ADVERTISEMENT

ADVERTISEMENT

ലഹരിവിരുദ്ധ ബോധവത്കരണ പരിപാടി നടത്തി

കുറ്റൂർ: ചന്ദ്ര മെമ്മോറിയൽ ഗവൺമെന്‍റ് ഹയർ സെക്കൻഡറി സ്കൂളിലെ എസ്പിസി കേഡറ്റുകൾ ഗാന്ധിജയന്തി വാരാഘോഷത്തിന്‍റെ ഭാഗമായി പൂമല പുനർജനി സന്ദർശിച്ച് ലഹരിവിരുദ്ധ ബോധവൽക്കരണ പരിപാടി നടത്തി.

സ്കൂൾ കലോത്സവത്തിന്‍റെ ഭാഗമായി ഐസ്ക്രീം വിറ്റുകിട്ടിയ തുകകൊണ്ട് പുനർജനിയിലെ അന്തേവാസികൾക്ക് കേക്ക് മുറിച്ച് മധുരവും പങ്കുവച്ചു. ‌വിദ്യാർഥികൾ ലഹരിവിമുക്ത പുനരധിവാസകേന്ദ്രം സന്ദർശിച്ചു. വിയ്യൂർ പോലീസ് സ്റ്റേഷനിലെ എസ്ഐ വിനോജ് കുമാർ, പോലീസ് ഇൻസ്ട്രക്ടർമാരായ മനേക്, രേഷ്മ, വർഗീസ്, അധ്യാപകരായ രാഖി, ലിൻസൺ എന്നിവർ നേതൃത്വം നൽകി.

ADVERTISEMENT

ദേവാലയങ്ങളില്‌ തിരുനാള്‌

കനകമല തീര്‍ഥാടകേന്ദ്രം ദുക്‌റാന തിരുനാളിന് കൊടിയേറി. കൊടകര ഫൊറോന വികാരി ഫാ. ജെയ്‌സണ്‍ കരിപ്പായി കെടിയേറ്റം നിര്‍വഹിച്ചു. തുടര്‍ന്ന് കുര്‍ബാന, ലദീഞ്ഞ്, പള്ളിചുറ്റി പ്രദക്ഷിണം എന്നിയുണ്ടായി. സഹവികാരി ഫാ. ആശീഷ് കീരഞ്ചിറ, ജനറല്‍ കണ്‍വീനര്‍ ഷോജന്‍ ഡി.വിതയത്തില്‍, കൈക്കാരന്‍മാരായ ജോസ് വെട്ടുമണിക്കല്‍, ജോസ് കറുകുറ്റിക്കാരന്‍, ജോയ് കളത്തിങ്കല്‍, ജോജു ചുള്ളി, ജോയ് കുയിലാടന്‍, ജോ. കണ്‍വീനര്‍ വര്‍ഗീസ് കളത്തിങ്കല്‍, ഷാജു വെളിയന്‍ എന്നിവര്‍ നേതൃത്വം നല്‍കി. തിരുനാള്‍ദിനമായ നാളെ രാവിലെ ഏഴിന് ആഘോഷമായ തിരുനാള്‍ പാട്ടുകുര്‍ബാന, ഊട്ടു വെഞ്ചരിപ്പ്, എട്ടിന് കുരിശുമുടിയില്‍ കുര്‍ബാന, 10ന് ആഘോഷമായ റാസകുര്‍ബാന. തുടര്‍ന്ന് പ്രദക്ഷിണം, തിരുശേഷിപ്പ് വണക്കം എന്നിവയുണ്ടാകും. ചെട്ടിക്കാട് ദേവാലയം ദുക്റാന തിരുനാൾ നാളെ. വൈകിട്ട് അഞ്ചിന് ജപമാല. 5.30ന് നടക്കുന്ന തിരുനാൾ ദിവ്യബലിക്ക് ഫാ. എബ്നേസർ ആന്‍റണി കാട്ടിപ്പറമ്പിൽ മുഖ്യകാർമികനാകും. തുടർന്ന് നേർച്ച ആശിർവാദം. തിരുനാളിനോടനുബന്ധിച്ച് മാർത്തോമാ ചർച്ച് ചരിത്രമ്യൂസിയവും വിശുദ്ധന്‍റെ കാൽപാദംപതിഞ്ഞ സ്ഥലവും 1953ൽ സ്ഥാപിച്ച സ്മാരകസ്തൂപവും സന്ദർശിക്കുന്നതിനുള്ള സൗകര്യം ഒരുക്കിയിട്ടുണ്ട്. കൂടാതെ തിരുനാൾദിനത്തിൽ മത്സ്യബന്ധന ബോട്ടുകളും വള്ളങ്ങളും വെഞ്ചരിക്കുന്നതിനുള്ള സൗകര്യവുമുണ്ട്. കോട്ടപ്പുറം മാർക്കറ്റ് കപ്പേള വിശുദ്ധ തോമസിന്‍റെ തിരുനാളിനും കോട്ടപ്പുറം രൂപതാദിനാഘോഷത്തിനും കൊടിയേറി. കോട്ടപ്പുറം രൂപത വികാരി ജനറാള്‌‌ മോൺ. റോക്കി റോബി കളത്തിൽ കൊടിയേറ്റി. തുടർന്നുനടന്ന ദിവ്യബലിക്ക് രൂപത എപ്പിസ്കോപ്പൽ വികാരി റവ.ഡോ. ഫ്രാൻസിസ്കോ പടമാടൻ മുഖ്യകാർമികനായി. തിരുനാൾ സപ്ലിമെന്‍റിന്‍റെ പ്രകാശനം ഫാ. ആൽഫിൻ ജൂഡ്സനുനല്കി റവ.ഡോ. ഫ്രാൻസിസ്കോ പടമാടൻ നിർവഹിച്ചു. ഇന്ന് വൈകീട്ട് 5.30ന് ദിവ്യബലിക്ക് ഗോതുരുത്ത് ഫൊറോന വികാരി ഫാ. ജാക്സൻ വലിയപറമ്പിൽ മുഖ്യകാർമികത്വംവഹിക്കും. ഫാ. ജോബി കാട്ടാശേരി പ്രസംഗിക്കും. നാളെ വൈകീട്ട് 4.30ന് കോട്ടപ്പുറം സെന്‍റ് മൈക്കിൾസ് എൽപി സ്കൂളിൽനിന്ന് കപ്പേളയിലേക്ക് നടക്കുന്ന പ്രവേശന പ്രദക്ഷിണത്തിൽ ബിഷപ് ഡോ. അംബ്രോസ് പുത്തൻവീട്ടിലിനൊപ്പം രൂപതയിലെ വൈദികരും അണിനിരക്കും. തുടർന്ന് ദിവ്യബലി, തുടർന്ന് ഊട്ടുനേർച്ച.

ഡോക്ടേഴ്സ് ഡേ ആചരിച്ചു

ചാലക്കുടി: ലയൺസ് ക്ലബ്‌ ഡോക്ടേഴ്സ് ഡേ ആചരിച്ചു. താലൂക്ക് ആശുപത്രിയിലെ ഡോക്ടർമാരെയും ലയൺസ് മെമ്പർമാരായ ഡോക്ടർമാരെയും ആദരിച്ചു. താലൂക്ക് ഗവ.ഹോസ്പിറ്റലിൽനടന്ന ചടങ്ങിൽ പ്രസിഡന്‍റ് ഡോ. ജോർജ്‌ കോലഞ്ചേരി അധ്യക്ഷത വഹിച്ചു. ലയൺസ് ഇന്‍റർനാഷണൽ പാസ്റ്റ് മൾട്ടിപ്പിൾ കൗൺസിലിംഗ് ചെയർമാൻ സാജു പാത്താടൻ ഉദ്ഘാടനംനിർവഹിച്ചു. താലൂക്ക് ഹോസ്പിറ്റൽ സൂപ്രണ്ട് ഡോ. മിനിമോൾ മുഖ്യതിഥിയായി. യോഗത്തിൽ ക്ലബ്‌ സെക്രട്ടറി എം.ജെ. ജോബി, ട്രഷറർ പീറ്റർ, വാർഡ് കൗൺസിലർ വി.ജെ. ജോജി എന്നിവർ പ്രസംഗിച്ചു. കുറ്റിലക്കടവ്: ഡോക്ടേഴ്സ് ഡേയോടനുബന്ധിച്ച് വിദ്യാർഥികൾ ഡോക്ടമാരെ ആദരിച്ചു. പെരിഞ്ഞനം ഗവ.യുപി സ്കൂളിലെ ഹെൽത്ത് ക്ലബിന്‍റെ നേതൃത്വത്തിലാണ് വിദ്യാർഥികൾ പെരിഞ്ഞനം കുറ്റിലക്കടവ് സാമൂഹികാരോഗ്യകേന്ദ്രത്തിലെത്തി ഡോക്ടമാരെ ആദരിച്ച് സ്നേഹസമ്മാനങ്ങൾ നൽകിയത്. പ്രധാനാധ്യാപിക കദീജാബീ, പിടിഎ പ്രസിഡന്‍റ് ഇ.ആർ. ജോഷി, എസ്എംസി ചെയർമാൻ സമീർ പാറയിൽ എന്നിവർ സന്നിഹിതരായി.

ഞാറ്റുവേലച്ചന്ത ആരംഭിച്ചു

മേലൂർ: സർവീസ് സഹകരണബാങ്കിന്‍റെ നേതൃത്വത്തിൽ ഞാറ്റുവേലച്ചന്ത ആരംഭിച്ചു. അഞ്ചുവരെയാണ് ചന്ത. ഞാറ്റുവേലച്ചന്തയുടെ ഉദ്ഘാടനം ബാങ്ക് പ്രസിഡന്‍റ് ഇ.കെ. കൃഷ്ണൻ നിർവഹിച്ചു. ഡയറക്ടർബോർഡ് അംഗം മധു തൂപ്രത്ത് അധ്യക്ഷത വഹിച്ചു. എൻ.ജി. സന്തോഷ്കുമാർ, അഡ്വ. പോൾ ചുങ്കൻ, ജോമോൻ നെറ്റിക്കാടൻ, സന്ധ്യ ബാബു, ബാങ്ക് സെക്രട്ടറി എം. സിന്ധു എന്നിവർ പ്രസംഗിച്ചു. കാടുകുറ്റി: കൃഷിഭവന്‍റെ നേതൃത്വത്തിൽ ഗ്രാമപഞ്ചായത്തിന്‍റെ സഹകരണത്തോടെ ഞാറ്റുവേലച്ചന്ത തുടങ്ങി. ഉദ്ഘാടനവും ആദ്യവില്പനയും ഗ്രാമപഞ്ചായത്ത് പ്രസിഡന്‍റ് പ്രിൻസി ഫ്രാൻസിസ് നിർവഹിച്ചു. വൈസ് പ്രസിഡന്‍റ് പി.സി. അയ്യപ്പൻ അധ്യക്ഷതവഹിച്ചു. ത്രിതല പഞ്ചായത്ത് ജനപ്രതിനിധികളായ ബീന രവീന്ദ്രൻ, രാഖി സുരേഷ്, മോഹിനി കുട്ടൻ, ലീന ഡേവീസ് എന്നിവർ പ്രസംഗിച്ചു. കൊടകര: പറപ്പൂക്കര പഞ്ചായത്ത് സോഷ്യല്‍ വെല്‍ഫയര്‍ കോ-ഓപറേറ്റീവ് സൊസൈറ്റിയുടെ ആഭിമുഖ്യത്തിലുള്ള 11-ാമത് ഞാറ്റുവേല മഹോത്സവവും ആയുര്‍വേദ മെഡിക്കല്‍ ക്യാമ്പും അഞ്ച്, ആറ് തിയതികളില്‍ നടക്കുമെന്ന് ഭാരവാഹികള്‍ അറിയിച്ചു. ശനിയാഴ്ച രാവിലെ 10.30ന് സനീഷ്കുമാര്‍ ജോസഫ് എംഎല്‍എ ഉദ്ഘാടനംചെയ്യും. എസ്എസ്എല്‍സി, പ്ലസ് ടു പരീക്ഷകളില്‍ ഉന്നതവിജയം നേടിയവരേയും വിവിധ മേഖലകളിലെ പ്രതിഭകളേയും ചടങ്ങില്‍ അനുമോദിക്കും. തുടര്‍ന്ന് മഴക്കാലരോഗങ്ങളും പ്രതിവിധികളും എന്ന വിഷയത്തില്‍ സെമിനാറുണ്ടാകും. പത്രസമ്മേളനത്തില്‍ സൊസൈറ്റി പ്രസിഡന്‍റ് ആര്‍. നാരായണന്‍കുട്ടി, ഭരണസമിതി അംഗങ്ങളായ പി.കെ. പ്രസാദ്, ചന്ദ്രന്‍ ചിറ്റിയത്ത് എന്നിവര്‍ പങ്കെടുത്തു.

വെള്ളക്കെട്ട്: ചെളിവെള്ളത്തിലിറങ്ങി പ്രതിഷേധം

കോടാലി: മറ്റത്തൂര്‍ പഞ്ചായത്തിലെ കോടാലിയില്‍ പഞ്ചായത്ത് ഏറ്റെടുത്ത സ്ഥലത്ത് വെള്ളംകെട്ടിക്കിടന്ന് രോഗഭീതിപരത്തുന്നതായി പരാതി. ടാക്‌സി സ്റ്റാന്‍ഡ്, ബസ് കാത്തിരിപ്പുകേന്ദ്രം, വനിത ജിംനേഷ്യം, പൊതുടോയ്‌ലറ്റ്, മത്സ്യ- മാംസ വിപണന കേന്ദ്രങ്ങള്‍ എന്നിവ സ്ഥിതിചെയ്യുന്നതിന് സമീപത്താണ് വെള്ളംകെട്ടിക്കിടക്കുന്നത്. വെള്ളക്കെട്ട് പരിഹരിച്ച് രോഗംപടരുന്ന സാഹചര്യം ഒഴിവാക്കാന്‍ നടപടി ഉണ്ടാകാത്തതില്‍ യൂത്ത് കോണ്‍ഗ്രസ് മറ്റത്തൂര്‍ മണ്ഡലം കമ്മിറ്റിയുടെ നേതൃത്വത്തില്‍ പ്രവര്‍ത്തകര്‍ ചെളിവെള്ളത്തിലിറങ്ങിനിന്ന് പ്രതിഷേധിച്ചു. യൂത്ത് കോണ്‍ഗ്രസ് നിയോജകമണ്ഡലം ജനറല്‍സെക്രട്ടറി നൈജോ ആന്‍റോ പ്രതിഷേധസമരം ഉദ്ഘാടനം ചെയ്തു. മണ്ഡലം പ്രസിഡന്‍റ് പ്രതീഷ് പണ്ടാരത്തില്‍ അധ്യക്ഷതവഹിച്ചു. കോണ്‍ഗ്രസ് ബ്ലോക്ക് കമ്മിറ്റി വൈസ് പ്രസിഡന്‍റ് ലിന്‍റോ പള്ളിപറമ്പന്‍, സിജില്‍ ചന്ദ്രന്‍, ബ്ലോക്ക് സെക്രട്ടറി കെ.എ. ഹനീഫ, ബൂത്ത് പ്രസിഡന്‍റ് സിബി വാസുപുരം, യൂത്ത് കോണ്‍ഗ്രസ് ബ്ലോക്ക് സെക്രട്ടറി ലിനോ മൈക്കിള്‍എന്നിവര്‍ പ്രസംഗിച്ചു.

ബിഎംബിസി റോഡ് തകർന്നു

കൊരട്ടി: നിർമാണം നടക്കുന്നതിനോടനുബന്ധിച്ച് ദേശീയപാത കൊരട്ടി മേഖലയിൽ രൂപപ്പെടുന്ന ഗതാഗതക്കുരുക്ക് ഒഴിവാക്കാൻ ഭാരവണ്ടികൾ വഴിതിരിച്ചുവിടുന്നതുമൂലം കൊരട്ടി - നാലുകെട്ട് റോഡിൽ കിൻഫ്രയ്ക്കും കോനൂർ ജംഗ്ഷനും ഇടയിൽ റോഡ് തകർന്നു. ശുദ്ധജലവിതരണ പൈപ്പുകൾ പൊട്ടി വൻതോതിൽ വെള്ളം പാഴായതിനുപിന്നാലെ ആധുനികരീതിയിൽ ബിഎംബിസി രീതിയിൽ നവീകരിച്ച പൊതുമരാമത്ത് റോഡും തകർന്നു. ഗ്രാമീണ റോഡുകളിൽനിന്നു വ്യത്യസ്തമായി കോടികൾ മുടക്കി പുനരുദ്ധരിച്ച ഈ പൊതുമരാമത്ത് റോഡിലൂടെ നൂറുകണക്കിന് വാഹനങ്ങളാണ് ദിനംപ്രതി കടന്നുപോകുന്നത്. അടിയന്തര പ്രാധാന്യത്തോടെ അറ്റകുറ്റപ്പണികൾ നടത്തിയില്ലെങ്കിൽ റോഡിന് കൂടുതൽ കേടുപാടുകൾ സംഭവിച്ചേക്കാം. ദേശീയപാതയിൽനിന്നു വാഹനങ്ങൾ വഴിതിരിച്ചുവിടുന്നതുമൂലം കൊരട്ടി, കാടുകുറ്റി, മേലൂർ പഞ്ചായത്തുകളിലെ പ്രധാന ഗ്രാമീണ റോഡുകളെല്ലാം തകർന്നനിലയിലാണ്. റോഡിന്‍റെ ശോച്യാവസ്ഥയെക്കുറിച്ച് ഗ്രാമപഞ്ചായത്തുകളുടെ പ്രസിഡന്‍റുമാർ കളക്ടറെയും എൻഎച്ച്എഐ പ്രൊജക്ട് ഡയറക്ടറെയും എംഎൽഎ, എംപി അടക്കമുള്ളവരെ ബോധ്യപ്പെടുത്തിയിട്ടുണ്ടെങ്കിലും സാങ്കേതിക കാരണങ്ങൾ പറഞ്ഞ് അറ്റകുറ്റപ്പണികൾക്ക് തയാറാകാതെ ഹൈവേ അധികൃതർ ഒഴിഞ്ഞുമാറുകയാണ്. ഈ പശ്ചാത്തലത്തിൽ കോടതിയെ സമീപിക്കാനുള്ള തയാറെടുപ്പിലാണ് പ്രാദേശിക ഭരണകൂടങ്ങൾ. വഴിതിരിച്ചുവിടല്‍: മാപ്രാണം -നെടുമ്പാള്‍ റോഡിനെ അപകടമേഖലയാക്കുന്നു മാപ്രാണം: തൃശൂര്‍ - കൊടുങ്ങല്ലൂര്‍ സംസ്ഥാനപാതയുടെ കോണ്‍ക്രീറ്റിംഗ് മൂലം കരുവന്നൂരില്‍നിന്നു ആറാട്ടുപുഴ, തൊട്ടിപ്പാള്‍, മുളങ്ങ് റോഡ് വഴി മാപ്രാണം നന്തിക്കര റോഡിലെ നെടുമ്പാളിലാണ് തൃശൂരില്‍നിന്ന് ഇരിങ്ങാലക്കുട, കൊടുങ്ങല്ലൂര്‍ ഭാഗത്തേക്കുള്ള വാഹനങ്ങള്‍ വഴിതിരിഞ്ഞുപോകുന്നത്. നെടുമ്പാള്‍ മുതല്‍ മാപ്രാണംവരെ പുതിയ റോഡ് ആയതിനാല്‍, വഴി തിരിച്ചുവിടലില്‍ നഷ്ടപ്പെട്ടസമയം തിരിച്ചുപിടിക്കാന്‍ അമിതവേഗതയിലാണ് ഇതിലെ വാഹനങ്ങള്‍ പായുന്നത്. കോന്തിപുലം പാടത്തിനും അച്യുതന്‍ നായര്‍ മൂലയ്ക്കും ഇടയ്ക്കുള്ള നടുവിലാല്‍ ഭാഗത്ത് റോഡിന്‍റെ ഒത്തനടുക്ക് നില്‍ക്കുന്ന മരങ്ങളുടെ വലതുവശത്തും ഇടതുവശത്തും വണ്‍വേ പാലിച്ചു പോകേണ്ടതിന് പകരം, റോംഗ്സൈഡിലൂടെയാണ് പലപ്പോഴും സ്വകാര്യ ബസുകളുടെ മത്സരയോട്ടം. ഇവ നിയന്ത്രിച്ചില്ലെങ്കില്‍ വലിയ അപകടങ്ങള്‍ക്ക് സാധ്യതയുള്ള മേഖലയാണ് ഇവിടം.

ശുദ്ധജലവിതരണ പൈപ്പ് പൊട്ടി; പരിഹരിക്കാത്തതിൽ പ്രതിഷേധം

ചാലക്കുടി: എഴുന്നള്ളത്തുപാത റോഡിൽ പാലസ് ആശുപത്രിക്കുസമീപം വാട്ടർ അഥോറിറ്റിയുടെ കുടിവെള്ള പൈപ്പ് പൊട്ടി വെള്ളംപോകുന്നതിന് അടിയന്തരമായി പരിഹാരംകാണുക, നഗരസഭ ഭരണാധികാരിയുടെ പ്രദേശത്തോടുള്ള അവഗണന അവസാനിപ്പിക്കുക എന്നീ ആവശ്യങ്ങൾ ഉന്നയിച്ചു എൽഡിഎഫ് 35-ാം വാർഡ് കമ്മിറ്റി പ്രതിഷേധധർണ നടത്തി. എൽഡിഎഫ് കൺവീനർ ടി.പി. ജോണി ഉദ്ഘാടനം ചെയ്തു. പി.എം. സത്യപാലൻ അധ്യക്ഷതവഹിച്ചു. സിപിഎം ഏരിയകമ്മിറ്റി മെമ്പർ ജിൽ ആന്‍റണി, രാജീവ് തേവാലിൽ, എം.കെ. ചന്ദ്രൻ, റാഫി പട്ടത്ത്, ജോസ് പുല്ലൻ എന്നിവർ പ്രസംഗിച്ചു.

കാർ റൗണ്ട്എബൗട്ടിൽ ഇടിച്ചുകയറി

തൃശൂർ: കാർ റൗണ്ട്എബൗട്ടിൽ ഇടിച്ചുകയറി അപകടം. ഇക്കണ്ടവാര്യർ റോഡിലെ പൗരസമിതിയുടെ റൗണ്ട് എബൗട്ടാണ് ഇന്നലെ പുലർച്ചെ ചാലക്കുടി സ്വദേശിയുടെ കാർ ഇടിച്ചുതകർത്തത്. അപകടത്തിൽ മരത്താക്കര സ്വദേശിക്കു പരിക്കേറ്റു. കാറിന്‍റെ മുൻവശം തകർന്നു. കാറിന്‍റെ മുൻവശത്തെ രണ്ടു ടയറുകൾക്കും ഗ്രിപ്പ് ഇല്ലാത്തതും റൗണ്ട് എബൗട്ടിന്‍റെ അശാസ്ത്രീയനിർമാണവുമാണ് അപകടത്തിനു കാരണമായതെന്നു കരുതുന്നതായി ട്രാഫിക് പോലീസ് പറഞ്ഞു.

മണലിത്തറയിലെ അങ്കണവാടികെട്ടിടത്തിന് 10 വർഷമായിട്ടും അനുമതി ലഭിച്ചില്ല

പുന്നംപറമ്പ്: തെക്കുംകര മണലിത്തറയിൽ അങ്കണവാടിക്ക് കെട്ടിടം നിർമിച്ചിട്ടു 10 വർഷമായിട്ടും ഇതുവരെ പ്രവർത്തനം തുടങ്ങിയില്ല. പാടശേഖരത്തിന്‍റെ നടുവിൽ നിർമിച്ച കെട്ടിടത്തിന് അനുമതി ലഭിക്കാത്തതിനെത്തുടർന്നാണ് അങ്കണവാടി പ്രവർത്തനം അവതാളത്തിലായത്. കെട്ടിടം ഇപ്പോൾ സാമൂഹ്യവിരുദ്ധരുടെയും ഇഴജന്തുക്കളുടെയും താവളമാണ്. യുഡിഎഫ് തെക്കുംകര പഞ്ചായത്ത് കമ്മിറ്റി 2015ൽ ആറു ലക്ഷംരൂപ ചെലവിൽ നിർമിച്ച അങ്കണവാടിയാണ് പ്രവർത്തനം തുടങ്ങാനാവാത്തത്. പാടത്തിന്‍റെ നടുവിലെ കെട്ടിടനിർമാണം പൊതുജനങ്ങളിൽനിന്നു തെരഞ്ഞെടുത്ത കമ്മിറ്റിയാണു പൂർത്തീകരിച്ചത്. അന്നത്തെ ജില്ലാ കളക്ടർ കെട്ടിടത്തിന് അനുമതി നൽകാമെന്നു പറഞ്ഞിരുന്നെങ്കിലും പിന്നീട് വന്ന കളക്ടർ അനുമതി നിഷേധിക്കുകയായിരുന്നു. ഇതോടെ പഞ്ചായത്ത് ഭരണസമിതി പ്രതിസന്ധിയിലായി. അന്നു മന്ത്രിയായിരുന്ന അന്തരിച്ച സി.എൻ. ബാലകൃഷ്ണന്‍റെ പ്രാദേശിക വികസനഫണ്ടിൽ നിന്ന് ആറുലക്ഷം രൂപ ചെലവഴിച്ചാണ് കെട്ടിടം നിർമിച്ചത്. പിന്നീട് തുടർച്ചയായി രണ്ടുതവണ ഭരണത്തിലെത്തിയ എൽഡിഎഫ് അങ്കണവാടി തുറക്കാനുള്ള ഒരു നടപടിയും എടുത്തില്ല. അങ്കണവാടി 2015ൽ അന്നത്തെ പഞ്ചായത്ത് പ്രസിഡന്‍റായിരുന്ന സുനിൽ ജേക്കബ് ആണ് ഉദ്ഘാടനം ചെയ്തത്.

സമൂഹം കുട്ടികൾക്കു നല്ല മാതൃകയാകണം: മന്ത്രി

ഒല്ലൂർ: നമ്മുടെ സമൂഹം കുട്ടികൾക്കു നല്ല മാതൃകയാവണമെന്നും നല്ല മനുഷ്യനാകുകയെന്നതാണ് ഈ കാലഘട്ടം നമ്മോട് ആവശ്യപ്പെടുന്നതെന്നും റവന്യു മന്ത്രി കെ.രാജൻ പറഞ്ഞു. ഒല്ലൂർ സെന്‍റ്് മേരീസ് സ്കൂളിന്‍റെ മെറിറ്റ് ഡേ ഉദ്ഘാടനം ചെയതു സംസാരിക്കുകയായിരുന്നു മന്ത്രി. പിടിഎ പ്രസിഡന്‍റ് ജോസ് ചാക്കോള അധ്യക്ഷത വഹിച്ചു. മേരിമാത പള്ളി വികാരി ഫാ. ജോയ് ചിറ്റിലപ്പിള്ളി, ഹെഡ്‌‌മിസ്ട്രസ് സിസ്റ്റർ സിബിയ തെരേസ്, ലോക്കൽ മാനേജർ സിസ്റ്റർ ഹംബലിൻ, സ്റ്റാഫ് പ്രതിനിധികളായ പി.എൽ. ലിലു, ബിനി ജോർജ്, എംപിടിഎ പ്രസിഡന്‍റ് മിനി ഡെന്നി തുടങ്ങിയവർ പ്രസംഗിച്ചു. എസ്എസ്എൽസി പരീക്ഷയിൽ ഉന്നതവിജയം നേടിയ വിദ്യാർഥികൾക്കുള്ള അവാർഡുകൾ മന്ത്രി വിതരണം ചെയ്തു.

നെല്ലിക്കുന്ന് തിരുനാൾ കൊടിയേറി

നെല്ലിക്കുന്ന്: സെന്‍റ് സെബാസ്റ്റ്യൻ പള്ളിയിലെ ദുക്റാന ഊട്ടുതിരുനാളിനു വികാരി ഫാ. പോൾസണ്‍ തട്ടിൽ കൊടിയേറ്റി. നാളെയാണ് തിരുനാൾ. അസിസ്റ്റന്‍റ് വികാരി ഫാ. ആന്‍റണി ചിറ്റിലപ്പിള്ളി, ഡീക്കൻ പ്രവീണ്‍ കുന്നത്ത്, ജനറൽ കണ്‍വീനർ ജോണ്‍സണ്‍ അക്കര, ട്രസ്റ്റിമാരായ കെ.ഡി. ജെയിംസ്, ജോർജ് ചിറമൽ, ലിജോ ജോയ് എന്നിവർ പങ്കെടുത്തു. ഇന്നു രാവിലെ ആറിനു ദിവ്യബലി, ലദീഞ്ഞ്, നൊവേന, തുടർന്ന് എഴുന്നള്ളിക്കൽ, നാളെ രാവിലെ ആറിനും 7.30 നും ദിവ്യബലി, ഒൻപതിന് ആഘോഷമായ റാസ കുർബാന - ഫാ. ബിൽജു വാഴപ്പിള്ളി, ഫാ. ജോണ്‍ പേരാമംഗലം എന്നിവർ കാർമികരാകും. തുടർന്നു പ്രദക്ഷിണം. 11 മുതൽ സൗജന്യ നേർച്ചഭക്ഷണവിതരണം എന്നിവയും ഉണ്ടായിരിക്കും.

പോത്തൻവലയുമായി മത്സ്യബന്ധനം: നാലു വള്ളങ്ങൾ പിടിയിൽ

ചാവക്കാട്: പരമ്പരാഗത വള്ളക്കാർ എന്ന വ്യാജേന നിരോധിതവലയുമായി മത്സ്യബന്ധനം നടത്തിയ നാലു വള്ളങ്ങൾ പിടികൂടി. പഞ്ചവടി തീരക്കടലിൽ പോത്തൻ വലകൾ ഉപയോഗിച്ച് അടിയൂറ്റൽ മത്സ്യബന്ധനം നടത്തിയിരുന്ന നാലു മത്സ്യബന്ധന യാനങ്ങളെയാണ് ഫിഷറീസ് - മറൈൻ എൻഫോഴ്സ്മെന്‍റ് സംഘം സ്വകാര്യ ഫൈബർവള്ളത്തിലെത്തി പിടികൂടിയത്. അണ്ടത്തോട് സ്വദേശിയായ മാമതിന്‍റെ ബദരിയ ഒന്ന്, രണ്ട് വള്ളങ്ങളും ചാവക്കാട് മണത്തല സ്വദേശിയായ രമേഷിന്‍റെ രജിസ്ട്രേഷൻ നടത്താത്ത രണ്ടു വള്ളങ്ങളുമാണു പിടിച്ചെടുത്തത്. നിരോധിച്ച ഡബിൾനെറ്റ് പോത്തൻവല ഉപയോഗിച്ച് മത്സ്യബന്ധനം നടത്തിയ യാനങ്ങളെ കണ്ടുകെട്ടി. പുലർച്ചെ മുതൽ പഞ്ചവടി ബീച്ച് തീരക്കടലിൽ രണ്ടു വള്ളങ്ങൾ ചേർന്നു പെയർ ട്രോളിംഗ് നടത്തുന്നതായി പരമ്പരാഗത വഞ്ചിക്കാർ ഫിഷറീസ് സ്റ്റേഷനിൽ അറിയിച്ചിരുന്നു. തീരമേഖലകളില്‍ അനധികൃതമത്സ്യബന്ധനം നടക്കുന്നതു കണ്ടെത്താൻ അഴിക്കോട് ഫിഷറീസ് സ്റ്റേഷൻ അസി. ഡയറക്ടർ ഡോ. സി. സീമയുടെ നേതൃത്വത്തിലുള്ള പ്രത്യേക അന്വേഷണസംഘം പുലര്‍ച്ചെ മുതല്‍ കടലില്‍ ശക്തമായ പരിശോധന നടത്തിവരികയായിരുന്നു. ഇതിനിടയിലാണ് പോത്തൻവല മത്സ്യബന്ധനം അറിയുന്നത്. വള്ളത്തി ൽ ഉണ്ടായിരുന്ന ചെമ്മീൻ ലേലംചെയ്തു കിട്ടിയ കാൽ ലക്ഷം രൂപ സർക്കാരിലേക്ക് അടച്ചു.വള്ളങ്ങളുടെ ഉടമകൾക്കെതിരെ ജില്ല ഫിഷറീസ് ഡെപ്യൂട്ടി ഡയറക്ടർ നിയമനടപടി പൂർത്തിയാക്കി, പിഴ ചുമത്തും. അഴിക്കട് ഫിഷറീസ് മറൈൻ എൻഫോഴ്‌സ്‌മെന്‍റ്് ആൻഡ് വിജിലൻസ്‌വിംഗ് ഓഫീസർമാരായ വി.എൻ. പ്രശാന്ത്കുമാർ, വി.എം. ഷൈബു തുടങ്ങിയവരുടെ നേതൃത്വത്തിലായിരുന്നു പിടികൂടിയത്. നിരോധിച്ച മത്സ്യബന്ധനം നടത്തിയാൽ കർശനനടപടി തുടരുമെന്ന് ഡെപ്യൂട്ടി ഡയറക്ടർ അബ്ദുൽ മജീദ് പോത്തന്നൂരാൻ അറിയിച്ചു.

അന്തിക്കാട് വെള്ളക്കെട്ട് ഒഴിയുന്നില്ല; 17 കുടുംബങ്ങളെ ക്യാമ്പിലേക്കു മാറ്റി

അന്തിക്കാട്: കനത്ത മഴയെത്തുടർന്നുണ്ടായ വെള്ളക്കെട്ട് ഒഴിയുന്നില്ല. മഴ ഒഴിഞ്ഞിട്ടും വീടുകൾ ഉപയോഗിക്കാൻ പറ്റാത്തതിനാൽ അന്തിക്കാട് പഞ്ചായത്തിലെ അഞ്ച്, ആറ്, ഏഴ് വാർഡുകളിൽനിന്നായി 17 കുടുംബങ്ങളെ ദുരിതാശ്വാസക്യാമ്പിലേക്കു മാറ്റിപ്പാർപ്പിച്ചു. വീടുകൾക്കുചുറ്റും വെള്ളം നിൽക്കുന്നതിനാൽ ശുചിമുറികൾ ഉപയോഗിക്കാൻ കഴിയാത്തതിനാലും വീടിനുള്ളിൽ വെള്ളത്തിന്‍റെ ഈർപ്പവും പുറത്ത് ചെളിയും തങ്ങിനിൽക്കുന്നതിനാലും താമസിക്കാൻ കഴിയാത്തതിനാലാണ് ഇവരെ അന്തിക്കാട് കെജിഎം എൽപി സ്കൂളിലെ ക്യാമ്പിലേക്കുമാറ്റിയത്. ഉച്ചഭക്ഷണം ഇവിടത്തെ കുട്ടികൾക്കു തയാറാക്കുന്നതിൽ കൂടുൽ ചേർത്തു തയാറാക്കിയാണ് കുടുംബങ്ങൾക്കു വിളമ്പുന്നത്. രാവിലെയും രാത്രിയും ക്യാമ്പിലുള്ളവർ ഒരുമിച്ച് ഭക്ഷണം തയാറാക്കും. ഇതിനാവശ്യമായ പലചരക്ക്, പച്ചക്കറിസാധനങ്ങൾ വാങ്ങിക്കുന്നതിനാവശ്യമായ സൗകര്യങ്ങൾ ഒരുക്കിയിട്ടുണ്ടെന്ന് പഞ്ചായത്ത് - വില്ലേജ് അധികൃതർ പറഞ്ഞു. പഞ്ചായത്ത് പ്രസിഡന്‍റ്് ജീന നന്ദൻ, വൈസ് പ്രസിഡന്‍റ്് പി.എസ്. സുജിത്ത്, വാർഡ് അംഗങ്ങളായ ലീന മനോജ്, ശരണ്യ രജീഷ്, അനിത ശശി, വില്ലേജ് ഓഫീസർ ജെ. ജെനേഷ്, ഹെൽത്ത് ഇൻസ്പക്ടർ അശ്വതി മനേഷ് എന്നിവർ ദുരിതാശ്വാസകേന്ദ്രത്തിലെത്തി കാര്യങ്ങൾ വിലയിരുത്തി.

ഡോക്ടേഴ്സ് ദിനാചരണം

ജൂബിലി മിഷൻ മെഡിക്കൽ കോളജിൽ ഫ്ലാഷ്മോബ് തൃശൂർ: ജൂബിലി മിഷൻ മെഡിക്കൽ കോളജ് ആശുപത്രിയിൽ ഡോക്ടേഴ്സ് ദിനത്തോടനുബന്ധിച്ച് ഫ്ലാഷ് മോബ് നടത്തി. ആശുപത്രി ഡയറക്ടർ ഫാ. റെന്നി മുണ്ടൻകുരിയൻ, അസോസിയേറ്റ് ഡയറക്ടർ ഫാ. ടെറിൻ മുള്ളക്കര, പ്രിൻസിപ്പൽ ഡോ. എം.എ. ആൻഡ്രൂസ്, മെഡിക്കൽ സൂപ്രണ്ട് ഡോ. ഷിബു സി. കള്ളിവളപ്പിൽ, സിഇഒ ഡോ. ബെന്നി ജോസഫ് നീലങ്കാവിൽ എന്നിവർ പ്രസംഗിച്ചു. അമലയിൽ മുതിർന്ന ഡോക്ടർമാരെ ആദരിച്ചു തൃശൂർ: അമല മെഡിക്കൽ കോളജിൽനിന്നും വിരമിച്ച ഡോക്ടർമാർക്ക് ആദരമർപ്പിച്ച് ഡോക്ടേഴ്സ് ദിനാചരണം നടത്തി. ഡയറക്ടർ ഫാ. ജൂലിയസ് അറയ്ക്കൽ ഉദ്ഘാടനം നിർവഹിച്ചു. അമല മെഡിക്കൽ കോളജ് പ്രിൻസിപ്പൽ ഡോ. ബെറ്റ്സി തോമസ്, മുൻപ്രിൻസിപ്പൽ ഡോ. എൻ.വി. സ്വർണം എന്നിവർ പ്രസംഗിച്ചു. ചൂണ്ടൽ സെന്‍റ് ജോസഫ്സ് ഹോസ്പിറ്റൽ ചൂണ്ടൽ: സെന്‍റ് ജോസഫ്സ് ഹോ സ്പിറ്റലിൽ ഡോക്ടേഴ്സ് ഡേ ആഘോഷിച്ചു. സീനിയർ ഡോ ക്ടർമാരായ ഡോ. ജോസ്, ഡോ. റെജു റോയ്സ്, സിസ്റ്റർ ഡോ. ബെന സിഎംസി, ഡോ. ഷാജി ഭാസ്കർ, ഡോ. സി.വി. സുനിത എന്നിവരെ അഡ്മിനിസ്ട്രേറ്റർ സിസ്റ്റർ ചെറുപുഷ്പം പൊന്നാടയണിയിച്ച് ആദരിച്ചു. നഴ്സിംഗ് സ്റ്റാഫ് ഫ്ലാഷ് മോബ് അവതരി പ്പിച്ചു. നഴ്സിംഗ് സൂപ്രണ്ട് സിസ്റ്റ ർ മേഘ, ക്വാളിറ്റി ഓഫീസർ നിഷ രമേഷ് എന്നിവർ ആശംസകളർപ്പിച്ചു. സേക്രഡ് ഹാർട്ട് സിഎൽപി സ്കൂൾ തൃശൂർ: സേക്രഡ് ഹാർട്ട് കോണ്‍വന്‍റ് എൽപി സ്കൂളിൽ ഡോക്ടേഴ്സ് ദിനം ആചരിച്ചു. ദന്തരോഗവിഭാഗം ഡോക്ടർ ചൈത്ര കുട്ടികളിൽ വളർത്തിയെടുക്കേണ്ട ആരോഗ്യശീലത്തെക്കുറിച്ച് സംസാരിക്കുകയും കുട്ടികളുടെ സംശയങ്ങൾക്ക് ഉത്തരം നൽകുകയും ചെയ്തു. ഹെഡ്മിസ്ട്രസ് സിസ്റ്റർ ലിനി തെരേസ് ഡോക്ടറെ ഉപഹാരം നൽകി ആദരിച്ചു. പാർവതി, ജീന ടീച്ചർ എന്നിവർ പ്രസംഗിച്ചു. ദി ഇന്‍റർനാഷണൽ സ്കൂൾ ഓഫ് തൃശൂർ ചിറക്കേക്കോട്: ആരോഗ്യമുള്ളജനതയെ പ്രതീക്ഷയുടെ ലോകത്തിലേക്ക് നയിക്കുന്ന പോരാളികളായ ഡോക്ടർമാർക്ക് നന്ദി അറിയിച്ചുകൊണ്ട് ദി ഇന്‍റർനാഷണൽ സ്കൂൾ ഓഫ് തൃശൂർ ഡോ ക്ടേഴ്സ് ദിനം ആചരിച്ചു. ഡോ. എം.ആർ. അഞ്ജു മുഖ്യാതിഥി യായി. സ്കൂൾ പ്രിൻസിപ്പൽ സാനു ജോസഫ് അധ്യക്ഷത വഹി ച്ചു. ജില്ലാ സഹകരണ ആശുപത്രി തൃശൂർ: ജില്ലാ സഹകരണ ആശുപത്രിയിൽ ഡോക്ടേഴ്സ് ദിനാചരണം ജൂബിലി മെഡിക്കൽ കോളജ് പ്രഫ‌സർ ഡോ. സി.വി. ആൻഡ്രൂസ് ഉദ്ഘാടനം ചെയ്തു. ആശുപത്രി വൈസ് പ്രസിഡന്‍റ് സത്യഭാമ അധ്യക്ഷത വഹിച്ചു. ഡയറക്ടർമാരായ വർഗീസ് ജോണ്‍, ഡോ. ടോണി ജോണ്‍ അക്കര, ഡോ. അനൂപ സ്റ്റാൻലി, ഡോ. മീനു മരിയ ബാബു, ഡോ. വിനീത വേണുഗോപാൽ, ഡോ. ഹരീഷ്, ഡോ. സാജൻ, ആശുപത്രി സെക്രട്ടറി എം.എസ്. സന, എ.ആർ. രാമചന്ദ്രൻ, ജോണ്‍സണ്‍ ആലപ്പാട്ട്, ജേക്കബ് പോൾ തട്ടിൽ, ശരത്കുമാർ എന്നിവർ പങ്കെടുത്തു. മെഡിക്കൽ സൂപ്രണ്ട് ഡോ. രാമദാസ് സ്വാഗതവും ഡയറക്ടർ എ.പി. ജോസ് നന്ദിയും പറഞ്ഞു.

ശമ്പളപരിഷ്കരണ നടപടികൾ ഉടൻ ‌ ആരംഭിക്കണം: ടി.വി. ചന്ദ്രമോഹൻ

തൃശൂർ: 12-ാം ശമ്പള പരിഷ്കരണനടപടികൾ ആരംഭിക്കാതെ അധ്യാപകരെയും മറ്റു ജീവനക്കാരെയും സർക്കാർ വഞ്ചിക്കുകയാണന്നു യുഡിഎഫ് ജില്ലാ ചെയർമാൻ ടി.വി. ചന്ദ്രമോഹൻ പറഞ്ഞു. കെപിഎസ്ടിഎ പ്രതിഷേധധർണ ഉദ്ഘാടനം ചെയ്യുകയായിരുന്നു അദ്ദേഹം. ഡിഎ കുടിശിക, മുൻ ശമ്പള പരിഷ്കരണ കുടിശിക തുടങ്ങി അധ്യാപകർക്കു ലഭിക്കേണ്ട സാമ്പത്തികങ്ങൾ സർക്കാർ നിഷേധിക്കുകയാണ്. സാമ്പത്തികപ്രതിസന്ധിയുടെ പേരിൽ ആനുകൂല്യങ്ങൾ നിഷേധിക്കുമ്പോൾ സർക്കാർ ആഡംബരം നടത്തുകയാണെന്നും ചന്ദ്രമോഹൻ കുറ്റപ്പെടുത്തി. ജില്ലാ പ്രസിഡന്‍റ് പി.സി. ശ്രീപദ്മനാഭൻ അധ്യക്ഷത വഹിച്ചു. സെക്രട്ടറി ജയപ്രകാശ് പാറപ്പുറത്ത് സ്വാഗതവും ട്രഷറർ സി.എ. മുഹമ്മദ് റാഫി നന്ദിയും പറഞ്ഞു.സംസ്ഥാന വൈസ് പ്രസിഡന്‍റ് സാജു ജോർജ് മുഖ്യപ്രഭാഷണം നടത്തി.

ജെയിംസ് വളപ്പിലയ്ക്കു തൃശൂരിൽ പൗരസ്വീകരണം

തൃശൂർ: ആതുരസേവന രംഗത്ത് മികവുറ്റ സേവനം കാഴ്ചവച്ച അഞ്ചു വനിതകളെ ആദരിക്കുന്ന ചടങ്ങും വനിതാസമ്മേളനവും നടന്നു. ചടങ്ങിൽ ലയണ്‍സ് കേരള മൾട്ടിപ്പിൾ സെക്രട്ടറിയായി തെരഞ്ഞെടുക്കപ്പെട്ട ഡിസ്ട്രിക്ട് ഗവർണർ ജെയിംസ് വളപ്പിലയ്ക്ക് പൗരസ്വീകരണവും നൽകി. മന്ത്രി ആർ. ബിന്ദു ഉദ്ഘാടനം നിർവഹിച്ചു. തൃശൂർ കോർപറേഷൻ മേയർ എം.കെ. വർഗീസ് അധ്യക്ഷത വഹിച്ചു. ഡെപ്യൂട്ടി മേയർ എം.എൽ. റോസി, കല്യാണ്‍ സിൽക്സ് എംഡി ടി.എസ്. പട്ടാഭിരാമൻ തുടങ്ങിയവർ വിശിഷ്ടാതിഥികളായിരുന്നു പങ്കെടുത്തു. തുടർന്ന് കോർപറേഷനിലെ മുന്നൂറിൽപരം ഹരിതകർമസേന അംഗങ്ങൾക്ക് ലയണ്‍സ് ഹൃദയപൂർവം ഗിഫ്റ്റ് ഓഫ് ജോയ് സമ്മാനമായി സാരികൾ നൽകി. പൗരാവലി പുരസ്കാരം മേയർ എം.കെ. വർഗീസ് ജെയിംസ് വളപ്പിലയ്ക്ക് സമ്മാനിച്ചു. വിവിധ വിഭാഗങ്ങളിലെ ജോയ് ഓഫ് ഹ്യുമാനിറ്റേറിയൻ അവാർഡുകൾ സെന്‍റ് ജോസഫ് സ്പെഷ്യൽ സ്കൂൾ പ്രിൻസിപ്പൽ സിസ്റ്റർ ലെറ്റീഷ്യ, പാലിയേറ്റീവ് വർക്കർ എം.പി. പ്രീതി, ആശ്രയഭവൻ ഡയറക്ടർ ലീന പീറ്റർ, ആശാ വർക്കറായ പ്രീതി സതീഷ്, കുടുംബശ്രീയിലെ അംബിക സോമൻ എന്നിവർക്ക് സമ്മാനിച്ചു. മുൻ ഡിസ്ട്രിക്ട് ഗവർണർമാരായ എം.ഡി. ഇഗ്നേഷ്യസ്, ഇ.ഡി. ദീപക്ക്, ജോസഫ് ജോണ്‍, സീനിയർ ചേംബർ നാഷണൽ ലീഡർമാരായ എൻ.ഐ. വർഗീസ്, ഹംസ അലി, കെ3എ പ്രതിനിധി ജോസ് വള്ളൂർ, പ്ലാറ്റൂണ്‍ ക്ലബ് സെക്രട്ടറി സോജൻ തുടങ്ങിയവർ ചടങ്ങിൽ സംബന്ധിച്ചു. ‌സാമൂഹ്യ, സാംസ്കാരിക രംഗങ്ങളിലെ വിവിധ സംഘടനകൾ ജെയിംസ് വളപ്പിലയെ ആദരിച്ചു. ലയണ്‍സ് ഡിസ്ട്രിക്ട് ഗവർണറായി സ്ഥാനമേറ്റതിനുശേഷം ഇന്ത്യയിലെ തന്നെ മികച്ച ഗവർണറായി സമസ്തമേഖലകളിലും നിരവധി സേവന പ്രവർത്തനങ്ങൾ നടത്തിയതിന്‍റെ അംഗീകാരമായാണ് ലയണ്‍സ് കേരള മൾട്ടിപ്പിൾ സെക്രട്ടറി എന്ന പുതിയ സ്ഥാനത്തിനു ജെയിംസ് വളപ്പില അർഹനായത്.

ജനറൽ ആശുപത്രിയിലെ ടോക്കണ്‍ സംവിധാനം അടിച്ചുതകർത്തു

തൃശൂർ: ജനറൽ ആശുപത്രിയിലെ ഒപി ടിക്കറ്റെടുക്കുന്നതിനായുള്ള ടോക്കണ്‍ സംവിധാനം അടിച്ചുതകർത്തു. മാനസികനില തെറ്റിയ ആളാണെന്നു സൂചന. ഇന്നലെ ഉച്ചയ്ക്കായിരുന്നു സംഭവം. ഒപി ടിക്കറ്റ് എടുക്കുന്ന സമയം കഴിഞ്ഞെത്തിയ ആൾ ടോക്കണ്‍ എടുക്കുന്ന മെഷീനുസമീപം എത്തി. എന്നാൽ മെഷീൻ ഓഫായിരുന്നു. ഇതിൽ പ്രകോപിതനായ ഇയാൾ സമീപത്തെ ഫയർ ഡിസ്റ്റിൻഗ്വിഷർ എടുത്ത് ടോക്കണ്‍ സംവിധാനം അടിച്ചുതകർക്കുകയായിരുന്നു. സംഭവമറിഞ്ഞ് സെക്യൂരിറ്റി ജീവനക്കാരും തൃശൂർ ഈസ്റ്റ് പോലീസും സ്ഥലത്തെത്തി ഇയാളെ പിടികൂടി.

ഡോക്ടർമാരില്ല; ഉള്ളവർക്ക് ഇരട്ടിപ്പണി

മുളങ്കുന്നത്തുകാവ്: ഗവ. മെഡിക്കൽ കോളജ് ആശുപത്രിയിലെ സൂപ്പർ സ്പെഷാലിറ്റി വിഭാഗമടക്കം പ്രധാനപ്പെട്ട വകുപ്പുകളിൽ മേധാവികളില്ല. സൂപ്പർ സ്പെഷാലിറ്റി വിഭാഗത്തെ വകുപ്പായി ഉൾപ്പെടുത്താത്തതിനാൽ പ്രഫസർതസ്തികകളും ഒഴിഞ്ഞുകിടക്കുന്നു. പിജി വിദ്യാർഥികൾക്കു പഠിക്കാനുള്ള സാഹചര്യമില്ലെന്നും പരാതി. യോഗ്യരായ പെർഫ്യൂഷനിസ്റ്റുകളില്ലാതെ ഹൃദയംതുറന്നുള്ള ശസ്ത്രക്രിയയും ഒരുമാസമായി മുടങ്ങി. ആഴ്ചയിൽ രണ്ടു ഹൃദയ ശസ്ത്രക്രിയകളാണു നടത്തിയിരുന്നത്. രണ്ടുവർഷത്തെ കാത്തിരിപ്പിനൊടുവിലാണ് ഒരു ഡോക്ടറെത്തിയത്. ശസ്ത്രക്രിയകൾ തുടങ്ങാതിരിക്കാൻ നിരവധി തടസങ്ങളും ഉയർന്നു. ഡോക്ടറുടെ നിശ്ചയദാർഢ്യത്തിലാണു സ്വകാര്യ ആശുപത്രികളിൽ ലക്ഷങ്ങൾ ചെലവുവരുന്ന ശസ്ത്രക്രിയ സൗജന്യനിരക്കിൽ ചെയ്യുന്നത്. ശസ്ത്രക്രിയ നടത്തുന്പോൾ യന്ത്രസഹായത്തിലാണു ജീവൻ നിലനിർത്തുക. ഇതിനു യോഗ്യതയുള്ള പെർഫ്യൂഷനിസ്റ്റുകൾ ഇല്ല. മൂന്നുപേരെ നിയമിച്ചെങ്കിലും ഒരാൾ വിദേശത്തുപോയി. ആശുപത്രി വികസനപദ്ധതിയിൽ ഒരാളെ നിയമിച്ചെങ്കിലും ആവശ്യത്തിനു യോഗ്യതയില്ലെന്നാണ് ആരോപണം. ശസ്ത്രക്രിയ കഴിഞ്ഞ രോഗിക്ക് അസ്വസ്ഥത അനുഭവപ്പെട്ടതോടെ ഡോക്ടർ നടത്തിയ പരിശോധനയിലാണു പെർഫ്യൂഷനിസ്റ്റിനു യന്ത്രം ഉപയോഗിക്കാൻ പരിജ്ഞാനമില്ലെന്ന് അറിഞ്ഞത്. രോഗിയുടെ ജീവൻ നഷ്ടമാകാൻ സാധ്യതയുള്ളതിനാൽ തീരുമാനമുണ്ടാകുന്നതുവരെ ശസ്ത്രക്രിയകൾ നിർത്തിവയ്ക്കാൻ ഡോക്ടർ നിർബന്ധിതനാകുകയായിരുന്നു. ഒരുമാസമായിട്ടും പ്രതിസന്ധി പരിഹരിക്കാൻ കഴിഞ്ഞില്ല. 60 രോഗികളാണ് ശസ്ത്രക്രിയയ്ക്ക് ഊഴംകാത്തിരിക്കുന്നത്. സൂപ്പർ സ്പെഷാലിറ്റി വിദഗ്ധരുടെ സേവനമുള്ള ഗ്യാസ്ട്രോളജി, യൂറോളജി, ന്യൂറോളജി, നെഫ്രോളജി, പ്ലാസ്റ്റിക് സർജറി വിഭാഗങ്ങളിൽ ഒരു ഡോക്ടറുടെ സേവനമാണുള്ളത്. യൂറോളജി ഡോക്ടർ കൊച്ചി, തൃശൂർ മെഡിക്കൽ കോളജുകളിലാണു ജോലിചെയ്യുന്നത്. ആഴ്ചയിൽ അഞ്ചുദിവസം തൃശൂരിലും ഒരുദിവസം കൊച്ചിയിലും. ഏക വാതരോഗവിദഗ്ധനായ ഡോക്ടർ കോട്ടയത്തും തൃശൂരിലുമായി ജോലിചെയ്യുന്നു. രണ്ടു ഡോക്ടർമാരുണ്ടായിരുന്ന ഗ്യാസ്ട്രോളജി വിഭാഗത്തിൽ ഒരാളാണുള്ളത്. അസോസിയേറ്റ് പ്രഫസറെ സ്ഥലംമാറ്റി പകരംവച്ച ഡോക്ടർ അമിതജോലിഭാരത്താൽ പ്രതിസന്ധിയിലാണ്. ഗ്യാസ്ട്രോളജിയിലടക്കം ഒപിയിലെത്തുന്ന രോഗികളുടെ എണ്ണം കുറച്ചു. 200 കോടി രൂപ ചെലവിട്ടു സൂപ്പർ സ്പെഷാലിറ്റി സമുച്ചയവും അനുബന്ധസൗകര്യങ്ങളും ഒരുക്കിയെങ്കിലും രോഗികൾക്കു ഗുണമില്ല. താത്കാലികമായി ഡോക്ടർമാരെ നിയമിക്കാൻ ഇന്നലെ അപേക്ഷ ക്ഷണിച്ചതുമാത്രമാണു പുരോഗതി. നിരവധി കാൻസർരോഗികൾ എത്തുന്ന നെഞ്ചുരോഗാശുപത്രിയിലും പ്രതിസന്ധി രൂക്ഷമാണ്.

സർക്കാർ മെഡിക്കൽ കോളജുകൾ വെന്‍റിലേറ്ററിൽ: ടി.എൻ. പ്രതാപൻ

മുളങ്കുന്നത്തുകാവ്: പിണറായി വിജയൻ മുഖ്യമന്ത്രിയായിരിക്കുന്നതു സാക്ഷരകേരളത്തിലാണെന്നും അദ്ദേഹം എത്ര തലപൂഴ്ത്തിവച്ചാലും എല്ലാം ജനങ്ങൾ കാണുന്നുണ്ടെന്നു മനസിലാക്കുന്നതു നല്ലതാണെന്നും കെപിസിസി രാഷ്ട്രീയകാര്യസമിതിയംഗം ടി.എൻ. പ്രതാപൻ. രാജ്യത്ത് ഒന്നാംസ്ഥാനമെന്നു വീന്പുപറഞ്ഞ കേരളത്തിലെ ആരോഗ്യരംഗത്തെ നാഴികക്കല്ലുകളായ സർക്കാർ മെഡിക്കൽ കോളജുകൾ ഇന്നു വെന്‍റിലേറ്ററിലാണെന്നും അദ്ദേഹം പറഞ്ഞു. ആരോഗ്യമേഖലയോടുള്ള സർക്കാർ അവഗണനയ്ക്കും അനാസ്ഥയ്ക്കുമെതിരേ കോണ്‍ഗ്രസ് നടത്തിയ തൃശൂർ മെഡിക്കൽ കോളജ് മാർച്ചും ധർണയും ഉദ്ഘാടനം ചെയ്യുകയായിരുന്നു അദ്ദേഹം. ഡിസിസി പ്രസിഡന്‍റ് അഡ്വ. ജോസഫ് ടാജറ്റ് അധ്യക്ഷത വഹിച്ചു. എം.പി. വിൻസെന്‍റ്, ജോസ് വള്ളൂർ, അനിൽ അക്കര, ജോസഫ് ചാലിശേരി, രാജേന്ദ്രൻ അരങ്ങത്ത്, സുനിൽ അന്തിക്കാട്, ഷാജി കോടങ്കണ്ടത്ത്, ജോണ്‍ ഡാനിയൽ, എൻ.ആർ. സതീശൻ, കെ.സി. ബാബു തുടങ്ങിയവർ നേതൃത്വം നൽകി.

പൊതുമരാമത്തുമന്ത്രിക്ക് പ്രതിഷേധ റീൽ അയച്ചു

തൃശൂർ: റോഡിലെ കുഴികളിൽ വീണു മരണങ്ങളും ഗുരുതരപരിക്കേൽക്കുന്ന സംഭവങ്ങളും ഉണ്ടായിട്ടും കുഴികൾ സമയബന്ധിതമായി അടയ്ക്കാൻ തയാറാകാത്ത പൊതുമരാമത്തു മന്ത്രി മുഹമ്മദ് റിയാസിനു പ്രതിഷേധ റീൽ അയച്ച് കൗൺസിലർ ജോൺ ഡാനിയൽ. ഇരുചക്രവാഹനയാത്രക്കാരായ ദമ്പതികൾക്കു വീണുപരിക്കേൽക്കാനിടയാക്കിയ കോലോത്തുംപാടം റോഡിലെ കുഴിക്കരികിൽനിന്നാണു പ്രതിഷേധ റീൽ ചിത്രീകരിച്ച് അയച്ചുകൊടുത്തത്. റോഡുകളെക്കുറിച്ച് സന്തോഷ റീൽ ഇടുന്ന മന്ത്രിക്കു റോഡുകളുടെ ദയനീയാവസ്ഥ ബോധ്യപ്പെടുത്താനാണു പ്രതിഷേധ റീൽ അയച്ചതെന്നു ജോൺ ഡാനിയൽ പറഞ്ഞു. തൊഴിലാളികൾ റോഡിലെ കുഴിയടച്ചുപോകുമ്പോൾ ഉദ്യോഗസ്ഥരുടെ കൃത്യമായ മേൽനോട്ടം ഉറപ്പുവരുത്തണമെന്നും ആവശ്യപ്പെട്ടു.

റോഡുകൾ കോർപറേഷനു നൽകിയാൽ എല്ലാ റോഡുകളും നന്നാക്കും: മേയർ

തൃശൂർ: കോർപറേഷൻപരിധിയിലെ റോഡുകൾ കോർപറേഷനു നൽകിയാൽ എല്ലാ റോഡുകളും നന്നാക്കുമെന്നു മേയർ എം.കെ. വർഗീസ്. നിലവിൽ ഏതു റോഡിലും കുഴി ഉണ്ടായാൽ അടികിട്ടുന്നതു തനിക്കുമാത്രമാണ്. നഗരത്തിലെ റോഡുകളുടെ അവകാശികൾ ആരാണെന്നു പലർക്കും അറിയാത്തതാണ് തന്നെ പഴിക്കാൻ ഇടയാക്കുന്നത്. നിലവിൽ നഗരത്തിലെ റോഡുകൾ പലതും കോർപറേഷൻ, പിഡബ്ല്യുഡി, കെഎസ്ടിപി എന്നിവരുടെ അധീനതയിൽ ഉള്ളവയാണ്. ഇതിൽ പിഡബ്ല്യുഡി റോഡുകൾ പലതും തകർന്നതാണ്. ഇതിനെതിരേ പലതവണ പരാതികൾ പറഞ്ഞിട്ടും യാതൊരു പ്രയോജനവുമില്ല. ഫണ്ട് ഇല്ലാത്തതായിരിക്കാം റോഡ് നന്നാക്കാത്തതിന്‍റെ കാരണമെന്നാണ് തനിക്കു തോന്നുന്നത്. കോർപറേഷനുകീഴിലുള്ള റോഡുകളിലെ കുഴികൾ കഴിഞ്ഞ ആറിനുതന്നെ പൂർണമായും നികത്തിയതാണ്. ഏതാനും ചില റോഡുകളിൽമാത്രം മഴയിൽ ഒന്നോ രണ്ടോ കുഴികൾ ഉണ്ടായിട്ടുണ്ടാകാം. അതു സ്വാഭാവികംമാത്രമാണ്. ഓരോ ഡിവിഷനിലേക്കും റോഡ് നിർമാണത്തിനായി നൽകുന്ന തുക സ്ട്രീറ്റ് ലൈറ്റിനും മറ്റും ഉപയോഗിക്കുന്നതാണ് റോഡ് നിർമാണം താളംതെറ്റിക്കുന്നത്. കൗണ്‍സിലർമാരോടു കുഴികൾ ഉണ്ടെങ്കിൽ യഥാസമയം അറിയിക്കണമെന്നു നേരത്തേതന്നെ ആവശ്യപ്പെട്ടിട്ടുണ്ട്. മാത്രമല്ല ഓരോ ഡിവിഷനിലും ബിഎംബിസി ടാറിംഗ് ചെയ്തിട്ടുണ്ട്. സ്വന്തം കൈയിൽനിന്ന് പണമെടുത്ത് മറ്റു റോഡുകൾ നന്നാക്കാൻ ആഗ്രഹമുണ്ടങ്കിലും അതിനു പലവിധ നിയമപ്രശ്നങ്ങളുണ്ടെന്നും മേയർ പറഞ്ഞു.

എത്രയൊക്കെ പറഞ്ഞിട്ടും ഫലമില്ല; റോഡിൽ വാഴനട്ട് കൗൺസിലർ

തൃശൂർ: പൊതുമരാമത്തുവകുപ്പിന്‍റെ അനാസ്ഥയ്ക്കെതിരേ റോഡിൽ വാഴനട്ട് ഡിവിഷൻ കൗൺസിലറുടെ പ്രതിഷേധം. തകർന്നുതരിപ്പണമായ ജൂബിലി മിഷൻ ഹോസ്പിറ്റൽ റോഡിലാണ് ഡിവിഷൻ കൗൺസിലർ ലീല വർഗീസിന്‍റെ നേതൃത്വത്തിൽ വാഴനട്ടത്. പലതവണ പരാതിനൽകിയിട്ടും, പരസ്യമായി പ്രതിഷേധം നടത്തുമെന്നു പറഞ്ഞിട്ടും ഫലമില്ലാതായതോടെയാണ് വാഴനട്ടതെന്നും നിലവിൽ മഴമാറിയിട്ടും കുഴികൾ അടയ്ക്കാത്തതു ഫണ്ടില്ലാതെ അല്ലെന്നും അവർ അടയ്ക്കാത്തതു തെറ്റുതന്നെയാണെന്നും കൗൺസിലർ പറഞ്ഞു. മിഷൻ ക്വാർട്ടേഴ്സ് ഡിവിഷൻ കമ്മിറ്റി നടത്തിയ പ്രതിഷേധസമരം ഡിസിസി ജനറൽ സെക്രട്ടറിയും മുൻകൗൺസിലറുമായ ബൈജു സി. വർഗീസ് ഉദ്ഘാടനം ചെയ്തു. ലീല വർഗീസ് അധ്യക്ഷത വഹിച്ചു. ഡിവിഷൻ പ്രസിഡന്‍റ് അബി ആന്‍റണി, ബ്ലോക്ക് വൈസ് പ്രസിഡന്‍റ് കെ.എ. ടോണി എന്നിവർ പ്രസംഗിച്ചു.

കുഴികളിൽ മണ്ണിടൽ, കണ്ണിൽ പൊടിയിടൽ

തൃശൂരിലെ റോഡുകളിൽ കുഴികൾ മാത്രമല്ല, മെറ്റലും ഇനി ആളെ വീഴ്ത്തും സി.ജി. ജിജാസൽ തൃശൂർ: ലേണിംഗ് സിറ്റിയായ തൃശൂരിൽ ലേണിംഗ് എടുത്തവർക്കുമാത്രമല്ല ലൈസൻസ് എടുത്തവർക്കുപോലും നിരത്തിലിറങ്ങണമെങ്കിൽ അല്പസ്വല്പം അഭ്യാസം അറിയണം. നഗരത്തിലെ ദൈനംദിനയാത്ര വലിയൊരു ദുരിതമായി മാറുന്ന കാലത്ത്, നേരത്തേ മഴയിൽ രൂപപ്പെട്ട കുഴികളായിരുന്നു വില്ലനെങ്കിൽ ഇപ്പോൾ അവ നികത്താൻ കൊണ്ടുവന്ന മെറ്റലും പുതിയ അപകടഭീഷണി ഉയർത്തുകയാണ്. കഴിഞ്ഞദിവസം കോവിലകത്തുംപാടം റോഡിലെ കുഴിയിൽവീണ് സ്കൂട്ടർയാത്രികരായ ദന്പതികൾക്കു ഗുരുതരപരിക്കേൽക്കുകയും തുടർന്നു കുഴി നികത്തുകയും ചെയ്തിരുന്നു. എന്നാൽ ഇതിനുമുൻപ് നികത്തിയ കുഴികളിലെ മെറ്റലുകൾ റോഡിൽ പരന്നുകിടക്കുന്നതു നീക്കംചെയ്യാത്തത് പുതിയ അപകടങ്ങൾ ക്ഷണിച്ചുവരുത്തുന്ന അവസ്ഥയാണ്. സംഭവം അധികാരികളുടെ ശ്രദ്ധയിൽപ്പെട്ടെങ്കിലും, ഇത്തരത്തിലുള്ള സാഹചര്യം നഗരത്തിലെ പലയിടങ്ങളിലും ആവർത്തിക്കപ്പെടുന്നു. അയ്യന്തോൾ– പഞ്ചിക്കൽ റോഡിലും മാതൃകാറോഡിലും റോഡിനകത്തും ഇരുഭാഗത്തും മെറ്റൽ കിടക്കുന്നത് ഇരുചക്രവാഹനയാത്രികർക്കു വല്ലാതെ ബുദ്ധിമുട്ടാണ് സൃഷ്ടിക്കുന്നത്. മാതൃകാറോഡിൽ കുഴിനികത്താൻ കൊണ്ടുവന്ന മെറ്റൽമിശ്രിതം റോഡിൽതന്നെ കൂട്ടിയിട്ടിരിക്കുകയാണ്. മഴയിൽ ഈ മിശ്രിതം വഴുക്കുന്നതിനൊപ്പം, റോഡിന്‍റെ ഉയരമാറ്റവും യാത്രക്കാർക്കു പുതിയ കെണിയാണ്.

ബൈക്ക് അപകടത്തിൽ പരിക്കേറ്റ യുവതി മരിച്ചു

വടക്കാഞ്ചേരി: ബൈക്ക് അപകടത്തിൽ ചികിത്സയിൽകഴിഞ്ഞിരുന്ന യുവതി മരിച്ചു. കട്ടിലപൂവം മേലില്ലം മുട്ടപ്പിള്ളിൽ വീട്ടിൽ ബിനോയ് വർഗീസിന്‍റെ ഭാര്യ മേരി ഏലിയാസ്(46) ആണ് മരിച്ചത്. കഴിഞ്ഞ മാസം 26 ന് മകനൊപ്പം ബൈക്കിൽ സഞ്ചരിക്കുന്നതിനിടെ വേങ്ങലകുണ്ട് പ്രദേശത്തുണ്ടായ അപകടത്തിലാണ് മേരിക്ക് പരിക്കേറ്റത്. തുടർന്ന് തൃശുർ മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. സംസ്കാരം ഇന്ന് ഉച്ചയ്ക്ക് മൂന്നിന് കട്ടിലപുവം സെന്‍റ് മേരീസ് പള്ളിയിൽ. മക്കൾ: പവിത്രൻ, പ്രതിഭ, ബിനോയ്. ഭർത്താവ്: ബിനോയ് വർഗീസ് (വെള്ളാനിക്കര കാർഷിക സർവകലാശാല ജീവനക്കാരൻ).

സ്നേഹാദരവ് - 2025

ചാലക്കുടി: സെന്‍റ് മേരീസ് ഫൊറോന പള്ളി കുടുംബകൂട്ടായ്മ കേന്ദ്രസമിതിയുടെ വാർഷികം സ്നേഹദരവ് - 2025 നടത്തി. വികാരി ഫാ. വർഗീസ് പാത്താടൻ അധ്യക്ഷത വഹിച്ചു. മുരിങ്ങൂർ ഡിംസ് മീഡിയ കോളജ് ഡയറക്ടർ ഫാ. ആന്‍റണി വടക്കേക്കര ഉദ്ഘാടനം ചെയ്തു. ശാരീരിക വെല്ലുവിളികളെ അതിജീവിച്ച് എൽഎൽബി പാസായ ജോൺപോൾ കല്ലനെയും പന്ത്രണ്ടാം ക്ലാസ് ഉന്നതവിജയം കരസ്ഥമാക്കിയ സോളമൻ ജോഷിയെയും ഉന്നതവിജയം നേടിയവരെയും വിവാഹജൂബിലി ആഘോഷിക്കുന്നവരെയും 2022-25 വർഷത്തിലെ യൂണിറ്റ് ഭാരവാഹികളെയും ആദരിച്ചു. അസി. വികാരിമാരായ ഫാ. ക്രിസ്റ്റി ചിറ്റക്കര, ഫാ. അഖിൽ തണ്ടിയേക്കൽ, ഫാ. ഡിക്സൺ കാഞ്ഞൂക്കാരൻ, രൂപത കേന്ദ്രസമിതി സെക്രട്ടറി ജോജി പടിഞ്ഞാക്കര, ഫൊറോന കേന്ദ്രസമിതി പ്രസിഡന്‍റ് ജിയോ കൈതാരത്ത്, നടൻ അനിൽ ആന്‍റോ, കേന്ദ്രസമിതി പ്രസിഡന്‍റ് ജോഷി പുത്തരിക്കൽ, സെക്രട്ടറി ജോസി കൊട്ടേക്കാരൻ, ജോർജ് വാച്ചാലുക്കൽ, വർഗീസ് കാട്ടുപറമ്പിൽ തുടങ്ങിയവർ പ്രസംഗിച്ചു. നേരത്തേ ദിവ്യബലിക്ക് രൂപത വികാരി ജനറാൾ മോൺ. ജോളി വടക്കൻ കാർമികത്വം വഹിച്ചു.

റോഡിലേക്കു കടക്കാൻ കുഴി താണ്ടണം

ചാലക്കുടി: ടൈൽ വിരിച്ച റോഡൊക്കെയുണ്ട്. എന്നാൽ ഈ റോഡിലേക്കു പ്രവേശിക്കണമെങ്കിൽ വലിയ കുഴി താണ്ടണം. സൗത്ത് ജംഗ്ഷനിൽനിന്നു പാലസ് റോഡിലേക്കുള്ള വൈദ്യഭൂഷണം രാഘവൻ തിരുമുല്പാട് റോഡിന്‍റെ അവസ്ഥയാണിത്. റോഡിലേക്കു പ്രവേശിക്കുന്ന ഭാഗത്തു വലിയ കുഴിയാണ്. മഴക്കാലത്ത് വെള്ളം നിറഞ്ഞുകിടക്കുന്നതിനാൽ കുഴിയുടെ ആഴം അറിയാതെ ഇതിലൂടെ ഇരുചക്രം വാഹനങ്ങൾ ഓടിക്കുന്നവർക്ക് അപകടം പതിവാണ്. റോഡിലെ കുഴി അടയ്ക്കാത്തതിൽ നാട്ടുകാർ പ്രതിഷേധത്തിനൊരുങ്ങുകയാണ്.

വിദ്യാഭ്യാസ പുരസ്കാരങ്ങൾ സമ്മാനിച്ചു

സെന്‍റ് മേരീസ് ഹൈസ്‌കൂൾ ഇരിങ്ങാലക്കുട: സെന്‍റ് മേരീസ് ഹൈസ്‌കൂളില്‍ നടന്ന വിജയോത്സവം ബിഷപ് മാര്‍ പോളി കണ്ണൂക്കാടന്‍ ഉദ്ഘാടനം ചെയ്തു. ഇരിങ്ങാലക്കുട സെന്‍റ്് തോമസ് കത്തീഡ്രല്‍ അസിസ്റ്റന്‍റ്് വികാരി ഫാ. ആന്‍റണി നമ്പളം അധ്യക്ഷത വഹിച്ചു. ഹെഡ്മിസ്ട്രസ് റീജ ജോസ്, ഇരിങ്ങാലക്കുട രൂപത കോഓ‍പ്പറേറ്റ് മാനേജര്‍ ഫാ. സീജോ ഇരിമ്പന്‍, വാര്‍ഡ് കൗണ്‍സിലര്‍ ഫെനി എബിന്‍, പിടിഎ പ്രസിഡന്‍റ് അജോ ജോണ്‍, ഹയര്‍ സെക്കന്‍ഡറി സ്‌കൂള്‍ അധ്യാപകന്‍ ജിഫിന്‍, മുന്‍ പിടിഎ പ്രസിഡന്‍റ് പി.പി. റപ്പായി, കത്തീഡ്രല്‍ ട്രസ്റ്റി തിമോസ് പാറേക്കാടന്‍, സ്‌കൂള്‍ലീഡര്‍ ക്രിസ്റ്റ ഡിയോണ്‍, സീനിയര്‍ അധ്യാപിക ബിന്ദു വി. റപ്പായി, ആല്‍ബ മെറിന്‍ എന്നിവര്‍ സംസാരിച്ചു. പാപ്പിനിവട്ടം സർവീസ് സഹകരണ ബാങ്ക് കയ്പമംഗലം: മതിലകം പാപ്പിനിവട്ടം സർവീസ് സഹകരണ ബാങ്ക് "വിദ്യാദരം' വിദ്യാഭ്യാസ അവാർഡ് വിതരണവും പുരസ്കാര സമർപ്പണവും നടന്നു. മതിലകം സാഞ്ചോ ഓഡിറ്റോറിയത്തിൽ സംഘടിപ്പിച്ച സമാദരണ സമ്മേളനം ഇ.ടി. ടൈസൺ എംഎൽഎ ഉദ്ഘാടനം ചെയ്തു. മതിലകം ഗ്രാമപഞ്ചായത്ത് പ്രസിഡന്‍റ് സീനത്ത് ബഷീർ അധ്യക്ഷയായിരുന്നു.എസ്എസ്എൽസി, പ്ലസ്ടു, യുഎസ്എസ്, എൽഎസ്എസ് പരീക്ഷകളിൽ ബാങ്ക് അംഗങ്ങൾ, നിക്ഷേപകർ, ജീവനക്കാർ എന്നിവരുടെ മക്കളിൽ ഉന്നതവിജയം കരസ്ഥമാക്കിയ കുട്ടികൾക്കുള്ള അവാർഡുകൾ വിതരണം ചെയ്തു. ചടങ്ങിൽ പ്രതിഭകളായ പി.ബി. മലൈഖയെയും മിസ്ബ ഗസ്‌നിയെയും ആദരിച്ചു. കൊടുങ്ങല്ലൂർ എഇഒ പ്രശാന്ത് മാസ്റ്റർ മുഖ്യപ്രഭാഷണം നടത്തി. ഗണിത ശാസ്ത്രജ്ഞനും വേദിക് മാത്തമാറ്റിക്സ് "മാത്തമാറ്റീഷൻ ഓഫ് ദ ഇയർ 2024' അവാർഡ് ജേതാവുമായ ടി.എൻ. രാമചന്ദ്രന്‍റെ ഗണിത പ്രഭാഷണം കുട്ടികൾക്ക് ഏറെ പ്രയോജനകരമായി. ബാങ്ക് പ്രസിഡന്‍റ് ബേബി പ്രഭാകരൻ, മതിലകം ബ്ലോക്ക് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഷീജ ബാബു, മതിലകം ഗ്രാമപഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ സുമതി സുന്ദരൻ, പഞ്ചായത്ത് മെമ്പർ ഒ.എ. ജെൻഡ്രിൻ, ബാങ്ക് വൈസ് പ്രസിഡന്‍റ്് ഗീത പ്രസാദ്, ബാങ്ക് സെക്രട്ടറി ടി.സി. സിനി തുടങ്ങിയവർ പ്രസംഗിച്ചു. ബാങ്ക് ഡയറക്ടർമാർ, ജീവനക്കാർ സഹകാരികൾ തുടങ്ങിയവർ പങ്കെടുത്തു. ഉമ്മൻ ചാണ്ടി എഡ്യുക്കേഷണൽ എക്സലൻസ് അവാർഡ് കൊടുങ്ങല്ലൂർ: താലൂക്ക് വ്യാപാരി വ്യവസായി സഹകരണ സംഘം മെമ്പർമാരുടെ മക്കൾക്കും സംഘത്തിന്‍റെ സമീപ പ്രദേശത്തുമുള്ള വിവിധ വാർഡുകളിൽ എസ്എസ്എൽ സി, പ്ലസ്ടു പരീക്ഷകളിൽ ഫുൾ എപ്ലസ് നേടിയ വിദ്യാർഥികളെ ഉമ്മൻചാണ്ടി എഡ്യുക്കേഷണൽ എക്സലൻസ് അവാർഡ് നൽകി ആദരിച്ചു. ബെന്നി ബഹനാൻ എംപി സമ്മേളനം ഉദ്ഘാടനം ചെയ്തു. സംഘം പ്രസിഡന്‍റ് വി.എം. ജോണി അധ്യക്ഷത വഹിച്ചു. നഗരസഭ ചെയർപേഴ്സൺ ടി.കെ. ഗീത, കോട്ടപ്പുറം രൂപത മോൺ. റോക്കി റോബി കളത്തിൽ, ഡിസിസി സെക്രട്ടറി ടി.എം. നാസർ, ബ്ലോക്ക് കോൺഗ്രസ് പ്രസിഡന്‍റ് ഇ.എസ്. സാബു, ഇ.കെ. സോമൻ, ജോഷി ചക്കാമാട്ടിൽ, സാലി ഫ്രാൻസീസ് എന്നിവർ സംസാരിച്ചു. സംഘം വൈസ് പ്രസിഡന്‍റ് ജെയിംസ് തിയ്യാടി സ്വാഗതവും സെക്രട്ടറി എം.വി. റീജ നന്ദിയും പറഞ്ഞു.

ഇരിങ്ങാലക്കുട സെന്‍റ്് തോമസ് കത്തീഡ്രല്‍ ഇടവകദിനാഘോഷം നടത്തി

ഇരിങ്ങാലക്കുട: സെന്‍റ്് തോമസ് കത്തീഡ്രല്‍ ഇടവക ദിനാഘോഷം രൂപത വികാരി ജനറാള്‍ മോണ്‍. ജോളി വടക്കന്‍ ഉദ്ഘാടനം ചെയ്തു. കത്തീഡ്രല്‍ വികാരി റവ. ഡോ. ലാസര്‍ കുറ്റിക്കാടന്‍ അധ്യക്ഷത വഹിച്ചു. അസിസ്റ്റന്‍റ് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം, ട്രസ്റ്റിമാരായ ബാബു ജോസ് പുത്തനങ്ങാടി, തിമോസ് പാറേക്കാടന്‍, പോള്‍ ചാമപറമ്പില്‍, ജോമോന്‍ തട്ടില്‍ മണ്ടി ഡേവി, കേന്ദ്രസമിതി പ്രസിഡന്‍റ്് ജോമി ചേറ്റുപുഴക്കാരന്‍, എന്നിവര്‍ സംസാരിച്ചു. മാതൃവേദി സംഘടിപ്പിച്ച പാചകറാണി മത്സരത്തില്‍ ലിന്‍റാ പോള്‍സണ്‍ ഒന്നാം സ്ഥാനം കരസ്ഥമാക്കി. വിന്‍സി ടോണി രണ്ടാം സ്ഥാനവും ജോഷ്മി ലാലു മൂന്നാം സ്ഥാനവും കരസ്ഥമാക്കി. മാതൃവേദി പ്രസിഡന്‍റ് ജോയ്‌സി ഡേവിസ് ചക്കാലക്കല്‍, ജനറല്‍ കണ്‍വീനര്‍ റോസിലി പോള്‍ തട്ടില്‍, സെക്രട്ടറി മൃദുല സ്റ്റാന്‍ലി, കൊച്ചുത്രേസ്യ ജയ്‌സണ്‍, ഉണ്ണി മേരി ബോബി തുടങ്ങിയവര്‍ സംസാരിച്ചു. ദുക്‌റാന തിരുനാളിനോട് അനുബന്ധിച്ച് കത്തീഡ്രല്‍ സിഎല്‍സിയുടെ ആഭിമുഖ്യത്തില്‍ നടത്തുന്ന മരിയന്‍ എക്‌സിബിഷന്‍റെ ലോഗോ പ്രകാശനം വികാരി റവ.ഡോ. ലാസര്‍ കുറ്റിക്കാടന്‍ നിര്‍വഹിച്ചു.

വിദ്യാർഥികൾക്കായി കഥകളി സെമിനാറും അവതരണവും നടന്നു

മേലൂർ: കേരളത്തിന്‍റെ ക്ലാസിക് കലാരൂപമായ കഥകളിയെക്കുറിച്ച് അടുത്തറിയാൻ ക്ലാസ്മുറിയിൽ നിന്നും കുട്ടികൾ കളിയരങ്ങിലേക്ക്. പത്താം ക്ലാസിലെ മലയാള പാഠപുസ്തകത്തിലെ കഥകളി ആസ്പദമാക്കിയുള്ള പാഠഭാഗങ്ങൾ പരിചയപ്പെടാനും ഹൃദിസ്ഥമാക്കാനുമാണ് ചാലക്കുടി കാർമൽ ഹയർസെക്കൻഡറി സ്കൂളിലെ കുട്ടികൾക്കായി കഥകളി സെമിനാർ സംഘടിപ്പിച്ചത്. മേലൂര്‍ കാലടി ശിവശക്തി ഭജന മണ്ഡപത്തില്‍ ചാലക്കുടി നമ്പീശന്‍ സ്മാരക കഥകളി ക്ലബ്ബിന്‍റെ സഹകരണത്തോടെയാണ് പരിപാടി സംഘടിപ്പിച്ചത്. കഥകളി സംഘാടകനായ മുരളീധരന്‍റെ നേതൃത്വത്തില്‍ നളചരിതം ആട്ടക്കഥ ഒന്നാം ദിവസം അവതരിപ്പിച്ചു. കഥകളിയുടെ അരങ്ങിലും അണിയറയിലും നടക്കുന്ന കാര്യങ്ങൾ പരിചയപ്പെടുത്തുന്നതിന് പ്രശസ്ത കലാകാരന്മാരായ ആര്‍.എല്‍.വി. ക്ഷമാരാജ, കലാമണ്ഡലം സൂര്യകിരണ്‍, കലാനിലയം രാജീവന്‍, ഹരിശങ്കര്‍ കണ്ണമംഗലം, കലാമണ്ഡലം സുഹാസ്, ആര്‍.എല്‍.വി. നീലകണ്ഠന്‍, മിഥുന്‍ മുരളി എന്നിവര്‍ അണിനിരന്നു. അവതരണത്തിനുശേഷം കുട്ടികൾക്ക് കഥകളി മുദ്രകള്‍ ചെയ്തു നോക്കുന്നതിനും സംശയനിവാരണത്തിനും അവസരം ലഭിച്ചു. സ്‌കൂള്‍ പ്രിന്‍സിപ്പല്‍ ഫാ. ജോസ് താണിക്കലും കുട്ടികൾക്കൊപ്പം ഉണ്ടായിരുന്നു.

മാലിന്യം വേര്‍തിരിക്കാനാകാതെ ഹരിതകര്‍മസേന

എടതിരിഞ്ഞി: ചോര്‍ന്നൊലിക്കുന്ന വാടകക്കെട്ടിടത്തില്‍നിന്ന് മാലിന്യം ശേഖരിക്കുന്ന സ്ഥലം (എംസിഎഫ്) മാറ്റണമെന്നാവശ്യപ്പെട്ട് പടിയൂര്‍ പഞ്ചായത്തിലെ എടതിരിഞ്ഞി ക്ലസ്റ്ററിലെ ഹരിതകര്‍മസേനാംഗങ്ങള്‍. കെട്ടിടം ചോര്‍ന്നൊലിച്ചതു കാരണം കഴിഞ്ഞ ദിവസം മാലിന്യങ്ങള്‍ വേര്‍തിരിക്കുന്നത് നിര്‍ത്തേണ്ടി വന്നു. തുടര്‍ന്ന് പഞ്ചായത്ത് ഇടപെട്ട് മാലിന്യങ്ങള്‍ പടിയൂര്‍ ക്ലസ്റ്ററിലെ എംസിഎഫിലേക്ക് മാറ്റി. തുടര്‍ന്നാണ് വേര്‍തിരിക്കല്‍ പുനരാരംഭിച്ചത്. ശനിയാഴ്ച രാവിലെയാണ് ചോര്‍ന്നൊലിക്കുന്ന കെട്ടിടത്തില്‍ നിന്ന് എംസിഎഫ് മാറ്റണമെന്നാവശ്യപ്പെട്ട് എടതിരിഞ്ഞി ക്ലസ്റ്ററിലെ ഹരിതകര്‍മസേനാംഗങ്ങള്‍ രംഗത്തെത്തിയത്. കഴിഞ്ഞ നാലുവര്‍ഷമായി ഇതേകെട്ടിടത്തില്‍തന്നെയാണ് എടതിരിഞ്ഞി ക്ലസ്റ്ററിന്‍റെ എംസിഎഫ് പ്രവര്‍ത്തിക്കുന്നത്. മഴപെയ്യാന്‍ തുടങ്ങിയതോടെ വീടിനകത്തും പുറത്തും ഒരുപോലെ വെള്ളം നിറയുന്നു. മാലിന്യങ്ങള്‍ ശേഖരിക്കാന്‍ എംസിഎഫില്‍ സ്ഥലമില്ലാത്തതിനാല്‍ വാര്‍ഡുകളില്‍തന്നെ പലസ്ഥലത്തായി കൂട്ടിയിട്ടിരിക്കുകയാണ്. കഴിഞ്ഞ മാസം പഞ്ചായത്തില്‍ ഇക്കാര്യം അറിയിച്ചപ്പോള്‍ ഷീറ്റിട്ട് നല്‍കാമെന്ന് അറിയിച്ചിരുന്നെങ്കിലും വീട്ടുടമ സമ്മതിച്ചില്ല. ഏഴുവാര്‍ഡ് ഉള്‍പ്പെട്ട എടതിരിഞ്ഞി ക്ലസ്റ്ററില്‍ 13 പേരാണ് ജോലി ചെയ്യുന്നത്. 17 തരം മാലിന്യങ്ങളാണ് സേനാംഗങ്ങള്‍ വേര്‍തിരിക്കുന്നത്. ക്ലസ്റ്റര്‍ ആക്കിയതോടെ ഏഴ് വാര്‍ഡിലും പ്ലാസ്റ്റിക് ശേഖരിക്കാന്‍ പോകണം. കിട്ടുന്ന വേതനത്തില്‍ 10 ശതമാനം കണ്‍സോര്‍ഷ്യം ഫണ്ടില്‍ പിടിച്ചശേഷമാണ് തുക കിട്ടുന്നത്. അതില്‍ നിന്നാണ് മാലിന്യശേഖരണത്തിനുള്ള ചാക്കുകളും വാങ്ങുന്നത്. കഴിഞ്ഞമാസം വേര്‍തിരിക്കല്‍ വേണ്ടത്ര നടന്നില്ലെങ്കിലും മാനുഷിക പരിഗണന കണക്കിലെടുത്ത് പഞ്ചായത്ത് ശമ്പളം നല്‍കുകയായിരുന്നുവെന്ന് സേനാംഗങ്ങള്‍ പറഞ്ഞു. ഇപ്പോള്‍ അഞ്ചാംതീയതിക്ക് മുമ്പായി തരംതിരിക്കല്‍ പൂര്‍ത്തിയാക്കാനാണ് പഞ്ചായത്ത് ആവശ്യപ്പെട്ടിരിക്കുന്നത്. എന്നാല്‍ ചെളിനിറഞ്ഞ കെട്ടിടത്തിലിരുന്ന് മാലിന്യം വേര്‍തിരിക്കല്‍ സാധിക്കില്ലെന്ന് സേനാംഗങ്ങള്‍ പറഞ്ഞു. എംസിഎഫ് മറ്റൊരു സ്ഥലത്തേക്ക് മാറ്റണമെന്നും ഇക്കാര്യത്തില്‍ പഞ്ചായത്ത് അടിയന്തരമായി ഇടപെടണമെന്നും അവര്‍ ആവശ്യപ്പെട്ടു.

വയോജനക്ലബ്ബിൽ വിയോജനക്കുറിപ്പ്

ചാലക്കുടി: നഗരസഭ വക ഭൂമിയില്‍ വയോജന ക്ലബ് ആരംഭിക്കുവാനുള്ള തീരുമാനത്തില്‍ പ്രതിപക്ഷാംഗങ്ങള്‍ വിയോജന ക്കുറിപ്പ് നൽകി. പോട്ടയില്‍ പണംകൊടുത്ത് ഏറ്റെടുത്ത, നിലവില്‍ മിനിമാര്‍ക്കറ്റ് പ്രവര്‍ത്തിക്കുന്ന രണ്ടരയേക്കര്‍ ഭൂമിയില്‍ വിവിധ പദ്ധതികള്‍ക്കായി നീക്കിവച്ചിട്ടുള്ള ഭൂമിയില്‍ ഒരു വാര്‍ഡിന്‍റെ വയോജന മന്ദിരം ആരംഭിക്കുന്നതിന് ഭൂമി വിട്ടുനല്‍കുന്നതിനെതിരേയാണ് പ്രതിപക്ഷാംഗങ്ങള്‍ വിയോജിപ്പ് രേഖപ്പെടുത്തിയത്. മറ്റു പല വാര്‍ഡുകളിലും കൗണ്‍സിലര്‍മാരുടെ നേതൃത്വത്തില്‍ സ്ഥലം കണ്ടെത്തിയാണ് വയോജനമന്ദിരങ്ങള്‍ പണിതിട്ടുള്ളതെന്ന് പ്രതിപക്ഷനേതാവ് സി.എസ്. സുരേഷ് ചൂണ്ടിക്കാട്ടി. ഇത്തരം പ്രവര്‍ത്തനങ്ങള്‍ മാതൃകയാക്കാതെ പോട്ട മേഖലയുടെ സമഗ്രവികസനത്തിനായി ഉപയോഗിക്കേണ്ട ഭൂമി യാതൊരുവിധ മാസ്റ്റര്‍പ്ലാനുമില്ലാതെ ചെറുകഷണങ്ങളാക്കി വാര്‍ഡിലെ പ്രവര്‍ത്തനങ്ങള്‍ക്കായി അനുവദിക്കുന്നത് ശരിയല്ലെന്ന് അറിയിച്ചു കൊണ്ടാണ് കുറിപ്പ് നൽകിയത്. നഗരസഭയിലെ വിവിധ വാര്‍ഡുകളില്‍ അനധികൃതമായി സ്ഥാപിച്ചിട്ടുള്ള സ്ട്രീറ്റ് ലൈറ്റുകളില്‍ ലൈന്‍ വലിക്കുന്നതിന് ജോയിന്‍റ് ഇന്‍സ്പെക‌്ഷന്‍ നടത്തിയതിനുശേഷം കെഎസ്ഇബി ആവശ്യപ്പെട്ട തുക അടയ്ക്കാനുള്ള തീരുമാനത്തിനെതിരേയും പ്രതിപക്ഷാംഗങ്ങള്‍ വിയോജിപ്പ് രേഖപ്പെടുത്തി. സ്ട്രീറ്റ് ലൈന്‍ വലിച്ചതിന്‍റെ പേരില്‍ പണം നല്‍കാന്‍ പാടില്ലെന്നും വാര്‍ഡുകളില്‍ പുതുതായി വലിക്കുന്ന ലൈനുകളുടെ തുക അടയ്ക്കുന്നതില്‍ പ്രതിപക്ഷാംഗങ്ങള്‍ എതിരല്ലെന്നും എല്‍ഡിഎഫ് പാര്‍ലമെന്‍ററി പാര്‍ട്ടി ലീഡര്‍ സി.എസ്. സുരേഷ് പറഞ്ഞു. ഇതുസംബന്ധിച്ച ചര്‍ച്ചയില്‍ പ്രതിപക്ഷ അംഗം വി.ജെ. ജോജിയും വികസന സ്റ്റാൻസിംഗ് കമ്മിറ്റി ചെയർമാൻ കെ.വി. പോളും തമ്മിൽ വാക്കേറ്റവും ബഹളവും നടന്നു. ഒടുവിൽ ചെയർമാൻ ഷിബു വാലപ്പൻ ഇടപെട്ടാണ് വാക്കേറ്റം അവസാനിപ്പിച്ചത്.

ബ്രഹ്മകുളം സെന്‍റ് തെരേസാസ് ഗേൾസ് ഹൈസ്കൂളിൽ വിജയോത്സവം

ഗുരുവായൂർ: ബ്രഹ്മകുളം സെന്‍റ് തെരേസാസ് ഗേൾസ് ഹൈസ് കൂളിൽ വിജയോത്സവം 2025 സെ ന്‍റ് തോമസ് പള്ളി വികാരി ഫാ. ഡേവിസ് പനംകുളം ഉദ്ഘാടനം ചെയ്തു. തൃശൂർ അസീസി പ്രൊ വിൻസ് കോർപറേറ്റ് മാനേജർ സിസ്റ്റർ റാണി കുരിയൻ അധ്യക്ഷത വഹിച്ചു. എസ്എസ്എൽസി പരീക്ഷയിൽ ഉന്നതവിജയം നേടിയവരെയും വിവിധ മത്സരങ്ങളിലെ സമ്മാനർഹരെയും അനുമോദിച്ചു. മുൻ ഡിഡിഇ എ.കെ. അജിതകുമാർ സമ്മാനദാനം നിർവഹിച്ചു. കൗൺസിലർ ഷിൽവ ജോഷി, പിടിഎ പ്രസിഡന്‍റ് ആൻസൻ ആ ന്‍റോ, പ്രധാനാധ്യാപിക സിസ്റ്റർ ഡെയ്സ് മരിയ, സ്റ്റെഫി ഇട്ടിയേച്ചൻ എന്നിവർ പ്രസംഗിച്ചു.

ഇന്നത്തെ സ്വകാര്യബസ് പണിമുടക്ക് മാറ്റിവച്ചു

പുന്നയൂർക്കുളം: പൊന്നാനി - ഗുരുവായൂർ സംസ്ഥാനപാതയിൽ ഇന്നു നടത്താൻ തീരുമാനിച്ചിരുന്ന ബസ് പണിമുടക്ക് മാറ്റിവച്ചു. റോഡിന്‍റെ അറ്റകുറ്റപ്പണികൾ നടത്താത്തതിൽ പ്രതിഷേധിച്ചാണു സ്വകാര്യബസ് തൊഴിലാളികൾ സൂചന പണിമുടക്ക് പ്രഖ്യാപിച്ചിരുന്നത്. ഗുരുവായൂർ - കുണ്ടുകടവ് സംസ്ഥാന പാതയിൽ രണ്ടുവർഷമായി അറ്റകുറ്റപ്പണികൾ നടത്താത്തതിനെ തുടർന്ന് പാത തകർന്നുകിടക്കുകയാണ്. റോഡിന്‍റെ ശോച്യാവസ്ഥ പരിഹരിക്കണമെന്ന് ബസ് തൊഴിലാളികൾ ആവശ്യപ്പെട്ടെങ്കിലും നടപടി ഉണ്ടായില്ല. ജൂൺ 30 നുമുമ്പ് റോഡിന്‍റെ അറ്റകുറ്റപ്പണികൾ നടത്തിയില്ലെങ്കിൽ ജൂലൈ ഒന്നിന് സൂചന പണിമുടക്ക് നടത്തുമെന്ന് ഇക്കഴിഞ്ഞ 22 ന് പ്രഖ്യാപിച്ചിരുന്നു. അഞ്ചിനകം റോഡിന്‍റെ അറ്റകുറ്റപ്പണികൾ നടത്താമെന്ന് പൊതുമരാമത്ത് അധികൃതർ ഉറപ്പുനൽകിയതായി ബസ് ഉടമകൾ അറിയിച്ചതിനെ തുടർന്നാണു പണിമുടക്ക് മാറ്റിയതെന്ന് പ്രൈവറ്റ് ബസ് എംപ്ലോയീസ് അസോസിയേഷൻ ഭാരവാഹികൾ അറിയിച്ചു. ഈ റൂട്ടിലെ ചില മേഖലകളിലെ വലിയ കുഴികൾ കഴിഞ്ഞ ദിവസം അടച്ചു. മഴ മാറിയാൽ ടാർ ചെയ്യാമെന്ന് അധികൃതർ അറിയിച്ചു. ജലജീവൻ മിഷൻ പദ്ധതിക്കായി റോഡ് പൊളിച്ചതും നികത്തിയിട്ടില്ല. ഇതും സമരപ്രഖ്യാപനത്തിനു കാരണമായി.

സാമുദായികശക്തീകരണം സമൂഹത്തിന്‍റെ പുരോഗതി ലക്ഷ്യമിടണം: മാർ നീലങ്കാവിൽ

തൃശൂർ: സമുദായശക്തീകരണ പ്രവർത്തനങ്ങൾ സമൂഹത്തിന്‍റെ ഉന്നമനംകൂടി ലക്ഷ്യമിടുന്നതാകണമെന്നു തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ. ക്രൈസ്തവസഭകളുടെ സാമൂഹികക്ഷേമ പ്രവർത്തനങ്ങൾ സമൂഹത്തിന്‍റെ ഉന്നതിക്കായിരുന്നുവെന്നും അദ്ദേഹം പറഞ്ഞു. സഭയും സമുദായവും നേരിടുന്ന അവഗണനകളും മറ്റു പ്രശ്നങ്ങളും വിശ്വാസസമൂഹത്തിന്‍റെ ശ്രദ്ധയിലെത്തിക്കാൻ ഇടവകകളിൽ സംഘടിപ്പിക്കുന്ന ജാഗ്രതാസദസുകളുടെ അതിരൂപതാതല ഉദ് ഘാടനം ചുവന്നമണ്ണ് സെന്‍റ് ജോസഫ് പള്ളിയിൽ നിർവഹിച്ചു പ്രസംഗിക്കുകയായിരുന്നു അദ്ദേഹം. വികാരി ഫാ. അനു ചാലിൽ, വികാരി ജനറാൾ മോണ്‍. ജെയ്സണ്‍ കൂനംപ്ലാക്കൽ, ഫൊറോന വികാരി ഫാ. തോമസ് വടുക്കൂട്ട്, കത്തോലിക്ക കോണ്‍ഗ്രസ് ഡയറക്ടർ ഫാ. ജിജോ വള്ളൂപ്പാറ, പ്രസിഡന്‍റ് ഡോ. ജോബി കാക്കശേരി, അഡ്വ. ബിജു കുണ്ടുകുളം, പാസ്റ്ററൽ കൗണ്‍സിൽ സെക്രട്ടറി ജോഷി വടക്കൻ, ട്രസ്റ്റി ഫ്രാൻസീസ് വല്ലൂരാൻ, സി.ഡി. റോയ് എന്നിവർ പ്രസംഗിച്ചു.

തെരുവുനായയുടെ ആക്രമണത്തിൽ വിദ്യാർഥിയടക്കം മൂന്നുപേർക്കു പരിക്ക്

എരുമപ്പെട്ടി: കടങ്ങോട് പഞ്ചായത്തിലെ ആദൂരിൽ വിദ്യാർഥിയുൾപ്പടെ മൂന്നുപേരെ തെരുവുനായ ആക്രമിച്ചു. പുലിയന്നൂർ ഗവ. യുപി സ്കൂളിലെ ഏഴാം ക്ലാസ് വിദ്യാർഥിനിയും തോന്നല്ലൂർ കല്ലുവളപ്പിൽ ഹംസത്തിന്‍റെ മകളുമായ ഹന ഷെറിൻ, ചുള്ളിയി ൽ സുലൈമാന്‍റെ ഭാര്യ ഫൗസിയ, കല്ലിങ്ങലകത്ത് കുഞ്ഞുമോൻ ഭാര്യ റുഖിയ എന്നിവർക്കാണ് കടിയേറ്റത്. ഇന്നലെ രാവിലെ പത്തോടെ ആദൂർ ജുമാഅത്ത് പള്ളിക്കു സമീപവും കാഞ്ഞിരമുറ്റം പള്ളിക്കു സമീപവും വെച്ചാണ് ആക്രമണമുണ്ടായത്. സ്കൂൾ വാഹനം കാത്ത് നിൽക്കുമ്പോഴാണ് ഹന ഷെറിനെ നായ ആക്രമിച്ചത്. അസുഖബാധിതയായ 75 വയസുള്ള റുഖിയയെ വീടിന്‍റെ അകത്തേയ്ക്കു കയറിയാണു നായ കടിച്ചത്. മൂന്നുപേരേയും തൃശൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. നായയ്ക്ക് പേവിഷ ബാധയുടെ ലക്ഷണമുണ്ട്. നായയെ പിന്നീട് നാട്ടുകാരുടെ സഹായത്തോടെ ഡോഗ് റെസ്ക്യൂ പ്രവർത്തകനായ ബൈജു കടങ്ങോട് പിടികൂടി. പഞ്ചായത്ത് വൈസ് പ്രസിഡന്‍റ് പി.എസ്. പുരുഷോത്തമന്‍റെ നേതൃത്വത്തിൽ കടങ്ങോട് വെറ്റിനറി സർജൻ മനോജ് തെറ്റയിലും മൃഗസംരക്ഷണ വകുപ്പ് ഉദ്യോഗസ്ഥരും സ്ഥലത്തെത്തി. പിടികൂടിയ നായയ്ക്കും പരിസരത്തുള്ള വീടുകളിലെ നായകൾക്കും വാക്സിൻ കുത്തിവച്ചു. കഴിഞ്ഞ ദിവസം വേലൂരിൽ കുറുനരികൾ രണ്ടുപേരെ കടിച്ചിരുന്നു. കുറുവന്നൂർ വാട്ടർ ടാങ്കിനുസമീപം പെരുമ്പിള്ളി വീട്ടിൽ രാജൻ, തണ്ടിലം പൊടിയട വീട്ടിൽ വിജയൻ എന്നിവരെയാണ് കുറുനരി കടിച്ചത്. ഇവരും തൃശൂർ മെഡിക്കൽ കോളജ് ആശുപത്രിയിൽ ചികിത്സതേടി.

ആരോഗ്യരംഗമുൾപ്പടെ സർവമേഖലയും തകർന്നടിഞ്ഞു: സന്ദീപ് വാര്യർ

എരുമപ്പെട്ടി: കേരളത്തിന്‍റെ ആരോഗ്യ രംഗം ഉൾപ്പടെ സർവമേഖലയും തകർന്നടിഞ്ഞൂവെന്ന് കോൺഗ്രസ് വക്താവ് സന്ദീപ് വാര്യർ. സിപിഎം നേതൃത്വം നൽകുന്ന എരുമപ്പെട്ടി പഞ്ചായത്ത് ഭരണസമിതിയുടെ അഴിമതിക്കും ദുർഭരണത്തിനുമെതിരെ കോൺഗ്രസ് ചിറ്റണ്ടയിൽ സംഘടിപ്പിച്ച ജനകീയ വിചാരണ സദസ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആരോഗ്യമേഖല സമ്പൂർണമായും തകർന്നതിനെത്തുടർന്ന് സാധാരണക്കാരായ രോഗികൾ ദുരിതമനുഭവിക്കുകയാണ്. സർക്കാർ മെഡിക്കൽ കോളജുകളിൽ ഉൾപ്പടെ അടിയന്തര സർജറിക്ക് ആവശ്യമായ നൂലും ഉപകരണങ്ങളും മരുന്നുകളും ഇല്ലെന്ന് ബന്ധപ്പെട്ട സ്ഥാപനങ്ങളിലെ മേധാവികൾ പരസ്യമായി പറഞ്ഞുകഴിഞ്ഞു. വികസനം എന്നുപറയുന്നത് കെട്ടിടങ്ങൾ നിർമിക്കൽ മാത്രമാണ്. ഇതു രോഗികൾക്കുവേണ്ടിയല്ല മറിച്ച് അഴിമതിക്കുവേണ്ടി മാത്രമാണെന്നും സന്ദീപ് വാര്യർ പറഞ്ഞു. കോൺഗ്രസ് എരുമപ്പെട്ടി മണ്ഡലം പ്രസിഡന്‍റ് എം.എം. നിഷാദ് അധ്യക്ഷനായി. ചിറ്റണ്ട സ്വദേശിനി റിയ റിസ്വാന വരച്ച സന്ദീപ് വാര്യരുടെ ചിത്രം ചടങ്ങിൽ കൈമാറി. യുഡിഎഫ് കുന്നംകുളം നിയോജക മണ്ഡലം കൺവീനർ അമ്പലപ്പാട്ട് മണികണ്ഠൻ, കോൺഗ്രസ് കടവല്ലൂർ ബ്ലോക്ക് പ്രസിഡന്‍റ്് സുരേഷ് മമ്പറമ്പിൽ, മുൻ ജില്ലാ പഞ്ചായത്തംഗം കെ. ജയശങ്കർ, മഹിളാ കോൺഗ്രസ് ജില്ലാ ജനറൽ സെക്രട്ടറി കെ.ആർ. രാധിക, ബ്ലോക്ക് പ്രസിഡന്‍റ്് സഫീന അസീസ്, പി.എസ്. സുനീഷ്, എം.കെ. ജോസ്, അജു നെല്ലുവായ്, സുന്ദരൻ ചിറ്റണ്ട, സതീഷ് ഇടമന, എം.ജി.വിവേക്, ഷിയാസ് ചിറ്റണ്ട തുടങ്ങിയവർ പ്രസംഗിച്ചു.

വെള്ളം നിറഞ്ഞു; ആലുംതാഴം ക്ഷേത്രത്തിൽ ഭക്തരെത്തുന്നതു ഫൈബർ ബോട്ടിൽ

അന്തിക്കാട്: കനത്ത മഴയിൽ വള്ളൂർ ആലുംതാഴം മഹാവാരാഹി ക്ഷേത്രത്തിലും പരിസരപ്രദേശങ്ങളിലും വെള്ളം നിറഞ്ഞതോടെ ഭക്തരെ ദർശനത്തിന് കൊണ്ടുവരാൻ ക്ഷേത്രം കമ്മിറ്റിക്കാർ ഫൈബർബോട്ട് ഇറക്കി. മഴയിൽ ക്ഷേത്രത്തിന് ചുറ്റും വെള്ളം മുങ്ങി. ആഴ്ചകൾ പിന്നിട്ടിട്ടും മഴയും വെള്ളക്കെട്ടും ഒഴിയുന്നില്ല. ഇതുമൂലം ദർശനത്തിനു വരാൻ ഭക്തർക്കു നിർവാഹമില്ലാതായി. ഇതോടെയാണു ഫൈബർ ബോട്ട് ഒരുക്കിയത്.

മലബാർ രാമൻനായർ സ്മാരക തുള്ളൽപുരസ്കാരം സമ്മാനിച്ചു

ഗുരുവായൂർ: ഓട്ടൻതുള്ളൽ കലാകാരന്മാർക്കായി മണലൂർ തുള്ളൽ കളരി ഏർപ്പെടുത്തിയ മലബാർ രാമൻനായർ സ്മാരക പുരസ്കാരം കരിവെള്ളൂർ രത്നകുമാറിനും കലാമണ്ഡലം ഗോവിന്ദൻകുട്ടി സ്മൃതി പുരസ്കാരം അനീഷ് മണ്ണാർക്കാടിനും സമ്മാനിച്ചു. പൈതൃകം കുടുംബസംഗമത്തോടനുബന്ധിച്ച് നടന്ന സാംസ്കാരിക സമ്മേളനത്തിൽ കേരള സംഗീത നാടക അക്കാദമി സെക്രട്ടറി കരിവെള്ളൂർ മുരളി പുരസ്കാര സമർപ്പണം നിർവഹിച്ചു. യോഗാചാര്യ സംഗീത ആർ. കുറുപ്പ്, പൈതൃകം നിർവാഹ കസമിതിയംഗം കെ. സതീഷ് ബാബു എന്നിവരെ ആദരിച്ചു. പൈതൃകം കോ-ഒാർഡിനേറ്റർ അഡ്വ. രവി ചങ്കത്ത് അധ്യക്ഷത വഹിച്ചു. കവി രാധാകൃഷ്ണൻ കാക്കശേരി മുഖ്യപ്രഭാഷണം നടത്തി. മണലൂർ ഗോപിനാഥ്, മധു. കെ. നായർ, കെ.കെ. വേലായുധൻ, വൈശ്രവണത്ത് നാരായണൻ നമ്പൂതിരി, കെ. മോഹനകൃഷ്ണൻ, എ.കെ. ദിവാകരൻ തുടങ്ങിയവർ പ്രസംഗിച്ചു. തുടർന്ന് ഓട്ടൻതുള്ളൽ അരങ്ങേറ്റവും ഉണ്ടായി.

ഉദരരോഗവിദഗ്ധരുടെ സമ്മേളനവും ശില്പശാലയും നടത്തി

തൃശൂർ: അമല ഗാസ്ട്രോ സെന്‍ററും തൃശൂര്‍ ഗാസ്ട്രോ സൊസൈ റ്റിയും ഹയാത്ത് റിജന്‍സിയില്‍ നടത്തിയ ഉദരരോഗവിദഗ്ധരുടെ സമ്മേളനവും ശില്പശാലയും അമല ഡയറക്ടര്‍ ഫാ. ജൂലിയസ് അറയ്ക്കല്‍ ഉദ്ഘാടനം ചെയ്തു. പദ്മശ്രീ ഡോ. ഫിലിപ്പ് അഗസ്റ്റിന്‍ ക്രോണ്‍സ് രോഗത്തക്കുറിച്ചു പ്രഭാഷണം നടത്തി. അമല ആശുപത്രി പട്ടിക്കാട് തുടങ്ങുന്ന പുതിയ സൂപ്പര്‍ സ്പെഷാലിറ്റി സെന്‍ററിന്‍റെ സോഫ്റ്റ് ലോഞ്ചും നടത്തി. ജോയിന്‍റ് ഡയറക്ടര്‍ ഫാ. ഡെല്‍ജോ പുത്തൂര്‍, അമല ഗാസ് ട്രോ സെന്‍റര്‍ മേധാവി ഡോ. സോ ജന്‍ ജോര്‍ജ്, ഡോ. അനൂപ് ജോണ്‍, ഡോ. രജനി ആന്‍റണി, ഡോ. ഡൊമിനിക് മാത്യു എന്നിവര്‍ പ്രമുഖ ഡോക്ടര്‍മാരോടൊപ്പം സംവാദത്തില്‍ പങ്കെടുത്തു. പോസ്റ്റ് ഗ്രാജ്വേറ്റ് വിദ്യാര്‍ഥികള്‍ക്കായി ക്വിസ് മത്സരവും നടത്തി.

അപകടക്കുഴി അടച്ചു... നിരത്തിൽ രക്തംപൊടിഞ്ഞപ്പോൾ

തൃശൂർ: അപകടക്കുഴി അടച്ചു. കോവിലകത്തുംപാടത്തെ അപകടക്കുഴിയെക്കുറിച്ച് ഞായറാഴ്ച ദീപിക മുന്നറിയിപ്പുനൽകിയ അന്നുതന്നെയാണ് സ്കൂട്ടർയാത്രികരായ ദന്പതികൾക്ക് അതേകുഴിയിൽ വീണ് ഗുരുതരമായി പരിക്കേറ്റത്. ഈ റോഡിലെതന്നെ മറ്റു കുഴികൾ കഴിഞ്ഞ ദിവസങ്ങളിലായി ടൈൽ വിരിച്ച് അടച്ചിരുന്നെങ്കിലും ഏറ്റവും അപകടസാധ്യത ഉയർത്തിയിരുന്ന കുഴി അടയ്ക്കാതിരുന്നതാണ് റിട്ട. പോലീസ് ഉദ്യോഗസ്ഥനായ കോലഴി സ്വദേശി തോമസിനെയും ഭാര്യ ബീനയെയും അപകടത്തിൽപ്പെടുത്തിയത്. ഇവർക്കു തൊട്ടുമുന്പ് വേറൊരു ഇരുചക്രവാഹനവും ഇതേ സ്ഥലത്ത് അപകടത്തിൽപ്പെട്ടിരുന്നു. തുടർന്നാണ് ഇന്നലെ രാവിലെതന്നെ കുഴികളിൽ സിമന്‍റ് കട്ടകൾ വിരിച്ച് അപകടസാധ്യത ഇല്ലാതാക്കിയത്.

പ്രതിപക്ഷബഹളം അഴിമതി ചർച്ചയാകാതിരിക്കാൻ: മേയർ

തൃശൂർ: കോർപറേഷന്‍റെ മാതൃകാപരമായ പ്രവർത്തനങ്ങളിൽ വിറളിപൂണ്ട കോണ്‍ഗ്രസ് നേതൃത്വം കൗണ്‍സിൽ തടസപ്പെടുത്താൻ ശ്രമിക്കുകയാണെന്നു മേയർ എം.കെ. വർഗീസ്. മാലിന്യസംസ്കരണം, കുടിവെള്ള- വൈദ്യുതിവിതരണം, വീടുകളുടെ നിർമാണം എന്നിവയിൽ മികച്ച നേട്ടമുണ്ടാക്കി. കോണ്‍ഗ്രസ് കൗണ്‍സിലർമാരുടെ ആവശ്യപ്രകാരമാണു കോർപറേഷൻ കെട്ടിടത്തിലെ ട്രസ് വീണ സംഭവം ചർച്ചയ്ക്കുവച്ചത്. കോണ്‍ഗ്രസ് നേതാക്കളുടെ ബിനാമികളായ കോണ്‍ട്രാക്ടർമാർ മറുപടി പറയേണ്ടിവരുമെന്നറിഞ്ഞാണു റീത്തുവയ്ക്കുമെന്ന് ആക്രോശിച്ചത്. ജനാധിപത്യമര്യാദയുടെ പേരിലാണു നേതാക്കളെ ചേംബറിലേക്കു ചർച്ചയ്ക്കു വിളിച്ചത്. എന്നാൽ, ചർച്ച പിന്നീടാകാമെന്ന നിലപാടെടുത്തു. ചർച്ചയ്ക്കുപകരം കൗണ്‍സിൽ അലങ്കോലപ്പെടുത്താനാണു പ്രതിപക്ഷം ശ്രമിച്ചത്. മാധ്യമങ്ങളുടെ ശ്രദ്ധ പിടിച്ചുപറ്റാനുള്ള ജനാധിപത്യവിരുദ്ധപ്രവർത്തനങ്ങളാണു നടത്തിയത്. റീത്ത് വയ്ക്കാനുള്ള നീക്കം ക്രിമിനൽ പ്രവൃത്തിയാണ്. 57 അജൻഡകളിൽ നാലണ്ണമൊഴിച്ചു ബാക്കിയെല്ലാം പാസാക്കിയതായി അറിയിക്കുന്നെന്നും മേയർ പറഞ്ഞു. പ്രതിഷേധം തുടരും: രാജൻ ജെ. പല്ലൻ തൃശൂർ: കോർപറേഷൻ റോഡുകളിൽ മനുഷ്യരക്തം ചിന്തുന്നതിൽ പ്രതിഷേധിച്ചു കോണ്‍ഗ്രസ് കൗണ്‍സിലർമാർ നടത്തിയ പ്രതീകാത്മകസമരം പ്രതിപക്ഷനേതാവ് രാജൻ ജെ. പല്ലൻ ഉദ്ഘാടനം ചെയ്തു. എല്ലാ കൗണ്‍സിലർമാരും വസ്ത്രത്തിൽ ചുവന്ന ചായമൊഴിച്ചു പ്രതിഷേധിച്ചു. എംജി റോഡിൽ വിഷ്ണുദത്ത് മരിച്ച സംഭവം കൗണ്‍സിൽ ചർച്ച ചെയ്യണമെന്ന് ആവശ്യപ്പെട്ടെങ്കിലും മേയർ അനുവദിച്ചില്ല. താൻ മേയറായിരിക്കുന്പോൾ കോണ്‍ഗ്രസ്, സിപിഎം, സിപിഐ, ബിജെപി കൗണ്‍സിലർമാരുടെ ഒറ്റക്കെട്ടായ പിന്തുണയിലാണ് റൗണ്ട്എബൗട്ടിൽ വൈദ്യുതി കണക്‌ഷന് അനുമതി നൽകിയതെന്നു രാജൻ പല്ലൻ പറഞ്ഞു. വിഷ്ണുദത്തിന്‍റെ കുടുംബത്തിനു നഷ്ടപരിഹാരം നൽകണം. മേയർക്കും സെക്രട്ടറിക്കുമെതിരേ കൊലക്കുറ്റത്തിനു കേസെടുത്തില്ലെങ്കിൽ കൗണ്‍സിലിലും പുറത്തും ശക്തമായ പ്രതിഷേധം തുടരുമെന്നു പ്രതിപക്ഷനേതാവ് അറിയിച്ചു. പ്രതിഷേധസമരത്തിൽ ജോണ്‍ ഡാനിയൽ, ഇ.വി. സുനിൽരാജ്, ജയപ്രകാശ് പൂവത്തിങ്കൽ, മുകേഷ് കൂളപറന്പിൽ, ശ്യാമള മുരളീധരൻ, കെ. രാമനാഥൻ, ലാലി ജെയിംസ്, എൻ.എ. ഗോപകുമാർ, സുനിത വിനു, എ.കെ. സുരേഷ്, സിന്ധു ആന്‍റോ, നിമ്മി റപ്പായി, എബി വർഗീസ്, വില്ലി ജിജോ, മേഴ്സി അജി, ലീല വർഗീസ്, റെജി ജോയ്, ആൻസി ജേക്കബ്, സനോജ് പോൾ, മേഫി ഡെൽസണ്‍, രെന്യ ബൈജു എന്നീ കൗണ്‍സിലർമാർ പങ്കെടുത്തു. റോഡുകളുടെ ശോച്യാവസ്ഥ മറയ്ക്കാൻ മേയറുടെ ശ്രമം: ജോണ്‍ ഡാനിയൽ തൃശൂർ: വിഷ്ണുദത്തിന്‍റെ മരണം സംബന്ധിച്ച ചർച്ചയൊഴിവാക്കാൻ മേയർ ശ്രമിച്ചതു കോർപറേഷൻ റോഡുകളുടെ ശോചനീയാവസ്ഥ മറച്ചുവയ്ക്കാനെന്നു കൗണ്‍സിലർ ജോണ്‍ ഡാനിയൽ. മരണത്തിന്‍റെ ഉത്തരവാദിത്വത്തിൽനിന്നു കൈകഴുകാൻ മേയർക്കാകില്ല. നടപടിയെടുക്കാതെ ഉത്തരവാദിത്വം കൗണ്‍സിലമരുടെ തലയിൽ കെട്ടിവയ്ക്കാനാണു മേയർ ശ്രമിക്കുന്നത്. വിഷ്ണുദത്തിന് അന്ത്യോപചാരമർപ്പിക്കാനോ കുടുംബാംഗങ്ങളെ ആശ്വസിപ്പിക്കാനോ മേയർ പോയില്ല. സമരംചെയ്ത കൗണ്‍സിലർമാരെ സസ്പെൻഡ് ചെയ്ത മേയറുടെ നടപടിക്ക് ഒരു വിലയും കൽപ്പിക്കുന്നില്ലെന്നും ജോണ്‍ ഡാനിയൽ പറഞ്ഞു.

കൗണ്‍സിലിൽ ‘ചോര’ത്തിളപ്പ്!

തൃശൂർ: തകർന്ന റോഡുകളിലെ അപകടമരണങ്ങളുടെ ഉത്തരവാദിത്വം ഏറ്റെടുത്തു മേയർ രാജിവയ്ക്കണമെന്ന് ആവശ്യപ്പെട്ടു നടത്തിയ പ്രതിപക്ഷസമരത്തിൽ കൗണ്‍സിൽ ഹാൾ പ്രക്ഷുബ്ധം. പ്രതീകാത്മകമായി ‘രക്തംചിന്തി’ നടത്തിയ പ്രതിപക്ഷസമരം മുന്നിൽകണ്ട് തയാറെടുത്താണു ഭരണപക്ഷവുമെത്തിയത്. രാവിലെ പത്തരയോടെ രാജൻ ജെ. പല്ലന്‍റെ നേതൃത്വത്തിൽ പ്രതിപക്ഷ കൗണ്‍സിലർമാർ കോർപറേഷൻ അങ്കണത്തിൽ ദേഹത്തു ചായമൊഴിച്ചു പ്രതീകാത്മകമായി രക്തംചിന്തിയാണു പ്രതിഷേധം തുടങ്ങിയത്. എംജി റോഡിലെ കുഴി ഒഴിവാക്കുന്നതിനിടെ ബസിടിച്ചു യുവാവ് മരിച്ചതിന്‍റെ ഉത്തരവാദിത്വമേറ്റെടുത്തു മേയർ എം.കെ. വർഗീസ് രാജിവയ്ക്കണമെന്നായിരുന്നു ആവശ്യം. അതേ വേഷത്തിലാണു കൗണ്‍സിൽ ഹാളിലുമെത്തിയത്. പ്രതിപക്ഷത്തെ കടുത്ത ഭാഷയിൽ വിമർശിച്ചാണു മേയർ യോഗം ആരംഭിച്ചത്. "കൗണ്‍സിലിനെ ചന്തയാക്കി മാറ്റരുതെ'ന്നു മേയർ പറഞ്ഞതോടെ പ്രതിഷേധവും കടുത്തു. അജൻഡകൾ പരിഗണിച്ചശേഷം ചർച്ചയാകാമെന്നുപറഞ്ഞെങ്കിലും പ്രതിപക്ഷം വഴങ്ങിയില്ല. പ്രതിപക്ഷത്തെ പൂട്ടാൻ ആദ്യ അജൻഡ ശക്തൻ സ്റ്റാൻഡിനുസമീപത്തെ മാതൃഭൂമി റൗണ്ട്എബൗട്ടിന്‍റെ വൈദ്യുതികുടിശിക 23.4 ലക്ഷമാണെന്നും രാജൻ പല്ലൻ മേയറായിരുന്ന 2014ലെ കൗണ്‍സിൽ യോഗതീരുമാനപ്രകാരമാണു വൈദ്യുതി ചാർജ് കോർപറേഷൻ ഏറ്റെടുത്തതെന്നും ഭരണപക്ഷം ആരോപിച്ചു. എന്നാൽ, 10 റൗണ്ട്എബൗട്ടുകൾക്കു തെരുവുവിളക്കുകളുടെ വിഭാഗത്തിൽ ഉൾപ്പെടുത്തി വൈദ്യുതി ചാർജ് അടയ്ക്കുന്നതു കോർപറേഷനാണെന്നും ഷോപ്പിംഗ് ഫെസ്റ്റിവലടക്കം നടത്തിയതിന്‍റെ 12 ലക്ഷം എവിടെയെന്നും രാജൻ പല്ലൻ തിരിച്ചടിച്ചു. ബഹളത്തിൽ മുങ്ങിയതു സജീവവിഷയങ്ങൾ തൃശൂർ: പ്രതിപക്ഷത്തിന്‍റെയും ഭരണപക്ഷത്തിന്‍റെയും സമരനാടകങ്ങളിൽ മുങ്ങിപ്പോയത് അജൻഡയായി നിശ്ചയിച്ച നിർണായകവിഷയങ്ങൾ. കോർപറേഷന്‍റെ ഉടമസ്ഥതയിലുള്ള കെട്ടിടത്തിന്‍റെ മേൽക്കൂരയിലെ ഷീറ്റ് കാറ്റിൽ പറന്നുവീണുണ്ടായ അപകടത്തിൽ മേയറുടെ നിർദേശപ്രകാരം സൂപ്രണ്ടിംഗ് എൻജിനീയറുടെ റിപ്പോർട്ടും അതിൽ സെക്രട്ടറിയുടെ കുറിപ്പും കൗണ്‍സിൽ പരിഗണനയ്ക്കുവച്ചിരുന്നു. അടുത്തിടെ തകർന്ന കെട്ടിടങ്ങളുടെ കാര്യത്തിൽ ഭാവിനടപടികളും ഇക്കൂട്ടത്തിൽ ചർച്ചയാകുമെന്നു പ്രതീക്ഷിച്ചിരുന്നു. ലൈഫ് 2017 ലിസ്റ്റിലെ അവശേഷിക്കുന്ന 106 ഗുണഭോക്താക്കൾക്കു മാറ്റാന്പുറത്തു ഭൂമി അനുവദിക്കൽ, ലൈഫ് ഭവനപദ്ധതിയിലെ അവസാനഗഡു അനുവദിക്കൽ, പൊതു, സ്വകാര്യയിടങ്ങളിൽ ഭിന്നശേഷിക്കാർക്കു വാഹനം പാർക്ക് ചെയ്യാൻ സ്ഥലം ലഭ്യമാക്കൽ, ചെന്പുക്കാവ് ഷോപ്പിംഗ് കോംപ്ലക്സുകളിലെ കടമുറികളുടെ വാടക നിശ്ചയിക്കൽ, അണ്ടർഗ്രൗണ്ട് വൈദ്യുതി കേബിൾ സ്ഥാപിക്കൽ, പുതിയ കുടിവെള്ള കണക്‌ഷൻ നൽകൽ, സ്കൂളുകളിൽ മൃഗാവകാശവിദ്യാഭ്യാസ ബോധവത്കരണം നടപ്പാക്കുന്നതിനെക്കുറിച്ചു ലഭിച്ച കത്തിൻമേലുള്ള ചർച്ച എന്നിവ മാറ്റിവച്ചു. റീത്ത് പരാമർശത്തിൽ അടിപൊട്ടി റോഡ് തകർന്ന വിഷയം ചർച്ചചെയ്യാതെ കൗണ്‍സിൽ പിരിച്ചുവിട്ടു മേയർ എഴുന്നേറ്റുപോയാൽ കസേരയിൽ റീത്തുവയ്ക്കുമെന്നു രാജൻ ജെ. പല്ലൻ പറഞ്ഞതോടെ കൗണ്‍സിൽ ഹാളിൽ വെല്ലുവിളികൾ നിറഞ്ഞു. ധൈര്യമുണ്ടെങ്കിൽ റീത്തുവയ്ക്കാൻ സ്റ്റാൻഡിംഗ് കമ്മിറ്റി അധ്യക്ഷൻമാരായ പി.കെ. ഷാജനും വർഗീസ് കണ്ടംകുളത്തിയും വെല്ലുവിളിച്ചതോടെ വാക്പോരു മുറുകി. രാജൻ പല്ലന്‍റെ നേതൃത്വത്തിൽ തങ്ങളുടെ മേശപ്പുറത്തു കയറി റീത്ത് ഉയർത്തിക്കാട്ടി പ്രതിഷേധിച്ചു. മര്യാദകൾ ലഘിച്ചെന്നുപറഞ്ഞ് ആദ്യം ജയപ്രകാശ് പൂവത്തിങ്കലിനെയും പിന്നീടു പത്തു കൗണ്‍സിലർമാരെയും അടുത്ത രണ്ടു കൗണ്‍സിലിൽനിന്ന് സസ്പെൻഡ് ചെയ്യുന്നതായി മേയർ പ്രഖ്യാപിച്ചു. 12.15നു മേയറുടെ ഡയസിലേക്കു പ്രതിപക്ഷനേതാക്കൾ ഇരച്ചെത്തിയതോടെ ഉന്തുംതള്ളുമായി. 2.23നു മേയർ ചേംബറിൽ ചർച്ചയ്ക്കു ക്ഷണിച്ചെങ്കിലും പ്രതിപക്ഷം വിട്ടുനിന്നതോടെ മേയർ കൗണ്‍സിൽ യോഗം പിരിച്ചുവിട്ടു.

അടാട്ട് ചാത്തന്‍കോള്‍ പരിസരത്ത് യുവാവിന്‍റെ മൃതദേഹം

മുതുവറ: അടാട്ട് ഉടലക്കാവ് ചാത്തന്‍കോള്‍ പരിസരത്ത് ഇന്നലെ വെള്ളത്തില്‍ പൊങ്ങിക്കിടക്കുന്ന നിലയില്‍ മൃതദേഹം കണ്ടെത്തി. നാട്ടുകാര്‍ വിവരമറിയിച്ചതിനെത്തുടര്‍ന്ന് പേരാമംഗലം പോലീസും ഫയര്‍ ഫോഴ്‌സും സ്ഥലത്തെത്തി മൃതദേഹം പുറത്തെടുത്തു. ഇതരസംസ്ഥാനത്തൊഴിലാളിയാണെന്ന് സംശയിക്കുന്നു. മൃതശരീരത്തിന് രണ്ടുദിവസത്തോളം പഴക്കം ഉണ്ടെന്നാണ് പ്രാഥമിക നിഗമനം. കൂടുതല്‍ വിവരങ്ങള്‍ അറിവായിട്ടില്ല. മൃതദേഹം തൃശൂർ മെഡിക്കൽ കോളജിലെ മോർച്ചറിയിലേക്ക് മാറ്റി.

വെള്ളച്ചാട്ടങ്ങളുടെ അദ്ഭുതലോകം; അതിരപ്പിള്ളി, ചാർപ്പ, വാഴച്ചാൽ

കുത്തിയൊലിച്ചുവരുന്ന പുഴ, നുരഞ്ഞുപൊന്തുന്ന പത, പിന്നെ കുത്തനെ പതിക്കുന്ന രൗദ്രഭാവമുള്ള വെള്ളച്ചാട്ടവും... ഇതാണ് ആവേശം പകർന്നെത്തിക്കുന്ന അതിരപ്പിള്ളിയുടെ വിസ്മയക്കാഴ്ച. കണ്ടവർകണ്ടവർ വീണ്ടും വീണ്ടും വരുന്പോൾ കാണാത്തവരെല്ലാം അനുഭവമാകുന്ന ഈ ദൃശ്യചാരുത കണ്‍കുളിർക്കെ കാണാൻ അതിർത്തികൾ ഭേദിച്ചും വന്നുകൊണ്ടിരിക്കുകയാണ്. വീശിയടിക്കുന്ന കാറ്റോ പെയ്തുവീഴുന്ന കൊടുംമഴയോ അവരെ തളർത്തുന്നില്ല. തെന്നിവീഴ്ത്തുന്ന പാറക്കെട്ടുകളോ വീഴ്ചകളിലെ മുറിവുകളോ വേദനിപ്പിക്കുന്നുമില്ല. കാരണം അവരുടെ മനസുനിറയെ അതിരപ്പിള്ളി എന്ന ഒരു വികാരംമാത്രം...അതവരെ കീഴടക്കുന്നു. മഴക്കാലം തുടങ്ങിയതോടെ, അതിരപ്പിള്ളിയിൽ ഇനി ഓരോ ദിവസവും പുതിയ നിറങ്ങളാണ്. പ്രകൃതിയോടുള്ള ആത്മബന്ധം ആഴപ്പെടാൻവേണ്ടിയുള്ള ഒരു ഹൃദയയാത്ര കൂടിയാണ് അതിരപ്പിള്ളിയിലേക്കുള്ള സഞ്ചാരം. ഇതിനുപുറമേ, ഗോവയിലെ ദൂത്സാഗർ വെള്ളച്ചാട്ടത്തിന്‍റെ ശൈലിയിൽ കലിതുള്ളിവരുന്ന ചാർപ്പ വെള്ളച്ചാട്ടവും സഞ്ചാരികളുടെ ശ്രദ്ധ കവരും. മഴവില്ലിന്‍റെ നിറങ്ങളിൽ മായാജാലമായി പുത്തൻരൂപത്തിൽ ചാർപ്പ കാഴ്ചയിൽ വരുന്പോൾ, അടുത്തുനിന്നാ കാഴ്ച നുകരാൻ തീർത്ത മഴവിൽപ്പാലവും സന്ദർശകർക്കു വിശേഷ അനുഭവം സമ്മാനിക്കുന്നു.അല്പംകൂടി പോയാൽ വാഴച്ചാലായി. വെള്ളിച്ചില്ലുംവിതറി തുള്ളിത്തുള്ളിയൊഴുകുന്ന വാഴച്ചാലിന്‍റെ മനോഹാരിത കൂടി മനസുനിറയ്ക്കുന്പോൾ യാത്ര ഗംഭീരം.

ശുചിത്വത്തിന്‍റെ കാര്യത്തിൽ ’പെർഫെക്ട് ഓക്കെ’

സഞ്ചാരികൾ ഒഴുകിയെത്തിയിട്ടും അതിരപ്പിള്ളിയിലോ പരിസരപ്രദേശങ്ങളിലോ പേരിനുപോലും ഒരു മാലിന്യവും കണ്ടെത്താനാകില്ല. ഇടയ്ക്കിടെയുള്ള വേസ്റ്റ് ബിന്നുകളിൽ അവ നിക്ഷേപിച്ചാണ് സന്ദർശകർ അതിരപ്പിള്ളിയിൽനിന്നു മടങ്ങുന്നത്. ഇതിനിടെ ആരുടെയെങ്കിലും കൈയിൽനിന്ന് ഏതെങ്കിലുംവിധത്തിലുള്ള മാലിന്യങ്ങളോ മറ്റോ അറിയാതെ വീണാൽപോലും ശുചീകരണ തൊഴിലാളികൾ അതു ശരവേഗത്തിൽ നീക്കം ചെയ്യുന്നുമുണ്ട്. ഇക്കാര്യത്തിൽ അതിരപ്പിള്ളിയിലെ ജീവക്കാർക്കു നൽകണം ബിഗ് സല്യൂട്ട്. യാത്രാസൗകര്യങ്ങൾ, അറിയേണ്ട കാര്യങ്ങൾ • ഗേറ്റിൽ പ്രവേശനം: രാവിലെ എട്ടുമുതൽ വൈകീട്ട് അഞ്ചുവരെ. ടിക്കറ്റ് കൗണ്ടർ പ്രവർത്തിക്കുന്നു. പ്രവേശനഫീസ്: അതിരപ്പിള്ളിയും വാഴച്ചാലും ഉൾപ്പെടെ മുതിർന്നവർക്ക് 60 രൂപ, കുട്ടികൾക്കു 15 രൂപ, വിദ്യാർഥികൾക്ക് 20 രൂപ • പാർക്കിംഗ് സൗകര്യം: വിനോദസഞ്ചാരത്തിനായി വരുന്ന വാഹനങ്ങൾക്കായി പാർക്കിംഗ് സൗകര്യം ഉൾപ്പെടെ നല്ലരീതിയിൽ ക്രമീകരിച്ചിട്ടുണ്ട്. • ഭക്ഷണവും കുടിവെള്ളവും: സമീപത്തായി റസ്റ്റോറന്‍റുകളും സ്നാക്ക് സ്റ്റാളുകളും പ്രവർത്തിക്കുന്നു. • സുരക്ഷാനിർദേശങ്ങൾ: ശക്തമായ ഒഴുക്കിൽ വെള്ളത്തിൽ ഇറങ്ങുന്നതു നിരോധിച്ചിരിക്കുന്നതിനാൽ സന്ദർശകർ ജാഗ്രത പാലിക്കണമെന്നു വനവകുപ്പ് മുന്നറിയിപ്പ് നൽകിയിട്ടുണ്ട്.

വർണമനോഹരിയാണീ അതിരപ്പിള്ളി

കേരളത്തിന്‍റെ മനോഹര പ്രകൃതികാഴ്ചകളിൽ ഒരിടമായ അതിരപ്പിള്ളി, മണ്‍സൂണ്‍കാലത്തിന്‍റെ പുതിയ ദൃശ്യാനുഭവങ്ങളുമായി സഞ്ചാരികളെ പുളകിതരാക്കുകയാണ്. പച്ചപ്പിന്‍റെ ഹരിതകുട ചൂടിയ പ്രകൃതിയുടെ വിരിമാറിലേക്കു പവിഴമുത്തുകൾപോലെ മഴത്തുള്ളികൾ പെയ്തിറങ്ങുന്പോൾ തൃശൂരിന്‍റെ സ്വന്തം അതിരപ്പിള്ളി വിളിക്കുകയാണ് - സഞ്ചാരികളെ...ഇതിലേ ഇതിലേ...! വെള്ളച്ചാട്ടംമാത്രമല്ല, നനഞ്ഞ പാറക്കെട്ടുകൾക്കിടയിലൂടെ ഒഴുകുന്ന നീർച്ചോലകൾ, കാട്ടരുവികൾ, കിളിക്കൊഞ്ചലുകളുടെ മനോഹരനാദങ്ങൾ, വന്യതയുടെ സൗന്ദര്യം നെഞ്ചേറ്റിയ കൊന്പന്മാർ, കുസൃതിയും കൗതുകവും നിറയ്ക്കുന്ന കുരങ്ങിൻകൂട്ടങ്ങൾ... ഇവയൊക്കെ കാഴ്ചകളുടെ നിറവുപകരുന്ന പ്രകൃതിയുടെ മായാജാലംതന്നെയാണ്. അതിരപ്പിള്ളിയെ കേരളത്തിന്‍റെ സ്വന്തം നയാഗ്ര എന്നുവിളിക്കുന്നതും ഈ മായാജാലംകൊണ്ടാണ്.

പുതുമോടിയിൽ കൈരളി, ശ്രീ തിയേറ്റർ

തൃശൂർ: നവീകരണം പൂർത്തിയാക്കിയ കൈരളി - ശ്രീ തിയേറ്റർ ഉദ്ഘാടനം ജൂലൈ ഒന്നിന്. രാവിലെ 11നു സാംസ്കാരികമന്ത്രി സജി ചെറിയാൻ ഉദ്ഘാടനംചെയ്യും. ലോകോത്തര സാങ്കേതികവിദ്യയോടുകൂടിയ ആർജിബി 4-കെ ലേസർ പ്രൊജക്ഷൻ, ഹ്യൂഗോ സിൽവർ സ്ക്രീൻ, 36 ചാനലുകളോടുകൂടിയ ഡോൾബി അറ്റ്മോസ് ശബ്ദസംവിധാനം, പുഷ്ബാക്ക് സീറ്റുകൾ, പ്ലാറ്റിനം സോഫ സീറ്റുകൾ എന്നിവയും ഒരുക്കി. കൈരളി തിയേറ്ററിൽ 33 ബാൽക്കണി പ്ലാറ്റിനം സോഫ സീറ്റുകൾ ഉൾപ്പെടെ 519 സീറ്റുകളും, ശ്രീ തിയേറ്ററിൽ 36 പ്ലാറ്റിനം സോഫ സീറ്റുകൾ ഉൾപ്പെടെ 327 സീറ്റുകളും ഒരുക്കി. ഒരേസമയം എണ്ണൂറിൽപരം ആളുകളെ ഉൾക്കൊള്ളാൻ കഴിയുന്ന തിയേറ്ററിൽ സിനിമാ ആസ്വാദകർക്കായി ശീതീകരണ സംവിധാനത്തോടു കൂടിയ ബേബി ഫീഡിംഗ് റൂമുകൾ, ലിഫ്റ്റ്, കഫെറ്റീരിയ, വെയ്റ്റിംഗ് ഏരിയ, ഗസ്റ്റ് റൂം, ടോയ്ലറ്റ്, വാഹന പാർക്കിംഗ് സൗകര്യങ്ങൾ എന്നിവയും ഒരുക്കിയിട്ടുണ്ട്. ഭിന്നശേഷിസൗഹൃദമായാണു നിർമാണം. മന്ത്രിമാരായ കെ. രാജൻ, ഡോ. ആർ. ബിന്ദു, പി. ബാലചന്ദ്രൻ എംഎൽഎ, കെ. രാധാകൃഷ്ണൻ എംപി, കോർപറേഷൻ മേയർ എം.കെ. വർഗീസ്, ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ്, സാംസ്കാരിക വകുപ്പ് അഡീഷണൽ ചീഫ് സെക്രട്ടറി രാജൻ എൻ. ഖോബ്രഗഡെ, സാംസ്കാരികവകുപ്പ് ഡയറക്ടർ ഡോ. ദിവ്യ എസ്. അയ്യർ, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ പി.കെ. ഷാജൻ, കൗണ്‍സിലർമാരായ പൂർണിമ സുരേഷ്, അനൂപ് ഡേവിഡ് കാട, കൊച്ചിൻ ദേവസ്വം ബോർഡ് പ്രസിഡന്‍റ് കെ. രവീന്ദ്രൻ, സാഹിത്യ അക്കാദമി ചെയർമാൻ കെ. സച്ചിദാനന്ദൻ, സംഗീതനാടക അക്കാദമി ചെയർമാൻ മട്ടന്നൂർ ശങ്കരൻകുട്ടി, ലളിതകലാ അക്കാദമി ചെയർമാൻ മുരളി ചീരോത്ത്, പട്ടികജാതി പട്ടികവർഗ വികസന കോർപറേഷൻ മാനേജിംഗ് ഡയറക്ടർ വി.പി. സുബ്രഹ്മണ്യൻ, ഐഎഫ്എഫ്ടി ജനസംസ്കാര ചലച്ചിത്രകേന്ദ്രം ഡയറക്ടർ ചെറിയാൻ ജോസഫ് എന്നിവർ പങ്കെടുക്കും. ഉദ്ഘാടനത്തിനു മുന്നോടിയായി നടന്ന വാർത്താസമ്മേളനത്തിൽ കേരള സംസ്ഥാന ചലച്ചിത്ര വികസന കോർപ്പറേഷൻ മാനേജിംഗ് ഡയറക്ടർ പി.എസ്. പ്രിയദർശനൻ, ചലച്ചിത്ര സംവിധായകനും ഡയറക്ടർ ബോർഡ് അംഗവുമായ എം.എ. നിഷാദ്, ഡയറക്ടർ ബോർഡ് അംഗം മെൽവിൻ മാത്യു, സൗണ്ട് എൻജിനീയർ എസ്. രാധാകൃഷ്ണൻ, കന്പനി സെക്രട്ടറി ജി. വിദ്യ, മെയിന്‍റനൻസ് എൻജിനീയർ അർച്ചന പ്രഭു എന്നിവർ പങ്കെടുത്തു.

മുന്നോട്ടുള്ള കുതിപ്പിന് അവാർഡുകൾ പ്രചോദനം: എ.എൻ. ഷംസീർ

തൃശൂർ: കഠിനാധ്വാനംചെയ്തു മുന്നോട്ടുപോകാനുള്ള കുതിപ്പിനു പ്രചോദനംനൽകാൻ അവാർഡുകൾ ഉപകരിക്കുമെന്ന് നിയമസഭ സ്പീക്കർ എ.എൻ. ഷംസീർ. എന്തുപഠിച്ചാലും ഇന്നത്തെ വിദ്യാർഥികൾ നാളത്തെ നല്ല മനുഷ്യരാകണം. മനസിൽ സഹാനുഭൂതിയുണ്ടാകണമെന്നും സ്പീക്കർ പറഞ്ഞു. ഒല്ലൂർ എംഎൽഎ 2025 പ്രതിഭാസംഗമം ഉദ്ഘാടനംനിർവഹിച്ചു പ്രസംഗിക്കുകയായിരുന്നു അദ്ദേഹം. മന്ത്രി കെ. രാജൻ അധ്യക്ഷനായി. ഐഎഫ്എസ് ജേതാവ് ശിശിര സത്യൻ, പ്ലസ് ടു പരീക്ഷയിൽ മുഴുവൻ മാർക്ക് നേടിയ അപർണ, എസ്എസ്എൽസി - പ്ലസ് ടു പരീക്ഷയിൽ 100 ശതമാനം നേടിയ സ്കൂളുകൾ, ഫുൾ എ പ്ലസ് നേടിയ വിദ്യാർഥികൾ, എൽഎസ്എസ്, യുഎസ്എസ്, എൻഎംഎംഎസ് സ്കോളർഷിപ് വിജയികൾ, വിവിധ മേഖലകളിലെ മത്സരങ്ങളിൽ വിജയികളായവർ എന്നിവരെ ചടങ്ങിൽ ആദരിച്ചു. വെള്ളാനിക്കര കേരള കാർഷിക സർവകലാശാല ഓഡിറ്റോറിയത്തിൽനടന്ന പ്രതിഭാസംഗമത്തിൽ നടൻ മനോജ് കെ.ജയൻ മുഖ്യാതിഥിയായി. ജില്ലാ കളക്ടർ അർജുൻ പാണ്ഡ്യൻ, ഇസാഫ് എംഡി പോൾ കെ. തോമസ്, ഗാനരചയിതാവ് ബി. കെ. ഹരിനാരായണൻ, നടനും കാരിക്കേച്ചറിസ്റ്റുമായ ജയരാജ് വാര്യർ, ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് എന്നിവർ പങ്കെടുത്തു.

എസ്ഐഎഫ്എൽ വികസന പ്രവർത്തനങ്ങളുടെ ഉദ്ഘാടനം ഇന്ന്

അത്താണി: സ്റ്റീൽ ആൻഡ് ഇൻഡസ്ട്രിയൽ ഫോർജിംഗ് ലിമിറ്റഡിന്‍റെ (എസ്ഐഎഫ്എൽ) വികസന പ്രവർത്തനങ്ങൾ വ്യവസായ മന്ത്രി പി. രാജീവ് ഇന്ന് ഉച്ചകഴിഞ്ഞു മൂന്നിന് ഉദ്ഘാടനംചെയ്യും. 12 കോടി മുടക്കി സ്ഥാപിച്ച ആറു ടണ്‍ ഹൈഡ്രോളിക് ഓപ്പണ്‍ ഫോർജിംഗ് ഹാമറിന്‍റെ പ്രവർത്തനോദ്ഘാടനം, 2.5 കോടി ചെലവിട്ടു നിർമിക്കുന്ന കോർപറേറ്റ് ഓഫീസ് കെട്ടിട സമുച്ചയത്തിന്‍റെ ശിലാസ്ഥാപനം എന്നിവയും മന്ത്രി നിർവഹിക്കും. പ്രതിരോധ - ബഹിരാകാശ മേഖലകളിൽ അധിഷ്ഠിതമായി പ്രവർത്തിക്കു പ്രമുഖ പൊതുമേഖല സ്ഥാപനമായ എസ്ഐഎഫ്എല്ലിന്‍റെ വികസനത്തിന് സർക്കാർ 25 കോടിയാണു നൽകിയത്. അഞ്ചുവർഷംകൊണ്ട് വിറ്റുവരവ് 45 കോടിയിൽനിന്ന 75 കോടിയായി ഉയർന്നു. 14 ശതമാനം സാന്പത്തിക വളർച്ചയോടെ 7.85 കോടി പ്രവർത്തനലാഭവും നേടി. ഐഎസ്ആർഒ, ബ്രഹ്മോസ് മിസൈൽ നിർമാണം, ബിആർഡിഒ, ഇന്ത്യൻ നേവി, എച്ച്എഎൽ എന്നിങ്ങനെ തന്ത്രപ്രധാന മേഖലകൾക്കാണു സ്ഥാപനം ഫോർജുകൾ നൽകുന്നത്. അന്തർവാഹിനിയുടെ നിർമാണത്തിനുള്ള സാമഗ്രികൾക്കായി 38 കോടിയുടെയും മിസൈൽ ഭാഗങ്ങൾ നൽകാൻ 25 കോടിയുടെയും ഓർഡർ ലഭിച്ചെന്നു മാനേജ്മെന്‍റ് വാർത്താസമ്മേളനത്തിൽ പറഞ്ഞു. ആറുടണ്‍ ഹൈഡ്രോളിക് ഒപ്പണ്‍ ഹാമർ വരുന്നതോടെ മൂവായിരം കിലോവരെയുള്ള ഭാഗങ്ങൾ നിർമിക്കാൻ കഴിയുമെന്നും വിദേശത്തേക്കുള്ള കയറ്റുമതിക്കും ഉപകാരപ്രദമാകുമെന്നും മാനേജ്മെന്‍റ് അറിയിച്ചു. വാർത്താ സമ്മേളനത്തിൽ ചെയർമാൻ അഡ്വ. ഷെരീഫ് മരയ്ക്കാർ, മാനേജിംഗ് ഡയറക്ടർ കമാൻഡർ പി. സുരേഷ് ഡയറക്ടർ മേരി തോമസ്, ജനറൽ മാനേജർമാരായ പി.കെ. മൻസൂർ, എ. അനിൽ ബോസ് എന്നിവർ പങ്കെടുത്തു

വിദ്യാഭ്യാസ പുരസ്കാരങ്ങൾ സമ്മാനിച്ചു

ഇന്ത്യന്‍ നാഷണല്‍ കോണ്‍ഗ്രസ് ഇരിങ്ങാലക്കുട നിയോജക മണ്ഡലം ഇരിങ്ങാലക്കുട: വിദ്യാര്‍ഥികള്‍ നാളത്തെ രാഷ്ട്രപുരോഗതിയുടെ ഭാഗമായി തീരുകയും അവര്‍ മുന്‍ രാഷ്ടപതി ഡോ. അബ്ദുള്‍ കലാമിന്‍റെ ജീവിതം മാതൃകയാക്കേണ്ടതാണെന്നും ബെന്നി ബഹന്നാന്‍ എംപി പറഞ്ഞു. ഇന്ത്യന്‍ നാഷണല്‍ കോണ്‍ഗ്രസ് നിയോജക മണ്ഡലം മെറിറ്റ് ഡേ - 2025 ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നിയോജക മണ്ഡലം പരിധിയിലെ സ്‌കൂളുകളില്‍ നിന്നും എസ്എസ്എല്‍സി, സിബിഎസ്ഇ, ഐസിഎസ്ഇ, പ്ലസ് ടു, വിഎച്ച്എസ്ഇ പരീക്ഷകളില്‍ ഉന്നത വിജയം നേടിയ വിദ്യാര്‍ഥികളേയും, നൂറ് ശതമാനം വിജയം കൈവരിച്ച സ്ഥാപനങ്ങളേയും മെമന്‍റോയും, സര്‍ട്ടിഫിക്കറ്റും നല്‍കി അനുമോദിച്ചു. ഓര്‍ഗനൈസിംഗ് കമ്മിറ്റി ചെയര്‍മാന്‍ എം.പി. ജാക്‌സണ്‍ അധ്യക്ഷത വഹിച്ചു. മുന്‍സിപ്പല്‍ ചെയര്‍പേഴ്‌സണ്‍ മേരിക്കുട്ടി ജോയ് സ്വാഗതവും കോ- ഓര്‍ഡിനേറ്റര്‍ സി.എസ്. അബ്ദുള്‍ ഹഖ് ആമുഖ പ്രസംഗവും നടത്തി. ഡിസിസി ജനറല്‍ സെക്രട്ടറിമാരായ ആന്‍റോ പെരുമ്പിള്ളി, കെ.കെ. ശോഭനന്‍, സോണിയ ഗിരി, അഡ്വ. സതീഷ് വിമലന്‍, മുന്‍ എം.പി. സാവിത്രി ലക്ഷമണന്‍, ബ്ലോക്ക് കോണ്‍ഗ്രസ് പ്രസിഡന്റുമാരായ സോമന്‍ ചിറ്റേത്ത്, ഷാറ്റോ കുരിയന്‍, കണ്‍വീനര്‍ ടി.വി. ചാര്‍ളി, കോ- ഓര്‍ഡിനേറ്റര്‍ എ.സി. സുരേഷ് എന്നിവര്‍ പ്രസംഗിച്ചു. കോ ഓര്‍പ്പറേറ്റ് ഇന്‍റര്‍നാഷണല്‍ ട്രെയ്‌നര്‍ ജോബി ജോണല്‍ വിദ്യാര്‍ഥികള്‍ക്ക് മോട്ടിവേഷന്‍ ക്ലാസ് എടുത്തു. കരാഞ്ചിറ സെന്‍റ്് സേവിയേഴ്സ് ഹൈസ്കൂൾ കാട്ടൂര്‍: കരാഞ്ചിറ സെന്‍റ് സേവിയേഴ്സ് ഹൈസ്‌കൂളില്‍ നടന്ന വിജയോത്സവം ജില്ലാ പഞ്ചായത്ത് പ്രസിഡന്‍റ്് വി.എസ്. പ്രിന്‍സ് ഉദ്ഘാടനം നിര്‍വഹിച്ചു. സ്‌കൂള്‍ മാനേജര്‍ ഫാ. ജെയിംസ് പള്ളിപ്പാട്ട് അധ്യക്ഷത വഹിച്ചു. ഇരിങ്ങാലക്കുട രൂപത കൊ ഓര്‍പ്പറേറ്റ് എഡ്യൂക്കേഷണല്‍ ഏജന്‍സി മാനേജര്‍ ഫാ. സീജോ ഇരിമ്പന്‍ അനുഗ്രഹപ്രഭാഷണം നടത്തി. ഹെഡ്മിസ്ട്രസ് ഹീര ഫ്രാന്‍സിസ് ആലപ്പാട്ട്, കാട്ടൂര്‍ പഞ്ചായത്ത് പ്രസിഡന്‍റ് ടി.വി. ലത, പിടിഎ പ്രസിഡന്‍റ്് കെ.കെ. സതീശന്‍, മുന്‍ ഹെഡ്മിസ്ട്രസ് സി.ജെ. മഞ്ജു, സ്റ്റാഫ് പ്രതിനിധി ആന്‍റോ പി. തട്ടില്‍, ഷിംല മജീദ്, ബിജു എലുവത്തിങ്കല്‍, മുഹമ്മദ് അല്‍ത്താഫ് എന്നിവര്‍ സംസാരിച്ചു. എടത്തിരുത്തി സെന്‍റ് ആന്‍സ് ജിഎച്ച്എസ് സ്‌കൂൾ എടത്തിരുത്തി: എടത്തിരുത്തി സെന്‍റ് ആന്‍സ് ജിഎച്ച്എസ് സ്‌കൂളിലെ വിജയോത്സവം തൃശൂര്‍ ജില്ലാ പഞ്ചായത്ത് പ്രസിഡന്റ് വി.എസ്. പ്രിന്‍സ് ഉദ്ഘാടനം ചെയ്തു. പിടിഎ പ്രസിഡന്‍റ്് ജോമോന്‍ വലിയവീട്ടില്‍ അധ്യക്ഷത വഹിച്ചു. ഫുള്‍ എപ്ലസ് നേടിയ 41 വിദ്യാര്‍ഥിനികളെയും ഒമ്പത് എപ്ലസ് നേടിയ എട്ട് വിദ്യാര്‍ഥിനികളെയും 100% വിജയം നേടിയ എല്ലാ വിദ്യാര്‍ഥിനികളെയും ട്രോഫിയും മെഡലും നല്‍കി ആദരിച്ചു. സ്‌കൂളിന്‍റെ ലോക്കല്‍ മാനേജര്‍ സിസ്റ്റര്‍ അല്‍ഫോന്‍സ് സിഎംസി സമ്മാനദാനം നിര്‍വഹിച്ചു. ഹെഡ്മിസ്ട്രസ് സിസ്റ്റര്‍ ലിസ്ജോ, അധ്യാപക പ്രതിനിധി ലയ ടീച്ചര്‍, ലിജി ലോനപ്പന്‍, വിദ്യാര്‍ഥി പ്രതിനിധി കുമാരി ജൂലിയോ ജോജോ എന്നിവര്‍ പ്രസംഗിച്ചു. ചെന്ത്രാപ്പിന്നി സർവീസ് സഹകരണ ബാങ്ക് കൊപ്രക്കളം: ചെന്ത്രാപ്പിന്നി സർവീസ് സഹകരണ ബാങ്കിന്‍റെ ആഭിമുഖ്യത്തിൽ വിദ്യാഭ്യാസ അവാർഡ് വിതരണം നടത്തി. മതിലകം ബ്ലോക്ക് പഞ്ചായത്ത് പ്രസിഡന്‍റ് സി.കെ. ഗിരിജ ഉദ്ഘാടനം ചെയ്തു. ബാങ്ക് പ്രസിഡന്‍റ് എം.വി. ഹരിലാൽ അധ്യക്ഷനായി. എസ്എസ്എൽസി, പ്ലസ്ടു എന്നീ പരീക്ഷകളിൽ ഉന്നത വിജയം നേടിയ വിദ്യാർഥികളെ മെമന്‍റോയും, കാഷ് അവാർഡും നൽകി അനുമോദിച്ചു. എടത്തിരുത്തി ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രബാബു, നാട്ടിക ഫർക്ക സഹകരണ റൂറൽ ബാങ്ക് പ്രസിഡന്‍റ്് അഡ്വ. വി.കെ. ജ്യോതിപ്രകാശ് എന്നിവർ മുഖ്യാതിഥികളായി. ഗ്രാമ പഞ്ചായത്ത് വൈസ് പ്രസിഡന്‍റ് ഷൈലജ രവീന്ദ്രൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർ പേഴ്സൺ വാസന്തി തിലകൻ, സർക്കിൾ സഹകരണ യൂണിയൻ അംഗം എ.വി. പ്രദീപ് ലാൽ, ബാങ്ക് വൈസ് പ്രസിഡന്‍റ്് എം.എം. ഗിരീന്ദ്ര ബാബു, സെക്രട്ടറി പി. അമ്പിളി തുടങ്ങിയവർ പ്രസംഗിച്ചു.

ഇരിങ്ങാലക്കുടയിൽ ഞാറ്റുവേല മഹോത്സവത്തിനു തുടക്കം

ഇരിങ്ങാലക്കുട: കലയുടെയും കൃഷിയുടെയും സംഗമഭൂമിയായ ഇരിങ്ങാലക്കുടയില്‍ ഞാറ്റുവേല മഹോത്സവത്തിനായി സാംസ്‌കാരികത തുളുമ്പുന്ന നഗരസഭയുടെ പ്രവര്‍ത്തനങ്ങള്‍ ഏറെ ശ്ലാഘനീയമെന്ന് പത്മശ്രീ പെരുവനം കുട്ടന്‍മാരാര്‍ പറഞ്ഞു. ഞാറ്റുവേല മഹോത്സവം ഉദ്ഘാടനം നിര്‍വ്വഹിച്ചുകൊണ്ട് സംസാരിക്കുകയായിരുന്നു അദ്ദേഹം. മുനിസിപ്പല്‍ ചെയര്‍പേഴ്‌സണ്‍ മേരികുട്ടി ജോയ് അധ്യക്ഷത വഹിച്ചു. നഗരസഭ വൈസ് ചെയര്‍മാന്‍ ബൈജു കുറ്റിക്കാടന്‍, ഞാറ്റുവേല മഹോത്സവത്തിന് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഫെനി എബിന്‍ വെള്ളാനിക്കാരന്‍, ആരോഗ്യകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ അംബിക പള്ളിപ്പുറത്ത്, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി.സി. ഷിബിന്‍, പൊതുമരാമത്ത് കാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ജെയ്‌സണ്‍ പാറേക്കാടന്‍, വിദ്യാഭ്യാസകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ അഡ്വ. ജിഷ ജോബി, പാര്‍ലിമെന്‍ററി പാര്‍ട്ടി ലീഡര്‍മാരായ സോണിയ ഗിരി, അഡ്വ. കെ.ആര്‍. വിജയ, അല്‍ഫോന്‍സ തോമസ്, കൃഷി അസിസ്റ്റന്‍റ് ഡയറക്ടര്‍ എസ്. മിനി, കൃഷി ഓഫീസര്‍മാരായ കെ.പി. അഖില്‍, എം.ആര്‍. അജിത്കുമാര്‍, മുനിസിപ്പല്‍ സെക്രട്ടറി എം.എച്ച്. ഷാജിക് തുടങ്ങിയവര്‍ സംസാരിച്ചു.

കാട്ടൂരിൽ കെട്ടിടത്തിനു മുകളിലെ ഇരുമ്പ്ഫ്രെയിം ഭീഷണി

കാട്ടൂര്‍: മാര്‍ക്കറ്റിന്‍റെ ഹൃദയഭാഗത്ത് സ്ഥിതി ചെയ്യുന്ന കെട്ടിടത്തിന് മുകളില്‍ കാലങ്ങളായി നില്‍ക്കുന്ന തകര്‍ന്നു വീഴാറായ ഇരുമ്പ് ഫ്രെയിമും ഫ്ലക്‌സ് ബോര്‍ഡും മാറ്റണമെന്ന ആവശ്യവുമായി നാട്ടുകാര്‍ രംഗത്ത്. ഫ്ലക്‌സ് സ്ഥാപിച്ചിരിക്കുന്ന ഫ്രെയിം തുരുമ്പെടുത്ത അവസ്ഥയിലാണ്. കാറ്റിലും മഴയിലും ഏത് സമയത്തും ഇവ നിലം പതിക്കാവുന്ന അവസ്ഥയാണ്. മാര്‍ക്കറ്റിലൂടെ പോകുന്ന പ്രധാന റോഡിനു സമീപത്തെ കെട്ടിടത്തിലാണ് ഇരുമ്പ് ഫ്രെയിം നില്‍ക്കുന്നത്. ഇതിനു സമീപത്ത് കൂടി വൈദ്യുതി ലൈനുകളും പോകുന്നുണ്ട്. ഇത് അടിയന്തരമായി നീക്കണമെന്നാവശ്യപ്പെട്ട് രഞ്ചില്‍ തേയ്ക്കാനത്ത്, ആന്‍ഡ്രൂസ് ചിറ്റിലപ്പിള്ളി, കെ.വി. ജോഷി എന്നിവരുടെ നേതൃത്വത്തില്‍ പഞ്ചായത്തില്‍ പരാതി നല്‍കി.

മുദ്രപ്പത്രം കാണാതായതിനെക്കുറിച്ച് അന്വേഷണം വേണം: ചെയർമാൻ

ചാലക്കുടി: നഗരസഭ പൊതുമരാമത്ത് വർക്ക്ഫയലിൽ കരാർഒപ്പിട്ട മുദ്രപ്പത്രം നഷ്ടപ്പെട്ടതിൽ അന്വേഷണം നടത്തി നടപടി സ്വീകരിക്കണമെന്ന് ചെയർമാൻ ഷിബു വാലപ്പൻ ആവശ്യപ്പെട്ടു. 22ാം വാർഡിൽ റോഡിലുണ്ടായ അപകടരമായ കുഴി ഒഴിവാക്കാൻ അടിയന്തര പ്രവൃത്തിയുടെ പൊതുമരാമത്ത് വർക്ക്ഫയലിൽ കരാറുകാരനുമായി അസി. എഞ്ചിനീയർ മുദ്രപ്പത്രത്തിൽ ഒപ്പുവെച്ച കരാർ നഷ്ടപ്പെട്ടിരിക്കുന്ന സാഹചര്യമാണ്. കഴിഞ്ഞ ദിവസം ഈ വർക്ക് ചെയ്യുന്ന വിഷയവുമായി ബന്ധപ്പെട്ട് അസി. എൻജിനീയർ തടസവാദം ഉന്നയിച്ചിരുന്നു. തനത് ഫണ്ട് ഉപയോഗിച്ച് നടത്താൻ തീരുമാനിച്ചിരുന്ന ഈ അടിയന്തര പ്രവൃത്തി തനിക്ക് ചെയ്യാൻ കഴിയില്ലെന്ന് എൻജിനീയർ പറയുകയും നേരത്തെ ഒപ്പുവെച്ച കരാർപത്രം വെട്ടിക്കളയുകയും ചെയ്തിരുന്ന കാര്യം കഴിഞ്ഞ ദിവസം നടന്ന കൗൺസിൽ യോഗത്തിൽ ചർച്ചയായിരുന്നു. ഗുരുതരമായ കുറ്റമാണ് എൻജിനീയറുടെ ഭാഗത്തുനിന്ന് ഉണ്ടായതെന്നും കൗൺസിലിൽ അഭിപ്രായമുയർന്നു. ഇതിനുശേഷം സെക്രട്ടറി ഈ ഫയൽ വാങ്ങി പരിശോധിച്ചപ്പോഴാണ്, ഫയലിൽ കരാർപത്രം മാറ്റിയതായി ശ്രദ്ധയിൽപ്പെട്ടത്. അന്വേഷണ വിധേയമായി സസ്പെൻഡ് ചെയ്യാനും അച്ചടക്ക നടപടി എടുക്കാനും, വിജിലൻസ് അന്വേഷണത്തിനും കൗൺസിൽ തീരുമാനമെടുത്ത ഒരു ഉദ്യോഗസ്ഥ, ഇവർ കൈകാര്യം ചെയ്യുന്ന ഫയലിൽ കൃത്രമം കാണിക്കാൻ ശ്രമിച്ചിട്ടുള്ളത് ഗുരുതരമായ കുറ്റമാണെന്ന് ചെയർമാൻ ചൂണ്ടിക്കാട്ടി.

മഴക്കെടുതി; കയ്പമംഗലത്ത് അടിയന്തരയോഗം ചേർന്നു

കാളമുറി: മഴക്കെടുതിയെ തുടർന്ന് കയ്പമംഗലത്ത് അടിയന്തരയോഗം ചേർന്നു. കയ്പമംഗലം ഗ്രാമപഞ്ചായത്ത് പ്രസിഡന്‍റ് ശോഭന രവി അധ്യക്ഷത വഹിച്ചു. താലൂക്ക്, ബ്ലോക്ക്, വില്ലേജ്, പഞ്ചായത്ത്, പട്ടികജാതി വികസനം, ആരോഗ്യം തുടങ്ങിയ വകുപ്പുകളിലെ ഉദ്യോഗസ്ഥർ, ജനപ്രതിനിധികൾ, സന്നദ്ധ പ്രവർത്തകർ തുടങ്ങിയവർ യോഗത്തിൽ സംബന്ധിച്ചു. പഞ്ചായത്തിലെ മഴക്കെടുതികൾ വിലയിരുത്തുകയും കാമ്പുകൾ സന്ദർശിച്ചു സാഹചര്യങ്ങൾ നിരീക്ഷിക്കുകയും ചെയ്തു. കയ്പമംഗലത്തെ സാഹചര്യങ്ങൾ വിലയിരുത്തി അടിയന്തര നടപടികൾ സ്വീകരിക്കുമെന്ന് യോഗത്തിൽ തഹസീൽദാർ, വില്ലേജ് ഓഫീസർ എന്നിവർ ഉറപ്പ് നൽകി.

കൊരട്ടിയിൽ അപകടഭീഷണി ഉയർത്തി പാഴ്മരങ്ങൾ

കൊരട്ടി: ഗ്രാമപഞ്ചായത്ത് - വില്ലേജ് കാര്യാലയങ്ങൾക്ക് മുന്നിൽ വൈദ്യുതി ലൈനുകൾക്ക് മുകളിലൂടെ അപകട ഭീഷണി ഉയർത്തി പാഴ്മരങ്ങൾ നിന്നിട്ടും ശിഖിരങ്ങൾ പോലും വെട്ടി നീക്കാത്തതിനെതിരെ പരാതി. തിരക്ക് പിടിച്ച പൊതുമരാമത്ത് റോഡുകളിലൊന്നാണ് ഇത്. കൊരട്ടിയുടെ മുഖ്യ പോസ്റ്റ് ഓഫീസ്, കൃഷിഭവൻ, സ്വകാര്യ ആശുപത്രി, സർക്കാർ ആയൂർവേദ - ഹോമിയോ ഡിസ്പെൻസറി, ദേശസാൽകൃത ബാങ്ക്, അക്ഷയ കേന്ദ്രം, വ്യാപാര സ്ഥാപനങ്ങൾ അടക്കം സ്ഥിതി ചെയ്യുന്ന ഇടത്താണ് ആശങ്ക ഉയർത്തി മരങ്ങൾ നിൽക്കുന്നത്. ചെറിയ കാറ്റിനെ പോലും അതിജീവിക്കാനാകാതെ ഉയർന്നു നിൽക്കുന്ന ഈ മരങ്ങൾ കച്ചവട സ്ഥാപനങ്ങൾക്കും ഭീഷണിയാണ്. മഴക്കാല മുന്നൊരുക്കത്തിൻ്റെ ഭാഗമായി ഗൗരവം ഉൾക്കൊണ്ട് മരങ്ങൾ വെട്ടി നീക്കി ഭീതി അകറ്റാൻ അധികൃതർ തയ്യാറാകണമെന്നാണ് നാട്ടുകാരുടെ ആവശ്യം.

പൂഗ്രാമം പദ്ധതിക്ക് തുടക്കമായി

ശാന്തിപുരം: ശ്രീനാരായണപുരത്ത് പൂഗ്രാമം പദ്ധതി ആരംഭിച്ചു. ശ്രീനാരായണപുരം ഗ്രാമപഞ്ചായത്ത് 2025- 26 വാർഷിക പദ്ധതിയിൽ ഉൾപ്പെടുത്തി നടപ്പിലാക്കുന്ന പദ്ധതിയുടെ ഉദ്ഘാടനം കൃഷിഭവനിൽ പ്രസിഡന്‍റ് എം.എസ്. മോഹനൻ നിർവഹിച്ചു. ഓണക്കാലത്ത് പൂവിപണിയിൽ വിലക്കയറ്റം പിടിച്ചുനിർത്തുന്നതിനായി 9 വർഷമായി തുടരുന്ന പദ്ധതിയിൽ 1,08,000 രൂപ വകയിരുത്തി 27,000 ചെണ്ടുമല്ലി തൈകളാണ് ഗ്രൂപ്പ് വ്യക്തിഗത അടിസ്ഥാനത്തിൽ വിതരണം ചെയ്ത് പദ്ധതി നടപ്പാക്കുന്നത്. വൈസ് പ്രസിഡന്‍റ്് സജിത പ്രദീപ് അധ്യക്ഷത വഹിച്ചു. വാർഡ് മെമ്പർ ഇബ്രാഹിംകുട്ടി, കൃഷി ഓഫീസർ അനുജ ലോനപ്പൻ, ലത, വിഷ്ണു തുടങ്ങിയവർ പങ്കെടുത്തു.

മത്സ്യബന്ധന വഞ്ചി മറിഞ്ഞു; ഒരാളെ കാണാതായി

കൊടുങ്ങല്ലൂർ: കോട്ടപ്പുറം കോട്ടയിൽ മത്സ്യബന്ധന വഞ്ചി പുഴയിൽ മറിഞ്ഞ് അപകടം. ഒരാളെ കാണാതായി. മറ്റൊരാൾ നീന്തി രക്ഷപ്പെട്ടു. എറണാകുളം ജില്ലയിലെ തിരുത്തിപ്പുറം സ്വദേശി രാജുവിനെയാണ് കാണാതായത്. ഇയാൾക്കൊപ്പം വഞ്ചിയിൽ ഉണ്ടായിരുന്ന വിനു നീന്തി രക്ഷപ്പെട്ടു. ഇന്നലെരാത്രി എട്ടരയോടെ കോട്ട തിരുത്തിപ്പുറം പാലത്തിനു സമീപം പുഴയിലായിരുന്നു അപകടം. തീരദേശ പൊലീസും ഫയർ ഫോഴ്സും തെരച്ചിൽ നടത്തിവരുകയാണ്.

മണ്ണാന്ത്ര അമ്പലനട റോഡ് പൊതുജനങ്ങൾക്കു തുറന്നുനൽകി

വെങ്കിടങ്ങ്: ഗ്രാമപഞ്ചായത്തിലെ മണ്ണാന്ത്ര അമ്പലനട റോഡ് പൊതുജനങ്ങൾക്കു തുറന്നു നൽകി. ജില്ലാ പഞ്ചായത്ത് 10 ലക്ഷം രൂപ ചെലവിൽ കോൺക്രീറ്റ് ചെയ്താണു മണ്ണാന്ത്ര അമ്പലനട റോഡ് നിർമിച്ചത്. ജില്ലാ പഞ്ചായത്ത് മെമ്പർ ബെന്നി ആന്‍റണി നവീകരിച്ച മണ്ണാന്ത്ര അമ്പലനട റോഡിന്‍റെ ഉദ്ഘാടനം നിർവഹിച്ചു. വെങ്കിടങ്ങ് ഗ്രാമപഞ്ചായത്ത് പ്രസിഡന്‍റ്് കൊച്ചപ്പൻ വടക്കൻ അധ്യക്ഷ വഹിച്ചു. വൈസ് പ്രസിഡന്‍റ് മുംതാസ് റസാക്ക്, വാർഡ് മെമ്പർ സൗമ്യ സുഗു, പൂർണിമ നിഖിൽ, വാസന്തി ആനന്ദൻ, ചാന്ദിനി വേണു, ജെസി റാഫേൽ, എൻ.കെ. വിമല, കെ. സി. ജോസഫ്, വി.കെ. സോമശേഖരൻ, മുൻ ബ്ലോക്ക് മെമ്പർ ഷാജു അമ്പലത്ത്, എ.ഇ. ഷൈനി എന്നിവർ പ്രസം ഗിച്ചു.

തൃശൂർ - കൊടുങ്ങല്ലൂർ സംസ്ഥാനപാത: കോൺഗ്രസ് പ്രതിഷേധ ധർണ നടത്തി

ചേർപ്പ്: തൃശൂർ - കൂർക്കഞ്ചേരി -കൊടുങ്ങല്ലൂർ സംസ്ഥാന പാതയിലെ റോഡ് നിർമാണം നീണ്ടുപോകുന്നതിനെതിരെയും ഇതുമൂലം ഉണ്ടാകുന്ന ഗതാഗതക്കുരുക്കിലും അപകടങ്ങളിലും പ്രതിഷേധിച്ച് ചേർപ്പ് ബ്ലോക്ക് കോൺഗ്രസ് കമ്മിറ്റി കരുവന്നൂരിൽ പ്രതിഷേധ ധർണ നടത്തി. ഡിസിസി പ്രസിഡന്‍റ് അഡ്വ. ജോസഫ് ടാജറ്റ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സിജോ ജോർജ് അധ്യക്ഷത വഹിച്ചു. ഡിസിസി ജനറൽ സെക്രട്ടറി ആന്‍റോ പെരുമ്പുള്ളി, മുൻ ബ്ലോക്ക് പ്രസിഡന്‍റ്് കെ.കെ.അശോകൻ, സുനിൽ ലാലൂർ, സുജിഷ കള്ളിയത്ത്, കെ.ആർ. സിദ്ധാർത്ഥൻ, എം.എം. അബൂബക്കർ, കുട്ടികൃഷ്ണൻ നടുവിൽ, വി.ബി. സുരേന്ദ്രൻ, ഷനിൽ പെരുവനം, ബെെജുസെൻജോൺ, അശോകൻ പൊറ്റേക്കാട്ട്, ജോയ്സൻ ചൊവ്വൂർ, ജോഷി ആലപ്പാട്ട്, പൈലിആന്‍റണി, കെ. രാമചന്ദ്രൻ, ഷൈജു സായ്റാം, പ്രിയൻ പെരിഞ്ചേരി, കെ.ആർ. ചന്ദ്രൻ, ബാസ്റ്റിൻ ഫ്രാൻസിസ്, ഐച്ചിയിൽ രാധാകൃഷ്ണൻ, സന്തോഷ് എടത്തേടൻ, സി.എൻ. പ്രേംഭാസി, പി. സന്ദീപ് എന്നിവർ പ്രസംഗിച്ചു.

ശുചിമുറിമാലിന്യം തള്ളാൻ ശ്രമം; നാട്ടുകാർ തടഞ്ഞു, വാഹനം പോലീസ് കസ്റ്റഡിയിൽ

കൈപ്പറമ്പ്: ഗ്രാമപഞ്ചായത്തിലെ പതിനഞ്ചാം വാർഡിൽ സെപ്റ്റിക് ടാങ്ക് മാലിന്യം തള്ളാൻ ശ്രമം. മുണ്ടൂർ ആണ്ടപ്പറമ്പ് - പോന്നൂർ റൂട്ടിൽ ശിവനട റോഡിനരികെയുള്ള കെഎൽഡിസി കനാൽ പരിസരത്ത് ശനിയാഴ്ച പുലർച്ചെ മാലിന്യം തള്ളാനെത്തിയ ലോറി റോഡരികിൽ താഴുകയായിരുന്നു. ഇതറിഞ്ഞ നാട്ടുകാർ സ്ഥലത്തെത്തി പ്രതിഷേധിച്ചു. സംഭവസ്ഥലത്ത് എത്തിച്ചേർന്ന വാർഡ് മെമ്പർ മേരി പോൾസൺ, 6-ാം വാർഡ് മെമ്പർ സി.ഒ. ഔസേപ്പ്, മുണ്ടൂർ ബാങ്ക് പ്രസിഡന്‍റ് എം.ജെ. നിജോൺ എന്നിവരും നാട്ടുകാരും ചേർന്ന് പേരാമംഗലം പോലീസിൽ അറിയിച്ചു. മാലിന്യംതള്ളാൻ എത്തിയവർ വാഹനം ഉപേക്ഷിച്ച് ഓടിരക്ഷപ്പെട്ടു. പുഴയ്ക്കൽ ബ്ലോക്ക് പ്രസിഡന്‍റ്് ലീലാ രാമകൃഷ്ണൻ, പഞ്ചായത്ത് പ്രസിഡന്‍റ്് ഉഷാദേവി, വൈസ് പ്രസിഡന്‍റ് കെ.എം. ലെനിൻ എന്നിവരും സ്ഥലംസന്ദർശിച്ച് സ്ഥിതിഗതികൾ പരിശോധിച്ചു. പോലീസ് വാഹനം കസ്റ്റഡിയിലെടുത്ത് തുടർനടപടികൾ സ്വീകരിച്ചു. കഴിഞ്ഞ കുറേ മാസങ്ങളായി പന്ത്രണ്ടോളം പ്രാവശ്യം സെപ്റ്റിക് ടാങ്ക് മാലിന്യം ഈ മേഖലയിൽ തള്ളിയതായി പ്രദേശവാസികൾ പറഞ്ഞു. ഇതുസംബന്ധിച്ച നിരവധി പരാതികൾ പഞ്ചായത്ത് അധികൃതർക്കും പോലീസിനും നാട്ടുകാർ നൽകിയിരുന്നു. ഇതുപോലെത്തന്നെ, മുണ്ടൂർ മനപ്പടി പ്രദേശത്തും വിക്ടോറിയ ഗാർഡൻ ഭാഗത്തും മാർച്ച് മുതൽ ജൂൺ വരെയുള്ള കാലയളവിൽ മൂന്നു പ്രാവശ്യം ശുചിമുറിമാലിന്യം തള്ളിയെന്ന് നാട്ടുകാർ ആരോപിച്ചു.

ദേവാലയങ്ങളിൽ തിരുനാൾ

മുണ്ടൂർ പരിശുദ്ധ കർമലമാത മുണ്ടൂർ: പരിശുദ്ധ കർമലമാത ദേവാലയത്തിൽ ജൂലൈ മൂന്നിനു നടക്കുന്ന മാർ തോമാശ്ലീഹായുടെ 27-ാമത് ദുക്റാന ഉൗട്ടുതിരുനാളിനു കൊടിയേറി. വികാരി ഫാ. ബാബു അപ്പാടൻ കോടിയേറ്റകർമവും സഹവികാരി കൊടി വെഞ്ചരിപ്പുകർമവും നിർവഹിച്ചു. ദീപാലംകൃതമായ കൊടി മുഖ്യആകർഷണമായി. സപ്ലിമെന്‍റിന്‍റെ പ്രകാശനവും നടന്നു. വ്യാഴാഴ്ച നടക്കുന്ന നേർച്ച ഉൗട്ടിനു ആയിരക്കണക്കിന് വിശ്വാസികൾ പങ്കുചേരും. രണ്ടിനു വൈകീട്ട് 5.30 ന് വിശുദ്ധ കുർബാന, ലദീഞ്ഞ്, നൊവേന, രൂപം എഴുന്നള്ളിച്ചുവെക്കൽ തുട ങ്ങിയ തിരുക്കർമങ്ങൾക്ക് ഫാ. ഡിറ്റോ കൂള കാർമികത്വം വഹിക്കും. തിരുനാൾ ദിനത്തിൽ രാവിലെ 10.30ന് നടക്കുന്ന ആഘോഷമായ ദിവ്യബലിക്ക് ഫാ. ഗോഡ്‌വിൻ കിഴക്കൂടൻ മുഖ്യകാർമികത്വം വഹിക്കും. തുടർന്ന് പ്രദക്ഷിണം, നേർച്ച ഉൗട്ട് വെഞ്ചരിപ്പ്. കെസിവൈഎം പ്രസിഡന്‍റ് ക്രിസ്റ്റോ ജോസഫ്, സെക്രട്ടറി ആന്‍റോ ഫ്രാൻസി, ആനിമേറ്റർ സിസ്റ്റർ ബീന, ജനറൽ കണ്‍വീനർ ഗോഡ്‌വിൻ ആന്‍, ജോയിന്‍റ് കണ്‍വീനർമാരായ സാന്‍റോ ജേക്കബ്, അലീന കെ. ഡേവിസ്, മാനേജിംഗ് ട്രസ്റ്റി ബെന്നി ജോസഫ്, മറ്റു സബ് കമ്മിറ്റി കണ്‍വീനർമാർ, കൈക്കാരന്മാർ, സിസ്റ്റേഴ്സ്, ഇടവക അംഗങ്ങൾ തുടങ്ങിയവർ സന്നിഹിതരായിരുന്നു. ആർത്താറ്റ് മാർതോമ തീർഥകേന്ദ്രം കുന്നംകുളം: ആർത്താറ്റ് മാർതോമ തീർഥകേന്ദ്രത്തിലെ ദുക്റാന തിരുനാളിനുള്ള ഒരുക്കങ്ങൾ പൂർത്തിയായി. മൂന്നിനു കാലത്ത് 10നുള്ള തിരുനാൾ പാട്ടുകുർബാനയ്ക്ക് ഫാ. തോമസ് ഉൗക്കൻ മുഖ്യകാർമികത്വം വഹിക്കും. ഫാ. ഡെമിൻ തറയിൽ തിരുനാൾ സന്ദേശം നൽകും. വിശുദ്ധ കുർബാനയ്ക്കുശേഷം ഇടവകയിലെ തോമസ് നാമധാരികളെ ആദരിക്കും. തുടർന്ന് തിരുനാൾ പ്രദക്ഷി ണം, ഉൗട്ട് നേർച്ച എന്നിവ ഉണ്ടായിരിക്കും. തിരുനാളിന്‍റെ സുഗമമായ നടത്തിപ്പിന് ഇടവക വികാരി ഫാ. ഷിജോ മാപ്രാണത്തുകാരൻ, ഇടവക ട്രസ്റ്റി, തിരുനാൾ കമ്മിറ്റി അംഗങ്ങളുടെയും നേതൃത്വത്തിൽ ഒരുക്കങ്ങൾ നടക്കുന്നു. പുത്തൂർ സെന്‍റ് തോമസ് ഫൊറോന പുത്തൂർ: സെന്‍റ് തോമസ് ഫൊറോന ദേവാലയത്തിൽ ഇടവക മധ്യ സ്ഥനായ വിശുദ്ധ തോമാശ്ലീഹായുടെയും വിശുദ്ധ അന്തോണീസിന്‍റെയും ഊട്ടുതിരുനാൾ ആഘോഷിച്ചു. തിരുനാൾ പാട്ടുകുർബാനയ് ക്ക് ഫാ. നിർമൽ അക്കരപട്ട്യേക്കൽ മുഖ്യകാർമികത്വം വഹിച്ചു. ഫൊറോന വികാരി ഫാ. ജോജു പനയ്ക്കൽ ഊട്ടുനേർച്ച ആശീർവദിച്ചു. അസി. വികാരി ഫാ. റെജി തോ മസ്, ജനറൽ കൺവീനർ ടോണി അന്തിക്കാടൻ, ജോയിന്‍റ് കൺവീനർ പ്രിൻസ് ഐനിക്കൽ, കൈക്കാരന്മാരായ സണ്ണി മാളിയേക്കൽ, ഷോയി മാളിയേക്കൽ, സന്തോഷ് ആട്ടോക്കാരൻ, ഷാജി തട്ടിൽ എന്നിവർ നേതൃത്വം നൽകി.

ആറ് അപകടങ്ങളിൽ ഒന്പതുപേർക്കു പരിക്ക്

കാർ സൈക്കിളിൽ ഇടിച്ചു കേച്ചേരി: ചിറനെല്ലൂർ കള്ളുഷാപ്പിനുസമീപം കാർ സൈക്കിളിൽ ഇടിച്ച് പരിക്കുപറ്റിയ സൈക്കിൾ യാത്രികൻ ചിറനെല്ലൂർ സ്വദേശി ഒലക്കെങ്കിൽ വീട്ടിൽ ചാക്കുണ്ണി മകൻ ജോസ്(70)നെ അമല ആശുപത്രിയിൽ പ്രവേശിച്ചു. ലോറിയുടെ പിറകിൽ സ്കൂട്ടർ ഇടിച്ചു കേച്ചേരി: ഗവ. എൽപി സ്കൂളിനുസമീപം നിർത്തിയിട്ട ലോറിയുടെ പിറകിൽ നിയന്ത്രണംവിട്ട സ്കൂട്ടർ ഇടിച്ച് പരിക്കുപറ്റിയ പെരുമണ്ണ് സ്വദേശികളായ ശ്രീലത ഭവനിൽ രവീന്ദ്രൻ നായർ മകൻ ഉമേഷ്‌(46), മകൾ രേവതി(6) എന്നിവരെ കുന്നംകുളം താലൂക്ക് ആശുപത്രിയിൽ പ്രവേശി പ്പിച്ചു. ബൈക്ക് മറിഞ്ഞു കൈപ്പറമ്പ്: നൈൽ ആശുപത്രിക്കുസമീപം ബൈക്ക് നിയന്ത്രണംവിട്ട് മറിഞ്ഞ് പരിക്കുപറ്റിയ കൊട്ടേക്കാട് സ്വദേശി ഐനിക്കുന്നത്ത് വീട്ടിൽ രവീന്ദ്രൻ മകൻ അക്ഷയ്(21)നെ തൃശൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. നായ കുറുകെച്ചാടി സ്കൂട്ടർ മറിഞ്ഞു മുണ്ടൂർ: ക്രിസ്ത്യൻ പള്ളിക്കുസമീപം നായ കുറുകെ ചാടി സ്കൂട്ടർ നിയന്ത്രണംവിട്ടുമറിഞ്ഞ് പരിക്കുപറ്റിയ സ്കൂട്ടർ യാത്രികരായ കുറുവന്നൂർ സ്വദേശികളായ അന്തിക്കാട്ട് വീട്ടിൽ ഫ്രാൻസിസ് മകൻ ജിനു(38), ഭാര്യ ആശ(30) എന്നിവരെ അമല ആശുപത്രിയിൽ പ്രവേശിപ്പിച്ചു. പോന്നോരിൽ ബൈക്ക് ഇടിച്ചു കൈപ്പറമ്പ്: പോന്നോർ ആയിരംങ്കാവ് ക്ഷേത്രത്തിനുസമീപം ഇന്നലെ വൈകീട്ട് നിയന്ത്രണംവിട്ട ബൈക്കിടിച്ച് കാൽനടക്കാരനുപരിക്ക്. പോന്നോർ സ്വദേശി കയ്പറയ്ക്കൽ വീട്ടിൽ ജയൻ (63), ബൈക്ക് യാത്രികൻ തോളൂർ സ്വദേശി പീടികയിൽ വീട്ടിൽ സുനിൽ (41) എന്നിവർക്കാണു പരിക്കേറ്റത്. ഇരുവരെയും പറപ്പൂർ ആക്ട്സ് പ്രവർത്തകർ തൃശൂ ർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ചേർപ്പിൽ കാറും ബൈക്കും കൂട്ടിയിടിച്ചു ചേർപ്പ്: സെന്‍ററിൽ കാറും ബൈക്കും കൂട്ടിയിടിച്ച യുവാവിനുപരിക്ക്. ഹെർബർട്ട് കനാൽ കാനാടി വീട്ടിൽ അജയഘോഷ് (25) നാണ് പരിക്കേറ്റത്. ഇയാളെ ആക്ട്സ് പ്രവർത്തകർ തൃശൂർ ജില്ലാ ആശുപത്രിയിൽ പ്രവേശിപ്പിച്ചു. ഇന്നലെ രാത്രി എട്ടിനാണ് അപകടമുണ്ടായത്. ചേർപ്പ് സെന്‍ററിൽ സ്ഥാപിച്ചിട്ടുള്ള മിനി മാസ്റ്റ് ലൈറ്റ് പ്രവർത്തനരഹിതമാണെന്നും രാത്രിസമയത്ത് പ്രദേശം ഇരുട്ടിലാണെന്നും നാട്ടുകാർ ആരോപിച്ചു.

ലോഹിതദാസിന്‍റെ ചരമവാർഷികം ആചരിച്ചു

തൃശൂർ: ഓയിസ്ക ഇന്‍റർനാഷണലിന്‍റെയും മണ്ണുത്തി കൈലാസനാഥ സ്കൂളിന്‍റെയും ആഭിമുഖ്യത്തിൽ തിരക്കഥാകൃത്തും സംവിധായകനുമായ ലോഹിതദാസിന്‍റെ പതിനാറാം ചരമവാർഷികദിനം കൈലാസനാഥ സ്കൂളിനോടനുബന്ധിച്ചുള്ള ലോഹിതദാസ് സ്മൃതിവനത്തിൽ ആചരിച്ചു. സംഗീതസംവിധായകൻ വിദ്യാധരൻ ഉദ്ഘാടനം ചെയ്തു. ഓയിസ്ക ഇന്‍റർനാഷണൽ പ്രസിഡന്‍റും ഔഷധി പഞ്ചകർമ ആശുപത്രി സൂപ്രണ്ടുമായ ഡോ. കെ.എസ്. രജിതൻ അധ്യക്ഷത വഹിച്ചു. സിനിമാതാരം ജയരാജ് വാര്യർ, ഔഷധി മാനേജിംഗ് ഡയറക്ടർ ഡോ. ടി.കെ. ഹൃദീക്, നടി രമാദേവി, കൈലാസനാഥ സ്കൂൾ മാനേജർ സിജോ പുരുഷോത്തമൻ, പ്രിൻസിപ്പൽ എസ്. അനിത, ഓയിസ്ക ജനറൽ സെക്രട്ടറി ഡോ. സോണി പീറ്റർ, ഓയിസ്ക വനിതാ ചാപ്റ്റർ പ്രസിഡന്‍റ് ഇ. സത്യഭാമ എന്നിവർ പ്രസംഗിച്ചു.

റോഡിലെ ചെളിയിൽ കുത്തിയിരുന്ന് മുൻ പഞ്ചായത്തംഗത്തിന്‍റെ പ്രതിഷേധം

പട്ടിക്കാട്: തെക്കുംപാടം റോഡിലെ ചെളിയിൽ കുത്തിയിരുന്ന് പാണഞ്ചേരി ഗ്രാമപഞ്ചായത്ത് മുൻ അംഗം കെ.പി. എൽദോസ് പ്രതിഷേധിച്ചു. റോഡിന്‍റെ ശോചനീയാവസ്ഥ എത്രയും പെട്ടന്ന് പരിഹരിച്ച് മഞ്ഞക്കുന്ന് - മൈലാട്ടുംപാറ റോഡ് സഞ്ചാരയോഗ്യമാക്കണമെന്ന് ആവശ്യപ്പെട്ടുകൊണ്ടാണ് പ്രതിഷേധം നടത്തിയത്. മൈലാട്ടുംപാറ വാർഡ് കോൺഗ്രസ് കമ്മറ്റി സംഘടിപ്പിച്ച പ്രതിഷേധം ബ്ലോക്ക് കോൺഗ്രസ് കമ്മറ്റി പ്രസിഡന്‍റ്് ഷിബുപോൾ ഉദ്ഘാടനം ചെയ്തു. ടി.എൻ. പ്രതാപൻ എംപി ആയിരിക്കുബോൾ പ്രധാനമന്ത്രി സഡക്ക് യോജന പദ്ധതി പ്രകാരം പുനർനിർമാണ പ്രവൃത്തികൾ ആരംഭിച്ച റോഡാണിത്. റോഡിന്‍റെ ഇരുവശങ്ങളിലും ജൽജീവൻ മീഷൻ, മഞ്ഞക്കുന്ന് ലിഫ്റ്റ് ഇറിഗേഷൻ പദ്ധതികളുടെ പൈപ്പുകൾ സ്ഥാപിക്കുന്ന പ്രവൃത്തികൾ ഇതുവരെയും പൂർത്തികരിക്കാൻ സാധിച്ചിട്ടില്ലെന്നും കെ.പി. എൽദോസ് പറഞ്ഞു. മൈലാട്ടുംപാറ വാർഡ് മെമ്പറുടെയും പഞ്ചായത്തിന്‍റെയും അനാസ്ഥയാണ് വിവിധ പ്രവൃ ത്തികൾ പൂർത്തികരിച്ച് റോഡ് സഞ്ചാരയോഗ്യമാക്കാൻ സാധിക്കാതിരുന്നതെന്നും എൽദോസ് ആരോപിച്ചു.

സ്കൂട്ടർ തോട്ടിലേക്ക് മറിഞ്ഞ് യുവാവ് മരിച്ചു

പഴയന്നൂർ: വാഴക്കോട് പ്ലാഴി സംസ്ഥാനപാതയിൽ സ്കൂട്ടർ തോട്ടിലേക്കുമറിഞ്ഞ് യുവാവ് മരിച്ചു. ചേലക്കോട് സെന്‍ററിനു 300 മീറ്റർ അകലെ കഴിഞ്ഞദിവസം അർധരാത്രിയോടെ നിയന്ത്രണംവിട്ട സ്കൂട്ടർ പാതയോരത്തെ തോട്ടിലേക്കുമറിഞ്ഞ് സ്കൂട്ടർ ഓടിച്ച വെങ്ങാനെല്ലൂർ സ്വദേശി മിഥുൻ(28) ആണ് മരിച്ചത്. സെവന്ത് ഡേ ആശുപത്രിയിൽ കഴിയുന്ന സഹപ്രവർത്തകൻ രാഹുലിനെ സന്ദർശിക്കാൻ രാഹുലിന്‍റെ ഉടമസ്ഥതയിലുള്ള സ്കൂട്ടറിൽ സഞ്ചരിക്കുന്പോഴാണ് അപകടം സംഭവിച്ചത്. രാത്രികാല പട്രോളിംഗ് നടത്തിയിരുന്ന പോലീസ് സംഘത്തെ അതുവഴിപോയ കാർ യാത്രികനാണ് അപകടവിവരം അറിയിച്ചത്. ഉടൻ നാട്ടുകാരും പോലീസും ചേർന്ന് മിഥുനെ ചേലക്കര താലൂക്ക് ആശുപത്രിയിലും തുടർന്ന് ജീവോദയ ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി. മാതാവ്: ഭാർഗവി. ഭാര്യ: ആതിര. സഹോദരി: മിതു.

യുവാവിനെ കനാലിൽ മരിച്ചനിലയിൽ കണ്ടെത്തി

മണ്ണുത്തി: കനാലിൽ യുവാവിനെ മരിച്ച നിലയിൽ കണ്ടെത്തി. മണ്ണൂർ മുണ്ടാടൻ ജോണി മകൻ ലിജോ (37) നെയാണ് മരിച്ചനിലയിൽ കണ്ടെത്തിയത്. മുളയത്തുള്ള ഒരു വ്യക്തിയുടെ വീടിനു സമീപത്ത് കൂടി പോകുന്ന പഞ്ചായത്ത് ചാലിലാണ് ലിജോ കിടക്കുന്നതായി കണ്ടത്. ഉടനെ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. ലിജോ കിടന്നിരുന്ന ചാലിൽ മീൻ പിടിക്കാൻ വൈദ്യുതി കെണി വച്ചിട്ടുണ്ടായിരുന്നു. ഇതിൽനിന്ന് ഷോക്കേറ്റാണ് മരിച്ചതെന്നാണ് സംശയിക്കുന്നത്. മൃതദേഹം ഇന്ന് പോസ്റ്റ്മോർട്ടത്തിനു ശേഷം ബന്ധുകൾക്ക് വിട്ടുകൊടുക്കും. അവിവാഹിതനാണ്. ഒല്ലൂർ പോലീസ് മേൽനടപടികൾ സ്വീകരിച്ചു.

വിഷ്ണുദത്തിന്‍റെ മരണം :കരിദിനവും ശവപ്പെട്ടിസമരവുമായി കോണ്‍ഗ്രസ്

തൃശൂർ: മരണശേഷവും അധിക്ഷേപമെന്നാരോപിച്ച് കോർപറേഷനിലേക്കു ശവപ്പെട്ടിസമരവുമായി കോണ്‍ഗ്രസ് കൗണ്‍സിലർമാർ. മേയറുടെയും കോർപറേഷൻ സെക്രട്ടറിയുടെയും പേരിൽ കൊലക്കുറ്റത്തിനു കേസെടുക്കണമെന്നും ആവശ്യം. വിഷ്ണുദത്തിന്‍റെ മരണത്തിൽ കരിദിനം ആചരിച്ച കൗണ്‍സിലർമാർ കറുത്ത ഗൗണും ശവപ്പെട്ടിയുമായി കോർപറേഷനിലേക്കു കയറാൻ ശ്രമിച്ചതു പോലീസ് സംഘം തടഞ്ഞു. തുടർന്നുനടന്ന കുത്തിയിരിപ്പുസമരം പ്രതിപക്ഷനേതാവ് രാജൻ ജെ. പല്ലൻ ഉദ്ഘാടനം ചെയ്തു. വിഷണുദത്ത് ബസ് കയറിയാണ് മരിച്ചതെന്നും റോഡിലെ കുഴിമൂലം അല്ലെന്നും കുഴി ഉണ്ടെങ്കിൽതന്നെ അതു കൗണ്‍സിലറുടെ ഉത്തരവാദിത്വമാണെന്നുമുള്ള മേയറുടെ പത്രപ്രസ്താവന ഒളിച്ചോട്ടമാണെന്ന് അദ്ദേഹം ആരോപിച്ചു. വിഷ്ണുദത്തിന്‍റെ കുടുംബത്തിനു ധനസഹായം നൽകണം. അമ്മയുടെ ചികിത്സാചെലവും കോർപറേഷൻ ഏറ്റെടുക്കണം. മുഴുവൻ റോഡുകളുടെയും അറ്റകുറ്റപ്പണികൾ യുദ്ധകാലാടിസ്ഥാനത്തിൽ നടത്തണമെന്നും ഇനിയും ഒരപകടവും ആവർത്തിക്കാതിരിക്കാൻ ആവശ്യമായ മുൻകരുതലുകൾ എടുക്കണമെന്നും പ്രതിപക്ഷനേതാവ് ആവശ്യപ്പെട്ടു. പ്രതിപക്ഷ ഉപനേതാവ് ഇ.വി. സുനിൽരാജ്, കൗണ്‍സിലർമാരായ മുകേഷ് കൂളപറന്പിൽ, ശ്യാമള മുരളീധരൻ, ലാലി ജെയിംസ്, സുനിത വിനു, എ.കെ. സുരേഷ്, വിനീഷ് തയ്യിൽ, സിന്ധു ആന്‍റോ, വില്ലി ജിജോ, റെജി ജോയ് തുടങ്ങിയവർ പങ്കെടുത്തു.

ജൂബിലിയിൽ അന്താരാഷ്ട്ര മൈക്രോബയോം ദിനം ആചരിച്ചു

തൃശൂർ: മനുഷ്യശരീരത്തിലും പരിസ്ഥിതിയിലുമുള്ള അണുജീവികളാണ് നമ്മുടെ ആരോഗ്യവും സുഖജീവിതവും സാധ്യമാക്കുന്നതെന്നും അവയെപ്പറ്റി പഠിക്കാനും ബോധവത്കരിക്കാനുമാണ് മൈക്രോബയോം ദിനം ആചരിക്കുന്നതെന്നും മുഖ്യമന്ത്രിയുടെ ശാസ്ത്ര ഉപദേഷ്ടാവായ പദ്മശ്രീ എം. ചന്ദ്രദത്തൻ. അന്താരാഷ്ട്ര മൈക്രോബയോം ദിനത്തോടനുബന്ധിച്ച് സംസ്ഥാന സർക്കാർ സ്ഥാപനമായ സെന്‍റർ ഫോർ എക്സലൻസ് ഇൻ മൈക്രോബയോമും (സിഒഇഎം) ജൂബിലി മിഷൻ മെഡിക്കൽ കോളജും ഗവേഷണകേന്ദ്രവും സംയുക്തമായി സംഘടിപ്പിച്ച മൈക്രോബയോം ആൻഡ് ഹ്യൂമൻ ഹെൽത്ത് എന്ന വിഷയത്തെ ആസ്പദമാക്കിയ സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. അന്തരീക്ഷത്തിലും സമുദ്രത്തിലും വലിയ തോതിലുള്ള അണുജീവികൾ നിലവിലുണ്ട്. കാലാവസ്ഥാവ്യതിയാനംമൂലം മഞ്ഞുരുകിവരുന്പോൾ നൂറ്റാണ്ടുകളുടെ പഴക്കമുള്ളതും നമ്മൾ അറിയാത്തതുമായ നൂറുകണക്കിന് അണുജീവികൾ നമ്മുടെ ജലാശയത്തിലേക്ക് എത്തുന്നതുവഴി പാരിസ്ഥിതികമാറ്റങ്ങൾക്കു കാരണമാകുന്നു. ഇതു നമ്മുടെ ജീവനും ആരോഗ്യത്തിനും പരമപ്രധാനമാണ്. ഇനിയുള്ള പഠനങ്ങൾ ഇവയെ സംബന്ധിച്ചാകുമെന്നു ചടങ്ങിൽ മുഖ്യാതിഥിയായിരുന്ന കേരള ഫിഷറീസ് യൂണിവേഴ്സിറ്റിവൈസ്ചാൻസലർ ഡോ. എ. ബിജുകുമാർ അഭിപ്രായപ്പെട്ടു. ജൂബിലി മെഡിക്കൽ കോളജിലെ മദർ തെരേസ ഹാളിൽ നടന്ന ചടങ്ങിൽ ജൂബിലി ഡയറക്ടർ ഫാ. റെന്നി മുണ്ടൻകുരിയൻ അധ്യക്ഷത വഹിച്ചു. ജൂബിലി റിസർച്ച് ഡയറക്ടർ ഡോ. ഡി.എം. വാസുദേവൻ, സെന്‍റർ ഓഫ് എക്സലൻസ് ഇൻ മൈക്രോബയോം ഡയറക്ടർ ഡോ. സാബു തോമസ്, ഡോ. അപർണ ശങ്കർ, ജൂബിലി മെഡിക്കൽ കോളജ് പ്രിൻസിപ്പൽ ഡോ. എം.എ. ആൻഡ്രൂസ്, സിഒഇഎം സയന്‍റിസ്റ്റ് ഡോ. കാർത്തിക, ജൂബിലി സെന്‍റർ ഫോർ മെഡിക്കൽ റിസർച്ച് സയന്‍റിസ്റ്റ് ഡോ. മാത്യു ജോണ്‍ തുടങ്ങിയവർ പ്രസംഗിച്ചു. തുടർന്ന് വിവിധ മൈക്രോബയോ വിഷയങ്ങളെ അടിസ്ഥാനമാക്കി ഡോ. ബേബി ചക്രപാണി, ഡോ. ശങ്കർ റാം, ഡോ. മഹേഷ് എസ്. കൃഷ്ണ, ഡോ. അലക്സ് ജോർജ് എന്നിവർ പ്രബന്ധങ്ങൾ അവതരിപ്പിച്ചു. നാല്പതിൽപ്പരം സ്ഥാപനങ്ങളിൽനിന്നായി മുന്നൂറോളം പേർ സെമിനാറിൽ പങ്കെടുത്തു.

കാറ്റ്, മഴ: വീടുകൾ തകർന്നു

എരുമപ്പെട്ടി: കനത്ത മഴയിൽ എരുമപ്പെട്ടി ആറ്റത്രയിൽ വീട് തകർന്നുവീണു. പാണൻ വീട്ടിൽ മദീശൻ, രജനി എന്നിവരുടെ ഓടിട്ട വീടാണു ഭാഗികമായി തകർന്നത്. ഇന്നലെ വൈകീട്ട് അഞ്ചോ ടെയാണ് അപകടം. ആർക്കും പരിക്കില്ല. നിർധന കുടുംബം താമസിക്കുന്ന വീട് കാലപ്പഴക്കത്താൽ ചോർന്നൊലിക്കുന്ന അവസ്ഥയിലായിരുന്നു. മഴയിൽ ഒരു വശത്തെ ചുമർ തകർന്ന് നിലംപൊത്തി. മേൽക്കൂരയും പൊട്ടിവീഴാറായ അവസ്ഥയിലുള്ള വീട് പൂർണമായും വാസയോഗ്യമല്ലാതായി. ജലസംഭരണി കിണറിനു മുകളിൽവീണ് തകർന്നു പുന്നയൂർക്കുളം: ശക്തമായ മഴ‌യിൽ കോൺക്രീറ്റ് ജലസംഭരണി കിണറിനു മുകളിലേക്കു വീണു തകർന്നു. പുന്നയൂർക്കുളം കോറോത്തയിൽ പള്ളിക്കുപടിഞ്ഞാറ് അത്താണിക്കൽ സുൽഫിക്കർ അലിയുടെ വീട്ടിലെ കോൺക്രീറ്റ് ജലസംഭരണിയാണ് കിണറിനു മുകളിലേക്കു തകർന്നുവീണത്. കോൺക്രീറ്റ് പാളികൾവീണ് കിണർ മൂടിയ നിലയിലാണ്. വെള്ളിയാഴ്ച രാത്രിയാണ് അപകടം. സംഭരണിക്കുവേണ്ടി കല്ലിൽ കെട്ടി ഉയർത്തിയ പമ്പ് ഹൗസും ഇതിനു മുകളിലെ 1000 ലിറ്ററിന്‍റെ കോൺക്രീറ്റ് സംഭരണിയുമാണ് വീണത്. കിണറിന്‍റെ ആൾമറയും തൂണുകളും തകർന്നനിലയിലാണ്. അഞ്ഞൂർ അങ്ങാടിയിലെ പമ്പ് ഹൗസ് മഴയിൽ തകർന്നുവീണു. രാത്രിയാണ് സംഭവം. ആളൊഴിഞ്ഞ സമീപത്തെ പറമ്പിലേക്കാണു വീണത്. കുറേകാലമായി പ്രവർത്തനരഹിതമായി ജീർണാവസ്ഥയിലാണ്. പഴയ കാലത്ത് ഏതാനും പ്രദേശത്തുകാരുടെ ആശ്രയമായിരുന്നു. വീടിന്‍റെ പിറകുവശം ഇടിഞ്ഞുവീണു എരുമപ്പെട്ടി: കനത്ത മഴയിൽ എരുമപ്പെട്ടി മങ്ങാട് പുന്നംക്കോട് പള്ളിക്കുന്ന് പ്രദേശത്ത് വീടിന്‍റെ പിറകുവശം ഇടിഞ്ഞുതാണു. ഫ്ലാറ്റ് റോഡിൽ തൃത്താലപ്പറവിൻ മണികണ്ഠന്‍റെ വീടിന്‍റെ പിറകുവശവും ഇതിനോടുചേർന്നുള്ള സംരക്ഷണഭിത്തിയുമാണ് തകർന്നത്. ഇന്നലെ വൈകീട്ട് നാലോടെയുണ്ടായ മഴയിലാണ് അപകടം. വീടിന്‍റെ അടുക്കളയുടെ വശത്തെ മണ്ണ് ഇടിഞ്ഞ് താഴുകയായിരുന്നു. കോൺക്രീറ്റ് ചെയ്ത കൊട്ടത്തളവും അലക്ക് കല്ലും മതിലും ഷീറ്റ് മേയാൻ ഉറപ്പിച്ചിരുന്ന ഇരുമ്പുകാലുകളും ഇടിഞ്ഞു വീഴുകയായിരുന്നു. തെങ്ങുവീണ് മേൽക്കൂര തകർന്നു വെങ്കിടങ്ങ്: ശക്തമായ മഴയിൽ തെങ്ങുവീണ് വീടിന്‍റെ മേൽക്കൂര ഭാഗികമായി തകർന്നു. തൊയക്കാവ് അടാട്ട്കുളങ്ങര അമ്പലത്തിനു കിഴക്കുവശം താമസിക്കുന്ന എടക്കാട് ശാന്തയുടെ വീടിന്‍റെ മുകളിലേക്കാണു സമീപത്തു ണ്ടാ യിരുന്ന സ്വകാര്യവ്യക്തിയുടെ പറമ്പിലെ തെങ്ങുവീണത്. കഴിഞ്ഞ ദിവസം രാത്രിയുണ്ടായ കാറ്റിലാണ് തെങ്ങുവീണത്. ആർക്കും പരിക്കില്ല.

സൗരോർജരംഗത്ത് കേരളത്തിന് മികച്ച വളർച്ച: മന്ത്രി കെ. കൃഷ്ണൻകുട്ടി

പാറളം: സൗരോർജരംഗത്ത് കേരളത്തിനു മികച്ച വളർച്ച കൈവരിക്കാനായതായി വൈദ്യുതി മന്ത്രി കെ. കൃഷ്ണൻകുട്ടി. സംസ്ഥാനത്തെ ആദ്യ സമ്പൂർണ തെരുവുവിളക്ക് പ്രഖ്യാപനം പാറളം ഗ്രാമപഞ്ചായത്തിൽ നിർവഹിച്ചു പ്രസംഗിക്കുകയായിരുന്നു മന്ത്രി. അഞ്ചുവർഷംകൊണ്ട് പഞ്ചായത്തിന്‍റെ വാർഷികപദ്ധതിയിൽ 89,20,692 രൂപ ചെലവഴിക്കുന്നതിന്‍റെ ഭാഗമായിട്ടാണ് ആദ്യ തെരുവുവിളക്ക് പഞ്ചായത്ത് പാറളത്തിനാകാനായത്. പഞ്ചായത്ത് പ്രസിഡന്‍റ് മിനി വിനയൻ അധ്യക്ഷയായി. ചേർപ്പ് ബ്ലോക്ക് പഞ്ചായത്ത് പ്രസിഡന്‍റ്് എ.കെ. രാധാകൃഷ് ണൻ, ജില്ലാ പഞ്ചായത്ത് അംഗം ഷീന പറയങ്ങാട്ടിൽ, ആശ മാത്യു, ജെയിംസ് പി. പോൾ, കെ. പ്രമോദ്, വിദ്യാ‌നന്ദനൻ, അനിതാ മണി, ടി.എച്ച്. സാദിഖ്, ജൂബി മാത്യു, പി.കെ. ലിജീവ്, പി.ആർ. വർഗീസ്, സതീഷ് ബാബു മാരാത്ത്, സന്തോഷ് അറയ്ക്കൽ, സുധീർ ചക്കാലപ്പറമ്പിൽ, വി. എസ്. രേഖ എന്നിവർ പ്രസംഗിച്ചു.

പി.ജെ. ജോസഫിന്‍റെ ശതാഭിഷേകം ആഘോഷിച്ചു

തൃശൂർ: കേരള കോണ്‍ഗ്രസ് ചെയർമാനും മുൻമന്ത്രിയുമായ പി.ജെ. ജോസഫ് എംഎൽഎയുടെ ശതാഭിഷേകത്തിന്‍റെ ഭാഗമായി കോളങ്ങാട്ടുകര ബഥനിഭവൻ വൃദ്ധമന്ദിരത്തിൽ ആഘോഷപരിപാടികൾ സംഘടിപ്പിച്ചു. കേരള കോണ്‍ഗ്രസ് സംസ്ഥാന വൈസ് ചെയർമാൻ എം.പി. പോളി ചടങ്ങ് കേക്കുമുറിച്ച് ഉദ്ഘാടനം ചെയ്തു. വടക്കാഞ്ചേരി നിയോജകമണ്ഡലം വർക്കിംഗ് പ്രസിഡന്‍റ് തോമസ് ആളൂർ അധ്യക്ഷത വഹിച്ചു. കേരള കോണ്‍ഗ്രസ് ജില്ലാ പ്രസിഡന്‍റ് സി.വി. കുര്യാക്കോസ് മുഖ്യപ്രഭാഷണം നടത്തി. കേരള യൂത്ത് ഫ്രണ്ട് സംസ്ഥാനപ്രസിഡന്‍റ് കെ.വി. കണ്ണൻ, ജോണ്‍സണ്‍ കാഞ്ഞിരത്തിങ്കൽ, ബഥനിഭവൻ വൃദ്ധമന്ദിരം മദർ സുപ്പീരിയർ സിസ്റ്റർ റെജിമീസ് മാത്യു, കേരള കോണ്‍ഗ്രസ് ജില്ലാ വൈസ് പ്രസിഡന്‍റ് തോമസ് ആന്‍റണി, ജില്ലാ ജനറൽ സെക്രട്ടറി ഇട്ടിച്ചൻ തരകൻ, ജോസഫ് തരകൻ തുടങ്ങിയവർ പ്രസംഗിച്ചു. സ്നേഹവിരുന്ന്, മധുരവിതരണം, കലാപരിപാടികൾ എന്നിവയും ഉണ്ടായിരുന്നു.

കെഎസ്ടിഎ പ്രവർത്തക കൺവൻഷൻ

തൃശൂർ: ഓഗസ്റ്റ് രണ്ടിനു തൃശൂരിൽ നടക്കുന്ന ജില്ലാ മാർച്ചും ധർണയും വിജയിപ്പിക്കുന്നതിനായുള്ള കെഎസ്ടിഎ ജില്ലാ പ്രവർത്തക കണ്‍വൻഷൻ സാഹിത്യ അക്കാദമയിൽ സംസ്ഥാന സെക്രട്ടറി എം.കെ. നൗഷാദലി ഉദ്ഘാടനം ചെയ്തു. കേന്ദ്ര സർക്കാരിന്‍റെ ജനവിരുദ്ധനയങ്ങൾ തിരുത്തുക, കേരളത്തോടുള്ള അവഗണന അവസാനിപ്പിക്കുക, ദേശീയ വിദ്യാഭ്യാസനയം 2020 തള്ളിക്കളയുക, കേരളസർക്കാരിന്‍റെ ജനപക്ഷനയങ്ങൾക്കു കരുത്തുപകരുക, നവകേരളത്തിനായി അണിചേരുക തുടങ്ങി 33 ആവശ്യങ്ങൾ ഉന്നയിച്ചാണ് ജില്ലാ മാർച്ച് സംഘടിപ്പിച്ചിരിക്കുന്നത്. കെഎസ്ടിഎ ജില്ലാ പ്രസിഡന്‍റ് കെ. പ്രമോദ് അധ്യക്ഷത വഹിച്ചു. സംസ്ഥാന എക്സിക്യൂട്ടീവ് അംഗം ഡോ. പി.സി. സിജി, ജില്ലാ സെക്രട്ടറി സാജൻ ഇഗ്നേഷ്യസ്, സംസ്ഥാന കമ്മിറ്റി അംഗങ്ങളായ ടി.എം. ലത, ദീപ ആന്‍റണി, ബിനോയ് ടി. മോഹൻ, ജില്ലാ ഭാരവാഹികളായ കെ.ബി. ഫെർഡി, സജി സി. പോൾസണ്‍ തുടങ്ങിയവർ പങ്കെടുത്തു.

മകന്‍റെ ചേതനയറ്റ ശരീരം കാണാൻ വേദനകളോടെ അമ്മയെത്തി

തൃശൂർ: ക്ഷേത്രദർശനത്തിനായി വീട്ടിൽനിന്നു മകന്‍റെ സ്കൂട്ടറിനു പിന്നിലിരുന്നുപോകുന്പോൾ ആ അമ്മ ഒരിക്കലും കരുതിയിരുന്നില്ല, ഇനി മകന്‍റെ ചേതനയറ്റ ശരീരമാണ് കാണേണ്ടിവരികയെന്ന്. തൃശൂർ എംജി റോഡിലെ ഗട്ടറിൽ വീഴാതിരിക്കാൻ സ്കൂട്ടർ വെട്ടിച്ചപ്പോൾ പിന്നിൽവന്ന ബസിടിച്ചുമരിച്ച മകൻ വിഷ്ണുദത്തിനെ അവസാനമായി ഒരുനോക്കുകാണാൻ അമ്മ പദ്മിനിയെ മെഡിക്കൽ കോളജ് ആശുപത്രിയിൽനിന്ന് ഇന്നലെ രാവിലെ പൂങ്കുന്നം ഉദയനഗർ എകെജി നഗറിലെ വീട്ടിലെത്തിച്ചപ്പോൾ കരൾപിളരും കാഴ്ചകൾക്കാണ് ആ വീട് സാക്ഷിയായത്. വിദേശത്തുള്ള സഹോദരി എത്താനുള്ളതുകൊണ്ടാണ് സംസ്കാരം വൈകിയത്. അപകടത്തിൽ റോഡിലേക്കു തെറിച്ചുവീണ് വാരിയെല്ലുകൾ ഒടിഞ്ഞ് ഗുരുതരാവസ്ഥയിലാണ് അമ്മ പദ്മിനി. മെഡിക്കൽ കോളജ് ആശുപത്രിയിൽ ട്രോമാ കെയറിൽ കഴിയുന്ന പദ്മിനിയെ മകനെ അവസാനമായി കാണിക്കാൻ ആംബുലൻസിൽ കൊണ്ടുവരികയായിരുന്നു. മകന്‍റെ മൃതദേഹത്തിനരികിൽ കരയാൻപോലുമാകാതെ മരവിച്ചിരുന്ന പദ്മിനിയെ എന്തുപറഞ്ഞ് ആശ്വസിപ്പിക്കണമെന്നറിയാതെ ബന്ധുക്കളും നാട്ടുകാരും വിഷമിച്ചു. പദ്മിനിയെ ആശുപത്രിയിലേക്ക‌ു തിരികെ കൊണ്ടുപോയതിനുശേഷം വിഷ്ണുദത്തിന്‍റെ മൃതദേഹം പാറമേക്കാവ് ശാന്തിഘട്ടിൽ സംസ്കരിച്ചു.

പാലയൂർ ദുക്റാന - തർപ്പണ തിരുനാൾ ജൂലൈ മൂന്നുമുതൽ

പാലയൂർ: മാർതോമ മേജർ ആർക്കിഎപ്പിസ്കോപ്പൽ തീർഥകേന്ദ്രത്തിൽ മാർ തോമാശ്ലീഹായുടെ ദുക്റാന - തർപ്പണ തിരുനാൾ ജൂലൈ മൂന്നു മുതൽ 14 വരെയുള്ള ദിവസങ്ങളിൽ ആഘോഷിക്കുമെന്ന് ഭാരവാഹികൾ വാർത്താസമ്മേളത്തിൽ അറിയിച്ചു. മൈലാപ്പൂരിൽ മാർ തോമാശ്ലീഹാ രക്തസാക്ഷിത്വം വരിച്ചതിന്‍റെ ഓർമപുതുക്കുന്ന ദുക്‌റാന ദിനത്തിലാണു പ്രസിദ്ധമായ ദുക്റാന ഊട്ട്. പപ്പടം, പഴം, പായസം ഉൾപ്പടെ ഏഴുവിഭവങ്ങളാണു വിളമ്പുക. പതിനായിരങ്ങൾ പങ്കെടുക്കുന്ന ഊട്ടിൽ തീർഥാടകരുടെ സൗകര്യത്തിനായി ഭക്ഷണ വിതരണത്തിനായി വിശാലമായ പന്തലും അഞ്ചു കൗണ്ടറുകളും പാർസൽ സൗകര്യവും ഒരുക്കിയിട്ടുണ്ടെന്ന് ആർച്ച് പ്രീസ്റ്റ് റവ. ഡോ. ഡേവിസ് കണ്ണമ്പുഴ, സഹവികാരി ഫാ. ക്ലിന്‍റ് പാണേങ്ങാടൻ, ട്രസ്റ്റി ചാക്കോ പുലിക്കോട്ടിൽ, ജനറൽ കൺ വീനർ ടി.ജെ. ഷാജു, തീർഥ‌കേന്ദ്രം സെക്രട്ടറി ബിജു മുട്ടത്ത് എന്നിവർ പറഞ്ഞു. രാവിലെ എട്ടുമുതൽ വൈകീട്ട് വരെയാണ് നേർച്ച ഭക്ഷണവിതരണം. അരലക്ഷത്തോളം തീർഥാടകരെയാണു പ്രതീക്ഷിക്കുന്നത്. 12, 13, 14 തിയതികളിലായി ആഘോഷിക്കുന്ന തർപ്പണ തിരുനാളിന്‍റെ കൊടിയേറ്റം ദുക്റാന ദിനത്തിൽ രാവിലെ 9.30ന് ബിഷപ് മാർ ബോസ്കോ പുത്തൂർ നിർവഹിക്കും. ദുക്റാന തിരുനാളിന്‍റെ ഭാഗമായി രാവിലെ 6.30 മുതൽ വിവിധ സമയങ്ങളിലായി ആറ് ദിവ്യബലിയുണ്ട്. ഇതിൽ ഉച്ചകഴിഞ്ഞ് 2.30ന് ബലി അർപ്പിക്കുന്നത് അമേരിക്കയിലെ ഡഫ് മിനിസ്ട്രിയിൽ പ്രവർത്തിക്കുന്ന കേൾവിയും സംസാരശേഷിയും ഇല്ലാത്ത വൈദികനായ ഫാ. മിഖായേലാണ്. തർപ്പണ തിരുനാൾ ആഘോഷത്തിന്‍റെ ഭാഗമായി 12ന് രാവിലെ എഴുന്നള്ളിപ്പുകൾ ആരംഭിക്കും. വൈകീട്ട് 5.30 ന് കൂടുതുറക്കൽ ശുശ്രൂഷ, രാത്രി എഴുന്നള്ളിപ്പ് സമാപനം, ദീപക്കാഴ്ച, വെട്ടിക്കെട്ട്. 13 ന് രാവിലെ 10 ന് തിരുനാൾ പാട്ടുകുർബാന. രണ്ടിനു ള്ള സമൂഹ മാമ്മോദീസയ്ക്ക് ബി ഷപ് മാർ ടോണി നീലങ്കാവിൽ കാർമികത്വം വഹിക്കും. വൈകീ ട്ട് ദിവ്യബലി, പ്രദക്ഷിണം തുടങ്ങിയവ ഉണ്ടാകുമെന്ന് കൺവീനർമാരായ ബോബ് ഇലവത്തിങ്കൽ, സി.ഡി. ജോസ്, പിആർഒ ജെഫിൻ ജോണി എന്നിവർ അറിയിച്ചു.

ഡിജിറ്റൽ സർവേ സംവിധാനം കാര്യക്ഷമമെന്നു വിലയിരുത്തൽ

തൃശൂർ: കേരളത്തിലെ ഡിജിറ്റൽ സർവേ സംവിധാനത്തെ അഭിനന്ദിച്ച് ഇതരസംസ്ഥാനങ്ങളിലെ ഉദ്യോഗസ്ഥർ. തിരുവനന്തപുരത്തു സംഘടിപ്പിച്ച ഭൂമി ദേശീയ കോണ്‍ക്ലേവിന്‍റെ ഭാഗമായി രാജ്യത്തെ വിവിധ സംസ്ഥാനങ്ങളിൽനിന്നുള്ള ഉദ്യോഗസ്ഥസംഘം ജില്ലയിലെ ഡിജിറ്റൽ സർവേ നടക്കുന്ന എടക്കഴിയൂർ വില്ലേജ് സന്ദർശിച്ചു. മൂന്നാംഘട്ടത്തിലേക്കു പ്രവേശിച്ച ഡിജിറ്റൽ സർവേ സംവിധാനങ്ങൾ നേരിട്ടെത്തി വിലയിരുത്തി. ഇതിനു മുന്നോടിയായി തൃശൂർ കളക്ടറേറ്റിൽ ജില്ലാ കളക്ടർ അർജുൻ പാണ്ഡ്യനുമായി ഉദ്യോഗസ്ഥ സംഘം കൂടിക്കാഴ്ച നടത്തി. കളക്ടറേറ്റ് കോണ്‍ഫറൻസ് ഹാളിൽ ഡിജിറ്റൽ സർവേ പ്രക്രിയയെക്കുറിച്ച് സർവേ വകുപ്പ് ഉദ്യോഗസ്ഥർ വിശദീകരിച്ചു. കേരളത്തിലെ ഡിജിറ്റൽ സർവേ സംവിധാനം വളരെ കാര്യക്ഷമവും നൂതനവുമാണെന്നു മറ്റു സംസ്ഥാനങ്ങളിൽ നിന്നെത്തിയ ഉദ്യോഗസ്ഥർ വിലയിരുത്തി. കേരളത്തിൽനിന്നു മറ്റു സംസ്ഥാനങ്ങൾക്ക് ഒരുപാട് കാര്യങ്ങൾ പഠിക്കാനുണ്ടെന്നും അവർ അഭിപ്രായപ്പെട്ടു. ജാർഖണ്ഡിൽനിന്നുള്ള സിവിൽ സർവീസ് ഉദ്യോഗസ്ഥൻ ചന്ദ്രശേഖർ, ജാർഖണ്ഡ് അണ്ടർ സെക്രട്ടറി ശങ്കർകുമാർ, അരുണാചൽപ്രദേശ് ഡയറക്ടർ പാഗലി സോറ, അരുണാചൽപ്രദേശിലെ ജില്ലാ ലാൻഡ് റവന്യൂ ആൻഡ് സെറ്റിൽമെന്‍റ് ഓഫീസർ പുടോം ടാക്കു, തെലുങ്കാന സെക്രട്ടറിയും സിഎംആർഒ പ്രോജക്ട് ഡയറക്ടറുമായ മാണ്ട മകരണ്ടു എന്നിവർ ഉൾപ്പെട്ട ഉദ്യോഗസ്ഥസംഘത്തെ പുന്നയൂർ പഞ്ചായത്ത് പ്രസിഡന്‍റ് ടി.വി. സുരേന്ദ്രൻ, സബ് കളക്ടർ അഖിൽ വി. മേനോൻ, സർവേ വകുപ്പ് ജോയിന്‍റ് ഡയറക്ടർ കെ.കെ. സുനിൽ, ഡെപ്യൂട്ടി ഡയറക്ടർ എസ്. അൻസദ്, അസിസ്റ്റന്‍റ് ഡയറക്ടർ മോനിക്കുട്ടൻ തുടങ്ങിയവർ അനുഗമിച്ചു. ജില്ലാ കളക്ടർ ഉദ്യോഗസ്ഥസംഘത്തിന് ഉപഹാരം നൽകി.

പ്രിയദർശിനി പബ്ലിക് ലൈബ്രറി ഉദ്ഘാടനം ജൂലൈ ഒന്നിന്

തൃശൂർ: തളിക്കുളം സ്നേഹതീരത്തു നവീകരിച്ച പ്രിയദർശിനി പബ്ലിക് ലൈബ്രറിയുടെ ഉദ്ഘാടനവും പ്രഥമ പ്രിയദർശിനി പുരസ്കാരസമർപ്പണവും ജൂലൈ ഒന്നിനു നടക്കുമെന്നു പ്രിയദർശിനി സ്മാരകസമിതി പ്രസിഡന്‍റും മുൻ എംപിയുമായ ടി.എൻ. പ്രതാപൻ പത്രസമ്മേളനത്തിൽ അറിയിച്ചു. ഉച്ചകഴിഞ്ഞു മൂന്നിന് പാർലമെന്‍റ് പബ്ലിക് അക്കൗണ്ട്സ് കമ്മിറ്റി ചെയർമാൻ കെ.സി. വേണുഗോപാൽ എംപി ചടങ്ങ് ഉദ്ഘാടനം ചെയ്യും. ഒരു ലക്ഷം രൂപയും പ്രശസ്തിപത്രവും ശില്പവും അടങ്ങുന്ന പുരസ്കാരം റാപ്പ് ഗായകൻ വേടൻ (ഹിരണ്‍ദാസ് മുരളി) ഏറ്റുവാങ്ങും. ചടങ്ങിൽ പദ്മപ്രഭ പുരസ്കാരജേതാവ് ആലങ്കോട് ലീലാകൃഷ്ണനെ രാഹുൽ മാങ്കൂട്ടത്തിൽ എംഎൽഎയും വയലാർ അവാർഡ് ജേതാവ് അശോകൻ ചരുവിലിനെ സി.സി. മുകുന്ദൻ എംഎൽഎയും ആദരിക്കും. കെഎസ്‌യു സംസ്ഥാന പ്രസിഡന്‍റ് അലോഷ്യസ് സേവ്യർ പ്രശസ്തിപത്രം കൈമാറും. ലൈബ്രറി സെക്രട്ടറി ഗഫൂർ തളിക്കുളം, ലൈബ്രറി കൗണ്‍സിൽ മുൻഅംഗം സുനിൽ ലാലൂർ എന്നിവരും പത്രസമ്മേളനത്തിൽ പങ്കെടുത്തു.

ദേശീയ സ്റ്റാറ്റിസ്റ്റിക്സ് ദിനം: ജില്ലാതല ആഘോഷം നാളെ

തൃശൂർ: പത്തൊന്പതാമത് ദേശീയ സ്റ്റാറ്റിസ്റ്റിക്സ് ദിനത്തിന്‍റെ ഭാഗമായി ജില്ലാതല ആഘോഷം നാളെ ടൗണ്‍ ഹാളിൽ നടത്തും. രാവിലെ 9.30 ന് മന്ത്രി കെ. രാജൻ ഉദ്ഘാടനം ചെയ്യും. പി. ബാലചന്ദ്രൻ എംഎൽഎ ഉന്നതവിജയം കൈവരിച്ച വകുപ്പിലെ ജീവനക്കാരുടെ മക്കൾക്കുള്ള പുരസ്കാരവിതരണവും ഒരുകോടി വൃക്ഷത്തൈ നടുക എന്ന സർക്കാർ പദ്ധതിയുടെ ഭാഗമായി വൃക്ഷത്തൈവിതരണവും നടത്തും. "എന്‍റെ കേരളം' പ്രദർശന വിപണനമേളയോടനുബന്ധിച്ച് മലയാളിയുടെ ഉന്നതവിദ്യാഭ്യാസ പ്രതീക്ഷകളെക്കുറിച്ചും ലഹരി ഉപയോഗത്തെക്കുറിച്ചും വകുപ്പ് നടത്തിയ അഭിപ്രായസർവേ റിപ്പോർട്ടിന്‍റെ പ്രകാശനം ജില്ലാ കളക്ടർ അർജുൻ പാണ്ഡ്യൻ നിർവഹിക്കും.

നീന്തൽ പ്രോത്സാഹിപ്പിച്ചാൽ ജലാശയ ദുരന്തങ്ങൾ കുറയ്ക്കാം: മന്ത്രി ബിന്ദു

തൃശൂർ: നീന്തൽ അറിയാത്തതുമൂലം മഴക്കാലത്തും മറ്റു സമയങ്ങളിലും അപകടങ്ങൾ ഉണ്ടാവുകയും ആളുകൾ മരണപ്പെടുകയും ചെയ്യുന്ന സഹചര്യമുള്ളതായും നീന്തൽപഠനത്തെ പ്രോത്സാഹിപ്പിച്ചാൽ ജലാശയ ദുരന്തങ്ങൾ ഒഴിവാക്കാനാവുമെന്നും മന്ത്രി ഡോ. ആർ. ബിന്ദു അഭിപ്രായപ്പെട്ടു. ജില്ലാ അക്വാട്ടിക് അസോസിയേഷന്‍റെ ആഭിമുഖ്യത്തിൽ നടത്തിയ സബ് ജൂണിയർ, ജൂണിയർ വിദ്യാർഥികളുടെ നീന്തൽ ചാന്പ്യൻഷിപ്പ് ഉദ്ഘാടനംചെയ്തു സംസാരിക്കുകയായിരുന്നു മന്ത്രി. എംഎൽഎ ഫണ്ടും മറ്റും ഉപയോഗിച്ച് ജില്ലാ അക്വാട്ടിക് കോംപ്ലക്സിലെ സ്വിമ്മിംഗ് പൂളിലെ ട്രസ് വർക്ക് അടക്കമുള്ള അടിസ്ഥാനസൗകര്യങ്ങൾ വർധിപ്പിക്കുമെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് അധ്യക്ഷനായി. പാണഞ്ചേരി ഗ്രാമപഞ്ചായത്ത് പ്രസിഡന്‍റ് പി.വി. രവീന്ദ്രൻ, ജില്ലാ അക്വാട്ടിക് അസോസിയേഷൻ പ്രസിഡന്‍റ് റാഫി ആന്‍റണി, വൈസ് പ്രസിഡന്‍റ് സി. മുരളീധരൻ തുടങ്ങിയവർ പ്രസംഗിച്ചു.

സർക്കാരിന്‍റെ നയം സൗഹൃദപരമല്ല: പെൻഷനേഴ്സ് അസോ.

തൃശൂർ: സ്ത്രീകളോടും വയോജനങ്ങളോടും സൗഹൃദപരമായ നയം സ്വീകരിക്കുന്ന സർക്കാരല്ല ഇപ്പോൾ കേരളം ഭരിക്കുന്നതെന്നു കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ. പതിറ്റാണ്ടുകൾ സർക്കാരിനെ സേവിച്ചുവിരമിച്ച വയോധികരായ വനിതകൾ അടിസ്ഥാന അവകാശങ്ങൾക്കുവേണ്ടി തെരുവിലിറങ്ങേണ്ട അവസ്ഥയാണ് ഇന്നു സംസ്ഥാനത്തുള്ളതെന്നു കെഎസ്എസ്പിഎ സെക്രട്ടറി രാജൻ കുരുക്കൾ ആരോപിച്ചു. വനിതാശില്പശാല ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. ജില്ലാ വനിതാ ഫോറം പ്രസിഡന്‍റ് എം.എസ്. നദീറ അധ്യക്ഷത വഹിച്ചു. വനിതാ ഫോറം സംസ്ഥാന പ്രസിഡന്‍റ് വാസന്തി മുഖ്യ പ്രഭാഷണം നടത്തി. സംസ്ഥാനസെക്രട്ടറി രാധാമണി, കെ.എ. ബീന, ജെസി തരകൻ, ടി.എസ്. സലിം, ടി.എം. കുഞ്ഞു മൊയ്തീൻ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]