തലസ്ഥാനത്തിന്‍റെ ഹൃദയഭാഗത്ത് എഡിജിപി അജിത്കുമാർ കൊട്ടാരസദൃശമായ മണിമാളിക പണിയുന്നതിനെക്കുറിച്ച് അന്വേഷിക്കണമെന്ന് വിജിലൻസിന് എറണാകുളം സ്വദേശി നേരത്തേ പരാതി നൽകിയിരുന്നു.
വിജിലൻസ് ഡയറക്‌ടർക്ക് ഇമെയിലായി അയച്ച പരാതി അന്വേഷണാനുമതിക്കായി സർക്കാരിനു കൈമാറിയിരുന്നു. പരാതിയിൽ പ്രാഥമിക പരിശോധന നടത്തിയ വിജിലൻസ് ഇക്കാര്യത്തിൽ വിശദ അന്വേഷണം വേണമെന്നും സർക്കാരിനെ അറിയിച്ചിരുന്നു.
ഭരണകക്ഷി എംഎൽഎയായ പി.വി. അൻവറും എം.ആർ. അജിത്കുമാറിന്‍റെ സാന്പത്തിക സ്രോതസ് അന്വേഷിക്കണമെന്ന് ആവശ്യപ്പെട്ടിരുന്നു. എഡിജിപിയുടെ ഭാര്യാസഹോദരൻമാർക്കെതിരേയും അൻവർ ആരോപണം ഉന്നയിച്ചിരുന്നു.
വെള്ളയന്പലം-കവടിയാർ റോഡിൽനിന്ന് മാറി ഗോൾഫ് ക്ലബ്ബിനടുത്ത് കവടിയാർ പാലസ് അവന്യൂവിലെ വീടിന്‍റെ വിവരങ്ങൾ പി.വി. അൻവറാണ് വെളിപ്പെടുത്തിയത്.
വിജിലൻസ് മേധാവി യോഗേഷ് ഗുപ്തയ്ക്ക് ഡിജിപി റാങ്കുണ്ട്. അതിനാൽ എഡിജിപിക്കെതിരായ അന്വേഷണം വിജിലൻസ് മേധാവിയുടെ മേൽനോട്ടത്തിലാകും നടത്തുക. വിജിലൻസ് ഡയറക്‌ടർക്കു കീഴിൽ ഐജിമാരില്ലാത്തതു പ്രതിസന്ധി സൃഷ്ടിക്കുന്നുണ്ട്. ഡയറക്‌ടർക്കു താഴെ എസ്പിമാർ മാത്രമാണുള്ളത്.