പാലിയേറ്റീവ് സൊസൈറ്റി വാർഷിക പൊതുയോഗം

ആലത്തൂർ: പാലിയേറ്റീവ് കെയർ സൊസൈറ്റി പാടൂർ കാവശേരിയുടെ വാർഷിക പൊതുയോഗം ആലത്തൂർ പോലീസ് ഇൻസ്പെക്ടർ ടി.എൻ. ഉണ്ണികൃഷ്ണൻ ഉദ്ഘാടനം ചെയ്തു. പാലിയേറ്റീവ് കെയർ സൊസൈറ്റി പ്രസിഡന്‍റ് സുനന്ദ രമേഷ് അധ്യക്ഷത വഹിച്ചു.

പാലിയേറ്റീവ് കെയർ ജില്ലാ കൂട്ടായ്മ പ്രസിഡന്‍റ് വി.പി ഹുസൈൻ മുഖ്യപ്രഭാഷണം നടത്തി.
എക്സിക്യൂട്ടീവ് മെംബർ ടി. രതീഷ് റിപ്പോർട്ട് അവതരിപ്പിച്ചു. സൊസൈറ്റി സെക്രട്ടറി വി. വിജയമോഹനൻ, ട്രഷറർ കെ. ഉണ്ണികൃഷ്ണൻ, പഞ്ചായത്ത് മെംബർ പി. കേശവദാസ്, കെ. സുചിത്ര, പാടൂർ എഎൽപി സ്കൂൾ ഹെഡ്മാസ്റ്റർ കെ. കണ്ണൻ, എൻ. രാജേന്ദ്രവർമ്മ, എം. ശിവനാരായണൻ, എ. സുരേന്ദ്രൻ, കെ. കുട്ടപ്പൻ എന്നിവർ പ്രസംഗിച്ചു.

ADVERTISEMENT

വിട്ടുമാറാത്ത മഴ ഓണവിപണിയെ തളർത്തി; വ്യാപാരികൾ അങ്കലാപ്പിൽ

വടക്കഞ്ചേരി: ഓണവിപണി ലക്ഷ്യംവച്ച് വലിയ സ്റ്റോക്ക് ഉൾപ്പെടെ ഒരുക്കിയ വ്യാപാരികൾ വലിയ അങ്കലാപ്പിലാണ്.മഴയാണ് പ്രധാന വില്ലനാകുന്നത്. പുറത്തിറങ്ങാനാകാത്ത വിധമാണ് ഇടക്ക് തോരാമഴ ചൊരിയുന്നത്. പത്തോളം പഞ്ചായത്തുകളുടെ സിരാകേന്ദ്രമായ വടക്കഞ്ചേരി ടൗണിലേക്കുള്ള റോഡുകളെല്ലാം തകർന്നുകിടക്കുന്നതും കൂനിമേൽ കുരു എന്നമട്ടിൽ വിപണിക്ക് വിനയായി. പ്രാദേശികമായി സാധനങ്ങൾ വാങ്ങി ആളുകൾ പുറത്തിറങ്ങുന്നില്ല. പച്ചക്കറി ഉൾപ്പെടെയുള്ളവയുടെ വിലക്കയറ്റം ജനങ്ങൾക്കും ബുദ്ധിമുട്ടുണ്ടാകുന്നുണ്ട്. കാട്ടുമൃഗങ്ങളുടെ ആക്രമണംമൂലം കാർഷികവിളകൾ ഇല്ലാതായത് ഓണവിപണിക്കും വലിയ പ്രഹരമാണ്. മലയോര പ്രദേശങ്ങളിൽ വാഴകൃഷി അപൂർവമായി. ഇതിനാൽ നാടൻ നേന്ത്രക്കായയുടെലഭ്യത കുറഞ്ഞു. പഴത്തിനും കായഉപ്പേരികൾക്കും വില കൂടി. രണ്ട് ദിവസം മഴ മാറി നിന്നാൽ ആശ്വാസമാകുമെന്ന് വ്യാപാരികൾ പറയുന്നത്. വ്യാപാരി സംരക്ഷണ സമിതിയുടെ നേതൃത്വത്തിൽ നടന്ന ഓണാഘോഷപരിപാടികൾക്ക് ചെയർമാൻ ബോബൻ ജോർജ്, പ്രസിഡന്‍റ് സി.കെ. അച്യുതൻ, സെക്രട്ടറി സതീഷ് ചാക്കോ, ട്രഷറർ സഫർ ഇമ്മേരിയാസ്, അബ്ദുൾ കലാം, ഗോപിനാഥൻ, ഷാജി, അബ്ദുൾ റഹിമാൻ, വൈശാഖ്, വനിതാവിംഗ് അംഗങ്ങളായ ഏവൂർ പ്രീതാവാര്യർ, അസീന, ജെസി, ബിന്ദു നേതൃത്വം നൽകി.

മഴ വില്ലനായി; പപ്പടം ഉണക്കൽ ഡ്രയറുകളിൽ

വടക്കഞ്ചേരി: ഓണദിവസങ്ങളിലെ തോരാമഴയിൽ വലിയ ധർമസങ്കടത്തിലാണ് പപ്പട നിർമാതാക്കൾ. ഉണ്ടാക്കുന്ന പപ്പടം വെയിലിൽ ഉണക്കിയെടുക്കാൻ വഴിയില്ല. അത്തത്തിനു മുമ്പുവരെ നല്ല വെയിൽ ഉണ്ടായിരുന്നു. എന്നാൽ പിന്നീട് കാലാവസ്ഥ മാറി. പകൽ മുഴുവൻ മഴ പെയ്യുന്ന സ്ഥിതി. ഓണസദ്യയിലെ പ്രധാനിയാണ് പപ്പടം. ചെറിയ പപ്പടം മുതൽ വലിയ പപ്പടം വരെ സദ്യക്ക് നിർബന്ധമാണ്. കുലത്തൊഴിലായി പപ്പടം ഉണ്ടാക്കുന്ന കുടുംബങ്ങളുടെ വർഷത്തിലെ പ്രധാന വരുമാന സീസണാണ് ഓണം. ഇതിനാൽ വലിയ സാമ്പത്തിക ബാധ്യത സഹിച്ചും ചെറുകിട വ്യവസായ സംരംഭമായി ലക്ഷങ്ങൾ വിലവരുന്ന ഡ്രയറുകൾ വാങ്ങിയാണ് ഇപ്പോൾ പല പപ്പടനിർമാണ യൂണിറ്റുകളും പ്രവർത്തിക്കുന്നതെന്ന് മുടപ്പല്ലൂർ കൈക്കോളത്തറയിലെ ശ്രീകൃഷ്ണ പപ്പട നിർമാണ യൂണിറ്റ് നടത്തുന്ന കൃഷ്ണൻ പറഞ്ഞു. മണിക്കൂറിൽ 30 കിലോ വരെ പപ്പടം ഉണക്കാവുന്ന ഡ്രയറാണ് പല യൂണിറ്റുകളിലുമുള്ളത്. വൈദ്യുതിയിലാണ് ഇതിന്‍റെ പ്രവർത്തനം. മഴ തുടരുന്നതിനാൽ പപ്പടം ഉണക്കിയെടുക്കാൻ ഡ്രയർ തന്നെയാണ് ആശ്രയം. വൈദ്യുതി ചാർജ് കൂടും. ഇത് പപ്പട നിർമാണ ചെലവും കൂട്ടുന്നുണ്ടെന്ന് കൃഷ്ണൻ പറഞ്ഞു. കഴിഞ്ഞ വർഷത്തെ അപേക്ഷിച്ച് ഉഴുന്നിൻ പരിപ്പിന് മാത്രമാണ് വിലയിൽ വലിയ മാറ്റമില്ലാത്തത്. ഉപ്പ് മുതൽ പപ്പടക്കാരം വരെയുള്ള മറ്റ് എല്ലാ കൂട്ടുകൾക്കും വില കൂടി. ഒരു കിലോയുടെ 25 പാക്കറ്റുകളുള്ള ഒരു ചാക്ക് ഉപ്പിന് നൂറ് രൂപ കൂടിയിട്ടുണ്ടെന്ന് പപ്പട നിർമാതാക്കൾ പറയുന്നു. ഇക്കുറി ഓണ ദിവസങ്ങളിൽ മുഹൂർത്തദിവസങ്ങൾ അടുത്തടുത്ത് വരുന്നതിനാൽ എത്ര പപ്പടം ഉണ്ടാക്കിയാലും അത് അധികമാകില്ലെന്നാണ് നിർമാതാക്കളുടെ കണക്കുകൂട്ടൽ. നല്ല പപ്പടമാണെങ്കിൽ അതിന് ആവശ്യക്കാർ ഏത് കാലത്തുമുണ്ട്. നാല് ഇഞ്ച് മുതൽ ആറ് ഇഞ്ച് വരെയുള്ള പപ്പടമുണ്ട്. ഓണം സ്പെഷൽ വല്യപപ്പടവും വിപണിയിലെത്തും. കുറഞ്ഞ വിലക്ക് ഗുണമേന്മയില്ലാത്ത പപ്പട വിപണിയിലെത്തുന്നത് കുലതൊഴിലായിട്ടുള്ള പപ്പട നിർമാതാക്കൾക്ക് വലിയ തിരിച്ചടിയാകുന്നുണ്ട്. ഉയർന്ന വിലക്ക് ഉഴുന്നുമാവ് ഉൾപ്പെടെയുള്ള സാധനങ്ങൾ വാങ്ങി നല്ല പപ്പടം ഉണ്ടാക്കി കടയിലെത്തിച്ചാൽ മത്സരിക്കേണ്ടി വരുന്നത് ഗുണമേന്മയില്ലാത്ത പപ്പടവുമായാണെന്ന് പപ്പട നിർമാണം കുലത്തൊഴിലായി ചെയ്തുവരുന്ന മുടപ്പല്ലൂർ കൈക്കോളത്തറയിലെ പപ്പട നിർമാതാക്കൾ പറയുന്നു. കാഴ്ചയിൽ പപ്പടമെല്ലാം ഒരു പോലെയാണെങ്കിലും ഗുണത്തിൽ വലിയ അന്തരമുണ്ട്. കൃത്രിമ പപ്പടം രോഗങ്ങൾക്കും വഴിവക്കും. ഗുണമേന്മ പരിശോധിച്ച് മനുഷ്യന് ഹാനികരമാകുന്ന ഭക്ഷ്യസാധനങ്ങൾ കണ്ടെത്തി നിരോധിക്കാൻ സംവിധാനമില്ലാത്തതിനാൽ വ്യാജപപ്പടവുമായി മത്സരിക്കേണ്ടി വരുന്നെന്ന് വീരശൈവസഭ ഭാരവാഹികൾ പറയുന്നു. പപ്പടതറകളിൽ നിന്നും വിലകുറവിൽ പപ്പടം വാങ്ങി ഉയർന്ന വിലക്ക് വിറ്റ് ലാഭം കൊയ്യുന്നതിൽ കച്ചവടക്കാരും പുറകിലല്ല. കൈക്കോളതറക്കു പുറമെ കാവശേരി വേപ്പിലശേരി, ഒലവക്കോട് ആണ്ടിമഠം, കൊടുവായൂർ, കുനിശേരി, കഞ്ചിക്കോട് തുടങ്ങിയ സ്ഥലങ്ങളിലും കുലതൊഴിലായി പപ്പടം നിർമിക്കുന്ന കുടുംബങ്ങളുണ്ട്.

നാട്ടിലെവിടെയും ഓണാഘോഷങ്ങളുടെ ആർപ്പുവിളികൾ

വടക്കഞ്ചേരി: ഓണപരീക്ഷ കഴിഞ്ഞ് സ്കൂളുകൾ അടച്ചതോടെ നാട്ടിലെവിടെയും കളികളും ആഘോഷങ്ങളുടെ ആർപ്പുവിളികളുമായി നാടുണർന്നു. കിഴക്കഞ്ചേരി: വക്കാല ത്രിവേണി ഫാർമേഴ്സ് ക്ലബ്ബിന്‍റെ ആഭിമുഖ്യത്തിൽ ഇന്ന് രാവിലെ 10ന് വക്കാല ഈഴവ സമുദായ ഹാളിൽ നടക്കുന്ന ഓണാഘോഷ പരിപാടികൾ കെ.ഡി. പ്രസേനൻ എംഎൽഎ ഉദ്ഘാടനം ചെയ്യും. കണ്ണമ്പ്ര: കൊട്ടേക്കാട് വായനശാല, ബാലവേദി, വനിതാവേദി, യുവത എന്നിവയുടെ സംയുക്താഭിമുഖ്യത്തിലുള്ള ഓണാഘോഷ പരിപാടികൾ മൂന്ന്, നാല്, അഞ്ച്, ഏഴ് തീയതികളിലായി നടക്കും. കല്ലിങ്കൽപാടം: യുണൈറ്റഡ് ആർട്സ് ആൻഡ് സ്പോർട്സ് ക്ലബ്ബും വായനശാലയും സംഘടിപ്പിക്കുന്ന ഓണാഘോഷ പരിപാടികൾ ഇന്നുമുതൽ സെപ്റ്റംബർ അഞ്ച് വരെയുള്ള തീയതികളിൽ നടക്കും. ജില്ലാതലത്തിലുള്ള വോളി, ചെസ്റ്റ് ടൂർണമെന്റുകൾ ഉൾപ്പെടെ മത്സരങ്ങൾ ഉണ്ടാകും. വള്ളിയോട്: മിച്ചാരംകോട് സൗഹൃദ ജനകീയ കൂട്ടായ്മ, വായനശാല എന്നിവയുടെ ഓണാഘോഷ പരിപാടികൾ സെപ്റ്റംബർ ആറിന് നടക്കും. ഉച്ചകഴിഞ്ഞ് ഒന്നുമുതൽ സൗഹൃദ ഗ്രൗണ്ടിലാണ് പരിപാടികളുടെ അരങ്ങേറ്റം.

കത്തോലിക്ക കോൺഗ്രസ് കർഷക പ്രതിഷേധജ്വാല

വടക്കഞ്ചേരി: വന്യജീവി ആക്രമണങ്ങൾക്കു ശാശ്വതപരിഹാരം കാണണമെന്നാവശ്യപ്പെട്ടും കാർഷികകടങ്ങൾ ഇളച്ചു നൽകാത്തതിൽ പ്രതിഷേധിച്ചും കേന്ദ്ര-സംസ്ഥാന സർക്കാരുകളുടെ കർഷകഅവഗണയിൽ പ്രതിഷേധിച്ചും കത്തോലിക്ക കോൺഗ്രസ് വടക്കഞ്ചേരി, മംഗലംഡാം, മേലാർകോട്, തത്തമംഗലം ഫൊറോന സമിതികളുടെ സംയുക്താഭിമുഖ്യത്തിൽ വടക്കഞ്ചേരിയിൽ കർഷക പ്രതിഷേധ ജ്വാല നടത്തി. ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ ഉദ്ഘാടനം ചെയ്തു. രൂപത വൈസ് പ്രസിഡന്‍റ് ജോസ് വടക്കേക്കര അധ്യക്ഷത വഹിച്ചു. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ, ഗ്ലോബൽ വൈസ് പ്രസിഡന്‍റുമാരായ ബെന്നി ആന്‍റണി, തോമസ് ആന്‍റണി, ഗ്ലോബൽ സെക്രട്ടറി ഡെന്നി തെങ്ങുംപള്ളി, വർക്കിംഗ് കമ്മിറ്റി അംഗം ജിജോ അറയ്ക്കൽ, രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, രൂപത ജനറൽ സെക്രട്ടറി ആന്‍റണി കുറ്റിക്കാടൻ, ട്രഷറർ രൂപത ജോസ് മുക്കട, ഫൊറോന പ്രസിഡന്‍റുമാരായ വിൽസൺ കൊള്ളന്നൂർ, ബെന്നി മറ്റപ്പിള്ളി, ജോയ് ഫിലിപ്പ്, രൂപത യൂത്ത് കൗൺസിൽ ജനറൽ കോ-ഓർഡിനേറ്റർ എബി വടക്കേക്കര പ്രസംഗിച്ചു.

ചെറുപുഷ്പം യുപി സ്കൂളിൽ ഓണാഘോഷം

വടക്കഞ്ചേരി: ചെറുപുഷ്പം ഇംഗ്ലീഷ് മീഡിയം യുപി സ്കൂളിൽ ഓണാഘോഷം വർണാഭമായി. കുട്ടികളുടെ വിവിധങ്ങളായ കലാവിരുന്നായിരുന്നു ഓണാഘോഷങ്ങളുടെ ഹൈലൈറ്റ്. കുട്ടികളുടെ മഹാബലി, വാമനൻ, ഓണപ്പാട്ട്, പുലിക്കളി, തുമ്പിതുള്ളൽ, കഥകളി, ചെണ്ടമേളം, കൈ കൊട്ടിക്കളി, വടംവലി, വള്ളംകളി, കളരി, തെയ്യം, ഓണനൃത്തം, മോഹിനിയാട്ടം, എൽകെജി കുട്ടികളുടെ റാം വാക്ക്, പൂക്കളം എന്നിങ്ങനെ ഒന്നിനൊന്ന് മികവുണർത്തുന്നതായിരുന്നു പരിപാടികളെല്ലാം. പിടിഎ പ്രസിഡന്‍റ് ബാലകൃഷ്ണൻ അധ്യക്ഷത വഹിച്ചു. വൈസ് പ്രസിഡന്‍റ് ഓണസന്ദേശം നൽകി. ഹെഡ്മിസ്ട്രസ് സിസ്റ്റർ റോസ്മിൻ വർഗീസ്, സ്റ്റാഫ് പ്രതിനിധി സമീക്ഷ ടീച്ചർ എന്നിവർ പ്രസംഗിച്ചു. ഓണപായസവിതരണത്തോടെയായിരുന്നു സമാപനം.

മൂലത്തറ ഇടതുകനാലിൽനിന്നും വൈദ്യുതോത്പാദനത്തിനു തുടക്കം

ചിറ്റൂർ: പട്ടഞ്ചേരി പഞ്ചായത്തിലെ കന്നിമാരി പള്ളിമൊക്കിൽ മൂലത്തറ ഇടതുകനാൽ വെള്ളത്തിൽ നിന്ന് ജലചക്രമുപയോഗിച്ച് വൈദ്യുതി ഉത്പാദിപ്പിച്ച് കെഎസ്ഇബി. ആദ്യഘട്ടത്തിൽ പരീക്ഷണാടിസ്ഥാനത്തിൽ പവർ ഗ്രിഡിലൂടെ 100 വീടുകളിലേക്കാണ് വൈദ്യുതിയെത്തിക്കുന്നത്. കഴിഞ്ഞദിവസം ജലചക്രമുപയോഗിച്ച് പരീക്ഷണയോട്ടം നടത്തി. അഞ്ചു കിലോവാട്ട് കപ്പാസിറ്റി എന്ന നിലയിൽ ഒരു മണിക്കൂറിൽ അഞ്ച് യൂണിറ്റ് വൈദ്യുതിയാണ് ഉത്പാദിപ്പിച്ചത്. പദ്ധതിയിലൂടെ പ്രതിദിനം 240 യൂണിറ്റ് വൈദ്യുതി ഉത്പാദിപ്പിക്കാൻ ആകുമെന്നാണ് പ്രതീക്ഷയെന്നും കനാലിലെ വെള്ളത്തിന്‍റെ തോത് ഉയർന്നാൽ പ്രതീക്ഷയ്ക്കൊത്തു വൈദ്യുതി ഉല്പാദിപ്പിക്കാനാകുമെന്നും അധികൃതർ പറഞ്ഞു. മന്ത്രി കെ. കൃഷ്ണൻകുട്ടിയുടെ സാന്നിധ്യത്തിലാണ് ജലചക്രത്തിന്‍റെ പരീക്ഷണ ഓട്ടം നടത്തിയത്. ജില്ലയിൽ തന്നെ ആദ്യമായാണ് കനാൽ വെള്ളത്തിൽ വൈദ്യുതി ഉത്പാദനം നടത്തുന്നത്. പരീക്ഷണ ഉത്പാദനം വിജയകരമായിരുന്നന്ന്െ അധികൃതർ അറിയിച്ചു. ഭാവിയിൽ സംസ്ഥാനവ്യാപകമായി ഇത്തര ത്തിലുള്ള ചെലവുകുറഞ്ഞ വൈദ്യുതി ഉദ്പാദിപ്പിക്കാനും വൈദ്യുതി വകുപ്പ് ലക്ഷ്യമിടുന്നുണ്ട്.

പട്ടാമ്പി പുതിയപാലം സ്ഥലമെടുപ്പ് നടപടികൾക്കു തുടക്കമായി

ഷൊർണൂർ: പട്ടാമ്പിയിൽ പുതിയപാലം നിർമാണത്തിന് സ്ഥലമേറ്റെടുപ്പ് നടപടികൾ തുടങ്ങി. ഭാരതപ്പുഴയിൽ പുതിയ പാലം നിർമിക്കണമെന്ന ജനകീയാവശ്യത്തിന് പതിറ്റാണ്ടുകളുടെ പഴക്കമുണ്ട്. ഈ ആവശ്യത്തിനാണ് പരിഹാരമാകുന്നത്. പാലത്തിനും അപ്രോച്ച് റോഡിനും ആവശ്യമായ സ്ഥലമേറ്റെടുപ്പാണ് നടത്തുന്നത്. പട്ടാമ്പി നഗരസഭയിലെയും തൃത്താല പഞ്ചായത്തിലെയും സ്ഥലങ്ങളാണ് ഏറ്റെടുക്കേണ്ടത്. പട്ടാമ്പി വില്ലേജിലെ 15 ഭൂമി ഉടമകളിൽ നിന്നും തൃത്താല വില്ലേജിലെ 24 ഭൂമി ഉടമകളിൽ നിന്നുമാണ് പാലത്തിനും റോഡിനും ആവശ്യമായ സ്ഥലം ഏറ്റെടുക്കാനുള്ളത്. ഭൂമിയുടെ ഉടമകൾക്കു ഭൂമിക്ക് ന്യായമായ വില നൽകിയായിരിക്കും സ്ഥലം ഏറ്റെടുക്കുക എന്നു നേരത്തെ മുഹമ്മദ് മുഹ്സിൻ എംഎൽഎ ഉടമകൾക്ക് ഉറപ്പ് നൽകിയിട്ടുണ്ട്. പട്ടാമ്പി പട്ടണത്തിന്‍റെ ഭാഗമായ പട്ടാമ്പി നഗരസഭയെയും തൃത്താല പഞ്ചായത്തിനെയും ബന്ധിപ്പിച്ച് ഭാരതപ്പുഴയ്ക്ക് കുറുകെയുള്ള പട്ടാമ്പിപാലത്തിനു പകരമായാണ് പുതിയ പാലത്തിന് അനുമതി. മഴക്കാലത്ത് ഭാരതപ്പുഴ നിറ‍ഞ്ഞു നിലവിലെ പട്ടാമ്പി പാലത്തിൽ വെള്ളം കയറി ദിവസങ്ങളോളം ഗതാഗത തടസം നേരിടാൻ തുടങ്ങിയതോടെയാണ് പട്ടാമ്പിയിൽ പുതിയ പാലം വേണമെന്ന ആവശ്യം ശക്തമായതും പുതിയ പാലം നിർമാണത്തിന് സർക്കാർ അനുമതിയും ഫണ്ടും ലഭിച്ചത്. രണ്ട് വർഷത്തിനകം പുതിയ പാലം നിർമാണം നടത്തുമെന്നാണ് ബന്ധപ്പെട്ടവർ അറിയിച്ചിരിക്കുന്നത്. പുതിയ പാലം നിർമാണം പൂർത്തിയായാൽ പഴയ പാലം ക‍ാൽനട യാത്രക്കാർക്കും ചെറു വണ്ടികൾക്കുമായി നിലനിർത്തും. ഭൂവുടമകൾക്കു കൃത്യമായ നഷ്ടപരിഹാരം നൽകുമെന്ന് കളക്ടറുടെ ഉത്തരവിൽ പറയുന്നുണ്ട്. പാലത്തിന്‍റെ ടെൻഡർ നടപടികൾ പൂർത്തീകരിച്ച് നിർമാണ പ്രവർത്തനങ്ങൾ മാസങ്ങൾക്ക് മുമ്പ് ആരംഭിച്ചെങ്കിലും മഴ കാരണം രണ്ട് മാസമായി പണി നിർത്തിവച്ചിരിക്കയാണ്. പുഴയിലെ തൂണുകളുടെ പൈലിംഗ് ജോലികൾ പുരോഗമിക്കുന്നതിനിടെയാണ് മഴ കനത്തത്. മഴ മാറി പുഴയിലെ വെള്ളം കുറയുന്നതോടെ നിർമാണ പ്രവർത്തനങ്ങൾ പുനരാരംഭിക്കും. 50 കോടി രൂപയാണ് പുതിയ പാലം നിർമാണത്തിന് പ്രതീക്ഷിക്കുന്ന ചെലവ്. 30.86 കോടി രൂപ അനുവദിച്ചിട്ടുണ്ട്. 370.9 മീറ്റർ നീളത്തിലാണ് പുതിയ പാലം നിർമിക്കുന്നത്. 7.5 മീറ്റർ റോഡും, 1.5 മീറ്റർ വീതിയിൽ നടപ്പാലവും ഉണ്ടാകും. ഇരു ഭാഗത്തേക്കും അനുബന്ധ റോഡുകളും പദ്ധതിയിൽ ഉൾപ്പെടും. കേരളറോഡ്ഫണ്ട് ബോർഡിനാണ് നിർമാണചുമതല.

പെരിങ്ങോട്ടുകുറിശിയിൽ വിവിധ പദ്ധതികളുടെ ഉദ്ഘാടനവും ഓണക്കിറ്റ് വിതരണവും

കുഴൽമന്ദം: പെരിങ്ങോട്ടുകുറിശ്ശി ഗ്രാമപഞ്ചായത്ത് 2025- 26 വാർഷിക പദ്ധതിയിൽ ഉൾപ്പെടുത്തി നടപ്പാക്കുന്ന വിവിധ പദ്ധതികളുടെ ഉദ്ഘാടനവും ഓണക്കിറ്റ് വിതരണവും നടന്നു. പട്ടികജാതി വിഭാഗത്തിലുള്ളവർക്കായി വിവാഹ ധനസഹായവും പഠനമുറിയും, പൊതുവിഭാഗത്തിലും പട്ടികജാതി വിഭാഗത്തിലുമുള്ള ഗുണഭോക്താക്കൾക്ക് ഭവന പുനരുദ്ധാരണ ധനസഹായം തുടങ്ങിയ പദ്ധതികളുടെ ഉദ്ഘാടനമാണ് നടന്നത്. വിതരണോദ്ഘാടനം ജില്ലാ പഞ്ചായത്ത് അംഗം അഭിലാഷ് തച്ചങ്കാട് നിർവഹിച്ചു. ഗ്രാമപഞ്ചായത്ത് പ്രസിഡന്‍റ് കെ.എം കേരളകുമാരി അധ്യക്ഷയായി. അതിദരിദ്രർക്കും ക്ഷയരോഗികൾക്കുമാണ് ഓണകിറ്റുകൾ വിതരണം ചെയ്തത്. 72 കിറ്റുകൾ അതിദരിദ്രർക്കും 20 കിറ്റുകൾ ക്ഷയരോഗികൾക്കും വിതരണം ചെയ്തു. പരിപാടിയിൽ വൈസ് പ്രസിഡന്‍റ് ഇ.പി. പൗലോസ്, സെക്രട്ടറി ഇൻചാർജ്ജ് എ.ഇ. മനോജ്, എ.വി. ഗോപിനാഥ്, പി.സി. രമണി സുനിത, പ്രിയ,സുഷമ എന്നിവർ പങ്കെടുത്തു.

സ്കൂൾകുട്ടികൾക്കുള്ള മെഗാ ഹെൽത്ത് ചെക്കപ്പ് ക്യാമ്പ്

കോയമ്പത്തൂർ: സിന്ധി ഇന്‍റർനാഷണൽ സ്കൂൾ, കോവൈ ഡയബറ്റിക്സ് സ്പെഷ്യാലിറ്റി സെന്‍റർ ആൻഡ് ഹോസ്പിറ്റൽ രാംനഗർ, റോട്ടറി ക്ലബ് ഓഫ് കോയമ്പത്തൂർ സായ് സിറ്റി എന്നിവയുമായി സഹകരിച്ച് തടകം റോഡിലെ സ്കൂൾ പരിസരത്ത് "ബൂട്ട് ക്യാമ്പ് ടു റീബൂട്ട് യുവർ ഹെൽത്ത് - 2025’ എന്ന പേരിൽ ഒരു മെഗാ ഹെൽത്ത് ചെക്ക്-അപ്പ് ക്യാമ്പ് സംഘടിപ്പിച്ചു. വിദ്യാർഥികൾ, രക്ഷിതാക്കൾ, അധ്യാപകർ, ജീവനക്കാർ എന്നിവരുൾപ്പെടെ 800-ലധികം പേർ പങ്കെടുത്തു.കോയമ്പത്തൂരിലെ പ്രശസ്ത സ്ഥാപനങ്ങളിൽ നിന്നുള്ള ഡോക്ടർമാരുടെയും ആരോഗ്യ സംരക്ഷണ വിദഗ്ധരുടെയും കൺസൾട്ടേഷനുകളും സ്ക്രീനിംഗുകളും മൾട്ടി-ഡിസിപ്ലിനറി ക്യാമ്പിൽ ഉണ്ടായിരുന്നു. ക്യാമ്പിൽ കുട്ടികൾക്ക് കണ്ണ്, ചെവി, ദന്ത പരിശോധനകൾ നടത്തി. മുതിർന്നവർക്ക് പ്രമേഹം, രക്തസമ്മർദ്ദം, ഹൃദയ, നേത്ര പരിശോധനകൾ എന്നിവ നടത്തി. കൂടാതെ, ശാരീരിക ആരോഗ്യം, പോഷകാഹാരം, വ്യായാമം എന്നിവയെക്കുറിച്ചുള്ള ബോധവത്കരണ സെഷനുകളും നടന്നു. ഡയറ്റീഷ്യൻമാർ ഭക്ഷണ മാർഗനിർദേശം നൽകി. ഫിസിയോതെറാപ്പിസ്റ്റുകൾ പതിവ് വ്യായാമത്തിന്‍റെ പ്രാധാന്യം വിശദീകരിച്ചു. സ്കൂൾ ചെയർമാൻ കമലേഷ് വി. രഹേജ, പ്രിൻസിപ്പൽ ഭാഗ്യലക്ഷ്മി ശ്രീനിവാസൻ, റോട്ടറി ക്ലബ് പ്രസിഡന്‍റ് ഹാൽതുറൈ എന്നിവർ പരിപാടിയിൽ പങ്കെടുത്തു. കോവൈ ഡയബറ്റിക്സ് സ്പെഷ്യാലിറ്റി സെന്‍റർ ആൻഡ് ഹോസ്പിറ്റലാണ് ക്രമീകരണങ്ങൾ ഏകോപിപ്പിച്ചത്.

പോലീസ് പെൻഷനേഴ്സ്‌ കൂട്ടായ്മ കുടുംബസംഗമം

പാലക്കാട്: പോലീസ് പെൻഷനേഴ്സ്‌ ഒരുമ കൂട്ടായ്മ ഓണാഘോഷവും കുടുംബസംഗമവും മാധവരാജാ ക്ലബ് ഓഡിറ്റോറിയത്തിൽ നടത്തി. ക്ലബ് പ്രസിഡന്‍റ് എ.കെ. നാരായണൻ ഉദ്ഘാടനം ചെയ്തു. കൂട്ടായ്മ പ്രസിഡന്‍റ് ജി. ബാബു അധ്യക്ഷനായിരുന്നു. സെക്രട്ടറി വി. രവീന്ദ്രൻ സ്വാഗതവും. റിട്ടയേഡ് ഡിവൈഎസ്പി വി.എസ്. മുഹമ്മദ് കാസിം, എം. നൂർ മുഹമ്മദ്, എം. അനന്തകൃഷ്ണൻ എന്നിവർ പ്രസംഗിച്ചു. ഡെപ്യൂട്ടി ഡയറക്ടർ ഓഫ് നേഴ്സിംഗായി പ്രമോഷൻ ലഭിച്ച കെ. രാധാമണിയെയും, രാഷ്ട്രപതിയുടെ പോലീസ് മെഡൽ നേടിയ ബി. സുരേന്ദ്രനെയും ചടങ്ങിൽ ആദരിച്ചു.

ഇന്ത്യൻ ആരോഗ്യമേഖലയുടെ സംഭാവനകൾ ശ്രദ്ധേയം: ഡോ.ജി. ഭക്തവത്സം

പാലക്കാട്: ലോക ആരോഗ്യമേഖലയ്ക്ക് ഇന്ത്യൻ ഡോക്ടർമാരുടെ പരിജ്ഞാനവും ഗവേഷണവും മാതൃകയാകുന്നുണ്ടെന്ന് കോയമ്പത്തൂർ കെ.ജി. ഹോസ്പിറ്റൽ ചെയർമാൻ ഡോ.ജി. ഭക്തവത്സം. പാലക്കാട് യൂമെഡ് ഹോസ്പിറ്റൽ വാർഷികാഘോഷ പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചടങ്ങിൽ യൂമെഡ് ആശുപത്രി ചെയർമാനും സീനിയർ ന്യൂറോളജിസ്റ്റുമായ ഡോ. എം. പ്രദീപ് അധ്യക്ഷത വഹിച്ചു. നഗരസഭ അധ്യക്ഷ പ്രമീള ശശിധരൻ, സീനിയർ അഭിഭാഷകൻ പി.ബി. മേനോൻ, ഡോ. പി.കെ. രാജഗോപാൽ, റിട്ട. എഎസ്പി കെ.എൽ. രാധാകൃഷ്ണൻ, സാമൂഹിക പ്രവർത്തകൻ നിഖിൽ കൊടിയത്തൂർ തുടങ്ങിയവർ പ്രസംഗിച്ചു.

അമലഗിരി അടിപ്പെരണ്ട പള്ളിയിൽ എട്ടുനോമ്പ് പെരുന്നാളിനു കൊടിയേറി

നെന്മാറ: അമലഗിരി അടിപ്പെരണ്ട മലങ്കര സുറിയാനി കത്തോലിക്ക പള്ളിയിൽ എട്ടുനോമ്പ് പെരുന്നാളിനു കൊടിയേറി. ഇടവകവികാരി ഫാ. ജോർജ് കയ്യാനിക്കൽ കൊടിയേറ്റി. നാളെ തുടങ്ങി എട്ടുദിവസം വരെയാണ് പെരുന്നാൾ. നാളെ വൈകുന്നേരം 4.30 ന് ജപമാല, ഫാ.ജോർജ് കയ്യാനിക്കൽ കാർമികത്വം വഹിക്കുന്ന വിശുദ്ധ കുർബാന, മധ്യസ്ഥ പ്രാർഥന. ഏഴിന് വൈകുന്നേരം 4.30ന് ജപമാല, വിശുദ്ധ കുർബാന. 6.30ന് റാസ. പള്ളിയിൽനിന്ന് ആരംഭിച്ച് അടിപ്പരണ്ട കവലവഴി പള്ളിയിലേക്ക്. എട്ടിനു രാവിലെ 8.30ന് പ്രഭാതപ്രാർഥനയ്ക്കുശേഷം ആഘോഷമായ തിരുനാൾ കുർബാനയ്ക്ക് ഫാ. വർഗീസ് പന്തീരായിതടത്തിൽ കാർമികത്വം വഹിക്കും. നേർച്ചസദ്യ, കൊടിയിറക്ക് എന്നിവയും നടക്കും.

ചുള്ളിമട പാലത്തിലേക്കുളള ഗ്രാമീണ റോഡ് ഗതാഗതയോഗ്യമാക്കണം: കോൺഗ്രസ്

ആലത്തൂർ: ആലത്തൂർ - എരിമയൂർ ഗ്രാമപഞ്ചായത്തുകളെ ബന്ധിപ്പിക്കുന്ന കൂട്ടമൂച്ചി - ചുള്ളിമട പാലത്തിലേക്ക് പോകുന്ന പഞ്ചായത്ത് റോഡിന്‍റെ ശോചനീയാ അവസ്ഥ പരിഹരിക്കണമെന്ന് നാലാം വാർഡ് കോൺഗ്രസ് കമ്മിറ്റി യോഗം ബന്ധപ്പെട്ടവരോടാവശ്യപ്പെട്ടു. ഏകദേശം 12 കോടി രൂപ ചെലവഴിച്ചു നിർമിച്ച കൂട്ടമൂച്ചി - ചുള്ളിമട പാലത്തിന്‍റെ ഉദ്ഘാടനം വൈകുകയാണ്. പഞ്ചായത്ത് ഭരണസമിതി മുൻകൈയെടുത്തു യാത്ര സൗകര്യം ഒരുക്കണമെന്നാണ് കൂട്ടമൂച്ചി നിവാസികളും കുമ്പളക്കോട് തൃപ്പാളൂർ വാർഡ് കോൺഗ്രസ് കമ്മിറ്റി യോഗവും ആവശ്യപ്പെടുന്നത്. പാലത്തിന്‍റെ ഉദ്ഘാടനത്തിനുമുമ്പ് ഗ്രാമീണ റോഡുകൂടി വൃത്തിയാക്കിയാൽ മാത്രമേ പൊതുജനത്തിനു പ്രയോജനം പൂർണമായി ലഭിക്കൂ. കെ.വി. ശ്രീജിത്ത് അധ്യക്ഷത വഹിച്ചു. ഐഎൻടിയുസി ജില്ലാ ജനറൽ സെക്രട്ടറി തൃപ്പാളൂർ ശശി, മുൻ ഗ്രാമപഞ്ചായത്ത് മെംബർ കെ. ഹരിദാസ്, വാർഡ് കോൺഗ്രസ് പ്രസിഡന്‍റുരായ സുമേഷ് തൃപ്പാളൂർ, ശിവദാസൻ എന്നിവർ പങ്കെടുത്തു.

കോയന്പത്തൂരിൽ 28.5 കോടി ചെലവിൽ ബഹുനില കാർപാർക്കുകൾ നിർമിക്കും

കോയമ്പത്തൂർ: നഗരത്തിലെ 3 സ്ഥലങ്ങളിൽ 28.5 കോടിരൂപ ചെലവിൽ ബഹുനില കാർപാർക്കുകൾ നിർമിക്കാൻ തീരുമാനം. കോയമ്പത്തൂരിലെ ക്രോസ് കട്ട് റോഡ്, രാജ വീഥി, റേസ് കോഴ്‌സ് റോഡ് എന്നിവിടങ്ങളിലെ ഗതാഗതക്കുരുക്ക് കുറയ്ക്കുന്നതിനും പാർക്കിംഗ് സൗകര്യങ്ങൾ മെച്ചപ്പെടുത്തുന്നതിനുമായി ബഹുനില കാർ പാർക്കുകൾ നിർമിക്കുന്നതിനുള്ള പ്രവർത്തനങ്ങൾ ആരംഭിക്കാനാണ് കോർപറേഷൻ തീരുമാനിച്ചത്. ക്രോസ്കട്ട് റോഡിലെ നിലവിലുള്ള കോർപറേഷൻ കാർപാർക്ക് സമുച്ചയം നവീകരിക്കാനും 9.5 കോടി രൂപ ചെലവിൽ 95 ഇരുചക്ര വാഹനങ്ങൾക്കും 84 കാറുകൾക്കും പാർക്കിംഗ് സൗകര്യം ഒരുക്കാനും തീരുമാനിച്ചു. രാജ വീഥിയിൽ 9.5 കോടി രൂപ ചെലവിൽ 50 ഇരുചക്ര വാഹനങ്ങൾക്കും 100 കാറുകൾക്കും ഒരു ബഹുനില കാർ പാർക്ക് നിർമിക്കാനും റേസ് കോഴ്‌സ് ഏരിയയിലെ കെ.ജി. തീയറ്ററിന് എതിർവശത്തുള്ള കോർപറേഷന്‍റെ സ്ഥലത്ത് 9.5 കോടി രൂപ ചെലവിൽ 95 ഇരുചക്ര വാഹനങ്ങൾക്കും 84 കാറുകൾക്കും ഒരു ബഹുനില കാർ പാർക്ക് നിർമിക്കാനും പ്രമേയങ്ങൾ പാസാക്കി. മുനിസിപ്പൽ അഡ്മിനിസ്ട്രേഷൻ ഡയറക്ടറേറ്റിന് അംഗീകാരത്തിനായി സമർപ്പിച്ച് പ്രവൃത്തി ആരംഭിക്കാനാണ് പദ്ധതി.

"ജലമാണ് ജീവൻ' യോഗം ചേർന്നു

നെന്മാറ: ഗ്രാമപഞ്ചായത്തിൽ ജലമാണ് ജീവൻ കാന്പയിനിന്‍റെ ഭാഗമായി കൂടിയാലോചന യോഗം ചേർന്നു. പഞ്ചായത്ത് ഹാളിൽ നടന്ന പരിപാടി പ്രസിഡന്‍റ് പ്രബിതാ ജയൻ ഉദ്ഘാടനം ചെയ്തു. അമീബിക് മസ്തിക ജ്വരത്തിന്‍റെ അപകടസാധ്യതയും ശാസ്ത്രീയ വസ്തുതകളും കമ്യൂണിറ്റി ഹെൽത്ത് സെന്‍റർ ജൂണിയർ ഹെൽത്ത് ഇൻസ്പെക്ടർ എസ്. അരുണ്‍കുമാർ വിശദീകരിച്ചു. കിണർ ക്ലോറിനേഷനെക്കുറിച്ച് നവകേരളം കർമപദ്ധതി റിസോഴ്സ് പേഴ്സണ്‍ എസ്.വി. പ്രേംദാസ് വിശദീകരിച്ചു. യോഗത്തിൽ നെന്മാറ ഗ്രാമപഞ്ചായത്ത് വൈസ് പ്രസിഡന്‍റ് സി. പ്രകാശൻ അധ്യക്ഷനായി. വാർഡ്മെംബർമാർ, അസിസ്റ്റന്‍റ് സെക്രട്ടറി കെ.ജി. നിജീഷ്, പഞ്ചായത്ത് ഹെൽത്ത് ഇൻസ്പെക്ടർ ജെ. സഹന, ആശ പ്രവർത്തകർ, ഹരിതകർമ സേനാംഗങ്ങൾ, എന്നിവർ പങ്കെടുത്തു.

എസ്. പുരന്ദരദാസിനെ ആദരിച്ചു

വണ്ടിത്താവളം: മൊഖോ ഇന്‍റര്‍നാഷണല്‍ ഫിലിം ഫെസ്റ്റിവലില്‍ മികച്ച സംവിധായകനായി തെരഞ്ഞെടുക്കപ്പെട്ട എസ്. പുരന്ദരദാസിനേയും സംഘത്തെയും പട്ടഞ്ചേരി ഗ്രാമീണ ഗ്രന്ഥശാലയുടെ ആഭിമുഖ്യത്തില്‍ ആദരിച്ചു. യോഗം സിനിമാസംവിധായകന്‍ ഫാറൂഖ് അബ്ദുല്‍റഹിമാന്‍ ഉദ്ഘാടനം ചെയ്തു. ലൈബ്രറി കൗണ്‍സില്‍ സംസ്ഥാന കൗണ്‍സിലംഗം ജയകൃഷ്ണന്‍ അധ്യക്ഷനായി. പത്രപ്രവര്‍ത്തകന്‍ വി.എം. ഷണ്‍മുഖദാസ്, വിജയകൃഷ്ണന്‍ (കൂടാരം), കലാസംവിധായകന്‍ അശ്വിന്‍, രാജഗോപാലന്‍, ഗുണശേഖരന്‍, രാമന്‍ ഉറവ്, സി.എം. ശങ്കരനാരായണന്‍, ജയ്‌സി എന്നിവര്‍ പ്രസംഗിച്ചു.

അമ്മമാരുടെ മഹാകുടുംബസംഗമം

വടക്കഞ്ചേരി: കോൺഗ്രസ് വടക്കഞ്ചേരി മണ്ഡലം കമ്മിറ്റിയുടെ നേതൃത്വത്തിൽ ലഹരിയിൽ നിന്ന് സ്വാതന്ത്ര്യം, ലഹരിക്കെതിരേ അമ്മമാർ എന്ന സന്ദേശവുമായി അമ്മമാർക്കായി മഹാ കുടുംബസംഗമവും ഉന്നതവിജയം നേടിയ എസ്എസ്എൽസി, പ്ലസ്‌ ടു വിദ്യാർഥികൾക്കുള്ള അനുമോദനവും സംഘടിപ്പിച്ചു. വടക്കഞ്ചേരി പഞ്ചായത്ത് കമ്യൂണിറ്റി ഹാളിൽ നടന്ന പരിപാടികൾ മുൻമന്ത്രി വി.സി. കബീർ മാസ്റ്റർ ഉദ്ഘാടനം ചെയ്തു. മണ്ഡലം പ്രസിഡന്‍റ് ഇല്ല്യാസ് പടിഞ്ഞാറെക്കളം അധ്യക്ഷത വഹിച്ചു. കെപിസിസി സെക്രട്ടറി പ്രഫ.കെ.എ. തുളസി മുഖ്യപ്രഭാഷണം നടത്തി. ദേശീയ സംസ്ഥാന തലങ്ങളിൽ മികച്ച പ്രകടനം നടത്തിയ കായിക താരങ്ങളെയും ചടങ്ങിൽ ആദരിച്ചു. കെപിസിസി മെംബർ വി. സുദർശനൻ, ഡിസിസി സെക്രട്ടറി ഡോ. അർസലൻ നിസാം, കോൺഗ്രസ് ബ്ലോക്ക് പ്രസിഡന്‍റ് അഡ്വ.എം. ദിലീപ്, വടക്കഞ്ചേരി കോ-ഓപറേറ്റീവ് സർവീസ് ബാങ്ക് പ്രസിഡന്‍റ് റെജി കെ. മാത്യു, ഗ്രാമപഞ്ചായത്ത് അംഗങ്ങളായ സി. മുത്തു, സി.കെ. ദേവദാസ്, ജി. സതീഷ് കുമാർ, അമ്പിളി മോഹൻദാസ്, കോൺഗ്രസ് മണ്ഡലം ഭാരവാഹികളായ ജോണി ഡയൻ, എ. ജോസ് ചുവട്ടുപാടം, എം.പി. ശശികല, സുനിൽ ചുവട്ടുപാടം, പി.എസ്. മുജീബ് പ്രസംഗിച്ചു.

നെല്ലിയാന്പതി ബാലഭവനിൽ മെഡിക്കൽ ക്യാന്പ് നടത്തി

നെല്ലിയാന്പതി: പ്രാഥമിക ആരോഗ്യ കേന്ദ്രത്തിന്‍റെ ആഭിമുഖ്യത്തിൽ പകർച്ചവ്യാധി നിയന്ത്രണവും കുഞ്ഞുങ്ങളുടെ ആരോഗ്യവും മുൻനിർത്തി മെഡിക്കൽ ക്യാന്പ് നടത്തി. മെഡിക്കൽ ഓഫീസർ ഡോ. മനു തോമസിന്‍റെ നേതൃത്വത്തിൽ ചന്ദ്രാമല ബാലാഭവനിലാണ് ക്യാന്പ് സംഘടിപ്പിച്ചത്. മെഡിക്കൽ ക്യാന്പിൽ 26 ഓളം കുട്ടികളെ മെഡിക്കൽ ഓഫീസർ പരിശോധിക്കുകയും മരുന്ന് വിതരണം നടത്തുകയും ചെയ്തു. കുട്ടികളിലെ പോഷകാഹാര കുറവ്, കുട്ടികളിലെ കുഷ്ഠരോഗ ലക്ഷണങ്ങൾ, അലർജി, പനി, മറ്റു രോഗലക്ഷണങ്ങൾ എന്നിവ പരിശോധിച്ച് മരുന്നുകൾ വിതരണം ചെയ്തു. കുട്ടികളിൽ കണ്ടുവരുന്ന പകർച്ചവ്യാധിയും അവ പ്രതിരോധിക്കേണ്ട രീതിയും സംബന്ധിച്ച് മെഡിക്കൽ ഓഫീസർ ഡോ. മനു തോമസ് ആരോഗ്യ ബോധവത്കരണ ക്ലാസ് എടുത്തു. പബ്ലിക് ഹെൽത്ത് നഴ്സ് സഹീത, ജൂണിയർ പബ്ലിക് ഹെൽത്ത് നഴ്സ് സുദിന സുരേന്ദ്രൻ, ജൂണിയർ ഹെൽത്ത് ഇൻസ്പെക്ടർമാരായ ബി. അഫ്സൽ, എസ്. ശരണ്‍റാം, സൈനു സണ്ണി എന്നിവരും ക്യാന്പിന് നേതൃത്വം നൽകി.

ഭക്ഷ്യസുരക്ഷാ വകുപ്പിന്‍റെ ഓണക്കാലപരിശോധന 51 കേന്ദ്രങ്ങളിൽ

പാലക്കാട്: ഓണത്തിന് മുന്നോടിയായി ജില്ലയിലെ വിവിധ ഭാഗങ്ങളിൽ ഭക്ഷ്യസുരക്ഷാ വകുപ്പ് നടത്തുന്ന പരിശോധന തുടരുന്നു. മാർക്കറ്റുകൾ, ഹോട്ടലുകൾ, ബേക്കറികൾ എന്നിവ കേന്ദ്രീകരിച്ചാണ് പരിശോധന നടക്കുന്നത്. തരൂർ, പട്ടാന്പി, ചിറ്റൂർ, തൃത്താല എന്നീ 4 സർക്കിളുകൾക്ക് കീഴിലായി 51 കേന്ദ്രങ്ങളിലാണ് ഇന്നലെ പരിശോധന നടത്തിയത്. ഇതിൽ ചിറ്റൂർ, തൃത്താല സർക്കിളുകൾ സിവിൽ സപ്ലൈസ് വകുപ്പുമായി ചേർന്ന് സംയുക്തമായാണ് പരിശോധന സംഘടിപ്പിച്ചത്. നാല്സാന്പിളുകൾ ശേഖരിച്ച് ലാബിലേക്ക് പരിശോധനയ്ക്ക് അയച്ചു. ഓരോ സ്ഥാപനങ്ങൾക്ക് വീതം തിരുത്തൽ നോട്ടീസും, കോന്പൗണ്ടിംഗ് നോട്ടീസ് നൽകി. ഒരു സ്ഥാപനത്തിന് മെച്ചപ്പെടുത്തൽ നോട്ടീസ് നൽകുകയും ചെയ്തു.

കൊടുന്തിരപ്പുള്ളി വിമലഹൃദയ പള്ളിയിൽ എട്ടുനോമ്പാചരണം നാളെമുതൽ

പാലക്കാട്: കൊടുന്തിരപ്പുള്ളി വിമലഹൃദയ ദേവാലയത്തിൽ പരിശുദ്ധ കന്യകാമറിയത്തിന്‍റെ പിറവിത്തിരുനാളിന് ഒരുക്കമായുള്ള എട്ടുനോമ്പാചരണം നാളെ ആരംഭിക്കും. വൈകുന്നേരം 5.30 ന് പാലക്കാട് രൂപത ചാൻസലർ ഫാ. ഗിൽബർട്ട് എട്ടൊന്നിൽ കൊടിയേറ്റും. തുടർന്ന് വിശുദ്ധ കുർബാന അർപ്പിക്കും. വികാരി ഫാ.ടോജി ചെല്ലങ്കോട്ട് സന്നിഹിതനായിരിക്കും. രണ്ടിന് ചൊവ്വ മുതൽ ആറാം തിയതിവരെ എല്ലാ ദിവസവും വൈകുന്നേരം 4.45 ന് ആരാധനയും 5.30 നു വിശുദ്ധ കുർബാനയും ഉണ്ടായിരിക്കും. ഫാ. ഫ്രെഡി അരിക്കാടൻ, ഫാ. ജിബിൻ കണ്ടത്തിൽ, ഫാ. ടിബിൻ കരോട്ടുപുല്ലുവേലിപ്പാറയിൽ, ഫാ. ഷിൻസ് കാക്കാനിയിൽ, ഫാ. എബി പൊറുത്തൂർ എന്നിവർ കാർമികത്വം വഹിക്കും. ഏഴിനു രാവിലെ ഏഴുമണിക്കു പാലന ഹോസ്പിറ്റൽ ഡയറക്ടർ ഫാ. വാൾട്ടർ തേലപ്പിള്ളി സിഎംഐ വിശുദ്ധ കുർബാന അർപ്പിക്കും. പ്രധാന തിരുനാൾ ദിനമായ എട്ടിന് വൈകുന്നേരം 4.30 ന് ആഘോഷമായ തിരുനാൾ കുർബാന ആരംഭിക്കും. വള്ളിയോട് സെന്‍റ് മേരീസ് പോളിടെക്നിക് അസിസ്റ്റന്‍റ് ഡയറക്ടർ ഫാ. ആനന്ദ് അമ്പൂക്കൻ മുഖ്യകാർമ്മികത്വം വഹിക്കും. മുണ്ടൂർ യുവക്ഷേത്ര കോളജ് വൈസ് പ്രിൻസിപ്പൽ ഫാ. ഷൈജു പരിയാത്ത് തിരുനാൾസന്ദേശം നൽകും. തുടർന്ന് പരിശുദ്ധ കന്യകാമറിയത്തിന്‍റെ തിരുസ്വരൂപം വഹിച്ചുകൊണ്ട് കൊടുന്തിരപ്പുള്ളി ജംഗ്ഷനിലേക്ക് ജപമാലപ്രദക്ഷിണം ഉണ്ടാകും. രാത്രി ഊട്ടുനേർച്ചയും നടത്തും. തിരുനാളിന്‍റെ നടത്തിപ്പിന് വികാരി ഫാ.ടോജി ചെല്ലങ്കോട്ട്, കൈക്കാരന്മാരായ വിൽസൺ പുലിക്കോട്ടിൽ, ആന്‍റണി ലൂയിസ് തൈപ്പറമ്പിൽ, ജനറൽ കൺവീനർ സെബാസ്റ്റ്യൻ പുത്തൻപുരയ്ക്കൽ, ജോയിന്‍റ് കൺവീനർ വിൻസി ജെയ്സൺ തലക്കോട്ടൂർ എന്നിവർ നേതൃത്വം നൽകും.

പാറമടയ്ക്ക് അനുമതിക്കെതിരേ പ്രതിഷേധധർണ നടത്തി

പല്ലശന: പഞ്ചായത്തിലെ രണ്ടാംവാർഡിൽ പ്രവർത്തനം നിർത്തിവെച്ചിരുന്ന പാറമടയ്ക്ക് വീണ്ടും അനുമതിനൽകിയ തീരുമാനത്തിൽ പ്രതിഷേധിച്ച് നാട്ടുകാർ പഞ്ചായത്തിനുമുന്നിൽ ധർണ നടത്തി. നൂറുകണക്കിനു കുടുംബങ്ങളുടെ ജീവനും സ്വത്തിനും ഭീഷണിയായതും 500 ഏക്കറോളം വരുന്ന കൃഷിസ്ഥലം നാശമാക്കാനിടവരുന്ന പാറമടയ്ക്കെതിരേ നാട്ടുകാർ ഒരുവർഷമായി സമരത്തിലാണ്. പാറപൊട്ടിച്ച സമയത്തു വീടിനുമുകളിൽ കല്ല് വീണപ്പോൾ നാട്ടുകാരുടെ പരാതിയുടെ അടിസ്ഥാനത്തിൽ സെക്രട്ടറി പ്രവർത്തനം നിർത്തിവയ്ക്കാൻ ഉത്തരവിട്ടിരുന്നു. എന്നാൽ നിയമലംഘനം നടത്തി പാറപൊട്ടിച്ചുവന്ന ക്വാറി ഉടമയ്ക്ക് അനുകൂലമായി പഞ്ചായത്ത് സമിതിയിലെ 10 ഭരണപക്ഷ അംഗങ്ങൾ ചേർന്ന് അനുവാദംകൊടുത്തത്. പ്രതിപക്ഷ മെംബർമാരായ കോൺഗ്രസ്‌ അംഗങ്ങൾ വിയോജനക്കുറിപ്പ് നൽകി യോഗം ബഹിഷ്കരിച്ചു. തുടർന്നു നിയമനടപടികളുമായി മുന്നോട്ടുപോകാനും തീരുമാനമായി. പ്രതിഷേധ ധർണ സമരസമിതി കൺവീനർ സി. ഗോപാലകൃഷ്ണന്‍റെ അധ്യക്ഷതയിൽ സമരസമിതി ചെയർമാനും രണ്ടാം വാർഡ് മെംബറുമായ എസ്. അശോകൻ ഉദ്ഘാടനം ചെയ്തു.

ലൂർദ്മാത പള്ളിയിൽ മാതാവിന്‍റെ ജനനത്തിരുനാളിനും എട്ടുനോമ്പാചരണത്തിനും ഇന്നു തുടക്കമാകും

വടക്കഞ്ചേരി: മരിയൻ തീർഥകേന്ദ്രമായ വടക്കഞ്ചേരി ലൂർദ്മാതാ ഫൊറോന പള്ളിയിലെ പരിശുദ്ധ കന്യകാമറിയത്തിന്‍റെ ജനന തിരുനാളിനും എട്ടുനോമ്പാചരണത്തിനും ഇന്ന് തുടക്കമാകും. വൈകുന്നേരം നാലരയ്ക്ക് ആഘോഷമായ കുർബാന, പ്രസംഗം, നൊവേന, ലദീഞ്ഞ്, നേർച്ച വിതരണം. തുടർന്ന് സെപ്റ്റംബർ ആറ് വരെയുള്ള ദിവസങ്ങളിൽ വൈകുന്നേരം അഞ്ചിനാണ് ആഘോഷമായ കുർബാനയും മറ്റുതിരുക്കർമങ്ങളും നടക്കുക. ജനന തിരുനാൾ ആഘോഷം നടക്കുന്ന സെപ്റ്റംബർ ഏഴിന് രാവിലെ എട്ടിന് ആഘോഷമായ കുർബാന, വചനസന്ദേശം, നൊവേന, ലദീഞ്ഞ്, സ്നേഹവിരുന്ന് എന്നീ ശുശ്രൂഷകളുണ്ടാകും. പഞ്ചാബ് ജലന്തർ രൂപത ബിഷപ് മാർ ജോസ് സെബാസ്റ്റ്യൻ തെക്കുംചേരിക്കുന്നേൽ കാർമികനാകും. സെപ്റ്റംബർ എട്ടിന് വൈകീട്ട് നാലരക്ക് ആഘോഷമായ കുർബാനയും മറ്റു തിരുകർമങ്ങളും ഉണ്ടാകും. ദിവസവും പതിവുപോലെ ആറരക്കുള്ള കുർബാന ഉണ്ടാകും. ഇന്നും സെപ്റ്റംബർ ഏഴിന് ഞായറാഴ്ചയും രാവിലെ ഒമ്പതരക്കുള്ള കുർബാന ഉണ്ടായിരിക്കുന്നതല്ല. ഫാ. ജിറ്റോ കപ്യാരുമലയിൽ ടിഒആർ, ഫാ. മെൽവിൻ ചൊവ്വല്ലൂർ, ഫാ. ഐബിൻ പെരുമ്പിള്ളിൽ, ഫാ. അരുൺ വാളിപ്ലാക്കൽ, ഫാ. എഡ്വിൻ കൊമ്പൻ, ഫാ. ബർണാന്‍റോ കുറ്റിക്കാടൻ, റവ.ഡോ. സേവ്യർ മാറാമറ്റം, ഫാ. ടോണി ചേക്കയിൽ എന്നീ വൈദികരാണ് ഓരോ ദിവസത്തെയും തിരുക്കർമങ്ങൾക്ക് കാർമികത്വം വഹിക്കുക. ഫൊറോന വികാരി ഫാ. റെജി പെരുമ്പിള്ളിൽ, അസി. വികാരി ഫാ. ടോണി ചേക്കയിൽ, കൈകാരന്മാരായ സണ്ണി നടയത്ത്, ബാബു തെങ്ങുംപള്ളി എന്നിവരുടെ നേതൃത്വത്തിലാണ് തിരുനാൾ പരിപാടികൾ.

നാലുമാസം പ്രായമുള്ള കുഞ്ഞ് പാൽ കുടിക്കുന്നതിനിടെ മരിച്ചു

വണ്ടിത്താവളം: മീനാക്ഷിപുരത്ത് നാലുമാസം പ്രായമായ പെൺകുഞ്ഞ് പാൽ ശ്വാസനാളത്തിൽ കുടുങ്ങി മരിച്ചു. സർക്കാർപതി പാർഥിപൻ - സംഗീത ദന്പതികളുടെ മകളാണ് മരിച്ചത്. വെള്ളിയാഴ്ച വൈകുന്നേരം 5.30ന് കുഞ്ഞ് പാൽ കുട്ടിക്കാനാവാതെ നിശ്ചലാവസ്ഥയിലായത്. ഉടൻതന്നെ ആംബുലൻസിൽ ജില്ലാ ആശുപത്രിയിൽ എത്തിച്ചു. പോസ്മോർട്ടം നടത്തിയതിൽ പാൽ ശ്വാസനാളത്തിൽ കുടുങ്ങിയതാണ് മരണകാരണമെന്ന് സ്ഥിരീകരിച്ചു. നാലു മാസം പ്രായമായ കുഞ്ഞിന് വളർച്ചക്കുറവുണ്ടായിരുന്നു. രണ്ടുവർഷം മുൻപ് ഇവരുടെ ആദ്യത്തെ കുഞ്ഞും നാലു മാസം പ്രായത്തിൽ മരിച്ചിരുന്നു. പാർഥിപന്‍റെ മൊഴിയിൽ പോലീസ് മേൽനടപടികൾ സ്വീകരിച്ചു.

ജില്ലാതല ഓണാഘോഷ പരിപാടികൾ സെപ്റ്റംബർ നാലുമുതൽ

പാലക്കാട്: സംസ്ഥാന ടൂറിസം വകുപ്പ്, ജില്ലാ ഭരണകൂടം, ജില്ലാ ടൂറിസം പ്രൊമോഷൻ കൗണ്‍സിൽ എന്നിവയുടെ സംയുക്ത ആഭിമുഖ്യത്തിൽ സംഘടിപ്പിക്കുന്ന ജില്ലാതല ഓണാഘോഷ പരിപാടികൾക്ക് സെപ്റ്റംബർ നാലിന് തുടക്കമാവും. പാലക്കാട് രാപ്പാടി ഓപ്പണ്‍ എയർ ഓഡിറ്റോറിയം, വെള്ളിയാങ്കല്ല് പൈതൃക പാർക്ക്, ശ്രീകൃഷ്ണപുരം ബാപ്പുജി ചിൽഡ്രൻസ് പാർക്ക്, പോത്തുണ്ടി ഉദ്യാനം എന്നിവിടങ്ങളിലായി വിവിധ വേദികളിലാണ് ഇത്തവണ പരിപാടികൾ അരങ്ങേറുന്നത്. സെപ്റ്റംബർ ഏഴുവരെ പരിപാടികൾ നീണ്ടു നിൽക്കും. സെപ്റ്റംബർ നാലിന് വൈകുന്നേരം 5.30ന് രാപ്പാടി ഓപ്പണ്‍ എയർ ഓഡിറ്റോറിയത്തിൽ കലാമണ്ഡലം വിവേകും സംഘവും അവതരിപ്പിക്കുന്ന മിഴാവ് മേളത്തോടെ പരിപാടികൾക്ക് തുടക്കമാകും. തുടർന്ന് ഉദ്ഘാടന സമ്മേളനം. ചലച്ചിത്രതാരം ശ്രുതി ജയനും സംഘവും നൃത്തപരിപാടികൾ അവതരിപ്പിക്കും, രാത്രി എട്ടിന് സ്വരലയ പാലക്കാടിന്‍റെ ഉത്രാടരാവ് എന്ന കലാപരിപാടിയും നടക്കും. അഞ്ചിന് വൈകുന്നേരം അഞ്ചിന് മണ്ണൂർ ചന്ദ്രനും സംഘവും അവതരിപ്പിക്കുന്ന പൊറാട്ടുകളിയും 5.30 ന് പത്മശ്രീ രാമചന്ദ്രപുലവരും സംഘവും അവതരിപ്പിക്കുന്ന തോൽപ്പാവക്കൂത്തും നടക്കും. വെള്ളിയാങ്കല്ല് പൈതൃക പാർക്കിൽ സെപ്റ്റംബർ ആറിന് വൈകുന്നേരം ആറിന് കൊച്ചിൻ കൈരളി കമ്യൂണിക്കേഷൻസിന്‍റെ ഗാനമേളയും സെപ്റ്റംബർ ഏഴിന് സരിത റഹ്മാൻ നയിക്കുന്ന ഗാനസന്ധ്യയും കലാമണ്ഡലം ഐശ്വര്യയും സംഘവും അവതരിപ്പിക്കുന്ന നൃത്തസന്ധ്യയും അരങ്ങേറും. ശ്രീകൃഷ്ണപുരം ബാപ്പുജി ചിൽഡ്രൻസ് പാർക്കിൽ സെപ്റ്റംബർ ആറിന് വൈകുന്നേരം 5.30 ന് കലാമണ്ഡലം അഭിജേഷും സംഘവും അവതരിപ്പിക്കുന്ന ചാക്യാർകൂത്ത്, വൈകുന്നേരം 6.30 ന് സാരംഗ് ഓർക്കസ്ട്രയുടെ ഗാനമേള എന്നിവ നടക്കും. സെപ്റ്റംബർ ഏഴിന് വൈകുന്നേരം 5.30 ന് വിശ്വനാഥപുലവരും സംഘവും അവതരിപ്പിക്കുന്ന തോൽപ്പാവക്കൂത്ത്, വൈകുന്നേരം 6.30 ന് വടക്കൻസ് പാലക്കാട് അവതരിപ്പിക്കുന്ന മെഗാ ഇവന്‍റ് എന്നിവയാണ് പരിപാടികൾ. പോത്തുണ്ടി ഉദ്യാനത്തിൽ സെപ്റ്റംബർ ആറിന് വൈകുന്നേരം നാലിന് കൈതോല നാടൻ പാട്ടുകൂട്ടത്തിന്‍റെ അല്ലിപ്പൂങ്കാവ്, വൈകുന്നേരം ആറിന് സപ്തസ്വരം ഓർക്കസ്ട്രയുടെ മെലോഡീയസ് ഹിറ്റ്സ് പരിപാടികളും സെപ്റ്റംബർ ഏഴിന് വൈകുന്നേരം 4.30 ന് ജനാർദനൻ പുതുശേരിയും സംഘവും അവതരിപ്പിക്കുന്ന ആവണിപ്പാട്ടുകൾ, ആറിന് പാട്ടൊരുമ പാലക്കാട് അവതരിപ്പിക്കുന്ന പാട്ടുത്സവം തുടങ്ങിയ കലാപരിപാടികളും നടക്കും.

കാഞ്ഞിരപ്പുഴ റൂറൽ ക്രെഡിറ്റ് കോ- ഓപ്പറേറ്റീവ് സൊസൈറ്റിയുടെ നവീകരിച്ച ഓഫീസ് ഉദ്ഘാടനം

കാഞ്ഞിരപ്പുഴ: കാഞ്ഞിരപ്പുഴ റൂറൽ ക്രെഡിറ്റ് കോ- ഓപ്പറേറ്റീവ് സൊസൈറ്റിയുടെ നവീകരിച്ച ഓഫീസ് കെടിഡിസി ചെയർമാൻ പി.കെ. ശശി ഉദ്ഘാടനം ചെയ്തു. സൊസൈറ്റി പ്രസിഡന്‍റ് എ. രാജഗോപാൽ അധ്യക്ഷനായി. പഞ്ചായത്ത് ഉപാധ്യക്ഷൻ സിദ്ദിഖ് ചേപ്പോടൻ, വാർഡ് മെംബർ പി. രാജൻ, പൊറ്റശേരി സർവീസ് സഹകരണ ബാങ്ക് പ്രസിഡന്‍റ് ജോയി ജോസഫ്, കാഞ്ഞിരപ്പുഴ സഹകരണ അർബൻ ക്രെഡിറ്റ് സൊസൈറ്റി പ്രസിഡന്‍റ് മുഹമ്മദ് ചെറൂട്ടി, ക്ഷീരോത്പാദക സഹകരണസംഘം പ്രസിഡന്‍റ് ബേബി ചെറുകര, വ്യാപാരി വ്യവസായി ഏകോപനസമിതി യൂണിറ്റ് പ്രസിഡന്‍റ് ജോർജ് നമ്പുശേരി, സിപിഎം മുൻ ലോക്കൽ സെക്രട്ടറിമാരായ കെ. ലിലീപ്കുമാർ, അരുൺ ഓലിക്കൽ, അബൂബക്കർ ചിറക്കൽപ്പടി, പി. ഉണ്ണികൃഷ്ണൻ, ബാലൻ പൊറ്റശേരി എന്നിവർ പ്രസംഗിച്ചു. മികച്ച സഹകാരിക്കുള്ള ഓവൻ പുരസ്കാരം നേടിയ പി.എ. ഉമ്മറിനെ ആദരിച്ചു.

താലൂക്ക് ആശുപത്രി ജീവനക്കാര്‍ക്കായി പുതിയ സ്റ്റാഫ് ക്വാര്‍ട്ടേഴ്‌സ് വരുന്നു

ചിറ്റൂര്‍: താലൂക്ക് ആശുപത്രി ജീവനക്കാര്‍ക്കായുള്ള പുതിയ സ്റ്റാഫ് ക്വാര്‍ട്ടേഴ്‌സ് നിര്‍മാണ പ്രവൃത്തികള്‍ക്കു തുടക്കമാവുന്നു. ആശുപത്രിക്ക് എതിർവശത്തെ ജീര്‍ണാവസ്ഥയിലുള്ള പഴയ കെട്ടിടങ്ങള്‍ പൊളിച്ചുമാറ്റി ഫ്‌ളാറ്റ് മാതൃകയിലാണ് പുതിയ കെട്ടിടം നിര്‍മിക്കുക. 2019-20 ലെ സംസ്ഥാന ബജറ്റില്‍ സ്റ്റാഫ് ക്വാര്‍ട്ടേഴ്‌സ് നിര്‍മാണത്തിനായി പത്തുകോടി രൂപ വകയിരുത്തിയിരുന്നു. ആധുനിക സൗകര്യങ്ങളോടുകൂടി ആറുനിലകളോടുകൂടിയ കെട്ടിടമാണ് വിഭാവനം ചെയ്തിരിക്കുന്നത്. കെട്ടിടത്തില്‍ 15 കുടുംബങ്ങള്‍ക്ക് താമസിക്കാനുള്ള സൗകര്യമുണ്ടാകും. സിവില്‍ പ്രവൃത്തികള്‍ക്കായി 8.9 കോടി രൂപയും ഇലക്ട്രിക്കല്‍ പ്രവൃത്തികള്‍ക്ക് 1.1 കോടി രൂപയുമാണ് വകയിരുത്തിയിട്ടുള്ളത് നിർമാണപ്രവർത്തനങ്ങൾക്കായുള്ള നടപടിക്രമങ്ങൾ പൂർത്തീകരിച്ചിട്ടുണ്ട്. മൂന്നുവർഷം മുൻപ് ലഭിച്ച സാങ്കേതിക അനുമതി ധനകാര്യ വകുപ്പിൽനിന്ന് പുതുക്കി കിട്ടേണ്ടതുണ്ടെന്നും തുടർന്ന് പ്രവർത്തനം വേഗത്തിൽ ആരംഭിക്കുമെന്നും സ്ഥലം എംഎൽഎ മന്ത്രി കെ. കൃഷ്ണൻകുട്ടി പറഞ്ഞു.

വണ്ടാഴി ഗ്രാമപഞ്ചായത്തിൽ വാദ്യോപകരണ വിതരണം

വടക്കഞ്ചേരി: വണ്ടാഴി ഗ്രാമപഞ്ചായത്ത് 2024-25 വാർഷിക പദ്ധതിയിൽ ഉൾപ്പെടുത്തി എസ്‌സി വിഭാഗത്തിൽപ്പെട്ടവർക്ക് വാദ്യോപകരണങ്ങൾ വിതരണം ചെയ്തു. കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെഎൽ. രമേഷ് അധ്യക്ഷത വഹിച്ചു. വൈസ് പ്രസിഡന്‍റ് പി. ശശികല, ജില്ലാ പഞ്ചായത്ത് മെംബർ ആർ. ചന്ദ്രൻ, പി.എച്ച്. സെയ്താലി, പി. ശശികുമാർ, സുബിത മുരളീധരൻ, എസ്. ഷക്കീർ, ഡിനോയ് കോമ്പാറ, ആർ. ഗംഗാധരൻ, എസ്. സന്തോഷ് എന്നിവർ പ്രസംഗിച്ചു.

യുവജന കമ്മീഷൻ അദാലത്ത്: ജില്ലയിൽ 11 പരാതികൾ തീർപ്പാക്കി

പാലക്കാട്: യുവജനങ്ങളുടെ പ്രശ്നപരിഹാരത്തിനായി കേരള സംസ്ഥാന യുവജന കമ്മീഷൻ നടത്തിയ ജില്ലാതല അദാലത്തിൽ 11 പരാതികൾ തീർപ്പാക്കി. കളക്ടറേറ്റ് കോണ്‍ഫറൻസ് ഹാളിൽ നടന്ന അദാലത്തിൽ 20 പരാതികൾ പരിഗണിച്ചു. ശേഷിക്കുന്ന ഒൻപത് പരാതികൾ അടുത്ത സിറ്റിംഗിൽ പരിഗണിക്കും. ഏഴ് പരാതികൾകൂടി പുതുതായി ലഭിച്ചു. തൊഴിൽതർക്കങ്ങൾ, സൈബർ തട്ടിപ്പുകൾ, ഗാർഹികപീഡനം, സാമൂഹ്യ മാധ്യമങ്ങളിലൂടെയുള്ള അപകീർത്തിപ്പെടുത്തൽ, വിദ്യാഭ്യാസ സ്ഥാപനങ്ങളിലെ ഫീസ് സംബന്ധമായ വിഷയങ്ങൾ, പിഎസ് സി യുമായി ബന്ധപ്പെട്ട കാര്യങ്ങൾ തുടങ്ങിയ വിവിധ വിഷയങ്ങളുമായി ബന്ധപ്പെട്ട പരാതികളാണ് അദാലത്തിൽ ലഭിച്ചത്. യുവജനങ്ങളുടെ പ്രശ്നങ്ങൾക്ക് ഫലപ്രദമായ പരിഹാരം കാണാൻ കമ്മീഷൻ പ്രതിജ്ഞാബദ്ധമാണെന്ന് യുവജന കമ്മീഷൻ ചെയർമാൻ എം. ഷാജർ പറഞ്ഞു. യുവജനങ്ങളുടെ മാനസികാരോഗ്യം മെച്ചപ്പെടുത്തുന്നതിനുള്ള പദ്ധതികളും ലഹരിവിരുദ്ധ കാന്പയിനുകളും സജീവമായി നടപ്പാക്കി വരികയാണെന്നും അദ്ദേഹം കൂട്ടിച്ചേർത്തു. കമ്മീഷൻ അംഗങ്ങളായ കെ. ഷാജഹാൻ, പി.സി. വിജിത, എച്ച്. ശ്രീജിത്ത്, അഡ്മിനിസ്ട്രേറ്റീവ് ഓഫീസർ കെ. ജയകുമാർ, സംസ്ഥാന കോ-ഓർഡിനേറ്റർ അഡ്വ. എം. രണ്‍ദീഷ്, അസിസ്റ്റന്‍റ് പി. അഭിഷേക് എന്നിവർ പങ്കെടുത്തു.

അർബൻ സൊസൈറ്റിയിൽ മുക്കുപണ്ടം പണയംവയ്ക്കാൻ ശ്രമം; രണ്ടുപേർ അറസ്റ്റിൽ

ശ്രീകൃഷ്ണപുരം: കടമ്പഴിപ്പുറം അർബൻ ഗ്രാമീൺ സൊസൈറ്റിയിൽ 10 പവൻ മുക്കുപണ്ടം പണയംവയ്ക്കാൻ ശ്രമിച്ച രണ്ടുപേരെ പോലീസ് പിടികൂടി. ആലങ്ങാട് സ്വദേശികളായ ഷമീർ, ഉണ്ണികൃഷ്ണൻ എന്നിവരാണ് പിടിയിലായത്. കഴിഞ്ഞ 20 ന് അമ്പലപ്പാറ സ്വദേശിയായ വിശ്വനാഥൻ എന്നയാൾ 11 പവൻ മുക്കുപണ്ടം ഇതേ സ്ഥാപനത്തിൽ പണയംവച്ച് 7.17 ലക്ഷം രൂപ കൈപ്പറ്റിയിരുന്നു. വിശ്വനാഥനാണ് ഷമീറിനെയും ഉണ്ണികൃഷ്ണനേയും മുക്കുപണ്ടം പണയം വയ്ക്കാൻ കൊണ്ടുവന്നത്. സംശയം തോന്നിയ സൊസൈറ്റി അധികൃതർ പോലീസിൽ വിവരമറിയിക്കുകയായിരുന്നു. തുടർന്നുനടത്തിയ പരിശോധനയിൽ ഇവർ കൊണ്ടുവന്നത് മുക്കുപണ്ടമാണെന്നു കണ്ടെത്തി. രണ്ടുപേർക്കുമെതിരേ പോലീസ് കേസെടുത്തു. സംഭവത്തിൽ കൂടുതൽ അന്വേഷണം നടന്നുവരികയാണ്.

വണ്ടാഴിയിൽ കോൺഗ്രസ് പ്രതിഷേധപ്രകടനം

വടക്കഞ്ചേരി: വടകരയിൽ ഷാഫി പറമ്പിൽ എംപി യെ വഴിയിൽ തടഞ്ഞ ഡിവൈഎഫ്ഐ ഗുണ്ടകൾക്കെതിരെ നിയമനടപടിയെടുക്കണമെന്നാവശ്യപ്പെട്ട് കോൺഗ്രസ്, യൂത്ത് കോൺഗ്രസ് വണ്ടാഴി മണ്ഡലം കമ്മിറ്റികളുടെ നേതൃത്വത്തിൽ വണ്ടാഴിയിൽ പ്രതിഷേധപ്രകടനം നടത്തി. കർഷക കോൺഗ്രസ് ജില്ല സെക്രട്ടറി കെ.സി. അരവിന്ദാക്ഷൻ മാസ്റ്റർ ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് കെ.എം. ശശീന്ദ്രൻ അധ്യക്ഷത വഹിച്ചു. കോൺഗ്രസ് ബ്ലോക്ക് സെക്രട്ടറിമാരായ എം. സുരേഷ്‌കുമാർ, എൻ. വിഷ്ണു, യൂത്ത് കോൺഗ്രസ് മണ്ഡലം പ്രസിഡന്‍റ് ആർ. അനീഷ്, കർഷക കോൺഗ്രസ് മണ്ഡലം പ്രസിഡന്‍റ് എസ്. പ്രദീപ്‌ പ്രസംഗിച്ചു.

പഞ്ചായത്ത് പദ്ധതികളിൽ അഴിമതി ആരോപണം; വടക്കഞ്ചേരിയിൽ യൂത്ത് കോൺഗ്രസ് പ്രതിഷേധം

വടക്കഞ്ചേരി: വടക്കഞ്ചേരി ഗ്രാമം റോഡിലെ ടാറിംഗ് ഉൾപ്പെടെയുള്ള വർക്കുകളിൽ വൻ അഴിമതിയാരോപണവുമായി പഞ്ചായത്തിനെതിരെ പ്രതിഷേധവുമായി യൂത്ത് കോൺഗ്രസ് പ്രവർത്തകർ. രാഷ്ട്രീയ വിവേചനത്തിന്‍റെ പേരിൽ നാലരവർഷം ഗ്രാമം റോഡിന്‍റെ പുനരുദ്ധാരണത്തിന് ഫണ്ട് അനുവദിക്കാതിരിക്കുകയും സമരങ്ങൾക്കൊടുവിൽ റീടാറിംഗ് നടന്നെങ്കിലും ടാറിംഗ് നടത്തി ഒരു മാസം തികയും മുമ്പേ വിവിധ ഇടങ്ങളിൽ കുഴികൾ രൂപപ്പെട്ടു. പഞ്ചായത്തിന്‍റെ വലിയ അഴിമതിയാണ് ഇതു വ്യക്തമാക്കുന്നതെന്ന് നേതാക്കൾ ആരോപിച്ചു. അഴിമതിക്കാർക്കെതിരെ നിയമനടപടി സ്വീകരിക്കണമെന്നാവശ്യപ്പെട്ട് യൂത്ത് കോൺഗ്രസ് വടക്കഞ്ചേരി മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും പൊതുയോഗവും നടത്തി. പ്രതിഷേധയോഗം കോൺഗ്രസ് മണ്ഡലം പ്രസിഡന്‍റ് ഇല്യാസ് പടിഞ്ഞാറെകളം ഉദ്ഘാടനം ചെയ്തു. യൂത്ത് കോൺഗ്രസ് മണ്ഡലം പ്രസിഡന്‍റ് സുനിൽ ചുവട്ടുപാടം അധ്യക്ഷത വഹിച്ചു. റെജി കെ. മാത്യു, ബാബു മാധവൻ, മോഹിത് ചുവട്ടുപാടം, ബാദുഷ പ്രധാനി, സുഗുണൻ കെ. നായർ, കെ. അഭിജിത് പ്രസംഗിച്ചു.

കത്തോലിക്ക കോൺഗ്രസ് നേതൃത്വപരിശീലന ശില്പശാല

വടക്കഞ്ചേരി: കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ രൂപത സമിതിയുടെ സഹകരണത്തോടെ വടക്കഞ്ചേരി ലൂർദ്മാത ഫൊറോന പള്ളി ഹാളിൽ നടന്ന നേതൃത്വ പരിശീലന ശില്പശാല ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ ഉദ്ഘാടനം ചെയ്തു. രൂപത വൈസ് പ്രസിഡന്‍റ് ജോസ് വടക്കേക്കര അധ്യക്ഷത വഹിച്ചു. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ, ഗ്ലോബൽ വൈസ് പ്രസിഡന്‍റ് ബെന്നി ആന്‍റണി എന്നിവർ സെഷനുകൾ നയിച്ചു. ഗ്ലോബൽ വൈസ് പ്രസിഡന്‍റ് തോമസ് ആന്‍റണി, ഗ്ലോബൽ സെക്രട്ടറി ഡെന്നി തെങ്ങുംപള്ളി, വർക്കിംഗ് കമ്മിറ്റി അംഗം ജിജോ അറയ്ക്കൽ, രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, ഫൊറോന വികാരി ഫാ.അഡ്വ. റെജി പെരുമ്പിള്ളിൽ, രൂപത ജനറൽ സെക്രട്ടറി ആന്‍റണി കുറ്റിക്കാടൻ, ട്രഷറർ ജോസ് മുക്കട, മേലാർകോട് ഫൊറോന ഡയറക്ടർ ഫാ. ക്രിസ് കോയിക്കാട്ടിൽ, ഫൊറോന പ്രസിഡന്‍റുമാരായ വിൽസൺ കൊള്ളന്നൂർ, ബെന്നി മറ്റപ്പിള്ളിൽ, ജോയ് ഫിലിപ്പ്, രൂപത യൂത്ത് കൗൺസിൽ ജനറൽ കോ-ഓർഡിനേറ്റർ എബി വടക്കേക്കര എന്നിവർ നേതൃത്വം നൽകി.

പാലക്കാട് നഗരസഭാപരിധിയിൽ ആയിരം പനവിത്തുകൾ നടും

പാലക്കാട്: ഹരിത കേരള മിഷന്‍റെ നേതൃത്വത്തിൽ നടപ്പാക്കുന്ന ഒരുതൈ നടാം വൃക്ഷവത്കരണ കാന്പയിനിന്‍റെ ഭാഗമായി ആയിരം പനവിത്തുകൾ നട്ടുപിടിപ്പിച്ചു. പാലക്കാട് നഗരസഭാ പരിധിയിൽ നടത്തിയ പരിപാടി നഗരസഭാ ചെയർപേഴ്സണ്‍ പ്രമീള ശശിധരൻ ഉദ്ഘാടനം ചെയ്തു. ജൂണ്‍ അഞ്ചുമുതൽ സെപ്റ്റംബർ 30 വരെ ഒരു കോടി വൃക്ഷത്തൈകൾ നട്ടുപിടിപ്പിക്കുക എന്നതാണ് കാന്പയിനിന്‍റെ ലക്ഷ്യം. ഗവ.വിക്ടോറിയ കോളജിലെ എൻഎസ്എസ് വിദ്യാർഥികളാണ് പനവിത്തുകൾ ശേഖരിച്ച് ഹരിതകേരളമിഷനു നൽകിയത്. കോട്ടമൈതാനത്ത് നടന്ന പരിപാടി നഗരസഭ വൈസ് ചെയർമാൻ ഇ. കൃഷ്ണദാസ് അധ്യക്ഷനായി. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ പി. സ്മിതേഷ്, കൗണ്‍സിലർ സെലീന ബീവി, ഹരിതകേരളമിഷൻ ജില്ലാ കോ-ഓർഡിനേറ്റർ പി. സൈതലവി, ഹരിതകേരളമിഷൻ ബ്ലോക്ക് കോ-ഓർഡിനേറ്റർ റഷീദ്, ക്ലീൻസിറ്റി മാനേജർ പി. മണി പ്രസാദ്, വിക്ടോറിയ കോളജ് എൻഎസ്എസ് പ്രോഗ്രാം ഡയറക്ടർ ആശ എന്നിവർ പ്രസംഗിച്ചു. വിക്ടോറിയ കോളജ് എൻഎസ്എസ് യൂണിറ്റ് പ്രതിനിധികൾ, നഗരസഭ ആരോഗ്യ വിഭാഗം ജീവനക്കാർ, ഹരിതകർമസേനാംഗങ്ങൾ തുടങ്ങിയവർ പങ്കെടുത്തു.

മാനസമിത്ര ദ്വിദിന ശില്പശാല

പട്ടാന്പി: നിയോജകമണ്ഡലത്തിലെ മാനസമിത്ര പദ്ധതി കേരളത്തിലെ വിദ്യാർഥികളുടെ മാനസികാരോഗ്യ സംരക്ഷണത്തിൽ നാഴികകല്ലാണെന്ന് മന്ത്രി വി. ശിവൻകുട്ടി. സമഗ്ര മാനസികാരോഗ്യ പരിപാടിയായ ‘മാനസമിത്ര’യുടെ ഭാഗമായുള്ള ദ്വിദിന ശില്പശാല ഓണ്‍ലൈനായി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. വർത്തമാന കാലഘട്ടത്തിൽ അക്കാദമിക് കാര്യങ്ങൾക്കപ്പുറം മാനസികാരോഗ്യത്തിന്കൂടി പ്രാധാന്യം നൽകണം. വിദ്യാർഥികൾക്ക് മികച്ച വിദ്യാഭ്യാസത്തിന് ഇത് സഹായകമാകുമെന്നും മന്ത്രി പറഞ്ഞു. കൊപ്പം നക്ഷത്ര റീജൻസിയിൽ നടന്ന പരിപാടിയിൽ മുഹമ്മദ് മുഹ്സിൻ എംഎൽഎ അധ്യക്ഷനായി. ഡോ.ഹംസ പറന്പിൽ മുഖ്യാഥിതിയായി. സ്കോൾ കേരളം എക്സിക്യൂട്ടീവ് ഡയറക്ടർ ഡോ. ജിനേഷ്കുമാർ, ശ്രദ്ധ കണ്‍വീനർ കെ.പി. ആഷിഫ്, ഡോ, ഷാരോണ്‍, ഡോ. പി.കെ. റഹീമുദ്ദീൻ, വിവിധ ജനപ്രതിനിധികൾ, രാഷ്ട്രീയപാർട്ടി പ്രതിനിധികൾ തുടങ്ങിയവർ പങ്കെടുത്തു.

ശിരുവാണി റോഡ് നിർമാണം: തഹസിൽദാർ ജില്ലാ കളക്ടർക്കു റിപ്പോർട്ട് നൽകും

പാലക്കാട്്: ശിരുവാണി അണക്കെട്ടിലേക്ക് ശിങ്കന്പാറ ഉന്നതിയിലേക്കും ഉള്ള റോഡ് നിർമാണവുമായി ബന്ധപ്പെട്ട ് അട്ടപ്പാടി തഹസിൽദാർ ജില്ലാ കളക്ടർക്ക് റിപ്പോർട്ട് കൈമാറും. കേരള-തമിഴ്നാട് സർക്കാരുകൾ ഉൾപ്പെട്ട കരാറിൽ ശിരുവാണിയിലേക്കുള്ള റോഡ് നവീകരണത്തിനായി 16 കോടി രൂപയുടെ പദ്ധതിയാണ് ജലസേചന വകുപ്പ് സമർപ്പിച്ചിട്ടുള്ളത്. ഇതിന്‍റെ കരാർ നടപടികളും പൂർത്തിയായി കൊണ്ടിരിക്കുകയാണ്. ശിരുവാണി റോഡരികിലെ മരങ്ങൾ മുറിക്കുന്നതുമായി ബന്ധപ്പെട്ട വനംവകുപ്പിന്‍റെ അനുമതി ലഭിക്കാത്തതിനാൽ പ്രവൃത്തികൾ തടസപ്പെട്ട അവസ്ഥയിലാണ്.ഉന്നതിയിലെ കുടുംബങ്ങൾ കളക്ടറെ നേരിട്ട്കണ്ട് നിവേദനം നൽകിയതിന്‍റെ അടിസ്ഥാനത്തിലാണ് അട്ടപ്പാടി തഹസിൽദാർ ഷാനവാസ്ഖാൻ സ്ഥലം സന്ദർശിച്ച് റിപ്പോർട്ട് തയ്യാറാക്കിയത്. ഇഞ്ചിക്കുന്ന് ചെക്ക്പോസ്റ്റ് മുതൽ കേരളമേടുവരെയുള്ള 17 കിലോമീറ്റർ റോഡ് ആണ് നവീകരിക്കുന്നത്. നിർമാണം പൂർത്തിയാക്കണമെങ്കിൽ റോഡിന്‍റെ വശങ്ങളിൽനിൽക്കുന്ന മരങ്ങൾ മുറിച്ചു നീക്കണം. മരങ്ങൾ മുറിച്ചുനീക്കി റോഡ് നവീകരിക്കുന്നത് വന്യമൃഗങ്ങളുടെ സഞ്ചാരത്തിന് തടസം സൃഷ്ടിക്കുമെന്ന പരാതിയാണ് റോഡ് നിർമാണം തടസപ്പെടാൻ കാരണം. ശിങ്കന്പാറ ഉന്നതിയിൽ ഉള്ളവർ തകർന്നുകിടക്കുന്ന റോഡിലൂടെ പുറംലോകത്തേക്ക് എത്താൻ പ്രയാസപ്പെടുകയാണ്. ഓട്ടോറിക്ഷകൾപോലും പോകാൻ വിസമ്മതിക്കുകയാണ്. ശിരുവാണി സന്ദർശിക്കുന്നതിനായി വനംവകുപ്പ് യാത്ര സൗകര്യം ഒരുക്കിയെങ്കിലും റോഡിന്‍റെ തകർച്ചമൂലം സന്ദർശകർ ആരും ശിരുവാണിയിലേക്ക് പോകാൻ തയ്യാറാകുന്നില്ല. റോഡിന്‍റെ പല ഭാഗത്തും മെറ്റലുകൾ ഇളകി റോഡ് ഒലിച്ചുപോയ അവസ്ഥയിലാണ്. തടസങ്ങൾ നീക്കി റോഡ് നിർമാണം പൂർത്തിയാക്കണമെന്നാണ് ശിങ്കന്പാറ ഉന്നതിക്കാരുടെ ആവശ്യം.

ഇന്‍റഗ്രേറ്റഡ് റൈസ് ടെക്നോളജി പാർക്കിന്‍റെ നിർമാണം പുരോഗമിക്കുന്നു

പാലക്കാട്: കിൻഫ്രയുടെ മെഗാ ഫുഡ് പാർക്കിൽ 4.806 ഏക്കറിൽ നിർമിക്കുന്ന ഇന്‍റഗ്രേറ്റഡ് റൈസ് ടെക്നോളജി പാർക്കിന്‍റെ നിർമാണം പുരോഗമിക്കുന്നു. 89% സിവിൽ ജോലികളും പൂർത്തിയായി. പാലക്കാട് ജില്ലയിൽ നിന്നും ശേഖരിക്കുന്ന നെല്ല് അരിയാക്കി നൽകുകയാണ് റൈസ് പാർക്കിലൂടെ ചെയ്യുന്നത്. 6000 ടണ്‍ സൈലോ സംഭരണിയും ഒരു മണിക്കൂറിൽ 5 മെട്രിക് ടണ്‍ നെല്ല് പ്രോസസ് ചെയ്യുന്നതിനുള്ള പ്ലാന്‍റും ആണ് ഇവിടെ സ്ഥാപിക്കുന്നത്. 39.5 കോടി രൂപയുടെ പദ്ധതിക്കാണ് ഭരണാനുമതി ലഭിച്ചിട്ടുള്ളത്. ശ്രീകോ പ്രോജക്ട്സ് പ്രൈവറ്റ് ലിമിറ്റഡ് എന്ന കന്പനിക്കാണ് നിർമാണ പ്രവർത്തനങ്ങളുടെ കരാർ നൽകിയിരുന്നത്. അതേസമയം പദ്ധതിക്കാവശ്യമായ യന്ത്രസാമഗ്രികൾ നൽകാനുള്ള കരാർ ദൈവിക് കണ്‍സ്ട്രക്ഷൻസ് എന്ന സ്ഥാപനത്തിനാണ്. നെല്ല് സംഭരണം, സംസ്കരണം, മൂല്യവർധിത ഉത്പന്നങ്ങളുടെ നിർമാണം എന്നിവ ലക്ഷ്യമിട്ടാണ് റൈസ് ടെക്നോളജി പാർക്ക് വിഭാവനം ചെയ്തിരിക്കുന്നത്. പദ്ധതി പൂർത്തിയാകുന്നതോടെ കർഷകർക്കും വ്യവസായികൾക്കും ഒരുപോലെ പ്രയോജനകരമാകും.

പി‌എസ്‌ജി കപ്പ് ബാസ്‌കറ്റ്‌ബോൾ: ചെന്നൈ ഇന്ത്യൻ ബാങ്ക് ജേതാക്കൾ

കോയമ്പത്തൂർ: 59-ാമത് പി‌എസ്‌ജി കപ്പ് പുരുഷ അഖിലേന്ത്യാ ബാസ്‌ക്കറ്റ്‌ബോൾ ടൂർണമെന്‍റിൽ ചെന്നൈ ഇന്ത്യൻ ബാങ്ക് ജേതാക്കളായി. ഫൈനലിൽ കെഎസ്ഇബി തിരുവനന്തപുരത്തെ 68- 50 എന്ന സ്കോറിൽ മറികടന്നാണ് വിജയം. ലോണാവാല ഇന്ത്യൻ എയർഫോഴ്‌സ് മൂന്നാം സ്ഥാനം നേടി. ചെന്നൈ ഇന്ത്യൻ ഓവർസീസ് ബാങ്ക് ടീമിനെ 81 -73 എന്ന സ്‌കോറിന് പരാജയപ്പെടുത്തി. വിജയിച്ച ഇന്ത്യൻ ബാങ്ക് ടീമിന് ഒന്നാംസമ്മാനമായി ഒരു ലക്ഷം രൂപയും ട്രോഫിയും രണ്ടാം സ്ഥാനക്കാരായ കേരള സ്റ്റേറ്റ് ഇലക്ട്രിസിറ്റി ബോർഡ് ടീമിന് 75,000 രൂപയും ട്രോഫിയും, മൂന്നാം സ്ഥാനക്കാരായ ഇന്ത്യൻ എയർഫോഴ്‌സ് ടീമിന് 50,000 രൂപയും ട്രോഫിയും, നാലാം സ്ഥാനക്കാരായ ഇന്ത്യൻ ഓവർസീസ് ബാങ്ക് ടീമിന് 25,000 രൂപയും ട്രോഫിയും ലഭിച്ചു. ഇന്ത്യൻ ബാങ്ക് ടീമിലെ ബാലയാണ് മികച്ച കളിക്കാരൻ. പി‌എസ്‌ജി എൻജിനീയറിംഗ് കോളജ് ഇൻഡോർ സ്റ്റേഡിയത്തിലാണ് ടൂർണമെന്‍റ് നടന്നത്.കോയമ്പത്തൂർ കളക്ടർ പവൻകുമാർ വിശിഷ്ടാതിഥിയായി പങ്കെടുത്ത് വിജയികളായ ടീമുകൾക്ക് സമ്മാനങ്ങൾ നൽകി. പിഎസ്ജി വിദ്യാഭ്യാസ സ്ഥാപനങ്ങളുടെ മാനേജിംഗ് ട്രസ്റ്റി ഗോപാലകൃഷ്ണൻ, കോയമ്പത്തൂർ ജില്ലാ ബാസ്കറ്റ്ബോൾ അസോസിയേഷൻ പ്രസിഡന്‍റും കോയമ്പത്തൂർ സിആർഐ പമ്പ്‌സിന്‍റെ മാനേജിംഗ് ഡയറക്ടറുമായ സെൽവരാജ് എന്നിവർ പങ്കെടുത്തു.

ഗണേശവിഗ്രഹ ഘോഷയാത്ര: കോയമ്പത്തൂരിൽ ഇന്നു ഗതാഗത ക്രമീകരണം

കോയന്പത്തൂർ: ഗണേശവിഗ്രഹ ഘോഷയാത്രയോടനുബന്ധിച്ച് കോയന്പത്തൂർ നഗരത്തിൽ ഇന്ന് ഗതാഗതനിയന്ത്രണം ഏർപ്പെടുത്തി. ഇന്ന് രാവിലെ 8 മുതൽ രാത്രി 10 വരെ നഗരത്തിലേക്ക് ഹെവി വാഹനങ്ങളും ട്രക്കുകളും പ്രവേശിക്കുന്നത് നിരോധിച്ചു. പൊള്ളാച്ചി റോഡിൽ നിന്ന് ഉക്കടം ഭാഗത്തേക്ക് വരുന്ന വാഹനങ്ങളും ബസുകളും എൽ ആൻഡ് ടി ബൈപാസ്, ഏച്ചനാരി സർവീസ് റോഡ് വഴി എത്തി ഏച്ചനാരി വിനായക ക്ഷേത്രത്തിന് മുന്നിൽ തിരിഞ്ഞ് ചെട്ടിപാളയം റോഡിൽ കയറി റെയിൽ കല്യാണ മണ്ഡപം ജംഗ്ഷനിൽ എത്തി പോത്തനൂർ കടൈ റോഡ്, നഞ്ചുണ്ടപുരം റോഡ്, രാമനാഥപുരം വഴി പോകണം. അല്ലെങ്കിൽ കുറിച്ചി ഡിവിഷൻ, ആത്തുപ്പാലം വഴി ഉക്കടത്തേക്ക് പോകാം. പൊള്ളാച്ചി റോഡിൽ നിന്ന് ഉക്കടം ഭാഗത്തേക്ക് വരുന്ന ചെറുവാഹനങ്ങൾ ഈച്ചനാരി, എൽഐസി കോളനി ജംഗ്ഷൻ, തക്കാളി മാർക്കറ്റ് വഴി വലത്തോട്ട് തിരിഞ്ഞ് ശാരദാ മിൽ റോഡ്, റെയിൽ കല്യാണ മണ്ഡപം ജംഗ്ഷൻ, പോത്തനൂർ കടായി റോഡിൽ എത്തി നഞ്ചുണ്ടപുരം റോഡ്, രാമനാഥപുരം വഴി കുറിച്ചി ഡിവിഷൻ, ആത്തുപ്പാലം വഴി ഉക്കടത്തേക്ക് പോകണം. മധുരൈ മാർക്കറ്റ് റോഡിൽ നിന്ന് ഉക്കടം ഭാഗത്തേക്ക് വരുന്ന ബസുകൾക്കും ചെറുവാഹനങ്ങൾക്കും കാമരാജപുരം ജംഗ്ഷനിൽ നിന്ന് വലത്തോട്ട് തിരിഞ്ഞ് എൽഐസി കോളനി, തക്കാളി മാർക്കറ്റ് റോഡ്, ശാരദാ മിൽ റോഡ്, റെയിൽ കല്യാണ മണ്ഡപം, പോത്തനൂർ കടയ് റോഡ്, നഞ്ചുണ്ടപുരം, രാമനാഥപുരം, കുറിച്ചി ഡിവിഷൻ വഴി ആത്തുപ്പാലം വഴി ഉക്കടം ഭാഗത്തേക്ക് പോകാം. ഉക്കടത്തുനിന്ന് പൊള്ളാച്ചി ഭാഗത്തേക്ക് പോകുന്ന ബസുകൾക്ക് ആത്തുപ്പാലം, കുറിച്ചി ഡിവിഷൻ വഴി ഇടത്തോട്ട് തിരിഞ്ഞ് പോത്തനൂർ റോഡ്, പോത്തനൂർ കടയ് റോഡ്, റെയിൽ കല്യാണ മണ്ഡപം ജംഗ്ഷൻ, ചെട്ടിപ്പാളയം റോഡ്, ഈച്ചനാരി വഴി പൊള്ളാച്ചി റോഡിലെത്താം. ഉക്കടത്ത് നിന്ന് പൊള്ളാച്ചി ഭാഗത്തേക്ക് പോകുന്ന ചെറുവാഹനങ്ങൾക്ക് ആത്തുപ്പാലം, കുറിച്ചി ഡിവിഷൻ, പോത്തനൂർ റോഡ്, പോത്തനൂർ കടായി റോഡ്, റെയിൽ കല്യാണ മണ്ഡപം ജംഗ്ഷൻ വഴി വലത്തോട്ട് തിരിഞ്ഞ് ശാരദാ മിൽ റോഡ് വഴി പൊള്ളാച്ചി റോഡിലെത്താം. ഉക്കടത്തുനിന്ന് കുനിയമുത്തൂർ വഴി പാലക്കാട്ടേക്ക് പോകുന്ന ഭാരവാഹനങ്ങൾക്കും ബസുകൾക്കും ഉക്കടം-പേരൂർ ബൈപാസ്, അശോക് നഗർ റൗണ്ട് എബൗട്ട്, സെൽവപുരം ഹയർസെക്കൻഡറി സ്കൂൾ വഴി ശിവാലയ ജംഗ്ഷൻ, പേരൂർ, സുണ്ടകാമുത്തൂർ, കോയമ്പത്തൂർ റോഡ് വഴി ഇടത്തോട്ട് തിരിഞ്ഞ് പാലക്കാട് ഭാഗത്തേക്ക് പോകാം. ഉക്കടത്തുനിന്ന് കുനിയമുത്തൂർ വഴി പാലക്കാട് ഭാഗത്തേക്ക് പോകുന്ന ചെറുവാഹനങ്ങൾ ഉക്കടം പേരൂർ ബൈപ്പാസ് റോഡിലൂടെ അശോക് നഗർ റൗണ്ട് എബൗട്ടിൽ നിന്ന് ഇടത്തോട്ട് തിരിഞ്ഞ് പുട്ടുവിക്കി റോഡ്, സേതുമവയ്ക്കൽ, ആശ്രമം സ്കൂൾ, കോയമ്പത്തൂർ സെക്ഷൻ വഴി പാലക്കാട് ഭാഗത്തേക്ക് പോകാം. പാലക്കാട് റോഡിൽ നിന്ന് ഉക്കടം ഭാഗത്തേക്ക് പോകുന്ന ഭാരവാഹനങ്ങൾക്കും ബസുകൾക്കും പാലക്കാട് റോഡ്, കോയമ്പത്തൂർ സെക്ഷനിൽ ഇടത്തേക്ക് തിരിഞ്ഞ് കോയമ്പത്തൂർ, ആശ്രാം സ്കൂൾ, പുട്ടുവിക്കി, സേതുമവൈക്കൽ, ശിവാലയ ജംഗ്ഷൻ എന്നിവിടങ്ങളിൽ എത്തി സെൽവപുരം ഹയർ സെക്കൻഡറി സ്കൂൾ ജംഗ്ഷനിൽ വലത്തേക്ക് തിരിഞ്ഞ് അശോക് നഗർ റൗണ്ട് എബൗട്ട്, പേരൂർ ബൈപാസ്, ഉക്കടം ഫൈവ്-പോയിന്‍റ് ജംഗ്ഷൻ വഴി ലക്ഷ്യസ്ഥാനങ്ങളിലേക്ക് പോകാം. പാലക്കാട് റോഡിൽ നിന്ന് ഉക്കടം ഭാഗത്തേക്ക് വരുന്ന ചെറുവാഹനങ്ങൾക്ക് കോയമ്പത്തൂർ ജംഗ്ഷനിൽ ഇടത്തേക്ക് തിരിഞ്ഞ്, കോയമ്പത്തൂർ ആശ്രാം സ്കൂൾ റോഡ് ജംഗ്ഷനിൽ വലത്തേക്ക് തിരിഞ്ഞ് ചുണ്ണമ്പു കളവൈ, സേതുമാവയ്ക്കൽ ചെക്ക് പോസ്റ്റിൽ വലത്തേക്ക് തിരിഞ്ഞ്, അശോക് നഗർ റൗണ്ട് എബൗട്ട് ജംഗ്ഷനിൽ എത്തി ഉക്കടം പേരൂർ ബൈപാസിൽ എത്താം.

ബോർഡ് നീക്കിയ പോലീസുദ്യോഗസ്ഥർക്കെതിരേ നടപടിയെടുക്കണമെന്നു മനുഷ്യാവകാശ കമ്മീഷൻ

പാലക്കാട്: ഉത്സവത്തോട് അനുബന്ധിച്ച് സ്വകാര്യവ്യക്തിയുടെ സ്ഥലത്ത് സ്ഥാപിച്ച ബോർഡ് നീക്കം ചെയ്ത ഒറ്റപ്പാലം സ്റ്റേഷനിലെ പ്രൊബേഷനറി എസ്ഐ അടക്കമുള്ള ഉദ്യോഗസ്ഥർക്കെതിരെ ഷൊർണൂർ ഡിവൈഎസ്പി കമ്മീഷനിൽ സമർപ്പിച്ച അന്വേഷണ റിപ്പോർട്ടിന്‍റെ അടിസ്ഥാനത്തിൽ ഉചിതമായ അച്ചടക്ക നടപടികൾ സ്വീകരിക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ് ഉത്തരവിട്ടു. ജില്ലാ പോലീസ് മേധാവിക്കാണ് കമ്മീഷൻ നിർദേശം നൽകിയത്. ഉത്തരവിന്‍റെ അടിസ്ഥാനത്തിൽ സ്വീകരിച്ച നടപടികൾ രണ്ടുമാസത്തിനുള്ളിൽ കമ്മീഷൻ ഓഫീസിൽ സമർപ്പിക്കണമെന്നും ഉത്തരവിൽ പറയുന്നു. അന്പലവട്ടം പനവണ്ണ ശങ്കരനാരായണ സ്വാമി ക്ഷേത്രത്തിലെ ഉത്സവത്തോടനുബന്ധിച്ചാണ് സംഭവമുണ്ടായത്. നവോത്ഥാന മൂല്യങ്ങൾ എഴുതിയ ബോർഡ് സ്വകാര്യവ്യക്തിയുടെ അനുവാദത്തോടെയാണ് അവരുടെ സ്ഥലത്ത് സ്ഥാപിച്ചതെന്നും ഇത് പ്രൊബേഷനറി എസ്ഐ തല്ലിപ്പൊളിച്ചു കളഞ്ഞെന്നും പരാതിക്കാരനായ പനമണ്ണ സ്വദേശി ബാലസുബ്രഹ്മണ്യൻ കമ്മീഷനെ അറിയിച്ചു. തന്‍റെ കഴുത്തിന് കുത്തിപ്പിടിച്ച് ലാത്തികൊണ്ട് മർദിച്ചെന്നും പരാതിയിൽ പറയുന്നു.ഷൊർണൂർ ഡിവൈഎസ്പിയിൽ നിന്നും കമ്മീഷൻ അന്വേഷണ റിപ്പോർട്ട് വാങ്ങി. ബോർഡിനെകുറിച്ച് ആരിൽ നിന്നും പരാതി ലഭിച്ചിരുന്നില്ലെന്നും പ്രൊബേഷനറി എസ്ഐ അനാവശ്യതിടുക്കം കാണിച്ചതായും റിപ്പോർട്ടിൽ പറയുന്നു. സമചിത്തതയോടെ പ്രവർത്തിക്കേണ്ടതിന് പകരം അനാവശ്യതിടുക്കം കാണിച്ചെന്നും റിപ്പോർട്ടിൽ പറഞ്ഞു. പോലീസ് സ്ഥലത്തെത്തുന്പോൾ സംഘർഷാവസ്ഥ നിലവിലുണ്ടായിരുന്നില്ലെന്നും എന്നിട്ടും ജനങ്ങളെ ലാത്തിവീശി ഓടിച്ചെന്നും റിപ്പോർട്ടിൽ പറയുന്നു. പരാതിക്കാരന് ലാത്തിയടിയേറ്റ് പരിക്കേറ്റതായും റിപ്പോർട്ടിലുണ്ട്. റിപ്പോർട്ടിന്‍റെ അടിസ്ഥാനത്തിൽ പരാതിക്കാരനെ നേരിൽകേട്ടശേഷം പോലീസുദ്യോഗസ്ഥർക്കെതിരെ അച്ചടക്കനടപടികൾ സ്വീകരിക്കണമെന്ന് ജസ്റ്റിസ് അലക്സാണ്ടർ തോമസ് ഉത്തരവിൽ പറഞ്ഞു.

ഒറ്റപ്പാലത്തു ഭാഗ്യദേവതയുടെ അനുഗ്രഹവർഷം തുടരുന്നു

ഒറ്റപ്പാലം: ഭാഗ്യദേവത തുടർച്ചയായി ഒറ്റപ്പാലത്തെ കനിഞ്ഞനുഗ്രഹിക്കുകയാണ്. വി. രാജൻ ലോട്ടറി ഏജൻസിയിൽ വിറ്റ ഭാഗ്യക്കുറി ടിക്കറ്റിന് വീണ്ടും ഒരുകോടി രൂപ കൂടി സമ്മാനം ലഭിച്ചതോടെ മൂന്നരമാസത്തിനിടെ അഞ്ചാംതവണയാണ് ഇതേ ഏജൻസിയിൽ നിന്ന് വിറ്റ ടിക്കറ്റിന് ഭാഗ്യം തെളിയുന്നത്. ടിക്കറ്റിന്‍റെ ഉടമയെ ഇനിയും കണ്ടെത്തിയിട്ടില്ല. കഴിഞ്ഞ ദിവസം നറുക്കെടുത്ത ‘സ്ത്രീശക്തി' ഭാഗ്യക്കുറിയുടെ ഒന്നാം സമ്മാനമാണ് ഇത്തവണ ലഭിച്ചത്. ഒറ്റപ്പാലത്തെ ഏജൻസിയിൽനിന്ന് ചുനങ്ങാട് മുരുക്കുംപറ്റ സ്വദേശിയായ കെ.പി. ഹരിദാസ് വില്പനക്കായി കൊണ്ടുപോയ എസ്എൽ 345939 എന്ന ഭാഗ്യക്കുറിക്കാണ് ഒരുകോടിയടിച്ചത്. നേരിട്ടുവിറ്റ ടിക്കറ്റിനും വില്പനക്കാർ വിറ്റ ടിക്കറ്റിനുമടക്കമാണ് അഞ്ച് തവണ നേട്ടമുണ്ടായത്. മേയ് എട്ടിന് തുടങ്ങിയതാണ് തുടർച്ചയായ ഭാഗ്യം തെളിയൽ. ആദ്യം കാരുണ്യപ്ലസ് ടിക്കറ്റിനായിരുന്നു ഒന്നാം സമ്മാനം. പിന്നീട് സുവർണ കേരളം ഭാഗ്യക്കുറിയിലൂടെ വീണ്ടുമെത്തി. ജൂലായ് 28 ന് ഭാഗ്യതാരയിലൂടെയാണ് ഒറ്റപ്പാലത്തേക്ക് ഭാഗ്യമെത്തിയത്. കഴിഞ്ഞ ചൊവ്വാഴ്ച സ്ത്രീശക്തിയിലൂടെ വീണ്ടും ലോട്ടറിയടിച്ചു. ഒടുവിൽ ഇപ്പോൾ സ്ത്രീശക്തിയിലൂടെയും ഒന്നാം സമ്മാനം ഒറ്റപ്പാലത്തെ ഏജൻസിക്ക് ലഭിച്ചത്. നറുക്കെടുപ്പിന് അഞ്ച് മിനിറ്റുമുൻപ്‌ വിറ്റ ഭാഗ്യക്കുറിക്കാണ് ഇത്തവണ ഒന്നാംസമ്മാനം ലഭിച്ചത്. മൂന്നുമണിക്കായിരുന്നു സ്ത്രീശക്തി ഭാഗ്യക്കുറിയുടെ നറുക്കെടുപ്പ്. വില്പനക്കാരനായ കെ.പി. ഹരിദാസൻ മായന്നൂർ പാലത്തിന് സമീപത്ത് 2.55 നാണ് ഈ ടിക്കറ്റ് ഭാഗ്യവാന് കൈമാറിയത്. തുടർച്ചയായി ഭാഗ്യവർഷം ചൊരിയാൻ തുടങ്ങിയതോടു കൂടി ഒറ്റപ്പാലത്തെ വിവിധ ലോട്ടറി കടകളിൽ വൻ തിരക്കാണ് അനുഭവപ്പെടുന്നത്. നഗരത്തിലെത്തുന്ന ഭൂരിഭാഗം പേരും ലോട്ടറി ടിക്കറ്റ് എടുക്കുന്ന അവസ്ഥയിലേക്ക് കാര്യങ്ങൾ എത്തിയിട്ടുണ്ട്. ലോട്ടറി എടുക്കുന്നതിനു വേണ്ടിമാത്രം എത്തുന്നവരുടെയും എണ്ണം കുറവല്ല. ജ്വല്ലറികളിലും തുണിക്കടകളിലും ഓണത്തിനോട് അനുബന്ധിച്ച് തിരക്ക് കുറവാണെങ്കിലും ലോട്ടറി കടകളിൽ വലിയ തിരക്കാണ് അനുഭവപ്പെടുന്നത്.

കാഞ്ഞിരപ്പുഴ ടൂറിസം പ്രോജക്ട് നിർമാണ ഉദ്ഘാടനം സെപ്റ്റംബർ ഒന്നിന്

കാഞ്ഞിരപ്പുഴ: ജലസേചനവകുപ്പ് നടപ്പിലാക്കുന്ന ഡാം ടൂറിസം പദ്ധതി സംസ്ഥാനതല ഉദ്ഘാടനവും 161 കോടി രൂപയുടെ കാഞ്ഞിരപ്പുഴ ടൂറിസം പ്രോജക്ടിന്‍റെ നിർമാണ ഉദ്ഘാടനവും സെപ്റ്റംബർ ഒന്നിന് വൈകുന്നേരം നാലിന് മന്ത്രി റോഷി അഗസ്റ്റിൻ നിർവഹിക്കുമെന്ന് ശാന്തകുമാരി എംഎൽഎ പറഞ്ഞു. ഉദ്യാനത്തിൽ നടക്കുന്ന ചടങ്ങിൽ മന്ത്രി എം.ബി. രാജേഷ് പദ്ധതിയുടെ രൂപരേഖ സമർപ്പണവും മന്ത്രി കെ. കൃഷ്ണൻകുട്ടി ലോഗോ പ്രകാശനവും നിർവഹിക്കും. ജനപ്രതിനിധികൾ, വകുപ്പ് ഉദ്യോഗസ്ഥർ തുടങ്ങിയവർ പങ്കെടുക്കും. കോഴിക്കോട് എഫ്എസ്ഐടി റെഡിഫൈൻ ഡെസ്റ്റിനേഷൻ പ്രൈവറ്റ് ലിമിറ്റഡ് കമ്പനിയാണ് കരാറുകാർ. കാഞ്ഞിരപ്പുഴ അണക്കെട്ടും ഉദ്യാനവും ഒഴിഞ്ഞുകിടക്കുന്ന സ്ഥലങ്ങളും ഉൾപ്പെടുത്തി 50 ഏക്കർ ഭൂമിയിൽ 161 കോടി രൂപയുടെ ടൂറിസം പദ്ധതിയാണ് വരുന്നത്. 30 വർഷത്തേക്ക് ടൂറിസം പ്രവൃത്തി നടത്താനാണ് സർക്കാർ അനുമതി നൽകിയത്. സ്വകാര്യ പൊതുപങ്കാളിത്തത്തോടെയാണ് പദ്ധതി. നിർമാണ ചെലവ് കരാറുകാർ ഏറ്റെടുക്കും. പദ്ധതിയിൽ നിന്നുള്ള വരുമാനത്തിന്‍റെ നിശ്ചിത ശതമാനം സർക്കാരിനും ലഭിക്കും. ജലസേചന വകുപ്പിന്‍റെ ഡാമുകളിൽ ഉപയോഗശൂന്യമായി കിടക്കുന്ന ഭൂമി ടൂറിസം മേഖലകളായി ഉപയോഗിക്കുന്നതിനായി സർക്കാർ ഇറിഗേഷൻ ടൂറിസം പോളിസി ഉത്തരവിറക്കിയിരുന്നു. ഇതിന്‍റെ അടിസ്ഥാനത്തിൽ ജലസേചന വകുപ്പിന്‍റെ നോഡൽ ഏജൻസിയായ കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്‍റ് കോർപ്പറേഷൻ സ്വകാര്യ സംരംഭകരിൽ നിന്ന് താത്പര്യപത്രം ക്ഷണിക്കുകയും കോഴിക്കോട് നിന്നുള്ള കമ്പനിയെ തെരഞ്ഞെടുക്കുകയും ചെയ്തു. വാട്ടർ തീം പാർക്ക്, സ്നോ വേൾഡ്, പക്ഷികളുടെ പാർക്ക്, മറൈൻ ഓഷ്യനേറിയം, ജയന്‍റ് വീൽ, ബോട്ടിംഗ്, ത്രീഡി തീയറ്റർ, റോപ്പ് വേ, ചില്ല് തൂക്കുപാലം, മ്യൂസിക്കൽ ഫൗണ്ടൻ, ലേസർ ഷോ, റിസോർട്ട്, വിവിധതരം അക്വേറിയം തുടങ്ങി വൻ പദ്ധതികൾ ഉണ്ടാകുമെന്ന് എംഎൽഎ പറഞ്ഞു. സെപ്റ്റംബർ ആറ്, ഏഴ് തീയതികളിലാണ് കാഞ്ഞിരപ്പുഴ ഉദ്യാനത്തിലെ ഓണാഘോഷ പരിപാടികൾ നടക്കുന്നത്.

നിയന്ത്രണംവിട്ട കാർ കനാലിലേക്കു മറിഞ്ഞു

ആലത്തൂർ: നിയന്ത്രണംവിട്ട കാർ കനാലിലേക്ക് മറിഞ്ഞു. കാറിലുണ്ടായിരുന്ന യാത്രക്കാർ പരിക്കേൽക്കാതെ രക്ഷപ്പെട്ടു. മലക്കുളം-ഇരട്ടക്കുളം ആർ.കൃഷ്ണൻ റോഡിൽ വാവേലിക്കുസമീപം ഇന്നലെ രാവിലെ ഒമ്പതരയോടെയാണ് അപകടമുണ്ടായത്. കനാൽ റോഡിന്‍റെ ഇരുഭാഗവും കാടുമൂടിയ നിലയിലാണ്. ഇരട്ടക്കുളം ഭാഗത്തേക്കു വരികയായിരുന്ന കാർ നിയന്ത്രണംവിട്ട് വെള്ളമുള്ള കനാലിലേക്ക് മറിയുകയായിരുന്നു. കാറിലെ യാത്രക്കാരായ പാസ്റ്റർ സോളമൻ സാമുവേൽ, ഭാര്യ കുഞ്ഞുമോൾ എന്നിവർ പരിക്കേൽക്കാതെ രക്ഷപ്പെട്ടു. പിന്നീട് ക്രെയിൻ ഉപയോഗിച്ച് കനാലിൽ കിടന്ന കാർ പുറത്തെടുത്തു.

മുടപ്പല്ലൂരിലെ വീടുകവർച്ച; സിസിടിവികൾ കേന്ദ്രീകരിച്ച് അന്വേഷണം ഊർജിതം

വടക്കഞ്ചേരി: മുടപ്പല്ലൂർ പടിഞ്ഞാറേത്തറ വഴിയിലുള്ള കണ്ടപറമ്പിൽ സിബി മാത്യൂസിന്‍റെ വീട്ടിൽ ചൊവ്വാഴ്ച രാത്രി നടന്ന കവർച്ച സംബന്ധിച്ച് പോലീസ് അന്വേക്ഷണം ഊർജിതം. സമീപപ്രദേശങ്ങളിലെ സിസി ടിവികൾ പരിശോധിച്ചുള്ള അന്വേഷണമാണ് പുരോഗമിക്കുന്നത്. വീടിനു പിറകിൽ മറ്റൊരാളുടെ കെട്ടിടനിർമാണ സ്ഥലത്ത് സ്ഥാപിച്ച കാമറയിൽ ഒരാളുടെ ദൃശ്യം പതിഞ്ഞിട്ടുണ്ടെങ്കിലും അതിന് സംഭവവുമായി ബന്ധമില്ലെന്ന് പോലീസ് സ്ഥിരീകരിച്ചു. സംഭവ ദിവസം വൈകുന്നേരം മറ്റാരെങ്കിലും വീടിനടുത്ത് വന്നിരുന്നോ എന്നും അന്വേഷിക്കുന്നുണ്ട്. രണ്ട് പേർ ബൈക്കിൽ പ്രദേശത്ത് വന്നിരുന്നതായി വിവരമുണ്ട്. ചൊവ്വാഴ്ച വൈകുന്നേരം അഞ്ചരക്കും രാത്രി ഒമ്പതിനും ഇടയ്ക്കുള്ള മൂന്നര മണിക്കൂർ സമയത്തിനുള്ളിലാണ് കവർച്ച നടന്നത്. വടക്കഞ്ചേരി ടൗണിലെ സൂപ്പർ മാർക്കറ്റ് മാനേജരായ സിബിയും ഭാര്യ ശ്രീജയും അഞ്ചരക്കു ശേഷം വീടുപൂട്ടി പുറത്തുപോയിരുന്നു. സിബി സൂപ്പർമാർക്കറ്റിലേക്കും ശ്രീജ മണ്ണുത്തിയിട്ടുള്ള ബന്ധുവീട്ടിലും പോയി. രണ്ട്പേരും രാത്രി ഒമ്പത് മണിയോടെ വീട്ടിൽ തിരിച്ചെത്തിയപ്പോഴാണ് കവർച്ചവിവരം അറിഞ്ഞത്. ഇരുപത്തിമൂന്നര പവൻ സ്വർണാഭരണങ്ങളാണ് താഴെ ബെഡ്റൂമിലെ അലമാരയിൽ നിന്നും നഷ്ടപ്പെട്ടത്. ആലത്തൂർ ഡിവൈഎസ്പി എൻ. മുരളീധരൻ, വടക്കഞ്ചേരി സിഐ കെ.പി. ബെന്നി എന്നിവരുടെ നേതൃത്വത്തിലുള്ള പ്രത്യേകസംഘമാണ് കേസന്വേഷണം നടത്തുന്നത്. അന്വേഷണത്തിന്‍റെ ഭാഗമായി ഹാർലി എന്ന പോലീസ്നായ മണംപിടിച്ച് വീടിനു പിറകുവശത്ത് കറങ്ങി പിന്നീട് പിറകിലെ ഉയരംകുറഞ്ഞ മതിൽചാടി കെട്ടിടനിർമാണം നടക്കുന്ന സൈറ്റ് വഴി മെയിൻ റോഡിലേക്കുള്ള വഴിയിലേക്ക് ഓടിയാണ് നിന്നത്. വീടിനു പിറകിലെ ഉയരം കുറഞ്ഞ മതിൽ ചാടിക്കടന്നാകും മോഷ്ടാക്കൾ വീടിന്‍റെ കോമ്പൗണ്ടിൽ കടന്നതെന്നാണ് പോലീസും സംശയിക്കുന്നത്.

ഒറ്റപ്പാലത്തു തരിശുഭൂമിയിൽ വിരിഞ്ഞതു പൂവസന്തം

ഒറ്റപ്പാലം: തരിശുഭൂമിയിൽ വിളഞ്ഞത് പൂക്കളുടെ നൂറ് മേനി. ഒറ്റപ്പാലം നഗരപരിധിയിൽ കാലങ്ങളായി തരിശുകിടന്നിരുന്ന ഭൂമി പ്രയോജനപ്പെടുത്തിയാണ് കണ്ണിയംപുറത്തുകാരനായ യുവാവും ബന്ധുവായ ജനപ്രതിനിധിയും ചേർന്നു പൂക്കളുടെ വിളവിറക്കിയത്. ചെണ്ടുമല്ലി കൃഷി ഓണക്കാലമായതോടെ വിളവെടുപ്പിന് പാകമാവുകയും ചെയ്തു. പനമണ്ണ അമ്പലവട്ടം ഐക്യത്തിൽ ഗിരീഷ് രണ്ട് മാസം മുമ്പാണ് 50 സെന്‍റ് ഭൂമിയിൽ ചെണ്ടുമല്ലി വിളവിറക്കിയത്. അടുത്ത ബന്ധുവും നഗരസഭാ കൗൺസിലറുമായ കെ.സുരേഷ്കുമാറിന്‍റെ പിന്തുണയോടെയായിരുന്നു കൃഷി. കൃഷിഭവൻ നൽകിയ ‘ആഫ്രിക്കൻ അശോക’ ഇനത്തിൽപെട്ട ചെടികളാണു നട്ടത്. ഓണമായതോടെ കൃഷി വിളവെടുപ്പിനു പാകമായി. മഞ്ഞ, ഓറഞ്ച് നിറങ്ങളിലുള്ള ചെണ്ടുമല്ലി ചെടികളാണു വിളഞ്ഞു നിൽക്കുന്നത്.തരിശുഭൂമിയിൽ ചെണ്ടുമല്ലി കൃഷി ഇറക്കാമെന്ന ആശയം സുരേഷ്കുമാറാണു മുന്നോട്ടുവച്ചത്. കൃഷിഭവന്‍റെ കൂടി പിന്തുണ ലഭിച്ചതോടെ എല്ലാം പെട്ടെന്നായി. ചെറിയ തോതിൽ വാടാമല്ലിയും വിളവിറക്കിയിരുന്നു. ഇതും വിളപ്പെടുപ്പിനു പാകമായി. 5 തവണയെങ്കിലും വിളവെടുക്കാൻ കഴിയുമെന്നാണു പ്രതീക്ഷ. വിളവെടുത്ത പൂക്കൾ നഗരത്തിൽ നേരിട്ടു വില്പന നടത്താനാണ് ആലോചനയെന്നു ഗിരീഷ് പറഞ്ഞു. നെല്ല്, റബർ, നാളികേരം എന്നിവ കൃഷി ചെയ്യുന്ന കർഷകനാണു ഗിരീഷ്. ചെണ്ടുമല്ലി കൃഷി വിളവെടുപ്പ് നഗരസഭാധ്യക്ഷ കെ. ജാനകീദേവി ഉദ്ഘാടനം ചെയ്തു. ഉപാധ്യക്ഷൻ കെ. രാജേഷ്, കെ.സുരേഷ്കുമാർ, ഐക്യത്തിൽ ഗിരീഷ് എന്നിവരും കൃഷി വകുപ്പിലെ ഉദ്യോഗസ്ഥരും പ്രസംഗിച്ചു.

ലയൺസ് ക്ലബ് ഓണാഘോഷം കാരുണ്യ ഓൾഡേജ് ഹോമിൽ

പാലക്കാട്: കരിങ്കരപ്പുള്ളി കാരുണ്യ ഓൾഡേജ് ഹോമിലെ അന്തേവാസികളോടൊപ്പം നടത്തിയ ഓണാഘോഷം ലയൺസ് ക്ലബ് മൾട്ടിപ്പിൾ സെക്രട്ടറി ജെയിംസ് പോൾ വളപ്പില ഉദ്ഘാടനം ചെയ്തു. പാം സിറ്റി പ്രസിഡന്‍റ് ആർ. ബാബു സുരേഷ് അധ്യക്ഷത വഹിച്ച ഓണാഘോഷത്തിൽ ലയൺസ് ഹങ്കർ ഡിസ്റ്റിക് കോ-ഓർഡിനേറ്റർ പ്രദീപ് മേനോൻ, പാം സിറ്റി സെക്രട്ടറി എൻ. കൃഷ്ണകുമാർ, ഡോ.എൻ. രാമചന്ദ്രൻ, ലയൺസ് ക്ലബ് റീജണൽ ചെയർമാൻ വി. അച്യുതൻ, സോൺ ചെയർമാൻ എ. രാജൻ, ക്ലബ്ബ് ഭാരവാഹികളായ പി.എ. ബൈജു, സദക്കത്തുള്ള, ടി. മനോജ് കുമാർ എന്നിവർ പ്രസംഗിച്ചു. ഓൾഡേജ് ഹോം അന്തേവാസികൾക്ക് ഓണക്കോടികൾ വിതരണം ചെയ്തു. ക്ലബ് അംഗങ്ങളുടെ വിവിധ കലാപരിപാടികളും ഓണസദ്യയും നടന്നു. ക്ലബ്ബ് ഡയബറ്റിക് പ്രൊജക്റ്റിന്‍റെ ഭാഗമായി ഡയബറ്റിക് പരിശോധനയുടെ കിറ്റ് കാരുണ്യ ഓൾഡേജ് ഹോം ചെയർമാൻ മധുസൂദനന് നൽകി. ക്ലബ്ബ് ഭാരവാഹികളായ റോഷൻ, അഡ്വ. മോഹൻദാസ് പാലാട്ട്, ആർ. ശ്രീകുമാർ, പി. സന്തോഷ് കുമാർ, പി.എ. അൻസാരി, എൻ. പുരുഷോത്തമൻ, കെ. പ്രദീപ് കുമാർ, ദീപക്, കെ. രാധാകൃഷ്ണൻ, സന്തോഷ്, സജി, റിജോ, രമ്യ ഹരി എന്നിവർ ഓണാഘോഷത്തിന് നേതൃത്വം നൽകി.

തത്തമംഗലത്തു വിദ്യാർഥിക്കു തെരുവുനായയുടെ കടിയേറ്റു

തത്തമംഗലം: പള്ളിമൊക്കിൽ തെരുവ്നായ വിദ്യാർഥിയെ കടിച്ച് മുറിവേൽപ്പിച്ചു. മേട്ടുവളവിൽ അബ്ദുൾ ഖാദറിന്‍റെ മകൻ ഉനൈസി (11) നാണ് ഇടതു കൈപ്പത്തിയിൽ കടിയേറ്റത്. ഇന്നലെ രാവിലെ ഏഴിന് മദ്രസയിൽ പഠിക്കാൻ പോകുമ്പോഴാണ് സംഭവം. സമീപവാസികൾ എത്തി നായയെ ഓടിച്ചതിനാൽ കൂടുതൽ അനിഷ്ടസംഭവം ഒഴിവായി. ഈ സ്ഥലത്തും പരിസരത്തുമായി നായ്ക്കൾ പരക്കം പായുന്നത് മുതിർന്നവർക്കും ഭീഷണിയാണ്. പ്രഭാതവ്യായാമത്തിനു പോലും റോഡിലിറങ്ങാൻ ഭയപ്പെടുകയാണ് ജനങ്ങൾ.

ചെക്ക്പോസ്റ്റുകളിൽ എക്സൈസ് പരിശോധന കർശനമാക്കി

കൊഴിഞ്ഞാമ്പാറ: ഓണം അടുത്തതോടെ അതിർത്തി ചെക്ക് പോസ്റ്റുകളിൽ വാഹനപരിശോധന കർശനമാക്കി. മീനാക്ഷിപുരം വേലന്താവളം, നടുപ്പുണി, ഗോവിന്ദാപുരം, ഗോപാലപുരം ചെക്ക്പോസ്റ്റുകളിലാണ് വാഹനപരിശോധന കർശനമാക്കിയിരിക്കുന്നത്. ഇതിനുപുറമെ ഡാൻസാഫ് പോലീസും പട്രോളിംഗ് വ്യാപിച്ചിരിക്കുകയാണ്. എന്നാൽ അതിർത്തിയിൽ ചില സ്വകാര്യ വ്യക്തികളുടെ തോപ്പുകളിലും പറമ്പുകളിലും രഹസ്യവഴിയുണ്ടാക്കി വാഹനങ്ങൾ പോവുന്നതായും നാട്ടുകാർ അറിയിക്കുന്നുണ്ട്. കള്ളക്കടത്തു മാഫിയ സംഘത്തിന്‍റെ അക്രമണഭീതി കാരണം ജനം പരസ്യപ്രതികരണത്തിനു തയാറാവുന്നില്ല.

ഗവ. ടെക്നിക്കൽ സ്കൂളിൽ ചെണ്ടുമല്ലി വിളവെടുപ്പ്

ചിറ്റൂർ: ഗവ. ടെക്നിക്കൽ ഹൈസ്കൂളിൽ ഒരുക്കിയിട്ടുള്ള ഓണപ്പൂകൃഷി വിളവെടുപ്പ് വാർഡ് മെംബർ സി. പ്രശാന്തിന്‍റെ നേതൃത്വത്തിൽ ആരംഭിച്ചു. ഓണം മുന്നിൽ കണ്ട് ഏതാണ്ട് നാനൂറോളം ഗ്രോബാഗുകളിൽ ആധുനിക ഓപ്പൺ പ്രിസിഷൻ സാങ്കേതികവിദ്യ ഉപയോഗിച്ചാണ് ചെണ്ടുമല്ലി കൃഷി ചെയ്തിട്ടുള്ളത്. സമീപപ്രദേശങ്ങളിൽ ഉള്ള പത്ത് വിദ്യാലയങ്ങൾക്ക് ആവശ്യമായ ചെണ്ടുമല്ലി തൈകളും ഹൈബ്രിഡ് പച്ചക്കറിതൈകളും നേരത്തെതന്നെ സ്കൂളിലെ ജീവനക്കാർക്കും വിദ്യാർഥികൾക്കും ഇത്തരത്തിൽ തൈകൾ സൗജന്യമായി നൽകിയിട്ടുണ്ട.് ചിറ്റൂർ മേഖലയിലെ വിദ്യാർഥികളെ കൃഷിയിലേക്ക് അടുപ്പിക്കുക എന്നതാണ് മാതൃക പ്രവർത്തനങ്ങളിലൂടെ ലക്ഷ്യമിടുന്നത്. ദേശീയഹരിതസേന, സ്കൂൾ ഇക്കോ ക്ലബ്, സ്്കൂൾ കാർഷിക ക്ലബ് അംഗങ്ങൾ ആയ വിദ്യാർഥികൾ ആണ് സ്കൂളിലെ ഈ കാർഷിക പ്രവർത്തനങ്ങൾ നടത്തുന്നത്. സ്കൂളിൽ ഒരു മികച്ച അടുക്കളത്തോട്ടവും വിദ്യാർഥികൾ ഒരുക്കിയിട്ടുണ്ട്. സ്കൂളിൽ നടന്ന വിളവെടുപ്പ് ഉദ്ഘാടനചടങ്ങിൽ സ്്കൂൾ സൂപ്രണ്ട് ലിബുകുമാർ, പിടിഎ വൈസ് പ്രസിഡന്‍റ് കെ.മുരളീധരൻ, പിടിഎ ഭാരവാഹികൾ, അധ്യാപകർ, ദേശീയ ഹരിതസേന അംഗങ്ങൾ, വിദ്യാർഥികൾ എന്നിവർ പങ്കെടുത്തു.

പൂട്ടിക്കിടക്കുന്ന വീടുകളിലെ കവർച്ചകളെല്ലാം അതിവിദഗ്ധമായി

വടക്കഞ്ചേരി: പിടികൊടുക്കാതെ തുടരുന്ന വീടുകവർച്ചക്കാർ പോലീസിന് വലിയ തലവേദനയായി മാറുന്നു. ചൊവ്വാഴ്ച രാത്രി മുടപ്പല്ലൂർ കണ്ടംപറമ്പിൽ സിബി മാത്യുവിന്‍റെ വീട്ടിൽ നടന്ന കവർച്ചയാണ് ഒടുവിലത്തേത്. സിബിയും ഭാര്യയും വീട് പൂട്ടി പുറത്തുപോയി നാലുമണിക്കൂർ കഴിഞ്ഞ് തിരിച്ചെത്തുമ്പോഴേക്കും വീട് കുത്തിത്തുറന്ന് കവർച്ച നടന്നു. താഴെ ബെഡ്റൂമിലെ അലമാരയിൽ സൂക്ഷിച്ചിരുന്ന ഇരുപത്തിമൂന്നര പവൻ സ്വർണാഭരണങ്ങൾ നഷ്ടപ്പെട്ടു. ‌അടുക്കളഭാഗത്തെ തറയിലെ വാട്ടർടാങ്കിനു മുകളിൽ പെയിന്‍റ് ബക്കറ്റ് വച്ച് അതിൽ കയറി സൺഷെയ്ഡ് വഴിയാണ് മോഷ്ടാവ് മുകളിലേക്ക് കയറിയത്. രണ്ടുമാസം മുമ്പാണ് സിബിയുടെ വീടിനടുത്ത് പടിഞ്ഞാറേത്തറയിൽ റിട്ട. ഡിഫൻസ് ഉദ്യോഗസ്ഥൻ ഗംഗാധരന്‍റെ വീട്ടിൽനിന്നു 13 പവൻ സ്വർണാഭരണങ്ങളും 8500 രൂപയും പന്ത്രണ്ടായിരം രൂപ വിലയുള്ള വാച്ചും കവർന്നത്. വീട് പൂട്ടി അടുത്ത് പന്തംപറമ്പിലുള്ള തറവാട്ടുവീട്ടിൽ പോയ സമയത്തായിരുന്നു സംഭവം. വാതിലുകൾക്കൊന്നും വലിയ കേടുപാടുകൾ വരുത്താതെയായിരുന്നു കവർച്ച. തുറന്ന വാതിലുകൾ അതേപടി അടച്ചുവച്ച് പെട്ടെന്ന് സംശയം തോന്നിക്കാത്ത വിധമായിരുന്നു ഗംഗാധരന്‍റെ വീട്ടിൽ മോഷ്ടാവ് പെരുമാറിയത്. അതിനു രണ്ടുദിവസം മുമ്പ് മുടപ്പല്ലൂരിൽതന്നെ ചക്കാന്തറ ആറുമുഖന്‍റെ വീട്ടിൽ മോഷണശ്രമമുണ്ടായി. പിറകിലെ വാതിൽ തുറക്കുന്ന ശബ്ദംകേട്ട് മുകൾനിലയിലായിരുന്ന മകൻ താഴേക്ക് ഓടിവരുമ്പോഴേക്കും മുഖംമൂടി ധരിച്ച മോഷ്ടാവ് രക്ഷപ്പെട്ടു. നാലുമാസംമുമ്പ് ദേശീയപാതയ്ക്കടുത്ത് ചുവട്ടുപാടത്ത് പ്രസാദ് പിള്ളയുടെ ഒറ്റപ്പെട്ട ഇരുനിലവീട്ടിൽനിന്നു 45 പവൻ സ്വർണാഭരണങ്ങൾ കവർന്നതും അതിവിദഗ്ധമായിട്ടായിരുന്നു. രാത്രി വീട്ടുകാർ ഉറങ്ങിക്കിടന്നിരുന്ന മുറിയിൽനിന്നാണ് ആഭരണങ്ങൾ കവർന്നത്. അടുക്കളഭാഗത്തെ ചിമ്മിനിക്കുഴലിലൂടെ കയറി മുകളിലെ നിലയിലെ വാതിൽവഴിയായിരുന്നു അന്ന് മോഷ്ടാവ് അകത്തുകടന്നത്. സ്വർണം കണ്ടെത്താനുള്ള പുതിയ ഉപകരണങ്ങൾ വല്ലതും മോഷ്ടാക്കൾ ഉപയോഗിക്കുന്നുണ്ടോ എന്ന് സംശയിക്കുംവിധമാണ് ആഭരണക്ക വർച്ചകൾ നടക്കുന്നത്.

ഓണവൈബ് ഏറ്റെടുത്ത് കുടുംബശ്രീ

പാലക്കാട്: ഓണപ്പൂക്കൾ, ഓണസദ്യ, പച്ചക്കറി വിപണികളിൽ സജീവമായികൊണ്ട് ഓണവൈബ് പൂർണമായി ഏറ്റെടുത്തിരിക്കുകയാണ് ജില്ലാ കുടുംബശ്രീ മിഷൻ. മുൻവർഷത്തേതിന് സമാനമായി ഇക്കുറിയും കുടുംബശ്രീ പൂകൃഷിയിൽ സജീവമാണ്. നിർദേശിച്ച നന്പറിൽ വിളിച്ചാൽ വീട്ടുപടിക്കലെത്തിക്കുന്ന ഓണസദ്യയാണ് ഇത്തവണത്തെ ഹൈലൈറ്റ്. പുറമെ കുടുംബശ്രീ യൂനിറ്റുകൾ ഉത്പാദിപ്പിച്ച ജൈവ പച്ചക്കറികളും ഇക്കുറി വിപണിയിലെ വിലക്കയറ്റത്തിന് തടയിടാൻ മുന്നിലുണ്ടാകും. ഓണം സ്പെഷൽ കിറ്റോടെ കുടുംബശ്രീയുടെ ഓണ്‍ലൈൻ പ്ലാറ്റ്ഫോമും ‘പോക്കറ്റ് മാർട്ട്’ ആപ്പ് മുഖേന തിളങ്ങി നിൽക്കുകയാണ്. ‘നിറപ്പൊലിമ’യായി ഓണപ്പൂക്കൾ ജില്ലയൊട്ടാകെ 24.5 ഏക്കറിലാണ് കുടുംബശ്രീയുടെ 90 കാർഷികഗ്രൂപ്പുകൾ ചേർന്ന് പൂകൃഷി ഒരുക്കിയത്. നിറപ്പൊലിമ എന്ന പേരിൽ ഈ ഓണപ്പൂക്കൾ ഇപ്പോൾ വിപണിയിൽ സജീവമാണ്. നിലവിൽ കുടുംബശ്രീ പൂപ്പാടങ്ങളിൽ വിളവെടുപ്പുത്സവങ്ങൾ നടന്ന് വരികയാണ്. ഓണപ്പൂക്കൾ വിപണിയിലെത്തിക്കുന്നതിനായി 2024 ൽ കുടുംബശ്രീ തുടക്കം കുറിച്ച പദ്ധതിയാണ് നിറപ്പൊലിമ. കുറഞ്ഞ കാലയളവിൽ ഉയർന്ന വിളവ് നൽകുന്ന ഹൈബ്രിഡ് ഇനങ്ങളാണ് കൃഷിക്കായി തെരഞ്ഞെടുത്തത്. ഓറഞ്ച്, മഞ്ഞ, ചെണ്ടുമല്ലിയും വാടാമല്ലിയുമാണ് കൃഷിചെയ്തത്. കൃഷിയിറക്കുന്ന സമയത്ത് കാലാവസ്ഥ അനുകൂലമല്ലാതിരുന്നത് കുടുംബശ്രീ സിഡിഎസുകൾക്കും കാർഷികഗ്രൂപ്പുകൾക്കും വെല്ലുവിളിയായിരുന്നു. 18 മുതൽ ജില്ലയുടെ വിവിധ ഭാഗങ്ങളിൽ പൂക്കളുടെ വിളവെടുപ്പ് നടന്ന് വരുന്നുണ്ട്. നേരിട്ടും ഓണച്ചന്തകൾ മുഖേനെയുമാണ് പൂവിപണി നടക്കുന്നത്. കിലോക്ക് 150 മുതൽ 200 രൂപ വരെയാണ് നിരക്ക്. അട്ടപ്പാടി മേഖലയിൽ നിന്നും കോയന്പത്തൂർ വിപണികളിലും കുടുംബശ്രീ യൂണിറ്റുകൾ പൂക്കളെത്തിക്കുന്നുണ്ട്. തമിഴ്നാട്ടിലെ തെങ്കാശിയിൽ നിന്നും ഗുണ്ടൽപേട്ട് നിന്നുമുളള പൂക്കൾക്ക് പകരമാവുകയാണ് കുടുംബശ്രീയുടെ ഈ ഓണപ്പൂക്കൾ. കുടുംബശ്രീ ഓണസദ്യ ഇത്തവണത്തെ ഹൈലൈറ്റ് ചോർ, സാന്പാർ, അവിയൽ, പച്ചടി, കിച്ചടി, പപ്പടം, അച്ചാർ, ചിപ്സ്, പായസം, ശർക്കര വരട്ടി, പുളിയിഞ്ചി, കാളൻ, രസം, മോര്, തുടങ്ങി വാഴയില വരെ ലഭ്യമാക്കികൊണ്ട് ബുക്ക് ചെയ്യുന്നവർക്ക് വീട്ടിലെത്തിക്കുന്ന ഓണസദ്യയാണ് ഇത്തവണ കുടുംബശ്രീയുടെ ഹൈലൈറ്റ്. ജില്ലയിലെ വിവിധ പ്രദേശങ്ങളിൽ നിന്നുള്ള മികച്ച മുപ്പത്തഞ്ചോളം കുടുംബശ്രീ കഫേ യൂണിറ്റുകളാണ് ഓണസദ്യ ഒരുക്കുന്നത്.ആവശ്യമായ ദിവസത്തിന് രണ്ട് ദിവസം മുന്പ് ബുക്ക് ചെയ്താൽ സദ്യ വീട്ടുപടിക്കൽ എത്തും. തിരുവോണദിനത്തിലെ ബുക്കിംഗ് സിഡിഎസ് കേന്ദ്രങ്ങളിൽ നേരിട്ടെത്തി ശേഖരിക്കാവുന്നതാണ്. നിലവിൽ ബുക്കിംഗ് ആയിരം കഴിഞ്ഞതായി കുടുംബശ്രീ മിഷൻ ജില്ല കോ-ഓർഡിനേറ്റർ അറിയിച്ചു. ആവശ്യക്കാരുടെ താത്പര്യമനുസരിച്ച് വിഭവങ്ങൾ തെരഞ്ഞെടുക്കാനും ഇനങ്ങൾ തീരുമാനിക്കാനും സാധിക്കും. സദ്യയുടെ ഫാമിലി പാക്കുൾപ്പെടെ ലഭ്യമാണ്. ജില്ലയിലെവിടെയും കുടുംബശ്രീ ഓണസദ്യ എത്തിക്കുമെന്നതും പ്രത്യേകതയാണ്. വിഷരഹിത പച്ചക്കറികളുമായി കുടുംബശ്രീ ഓണക്കനി ഓണവിപണിയിൽ ‘ഓണക്കനി’ എന്ന പേരിൽ വിഷരഹിതവും ഗുണമേന്മയും ഉറപ്പാക്കുന്ന പച്ചക്കറികൾ താരതമ്യേന വിലക്കുറവിൽ ലഭ്യമാക്കാനും കുടുംബശ്രീ മുന്നിലുണ്ട്. 2024 മുതൽ കുടുംബശ്രീ നടപ്പിലാക്കുന്ന പദ്ധതിയാണ് ഓണക്കനി. 190 സംഘകാർഷിക ഗ്രൂപ്പുകളുടെ നേതൃത്വത്തിൽ പാലക്കാട് ജില്ലയിൽ 328.4 ഏക്കറിലാണ് പച്ചക്കറികൃഷി നടന്നുവരുന്നത്. വെണ്ട, വഴുതന, തക്കാളി, പയർ, മത്തൻ, കുന്പളം, പടവലം, പാവയ്ക്ക, പയർ, മുളക്, ചീര,നേന്ത്ര കായ എന്നിവയാണ് പ്രധാനമായും ഓണ വിപണിക്കായി തയ്യാറായിരിക്കുന്നത്. മെയ് അവസാന വാരം തന്നെ പച്ചക്കറി കൃഷി ആരംഭിച്ചെങ്കിലും അതിശക്ത മഴയിൽ ചില ഗ്രൂപ്പുകൾക്ക് കൃഷിനാശം സംഭവിച്ചു. എന്നാൽ മഴയ്ക്ക്ശേഷം വീണ്ടും തൈകളും വിത്തുകളും നട്ടുകൊണ്ട് ഗ്രൂപ്പുകൾ സജീവമായി വീണ്ടും കൃഷിയിറക്കി. അത്യുത്പാദന ശേഷിയുള്ള മികച്ച ഇനം ഹൈബ്രിഡ് വിത്തുകളും തൈകളുമാണ് ഈ വർഷവും കർഷകർ ഉപയോഗിച്ചിരിക്കുന്നത്. കുടുംബശ്രീ നഴ്സറികൾ മുഖേനയും തൈകൾ ലഭ്യമാക്കിയിരുന്നു. കാർഷിക ഉത്പന്നങ്ങളോടൊപ്പം കുടുംബശ്രീ സംരംഭങ്ങൾ തയ്യാറാക്കുന്ന വിവിധ കാർഷിക മൂല്യവർദ്ധിത ഉത്പന്നങ്ങളും ഓണ വിപണിയിൽ ലഭ്യമാവും. കുടുംബശ്രീ നാട്ടുചന്തകൾ, ഓണച്ചന്തകൾ, കിയോസ്കുകൾ എന്നിവ മുഖേനയാണ് പ്രധാനമായും വിപണനം. പരന്പരാഗത കൃഷി രീതികളോടൊപ്പം നൂതന ഓപ്പണ്‍ പ്രിസിഷൻ ഫാർമിംഗ് രീതികളും കുടുംബശ്രീ കർഷകർ ഉപയോഗിച്ചിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]