തിയറ്ററുകളിലെ അധിക ടിക്കറ്റ് നിരക്ക്: സര്‍ക്കാരിനോടു വിശദീകരണം തേടി
Wednesday, June 11, 2025 1:56 AM IST
കൊച്ചി: സിനിമാ തിയറ്ററുകളിലെ അധിക ടിക്കറ്റ് നിരക്ക് ചോദ്യം ചെയ്തു നല്‍കിയ പൊതുതാത്പര്യ ഹര്‍ജിയില്‍ സംസ്ഥാന സര്‍ക്കാരിനോടു വിശദീകരണം തേടി ഹൈക്കോടതി.
മൂന്നാഴ്ചയ്ക്കകം മറുപടി നല്‍കാനാണു സര്‍ക്കാരിന് ചീഫ് ജസ്റ്റീസ് അധ്യക്ഷനായ ഡിവിഷന്‍ ബെഞ്ചിന്‍റെ നിര്‍ദേശം. സംസ്ഥാനത്തെ സിനിമാ തിയറ്ററുകളിലെ ടിക്കറ്റ് നിരക്ക് ഏകീകരിക്കണമെന്നും അധിക നിരക്ക് ഈടാക്കുന്നത് തടയണമെന്നും ഹര്‍ജിയില്‍ ആവശ്യപ്പെടുന്നു.
പിവിആര്‍ ഇനോക്‌സ് ഉള്‍പ്പെടെയുള്ള മള്‍ട്ടി പ്ലക്‌സുകള്‍ പൊതുസമൂഹത്തിനു സാമ്പത്തിക ബാധ്യത സൃഷ്‌ടിക്കുന്നുവെന്നും ഹര്‍ജിയില്‍ പറയുന്നു.
ആന്ധ്രാപ്രദേശ്, കര്‍ണാടക, തമിഴ്‌നാട് ഉള്‍പ്പെടെയുള്ള മറ്റു സംസ്ഥാനങ്ങളില്‍ ടിക്കറ്റ് നിരക്ക് നിയന്ത്രിക്കാന്‍ നിയമം നിലവിലുണ്ട്. സമാന വിഷയത്തില്‍ മദ്രാസ്, തെലുങ്കാന ഹൈക്കോടതികള്‍ ഉത്തരവ് പുറപ്പെടുവിച്ചിട്ടുണ്ട്.
അയല്‍സംസ്ഥാനങ്ങള്‍ സിനിമാ ടിക്കറ്റ് നിരക്ക് നിയന്ത്രണം നടപ്പാക്കിയിട്ടുണ്ടെന്നും ചൂണ്ടിക്കാട്ടിയാണു ഹര്‍ജി.