നതതല ചർച്ചകൾ നടക്കുകയും വിവിധ മാധ്യമങ്ങളിലൂടെ അറിയിക്കുന്നുണ്ടെങ്കിലും ഗുണപരമായി നടപ്പാക്കാനായിട്ടില്ല എന്നതാണ് യാഥാർഥ്യം. നിർദ്ദേശങ്ങളിൽ പലതും ആവർത്തനങ്ങളാണ്. ദിശാ ബോർഡുകൾ പോലും നാളിതുവരെ ഫലപ്രദമായി സ്ഥാപിക്കാനായിട്ടില്ല. സൂപ്പർഫാസ്റ്റ് ബസുകളും എയർ ബസുകളും രാത്രിയിൽ വഴിയറിയാതെ ചെറുവഴികളിൽ പോകുന്ന കാഴ്ചകളും കാണാം. ഭാരവണ്ടികളും എയർ ബസുകളും മറ്റും വാട്ടർ അഥോറിറ്റിയും ജലനിധിയും കുഴിച്ച കുഴികളിൽ പെടുന്ന അവസ്ഥയും നിലനിൽക്കുന്നുണ്ട്.

എല്ലാവർക്കും വീട് പദ്ധതിയുമായി കെവിവിഇഎസ്

തൃശൂർ: കേരള വ്യാപാരി വ്യവസായി ഏകോപന സമിതി ജില്ലാ കമ്മിറ്റിയുടെ ലീഡേഴ്സ് മീറ്റ് 2025ന്‍റെ ഉദ്ഘാടനവും ഹോംഫോർ എവരിവണ്‍ (എല്ലാവർക്കും വീട്) പദ്ധതിയുടെ പ്രഖ്യാപനവും ഡിബിസിഎൽസി ഹാളിൽ മന്ത്രി കെ. രാജൻ നിർവഹിച്ചു. ജില്ലയിലെ അരലക്ഷത്തോളംവരുന്ന വ്യാപാരികൾക്കും രണ്ടരലക്ഷത്തോളംവരുന്ന കുടുംബാംഗങ്ങൾക്കുമായി ഏർപ്പെടുത്തുന്ന ആരോഗ്യരക്ഷാപദ്ധതി വീ കെയറിന്‍റെ ഉദ്ഘാടനം സംസ്ഥാന പ്രസിഡന്‍റ് രാജു അപ്സരയും ലോഗോപ്രകാശനം സംസ്ഥാന ജനറൽ സെക്രട്ടറി ദേവസ്യ മേച്ചേരിയും നിർവഹിച്ചു. ഭദ്രം, ഭദ്രം പ്ലസ് എന്നീ പദ്ധതികളിലൂടെ 41 മാസത്തിനിടെ 50 കോടി വിതരണം ചെയ്തതിന്‍റെ പ്രഖ്യാപനം സംസ്ഥാന വർക്കിംഗ് പ്രസിഡന്‍റ് പി. കുഞ്ഞാവു ഹാജി നിർവഹിച്ചു. സംസ്ഥാന ട്രഷറർ എസ്. ദേവരാജൻ എല്ലാവർക്കും വീട് പദ്ധതിയുടെ ലോഗോ പ്രകാശനം ചെയ്തു. ജില്ല പ്രസിഡന്‍റ് കെ.വി. അബ്ദുൾ ഹമീദ്, വൈസ് പ്രസിഡന്‍റ് കെ.കെ. ഭാഗ്യനാഥൻ, ജനറൽ സെക്രട്ടറി എൻ.ആർ. വിനോദ്കുമാർ, ട്രഷറർ വി.ടി. ജോർജ്, വൈസ് പ്രസിഡന്‍റുമാരായ പി. നാരായണൻകുട്ടി, പി. പവിത്രൻ, ലൂക്കോസ് തലക്കോട്ടൂർ, സെബാസ്റ്റ്യൻ മഞ്ഞളി, യൂത്ത് വിംഗ് ജില്ലാ പ്രസിഡന്‍റ് എം.കെ. അബി, വനിതാ വിംഗ് ജില്ലാ പ്രസിഡന്‍റ് ഷൈന ജോർജ് എന്നിവർ പ്രസംഗിച്ചു.

ലയണ്‍സ് ക്ലബുകൾ നന്മനിറഞ്ഞ സേവനങ്ങളുടെ കരുത്തുറ്റ മാതൃക: മാർ ആൻഡ്രൂസ് താഴത്ത്

തൃശൂർ: ലോകത്തിൽ നന്മനിറഞ്ഞ സേവന പ്രവർത്തനങ്ങളിലുടെ കരുത്തറ്റ മാതൃകയാണ് ലയണ്‍സ് ക്ലബ് എന്ന് ആർച്ച്ബിഷപ് മാർ ആൻഡ്രൂസ് താഴത്ത്. ലയണ്‍സ് ഇന്‍റർനാഷണൽ ഡിസ്ട്രിക്ടിന്‍റെ ഹ്യുമാനിറ്റേറിയൻ സർവീസിന്‍റെ ഭാഗമായി തെരഞ്ഞെടുക്കപ്പെട്ട അനാഥാലയങ്ങളിലക്കും പാലിയേറ്റീവ് സെന്‍ററുകളിലേക്കും 200 വീൽചെയറുകൾ വിതരണം ചെയ്യുന്ന ചടങ്ങ് തൃശൂർ ടൗണ്‍ ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. 2024-25ൽ ലയണ്‍സ് ക്ലബ്സ് ഇന്‍റർനാഷണൽ വീൽസ് ഓഫ് ഹോപ് പദ്ധതിയുടെ ഭാഗമായി നൂറു സ്ഥാപനങ്ങളിേൽക്ക് 500 വീൽചെയറുകളുടെ വിതരണമാണ് പൂർത്തിയാക്കിയത്. അഞ്ഞൂറോളം ലയണ്‍സ് പ്രതിനിധികൾ ചടങ്ങിൽ പങ്കെടുത്തു. ഡിസ്ട്രിക്ട് ഗവർണർ ജെയിംസ് വളപ്പില, ലയണ്‍സ് മൾട്ടിപ്പിൾ കൗണ്‍സിൽ ചെയർപേഴ്സണ്‍ ടോണി ഏനോക്കാരൻ, നിയുക്ത ഡിസ്ട്രിക്ട് ഗവർണർ ടി. ജയകൃഷ്ണൻ, വൈസ് ഡിസ്ട്രിക്ട് ഗവർണർ സുരേഷ് കെ. വാര്യർ, മുൻ ഗവർണർമാരായ ഇ.ഡി. ദീപക്, എം.ഡി. ഇഗ്നേഷ്യസ്, ദർശന സർവീസ് സൊസൈറ്റി പ്രസിഡന്‍റ് ഫാ. സോളമൻ കടന്പാട്ടുപറന്പിൽ, ലയണ്‍സ് കാബിനറ്റ് സെക്രട്ടറി അഡ്വ. മിക്കി നടക്കലാൻ എന്നിവർ പ്രസംഗിച്ചു.

ഇടതുപക്ഷം മനസ് നഷ്ടപ്പെട്ടവരുടെ കൂട്ടമായി: അഡ്വ. ജോസഫ് ടാജറ്റ്

തൃശൂർ: കേരളത്തിലെ ഇടതുപക്ഷം മനസ് നഷ്ടപ്പെട്ടവരുടെ കൂട്ടമായി മാറിയെന്ന് ഡിസിസി പ്രസിഡന്‍റും ജില്ല പഞ്ചായത്ത് പ്രതിപക്ഷ നേതാവുമായ അഡ്വ. ജോസഫ് ടാജറ്റ്. ആശമാരുടെ ആവശ്യങ്ങൾ ഇനിയും സർക്കാർ അനുവദിച്ചിട്ടില്ല. ജനങ്ങളുടെ ആവശ്യങ്ങൾ തിരിച്ചറിയാത്ത മുഖ്യമന്ത്രിയാണു പിണറായി വിജയനെന്നു കേരളസമൂഹം മുദ്രകുത്തും. സ്ത്രീപക്ഷ സമരത്തെ അധിക്ഷേപിക്കുന്ന സർക്കാരിൽ തുടരുന്ന വനിതാ മന്ത്രിമാരും സമൂഹത്തിന് അപമാനമാണ്. കോണ്‍ഗ്രസ് അരിന്പൂർ മണ്ഡലം കമ്മിറ്റിയുടെ നേത്യത്വത്തിൽ അരിന്പൂർ പഞ്ചായത്തിലെ ആശ വർക്കർമാർക്കുളള പൗരസമൂഹത്തിന്‍റെ ഓണറേറിയം വിതരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കോണ്‍ഗ്രസ് അരിന്പൂർ മണ്ഡലം പ്രസിഡന്‍റ് ജെൻസൻ ജെയിംസ്, ഡിസിസി ജനറൽ സെക്രട്ടറി അഡ്വ. വി. സുരേഷ്കുമാർ, യൂത്ത്കോണ്‍ഗ്രസ് സംസ്ഥാനസെക്രട്ടറി മിഥുൻ മോഹൻ, ബ്ലോക്ക് പഞ്ചായത്ത് മെംബർ ലത മോഹനൻ, പഞ്ചായത്ത് അംഗങ്ങളായ സുധ സദാനന്ദൻ, സി. വൃന്ദ, വി.കെ. ശശികുമാർ, സി.പി. ജോർജ് എന്നിവർ പ്രസംഗിച്ചു. അരിന്പൂർ പഞ്ചായത്തിലെ 10 ആശാ പ്രവർത്തകർക്ക് ചടങ്ങിൽ ജൂണിലെ ഓണറേറിയം കൈമാറി.

വാടാനപ്പിള്ളി നടുവിൽക്കരയിൽ 50 വീടുകളിൽ വെള്ളംകയറി

വാടാനപ്പള്ളി: ദേശീയപാത നിർമാണത്തെത്തുടർന്ന് തോടുകൾ അടച്ചതോടെ കനത്ത മഴയിൽ വെള്ളം ഒഴുകിപോകാൻ കഴിയാതെ നടുവിൽക്കര മേഖലയിൽ 50 ലധികം വീടുകൾ വെള്ളത്തിലായി. പോലീസ്‌സ്റ്റേഷന് കിഴക്ക് പുതിയ പാലം മുതൽ നടുവിൽക്കര വടക്കുമുറിവരെ ദേശീയപാതയ്ക്കു സമീപമുള്ള വീടുകളാണ് വെള്ളത്തിലായത്. നേരത്തെ പാടമായിരുന്ന പ്രദേശത്തെ തോടുകൾ ഏറേയും ഹൈവേ നിർമാണത്തെ തുടർന്ന് അടച്ചു. മഴയിൽ വെള്ളം തോടുകൾവഴി ഒഴുകി കനോലി പുഴയിലാണ് വന്നുചേരാറ്. തോടുകൾ അടച്ചതോടെ വെള്ളം ഒഴുകിപോകാതെ വീടുകൾക്ക് സമീപം കനത്ത വെളളക്കെട്ടാണ്. തോരാതെയുള്ള മഴയിലാണ് വെള്ളം പൊങ്ങിയത്. പാലത്തിനു കിഴക്ക്, വടക്ക്, മണ്ണാംപുറത്ത് ക്ഷേത്രപരിസരം, പടിയം ക്ഷേത്രത്തിനുസമീപം, ചക്കാമഠത്തിൽ ക്ഷേത്രത്തിന് കിഴക്ക്, ഹെൽത്ത് സെന്‍ററിന് പടിഞ്ഞാറ്, മേപ്രങ്ങാട്ട് ക്ഷേത്രത്തിനു കിഴക്ക്, എംഗൽസ് നഗറിന് കിഴക്ക് എന്നിവിടങ്ങളിലാണ് വെളളം നിറഞ്ഞത്. വെള്ളം ചവിട്ടിവേണം വീട്ടുകാർക്ക് പുറത്തിറങ്ങാൻ. വെള്ളം കെട്ടിനിന്ന് കറുത്ത നിറമായി. പലർക്കും ചൊറിച്ചിലും അനുഭവപ്പെടുന്നുണ്ട്. വികലാംഗരടക്കമുള്ളവരാണ് വീടുകളിൽ കഴിയുന്നത്. വെള്ളം കെട്ടിനിന്നതോടെ പ്രദേശം രോഗഭീഷണിയിലായി. പഞ്ചായത്ത് അംഗങ്ങളുടെ നേതൃത്വത്തിൽ വെട്ടിപ്പൊളി നടത്തിയെങ്കിലും വെള്ളം ഒഴുകിപ്പോകുന്നില്ലെന്ന് പ്രദേശവാസികൾ പറയുന്നു. അടിയന്തരമായി കാനകൾ നിർമിക്കണമെന്ന ആവശ്യം ശക്തമാണ്. കാനകൾ നിർമിച്ചില്ലെങ്കിൽ വരുംവർഷങ്ങളിലും വെള്ളക്കെട്ട് രൂക്ഷമാകും.

ഓപ്പറേഷൻ കാപ്പ: എട്ട് ഗുണ്ടകളെ നാടുകടത്തി

തൃശൂർ: ഓപ്പറേഷൻ കാപ്പയുടെ ഭാഗമായി തൃശൂർ റൂറൽ പോലീസിന്‍റെ നേതൃത്വത്തിൽ എട്ടു ഗുണ്ടകളെക്കൂടി നാടുകടത്തി. ഈ വർഷം ഇതുവരെ 93 ഗുണ്ടകൾക്കെതിരേയാണു കാപ്പ ചുമത്തിയത്. 57 പേർക്കെതിരേ നാടുകടത്തൽ അടക്കമുള്ള നടപടിയെടുത്തു. 36 പേരെ ജയിലിൽ അടച്ചെന്നും പോലീസ് പറഞ്ഞു. മനക്കൊടി കാട്ടുതിണ്ടി വീട്ടിൽ ആകാശ് കൃഷ്ണ (24), കിരണ്‍ കൃഷ്ണ (32), മണലൂർ പള്ളിയിൽ വീട്ടിൽ പ്രത്യുഷ് (26), അഴിക്കോട് ചൂളക്കപറന്പിൽ വീട്ടിൽ മായാവി എന്നു വിളിക്കുന്ന നിസാഫ് (25), മറ്റത്തൂർ പത്തമടക്കാരൻ വീട്ടിൽ ഷാനാസ് (32), പെരിഞ്ഞനം പണിക്കശേരി വീട്ടിൽ സഞ്ജു (26), ചാലക്കുടി ചെതലൻ വീട്ടിൽ സോജൻ (48) എന്നിവരെ നാടുകടത്തി. അന്തിക്കാട് തണ്ടിയേക്കൽ വീട്ടിൽ നവീൻ(38) ആറുമാസത്തേക്ക് ഇരിങ്ങാലക്കുട ഡിവൈഎസ്പി ഓഫീസിലെത്തി ഒപ്പുവയ്ക്കണം. അന്തിക്കാട്, കൊടുങ്ങല്ലൂർ, മതിലകം, വടക്കേക്കര, കൊടകര, ചേർത്തല, കാലടി, കയ്പമംഗലം, ചാലക്കുടി, പുതുക്കാട്, വെള്ളക്കുളങ്ങര, അതിരപ്പിള്ളി, ഇരിങ്ങാലക്കുട, കോട്ടക്കൽ, കൊണ്ടോട്ടി, പാലക്കാട് കസബ എന്നിവിടങ്ങളിൽ പ്രതികൾക്കെതിരേ വധശ്രമമടക്കം നിരവധി കേസുകളുണ്ട്. തൃശൂർ റൂറൽ പോലീസ് മേധാവി ബി. കൃഷ്ണകുമാർ നൽകിയ ശിപാർശയിൽ റേഞ്ച് ഡിഐജി ഹരിശങ്കറാണ് ഉത്തരവിട്ടത്. കൂടുതൽ ഗുണ്ടകൾക്കെതിരേ നടപടിയെടുക്കുമെന്നു പോലീസ് അറിയിച്ചു.

വിദ്യാർഥികളെ വരവേൽക്കാനൊരുങ്ങി സ്കൂളുകൾ;പ്രവേശനോത്സവം ഇന്ന്

തൃശൂർ: വേനലവധിക്കുശേഷം വിദ്യാർഥികളെ വരവേൽക്കാനൊരുങ്ങി വിദ്യാലയങ്ങൾ. പുതിയ അധ്യയനവർഷത്തിനു തുടക്കംകുറിച്ചു വിദ്യാലയങ്ങളിൽ ഇന്നു പ്രവേശനോത്സവം നടക്കും. ഈ വർഷത്തെ ജില്ലാതല പ്രവേശനോത്സവം പുത്തൂർ ജിവിഎച്ച്എസിൽ നടക്കും. രാവിലെ പത്തിനു മന്ത്രി കെ. രാജൻ ഉദ്ഘാടനം ചെയ്യും. ജില്ലാപഞ്ചായത്ത് പ്രസിഡന്‍റ് വി.എസ്. പ്രിൻസ് അധ്യക്ഷനാകും. ജില്ലാ കളക്ടർ അർജുൻ പാണ്ഡ്യൻ, ജില്ലാ പഞ്ചായത്ത് വൈസ് പ്രസിഡന്‍റ് ലത ചന്ദ്രൻ, ജില്ലാ പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ റഹീം വീട്ടിപ്പറന്പിൽ, ഒല്ലൂക്കര ബ്ലോക്ക് പഞ്ചായത്ത് പ്രസിഡന്‍റ് കെ.ആർ. രവി, പുത്തൂർ ഗ്രാമപഞ്ചായത്ത് പ്രസിഡന്‍റ് മിനി ഉണ്ണികൃഷ്ണൻ തുടങ്ങിയവരും ജനപ്രതിനിധികൾ, അധ്യാപകർ, ഉദ്യോഗസ്ഥർ, വിദ്യാർഥികൾ പങ്കെടുക്കും. കേരളത്തിലെ പൊതുവിദ്യാഭ്യാസം ലോകത്തിനു മാതൃകയാണെന്നും ഈ അധ്യയനവർത്തേക്കുള്ള പാഠപുസ്തകങ്ങളുടെ വിതരണംനടന്നെന്നും മന്ത്രി കെ. രാജൻ പറഞ്ഞു. ഒന്പതാംക്ലാസിലെ പരീക്ഷ കഴിയുന്നതിനുമുന്പ് പത്താംക്ലാസിലെ പാഠപുസ്തകങ്ങൾ വിതരണം ചെയ്തതു ചരിത്രമാണ്. ഓണപ്പരീക്ഷ കഴിഞ്ഞിട്ടും പാഠപുസ്തകങ്ങൾ ലഭിക്കാതിരുന്ന ഒരു കാലഘട്ടമുണ്ടായിരുന്നു എന്നും അതു മാറ്റിയെടുത്തത് ഇടതുപക്ഷ സർക്കാരാണെന്നും മന്ത്രി പറഞ്ഞു.

ആറ്റത്ര പള്ളിയിൽ തിരുനാളിനു കൊടിയേറി

ആറ്റത്ര: വിശുദ്ധ അന്തോണീസിന്‍റെ മരണത്തിരുനാളിന് വികാരി ഫാ. ജോമോൻ മുരിങ്ങാത്തേരി കൊടിയേറ്റം നിർവഹിച്ചു. ദിവ്യബലി, ലദീഞ്ഞ്, നൊവേന എന്നി വ നടന്നു. 11 വരെ എല്ലാ ദിവസവും രാവിലെ 6.30 ന് ദിവ്യബലിയും തുടർന്ന് ഇടവക പള്ളി കപ്പേളയിലും വൈകീട്ട് ഏഴിന് കോട്ടപ്പുറം സെന്‍റ് ആന്‍റണീസ് കപ്പേളയിലും ലദീഞ്ഞ്, നൊവേന, നേർച്ച സമർപ്പണം എന്നിവ നടക്കും. തിരുനാൾ ദിനത്തിൽ രാവിലെ 10.30 നു ള്ള തിരുനാൾ ദിവ്യബലിക്ക് ബിഷപ് എമരിറ്റസ് മാർ ബോസ് കോ പുത്തൂർ മുഖ്യകാർമികനാകും. ഊട്ടുതിരുനാളിന് ട്രസ്റ്റിമാരായ ഫ്രെഡി നീലങ്കാവിൽ, കൺവീനർമാരായ എം.എൽ. റാഫേൽ, എ.വി. വിൽജോ, മദർ സിസ്റ്റർ ലിറ്റി ജോസഫ് സിഎസ്എസ് എന്നിവർ നേതൃത്വം നല്കും. 13നാണ് തിരുനാളാഘോഷം.

ജൈവമാലിന്യ സംസ്കരണ പ്ലാന്‍റ് തുറന്നു

ചാവക്കാട്: നഗരസഭയുടെ നേതൃത്വത്തിൽ പരപ്പിൽ താഴത്ത് നിർമിച്ച കേന്ദ്രീകൃത ജൈവ മാലിന്യ സംസ്കരണ പ്ലാന്‍റ് തുറന്നു. 1.15 കോടി രൂപ ചെലവിൽ 5800 അടിവിസ്തൃതിയിൽ നിർമിച്ച സംസ്കരണശാല മന്ത്രി എം. ബി. രാജേഷ് ഉദ്ഘാടനം ചെയ്തു. എൻ.കെ. അക്ബർ എംഎൽഎ അധ്യക്ഷത വഹിച്ചു. ചാവക്കാട് നഗരസഭ ശുചിത്വ അംബാസഡർ പി.ടി. കുഞ്ഞു മുഹമ്മദ് മുഖ്യാതിഥിയായി. നഗരസഭ ചെയർപേഴ്സൺ ഷീജ പ്രശാന്ത്, അസി. എക്സിക്യൂട്ടീവ് എൻജിനീയർ പി.പി. റിഷ്മ, വൈസ് ചെയർമാൻ കെ.കെ. മുബാറക്ക്, വിവിധ സ്റ്റാൻഡിംഗ് കമ്മിറ്റി ചെയർമാൻമാരായ പി.എസ്. അബ്ദുൾറഷീദ്, ഷാഹിന സലീം, ബുഷറ ലത്തീഫ്, അഡ്വ. എ.വി. മുഹമ്മദ് അൻവർ, പ്രസന്ന രണദിവേ, മുൻ ചെയർമാൻ എം.ആർ. രാധാകൃഷ്ണൻ, എ.എ. മഹേന്ദ്രൻ, അഡ്വ. പി. മുഹമ്മദ് ബഷീർ, ടി.പി. ഷാഹു, പി.കെ. സെയ്താലിക്കുട്ടി, വർഷ മണികണ്ഠൻ, ഇ.പി. സുരേഷ്കുമാർ, ക്ലീൻ സിറ്റി മാനേജർ ബി. ദിലീപ് എന്നിവർ പ്രസംഗിച്ചു. പണിതീരാത്ത പദ്ധതി ഉദ് ഘാ ടനം ചെയത് ജനങ്ങളെ കബളിപ്പിക്കുകയാണെന്നാരോപിച്ച് യുഡിഎഫ് ബഹിഷ്കരിച്ചു.

പത്തു കുടുംബങ്ങൾ ദുരിതത്തിൽ; വെള്ളക്കെട്ടിൽ ഇരുന്ന് പ്രതിഷേധം

പാവറട്ടി: മുല്ലശേരി - പാടൂർ റോഡിൽ പുതുകുളം പ്രദേശത്തെ പത്തോളം കുടുംബങ്ങൾ വെള്ളക്കെട്ടുമൂലം ദുരിതത്തിൽ. പലതവണ അധികൃതരോടു പരാതിപ്പെട്ടെങ്കിലും പരിഹാരം കാണാനായില്ല. ബാബു എടമിനി, രാജൻ കണിച്ചീയിൽ, വേലായുധൻ വാഴപ്പുള്ളി, സജിനി മാങ്ങാടി, പ്രഭു പേരുമ്പടപ്പ്, രാധിക വീട്ടിക്കൽ, സനിൽ ഗുരുക്കൾ, സജു വെട്ടിയാറ, ഫ്രാൻസിസ് ചാലക്കൽ തുടങ്ങിയ വീടുകളാണ് വെള്ള ക്കെട്ടുമൂലം ദുരിതം അനുഭവിക്കുന്നത്. ഒരാഴ്ചയിലേറെയായി തുടരുന്ന കനത്ത വെള്ളക്കെട്ട് വീടുകൾക്കും ഭീഷിണിയായിത്തുടങ്ങിയതോടെ പരിസരവാസികൾ പ്രതൃക്ഷസമരവുമായി രംഗത്ത് ഇറങ്ങി. പ്രായാധിക്യംമൂലവും ശാരീരിക അസുഖങ്ങൾ മുലവും കിടപ്പുരോഗികളായവരും ഈ വീടുകളിൽ ഉണ്ട്. ഇവർക്ക് മുല്ലശേരി പഞ്ചായത്തിന്‍റെ ദുരിതാശ്വാസ ക്യാമ്പിലേക്ക് മാറാൻ കഴിയാത്ത അവസ്ഥയാണെന്ന് പറയുന്നു. വെള്ളക്കെട്ട് ഒഴിവാക്കാൻ ബന്ധപ്പെട്ട അധികാരികൾ അടിയന്തര നടപടി സ്വീകരിക്കാത്തതിനെ തുടർന്ന് പരിസരവാസിയായ ഇ.എ ബാബുവും നാലു വയസായ മകൾ ശ്രീദുർഗയും വെള്ളക്കെട്ടിൽ ഇരുന്ന് പ്രതിഷേധ സമരം നടത്തി. സമരം നീണ്ടതോടെ പഞ്ചായത്ത് അധികൃതരും പാവറട്ടി പോലീസ് ഉദ്യോഗസ്ഥരും സ്ഥലത്തെത്തി പരിസരത്തെ വീട്ടുകാരുമായി ചർച്ച നടത്തി. വെള്ളക്കെട്ട് ഒഴിവാക്കുന്നതിന് സാധ്യമായ എല്ലാ മാർഗവും ഉടൻ സ്വീകരിക്കുമെന്ന് ഉറപ്പുനൽകിയതോടെയാണു പ്രതിഷേധസമരം തത്കാലം അവസാനിപ്പിച്ചത്. വെള്ളക്കെട്ട് ഒഴിവാക്കുന്നതിന് സാധ്യമായ എല്ലാ മാർഗവും ഉടൻ സ്വീകരിക്കുമെന്ന് ഉറപ്പുനൽകിയതോടെയാണു പ്രതിഷേധസമരം തത്കാലം അവസാനിപ്പിച്ചത്.

പാലയൂർ തീർഥകേന്ദ്രത്തിൽ ഗ്വാളിയർസംഘം പ്രാർഥന നടത്തി

പാലയൂർ: മഹാരാഷ്ട്രയിലെ ഗ്വാളിയർ നിന്നുള്ള 41 അംഗതീർഥാടകർ പാലയൂർ മാർതോമ മേജർ ആർക്കിഎപ്പിസ്കോപ്പൽ തീർഥകേന്ദ്രത്തിലെത്തി പ്രാർഥന നടത്തി. തുടർന്ന് മാർ തോമാശ്ലീഹായുടെ പാലയൂർ പ്രവേശനവുമായി ബന്ധപ്പെട്ട ചരിത്രസ്മാരകങ്ങൾ സന്ദർശിച്ചു. ബ്ലാങ്ങാട് ബീച്ചും ഗുരുവായൂർ ആനക്കോട്ടയും സന്ദർശിച്ച സംഘത്തിന് വിശ്വാസത്തിന്‍റെ ഈറ്റില്ലവും കടൽ തിരമാലകളും ആനക്കൂട്ടങ്ങളും പുതിയ അനുഭവമായെന്ന് പറഞ്ഞു. ഗ്വാളിയറിലെ ആദിവാസി മേഖലയിൽ പ്രവർത്തിക്കുന്ന കലാകാരന്മാരാണ് സംഘത്തിലെ അധികം പേരും. കേരളത്തിൽ ആദ്യമായി എത്തിയ സംഘത്തിന് എല്ലാം കൗതുകമായിരുന്നു. ഗ്വാളിയർ രൂപത ബിഷപ് ഡോ. ജോസഫ് തൈക്കാട്ടിലിന്‍റെ നേതൃത്തിൽ എത്തിയവരെ മലയാളി വൈദികനായ ഫാ. ജോൺസൻ, മഹാരാഷ്ട ക്കാരായ ഫാ. ആകാശ്, ഫാ. സനു എന്നിവർ നയിച്ചു. പാലയൂർ തീർഥകേന്ദ്രത്തിൽ എത്തിയവരെ ആർച്ച്പ്രീസ്റ്റ് റവ. ഡോ. ഡേവിസ് കണ്ണമ്പുഴ, സഹവികാരി ഫാ. ക്ലിന്‍റ്് പാണേങ്ങാടാൻ, ട്രസ്റ്റിമാർ തുടങ്ങിയവർചേർന്ന് സ്വീകരിച്ചു. മാർതോമാശ്ലീഹാ വിശ്വാസപ്രഖ്യാപനം നടത്തിയ പാലയൂർ കുരിശടിയിലെ കൽവിളക്കിൽ ബിഷപ്പിന്‍റെ നേതൃത്വത്തിൽ തിരിതെളിച്ചു.

വലപ്പാട് ജിഡിഎം എൽപി സ്കൂളിൽ കുട്ടികളുടെ പാർക്ക് തുറന്നു

തൃപ്രയാർ: പുതിയ അധ്യയന വർഷത്തിൽ സ്കൂളിലെത്തുന്ന കുട്ടികളെ വരവേൽക്കാനായി സ്കൂൾ പിടിഎയുടെ നേതൃത്വത്തിൽ വലപ്പാട് ബീച്ച് ജിഡിഎം എൽപി സ്കൂളിൽ നിർമിച്ച കുട്ടികളുടെ പാർക്ക് തുറന്നു. സി. സി. മുകുന്ദൻ എംഎൽഎ ഉദ്ഘാടനം നിർവഹിച്ചു. പാർക്ക് ഒരുക്കിയ ആർട്ടിസ്റ്റ് വിജയകുമാറിനെ ചടങ്ങിൽ ആദരിച്ചു. വിദ്യാലയത്തിൽ നിന്നും പോകുന്ന കെജി അധ്യാപികമാരായ പാർവതി ദിലീപ്, സി.ഡി. ദിവ്യ എന്നിവർക്കുള്ള ഉപഹാരവും എംഎൽഎ സമ്മാനിച്ചു. സ്കൂൾ വികസന സമിതി വർക്കിംഗ് ചെയർമാൻ ആർ.ആർ. സുബ്രഹ്മണ്യൻ, ഹെഡ്മാസ്റ്റർ സി.കെ. ബിജോയ്, ഗ്രാമപഞ്ചായത്തംഗം രശ്മി ഷിജോ, വിജിത ഹരിലാൽ, സരിത രാജു, സബിത കലേഷ്, ഷാനി അസീസ്, സി.ബി. സിജ എന്നിവർ പ്രസംഗിച്ചു. രണ്ടരലക്ഷം രൂപ ചെലവഴിച്ചാണ് പാർക്ക് നിർമിച്ചത്.

പുതിയതലമുറ തന്‍റേതായപങ്ക് സമൂഹത്തിനു തിരിച്ചുനൽകണം: എം. കൃഷ്ണദാസ്

ഗുരുവായൂർ: വിദ്യാഭ്യാസത്തിൽ മികച്ച വിജയംനേടി വിവിധ തലങ്ങളിൽ എത്തുന്ന പുതിയ തലമുറ തങ്ങളുടെ പങ്ക് സമൂഹത്തിനു തിരിച്ചുനൽകണമെന്ന് ഗുരുവായൂർ നഗരസഭ ചെയർമാൻ എം. കൃഷ്ണദാസ് അഭിപ്രായപെട്ടു. ദീപികയുടെ "ആദരം 2025' ന്‍റെ ഗുരുവായൂർ മേഖല ഉദ്ഘാടനം എൽഎഫ് കോളജിൽ നിർവഹിച്ചു സംസാരിക്കുകയായിരുന്നു അദ്ദേഹം. കേരളത്തിലെ ആദ്യവിദ്യഭ്യാസമന്ത്രി ഉൾപ്പെടെ പൂർവികർ നടത്തിയ ജീവിത സമർപ്പണത്തിന്‍റെ ഭാഗമാണ് വിദ്യാഭ്യാസ - ആരോഗ്യ മേഖലയിലെ നേട്ടങ്ങളെന്നും കൃഷ്ണദാസ് പറഞ്ഞു. എൽഎഫ് കോളജ് പ്രിൻസിപ്പൽ സിസ്റ്റർ ഡോ. ജെന്നി തെരേസ് അധ്യക്ഷത വഹിച്ചു. ദീപിക തൃശൂർ റസിഡന്‍റ് മാനേജർ ഫാ. ജിയോ തെക്കിനിയത്ത് ആമുഖപ്രഭാഷണം നടത്തി. എഡ്യുപോർട്ട് എംഡി ഡോ. ബിലാൽ മുഹസിൻ, എൽഎഫ് കോ ളജ് അധ്യാപിക ഹിത പോൾസൺ എന്നിവർ തുടർവിദ്യഭ്യാസത്തിന്‍റെ സാധ്യതകളെക്കുറിച്ച് ക്ലാസെടുത്തു. ദീപിക മാർക്കറ്റിംഗ് കോ-ഒാർഡിനേറ്റർ ഫാ. ജിയോ ചെരടായി, സർക്കുലേഷൻ മാനേജർ കെ.എൽ. ഡേവിസ്, ഗുരുവായൂർ പ്രാദേ ശിക ലേഖകൻ ആർ. ജയകു മാർ, സർക്കുലേഷൻ ഏരിയമാനേജർ നിതിൻ വിൽസൺ എന്നിവർ പ്രസംഗിച്ചു. ഗുരുവായൂർ മേഖലയിലെ എസ്എസ്എൽസി ഹയർ സെക്കൻഡറി പരീക്ഷ കളിൽ എ പ്ലസ് നേടിയ ആയിരത്തോളം വിദ്യാർഥികൾക്ക് മെഡലും സർട്ടിഫിക്കറ്റും നൽകി ആദരിച്ചു. നൂറുശതമാനം വിജയംനേടിയ വിദ്യാലയങ്ങളെയും ആദരിച്ചു.

ചായയുമായി എത്തിയ അധ്യാപികയ്്ക്ക് തന്‍റെ ഛായ; മന്ത്രിക്കു കൗതുകം

പുന്നംപറമ്പ്: തന്‍റെ മുഖഛായയുള്ള ടീച്ചർ ചായയുമായി എത്തിയപ്പോൾ ബിന്ദു ടീ ച്ചർ ആദ്യമൊന്നു ഞെട്ടി. പിന്നെ കുശലാന്വേഷണമായി. ഇന്നലെ രാവിലെ മച്ചാട് ഗവ. എൽപി സ്കൂളിൽ പുതിയതായി നിർമിച്ച സ്കൂൾ കെട്ടിടത്തിന്‍റെ ഉദ്ഘാടനത്തിന് എത്തിയാതായിരുന്നു ഉന്നത വിദ്യാഭ്യാസമന്ത്രി ഡോ. ആർ. ബിന്ദു. സ്റ്റാഫ് റൂമിലേക്കുവന്ന മന്ത്രിക്ക് ചായയുമായി വന്നതായിരുന്നു അതേ സ്കൂളിലെ ഹൈസ്കൂൾ വിഭാഗം അധ്യാപികയായ വിരുപ്പാക്ക സ്വദേശിനി കെ.എം. മിനി. മന്ത്രിയുടെ ആശ്ചര്യവും സംസാരവും കേട്ടതോടെ കൂടിനിന്നവരെ ല്ലാം ഇരുവരെയും ഒരുമിച്ചുനിർത്തി ഫോട്ടോയെടുത്തു.

സ്നേഹത്തിന്‍റെ കൂടാരമായി സ്കൂളുകൾ മാറണം: മന്ത്രി

പുന്നംപറമ്പ്: സ്നേഹത്തിന്‍റെ വിദ്യാഭ്യാസ കൂടാരമായി സ്കൂളുകൾ മാറണമെന്നും ലഹരിക്കെതിരെ സർക്കാരും ജനങ്ങളും കൈകോർത്ത് ഒന്നിച്ചുപോരാടുമെന്നും ഉന്നത വിദ്യാഭ്യാസ മന്ത്രി ഡോ.ആർ. ബിന്ദു. മച്ചാട് ഗവ. എൽപി സ്കൂളിൽ ഒരു കോടി രൂപ ചെലവിൽ പുതുതായി നിർമിച്ച ഇരുനില കെട്ടിടം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. സംസ്ഥാ നത്ത് ഉന്നത വിദ്യാഭ്യാസം നൽകുകയാണ് സർക്കാരിന്‍റെ ലക്ഷ്യമെന്നും മന്ത്രി പറഞ്ഞു. സേവ്യർ ചിറ്റിലപ്പിള്ളി എംഎൽഎ അധ്യക്ഷത വഹിച്ചു. തെക്കുംകര പഞ്ചായത്ത് പ്രസിഡന്‍റ്് ടി.വി. സുനിൽകുമാർ, എൽഎസ്ജിഡി അസി. എക് സി. എൻജിനീയർ ടി.പി. അനി, ബ്ലോക്ക് പഞ്ചായത്ത് പ്രസിഡന്‍റ് കെ. വി. നഫീസ, ജില്ലാ പഞ്ചായത്ത് അംഗം പി.എസ്. വിനയൻ, ബ്ലോക്ക് പഞ്ചായത്ത് വൈസ് പ്രസിഡന്‍റ്് സി.വി. സുനിൽകുമാർ, പഞ്ചായത്ത് വൈസ് പ്രസിഡന്‍റ് ഇ. ഉമാലക്ഷ്മി, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷ എം. കെ. ശ്രീജ, പി.ആർ.രാധാകൃഷ്ണൻ, വി.സി. സജീന്ദ്രൻ, കെ. രാമചന്ദ്രൻ, എ.ആർ. കൃഷ്ണൻകുട്ടി, എസ് ഐഎഫ്എൽ ഡയറക്ടർ മേരിതോമസ്, ജെയ്സൺ മാത്യു, കെ.എൻ. രാജൻ, അഡ്വ. ടി.എ. നജീബ്, ഷൈനി ജോസഫ്, കെ.കെ. ഷീന, ടി.പി. ബിന്ദു, സി.എസ്. നദീ റ, എൻ.പി. മാലിനി എന്നിവർ പങ്കെടുത്തു. തുടർന്ന് വിവിധ കലാപരിപാടികളും നടന്നു.

മുങ്ങി മരിച്ചനിലയിൽ

ചേലക്കര: നാട്ട്യൻചിറയിൽ പെൺകുട്ടിയെ മുങ്ങി മരിച്ചനിലയിൽ കണ്ടെത്തി. നാട്ട്യൻചിറ പുടവങ്ങോട്ട് ഞാലിൽ സവാദിന്‍റെ മകൾ നാഷിത (19) യാണ് മരിച്ചത്. ഇന്നലെ വൈകിട്ടോടെയാണ് സംഭവം. ഉച്ചമുതൽ കാണാതായ കുട്ടിയെ വീടിനടുത്തുള്ള സ്വകാര്യ വ്യക്തിയുടെ കുളത്തിലാണ് കണ്ടത്. ഫയർഫോഴ്സ് എത്തി മൃതദേഹം പുറത്തെടുത്തു. അമ്മ : സാബിത സഹോദരങ്ങൾ: നദീറ, നാഫിയ.

ലഹരിക്കെതിരെ കണ്ടുപിടിത്തവുമായി ക്രൈസ്റ്റ് എന്‍ജി. വിദ്യാര്‍ഥികള്‍

ഇരിങ്ങാലക്കുട: വായുവിലെ സിന്തറ്റിക് ഡ്രഗ്ഗുകളുടെ സാന്നിധ്യം തിരിച്ചറിയാന്‍ സഹായിക്കുന്ന പ്രൊജക്ടുമായി ക്രൈസ്റ്റ് എന്‍ജിനീയറിംഗ് കോളജിലെ ഇലക്ട്രിക്കല്‍ ആന്‍ഡ് ഇലക്ട്രോണിക്‌സ് എന്‍ജിനീയറിംഗ് വിഭാഗം വിദ്യാര്‍ഥികള്‍. വിവിധ സെന്‍സറുകള്‍ ഉപയോഗിച്ച് ലഭിക്കുന്ന ഡാറ്റ നിര്‍മിത ബുദ്ധിയുടെ സഹായത്തോടെ വിശകലനം ചെയ്താണ് വിവിധ ഘടകങ്ങളുടെ സാന്നിധ്യം തിരിച്ചറിയുന്നത്. മൂന്നാം വര്‍ഷ വിദ്യാര്‍ഥികളായ കെ.ബി. ലിബിഹരി, ജോസ്‌വിന്‍ സോജന്‍, കെ. ദിവ്യേഷ് മേനോന്‍, എ. ലക്ഷ്മി, ലെനിന്‍ സുനില്‍, ടി.ജെ. ലോയ്ഡ്, നവനീത് സി. മനോജ് എന്നിവരാണ് കണ്ടുപിടിത്തതിന് പിന്നില്‍. ഇലക്ട്രിക്കല്‍ വിഭാഗം അസിസ്റ്റന്‍റ്് പ്രഫസര്‍ കെ.എസ്. നിതിന്‍ ആണ് പ്രൊജക്ട് കോ ഓര്‍ഡിനേറ്റര്‍. സാങ്കേതിക വിദ്യയുടെ പേറ്റന്‍റിനായി അപേക്ഷ കൊടുത്തിരിക്കുകയാണ് വിദ്യാര്‍ഥികള്‍.

തോടിന്‍റെ കരിങ്കൽഭിത്തി ഇടിഞ്ഞു; രണ്ടു വീടുകളുടെ ചുമരിനു വിള്ളൽ

കാടുകുറ്റി: കാലങ്ങളായി പരിപാലനമില്ലാതെ കിടക്കുന്ന അന്നനാട് ക്ലാമത്തോടിന്‍റെ സ്വാഭാവിക നീരൊഴുക്ക് നിലയ്ക്കുകയും വെള്ളക്കെട്ട് രൂക്ഷമാവുകയും ചെയ്തതോടെ തോടിന്‍റെ പാർശ്വഭിത്തി ഇടിഞ്ഞ് രണ്ടുവീടുകൾക്ക് അപകടഭീഷണി. ചെട്ടിവളപ്പിൽ മൈക്കിൾ ഡിസിൽവയുടെ വീടിന്‍റെ ഭിത്തികൾക്കാണ് വിള്ളൽ വീണതും സാരമായ കേടുപാടുകൾ സംഭവിച്ചതും. വീടിന്‍റെ ചുമരുകൾക്കെല്ലാം വിള്ളൽ സംഭവിച്ചിട്ടുണ്ട്. മഴ കനത്താൽ കരിങ്കൽഭിത്തി കൂടുതൽ തകരുമോയെന്ന ആശങ്കയും നിലനിൽക്കുകയാണ്. കാടുകുറ്റി മൂന്നാം വാർഡിൽ നിന്നും ക്ലാമത്തോട് വഴിയാണ് മഴവെള്ളം ചാത്തൻചാലിലേക്ക് ഒഴുകുന്നത്. ക്ലാമത്തോട് ശുചീകരിക്കാത്തതും അകലെ ബണ്ട് നിർമിച്ചതും വെള്ളക്കെട്ടിന് കാരണമായി. കൂടാതെ സമീപത്തെ കുട്ടൻകുളം ലക്ഷങ്ങൾ മുടക്കി നവീകരിച്ചപ്പോൾ എടുത്ത മണ്ണ് കൂട്ടിയിട്ടതും തോടിന്‍റെ സുഗമമായ ഒഴുക്കിന് തടസമായി. തോട് നവീകരിച്ച് വെള്ളക്കെട്ട് ഒഴിവാക്കുകയും ഇടിഞ്ഞുപോയ കരിങ്കൽഭിത്തി കുറ്റമറ്റ രീതിയിൽ കെട്ടി സംരക്ഷിച്ചില്ലെങ്കിൽ വീടിന്‍റെ ബലക്ഷയത്തിനും നാശത്തിനും കാരണമാകും.

ഇരിങ്ങാലക്കുടയില്‍ ട്രെയിനുകള്‍ക്ക് സ്റ്റോപ്പ് അനുവദിക്കണം

കല്ലേറ്റുംകര: ഹൈവേ വികസനത്തെത്തുടര്‍ന്നുള്ള ഗതാഗതക്കു രുക്കിന്‍റെ പശ്ചാത്തലത്തില്‍ ഇരിങ്ങാലക്കുട റെയില്‍വേ സ്റ്റേഷനില്‍ ട്രെയിനുകള്‍ക്കു താത്കാലിക സ്റ്റോപ്പ് അനുവദിക്കണമെന്ന് ആവശ്യം. ആന്പല്ലൂർ, കൊരട്ടി ഭാഗങ്ങളില്‍ അടിപ്പാതനിര്‍മാണം നടക്കുന്നതിനാല്‍ എറണാകുളത്തേക്കും തൃശൂരിലേക്കും ഹൈവേ വഴിയുള്ള യാത്രയില്‍ വലിയ ഗതാഗതക്കുരുക്കാണ് അനുഭവപ്പെടുന്നത്. ഹൈവേ വഴി യാത്രചെയ്യുന്ന ആയിരത്തിലധികം യാത്രക്കാരെയാണ് ഇതു പ്രതികൂലമായി ബാധിച്ചിരിക്കുന്നത്. അതിനാല്‍ ഈ സമയത്ത് ഇരി ങ്ങാലക്കുട റെയില്‍വേ സ്റ്റേഷനില്‍ താത്കാലികമായി ട്രെയിനുകള്‍ക്ക് സ്റ്റോപ്പ് അനുവദിച്ചാല്‍ പ്രശ്‌നത്തിന് ഒരു പരിധിവരെ പരിഹാരം കാണാനാകുമെന്ന് റെയില്‍വേ പാസഞ്ചേഴ്‌സ് അസോസിയേഷന്‍ പറഞ്ഞു. നേരത്തേ ചാലക്കുടിയില്‍ പാലം തകരാറിലായ സമയത്ത് റോ ഡുമാര്‍ഗമുള്ള യാത്രയ്ക്ക് അസൗകര്യം വന്നതിനെത്തുടര്‍ന്ന് എല്ലാ ട്രെയിനുകള്‍ക്കും ഇരിങ്ങാലക്കുടയില്‍ താത്കാലികമായി സ്റ്റോപ്പ് അനുവദിച്ചത് ഏറെ ഗുണം ചെയ്തിരുന്നു. ഇപ്പോഴത്തെ സാഹചര്യത്തില്‍ ട്രെയിനുകള്‍ക്ക് സ്റ്റോപ്പ് അനുവദിച്ച്,യാത്രക്കാര്‍ക്ക് വാഹനങ്ങള്‍ ഒഴിവാക്കി ട്രെയിനുകളില്‍ പോകാന്‍ അവസരം മൊരുക്കണമെന്ന് അസോസിയേഷന്‍ ആവശ്യപ്പെട്ടു.

കൊടുങ്ങല്ലൂർ ബൈപാസിലെ വെള്ളക്കെട്ട്: നിരവധി കുടുംബങ്ങൾ ദുരിതത്തിലായി

കൊടുങ്ങല്ലൂർ: ദേശീയപാത നിർമാണ പ്രവൃത്തികൾ നടന്നു വരുന്ന ചന്തപ്പുര - കോട്ടപ്പുറം ബൈപാസിനരികിലെ പ്രദേശങ്ങളിൽ താമസിക്കുന്ന കുടുംബങ്ങൾ മാലിന്യം കലർന്ന വെള്ളക്കെട്ട് മൂലം ദുരിതത്തിലായി. സിഐ ഓഫീസ്, പടാകുളം, ഗൗരി ശങ്കർ, ടികെഎസ് പുരം, കോട്ടപ്പുറം എന്നീ പ്രദേശങ്ങളിലുള്ള ആളുകളുടെ ജീവിതത്തെ മാലിന്യ വെള്ളം ദുസഹമാക്കിയിരിക്കുകയാണ്. കോട്ടപ്പുറം പാലത്തിന് സമീപം താമസിക്കുന്ന എട്ടോളം കുടുംബങ്ങൾ കനത്ത വെള്ളക്കെട്ടിലായി. റോഡ് നിർമാണം തുടങ്ങിയ അന്നു മുതൽ ബൈപാസിനിരുവശവും താമസിക്കുന്നവർക്കും കച്ചവടക്കാർക്കും സ്വസ്ഥത നഷ്ടപ്പെട്ട അവസ്ഥയിലാണ്. വേനൽക്കാലത്ത് അന്തരീക്ഷമലിന്യകരണമായിരുന്നു പ്രധാന പ്രശ്നം. പൊടിമൂലം പല കച്ചവട സ്ഥാപനങ്ങളും പൂട്ടിപ്പോയി. കാണുന്നിടത്തെല്ലാം പൊടിമണ്ണായിരുന്നു. നോക്കുന്നിടത്തെല്ലാം ചെമ്മൺ നിറമായിരുന്നു. എന്നാൽ മഴ പെയ്തു തുടങ്ങിയതോടെ വീടുകൾ ചെളിവെള്ളത്തിലായ സ്ഥിതിയിലായി. റോഡുകളിലൂടെ ഒഴുകി വരുന്ന മലിനജലം താഴെയുള്ള വീടുകളുടെ ചുറ്റുമുള്ള സ്ഥലങ്ങളിൽ കെട്ടി നിൽക്കുകയാണ്. അത്യാവശ്യ കാര്യങ്ങൾക്ക് പോലും മുറ്റത്തിറങ്ങാൻ പറ്റാത്ത അവസ്ഥയിലാണ് കുടുംബങ്ങൾ. നിർമാണത്തിലിരിക്കുന്ന റോഡിൽ അടിഞ്ഞുകൂടിയ കൽപൊടി മഴവെള്ളത്തോടൊപ്പം വീട്ടുമുറ്റത്തേക്ക് കുത്തിയൊലിച്ചുവരുകയാണ്. രണ്ടു നില വീടുകളിൽ താമസിക്കുന്നവർ താഴെത്തെ നില ഉപേക്ഷിച്ച് മുകൾ നിലയിലേക്ക് താമസം മാറ്റേണ്ടി വന്നു. ദേശീയപാത നിർമാണ കമ്പനികൾ പ്രവൃത്തികൾക്കിടയിൽ നാട്ടുകാർക്ക് ഉണ്ടാക്കുന്ന പ്രശ്നങ്ങൾ കേൾക്കാനും പരിഹരിക്കാനും തയ്യാറാകുന്നില്ലെന്ന് കോൺഗ്രസ് നേതാവും നഗരസഭ കൗൺസിലറുമായ വി.എം. ജോണി ആരോപിച്ചു.

ചാലക്കുടി സബ്ട്രഷറി കെട്ടിടം ശിലാസ്ഥാപനകർമം നടത്തി

ചാലക്കുടി: രണ്ടുകോടി ചെലവിൽ നിർമിക്കുന്ന സബ്ട്രഷറി കെട്ടിടത്തിന്‍റെ ശിലാസ്‌ഥാപനകർമം ധനമന്ത്രി കെ.എൻ. ബാലഗോപാൽ നിർവഹിച്ചു. സനീഷ്‌കുമാർ ജോസഫ് എംഎൽഎ അധ്യക്ഷത വഹിച്ചു. ബെന്നി ബഹനാൻ എംപി മുഖ്യാതിഥിയായി. ട്രഷറി വകുപ്പ് ഡയറക്ടർ വി. സാജൻ, ഡെപ്യൂട്ടി ഡയറക്ടർ മധ്യമേഖല ഐ. ബിന്ദു, വേണു കണ്ഠരുമഠത്തിൽ, ഷിബു വാലപ്പൻ, എം.എസ്. മായ, കോടശേരി പഞ്ചായത്ത് പ്രസിഡന്‍റ് കെ.പി. ജെയിംസ്,ജെനിഷ് പി. ജോസ്, വാർഡ് കൗൺസിലർ നിതാ പോൾ, സി. വി. ജോഫി, കോൺഗ്രസ് ബ്ലോക്ക് പ്രസിഡന്‍റ്് വി.ഒ. പൈലപ്പൻ, ഡെന്നിസ് കെ ആന്‍റണി, പോൾ പുല്ലൻ, ഐ.ഐ. അബ്ദുൾ മജീദ്, വി.ഐ. സുധീർ, എ.ബി. അനിൽ കുമാർ, ജോസഫ് ഫ്രാൻസിസ്, കെ. രാജേന്ദ്രൻ, എം. എ. നാരായണൻ, കെ. സി. തമ്പി, ജോയി ജോർജ്, വി. രാമദാസ്, ജില്ലാ ട്രഷറി ഓഫീസർ ടി.ടി. മാത്യു തുടങ്ങിയവർ പ്രസംഗിച്ചു.

"മദ്യ, പുകയില, രാസലഹരികളുടെ അന്ധകാരത്തിൽ തലമുറകൾ ‌വഴിതെറ്റിപ്പോകുന്നു'

തൃശൂർ: മദ്യ, പുകയില, രാസലഹരികളുടെ അന്ധകാരത്തിൽ തലമുറകൾ വഴിതെറ്റിപ്പോകുന്നുവെന്ന് അതിരൂപത വികാരി ജനറാൾ മോണ്‍. ജെയ്സണ്‍ കൂനംപ്ലാക്കൽ. കെസിബിസി മദ്യവിരുദ്ധസമിതി തൃശൂർ അതിരൂപത പാലയ് ക്കൽ സെന്‍റ് മാത്യൂസ് പള്ളി ഹാളിൽ സംഘടിപ്പിച്ച ആഗോള പുക യിലവിരുദ്ധ ദിനാചരണം ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. അതിരൂപത പ്രസിഡന്‍റ് വി.എം. അഗസ്റ്റിൻ അധ്യക്ഷത വഹിച്ചു. ഡയറക്ടർ റവ.ഡോ. ദേവസി പന്തല്ലൂക്കാരൻ, ഇടവകവികാരി ഫാ. ലിറിൽ തളിയപറന്പിൽ, ഫാ. ജിൻസണ്‍ മുക്കിടിയിൽ, മദ്യവിരുദ്ധസമിതി സംസ്ഥാനപ്രസിഡന്‍റ് ടി.എസ്. അബ്രഹാം, അതിരൂപത സെക്രട്ടറി സിജോ ഇഞ്ചോടിക്കാരൻ, കേന്ദ്രസമിതി സെക്രട്ടറി പി.സി. ജോസ്, ജോസ് വടക്കേത്തല എന്നിവർ പ്രസംഗിച്ചു. റിട്ട. എസ്ഐ സേവ്യർ പള്ളിപ്പാടൻ സെമിനാറിനു നേതൃത്വം നൽകി. മദ്യവിരുദ്ധസമിതി അതിരൂപത ആനിമേറ്റർ സിസ്റ്റർ സി.എസ്. എൻസ്വീഡ് ലഹരിവിരുദ്ധപ്രതിജ്ഞ ചൊല്ലിക്കൊടുത്തു. ലഹരി വിരുദ്ധ ക്വിസ് മത്സരത്തിൽ ഒന്നാം സ്ഥാനം കരസ്ഥമാക്കിയ ഒല്ലൂർ ഇടവകാംഗം തെരേസ ബിജോയിയെ അനുമോദിച്ചു.

എളവള്ളി ഗവ. ആയുർവേദ ഡിസ്പെൻസറിയെ കേന്ദ്രനിലവാരത്തിലേക്ക് ഉയർത്തി

ചിറ്റാട്ടുകര: എളവള്ളി ഗ്രാമപഞ്ചായത്തിലെ ഗവ. ആയുർവേദ ഡിസ്പെൻസറിയെ കേന്ദ്ര നിലവാരത്തിലേയ്ക്ക് ഉയർത്തി. കേന്ദ്ര ആയുഷ് വകുപ്പിന്‍റെ കീഴിൽ പ്രവർത്തിക്കുന്ന നാഷണൽ അക്രഡിറ്റേഷൻ ബോർഡ് പരിശോധന നടത്തിയാണ് ഡിസ്പൻസറിയെ തെരഞ്ഞെടുത്തത്. ഭാരതീയ ചികിത്സാവകുപ്പിനു കീഴിൽ ആറ് ആയുർവേദ ഡിസ്പെൻസറികളാണ് ജില്ലയിൽ ഇടംനേടിയത്. കേന്ദ്ര അംഗീകാരം ലഭിക്കുന്നതോടെ കേന്ദ്രഫണ്ടുകൾ ഉപയോഗിച്ച് കൂടുതൽ മെച്ചപ്പെട്ട സൗകര്യങ്ങൾ ഡിസ്പൻസറിയിൽ വർധിപ്പിക്കാനാവും. സംസ്ഥാന ആരോഗ്യമന്ത്രി വീണ ജോർജ് സർട്ടിഫിക്കറ്റ് വിതരണം ചെയ്തു. ആയുഷ് വകുപ്പ് അഡീഷണൽ ചീഫ് സെക്രട്ടറി ഡോ. രാജ ൻ എൻ. ഖോബ്രഗഡേ അധ്യക്ഷനായി. നാഷണൽ ആയുഷ്‌മിഷൻ സ്റ്റേറ്റ് മിഷൻ ഡയറക്ടർ ഡോ. ഡി. സജിത്ത് ബാബു, ഗവ. ഓഫ് ഇന്ത്യ മിനിസ്ട്രി ഓഫ് ആയുഷ് ജോയിന്‍റ് സെക്രട്ടറി കവിത ഗാർഗ്, ഡോ. എ. രഘു, ഡോ. കെ.എസ്. പ്രിയ, ഡോ. എം.പി. ബീന, ടി.ഡി. ശ്രീകുമാർ എന്നിവർ പ്രസംഗിച്ചു. ഗവ. ആയുർവേദ ഡിസ്പെൻസറിയെ കേന്ദ്ര നിലവാരത്തിലേയ്ക്ക് ഉയർത്തുന്നതോടെ കിടത്തിചികിത്സ ഉൾപ്പെടെയുള്ള സൗകര്യങ്ങൾ ഏർപ്പെടുത്തുകയാണ് ലക്ഷ്യമെന്ന് ഗ്രാമപഞ്ചായത്ത് പ്രസിഡന്‍റ് ജിയോ ഫോക്സ് വ്യക്തമാക്കി.

ഇടപാടുകൾക്കപ്പുറം സൗഹൃദത്തിന്‍റെ കേന്ദ്രംകൂടിയാണ് ട്രഷറികൾ: മന്ത്രി കെ.എൻ. ബാലഗോപാൽ

കുന്നംകുളം: മാസത്തിലൊരിക്കൽ ട്രഷറിയിൽ എത്തുന്ന റിട്ടയേഡ് ഉദ്യോഗസ്ഥർക്ക് സുഹൃത്തുക്കളുമായി ഒത്തുകൂടാനുള്ള ഒരു സൗഹൃദകേന്ദ്രം കൂടിയാണ് ട്രഷറി. അതുകൊണ്ടുതന്നെ അവർക്കുവേണ്ട പരിഗണന കൊടുത്ത് ഒന്നാം നിലയിൽത്തന്നെ ആവശ്യമായ സൗകര്യങ്ങൾ ഒരുക്കിയാണ് പുതിയ ട്രഷറികൾ രൂപകല്പന ചെയ്യുന്നതെന്ന് ധനമന്ത്രി കെ.എൻ. ബാലഗോപാൽ. കുന്നംകുളം സബ്ട്രഷറി കെട്ടിടത്തിന്‍റെ ശിലാസ്ഥാപനം ടൗണ്‍ഹാളില്‍ നിർവഹിക്കുകയായിരുന്നു അദ്ദേഹം. ജംഗ്ഷൻ വികസനവും റോഡ് നിര്‍മാണങ്ങളും സര്‍ക്കാര്‍ ഓഫീസ് കെട്ടിടങ്ങളുടെ നിർമാണവുമെല്ലാം സർക്കാർ മാറുമ്പോൾ മാറ്റംവരുത്തേണ്ട കാര്യങ്ങൾ അല്ല. എന്നാല്‍ പലപ്പോഴും അതിന് പൂർണത ഉണ്ടാകാറില്ല. എന്നാല്‍ ഇപ്പോൾ കേരളത്തിൽ വികസനത്തുടര്‍ച്ചയുള്ളതുകൊണ്ട് ഇവയെല്ലാം പൂര്‍ണതയോടെ ജനങ്ങള്‍ക്കു സമര്‍പ്പിക്കാനാവുന്നുണ്ടെന്നും ജനപങ്കാളിത്തമാണ് ഈ സര്‍ക്കാരിന്‍റെ മുഖമുദ്രയെന്നും ബാലഗോപാല്‍ പറഞ്ഞു. എ.സി. മൊയ്തീൻ എംഎൽഎ അധ്യക്ഷത വഹിച്ചു. കെ. രാധാകൃഷ്ണൻ എംപി വിശിഷ്ടാതിഥിയായിരുന്നു. നഗരസഭ ചെയർപേഴ്സൺ സീത രവീന്ദ്രൻ മുഖ്യാതിഥിയായി. കുന്നംകുളം മുനിസിപ്പാലിറ്റി, ചൊവ്വന്നൂർ ബ്ലോക്ക് പഞ്ചായത്ത്, ചൊവ്വന്നൂർ, ചൂണ്ടൽ, കടവല്ലൂർ, കണ്ടാണശ്ശേരി, കാട്ടകാമ്പാൽ, പോർക്കുളം, കടങ്ങോട് എന്നീ ഗ്രാമപഞ്ചായത്തുകളും കുന്നംകുളം സബ് ട്രഷറിയുടെ അധികാരപരിധിയിൽ വരുന്നുണ്ട്. കാലപ്പഴക്കം മൂലം ശോചനീയാവസ്ഥയിലായിരുന്ന പഴയ കെട്ടിടം പൊളിച്ചുമാറ്റിയാണ് ആധുനിക സൗകര്യങ്ങളോടുകൂടിയ പുതിയ കെട്ടിടം നിര്‍മിക്കുന്നത്. നിര്‍മാണത്തിന്‍റെ ഭാഗമായി നിലവില്‍ സബ് ട്രഷറി ഓഫീസ് ഗുരുവായൂര്‍ റോഡിലെ വാടകക്കെട്ടിടത്തിലാണ് താത്കാലികമായി പ്രവര്‍ത്തിച്ചുവരുന്നത്. മധ്യമേഖല ഡെപ്യൂട്ടി ഡയറക്ടർ ഐ. ബിന്ദു റിപ്പോർട്ട് അവധരിപ്പിച്ചു. ചൊവ്വന്നൂർ ബ്ലോക്ക് പഞ്ചായത്ത് പ്രസിഡന്‍റ് ആൻസി വില്യംസ്, കടവല്ലൂർ ഗ്രാമപഞ്ചായത്ത് പ്രസിഡന്‍റ് പി. ഐ. രാജേന്ദ്രൻ തുടങ്ങിയവർ ആശംസകളർപ്പിച്ചു.

പെരിങ്ങാട് പുഴയിലെ ചെളിയും മണ്ണും നീക്കാൻ ജില്ലാ കളക്ടറുടെ ഉത്തരവ്

പാവറട്ടി: പെരിങ്ങാട് പുഴയിലെ ചെളിയും മണ്ണും നീക്കാൻ ജില്ലാ കളക്ടർ ഉത്തരവിട്ടു. മഴ ശക്തിയാകുംമുൻപേ ചെളിയും മണ്ണും നീക്കാൻ തൃശൂർ അഡീഷണൽ ഇറിഗേഷൻ ഡിവിഷൻ എക്സിക്യൂ ട്ടീവ് എൻജിനീയർക്ക് ജില്ലാ കളക്ടർ അർജുൻ പാണ്ഡ്യൻ നിർദേശം നൽകി. 2021-ലാണ് പെരിങ്ങാട് പുഴയും പുഴയോടുചേർന്ന കണ്ടൽ പ്രദേശങ്ങളും സംരക്ഷിത വനമേഖലയായി പ്രഖ്യാപിച്ച് കരട് വിജ്ഞാപനം പുറത്തിറങ്ങിയത്. ഇതിനുശേഷം അഞ്ചര കിലോമീറ്റർ ചുറ്റളവുള്ള പെരിങ്ങാട് പുഴയിൽനിന്ന് ചെളികോരാനുള്ള നടപടികൾ നിലയ്ക്കുകയായിരുന്നു. ചെളി നീക്കാൻ ജലസേചനവകുപ്പ് നാലുകോടി രൂപയുടെ പദ്ധതി തയാറാക്കി സർക്കാരിലേക്ക് സമർപ്പിച്ചെങ്കിലും സംരക്ഷിത വനമേഖലയായി പ്രഖ്യാപിച്ചുള്ള കരട് വിജ്ഞാപനം തടസമായി. പ്രളയത്തിൽ അടിഞ്ഞുകൂടിയ ചെളിക്കുപുറമേ വർഷംതോറും ഇടിയഞ്ചിറ റെഗുലേറ്ററിനു സമീപം നിർമിക്കുന്ന താത്‌കാലിക വളയംബണ്ട് പൊളിക്കുന്ന മണ്ണും പെരിങ്ങാട് പുഴയിലേക്കാണ് ഒഴുക്കിയിരുന്നത്. പുഴ ആഴം കുറയാൻ ഇതും കാരണമായി. ഇതിനെതിരേ തീരദേശ സംരക്ഷണ സമിതി അംഗങ്ങളും പ്രദേശവാസികളും നിരവധി പ്രതിഷേധങ്ങൾ നടത്തിയിരുന്നു. ക്രമാതീതമായി മണ്ണ് പെരിങ്ങാട് പുഴയിൽ അടിഞ്ഞതിനാൽ ആഴം ഗണ്യമായി കുറഞ്ഞ് പലയിടങ്ങളിലും ഉപ്പു വെള്ളം കയറുകയും കൃഷി നശിക്കുകയും ശുദ്ധജല സ്രോതസ് മലിനമാകുകയും ചെയ്തു. പുഴയുടെ ആഴം കുറഞ്ഞതിനാൽ മത്സ്യസമ്പത്തും കുറഞ്ഞു. പെരിങ്ങാട് പുഴയിൽ നിന്നും ചെളിയും മണ്ണും നീക്കം ചെയ്യാനുള്ള ജില്ലാ കളക്ടറുടെ ഉത്തരവിനെ സ്വാഗതം ചെയ്യുന്നതായി തീരദേശ സംരക്ഷണ സമിതി കൺവീനർ ഷൈജു തിരുനെല്ലൂർ പറഞ്ഞു. മഴക്കാലത്ത് ജില്ലയിൽ നിന്നുള്ള 70 ശതമാനം അധികവെള്ളവും കടലിലേക്ക് ഒഴുകിപ്പോകേണ്ടത് ഇടിയഞ്ചിറ റെഗുലേറ്റർ കടന്ന് പെരിങ്ങാട് പുഴ വഴിയാണ്. പക്ഷേ, ആഴം കുറഞ്ഞ പെരിങ്ങാട് പുഴയിൽ ചെളിയും മണ്ണും നിറഞ്ഞ് അധികവെള്ളം ഉൾക്കൊള്ളാൻ കഴിയാത്ത അവസ്ഥ യിലാണ്. ഇതുമൂലം പാവറട്ടി, മുല്ലശേ രി, എളവള്ളി ഉൾപ്പെടെയുള്ള താഴ്ന്ന ദേശങ്ങൾ വെള്ളക്കെട്ടിൽപ്പെടുന്നത് പതിവായിരുന്നു. പുഴയിലെ ചെളിയും മണ്ണും നീക്കാൻ അഡീഷണൽ ഇറിഗേഷന് നിർദേശം നൽകണമെന്നാവശ്യപ്പെട്ട് പാവറട്ടി പഞ്ചായത്ത് സെക്രട്ടറി ഷിബുദാസ് കൊമേരി കളക്ടർക്ക് കത്തുനൽകിയിരുന്നു. കോടതി ഉത്തരവിന്‍റെകൂടി അടിസ്ഥാനത്തിൽ സബ് കളക്ടറുടെ നേതൃത്വത്തിലുള്ള സംഘം നടത്തിയ പരിശോധനയിൽ പെരിങ്ങാട് പുഴയുടെ പല ഭാഗത്തുമുള്ള മൺതിട്ടകൾ അടിയന്തരമായി മാറ്റണമെന്നും അല്ലാത്തപക്ഷം ഇവ പുഴുടെ ജലസംഭരണശേഷി കുറച്ച് പ്രളയത്തിന് കാരണമാകാമെന്നും സംഘം കണ്ടെത്തിയിരുന്നു.

ഒല്ലൂർ സ്മാർട്ട് വില്ലേജ് ഓഫീസ് തുറന്നു

ഒല്ലൂർ: സ്മാർട്ട് വില്ലേജ് ഓഫീസ് ഉദ്ഘാടനം റവന്യൂ മന്ത്രി കെ. രാജൻ നിർവഹിച്ചു. കഴിഞ്ഞ ഒൻപതുവർഷംകൊണ്ട് നാലുലക്ഷത്തിലധികം കുടുംബങ്ങൾ ഭൂമിയുടെ അവകാശികളായി മാറിയതായി മന്ത്രി പറഞ്ഞു. എല്ലാവർക്കും ഭൂമി, എല്ലാവർക്കും വീട് എന്നതാണ് സർക്കാരിന്‍റെ ലക്ഷ്യം. ഇതു നടപ്പിലാക്കാൻ സർക്കാർ പ്രതിജ്ഞാബദ്ധമാണെന്ന് മന്ത്രി പറഞ്ഞു. റവന്യൂ വകുപ്പിന്‍റെ പ്ലാൻ 2022- 23 ഉൾപ്പെടുത്തിയാണ് ഒല്ലൂർ സ്മാർട്ട് വില്ലേജ് ഓഫീസിന്‍റെ നിർമാണം പൂർത്തീകരിച്ചത്. കുട്ടനെല്ലൂർ എൻസിസി ബറ്റാലിയൻ കോംപ്ലക്സ് അങ്കണത്തിൽ നടന്ന ചടങ്ങിൽ പി. ബാലചന്ദ്രൻ എംഎൽഎ അധ്യക്ഷത വഹിച്ചു. കേരള സ്റ്റേറ്റ് നിർമിതി കേന്ദ്രം പ്രോജക്ട് മാനേജർ സതീദേവി റിപ്പോർട്ട് അവതരിപ്പിച്ചു. തൃശൂർ കോർപറേഷൻ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ വർഗീസ് കണ്ടംകുളത്തി, പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സൺ കരോളിൻ ജെറീഷ് പെരിഞ്ചേരി, ജില്ലാ കളക്ടർ അർജുൻ പാണ്ഡ്യൻ, സബ് കളക്ടർ അഖിൽ വി. മേനോൻ, അഡീഷണൽ ജില്ലാ മജിസ്ട്രേറ്റ് ടി. മുരളി, തഹസിൽദാർ ടി. ജയശ്രീ, ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.`

"ക്യാപ്റ്റൻ ലക്ഷ്മി ഷീ സ്റ്റേ ഹോം' ഏഴിനു നാടിനു സമർപ്പിക്കും

ഗുരുവായൂർ: നഗരസഭയുടെ വികസനപദ്ധതികളിൽ സ്ത്രീകൾക്കുമാത്രം താമസിക്കുന്നതിനായി നിർമിച്ച "ക്യാപ്റ്റൻ ലക്ഷ്മി ഷീസ്റ്റേ ഹോം' ഏഴിന് സ്ത്രീകൾക്കായി തുറന്നു കൊടുക്കുമെന്ന് നഗരസഭ ചെയർമാൻ എം. കൃഷ്ണദാസ്, വൈസ് ചെയർപേഴ്സൺ അനീഷ്മ ഷനോജ് എന്നിവർ പത്രസമ്മേളനത്തിൽ അറിയിച്ചു. തീർഥാടക നഗരത്തിൽ എത്തുന്ന സ്ത്രീകൾക്ക് താമസിക്കാനായി വടക്കേ ഔട്ടർ റിംഗ് റോഡിൽ നാലു നിലകളിലായാണ് നിർമിച്ചിട്ടുള്ളത്. താഴത്തെ നിലയിൽ സ്വീകരണ ലോബി, സൈനിംഗ് ഏരിയ എന്നിവയാണ്. ഒന്നും രണ്ടും നിലകളിലായി ഏഴ് ഡോർ മെറ്ററികളാണുള്ളത്. ഇതിൽ 70 പേർക്കു താമസിക്കാനാകും. മുകളിലത്തെ നിലയിൽ ഏഴ് മുറികളിലായി 24 കിടക്കകളും ഒരുക്കിയിട്ടുണ്ട്. അഞ്ച് കോടിയോളം ചെലവിലാണു നിർമാണം പൂർത്തീകരിച്ചത്. കുടുംബശ്രീയുടെ നഗര ഉപജീവന കേന്ദ്രത്തിനാണു നടത്തൽ ചുമതല. ഓൺലൈൻവഴി ബുക്കിംഗ് നടത്താം. ഏഴിന് ഉച്ചകഴിഞ്ഞ് 3.30 ന് മന്ത്രി എം.ബി. രാജേഷ് ഉദ്ഘാടനം ചെയ്യും. ക്യാപ്റ്റൻ ലക്ഷ്മിയുടെ മകൾ സുഭാഷിണി അലി വിശിഷ്ടാതിഥിയായി പങ്കെടുക്കും. നഗരസഭയുടെ അഭിമാന പദ്ധതിയായ ബസ് സ്റ്റാൻഡും സ്ട്രീറ്റ് ഷോപ്പിംഗ് കോംപ്ലക്സും ഈ വർഷം തുറന്നു കൊടുക്കാനാകുമെന്ന് പ്രതീക്ഷിക്കുന്നതായും ചെയർമാൻ അറിയിച്ചു. സ്ഥിരം സമിതി അധ്യക്ഷന്മാരായ എ.എം. ഷെഫീർ, എ.എസ്. മനോജ്, എ. സായിനാഥൻ, ബിന്ദു അജിത്കുമാർ, ഷൈലജ സുധൻ, നഗരസഭ സെക്രട്ടറി എച്ച്. അഭിലാഷ്കുമാർ എന്നിവരും പത്രസമ്മേളനത്തിൽ പങ്കെടുത്തു.

33 പേർക്കു കാടകളും കൂടുകളും സമ്മാനിച്ച് മൃഗസംരക്ഷണ ഓഫീസർ പടിയിറങ്ങി

തൃശൂർ: 33 വർഷങ്ങൾ... ഒടുവിൽ തന്‍റെ ജോലിയിൽനിന്നും പടിയിറങ്ങുന്പോൾ 33 പേർക്കു കാടകളെയും ഹൈടെക് കാടക്കൂടുകളും സമ്മാനിച്ച് ജില്ലാ മൃഗസംരക്ഷണ ഓഫീസർ ഡോ. അജിത് ബാബു. 33 വർഷ സേവന കാലയളവിന്‍റെ പ്രതീകമായാണ് അഭയകേന്ദ്രങ്ങൾക്കും സന്നദ്ധപ്രവർത്തകർക്കും 5,000 രൂപയോളം ചെലവുവരുന്ന ഊഞ്ഞാൽകൂടുകളും കാടകളെയും അദ്ദേഹം സമ്മാനിച്ചത്. വെറ്ററിനറി സർവകലാശാലയിൽ സേവനമനുഷ്ഠിച്ച കാലത്തു രൂപംനൽകിയ ഗാർഹിക കാടക്കൂടുകൾ പ്രചാരത്തിലാക്കുന്നതിന്‍റെ ഭാഗമായാണ് സൗജന്യമായി ഇവ നൽകിയത്. ഓട്ടോമാറ്റിക് നിപ്പിൾ സംവിധാനവും എഗ് ട്രേയും ഫീഡറും ഘടിപ്പിച്ചിട്ടുള്ള ഊഞ്ഞാൽകൂടുകളും മുട്ടയിടാൻ പ്രായമായ 10 കാടകളെയും അവയ്ക്കു രണ്ടാഴ്ചത്തേക്കു വേണ്ടുന്ന തീറ്റയും അടങ്ങുന്ന യൂണിറ്റ് കളക്ടറേറ്റ് ഓഫീസ് പരിസരത്തു നടന്ന ചടങ്ങിൽ ഡോ. അജിത് ബാബു വിതരണംചെയ്തു.ഉയർന്ന ഉത്പാദനക്ഷമതയുള്ള മണ്ണുത്തി കാടകൾ വെറ്ററിനറി സർവകലാശാലയുടെ തിരുവിഴാംകുന്ന് പക്ഷിഗവേഷണകേന്ദ്രത്തിൽ ഉരുത്തിരിച്ചെടുത്തതാണ്. ഒരുവർഷത്തോളം ലാഭകരമായി ഇവ മുട്ടനൽകും. കൂടുകളിൽ ജൈവവളം ശേഖരിക്കുന്നതിനുള്ള ഡ്രോപ്പിംഗ് ട്രേ ഘടിപ്പിച്ചിട്ടുള്ളതിനാൽ വീട്ടിലെ പച്ചക്കറികൃഷിക്കും ഉദ്യാനപാലനത്തിനും ഇവ സഹായകരമാണ്. തൃശൂർ ജില്ലാ ഓഫീസർ ആകുന്നതിനുമുന്പ് മൃഗസംരക്ഷണവകുപ്പിന്‍റെ പൗൾട്രി വിഭാഗത്തിന്‍റെ ജോയിന്‍റ് ഡയറക്ടറും വെറ്ററിനറി സർവകലാശാലയുടെ പൗൾട്രി കോളജ് ഡീനുമായിരുന്നു അജിത് ബാബു. മട്ടുപ്പാവിലെ മുട്ടക്കോഴിവളർത്തലിനുള്ള ഗാർഹിക കോഴിക്കൂടുകളിലൂടെ ഉത്പാദനക്ഷമതയിൽ ഭാരതത്തിൽ ഒന്നാംസ്ഥാനമുള്ള പൂക്കോട് വെറ്റിനറി സർവകലാശാലയിലെ അതുല്യ കോഴികളുട വ്യാപനം സാധ്യമാക്കിയത് ഇദ്ദേഹത്തിന്‍റെ ശ്രമഫലമായാണ്.

പുളിക്കലച്ചിറ പാലം: റോഡ് ബലപ്പെടുത്താൻ നിർദേശം

തൃശൂർ: ജില്ലയിലെ വിവിധ വികസനപദ്ധതികളുടെ പുരോഗതി അവലോകനംചെയ്ത് ജില്ലാ വികസനസമിതി യോഗം ചേർന്നു. ജില്ലാ കളക്ടർ അർജുൻ പാണ്ഡ്യൻ അധ്യക്ഷനായി. പൂമംഗലം ഗ്രാമപഞ്ചായത്തിലെ പുളിക്കലച്ചിറ പാലംനിർമാണവുമായി ബന്ധപ്പെട്ട് താത്കാലികമായി നിർമിച്ച റോഡ് ബലപ്പെടുത്തുവാൻ വേണ്ട നടപടികൾ സ്വീകരിക്കണമെന്നും പ്രവർത്തനങ്ങൾ വേഗത്തിലാക്കണമെന്നും കളക്ടർ നിർദേശിച്ചു. കാലവർഷം ശക്തമാകുന്നതിനു മുന്നോടിയായി ഇടിയഞ്ചിറ ബണ്ട് നീക്കംചെയ്യാനുള്ള പ്രവർത്തനങ്ങൾ വേഗത്തിലാക്കണമെന്നു മുരളി പെരുനെല്ലി എംഎൽഎ ആവശ്യപ്പെട്ടു. ജൽജീവൻ മിഷൻ പൈപ്പിടലിന്‍റെ ഭാഗമായി വിവിധ പ്രദേശങ്ങളിൽ റോഡുകളുടെ നിർമാണപുരോഗതികൾ യോഗത്തിൽ ചർച്ചയായി. ജില്ലയിലെ വിവിധ വിദ്യാലയങ്ങളിലെ നിർമാണപ്രവൃത്തികളുടെ പുരോഗതിയും അവലോകനം ചെയ്തു. നവകേരള മിഷൻ, ആർദ്രം മിഷൻ, വിദ്യാകിരണം, ലൈഫ് മിഷൻ, മാലിന്യമുക്ത നവകേരളം, നവകേരള സദസ് പ്രോജക്ടുകൾ, അതിദാരിദ്യ്ര ലഘൂകരണം തുടങ്ങിയവയുടെ പുരോഗതിഅവലോകനവും നടന്നു. കളക്ടറേറ്റ് കോണ്‍ഫറൻസ് ഹാളിൽ നടന്ന യോഗത്തിൽ എംഎൽഎമാരായ പി. ബാലചന്ദ്രൻ, സനീഷ് കുമാർ ജോസഫ്, കെ.കെ. രാമചന്ദ്രൻ, ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ്, സബ് കളക്ടർ അഖിൽ വി. മേനോൻ, അസിസ്റ്റന്‍റ് കളക്ടർ സ്വാതി മോഹൻ റത്തോഡ്, ജില്ലാ പ്ലാനിംഗ് ഓഫീസർ ടി.ആർ. മായ, ജില്ലയിലെ മന്ത്രിമാരുടെയും എംപിമാരുടെയും പ്രതിനിധികൾ എന്നിവർ പങ്കെടുത്തു.

കേരളത്തിന്‍റെ വിജയത്തിനുപിറകിൽ കൂട്ടായ പ്രവർത്തനം: മന്ത്രി

തൃശൂർ: കേരളം പിന്നോട്ടല്ല മുന്നോട്ടുതന്നെയാണ് പോകുന്നതെന്നും കേന്ദ്ര സർക്കാരിൽനിന്ന് ലഭിക്കാനുള്ള വിഹിതം പകുതിപോലും ലഭിക്കാത്ത സാഹചര്യത്തിലും വിവിധ മേഖലകളിൽ പുതിയ പദ്ധതികളും പ്രവർത്തനങ്ങളും നടപ്പിലാക്കാൻ സാധിക്കുന്നതു കേരളജനതയുടെ കൂട്ടായ്മകൊണ്ടാണെന്നും ധനമന്ത്രി കെ.എൻ. ബാലഗോപാൽ. ട്രഷറി അടിസ്ഥാനസൗകര്യ വികസനപദ്ധതിയായ ടിഎഡിപി പദ്ധതിയിൽ ഉൾപ്പെടുത്തി നിർമിക്കുന്ന മെഡിക്കൽ കോളജ് സബ് ട്രഷറി കെട്ടിടത്തിന്‍റെ ശിലാസ്ഥാപനകർമം നിർവഹിക്കുകയായിരുന്നു അദ്ദേഹം. ഒരു കോടി തൊണ്ണൂറുലക്ഷം രൂപ ചെലവിൽ 2,700 സ്ക്വയർഫീറ്റ് വിസ്തൃതിയിൽ സബ് ട്രഷറിയുടെ പുതിയ കെട്ടിടനിർമാണം ഒൻപതുമാസംകൊണ്ട് പൂർത്തിയാക്കാനാണ് ലക്ഷ്യമിടുന്നത്. സേവ്യർ ചിറ്റിലപ്പിള്ളി എംഎൽഎ അധ്യക്ഷത വഹിച്ചു. കെ. രാധാകൃഷ്ണൻ എംപി മുഖ്യാതിഥിയായി. പുഴയ്ക്കൽ ബ്ലോക്ക് പഞ്ചായത്ത് പ്രസിഡന്‍റ് ലീല രാമകൃഷ്ണൻ, കോലഴി പഞ്ചായത്ത് പ്രസിഡന്‍റ് ലക്ഷ്മി വിശ്വംഭരൻ, ഗവ. മെഡിക്കൽ കോളജ് പ്രിൻസിപ്പൽ ഡോ. എൻ. അശോകൻ തുടങ്ങിയവർ പ്രസംഗിച്ചു.

കുന്പളങ്ങാട് ബിജു വധക്കേസ്; എട്ടു ബിജെപി പ്രവർത്തകർക്ക് ആജീവനാന്ത തടവുശിക്ഷ

തൃശൂർ: ഡിവൈഎഫ്ഐ പ്രവർത്തകനായിരുന്ന കുന്പളങ്ങാട് ബിജുവിനെ വധിച്ച കേസിൽ ബിജെപി- ആർഎസ്എസ് പ്രവർത്തകരായ എട്ടു പ്രതികൾക്കും ആജീവനാന്തം തടവും ആകെ 11,52,000 രൂപ പിഴയും ശിക്ഷ. ഒന്നുമുതൽ ഒൻപതുവരെ പ്രതികളായ കുന്പളങ്ങാട് മൂരായിൽ ജയേഷ്(43), ഇരവുകുളങ്ങര സുമേഷ്(42), കുറ്റിക്കാടൻ സെബാസ്റ്റ്യൻ(46), തൈക്കാടൻ ജോണ്‍സണ്‍(51), കിഴക്കോട്ടിൽ ബിജു എന്ന കുചേലൻ ബിജു(46), കരിന്പനവളപ്പിൽ സജീഷ് എന്ന സതീഷ്(39), കരിന്പനവളപ്പിൽ സുനീഷ്(34), കരിന്പനവളപ്പിൽ സനീഷ്(37) എന്നിവരെയാണ് തൃശൂർ മൂന്നാം അഡീഷണൽ ജില്ല ആൻഡ് സെഷൻസ് ജഡ്ജി കെ.എം. രതീഷ്കുമാർ ശിക്ഷിച്ചത്. ഓരോരുത്തരും 1,44,000 രൂപയാണ് പിഴയടയ്ക്കേണ്ടത്. കേസിലെ ആറാംപ്രതി രവി വിചാരണയ്ക്കിടെ മരിച്ചു. സിഐടിയു ചുമട്ടുതൊഴിലാളിയായ കുന്പളങ്ങാട് പന്തലങ്ങാട്ട് ജിനീഷി(39)നെയും ബിജുവിനൊപ്പം പ്രതികൾ കൊലപ്പെടുത്താൻ ശ്രമിച്ചിരുന്നു. 2010 മേയ് 16നു വൈകീട്ട് കുന്പളങ്ങാട് ഗ്രാമീണവായനശാലയുടെ മുൻവശത്തുവച്ച് ബിജുവിനെയും ജിനീഷിനെയും ബിജെപി- ആർഎസ്എസ് പ്രവർത്തകരായ പ്രതികൾ രാഷ്ട്രീയവിരോധത്താൽ മാരകായുധങ്ങളുമായി ആക്രമിക്കുകയായിരുന്നു. വടക്കാഞ്ചേരി സിഐ ആയിരുന്ന ഇപ്പോഴത്തെ ഗുരുവായൂർ അസിസ്റ്റന്‍റ് പോലീസ് കമ്മീഷണർ ടി.എസ്. സിനോജാണു കേസന്വേഷിച്ചു കുറ്റപത്രം സമർപ്പിച്ചത്. പ്രതികൾ പിഴയടച്ചാൽ അതിൽനിന്ന് രണ്ടുലക്ഷം രൂപ ഒന്നാംസാക്ഷിയായ ജിനീഷിനു നൽകണമെന്നും അഞ്ചുലക്ഷം രൂപ കൊല്ലപ്പെട്ട ബിജുവിന്‍റെ കുടുംബത്തിനു നൽകണമെന്നും വിധിയിലുണ്ട്. പിഴയടച്ചില്ലെങ്കിൽ രണ്ടുവർഷം വീതം ഓരോരുത്തരും അധികതടവ് അനുഭവിക്കണം. പ്രോസിക്യൂഷനുവേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ. കെ.ഡി. ബാബു, അഡ്വ. ശരത് ബാബു കോട്ടയ്ക്കൽ, അഡ്വ. പി.വി. രേഷ്മ എന്നിവർ ഹാജരായി.

നഷ്ടപ്പെട്ട പണത്തിന് ഉത്തരവാദി സിപിഎം; എങ്ങനെ തിരിച്ചുനൽകും: ജോസഫ് ടാജറ്റ്

തൃശൂർ: കരുവന്നൂർ സഹകരണബാങ്ക് അഴിമതിയിലൂടെ നിക്ഷേപകരുടെ നഷ്ടപ്പെട്ട പണത്തിന് ഉത്തരവാദി സിപിഎമ്മാണെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ്. കേന്ദ്രസർക്കാർ ഇഡിയെക്കൊണ്ടും സംസ്ഥാന സർക്കാർ ക്രൈംബ്രാഞ്ചിനെക്കൊണ്ടും അന്വേഷിച്ച് പരസ്പരം നാടകം കളിക്കാതെ നഷ്ടപ്പെട്ട പണം എങ്ങനെ, എന്നു കൊടുക്കുമെന്നു സിപിഎമ്മും സർക്കാരും വ്യക്തമാക്കണം. കരുവന്നൂരിൽ കട്ട പണം നിക്ഷേപകർക്കു തിരികെനൽകണമെന്നും മുഴുവൻ പ്രതികളെയും അറസ്റ്റ് ചെയ്യണമെന്നും ആവശ്യപ്പെട്ട് കോണ്‍ഗ്രസ് തൃശൂർ, അയ്യന്തോൾ ബ്ലോക്ക് കമ്മിറ്റികളുടെ നേതൃത്വത്തിൽ നടന്ന പ്രതിഷേധപ്രകടനവും സംഗമവും ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ഫ്രാൻസിസ് ചാലിശേരി അധ്യക്ഷത വഹിച്ചു. നേതാക്കളായ എം.പി. വിൻസെന്‍റ്, ടി.വി. ചന്ദ്രമോഹൻ, സുനിൽ അന്തിക്കാട്, എ. പ്രസാദ്, ജോണ്‍ ഡാനിയൽ, കെ.ബി. ശശികുമാർ, ഐ.പി. പോൾ, രാജൻ പല്ലൻ എന്നിവർ പ്രസംഗിച്ചു.

ബാഗില്ലാതെ സ്കൂളിലേക്ക്; മാതൃകയായി ഡോ. രാജു ഡേവിസ് ഇന്‍റർനാഷണൽ സ്കൂൾ

തൃശൂർ: പുതിയ അധ്യയനവർഷത്തിൽ കൈയുംവീശി സ്കൂളിലേക്ക്, കൈയും വീശി വീട്ടിലേക്ക് എന്ന ആശയം പ്രാവർത്തികമാക്കി മാള ഡോ. രാജു ഡേവിസ് ഇന്‍റർനാഷണൽ സ്കൂൾ. പ്രീപ്രൈമറി മുതൽ നാലാംക്ലാസ്‌വരെ കുട്ടികൾക്ക് ഇനി ബാഗിന്‍റെ ഭാരമില്ലാതെ സ്കൂളിലെത്താം. നാലാംക്ലാസ് വരെയുള്ള വിദ്യാർഥികൾക്കു ഹോംവർക്ക് പൂർണമായും ഒഴിവാക്കി. ക്ലാസിലെടുക്കുന്ന പാഠഭാഗങ്ങൾ സ്കൂളിൽവച്ചുതന്നെ ഹൃദിസ്ഥമാക്കുന്ന തരത്തിലാണു ടൈംടേബിൾ. പ്രഭാതഭക്ഷണം, ഉച്ചഭക്ഷണം, വൈകീട്ടത്തെ ലഘുഭക്ഷണം എന്നിവ സ്കൂളിൽനിന്നു നൽകും. ജങ്ക് ഫുഡുകളും ബേക്കറി പലഹാരങ്ങളും അനുവദിക്കില്ല. സ്കൂളിലെ ഫിൽട്ടർ പ്ലാന്‍റിൽ ശുദ്ധീകരിച്ച കുടിവെള്ളമാണു നൽകുന്നത്. ദിവസേന ഒരുമണിക്കൂർ കളികൾക്കായി നീക്കിവച്ചിട്ടുണ്ട്. എഐ റോബോട്ടിക് ക്ലാസുകൾ, ബ്രിട്ടീഷ് അധ്യാപകരുടെ നേതൃത്വത്തിൽ ആക്സന്‍റ് ട്രെയിനിംഗ്, സ്കേറ്റിംഗ്, സ്വിമ്മിംഗ് തുടങ്ങി ഇരുപതോളം കായിക ഇനങ്ങളിൽ പരിശീലനം നൽകുന്നുണ്ട്. പത്രസമ്മേളനത്തിൽ ചെയർമാൻ ഡോ. രാജു ഡേവിസ് പെരേപ്പാടൻ, പ്രിൻസിപ്പൽ ഇ.ടി. ലത, പ്രൈമറി വൈസ് പ്രിൻസിപ്പൽ ജി.ആർ. രജനി എന്നിവർ പങ്കെടുത്തു.

ഗതാഗതക്കുരുക്ക്: ടോൾ നിർത്തണമെന്ന ഇടക്കാലഹർജി നാളെ വാദത്തിനെടുക്കും

തൃശൂർ: അടിപ്പാതനിർമാണം നടക്കുന്നതിനാൽ രൂക്ഷമായ ഗതാഗതക്കുരുക്കുകാരണം ടോൾ നിർത്തിവയ്ക്കണമെന്ന് ആവശ്യപ്പെട്ട് ഫയൽചെയ്ത ഇടക്കാലഹർജി നാളെ വാദത്തിനെടുക്കും. ടോൾപിരിവിനെതിരേ കെപിസിസി സെക്രട്ടറി അഡ്വ. ഷാജി കോടങ്കണ്ടത്തിന്‍റെ ഹർജി ഹൈക്കോടതി പരിഗണനയിലിരിക്കെയാണ് ഇടക്കാലഹർജി നൽകിയത്. നിർമാണത്തിനു ചെലവായതിനെക്കാൾ കൂടുതൽ തുക ടോൾ പിരിച്ചതിനാൽ കരാർകമ്പനിക്ക് അമിതലാഭം ലഭിച്ചിട്ടുള്ളതിനാൽ ടോൾ നിർത്തണമെന്നും ടോൾപിരിവുകാലാവധി 2026ൽനിന്ന് 2028 ലേക്കു നീട്ടിക്കൊടുത്ത ഉത്തരവ് റദ്ദാക്കണമെന്നും കരാർപ്രകാരമുള്ള പണികൾ നടത്താത്തതിനാൽ ടോൾപിരിവ് നിർത്തണമെന്നും ആവശ്യപ്പെട്ടാണു ഷാജി കോടങ്കണ്ടത്ത് ഹൈക്കോടതിയിൽ ഹർജി നല്കിയിട്ടുള്ളത്. ഹർജിയിൽ ഹൈക്കോടതി ടോൾകമ്പനിയോടും ദേശീയപാത അഥോറിറ്റിയോടും ടോൾകമ്പനിക്കു ചെലവായ സംഖ്യയും ഇതുവരെ പിരിച്ചെടുത്ത ടോളിന്‍റെ കണക്കും അറ്റകുറ്റപ്പണിക്കു ചെലവായ സംഖ്യയും ടോൾനടത്തിപ്പിനു ചെലവായ സംഖ്യയും ന്യായമായ ലാഭവും കാണിക്കുന്ന രേഖകൾ ഹാജരാക്കാൻ നിർദേശിച്ചിരുന്നു. ദേശീയപാത അഥോറിറ്റി ടോൾകമ്പനിയെ ന്യായീകരിച്ചു മറുപടിയും ബോധിപ്പിച്ചു. തുടർന്നു കഴിഞ്ഞയാഴ്ച ചീഫ് ജസ്റ്റീസ് കേസ് വാദത്തിനെടുത്തിരുന്നു. ഇതിനിടെ ഇടക്കാലഹർജി ബോധിപ്പിച്ചപ്പോൾ കേസിൽ മുന്പു വാദംകേട്ട ജസ്റ്റീസ് മുഹമ്മദ് മുസ്താക്കിന്‍റെ ബെഞ്ചിൽ വാദംകേൾക്കാൻ നിർദേശിക്കുകയായിരുന്നു. ഇതിന്‍റെ അടിസ്ഥാനത്തിലാണ് ഇടക്കാല ഹർജി നാളെ പരിഗണിക്കുക.

ഒരു രാജ്യം ഒരു തെരഞ്ഞെടുപ്പ് സാന്പത്തികഭദ്രതയ്ക്ക് അനിവാര്യം: സുരേഷ് ഗോപി

തൃശൂർ: രാജ്യത്തിന്‍റെ സാന്പത്തികഭദ്രത ഉറപ്പുവരുത്തുന്നതിനും മനുഷ്യാധ്വാനത്തിന്‍റെ ദുർവ്യയം തടയുന്നതിനും ഒരു രാജ്യം ഒരു തെരഞ്ഞെടുപ്പ് അനിവാര്യമാണെന്നു കേന്ദ്രമന്ത്രി സുരേഷ്ഗോപി. രാജ്യത്തു മൂന്നുമാസം കൂടുന്പോൾ തെരഞ്ഞെടുപ്പ് നടക്കുന്ന സാഹചര്യമാണു നിലവിലുള്ളത്. ഇത് ഇന്ത്യയുടെ സാന്പത്തിക അടിത്തറ തകർക്കുകയാണ്. ഒരു രാജ്യം ഒരു തെരഞ്ഞെടുപ്പ് എന്ന വിഷയത്തിൽ തൃശൂരിൽ നടന്ന സെമിനാറിൽ പ്രസംഗിക്കുകയായിരുന്നു മന്ത്രി. ബിജെപി സിറ്റി ജില്ലാ പ്രസിഡന്‍റ് ജസ്റ്റിൻ ജേക്കബ് അധ്യക്ഷത വഹിച്ചു. കേന്ദ്ര വാണിജ്യവ്യവസായമന്ത്രാലയം ഔദ്യോഗികഭാഷാവിഭാഗം അംഗം അഡ്വ. വി.പി. ശ്രീപദ്മനാഭൻ വിഷയാവതരണം നടത്തി. റിട്ട. ഡിജിപി ജേക്കബ് തോമസ്, അഡ്വ. രവികുമാർ ഉപ്പത്ത്, അഡ്വ. കെ.ആർ. ഹരി, എ. നാഗേഷ്, എം.വി. ഗോപകുമാർ, അഡ്വ. കെ.കെ. അനീഷ് കുമാർ, രഘുനാഥ് സി. മേനോൻ എന്നിവർ പ്രസംഗിച്ചു. പദ്മശ്രീ ജേതാവ് ഐ.എം. വിജയനെ ചടങ്ങിൽ ആദരിച്ചു.

വയോധികനെ മരിച്ചനിലയിൽ കണ്ടെത്തി

കൊടുങ്ങല്ലൂർ: പുല്ലൂറ്റ് പന്തീരാം പാലയൻ വയോധികനെ പുഴയോരത്ത് മരിച്ചനിലയിൽ കണ്ടെത്തി. നാലുമാക്കൽ സുധാകരൻ(70)നെയാണ് ഇന്നലെ വൈകീട്ട് മുരിങ്ങാത്തുരുത്തിൽ മരിച്ചനിലയിൽ കണ്ടെത്തിയത്. കഴിഞ്ഞ ഒരാഴ്ചയായി മുരിങ്ങാത്തുരുത്തിലേക്ക് ജോലിക്കാരെ വഞ്ചിയിൽ കൊണ്ടുവിടാറുണ്ടായിരുന്നു. ഭാര്യ: ചന്ദ്രിക. മക്കൾ: ബിനിൽ, അനിൽ.

പതിനാറുകാരൻ മരിച്ചനിലയിൽ

ചെന്ത്രാപ്പിനി: എടത്തിരുത്തിയിൽ പതിനാറ് വയസുകാരനെ മരിച്ചനിലയിൽ കണ്ടെത്തി. എടത്തിരുത്തി മടത്തിക്കുളം ബദരിയ്യ പള്ളിക്കടുത്ത് മൂലംകണ്ണിവീട്ടിൽ സാലിയുടെ മകൻ സഹദ് ആണ് മരിച്ചത്. ഇന്നലെ പുലർച്ചെ ആറരയോടെയാണ് മുറിക്കുള്ളിൽ മരിച്ചനിലയിൽ കണ്ടെത്തിയത്. കയ്പമംഗലം പോലീസ് സ്ഥലത്തെത്തി മേൽനടപടികൾ സ്വീകരിച്ചു, മൃതദേഹം കൊടുങ്ങല്ലൂർ താലൂക്ക് ആശുപത്രിയിലേക്ക് മാറ്റി.

ഉന്നത വിജയം നേടിയവരെ സഹൃദയ കോളജ് അനുമോദിച്ചു

കൊടകര: സാമൂഹ്യബോധവും ഉത്തരവാദിത്വവുമുള്ള ഒരു പുതുതലമുറയായി വിദ്യാര്‍ഥികള്‍ ഉയര്‍ന്നുവരണമെന്ന് സനീഷ്‌കുമാര്‍ ജോസഫ് എംഎല്‍എ അഭിപ്രായപ്പെട്ടു. ഹയര്‍ സെക്കന്‍ഡറി പരീക്ഷയില്‍ ഉന്നതവിജയം നേടിയ വിദ്യാര്‍ഥികള്‍ക്കായി കൊടകര സഹൃദയ കോളജ് ഓഫ് അഡ്വാന്‍സ് സ്റ്റഡീസ് സംഘടിപ്പിച്ച അനുമോദനസമ്മേളനം ഉദ്ഘാടനം ചെയ്യുയായിരുന്നു അദ്ദേഹം. സ്വപ്നസാക്ഷാത്കാരത്തിനായി കഠിനമായി അധ്വാനിക്കണമെന്നും ഉന്നതവിജയം നേടിയവര്‍ ഭാവിയുടെ വാഗ്ദാനങ്ങളാണെന്നും അധ്യക്ഷ പ്രസംഗത്തില്‍ ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍ പറഞ്ഞു. ജില്ലയില്‍ പ്ലസ്ടു പരീക്ഷയില്‍ നൂറുശതമാനം വിജയം നേടിയ സ്‌കൂളുകളെയും ചടങ്ങില്‍ അനുമോദിച്ചു. മോണ്‍. വില്‍സണ്‍ ഈരത്തറ, സഹൃദയ കോളജ് എക്‌സിക്യൂട്ടീവ് ഡയറക്ടര്‍ റവ.ഡോ. ഡേവിസ് ചെങ്ങിനിയാടൻ, പ്രിന്‍സിപ്പല്‍ ഡോ. കെ. എൽ. ജോയ്, വൈസ് പ്രിന്‍സിപ്പല്‍ ഡോ. കെ. കരുണ, ഫിനാന്‍സ് ഓഫീസര്‍ ഫാ. സിബിന്‍ വാഴപ്പിള്ളി, ഡീന്‍ ഓഫ് ഇന്‍റര്‍നാഷണല്‍ അഫയേഴ്‌സ് പ്രഫ. വി.ജി. തോമസ്, പ്രോഗ്രാം കണ്‍വീനര്‍ ആശ സുധീഷ് എന്നിവര്‍ പ്രസംഗിച്ചു. തുടര്‍ന്ന് പി.എല്‍. ജോമിയുടെ നേതൃത്വത്തില്‍ കരിയര്‍ ഗൈഡന്‍സ് ക്ലാസും വിദ്യാര്‍ഥികളുടെ കലാപരിപാടികളും ഉണ്ടായി.

പോട്ട ചെറുപുഷ്പം ദേവാലയത്തിൽ വയോജനവാർഷികം

പോട്ട : ചെറുപുഷ്പം ദേവാലയത്തിൽ സെന്‍റ് ജോസഫ് വയോജനകൂട്ടായ്മയുടെ 22-ാം വാർഷികം ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ ഉദ്ഘാടനം ചെയ്തു. വികാരി ഫാ. ടോം മാളിയേക്കൽ അധ്യക്ഷതവഹിച്ചു. അസി. വികാരി ഫാ.റൈസൻ തട്ടിൽ, ഫാ. ജോസ് വെതമറ്റിൽ, തോമസ് മേലേപ്പുറം, ജോസ് കോക്കാടൻ എന്നിവർ പ്രസംഗിച്ചു. സെക്രട്ടറി ജോർജ് കോക്കാടൻ റിപ്പോർട്ടും പൗലോസ് പൊട്ടത്ത്പറമ്പിൽ കണക്കും അവതരിപ്പിച്ചു. വൈസ് പ്രസിഡന്‍റ്് ലൂയിസ് മേലേപ്പുറം സ്വാഗതവും പ്രസിഡന്‍റ്് ആന്‍റണി മേലേപ്പുറം നന്ദിയും പറഞ്ഞു.

കൊരട്ടി സിഗ്നൽ ജംഗ്ഷൻ വെള്ളക്കെട്ടിൽ

കൊരട്ടി: ദേശീയപാത വികസനത്തിന്‍റെ ഭാഗമായി കൊരട്ടി മേഖലയിൽ നിർമിച്ച കാനകളുടെ അശാസ്ത്രീയതമൂലം ജംഗ്ഷൻ വെള്ളക്കെട്ടിന്‍റെ പിടിയിൽ. കൊരട്ടിയുടെ വടക്കു - കിഴക്കൻ മേഖലകളിൽനിന്നും ഒഴുകിയെത്തുന്ന വെള്ളമാണ് സിഗ്നൽ ജംഗ്ഷനിൽ ദേശീയപാതയിൽനിന്നും നാലുകെട്ടിലേക്കുള്ള പ്രവേശന കവാടത്തിൽ അടിഞ്ഞുകൂടുന്നത്. ഓട്ടോറിക്ഷ സ്റ്റാൻഡ്, കച്ചവടസ്ഥാപനങ്ങൾ, പഞ്ചായത്തിന്‍റെ മേൽനോട്ടത്തിൽ പ്രവർത്തിക്കുന്ന ടേക്ക് എ ബ്രേക്ക് തുടങ്ങിയവയെല്ലാം വെള്ളക്കെട്ടിന്‍റെ പിടിയിലാണ്. കച്ചവടസ്ഥാപനങ്ങളിൽ പലതും അടച്ചുപൂട്ടൽ ഭീഷണിയിലാണ്. വെള്ളക്കെട്ടിനെ അവഗണിച്ച് സാധനങ്ങൾ വാങ്ങാൻ ആരാണ് കടയിലേക്ക് എത്തുകയെന്ന ചോദ്യമാണ് വ്യാപാരികൾ ഉന്നയിക്കുന്നത്. ഇരുചക്രവാഹനങ്ങൾ വെള്ളത്തിലൂടെ കടന്നു പോകുമ്പോൾ എൻജിൻ ഓഫായിപ്പോകുന്ന കാഴ്ചകളും കാണാം. മുരിങ്ങൂരിലും ചിറങ്ങരയിലും നടക്കുന്ന നിർമാണപ്രവൃത്തികൾ വളരെ മന്ദഗതിയിലാണ് നടക്കുന്നത്. തൊഴിലാളികൾ ഇല്ലാത്തതാണ് കാരണം. തീരദേശത്ത് വീടുകൾ വെള്ളത്തിലായി കയ്പമംഗലം: തോരാമഴയിൽ തീരദേശത്ത് നിരവധി വീടുകൾ വെള്ളത്തിലായി. എടത്തിരുത്തി, കയ്പമംഗലം പഞ്ചായത്തുകളിലാണ് വെള്ളക്കെട്ട് രൂക്ഷമായിട്ടുള്ളത്. പ്രധാന തോടുകൾ കടന്നു പോകുന്ന പ്രദേശത്തെ വീടുകളാണ് വെള്ളത്തിലായിട്ടുള്ളത്. എടത്തിരുത്തി പതിനഞ്ചാം വാർഡ് ചെന്ത്രാപ്പിന്നി ബൈപ്പാസിന് സമീപവും, പപ്പടം നഗറിലും നിരവധി വീടുകളിൽ വെള്ളം കയറി. പലരും ബന്ധുവീടുകളിലേക്കും മറ്റും താമസം മാറിയിരിക്കുകയാണ്. ദേശീയ പാത നിർമാണത്തേതുടർന്ന് വെള്ളം ഒഴുകി പോകുന്ന തോടുകൾ നികത്തിയതും കൂടുതൽ വെള്ളക്കെട്ടിന് കാരണമായി. വീട്ടുപറമ്പുകളിലേക്ക് തോടുകൾ കവിഞ്ഞൊഴുകി അമ്പതോളം വീടുകളിൽ വെള്ളക്കെട്ട് രൂക്ഷമായിരിക്കുകകാണ്. നിരവധി സ്ഥലത്ത് കൃഷിനാശവും ഉണ്ടായിട്ടുണ്ട്. കയ്പമംഗലം പഞ്ചായത്തിലും വെള്ളക്കെട്ട് ശക്തമാണ്. രണ്ടാം വാർഡ് കൂരിക്കുഴി സലഫി വടക്ക് ഭാഗത്താണ് വെള്ളക്കെട്ട് ഏറെയുള്ളത്. ഈ ഭാഗത്ത് നാല്പതോളം കുടുംബങ്ങൾ വെള്ളക്കെട്ടിലാണ്. ചില വീടുകളിൽ വെള്ളം കയറിയിട്ടുണ്ട്. ഇവരെ ദുരിതാശ്വാസ ക്യാമ്പിലേക്ക് മാറ്റി താമസിപ്പിക്കാനുള്ള നടപടികൾ ആരംഭിച്ചതായി പഞ്ചായത്ത് പ്രസിഡന്‍റ് ശോഭന രവി, വാർഡ് മെമ്പർ പി.എം.എസ് ആബിദീൻ എന്നിവർ പറഞ്ഞു. കാളമുറി കിഴക്ക് വിളക്കുപറമ്പ്, തൈവെപ്പ്, പള്ളിത്താനം, ഗ്രാമ ലക്ഷ്മി പ്രദേശത്തും വെള്ളക്കെട്ട് രൂക്ഷമാണ്. വൈകീട്ടോടെ കൂരിക്കുഴി ബാബുൽഉലും മദ്രസ, ആർസിയുപി സ്കൂൾ എന്നിവിടങ്ങളിൽ ക്യാമ്പ് തുടങ്ങാനുള്ള ഒരുക്കത്തിലാണ് അധികൃതർ. കോടാലിപ്പാടത്തെ ഞാറ്റടികള്‍ മുങ്ങി കോടാലി: തിമിര്‍ത്തുപെയ്യുന്ന മഴ മറ്റത്തൂരിലെ കോടാലി പാടശേഖരത്തെ വെള്ളത്തിനടിയിലാക്കി. വെള്ളിക്കുളം വലിയതോട് കവിഞ്ഞൊഴുകിയതിനെ തുടര്‍ന്നാണ് കോടാലി പാടശേഖരം മുങ്ങിയത്. വിരിപ്പൂകൃഷിയിറക്കാനായി പാടത്ത് തയ്യാറാക്കിയ ഞാറ്റടികള്‍ വെള്ളത്തില്‍ മുങ്ങിക്കിടക്കുകയാണ്. അടുത്താഴ്ച ഞാറുവലിച്ച് നടീല്‍ നടത്താനൊരുങ്ങിയിരുന്ന കര്‍ഷകര്‍ക്ക് ഞാറ്റടി വെള്ളത്തില്‍ മുങ്ങിയത് തിരിച്ചടിയായി. മഴ തുടര്‍ന്നാല്‍ ഞാറ്റടി നശിക്കുമെന്ന ആശങ്കയിലാണ് കര്‍ഷകര്‍. ഇത്തവണ കോടാലി പാടശേഖരത്തിലെ പകുതിയോളം നിലത്തില്‍ ഞാറുനടാനാണ് കര്‍ഷകരുടെ തീരുമാനം. നടീല്‍ യന്ത്രത്തിന്‍റെ സഹായത്തോടെ ഒറ്റഞാര്‍ നടാനായാണ് ഞാറ്റടികള്‍ ഒരുക്കിയിരുന്നത്.

സർക്കാരിലേക്ക് തുക അടയ്ക്കേണ്ടതിൽ സാവകാശം ആവശ്യപ്പെട്ട് നഗരസഭ

ചാലക്കുടി: നഗരസഭ ഇൻഡോർ സ്റ്റേഡിയം നിർമാണത്തിനായി ഭൂമി ഏറ്റെടുത്തതിൽ കോടതി വിധിപ്രകാരം സ്ഥലമുടമകൾക്ക് നൽകാനുണ്ടായിരുന്ന 27 കോടി രൂപ സർക്കാരിന്‍റെ ലാഭവിഹിതത്തിൽ നിന്നും സിയാൽ അടച്ചതിനെ തുടർന്ന് ഈ തുക 35 ലക്ഷം രൂപ വീതം മാസ ഗഡുക്കളായി നഗരസഭ അടക്കണമെന്ന സർക്കാർ ഉത്തരവിനെ തുടർന്ന് 20 ലക്ഷം രൂപ വീതമുള്ള മാസഗഡുക്കളായി അടയ്ക്കാൻ സാവകാശം അനുവദിക്കണമെന്നും പലിശ, ഫൈൻ എന്നിവ ഒഴിവാക്കണമെന്നും കൗൺസിൽ സർക്കാരിനോട് ആവശ്യപ്പെട്ടു. ഭൂമി ഏറ്റെടുത്ത വകയിൽ കോടതി വിധിപ്രകാരം 45 കോടി രൂപയാണ് നൽകേണ്ടി വരുന്നത്. ഇതിൽ 18 കോടി രൂപ നഗരസഭ നൽകിയിരുന്നു. ബാക്കി വന്ന 27 കോടി രൂപയാണ് സർക്കാരിന് ഉടമകൾക്ക് നൽകേണ്ടി വന്നത്.ഈ തുക 70 ഗഡുക്കളായി നഗരസഭയുടെ തനത് ഫണ്ടിൽ നിന്നും സർക്കാരിലേക്ക് അടയ്ക്കാനാണ് ആദ്യം ഉത്തരവായത്. ഇത്രയും തുക തനത് ഫണ്ടിൽ നിന്നും മാസ ഗഡുക്കളായി അടയ്ക്കുന്നത് നഗരസഭയുടെ വികസന പ്രവർത്തനങ്ങളെ ബാധിക്കുമെന്നും, പദ്ധതി വിഹിതത്തിൽ നിന്നും തുക അടയ്ക്കാൻ അനുവാദം നൽകണമെന്നും നേരത്തേ കൗൺസിൽ ആവശ്യപെട്ടതിനെ തുടർന്ന് ഇതിന് അനുമതി ലഭിച്ചിരുന്നു. എന്നാൽ മാസഗഡു 35 ലക്ഷം എന്നുള്ളത് 20 ലക്ഷം രൂപയായി കുറച്ചു നൽകണമെന്നും പലിശയും ഫൈനും ഒഴിവാക്കി നൽകണമെന്നുമാണ് ഇന്ന് കൗൺസിൽ ആവശ്യപ്പെട്ടിട്ടുള്ളത്. നിലവിൽ സർക്കാർ ഉത്തരവ് പ്രകാരം ആദ്യ ഗഡു 35 ലക്ഷം രൂപ ചെയർപേഴ്സന്‍റെ മുൻകൂർ അനുമതിയോടെ നഗരസഭ അടച്ചിട്ടുണ്ട്. സാമൂഹ്യ സുരക്ഷാ പെൻഷൻ അപേക്ഷകരായ 101 ഗുണഭോക്താക്കൾക്ക് പുതുതായി പെൻഷൻ അനുവദിക്കുവാൻ കൗൺസിൽ തീരുമാനിച്ചു.ചെയർപേഴ്സൺ ഷിബു വാലപ്പൻ കൗൺസിൽ യോദത്തിന് അധ്യക്ഷത വഹിച്ചു.

വിദ്യാഭ്യാസ, സാമൂഹ്യ രംഗങ്ങളിൽ ദീപികയ്ക്കു മഹത്തായ പാരമ്പര്യം: സനീഷ്കുമാർ ജോസഫ്

ചാലക്കുടി: വിദ്യാഭ്യാസ സാമൂഹ്യരംഗങ്ങളിൽ മികച്ച നേതൃത്വം കൊടുത്ത മഹത്തായ പാരമ്പര്യമാണ് ദീപികയ്ക്കുള്ളതെന്നു സനീഷ് കുമാർ ജോസഫ് എംഎൽഎ. ചാലക്കുടി മേഖലയിൽനിന്ന് എസ്എസ്എൽസി, ഹയർ സെക്കൻഡറി പരീക്ഷകളിൽ ഫുൾ എ പ്ലസ് നേടിയ വിദ്യാർഥികളെയും ഉന്നതവിജയം നേടിയ വിദ്യാലയങ്ങളെയും ആദരിക്കുന്ന ദീപിക ആദരം 2025 ഉദ്ഘാടനംചെയ്ത് പ്രസംഗിക്കുകയായിരുന്നു എംഎൽഎ. വലിയ കഠിനാധ്വാനത്തിന്‍റെയും പരിശ്രമത്തിന്‍റെയും ഫലമാണ് മികച്ച വിജയമെന്നും നമ്മുടെ നാടിനെ മുൻപോട്ടു നയിക്കേണ്ടവരാണ് നിങ്ങൾ ഓരോരുത്തരുമെന്നും എംഎൽഎ കൂട്ടിച്ചേർത്തു. സേക്രഡ് ഹാർട്ട് കോളജിൽ നടന്ന ചടങ്ങിൽ പ്രിൻസിപ്പൽ സിസ്റ്റർ ഡോ. ഐറിൻ അധ്യക്ഷത വഹിച്ചു. രാഷ്ട്രദീപിക ലിമിറ്റഡ് ഡയറക്ടർ ഇട്ടൂപ്പ് കോനൂപ്പറമ്പൻ, എഡ്യുപോർട്ട് ഡയറക്ടർ ജോജു തരകൻ, ദീപിക റസിഡന്‍റ് മാനേജർ ഫാ. ജിയോ തെക്കിനിയത്ത് എന്നിവർ പ്രസംഗിച്ചു. ദീപിക കോഓർഡിനേറ്റിംഗ് എഡിറ്റർ ഫാ. റിന്‍റോ പയ്യപ്പിള്ളി സ്വാഗതവും ഏരിയാ മാനേജർ ആൻസ് ആന്‍റോ നന്ദിയും പറഞ്ഞു. എഡ്യുപോർട്ട് ഫാക്കൽറ്റി ബിലാൽ മുഹസിൻ ക്ലാസ് നയിച്ചു.

പെരിഞ്ചേരി തിരുഹൃദയ തിരുനാളിനു കൊടിയേറി

പെരിഞ്ചേരി: തിരുഹൃദയ തീർഥാടന കേന്ദ്രത്തിൽ ജൂണ്‍ 6, 7,8 തീയതികളിൽ ആഘോഷിക്കുന്ന ഈശോയുടെ തിരുഹൃദയ തിരുനാളിന് അതിരൂപത വികാരി ജനറാൾ മോണ്‍. ജെയ്സണ്‍ കൂനംപ്ലാക്കൽ കൊടിയേറ്റി. നവനാൾ തിരുക്കർമങ്ങൾക്കും തുടക്കമായി. തിരുനാൾദിനം വരെ എല്ലാ ദിവസങ്ങളിലും രാവിലെ ആറിനും വൈകീട്ട് ആറിനും ലദീഞ്ഞ്, പാട്ടുകുർബാന, നൊവേന എന്നിവ ഉണ്ടായിരിക്കും. ആറിനു മാസാദ്യവെള്ളി തിരുഹൃദയ ഊട്ടുതിരുനാളും തീർഥാടനകേന്ദ്ര പ്രഖ്യാപനത്തിന്‍റെ പതിനഞ്ചാം വാർഷികവും ആഘോഷിക്കും. രാവിലെ ആറിനും 7.15 നും വൈകീട്ട് ആറിനും പാട്ടുകുർബാന, ലദീഞ്ഞ്, നൊവേന, രാവിലെ 10 ന് ആഘോഷമായ പാട്ടുകുർബാന, സന്ദേശം, ആരാധന, നൊവേന, ദിവ്യകാരുണ്യപ്രദക്ഷിണം എന്നിവയുണ്ടാകും. തിരുക്കർമങ്ങൾക്ക് ഫാ. അലക് സാണ്ടർ കൂരിക്കാട്ടിൽ മുഖ്യകാർമികത്വം വഹിക്കും. ഉച്ചയ്ക്കു 12.30 മുതൽ തിരുഹൃദയ ഊട്ടുവിതരണം ആരംഭിക്കും. ഏഴിനു വൈകീട്ട് ആറിന് ആഘോഷമായ പാട്ടുകുർബാന, ലദീഞ്ഞ്, നൊവേന, രൂപക്കൂട് തുറക്കൽ ശുശ്രൂഷ എന്നിവയ്ക്കു ഫാ. ജീജോ വള്ളൂപ്പാറ മുഖ്യകാർമികനാകും. തുടർന്നു വർണമഴ, തിരുനടയിൽ വാദ്യമേളവും നടക്കും. എട്ടിനു രാവിലെ 10 ന് ആഘോ ഷമായ പാട്ടുകുർബാന, ലദീഞ്ഞ്, നൊവേന എന്നിവയ്ക്കു ഫാ. ജോബ് വടക്കൻ മുഖ്യകാർമികത്വം വഹിക്കും. ഡോ. സെബാസ്റ്റ്യൻ ചാലയ്ക്കൽ സന്ദേശം നൽകും. തുടർന്ന് പ്രദക്ഷിണം നടക്കും. 15 നാണ് എട്ടാമിടം. തിരുനാൾദിനത്തിൽ തീർഥാടനകേന്ദ്രത്തിന്‍റെ ആഭിമുഖ്യത്തിൽ തൃശൂർ ജൂബിലി മെഡിക്കൽ കോളജിൽ സൗജന്യ ഡയാലിസിസ് നടത്തുമെന്നും റെക്ടർ റവ. ഡോ. ജോബ് പടയാട്ടിൽ, അസിസ്റ്റന്‍റ് വികാരി ഫാ. ജോണ്‍ പേരാമംഗലം എന്നിവർ അറിയിച്ചു.

പ്രായപൂർത്തിയാകാത്ത കുട്ടികൾക്ക് നിരോധിത പുകയില ഉത്പന്നങ്ങൾ നൽകിയ നാലുപേർ അറസ്റ്റിൽ

അന്തിക്കാട്: പ്രായപൂർത്തിയാകാത്ത കുട്ടികൾക്ക് നിരോധിത പുകയില ഉത്പന്നങ്ങൾ നൽകിയതിന് അന്തിക്കാട് പോലീസ് നടത്തിയ പരിശോധനയിൽ താന്ന്യത്ത് മൂന്നുപേർ അറസ്റ്റിൽ. താന്ന്യം സ്വദേശികളായ ചക്കിത്തറ വീട്ടിൽ കിനുരാജ് (33), പറമ്പിൽ വീട്ടിൽ വഞ്ചി രഞ്ജു എന്ന് വിളിക്കുന്ന രഞ്ജിത്ത് (49), കിഴുപ്പിള്ളിക്കര സ്വദേശി കല്ലിങ്കൽ വീട്ടിൽ സൽമാൻ (29) എന്നിവരെയാണ് അന്തിക്കാട് പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. താന്ന്യം തൊട്ടുമണ്ട കള്ളുഷാപ്പിന് സമീപമുളള പാലത്തിൽവച്ച് കുട്ടികൾക്ക് ലഹരി വസ്തുക്കൾ നൽകുന്നതിനിടെ പോലീസിനെക്കണ്ട് ഓടിപ്പോയ ഇവരെ പോലീസ് പിന്തുടർന്ന് പിടികൂടുകയായിരുന്നു. പ്രതികളുടെ മോട്ടോർസൈക്കിളുകളിൽ സൂക്ഷിച്ച നിരോധിത പുകയില ഉത്പന്നങ്ങളും കഞ്ചാവ് ബീഡി വലിക്കുന്നതിനുള്ള ഉപകരണങ്ങൾ, ഒസിബി പേപ്പർ പാക്കറ്റ് എന്നിവ കണ്ടെടുത്തു. നാട്ടികയിൽ യുവാവ് അറസ്റ്റിൽ തൃപ്രയാർ: നാട്ടിക ജംഗ്ഷനിലെ സ്കൂളിന് സമീപം റോഡരികിലുള്ള മുറുക്കാൻ കടയിലൂ ടെ പ്രായപൂർത്തിയാകാത്ത കുട്ടികൾക്ക് പുകയില ഉത്പന്നവില്പന നടത്തിയ യുവാവ് അറസ്റ്റിൽ. ഉത്തർപ്രദേശ് സ്വദേശി രവി (25) യെയാണ് വലപ്പാട് പോലീസ് അറസ്റ്റ് ചെയ്തത്. പോലീസ് ജീപ്പുകണ്ട് കുട്ടികൾ ഓടിപ്പോകുന്നത് ശ്രദ്ധയിൽപ്പെട്ട പോലീസ് നടത്തിയ പരിശോധനയിലാണ് മുറുക്കാൻ കടയിൽ നിരോധിത പുകയില ഉത്പ്പന്നങ്ങൾ വിൽപ്പന നടത്തുന്നതായി കണ്ടെത്തിയത്.

മഴ: നാശം തുടരുന്നു

ചേർപ്പ്: മഴമൂലം ചേർപ്പ് മേഖലയിൽ വ്യാപകനാശം. പ്രദേശത്തെ എട്ടുമന, പനംകുളം മിത്രാനന്ദപുരം പ്രദേശങ്ങളിൽ വീടുകൾ വെള്ളക്കെട്ട് ഭീഷണിയിലായി. ഹെർബർട്ട് കനാലിനു സമീപം റോഡരികിൽ നിന്നിരുന്ന മരം കടപുഴകി വീണു. പൂത്തറയ്ക്കൽ മൂത്താരൻ സുബ്രൻന്‍റെ വീട് തകർന്നു. പല്ലിശേരി കണ്ഠേശ്വരം ക്ഷേത്രം മഴവെള്ളം കയറിയ നിലയിലായി. പാറളം പഞ്ചായത്തിലെ താണിക്കുനയം നെടുപുഴ റോഡിൽ കാറ്റിലും മഴയിലും കൂറ്റൻ തണൽ മരം കടപുഴകി വീണു. പള്ളിപ്പടവിൽ പതിനാല് ഏക്കറിൽ നടത്തിയ തണ്ണീർമത്തൻ കൃഷി വിളവെടുപ്പു പൂർത്തിയാകുംമുന്പേ മഴമൂലം അഴുകി നശിച്ച നിലയിലായി. മണ്ണിടിഞ്ഞു മുതുവറ: പുറനാട്ടുകര അടാട്ട് പഞ്ചായത്ത് ഓഫീസിനും പുഴക്കൽ ബ്ലോക്ക് പഞ്ചായത്ത് ഓഫീസിനും പിൻവശത്തായി ജനശക്തി റോഡിൽ ഹണി ഡേയിൽ ഫ്ലാറ്റിന് എതിർവശത്തുള്ള വിലങ്ങൻ കുന്നിനോടു ചേർന്നുകിടക്കുന്ന സ്വകാര്യ വ്യക്തിയുടെ റോഡ് പാർശ്വഭിത്തി നിർമാണം അടക്കമുള്ള പ്രവൃത്തികൾ നടക്കുന്ന സ്ഥലത്താണ് മണ്ണിടിഞ്ഞത്. ആളപായം ഇല്ല.

വളയംകെട്ടിന്‍റെ പേരിലുള്ള കള്ളക്കളി അനുവദിക്കില്ല: യുഡിഎഫ്

പൂവത്തൂർ: താത്കാലിക വളയം കെട്ടിന്‍റെ പേരിൽ ഉദ്യോഗസ്ഥരും കരാറുകാരും ചില രാഷ്ട്രീയക്കാരും ചേർന്നുള്ള കള്ളക്കളിയും അഴിമതിയും ഇനി മണലൂരിൽ അനുവദിക്കില്ലന്ന് മുൻ എംപി. ടി.എൻ. പ്രതാപൻ പറഞ്ഞു. യുഡിഎഫ് മണലൂർ നിയോജക മണ്ഡലം കമ്മിറ്റിയുടെ നേതൃത്വത്തിൽ ഇടിയഞ്ചിറ ഏനാമാവ് റെഗുലേറ്ററുകളുടെ നിർമാണം അട്ടിമറിച്ച്, പ്രദേശവാസികളെയും കർഷകരെയും ദുരിതത്തിലാക്കിയ മണലൂർ എംഎൽഎയുടെ ജനദ്രോഹനയത്തിനെതിരെ പൂവത്തൂരിൽ നടത്തിയ സായാഹ്ന ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഏനാമാവ് ഇടിയഞ്ചിറ റെഗുലേറ്ററുകളുടെ നിർമാണ പ്രവർത്തനത്തിൽ ശ്രദ്ധ ചെലുത്താതെ ഉദ്യോഗസ്ഥരും കരാറുകാരും നിർമ്മാണ അഴിഞ്ഞാട്ടം നടത്തുന്നത് തടയാനാകാതെ നിസ്സഹായനായി നിൽക്കുന്ന എംഎൽഎയായി മുരളി പെരുന്നെല്ലി മാറിയെന്നും പ്രതാപൻ ആരോപിച്ചു. യുഡിഎഫ് കൺവീനർ കെ.കെ. ബാബു അധ്യക്ഷത വഹിച്ചു. മുൻ എംഎൽഎ അനിൽ അക്കര, സിഎംപി സെക്രട്ടറി പി.ആർ.എൻ നമ്പീശൻ, അഡ്വ. മുഹമദ് ഗസാലി, സി.സി. ശ്രീകുമാർ, ആർ.എ. അബ്ദുൾ മനാഫ്, സി.എ. സണ്ണി, സി.ഐ. സെബാസ്റ്റ്യൻ, എൻ.ജെ. ലിയോ, പി.കെ. രാജൻ, സി.എം. നൗഷാദ്, സി.ജെ. സ്റ്റാൻലി എന്നിവർ പ്രസംഗിച്ചു.

ഇടിയഞ്ചിറ റഗുലേറ്ററിന്‍റെ സമീപമുള്ള വളയംകെട്ടുകൾ പൂർണമായി പൊളിച്ചുനീക്കണം

പാവറട്ടി: ശക്തമായ മഴ തുടരുന്ന സാഹചര്യത്തിൽ ഇടിയഞ്ചിറ റഗുലേറ്ററിന്‍റെ സമീപമുള്ള വളയം കെട്ടുകൾ പൂർണമായും പൊളിച്ചുനീക്കണമെന്ന ആവശ്യം ശക്തമായി. റഗുലേറ്ററിന്‍റെ രണ്ടു വശങ്ങളിലുള്ള താത്കാലിക വളയം ബണ്ടുകൾ മൂലമാണ് മുല്ലശേരി കെഎൽഡിസി കനാലിൽ ജലനിരപ്പ് ഉയരുന്നത്. വളയംകെട്ടുകൾ പൂർണമായും പൊളിച്ചു നീക്കാതെ വെള്ളം പുഴയിലേക്കു സുഗമമായി ഒഴുകിപ്പോവുകയില്ല. തിരുനെല്ലൂർ മേഖലയിലും തണ്ണീർ കായൽ പാടശേഖരങ്ങളോടുചേർന്നുള്ള താഴ്ന്ന പ്രദേശങ്ങളിലും ഇപ്പോൾ ജലനിരപ്പ് ഉയർന്നുകൊണ്ടിരിക്കുകയാണ്. ഇനിയും അധികൃതർ അനാസ്ഥ കാട്ടിയാൽ എളവള്ളി, പാവറട്ടി, മുല്ലശേരി പഞ്ചായത്തുകൾ വലിയ പ്രളയത്തിനു സാക്ഷ്യം വഹിക്കേണ്ടിവരുമെന്ന് തീരദേശ സംരക്ഷണസമിതി കൺവീനർ ഷൈജു തിരുനെല്ലൂർ പറഞ്ഞു. വേലിയേറ്റസമയത്ത് കടൽ വെള്ളമെടുക്കാതെയാകുമ്പോൾ കിഴക്കൻ മേഖലകളിൽ പെയ്യുന്ന മഴവെള്ളം ഉൾക്കൊള്ളേണ്ട പെരിങ്ങാട് പുഴയിൽ മണ്ണും ചെളിയും നിറഞ്ഞതും വെള്ളം ഒഴുകിപ്പോകുന്നതിനു തടസമായിട്ടുണ്ട്. ഡാമുകൾ നിറഞ്ഞു കൊണ്ടിരിക്കുകയും കാലവർഷം കൂടുതൽ ശക്തമാകുകയും ചെയ്യുന്ന സാഹചര്യത്തിൽ വെള്ളത്തിന് ഒഴുകിപ്പോകാനുള്ള മാർഗങ്ങൾ തടസപ്പെടുത്തിയുള്ള എല്ലാ നിർമിതികളും എത്രയും പെട്ടെന്ന് നീക്കം ചെയ്യണമെന്ന് തീരദേശ സംരക്ഷണസമിതി നേതാക്കൾ ആവശ്യപ്പെട്ടു. കഴിഞ്ഞവർഷം വാഴാനി ഡാം തുറന്നതിനെത്തുടർന്ന് വടക്കാഞ്ചേരി തൊട്ട് ഇടിയഞ്ചിറവരെയുള്ള എല്ലാ പഞ്ചായത്തുകളിലും വെള്ളപ്പൊക്കം ഉണ്ടായിരുന്നതായും പെരിങ്ങാട് പുഴയിലൂടെ സുഗമമായി വെള്ളം പോകാത്തതാണ് താഴ്ന്ന മേഖലയിൽ കാരണമെന്നും ജില്ലാ ഭരണകൂടം അടിയന്തരമായി ഇടപെടണമെന്നും നാട്ടുകാർ ആവശ്യപ്പെട്ടു.

ദേശീയപാത ഏങ്ങണ്ടിയൂരിലും ചേറ്റുവയിലും കണ്ടെയ്നർ ലോറി, പെട്ടിഓട്ടോ മറിഞ്ഞു

വാടാനപ്പള്ളി: ദേശീയപാത 66 ഏങ്ങണ്ടിയൂരിൽ സർവീസ് റോഡിന്‍റെ സൈഡ് ഇടിഞ്ഞ് കണ്ടെയ് നർ ലോറി മറിഞ്ഞു. സമീപത്ത് റോഡ് പണിക്ക് ഉപയാഗിച്ചിരുന്ന ജെസിബി കൊണ്ട് ലോറിയെ തടഞ്ഞുനിർത്തി. കൊച്ചിയിൽനിന്നും മലപ്പുറത്തേക്ക് ടൈൽസുമായി പോയി രുന്ന കണ്ടെയ്നർ ലോറിയാണ് ഏങ്ങണ്ടിയൂർ ചന്തപ്പടിയിൽ വച്ച് അപകടത്തിൽപ്പെട്ടത്. പിന്നീട് മറ്റൊരു വാഹനത്തിലേക്ക് ടൈ ൽസുകൾ മാറ്റുകയായിരുന്നു. ചേറ്റുവ കടവിൽ പെട്ടി ഓട്ടോ ദേശീയ പാതയിലെ കുഴിയിൽ വീണ് മറിഞ്ഞു. ആമസോൺ ഡെലി വറി വാഹനമാണ് അപകടത്തിൽപ്പെട്ടത്. ഓട്ടോയുടെ മുന്നിലെ ഗ്ലാസ് തകർന്നു. ഏങ്ങണ്ടിയൂരിൽ പലഭാഗങ്ങളിലുമായി വലിയ കുന്നാക്കിയിട്ടിട്ടുള്ള ചെമ്മണ്ണ് വാഹന യാത്രക്കാർക്കും കാൽനടയാത്രക്കാർക്കും ഏറെ ഭീഷണിയാണ്. പല ഭാഗങ്ങളിലും ചെമ്മണ്ണ് ചളിരൂപത്തിലായി വീടുകളിലേക്കും വ്യാപാരസ്ഥാപനങ്ങളിലേക്കും ഒലിച്ചിറങ്ങി പ്രദേശവാസികൾ ഏറെ ദുരിതത്തിലാണ്. മഴ ശക്തമാകുമ്പോൾ പാലിക്കേണ്ടതായ യാതൊരുവിധ നടപടിയും ദേശീയപാത നിർമാണക്കമ്പനിയുടെ ഭാഗത്തുനിന്നും ഉണ്ടായിട്ടില്ല. ദിനംപ്രതി നിരവധി വാഹനങ്ങൾ ആണ് ദേശീയപാതയിൽ അപകടത്തിൽപ്പെടുന്നത്. റോഡ് നിർമാണത്തിനായി കുഴിയെടുത്ത വലിയ കുഴികളിൽ വെള്ളം നിറഞ്ഞ് റോഡിന് അടിയിൽനിന്നും മണ്ണൊലിച്ചുപോയി വാഹനങ്ങള ടക്കം കുഴിയിലേക്ക് മറിയാൻ സാധ്യത ഏറെയാണ്. ദേശീയപാത കരാർ കമ്പനി അടിയന്തരമായി അപകടകരമായ സ്ഥലങ്ങൾ സന്ദർശിച്ച് വാഹന യാത്രക്കാർക്കും കാൽനടയാത്രക്കാർക്കും വേണ്ട സുരക്ഷ ഉറപ്പുവരുത്തണമെന്നും വാഹന യാത്രക്കാർക്ക് ഭയം കൂടാതെ സഞ്ചരിക്കുവാൻവേണ്ട വഴിയൊരുക്കണമെന്നും പൊതുപ്രവർത്തകൻ ലത്തീഫ് കെട്ടുമ്മൽ ആവശ്യപ്പെട്ടു.

കൊമ്പൻ ഗോപീകണ്ണൻ ചരിഞ്ഞു

ഗുരുവായൂർ: ദേവസ്വത്തിന്‍റെ കൊമ്പൻ ഗോപീകണ്ണൻ ചരിഞ്ഞു. ദേവസ്വം രേഖകൾപ്രകാരം 51 വയസാണ് പ്രായം. ഒരസുഖവും ഇല്ലാതിരുന്ന ആന ഇന്നലെ പുലർച്ചെ 4.10ന് കെട്ടുംതറിയിൽ കുഴഞ്ഞുവീഴുകയായിരുന്നു. രണ്ടുമാസത്തോളമായി മദപ്പാടിൽ തളച്ചിരിക്കുകയായിരുന്നു. കഴിഞ്ഞദിവസം ആനയ്ക്കു ഗ്യാസ് കയറിയതു പോലെ വയറിനു ചെറിയ വീക്കം കണ്ടിരുന്നതായി ഡോക്ടർ പറഞ്ഞു. എന്നാൽ പിന്നീട് ആന പിണ്ടം ഇട്ടതായും പറയുന്നു. 2001 സെപ്റ്റംബറിൽ ഗോപു നന്തിലത്താണ് ആനയെ നടയിരുത്തിയത്. ആസാമിൽനിന്നുള്ള ആനയാണെങ്കിലും സൗമ്യനും, ലക്ഷണമൊത്ത കൊമ്പനുമായിരുന്നു. ക്ഷേത്രത്തിലെ ശീവേലി, വിളക്ക് തുടങ്ങിയ ചടങ്ങുകൾക്കു മിക്കദിവസങ്ങളിലും എഴുന്നള്ളിപ്പ് നടത്തിയിരുന്നതു ഗോപീകണ്ണനായിരുന്നു. ആനയോട്ടത്തിലെ താരമായിരുന്ന ഗോപീകണ്ണൻ ഒന്പതുപ്രാവശ്യമാണ് ജേതാവായത്. പിടിയാന നന്ദിനിക്കു പാദരോഗം പിടിപെട്ടസമയത്ത് ഗുരുവായൂർ ഉത്സവത്തിന്‍റെ പള്ളിവേട്ട, ആറാട്ട് ദിവസങ്ങളിൽ ഗോപീകണ്ണൻ തിടമ്പേറ്റി ഓട്ടപ്രദക്ഷിണം നടത്തിയിരുന്നു. സംസ്ഥാനത്തിന്‍റെ വിവിധ ഭാഗങ്ങളിലെ ഉത്സവങ്ങൾക്കും പൂരങ്ങൾക്കും തടമ്പേറ്റിയിരുന്നു. ഇക്കാലത്തിനിടയ്ക്ക് ഒരിക്കൽപ്പോലും അനുസരണക്കേട് കാണിക്കുകയോ പ്രശ്നങ്ങളുണ്ടാക്കുകയോ ചെയ്തിട്ടില്ല. നല്ല ഇണക്കമുള്ള കൊമ്പനായിരുന്നു ഗോപീകണ്ണൻ. ഗൗരവതരമായ ഒരു അസുഖവുമില്ലാതിരുന്ന കൊമ്പൻ ഗോപീകണ്ണന്‍റെ വേർപാടിന്‍റെ വേദനയിലാണ് ആനപ്രേമികളും ദേവസ്വം ആനക്കോട്ടയിലെ ജീവനക്കാരും. ആനയെ കോടനാടെത്തിച്ച് സംസ്കാരം നടത്തി. ഗോപീകണ്ണന്‍റെ വിയോഗത്തോടെ ദേവസ്വത്തിന്‍റെ ആനകളുടെ എണ്ണം 36 ആയി.

തൃശൂർ ലത്തീൻ പള്ളിയിൽ ഊട്ടുതിരുനാൾ പത്തിന്

തൃശൂർ: തിരുഹൃദയ റോമൻ കാത്തലിക് ലത്തീൻ പള്ളിയിൽ വിശുദ്ധ അന്തോണീസിന്‍റെ ഊട്ടുതിരുനാൾ ജൂൺ പത്തിന് ആഘോഷിക്കുമെന്നു വികാരി ഫാ. ആന്‍റണി ചില്ലിട്ടശേരി പത്രസമ്മേളനത്തിൽ പറഞ്ഞു. ഊട്ടുതിരുനാൾ കൊടിയേറ്റം മൂന്നിനു രാവിലെ 10.15നു കോട്ടപ്പുറം രൂപത ബിഷപ് എമരിറ്റസ് ഡോ. ജോസഫ് കാരിക്കശേരി നിർവഹിക്കും. രാവിലെ 6.30, 10.30, വൈകീട്ട് 4.30, രാത്രി ഏഴ് സമയങ്ങളിൽ ദിവ്യബലി, നൊവേന, ആരാധന എന്നിവയുണ്ടാകും. തിരുഹൃദയത്തിരുനാൾ ജൂൺ എട്ടിനു നടക്കും. രാവിലെ 8.30നു ദിവ്യബലിക്കു ഫാ. ജിജൂ ജോർജ് അറക്കത്തറ മുഖ്യകാർമികത്വം വഹിക്കും. ഫാ. ഫ്രാൻസിസ് മോറിസ് ഒഎസ്ജെ വചനപ്രഘോഷണം നടത്തും. രാവിലെ 6.30നും വൈകീട്ട് 5.30നും രാത്രി ഏഴിനും ദിവ്യബലി, നൊവേന. രാവിലെ പത്തിനു നേർച്ചപ്പായസം ആശീർവാദം ഫാ. ജിജു ജോർജ് അറക്കത്തറ നിർവഹിക്കും. പത്തിന് ഊട്ടുതിരുനാൾദിനത്തിൽ രാവിലെ 5.30 മുതൽ രാത്രി ഒന്പതുവരെ തുടർച്ചയായി വിവിധ ഭാഷകളിൽ ദിവ്യബലി, നൊവേന. ആരാധന എന്നിവയുണ്ടാകും. രാവിലെ 6.30നു ഫാ. ബാബു മുട്ടിക്കലും 8.30ന് ഫാ. ജോബി കാട്ടാശേരിയും മുഖ്യകാർമികത്വം വഹിക്കും. രാവിലെ 9.30നു കോട്ടപ്പുറം രൂപത മെത്രാൻ ഡോ. അംബ്രോസ് പുത്തൻവീട്ടിലിനു സ്വീകരണം, തുടർന്ന് ഊട്ടുസദ്യ ആശീർവാദം. രാത്രി പത്തുവരെ ഊട്ടുനേർച്ച ഉണ്ടായിരിക്കും. രാവിലെ 10.30നു തിരുനാൾ ദിവ്യബലി. ‌രണ്ടുലക്ഷംപേർക്കാണ് ഇത്തവണ ഊട്ടുനേർച്ച ഒരുക്കുന്നത്. ഊട്ടുതിരുനാളിനോടനുബന്ധിച്ചു വിവിധ ദിവസങ്ങളിലായി പൂമൂടൽപ്രദക്ഷിണം, വാഹനവെഞ്ചരിപ്പ്, പൊൻനാവുനേർച്ച എന്നിവയുണ്ടാകും. പത്രസമ്മേളനത്തിൽ തിരുനാൾ കമ്മിറ്റി കൺവീനർ ആർ.എസ്. ഷാരോൺ, ജോയിന്‍റ് കൺവീനർ ഡീന ജോൺസൻ, പബ്ലിസിറ്റി കൺവീനർ എബ്രഹാം ബാവലി, കേന്ദ്രസമിതി പ്രസിഡന്‍റ് ബെന്നി ചക്കാലയ്ക്കൽ എന്നിവരും പങ്കെടുത്തു.

മെഗാ ജോബ് ഫെയർ സംഘടിപ്പിച്ചു

തൃശൂർ: അതിരൂപത കെസിവൈഎമ്മും ദീപികയും സംയുക്തമായി ഡോൺ ബോസ്കോ ജോബ് പ്ലേസ്മെന്‍റ് സെല്ലുമായി സഹകരിച്ച് മെഗാ ജോബ് ഫെയർ സംഘടിപ്പിച്ചു. യുവജനങ്ങൾക്ക് സ്വന്തം നാട്ടിൽ തന്നെ ജോലി എന്ന ആശയം മുൻനിർത്തി നടത്തിയ തൊഴിൽമേള ആർച്ച്ബിഷപ് മാർ ആൻഡ്രൂസ് താഴത്ത് ഉദ്ഘാടനംചെയ്തു. കുരിയച്ചിറ സെന്‍റ് ജോസഫ്സ് മോഡൽ ഹയർ സെക്കൻഡറി സ്കൂളിൽ നടന്ന മെഗാ ജോബ് ഫെയറിൽ ടെസ്ല, ആമസോൺ, മുത്തൂറ്റ് ഫിൻകോർപ്, ആദിത്യ ബിർള കാപിറ്റൽ, ഹൈകൺ, ഡാൻ കോർപറേഷൻ തുടങ്ങി ഇന്ത്യയിലെ 32 പ്രമുഖ കമ്പനികൾ പങ്കെടുത്തു. ജില്ലയിലെ വിവിധ പ്രദേശങ്ങളിൽനിന്ന് നൂറുകണക്കിനു യുവജനങ്ങൾ പങ്കെടുത്തു. അതിരൂപത കെസിവൈഎം ഡയറക്ടർ ഫാ. ജിയോ ചെരടായി, അതിരൂപത പ്രസിഡന്‍റ് ജിഷാദ് ജോസ്, ജനറൽ സെക്രട്ടറി മെജോ മോസസ്, വൈസ് പ്രസിഡന്‍റ് സ്നേഹ ബെന്നി, ആനിമേറ്റർ സിസ്റ്റർ ഫ്രാൻസി മരിയ, സെന്‍റ് ജോസഫ്സ് സ്കൂൾ പ്രിൻസിപ്പൽമാരായ ഫാ. ബിജു നന്തിക്കര, ഫാ. ജോൺപോൾ ചെമ്മണ്ണൂർ, സിൻഡിക്കേറ്റ് അംഗം ആഷ്ലിൻ ജെയിംസ്, സെനറ്റ് അംഗങ്ങളായ ഷാരോൺ സൈമൺ, ജുവിൻ ജോസ്, റിൻസി റോയ്, വിവിധ ഫൊറോന യൂണിറ്റ് ഭാരവാഹികൾ, കെസിവൈഎം യൂണിറ്റ് പ്രവർത്തകർ തുടങ്ങിയവർ നേതൃത്വം നൽകി.

വീട്ടില്‍ ഗ്യാസ് സിലിണ്ടര്‍ ചോര്‍ന്നു: രണ്ടുപേര്‍ക്ക് പൊള്ളലേറ്റു

പുതുക്കാട്: കണ്ണമ്പത്തൂരില്‍ വീട്ടില്‍ ഗ്യാസ് സിലിണ്ടര്‍ സര്‍വീസ് ചെയ്യുന്നതിനിടെ ഗ്യാസ് ചോര്‍ന്ന് രണ്ടുപേര്‍ക്ക് പൊള്ളലേറ്റു. കണ്ണംമ്പത്തൂര്‍ പൊന്നാമ്പിടി വീട്ടില്‍ ബിന്ദു, സിലിണ്ടര്‍ സര്‍വീസ് ചെയ്യാനെത്തിയ വട്ടണാത്ര സ്വദേശി കൈനാത്തൂടന്‍ വീട്ടില്‍ അശോകന്‍ എന്നിവര്‍ക്കാണ് പൊള്ളലേറ്റത്. ഗുരുതരമായി പൊള്ളലേറ്റ രണ്ടുപേരെയും തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചയ്ക്ക് രണ്ടുമണിയോടെയാണ് സംഭവം. അടുക്കളയില്‍ സിലിണ്ടര്‍ സര്‍വീസ് ചെയ്യുന്നതിനിടെയാണ് തീപടര്‍ന്നതെന്ന് കരുതുന്നു. വലിയ ശബ്ദത്തില്‍ പൊട്ടിത്തെറി കേട്ടതായും സമീപവാസികള്‍ പറഞ്ഞു. വീടിന്‍റെ ജനല്‍ച്ചില്ലുകള്‍ പൊട്ടുകയും കര്‍ട്ടണുകള്‍ കത്തിയ നിലയിലുമാണ്. അടുക്കളയുടെ സ്ലാബില്‍വച്ചിരുന്ന മൊബൈല്‍ ഫോണ്‍ കത്തിനശിച്ചു. ശുചിമുറിയുടെ വാതിലും ഫാനും തകര്‍ന്നുവീണു. പൊള്ളലേറ്റ ഇരുവരും പുറത്തേക്കിറങ്ങി നിലവിളിച്ചപ്പോഴാണ് സമീപവാസികള്‍ അറിയുന്നത്. ഉടന്‍തന്നെ രണ്ടുപേരെയും നാട്ടുകാര്‍ചേര്‍ന്ന് പുതുക്കാട് താലൂക്ക് ആശുപത്രിയില്‍ എത്തിച്ചശേഷം തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. പുതുക്കാട് പോലീസും ഫയര്‍ഫോഴ്‌സും സ്ഥലത്തെത്തി. ഗ്യാസ് സിലിണ്ടര്‍ ചോരാനിടയായ കാരണം വ്യക്തമല്ലെന്ന് പോലീസ് പറഞ്ഞു.

സിസ്റ്റർ ഡോ. ടി.എൽ. ബീന സെന്‍റ് മേരീസിന്‍റെ പടിയിറങ്ങുന്നു

തൃശൂർ: കാൽനൂറ്റാണ്ടുകാലത്തെ സ്തുത്യർഹസേവനത്തിനുശേഷം പ്രിൻസിപ്പൽ സിസ്റ്റർ ഡോ. ടി.എൽ. ബീന (സിസ്റ്റർ നമിത റോസ്) സെന്‍റ് മേരീസ് കോളജിന്‍റെ പടിയിറങ്ങുന്നു. കോളജിന് ഓട്ടോണമസ് പദവിയും നാക് നാലാം സൈക്കിൾ അക്രഡിറ്റേഷൻ എ പ്ലസും നേടിക്കൊടുത്താണു സിസ്റ്റർ ബീനയുടെ മടക്കം. രണ്ടായിരത്തിൽ തൃശൂർ സേക്രഡ് ഹാർട്ട് ഹയർസെക്കൻഡറി വിഭാഗത്തിൽ മലയാളം അധ്യാപികയായി തുടങ്ങിയ സിസ്റ്റർ, 2009ൽ വിമല കോളജ് മലയാളം വിഭാഗം അധ്യാപികയായും തുടർന്നു 14 വർഷം വൈസ് പ്രിൻസിപ്പലുമായി. പ്രിൻസിപ്പലെന്ന നിലയിൽ രണ്ടുവർഷത്തെ ഭരണസാരഥ്യം, ഭാഷാ അധ്യാപിക, മലയാളവിഭാഗം അധ്യക്ഷ, റിസർച്ച് ഗൈഡ്, ഹോസ്റ്റൽ വാർഡൻ എന്നിങ്ങനെ നിരവധി കർമമേഖലകളിൽ വ്യക്തിമുദ്ര പതിപ്പിച്ചു. കത്തോലിക്കാസഭ പത്രത്തിന്‍റെ പത്രാധിപ സമിതി അംഗം, സിആർഐ സെക്രട്ടറി എന്നീ ചുമതലകളും വഹിച്ചു. എസ്ഡബ്ല്യുഎഎച്ച് അന്തർദേശീയ സെമിനാറിലെ ഏറ്റവും നല്ല പ്രബന്ധ അവതാരികയ്ക്കുള്ള പുരസ്കാരം (2015), ഇന്‍റർനാഷണൽ ടാഗോർ അവാർഡ് (2024), തായ്‌ലൻഡിൽ നടന്ന എസിഎൻ ഇന്‍റർനാഷണൽ കോണ്‍ഫ്രൻസിൽ ബെസ്റ്റ് പേപ്പർ അവാർഡ് (2023) എന്നിങ്ങനെ നിരവധി പുരസ്കാരങ്ങൾ നേടി.

തോരാമഴയിൽ തീരാദുരിതം; ജില്ലയിൽ വ്യാപക നാശനഷ്ടം

തൃശൂർ: തോരാമഴ തീരാദുരിതം വിതയ്ക്കുന്നു. കനത്ത മഴയിൽ ജില്ലയിൽ വ്യാപകനാശനഷ്ടം. നേരത്തേ ഓറഞ്ച് അലർട്ട് പ്രഖ്യാപിച്ചിരുന്ന ജില്ലയിൽ ഇന്നലെ രാവിലെയാണ് അതിതീവ്രമഴ പെയ്തത്. ഇതോടെ മഴമുന്നറിയിപ്പ് റെഡ് അലർട്ടാക്കി പുതുക്കി. കഴിഞ്ഞ ദിവസം റെഡ് അലർട്ട് പ്രഖ്യാപിച്ചിരുന്നെങ്കിലും അതു പിൻവലിച്ച് ഓറഞ്ച് അലർട്ടായതോടെ ആശങ്ക കുറഞ്ഞെങ്കിലും പിന്നീട് റെഡ് അലർട്ട് പ്രഖ്യാപിച്ചതോടെ ജനം വീണ്ടും ആശങ്കയിലായി. പലയിടങ്ങളിലും പുഴകൾ നിറഞ്ഞതും നാട്ടുകാരുടെ ഭീതി വർധിപ്പിച്ചു. പുഴകളിലും റോഡുകളിലും മരങ്ങൾ വീണു. പുറനാട്ടുകരയിൽ മണ്ണിടിഞ്ഞു. പലയിടങ്ങളിലെ വെള്ളക്കെട്ടുണ്ടായിട്ടുണ്ട്. ഇന്നലെ ഉച്ചയ്ക്ക് ഒന്നുവരെയുള്ള റിപ്പോർട്ട് പ്രകാരം നാലു വീടുകൾ പൂർണമായും 177 വീടുകൾ ഭാഗികമായും തകർന്നിട്ടുണ്ട്. വ്യാഴാഴ്ച പെയ്ത കനത്ത മഴയിൽമാത്രം ഒരു വീട് പൂർണമായും 13 വീടുകൾ ഭാഗികമായും തകർന്നിട്ടുണ്ട്. മഴ അതിശക്തമായതോടെ ഏഴു ക്യാന്പുകളും ജില്ലയിൽ തുറന്നിട്ടുണ്ട്. 18 കുടുംബങ്ങളെയാണ് ക്യാന്പുകളിലേക്കു മാറ്റിപ്പാർപ്പിച്ചത്. 17കുട്ടികൾ ഉൾപ്പെടെ 64 പേർ ഈ ക്യാന്പുകളിൽ താമസിക്കുന്നുണ്ട്. കെഎസ്ഇബിക്കും മഴയിൽ കനത്ത നഷ്ടം സംഭവിച്ചു. തൃശൂർ സർക്കിളിൽ 1162.283 ലക്ഷം രൂപയുടെയും ഇരിങ്ങാലക്കുട സർക്കിളിൽ 1798.017 ലക്ഷം രൂപയുടെയും നഷ്ടമാണ് കണക്കാക്കിയിരിക്കുന്നത്. ഇതിനുപുറമെ 689.94 ഹെക്ടർ കൃഷി നശിച്ചതിലൂടെ 748.82 ലക്ഷം രൂപയുടെ കൃഷിനാശവും രേഖപ്പെടുത്തിയിട്ടുണ്ട്. ജില്ലയിലെ 3821കർഷകർക്കാണ് മഴക്കെടുതിയിൽ നഷ്ടമുണ്ടായത്. പൊതുമരാമത്ത് റോഡുകൾക്കുമാത്രമായി 13.78 ലക്ഷം രൂപയുടെ കേടുപാടുകളും സംഭവിച്ചിട്ടുണ്ട്. കളക്ടർ അനുമതി നൽകിയെങ്കിലും വാഴാനി ഷട്ടറുകൾ ഇന്നു തുറക്കില്ല തൃശൂർ: മഴ തുടരുന്ന സാഹചര്യത്തിൽ വാഴാനി അണക്കെട്ടിന്‍റെ ഷട്ടറുകൾ ഉയർത്തുന്നതിനു കളക്ടർ അനുമതിനൽകിയെങ്കിലും ഇന്നു ഷട്ടറുകൾ ഉയർത്തില്ല. ആവശ്യസന്ദർഭങ്ങളിൽ അധികജലം പുറത്തേക്ക് ഒഴുക്കി അണക്കെട്ടിന്‍റെ റൂൾ കർവ് ലെവൽ പാലിക്കണമെന്നാണ് ദുരന്തനിവാരണസമിതി ചെയർമാൻ കൂടിയായ കളക്ടറുടെ ഉത്തരവ്. വടക്കാഞ്ചേരി പുഴയിൽ പെയ്ത്തുവെള്ളം നിറഞ്ഞൊഴുകുന്നതിനാൽ അണക്കെട്ടിന്‍റെ ഷട്ടറുകൾകൂടി ഉയർത്തിയാൽ വടക്കാഞ്ചേരി നഗരത്തിൽ ഉൾപ്പെടെ വെള്ളക്കെട്ടിനുള്ള സാധ്യത എറെയാണ്. ഈ സാഹചര്യത്തിൽ പുഴയിലെ ജലനിരപ്പ് താഴ്ന്നതിനുശേഷംമാത്രമേ ഷട്ടർ ഉയർത്താവൂ എന്നു സേവ്യർ ചിറ്റിലപ്പിള്ളി എംഎൽഎ ജലസേചനവിഭാഗം ഉദ്യോഗസ്ഥരോടു നിർദേശിച്ചു. ഇതിനുപുറമെ വാഴാനി ഷട്ടറുകൾ ഉയർത്തി വെള്ളംവിടില്ലെന്നു വാഴാനി അസിസ്റ്റന്‍റ് എൻജിനിയർ പി.എസ്. സാൽവിനും വ്യക്തമാക്കി. പരമാവധി സംഭരണശേഷി 62.48 മീറ്ററുള്ള ഡാമിൽ ഇന്നലെ വൈകീട്ട് നാലിനുവന്ന റിപ്പോർട്ട് പ്രകാരം ജലനിരപ്പ് 50.30 മീറ്റർമാത്രമാണ്. അതിനാൽതന്നെ ഷട്ടർ തുറന്നു പുറത്തുവിടാനുള്ള വെള്ളം ഇതുവരെയായിട്ടില്ലെന്ന് ഉദ്യോഗസ്ഥർ പറഞ്ഞു. പൊതുവേ ജലനിരപ്പ് 59 മീറ്റർ ആകുന്പോഴാണ് സാധാരണനിലയിൽ ഡാമിന്‍റെ ഷട്ടറുകൾ ചെറുതായി തുറക്കാറുളളത്. വരുംദിവസങ്ങളിൽ പുഴയിൽ വെള്ളത്തിന്‍റെ ഒഴുക്കു കുറഞ്ഞാൽ ഡാമിൽനിന്ന് കുടിവെള്ളത്തിനായി സ്ലൂയിസ് വാൽവ് തുറന്നു വെള്ളം പുറത്തേക്കു വിടുമെന്നും അതിൽ ആശങ്ക വേണ്ടെന്നും ഉദ്യോഗസ്ഥർ അറിയിച്ചു.

മുറിയിൽ മരിച്ച നിലയിൽ

ചാവക്കാട്: കടപ്പുറം തൊട്ടാപ്പ് പുളിഞ്ചുവട്ടിൽ കുട പള്ളിക്ക് കിഴക്ക് പുതുവീട്ടിൽ പരേതനായ മുഹമ്മദ് മകൻ ഹനീഫ (55) സലാലയിൽ മുറിയിൽ മരിച്ച നിലയിൽ കണ്ടെത്തി. കബറടക്കം പിന്നീട് അഞ്ചങ്ങാടി ഉപ്പാപ്പ പള്ളി കബർസ്ഥാനിൽ. കരിക്ക് കച്ചവടം ചെയ്യുന്ന ഹനീഫ മുറിയിൽ വിശ്രമത്തിന് പോയതായിരുന്നു. കാണാതായതിനെ തുടർന്ന് അന്വേഷിച്ചപ്പോഴാണ് മുറിയിൽ മരിച്ച നിലയിൽ കണ്ടെത്തിയത്. ഭാര്യ: ആരിഫ. മക്കൾ: അറഫ, അർഫാൻ ഹനീഫ് (ഇരുവരും വിദ്യാർഥികൾ ഏങ്ങണ്ടിയൂർ സെന്‍റ് തോമസ് ഹൈസ്കൂൾ). മാതാവ്: പരേതയായ ഫാത്തിമ.

വയോധികനെ കുളത്തിൽ മരിച്ച നിലയിൽ കണ്ടെത്തി

നടത്തറ: വയോധികനെ കുളത്തിൽ മരിച്ച നിലയിൽ കണ്ടെത്തി. കൊഴുക്കുള്ളി സ്വദേശി പൊങ്ങണംമൂല വീട്ടിൽ വിശ്വംഭരൻ(70) ആണ് മരിച്ചത്. ഇന്നലെ രാവിലെയാണ് കുളത്തിൽ മൃതദേഹം കണ്ടെത്തിയത്. ഫയർ ഫോഴ്സ് എത്തിയാണ് മൃതദേഹം പുറത്ത് എടുത്തത്. മണ്ണുത്തി പോലീസ് മേൽ നടപടികൾ സ്വീകരിച്ചു. ദിവസവും രാവിലെ നടക്കാൻ പോവാറുള്ള വിശ്വംഭരൻ പതിവുപോലെ പുലർച്ചെ വീട്ടിൽ നിന്നും നടക്കാൻ പോയതായും മകൻ പറഞ്ഞു. ഭാര്യ മരിച്ചതിനു ശേഷം വിശ്വംഭരൻ മാനസിക വിഷമത്തിലായിരുന്നു എന്നും പറയുന്നു.

പഠനത്തിന് അന്ധത ബാധിക്കാത്ത അധ്യാപകൻ യാത്രയായി

ചാവക്കാട്: അകകണ്ണുകൊണ്ട് വിദ്യ പകർന്ന ജയപാലൻ വിട പറഞ്ഞു. ചാവക്കാട് ടൗണിൽ മുനിസിപ്പൽ കെട്ടിടത്തിൽ കോളജ് ഓഫ് കൊമേഴ്സ് എന്ന ട്യൂഷൻ സെന്‍റർ നടത്തുന്ന മണത്തല അയിനിപ്പുള്ളികറുത്താൻ ജയപാൽ (54) അന്തരിച്ചു. സംസ്കാരം നടത്തി. കാഴ്ചശക്തിയില്ലെങ്കിലും വിദ്യാർഥികളെ പഠിപ്പിക്കാനുള്ള മാഷുടെ അസാധാരണ കഴിവ് തിരിച്ചറിഞ്ഞ രക്ഷിതാക്കൾ കുട്ടികളെ ഇവിടെ ചേർക്കാൻ മത്സരമായിരുന്നു. നൂറു കണക്കിന് വിദ്യാർഥികളും നിരവധി അധ്യാപകരുമായി സമാന്തര സ്കൂൾ പോലെയായിരുന്നു കൊമേഴ്സ് സ്ഥാപനം. ഇവിടെ ചേർത്താൽ കുട്ടികൾ പരാജയപ്പെടുകയില്ലെന്നാണ് മാതാപിതാക്കൾ പറയുക. ചാവക്കാട് മേഖലയിലെ ട്യൂഷൻ കേന്ദ്രങ്ങളിൽ മികച്ച സ്ഥാപനമായിരുന്നു. ബ്ലൈന്‍റ് ഫെഡറേഷൻ, വൺ ഇന്ത്യ വൺ പെൻഷൻ മൂവ്മെന്‍റ് എന്നീ സംഘടകളുടെ ഭാരവാഹിയാണ് ജയപാൽ. ഭാര്യ: ജിനി മകൻ : ശ്രാവൺ (ബി. ടെക് വിദ്യാർഥി)

മണ്ണുത്തി മേൽപ്പാലത്തിനു സമീപം കാർ മറിഞ്ഞ് അപകടം

മണ്ണുത്തി: മേൽ പാലത്തിന് സമീപം വെള്ളക്കെട്ടിൽപെട്ട കാർ നിയന്ത്രണം വിട്ട് മറിഞ്ഞു. കാർ യാത്രക്കാർ പരിക്കേൽകാതെ രക്ഷപ്പെട്ടു. എറണാകുളത്തുനിന്ന് ട്രിച്ചിയിലേക്ക് പോവുകയായിരുന്ന കാറാണ് അപകടത്തിൽപ്പെട്ടത്. എറണാകുളം സ്വദേശികളായ നിസാമുദ്ദീൻ, സുഹൃത്ത് കൈയ്സ്, കെയ്സിന്‍റെ പിതാവ് അൻവർ എന്നിവരാണ് കാറിലുണ്ടായിരുന്നത്. മേൽപ്പാലത്തിൽ വെളിച്ചക്കുറവ് ഉണ്ടായതും അപകടത്തിന് കാരണമായതായി കാർ യാത്രക്കാർ പറഞ്ഞു പോലീസും ചേർന്നാണ് രക്ഷാപ്രവർത്തനം നടത്തിയത്.

ഓടിക്കൊണ്ടിരിക്കുന്ന കാർ തലകീഴായി മറിഞ്ഞു

ചേലക്കര: ഓടിക്കൊണ്ടിരിക്കുന്ന കാർ നിയന്ത്രണം തെറ്റി ഡിവൈഡറിൽ ഇടിച്ച് തലകീഴായി മറിഞ്ഞു. യാത്രക്കാരനായ യുവാവ് പരിക്കേൽക്കാതെ രക്ഷപ്പെട്ടു. പൈങ്കുളം റെയിൽവേ ഗേറ്റിന് സമീപം ഇന്നലെ രാവിലെ 9.30നാണ് അപകടം. മലപ്പുറം പെരിന്തൽമണ്ണ ഏലംകുളം സ്വദേശി നൗഷാദിന്‍റെ കാറാണ് നിയന്ത്രണം തെറ്റി തലകീഴായി മറിഞ്ഞത്. പൈങ്കുളം റോഡിലെ സ്വകാര്യ റിസോർട്ടിൽ മാർബിൾ അസോസിയേഷൻ സമ്മേളനം നടക്കുന്നതിന്‍റെ ഭാഗമായി പങ്കെടുക്കാൻ എത്തിയതായിരുന്നു നൗഷാദ്. പൈങ്കുളം റെയിൽവേ ഗേറ്റ് അടച്ചതിനെ തുടർന്ന് കാർ തിരിച്ച് ചെറുതുരുത്തിയിലേക്ക് പോകുമ്പോഴാണ് അപകടം. പുല്ലിൽ മൂടിക്കിടന്നിരുന്ന ഡിവൈഡർ കാണാതെ നിയന്ത്രണം തെറ്റിയാണ് കാർ തലകീഴായി മറിഞ്ഞത്. ചെറുതുരുത്തി പൊലിസ് സ്ഥലത്തെത്തി.

തമ്പുരാട്ടിപ്പടിയിൽ ഗതാഗതക്കുരുക്ക്; പൊടിയിട്ടു കുഴിയടച്ച് അധികൃതർ

പട്ടിക്കാട്: ദേശീയപാതയിലെ വലിയ ഗതാഗതക്കുരുക്കിനിടയിലും തൂമ്പകൊണ്ട് പാറപ്പൊടി വാരിയിട്ട് കുഴിയടയ്ക്കാൻ ശ്രമിക്കുകയാണ് ദേശീയപാത അധികൃതർ. മറ്റൊരു തൊഴിലാളി പ്ലാസ്റ്റിക് കുട്ടകൊണ്ട് കുഴിയിലെ വെള്ളം കോരിക്കളയുന്നു. പണികൾക്ക് നേതൃത്വം നൽകാൻ ഒരു സൂപ്പർവൈസറും അവർക്കൊപ്പം ഉണ്ട്. ദേശീയപാത തമ്പുരാട്ടിപ്പടിയിലാണ് നിർമാണക്കമ്പനിയുടെ നാടകം അരങ്ങേറിയത്. കല്ലിടുക്ക് മുതൽ തമ്പുരാട്ടിപ്പടിവരെ ഇന്നലെ രാവിലെമുതൽ തുടങ്ങിയതാണ് ഗതാഗതക്കുരുക്ക്. പ്രധാനപാതയിലൂടെ ഒറ്റവരിയായി വരുന്ന വാഹനങ്ങൾ മൂന്നുവരി പാതയിലേക്ക് പ്രവേശിക്കുന്ന ഭാഗത്ത് റോഡ് തകർന്നതാണ് ഗതാഗതക്കുരുക്കിന് കാരണമായത്. എന്നാൽ വൈകുന്നേരമായിട്ടും ഗതാഗതക്കുരുക്കിനു പരിഹാരം കാണാൻ ദേശീയപാത അധികൃതർക്ക് സാധിച്ചില്ല. അടിയന്തരമായി കുഴിയടച്ച് വാഹനങ്ങൾ കടത്തിവിടേണ്ടതിനുപകരമാണ് രണ്ട് തൊഴിലാളികളെ നിർത്തി കുഴിയടയ്ക്കാൻ ശ്രമിക്കുന്നത്. വാണിയംപാറ മുതൽ ആറാംകല്ല് വരെ മണിക്കൂറുകളാണ് വാഹനങ്ങൾ വരിയിൽ കിടക്കുന്നത്. ബന്ധപ്പെട്ട ഉദ്യോഗസ്ഥരുടെ അനാസ്ഥ മാത്രമാണ് ഇതിനു കാരണമെന്നാണ് ജനങ്ങൾ പറയുന്നത്.

വെള്ളക്കെട്ടുഭീഷണിയിൽ സൗഹൃദ ലെയ്ൻ നിവാസികൾ

നടത്തറ: വലക്കാവ് - താളിക്കുണ്ട് റോഡുമായി ബന്ധിപ്പിക്കുന്ന നെല്ലാനി- സൗഹൃദ ലൈൻ റോഡിന്‍റേയും കലുങ്കിന്‍റേയും പണി പൂർത്തിയാകാത്തതിനാൽ പ്രദേശവാസികൾ വെള്ളക്കെട്ട് ഭീഷണിയിൽ. 2023 ജൂലൈ ആറിനാണ് റോഡും കലുങ്കും ഇടിഞ്ഞ് പോയത്. സൗഹൃദ ലെയ്ൻ നിവാസികൾ പിറ്റേന്നുതന്നെ നടത്തറ പഞ്ചായത്ത് അധികൃതർക്ക് പരാതി നൽകുകയും ചെയ്തിരുന്നു. പരാതിയുടെ അടിസ്ഥാനത്തിൽ കഴിഞ്ഞ ജനുവരിയിൽ ഇടിഞ്ഞുപോയ പാലത്തിനോടുനുബന്ധിച്ചുള്ള പണി ആരംഭിച്ചുവെങ്കിലും ഇതുവരെയും പൂർത്തിയായിട്ടില്ല. പഞ്ചായത്തിൽ സ്ഥിരമായി എഇ ഇല്ലാത്തതാണ് പണികൾ ഇഴഞ്ഞ് നീങ്ങാൻ കാരണമെന്ന് പ്രദേശവാസികൾ പറഞ്ഞു. മഴക്കാലത്ത് സ്ഥിരമായി വെള്ളം കയറുന്ന സ്ഥലമായതിനാൽ അടിയന്തിരമായി പാലത്തിന്‍റെ പണി പൂർത്തിയാക്കണമെന്ന് നാട്ടുകാർ ആവശ്യപ്പെട്ടു. തോട്ടിലെ മണ്ണ് നീക്കി വൃത്തിയാക്കണമെന്നും നാട്ടുകാർ ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]