മാസ് എന്ട്രിയുമായി ഷാഫി പറമ്പില് തീര്ത്തും അപ്രതീക്ഷതമായാണു ഷാഫി പറമ്പില് എംഎല്എ വടകരയില് സ്ഥാനാര്ഥിയായി എത്തിയത്. സിറ്റിംഗ് എംപി കെ. മുരളീധരന് പ്രചാരണം തുടങ്ങി മുന്നേറുന്നതിനിടെ തൃശൂരിലേക്കു മാറിയതാണ് ഷാഫിക്കു നറുക്കുവീഴാന് കാരണം.
യുവനേതാവെന്ന നിലയ്ക്കു ചെറുപ്പക്കാര്ക്കിടയില് തരംഗം സൃഷ്ടിക്കാന് ഷാഫിക്കു കഴിയുമെന്ന കണക്കുകൂട്ടലാണു യുഡിഎഫിനുള്ളത്. ആയിരക്കണക്കിനു പ്രവര്ത്തകരാണ് ഷാഫി വടകരയില് എത്തിയപ്പോള് വരവേല്ക്കാന് ഉണ്ടായിരുന്നത്. പ്രചാരണത്തില് ഇടതുസ്ഥാനാര്ഥിക്ക് ഒപ്പമെത്തിയില്ലെങ്കിലും ഷാഫിക്കു മണ്ഡലമാകെ ഇളക്കിമറിക്കാന് കഴിഞ്ഞിട്ടുണ്ട്.
പാനൂരില് ബോംബ് പൊട്ടി സിപിഎം പ്രവര്ത്തകന് മരിച്ചപ്പോള് അവിടെ സമാധാന യാത്ര നടത്തി താരമാകാനും ഷാഫിക്കു കഴിഞ്ഞു. സ്ത്രീകളടക്കമുള്ള വോട്ടര്മാര് സ്നേഹത്തോടെയാണ് ഷാഫിയെ എതിരേല്ക്കുന്നത്. അന്യതാബോധം ഇവിടെയില്ല.
ആളുകള്ക്കിടയിലേക്ക് ഇറങ്ങിച്ചെന്ന് കുശലം പറഞ്ഞും തോളില് കൈയിട്ടും ഷാഫി അവരിലൊരാളായി മാറുകയാണ്. മുല്ലപ്പള്ളി രാമചന്ദ്രനും കെ. മുരളീധരനും മണ്ഡലത്തില് നടപ്പാക്കിയ വികസനത്തിന്റെ പിന്തുടര്ച്ചയാണ് ഷാഫി അവകാശപ്പെടുന്നത്. സംസ്ഥാന സര്ക്കാരിനെതിരായ ഭരണ വിരുദ്ധ വികാരം തനിക്ക് അനൂകൂലമാവുമെന്ന് ഷാഫി കണക്കുകൂട്ടുന്നു.
നാട്ടുകാരുടെ ബലത്തില് പ്രഫുല് കൃഷ്ണന് യുവമോര്ച്ച സംസ്ഥാന പ്രസിഡന്റ് സി.ആര്. പ്രഫുല് കൃഷ്ണനാണ് എന്ഡിഎ സ്ഥാനാര്ഥി. വടകര കടമേരി സ്വദേശിയായ അദ്ദേഹം വടകര എസ്ജിഎംഎസ്ബി സ്കൂള് അധ്യാപകനാണ്.
യുവതലമുറയ്ക്കിടയിലുള്ള വ്യക്തിബന്ധങ്ങളും കുടുംബ വോട്ടുകളുമെല്ലാം തനിക്ക് ഗുണം ചെയ്യുമെന്ന് അദ്ദേഹം വിശ്വസിക്കുന്നു. മോദി സര്ക്കാറിന്റെ ഭരണ നേട്ടങ്ങളാണ് വോട്ടര്മാര്ക്കു മുന്നില് അദ്ദേഹം ചര്ച്ചയാക്കുന്നത്. പരമാവധി വോട്ടുകള് സമാഹരിക്കുന്നതിനുള്ള പ്രവര്ത്തനമാണ് എന്ഡിഎ നടത്തുന്നത്.