കാറും ഓട്ടോറിക്ഷയും കൂട്ടിയിടിച്ചു രണ്ടുപേർ മരിച്ചു : Deepika.com Kerala News |

ചാരുംമൂട്: കാറും ഓട്ടോറിക്ഷയും കൂട്ടിയിടിച്ചുണ്ടായ അപകടത്തിൽ ഓട്ടോ ഡ്രൈവർ ഉൾപ്പടെ രണ്ടു പേർ മരിച്ചു. കുട്ടിയടക്കം നാലു പേർക്കു പരിക്കേറ്റു. ഓട്ടോറിക്ഷ ഡ്രൈവർ ചുനക്കര തെരുവിൽമുക്ക് കിഴക്കേവിളയിൽ ചോണേത്ത് അജ്മൽ ഖാൻ (തമ്പി-57) ഓട്ടോ റിക്ഷയിൽ യാത്ര ചെയ്തിരുന്ന ചുനക്കര തെക്ക് രാമനിലയത്തിൽ തങ്കമ്മ (75) എന്നിവരാണ് മരിച്ചത്.

ഓട്ടോറിക്ഷയിലുണ്ടായിരുന്നചുനക്കര നടുവിൽ തെക്കണശേരി തെക്കതിൽ ദിലീപ് ഭവനത്തിൽ മണിയമ്മ (57) പരിക്കേറ്റ് വണ്ടാനം മെഡിക്കൽ കോളജിൽ ചികിത്സയിലാണ്. കൊല്ലം - തേനി ദേശീയ പാതയിൽ ചുനക്കര തെക്ക് പത്തിശേരിൽ ക്ഷേത്രത്തിനു സമീപം ഇന്നലെ വൈകുന്നേരം നാലോടെ ആയിരുന്നു അപകടം .

ചെന്നൈയിൽ ജോലി ചെയ്യുന്ന പ്രബിനും ഭാര്യയും കുട്ടിയുമാണ് കാറിലുണ്ടായിരുന്നത്. ഇവർക്കും പരിക്കേറ്റെങ്കിലും സാരമുള്ളതല്ല. കൊല്ലം പുത്തൂരേക്കു വരികയായിരുന്നു ഇവർ. ചാരുംമൂട്ടിൽനിന്നു ചുനക്കരയ്ക്കു വരികയായിരുന്നു ഓട്ടോറിക്ഷ. എതിർദിശയിൽനിന്നു വരികയായിരുന്ന കാറു നിയന്ത്രണം വിട്ട് ഓട്ടോറിക്ഷ സഞ്ചരിച്ചിരുന്ന വശത്തേക്ക് ഇടിച്ചു കയറുകയായിരുന്നു. ഓട്ടോറിക്ഷ പൂർണമായും കാറിന്‍റെ മുൻഭാഗവും തകർന്നു. കാറിടിച്ചു വൈദ്യുത പോസ്റ്റും ഒടിഞ്ഞു. കാറിനുള്ളിലെ സുരക്ഷാ ബാഗ് പൊട്ടിയിട്ടുണ്ട്.

അപകടത്തിൽ തകർന്ന ഓട്ടോ റിക്ഷയിൽ കുടുങ്ങി കിടന്നവരെ 15 മിനിറ്റോളം കഴിഞ്ഞാണ് പുറത്തെടുത്തത്. ഇവരെ കാറിലും ചുനക്കര ഗ്രാമപഞ്ചായത്ത് പ്രസിഡന്‍റ് കെ.ആർ. അനിൽകുമാർ സഞ്ചരിച്ചിരുന്ന പഞ്ചായത്തിന്‍റെ ജീപ്പിലുമായാണ് കറ്റാനത്തുള്ള സ്വകാര്യ ആശുപത്രിയിൽ എത്തിച്ചത്.ചാരുംമൂട്ടിലും ചുനക്കര തെരുവുമുക്കിലുമായി വർഷങ്ങളായി ഓട്ടോ ഓടിക്കുകയായിരുന്നു അജ്മൽ ഖാൻ.

ചാരുംമൂട്ടിൽനിന്നു സാധനം വാങ്ങാനാനെത്തി മടങ്ങുകയായിരുന്നു തങ്കമ്മയും മണിയമ്മയും. ഷൈലയാണ് അജ്മലിന്റെ ഭാര്യ. മക്കൾ: അഫ്സൽ ഖാൻ, ആയിഷ.

പരേതനായ രാമൻ നായരാണ് തങ്കമ്മയുടെ ഭർത്താവ്. മക്കൾ: ഗോപാലകൃഷ്ണൻ നായർ, ശിവൻ, തുളസി, നാരായണൻ നായർ, രജനി.