ADVERTISEMENT

ADVERTISEMENT

കെസിവൈഎം പ്രവർത്തന വർഷത്തിന് തുടക്കം

മൂവാറ്റുപുഴ : ഹോളി മാഗി ഫൊറോന പള്ളി കെസിവൈഎം യൂണിറ്റിന്‍റെ 2025-26 പ്രവർത്തന വർഷത്തിന് തുടക്കം. ലുമോസ് എന്ന പേരിൽ പാരിഷ് ഹാളിൽ സംഘടിപ്പിച്ച പരിപാടി വികാരി റവ.ഡോ. മാനുവൽ പിച്ചളക്കാട്ട് ഉദ്ഘാടനം ചെയ്തു. യൂണിറ്റ് പ്രസിഡന്‍റ് ഡോയൽ ദേവസി ജോസ് അധ്യക്ഷത വഹിച്ചു.

അസിസ്റ്റന്‍റ് വികാരി ഫാ. വർഗീസ് കണ്ണാടൻ, ആനിമേറ്റർ സിസ്റ്റർ ഡെലീന സിഎംസി, ഫൊറോന പ്രസിഡന്‍റ് ജേക്കബ് സാന്‍റി, സെക്രട്ടറി എഡ്വിൻ, വൈസ് പ്രസിഡന്‍റ് കാതറിൻ എന്നിവർ പ്രസംഗിച്ചു. കെസിവൈഎം യൂണിറ്റംഗങ്ങളുടെ ആഭിമുഖ്യത്തിൽ സംഘടിപ്പിച്ച വിവിധ കലാപരിപാടികളും അരങ്ങേറി. തുടർന്ന് ഫാ. പോൾ കള്ളിയാടിക്കൽ സിഎംഐ യുവാക്കൾക്കായി ഓറിയന്േ‍റഷൻ ക്ലാസും നയിച്ചു.

ADVERTISEMENT

എറണാകുളം നോര്‍ത്തിലെ ഫര്‍ണിച്ചര്‍ കടയില്‍ വന്‍ തീപിടുത്തം

കൊച്ചി: എറണാകുളം നോര്‍ത്ത് ടൗണ്‍ഹാളിനു സമീപം ഫര്‍ണിച്ചര്‍ കടയില്‍ ഇന്നലെ പുലര്‍ച്ചെയോടെ വന്‍ തീപിടുത്തം. ഷെയര്‍ ലാന്‍ഡ് സെക്കന്‍ഡ് ഫര്‍ണിച്ചര്‍ എന്ന യൂസ്ഡ് ഫര്‍ണിച്ചറുകള്‍ വില്പന നടത്തുന്ന കടയിലാണ് പുലര്‍ച്ചെ മൂന്നോടെ തീപിടിത്തമുണ്ടായത്. അഗ്നിക്ഷാസേനയുടെ മണിക്കൂറുകള്‍ നീണ്ട ശ്രമത്തിലൊടുവിലാണ് തീ പൂര്‍ണമായും അണയ്ക്കാനായത്. സമീപത്ത് മൂന്ന് പെട്രോള്‍ പമ്പുകളും, കടയ്ക്കു പിറകിലായി രണ്ടു ഫ്‌ളാറ്റുകളും ഒരു വീടുമുണ്ട്. സമീപത്തു കൂടി മെട്രോ റെയിലും കടന്നു പോകുന്നുണ്ട്. തീ നിയന്ത്രണവിധേയമായെങ്കിലും കടയില്‍ നിന്നും പുകയുയര്‍ന്നത് ചെറിയ തോതില്‍ ആശങ്ക സൃഷ്ടിച്ചു. കടയ്ക്കുള്ളിലുണ്ടായിരുന്ന ഫര്‍ണിച്ചറുകളെല്ലാം കത്തി നശിച്ചു. മേശ, കസേര, സെറ്റി, അലമാര ഉള്‍പ്പെടെയുള്ള ഗൃഹോപകരണങ്ങളാണ് കത്തിനശിച്ചത്. സമീപത്തെ ഹോട്ടല്‍ കെട്ടിടത്തിനും നേരിയ നാശമുണ്ട്. ഏകദേശം 50 ലക്ഷം രൂപയുടെ നഷ്ടമുണ്ടായതായാണ് പ്രാഥമിക നിഗമനം. സ്ഥാപനത്തിനുള്ളില്‍ സൂക്ഷിച്ചിരുന്ന രണ്ട് ഗ്യാസ് സിലിണ്ടറുകളില്‍ നിന്ന് ചോര്‍ച്ചയുണ്ടായി തീ പടര്‍ന്നതായി അഗ്‌നി രക്ഷാസേന അറിയിച്ചു. സമയോചിതമായ ഇടപെടലിനെ തുടര്‍ന്നാണ് പൊട്ടിത്തറി ഒഴിവായത്. ഫോറന്‍സിക് വിദഗ്ധര്‍ സ്ഥലത്ത് പരിശോധന നടത്തി. കഴിഞ്ഞ എട്ടു വര്‍ഷമായി യൂസ്ഡ് ഓഫീസ് ഫര്‍ണിച്ചറുകളുടെ വില്പന നടത്തിവന്ന സ്ഥാപനത്തിന്‍റെ ഉടമ എളമക്കര കറുകപ്പിള്ളി വീട്ടില്‍ ഹാരിസാണ്. ഞായറാഴ്ച രാത്രി 10.30 ഓടെയാണ് ഹാരിസ് കടയടച്ച് വീട്ടിലേക്ക് പോയത്. കടയിലെ മെയിന്‍ സ്വിച്ചും ഓഫാക്കിയിരുന്നു. പുലര്‍ച്ചെ സമീപവാസികളാണ് തീപിടിച്ച വിവരം ഹാരിസിനെ അറിയിച്ചത്. ഫയര്‍ ഫോഴ്‌സും പോലീസും സ്ഥലത്തെത്തി. രണ്ടു മണിക്കൂറിനുള്ളില്‍ തീയണച്ച് സേന ഷീറ്റുകൊണ്ട് പണിത ഏകദേശം 1,800 സ്‌ക്വയര്‍ ഫീറ്റിലുള്ള കട പുറത്തുനിന്നു പൂട്ടിയിരുന്നതിനാല്‍ അഗ്നിരക്ഷാസേന എത്തുമ്പോള്‍ അകത്ത് തീ ആളിക്കത്തുന്ന നിലയിലായിരുന്നു. മേല്‍ക്കൂരയും തീയില്‍ തകര്‍ന്നു വീണു. കടയുടെ പൂട്ടുപൊളിച്ച് വശങ്ങളിലെ ഷീറ്റുകള്‍ തകര്‍ത്താണ് അഗ്നിരക്ഷാസേന രക്ഷാപ്രവര്‍ത്തനം തുടങ്ങിയത്. ഫയര്‍ സ്‌റ്റേഷന്‍ ഓഫീസര്‍ രാജേഷ് കുമാറിന്‍റെ നേതൃത്വത്തില്‍ ഗാന്ധിനഗര്‍, ക്ലബ് റോഡ്, തൃപ്പൂണിത്തുറ, തൃക്കാക്കര, ഏലൂര്‍, മട്ടാഞ്ചേരി എന്നിവിടങ്ങളില്‍ നിന്നുള്ള ഒമ്പതു ഫയര്‍ യൂണിറ്റുകള്‍ രണ്ടു മണിക്കൂര്‍ നേരം കിണഞ്ഞു പരിശ്രമിച്ചാണ് തീയണച്ചത്. കടയ്ക്കുള്ളില്‍ ഇരുമ്പും പ്ലാസ്റ്റിക്കും കൊണ്ട് നിര്‍മിച്ച വസ്തുക്കളായതിനാല്‍ തീ അണയ്ക്കുന്ന ദൗത്യം കഠിനമായിരുന്നു. കെഎംആര്‍എല്ലില്‍ നിന്നും പമ്പിംഗിനായി വെള്ളം ഉപയോഗിച്ചു. അഗ്നിരക്ഷാസേനയും എറണാകുളം സെന്‍ട്രല്‍ പോലീസും ഉടന്‍ തന്നെ സമീപത്തെ ഫ്‌ളാറ്റുകളിലെയും വീട്ടിലെയും ആളുകളെ സുരക്ഷിത സ്ഥാനങ്ങളിലേക്ക് മാറ്റി. പെട്രോള്‍ പമ്പുകളുടെ പ്രവര്‍ത്തനവും നിര്‍ത്തിവയ്പിച്ചതിനാല്‍ കൂടുതല്‍ ദുരന്തം ഒഴിവായി. ഈ വഴിയുള്ള ഗതാഗതം പോലീസ് തിരിച്ചുവിട്ടു. സംഭവത്തില്‍ എറണാകുളം സെന്‍ട്രല്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. സ്ഥാപനത്തില്‍ അഗ്‌നിശമന സംവിധാനങ്ങളില്ലെന്ന് കണ്ടത്തിയതിനെ തുടര്‍ന്ന് സ്ഥാപനത്തിന് നോട്ടീസ് നല്‍കുമെന്ന് ജില്ലാ ഫയര്‍ ഓഫീസര്‍ കെ. ഹരികുമാര്‍ പറഞ്ഞു. മോഷണശ്രമം സംശയിക്കുന്നതായി കടയുടമ തീപിടുത്തത്തില്‍ മോഷണശ്രം സംശയിക്കുന്നതായി കടയുടമ ഹാരിസ് പറഞ്ഞു. പതിവു പോലെ മെയിന്‍ സ്വിച്ച് ഇന്നലെ രാത്രിയും ഓഫാക്കിയിരുന്നു. മോഷ്ടിക്കാനായി കയറിയ ആരെങ്കിലും ലൈറ്ററോ മറ്റ് തെളിച്ചതാകാമെന്നും അദ്ദേഹം പറഞ്ഞു. മുമ്പും ഈ കടയില്‍ മോഷണശ്രമം ഉണ്ടായിട്ടുണ്ടെന്ന് ഉടമ വ്യക്തമാക്കി.

മുതിർന്ന പൗരനിൽ നിന്ന് 25 ലക്ഷം തട്ടിയെടുത്ത കേസിൽ ഒരാൾ അറസ്റ്റിൽ

കിഴക്കമ്പലം: ബാങ്ക് ലോൺ തരപ്പെടുത്തി നൽകാമെന്ന് പറഞ്ഞ് മുതിർന്ന പൗരനിൽ നിന്ന് 25 ലക്ഷം രൂപ തട്ടിയ കേസിൽ ഒരാൾ അറസ്റ്റിൽ. ബീഹാർ നളന്ദ സ്വദേശി വിശാൽ കുമാറി(21)നെയാണ് തടിയിട്ടപറമ്പ് പോലീസ് അറസ്റ്റ് ചെയ്തത്. കിഴക്കമ്പലം സ്വദേശിക്കാണ് പണം നഷ്ടമായത്. സോഷ്യൽ മീഡിയയിലൂടെയാണ് തട്ടിപ്പ് സംഘത്തെ പരിചയപ്പെടുന്നത്. ഒരു ദേശസാൽകൃത ബാങ്കിൽ നിന്ന് 50 ലക്ഷം രൂപയുടെ ലോൺ തരപ്പെടുത്തി കൊടുക്കാമെന്നായിരുന്നു വാഗ്ദാനം. പ്രോസസിംഗ് ഫീ, ഇൻഷ്വറൻസ്, ബാങ്കിലെ നിയമങ്ങൾ മാറിയെന്നു പറഞ്ഞ് അതിന് ഫീ തുടങ്ങി ഓരോരോ കാരണങ്ങൾ പറഞ്ഞ്പണം വാങ്ങുകയായിരുന്നു. പിന്നീട് പണം വാങ്ങിയവരെക്കുറിച്ച് ഒരു വിവരവുമുണ്ടായില്ല. തുടർന്നാണ് പോലീസിൽ പരാതി നൽകിയത്. ജില്ലാ പോലീസ് മേധാവി എം. ഹേമലതയുടെ മേൽനോട്ടത്തിൽ പ്രത്യേക ടീം രൂപീകരിച്ചു. ശാസ്ത്രീയ അന്വേഷണത്തിനൊടുവിൽ നളന്ദയിലെ ഒറ്റപ്പെട്ട ഗ്രാമത്തിൽ പ്രതികളിലൊരാളുണ്ടെന്ന് മനസിലാക്കി. തുടർന്ന് വേഷം മാറി ദിവസങ്ങളോളം അവിടെ താമസിച്ച് സാഹസികമായി പിടികൂടി ഇയാളെ നാട്ടിലെത്തിക്കുകയായിരുന്നു. നിരവധി പേർക്ക് ഇത്തരത്തിൽ പണം നഷ്ടപ്പെട്ടിട്ടുണ്ടെന്നാണ് പ്രാഥമിക വിവരം. എഎസ്പി ശക്തി സിംഗ്‌ ആര്യ, ഇൻസ്പെക്ടർ പി.ജെ. കുര്യാക്കോസ്, എസ്ഐ എൻ.കെ. ജേക്കബ് സീനിയർ സിപിഒമാരായ കെ.കെ. ഷിബു, മിഥുൻ മോഹൻ എന്നിവരാണ് അന്വേഷണ സംഘത്തിലുള്ളത്.

വധശ്രമം: യുവാവ് അറസ്റ്റിൽ

നെടുമ്പാശേരി: 47കാരനെ കൊലപ്പെടുത്താൻ ശ്രമിച്ച കേസിൽ യുവാവ് അറസ്റ്റിൽ. പാലക്കാട് നെന്മാറ തിരുത്തുംപാടം പ്രണവിനെ(33)യാണ് ചെങ്ങമനാട് പോലീസ് അറസ്റ്റ് ചെയ്തത്. മൂന്നുപേർ നേരത്തെ പിടിയിലായിരുന്നു. കഴിഞ്ഞ മാർച്ചിൽ അത്താണിയിലുള്ള ബാറിലായിരുന്നു സംഭവം. പ്രതികളിലൊരാളായ വിക്രമൻ ബാർ കൗണ്ടറിലിരുന്ന് ബഹളം വച്ചപ്പോൾ മിണ്ടാതിരിക്കാൻ പറഞ്ഞതിലുള്ള വിരോധമാണ് വധശ്രമത്തിൽ കലാശിച്ചത്. പാർക്കിംഗ് ഏരിയയിൽ തടഞ്ഞു നിർത്തിയ ശേഷം മറ്റു പ്രതികളെ വിളിച്ചുവരുത്തി ആക്രമിക്കുകയായിരുന്നു. വിവിധ സ്റ്റേഷനുകളിലായി 15ഓളം കേസുകളിലെ പ്രതിയാണ് പ്രണവ്.

മദ്യപിച്ച് വാഹനം ഓടിച്ച മൂന്നു സ്വകാര്യ ബസ് ഡ്രൈവര്‍മാര്‍ കുടുങ്ങി

കൊച്ചി: മദ്യപിച്ച് വാഹനമോടിച്ച മൂന്ന് സ്വകാര്യ ബസ് ഡ്രൈവര്‍മാര്‍ക്കെതിരെ നടപടി. ഗതാഗത വകുപ്പ് കമ്മീഷണറുടെ നിര്‍ദേശപ്രകാരം എറണാകുളം ഡെപ്യൂട്ടി ട്രാന്‍സ്‌പോര്‍ട്ട് കമ്മീഷണര്‍, ആര്‍ടിഒ(എന്‍ഫോഴ്‌സ്‌മെന്‍റ്) സ്‌ക്വാഡ്, എറണാകുളം സിറ്റി പോലീസ് എന്നിവര്‍ സംയുക്തമായി നടത്തിയ പരിശോധനയിലാണ് മൂന്നുപേര്‍ പിടിയിലായത്. നിയമംലംഘിച്ച് സർവീസ് നടത്തിയ 18 ബസുകള്‍ക്കെതിരെയും നടപടികള്‍ സ്വീകരിച്ചു. നഗരത്തില്‍ സര്‍വീസ് നടത്തുന്ന ബസ് ഡ്രൈവര്‍മാര്‍ക്കെതിരെ പരാതികള്‍ ലഭിച്ചതിന്‍റെ അടിസ്ഥാനത്തില്‍ ഹൈക്കോര്‍ട്ട് ജംഗ്ഷന്‍, കലൂര്‍ ബസ്‌സ്റ്റാൻഡ് എന്നിവിടങ്ങള്‍ കേന്ദ്രീകരിച്ചായിരുന്നു പരിശോധന. വരുന്ന ദിവസങ്ങളിലും പരിശോധന തുടരുമെന്നു എറണാകുളം ആര്‍ടിഒ(എന്‍ഫോഴ്‌സ്‌മെന്‍റ്) അറിയിച്ചു.

‘മിഷന്‍ റാബീസ്'കാമ്പയിനുമായി കൊച്ചി കോര്‍പറേഷന്‍

കൊച്ചി: തെരുവുനായ ആക്രമണങ്ങള്‍ വര്‍ധിച്ചുവരുന്നതിനാല്‍ തെരുവുനായ്ക്കളെ കൂട്ടത്തോടെ വാക്‌സിനേറ്റ് ചെയ്യുന്ന ക്യാമ്പയിനുമായി കൊച്ചി കോര്‍പറേഷന്‍. പതിനായിരം നായ്ക്കളെ ഒറ്റയടിക്ക് വാക്‌സിനേറ്റ് ചെയ്യുന്ന ‘മിഷന്‍ റാബീസ്' ക്യാമ്പയിന്‍ ഓഗസ്റ്റ് ആദ്യവാരം നടക്കുമെന്ന് ആരോഗ്യ സ്ഥിരംസമിതി അധ്യക്ഷന്‍ ടി.കെ. അഷറഫ് പറഞ്ഞു. ഇതിനായി ആറ് നായ പിടുത്തക്കാരെക്കൂടി കരാര്‍ അടിസ്ഥാനത്തില്‍ ഗോവയില്‍ നിന്ന് കൊണ്ടുവരും. നിലവില്‍ ഈ ജോലി ചെയ്യുന്ന പരിശീലനം ലഭിച്ച അഞ്ച് ഡോഗ് കാച്ചര്‍മാരുണ്ട്. കൂടുതല്‍ പേര്‍ വരുന്നതോടെ നഗരത്തിലെ തെരുവുനായ പ്രശ്‌നത്തിന് പരിഹാരമാകുമെന്നും അദ്ദേഹം പറഞ്ഞു. ഗോവയിലെ വേള്‍ഡ് വൈഡ് വെറ്ററിനറി സര്‍വീസി(ഡബ്ല്യുവിഎസ്)ല്‍ നിന്നാണ് ഡോഗ് കാച്ചര്‍മാരെ എത്തിക്കുന്നത്. ഒരു വര്‍ഷത്തേക്കാണ് കരാര്‍. വേതനം ഉള്‍പ്പെടെയുള്ള ഇവരുടെ ചെലവുകള്‍ നഗരസഭ വഹിക്കും. നിലവിലുള്ള നായ പിടിത്തക്കാര്‍ക്ക് പ്രതിമാസം 21,000 ശമ്പളവും മറ്റ് ആനുകൂല്യങ്ങളുമാണ് നഗരസഭ നല്‍കുന്നത്. നായ പിടുത്തത്തിനായി ഒരു വാഹനം മാത്രമേ നിലവിലുള്ളു. ക്യാമ്പയിന്‍ ആരംഭിക്കുമ്പോള്‍ രണ്ട് വാഹനങ്ങള്‍ക്കൂടി കുടുതലായി വാങ്ങും. ബ്രഹ്മപുരത്തുള്ള അനിമല്‍ ബര്‍ത്ത് കണ്‍ട്രോള്‍ (എബിസി) യൂണിറ്റില്‍ 40 നായ്ക്കളെ ഒരേസമയം പാര്‍പ്പിക്കാന്‍ സൗകര്യമുള്ള ഒരു കൂടും നിര്‍മിക്കും. ക്യാമ്പയിന് മുന്നോടിയായി ബ്രഹ്മപുരത്തെ എബിസി യൂണിറ്റ് നവീകരണവും പൂര്‍ത്തീകരിക്കും. ശസ്ത്രക്രിയ ടേബിളുകളുടെ എണ്ണം ഒന്നില്‍ നിന്ന് മൂന്നായി ഉയര്‍ത്തും. വന്ധ്യംകരണ ശസ്ത്രക്രിയയ്ക്കായി ഒരു ഡോക്ടറെകൂടി കൂടുതലായി നിയമിച്ചിട്ടുണ്ട്. ഇതോടെ പ്രതിദിനം നായ്ക്കളുടെ വന്ധ്യംകരണം എട്ടില്‍ നിന്ന് 12 ആയി ഉയര്‍ന്നിരുന്നു. പെണ്‍ നായ്ക്കളെ വന്ധ്യംകരിക്കുന്നതിലാണ് ശ്രദ്ധ കേന്ദ്രീകരിക്കുന്നത്. വന്ധീകരണത്തിന് ശേഷം നായ്ക്കളെ പിടികൂടിയ സ്ഥലങ്ങളില്‍ തന്നെ തുറന്നു വിടും.

ഫ്ലാറ്റ് സമുച്ചയത്തിലെ സ്റ്റീം ബാത്ത് യൂണിറ്റിന് തീപിടിച്ചു

ഇടക്കൊച്ചി: ഇടക്കൊച്ചിയിലുള്ള കെന്‍റ് ബേ വാച്ച് സ്യൂട്ട്സ് എന്ന ഫ്ലാറ്റ് സമുച്ചയത്തിലെ സ്റ്റീം ബാത്ത് യൂണിറ്റിന് തീപിടിച്ച് ലക്ഷങ്ങളുടെ നഷ്ടം. ഇന്നലെ രാവിലെ 11ഓടെയായിരുന്നു സംഭവം. അരൂരിൽനിന്ന് ഫയർ യൂണിറ്റ് എത്തിയാണ് തീയണച്ചത്. ഷോർട്ട് സർക്യൂട്ടാണ് തീപിടുത്തത്തിനു കാരണമെന്നാണ് നിഗമനം. ദിവസ വാടകയ്ക്ക് നല്കിവരുന്ന സർവീസ് അപ്പാർട്ട്മെന്‍റാണിത്. കെട്ടിടത്തിലെ സ്വിമ്മിംഗ് പൂളിന് സമീപമാണ് സ്റ്റീം ബാത്ത് യൂണിറ്റ് സ്ഥാപിച്ചിരുന്നത്. തീപിടുത്തം നടന്ന സമയം പൂളിനു സമീപത്ത് സന്ദർശകർ ഉണ്ടായിരുന്നെങ്കിലും ആളപായമില്ല. കെട്ടിടത്തിൽനിന്ന് പുക ഉയരുന്നതുകണ്ട് നാട്ടുകാരും പരിഭ്രാന്തരായി ഇവിടേക്കെത്തി. 15 ലക്ഷത്തിന്‍റെ നാശനഷ്ടമുണ്ടായതായി അധികൃതർ പറഞ്ഞു. അരൂർ ഫയർ സ്റ്റേഷനിലെ അസി. ഫയർ ഓഫീസർ പി.എ. നിഷാദ്, റെസ്ക്യു ഓഫീസർമാരായ എം.വി. ഹർഷകുമാർ, പി.വി. സൂരജ്, എസ്. ലെനിൻ, ബിജു കെ. ഉണ്ണി, ഡ്രൈവർ സുമേഷ് എന്നിവരുടെ നേതൃത്വത്തിലാണ് തീയണച്ചത്.

ചന്ദര്‍കുഞ്ജ് ഫ്ളാറ്റ്: താമസക്കാരെ ഓഗസ്റ്റ് 31നകം ഒഴിപ്പിക്കും

കൊച്ചി: വൈറ്റില സില്‍വര്‍ സാന്‍ഡ് ഐലൻഡില്‍ സ്ഥിതി ചെയ്യുന്ന ചന്ദര്‍കുഞ്ജ് ആര്‍മി പാര്‍പ്പിട സമുച്ചയത്തിലെ ബി, സി ടവറുകള്‍ ബലക്ഷയത്തെ തുടര്‍ന്ന് പൊളിക്കുന്നതിനു മുന്നോടിയായി ഓഗസ്റ്റ് 31നകം താമസക്കാരെ ഒഴിപ്പിക്കാന്‍ തീരുമാനമായി. ഹൈക്കോടതിയില്‍ സമര്‍പ്പിച്ചിട്ടുള്ള സമയക്രമ പ്രകാരം തന്നെ കെട്ടിടങ്ങള്‍ പൊളിക്കുന്നതിനും പുനര്‍നിര്‍മിക്കുന്നതിനും നടപടികള്‍ സ്വീകരിക്കുമെന്ന് ദുരന്തനിവാരണ ഡെപ്യൂട്ടി കളക്ടര്‍ അറിയിച്ചു.

എസ്‌സി, എസ്ടി മോണിറ്ററിംഗ് കമ്മിറ്റി : 54 പരാതികള്‍ പരിഗണിച്ചു

കൊച്ചി: ജില്ലാതല എസ്‌സി എസ്ടി വിജിലന്‍സ് ആന്‍ഡ് മോണിറ്ററിംഗ് കമ്മിറ്റി യോഗം ചേര്‍ന്നു. പി.വി. ശ്രീനിജിന്‍ എംഎല്‍എയുടെ സാന്നിധ്യത്തില്‍ ജില്ലാ കളക്ടര്‍ എന്‍.എസ്.കെ. ഉമേഷ് അധ്യക്ഷനായി ചേര്‍ന്ന യോഗത്തില്‍ 54 പരാതികള്‍ പരിഗണിച്ചു. പട്ടികജാതി (എസ്‌സി) വിഭാഗത്തിലുള്ളവരുടെ 37 പരാതികളും, പട്ടികവര്‍ഗ(എസ്ടി) വിഭാഗത്തിലുള്ളവരുടെ 17 പരാതികളുമാണ് കമ്മിറ്റിയുടെ പരിഗണനയ്ക്കു വന്നത്. ചാര്‍ജ് ഷീറ്റ് നല്‍കിയ കേസുകളും കോടതിയുടെ പരിഗണനയിലുള്ള കേസുകളും അവലോകനത്തിന് പരിഗണിക്കേണ്ട പട്ടികയില്‍ നിന്ന് ഒഴിവാക്കാവുന്നതാണെന്ന് യോഗം നിരീക്ഷിച്ചു. കേസുകളുടെ പുരോഗതി കൃത്യമായി ബന്ധപ്പെട്ട ഉദ്യോഗസ്ഥര്‍ പരിശോധിക്കേണ്ടതാണ്. ഇത്തരം കേസുകളില്‍ സമയബന്ധിതമായി അന്വേഷണം നടത്തി റിപ്പോര്‍ട്ട് ചെയ്ത പോലീസ് ഉദ്യോഗസ്ഥരെ യോഗത്തില്‍ എംഎല്‍എ അഭിനന്ദിച്ചു. കളക്ടറുടെ ചേംബറില്‍ നടന്ന യോഗത്തില്‍ പെരുമ്പാവൂര്‍ എഎസ്പി ശക്തി സിംഗ് ആര്യ, മറ്റ് ബന്ധപ്പെട്ട ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

പാലക്കാട് കാര്‍ പൊട്ടിത്തെറിച്ച് അപകടം: ചികിത്സയിലുള്ളവരുടെ നിലയില്‍ മാറ്റമില്ല

കൊച്ചി: പാലക്കാട് പൊല്‍പ്പുള്ളി അത്തിക്കോട്ടില്‍ കാര്‍ പൊട്ടിത്തെറിച്ചുണ്ടായ അപകടത്തില്‍ പൊള്ളലേറ്റ് എറണാകുളത്തെ സ്വകാര്യ ആശുപത്രിയില്‍ ചികിത്സയില്‍ കഴിയുന്ന എല്‍സി, മകള്‍ അലീന (10) എന്നിവരുടെ നില മാറ്റമില്ലാതെ തുടരുന്നു. എല്‍സിക്ക് 45 ശതമാനവും അലീനക്ക് 35 ശതമാനവും പൊള്ളലേറ്റിരുന്നു. ഇരുവര്‍ക്കും ബോധം തെളിഞ്ഞു. മരുന്നുകളോട് പ്രതികരിക്കുന്നുമുണ്ട്. എന്നാല്‍ ആരോഗ്യസ്ഥിതി മെച്ചപ്പെട്ടിട്ടില്ലെന്ന് ആശുപത്രി അധികൃതര്‍ അറിയിച്ചു. അപകടത്തില്‍ എല്‍സിയുടെ മറ്റു രണ്ടു മക്കളായ ആല്‍ഫ്രഡ് (ആറ്), എമിലിന(നാല്) എന്നിവര്‍ മരണപ്പെട്ടിരുന്നു. വെള്ളിയാഴ്ച വൈകിട്ട് 5.30ഓടെയായിരുന്നു സംഭവം. ആശുപത്രിയിലെ ജോലി കഴിഞ്ഞെത്തിയ എല്‍സി കുട്ടികളെയും കൂട്ടി തന്‍റെ മാരുതി 800 കാറില്‍ പുറത്തേക്ക് പോകാനൊരുങ്ങുമ്പോഴായിരുന്നു അപകടം.

അഴീക്കോട്-മുനമ്പം പാലം: ബോക്‌സ് ഗർഡർ സ്ഥാപിച്ചു തുടങ്ങി

ചെറായി: തീരദേശ ഹൈവേയിലെ ചേർത്തല - പൊന്നാനി ഇടനാഴിയിലെ ഏറ്റവും വലിയ പാലമായ അഴീക്കോട് -മുനമ്പം പാലത്തിന്‍റെ സെഗ്‌‌‌‌മെന്‍റ് ബോക്സ്‌ ഗർഡറുകൾ സ്ഥാപിച്ചു തുടങ്ങി. നാട്ടുകാരുടെയും ജനപ്രതിനിധികളുടെയും സന്നിധ്യത്തിൽ ആദ്യ ഗർഡർ ഇന്നലെ അഴീക്കോട് ഭാഗത്താണ് സ്ഥാപിച്ചത്. ആകെ 216 ഗർഡറുകളാണ് പാലത്തിനു വേണ്ടത്. 40 എണ്ണത്തിന്‍റെ നിർമാണം ഇതുവരെ പൂർത്തിയായതോടെയാണ് ഇവ സ്ഥാപിച്ചു തുടങ്ങിയത്. 110 ടണ്ണിലേറെ ഭാരമുള്ള കൂറ്റൻ ഗർഡറുകൾ ഒരു കിലോ മീറ്റർ അകലെയുള്ള നിർമാണശാലയിൽനിന്ന് ട്രെയ്‌ലറിൽ എത്തിച്ച് ക്രെയിൻ ഉപയോഗിച്ച് സ്ഥാപിക്കുകയാണ് ചെയ്യുന്നത്. സംസ്ഥാനത്ത് ആദ്യമായാണ് പാലം നിർമാണത്തിൽ ഇത്തരം ബോക്‌സ് ഗർഡർ ലോഞ്ചിംഗ് ഉപയോഗിക്കുന്നത്. നിർമാണം വേഗത്തിലാക്കാനും കോൺക്രീറ്റ് മാലിന്യം കായലിൽ വീഴാതിരിക്കാനുമാണിതെന്ന് ചടങ്ങിനു സാക്ഷ്യം വഹിച്ച കൈപ്പമംഗലം എംഎൽഎ എം.എൽ.ഇ.ടി. ടൈസൺ അറിയിച്ചു. പുരാതന മുസരീസ് കൊടുങ്ങല്ലൂർ തുറമുഖ കവാടമായ ഇവിടത്തെ പ്ര കൃതി സൗന്ദര്യം നേരിട്ട് ആസ്വ ദിക്കാനാവും വിധമാണ് പാലത്തിന്‍റെ ഡിസൈൻ. അപ്രോച്ച് റോഡ് ഉൾപ്പെടെ 1123 മീറ്റർ നീളവും 15.70 മീറ്റർ വീതിയും പാലത്തിനുണ്ടാവും. ഒന്നര മീറ്റർ വീതിയിൽ നടപ്പാതയും 1.80 മീറ്റർ സൈക്കിൾ ട്രാക്കും പാലത്തിനുണ്ട്. കിഫ്ബിയിൽനിന്ന് അനുവദിച്ച 164 കോടി രൂപ ചെലവഴിച്ചാണ് പാലം നിർമിക്കുന്നത്.

അപകടാവസ്ഥയിലുള്ള മതിലിലേക്ക് ലോറി ചരിഞ്ഞു

ചോറ്റാനിക്കര: അപകടാവസ്ഥയിലുള്ള സ്കൂൾ മതിലിനരികിൽ പാർക്ക് ചെയ്തിരുന ലോറി മതിലിലേയ്ക്ക് ചേർന്ന് ചരിഞ്ഞത് പരിഭ്രാന്തി പരത്തി. ചോറ്റാനിക്കര വൊക്കേഷണൽ ഹയർ സെക്കൻഡറി സ്കൂൾ വളപ്പിനോട് ചേർന്ന് ചരിഞ്ഞു നിൽക്കുന്ന മതിലിലേക്കാണ് ലോറി ചരിഞ്ഞത്. ഞായറാഴ്ച്ച വൈകിട്ട് മഴയെത്തുടർന്ന് മണ്ണൊലിച്ച് പോയതിനാലാണ് ഇവിടെ റോഡരികിൽ പാർക്ക് ചെയ്ത ലോറി ചരിഞ്ഞത്. തുടർന്ന് തിങ്കളാഴ്ച്ച ഉച്ചയോടെ മുളന്തുരുത്തി അഗ്നിരക്ഷാ സേനാംഗങ്ങളെത്തി ക്രെയിൻ ഉപയോഗിച്ച് ലോറി നീക്കുകയായിരുന്നു. മതിൽ ചരിഞ്ഞ ഭാഗത്ത് വിഎച്ച്എസ്‌‌‌‌സി കെട്ടിടമുള്ളതിനാൽ ലോറി മാറ്റുന്ന സമയത്തുള്ള അപകട സാഹചര്യം മുൻനിർത്തി സ്കൂളിന് ഉച്ചയ്ക്ക് ശേഷം അവധി നൽകി. ഇവിടെ റോഡ് നിരപ്പിനെക്കാളും താഴ്ന്ന നിലയിലാണ് സ്കൂൾ വളപ്പ് സ്ഥിതി ചെയ്യുന്നത്. മതിലിന്‍റെ താഴെയുള്ള കരിങ്കൽ കെട്ടിനടിയിൽനിന്നു മണ്ണൊലിച്ച് പോയതോടെ മതിലിന്‍റെ സ്ഥിതി കൂടുതൽ പരിതാപകരമായിരുന്നു. മതിൽ ഇടിഞ്ഞാൽ സ്കൂൾ വളപ്പിലേക്ക് വീഴുമെന്നതിനാൽ ഈ ഭാഗത്തുള്ള ടോയ്‌‌ലറ്റ് ബ്ലോക്കിലേയ്ക്കുള്ള പ്രവേശനവും തടഞ്ഞിട്ടുണ്ട്. അപകടാവസ്ഥയിൽ ചരിഞ്ഞു നിൽക്കുന്ന മതിൽ എത്രയും പെട്ടെന്ന് നീക്കം ചെയ്യണമെന്ന് സേനാംഗങ്ങൾ ബന്ധപ്പെട്ടവരോട് ആവശ്യപ്പെട്ടിട്ടുണ്ട്. കെഎസ്ഇബി അധികൃതരും വില്ലേജ് ഓഫീസറും പഞ്ചായത്ത് പ്രസിഡന്‍റും സംഭവ സ്ഥലത്തെത്തിയിരുന്നു.

മുറിച്ചിട്ട മരങ്ങൾക്കിടയിലൂടെ കുഞ്ഞുങ്ങളുടെ അപകടയാത്ര

പെരുമ്പാവൂർ: കൂവപ്പടി ഗവ. എൽപി സ്കൂളിനു മുന്നിൽ റോഡിൽ നിന്നിരുന്ന പാഴ്മരങ്ങളെല്ലാം വെട്ടിമാറ്റിയിട്ട് ആഴ്ചകളേറെയായി. വെട്ടിയിട്ട മരങ്ങൾ നീക്കം ചെയ്യാത്തതു മൂലം സ്കൂളിലേയ്ക്കെത്തുന്ന കൊച്ചുകുഞ്ഞുങ്ങളും രക്ഷിതാക്കളും ബുദ്ധിമുട്ടിലായിരിക്കുകയാണ്. ഭയചകിതരായാണ് കൊച്ചുകുഞ്ഞുങ്ങളുടെ ഇതുവഴിയുള്ള യാത്ര. വാഹന ഗതാഗതത്തിരക്കേറിയ റോഡിൽ കുട്ടികൾ റോഡുമുറിച്ചു കടക്കുന്നതുതന്നെ ഏറെ ഭയപ്പെട്ടാണ്. മുറിച്ചിട്ടിരിക്കുന്ന പാഴ്മരങ്ങൾ കൂട്ടിയിട്ടിയിരിക്കുന്നതിനിടയിലൂടെ വേണം കുട്ടികൾക്ക് സ്കൂളിനകത്തേയ്ക്കും പുറത്തേയ്ക്കും കടക്കാൻ. കാൽനട യാത്രക്കാർക്കും ഇത് ബുദ്ധിമുട്ടായിത്തീർന്നിരിക്കുകയാണ്. സ്കൂൾ പരിസരത്ത് വാഹനങ്ങളുടെ അമിതവേഗം നിയന്ത്രിക്കാനും അടിയന്തര നടപടിവേണമെന്ന് നാട്ടുകാരും പിടിഎ ഭാരവാഹികളും ആവശ്യപ്പെട്ടു.

‘സംസ്ഥാന സർക്കാർ പദ്ധതിരേഖ കേന്ദ്രത്തിന് സമർപ്പിക്കണം’

വൈപ്പിൻ: മുനമ്പം ഹാർബർ നവീകരണത്തിനു സംസ്ഥാന സർക്കാർ ശിപാർശയും വിശദ പദ്ധതിരേഖയും കേന്ദ്ര സർക്കാരിൽ സമർപ്പിക്കണമെന്ന് ആവശ്യപ്പെട്ട് മുനമ്പം മത്സ്യബന്ധന മേഖലയുമായി ബന്ധപ്പെട്ട വിവിധ സംഘടനകൾ രംഗത്ത്. ഫണ്ട് അനുവദിക്കാൻ സംസ്ഥാന സർക്കാർ വിശദമായ പദ്ധതിരേഖ സമർപ്പിക്കണമെന്ന് ഹൈബി ഈഡൻ എംപിയെ കേന്ദ്ര ഫിഷറീസ് മന്ത്രി അറിയിച്ചതിന് തുടർന്നാണിത്. രണ്ട് പതിറ്റാണ്ട് മുമ്പ് മാതൃക ഫിഷിംഗ് ഹാർബർ ആയി പ്രഖ്യാപിച്ച മുനമ്പത്തിന് പിന്നീട് എന്നും അവഗണനയായിരുന്നുവെന്ന് ബോട്ട്ഓണേഴ്സ് ആൻഡ് ഓപ്പറേറ്റേഴ്സ് കോ ഓർഡിനേഷൻ കമ്മിറ്റി ചെയർമാൻ കെ.ബി. രാജീവ് പറയുന്നു. ഹാർബറിൽനിന്ന് കിട്ടുന്ന കോടികളുടെ വരുമാനം ഇവിടുത്തെ വികസനത്തിനുവേണ്ടി ഉപയോഗിക്കുന്നില്ല. ഹാർബറിൽ നാലാമതായി ഒരു ബർത്തും ലേല ഹാളും കൂടി സ്ഥാപിക്കണമെന്നത് ഏറെ നാളായുള്ള ആവശ്യമാണ്. ഇന്ത്യയിൽനിന്നും മത്സ്യവിഭവങ്ങൾ ഇറക്കുമതി ചെയ്യുന്ന യൂറോപ്യൻ യൂണിയൻ പ്രതിനിധികൾ ഹാർബർ സന്ദർശിച്ചപ്പോൾ ആവശ്യപ്പെട്ട പ്രകാരം ഒന്നാമത്തെ ലേല ഹാൾ അടച്ചു കെട്ടുകയും ശീതീകരിക്കുകയും വേണമെന്ന ആവശ്യവും ഇതുവരെ നടപ്പാക്കിയില്ല. ഈ സാഹചര്യത്തിൽ സർക്കാർ പദ്ധതിരേഖ സമർപ്പിക്കുമ്പോൾ ഇക്കാര്യംകൂടി പരിഗണിക്കണമെന്ന് കോ ഓർഡിനേഷൻ കമ്മിറ്റി ചെയർമാൻ ആവശ്യപ്പെട്ടു.

ചൂർണിക്കര- മനയ്ക്കപ്പടി റോഡ് തകർന്നു: വാഴനട്ട് പ്രതിഷേധിച്ചു

ആലുവ: തകർന്ന് തരിപ്പണമായ ചൂർണിക്കര - മാരിയിൽ - മനയ്ക്കപ്പടി റോഡ് സഞ്ചാരയോഗ്യമാക്കണമെന്ന് ആവശ്യപ്പെട്ട് വാഴനട്ട് പ്രതിഷേധിച്ചു. ബിജെപിയുടെ നേതൃത്വത്തിൽ നടന്ന പ്രതിഷേധം മണ്ഡലം ജനറൽ സെക്രട്ടറി പ്രദീപ് പെരുംപടന്ന ഉദ്ഘാടനം ചെയ്തു. ചൂർണിക്കര പഞ്ചായത്തിലെ മാരിയിൽ - മനയ്ക്കപ്പടി റോഡ് തകർന്നിട്ട് നാളുകൾ ഏറെയായി. അശോകപുരത്തുനിന്നും തായിക്കാട്ടുകര അമ്പാട്ട്കാവ് ഭാഗത്തേക്ക് ആലുവ പട്ടണം ഒഴിവാക്കി എളുപ്പത്തിൽ എത്താവുന്ന റോഡാണിത്.

ലൂര്‍ദ് ആശുപത്രിയില്‍ പ്ലാസ്റ്റിക് സര്‍ജറി എക്‌സിബിഷന്‍

കൊച്ചി: ലോക പ്ലാസ്റ്റിക് സര്‍ജറി ദിനം പ്രമാണിച്ച് എറണാകുളം ലൂര്‍ദ് ആശുപത്രിയില്‍ വിവിധ പരിപാടികളോടെ ആചരിച്ചു. ലൂര്‍ദ് ആശുപത്രി പ്ലാസ്റ്റിക് സര്‍ജറി വിഭാഗം മേധാവിയും സീനിയര്‍ കണ്‍സള്‍ട്ടന്റുമായ ഡോ. ചാക്കോ സിറിയക്ക് നേതൃത്വത്തില്‍ നടത്തിയ 111 പ്ലാസ്റ്റിക് സര്‍ജറികളുടെ വിശദാംശങ്ങളടങ്ങിയ എക്‌സിബിഷന്‍ ടി.ജെ. വിനോദ് എംഎല്‍എ ഉദ്ഘാടനം ചെയ്തു. ലൂര്‍ദ് ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ഡയറക്ടര്‍ ഫാ.ജോര്‍ജ് സെക്വീര അധ്യക്ഷത വഹിച്ച ചടങ്ങില്‍ ലൂര്‍ദ് ആശുപത്രി മെഡിക്കല്‍ സൂപ്രണ്ട് ഡോ. സന്തോഷ് ജോണ്‍ ഏബ്രഹാം, ലൂര്‍ദ് കോളജ് ഓഫ് നഴ്‌സിംഗ് പ്രിന്‍സിപ്പല്‍ സിസ്റ്റര്‍ റുഫീന എട്ടുരുത്തില്‍, ഡോ. ചാക്കോ സിറിയക്, ലൂര്‍ദ് ആശുപത്രി നഴ്‌സിംഗ് സൂപ്പര്‍വൈസര്‍ സിസ്റ്റര്‍ അനീറ്റ എന്നിവര്‍ പ്രസംഗിച്ചു. പ്ലാസ്റ്റിക് സര്‍ജറി എക്‌സിബിഷന്‍ 19 വരെ രാവിലെ ഒന്‍പത് മുതല്‍ വൈകുന്നേരം അഞ്ച് വരെ സൗജന്യമായി സന്ദര്‍ശിക്കാം.

27 വർഷമായി ഒളിവിലായിരുന്ന പ്രതി പോലീസ് പിടിയിൽ

നെടുമ്പാശേരി: ഇരുപത്തിയേഴ് വർഷമായി ഒളിവിൽ കഴിഞ്ഞ പ്രതി പോലീസ് പിടിയിലായി. ചെങ്ങമനാട് പറമ്പയത്ത് താമസിച്ചിരുന്ന രമേശനെ (62)യാണ് ചെങ്ങമനാട് പോലീസ് ചേർത്തലയിൽനിന്നു പിടികൂടിയത്. ഇയാളുടെ വീട്ടിൽനിന്നും കഞ്ചാവ് പിടികൂടിയ കേസിൽ നേരത്തെ അറസ്റ്റ് ചെയ്തിരുന്നു. തുടർന്ന് ജാമ്യം കിട്ടി. കോടതി നടപടികൾക്കിടയിൽ 1998ലാണ ഇയാൾ ഒളിവിൽപ്പോയത്.

ലയൺസ് ക്ലബ് കൊച്ചിൻ പ്രൈഡിന് 25 ലക്ഷത്തിന്‍റെ സേവന പദ്ധതികൾ

കൊച്ചി: ലയൺസ് ക്ലബ് കൊച്ചിൻ പ്രൈഡിന്‍റെ പരിധിയിൽ 25 ലക്ഷം രൂപയുടെ സേവന പദ്ധതികൾ ഈ വർഷം നടപ്പിലാക്കുമെന്നു പ്രസിഡന്‍റ് എൻ.ബി. രാധാകൃഷ്ണൻ നായർ പറഞ്ഞു. വിദ്യാലയങ്ങളിൽ നാപ്കിൻ ഇൻസുലേറ്റർ, ലഹരി വിരുദ്ധ പ്രചരണം, കുട്ടികളുടെ നേത്ര പരിശോധന, വിശക്കുന്നവർക്ക് ഭക്ഷണം, വിദ്യാഭ്യാസ സഹായം, വീൽചെയർ വിതരണം, മെഡിക്കൽ ക്യാമ്പുകൾ, നിർധനരായ രോഗികൾക്ക് ധന സഹായം, ഉൾപ്പെടെയുള്ള പദ്ധതികളും ലയൺസ് ഇന്‍റർനാഷണൽ പ്രോജക്ടുകളും നടപ്പിലാക്കും. 2025-2026 വർഷത്തെ ഭാരവാഹികളുടെ സ്ഥാനാരോഹണവും സേവന പദ്ധതികളുടെ ഉദ്ഘാടനവും ലയൺസ് വൈസ് ഗവർണർ വി.എസ്. ജയേഷ് നിർവഹിച്ചു. സോൺ ചെയർപേഴ്സൺ വേണാട്ട് യേശുദാസ് അധ്യക്ഷത വഹിച്ചു. ഡിസ്ട്രിക്ട് ചീഫ് പ്രോജക്ട് കോ-ഓർഡിനേറ്റർ സിബി ഫ്രാൻസിസ്, സാബു ജോസഫ്, റീജണൽ ചെയർപേഴ്സൺ സി. ചാണ്ടി, പബ്ലിസിറ്റി സെക്രട്ടറി കെ. വിജയകുമാർ, മീഡിയ സെക്രട്ടറി കുമ്പളം രവി, ക്വിസ് ബൗൾ സെക്രട്ടറി ദീപ്തി വിജയകുമാർ, സെക്രട്ടറി റോബർട്ട് സേവ്യർ, ട്രഷറർ മനോജ് സുകുമാരൻ, റോബിൻ ക്ളമെന്‍റ്, വേണു സി. മേനോൻ, കെ.എൻ. സുകുമാര മേനോൻ, എസ്.കെ. ഗോപാലകൃഷ്ണൻ എന്നിവർ പ്രസംഗിച്ചു.

ഫെൻസിംഗ് മത്സരം

ഏലൂർ: ഇടപ്പള്ളിയിൽ വച്ച് നടന്ന ഫെൻസിംഗ് മത്സരത്തിൽ ഫോയിൽ ആൺകുട്ടികളുടെ സബ് ജൂണിയർ ഇനത്തിൽ എലൂർ ഗവ. ഹൈസ്കൂളിലെ എട്ടാം ക്ലാസ് വിദ്യാർഥികളായ പുനീത് രണ്ടാം സ്ഥാനവും എം. വിഷ്ണു മൂന്നാം സ്ഥാനവും വിഷ്ണു വർധൻ നാലാം സ്ഥാനവും കരസ്ഥമാക്കി. ഫോയിൽ അണ്ടർ-17 ഗേൾസ് കാഡറ്റിൽ സഫാ സുൽത്താന ഒന്നാം സ്ഥാനവും ആയിഷാ പർവീൺ മൂന്നാം സ്ഥാനവും കരസ്ഥമാക്കി. എപ്പീ അണ്ടർ-17 ബോയ്സ് കാഡറ്റ് ഇനത്തിൽ അഭിനീത് കെ. ഷൈജു ഒന്നാം സ്ഥാനവും സ്റ്റൈൻ മൈക്കിൾ രണ്ടാം സ്ഥാനവും കരസ്ഥമാക്കി. എപ്പീ അണ്ടർ-17 ഗേൾസ് കാഡറ്റ് ഇനത്തിൽ അനശ്വര പ്രജീഷ് മൂന്നാം സ്ഥാനം കരസ്ഥമാക്കി. എപ്പീ സബ് ജൂണിയർ ബോയ്സ് ഇനത്തിൽ ദേവ് രാജ് ഒന്നാം സ്ഥാനവും സി.എസ്. ആകാശ് രണ്ടാം സ്ഥാനവും ആന്‍റൺ അഭിലാഷ് മൂന്നാം സ്ഥാനവും കരസ്ഥമാക്കി. സാബർ സബ് ജൂണിയർ ബോയ്സ് ഇനത്തിൽ മുഹമ്മദ് അമാൻ രണ്ടാം സ്ഥാനവും വി.പി. സൂര്യദേവ് മൂന്നാം സ്ഥാനവും കരസ്ഥമാക്കി.

വിദ്യാർഥി സമരം: സംസ്കൃത സർവകലാശാലയിൽ പോലീസ് സംരക്ഷണം ആവശ്യപ്പെട്ടു

കാലടി: ശ്രീശങ്കരാചാര്യ സംസ്കൃത സർവകലാശാലയിൽ അച്ചടക്കം ഉറപ്പുവരുത്തുന്നതിനും ലഹരി വിമുക്ത ക്യാമ്പസാക്കി മാറ്റുന്നതിനുമായി കാലടി മുഖ്യ കാമ്പസിൽ നടപ്പിലാക്കിയ ഉത്തരവിനെതിരെ ഒരു വിഭാഗം വിദ്യാർഥികൾ നടത്തിവരുന്ന സമരത്തിനെതിരെ ശക്തമായ നടപടികൾ സ്വീകരിക്കുന്നതിന്‍റെ ഭാഗമായി സർവകലാശാല പോലീസ് സംരക്ഷണം ആവശ്യപ്പെട്ട് കത്ത് നൽകി. ജില്ല പോലീസ് മേധാവിയ്ക്കും കാലടി പോലീസ് എസ്എച്ച്ഒയ്ക്കുമാണ് സർവകലാശാല രജിസ്ട്രാർ കത്ത് നൽകിയത്. ജൂലൈ ഒന്നിലെയും എട്ടിലെയും ഉത്തരവുകൾ കൃത്യമായി നടപ്പിലാക്കുവാനാണ് സർവകലാശാലയ്ക്ക് പോലീസ് സംരക്ഷണം ആവശ്യപ്പെട്ടിരിക്കുന്നത്. സർവകലാശാലയ്ക്കും ഉദ്യോഗസ്ഥർക്കും പോലീസ് സംരക്ഷണം നൽകണമെന്നും രാത്രി 11ന് സർവകലാശാലയുടെ മുഖ്യ കവാടങ്ങളും ഹോസ്റ്റലുകളുടെ കവാടങ്ങളും അടയ്ക്കാൻ പോലീസ് ഇടപെടണമെന്നുമാണ് രജിസ്ട്രാർ കത്തിലൂടെ പോലീസിനോട് ആവശ്യപ്പെട്ടിരിക്കുന്നത്.

കഞ്ചാവുമായി യുവാവ് അറസ്റ്റിൽ

കാലടി: 620 ഗ്രാം കഞ്ചാവുമായി യുവാവ് പിടിയിൽ. ചൊവ്വര ശ്രീമൂലനഗരം തേവര് പറമ്പിൽ നിയാസ് (31) നെയാണ് കാലടി പോലീസ് പിടികൂടിയത്. അകനാട് കനാൽ ബണ്ട് റോഡ് ഭാഗത്ത് സ്കൂട്ടറിൽ കഞ്ചാവ് കടത്തുന്നതിനിടയിലാണ് ഇയാളെ കസ്റ്റഡിയിലെടുത്തത്. ഇയാളിൽനിന്ന് കഞ്ചാവ് വാങ്ങുന്നവരെക്കുറിച്ചും അന്വേഷണം നടക്കുന്നു. എഎസ്പി ശക്തി സിംഗ് ആര്യയുടെ നേതൃത്വത്തിൽ ഇൻസ്പെക്ടർ അനിൽ കുമാർ ടി. മേപ്പിള്ളി, എസ്ഐമാരായ ജോസി എം. ജോൺസൺ, മുഹമ്മദ്‌ ആഷിക്ക്, എഎസ്ഐ ജിൻസൺ, സിപിഒ സജീവ് എന്നിവരാണ് അന്വേഷണ സംഘത്തിലുള്ളത്.

പുതുതലമുറ നന്മയുടെ മാതൃകകളെ ജീവിതത്തിൽ പകർത്തണം: മന്ത്രി രാജൻ

മൂവാറ്റുപുഴ: പുതു തലമുറയ്ക്ക് നമ്മൾ പഠിപ്പിച്ചു കൊടുക്കേണ്ട പാഠങ്ങൾ കേവലം പാഠപുസ്തകങ്ങളിലെ വരികളിൽ നിന്നു മാത്രമല്ലെന്നും നമുക്കു ചുറ്റുമുള്ള നന്മയുടെ മാതൃകകളെ കൂടി അവരുടെ ജീവിതത്തിൽ പകർത്താൻ കഴിയണമെന്നും മന്ത്രി കെ. രാജൻ. സബൈൻ ആശുപത്രിയും അതിഥി ചാരിറ്റബിൾ സൊസൈറ്റിയും സംയുക്തമായി ഒന്പത് കുടുംബങ്ങൾക്ക് സൗജന്യമായി നൽകിയ ഭവനങ്ങളുടെ താക്കോൽദാന ചടങ്ങ് ഉദ്ഘാടനം ചെയ്യുകയായിരുന്നു മന്ത്രി. ‌ മാത്യു കുഴൽനാടൻ എംഎൽഎ അധ്യക്ഷത വഹിച്ചു. കേരള ബാങ്ക് പ്രസിഡന്‍റ് ഗോപി കോട്ടമുറിക്കൽ താക്കോൽ ദാനം നിർവഹിച്ചു. ആശുപത്രി എംഡി ഡോ. എസ്. സബൈൻ, ഡീൻ കുര്യാക്കോസ് എംപി, എൽദോസ് കുന്നപ്പിള്ളി എംഎൽഎ, മുൻ എംഎൽഎമാരായ ജോസഫ് വാഴയ്ക്കൻ, ബാബു പോൾ, പായിപ്ര പഞ്ചായത്ത് പ്രസിഡന്‍റ് എം.എസ് അലിയാർ, മുൻ പഞ്ചായത്ത് പ്രസിഡന്‍റ് പി.എ. ബഷീർ, എ.പി. മിഷൻ ഹോസ്പിറ്റൽ ചെയർമാൻ പി.ആർ. മുരളീധരൻ, ബിജെപി എറണാകുളം ഈസ്റ്റ് ജില്ല ജനറൽ സെക്രട്ടറി അരുണ്‍ പി. മോഹൻ, സിപിഎം ഏരിയ സെക്രട്ടറി അനീഷ് എം. മാത്യു, ബ്ലോക്ക് പഞ്ചായത്തംഗം റിയാസ് ഖാൻ, പായിപ്ര പഞ്ചായത്തംഗം നെജി ഷാനവാസ്, ആശുപത്രി സിഇഒ ഡോ. സാന്‍റി സാജൻ, ജനറൽ മാനേജർ ഡെയ്സി റോയി എന്നിവർ പ്രസംഗിച്ചു. നിർധനരായ ഒന്പത് കുടുംബങ്ങളുടെ വീടെന്ന സ്വപ്നം യാഥാർഥ്യമാക്കിയാണ് സബൈൻ ഹോസ്പിറ്റൽസും അതിഥി ചാരിറ്റബിൾ സൊസൈറ്റിയും സംയുക്തമായി വീടുകൾ നിർമിച്ചു നൽകിയത്. 2.35 കോടി ചെലവഴിച്ച് 35 സെന്‍റ് സ്ഥലത്ത് ഒരേ മാതൃകയിലുള്ള ഒന്പതു വീടുകളാണ് നിർമിച്ചിരിക്കുന്നത്. 550 ചതുരശ്ര അടി വലിപ്പത്തിൽ നിർമിച്ചിരിക്കുന്ന വീടുകളിൽ രണ്ട് അറ്റാച്ച്ഡ് ബെഡ്റൂമുകൾ, അടുക്കള, സ്വീകരണ മുറി എന്നിവയും മറ്റ് സൗകര്യങ്ങളും ഒരുക്കിയിട്ടുണ്ട്.

റോഡരികിലെ അടിക്കാട് വെട്ടിത്തെളിച്ച് ജനകീയ കൂട്ടായ്മ

കോതമംഗലം: കാട്ടാന ശല്യം രൂക്ഷമായ കോട്ടപ്പടി വാവേലിയിൽ ജനകീയ കൂട്ടായ്മയുടെ നേതൃത്വത്തിൽ വാവേലി - കുളങ്ങാട്ടുകുഴി റോഡരികിലെ അടിക്കാട് വെട്ടിത്തെളിച്ചു. കോട്ടപ്പാറ വനത്തിൽ നിന്നും പിഡബ്ല്യുഡി റോഡ് കുറുകെ കടന്ന് കർഷകരുടെ കൃഷിയിടങ്ങളിലേയ്ക്ക് ആന ഉൾപ്പടെയുള്ള വന്യജീവികളുടെ സ്ഥിര സഞ്ചാരപാതയാണ് കുറുപ്പംപടി കൂട്ടിക്കൽ റോഡിന്‍റെ വാവേലി മുതൽ കുളങ്ങാട്ടുകുഴി വരെയുള്ള ഭാഗം. അടിക്കാട് വെട്ടിത്തെളിച്ചതിലൂടെ റോഡ് മുറിച്ച് കടക്കാൻ ഒരുങ്ങുന്ന ആനകളും, പന്നികളും ഉൾപ്പടെയുള്ള വന്യജീവികളെ ഡ്രൈവർമാർക്ക് അകലെ നിന്ന് കാണാൻ സാധിക്കും. ഈ റോഡിലൂടെ ദിവസേന യാത്ര ചെയ്യുന്ന കാൽനട യാത്രക്കാർ ഉൾപ്പെടെയുള്ള നിരവധി ആളുകളുടെ മാസങ്ങളായിട്ടുള്ള ആവശ്യമാണ് സന്നദ്ധ പ്രവർത്തനത്തിലൂടെ യാഥാർഥ്യമായത്. ‌‌ ആനകളെ തുരത്താൻ എത്തുന്ന റാപ്പിഡ് റെസ്പോണ്‍സ് ടീം അംഗങ്ങൾക്കും അടിക്കാട് നീക്കം ചെയ്യുന്നത് വലിയൊരു ആശ്വാസമാണ്. രാത്രി ടോർച്ച് തെളിച്ച് വന്യജീവി സാന്നിധ്യം പരിശോധന നടത്തുന്നതിന് അടിക്കാട് തടസം സൃഷ്ടിച്ചിരുന്നു. അതുകൊണ്ട് തന്നെ ജനവാസ മേഖലയിലേക്ക് ഇറങ്ങാൻ തൊട്ടടുത്ത് വരുന്പോഴായിരുന്നു പലപ്പോഴും ആനകളുടെ സാന്നിധ്യം തിരിച്ചറിയാൻ കഴിഞ്ഞിരുന്നത്. കഴിഞ്ഞയാഴ്ച് രണ്ട് ബൈക്ക് യാത്രികർ ആനയുടെ മുന്നിൽ പെടുകയും തലനാരിഴയ്ക്ക് രക്ഷപ്പെടുകയും ചെയ്തു. ഓടി റോഡിലേക്ക് കയറിയ ആനയുടെ മുന്നിൽ നിന്നും ബസിൽ കയറാനായി അതിലൂടെ നടന്നു വന്നിരുന്ന കാൽ നടയാത്രക്കാരൻ കാട്ടിലേക്ക് എടുത്തു ചാടിയാണ് രക്ഷപ്പെട്ടത്. വന വികസന ഏജൻസിയുടെ വനസംരക്ഷണ സമിതി മാതൃകയിൽ പൊതുജനങ്ങളെയും വാച്ചർമാരെയും ഉദ്യോഗസ്ഥരെയും ഉൾപ്പെടുത്തി സ്ഥിരം സമിതികളുണ്ടാക്കാൻ അധികൃതർ നടപടി സ്വീകരിക്കണമെന്ന് അടിക്കാട് നീക്കം ചെയ്യൽ പ്രവർത്തനങ്ങൾക്ക് നേതൃത്വം നൽകിയ കേരള വിദ്യാർഥി കോണ്‍ഗ്രസ് -എം ജില്ല പ്രസിഡന്‍റ് ബിനിൽ വാവേലി ആവശ്യപ്പെട്ടു.

എംഎ കോളജിന്‍റെ സപ്തതി ആഘോഷം; വിളംബരജാഥ സംഘടിപ്പിച്ചു

കോതമംഗലം : സപ്തതി നിറവിൽ നിൽക്കുന്ന കോതമംഗലം മാർ അത്തനേഷ്യസ് കോളജിന്‍റെ സ്ഥാപക ദിനമായ ഇന്നലെ വിളംബര ജാഥ സംഘടിപ്പിച്ച് ഒരു വർഷം നീളുന്ന ആഘോഷങ്ങൾക്ക് തുടക്കം കുറിച്ചു. 70 വാഹനങ്ങളാണ് വിളംബര ജാഥയിൽ പങ്കെടുത്തത്. കോളജിന്‍റെ കാവൽപിതാവായ പൗലോസ് മാർ അത്താനാസ്യോസിന്‍റെ (ആലുവയിലെ വലിയതിരുമേനി) അന്ത്യവിശ്രമസ്ഥലമായ ആലുവയിലെ തൃക്കുന്നത്ത് സെമിനാരിയിൽ നിന്ന് മാർ അത്തനേഷ്യസിന്‍റെ ഛായാചിത്രം വഹിച്ച് രാവിലെ 11 ഓടെയാണ് വിളംബര ജാഥ ആരംഭിച്ചു. വിളംബര ജാഥ കോതമംഗലം മാർത്തോമ ചെറിയപ്പള്ളിയിലെത്തിയശേഷം യൽദോ മാർ ബസേലിയോസ് ബാവയുടെ കബറിടത്തിന്‍റെ ചിത്രം കൂടി വഹിച്ചാണ് എംഎ കോളജ് ക്യാന്പസിൽ എത്തിച്ചേർന്നത്. മാർ അത്തനേഷ്യസ് കോളജ് അസോസിയേഷൻ ചെയർമാൻ ഡോ. മാത്യൂസ് മാർ അപ്രേം മെത്രാപ്പോലിത്ത ആലുവ തൃക്കുന്നത്തു സെമിനാരിയിലും, ഏലിയാസ് മാർ യൂലിയോസ് മെത്രാപ്പോലീത്ത കോതമംഗലം ചെറിയ പള്ളിയിലും പ്രാർത്ഥനകൾക്ക് കാർമികത്വം വഹിച്ചു. അധ്യാപകരും, അനധ്യാപകരും, വിദ്യാർഥികളും അടങ്ങുന്ന വൻ ജനാവലിയാണ് ക്യാന്പസിൽ ജാഥയെ വരവേറ്റത്. എം.എ. കോളജ് അസോസിയേഷൻ സെക്രട്ടറി ഡോ. വിന്നി വർഗീസ്, കോളജ് പ്രിൻസിപ്പൽ ഡോ. മഞ്ജു കുര്യൻ, മാർ അത്തനേഷ്യസ് കോളജ് ഓഫ് എൻജിനിയറിംഗ് പ്രിൻസിപ്പൽ ഡോ. ബോസ് മാത്യു ജോസ്, മാർ അത്തനേഷ്യസ് കോളജ് അസോസിയേഷൻ എക്സിക്യൂട്ടിവ് കമ്മിറ്റിയംഗങ്ങൾ, ഗവേണിംഗ് ബോർഡ് അംഗങ്ങൾ, മുൻ പ്രിൻസിപ്പൽമാർ, ഷേയർ ഹോൾഡേഴ്സ് എന്നിവർ പങ്കെടുത്തു. മാർ അത്തനേഷ്യസ് ഓട്ടോണമസ് കോളജിന്‍റെ സപ്തതി ആഘോഷങ്ങളുടെ ഭാഗമായി, കോളജ് ക്യാന്പസിൽ ഒരു വർഷം നീണ്ടുനിൽക്കുന്ന വിവിധ പരിപാടികളാണ് ആസൂത്രണം ചെയ്തിട്ടുള്ളതെന്ന് കോളജ് അസോസിയേഷൻ സെക്രട്ടറി ഡോ. വിന്നി വർഗീസ് പറഞ്ഞു.

പോക്സോ കേസ് പ്രതിയെ സംരക്ഷിക്കുന്ന എംഎൽഎ രാജി വയ്ക്കണമെന്ന്

കോതമംഗലം : സ്ക്കൂൾ വിദ്യാർഥിനിയെ നിരന്തരം ഉപദ്രവിച്ചു എന്ന കേസിൽ റിമാൻഡിലായ പോക്സോ കേസ് പ്രതി കെ.വി. തോമസിന് ജയിലനകത്തും സംരക്ഷണം തുടരുന്ന ആന്‍റണി ജോണ്‍ എംഎൽഎയ്ക്ക് തത് സ്ഥാനത്ത് തുടരാൻ അർഹതയില്ലെന്ന് യുഡിഎഫ് ജില്ലാ കണ്‍വീനർ ഷിബു തെക്കുംപുറം. പെണ്‍കുട്ടിയും കുടുംബാംഗങ്ങളും പോലീസിൽ കൊടുത്ത പരാതിയിൽ നടപടി വൈകിപ്പിക്കുകയും ഇരയേയും കുടുംബത്തെയും ഭീഷണിപ്പെടുത്തി പരാതി പിൻവലിപ്പിക്കാൻ സമ്മർദം ചെലുത്തുകയും ചെയ്തത് അപമാനമാണ്. നാട്ടിൽ നിയമവാഴ്ച നടക്കുന്നുണ്ടെന്ന് ഉറപ്പാക്കാൻ ഭരണഘടനാപരമായി ബാധ്യതയുള്ള ആളാണ് എംഎൽഎ. ഇരയായ പെണ്‍കുട്ടിക്കും കുടുംബത്തിനും ലഭിക്കുന്ന നീതി പൂർണമാകണമെങ്കിൽ എംഎൽഎ രാജിവച്ചേ മതിയാകൂയെന്നും ഷിബു തെക്കുംപുറം പറഞ്ഞു. യുഡിഎഫ് പ്രതിഷേധം നാളെ കോതമംഗലം : പോക്സോ കേസിലെ പ്രതിയെ സംരക്ഷിക്കുന്ന ആന്‍റണി ജോണ്‍ എംഎൽഎ രാജിവെക്കണമെന്നാവശ്യപ്പെട്ട് യുഡിഎഫ് നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ നാളെ രാവിലെ 10ന് കോതമംഗലം ടൗണിൽ പ്രതിഷേധ പ്രകടനം നടത്തുമെന്ന് ചെയർമാൻ ടി.യു. കുരുവിള, കണ്‍വീനർ എം.എസ്. എൽദോസ് എന്നിവർ അറിയിച്ചു. ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്യും.

ഓടിക്കൊണ്ടിരുന്ന കാറിന് തീപിടിച്ചു

മൂവാറ്റുപുഴ : ഓടിക്കൊണ്ടിരുന്ന കാറിന് തീപിടിച്ചു. എംസി റോഡിൽ വാഴപ്പിള്ളിയിൽ ഞായറാഴ്ച രാത്രി 10ഓടെയാണ് ഓടിക്കൊണ്ടിരുന്ന കാറിന് തീപിടിച്ചത്. മൂവാറ്റുപുഴയിൽ നിന്ന് പെരുന്പാവൂർ ഭാഗത്തെയ്ക്ക് പോകുകയായിരുന്ന പായിപ്ര സൊസൈറ്റിപടി സ്വദേശി എൽദോസിന്‍റെ കാറിനാണ് തീപിടിച്ചത്. പുക ഉയരുന്നത് ശ്രദ്ധയിൽപ്പെട്ട എൽദോസ് ഉടൻ വാഹനം നിർത്തി പുറത്തിറങ്ങിയതോടെ കത്തിപ്പിടിക്കുകയായിരുന്നു. എൽദോസ് മാത്രമാണ് വാഹനത്തിൽ ഉണ്ടായിരുന്നത്. മൂവാറ്റുപുഴ അഗ്നിശമന രക്ഷാസേനയെത്തി തീഅണച്ചു. തീപിടുത്തതിന്‍റെ കാരണം വ്യക്തമല്ല. കാർ പൂർണമായും കത്തിനശിച്ചു.

വാൻ അപകടത്തിൽപ്പെട്ടു

മൂവാറ്റുപുഴ: നിർത്തിയിട്ടിരുന്ന ലോറിയ്ക്കു പിന്നിൽ നിയന്ത്രണം നഷ്ടപ്പെട്ട വാൻ ഇടിച്ചുകയറി. വെള്ളൂർക്കുന്നം കാർഷിക ബാങ്കിന് മുന്പിൽ ഇന്നലെ രാവിലെ ഏഴോടെയായിരുന്നു അപകടം. തമിഴ്നാട്ടിൽ നിന്ന് പെരുന്പാവൂരിലേക്ക് പോകുകയായിരുന്ന ഓമ്നിവാനാണ് അപകടത്തിൽപ്പെട്ടത്. അപകടത്തിൽ പരിക്കേറ്റ വാൻ ഡ്രൈവർ തമിഴ്നാട് സ്വദേശിയായ യുവാവിനെ മൂവാറ്റുപുഴ ജനറൽ ആശുപത്രിയിൽ പ്രവേശിപ്പിച്ചു. അപകടത്തിൽ വാൻ ഭാഗികമായി തകർന്നു.

വിദ്യാസ്പർശം മെറിറ്റ് അവാർഡ് വിതരണം

പോത്താനിക്കാട് : എസ്എസ്എൽസി, പ്ലസ് ടു പരീക്ഷകളിൽ എല്ലാ വിഷയങ്ങൾക്കും എപ്ലസ് വാങ്ങിയ പൈങ്ങോട്ടൂർ പഞ്ചായത്തിലെ മുഴുവൻ വിദ്യാർഥികൾക്കും മാത്യു കുഴൽനാടൻ എംഎൽഎയുടെ വിദ്യാസ്പർശം അവാർഡുകൾ വിതരണം ചെയ്തു. പഞ്ചായത്ത് കമ്യൂണിറ്റി ഹാളിൽ മാത്യു കുഴൽനാടൻ എംഎൽഎ ഉദ്ഘാടനം ചെയ്തു. പഞ്ചായത്ത് വികസനകാര്യ സ്ഥിരം സമിതി അധ്യക്ഷ നൈസ് എൽദോ അധ്യക്ഷത വഹിച്ചു. ജില്ലാ പഞ്ചായത്തംഗം റാണിക്കുട്ടി ജോർജ് മുഖ്യപ്രഭാഷണം നടത്തി. ആനീസ് ഫ്രാൻസിസ്, മിൽസി ഷാജി, സാറാമ്മ കുര്യാക്കോസ്, സിസ്റ്റർ സിജി ജോർജ്, റോബിൻ ഏബ്രഹാം, ബിനു ചെറിയാൻ, എന്നിവർ പ്രസംഗിച്ചു.

വനംവകുപ്പിന്‍റെ വാഹനങ്ങൾ റോഡിൽ തടയും: കത്തോലിക്കാ കോണ്‍ഗ്രസ്

കോതമംഗലം : നാടിന്‍റെ സമഗ്ര വളർച്ചയ്ക്കും പൊതുഗതാഗത വികസനത്തിനും തുരങ്കം വയ്ക്കുന്ന വനംവകുപ്പിന്‍റെയും കപട പരിസ്ഥിതി വാദികളുടെയും ജനദ്രോഹനിലപാട് തുടർന്നാൽ വനം വകുപ്പിന്‍റെ വാഹനങ്ങൾ റോഡിൽ തടയേണ്ടി വരുമെന്ന് കത്തോലിക്കാ കോണ്‍ഗ്രസ് കോതമംഗലം രൂപത കമ്മിറ്റി. ദേശീയപാതയുടെ ഭാഗമായ നേര്യമംഗലം മുതൽ വാളറ വരെയുള്ള ഭാഗത്തെ റോഡ് വികസനം തടസപ്പെടാൻ ഇടയാക്കിയ ആസൂത്രിത ഗൂഢാലോചന റിപ്പോർട്ട് പോലുള്ള ധാർഷ്ട്യം തുടരാൻ ഇനിയും അനുവദിക്കാനാവില്ല. നിരന്തരമായി ഗതാഗത കുരുക്കും അപകടങ്ങളും ഉണ്ടാകുന്ന നേര്യമംഗലം - വാളറ മേഖലയിൽ റോഡ് വികസിപ്പിക്കേണ്ടതില്ലെന്നാണ് വനംവകുപ്പിന്‍റെ നിലപാടെങ്കിൽ ആ റോഡിലൂടെ വനം വകുപ്പിന്‍റെ വാഹനങ്ങൾ ഓടിക്കേണ്ടതില്ലെന്ന് പൊതുജനം തീരുമാനിക്കും. ആഡംബര വാഹനങ്ങൾ ഉൾപ്പെടെയുള്ള വനംവകുപ്പിന്‍റെ നിരവധി വാഹനങ്ങൾ ദിനംപ്രതി ഈ വഴിയിലൂടെ ഓടുന്നുണ്ട്. റോഡ് ആവശ്യമില്ലാത്തവർ കാട്ടിലൂടെ നടന്നു പോയാൽ മതിയെന്ന് നിലപാടെടുക്കേണ്ടി വരുമെന്നും മുന്നറിയിപ്പ് നൽകി. സമാന ചിന്താഗതിയുള്ള സംഘടനകളുടെയും വ്യക്തികളുടെയും സഹകരണത്തോടെ കർമ്മ പദ്ധതികൾ ആസൂത്രണം ചെയ്ത് വനംവകുപ്പിന്‍റെ ജനദ്രോഹ നടപടികളെ ചെറുക്കുമെന്ന് കത്തോലിക്കാ കോണ്‍ഗ്രസ് അറിയിച്ചു. വനംവകുപ്പ് ഉദ്യോഗസ്ഥർ ജനദ്രോഹ നിലപാട് സ്വീകരിക്കുന്പോൾ ഭരണ നേതൃത്വവും ജനപ്രതിനിധികളും എന്തെടുക്കുകയാണെന്ന് അറിയാൻ ജനത്തിന് താല്പര്യമുണ്ട്. വനം വകുപ്പുകാരെ കൊണ്ട് തെറ്റായ നിലപാടുകൾ തിരുത്തിക്കാനുള്ള ഇച്ഛാശക്തി ഭരണത്തിന് നേതൃത്വം കൊടുക്കുന്നവർ കാണിക്കണം. രാഷ്ട്രീയ രംഗത്തും പരിസ്ഥിതി പ്രവർത്തനരംഗത്തും പൊതുപ്രവർത്തന മേഖലയിലുമുള്ള ചിലർ ചേർന്നുള്ള ഉപജാപക സംഘത്തിന്‍റെ പ്രവർത്തനങ്ങൾ പൊതുജനം തിരിച്ചറിയണമെന്ന് കത്തോലിക്കാ കോണ്‍ഗ്രസ് ആവശ്യപ്പെട്ടു. രൂപത പ്രസിഡന്‍റ് സണ്ണി കടൂത്താഴെ അധ്യക്ഷത വഹിച്ചു. രൂപത ഡയറക്ടർ റവ. ഡോ. മാനുവൽ പിച്ചളക്കാട്ട്, രൂപത ജനറൽ സെക്രട്ടറി മത്തച്ചൻ കളപ്പുരക്കൽ, രൂപത ട്രഷറർ തന്പി പിട്ടാപ്പിള്ളിൽ, സി.എ. തോമസ്, യു.വി. ചാക്കോ, ബിന്ദു ജോസ്, മേരി ആന്‍റണി, ഷൈജു ഇഞ്ചക്കൽ, ജിജി പുളിക്കൽ, ആന്‍റണി പുല്ലൻ, ജോർജ് മങ്ങാട്ട്, അബി കാഞ്ഞിരപ്പാറ, ജോണ്‍ മുണ്ടൻകാവിൽ, ജോയ്സ് മേരി ആന്‍റണി, ബേബിച്ചൻ നിധീരിക്കൽ, ബെന്നി തോമസ്, ജോർജ് കുര്യാക്കോസ്, ജിനു ആന്‍റണി, ജോണി ജേക്കബ്, കെ.എം. ജോസഫ്, ഇ.ആർ. പൈലി, വി.ജെ. റോജോ, സനിൽ പി. ജോസ്, അമിതാ ജോണി, ജോസ് കുര്യൻ, റോയ് മാത്യു, അഞ്ചു ജോസ് എന്നിവർ പ്രസംഗിച്ചു.

ആരക്കുഴ സെന്‍റ് മേരീസ് ഹയർ സെക്കൻഡറി സ്കൂളിൽ

ആരക്കുഴ: ദീപിക നമ്മുടെ ഭാഷ പദ്ധതിയുടെ ആരക്കുഴ ഫൊറോനാ തല ഉദ്ഘാടനം ആരക്കുഴ സെന്‍റ് മേരീസ് ഹയർ സെക്കൻഡറി സ്കൂളിൽ നടന്നു. രാഷ്ട്രദീപിക ലിമിറ്റഡ് ഡയറക്ടർ റവ. ഡോ. തോമസ് പോത്തനാമൂഴി ഉദ്ഘാടനം ചെയ്തു. ഡിഎഫ്സി ആരക്കുഴ ഫൊറോന ഡയറക്ടർ ഫാ. സെബാസ്റ്റ്യൻ കണിമറ്റത്തിൽ അധ്യക്ഷത വഹിച്ചു. ആരക്കുഴ ഫൊറോനയുടെ കീഴിലുള്ള എല്ലാ സ്കൂളുകളിലേയും ദീപിക നമ്മുടെ ഭാഷ പദ്ധതിയുടെ ഉദ്ഘാടനം ആരക്കുഴ കോ-ഓപ്പറേറ്റീവ് ബാങ്ക് പ്രസിഡന്‍റ് ജോർജ് തോമസ് ചേറ്റൂർ നിർവഹിച്ചു. ഡിഎഫ്സി രൂപത ഡയറക്ടർ റവ. ഡോ. ആന്‍റണി പുത്തൻകുളം, സ്കൂൾ പ്രിൻസിപ്പൽ ഷിജി മാണി, പഞ്ചായത്തംഗം ദീപ്തി സണ്ണി, ഡിഎഫ്സി രൂപത വൈസ് പ്രസിഡന്‍റ് സിബി പൊതൂർ, സോണ്‍ പ്രസിഡന്‍റ് പോൾ ലൂയിസ് എന്നിവർ പ്രസംഗിച്ചു. ഫൊറോന ജനറൽ സെക്രട്ടറി ജിമ്മി ആനിക്കതോട്ടത്തിൽ, ഡിഎഫ്സി സംസ്ഥാന, രൂപത തല നേതാക്കളായ ലോറൻസ് ഏബ്രഹാം, തോമസ് കുണിഞ്ഞി, ഡിഗോൾ കെ. ജോർജ്, ജോർജ് തോമസ് മങ്ങാട്ട് എന്നിവർ പങ്കെടുത്തു. വിവിധ സ്കൂളുകൾക്ക് വേണ്ടി പ്രധാനാധ്യപകർ പത്രത്തിന്‍റെ കോപ്പി ഏറ്റുവാങ്ങി. ആരക്കുഴ കോ-ഓപ്പറേറ്റീവ് ബാങ്ക്, പണ്ടപ്പിള്ളി മർച്ചന്‍റ്സ് അസോസിയേഷൻ എന്നിവരാണ് പത്രം സ്പോണ്‍സർ ചെയ്തിരിക്കുന്നത്.

പ്രതിഷേധ മാർച്ച് നടത്തി

കോതമംഗലം : കോണ്‍ഗ്രസ് കോതമംഗലം ഈസ്റ്റ് വെസ്റ്റ് മണ്ഡലം കമ്മിറ്റികൾ നഗരസഭ ഓഫീസിലേക്ക് നടത്തിയ പ്രതിഷേധ മാർച്ച് ഡിസിസി പ്രസിഡന്‍റ് ഡോ. ജിന്‍റോ ജ‌ോൺ ഉദ്ഘാടനം ചെയ്തു. പോക്സോ കേസിൽ പ്രതിയായ കോതമംഗലം നഗരസഭാംഗം കെ.വി. തോമസിന്‍റെ കേസ് ഒതുക്കി തീർക്കാൻ കൂട്ടുനിന്ന ആന്‍റണി ജോണ്‍ എംഎൽഎയ്ക്ക് ജനപ്രതിനിധിയായി തുടരാൻ അവകാശമില്ലെന്ന് അദ്ദേഹം പറഞ്ഞു. പി.ആർ. അജി അധ്യക്ഷത വഹിച്ചു. സണ്ണി വർഗീസ്, എ.ജി. ജോർജ്, കെ.പി. ബാബു, ഷമീർ പനക്കൽ, ബാബു ഏലിയാസ്, എം.എസ്. എൽദോസ്, സിജു ഏബ്രഹാം, പ്രിൻസ് വർക്കി, അനൂപ് ഇട്ടൻ, എൽദോസ് കീച്ചേരി, അനൂപ് ജോർജ്, നോബിൾ ജോസഫ്, സലീം മംഗലപ്പാറ, സീതി മുഹമ്മദ്, എൽദോസ് ഡാനിയൽ, കെ.എ. റമീസ്, ജോർജ് വർഗീസ്, ഭാനുമതി രാജു, ജെസി സാജു, സത്താർ വട്ടക്കുടി, എം.വി. റെജി, പരീത് പട്ടമാവുടി, പ്രവീണ ഹരി, സണ്ണി വെളുക്കര, മാജോ മാത്യു, ബബിത മത്തായി, റീന ജോഷി, അമീർ അലി, ലിസി പോൾ, സിന്ധു ജിജോ, അലി പടിഞ്ഞാറച്ചാലി, മത്തായി കോട്ടക്കുന്നേൽ, നന്ദ ഗോപൻ, ശശി കുഞ്ഞുമോൻ, പി.ടി പ്രസാദ് എന്നിവർ പ്രസംഗിച്ചു.

റോട്ടറി ക്ലബ് ബാഗുകൾ നൽകി

കോലഞ്ചേരി: റോട്ടറി ക്ലബ്ബിന്‍റെ സാമൂഹിക സേവന പദ്ധതികളുടെ ഭാഗമായി കറുകപ്പിള്ളി ഗവണ്‍മെന്‍റ് യുപി സ്കൂളിലെ 83 വിദ്യാർഥികൾക്ക് സ്കൂൾ ബാഗുകൾ വിതരണം ചെയ്തു. റോട്ടറി ക്ലബ് പ്രസിഡന്‍റ് ക്രിസ്റ്റി സാജ് വിതരണോദ്ഘാടനം നിർവഹിച്ചു. സ്കൂൾ പിടിഎ പ്രസിഡന്‍റ് കെ.എൻ. സജീവ്കുമാർ അധ്യക്ഷത വഹിച്ചു. ബ്ലോക്ക് പഞ്ചായത്തു അംഗം ഷൈജ റജി, അസിസ്റ്റന്‍റ് ഗവർണർ ഐജു ജേക്കബ്, സി.ജി.ആർ ജോഷി ചെറിയാൻ തുടങ്ങിയവർ പ്രസംഗിച്ചു.

ലഹരിവിരുദ്ധ റാലിയും സെമിനാറും

കോതമംഗലം: വടാട്ടുപാറ സെന്‍റ് മേരീസ് ഇടവകയിലെ സണ്‍ഡേ സ്കൂൾ, ചെറുപുഷ്പ മിഷൻ ലീഗിന്‍റെയും, മാതൃദീപ്തിയുടെയും ആഭിമുഖ്യത്തിൽ ലഹരിവിരുദ്ധ റാലിയും സെമിനാറും ലഹരിവിരുദ്ധ പ്രതിജ്ഞയും നടത്തി. വികാരി ഫാ. ജിനോ ഇഞ്ചപ്ലാക്കൽ സെമിനാർ ഉദ്ഘാടനം ചെയ്തു. സണ്‍ഡേ സ്കൂൾ പ്രധാനാധ്യാപിക സിസ്റ്റർ ജസീന അധ്യക്ഷത വഹിച്ചു. കെസിബിസി മദ്യവിരുദ്ധ സമിതി രൂപത പ്രസിഡന്‍റ് ജെയിംസ് കോറന്പേൽ ക്ലാസ് നയിച്ചു. മിലൻ രാജു, റീന സജി, സാബു ജോസ്, അഖിൽ ആന്‍റണി, ജോബി ജോസഫ്, ഷാന ഷാജൻ, ബിന്ദു ബിജു, അയോണ മരിയ ഏലിയാസ് എന്നിവർ നേതൃത്വം നൽകി. റാലിയിൽ 250 ഓളം കുട്ടികളും മുതിർന്നവരും പങ്കെടുത്തു.

ലോഡ്ജിൽ കർണാടക സ്വദേശി മരിച്ചനിലയിൽ

ആലുവ: റെയിൽവേ സ്റ്റേഷന് സമീപത്തെ ലോഡ്ജിനുള്ളിൽ കർണാടക സ്വദേശിയായ വയോധികനെ മരിച്ചനിലയിൽ കണ്ടെത്തി. അബ്ദുൾ സലാം (63) ആണ് മരിച്ചത്. മൃതദേഹം അഴുകിയ നിലയിലായിരുന്നു. രണ്ട് ദിവസമായി തുറക്കാത്ത മുറിയിൽ നിന്ന് ദുർഗന്ധം അനുഭവപ്പെട്ടതോടെ ഇന്നലെ ഉച്ചകഴിഞ്ഞ് പോലീസിൽ വിവരം അറിയിച്ചു. പോലീസ് എത്തി വാതിൽ പൊളിച്ച് മുറിക്കുള്ളിൽ പ്രവേശിച്ചപ്പോൾ കട്ടിലിൽ മൃതദേഹം കണ്ടെത്തുകയായിരുന്നു. പോലീസ് മേൽനടപടികൾ സ്വീകരിച്ചു.

ഓട്ടോറിക്ഷ ഡ്രൈവേഴ്സ് അസോ. (സിഐടിയു) നെടുമ്പാശേരി മേഖലാ സമ്മേളനം

നെടുമ്പാശേരി : ജില്ലാ ഓട്ടോറിക്ഷ ഡ്രൈവേഴ്സ് അസോസിയേഷൻ (സിഐടിയു) നെടുമ്പാശേരി മേഖലാ സമ്മേളനം നടന്നു. ജില്ലാ ജനറൽ സെക്രട്ടറി എം.ബി. സ്യമന്തഭദ്രൻ സമ്മേളനം ഉദ്ഘാടനം ചെയ്തു. അത്താണി എ.പി. കുര്യൻ സ്മാരക മന്ദിരത്തിൽ നടന്ന സമ്മേളനത്തിൽ മേഖലാ പ്രസിഡന്‍റ് ബെയ്സിൽ ഏലിയാസ് അധ്യക്ഷനായി. സിപിഎം നെടുമ്പാശേരി വെസ്റ്റ് ലോക്കൽ സെക്രട്ടറി പി.സി. സോമശേഖരൻ, ഈസ്റ്റ് ലോക്കൽ സെക്രട്ടറി സണ്ണി പോൾ, സിഐടിയു പഞ്ചായത്ത് കൺവീനർ എ.എസ്. സുരേഷ് , നെടുമ്പാശേരി പഞ്ചായത്ത് പ്രസിഡന്‍റ് എ.വി. സുനിൽ , അസോസിയേഷൻ ഏരിയ പ്രസിഡന്‍റ് കെ.ഐ. കുഞ്ഞുമോൻ തുടങ്ങിയവർ പ്രസംഗിച്ചു. ഭാരവാഹികളായി പി.ആർ. അഭിലാഷ് (പ്രസിഡന്‍റ്), കെ.ബി. ഷാഹി (സെക്രട്ടറി), കെ.എം. രതീഷ് (ട്രഷറർ) എന്നിവരെ തെരഞ്ഞെടുത്തു.

അണ്ടർ 13 ചെസ്: സൈറസും ടെസയും ചാമ്പ്യൻമാർ

കളമശേരി : അസപ് കമ്യൂണിറ്റി സ്കിൽ പാർക്കിൽ നടന്ന എറണാകുളം ജില്ലാ അണ്ടർ 13 ചെസ് ചാമ്പ്യൻഷിപ്പിൽ ഓപ്പൺ വിഭാഗത്തിൽ സൈറസ് എൽദോയും പെൺകുട്ടികളുടെ വിഭാഗത്തിൽ ടെസ ജാക്സനും ചാമ്പ്യന്മാർ. ഓപ്പൺ വിഭാഗത്തിൽ ജോവറ്റ് ജിബിൻ, എറിക് സനിഷ്, ഡാനിയൽ ബോബി എന്നിവരും പെൺകുട്ടികളുടെ വിഭാഗത്തിൽ പ്രഗ്യ പ്രദീപ്‌, വർഷിനി അരുൺ, കാർത്തിക സജിത്ത് എന്നിവരും യഥാക്രമം രണ്ട് മുതൽ നാല് വരെ സ്ഥാനങ്ങൾ കരസ്ഥമാക്കി. ഇരു വിഭാഗത്തിലെയും ആദ്യ രണ്ട് സ്ഥാനക്കാർ തൃശൂരിൽ നടക്കുന്ന സംസ്ഥാന ചെസ് ചാമ്പ്യൻഷിപ്പിൽ ജില്ലയെ പ്രതിനിധീകരിക്കും. സമ്മാനദാന ചടങ്ങിൽ ജില്ലാ സെക്രട്ടറി എം. കണ്ണൻ, ചെസ് ഇൻ സ്കൂൾ വൈസ് ചെയർമാൻ വി.എം. രാജീവ്‌ , ജില്ല ജോയിന്‍റ് സെക്രട്ടറി മാർട്ടിൻ സാമുവൽ എന്നിവർ സംസാരിച്ചു.അന്താരാഷ്ട്ര ഫിഡെ ആർബിറ്റർ പി.വി. കുഞ്ഞുമോനാണ് ചാമ്പ്യൻഷിപ്പ് നിയന്ത്രിച്ചത്.

പറവൂർ മർച്ചന്‍റ്സ് അസോ. സുവർണ ജൂബിലി ആഘോഷിച്ചു

പറവൂർ : പറവൂർ മർച്ചന്‍റ്സ് അസോസിയേഷന്‍റെ (മാർക്കറ്റ് ) സുവർണ ജൂബിലിയാഘോഷം ഹൈബി ഈഡൻ എംപി ഉദ്ഘാടനം ചെയ്തു. ചെയർമാൻ കെ.ബി. മോഹനൻ അധ്യക്ഷനായി. വിദ്യാഭ്യാസ അവാർഡും എക്സലൻസി അവാർഡ് വിതരണവും മുൻസിപ്പൽ ചെയർപേഴ്സൺ ബീനാ ശശിധരൻ നിർവഹിച്ചു. ജില്ലാ ക്ഷേമനിധി ആനുകൂല്യം ജില്ലാ ട്രഷറർ സി.എസ്. അജ്മൽ വിതരണം ചെയ്തു. 70 വയസ് തികഞ്ഞ വ്യാപാരികളെ മുൻസിപ്പൽ വൈസ് ചെയർമാൻ എം.ജെ. രാജു ആദരിച്ചു. സുവനീർ പ്രകാശനം റവ. ഡോ. ജെയിംസ് പേരേപ്പാടൻ നിർവഹിച്ചു. സമകാലീന വിഷയത്തെക്കുറിച്ച് ജില്ലാ ജനറൽ സെക്രട്ടറി എ.ജെ. റിയാസ് സംസാരിച്ചു. ജില്ലാ പ്രസിഡന്‍റ് പി.സി. ജേക്കബ് മുഖ്യപ്രഭാഷണം നടത്തി. മുൻസിപ്പൽ പ്രതിപക്ഷ നേതാവ് ടി.വി. നിതിൻ, വാർഡ് കൗൺസിലർ എം.കെ. ബാനർജി ,നിയോജകമണ്ഡലം പ്രസിഡന്‍റ് കെ.എൽ. ഷാറ്റോ, യൂത്ത് ജില്ലാ പ്രസിഡന്‍റ് പ്രദീപ് ജോസ്, വനിതാവിംഗ് നിയോജക മണ്ഡലം പ്രസിഡന്‍റ് ടി. ശാന്തമ്മ, യൂത്ത് വിംഗ് ജില്ലാ ജനറൽ സെക്രട്ടറി വിനോദ് ബേബി, പറവൂർ മർച്ചന്‍റ്സ് അസോസിയേഷൻ ജനറൽ കൺവീനർ ടി.ഡി. റീജൻ, ട്രഷറർ കെ.ബി. ഹാരിഷ് , ജോയിന്‍റ് സെക്രട്ടറിമാരായ കെ.എ. സാദത്ത്, വി.ജെ. ജോയ് എന്നിവർ സംസാരിച്ചു.

കൂവപ്പടി സെന്‍റ് ആൻസിൽ അവാർഡ്ദാനം നടത്തി

കൂവപ്പടി: കൂവപ്പടി സെന്‍റ് ആൻസ് പബ്ലിക് സ്കൂളിൽ 2024 -25 അധ്യായന വർഷത്തിൽ സിബിഎസ്ഇ പത്താം ക്ലാസ് പരീക്ഷയിൽ ഉന്നത വിജയം നേടിയ വിദ്യാർഥികളുടെ അവാർഡ് ദാനവും അനുമോദന ചടങ്ങും സംഘടിപ്പിച്ചു. സെന്‍റ് തോമസ് പ്രൊവിൻഷ്യാൾ സിസ്റ്റർ ബ്ലെസി പീറ്റർ ഉദ്ഘാടനം ചെയ്തു. സെന്‍റ് തോമസ് വൈസ് പ്രൊവിൻഷ്യാളും എഡ്യൂക്കേഷൻ കോ ഓർഡിനേറ്ററുമായ സിസ്റ്റർ സിബി കുര്യൻ, സ്കൂളിലെ പൂർവവിദ്യാർഥി ഡോ. അപർണ ജോണി, സ്കൂൾ പ്രിൻസിപ്പൽ സിസ്റ്റർ ഗ്രേസി പോൾ, സ്കൂൾ മാനേജർ സിസ്റ്റർ പുഷ്പ റാണി , പിടിഎ പ്രസിഡന്‍റ് ബിജോയ് പി. മാത്യു തുടങ്ങിയവർ പങ്കെടുത്തു.

ഒ.പി. ജോസഫ് ജന്മശതാബ്ദി ആഘോഷം

ആലുവ: സമസ്ത കേരള സാഹിത്യപരിഷത്തിന്‍റെയും ജീവസ് കേന്ദ്രത്തിന്‍റെയും യുക്താഭിമുഖ്യത്തിൽ ഒ.പി. ജോസഫ് ജന്മ ശതാബ്ദി ആഘോഷിച്ചു. പ്രഫ. എം. തോമസ് മാത്യു ഉദ്ഘാടനം ചെയ്തു. സാഹിത്യ പരിഷത്ത് പ്രസിഡന്‍റ് സി. രാധാകൃഷ്ണൻ അധ്യക്ഷത വഹിച്ചു. ആലുവ മുനി. ചെയർമാൻ എം.ഒ. ജോൺ, ജീവസ് കേന്ദ്രം ഡയറക്ടർ ഫാ. സജി തെക്കേകൈതക്കാട്ട്, ഷെല്ലി ജോസഫ് തുടങ്ങിയവർ പ്രസംഗിച്ചു.

എറണാകുളം-അങ്കമാലി അതിരൂപത കുടുംബ പ്രേഷിത കേന്ദ്രം സുവർണ ജൂബിലിയാഘോഷം

കാലടി: എറണാകുളം-അങ്കമാലി അതിരൂപത കുടുംബപ്രേഷിത കേന്ദ്രത്തിന്‍റെ സുവർണ ജൂബിലി ആഘോഷങ്ങൾ തുടങ്ങി. ദന്പതീ വിശുദ്ധരായ ലൂയിയുടെയും സെലിന്‍റെയും തിരുനാൾ ദിനമായ ജൂലെ 12ന് കെട്ടുറപ്പിന്‍റെ 50 വർഷം എന്ന ആശയത്തോടെ ജൂബിലി വർഷത്തിന്‍റെ ഉദ്ഘാടനം അതിരൂപത പ്രോ പ്രോട്ടോ സിഞ്ചെലൂസ് റവ. ഡോ. ജിമ്മി പൂച്ചക്കാട്ട് നിർവഹിച്ചു. വികാരി ഫാ. മാത്യു കിലുക്കൻ ജൂബിലി പതാക ഉയർത്തി. മുൻ ഡയറക്ടർമാരായിരുന്ന ഫാ. പോൾ മണവാളൻ, ഫാ. പോൾ കല്ലൂക്കാരൻ, ഫാ. സെബാസ്റ്റ്യൻ തോട്ടപ്പിള്ളി, ഫാ. ജോർജ് മാങ്കുഴിക്കരി, ഫാ. സഖറിയാസ് പറനിലം, ഫാ. ആന്‍റണി പെരുമായൻ, ഫാ. വർഗീസ് പുളിക്കൽ, ഫാ. അഗസ്റ്റിൻ കല്ലേലി, റിസോഴ്സ് ടീം ആയിരുന്ന റൈഫൻ ജോസഫ്, വിൻസെന്‍റ് ജോസഫ്, ജോസ് മഴുവഞ്ചേരി സിസ്റ്റർ ഗോൺസാഗ എന്നിവരെ ആദരിച്ചു. ജൂബിലി വർഷത്തിന്‍റെ കർമ പദ്ധതി ഫാ. റിജു വെളിയിൽ, റൂബി മേജോ കോയിപറമ്പിൽ, ഡെയ്സിഅഗസ്റ്റിൻ എന്നിവർ അവതരിപ്പിച്ചു. വിശുദ്ധ ലൂയി സെലിൻ ദമ്പതികളുടെ നൊവേന ദേവാലയത്തിൽ നടന്നു. കറുകുറ്റി ഫൊറോന ഡയറക്ടർ ഫാ. കുര്യാക്കോസ് തേങ്ങാത്തറ കാർമികത്വം വഹിച്ചു. ഫാ. ജേക്കബ് മുളവരിക്കൻ വചന സന്ദേശം നൽകി. ആഘോഷമായ പ്രദക്ഷിണം, തിരുശേഷിപ്പ് വണക്കം, സ്നേഹവിരുന്ന് എന്നിവയുണ്ടായി.

ഏലൂർ നഗരസഭാ വിദ്യാഭ്യാസ അവാർഡുകൾ വിതരണം ചെയ്തു

ഏലൂർ : എസ്എസ്എൽ സി -പ്ലസ് ടു പരീക്ഷയിൽ ഉന്നതവിജയം നേടിയവരെ ഏലൂർ നഗരസഭ ആദരിച്ചു. വിജയിച്ച എല്ലാ വിഷയത്തിനും എ പ്ലസ് നേടിയവരും ബിരുദ -ബിരുദാനന്തര വിഷയങ്ങളിൽ റാങ്ക് നേടിയവരുമായ 425 വിദ്യാർഥികളെ അനുമോദിക്കുന്നതിനായാണ് മികവ് -025 വിദ്യാഭ്യാസ അവാർഡ് സംഘടിപ്പിച്ചത്. ഏലൂർ നഗരസഭാ ടൗൺഹാളിൽ ചെയർപേഴ്സൺ എ.ഡി. സുജിൽ ഇന്നലെ പരിപാടി ഉദ്ഘാടനം ചെയ്തു. വൈസ് ചെയർപേഴ്സൺ ജയശ്രീ സതീഷ് , ടി.എം.ഷെനിൻ , വി.എ. ജെസി, പി.എ. ഷെരീഫ്, നിസി സാബു, കെ.എ. മാഹിൻ, അംബികാ ചന്ദ്രൻ, പി.എം.അയൂബ്, എസ്. ഷാജി എന്നിവർ പങ്കെടുത്തു. എക്സൈസ് ഇൻസ്പക്ടർ വി.എസ്. ഹാനിഷിന്‍റെ നേതൃത്വത്തിൽ ലഹരി ബോധവത്കരണ ക്ലാസും നടത്തി.

ഫോർട്ടുകൊച്ചി-വൈപ്പിൻ റോ റോ ജങ്കാറിൽ സർക്കാർ ജീവനക്കാരുടെ വാഹനങ്ങൾക്ക് മുൻഗണനയും സൗജന്യവുമെന്ന്

വൈപ്പിൻ: ഫോർട്ടുകൊച്ചി-വൈപ്പിൻ റോ റോ ജങ്കാറിൽ സർക്കാർ ജീവനക്കാർ സ്വന്തം വാഹനങ്ങളുമായി സൗജന്യയാത്ര ചെയ്യുന്നതായി ആക്ഷേപം. അതും വൻതിരക്കിൽ ജങ്കാറിൽ കയറിപ്പറ്റാൻ ഏറെ നേരം ക്യൂവിൽ കാത്തു കിടക്കുന്ന സാധാരണക്കാരെ മറികടന്ന് മുൻഗണന നേടിയാണ് ഇവരുടെ സൗജന്യയാത്ര. ആർഡിഒ ഓഫീസ്, താലൂക്ക് ഓഫീസ്, നഗരസഭാ മേഖല ഓഫീസ്, ലേബർ ഓഫീസ്, എഇഒ ഓഫീസ്, അഗ്നിശമന സ്റ്റേഷൻ, പോലീസ് സ്റ്റേഷൻ, താലൂക്ക് ആശുപത്രി, കെഎസ്ഇബി, വാട്ടർ അഥോറിറ്റി, കസ്റ്റംസ് തുടങ്ങിയ സർക്കാർ സ്ഥാപനങ്ങളിലെ ജീവനക്കാരാണ് ക്യൂ മറികടന്നുള്ള ഈ സൗജന്യ യാത്രക്കാർ. കഴുത്തിൽ തിരിച്ചറിയൽ ബാഡ്ജ് ധരിച്ച് കോർപ്പറേഷൻ ഓഫീസിൽ നിന്ന് മുൻഗണനയും സൗജന്യ യാത്രയും അനുവദിച്ച് എഴുതി വാങ്ങിയ ഒരു വാറോലയുമായാണ് ഇക്കൂട്ടർ റോ-റോയിൽ കയറാൻ വരുന്നതത്രേ. ഈ സമയം മണിക്കൂറോളം ജങ്കാർ കാത്തുകിടക്കുന്ന സാധാരണക്കാരെ മറികടന്ന് ജീവനക്കാർ ഇവരെ ജങ്കാറിൽ കടത്തിവിടുകയാണ് പതിവത്രേ. സർക്കാർ വകുപ്പ് വാഹനങ്ങൾക്കും വികലാംഗർക്കും സ്ത്രീകൾക്കും ഉള്ള മുൻഗണനാ സൗകര്യമാണ് ജീവനക്കാർ ദുരുപയോഗം ചെയ്യുന്നത്. ഇതിനെതിരേ യാത്രക്കാർ വ്യാപകമായ എതിർപ്പ് പ്രകടിപ്പിച്ചതോടെ വിഷയം വൈപ്പിൻ-ഫോർട്ടുകൊച്ചി പാസഞ്ചേഴ്സ് അസോസിയേഷൻ ഏറ്റെടുത്തിട്ടുണ്ട്. നാളെ ഇത് സംബന്ധിച്ച് ജില്ലാ കളക്ടർ, കൊച്ചി മേയർ ആർഡിഒ തുടങ്ങിയവർക്ക് പരാതി നൽകുമെന്ന് പ്രസിഡന്‍റ് ഫ്രാൻസിസ് ചമ്മിണി, ജനറൽ സെക്രട്ടറി വി.കെ. ബാബു എന്നിവർ അറിയിച്ചു.

എംബിബിഎസ് വിദ്യാർഥികളുടെ ഗ്രാജുവേഷൻ സെറിമണി നടത്തി

നെടുമ്പാശേരി : കുന്നുകര ചാലാക്ക ശ്രീനാരായണ ഇൻസ്റ്റ്യൂട്ട് ഓഫ് മെഡിക്കൽ സയൻസിൽ നടത്തിയ എംബിബിഎസ് 2019 ബാച്ച് വിദ്യാർഥികളുടെ ഗ്രാജുവേഷൻ സെറിമണി 'ആരോഹ 2025' കേരള യൂണിവേഴ്സിറ്റി ഹെൽത്ത് സയൻസസ് വൈസ് ചാൻസിലർ ഡോ. മോഹനൻ കുന്നുമ്മൽ ഉദ്ഘാടനം ചെയ്തു. ഗുരുദേവ ചാരിറ്റബിൾ ട്രസ്റ്റ് പ്രസിഡന്‍റ് പ്രദീപ്കുമാർ തങ്കപ്പൻ അധ്യക്ഷനായി. മാനേജർ ഡോ. പി.എ. സേതു, പ്രിൻസിപ്പൽ ഡോ. കെ.ആർ. ഇന്ദിര കുമാരി ബിരുദ പ്രതിജ്ഞ ചൊല്ലിക്കൊടുത്തു. ഡോ. സുമ കൃഷ്ണ ശാസ്ത്രി വിദ്യാർഥികൾക്ക് മൊമെന്‍റോ നൽകി അനുമോദിച്ചു. വൈസ് പ്രിൻസിപ്പൽ ഡോ. തോമസ് ജെറി, ഗുരുദേവ ചാരിറ്റബിൾ ട്രസ്റ്റ് വൈസ് പ്രസിഡന്‍റ് ഡോ. പി.കെ. രാജൻ ബാബു, ജോയിന്‍റ് സെക്രട്ടറി ആർ. രാജേന്ദ്രൻ, കെ.ആർ. ദിനേശൻ, ഡോ. മുഹമ്മദ് നവാസ് എന്നിവർ സംസാരിച്ചു. പിന്നണി ഗായിക സിതാര കൃഷ്ണകുമാർ നയിച്ച സംഗീത വിരുന്നും നടത്തി.

മഞ്ഞുമാതാ ബസിലിക്കയിൽ യുവജനദിനാഘോഷം

ചെറായി: പള്ളിപ്പുറം മഞ്ഞുമാതാ ബസിലിക്കയിൽ യുവജനദിനാഘോഷം നടത്തി. ബസിലിക്ക റെക്ടർ റവ. ഡോ. ആന്‍റണി കുരിശിങ്കൽ പതാക ഉയർത്തി. കെസിവൈഎമ്മിന്‍റെ നേതൃത്വത്തിൽ ഫ്‌ളാഷ് മോബും അവതരിപ്പിച്ചു. സഹവികാരിമാരായ ഫാ. സിന്‍റോ കുരിയപറമ്പിൽ, ഫാ. ജോമിറ്റ് നടുവിലവീട്ടിൽ, കൈക്കാരൻമാരായ മനു പടമാടൻ, ബെന്നി വലിയ വീട്ടിൽ, മിൽട്ടൻ ലിവേര, കേന്ദ്ര സമിതി പ്രസിഡന്‍റ് തോമസ് ചെമ്പകശേരി, പാരിഷ് കൗൺസിൽ സെക്രട്ടറി ഡോൺ സാവിയോ, മതബോധന വിഭാഗം പ്രധാന അധ്യാപിക സി. അതുല്ല്യ എന്നിവർ പ്രസംഗിച്ചു.

ടോയ്‌ലറ്റ് ബ്ലോക്ക് അടച്ചുപൂട്ടി : ആലുവ മത്സ്യമാർക്കറ്റ് കെട്ടിടം ഇടിഞ്ഞു വീഴാറായ നിലയിൽ

ആലുവ: ആലുവ നഗരത്തിലെ മത്സ്യ മാർക്കറ്റിൽ അടിസ്ഥാന സൗകര്യങ്ങൾ ഒരുക്കണമെന്നാവശ്യപ്പെട്ടിട്ടും നഗരസഭ അവഗണിക്കുന്നതായി പരാതി. പച്ചമത്സ്യം, ഉണക്കമീൻ, മാംസം തുടങ്ങിയവ വില്പന നടത്തുന്ന 25 ഓളം കടകളാണ് വർഷങ്ങളായി അറ്റകുറ്റപ്പണി നടത്താത്ത കെട്ടിടത്തിൽ പ്രവർത്തിക്കുന്നത്. ദിവസേന നൂറു കണക്കിന് ജനങ്ങളാണ് ഇവിടെ വിവിധ ആവശ്യങ്ങൾക്കായി വരുന്നത്. ചെളിക്കെട്ട് ചാടിക്കടന്നു വേണം ഇവിടേയ്ക്ക് വരാൻ. കെട്ടിടം വൃത്തിയാക്കി സൂക്ഷിക്കാൻ ആരോഗ്യ വിഭാഗവും താത്പര്യം എടുക്കുന്നില്ലെന്നാണ് വ്യാപാരികളുടെ പരാതി. കടയുടമകളും തൊഴിലാളികളും അടക്കം എഴുപത്തഞ്ചോളം പേർ ഇവിടെ പണിയെടുക്കുന്നുണ്ട്. കൂടാതെ വ്യാപാര സാധനങ്ങൾ കൊണ്ടുവരുന്ന വണ്ടികളിലെ തൊഴിലാളികൾ വേറെ. ഇവിടെ പ്രാഥമിക ആവശ്യങ്ങൾക്ക് ടോയ്‌ലറ്റ് പോലുമില്ലാത്ത സ്ഥിതിയാണ്. 50 കോടി രൂപ മുടക്കി നിർമിക്കുന്ന ഹൈടെക്ക് മാർക്കറ്റ് ഉയരുന്നത് മത്സ്യ മാർക്കറ്റിന് സമീപമാണ്. ഇതിനുള്ള നിർമാണ സാമഗ്രികൾ വയ്ക്കാനായി ഇവിടെയുള്ള പഴയ കെട്ടിടങ്ങൾ പൊളിച്ചപ്പോൾ ടോയ് ലറ്റ് ബ്ലോക്കും ഇല്ലാതായി. പകരം സംവിധാനമൊരുക്കിയിട്ടുമില്ല. കെട്ടിടത്തിനുള്ളിലുള്ള ടോയ്‌ലറ്റ് ഉപയോഗ ശൂന്യമായി കിടക്കാൻ തുടങ്ങിയിട്ട് മാസങ്ങളായി. അറ്റകുറ്റപ്പണിക്കായി അടച്ചിട്ടിരിക്കുന്നു എന്ന ബോർഡ് വച്ചതല്ലാതെ നഗരസഭ തിരിഞ്ഞു നോക്കിയിട്ടില്ല എന്നാണ് വ്യാപാരികൾ പരാതിപ്പെടുന്നത്. പുതിയ കെട്ടിട നിർമാണം പൂർത്തിയാകാൻ മൂന്ന് വർഷമെങ്കിലും വേണ്ടിവരുമെന്നാണ് സൂചന. അത് വരെ ചെളിക്കെട്ടിൽ കച്ചവടം നടത്തണമോയെന്നാണ് വ്യാപാരികൾ ചോദിക്കുന്നത്. മാർക്കറ്റിന് പുറത്ത് അനധികൃതമായി നടക്കുന്ന മത്സ്യ വിൽപ്പന മൂലം മാർക്കറ്റിലെ വ്യാപാരികൾക്ക് കനത്ത നഷ്ടമാണ് ഉണ്ടാകുന്നത്. നഗരസഭയ്ക്ക് ആകെ വാടക ലഭിക്കുന്നത്. മത്സ്യമാർക്കറ്റിലെ വ്യാപാരികളിൽ നിന്നാണ്. പക്ഷെ അവർക്ക് വേണ്ട അടിസ്ഥാന സൗകര്യങ്ങൾ പോലും ഒരുക്കുന്നതിൽ നഗരസഭാ തികഞ്ഞ പരാജയമാണെന്ന് ബിജെപി കുറ്റപ്പെടുത്തി.

മലയിടംതുരുത്ത് പ്രത്യാശഭവൻ കെട്ടിടത്തിന്‍റെ കൂദാശ നടത്തി

കിഴക്കമ്പലം: മലയിടംതുരുത്ത് പ്രത്യാശഭവൻ (ആകാശപ്പറവ) പുതിയ കെട്ടിടത്തിന്‍റെ കൂദാശയും ഉദ്ഘാടനവും നടത്തി. ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവ ഉദ്ഘാടനവും മാത്യൂസ് മാർ അഫ്രേം തിരുമേനിയുടെയും കാർമികത്വത്തിൽ വെഞ്ചിരിപ്പു കർമവും നടത്തി. പൊതുസമ്മേളനത്തിൽ ബെന്നി ബഹനാൻ എംപി എസ്എസ്എൽസി വിജയികളായവർക്ക് അവാർഡുകൾ വിതരണം ചെയ്തു. സ്‌ഥാപക ഡയറക്ടർ പുറമഠം ഡീക്കൻ വർഗീസ് കുട്ടി, ഡോ. ജോർജ് സ്ലീബ, എം.കെ. അനിൽകുമാർ, ഏലിയാസ് കാരിപ്ര , എം.ആർ. സൂരജ്, ഫാ. ജോർജ് ഐസക്ക് ചൂണ്ടക്കാരൻ എന്നിവർ ആശംസാ പ്രസംഗം നടത്തി. കൺവീനർ ഫാ. ഷാജി വർഗീസ് പാറക്കാടൻ സ്വഗതവും റോമി സ്ലീബ കീരിക്കാട്ടിൽ കൃതജ്ഞതയും പറഞ്ഞു. തെരുവിൽ അലയുന്ന മക്കൾക്ക് അഭയ കേന്ദ്രമായ പ്രത്യാശ ഭവൻ 1995-ലാണ് വർഗീസ്കുട്ടി പുറമഠവും ഭാര്യ അമ്മിണിയും ചേർന്ന് ആരംഭിക്കുന്നത്. 30വർഷം പിന്നിടുന്ന സ്‌ഥാപനം വിവിധ കോർപ്പറേറ്റ് കമ്പനികളുടെ സഹകരണത്തോടെയാണ് പുതിയ കെട്ടിടത്തിന്‍റെ നിർമാണം പൂർത്തിയാക്കിയത്. ഇതോടൊപ്പം പുതിയ ലിഫ്റ്റിന്‍റെ സമർപ്പണവും നടന്നു. അറുപത്തിമൂന്നു പേരാണ് ഇവിടെ അന്തേവാസികളായി ഉള്ളത്.

ദീപിക നമ്മുടെ ഭാഷ പദ്ധതി : പഴങ്ങാട് സെന്‍റ് ജോർജ് സ്കൂളിൽ

ഫോർട്ടുകൊച്ചി : കുമ്പളങ്ങി സർവീസ് സഹകരണ ബാങ്കിന്‍റെ സഹകരണത്തോടെ പഴങ്ങാട് സെന്‍റ് ജോർജ് യുപി, എൽപി സ്കൂളുകളിൽ ദീപിക നമ്മുടെ ഭാഷ പദ്ധതി ആരംഭിച്ചു. കുമ്പളങ്ങി സർവീസ് സഹകരണ ബാങ്ക് പ്രസിഡന്‍റ് നെൽസൺ കോച്ചേരി പദ്ധതി ഉദ്ഘാടനം ചെയ്തു. വികാരിയും സ്കൂൾ മാനേജരുമായ ഫാ. സെബാസ്റ്റ്യൻ പുത്തൻപുരയ്ക്കൽ അധ്യക്ഷത വഹിച്ചു. ബാങ്ക് ഡയറക്ടർ ബോർഡ് വൈസ് പ്രസിഡന്‍റ് ഉഷ പ്രദീപ്, അംഗങ്ങളായ ജോണി കുന്നുംപുറം, ജെയ്സൺ കൊച്ചുപറമ്പിൽ, പൊന്നൻ കാരത്തറ, ശോഭ ജോസഫ് , ജ്യോതി പോൾ, സി.ജെ. ജോസഫ് ചാലാവീട്ടിൽ, ഷാജി കുറുപ്പശേരി, കെ.വി. ആന്‍റണി, സി.സി. ചന്ദ്രൻ, ലാലു വേലിക്കകത്ത്, പ്രധാനാധ്യാപികമാരായ സോണി ബെയ്സിൽ, ജെയിൻ, ദീപിക പ്രതിനിധികളായ പോൾ ബെന്നി പുളിക്കൽ, അനിത അനിൽ എന്നിവർ പ്രസംഗിച്ചു.

ദീപിക നമ്മുടെ ഭാഷ പദ്ധതി : അകനാട് ഗവ. എൽപി സ്കൂളിൽ

പെരുമ്പാവൂർ: മുടക്കുഴ അകനാട് ഗവണ്മെന്‍റ് എൽപി സ്കൂളിൽ ദീപിക നമ്മുടെ ഭാഷ പദ്ധതിക്കു തുടക്കമായി. പദ്ധതിയുടെ ഉദ്ഘാടനം മുടക്കുഴ സർവീസ് സഹകരണ ബാങ്ക് പ്രസിഡന്‍റ് ജോഷി തോമസ് വിദ്യാർഥികളായ ശബരി തേജസ് ബാബു, കെ.ജി. ആരിക എന്നിവർക്ക് ദീപിക പത്രം നൽകി നിർവഹിച്ചു. ബാങ്ക് വൈസ് പ്രസിഡന്‍റ് എം.ജി. സന്തോഷ്‌ കുമാർ, മുടക്കുഴ ഗ്രാമപഞ്ചായത്ത്‌ പ്രസിഡന്‍റ് പി.പി. അവറാച്ചൻ, ബാങ്ക് ഭരണസമിതി അംഗങ്ങളായ പി.പി. ഗോപിനാഥൻ നായർ, ആർ. ശ്രീജിത്ത്‌ , രമേശ് കുമാർ, ഷാജി കീച്ചേരി, ശ്രീജ ബിജു, റിനി ബെന്നി, മിമി ലിനോയി, പോൾ വർഗീസ്, ടി.കെ. സാബു, പ്രധാനാധ്യാപിക ബീന സാമൂവൽ, സ്കൂൾ അസിസ്റ്റന്‍റ് സി.എസ്. ഷിജി, സ്റ്റാഫ്‌ സെക്രട്ടറി ഷിനി കുര്യാക്കോസ്, അധ്യാപകരായ രജനി, സൗമ്യ, ഹേമ, വത്സല, ഏരിയ മാനേജർ ടി.എ. നിബിൻ എന്നിവർ സംസാരിച്ചു. സ്കൂളിൽ പത്രം സ്പോൺസർ ചെയ്തിരിക്കുന്നത് മുടക്കുഴ സർവീസ് സഹകരണ ബാങ്കാണ്.

കരവട്ടെ വാളകത്ത് ദീർഘദൂര ബസുകൾക്ക് സ്റ്റോപ്പ് അനുവദിക്കണം: ഐഎൻടിയുസി

മൂവാറ്റുപുഴ: മൂവാറ്റുപുഴ-എറണാകുളം ദേശസാത്കൃത റൂട്ടിൽ സർവീസ് നടത്തുന്ന കെഎസ്ആർടിസി ദീർഘദൂര ബസുകൾക്ക് കരവട്ടെ വാളകത്ത് സ്റ്റോപ്പ് ഇല്ലാത്തതിനാൽ യാത്രികർ വലയുകയാണ്.കൊച്ചി-ധനുഷ്കോടി ദേശീയ പാതകൂടിയായ ഈ റൂട്ടിൽ പൊതുഗതാഗതത്തെ ഏറ്റവും കൂടുതൽ ആളുകൾ ആശ്രയിക്കുന്നത് കെഎസ്ആർടിസി ബസുകളെയാണ്. ദീർഘദൂര ബസുകളെ ആശ്രയിക്കുന്നവരും മറ്റ് ജില്ലകളിൽ ജോലിക്ക് പോകുന്നവരും കരവട്ടെ വാളകത്ത് സ്റ്റോപ്പ് ഇല്ലാത്തതുമൂലം ദുരിതം അനുഭവിക്കുകയാണ്. കരവട്ടെ വാളകത്ത് കെഎസ്ആർട്ടിസി ഫാസ്റ്റ്, ലിമിറ്റഡ് സ്റ്റോപ്പ് ബസുകൾക്ക് സ്റ്റോപ്പ് അനുവദിക്കണമെന്ന് ആവശ്യപ്പെട്ട് ഐഎൻടിയുസി വാളകം മണ്ഡലം പ്രസിഡന്‍റ് ജിജോ പാപ്പാലിൽ ഗതാഗത മന്ത്രിക്ക് പരാതി നൽകി. കഴിഞ്ഞ ദിവസം നടന്ന രണ്ടാം വാർഡ് ഗ്രാമസഭയിലും ഈ വിഷയം ഉന്നയിച്ചതിന്‍റെ അടിസ്ഥാനത്തിൽ ഗ്രാമസഭ പ്രമേയം പാസാക്കുകയും വിഷയത്തിൽ പഞ്ചായത്ത് കമ്മിറ്റി തീരുമാനമെടുത്ത് ബന്ധപ്പെട്ട അധികാരികൾക്ക് സമർപ്പിച്ച് സ്റ്റോപ്പ് അനുവദിച്ച് കിട്ടാൻ നടപടി സ്വീകരിക്കുമെന്ന് ഗ്രാമസഭ അധ്യക്ഷൻ കൂടിയായ പഞ്ചായത്ത് പ്രസിഡന്‍റ് കെ.പി. ഏബ്രഹാം ഉറപ്പ് നൽകുകയും ചെയ്തു.

വിദ്യാസ്പര്‍ശം മെറിറ്റ് അവാര്‍ഡ് വിതരണം

മൂവാറ്റുപുഴ: എസ്എസ്എല്‍സി, പ്ലസ്ടു പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് വാങ്ങിയ ആരക്കുഴ പഞ്ചായത്തിലെ മുഴുവന്‍ വിദ്യാര്‍ഥികള്‍ക്കും മാത്യു കുഴല്‍നാടന്‍ എംഎല്‍എയുടെ വിദ്യാസ്പര്‍ശം മെറിറ്റ് അവാര്‍ഡുകള്‍ വിതരണം ചെയ്തു. ആരക്കുഴ സെന്‍റ് ജോസഫ്സ് ഹൈസ്‌കൂളില്‍ സംഘടിപ്പിച്ച ചടങ്ങ് മാത്യു കുഴല്‍നാടന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ലസിത മോഹനന്‍ അധ്യക്ഷത വഹിച്ചു. ആരക്കുഴ സെന്‍റ് ജോസഫ്സ് ഹൈസ്‌കൂള്‍ പ്രധാനാധ്യാപിക സിസ്റ്റർടിസ മരിയ ആമുഖ പ്രഭാഷണം നടത്തി. ആരക്കുഴ സെന്‍റ് മേരീസ് ആർക്കി എപ്പിസ്കോപ്പൽ പള്ളി വികാരി ആര്‍ച്ച് പ്രീസ്റ്റ് ഫാ. സെബാസ്റ്റ്യന്‍ കണിമറ്റത്തില്‍ മുഖ്യപ്രഭാഷണം നടത്തി. മൂവാറ്റുപുഴ: എല്ലാ വിഷയങ്ങള്‍ക്കും എ പ്ലസ് നേടിയ പായിപ്ര പഞ്ചായത്തിലെ വിദ്യാര്‍ഥികൾക്ക് മാത്യു കുഴല്‍നാടന്‍ എംഎല്‍എയുടെ വിദ്യാസ്പര്‍ശം മെറിറ്റ് അവാർഡുകൾ വിതരണം ചെയ്തു. ചടങ്ങ് മാത്യു കുഴല്‍നാടന്‍ എംഎല്‍എ ഉദ്ഘാടനം ചെയ്തു. പുതിയ കാലത്തിന്‍റെ ഭാഗമായി മാറുന്നതിന് വിദ്യാഭ്യാസ തിയറ്റര്‍, ഡിജിറ്റല്‍ ലൈബ്രറി പദ്ധതി എംഎല്‍എ ഫണ്ടില്‍നിന്നു തുക അനുവദിച്ചു നടപ്പാക്കും. ആദ്യ ഘട്ടത്തില്‍ പേഴയ്‌ക്കാപ്പിള്ളി സ്‌കൂളിലാണ് പദ്ധതിക്ക് തുടക്കമിട്ടത്. 100 ശതമാനം വിജയം നേടിയ വിദ്യാലയങ്ങളെയും യൂണിവേഴ്‌സിറ്റി പരീക്ഷകളിലെ റാങ്ക് ജേതാക്കളെയും എംഎല്‍എ ചടങ്ങില്‍ ആദരിച്ചു. 134 വിദ്യാര്‍ഥികള്‍ അവര്‍ഡിന് അര്‍ഹരായി. പഞ്ചായത്ത് പ്രസിഡന്‍റ് എം.എസ്. അലിയാര്‍ അധ്യക്ഷത വഹിച്ചു.

അയ്യങ്കാവിൽ വാഹനങ്ങളുടെ കൂട്ടയിടി

കോതമംഗലം: ദേശീയ പാതയില്‍ അയ്യങ്കാവ് ഗവ.സ്‌കൂളിന് സമീപം വാഹനങ്ങളുടെ കൂട്ടയിടി. അഞ്ച് വാഹനങ്ങളുടെ കൂട്ടയിടിയില്‍ ആറ് പേര്‍ക്ക് പരിക്ക്. നേര്യമംഗലം ഭാഗത്തനിന്നുവന്ന ഇന്നോവ കാറാണ് മറ്റ് വാഹനത്തില്‍ ഇടിച്ചത്. ഇന്നലെ വൈകുന്നേരം നാലിനായിരുന്നു അപകടം. പരിക്കേറ്റവരെ കോതമംഗലത്തെ സ്വകാര്യ ആശുപത്രിയില്‍ പ്രവേശിപ്പിച്ച് പിന്നീട് ആലുവയിലെ സ്വകാര്യ ആശുപത്രിയിലേക്ക് മാറ്റി. തലക്കോട് പീടികക്കുടിയില്‍ പി.കെ. അഷറഫ് (46), ഊന്നുകല്‍ കീടത്തുംകുടി നസീര്‍ ഹമീദ് (44), ഊന്നുകല്‍ കീടത്തുംകുടി സഫിയ (40) എന്നിവര്‍ക്കാണ് സാരമായി പരിക്കേറ്റത്. മറ്റുള്ളവര്‍ പ്രാഥമിക ചികിത്സയ്‌ക്ക് ശേഷം മടങ്ങി. കോതമംഗലത്തേക്ക് വരികയായിരുന്ന ഇന്നോവ കാര്‍ നിയന്ത്രണംവിട്ട് എതിര്‍ദിശയില്‍നിന്നുവന്ന കാറില്‍ ഇടിച്ചശേഷം ഓട്ടോറിക്ഷയിലിടിക്കുകയായിരുന്നു. ഇടിയുടെ ആഘാതത്തില്‍ ഉയര്‍ന്ന് പൊങ്ങിയ ഓട്ടോറിക്ഷയുമായി കാര്‍ കടയിലേക്ക് ഇടിച്ചുകയറി. ആദ്യം ഇടിച്ച കാറിലേക്ക് സ്‌കൂട്ടറും ബൈക്കും ഇടിച്ച് വാഹനങ്ങള്‍ മറിഞ്ഞു. ഇരുചക്ര വാഹനം ഓടിച്ചവര്‍ റോഡിലേക്ക് തെറിച്ച് വീണു. ഒരു ഓട്ടോറിക്ഷയും രണ്ട് ഇരുചക്ര വാഹനങ്ങളും രണ്ട് കാറുകളുമാണ് അപകടത്തില്‍പ്പെട്ടത്. ഓട്ടോയുമായി കാര്‍ ഇടിച്ചുകയറി വ്യാപാര സ്ഥാപനത്തിന്‍റെ മുന്‍വശം തകര്‍ന്നു. കടയുടെ മുന്‍ഭാഗത്ത് ഉറപ്പിച്ചിരുന്ന ഗ്രില്ലുകളും സാധനസാമഗ്രികളും നശിച്ചു. മൂവാറ്റുപുഴ സ്വദേശിയുടേതാണ് ഇന്നോവ കാർ. അടിമാലി ഭാഗത്ത് പോയി മടങ്ങുകയായിരുന്നു.

വിദേശജോലി വാഗ്ദാനം ചെയ്ത് കോടികൾ തട്ടിയയാൾ പിടിയിൽ

ആലത്തൂർ: വിദേശരാജ്യങ്ങളിൽ ജോലിവാഗ്ദാനം നൽകി തട്ടിപ്പുനടത്തിയ ആളെ ആലത്തൂർ പോലീസ് പിടികൂടി. കോഴിക്കോട് കല്ലുരുട്ടി സ്വദേശി മനോജ് (49) ആണു പിടിയിലായത്. ഇറ്റലി, ജർമനി തുടങ്ങിയ വിദേശരാജ്യങ്ങളിൽ നഴ്സിംഗ് ഉള്‍പ്പെടെ ജോലി വാഗ്ദാനംചെയ്ത് സംസ്ഥാനത്തെ വിവിധ ജില്ലകളിൽനിന്നുള്ളവരിൽനിന്നു കോടിക്കണക്കിനു രൂപ തട്ടിയെടുത്തെന്ന കേസിലാണ് അറസ്റ്റ്. ആലത്തൂർ ബസ് സ്റ്റാൻഡിൽ തിരംഗ ഇൻസ്റ്റിറ്റ്യൂട്ട് എന്ന സ്ഥാപനം ആരംഭിച്ച ഇയാൾ പാലക്കാട്, കോട്ടയം, ആലപ്പുഴ, തൊടുപുഴ, എറണാകുളം, വയനാട്, മലപ്പുറം തുടങ്ങിയ സ്ഥലങ്ങളിൽ സമാന സ്ഥാപനങ്ങൾ നടത്തി ഓണ്‍ലൈൻ കോഴ്സും ജോലിയും വാഗ്ദാനംചെയ്ത് തട്ടിപ്പുനടത്തിവരികയായിരുന്നു. തട്ടിപ്പിനിരയായ കോട്ടയം മണർകാട് സ്വദേശി നൽകിയ പരാതിയിലാണ് ആലത്തൂർ പോലീസ് കേസ് രജിസ്റ്റർ ചെയ്തത്. പ്രതി എറണാകുളം കളമശേരിയിൽ ഒരു മീറ്റിംഗിൽ പങ്കെടുക്കുന്നതിനായി എത്തുന്നുണ്ടെന്ന രഹസ്യവിവരം ലഭിച്ചതിനെത്തുടർന്ന് പോലീസെത്തി കസ്റ്റഡിയിലെടുക്കുകയായിരുന്നു. ആലത്തൂർ പോലീസ് ഇൻസ്പെക്ടർ ടി.എൻ. ഉണ്ണികൃഷ്ണന്‍റെ നേതൃത്വത്തിൽ എസ്ഐ ജിതിൻകുമാർ, ഡ്രൈവർ സിപിഒ ഇൻഷാദ്, ജിഎസ്‌സിപിഒ പീയുഷ്, ഹോംഗാർഡ് ജയപ്രകാശ് എന്നിവർചേർന്നാണു പ്രതിയെ കസ്റ്റഡിയിലെടുത്തത്. ആലത്തൂരിലെ കന്പനിക്കെതിരേ നേരത്തേ അറുപതിലധികം പരാതി ലഭിച്ചിരുന്നു. അന്വേഷണം നടക്കുന്നതിനിടെ പ്രതികൾ പണം തിരികെനൽകാമെന്നു വാഗ്ദാനം ചെയ്തെങ്കിലും പിന്നീട് ആലത്തൂരിലെ സ്ഥാപനം മുന്നറിയിപ്പില്ലാതെ പൂട്ടി രക്ഷപ്പെടുകയായിരുന്നു. അടുത്തിടെ എറണാകുളത്ത് സ്ഥാപനം തുടങ്ങി തട്ടിപ്പുനടത്തിവരുന്നതിനിടയിലാണു പ്രതി പിടിയിലായതെന്ന് ആലത്തൂർ ഇൻസ്പെക്ടർ ടി.എൻ. ഉണ്ണിക്കൃഷ്ണൻ പറഞ്ഞു. നിലവിൽ മനോജിനെതിരേ ആലത്തൂർ സ്റ്റേഷനിൽ ഏഴു പരാതികൾ ലഭിച്ചിട്ടുണ്ട്. അറസ്റ്റിലായ പ്രതിയെ കോടതി റിമാൻഡ് ചെയ്തു.

പെന്‍ഷന്‍ വിതരണം : ഏകീകൃത ഫോം സംവിധാനം നടപ്പാക്കാനൊരുങ്ങി ട്രഷറി വകുപ്പ്

സീമ മോഹന്‍ലാല്‍ കൊച്ചി: സംസ്ഥാന ട്രഷറികളില്‍ നിന്നും പ്രതിമാസ പെന്‍ഷന്‍ കൈപ്പറ്റുന്ന പെന്‍ഷന്‍കാരുടെ അടിസ്ഥാന വിവരങ്ങള്‍ ശേഖരിക്കാനായി ട്രഷറി വകുപ്പ് ഏകീകൃത ഫോം സംവിധാനം നടപ്പാക്കുന്നു. പെന്‍ഷന്‍കാരുടെ അടിസ്ഥാന വിവരങ്ങള്‍ സമയബന്ധിതമായി ശേഖരിക്കുന്നതിനും പേഴ്‌സണല്‍ ഇന്‍ഫോര്‍മേഷന്‍ മാനേജ്‌മെന്‍റ് സിസ്റ്റം(പിഐഎംഎസ്) ആപ്ലിക്കേഷനില്‍ അവ കൃത്യമായി ഉള്‍പ്പെടുന്നതിനുമായാണ് പുതിയ സംവിധാനം വരുന്നത്. ഇതിനായി സര്‍ക്കാര്‍ അംഗീകരിച്ച പെന്‍ഷനേഴ്‌സ് ഡാറ്റ ഷീറ്റ് ഫോമുകളുടെ അച്ചടി ട്രഷറി ഡയറക്ടറേറ്റില്‍ പൂര്‍ത്തിയായി. വരും ദിവസങ്ങളില്‍ ഇത് ജില്ല, സബ് ട്രഷറികളിലൂടെ വിതരണം ചെയ്യും. നിലവിലെ പെന്‍ഷന്‍കാര്‍ ഈ വര്‍ഷം ഡിസംബര്‍ 31നു മുമ്പായും പുതിയ പെന്‍ഷന്‍കാര്‍ സര്‍വീസില്‍നിന്ന് വിരമിച്ച് ആറ് മാസത്തിനകവും പൂരിപ്പിച്ച ഫോറം ട്രഷറിയില്‍ സമര്‍പ്പിക്കണം. നിലവില്‍ പെന്‍ഷന്‍ പ്രൊപ്പോസല്‍ സമര്‍പ്പിക്കുമ്പോള്‍ ആവശ്യപ്പെടുന്ന ട്രഷറികള്‍ വഴിയാണ് പെന്‍ഷന്‍, ഡെത്ത് കം റിട്ടയര്‍മെന്‍റ് ഗ്രാറ്റ്വിറ്റി(ഡിസിആര്‍ജി) എന്നിവ ലഭിക്കുന്നത്. അത് തുടരും. പെന്‍ഷന്‍ പ്രൊപ്പോസലിനായി പ്രത്യേക സൈറ്റുണ്ട്. പ്രിസം പോര്‍ട്ടല്‍ വഴിയാണ് ജീവനക്കാര്‍ പെന്‍ഷന്‍ അപേക്ഷ സമര്‍പ്പിക്കുന്നത്. പെന്‍ഷന്‍ വാങ്ങുന്നവരുടെ വിവരങ്ങള്‍ ട്രഷറിതലത്തില്‍ ശേഖരിച്ചു സൂക്ഷിക്കുന്നതിനു വേണ്ടി മാത്രമാണ് പുതിയ സംവിധാനം. പെന്‍ഷണര്‍ വിദേശത്താണ് താമസമെങ്കില്‍ പാസ്‌പോര്‍ട്ട് നമ്പര്‍ ഫോമില്‍ രേഖപ്പെടുത്തുകയും പാസ്‌പോര്‍ട്ട് നമ്പറും മേല്‍വിലാസവുമുള്ള പേജിന്‍റെ പകര്‍പ്പ് സമര്‍പ്പിക്കുകയും വേണം. വിദേശ പൗരത്വം സ്വീകരിച്ചിട്ടുണ്ടെങ്കില്‍ പ്രസ്തുത രാജ്യത്തിലെ ഐഡന്‍റിഫിക്കേഷന്‍ കാര്‍ഡ് നമ്പര്‍, ബന്ധപ്പെട്ട എംബസി സാക്ഷ്യപ്പെടുത്തിയ കാര്‍ഡ് നമ്പറും അഡ്രസ് ഉള്‍പ്പെടുന്ന പേജിന്‍റെ പകര്‍പ്പും ഫോമിനോടൊപ്പം സമര്‍പ്പിക്കണം. ഒന്നിലധികം പെന്‍ഷന്‍ വാങ്ങുന്നവര്‍ അക്കാര്യങ്ങളെല്ലാം വ്യക്തമാക്കണമെന്നുമുള്ള നിര്‍ദേശങ്ങളും ട്രഷറി വകുപ്പ് അസിസ്റ്റന്‍റ് ഡയറക്ടറുടെ ഉത്തരവിലുണ്ട്.

ഓൾ കേരള റീട്ടെയിൽ റേഷൻ ഡീലേഴ്സ് അസോസിയേഷൻ ജില്ലാ സമ്മേളനം

പറവൂർ: ഓൾ കേരള റീട്ടെയിൽ റേഷൻ ഡീലേഴ്സ് അസോസിയേഷൻ ജില്ലാ സമ്മേളനം പറവൂർ ടൗൺഹാളിൽ അൻവർ സാദത്ത് എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് വി.വി. ബേബി അധ്യക്ഷത വഹിച്ചു. റേഷൻ ഡീലേഴ്സ് അസോസിയേഷന്‍ സംസ്ഥാന പ്രസിഡന്‍റ് ജോണി നെല്ലൂർ മുഖ്യപ്രഭാഷണം നടത്തി. സംസ്ഥാന ജനറൽ സെക്രട്ടറി ടി. മുഹമ്മദാലി, സംസ്ഥാന വൈസ് പ്രസിഡന്‍റ് പി.ഡി. പോൾ, സംസ്ഥാന സെക്രട്ടറി കെ.കെ. ഇസഹാക്ക്, ബേബി തോമസ്, കെ.ഡി. റോയ്, യു.എൻ. ഗിരിജൻ, മജോ മാത്യു, ചിന്നമ്മ പോൾ, കെ.എസ്. പൗലോസ്, എം.ജെ. രാജു തുടങ്ങിയവർ പ്രസംഗിച്ചു.

നായ്ക്കുട്ടിയെ ഉപദ്രവിച്ചതായി പരാതി

കോലഞ്ചേരി: മൂന്നു മാസം പ്രായമുള്ള നായ്ക്കുട്ടിയെ ക്രൂരമായി ഉപദ്രവിച്ചതായി പരാതി. ഓമനിച്ച് വളർത്തിവന്ന നായ്ക്കുട്ടിയോട് ക്രൂരത കാണിച്ചവരെ കണ്ടെത്തി ശക്തമായ നടപടി സ്വീകരിക്കണമെന്ന് ആവശ്യപ്പെട്ട് ഉടമ പുത്തൻകുരിശ് പോലീസിന് പരാതി നൽകി. പുത്തൻകുരിശ് മോനപ്പിള്ളി പാറപ്പുഴ പുത്തൻപുരയിൽ നയനമോൾ ജിബിയുടെ വീട്ടിലെ നായ്ക്കുട്ടിയെയാണ് കെമിക്കൽ ദ്രാവകം ദേഹത്ത് ഒഴിച്ച് ഉപദ്രവിച്ചതായുള്ള പരാതി ഉയർന്നത്. വീട്ടിൽ ആളില്ലാത്ത സമയം നോക്കിയാണ് കഴിഞ്ഞ ഒൻപതിന് നായ്ക്കുട്ടിക്കെതിരെ ക്രൂര ഉപദ്രവം നടന്നത്. നായ്ക്കുട്ടിയെ പരിശോധിച്ച ഡോക്ടർ പട്ടിയുടെ കരളിനേയും കിഡ്നിയേയും സംഗതി ബാധിച്ചിട്ടുണ്ടെന്ന് കണ്ടെത്തി. ഒരു കണ്ണിന്‍റെ കാഴ്ച പൂർണമായും നഷ്ടപ്പെട്ട നായുടെ മറ്റേ കണ്ണിന്‍റെ കാഴ്ച ഭാഗികമായും പോയിട്ടുണ്ട്. മുഖവും വായും കെമിക്കലിൽ ചവിട്ടി നിന്നതു മൂലം കാലിന്‍റെ അടിഭാഗവും പൊള്ളലേറ്റ നിലയിലാണ്.

എംഡിഎംഎയുമായി യുവതിയടക്കം മൂന്നുപേർ അറസ്റ്റിൽ

മരട്: തൈക്കൂടത്ത് ലോഡ്ജിൽ നിന്ന് എംഡിഎംഎയുമായി യുവതിയടക്കം മൂന്നു പേർ പിടിയിൽ. പള്ളുരുത്തി ദേശം ചിറപ്പറമ്പിൽ വീട്ടിൽ ലിജിയ മേരി (34), മരട് ചമ്പക്കര കീർത്തി നഗറിൽ നരത്തുരുത്തി വീട്ടിൽ വിഷ്ണു (26), മരട് വിളക്കേടത്ത് വീട്ടിൽ സജിത്ത് (29) എന്നിവരെയാണ് എക്സൈസ് സംഘം അറസ്റ്റ് ചെയ്തത്. തൈക്കൂടത്തെ ലോഡ്‌ജിൽ നിന്നാണ് ലിജിയയെ പിടികൂടിയത്. ലോഡ്‌ജ് മുറിയിൽ നടത്തിയ പരിശോധനയിൽ 23 ഗ്രാം എംഡിഎംഎ കണ്ടെടുത്തു. ബംഗളൂരുവിൽ നിന്ന് കൊച്ചിയിലേക്ക് ലഹരി എത്തിച്ച് വിൽപ്പന നടത്തുന്നവരിൽ പ്രധാനിയാണ് ലിജിയയെന്ന് പറയുന്നു. ലിജിയയിൽ നിന്ന് എംഡിഎംഎ വാങ്ങാനെത്തിയതായിരുന്നു പിടിയിലായ മറ്റ് രണ്ടു പേർ. എറണാകുളം എക്സൈസ് സ്പെഷൽ സ്ക്വാഡ് ശനിയാഴ്ച അർധരാത്രി നടത്തിയ പരിശോധനയിലാണ് സംഘത്തെ പിടികൂടിയത്.

രാസലഹരിയുമായി യുവാക്കൾ പിടിയിൽ

കിഴക്കന്പലം: 46 ഗ്രാം എംഡിഎംഎയുമായി രണ്ടു യുവാക്കൾ പോലീസ് പിടിയിൽ. സൗത്ത് വാഴക്കുളം മണ്ണൂപ്പറമ്പൻ മുഹമ്മദ് അസ്‌ലം(25), പെരുമ്പാവൂർ ചെമ്പരത്തുകുന്ന് തെക്കേ വടയത്ത് അജ്മൽ(25) എന്നിവരെയാണ് റൂറൽ ജില്ലാ ഡാൻസാഫ് ടീമും, തടിയിട്ടപറമ്പ് പോലീസും ചേർന്ന് പിടികൂടിയത്. ജില്ലാ പോലീസ് മേധാവി എം. ഹേമലതയ്ക്കു ലഭിച്ച രഹസ്യവിവരത്തിന്‍റെ അടിസ്ഥാനത്തിൽ നടത്തിയ പരിശോധനയിൽ വാഴക്കുളത്തെ വീട്ടിൽനിന്നാണ് രാസലഹരി കണ്ടെടുത്തത്. ബംഗളൂരുവിൽ നിന്നാണ് മയക്കുമരുന്ന് എത്തിച്ചത്. യുവാക്കളെ കേന്ദ്രീകരിച്ച് ചെറിയ പായ്ക്കറ്റുകളിലാക്കിയായിരുന്നു വില്പന. രാസലഹരി നിറക്കാനുള്ള സിപ്പ് ലോക്ക് കവറുകളും ഇവിടെനിന്ന് കണ്ടെടുത്തു. ജില്ലയിലെ രാസലഹരി വില്പന ശൃംഖലയിലെ കണ്ണികളാണിവർ. കുറച്ചുനാളുകളായി നിരീക്ഷണത്തിലായിരുന്നു. വീടിനകത്ത് അലമാരിയിൽ പ്രത്യേക അറയുണ്ടാക്കി അതിനകത്താണ് മയക്കുമരുന്ന് ഒളിപ്പിച്ചിരുന്നത്. മുഹമ്മദ് അസ്‌ലം അഞ്ച് കേസുകളിലും, അജ്മൽ രണ്ട് മയക്കുമരുന്ന് കേസുകളിലും പ്രതികളാണ്.

ബൈക്ക് മോഷ്ടാവ് കുടുങ്ങി

കാലടി: ബൈക്ക് മോഷണ കേസിലെ പ്രതി പിടിയിൽ. പാലക്കാട് ഓങ്ങല്ലൂർ പട്ടാമ്പി ആത്താരത്തൊടി വീട്ടിൽ പൊന്നു (47) വിനെയാണ് കാലടി പോലീസ് അറസ്റ്റ് ചെയ്തത്. കഴിഞ്ഞ ഒന്നിന് കാലടി ഭാഗത്തുള്ള ഹോട്ടലിന്‍റെ പിൻവശത്ത് പാർക്കിംഗ് ഏരിയയിൽ വച്ചിരുന്ന മാണിക്കമംഗലം സ്വദേശിയുടെ ബൈക്കാണ് മോഷണം പോയത്. അന്വേഷണത്തിനൊടുവിൽ ആലപ്പുഴ - പത്തനംതിട്ട അതിർത്തിയിലെ ആദിക്കാട്ടുകുളങ്ങര ഭാഗത്ത് നിന്നാണ് വാഹനവും പ്രതിയെയും കണ്ടെത്തിയത്. പൊന്നുവിനെതിരെ വിവിധ പോലീസ് സ്റ്റേഷനുകളിൽ വേറെയും കേസുകളുണ്ട്. അന്വേഷണസംഘത്തിൽ ഇൻസ്പെക്ടർ അനിൽ ടി. മേപ്പിള്ളി, എസ്ഐ മാരായ ജോസി എം. ജോൺസൺ, ജയിംസ് മാത്യു, എഎസ്ഐ പി.കെ. പ്രീജ, എസ്‌സിപിഒ റ്റി.എൻ.മനോജ് കുമാർ, സിപിഒ ധനേഷ് എന്നിവരാണ് ഉണ്ടായിരുന്നത്.

കാഴ്ച പരിമിതരുടെ ചെസ്: പി. ബലരാമൻ ചാന്പ്യൻ

ആലുവ: കാഴ്ച പരിമിതർക്കായി സംഘടിപ്പിച്ച ജേക്കബ് മണ്ണാറപ്രായിൽ കോർഎപ്പിസ്ക്കോപ്പ ‌ചെസ് ചാമ്പ്യൻഷിപ്പ് ഓപ്പൺ വിഭാഗത്തിൽ പി. ബലരാമൻ (തിരുവനന്തപുരം) ചാമ്പ്യനായി. വൈഎംസിഎ ക്യാമ്പ് സെന്‍ററിൽ നടന്ന സമ്മളനത്തിൽ അൻവർ സാദത്ത്‌ എംഎൽഎ ട്രോഫികൾ സമ്മാനിച്ചു. ഇ.പി. നൗഷാദ്(കോഴിക്കോട്‌), ടി. ഷൈബു(കണ്ണൂർ) എന്നിവർ രണ്ടും മൂന്നും സ്ഥാനങ്ങൾ നേടി. വനിതാ വിഭാഗത്തിൽ അയിഷ സൈനബ്‌, ജൂണിയർ വിഭാഗത്തിൽ കെ. മുഹമ്മദ്‌ ‌ റനീഷ്‌ എന്നിവർ ഒന്നാമതെത്തി.

മണൽത്തിട്ടയിൽ കുടുങ്ങിയ ബാർജ് നീക്കി

മട്ടാഞ്ചേരി: ഫോർട്ടുകൊച്ചി കടൽ തീരത്ത് മണൽത്തിട്ടയിൽ കുടുങ്ങിയ ബാർജ് ഇന്നലെ വൈകുന്നേരം ടഗ് ബോട്ടുകൾ ഉപയോഗിച്ച് നീക്കി. എൻജിൻ തകരാറിനെ തുടർന്ന് കൊച്ചി അഴിമുഖത്ത് ഒഴുകിയ സ്വകാര്യ കമ്പനിയുടെ ഡുൾ- ഡുൾ 5 എന്ന ബാർജാണ് ശനിയാഴ്ച രാവിലെ എട്ടോടെ ഫോർട്ടുകൊച്ചി കൊച്ചിൻ ക്ലബിന് പടിഞ്ഞാറായി മണൽത്തിട്ടയിൽ കുടുങ്ങിയത്. അന്നു തന്നെ ബാർജ് നീക്കുന്നതിനുള്ള ശ്രമം ടഗ് ബോട്ടുകൾ ഉപയോഗിച്ച് നടത്തിയെങ്കിലും വിഫലമായിരുന്നു. ഇന്നലെ രണ്ട് ടഗ് ബോട്ടുകൾ ഒരുമിച്ച് ബാർജ് വലിച്ചുനീക്കാൻ ശ്രമിക്കുന്നതിനിടെ ഒരു ടഗ് ബോട്ട് മണൽത്തിട്ടയിൽ കുടുങ്ങി. തുടർന്ന് അടുത്ത ടഗ് ബോട്ട് ഉപയോഗിച്ച് വലിച്ച് നീക്കുകയായിരുന്നു. ഈ രണ്ടു ടഗ് ബോട്ടുകളും ചേർന്ന് നടത്തിയ ശ്രമത്തിനൊടുവിലാണ് ഇന്നലെ വൈകുന്നേരത്തോടെ മണൽത്തിട്ടയിൽനിന്ന് ബാർജ് നീക്കാനായത്.

മന്ത്രിയെ കരിങ്കൊടി കാട്ടാനെത്തിയ യൂത്ത് കോൺ. നേതാവ് അറസ്റ്റിൽ

തൃപ്പൂണിത്തുറ: മന്ത്രി ആർ. ബിന്ദുവിനെ കരിങ്കൊടി കാണിക്കാനെത്തിയ യൂത്ത് കോൺഗ്രസ് നേതാവിനെ അറസ്റ്റ് ചെയ്തു. വനിതാ കഥകളി സംഘത്തിന്‍റെ ജൂബിലിയാഘോഷങ്ങളിൽ പങ്കെടുക്കാനെത്തിയ മന്ത്രിയുടെ പ്രസംഗം നടക്കുമ്പോൾ കരിങ്കൊടിയുമായി എത്തിയ ബ്ലോക്ക് പ്രസിഡന്‍റ് പ്രവീൺ പറയന്താനത്തിനെയാണ് പോലീസ് അറസ്റ്റ് ചെയ്തത്. കസ്റ്റഡിയിൽ എടുത്ത ഉടനെ കരിങ്കൊടി വീശി. സ്‌റ്റേഷനിലേക്ക് കൊണ്ടുപോയ പ്രവീണിനെ മന്ത്രി പോയ ശേഷമാണ് സ്‌റ്റേഷൻ ജാമ്യം നൽകി വിട്ടയച്ചത്.

ഇതര സംസ്ഥാന തൊഴിലാളിയുടെ മൃതദേഹം : 24 ദിവസമായി മോർച്ചറിയിൽ

പോലീസ് അനാസ്ഥയ്ക്കെതിരേ മനുഷ്യാവകാശ കമ്മീഷനിൽ പരാതി കൊച്ചി: അപകടത്തിൽ പരിക്കേറ്റ് മരിച്ച ഇതരസംസ്ഥാന തൊഴിലാളിയുടെ മൃതദേഹം 24 ദിവസമായി മോർച്ചറിയിൽ. പോലീസ് അനാസ്ഥയ്ക്കെതിരേ ജനകീയ അന്വേഷണ സമിതി കൺവീനർ ടി.എൻ. പ്രതാപൻ മനുഷ്യാവകാശ കമ്മീഷന് പരാതി നൽകി. ഹിൽപാലസ് സ്റ്റേഷന് സമീപം അവശനിലയിൽ റോഡിൽ കിടന്നയാളെ പോലീസ് ആശുപത്രിയിലെത്തിച്ചെങ്കിലും ചികിത്സയിലിരിക്കേ മരിച്ചു. എന്നാൽ തുടർ നടപടികളൊന്നും കൈക്കൊള്ളാൻ പോലീസ് തയാറായില്ലെന്നാണ് ആക്ഷേപം. ഉന്നതതല അന്വേഷണം ആരംഭിച്ചതോടെ ശനിയാഴ്ച കേസെടുത്തു. സംഭവം വിവാദമായതോടെ ജൂലൈ 12ന് രജിസ്റ്റർ ചെയ്ത എഫ്ഐആറിൽ രേഖപ്പെടുത്തിയിരിക്കുന്ന വിവരങ്ങൾ സംബന്ധിച്ചും ആക്ഷേപമുയരുന്നുണ്ട്. ജൂൺ 19ന് പുലർച്ചെ നടന്ന അപകട വിവരവും അന്നുതന്നെ സംഭവിച്ച മരണവും സ്റ്റേഷനിൽ അറിഞ്ഞതായി രേഖപ്പെടുത്തിയിരിക്കുന്നത് ജൂലൈ 12 നാണ്. അവശനിലയിൽ കിടന്ന ഇതരസംസ്ഥാന തൊഴിലാളിയെ രാത്രി ഡ്യൂട്ടിയിലുണ്ടായിരുന്ന പോലീസുദ്യോഗസ്ഥർ തൃപ്പൂണിത്തുറ താലൂക്കാശുപത്രിയിലെത്തിക്കുകയായിരുന്നു. ഇയാളുടെ നില ഗുരുതരമായിരുന്നതിനാൽ താലൂക്കാശുപത്രിയിൽ നിന്നും കളമശേരി മെഡിക്കൽ കോളജിലേക്ക് മാറ്റിയെന്നും ഈ വിവരം താലൂക്കാശുപത്രി അധികൃതർ ഹിൽപാലസ് സ്റ്റേഷനിൽ അറിയിച്ചതായും പറയുന്നു. ജൂൺ 19ന് ഇയാൾ മരിച്ചതിനെ തുടർന്ന് പോലീസ് സ്റ്റേഷനിലേക്ക് ലഭിച്ച ഇന്‍റിമേഷനിൽ നടപടിയാകാതിരുന്നതോടെ 27ന് മെഡിക്കൽ കോളജിൽ നിന്ന് രേഖാമൂലം, തിരിച്ചറിയാത്ത മൃതദേഹം ഇവിടെയുണ്ടെന്നു ചൂണ്ടിക്കാട്ടി കത്ത് നൽകി. എന്നിട്ടും തുടർ നടപടികൾ സ്വീകരിക്കുന്നതിൽ ഹിൽപാലസ് എസ്ഐ അനില വീഴ്ച വരുത്തിയതായാണ് ആരോപണം. പോലീസിന്‍റെ ഭാഗത്തുനിന്ന് പ്രതികരണമില്ലാതെ വന്നപ്പോൾ മൃതദേഹം അനാട്ടമി വിഭാഗത്തിലേക്ക് മെഡിക്കൽ കോളജ് അധികൃതർ മാറ്റി. സംഭവം സംബന്ധിച്ച് അന്വേഷണം നടത്തുമെന്നും ഇൻക്വസ്റ്റും പോസ്റ്റ്മോർട്ടം നടപടികളും അടുത്ത ദിവസം പൂർത്തീകരിക്കുമെന്നും തൃക്കാക്കര അസിസ്റ്റന്‍റ് പോലീസ് കമ്മീഷണർ പി.എസ്. ഷിജു പറഞ്ഞു.

വരുന്നു... നഗരത്തില്‍ അഞ്ചിടങ്ങളില്‍ റെസ്റ്റോ കഫേകള്‍

കൊച്ചി: വിദേശ രാജ്യങ്ങളിലേതുപോലെ -അത്യാധുനിക ശൗചാലയത്തോടൊപ്പം റെസ്റ്ററന്‍റ്- പദ്ധതിയായ റെസ്റ്റോ കഫേ നഗരത്തില്‍ അഞ്ചിടങ്ങളില്‍ സ്ഥാപിക്കാൻ തീരുമാനമായി. ഫോര്‍ട്ട്‌കൊച്ചി ബീച്ചിനോട് ചേര്‍ന്നും ആളുകള്‍ കൂടുതലായി വന്നുപോകുന്ന നഗരത്തിലെ മറ്റ് നാലിടങ്ങളിലുമാണ് പരീക്ഷണാടിസ്ഥാനത്തില്‍ പദ്ധതി നടപ്പാക്കുക. പദ്ധതിയുടെ നടത്തിപ്പുകാരായ അര്‍ബന്‍ സൊല്യൂഷന്‍സ് കമ്പനി ഇതിനായി 30ഓളം സ്ഥലങ്ങള്‍ കണ്ടെത്തിയിട്ടുണ്ട്. ഇതില്‍ നിന്ന് അഞ്ച് സ്ഥലങ്ങള്‍ കോര്‍പറേഷന്‍ നിശ്ചയിക്കും. പദ്ധതി വിജയിച്ചാല്‍ കൂടുതല്‍ സ്ഥലങ്ങളില്‍ റസ്റ്റോ കഫേകള്‍ സ്ഥാപിക്കാനാണ് ധാരണ. റെസ്റ്ററന്‍റും ഫുഡ്‌കോര്‍ട്ടും ഉള്‍പ്പടെയുള്ള 25 ആധുനിക ശൗചാലയങ്ങള്‍ ബിഒടി മാതൃകയില്‍ നിര്‍മിക്കുന്ന പദ്ധതിയാണ് അര്‍ബന്‍ സൊല്യൂഷന്‍സ് എന്ന സ്ഥാപനം കൗണ്‍സിലില്‍ അവതരിപ്പിച്ചത്. ഇതിനായി നഗരത്തിന്‍റെ കണ്ണായ സ്ഥലത്തുള്ള 75 സെന്‍റ് ഭൂമി സൗജന്യമായി സ്ഥാപനത്തിന് കൈമാറണം. ഇവിടെ സ്ഥാപനം റെസ്‌റ്റോ കഫേ ആശയത്തില്‍ ടോയ്‌ലറ്റ് സമുച്ചയം നിര്‍മിക്കും. താഴത്തെ നിലയിലാകും ശൗചാലയം. ഭിന്നശേഷി സൗഹൃദമായിരിക്കും. മുകളിലെ നിലയില്‍ ശീതീകരിച്ച റസ്റ്ററന്‍റും ആളുകള്‍ക്ക് ഇരിക്കാനുള്ള ഓപ്പണ്‍ സ്‌പേസും ഉണ്ടാകും. മൂന്ന് കാറ്റഗറിയില്‍ നിര്‍മിക്കുന്ന റെസ്റ്റോ കഫേയുടെ പ്രീമിയം വിഭാഗത്തിലുള്ള സമുച്ചയത്തില്‍ ശീതീകരിച്ച ശൗചാലത്തിന് പുറമേ മുകളിലെ നിലയില്‍ എസി റെസ്റ്ററന്‍റ്, ഓപ്പണ്‍ എയര്‍ സ്‌പേസ്, താഴത്തെ നിലയില്‍ ഫുഡ് കിയോസ്‌ക് എന്നിവയുണ്ടാകും. ബി കാറ്റഗറിയില്‍ എസി റെസ്റ്ററന്‍റിന് വലുപ്പം കുറവായിരിക്കും. സി കാറ്റഗറിയില്‍ ഒറ്റ നില മാത്രമേ ഉണ്ടാകുകയുള്ളു. റെസ്റ്ററന്‍റും ഓപ്പണ്‍ സ്‌പേസും ഇല്ല. 20 കോടിയാണ് എസ്റ്റിമേറ്റ്. ശൗചാലയം ഉപയോഗിക്കാന്‍ നഗരസഭ നിശ്ചയിച്ചിട്ടുള്ള നിരക്ക് ഈടാക്കും. 20 വര്‍ഷത്തിന് ശേഷം നഗരസഭയ്ക്ക് കൈമാറും വിധമാണ് കരാര്‍. നഗരസഭാ സെക്രട്ടറിയുടെ മേല്‍നോട്ടത്തിലാണ് പദ്ധതിയുടെ ഇപ്പോഴുള്ള പ്രവര്‍ത്തനങ്ങള്‍ മുന്നോട്ട് പോകുന്നത്.

ഡാര്‍ക്ക് നെറ്റ് കേസ്: പ്രതികളെ വീണ്ടും കസ്റ്റഡിയില്‍ വാങ്ങാന്‍ എന്‍സിബി

കൊച്ചി: മൂവാറ്റുപുഴ സ്വദേശി എഡിസണ്‍ മുഖ്യപ്രതിയായ ഡാര്‍ക്ക് നെറ്റ് ലഹരി ഇടപാട് കേസില്‍ പ്രതികളെ നര്‍ക്കോട്ടിക് കണ്‍ട്രോള്‍ ബ്യൂറോ (എന്‍സിബി) വീണ്ടും ചോദ്യം ചെയ്യും. ഇതിനായി ഇന്ന് വീണ്ടും കസ്റ്റഡി അപേക്ഷ നല്‍കിയേക്കും. രണ്ടു ദിവസത്തേക്കാകും കസ്റ്റഡി ആവശ്യപ്പെടുക. നിലവിലെ കസ്റ്റഡി കാലാവധി വെള്ളിയാഴ്ച അവസാനിച്ചിരുന്നു. കഴിഞ്ഞ ദിവസം നടന്ന ചോദ്യം ചെയ്യലില്‍ എന്‍സിബിക്ക് കാര്യമായ വിവരങ്ങള്‍ എഡിസണില്‍ നിന്ന് ലഭിച്ചില്ലെന്നാണ് വിവരം. എഡിസന്‍റെ സുഹൃത്ത് അരുണ്‍ തോമസ്, മറ്റൊരു കേസില്‍ അറസ്റ്റിലായ ഡിയോള്‍ എന്നിവരെയാണ് ചോദ്യം ചെയ്തത്. ഡിയോളിനൊപ്പം അറസ്റ്റിലായ ഇയാളുടെ ഭാര്യ അഞ്ജുവിനെ വനിതാ ഉദ്യോഗസ്ഥരുടെ കുറവിനെ തുടർന്ന് എന്‍സിബിക്ക് ചോദ്യം ചെയ്യാനായില്ല.

പോക്സോ കേസ്: കോതമംഗലത്ത് സിപിഎം കൗൺസിലർ രാജിവച്ചു

കോതമംഗലം: പോക്സോ കേസിൽ അറസ്റ്റിലായ സിപിഎം അംഗവും മുനിസിപ്പൽ കൗൺസിലറുമായ കെ.വി. തോമസിനെ പാർട്ടിയുടെ പ്രാഥമിക അംഗത്വത്തിൽനിന്ന് പുറത്താക്കിയതിനുപിന്നാലെ കൗൺസിലർ സ്ഥാനവും രാജിവയ്പ്പിച്ചു. പാർട്ടി നിർദേശം മാനിച്ച് കെ.വി. തോമസ് കൗൺസിലർ സ്ഥാനം രാജിവച്ചതായി സിപിഎം കോതമംഗലം ഏരിയ സെക്രട്ടറി കെ.എ. ജോയി അറിയിച്ചു.

കേന്ദ്ര സര്‍ക്കാരിന്‍റെ ശുചിമുറി പദ്ധതി

കൊച്ചി: ഏഴേമുക്കാല്‍ കോടി ചിലവില്‍ നഗരത്തില്‍ കേന്ദ്ര സര്‍ക്കാരിന്‍റെ ശൗചാലയ പദ്ധതി വരുന്നു. 'സ്വച്ഛ് ഭാരത് മിഷ'ന്‍റെ ഭാഗമായി നഗരത്തിലെമ്പാടും 200 ടോയ്ലറ്റുകള്‍ സ്ഥാപിക്കുന്നതാണ് പദ്ധതി. അഞ്ച് കോടി കേന്ദ്ര സര്‍ക്കാരിന്‍റെ സ്വച്ഛ് ഭാരത് മിഷന്‍ (എസ്ബിഎം) ഫണ്ടില്‍ നിന്നു ലഭിക്കും. ബാക്കിയുള്ള തുക കോര്‍പറേഷന്‍ കണ്ടെത്തണം. ഇതില്‍ 1.65 കോടി രൂപ എസ്ബിഎം സഹായമായി ലഭിക്കും. കമ്യൂണിറ്റി ടോയ്‌ലറ്റ് വിഭാഗത്തില്‍പ്പെടുത്തി ചേരി പ്രദേശങ്ങള്‍ ഉള്‍പ്പെടെയുള്ള ഭാഗങ്ങളില്‍ 40 ടോയ്ലറ്റുകളും സ്മാര്‍ട് ടോയ്‌ലറ്റ് വിഭാഗത്തില്‍ നഗരത്തില്‍ 64 ടോയ്‌ലറ്റുകളുമാണ് നിര്‍മിക്കുക. മൂത്രപ്പുരകളില്‍ 148 യൂറിനലുകള്‍ നിര്‍മിക്കാനായി 47 ലക്ഷം രൂപ ലഭിക്കും. അതോടൊപ്പം പിഎംഎവൈ പദ്ധതിയില്‍ വീടുകള്‍ നിര്‍മിക്കുന്നവര്‍ക്കു ശുചിമുറി നിര്‍മാണത്തിനുള്ള വ്യക്തിഗത ഗാര്‍ഹിക ശുചിമുറി (ഐഎച്ച്എച്ച്എല്‍) പദ്ധതി പ്രകാരം രണ്ട് കോടിയുമാണ് പദ്ധതിയിലുപ്പെടുത്തിയിട്ടുള്ളത്.

പണം അടിച്ചു പോകാതിരിക്കാന്‍ ജാഗ്രത കുറച്ചൊന്നും പോരാ...

കൊച്ചി: ജില്ലയില്‍ ഓണ്‍ലൈന്‍ സാമ്പത്തിക തട്ടിപ്പ് കേസുകള്‍ വര്‍ധിക്കുന്നു. വാട്‌സ്ആപ് മുഖേന ഗായികയ്ക്ക് കഴിഞ്ഞ മാസം 45,000 രൂപ നഷ്ടമായതിന് പിന്നാലെയാണ് ജില്ലയില്‍ കാംകോ ജീവനക്കാരനില്‍ നിന്നും നാല് ലക്ഷത്തോളം രൂപ വെള്ളിയാഴ്ച നഷ്ടമായത്. ബാങ്കിന്‍റെ വ്യാജ ആപ് ഉപയോഗിച്ചാണ് തട്ടിപ്പ് നടത്തിയത് എന്നത് ആശങ്ക വര്‍ധിപ്പിക്കുന്നു. കാഴ്ചയിലും സൗകര്യങ്ങളിലും ബാങ്കിന്‍റെ ആപ് എന്ന് തോന്നിക്കുന്ന വ്യാജനും പണം തട്ടാന്‍ രംഗത്തിറങ്ങിയതോടെ ഓണ്‍ലൈന്‍ പണമിടപാടുകളില്‍ പൊതുജനം കൂടുതല്‍ ജാഗ്രത പുലര്‍ത്തണമെന്ന് സൈബര്‍ സുരക്ഷാ വിഭാഗം മുന്നറിയിപ്പ് നല്‍കുന്നു. ഡെയ്ഞ്ചര്‍ എപികെ ബാങ്കിന്‍റെയും വിവിധ സ്ഥാപനങ്ങളുടെയും പേരില്‍ ഫോണിലേക്ക് എത്തുന്ന മെസേജുകളിലെ ലിങ്കുകളാണ് ഭൂരിഭാഗം തട്ടിപ്പുകള്‍ക്ക് പിന്നിലും. ഇതില്‍ ക്ലിക്ക് ചെയ്യുന്നതോടെ ഒരു ആൻഡ്രോയ്ഡ് പാക്കേജ് കിറ്റ് (എപികെ) തനിയെ ഫോണില്‍ ഇന്‍സ്റ്റാള്‍ ചെയ്യപ്പെടും. ഇത് യഥാർഥ ആപ്പുകളുടെ വ്യാജനായിരിക്കും. ഈ ആപ് ഓപ്പണ്‍ ചെയ്യുന്നതോടെ ഫോണിന്‍റെ സ്‌ക്രീന്‍, തട്ടിപ്പുകാര്‍ക്ക് കാണാവുന്ന രീതിയില്‍ കൈമാറും. ഇതോടെ ഫോണ്‍ അവരുടെ നിയന്ത്രണത്തിലാകും. ബാങ്ക് അക്കൗണ്ടും മറ്റ് വിവരങ്ങളും ഇതിലൂടെ അനായാസം കൈക്കലാക്കാന്‍ തട്ടിപ്പുകാര്‍ക്ക് സാധിക്കും. ഒടിപി സന്ദേശങ്ങളും മറ്റും ഡിലീറ്റ് ചെയ്യുന്നതിനാല്‍ പണം നഷ്ടപ്പെട്ടുവെന്ന് ഉടന്‍ തിരിച്ചറിയാന്‍ സാധിക്കില്ല. തട്ടിപ്പുകള്‍ പലവിധം ബാങ്കുകള്‍ രണ്ട് വര്‍ഷം കൂടുമ്പോള്‍ ഉപഭോക്താക്കളോട് കെവൈസി വിവരങ്ങള്‍ അപ്‌ഡേറ്റ് ചെയ്യാന്‍ ആവശ്യപ്പെടാറുണ്ട്. ഇതിന്‍റെ മറവില്‍ പലപ്പോഴും വ്യാജ ലിങ്കുകള്‍ അയച്ച് പണം തട്ടുന്നത് തട്ടിപ്പ് സംഘങ്ങളാണ്. കെവൈസി അപ്‌ഡേറ്റ് ചെയ്യാന്‍ ബാങ്കുകളില്‍ നേരിട്ടു പോകാം. അല്ലെങ്കില്‍ ഔദ്യോഗിക വെബ്‌സൈറ്റോ ആപ്പോ മാത്രം ഉപയോഗിക്കുക. കറന്‍റ് ബില്ല്, ഗതാഗത നിയമലംഘനത്തിന് പിഴ, തുടങ്ങിയവ ഒടുക്കുന്നതിന് ലിങ്കില്‍ ക്ലിക്ക് ചെയ്യൂ എന്ന സന്ദേശവും തട്ടിപ്പാണ്. അധികമായി സാമ്പത്തിക ഇടപാട് നടത്തുന്ന (ആദായനികുതി അടയ്ക്കുന്ന) ആളുകളെ ലക്ഷ്യമിട്ട് ഐടി റീഫണ്ട് ചെയ്യാന്‍ സഹായിക്കാമെന്ന തരത്തിലെത്തുന്ന ഭൂരിഭാഗം സന്ദേശങ്ങളും വ്യാജമാണ്. ഇത്തരം സന്ദേശങ്ങള്‍ അവഗണിക്കുകയും എന്തെങ്കിലും സംശയങ്ങളുണ്ടെങ്കില്‍ ബന്ധപ്പെട്ട ബാങ്കുകളുമായി നേരിട്ട് ബന്ധപ്പെടുകയും ചെയ്യുക. മറ്റൊന്ന് ബാങ്കിന്‍റെ ബംപര്‍ സമ്മാനം നിങ്ങള്‍ക്ക് ലഭിച്ചിട്ടുണ്ട്. തുക ലഭിക്കുന്നതിന് ലിങ്ക് ഉപയോഗിക്കൂ എന്ന് പറഞ്ഞെത്തുന്ന സന്ദേശമാണ്. ഒരു ബാങ്കും രാജ്യത്തെ ഒരു പൗരനും സൗജന്യമായി പണം നല്‍കില്ലെന്ന് ഓര്‍ക്കുക. ബന്ധുക്കളടക്കം വാട്‌സ്ആപ്പില്‍ പണം ചോദിച്ചാലും വിളിച്ച് ഉറപ്പുവരുത്തിയശേഷം മാത്രം കൈമാറുക. അസ്വാഭാവികമായി വാട്‌സ്ആപ്പിലും ഫോണിലും മെസേജ് ആയി ലഭിക്കുന്ന ഒടിപികൾ ഷെയര്‍ ചെയ്യാതിരിക്കാനും ലിങ്കുകളില്‍ പ്രവേശിക്കാതിരിക്കാനും ശ്രദ്ധിക്കണം. അഥവാ ഇരയായാൽ ഓണ്‍ലൈന്‍ സാമ്പത്തികതട്ടിപ്പിന് ഇരയായാല്‍ '1930' എന്ന നമ്പറില്‍ വിളിച്ച് പരാതി രജിസ്റ്റര്‍ചെയ്യണം. ഒരു മണിക്കൂറിനകം പരാതി നല്‍കുന്നതാണ് ഏറ്റവും ഗുണകരമാവുക. cybercrime.gov.in എന്ന വെബ് സൈറ്റിലൂടെയും പരാതി രജിസ്റ്റര്‍ചെയ്യാം.

ഇതരസംസ്ഥാന തൊഴിലാളിയെ മൂവാറ്റുപുഴയാറിൽ കാണാതായി

മൂവാറ്റുപുഴ: കുളിക്കുന്നതിനിടെ മൂവാറ്റുപുഴയാറില്‍ ഒഴുക്കില്‍പ്പെട്ട് ഇതരസംസ്ഥാന തൊഴിലാളിയെ കാണാതായി. സൗത്ത് മാറാടി ആഷ്‌‌‌ലി ഫര്‍ണിച്ചര്‍ ഷോപ്പ് ജീവനക്കാരനായ ബംഗളൂരു സ്വദേശി ഫയാസ് ഖാനെ(45)യാണ് ഇന്നലെ വൈകുന്നേരം നാലരയോടെ കാണാതായത്. മഞ്ചേരിപ്പടി തിരുമധുര ശ്രീകൃഷ്ണസ്വാമി ക്ഷേത്രക്കടവില്‍ ബന്ധുവിനോടൊപ്പം കുളിക്കുന്നതിനിടെ ഫയാസ് ഒഴുക്കില്‍‌‌പ്പെടുകയായിരുന്നു. മൂവാറ്റുപുഴ പോലീസും അഗ്നിരക്ഷാസേനയും സ്ഥലത്തെത്തി തെരച്ചില്‍ ആരംഭിച്ചെങ്കിലും രാത്രി വൈകിയും കണ്ടെത്താനായില്ല.

ഇഡി ഉദ്യോഗസ്ഥന്‍ പ്രതിയായ കേസ് : നിര്‍ണായക ഡിജിറ്റല്‍ തെളിവുകള്‍ വിജിലന്‍സിന്

കേസിലെ പ്രതിയായ ചാര്‍ട്ടേഡ് അക്കൗണ്ടന്‍റ് രഞ്ജിത്ത് വാര്യരും ഇഡി ഉദ്യോഗസ്ഥനായ ശേഖര്‍കുമാറും തമ്മില്‍ സംസാരിച്ചതിന്‍റെ തെളിവുകളാണ് ലഭിച്ചിട്ടുളളത് കൊച്ചി: കേസ് ഒതുക്കാന്‍ എന്‍ഫോഴ്‌സ്‌മെന്‍റ് ഡയറക്ടറേറ്റ് ഉദ്യോഗസ്ഥന്‍ കൈക്കൂലി ആവശ്യപ്പെട്ടെന്ന കേസില്‍ നിര്‍ണായക ഡിജിറ്റല്‍ തെളിവുകള്‍ വിജിലന്‍സിന്. കേസിലെ നാലാം പ്രതിയായ ചാര്‍ട്ടേഡ് അക്കൗണ്ടന്‍റ് രഞ്ജിത്ത് വാര്യരും മുഖ്യപ്രതി ഇഡി ഉദ്യോഗസ്ഥനായ ശേഖര്‍കുമാറും തമ്മില്‍ പ്രത്യേക ആപ്പിലൂടെ സംസാരിച്ചതിന്‍റെ തെളിവുകളാണ് അന്വേഷണ സംഘത്തിന് ലഭിച്ചിട്ടുളളത്. ശാസ്ത്രീയ പരിശോധനയ്ക്ക് വിധേയമാക്കിയ പ്രതികളുടെ ഫോണില്‍ നിന്നാണ് വിജിലന്‍സിന് ഈ രേഖകള്‍ കിട്ടിയിട്ടുള്ളത്. ശേഖര്‍ കുമാറിനെതിരായ തെളിവുകളുടെ പശ്ചാത്തലത്തില്‍ ഇഡി വൈകാതെ ഇയാളെ ചോദ്യം ചെയ്‌തേക്കും. കേസില്‍ ശേഖര്‍ കുമാറിന് ഹൈക്കോടതി സിംഗിള്‍ ബെഞ്ച് കഴിഞ്ഞദിവസം മുന്‍കൂര്‍ ജാമ്യം അനുവദിച്ചിരുന്നു. രണ്ടാഴ്ചയ്ക്കകം ഹര്‍ജിക്കാരന്‍ അന്വേഷണ ഉദ്യോഗസ്ഥൻ മുമ്പാകെ ഹാജരാകണം. ചോദ്യംചെയ്യലിനെത്തുടര്‍ന്ന് അറസ്റ്റുചെയ്താല്‍ അന്നുതന്നെ കോടതിയില്‍ ഹാജരാക്കണം. ചോദ്യംചെയ്യലുമായി ഹര്‍ജിക്കാരന്‍ സഹകരിക്കണമെന്നും കോടതി നിര്‍ദേശിച്ചിരുന്നു. രണ്ടാഴ്ചയ്ക്കകം ഹാജരായില്ലെങ്കില്‍ ജാമ്യം റദ്ദാക്കണമെന്നു കാട്ടി കോടതിയെ സമീപിക്കാനാണ് വിജിലന്‍സ് തീരുമാനം. കശുവണ്ടി വ്യവസായിയായ അനീഷിന്‍റെ പേരിലുളള കേസ് ഒഴിവാക്കാന്‍ രണ്ടു കോടി രൂപ കൈക്കൂലി ആവശ്യപ്പെട്ടു എന്നാണ് കേസ്. തമ്മനം സ്വദേശി വില്‍സണ്‍ വര്‍ഗീസ്, രാജസ്ഥാന്‍ സ്വദേശി മുകേഷ് എന്നിവരാണ് കേസിലെ മറ്റു പ്രതികള്‍.

ക്ഷേത്രക്കുളത്തിൽ മുങ്ങിമരിച്ചനിലയിൽ

തൃപ്പൂണിത്തുറ: ക്ഷേത്രക്കുളത്തിൽ മുങ്ങിമരിച്ച നിലയിൽ കണ്ടെത്തി. മരട് ഇന്ദിരാജി റോഡ് ചക്കാലക്കൽ ഷിജു വർഗീസിനെ (ഇഞ്ചപ്പൻ 48) ആണ് തൃപ്പൂണിത്തുറ കണ്ണൻകുളങ്ങര ക്ഷേത്രക്കുളത്തിൽ മുങ്ങി മരിച്ച നിലയിൽ കണ്ടെത്തിയത്. കുറച്ചു നാളായി തൃപ്പൂണിത്തുറയിലെ സ്വകാര്യ ലോഡ്ജിലായിരുന്നു താമസം. ഇന്നലെ രാവിലെ കുളിക്കാനെത്തിയവരുടെ സംശയത്തെ തുടർന്ന് തൃപ്പൂണിത്തുറ അഗ്നിരക്ഷാസേന അസി.സ്റ്റേഷൻ ഓഫിസർ കെ.കെ.കൃഷ്ണകുമാറിന്‍റെ നേതൃത്വത്തിൽ സേനാംഗങ്ങൾ നടത്തിയ തെരച്ചിലിലാണ് മൃതദേഹം കണ്ടെത്തിയത്. മൃതദേഹം താലൂക്കാശുപത്രി മോർച്ചറിയിലേയ്ക്ക് മാറ്റി. സംസ്കാരം ഇന്ന് മൂന്നിന് തൈക്കൂടം സെന്‍റ് റാഫേൽസ് പള്ളിയിൽ. ഭാര്യ: ടിന്‍റു മരിയ. മകൾ: അന്ന.

എലിപ്പനി ബാധിച്ച് മരിച്ചു

മരട്: എലിപ്പനി ബാധിച്ച് ചികിത്സയിലിരുന്ന വീട്ടമ്മ മരിച്ചു. നെട്ടൂർ കൈതവനക്കര മൂത്തേടത്ത് കോളനി പി.കെ.ദാസന്‍റെ ഭാര്യ രമ (55) ആണ് മരിച്ചത്. എറണാകുളം ജനറൽ ആശുപത്രിയിൽ ചികിത്സയിലിരിക്കെ ശനിയാഴ്ച രാത്രിയാണ് മരിച്ചത്. സംസ്കാരം നടത്തി. മക്കൾ: അഖിൽ ദാസ്, അക്ഷയ് ദാസ്, അമൽദാസ്, അഞ്ജന, അജയ്. മരുമകൾ: അക്ഷയ.

കെഎസ്ആർടിസി ബസ് സ്റ്റേഷൻ: നിർമാണ പ്രവർത്തനങ്ങൾ ആരംഭിച്ചു

മൂവാറ്റുപുഴ: കെഎസ്ആർടിസി ബസ് സ്റ്റാൻഡ് നവീകരണത്തിന്‍റെയും പുതിയ കെട്ടിട സമുച്ചയത്തിന്‍റെയും നിർമാണോദ്ഘാടനം മാത്യു കുഴൽനാടൻ എംഎൽഎ നിർവഹിച്ചു. നഗരസഭാധ്യക്ഷൻ പി.പി. എൽദോസ് അധ്യക്ഷത വഹിച്ചു. ഒരു പതിറ്റാണ്ടായി നിർമാണ പ്രവർത്തനങ്ങൾ മുടങ്ങി പ്രാഥമിക സൗകര്യങ്ങൾ പോലുമില്ലാതെ ശോചനീയാവസ്ഥയിലായിരുന്നു. എംഎൽഎയുടെ ആസ്തി വികസന ഫണ്ടിൽനിന്നു 4.25 കോടി അനുവദിച്ചാണ് നിർമാണം നടത്തുന്നത്. ബസ് സ്റ്റാൻഡിന്‍റെ നിർമാണ പ്രവർത്തികൾക്കായി 2.75 കോടി കെഎസ്ആർടിസി വകുപ്പിൽനിന്നു നേരത്തെ അനുവദിച്ചിരുന്നു. എന്നാൽ വർക്ക് ടെൻഡർ നടപടികളിലേക്ക് കടന്നപ്പോൾ ആരും എടുക്കാൻ തയാറാകാതെ വന്ന സാഹചര്യത്തിൽ പല കരാറുകാരുമായി എംഎൽഎ നേരിട്ട് ബന്ധപ്പെട്ടു. കെഎസ്ആർടിസി വകുപ്പ് വകയിരുത്തിയിരിക്കുന്ന ഫണ്ടിൽ നിന്നുള്ള വർക്കുകൾ എടുക്കാൻ ആരും തയാറാവാതെ വന്ന സാഹചര്യത്തിലാണ് മൂവാറ്റുപുഴയിലെ കെഎസ്ആർടിസി നവീകരണം സാധ്യമാക്കുന്നതിനായി 2023-24 വർഷത്തെ എംഎൽഎ ഫണ്ടിന്‍റെ 90 ശതമാനവും ഇതിനായി വകയിരുത്തിയതെന്ന് മാത്യു കുഴൽനാടൻ എംഎൽഎ പറഞ്ഞു. ഒന്പതര വർഷങ്ങൾക്ക് ശേഷം മൂവാറ്റുപുഴയിലെ കെഎസ്ആർടിസി ബസ് സ്റ്റാന്‍ഡിന് ഒരു മുഖം കൈവരിക്കാൻ കഴിയുന്നതിൽ അഭിമാനകരമായ സന്തോഷമുണ്ടെന്ന് മുൻ എംഎൽഎ ജോസഫ് വാഴയ്ക്കൻ പറഞ്ഞു. വർഷങ്ങളുടെ കാത്തിരിപ്പിന് ശേഷമാണ് മൂവാറ്റുപുഴ കെഎസ്ആർടിസി ബസ് സ്റ്റേഷന്‍റെ നിർമാണം പൂർത്തീകരണത്തിന്‍റെ പാതയിലെത്തുന്നത്. മാത്യു കുഴൽനാടൻ എംഎൽഎ, മുൻ എംഎൽഎമാരായ ജോസഫ് വാഴയ്ക്കൻ, ജോണി നെല്ലൂർ, നഗരസഭ വൈസ് ചെയർപേഴ്സണ്‍ സിനി ബിജു, ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ, ജില്ല പഞ്ചായത്തംഗം ഉല്ലാസ് തോമസ്, പഞ്ചായത്ത് പ്രസിഡന്‍റുമാരായ എം.എസ്. അലിയാർ, കെ.പി. അബ്രഹാം, ഷെൽമി ജോണ്‍സ്, ഒ.പി. ബേബി, നഗരസഭാംഗം ജോസ് കുര്യാക്കോസ്, എ. മുഹമ്മദ് ബഷീർ, കെ.എം. പരീത്, കെ.എം. സലിം, വർഗീസ് മാത്യു, പി.എ. ബഷീർ, മുഹമ്മദ് പനയ്‌ക്കൻ, സാബു ജോണ്‍, സുഭാഷ് കടയ്ക്കോട്, ജോസ് പെരുന്പിള്ളിക്കുന്നേൽ, ഷൈസണ്‍ പി. മാങ്ങഴ, തോംസണ്‍ പീച്ചപ്പിള്ളി, സുരേന്ദ്രൻ, അനിൽ വാളകം, ജിനു ആന്‍റണി മടേയ്ക്കൽ, ജോയ്സ് മേരി ആന്‍റണി, അമൽ ബാബു, അസം ബീഗം, മേരിക്കുട്ടി ചാക്കോ, ഷാജു കുര്യാക്കോസ്, എ. അസീം എന്നിവർ പ്രസംഗിച്ചു.

മെറിറ്റ് അവാർഡ് വിതരണം

മൂവാറ്റുപുഴ: ആവോലി പഞ്ചായത്തിൽ വിവിധ പരീക്ഷകളിൽ മികച്ച വിജയം കരസ്ഥമാക്കിയ വിദ്യാർഥികൾക്കുള്ള മെറിറ്റ് അവാർഡ് വിതരണം സംഘടിപ്പിച്ചു. പഞ്ചായത്ത് ഹാളിൽ സംഘടിപ്പിച്ച ചടങ്ങിൽ പ്രസിഡന്‍റ് ഷെൽമി ജോണ്‍സ് ഉദ്ഘാടനം നിർവഹിച്ചു. റാങ്ക് ജേതാക്കളും എസ്എസ്എൽസി, പ്ലസ് ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയ കുട്ടികളെയുമാണ് ചടങ്ങിൽ ആദരിച്ചത്. 90 കുട്ടികളെ ചടങ്ങിൽ മെമന്‍റോ നൽകി ആദരിച്ചു. പഞ്ചായത്ത് വൈസ് പ്രസിഡന്‍റ് ബിജു ജോസ് മുള്ളൻകുഴി അധ്യക്ഷത വഹിച്ചു.

കോട്ടപ്പടിയിൽ കാട്ടാന കുടില്‍ തകര്‍ത്തു

കോതമംഗലം: കോട്ടപ്പടി വടക്കുംഭാഗത്ത് ആന കുടില്‍ തകര്‍ത്തു. വടക്കുംഭാഗത്ത് മണ്ണോര്‍ക്കോട്ട് പുത്തന്‍പുരക്കല്‍ മോഹനന്‍റെ കൂടിലാണ് ആന തകര്‍ത്തത്. ജനവാസ മേഖലയില്‍ കടന്നുകയറിയ ആനക്കൂട്ടത്തിലൊന്നാണ് കുടില്‍ തകര്‍ത്തത്. പ്ലാസ്റ്റിക് ഷീറ്റുകള്‍കൊണ്ടുണ്ടാക്കിയ കുടിലാണിത്. കുടിലിന്‍റെ തൂണുകള്‍ ഒടിഞ്ഞിട്ടുണ്ട്. തുണികള്‍ സൂക്ഷിച്ചിരുന്ന സ്റ്റീല്‍ അലമാര മറിഞ്ഞുവീണു. മോഹനന്‍റെയും സഹോദരന്‍റെയും കുടിലുകള്‍ ചേര്‍ന്നുതന്നെയാണ്. ഇതിനിടയിലൂടെ ആന കടന്നുപോയപ്പോഴാണ് കുടില്‍ തകര്‍ന്നത്. വളര്‍ത്തുനായയുടെ കുര കേട്ടാണ് ആന വരുന്ന വിവരം വീട്ടുകാര്‍ അറിഞ്ഞത്. ഉടന്‍ അവര്‍ പുറത്തേക്ക് മാറിയതിനാലാണ് ആളപായം ഒഴിവായത്. മറ്റൊരു ഭാഗത്തുനിന്നു വനപാലകര്‍ ഓടിച്ച ആനകളിലൊന്നാണ് കൂട്ടംവിട്ട് ഇവരുടെ കുടിലിന്‍റെ ഭാഗത്തേക്ക് ഓടിയത്. മുട്ടത്തുപാറയില്‍ ഞാറ്റുംകാലായില്‍ ജോര്‍ജിന്‍റെ വീടിന്‍റെ മതിലും ഗേറ്റും ആന തകര്‍ത്തു. വീടിനോട് ചേർന്നുള്ള കൃഷിയും നശിപ്പിച്ചിട്ടുണ്ട്. മറ്റ് ഭാഗങ്ങളിലും ആന വ്യാപകമായി നാശം വിതച്ചിട്ടുണ്ട്. കോട്ടപ്പടി പഞ്ചായത്തില്‍ ഭീതിവിതച്ചുകൊണ്ടിരിക്കുന്ന ആറംഗ കാട്ടാനക്കൂട്ടമാണ് വെള്ളിയാഴ്ച രാത്രിയിലും വിവിധ പ്രദേശങ്ങളില്‍ നാശനഷ്ടമുണ്ടാക്കിയത്. കഴിഞ്ഞ കുറേ ദിവസങ്ങളായി പഞ്ചായത്തിലെ വിവിധ ജനവാസ മേഖലകളില്‍ ആനകള്‍ വലിയ ഭീഷണിയായി മാറിയിട്ടുണ്ട്.

എൻഎസ്എസ് ദ്വിദിന പരിശീലനം

മൂവാറ്റുപുഴ: കേരള സാങ്കേതിക ശാസ്ത്ര സർവകലാശാല എൻഎസ്എസ് സെല്ലിന്‍റെ എൻഎസ്എസ് വോളന്‍റിയർ സെക്രട്ടറിമാർക്കുള്ള ദ്വിദിന മേഖലതല പരിശീലനം ‘ജ്വാല-25’ന് ഇലാഹിയ എൻജിനീയറിംഗ് കോളജിൽ തുടക്കമായി. ആന്‍റണി ജോണ്‍ എംഎൽഎ പരിശീലന പരിപാടി ഉദ്ഘാടനം ചെയ്തു. യുവതലമുറ ലഹരി വസ്തുക്കളുടെ പുറകെ പോകുന്പോൾ എൻഎസ്എസ് പോലുള്ള സന്നദ്ധ സംഘടനകൾ സമൂഹത്തിൽ വഹിക്കുന്ന പ്രവർത്തനങ്ങൾ മാതൃകാപരമാണെന്ന് എംഎൽഎ പറഞ്ഞു. സാങ്കേതിക സർവകലാശാല എൻഎസ്എസ് സെൽ പ്രോഗ്രാം കോ-ഓർഡിനേറ്റർ അരുണ്‍ അധ്യക്ഷത വഹിച്ചു. ആലപ്പുഴ, ഇടുക്കി, കോട്ടയം, എറണാകുളം ജില്ലകളിലെ എൻജിനീയറിംഗ് കോളജുകളിൽ നിന്നുമായി നൂറിലധികം വോളന്‍റിയർ സെക്രട്ടറിമാരാണ് പങ്കെടുക്കുന്നത്. രണ്ട് ദിവസത്തെ ക്യാന്പിൽ ബ്രഹ്മനായകം മഹാദേവൻ നയിക്കുന്ന വ്യക്തിത്വ വികസന ക്ലാസുകൾ, എൻഎസ്എസിന്‍റെ ചരിത്രവും ദർശനവും എന്ന വിഷയത്തിൽ പ്രഫ. സിജോ ജോർജ്, എൻഎസ്എസ് യൂണിറ്റ് ലെവൽ മാനേജ്മെന്‍റ് എന്ന വിഷയത്തിൽ എം. അരുണ്‍, ഡോക്യൂമെന്‍റഷൻ, മൈ ഭാരത് പോർട്ടൽ എന്ന വിഷയത്തിൽ പ്രഫ. റെജുമോൻ, യൂണിവേഴ്സിറ്റി എൻഎസ്എസ് പോർട്ടൽ പ്രഫ. റീന ഏബ്രഹാം, പോസിറ്റീവ് തിങ്കിംഗ് എന്ന വിഷയത്തിൽ ജി. അഞ്ജന (സംസ്ഥാന എയ്ഡ്സ് കൺട്രോൾ സൊസൈറ്റി), എൻഎസ്എസ് ഫ്ളാഗ്ഷിപ് പ്രോഗ്രാമുകളെ പരിചയപ്പെടുത്തുന്ന ക്ലാസ് പ്രഫ. ഷിജു രാമചന്ദ്രൻ എന്നിവർ ക്ലാസുകൾ നയിക്കും.

നാലമ്പല തീര്‍ഥയാത്ര ഉദ്ഘാടനം 16ന്

കൊച്ചി: ജില്ലയിലെ നാലമ്പല തീര്‍ഥയാത്രയുടെ ഉദ്ഘാടനം 16ന് നടക്കുമെന്ന് നാലമ്പലസമിതി ഭാരവാഹികള്‍ പത്രസമ്മേളനത്തില്‍ പറഞ്ഞു. മാമലശേരി ശ്രീരാമ സ്വാമി ക്ഷേത്രാങ്കണത്തില്‍ വൈകുന്നേരം ആറിന് പുണര്‍തം തിരുനാള്‍ നാരായണ വര്‍മ ഉദ്ഘാടനം ചെയ്യും. മുന്‍ ഡിജിപി ഡോ. അലക്‌സാണ്ടര്‍ ജേക്കബ് മുഖ്യപ്രഭാഷണം നടത്തും. പിറവം മുനിസിപ്പല്‍ ചെര്‍പേഴ്‌സണ്‍ അഡ്വ. ജൂലി സാബു, രാമമംഗലം പഞ്ചായത്ത് പ്രസിഡന്‍റ് പി.വി. സ്റ്റീഫന്‍, പാമ്പാക്കുട പഞ്ചായത്ത് പ്രസിഡന്‍റ് ശ്രീകാന്ത് നന്ദനന്‍, മുളക്കുളം പഞ്ചായത്ത് പ്രസിഡന്‍റ് വാസുദേവന്‍ നായര്‍ എന്നിവര്‍ പങ്കെടുക്കും. തീര്‍ഥാടകര്‍ക്കായി കെഎസ്ആര്‍ടിസി സര്‍വീസ് ക്രമീകരിച്ചിട്ടുണ്ടെന്നും സമിതി പ്രസിഡന്‍റ് എന്‍. രഘുനാഥ്, സെക്രട്ടറി പി.പി. സുരേഷ് കുമാര്‍, ട്രഷറര്‍ ഇ.കെ. മോഹനന്‍ എന്നിവര്‍ പത്രസമ്മേളനത്തില്‍ പറഞ്ഞു.

സ്വകാര്യ ബസും പാചകവാതക ലോറിയും കൂട്ടിയിടിച്ചു

12 പേർക്ക് പരിക്ക് പോത്താനിക്കാട്: കക്കടാശേരി-കാളിയാർ റോഡിൽ ആയങ്കര മൃഗാശുപത്രിക്കു സമീപം സ്വകാര്യ ബസും പാചകവാതക സിലിണ്ടർ കയറ്റിവന്ന ലോറിയും കൂട്ടിയിടിച്ചു. ബസ് യാത്രക്കാരായ 12 പേർക്ക് പരിക്കേറ്റു. പരിക്കേറ്റവരെ വിവിധ സ്വകാര്യ ആശുപത്രികളിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല. രാവിലെ 8.15ന് മൂവാറ്റുപുഴയിലേക്ക് പോകുകയായിരുന്ന സ്വകാര്യ ബസും എതിരെ വന്ന ലോറിയുമായി കൂട്ടിയിടിക്കുകയായിരുന്നു. ഓടിക്കൂടിയ നാട്ടുകാരും പോലീസും ചേർന്ന് പരിക്കേറ്റവരെ വിവിധ ആംബുലൻസുകളിലായി മൂവാറ്റുപുഴയിലേയും കോലഞ്ചേരിയിലേയും ആശുപത്രികളിൽ പ്രവേശിപ്പിച്ചു. ഇരുവാഹനങ്ങളിലേയും ഡ്രൈവർമാർക്ക് പരിക്കേറ്റിട്ടില്ല.

എടവനക്കാട് തൊഴിലുറപ്പ് തൊഴിലാളികളുടെ പ്രതിഷേധം

വൈപ്പിൻ: തൊഴിൽ ഉറപ്പ് ഫണ്ട് വെട്ടിക്കുറച്ച കേന്ദ്ര സർക്കാർ നടപടി പിൻവലിക്കണമെന്നാവശ്യപ്പെട്ട് തൊഴിലുറപ്പ് തൊഴിലാളികൾ എടവനക്കാട് കഞ്ഞിക്കലം കമഴ്ത്തി പ്രതിഷേധിച്ചു. എൻഎംഎം ജിയോ ടാഗിംഗ് സംവിധാനം പിൻവലിക്കുക, തൊഴിൽ സമയം ഒമ്പതുമുതൽ നാലു വരെ ആക്കുക, കൂലി 600 രൂപയായി വർധിപ്പിക്കുക, തൊഴിൽ ദിനങ്ങൾ 200 ആക്കി വർധിപ്പിക്കുക തുടങ്ങിയ ആവശ്യങ്ങളും സമരക്കാർ ഉന്നയിച്ചു. കെ.എൻ. ഉണ്ണിക്കൃഷ്ണൻ എംഎൽഎ ഉദ്ഘാടനം ചെയ്തു. കെ.ജെ. ആൽബി അധ്യക്ഷനായി. കെ.എ. സാജിത്ത്, കെ.യു. ജീവൻമിത്ര, വത്സല സത്യൻ, സിബി അശ്വരാജ് എന്നിവർ സംസാരിച്ചു.

ആസ്റ്റർ ക്രിട്ടിക്കോൺ-2025 ന‌ടത്തി

കൊച്ചി: ആസ്റ്റർ മെഡ്‌സിറ്റി സംസ്ഥാനതല ക്രിട്ടിക്കൽ കെയർ നഴ്‌സിംഗ് ശില്പശാല (ആസ്റ്റർ ക്രിട്ടിക്കോൺ 2025) സംഘടിപ്പിച്ചു. ഹൈബി ഈഡൻ എംപി ഉദ്ഘാടനം ചെയ്തു. നഴ്‌സുമാർക്കിടയിൽ ക്രിട്ടിക്കൽ കെയർ വൈദഗ്ധ്യം ഉണ്ടാകേണ്ടത് ആരോഗ്യമേഖലയുടെ വളർച്ചയ്ക്കും മികവിനും അത്യന്താപേക്ഷിതമാണെന്ന് അദ്ദേഹം പറഞ്ഞു. ക്രിട്ടിക്കൽ കെയറിലെ നഴ്‌സുമാരുടെ ക്ലിനിക്കൽ വൈദഗ്ധ്യം വർധിപ്പിക്കുന്നതിനായി രൂപകല്പന ചെയ്‌ത പരിപാടിയിൽ വിവിധ ആശുപത്രിയിൽനിന്നുള്ള 150 ഓളം പേർ പങ്കെടുത്തു. ആസ്റ്റർ ഡിഎം ഹെൽത്ത്‌കെയറിലെ നഴ്‌സിംഗ് ചീഫ് ക്യാപ്റ്റൻ ആർ. തങ്കം, ഡോ. വിവേക് ടി. മേനാച്ചേരി, ഡോ. സുരേഷ് ജി. നായർ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]