ഹയര്‍ സെക്കൻഡറി ട്രാന്‍സ്ഫര്‍ താത്കാലിക പട്ടിക പ്രസിദ്ധീകരിച്ചു
Wednesday, May 21, 2025 1:04 AM IST
തിരുവനന്തപുരം: സർക്കാര്‍ ഹയർ സെക്കൻഡറി സ്കൂള്‍ അധ്യാപകരുടെ 2025-26ലെ ഓണ്‍ലൈന്‍ വഴിയുള്ള സ്ഥലംമാറ്റവുമായി ബന്ധപ്പെട്ട താത്കാലിക പട്ടിക (പ്രൊവിഷണൽ ലിസ്റ്റ്)www.dhsetransfer. kerala.gov.in എന്ന വെബ് സൈറ്റില്‍ പ്രസിദ്ധീകരിച്ചു.
ലിസ്റ്റിന്മേല്‍ പരാതികള്‍ 24നകം dhsetrans [email protected] എന്ന ഇമെയിലില്‍ സമർപ്പിക്കണം. പ്രൊഫൈല്‍ അപ്‍ഡേറ്റ് ചെയ്യാന്‍ നിരവധി അവസരങ്ങള്‍ നൽകിയിട്ടും അവ കൃത്യമാക്കാത്തതുമൂലം അധ്യാപകരുടെ സേവന കാലയളവ് ലിസ്റ്റില്‍ കുറവായി കാണുന്നുവെങ്കില്‍ അത്തരം പരാതികള്‍ ഇനി പരിഗണിക്കില്ല.
പരിരക്ഷിതം, മുന്‍ഗണന, അനുകമ്പാര്‍ഹം വിഭാഗത്തില്‍ തെറ്റായ വിവരങ്ങളും രേഖകളും നല്‍കി ആനുകൂല്യം പറ്റുന്നവർ ലിസ്റ്റിലുണ്ടെങ്കില്‍ അതിനെതിരേ മറ്റുള്ളവര്‍ക്കും പരാതി നൽകാം.
8209 അപേക്ഷകളാണ് ജനറല്‍ ട്രാന്‍സ്ഫറിനായി ഈ വര്‍ഷം ലഭിച്ചത്. ഇതില്‍ 4694 അധ്യാപകര്‍ക്ക് മറ്റു സ്കൂളുകളിലേക്കും 3245 അധ്യാപകര്‍ക്ക് അവര്‍ നിലവില്‍ ജോലി ചെയ്യുന്ന സ്കൂളുകളിലേക്കും പ്രൊവിഷണല്‍ ലിസ്റ്റ് പ്രകാരം ട്രാന്‍സ്ഫര്‍ ലഭിച്ചിട്ടുണ്ട്. ഇതില്‍ 3607 അധ്യാപകര്‍ക്ക് അവരുടെ ഒന്നാമത്തെ ചോയ്സും 768 അധ്യാപകര്‍ക്ക് രണ്ടാമത്തെ ചോയ്സും ലഭിച്ചിട്ടുണ്ട്. 467 അധ്യാപകര്‍ക്ക് മൂന്നാമത്തെയും 316 അധ്യാപകര്‍ക്ക് നാലാമത്തെയും ചോയ്സുകള്‍ ലഭിച്ചു.