ADVERTISEMENT

ADVERTISEMENT

മുട്ടുചിറ സെന്‍റ് ആഗ‌്നസ് ഹൈസ്‌കൂളില്‍ വിജയദിനാഘോഷം

മുട്ടുചിറ: സെന്‍റ് ആഗ‌്നസ് ഹൈസ്‌കൂളില്‍ വിജയദിനം ആഘോഷിച്ചു. സ്‌കൂള്‍ മാനേജര്‍ ഫാ. ഏബ്രഹാം കൊല്ലിത്താനത്തുമലയില്‍ അധ്യക്ഷത വഹിച്ച യോഗം മോന്‍സ് ജോസഫ് എംഎല്‍എ ഉദ്ഘാടനം ചെയ്തു.

ഹെഡ്മിസ്ട്രസ് സില്‍ജ മാത്യൂസ്, സ്‌കൂള്‍ അസിസ്റ്റന്റ് മാനേജര്‍ ഫാ.മാത്യു വാഴചാരിക്കല്‍, വാര്‍ഡ് മെംബര്‍ ജാന്‍സി സണ്ണി, പിടിഎ പ്രസിഡന്‍റ് ജോണിക്കുട്ടി മാത്യു, അധ്യാപക പ്രതിനിധി സിനി പി. അബ്രഹാം, വിദ്യാര്‍ഥി പ്രതിനിധി റിയ ജോണി എന്നിവര്‍ പ്രസംഗിച്ചു.

ADVERTISEMENT

അരുവിത്തുറ സെന്‍റ് ജോർജ് കോളജിൽ രക്തദാന ക്യാമ്പ് സംഘടിപ്പിച്ചു

അരുവിത്തുറ: സെന്‍റ് ജോർജ് കോളജ് കൊമേഴ്സ് വിഭാഗത്തിന്‍റെയും സ്റ്റേറ്റ് ബാങ്ക് ഓഫ് ഇന്ത്യ പാലാ റീജണൽ ഓഫീസിന്‍റെയും തൊടുപുഴ ഐഎംഎ ബ്ലഡ് ബാങ്കിന്‍റെയും സംയുക്താഭിമുഖ്യത്തിൽ അരുവിത്തുറ സെന്‍റ് ജോർജ് കോളജിൽ മഹാരക്തദാന ക്യാമ്പ് നടന്നു. സ്റ്റേറ്റ് ബാങ്ക് ഓഫ് ഇന്ത്യയുടെ 70-ാം സ്ഥാപക ദിനവുമായി ബന്ധപ്പെട്ട് 70,000 യൂണിറ്റ് രക്തം ദാനം ചെയ്യുന്നതിന്‍റെ ഭാഗമായിയാണ് സെന്‍റ് ജോർജ് കോളജിലെ വിദ്യാർഥികളും സ്റ്റാഫ് അംഗങ്ങളും ഉൾപ്പെടെ അമ്പതിലധികം പേർ രക്തം ദാനം ചെയ്തത്. സെന്‍റ് ജോർജ് കോളജ് ബർസാർ ആൻഡ് കോഴ്സ് കോഓർഡിനേറ്റർ ഫാ. ബിജു കുന്നയ്ക്കാട്, വൈസ് പ്രിൻസിപ്പൽ ഡോ. ജിലു ആനി ജോൺ, എസ്ബിഐ പാലാ റീജണൽ ചീഫ് മാനേജർ ദിലീപ് ചെറിയാൻ, എസ്ബിഐ ഈരാറ്റുപേട്ട ടൗൺ ബ്രാഞ്ച് മാനേജർ ജി. ലക്ഷ്മി, എസ്ബിഐ ഡെപ്യൂട്ടി മാനേജർ ദിലീപ് വാസുദേവൻ നായർ, കൊമേഴ്സ് വിഭാഗം മേധാവി ഷെറിൻ എലിസബത്ത് ജോൺ, ക്യാമ്പിന്‍റെ കൺവീനർമാരായ ഡോ. മിഥുൻ ജോൺ, റോണി തോമസ്, മായ ആർ തുടങ്ങിയവർ പരിപാടികൾക്ക് നേതൃത്വം നൽകി.

അടിയന്തരാവസ്ഥയുടെ വാര്‍ഷികം മനുഷ്യാവകാശ സംരക്ഷണ ദിനമായി ആചരിച്ച് ആര്‍ജെഡി

കോട്ടയം: അടിയന്തരാവസ്ഥയുടെ 50-ാം വാര്‍ഷികം മനുഷ്യാവകാശ സംരക്ഷണ ദിനമായി രാഷ്‌ട്രീയ ജനതാദള്‍ സംസ്ഥാന വ്യാപകമായി ആചരിച്ചു. ആര്‍ജെഡി കോട്ടയം ജില്ലാ കമ്മറ്റിയുടെ ആഭിമുഖ്യത്തില്‍ നടന്ന യോഗം ജില്ലാ പ്രസിഡന്‍റ് സണ്ണി തോമസ് ഉദ്ഘാടനം ചെയ്തു. ആര്‍ജെഡി സംസ്ഥാന കമ്മറ്റിയംഗം അഡ്വ. ബെന്നി കുര്യന്‍ അധ്യക്ഷത വഹിച്ചു. നേതാക്കളായ ജോര്‍ജ് മാത്യു, ജോസ് മടുക്കക്കുഴി, ജോണ്‍ മാത്യം മൂലയില്‍, കെ.ആര്‍ മനോജ് കുമാര്‍, കെ. ഇ. ഷെറീഫ്, അഡ്വ ഏബ്രഹാം പി. തോമസ്, വി.കെ. സജികുമാര്‍, ബെന്നി വര്‍ഗീസ് എന്നിവര്‍ പ്രസംഗിച്ചു. അടിയന്തരാവസ്ഥക്കെതിരേ ജനകീയ പ്രക്ഷോഭത്തിനു നേതൃത്വം നല്‍കി ജയില്‍വാസം അനുഭവിച്ച ദേശീയ നേതാക്കളുടെ ഛായാചിത്രത്തില്‍ നേതാക്കളും പ്രവര്‍ത്തകരും പുഷ്പാര്‍ച്ചന നടത്തി.

ഓട്ടോറിക്ഷയ്ക്ക് സൈഡ് കൊടുത്തില്ല; കാർ അടിച്ചുതകർത്ത് യാത്രികരെ ആക്രമിച്ച കേസിൽ രണ്ടുപേർ അറസ്റ്റിൽ

ചങ്ങനാശേരി: ഓട്ടോറിക്ഷയ്ക്ക് സൈഡ് കൊടുത്തില്ലെന്നാരോപിച്ച് കാർ അടിച്ചുതകർത്ത് യാത്രക്കാരെ ആക്രമിച്ച കേസിലെ പ്രതികൾ പിടിയിൽ. മോർക്കുളങ്ങര തൈപ്പറമ്പിൽ ബിനീഷ് കുഞ്ഞുമോൻ (35), രണ്ടുകുഴിച്ചിറയിൽ ജോമോൻ ശശി (19) എന്നിവരെയാണ് ചങ്ങനാശേരി പോലീസ് അറസ്റ്റ് ചെയ്തത്. പ്രതികളുടെ ഓട്ടോറിക്ഷയ്ക്ക് സൈഡ് കൊടുത്തില്ലെന്ന വിരോധത്താൽ ഇക്കഴിഞ്ഞ 25ന് വൈകുന്നേരം 3.30ന് ചെത്തിപ്പുഴ മുന്തിരിക്കവല ഭാഗത്തുവച്ച് കാർ തടഞ്ഞുനിർത്തി അസഭ്യം പറയുകയും കല്ലുകൊണ്ടിടിച്ച് പരിക്കേല്പിക്കുകയും കാറിന്‍റെ കണ്ണാടിയും ബോണറ്റും തല്ലിത്തകർക്കുകയുമായിരുന്നു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു. ചങ്ങനാശേരി പോലീസ് സ്റ്റേഷനിൽ നിര വധി കേസുകളി ൽ ഉൾപ്പെട്ട ബിനീഷ്, ചെത്തിപ്പുഴയിൽ വീടു കയറി സ്ത്രീകൾ ഉൾപ്പെടെയുള്ളവരെ ആക്രമിക്കുകയും വീട്ടുപകരണങ്ങൾ നശിപ്പിക്കുകയും മോഷ്ടിച്ചു കൊണ്ടുപോവുകയും ചെയ്ത കേസിലും ചെത്തിപ്പുഴക്കടവ് ഭാഗത്ത് യുവാക്കളെ സോഡാക്കുപ്പികൊണ്ട് പരിക്കേൽപ്പിച്ച കേസിലും പ്രതിയാണ്. ഇരുപതിലധികം കേസുകളിൽ പ്രതിയായി കാപ്പാ നിയമപ്രകാരം സെൻട്രൽ ജയിലിൽ കരുതൽ തടങ്കലിലായിരുന്ന ഇയാൾ 2024 ഡിസംബറിലാണ് ജയിൽ മോചിതനായത്.

വണ്ടിപ്പേട്ടയിൽ മരം കടപുഴകി റോഡ് ഇടിഞ്ഞുതാണു; പറാല്‍ റോഡില്‍ ഗതാഗതം അപകടാവസ്ഥയില്‍

ചങ്ങനാശേരി: ചങ്ങനാശേരി- വണ്ടിപ്പേട്ട -പറാല്‍ റോഡില്‍ വണ്ടിപ്പേട്ടയ്ക്കു സമീപം റോഡരികിൽ നിന്ന പാഴ്മരം പാടത്തേക്കു കടപുഴകി വീണു. ഇതേത്തുടർന്ന് റോഡ് തകര്‍ന്ന് വാഹനസഞ്ചാരം അപകടാവസ്ഥയിലായി. മരം കടപുഴകിയപ്പോള്‍ ടാറിംഗിനോടു ചേര്‍ന്നുള്ള ഭാഗംകൂടി തകര്‍ന്നതാണ് ഇരുചക്രവാഹനങ്ങളടക്കമുള്ളവയുടെ യാത്ര അപകട ഭീഷണിയിലാക്കിയത്. പതിനഞ്ച് മീറ്ററോളം നീളത്തിലാണ് റോഡിന്‍റെ വശം തകര്‍ന്നത്. റോഡ് തകര്‍ന്നുണ്ടായ വശത്തെ വെള്ളക്കെട്ടില്‍ വാഹനങ്ങള്‍ നിയന്ത്രണംവിട്ട് വീഴാന്‍ സാധ്യതയുണ്ട്. ഈ ഭാഗത്ത് എതിരേ വരുന്ന വാഹനങ്ങള്‍ക്ക് സൈഡ് കൊടുക്കാനും ബുദ്ധിമുട്ട് നേരിടുന്നുണ്ട്. മരം കടപുഴകി വീണ് റോഡ് തകര്‍ന്ന ഭാഗത്ത് സംരക്ഷണഭിത്തി നിര്‍മിച്ച് വാഹനങ്ങള്‍ക്ക് സുരക്ഷയൊരുക്കണമെന്ന ആവശ്യം ശക്തമാണ്. കടപുഴകിയ മരത്തിന്‍റെ എതിര്‍വശത്ത് നില്‍ക്കുന്ന മരവും ഏതുസമയവും നിലംപൊത്താവുന്ന നിലയിലാണ്. നഗരസഭയുടെ 32-ാം വാര്‍ഡിലാണ് റോഡ് തകര്‍ന്നത്.

സംഭരിച്ച നെല്ലിന്‍റെ വില ലഭിച്ചില്ല; ബാങ്കുകളില്‍ പ്രതിഷേധ കൂട്ടായ്മ സംഘടിപ്പിച്ച് ‍കര്‍ഷകര്‍

ചങ്ങനാശേരി: നെല്ല് സംഭരിച്ചിട്ട് മൂന്നുമാസമായിട്ടും പണം സിവില്‍ സപ്ലൈസ് വകുപ്പ് കര്‍ഷകര്‍ക്ക് നല്‍കാത്തതിനെതിരേ നെല്‍കര്‍ഷക സമിതിയും കര്‍ഷകരും ചേര്‍ന്ന് ബാങ്കുകളില്‍ പ്രതിഷേധമാരംഭിച്ചു. മന്ത്രിയും സിവില്‍ സപ്ലൈസ് വകുപ്പും ബാങ്കുകാരും മാറിമാറി പ്രസ്താവന നടത്തുന്നതല്ലാതെ പണം ലഭ്യമാക്കുന്നില്ലെന്നും ആയിരക്കണക്കിന് പിആര്‍എസുകള്‍ ബാങ്കുകളില്‍ കെട്ടിക്കിടക്കുകയാണെന്നും ഭാരവാഹികള്‍ ആരോപിച്ചു. കര്‍ഷകര്‍ക്ക് പണം ലഭിക്കാന്‍ അടിയന്തര നടപടി സ്വീകരിക്കണമെന്നാവശ്യപ്പെട്ടു നെല്‍കര്‍ഷക സംരക്ഷണ സമിതി ബാങ്കുകളില്‍ കൂട്ടായ്മയും നിവേദനവും സമര്‍പ്പിക്കുന്നതിന്‍റെ ഭാഗമായി പെരുന്ന എസ്ബിഐ അഗ്രികച്ചറല്‍ ശാഖ, കാനറാ ബാങ്ക് ചങ്ങനാശേരി ശാഖ എന്നിവിടങ്ങളില്‍ പ്രതിഷേധം സംഘടിപ്പിച്ചു. ചങ്ങനാശേരിയില്‍ നെല്‍കര്‍ഷക സംരക്ഷണ സമിതി സംസ്ഥാന രക്ഷാധികാരി വി.ജെ. ലാലി ഉദ്ഘാടനം ചെയ്തു. വൈസ് പ്രസിഡന്‍റ് സന്തോഷ് പറമ്പിശേരിയുടെ അധ്യക്ഷതയില്‍ കോ-ഓര്‍ഡിനേറ്റര്‍ അനിയന്‍കുഞ്ഞ്, ജിക്കു കുര്യാക്കോസ്, വി.എന്‍. ശര്‍മ, സോണി കളരിക്കല്‍, ആലിച്ചന്‍ തൈപ്പറമ്പില്‍, ജോബി മൂലകുന്നം, ബൈജു സെബാസ്റ്റ്യന്‍, കെ.എ. സെബാസ്റ്റ്യന്‍, ബി. രാജപ്പനാചാരി, മോഹനന്‍ ചൂരക്കുറ്റി, ജോസഫ് കെന്നടി, തോമസുകുട്ടി, ജോസഫ് വട്ടപ്പറമ്പ്, സിബി സെബാസ്റ്റ്യന്‍ എന്നിവര്‍ പ്രസംഗിച്ചു. ഒരാഴ്ചയ്ക്കകം പണം നല്‍കിയില്ലെങ്കില്‍ ശക്തമായ സമരത്തിന് എന്‍കെഎസ്എസ് നേതൃത്വം നല്‍കുമെന്ന് ഭാരവാഹികള്‍ പറഞ്ഞു

ഒരുവശത്ത് പ്രോത്സാഹനം, മറുവശത്ത് ബോധവത്കരണം; സര്‍ക്കാരിന് എന്ത് ആത്മാര്‍ഥതയെന്ന് മാര്‍ തോമസ് തറയില്‍

ചങ്ങനാശേരി: സംസ്ഥാനത്താകമാനം മദ്യമൊഴുക്കുന്ന സര്‍ക്കാര്‍ ലഹരിവിരുദ്ധ ദിനം ആചരിക്കുന്നതില്‍ എന്ത് ആത്മാര്‍ഥതയാണുള്ളതെന്ന് ആര്‍ച്ച്ബിഷപ് മാര്‍ തോമസ് തറയില്‍. ചങ്ങനാശേരി അതിരൂപതയിലെ വിവിധ സംഘടനകളുുടെയും സ്‌കൂളുകളുടെയും നേതൃത്വത്തില്‍ അസംപ്ഷന്‍ കോളജ് ഓഡിറ്റോറിയത്തില്‍ സംഘടിപ്പിച്ച ലഹരിവിരുദ്ധ സമ്മേളനം ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ്. ഒരു വശത്ത് ലഹരിവ്യാപനത്തെ പ്രോത്സാഹിപ്പിക്കുകയും മറുവശത്ത് ലഹരിവിമുക്ത പ്രവര്‍ത്തനങ്ങള്‍ നടത്തുകയും ചെയ്യുന്ന സര്‍ക്കാരിന്‍റെ പ്രവര്‍ത്തനങ്ങളില്‍ വൈരുദ്ധ്യമാണ് കാണുന്നത്. നമ്മുടെ സംസ്ഥാനത്തിന്‍റെ തകര്‍ച്ച മദ്യവ്യാപാരവും ഉപഭോഗവും മൂലമാണ്. മദ്യവും മയക്കുമരുന്നും മനുഷ്യന്‍റെ സാമാന്യബോധം തകര്‍ക്കുന്ന വിപത്താണ്. സമൂഹം നേരിടുന്ന ലഹരിവിപത്തിനെതിരേ വിദ്യാര്‍ഥികളുടെ പോരാട്ടം തുടരണമെന്ന് മാര്‍ തോമസ് തറയില്‍ ആഹ്വാനം ചെയ്തു.

മഴയിലും അലിയാത്ത ലഹരിവിരുദ്ധത: കോരിച്ചൊരിയുന്ന മഴയത്ത് കുട ചൂടി വിദ്യാര്‍ഥികളുടെ മഹാറാലി

ചങ്ങനാശേരി: കോരിച്ചൊരിയുന്ന മഴ അവഗണിച്ച് കുടകള്‍ചൂടി ലഹരിക്കെതിരേ വിദ്യാര്‍ഥികള്‍ ചങ്ങനാശേരി നഗരത്തില്‍ നടത്തിയ റാലി ലഹരിവിമുക്ത പ്രവര്‍ത്തനങ്ങള്‍ക്ക് പുത്തനുണര്‍വായി. ലഹരിവിരുദ്ധ ദിനത്തോടനുബന്ധിച്ച് എസ്ബി സ്‌കൂളില്‍നിന്നാരംഭിച്ച റാലി അസംപ്ഷന്‍ കോളജില്‍ സമാപിച്ചു. ചങ്ങനാശേരി ഡിവൈഎസ്പി കെ.പി. തോംസണ്‍ റാലി ഫ്ളാഗ് ഓഫ് ചെയ്തു. അസംപ്ഷന്‍ കോളജ് ഓഡിറ്റോറിയത്തില്‍ സംഘടിപ്പിച്ച സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്തു. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. എസ്ബി കോളജ് പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍, അസംപ്ഷന്‍ കോളജ് പ്രിന്‍സിപ്പല്‍ ഡോ. റാണി മരിയ തോമസ്, എസ്ബി ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ഫാ. റോജി വല്ലയില്‍, വാഴപ്പള്ളി സെന്‍റ് തെരേസാസ് ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ഷിജി ജോണ്‍സണ്‍, വിവിധ വകുപ്പ് ഡയറക്ടര്‍മാരായ ഫാ. ജോര്‍ജ് പനക്കേഴം, ഫാ. സാവിയോ മാനാട്ട്, ഫാ. ജോസഫ് ചോരേട്ട് ചാമക്കാല, ഫാ. ജോജോ പള്ളിച്ചിറ, അധ്യാപക പ്രതിനിധികളായ വിനോദ് ബാബു, റിന്‍സ് വര്‍ഗീസ്, അരുണ്‍ ടോം എന്നിവര്‍ പ്രസംഗിച്ചു. ചങ്ങനാശേരി സോഷ്യല്‍ സര്‍വീസ് സൊസൈറ്റി, കേന്ദ്ര സാമൂഹിക നീതി ശക്തീകരണ മന്ത്രാലയത്തിന്‍റെ കീഴില്‍ പ്രവര്‍ത്തിക്കുന്ന സ്റ്റേറ്റ് ലെവല്‍ കോ-ഓര്‍ഡിനേറ്റിംഗ് ഏജന്‍സി, അതിരൂപത ആത്മതാ കേന്ദ്രം, കെസിഎസ്എല്‍, യുവദീപ്തി-എസ്എംവൈഎം, എസ്ബി, അസംപ്ഷന്‍ കോളജുകള്‍, മീഡിയ വില്ലേജ്, ചെത്തിപ്പുഴ സെന്‍റ് തോമസ് നഴ്‌സിംഗ് കോളജ്, എസ്ബി സ്‌കൂള്‍, സെന്‍റ് ആന്‍സ്, സെന്‍റ് ജോസഫ്‌സ്, വാഴപ്പള്ളി സെന്‍റ് തെരേസാസ്, മോര്‍ക്കുളങ്ങര എകെഎം, ചങ്ങനാശേരി എസ്എച്ച്, കിളിമല എസ്എച്ച് എന്നിവയുടെ സംയുക്താഭിമുഖ്യത്തിലാണ് റാലിയും സമ്മേളനവും സംഘടിപ്പിച്ചത്. വിദ്യാര്‍ഥികള്‍ ലഹരിക്കെതിരേ ഫ്‌ളാഷ്‌മോബും തെരുവുനാടകവും അവതരിപ്പിച്ചു. അധ്യാപകരും വിദ്യാര്‍ഥികളും ലഹരിവിരുദ്ധ പ്രതിജ്ഞ എടുത്താണ് സമ്മേളനം സമാപിച്ചത്.

വെള്ളൂർ ജംഗ്ഷനിൽ അപകടഭീതി ഉയർത്തുന്ന മരം മുറിക്കണം

വെള്ളൂർ: വെള്ളൂർ ജംഗ്ഷനിൽ അപകട ഭീതി ഉയർത്തുന്ന മരം മുറിച്ചുനീക്കണമെന്ന ആവശ്യം ശക്തമായി. നിരവധി ആളുകൾ വന്നുപോകുന്ന ജംഗ്ഷനിൽ നിൽക്കുന്നവൻമരം ഏതു നിമിഷവും മറിഞ്ഞുവീഴുന്ന സ്ഥിതിയിലാണ്. മരത്തിനു സമീപം ഓട്ടോറിക്ഷാ സ്റ്റാൻഡുമുണ്ട്. യാത്രക്കാർക്കും ജംഗ്ഷനിലെത്തുന്നവർക്കും അപകടഭീഷണിയായ മരം മുറിച്ചുനീക്കണമെന്ന് നാട്ടുകാർ ആവശ്യപ്പെട്ടു.

വൈക്കത്തെ പഴയ ബോട്ടുജെട്ടിയുടെ മേൽക്കൂര നിർമാണം പുരോഗമിക്കുന്നു

വൈക്കം: നൂറ്റാണ്ടു പിന്നിട്ട വൈക്കത്തെ പഴയ ബോട്ടുജെട്ടി കെട്ടിടത്തിന്‍റെ മേൽക്കൂരയുടെ നിർമാണം പുരോഗമിക്കുന്നു. ബോട്ടുജെട്ടിയുടെ നവീകരണത്തിനായി 25 ലക്ഷം രൂപയാണ് എസ്റ്റിമേറ്റ് തുക. കെട്ടിടത്തിന്‍റെ പഴയ രൂപത്തിനു മാറ്റം വരുത്താതെയാണ് നിർമാണ പ്രവർത്തനങ്ങൾ നടന്നുവരുന്നത്. പഴയ കെട്ടിടത്തിലെ കേടാകാത്ത തടികൾ,ആസ്ബസ്‌റ്റോസ് എന്നിവയടക്കം ഉപയോഗിച്ചാണ് നിർമാണം നടത്തുന്നത്. കെട്ടിടത്തിന്‍റെ ഭിത്തി ബലപ്പെടുത്തുന്ന പണികൾ ആദ്യം പൂർത്തിയാക്കിയിരുന്നു. വെള്ളം കയറുന്നതിനാൽ തറ ഉയർത്തി നിർമി ക്കും. മുറികളിലും പാസേജിലും ടൈലുകൾ പാകും. ഭിത്തിക്കു പുറമേ പാകിയിരുന്ന കേടായ പലകകൾ മാറ്റി തേക്കിന്‍റെ പുതിയ പാനലുകൾ ഉറപ്പിക്കും.ഓഗസ്റ്റ് ആദ്യം പണികൾ പൂർത്തിയാക്കാനാണ് അധികൃതർ ശ്രമം നടത്തിവരുന്നത്. വൈക്കം സത്യഗ്രഹത്തിൽ പങ്കെടുക്കാൻ വന്ന മഹാത്മജി അടക്കമുള്ള നേതാക്കൾ ബോട്ടു മാർഗമെത്തി വൈക്കം ജെട്ടിയിലാണ് ഇറങ്ങിയത്.

കടുത്തുരുത്തി നിയോജകമണ്ഡലം പ്രതിഭാസംഗമവും എംഎല്‍എ എക്‌സലന്‍സ് അവാര്‍ഡ്ദാനവും നടത്തി

കടുത്തുരുത്തി: വിദ്യാര്‍ഥികള്‍ക്ക് ആവേശവും വിവിധ മേഖലകളില്‍നിന്നുള്ള പ്രതിഭകള്‍ക്കുള്ള ആദരവുമായി കടുത്തുരുത്തി നിയോജകമണ്ഡലം പ്രതിഭാസംഗമവും എംഎല്‍എ എക്‌സലന്‍സ് അവാര്‍ഡുദാന സമ്മേളനവും കടുത്തുരുത്തിയില്‍ നടന്നു. കടുത്തുരുത്തി ഗൗരീശങ്കരം ഓഡിറ്റോറിയത്തില്‍ നടന്ന പ്രതിഭാസംഗമത്തിന്‍റെ ഉദ്ഘാടനം മോന്‍സ് ജോസഫ് എംഎല്‍എ നിര്‍വഹിച്ചു. ഫ്രാന്‍സിസ് ജോര്‍ജ് എംപി, സിനിമാതാരങ്ങളായ ഷെയ്ന്‍ നിഗം, ദിലീഷ് പോത്തന്‍, കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളി വികാരി ഫാ. മാത്യു ചന്ദ്രന്‍കുന്നേല്‍, ദീപിക മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട്, മാന്നാനം കെഇ സ്‌കൂള്‍ പ്രിന്‍സിപ്പൽ‍ ഫാ. ജയിംസ് മുല്ലശേരി, വൈക്കം ഡിവൈഎസ്പി ടി. വിജയന്‍, കടുത്തുരുത്തി സിഐ ടി.എസ്. റെനീഷ് തുടങ്ങിയവര്‍ പ്രസംഗിച്ചു. യൂണിവേഴ്‌സിറ്റി പരീക്ഷകളിലെ റാങ്ക് ജേതാക്കള്‍, വിവിധ മത്സരപരീക്ഷകളില്‍ ഉന്നതവിജയം കരസ്ഥമാക്കിയവര്‍, എസ്എസ്എല്‍സി, ഹയര്‍ സെക്കന്‍ഡറി പരീക്ഷകളില്‍ മികച്ച വിജയം നേടിയ വിദ്യാര്‍ഥികള്‍ എന്നിവരെ എംഎല്‍എ എക്‌സലന്‍സ് അവാര്‍ഡ് നല്‍കി അനുമോദിച്ചു. നൂറ് ശതമാനം വിജയം നേടിയ വിദ്യാര്‍ഥികള്‍ക്ക് പ്രത്യേക പുരസ്‌കാരം സമ്മാനിച്ചു. 1500 ലധികം പേരെ യോഗത്തില്‍ ആദരിച്ചു. പാലാ ബ്രില്ല്യന്‍റ് ഡയറക്ടര്‍ ജോര്‍ജ് തോമസ്, സിനിമാ നിര്‍മാതാവ് സന്തോഷ് ടി. കുരുവിള, യുവസംവിധായകന്‍ ബിന്‍റോ സ്റ്റീഫന്‍, ഹോളിവുഡ് നടന്‍ സിറിയക് ആലഞ്ചേരി, ഏഷ്യാനെറ്റ് ബിഗ്‌ബോസ് ഫെയിം അര്‍ജുന്‍ ശ്യാം ഗോപന്‍, മിസ് ക്വീന്‍ ഓഫ് ഇന്ത്യ-2024 ഹര്‍ഷ ശ്രീകാന്ത്, യുഎയിലും കേരളത്തിലും ജീവകാരുണ്യ പ്രവര്‍ത്തനത്തിന് നേതൃത്വം നല്‍കുന്ന ഷിജി അന്ന ജോസഫ്, പിന്നണിഗായിക മരിയ മാത്യു കോലടി എന്നിവര്‍ക്ക് പ്രതിഭാപുരസ്‌കാരം സമ്മാനിച്ചു. കടുത്തുരുത്തിയില്‍ മാംഗോ മെഡോസ് അഗ്രിക്കള്‍ച്ചറല്‍ തീം പാര്‍ക്ക് സ്ഥാപിച്ച എന്‍.കെ. കുര്യന്‍, 120 തവണ രക്തദാനം നല്‍കി മാതൃക കാണിച്ച ഷിബു തെക്കേമറ്റം, ദേശീയ-സംസ്ഥാന ക്ഷീരകര്‍ഷക അവാര്‍ഡ് ജേതാവ് വിധു രാജീവ്, അസ്സിസ്റ്റന്‍റ് എക്‌സൈസ് കമ്മീഷണറായി നിയമിതനായ സിബി ഇ.പി, ഡോ.അഞ്ജു ആന്‍ മാത്യു, കോട്ടയം ചൈല്‍ഡ് വെല്‍ഫെയര്‍ കമ്മിറ്റി ചെയര്‍മാന്‍ റവ.ഡോ. അരുണ്‍ കുര്യന്‍ എന്നിവര്‍ക്ക് സ്‌പെഷല്‍ അവാർഡുകളുംസമ്മാനിച്ചു.

കടുത്തുരുത്തി ടൗണിൽ ഗതാഗത പരിഷ്‌കാരം : സര്‍വകക്ഷിയോഗം ചേർന്നു

കടുത്തുരുത്തി: ടൗണിലെ ഗതാഗത പരിഷ്‌കാരത്തിനു പഞ്ചായത്തിന്‍റെ നേതൃത്വത്തില്‍ സര്‍വകക്ഷി യോഗം ചേർന്നു. സ്വകാര്യബസിന്‍റെ മത്സര ഓട്ടത്തിനിടെ സ്‌കൂട്ടിറിലിടിച്ചു കടുത്തുരുത്തി വലിയപാലത്തില്‍വച്ച് ഒരാള്‍ക്ക് ജീവന്‍ നഷ്ടപ്പെട്ടതിനെത്തുടർന്നാണ് വാഹനങ്ങളുടെ അമിതവേഗത നിയന്ത്രിക്കുന്നതിനും ഗതാഗതക്കുരുക്ക് പരിഹരിക്കുന്നതിനും യോഗം വിളിച്ചത്. ഹോം ഗാര്‍ഡിനൊപ്പം രാവിലെയും വൈകൂന്നേരവും ടൗണില്‍ പോലീസിന്‍റെ സേവനം ലഭ്യമാക്കണം, ടൗണ്‍ ലിമിറ്റില്‍ വേഗത നിയന്ത്രണം വേണം, സെന്‍ട്രല്‍ ജംഗ്ഷനിലെ സീബ്രാ ലൈനിന്‍റെ അശാസ്ത്രീയത പരിഹരിക്കണം എന്നിങ്ങനെയുള്ള നിര്‍ദേശങ്ങളാണ് യോഗത്തില്‍ ഉണ്ടായത്. വിദ്യാര്‍ഥികളെ കയറ്റാത്ത ബസുകള്‍ക്കെതിരേ നടപടി സ്വീകരിക്കണമെന്നും കടുത്തുരുത്തി ടൗണിലേക്കുള്ള ഇറക്കത്തില്‍ റബിന്‍ സ്ട്രിപ്പ് സ്ഥാപിക്കണമെന്നും നിര്‍ദേശമുണ്ടായി. സെന്‍ട്രല്‍ ജംഗ്ഷനില്‍ സ്ഥലം ലഭ്യമാക്കിയാല്‍ കോട്ടയം ഭാഗത്തേക്ക് ബസ് കാത്തിരിപ്പുകേന്ദ്രം നിര്‍മിച്ചു നല്‍കാമെന്നു ബ്ലോക്ക് പഞ്ചായത്ത് പ്രസിഡന്‍റ് യോഗത്തില്‍ അറിയിച്ചു. പഞ്ചായത്ത് പ്രസിഡന്‍റ് എന്‍.ബി. സ്മിതയുടെ അധ്യക്ഷതയില്‍ ചേര്‍ന്ന യോഗം ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ജിന്‍സി എലിസബത്ത്, എസ്‌ഐ സുനില്‍കുമാര്‍, മോട്ടോര്‍ വെഹിക്കിള്‍ ഇന്‍സ്‌പെക്ടര്‍ സമീര്‍ തുടങ്ങിയവര്‍ പ്രസംഗിച്ചു.

സില്‍വര്‍ലൈന്‍ പദ്ധതിക്കെതിരേ പ്രതിഷേധ സംഗമം

കോട്ടയം: സില്‍വര്‍ലൈന്‍ പദ്ധതിക്കെതിരേ സില്‍വര്‍ലൈന്‍ വിരുദ്ധ സമിതി സംസ്ഥാനതലത്തില്‍ നാളെ പ്രതിഷേധദിനം സംഘടിപ്പിക്കും. ജില്ലാതല പരിപാടി വൈകുന്നേരം അഞ്ചിനു ഗാന്ധി സ്‌ക്വയറില്‍ നടക്കും. സമരസമിതി ജില്ലാ ചെയര്‍മാന്‍ ബാബു കുട്ടന്‍ചിറയുടെ അധ്യക്ഷതയില്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ പ്രതിഷേധ സംഗമം ഉദ്ഘാടനം ചെയ്യും.

ലഹരിവിരുദ്ധ ദിനാചരണം

പാമ്പാടി: വിമലാംബിക സീനിയർ സെക്കൻഡറി സ്‌കൂളിൽ ലോക ലഹരി വിരുദ്ധദിനാചരണം നടത്തി. പാമ്പാടി സർക്കിൾ ഇൻസ്‌പെക്ടർ റിച്ചാർഡ് വർഗീസ് ഉൽഘാടനം ചെയ്തു. സബ് ഇൻസ്‌പെക്ടർ ഉദയകുമാർ ക്ലാസ് നയിച്ചു. എക്‌സൈസ് ഇൻസ്‌പെക്ടർ ബി. അനന്തകൃഷ്ണൻ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. പി ടി എ പ്രസിഡന്‍റ് ഷിൻസ് പീറ്റർ, വൈസ് പ്രസിഡന്‍റ് ആശാ കിരൺ, സ്‌കൂൾ മാനേജർ റവ.ഡോ. പ്രദീപ് വാഴത്തറമലയിൽ, പ്രിൻസിപ്പൽ റൂബി ബെന്നി, വൈസ് പ്രിൻസിപ്പാൾ എ.ജെ. അഗസ്റ്റിൻ തുടങ്ങിയവർ പ്രസംഗിച്ചു. കോട്ടയം: അന്താരാഷ്‌ട്ര ലഹരി വിരുദ്ധ ദിനാചരണത്തിന്‍റെ ഭാഗമായി എംജി സര്‍വകലാശാലയില്‍ നടന്ന ചടങ്ങില്‍ വൈസ് ചാന്‍സലറുടെ ചുമതല വഹിക്കുന്ന ഡോ. കെ. ജയചന്ദ്രന്‍ പ്രതിജ്ഞയ്ക്ക് നേതൃത്വം നല്‍കി. കാരാപ്പുഴ: എൻഎസ്എസ് ഹയർ സെക്കൻഡറി സ്കൂളിൽ ലോക ലഹരിവിരുദ്ധ ദിനം ആച രിച്ചു. സ്കൗട്ട്സ് ആൻഡ് ഗൈഡ്സിന്‍റെ ആഭിമുഖ്യത്തിൽ തിരുനക്കര ഗാന്ധി സ്ക്വയറിൽ ഫ്ലാഷ്മോബ് അവതരിപ്പിച്ചു. എക്സൈസ് ഓഫീസർ ടി. വീണ പ്രോഗ്രാമിന് നേതൃത്വം നൽകി. കോട്ടയം: സംസ്ഥാന യുവജനക്ഷേമബോര്‍ഡ് ജില്ലാ യുവജന കേന്ദ്രത്തിന്‍റെ നേതൃത്വത്തില്‍ ലഹരി വിരുദ്ധദിനാചാരണം സംഘടിപ്പിച്ചു. കാരാപ്പുഴ ഗവൺമെന്‍റ് ഹയര്‍ സെക്കന്‍ഡറി സ്‌കൂളില്‍ നടന്ന ദിനചാരണം യുവജന ക്ഷേമബോര്‍ഡംഗം അഡ്വ. റോണി മാത്യു ഉദ്ഘാടനം ചെയ്തു. കോളജ് പ്രിന്‍സിപ്പല്‍ സുനിത സൂസന്‍ ജില്ലാ പ്രോഗ്രാം ഓഫീസര്‍ ടി.എ. ലൈജു, കോ-ഓര്‍ഡിനേറ്റര്‍ മാര്‍സബില്‍, പ്രിന്‍സ് എന്നിവര്‍ പ്രസംഗിച്ചു. എക്സൈസ് ഇന്‍സ്‌പെക്ടര്‍ ഫിലിപ് തോമസ് ലഹരിവിരുദ്ധ ബോധവത്കരണ ക്ലാസെടുത്തു. അതിരമ്പുഴ: അന്താരാഷ്‌ട്ര ലഹരിവിരുദ്ധ ദിനത്തിൽ അതിരമ്പുഴയിൽ വിദ്യാർഥികൾ കൂട്ടയോട്ടം നടത്തി. സെന്‍റ് അലോഷ്യസ് ഹയർ സെക്കൻഡറി സ്കൂൾ വിദ്യാർഥികളാണ് കൂട്ടയോട്ടം നടത്തിയത്. കായികാധ്യാപകൻ ജോഷി ഇമ്മാനുവലിന്‍റെ നേതൃത്വത്തിൽ 200 വിദ്യാർഥികൾ കൂട്ടയോട്ടത്തിൽ പങ്കെടുത്തു. ചന്തക്കടവിൽനിന്ന് സ്കൂളിലേക്കു നടത്തിയ കൂട്ടയോട്ടം സെന്‍റ് മേരീസ് ഫൊറോനാ പള്ളി വികാരി ഫാ. മാത്യു പടിഞ്ഞാറേക്കുറ്റ് ഫ്ലാഗ് ഓഫ് ചെയ്തു. ലഹരിയുടെ പിടിയിൽനിന്ന് യുവതലമുറയെ രക്ഷിക്കേണ്ടതുണ്ടെന്നും അതിന്ഗൗരവതരമായ ഇടപെടലുകൾ ഉണ്ടാകണമെന്നും അദ്ദേഹം പറഞ്ഞു. അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, സ്കൂൾ പ്രിൻസിപ്പൽ ബിനു ജോൺ, എക്സൈസ് സബ് ഇൻസ്പക്ടർ ബിനോദ് കെ.ആർ., എക്സൈസ് ഉദ്യോഗസ്ഥരായ രഞ്ജിത്ത് കെ. നമ്പ്യാട്ട്, പ്രിയ വി.ഒ. ജയപ്രഭ, ഹെഡ്മിസ്ട്രസ് റോഷ്നി കെ. ജേക്കബ്, അധ്യാപക പ്രതിനിധി ജോഷി ഇമ്മാനുവൽ എന്നിവർ പ്രസംഗിച്ചു. കോട്ടയം: ജില്ലാ ആരോഗ്യവകുപ്പ് ആരോഗ്യകേരളം, സ്‌കൗട്ട്സ് ആന്‍ഡ് ഗൈഡ്സ് എന്നിവയുടെ ആഭിമുഖ്യത്തില്‍ എംഡി സെമിനാരി ഹയര്‍സെക്കന്‍ഡറി സ്‌കൂളില്‍ അന്താരാഷ്‌ട്ര ലഹരിവിരുദ്ധ ദിനാചരണം നടത്തി. ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ ഉദ്ഘാടനം ചെയ്തു. ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ അധ്യക്ഷത വഹിച്ചു. കോട്ടയം: ലഹരിവിരുദ്ധ ദിനത്തോടനുബന്ധിച്ചു കടുവാക്കുളം എമ്മാവൂസ് പബ്ലിക് സ്‌കൂളിലെ കുട്ടികള്‍ കോട്ടയം ഗാന്ധി സ്‌ക്വയറില്‍ മൈം, ഫ്‌ളാഷ് മോബ് പരിപാടികള്‍ അവതരിപ്പിച്ചു. എക്‌സൈസ് ഓഫീസര്‍ സുമേഷ് ദേവദാസ് ഉദ്ഘാടനം ചെയ്തു. പ്രിന്‍സിപ്പല്‍ ഫാ. ജിതിന്‍ വെട്ടിത്തുരുത്തേലും അധ്യാപകരും പരിപാടികള്‍ക്കു നേതൃത്വം നല്‍കി. കോട്ടയം: ജില്ലാ സാമൂഹികനീതി ഓഫീസ് കേന്ദ്ര സര്‍ക്കാരിന്‍റെ നശാ മുക്ത് ഭാരത് അഭിയാന്‍ പദ്ധതിയുടെ ഭാഗമായി കോട്ടയം എംഡി സെമിനാരി ഹയര്‍ സെക്കന്‍ഡറി സ്‌കൂളിലെ എന്‍എസ്എസ് യൂണിറ്റിന്‍റെ സഹകരണത്തോടെ അന്താരാഷ്‌ട്ര ലഹരിവിരുദ്ധ ദിനാചരണം നടത്തി. തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. കോട്ടയം നഗരസഭാ വൈസ് ചെയര്‍മാന്‍ ബി. ഗോപകുമാര്‍ അധ്യക്ഷത വഹിച്ചു.

കാരുണ്യപ്ലസിന്‍റെ ഒന്നാം സമ്മാനം പാമ്പാടിയിൽ

പാമ്പാടി: ഇന്നലെ നറുക്കെടുത്ത കേരള ലോട്ടറി കാരുണ്യപ്ലസിന്‍റെ ഒന്നാം സമ്മാനമായ ഒരു കോടി രൂപ പാമ്പാടി ന്യൂ സംഘം ഹോട്ടൽ ഉടമ പുത്തൻപറമ്പിൽ പി.ടി.സന്തോഷിന്.പിവി 409920 എന്ന ടിക്കറ്റിനാണ് ഒന്നാം സമ്മാനം ലഭിച്ചത്. സമ്മാനാർഹമായ ടിക്കറ്റ് പാമ്പാടി സർവീസ് സഹകരണ ബാങ്കിൽ ഏല്പിച്ചു. ഹോട്ടലിൽ സ്ഥിരമായി വരുന്ന എട്ടാംമൈൽ സ്വദേശിനിയായ ഏജന്‍റിൽനിന്നാണ് സന്തോഷ് ടിക്കറ്റ് എടുത്തത്. ആദ്യം ടിക്കറ്റെടുക്കാൻ സന്തോഷ് വിസമ്മതിച്ചെങ്കിലും പിന്നീട് ഏജന്‍റിന്‍റെ നിർബന്ധത്തിനു വഴങ്ങി ടിക്കറ്റെടുക്കു കയായിരുന്നു.

വീടിനു മുകളിൽ മരം വീണു

കൈപ്പുഴ: കാറ്റിനും മഴയ്ക്കും ശമനമില്ലാതായതോടെ കൈപ്പുഴയിൽ വീടിനു മുകളിൽ മരം വീണ് അപകടം ഉണ്ടാകുന്നത് തുടരുകയാണ്. ഇന്നലെ രാവിലെ കൈപ്പുഴ കാവിൽറോഡിൽ തടത്തിൽ റെജിയുടെ ഇരുനില വീടിന് മുകളിൽ സമീപത്തെ റബർ തോട്ടത്തിൽനിന്ന കൂറ്റൻ റബർ മരം വീണു. മരം വൈദ്യുതിലൈൻ തട്ടി നിന്നതിനാൽ വീടിനു കൂടുതൽ കേടുപാട് സംഭവിച്ചില്ല. കഴിഞ്ഞ ആഴ്ച ഉണ്ടായ ശക്തമായ കാറ്റിലും മഴയിലും ഈ റബർ തോട്ടത്തിലെ റബർ മരങ്ങൾ ഭൂരിഭാഗവും ഒടിഞ്ഞിരുന്നു. കഴിഞ്ഞ ദിവസം തേക്കുമരം വീണ് സമീപവാസിയുടെ വീടിന്‍റെ മുകൾഭാഗം പൊട്ടിത്തകർന്നു. കൈപ്പുഴ പുളിയൻപറമ്പിൽ ജോമോന്‍റെ വീടിനു മുകളിലേക്കാണ് സമീപത്തെ പറമ്പിൽ നിന്ന കൂറ്റൻ തേക്കുമരം മറിഞ്ഞു വീണത്. സംഭവത്തത്തുടർന്ന് വീടിന്‍റെ ഷീറ്റ് പൊട്ടിത്തകർന്നു. ജനലുകളും തകർന്നു. വീട്ടുകാർക്ക് അപകടമൊന്നും സംഭവിച്ചില്ല.

സഹകരണ പെന്‍ഷന്‍കാരുടെ നിർത്തലാക്കിയ ഡിഎ പുനഃസ്ഥാപിക്കണമെന്ന്

കോട്ടയം: സഹകരണ പെന്‍ഷന്‍കാരുടെ 2021 മുതല്‍ നിര്‍ത്തലാക്കിയ ഡിഎ പുനഃസ്ഥാപിക്കണമെന്ന് കേരള കോ-ഓപ്പറേറ്റീവ് സര്‍വീസ് പെന്‍ഷനേഴ്‌സ് അസോസിയേഷന്‍ ജില്ലാ സമ്മേളനം ആവശ്യപ്പെട്ടു. ജില്ലാ പ്രസിഡന്‍റ് ടി.ജെ. മാത്യു തെങ്ങുംപ്ലാക്കല്‍ അധ്യക്ഷത വഹിച്ചു. സംസ്ഥാന സഹകരണ യൂണിയന്‍ അംഗം കെ.എം. രാധാകൃഷ്ണന്‍ ഉദ്ഘാടനം ചെയ്തു. കാര്‍ഷിക വികസന ബാങ്ക് ഡയറക്‌ടര്‍ ബോര്‍ഡ് അംഗം ഫില്‍സണ്‍ മാത്യൂസ്, സംസ്ഥാന പ്രസിഡന്‍റ് എം. സുകുമാരന്‍, ജില്ലാ സെക്രട്ടറി അവിരാ ജോസഫ്, സംസ്ഥാന ട്രഷറര്‍ കെ.എം. തോമസ് തുടങ്ങിയവര്‍ പ്രസംഗിച്ചു. ഭാരവാഹികളായി ടി.ജെ. മാത്യു തെങ്ങുംപ്ലാക്കല്‍ (പ്രസിഡന്‍റ്), വി.ജി. വിജയകുമാര്‍ (സെക്രട്ടറി) തുടങ്ങിയവരെ തെരഞ്ഞെടുത്തു.

പിക്ക്അപ്പ് മീന്‍കടയിലേക്ക് ഇടിച്ചുകയറി ആറുപേർക്കു പരിക്ക്

കോട്ടയം: ചുങ്കം-മെഡിക്കല്‍ കോളജ് റോഡില്‍ തിരുവാറ്റയില്‍ പിക്ക്അപ്പ് വാന്‍ തട്ട് മീന്‍കടയിലേക്ക് ഇടിച്ചു കയറി ആറു പേര്‍ക്ക് പരിക്കേറ്റു. ഇന്നലെ ഉച്ചയ്ക്ക് 12.30 നായിരുന്നു അപകടം. മീന്‍കടയിലെ ജീവനക്കാരടക്കം ആറ് പേര്‍ക്കാണു പരിക്കേറ്റത്. മീന്‍ വാങ്ങാന്‍ വന്ന മൂന്നു പേര്‍, കടയുടമകളില്‍ ഒരാളായ ജിനു, ജീവനക്കാരായ ഇതര സംസ്ഥാന തൊഴിലാളികൾ ധ്രുവ്, പിങ്കു എന്നിവര്‍ക്കാണു പരിക്കേറ്റത്. ഇതില്‍ മീൻ വാങ്ങാന്‍ സ്‌കൂട്ടറില്‍ വന്ന വര്‍ഗീസിനു (55) സാരമായി പരിക്കേറ്റിട്ടുണ്ട്. ചങ്ങനാശേരിയിലേക്ക് ഏറ്റുമാനൂരില്‍നിന്നു പച്ചക്കറി എത്തിച്ചശേഷം മടങ്ങിയ പിക്ക് അപ്പ് ലോറിയാണ് നിയന്ത്രണംവിട്ട് കടയിലേക്ക് ഇടിച്ചുകയറിയത്. ദേഹാസ്വാസ്ഥ്യം അനുഭവപ്പെട്ടതാണ് അപകടത്തിനിടയാക്കിയതെന്ന് വില്ലൂന്നി സ്വദേശിയായ ഡ്രൈവര്‍ പറഞ്ഞു.

ശ്രീനാരായണജയന്തി കുമരകം മത്സരവള്ളംകളി സെപ്റ്റംബർ ഏഴിന്

കുമരകം: ശ്രീനാരായണ ഗുരു 1903ല്‍ കുമരകം ശ്രീകുമാരമംഗലം ക്ഷേത്ര വിഗ്രഹ പ്രതിഷ്ഠയ്ക്കായി സന്ദര്‍ശിച്ചതിന്‍റെ ഓര്‍മ പുതുക്കുന്നതിനു സംഘടിപ്പിക്കുന്ന ശ്രീനാരായണ ജയന്തി കുമരകം മത്സരവള്ളംകളി കോട്ടത്തോട്ടില്‍ സെപ്റ്റംബര്‍ ഏഴിനു നടക്കും. ചതയദിനത്തില്‍ നടക്കുന്ന 122-ാമത് ശ്രീനാരായണ ജയന്തി കുമരകം മത്സരവള്ളംകളിയുടെ പ്രവര്‍ത്തനോദ്ഘാടനം കുമരകം ഗവണ്‍മെന്‍റ് എച്ച്എസ്എസ് യുപി സ്‌കൂള്‍ ഹാളില്‍ സഹകരണ മന്ത്രി വി.എന്‍. വാസവന്‍ നിര്‍വഹിച്ചു. വള്ളംകളിക്കുള്ള ആദ്യസംഭാവന പി. വിജയന്‍ പുറത്തേച്ചിറയില്‍നിന്നും മന്ത്രി ഏറ്റുവാങ്ങി. ക്ലബ്ബ് പ്രസിഡന്‍റ് വി.പി. അശോകന്‍ അധ്യക്ഷത വഹിച്ചു. കുമരകം പഞ്ചായത്ത് പ്രസിഡന്‍റ് ധന്യാ സാബു, എസ്കെഎം ദേവസ്വം പ്രസിഡന്‍റ് എ.കെ. ജയപ്രകാശ്, കുമരകം പഞ്ചായത്ത് വൈസ് പ്രസിഡന്‍റ് ആര്‍ഷാ ബൈജു, ബ്ലോക്ക് പഞ്ചായത്തംഗം കവിതാ ലാലു, സഹകരണ ബാങ്ക് പ്രസിഡന്‍റുമാരായ കെ. കേശവന്‍, പി.വി. ഏബ്രഹാം, ക്ലബ്ബ് ജനറല്‍ സെക്രട്ടറി എസ്.ഡി. പ്രേംജി, ട്രഷറര്‍ എസ്.വി. സുരേഷ്‌കുമാര്‍ എന്നിവര്‍ പ്രസംഗിച്ചു.

ശുചിത്വമില്ലാതെ തട്ടുകടകളും പലഹാരക്കടകളും

കോട്ടയം: കൂണുപോലെ മുളച്ചുപൊങ്ങുന്ന വഴിയോരങ്ങളിലെ തട്ടുകടകളിലും പലഹാരക്കടകളിലും ആരോഗ്യവകുപ്പ് പരിശോധന നടത്തുന്നില്ലെന്ന് പരാതി. മഴക്കാലമായതോടെ ഒട്ടുമിക്ക തട്ടുകടകളിലും ബജിക്കടകളിലും പരിസര ശുചിത്വം പാലിക്കുന്നില്ലെന്നും ആരോപണമുണ്ട്. നഗരത്തിലും പരിസരപ്രദേശങ്ങളിലും നിരവധി തട്ടുകടകളും ബജിക്കടകളുമുണ്ടെങ്കിലും ആരോഗ്യവകുപ്പിന്‍റെ പരിശോധന നടക്കുന്നില്ല. മിക്ക തട്ടുകടകളും പ്രവര്‍ത്തിക്കുന്ന സ്ഥലവും പരിസരവും മാലിന്യത്തില്‍ മുങ്ങിയിരിക്കുകയാണ്. തട്ടുകടകളുടെ ചുറ്റും മലിനജലം കെട്ടിക്കിടക്കുന്നതും സാധാരണമാണ്. അതു വകവയ്ക്കാതെ തട്ടുകട നടത്തുന്നവരാണ് ഏറെയും. തട്ടുകടകളിലെ മാലിന്യം ഉത്തരവാദിത്വത്തോടെ നീക്കം ചെയ്യേണ്ടത് നടത്തിപ്പുകാരാണ്. എന്നാൽ, തട്ടുകടക്കാർ വില്പനശാലയ്ക്കുസമീപം ഉപേക്ഷിച്ചുപോകുന്ന മാലിന്യങ്ങള്‍ നഗരസഭാ ശുചീകരണത്തൊഴിലാളികളാണ് നീക്കം ചെയ്യുന്നത്. വൃത്തിഹീനമായ അന്തരീക്ഷത്തിലാണ് തട്ടുകടകളില്‍ ഭക്ഷണം പാകം ചെയ്യുന്നതെന്ന ആരോപണത്തിനു വര്‍ഷങ്ങളുടെ പഴക്കമുണ്ട്. പല തട്ടുകടയിലും വൈകുന്നേരം മാവ് കുഴച്ചുവയ്ക്കുന്നത് റോഡിന്‍റെ പാര്‍ശ്വങ്ങളിലാണ്. പിന്നീട് രാത്രിയില്‍ എത്തിയാണ് ഇവ പാകപ്പെടുത്തുന്നത്. തട്ടുകടകളുടെ പരിസരം എലി, പാറ്റ, പല്ലി തുടങ്ങിയ ജീവികളുടെ ആവാസകേന്ദ്രങ്ങളാണ്. ഇതിനു പുറമെ തെരുവുനായ്ക്കളും ധാരാളമുണ്ട്. തട്ടുകടകളും പാചകം ചെയ്യുന്ന സ്ഥലങ്ങളും മുന്പ് നഗരസഭ-പഞ്ചായത്ത് ആരോഗ്യവകുപ്പ് അധികൃതര്‍ പരിശോധിച്ചിരുന്നെങ്കിലും ഇപ്പോള്‍ പരിശോധനകളില്ല. മിക്ക തട്ടുകടകളുടെയും പിന്നിൽ ഉന്നതരുണ്ട്. അതിനാലാണ് ആരോഗ്യവിഭാഗം പരിശോധന നടത്താന്‍ മടിക്കുന്നത്. അടിയന്തരമായി തട്ടുകടകളിലും പലഹാരക്കടകളിലും ആരോഗ്യവകുപ്പ് അധികൃതര്‍ പരിശോധന നടത്തണമെന്ന് നാട്ടുകാര്‍ ആവശ്യപ്പെട്ടു.

പാലങ്ങൾ മുങ്ങി; എരുമേലിയുടെ കിഴക്കൻമേഖല ഒറ്റപ്പെട്ടു

കോട്ടയം/കണമല: ശക്തമായ കാറ്റും പിന്നാലെ അതിതീവ്ര മഴയും. പാലം മുങ്ങി പുറംലോകവുമായി ബന്ധമില്ലാതെ അറയാഞ്ഞിലിമണ്ണ് ഗ്രാമം. മൂക്കൻപെട്ടി, കുറുമ്പൻമുഴി പാലങ്ങളും വെള്ളത്തിനടിയിൽ. എരുമേലിയുടെ കിഴക്കൻ മലയോരമേഖല വീണ്ടും പ്രളയഭീതിയിൽ. ശക്തമായ മഴയിൽ കഴിഞ്ഞ ദിവസം അർധരാത്രിയോടെ പമ്പ, അഴുത നദികളിൽ വെള്ളം നിറയുകയായിരുന്നു. മീനച്ചിലാറ്റിലും ജലനിരപ്പ് അപകടനില കവിഞ്ഞൊഴുകയാണ്. കോട്ടയം നഗരപ്രാന്തങ്ങളില്‍ വെള്ളക്കെട്ട് രൂക്ഷമായി തുടരുന്നു. കഴിഞ്ഞ വെള്ളപ്പൊക്കത്തില്‍ എത്തിയ മലവെള്ളം പറമ്പിലും മുറ്റത്തും കെട്ടിനില്‍ക്കുന്നു. ഇഴജന്തുക്കളുടെ ശല്യവും രൂക്ഷമാണ്. മലയോരങ്ങളില്‍ മഴയ്‌ക്കൊപ്പം കനത്ത കാറ്റും ഭീതി സൃഷ്ടിക്കുന്നു. മരങ്ങളും ചില്ലകളും ഒടിഞ്ഞ് വൈദ്യുതി ബന്ധം പരക്കെ തടസപ്പെട്ടു. ഇന്നും നാളെയും മഴ തുടരുമെന്നാണ് കാലാവസ്ഥാ പ്രവചനം. വിവിധ ജില്ലകളില്‍ അവധി പ്രഖ്യാപിക്കുന്നുണ്ടെങ്കിലും പ്ലസ് ടു സെ പരീക്ഷകള്‍ മാറ്റമില്ലാതെ തുടരുകയാണ്. ഇന്നലെ രാവിലെയോടെ അറയാഞ്ഞിലിമണ്ണ്, മൂക്കൻപെട്ടി, കുറുമ്പൻമുഴി പാലങ്ങൾ കാണാനാവാത്ത വിധം വെള്ളത്തിനടിയിലായി. ഉച്ചയ്ക്ക് അൽപസമയം ജലനിരപ്പ് താഴ്ന്നപ്പോഴാണ് നാട്ടുകാർക്ക് മറുകര കടക്കാനായത്. എന്നാൽ, വീണ്ടും പാലങ്ങൾ മുങ്ങിയതോടെ ആശങ്കയിലാണ് നാട്. മൂക്കൻപെട്ടിയിൽ പാലം മുങ്ങിയതിനെത്തുടർന്ന് കണമല വഴി തുലാപ്പള്ളി, എയ്ഞ്ചൽവാലി വഴിയാണ് സ്വകാര്യ ബസുകളും സ്കൂൾ വാഹനങ്ങളും ഉൾപ്പെടെ സഞ്ചരിച്ചത്. അതേസമയം മറുകര കടക്കാൻ കഴിയാതെ ഒറ്റപ്പെട്ട നിലയിലായിരുന്നു അറയാഞ്ഞിലിമണ്ണ്, കുറുമ്പൻമുഴി പ്രദേശങ്ങളിലെ നാട്ടുകാർ. വിദ്യാർഥികൾക്ക് സ്കൂളിൽ പോകാനായില്ല. അക്കരെ കടന്നവർക്ക് തിരികെ പോകാൻ കഴിയാതെ ബന്ധുവീടുകളിൽ തങ്ങുകയാണ്. മേഖലയിൽ രാത്രിയിൽ തുടർച്ചയായി ശക്തമായ കാറ്റ് വീശി. നിരവധി റബർമരങ്ങൾ കടപുഴകി. വൈദ്യുതിബന്ധം തടസപ്പെട്ടു. വനത്തിൽനിന്നുള്ള മരങ്ങൾ പമ്പ, അഴുത നദികളിലൂടെ ഒഴുകി പാലങ്ങളിൽ അടിഞ്ഞ നിലയിലാണ്. മൂക്കൻപെട്ടി, അറയാഞ്ഞിലിമണ്ണ് പാലങ്ങളിൽ തങ്ങിക്കിടന്ന തടികൾ നാട്ടുകാർ ഉച്ചയ്ക്ക് വെള്ളം താഴ്ന്നപ്പോൾ മുറിച്ചുനീക്കി. വെള്ളപ്പൊക്കസാധ്യത പ്രകടമായപ്പോൾത്തന്നെ മൂക്കൻപെട്ടി പാലത്തിലെ കൈവരികൾ നാട്ടുകാർ ഊരി മാറ്റിയിരുന്നു. പമ്പാനദിയിലെ എയ്ഞ്ചൽവാലി പാലവും എരുമേലിയിൽ മണിമലയാറിലെ ഓരുങ്കൽകടവ്, പഴയിടം പാലങ്ങളും വെള്ളപ്പൊക്ക ഭീഷണി നേരിടുകയാണ്. ചികിത്സയ്ക്ക് വലഞ്ഞ് അപ്പു ഡയാലിസിസ് ചെയ്യാൻ കഴിയാതെ വലഞ്ഞ അറയാഞ്ഞിലിമണ്ണ് ചിറയ്ക്കൽ അപ്പുവിനെ ഇന്നലെ ഉച്ചയ്ക്ക് പാലത്തിൽ വെള്ളം കുറഞ്ഞപ്പോൾ നാട്ടുകാർ ചേർന്ന് കൈപിടിച്ച് നടത്തി അക്കരെ എത്തിച്ചു. തുടർന്ന് കോട്ടയം ഭാരത് ആശുപത്രിയിൽ ഡയാലിസിസ് നടത്തിയ അപ്പുവിന് വൈകുന്നേരം പാലം വെള്ളത്തിലായതിനാൽ വീട്ടിലേക്ക് പോകാനായില്ല. തുടർന്ന് ഇടകടത്തിയിലെ ബന്ധുവീട്ടിൽ കഴിയുകയാണ് അപ്പു. അടുത്ത ദിവസവും ഡയാലിസിസ് വേണ്ടി വരും. വീട്ടിൽ പോയാൽ ചികിത്സയ്ക്ക് പാലം കടക്കാതെ വേറെ മാർഗമില്ല. പാലം മുങ്ങിയാൽ അപ്പുവിന്‍റെ ഡയാലിസിസ് മുടങ്ങും. എന്ത് ചെയ്യണമെന്നറിയാതെ ആധിയിലാണ് അപ്പുവും കുടുംബവും. അറയാഞ്ഞിലിമണ്ണ് സ്വദേശിയായ അമൽജ്യോതി എൻജിനിയറിംഗ് കോളജ് വിദ്യാർഥിയെ ഇന്നലെ പാലം കടത്തിവിട്ടതും നാട്ടുകാർ ചേർന്ന് ഏറെ സാഹസികമായിട്ടായിരുന്നു. പാലത്തിലൂടെ തിരികെ വീട്ടിൽ പോകാൻ കഴിയാതെ വിദ്യാർഥി ബന്ധുവീട്ടിൽ കഴിയുകയാണ്. ഇതേ സ്ഥിതിയിലാണ് മിക്കവരും.

റോഡുകളില്‍ വെള്ളക്കെട്ടും കുഴിയും; യാത്ര ദുസ്സഹം

കോട്ടയം: കനത്ത മഴയില്‍ റോഡുകളില്‍ വെള്ളക്കെട്ട്. വെള്ളക്കെട്ട് രൂക്ഷമായതോടെ വാഹനയാത്ര ദുസഹമായി. എംസി റോഡിലും ജില്ലയിലെ പ്രധാനപ്പെട്ട റോഡുകളിലുമെല്ലാം ഒറ്റമഴയില്‍ത്തന്നെ വലിയ വെള്ളക്കെട്ടുകളാണ് രൂപപ്പെടുന്നത്. ചുരുങ്ങിയ സമയത്തിനുള്ളില്‍ അതിതീവ്രമായി മഴ പെയ്യുന്നതാണ് പെട്ടെന്ന് വെള്ളക്കെട്ടുണ്ടാകാന്‍ കാരണം. പെട്ടെന്നുള്ള മഴയില്‍ വെള്ളം ഒഴുകി പോകാന്‍ താമസമെടുക്കുന്നു. ഓടകളും ചാലുകളും നിറഞ്ഞുകവിഞ്ഞാണ് റോഡുകളിലേക്ക് വെള്ളം ഒഴുകുന്നത്. കുറവിലങ്ങാട്, ഏറ്റുമാനൂര്‍, കോട്ടയം ടൗണിലെ വിവിധ ഭാഗങ്ങള്‍, പാലാ-വൈക്കം റോഡിൽ ആർവി ജംഗ്ഷൻ, മരങ്ങാട്ടുപിള്ളി ആണ്ടൂർ ഭാഗം, പാലാ-ഏറ്റുമാനൂർ റോഡിൽ കട്ടച്ചിറ ഭാഗം, കിടങ്ങൂര്‍, എസ്എച്ച് മൗണ്ട്, കുമരകം റോഡില്‍ ഇല്ലിക്കല്‍, താഴത്തങ്ങാടി ഭാഗം തുടങ്ങിയ സ്ഥലങ്ങളിലെല്ലാമാണ് വെള്ളക്കെട്ട് രൂക്ഷം. ഓടകളിലും വെള്ളം ഒഴുകിപ്പോകുന്ന സ്ഥലങ്ങളിലുമെല്ലാം ചെളിയും എക്കലും അടിഞ്ഞിരിക്കുകയാണ്. പലയിടത്തും അശാസ്ത്രീയമായ നിര്‍മാണ പ്രവര്‍ത്തനങ്ങളും കൈയേറ്റങ്ങളും വ്യാപകമാണ്. ഇതുമൂലം വെള്ളം ഒഴുകിപ്പോകാന്‍ യാതൊരു നിര്‍വാഹവുമില്ലാത്ത അവസ്ഥയാണ്. വെള്ളക്കെട്ടുണ്ടായാല്‍ മണിക്കൂറുകളോളമാണ് പലയിടത്തും ഗതാഗതം തടസപ്പെടുന്നത്. വാഹനങ്ങള്‍ കിലോമീറ്ററോളം വഴി തിരിഞ്ഞു പോകേണ്ട അവസ്ഥയുമുണ്ട്. കനത്തമഴയില്‍ റോഡുകളില്‍ കുഴികളും രൂപപ്പെട്ടു. മഴക്കാലം തുടങ്ങിയപ്പോള്‍ അടച്ച കുഴികളെല്ലാം വീണ്ടും വലിയ കുഴികളായി മാറി. എംസി റോഡില്‍ തെള്ളകം മുതല്‍ പട്ടിത്താനം വരെ വലിയ കുഴികളാണ് രൂപപ്പെട്ടിരിക്കുന്നത്. കെകെ റോഡിലും പലയിടത്തും ചെറുതും വലുതമായി കുഴികളുണ്ട്. ഏറ്റുമാനൂര്‍-പൂഞ്ഞാര്‍ ഹൈവേയിലും കിടങ്ങൂര്‍-മണര്‍കാട് റോഡിലും കോട്ടയം ടൗണിലെ വിവിധ ഭാഗങ്ങളിലും വലിയ കുഴികള്‍ രൂപപ്പെട്ടിരിക്കുകയാണ്. ഇരുചക്ര വാഹനങ്ങള്‍ ഉള്‍പ്പെടെയുള്ളവ കുഴികളില്‍ ചാടാതെ വെട്ടിക്കുന്നത് അപകടങ്ങള്‍ക്കും കാരണമാകുന്നു.

കടം കയറിയാലും തീരുന്നതല്ല വള്ളംകളിയുടെ ആവേശാരവം

കോട്ടയം: വള്ളംകളി സീസണിലേക്ക് ഒരു ടീമിനു വേണ്ടിവരുന്നത് ഒരു കോടി രൂപ വരെ. പരിശീലനം നേടി മത്സരം കാഴ്ചവയ്ക്കാന്‍ ചില്ലറയല്ല ചെലവ്. വള്ളംകളി സംഘാടകരില്‍നിന്നു കിട്ടുന്ന വിഹിതംകൊണ്ടൊന്നും പരിശീലനം പൂര്‍ത്തിയാക്കാനാവില്ല. കഴിഞ്ഞ നെഹ്റു ട്രോഫി വള്ളംകളിയുടെ വിഹിതം അഞ്ചു ലക്ഷം രൂപ ടീമുകള്‍ക്ക് ലഭിച്ചത് കഴിഞ്ഞ മാസമാണ്. ടൂറിസം വകുപ്പിന്‍റെ ചാമ്പ്യന്‍സ് ബോട്ട് ലീഗ് വള്ളംകളിയുടെ കഴിഞ്ഞ വര്‍ഷത്തെ വിഹിതം മൂന്നു ലക്ഷം രൂപ പുതിയ സീസണ്‍ അടുത്തിട്ടും ലഭിച്ചില്ല. ചമ്പക്കുളം മൂലം വള്ളംകളിയില്‍ തുടങ്ങി നെഹ്റു ട്രോഫിയും പിന്നിട്ട് ചാമ്പ്യന്‍സ് ബോട്ട് ലീഗോടെയാണ് സീസണ്‍ സമാപിക്കുക. തുഴച്ചില്‍കാര്‍ക്ക് ഇക്കാലത്ത് ഒരു മാസത്തേക്ക് അന്‍പതിനായിരം രൂപയുടെ പാക്കേജാണ്. കൂടാതെ താമസസൗകര്യവും നാലു നേരം ഭക്ഷണവും നല്‍കണം. കാഷ്മീര്‍, ആസാം, ഡല്‍ഹി ഉള്‍പ്പെടെ സംസ്ഥാനങ്ങളില്‍നിന്ന് കുമരകത്ത് തുഴച്ചില്‍കാര്‍ വരുന്നുണ്ട്. ഇവര്‍ക്ക് വിമാന ടിക്കറ്റ് ഉള്‍പ്പെടെ സ്‌പെഷല്‍ പാക്കേജാണ്. ഒരു ചുണ്ടന്‍വള്ളത്തില്‍ തുഴക്കാരും അമരക്കാരും താളക്കാരും മറ്റുമായി നൂറോളം പേരുണ്ടാകും. കൂടാതെ സംഘാടകരും കമ്മിറ്റിയും ഉള്‍പ്പെടെ വേറെയും നൂറു പേര്‍ സജീവമായി കൂടെ നില്‍ക്കണം. വള്ളംകളി മത്സരം തുടങ്ങുന്നതിന് 10 ദിവസം മുമ്പ് മുതലാണ് മത്സരത്തില്‍ പങ്കെടുക്കുന്ന ചുണ്ടന്‍വള്ളത്തില്‍ പരിശീലനം നടത്തുക. അതുവരെയുള്ള പരിശീലനത്തിന് ചുണ്ടന്‍ വാടകയ്ക്കെടുക്കണം. ഒരു ചുണ്ടന് എട്ട് ലക്ഷം രൂപവരെയാകും വാടക. മൂന്നാഴ്ച നീളുന്ന പരിശീലനത്തിന്‍റെ തുടക്കവും ഒടുക്കവും വള്ളം മിനുക്കി പെയിന്‍റ് ചെയ്ത് എണ്ണയിടുന്നതില്‍ ഭാരിച്ച ചെലവുണ്ട്. ഇതിനു പുറമെയാണ് നയമ്പും മറ്റും വാങ്ങാനുള്ള ചെലവുകള്‍. വള്ളംസമിതിയുടെയും സ്പോണ്‍സര്‍മാരുടെയുമെല്ലാം സഹായംകൊണ്ടാണ് മിക്ക ചുണ്ടൻ വള്ളങ്ങളും മത്സരത്തിനെത്തുന്നത്. വള്ളംകളി പ്രേമികള്‍ വിഹിതമെടുത്തും നാട്ടുകാരുടെ സഹകരണം തേടിയുമാണ് ബോട്ട് ക്ലബ്ബുകള്‍ ഓളപ്പരമ്പിലെ ഒളിമ്പിക്‌സില്‍ മത്സരിക്കാന്‍ ടീമുകളെ ഒരുക്കുക. കുമരകത്തുനിന്നും ഇക്കൊല്ലം രണ്ടു ടീമുകള്‍ നെഹ്റു ട്രോഫി വള്ളംകളിയില്‍ പങ്കെടുക്കാനൊരുങ്ങുകയാണ്. ഓഗസ്റ്റ് മുപ്പതിന് വള്ളകളിക്കു പോകാന്‍ ജൂലൈ അവസാനം പരിശീലനം തുടങ്ങും. ഓരോ വര്‍ഷവും ടീമുകള്‍ ഭീമമായ കടക്കെണിയിലാണ് സീസണ്‍ കഴിഞ്ഞ് വള്ളം കരയില്‍ കയറ്റുക.

ക്യാപ്‌സ് സംസ്ഥാന കമ്മിറ്റി ഓഫീസ് ഉദ്ഘാടനവും ലഹരി വിരുദ്ധ ശില്പശാലയും നാളെ

കോട്ടയം: കേരള അസോസിയേഷന്‍ ഓഫ് പ്രഫഷണല്‍ സോഷ്യല്‍ വര്‍ക്കേഴ്‌സ് (ക്യാപ്‌സ്) സംസ്ഥാന കമ്മിറ്റി ഓഫീസ് ഉദ്ഘാടനവും ലഹരി വിരുദ്ധ പ്രവര്‍ത്തനങ്ങളുടെ സംസ്ഥാന ശില്പശാലയും നാളെ രാവിലെ 9.45നു കോട്ടയം ലോഗോസ് ജംഗ്ഷനിലെ സിറിള്‍സ് ടൗവറിലും ഹോട്ടല്‍ ഫ്‌ളോറല്‍ പാലസിലും നടക്കും. സംസ്ഥാന ഓഫീസിന്‍റെ ഉദ്ഘാടനം ചീഫ് വിപ്പ് ഡോ. എന്‍. ജയരാജും ലഹരി വിരുദ്ധ പരിപാടികളുടെ ഉദ്ഘാടനം ഫ്രാന്‍സിസ് ജോര്‍ജ് എംപിയും ലഹരി വിരുദ്ധ ശില്പശാലയുടെ ഉദ്ഘാടനം തിരുവഞ്ചൂര്‍ രാധാകൃഷ്ണന്‍ എംഎല്‍എയും ലഹരി വിരുദ്ധ സന്ദേശം ജില്ലാ പോലീസ് മേധാവി ഷാഹുല്‍ ഹമീദും നിര്‍വഹിക്കും. സംസ്ഥാന പ്രസിഡന്‍റ് ഡോ. ചെറിയാന്‍ പി. കുര്യന്‍ അധ്യക്ഷത വഹിക്കും. ഇന്ത്യാ നെറ്റ്‌വര്‍ക്ക് ഓഫ് പ്രഫഷണല്‍ സോഷ്യല്‍ വര്‍ക്കേഴ്‌സ് അസോസിയേഷന്‍സ് പ്രസിഡന്‍റ് ഡോ. ഗാന്ധിദാസ്, ദേശീയ സെക്രട്ടറി ഡോ. ഐപ്പ് വര്‍ഗീസ്, ക്യാപ്‌സ് വര്‍ക്കിംഗ് പ്രസിഡന്‍റ് ഡോ. എം.പി. ആന്‍റണി, ജനറല്‍ സെക്രട്ടറി പ്രഫ. സേവ്യര്‍കുട്ടി ഫ്രാന്‍സിസ്, ട്രഷറര്‍ ഡോ. ഫ്രാന്‍സിന സേവ്യര്‍ എന്നിവര്‍ പങ്കെടുക്കും. ലഹരി വിരുദ്ധ ശില്പശാലയ്ക്ക് ഡോ. ജോവാന്‍ ചുങ്കപ്പുര, ഫ്രാന്‍സിസ് മൂത്തേടന്‍, സോണി സെല്‍വി, ഡോ. കെ.ആര്‍. അനീഷ് എന്നിവര്‍ നേതൃത്വം നല്‍കും. കെ. ചിറ്റിലപ്പള്ളി ഫൗണ്ടേഷനും ഇസാഫ് ബാങ്കും സഹകരിച്ചാണ് പദ്ധതി നടപ്പാക്കുന്നത്. പത്രസമ്മേളനത്തില്‍ ഡോ. ചെറിയാന്‍ പി. കുര്യന്‍, ഡോ. എം.പി. ആന്‍റണി, വൈസ്പ്രസിഡന്‍റ് എം.ബി. ദിലീപ് കുമാര്‍, ഡോ. ജെയ്‌സണ്‍ ഫിലിപ്പ് ആലപ്പാട്ട് എന്നിവര്‍ പങ്കെടുത്തു.

വന്ധ്യംകരണംകൊണ്ടു മാത്രമായില്ല; പേവിഷബാധയാണ് അപകടകാരി

കോട്ടയം: തെരുവുനായകളെ പിടികൂടി വന്ധ്യംകരിച്ച് തുറന്നുവിട്ടതുകൊണ്ടു മാത്രം കാര്യമായില്ല. പേ വിഷബാധ പ്രതിരോധ കുത്തിവയ്പുകള്‍ തുടരെ നല്‍കാത്ത സാഹചര്യത്തില്‍ തെരുവുനായകള്‍ക്ക് പേയിളകാനുള്ള സാധ്യതയും സാഹചര്യവും ഏറെയാണ്. നിലവില്‍ നാടും നഗരവും നേരിടുന്ന ഏറ്റവും ഭയാനകമായ സ്ഥിതിവിശേഷമാണ് തെരുവുനായ ആക്രമണം. മത്സ്യം, മാംസം എന്നിവയുടെ അവശിഷ്ടങ്ങള്‍ പതിവായി തിന്നുന്ന നായകള്‍ക്ക് ആക്രമണവാസന കൂടുതലുണ്ട്. പെറ്റുപെരുകാനുള്ള സാധ്യത കുറയും എന്നതു മാത്രമാണ് വന്ധ്യംകരണംകൊണ്ടുളള ഏകനേട്ടം. എന്നാല്‍ വന്ധ്യംകരണം എത്ര നടത്തിയാലും നായക്കൂട്ടത്തിലേക്ക് പുതിയ നായകള്‍ വന്നുകൊണ്ടിരിക്കും. പ്രായമായതും രോഗം വന്നതുമായ നായകളെ ഉടമകള്‍ നഗരങ്ങളില്‍ ഉപേക്ഷിച്ചു കളഞ്ഞാല്‍ ഇവയും തെരുവു നായകളുടെ സംഘത്തില്‍ ചേരും. തെരുവുനായ ആക്രമണത്തില്‍ കുട്ടികള്‍ക്ക് ഉള്‍പ്പെടെ ഇക്കൊല്ലം ഇതുവരെ സംസ്ഥാനത്ത് രണ്ടായിരം പേര്‍ക്കാണ് കടിയേറ്റത്. പേ വിഷ പ്രതിരോധ കുത്തിവയ്പ് എടുത്തശേഷവും അഞ്ചു കുട്ടികള്‍ക്ക് മരണം സംഭവിക്കുകയും ചെയ്തു. നിലവില്‍ ലഭ്യമായ റാബീസ് വാക്‌സിന്‍ പഴയതുപോലെ പ്രതിരോധം നല്‍കുന്നതല്ലെന്ന് പരക്കെ പരാതിയുണ്ട്. വന്ധ്യകരണ യജ്ഞം എത്രനാള്‍ തുടര്‍ന്നാലും പകുതിയോളം തെരുവുനായകളെപോലും കണ്ടെത്തി പിടികൂടുക എളുപ്പമല്ല. നഗരങ്ങളിലും ബീച്ചുകളിലും മത്സ്യ-മാംസ മാര്‍ക്കറ്റുകളിലും ഇവ കൂട്ടമായി കഴിയുന്നുണ്ടെങ്കിലും ഗ്രാമങ്ങളില്‍ ഒറ്റപ്പെട്ട് അലഞ്ഞുതിരിയുന്ന നായകളെ പിടികൂടി വന്ധ്യംകരിക്കുക പ്രായോഗികമല്ല. കുറുക്കന്‍, നരി തുടങ്ങിയ ജീവികളില്‍നിന്ന് ഇവയ്ക്ക് പേ വിഷബാധയുണ്ടാവുക സാധാരണമായിരിക്കുന്നു. കോട്ടയത്ത് വന്ധ്യംകരണം തുടങ്ങിയ ദിവസംതന്നെ തെരുവുനായകള്‍ ഏറെയും നഗരത്തില്‍ നിന്ന് സ്ഥലം വിട്ടുകഴിഞ്ഞു. നായ പിടിത്തക്കാരെ തിരിച്ചറിഞ്ഞതോടെ ഇവരുടെ സാന്നിധ്യം ദൂരത്ത് കാണുമ്പോള്‍തന്നെ നായകള്‍ ഓടി കാട്ടില്‍ ഒളിക്കുന്ന സാഹചര്യമാണുള്ളത്.

മഴ ശക്തിപ്പെട്ടു; റബര്‍ ഉത്പാദനം നിലച്ചു

കോട്ടയം: മഴ കനത്തതോടെ മഴമറയിട്ട തോട്ടങ്ങളിലും റബര്‍ ടാപ്പിംഗ് നിലച്ചു. അടുത്ത നാലു ദിവസം കനത്ത മഴ പെയ്യുമെന്നാണ് കാലാവസ്ഥാ നിരീക്ഷണം. റബര്‍ ഷീറ്റിനും ലാറ്റക്‌സിനും വില ഒരേ നിരക്കിലായതിനാല്‍ ഏറെ കര്‍ഷകരും ഷീറ്റ് സംസ്‌കരണത്തില്‍നിന്ന് പിന്‍മാറിയതോടെ മാര്‍ക്കറ്റില്‍ ഷീറ്റിന് ക്ഷാമമുണ്ട്. ലാറ്റക്‌സിന് 202 രൂപയും ഷീറ്റിന് 201 രൂപയുമാണ് ഇന്നലെ മാര്‍ക്കറ്റ് വില. പുകപ്പുരകളില്‍ ഒരു കിലോ ഷീറ്റ് ഉണക്കാന്‍ ആറു രൂപ ചെലവും വാഹനക്കൂലിയും മുടക്കണമെന്നതിനാല്‍ കര്‍ഷകര്‍ ലാറ്റക്‌സ് വില്‍ക്കാന്‍ താല്‍പര്യപ്പെടുന്നു. വ്യവസായികള്‍ക്ക് റബര്‍ ഷീറ്റും ലാറ്റക്‌സും കാര്യമായി സ്റ്റോക്കില്ലാത്ത സാഹചര്യത്തില്‍ അടുത്തയാഴ്ച വില കുറെക്കൂടി മെച്ചപ്പെടുമെന്നാണ് മാര്‍ക്കറ്റ് സൂചന. കിഴക്കന്‍മലയോരമേഖലയില്‍ വന്യമൃഗശല്യത്തെത്തുടര്‍ന്ന് നിരവധി തോട്ടങ്ങളില്‍ ടാപ്പിംഗ് തുടങ്ങിയിട്ടില്ല. ഒട്ടേറെ തോട്ടങ്ങളില്‍ കാട്ടുപന്നി സ്ഥിരവാസമാക്കിയതും റബര്‍ മേഖലയ്ക്ക് ആഘാതമായി.

കൊക്കയാർ മാക്കൊച്ചിയിൽ ഭൂമിക്കടിയിൽനിന്നു മുഴക്കം കേട്ടതായി വ്യാജ പ്രചാരണം

മുണ്ടക്കയം: 2021ലെ ഉരുൾപൊട്ടലിൽ നിരവധി ജീവനുകൾ പൊലിഞ്ഞ കൊക്കയാർ പഞ്ചായത്തിലെ മാക്കൊച്ചി മേഖലയിൽ ഭൂമിക്കടിയിൽനിന്നു മുഴക്കം കേട്ടതായി പ്രചാരണം. എന്നാൽ, ഇത് അടിസ്ഥാനരഹിതമെന്ന് വില്ലേജ് അധികാരികളും ജനപ്രതിനിധികളും. ബുധനാഴ്ചയാണ് കനത്ത മഴയിൽ മേഖലയിൽ നിന്നു മുഴക്കം കേട്ടതായി സോഷ്യൽ മീഡിയയിലടക്കം വ്യാപകമായി പ്രചരണം നടന്നത്. ഇതോടെ പ്രദേശവാസികൾ കടുത്ത ആശങ്കയിലായി. പല കുടുംബങ്ങളും രാത്രിയിൽ ഉറങ്ങാതെ കഴിഞ്ഞുകൂടുന്ന സാഹചര്യവുമുണ്ടായി. സംഭവത്തിന്‍റെ നിജസ്ഥിതിയെപ്പറ്റി ജനപ്രതിനിധികളും പോലീസ് രഹസ്യാന്വേഷണ വിഭാഗവും മാധ്യമങ്ങളും അന്വേഷണം നടത്തിയെങ്കിലും നിജസ്ഥിതി വ്യക്തമായില്ല. മാക്കൊച്ചി പ്രദേശത്ത് ഭൂമിക്കടിയിൽനിന്നു മുഴക്കം കേട്ടതായി ശ്രദ്ധയിൽപ്പെട്ടിട്ടില്ലെന്നും ഇത്തരം പ്രചരണം വ്യാജമാണെന്നും കൊക്കയാർ വില്ലേജ് ഓഫീസർ പറഞ്ഞു. അനാവശ്യമായി നടത്തുന്ന പ്രചരണം നാടിനെ പേടിപ്പെടുത്തുകയാണെന്നും സംഭവത്തിൽ വാസ്തവമില്ലെന്നും അന്വേഷണത്തിൽ പ്രചാരണം തെറ്റാണന്ന് മനസിലാക്കാനായതായും കൊക്കയാർ പഞ്ചായത്ത് മെംബർ സ്റ്റാൻലി സണ്ണിയും പറഞ്ഞു.

ഫ്ളാഷ് മോബ് സംഘടിപ്പിച്ചു

മുണ്ടക്കയം: ലഹരിക്കെതിരേ പടപൊരുതാൻ ജനമൈത്രി പോലീസിനോടു ചേർന്ന് സെന്‍റ് ജോസഫ്സ് സെൻട്രൽ സ്കൂളിലെ വിദ്യാർഥികൾ. ലഹരിക്കെതിരായ ബോധവൽക്കരണത്തിന്‍റെ ഭാഗമായി വിദ്യാർഥികളുടെ നേതൃത്വത്തിൽ മുണ്ടക്കയം ബസ് സ്റ്റാൻഡിൽ ഫ്ലാഷ് മോബ് അവതരിപ്പിച്ചു. മുണ്ടക്കയം പോലീസ് സ്റ്റേഷൻ എസ്എച്ച്ഒ രാകേഷ് കുമാർ ഉദ്ഘാടനം ചെയ്തു. സ്കൂൾ മാനേജർ ഫാ. മത്തായി മണ്ണൂർവടക്കേതിൽ, പ്രിൻസിപ്പൽ ഫാ. തോമസ് നാലന്നടിയിൽ, സ്കൂൾ ഹെഡ്ഗേൾ അയന സൂസൻ എന്നിവർ ലഹരിവിരുദ്ധ സന്ദേശം നൽകി. തുടർന്ന് വിദ്യാർഥികളുടെ നേതൃത്വത്തിൽ വിവിധ സ്ഥലങ്ങളിൽ വാഹന പ്രചരണ ജാഥ, ലഹരിവിരുദ്ധ ബോധനഗീതം, ലഹരിവിരുദ്ധ പ്രതിജ്ഞ, വ്യത്യസ്ത ലഹരിവിരുദ്ധ ബോധവത്കരണ പരിപാടികൾ എന്നിവ സംഘടിപ്പിച്ചു. പിടിഎ എക്സിക്യൂട്ടീവ് അംഗങ്ങളും അധ്യാപകരും പ്രവർത്തനങ്ങൾക്ക് നേതൃത്വം നൽകി.

മെഗാ രക്തദാന ക്യാമ്പ് നടത്തി

മുരിക്കുംവയൽ: ശ്രീ ശബരീശ കോളജ് നാഷണൽ സർവീസ് സ്കീം യൂണിറ്റിന്‍റെയും സ്റ്റേറ്റ് ബാങ്ക് ഓഫ് ഇന്ത്യ ചങ്ങനാശേരി റീജണൽ ബിസിനസ് ഓഫീസിന്‍റെയും പാലാ ബ്ലഡ് ഫോറത്തിന്‍റെയും മരിയൻ മെഡിക്കൽ സെന്‍ററിൻ്റെയും സഹകരണത്തോടെ മുരിക്കുംവയൽ ശ്രീ ശബരീശ കോളജിൽ മെഗാ രക്തദാന ക്യാമ്പ് നടത്തി. സ്റ്റേറ്റ് ബാങ്ക് ഓഫ് ഇന്ത്യയുടെ മുണ്ടക്കയം മാനേജർ അർജുൻ ആർ. നായർ രക്തദാനക്യാമ്പ് ഉദ്ഘാടനം ചെയ്തു. പ്രിൻസിപ്പൽ എം. ജിജീഷ് അദ്ധ്യക്ഷത വഹിച്ചു. പാലാ ബ്ലഡ് ഫോറം ജനറൽ കൺവീനർ ഷിബു തെക്കേമറ്റം രക്തദാന സന്ദേശം നൽകി. എസ്ബിഐ മുരിക്കുംവയൽ ബ്രാഞ്ച് മാനേജർ പ്രവീൺ ശശിധരൻ, എൻഎസ്എസ് പ്രോഗ്രാം ഓഫീസർമാരായ വി.ജി. ഹരീഷ്കുമാർ, അരുൺ കെ. ബാലൻ, ബി. അഖിൽജിത്, ഡോ.വി.ഡി. മാമച്ചൻ, സിസ്റ്റർ ബിൻസി എഫ്സിസി, സിസ്റ്റർ മരീനാ ജോസ് എഫ്സിസി, അനന്ത കൃഷ്ണ തുടങ്ങിയവർ പ്രസംഗിച്ചു. യുവജനതയിൽ സാമൂഹിക പ്രതിബദ്ധത രൂപപ്പെടുത്തുന്ന പദ്ധതിയുടെ ഭാഗമായി നിരവധി രക്തദാന ക്യാമ്പുകൾ ശ്രീ ശബരീശ കോളജ് എൻഎസ്എസ് യൂണിറ്റിന്‍റെ ആഭിമുഖ്യത്തിൽ ഈ അക്കാദമിക വർഷം സംഘടിപ്പിക്കുമെന്ന് ഭാരവാഹികൾ അറിയിച്ചു. സ്റ്റേറ്റ് ബാങ്ക് ഓഫ് ഇന്ത്യയുടെ 70-ാം സ്ഥാപക ദിനത്തോടനുബന്ധിച്ച് ഇന്ത്യയൊട്ടാകെ രക്തദാന ക്യാമ്പുകൾ നടത്തുന്നുണ്ട്. എഴുപത് വിദ്യാർഥികളൾ ശ്രീ ശബരീശ കോളജിൽ നടന്ന ക്യാമ്പിൽ രക്തം ദാനം ചെയ്തു.

പുതിയ ബാച്ചുകളുടെ ആരംഭവും അവാര്‍ഡ് ജേതാവിനെ ആദരിക്കലും

കാഞ്ഞിരപ്പള്ളി: കാഞ്ഞിരപ്പള്ളി സെന്‍റ് ആന്‍റണീസ് കോളജില്‍ പുതിയതായി പ്രവേശനം നേടിയ മൂന്നുറിലധികം വിദ്യാർഥികള്‍ക്കുള്ള ഓറിയന്‍റേഷന്‍ ക്ലാസും എഡ്യുക്കേഷണല്‍ എക്‌സലസ്, ഗുരുശ്രേഷ്ഠ അവാര്‍ഡ് ഉള്‍പ്പെടെ നിരവധി അവാര്‍ഡുകള്‍ നേടിയ കോളജ് ഡയറക്ടര്‍ ഡോ. ആന്‍റണി ജോസഫ് കല്ലമ്പള്ളിക്ക് അനുമോദനവും സംഘടിപ്പിച്ചു. കോളജില്‍ പുതിയതായി ആരംഭിച്ച പ്ലസ് വണ്‍ സയന്‍സ് ബാച്ചിന്‍റെ ഉദ്ഘാടനവും ഇതോടനുബന്ധിച്ച് നടന്നു. വൈസ് പ്രിന്‍സിപ്പല്‍ ടിജോമോന്‍ ജേക്കബ്, സ്റ്റാഫ്‌ സെക്രട്ടറിമാരായ ബേബി മാത്യു, ലൂസിയാമ്മ ജോര്‍ജ് തുടങ്ങിയവര്‍ പ്രസംഗിച്ചു. ഏവിയേഷന്‍, ഡിഎംഎല്‍ടി, ഹോട്ടല്‍ മാനേജ്‌മെന്‍റ്, പ്ലസ് വണ്‍, ഡിഗ്രീ കോഴ്‌സുളിലേക്കുള്ള അഡ്മിഷന്‍ തുടരുകയാണന്ന് പ്രിന്‍സിപ്പല്‍ എ.ആര്‍. മധുസൂദനന്‍ അറിയിച്ചു.

പ്രതിയുമായി പോയ പോലീസ് ജീപ്പ് മറിഞ്ഞു

മണിമല: പുനലൂർ - മൂവാറ്റുപുഴ സംസ്ഥാനപാതയിൽ മണിമലയ്ക്കു സമീപം കറിക്കാട്ടൂരിൽ പ്രതിയുമായി പോയ പോലീസ് ജീപ്പ് നിയന്ത്രണംവിട്ട് മറിഞ്ഞു. അപകടത്തിൽ ആർക്കും പരിക്കില്ല. പത്തനംതിട്ട ചിറ്റാർ പോലീസ് സ്റ്റേഷനിലെ ജീപ്പാണ് ഇന്നലെ വൈകുന്നേരം കനത്ത മഴയിൽ തെന്നിമറിഞ്ഞത്. വടക്കാഞ്ചേരിയിൽനിന്നു പ്രതിയുമായി ചിറ്റാർ പോലീസ് സ്റ്റേഷനിലേക്കു പോയ ജീപ്പാണ് അപകടത്തിൽപ്പെട്ടത്. വാഹനത്തിൽ പ്രതിയെ കൂടാതെ ഒരു എസ്ഐയും രണ്ടു പോലീസുകാരും ഉണ്ടായിരുന്നു. ഇവരിൽ ആർക്കും പരിക്കില്ല. കനത്ത മഴയിൽ ജീപ്പ് നിയന്ത്രണംവിട്ട് മറിയുകയായിരുന്നു. ജീപ്പിന്‍റെ ടയറുകൾ തേഞ്ഞുതീർന്ന നിലയിലാണ്. ഇതാണ് മഴയിൽ ജീപ്പ് തെന്നിമറിയാൻ കാരണമെന്ന് കരുതുന്നു.

ലോക ലഹരിവിരുദ്ധ ദിനാചരണം

നോ ഡ്രഗ് എസ്ഡിസി@60 യെസ് ലൈഫ് കാഞ്ഞിരപ്പള്ളി: ഉന്നത വിദ്യാഭ്യാസ വകുപ്പിന്‍റെ നിർദേശപ്രകാരമുള്ള ലോക ലഹരിവിരുദ്ധ ദിനാചരണത്തിന്‍റെ ഭാഗമായി കാഞ്ഞിരപ്പള്ളി സെന്‍റ് ഡൊമിനിക്സ് കോളജിലെ മുഴുവൻ അധ്യാപകരും വിദ്യാർഥികളും അനധ്യാപകരും ചേർന്ന് യെസ് ലൈഫ് എന്ന പേരിൽ ഒരൊറ്റ ചിത്രമായി ലഹരിവിരുദ്ധ സന്ദേശം പകർന്നു. കോളജിന്‍റെ വജ്രജൂബിലി വർഷാഘോഷത്തിന്‍റെ ഭാഗമായിരുന്നു യെസ് ലൈഫ് പരിപാടി. നോ ഡ്രഗ് എസ്ഡിസി @ 60 യെസ് ലൈഫ് എന്നീ വാക്കുകളുടെ രൂപത്തിൽ യഥാക്രമം ചുവപ്പ്, വെള്ള, പച്ച നിറങ്ങളിലുള്ള കാർഡുകൾ ഏന്തിയാണ് സെന്‍റ് ഡൊമിനിക്സ് ലഹരിവിരുദ്ധ ജീവിതാനുകൂല ചിത്രം രചിച്ചത്. കോളജിലെ അധ്യാപകനായ ഡോ. അരുൺ രാജ് രചിച്ച കവിതയിലൂടെയാണ് ലഹരി വിരുദ്ധ സന്ദേശം ആവിഷ്കരിച്ചത്. ജീവിതം മൂല്യങ്ങൾ നിറഞ്ഞതാകുമ്പോൾ ഉണ്ടാകുന്ന സന്തോഷത്തെ അവതരിപ്പിച്ചുകൊണ്ട് കാമ്പസ് ഒന്നാകെ സൂംബ നൃത്തച്ചുവടുകൾവച്ചു. തുടർന്ന് ലഹരിവിരുദ്ധ പ്രതിജ്ഞയും പോസ്റ്ററുകൾ തയാറാക്കലും നടത്തി. കഴിഞ്ഞ ഏതാനും വർഷങ്ങളായി കോളജിൽ നടത്തിവരുന്ന പങ്കാളിത്ത ബോധവത്കരണ പരിപാടിയുടെ ഭാഗമാണ് യെസ് ലൈഫ് സംഘടിപ്പിച്ചതെന്ന് പ്രിൻസിപ്പൽ ഡോ. സീമോൻ തോമസ് പറഞ്ഞു. ലഹരിയെ പ്രതിരോധിക്കുന്നതിന് സമൂഹം ഒന്നാകെ കൈകോർക്കണമെന്നും സമാപന സന്ദേശത്തിൽ അദ്ദേഹം ഓർമിപ്പിച്ചു. റവ.ഡോ. മനോജ് ജോസഫ്, പ്രഫ. ബിനോ പി. ജോസ്, എൻഎസ്എസ് പ്രോഗ്രാം ഓഫീസർമാരായ ഡോ. ജിനു എലിസബത്ത്, സെബാസ്റ്റ്യൻ, ഡോ.എസ്. പ്രശാന്ത് കുമാർ, പ്രഫ. നെൽസൺ കുര്യാക്കോസ്, പ്രഫ. മൈക്കിൾ തോമസ് എന്നിവർ നേതൃത്വം നൽകി. എസ്എംവൈഎം കാമ്പസ് ഷീൽഡ് പൊൻകുന്നം: പൊൻകുന്നം ഫൊറോന എസ്എംവൈഎമ്മിന്‍റെ ആഭിമുഖ്യത്തിൽ കേരള എക്സൈസ് ഡിപ്പാർട്ട്മെന്‍റിന്‍റെ സഹായത്തോടെ ലഹരിവിരുദ്ധ ദിനത്തിന്‍റെ ഭാഗമായി കാമ്പസ് ഷീൽഡ് എന്ന പേരിൽ വിവിധ സ്കൂളുകളിൽ ദൃശ്യാവിഷ്കാരങ്ങളും ലഹരി വിരുദ്ധ സന്ദേശവും പ്രതിജ്ഞയും നടത്തി. പാമ്പാടി എക്സൈസ് ഇൻസ്പെക്ടർ പി. ശ്രീകാന്ത്, എക്സൈസ് ഓഫീസർ നിതിൻ, പൊൻകുന്നം ഫൊറോന എസ്എംവൈഎം ഡയറക്ടർ ഫാ. നോബി വെള്ളാപ്പള്ളി, ഫൊറോന പ്രസിഡന്‍റ് മെറിൻ സക്കറിയാസ്, വൈസ് പ്രസിഡന്‍റ് ആൽബിൻ, സെബിൻ, എയ്ബൻ എന്നിവർ പ്രസംഗിച്ചു. ചെങ്കൽ ദേവാലയത്തിലെ യുവജനങ്ങൾ നേതൃത്വം നൽകി. ലഹരിവിരുദ്ധ സെമിനാർ നടത്തി ഇളങ്ങുളം: എലിക്കുളം പഞ്ചായത്തിന്‍റെ ലഹരിവിരുദ്ധ സെമിനാർ പൊൻകുന്നം എക്‌സൈസ് സർക്കിൾ ഇൻസ്‌പെക്ടർ കെ. ബിനു ഉദ്ഘാടനം ചെയ്തു. വൈസ്പ്രസിഡന്‍റ് സൂര്യാമോൾ അധ്യക്ഷത വഹിച്ചു. ജയിംസ് ജീരകത്തിൽ, കെ.എൻ. രാധാകൃഷ്ണപിള്ള, വി.പി. ശശി, എസ്. ഷാജി, സിൽവി വിത്സൺ, ഷേർളി അന്ത്യാംകുളം, സിനി ജോയി, ആഷാമോൾ തുടങ്ങിയവർ പ്രസംഗിച്ചു.

ഉന്നതിയിലേക്ക് എരുത്വാപ്പുഴ; ഒരു കോടിയുടെ പദ്ധതികൾക്ക് തുടക്കം

കണമല: എരുത്വാപ്പുഴയിൽ ആദിവാസി മലവേടർ വിഭാഗം അധിവസിക്കുന്ന പ്രദേശം മുമ്പ് കോളനി ആയിരുന്നെങ്കിൽ കോളനി എന്ന പേര് സർക്കാർ നീക്കി ഉന്നതിയിൽ എന്നാക്കിയത് അർഥപൂർണമാക്കാൻ ഒരു കോടി രൂപയുടെ വികസന പദ്ധതികൾ തുടങ്ങുന്നു. പദ്ധതികളുടെ നിർമാണോദ്ഘാടനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. 2024 ജൂണ്‍ 18 നാണ് കേരളത്തില്‍ കോളനികള്‍ എന്ന പേര് ഒഴിവാക്കി പകരം ഉന്നതികളും നഗറുകളുമാക്കിയത്. അടിസ്ഥാന വികസനം ഇല്ലാതെ നൂറോളം മലവേടർ കുടുംബങ്ങളാണ് വളരെ ദുരിത സാഹചര്യത്തിൽ എരുത്വാപ്പുഴയിലുള്ളത്. വർഷങ്ങൾക്ക് മുമ്പ് പുനരധിവസിപ്പിക്കപ്പെട്ട ഈ കുടുംബങ്ങൾക്കായി നടപ്പിലാക്കപ്പെട്ട വികസന ക്ഷേമ പദ്ധതികൾ ഫലപ്രാപ്തിയിലെത്തിയിട്ടില്ല. ഈ സാഹചര്യത്തിലാണ് സംസ്ഥാന പട്ടികവർഗ വികസന വകുപ്പിന്‍റെ അംബേദ്കർ ഗ്രാമം പദ്ധതിയിൽപ്പെടുത്തി ഒരു കോടി രൂപയുടെ പദ്ധതികൾക്ക് നടപടികളായത്. വിദ്യാർഥികളുള്ള വീടുകൾക്ക് അധികമായി പഠനമുറി, വീടുകളുടെ മെയിന്‍റനൻസ്, വയറിംഗ്, പ്ലംബിംഗ്, കിണറുകളുടെ പുനരുദ്ധാരണം, സംരക്ഷണഭിത്തികൾ, വ്യക്തിഗത ആനുകൂല്യങ്ങൾ എന്നിവ ഓരോ കുടുംബവുമായി ബന്ധപ്പെട്ട് നടപ്പിലാക്കുന്നതാണ് പദ്ധതി. ഒപ്പം കമ്മ്യൂണിറ്റി ഹാൾ വിപുലീകരണം, നിലവിലുള്ള റോഡിന്‍റെ കോൺക്രീറ്റ് നവീകരണം, പൊതു കിണറിന്‍റെ മെയിന്‍റ്നൻസ് എന്നിവയും ഉൾപ്പെടുന്നു. സംസ്ഥാന നിർമിതി കേന്ദ്രമാണ് നിർമാണ പ്രവർത്തനങ്ങൾ ചെയ്യുക. പൂഞ്ഞാർ മണ്ഡലത്തിൽ എരുത്വാപ്പുഴ കൂടാതെ മൂക്കൻപെട്ടി, കനകപ്പലം, ഇരുമ്പൂന്നിക്കര, ചെറുമല, മുറികല്ലുംപുറം, കൊമ്പുകുത്തി എന്നീ ഉന്നതികളിലും നഗറുകളിലും ഓരോ കോടി രൂപ പ്രകാരം അനുവദിച്ച് അംബേദ്കർ ഗ്രാമം പദ്ധതികൾ നടപ്പിലാക്കി വരുന്നുണ്ടെന്നും ഓരോ കുടുംബത്തിനും അടിസ്ഥാന സൗകര്യ വികസനത്തിനും ആവശ്യങ്ങൾ നിർവഹിക്കത്തക്ക വിധവുമാണ് പദ്ധതി ആവിഷ്കരിച്ചിട്ടുള്ളതെന്നും എംഎൽഎ പറഞ്ഞു. ഉദ്ഘാടന സമ്മേളനത്തിൽ ഊരുമൂപ്പൻ കേളൻ ഗോപി അധ്യക്ഷത വഹിച്ചു. പട്ടികവർഗ വികസന വകുപ്പ് ജില്ലാ പ്രോജക്ട് ഓഫീസർ എസ്. സജു, പഞ്ചായത്ത് മെംബർമാരായ എം.എസ്. സതീഷ്, മറിയാമ്മ ജോസഫ്, നിർമിതി കേന്ദ്രം റീജണൽ എൻജിനീയർ ടോമിച്ചൻ കെ. ജോസഫ്, ട്രൈബൽ എക്സ്റ്റൻഷൻ ഓഫീസർ കെ.വി. ജയേഷ് എന്നിവർ പ്രസംഗിച്ചു.

ലഹരി വിരുദ്ധ ദിനം

ചെമ്മലമറ്റം: അന്താരാഷ്ട്ര ലഹരിവിരുദ്ധ ദിനത്തിന്‍റെ ഭാഗമായി കെസിഎസ്എൽ പാലാ രൂപതയും ചെമ്മലമറ്റം ലിറ്റിൽ ഫ്‌ളവർ ഹൈസ്കുളും സംയുക്തമായി നടത്തിയ ലഹരിവിരുദ്ധ സമ്മേളനം ശ്രദ്ധയമായി വികാരി ജനറാൾ മോൺ. സെബാസ്റ്റ്യൻ വേത്താനത്ത് സമ്മേളനം ഉദ്ഘാടനം ചെയ്തു കോർപറേറ്റ് എഡ്യുക്കേഷൻ സെക്രട്ടറി ഫാ. ജോർജ് പുല്ലുകാലായിൽ, തിടനാട് സബ് ഇൻസ്പക്ടർ ശ്യാം കെ., ഹെഡ്മാസ്റ്റർ ജോബെറ്റ് തോമസ് തുടങ്ങിയവർ പ്രസംഗിച്ചു. പാലാ: സെന്‍റ് തോമസ് ഹൈസ്കൂളിൽ അന്താരാഷ്‌ട്ര ലഹരിവിരുദ്ധ ദിനാചരണത്തിന്‍റെ ഭാഗമായി വിവിധ പ്രവർത്തനങ്ങൾ നടത്തി. സ്കൂൾ പിടിഎ പ്രസിഡന്‍റ് വി.എം. തോമസ് അധ്യക്ഷത വഹിച്ച ലഹരിവിരുദ്ധ ദിനാചരണ സമ്മേളനം പാലാ സിവിൽ പോലീസ് ഓഫീസർ ലികേഷ് കാർത്തികേയൻ ഉദ്ഘാടനം ചെയ്തു. ഹെഡ്മാസ്റ്റർ ഫാ. റെജി തെങ്ങുംപള്ളി, വിദ്യാർഥി പ്രതിനിധികളായ സിറിയക് ഡയസ്, ജോസിയ വിനോദ്, തോമസ് അഭിലാഷ്, മൈക്കിൾ തോമസ് റോഷൻ എന്നിവർ പ്രസംഗിച്ചു. തുടർന്ന് പഠനമാണ് ലഹരി എന്ന ആശയം പങ്കുവച്ചുകൊണ്ട് കുട്ടികൾ സൂംബ ഡാൻസ് അവതരിപ്പിച്ചു. ഉപജില്ലാ ട്രെയിനറും സ്കൂൾ ഫിസിക്കൽ എജ്യുക്കേഷൻ അധ്യാപകനുമായ മനു ജെയിംസിന്‍റെ നേതൃത്വത്തിൽ നടത്തിയ ഡാൻസ് പ്രദർശനത്തിൽ സ്കൂളിലെ മുഴുവൻ വിദ്യാർഥികളും അധ്യാപകരും പങ്കെടുത്തു. സ്കൂളിലെ അഡാർട്ട് - വിമുക്തി ക്ലബ്ബുകളുടെ ആഭിമുഖ്യത്തിൽ നടത്തിയ ലഹരിവിരുദ്ധ ദിനാചരണ പ്രവർത്തനങ്ങൾക്ക് അധ്യാപക കോർഡിനേറ്റർ ഫെനിക്സ് ഫ്രാൻസിസ് നേതൃത്വം നൽകി.

ഭരണാധികാരികള്‍ മാരക ലഹരിക്കെതിരേ പിടിമുറുക്കണം: ബിഷപ് കല്ലറങ്ങാട്ട്

പാലാ: ഭരണാധികാരികള്‍ മാരക ലഹരികള്‍ക്കെതിരേ ശക്തമായി പിടിമുറുക്കണമെന്ന് ബിഷപ് മാര്‍ ജോസഫ് കല്ലറങ്ങാട്ട്. ആഗോള ലഹരിവിരുദ്ധ ദിനാചരണത്തിന്‍റെ ഭാഗമായി കെസിബിസി മദ്യവിരുദ്ധ സമിതി സംഘടിപ്പിച്ച സംസ്ഥാനതല ലഹരിവിരുദ്ധ സമ്മേളനം പാലായില്‍ ഉദ്ഘാടനം ചെയ്യുകയായിരുന്നു ബിഷപ്. അക്രമങ്ങളും കൊലപാതകങ്ങളും ഇല്ലാത്ത സിനിമകള്‍ പരാജയമാണെന്ന ചിന്ത മാറണം. ഈ ഭാഗങ്ങള്‍ ഇളംതലമുറയെ ഏറെ സ്വാധീനിക്കുന്നുണ്ട്. മദ്യമയക്കുമരുന്ന് സംസ്‌കാരം മനുഷ്യന്റെ നിലവാര തകര്‍ച്ചയാണ് സൂചിപ്പിക്കുന്നത്. മയക്കുമരുന്നുകളുടെ സ്വാധീനം സംസ്ഥാനത്ത് ഏറെ വര്‍ധിച്ചിട്ടുണ്ടെന്നും ലഹരിക്കെതിരെ പൊതുസമൂഹം ഒന്നിച്ച് പ്രതികരിക്കുകയും ചിന്തിക്കുകയും ചെയ്യണമെന്നും ബിഷപ് പറഞ്ഞു. രൂപതാ പ്രസിഡന്‍റും സംസ്ഥാന സെക്രട്ടറിയുമായ പ്രസാദ് കുരുവിള അധ്യക്ഷത വഹിച്ചു. ഫ്രാന്‍സിസ് ജോര്‍ജ് എം.പി, മാണി സി. കാപ്പന്‍ എംഎല്‍എ, ഫാ. ജേക്കബ് വെള്ളമരുതുങ്കല്‍, പ്രിന്‍സിപ്പല്‍ റവ. ഡോ. സിസ്റ്റര്‍ മിനിമോള്‍ മാത്യു, സാബു ഏബ്രഹാം, എക്സൈസ് ഇന്‍സ്പെക്ടര്‍ ജെക്സി ജോസഫ് എന്നിവര്‍ പ്രസംഗിച്ചു. സംസ്ഥാന സെക്രട്ടറി പ്രസാദ് കുരുവിള ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ഒരു മാസം നീണ്ടുനില്‍ക്കുന്ന പരിപാടികളായ ലഹരിവിരുദ്ധ പരിപാടികള്‍ ആസൂത്രണം ചെയതിട്ടുണ്ട്. സമ്മേളനങ്ങള്‍, സെമിനാറുകള്‍, കോര്‍ണര്‍ യോഗങ്ങള്‍, തൊഴില്‍ മേഖലകളിലൂടെയും വിദ്യാഭ്യാസ സ്ഥാപനങ്ങളിലൂടെയുമുള്ള സന്ദേശ പ്രതിജ്ഞാ പരിപാടികള്‍, ലഘുലേഖകള്‍, ഹൃസ്വചിത്ര പ്രദര്‍ശനം എന്നിവ നടത്തും.

മൂവായിരത്തിലേറെ ദീപങ്ങൾ മിഴി തുറന്നു; ലഹരിക്കെതിരേ കോട്ട തീർക്കാൻ കുറവിലങ്ങാട് ഇടവക

കുറവിലങ്ങാട്: മുവായിരത്തിലേറെ കുടുംബങ്ങളിൽ ലഹരിക്കെതിരേ ജാഗ്രതാദീപങ്ങൾ ഒരുമിച്ചു മിഴി തുറന്നു. 15,000 ത്തോളം പേർ സന്ധ്യാ പ്രാർത്ഥനയ്ക്കു ശേഷം ലഹരിവിരുദ്ധ പ്രവർത്തനങ്ങളിൽ പങ്കാളിയാകുമെന്ന് പ്രതിജ്ഞയെടുത്തു. ലഹരിക്കെതിരേ കോട്ടതീർക്കാനുള്ള കുറവിലങ്ങാട് ഇടവകയുടെ പരിശ്രമങ്ങളുടെ ആരംഭമാണ് വേറിട്ട പ്രവർത്തനങ്ങളിലൂടെ ശ്രദ്ധനേടിയത്. ഇടവകയുടെ ലഹരിവിരുദ്ധ വാരാചരണത്തിന്‍റെ ഭാഗമായിരുന്നു ജാഗ്രതാദീപം തെളിക്കലും പ്രതിജ്ഞയും. ഇടവകയിലെ വൈദികരുടെയും സന്യാസിനിമാരുടേയും യോഗപ്രതിനിധികളുടെയും കുടുംബ കൂട്ടായ്മാ ഭാരവാഹികളുടെയും നേതൃത്വത്തിലാണ് ലഹരിക്കെതിരേയുള്ള ആവേശകരമായ പ്രവർത്തനങ്ങൾക്ക് തുടക്കം കുറിച്ചത്. കുടുംബനാഥന്മാരാണ് സന്ധ്യാപ്രാർഥനയ്ക്കു ശേഷം വീടുകളിൽ ദീപം തെളിച്ച് പ്രതിജ്ഞ ചൊല്ലിക്കൊടുത്തത്. തുടർന്ന് കുടുംബാംഗങ്ങളെല്ലാം ജാഗ്രതാദീപം തെളിച്ചു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി നൽകിയ ആഹ്വാനത്തിന്‍റെ അടിസ്ഥാനത്തിലാണ് ഇടവക ഒന്നാകെ ലഹരിക്കെതിരേ കോട്ട തീർക്കാൻ രംഗത്തിറങ്ങിയിട്ടുള്ളത്. ഇടവകയുടെ ഏഴു വാർഡുകൾ ഉൾക്കൊള്ളിച്ചുള്ള ഓരോ സോണുകളിലും അന്പതോളം കുടുംബങ്ങൾ വീതം ഒരുമിച്ചുചേർന്ന് സോൺ തലത്തിലുള്ള പ്രവർത്തനങ്ങൾക്കും തുടക്കമിട്ടു. ലഹരിവിരുദ്ധ വാരാചരണ പ്രവർത്തനങ്ങളുടെ ഇടവകതല ഉദ്ഘാടനം ആർച്ച്പ്രീസ്റ്റ് റവ.ഡോ. തോമസ് മേനാച്ചേരി നിർവഹിച്ചു. സാമൂഹികതിന്മകൾക്കെതിരേ സാക്ഷ്യംവഹിക്കാനും പ്രവാചക ധീരതയോടെ പ്രവർത്തിക്കാനും കഴിയണമെന്ന് ആർച്ച്പ്രീസ്റ്റ് പറഞ്ഞു. സംസ്ഥാന എക്സൈസ് വകുപ്പ് പുറത്തിറക്കിയിട്ടുള്ള ലഹരിവിരുദ്ധ കാമ്പയിൻ ലഘുലേഖകളും വീഡിയോയും പ്രചരിപ്പിക്കുന്ന പ്രവർത്തനങ്ങളും ആരംഭിച്ചു. സീനിയർ അസി. വികാരി ഫാ. ജോസഫ് മണിയൻചിറ, അസിസ്റ്റന്‍റ് വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ എന്നിവർ സന്ദേശം നൽകി. കുടുംബ കൂട്ടായ്മാ ജനറൽ ലീഡർ ബോബിച്ചൻ നിധീരി, സോൺ ഭാരവാഹികളായ ഷൈജു പാവുത്തിയേൽ, ജിയോ സിറിയക് കരികുളം, ജോസ് സി. മണക്കാട്ട്, സണ്ണി വെട്ടിക്കാട്ടിൽ, ജോളി ടോമി എണ്ണംപ്രായിൽ, സ്മിത പുതിയിടത്ത്, ഷൈനി സാബു മഞ്ഞപ്പിള്ളി, ആശ വിക്ട കുന്നുമലയിൽ എന്നിവരും യോഗപ്രതിനിധികളും പ്രവർത്തനങ്ങൾക്കു നേതൃത്വം നൽകി.

മീനച്ചിൽ ഈസ്റ്റ് ബാങ്കിന്‍റെ നവീകരിച്ച ചേന്നാട് ബ്രാഞ്ച് ഉദ്ഘാടനം നാളെ

പുഞ്ഞാർ: മീനച്ചിൽ ഈസ്റ്റ് അർബൻ കോ-ഓപ്പറേറ്റീവ് ബാങ്കിന്‍റെ നവീകരിച്ച ചേന്നാട് ബ്രാഞ്ച് ഇടപാടുകാരുടെ സൗകര്യാർഥം ചേന്നാട് ടൗണിലുള്ള ഐക്കര സെന്‍റർ ബിൽഡിംഗിലേക്ക് നാളെ വൈകുന്നേരം നാലിന് മാറ്റി സ്ഥാപിക്കും നവീകരിച്ച ശഖാ മന്ദിരത്തിന്‍റെ ഉദ്ഘാടനം കേന്ദ്രമന്ത്രി ജോർജ് കുര്യൻ നിർവഹിക്കും. ബാങ്ക് ചെയർമാൻ കെ.എഫ് കുര്യൻ കളപ്പുരയ്ക്കൽപറമ്പിൽ അധ്യക്ഷത വഹിക്കും. ജില്ലാ പഞ്ചായത്ത് അംഗവും ബാങ്ക് വൈസ് ചെയർമാനുമായ അഡ്വ. ഷോൺ ജോർജ്, ജനപ്രതിനിധികൾ, ഭരണസ സമിതി അംഗങ്ങൾ,തുടങ്ങിയവർ പങ്കെടുക്കും.

കടപുഴ പാലം പുനര്‍നിര്‍മാണം: റിപ്പോര്‍ട്ട് ഉടന്‍ സമര്‍പ്പിക്കും-ഫ്രാന്‍സിസ് ജോര്‍ജ്

പാലാ: മൂന്നിലവ് കടപുഴ പാലം പുനര്‍നിര്‍മ്മിക്കുന്നത് സംബന്ധിച്ച് കേന്ദ്ര സര്‍ക്കാരിന് ഉടന്‍ റിപ്പോര്‍ട്ട് സമര്‍പ്പിക്കുമെന്ന് ഫ്രാന്‍സിസ് ജോര്‍ജ് എംപി. ഗവണ്‍മെന്‍റിന്‍റെ നിര്‍ദേശപ്രകാരം ഫ്രാന്‍സിസ് ജോര്‍ജ് എംപി, മാണി സി.കാപ്പന്‍ എംഎല്‍എ എന്നിവരുടെ നേതൃത്വത്തില്‍ ജനപ്രതിധികളും ഉദ്യോഗസ്ഥരും സ്ഥലം സന്ദര്‍ശിച്ച് സ്ഥിതിഗതികള്‍ വിലയിരുത്തി. പിഎംജിഎസ്‌വൈ പദ്ധതി ആവിഷ്‌കരണ വിഭാഗത്തിലെയും ദേശീയപാതാ വിഭാഗത്തിലെയും ഉദ്യോഗസ്ഥരാണ് റിപ്പോര്‍ട്ട് തയാറാക്കുന്നതിന്‍റെ ഭാഗമായി സ്ഥലം സന്ദര്‍ശിച്ചത്. 2021 ലെ അതിതീവ്രമഴയെ തുടര്‍ന്നാണ് പാലം തകര്‍ന്നത്. കേന്ദ അഭ്യന്തര വകുപ്പ് മന്ത്രി അമിത് ഷാ, കേന്ദ്ര ഗോത്രകാര്യ വകുപ്പ് മന്ത്രി ജൂവല്‍ ഓറം എന്നിവര്‍ക്ക് ഫ്രാന്‍സിസ് ജോര്‍ജ് എംപി നല്‍കിയ നിവേദനത്തിന്‍റെ അടിസ്ഥാനത്തിലാണ് വിശദമായ റിപ്പോര്‍ട്ട് തയാറാക്കാന്‍ ഉദ്യോഗസ്ഥരും ജനപ്രതിനിധികളും സന്ദര്‍ശനം നടത്തിയത്. കോട്ടയം ലോക്‌സഭാ മണ്ഡലത്തിലെ ഏക പട്ടികജാതി -പട്ടികവര്‍ഗ പഞ്ചായത്തായ മൂന്നിലവിലെ കടപുഴ പാലം അടിയന്തരമായി പുനര്‍നിര്‍മിക്കണമെന്ന ആവശ്യം ലോക്‌സഭയിലെ ശൂന്യവേളയില്‍ ഉന്നയിച്ചപ്പോള്‍ ഈ പ്രശ്‌നത്തില്‍ അടിയന്തരമായി ഇടപെടുമെന്നും കേന്ദ ഫണ്ട് ഉപയോഗിച്ച് പാലം നിര്‍മ്മിക്കുന്ന കാര്യം പരിഗണിക്കുമെന്നും മന്ത്രി അറിയിച്ചിരുന്നു. പാലം തകര്‍ന്നതോടെ മലഞ്ചെരുവുകള്‍ നിറഞ്ഞ പഞ്ചായത്തിലെ ഭൂരിപക്ഷം ജനങ്ങളുടെയും സഞ്ചാരം ദുഷ്‌കരമായിരിക്കുകയാണ്. ആശുപത്രികള്‍, സ്‌കൂള്‍, കോളജ് എന്നിവിടങ്ങളിലേക്ക് ജനങ്ങള്‍ക്ക് പോകാന്‍ 20 കിലോമീറ്ററിലധികം യാത്ര ചെയ്യേണ്ട അവസ്ഥക്ക് പരിഹാരം കാണാന്‍ ശ്രമിച്ചുവരുകയാണന്നും ഫ്രാന്‍സിസ് ജോര്‍ജ് എംപി പറഞ്ഞു. പൊതുമരാമത്ത് വകുപ്പ് തയാറാക്കിയ എസ്റ്റിമേറ്റ് അനുസരിച്ച് പാലം പുതുക്കിപ്പണിയാന്‍ നാലു കോടിയും അപ്രാച്ച് റോഡ് നിര്‍മ്മാണത്തിന് എട്ടു കോടി രൂപയുമാണ് കണക്കാക്കിയിരിക്കുന്നത്. എന്നാല്‍, സംസ്ഥാന സര്‍ക്കാര്‍ ഒരു നടപടിയും ഇതുവരെ സ്വീകരിച്ചിട്ടില്ലെന്ന് ഫ്രാന്‍സിസ് ജോര്‍ജ് എംപിയും മാണി സി. കാപ്പന്‍ എംഎല്‍എ യും പറഞ്ഞു. പിഎംജിഎസ്‌വൈ എക്‌സിക്യൂട്ടീവ് എൻജിനിയര്‍ ബിന്ദു വേലായുധന്‍, എഇ ജിറ്റ് ജോസഫ്, ദേശീയപാതാ വിഭാഗം അസി. എൻജനിയര്‍ കെ.എം. അരവിന്ദ്, മൂന്നിലവ് പഞ്ചായത്ത് പ്രസിഡന്‍റ് ചാര്‍ലി ഐസക്ക്, ഷാന്‍റിമോള്‍ സാം, ജോഷി ജോഷ്വാ, ജയിംസ് മാത്യു തെക്കേല്‍, എം.പി.കൃഷ്ണന്‍ നായര്‍, ജോര്‍ജ് പുളിങ്കാട്, തങ്കച്ചന്‍ മുളങ്കുന്നം, ഷൈന്‍ പാറയില്‍, റെജി മിറ്റത്താനി, ജോബി നമ്പുടാകം, എ.എസ്.സൈമണ്‍, ഡിജു സെബാസ്റ്റ്യന്‍ എന്നിവര്‍ സംഘത്തിലുണ്ടായിരുന്നു.

അരുവിത്തുറ കോളജിൽ ലഹരി വിരുദ്ധ ദിനമാചരിച്ചു

അരുവിത്തുറ: ഈരാറ്റുപേട്ട ജനമൈത്രി പോലീസിന്‍റെയും അരുവിത്തുറ സെന്‍റ് ജോർജസ് കോളജ് കൊമേഴ്സ് വിഭാഗത്തിന്‍റെയും ആഭിമുഖ്യത്തിൽ ലോക ലഹരി വിരുദ്ധ ദിനം വിപുലമായ പരിപാടികളോടെ സംഘടിപ്പിച്ചു. ഈരാറ്റുപേട്ട എസ്എച്ച്ഒ എ.ജെ. തോമസ് അധ്യക്ഷത വഹിച്ച ലഹരി വിരുദ്ധ ദിനാചരണം കോളജ് ബർസാർ റവ. ഫാ. ബിജു കുന്നയ്ക്കാട്ട് ഉദ്ഘാടനം ചെയ്തു. വൈസ് പ്രിൻസിപ്പൽ ഡോ. ജിലു ആനി ജോൺ, സെൽഫ് ഫിനാൻസ് കൊമേഴ്സ് വിഭാഗം മേധാവി പി.സി. അനീഷ്, കോമേഴ്സ് വിഭാഗം അധ്യാപകൻ ബിനോയ് സി. ജോർജ് തുടങ്ങിയവർ സംസാരിച്ചു. സംസ്ഥാന സർക്കാരിന്‍റെ "ജീവിതമാണ് ലഹരി' കാമ്പയിൻ ഭാഗമായി സംഘടിപ്പിച്ച പരിപാടിയിൽ വിദ്യാർഥികൾ ലഹരി വിരുദ്ധ പ്രതിജ്ഞ എടുത്തു. പൂഞ്ഞാർ എസ്എംവി ഹയർ സെക്കൻഡറി സ്കൂളിലെ വിദ്യാർഥികൾ അവതരിപ്പിച്ച നൃത്ത ശില്പവും ചടങ്ങിന് മാറ്റുകൂട്ടി.

സാമൂഹ്യനീതി വകുപ്പ് വോളിബോൾ ടൂർണമെന്‍റ്: അരുവിത്തുറ കോളജ് ജേതാക്കൾ

കോട്ടയം: സംസ്ഥാന സാമൂഹ്യനീതി വകുപ്പിന്‍റെ ആഭിമുഖ്യത്തിൽ കോട്ടയം ജില്ലാ സ്പോർട്സ് കൗൺസിലിന്‍റെ സഹകരണത്തോടെ നടന്ന ഇന്‍റർ കോളജിയേറ്റ് വോളിബോൾ ടൂർണമെന്‍റിൽ പുരുഷ വിഭാഗത്തിൽ അരുവിത്തുറ സെന്‍റ് ജോർജ് കോളജും വനിതാ വിഭാഗത്തിൽ ചങ്ങനാശേരി അസംഷൻ കോളജും ജേതാക്കളായി. കോട്ടയം ഇൻഡോർ സ്റ്റേഡിയത്തിലാണ് മത്സരങ്ങൾ നടന്നത്. സെമിഫൈനലിൽ നേരിട്ടുള്ള സെറ്റുകൾക്ക് സിഎംഎസ് കോളജ് കോട്ടയത്തെയും അഞ്ച് സെറ്റ് നീണ്ടുനിന്ന ഫൈനൽ മത്സരത്തിൽ സെന്‍റ് തോമസ് കോളജ് പാലായെയുമാണ് അരുവിത്തുറ കോളജ് പരാജയപ്പെടുത്തിയത്. വനിതാ വിഭാഗം ഫൈനൽ മത്സരത്തിൽ ഒന്നിനെതിരേ മൂന്ന് സെറ്റുകൾക്ക് അൽഫോൻസ കോളജ് പാലായെ പരാജയപ്പെടുത്തിയാണ് അസംഷൻ കോളജ് ജേതാക്കളായത്. വിജയികൾക്കുള്ള ട്രോഫിയും മെഡലും കാഷ് പ്രൈസും ജില്ലാ കളക്ടറുടെയും തിരുവഞ്ചൂർ രാധാകൃഷ്ണൻ എംഎൽഎയുടെയും സാന്നിധ്യത്തിൽ സാമൂഹ്യനീതി വകുപ്പിന്‍റെ ആഭിമുഖ്യത്തിൽ കോട്ടയം എംഡി സെമിനാരി സ്കൂളിൽ നടക്കുന്ന ചടങ്ങിൽ നൽകും.

ജില്ലയിൽ 54 പുതിയ ബസ് സര്‍വീസുകള്‍ ആരംഭിക്കാന്‍ ഗതാഗത വകുപ്പ്

കോട്ടയം: മലയോര മേഖലയിലടക്കം ജില്ലയില്‍ പുതിയ ബസ് സര്‍വീസുകള്‍ ആരംഭിക്കാന്‍ ഗതാഗത വകുപ്പ്. ജില്ലയിലെ ഒമ്പത് നിയോജകമണ്ഡലങ്ങളിലും ഗതാഗത വകുപ്പ് നടത്തിയ ജനകീയ സദസുകളില്‍നിന്നു ലഭിച്ച നിര്‍ദേശങ്ങളില്‍നിന്നാണ് 54 റൂട്ടുകളില്‍ ബസ് സര്‍വീസുകള്‍ ആരംഭിക്കാന്‍ തീരുമാനിച്ചത്. ഒരു റൂട്ടില്‍ രണ്ടുമുതല്‍ മൂന്നു ബസുകള്‍ക്കുവരെ അനുമതി ലഭിച്ചേക്കും. ഈ റൂട്ടുകളില്‍ ഭൂരിഭാഗം റൂട്ടുകളിലും നിലവില്‍ കെഎസ്ആര്‍ടിസിയോ സ്വകാര്യ ബസുകളോ സര്‍വീസ് നടത്തുന്നില്ല. ഒമ്പതു നിയോജക മണ്ഡലങ്ങളില്‍ നടത്തിയ ജനകീയ സദസില് 300 അപേക്ഷകളാണ് ലഭിച്ചത്. ലഭിച്ച അപേക്ഷയുടെ അടിസ്ഥാനത്തില്‍ മോട്ടോര്‍ വാഹനവകുപ്പ് ഉദ്യോഗസ്ഥര്‍ ജനപ്രതിനിധികളുമായി ചര്‍ച്ച നടത്തിയാണ് 54 റൂട്ടുകള്‍ തെരഞ്ഞെടുത്തിരിക്കുന്നത്. മലയോര മേഖലയില്‍ പല റൂട്ടുകളിലും ബസ് സര്‍വീസുകളില്ല, അതേപോലെ പുതിയതായി തുറന്ന റോഡുകളിലും സര്‍വീസുകള്‍ ഇല്ല. സ്‌കൂള്‍ കുട്ടികള്‍ അടക്കമുള്ളവര്‍ ഇതുമൂലം ദുരിതത്തിലാണ്. റൂട്ടുകളുടെ പേരുകള്‍ ഒരാഴ്ചയ്ക്കകം വിജ്ഞാപനത്തിലൂടെ പുറത്തിറക്കും. തുടര്‍ന്ന് റൂട്ടുകള്‍ ലേലം വയ്ക്കാനാണ് തീരുമാനം. കോവിഡ് കാലത്താണ് ജില്ലയില്‍ സ്വകാര്യ ബസ് സര്‍വീസുകള്‍ കൂടുതലും നിലച്ചുപോയത്. ലാഭകരമല്ലാത്ത റൂട്ടിലെ കെഎസ്ആര്‍ടിസി ബസുകളും പിന്‍വലിച്ചതോടെ പല ഗ്രാമങ്ങളും യാത്രാ സൗകര്യമില്ലാതെ ഒറ്റപ്പെട്ടുപോയിരുന്നു. കോവിഡിനു ശേഷം എല്ലാ രംഗവും സജീവമായെങ്കിലും നിര്‍ത്തിയ ബസ് സര്‍വീസുകള്‍ പലതും തുടങ്ങിയില്ല. ഇതോടെ പല മേഖലകളിലും യാത്രാക്ലേശം രൂക്ഷമാണ്. കെഎസ്ആര്‍ടിസി ഗ്രാമവണ്ടി എന്ന പേരില്‍ സര്‍വീസ് ആരംഭിച്ചെങ്കിലും പല പഞ്ചായത്തുകളും ഇതിനോട് വിമുഖത കാട്ടി. മീനച്ചില്‍ പഞ്ചായത്തിന്‍റെയും കടുത്തുരുത്തി, വൈക്കം ബ്ലോക്ക് പഞ്ചായത്തുകളുടെയും ഗ്രാമവണ്ടികള്‍ മാത്രമാണ് ഇപ്പോഴുമുള്ളത്. ഗതാഗത വകുപ്പ് നടത്തിയ അദാലത്തില്‍ ത്രിതല പഞ്ചായത്ത് പ്രതിനിധികളും എംഎല്‍എമാരും തങ്ങളുടെ പ്രദേശത്തെ യാത്രാക്ലേശം രൂക്ഷമായ റൂട്ടുകളില്‍ ബസ് സര്‍വീസിന് അനുമതി ആവശ്യപ്പെട്ട് മോട്ടോര്‍ വാഹന വകുപ്പിന് നിവേദനമായി സമര്‍പ്പിക്കുകയായിരുന്നു. പുതിയ സര്‍വീസുകള്‍ ഏറ്റെടുക്കാന്‍ സ്വകാര്യ ബസുകളും കെഎസ്ആര്‍ടിസിയും തയാറായാല്‍ ഗ്രാമീണ മേഖലയിലെ യാത്രാക്ലേശത്തിനു പരിഹാരമാകും.

ബാപ്പുജിയെയും ചാച്ചാജിയെയും കണ്ട എരുമേലിയുടെ മുത്തശി ഓർമയായി

എരുമേലി: പഴയ കാലത്തിന്‍റെ ഓർമപ്പുസ്തകമായിരുന്ന എരുമേലിയുടെ പ്രിയ കുട്ടിയമ്മ ഇനിയില്ല. 110 വയസിലെത്തിയ കനകപ്പലം നീറംപ്ലാക്കൽ (മേപ്രായിൽ) ശോശാമ്മ മാത്തൻ (കുട്ടിയമ്മ) ഇന്നലെ അന്തരിച്ചു. ഗാന്ധിജിയെയും നെഹ്‌റുവിനെയും കണ്ടത് ഉൾപ്പെടെ പഴയ കാലത്തെ ഓർമകൾ കുട്ടിയമ്മ പങ്കുവച്ചിരുന്നു. ബാല്യത്തിലാണ് ഗാന്ധിജിയെ കണ്ടത്. തിരുവല്ലയിൽ നെഹ്‌റു എത്തിയപ്പോൾ അടുത്തുനിന്ന് കണ്ടു. പോയകാലത്തിലെ ചരിത്രസംഭവങ്ങൾ വർഷവും മാസവും തീയതിയും അടക്കം കൃത്യമായി ഓർത്തുവച്ചിരുന്ന കുട്ടിയമ്മയുടെ ഓർമശക്തി അപാരമായിരുന്നു. എരുമേലി പഞ്ചായത്തിലെ ഏറ്റവും മുതിർന്ന വോട്ടറായിരുന്നു കുട്ടിയമ്മ. 1916 ഒക്ടോബർ ആറിനായിരുന്നു ജനനം. 13 വയസുള്ളപ്പോഴായിരുന്നു വിവാഹം. എട്ടു മക്കളിൽ നാലു പേർ മരണപ്പെട്ടു. ഭർത്താവ് ചാക്കോ മാത്തൻ 29 വർഷം മുമ്പാണ് മരണപ്പെട്ടത്. പിതാവ് മേപ്രായിൽ പാപ്പി പഴയകാലത്തെ സർക്കാർ ഫോറസ്റ്റ് കോൺട്രാക്ടറായിരുന്നു. മേഖലയിലെ ആദ്യ സ്കൂളായ കനകപ്പലത്തെ എൻഎം എൽപി സ്കൂളിലെ ആദ്യ വിദ്യാർഥികളിൽ ഒരാളായിരുന്നു കുട്ടിയമ്മ. നാലാം ക്ലാസ് വരെയാണ് പഠിച്ചതെങ്കിലും ഇംഗ്ലീഷിൽ എഴുതാനും വായിക്കാനും വശമാക്കിയിരുന്നു. പ്രായം 24 ആയപ്പോഴായിരുന്നു ആദ്യ വോട്ട്. അന്ന് 1952ലെ പാർലമെന്‍റ് തെരഞ്ഞെടുപ്പിൽ മൂവാറ്റുപുഴ മണ്ഡലം കോൺഗ്രസ്‌ സ്ഥാനാർഥി ജോർജ് തോമസ് കൊട്ടുകാപ്പള്ളിക്ക് തന്‍റെ ആദ്യ വോട്ട് ചെയ്തത് കാള ചിഹ്നത്തിൽ ആയിരുന്നെന്ന് കുട്ടിയമ്മ പറഞ്ഞിട്ടുണ്ട്. ആ വോട്ടുചരിത്രം കുട്ടിയമ്മ പങ്കുവച്ചത് പുതിയ തലമുറയ്ക്ക് അറിയാത്ത ശ്രദ്ധേയമായ വസ്തുതകൂടി പങ്കുവച്ചാണ്. അന്ന് ബൂത്തുകളിൽ ഓരോ സ്ഥാനാർഥിക്കും ഓരോ നിറത്തിലുള്ള പെട്ടിയാണ് ഉണ്ടാവുകയെന്നും അതിലാണ് വോട്ട് ചെയ്ത് ഇടേണ്ടതെന്നും ഈ പെട്ടികൾ ഒന്നിച്ചു കൊണ്ടുവന്ന് ഓരോ സ്ഥാനാർഥിയുടെയും വെവ്വേറെ തുറന്ന് എണ്ണിയാണ് വിജയിയെ പ്രഖ്യാപിച്ചിരുന്നതെന്നും പഴയ കാലം വീണ്ടെടുത്ത് കുട്ടിയമ്മ പങ്കുവച്ചിരുന്നു. 2015 ൽ പെട്ടെന്നുണ്ടായ അസുഖംമൂലം കിടപ്പിലായതിനാൽ അന്നത്തെ പഞ്ചായത്ത്‌ തെരഞ്ഞെടുപ്പിൽ വോട്ട് ചെയ്യാൻ കഴിഞ്ഞില്ലെന്നത് ഒഴിച്ചാൽ എല്ലാ തെരഞ്ഞെടുപ്പിലും കുട്ടിയമ്മ വോട്ട് ചെയ്തിരുന്നു. കുട്ടിയമ്മയുടെ സഹോദരൻ പി.ജി. മത്തായി രണ്ടു തവണ ജയിച്ച് പഞ്ചായത്ത്‌ പ്രസിഡന്‍റായിരുന്നു. മകൻ ജോയി മേപ്രായിൽ മുൻ പഞ്ചായത്ത്‌ വൈസ് പ്രസിഡന്‍റാണ്.

സ്‌കൂള്‍ മെനു കെങ്കേമമാക്കി സർക്കാർ ഫണ്ടിന്‍റെ കാര്യത്തിൽ മിണ്ടാട്ടമില്ല

കോട്ടയം: സര്‍ക്കാര്‍ അഞ്ചു പൈസ അധികം കൊടുക്കില്ല. എന്നാല്‍ സ്‌കൂളില്‍ കുട്ടികള്‍ക്ക് പോഷകസദ്യ കൊടുക്കുകയും വേണം. ഉച്ചഭക്ഷണ പദ്ധതിയില്‍ പുതുക്കിയ മെനു പുറത്തിറക്കി വിദ്യാഭ്യാസ മന്ത്രി കൈയടി വാങ്ങിയപ്പോള്‍ പെട്ടുപോയത് പ്രധാനാധ്യാപകരാണ്. അധികച്ചെലവ് അധ്യാപകര്‍ കണ്ടെത്തണമെന്ന് മന്ത്രി കഴിഞ്ഞ ദിവസം ആവര്‍ത്തിക്കുകകൂടി ചെയ്തതോടെ അധ്യാപക സംഘടനകള്‍ പരസ്യപ്രതിഷേധത്തിലേക്ക് കടന്നിരിക്കുന്നു. ഉപ്പിനും കറിവേപ്പിലയ്ക്കുംവരെ വില കൂടിയിരിക്കെ സര്‍ക്കാര്‍ വിഹിതം കൂട്ടാതെ സ്‌കൂള്‍ മെനു പരിഷ്‌കരണം നടപ്പാകില്ല. എല്‍പി സ്‌കൂളില്‍ ഒരു കുട്ടിക്ക് 6.78 രൂപയും യുപി ക്ലാസില്‍ 10.17 രൂപയുമാണ് സര്‍ക്കാര്‍ നല്‍കുന്നത്. സപ്ലൈകോയിലൂടെ അരി വെറുതെ കൊടുത്താലും കാര്യമില്ല. അരിയുടെ അഞ്ചിരട്ടി ചെലവാണ് പച്ചക്കറിക്കും പലവ്യഞ്ജനത്തിനും എണ്ണയ്ക്കും പാചകവാതകത്തിനും വരുന്നത്. ഒരു കുട്ടിക്ക് മിനിമം 30 രൂപ കൊടുക്കാതെ പുതിയ മെനു നടപ്പാകില്ല. പാചകക്കാരുടെ വേതനത്തിലും വര്‍ധനവുണ്ടാകണം. പാചകവാതകം, വാഹനച്ചെലവ്, പച്ചക്കറി, പലവ്യഞ്ജനം എന്നിവയ്ക്ക് നിലവിലെ തുക അപര്യാപ്തമാണെന്നറിയാതെയാണ് വിദ്യാഭ്യാസ മന്ത്രി ചെറുധാന്യങ്ങളും വന്‍ധാന്യങ്ങളും ഫ്രൈഡ് റൈസുമൊക്കെ ചേര്‍ന്ന സദ്യവട്ടം നിര്‍ദേശിക്കുന്നത്. ഒരു കിലോ ഫ്രൈഡ് റൈസ് അരിക്ക് 120 രൂപ മാര്‍ക്കറ്റ് വിലയുണ്ട്. പരിപ്പിനും പയറിനുമൊക്കെ വില നൂറിനു മുകളിലാണ്. ഇപ്പോഴും 500 കുട്ടികള്‍ക്ക് ഒരു പാചകക്കാരി മാത്രമേയുള്ളൂ. കുട്ടികള്‍ കൂടുതലുള്ള സ്‌കൂളുകളില്‍ അധ്യാപകരുടെ ചെലവില്‍ സഹായിയെകൂടി നിയമിച്ചാണ് ചോറും കറിയും വയ്ക്കുന്നത്. പുതിന, ഇഞ്ചി, നെല്ലിക്ക, പച്ചമാങ്ങ എന്നിവ ചേര്‍ത്തുള്ള ചമ്മന്തിവരെയാണ് മന്ത്രിയുടെ മനസിലുള്ളത്. ഇവ വെജ് റൈസ്, ബിരിയാണി, ലെമണ്‍ റൈസ് എന്നിവയുടെ കൂടെ തൊടുകറിയായി കൊടുക്കണം. ആഴ്ചയില്‍ റാഗി ഉപയോഗിച്ചു റാഗി ബാള്‍സ്, ശര്‍ക്കരയും തേങ്ങയും ചേര്‍ത്ത റാഗി കൊഴുക്കട്ട, ഇലയട, അവില്‍ കുതിര്‍ത്തത്, പാല്‍ ഉപയോഗിച്ച് കാരറ്റ് പായസം, റാഗിയോ മറ്റ് മില്ലറ്റുകളോ ഉപയോഗിച്ചുള്ള പായസം എന്നീ വിഭവങ്ങള്‍ മെനുവില്‍ ഉള്‍പ്പെടുത്തിയിട്ടുണ്ട്. ഒരു ലിറ്റര്‍ പാലിന് 55 രൂപയും ഒരു കിലോ തേങ്ങയ്ക്ക് 90 രൂപയും ശര്‍ക്കരയ്ക്ക് 60 രൂപയുമൊക്കെയാണ് നിരക്ക്. ചില സീസണില്‍ കാരറ്റ് വില നൂറിനു മുകളിലെത്താറണ്ട്. ഒരു കിലോ വെളിച്ചെണ്ണയ്ക്ക് വില 400 കടന്നു. ചെറുധാന്യങ്ങള്‍ക്കെല്ലാം 200 രൂപയ്ക്ക് മുകളിലാണ് വില. കഞ്ഞിയിലും ചെറുപയറിലുമായിരുന്നു സ്‌കൂള്‍ ഉച്ചഭക്ഷണത്തിന്‍റെ തുടക്കം. പിന്നീട് ചോറും കറിയുമായി. ചോറും കറിയും മാത്രം വയ്ക്കാന്‍ അറിയാവുന്ന സാധാരണക്കാരും വയോധികരുമായ പാചകക്കാരികള്‍ക്ക് വിദ്യാഭ്യാസമന്ത്രി പറയുന്ന ഒരു വിഭവവും തയാറാക്കാന്‍ വൈദഗ്ധ്യമില്ല. ഇവരാരുംതന്നെ ഹോം സയന്‍സ് പഠിച്ചവരുമല്ല. സ്റ്റാര്‍ ഹോട്ടലുകളിലെ മോഡേണ്‍ കിച്ചനില്‍ ഷെഫുമാര്‍ക്കുപോലും വശമില്ലാത്ത ഡിഷുകള്‍ സ്‌കൂളിലെ കഞ്ഞിപ്പുരയില്‍ തയാറാക്കാന്‍ പാചക പുസ്തകമോ യൂ ട്യൂബ് വീഡിയോയോ സര്‍ക്കാര്‍ പുറത്തിറക്കണമെന്ന് ചില അധ്യാപക സംഘടനകള്‍ ആവശ്യപ്പെട്ടു.

അഡ്വ. ജിസ്‌മോളുടെയും മക്കളുടെയും മരണം: ആക്‌ഷൻ കൗൺസിൽ പോലീസ് സ്റ്റേഷൻ മാർച്ച് നടത്തി

ഏറ്റുമാനൂര്‍: അഡ്വ. ജിസ്‌മോള്‍ തോമസ് മക്കൾക്കൊപ്പം ആറ്റിൽ ചാടി ജീവനൊടുക്കിയ സംഭവത്തിൽ അന്വേഷണം ക്രൈംബ്രാഞ്ചിനെ ഏല്‍പ്പിക്കണമെന്ന് ആവശ്യപ്പെട്ട് ആക്‌ഷന്‍ കൗണ്‍സിലിന്‍റെ നേതൃത്വത്തില്‍ ഏറ്റുമാനൂര്‍ പോലീസ് സ്‌റ്റേഷനിലേക്ക് മാര്‍ച്ച് നടത്തി. നിലവിലുള്ള കേസ് അന്വേഷണം തൃപ്തികരമല്ലെന്നും പ്രതികളെ എല്ലാവരെയും ചോദ്യം ചെയ്യണമെന്നും ആക്‌ഷന്‍ കൗണ്‍സിലും ജിസ്‌മോളുടെ ബന്ധുക്കളും ആവശ്യപ്പെട്ടു. പല കാര്യങ്ങളോടും പോലീസ് നിസംഗത പുലര്‍ത്തുകയാണെന്നും ആക്‌ഷന്‍ കൗണ്‍സില്‍ ഭാരവാഹികള്‍ പറഞ്ഞു. പ്രതിയുടെ വീട്ടിലുണ്ടായിരുന്ന സിസി ടിവി പോലീസ് പരിശോധിച്ചിട്ടില്ല. ഒന്നാം പ്രതി വഴക്ക് പറഞ്ഞതിന്‍റെ പേരിലാണ് മരണം നടന്നത് എന്ന പോലീസിന്‍റെ കണ്ടെത്തലും ജിസ്‌മോളെ മാനസികരോഗിയാക്കാനുള്ള പ്രതികളുടെ വ്യഗ്രതയും അന്വേഷണം അട്ടിമറിക്കാനുള്ള ഗൂഢനീക്കമായാണ് ആക്‌ഷന്‍ കൗണ്‍സില്‍ കാണുന്നത്. സംശയങ്ങള്‍ നിലനില്‍ക്കുന്ന സാഹചര്യത്തിലാണ് സമരവുമായി മുന്നോട്ടുപോകുന്നതെന്ന് ആക്‌ഷന്‍ കൗണ്‍സില്‍ ചെയര്‍മാന്‍ എന്‍.കെ. ശശികുമാര്‍ പറഞ്ഞു. ആക്‌ഷൻ കൗൺസിൽ ചെയർമാൻ എൻ.കെ. ശശികുമാർ, കൺവീനർ ശാന്തി പ്രഭാത, അംഗങ്ങളായ ആര്യ സബിൻ, പ്രിൻസ് നീറിക്കാട്, അശോക് എ.ആർ, ജിസ്മോളുടെ പിതാവ് പി.കെ. തോമസ്, രാജു ആലപ്പാട്ട് ഉൾപ്പെടെയുള്ളവർ പ്രതിഷേധ മാർച്ചിൽ പങ്കെടുത്തു. കേസിന്‍റെ പ്രാധാന്യം കണക്കിലെടുത്ത് ഗൗരവകരമായ അന്വേഷണമാണ് നടത്തിയതെന്ന് ഏറ്റുമാനൂര്‍ പോലീസ് പറഞ്ഞു. പ്രതികളില്‍ പലര്‍ക്കും ജാമ്യം ലഭിച്ചു. വിദേശത്തേക്ക് പോയ കുറ്റാരോപിതക്കായി ലുക്ക് ഔട്ട് നോട്ടീസ് പുറപ്പെടുവിച്ചിട്ടുണ്ടെന്നും പോലീസ് പറഞ്ഞു.

കാഞ്ഞിരപ്പള്ളിയുടെ മലയോരങ്ങളില്‍ കാലാവസ്ഥാ നിരീക്ഷണ സംവിധാനം

കോട്ടയം: കൂട്ടിക്കല്‍ ഉരുള്‍പൊട്ടലിന്‍റെ പശ്ചാത്തലത്തില്‍ കാഞ്ഞിരപ്പള്ളി ബ്ലോക്ക് പരിധിയില്‍ കാലാവസ്ഥാ മുന്നറിയിപ്പ് കൃത്യമായി നല്‍കാന്‍ സംവിധാനം. വയനാട് ജില്ലയിലെ കല്‍പ്പറ്റ ആസ്ഥാനമായ ഹ്യൂം സെന്‍റര്‍ ഫോര്‍ ഇക്കോളജിയുടെ സാങ്കേതിക സഹായത്തിലാണ് ജനകീയ സഹകരണത്തോടെ കാഞ്ഞിരപ്പള്ളി ബ്ലോക്ക് പരിധിയില്‍ സുരക്ഷാ സംവിധാനം. കൂട്ടിക്കല്‍, മുണ്ടക്കയം, കണമല, ഇളങ്കാട്, ഏന്തയാര്‍, കോരുത്തോട് എന്നിവിടങ്ങളില്‍ മൂന്നുമുതല്‍ അഞ്ചുവരെ കിലോമീറ്റര്‍ ഇടവിട്ട് മഴമാപിനികള്‍ വയ്ക്കും. ഓരോ ദിവസത്തെയും മഴ, കാറ്റിന്‍റെ വേഗം, അന്തരീക്ഷ ഈര്‍പ്പം, മണ്ണിലെ നനവ്, താപനില തുടങ്ങിയവ ശേഖരിക്കാന്‍ ജനങ്ങളുടെ സഹകരണം തേടും. ഇതുകൂടാതെ കാലാവസ്ഥാ നിരീക്ഷണ കേന്ദ്രം റഡാറില്‍ എടുക്കുന്ന ചിത്രങ്ങളും വിലയിരുത്തും. ഓരോ പ്രദേശത്തെയും മഴമേഘങ്ങളെ ശാസ്ത്രീയമായി അപഗ്രഥിക്കും. മേഘവിസ്‌ഫോടനം ഉള്‍പ്പെടെ ചെറിയൊരു പ്രദേശത്ത് പെരുമഴയും മലയിടിച്ചിലും വെള്ളപ്പൊക്കവും സംഭവിക്കാനുള്ള സാധ്യത ദുരന്തനിവാരണ വിഭാഗത്തെ അറിയിക്കും. ജനങ്ങള്‍ക്ക് മുന്‍കൂര്‍ അറിയിപ്പ് നല്‍കാനും സുരക്ഷിത സ്ഥലത്തേക്ക് മാറ്റാനും ഇത്തരത്തില്‍ സാധിക്കും. മുണ്ടക്കയം, പെരുവന്താനം, കൂട്ടിക്കല്‍, എരുമേലി പഞ്ചായത്ത് പരിധിയില്‍ കൂട്ടിക്കലിനു സമാനമായ ദുരന്തങ്ങള്‍ക്കും ഉരുള്‍പൊട്ടലിനും സാധ്യതയേറെയാണ്. ഈ സാഹചര്യത്തിലാണ് മണിമല, പമ്പ, അഴുത, പുല്ലകയാര്‍ നദീതീരങ്ങളോടു ചേര്‍ന്ന മലയോരങ്ങളില്‍ സംഭവിക്കാവുന്ന പ്രകൃതി ദുരന്തങ്ങളില്‍ ജാഗ്രത നല്‍കാന്‍ നീക്കം. നിലവില്‍ കേരളത്തില്‍തന്നെ ഏറ്റവുമധികം മഴലഭ്യതയുള്ള പ്രദേശങ്ങളുടെ പട്ടികയിലാണ് കാഞ്ഞിരപ്പള്ളി താലൂക്ക്. കുസാറ്റ്, ഐഎസ്ആര്‍ഒ ഉള്‍പ്പെടെ വിവിധ സ്ഥാപനങ്ങളുടെ സഹകരണത്തോടെ കാലാവസ്ഥാ നിരീക്ഷണ കേന്ദ്രങ്ങളും വിവിധയിടങ്ങളില്‍ സ്ഥാപിക്കുന്നുണ്ട്. 2021 ഒക്ടോബര്‍ 16ന് കൂട്ടിക്കല്‍, പ്ലാപ്പള്ളി, കാവാലി, കൊക്കയാര്‍ പ്രദേശങ്ങളിലുണ്ടായ അതിവര്‍ഷത്തില്‍ ആറിടത്ത് ഉരുള്‍പൊട്ടി വന്‍നാശനഷ്ടങ്ങളുണ്ടായി. 21 പേര്‍ക്ക് ജീവന്‍ നഷ്ടമായി. വലുതും ചെറുതുമായ 44 പാലങ്ങള്‍ തകര്‍ന്നു. ആറ് റോഡുകള്‍ ഒലിച്ചുപോയി. ഇരുന്നൂറിലേറെ പേര്‍ക്ക് വീടുകള്‍ നഷ്ടമായി. കടകളില്‍ വെള്ളം കയറി വ്യാപാരികള്‍ക്ക് കോടികളുടെ നഷ്ടമുണ്ടായി.

പൂവഞ്ചിയിൽ പാറമടലോബി വീണ്ടും സജീവമാകുന്നു

കൊക്കയാർ: ഉരുൾപൊട്ടലിൽ നിരവധി ജീവനുകൾ പൊലിഞ്ഞ കൊക്കയാർ പഞ്ചായത്തിലെ പൂവഞ്ചിയിൽ പാറമടലോബി വീണ്ടും സജീവമാകുന്നു. 2021 ഒക്ടോബർ 16നുണ്ടായ പ്രകൃതിദുരന്തത്തിൽ മാക്കോച്ചിയിലുണ്ടായ ഉരുൾപൊട്ടലിൽ പിഞ്ചുകുട്ടിയടക്കം എട്ടുപേര്‍ മരിച്ചിരുന്നു. ഇതേത്തുടർന്ന് പൂവഞ്ചിയിൽ പ്രവർത്തിക്കുന്ന പാറമടകൾക്കെതിരേ വ്യാപക ആക്ഷേപം ഉയർന്നിരുന്നു. അന്നത്തെ ഉരുൾപൊട്ടലിനെത്തുടർന്ന് നിരവധി വീടുകള്‍ അപകടഭീഷണിയിലായി ഇപ്പോഴും നിലനില്‍ക്കുകയാണ്. ഇതിനിടയിലാണ് വീണ്ടും പൂവഞ്ചിയില്‍ സ്വകാര്യ വ്യക്തിയുടെ പുരയിടത്തിൽ പാറമട പ്രവർത്തനമാരംഭിക്കാൻ നീക്കം നടക്കുന്നത്. പാറമട അനുവദിക്കണമെന്നാവശ്യപ്പെട്ടുള്ള അപേക്ഷ സംബന്ധിച്ച് കളക്ടര്‍ റിപ്പോര്‍ട്ട് ആവശ്യപ്പെട്ടതായും അറിയുന്നു. ഇതിനായി കഴിഞ്ഞ ദിവസം പോലീസ് അന്വേഷണം നടത്തി പരിസരവാസികളില്‍നിന്ന് അഭിപ്രായങ്ങള്‍ തേടിയിട്ടുണ്ട്. മേഖലയില്‍ നിലവില്‍ രണ്ട് പാറമടകള്‍ക്ക് അനുമതിയുണ്ടങ്കിലും പ്രവർത്തനം നിര്‍ത്തിവച്ചിരിക്കുകയാണ്. ഇതില്‍ ഒരു പാറമട അധികാരികളുടെ മൗനാനുവാദത്തില്‍ പ്രവര്‍ത്തിക്കുന്നതായും പറയപ്പെടുന്നു. പ്രകൃതിലോല പ്രദേശ പട്ടികയിലുള്ള ഇവിടത്തെ പാറമടകള്‍ നാടിനെ ദോഷകരമായി ബാധിച്ചിരുന്നു. ഇതിനിടയിലാണ് അനധികൃത പാറമട പ്രവര്‍ത്തനവും പുതിയ പാറമടയുടെ അപേക്ഷയുമായി കൂടുതല്‍ പേര്‍ രംഗത്തു വന്നിരിക്കുന്നതും. ഇനിയൊരു ദുരന്തംകൂടി താങ്ങാൻ നാടിനു കഴിയില്ലെന്നും പാറമട ആരംഭിച്ചാൽ ശക്തമായ പ്രതിഷേധ പരിപാടികൾ ആരംഭിക്കുമെന്നുമാണ് പ്രദേശവാസികൾ പറയുന്നത്.

കുറവിലങ്ങാട് താലൂക്ക് ആശുപത്രിയില്‍ പേവാര്‍ഡ് നിര്‍മാണം പൂര്‍ത്തീകരണത്തിലേക്ക്

കുറവിലങ്ങാട്: കുറവിലങ്ങാട് താലൂക്ക് ആശുപത്രിയുടെ മുഖഛായ മാറ്റി അത്യാഹിത വിഭാഗം, പേവാര്‍ഡ് എന്നിവയുടെ നിര്‍മാണ പ്രവര്‍ത്തനങ്ങള്‍ ദ്രുതഗതിയില്‍ പുരോഗമിക്കുന്നു. ഉഴവൂര്‍ ബ്ലോക്ക് പഞ്ചായത്തിന്‍റെ 2024-25 വികസന പദ്ധതിയില്‍ ഉള്‍പ്പെടുത്തിയാണ് അത്യാഹിത വിഭാഗത്തിന്‍റെയും പേവാര്‍ഡിന്‍റെയും നിര്‍മാണം. 35 ലക്ഷം രൂപ ചെലവഴിച്ച് നിലവിലെ കെട്ടിടത്തിന്‍റെ മുകളിലായിട്ടാണ് പുതിയ കെട്ടിടം പണിയുന്നത്. രോഗികള്‍ക്കായി എട്ട് മുറികളും അതോടൊപ്പം ശുചിമുറിയുമാണ് ഇവിടെ സജ്ജമാക്കുന്നത്. 2217 ചതുരശ്ര അടിയിലാണ് നിര്‍മാണം. നിലവില്‍ പേ വാര്‍ഡിന്‍റെ പെയിന്‍റിംഗ് പ്രവര്‍ത്തനങ്ങള്‍ നടന്നുവരികയാണ്. ബ്ലോക്ക് പഞ്ചായത്തിന്‍റെ 2024-25, 2025-26 പദ്ധതികളുടെ ഭാഗമായാണ് താലൂക്ക് ആശുപത്രിയിലെ അത്യാഹിത വിഭാഗത്തിന്‍റെ നിര്‍മാണം നടന്നുവരുന്നത്. മൂന്നു കോടി രൂപ ചെലവില്‍ 10,838 ചതുരശ്ര അടിയില്‍ രണ്ടു നിലകളിലായാണ് കെട്ടിടം നിര്‍മിക്കുന്നത്. നാഷണല്‍ ഹെല്‍ത്ത് മിഷനാണ് പദ്ധതിയുടെ നടത്തിപ്പുചുമതല. നിര്‍മിതിയാണ് കരാര്‍ ഏറ്റെടുത്തിരിക്കുന്നത്. അത്യാഹിത വിഭാഗത്തിന്‍റെ നിര്‍മാണ പ്രവര്‍ത്തനങ്ങളും ആരംഭിച്ചിട്ടുണ്ട്. ഇതുകൂടാതെ സ്റ്റേറ്റ് പ്ലാന്‍ ഫണ്ടില്‍നിന്നുള്ള ഒരു കോടി രൂപ ചെലവില്‍ 2485 ചതുരശ്ര അടിയില്‍ പുതിയ അഡ്മിനിസ്‌ട്രേറ്റീവ് ബ്ലോക്കും നിര്‍മിക്കുന്നുണ്ട്. പൊതുമരാമത്തുവകുപ്പിന്‍റെ മേല്‍നോട്ടത്തിലാണ് നിര്‍മാണം.

‌എമർജൻസി റെസ്പോൺസ് ടീമംഗങ്ങൾക്ക് പരിശീലനം സംഘടിപ്പിച്ചു

വാഴൂർ: ദുരന്തനിവാരണ പദ്ധതി പ്രകാരം ബ്ലോക്ക് പഞ്ചായത്ത് പരിധിയിലെ ആറ് പഞ്ചായത്തുകളിലെയും എമർജൻസി റെസ്പോൺസ് ടീം അംഗങ്ങൾക്കുള്ള ഏകദിന പരിശീലന പരിപാടി സംഘടിപ്പിച്ചു. അപകടത്തിൽ പരിക്കേൽക്കുന്നവർക്കും വിഷബാധയേൽക്കുന്നവർക്കും പ്രാഥമിക ശുശ്രൂഷ നൽകുന്നത് എങ്ങനെയെന്നും വെള്ളപ്പൊക്കവും അഗ്നിബാധയും ഉണ്ടാകുമ്പോൾ അവലംബിക്കേണ്ട രക്ഷാമാർഗങ്ങളെക്കുറിച്ചുമാണ് ക്ലാസുകൾ സംഘടിപ്പിച്ചത്. ബ്ലോക്ക് പഞ്ചായത്ത് പ്രസിഡന്‍റ് മുകഷ് കെ. മണി പരിശീലനപരിപാടി ഉദ്ഘാടനം ചെയ്തു. വികസനകാര്യ സ്ഥിരം സമിതി അധ്യക്ഷൻ ഷാജി പാമ്പൂരി അധ്യക്ഷത വഹിച്ചു. ബ്ലോക്ക് പഞ്ചായത്തംഗങ്ങളായ പി.എം. ജോൺ, ബി. രവീന്ദ്രൻ നായർ, ജോയിന്‍റ് ബിഡിഒ കെ. സിയാദ് എന്നിവർ പ്രസംഗിച്ചു. പാമ്പാടി ഫയർ ഫോഴ്സിലെ സീനിയർ ഫയർ ഓഫീസർ ടി. അഭിലാഷ്, ഇടയിരിക്കപ്പുഴ പബ്ലിക് ഹെൽത്ത് ലാബിലെ എപ്പിഡർമോളജിസ്റ്റ് സിൻസി മെറിൻ വർഗീസ് എന്നിവർ ക്ലാസുകൾ നയിച്ചു.

സെന്‍റ് ഡൊമിനിക്സ് കോളജ് മെറിറ്റ് ഡേ

കാഞ്ഞിരപ്പള്ളി: സെന്‍റ് ഡൊമിനിക്സ് കോളജ് മെറിറ്റ് ഡേ ഇന്നു രാവിലെ 11ന് കോളജ് ഓഡിറ്റോറിയത്തിൽ നടക്കും. പത്മശ്രീ ഷൈനി വിൽസൺ ഉദ്ഘാടനം ചെയ്യും. പ്രിൻസിപ്പൽ ഡോ. സീമോൻ തോമസ് അധ്യക്ഷത വഹിക്കും. കോളജ് മാനേജർ റവ.ഡോ. കുര്യൻ താമരശേരി മുഖ്യപ്രഭാഷണം നടത്തും. മാത്യു ചാക്കോ വെട്ടിയാങ്കൽ, പിടിഎ സെക്രട്ടറി പ്രഫ. റാണി ജോസ്, സ്റ്റാഫ് അസോസിയേഷൻ സെക്രട്ടറി ഡോ. ജിപ്സൺ വർഗീസ് എന്നിവർ പ്രസംഗിക്കും. ഈ വർഷം യൂണിവേഴ്സിറ്റി റാങ്കുകൾ സ്വന്തമാക്കിയ 20 വിദ്യാർഥികളെയും കായികരംഗത്ത് ദേശീയ, സംസ്ഥാന, സർവകലാശാലാ തലങ്ങളിൽ നേട്ടങ്ങൾ കൊയ്ത 40 വിദ്യാർഥികളെയും യോഗത്തിൽ ആദരിക്കും. കോളജിന്‍റ റാങ്ക് ജേതാക്കൾക്കും ദേശീയതാരങ്ങൾക്കും പൂർവവിദ്യാർഥീസംഘടന കാഷ് അവാർഡുകൾ നൽകും.

ബസിൽ യാത്രക്കാരിക്ക് ദേഹാസ്വാസ്ഥ്യം; രക്ഷകരായി യാത്രക്കാരായ ആരോഗ്യവകുപ്പ് ജീവനക്കാർ

പെരുവന്താനം: ബസ് യാത്രയ്ക്കിടെ ദേഹാസ്വാസ്ഥ്യം അനുഭവപ്പെട്ട സഹയാത്രക്കാരിക്ക് രക്ഷകരായി ആരോഗ്യവകുപ്പ് ജീവനക്കാർ. നെടുങ്കണ്ടം-കോട്ടയം റൂട്ടിൽ സർവീസ് നടത്തുന്ന സെന്‍റ് ജോർജ് ബസിൽ ഇന്നലെ രാവിലെയായിരുന്നു സംഭവം. ഏലപ്പാറ സ്വദേശിനിയായ ചന്ദ്രപ്രഭ (48) മുണ്ടക്കയത്തേക്കുള്ള യാത്രയ്ക്കായാണ് ബസിൽ കയറുന്നത്. ഏലപ്പാറയിൽനിന്നു ബസിൽ യാത്ര തുടർന്ന് ഏതാനും മിനിറ്റുകൾക്ക് ശേഷം ഇവർക്ക് ശാരീരിക ബുദ്ധിമുട്ടുകൾ അനുഭവപ്പെട്ടു. മഴയുള്ളതിനാൽ ബസിന്‍റെ വശങ്ങളിലെ ഷട്ടറുകൾ അടച്ചതുകൊണ്ടുള്ള ബുദ്ധിമുട്ടാണെന്നാണ് ആദ്യം കൂടെയുള്ള യാത്രക്കാർ കരുതിയത്. കുട്ടിക്കാനത്ത് എത്തിയപ്പോഴേക്കും ചന്ദ്രപ്രഭയുടെ ആരോഗ്യനില വഷളായി ബോധരഹിതയായി. ഉടൻ തന്നെ ബസിൽ യാത്ര ചെയ്യുകയായിരുന്ന പെരുവന്താനം, കൊക്കയാർ പ്രാഥമിക ആരോഗ്യ കേന്ദ്രങ്ങളിലെ എംഎൽഎസ്പി ജീവനക്കാരായ ട്രീസ ഡൊമിനിക്, അനു ബേബി, നിമിഷ ഷെവിൻ, ശുഭ എന്നിവർ ചേർന്ന് രോഗിക്ക് പ്രാഥമികശുശ്രൂഷ നൽകി. തങ്ങളുടെ കൈയിലെ മെഡിക്കൽ ഉപകരണങ്ങളുടെ സഹായത്തോടെ നടത്തിയ പരിശോധനയിൽ ചന്ദ്രപ്രഭയുടെ ബ്ലഡ് പ്രഷർ തീർത്തും താഴ്ന്ന നിലയിലാണെന്ന് മനസിലായി. ഉടൻ തന്നെ ബസ് ജീവനക്കാരോട് കാര്യങ്ങൾ പറഞ്ഞ് മനസിലാക്കി. മറ്റു സ്റ്റോപ്പുകളിലൊന്നും ബസ് നിർത്താതെ പെരുവന്താനം പ്രാഥമികാരോഗ്യ കേന്ദ്രത്തിലേക്ക് കൊണ്ടുപോകാൻ തീരുമാനിച്ചു. ഇതിനിടയിൽ പെരുവന്താനം പ്രാഥമികാരോഗ്യ കേന്ദ്രത്തിലെ ആംബുലൻസ് ഡ്രൈവർ ഹാഷിമിനെ ഫോണിൽ വിളിച്ച് പെരുവന്താനം ജഗ്ഷനിൽ ആംബുലൻസുമായി വന്നു നിൽക്കണമെന്നും അറിയിച്ചു. ആംബുലൻസിൽ കയറ്റിയ ചന്ദ്രപ്രഭയെ ഉടൻ പെരുവന്താനം പ്രാഥമികാരോഗ്യ കേന്ദ്രത്തിലെത്തിച്ചു. ഡോ. മാത്യു പി. തോമസിന്‍റെ നേതൃത്വത്തിൽ നഴ്സുമാരായ സൗമ്യമോൾ സെബാസ്റ്റ്യൻ, താഹിറ, ഗായത്രി എന്നിവർ ചികിത്സ നൽകി. പിന്നീട് വിദഗ്ധ ചികിത്സയ്ക്കായി ഇവരെ മറ്റൊരു ആശുപത്രിയിലേക്ക് മാറ്റി. ബസിലെ യാത്രക്കാരായ ആരോഗ്യവകുപ്പ് ജീവനക്കാരുടെ അവസരോചിതമായ ഇടപെടൽ ചന്ദ്രപ്രഭയ്ക്ക് പുതുജീവനാണ് നൽകിയത്.

പഴയിടം കോസ്‌വേയിലെ മാലിന്യം ആറ്റിലൂടെ ഒഴുക്കിവിട്ടു

പഴയിടം: മണിമലയാറ്റിലെ പഴയിടം കോസ്‌വേയിൽ ഒഴുകിയെത്തി അടിഞ്ഞ മാലിന്യം മണ്ണുമാന്തി യന്ത്രമുപയോഗിച്ച് മണിമലയാറ്റിലൂടെ ഒഴുക്കിവിട്ടു. ഉയരം കുറഞ്ഞ പാലമായതിനാൽ തൂണുകളിൽ മരക്കഷണങ്ങളും ചപ്പുചവറുകളും തങ്ങിനിന്നിരുന്നു. കഴിഞ്ഞ ദിവസം പൊതുമരാമത്തുവകുപ്പ് അധികാരികൾ നിയോഗിച്ചവരാണ് മാലിന്യം നീക്കിയത്. എല്ലാ മഴക്കാലത്തും അടിയുന്ന പ്ലാസ്റ്റിക് ഉൾപ്പെടെയുള്ള ടൺകണക്കിന് മാലിന്യം ഇതേപോലെ നീക്കുകയാണ് പതിവ്. മാലിന്യം കരയ്ക്കെടുത്ത് സംസ്‌കരിക്കാൻ സംവിധാനമില്ലാത്തതിനാൽ കരാറെടുക്കുന്നവർ അവയത്രയും മണിമലയാറ്റിലൂടെ തന്നെ ഒഴുക്കിവിടുകയാണ്. കടകളിലും വീടുകളിലും നിന്ന് ആറ്റുപുറമ്പോക്കിൽ ഉപേക്ഷിക്കുന്ന പാഴ്‌വസ്തുക്കളും കാറ്റിൽ ഒടിഞ്ഞുവീഴുന്ന മരച്ചില്ലകളും മരങ്ങളും ഒഴുകിയെത്തി പാലത്തിൽ ഇടിച്ചുനിന്ന് ബലക്ഷയമുണ്ടാകാതിരിക്കാനാണ് ഇവ നീക്കിയത്. മരങ്ങളും ചില്ലകളും തങ്ങിനിന്ന് വെള്ളമൊഴുക്ക് പാലത്തിന് മുകളിലൂടെയായി കൈവരി പലവട്ടം തകർന്നിട്ടുണ്ട്. മാലിന്യം ആറ്റിലൂടെ ഒഴുക്കിവിടാതെ സംസ്‌കരിക്കാൻ നടപടിയുണ്ടാവണമെന്ന് കാലങ്ങളായി ആവശ്യമുയർന്നെങ്കിലും ഇതുവരെയായിട്ടും ഒരു നടപടിയും സ്വീകരിച്ചിട്ടില്ല.

വിദ്യാർഥിനിക്ക് നേരേ ലൈംഗികാതിക്രമം; ഡ്രൈവർ അറസ്റ്റിൽ

കാഞ്ഞിരപ്പള്ളി: സ്കൂൾ വാനിൽ വിദ്യാർഥിനിക്ക് നേരേ ലൈംഗികാതിക്രമം കാട്ടിയ ഡ്രൈവർ പോലീസിന്‍റെ പിടിയിൽ. പാറത്തോട് കൊല്ലംപറമ്പിൽ കെ.എസ്. റഹീ (55)മിനെയാണ് കാഞ്ഞിരപ്പള്ളി പോലീസ് അറസ്റ്റ് ചെയ്തത്. കഴിഞ്ഞ ഫെബ്രുവരി മുതൽ ജൂൺ വരെയുള്ള കാലയളവിലാണ് കേസിനാസ്പദമായ സംഭവം നടക്കുന്നത്. പ്രതി ഡ്രൈവറായി ജോലി നോക്കുന്ന സ്കൂൾ വാനിലെ യാത്രക്കാരിയായ ഏഴാം ക്ലാസ് വിദ്യാർഥിനിയെ ദുരുദ്ദേശ്യത്തോടെ കടന്നുപിടിക്കുകയും അനുചിതമായി സംസാരിക്കുകയും ചെയ്തതായാണ് പരാതി. കൂടാതെ കുട്ടിയെ ഫോണിലൂടെയും പിന്തുടർന്നും ശല്യം ചെയ്തും ഭീഷണിപ്പെടുത്തിയും മാനസികമായും ശാരീരികമായും ഉപദ്രവിക്കുകയായിരുന്നു.

പുഴുവരിച്ച നിലയിൽ കണ്ടെത്തിയ മുൻ സൈനികൻ മരിച്ചു

വാഴൂർ: താമസസ്ഥലത്ത് പുഴുവരിച്ച നിലയിൽ കണ്ടെത്തിയ മുൻ സൈനികൻ മരിച്ചു. കൊടുങ്ങൂർ കവലയ്ക്ക് സമീപത്തെ കെട്ടിടത്തിൽ അവശനിലയിൽ കണ്ടെത്തിയ വൈരമല സാബു (60) ആണ് മരിച്ചത്. വർഷങ്ങളായി കൊടുങ്ങൂരിൽ ഒറ്റയ്ക്ക് കഴിഞ്ഞിരുന്ന സാബുവിനെ ഞായറാഴ്ച രാത്രിയിലാണ് പുഴുവരിച്ച് അവശനിലയിൽ കണ്ടെത്തിയത്. പഞ്ചായത്തംഗം എസ്. അജിത്ത്കുമാറിന്‍റെ നേതൃത്വത്തിൽ ആംബുലൻസ് എത്തിച്ച് സാബുവിനെ കോട്ടയം മെഡിക്കൽ കോളജിൽ പ്രവേശിപ്പിക്കുകയായിരുന്നു. ചികിത്സയിലിരിക്കേ ഇന്നലെ പുലർച്ചെ 1.30ഓടെ മരിച്ചു. ദിവസങ്ങളായി അസുഖം മൂലം കിടപ്പിലായിരുന്നു സാബു. ശരീരത്തെ മുറിവുകൾ പഴുത്ത് പുഴുവരിച്ചു കിടന്നത് ദുർഗന്ധം വമിച്ചതോടയാണ് നാട്ടുകാർ അറിഞ്ഞത്. മൃതദേഹം പോസ്റ്റ്മോർട്ടത്തിനുശേഷം മുട്ടമ്പലം ശ്മശാനത്തിൽ സംസ്‌കരിച്ചു.

ആഗോള ലഹരിവിരുദ്ധ ദിനാചരണം: മാസാചരണ പരിപാടികളോടെ പാലായില്‍ നാളെ തുടക്കം

പാലാ: ആഗോള ലഹരിവിരുദ്ധ ദിനമായ നാളെ പാലാ രൂപത കെസിബിസി മദ്യലഹരി വിരുദ്ധ സമിതിയുടെ ആഭിമുഖ്യത്തില്‍ ലഹരിവിരുദ്ധ മാസാചരണ പരിപാടികള്‍ക്ക് പാലായില്‍ തുടക്കം കുറിക്കും.നാളെ രാവിലെ 11.30ന് പാലാ അല്‍ഫോന്‍സ കോളജിലാണ് രൂപതാതല പരിപാടികളുടെ ഉദ്ഘാടനം നടക്കുന്നത്. സമ്മേളനം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപത പ്രസിഡന്‍റും സംസ്ഥാന സെക്രട്ടറിയുമായ പ്രസാദ് കുരുവിള അധ്യക്ഷത വഹിക്കും. ഫ്രാന്‍സിസ് ജോര്‍ജ് എംപി, മാണി സി. കാപ്പന്‍ എംഎല്‍എ, മുനിസിപ്പല്‍ ചെയര്‍മാന്‍ തോമസ് പീറ്റര്‍, മോണ്‍. സെബാസ്റ്റ്യന്‍ വേത്താനത്ത്, ഫാ. ജേക്കബ് വെള്ളമരുതുങ്കല്‍, ഫാ. ജോര്‍ജ് പുല്ലുകാലായില്‍, പ്രിന്‍സിപ്പല്‍ സിസ്റ്റര്‍ ഡോ. മിനിമോള്‍ മാത്യു, സാബു ഏബ്രഹാം എന്നിവര്‍ പ്രസംഗിക്കും. ഒരു മാസം നീണ്ടുനില്‍ക്കുന്ന പരിപാടികളാണ് സംഘടിപ്പിച്ചിട്ടുള്ളത്. ലഹരിവിരുദ്ധ സമ്മേളനങ്ങള്‍, സെമിനാറുകള്‍, കോര്‍ണര്‍ യോഗങ്ങള്‍, തൊഴില്‍ മേഖലകളിലൂടെയും വിദ്യാഭ്യാസ സ്ഥാപനങ്ങളിലൂടെയുമുള്ള സന്ദേശ-പ്രതിജ്ഞാ പരിപാടികള്‍, ലഘുലേഖകള്‍, ഹ്രസ്വചിത്ര പ്രദര്‍ശനം എന്നിവ നടത്തും. സമിതിയുടെ തെരഞ്ഞെടുക്കപ്പെട്ട പ്രതിനിധികള്‍ നേതൃത്വം നല്‍കും. രൂപതയിലെ വിവിധ സ്‌കൂളുകള്‍ ആതിഥേയത്വം വഹിക്കുകയും പരിപാടികള്‍ക്ക് സജീവ പങ്കാളികളാകുകയും ചെയ്യും. കേരള കത്തോലിക്ക സഭയുടെ ആഹ്വാനമനുസരിച്ച് അന്നേദിവസം രൂപതയിലെ മുഴുവന്‍ വിദ്യാലയങ്ങളിലും ലഹരിവിരുദ്ധ പ്രതിജ്ഞയെടുക്കുകയും വിവിധ പരിപാടികള്‍ ക്രമീകരിക്കുകയും ചെയ്യും. പരിപാടികള്‍ക്ക് ആന്‍റണി മാത്യു, ജോസ് കവിയില്‍, അലക്സ് കെ. എമ്മാനുവല്‍, ടിന്‍റു അലക്സ് എന്നിവര്‍ നേതൃത്വം നല്‍കും.

ജൂലൈ മൂന്ന് പൊതുഅവധിയായി പ്രഖ്യാപിക്കണം: എസ്എംവൈഎം

പാലാ: മാര്‍ത്തോമ്മാ ശ്ലീഹായുടെ ഓര്‍മദിനമായ ജൂലൈ മൂന്ന് പൊതുഅവധിയായി പ്രഖ്യാപിക്കണമെന്ന് പാലാ രൂപത എസ് എംവൈഎം അര്‍ധവാര്‍ഷിക സെനറ്റ് സമ്മേളനം ആവശ്യപ്പെട്ടു. രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ അധ്യക്ഷത വഹിച്ച സമ്മേളനം രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി ഉദ്ഘാടനം ചെയ്തു. രൂപത ജനറല്‍ സെക്രട്ടറി റോബിന്‍ താന്നിമല, ജോയിന്‍റ് ഡയറക്ടര്‍ സിസ്റ്റര്‍ നവീന സിഎംസി, കടപ്ലാമറ്റം പള്ളി വികാരി ഫാ. ജോസഫ് മുളഞ്ഞനാല്‍, ഫൊറോന ഡയറക്ടര്‍ ഫാ. ജോസഫ് തേവര്‍പറമ്പില്‍, ജോയല്‍ ജോസഫ്, സോന മാത്യു, ബില്‍ന സിബി, ജോസഫ് തോമസ് എന്നിവര്‍ പ്രസംഗിച്ചു.

ഭൂമികയുടെ വിത്തുകുട്ടകൾ സജീവമാകുന്നു

പൂഞ്ഞാര്‍: ഭക്ഷ്യ-ആരോഗ്യ സ്വരാജ് പ്രവര്‍ത്തനങ്ങളും ജൈവ വൈവിധ്യ പരിപോഷണവും കാലാവസ്ഥാ പ്രവര്‍ത്തനവും ലക്ഷ്യംവച്ച് ഭൂമിക നടത്തിവരുന്ന വിത്തുകുട്ടകള്‍ മഴക്കാലത്തിന്‍റെ കാര്‍ഷിക ഉണര്‍വിനൊപ്പം കൂടുതല്‍ സജീവമാകുകയാണ്. അഞ്ചു വര്‍ഷം മുന്‍പാണ് വിത്തുകുട്ട പ്രവര്‍ത്തനം ആരംഭിച്ചത്. 160 വിത്തുകുട്ടകളാണ് ജില്ലയുടെ പല ഭാഗങ്ങളിലായി ഇതോടകം നടത്തിയത്. പൂഞ്ഞാര്‍ തെക്കേക്കര ബസ് സ്റ്റാൻഡില്‍ ഭൂമിക നേറ്റീവ് വിന്‍ഡോയുടെ സമീപം നടത്തിയ 161-ാമത് വിത്തുകുട്ട ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഓഷ്യാനോഗ്രഫി ഗോവയില്‍ റിട്ട. സീനിയര്‍ സയന്‍റിസ്റ്റ് ഡോ. രമേഷ് കുമാര്‍ ഉദ്ഘാടനം ചെയ്തു. ഓണത്തോടനുബന്ധിച്ച് ഇരുനൂറാമത് വിത്തുകുട്ട നടത്താനുള്ള തയാറെടുപ്പിലാണ് ഭൂമിക. 27നു പാലാ അഡാര്‍ട്ടില്‍ ജൈവകര്‍ഷക സമിതി, ഗാന്ധി സ്റ്റഡി സെന്‍റര്‍ പാലാ, അഡാര്‍ട്ട് പാലാ എന്നിവയുടെ സഹകരണത്തോടെ 3.30ന് 162-ാമത് വിത്തുകുട്ട ഞാറ്റുവേലയുടെ ഭാഗമായി നടത്തും. തുടര്‍ന്നുള്ള ആഴ്ചകളില്‍ പൂഞ്ഞാര്‍, കൊഴുവനാല്‍, മുത്തോലി, ഭരണങ്ങാനം, പാതാമ്പുഴ, കൂട്ടിക്കല്‍, കുന്നോന്നി, മേലുകാവ്, തീക്കോയി, മൂന്നിലവ്, തലനാട് എന്നിവിടങ്ങളിലും വിത്തുകുട്ട സംഘടിപ്പിക്കും. കൈവശമുള്ള പച്ചക്കറികള്‍, ഔഷധങ്ങള്‍, കിഴങ്ങ്-ഫലവര്‍ഗങ്ങള്‍, വൃക്ഷവിളകള്‍ എന്നിവയുടെ വിത്തുകളും തൈകളും മറ്റു നടീല്‍വസ്തുക്കളും വിത്തുകുട്ടകളില്‍ കൊണ്ടുവന്ന് പരസ്പരം പങ്കുവയ്ക്കുന്ന പ്രക്രിയയിലൂടെ ഇതോടകം ആയിരക്കണക്കിന് കൈമാറ്റങ്ങളാണ് നടന്നിട്ടുള്ളത്. ഒട്ടേറെ പ്രമുഖരും വിവിധ പ്രദേശങ്ങളില്‍നിന്നുള്ള കര്‍ഷകരും സാമൂഹികപ്രവര്‍ത്തകരും വിത്തുകുട്ടകളില്‍ ഭാഗഭാക്കായി. പ്രാദേശിക സംഘാടനത്തിന് സന്നദ്ധ സംഘടനകളുടെയും കര്‍ഷകരുടെയും പിന്തുണ തേടുന്നുമുണ്ട് ഭൂമിക. ഫോണ്‍: 9400213141.

കാർ വീട്ടുമുറ്റത്തേക്കു മറിഞ്ഞു

രാമപുരം: പാലാ-തൊടുപുഴ റോഡില്‍ കുറിഞ്ഞിക്ക് സമീപം ചൂരപ്പട്ട വളവിനും കുഴിവേലി വളവിനും ഇടയില്‍ കാര്‍ നിയന്ത്രണംവിട്ട് റോഡില്‍നിന്നു വീട്ടുമുറ്റത്തേക്ക് മറിഞ്ഞ് അപകടം. കഴിഞ്ഞ ദിവസം പലര്‍ച്ചെ രാവിലെ നാലിനാണ് അപകടമുണ്ടായത്. കോഴിക്കോട് ഭാഗത്തുനിന്നു തിരുവനന്തപുരത്തേക്കു പോവുകയായിരുന്നു കാര്‍. താഴത്തേടത്ത് ഷിജു ബാലന്‍റെ വീടിന്‍റെ മുറ്റത്തേക്കാണ് കാര്‍ മറിഞ്ഞത്. അപകട സമയത്ത് ഷിജുവിന്‍റെ അമ്മ‍യും ഭാര്യയും രണ്ടു മക്കളുമാണ് വീട്ടിലുണ്ടായിരുന്നത്. ഡ്രൈവര്‍ ഉറങ്ങിപ്പോയതാണ് അപകടകാരണം. കാറില്‍ ഡ്രൈവറടക്കം രണ്ടുപേരാണ് ഉണ്ടായിരുന്നത്.

തെരുവുനായ പ്രശ്നം: ഒപ്പുശേഖരണം ആരംഭിച്ചു

പാലാ: തെരുവുനായ പ്രശ്നത്തില്‍ ഉടന്‍ ശാശ്വത പരിഹാരം ഉണ്ടാക്കണമെന്നാവശ്യപ്പെട്ട് സ്‌കൂള്‍ കുട്ടികള്‍, രക്ഷിതാക്കള്‍, പൊതുജനങ്ങള്‍ എന്നിവര്‍ ചേര്‍ന്ന് നൽകുന്ന നിവേദനത്തില്‍ സ്‌കൂള്‍ കുട്ടികള്‍ ഒപ്പുശേഖരണം ആരംഭിച്ചു. ബൗബൗ സമരസമിതിയുടെ ആഭിമുഖ്യത്തില്‍ ആയിരക്കണക്കിന് ഒപ്പുകള്‍ ശേഖരിച്ചാണ് നിവേദനം നൽകുന്നത്. ഒപ്പുശേഖരണ പരിപാടി മഹാത്മാഗാന്ധി ഗവ. സ്‌കൂള്‍ ജാഗ്രതാ സമിതി കണ്‍വീനര്‍ സന്തോഷ് കെ. മണര്‍കാട്ട് ഉദ്ഘാടനം ചെയ്തു. ബൗബൗ സമരസമിതി നേതാക്കളായ മൈക്കിള്‍ കാവുകാട്ട്, ജോസ് വേരനാനി, ജോഷി വട്ടക്കുന്നേല്‍, എന്‍.പി. കൃഷ്ണന്‍നായര്‍ എന്നിവര്‍ നേതൃത്വം നൽകി.

ബിരുദസമർപ്പണവും മെറിറ്റ് ദിനാഘോഷവും

ഉഴവൂർ: സെന്‍റ് സ്റ്റീഫൻസ് കോളജിൽ മെറിറ്റ് ദിനാഘോഷവും ബിരുദസമർപ്പണവും നടത്തി. സമ്മേളനം ഡോ. രാജു നാരായണസ്വാമി ഉദ്ഘാടനം ചെയ്തു. വിദ്യാഭ്യാസത്തിലൂടെ ലക്ഷ്യബോധവും ആത്മാർഥതയും കൈവരിക്കണമെന്നും ഉത്തമ പൗരന്മാരായി വളരണമെന്നും അദ്ദേഹം ആഹ്വാനം ചെയ്തു . ഫൊറോന പള്ളി വികാരി ഫാ. അലക്സ് ആക്കപ്പറമ്പിൽ അധ്യക്ഷത വഹിച്ചു. സ്കിൽ ഡെവലപ്മെന്‍റ് ആഡ് ഓൺ കോഴ്സുകളുടെ ഉദ്ഘാടനത്തിന്‍റെ ഭാഗമായി ട്രിപ്പിൾ ഐടി വലവൂരുമായി ധാരണാപത്രം കൈമാറി. പ്രോ മാനേജർ ഡോ. ടി.എം. ജോസഫ്, കോളജ് ബർസാർ ഫാ.എബിൻ ഇറപുറത്ത്, പ്രിൻസിപ്പൽ ഡോ. സിൻസി ജോസഫ്, വൈസ് പ്രിൻസിപ്പൽ ഡോ. കെ.സി. തോമസ് എന്നിവർ പ്രസംഗിച്ചു.

ഗ്രാമീണ റോഡ് ശുചിയാക്കി കുടുംബക്കൂട്ടായ്മ

കുറവിലങ്ങാട്: മുക്കേല്‍-ചെറുകരപ്പാറ ഗ്രാമീണ റോഡ് ശുചിയാക്കി കുറവിലങ്ങാട് മേജര്‍ ആര്‍ക്കി എപ്പിസ്‌കോപ്പല്‍ മര്‍ത്തമറിയം തീര്‍ഥാടന ദേവലായത്തിലെ ഒന്പതാം വാര്‍ഡിലെ വിശുദ്ധ ക്ലാരയുടെ നാമത്തിലുള്ള കുടുംബക്കൂട്ടായ്മ അംഗങ്ങള്‍. സാമൂഹിക പ്രതിബദ്ധതയുള്ള മറ്റു പദ്ധതികളും‍ ഏറ്റെടുത്ത് നടത്താനുള്ള ആലോചനയിലാണു കൂട്ടായ്മയിലുള്ള അംഗങ്ങള്‍. വാര്‍ഡിലെ പള്ളിയോഗ പ്രതിനിധി, കുടുംബക്കൂട്ടായ്മ ഭാരവാഹികള്‍ എന്നിവര്‍ നേതൃത്വം നൽകി.

സോണല്‍ ബാഡ്മിന്‍റണ്‍: ക്രിസ്തുജ്യോതി വിദ്യാനികേതന് ജയം

ചങ്ങനാശേരി: മാന്നാനം കെഇ സ്‌കൂളില്‍ നടന്ന സിഐഎസ് സിഇ സോണല്‍ ബാഡ്മിന്‍റണ്‍ ചാമ്പ്യന്‍ഷിപ്പില്‍ ചെത്തിപ്പുഴ ക്രിസ്തുജ്യോതി വിദ്യാനികേതന്‍ ഐസിഎസ്ഇ സ്‌കൂള്‍ വ്യത്യസ്ത വിഭാഗങ്ങളില്‍ ഏറ്റവും കൂടുതല്‍ മെഡലുകള്‍ നേടി. അണ്ടര്‍ 17 ബോയ്‌സ് വിഭാഗത്തില്‍ എയ്ബന്‍ ജോസഫ്, ജോണ്‍ പറമ്പത്ത് ചാക്കോ, എയ്ഡന്‍ ജോബിന്‍ എന്നിവര്‍ യഥാക്രമം ഗോള്‍ഡ്, സില്‍വര്‍, ബ്രോണ്‍സ് മെഡലുകള്‍ കരസ്ഥമാക്കി. അണ്ടര്‍ 14 ബോയ്‌സ് വിഭാഗത്തില്‍ ഗോവിന്ദ് എസ്. നായര്‍, അണ്ടര്‍ 17 ഗേള്‍സ് വിഭാഗത്തില്‍ ലിയ ട്രീസ ഡോമിനിക് എന്നിവരും ഗോള്‍ഡ് മെഡല്‍ നേടി. അണ്ടര്‍ 17 ബോയ്‌സ് ഡബിള്‍സില്‍ എയ്ബന്‍ ജോസഫും ജോണ്‍ പറമ്പത്ത് ചാക്കോയും ഗോള്‍ഡ് നേടി. വിജയികളെയും പരിശീലകന്‍ എസ്. സിബിന്‍ കുമാറിനെയും പ്രിന്‍സിപ്പല്‍ ഫിലിപ്പോസ് തുണ്ടുവാലിച്ചിറയുടെ അധ്യക്ഷതയില്‍ ചേര്‍ന്ന സമ്മേളനം അഭിനന്ദിച്ചു.

സെന്‍റ് പീറ്റേഴ്‌സ് സ്കൂളിൽ അക്ഷരയാനം സംഘടിപ്പിച്ചു

കുറുമ്പനാടം: വായനവാരാചരണത്തോടനുബന്ധിച്ച് കുറുമ്പനാടം സെന്‍റ് പീറ്റേഴ്സ് ഹയര്‍ സെക്കന്‍ഡറി സ്‌കൂളില്‍ അക്ഷരയാനം നടത്തി. അഞ്ചു മുതല്‍ ഒന്‍പതുവരെ ക്ലാസുകളിലെ തെരഞ്ഞെടുക്കപ്പെട്ട വിദ്യാര്‍ഥികള്‍ ഇന്ത്യയിലെ ആദ്യത്തെ ഭാഷാമ്യൂസിയമായ കോട്ടയം അക്ഷരത്തിലേക്കാണ് അക്ഷരയാനം സംഘടിപ്പിച്ചത്. സംസ്ഥാന സര്‍ക്കാരിന്‍റെ ഭരണഭാഷാ ഉന്നതതല സമിതിയംഗവും ചങ്ങനാശേരി എസ്ബി കോളജ് മലയാളവിഭാഗം മുന്‍ മേധാവിയുമായ ഡോ. ജയിംസ് മണിമല അക്ഷരയാനം ഉദ്ഘാടനം ചെയ്തു. ഉച്ചയ്ക്കുശേഷം നടന്ന സെഷനില്‍ കേരളത്തിലെ സാഹിത്യപ്രവര്‍ത്തനത്തിന്‍റെ ചരിത്രപഥങ്ങളെക്കുറിച്ചും ഭാഷാവികസനത്തെക്കുറിച്ചുമുള്ള ഡോക്യൂമെന്‍ററിയും ത്രീഡിഷോ പ്രദര്‍ശനവും നടന്നു. പ്രോഗ്രാം കോ-ഓര്‍ഡിനേറ്റര്‍ ജെലീല മാത്യൂ അധ്യക്ഷത വഹിച്ചു. അധ്യാപകരായ ബിനു കുര്യാക്കോസ്, ടിജോ സെബാസ്റ്റ്യന്‍ എന്നിവര്‍ പ്രസംഗിച്ചു.

ചങ്ങനാശേരി അതിരൂപതയുടെ നേതൃത്വത്തില്‍ ഇന്ന് ലഹരിവിരുദ്ധ സന്ദേശറാലി നടത്തും

ചങ്ങനാശേരി: ലോകലഹരി വിരുദ്ധ ദിനത്തോടനുബന്ധിച്ച് ചങ്ങനാശേരി സോഷ്യല്‍ സര്‍വീസ് സൊസൈറ്റി, കേന്ദ്ര സാമൂഹികനീതി ശാക്തി മന്ത്രാലയത്തിന്‍റെ കീഴില്‍ പ്രവര്‍ത്തിക്കുന്ന സ്റ്റേറ്റ് ലെവല്‍ കോ-ഓര്‍ഡിനേറ്റിംഗ് ഏജന്‍സി, അതിരൂപത ആത്മതാ കേന്ദ്രം, കെസിഎസ്എല്‍, യുവദീപ്തി എസ്എംവൈഎം, എസ്ബി, അസംപ്ഷന്‍ കോളജുകള്‍, മീഡിയ വില്ലേജ്, സെന്‍റ് തോമസ് നഴ്‌സിംഗ് കോളജ് എന്നിവയുടെ ആഭിമുഖ്യത്തിലാണ് പരിപാടി സംഘടിപ്പിക്കുന്നത്. 2,500 വിദ്യാര്‍ഥികളെ അണിനിരത്തി എസ്ബി സ്‌കൂളില്‍നിന്നാരംഭിക്കുന്ന റാലി എസ്ബി കോളജ് മൈതാനത്ത് സമാപിക്കും. ചങ്ങനാശേരി ഡിവൈഎസ്പി കെ.പി. ടോംസണ്‍ ഫ്ലാഗ് ഓഫ് ചെയ്യും. എസ്ബി കോളജില്‍ നടക്കുന്ന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ജില്ലാ പോലീസ് മേധാവി ഷാഹുല്‍ ഹമീദ് ലഹരി വിരുദ്ധ സന്ദേശം നല്‍കും. അതിരൂപത വികാരി ജനറാള്‍മാരായ മോണ്‍. ആന്‍റണി എത്തക്കാട്ട്, മോണ്‍. സ്‌കറിയ കന്യാകോണില്‍, സാംസ്‌കാരിക നായകന്‍മാര്‍ എന്നിവര്‍ പങ്കെടുക്കും. ലഹരി വിരുദ്ധ സന്ദേശം നല്‍കുന്ന തെരുവ് നാടകവും ഫ്ലാഷ് മോബും ഉണ്ടായിരിക്കും.

പായിപ്പാട്ട് പൈപ്പ് സ്ഥാപിക്കാന്‍ കുഴിച്ച റോഡുകള്‍ അപകടക്കെണി; പ്രതിഷേധവുമായി നാട്ടുകാര്‍

പായിപ്പാട്: ജല്‍ ജീവൻ മിഷന്‍ പദ്ധതിക്കായി പൈപ്പ് സ്ഥാപിക്കാന്‍ കുഴിച്ച റോഡുകള്‍ പൂര്‍വസ്ഥിതിയില്‍ എത്തിച്ചില്ല. റോഡുകളിലെ യാത്രാ ദുരിതത്തിലായ പായിപ്പാട് എട്ടാംവാര്‍ഡ് നിവാസികള്‍ പ്രതിഷേധവുമായി പഞ്ചായത്ത് പ്രസിഡന്‍റ് കെ.ഡി. മോഹനനെ നേരില്‍ക്കണ്ട് പ്രതിഷേധം അറിയിച്ചു. തുടര്‍ന്നു നടന്ന ചര്‍ച്ചയില്‍ ജൂലൈ 14ന് മുമ്പ് റോഡിലെ കുഴികള്‍ അടച്ച് സഞ്ചാരയോഗ്യമാക്കാമെന്ന പഞ്ചായത്ത് പ്രസിഡന്‍റിന്‍റെ ഉറപ്പിന്മേല്‍ പ്രതിഷേധം അവസാനിപ്പിച്ചു. അബ്ദുല്‍ കലാം, നാസര്‍ കുളത്തിങ്കല്‍, അനീഷ് തന്‍സില്‍, മായ, ശോഭന, സെലീന, അനീഷ് തുടങ്ങിയവര്‍ നേതൃത്വം നല്‍കി.

‘ഒരു തൈ നടാം, ചങ്ങാതിക്കൊരു മരം’ പദ്ധതി തുടങ്ങി

വെള്ളാവൂർ: ‘ഒരു തൈ നടാം, ചങ്ങാതിക്കൊരു മരം’ പദ്ധതിയുടെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ താഴത്തുവടകര ഗവ. ഹയര്‍ സെക്കന്‍ഡറി സ്‌കൂളില്‍ നിര്‍വഹിച്ചു. വെള്ളാവൂര്‍ പഞ്ചായത്ത് പ്രസിഡന്‍റ് പി.ടി. അനൂപ് അധ്യക്ഷത വഹിച്ചു. പരിസ്ഥിതി പുനഃസ്ഥാപനം ലക്ഷ്യമിട്ട് ഹരിതകേരള മിഷന്‍റെ ഏകോപനത്തില്‍ തദ്ദേശ സ്വയംഭരണ സ്ഥാപനങ്ങള്‍ നടപ്പാക്കുന്ന ഒരു തൈ നടാം പരിപാടിയില്‍ സംസ്ഥാനത്ത് ഒരു കോടി വൃക്ഷത്തൈകള്‍ നട്ടുപിടിപ്പിക്കും. ജില്ലയില്‍ ഏഴര ലക്ഷം തൈകളാണ് നടുക. തദ്ദേശസ്വയംഭരണ വകുപ്പ്, സാമൂഹിക വനവത്കരണവകുപ്പ്, വിദ്യാഭ്യാസവകുപ്പ്, കൃഷിവകുപ്പ് എന്നിവയുടെ സഹകരണത്തോടെ തദ്ദേശ സ്വയംഭരണ സ്ഥാപനങ്ങളാണ് പദ്ധതി നടപ്പാക്കുന്നത്.

സിവില്‍ സപ്ലൈസ് ഉദ്യോഗസ്ഥന്‍ ചമഞ്ഞ് തട്ടിപ്പ്: പ്രതി പിടിയില്‍

ചങ്ങനാശേരി: ചങ്ങനാശേരി മാര്‍ക്കറ്റില്‍ സിവില്‍ സപ്ലൈസ് ഉദ്യാഗസ്ഥന്‍ ചമഞ്ഞ് തട്ടിപ്പു നടത്തിയയാള്‍ അറസ്റ്റിലായി. നെടുങ്കണ്ടം അമ്പലപ്പാറ കുഴിവിള വീട്ടില്‍ മനു ദശരഥന്‍ (45) ആണ് അറസ്റ്റിലായത്. ചങ്ങനാശേരി വട്ടപ്പള്ളി ഭാഗത്തുള്ള പ്രഭു ബാലാജി എന്ന പലചരക്കു ഹോള്‍സെയില്‍ കടയിലെത്തി സിവില്‍ സപ്ലൈസ് ഉദ്യാഗസ്ഥനാണെന്നും കുടുംബശ്രീ പ്രവര്‍ത്തര്‍ക്ക് വിതരണം ചെയ്യാനെന്നു ധരിപ്പിച്ച് 1,250 കിലോ പഞ്ചസാരയും 29 ചാക്ക് അരിയും 10 പെട്ടി വെളിച്ചെണ്ണയും ഉള്‍പ്പെടെ 2,19,775 രൂപയുടെ സാധനങ്ങള്‍ കൈപ്പറ്റിയശേഷം പണം നല്കാതെ മുങ്ങുകയായിരുന്നു. കടയുടമ ചങ്ങനാശേരി പോലീസ് സ്റ്റേഷനില്‍ പരാതി സമര്‍പ്പിച്ചിരുന്നു. കോട്ടയം ജില്ലാ പോലീസ് മേധാവി ഷാഹുല്‍ ഹമീദിന്‍റെ നിര്‍ദേശപ്രകാരം ചങ്ങനാശേരി ഡിവൈഎസ്പി കെ.പി. ടോംസണിന്‍റെ മേല്‍നോട്ടത്തില്‍ പോലീസ് ഇന്‍സ്‌പെക്ടര്‍ അരുണ്‍ ജെ. മംഗലപ്പള്ളി, ചങ്ങനാശേരി പോലീസ് സബ് ഇന്‍സ്‌പെക്ടര്‍ ജെ. സന്ദീപ്, ജൂണിയര്‍ സബ് ഇന്‍സ്പക്ടര്‍ ആര്‍.പി. ടിനു, സബ് ഇന്‍സ്‌പെക്ടര്‍മാരായ രാജ് മോഹന്‍, ആന്‍റണി മൈക്കിള്‍, സീനിയര്‍ സിപിഒ തോമസ് സ്റ്റാന്‍ലി, നിയാസ്, വിനീഷ് മോന്‍ എന്നിവരടങ്ങുന്ന സംഘം നടത്തിയ അന്വേഷണത്തിലാണ് എറണാകുളം മുളന്തുരുത്തി ഭാഗത്ത് ഒളിവില്‍ കഴിയുകയായിരുന്നു പ്രതിയെ പിടികൂടിയത്. ഇയാള്‍ കേരളത്തിലെ പല സ്ഥലങ്ങളിലും സമാന രീതിയിലുളള തട്ടിപ്പുകള്‍ നടത്തിയിട്ടുളളതായി വിവരം ലഭിച്ചിട്ടുണ്ടെന്ന് പോലീസ് പറഞ്ഞു.

ദുരിതാശ്വാസ ക്യാമ്പുകളിലുള്ള കുടുംബങ്ങളെ മാറ്റിപ്പാര്‍പ്പിച്ചു : പെരുന്ന, ചിങ്ങവനം ഗവ. എല്‍പി സ്‌കൂളുകള്‍ ഇന്നു തുറക്കും

ചങ്ങനാശേരി: പെരുന്ന ഗവ. എല്‍പി, ചിങ്ങവനം ഗവ. എല്‍പി സ്‌കൂളുകളിലെ ദുരിതാശ്വാസ ക്യാമ്പുകളിലുള്ള ആളുകളെ മറ്റ് കേന്ദ്രങ്ങളിലേക്കു മാറ്റിപ്പാര്‍പ്പിച്ച് ഇന്നുമുതല്‍ ഈ സ്‌കൂളുകളില്‍ വിദ്യാര്‍ഥികള്‍ക്ക് ക്ലാസുകള്‍ ആരംഭിക്കാന്‍ ജില്ലാ കളക്ടര്‍ ജോണ്‍ വി.സാമുവല്‍ വിളിച്ചുചേര്‍ത്ത യോഗത്തില്‍ തീരുമാനിച്ചു. പെരുന്ന സ്‌കൂളിലെ ക്യാമ്പിലുള്ളവരെ ഗവ. മോഡല്‍ ഹൈസ്‌കൂളിലെ മുറികളിലേക്കും ചിങ്ങവനം സ്‌കൂളിലെ ക്യാമ്പിലുള്ളവരെ അനുയോജ്യമായ മറ്റൊരു സ്‌കൂളിലേക്കും മാറ്റിപ്പാര്‍പ്പിക്കാനാണ് തീരുമാനം. ജില്ലാ കളക്ടറുടെ നിര്‍ദേശപ്രകാരം ക്യാമ്പിലുള്ളവരെ ഇന്നലെ രാത്രിയോടെ മാറ്റിപ്പാര്‍പ്പിച്ചു. ഇന്നുമുതല്‍ ഈ രണ്ടു സ്‌കൂളുകളിലും തടസംകൂടാതെ ക്ലാസുകള്‍ ആരംഭിക്കും. രണ്ട് സ്‌കൂളുകളിലേയും ഹെഡ്മാസ്റ്റര്‍മാര്‍, പടിഎ ഭാരവാഹികള്‍, ജനപ്രതിനിധികള്‍, തദ്ദേശസ്ഥാപന ഉദ്യോഗസ്ഥര്‍, വിദ്യാഭ്യാസ വകുപ്പിലെ ഉദ്യോഗസ്ഥര്‍ എന്നിവര്‍ ചര്‍ച്ചകളില്‍ പങ്കെടുത്തു. സ്‌കൂളുകള്‍ തുറക്കാനുള്ള തീരുമാനത്തെ പിടിഎ സ്വാഗതം ചെയ്തു. രക്ഷിതാക്കളുടെ ആവശ്യം കളക്ടര്‍ കരുതലോടെ കേട്ടു പെരുന്ന ഗവ. എല്‍പി സ്‌കൂളില്‍ ദുരിതാശ്വാസ ക്യാമ്പ് തുടരുന്നതുമൂലം വിദ്യാര്‍ഥികള്‍ക്ക് പഠനം നിഷേധിക്കപ്പെടുന്നതായി ചൂണ്ടിക്കാണിച്ച് രക്ഷിതാക്കളും അധ്യാപകരും നഗരസഭാധികൃതര്‍, തഹസില്‍ദാര്‍, എഇഒ എന്നിവര്‍ക്ക് പരാതി നല്‍കിയിരുന്നു. എല്‍കെജി, യുകെജി മുതല്‍ നാലുവരെ ക്ലാസുകളിലായി അമ്പതു വിദ്യാര്‍ഥികളാണ് ഈ സ്‌കൂളില്‍ പഠിക്കുന്നത്. സ്‌കൂള്‍ തുറന്നപ്പോള്‍മുതല്‍ ദുരിതാശ്വാസ ക്യാമ്പ് പ്രവര്‍ത്തിച്ചിരുന്നതിനാല്‍ നാലുദിവസം മാത്രമേ ക്ലാസ് നടത്താന്‍ കഴിഞ്ഞിരുന്നുള്ളൂ. ദുരിതാശ്വാസ ക്യാമ്പിലെ ആളുകളെ അനുയോജ്യമായ സ്ഥലത്തേക്കു മാറ്റി സ്‌കൂളില്‍ വിദ്യാര്‍ഥികള്‍ക്ക് പഠിക്കാനുള്ള അവസരം ഒരുക്കണമെന്ന് പിടിഎ നല്‍കിയ നിവേദനത്തില്‍ ചൂണ്ടിക്കാട്ടിയിരുന്നു. ദുരിതാശ്വാസ ക്യാമ്പുകള്‍ നടക്കുന്ന സ്‌കൂളുകളില്‍ സര്‍ക്കാര്‍ നിശ്ചയിച്ചിരിക്കുന്നതുപ്രകാരമുള്ള ദിവസം എങ്ങനെ ക്ലാസുകള്‍ നടത്താനാകുമെന്ന ചോദ്യവും ഉയര്‍ന്നിരുന്നു. അടിയന്തര സാഹചര്യങ്ങളില്ലെങ്കില്‍ ദുരിതാശ്വാസ ക്യാമ്പു പ്രവര്‍ത്തനത്തില്‍നിന്ന് എല്‍പി സ്‌കൂളുകളെ ഒഴിവാക്കണമെന്ന് നേരത്തേതന്നെ സര്‍ക്കാര്‍ നിര്‍ദേശിച്ചിട്ടുണ്ട്. കുന്നക്കാട് കമ്യൂണിറ്റിഹാള്‍ ക്യാമ്പിനായി സജ്ജമാക്കണം മഴയുടെ സാഹചര്യം നിലനില്‍ക്കുന്നതനാല്‍ ദുരിതാശ്വാസ ക്യാമ്പ് പ്രവര്‍ത്തിക്കത്തവിധം ഫാത്തിമാപുരം കുന്നക്കാട് കമ്യൂണിറ്റി ഹാളില്‍ രണ്ടാഴ്ചക്കകം ക്രമീകരണങ്ങള്‍ ഏര്‍പ്പെടുത്തണമെന്നും ചങ്ങനാശേരി നഗരസഭയ്ക്ക് ജില്ലാ കളക്ടര്‍ നിര്‍ദേശം നല്‍കിയിട്ടുണ്ട്.

മിഷന്‍ലീഗ് പ്രവര്‍ത്തനവര്‍ഷം ഉദ്ഘാടനം നിർവഹിച്ചു

ചങ്ങനാശേരി: ചെറുപുഷ്പ മിഷന്‍ലീഗ് ചങ്ങനാശേരി മേഖല പ്രവര്‍ത്തന വര്‍ഷത്തിന്‍റെ ഉദ്ഘാടനം വെരൂര്‍ സെന്‍റ് ജോസഫ് പള്ളിയില്‍ മിഷലീഗ് അതിരൂപത ഡയറക്ടര്‍ റവ. ഡോ. വര്‍ഗീസ് പുത്തന്‍പുരയ്ക്കല്‍ നിര്‍വഹിച്ചു. മേഖല പ്രസിഡന്‍റ് ഹയാ ടോജി അധ്യക്ഷത വഹിച്ചു. മേഖല ഡയറക്ടര്‍ ഫാ. ജോസഫ് കുറശേരി മുഖ്യസന്ദേശം നല്‍കി. കുഞ്ഞേട്ടന്‍ പുരസ്‌കാര ജേതാവ് ജോണ്‍സന്‍ കാഞ്ഞിരക്കാട്ടിനെയും അതിരൂപത സമിതിയിലേക്ക് തെരഞ്ഞെടുക്കപ്പെട്ട ടിന്‍റോ സെബാസ്റ്റ്യന്‍, ദിവ്യാ മരിയ ജയിംസ്, ഹയാ ടോജി, കെ.പി. മാത്യു എന്നിവരെയും ആദരിച്ചു. ജോണ്‍സന്‍ പെരുമ്പായി, ജോസുകുട്ടി കുട്ടംപേരൂര്‍, സിസ്റ്റര്‍ കാര്‍മല്‍ എഫ്‌സിസി, ടി.എം. സ്റ്റാനി, ജൂലി വര്‍ഗീസ്, ദിവ്യ മരിയ ജെയിംസ്, ജോയല്‍ ജോസഫ്, റോണി ജോസഫ്, സോണിയ ജോസഫ് എന്നിവര്‍ പ്രസംഗിച്ചു.

‘ഉപ്പുംമുളകിലെ’ കേശു ബിരുദ പഠനത്തിന് കൊതവറകോളജിൽ

വൈക്കം: ഫ്ലവേഴ്സ് ചാനലിലെ ജനപ്രിയ ഹാസ്യ പരിപാടിയായ ഉപ്പും മുളകിലെ കേശുവെന്ന കഥാപാത്രത്തെ അവതരിപ്പിക്കുന്ന അൽസാബിത്ത് വൈക്കം കൊതവറ സെന്‍റ് സേവ്യേഴ്സ് കോളജിൽ ബിരുദപഠനത്തിനു പ്രവേശനം നേടി. ബിഎ പൊളിറ്റിക്സിനു പ്രവേശനം നേടാൻ പത്തനാപുരം സ്വദേശിയായ കേശു അമ്മയ്ക്കൊപ്പമാണ് കോളജിലെത്തിയത്. കലാജീവിതവും പഠനവും ഒരുമിച്ചു കൊണ്ടുപോകാൻ ആഗ്രഹിക്കുന്ന കേശു ഇപ്പോൾ ഇടപ്പള്ളിയിലാണ് താമസിക്കുന്നത്.

ടൗണില്‍ വെയിറ്റിംഗ് ഷെഡ് നിര്‍മിക്കാന്‍ 15 ലക്ഷം രൂപ; നമ്പ്യാകുളം വെയിറ്റിംഗ് ഷെഡ് നവീകരിക്കാന്‍ അഞ്ച് ലക്ഷം

കടുത്തുരുത്തി: കോട്ടയം-എറണാകുളം റോഡില്‍ ബസ് കാത്തുനില്‍ക്കുന്ന യാത്രക്കാര്‍ മഴയത്തും വെയിലത്തും കഷ്ടപ്പെടുന്ന സാഹചര്യങ്ങള്‍ കണക്കിലെടുത്ത് കടുത്തുരുത്തി സെന്‍ട്രല്‍ ജംഗ്ഷനില്‍ കോട്ടയം ഭാഗത്തേക്കുള്ള സൈഡില്‍ വെയിറ്റിംഗ് ഷെഡ് നിര്‍മിക്കുന്നതിന് എംഎല്‍എ ഫണ്ടില്‍നിന്ന് 15 ലക്ഷം രൂപ അനുവദിച്ചതായി മോന്‍സ് ജോസഫ് എംഎല്‍എ അറിയിച്ചു. കോട്ടയം-എറണാകുളം റോഡില്‍ വാഹനാപകടത്തില്‍ തകര്‍ന്നുപോയ നമ്പ്യാകുളം വെയിറ്റിംഗ് ഷെഡ് നവീകരിക്കാന്‍ അഞ്ച് ലക്ഷം രൂപ അനുവദിച്ചതായും മോന്‍സ് ജോസഫ് അറിയിച്ചു.

തകര്‍ന്നുകിടക്കുന്ന പെരുവ -ശാന്തിപുരം റോഡ് നന്നാക്കാന്‍ നടപടിവേണമെന്ന് നാട്ടുകാര്‍

പെരുവ: തകര്‍ന്നുകിടക്കുന്ന പെരുവ -ശാന്തിപുരം റോഡ് നന്നാക്കാന്‍ നടപടി സ്വീകരിക്കണമെന്ന് നാട്ടുകാര്‍. പൊതുമരാമത്ത് വകുപ്പിന്‍റെ കീഴിലുള്ള പെരുവ - ശാന്തിപുരം റോഡിന്‍റെ കഴിഞ്ചിക്കാട്ട് ഭാഗത്താണ് കാല്‍നടപോലും സാധ്യമല്ലാത്തവിധം കൂടുതല്‍ തകര്‍ന്നുകിടക്കുന്നത്. തകര്‍ന്ന റോഡിന്‍റെ കുഴികളില്‍ വെള്ളം കെട്ടിനില്‍ക്കുന്നതിനാല്‍ കാല്‍നടയായി പോകുന്ന വിദ്യാര്‍ഥികള്‍ ഏറെ ബുദ്ധിമുട്ടുകയാണ്. ദിവസവും നൂറുകണക്കിന് ഇരുചക്ര വാഹനങ്ങള്‍ ഉള്‍പ്പെടെയുള്ള വാഹനങ്ങളില്‍ യാത്രക്കാര്‍ സഞ്ചരിക്കുന്ന വഴിയാണിത്. പെരുവ മുതല്‍ ശാന്തിപുരം വരെ അറ്റകുറ്റ പണികള്‍ നടത്തിയെങ്കിലും ഈ ഭാഗത്ത് ഒരു പണിപോലും ചെയ്യാതിരുന്നതാണ് റോഡ് മഴ പെയ്തപ്പോള്‍ തകരാൻ കാരണമെന്ന് നാട്ടുകാര്‍ പറയുന്നു. പലതവണ അധികൃതരേയും ജനപ്രതിനിധികളേയും അറിയിച്ചെങ്കിലും യാതൊരു നടപടിയും ഉണ്ടായില്ല. എത്രയും വേഗം റോഡ് സഞ്ചാരയോഗ്യമാക്കാന്‍ നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു.

ലൈബ്രറി ഉദ്ഘാടനം ചെയ്തു

തലയോലപ്പറമ്പ്: തലയോലപ്പറമ്പ് വൈക്കം മുഹമ്മദ് ബഷീർ സ്മാരക ഗവൺമെന്‍റ് വിഎച്ച്എസ്എസിൽ നവീകരിച്ച സന്തോഷ് മാഷ് മെമ്മോറിയൽ ലൈബ്രറിയും സ്കിൽ ഡവലപ്പ്മെന്‍റ് സെന്‍റർ ഉദ്ഘാടനവും നടത്തി. സ്കൂൾ ഓഡിറ്റോറിയത്തിൽ നടന്ന സമ്മേളനത്തിൽ ലൈബ്രറിയുടെയും സ്കിൽ ഡവലപ്പ്മെന്‍റ് സെന്‍ററിന്‍റെയും ഉദ്ഘാടനം സി.കെ. ആശ എംഎൽഎ നിർവഹിച്ചു. പിടിഎ പ്രസിഡന്‍റ് കലേശൻ അധ്യക്ഷത വഹിച്ചു. സ്കിൽ ഡവലപ്മെന്‍റ് സെന്‍റർ തുടങ്ങിയതോടെ ഇലക്‌ട്രിക് വെഹിക്കിൾ സർവീസ്, അനിമേറ്റർ മീഡിയ ആൻഡ് എന്‍റർടെയ്ൻമെന്‍റ് എന്നീ കോഴ്സുകളിൽ പഠിക്കാൻ വിദ്യാർഥികൾക്ക് അവസരം ലഭിക്കും. വിവിധമേഖലകളിൽ മികവ് തെളിയിച്ചവരെ യോഗത്തിൽ ഉപഹാരം നൽകി അനുമോദിച്ചു. ജില്ലാ പഞ്ചായത്തംഗം ടി.എസ്. ശരത്, പഞ്ചായത്ത് പ്രസിഡന്‍റ് ഷിജി വിൻസന്‍റ് ,എസ്എസ്കെ കോട്ടയം ഡിപിസി കെ.ജെ. പ്രസാദ്, ബ്ലോക്ക് പഞ്ചായത്തംഗം ശ്രുതിദാസ്, എസ്എസ്കെ കോട്ടയം ഡിപിഒ ബിനുഏബ്രഹാം, വൈക്കം എഇഒ കെ.സി. ദീപ, എസ്‌എസ്കെ വൈക്കം ബിപിസി സുജവാസുദേവൻ, സ്കൂൾ പ്രിൻസിപ്പൽ സജിനി സെബാസ്റ്റ്യൻ, ഹെഡ്മാസ്റ്റർ ജി. ശ്രീരഞ്ജിത്ത്, സീനിയർ അസിസ്റ്റന്‍റുമാരായ എം.ടി. ഗോപകുമാർ, ടി. രാജേഷ്, ലൈബ്രറി ഇൻചാർജ് സി.ആർ. ധരിത്രിദേവി, എസ്ഡിസി കോ-ഓർഡിനേറ്റർ ലിബിൻമാത്യു തുടങ്ങിയവർ പ്രസംഗിച്ചു.

നിരവധി മോഷണക്കേസിലെ പ്രതി വീണ്ടും പിടിയില്‍ : പിടികൂടിയത് കടുത്തുരുത്തിയിലെ കേസില്‍; പാലക്കാട്ടെ മോഷണക്കേസും തെളിഞ്ഞ ു

കടുത്തുരുത്തി: മാന്‍വെട്ടത്തെ വീടിന്‍റെ മുന്‍വശത്തെ വാതില്‍ കുത്തിത്തുറന്ന് മുറിക്കുള്ളിലെ അലമാരയില്‍ സൂക്ഷിച്ചിരുന്ന 32 പവന്‍ സ്വര്‍ണവും 25,000 രൂപയും മോഷ്ടിച്ച സംഭവവുമായി ബന്ധപ്പെട്ട് ഒരാളെ പോലീസ് കസ്റ്റഡിയിലെടുത്തു. കൊല്ലം വടക്കേവിള അയത്തില്‍ പുത്തന്‍വിള വീട്ടില്‍ നജീമുദീന്‍ (52) നെയാണ് കടുത്തുരുത്തി പോലീസ് പിടികൂടിയത്. തിരുവനന്തപുരം ബീമാപ്പള്ളിയില്‍നിന്നാണ് ഇയാളെ പിടികൂടിയത്. പോലീസ് സ്റ്റേഷനിലെത്തിച്ച് ചോദ്യം ചെയ്തപ്പോള്‍ ഒറ്റപ്പാലത്തെ ഒരു വീട്ടില്‍നിന്ന് എട്ടര പവന്‍ സ്വര്‍ണവും 25,000 രൂപയും പാലക്കാട് വടക്കഞ്ചേരി പോലീസ് സ്റ്റേഷന്‍ പരിധിയില്‍നിന്ന് ഒരു വീട്ടില്‍ നടത്തിയ മോഷണത്തിനിടെ രണ്ട് വാച്ചുകളും കവര്‍ന്നതായി ഇയാള്‍ പോലീസിനോട് സമ്മതിച്ചു. മാന്‍വെട്ടത്തെ മോഷണ ദിവസത്തെ സിസിടിവി കാമറകള്‍ പരിശോധിച്ചതില്‍നിന്ന് മഴക്കോട്ടിട്ട ഒരാള്‍ പോകുന്നത് കണ്ടിരുന്നു. ഇയാളുടെ ദൃശ്യം വ്യക്തമല്ലായിരുന്നു. കുറുപ്പന്തറ കവലയിലെത്തി ഓട്ടോറിക്ഷയില്‍ ഇയാള്‍ കയറി കുറവിലങ്ങാട് ഇറങ്ങി. ഇങ്ങനെ ഒരാള്‍ പുലര്‍ച്ചെ വന്ന് ഓട്ടം വിളിച്ചിരുന്നതായി ഓട്ടോ ഡ്രൈവര്‍ മൊഴി നല്‍കിയിരുന്നു. കുറവിലങ്ങാടുനിന്ന് ബസില്‍ കയറിപ്പോയ ഇയാളുടെ സാന്നിധ്യം കൂത്താട്ടുകുളത്തും പിന്നീട് വടക്കന്‍ പറവൂരിലും പോലീസ് സംഭവ ദിവസം കണ്ടെത്തി. സംഭവദിവസം ഏറ്റുമാനൂരില്‍ വരെ താന്‍ വന്നിരുന്നതായും മോഷണം നടത്താനായി ശ്രമിച്ചെങ്കിലും ഒരിടത്തും കയറാനായില്ലെന്നും നജീമുദീന്‍ പോലീസിനോട് പറഞ്ഞു. ബുധനാഴ്ച നജീമുദീനെ വടക്കഞ്ചേരി പോലീസിന് കൈമാറിയതായി കടുത്തുരുത്തി എസ്എച്ച്ഒ ടി.എസ്. റെനീഷ് പറഞ്ഞു. കസ്റ്റഡിയിലാകുന്നത് 22 ദിവസത്തിന് ശേഷം കഴിഞ്ഞ മേയ് 31-ന് രാത്രിയിലാണ് മാന്‍വെട്ടം നെടുതുരുത്തി മ്യാലില്‍ എന്‍.ജെ. ജോയിയുടെ വീട്ടില്‍ മോഷണം നടന്നത്. ജോയിയും ഭാര്യ ലിസിയും മകള്‍ ജൂലിയുടെ ചികിത്സാവശ്യത്തിനായി ഏറ്റുമാനൂര്‍ കാരിത്താസ് ആശുപത്രിയിലായിരുന്നു. ജൂണ്‍ ഒന്നിന് രാവിലെ പത്തിന് ജോയി വീട്ടിലെത്തിയപ്പോഴാണ് വീടിന്‍റെ മുന്‍വശത്തെ വാതിലിന്‍റെ പൂട്ട് തകര്‍ത്ത നിലയില്‍ കാണുന്നത്. അലമാരയുടെ അടിവശത്തെ അറയില്‍ സൂക്ഷിച്ചിരുന്ന ഭാര്യയുടെയും മകളുടെയും മരുമകന്‍ ബിനുവിന്‍റെയും മാല, വള, കമ്മല്‍, മോതിരങ്ങള്‍ ഉള്‍പ്പെടെയുള്ള 32 പവന്‍ സ്വര്‍ണാഭരണങ്ങളാണ് മോഷ്ടിക്കപ്പെട്ടത്. ഇതിനൊപ്പമുണ്ടായിരുന്ന 25,000 രൂപയും നഷ്ടപ്പെട്ടു. ജോയിയുടെ സമീപത്തെ വീട്ടില്‍ താമസക്കാരില്ല. തുടര്‍ന്ന് കടുത്തുരുത്തി പോലീസില്‍ വിവരമറിയിക്കുകയായിരുന്നു.

ക്രിപ്‌റ്റോ കറന്‍സിയുടെ പേരിൽ തട്ടിപ്പ്: ഒരാള്‍കൂടി പിടിയില്‍

ചിങ്ങവനം: ക്രിപ്‌റ്റോ കറന്‍സി ബിസിനസില്‍ പണം നിക്ഷേപിച്ചാല്‍ കൂടുതല്‍ വരുമാനം ഉണ്ടാക്കിത്തരാമെന്നു പറഞ്ഞ് പനച്ചിക്കാട്, പാത്താമുട്ടം സ്വദേശിയായ മോനി പൗലോസ്( 62 ) എന്നയാളില്‍നിന്ന് അഞ്ചുലക്ഷം രൂപ തട്ടിയെടുത്ത കേസില്‍ ഒരാള്‍കൂടി പിടിയില്‍. മല്ലപ്പള്ളി ചെങ്ങരൂര്‍ ഭാഗത്ത് കല്ലുപാലത്തിങ്കല്‍ ഏബ്രഹാം വര്‍ഗീസ് (60) എന്നയാളെയാണ് ചിങ്ങവനം പോലീസ് അറസ്റ്റ് ചെയ്തത്. ഈ കേസിലെ ഒന്നാം പ്രതിയായ തൃശൂര്‍, മണ്ണാമംഗലം ഭാഗത്ത് തകിടിപ്പുറത്ത് ടി.ജെ. ജോയി(50) യെ നേരത്തെ അറസ്റ്റ് ചെയ്തിരുന്നു. ചിങ്ങവനം എസ്എച്ച്ഒ, വി.എസ്. അനില്‍കുമാറിന്‍റെ നേതൃത്വത്തില്‍ എസ്‌ഐ മാരായ വിഷ്ണു, എം.പി. സജി, സിപിഒ മാരായ സിറാജുദ്ദീന്‍, പ്രദീപ് എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു.

യുവാവിനെ കൊലപ്പെടുത്താൻ ശ്രമിച്ച കേസിലെ പ്രതി അറസ്റ്റിൽ

കോട്ടയം: യുവാവിനെ കൊലപ്പെടുത്താൻ ശ്രമിച്ച കേസിലെ പ്രതി അറസ്റ്റിൽ. കുടമാളൂർ അമ്പാടി ഭാഗത്ത് കൊപ്രയിൽ വീട്ടിൽ ജയിംസ് ആണ് കോട്ടയം വെസ്റ്റ് പോലീസിന്‍റെ പിടിയിലായത്. കഴിഞ്ഞ 19ന് രാത്രിയിൽ ജനറൽ ആശുപത്രിക്കു സമീപമുള്ള മെഡിക്കൽ സ്റ്റോറിന്‍റെ വരാന്തയിൽ കിടന്നുറങ്ങുകയായിരുന്ന തലയാഴം സ്വദേശി മണിക്കുട്ടനുമായുണ്ടായ തർക്കത്തെത്തുടർന്ന് കത്തിക്ക് കുത്തിപ്പരിക്കേൽപ്പിക്കുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഇയാൾ കോട്ടയം ജില്ലയിലെ വിവിധ സ്റ്റേഷനുകളിൽ നിരവധിക്കേസുകളിൽ പ്രതിയാണ്.

അയര്‍ക്കുന്നം ലിറ്റില്‍ ഫ്ലവര്‍ പള്ളിയില്‍ തിരുനാൾ

അയര്‍ക്കുന്നം: ലിറ്റില്‍ ഫ്ലവര്‍ പള്ളിയില്‍ വിശുദ്ധ അന്തോണീസിന്‍റെ നൊവേനയ്ക്കും തിരുനാളിനും തുടക്കമായി. 27, 28, 29 തീയതികളിലാണ് പ്രധാന തിരുനാള്‍. നാളെ വൈകുന്നേരം അഞ്ചിന് ജപമാല, 5.30നു കൊടിയേറ്റ്, തുടര്‍ന്ന് ദിവ്യബലി, ഫാ. അരുണ്‍ സിഎസ്‌സി, 28നു വൈകുന്നേരം അഞ്ചിന്ന് ജപമാല, തുടര്‍ന്ന് ദിവ്യബലി, വിജയപുരം കൂരിയ മോഡറേറ്റര്‍ ഫാ. ജോസഫ് അജി ചെറുകാക്രാംചേരില്‍, 29നു രാവിലെ 10ന് ജപമാല തുടര്‍ന്ന് തിരുനാള്‍ ദിവ്യബലി നല്ലിടയന്‍ ഫൊറോന വികാരി ഫാ. വില്‍സണ്‍ കപ്പാട്ടില്‍ ഒസിസി, തുടര്‍ന്ന് ദിവ്യകാരുണ്യപ്രദക്ഷിണം, കൊടിയിറക്ക്, 12.30ന് നേര്‍ച്ച. തിരുനാള്‍ കര്‍മങ്ങള്‍ക്ക് പള്ളി വികാരി ഫാ. തോമസ് കളരിപ്പറമ്പില്‍, സെക്രട്ടറി സജി കവലച്ചാലില്‍, കണ്‍വീനര്‍ പ്രവീണ്‍ ലൂക്കോസ് എന്നിവര്‍ നേതൃത്വം നല്‍കും.

ബാറിലെ വാക്കുതർക്കം: യുവാവിനെ കൊലപ്പെടുത്താൻ ശ്രമിച്ച കേസിലെ പ്രതി പിടിയിൽ

ഏറ്റുമാനൂർ: ബാറിലെ വാക്കുതർക്കത്തിന്‍റെ പേരിൽ യുവാവിനെ കൊലപ്പെടുത്താൻ ശ്രമിച്ച കേസിലെ പ്രതിയെ അറസ്റ്റ് ചെയ്തു. പേരൂർ ഇഞ്ചിക്കാല വീട്ടിൽ മുഹമ്മദ് റാഫി(41)യെയാണ് ഏറ്റുമാനൂർ പോലീസ് അറസ്റ്റ് ചെയ്തത്. കഴിഞ്ഞ 11നു വൈകുന്നേരം തവളക്കുഴിയിലെ ബാർ ഹോട്ടലിനു സമീപം റോഡരികിൽവച്ച് പ്രതി ഏറ്റുമാനൂർ സ്വദേശി ഹരികൃഷ്ണൻ എന്ന യുവാവിനെ മർദിക്കുകയും ആയുധം ഉപയോഗിച്ച് കഴുത്തിന് മുറിവേൽപ്പിക്കുകയുമായിരുന്നു. ഏറ്റുമാനൂർ സ്റ്റേഷൻ ഹൗസ് ഒഫീസർ ഇൻസ്പെക്ടർ എ.എസ്. അൻസൽ, എസ്ഐമാരായ അഖിൽദേവ്, മനോജ് കെ.കെ, എസ്‌സിപി ഒമാരായ ജിജോ, ജോമി, സുനിൽ കുര്യൻ, സിപിഒമാരായ അനീഷ്‌ വി.കെ, അജിത് എം. വിജയൻ, അനിൽകുമാർ എന്നിവരടങ്ങുന്ന സംഘമാന് പ്രതിയെ അറസ്റ്റ് ചെയ്തത്. ആക്രമണത്തിന് പ്രതി ഉപയോഗിച്ച് ആയുധം കണ്ടെടുത്തിട്ടുണ്ട്. പ്രതിയെ കോടതിയിൽ ഹാജരാക്കി.

ഓട്ടോ ഡ്രൈവറുടെയും വഴിയാത്രക്കാരന്‍റെയും ഇടപെടൽ; വീട്ടമ്മയ്ക്ക് പഴ്സ് തിരികെ ലഭിച്ചു

മാങ്ങാനം: സൂപ്പർ മാർക്കറ്റിൽ സാധനം മേടിക്കാൻ കാറിൽനിന്നിറങ്ങവേ പഴ്സ് നഷ്ടപ്പെട്ട പത്തനംതിട്ട സ്വദേശിനിക്ക് ഓട്ടോ ഡ്രൈവറുടെയും വഴി യാത്രക്കാരന്‍റെയും ഇടപെടൽ മൂലം പണവും രേഖകളും അടങ്ങിയ പഴ്സ് തിരികെ ലഭിച്ചു. ചൊവ്വാഴ്ച ഉച്ചകഴിഞ്ഞ് രണ്ടിന് മാങ്ങാനം മോർ സൂപ്പർ മാർക്കറ്റിൽ സാധനം മേടിക്കാൻ കാറിൽനിന്നിറങ്ങി തിരികെ കാറിൽ കയറിയ പത്തനംതിട്ട കൊറ്റനാട്‌ സ്വദേശിനി സൂസമ്മ ചെറിയാന്‍റെ കൈയിൽനിന്നാണ് പണവും രേഖകളും അടങ്ങിയ പഴ്സ് നഷ്ടമായത്. ആ സമയം അതുവഴി എത്തിയ ഓട്ടോ ഡ്രൈവർ പെരുമ്പായിക്കാട് പൊന്നാറ്റിൽ രാജേഷ്, സ്കൂട്ടർ യാത്രികനായ വാഴൂർ ഈസ്റ്റ് മണ്ണിപ്ലാക്കൽ ഏബ്രഹാം തോമസ് എന്നിവർക്കാണ് പഴ്സ് ലഭിച്ചത്. ഇരുവരും ചേർന്ന് പഴ്സ് കോട്ടയം ഈസ്റ്റ് പോലീസ് സ്റ്റേഷനിൽ ഏൽപ്പിക്കുകയും ഡ്രൈവിംഗ് ലൈസൻസിൽനിന്നു ലഭിച്ച അഡ്രസ് പ്രകാരം ഉടമയെ കണ്ടെത്തി സ്റ്റേഷനിൽ വച്ച് പഴ്സ് ഉടമയ്ക്ക് കൈമാറുകയും ചെയ്തു.

മിനിഹൈമാസ്റ്റ് ലൈറ്റുകൾ പ്രകാശിപ്പിച്ചു

മാന്നാനം: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി മാന്നാനം കുമാരപുരം ശ്രീബാലസുബ്രഹ്‌മണ്യ സ്വാമി ക്ഷേത്രത്തിനു മുന്നിലും വേലംകുളം ലിസ്യു കുരിശടി ജംഗ്ഷനിലും മിനി ഹൈമാസ്റ്റ് ലൈറ്റുകൾ സ്ഥാപിച്ചു. ജില്ലാ പഞ്ചായത്തംഗം റോസമ്മ സോണി സ്വിച്ചോണ്‍ കര്‍മം നിര്‍വഹിച്ചു. അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കളം അധ്യക്ഷത വഹിച്ചു. പഞ്ചായത്തംഗം ഹരി പ്രകാശ്, എസ്എന്‍ഡിപി ശാഖ പ്രസിഡന്‍റ് സജീവ് കുമാര്‍, സെക്രട്ടറി എന്‍.കെ. മോഹന്‍ദാസ് എന്നിവര്‍ പ്രസംഗിച്ചു.

കുടുംബസംഗമവും പൂര്‍വ പിതാക്കന്മാരുടെ അനുസ്മരണവും

പുന്നത്തുറ: സെന്‍റ് തോമസ് ക്‌നാനായ പഴയപള്ളിയുടെ ചതുര്‍ ശതാബ്ദി ആഘോഷങ്ങളോടനുബന്ധിച്ചു ക്നാനായ കത്തോലിക്കാ കോണ്‍ഗ്രസിന്‍റെ നേതൃത്വത്തില്‍ കുടുംബ സംഗമവും പൂര്‍വ പിതാക്കന്മാരുടെ അനുസ്മരണവും സംഘടിപ്പിച്ചു. പൊതുസമ്മേളനം ആർച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്തു. കെസിസി അതിരൂപത പ്രസിഡന്‍റ് ബാബു പറമ്പടത്തുമലയില്‍ അധ്യക്ഷത വഹിച്ചു. കോട്ടയം അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരില്‍ അനുഗ്രഹപ്രഭാഷണം നടത്തി. അതിരൂപതയില്‍ സേവനമനുഷ്ഠിക്കുന്ന വിവിധ സഭാസമൂഹങ്ങളുടെ പ്രതിനിധികളെ ആദരിച്ചു. അതിരൂപത വികാരി ജനറാള്‍മാരായ ഫാ. തോമസ് ആനിമൂട്ടില്‍, ഫാ. മൈക്കിള്‍ വെട്ടിക്കാട്ട്, ഫൊറോന വികാരി ഫാ. സ്റ്റാനി ഇടത്തിപ്പറമ്പില്‍, ഇടവക വികാരി ഫാ. ബിബിന്‍ കണ്ടോത്ത്, അസി. വികാരി ഫാ. ടോം പുത്തന്‍പുരയ്ക്കല്‍, ജൂബിലി ജോയിന്‍റ് കണ്‍വീനര്‍ ബിനു സ്റ്റീഫന്‍ പല്ലോന്നില്‍, ബേബി സൈമണ്‍ മുളവേലിപ്പുറം, കെസിസി കിടങ്ങൂര്‍ ഫൊറോനാ പ്രസിഡന്‍റ് ഷൈബി അലകസ്, കെസിസി പുന്നത്തുറ യൂണിറ്റ് പ്രസിഡന്‍റ് ജോഷി മുത്തൂറ്റില്‍ എന്നിവര്‍ പ്രസംഗിച്ചു. ഫാ. ജോസഫ് പുത്തന്‍പുരയ്ക്കല്‍ ക്ലാസ് നയിച്ചു. മാര്‍ ജോസഫ് പണ്ടാരശേരിലിന്‍റെ മുഖ്യ കാര്‍മികത്വത്തില്‍ കൃതജ്ഞതാബലിയര്‍പ്പിച്ചു.

കുടമാളൂര്‍ തിരുഹൃദയ ചാപ്പലില്‍ തിരുനാൾ

കുടമാളൂര്‍: കുടമാളൂർ തിരുഹൃദയ ചാപ്പലില്‍ ഈശോയുടെ തിരുഹൃദയ തിരുനാള്‍ നാളെ മുതല്‍ 30 വരെ ആഘോഷിക്കും. തിരുഹൃദയ വണക്കമാസ സമാപനത്തിന്‍റെ ഭാഗമായി ഇന്നു വൈകുന്നേരം 5.45ന് ആര്‍ച്ച്പ്രീസ്റ്റ് റവ. ഡോ. ജോര്‍ജ് മംഗലത്തില്‍ കൊടിയേറ്റും. നാളത്തെ തിരുക്കര്‍മങ്ങള്‍ക്ക് ഫാ. ജോയല്‍ പുന്നശേരി നേതൃത്വം നല്‍കും. പ്രധാന തിരുനാള്‍ ദിനമായ 29നു വൈകുന്നേരം ആറിന് വിശുദ്ധ കുർബാന ഫാ. ജസ്റ്റിന്‍ വരവുകാലാ. വചന സന്ദേശം-ആര്‍ച്ച് പ്രീസ്റ്റ് റവ. ഡോ. ജോര്‍ജ് മംഗലത്തിൽ. തുടര്‍ന്ന് പ്രദക്ഷിണവും കുടുംബസംഗമവും ഉണ്ടായിരിക്കും. ഫാ. അലോഷ്യസ് വല്ലാത്തറ നേതൃത്വം നല്‍കും. 30ലെ തിരുക്കര്‍മങ്ങള്‍ക്ക് ഫാ. സുനില്‍ ആന്‍റണി നേതൃത്വം നല്‍കും. വിദ്യാഭ്യാസ അവാര്‍ഡ് വിതരണവും ജീവകാരുണ്യ ഫണ്ടിന്‍റെ സ്വീകരണവും ഉണ്ടായിരിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]