ADVERTISEMENT

ADVERTISEMENT

പുതിയകാലത്തെ വിദ്യാർഥികൾ നിർമിത ബുദ്ധിയോടൊത്ത് പ്രവർത്തിക്കണം: സബ്കളകർ

തിരുവനന്തപുരം: നിർമിത ബുദ്ധിയോടൊത്തു വിമർശന ബുദ്ധിയോടെ പ്രവർത്തിക്കുന്നവരായി വിദ്യാർഥികൾ മാറണമെന്നു തിരുവനന്തപുരം സബ്കളക്ടർ ഒ.വി. ആൽഫ്രഡ്. പട്ടം സെന്‍റ് മേരീസ് ഹയർ സെക്കൻഡി സ്കൂളിൽ മെറിറ്റ് അവാർഡ് വിതരണ ചടങ്ങായ "എക്സലൻസിയ 2025' ഉദ്ഘാടനം ചെയ്യുകയായിരുന്നു അദ്ദേഹം. തിരുവനന്തപുരം മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമ്മിസ് കാതോലിക്കാ ബാവ അധ്യക്ഷത വഹിച്ചു.

സ്കൂളിൽ മുഴുവൻ മാർക്കും കരസ്ഥമാക്കിയ വിദ്യാർഥികളെയും ഹയർ സെക്കൻഡറി, എസ്എസ്എൽസി പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയവരെയും ചടങ്ങിൽ ആദരിച്ചു. അഭിനേത്രിയും സ്കൂൾ ഒമ്പതാം ക്ലാസ് വിദ്യാർഥിനിയുമായ കൃഷ്ണപ്രിയ ആർട്സ് ക്ലബ് ഉദ്ഘാടനം ചെയ്തു.

വാർഡ് കൗൺസിലർ ജോൺസൻ ജോസഫ്, ലോക്കൽ മാനേജർ ഫാ. തോമസ് കയ്യാലയ്ക്കൽ, പ്രിൻസിപ്പൽ ഫാ. നെൽസൻ വലിയവീട്ടിൽ, വൈസ് പ്രിൻസിപ്പൽ റജി ലൂക്കോസ്, പിടിഎ പ്രസിഡന്‍റ് മുരളീദാസ്, മദർ പിടിഎ പ്രസിഡന്‍റ് എം.എസ്. സജിനി, രേണുകാദേവി, സാറാ സൂസൻ തോമസ്, ആർട്ട്സ് ക്ലബ് സെക്രട്ടറി എബിൻ ജോൺ എന്നിവർ പ്രസംഗിച്ചു.

ADVERTISEMENT

മൃതദേഹം മോര്‍ച്ചറിയില്‍

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലിരിക്കെ മരിച്ചയാളുടെ മൃതദേഹം മോര്‍ച്ചറിയില്‍. 19ന് തമ്പാനൂര്‍ കെഎസ്ആര്‍ടിസി ഭാഗത്തു അസുഖബാധിതനായി കണ്ടെത്തുകയും മെഡിക്കല്‍കോളജ് ആശുപത്രിയില്‍ ചികിത്സയിലിരിക്കെ ഇന്നലെ മരിക്കുകയും ചെയ്തയാളുടെ മൃതദേഹമാണ് മോര്‍ച്ചറിയിൽ സൂക്ഷിച്ചിട്ടുള്ളത്. ഇയാളുടെ പേരോ ബന്ധുക്കളെക്കുറിച്ചുള്ള വിവരങ്ങളോ ആശുപത്രിരേഖകളിലില്ല. 60 വയസ്സു പ്രായം തോന്നിക്കുന്ന ഇയാളെക്കുറിച്ച് എന്തെങ്കിലും വിവരം ലഭിക്കുന്നവര്‍ തമ്പാനൂര്‍ പോലീസുമായി ബന്ധപ്പെടണം. ഫോണ്‍: 0471 2326549, 94979 80046.

"എന്‍റെ കൃഷി എന്‍റെ ഭക്ഷണം' കാന്പയിൻ

കാട്ടാക്കട: മൈലോട്ടുമൂഴി ജനതാ ഗ്രന്ഥശാലയിൽ എന്‍റെ കൃഷി എന്‍റെ ഭക്ഷണം കാന്പയിനു തുടക്കമായി. ജില്ലാ ലൈബ്രറി കൗൺസിൽ അംഗം കെ. ഗിരി ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് എ.ജെ. അലക്സ് റോയ് അധ്യക്ഷനായി. വൈസ് പ്രസിഡന്‍റ് എസ്. അനിക്കുട്ടൻ, ജ്യോതിഷ് വിശ്വംഭരൻ, എ. വിജയകുമാരൻ നായർ, എസ്. സുരേഷ് കുമാർ, കെ.വി. അശോകൻ, ടി. ഓമന, അനിൽ ചാന്ദ്രമൂഴി തുടങ്ങിയവർ പ്രസംഗിച്ചു. വിവിധ ദിവസങ്ങളിലായി പച്ചക്കറി വിത്തുകൾ, നടീൽ വസ്തുക്കൾ, കൃഷിരീതി വിവരിക്കുന്ന ലഘുലേഖകൾ എന്നിവയുടെ വിതരണം, പഠന പരിപാടികൾ, അടുക്കളത്തോട്ട മത്സരം, രചനാ മത്സരങ്ങൾ എന്നിവ നടക്കും.

കെഎസ്ഇബി ഓഫീസ് മാർച്ച്

നെടുമങ്ങാട്: വൈദ്യുത ലൈൻ പൊട്ടിവീണ് പനയമുട്ടത്ത് 19കാരനായ അക്ഷയ് എന്ന ചെറുപ്പക്കാരൻ മരണപ്പെട്ടതിൽ പ്രതിഷേധിച്ചുകൊണ്ട് യൂത്ത് കോൺഗ്രസ് വാമനാപുരം നിയോജകമണ്ഡലം കമ്മിറ്റിയുടെ നേതൃത്വത്തിൽ പനവൂർ കെഎസ്ഇബി ഓഫീസിലേക്ക് മാർച്ച് നടത്തി. ജില്ലാ കോൺഗ്രസ് കമ്മിറ്റി വൈസ് പ്രസിഡന്‍റ് സുധീർ ഷാ പാലോട് ഉദ്ഘാടനം ചെയ്തു. യൂത്ത് കോൺഗ്രസ് നിയോജക മണ്ഡലം പ്രസിഡന്‍റ് യൂസഫ് കല്ലറ, യൂത്ത് കോൺഗ്രസ് സംസ്ഥാന സെക്രട്ടറി അമി തിലക്, യൂത്ത് കോൺഗ്രസ് ഭാരവാഹികളായ ഷിനാസ്, നജീബ്, ശ്രീകല വെള്ളാഞ്ചിറ എന്നിവരെ പോലീസ് അറസ്റ്റ് ചെയ്തു നീക്കി. കോൺഗ്രസ് പനവൂർ മണ്ഡലം പ്രസിഡന്‍റ് കുന്നിൽ ശശി, കോൺഗ്രസ് മൂഴി മണ്ഡലം പ്രസിഡന്‍റ് വേട്ടംപള്ളി സനൽ, മഹിളാ കോൺഗ്രസ് നിയോജക മണ്ഡലം പ്രസിഡന്‍റ് ഷൈല, രാജ്കുമാർ, യൂത്ത് കോൺഗ്രസ് മണ്ഡലം പ്രസിഡന്‍റ് ഡാഡുഷ, റിഷാദ് പാങ്ങോട്, ആനന്ദ് ആർ. നായർ, നൗഫൽ പെരിങ്ങമല, സിനോജ്, ലീല, മുഹമ്മദ് ഷാൻ, അൻസൽ, രാഹുൽ, കല്ലിയോട് രാഹുൽ, അൻസാരി എന്നിവർ സംസാരിച്ചു.

ഗ്യാസ് കുറ്റികളും വാഴക്കുലയും മോഷ്ടിച്ച യുവാവ് പിടിയിൽ

നെയ്യാർഡാം: ഗ്യാസ് കുറ്റികളും വാഴക്കുലകളും മോഷ്ടിച്ച യുവാവിനെ തൊണ്ടിയോടെ പിടികൂടി. ഊരൂട്ടമ്പലം സ്വദേശിയായ മണികണ്ഠനെ(44) യാണ് അറസ്റ്റ് ചെയ്തത്. നെയ്യാർഡാം പോലീസ് സംഘം പട്രോളിംഗിനിടെ അന്പൂരിയിൽനിന്നും കുട്ടമലവഴി വരവേ വാഴിച്ചൽ ജംഗ്ഷനിൽ സംശയാസ്പദമായ രീതിയിൽ യുവാവിനെ കണ്ടെത്തിയതിനെ തുടർന്നു നടത്തിയ ചോദ്യം ചെയ്യലിലാണ് പ്രതി പിടിയിലായത്. മണികണ്ഠൻ രണ്ടു കുറ്റി ഗ്യാസുകളും ഒരു വാഴക്കുലയുമായി പോലീസ് ജീപ്പിനുമുന്നിലേക്കു വന്നിറങ്ങുകയായിരുന്നു. സംശയം തോന്നിയ പോലീസ് സംഘം സ്കൂട്ടർ തടഞ്ഞു നിർത്തി വണ്ടിയുടെ താക്കോൽ ഊരിയെടുത്തു പരിശോധിച്ചപ്പോഴാണ് നമ്പർ പ്ലേറ്റ് പ്ലാസ്റ്റിക് സ്റ്റിക്കർ വെട്ടി ഒട്ടിച്ചുവെച്ച് മാറ്റിയിരിക്കുകയാണെന്ന് മനസിലായത്. തുടർന്നാണ് ഗ്യാസ് കുറ്റികൾ പ്രദേശത്തെ രണ്ടു വീടുകളിൽനിന്നും മോഷ്ടിച്ചതാണെന്നും വാഴക്കുല മറ്റൊരു വീട്ടിൽനിന്നു മോഷ്ടിച്ചതാണെന്നും വ്യക്തമായത്. തുടർന്നു അറസ്റ്റ് രേഖപ്പെടുത്തി.

വീണ്ടും അപകട ഭീഷണി നേരിടുന്നതായി പരാതി : തിരുവല്ലം പാച്ചല്ലൂരില്‍ അപകടത്തില്‍പ്പെട്ട വാഹനങ്ങള്‍ മാറ്റാതെ അധികൃതര്‍

തിരുവല്ലം: പാച്ചല്ലൂരിനു സമീപം പാറവിളയില്‍ ആഴ്ചകള്‍ക്ക് മുമ്പ് അപകടത്തില്‍പ്പെട്ട കാറും ഒമിനി വാനും അപകട മേഖലയായ കൊടുംവളവില്‍ നിന്നും മാറ്റുന്നില്ലെന്ന് പരാതി. ഇക്കഴിഞ്ഞ ഒമ്പതിന് പൊതുപണിമുടക്ക് ദിവസം പുലര്‍ച്ചെ 2.30 ഓടുകൂടിയാണ് മാരുതി ബൊലേനോ കാറും മാരുതി ഒമിനി വാനും കൂട്ടിയിടിച്ച് തലകീഴായി മറിഞ്ഞത്. സംഭവം നടന്ന് ഒരാഴ്ച കഴിഞ്ഞിട്ടും ബന്ധപ്പെട്ട അധികൃതര്‍ ഇടപെട്ടു വാഹനങ്ങള്‍ സംഭവസ്ഥലത്തുനിന്നും മാറ്റാത്തതില്‍ നാട്ടുകാര്‍ക്കിടയിലും വാഹന യാത്രികര്‍ക്കിടയിലും പ്രതിഷേധം ശക്തമായിരി ക്കുകയാണ്. അപകട മേഖലയിലെ കൊടും വളവില്‍ റോഡിനു വശത്തായി വാഹനങ്ങള്‍ കിടക്കുന്നത് ഏതു സമയത്തും വന്‍ അപകടം വരുത്തിവയ്ക്കും എന്നാണ് പരാതി ഉയരുന്നത്. തിരുവല്ലം പോലീസ് സംഭവ സമയം സ്ഥലത്തെത്തി പോയതല്ലാതെ വാഹനം മാറ്റുന്ന കാര്യത്തില്‍ യാതൊരുവിധ നടപടിയും സ്വീകരിച്ചിട്ടില്ലെന്നും പറയുന്നു. ബന്ധപ്പെട്ട അധികൃതര്‍ ഇടപെട്ട് ഇനിയൊരപകടം സംഭവിക്കുന്നതിനു മുമ്പ് തന്നെ വാഹനങ്ങള്‍ തിരക്കേറിയ റോഡിനു വശത്തുനിന്നും എത്രയും വേഗം മാറ്റണമെന്നാണ് പൊതുജനങ്ങളുടെയും ആവശ്യം.

വ്യാപാരിയുടെ കുടുംബത്തിന് ധനസഹായം കൈമാറി

നെയ്യാറ്റിന്‍കര: മരണമടഞ്ഞ വ്യാപാരിയുടെ കുടുംബത്തിനു സഹായഹസ്തവുമായി കേരള വ്യാപാരി വ്യവസായി ഏകോപന സമിതി നെയ്യാറ്റിൻകര യൂണിറ്റ്. നെയ്യാറ്റിന്‍കര ആലുംമൂട്ടില്‍ റെഡിമെയ്ഡ് സെന്‍റര്‍ ഉടമ മനോഹര്‍ ജഫേഴ്സണിന്‍റെ കുടുംബത്തിനാണ് കേരള വ്യാപാരി വ്യവസായി ഏകോപന സമിതി നെയ്യാറ്റിൻകര യൂണിറ്റ് പത്തു ലക്ഷം രൂപയുടെ ധനസഹായം നല്‍കിയത്. യൂണിറ്റ് പ്രസിഡന്‍റ് മഞ്ചത്തല സുരേഷിൻ്റെ അധ്യക്ഷതയിൽ ചേര്‍ന്ന യോഗത്തിൽ സമിതി ജില്ലാ പ്രസിഡന്‍റ് ധനീഷ് ചന്ദ്രൻ ധനസഹായ വിതരണം നിര്‍വഹിച്ചു. ബസ് സ്റ്റാൻഡ് ജംഗ്ഷനിലെ നവീകരിച്ച വ്യാപാരഭവന്‍റെ ഉദ്ഘാടനവും ഉന്നത വിജയം കൈവരിച്ച അംഗങ്ങളുടെ മക്കള്‍ക്ക് അനുമോദനവും മറ്റു വ്യാപാര സംഘടനകളിൽ നിന്ന് ഏകോപന സമിതിയിൽ ചേർന്നവർക്ക് അംഗത്വ വിതരണവും ഇതോടൊപ്പം നടന്നു. ജോഷി ബാനു, ഷിറോസ്ഖാൻ, വെള്ളറട രാജേന്ദ്രൻ, ഉദിയൻകുളങ്ങര ശ്രീകുമാർ, ആന്‍റണി അലൻ, അരുൺ സരയു, ശ്രീധരൻനായർ, കൃഷ്ണൻനായർ, വേണുഗോപാൽ, സുലൈമാൻ, ചൈതന്യലാൽ എന്നിവർ പ്രസംഗിച്ചു.

കാണിക്കവഞ്ചി കുത്തിത്തുറന്നു പണം മോഷ്ടിച്ചു

പൂവച്ചൽ: പൂവച്ചൽ കോട്ടാകുഴി തമ്പുരാൻകാവ് ദുർഗാദേവി ക്ഷേത്ര കവാടത്തിലെ കാണിക്കവഞ്ചി കുത്തിത്തുറന്നു പണം മോഷ്ടിച്ചു. ക്ഷേത്രത്തിലെ പടിക്കെട്ടുകൾ പൊളിഞ്ഞതു അറ്റകുറ്റപ്പണി നടത്തിയിരുന്നു. ഇതിൽ വെള്ളം ഒഴിക്കാൻ ക്ഷേത്ര ഭാരവാഹി എത്തിയപ്പോഴാണ് കാണിക്കവഞ്ചി തകർത്ത നിലയിൽ കാണുന്നത്. തുടർന്നു കാട്ടാക്കട പോലീസിൽ പരാതി നൽകി. ആറുമാസത്തിലൊരിക്കലാണ് കാണിക്കവഞ്ചി തുറന്നു പണം എടുക്കുന്നത്. 30,000 ത്തോളം രൂപ ഉണ്ടാകുമെന്നും അവസാനമായി പണം എടുത്തിട്ട് മൂന്നുമാസം പിന്നിടുന്നതായും പരാതിയിൽ പറയുന്നു.

കടമ്പനാട് വാർഡിൽ സമഗ്ര കുടിവെള്ള പദ്ധതി

നെടുമങ്ങാട്: അരുവിക്കര പഞ്ചായത്തിലെ കടമ്പനാട് വാർഡിൽ സമഗ്ര കുടിവെള്ള പദ്ധതി നടപ്പിലാക്കുന്നതിന്‍റെ ഭാഗമായി സ്ഥാപിച്ച ബൂസ്റ്റർ പമ്പും മോട്ടോറും ബ്ലോക്ക്‌ പഞ്ചായത്ത്‌ പ്രസിഡന്‍റ് വി. അമ്പിളി ഉദ്‌ഘാടനം ചെയ്തു. കടമ്പനാട് വാർഡിലെ കുറുംതോട്ടം, നിലക്കൽ, കരിംകുട്ടി, മഴുവൻകോട് ഉൾപ്പെടെയുള്ള ഉയർന്ന പ്രദേശങ്ങൾ കുടിവെള്ള ക്ഷാമം പരിഹരിക്കുന്നതിനു വേണ്ടി വാർഡ് മെമ്പർ എൽ.ജി. അജേഷിന്‍റെ നിരന്തര ഇടപെടലിന്‍റെ ഭാഗമായി ബ്ലോക്ക്‌ ഡിവിഷൻ മെമ്പർ അരുവിക്കര വിജയൻ നായർ നെടുമങ്ങാട് ബ്ലോക്ക്‌ പഞ്ചായത്തിന്‍റെ സമഗ്ര കുടിവെള്ള പദ്ധതിയിൽ ഉൾപ്പെടുത്തി നാലുലക്ഷം രൂപ അനുവദിച്ചതിലൂടെയാണ് പദ്ധതി നടപ്പിലാക്കിയത്. അരുവിക്കര പഞ്ചായത്ത്‌ വൈസ് പ്രസിഡന്‍റ് രേണുക രവിയുടെ അധ്യക്ഷതയിൽ നടന്ന യോഗത്തിൽ ജില്ലാ പഞ്ചായത്ത്‌ അംഗം വെള്ളനാട് ശശി, ബ്ലോക്ക്‌ ഡിവിഷൻ മെമ്പർ അരുവിക്കര വിജയൻ നായർ, പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർപേഴ്സന്മാരായ മറിയകുട്ടി, അലീഫിയ, വെള്ളനാട് പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർപേഴ്സൺ എസ്. ബിന്ദു, വെമ്പനൂർ വാർഡ് മെമ്പർ ഷജിത, വാട്ടർ അഥോറിറ്റി അസിസ്റ്റന്‍റ് എക്സിക്യൂട്ടീവ് എൻജിനീയർ എൻ.വി. അജേഷ്, വിവിധ രാഷ്ട്രീയ പാർട്ടികളിലെ നേതാക്കളായ വിശ്വനാഥൻ, ജയൻ, ഗോപാലകൃഷ്ണൻ, കാലമാനൂർ രാജേന്ദ്രൻ, അജിത്, മഴുവൻക്കോട് മോഹനൻ തുടങ്ങിയവർ പ്രസംഗിച്ചു.

വാടക കെട്ടിടങ്ങളിലേക്കു മാറി മാറി കെഎസ്ഇബി : സ്വന്തം കെട്ടിടം നിർമിക്കാൻ ഇനിയും നടപടികളായില്ല

മാറനല്ലൂർ: വാടക കെട്ടിടങ്ങളിലേക്കു മാറി മാറി കെഎസ്ഇബി. പുതിയ കെട്ടിടത്തിലേയ്ക്ക് ഉടൻ മാറും. മാറനല്ലൂരിൽ പ്രവർത്തിക്കുന്ന കെഎസ്ഇബി സെക്ഷൻ ഓഫീസിന് സ്വന്തമായി കെട്ടിടം നിർമിക്കാൻ പഞ്ചായത്ത് സ്ഥലം നൽകിയെങ്കിലും നടപടികളാകുന്നില്ല. കഴിഞ്ഞ പഞ്ചായത്ത് ഭരണസമിതിയുടെ അവസാന നാളുകളിലാണ് ഓഫീസിനു കെട്ടിടം നിർമിക്കുന്നതിനുവേണ്ടി മാറനല്ലൂർ പോലീസ് സ്റ്റേഷനു സമീപമുള്ള 10 സെന്‍റ് സ്ഥലം വിട്ടുനൽകുന്നതിനു തീരുമാനമെടുത്തത്. പുതിയ ഭരണസമിതി അധികാരമേറ്റതോടെ ഇതിനുവേണ്ടിയുള്ള നടപടികളും ആരംഭിച്ചു. താലൂക്ക്, വില്ലേജ് അധികൃതർ വന്നു സ്ഥലം പരിശോധിക്കുകയും അളന്നു തിട്ടപ്പെടുത്തുകയും ചെയ്‌തെങ്കിലും മറ്റു നടപടികളൊന്നുംതന്നെയായിട്ടില്ല. ബോർഡ് അധികൃതർ ഇതുമായി ബന്ധപ്പെട്ട് മുന്നോട്ടുപോകുന്നില്ലെന്ന് പഞ്ചായത്ത് അധികൃതർ പറയുമ്പോൾ താലൂക്കിൽനിന്നുള്ള നടപടികൾക്ക് വേഗംകൂട്ടാൻ പഞ്ചായത്ത് അധികൃതർ തയാറാകുന്നില്ലെന്നാണു ബോർഡ് അധികൃതരുടെ വിശദീകരണം. നിലവിൽ മൂലക്കോണത്തിനു സമീപം വാടകക്കെട്ടിടത്തിൽ പ്രവർത്തിക്കുന്ന ഓഫീസ് സ്ഥലസൗകര്യമില്ലാത്തതു കാരണം ഇപ്പോൾ മറ്റൊരു വാടകക്കെട്ടിടം അന്വേഷിക്കുകയാണ്. സൗകര്യപ്രദമായ കെട്ടിടം കിട്ടുന്നതോടെ ഓഫീസ് ഇനി മറ്റൊരിടത്തായിരിക്കും പ്രവർത്തിക്കുന്നത്. കഴിഞ്ഞ മൂന്നുവർഷത്തിനിടെ മാറനല്ലൂരിലെ കെഎസ്ഇബി ഓഫീസ് മൂന്നിടത്താണ് പലപ്പോഴായി മാറിയത്. ഓഫീസ് പലയിടങ്ങളിലായി മാറി പ്രവർത്തിക്കുന്നത് ജീവനക്കാർക്കും, ഉപഭോക്താക്കൾക്കും ഒരുപോലെ ബുദ്ധിമുട്ടാവുകയാണ്. നിലവിൽ പ്രവർത്തിക്കുന്ന കെട്ടിടത്തിൽ സൗകര്യക്കുറവായതു കാരണം അറ്റകുറ്റപ്പണികൾ നടത്തുന്നതിനുവേണ്ടിയുൾപ്പെടെയുള്ള സാധനസാമഗ്രികൾ പലതും പാതയോരത്താണ് നിക്ഷേപിച്ചിരിക്കുന്നത്. അലുമിനിയം കമ്പികളുൾപ്പെടെ മോഷണം പോകുന്നതും ഇപ്പോൾ പതിവായിട്ടുണ്ട്.

എല്ലാ വിദ്യാഭ്യാസ ജില്ലകളിലും സ്ട്രീം ശില്പശാലകൾ: മന്ത്രി

നേമം: സംസ്ഥാനത്തെ 41 വിദ്യാഭ്യാസ ജില്ലകളിലും വിദ്യാർഥികൾക്കായി സ്ട്രീം അധിഷ്ഠിത ശില്പശാലകൾ സംഘടിപ്പിക്കുമെന്ന് മന്ത്രി വി ശിവൻകുട്ടി. പൊതു വിദ്യാഭ്യാസ വകുപ്പിന്‍റെ ഭാഗമായ സ്റ്റേറ്റ് ഇൻസ്റ്റിറ്റ്യൂട്ട് ഓഫ് എഡ്യൂക്കേഷണൽ ടെക്നോളജി (എസ്ഐഇടി) സംഘടിപ്പിച്ച നവസാങ്കേതികവിദ്യാ ശില്പശാലയുടെ സമാപന സമ്മേളനം തിരുവനന്തപുരം മൺവിളയിൽ ഉദ്ഘാടനം ചെയ്യുകയായിരുന്നു മന്ത്രി. സയൻസ് , ടെക്നോളജി, എൻജിനീയറിംഗ്, മാത്തമാറ്റിക്സ് എന്നിവ ഉൾപ്പെടുന്നതാണ് സ്റ്റം. ഇതോടൊപ്പം റോബോട്ടിക്സും ആർട്സും ചേർത്ത് സ്ട്രീം ആക്കി സംസ്ഥാന വ്യാപകമായി എസ്ഐഇടി നടപ്പാക്കും- മന്ത്രി പറഞ്ഞു. തിരുവനന്തപുരം പൂവത്തൂർ ഗവ. ഹയർ സെക്കൻഡറി സ്കൂൾ വിദ്യാർഥിനി ആർ.എസ്. നന്ദന സ്വാഗതം പറഞ്ഞു. എറണാകുളം കടയിരിപ്പ് ഗവ. ഹയർ സെക്കൻഡറി സ്കൂൾ വിദ്യാർഥിനി അനസൂയ അനിൽ അധ്യക്ഷത വഹിച്ചു. വയനാട് പടിഞ്ഞാറത്തറ ജിഎച്ച്എസ്എസ് വിദ്യാർഥി ഉജ്വൽ കൃഷ്ണ നന്ദി പറഞ്ഞു. കോട്ടയം സെന്‍റ് ആൻസ് ഗേൾസ് ഹയർ സെക്കൻഡറി സ്കൂൾ വിദ്യാർഥിനി ഗായത്രി നായർ പരിപാടികൾ ഏകോപിപ്പിച്ചു. ‌എസ്ഐഇടി ഡയറക്ടർ ബി. അബുരാജ്, എസിഎസ്ടിഐ ഡയറക്ടർ കെ.സി. സഹദേവൻ, എസ്ഐഇടി അക്കാദമിക് കോ-ഓർഡിനേറ്റർ സുരേഷ് ബാബു, പ്രോഗ്രാം കോ-ഓർഡിനേറ്റർ എസ്.എൻ. സമിത തുടങ്ങിയവർ പ്രസംഗിച്ചു.

മഴവെള്ളം നിറഞ്ഞ ഓടയിൽവീണു ബൈക്ക് യാത്രികർക്കു പരിക്ക്

വെള്ളറട : വെള്ളറട ജംഗ്ഷനില്‍ വെള്ളം വാര്‍ന്നു പോകാന്‍ കഴിയാതെ ഓടകള്‍ നിറഞ്ഞതോടെ ആഴമറിയാതെ ബൈക്ക് യാത്രികര്‍ ഓടയില്‍ വീണ് രണ്ടുപേര്‍ക്കു പരിക്കേറ്റു. കാറ്റാടി ആറടിക്കര വീട്ടില്‍ ജയരാജ് (28), സുനില്‍ (41)നു മാണ് പരിക്കേറ്റത്. ഇന്നലെ രാവിലെ മുതല്‍ തിമിര്‍ത്തു പെയ്യുന്ന മഴയില്‍ വെള്ളം വാര്‍ന്നു പോകാന്‍ കഴിയാതെ വെള്ളറട ജംഗ്ഷനില്‍ ഓട നിറയെ മലിനജലം കെട്ടിനില്‍ക്കുകയായിരുന്നു. ഊരാളുങ്കൽ സൊസൈറ്റിയാണ് വെള്ളറട കാരക്കോണം റോഡിന്‍റെ പണി പൂര്‍ത്തിയാക്കിയത്. എന്നാല്‍ പല നിയമപ്രശ്‌നങ്ങളിലും കുടുങ്ങി വെള്ളറട ടൗണില്‍ വികസനം നടക്കുന്നില്ല. തുടര്‍ന്ന് സമീപത്തെ ഹോട്ടലില്‍ നിന്നുള്ള മാലിന്യവും ഇന്നലെ പെയ്ത മഴവെള്ളവും കൂടെ ചേര്‍ന്നു ടൗണില്‍ വെള്ളം പരിധിയിലധികം ഉയര്‍ന്നതാണു ബൈക്ക് യാത്രികരെ വീഴ്ത്തിയത്. മലിന ജലം കെട്ടിനില്‍ക്കുന്ന സ്ഥലം റോഡ് ആണെന്നു കരുതി ബൈക്ക് ഓടിച്ചിറക്കിയത് ഓടയിലേക്ക് ആയിരുന്നു. പരിക്കേറ്റ രണ്ടുപേരെയും ആശുപത്രിയിലേക്ക് മാറ്റി. ആഴമറിയാതെ റോഡു വക്കിലെ വെള്ളത്തില്‍ കാലു വയ്ക്കുന്നവരെല്ലാം ഓടയില്‍വീണ് പരിക്കേല്‍ക്കുന്ന സാഹചര്യമാണ് നിലവില്‍ ഉള്ളത്. എത്രയും പെട്ടെന്ന് ഓട നിര്‍മാണം പൂര്‍ത്തിയാക്കുകയും സ്ലാബുകള്‍ തകര്‍ന്നു കിടക്കുന്ന ഭാഗത്ത് പുതിയ സ്ലാബുകള്‍ ഇട്ട് അപകടരഹിതമാക്കി മാറ്റണമെന്നുമാണ് ആവ ശ്യം. യാത്രക്കാര്‍ക്കും സമീപത്തെ കടകളിലെ ആളുകള്‍ക്കും കടകളില്‍ കയറാന്‍ കഴിയാത്ത സാഹചര്യമാണ്.

"തൊഴിലാണ് എന്‍റെ ലഹരി' പദ്ധതി കാപ്പുകാട്ട് ആരംഭിച്ചു

കോട്ടൂർ: തൊഴിലാണ് എന്‍റെ ലഹരി പദ്ധതിക്ക് കാപ്പുകാട്ട് തുടക്കമായി. എക്സെസ്, വനം വകുപ്പുകളുടെയും എക്കോ ഡെവലപ്മെന്‍റ് കമ്മിറ്റിയുടെയും, സംയുക്താഭിമുഖ്യത്തിൽ വിമുക്തി മിഷന്‍റെ സഹകരണത്തോടെ കോട്ടൂരിലെ 27 ഓളം സെറ്റിൽമെന്‍റുകളിലുള്ള യുവതയ്ക്കായാണു സൗജന്യ പിഎസ്‌സി കോച്ചിംഗ് സെന്‍റർ ആരംഭിച്ചത്. കോട്ടൂർ ഫോറസ്റ്റ് ഓഫീസിൽ നടന്ന യോഗത്തിൽ കുറ്റിച്ചൽ പഞ്ചായത്ത് പ്രസിഡന്‍റ് ജി. മണികണ്ഠൻ അധ്യക്ഷനായി. ജി.സ്റ്റീഫൻ എംഎൽഎ യോഗം ഉദ്ഘാടനം ചെയ്തു. അഗസ്ത്യവനം ബയോളജിക്കൽ പാർക്ക് സർക്കിൾ, കൺസർവേറ്റർ ഓഫ് ഫോറസ്റ്റ് ശ്യാം മോഹൻലാൽ മുഖ്യ പ്രഭാഷണം നടത്തി. പിഎസ്‌സി ക്ലാസിന് ആവശ്യമായ വൈറ്റ്ബോർഡ് ലയൺസ് ക്ലബ് പ്രസിഡന്‍റ് പി. ജയരാമൻ നായർ, എംഎൽഎയ്ക്ക് കൈമാറി. വിമുക്തി മാനേജർ എസ്.കെ. സന്തോഷ്കുമാർ, ജില്ലാ വിമുക്തി മിഷൻ കോ-ഓർഡിനേറ്റർ വിഘ്നേഷ് വിശ്വനാഥ്, ഡെപ്യൂട്ടി എക്സൈസ് കമ്മീഷണർ പി.എൽ. ഷിബു, ശ്രീദേവി സുരേഷ്, ജി.ആർ. അനീഷ്, പ്രദീപ് കുമാർ, യു.എസ്. അനീസ്, ആർ.ജി. രാജേഷ്, സ്റ്റാഫ് അസോസിയേഷൻ ജില്ലാ സെക്രട്ടറി എം. വിശാഖ് തുടങ്ങിയവർ സംസാരിച്ചു. ക്ലാസിൽ പങ്കെടുത്ത വിദ്യാർത്ഥികൾക്ക് പഠനോപകരണങ്ങൾ വിതരണം ചെയ്തു. നെടുമങ്ങാട് എക്സൈസ് സർക്കിൾ ഇൻസ്പെക്ടർ ജെ.എസ്. ബിനു നന്ദി പറഞ്ഞു.

ശ്രീചിത്തിര തിരുനാളിന്‍റെ നാടുനീങ്ങലിന്‍റെ വാർഷികം

തിരുവനന്തപുരം: തിരുവിതാംകൂറിലെ അവസാന രാജാവ് ശ്രീചിത്തിര തിരുനാൾ ബാലരാമവർമയുടെ 34-ാമത് നാടുനീങ്ങൽ വാർഷികം ശ്രീചിത്തിര തിരുനാൾ സ്മാരക സമിതിയുടെ ആഭിമുഖ്യത്തിൽ കവടിയാർ കൊട്ടാരവളപ്പിൽ അദ്ദേഹം അന്ത്യവിശ്രമം കൊള്ളുന്ന "പഞ്ചവടി’യിൽ ആച രിച്ചു. പ്രത്യേകം സജ്ജമാക്കിയ പന്തലിൽ നടന്ന ചടങ്ങ് ഗവർണർ രാജേന്ദ്ര വിശ്വനാഥ അർലേക്കർ ഭദ്രദീപം തെളിച്ച് ഉദ്ഘാടനം ചെയ്തു. തുടർന്നു ഗവർണർ, രാജകുടുംബാംഗങ്ങൾ, വിശിഷ്ടാതിഥികൾ, സമിതി ഭാരവാഹികൾ തുടങ്ങിയവർ പുഷ്പാർച്ചന നടത്തി. ഗവർണറോടൊപ്പം പൂയം തിരുനാൾ ഗൗരി പാർവതീഭായി, അശ്വതി തിരുനാൾ ഗൗരിലക്ഷ്മീഭായി, അവിട്ടം തിരുനാൾ ആദിത്യ വർമ, കെ. മുരളീധരൻ, മുൻ അംബാസിഡർ ടി.പി.ശ്രീനിവാസൻ, പാലോട് രവി, മുൻ മന്തി എം. വിജയകുമാർ, ധനലക്ഷ്മി ബാങ്ക് ചെയർമാൻ മധു കലഞ്ഞൂർ, ശാസ്തമംഗലം മോഹൻ, മുൻ അംബാസിഡർ ടി.പി. സീതാരാമൻ, ബിജെപി ജില്ല പ്രസിഡന്‍റ് കരമന ജയൻ, ഭീമ ജൂവലേഴ്സ് ചെയർമാൻ ഡോ. ബി. ഗോവിന്ദൻ, എം. അയ്യപ്പൻ, വിക്ടർ ടി. തോമസ്, സതീശൻ, പുഷ് പവല്ലി, എസ്.എൻ. രഘുചന്ദ്രൻ നായർ, ജേക്കബ് കെ. എബ്രഹാം, വി. സണ്‍ലാൽ, പി. രവിന്ദ്രൻ നായർ, ബി. രാജൻ, ബാബു നാരായണൻ തുടങ്ങിയവർ പങ്കെടുത്തു. വള്ളക്കടവ് യത്തീംഖാന, സ്കൗട്ട് ആൻഡ് ഗൈഡ്സ്, അശ്വാരൂഢ പോലീസ്, വിവിധ സാമൂഹിക- സാംസ്കാരിക സംഘടനകളുടെ പ്രതിനിധികൾ തുടങ്ങിയവർ പുഷ്പാർച്ചനയിൽ പങ്കെടുത്തു.

തീരദേശം കേന്ദ്രീകരിച്ച് വിലസുന്ന വീസാ തട്ടിപ്പുകാരുടെ ഇരയായി ബൻസിഗർ.!

എസ്. രാജേന്ദ്രകുമാർ വിഴിഞ്ഞം: തീരദേശം കേന്ദ്രീകരിച്ച് വിലസുന്ന വീസാ തട്ടിപ്പുകാരുടെ ഇരയായി ബൻസിഗർ. ഇടനിലക്കാരനായിനിന്നു വാങ്ങി നൽകിയ പണം കൈപ്പറ്റിയവർ തിരികെ നൽകാതായ പ്പോൾ പിടിച്ചു നിൽക്കാനാകാതെ സ്വന്തം വള്ളത്തിൽ ഉൾക്കടലിൽ പോയി ജീവനൊടുക്കി. കടക്കാരുടെ മുന്നിൽ പിടിച്ച് നിൽക്കാനാകില്ലെന്ന നിസഹായാ വസ്ഥ വിവരിച്ചു ഭാര്യക്കും ബന്ധുക്കൾക്കും വീഡിയോ കോൾ ചെയ്തശേഷമാണ് ബ ൻ സിഗർ ജീവനൊടുക്കിയത്. പൂവാർ പള്ളം പുരയിടത്തിൽനിന്ന് വിഴിഞ്ഞം കോട്ടപ്പുറം തെന്നൂർക്കോണം കുഴിവിളയിൽ താമസമാക്കിയ മത്സ്യത്തൊഴിലാളിയായ ബൻസിഗറി (39) ന്‍റെ മരണമാണു വീട്ടുകാർക്കും ബന്ധുക്കൾക്കും തീരാനഷ്ടമായത്. ""എല്ലാം കൈവിട്ടു പോയി, പണം വാങ്ങിയ എല്ലാവരോടും കള്ളം പറഞ്ഞു മടുത്തു. എനിക്ക് എല്ലാം മതിയായി, മരിക്കാനും മടിയാണ്. മരിക്കാതിരിക്കാനും വയ്യ. വീസക്കു പണം തന്നവരെ പറഞ്ഞു സമാധാനിപ്പിക്കുന്നതിനും പരിധിയില്ലേ. ഞാൻ ജീവിച്ചിരുന്നിട്ട് കാര്യമില്ല..'' എന്നിങ്ങനെ വീസ തട്ടിപ്പുകാരുടെ പിടിയിൽപെട്ടതിന്‍റെ നിരാശയും നിസാഹായവസ്ഥയും കടലിൽനിന്നു വള്ളത്തിലിരുന്നു ഭാര്യയെ ലൈവ് വീഡിയോ കോളിലൂടെ അറിയിച്ച ശേഷം എല്ലാം അവസാനിപ്പിച്ചു. അഞ്ചാം നാൾ തമിഴ്നാട് അതിർത്തിയിൽ പൊങ്ങിയ മൃതദേഹത്തിൽ കണ്ട ദൂരൂഹത തേടിയുള്ള തീരദേശ പോലീസിന്‍റെ അന്വേഷണത്തിലാണു വ്യത്യസ്തമായ ജീവത്യാഗത്തിന്‍റെ ചുരുളഴിയുന്നത്. നീന്താനറിയാവുന്ന ബൻസിഗർ ജീവിതത്തിലേക്കു ഇനി തിരിച്ചു വരവുണ്ടാകരുതെന്ന കണക്കു കൂട്ടലിലായിരുന്നു എല്ലാം പ്ലാൻ ചെയ്തത്. അഞ്ചു ലിറ്റർ വീതം കൊള്ളുന്ന മൂന്നു കറുത്ത കന്നാസുകളിൽ മണൽ നിറച്ചു. കൈയിൽ നായ്കളെ കെട്ടുന്ന തരത്തിലുള്ള ചങ്ങലയും കരുതി. ഇക്കഴിഞ്ഞ 11നു വൈകുന്നേരം മൂന്നരക്ക് വിഴിഞ്ഞം തുറമുഖത്തുനിന്നു വളളം തുഴഞ്ഞ് ഉൾക്കടലിലേക്ക് തിരിച്ചു. മണൽനിറച്ച കന്നാസുകൾ ചങ്ങല കൊണ്ട് കോർത്ത് കാലിൽ ബന്ധിച്ചു പൂട്ട് കൊണ്ട് പൂട്ടി താക്കോൽ വള്ളത്തിൽ ഉപേക്ഷിച്ചു. കണ്ണുകൾ രണ്ടും തോർത്ത് കൊണ്ടു മറച്ചശേഷം കടലിലേക്ക് എടുത്തുചാടി. കാലിൽ കെട്ടിയ ഭാരം കാരണം ഉയർന്നു വരാനുമായില്ല. ശക്തമായ കടൽക്ഷോഭമുള്ള സമയത്ത് ആളില്ലാതെ ഒരു വള്ളം അനാഥമായി കിടക്കുന്നതു കണ്ട മറ്റു മത്സ്യത്തൊഴിലാളികളാണു വിവരം തീരദേശ പോലീസിനു കൈമാറിയത്. അധികൃതർ നടത്തിയ പരിശോധനയിൽക്കണ്ട ആധാർ കാർഡും ഫോണും കേന്ദ്രീകരിച്ചു നടത്തിയ പരിശോധനയിലാണു വള്ളം ബൻസിഗറിന്‍റേതെന്നു തെളിഞ്ഞത്. കാര്യങ്ങൾ അറിഞ്ഞതോടെ വീട്ടുകാർ ആത്മഹത്യ ഉറപ്പിച്ചു. തീരദേശ പോലീസിന്‍റെയും മറൈൻ എൻ ഫോഴ്സ്മെന്‍റിന്‍റെയും സ്കൂബാ സംഘങ്ങളുടെയും നിരന്തരമായ തെരച്ചിൽ നടക്കുന്നതിനിടയിലാണ് മൃതദേശം കണ്ടെത്തിയത്. തുടർന്നു കേസെടുത്ത തീരദേശ പോലീസ് നടത്തിയ മൊഴിയെടുക്കലിലാണ് വിസാ തട്ടിപ്പാണു പിന്നിലെന്ന വിവരം ബന്ധുക്കൾ അറിയിക്കുന്നത്. തൊഴിലെടുക്കാൻ വിദേശത്തുകൊണ്ടുപോകാമെന്ന മോഹന വാഗ്ദാനം നൽകി മത്സ്യത്തൊഴിലാളികളെ വലയിലാക്കി പണം തട്ടുന്ന വൻ സംഘം തിരദേശം കേന്ദ്രീകരിച്ച് പ്രവർത്തിക്കുന്നതായി അധികൃതർക്ക് വിവരം ലഭിച്ചിട്ടുണ്ട്. ഇറ്റലി, കാനഡ, ജപ്പാൻ, ഇസ്രായേൽ, ബ്രിട്ടൺ എന്നിങ്ങനെയുള്ള രാജ്യങ്ങളിൽ പോകാൻ സ്വപ്നം കാണുന്ന യുവാക്കളെ വലയിലാക്കുന്ന സംഘം വീസക്കും മറ്റുമായി അഡ്വാൻസ് എന്ന പേരിൽ പലപ്പോഴായി വൻ തുകകൾ കൈക്കലാക്കും. തുടർന്ന് എവിടെയെങ്കിലുംപ്രവർത്തിക്കുന്ന ഒരു തട്ടിക്കൂട്ട് ഓഫീസിന്‍റെ മേൽവിലാസവും നൽകി ആൾക്കാരെ വിശ്വാസത്തിലെടുക്കും. പണം കൈപ്പറ്റലും മറ്റുമെല്ലാം രഹസ്യമാക്കുന്നതിനാൽ പലരും തട്ടിപ്പ് മനസിലാക്കുന്നത് വൈകിയായിരിക്കും. പലരിൽ നിന്നായി വൻ തുകകൾ കൈക്കലാക്കുന്ന സംഘം ദിവസങ്ങൾക്കുള്ളിൽ ഓഫീസുകൾ പൂട്ടി മുങ്ങുന്നതോടെ പെട്ടു പോകുന്നത് ഇടനിലക്കാരാണ്. പണം നൽകിവരോട് അവധി പറഞ്ഞ് മടുത്ത ചിലർ നാടുവിട്ടതായും അറിയുന്നു.

ജവഹര്‍നഗര്‍ വസ്തുതട്ടിപ്പ് : അനന്തപുരി മണികണ്ഠന്‍റെ വീട്ടില്‍ പരിശോധന നടത്തി

പേരൂര്‍ക്കട: ജവഹര്‍നഗറിലെ വീടും വസ്തുവും തട്ടിയ സംഭവത്തില്‍ നിലവിലെ പ്രധാന കണ്ണിയായ അനന്തപുരി മണികണ്ഠന്‍റെ വീട്ടില്‍ പോലീസ് പരിശോധന നടത്തി. കിള്ളിപ്പാലം പുത്തന്‍കോട്ടയിലെ വാടകവീട്ടിലാണു മ്യൂസിയം പോലീസ് പരിശോധന നടത്തിയത്. വിവിധ സ്ഥലങ്ങളില്‍ മണികണ്ഠന്‍ വസ്തു വാങ്ങിയിട്ടുണ്ടെന്നും പണി നടന്നുവരുന്നുണ്ടെന്നുമാണ് സൂചന. പോലീസ് പരിശോധനയ്‌ക്കെത്തുമ്പോള്‍ ഭാര്യയും മണികണ്ഠൻഖെ മാതാപിതാക്കളുമാണ് ഇവിടെയുണ്ടായിരുന്നത്. മണികണ്ഠന്‍ ഇത്തരമൊരു ഗൂഢാലോചന നടത്തിയിട്ടില്ലെന്നും തെറ്റുകാരനല്ലെന്നുമായിരുന്നു മാതാപിതാക്കള്‍ക്കു പറയാനുണ്ടായിരുന്നത്. അതിനിടെ വസ്തുവിന്‍റെ ഒറിജിനല്‍ പ്രമാണം ഹാജരാക്കാന്‍ ആവശ്യപ്പെട്ടിരുന്ന ചന്ദ്രസേനന്‍റെ മരുമകന്‍ അനില്‍ തമ്പി സമയപരിധി കഴിഞ്ഞിട്ടും മ്യൂസിയം പോലീസുമായി സഹകരിച്ചിട്ടില്ല. വസ്തുവിന്‍റെ ഒറിജിനല്‍ പ്രമാണം തന്‍റെ പക്കല്‍ ഇല്ലെന്നാണ് ഇയാളുടെ പുതിയ വാദഗതി. അനന്തപുരി മണികണ്ഠന്‍റെ ജാമ്യാപേക്ഷ വഞ്ചിയൂര്‍ സെഷന്‍സ് കോടതി തള്ളിയതോടെയാണ് ഇയാളുടെ വീട്ടില്‍ പോലീസ് പരിശോധനയ്ക്ക് എത്തിയത്. അതിനിടെ മണികണ്ഠന്‍ ഒരു ലക്ഷ്വറി കാര്‍ വാങ്ങിയതായി സൂചനയുണ്ട്. വസ്തു ഇടപാടിലൂടെ ലഭിച്ചപണമാണോ ഇതിന് ഉപയോഗിച്ചിരിക്കുന്നതെന്ന പോലീസിന്‍റെ സംശയം ബലപ്പെടുത്തുന്ന ഒന്നാണ് ഇത്. അമേരിക്കയില്‍ സ്ഥിരതാമസമാക്കിയിരിക്കുന്ന ഡോറ അസറിയ ക്രിപ്‌സിന്‍റെ ജവഹര്‍ നഗറിലെ വസ്തു അവരറിയാതെ തട്ടിയെടുത്തതിലെ പ്രധാന കണ്ണിയാണ് മണികണ്ഠന്‍. കെയര്‍ ടേക്കര്‍ വസ്തുവിന്‍റെ കരമടയ്ക്കാന്‍ എത്തിയപ്പോഴാണ് കരമൊടുക്കിയതായി ഉദ്യോഗസ്ഥര്‍ അറിയിച്ചത്. ഇതോടെയാണ് വസ്തു തട്ടിപ്പുമായി ബന്ധപ്പെട്ട വിവാദങ്ങള്‍ ആരംഭിക്കുന്നത്.

അഭയകേന്ദ്രത്തില്‍നിന്നു നാലുപേര്‍ രക്ഷപ്പെട്ടു; മൂന്നുപേരെ പോലീസ് കണ്ടെത്തി

പേരൂര്‍ക്കട: അഭയകേന്ദ്രത്തില്‍ നിന്നു നാലുപേര്‍ രഹസ്യമായി രക്ഷപ്പെട്ടു. മൂന്നുപേരെ പോലീസ് കണ്ടെത്തി തിരികെക്കൊണ്ടുവന്നു. ‌ഞായറാഴ്ച രാവിലെ ആറോടെയാണ് തമ്പാനൂരിലെ ഡോണ്‍ ബോസ്‌കോ നിവാസ് എന്ന കുട്ടികളുടെ അഭയകേന്ദ്രത്തില്‍ നിന്നു നാല് ആൺകുട്ടികളെ കാണാതായത്. 13 മുതല്‍ 15 വയസുവരെ വിവിധ പ്രായത്തിലുള്ള നാലുപേരാണ് അഭയകേന്ദ്രത്തില്‍നിന്ന് ഒന്നിച്ചു പുറത്തുപോയത്. കേന്ദ്രത്തിന്‍റെ ഗേറ്റ് പൂട്ടിട്ടു പൂട്ടിയ നിലയിലായിരുന്നു. ഇത് താക്കോല്‍ ഉപയോഗിച്ച് തുറന്നശേഷമായിരുന്നു നാല്‍വര്‍ സംഘം രക്ഷപ്പെട്ടത്. തമ്പാനൂര്‍ പോലീസ് നടത്തിയ അന്വേഷണത്തില്‍ രണ്ടുപേരെ ശാസ്തമംഗലം ഭാഗത്തുനിന്നും ഒരാളെ തമ്പാനൂര്‍ റെയില്‍വേ സ്റ്റേഷന്‍ പരിസരത്തുനിന്നുമാണ് കണ്ടെത്താനായത്. നാലാമനെ കണ്ടെത്തുന്നതിനായി അന്വേഷണം ഊര്‍ജ്ജിതമാക്കിയിട്ടുണ്ടെന്നു തമ്പാനൂര്‍ എസ്.ഐ ബിനു മോഹന്‍ അറിയിച്ചു.

ഇവനോ ക്വിസ്: സെന്‍റ് ഗൊരേത്തീസ് സ്കൂളിനു ചാമ്പ്യൻഷിപ്പ്

തിരുവനന്തപുരം: നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിന്‍റെ രജത ജൂബിലി ആഘോഷത്തിന്‍റെ ഭാഗമായി സംഘടിപ്പിച്ച ഇന്‍റർ സ്കൂൾ ഇവാനോ ക്വിസിൽ നാലാഞ്ചിറ സെന്‍റ് ഗൊരേത്തീസ് സ്കൂൾ ചാമ്പ്യൻഷിപ്പുനേടി. സഭാ സ്ഥാപകൻ ധന്യൻ മാർ ഈവാനിയോസിന്‍റെ സ്മരണക്കായിട്ടാണ് എല്ലാ വർഷവും ഇവാനോ ക്വിസ് സംഘടിപ്പിക്കുന്നതെന്നു പ്രിൻസിപ്പൽ ഫാ. ജോസ് ചരുവിൽ പറഞ്ഞു. നാലാഞ്ചിറ സെന്‍റ് ഗൊരേത്തീസ് സ്കൂൾ, കിഴക്കേക്കര സെന്‍റ് മേരീസ് ഹയർ സെക്കൻഡറി സ്കൂൾ, സെന്‍റ് ജോൺസ് സ്കൂൾ, അബൽ, നവജീവൻ ബഥനി വിദ്യാലയ, നാലാഞ്ചിറ, നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂൾ എന്നിവർ ഒന്നുമുതൽ അഞ്ചു വരെ സ്ഥാനങ്ങൾക്ക് അർഹത നേടി. സമാപന സമ്മേളനത്തിൽ പ്രിൻസിപ്പൽ ഫാ. ജോസ് ചരുവിൽ അധ്യക്ഷത വഹിച്ചു. ബഥനി തിരുവനന്തപുരം പ്രൊവിൻഷ്യൽ സുപ്പീരിയർ സിസ്റ്റർ സാന്ദ്ര സമ്മാനദാനം നിർവഹിച്ചു. പ്രമുഖ സ്പിരിച്വൽ ക്വിസ് മാസ്റ്റർ ഫാ. ജോബിൻ, കൺവീനർ അജുമോൻ, വൈസ് പ്രിൻസിപ്പൽ ആർ.സി. അജീഷ് കുമാർ, പിടിഎ പ്രസിഡന്‍റ് ഡോ. ജോജു ജോൺ എന്നിവർ പ്രസംഗിച്ചു.

ആദിവാസി യുവാവിന്‍റെ മരണം : കോൺഗ്രസ് പ്രവർത്തകർ ആംബുലൻസ് തടഞ്ഞതിനാലെന്ന് ആരോപണം

വിതുര: ആംബുലൻസ് തടഞ്ഞു വച്ചതിനെ തുടർന്ന് ആദിവാസി യുവാവ് മരിച്ചതായി ആരോപണം. വിതുര മണലി കല്ലൻകുടി തടത്തരികത്ത് വീട്ടിൽ ബിനു (43)ആണ് മരിച്ചത്. കഴിഞ്ഞദിവസം വിഷം ഉള്ളിൽ ചെന്നതിനെതുടർന്ന് വിതുര താലൂക്ക് ആശുപത്രിയിൽ എത്തിച്ച ബിനുവിനെ മെഡിക്കൽ കോളജിലേക്ക് കൊണ്ടുപോകുന്നതിനിടയിൽ ആശുപത്രിയിൽ വച്ച് കോൺഗ്രസ് പ്രവർത്തകർ ആംബുലൻസ് തടയുകയായിരുന്നു. ആംബുലൻസിന്‍റെ കാലപ്പഴക്കവും ഇൻഷ്വറൻസ് തീർന്നതും ആരോപിച്ചായിരുന്നു കോൺഗ്രസ് വിതുര മണ്ഡലം കമ്മിറ്റിയുടെ ആംബുലൻസ് തടഞ്ഞുള്ള പ്രതിഷേധം. ഏകദേശം 20 മിനിറ്റോളം ആംബുലൻസ് ആശുപത്രി വളപ്പിൽ തടഞ്ഞിട്ടിരുന്നു. തുടർന്ന് ബിനുവിനെ മെഡിക്കൽ കോളജിൽ എത്തിച്ചെങ്കിലും മരണം സംഭവിക്കുകയായിരുന്നു. വിതുര താലൂക്ക് ആശുപത്രിയിൽനിന്നും എത്രയുംവേഗം മെഡിക്കൽ കോളേജിൽ കൊണ്ടുപോകാൻ ഡോക്ടർ പറഞ്ഞെന്നും കോൺഗ്രസ് പ്രവർത്തകർ അതു തടയുകയായിരുന്നുവെന്നും നേരത്തെ മെഡിക്കൽ കോളജിൽ എത്തിയെങ്കിൽ മരണം സംഭവിക്കില്ലെന്നും ബിനുവിന്‍റെ ബന്ധുക്കൾ പറഞ്ഞു. രോഗിയുടെ അവസ്ഥ ബോധ്യപ്പെടുത്താൻ ശ്രമിച്ച ആശുപത്രി ജീവനക്കാരോടും പ്രതിഷേധക്കാർ അസഭ്യം പറഞ്ഞതായി ജീവനക്കാർ പറഞ്ഞു. ഭാര്യ: സുമ. മക്കൾ ആര്യ, അഭിഷേക്. മന്ത്രി വീട് സന്ദർശിച്ചു മരണപ്പെട്ട ബിനുവിന്‍റെ വീട് മന്ത്രി ആർ. കേളു സന്ദർശിച്ചു. ആംബുലൻസ് തടഞ്ഞതിലൂടെ ഒരു യുവാവിന്‍റെ ജീവൻ നഷ്ടപ്പെട്ട സംഭവം ദൗർഭാഗ്യകരമെന്നും അദ്ദേഹം പറഞ്ഞു. ആംബുലൻസ് തടഞ്ഞു ആദിവാസി യുവാവ് മരിച്ച സംഭവത്തിൽ കുറ്റക്കാർക്കെതിരേ നടപടി സ്വീകരിക്കണമെന്നു സിപിഐ മണ്ഡലം സെക്രട്ടറി എം.എസ്. റഷീദ് ആവശ്യപ്പെട്ടു. ഇയാളെ യഥാസമയം മെഡിക്കൽ കോളജിൽ എത്തിച്ചിരുന്നെങ്കിൽ ജീവിതത്തിലേക്കു തിരിച്ചുകൊണ്ടുവരാൻ കഴിയുമായിരുന്നുവെന്നും ഇത്തരം സംഭവങ്ങൾ ആവർത്തിക്കാതിരിക്കാൻ നടപടി സ്വീകരിക്കണമെന്നും റഷീദ് ആവശ്യപ്പെട്ടു.

തരിശുഭൂമിയില്‍ പച്ചക്കറിത്തോട്ടം‍

മെഡിക്കല്‍കോളജ്: ചെറുവയ്ക്കല്‍ പേപ്പര്‍മില്‍ റോഡിനു സമീപം വര്‍ഷങ്ങളായി തരാശായികിടന്ന രണ്ടേക്കർ ഭൂമിയിൽ ഉള്ളൂര്‍ കൃഷിഭവന്‍ പച്ചക്കറിത്തോട്ടം ഒരുക്കുന്നു. ഇതിന്‍റെ ഉദ്ഘാടനം ജില്ലാ പ്രിന്‍സിപ്പല്‍ കൃഷി ഓഫീസര്‍ മേരി കെ. അലക്‌സ് നിര്‍വഹിച്ചു. ആക്കുളം വാര്‍ഡ് കൗണ്‍സിലര്‍ സുരേഷ്‌കുമാര്‍ അധ്യക്ഷത വഹിച്ചു. ഡെപ്യൂട്ടി കൃഷി ഡയറക്ടര്‍ ഷീന പദ്ധതിവിശദീകരണം നടത്തി. കേരള അഗ്രിക്കൾച്ചർ യൂണിവേഴ്‌സിറ്റിയില്‍നിന്നും കൃഷിവിജ്ഞാന വ്യാപന വിഭാഗം മേധാവിയായി വിരമിച്ച ഡോ. വി.ബി പത്മനാഭന്‍, ഫാം ജേണലിസ്റ്റ് സുരേഷ് മുതുകുളം എന്നിവര്‍ വിശിഷ്ടാതിഥികളായിരുന്നു. മുളക്, തക്കാളി, വെണ്ട, വഴുതന, കത്തിരി, പയര്‍, പടവലം, വെള്ളരി, ചീര, അഗത്തി ചീര, കറിവേപ്പില എന്നിവയാണ് ഇവിടെ ഒരുങ്ങുന്നത്. കൃഷി അസി. ഡയറക്ടര്‍ ആര്‍. റിയാസ് ആശംസകള്‍ അര്‍പ്പിച്ചു.

പഴകിയ ഭക്ഷണ സാധനങ്ങൾ പിടിച്ചെടുത്തു

നെടുമങ്ങാട്: പഴകുറ്റിക്ക് സമീപത്തെ കമ്മാളം റെസ്റ്റോറന്‍റിൽ നെടുമങ്ങാട് നഗരസഭ ആരോഗ്യ വിഭാഗം മിന്നൽ പരിശോധന നടത്തി. പരിശോധനയിൽ പഴകിയ ചിക്കൻ, ബീഫ്, തലേ ദിവസത്തെ അവിയൽ, തോരൻ, തുടങ്ങിയവ പിടിച്ചെടുത്തു. റെസ്റ്റോറന്‍റിലെ മാലിന്യം കിള്ളിയാറിലേക്ക് ഒഴുക്കി വിടുന്നതായും കണ്ടെത്തി. 24 മണിക്കൂറിനകം കട പൂട്ടുവാൻ ഉടമയ്ക്ക് നോട്ടീസ് നൽകി. 25,000 രൂപ പിഴയും ചുമത്തിയതായി ഉദ്യോഗസ്ഥർ പറഞ്ഞു. എച്ച്ഐ ബിന്ദു, പബ്ല്ളിക് ഹെൽത്ത് ഇൻസ്പെക്ടർമാരായ സബിത, മീര, ഷീന എന്നിവർ റെയ്ഡിൽ പങ്കെടുത്തു.

കർഷക കോൺഗ്രസ് പ്രതിഷേധിച്ചു

നെടുമങ്ങാട്: ആനാട് പഞ്ചായത്തിലെ ഹരിത കർമസേനയ്ക്ക് വീടുകളിൽനിന്നും ശേഖരിക്കുന്ന പ്ലാസ്റ്റിക് മാലിന്യങ്ങളും മറ്റു വസ്തുക്കളും കൊണ്ടുപോകാനായി നൽകിയ രണ്ടുവർഷം മാത്രം പഴക്കമുള്ള ലക്ഷങ്ങൾ വിലയുള്ള വാഹനം നശിക്കുന്നു. ബ്ലോക്ക് പഞ്ചായത്ത് 2022 - 23 ലെ വാർഷിക പദ്ധതിയിൽ ഉൾപ്പെടുത്തിയാണ് വാഹനം വാങ്ങിയത്. പഞ്ചായത്ത് ഭരണസമിതിക്കെതിരെ കർഷക കോൺഗ്രസ് ആനാട് മണ്ഡലം കമ്മിറ്റിയുടെ നേതൃത്വത്തിൽ വാഹനത്തിൽ റീത്ത് വച്ചും കരിങ്കൊടി കെട്ടിയും പ്രതിക്ഷേധിച്ചു. കർഷക കോൺഗ്രസ് മണ്ഡലം പ്രസിഡന്‍റ് ആനാട് ജോയിയുടെ അധ്യക്ഷതയിൽ പഞ്ചായത്ത് മുൻ പ്രസിഡന്‍റ് ആനാട് സുരേഷ് പ്രതിഷേധ സമരം ഉദ്ഘാടനം ചെയ്തു. മണ്ഡലം പ്രസിഡന്‍റുമാരായ ഹുമയൂൺകബീർ, വേട്ടം പ്പള്ളി സനൽ, യുഡിഎഫ് ചെയർമാൻ അജയകുമാർ, ആനാട് ഗോപകുമാർ, വേങ്കവിള സുരേഷ്, എം. എൻ. ഗിരി, വാമനാപുരം നിയോജക മണ്ഡലം പ്രസിഡന്‍റ് ജോയി, മുരളീധരൻ നായർ, മഹിളാ കോൺഗ്രസ് മണ്ഡലം പ്രസിഡന്‍റ് അഖില, യൂത്ത് കോൺഗ്രസ് മണ്ഡലം പ്രസിഡന്‍റ് ആനന്ദ് ആർ. നായർ എന്നിവർ പ്രസംഗിച്ചു.

വെള്ളനാട് പഞ്ചായത്തിൽ കാട്ടുപന്നികളുടെ ശല്യം രൂക്ഷം

നെടുമങ്ങാട്: വെള്ളനാട് പഞ്ചായത്തിലെ കുളക്കോട്, ആറ്റുകാൽ, വെളിയന്നൂർ, ചാങ്ങ, കിടങ്ങുമ്മൽ, കണ്ണമ്പള്ളി, ആശാരിമൂല, വെള്ളൂർക്കോണം തുടങ്ങിയ ഗ്രാമീണമേഖലകളിൽ കാട്ടുപന്നികളുടെ ശല്യം രൂക്ഷമായി. പന്നികളുടെ ആക്രമണം ഭയന്നു നാട്ടുകാർക്കു വീടിനു പുറത്തിറങ്ങാൻ പോലും പറ്റാത്ത സ്ഥിതിയാണ് പലയിടത്തും. പകൽ സമയത്തു പോലും പന്നികൾ കൂട്ടമായി റോഡിലിറങ്ങുകയാണ്. വെളിയന്നൂർ സ്വദേശികളായ പ്ലാവിള തടത്തരികത്ത് വീട്ടിൽ സോമൻ (58), ഇദ്ദേഹത്തിന്‍റെ സമീപവാസിയായ പ്ലാവിള സായൂജ്യത്തിൽ പ്രസന്നൻ (47) എന്നിവരെ ഈയിടെ കാട്ടുപന്നികൾ ഗുരുതരമായി ആക്രമിച്ചിരുന്നു. പന്നികളുടെ ശല്യം രൂക്ഷമായ പ്രദേശങ്ങളിലെ കുട്ടികൾക്ക് ഒറ്റയ്ക്ക് സ്‌കൂളിൽ പോകാൻപോലും ഭയമായി തീർന്നിരിക്കുകയാണ്. കൂട്ടത്തോടെ കൃഷിയിടങ്ങളിലിറങ്ങുന്ന പന്നികൾ വ്യാപകമായി കാർഷിക വിളകൾ നശിപ്പിക്കുന്നതും പതിവ്. ആഴ്ചകൾക്കുമുമ്പ് ആശാരിമൂല, വെള്ളൂർക്കോണം പ്രദേശങ്ങളിലെ കർഷകരുടെ രണ്ടരയേക്കറോളം വരുന്ന വാഴ, മരച്ചീനി, ചേമ്പ്, ചേന, തെങ്ങിൻ തൈകൾ തുടങ്ങിയ കൃഷികൾ വ്യാപകമായി നശിപ്പിച്ചിരുന്നു. പന്നികളുടെ ശല്യം കാരണം കൃഷി ഉപേക്ഷിക്കേണ്ട അവസ്ഥയിലാണ് കർഷകർ. കാടുപിടിച്ചു കിടക്കുന്ന പറമ്പുകളിലും ചതുപ്പുകളിലും കുന്നിൻചരിവുകളിലും താവളമുറപ്പിച്ചിരിക്കുന്ന കാട്ടുപന്നികൾ നാട്ടുകാർക്കും ഭീഷണിയായി തീർന്നിട്ട് കാലമേറെയായി. നാട്ടുകാർ വനംവകുപ്പ് അധികൃതരോടു പരാതി പറയുമ്പോൾ പഞ്ചായത്ത് അധികൃതർക്കു പരാതി നൽകാനാണു നിർദേശിക്കുന്നത്.

ഇവിഎം മെഷീനിൽ കുരുന്നുകളുടെ വോട്ടിടൽ

വിഴിഞ്ഞം: ഗവ. ഹാർബർ ഏരിയ അപ്പർ പ്രൈമറി സ്കൂൾ മൊബൈൽ ഇലക്ട്രോണിക് വോട്ടിംഗ് മെഷീനുകൾ (ഇവിഎം) ഉപയോഗിച്ച് സ്കൂൾ പാർലമെന്‍റ് തെരഞ്ഞെടുപ്പു നടത്തി. രാജ്യത്തെ യഥാർഥ പോളിംഗ് നടപടിക്രമങ്ങൾ കുട്ടികൾക്ക് പകർന്നു നൽകുന്നതിനായി, എല്ലാ തെരഞ്ഞെടുപ്പു നടപടി ക്രമങ്ങളും അനുകരിച്ചാണ് ഇലക്‌ഷൻ നടത്തിയത്. തെരഞ്ഞെടുപ്പ് പ്രഖ്യാപനം, നോമിനേഷൻ സമർപ്പണം, ഇലക്‌ഷൻ പ്രചാരണം, കൊട്ടിക്കലാശം, തെരഞ്ഞെടുപ്പ് ഓഫീസർമാർ, ഫലപ്രഖ്യാപനം, സുരക്ഷാ ഉദ്യോഗസ്ഥർ, പോളിംങ് സ്റ്റേഷനുകൾ, പോസ്റ്റൽ ബാലറ്റുകൾ തുടങ്ങി എല്ലാ പ്രവർത്തനങ്ങളും കുട്ടികളുടെ നേതൃത്വത്തിലാണ് നടന്നത്. വിദ്യാർഥികൾ അവരുടെ തിരിച്ചറിയൽ കാർഡ് കാണിക്കുകയും, വോട്ട് രേഖപ്പെടുത്താൻ അവരുടെ വിരലുകളിൽ മഷി പുരട്ടുകയും ചെയ്തു. സ്കൂൾ ലീഡർ, അസിസ്റ്റന്‍റ് ലീഡർ, വിവിധ ക്ലബുകളുടെ കൺവീനർ, സ്പോർട്സ് ക്യാപ്റ്റൻ, ഫൈനാൻസ് കൺവീനർ തുടങ്ങിയ സ്ഥാനങ്ങളിലേക്ക് മത്സരിച്ചവരാണ് ഇലക്ഷനിലൂടെ തെരഞ്ഞെടുക്കപ്പെട്ടത്.

ചെറുപുഷ്പ മിഷന്‍ ലീഗ് പ്രവര്‍ത്തന വര്‍ഷ ഉദ്ഘാടനം

തിരുവനന്തപുരം: തിരുവനന്തപുരം ഫൊറോന ചെറുപുഷ്പ മിഷന്‍ ലീഗിന്‍റെ 2025-26 പ്രവര്‍ത്തന വര്‍ഷ ഉദ്ഘാടനവും ദിവ്യകാരുണ്യം സ്വീകരിച്ച കുട്ടികളുടെ ഫൊറോനതല സംഗമമായ "ഏയ്ഞ്ചല്‍സ് മീറ്റ്' ഉദ്ഘാടനവും ലൂര്‍ദ് ഫൊറോന വികാരി റവ. ഡോ. ജോണ്‍ തെക്കേക്കര നിര്‍വഹിച്ചു. മിഷന്‍ ലീഗ് ഫൊറോന ഡയറക്ടര്‍ ഫാ.ബിജോ അരഞ്ഞാണിയില്‍, ഫൊറോന ജോയിന്‍റ് ഡയറക്ടര്‍ സി. ഡോണാ ജോസഫ്, ഓര്‍ഗനൈസിംഗ് ജോയിന്‍റ് സെക്രട്ടറി ജോണ്‍സണ്‍, ഫൊറോന ആനിമേറ്റര്‍ അഡ്വ. ജോണ്‍സണ്‍ കെ. ജയിംസ്, ഫൊറോന പ്രസിഡന്‍റ് അന്നാ മരിയ തുടങ്ങിയവര്‍ പങ്കെടുത്തു. ഫൊറോന ഓര്‍ഗനൈസിംഗ് പ്രസിഡന്‍റ് ജോ മാത്യു പാണനാല്‍ നന്ദി പറഞ്ഞു.

കര്‍മല മാതാമല തിരുനാള്‍ സമാപിച്ചു

വെള്ളറട: കര്‍മ്മല മാതാമല തിരുനാള്‍ സമാപിച്ചു. പരിശുദ്ധ മറിയം സമാധാനത്തിന്‍റെ രാഞ്ജി എന്നതായിരുന്നു തിരുനാള്‍ സന്ദേശം. തെക്കന്‍ കുരിശുമല സംഗമ വേദിയില്‍ നിന്നും മാതാ മലയിലേയ്ക്കു നടന്ന ജപമാല പദയാത്രയില്‍ നൂറു കണക്കിനു പേര്‍ പങ്കെടുത്തു. മാതാ സന്നിധിയില്‍ ജപമാല, ലിറ്റിനി, നൊവേന, മരിയന്‍ പ്രഭാഷണം എന്നിവയും നടന്നു. ആഘോഷമായ തിരുനാള്‍ ദിവ്യബലിക്ക് ആനപ്പാറ ഇടവക സഹവികാരി ഫാ. അരുണ്‍ പി. ജിത്ത് മുഖ്യകാര്‍മികത്വം വഹിച്ചു. തുടര്‍ന്നു പരിശുദ്ധ കര്‍മലമാതാവിനോടുള്ള വണക്ക പ്രാര്‍ഥനയും സമാപനാ ആശീര്‍വാദവും നടന്നു. തെക്കന്‍ കുരിശുമല സംഗമവേദിയില്‍ നടന്ന സ്‌നേഹവിരുന്നില്‍ നിരവധി പേര്‍ പങ്കെടുത്തു. തീര്‍ഥാടന കമ്മിറ്റി ശുശ്രൂഷകള്‍ക്ക് നേതൃത്വം നല്‍കി.

വിദ്യാർഥി ഷോക്കേറ്റു മരിച്ചതിന്‍റെ ദുഃഖം മാറുംമുന്പെ പാറശാല ഗവ. ജിഎച്ച്എസ്എസിൽ ജയോത്സവം നടത്താനുള്ള നീക്കം തടഞ്ഞു

പാറശാല: പാറശാല ഗവണ്‍മെന്‍റ് ഗേള്‍സ് ഹയര്‍ സെക്കൻഡറി സ്‌കൂളിലെ പിടിഎയുടെ നേതൃത്വത്തില്‍ ഇന്നലെ "ജയോത്സവം 2025' എന്ന പേരില്‍ ഒരു പരിപാടി നടത്താന്‍ തീരുമാനിച്ചിരുന്നത് കോൺഗ്രസ് പ്രതിഷേധത്തെ തുടർന്നു മുടങ്ങി. ജില്ലാ പഞ്ചായത്ത് അംഗം വി.ആര്‍. സലൂജ, ഹരിത വി. കുമാര്‍, മുരുകന്‍ കട്ടാക്കട തുടങ്ങിയ പ്രമുഖരെ പങ്കെടുപ്പിച്ച് നടത്താനിരുന്ന പരിപാടി, മിഥുന്‍റെ സംസ്‌കാര ചടങ്ങുകള്‍ കഴിയുന്നതുവരെയെങ്കിലും മാറ്റിവെക്കണമെന്നാവശ്യപ്പെട്ടു പാറശാല പഞ്ചായത്ത് കോണ്‍ഗ്രസ് മെമ്പര്‍മാര്‍ സ്‌കൂളിനു മുന്നില്‍ കരിങ്കൊടിയുമായി കുത്തിയിരുന്നു പ്രതിഷേധിക്കുകയായിരുന്നു. ദുഃഖാചരണത്തിന്‍റെ വേളയില്‍ പരിപാടി മാറ്റിവെക്കാന്‍ തയാറാവാതെ, "എന്തുവന്നാലും പരിപാടി നടത്തും' എന്ന പിടിവാശി കാണിച്ച പിടിഎയുടെ ധാര്‍ഷ്ട്യത്തിനുള്ള മറുപടിയാണ് കോണ്‍ഗ്രസ് മെമ്പര്‍മാരുടെ പ്രതിഷേധമെന്ന് അറിയിച്ചു. രാവിലെ മുതല്‍ ഓഫീസ് റൂമില്‍ കുത്തിയിരുന്ന്, ഉച്ചയ്ക്ക് രണ്ടുവരെയാണു അംഗങ്ങൾ പ്രതിഷേധിച്ചത്. ഇതേ തുടര്‍ന്ന് ജയോത്സവം സംഘടിപ്പിന്‍ കഴിഞ്ഞില്ല. പരിപാടികൾ സംഘടിപ്പിക്കാൻ സാധിക്കാതെ പിടിഎ പിൻവാങ്ങിയപ്പോൾ 3:30 ഓടെ സമരം അവസാനിപ്പിച്ച് മെമ്പര്‍മാര്‍ മടങ്ങിപ്പോയി. പാറശാല പഞ്ചായത്ത് പ്രതിപക്ഷ നേതാവ് ലെല്‍വിന്‍ ജോയ്, കോണ്‍ഗ്രസ് മെമ്പര്‍മാരായ വിനയനാഥ് മെമ്പര്‍, താര, നിര്‍മല കുമാരി എന്നിവര്‍ നേതൃത്വം നൽ കി. നാട്ടുകാരും, രക്ഷിതാക്കളും സമരക്കാർക്കു നന്ദി അറിയിച്ചു. മനുഷ്യത്വത്തിന്‍റെയും പൊ തുവികാരത്തിന്‍റെയും വിജയമാണ് സമരത്തിന്‍റെ വിജയത്തി നു പിന്നിലെന്നു പ്രതിഷേധിച്ച നേതാക്കളും വ്യക്തമാക്കി.

വാർഷിക സ്പോർട്സ് മീറ്റ് സംഘടിപ്പിച്ചു

മാറനല്ലൂർ: ക്രൈസ്റ്റ് നഗർ പബ്ലിക് സീനിയർ സെക്കണ്ടറി സ്കൂളിലെ വാർഷിക സ്പോർട്സ് മീറ്റ് 2025-26 അന്താരാഷ്ട്ര ഖോ ഖോ പ്ലേയർ എസ്. ശ്രീജേഷ് ഉദ്ഘാടനം ചെയ്തു. സ്കൂൾ മാനേജർ ഫാ. സിറിയക്ക് മഠത്തിൽ സിഎം ഐ സ്കൂൾ പതാക ഉയർത്തുകയും അധ്യക്ഷത വഹിക്കുകയും ചെയ്തു. സ്പോർട്സ് കൗൺസിലർ മാസ്റ്റർ എം.ആർ. ആരോമൽ, സത്യപ്രതിജ്ഞ ചൊല്ലി ക്കൊടുത്തു. സ്കൂൾ പ്രിൻസിപ്പൽ ഫാ. ചാക്കോ പുതുകുളം സിഎംഐ അതിഥിക്കു സ്നേഹോപഹാരം സമ്മാനിച്ചു. പിടിഎ പ്രസിഡന്‍റ് പ്രേംജിത്ത് പ്രസംഗിച്ചു. വിവിധ മത്സരങ്ങളിലെ വിജയികൾക്ക് സമ്മാനദാനവും നിർവഹിച്ചു.

സമ്മോഹനം മാനവിക- സൗഹൃദ കൂട്ടായ്മ സംഘടിപ്പിച്ചു

തിരുവനന്തപുരം: മുഖ്യമന്ത്രി എന്ന നിലയിൽ ജനക്ഷേമ പ്രവർത്തനങ്ങളിലൂടെ ജനപ്രിയനായി മാറിയ ഉമ്മൻ ചാണ്ടിയെ സ്വഭാവഹത്യ ചെയ്തു രാഷ്ട്രീയമായി വേട്ടയാടിയതിനു കാലം നൽകിയ കനത്ത ശിക്ഷയാണ് പിണറായി സർക്കാർ ഇപ്പോൾ അനുഭവിച്ചു കൊണ്ടിരിക്കുന്നതെന്ന് കോണ്‍ഗ്രസ് നേതാവ് എം.എം. ഹസൻ. നീതിമാനായ ഉമ്മൻചാണ്ടിയെ അനീതിയും അധർമവും നടത്തി അപമാനിച്ചവർക്കുള്ള കടുത്ത മറുപടിയായിരുന്നു തിരുവനന്തപുരം മുതൽ പുതുപ്പള്ളി വരെ ജനലക്ഷങ്ങൾ അദ്ദേഹത്തിനു നൽകിയ അന്ത്യയാത്രയെന്നും ഹസൻ അനുസ്മരിച്ചു. ഉമ്മൻചാണ്ടിയുടെ രണ്ടാം ചരമവാർഷികത്തോടനുബന്ധിച്ചു സമ്മോഹനം മാനവിക- സൗഹൃദ കൂട്ടായ്മ തിരുവനന്തപുരം പ്രസ് ക്ലബ് ഹാളിൽ സംഘടിപ്പിച്ച അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സമ്മോഹനം ചെയർമാൻ വിതുര ശശിയുടെ അധ്യക്ഷതയിൽ നടന്ന സമ്മേളനത്തിൽ ജനറൽ കണ്‍വീനർ പിരപ്പൻകോട് സുഭാഷ്, മുൻ സ്പീക്കർ എൻ. ശക്തൻ, മുൻമന്ത്രി വി.എസ്. ശിവകുമാർ, കെപിസിസി ജനറൽ സെക്രട്ടറി ജി.എസ്. ബാബു, കന്പറ നാരായണൻ, എസ്. മനോഹരൻനായർ, ജെ.എസ്. അഖിൽ, സി.കെ. വത്സലകുമാർ, അണിയൂർ എം. പ്രസന്നകുമാർ തുടങ്ങിയവർ പ്രസംഗിച്ചു.

ആനി മസ്ക്രീൻ ചരമവാർഷികം ആചരിച്ച് കെഎൽസിഎ

തിരുവനന്തപുരം: ആനി മസ്ക്രീനെ പോലുള്ള നിരവധി വനിതകൾ വളർന്നു വരേണ്ടത് ഇന്നത്തെ കാലഘട്ടത്തിന്‍റെ ആവശ്യമാണെന്നു തിരുവനന്തപുരം ലത്തീൻ അതിരൂപത സഹായമെത്രാൻ ഡോ. ആർ. ക്രിസ്തുദാസ്. കെഎൽസിഎ സംഘടിപ്പിച്ച ആനി മസ്ക്രീന്‍റെ 62-ാമത് ചരമവാർഷിക പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരളത്തിലെ ആദ്യ വനിതാമന്ത്രിയും സ്വാതന്ത്ര്യസമര സേനാനിയും തിരുവനന്തപുരത്തുനിന്നുള്ള ലോകസഭാംഗവും, ഭരണഘടനയുടെ കരട് രേഖയിൽ ഒപ്പുവച്ച വനിത കൂടിയായ ആനി മസ്ക്രീന്‍റെ ചരിത്രം ഇന്നത്തെ തലമുറ മറക്കുകയാണെന്ന് അദ്ദേഹം പറഞ്ഞു. പാട്രിക് മൈക്കൾ അധ്യക്ഷത വഹിച്ചു. കേരള തയ്യൽ തൊഴിലാളി ക്ഷേമനിധി ബോർഡ് ചെയർപേഴ്സണ്‍ എലിസബത്ത് അസീസി, ഫാ. ബീഡ് മനോജ് അമാദോ, സുരേഷ് സേവ്യർ, ഫാ. സെബാസ്റ്റ്യൻ, ആന്‍റണി ഗ്രേഷ്യസ്, ജോർജ് എസ്. പള്ളിത്തറ, ടി.എസ്. ജോയി, മേരിപുഷ്പം, ഡോളി ഫ്രാൻസിസ്, യേശുരാജ് തുടങ്ങിയവർ പ്രസംഗിച്ചു.

മേയര്‍ക്ക് ജയിലിലേക്ക് പോകേണ്ട സാഹചര്യം: ശോഭസുരേന്ദ്രന്‍

തിരുവനന്തപുരം: നഗരസഭാ മേയര്‍ ആര്യാ രാജേന്ദ്രനും ആവരെ സഹായിക്കുന്ന പലര്‍ക്കും ജയിലിലേക്ക് പോകേണ്ട സാഹചര്യം ഉണ്ടായിരിക്കുകയാണെന്ന് ബിജെപി സംസ്ഥാന ജനറല്‍ സെക്രട്ടറി ശോഭാ സുരേന്ദ്രന്‍. നഗരസഭയിലെ എല്‍ഡിഎഫ് ഭരണസമിതിയുടെ അനധികൃത നിയമനത്തിനെതിരേ ബിജെപി സിറ്റി ജില്ലാ കമ്മിറ്റിയുടെ നേതൃത്വത്തില്‍ നടത്തിയ ഏകദിന സത്യാഗ്രഹം ഉദ്ഘാടനം ചെയ്തു പ്രസംഗിക്കുകയായിരുന്നു അവര്‍. അനധികൃതമായി കത്തെഴുതി നിയമനം നടത്തേണ്ടതെങ്ങനെയെന്നു ഡോക്ടറേറ്റ് എടുത്ത ആളാണ് നഗരസഭാ മേയര്‍. ഇന്ന് ആര്യ മാത്രമല്ല ശിവന്‍കുട്ടിവരെ ഭയപ്പാടോടു കൂടിയാണ് ബിജെപിയെ നോക്കുന്നത്. നഗരസഭയുടെ ഭരണത്തിലേക്ക് ബിജെപി വരുന്നതു വരെ മാത്രമെ അഴിമതി നിറഞ്ഞ സിപിഎം ഭരണകര്‍ത്താക്കള്‍ക്ക് നാട്ടിലിറങ്ങി നടക്കാന്‍ സാധിക്കൂ. അതു കഴിഞ്ഞാല്‍ അവരുടെ സ്ഥാനം ജയിലിലാണെന്നും അവര്‍ പറഞ്ഞു. സിറ്റി ജില്ലാ പ്രസിഡന്‍റ് കരമന ജയന്‍ അധ്യക്ഷനായ ചടങ്ങില്‍ സംസ്ഥാന സെക്രട്ടറിമാരായ വി.വി. രാജേഷ്, എം.വി. അഞ്ജന, മുന്‍ സംസ്ഥാന ഉപാധ്യക്ഷന്‍ സി.ശിവന്‍കുട്ടി, സൗത്ത് ജില്ലാ പ്രസിഡന്‍റ് മുക്കംപാലമൂട് ബിജു, നഗരസഭാ കൗണ്‍സിലര്‍മാര്‍ തുടങ്ങിയവര്‍ പങ്കെടുത്തു.

സംസ്ഥാനതല ഓണാഘോഷ പരിപാടികൾ സെപ്റ്റംബർ മൂന്നു മുതൽ ഒന്പതു വരെ

തിരുവനന്തപുരം: സംസ്ഥാനതല ഓണാഘോഷ പരിപാടികൾ സെപ്റ്റംബർ മൂന്നു മുതൽ ഒ ന്പതു വരെ സംഘടിപ്പിക്കാൻ തീരുമാനിച്ചു. ഒൻപതിന് ഘോഷയാത്രയോടെ തിരുവനന്തപുരത്തു സമാപിക്കും. ജില്ലാതലത്തിൽ ഡിടിപിസിയുടെ നേതൃത്വത്തിൽ ഓണാഘോഷ പരിപാടി നടത്തും. നടത്തിപ്പുമായി ബന്ധപ്പെട്ടു മുഖ്യമന്ത്രിയു‌ടെ അധ്യക്ഷതയിൽ ചേർന്ന യോഗത്തിലാണ് തീരുമാനം. ഓണാഘോഷം വിപുലമായി സംഘടിപ്പിക്കാൻ വിവിധ വകുപ്പുകൾ ഏകോപിതമായി നീങ്ങണമെന്നു മുഖ്യമന്ത്രി നിർദേശിച്ചു. കവടിയാർ മുതൽ മണക്കാട് വരെയുള്ള പ്രദേശം ഉത്സവ മേഖലയായി പ്രഖ്യാപിക്കും. വൈദ്യുത ദീപാലങ്കാരം നടത്തും. ഹരിത ചട്ടം പാലിച്ചു ഹരിത ഓണം എന്ന നിലയിലാകും പരിപാടി നടത്തുക. കുടുംബശ്രീയുടെ നേതൃത്വത്തിൽ ജില്ലാ, സിഡിഎസ്, എഡിഎസ് തലങ്ങളിൽ ഓണം മേളകൾ സംഘടിപ്പിക്കും. കുടുംബശ്രീ മുഖേന കൃഷി ചെയ്ത പച്ചക്കറിയും പൂക്കളും ഓണത്തിനു മുന്പു വിളവെടു ക്കും. ഓണത്തിനാവശ്യമായ എല്ലാ വിഭവങ്ങളും അടങ്ങുന്ന കിറ്റ് നേരിട്ടും ഓണ്‍ലൈനായും ലഭ്യമാക്കും. സപ്ലൈകോ ഓണച്ചന്തകൾ ജില്ലാ, താലൂക്ക്, മണ്ഡലം കേന്ദ്രങ്ങളിൽ തുടങ്ങും. സാംസ്കാരിക മേഖലയിലെ സ്ഥാപനങ്ങൾ മുഖേന സാംസ് കാരിക പരിപാടികളും ഫിഷറീസ് മേഖലയിൽ വള്ളങ്ങൾ ഉൾപ്പെടുത്തി ആളുകളെ ആകർഷിക്കുന്ന പരിപാടികളും നടത്തുന്ന കാര്യം ആലോചിക്കും. കണ്‍സ്യൂമർഫെഡ് വഴിയും പ്രാഥമിക സഹകരണ സംഘങ്ങൾ വഴിയും പച്ചക്കറിയും നിത്യോപയോഗ സാധനങ്ങളും വിതരണം നടത്തും. കൂടുതൽ പ്രാഥമിക സംഘങ്ങൾ പച്ചക്കറി കൃഷി ചെയ്ത് ഓണം വിപണിയിലേക്കു കൊണ്ടുവരും. ഹോർട്ടി കോർപ്പിന്‍റെ പച്ചക്കറി ചന്തകളും കൃഷി വകുപ്പിന്‍റെ സംവിധാനങ്ങളും സജീവമാക്കി കൂടുതൽ ഇനങ്ങൾ ചന്തയിൽ എത്തിക്കാനും തീരുമാനിച്ചു. മന്ത്രിമാരായ പി.എ. മുഹമ്മദ് റിയാസ്, വി.എൻ. വാസവൻ, സജി ചെറിയാൻ, ജെ. ചിഞ്ചുറാണി, ജി.ആർ. അനിൽ, എം.ബി. രാജേഷ്, വി. ശിവൻകുട്ടി പി. പ്രസാദ്, ചീഫ് സെക്രട്ടറി ഡോ. എ. ജയതിലക് തുടങ്ങിയവർ പ്രസംഗിച്ചു.

കാറുമായി കൂട്ടിയിടിച്ച് ബൈക്ക് യാത്രികൻ മരിച്ചു

പോത്തൻകോട്: പൂലന്തറയിൽ കാറും ബൈക്കും കൂട്ടിയിടിച്ച് ഉണ്ടായ അപകടത്തിൽ യാത്രികനായ യുവാവ് മരിച്ചു. ഞാണ്ടൂർക്കോണം സ്വദേശി വിഷ്ണു (28) ആണ് മരിച്ചത്. ഓട്ടോഡ്രൈവറായിരുന്നു. ഇന്നലെ പുലർച്ചെ 12.30നായിരുന്നു അപകടം. പോത്തൻകോട് നിന്ന് കോലിയക്കോട് ഭാഗത്തേക്ക് പോയ ബൈക്കും കോലിയക്കോട്നിന്ന് പോത്തൻകോട് ഭാഗത്തേക്ക് വന്ന കാറുമാണ് കൂട്ടിയിടിച്ചത്. അമിത വേഗതയാണ് അപകടത്തിന് കാരണമെന്നാണ് പ്രാഥമിക വിവരം. ഒപ്പം സഞ്ചരിച്ചിരുന്ന സുഹൃത്ത് നവീൻ ആശുപത്രിയിൽ ചികിത്സയിലാണ്.

നാടൊന്നാകെ ഉമ്മൻചാണ്ടിയെ അനുസ്മരിച്ചു

വെള്ളറട: ഇന്ത്യന്‍ നാഷണല്‍ കോണ്‍ഗ്രസ് മാരായമുട്ടം മണ്ഡലം കമ്മിറ്റിയുടെ നേതൃത്വത്തില്‍ കാരുണ്യത്തിന്‍റെ സ്പര്‍ശം മുന്‍ മുഖ്യമന്ത്രി ഉമ്മന്‍ചാണ്ടിയുടെ രണ്ടാമത് ചരമവാര്‍ഷിക ദിനം ആചരിച്ചു. മാരായമുട്ടം മണ്ഡലം കമ്മിറ്റിയുടെ നേതൃത്വത്തില്‍ അനുസ്മരണ പ്രഭാഷണവും രണ്ടാമത് കാരുണ്യ സ്പര്‍ശം നടത്തി. മണ്ഡലം തല ഛായയാത്ര പുഷ്പാര്‍ച്ചനയും അനുസ്മരണവും മാരായമുട്ടം ജംഗ്ഷനില്‍ കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍മാരായമുട്ടം ഉദ്ഘാടനം ചെയ്തു. മണ്ഡലം പ്രസിഡന്‍റ് ബിനില്‍ മണല് വിള അധ്യക്ഷത വഹിച്ചു. കോണ്‍ഗ്രസ് ബ്ലോക്ക് ഭാരവാഹികളായ മണ്ണൂര്‍ ശ്രീകുമാര്‍,മണ്ണൂര്‍ ഗോപന്‍,അഡ്വ.ഷിബു ശ്രീധര്‍,ഇടവഴിക്കര ജയന്‍,വടകര ജയന്‍,വടകര വില്‍സണ്‍, അരുവിക്കര മണി കണ്ടന്‍,കോണ്‍ഗ്രസ് മണ്ഡലം ഭാരവാഹികളായ ശ്രീരാഗം ശ്രീകുമാര്‍,കാക്കണം മധു,തുളസീധരന്‍ ആശാരി, വടകര രാജേഷ്,മാലകുളങ്ങര ജോണി, തത്തിയൂര്‍ സുരേന്ദ്രന്‍, ചുള്ളിയൂര്‍ അനീഷ് ,ആരാമം മധുസൂദനന്‍ നായര്‍,യൂത്ത് കോണ്‍ഗ്രസ് മണ്ഡലം പ്രസിഡന്‍റ് അനന്തന്‍ മാരായമുട്ടം ,കോട്ടക്കല്‍ വിനോദ്,തൃപ്പലവൂര്‍ ഹരിപ്രസാദ്,നിരപ്പില്‍ അഖില്‍,വെള്ളുക്കുഴി അഖില്‍,അരുവിക്കര കൃഷ്ണകുമാര്‍ ,മിനിമോള്‍ വടകര, എന്നിവര്‍ നേത്യത്വം നല്‍കി. എല്ലാ വാര്‍ഡിലെയും പ്രധാന ജംഗ്ഷനുകളില്‍ വാര്‍ഡ് കമ്മിറ്റിയുടെ നേതൃത്വത്തില്‍ പുഷ്പാര്‍ച്ചനയും അനുസ്മരണവും സംഘടിപ്പിച്ചിരുന്നു. കാരുണ്യ സ്പര്‍ശത്തിന്‍റെ ഭാഗമായി കിടപ്പു രോഗികൾക്ക് ഭക്ഷ്യ ക്വിറ്റ്,മരുന്നുകളും വാങ്ങി നല്‍കി. കിളിമാനൂർ: മുൻ മുഖ്യമന്ത്രി ഉമ്മൻ‌ചാണ്ടിയുടെ രണ്ടാം ചരമദിനത്തോടനുബന്ധിച്ചു പുളിമാത്ത് മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ കരേറ്റ് ജംഗ്ഷനിൽ നടന്ന അനുസ്മരണ പരിപാടികൾ ബ്ലോക്ക്‌ കോൺഗ്രസ്‌ കമ്മിറ്റി പ്രസിഡന്‍റ് എ. അഹമ്മദ് കബീർ ഉദ്ഘാടനം ചെയ്തു. മണ്ഡലം കോൺഗ്രസ്‌ കമ്മിറ്റി പ്രസിഡൻര് എസ്. എസ്. സുമേഷ് അധ്യക്ഷത വഹിച്ചു. പഞ്ചായത്തു പ്രസിഡന്‍റ് എസ്. സുസ്മിത ജനപ്രതിനിധികളായ ജി. രവീന്ദ്രഗോപാൽ, ബി. ജയചന്ദ്രൻ, എസ്. ശിവപ്രസാദ്, ശ്രീമതി ആശ എ. എസ് എന്നിവർ പങ്കെടുത്തു. പാറശാല: ഇന്ത്യന്‍ നാഷണല്‍ കോണ്‍ഗ്രസ് പാറശാല മണ്ഡലം കമ്മിറ്റിയുടെ ആഭിമുഖ്യത്തില്‍ മുന്‍ മുഖ്യമന്ത്രി ഉമ്മന്‍ചാണ്ടിയുടെ രണ്ടാമത് ചരമവാര്‍ഷികംആചരിച്ചു. പാറശാല ജംഗ്ഷനില്‍ പുഷ്പാര്‍ച്ചനയും അനുസ്മരണവും നടത്തി. മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് കെ. കെ. ജസ്റ്റിന്‍ രാജ് അധ്യക്ഷത വഹിച്ചു. മുന്‍ എംഎല്‍എ എ. ടി. ജോര്‍ജ് ഉദ്ഘാടനം ചെയ്തു. ഡിസിസി ജനറല്‍ സെക്രട്ടറി പാറശാല സുധാകരന്‍, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് അഡ്വ.ജോണ്‍, ബ്ലോക്ക് കോണ്‍ഗ്രസ് കമ്മിറ്റി ഭാരവാഹികളായ വേലപ്പന്‍ നായര്‍, വിന്‍സര്‍, ഡാഷര്‍ ഡാനിയല്‍, രാജേന്ദ്രപ്രസാദ്, നേതാക്കളായ ലില്‍വിന്‍ജോയ്,വിനയനാഥ്, ലസ്റ്റിന്‍ രാജ്, സുനില്‍കുമാര്‍, വിജയകുമാര്‍, സുരേഷ്, രാജന്‍, മുരുകന്‍ തുടങ്ങിയവര്‍ പ്രസംഗിച്ചു. പാറശാല: കോണ്‍ഗ്രസ് കൊല്ലയില്‍ മണ്ഡലം കമ്മിറ്റിയുടെ നേതൃത്വത്തില്‍ മുന്‍ മുഖ്യമന്ത്രി ഉമ്മന്‍ചാണ്ടിയുടെ രണ്ടാം ചരമവാര്‍ഷികം ആചരിച്ചു. കൊല്ലയില്‍ പഞ്ചായത്ത് ഓഫീസിന് മുന്നില്‍ ഛായാ ചിത്രത്തില്‍പുഷ്പാര്‍ച്ചന നടത്തി. മണ്ഡലം പ്രസിഡന്‍റ് കൊല്ലയില്‍ ആനന്ദന്‍റെ അധ്യക്ഷതയില്‍ കെപിസിസി മീഡിയ സെല്‍ അംഗം അഡ്വ.മഞ്ചവിളാകം ജയന്‍ ഉദ്ഘാടനം ചെയ്തു.ബ്ലോക്ക് കോണ്‍ഗ്രസ് വൈസ് പ്രസിഡന്‍റുമാരായ പി. മോഹന്‍ കുമാര്‍, ശ്രീനിവാസന്‍, യുഡി എഫ് പഞ്ചായത്ത് ചെയര്‍മാന്‍. കുളത്താമല്‍ സുരേഷ്,പഞ്ചായത്ത് അംഗം. ബിന്ദുബാല,സജി, ഗോപകുമാര്‍, റെജി,സ്റ്റീഫന്‍, ബിനു, അജിത്ത്, ഗോപി തുടങ്ങിയവര്‍ പ്രസംഗിച്ചു. വെള്ളറട: ഇന്ത്യന്‍ യൂത്ത് കോണ്‍സ് പെരുങ്കടവിള മണ്ഡലം കമ്മിറ്റി നടത്തിയ ഉമ്മന്‍ചാണ്ടി അനുസ്മരണം മുന്‍ യൂത്ത് കോണ്‍ഗ്രസ് ജില്ലാ ജനറല്‍ സെക്രട്ടറി അനന്തന്‍മാരായമുട്ടം ഉദ്ഘാടനം ചെയ്തു. അനുസ്മരണ പരിപാടിയില്‍ ബിനില്‍ മണലുവിള, മണ്ണൂര്‍ ശ്രീകുമാര്‍,ശ്രീരാഗം ശ്രീകുമാര്‍,അഡ്വ.ഷിബു ശ്രീധര്‍ , മണ്ണൂര്‍ഗോപന്‍ , സുരേഷ് പെരുങ്കടവിള , ജോണി മാലകുളങ്ങര,തുളസീധരന്‍ ആശാരി, ഹരിപ്രസാദ്,തെള്ളുക്കുഴിഅഖില്‍ , അഖില്‍ നിരപ്പില്‍,വിനോദ് കോട്ടയക്കല്‍, ലാലുമാലകുളങ്ങര, കൃഷ്ണകുമാര്‍ , അലക്‌സ് എന്നിവര്‍പങ്കെടുത്തു. വെള്ളറട: ഉമ്മന്‍ചാണ്ടിയുടെ രണ്ടാം ചരമവാര്‍ഷികത്തോടനുബന്ധിച്ച് വെള്ളടയില്‍മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തില്‍ അനുസ്മരമം സംഘടിപ്പിച്ചു. വെള്ളറട ഠൗണില്‍ ഉമ്മന്‍ചാണ്ടിയുടെചായ ചിത്രത്തില്‍ പുഷ്പാര്‍ച്ചന നടത്തി അഡ്വ. ഗിരീഷ് കുമാര്‍, മണലി സ്റ്റാന്‍ലി, എം.രാജ് മോഹന്‍, കെ,ജി, മംഗല്‍ദാസ്,സരളാ വില്‍സന്‍റ്, മലയില്‍ രാധാകൃഷ്ണന്‍, മണ്ണാത്തിപ്പാറ ജോണ്‍സണ്‍, പ്ലാന്‍ കാല ജോണ്‍സണ്‍, ശേഖരദാസ് തുടങ്ങിയവര്‍ പങ്കെടുത്തു. വെഞ്ഞാറമൂട് : കാരേറ്റ് കേന്ദ്രമാക്കി പ്രവർത്തിക്കുന്ന പ്രിയദർശിനി എഡ്യൂക്കേഷൻ ചാരിറ്റബിൾ ട്രസ്റ്റിന്‍റെ ആഭിമുഖ്യത്തിൽ പുളിമാത്ത് പഞ്ചായത്തിലെ കാട്ടുംപുറത്ത് പ്രവർത്തിക്കുന്ന ബഡ്‌സ് സ്കൂളിലെ വിദ്യാർഥികളോടൊപ്പം അനുസ്മരണ പരിപാടികൾ സംഘടിപ്പിച്ചു. ട്രസ്റ്റ്‌ ചെയർമാൻ എ. അഹമ്മദ്‌ കബീർ അധ്യക്ഷത വഹിച്ച അനുസ്മരണ പരിപാടികൾ കെപിസിസി മെമ്പർ എൻ. സുദർശനൻ ഉത്ഘാടനം ചെയ്തു. പഞ്ചായത്ത് പ്രസിഡന്‍റ് എസ്. സുസ്മിത, മെഡിക്കൽ ഓഫീസർ ഡോ. നിജു മുഹമ്മദ്‌, ബ്ലോക്ക്‌ കോൺഗ്രസ് ജനറൽ സെക്രട്ടറി മാരായ സി. രുഗ്മിണിയമ്മ, സുരേഷ് , സി. ബിനു, ജി. രവീന്ദ്രഗോപാൽ, മണ്ഡലം കോൺഗ്രസ്‌ കമ്മിറ്റി പ്രസിഡന്‍റ് എസ്. എസ്. സുമേഷ്, ജി. ചന്ദ്രശേഖരൻ നായർ ബ്ലോക്ക്‌ കോൺഗ്രസ് കമ്മിറ്റി ട്രഷറർ വി. ഗുരുലാൽ, ബി. രമേശ്‌ കുമാർ,ബഡ്‌സ് സ്കൂൾ ടീച്ചർ ശ്രീമതി അനീന എന്നിവർ പ്രസംഗിച്ചു. നെടുമങ്ങാട്: നെടുമങ്ങാട് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ കച്ചേരി നടയിൽ ഉമ്മൻചാണ്ടിയുടെ ഛായചിത്രത്തിൽ പുഷ്പാർച്ച നടത്തി. മണ്ഡലം കോൺഗ്രസ് കമ്മിറ്റിയുടെ പ്രസിഡന്‍റ് അഡ്വ.സി. മഹേഷ് ചന്ദ്രന്‍റെ നേതൃത്വത്തിൽ ഡിസിസി ഭാരവാഹികളായ നെട്ടി റച്ചിറ ജയൻ ,അഡ്വ.ബാജി, ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ടി.അർജുനൻ, കോൺഗ്രസ് നേതാക്കളായ ഹാഷിം റഷീദ്. എസ്.എ. റഹീം, നെട്ടിറച്ചിറ രഘു, കണ്ണാരംകോട് സുധൻ, എ.എം.ഷെരിഫ്.രാജശേഖരൻ നായർ , പഴവിള ജലീൽ.സോണി പുന്നിലം, ബൈജു തോട്ടുകട, ഉണ്ണി വിജയൻ തുടങ്ങിയവർ പങ്കെടുത്തു. നെടുമങ്ങാട്: ഇന്ത്യൻ നാഷണൽ കോൺഗ്രസ് ആനാട് മണ്ഡലം കമ്മിറ്റിയുടെ നേതൃത്വത്തിൽ ഉമ്മൻചാണ്ടിയുടെ രണ്ടാമത് ചരമവാർഷികം ആചരിച്ചു. കെപിസിസി മുൻ നിർവഹസമിതി അംഗം ആനാട് ജയൻ ഉദ്ഘാടനം നിർവഹിച്ചു. മണ്ഡലം കോൺഗ്രസ് കമ്മിറ്റി പ്രസിഡന്‍റ് ഹുമയൂൺ കബീർ അധ്യക്ഷത വഹിച്ച ചടങ്ങിൽ യുഡിഎഫ് പഞ്ചായത്ത് കമ്മിറ്റി ചെയർമാൻ ആർ. അജയകുമാർ , മുൻ പഞ്ചായത്ത് പ്രസിഡന്‍റ് ആനാട് സുരേഷ്, കോൺഗ്രസ് മണ്ഡലം കമ്മിറ്റി ഭാരവാഹികളായ എം.എൻ. ഗിരി, വേലപ്പൻ നായർ, യൂത്ത് കോൺഗ്രസ് ആനാട് മണ്ഡലം പ്രസിഡന്‍റ് ആനന്ദ് ആർ നായർ, കർഷക കോൺഗ്രസ് മണ്ഡലം പ്രസിഡന്‍റ് ജോയ്, മഹിളാ കോൺഗ്രസ് മണ്ഡലം പ്രസിഡന്‍റ് എസ്. ആർ. അഖില തുടങ്ങിയവർ പങ്കെടുത്തു. നെടുമങ്ങാട്: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമ വാർഷികത്തോടനുബന്ധിച്ച് യൂത്ത് കോൺഗ്രസ് നെടുമങ്ങാട് മണ്ഡലം കമ്മിറ്റിയുടെ നേതൃത്വത്തിൽ മാർക്കറ്റ് ജംഗ്ഷനിൽ പുഷ്പാർച്ചനയും അനുസ്മരണ യോഗവും സംഘടിപ്പിച്ചു. ജില്ലാ സെക്രട്ടറി ഷിനു നെട്ട, നിയോജകമണ്ഡലം പ്രസിഡന്‍റ് താഹിർ നെടുമങ്ങാട്, ഡിസിസി നിർവാഹക സമിതി അംഗം ഹാഷിം റഷീദ്, കോൺഗ്രസ് മണ്ഡലം പ്രസിഡന്‍റ് അഡ്വ. മഹേഷ് ചന്ദ്രൻ, യൂത്ത് കോൺഗ്രസ് ഭാരവാഹികളായ മൻസൂർ എസ്, ഷാഹിം എസ്, ഉണ്ണികൃഷ്ണൻ വി, ഷാജഹാൻ, ആൽവിൻ, അജി,അജിം ഷാ, അഖിൽ പേരുമല തുടങ്ങിയവർ പങ്കെടുത്തു. നെടുമങ്ങാട്: മൂഴി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ വിവിധ ഭാഗങ്ങളിൽ അനുസ്മരണവും പുഷ്പാർച്ചനയും നടത്തി. മൂഴിമണ്ഡലം കോൺഗ്രസ് കമ്മിറ്റി പ്രസിഡന്‍റ് വേട്ടം പള്ളി സനൽ, ബ്ലോക്ക് കോൺഗ്രസ് കമ്മിറ്റി ഭാരവാഹികളായ കെ.ശേഖരൻ, ഇര്യനാട് രാമചന്ദ്രൻ, കല്ലിയോട് ഭുവനേന്ദ്രൻ, വേങ്കവിള സുരേഷ്, മൂഴി സുനിൽ, മണ്ഡലം കോൺഗ്രസ് കമ്മിറ്റി ഭാരവാഹികളായ കുളപ്പള്ളി സുനിൽ, ഷെമി മൂഴി, വേണുഗോപാൽ പന്നിയോട്ടുകോണം, ബിജുവടക്കേക്കോണം തുടങ്ങിയവർ നേതൃത്വം നൽകി. നെടുമങ്ങാട്: ബ്ലോക്ക്‌ കോൺഗ്രസ്‌ കമ്മിറ്റിയുടെ കീഴിൽ മണ്ഡലം കമ്മിറ്റികളിൽ ഉമ്മൻ ചാണ്ടിയുടെ രണ്ടാം ചരമവാർഷികം ആചരിച്ചു.നെടുമങ്ങാട് മണ്ഡലം കോൺഗ്രസ്സ് കമ്മിറ്റി നെടുമങ്ങാട് ടൗണിലും, കരുപ്പൂര് മണ്ഡലം ഉഴപ്പാകോണത്തും, കരകുളം മണ്ഡലം, എട്ടാം കല്ലിലും, പൂവത്തൂർ മണ്ഡലം പൂവത്തൂർ ജംഗ്ഷനിലും വട്ടപ്പാറ മണ്ഡലം വട്ടപ്പാറ ജംഗ്ഷനിലും ഉമ്മൻ ചാണ്ടിയുടെ ഛായാചിത്രത്തിൽ പുഷ്പാർച്ചന നടത്തി. ബ്ലോക്ക്‌ കോൺഗ്രസ്‌ കമ്മിറ്റി പ്രസിഡന്‍റ് ടി. അർജുനൻ അറിയിച്ചു. നേതാക്കളായ കരകുളം കൃഷ്ണപിള്ള, അഡ്വ.എൻ. ബാജി, നെട്രച്ചിറ ജയൻ, നെടുമങ്ങാട് മണ്ഡലം പ്രസിഡന്‍റ് മഹേഷ്ചന്ദ്രൻ, കരുപൂര് മണ്ഡലം പ്രസിഡന്‍റ് രജീഷ്, പൂവത്തൂർ മണ്ഡലം പ്രസിഡന്‍റ് ചിറമുക്ക് റാഫി എന്നിവർ നേതൃത്വം നൽകി. നെയ്യാറ്റിൻകര: കോൺഗ്രസ് നെയ്യാറ്റിൻകര ടൗൺ മണ്ഡലം കമ്മിറ്റി സംഘടിപ്പിച്ച അനുസ്മരണ പരിപാടികൾ ഡിസിസി ജനറൽ സെക്രട്ടറി ജെ. ജോസ് ഫ്രാങ്ക്ളിൻ ഉദ്ഘാടനം ചെയ്തു. മണ്ഡലം കോൺഗ്രസ് കമ്മിറ്റി പ്രസിഡന്‍റ് കവളാകുളം സന്തോഷ് അധ്യക്ഷത വഹിച്ചു. അഡ്വ. ഷിജുലാൽ, മുൻ നഗരസഭ കൗൺസിലർ സുനിത, ഓലത്താന്നി സുര, ചിറ്റാകോട് രാജു, കുരിശു മുത്തു, കെ. അനിൽകുമാര്‍ എന്നിവര്‍ സംബന്ധിച്ചു. വെള്ളറട: ഐഎന്‍ടിയുസി യംഗ് വര്‍ക്കേഴ്‌സ് കൗണ്‍സിലിന്‍റെ ആഭിമുഖ്യത്തില്‍ ഉമ്മന്‍ചാണ്ടി അനുസ്മരണം സംഘടിപ്പിച്ചു. രാവിലെ അനുസ്മരണയോഗവും ഛായാചിത്രത്തില്‍ പുഷ്പാര്‍ച്ചനയും നടന്നു. ഉച്ചയ്ക്ക് ഒറ്റശേഖരമംഗലം ബഡ്‌സ് സ്‌കൂളില്‍ സംഘടിപ്പിച്ച ഉച്ചഭക്ഷണ വിതരണം യംഗ് വര്‍ക്കേഴ്‌സ് കൗണ്‍സില്‍ സംസ്ഥാന സെക്രട്ടറി ജെ. ജെ. വിഷ്ണു ഉദ്ഘാടനം ചെയ്തു. ജില്ലാ സെക്രട്ടറി അനീഷ് കുരിശിങ്കല്‍ അധ്യക്ഷത വഹിച്ചു. ജില്ലാ ജനറല്‍ സെക്രട്ടറി മലയിന്‍കീഴ് അക്ഷയ്, യുഡിഎഫ് മണ്ഡലം ചെയര്‍മാന്‍ വട്ടക്കുഴി സാംകുട്ടി, ഐഎന്‍ടിയുസി മണ്ഡലം പ്രസിഡന്‍റ് സ്വരാജ്, വെള്ളറട ബ്ലോക്ക് കോണ്‍ഗ്രസ് കമ്മിറ്റി സെക്രട്ടറിമാരായ മാഹിന്‍കുട്ടി, ജയന്‍, ബൂത്ത് പ്രസിഡന്‍റ് വിജയന്‍ തുടങ്ങിയവര്‍ പങ്കെടുത്തു. വിതുര : കോൺഗ്രസ് തോളിക്കോട് മണ്ഡലം കമ്മിറ്റി തോട്ടുമുക്ക് ജംഗ്ഷനിൽ അനുസ്മരണം സംഘടിപ്പിച്ചു. വാർഡ് പ്രസിഡന്‍റ് ഹക്കീമിന്‍റെ അധ്യക്ഷതയിൽ ഡിസിസി ജനറൽസെക്രട്ടറി തോട്ടുമുക്ക്അൻസർ ഉദ്ഘാടനം ചെയ്തു. മണ്ഡലം ഭാരവാഹികളായ സുരേന്ദ്രൻ,സജിത് പുളിമൂട്, പൊൻപാറരവി,വേലപ്പൻ, ഷീല യൂത്ത് കോൺഗ്രസ് മണ്ഡലം പ്രസിഡൻറ് ഷെഹിൻ ,ഹക്കീം, അഷ്റഫ്,ബഷീർ,ജാനറ്റ്,സലിം,വിജയൻ തുടങ്ങിയ നേതാക്കൾ പങ്കെടുത്തു. പൂവച്ചൽ: ഛായാചിത്രത്തിൽ പുഷ്പാർച്ചന നടത്തി പൂവച്ചൽ മണ്ഡലം കോൺഗ്രസ് കമ്മിറ്റി ഉമ്മൻ ചാണ്ടി അനുസ്മരണം സംഘടിപ്പിച്ചു. മണ്ഡലം കോൺഗ്രസ് കമ്മിറ്റി പ്രസിഡന്‍റ് കട്ടയ്ക്കോട് തങ്കച്ചന്‍റെ അധ്യഷതയിൽ മുൻ ബ്ലോക്ക് പ്രസിഡന്‍റ് സി.ആർ. ഉദയകുമാർ ഉദ്ഘാടനം ചെയ്തു. യുഡിഎഫ് ചെയർമാൻ സത്യദാസ് പൊന്നെടുത്ത കുഴി, മുൻ പഞ്ചായത്ത് പ്രസിഡന്‍റ് പി. രാജേന്ദ്രൻ, അഡ്വ. ആർ. രാഘവ ലാൽ, സുരേന്ദ്രൻനായർ, കെ. ശശീന്ദ്രൻ, ഉണ്ണി,ലിജു സാമുവൽ, അലി അക്ബർ, സുരേഷ്കുമാർ, മുജീബ്. ജയൻ, ഷീജാബീവി, യൂജിൻ, ഫ്രഡറിക്, ബിനു, ബെൻ റോയ്, ബാലസ്, ഷാഹുൽ ഹമീദ്, റ്റിജു,ജോൺ ക്രിസ്റ്റഫർ, സ്റ്റീഫൻ, സരസൻ തുടങ്ങിയവർ പങ്കെടുത്തു.

ഉമ്മന്‍ ചാണ്ടിയുടെ സംഭാവനകള്‍ കാലം മറക്കില്ല: രമേശ് ചെന്നിത്തല

തിരുവനന്തപുരം: ആധുനിക കേരളത്തിന് മുന്‍ മുഖ്യമന്ത്രി ഉമ്മന്‍ ചാണ്ടി നല്‍കിയ സംഭാവനകള്‍ കാലം മറക്കില്ലെന്ന് കോണ്‍ഗ്രസ് നേതാവ് രമേശ് ചെന്നിത്തല. തിരുവനന്തപുരം ഡിസിസി സെന്‍ട്രല്‍ സ്റ്റേഡിയത്തില്‍ സംഘടിപ്പിച്ച ഉമ്മന്‍ ചാണ്ടി അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജനങ്ങളുടെ മുന്നില്‍ എന്നും തെളിഞ്ഞു നില്‍ക്കുന്ന ശുക്രനക്ഷത്രമാണ് ഉമ്മന്‍ ചാണ്ടിയെന്നും അദേഹം പറഞ്ഞു. ഡിസിസി അധ്യക്ഷന്‍ പാലോട് രവി അധ്യക്ഷത വഹിച്ചു. ഉമ്മന്‍ ചാണ്ടി അനുസ്മരണ സമ്മേളനത്തോടനുബന്ധിച്ചു സംഘടിപ്പിച്ച സെമിനാര്‍ കോണ്‍ഗ്രസ് നേതാവ് കെ.മുരളീധരന്‍ ഉദ്ഘാടനം ചെയ്തു. മുന്‍ ചീഫ് സെക്രട്ടറി ജിജി തോംസണ്‍ വിഷയാവതരണം നടത്തി. ചടങ്ങില്‍ ഉമ്മന്‍ ചാണ്ടി കാരുണ്യ പുരസ്‌കാരം ഗോപിനാഥ് മുതുകാടിനു സമ്മാനിച്ചു. സിപിഐ നേതാവ് സി.ദിവാകരന്‍, മുതിര്‍ന്ന മാധ്യമ പ്രവര്‍ത്തകന്‍ സണ്ണിക്കുട്ടി ഏബ്രഹാം തുടങ്ങിയവര്‍ പ്രസംഗിച്ചു.

ക്ഷീരവിപ്ലവം, സോമരാജൻ വക

ആർ. സി. ദീപു നെടുമങ്ങാട്: വീട്ടു വളപ്പിൽ പശുക്കളെ വളർത്തി നാട്ടുകാർക്ക് ശുദ്ധമായ പശുവിൻ പാൽ എത്തിച്ചു കൊടുത്തു സംതൃപ്തി നേടുന്ന പൊതു പ്രവർത്തകൻ മാതൃകയാകുന്നു. ഇടിഞ്ഞാർ അടിയോടി കുന്നിൻ ചെരിവിലെ ചെറുവേലി ഹൗസിൽ സോമരാജനാണ് തന്‍റെ വീട്ടുവളപ്പിലെ ഫാം കൃഷി യിലൂടെ ശ്രദ്ധേയനാകുന്നത്. ഐഎൻടിയുസി നേതാവും മുൻ പഞ്ചായത്തംഗവുമായ സോമരാജന് സ്വന്തമായി 20പശുക്കളാണുള്ളത്. ഇടിഞ്ഞാർ ശ്രീ മാടൻ തമ്പുരാൻ ക്ഷേത്രത്തിൽ സുപ്രഭാത കീർത്തനം ഉയരും മുൻപ് സോമരാജൻ തന്‍റെ ഗോശാലയും പരിസരവും വൃത്തിയാക്കും.തീറ്റ കൊടുത്ത് പശുക്കളെ കുളിപ്പിച്ച് തയാറാക്കി നിർത്തും. സുന്ദരിയെയും മകൾ മീനാക്ഷിയെയുമാണ് ആദ്യം കുളിപ്പിക്കുക. ഗോകുലത്തിലെ മുതിർന്ന അംഗങ്ങളാണ് ഇരുവരും. നല്ല പച്ചപ്പുല്ലും പച്ചവെള്ളവും ഉഴുന്നിന്‍റെ തവിടും ചേർത്താണ് ഭോജനം. പാൽ ചുരത്തുന്നതിൽ ആർക്കുമില്ല യാതൊരു വൈമനസ്യവും. സോമരാജൻ പാലുമായി എത്തിയ ശേഷമേ പെരിങ്ങമ്മല ക്ഷീരോത്പാദക സംഘം ഉണരുകയുള്ളു. ദിവസവും 100 ലിറ്റർ പാലാണ് കണ്ണിലുണ്ണികളായ പശുക്കൾ ചുരത്തുന്നത്. പെരിങ്ങമ്മല പഞ്ചായത്തിലെ കടകളിലും വീടുകളിലും ശുദ്ധമായ പശുവിൻ പാൽ എത്തിക്കാൻ കഴിയുന്നതിന്‍റെ ചാരിതാർഥ്യത്തിലാണ് ഈ പൊതുപ്രവർത്തകൻ. മുൻ ഗ്രാമ പഞ്ചായത്ത് മെമ്പർ , ഐഎൻടിയുസി സംസ്ഥാന ജനറൽ കൗൺസിൽ മെമ്പർ. ദീർഘകാലം ഇടിഞ്ഞാർ ശ്രീ മാടൻ തമ്പുരാൻ ക്ഷേത്ര സമിതിയുടെ രക്ഷാധികാരി എന്നീ നിലകളിൽ സോമരാജൻ തന്‍റെ വ്യക്തിമുദ്ര പതിപ്പിച്ചിട്ടുണ്ട്. നാലു പതിറ്റാണ്ടു പിന്നിടുന്ന പൊതുജീവിതത്തിനിടയിൽ ഉപജീവനത്തിനായി കൂലിപ്പണിയും ചെയ്തിട്ടുണ്ട്. പശുവളർത്തൽ കേവലം ജീവനോപാധി മാത്രമല്ല സോമരാജന്. മിണ്ടാപ്രാണികളോടുള്ള കരുതൽ കൂടിയാണ്. പാലോട് നിന്ന് ഒൻപത് കി.മീറ്റർ മാറി മങ്കയം ഇക്കോ ടൂറിസം സെന്‍റർ റോഡിൽ ഇടിഞ്ഞാർ അടിയോടി കുന്നിൻ ചെരിവിലാണ് ഗോശാല. അതിന് സമീപം നിറഞ്ഞു തുളുമ്പിയൊഴുകുന്ന ചിറ്റാർപ്പുഴ. ആരുടെയും മനം കവരുന്ന പ്രകൃതിയുടെ മടിത്തട്ടിൽ ഫാം ടൂറിസത്തിന് പശ്ചാത്തലമൊരുങ്ങിയാൽ അത് ഒരു നാടിന്‍റെ മുഖച്ഛായ മാറ്റുമെന്നുറപ്പ്. തന്‍റെ നാട്ടുകാർക്ക് കൂടി ഉപകാരപ്രദമാകുന്ന രീതിയിൽ ഫാം ടൂറിസം നടപ്പാക്കുകയാണ് സ്വപ്നം എന്ന് സോമരാജൻ പറഞ്ഞു.

ജ്വല്ലറിക്കെതിരേയുള്ള പരാതികള്‍ 150 പിന്നിട്ടു

പേരൂര്‍ക്കട: പണം, സ്വര്‍ണ്ണാഭരണത്തട്ടിപ്പുമായി ബന്ധപ്പെട്ട് അല്‍ മുക്താദിര്‍ ജ്വല്ലറിക്കെതിരേ ഫോര്‍ട്ട് സ്റ്റേഷനില്‍ ലഭിച്ച പരാതികള്‍ 150 കടന്നു. ഇന്നലെവരെ 159 പരാതികളാണ് ഇവിടെ ലഭിച്ചത്. പഴവങ്ങാടിയിലാണ് ജ്വല്ലറിയുടെ പ്രധാന ഷോറൂമുള്ളത്. ഇതിപ്പോള്‍ അടച്ചുപൂട്ടിയ നിലയിലാണ്. കസ്റ്റമേഴ്സ് നല്‍കുന്ന പഴയ സ്വര്‍ണ്ണാഭരണങ്ങളും പണവും നിശ്ചിത വര്‍ഷത്തേക്ക് ഫിക്സഡ് ഡപ്പോസിറ്റായി സ്വീകരിക്കുമെന്നും അവര്‍ക്ക് ആകര്‍ഷകമായ പലിശ നല്‍കുമെന്നുമുള്ള ജ്വല്ലറിയുടെ വാഗ്ദാനത്തില്‍ കുടുങ്ങി നിരവധി പേര്‍ക്കാണ് ആഭരണങ്ങളും പണവും നഷ്ടപ്പെട്ടത്. ഒരു നിശ്ചിത കാലാവധിയിലേക്ക് ഡെപ്പോസിറ്റ് ചെയ്യുന്നവര്‍ സ്വര്‍ണ്ണാഭരണങ്ങള്‍ വാങ്ങാനെത്തുമ്പോള്‍ അവര്‍ക്കു പലിശ നല്‍കുമെന്നും പുതിയ ആഭരണങ്ങള്‍ക്ക് പണിക്കൂലി ഈടാക്കില്ലെന്നും വാഗ്ദാനമുണ്ടായിരുന്നു. പണം സ്ഥിരനിക്ഷേപം നടത്തുന്നവര്‍ക്ക് 12.5 ശതമാനം മുതല്‍ 19 ശതമാനം വരെ പലിശയാണ് ജ്വല്ലറി വാഗ്ദാനം ചെയ്തിരുന്നത്. ചിലര്‍ക്ക് ഇത്തരത്തില്‍ ആറുമാസം വരെ പലിശ ലഭിച്ചതു ആദ്യമാദ്യം ജ്വല്ലറിയോടുള്ള വിശ്വാസ്യത വര്‍ദ്ധിപ്പിക്കുകയായിരുന്നു. പണവും പലിശയും ഉള്‍പ്പെടെ വീണ്ടും നിക്ഷേപിച്ച് കബളിപ്പിക്കപ്പെട്ടവരും നിരവധിയാണ്. വിഴിഞ്ഞം, മുട്ടത്തറ, ഫോര്‍ട്ട്, കരമന, പേട്ട, ആറ്റിങ്ങല്‍, വര്‍ക്കല, കല്ലമ്പലം, വെഞ്ഞാറമൂട്, കരകുളം, പൂജപ്പുര, വട്ടിയൂര്‍ക്കാവ്, നെയ്യാറ്റിന്‍കര തുടങ്ങിയ നിരവധി സ്ഥലങ്ങളില്‍ നിന്നു പരാതികള്‍ ലഭിച്ചിട്ടുണ്ട്. പണം നഷ്ടപ്പെട്ടതുമായി ബന്ധപ്പെട്ട് കഴിഞ്ഞ ഒരുമാസമായി പഴവങ്ങാടിയിലെ അടഞ്ഞുകിടക്കുന്ന ജ്വല്ലറിക്കുമുന്നില്‍ നിരവധി പേര്‍ സമരമിരിക്കുന്നുണ്ട്. ജ്വല്ലറി ഉടമയുടെ പൂജപ്പുരയിലെ വസതിക്കുമുന്നില്‍ കൊല്ലം സ്വദേശിയായ വയോധികന്‍ കഴിഞ്ഞ ഏപ്രില്‍ മാസത്തില്‍ സമരമിരിക്കുകയും കരമന സ്വദേശികളായ നാലുപേര്‍ ആത്മഹത്യാ ശ്രമം നടത്തുകയും ചെയ്തിരുന്നു.

സെന്‍റ് തോമസ് സ്കൂളിൽ പാർലമെന്‍റ് തെരഞ്ഞെടുപ്പ്

പോത്തൻകോട്: പൊതുതെരഞ്ഞെടുപ്പിന്‍റെ മാതൃകയിൽ സെന്‍റ് തോമസ് യുപി സ്കൂളിൽ സ്കൂൾ പാർലമെന്‍റ് തെരഞ്ഞെടുപ്പ് സംഘടിപ്പിച്ചു. ബാലറ്റ് പേപ്പറും വോട്ടേഴ്സ് ലിസ്റ്റും പോളിംഗ് ബൂത്തുമുൾപ്പെടെയുള്ള ക്രമീകരണങ്ങളോടെ തികച്ചും പൊതു തെരഞ്ഞെടുപ്പിന്‍റെ മാതൃകയിൽ നടന്ന തെരഞ്ഞെടുപ്പിന് സ്കൂൾ ഹെഡ്മാസ്റ്റർ ബിജു ജോബോയ് നേതൃത്വം നൽകി. പോളിംഗ് ഓഫീസർമാർ, പ്രിസൈഡിംഗ് ഓഫീസർമാർ എന്നിവ വിദ്യാർഥികൾതന്നെ ഏറ്റെടുത്തതും ശ്രദ്ധേയമായി. നോമിനേഷൻ നൽകിയ 14 പേരിൽനിന്നും ഏഴാം ക്ലാസിലെ അനന്തു ചന്ദ്രൻ 150 വോട്ടുകൾ നേടി സ്കൂൾ ലീഡറായി തെരഞ്ഞെടുക്കപ്പെട്ടു. 66 വോട്ടുകൾ നേടിയ ആറാം ക്ലാസിലെ കൃതി ഗോപിനാഥാണ് ഹെഡ് ഗേൾ.

ട്രിമ-2025 മാനേജ്മെന്‍റ് കണ്‍വൻഷൻ 30ന് തുടങ്ങും

തിരുവനന്തപുരം: ട്രിവാൻഡ്രം മാനേജ്മെന്‍റ്് അസോസിയേഷൻ സംഘടിപ്പിക്കുന്ന ട്രിമ -2025 വാർഷിക മാനേജ്മെന്‍റ്കണ്‍വൻഷൻ 30, 31 തീയതികളിൽ തിരുവനന്തപുരത്ത് നടക്കും. ഹോട്ടൽ ഒ ബൈ താമരയിലാണു കണ്‍വൻഷൻ നടക്കുന്നത്. അത്യാധുനിക സാങ്കേതികവിദ്യകളും സുസ്ഥിര രീതികളും ഉപയോഗിച്ച് സംസ്ഥാനത്തിന്‍റെ സാധ്യതകൾ പരമാവധി ഉപയോഗപ്പെടുത്തി കേരളത്തിന്‍റെ വളർച്ച വർധിപ്പിക്കുന്നതിലാണ് കണ്‍വൻഷനിലെ ചർച്ചകൾ ശ്രദ്ധ കേന്ദ്രീകരിക്കുന്നതെന്ന് ടിഎംഎ പ്രസിഡന്‍റ് ജി. ഉണ്ണികൃഷ്ണൻ പറഞ്ഞു.ചെയർമാൻ ഡോ. എം. അയ്യപ്പൻ, സെക്രട്ടറി ഉണ്ണികൃഷ്ണൻ ഗോപിനാഥ്, കോ-ചെയർ പി.സി. ഹരികേഷ് എന്നിവരും പത്രസമ്മേളനത്തിൽ പങ്കെടുത്തു. കണ്‍വൻഷന്‍റെ ഓണ്‍ലൈൻ ഡെലിഗേറ്റ് രജിസ്ട്രേഷൻ പുരോഗമിക്കുകയാണ്.

ക്വിസ് ചാമ്പ്യൻഷിപ്പ് സെന്‍റ് ഗൊരേത്തീസ് സ്കൂളിന്

തിരുവനന്തപുരം: നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിന്‍റെ രജത ജൂബിലി ആഘോഷത്തിന്‍റെ ഭാഗമായി സംഘടിപ്പിച്ച ഇന്‍റർ സ്കൂൾ ഇവാനോ ക്വിസിൽ നാലാഞ്ചിറ സെന്‍റ് ഗൊരേത്തീസ് സ്കൂൾ ചാമ്പ്യൻഷിപ് കരസ്ഥമാക്കി. സഭാ സ്ഥാപകൻ ധന്യൻ മാർ ഈവാനിയോസിന്‍റെ സ്മരണക്കായിട്ടാണ് എല്ലാ വർഷവും ഇവാനോ ക്വിസ് സംഘടിപ്പിക്കുന്നതെന്ന് പ്രിൻസിപ്പൽ ഫാ. ജോസ് ചരുവിൽ പറഞ്ഞു. സെന്‍റ് മേരീസ് ഹയർ സെക്കൻഡറി സ്കൂൾ , കിഴക്കേക്കര സെന്‍റ് ജോൺസ് സ്കൂൾ ,അബൽ നവജീവൻ ബഥനി വിദ്യാലയ ,നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂൾ ,നാലാഞ്ചിറ എന്നിവർ രണ്ടുമുതൽ അഞ്ചു വരെ സ്ഥാനങ്ങൾക്ക് അർഹത നേടി. സമാപന സമ്മേളനത്തിൽ പ്രിൻസിപ്പൽ ഫാ. ജോസ് ചരുവിൽ അധ്യക്ഷത വഹിച്ചു. ബഥനി തിരുവനന്തപുരം പ്രൊവിൻഷൽ സുപ്പീരിയർ സിസ്റ്റർ സാന്ദ്ര സമ്മാനദാനം നിർവഹിച്ചു. പ്രമുഖ സ്പിരിച്വൽ ക്വിസ് മാസ്റ്റർ ഫാ. ജോബിൻ,കൺവീനർ അജുമോൻ ,വൈസ് പ്രിൻസിപ്പൽ ആർ.സി. അജീഷ് കുമാർ ,പിടിഎ പ്രസിഡന്‍റ് ഡോ. ജോജു ജോൺ എന്നിവർ പ്രസംഗിച്ചു.

ബിജിലാൽ ഇനിയും ജീവിക്കും, ആറുപേരിലൂടെ

മാറനല്ലൂർ: മസ്തിഷ്‌ക മരണം സംഭവിച്ച ബിജിലാല്‍ ആറുപേരിലൂടെ ഇനിയും ജീവിക്കും. തിരുവനന്തപുരം കിഴാറൂര്‍ പശുവെണ്ണറ കാറാത്തലവിളയില്‍ ബിജിലാല്‍ കൃഷ്ണ (42) സഞ്ചരിച്ചിരുന്ന ബൈക്ക് ടാങ്കര്‍ലോറിയുമായി കൂട്ടിയിച്ച് കഴിഞ്ഞ ഏഴിന് കവടിയാറിൽ അപകടം നടക്കുന്നത്. തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയില്‍ കഴിയുന്നതിനിടെ വ്യാഴാഴ്ച മസ്തിഷ്‌ക മരണം സംഭവിച്ചു. ബന്ധുക്കള്‍ അവയവ ദാനത്തിന് സന്നദ്ധരായതോടെ ബിജിലാലിന്‍റെ രണ്ട് വൃക്കയും കരളും ഹൃദയവാല്‍വും രണ്ട് നേത്രപടലങ്ങളും വിവിധ ആശുപത്രികളില്‍ ചികിത്സയില്‍ കഴിയുന്ന രോഗികള്‍ക്കായി നല്‍കാന്‍ തീരുമാനിക്കുകയായിരുന്നു. ഒരു വൃക്ക തിരുവനന്തപുരം മെഡിക്കല്‍കോളജിലേക്കും മറ്റൊരു വൃക്കയും കരളും തിരുവനന്തപുരം കിംസ് ആശുപത്രിയിലേക്കും ഹൃദയവാല്‍വ് ശ്രീചിത്തിര തിരുന്നാള്‍ ഇന്‍സ്റ്റിറ്റ്യൂട്ടിലേക്കും നേത്രപടലം തിരുവനന്തപുരം റീജണല്‍ ഇന്‍സ്റ്റിറ്റ്യൂട്ട് ഓഫ് ഒഫ്താല്‍മോളജിയിലേക്കുമാണ് നല്‍കിയത്. കേരള സ്റ്റേറ്റ് ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്റ് ഓര്‍ഗനൈസേഷന്‍റെ (കെ-സോട്ടോ) നേതൃത്വത്തിലാണ് അവയവമാ കൈമാറ്റ നടപടിക്രമങ്ങള്‍ പൂര്‍ത്തീകരിച്ചത്. കാട്ടാക്കട മാറനല്ലൂരിനു സമീപം പുന്നാവൂരില്‍ സലൂണ്‍ നടത്തുകയായിരുന്നു ബിജിലാല്‍. വിജിയാണ് സഹോദരി.

വലിയതുറ ആശുപത്രിയിൽ രണ്ടു മാസത്തിനുള്ളിൽ കിടത്തി ചികിത്സ ആരംഭിക്കണം: മനുഷ്യാവകാശ കമ്മീഷൻ

തിരുവനന്തപുരം: വലിയതുറ തീരദേശ സ്പെഷാലിറ്റി ആശുപത്രിയിൽ കിടത്തിചികിത്സയും 24 മണിക്കൂർ സേവനവും രണ്ടു മാസത്തിനുള്ളിൽ പുനരാരംഭിക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ്. ഇതിനുവേണ്ട ി ജില്ലാ മെഡിക്കൽ ഓഫീസറും നഗരസഭാ സെക്രട്ടറിയും സംയുക്തമായി യോഗം ചേർന്ന് നഗരസഭയും ആരോഗ്യവകുപ്പും ചെയ്യേണ്ട കാര്യങ്ങളെക്കുറിച്ചു വ്യക്തത വരുത്തണമെന്നും കമ്മീഷൻ ഉത്തരവിൽ പറഞ്ഞു. സ്വീകരിച്ച നടപടികൾ ഡിഎംഒയും നഗരസഭാ സെക്രട്ടറിയും കമ്മീഷനെ അറിയിക്കണം. ഐപി വാർഡിന്‍റെ അറ്റകുറ്റപണികൾ തീർത്ത് കെട്ടിടം നഗരസഭ അടിയന്തരമായി കൈമാറണം. ഡോക്ടർമാരുടെയും മറ്റു ജീവനക്കാരുടെയും സേവനം ഡിഎംഒ ഉറപ്പാക്കണമെന്നും കമ്മീഷൻ ആവശ്യപ്പെട്ടു.

പനങ്ങോട് സഹകരണ സംഘത്തിൽ വെട്ടിപ്പ്; രണ്ടുപേർ അറസ്റ്റിൽ

കോവളം: ബിജെപി ഭരിക്കുന്ന വെങ്ങാനൂർ പനങ്ങോട് റൂറൽ ഡെവലപ്മെന്‍റ് സഹകരണ സംഘത്തിൽ ലക്ഷങ്ങളുടെ തിരിമറി. സംഘം വൈസ് പ്രസിഡന്‍റും സെക്രട്ടറിയും അറസ്റ്റിൽ. പ്രസിഡന്‍റുൾപ്പെടെയുള്ളവർക്കായി കോവളം പോലീസ് അന്വേഷണം ആരംഭിച്ചു. മുട്ടയ്ക്കാട് ഡിവിഷൻ ബ്ലോക്ക് അംഗവും ബോർഡ് വൈസ് പ്രസിഡന്‍റുമായ മുട്ടക്കാട് ചൈത്രത്തിൽ കെ.എസ്. സാജൻ, സെക്രട്ടറി വെങ്ങാനൂർ ഗൗരിനന്ദനത്തിൽരമേഷ് എന്നിവരാണ് അറസ്റ്റിലായത്. പ്രസിഡന്‍റ് സതീഷ് കുമാർ ഉൾപ്പെടെയുള്ളവർ ഒളിവിലാണെന്ന് പോലീസ് അറിയിച്ചു. പരാതി നൽകിയ നാല് പേർക്കായി മാത്രം ബാങ്ക് 65ലക്ഷത്തോളം രൂപ നൽകാനുണ്ട്. എല്ലാവരും സർക്കാർ ഉദ്യോഗസ്ഥരായിരുന്നപ്പോഴും പെൻഷൻ പറ്റിയപ്പോഴുമായി നിക്ഷേപിച്ച തുകയാണ് തിരികെ നൽകാനുള്ളത്. പ്രായാധിക്യത്തിന്‍റെ അവശതയിലായവർ തങ്ങളുടെ നിക്ഷേപം തിരികെ ആവശ്യപ്പെട്ടിട്ടും കിട്ടാതെ വന്നതോടെയാണ് പരാതിയുമായി രംഗത്തെത്തിയത്. ഉയർന്ന പലിശ നൽകാമെന്ന വാഗ്ദാനം നൽകി ആൾക്കാരിൽ നിന്ന് ഡിപ്പോസിറ്റായി വാങ്ങിയ കോടികളാണ് അധികൃതർ മുക്കിയതെന്ന് പരാതിയുണ്ട്. ഇനിയും കൂടുതൽ പേർ പരാതിയുമായി വരാൻ സാധ്യതയുണ്ടെന്നും കോവളം പോലീസ് കരുതുന്നു. ഇതിനോടകം ചിലർ മുൻകൂർ ജാമ്യവും നേടിയെന്ന് പോലിസ് പറയുന്നു. അറസ്റ്റിലായവരെ കോടതിയിൽ ഹാജരാക്കി റിമാൻഡു ചെയ്തു.

അച്ഛന്‍ ആത്മഹത്യ ചെയ്ത സംഭവം; മകനെതിരേ പ്രേരണാക്കുറ്റം

വെള്ളറട: അച്ഛന്‍ ആത്മഹത്യ ചെയ്ത സംഭവത്തില്‍ മകന്‍ അനീഷിനെ (43) പ്രേരണാക്കുറ്റം ചുമത്തി നെയ്യാറ്റിന്‍കര കോടതി റിമാന്‍ഡ് ചെയ്തു. നെയ്യാറ്റിന്‍കരയിലെ ഒറ്റശേഖരമംഗലം സ്വദേശിയായ 74കാരനായ ചന്ദ്രനാണ് ആത്മഹത്യ ചെയ്തത്. കെഎസ്ആര്‍ടിസിയില്‍ നിന്ന് വിരമിച്ച ജീവനക്കാരനായിരുന്നു ചന്ദ്രന്‍. കഴിഞ്ഞ ജനുവരി 31.ന് ചന്ദ്രന്‍ സ്വന്തം വീട്ടില്‍വച്ച് പെട്രോള്‍ ഒഴിച്ച് ആത്മഹത്യക്ക് ശ്രമിക്കുകയായിരുന്നു. ഗുരുതരമായ പൊള്ളലുകളോടെ ചികിത്സയിലിരിക്കെ ഫെബ്രുവരി ഒന്നാം തീയതി പുലര്‍ച്ചെ മരിച്ചു. ദീര്‍ഘകാലമായി കുടുംബ സ്വത്തിനെ ചൊല്ലി വീട്ടില്‍ കലഹം പതിവായിരുന്നുവെന്ന് ബന്ധുക്കളും അയല്‍വാസികളും മൊഴി നല്‍കിയിരുന്നു. തര്‍ക്കങ്ങള്‍ ചന്ദ്രനെ കടുത്ത മനോവിഷമത്തിലേക്ക് തള്ളിവിട്ടു. ഇത് ആത്മഹത്യയിലേക്ക് നയിച്ചതെന്നും, ഇതിന് പ്രധാന കാരണക്കാര്‍ അനീഷും ഭാര്യയുമാണെന്നും കാണിച്ച് ചന്ദ്രന്‍റെ മറ്റ് ബന്ധുക്കള്‍ ആര്യങ്കോട് പൊലീസില്‍ പരാതി നല്‍കി.

യുവതിയെ വെട്ടിക്കൊന്ന കേസിൽ ഭർത്താവ് കുറ്റക്കാരൻ

തിരുവനന്തപുരം: യുവതിയെ വെട്ടിക്കൊലപ്പെടുത്തിയ കേസിൽ ഭർത്താവ് കുറ്റക്കാരനെന്നു കോടതി കണ്ടെത്തി. വർക്കല ചെറുന്നിയൂരിൽ അന്പിളിച്ചന്ത കാവുവിള വീട്ടിൽ കൗസല്യയുടെ മകൾ കുഞ്ഞുമോളെ(30)വെട്ടിക്കൊലപ്പെടുത്തുകയും കൗസല്യയെ ആക്രമിച്ചു പരിക്കേൽപ്പിക്കുകയും ചെയ്ത കുഞ്ഞുമോളുടെ ഭർത്താവ് ചെറുന്നിയൂർ തൊപ്പിച്ചന്ത ദേശത്ത് മുട്ടുകോണം ചരുവിള പുത്തൻവീട്ടിൽ സുരേന്ദ്രൻ (37)നെ തിരുവനന്തപുരം അഞ്ചാം അഡീഷണൽ സെഷൻസ് കോടതി ജഡ്ജി സിജു ഷെയ്ക്ക് ആണു കുറ്റക്കാരനെന്നു കണ്ടെത്തിയത്. വർക്കല പൊലീസാണ് കേസ് രജിസ്റ്റർ ചെയ്തതും അന്വേഷണം നടത്തി കുറ്റപത്രം സമർപ്പിച്ചതും.

രാഹുല്‍ഗാന്ധി തെന്നലയുടെ വീട് സന്ദര്‍ശിച്ചു

പേരൂര്‍ക്കട: പ്രതിപക്ഷ നേതാവ് രാഹുല്‍ഗാന്ധി തെന്നല ബാലകൃഷ്ണപിള്ളയുടെ വീട് സന്ദര്‍ശിച്ചു. വട്ടിയൂര്‍ക്കാവ് നെട്ടയം മുക്കേലയിലെ വീട്ടിലാണ് ഇന്നലെ വൈകുന്നേരം 3.45നു രാഹുല്‍ഗാന്ധി എത്തിയത്. ബ്ലോക്ക് പ്രസിഡന്‍റ് വെള്ളൈക്കടവ് വേണുകുമാര്‍ ഷാള്‍ അണിയിച്ച് സ്വീകരിച്ചു. തെന്നലയുടെ വിയോഗത്തില്‍ ദു:ഖം രേഖപ്പെടുത്തിയ രാഹുല്‍ഗാന്ധി കുടുംബാംഗങ്ങളെ ആശ്വസിപ്പിച്ചു. തെന്നലയുടെ ഭാര്യ സതീദേവി, മകള്‍ നീത രാജേന്ദ്രന്‍, മരുമകന്‍ ഡോ. രാജേന്ദ്രന്‍ നായര്‍, ചെറുമകന്‍ അരവിന്ദ് എന്നിവരുമായി രാഹുല്‍ഗാന്ധി സംസാരിച്ചു. അരമണിക്കൂറോളം വീട്ടിൽ ചെലവിട്ട രാഹുല്‍ഗാന്ധിക്കൊപ്പം എഐസിസി ജനറല്‍ സെക്രട്ടറിമാരായ കെ.സി. വേണുഗോപാല്‍, പ്രിയദാസ് മുന്‍ഷി, കെപിസിസി പ്രസിഡന്‍റ് സണ്ണി ജോസഫ്, ഡിസിസി പ്രസിഡന്‍റ് പാലോട് രവി, രമേശ് ചെന്നിത്തല, കെ. മുരളീധരന്‍, അടൂര്‍ പ്രകാശ്, രാജ്മോഹന്‍ ഉണ്ണിത്താന്‍‌, പി.സി വിഷ്ണുനാഥ്, ടി. ശരത്ചന്ദ്രപ്രസാദ്, കാച്ചാണി സനല്‍ എന്നിവരുമുണ്ടായിരുന്നു.

മേൽപ്പാല നിർമാണം തുടങ്ങുന്നു; വെഞ്ഞാറമൂടിൽ ഗതാഗത നിയന്ത്രണം

വെഞ്ഞാറമൂട് : വെഞ്ഞാറമൂട് മേൽപ്പാല നിർമാണത്തിന്‍റെ പ്രാഥമിക പ്രവർത്തികൾ 25 ന് തുടങ്ങും. ആദ്യഘട്ടമായി ഇലട്രിക്കൽ കേബിൾ വർക്കുകളാണ് തുടങ്ങുന്നത്. ഇതിനു മുന്നോടിയായി ഗതാഗതം തിരിച്ചു വിടാൻ ഇന്നലെ വെഞ്ഞാറമൂട് പോലിസ് സ്റ്റേഷനിൽ ഡി.കെ. മുരളി എംഎൽഎ യുടെ അധ്യക്ഷതയിൽ ചേർന്ന യോഗത്തിൽ തീരുമാനമായി. തിരുവനന്തപുരം ഭാഗത്തു നിന്നും വെഞ്ഞാറമൂട് ഭാഗത്തേക്ക് വരുന്ന കെഎസ്ആർടിസി ബസ് ഉൾപ്പടയുള്ള വാഹനങ്ങൾ തൈക്കാട് സമന്വയ നഗർ വഴി പാകിസ്ഥാൻമുക്കിൽ വന്ന് വെഞ്ഞാറമൂട് ജംഗ്ഷൻ വഴി കൊട്ടാരക്കര ഭാഗത്തേക്ക് പോകും. കെഎസ്ആർടിസി ബസുകൾ സ്റ്റാൻഡിൽ പ്രവേശിക്കാതിരിക്കാൻ പാകിസ്ഥാൻ മുക്കിൽ കെഎസ്ആർടിസി ഔട്ട് പോസ്റ്റ് സ്ഥാപിക്കും. സമന്വയ നഗർ മുതൽ പാകിസ്ഥാൻമുക്ക് വരയുള്ള ഭാഗങ്ങളിലെ ഇലട്രിക്ക് ലൈനുകൾ ഉയർത്തി കെട്ടുന്നതിലേക്കായി കെഎസ്ഇബിക്ക് നിർദേശം നൽകിയിട്ടുണ്ട്. ആറ്റിങ്ങൽ നെടുമങ്ങാട് റോഡ് - ട്രാഫിക് ഡൈവേർഷൻ ആദ്യ ഘട്ടത്തിൽ ഇല്ല. കൊട്ടാരക്കര ഭാഗത്തുനിന്നും തിരുവനന്തപുരം ഭാഗത്തേക്ക് പോകുന്ന വാഹനങ്ങൾ ഔട്ടർ റിംഗ് റോഡ് വഴി പോകണം.(അമ്പലമുക്ക് –പാലാംകോണം റോഡ്). കൊട്ടാരക്കര ഭാഗത്തുനിന്നും ഗോകുലം മെഡിക്കൽ കോളജിലേക്ക് പോകുന്ന വാഹനങ്ങൾ അമ്പലമുക്ക് വഴി ഗോകുലം മെഡിക്കൽ കോളജിൽ പോകണം. ഇന്നർ റിംഗ് റോഡ് വർക്ക് പൂർത്തിയാകുന്ന മുറയ്ക്ക് കൊട്ടാരക്കര ഭാഗത്തുനിന്നും തിരുവനന്തപുരം ഭാഗത്തേക്ക് പോകുന്ന കെഎസ് ആർടിസി ബസുകൾ ഇന്നർ റിംഗ് റോഡ് വഴി(വെഞ്ഞാറമൂട് പോലീസ് സ്റ്റേഷന്‍റെ ഭാഗത്തുനിന്നും ഇടത്തോട്ട് ചന്ത വഴി ) ഡിപ്പോയിൽ പ്രവേശിക്കുകയും തിരിച്ച് ഔട്ടർ റിംഗ് റോഡ് വഴി (പാലാംകോണം വഴി)തിരുവനന്തപുരം ഭാഗത്തേക്ക് പോകണം. അമ്പലമുക്ക് ജംഗ്ഷനിൽ നിന്നും റിംഗ് റോഡിലേക്ക് പ്രേവശിക്കുന്ന ഭാഗത്ത് വാഹനങ്ങൾ സുഗമമായി കയറുന്നതിനും ഇറങ്ങുന്നതിനു ആവശ്യമായ നടപടികൾ സ്വീകരിക്കാൻ കെഎസ്ടിപി ക്ക് നിർദേശം നൽകി. കൂടുതലായുള്ള നിർദേശങ്ങൾ വർക്കുകളുടെ ഓരോ ഘട്ടങ്ങളിലും നല്കാനും യോഗത്തിൽ തീരുമാനമായി.

വെട്ടുകാട് ഭാഗത്ത് ബോട്ട് മറിഞ്ഞു : ഒരാളെ കാണാതായി; നാലുപേർ രക്ഷപ്പെട്ടു

വലിയതുറ: ശക്തമായ തിരയില്‍ വെട്ടുകാട് പളളിക്ക് സമീപം കടലില്‍ മത്സ്യബന്ധനത്തിനായി പോകുകയായിരുന്ന അഞ്ചംഗ സംഘത്തിന്‍റെ ബോട്ട് മറിഞ്ഞു. ഒരാളെ കാണാതായി. നാലുപേര്‍ നീന്തി രക്ഷപ്പെട്ടു. വെട്ടുകാട് സ്വദേശി അനില്‍ ആന്‍ഡ്രൂ (36) വിനെയാണ് കാണാതായത്. വെട്ടുകാട് സ്വദേശികളായ വര്‍ഗീസ് , ജോണ്‍സണ്‍ , ജോബി , ടെലിക്‌സ് എന്നിവരാണ് രക്ഷപ്പെട്ടത്. ഇന്നലെ രാവിലെ 6.30 ഓടുകൂടി വെട്ടുകാട് പളളിക്കു സമീപത്തുനിന്നും കടലില്‍ ഏകദേശം 25 മീറ്റര്‍ അകലെയായി ശക്തമായ തിരയില്‍ ബോട്ട് മറിഞ്ഞത്. വെട്ടുകാട് സ്വദേശിയുടെ ക്രൈസ്റ്റ് കിംഗ് എന്ന ബോട്ടാണ് അപകടത്തില്‍പ്പെട്ടത്. സംഭവം നടന്നയുടന്‍ തന്നെ വിഴിഞ്ഞം കോസ്റ്റ് ഗാര്‍ഡിന്‍റെയും കോസ്റ്റല്‍ പോലീസിന്‍റെയും മറൈന്‍ എന്‍ഫോഴ്‌സ്‌മെന്‍റും സംയുക്തമായി തെരച്ചില്‍ നടത്തിയെങ്കിലും അനിലിനെ കണ്ടെത്താന്‍ കഴിഞ്ഞില്ല. ഇന്ന് രാവിലെ തെരച്ചില്‍ ആരംഭിക്കുമെന്ന് വിഴിഞ്ഞം കോസ്റ്റല്‍ പൊലീസ് അറിയിച്ചു. കാണാതായ അനില്‍ ആന്‍ഡ്രൂ അവിവാഹിതനാണ്.

ഭൂമി തട്ടിപ്പു കേസ്: ചന്ദ്രസേനനു ജാമ്യം

തിരുവനന്തപുരം: വ്യാജരേഖകൾ ഉണ്ടാക്കി ആൾമാറാട്ടം നടത്തി അമേരിക്കയിലുളള സ്ത്രീയുടെ വീടും വസ്തുവും തട്ടിയെടുത്ത കേസിൽ നാലാം പ്രതി ചന്ദ്രസേനന് കോടതി ജാമ്യം അനുവദിച്ചു. കേസിലെ മൂന്നാം പ്രതിയും കോണ്‍ഗ്രസ് നേതാവുമായ അനന്തപുരി മണികണ്ഠന്‍റെ മുൻകൂർ ജാമ്യം കോടതി തളളി. ജില്ലാ പ്രിൻസിപ്പൽ സെഷൻസ് കോടതിയാണ് ജാമ്യ ഹർജികൾ പരിഗണിച്ചത്. കേസിലെ ഒന്നാം പ്രതി മെറിൻ ജേക്കബിന്‍റെ റിമാൻഡ് കാലാവധി 31 വരെ നീട്ടിയ കോടതി ജാമ്യഹർജിയിൽ ഇന്നു വിധി പറയും. ശാസ്തമംഗലം ജവഹർ നഗറിൽ ഡോറ അസറിയ ക്രിപ്സിന്‍റെ ഉടമസ്ഥതയിലുളള ഒന്നര കോടി രൂപ വിലവരുന്ന ഭൂമിയും വീടുമാണ് പ്രതികൾ തട്ടിയെടുത്തു വിൽപന നടത്തിയത്. പുനലൂർ അടയമണ്‍ ചണ്ണപ്പേട്ട മണക്കാട് പുതുപറന്പിൽ വീട്ടിൽ മെറിൻ ജേക്കബ്, വട്ടപ്പാറ മരുതൂർ ചീനിവിള പാലയ്ക്കാട്ട് വീട്ടിൽ വസന്ത എന്നിവർ ചേർന്ന് വെണ്ടറായ അനന്തപുരി മണികണ്ഠന്‍റെ സഹായത്താൽ ഭൂമി തട്ടിയെടുത്ത് ചന്ദ്രസേനന് വിലയാധാരമായി നൽകുകയായിരുന്നു. ഭൂമി സംബന്ധമായ രേഖകൾക്ക് വീടു സൂക്ഷിപ്പുകാരൻ സബ് രജിസ്ട്രാർ ഓഫീസിൽ എത്തിയപ്പോഴാണ് തട്ടിപ്പ് നടന്ന വിവരം അറിയുന്നത്. യഥാർത്ഥ പ്രമാണം ഹാജരാക്കിയില്ല പേരൂർക്കട: കവടിയാർ ജവഹർ നഗറിലെ വസ്തു തട്ടിപ്പുമായി ബന്ധപ്പെട്ട് യഥാർത്ഥ പ്രമാണം ഇനിയും ഹാജരാക്കിയില്ല. ചന്ദ്രസേനന്‍റെ മരുമകൻ അനിൽ തമ്പിയുടെ കൈവശമാണ് അസ്സൽ പ്രമാണം ഉള്ളത്. ഇത് ഹാജരാക്കുന്നതിന് മ്യൂസിയം പോലീസ് ഇദ്ദേഹത്തിന് രണ്ട് ദിവസത്തെ സാവകാശം അനുവദിച്ചിരുന്നു. എന്നാൽ സമയപരിധി കഴിഞ്ഞിട്ടും ഒറിജിനൽ പ്രമാണം ഇദ്ദേഹം ഹാജരാക്കിയിട്ടില്ല.

ടെക്സ്റ്റൈയിൽ ഉടമയും വനിതാ മാനേജരും കടയിൽ തൂങ്ങി മരിച്ച നിലയിൽ

കൊല്ലം: ആയൂരിൽ വസ്ത്ര വ്യാപാരശാലയുടെ ഉടമയെയും വനിതാ മാനേജരെയും ഒരേ മുറിയിൽ തൂങ്ങി മരിച്ച നിലയിൽ കണ്ടെത്തി. എംസി റോഡിൽ ആയൂർ ടൗണിലെ ലാവിഷ് ടെക്സ്റ്റൈൽസ് ഉടമ മലപ്പുറം കരിപ്പൂർ കരിപ്പത്തൊടിയിൽ വീട്ടിൽ അലി (35), ചടയമംഗലം പള്ളിക്കൽ ചന്ദ്രവിലാസത്തിൽ ദിവ്യാമോൾ(40) എന്നിവരാണ് മരിച്ചത്. ഇന്നലെ രാവിലെ എട്ടോടെയാണ് വസ്ത്രവ്യാപാരശാലയുടെ താഴെ നിലയിലെ വിശ്രമമുറിയിൽ രണ്ട് ഫാനുകളിലായി ഇരുവരെയും തൂങ്ങി മരിച്ച നിലയിൽ കണ്ടെത്തിയത്. കഴിഞ്ഞദിവസം രാത്രി വൈകിയും ദിവ്യാമോൾ വീട്ടിലെത്താത്തതിനെ തുടർന്ന് ബന്ധുക്കൾ രാവിലെ കടയിലെത്തി ജീവനക്കാരനൊപ്പം നടത്തിയ പരിശോധനയിലാണ് മൃതദേഹങ്ങൾ കണ്ടെത്തിയത്. പോലീസ് എത്തി വാതിൽ തകർത്ത് അകത്തുകടന്ന് മരണം സ്ഥിരീകരിക്കുകയായിരുന്നു. ഫോറൻസിക് ഉദ്യോഗസ്ഥരെത്തി തെളിവെടുപ്പ് നടത്തി. ഇൻക്വിസ്റ്റ് പൂർത്തിയാക്കി ഉച്ചയോടെ ഇരു മൃതദേഹങ്ങളും പാരിപ്പള്ളി ഗവ.മെഡിക്കൽ കോളജ് ആശുപത്രിയിലേക്ക് മാറ്റി. പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുകൊടുക്കും. ഇരുവരും പ്രണയത്തിലായിരുന്നുവെന്നും സാമ്പത്തിക വിഷയത്തെച്ചൊല്ലിയുണ്ടായ പ്രശ്നങ്ങളാകാമെന്നുമാണ് മറ്റ് ജീവനക്കാർ പോലീസിൽ മൊഴി നൽകിയിട്ടുള്ളത്. പോസ്റ്റുമോർട്ടത്തിന് ശേഷമേ കൂടുതൽ വിവരങ്ങൾ വ്യക്തമാവുകയുള്ളൂ. ചടയമംഗലം പോലീസ് കേസെടുത്തു. വർക്കലയിലെ ചെടിവില്പന കേന്ദ്രത്തിലെ ജീവനക്കാരനായ രാജീവാണ് ദിവ്യാമോളുടെ ഭർത്താവ്. മക്കൾ: അനുശ്രീ, ശ്രേയശ്രീ. അലിക്ക് ഭാര്യയും മൂന്ന് മക്കളുമുണ്ട്.

ധാന്യം പൊടിക്കുന്ന മില്ലിന്‍റെ ബെല്‍റ്റിൽ കുടുങ്ങി ജീവനക്കാരി മരിച്ചു

വെഞ്ഞാറമൂട് : ധാന്യം പൊടിക്കുന്ന‍ മില്ലില്‍ പ്രവര്‍ത്തിച്ചു കൊണ്ടിരുന്ന അരിപ്പൊടി വറുക്കുന്ന യന്ത്രത്തിന്‍റെ ബെല്‍റ്റിലേക്ക് വീണ് ജീവനക്കാരിക്ക് ദാരുണാന്ത്യം. പുളിമാത്ത് പാറമുകള്‍ തെക്കുംകര പുത്തന്‍ വീട്ടില്‍ ഉണ്ണിയുടെ ഭാര്യ ബീനയാണ് (45) മരിച്ചത്. കഴിഞ്ഞദിവസം ഉച്ചകഴിഞ്ഞ് മൂന്നിന് വെഞ്ഞാറമൂട് ജംഗ്ഷനില്‍ നെല്ലനാട് പഞ്ചായത്ത ഓഫീസിന് സമീപമുള്ള ആരുഡിയില്‍ ഫ്ളവര്‍ മില്ലിലായിരുന്നു സംഭവം. അരി വറുത്ത് കഴിഞ്ഞ് യന്ത്രം നിര്‍ത്താന്‍ സ്വിച്ച് ബോർഡിനടുത്തേക്ക് പോകുന്നതിനിടയില്‍ കാല്‍ തെറ്റി ബെല്‍റ്റിലേക്ക് വീഴുകയും ബെല്‍റ്റിനും മോട്ടോറിനുമിടയില്‍ തല കുരുങ്ങി സംഭവ സ്ഥലത്ത് വച്ച് തന്നെ മരണമടയുകയുമായിരുന്നു. വിവരമറിഞ്ഞ് വെഞ്ഞാറമൂട് അഗ്നിരക്ഷാ സേനയെത്തിയാണ് മൃതദേഹം ബെല്‍റ്റില്‍ നിന്നും വേര്‍പെടുത്തിയത്. തുടര്‍ന്ന് വെഞ്ഞാറമൂട് പോലീസ് മൃതദേഹം തിരുവനന്തപുരം മെഡിക്കല്‍് കോളജ് മോർച്ചറിയിലേക്ക് മാറ്റി. മക്കള്‍: പ്രവീണ്‍, വീണ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]