ADVERTISEMENT

ADVERTISEMENT

അംഗത്വ വിതരണോദ്ഘാടനം

തലയോലപ്പറമ്പ്: കെപിഎംഎസിന്‍റെ 2025-2026 സംഘടനാവർഷത്തെ അംഗത്വ വിതരണത്തിന്‍റെ ജില്ലാതല ഉദ്ഘാടനം നടത്തി. തലയോലപ്പറമ്പ് യൂണിയനിലെ മറവൻതുരുത്തിൽ ഐഎച്ച്ഡിപി ഹാളിൽ നടന്ന യോഗത്തിൽ അംഗത്വ വിതരണോദ്ഘാടനം കെപിഎംഎസ് സംസ്ഥാന ട്രഷറർ അഡ്വ.എ. സനീഷ്കുമാർ നിർവഹിച്ചു.

യൂണിയൻ പ്രസിഡന്‍റ് എസ്. പുഷ്പകുമാർ അധ്യക്ഷത വഹിച്ചു. കെ.കെ. കൃഷ്ണകുമാർ, മോഹനൻ പേരേത്തറ, ഒ.ടി. പുഷ്കരൻ, മിനി സിബി, ഇ.ആർ.സിന്ധുമോൻ, ആശ ഫെനിൽ, സി.വി. മധു, കെ.കെ.രാജൻ, കെ.കെ. അനിൽകുമാർ, ബി. ശ്രീകല, എം.കെ. സുധീഷ്, കെ. തിലകൻ തുടങ്ങിയവർ പ്രസംഗിച്ചു.

ADVERTISEMENT

ഗതാഗതക്കുരുക്കായി തണൽമരങ്ങൾ

കുമരകം: വാഹനഗതാഗതം പുനരാരംഭിച്ച കോണത്താറ്റു പാലത്തിലൂടെ കടന്നുവരുന്ന വാഹന ഡ്രൈവർമാരുടെ കാഴ്ചമറയ്ക്കുന്ന തണൽ മരങ്ങൾ വാഹനക്കുരുക്കിനു കാരണമാകുന്നതായി പരാതി. കുമരകം ഭാഗത്തുനിന്ന് കോണത്താറ്റു പാലത്തിലെത്തുന്ന വാഹനങ്ങളുടെ ഡ്രൈവർമാർക്ക് കോട്ടയം ഭാഗത്തുനിന്നു വരുന്ന വാഹനങ്ങളെ കാണാൻ കഴിയാത്തതിനു കാരണം റോഡിന്‍റെ ഇരുവശങ്ങളിലായി വളർന്നുനില്ക്കുന്ന രണ്ടു തണൽമരങ്ങളാണ്. ഒരു മരത്തിന്‍റെ ശിഖരങ്ങൾക്കിടയിലൂടെ വൈദ്യുതിലൈനുകളും കടന്നുപോകുന്നു. ഇത് അപകടങ്ങൾക്കും വൈദ്യുതിമുടങ്ങുന്നതിനും കാരണമാകും. ഡ്രൈവർമാർക്ക് ബുദ്ധിമുട്ടുണ്ടാക്കുന്ന മരത്തിന്‍റെ ശിഖരങ്ങൾ രാഷ്‌ട്രപതി എത്തുന്നതിനു മുമ്പുതന്നെ മുറിച്ചു മാറ്റി ഗതാഗതം സുഗമമാക്കണമെന്നാണ് ഡ്രൈവർമാരുടെയും നാട്ടുകാരുടെയും ആവശ്യം.

മെഡി. കോളജ് ട്രോമ കെയർ യൂണിറ്റിലെ രോഗികളുടെ കൂട്ടിരിപ്പുകാർ ദുരിതത്തിൽ

ഗാന്ധിനഗര്‍: മെഡിക്കല്‍ കോളജ് ആശുപത്രി ട്രോമ കെയര്‍ യൂണിറ്റില്‍ ചികിത്സയില്‍ കഴിയുന്ന രോഗികളുടെ കൂട്ടിരിപ്പുകാര്‍ ദുരിതത്തില്‍. തലയ്ക്ക് ഗുരുതര പരിക്കേറ്റവരും ന്യൂറോ സര്‍ജറി വിഭാഗത്തിന് കീഴില്‍ തലയില്‍ ശസ്ത്രക്രിയ നടത്തിയവരുമാണ് ട്രോമ കെയര്‍ യൂണിറ്റില്‍ ചികിത്സയിലുള്ളത്. എന്നാല്‍, ഇവരുടെ കൂട്ടിരിപ്പുകാര്‍ അടിസ്ഥാന സൗകര്യങ്ങളുടെ അഭാവം നേരിടുകയാണ്. മഴക്കാലമായതിനാല്‍ കൂട്ടിരിപ്പുകാര്‍ ഇരിക്കുന്ന ഭാഗത്തുകൂടെയാണ് വെള്ളം കുത്തിയൊലിക്കുന്നത്. ഇതില്‍ ചവിട്ടിവേണം കൂട്ടിരിപ്പുകാര്‍ ഈ വിഭാഗത്തില്‍ പ്രവേശിക്കാന്‍. വലിയ ശുചിത്വം പാലിക്കേണ്ട വിഭാഗമാണ് ട്രോമ കെയര്‍. വെള്ളം കെട്ടിക്കിടന്ന് ചെളി നിറഞ്ഞ നിലയിലാണ് ഇപ്പോള്‍ ഇവിടം. ഇതു കൊതുക് ശല്യവും വര്‍ധിപ്പിച്ചിരിക്കുകയാണ്. ഇവിടേക്കുള്ള വെള്ളമൊഴുക്കിന്‍റെ ഗതി മാറ്റി വിടേണ്ടത് അടിയന്തര ആവശ്യമാണ്. രോഗികളുടെ കൂട്ടിരിപ്പുകാര്‍ക്ക് രാത്രികാലങ്ങളില്‍ കിടക്കുന്നതിനുള്ള സൗകര്യവും പരിമിതമാണ്. സ്ത്രീകള്‍ക്ക് കിടക്കുന്നതിന് ചെറിയ സൗകര്യം ഒരുക്കിയിട്ടുണ്ടെങ്കിലും ഇതു പരിമിതമാണ്. പുരുഷന്മാർക്ക് കിടക്കുന്നതിന് വലിയ ദുരിതമാണ് നേരിടുന്നത്.

കോണത്താറ്റ് പാലം അടുത്തമാസം ‌ ഗതാഗതയോഗ്യമാക്കും: മന്ത്രി വാസവന്‍

കുമരകം: കോട്ടയം-കുമരകം റോഡിലെ കോണത്താറ്റ് പാലം പൂര്‍ണമായും അടുത്തമാസം ഗതാഗത യോഗ്യമാക്കുമെന്ന് മന്ത്രി വി.എന്‍ വാസവന്‍. കുമരകം പഞ്ചായത്തിലെ വികസനസദസ് ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. കോണത്താറ്റ് പാലത്തിന്‍റെ നിര്‍മാണം സമയബന്ധിതമായി പൂര്‍ത്തിയാക്കിയെങ്കിലും ഉറപ്പില്ലാത്ത മണ്ണായതിനാലാണ് സമാന്തര പാത നിര്‍മാണം വൈകിയതെന്ന് മന്ത്രി പറഞ്ഞു. കുമരകം പഞ്ചായത്തിനു സമീപമുള്ള ഗവൺമെന്‍റ് എൽപി സ്കൂൾ ഗ്രൗണ്ടിൽ നടന്ന സെമിനാറിൽ പഞ്ചായത്ത് പ്രസിഡന്‍റ് ധന്യ സാബു അധ്യക്ഷത വഹിച്ചു. പഞ്ചായത്തിന്‍റെ വികസന രേഖ മന്ത്രി പ്രകാശനം ചെയ്തു. സംസ്ഥാന സർക്കാരിന്‍റെ വികസന നേട്ടങ്ങൾ റിസോഴ്സ് പേഴ്സൺ ബിലാൽ കെ. റാമും പഞ്ചായത്തിന്‍റെ വികസന നേട്ടങ്ങൾ സെക്രട്ടറി എസ്. ബിനുവും അവതരിപ്പിച്ചു. ജില്ലാ പഞ്ചായത്തഗം കെ.വി. ബിന്ദു, പഞ്ചായത്ത് വൈസ് പ്രസിഡന്‍റ് ആർഷ ബൈജു, ബ്ലോക്ക് പഞ്ചായത്ത് അംഗങ്ങളായ കവിത ലാലു, മേഘലാ ജോസഫ്, പഞ്ചായത്ത് അംഗങ്ങളായ സ്മിത സുനിൽ, മായാ സുരേഷ്, പി.ഐ. ഏബ്രഹാം, ശ്രീജ സുരേഷ്, വി.കെ. ജോഷി, രശ്മികല, പി.എസ്. അനീഷ്, വി.സി. അഭിലാഷ്, പി.കെ. മനോഹരൻ, അസിസ്റ്റന്‍റ് സെക്രട്ടറി കെ.ഡി. മുത്തുമണി എന്നിവർ പങ്കെടുത്തു.

പ്രാര്‍ഥനാസമാജം സില്‍വര്‍ജൂബിലി സമാപനം ഇന്ന്

കോട്ടയം: യാക്കോബായ സഭ ഭദ്രാസന പ്രാര്‍ഥനാസമാജം സില്‍വര്‍ ജൂബിലി സമാപന സമ്മേളനവും കൃപാധാര ധ്യാന സംഗമവും കോട്ടയം സെന്‍റ് ജോസഫ്‌സ് കത്തീഡ്രലില്‍ ഇന്നു രാവിലെ എട്ടു മുതല്‍ ഉച്ചകഴിഞ്ഞ് ഒന്നുവരെ നടക്കും. ഫാ. സേവേറിയോസ് തോമസ് നിരണം വിശുദ്ധ കുര്‍ബാനയര്‍പ്പിക്കും. കുര്യാക്കോസ് മാര്‍ ക്ലീമീസ് മെത്രാപ്പോലീത്ത വചനസന്ദേശം നല്‍കും. സമാപന സമ്മേളനം യാക്കോബായ സഭ എപ്പിസ്‌കോപ്പല്‍ സുന്നഹദോസ് സെക്രട്ടറി തോമസ് മാര്‍ തീമോത്തിയോസ് ഉദ്ഘാടനം ചെയ്യും. 50-ാം വര്‍ഷ പൗരോഹിത്യ ജൂബിലി ആചരിക്കുന്ന തോമസ് മാര്‍ തീമോത്തിയോസിനെ പ്രാര്‍ഥനാസമാജം ആദരിക്കും. ഭദ്രാസന സെക്രട്ടറി ഫാ. ഷൈജു ജോസ് ചെന്നിക്കര സമാപനസന്ദേശം നല്‍കും.

ഒന്ന്, രണ്ട് ബസ് സ്റ്റാന്‍ഡുകളുടെ പരിപാലനം സ്വകാര്യ വ്യക്തിക്കു നല്‍കി നഗരസഭ

ചങ്ങനാശേരി: സ്വകാര്യ വ്യക്തിയുടെ പങ്കാളിത്തത്തോടെ ഒന്നാംനമ്പര്‍ പഴയ ബസ് സ്റ്റാന്‍ഡ്, പെരുന്ന ബസ് സ്റ്റാന്‍ഡുകളുടെ മുഖം മിനുക്കുന്നു. ഇരു ബസ്‌സ്റ്റാന്‍ഡുകളിലും ഇരിപ്പിടങ്ങള്‍ സജ്ജമാക്കും. അലങ്കാരദീപങ്ങള്‍ തെളിക്കും. ചെടിച്ചട്ടികളില്‍ പൂച്ചെടികള്‍ വച്ചുപിടിപ്പിക്കും. ടെര്‍മിനലും മുറികളും പെയിന്‍റുചെയ്ത് മനോഹരമാക്കും. വൈദ്യുതി ചാര്‍ജ് അടയ്ക്കുന്നതും സ്വകാര്യ വ്യക്തിയായിരിക്കും. പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് നടത്തിപ്പ് 7500 രൂപ മാസവാടകക്ക് ഇതേവ്യക്തിക്കു നല്‍കിയിട്ടുണ്ട്. ഇതില്‍ കാപ്പിക്കട തുറക്കും. ഇരു സ്റ്റാന്‍ഡുകളിലും കാമറ സ്ഥാപിച്ച് സുരക്ഷ ഉറപ്പാക്കും. ഡിജിറ്റല്‍ ബോര്‍ഡ് സ്ഥാപിച്ച് പരസ്യങ്ങള്‍ പ്രദര്‍ശിപ്പിക്കും. ജൈവ, അജൈവ മാലിന്യങ്ങള്‍ തരംതിരിച്ച് ശേഖരിക്കാന്‍ ബിന്നുകളും ബോട്ടില്‍ബൂത്തും സ്ഥാപിക്കും. നഗരസഭ നിര്‍ദേശിക്കുന്ന അറിയിപ്പുകളും നിര്‍ദേശങ്ങളും പ്രദര്‍ശിപ്പിക്കും. ദിവസവും ശുചീകരണം നടത്തും. രണ്ട് ലക്ഷം രൂപ സെക്യൂരിറ്റി ഡിപ്പോസിറ്റ് നല്‍കി സ്റ്റാന്‍ഡിന്‍റെ വിവിധ ഭാഗങ്ങളിലും ടെര്‍മിനലിലും നഗരസഭ അനുവദിക്കുന്ന അളവില്‍ പരസ്യബോര്‍ഡ് സ്ഥാപിച്ചാണ് സ്വകാര്യവ്യക്തി ബസ് സ്റ്റാന്‍ഡുകളുടെ പരിപാലനം ഏറ്റെടുത്തിരിക്കുന്നത്. യാത്രക്കാരുടെ സൗകര്യങ്ങള്‍ മെച്ചമാക്കാന്‍ ഉപകരിക്കും കഴിഞ്ഞ ബജറ്റിലെ നിര്‍ദേശപ്രകാരമാണ് പഴയ ബസ് സ്റ്റാന്‍ഡിന്‍റെയും പെരുന്ന ബസ് സ്റ്റാന്‍ഡിന്‍റെയും സൗന്ദര്യവത്കരണവും പരിപാലനവും സ്വകാര്യവ്യക്തിയെ ഏല്‍പ്പിച്ചത്. ഇതു യാത്രക്കാര്‍ക്ക് ഏറെ ഉപകരിക്കും. - മാത്യൂസ് ജോര്‍ജ്വൈസ് ചെയര്‍മാന്‍, ചങ്ങനാശേരി നഗരസഭ

ഗര്‍ഭച്ഛിദ്രം നിരുത്സാഹപ്പെടുത്തണം: മാര്‍ തോമസ് തറയില്‍

ചങ്ങനാശേരി: ഗര്‍ഭസ്ഥ ശിശുവിന്‍റെ ജീവിക്കാനുള്ള അവകാശത്തെ ധ്വംസിക്കുന്ന ഗര്‍ഭച്ഛിദ്രം നിരുത്സാഹപ്പെടുത്തണമെന്ന് ആര്‍ച്ച്ബിഷപ് മാര്‍ തോമസ് തറയില്‍. ജീവന്‍ ജ്യോതിസ് പ്രോലൈഫ് സെല്ലിന്‍റെ രജതജൂബിലി ദീപം തെളിച്ചു പ്രസംഗിക്കുകയായിരുന്നു ആര്‍ച്ച്ബിഷപ്. കുടുംബങ്ങളില്‍ മക്കളുടെ എണ്ണം കുറയുന്നത് സാമൂഹ്യവിപത്തായി നാം കാണേണ്ടിയിരിക്കുന്നു. കൂടുതല്‍ മക്കള്‍ ജനിക്കുവാന്‍ ദമ്പതികളെ പ്രോത്സാഹിപ്പിക്കേണ്ടത് ഈ കാലഘട്ടത്തിന്‍റെ ആവശ്യമാണെന്നും ആര്‍ച്ച്ബിഷപ് കൂട്ടിച്ചേര്‍ത്തു. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ആമുഖസന്ദേശം നല്‍കി. ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാമക്കാല, യുഗേഷ് പുളിക്കന്‍, ഏബ്രഹാം പുത്തന്‍കളം എന്നിവര്‍ ക്ലാസുകള്‍ നയിച്ചു. സമാപന സമ്മേളനത്തില്‍ ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാമക്കാല, ഡയറക്ടര്‍ ഫാ. ജോസഫ് പാറയ്ക്കല്‍, അനിമേറ്റര്‍ സിസ്റ്റർ ജിന്‍സ് മേരി, അസിസ്റ്റന്‍റ് ഡയറക്ടര്‍ ഫാ. ജോണിക്കുട്ടി തറക്കുന്നേല്‍, ഏബ്രഹാം പുത്തന്‍കളം, പ്രോലൈഫ് സെക്രട്ടറി റെജി ആഴാഞ്ചിറ, പിതൃവേദി പ്രസിഡന്‍റ് റോയ് കപ്പാങ്കല്‍, മാതൃവേദി പ്രസിഡന്‍റ് റോസമ്മ സോണി എന്നിവര്‍ പ്രസംഗിച്ചു. പരിശീലനത്തില്‍ റെജി ആഴാഞ്ചിറ, ബൈജു ആലഞ്ചേരി, ടോമിച്ചന്‍ കാവാലം, ലൂസിയമ്മ ചെന്നാട്ടുശേരി, ബെറ്റി, പ്രിന്‍സ് ചക്കാല എന്നിവര്‍ നേതൃത്വം വഹിച്ചു.

സഭയുടെ പാരമ്പര്യം പുതുതലമുറയിലേക്കു പകരണം: മാര്‍ തോമസ് തറയില്‍

ചങ്ങനാശേരി: സീറോമലബാര്‍ സഭാംഗങ്ങള്‍ സ്വത്തബോധമുള്ളവരും പൂര്‍വികര്‍ പകര്‍ന്നുതന്ന വിശ്വാസതീക്ഷ്ണതയിലും പാരമ്പര്യങ്ങളും അഭിമാനം കൊള്ളുന്നവരുമാകണമെന്ന് ആര്‍ച്ച്ബിഷപ് മാര്‍ തോമസ് തറയില്‍. സീറോമലബാര്‍ സമുദായിക ശക്തീകരണ വര്‍ഷത്തിന്‍റെ ഭാഗമായി ചങ്ങനാശേരി അതിരൂപത എസ്ബി ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ ടീച്ചിംഗ് ടീം അംഗങ്ങള്‍ക്കായി സംഘടിപ്പിച്ച പരിശീലന പരിപാടിയില്‍ മുഖ്യസന്ദേശം നല്‍കുകയായിരുന്നു ആര്‍ച്ച്ബിഷപ്. പുതുതലമുറയ്ക്ക് സഭയുടെയും സമുദായത്തിന്‍റെയും ചരിത്രവും പാരന്പര്യങ്ങളും പകര്‍ന്നുനല്‍കണമെന്നും മാര്‍ തോമസ് തറയില്‍ കൂട്ടിച്ചേര്‍ത്തു. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം നിര്‍വഹിച്ചു. സീറോമലബാര്‍ പബ്ലിക് അഫയേഴ്‌സ് കമ്മീഷന്‍ സെക്രട്ടറി ഫാ. ജയിംസ് കൊക്കാവയലില്‍, താമരശേരി രൂപതാ എയ്ഡര്‍ എഡ്യുകെയര്‍ ഡയറക്ടര്‍ ഫാ. മെല്‍ബിന്‍ വെള്ളയ്ക്കാക്കുടി, കാര്‍പ് പ്രമോട്ടര്‍ ബേബി വട്ടക്കര, റിട്ടയേർഡ് ഡെപ്യൂട്ടി തഹസില്‍ദാര്‍ ആന്‍റണി ആറില്‍ച്ചിറ എന്നിവര്‍ ക്ലാസുകള്‍ നയിച്ചു. സമുദായ ശക്തീകരണ അതിരൂപത കമ്മിറ്റി ഡയറക്ടര്‍ ഫാ. സാവിയോ മാനാട്ട്, കരിയര്‍ കോ-ഓര്‍ഡിനേറ്റര്‍ ഫാ. മാത്യു നടയ്ക്കല്‍, കണ്‍വീനര്‍ ബിജു സെബാസ്റ്റ്യന്‍ എന്നിവര്‍ പ്രസംഗിച്ചു.

വിശ്വാസീസമൂഹങ്ങളുടെ ഐക്യം മതേരത്വത്തെ ശക്തിപ്പെടുത്തും: ബിഷപ് ഡോ. മഠത്തിപ്പറമ്പില്‍

ചങ്ങനാശേരി: ഓരോ വിശ്വാസീ സമൂഹത്തിന്‍റെയും ഐക്യവും മൂല്യാധിഷ്ഠിത വളര്‍ച്ചയും ഒരു മതേതരസമൂഹത്തില്‍ രാജ്യത്തിന്‍റെ കെട്ടുറപ്പിനെ ശക്തിപ്പെടുത്തുമെന്ന് വിജയപുരം രൂപതാ സഹായ മെത്രാന്‍ ഡോ. ജസ്റ്റിന്‍ മഠത്തിപ്പറമ്പില്‍. രൂപതയുടെ ശതാബ്ദിക്കു മുന്നോടിയായി നടക്കുന്ന സിനഡാത്മക കോണ്‍ക്ലേവിന്‍റെ തിരുവല്ലാ മേഖലാതല കോണ്‍ക്ലേവ് ചങ്ങനാശേരി മേരി മൗണ്ട് റോമന്‍ കത്തോലിക്കാ പള്ളിയില്‍ ഉദ്ഘാടനം ചെയ്യുകയായിരുന്നു ബിഷപ്. രൂപതാ സിനഡല്‍ കമ്മീഷന്‍ സെക്രട്ടറി ഫാ. അജി ചെറുകാക്രാംചേരില്‍ അധ്യക്ഷനായിരുന്നു. രൂപതാ ശുശ്രൂഷാ സമിതി കോ-ഓര്‍ഡിനേറ്റര്‍ ഫാ. വര്‍ഗീസ് കൊട്ടയ്ക്കാട്ട്, ഫെറോനാ വികാരി ഫാ. സ്റ്റീഫന്‍ പുത്തന്‍പറമ്പില്‍, മേഖലാ സെക്രട്ടറി ഫാ. മാത്യു ഒഴത്തില്‍, ഫാ. തിയോഫിന്‍ തുരുത്തിക്കോണം, ഫാ. ഔസേഫ് പുത്തന്‍പറമ്പില്‍, ഫാ. ജോര്‍ജ് ലോബോ, ഫാ. സാബിന്‍ ചേപ്പില, മദര്‍ ദീപ്തി, സിസ്റ്റര്‍ മേബിള്‍, ഫ്രാന്‍സിസ് ബി. സാവിയോ, ജസ്റ്റിന്‍ ബ്രൂസ് തുടങ്ങിയവര്‍ പ്രസംഗിച്ചു. വിവിധ ശുശ്രൂഷാ സമിതികള്‍ ചര്‍ച്ച ചെയ്ത് അംഗീകരിച്ച റിപ്പോര്‍ട്ട് രൂപതാധ്യക്ഷനു കൈമാറുമെന്ന് മേഖലാ സെക്രട്ടറി ഫാ. മാത്യു ഒഴത്തില്‍ പറഞ്ഞു.

ദൈവദാസന്‍ മാര്‍ കാവുകാട്ടിന്‍റെ സുഗന്ധവ്യഞ്ജനങ്ങളാല്‍ നിര്‍മിച്ച ചിത്രം കബറിടത്തില്‍ സമര്‍പ്പിച്ച് കുടുംബക്കൂട്ടായ്മ

ചങ്ങനാശേരി: ദൈവദാസന്‍ മാര്‍ കാവുകാട്ടിന്‍റെ ചിത്രം സുഗന്ധവ്യഞ്ജനങ്ങളാല്‍ നിര്‍മിച്ച് കബറിടത്തില്‍ സമര്‍പ്പിച്ച് കുടുംബക്കൂട്ടായ്മ യൂണിറ്റ്. കുറവിലങ്ങാട് മേജര്‍ ആര്‍ക്കി എപ്പിസ്‌കോപ്പല്‍ മര്‍ത്ത്മറിയം അര്‍ക്കദിയാക്കോന്‍ തീര്‍ഥാടന ഇടവകയിലെ 27-ാം വാര്‍ഡിലെ ഒന്നാം കുടുംബക്കൂട്ടായ്മ യൂണിറ്റാണ് പുണ്യവഴി തേടി പുതിയ മാതൃക സ്വീകരിച്ചത്. കുടുംബക്കൂട്ടായ്മ യൂണിറ്റ് ദൈവദാസന്‍ മാര്‍ മാത്യു കാവുകാട്ടിന്‍റെ പേരിലുള്ളതാണ്. മാര്‍ മാത്യു കാവുകാട്ടിന്‍റെ ചരമവാര്‍ഷികത്തോടനുബന്ധിച്ച് അദ്ദേഹത്തിന്‍റെ കബറിടം സ്ഥിതി ചെയ്യുന്ന ചങ്ങനാശേരി മെത്രാപ്പോലീത്തന്‍ പള്ളിയോട് ചേര്‍ന്നുള്ള കബറിട പള്ളിയില്‍ കൂട്ടായ്മ അംഗങ്ങള്‍ എത്തിയാണ് സുഗന്ധവ്യഞ്ജനങ്ങളാല്‍ നിര്‍മിച്ച ചിത്രം സമര്‍പ്പിച്ചത്. മാര്‍ മാത്യു കാവുകാട്ട് വൈദികനായിരിക്കേ വിശുദ്ധ കുര്‍ബാനയര്‍പ്പിച്ചിരുന്ന പള്ളിയില്‍ അസിസ്റ്റന്‍റ് വികാരി ഫാ. തോമസ് താന്നിമലയുടെ കാര്‍മികത്വത്തില്‍ വിശുദ്ധ കുര്‍ബാനയര്‍പ്പണം നടത്തി. തുടര്‍ന്ന് മാര്‍ മാത്യു കാവുകാട്ട് മ്യൂസിയത്തിലേക്ക് ചിത്രം കൈമാറി. കുറവിലങ്ങാട് ഇടവക പള്ളിയില്‍നിന്ന് ആരംഭിച്ച തീര്‍ഥാടനം ആര്‍ച്ച്പ്രീസ്റ്റ് റവ.ഡോ. തോമസ് മേനാച്ചേരി ഫ്ളാഗ് ഓഫ് ചെയ്തു. അസിസ്റ്റന്‍റ് വികാരിമാരായ ഫാ. പോള്‍ കുന്നുംപുറത്ത്, ഫാ. തോമസ് താന്നിമലയില്‍, ഫാ. ജോസഫ് ചൂരയ്ക്കല്‍ എന്നിവരുടെ കാര്‍മികത്വത്തില്‍ പ്രത്യേക പ്രാര്‍ഥനകളോടെയാണ് ചങ്ങനാശേരി കത്തീഡ്രലിലേക്കുള്ള തീര്‍ഥാടനമാരംഭിച്ചത്. പള്ളിയോഗം സെക്രട്ടറി ബെന്നി കോച്ചേരി, കുടുംബക്കൂട്ടായ്മ ജനറല്‍ ലീഡര്‍ ബോബിച്ചന്‍ നിധീരി, സോണ്‍ ലീഡര്‍ സണ്ണി വെട്ടിക്കാട്ട്, യൂണിറ്റ് പ്രസിഡന്‍റ് പോള്‍സണ്‍ ചേലക്കാപ്പിള്ളില്‍, സെക്രട്ടറി സുമി റോയി ഓലിക്കാട്ടില്‍ തുടങ്ങിയവര്‍ പ്രസംഗിച്ചു. മാര്‍ മാത്യു കാവുകാട്ട് നാമകരണനടപടികളുടെ വൈസ് പോസ്റ്റുലേറ്റര്‍ ഫാ. ജോണ്‍ പ്ലാത്താനം ചിത്രം ഏറ്റുവാങ്ങി. സുഗന്ധവ്യഞ്ജനങ്ങള്‍കൊണ്ട് മാര്‍ കാവുകാട്ടിന്‍റെ ചിത്രം ചുക്ക്, മഞ്ഞള്‍, ഏലക്ക, ഗ്രാമ്പൂ, കുരുമുളക്, കറുവ എന്നിങ്ങനെ പത്തിനം സുഗന്ധവ്യഞ്ജനങ്ങള്‍ ഉപയോഗിച്ചാണ് ചിത്രം ഒരുക്കിയത്. ഒരു മാസത്തോളം നീണ്ട പരിശ്രമങ്ങളിലാണ് ചിത്രം ഒരുക്കിയതെന്ന് യൂണിറ്റ് ഭാരവാഹികളായ പോള്‍സണ്‍ ചേലയ്ക്കാപ്പള്ളിയും സുമി റോയിയും പറഞ്ഞു. ചിത്രകലയില്‍ ശ്രദ്ധേയനായ സണ്ണി ഇടത്തിനാലാണ് ചിത്രം ക്രമീകരിക്കാന്‍ മാര്‍ഗനിര്‍ദേശങ്ങള്‍ നല്‍കിയത്.

കത്തോലിക്ക കോണ്‍ഗ്രസ് അവകാശസംരക്ഷണ യാത്രയ്ക്ക് ചങ്ങനാശേരിയിൽ സ്വീകരണം നാളെ

ചങ്ങനാശേരി: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ "സമുദായ ശക്തീകരണം രാഷ്‌ട്രപുരോഗതിക്ക്, നീതി ഔദാര്യമല്ല അവകാശമാണ്’ എന്നീ മുദ്രാവാക്യങ്ങള്‍ ഉയര്‍ത്തി ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശ സംരക്ഷണ യാത്രയ്ക്ക് നാളെ ചങ്ങനാശേരിയില്‍ വരവേല്പ് നല്‍കും. വൈകുന്നേരം 4.30ന് പെരുന്നയില്‍നിന്ന് വാദ്യമേളങ്ങളുടെ അകമ്പടിയോടുകൂടി സ്വീകരിച്ച് സമ്മേളന വേദിയായ പെരുന്ന ബസ്‌സ്റ്റാന്‍ഡ് മൈതാനത്ത് ക്രമീകരിച്ചിരിക്കുന്ന സമ്മേളന നഗറിലേക്ക് ആനയിക്കും. തുടര്‍ന്നു നടക്കുന്ന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. അതിരുപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും. ജാഥാ ക്യാപ്റ്റന്‍ പ്രഫ. രാജീവ് കൊച്ചുപറമ്പില്‍ വിഷയാവതരണ പ്രസംഗം നടത്തും. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യസന്ദേശം നല്കും. അതിരൂപത ഡയറക്ടര്‍ ഫാ. സാവിയോ മാനാട്ട്, കത്തോലിക്കാ കോണ്‍ഗ്രസ് ഗ്ലോബല്‍ ഡയറക്ടര്‍ ഫാ. ഫിലിപ്പ് കവിയില്‍ തുടങ്ങിയവര്‍ പ്രസംഗിക്കും. സ്വീകരണത്തിന് വിപുലമായ കമ്മിറ്റി സ്വീകരണത്തിന്‍റെ വിജയത്തിനായി ഫൊറോന വികാരിമാരായ ഫാ. ജോസഫ് വാണിയപ്പുരയ്ക്കല്‍, ഫാ. സെബാസ്റ്റ്യന്‍ പുന്നശേരി, ഫാ. ജേക്കബ് ചീരംവേലില്‍, ഫാ. ജോബി കറുകപ്പറമ്പില്‍, ഫാ. വര്‍ഗീസ് കൈതപ്പറമ്പില്‍, അതിരൂപതാ ഭാരവാഹികളായ ബിനു ഡൊമിനിക്, ജോസ് വെങ്ങാന്തറ, രാജേഷ് ജോണ്‍, ടോമിച്ചന്‍ അയ്യരുകുളങ്ങര, സൈബി അക്കര, കെ.എസ്. ആന്‍റണി, ജേക്കബ് നിക്കോളാസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസിലിന്‍ കുരുവിള, സേവ്യര്‍ കൊണ്ടോടി, പി.സി. കുഞ്ഞപ്പന്‍, സിസി അമ്പാട്ട്, ബാബു വള്ളപ്പുര, ലിസി ജോസ്, ടോം കയ്യാലകം, പി.ജെ. സെബാസ്റ്റ്യന്‍, കുഞ്ഞുമോന്‍ തൂമ്പുങ്കല്‍, ലാലി ഇളപ്പുങ്കല്‍, കെ.ഡി. ചാക്കോ, ഇ.ജെ. തോമസ്, ഔസേപ്പച്ചന്‍ ചെറുകാട് തുടങ്ങിയവരുടെ നേതൃത്വത്തില്‍ വിവിധ കമ്മിറ്റികള്‍ പ്രവര്‍ത്തിച്ചുവരുന്നു. വിവിധ ഫൊറോനകളില്‍നിന്നു വാഹനങ്ങളിലെത്തുന്നവര്‍ക്ക് പെരുന്ന ബസ് സ്റ്റാന്‍ഡില്‍ ആളെ ഇറക്കി വാഹനങ്ങള്‍ കത്തീഡ്രല്‍ പള്ളി മൈതാനിയില്‍ പാര്‍ക്കു ചെയ്യാവുന്നതാണ്.

ജൂബിലി ലോഗോസ് ക്വിസ് -2025: ചങ്ങനാശേരി അതിരൂപത വിജയികളെ പ്രഖ്യാപിച്ചു

ചങ്ങനാശേരി: ജൂബിലി ലോഗോസ് ക്വിസ് - 2025ന്‍റെ അതിരൂപതാതല വിജയികളെ പ്രഖ്യാപിച്ചു. വിവിധ കാറ്റഗറികളിലെ വിജയികൾ. കാറ്റഗറി-എ  ഒന്നാംസ്ഥാനം: ജോസഫ് ജോൺ മേനാച്ചേരി, ലൂർദ് ഫൊറോന പള്ളി തിരുവനന്തപുരം, തിരുവനന്തപുരം ഫൊറോന. രണ്ടാംസ്ഥാനം: സേറ ആൻ ജൂവൽ സെന്‍റ് മേരിസ് പാറേൽ, ചങ്ങനാശേരി ഫൊറോന. മൂന്നാംസ്ഥാനം: തെരേസ ടോജോ ഉറുമ്പക്കൽ ക്രിസ്തുരാജ് പള്ളി, ഏറ്റുമാനൂർ, അതിരമ്പുഴ ഫൊറോന. കാറ്റഗറി-ബി  ഒന്നാംസ്ഥാനം: ജാൻവി ആൻ ജോസി മറ്റപ്പറമ്പിൽ, എസ്എച്ച് പള്ളി, ചെത്തിപ്പുഴ, ചങ്ങനാശേരി ഫൊറോന. രണ്ടാംസ്ഥാനം: ഏയ്ഞ്ചൽ മേരി തോമസ് ഷാരോൺ കുറ്റിക്കാട്ട് സെന്‍റ് മേരീസ് ആർക്കിഎപ്പിസ്കോപ്പൽ പള്ളി കുടമാളൂർ, കുടമാളൂർ ഫൊറോന. മൂന്നാംസ്ഥാനം: അലോണ നോജി കാട്ടാമ്പള്ളി സെന്‍റ് ജോൺ ദ ബാപ്റ്റിസ്റ്റ് പള്ളി നെടുംകുന്നം, നെടുംകുന്നം ഫൊറോന. സി-കാറ്റഗറി  ഒന്നാംസ്ഥാനം: ജോയൽ ജോമോൻ പതിനഞ്ചിൽ സെന്‍റ് തോമസ് കപ്പൂച്ചിൻ ആശ്രമം സൺഡേ സ്കൂൾ, കാവാലം സെന്‍റ് തെരേസാസ് ഇടവക, പുളിങ്കുന്ന് ഫൊറോന. രണ്ടാംസ്ഥാനം: വിൻസി റോസ് ക്രിസ്തുരാജ് പള്ളി രാജഗിരി, അമ്പൂരി ഫൊറോന. മൂന്നാംസ്ഥാനം: ജിഷ ജോർജ് കുരീക്കാട്ട്, സെന്‍റ് ജോസഫ് പള്ളി, ചമ്പക്കര, നെടുംകുന്നം ഫൊറോന. ഡി-കാറ്റഗറി  ഒന്നാംസ്ഥാനം: മജേഷ് ജോസഫ് തൈക്കാട് സെന്‍റ് ജോസഫ് ചർച്ച് വായ്പൂര്, നെടുംകുന്നം ഫൊറോന. രണ്ടാംസ്ഥാനം: സിസ്റ്റർ സിസി മരിയ പറപ്പള്ളി എസ്എബിഎസ്, ലൂർദ് മാതാ ചർച്ച് മാമ്മൂട്, കുറുമ്പനാടം ഫൊറോന. മൂന്നാംസ്ഥാനം: നിധി ആന്‍റൺ കൈലാത്ത്, സെന്‍റ് മേരീസ് കത്തീഡ്രൽ, ചങ്ങനാശേരി ഫൊറോന. ഇ-കാറ്റഗറി  ഒന്നാംസ്ഥാനം: തോമസുകുട്ടി ജോസ് വള്ളവന്ത്ര സെന്‍റ് ഗ്രിഗോറിയസ് ചർച്ച്, പുന്നപ്ര, ആലപ്പുഴ ഫൊറോന. രണ്ടാംസ്ഥാനം: ഫാ. മാർട്ടിൻ തൈപ്പറമ്പിൽ സെന്‍റ് തോമസ് ചെത്തിപ്പുഴ, ചങ്ങനാശേരി ഫൊറോന. മൂന്നാംസ്ഥാനം: അമ്മിണി ഇമ്മാനുവൽ കാരിക്കാട്ട്, ക്രിസ്തുരാജ് പള്ളി കുറ്റിക്കോണം, കൊല്ലം-ആയൂർ ഫൊറോന. എഫ്-കാറ്റഗറി  ഒന്നാംസ്ഥാനം: വത്സമ്മ സ്കറിയ അമ്പലത്തട്ടിൽ, സെന്‍റ് ജോർജ് പള്ളി തോട്ടയ്ക്കാട്, കുറുമ്പനാടം ഫൊറോന. രണ്ടാംസ്ഥാനം: സിസ്റ്റർ ആശാ എസ്ഡിഎസ് സെന്‍റ് ജോസഫ് പള്ളി പടഹാരം, ചമ്പക്കുളം ഫൊറോന. മൂന്നാംസ്ഥാനം: ലിസി തോമസ് കുരിശുംമൂട്ടിൽ സെന്‍റ് അൽഫോൻസ പള്ളി പൊങ്ങംമൂട്. മത്സരത്തിന്‍റെ മുഴുവൻ ഫലങ്ങളും ചങ്ങനാശേരി അതിരൂപത, ഇടവകതല മത്സര റിസൾട്ട് ഉൾപ്പെടെ www.logosquiz.org എന്ന സൈറ്റിൽ ലഭ്യമാണെന്ന് സംഘാടകർ അറിയിച്ചു. ചങ്ങനാശേരി അതിരൂപത കേന്ദ്രത്തിൽ നടന്ന വാർത്താ സമ്മേളനത്തിൽ വികാരി ജനറാൾ മോൺ. ആന്‍റണി എത്തയ്ക്കാട്ട്, ബൈബിൾ അപ്പൊസ്തലേറ്റ് അതിരൂപത ഡയറക്ടർ ഫാ. ജോർജ് മാന്തുരുത്തിൽ, പ്രഫ. ജോസഫ് ടിറ്റോ നേര്യംപറമ്പിൽ, സിസ്റ്റർ ചെറുപുഷ്പം എസ്എബിഎസ്, മറിയം ജോർജ് പൊട്ടംകളം, റ്റോമിച്ചൻ കൈതക്കളം, ജിക്കു ജോസഫ് ഉണ്ടിപ്പറമ്പിൽ, ജോഷി കൊല്ലാപുരം തുടങ്ങിയവർ പങ്കെടുത്തു. സെമിഫൈനൽ മത്സരം നവംബർ 9ന്  വിജയികൾക്കുള്ള സെമിഫൈനൽ മത്സരം നവംബർ 9ന് കൊല്ലം ജ്യോതി നികേതൻ വിമൻസ് കോളജിൽ ഉച്ചകഴിഞ്ഞ് 2 മുതൽ 3 വരെ നടക്കും. വിശദവിവരങ്ങൾക്ക് ഫോൺ: +91 96050 , +91 99613 69380.

സ്ത്രീകളെ ശക്തീകരിക്കാൻ കുടുംബശ്രീക്ക് കഴിഞ്ഞു: മന്ത്രി

തലയാഴം: സാമൂഹ്യ, സാംസ്കാരിക വളർച്ചയ്ക്കൊപ്പം സ്ത്രീകളെ സാമ്പത്തികമായും ശക്തീകരിക്കാൻ കുടുംബശ്രീക്ക് കഴിഞ്ഞതായി മന്ത്രി വി.എൻ. വാസവൻ. തലയാഴം പഞ്ചായത്ത് കുടുംബശീ സിഡിഎസ് വാർഷികം ഉല്ലല ജൂബിലി മെമ്മോറിയൽ ഹാളിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ബ്രാൻഡഡ് പ്രോഡക്ടുകൾ നാണിച്ചുപോകുന്ന തരത്തിലുള്ള നല്ല ഉത്പന്നങ്ങൾ ഉത്പാദിപ്പിച്ച് വിപണിയിലെത്തിക്കാൻ കുടുംബശ്രീക്ക് കഴിയുന്നത് ഏറെ അഭിമാനകരമാണെന്നും മന്ത്രി കൂട്ടിച്ചേർത്തു. സി.കെ. ആശ എംഎൽഎ അധ്യക്ഷത വഹിച്ചു. തലയാഴം പഞ്ചായത്ത് പ്രസിഡന്‍റ് രമേഷ് പി. ദാസ് മുഖ്യ പ്രഭാഷണം നടത്തി. മന്ത്രി വി.എൻ. വാസവൻ, സി.കെ. ആശ എംഎൽഎ, പഞ്ചായത്ത് പ്രസിഡന്‍റ് രമേഷ് പി. ദാസ്, ഡോ. സലില മുല്ലൻ തുടങ്ങിയവരെ ഉപഹാരം നൽകി ആദരിച്ചു. ജില്ലാ പഞ്ചായത്തംഗം ഹൈമി ബോബി, ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, ബ്ലോക്ക് പഞ്ചായത്ത് മുൻ പ്രസിഡന്‍റ് കെ.ക. രഞ്ജിത്ത്, പഞ്ചായത്ത് വൈസ് പ്രസിഡന്‍റ് ജെൽസി സോണി, പ്രതിപക്ഷ നേതാവ് എസ്. ദേവരാജൻ, പഞ്ചായത്ത് അംഗങ്ങളായ സുജാത മധു, കൊച്ചുറാണി ബേബി, ബി.എൽ. സെബാസ്റ്റ്യൻ, കെ. ബിനിമോൻ, പ്രീജു കെ. ശശി, റോസി ബാബു, എം.എസ്. ധന്യ, ഷീജ ബൈജു, പഞ്ചായത്ത് സെക്രട്ടറി വി.എൻ. റെജിമോൻ, സിഡിഎസ് ചെയർപേഴ്സൺ പി.ആർ. രജനി, മെമ്പർ സെക്രട്ടറി ജി. മഞ്ജു, സിഡിഎസ് മെമ്പർ മരിയ ജൂഡിത്ത് തുടങ്ങിയവർ പ്രസംഗിച്ചു.

കോരിക്കൽ പാലം വീതികൂട്ടി പുനർനിർമിക്കണം

തലയോലപ്പറമ്പ്: തലയോലപ്പറമ്പ് - കോരിക്കൽ- പഴമ്പെട്ടി റോഡിലെ കോരിക്കൽ പാലം വീതികൂട്ടി പുനർനിർമിക്കണമെന്ന ആവശ്യം ശക്തമായി. പാലത്തിന്‍റെ ഒരു ഭാഗത്തെ കൈവരി തകർന്നത് അപകടഭീതി പരത്തുകയാണ്. ഏതാനും വർഷം മുമ്പാണ് പാലത്തിന്‍റെ കൈവരി തകർന്നത്. കുറുന്തറപുഴയ്ക്കു കുറുകെയുള്ള പാലത്തിന് അന്പതു വർഷത്തിലധികം പഴക്കമുണ്ട്. വാഹനത്തിരക്കേറിയ വീതികുറഞ്ഞ റോഡിലെ കൈവരിയില്ലാത്ത പാലത്തിലൂടെ കടന്നുപോകുന്ന വാഹനങ്ങൾ രാത്രികാലങ്ങളിൽ ആഴമേറിയ തോട്ടിലേക്കു പതിക്കാനുള്ള സാധ്യത ഏറെയാണെന്ന് നാട്ടുകാർ പറയുന്നു. 2018ലെ പ്രളയത്തിലാണ് പാലത്തിന്‍റെ കൈവരികൾ തകർന്നത്. തലയോലപ്പറമ്പിൽനിന്ന് എഴുമാ‌ന്തുരുത്ത്, വൈക്കം എന്നിവടങ്ങളിലേക്കുള്ള എളുപ്പമാർഗമായതിനാൽ പാലത്തിന്‍റെ കൈവരികളും പുനർനിർമിക്കണമെന്ന ആവശ്യം പ്രദേശവാസികൾ ഏറെക്കാലമായി ഉയർത്തുന്നു. വിദ്യാർഥികളും വയോജനങ്ങളും പാലത്തിന്‍റെ വശംചേർന്നു നടന്നുപോകുന്നത് ഭയത്തോടെയാണ്. അപകടത്തിനു കാക്കാതെ കൈവരികൾ നന്നാക്കണം അരനൂറ്റാണ്ടിലധികം പഴക്കമുള്ള പാലത്തിന് ബലക്ഷയം സംഭവിച്ചിട്ടുണ്ടോയെന്നകാര്യം പരിശോധിക്കണം. ജനങ്ങൾ നിരന്തരം ഇക്കാര്യം പഞ്ചായത്തിനെ ബോധ്യപ്പെടുത്തിയിട്ടുള്ളതാണ്. -സുരേഷ് പെരുമ്പാട്ടത്തിൽ,കോരിക്കൽ പാലം പുനർനിർമിക്കണം റോഡ് ബിഎം ആൻഡ് ബിസി നിലവാരത്തിൽ നിർമിച്ചത് ഗുണകരമായെങ്കിലും കാലപ്പഴക്കത്താൽ ജീർണാവസ്ഥയിലായ കോരിക്കൽ പാലം പുനർനിർമിക്കാൻ നടപടിയുണ്ടായില്ല. കൃഷിയുമായി ബന്ധപ്പെട്ട് പാടശേഖരങ്ങളിലേക്കു വരുന്ന വാഹനങ്ങളും സ്‌കൂൾ ബസുകളും സ്വകാര്യബസും കെഎസ്ആർടിസിയുടെ ഗ്രാമവണ്ടിയുമടക്കം നൂറുകണക്കിനു വാഹനങ്ങളാണ് ദിനംപ്രതി പാലത്തിലൂടെ പോകുന്നത്. അറ്റകുറ്റപ്പണി നടത്താതെ കാലപ്പഴക്കമേറിയ പാലം വീതികൂട്ടി പുനർനിർമിക്കാൻ സർക്കാർ നടപടി സ്വീകരിക്കണം. - ശശിധരൻ വാളവേലിപൊതുപ്രവർത്തകൻ, തലയോലപ്പറമ്പ് വീണ്ടും ടെൻഡർ ചെയ്യും ‌പൊതുമരാമത്തു വകുപ്പ് ബ്രിഡ്ജസ് വിഭാഗത്തിന്‍റെ കീഴിൽ വിവിധ പാലങ്ങൾക്കായി പത്തു ലക്ഷം രൂപ അനുവദിച്ചതിൽ കോരിക്കൽ പാലത്തിന്‍റെ കൈവരി നിർമാണവും ഉൾപ്പെടുത്തിയിട്ടുണ്ട്. രണ്ടു തവണ ടെൻഡർ ചെയ്തെങ്കിലും കരാറുകാർ പ്രവൃത്തി ഏറ്റെടുത്തില്ല. വീണ്ടും ടെൻഡർ നടത്താൻ തീരുമാനിച്ചിട്ടുണ്ട്. - എസ്.എ. കിരൺലാൽ, അസി. എൻജിന‌ിയർ, പൊതുമരാമത്ത് വകുപ്പ് ബ്രിഡ്‌ജസ് വിഭാഗം

അഞ്ചുലക്ഷം പാർപ്പിടമൊരുക്കിയ നേട്ടം കേരളത്തി‌നു മാത്രം: മന്ത്രി വാസവൻ

ഉദയനാപുരം: നിർധന കുടുംബങ്ങൾക്ക് 5,22,000 വീടുകൾ ലൈഫ് പദ്ധതിയിൽ പൂർത്തിയാക്കിയ നേട്ടം കേരളത്തിനു മാത്രം സ്വന്തമെന്ന് മന്ത്രി വി.എൻ. വാസവൻ. ഉദയനാപുരം പഞ്ചായത്തിലെ വികസനസദസും ലൈഫ് ഭവന പദ്ധതിയിലൂടെ നിർമാണം പൂർത്തീകരിച്ച വീടുകളുടെ താക്കോൽ വിതരണോദ്ഘാടനവും നിർവഹിച്ചു പ്രസംഗിക്കുകയായിരുന്നു മന്ത്രി. വൈക്കം മുഹമ്മദ് ബഷീർ സ്മാരക ഹാളിൽ നടന്ന യോഗത്തിൽ സി.കെ. ആശ എംഎൽഎ അധ്യക്ഷത വഹിച്ചു. സംസ്ഥാന സർക്കാരിന്‍റെ വികസനനേട്ടങ്ങൾ വികസനസദസ് റിസോഴ്സ് പേഴ്സൺ സുമേഷ് സുകുമാരൻ അവതരിപ്പിച്ചു. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, പഞ്ചായത്ത് പ്രസിഡന്‍റ് പി.കെ. ആനന്ദവല്ലി, വൈസ് പ്രസിഡന്‍റ് സി.പി. അനൂപ്, ജില്ലാ പഞ്ചായത്തംഗം പി.എസ്. പുഷ്പമണി, ബ്ലോക്ക് പഞ്ചായത്തംഗം ഒ.എം. ഉദയപ്പൻ എന്നിവർ പങ്കെടുത്തു.

കടുത്തുരുത്തിയില്‍ സമഗ്ര കൂണ്‍ഗ്രാമ പ്രഖ്യാപനവും കിസാന്‍മേളയും ഇന്ന്

കടുത്തുരുത്തി: സമഗ്ര കൂണ്‍ഗ്രാമ വികസനപദ്ധതി പൂര്‍ത്തീകരണവും സംസ്ഥാനത്തെ പ്രഥമ പ്രഖ്യാപനവും ഭാരതീയ പ്രകൃതി കൃഷിപദ്ധതി കിസാന്‍മേളയും ഇന്നു കടുത്തുരുത്തിയില്‍ മന്ത്രി പി. പ്രസാദ് നിര്‍വഹിക്കും. കടുത്തുരുത്തി മിനി സിവില്‍ സ്റ്റേഷന്‍ അങ്കണത്തില്‍ 3.30ന് നടക്കുന്ന യോഗത്തില്‍ മോന്‍സ് ജോസഫ് എംഎല്‍എ അധ്യക്ഷത വഹിക്കും. പരിപാടിയോടനുബന്ധിച്ചു കര്‍ഷകരുടെ ഉത്പന്നങ്ങളും മൂല്യവര്‍ധിത ഉത്പന്നങ്ങളും പ്രോത്സാഹിപ്പിക്കുന്നതിന്‍റെ ഭാഗമായി പത്തു മുതല്‍ ഏഴു വരെ കാര്‍ഷിക പ്രദര്‍ശന മേളയും ഉണ്ടായിരിക്കും. 2024-25 വര്‍ഷത്തെ സംസ്ഥാനത്തെ മികച്ച കൂണ്‍കര്‍ഷകനായി തെരഞ്ഞെടുക്കപ്പെട്ട രാഹുല്‍ ഗോവിന്ദ് നയിക്കുന്ന ശാസ്ത്രീയ കൂണ്‍കൃഷിയും സംരംഭകത്വവും എന്ന വിഷയത്തില്‍ 11 മുതല്‍ സെമിനാറും നടക്കും. നിരവധി കര്‍ഷകരെ കൂണ്‍ കൃഷിയിലേക്ക് ആകര്‍ഷിക്കാനും മൂല്യാധിഷ്ഠിത ഉത്പന്നങ്ങളിലൂടെ വരുമാനമാര്‍ഗം കണ്ടെത്തുന്നതിനും പദ്ധതി സഹായിച്ചു. കിസാന്‍ മേളയുടെ ഉദ്ഘാടനം കെ.ഫ്രാന്‍സിസ് ജോര്‍ജ് എംപിയും ആദ്യവില്‍പന സി.കെ. ആശ എംഎല്‍എയും നിര്‍വഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ മുഖ്യപ്രഭാഷണം നടത്തും. മിഷന്‍ ഡയറക്ടര്‍ സജി ജോണ്‍ റിപ്പോര്‍ട്ട് അവതരിപ്പിക്കും.

അയർക്കുന്നത്തെ മോഷണം: അന്വേഷണം ഊർജിതം

അയര്‍ക്കുന്നം: വീടിനുള്ളിലെ അലമാര തകര്‍ത്ത് 12 പവന്‍ സ്വര്‍ണവും 28,000 രൂപയും മോഷ്ടിച്ച സംഭവത്തില്‍ പോലീസ് അന്വേഷണം ഊര്‍ജിതമാക്കി. വിവിധ ഭാഗങ്ങളിലെ സിസിടിവികള്‍ കേന്ദ്രീകരിച്ചാണ് അന്വേഷണം പുരോഗമിക്കുന്നത്. കഴിഞ്ഞ ഞായറാഴ്ചയായിരുന്നു സംഭവം. അയര്‍ക്കുന്നം കൊങ്ങാണ്ടൂര്‍ കല്ലിട്ടനട ഭാഗത്തു താമസിക്കുന്ന പോളയ്ക്കല്‍ ബെന്നി ചാക്കോയുടെ വീട്ടിലായിരുന്നു മോഷണം. പാലായിലെ സ്വകാര്യ ആശുപത്രിയില്‍ ജോലിചെയ്യുന്ന മകള്‍ അനീറ്റ വീട്ടിലെത്തിയപ്പോഴാണ് മോഷണ വിവരമറിഞ്ഞത്. തുടര്‍ന്ന് അയര്‍ക്കുന്നം പോലീസില്‍ പരാതി നല്‍കി. എസ്എച്ച്ഒ അനൂപ് ജോസിന്‍റെ നേതൃത്വത്തിലുള്ള പോലീസ് സംഘമാണ് അന്വേഷണം നടത്തുന്നത്.

സ്മാർട്ട്‌ ഫർണിച്ചറുകളുടെ വിതരണം

ഉല്ലല: പള്ളിയാട് ശ്രീനാരായണ യുപി സ്കൂളിൽ വൈക്കം ബ്ലോക്ക് പഞ്ചായത്തംഗം കെ.കെ. രഞ്ജിത്തിന്‍റെ വികസനഫണ്ട് വിനിയോഗിച്ച് സ്മാർട്ട് ക്ലാസ്റൂമുകളിലേക്കു വാങ്ങിയ സ്മാർട്ട്‌ ഫർണിച്ചറുകളുടെ വിതരണോദ്‌ഘാടനം നടത്തി. സ്കൂൾ മാനേജർ ടി.പി. സുഖലാലിന്‍റെ അധ്യക്ഷതയിൽ നടന്ന യോഗത്തിൽ പുതിയ ഫർണിച്ചറുകൾ കുട്ടികൾക്കു കൈമാറി കെ.കെ. രഞ്ജിത്ത് ഉദ്ഘാടനം നിർവഹിച്ചു. അഞ്ചു ലക്ഷം രൂപയുടെ ഫർണിച്ചറാണ് നൽകിയത്. ഹെഡ്മാസ്റ്റർ പി. പ്രദീപ്, പഞ്ചായത്തംഗങ്ങളായ ടി. മധു, കെ. ബിനിമോൻ, എസ്. ദേവരാജൻ, പിടിഎ വൈസ് പ്രസിഡന്‍റ് എം.എം. സാജൻ, എസ്എൻഡിപി ശാഖായോഗം സെക്രട്ടറി എ.ജി.ബിജു, വൈസ് പ്രസിഡന്‍റ് എൻ.എസ്. നിജു, എംപി‌ടിഎ പ്രസിഡന്‍റ് ഷീജാ വിക്രമൻ, സ്റ്റാഫ്‌ സെക്രട്ടറി ടി.ടി. ബൈജു എന്നിവർ പ്രസംഗിച്ചു.

ജില്ലാ സമ്മേളനം

കോട്ടയം: അസോസിയേഷന്‍ ഓഫ് ഓട്ടോമൊബൈല്‍ വര്‍ക്ക്‌ഷോപ്പ് കേരളയുടെ 36-ാമത് ജില്ലാ സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്തു. ജില്ലാ പ്രസിഡന്‍റ് എ.ആര്‍. രാജന്‍ അധ്യക്ഷത വഹിച്ചു. സംഘടനയില്‍ ഒരംഗം മരണപ്പെട്ടാല്‍ 10 ദിവസത്തിനുള്ളില്‍ 10 ലക്ഷം രൂപ നല്കുന്ന പദ്ധതി നിലവില്‍ പ്രാബല്യത്തിലായി. സംഘടനയുടെ സ്ഥാപന നേതാക്കളായ ടോമി തോമസ്, എ.ആര്‍. രാജന്‍, ടി.കെ. പൊന്നപ്പന്‍, എ.പി. ജയരാജന്‍ എന്നിവരെ ആദരിച്ചു. ജില്ലാ സെക്രട്ടറി കെ.പി.എന്‍. സുരേഷ് ബാബു, സംസ്ഥാന പ്രസിഡന്‍റ് കെ.ജി. ഗോപകുമാര്‍, സംസ്ഥാന ജനറല്‍ സെക്രട്ടറി നസീര്‍ കള്ളിക്കാട്, ട്രെയിനിംഗ് ബോര്‍ഡ് ചെയര്‍മാന്‍ മുഹമ്മദ് ഷാ, ജില്ലാ ട്രഷാര്‍ പി.ജി. ഗിരീഷ്, ജില്ലാ വൈസ് പ്രസിഡന്‍റ് ഷിഫാസ് എം. ഇസ്മയില്‍, ജില്ലാ ജോയിന്‍റ് സെക്രട്ടറി കെ.എന്‍. സതീശന്‍ തുടങ്ങിയവര്‍ പ്രസംഗിച്ചു.

ചാച്ചാജി ഗോള്‍ഡ് മെഡല്‍ പെയിന്‍റിംഗ് മത്സരം

കോട്ടയം: പ്രീ-പ്രൈമറി കുട്ടികള്‍ മുതല്‍ പ്ലസ്ടു വരെയുള്ള കുട്ടികള്‍ വരകളും വര്‍ണങ്ങളുമായി ദീപാവലി ദിനത്തില്‍ ഒരുമിച്ചു കൂടി. ജവഹര്‍ ബാല്‍ മഞ്ച് ജില്ലാ കമ്മിറ്റി സംഘടിപ്പിച്ച ചാച്ചാജി ഗോള്‍ഡ് മെഡല്‍ പെയിന്‍റിംഗ് മത്സരത്തില്‍ നിരവധി കുട്ടികള്‍ പങ്കെടുത്തു. എംഡി സെമിനാരി സ്‌കൂളില്‍ ജില്ലാ ചെയര്‍മാന്‍ രഞ്ജു തോമസിന്‍റെ അധ്യക്ഷതയില്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. കെപിസിസി ജനറല്‍ സെക്രട്ടറി ജോഷി ഫിലിപ്പ്, സംസ്ഥാന കോ-ഓര്‍ഡിനേറ്റര്‍ സാബുമാത്യു, പ്രോഗ്രാം കോ-ഓര്‍ഡിനേറ്ററും നഗരസഭ കൗണ്‍സിലറുമായ ജയമോള്‍ ജോസഫ്, ജില്ലാ കോ-ഓര്‍ഡിനേറ്റര്‍മാരായ എസ്. വിനോദ്കുമാര്‍, വിനീത ഹരിലാല്‍, എ.ആര്‍. രാജേഷ് കുമാര്‍, ബിജി സണ്ണി, എം.എം. ഷീബാമോള്‍, ഡാനി ജോസ്, ഡെന്നി തോമസ്, ജില്ലാ പ്രസിഡന്‍റ് കെസിയ മജു, വിഷ്ണു പ്രസാദ്, പ്രിന്‍സ് പാമ്പാടി, ജോളിയമ്മ ജോസഫ്, എ.വി. അജയ്, ബിഫാസ് വടക്കേല്‍, വിനീഷ് വിജയന്‍, ക്രിസ്റ്റീന്‍ സ്‌കറിയ പ്രസംഗിച്ചു.

മീനടം പഞ്ചായത്ത് പ്രവാസി ഗ്രാമസഭ

മീനടം: മീനടം പഞ്ചായത്തിലെ 10-ാം വാര്‍ഡില്‍ പ്രവാസി ഗ്രാമസഭ ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് മോനിച്ചന്‍ കിഴക്കേടം അധ്യക്ഷത വഹിച്ചു. വാര്‍ഡു മെംബര്‍ റെജി ചാക്കോയാണ് വ്യത്യസ്തമായ രീതിയില്‍ ഗ്രാമസഭ സംഘടിപ്പിച്ചത്. ഗവണ്‍മെന്‍റ് ്ഡെപ്യൂട്ടി സെക്രട്ടറി പദവിയില്‍നിന്നു വിരമിച്ച ഗ്രാമസഭാംഗം ജോസഫ് സ്‌കറിയ, വിവിധ പരീക്ഷകളില്‍ ഉന്നത വിജയം നേടിയ ജി. ഗംഗ, ഗായത്രി സന്തോഷ്, അലീന അന്ന അശോക്, അന്ന സൂസന്‍ സജി, അനീറ്റ അന്ന ചെറിയാന്‍ എന്നിവരെ മെമന്‍റോ നല്‍കി ആദരിച്ചു. ഗ്രാമസഭയില്‍ 220 പേരും ഓണ്‍ലൈനായി നിരവധി പ്രവാസികളും പങ്കെടുത്തു. നേരില്‍ പങ്കെടുക്കാനെത്തിയവര്‍ക്ക് ഉച്ചഭക്ഷണവും നല്‍കിയ ഗ്രാമസഭ നാടിനു പുത്തനനുഭവമായി. പാമ്പാടി ബ്ലോക്ക് പഞ്ചായത്തംഗം സിന്ധു വിശ്വന്‍, പഞ്ചായത്തംഗങ്ങളായ റെജി ചാക്കോ, ലീന്‍ മാത്യു, രമണി ശശിധരന്‍, ലാലി വര്‍ഗീസ്, സൂസന്‍ ചാണ്ടി, ഗിരീന്ദ്രന്‍, ബെന്നി അടിച്ചിറ, ടോം സെബാസ്റ്റ്യന്‍, റെജി സ്‌കറിയ തുടങ്ങിയവര്‍ പ്രസംഗിച്ചു.

ശങ്കേഴ്‌സ് മത്സര അവാര്‍ഡ് വിതരണം

കോട്ടയം: 28-ാമത് ദര്‍ശന ശങ്കേഴ്‌സ് അഖില കേരള കാര്‍ട്ടൂണ്‍ പെയിന്‍റിംഗ് മത്സരങ്ങളുടെ അവാര്‍ഡുകള്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ വിതരണം ചെയ്തു. പി.ആര്‍. ശ്രീഹരി (കണ്ണൂര്‍) ശങ്കേഴ്‌സ് അവാര്‍ഡ് ഏറ്റുവാങ്ങി. എട്ടു വിഭാഗങ്ങളിലായി നടന്ന മത്സരത്തില്‍ 150 കുട്ടികള്‍ സമ്മാനങ്ങള്‍ സ്വന്തമാക്കി. ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍ സിഎംഐ അധ്യക്ഷത വഹിച്ച ചടങ്ങില്‍ തേക്കിന്‍കാട് ജോസഫ്, രാജു നായര്‍, പഴയിടം മുരളി, പി.കെ. ആനന്ദക്കുട്ടന്‍, ആര്‍ട്ടിസ്റ്റ് അശോകന്‍, ടി.എസ്. ശങ്കര്‍ തുടങ്ങിയവര്‍ പ്രസംഗിച്ചു. രണ്ടായിരത്തില്‍പ്പരം കുട്ടികള്‍ മത്സരത്തില്‍ പങ്കെടുത്തു

ധന്യന്‍ മാര്‍ മാത്യു മാക്കീലിന്‍റെ കബറിടത്തിലേക്ക് തീര്‍ഥാടന പദയാത്ര നടത്തി

കോട്ടയം: കോട്ടയം അതിരൂപത ചെറുപുഷ്പ മിഷന്‍ലീഗിന്‍റെ ആഭിമുഖ്യത്തില്‍ അതിരൂപതയിലെ വിവിധ മേഖലകളില്‍നിന്നായി ധന്യന്‍ മാര്‍ മാത്യു മാക്കീല്‍ തീര്‍ഥാടന പദയാത്ര നടത്തി. മള്ളൂശേരി സെന്‍റ് തോമസ് ക്‌നാനായ പള്ളിയില്‍നിന്നാരംഭിച്ച യാത്ര കോട്ടയം അതിരൂപത വികാരി ജനറാള്‍ ഫാ. തോമസ് ആനിമൂട്ടില്‍ സന്ദേശം നല്‍കി ഫ്ലാഗ് ഓഫ് ചെയ്തു. മള്ളൂശേരി പള്ളി വികാരി ഫാ. ബിജി പല്ലോന്നില്‍ ആമുഖസന്ദേശം നല്‍കി. കബറിടം സ്ഥിതിചെയ്യുന്ന ഇടയ്ക്കാട്ട് സെന്‍റ് ജോര്‍ജ് പള്ളിയിലെത്തിയ തീര്‍ഥാടകരെ ഫൊറോന വികാരി ഫാ. സൈമണ്‍ പുല്ലാട്ടിന്‍റെ നേതൃത്വത്തില്‍ സ്വീകരിച്ചു. ഇടയ്ക്കാട്ട് സെന്‍റ് ജോര്‍ജ് പള്ളിയിലെ ആശീര്‍വാദ പ്രാര്‍ഥനയ്ക്ക് കോട്ടയം അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരില്‍ കാര്‍മികത്വം വഹിച്ചു. തുടര്‍ന്നു പിതൃസമ്മാനം നറുക്കെടുപ്പ് സമ്മാന പദ്ധതിയുടെ ഉദ്ഘാടനം രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് നിര്‍വഹിച്ചു. ചെറുപുഷ്പ മിഷന്‍ ലീഗ് അതിരൂപത ഡയറക്‌ടര്‍ ഫാ. ജെഫിന്‍ ഒഴുങ്ങാലില്‍ നന്ദിയര്‍പ്പിച്ചു. വിവിധ ദേവാലയങ്ങളില്‍നിന്നായി ആയിരത്തില്‍പ്പരം ചെറുപുഷ്പ മിഷന്‍ ലീഗ് അംഗങ്ങള്‍ പങ്കെടുത്തു.

അധ്യാപക ഡോക്ടർമാരുടെ ഒപി ബഹിഷ്കരണം ; ഒപികളിലെത്തിയ രോഗികളുടെ എണ്ണത്തിൽ കുറവ്

ഗാന്ധിനഗർ: കോട്ടയം മെഡിക്കൽ കോളജിൽ അധ്യാപക ഡോക്ടർമാർ ഇന്നലെ ഒപി ബഹിഷകരിച്ചു. സർക്കാർ മെഡിക്കൽ കോളജുകളിലെ അടിസ്ഥാന സൗകര്യങ്ങളുടെയും അധ്യാപക തസ്തികകളുടെയും അപര്യാപ്തതകൾ പരിഹരിക്കുക, ശമ്പള പരിഷ്കരണത്തിലെ അപാകതകൾ പരിഹരിക്കുക തുടങ്ങിയ വിവിധ ആവശ്യങ്ങൾ ഉന്നയിച്ചാണ് ഒപി ബഹിഷ്കരണം. കെജിഎംസിടിഎയുടെ നേതൃത്വത്തിലാണ് ബഹിഷ്കരണം നടത്തിയത്. ദീപാവലിയും അധ്യാപക ഡോക്ടർമാരുടെ ഒപി ബഹിഷ്കരണത്തെ തുടർന്നും ഇന്നലെ കോട്ടയം മെഡിക്കൽ കോളജ് ഒപിയിലെത്തിയ രോഗികളുടെ എണ്ണം വളരെ കുറവായിരുന്നു. ഉച്ചയ്ക്ക് 12 ആയപ്പോഴേക്കും ഒപി ടിക്കറ്റ് എടുക്കുന്ന കൗണ്ടർ ആളൊഴിഞ്ഞ നിലയിലായിരുന്നു. സാധാരണ ഗതിയിൽ ഈ സമയത്തൊക്കെ ഒപി കൗണ്ടറിൽ വൻ തിരക്കായിരിക്കും. റുമറ്റോളജി വിഭാഗം ഒപി ഇന്നലെ പ്രവർത്തിച്ചില്ല. എന്നാൽ റുമറ്റോളജി ഒപി ഉണ്ടെന്ന് കരുതി നിരവധി രോഗികളെത്തിയിരുന്നു. ഇവർ പിന്നീട് തിരിച്ചു പോകുകയായിരുന്നു. നേത്രവിഭാഗം, ജനറൽ മെഡിസിൻ തുടങ്ങിയ വിഭാഗങ്ങളിൽ രോഗികളുടെ തിരക്കില്ലായിരുന്നു. അധ്യാപക ഡോക്ടർമാർ മാത്രമാണ് ബഹിഷ്ക്കരണം നടത്തിയത്. എന്നാൽ ജൂണിയർ ഡോക്ടർമാരുടെ നേതൃത്വത്തിൽ ഒപി യുടെ പ്രവർത്തനം നടന്നു. അതേസമയം വാർഡുകളിൽ അധ്യാപക ഡോക്ടർമാരുടെ സേവനം ലഭിച്ചു. മെഡിക്കൽ കോളജുകളിൽ വിദ്യാർഥി അധ്യാപക അനുപാതവും രോഗി ബാഹുല്യത്തിന് ആനുപാതികമായ ഡോക്ടർമാരുടെ എണ്ണവും തമ്മിൽ വളരെ അന്തരം ഉണ്ടെന്ന് കെജിഎംസിടിഎ ചൂണ്ടിക്കാട്ടുന്നു.

തേനീച്ചയുടെ കുത്തേറ്റു വിനോദസഞ്ചാരികൾക്ക് പരിക്ക്

ചെറുതോണി: പാണ്ടിപ്പാറ ടൂറിസ്റ്റ് പാറയിൽ വിനോദസഞ്ചാരികൾ ഉൾപ്പെടെ 13 പേർക്ക് തേനീച്ചയുടെ കുത്തേറ്റു. ഇന്നലെ ഉച്ചയോടെയാണ് സംഭവം. പാണ്ടിപ്പാറ ടൂറിസ്റ്റ് പാറയിലെത്തിയ എറണാകുളം സ്വദേശികൾക്കാണ് ആദ്യം കുത്തേറ്റത്. പാറയിൽ ഭക്ഷണം കഴിച്ചുകൊണ്ടിരുന്ന സഞ്ചാരികൾ തേനീച്ചയുടെ കുത്തേറ്റ് ഓടുന്നതുകണ്ട് രക്ഷിക്കാനെത്തിയ നാട്ടുകാരെയും ഈച്ചകൾ ഓടിച്ചിട്ട് കുത്തി. സമീപ പ്രദേശത്ത വീടുകളിലുണ്ടായിരുന്നവർക്കും തേനീച്ചയുടെ ആക്രമണമുണ്ടായി. എറണാകുളം സ്വദേശികളായ ഹംബൽ (20), സ്റ്റെഫി ജോസ് (28), ബിൽദാർ (20 ), നബീൽ (20), അഖിൽ (20), മുബാരീസ് (21) എന്നിവർക്കും സമീപവാസികളായ ഓടമ്പള്ളിൽ സൗമ്യ (43), സാബു ഇഞ്ചയിൽ (48), സാബുവിന്‍റെ ഭാര്യ ലിറ്റിൽ (45), ഇവരുടെ മക്കളായ അമല (11 ), ആഗ്‌നസ് (7) എന്നിവർക്കും രക്ഷിക്കാനെത്തിയ ചാക്കോ (56), പ്രതീഷ് ചാമക്കാല എന്നിവർക്കുമാണ് തേനീച്ച യുടെ കുത്തേറ്റത്. ഇവരെ ആംബുലൻസിൽ ഇടുക്കി മെഡിക്കൽ കോളജ് ആശുപത്രിയിൽ എത്തിച്ച് ചികിത്സ നൽകി. ഇവരിൽ ആഗ്‌നസ്, അമല എന്നിവരൊഴികെ മറ്റുള്ളവരെ പ്രാഥമിക ചികിത്സ നൽകി വിട്ടയച്ചു. വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. പരുന്ത് കൂടിളക്കിയതിനെത്തുടർന്നാവണം ഈച്ചകൾ ഇളകിയതെന്നു വനംവകുപ്പ് ഉദ്യോഗസ്ഥർ പറഞ്ഞു.

മണ്ഡലകാലത്തിന് ഒരു മാസം ബാക്കി; ഒരുക്കങ്ങള്‍ മന്ദഗതിയില്‍

കോട്ടയം: ശബരിമല മണ്ഡലകാലത്തിന് 28 ദിവസം മാത്രം ബാക്കി നിർക്കെ രണ്ടു കോടിയോളം തീര്‍ഥാടകരെത്തുന്ന എരുമേലിയിലും പമ്പയിലും അടിസ്ഥാന സൗകര്യങ്ങളോ സംവിധാനങ്ങളോ ഏര്‍പ്പെടുത്താന്‍ ഇനിയുമായിട്ടില്ല. എരുമേലിയിലേക്കുള്ള പല ഗ്രാമീണ റോഡുകളുടെയും സ്ഥിതി ദയനീയമാണ്. വിവിധ ജില്ലകളില്‍നിന്ന് അന്‍പത് സ്‌പെഷല്‍ ബസുകളും 200 അധികം ജീവനക്കാരും എത്തുന്ന എരുമേലി കെഎസ്ആര്‍ടിസി ഡിപ്പോയുടെ നില ദയനീയമാണ്. ചെളിക്കുളമായി മാറുന്ന ഡിപ്പോയില്‍ ടോയ്‌ലറ്റ് സൗകര്യം പരിമിതമാണ്. അന്‍പതുവര്‍ഷം പഴക്കമുള്ള എരുമേലി പ്രൈവറ്റ് ബസ് സ്റ്റാന്‍ഡിന് നേരിയ നവീകരണംപോലും നടത്താനായിട്ടില്ല. 27 വര്‍ഷം മുന്‍പ് അനുമതിയായ ശബരി റെയില്‍വേ പദ്ധതി ഇപ്പോഴും രേഖകളില്‍ മാത്രം. 2029ല്‍ നിര്‍മാണം പൂര്‍ത്തിയാക്കുമെന്ന് സര്‍ക്കാര്‍ അവകാശപ്പെടുന്ന എരുമേലി ശബരി എയര്‍പോര്‍ട്ട് പദ്ധതിയും നിയമക്കുരുക്കില്‍തന്നെ. വന്യമൃഗശല്യം അതിരൂക്ഷമാകുന്ന സാഹചര്യത്തില്‍ കാനനപാത സുരക്ഷിതമാക്കാനോ ഇടത്താവളങ്ങളില്‍ വൈദ്യുതി എത്തിക്കാനോ നടപടിയായിട്ടില്ല. തുലാമഴ ഡിസംബര്‍ വരെ നീളുന്ന സാഹചര്യമുണ്ടായാല്‍ തീര്‍ഥാടനപാതയില്‍ മിന്നല്‍പ്രളയം നേരിടാനുള്ള സൗകര്യങ്ങളുമില്ല. മുന്‍വര്‍ഷങ്ങളില്‍ നവംബറിന് മുന്‍പ് കാനനപാതയിലെ അടിക്കാടുകള്‍ വെട്ടിത്തെളിക്കുമായിരുന്നു. എരുമേലിയില്‍ തീര്‍ഥാടകര്‍ക്ക് പേട്ട തുള്ളലിനായി പില്‍ഗ്രിം പാത്ത് നിര്‍മിക്കാനുള്ള പദ്ധതിക്ക് മൂന്നു പതിറ്റാണ്ട് പഴക്കമുണ്ട്. എരുമേലിയില്‍ സ്ഥിരമായി ഫയര്‍ സ്റ്റേഷന്‍ നിര്‍മിക്കണമെന്ന ആവശ്യവും നടപ്പായില്ല. നിലവില്‍ കാഞ്ഞിരപ്പള്ളി ഫയര്‍ സ്റ്റേഷനില്‍നിന്ന് ഒരു യൂണിറ്റ് താത്കാലികമായി സീസണില്‍ എരുമേലിയില്‍ ക്യാമ്പ് ചെയ്യുകയാണ് പതിവ്. പ്ലാച്ചേരി പാലം, കരിങ്കല്ലുമൂഴി കലുങ്ക് എന്നിവയുടെ കൈവരികള്‍ തകര്‍ന്നു കിടക്കുന്നു. അപകട മേഖലയായ കരിങ്കല്ലുമൂഴി വളവില്‍ രൂപപ്പെട്ട കുഴി കിടങ്ങുപോലെയായിരിക്കുന്നു. പ്ലാച്ചേരി-എരുമേലി, കണമല- പമ്പ വനയോര പാതയുടെ ഇരുവശവും കാട് കയറിയ നിലയിലാണ്. പമ്പയില്‍ തിരക്കുകൂടുമ്പോള്‍ എരുമേലിയില്‍ തീര്‍ഥാടകവാഹനങ്ങള്‍ എരുമേലിയില്‍ തടയുക പതിവാണ്. നൂറുകണക്കിന് വാഹനങ്ങള്‍ കുരുക്കില്‍ പെടുന്നത് ഒഴിവാക്കാന്‍ കൂടുതല്‍ പാര്‍ക്കിംഗ് മൈതാനങ്ങള്‍ നിര്‍മിക്കാനും സാധിച്ചിട്ടില്ല. ഇലക്‌ട്രിക് ചാര്‍ജിംഗ് സൗകര്യമില്ല കോട്ടയം: ഒട്ടേറെ ഇലക്‌ട്രിക് വാഹനങ്ങളാണ് സംസ്ഥാനത്തിന് അകത്തുനിന്നും പുറത്തുനിന്നും എരുമേലിയിലും പമ്പയിലും മണ്ഡലകാലത്ത് എത്തുന്നത്. ഇത്തരം വാഹനങ്ങള്‍ ചാര്‍ജ് ചെയ്യുന്നതിനുള്ള സൗകര്യം പാലാ, മുണ്ടക്കയം, പൊന്‍കുന്നം, മുക്കൂട്ടുതറ, പ്ലാച്ചേരി എന്നിവിടങ്ങളില്‍ ഏര്‍പ്പെടുത്തണമെന്നത് ഏറെക്കാലമായുള്ള ആവശ്യമാണ്. കഴിഞ്ഞ വര്‍ഷം തീര്‍ഥാടക വാഹനങ്ങള്‍ ചാര്‍ജ് തീര്‍ന്ന് വഴിയില്‍ കിടന്ന സംഭവങ്ങള്‍ പലതുണ്ടായി.

ഗതാഗത നിയന്ത്രണം

കോട്ടയം: രാഷ്‌ട്രപതിയുടെ സന്ദര്‍ശനവുമായി ബന്ധപ്പെട്ട് 23ന് ഉച്ചകഴിഞ്ഞ് ഒന്നു മുതല്‍ ഏഴു വരെയും, 24നു രാവിലെ ആറു മുതല്‍ മുതല്‍ 11 വരെയും കോട്ടയം ടൗണില്‍ ഗതാഗത നിയന്ത്രണം ഏര്‍പ്പെടുത്തി. 8മൂവാറ്റുപുഴ, കടുത്തുരുത്തി ഭാഗങ്ങളില്‍നിന്നു ചങ്ങനാശേരി ഭാഗത്തേക്ക് പോകേണ്ട വാഹനങ്ങള്‍ പട്ടിത്താനം ജംഗ്ഷനില്‍നിന്നു തിരിഞ്ഞ് ഏറ്റുമാനൂര്‍-മണര്‍കാട് ബൈപാസ്, പുതുപ്പള്ളി വഴി പോകണം. 8ചങ്ങനാശേരി ഭാഗത്തുനിന്ന് ഏറ്റുമാനൂര്‍ ഭാഗത്തേക്ക് പോകേണ്ട വാഹനങ്ങള്‍ ചങ്ങനാശേരി ടൗണില്‍നിന്നു കുരിശുംമൂട്, തെങ്ങണ, ഞാലിയാകുഴി, പുതുപ്പള്ളി, മണര്‍കാട്-ഏറ്റുമാനൂര്‍ ബൈപാസ് വഴി പോകണം. 8മെഡിക്കല്‍ കോളജ് ഭാഗത്തുനിന്നു കോട്ടയം ടൗണിലേക്ക് പോകേണ്ട പ്രൈവറ്റ് ബസുകള്‍ വട്ടമൂട് പാലം കയറി തിരുവഞ്ചൂര്‍ വഴി പോകണം. തിരുവഞ്ചൂര്‍ മുതല്‍ വട്ടമൂട് വരെയുള്ള ഭാഗം വണ്‍വേ ആയിരിക്കും. 8ചിങ്ങവനം ഭാഗത്തുനിന്നു കോട്ടയം ടൗണിലേക്ക് പോകേണ്ട വാഹനങ്ങള്‍ മാവിളങ്ങ് ജംഗ്ഷനില്‍നിന്നു തിരിഞ്ഞ് പാക്കില്‍, പൂവന്തുരുത്ത്, കടുവാക്കുളം, നാല്‍ക്കവല വഴി പുതുപ്പള്ളിയെത്തി പോകണം. 8ചങ്ങനാശേരി ഭാഗത്തുനിന്നു കോട്ടയത്തേക്ക് വരുന്ന കെഎസ്ആര്‍ടിസി ബസുകള്‍ പുളിമൂട് ജംഗ്ഷനില്‍നിന്നും തിരിഞ്ഞ് കെഎസ്ആര്‍ടിസി സ്റ്റാൻഡിലേക്ക് പോകണം. 8പൊന്‍കുന്നം, കാഞ്ഞിരപ്പള്ളി, മുണ്ടക്കയം ഭാഗങ്ങളിലേക്ക് പോകേണ്ട കെഎസ്ആര്‍ടിസി ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംഗ്ഷനിലെത്തി അവിടെനിന്നു കെകെ റോഡ് കളക്ടറേറ്റ് ജംഗ്ഷന്‍, കഞ്ഞിക്കുഴി, മണര്‍കാട് വഴി പോകണം. 8എറണാകുളം, തൃശൂര്‍ ഭാഗങ്ങളിലേക്ക് പോകേണ്ട കെഎസ്ആര്‍ടിസി ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംഗ്ഷനിലെത്തി അവിടെനിന്നു കെകെ റോഡ് കളക്റ്ററേറ്റ് ജംഗ്ഷന്‍, കഞ്ഞിക്കുഴി, മണര്‍കാട്, ഏറ്റുമാനൂര്‍ വഴി പോകണം. 8ആലപ്പുഴ, ചേര്‍ത്തല ഭാഗങ്ങളില്‍നിന്നു കോട്ടയം ടൗണിലേക്ക് പോകേണ്ട വാഹനങ്ങള്‍ ബണ്ട് റോഡില്‍നിന്നും തിരിഞ്ഞ് ഇടയാഴം, കല്ലറ, നീണ്ടൂര്‍ വഴി പോകണം. 8ചേര്‍ത്തല ഭാഗത്തുനിന്നു കുമരകത്തേക്ക് വരുന്ന ബസുകള്‍ മണിയാപറമ്പ് റോഡ് ജംഗ്ഷനില്‍ സര്‍വീസ് നിര്‍ത്തി തിരികെ പോകണം. 8വൈക്കം-കുമരകം വഴി കോട്ടയം ഭാഗത്തേക്ക് പോകേണ്ട വാഹനങ്ങള്‍ ഇടയാഴം ജംഗ്ഷനില്‍നിന്നു തിരിഞ്ഞ് കല്ലറ, നീണ്ടൂര്‍ വഴി പോകണം. 8കല്ലറ, നീണ്ടൂർ ഭാഗങ്ങളില്‍നിന്നു പനമ്പാലം വഴി കോട്ടയം ടൗണിലേക്ക് പോകേണ്ട വാഹനങ്ങള്‍ കുടമാളൂര്‍ കുരിശുപള്ളി ജംഗ്ഷനില്‍നിന്നു തിരിഞ്ഞ് പുളിഞ്ചുവട്, കുമാരനല്ലൂര്‍ മേല്‍പ്പാലം വഴി പോകണം. 8ചിങ്ങവനം ഭാഗത്തുനിന്നു കോട്ടയം ടൗണിലേക്ക് വരുന്ന പ്രൈവറ്റ് ബസുകള്‍ കോടിമത സ്റ്റാന്‍ഡില്‍ സര്‍വീസ് അവസാനിപ്പിച്ചു തിരികെ പോകണം. 8ദിവാന്‍ കവലയില്‍നിന്നു കഞ്ഞിക്കുഴി ഭാഗത്തേക്ക് വാഹനങ്ങള്‍ പോകാന്‍ പാടില്ല. 8മെഡിക്കല്‍ കോളജ് ഭാഗത്തുനിന്ന് എറണാകുളം, മൂവാറ്റുപുഴ ഭാഗങ്ങളിലേക്ക് പോകേണ്ട വാഹനങ്ങള്‍ മെഡിക്കല്‍ കോളജ് കുരിശുപള്ളി ജംഗ്ഷനില്‍നിന്ന് അമ്മഞ്ചേരി, യൂണിവേഴ്‌സിറ്റി, അതിരമ്പുഴ വഴി അതിരമ്പുഴ ഉപ്പുപുര ജംഗ്ഷനിലെത്തി ഇടത്തേക്ക് തിരിഞ്ഞ് കോട്ടമുറി, ആനമല വഴി കാണക്കാരി അമ്പലം ജംഗ്ഷനിലെത്തി പോകണം. 823ന് ഉച്ചയ്ക്ക് 12 മുതല്‍ രാത്രി ഏഴു വരെയും 24നു പുലര്‍ച്ചെ 12.30 മുതല്‍ ഉച്ചയ്ക്കു 12 വരെയും റോഡ് അരികുകളിലും ജംഗ്ഷനുകളിലും പാര്‍ക്കിംഗും തട്ടുകട ഉള്‍പ്പെടെയുള്ള വഴിയോര വാണിഭങ്ങളും ഓട്ടോ, ടാക്‌സി സ്റ്റാന്‍ഡുകളും കര്‍ശനമായി നിരോധിച്ചു. പാലാ-കോട്ടയം റൂട്ടിലെ ക്രമീകരണം 23നു പാലാ ഭാഗത്തുനിന്നു കോട്ടയം ഭാഗത്തേക്ക് വരുന്ന വാഹനങ്ങള്‍ പാലാ ജനറല്‍ ആശുപത്രി ജംഗ്ഷനില്‍നിന്നു പൊന്‍കുന്നം പാലം കയറി പൊന്‍കുന്നം റോഡില്‍ പൈക ജംഗ്ഷനില്‍നിന്നു വലത്തോട്ട് തിരിഞ്ഞ് കൊഴുവനാല്‍-മറ്റക്കര അയര്‍ക്കുന്നത്തെത്തി കോട്ടയം ഭാഗത്തേക്കും പോകണം. തൊടുപുഴ ഭാഗത്തുനിന്നു കോട്ടയം ഭാഗത്തേക്ക് വരുന്ന വാഹനങ്ങള്‍ പാലാ-തൊടുപുഴ റോഡില്‍ കുറിഞ്ഞിയില്‍നിന്നോ കൊല്ലപ്പള്ളിയില്‍ നിന്നോ വലത്തോട്ട് തിരിഞ്ഞ് രാമപുരം വഴി എംസി റോഡിലെത്തി കോട്ടയം ഭാഗത്തേക്ക് പോകണം. പാലാ ഭാഗത്തുനിന്ന് ഏറ്റുമാനൂര്‍, കോട്ടയം മെഡിക്കല്‍ കോളജ്, എറണാകുളം ഭാഗത്തേക്ക് പോകുന്ന വാഹനങ്ങള്‍ പാലാ-സിവില്‍സ്റ്റേഷന്‍-ആവി ജംഗ്ഷന്‍ തിരിഞ്ഞ് മരങ്ങാട്ടുപിള്ളി-കോഴ, കുറവിലങ്ങാട് വഴി എംസി റോഡിലെത്തി പോകണം. ഈരാറ്റുപേട്ട ഭാഗത്തുനിന്നു കോട്ടയം, പൊന്‍കുന്നം ഭാഗത്തേക്ക് വരുന്ന വാഹനങ്ങള്‍ തിടനാട് കാഞ്ഞിരപ്പള്ളി വഴി കെകെ റോഡിലെത്തിയോ ഭരണങ്ങാനം പള്ളി ഭാഗത്തുനിന്ന് ഇടത്തോട്ട് തിരിഞ്ഞ് ഇടമറ്റം, പൈക-വഴി പൊന്‍കുന്നം ഭാഗത്തേക്കും പൈക ജംഗ്ഷനില്‍നിന്നു തിരിഞ്ഞ് കൊഴുവനാല്‍ മറ്റക്കര-അയര്‍ക്കുന്നത്തെത്തി കോട്ടയം ഭാഗത്തേക്കും പോകണം. ആംബുലന്‍സുകള്‍ വഴിതിരിച്ചുവിടും 23ന് ഉച്ചകഴിഞ്ഞ് ഒന്നു മുതല്‍ രാത്രി ഏഴു വരെ വിവിധ ഭാഗങ്ങളില്‍നിന്നു കോട്ടയം നഗരത്തിലെത്തുന്ന ആംബുലന്‍സ്, മറ്റ് ഹോസ്പിറ്റല്‍ എമര്‍ജന്‍സി വാഹനങ്ങള്‍ എന്നി വയ്ക്കും നിയന്ത്രണം ഏര്‍പ്പെടുത്തി. എംസി റോഡിലൂടെ തിരുവല്ല ഭാഗത്തുനിന്നു വരുന്ന ആംബുലന്‍സുകളും മറ്റ് ആശുപത്രി സംബന്ധമായ എമര്‍ജന്‍സി വാഹനങ്ങളും ചങ്ങനാശേരി ബൈപാസ് റോഡില്‍ പ്രവേശിച്ചു തെങ്ങണ, പുതുപ്പള്ളി, മണര്‍കാട്, പൂവത്തുംമൂട്, സംക്രാന്തി വഴി എംസിഎച്ചില്‍ എത്തണം. ആലപ്പുഴ ചേര്‍ത്തല ഭാഗത്തുനിന്നു വരുന്ന ആംബുലന്‍സുകളും എമര്‍ജന്‍സി വാഹനങ്ങളും ഇടയാഴം ജംഗ്ഷനില്‍നിന്ന് ഇടത്തേക്ക് തിരിഞ്ഞ് കല്ലറ വഴി എംസിഎച്ചില്‍ എത്തണം. കെകെ റോഡില്‍നിന്നു വരുന്ന ആംബുലന്‍സുകളും എമര്‍ജന്‍സി വാഹനങ്ങളും മണര്‍കാട് എത്തി പൂവത്തുംമൂട് പാലം വഴി എംസിഎച്ചില്‍ എത്തണം. പാലാ, കുറവിലങ്ങാട്, എറണാകുളം ഭാഗങ്ങളില്‍നിന്നും വരുന്ന ആംബുലന്‍സുകളും മറ്റ് എമര്‍ജന്‍സി വാഹനങ്ങളും ഏറ്റുമാനൂര്‍ സെന്‍ട്രല്‍ ജംഗ്ഷനില്‍ എത്തി അതിരമ്പുഴ യൂണിവേഴ്‌സിറ്റി വഴി എംസിഎച്ചില്‍ എത്തണം.

രാഷ്‌ട്രപതിയെ വരവേല്‍ക്കാന്‍ വിപുലമായ ഒരുക്കങ്ങള്‍

കോട്ടയം: രാഷ്‌ട്രപതി ദ്രൗപദി മുര്‍മുവിനെ വരവേല്‍ക്കാന്‍ പാലായും കോട്ടയവും കുമരകവും അണിഞ്ഞൊരുങ്ങുന്നു. മൂന്നിടങ്ങളിലും റോഡിലെ കുഴിയടയ്ക്കല്‍, പുല്ലുവെട്ട്, വൈദ്യുതി അറ്റകുറ്റപ്പണികള്‍ എന്നിവ നടക്കുന്നു. കോട്ടയം നഗരത്തിന്‍റെ അഞ്ചു കിലോമീറ്റര്‍ പരിധിയില്‍ റോഡുകളുടെ നിര്‍മാണം നടക്കുന്നതിനാല്‍ ഗതാഗതതടസം രൂക്ഷമായി. ശിവഗിരിയില്‍നിന്ന് 23ന് ഉച്ചകഴിഞ്ഞ് 3.45ന് രാഷ്‌ട്രപതി ഹെലികോപ്ടറില്‍ പാലായിലെത്തും. സെന്‍റ് തോമസ് കോളജിലെ ബിഷപ് വയലില്‍ ഹാളിലാണു പ്ലാറ്റിനം ജൂബിലി സമാപന സമ്മേളനം. ജില്ലാ പോലീസ് ചീഫ് എ. ഷാഹുല്‍ ഹമീദ് കോളജിലെ ക്രമീകരണങ്ങള്‍ വിലയിരുത്തി. പ്രിന്‍സിപ്പല്‍ ഡോ. സിബി ജയിംസ്, വൈസ്പ്രിന്‍സിപ്പല്‍ റവ. ഡോ. സാല്‍വിന്‍ കാപ്പിലിപ്പറമ്പില്‍ എന്നിവരുമായി അദ്ദേഹം ചര്‍ച്ച നടത്തി. പാലായില്‍നിന്ന് 5.30ന് ഹെലികോപ്റ്ററില്‍ കോട്ടയം പോലീസ് പരേഡ് മൈതാനത്ത് ഇറങ്ങി റോഡ് മാര്‍ഗമാണ് രാഷ്‌ട്രപതി കുമരകം ടാജ് ഹോട്ടലിലെത്തി അന്നു രാത്രി അവിടെ തങ്ങുന്നത്. കോണത്താറ്റ് പാലത്തിനുസമീപം നിലവിലുള്ള താത്കാലിക റോഡില്‍ തറ ഓടുകള്‍ പാകുന്നതിനുള്ള ജോലിയാണ് റോഡിന്‍റെ കാര്യത്തില്‍ ചെയ്യുന്നത്. ഇന്നലെ റോഡ് പണി തുടങ്ങി. കോണത്താറ്റ് പാലത്തിലൂടെ രാഷ്‌ട്രപതിയുടെ കാര്‍ പോകുന്നതിനു സുരക്ഷാ പ്രശ്‌നം ഉണ്ടെങ്കില്‍ ഉപയോഗിക്കുന്നതിനാണു താത്കാലിക റോഡ് നന്നാക്കുന്നത്. കുമരകം റോഡിലെ പാലങ്ങളുടെ കൈവരികള്‍ വെള്ളപൂശി മനോഹരമാക്കും. റോഡിലേക്ക് ചാഞ്ഞുനില്‍ക്കുന്ന മരങ്ങളുടെ ശിഖരങ്ങള്‍ വെട്ടിമാറ്റി. കുമരകം റൂട്ടില്‍ ഇല്ലിക്കല്‍പാലം മുതല്‍ കവണാറ്റിന്‍കര വരെയുള്ള റോഡ് കുഴികള്‍ അടച്ചുവരികയാണ്. 24ന് രാവിലെ 10നു കുമരകത്തുനിന്നും‌ റോഡുമാര്‍ഗം കോട്ടയത്തെത്തി ഹെലികോപ്റ്ററില്‍ കൊച്ചിയിലേക്കും തുടര്‍ന്ന് ഡല്‍ഹിയിലേക്കും മടങ്ങും. അവിസ്മരണീയ മുഹൂർത്തം കാത്ത് പാലാ സെന്‍റ് തോമസ് കോളജ് പാലാ: പാലാ സെന്‍റ് തോമസ് ഓട്ടോണമസ് കോളജ് രാഷ്‌ട്രപതി ദ്രൗപദി മുര്‍മുവിനെ വരവേല്ക്കാന്‍ ഒരുങ്ങുന്നു. പ്ലാറ്റിനം ജൂബിലി സമാപന സമ്മേളനത്തില്‍ പങ്കെടുക്കാന്‍ വ്യാഴാഴ്ച വൈകുന്നേരം 4.15ന് രാഷ്‌ട്രപതി എത്തും. ജൂബിലി സ്മാരക ബ്ലോക്കിന്‍റെ ശിലാഫലകം അനാച്ഛാദനം ചെയ്യും. ജവഹര്‍ലാല്‍ നെഹ്റു, ഇന്ദിരാഗാന്ധി, ഡോ. എ.പി.ജെ. അബ്ദുള്‍ കലാം, വി.വി. ഗിരി തുടങ്ങിയവരുടെ സന്ദര്‍ശനത്തിന്‍റെ ഓര്‍മകളുള്ള കോളജിന് രാഷ്‌ട്രപതി ദ്രൗപദി മുര്‍മുവിന്‍റെ സന്ദര്‍ശനത്തിലൂടെ അവിസ്മരണീയമായ മറ്റൊരു സ്മരണകൂടി സ്വന്തമാകുകയാണ്. പൂര്‍വവിദ്യാര്‍ഥിയും സുപ്രീം കോടതി ചീഫ് ജസ്റ്റീസുമായിരുന്ന കെ.ജി. ബാലകൃഷ്ണന്‍, എസ്.കെ. പാട്ടീല്‍ എംപി, മുന്‍ മുഖ്യമന്ത്രി എ.ജെ. ജോണ്‍, ശ്രീചിത്തിര തിരുനാള്‍, കര്‍ദിനാള്‍ ടിസറങ്, ഗായകന്‍ മുഹമ്മദ് റാഫി, കെ.ജെ. യേശുദാസ്, എസ്. ജാനകി, ഹേമലത, പി.ബി. ശ്രീനിവാസന്‍, താരങ്ങളായ സത്യന്‍, പ്രേം നസീര്‍, ഇറോം ശര്‍മ്മിള, സ്‌കോട്ടിഷ് ചരിത്രകാരന്‍ വില്യം ഡാല്‍റിംപിള്‍ തുടങ്ങിയവരും കോളജ് സന്ദര്‍ശിച്ചവരില്‍പ്പെടുന്നു. മന്ത്രിപദവിയിലെത്തിയവരില്‍ ജോര്‍ജ് കുര്യന്‍, റോഷി അഗസ്റ്റിന്‍ എന്നിവരുണ്ട്. മുന്‍ മന്ത്രി എന്‍.എം. ജോസഫ് ഇവിടെ അധ്യാപകനായിരുന്നു. എംജി യൂണിവേഴ്സിറ്റി മുന്‍ വൈസ് ചാന്‍സര്‍ ഡോ. എ.ടി. ദേവസ്യ, ഡോ. സിറിയക് തോമസ്, ഡോ. ബാബു സെബാസ്റ്റ്യന്‍ എന്നിവര്‍ സെന്‍റ് തോമസിലെ അധ്യാപകരായിരുന്നു. 16 യുജി, പിജി കോഴ്‌സുകളും 11 ഗവേഷണവിഭാഗങ്ങളും കോളജിനുണ്ട്. ബിഎസ്‌സി സൈക്കോളജി, എംഎസ്‌ സി ഫുഡ് സയന്‍സ് ആന്‍ഡ് ടെക്നോളജി കോഴ്സുകള്‍ ഇക്കൊല്ലം തുടങ്ങി. മൈക്രോബയോളജി, ബയോ സ്റ്റാറ്റിറ്റിക്സ്, ബയോ ടെക്നോളജി തുടങ്ങിയ പ്രഫഷണല്‍ കോഴ്സുകളുമുണ്ട്. നാക് ഗ്രേഡിംഗില്‍ എ പ്ലസ് പ്ലസ് അംഗീകാരം കരസ്ഥമാക്കുകയും ഓട്ടോണമസ് പദവി നേടുകയും ചെയ്ത കോളജിന് അഭിമാനം പകരുന്നതാണ് രാഷ്‌ട്രപതിയുടെ വരവ്. ഡേറ്റാ സയന്‍സ് ഉള്‍പ്പെടെ കോഴ്സുകള്‍ തുടങ്ങുകയും ഡീംഡ് യൂണിവേഴ്സിറ്റിയായി ഉയര്‍ത്തുകയുമാണ് ലക്ഷ്യമെന്ന് പ്രന്‍സിപ്പല്‍ ഡോ. സിബി ജെയിംസ് പറഞ്ഞു.

രാമപുരം-നീറന്താനം-മാറിക റോഡില്‍ അപകടം പതിവാകുന്നു; തിട്ട ഇടിയുന്നു

രാമപുരം: മരണക്കെണിയായി രാമപുരം - നീറന്താനം - മാറിക റോഡ്. പല ഭാഗങ്ങളിലും റോഡ് ഇടിഞ്ഞ് താണുകൊണ്ടിരിക്കുന്നു. കഴിഞ്ഞ ദിവസം നീറന്താനത്തിന് സമീപം കയം ഭാഗത്ത് കല്ലുമായി പോയ ഭാരവണ്ടി റോഡിന്‍റെ സൈഡ് ഇടിഞ്ഞ് ഒരുവശത്തേക്ക് താന്നുപോയി. ഭാഗ്യംകൊണ്ടാണ് താഴെയുള്ള കൊക്കയിലേക്ക് പതിക്കാതെ വാഹനം രക്ഷപ്പെട്ടത്. ജെസിബി ഉപയോഗിച്ചാണ് പിന്നീട് ഈ ലോറി ഉയര്‍ത്തിയത്. ഈ അപകടത്തില്‍ റോഡ് ഇടിഞ്ഞ് തകര്‍ന്ന് കിടക്കുകയാണ്. നാട്ടുകാരുടെ നേതൃത്വത്തില്‍ ഇടിഞ്ഞ ഭാഗത്ത് ടാര്‍ വീപ്പകള്‍ വെച്ചിരിക്കുകയാണ്. ഈ ഭാഗത്ത് വലിയൊരു വളവാണുള്ളത്. അമിത വേഗത്തിലേത്തുന്ന വാഹനങ്ങള്‍ അപകടത്തില്‍പ്പെടാതെ കഷ്ടിച്ചാണ് രക്ഷപ്പെടുന്നത്. മൂവാറ്റുപുഴയില്‍ നിന്നു പാലായിലേയ്ക്ക് എളുപ്പം എത്തുവാന്‍ ഗൂഗിള്‍ മാപ്പില്‍ കാണിക്കുന്ന റോഡായതിനാല്‍ ശബരിമല തീര്‍ഥാടകരടക്കം നിരവധി ദീര്‍ഘദൂര വാഹനങ്ങളും ഭാര വണ്ടികളും സ്‌കൂള്‍ കുട്ടികളുമായി പോകുന്ന ബസുകളും സര്‍വീസ് ബസുകളും ഇടതടവില്ലാതെ ഈ റോഡിലൂടെ പോകുന്നുണ്ട്. ഈ അപകടം നടന്നതിന്‍റെ തൊട്ട് മുന്പിലായി വല്യവീട്ടില്‍ വാതിലിന് സമീപം റോഡിന്‍റെ ഒരു സൈഡ് താഴ്ന്ന് പൊയ്ക്കൊണ്ടിരിക്കുകയാണ്. വലിയ വാഹനങ്ങള്‍ ഒരു വശത്തേക്ക് ചെരിഞ്ഞ് അപകടത്തില്‍പ്പെടാതെ കഷ്ടിച്ചാണ് രക്ഷപ്പെടുന്നത്. മഴ കനക്കുന്നതോടുകൂടി ഈ ഭാഗം ഇടിയുവാന്‍ സാധ്യതയുണ്ട്. ഈ റോഡിന്‍റെ അപാകതകള്‍ എത്രയും പെട്ടന്ന് പരിഹരിക്കണമെന്ന നാട്ടുകാരുടെ ആവശ്യം ശക്തമാവുകയാണ്.

നാമഹേതുകന്‍റെ ചിത്രം സുഗന്ധവ്യഞ്ജനങ്ങളാൽ നിർമിച്ച് സമർപ്പിച്ച് കുറവിലങ്ങാട് കുടുംബകൂട്ടായ്മ യൂണിറ്റ്

കുറവിലങ്ങാട്: നാമഹേതുകന്‍റെ ചിത്രം സുഗന്ധവ്യഞ്ജനങ്ങളാൽ നിർമിച്ച് സമർപ്പിച്ച് കുടുംബകൂട്ടായ്മ യൂണിറ്റ്. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ 27-ാം വാർഡിലെ ഒന്നാം കുടുംബകൂട്ടായ്മ യൂണിറ്റാണ് പുണ്യവഴികൾ തേടി പുതിയ മാതൃക സ്വീകരിച്ചത്. ദൈവദാസൻ മാർ മാത്യു കാവുകാട്ടാണ് യുണിറ്റിന്‍റെ നാമഹേതുകൻ. ആർച്ച്ബിഷപ് മാർ മാത്യു കാവുകാട്ടിന്‍റെ അനുസ്മരണ വാർഷികത്തോടനുബന്ധിച്ചാണ് ആർച്ച്ബിഷപ്പിന്‍റെ കബറിടം സ്ഥിതി ചെയ്യുന്ന ചങ്ങനാശേരി മെത്രാപ്പോലീത്തൻ പള്ളിയോട് ചേർന്നുള്ള കബറിട പള്ളിയിൽ കൂട്ടായ്മ അംഗങ്ങൾ എത്തിയത്. തുടർന്ന് ആർച്ച്ബിഷപ് മാർ മാത്യു കാവുകാട്ട് വൈദികനായിരിക്കെ വിശുദ്ധ കുർബാനയർപ്പിച്ചിരുന്ന പള്ളിയിൽ അസിസ്റ്റന്‍റ് വികാരി ഫാ. തോമസ് താന്നിമലയുടെ കാർമികത്വത്തിൽ വിശുദ്ധ കുർബാനയർപ്പണം നടത്തി. മാർ മാത്യു കാവുകാട്ട് മ്യൂസിയത്തിലേക്ക് ചിത്രം കൈമാറി. കുറവിലങ്ങാട് ഇടവക പള്ളിയിൽ നിന്ന് ആരംഭിച്ച തീർഥാടനം ആർച്ച്പ്രീസ്റ്റ് റവ.ഡോ.തോമസ് മേനാച്ചേരി ഫ്‌ളാഗ് ഓഫ് ചെയ്തു. അസിസ്റ്റന്‍റ് വികാരിമാരായ ഫാ. പോൾ കുന്നുംപുറത്ത്, ഫാ. തോമസ് താന്നിമലയിൽ, ഫാ. ജോസഫ് ചൂരയ്ക്കൽ എന്നിവരുടെ കാർമികത്വത്തിൽ പ്രത്യേക പ്രാർഥനകളോടെയാണ് ചങ്ങനാശേരി കത്തീഡ്രലിലേക്കുള്ള തീർഥാടനം ആരംഭിച്ചത്. പള്ളിയോഗം സെക്രട്ടറി ബെന്നി കോച്ചേരി, കുടുംബകൂട്ടായ്മ ജനറൽ ലീഡർ ബോബിച്ചൻ നിധീരി, സോൺ ലീഡർ സണ്ണി വെട്ടിക്കാട്ട്,യൂണിറ്റ് പ്രസിഡന്‍റ് പോൾസൺ ചേലക്കാപ്പിള്ളിൽ, സെക്രട്ടറി സുമി റോയി ഓലിക്കാട്ടിൽ തുടങ്ങിയവർ പ്രസംഗിച്ചു. ഒരുമാസത്തോളം നീണ്ട പരിശ്രമങ്ങളിലാണ് ചിത്രം ഒരുക്കിയതെന്ന് യൂണിറ്റ് ഭാരവാഹികളായ പോൾസൺ ചേലയ്ക്കാപ്പള്ളിയും സുമി റോയിയും പറഞ്ഞു. ചിത്രകലയിൽ ശ്രദ്ധേയനായ സണ്ണി ഇടത്തിനാലാണ് ചിത്രം ക്രമീകരിക്കാൻ മാർഗനിർദേശങ്ങൾ നൽകിയത്.

ഉപജില്ലാ ശാസ്ത്ര, പ്രവൃത്തി പരിചയമേള കീരീടം കൈവിടാതെ നസ്രത്ത്ഹിൽ ഡിപോൾ

കുറവിലങ്ങാട്: ഉപജില്ലാ ശാസ്‌ത്രോത്സവത്തിൽ ഓവറോൾ കിരീടം നസ്രത്ത്ഹിൽ ഡി പോൾ ഹയർസെക്കൻഡറി സ്‌കൂളിന്. തുടർച്ചയായ ആറാം തവണയാണ് ഡിപോളിന്‍റെ തേരോട്ടം. 989 പോയിന്‍റ് നേടിയാണ് ഡിപോളിലെ പ്രതിഭകൾ ഒന്നാംസ്ഥാനം കൈപ്പിടിയിലൊതുക്കിയത്. ശാസ്ത്ര, ഗണിതശാസ്ത്ര, പ്രവൃത്തിപരിചയ, ഐടി മേളകളിളെല്ലാം ഓവറോൾ കിരീടം നസ്രത്ത്ഹിൽ ഡി പോളിനാണ്.

ലേബര്‍ ഇന്ത്യ നോളജ് സിറ്റിയില്‍ ഐക്യരാഷ്ട്രസഭ പുനരാവിഷ്‌കരണം

കോട്ടയം: ഐക്യരാഷ്ട്രസഭ പുനരാവിഷ്‌കരണം (യുഎന്‍ റെപ്ലിക്ക) മരങ്ങാട്ടുപിള്ളി ലേബര്‍ ഇന്ത്യ നോളജ് സിറ്റിയില്‍ 24, 25 തീയതികളില്‍ നടത്തും. 2016ല്‍ ഇന്ത്യന്‍ മുന്‍ അംബാസഡറും ഐഎഇഎയില്‍ ഇന്ത്യയുടെ ഗവര്‍ണറുമായിരുന്ന അംബാസഡര്‍ ടി.പി. ശ്രീനിവാസനും ലേബര്‍ ഇന്ത്യ ഡയറക്ടർ രാജേഷ് ജോര്‍ജ് കുളങ്ങരയുമാണ് ഈ സംരംഭത്തിനു തുടക്കമിട്ടത്. ഇതിന്‍റെ പത്താം വാര്‍ഷികാഘോഷമാണ് ലേബര്‍ ഇന്ത്യ പബ്ലിക് സ്‌കൂളിന്‍റെ ആഭിമുഖ്യത്തില്‍ നടത്തുന്നത്. തെരഞ്ഞെടുത്ത കോളജുകളിലെയും സ്‌കൂളുകളിലെയും 193 വിദ്യാര്‍ഥികളാണു പങ്കെടുക്കുന്നത്. യുഎന്‍ റെപ്ലിക്കയില്‍ പങ്കെടുക്കുന്ന വിദ്യാര്‍ഥികള്‍ ഓരോ രാജ്യത്തെയും പ്രതിനിധീകരിച്ചു പ്രസംഗിക്കും. ഐക്യരാഷ്ട്ര സംഘടനയുടെ പ്രവര്‍ത്തനരീതിയും വര്‍ത്തമാനകാല പ്രസക്തിയും പുതുതലമുറയെ ബോധ്യപ്പെടുത്താനാണു മാതൃകാ യുഎന്‍ നടത്തുന്നത്. പരിപാടിയുടെ ആദ്യഘട്ട പരിശീലനം ഏതാനും ആഴ്ച മുമ്പ് നടന്നു. ഐക്യരാഷ്ട്ര സംഘടനയിലെ 193 രാജ്യങ്ങളുടെ പതാക, വേഷവിധാനങ്ങള്‍, ഓരോ രാജ്യത്തെയും ഭക്ഷണം തുടങ്ങിയവ എല്ലാം ഒരുക്കിയാണ് മാതൃകാ യുഎന്‍ ചേരുന്നത്. ഐക്യരാഷ്ട്രസഭയിലെ സെക്യൂരിറ്റി കൗണ്‍സിലും ജനറല്‍ അസംബ്ലിയും ഇവിടെ പുനരാവിഷ്‌കരിക്കുകയാണ്. ഹോഴ്സ് ഷൂ മാതൃകയില്‍ ഉള്ള ഇരിപ്പിടം, മ്യൂറല്‍ പെയിന്‍റിംഗ് തുടങ്ങിയവ എല്ലാം ഐക്യരാഷ്ട്ര സഭയുടെ സെക്യൂരിറ്റി കൗണ്‍സില്‍ ഹാളില്‍ കാണുന്ന രീതിയില്‍ തന്നെയാണ് ലേബര്‍ ഇന്ത്യയില്‍ പുനരാവിഷ്‌കരിച്ചിരിക്കുന്നത്. യുഎന്‍ റെപ്ലിക്ക 2025 ദശാബ്ദി സമ്മേളനത്തിനായി ലേബര്‍ ഇന്ത്യ നോളജ് സിറ്റിയിലേക്ക് തിരിച്ചെത്തുമ്പോള്‍, ആഗോള രാഷ്ട്രീയം, അന്താരാഷ്ട്ര ചര്‍ച്ചകള്‍, യുവ നയതന്ത്രം എന്നിവയുടെ രണ്ട് ദിനങ്ങളിലായി നടക്കുന്ന ഈ പരിപാടിയില്‍ പങ്കുചേരാന്‍ രാജ്യത്തുടനീളമുള്ള സ്‌കൂളുകളെയും കോളജുകളെയും ക്ഷണിച്ചു. പത്രസമ്മേളനത്തില്‍ ലേബര്‍ ഇന്ത്യ പബ്ലിക് സ്‌കൂള്‍ പ്രിന്‍സിപ്പല്‍ സുജ കെ. ജോര്‍ജ്, റസിഡന്‍റ് ഡയറക്ടര്‍ ടിനു രാജേഷ്, പ്രോഗ്രാം കോഓര്‍ഡിനേറ്റര്‍ ഡോമില്‍ ആന്‍റണി ജോണ്‍സണ്‍, യുഎന്‍ സ്റ്റുഡന്‍റ് കോഓര്‍ഡിനേറ്റര്‍മാരായ അഡ്വൈത് വിജയ്, ഹന്നാ മറിയം ജോര്‍ജ്, ഹരോള്‍ഡ് രാജേഷ് ജോര്‍ജ് എന്നിവര്‍ പങ്കെടുത്തു

ഗാര്‍ഹിക സാനിട്ടറി മാലിന്യ ശേഖരണവുമായി പാലാ നഗരസഭ

പാലാ: ഉപയോഗിച്ച ട്യൂബുകള്‍, മെഡിസിന്‍ സ്ട്രിപ്പുകള്‍, ഡ്രസിംഗ് കോട്ടണ്‍, കാലഹരണപ്പെട്ട മരുന്നുകള്‍, ഗ്ലൗസുകള്‍,ഡയപ്പറുകള്‍, സാനിട്ടറി പാഡുകള്‍, യൂറിന്‍ ബാഗുകള്‍, മാസ്‌ക്കുകള്‍ തുടങ്ങിയ ഗാര്‍ഹിക മാലിന്യങ്ങള്‍ സംസ്‌കരിക്കുവാന്‍ പാലാ നഗരസഭ പരിധിയില്‍ ഉള്ളവര്‍ക്ക് ഇനി ബുദ്ധിമുട്ടേണ്ടതില്ല. ഇതിനായി സുസ്ഥിര മാലിന്യ നിര്‍മാര്‍ജന രംഗത്ത് പ്രവര്‍ത്തിക്കുന്ന ആക്രി ആപ്പുമായി പാലാ നഗരസഭ പൊതുജനാരോഗ്യ പരിസ്ഥിതി പരിപാലന വിഭാഗം കൈകോര്‍ക്കുന്നു. ശുചിത്വമിഷന്‍ അംഗീകൃത ഗാര്‍ഹിക സാനിട്ടറി മാലിന്യ ശേഖരണം നടത്തുന്ന സ്ഥാപനമാണ് ആക്രി (ആക്രി ഇംപാക്ട് പ്രെവറ്റ് ലിമിറ്റഡ്) അടുത്തയാഴ്ച മുതല്‍ പാലാ നഗരസഭ പ്രദേശത്ത് പ്രവര്‍ത്തനമാരംഭിക്കുമെന്ന് ക്ലീന്‍ സിറ്റി മാനേജര്‍ ആറ്റ്‌ലി പി. ജോണ്‍, സീനിയര്‍ പബ്‌ളിക് ഹെല്‍ത്ത് ഇന്‍സ്പക്ടര്‍ അനീഷ് സി.ജി. എന്നിവര്‍ അറിയിച്ചു. പാലാ നഗരസഭ പ്രദേശത്തെ കിടപ്പുരോഗികള്‍ക്കും, വൃദ്ധമന്ദിരങ്ങളിലെ അന്തേവാസികള്‍ക്കും നവജാത ശിശുക്കളുടെ മാതാപിതാക്കള്‍ക്കും ഈ പദ്ധതി പ്രയോജനകരമാകും. മാലിന്യ ശേഖരണത്തിന് ഏജന്‍സി വ്യതസ്ത നിറങ്ങളിലുള്ള ബാഗുകള്‍ ഉപഭോക്താവിന് നല്കും. മാലിന്യശേഖരണത്തിന് തൂക്കത്തിന് അനുസരിച്ചുള്ള നിരക്ക് ഉപഭോക്താവ് ഏജന്‍സിക്ക് കൈമാറേണ്ടതുണ്ട് (കിലോഗ്രാമിന് 45 രൂപ + 5 ശതമാനം ജി എസ് ടി). പാലാ നഗരസഭയിലെ ഡയപ്പര്‍ മാലിന്യശേഖരണത്തിനെത്തുന്ന വാഹനത്തിന്‍റെ ഫ്‌ളാഗ് ഓഫ് 24 ന് നഗരസഭ ചെയര്‍മാന്‍ തോമസ് പീറ്റര്‍ നിര്‍വഹിക്കും. നഗരസഭ പരിധിയിലെ താമസക്കാര്‍ക്ക് ആക്രിയുടെ ആപ്പിലൂടെ ഗൂഗിള്‍ പ്ലേ സ്റ്റോര്‍, ആപ്പ് സ്റ്റോര്‍ എന്നിവ ഉപയോഗിച്ച് ബുക്ക് ചെയ്യാം.കൂടാതെ ടോള്‍ ഫ്രീ നമ്പരായ 08031405048 ലോ വാട്ട്‌സ് ആപ്പ് നമ്പരായ 7591911110 നമ്പരിലോ ബന്ധപ്പെട്ടാല്‍ ഏജന്‍സി വീടുകളിലെത്തി ബയോ മെഡിക്കല്‍ മാലിന്യങ്ങള്‍ ശേഖരിക്കും. തുടര്‍ന്ന് അമ്പലമുകളിലുള്ള കേരള എന്‍വിറോ ഇന്‍ഫ്രാസ്‌ട്രക്ച്ചര്‍ ലിമിറ്റഡിന്‍റെ പ്ലാന്‍റിലെത്തിച്ച് മലിനീകരണ സാധ്യതയില്ലാതെ ശാസ്ത്രീയമായി സംസ്‌കരിക്കും. ബയോ മെഡിക്കല്‍ മാലിന്യങ്ങളടക്കം സംസ്‌കരിക്കുന്നതിന് ആവശ്യമായ ഭൗതിക സൗകര്യങ്ങള്‍ ലഭ്യമല്ലാത്തത് മൂലം ഡയപ്പര്‍ മാലിന്യങ്ങള്‍ ഉള്‍പ്പെടെയുള്ളവ പൊതു സ്ഥലങ്ങളിലും ജലാശയങ്ങളിലും തള്ളപ്പെടുന്ന സാഹചര്യം ഗുരുതരമായ പരിസ്ഥിതി പ്രശ്‌നങ്ങള്‍ സൃഷ്ടിക്കുന്നതിനും മലിനീകരണത്തിനും പകര്‍ച്ചവ്യാധികള്‍ക്കും കാരണമാകുന്നുണ്ട്. ഇതു പരിഹരിക്കുവാനാണ് പുതിയ ക്രമീകരണം.

എകെസിസി അവകാശ സംരക്ഷണ ജാഥയ്ക്ക് സ്വീകരണം

പാലാ: നീതി ഔദാര്യമല്ല, അവകാശമാണ് എന്ന മുദ്രാവാക്യത്തോടെ കത്തോലിക്കാ കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ നടത്തുന്ന അവകാശ സംരക്ഷണ ജാഥ ഇന്ന് പാലായിലെത്തും. ഭരണഘടനയും ഭരണഘടന വിഭാവനം ചെയ്യുന്ന മതേതരത്വവും സംരക്ഷിക്കുക, ക്രൈസ്തവ പിന്നോക്കാവസ്ഥയെപ്പറ്റി പഠിക്കാന്‍ നിയോഗിച്ച ജസ്റ്റിസ് ജെ. ബി. കോശി കമ്മീഷന്‍ റിപ്പോര്‍ട്ട് രഹസ്യ രേഖയായി സൂക്ഷിക്കുന്നത് അവസാനിപ്പിച്ച് റിപ്പോര്‍ട്ട് പുറത്തുവിടുകയും അതിലെ നിര്‍ദേശങ്ങള്‍ നടപ്പാക്കുകയും ചെയ്യുക, വന്യമൃഗങ്ങളുടെ ആക്രമവും തെരുവുനായ ശല്യവും പരിഹരിക്കാന്‍ വേണ്ട നടപടികള്‍ സ്വീകരിക്കുക, കര്‍ഷകര്‍ക്ക് ദ്രോഹകരമായ ഭൂ നിയമങ്ങള്‍ കാലാനുസൃതമായി പരിഷ്‌കരിക്കുക, കാര്‍ഷിക ഉത്പന്നങ്ങളുടെ വില തകര്‍ച്ച പരിഹരിക്കാന്‍ നടപടിയെടുക്കുക, വിദ്യാഭ്യാസ മേഖലയിലെ ന്യൂനപക്ഷ അവഗണന അവസാനിപ്പിക്കുക എന്നീ ആവശ്യങ്ങള്‍ ഉയര്‍ത്തിയാണ് കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ ഈ മാസം കാസര്‍ഗോഡ് നിന്ന് തിരുവനന്തപുരത്തേക്ക് ജാഥ ആരംഭിച്ചത്. വിവിധ രൂപതകളിലൂടെ കടന്നുവന്ന ജാഥ ചെമ്മലമറ്റത്ത് നിന്നു പാലാ രൂപതയില്‍ പ്രവേശിക്കും. രൂപതാ ഭാരവാഹികള്‍ ജാഥയെ സ്വീകരിക്കും. തുടര്‍ന്ന് അരുവിത്തുറ, രാമപുരം ഫൊറോനകളിലെ സ്വീകരണങ്ങള്‍ ഏറ്റുവാങ്ങി വൈകുന്നേരം 4.30 ന് പാലായില്‍ എത്തിച്ചേരും. ളാലം പഴയപള്ളി അങ്കണത്തില്‍ നിന്നാരംഭിക്കുന്ന റാലി മോണ്‍. സെബാസ്റ്റ്യന്‍ വേത്താനത്ത് ഫ്‌ളാഗ് ഓഫ് ചെയ്യും. തുടര്‍ന്ന് സമ്മേളനം ആരംഭിക്കും. കുരിശുപള്ളിക്കവലയില്‍ രൂപത പ്രസിഡന്‍റ് ഇമ്മാനുവല്‍ നിധീരിയുടെ അധ്യക്ഷതയില്‍ ചേരുന്ന പൊതു സമ്മേളനം സീറോ മലബാര്‍ സഭ മേജര്‍ ആര്‍ച്ച് ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്യും. ളാലം പഴയപള്ളിയുടെ മുറ്റത്തും ഓഡിറ്റോറിയത്തിനു സമീപവും ളാലം പുത്തന്‍പള്ളിയുടെ മുറ്റത്തും പുതിയ പാര്‍ക്കിംഗ് സ്ഥലത്തും വാഹനങ്ങള്‍ പാര്‍ക്കു ചെയ്യാം. വിവിധ രൂപതാധ്യക്ഷന്മാര്‍ പങ്കെടുക്കുന്ന റാലിയോടെ 24ന് തിരുവനന്തപുരം സെക്രട്ടറിയേറ്റില്‍ ജാഥ സമാപിക്കും. അരുവിത്തുറയിൽ സ്വീകരണം അരുവിത്തുറ: അവകാശ സംരക്ഷണ ജാഥയ്ക്ക് ഇന്ന് ഉച്ചകഴിഞ്ഞ് 2.30 ന് അരുവിത്തുറയിൽ സ്വീകരണം നൽകും. ഫൊറോന പ്രസിഡന്‍റ് സാബു പ്ലാത്തോട്ടം അധ്യക്ഷത വഹിക്കുന്ന യോഗം ഫൊറോന വികാരി ഫാ. സെബാസ്റ്റ്യൻ വെട്ടുകല്ലേൽ ഉദ്ഘാടനം ചെയ്യും. രൂപത സെക്രട്ടറി ജോൺസൺ ചെറുവള്ളി, യൂണിറ്റ് പ്രസിഡന്‍റ് ബെന്നി വെട്ടത്തേൽ തുടങ്ങിയവർ പ്രസംഗി ക്കും.

തീക്കോയിയിൽ തീ പാറും

തീക്കോയി ഗ്രാമപഞ്ചായത്ത് വീണ്ടുമൊരു തദ്ദേശ തെരഞ്ഞെടുപ്പ് ചൂടിലേക്ക് എത്തുന്പോൾ തീക്കോയിയിലെ വികസന നേട്ടങ്ങളും കോട്ടങ്ങളും ഭരണപക്ഷവും പ്രതിപക്ഷവും പങ്കുവയ്ക്കുന്നു. തീക്കോയി പഞ്ചായത്ത് 1962 ജനുവരി ഒന്നിന് രൂപീകൃതമായ തീക്കോയി പഞ്ചായത്ത് കഴിഞ്ഞ 25 വർഷമായി തുടർച്ചയായി യുഡിഎഫ് ഭരണത്തിലാണ്. വിനോദസഞ്ചാരകേന്ദ്രങ്ങളായ മാർമല അരുവി, കാരികാട് ടോപ്പ് തുടങ്ങിയവ സ്ഥിതി ചെയ്യുന്നത് ഈ പഞ്ചായത്തിലാണ്. തീക്കോയി പഞ്ചായത്തിൽ 13 വാർഡുകളാണ് നിലവിലുള്ളത്. വാർഡ് വിഭജനം വരുമ്പോൾ 14 വാർഡുകളാകും. കോൺഗ്രസിലെ കെ.സി. ജെയിംസാണ് പ്രസിഡന്‍റ്. പഞ്ചായത്തിലാകെ വികസനമെത്തിച്ചു കെ.സി. ജെയിംസ് (പ്രസിഡന്‍റ്) തീക്കോയി പഞ്ചായത്തിലെ എല്ലാ ഗ്രാമീണ റോഡുകളും ഗതാഗത യോഗ്യമാക്കുകയും എല്ലാ ഭവനങ്ങളിലും ജലനിധി പ്രകാരം കുടിവെള്ളമെത്തിക്കുകയും ചെയ്തു. മുഴുവൻ പൊതുവഴികളിൽ വഴിവിളക്കുകളും പ്രധാന ജംഗ്ഷനുകളിൽ ഉയരവിളക്കുകളും സ്ഥാപിച്ചു. സമ്പൂർണ ഭവനപദ്ധതി നടപ്പിലാക്കി. പഞ്ചായത്ത് കാര്യാലയവും 14 അങ്കണവാടികളും നവീകരിച്ചു. പട്ടികജാതി-വർഗ വിഭാഗങ്ങൾക്കുള്ള ക്ഷേമ പദ്ധതികൾ നടപ്പിലാക്കി. പഞ്ചായത്തിലെ പ്രധാന വിനോദസഞ്ചാര കേന്ദ്രമായ മാർമല അരുവിയിൽ സുരക്ഷാ ജീവനക്കാരെ നിയമിക്കുകയും അടിസ്ഥാന സൗകര്യങ്ങൾ ഏർപ്പെടുത്തുകയും ചെയ്തു. പൊതുസ്ഥലത്ത് മാലിന്യം വലിച്ചെറിയുന്നവരെ കണ്ടെത്തുന്നതിനായി 17 സ്ഥലങ്ങളിൽ സോളാർ നിരീക്ഷണ കാമറകൾ സ്ഥാപിച്ചു. പ്രാഥമിക ആരോഗ്യ കേന്ദ്രത്തെ കുടുംബാരോഗ്യ കേന്ദ്രമാക്കി ഉയർത്തുകയും 80 ലക്ഷം രൂപ മുടക്കി ടൗണിൽ പുതിയ കെട്ടിടം നിർമിക്കുകയും ചെയ്തു. ഒറ്റയീട്ടി, കല്ലം സബ് സെന്‍ററുകൾക്ക് സ്ഥലം കണ്ടെത്തുകയും പുതിയ കെട്ടിടം നിർമിക്കുന്നതിന് തുക അനുവദിക്കുകയും ചെയ്തു. ആയുർവേദ ഹോമിയോ ആശുപത്രികൾ നവീകരിച്ചു. കുടുംബശ്രീ പ്രസ്ഥാനത്തെ ശക്തിപ്പെടുത്തി. കഴിഞ്ഞ അഞ്ചു വർഷത്തിനുള്ളിൽ ഒന്നേകാൽ കോടിയുടെ കാർഷിക വികസന പദ്ധതികൾ നടപ്പിലാക്കി. കെടുകാര്യസ്ഥതയുടെ അഞ്ച് വർഷം സിബി രഘുനാഥൻ (പ്രതിപക്ഷ നേതാവ്) തീക്കോയി പഞ്ചായത്തിലെ യുഡിഎഫ് ഭരണസമിതിയുടെ കെടുകാര്യസ്ഥത മൂലം മെയിന്‍റനൻസ് ഗ്രാൻഡ് ആയി സർക്കാർ നൽകിയ 80 ലക്ഷം രൂപ നഷ്ടപ്പെടുത്തി. പഞ്ചായത്തിലെ വിനോദസഞ്ചാരവുമായി ബന്ധപ്പെട്ട ഒരു സാധ്യതയും പ്രയോജനപ്പെടുത്താൻ ഭരണസമിതിക്ക് സാധിച്ചിട്ടില്ലെന്ന് മാത്രമല്ല അടുത്ത ദിവസംവരെ വിനോദസഞ്ചാരവുമായി ബന്ധപ്പെട്ട പ്രദേശങ്ങൾ മാലിന്യം നിറഞ്ഞുകിടക്കുന്ന സാഹചര്യമായിരുന്നു. ആയിരക്കണക്കിന് വിനോദസഞ്ചാരികൾ കടന്നുവരുന്ന പഞ്ചായത്ത് പ്രദേശത്ത് ഒരു ശൗചാലയ സൗകര്യം ഒരുക്കുവാൻ ഭരണസമിതിക്ക് കഴിഞ്ഞില്ല. മാലിന്യനിർമാർജനത്തിനായി ലക്ഷങ്ങൾ മുടക്കി സ്ഥാപിച്ച പ്ലാസ്റ്റിക് ഷെഡിംഗ് യൂണിറ്റും ജനറേറ്ററും തുരുമ്പെടുത്ത നശിക്കുകയാണ്. ഇതുവഴി 25 ലക്ഷം രൂപ നഷ്ടം വരുത്തി. സാമ്പത്തികമായി പിന്നാക്കം നിൽക്കുന്ന ജനറൽ വിഭാഗത്തിൽപെട്ട ഒരാൾക്ക് പോലും വീട് വാസയോഗ്യമാക്കി നൽകിയില്ല. പുതിയതായി 10 മീറ്റർ റോഡ് പോലും കഴിഞ്ഞ അഞ്ചുവർഷംകൊണ്ട് നിർമിച്ചിട്ടില്ല. കേന്ദ്ര, സംസ്ഥാന പദ്ധതികളും എംഎൽഎയുടെ വികസന പ്രവർത്തനങ്ങളും തന്‍റേതാണെന്ന് കാണിക്കുക മാത്രമാണ് പ്രസിഡന്‍റും ഭരണസമിതിയും ചെയ്തിട്ടുള്ളത്. കക്ഷിനില കോൺഗ്രസ് - ആറ്, സിപിഎം - രണ്ട്, സിപിഐ - ഒന്ന്, കേരള കോൺഗ്രസ് - ഒന്ന്, കേരള കോൺഗ്രസ് എം - ഒന്ന്, എസ്ഡിപിഐ സ്വതന്ത്രൻ - ഒന്ന്, സ്വതന്ത്രൻ - ഒന്ന്.

നൂറു മീറ്റർ ഓട്ട മത്സരത്തിലെ വിജയിയെ അഭിനന്ദിച്ചു

ചിറക്കടവ്: ജില്ല കായികമേളയിൽ 100 മീറ്റർ ഓട്ട മത്സരത്തിൽ ഒന്നാം സ്ഥാനം നേടിയ ചിറക്കടവ് സ്വദേശി എം.അരവിന്ദനെ യൂത്ത് ഫ്രണ്ട് - എം വീട്ടിലെത്തി അഭിനന്ദിച്ചു. സംസ്ഥാന കായികമേളയിൽ പങ്കെടുക്കുവാൻ അരവിന്ദന് സ്പെക്സ് സമ്മാനമായി നൽകുമെന്ന് യൂത്ത് ഫ്രണ്ട് കമ്മിറ്റി അറിയിച്ചു. ചീഫ് വിപ്പ് ഡോ.എൻ. ജയരാജ് ഉപഹാരം കൈമാറി. നിയോജകമണ്ഡലം പ്രസിഡന്‍റ് രാഹുൽ ബി. പിള്ള അധ്യക്ഷത വഹിച്ചു. ഷാജി പാമ്പൂരി, ഷാജി നല്ലേപറമ്പിൽ, ആന്‍റണി മാർട്ടിൻ, ശ്രീകാന്ത് എസ്. ബാബു, ഷൈല ജോൺ, ജെറി മനു, ആൻഡ്രൂ വി. സുമേഷ് എന്നിവർ പ്രസംഗിച്ചു.

കത്തോലിക്ക കോൺഗ്രസ് അവകാശ സംരക്ഷണയാത്രയ്ക്ക് സ്വീകരണം ഇന്ന്

കാഞ്ഞിരപ്പള്ളി: സമുദായ ശക്തീകരണം രാഷ്‌ട്രപുരോഗതിക്ക് എന്ന ലക്ഷ്യവുമായി വിവിധ ആവശ്യങ്ങൾ ഉന്നയിച്ച് കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ രാജീവ് കൊച്ചുപറമ്പിൽ നയിക്കുന്ന അവകാശ സംരക്ഷണ യാത്രയ്ക്ക് ഇന്ന് കാഞ്ഞിരപ്പള്ളി രൂപതയിൽ സ്വീകരണം നൽകും. രാവിലെ ഒന്പതിന് മുണ്ടക്കയം ബസ് സ്റ്റാൻഡ് മൈതാനിയിൽ നടക്കുന്ന സ്വീകരണ സമ്മേളനം മുണ്ടക്കയം വ്യാകുലമാതാ ഫൊറോന വികാരി റവ.ഡോ. ജെയിംസ് മുത്തനാട്ട് ഉദ്ഘാടനം ചെയ്യും. 11ന് കാഞ്ഞിരപ്പള്ളി പേട്ടക്കവലയ്ക്ക് സമീപത്തുനിന്ന് ആരംഭിക്കുന്ന റാലിയെ തുടർന്ന് കാഞ്ഞിരപ്പള്ളി പഴയപള്ളി മൈതാനിയിൽ നടക്കുന്ന സ്വീകരണ സമ്മേളനം രൂപതാധ്യക്ഷൻ മാർ ജോസ് പുളിക്കൽ ഉദ്ഘാടനം ചെയ്യും. രൂപത പ്രസിഡന്‍റ് ബേബി കണ്ടത്തിൽ അധ്യക്ഷത വഹിക്കും. വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ആമുഖസന്ദേശം നൽകും. ഡയറക്ടർ ഫാ. ഫിലിപ്പ് കവിയിൽ മുഖ്യപ്രഭാഷണം നടത്തും. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ യാത്രാ ലക്ഷ്യം വിശദീകരണം നടത്തും. രൂപത ഡയറക്ടർ ഫാ. ജസ്റ്റിൻ മതിയത്ത്, ഗ്ലോബൽ ഭാരവാഹികളായ ജോമി കൊച്ചുപറമ്പിൽ, ബെന്നി ആന്‍റണി, രാജേഷ് ജോൺ, ട്രീസ ലിസ് സെബാസ്റ്റ്യൻ, ടെസി ബിജു പാഴിയാങ്കൽ, രൂപത ഭാരവാഹികളായ ജോസഫ് പണ്ടാരക്കളം, ജോജോ തെക്കുംചേരിക്കുന്നേൽ, സണ്ണിക്കുട്ടി അഴകമ്പ്രയിൽ, ഫിലിപ്പ് പള്ളി വാതുക്കൽ, ബിജു ശൗര്യാംകുഴി, സിനി ജിബു നീറനാക്കുന്നേൽ, ഡെയ്സി ജോർജുകുട്ടി എന്നിവർ പ്രസംഗിക്കും.

ഭൂസർവേ ജോലികൾ അവസാന ഘട്ടത്തിൽ

എരുമേലി: ഹിൽമെന്‍റ് സെറ്റിൽമെന്‍റ് പ്രദേശത്തെ കുടുംബങ്ങൾക്ക് പട്ടയം നൽകുന്നതിന് എരുമേലി തെക്ക്‌, എരുമേലി വടക്ക്, കോരുത്തോട് വില്ലേജുകളിൽ ആരംഭിച്ച ഭൂസർവേ ജോലികൾ അവസാന ഘട്ടത്തിൽ. ഇനി എരുമേലി തെക്ക് വില്ലേജിലെ ഒന്പത്, 10 വാർഡുകളിലെ ഭൂമി സർവെ പൂർത്തിയാകാനുണ്ട്. ഈ വാർഡുകളിൽ നാളെ മുതൽ സർവേ തുടങ്ങുമെന്ന് സർവേ വിഭാഗം ലാൻഡ് അസൈൻമെന്‍റ് യൂണിറ്റ് സ്പെഷൽ തഹസീൽദാർ അറിയിച്ചു. അതിന് മുമ്പായി ഭൂമി ഉടമകളുടെ യോഗം വിളിച്ചു ചേർത്തിട്ടുണ്ട്. ഇന്ന് ഉച്ചകഴിഞ്ഞ് മൂന്നിന് കോയിക്കക്കാവ് ഫോറസ്റ്റ് സ്റ്റേഷന് സമീപത്താണ് യോഗം ചേരുക. സർവേ നടപടികൾക്ക് തുടക്കം കുറിച്ച എരുമേലി തെക്ക് വില്ലേജിൽ ഇരുമ്പൂന്നിക്കര ഭാഗത്ത് നാല് ബ്ലോക്കുകളിൽ ആദ്യം തന്നെ സർവേ പൂർത്തിയായിരുന്നു. തുടർന്ന് എരുമേലി വടക്ക് വില്ലേജിലും കോരുത്തോട് വില്ലേജിലുമായി 34 ബ്ലോക്കിലെ സർവേ പൂർത്തീകരിച്ചു. എരുമേലി വടക്ക് വില്ലേജ് പൂർണമായും സർവേ ചെയ്തു കഴിഞ്ഞു. എരുമേലി തെക്ക് വില്ലേജിലെ അവശേഷിക്കുന്ന പ്രദേശങ്ങളിൽ 22 മുതൽ സർവേ പുനരാരംഭിക്കാനുള്ള ഒരുക്കങ്ങൾ പൂർത്തിയായി. എരുമേലി പഞ്ചായത്ത് ഒന്പത്,10 വാർഡുകളിൽ വരുന്ന കോയിക്കകാവ്, ആശാൻ കോളനി പ്രദേശങ്ങളിലാണ് 22 മുതൽ സർവേ ആരംഭിക്കുക. ഇതുമായി ബന്ധപ്പെട്ട് സർവേ സംവിധാനങ്ങളെയും രീതികളെയും സംബന്ധിച്ച് ചർച്ച ചെയ്യുന്നതിനും ഭൂമി ഉടമകളുടെ സംശയങ്ങൾ ദൂരീകരിക്കുന്നതിനും നിർദേശങ്ങൾ നൽകുന്നതിനുമായാണ് വാർഡ് ഒന്പത്, 10ലെ കോയിക്കകാവ്, ആശാൻ കോളനി ഭാഗത്തുള്ള ഭൂമി ഉടമകളുടെ യോഗം വിളിച്ചു ചേർത്തിരിക്കുന്നത്. എരുമേലി വടക്ക്, എരുമേലി തെക്ക്, കോരുത്തോട് വില്ലേജുകളിൽ 1450 ഹെക്ടർ പ്രദേശത്തെ പതിനായിരത്തോളം കുടുംബങ്ങൾക്കാണ് പട്ടയം ലഭിക്കാനുള്ളത്. സെബാസ്റ്റ്യൻ കുളത്തുങ്കൽ എംഎൽഎ ഇടപെട്ട് അനുവദിപ്പിച്ച മുണ്ടക്കയം പുത്തൻചന്തയിലെ സ്പെഷൽ തഹസീൽദാർ ഓഫീസ് മുഖേനെ നാല് ടീമുകളായി 17 ഉദ്യോഗസ്ഥർ ഉൾപ്പെട്ട റവന്യു വിഭാഗം സ്പെഷൽ സർവേ സംഘത്തിന്‍റെ നേതൃത്വത്തിലാണ് സർവേ. 2020 ജൂൺ രണ്ടിലെ സർക്കാർ ഉത്തരവിലൂടെയാണ് ഈ പ്രദേശങ്ങളിൽ പട്ടയം അനുവദിക്കുന്നതിന് നടപടികൾ ആദ്യം തുടങ്ങിയത്. എന്നാൽ ഏഴായിരത്തോളം അപേക്ഷകൾ ലഭിച്ചിട്ടും തുടർ നടപടികളായില്ല. 2010ൽ വനാവകാശ രേഖ ലഭിച്ച ഈ വില്ലേജുകളിലെ ആദിവാസി കുടുംബങ്ങൾക്കും പട്ടയം ലഭിച്ചിരുന്നില്ല. പട്ടയം ഇല്ലാത്തതിനാൽ നിലവിൽ മൂന്നിരട്ടി നികുതിയാണ് ഭൂമി ഉടമകൾ നൽകിക്കൊണ്ടിരുന്നത്. പട്ടയം ലഭിക്കുന്നതോടെ ഇനിസാധാരണ നികുതിയാണ് ബാധകമാവുക. പട്ടയം ഇല്ലാത്തതിനാൽ അനധികൃത നിർമാണങ്ങളായാണ് പഞ്ചായത്ത്‌ നികുതി രജിസ്റ്റർ പ്രകാരം ഈ മേഖലകളിലെ നിർമാണങ്ങൾ കണക്കാക്കിയിരുന്നത്. കുടുംബങ്ങൾക്ക് ഭവന നിർമാണം ഉൾപ്പെടെ സർക്കാർ പദ്ധതി പ്രകാരമുള്ള ധനസഹായങ്ങൾ ലഭിക്കുന്നതിനും തടസം നേരിട്ടിരുന്നു. സ്ഥലങ്ങൾ വിൽക്കാനും ബാങ്ക് വായ്പ സ്വീകരിക്കാനുമൊക്കെ പട്ടയം ഇല്ലാത്തത് മൂലം സാധിച്ചിരുന്നില്ല.

പഞ്ചായത്തുകളിൽ വികസനസദസ്

കാഞ്ഞിരപ്പള്ളി: ചിറക്കടവ്, വാഴൂർ, മുണ്ടക്കയം പഞ്ചായത്തുകളിലെ വികസനസദസ് നടത്തി. പൊന്‍കുന്നം രാജേന്ദ്ര മൈതാനത്ത് നടന്ന ചിറക്കടവ് പഞ്ചായത്തിലെ വികസന സദസ് ചീഫ് വിപ്പ് ഡോ.എന്‍. ജയരാജ് ഉദ്ഘാടനം ചെയ്തു. പഞ്ചായത്തിന്‍റെ വികസനരേഖ ഡോ.എന്‍. ജയരാജ് പ്രകാശനം ചെയ്തു. പഞ്ചായത്ത് പ്രസിഡന്‍റ് സി.ആര്‍. ശ്രീകുമാര്‍ അധ്യക്ഷത വഹിച്ചു. സംസ്ഥാന സര്‍ക്കാരിന്‍റെ വികസന നേട്ടങ്ങള്‍ റിസോഴ്‌സ് പേഴ്‌സണ്‍ എം. ഷെമീമും പഞ്ചായത്ത് വികസനനേട്ടങ്ങള്‍ സെക്രട്ടറി എസ്. ചിത്രയും അവതരിപ്പിച്ചു. ജില്ലാ പഞ്ചായത്തംഗം ടി.എന്‍. ഗിരീഷ് കുമാര്‍, ബ്ലോക്ക് പഞ്ചായത്തംഗങ്ങളായ മിനി സേതുനാഥ്, ബി. രവീന്ദ്രന്‍ നായര്‍, ഷാജി പാമ്പൂരി, പഞ്ചായത്ത് വൈസ് പ്രസിഡന്‍റ് സതി സുരേന്ദ്രന്‍, പഞ്ചായത്തംഗങ്ങളായ സുമേഷ് ആന്‍ഡ്രൂസ്, ആന്‍റണി മാര്‍ട്ടിന്‍, ടി.എന്‍. ശോഭന എന്നിവർ പ്രസംഗിച്ചു. വാഴൂര്‍ പഞ്ചായത്ത് കമ്മ്യൂണിറ്റി ഹാളില്‍ നടന്ന വികസന സദസിൽ പഞ്ചായത്ത് പ്രസിഡന്‍റ് തോമസ് വെട്ടുവേലില്‍ അധ്യക്ഷത വഹിച്ചു. പഞ്ചായത്ത് വികസനരേഖ ജില്ലാ പഞ്ചായത്തംഗം ടി.എന്‍. ഗിരീഷ് കുമാര്‍ പ്രകാശനം ചെയ്തു. സംസ്ഥാന സര്‍ക്കാരിന്‍റെ വികസനനേട്ടങ്ങള്‍ റിസോഴ്‌സ് പേഴ്‌സണ്‍ അരുണ്‍ പി. സുരേന്ദ്രനും പഞ്ചായത്തിന്‍റെ വികസന നേട്ടങ്ങള്‍ സെക്രട്ടറി എന്‍. സൗമ്യയും അവതരിപ്പിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, പഞ്ചായത്ത് വൈസ് പ്രസിഡന്‍റ് ഡി. സേതുലക്ഷ്മി, ബ്ലോക്ക് പഞ്ചായത്തംഗം പി.എം. ജോണ്‍, പഞ്ചായത്തംഗങ്ങള്‍ തുടങ്ങിയവര്‍ പ്രസംഗിച്ചു. മുണ്ടക്കയം പഞ്ചായത്തിലെ വികസനസദസ് സെബാസ്റ്റ്യന്‍ കുളത്തുങ്കല്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് രേഖാദാസ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് വികസനരേഖ പ്രകാശനം ചെയ്യുകയും മുഖ്യപ്രഭാഷണം നിര്‍വഹിക്കുകയും ചെയ്തു. സംസ്ഥാന സര്‍ക്കാരിന്‍റെ വികസനപ്രവര്‍ത്തനങ്ങള്‍ റിസോഴ്‌സ് പേഴ്‌സണ്‍ സുമേഷും പഞ്ചായത്തിന്‍റെ വികസന നേട്ടങ്ങള്‍ പഞ്ചായത്ത് സെക്രട്ടറി ഷാഹുല്‍ അഹ്‌മദും അവതരിപ്പിച്ചു. ജില്ലാ പഞ്ചായത്തംഗം പി.ആര്‍. അനുപമ, ബ്ലോക്ക് പഞ്ചായത്തംഗം പി.കെ. പ്രദീപ്, പഞ്ചായത്ത് വൈസ് പ്രസിഡന്‍റ് ഷീലാമ്മ ഡൊമിനിക്, പഞ്ചായത്തംഗങ്ങളായ സി.വി. അനില്‍കുമാര്‍, ഷിജി ഷാജി, സുലോചന സുരേഷ്, പി.എം. ഫൈസല്‍മോന്‍, പ്രസന്ന ഷിബു, ദിലീഷ് ദിവാകരന്‍, കെ.എം. സോമരാജന്‍, പി.എം. രാജേഷ്, ബിന്‍സി മാനുവല്‍, കെ.ടി. റേച്ചല്‍, അസിസ്റ്റന്‍് സെക്രട്ടറി എസ്. ഗംഗ എന്നിവര്‍ പ്രസംഗിച്ചു.

കച്ചകെട്ടി കാഞ്ഞിരപ്പള്ളി

കാഞ്ഞിരപ്പള്ളി ഗ്രാമപഞ്ചായത്ത് വീണ്ടുമൊരു തദ്ദേശ തെരഞ്ഞെടുപ്പ് ചൂടിലേക്ക് എത്തുന്പോൾ കാഞ്ഞിരപ്പള്ളിയിലെ വികസന നേട്ടങ്ങളും കോട്ടങ്ങളും ഭരണപക്ഷവും പ്രതിപക്ഷവും പങ്കുവയ്ക്കുന്നു. കാഞ്ഞിരപ്പള്ളി പഞ്ചായത്ത് മലയോര മേഖലയിലെ പ്രധാനപ്പെട്ട സ്ഥലമാണ് കാഞ്ഞിരപ്പള്ളി. 1958ലാണ് പഞ്ചായത്ത് രൂപീകൃതമായത്. കാഞ്ഞിരപ്പള്ളി താലൂക്കിൽ കാഞ്ഞിരപ്പള്ളി ബ്ലോക്കിൽ കാഞ്ഞിരപ്പള്ളി, കൂവപ്പള്ളി വില്ലേജുകൾ ഉൾപ്പെടുന്ന 52.47 ചതുരശ്ര കിലോമീറ്റർ വിസ്തീർണമുള്ള പഞ്ചായത്താണ് കാഞ്ഞിരപ്പള്ളി. 23 വാർഡുകളുള്ള പഞ്ചായത്തിൽ 10 വർഷമായി എൽഡിഎഫ് ആണ് ഭരിക്കുന്നത്. നേട്ടങ്ങൾ കെ.ആർ. തങ്കപ്പൻ (പഞ്ചായത്ത് പ്രസിഡന്‍റ്) എംഎൽഎയുടെ ആസ്തി വികസന ഫണ്ടിൽനിന്ന് മൂന്നരക്കോടി രൂപ മുടക്കി പഞ്ചായത്തിന് പുതിയ ഓഫീസ് കെട്ടിടം നിർമിച്ചു. ഡിസംബറിൽ ഓഫീസ് പ്രവർത്തനമാരംഭിക്കും. സഹൃദയ വായനശാലയ്ക്ക് പുതിയ കെട്ടിടം നിർമിച്ചു. ഡിസംബറിൽ പ്രവർത്തനമാരംഭിക്കും. കുടുംബശ്രീയുടെ ചുമതലയിൽ വഴിയോര വിശ്രമകേന്ദ്രം നിർമിച്ചു. കുട്ടികളുടെ പ്രാഥമിക വിദ്യാഭ്യാസത്തിനായി സ്മാർട്ട് അങ്കണവാടികൾ നിർമിച്ചു. അടിസ്ഥാന സൗകര്യങ്ങൾ ഒരുക്കി ഒരുകോടി മുടക്കി വിഴിക്കത്തോട് പിഎച്ച്സി നിർമിച്ച് പ്രവർത്തനാമാരംഭിച്ചു. കാളകെട്ടി പിഎച്ച്സിയുടെ പുതിയ കെട്ടിടത്തിന്‍റെ ഉദ്ഘാടനം 23ന് നടക്കും. പ്ലാസ്റ്റിക് ശേഖരിച്ച് മാലിന്യ സംസ്കരണം നടത്തിവരുന്നു. ഒരുകോടി രൂപ മുടക്കി എംഎസിഎഫ് നിർമാണം നടന്നു വരുന്നു. ഡിസംബറിൽ പൂർത്തിയാകും. ലൈഫ് ഭവന പദ്ധതി വഴി 18.20 കോടി രൂപ മുടക്കി 400 വീട് പൂർത്തീകരിച്ചു നൽകി. വിവിധ വാർഡുകളിൽ ഗ്രാമീണ റോഡുകളുടെ നവീകരണം നടത്തി. ജൽജീവൻ പദ്ധതിയുടെ സഹായത്തോടെ 9400 വീടുകളിൽ കുടിവെള്ളം എത്തിക്കുന്നതിനുള്ള നടപടികൾ ആരംഭിച്ചു. പകുതിയോളം വീടുകളിൽ കുടിവെള്ളം എത്തിച്ചു. വനിത വിപണന കേന്ദ്രത്തിൽ വനിതകൾക്കായി ഫിറ്റനസ് സെന്‍റർ ആരംഭിച്ചു. സംസ്കാരിക കേന്ദ്രങ്ങൾ നിർമിച്ചു. മേലരുവി, കരിന്പുകയം ടൂറിസം പദ്ധതികൾ ആരംഭിച്ചു. കോട്ടങ്ങൾ പി.എ. ഷെമീർ (പ്രതിപക്ഷ നേതാവ്). 4കാഞ്ഞിരപ്പള്ളി ടൗണിലെ ഗതാഗതക്കുരുക്കിന് ഒരു പരിധി വരെ പരിഹാരമാകുമായിരുന്ന മിനി ബൈപാസ് നിർമാണത്തിന് 10 വർഷത്തിനിടയിൽ ഒരു രൂപ പോലും അനുവദിക്കാതെ രാഷ്‌ട്രീയ പ്രേരിതമായി അട്ടിമറിച്ചു. പത്ത് വർഷം തുടർച്ചയായി അവസരം ലഭിച്ചിട്ടും യുവജനങ്ങൾക്കായിഒരു കളിക്കളം പോലും നിർമിക്കുന്നതിന് ഒരു നടപടിസ്വീകരിച്ചില്ല. മാലിന്യ നിർമാർജനത്തിന് ഒരു സംവിധാനവും ഒരുക്കിയിട്ടില്ല. കാഞ്ഞിരപ്പള്ളി ബസ് സ്റ്റാൻഡിലെ കംഫർട്ട് സ്റ്റേഷനിൽനിന്ന് ഒഴുകുന്ന മലിനജലം തോട്ടിലേക്ക് പോകുന്നത് തടയുന്നതിന് നാളിതുവരെ ഒരു നടപടിയും സ്വീകരിച്ചിട്ടില്ല. സഹൃദയ വായനശാലയ്ക്ക് ഭൂമി സൗജന്യമായി വിട്ടുനൽകിയ കെ.ജെ. തോമസ് കരിപ്പാപറമ്പിലിന്‍റെ പേര് വായനശാലയ്ക്ക് നൽകണമെന്ന കുടുംബക്കാരുടെയും പ്രതിപക്ഷത്തിന്‍റെയും ആവശ്യം ഇതുവരെ അംഗീകരിച്ചിട്ടില്ല. എംഎൽഎയുടെ ആസ്തിവികസനഫണ്ട് ഉപയോഗിച്ച് നിർമിച്ച പഞ്ചായത്ത് ഓഫീസ് നിർമാണം പണി പൂർത്തിയാകാതെ ഉദ്ഘാടനം ചെയ്ത് സ്വയം അപഹാസ്യരായി. സഹൃദയ വായനശാലയുടെ ഉദ്ഘാടനം കഴിഞ്ഞ് മാസങ്ങൾ പിന്നിട്ടിട്ടും ലൈബ്രറിയുടെ പ്രവർത്തനം പുതിയ കെട്ടിടത്തിലേക്ക് മാറ്റിയിട്ടില്ല. കക്ഷിനില സിപിഎം - 10, സിപിഐ - ഒന്ന്, കേരള കോൺഗ്രസ് (എം) - മൂന്ന്, കോൺഗ്രസ് - ആറ്, കേരള കോൺഗ്രസ് - ഒന്ന്, ബിജെപി - രണ്ട്.

മറുനാടൻ വാഴക്കുലകൾ സുലഭം; നാടന്് വിലയില്ല

മുണ്ടക്കയം: കുറഞ്ഞ വിലയ്ക്ക് മറുനാടൻ വാഴക്കുലകൾ വിപണി കീഴടക്കിയതോടെ കർഷക മാർക്കറ്റിൽ നിന്ന് ഉൽപ്പന്നങ്ങൾ വാങ്ങുവാൻ തയാറാകാതെ വ്യാപാരികൾ. സാധനം വിറ്റഴിക്കുവാൻ മാർഗം ഇല്ലാതെ കർഷകർ ദുരിതത്തിൽ. തമിഴ്നാട് മേട്ടുപ്പാളയത്തിൽ നിന്നു കുറഞ്ഞ നിരക്കിൽ വാഴക്കുലകൾ കേരളത്തിന്‍റെ വിവിധ ഭാഗങ്ങളിൽ എത്തിച്ച് നൽകുന്നതാണ് കേരളത്തിൽ ഉത്പാദിപ്പിക്കുന്ന നാടൻ വാഴക്കുലകളുടെ വില ഗണ്യമായി കുറയുവാൻ കാരണം. വെജിറ്റബിൾ ആൻഡ് ഫ്രൂട്ട്സ് പ്രമോഷൻ കൗൺസിലിന് (വിഎഫ്പിസികെ) കീഴിൽ പ്രവർത്തിക്കുന്ന കർഷക മാർക്കറ്റുകളിലും കർഷക ഓപ്പൺ മാർക്കറ്റുകളിലും വാഴക്കുലകൾ കെട്ടിക്കിടക്കുകയാണ്. 60 രൂപ വിലയുണ്ടായിരുന്ന ഏത്തക്കായ്ക്ക് ഇപ്പോൾ 30 മുതൽ 36 രൂപ വരെയാണ് ലഭിക്കുന്നത്. 80 രൂപ വിലയുണ്ടായിരുന്ന ഞാലിപ്പൂവന് ഇപ്പോൾ 20 മുതൽ 30 രൂപ വരെ മാത്രമാണ് കർഷകന് ലഭിക്കുന്നത്. പാളയംകോടനും റോബസ്റ്റയും വാങ്ങുവാൻ പോലും വ്യാപാരികൾ തയാറാകുന്നില്ല. കഴിഞ്ഞ ദിവസം മുണ്ടക്കയം ചോറ്റിയിൽ പ്രവർത്തിക്കുന്ന വിഎഫ്പിസികെയുടെ മാർക്കറ്റിൽ എത്തിച്ച വാഴക്കുലകൾ വാങ്ങുവാൻ വ്യാപാരികൾ ഇല്ലാത്തത് മൂലം കർഷകർക്ക് തിരികെ കൊണ്ടുപോകേണ്ടി വന്നിരുന്നു. കോട്ടയം ജില്ലയിലെ ഒട്ടുമിക്ക മാർക്കറ്റുകളിൽ നിന്നും വ്യാപാരികൾ ഇപ്പോൾ വാഴക്കുലകൾ ശേഖരിക്കുന്നില്ല. കുറഞ്ഞ വിലയ്ക്ക് തമിഴ്നാട്ടിൽ നിന്നും വാഴക്കുലകൾ എത്തിച്ചു നൽകും എന്നതാണ് ഇതിന് പ്രധാന കാരണം. ഇതോടെ മലയോര മേഖലയിലെ കർഷകർ കടുത്ത ദുരിതത്തിലായി. സ്ഥലം പാട്ടത്തിനെടുത്തും വലിയ തുക മുതൽമുടക്കിയും പ്രതികൂല കാലാവസ്ഥയെ അതിജീവിച്ചുമെല്ലാം വിപണിയിൽ കാർഷിക ഉൽപ്പന്നങ്ങൾ എത്തിക്കുമ്പോൾ ന്യായവില പോലും ലഭിക്കാത്തത് പലരെയും കൃഷിയിൽ നിന്ന് പിന്തിരിപ്പിക്കുകയാണ്. കാലാവസ്ഥയ്ക്ക് അനുസരിച്ച് മാത്രമാണ് കേരളത്തിൽ വാഴ കൃഷി ചെയ്യുന്നത്. എന്നാൽ തമിഴ്നാട്ടിൽ എല്ലാ സീസണിലും വാഴകൃഷി സുലഭമായി നടക്കും. അതുകൊണ്ടുതന്നെ വലിയതോതിൽ ഉത്പാദനം നടത്തി കേരള വിപണിയിൽ എത്തിച്ച് ഇവിടുത്തെ വില ഇടിക്കും. ഇതോടെ കർഷകർ കൃഷിയിൽ നിന്ന് പിന്മാറും. ഈ അവസരം മുതലെടുത്ത് വലിയ വിലയ്ക്ക് വീണ്ടും അന്യസംസ്ഥാനങ്ങളിൽ നിന്നു കേരളത്തിലേക്ക് വാഴക്കുലകൾ എത്തും. ഈ ചൂഷണം ഏറ്റവും കൂടുതൽ ബാധിക്കുന്നത് കർഷകരെയാണ്. വർഷങ്ങളായി ഈ പ്രതിഭാസം തുടരുന്നുണ്ടെങ്കിലും കേരളത്തിലെ കർഷകരുടെ ഉൽപ്പന്നങ്ങൾക്ക് ന്യായവില ഉറപ്പാക്കുവാൻ ബന്ധപ്പെട്ട അധികാരികൾ യാതൊരു നടപടിയും സ്വീകരിക്കുന്നില്ല. തങ്ങൾ ഉത്പാദിപ്പിക്കുന്ന കാർഷിക ഉൽപ്പന്നങ്ങൾക്ക് വിപണിയിൽ ന്യായവില ഉറപ്പാക്കുവാൻ സർക്കാർ നടപടി സ്വീകരിക്കണമെന്നാണ് കർഷകരുടെ ആവശ്യം.

അമ്മയ്ക്ക് പിന്നാലെ മകനും യാത്രയായി

പാലാ: അമ്മ മരിച്ച് മണിക്കൂറുകളുടെ ഇടവേളയില്‍ മകനും യാത്രയായി. ഇടപ്പാടി വാളിപ്ലാക്കല്‍ (പീടികയില്‍) പരേതനായ വി.ജെ. മാത്യുവിന്‍റെ ഭാര്യ മേരിക്കുട്ടി (86) ഇക്കഴിഞ്ഞ 18 ന് രാത്രി പത്തോടെയാണ് മരിച്ചത്. വാര്‍ദ്ധക്യസഹജമായ അസുഖങ്ങള്‍ ഉണ്ടായിരുന്നെങ്കിലും പെട്ടെന്നായിരുന്നു മരണം. ചൊവ്വാഴ്ച രാവിലെ 10 ന് മേരിക്കുട്ടിയുടെ സംസ്‌കാര ചടങ്ങുകള്‍ തീരുമാനിച്ചിരുന്നു. ഇതിനിടെയാണ് മകന്‍ ജോസ് മാത്യു (ബേബിച്ചന്‍ - 67) മരണപ്പെട്ടത്. ഹൃദ്രോഗ ബാധിതനായിരുന്നു. തുടര്‍ന്ന് ബന്ധുമിത്രാദികള്‍ ഇരുവരുടെയും സംസ്‌കാരം നാളെ രാവിലെ പത്തിന് വീട്ടിലെ ശുശ്രൂഷകള്‍ക്ക് ശേഷം ഭരണങ്ങാനം സെന്‍റ് മേരീസ് ഫൊറോന പള്ളിയില്‍ നടത്താന്‍ തീരുമാനിക്കുകയായിരുന്നു. മേരിക്കുട്ടി ചൂണ്ടച്ചേരി കോരംകോട്ട് കുടുംബാംഗമാണ്. മറ്റുമക്കള്‍: റോസമ്മ, ആന്‍സമ്മ, അവിരാച്ചന്‍, മാത്തുക്കുട്ടി, കുര്യച്ചന്‍, ജോയിമോന്‍. മരുമക്കള്‍: സാബു വാഴപള്ളി മറ്റക്കര, വിന്‍സെന്‍റ് വെട്ടുകല്ലും പുറത്ത് വാഴക്കുളം, റാണി പള്ളിക്കല്‍ പുല്ലുവഴി, മിനി കിടങ്ങത്താഴെ മണിയംകുന്ന്, റിന്‍സി ചെറ്റാലില്‍ ഭരണങ്ങാനം, സിമി പുത്തന്‍പുരയ്ക്കല്‍ തൃശൂര്‍. ജോസ് മാത്യുവിന്റെ (ബേബിച്ചന്‍) ഭാര്യ ജോളി ചെമ്പേരി കുര്യന്താനം കുടുംബാംഗം. മക്കള്‍ : ജോബിന്‍ ജോസ് (ന്യൂസിലാൻഡ്), ജോമി ജോസ് (യുകെ). മരുമക്കള്‍ : ഡോണിയ മംഗലശേരില്‍ ആയവന (ന്യൂസിലാൻഡ്), ആന്‍സ് കണിച്ചേരില്‍ കൈനകരി (യു‌കെ). ഇരുവരുടെയും മൃതദേഹങ്ങള്‍ ഇന്ന് വൈകുന്നേരം അഞ്ചിന് ഭവനത്തില്‍ കൊണ്ടുവരും.

കോട്ടയം അതിരൂപത ചെറുപുഷ്പ മിഷന്‍ലീഗിന്‍റെ ആഭിമുഖ്യത്തില്‍ ധന്യന്‍ മാര്‍ മാത്യു മാക്കില്‍ തീര്‍ഥാടന പദയാത്ര നടത്തി

കോട്ടയം: കോട്ടയം അതിരൂപത ചെറുപുഷ്പ മിഷന്‍ലീഗിന്‍റെ ആഭിമുഖ്യത്തില്‍ അതിരൂപതയിലെ വിവിധ മേഖലകളില്‍നിന്നായി ധന്യന്‍ മാര്‍ മാത്യു മാക്കില്‍ തീര്‍ഥാടന പദയാത്ര നടത്തി. മള്ളൂശേരി സെന്‍റ് തോമസ് ക്‌നാനായ പള്ളിയില്‍നിന്നും ആരംഭിച്ച യാത്ര കോട്ടയം അതിരൂപത വികാരി ജനറാള്‍ ഫാ. തോമസ് ആനിമൂട്ടില്‍ സന്ദേശം നല്‍കി ഫ്‌ളാഗ് ഓഫ് ചെയ്തു. മള്ളുശേരി പള്ളി വികാരി ഫാ. ബിജി പല്ലോന്നില്‍ ആമുഖസന്ദേശം നല്‍കി. കബറിടം സ്ഥിതിചെയ്യുന്ന ഇടയ്ക്കാട്ട് സെന്‍റ് ജോര്‍ജ് പള്ളിയിലെത്തിയ തീര്‍ഥാടകരെ ഫൊറോന വികാരി ഫാ. സൈമണ്‍ പുല്ലാട്ടിന്‍റെ നേതൃത്വത്തില്‍ സ്വീകരിച്ചു. ഇടയ്ക്കാട്ട് സെന്‍റ് ജോര്‍ജ് പള്ളിയിലെ ആശിര്‍വാദ പ്രാര്‍ഥനയ്ക്ക് കോട്ടയം അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരില്‍ കാര്‍മികത്വം വഹിച്ചു. തുടര്‍ന്നു പിതൃസമ്മാനം നറുക്കെടുപ്പ് സമ്മാന പദ്ധതിയുടെ ഉദ്ഘാടനം രാഷ്ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് നിര്‍വഹിച്ചു. ചെറുപുഷ്പ മിഷന്‍ ലീഗ് അതിരൂപത ഡയറക്ടര്‍ ഫാ. ജെഫിന്‍ ഒഴുങ്ങാലില്‍ നന്ദിയര്‍പ്പിച്ചു. വിവിധ ദൈവാലയങ്ങളില്‍നിന്നായി ആയിരത്തില്‍പ്പരം ചെറുപുഷ്പ മിഷന്‍ ലീഗ് അംഗങ്ങള്‍ പങ്കെടുത്തു.

മരങ്ങോലി സെന്‍റ് മേരീസ് പള്ളി ദീപിക വാര്‍ഷിക വരിസംഖ്യ പദ്ധതി

മരങ്ങോലി: സെന്‍റ് മേരീസ് പള്ളിയിലെ ദീപിക വാര്‍ഷിക വരിസംഖ്യ പദ്ധതിയുടെ ഉദ്ഘാടനം വികാരി റവ.ഡോ. ജോസഫ് പര്യാത്ത് ദീപിക പത്രം ബെന്നി കൊഴുപ്പന്‍കുറ്റിക്കു നല്‍കി നിര്‍വഹിക്കുന്നു. ദീപിക ജനറല്‍ മാനേജര്‍ (സർക്കുലേഷൻ) ഫാ. ജിനോ പുന്നമറ്റത്തില്‍, വാര്‍ഷിക വരിസംഖ്യ പദ്ധതിയില്‍ അംഗങ്ങളായ ബേബി ചെങ്ങന്താനം, ഫ്രാന്‍സിസ് കൊച്ചുമലയില്‍, മാത്യു ജോണ്‍ പുത്തന്‍പുരയില്‍, ജോസഫ് സ്‌കറിയ വേളകൊമ്പില്‍, ബേബി പട്ടര്‍കാലായില്‍, കെ.പി. ജോസഫ് കൊഴുപ്പന്‍കുറ്റി, ജോണ്‍സണ്‍ നാലാംകുഴി, ഫ്രാന്‍സീസ് ഊളവള്ളിക്കല്‍, പൗലോസ് കൊച്ചുപുരയ്ക്കല്‍ എന്നിവര്‍ സമീപം.

എൽഡിഎഫ് സർക്കാർ സമസ്ത മേഖലയിലും വികസന മുന്നേറ്റമുണ്ടാക്കിയെന്ന് മന്ത്രി റോഷി

തലയോലപ്പറമ്പ്: എൽഡിഎഫ് സർക്കാർ സമസ്ത മേഖലയിലും വികസന മുന്നേറ്റമുണ്ടാക്കിയതായി മന്ത്രി റോഷി അഗസ്റ്റിൻ. തലയോലപ്പറമ്പ് പഞ്ചായത്തിൽ ആധുനിക സൗകര്യങ്ങളോടുകൂടിയ എംസിഎഫ് നിർമാണത്തിന് ജലവിഭവ വകുപ്പിന്‍റെ ഉടമസ്ഥതയിലുള്ള വെട്ടിക്കാട്ടുമുക്കിലെ സ്ഥലത്തിൽനിന്ന് 50 സെന്‍റ് സ്ഥലം പഞ്ചായത്തിന് നൽകുന്നതിന്‍റെ പ്രഖ്യാപനവും ഫലക അനാച്ഛാദനവും നിർവഹിച്ചു പ്രസംഗിക്കുകയായിരുന്നു മന്ത്രി. സി.കെ. ആശ എംഎൽഎ അധ്യക്ഷത വഹിച്ചു. കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോൺസൺ കൊട്ടുകാപ്പള്ളി, ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തൻകാല, പഞ്ചായത്ത് പ്രസിഡന്‍റ് ഷിജി വിൻസന്‍റ്, തദ്ദേശ സ്വയംഭരണ വകുപ്പ് കോട്ടയം ജോയിന്‍റ് ഡയറക്ടർ ബിനുജോൺ, ബ്ലോക്ക് പഞ്ചായത്തംഗങ്ങളായ സെലിനാമ്മ ജോർജ്, ശ്രുതിദാസ്, തങ്കമ്മ വർഗീസ്, പഞ്ചായത്ത് വൈസ് പ്രസിഡന്‍റ് ലിസമ്മ ജോസഫ്, പഞ്ചായത്തംഗങ്ങളായ അനി ചെള്ളാങ്കൽ, എം.ടി. ജയമ്മ , അഞ്ജു എം. ഉണ്ണികൃഷ്ണൻ, ഡൊമിനിക് ചെറിയാൻ, പഞ്ചായത്ത് സെക്രട്ടറി ആർ. അമ്പിളി, ടി.കെ. ഗോപി തുടങ്ങിയവർ പ്രസംഗിച്ചു.

കോലത്താർ പാടശേഖരത്ത് നെൽവിത്ത് വിതരണം തുടങ്ങി

തലയോലപ്പറമ്പ്: തലയോലപ്പറമ്പ് കൃഷിഭവന്‍റെ പരിധിയിൽ വരുന്ന കോലത്താർ പാടശേഖരത്തിലെ 90 ഏക്കറിലെ പുഞ്ചകൃഷിക്കായി വിത്തുവിതരണം തുടങ്ങി. പഞ്ചായത്ത് കൃഷി ഭവനിൽനിന്ന് സൗജന്യമായി ലഭിച്ച ഉമ ഇനത്തിൽപ്പെട്ട നെൽവിത്തിന്‍റെ വിതരണം മുതിർന്ന കർഷകനായ വി.കെ. ശശിധരൻ വാളവേലിൽ നിർവഹിച്ചു. കോരിക്കൽ ജവഹർ സെന്‍റർ ഹാളിൽ നടന്ന യോഗത്തിൽ പാടശേഖര സമിതി പ്രസിഡന്‍റ് സാബുജോർജ് മംഗലത്ത് അധ്യക്ഷത വഹിച്ചു. കർഷകരും പാടശേഖര സമിതി ഭാരവാഹികളുമായ സി.ഡി. ദിനേശ് തയ്യിൽ, രാജു പി. വാര്യത്ത്, ഡി. കുമാരികരുണാകരൻ, കെ.എസ്. പുഷ്പരാജൻ കണ്ടത്തിൽ, സി.വി. വിനോദ്, കെ.എസ്. ബിജുകോരിക്കൽ, മനോഹരൻ ഇടയങ്കയിൽ, ആകാശ് രവീന്ദ്രൻ, പി.കെ. പ്രകാശൻ, കുമാരി നടേശൻ, മധു ബ്ലായിൽ എന്നിവർ പങ്കെടുത്തു.

വെള്ളൂരിലെ കുടിവെള്ള വിതരണം: ഓവർഹെഡ് ടാങ്ക് പൂർത്തിയാകുന്നതോടെ കാര്യക്ഷമമാകും: മന്ത്രി റോഷി അഗസ്റ്റിൻ

വൈക്കം: വെള്ളൂരിലെ കുടിവെള്ള വിതരണം കാര്യക്ഷമമാക്കാൻ മൂന്നുകോടി രൂപ വിനിയോഗിച്ച് ഓവർഹെഡ് ടാങ്ക് നിർമിക്കുന്നതിനുള്ള നടപടി പൂർത്തിയായി വരികയാണെന്ന് മന്ത്രി റോഷി അഗസ്റ്റിൻ. വെള്ളൂർ ഇറുമ്പയം, ഇറുമ്പയം ഇരിപ്പു, തോട്ടാറപുഞ്ച എന്നീ പാടശേഖരങ്ങളുടെ അടിസ്ഥാന സൗകര്യ വികസനത്തിനായി രണ്ടാം കുട്ടനാട് പാക്കേജിൽ ഉൾപ്പെടുത്തി അനുവദിച്ച 95 ലക്ഷം രൂപയുടെ മൂന്ന് പ്രവൃത്തികളുടെ നിർമാണോദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. സി.കെ. ആശ എംഎൽഎ അധ്യക്ഷത വഹിച്ചു. ഫ്രാൻസിസ് ജോർജ് എംപി മുഖ്യപ്രഭാഷണം നടത്തി. കെഡി ഡിവിഷൻ തണ്ണീർമുക്കം എക്സിക്യൂട്ടീവ് എൻജിനിയർ ആർ. അജയകുമാർ റിപ്പോർട്ട് അവതരിപ്പിച്ചു. കടുത്തുരുത്തി ബ്ലോക്ക് പഞ്ചായത്ത് വൈസ് പ്രസിഡന്‍റ് പി.കെ. സന്ധ്യ, വെള്ളൂർ പഞ്ചായത്ത് പ്രസിഡന്‍റ് കെ.എൻ. സോണിക, പഞ്ചായത്ത് വൈസ് പ്രസിഡന്‍റ് രാധാമണി മോഹനൻ, പഞ്ചായത്തംഗങ്ങളായ ലൂക്ക് മാത്യു, ആർ. നികിത കുമാർ, കുര്യാക്കോസ് തോട്ടത്തിൽ, കെ.എസ്. സച്ചിൻ, ജയഅനിൽ,ലിസി സണ്ണി, വി.കെ. മഹിളാമണി, കൃഷി ഓഫീസർ എ. അനില, പാടശേഖര ഭാരവാഹികളായ എം.കെ. ഹരിദാസ്, സുരേഷ് ശർമ, കെ.ആർ. ഷിബു, കെഡി ഡിവിഷൻ തണ്ണീർമുക്കം സബ് ഡിവിഷൻ അസിസ്റ്റന്‍റ് എക്സിക്യൂട്ടീവ് എൻജിനിയർ ബിന്ദു തുടങ്ങിയവർ പ്രസംഗിച്ചു. പാടശേഖരങ്ങളിൽ വെള്ളപ്പൊക്കം നിയന്ത്രിക്കാൻ പുറംബണ്ടുകൾ ഉയർത്തി ബലപ്പെടുത്തൽ, മോട്ടോർതറ, മോട്ടോർ ഷെഡ്, സ്ല്യൂയിസ്, പൈപ്പ് കൾവർട്ട്, ബോക്സ് കൾവർട്ട് തുടങ്ങിയവയാണ് നിർമിക്കുന്നത്.

ലഹരിക്കെതിരേ നടത്തിയ അഖിലകേരള ചെസ് ടൂർണമെന്‍റ് കുട്ടികളുടെ പങ്കാളിത്തത്താൽ ശ്രദ്ധേയമായി

തലയോലപ്പറമ്പ്: മദ്യത്തിനും മയക്കുമരുന്നിനും രാസലഹരിക്കുമെതിരേ കൗമാരക്കാരെ അണിനിരത്തുകയെന്ന ലക്ഷ്യത്തോടെ തലയോലപ്പറമ്പ് എസിഇടിടിയുടെ ആഭിമുഖ്യത്തിൽ സംഘടിപ്പിച്ച ഓൾ കേരള ചെസ് ടൂർണമെന്‍റിൽ മത്സരാർഥികളായി മാറ്റുരച്ചത് ആറു മുതൽ 86 വയസുവരെ പ്രായമുള്ളവർ. മത്സരം കുട്ടികളുടെ വലിയ പങ്കാളിത്തത്താൽ ശ്രദ്ധേയമായി. തമിഴ്നാട്ടിൽനിന്ന് നിരവധിപേർ മത്സരത്തിൽ പങ്കെടുക്കാനെത്തിയതും മത്സരത്തെ കൂടുതൽ ആകർഷകമാക്കി. തലയോലപ്പറമ്പ് വൈക്കം മുഹമ്മദ് ബഷീർ സ്മാരക സ്കൂൾ ഹാളിൽ നടന്ന ടൂർണമെന്‍റ് തലയോലപ്പറമ്പ് എസ്എച്ച്ഒ വിപിൻചന്ദ്രൻ ഉദ്ഘാടനം ചെയ്തു. കേരളത്തിലെ വിവിധ ജില്ലകളിൽനിന്നായി250ഓളം പേരാണ് മത്സരത്തിൽ പങ്കെടുത്തത്. വിജയികൾക്ക് ആകെ ഒരു ലക്ഷത്തോളം രൂപയാണ് സമ്മാനമായി നൽകിയത്. മത്സരത്തിൽ മുഹമ്മദ് റിജ, മുഹമ്മദ്ഫസൽ, എസ്. സനിൽ എന്നിവർ യഥാക്രമം ഒന്നും രണ്ടും മൂന്നും സ്ഥാനങ്ങളോടെ കാഷ് അവാർഡും ട്രോഫിയും കരസ്ഥമാക്കി. എസിഇടിടി ചെയർമാൻ വി.കെ. രമേശൻ, ജനറൽ കൺവീനർ ബിനുമോഹൻ, രക്ഷാധികാരി എം.ടി. തര്യച്ചൻ, ക്ലബ് പ്രസിഡന്‍റ് കെ.കെ. ഉണ്ണിക്കുട്ടൻ, ക്ലബ് സെക്രട്ടറി ബിജു പവിത്രൻ തുടങ്ങിയവർ നേതൃത്വം നൽകി.

കായികപ്രേമികളുടെ സ്വപ്നങ്ങൾക്ക് നിറം പകർന്ന് വെള്ളൂർ ഇറുമ്പയം പെരുന്തട്ട് ആധുനിക സ്റ്റേഡിയം

വെള്ളൂർ: വൈക്കത്തെ കായികപ്രേമികളുടെ കായിക സ്വപ്നങ്ങൾക്ക് നിറം പകർന്ന് വെള്ളൂർ ഇറുമ്പയം പെരുന്തട്ട് ആധുനിക സ്റ്റേഡിയത്തിന്‍റെ നിർമാണം അവസാന ഘട്ടത്തിൽ. സംസ്ഥാന സർക്കാർ ബജറ്റിൽ ഉൾപ്പെടുത്തി അനുവദിച്ച മൂന്നു കോടി രൂപ വിനിയോഗിച്ചാണ് വിവിധ കായിക മത്സരങ്ങൾ സംഘടിപ്പിക്കാവുന്ന വിധത്തിൽ ഒരേക്കറിലധികം സ്ഥലത്ത് സ്‌റ്റേഡിയം ഒരുക്കുന്നത്. സ്റ്റേഡിയത്തോടനുബന്ധിച്ചുള്ള ഇൻഡോർ സ്റ്റേഡിയത്തിന്‍റെ നിർമാണം പൂർത്തിയായി. ഫ്ലെഡ് ലൈറ്റ് സംവിധാനത്തോടുകൂടിയ സ്റ്റേഡിയത്തോട് ചേർന്ന് ഓപ്പൺ ജിമ്മും സജ്ജീകരിക്കുന്നുണ്ട്. കായികതാരങ്ങൾക്ക് വസ്ത്രംമാറാൻ ചേഞ്ചിംഗ് റൂം, ടൊയ്‌ലറ്റ് സൗകര്യം ‍എന്നിവ ഒരുക്കിയിട്ടുണ്ട്.29ന് കായിക വകുപ്പ് മന്ത്രി വി. അബ്ദുറഹിമാൻ സ്റ്റേഡിയം നാടിന് സമർപ്പിക്കും. സി.കെ. ആശ എംഎൽഎ നിർമാണ പ്രവർത്തനങ്ങൾ വിലയിരുത്തി. സ്റ്റേഡിയത്തിൻ്റെ ഉദ്ഘാടന സമ്മേളനത്തിന്‍റെ വിജയത്തിനായി പെരുന്തട്ട് കമ്യൂണിറ്റിഹാളിൽ നടന്ന സ്വാഗതസംഘം യോഗം സി.കെ.ആശ എംഎൽഎ ഉദ്ഘാടനം ചെയ്തു. എംഎൽഎ രക്ഷാധികാരിയായും പഞ്ചായത്ത് പ്രസിഡന്‍റ് കെ.എൻ. സോണിക ചെയർമാനും വാർഡ് മെംബർ കെ.എസ്. സച്ചിൻ കൺവീനറായും വിപുലമായ കമ്മിറ്റി രൂപീകരിച്ചു. പഞ്ചായത്ത് വൈസ് പ്രസിഡന്‍റ് രാധാമണി മോഹൻ, പഞ്ചായത്തംഗം ലൂക്ക് മാത്യു തുടങ്ങിയവർ പ്രസംഗിച്ചു.

മേല്‍പ്പാല നിര്‍മാണത്തിന് വഴിതെളിയുന്നു; പരാതിക്കാരുടെ ഹര്‍ജി തള്ളി സുപ്രീം കോടതി

കടുത്തുരുത്തി: നിയമക്കുരുക്കില്‍പ്പെട്ടും അധികൃതരുടെ മെല്ലെപ്പോക്കുംകൊണ്ട് നിര്‍മാണം തുടങ്ങാന്‍ കാലതാമസം നേരിട്ട കുറുപ്പന്തറ റെയില്‍വേ മേല്‍പ്പാലം നിര്‍മാണത്തിന് വീണ്ടും വഴിതെളിയുന്നു. മേൽപ്പാല നിര്‍മാണത്തിനു തടസവാദം ഉന്നയിച്ച് പ്രദേശവാസികളായ രണ്ടുപേര്‍ നല്‍കിയ ഹര്‍ജി സുപ്രീംകോടതി തള്ളിയതോടെയാണ് മേല്‍പാലം നിര്‍മാണത്തിനുള്ള തടസങ്ങള്‍ നീങ്ങിയത്. പ്രദേശവാസികളായ കെ.ജെ. ജയിംസ്, അലക്സ് തയ്യില്‍ എന്നിവര്‍ നല്‍കിയിരുന്ന ഹര്‍ജിയാണ് സുപ്രീംകോടതി തള്ളിയത്. പരാതിക്കാര്‍ ഹൈക്കോടതിയില്‍ നല്‍കിയിരുന്ന തടസഹര്‍ജി ഡിവിഷന്‍ ബെഞ്ച് ജൂണില്‍ തള്ളിയിരുന്നു. തുടര്‍ന്നാണ് ഇവര്‍ സുപ്രീം കോടതിയെ സമീപിച്ചത്. പരാതിക്കാരുടെ ഹര്‍ജി നിലനില്‍ക്കുന്നതല്ലെന്ന് ചൂണ്ടാക്കാട്ടിയാണ് സുപ്രീംകോടതിയിലെ ജസ്റ്റിസ് സഞ്ജയ് കരോള്‍, ജസ്റ്റിസ് പ്രശാന്ത് കുമാര്‍ മിശ്ര എന്നിവര്‍ ഹര്‍ജി നിരാകരിച്ചത്. ഹര്‍ജി തള്ളിയതോടെ റെയില്‍വേക്കും സര്‍ക്കാരിനും മേല്‍പ്പാലം നിര്‍മാണത്തിനുള്ള നടപടികളുമായി മുന്നോട്ടുപോകാം. തടസങ്ങളെല്ലാം നീങ്ങിയതോടെ ഉടന്‍ റെയില്‍വേ മേല്‍പ്പാലം നിര്‍മാണം തുടങ്ങണമെന്നാണ് നാട്ടുകാരുടെ ആവശ്യം. മേല്‍പ്പാലം പദ്ധതിയുടെ പിന്നിട്ട വഴി ആലപ്പുഴ- മധുര മിനി ഹൈവേയില്‍ കുറുപ്പന്തറയിലുള്ള റെയില്‍വേയുടെ ലവല്‍ ക്രോസില്‍ മേല്‍പ്പാലം നിര്‍മിക്കുന്നതിന് 2015-ലാണ് റെയില്‍വേ അംഗീകാരം നല്‍കിയത്. 2018-ലെ സംസ്ഥാന ബജറ്റിലാണ് പാലം നിര്‍മാണത്തിനുള്ള 30.56 കോടി രൂപ അനുവദിച്ചത്. റെയില്‍വേ ആവശ്യപ്പെട്ട പ്രകാരം ജിഎഡി (ജനറല്‍ അറേഞ്ച്‌മെന്‍റ് ഡ്രോയിംഗ് ഇന്‍ കണ്‍സ്ട്രക്ഷന്‍ ഏരിയ) സമര്‍പ്പിക്കുകയും, റെയില്‍വേ പദ്ധതി അംഗീകരിക്കുകയും ചെയ്തിരുന്നു. പൊന്നുംവില നടപടി അനുസരിച്ചു നോട്ടിഫിക്കേഷന്‍ പുറപ്പെടുവിച്ച് സര്‍വേ നടപടികള്‍ പൂര്‍ത്തീകരിച്ച് സ്ഥലവിലയും കെട്ടിടവില നിര്‍ണയവും നടത്തി. തുടര്‍ന്ന് രണ്ടുപേര്‍ കോടതിയില്‍ കേസ് ഫയല്‍ ചെയ്തു. ഇതേത്തുടര്‍ന്ന് റെയില്‍വേയോട് ഇനി ഒരു ഉത്തരവ് ഉണ്ടാകുന്നതു വരെ തുടര്‍നടപടികള്‍ സ്വീകരിക്കരുതെന്നു കോടതി നിര്‍ദേശിച്ചു. ഇതോടെ മേല്‍പാലം നിര്‍മാണത്തിന്‍റെ തുടര്‍നടപടികള്‍ നിലയ്ക്കുകയായിരുന്നു. ഇത് സുപ്രീംകോടതിവരെ നീണ്ടുപോകുകയായിരുന്നു. സര്‍ക്കാരിനും റെയില്‍വേക്കും ഒപ്പം മാഞ്ഞൂര്‍ വികസന സമിതിയും കേസില്‍ കകഷി ചേര്‍ന്നിരുന്നു. 2024 ഫെബ്രുവരിയില്‍ പ്രധാനമന്ത്രി നരേന്ദ്ര മോദി നിര്‍മാണോദ്ഘാടനം നിര്‍വഹിച്ച മേല്‍പാലങ്ങളുടെ കൂട്ടത്തില്‍ കുറുപ്പന്തറ മേല്‍പ്പാലവും ഉള്‍പ്പെട്ടിരുന്നു. കേസ് മൂലം നടപടികള്‍ നടക്കാതെ പോവുകയായിരുന്നു. ഭൂമിയേറ്റെടുക്കല്‍ ഉടന്‍ പൂര്‍ത്തിയാക്കും റെയില്‍വേ മേല്‍പാലം നിര്‍മാണത്തിന് ആവശ്യമായ ഭൂമി ഏറ്റെടുക്കല്‍ നടപടികള്‍ പൂര്‍ത്തിയാകുന്നു. മേല്‍പ്പാല നിര്‍മാണത്തിന്‍റെ ചുമതലയുള്ള കേരള റെയില്‍ ഡെവലപ്മെന്‍റ് കോർപറേഷൻ അധികൃതരും റവന്യു അധികൃതരും ഏറ്റെടുക്കേണ്ട സ്ഥലങ്ങള്‍ സന്ദര്‍ശിച്ചു പരിശോധന നടത്തി. മേല്‍പ്പാലത്തിന് ആവശ്യമായ മുഴുവന്‍ ഭൂമിയും ഒരാഴ്ചയ്ക്കുള്ളില്‍ ലഭ്യമാകുമെന്ന് അധികൃതര്‍ അറിയിച്ചു. ഒരു വക്തിയുടെ ഭൂമികൂടി ഏറ്റെടുക്കാനുണ്ട്. ഇത് ഈ ആഴ്ചതന്നെ ഏറ്റെടുക്കും. നിര്‍മാണത്തിന് തടസവാദം ഉന്നയിച്ച് രണ്ട് വ്യക്തികള്‍ നല്‍കിയ ഹർജി സുപ്രീംകോടതി തള്ളിയതോടെയാണ് സ്ഥലം ഏറ്റെടുപ്പു നടപടികള്‍ റവന്യു വകുപ്പ് വേഗത്തിലാക്കിയത്. കുറുപ്പന്തറയില്‍ റെയില്‍വേ മേല്‍പ്പാലം വേണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ട്. ഇരട്ടപ്പാത പൂര്‍ത്തിയായതോടെ സ്റ്റേഷനോട് ചേര്‍ന്നുള്ള കുറുപ്പന്തറ റെയില്‍വേ ക്രോസില്‍ നാല് ട്രാക്കുകളുണ്ട്. റെയില്‍വേ ക്രോസ് അടയ്ക്കുന്ന സമയത്ത് ഗതാഗതക്കുരുക്കും അപകടങ്ങളും പതിവാണ്.

സംസ്ഥാന മാസ്‌റ്റേഴ്‌സ് നീന്തല്‍ മത്സരം: അഞ്ച് ഇനങ്ങളില്‍ നേട്ടവുമായി എം.വി. ജോയി

കോട്ടയം: സംസ്ഥാന മാസ്‌റ്റേഴ്‌സ് നീന്തല്‍ മത്സരത്തില്‍ അഞ്ച് ഇനങ്ങളില്‍ മെഡല്‍ നേട്ടവുമായി അയ്മനം പോളക്കാട്ടില്‍ എം.വി. ജോയി(67). തിരുവല്ല ബിലീവേഴ്‌സ് റെസിഡന്‍ഷ്യല്‍ സ്‌കൂളില്‍ നടത്തപ്പെട്ട മത്സരത്തില്‍ മൂന്ന് സ്വര്‍ണവും രണ്ടു വെള്ളിയും നേടിയാണ് ജോയി നാടിന്‍റെ അഭിമാനമായത്. 50 മീറ്റര്‍ ഫ്രീ സ്റ്റൈലും 50 മീറ്റര്‍ ബ്രെസ്റ്റ് സ്‌ട്രോക്ക്, 4X50 മീറ്റര്‍ ഫ്രീ സ്റ്റൈല്‍ ബെല്ലിയിലുമാണ് സ്വര്‍ണം നേടിയത്. 100 മീറ്റര്‍ ഫ്രീ സ്റ്റൈലിലും 4X50 മീറ്റര്‍ മെഡെലി ബെല്ലിയിലുമാണ് വെള്ളി കരസ്ഥമാക്കിയത്. പഠനകാലത്ത് കേരള യൂണിവേഴ്‌സിറ്റി മെഡലിസ്റ്റായിരുന്നു എം.വി. ജോയി. മക്കളായ ജോണ്‍സി, ജോസ്‌ന, ജോസിയ എന്നിവര്‍ നീന്തലില്‍ ദേശീയ മെഡല്‍ സ്വന്തമാക്കിയിട്ടുണ്ട്. കൂടാതെ മൂന്നുപേരും 2003ല്‍ വേമ്പനാട് കായൽ രണ്ട് കിലോമീറ്റര്‍ നീന്തിക്കടന്നിരുന്നു. ഐക്കരച്ചിറ ഇടവകാംഗമാണ്.

കുട്ടിക്കര്‍ഷകരുടെ ജൈവകൃഷിക്ക് നൂറുമേനി

മറ്റക്കര: സെന്‍റ് ആന്‍റണീസ് എല്‍പി സ്‌കൂളിലെ കുട്ടിക്കര്‍ഷകര്‍ സ്‌കൂളിന്‍റെ പരിസരത്ത് ഒരേക്കറില്‍ ചെയ്ത ജൈവ കൃഷിത്തോട്ടവും പൂന്തോട്ടവും നാടിനു മാതൃകയാകുന്നു. സ്‌കൂളിലെ പ്രഥമാധ്യാപകനായ സജിമോന്‍ സാറിന്‍റെ സ്വപ്‌നസാഫല്യമാണ് കൃഷിത്തോട്ടം. അഞ്ചു വര്‍ഷം മുമ്പ് സ്‌കൂളില്‍ പ്രഥമാധ്യാപകനായി ചാര്‍ജെ‌ടുത്ത അകലക്കുന്നം പഞ്ചായത്തിലെ കാഞ്ഞിരമറ്റം നാഗമറ്റത്ത് സജിമോന്‍ ജോസഫിന് ഒറ്റ ആഗ്രഹമേ ഉണ്ടായിരുന്നുള്ളൂ, കുട്ടികള്‍ക്ക് കൊടുക്കുന്ന ഉച്ചഭക്ഷണം വിഷരഹിതമായ പച്ചക്കറികള്‍ ഉപയോഗിച്ച് ഉണ്ടാക്കുന്നതായിരിക്കണം. സ്‌കൂളിനോടു ചേര്‍ന്നുള്ള അല്പം സ്ഥലത്ത് ചെറിയ രീതിയില്‍ കൃഷി തുടങ്ങിയെങ്കിലും ആവശ്യത്തിന് തികഞ്ഞിരുന്നില്ല. ഇതു മനസിലാക്കിയ എഫ്സി കോണ്‍വെന്‍റിലെ മദര്‍ സുപ്പീരിയര്‍ സിസ്റ്റര്‍ സെലിന്‍ സ്‌കൂളിനോടു ചേര്‍ന്നുള്ള ഒരേക്കര്‍ സ്ഥലം കുട്ടികള്‍ക്ക് കൃഷിക്കായി വിട്ടുകൊടുക്കുകയായിരുന്നു. ഇപ്പോഴത്തെ മദര്‍ സുപ്പീരിയര്‍ സിസ്റ്റര്‍ ഷാലറ്റും ആവശ്യമായ സഹായങ്ങള്‍ ചെയ്തു. പാലാ രൂപത കോര്‍പറേറ്റ് എഡ്യുക്കേഷണല്‍ ഏജന്‍സിയും പാലാ സോഷ്യൽ വെല്‍ഫെയര്‍ സൊസൈറ്റിയും സംയുക്തമായി കുട്ടികളില്‍ കാര്‍ഷികാഭിരുചി വളര്‍ത്തുന്നതിനായി രൂപീകരിച്ച ഞങ്ങളും കൃഷിയിലേക്ക് എന്ന പദ്ധതിയും സ്‌കൂള്‍ ഏറ്റെടുത്തത് കൃഷി കൂടുതല്‍ വ്യാപിപ്പിക്കാന്‍ സഹായകരമായി. പാവല്‍, പടവലം, തക്കാളി, കോവല്‍, പയര്‍, കുക്കുമ്പര്‍, വെണ്ട, വഴുതന, വിവിധ തരം മുളകുകള്‍, വിവിധ തരം ചീരകള്‍, ചേന, വിവിധ തരം ചേമ്പുകള്‍, കാച്ചില്‍, മത്തന്‍, വെള്ളരി, കുമ്പളം, ഇവ കൂടാതെ വിവിധയിനം പപ്പായ, നാരകം തുടങ്ങിയവയും കൃഷി ചെയ്തുവരുന്നു. ഓരോ ദിവസത്തെയും കൃഷിപ്പണികള്‍ ചെയ്യാന്‍ കാര്‍ഷിക ക്ലബുകള്‍ രൂപീകരിച്ചിട്ടുണ്ട്. എല്ലാ ദിവസവും വൈകുന്നേരം സ്‌കൂള്‍ വിട്ടശേഷം കുട്ടികള്‍ വണ്ടി കാത്തിരിക്കുന്ന സമയമാണ് കൃഷിക്കായി ഉപയോഗിക്കുന്നത്. വളമിടുന്നതും, വെള്ളമൊഴിക്കുന്നതും, കീടങ്ങളെ തുരത്തുന്നതും കുട്ടികള്‍ തന്നെ. കുട്ടികള്‍ കൃഷിയിലേക്ക് ഇറങ്ങിയ ശേഷം വളരെയധികം മാറ്റങ്ങള്‍ അവരുടെ വൃക്തി ജീവിതത്തില്‍ വന്നതായി അധ്യാപകരും രക്ഷിതാക്കളും‍ പറയുന്നു. എഫ്സി കോണ്‍വെന്‍റില്‍നിന്നു ലഭിക്കുന്ന ചാണകവും സജിമോന്‍ സാർ സ്വന്തമായി വികസിപ്പിച്ച ജൈവ കന്പോസ്റ്റു സംവിധാനത്തില്‍നിന്നു ലഭിക്കുന്ന വളവുമാണ് ചെടികള്‍ക്കായി ഉപയോഗിക്കുന്നത്. പച്ചക്കറി കൃഷിയില്‍ നൂറുമേനി നേടിയതൊടെ മീന്‍ വളര്‍ത്തലും തേനീച്ചവളര്‍ത്തലും കോഴിവളര്‍ത്തലും കൂടി സ്‌കൂളില്‍ തുടങ്ങിയിട്ടുണ്ട്. കൃഷിയിൽ കുട്ടികളെ സഹായിക്കാന്‍ അധ്യാപകരായ ജോയല്‍ ബിജു, സിജാ ഷാജി, ജെ. ജോബി, നൈസി മോള്‍ ജോസഫ്, പിടിഎ പ്രസിഡന്‍റ് റ്റിസ് ജോസ് വയലുങ്കല്‍, എംപിടിഎ പ്രസിഡന്‍റ് അശ്വതി അനു, വാര്‍ഡ് മെംബര്‍ ജാന്‍സി ബാബു തുടങ്ങിയവര്‍ എപ്പോഴുമുണ്ട്. അകലക്കുന്നം കൃഷിഭവനും കൃഷി ഓഫീസര്‍ ഡോ. രേവതി ചന്ദ്രന്‍റെ നേതൃത്വത്തിൽ കൃഷിക്ക് എല്ലാ സഹായവും നൽകുന്നു.

ഉമ്മന്‍ ചാണ്ടി മെമ്മോറിയല്‍ എവറോളിംഗ് ട്രോഫി അനാച്ഛാദനം ചെയ്തു

കോട്ടയം: ശ്രീചിത്തിര കേരളാ സ്റ്റേറ്റ് റാങ്കിംഗ് പുരുഷ ഡബിള്‍സ് ടെന്നീസ് ടൂര്‍ണമെന്‍റ് വിജയികള്‍ക്കുള്ള ഉമ്മന്‍ ചാണ്ടി മെമ്മോറിയല്‍ എവറോളിംഗ് ട്രോഫിയുടെ അനാച്ഛാദനം കോട്ടയം പ്രസ് ക്ലബില്‍ ചാണ്ടി ഉമ്മന്‍ എംഎല്‍എ നിര്‍വഹിച്ചു. തു ടർന്ന് ട്രോഫി കേരള ടെന്നീസ് അസോസിയേഷനു കൈമാറി. ഉമ്മന്‍ ചാണ്ടി ടെന്നീസിനു നല്‍കിയ സംഭാവനകളുടെ സ്മരണ‍ നിലനിര്‍ത്തുന്നതിനാണ് ശ്രീചിത്തിര ടെന്നീസ് ടൂര്‍ണമെന്‍റിന് ട്രോഫി നല്‍കിയതെന്നു ഭാരവാഹികള്‍ വ്യക്തമാക്കി. ഉമ്മന്‍ ചാണ്ടി ഫൗണ്ടേഷന്‍ ചെയര്‍മാന്‍ ചാണ്ടി ഉമ്മന്‍ എംഎല്‍എ, മന്ന ചാരിറ്റബിള്‍ ട്രസ്റ്റ് ട്രസ്റ്റി മറിയാമ്മ ഉമ്മന്‍, മാനേജിംഗ് ട്രസ്റ്റി ഡോ. മറിയ ഉമ്മന്‍, കേരളാ ടെന്നീസ് അസോസിയേഷന്‍ മുന്‍ പ്രസിഡന്‍റ് ജേക്കബ് കള്ളിവയലില്‍, തിരുവനന്തപുരം ജില്ലാ ടെന്നീസ് അസോസിയേഷന്‍ പ്രസിഡന്‍റ് എസ്.എന്‍. രഘുചന്ദ്രന്‍, എഫിനോവ ഉമ്മന്‍ റിച്ചി തുടങ്ങിയവര്‍ പങ്കെടുത്തു.

ചെത്തിപ്പുഴ ആശുപത്രിയില്‍ രാജ്യാന്തര സമ്മേളനം തുടങ്ങി

ചങ്ങനാശേരി: എംജി സര്‍വകലാശാലയിലെ ഡോ.എന്‍. രാധാകൃഷ്ണന്‍ ഇന്‍റര്‍നാഷനല്‍ സെന്‍റര്‍ ഫോര്‍ മെഡിക്കല്‍ ഇന്നൊവേഷന്‍റെ നേതൃത്വത്തില്‍ ചെത്തിപ്പുഴ സെന്‍റ് തോമസ് ആശുപത്രിയില്‍ ആരംഭിച്ച "റിഥം -2025’ രാജ്യാന്തര സമ്മേളനം എംജി സര്‍വകലാശാല വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ ഉദ്ഘാടനം ചെയ്തു. ആശുപത്രി എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിച്ചു. കോട്ടയം മെഡിക്കല്‍ കോളജ് ആശുപത്രി പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ് മുഖ്യപ്രഭാഷണം നടത്തി. ജോബ് മൈക്കിള്‍ എംഎല്‍എ, സെന്‍റ് തോമസ് ആശുപത്രി മാനേജര്‍ മോണ്‍. ജോണ്‍ തെക്കേക്കര, അസോസിയേറ്റ് ഡയറക്ടര്‍ ഫാ. ജോഷി മുപ്പതില്‍ചിറ, എന്‍ആര്‍ഐസിഎംഐ ചെയര്‍മാനും സെന്‍റ് തോമസ് ഇന്‍സ്റ്റിറ്റ്യൂട്ട് ഓഫ് റിസര്‍ച്ച് ഓണ്‍ വീനസ് ഡിസീസ് മെഡിക്കല്‍ ഡയറക്ടറുമായ ഡോ. എന്‍. രാധാകൃഷ്ണന്‍, സെന്‍റ് തോമസ് ആശുപത്രി കാര്‍ഡിയോളജി വിഭാഗം ഡോ. അബ്ദുല്‍ ഖാദര്‍, മാര്‍ അത്തനാസിയോസ് കോളജ് ഫോര്‍ അഡ്വാന്‍സ് സ്റ്റഡീസ് മുൻ പ്രിന്‍സിപ്പല്‍ ഫാ. ഏബ്രഹാം മുളമൂട്ടില്‍, പുഷ്പഗിരി മെഡിക്കല്‍ കോളജ് ജനറല്‍ സര്‍ജറി വിഭാഗം പ്രഫ. റോബിന്‍സണ്‍ പി. ജോര്‍ജ്, ഡോ. സി. ചന്ദന എന്നിവര്‍ പ്രസംഗിച്ചു.

അയര്‍ക്കുന്നത്ത് വീട് കുത്തിത്തുറന്ന് 12 പവനും 28,000 രൂപയും മോഷ്ടിച്ചു

അയര്‍ക്കുന്നം: അയര്‍ക്കുന്നത്തിനു സമീപം കല്ലിട്ടനടയില്‍ വീട് കുത്തിത്തുറന്ന് 12 പവന്‍ സ്വര്‍ണാഭരണങ്ങളും 28,000 രൂപയും മോഷ്‌ടിച്ചു. കല്ലിട്ടനട കൊങ്ങാണ്ടൂര്‍ പോളക്കല്‍ ബെന്നി ചാക്കോയുടെ വീടിന്‍റെ പിന്‍ഭാഗത്തെ കതക് തകര്‍ത്താണ് മോഷ്ടാക്കള്‍ അകത്തുകയറിയത്. ഇന്നലെ രാവിലെ 6.30നു ബെന്നിയും ഭാര്യയും പള്ളിയില്‍ പോയ സമയത്തായിരുന്നു മോഷണം. സ്വകാര്യ ആശുപത്രിയില്‍ നഴ്‌സായി ജോലി ചെയ്യുന്ന മകള്‍ നൈറ്റ് ഡ്യൂട്ടി കഴിഞ്ഞ് രാവിലെ 8.30നു തിരിച്ചെത്തിയപ്പോഴാണ് മോഷണവിവരം പുറത്തറിയുന്നത്. വീടിന്‍റെ ഇരുനിലകളിലുമുണ്ടായിരുന്ന അലമാരകള്‍ കുത്തിത്തുറന്നു സാധനങ്ങള്‍ വാരിവലിച്ചിട്ട നിലയിലായിരുന്നു. അയര്‍ക്കുന്നം പോലീസ് സ്ഥലത്തത്തി അന്വേഷണം ആരംഭിച്ചു. വിരലടയാള വിദഗ്ധരും, ഡോഗ് സ്‌ക്വാഡും സ്ഥലത്തെത്തി പരിശോധന നടത്തി.

കത്തോലിക്ക കോൺഗ്രസ് : അവകാശ സംരക്ഷണ യാത്രയ്ക്ക് ബുധനാഴ്ച ഏറ്റുമാനൂരിൽ വരവേല്പ്

ഏറ്റുമാനൂർ: കത്തോലിക്ക കോൺഗ്രസ് ഗ്ലോബൽ സമിതിയുടെ നേതൃത്വത്തിൽ 13 ന് കാസർഗോടുനിന്ന് ആരംഭിച്ച അവകാശ സംരക്ഷണ ജാഥയ്ക്ക് ബുധനാഴ്ച ഏറ്റുമാനൂരിൽ ഉജ്വല വരവേല്പ് നൽകും. രാവിലെ 8.45ന് സെൻട്രൽ ജംഗ്ഷനിൽ ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിലിന്‍റെ നേതൃത്വത്തിൽ എത്തിച്ചേരുന്ന യാത്രയെ കുരിശുപള്ളി കവലയിലേക്ക് സ്വീകരിച്ചാനയിക്കും. സ്വീകരണത്തിന്‍റെ ഒരുക്കങ്ങൾ വിലയിരുത്തുന്നതിനായി കത്തോലിക്ക കോൺഗ്രസ് അതിരമ്പുഴ ഫൊറോനാ പ്രസിഡൻ്റ് ജോയി പാറപ്പുറത്തിന്‍റെ അധ്യക്ഷതയിൽ ഏറ്റുമാനൂർ ക്രിസ്തുരാജ പള്ളിയിൽ യോഗം ചേർന്നു. ഫൊറോനാ ഡയറക്ടർ ഫാ. ജോസഫ് ആലുങ്കൽ ഉദ്ഘാടനം ചെയ്തു. തോമസ് പീടിയേക്കൽ, സെബാസ്റ്റ്യൻ പുല്ലാട്ടുകാല, ജോബി ചൂരക്കുളം, റോബിൻ ആലഞ്ചേരി മാനാട്ട്, ഡോ.കെ.സി. ജോർജ്, ബിൻസി കുഴിന്തൊട്ടിയിൽ, ലൂസി പാറശേരി, ജോയി കാരിക്കൊമ്പിൽ, സണ്ണി വട്ടക്കാട്ടിൽ, സാബു പുല്ലുകാലായിൽ എന്നിവർ പ്രസംഗിച്ചു. ചങ്ങനാശേരി അതിരൂപതയിലെ അതിരമ്പുഴ, കോട്ടയം അതിരൂപതയിലെ കൈപ്പുഴ ഫൊറോനകളിലെ 24 ഇടവകകളിൽനിന്ന് മൂവായിരം പ്രതിനിധികൾ സ്വീകരണ സംഗമത്തിൽ പങ്കെടുക്കും.

മാന്നാനം ബൈബിൾ കൺവൻഷൻ പന്തലിന് കാൽനാട്ടി

മാന്നാനം: സെന്‍റ് ജോസഫ്സ് ആശ്രമ ദേവാലയത്തിൽ നവംബർ 19 മുതൽ 25 വരെ അട്ടപ്പാടി സെഹിയോൻ ധ്യാനകേന്ദ്രം ഡയറക്ടർ ഫാ. സേവ്യർ ഖാൻ വട്ടായിലിന്‍റെയും ഫാ. സാംസൺ ക്രിസ്റ്റി മണ്ണൂരിന്‍റെയും നേതൃത്വത്തിൽ നടക്കുന്ന ബൈബിൾ കൺവൻഷനായുള്ള പന്തലിന്‍റെ കാൽനാട്ടുകർമം എംഎസ്ടി കോൺഗ്രിഗേഷന്‍റെ ഡയറക്ടർ ജനറൽ റവ.ഡോ. വിൻസന്‍റ് കദളിക്കാട്ടിൽ പുത്തൻപുര നിർവഹിച്ചു. മാന്നാനം ആശ്രമം പ്രിയോർ റവ.ഡോ. കുര്യൻ ചാലങ്ങാടി, തീർഥാടന കേന്ദ്രം അസിസ്റ്റന്‍റ് ഡയറക്ടർ ഫാ. റെന്നി കളത്തിൽ, കൺവൻഷൻ കമ്മിറ്റി ചെയർമാൻ ബ്രദർ മാർട്ടിൻ പെരുമാലിൽ തുടങ്ങിയവർ സന്നിഹിതരായിരുന്നു. കൺവൻഷനു മുന്നോടിയായുള്ള ആദ്യത്തെ ഒരുക്കധ്യാനം നടത്തി. നാഗമ്പടം സെന്‍റ് ആന്‍റണീസ് തീർഥാടന കേന്ദ്രം ഡയറക്ടർ മോൺ. സെബാസ്റ്റ്യൻ പൂവത്തിങ്കൽ ധ്യാനം നയിച്ചു.

കെസിവൈഎല്‍ ലീഡര്‍ഷിപ്പ് ക്യാമ്പ് ആരംഭിച്ചു

കോട്ടയം: ക്നാനായ കാത്തലിക് യൂത്ത് ലീഗിന്‍റെ 2024-25 പ്രവര്‍ത്തന വര്‍ഷത്തെ രണ്ടാമത് ലീഡര്‍ഷിപ്പ് ക്യാമ്പ് കോട്ടയം അതിരൂപതാ സഹായമെത്രാന്‍ മാര്‍ ജോസഫ് പണ്ടാരശേരില്‍ ഉദ്ഘാടനം ചെയ്തു. നേതൃവാസനയുള്ള സമൂഹമാണ് ക്‌നാനായ സമുദായമെന്നും ക്‌നായിത്തോമ ഉള്‍പ്പെടെയുള്ള നേതൃത്വത്തിന്‍റെ ഗുണങ്ങള്‍ സ്വായത്തമാക്കാന്‍ യുവാക്കള്‍ക്ക് സാധിക്കണമെന്നും മാര്‍ ജോസഫ് പണ്ടാരശേരില്‍ പറഞ്ഞു. അതിരൂപത പ്രസിഡന്‍റ് ജോണീസ് പി. സ്റ്റീഫന്‍ പാണ്ടിയാംകുന്നേല്‍ അധ്യക്ഷത വഹിച്ചു. അതിരൂപത ചാപ്ലെയിന്‍ ഫാ. മാത്തുക്കുട്ടി കുളക്കാട്ടുകുടിയില്‍ ആമുഖസന്ദേശം നല്‍കി. ചൈതന്യ പാസ്റ്ററല്‍ സെന്‍റര്‍ ഡയറക്‌ടര്‍ ഫാ. സുനില്‍ പെരുമാനൂര്‍ മുഖ്യപ്രഭാഷണം നടത്തി. കെസിഡബ്‌ള്യുഎ അതിരൂപത സെക്രട്ടറി സില്‍ജി സജി എന്നിവര്‍ പ്രസംഗിച്ചു. അതിരൂപത സമിതിയംഗങ്ങളായ സെക്രട്ടറി ചാക്കോ ഷിബു, ഡയറക്ടര്‍ ഷെല്ലി ആലപ്പാട്ട്, ജോയിന്‍റ് ഡയറക്ടര്‍ സ്റ്റെഫി പുതിയകുന്നേല്‍, അഡ്വൈസര്‍ സിസ്റ്റര്‍ ലേഖ എസ്‌ജെസി, ഭാരവാഹികളായ നിതിന്‍ ജോസ്, അലന്‍ ബിജു, ആല്‍ബിന്‍ ബിജു, ബെറ്റി തോമസ്, ജാക്‌സണ്‍ സ്റ്റീഫന്‍ എന്നിവര്‍ ക്യാമ്പിന് നേതൃത്വം നല്‍കി.

ധന്യന്‍ മാര്‍ മാത്യു മാക്കില്‍ തീര്‍ഥാടന പദയാത്ര

കോട്ടയം: കോട്ടയം അതിരൂപത ചെറുപുഷ്പ മിഷന്‍ലീഗിന്‍റെ ആഭിമുഖ്യത്തില്‍ ഇന്ന് ഉച്ചകഴിഞ്ഞു മൂന്നിന് ധന്യന്‍ മാര്‍ മാത്യു മാക്കില്‍ തീര്‍ഥാടന പദയാത്ര നടത്തും. മള്ളൂശേരി സെന്‍റ് തോമസ് ക്നാനായ പള്ളിയില്‍ നിന്നു ധന്യന്‍ മാര്‍ മാത്യു മാക്കീലിന്‍റെ കബറിടം സ്ഥിതി ചെയ്യുന്ന ഇടയ്ക്കാട്ട് സെന്‍റ് ജോര്‍ജ് പള്ളിയിലേക്കാണ് തീര്‍ഥാടനം. കോട്ടയം അതിരൂപത വികാരി ജനറാള്‍ ഫാ. തോമസ് ആനിമൂട്ടില്‍ സന്ദേശം നല്‍കി പദയാത്ര ഉദ്ഘാടനം ചെയ്യും. പദയാത്ര സമാപന വേളയില്‍ കോട്ടയം അതിരൂപത സഹായമെത്രാന്‍ മാര്‍ ജോസഫ് പണ്ടാരശേരില്‍ ആശിര്‍വാദ പ്രാര്‍ഥന നടത്തും. തുടര്‍ന്ന് പിതൃസമ്മാനം നറുക്കെടുപ്പ് സമ്മാന പദ്ധതി കോട്ടയം അതിരൂപത വികാരി ജനറാളും രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടറുമായ ഫാ. മൈക്കിള്‍ വെട്ടിക്കാട്ട് ഉദ്ഘാടനം ചെയ്യും.

ഇരുകരകളിലും പാർക്ക്; രൂപവതിയായി കട്ടച്ചിറ ചെക്ക് ഡാം

കിടങ്ങൂര്‍: പൊന്തക്കാടുകള്‍ നിറഞ്ഞും മാലിന്യങ്ങള്‍ നിക്ഷേപിച്ചും സാമൂഹ്യവിരുദ്ധശല്യം കാരണവും പൊതുജനങ്ങളുടെ സ്വൈരജീവിതത്തിന് തടസമായിനിന്ന കിടങ്ങൂര്‍ കട്ടച്ചിറ ചെക്ക് ഡാമിന്‍റെ ഇരുകരകളും ഇന്ന് മനോഹര പാർക്കായി മാറിയിരിക്കുന്നു. കിടങ്ങൂര്‍ പഞ്ചായത്തിലെ 12, 13 വാര്‍ഡുകളില്‍പ്പെട്ട ഇരു കരകളിലും മിനി പാര്‍ക്ക് സ്ഥാപിക്കുന്നതിന് ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടയ്ക്കല്‍ അനുവദിച്ച 10 ലക്ഷം രൂപ ഉപയോഗിച്ച് നടത്തിയ പ്രവൃത്തികളിലൂടെയാണ് ഇതു സാധിച്ചത്. ഇരുവശങ്ങളിലും സ്റ്റീല്‍വേലികള്‍ തീര്‍ത്തു പ്രതലം ഇന്‍റര്‍ലോക്ക് വിരിച്ച് സ്റ്റീല്‍ പൈപ്പ് കൊണ്ടുള്ള ഇരിപ്പിടങ്ങള്‍ സജ്ജമാക്കുകയും രണ്ടു സ്ഥലങ്ങളിലും ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി മിനി മാസ്റ്റ് ലൈറ്റുകള്‍ സ്ഥാപിക്കുകയും ചെയ്തു. പതിമൂന്നാം വാര്‍ഡിന്‍റെ ഭാഗത്തെ പ്രവര്‍ത്തനങ്ങള്‍ക്ക് പുഴയോരം റസിഡന്‍റ്സ് അസോസിയേഷനും പന്ത്രണ്ടാം വാര്‍ഡിന്‍റെ ഭാഗത്തെ പ്രവര്‍ത്തനങ്ങള്‍ക്ക് കൈരളി റസിഡന്‍റ്സ് അസോസിയേഷനും നേതൃത്വം നല്‍കി. ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ഇവിടെ സ്ഥാപിച്ച മിനി മാസ്റ്റ് ലൈറ്റിന്‍റെ സ്വിച്ച് ഓണ്‍ കര്‍മവും നടത്തി. യോഗത്തില്‍ പഞ്ചായത്ത് പ്രസിഡന്‍റ് ഇ.എന്‍. ബിനു അധ്യക്ഷത വഹിച്ചു. ബ്ലോക്ക് പഞ്ചായത്ത് മെംബര്‍ ഡോ. മേഴ്‌സി ജോണ്‍, മുന്‍ പഞ്ചായത്ത് പ്രസിഡന്‍റ് തോമസ് മാളിയേക്കല്‍, പഞ്ചായത്തംഗം ദീപലത സുരേഷ്, എം. ദിലീപ് തെക്കുംചേരി, രാധാ പ്രദീപ് കൂടാരപ്പള്ളി, രാധാകൃഷ്ണക്കുറുപ്പ് തുടങ്ങിയവര്‍ പ്രസംഗിച്ചു.

വിശ്വസിക്കാനാവാതെ വീട്ടുടമ ഡിന്നി

നിര്‍മാണം പൂര്‍ത്തിയാക്കി താമസം ആരംഭിക്കാനിരിക്കുന്ന വീട്ടിലുണ്ടായ അപ്രതീക്ഷിത സംഭവത്തിന്‍റെ ഞെട്ടലിലാണ് വീട്ടുടമ ഇളപ്പാനി മണ്ണനാല്‍ ഡിന്നി സെബാസ്റ്റ്യനും കുടുംബവും. ഏറെക്കുറെ നിര്‍മാണം പൂര്‍ത്തിയായ വീട്ടിലേക്ക് നവംബര്‍ 29നു പാലുകാച്ചല്‍ നടത്തി കയറി താമസിക്കാനിരിക്കെ അപ്രതീക്ഷിതമായാണ് ഈ സംഭവമുണ്ടാകുന്നത്. കൊലപാതകം നടന്നതിന്‍റെ തലേ ആഴ്ചയിലാണ് സോണിയും ഭാര്യയും മണ്ണ് നിരത്തുന്നതിനുള്‍പ്പെടെയുള്ള ജോലികള്‍ക്ക് ഇവിടെ എത്തുന്നത്. പിന്നീട് 15നു വീണ്ടും ജോലിക്കെത്താമെന്നു പറഞ്ഞാണ് ഇരുവരും മടങ്ങിയത്. 14നു രാവിലെ കൊലപാതകം നടത്തി മൃതദേഹം കുഴിച്ചിട്ടിട്ടു മടങ്ങിയ സോണി അയര്‍ക്കുന്നം ജംഗ്ഷനില്‍ തങ്ങുകയായിരുന്നു. ഈ ദിവസം രാവിലെ നിര്‍മാണം നടക്കുന്ന വീട്ടിലെത്തിയ വീട്ടുടമ ഡിന്നി മുറ്റത്ത് ചിപ്‌സ് നിരത്താന്‍ തീരുമാനിച്ചു. ഡിന്നി സോണിയെ ഫോണില്‍ വിളിച്ചു ജോലിക്കു വരാന്‍ ആവശ്യപ്പെട്ടു. കൊലപാതകം നടത്തിയ ദിവസം വീണ്ടും ഇയാള്‍ ഇവിടെ ജോലിക്കെത്തി പിറകുവശത്തെ മുറ്റത്തെ മണ്ണ് ഇടിച്ചുറപ്പിക്കുകയും ചിപ്‌സ് നിരത്തുകയും ചെയ്തു. മൃതദേഹം കുഴിച്ചിട്ടു സ്ഥലത്തും മണ്ണിട്ടതായി പോലീസ് സംശയിക്കുന്നുണ്ട്.

അയര്‍ക്കുന്നം നിവാസികള്‍ ഉണർന്നതു ഞെട്ടിക്കുന്ന വാർത്തകൾ കേട്ട്

അയര്‍ക്കുന്നം: അയര്‍ക്കുന്നം നിവാസികള്‍ ഇന്നലെ ഉണര്‍ന്നപ്പോള്‍ കേട്ടതു കൊലപാതകവും മോഷണവും. രാവിലെ ഒന്‍പതോടെയാണ് കൊങ്ങാണ്ടൂര്‍ പോളയ്ക്കല്‍ ബെന്നിയുടെ വീട്ടില്‍നിന്ന് 12 പവന്‍ സ്വര്‍ണവും 28,000 രൂപയും മോഷണം പോയ വിവരം നാട്ടിലറിഞ്ഞത്. തൊട്ടുപിന്നാലെ ഇളപ്പാനി ജംഗ്ഷനു സമീപത്തുള്ള നിര്‍മാണം നടക്കുന്ന വീട്ടില്‍ ഇതര സംസ്ഥാന തൊഴിലാളി ഭാര്യയെ കൊന്നു കുഴിച്ചുമൂടിയെന്ന വാര്‍ത്തയുമെത്തി. ഇതോടെ പ്രദേശവാസികള്‍ ഞെട്ടലിലായി. മണിക്കൂറുകള്‍ക്കം നിര്‍മാണത്തിലിരിക്കുന്ന വീടും പരിസരവും നാട്ടുകാരെക്കൊണ്ടു നിറഞ്ഞു. ഉച്ചകഴിഞ്ഞതോടെ പ്രതിയായ സോണിയെ പോലീസ് സംഘത്തിന്‍റെ അകമ്പടിയോടെ ഇവിടെ എത്തിച്ചു തെളിവെടുപ്പ് നടത്തി. ആദ്യം അല്‍പനയുടെ മൃതദേഹം കുഴിച്ചിട്ടിരിക്കുന്ന സ്ഥലം പ്രതി പോലീസിനു ചൂണ്ടിക്കാണിച്ചു കൊടുത്തു. തുടര്‍ന്നു കൊലപാതകം നടത്തിയ രീതിയിലും ഇയാള്‍ വിവരിച്ചു. ഈ സമയത്ത് ജില്ലാ പോലീസ് ചീഫ് എ. ഷാഹുല്‍ ഹമീദ് ഉള്‍പ്പെടെയുള്ള ഉയര്‍ന്ന പോലീസ് ഉദ്യോഗസ്ഥരും സ്ഥലത്തെത്തിയിരുന്നു. പിന്നീട് വീടിരിക്കുന്ന സ്ഥലത്തിനു മുകള്‍വശത്തുള്ള പറമ്പില്‍നിന്നും അല്‍പ്പനയുടെ ചെരിപ്പും സോണി പോലീസിനു കാണിച്ചുകൊടുത്തു. തുടര്‍ന്നു മൃതദേഹം കുഴിച്ചിട്ട സ്ഥലത്തെ മണ്ണ് നീക്കി മൃതദേഹം പുറത്തെടുക്കുകയായിരുന്നു. പോലീസിനു സഹായമായതു സിസിടിവി ദൃശ്യം മുന്‍കൂട്ടി നടത്തിയ കൃത്യമായ പ്ലാനിംഗിലൂടെയാണ് സോണി ഭാര്യ അല്‍പനയെ കൊലപ്പെടുത്തി കുഴിച്ചുമൂടിയത്. എന്നാല്‍ സിസിടിവി ദൃശ്യങ്ങള്‍ ലഭിച്ചതോടെ പോലീസിനു കാര്യങ്ങള്‍ ബോധ്യപ്പെടുകയും പ്രതിയെ പിടികൂടുകയുമായിരുന്നു. നിര്‍മാണത്തിലിരിക്കുന്ന വീടിനു സമീപം വിജനമാണെന്ന് വ്യക്തമായി അറിയാവുന്ന തൊഴിലാളിയായിരുന്നു സോണി. ഈ വീട്ടിലേക്കു വരുന്ന വഴിയിലുള്ള ഒരു വീട്ടില്‍ സിസിടിവി ഉണ്ടെന്ന കാര്യം സോണിക്ക് അറിയില്ലായിരുന്നു. ഇവര്‍ ഓട്ടോയില്‍ ഇവിടെ വന്നിറങ്ങുന്നതും നടന്നുപോകുന്നതും സിസിടിവി ദൃശ്യത്തിലുണ്ട്. കുറച്ചു സമയത്തിനുശേഷം സോണി മാത്രമാണ് തിരികെ മടങ്ങിയത്. ഭാര്യയെ കാണാനില്ലെന്ന് അയര്‍ക്കുന്നം പോലീസില്‍ പരാതി നല്‍കിയതോടെ പോലീസ് ആദ്യം പരിശോധിച്ചത് ഈ പ്രദേശത്തെ സിസിടിവി ദൃശ്യങ്ങളാണ്. ഇതോടെ കാര്യങ്ങള്‍ ബോധ്യപ്പെടുകയായിരുന്നു. അല്‍പനയ്ക്കു മറ്റൊരാളുമായി ഉണ്ടായിരുന്ന അടുപ്പമാണ് കൊലപാതകത്തില്‍ കലാശിച്ചത്. അയര്‍ക്കുന്നത്തും സമീപ പ്രദേശങ്ങളിലും നിര്‍മാണ മേഖലയിൽ ജോലി ചെയ്തു വരികയായിരുന്നു സോണിയും ഭാര്യ അല്‍പനയും. ഇവരുടെ മക്കള്‍ അമയന്നൂര്‍ സ്‌കൂളിലായിരുന്നു പഠിച്ചിരുന്നത്. അല്‍പനയുടെ സൗഹൃദത്തെ ചൊല്ലി സോണി നിരന്തരം വഴക്കിടുക പതിവായിരുന്നു. കൊലപാതകം മുന്‍കൂട്ടി തീരുമാനിച്ചാണ് ഇയാള്‍ അല്‍പനയുമായി 14നു രാവിലെ ഇളപ്പാനി ജംഗ്ഷനു സമീപത്തെ വീട്ടില്‍ എത്തിയത്. ഇവിടെവച്ചു ഭാര്യയെ കൊലപ്പെടുത്തി കുഴിച്ചുമൂടിയശേഷം മടങ്ങുകയായിരുന്നു. അല്‍പനയുടെ തല കരിങ്കല്ല് ഭിത്തിയില്‍ ഇടിപ്പിച്ചും കമ്പിപ്പാരയ്ക്ക് അടിച്ചുമാണ് കൊലപാതകം നടത്തിയതെന്ന് പോലീസ് പറഞ്ഞു. തുടര്‍ന്നു വീടിന്‍റെ പിന്നില്‍ രണ്ടടി താഴ്ചയില്‍ കുഴിച്ചിട്ടു. ഏതാനും ദിവസങ്ങള്‍ക്കു മുമ്പ് ഇവിടെ മണ്ണിട്ടു നികത്തിയതിനാലാണ് മൃതദേഹം കുഴിച്ചിടാന്‍ ഈ സ്ഥലം തെഞ്ഞെടുത്തതെന്ന് പ്രതി പോലീസിനോട് പറഞ്ഞു. ഭാര്യ മറ്റൊരാള്‍ക്കൊപ്പം പോയതായിട്ടാണു ഇയാള്‍ കൊലപാതകത്തിനുശേഷം എല്ലാവരോടും പറഞ്ഞിരുന്നത്. ആദ്യഘട്ടത്തില്‍ ഇയാള്‍ പോലീസില്‍ പരാതി നല്കാന്‍പോലും തയാറായിരുന്നില്ല. പിന്നീടു സുഹൃത്തുക്കള്‍ പറഞ്ഞതോടെയാണ് പരാതി നല്കിയത്. പരാതി ലഭിച്ച ആദ്യഘട്ടത്തില്‍ തന്നെ സോണിയുടെ പെരുമാറ്റത്തില്‍ സംശയം തോന്നിയ പോലീസ് ഇയാളെ നിരീക്ഷിച്ചുവരികയായിരുന്നു. തന്നിലുള്ള സംശയം ഒഴിവാക്കാനായി ഇയാള്‍ അയര്‍ക്കുന്നത്തുള്ള മറ്റു ഇതര സംസ്ഥാനക്കാരായ തൊഴിലാളികള്‍ക്കൊപ്പം ഭാര്യയെ വിവിധ സ്ഥലങ്ങളില്‍ എത്തി അന്വേഷിക്കുകയും ചെയ്തിരുന്നു. അന്വേഷണം പുരോഗമിക്കുന്നതിനിടയില്‍ പോലീസ് സോണിയുടെ മൊബൈല്‍ ലൊക്കേഷന്‍ പരിശോധിച്ചപ്പോള്‍ എറണാകുളം ഭാഗത്തേക്ക് ഇയാള്‍ ട്രെയിനില്‍ യാത്ര ചെയ്യുന്നതായി കണ്ടെത്തി. തുടര്‍ന്ന് കസ്റ്റഡിയിലെടുത്തു നടത്തിയ ചോദ്യം ചെയ്യലിലാണ് ഭാര്യയോടുള്ള സംശയത്തെ തുടര്‍ന്നാണ് കൊല നടത്തിയതെന്നു പ്രതി സമ്മതിച്ചത്. എറണാകുളത്ത് പ്രതിയെ അറസ്റ്റു ചെയ്യാൻ പോയ സംഘത്തിൽ എസ്ഐ സജു ടി. ലൂക്കോസ്, എഎസ്ഐ എസ്. ജയരാജ്,എ എസ്ഐ സുഭാഷ്, എഎസ്ഐ ജിജോ തോമസ്, ഹോംഗാർഡ് ജയരാജ് എന്നിവർ ഉണ്ടായിരുന്നു.

രംഗോത്സവ് - 2025: സംഘാടന മികവിൽ കെഇ സ്കൂൾ

മാന്നാനം: കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂളിൽ എഎസ്ഐഎസ്‌സി കേരള റീജൺ കലോത്സവം - രംഗോത്സവ് 2025ന്‌ കൊടിയിറങ്ങുമ്പോൾ കെഇ സ്കൂളിന്‍റെ സംഘാടന മികവ് ഒരിക്കൽകൂടി ശ്രദ്ധിക്കപ്പെടുന്നു. 160 സ്കൂളുകളിൽനിന്ന് 2000 വിദ്യാർഥികൾ പങ്കെടുത്ത കലോത്സവം. 10 വേദികളിലായി 56 മത്സര ഇനങ്ങൾ. 10 വേദികളിലും മത്സരങ്ങൾ പരാതികളില്ലാതെ സുഗമമായി നടന്നു. ഓരോ ഇനത്തിന്‍റെയും ഫലം പ്രഖ്യാപിച്ചാലുടൻ സമ്മാനങ്ങൾ നൽകാൻ പ്രത്യേക വേദിയും ക്രമീകരണവും. തിക്കും തിരക്കുമില്ലാതെ യഥാസമയം ഭക്ഷണം. താമസ സൗകര്യം. വർണദീപങ്ങളാൽ അലംകൃതമായ കെഇ സ്കൂളും പരിസരവും കലോത്സവത്തിനെത്തിയ വിദ്യാർഥികളെ മറ്റൊരു ലോകത്തെത്തിച്ചു. അവർ സർവം മറന്ന് കലോത്സവ ദിനങ്ങൾ ആഘോഷമാക്കി. 2024ലും ഇതേ കലോത്സവത്തിന് ആതിഥേയത്വം വഹിച്ചത് കെഇ സ്കൂൾ ആയിരുന്നു. അന്നത്തെ സംഘാടന മികവാണ് തൊട്ടടുത്ത വർഷം വീണ്ടും കലോത്സവം മാന്നാനത്തു തന്നെ എത്താൻ കാരണമായത്. മികച്ച സംഘാടകനായ കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി സിഎംഐയുടെ ശിരസിൽ മറ്റൊരു പൊൻതൂവൽ കൂടിയായി രംഗോത്സവ് - 2025.

സിന്ധുവിന്‍റെ തിരോധാനത്തിലും സെബാസ്റ്റ്യന്‍ സംശയനിഴലില്‍

കോട്ടയം: അതിരമ്പുഴ സ്വദേശി ജെയ്‌നമ്മ (54), ചേര്‍ത്തല കടക്കരപ്പള്ളി സ്വദേശി ബിന്ദു പത്മനാഭന്‍ (52) എന്നിവരെ കൊലപ്പെടുത്തിയ കേസുകളില്‍ പ്രതിയായ പള്ളിപ്പുറം ചൊങ്ങുംതറ സി.എം. സെബാസ്റ്റ്യന്‍ കൂടുതല്‍ കേസുകളില്‍ അറസ്റ്റിലായേക്കും. 2020 ഒക്ടോബര്‍ 19ന് ചേര്‍ത്തല തെക്ക് പഞ്ചായത്ത് 13-ാം വാര്‍ഡ് വള്ളാകുന്നംവെളി വീട്ടില്‍നിന്നും തിരുവിഴ ക്ഷേത്രത്തിലേക്കെന്നു പറഞ്ഞ് പുറപ്പെട്ട സിന്ധു (48)വിനെക്കുറിച്ച് പിന്നീടൊരു വിവരവുമില്ല. സിന്ധു മൊബൈല്‍ ഫോണ്‍ കൊണ്ടുപോയിരുന്നില്ല. എന്നാല്‍ ക്ഷേത്രത്തില്‍ വഴിപാട് നടത്തിയതായി കണ്ടെത്തിയിരുന്നു. ഇവിടെനിന്നും സിന്ധു എങ്ങോട്ടുപോയെന്ന് വ്യക്തമല്ല. സിന്ധുവിനെയും സമാനരീതിയില്‍ സെബാസ്റ്റ്യന്‍ കൊലപ്പെടുത്തിയതാണെന്ന സൂചനയില്‍ അഞ്ചു വര്‍ഷം മുന്‍പ് അര്‍ത്തുങ്കല്‍ പോലീസ് രജിസ്റ്റര്‍ ചെയ്ത കേസില്‍ പുനരന്വേഷണം ആരംഭിച്ചു. ഭര്‍ത്താവുമായി അകന്നുകഴിഞ്ഞിരുന്ന സിന്ധുവിനെ മകളുടെ വിവാഹനിശ്ചയത്തിന് രണ്ടു ദിവസം മുമ്പാണ് കാണാതായത്. മകളുടെ വിവാഹത്തിനുള്ള സ്വര്‍ണം സിന്ധു സൂക്ഷിച്ചിരുന്നു. സ്ത്രീകളെ പ്രണയം നടിച്ച് കൊലപ്പെടുത്തി സ്വത്തും സ്വര്‍ണവും കൈക്കലാക്കുന്ന കുറ്റവാളിയെന്ന് വ്യക്തമായതോടെയാണ് ഈ കേസിലും സെബാസ്റ്റ്യന്‍ സംശയനിഴലിലായത്, ബിന്ദു പത്മനാഭന്‍, ജെയ്‌നമ്മ വധക്കേസുകള്‍ക്കു പുറമെ സെബാസ്റ്റ്യന്‍ റിട്ട. പഞ്ചായത്ത് ജീവനക്കാരി ഐഷ(58) യെയും കൊലപ്പെടുത്തിയതായി സ്ഥിരീകരിച്ചിട്ടുണ്ട്. വിയ്യൂര്‍ ജയിലില്‍ കഴിയുന്ന സെബാസ്റ്റ്യനെ അടുത്തയാഴ്ച കസ്റ്റഡിയില്‍ വാങ്ങി ഐഷ കൊലക്കേസിലും അറസ്റ്റ് രേഖപ്പെടുത്തും. ഐഷയെ 2012 മേയ് 12നാണ് കാണാതായത്. വീടുവയ്ക്കാന്‍ സ്ഥലം തരപ്പെടുത്തിക്കൊടുക്കാമെന്ന ഉറപ്പില്‍ സ്ഥലം ബ്രോക്കറായിരുന്ന സെബാസ്റ്റ്യന്‍ പള്ളിപ്പുറത്തെ വീട്ടിലെത്തിച്ചു കൊലപ്പെടുത്തിയെന്നാണു നിഗമനം.

കൗമാരകുതിപ്പിനായി കോട്ടയം ടീം നാളെ അനന്തപുരിയിലേക്ക്

കോട്ടയം: അനന്തപുരിയില്‍ കൗമാരകുതിപ്പിനായി കോട്ടയം ടീം നാളെ പുറപ്പെടും. കഴിഞ്ഞ വര്‍ഷം എറണാകുളത്തു നടന്ന സംസ്ഥാന കായികമേളയില്‍ ജില്ലയ്ക്ക് എട്ടാം സ്ഥാനമായിരുന്നു. ഇത്തവണ നില മെച്ചപ്പെടുത്താനുള്ള ഒരുക്കത്തിലാണ് കോട്ടയം ടീം. ആദ്യകാലങ്ങളില്‍ വിദ്യാഭ്യാസ ജില്ലാ അടിസ്ഥാനത്തില്‍ മത്സരങ്ങള്‍ നടത്തിയപ്പോള്‍ കാഞ്ഞിരപ്പള്ളി വിദ്യാഭ്യാസ ജില്ല തുടര്‍ച്ചയായി 16 വര്‍ഷം ചാമ്പ്യന്‍പട്ടം നേടിയിരുന്നു തുടര്‍ന്ന് 12 വര്‍ഷം കോട്ടയം ജില്ലയും ചാമ്പ്യന്‍പട്ടം നേടി. തുടര്‍ന്നാണ് പാലക്കാടും എറണാകുളവുമൊക്കെ കിരീടം നേടിയത്. ഗെയിംസിലും അത്‌ലറ്റിക്‌സിലുമായി ഇത്തവണ ആയിരത്തോളം കുട്ടികളടങ്ങുന്ന ടീമാണ് കോട്ടയത്തിനുള്ളത്. ഗെയിംസില്‍ ബാസ്‌കറ്റ്‌ബോളില്‍ സ്വര്‍ണ പ്രതീക്ഷയാണുള്ളത്. അത്‌ലറ്റിക്‌സില്‍ സീനിയര്‍ ആണ്‍കുട്ടികളുടെ ഹൈജംപ്, 100 മീറ്റര്‍ ആണ്‍, പെണ്‍, പോള്‍വാള്‍ട്ട് തുടങ്ങിയവയില്‍ സ്വര്‍ണം പ്രതീക്ഷിക്കുന്ന ടീം റിലേയിലും ഹര്‍ഡില്‍സിലും ജാവലിനിലും മികച്ച പ്രകടനമാണ് പ്രതീക്ഷിക്കുന്നത്. സീനിയര്‍ ആണ്‍കുട്ടികളുടെ ഹൈജംപില്‍ ജില്ലാ മേളയില്‍ ദേശീയ റിക്കാര്‍ഡ് ഭേദിച്ച ജുവല്‍ തോമസ് ഇത്തവണയും സ്വര്‍ണം നേടുമെന്നാണ് പ്രതീക്ഷ. അതേപോലെ സീനിയര്‍ വിഭാഗം ആണ്‍കുട്ടികളുടെയും പെണ്‍കുട്ടികളുടെയും പോള്‍വാള്‍ട്ടിലും കോട്ടയം സ്വര്‍ണം ഉറപ്പിച്ചുകഴിഞ്ഞു. പാലാ സെന്‍റ് തോമസ് സ്‌കൂള്‍, പൂഞ്ഞാര്‍ എസ്എംവി, കാഞ്ഞിരപ്പള്ളി സെന്‍റ് മേരീസ് ഗേള്‍സ്, ഭരണങ്ങാനം എസ്എച്ച്ജിഎച്ച്‌എസ്, ഗവ. വിഎച്ച്എസ്ഇ മുരിക്കുംവയല്‍, സെന്‍റ് പീറ്റേഴ്‌സ് സ്‌കൂള്‍ കുറുമ്പനാട് എന്നീ സ്‌കൂളുകളിലെ കുട്ടികളാണ് കൂടുതലും വിജയികളായത്. നാളെ രാവിലെ 8.15നുള്ള ബംഗളൂരു- കന്യാകുമാരി ട്രെയിനില്‍ കോട്ടയം റവന്യു ജില്ലാ സ്‌പോര്‍ട്സ് സെക്രട്ടറി വി. പി. സജിമോന്‍റെ നേതൃത്വത്തില്‍ ടീം അനന്തപുരിക്ക് യാത്ര തിരിക്കും.

സ്‌കൂള്‍ കായികമേള: ചീഫ് മിനിസ്റ്റേഴ്‌സ് ട്രോഫിക്കു കോട്ടയത്ത് സ്വീകരണം നല്‍കി

കോട്ടയം: 21 ന് തിരുവനന്തപുരത്താരംഭിക്കുന്ന 67 -ാമത് സംസ്ഥാന സ്‌കൂള്‍ കായികമേളയിലെ ചാമ്പ്യന്മാര്‍ക്കുള്ള ചീഫ് മിനിസ്റ്റേഴ്‌സ് ട്രോഫിക്ക് ജില്ലയില്‍ സ്വീകരണം നല്‍കി. കുടമാളൂര്‍ ഗവ. എച്ച്എസ് എല്‍പി സ്‌കൂളില്‍ നടന്ന യോഗത്തില്‍ മന്ത്രി വി.എന്‍. വാസവന്‍ ട്രോഫിയില്‍ മാല ചാര്‍ത്തി സ്വീകരിച്ചു. ദേശീയ, അന്തര്‍ദേശീയ തലത്തില്‍ മികച്ച കായികതാരങ്ങളെ സംഭാവന ചെയ്തിട്ടുള്ള കേരളത്തിന്‍റെ കായികരംഗത്തെ കൂടുതല്‍ തിളക്കമുള്ളതാക്കി മാറ്റാന്‍ സ്‌കൂള്‍ കായിക മേളകള്‍ക്ക് കഴിയുമെന്ന് അദ്ദേഹം പറഞ്ഞു. സ്‌കൂളിലെ വര്‍ണക്കൂടാരം പരിപാടിയുടെ ഉദ്ഘാടനവും അദ്ദേഹം നിര്‍വഹിച്ചു. അയ്മനം പഞ്ചായത്ത് പ്രസിഡന്‍റ് വിജി രാജേഷ് അധ്യക്ഷത വഹിച്ചു. ജില്ലാപഞ്ചായത്ത് പ്രസിഡന്റ് ഹേമലത പ്രേംസാഗര്‍,ഏറ്റുമാനൂര്‍ ബ്ലോക്ക് പഞ്ചായത്ത് പ്രസിഡന്റ് ആര്യ രാജന്‍, പൊതുവിദ്യാഭ്യാസ ജോയിന്റ് ഡയറക്ടര്‍ ഗിരീഷ് ചോലയില്‍, ഡെപ്യൂട്ടി ഡയറക്ടര്‍ ഹണി ജി. അലക്‌സാണ്ടര്‍,ഡിഇഒ എ. ആര്‍. സുനിമോള്‍ എന്നിവര്‍ പങ്കെടുത്തു.

പ്രകടന പത്രിക ഇനി വേണ്ട, സര്‍ക്കാര്‍ ഉറക്കം വിട്ടുണരണം: കെസിബിസി മദ്യവിരുദ്ധ സമിതി

കോട്ടയം: ആസന്നമായ നിയമസഭാ തെരഞ്ഞെടുപ്പില്‍ മദ്യനയം സംബന്ധിച്ച പ്രകടന പത്രിക ഇടതുമുന്നണി ഇനി പ്രസിദ്ധീകരിക്കരുതെന്നും മുന്‍തെരഞ്ഞെടുപ്പുകളില്‍ നല്കിയതൊക്കെ വ്യാജമായിരുന്നെന്ന് കാലം തെളിയിച്ചെന്നും കെസിബിസി മദ്യവിരുദ്ധ സമിതി കോട്ടയം മേഖല സമ്മേളനം. പ്രകടന പത്രികയില്‍ പറഞ്ഞതൊക്കെ അധികാരത്തില്‍ വന്നപ്പോള്‍ സമൂലം തള്ളിയ സര്‍ക്കാരാണ് കഴിഞ്ഞ ഒന്‍പത് വര്‍ഷക്കാലമായി ഭരണം നടത്തുന്നത്. കേരളത്തിന്‍റെ ചരിത്രത്തില്‍ ഇത്രയധികം മദ്യശാലകളും മാരക ലഹരിവസ്തുക്കളും ഉണ്ടായ കാലഘട്ടമില്ല. സര്‍ക്കാര്‍ ഉറക്കം വിട്ടുണരണമെന്നും സമ്മേളനം ആവശ്യപ്പെട്ടു. കോട്ടയം, പാലാ, കാഞ്ഞിരപ്പള്ളി, വിജയപുരം രൂപതകളുടെ ആഭിമുഖ്യത്തില്‍ സംഘടിപ്പിച്ച കോട്ടയം മേഖലാ സമ്മേളനം സംസ്ഥാന സെക്രട്ടറി പ്രസാദ് കുരുവിള ഉദ്ഘാടനം ചെയ്തു. മേഖലാ പ്രസിഡന്‍റ് തോമസുകുട്ടി മണക്കുന്നേല്‍ അധ്യക്ഷത വഹിച്ചു. ഡയറക്ടര്‍ ഫാ. ജേക്കബ് വെള്ളമരുതുങ്കല്‍ മുഖ്യപ്രഭാഷണം നടത്തി. ആന്‍റണി മാത്യു, കെ.പി. മാത്യു, സാബു ഏബ്രഹാം, ജോസ് കവിയില്‍, ജോസ്മോന്‍ പുഴക്കരോട്ട്, ബേബിച്ചന്‍ പുത്തന്‍പറമ്പില്‍, ഔസേപ്പച്ചന്‍ ചെറുകാട്, ജിയോ കുന്നശേരി, ടോമി പൊട്ടംകുഴിയില്‍, ടി.തോമസുകുട്ടി എന്നിവര്‍ പ്രസംഗിച്ചു.

കോട്ടയത്ത് വന്‍ എംഡിഎംഎ വേട്ട

കോട്ടയം: കോട്ടയത്ത് വന്‍ എംഡിഎംഎ വേട്ട. ദമ്പതികള്‍ ഉള്‍പ്പെടെ മൂന്നു പേര്‍ അറസ്റ്റില്‍. പുതുപ്പള്ളി, വാകത്താനം ഇരവുചിറ വെള്ളത്തടത്തില്‍ എ.കെ. അമല്‍ ദേവ് (38), ഭാര്യ ശരണ്യ രാജന്‍ (36), ഇവരുടെ സുഹൃത്ത് ചേര്‍ത്തല മാരാരിക്കുളം പുകലപ്പുരയ്ക്കല്‍ രാഹുല്‍ രാജ് (33) എന്നിവരാണ് പിടിയിലായത്. മീനടം വെട്ടത്തുകവല-ഇലക്കൊടിഞ്ഞി റോഡില്‍ പുത്തന്‍പുരപ്പടിക്കു സമീപമുള്ള മഠത്തില്‍ വീട്ടില്‍ വാടകയ്ക്ക് താമസിക്കുകയായിരുന്നു പ്രതികള്‍. രണ്ടാഴ്ച മുന്പാണ് പ്രതികള്‍ ഇവിടെ വീട് വാടകയ്ക്ക് എടുത്തത്. റോഡ് സൈഡിലുള്ള വീട് ഒരാള്‍ ഉയരത്തില്‍ ഗാർഡന്‍ നെറ്റ് ഉപയോഗിച്ച് മറച്ചായിരുന്നു സംഘം കച്ചടവടം നടത്തിയത്. ‌ഇവിടെ നിന്നുമാണ് 68 ഗ്രാം എംഡിഎംഎയുമായി ഇവര്‍ പിടിയിലായത്. ഇവര്‍ കാറില്‍ ലഹരി മരുന്ന് ഒളിപ്പിച്ച് ആവശ്യക്കാര്‍ക്ക് എത്തിച്ചുനല്‍കുകയാണ് ചെയ്യുന്നത്. ഇന്നും പതിവുപോലെ കാറില്‍ ലഹരി വില്പന നടത്തി വീട്ടില്‍ തിരിച്ചെത്തിയപ്പോഴാണ് ഇവര്‍ പോലീസിന്‍റെ പിടിയിലാകുന്നത്. ജില്ലാ പോലീസ് ചീഫ് എ. ഷാഹുല്‍ ഹമീദിനു ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ ലഹരി വിരുദ്ധ സ്‌ക്വാഡ്, പാമ്പാടി പോലീസ്, ഇന്‍റലിജന്‍സ് വിഭാഗം എന്നിവര്‍ ചേര്‍ന്നാണ് പിടികൂടിയത്. ബംഗളൂരുവില്‍ നിന്നുമാണ് ഇവര്‍ എംഡിഎംഐ എത്തിച്ചിരുന്നത്. പാമ്പാടിയിലും സമീപപ്രദേശങ്ങളിലും ഇവര്‍ എംഡിഎംഐ വില്‍പ്പന നടത്തുന്നതായി പോലീസിനു രഹസ്യവിവരം ലഭിച്ചിരുന്നു. ഇതിനെത്തുടര്‍ന്ന് പോലീസ് രഹസ്യമായി ഇവരെ നിരീക്ഷിച്ചുവരികയായിരുന്നു. ഈ പ്രദേശത്ത് ഇവരുടെ ഇടനിലക്കാരുണ്ടെന്നും ലഹരി വില്‍പ്പന സജീവമാണെന്നും നാട്ടൂകാര്‍ ആരോപിക്കുന്നു. അമല്‍ദേവും രാഹുല്‍ രാജും വധശ്രമം, ലഹരി വില്പന തുടങ്ങി നിരവധി കേസുകളില്‍ പ്രതികളാണ്. രാഹുലിന് വാറണ്ടുള്ളതിനാല്‍ ദമ്പതികളോടൊപ്പം ഇവിടെ ഒളിച്ചുതാമസിക്കുകയായിരുന്നുവെന്ന് പോലീസ് പറഞ്ഞു.

വാഗമണ്ണിനെ ടൂറിസം ഹബ്ബാക്കും: മന്ത്രി മുഹമ്മദ് റിയാസ്

മുണ്ടക്കയം: കേരളത്തിൽ പശ്ചാത്തല വികസനരംഗത്ത് വലിയ മുന്നേറ്റം കൈവരിക്കാൻ കഴിഞ്ഞതായി മന്ത്രി മുഹമ്മദ് റിയാസ്. മുണ്ടക്കയം-കൂട്ടിക്കൽ -ഏന്തയാർ-വല്യേന്ത-വാഗമൺ റോഡിന്‍റെ രണ്ടാംഘട്ട നിർമാണോദ്ഘാടനം ഓൺലൈനായി നിർവഹിച്ച് പ്രസംഗിക്കുകയായിരുന്നു മന്ത്രി. സംസ്ഥാനത്തെ പകുതിയിലധികം പൊതുമരാമത്ത് റോഡുകൾ ബിഎം ആൻഡ് ബിസി നിലവാരത്തിലേക്ക് ഉയർത്താനും നൂറ്റന്പതിലധികം പാലങ്ങൾ പുതുതായി നിർമിക്കാനും ടൂറിസം രംഗത്തടക്കം വലിയ മുന്നേറ്റം കൈവരിക്കാനും കഴിഞ്ഞിട്ടുണ്ട്. ഇതിന്‍റെ ഭാഗമായി വാഗമണ്ണിനെ ടൂറിസം ഹബ്ബാക്കി മാറ്റുമെന്നു മന്ത്രി പറഞ്ഞു. ഇളങ്കാട് ടൗണിൽ ചേർന്ന ഉദ്ഘാടന സമ്മേളനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. കെ.ജെ. തോമസ് മുഖ്യപ്രഭാഷണം നടത്തി. ജില്ലാപഞ്ചായത്തംഗങ്ങളായ ശുഭേഷ് സുധാകരൻ, പി.ആർ. അനുപമ, ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, കൂട്ടിക്കൽ പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം, പഞ്ചായത്ത് വൈസ് പ്രസിഡന്‍റ് രജനി സുധീർ, പഞ്ചായത്തംഗങ്ങളായ പി.എസ്. സജിമോൻ, ജെസി ജോസ്, എം.വി. ഹരിഹരൻ, കെ.എസ്. മോഹനൻ, വിവിധ രാഷ്ട്രീയ, സാമൂഹ്യ, സാംസ്കാരിക സംഘടനാ നേതാക്കൾ, പൊതുമരാമത്ത് വകുപ്പ് ഉദ്യോഗസ്ഥർ തുടങ്ങിയവർ പ്രസംഗിച്ചു. നിലവിൽ വല്യേന്തവരെ എത്തിനിൽക്കുന്ന റോഡ് തുടർന്ന് ഏഴു കിലോമീറ്റർ പൂർത്തീകരിച്ചാണ് മുണ്ടക്കയം - വാഗമൺ റോഡ് നിർമിക്കുന്നത്. ഇതിനായി 2022-23 ലെ സംസ്ഥാന ബജറ്റിൽ 12 കോടി രൂപയും 2023-24 വർഷത്തെ സംസ്ഥാന ബജറ്റിൽ അഞ്ചുകോടി രൂപയും വകയിരുത്തിയിരുന്നു. ഇപ്രകാരം ലഭ്യമായ 17 കോടി രൂപ വിനിയോഗിച്ചാണ് റോഡിന്‍റെ നിർമാണ പ്രവൃത്തികൾ നടത്തുന്നത്. റോഡ് യാഥാർഥ്യമാകുന്നതോടെ മുണ്ടക്കയത്തുനിന്ന് 22 കിലോമീറ്റർ മാത്രം സഞ്ചരിച്ച് വിനോദ സഞ്ചാരികൾക്ക് വാഗമണ്ണിൽ എത്തിച്ചേരാൻ കഴിയും. ഈ പ്രദേശങ്ങളിൽ നൂറുകണക്കിന് ഏക്കർ റവന്യൂ ഭൂമിയുള്ളതിനാൽ ടൂറിസം അധിഷ്ഠിതവും മറ്റിതര സംരംഭങ്ങളും സർക്കാർ ഉടമസ്ഥതയിൽ ആരംഭിക്കുന്നതിനും കഴിയും. ഇതിനോടകംതന്നെ ഡിസ്ട്രിക്ട് ടൂറിസം പ്രമോഷൻ കൗൺസിലിന്‍റെ നേതൃത്വത്തിൽ ഇളങ്കാട് കേന്ദ്രീകരിച്ചും കോലാഹലമേട് കേന്ദ്രീകരിച്ചും ഓരോ ടൂറിസം പദ്ധതി ആവിഷ്കരിക്കുന്നതിന് ഡിപിആർ തയാറാക്കിവരികയാണ്. സ്വകാര്യ പങ്കാളിത്തത്തോടെ ഇത്തരം ടൂറിസം പദ്ധതികൾ നടപ്പാക്കാനാണ് ഉദ്ദേശിക്കുന്നത്. കൂടാതെ ഭാവിയിൽ എരുമേലി ശബരി ഗ്രീൻഫീൽഡ് ഇന്‍റർനാഷണൽ എയർപോർട്ട് യാഥാർഥ്യമാകുമ്പോൾ ദേശീയ - അന്താരാഷ്ട്ര തലങ്ങളിൽനിന്ന് എത്തിച്ചേരുന്ന വിനോദസഞ്ചാരികൾക്ക് 36 കിലോമീറ്റർ മാത്രം സഞ്ചരിച്ച് ഇതുവഴി വാഗമണ്ണിൽ എത്തിച്ചേരാൻ കഴിയുമെന്നുള്ളതും ഭാവിയിൽ വാഗമണ്ണിന്‍റെ ടൂറിസം സാധ്യതകൾ കൂടുതൽ വർധിപ്പിക്കുന്നതാണ്. മുണ്ടക്കയം, കൂട്ടിക്കൽ, കോരുത്തോട്, എരുമേലി, പാറത്തോട് പഞ്ചായത്തുകളുടെയും സമഗ്ര പുരോഗതിക്കും ഈ പാത ഉപകരിക്കും.

അഞ്ചിലിപ്പ പാലത്തിന്‍റെ തൂണില്‍ മാലിന്യങ്ങള്‍ അടിഞ്ഞുകൂടി

കാഞ്ഞിരപ്പള്ളി: കഴിഞ്ഞ ദിവസമുണ്ടായ ശക്തമായ മഴയിൽ ചിറ്റാര്‍ പുഴയില്‍ അഞ്ചിലിപ്പ പാലത്തിനടിയില്‍ മാലിന്യം അടിഞ്ഞുകൂടി. പ്ലാസ്റ്റിക് കുപ്പികളും കൂടുകളും അടങ്ങുന്ന പാഴ്‌വസ്തുക്കളും വലിയ മരത്തടികളുമാണ് മഴയില്‍ ഒഴുകിയെത്തി തങ്ങിക്കിടക്കുന്നത്. ശക്തമായ ഒഴുക്കുള്ള ഇവിടെ നിരൊഴുക്ക് തടഞ്ഞാണ് മാലിന്യങ്ങള്‍ കിടക്കുന്നത്. വന്‍മരങ്ങള്‍ ഒഴുകിയെത്തി പാലത്തിന്‍റെ തൂണുകളില്‍ തങ്ങി നില്‍ക്കുന്നത് പാലത്തിനും തൂണുകള്‍ക്കും ബലക്ഷയത്തിനു കാരണമാകും. ചിറ്റാര്‍ പുഴയില്‍നിന്ന് ഈ മാലിന്യങ്ങള്‍ നീക്കം ചെയ്യാതെ ഒഴുക്കി വിട്ടാല്‍ ചെന്നെത്തുന്നത് മണിമലയാറ്റിലേക്കുമാണ്. കഴിഞ്ഞദിവസം ചിറ്റാര്‍ പുഴയുടെ കൈത്തോടായ ആനക്കല്ല് - കപ്പാട് തോട്ടില്‍ രണ്ട് താത്കാലിക തടിപ്പാലങ്ങള്‍ ഒഴുകിപ്പോയിരുന്നു. മാലിന്യങ്ങള്‍ അടിഞ്ഞുകൂടി കിടക്കുന്നതിന് സമീപമാണ് കുളിക്കടവുമുള്ളത്. മാലിന്യം കിടക്കുന്നത് നീരൊഴുക്കിന് തടസമാകുന്നതിനാല്‍ വീണ്ടും മഴയെത്തിയാല്‍ വെള്ളം കരകവിഞ്ഞൊഴുകാനുള്ള സാധ്യതയുമേറെയാണ്. മഴയില്‍ ഒഴുകിയെത്തിയ മാലിന്യങ്ങള്‍ നീക്കം ചെയ്യണമെന്ന് നാട്ടുകാർ ആവശ്യപ്പെട്ടു.

കാടുകയറി പൊൻകുന്നം- കപ്പാട് റോഡ്

പൊൻകുന്നം: പൊൻകുന്നം - കപ്പാട് റോയൽ ബൈപാസ് റോഡിന്‍റെ ഇരുവശവും കാട് വളർന്ന് യാത്ര ദുഷ്ക്കരമായി. റോഡിന്‍റെ പകുതിയോളം കാട് വളർന്നതിനാൽ കാൽനടയാത്ര ഏറെ ബുദ്ധിമുട്ടായിരിക്കുകയാണ്. വാഹനങ്ങൾ വരുമ്പോൾ റോഡിന്‍റെ ഓരം ചേർന്ന് പോകാനാവാത്ത സ്ഥിതിയാണ്. കാടുമൂലം എതിരേ വരുന്ന വാഹനങ്ങൾ കാണാനും കഴിയാറില്ല. ഇവിടെ ഇഴജന്തുക്കളുടേയും കീരി, കുറുക്കൻ എന്നിവയുടേയും ശല്യമുണ്ട്. ഇതിനെല്ലാം ഉപരിയാണ് സാമൂഹിക വിരുദ്ധരുടെ അഴിഞ്ഞാട്ടവും. കഴിഞ്ഞ ദിവസം ബൈക്കിലെത്തിയ ആൾ പൂർണ നഗ്നനായി യുവതിയെ ആക്രമിക്കാൽ ശ്രമിച്ചത് റോഡിൽ കാട് വളർന്ന ഭാഗത്തുവച്ചാണ്. ആറ് കിലോമീറ്റർ ദൈർഘ്യമുള്ള റോഡിന്‍റെ ഒരു കിലോമീറ്റർമാത്രമാണ് സഞ്ചാരയോഗ്യമായുള്ളത്. ശേഷിക്കുന്ന അഞ്ചു കിലോമീറ്റർ ദൂരം തകർന്നുകിടക്കുകയാണ്. റോഡിലേക്ക് വളർന്നുനിൽക്കുന്ന കാട് വെട്ടിത്തെളിക്കണമെന്നാണ് നാട്ടുകാരുടെ ആവശ്യം.

അബിയ ആൻ ജിജിക്ക് ആദരം

പുലിക്കുന്ന്: ഒഡീഷ്യയിലെ ഭുവനേശ്വറിൽ നടന്ന 40ാമത് ജൂനിയർ അത്‌ലറ്റിക് ചാമ്പ്യൻഷിപ്പിൻ പെൺകുട്ടികളുടെ ഹൈജന്പിൽ സ്വർണ മെഡലും കഴിഞ്ഞദിവസം നെടുങ്കണ്ടത്ത് നടന്ന ഇടുക്കി ജില്ലാ സ്കൂൾ മീറ്റിൽ ഹൈജമ്പ്, ലോംഗ് ജമ്പ്, ത്രിബിൾ ജമ്പ് എന്നീ ഇനത്തിലും ഒന്നാം സ്ഥാനം കരസ്ഥമാക്കിയ പുലിക്കുന്ന് വെട്ടിക്കിഴക്കേതിൽ അബിയ ആൻ ജിജിയെ കണ്ണിമല ഫാർമേഴസ് ക്ലബിന്‍റെ ആദരവ്. കേരള പ്ലാന്‍റേഷൻ കോർപറേഷൻ ചെയർമാൻ ഒ.പി.എ. സലാം ആദരപത്രം വീട്ടിലെത്തി നൽകി ആദരിക്കുകയും പൊന്നാടയണിയിക്കുകയും ചെയ്തു. കാഞ്ഞിരപ്പള്ളി ബ്ലോക്ക് പഞ്ചായത്തംഗം പി.കെ. പ്രദീപ് കാഷ് അവാർഡ് സമ്മാനിച്ചു. ക്ലബ് പ്രസിഡന്‍റ് പി.ഡി. ജോൺ പവ്വത്ത് അധ്യക്ഷത വഹിച്ചു. മുണ്ടക്കയം പഞ്ചായത്ത് മുൻ പ്രസിഡന്‍റ് ബേബിച്ചൻ പ്ലാക്കാട്ട്, പഞ്ചായത്തംഗം ദിലീഷ് ദിവാകരൻ, ക്ലബ് സെക്രട്ടറി സാബു തോമസ് തകടിയേൽ, വൈസ് പ്രസിഡന്‍റ് കെ.എൻ. ഷിബു കപ്ലിയിൽ, എ.ജെ. അലക്സ് റോയ്, ടി.പി. ആന്‍റണി തകടിയേൽ, റെജി പനമൂട്ടിൽ തുടങ്ങിയവർ പ്രസംഗിച്ചു.

ചെത്തിപ്പുഴ ആശുപത്രിയില്‍ രാജ്യാന്തര സമ്മേളനം തുടങ്ങി

ചങ്ങനാശേരി: എംജി സര്‍വകലാശാലയിലെ ഡോ.എന്‍. രാധാകൃഷ്ണന്‍ ഇന്‍റര്‍നാഷനല്‍ സെന്‍റര്‍ ഫോര്‍ മെഡിക്കല്‍ ഇന്നൊവേഷന്‍റെ നേതൃത്വത്തില്‍ ചെത്തിപ്പുഴ സെന്‍റ് തോമസ് ആശുപത്രിയില്‍ ആരംഭിച്ച "റിഥം -2025’ രാജ്യാന്തര സമ്മേളനം എംജി സര്‍വകലാശാല വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ ഉദ്ഘാടനം ചെയ്തു. ആശുപത്രി എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിച്ചു. കോട്ടയം മെഡിക്കല്‍ കോളജ് ആശുപത്രി പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ് മുഖ്യപ്രഭാഷണം നടത്തി. ജോബ് മൈക്കിള്‍ എംഎല്‍എ, സെന്‍റ് തോമസ് ആശുപത്രി മാനേജര്‍ മോണ്‍. ജോണ്‍ തെക്കേക്കര, അസോസിയേറ്റ് ഡയറക്ടര്‍ ഫാ. ജോഷി മുപ്പതില്‍ചിറ, എന്‍ആര്‍ഐസിഎംഐ ചെയര്‍മാനും സെന്‍റ് തോമസ് ഇന്‍സ്റ്റിറ്റ്യൂട്ട് ഓഫ് റിസര്‍ച്ച് ഓണ്‍ വീനസ് ഡിസീസ് മെഡിക്കല്‍ ഡയറക്ടറുമായ ഡോ. എന്‍. രാധാകൃഷ്ണന്‍, സെന്‍റ് തോമസ് ആശുപത്രി കാര്‍ഡിയോളജി വിഭാഗം ഡോ. അബ്ദുൾ ഖാദര്‍, മാര്‍ അത്തനാസിയോസ് കോളജ് ഫോര്‍ അഡ്വാന്‍സ് സ്റ്റഡീസ് പ്രിന്‍സിപ്പല്‍ ഫാ. ഏബ്രഹാം മുളമൂട്ടില്‍, പുഷ്പഗിരി മെഡിക്കല്‍ കോളജ് ജനറല്‍ സര്‍ജറി വിഭാഗം പ്രഫ. റോബിന്‍സണ്‍ പി. ജോര്‍ജ്, ഡോ. സി. ചന്ദന എന്നിവര്‍ പ്രസംഗിച്ചു.

കെഎസ്ആർടിസി കെട്ടിടത്തിന്‍റെ കരിങ്കൽകെട്ട് ഇടിഞ്ഞുവീണു

എരുമേലി: കെഎസ്ആർടിസി ഓപ്പറേറ്റിംഗ് സെന്‍റർ കെട്ടിടത്തിന്‍റെ പിറകിലെ ഉയരമേറിയ കരിങ്കൽകെട്ടിന്‍റെ കുറച്ചുഭാഗം ഇടിഞ്ഞുവീണു. അവശേഷിക്കുന്ന ഭാഗവും ഇടിഞ്ഞ നിലയിലാണ്. മഴ തുടരുന്നതിനാൽ ഇതും ഉടൻ ഇടിഞ്ഞുവീഴുമെന്ന് ആശങ്ക. ഇന്നലെ പുലർച്ചെ മൂന്നോടെ മെക്കാനിക്ക് വിഭാഗം മുറിയുടെ പിന്നിലേക്ക് കരിങ്കൽകെട്ടും മണ്ണും നിലംപതിക്കുകയായിരുന്നു. മതിൽ പൂർണമായും പൊളിച്ചു മാറ്റണമെന്ന് ജീവനക്കാർ ആവശ്യപ്പെട്ടു. അതേസമയം എരുമേലിയിലെ കെഎസ്ആർടിസി ബസ് സ്റ്റാൻഡ് ഉൾപ്പെടെയുള്ള സ്ഥലവും കെട്ടിടവും സംബന്ധിച്ച് നിലവിൽ കോടതിയിൽ തർക്കം നിലവിലുള്ളതിനാൽ മതിൽ പൊളിച്ചുമാറ്റി പുനർ നിർമിക്കുന്നതിന് കോടതി അനുമതി വേണ്ടിവന്നേക്കും. ശബരിമല സീസണിന് ഒരു മാസം മാത്രം ശേഷിക്കേ ബസ് സ്റ്റാൻഡ് കെട്ടിടം സുരക്ഷിതമാക്കാൻ കഴിഞ്ഞിട്ടില്ല. സീസണിൽ അയ്യപ്പഭക്തർ ഏറെ എത്തുന്ന സ്റ്റാൻഡിൽ ആവശ്യമായ സൗകര്യം ഒരുക്കാനും കഴിയുന്നില്ല. ബസ് പാർക്കിംഗ് സ്ഥലത്തും അപകടത്തിലായ നിലയിൽ മറ്റൊരു കരിങ്കൽ കെട്ട് ഉണ്ട്. ഇതും തകർച്ചയിലാണ്. സ്റ്റാൻഡ് കുണ്ടും കുഴികളും നിറഞ്ഞ നിലയിലാണ്. തത്കാലത്തേക്ക് തൊട്ടടുത്ത് എതിർവശത്തുള്ള ദേവസ്വം ബോർഡ് ഷോപ്പിംഗ് കോംപ്ലക്സ് കെട്ടിടത്തിലെ രണ്ട് മുറികൾ കെഎസ്ആർടിസിയുടെ ഓഫീസ് പ്രവർത്തനത്തിന് ഉപയോഗിച്ച് പ്രതിസന്ധി പരിഹരിക്കാനാണ് നീക്കം. മുറികൾ വിട്ടു കിട്ടാൻ സെബാസ്റ്റ്യൻ കുളത്തുങ്കൽ എംഎൽഎ ദേവസ്വത്തിന് കത്ത് നൽകിയിട്ടുണ്ട്. 2018ലെ പ്രളയത്തിൽ വെള്ളം കയറിയാണ് കെഎസ്ആർടിസി ഓഫീസ് കെട്ടിടത്തിന് നാശനഷ്‌ടങ്ങളുണ്ടായി ദുർബലമായത്. സ്ഥലം സംബന്ധിച്ച് സ്വകാര്യ വ്യക്തിയും കുടുംബവും നൽകിയ ഉടമസ്ഥ അവകാശ കേസിൽ പാലാ സബ് കോടതിയിൽനിന്ന് കെഎസ്ആർടിസിയ്ക്കെതിരേയാണ് വിധി ഉണ്ടായത്. സ്വകാര്യ വ്യക്തിക്കും കുടുംബത്തിനും സ്ഥലം തിരികെ കൊടുക്കണമെന്നായിരുന്നു വിധി. ഇതിന് മൂന്ന് മാസം സാവകാശം നൽകിയിരുന്നു. ഈ കേസിൽ പാലായിലെതന്നെ ജില്ലാ കോടതി ബഞ്ചിൽ കെഎസ്ആർടിസി നൽകിയ അപ്പീൽ ഹർജി തീർപ്പായിട്ടില്ല.

ബിഎസ്എൻഎൽ ഓഫീസിന്‍റെ കരിങ്കൽകെട്ട് ഇടിഞ്ഞുവീണു

എരുമേലി: പഞ്ചായത്ത്‌ ഓഫീസ് റോഡിൽ ബിഎസ്എൻഎൽ ഓഫീസിന്‍റെ അപകടത്തിലായിരുന്ന ചുറ്റുമതിലിന്‍റെ കുറച്ചുഭാഗം കഴിഞ്ഞദിവസം പൊളിച്ചുമാറ്റിയിരുന്നു. പൊളിക്കാതെ അവശേഷിച്ചിരുന്ന കരിങ്കൽകെട്ട് ഇന്നലെ നിലംപതിച്ചു. കഴിഞ്ഞ ദിവസം മതിൽ പൊളിച്ചപ്പോൾ ഒരു ഭാഗത്ത്‌ മതിലിനോടു ചേർന്ന് മരം നിന്നിരുന്നതിനാൽ പൂർണമായി പൊളിച്ചുമാറ്റാനായില്ല. മരം വെട്ടിമാറ്റിയ ശേഷം ബാക്കി ഭാഗം പൊളിക്കാനാണ് തീരുമാനിച്ചിരുന്നത്. ഇന്നലെ അവധിദിനമായതിനാൽ പണികൾ അടുത്ത ദിവസത്തേക്ക് മാറ്റിയിരുന്നു. ഇതിനു പിന്നാലെയാണ് അവശേഷിച്ചിരുന്ന ഭാഗം ഇന്നലെ ഇടിഞ്ഞു റോഡിൽ പതിച്ചത്. ഇതോടെ മരം ചെരിഞ്ഞ നിലയിലാണ്. അപകടത്തിലായ മരം വെട്ടിമാറ്റി ഉടൻതന്നെ കരിങ്കൽകെട്ട് പൂർണമായും പൊളിച്ചുമാറ്റുമെന്ന് ബിഎസ്എൻഎൽ അധികൃതർ അറിയിച്ചു. മതിൽ അപകടത്തിലായതു സംബന്ധിച്ച് ദീപിക നേരത്തേ വാർത്ത പ്രസിദ്ധീകരിച്ചിരുന്നു. തുടർന്നാണ് പൊളിച്ചുനീക്കാൻ നടപടികളായത്.

റോഡിലെ മണ്‍കൂനയിൽ കയറി സ്കൂട്ടർ മറിഞ്ഞ് വ്യാപാരി മരിച്ചു

കുമളി: വെള്ളാരംകുന്നിൽ ശനിയാഴ്ച രാത്രിയുണ്ടായ കനത്ത മഴയിൽ റോഡിലേക്ക് ഇടിഞ്ഞുവീണ മണ്‍കൂനയിൽ കയറി സ്കൂട്ടർ മറിഞ്ഞ് വ്യാപാരി മരിച്ചു. വെള്ളാരംകുന്ന് പറപ്പള്ളിൽ പി.എം. തോമസ് (തങ്കച്ചൻ - 66) ആണ് മരിച്ചത്. ആനവിലാസം സെൻട്രൽ ഹോട്ടൽ ഉടമയാണ് തോമസ്. ഹോട്ടൽ അടച്ച് രാത്രി എട്ടോടെ വീട്ടിലേക്ക് പോകുന്പോഴാണ് അപകടമുണ്ടായത്. വഴിയാത്രക്കാരാണ് തോമസിന്‍റെ സഹോദരൻ സജുവിനെ അപകടവിവരം അറിയിച്ചത്. തോമസിനെ കട്ടപ്പനയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം വ്യാഴാഴ്ച രണ്ടിന് വെള്ളാരംകുന്ന് സെന്‍റ് മേരീസ് പള്ളിയിൽ. ഭാര്യ ലീലാമ്മ തോമസ്. മകൾ: ജോസ്ന തോമസ്. മരുമകൻ: ജോസഫ് ആന്‍റണി. കാഞ്ഞിരപ്പള്ളി പഴയിടം സെന്‍റ് മൈക്കിൾസ് പള്ളി വികാരി ഫാ. ജോസ് മാത്യു പറപ്പള്ളിൽ പരേതന്‍റെ സഹോദരനാണ്.

കട്ടച്ചിറ ചെക്ക് ഡാമിന്‍റെ ഇരുകരകളും ഇനി മനോഹരം

കിടങ്ങൂര്‍: പൊന്തക്കാടുകള്‍ നിറഞ്ഞും മാലിന്യങ്ങള്‍ നിക്ഷേപിച്ചും സാമൂഹ്യവിരുദ്ധ ശല്യവും മൂലം പൊതുജനങ്ങളുടെ സൈ്വരജീവിതത്തിനു തടസമായിരുന്ന കിടങ്ങൂര്‍ കട്ടച്ചിറ ചെക്ക് ഡാമിന്‍റെ ഇരുകരകളും മനോഹര മായിരിക്കുന്നു. കിടങ്ങൂര്‍ പഞ്ചായത്തിലെ 12, 13 വാര്‍ഡുകളില്‍പ്പെട്ട ഇരു കരകളിലും മിനി പാര്‍ക്ക് സ്ഥാപിക്കുന്നതിനായി ജില്ലാപഞ്ചായത്തംഗം ജോസ്‌മോന്‍ മുണ്ടയ്ക്കല്‍ അനുവദിച്ച 10 ലക്ഷം രൂപ വിനിയോഗിച്ച് നടത്തിയ പ്രവര്‍ത്തനങ്ങളിലൂടെയാണിത് സാധിച്ചത്. ചെക്ക്ഡാമിന്‍റെ ഇരുവശങ്ങളിലും സ്റ്റീല്‍ വേലികള്‍ തീര്‍ത്ത് പ്രതലം ഇന്‍റര്‍ലോക്ക് വിരിച്ച് സ്റ്റീല്‍ പൈപ്പുകൊണ്ടുള്ള ഇരിപ്പിടങ്ങള്‍ സജ്ജമാക്കി. രണ്ട് സ്ഥലങ്ങളിലും മിനി മാക്‌സ് ലൈറ്റുകള്‍ സ്ഥാപിച്ചു. പതിമൂന്നാം വാര്‍ഡിന്‍റെ ഭാഗത്തെ പ്രവര്‍ത്തനങ്ങള്‍ക്ക് പുഴയോരം റസിഡന്‍സ് അസോസിയേഷനും പന്ത്രണ്ടാം വാര്‍ഡിന്‍റെ ഭാഗത്തെ പ്രവര്‍ത്തനങ്ങള്‍ക്ക് കൈരളി റസിഡന്‍സ് അസോസിയേഷനും നേതൃത്വം നല്‍കി. യോഗത്തില്‍ പഞ്ചായത്ത് പ്രസിഡന്‍റ് ഇ.എന്‍. ബിനു അധ്യക്ഷത വഹിച്ചു. ബ്ലോക്ക് പഞ്ചായത്തംഗം ഡോ.മേഴ്‌സി ജോണ്‍, മുന്‍ പഞ്ചായത്ത് പ്രസിഡന്‍റ് തോമസ് മാളിയേക്കല്‍, പഞ്ചായത്തംഗം ദീപലത സുരേഷ്, എം. ദിലീപ് തെക്കുംചേരി, രാധാ പ്രദീപ് കൂടാരപ്പള്ളി, രാധാകൃഷ്ണക്കുറുപ്പ് തുടങ്ങിയവര്‍ പ്രസംഗിച്ചു.

കൂത്താട്ടുകുളം ടൗൺ ഫൊറോന പള്ളിയിൽ നൊവേന തിരുനാളിന് കൊടിയേറി

കൂത്താട്ടുകുളം: കൂത്താട്ടുകുളം ടൗൺ ഫൊറോന പള്ളിയിൽ നൊവേന തിരുനാളിന് കൊടിയേറി. പാലാ രൂപത വികാരി ജനറാൾ മോൺ. ജോസഫ് തടത്തിൽ കൊടിയേറ്റ് നിർവഹിച്ചു. വികാരി ഫാ. ജയിംസ് കുടിലിൽ, സഹവികാരി ഫാ. ജോസഫ് മരോട്ടിക്കൽ എന്നിവർ തിരുക്കർമങ്ങൾക്കു നേതൃത്വം നൽകി. ഈ മാസം 28 വരെ വിശുദ്ധ യൂദാശ്ലീഹായുടെ നൊവേന തിരുനാൾ ആഘോഷിക്കും. 28 വരെ ദിവസവും വൈകുന്നേരം 6.15ന് 1001 എണ്ണത്തിരി തെളിക്കൽ ശുശ്രൂഷ ഉണ്ടായിരിക്കും.

ഈരാറ്റുപേട്ട-വാഗമൺ റോഡിൽ പിക്കപ്പ് വാൻ മറിഞ്ഞു

തീക്കോയി: ഈരാറ്റുപേട്ട- വാഗമൺ റോഡിൽ പിക്കപ്പ് വാൻ കൊക്കയിലേക്കു മറിഞ്ഞു. ഇന്നലെ 3.30ന് കാരികാട് ടോപ്പിനു സമീപം എട്ടാം മൈലിലാണ് അപകടമുണ്ടായത്. 50 അടിയോളം താഴ്ചയിലേക്ക് മറിഞ്ഞ പിക്കപ്പ് ആൾതാമസം ഇല്ലാത്ത വീടിനു മുകളിലേക്കാണ് വീണത്. തമിഴ്‌നാട് സ്വദേശികളായ രണ്ടു പേരാണ് പിക്കപ്പിലുണ്ടായിരുന്നത്. ഇവർ നിസാര പരിക്കുകളോടെ രക്ഷപ്പെട്ടു.

ദേവമാതാ കോളജിൽ ശ്രീനാരായണഗുരു ഓപ്പൺ സർവകലാശാല പ്രാദേശിക കേന്ദ്രം പ്രവർത്തനമാരംഭിച്ചു

കുറവിലങ്ങാട്: ദേവമാതാ ഓട്ടോണമസ് കോളജിൽ ശ്രീനാരായണഗുരു ഓപ്പൺ യൂണിവേഴ്സിറ്റിയുടെ പ്രാദേശികകേന്ദ്രം പ്രവർത്തനമാരംഭിച്ചു. 15 ബിരുദ പ്രോഗ്രാമുകളും 12 ബിരുദാനന്തരബിരുദ പ്രോഗ്രാമുകളുമാണ് ദേവമാതാ പ്രാദേശിക കേന്ദ്രത്തിൽ ആരംഭിച്ചിരിക്കുന്നത്. കോളജ് മാനേജർ ആർച്ച്പ്രീസ്റ്റ് റവ. ഡോ. തോമസ് മേനാച്ചേരി അധ്യക്ഷത വഹിച്ചു. ഓപ്പൺ യൂണിവേഴ്സിറ്റി വൈസ് ചാൻസിലർ ഡോ. വി.പി.ജഗതിരാജ് പഠനകേന്ദ്രത്തിന്‍റെ ഉദ്ഘാടനം നിർവഹിച്ചു. പ്രിൻസിപ്പൽ ഡോ. സുനിൽ സി. മാത്യു, റീജണൽ ഡയറക്ടർ ഡോ. ടോജോമോൻ മാത്യു, ബർസാർ ഫാ. ജോസഫ് മണിയൻചിറ, സെന്‍റർ കോ-ഓർഡിനേറ്റർ റെനീഷ് തോമസ്, എന്നിവർ പ്രസംഗിച്ചു. ശ്രീനാരായണഗുരു യൂണിവേഴ്സിറ്റി അസിസ്റ്റന്‍റ് പ്രഫസർ യു. അഖിലേഷ് പുതുതായി ചേർന്ന വിദ്യാർഥികൾക്ക് ഓറിയന്‍റേഷൻ ക്ലാസ് നടത്തി.

ഈരാറ്റു പേട്ട ഉപജില്ലാ ശാസ്ത്രോത്സവം അരുവിത്തുറയിൽ

അരുവിത്തുറ: ഈരാറ്റുപേട്ട ഉപജില്ലാ ശാസ്‌ത്രോത്സവം 21, 22 തീയതികളിൽ അരുവിത്തുറ സെന്‍റ് ജോർജ് ഹയർ സെക്കൻഡറി സ്‌കൂൾ, സെന്‍റ് മേരീസ് എൽപി സ്‌കൂൾ എന്നിവിടങ്ങളിലായി നടക്കും. നാളെ രാവിലെ 9.30 ന് സെബാസ്റ്റ്യൻ കുളത്തുങ്കൽ എം.എൽ.എ ഉദ്ഘാടനം നിർവഹിക്കും. സ്‌കൂൾ മാനേജർ ഫാ. സെബാസ്റ്റ്യൻ വെട്ടുകല്ലേലിൽ‌ അധ്യക്ഷത വഹിക്കും. ഈരാറ്റുപേട്ട മുനിസിപ്പൽ ചെയർപേഴ്‌സൺ സുഹ്‌റ അബ്ദുൽ ഖാദർ മുഖ്യപ്രഭാഷണം നടത്തും. 22 ന് വൈകുന്നേരം 4.30 ന് നടക്കുന്ന സമാപന സമ്മേളനം മുനിസിപ്പൽ ചെയർപേഴ്‌സൺ സുഹ്‌റ അബ്ദുൾ ഖാദർ ഉദ്ഘാടനം ചെയ്യും. സ്‌കൂൾ മാനേജർ ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിക്കും. രണ്ടു ദിവസങ്ങളിലായി നടക്കുന്ന ശാസ്ത്ര, സാമൂഹ്യശാസ്ത്ര, ഗണിതശാസ്ത്ര, ഐടി, പ്രവൃത്തിപരിചയമേളകളിലായി മൂവായിരത്തോളം കുട്ടികൾ പങ്കെടുക്കുമെന്ന് ഉപജില്ലാ വിദ്യാഭ്യാസ ഓഫീസർ ഷംല ബീവി, പ്രിൻസിപ്പൽ സജി തോമസ്, ഹെഡ്മാസ്റ്റർ ജോബിൻ തോമസ് എന്നിവർ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]