ADVERTISEMENT

ADVERTISEMENT

യുദ്ധവിരുദ്ധ സന്ദേശറാലി സംഘടിപ്പിച്ചു

കുളത്തൂപ്പുഴ: ബിഎംജി ഹൈസ്കൂൾ സന്നദ്ധ സംഘടനകൾ ഹിരോഷിമ നാഗസാക്കി ദിനാചരണ ഭാഗമായി യുദ്ധവിരുദ്ധ റാലി സംഘടിപ്പിച്ചു. സ്കൂൾ ഹെഡ്മാസ്റ്റർ ഷാജുമോൻ ഉദ്ഘാടനം ചെയ്ത റാലിയിൽ പിടിഎ പ്രസിഡന്‍റ് പി.ആർ.സന്തോഷ്‌കുമാർ അധ്യക്ഷപ്രസംഗം നടത്തി. സ്കൂൾ ലോക്കൽ മാനേജർ ഫാ .മാത്യു ചരിവുകാലായിൽ മുഖ്യസന്ദേശം നൽകി.

സോഷ്യൽ സയൻസ് ക്ലബിന്‍റെ നേതൃത്വത്തിൽ സംഘടിപ്പിച്ച റാലിയിൽ എസ് പി സി കേഡറ്റുകൾ, സ്കൗട്ട് ആന്‍റ് ഗൈഡ്സ് അംഗങ്ങൾ, ലിറ്റിൽ കൈറ്റ്സ്, ജെ ആർ സി വിദ്യാർഥികൾ അണിനിരന്നു. സമാധാന സന്ദേശമുദ്രാവാക്യം സ്കൂൾ അങ്കണത്തിൽ മുഴങ്ങിയപ്പോൾ വിദ്യാർഥി പ്രതിനിധികൾ എല്ലാ ക്ലാസുകളിലും അതേ സന്ദേശം പകർന്നു .

ഫാ വിൽസൻ ചരുവിള, സുനിൽ കെ തോമസ്, സജിനി , സി .ഐശ്വര്യ എസ് ഐ സി, സുനിത , സ്റ്റാഫ് സെക്രട്ടറി ജോസ്മോൻ എന്നിവർ പ്രസംഗിച്ചു. റോജി വർഗീസ്, അപർണ ,ലീനാമോൾ , റോസ് ജോർജ്, ജീന ജെയിംസ് എന്നിവർ നേതൃത്വം നൽകി.

ADVERTISEMENT

വഴിയോര കച്ചവടക്കാരുടെ ഉപജീവനമാർഗം നശിപ്പിക്കുന്നുവെന്ന്

കൊല്ലം: കേരള ഹൈക്കോടതിയുടെ സ്റ്റേ ഉത്തരവ് ഉണ്ടായിട്ടും കോർപറേഷൻ, സിവിൽ സപ്ലൈസ്, റവന്യൂ, പോലീസ് ഉദ്യോഗസ്ഥർ വഴിയോരകച്ചവടക്കാരുടെ ഉപജീവന മാർഗങ്ങൾ നശിപ്പിക്കുകയാണെന്ന് ഭാരവാഹികൾ കൊല്ലത്ത് പത്രസമ്മേളനത്തിൽ ആരോപിച്ചു. വഴിയോര കച്ചവടക്കാർ നിരന്തരമായി ഉദ്യോഗസ്ഥരുടെ ഭീഷണി നേരിട്ടു കൊണ്ടിരിക്കുകയാണെന്നും ഇത് അവസാനിപ്പിക്കണമെന്നും വഴിയോര കച്ചവടക്കാരുടെ അസോസിയേഷൻ നേതാക്കളായ വി. സുരേഷ് കുമാർ, ബിന്ദു, മഹാദേവി എന്നിവർ ആവശ്യപ്പെട്ടു. വഴിയോര കച്ചവടക്കാരുടെ അസോസിയേഷൻ നേതാക്കളായ വി. സുരേഷ് കുമാർ, ബിന്ദു, മഹാദേവി എന്നിവർ പത്രസമ്മേളനത്തിൽ പങ്കെടുത്തു.

ഒ. മാധവൻ സ്മാരക അവാർഡ് സൂര്യ കൃഷ്‌ണമൂർത്തിക്കും കെപിഎസി ലീലയ്ക്കും

കൊല്ലം: ഒ. മാധവന്‍റെ സ്മരണക്കായി ഒ. മാധവൻ ഫൗണ്ടേഷൻ ഏർപ്പെടുത്തിയ അവാർഡുകൾ പ്രഖ്യാപിച്ചു. നാടക രചനയ്ക്കും സംവിധാനത്തിനും സൂര്യ കൃഷ്‌ണമൂർത്തിക്കും മികച്ച നടിയായി കെപിഎ സി ലീലയും ആണ് തെരഞ്ഞെടുക്കപ്പെട്ടത്. ഓഗസ്റ്റ് 19നാണ് ഒ. മാധവൻ ദിനം. അന്നേദിവസം വൈകുന്നേരം 5.30ന് കൊല്ലം സോപാനം ഓഡിറ്റോറിയത്തിൽ നടക്കുന്ന അനുസ്മരണ സമ്മേളനത്തിൽ ചലച്ചിത്ര നടി ഉർവശി പുരസ്‌കാര സമർപ്പണം നടത്തുമെന്ന് ഒ. മാധവൻ ഫൗണ്ടേഷൻ ചെയർമാൻ കെ. വരദരാജൻ, ജനറൽ സെക്രട്ടറി എം. മുകേഷ് എംഎൽഎ, സന്ധ്യ രാജേന്ദ്രൻ എന്നിവർ വാർത്താസമ്മേളനത്തിൽ അറിയിച്ചു.

ഹിരോഷിമ ദിനം ആചരിച്ചു

കുളത്തൂപ്പുഴ: സർക്കാർ മോഡൽ റസിഡൻഷ്യൽ സ്കൂളിൽ ഹിരോഷിമ ദിനം ആചരിച്ചു. സ്കൂൾ അങ്കണത്തിൽ നടന്ന പരിപാടിയിൽ വിദ്യാർഥികളുടെ നേതൃത്വത്തിൽ സമാധാനത്തിന്‍റെ പ്രതീകമായ സുഡോക്കോ കൊറ്റികൾ നിർമിക്കുകയും ലോക സമാധാനത്തിനായി പ്രഥമാധ്യാപിക സി. ഗിരിജയുടെ നേതൃത്വത്തിൽ ഭദ്രദീപം തെളിയിക്കുകയും ചെയ്തു. ‘ഇനിയൊരു യുദ്ധം വേണ്ട' എന്ന സന്ദേശം ഉണർത്തി വിദ്യാർഥികളും അധ്യാപകരും ചേർന്ന് മനുഷ്യ ചങ്ങല തീർത്തു. വിദ്യാർഥി വിജേഷ് യുദ്ധവിരുദ്ധ സന്ദേശം നൽകി. രാംരാജു ബാഗ്ദാദ് കവിത അവതരിപ്പിച്ചു. അധ്യാപകരായ എഫ്.എൽ.ബിനിൽകുമാർ, സോഷ്യൽ സയൻസ് അധ്യാപകൻ എ.അനീസ്, സീനിയർ അസിസ്റ്റന്‍റ് എസ്.ബിനുകുമാർ, ആർ.ശിവപ്രസാദ് ,വിദ്യാർഥികളായ ഫ്രാൻസിസ് റോയ്, അഗ്നേഷ്എന്നിവർ പരിപാടിയ്ക്ക് നേതൃത്വം നൽകി.

വയോജനങ്ങൾക്കായി ‘കൂട് ’ജെറിയാട്രിക് ക്ലബ് രൂപീകരിച്ചു

കുളത്തൂപ്പുഴ : കുളത്തൂപ്പുഴ സാമൂഹ്യ ആരോഗ്യ കേന്ദ്രത്തിന്‍റെയും നെടുവന്നൂർ കടവ് ജനകീയ ആരോഗ്യ കേന്ദ്രം ഹെൽത്ത് ക്ലബിന്‍റെയും സംയുക്ത ആഭിമുഖ്യത്തിൽ വയോജനങ്ങൾക്ക് വേണ്ടി "കൂട്’എന്ന പേരിൽ പ്രത്യേക പരിപാടി സംഘടിപ്പിച്ചു. 70 വയസിന് മുകളിൽ പ്രായമുള്ള വയോജനങ്ങൾക്കായി ജെറിയാട്രിക് ക്ലബ് രൂപീകരിച്ചു. ഇവരെ പരിചരിക്കുന്നതിനും ശാരീരികവും മാനസികവുമായ പ്രശ്നങ്ങൾ കണ്ടെത്തുന്നതിന് വേണ്ടിയും എല്ലാ വ്യാഴാഴ്ച കളിലും ഈ ക്ലബ് ജനകീയ ആരോഗ്യ കേന്ദ്രത്തിൽ പ്രവർത്തിക്കും. വീടുകളിൽ ഒറ്റപ്പെട്ടു കഴിയുന്ന വയോജനങ്ങളുടെ ക്ഷേമത്തിന് ഊന്നൽ നൽകി കൊണ്ടാണ് ഈ ക്ലബ് പ്രവർത്തിക്കുന്നത്. അഞ്ചൽ ബ്ലോക്ക് പഞ്ചായത്ത് മെമ്പർ റെജി ഉമ്മൻ ഉദ്ഘാടനം നിർവഹിച്ചു. റോയി ഉമ്മൻ അധ്യക്ഷത വഹിച്ചു. മെഡിക്കൽ ഓഫീസർ ഡോ. നിസാ ബഷീർ,സി. ആർ. അരുൺകുമാർ, ഹെൽത്ത് ഇൻസ്പെക്ടർ എസ്. ഷൈജു, എപ്പിടെമിയോളജിസ്റ് അശ്വതി, എന്നിവർ പ്രസംഗിച്ചു. നഴ്സുമാരായ സുജിത പ്രിയ രാജു, രാരി,വിനീത്, സൂര്യ, ആശാവർക്കർമാരായ സിന്ധു, ജനിക്കുട്ടി എന്നിവർ നേതൃത്വം നൽകി.

ട്രെയിനിന്‍റെ ബാങ്കര്‍ എന്‍ജിനില്‍ തീപിടിത്തം

പുനലൂർ : ഗുരുവായൂര്‍ മധുര ട്രെയിനിന്‍റെ ബാങ്കര്‍ എന്‍ജിനില്‍ തീപിടുത്തം. ജീവനക്കാരുടെ സമയോചിതമായ ഇടപെടൽ മൂലം വൻ അപകടം ഒഴിവായി. കൊല്ലം ചെങ്കോട്ട റെയില്‍ പാതയില്‍ പുനലൂര്‍ റെയില്‍വേ സ്റ്റേഷനില്‍ വച്ചാണ് ഗുരുവായൂര്‍ മധുര ട്രെയിന്‍റെ ബാങ്കര്‍ എന്‍ജിനില്‍ തീപിടിത്തം ഉണ്ടായത്. ഇന്നലെ ഉച്ചയോടെയായിരുന്നു സംഭവം. ട്രെയിനിന്‍റെ ബാങ്കര്‍ എന്‍ജിന്‍റെ മധ്യഭാഗത്തായാണ് പുക ഉയര്‍ന്നത്.

സ്നേഹത്തിന്‍റെ കുഞ്ഞു പുസ്തകം രചിച്ച് കുരുന്നുകൾ

കൊട്ടിയം : ഹിരോഷിമ ദിനത്തിൽ കൊല്ലൂർവിള ഗവ.എൽപിഎസിലെ മൂന്നാം ക്ലാസിലെ കുട്ടികൾ സ്നേഹത്തിന്‍റെ കുഞ്ഞു പുസ്തകം രചിച്ചു. അന്വേഷണ പഠന രീതിയിലൂടെ ഹിരോഷിമ നാഗസാക്കി പ്രവർത്തനങ്ങളെ കുറിച്ച് അറിഞ്ഞതിന് പുറമെ ലോകത്തിന്‍റെ വിവിധഭാഗങ്ങളിൽ ഇപ്പോഴും നിലനിൽക്കുന്ന യുദ്ധ സാഹചര്യത്തെ കുറിച്ച് മനസിലാക്കുകയും യുദ്ധക്കെടുതികൾക്കിരയാകുന്ന കുട്ടികൾക്ക് വേണ്ടി അവർ എഴുതുകയുമായിരുന്നു. കുഞ്ഞുങ്ങൾ പക്ഷികളെപ്പോലെയും പട്ടത്തെപ്പോലെയും പറക്കേണ്ടവരാണെന്ന് ഭയത്തോടെ ഒളിച്ചിരിക്കേണ്ടവരല്ലെന്നും അവർ എഴുതി. കുഞ്ഞുപുസ്തകങ്ങൾക്ക് കുട്ടികൾ സ്വയമായി ചിത്രവും വരച്ചു. കുട്ടികൾ തയാറാക്കിയ ഈ കുഞ്ഞു പുസ്തകങ്ങളുടെ പ്രകാശനം ഹിരോഷിമ ദിനത്തിൽ സ്നേഹത്തിന്‍റെ കുഞ്ഞു പുസ്തകങ്ങൾ എന്ന പേരിൽ സ്കൂൾ ഹെഡ്മിസ്ട്രസ് റീന മെൻസസ് നിർവഹിച്ചു. ഈ കുഞ്ഞുപുസ്തകങ്ങളുടെ ഇംഗ്ലീഷ് ഭാഷയിലേക്കുള്ള പരിഭാഷപ്പെടുത്തലും ക്ലാസ് പ്രവർത്തനങ്ങളുടെ ഭാഗമായി നടക്കുകയുണ്ടായി. കുട്ടികളും അധ്യാപകരും രക്ഷിതാക്കളും സമൂഹവും ഒക്കെ ചേർന്നുകൊണ്ട് സമാധാന പ്രതീകമായി നൂറുകണക്കിന് കടലാസ് കൊക്കുകളെ നിർമിച്ച് സ്കൂളിലെത്തിച്ചതും വേറിട്ട പ്രവർത്തനമായി. സ്നേഹത്തിന്‍റ് കുഞ്ഞു രചനകൾ സമാഹരിച്ച് പ്രിന്‍റ് ചെയ്ത് പുസ്തകരൂപത്തിലാക്കാനുള്ള ശ്രമത്തിലാണ് വിദ്യാലയം. പ്രവർത്തനങ്ങൾക്ക് ഹെഡ്മിസ്ട്രസ് റീനമെൻസസ് ,അധ്യാപകരായ സൈജ , ഷൈലത്ത്, സജീന, ഗീത എന്നിവർ നേതൃത്വം നൽകി.

കൊല്ലത്ത് കിൻഡർ വുമൺസ് ഹോസ്‌പിറ്റൽ ഡിസംബറിൽ പ്രവർത്തനം ആരംഭിക്കും

കൊല്ലം: സിംഗപ്പൂർ ആസ്ഥാനമായിട്ടുള്ള അന്താരാഷ്‌ട്ര കിൻഡർ മെഡിക്കൽ ഗ്രൂപ്പിന്‍റെ ആറാമത്തെ ഹോസ്പിറ്റലായ കിൻഡർ വുമൺസ് ഹോസ്‌പിറ്റൽ ആന്‍ഡ് ഫെർട്ടിലിറ്റി സെന്‍റർ കൊല്ലം രണ്ടാംകുറ്റിയിൽ മാർക്ക് ഗ്രൂപ്പിന്‍റെ കെട്ടിടത്തിൽ ഡിസംബറിൽ പ്രവർത്തനം ആരംഭിക്കും. സ്ത്രീകളുടെയും കുട്ടികളുടെയും ആരോഗ്യ മേഖലയിൽ അന്താരാഷ്ട്ര നിലവാരമുള്ള ചികിത്സ സംവിധാനങ്ങളും ചികിത്സാരിതികളും സമൂഹത്തിന്‍റെ എല്ലാ സാമ്പത്തിക മേഖലയിലുമുള്ള ആളുകളിലേക്ക് എത്തിക്കുക എന്ന ലക്ഷ്യത്തോടുകൂടിയാണ് കിൻഡർ മെഡിക്കൽ ഗ്രൂപ്പ് പ്രവർത്തിക്കുന്നതെന്നു കിൻഡർ ഹോസ്‌പിറ്റൽസ് ചെയർമാൻ ഡോ. വി.കെ. പ്രദീപ്‌കുമാർ പത്രസമ്മേളനത്തിൽ അറിയിച്ചു. ഇന്ത്യയിൽ 2011ൽ ചേർത്തലയിലാണ് ആശുപത്രി ആദ്യമായി ആരംഭിക്കുന്നത്. 2018ൽ കൊച്ചിയിലും 22ൽ ബംഗളൂരിലും 23ൽ ആലപ്പുഴയിലും പിന്നീട് ആറന്മുളയിലും ആരംഭിച്ചു. ആദ്യഘട്ടത്തിൽ അന്പതു കിടക്കകളുള്ള ആശുപത്രിയായി പ്രവർത്തനം തുടങ്ങുമെങ്കിലും 110ലേക്ക് എത്തിക്കും. 70 ജീവനക്കാരുമായി ആരംഭിക്കുന്ന ഹോസ്പിറ്റൽ 150 ജീവനക്കാരിലേക്ക് ഉയർത്തും. ഈ വർഷം തന്നെ മലപ്പുറത്തും കോഴിക്കോടും ആശുപത്രി ആരംഭിക്കും. നിർധനരായ സ്ത്രീകളുടെ പ്രസവശുശ്രൂഷകൾക്കുവേണ്ടി ഒരു കോടി രൂപയോളം ചെലവുചെയ്യുമെന്നും ചെയർമാൻ വ്യക്തമാക്കി. ആന്‍റിനേറ്റൽ കൗൺസിലിംഗ്, ആന്‍റിനേറ്റൽ ക്ലാസ്, ഗർഭിണികൾക്കായുള്ള യോഗ ക്ലാസ്, 24 മണിക്കൂറും ഒരു ഗൈനെക്കോളജി ഡോക്ടറുടെ പിന്തുണയോടുകൂടിയുള്ള വാട്സ് അപ്പ് ഗ്രൂപ്പ്, മാനസിക സംഘർഷം അനുഭവിക്കുന്നവർക്കു വേണ്ടിയുള്ള ഇൻഹൗസ് സൈക്കോളജിക്കൽ കൗൺസിലിംഗ് ഇവയെല്ലാം പ്രത്യേകതയാണ്. ഹോസ്‌പിറ്റൽ ടൂർ, പിറന്നാൾ, വിവാഹ വാർഷികം പോലെയുള്ള മനോഹര നിമിഷങ്ങളിൽ കിൻഡറും അവരോടൊപ്പം പങ്കുചേരും. കിൻഡർ ഹോസ്‌പിറ്റലിൽ ഗർ ഭിണികൾക്കായി വ്യത്യസ്‌തങ്ങളായ പല പ്രോഗ്രാമുകളും ഒരുക്കാറുണ്ട്. വേൾഡ് റെക്കോർഡ് കരസ്‌ഥമാക്കിയ ഗർഭിണികളുടെ ഫാഷൻ ഷോ, മ്യൂസിക് കോമ്പറ്റിഷൻനു പുറമെ കേക്ക് മിക്‌സിംഗ് സെറിമണി, ബേബി ഷവർ സെറിമണി എന്നിവയെലാം അതിനു ഉദാഹരണങ്ങളാണ്. പത്രസമ്മേളനത്തിൽ മാനേജിംഗ് പാർട്‌ണർ മാർക്ക് ഗ്രൂപ്പ് ഓഫ് കന്പനിസ് ഡോ.നൂർദീൻ അബ്ദുൽ , കിൻഡർ ഹോസ്‌പിറ്റൽസ് സിഇഒ രഞ്ജിത് കൃഷ്‌ണൻ, കൊല്ലം ഹോസ്പിറ്റൽ സിഇഒ ആന്‍റോ ട്വിങ്കി ൾ, ഫോർഫ്രണ്ട് ടെക്നോളോജിസ് സിഇഒ ആൻഡ് ഫൗണ്ടർ പി.എം. റസൽ തുടങ്ങിയവരും പത്രസമ്മേളനത്തിൽ പങ്കെടുത്തു.

സംസ്ഥാന സീനിയർ വടംവലി മത്സരം 10ന് യുകെഎഫിൽ

കൊല്ലം: സംസ്ഥാന വടംവലി അസോസിയേഷന്‍റെ നേതൃത്വത്തിൽ 32-ാമത് സംസ്ഥാന പുരുഷ, വനിത വിഭാഗം സീനിയർ വടംവലി മത്സരം പാരിപ്പള്ളി യുകെ എഫ് എൻജിനിയറിംഗ് ഓട്ടോണമസ് കോളജിൽ നടക്കും. രാവിലെ എട്ടുമുതൽ ആരംഭിക്കുന്ന വടംവലി മത്സരത്തിൽ 14 ജില്ലകളിൽ നിന്നായി 600 ലധികം മത്സരാർഥികളും രണ്ടായിരത്തിലധികം കാണികളും പങ്കെടുക്കുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. വൈകുന്നേരം അഞ്ചിന് നടക്കുന്ന സമാപന സമ്മേളനം മന്ത്രി ജെ. ചിഞ്ചുറാണി ഉദ്ഘാടനം ചെയ്ത് സമ്മാനദാനം നിർവഹിക്കും. കല്ലുവാതുക്കൽ പഞ്ചായത്ത് പ്രതിനിധികൾ, പാരിപ്പള്ളി പ്രദേശത്തെ സാംസ്കാരിക പ്രവർത്തകർ, കോളജ് വിദ്യാർഥികൾ, അധ്യാപകർ, തുടങ്ങിയവർ പരിപാടിയിൽ പങ്കെടുക്കും. സംസ്ഥാന വടം വലി അസോസിയേഷൻ സെക്രട്ടറി ഷാൻ മുഹമ്മദ്, സംഘാടകസമിതി ചെയർമാനും കോളജ് എക്സിക്യൂട്ടീവ് ഡയറക്ടറുമായ പ്രഫ. ജിബി വർഗീസ്, വൈസ് ചെയർമാനും കോളജ് പ്രിൻസിപ്പാലുമായ ഡോ. ജയരാജു മാധവൻ, ഡോ. വി. എൻ. അനീഷ്, പ്രഫ. ഉണ്ണി .സി. നായർ, എ. സുന്ദരേശൻ, സിനോ.പി. ബാബു എന്നിവർ പത്രസമ്മേളനത്തിൽ പങ്കെടുത്തു.

സർക്കാർ - ഉദ്യോഗസ്ഥ അനാസ്ഥ: കൊല്ലം രൂപതയിലെ അധ്യാപകർ ഇന്ന് കരിദിനമായി ആചരിക്കും

കൊല്ലം: കൊല്ലം രൂപത കോർപറേറ്റ് മാനേജ്‌മെന്‍റ് വിദ്യാലയങ്ങളിൽ നിയമന അംഗീകാരം ലഭിക്കാത്ത സർക്കാർ - ഉദ്യോഗസ്ഥ അനാസ്ഥക്കെതിരെയും ജീവൻവെടിഞ്ഞ അധ്യാപികയുടെ ഭർത്താവിന്‍റെ മരണത്തിൽ അനുശോചിച്ചും ഇന്ന് രൂപതയുടെ കീഴിലുള്ള എല്ലാ എയ്ഡഡ് സ്കൂളുകളിലും അധ്യാപകർ കറുത്ത ബാഡ്ജ് ധരിച്ച് കരിദിനം ആചരിക്കും. വർഷങ്ങളായി നിയമന അംഗീകാരം ലഭിക്കാതെ ജോലിയിൽ തുടരുന്ന അധ്യാപകർക്ക് നിയമന അംഗീകാരം നൽകി നീതി ലഭ്യമാക്കണമെന്നു കാത്തലിക് സ്കൂൾ സ്റ്റാഫ് അസോസിയേഷൻ കൊല്ലം രൂപതാ നേതൃയോഗം ആവശ്യപ്പെട്ടു. അധ്യാപകർക്ക് നിയമനത്തിനുള്ള വഴിയടച്ച സർക്കാർ നിലപാട് വഞ്ചനാപരവും മനുഷ്യത്വരഹിതവുമാണെന്ന് കാത്തലിക് സ്കൂൾ സ്റ്റാഫ് അസോസിയേഷൻ കുറ്റപ്പെടുത്തുന്നു. നിയമനാംഗീകാരവുമായി ബന്ധപ്പെട്ട് കോടതി ഉത്തരവ് നടപ്പിലാക്കുവാൻ സർക്കാർ മനഃപൂർവം താമസിപ്പിച്ചത് അധ്യാപകരോടുള്ള വെല്ലുവിളിയും സർക്കാരിന്‍റെ അനാസ്ഥയുമാണ്. സർക്കാർ നിലപാട് വഞ്ചനാപരവും മനുഷ്യത്വരഹിതവുമാണെന്ന് അഭിപ്രായപ്പെട്ട അസോസിയേഷൻ കൊല്ലം രൂപതയുടെ വിവിധ സ്കൂളുകളിൽ നിയമനാംഗീകാരം ലഭിക്കാത്ത നൂറുകണക്കിന് അധ്യാപകർക്ക് നീതി ലഭ്യമാക്കണമെന്നും ആവശ്യപ്പെട്ടുകൊണ്ടാണ് ഇന്ന് കരിദിനാചരണം നടത്തുന്നത്. നിയമനാംഗീകാരം ലഭിക്കാത്തതിനാൽ ഇവരിൽ പലരും അത്മഹത്യയുടെ വക്കിലാണ്. നിയമന അംഗീകാര കാര്യത്തിൽ ഉടൻ തീരുമാനമുണ്ടായില്ലെങ്കിൽ ശക്തമായ സമരവുമായി കൊല്ലം രൂപതയിലെ അധ്യാപക സമൂഹം രംഗത്തിറങ്ങുമെന്നും കാത്തലിക് സ്കൂൾ സ്റ്റാഫ് അസോസിയേഷൻ കൊല്ലം രൂപത വിദ്യാഭ്യാസ സെക്രട്ടറി ഫാ.ബി. ബിനു തോമസ്, പ്രസിഡന്‍റ് ആർ.ബർണാഡ്, സെക്രട്ടറി സുമേഷ് ദാസ് എന്നിവർ മുന്നറിയിപ്പ് നൽകി.

തിരുമുക്കിലെ അശാസ്ത്രീയമായ അടിപ്പാത : ജനകീയ റിലേ ധർണ സമാപിച്ചു

ചാത്തന്നൂർ: ദേശീയ പാതയിൽ ചാത്തന്നൂർ തിരുമുക്കിൽ കഴിഞ്ഞ നാല് ദിവസമായി നടന്നു വന്ന ജനകീയറിലേ ധർണ കലാസാംസ്കാരിക സംഗമത്തോടെ സമാപിച്ചു.തിരുമുക്കിലെ അശാസ്ത്രീയ അടിപ്പാത പുനർനിർമിക്കുക,എല്ലാ യാത്രാ ബസുകളും ചാത്തന്നൂരിലെത്തുക എന്നീ ആവശ്യങ്ങൾ ഉന്നയിച്ച് കൊണ്ട് ചാത്തന്നൂർ വികസന സമിതിയുടെ നേതൃത്വത്തിലാണ് ജനകീയറിലേ ധർണ സംഘടിപ്പിച്ചത്. ചാത്തന്നൂർ പഞ്ചായത്ത് ഭരണസമിതി അംഗങ്ങളും, വ്യാപാരി സംഘടനകളും, അധ്യാപകരും മറ്റ് പ്രസ്ഥാനങ്ങളും വിവിധ ദിവസങ്ങളിൽ ജനകീയ റിലേ ധർണയുടെ ഭാഗമായി. സമാപന ദിവസം നടന്നകലാസാംസ്കാരിക സംഗമത്തിൽ പാട്ടും പറച്ചിലുമായി കവികളും സാംസ്കാരിക പ്രവർത്തകരും പങ്കെടുത്തു. തിരുമുക്കിൽ ധർണപന്തലിന് സമീപം ഉയർത്തിയിരുന്ന വലിയ കാൻവാസിൽ ചിത്രകാരന്മാർ പ്രതിഷേധ ചിത്രമെഴുത്തും നടത്തുകയുണ്ടായി. കവി ബാബു പാക്കനാർ കലാസാംസ്കാരിക സംഗമം ഉദ്ഘാടനം ചെയ്തു.വികസന സമിതി ചെയർമാൻ ജി.രാജശേഖരൻ അധ്യക്ഷനായിരുന്നു. കവികളും സാംസ്കാരിക പ്രവർത്തകരുമായ ആശ്രാമം ഭാസി, ഡി.സുധീന്ദ്ര ബാബു, പി.കെ.വിജയനാഥ് ,വിജയൻ ചന്ദനമാല, ജസിയാഷാജഹാൻ,കെ.സി.ബിജു. മുരളീധരൻ. രാജൻ തോമസ്, മടന്തകോട് രാധാകൃഷ്ണൻ , ചാത്തന്നൂർ സുരേന്ദ്രൻ സി.പി.സുരേഷ് കുമാർ. സുനേഷ് കുമാർ. ടി.എസ്. തുടങ്ങിയവർ കവിതകൾ ചൊല്ലിയും വർത്തമാനം പറഞ്ഞും അവരുടെ പ്രതിഷേധം രേഖപ്പെടുത്തി. പ്രമുഖ അനുകരണ കലാകാരൻ പ്രദീപ് വൈഗ, ഗായകൻ അജയ സിംഹൻ , ഗായിക ഫെബിയ ഷൈജു തുടങ്ങിയവർ വിവിധ പരിപാടികൾ അവതരിപ്പിച്ചു. ചാത്തന്നൂരിലെ വിവിധ സ്കൂളുകളിലെ കുട്ടികളും ചിത്രകാരന്മാരും പൊതുജനങ്ങളും തിരുമുക്കിൽ തയാറാക്കിയിരുന്ന വലിയ കാൻവാസിൽ പ്രതിഷേധ ചിത്രമെഴുത്ത് നടത്തി. ചാത്തന്നൂർ ഗ്രാമപഞ്ചായത്ത് പ്രസിഡന്‍റ് എസ്.കെ.ചന്ദ്രകുമാർ ചിത്രമെഴുത്തിന്‍റെ ഉദ്ഘാടനം നിർവഹിച്ചു. ചാത്തന്നൂർ വികസന സമിതി നേതൃത്വത്തിൽ നടത്തിക്കൊണ്ടിരിക്കുന്ന സമരപരിപാടികളുടെ രണ്ടാം ഘട്ടമായ ജനകീയറിലേ ധർണയാണ് കലാ സാംസ്കാരിക സംഗമത്തോടെ സമാപിച്ചത്. ആവശ്യങ്ങൾ നേടിയെടുക്കുന്നതു വരെ ജനകീയ സമരപരിപാടികളുമായി വികസന സമിതി മുന്നോട്ട് പോകുമെന്ന് വികസന സമിതി ഭാരവാഹികൾ അറിയിച്ചു.

ഹിരോഷിമ ദിനാചരണം

കൊട്ടാരക്കര: കലയപുരം എംഎസ്‌സി എൽ പി സ്കൂളിൽ ദീപിക ബാലസഖ്യത്തിന്‍റെ നേതൃത്വത്തിൽ ഹിരോഷിമ ദിനം ആചരിച്ചു. ദിനാചാരണത്തോടനുബന്ധിച്ച് നടത്തിയ പ്രത്യേക അസംബ്ലി യിൽ ഹെഡ് മാസ്റ്റർ മാത്യുക്കുട്ടി ഹിരോഷിമ ദിന പ്രാധാന്യത്തെ കുറിച്ചും യുദ്ധം ഉണ്ടാക്കുന്ന പ്രതിസന്ധികളെ കുറിച്ചും പ്രസംഗിച്ചു. വിദ്യാർഥി പ്രതിനിധികളായ എം.എസ്.നിധി,റെൻസി, ദേവശ്രീ, ലക്ഷ്മികൃഷ്ണൻ, ഗൗരീഷ്, ആൻസൻ, ശ്രേയഅനു എന്നിവർ പ്രസംഗിച്ചു. പോസ്റ്റർ മത്സരം, ഡോക്യുമെന്‍ററി പ്രദർശനം, ക്വിസ് മത്സരം എന്നിവയും നടത്തി.

പ്ലാന്‍റിനെതിരേ സമരം ചെയ്തവർക്കു മർദനം: റിപ്പോർട്ട് ആവശ്യപ്പെട്ട് മനുഷ്യാവകാശ കമ്മീഷൻ

കൊല്ലം: വെളിനല്ലൂർ പൂയപ്പിള്ളി മുളയറച്ചാലിൽ പ്രവർത്തിക്കുന്ന പ്ലാന്‍റിനെതിരേ പ്രതിഷേധിച്ച നാട്ടുകാരെ പോലീസ് ലാത്തി ചാർജ് ചെയ്ത സംഭവത്തിൽ തൽസ്ഥിതി റിപ്പോർട്ട് ഹാജരാക്കണമെന്ന് മനുഷ്യാവകാശ കമ്മീഷൻ അംഗം വി.ഗീത കൊട്ടാരക്കര ഡിവൈഎസ്പിക്കു നിർദേശം നൽകി. ഹൈക്കോടതി ഉത്തരവിന്‍റെ അടിസ്ഥാനത്തിലാണ് പ്രതിഷേധിക്കാനെത്തിയവരെ തടഞ്ഞതെന്ന ഡിവൈഎസ്പിയുടെ റിപ്പോർട്ട് പരിഗണിച്ച കമ്മീഷൻ പ്രസ്തുത ഉത്തരവ് ഹാജരാക്കണമെന്നും ആവശ്യപ്പെട്ടു. കാരക്കൽ സ്വദേശി കെ. ബെന്നിയാം സമർപ്പിച്ച പരാതിയിലാണ് നടപടി.

പോലീസ് സ്റ്റേഷനിൽ നിന്നും രക്ഷപ്പെട്ട എംഡിഎംഎ കേസിലെ പ്രതി പിടിയിൽ

കൊല്ലം : എംഡിഎംഎ കേസിലെ പ്രതി അജു മൻസൂറിനെയും ഭാര്യ ബിൻഷിയെയും തമിഴ്നാട് തിരുപ്പൂരിൽ നിന്നും പോലീസ് പിടികൂടി. കേസിലെ പ്രതിയായ അജുവിനെ കരുതൽ തടങ്കലിൽ ആക്കുന്നതിനായി പിറ്റ് എൻഡിപിഎസ് ഫോമുകൾ ഒപ്പിടുന്ന നേരം സ്റ്റേഷന് വെളിയിൽ ഉണ്ടായിരുന്ന ഭാര്യ സ്കൂട്ടറിൽ അജുവിനെ രക്ഷപ്പെടുത്തുകയായിരുന്നു. രക്ഷപെട്ട ഇവർ നടത്തിയ ഫോൺ ഇടപാടുകൾ നിരീക്ഷിച്ച സൈബർ സെൽ തമിഴ്നാട്ടിലേക്ക് കടന്നതായി കണ്ടെത്തി. നിരന്തരമുള്ള അന്വേഷണത്തിൽ തമിഴ്നാട് തോപ്പൂർ പോലീസ് സ്റ്റേഷൻ പരിധിയിൽ വച്ച് ഇവർ സഞ്ചരിച്ചിരുന്ന ടൂറിസ്റ്റ് ബസ് തടഞ്ഞുനിർത്തി അറസ്റ്റ് ചെയ്യുകയായിരുന്നു.

കൊല്ലം രൂപത 696-ാം സ്ഥാപിത ദിനാചരണ ആഘോഷം ഇന്നും നാളെയും

കൊല്ലം: കൊല്ലം രൂപത ചരിത്രപരമായി സ്ഥാപിക്കപ്പെട്ടിട്ട് 696 വർഷം പിന്നിടുന്നു. ഭാരതത്തിലെ ക്രൈസ്തവ വിശ്വാസികളെ 1329 ഓഗസ്റ്റ് ഒന്പതിനാണ് ജോൺ 22-ാം മാർപാപ്പ ഡിക്രിയിലൂടെ സ്ഥാപിച്ചത്. 696-ാംസ്ഥാപിത ദിനാചരണം ഇന്നും നാളെയും രൂപത ആഘോഷിക്കുന്നു. ഇന്നു ബിഷപ് ഹൗസ് ചാപ്പലിൽ പ്രഭാത ദിവ്യബലിയും പതാക ഉയർത്തലും നടക്കും. ബിഷപ് ഡോ. പോൾ ആന്‍റണി മുല്ലശേരി കാർമികത്വം വഹിക്കും. നാളെ രാവിലെ 10ന് ക്വയിലോൺ സോഷ്യൽ സർവീസ് സൊസൈറ്റി ഹാളിൽ രൂപത ഹെറിറ്റേജ് കമ്മിഷന്‍റെ ആഭിമുഖ്യത്തിൽ ചരിത്ര സെമിനാർ നടക്കും. സെമിനാർ സിഎസ്ഐ സഭാ കൊല്ലം കൊട്ടാരക്കര രൂപത ബിഷപ് റവ. ജോസ് ജോർജ് ഉദ്ഘാടനം ചെയ്യും. ബിഷപ് ഡോ. പോൾ ആന്‍റണി മുല്ലശേരി അധ്യക്ഷത വഹിക്കും.രൂപത വികാരി ജനറൽ മോൺ. ബൈജു ജൂലിയാൻ, എഡ്യൂക്കേഷണൽ സെക്രട്ടറി ഫാ. ബിനു തോമസ് തുടങ്ങിയവർ പ്രസംഗിക്കും. ഫാത്തിമ മാതാ നാഷണൽ കോളജ് മനശാസ്ത്ര വിഭാഗം മുൻ മേധാവി റവ.ഡോ.ജോസ് പുത്തൻവീട് പ്രസംഗിക്കും. കേരള ചരിത്ര പൈതൃക കേന്ദ്രം ആന്‍റ് മ്യൂസിയം ഡയറക്ടർ പ്രഫ. ഡോ. റെയ്മൺ, ഡൽഹി ജവഹർലാൽ നെഹ്റു യൂണിവേഴ്സിറ്റി ചരിത്ര ഗവേഷകൻ ഫാ.ജോർജ് റോബിൻസൺ എന്നിവർ സെമിനാറിൽ വിഷയങ്ങൾ അവതരിപ്പിക്കും. സ്ഥാപിത ദിനാചരണത്തോടനുബന്ധിച്ച് നടത്തിയ ചരിത്ര ക്വിസ് മത്സരത്തിലെയും കവിത രചന മത്സര വിജയികളെയും ചടങ്ങിൽ ആദരിക്കും. ഉച്ചകഴിഞ്ഞ് മൂന്നിനു കൊമ്പ്രിയ സഭാ സംഗമം സംഘടിപ്പിക്കും. വൈകുന്നേരം നാലിനു പ്രദക്ഷിണം തങ്കശേരി ഹോളിക്രോസ് പള്ളിയിൽ നിന്നും ആരംഭിച്ച് ഇൻഫന്‍റ് ജീസസ് കത്തീഡ്രലിൽ സമാപിക്കും. തുടർന്ന് ഡോ. പോൾ ആന്‍റണി മുല്ലശേരിയുടെ മുഖ്യ കാർമികത്വത്തിൽ കൃതജ്ഞതാ ദിവ്യബലി അർപ്പിക്കും.

കൊല്ലത്ത് കുട്ടികൾ വർണം ചാർത്തും; ദീപിക കളർ ഇന്ത്യ മത്സരം ഇന്ന്

കൊല്ലം: ഇന്ത്യ എന്ന വികാരം ഹൃദയതാളമായി മാറുന്ന ദീപിക കളർ ഇന്ത്യ മത്സരം ഇന്നു ജില്ലയിൽ നടക്കും. പുതുതലമുറയിൽ ദേശഭക്തിയും സാഹോദര്യവും ഊട്ടിയുറപ്പിക്കുന്ന ദേശീയോദ്ഗ്രഥന മുന്നേറ്റത്തിനാണ് കുട്ടികൾ വർണം ചാർത്തുന്നത്. എൽകെജി മുതൽ പ്ലസ് ടുവരെയുള്ള കുട്ടികളാണ് വിവിധ വിഭാഗങ്ങളിലായി ഈ മത്സരത്തിൽ അണിചേരുന്നത്. ലഹരിക്കെതിരേയുള്ള പോരാട്ടവും ഭാരതത്തിന്‍റെ ഐക്യവും അഖണ്ഡതയും ഊട്ടിയുറപ്പിക്കാനുള്ള സന്ദേശവും കുട്ടികൾക്കു പകർന്നു നൽകാൻ ലക്ഷ്യമിട്ടാണ് ദീപികയും ദീപിക ബാലസഖ്യവും മത്സരം സംഘടിപ്പിക്കുന്നത്. മത്സരത്തിനു ജില്ലയിൽ നൂറുക്കണക്കിനു വിദ്യാർഥികളാണ് പങ്കാളികളാകുന്നത്. ജില്ലയിലെ മുഴുവൻ സ്കൂളുകളും മത്സരത്തിൽ കുട്ടികളെ പങ്കെടുപ്പിക്കുന്നുണ്ട്. കൊല്ലം മേഖലയിൽ രാവിലെ 9.30ന് കൊല്ലം സെന്‍റ് ജോസഫ് എയ്ഡഡ് എൽപി സ്കൂളിൽ ദീപിക കളർ ഇന്ത്യ മത്സരത്തിന്‍റെ ഉദ്ഘാടനം അഡീഷണൽ ജില്ലാ മജിസ്ട്രേറ്റ് ജി.നിർമൽകുമാർ നിർവഹിക്കും. സ്കൂൾ ഹെഡ്മിസ്ട്രസ് സിസ്റ്റർ റോസ് മാർഗരറ്റ് അധ്യക്ഷത വഹിക്കും. ദീപിക കൊല്ലം രൂപത കോർഡിനേറ്റർ ഫാ. ലാസർ എസ്. പട്ടകടവ്, ദീപിക ബ്യൂറോ ചീഫ് ജോൺസൺ വേങ്ങത്തടം, ശോഭ ജോസഫ് തുടങ്ങിയവർ പ്രസംഗിക്കും. പ്രീതി എഡ്വേർഡ് പ്രതിജ്ഞ ചൊല്ലി കൊടുക്കും. ദീപിക സർക്കുലേഷൻ ഏരിയ മാനേജർ സുധീർ തോട്ടുവാൽ സ്വാഗതവും സീനിയർ സബ് എഡിറ്റർ രാജീവ് ഡി. പരിമണം നന്ദിയും പറയും. പുനലൂർ മേഖലയിലും ദീപിക കളർ ഇന്ത്യ മത്സരത്തിനു കുട്ടികളുടെ സജീവപങ്കാളിത്തമാണ് ഉണ്ടാകുക. ഈ മേഖലയിലെ നൂറോളം സ്കൂളുകളിൽനിന്നും കുട്ടികൾ മത്സരത്തിൽ പങ്കെടുക്കും. രാവിലെ 9.30ന് ആര്യങ്കാവ് സെന്‍റ് മേരീസ് ഹൈസ്കൂളിൽ സ്കൂൾ മാനേജർ ഫാ. ഫിലിപ്പ് തയ്യിൽ ദീപിക കളർ ഇന്ത്യ മത്സരം ഉദ്ഘാടനം ചെയ്യും. ലഹരിയ്ക്കെതിരെയുള്ള പോരാട്ടവും ഭാരതത്തിന്‍റെ ഐക്യവും അഖണ്ഡതയും ഊട്ടിയുറപ്പിക്കുവാൻ ലക്ഷ്യമിട്ടിട്ടുള്ള ദീപികയുടെ പോരാട്ടത്തിൽ കുട്ടികൾ ആവേശത്തോടെയാണ് പങ്കെടുക്കുന്നത്.

ഇതാണോ ശുചിത്വ നഗരം..‍?

കൊല്ലം:മാലിന്യമുക്ത പദവിയുടെ തിളക്കത്തിലാണ് ജില്ല. ശുചിത്വ നഗരം, സമ്പൂർണ മാലിന്യമുക്ത കോർപറേഷൻ എന്നിങ്ങനെ ബഹുമതികൾ സ്വന്തമാക്കുമ്പോഴും നഗരത്തിൽ മാലിന്യമല രൂപപ്പെടുന്നതിൽ മാറ്റമൊന്നുമില്ല. പദവികൾ വെറും പൊങ്ങച്ചത്തിന്‍റെ കിരീടമായി മാത്രം മാറുകയാണ്. വഴിയിലിറങ്ങി ഒന്നു നടന്നു നോക്കുന്പോഴാണ് മാലിന്യത്തിന്‍റെ കാഠിന്യം മനസിലാകുന്നത്. റോഡുകളിൽ പ്ലാസ്റ്റിക് സഞ്ചികളിൽ ആർക്കോ സമ്മാനം കൊടുക്കാൻ എന്ന നിലയിൽ നടപ്പാതയിൽ തള്ളിയിട്ടു ഒന്നും അറിയാത്തതുപോലെ നടന്നു പോകുന്നവരും വാഹനത്തിൽവന്നു റോഡിലേക്കു വലിച്ചെറിയുന്നതും നിത്യസംഭവമായിട്ടുണ്ട്. ഇതെല്ലാം ചെയ്യുന്നവർക്കു മനസിനു വല്ലാത്ത സുഖം ലഭിക്കുന്നുണ്ട്. സ്വന്തം അടുക്കളയിൽനിന്നും മാലിന്യം അയൽവാസിയുടെ പുരയിടത്തിലേക്കും റോഡിലേക്കും വലിച്ചെറിയുന്പോൾ കിട്ടുന്ന സുഖം പലരും അനുഭവിക്കുന്നുണ്ട്. നഗരത്തിലും ബീച്ചിലും ഹാർബർ മേഖലകളിലും പോലീസ് സൂപ്രണ്ടിന്‍റെ ഓഫീസിനു സമീപവും കെഎസ്ആർടിസി ബസ് സ്റ്റാൻഡിനു സമീപമുള്ള ബൈപ്പാസ് റോഡിലും നിറഞ്ഞുകിടക്കുകയാണ്. ഇതെല്ലാം ചെറിയ ഉദാഹരണങ്ങൾ മാത്രമാണ്. ഇതിലും കൂടുതലാണ് മറ്റു പ്രദേശങ്ങളിലുള്ളത്. ചുറ്റുമൊന്നു കണ്ണോടിച്ചാൽ മാലിന്യ കൂന്പാരം. മാലിന്യം വലിച്ചെറിയുന്നവരുടെ നാടായി കൊല്ലം മാറുകയാണ്. സ്വന്തം വീടുകളിൽനിന്നും മനോഹരമായ കവറുകളിൽ കൊണ്ടുവന്നു റോഡരികിൽ നിക്ഷേപിച്ചിട്ടു കടന്നുപോകുന്നവഴിയാത്രക്കാരും വാഹനയാത്രക്കാരുമുള്ള നാടാണ് കൊല്ലം. പ്ലാസ്റ്റിക്, ആഹാരാവശിഷ്‌ടങ്ങൾ, ക്ലോത്ത് വേസ്റ്റ്, മദ്യകുപ്പികൾ, ടയറുകൾ എന്നിങ്ങനെ മാലിന്യമാണ് വലിച്ചെറിഞ്ഞിരിക്കുന്നത്. കൊല്ലം ബീച്ചിലും കുറ്റിച്ചെടികൾ വളർന്നു നിൽക്കുന്ന ഭാഗത്തായാണ് ഏറ്റവും കൂടുതൽ മാലിന്യം തള്ളിയിരിക്കുന്നത്. ഗാർഹിക മാലിന്യത്തിനു പുറമേ വ്യാപാരസ്ഥാപനങ്ങളിൽ നിന്നുള്ള മാലിന്യങ്ങളും വലിച്ചെറിഞ്ഞിട്ടുണ്ട്. ബീച്ചിലെത്തുന്ന സന്ദർശകരും പ്ലാസ്റ്റിക് വലിച്ചെറിയുന്നതിൽ പിന്നിലല്ല. ജലകേളിക്കു സമീപത്തായുള്ള ജൈവമാലിന്യസംസ്കരണ പ്ലാന്‍റും( തുമ്പൂർമുഴി മാതൃക) കാടുകയറിയ നിലയിലാണ്. കൊല്ലം തോട്ടിലേക്കും കൊല്ലം തോടിന്‍റെ വശങ്ങളിലേക്കും മാലിന്യം തള്ളുന്നതു പതിവായിരിക്കുകയാണ്. ആഹാരവശിഷ്‌ടങ്ങൾ കഴിക്കാനെത്തുന്ന തെരുവുനായ്ക്കളുടെ ശല്യവും രൂക്ഷമാണ്. വലിച്ചെറിയുന്നവരെ കണ്ടെത്തണം മാലിന്യം വലിച്ചെറിയുന്നവരെ പിടികൂടാൻ സംവിധാനമൊരുക്കുന്ന നാട്ടുകാരും സ്ഥാപനങ്ങളുമുണ്ട്. മാലിന്യവാഹനങ്ങളുമായി എത്തുന്നവരെ പിടികൂടാൻ യുവാക്കൾ രംഗത്തിറങ്ങുന്ന സ്ഥലങ്ങളുണ്ട്. ശ്രീനാരായണ ഗുരു ഓപ്പൺ സർവകലാശാലയ്ക്ക് ആസ്ഥാനമന്ദിരം നിർമിക്കാൻ തെക്കേവിള ഡിവിഷനിലെ കച്ചിക്കടവിൽ ഏറ്റെടുത്ത സ്ഥലത്ത് ഇരുട്ടിന്‍റെ മറവിൽ തള്ളിയതു കിലോക്കണക്കിന് മാലിന്യമാണെങ്കിലും സംഘത്തെ പിടികൂടാൻ സാധിച്ചതും വാർത്തയായിരുന്നു.കോർപറേഷൻ ആരോഗ്യ വിഭാഗം 5000 രൂപ പിഴയും നൽകി. വല്ലയിലെ ഒരു സ്ഥാപനത്തിലെ മാലിന്യമാണ് ഇവിടെ തള്ളിയത്. പ്ലാസ്റ്റിക് കവറുകൾ, പ്ലാസ്റ്റിക് കുപ്പികൾ, പഴയ വാഹന ആക്സസറികൾ,കടലാസുകൾ എന്നിങ്ങനെ പലതരത്തിലുളള മാലിന്യമാണ് വലിച്ചെറിഞ്ഞിരുന്നത്. കൗൺസിലറും സർവകലാശാല അധികൃതരും പ്രദേശവാസികളും നടത്തിയ പരിശോധനയിൽ മാലിന്യത്തിൽ നിന്നു കിട്ടിയ കൊറിയർ പാക്കറ്റിലെ ഫോൺ നമ്പറിൽ ബന്ധപ്പെട്ടപ്പോഴാണ് മാലിന്യം വലിച്ചെറിഞ്ഞവരെ തിരിച്ചറിയാൻ സാധിച്ചത്. ഇവരെ പിടികൂടി. ഇരുട്ടിന്‍റെ മറവിൽ വാഹനങ്ങളിൽ മാലിന്യവുമായി ഇറങ്ങുന്നവർ എല്ലാ നാട്ടിലുമുണ്ട് . സ്വയം ചിന്തിക്കുക പല്ലിൽകുത്തി നാറ്റിക്കുന്നതുപോലെയാണ് ഇതെല്ലാം. സ്വന്തം പുരയിടത്തിലെ മാലിന്യം വലിച്ചെറിയാൻ പൊതുവഴി തെരഞ്ഞെടുക്കുന്നവരുടെ മനസിന്‍റെ അവസ്ഥയൊന്ന് ഓർത്തുനോക്കിക്കേ. തന്‍റെ വീട്ടിലെ അവിശിഷ്ടമെല്ലാം അയൽവാസിയുടെ വീടിനുമുന്നിലേക്ക് വലിച്ചെറിയണമോ എന്നു ചിന്തിക്കണം. എല്ലാവരും സ്വയമായി ഇതിനെതിരേ പ്രവർത്തിച്ചാൽ നാട്ടിൽ മാലിന്യപ്രശ്നമുണ്ടാകില്ല. തെരുവുനായ്ക്കളുടെ ഉപദ്രവവും സംഭവിക്കില്ല. ധൈര്യമായി മൂക്കുപൊത്താതെ റോഡിലൂടെ നമുക്ക് നടക്കാം. അപ്പോൾ നഗരം മനോഹരമാകും. നമുക്ക് അഭിമാനത്തോടെ ജീവിക്കാം.

മിനി ലോറിയും ബൈക്കും കൂട്ടിയിടിച്ചു യുവാവ് മരിച്ചു

ചാത്തന്നൂർ: മിനിലോറിയും ബൈക്കും കൂട്ടിയിടിച്ച് ബൈക്ക് യാത്രക്കാരനായ യുവാവ് മരിച്ചു. മീനമ്പലം പാമ്പുറം പ്രീത മന്ദിരത്തിൽ പ്രീതയുടെയും പരേതനായ സജീവിന്‍റെയും മകൻ അനന്തു കൃഷ്‌ണൻ (19) ആണ് മരിച്ചത്. പരവൂർ-പാരിപ്പള്ളി റോഡിൽ പ്ലാവിന്‍റെ മൂട് ക്ഷീരസംഘത്തിനു സമീപം ഇന്നലെ വൈകുന്നേരമായിരുന്നു അപകടം. പെയിന്‍റിംഗ് തൊഴിലാളിയായ അനന്തു കൃഷ്ണൻ ജോലി കഴിഞ്ഞു മടങ്ങുമ്പോഴാണ് അപകടം. സഹോദരി: ദേവിക.

ഉയരപ്പാതയിൽ തീ പിടിത്തം: കൊട്ടിയത്ത് പരിഭ്രാന്തിക്കിടയാക്കി

കൊട്ടിയം: ദേശീയപാതയ്ക്കായി നിർമാണം നടന്നുകൊണ്ടിരിക്കുന്ന ഉയരപ്പാതയുടെ മുകളിൽ തീ പിടിച്ചത് കൊട്ടിയത്ത് പരിഭ്രാന്തി ഉണ്ടാക്കി. ചൊവ്വാഴ്ച രാത്രി ഏഴോടെ കൊട്ടിയം ജംഗ്ഷനിൽ ഉള്ള ഉയരപ്പാതയ്ക്ക് മുകളിൽ നിന്നും തീ ഉയരുന്നത് നാട്ടുകാരുടെയും വഴിയാത്രക്കാരുടെയും ശ്രദ്ധയിൽപ്പെടുകയായിരുന്നു. തീ ഉയർന്നതോടെ വഴിയാത്രക്കാരും നാട്ടുകാരും പരിഭ്രാന്തരായി .തുടർന്ന് പോലീസിനെ വിവരമറിയിച്ചു. ജംഗ്ഷനിൽ ഡ്യൂട്ടിയിലുണ്ടായിരുന്ന പോലീസുകാരനും നാട്ടുകാരും ചേർന്ന് ഉയരപ്പാതക്കു മുകളിൽ വെള്ളം എത്തിച്ച് തീ കെടുത്തുകയായിരുന്നു. ഉയരപ്പാത നിർമാണത്തിനായി വശങ്ങളിൽ അടിച്ചിരുന്ന തടിക്കാണ് തീ പിടിച്ചത്.

വിപഞ്ചികയുടെ മരണം പഴുതടച്ച അന്വേഷണം വേണം: എംപി

കുണ്ടറ : ഷാർജയിൽ ദുരൂഹ സാഹചര്യത്തിൽ മരിച്ച കൊല്ലം കേരളപുരം സ്വദേശിനി വിപഞ്ചികയുടെ വീട്ടിലെത്തി എൻ.കെ.പ്രേമചന്ദ്രൻ എംപി കുടുംബാംഗങ്ങളെ അനുശോചനമറിയിച്ചു. വിപഞ്ചികയുടെയും മകൾ വൈഭവിയുടെയും മരണത്തിൽ സത്യസന്ധമായ അന്വേഷണം നടത്തണമെന്ന് അദ്ദേഹം യു എ ഇ യിലെ ഇന്ത്യൻ എംബസി അംബാസഡറോടും കേന്ദ്ര വിദേശകാര്യമന്ത്രിയോടും ആവശ്യപ്പെട്ടിട്ടുണ്ട്. മൃതദേഹം നാട്ടിലെ ത്തിക്കുന്നതിനും അദ്ദേഹം ഇട പെടലുകൾ നടത്തിയിരുന്നു. വിവാഹശേഷം വിദേശത്തെത്തുന്ന പെൺകുട്ടികൾ ദുരൂഹ സാഹചര്യത്തിൽ മരിക്കുന്ന സംഭവങ്ങൾ വർധിച്ചു വരുന്ന സാഹചര്യത്തിൽ ഈ വിഷയത്തിൽ സമ ഗ്രമായ അന്വേഷണം അനിവാര്യമാണെന്ന് എംപി ചൂണ്ടിക്കാട്ടി. കുറ്റക്കാർക്കെതിരേ കേരളത്തിലും നിയമനടപടികൾ സ്വീകരിച്ച് മാതൃകാപരമായ ശിക്ഷ ഉറപ്പാക്കാൻ പഴുതടച്ചപോലീസ് നടപടികളുംധ്രുത ഗതിയിൽ ഉണ്ടാകണമെന്ന് അദ്ദേഹം ആവശ്യപ്പെട്ടു.

തിരുമുക്ക് അടിപ്പാത: ജനകീയറിലേ ധർണയിൽ വ്യാപാരികളും അധ്യാപകരും പങ്കാളിയായി

ചാത്തന്നൂർ:ദേശീയ പാതയിൽ തിരുമുക്കിൽ നിർമിച്ച് വരുന്ന അശാസ്ത്രീയ അടിപ്പാത പുതുക്കിപ്പണിയുക, പരവൂർ കൊട്ടിയം ഭാഗങ്ങളിൽ നിന്ന് വരുന്ന എല്ലാ സ്വകാര്യ ബസുകളും ചാത്തന്നൂരിൽ എത്തുക തുടങ്ങിയ ആവശ്യങ്ങൾ ഉന്നയിച്ച് ചാത്തന്നൂർ വികസന സമിതി തിരുമുക്കിൽ സംഘടിപ്പിച്ചിട്ടുള്ള ജനകീയ റിലേ ധർണയുടെ മൂന്നാം ദിവസം വ്യാപാരി വ്യവസായി സംഘടനകൾ ധർണയുടെ ഭാഗമായി.വ്യാപാര സ്ഥാപനങ്ങൾക്ക് അവധി നൽകി ചാത്തന്നൂർ നിന്നും പ്രകടനമായെത്തിയാണ് അവർ ധർണയിൽ പങ്കെടുത്തത്. രാവിലെ വ്യാപാരി വ്യവസായി സമിതി പ്രവർത്തകർ പങ്കെടുത്ത ധർണ ജില്ലാ ജോയിന്‍റ്സെക്രട്ടറി ജയചന്ദ്രൻ ചാനൽവ്യൂ ഉദ്ഘാടനം ചെയ്തു.കെ.കെ.നിസാർ അധ്യക്ഷത വഹിച്ചു.എം.ശശിധരൻ, ജി.എസ്.സുരേഷ് ,ജി.രാജശേഖരൻ, ദീപ, ഹരികൃഷ്ണൻ തുടങ്ങിയവർ പ്രസംഗിച്ചു. സ്കൂൾ വിദ്യാർഥികളെയും അധ്യാപകരെയും ഭാവിയിൽ ബാധിക്കുന്ന ഒരു പ്രധാന വികസന പ്രശ്നത്തിന് പരിഹാരം തേടി ചാത്തന്നൂർ സെന്‍റ്ജോർജ് യുപിഎസ്‌ പിറ്റി എയുടെ നേതൃത്വത്തിൽ രക്ഷിതാക്കളും അധ്യാപകരും ധർണയിൽ പങ്കാളിയായി. വൈകുന്നേരം നടന്ന ധർണ ഹെഡ്മാസ്റ്റർ ബെനിൽ മാത്യൂഉദ്ഘാടനം ചെയ്തു. സിദ്ധീഖ് മൗലവി അധ്യക്ഷനായി. ശ്യാം, അനസ് എന്നിവർ പ്രസംഗിച്ചു. തുടർന്ന് വ്യാപാരി വ്യവസായി ഏകോപന സമിതി പ്രവർത്തകരാണ് ധർണയിൽ പങ്കെടുത്തത്. ജില്ലാ സെക്രട്ടറി രാജൻ കുറുപ്പ് ധർണ ഉദ്ഘാടനം ചെയ്തു.ചാത്തന്നൂർ യൂണിറ്റ് പ്രസിഡന്‍റ്എം.ശശിധരൻ അധ്യക്ഷനായിരുന്നു. ബാബു ,ഹരി അമ്മൂസ്,പി.മോഹനൻഎന്നിവർ പ്രസംഗിച്ചു. ജനകീയറിലേ ധർണയുടെ സമാപനദിവസമായഇന്ന്ഉച്ചകഴിഞ്ഞ് മൂന്നുമുതൽ കലാസാംസ്ക്കാരിക സംഗമം നടക്കും. പാട്ടും പറച്ചിലുമായി കവികളും സാംസ്കാരിക പ്രവർത്തകരും പങ്കെടുക്കും.തിരുമുക്കിൽ സ്ഥാപിക്കുന്ന 30 മീറ്റർ നീളമുള്ള കാൻവാസിൽ ചിത്രകാരന്മാർ പ്രതിഷേധ ചിത്രമെഴുത്ത് നടത്തും. കലാസാംസ്ക്കാരിക സംഗമത്തിൽ സ്വമേധയാ പങ്കെടുത്ത് വിജയിപ്പിക്കണമെന്ന് ചാത്തന്നൂർ വികസന സമിതി അഭ്യർഥിച്ചു.

അമച്ചർ അത്‌ലറ്റിക് മീറ്റിൽ തിളക്കമാർന്ന നേട്ടം കൈവരിച്ചു

കുളത്തൂപ്പുഴ : കൊല്ലം അമച്ചർ അത്‌ലറ്റിക് മീറ്റിൽ തിളക്കമാർന്ന നേട്ടം കൈവരിച്ച് കുളത്തൂപ്പുഴയിലെ മോഡൽ റസിഡൻഷൽ സ്കൂളിലെ വിദ്യാർഥികൾ. ആറ്റിങ്ങലിൽ നടന്ന അണ്ടർ 20 ജില്ലാ അത്‌ലറ്റിക്സ് മീറ്റിൽ സീനിയർ വിഭാഗത്തിൽ ലോങ്ങ് ജമ്പിൽ , എസ്.ആദർശ്, 4×100 റിലേയിൽ എ. അനുരാഗ്, എസ്. ആദർശ്, കൃഷ്ണനുണ്ണി എന്നിവർ സ്വർണ്ണ മെഡലും ആണ് നേടിയിരിക്കുന്നത്.ട്രിപ്പിൾ ജമ്പിൽ ആദർശ് വെള്ളി മെഡൽ, 800 ഓട്ടത്തിൽ എ. അനുരാഗിന് വെങ്കല മെഡൽ, 100 മീറ്റർ ഓട്ടത്തിൽ കൃഷ്ണനുണ്ണിയും, 400 മീറ്റർ ഓട്ടത്തിൽ അനന്തു ചന്ദ്രനും വെങ്കല മെഡലും ആണ് സ്വന്തമാക്കിയത്. ഹാമർ ത്രേയിൽ ആദിനാഥിന് വെങ്കലം കിട്ടി. ജൂനിയർ വിഭാഗത്തിൽ 4× 100 റിലേയിൽ വരുൺ, പ്രജിത്ത് എന്നിവർ വെങ്കല മെഡലും നേടി. സ്കൂളിലെ കായിക അധ്യാപകൻ സ്റ്റാലിന്റെ കോച്ചിങ്ങിലാണ് ഈ നേട്ടങ്ങൾ.

ഗവർണർ -സർക്കാർ തർക്കം ഉന്നത വിദ്യാഭ്യാസ മേഖലയെ തകർക്കും: എൻ.കെ.പ്രേമചന്ദ്രൻ എംപി

കൊട്ടിയം: ഗവർണരും സർക്കാരും തമ്മിലുള്ള അഭിപ്രായ ഭിന്നത ഉന്നത വിദ്യാഭ്യാസ മേഖലയെ തകർക്കാൻ മാത്രമേ ഉപകരിക്കു എന്ന് എൻ. കെ. പ്രേമചന്ദ്രൻ എം പി അഭിപ്രായപെട്ടു. ആർഎസ് പി, ആർ വൈ എഫ് പ്ലാക്കാട് ബ്രാഞ്ച് കമ്മിറ്റികളുടെ നേതൃത്വത്തിൽ സംഘടിപ്പിച്ച ആദരവ് 2025 എന്ന പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എസ് എസ് എൽ സി, പ്ലസ് ടു പരീക്ഷകളിൽ ഉയർന്ന മാർക്ക് വാങ്ങി വിജയിച്ചവർ, ആശ പ്രവർത്തകർ, അങ്കണവാടി ജീവനക്കാർ, ഹരിത കർമ സേന പ്രവർത്തകർ, തൊഴിലുറപ്പ് തൊഴിലാളികൾ എന്നിവരെ ആദരിച്ചു. സൗജന്യ പഠനോപകരണ വിതരണം ചെയ്തു. ആർഎസ്പി ജില്ലാ എക്സിക്യൂട്ടീവ് കമ്മിറ്റി അംഗവും, ഗ്രാമ പഞ്ചായത്ത്‌ അംഗവുമായ പ്ലാക്കാട് ടിങ്കു അധ്യക്ഷത വഹിച്ചു. കോൺഗ്രസ്‌ ജില്ലാ സെക്രട്ടറി എസ്. ശ്രീലാൽ, ആർ എസ് പി ജില്ലാ കമ്മിറ്റി അംഗങ്ങളായ ശ്യാം മോഹൻ കൈപ്പുഴ, തമ്പി പുന്നതല, യുഡിഫ് മണ്ഡലം കൺവീനർ എ. രാജീവ്‌, ചെയർമാൻ സജി, സാമൂവൽ, ബ്ലോക്ക്‌ പഞ്ചായത്ത്‌ അംഗം ശ്രീലാൽ ചിറയത്ത്, സീത ശിവൻകുട്ടി, സുധീഷ്, വിനോദ് കുമാർ സന്ധ്യ, രഞ്ജിനി രാജൻ കുറുപ്പ്, സുഭദ്രാമ്മ എന്നിവർ പ്രസംഗിച്ചു. തുടർന്ന് കലാപരിപാടികളുംനടന്നു.

ഇത്തിക്കര ബ്ലോക്ക് പഞ്ചായത്തിൽ ജോബ്‌ സ്റ്റേഷൻ ഉദ്ഘാടനം ചെയ്തു

ചാത്തന്നൂർ:ഇത്തിക്കര ബ്ലോക്ക് പഞ്ചായത്തിൽ ജോബ്‌ സ്റ്റേഷന്‍റെ ഉദ്ഘാടനം ബ്ലോക്ക്‌ പഞ്ചായത്ത്‌ പ്രസിഡന്‍റ് അഡ്വ.എം. കെ. ശ്രീകുമാര്‍ നിർവഹിച്ചു. ബ്ലോക്ക്‌ പഞ്ചായത്ത്‌ അംഗം എൻ. സദാനന്ദൻ പിള്ള അധ്യക്ഷത വഹിച്ചു. ജോയിന്‍റ് ബി ഡി ഒ കെ. ജിപ്സൺ പ്രസംഗിച്ചു. തദ്ദേശ സ്വയംഭരണ വകുപ്പിന്‍റെ നേതൃത്വത്തിൽ ഉന്നത വിദ്യാഭ്യാസ, തൊഴിൽ വകുപ്പുമായി കൈകോർത്ത് കേരള ഡെവലപ്മെന്‍റ് ആന്‍റ് ഇന്നൊവേഷൻ സ്‌ട്രാറ്റെജിക് കൗൺസിൽ ( കെ - ഡിസ്ക്) നേതൃത്വം നൽകുന്ന പദ്ധതിയാണ് വിജ്ഞാന കേരളം. അടുത്ത ഒരു വർഷത്തിനുള്ളിൽ തൊഴിലന്വേഷകർക്ക് അഞ്ച് ലക്ഷം വിജ്ഞാന തൊഴിലുകൾ നൽകുക എന്നതാണ് ഇതിന്‍റെ ലക്ഷ്യം. കേരളത്തിലെ ഉന്നത വിദ്യാഭ്യാസ കോഴ്‌സുകളിൽ നൈപുണ്യ വികസന ഉള്ളടക്കം അവതരിപ്പിച്ച് തൊഴിലവസരക്ഷമത വർധിപ്പിക്കുക എന്നതാണ് പദ്ധതിയുടെ ലക്ഷ്യമെന്ന് കുടുംബശ്രീ ഡി പി എം സനല്‍ പറഞ്ഞു. പൂതക്കുളം ഗ്രാമപഞ്ചായത്ത് പ്രസിഡന്‍റ് എസ്. അമ്മിണി അമ്മ, ചിറക്കര ഗ്രാമപഞ്ചായത്ത് പ്രസിഡന്‍റ് സജില,ഗ്രാമപഞ്ചായത്ത് അംഗങ്ങള്‍ , ബ്ലോക്ക്‌ പഞ്ചായത്ത്‌ അംഗങ്ങള്‍, കുടുംബശ്രീ പ്രവർത്തകര്‍ ,കില റീസോഴ്സ്പേഴ്സന്‍ ഗ്രാമപഞ്ചായത്ത് ബ്ലോക്ക്‌ പഞ്ചായത്ത്‌ ഉദ്യോഗസ്ഥര്‍ എന്നിവര്‍ പങ്കെടുത്തു.

ബൈക്കിൽ കുടുങ്ങിയ പാന്പിനെ പുറത്തെടുത്തു

കുണ്ടറ : ബൈക്കിൽ കുടുങ്ങിയനിലയിൽ പാമ്പിനെ കണ്ടു . ആശുപത്രിമുക്കിൽ ഇന്നലെ ഉച്ചയ്ക്ക് ആയിരുന്നു സംഭവം. എൻഫീൽഡ് ബുള്ളറ്റ് ബൈക്കിൽ എത്തിയ യുവാക്കൾ ബൈക്ക് നിർത്തിയ ശേഷം കോഫി ഷോപ്പിലേക്ക് കയറിപ്പോയി. അതുവഴി വന്ന കാൽനടക്കാരായ രണ്ട് സ്ത്രീകളാണ് പെട്രോൾ ടാങ്കിന്‍റെ അടിയിൽ പാമ്പിനെ കണ്ടത്. സ്ത്രീകളുടെ നിലവിളി കേട്ട് ഓടിക്കൂടിയ നാട്ടുകാർ ബൈക്ക് മറിച്ചിട്ട് നടത്തിയ പരിശോധനയിൽ പാമ്പിനെ കണ്ടെത്തുകയായിരുന്നു. ആൾക്കൂട്ടത്തിൽ നിന്ന ശാസ്താംകോട്ട സ്വദേശി അനന്തുവാണ് കമ്പിയും മറ്റും ഉപയോഗിച്ച് പാന്പിനെ പുറത്തെടുത്തത്. കാലാവസ്ഥ വ്യതിയാനം ഉള്ളതിനാൽ കുടുംബമായി സഞ്ചരിക്കുന്നവർ, വാഹനങ്ങൾ എടുക്കുന്നതിന് മുമ്പ് ശ്രദ്ധാലുക്കളാകണമെന്ന മുന്നറിയിപ്പാണ് ഇത്തരം സംഭവങ്ങൾ ഓർമിപ്പിക്കുന്നത്.

മുറിച്ചിട്ടമരം ഗതാഗതതടസം ഉണ്ടാക്കുന്നു

കുണ്ടറ: മുറിച്ചിട്ട മരം ഗതാഗത തടസം ഉണ്ടാക്കുന്നു. പള്ളിമുക്ക് മാർക്കറ്റ് ഭാഗത്തു നിന്നും കാക്കോലിൽ, അടുക്കോട്, കാഞ്ഞിരകോട് ഭാഗങ്ങളിലേക്ക് പോകുന്ന റോഡിൽ മരം മുറിച്ചിട്ടത് മൂലം ഗതാഗതം തടസപ്പെട്ട നിലയിലാണ്. പാതയുടെ ഓരത്ത് നിന്ന പാലമരം ഒരാഴ്ച മുമ്പാണ് റെയിൽവേ അധികൃതർ മുറിച്ചത്. എന്നാൽ നാളിതുവരെ ആയിട്ടും റോഡിന് കുറുകെ കിടക്കുന്ന തടി മാറ്റാത്തത് മൂലം ഗതാഗതം തടസപ്പെട്ടിരിക്കുകയാണ്. നിരവധി വാഹനങ്ങളും കാൽനടയാത്രക്കാരും സ്ഥിരമായി ഉപയോഗിക്കുന്നതും, പള്ളിമുക്ക് ജംഗ്ഷനിൽ ഗതാഗതകുരുക്ക് അനുഭവപ്പെട്ടാൽ പൊതുജനങ്ങൾ പ്രയോജനപ്പെടുത്തുന്നതുമായ സമാന്തര റോഡാണ് തടസപ്പെട്ടു കിടക്കുന്നതെന്ന് നാട്ടുകാർ പറഞ്ഞു. ഈ വിഷയത്തിൽ റെയിൽവേ സത്വര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

കെഎൽസിഎ രൂപത മെമ്പർഷിപ്പ് കാമ്പയിന് കൊല്ലത്ത് തുടക്കമായി

കൊല്ലം: കേരളത്തിൽ തദ്ദേശസ്ഥാപനങ്ങളിലേക്ക് തെരഞ്ഞെടുപ്പും തുടർന്ന് നിയമസഭാ തെരഞ്ഞെടുപ്പും നടക്കുന്ന സാഹചര്യത്തിൽ സ്ഥാനാർഥി നിർണയത്തിൽ അർഹമായ പരിഗണന ലത്തീൻ സമുദായത്തിന് പ്രമുഖ രാഷ്ട്രീയ പാർട്ടികൾ നൽകണമെന്ന് കൊല്ലം കെഎൽസിഎ യോഗം ആവശ്യപ്പെട്ടു. കെഎൽസിഎ കൊല്ലം രൂപത മെമ്പർഷിപ്പ് കാമ്പയിൻ കൊല്ലം രൂപത വികാരി ജനറൽ റവ. ഡോ.ബൈജു ജൂലിയൻ ഉദ്ഘാടനം ചെയ്തു. 31 വരെയാണ് അംഗത്വ വിതരണം നടക്കുക. കേരള ലത്തീൻ സഭയുടെ സമുദായ സംഘടനയായ കെഎൽസിഎ പുതിയ നേതൃത്വ തെരഞ്ഞെടുപ്പിലേക്ക് കടക്കുകയാണ്. രൂപത പ്രസിഡന്‍റ് ലെസ്റ്റർ കാർഡോസിന്‍റെ അധ്യക്ഷതയിൽ നടന്ന സമ്മേളനത്തിൽ കായംകുളം യൂണിറ്റ് പ്രസിഡന്‍റ് വിനാൻസി ഷാരോൺ ആദ്യ മെമ്പർഷിപ്പ് ഏറ്റുവാങ്ങി. ജനറൽ സെക്രട്ടറി ജാക്സൺ നീണ്ടകര, ഫാ. ജോർജ് സെബാസ്റ്റ്യൻ, അനിൽ ജോൺ, വിൻസി ബൈജു, അഡ്വ. ഫ്രാൻസിസ് .ജെ. നെറ്റോ, എഡിസൺ അലക്സ്, സാലി സക്കറിയ, ജോസ് കല്ലശേരി, സോളമൻ റൊസാരിയോ. റോണാ റിബേറോ, ഡൽസി ആന്‍റണി, ഡെറിക് കാർഡോസ്, ജോസഫ് വാടി, ഫ്രാൻസിസ് ജോസഫ് തോപ്പ് എന്നിവർ പ്രസംഗിച്ചു.

മുങ്ങിയ കപ്പലിലെ കണ്ടെയ്നറുകൾ അപകടഭീഷണി ; ലക്ഷങ്ങളുടെ നഷ്ടത്തിൽ പൊറുതി മുട്ടി മത്സ്യതൊഴിലാളികൾ

അജി വള്ളിക്കീഴ് കൊല്ലം: കേരള തീരത്ത് രണ്ടു ചരക്ക് കപ്പലുകൾ മുങ്ങിയതിനെ തുടർന്ന് കടലിൽ പെട്ട കണ്ടയ്നറുകൾ മൽസ്യ ബന്ധന തൊഴിലാളികൾക്ക് അപകട ഭീഷണിയായി. ലക്ഷക്കണക്കിന് രൂപവിലമതിക്കുന്ന വള്ളങ്ങളും വലകളുമാണ് ഇതിനകം ബോട്ടുകൾക്കും വള്ളങ്ങൾക്കും നഷ്ടമായിരിക്കുന്നത്. അപകടത്തിൽപ്പെട്ട കപ്പലിലെ കണ്ടെയ്നറുകൾ കടലിൽ ഒഴുകി നടക്കുന്നത് തുടരുമ്പോൾ മത്സ്യബന്ധന മേഖലക്ക് ഇത് മൂലം ഉണ്ടാക്കിയിരിക്കുന്ന പ്രതിസന്ധി ചില്ലറയല്ല. കണ്ടെയ്നറുകളിലും കണ്ടെയ്നർ അവശിഷ്ടങ്ങളിലും ഉടക്കി കൊല്ലം തീരത്ത് നിന്ന് കടലിൽ പോയ 38 ഓളം വള്ളങ്ങളുടെയും ബോട്ടുകളുടെയും വലകൾക്ക് മാത്രമായി ഒരുകോടിക്കടുത്ത് നഷ്ടമാണ് ഉണ്ടായിരിക്കുന്നത്. വലകൾക്ക് നഷ്ടം സംഭവിച്ചവർക്കായി പ്രത്യേക സാമ്പത്തിക പാക്കേജ് പ്രഖ്യാപിക്കണമെന്ന മൽസ്യത്തൊഴിലാളികളുടെ ആവശ്യത്തിനു മുന്നിൽ സർക്കാർ തീർത്തും മൗനം പാലിക്കുകയാണ്. കടലിൽ അപകടത്തിൽപ്പെട്ട കപ്പലിൽ നിന്ന് കടലിൽ പതിച്ച കണ്ടെയ്‌നറുകൾ കുരുങ്ങിൊയാണ് മത്സ്യത്തൊഴിലാളികളുടെ വലകൾ നഷ്ടപ്പെടുന്നത്. കണ്ടെയ്നർ അവശിഷ്ടങ്ങളിൽ വലകൾ കുരുങ്ങിയാൽ പിന്നെ ആ വലകൾ ഉപയോഗ യോഗ്യമാക്കണമെങ്കിൽ ലക്ഷങ്ങളാണ് ചിലവഴിക്കേണ്ടി വരുക. കഴിഞ്ഞ നാല് ആഴ്ചകൾക്കുള്ളിൽ മാത്രം എട്ടു മൽസ്യ തൊഴിലാളികൾക്ക് വല പൂർണമായും നഷ്ടപ്പെടുന്ന സ്ഥിതി വിശേഷം ഉണ്ടായി. അപകടത്തിൽപ്പെട്ട എം എസ് സി എൽസ കപ്പലിൽ നിന്ന് കടലിൽ മുങ്ങിയ കണ്ടെയ്നറുകൾ ഒഴുകി നടക്കാൻ തുടങ്ങിയിട്ട് രണ്ടു മാസത്തിലേറെയായി. മാസത്തിലധികമായി ജൂലൈ മൂന്നിന് മുൻപ് കണ്ടെയ്നറുകൾ നീക്കം ചെയ്യണമെന്നായിരുന്നു ഷിപ്പിങ്ങ് മന്ത്രാലയത്തിന്‍റെനിർദേശം. എന്നാൽ ഒരു നടപടിയും ഉണ്ടായില്ല. വലകൾ കണ്ടെയ്നറിൽ ഉടക്കി നീണ്ടകര, ശക്തികുളങ്ങര, വാടി ഭാഗങ്ങളിൽ നിന്ന് കടലിൽ പോയ 38 ഓളം വള്ളങ്ങളുടെ ബോട്ടുകളുടെയും വലകൾക്ക് നാശം സംഭവിച്ചിട്ടും അധികൃതർ അനങ്ങാപ്പാറ നയം തുടരുകയാണ്. ട്രോളിങ്ങ് നിരോധനം കഴിഞ്ഞതോടെ പരമ്പരാഗത മത്സ്യബന്ധന വള്ളങ്ങൾക്ക് മീൻ കൂടുതൽ കിട്ടുന്ന സമയത്താണ് ഈ ദുരവസ്ഥ ഉണ്ടായിരിക്കുന്നത്. വലകൾ നശിച്ച വള്ളങ്ങൾക്ക് ഇനി ദിവസങ്ങളോളം കടലിൽ പോകാനാവില്ല. ഇത് നൂറുകണക്കിന് കുടുംബങ്ങളെയാണ് കഷ്ടത്തിലാക്കിയിരിക്കുന്നത്. പരാതി നൽകുമ്പോൾ കേസെടുക്കാൻ പോലും തീരദേശ പോലീസ് തയാറാകുന്നില്ലെന്ന ആരോപണം വേറെ. ട്രോളിംഗ് നിരോധനം കഴിഞ്ഞ് കൂടുതൽ ബോട്ടുകൾ കടലിൽ പോകാൻ തുടങ്ങിയെങ്കിലും കൂടുതൽ പേരും ആശങ്കയോടെയാണ് മത്സ്യബന്ധനത്തിനായി പോകുന്നത്. വലകൾ നഷ്ടമായ വള്ളങ്ങൾക്ക് പ്രത്യേക സാമ്പത്തിക പാക്കേജ് പ്രഖ്യാപിക്കണമെന്നാണ് മൽസ്യത്തൊഴിലാളികൾ ഈ സാഹചര്യത്തിൽ ആവർത്തിച്ച് ആവശ്യപ്പെടുന്നത്. തോട്ടപ്പള്ളിക്ക് പടിഞ്ഞാറ് ഭാഗത്ത് 14.6 നോട്ടിക്കല്‍ മൈല്‍ ദൂരെ അപകടത്തില്‍പ്പെട്ട എംഎസ് സി എല്‍സ മൂന്ന് എന്ന ചരക്ക് കപ്പലില്‍ നിന്ന് 700 ഓളം കണ്ടെയ്‌നറുകളും ബേപ്പൂര്‍ തുറമുഖത്തിന് പടിഞ്ഞാറ് ഭാഗത്തായി 106 നോട്ടിക്കല്‍ മൈലില്‍ സിങ്കപ്പൂര്‍ വാന്‍ ഹായി 503 എന്ന കപ്പലില്‍ നിന്ന് 600 ഓളം കണ്ടെയ്‌നറുകളും ആണ് കടലിന്‍റെവിവിധ ഭാഗങ്ങളില്‍ പതിക്കുന്നത്. ഈ കണ്ടെയ്‌നറുകളില്‍ ഭൂരിഭാഗവും എറണാകുളം, ആലപ്പുഴ, കൊല്ലം, തിരുവനന്തപുരം ഭാഗത്തെ കടലിന്‍റെ വിവിധ ഭാഗങ്ങളില്‍ അടിത്തട്ടില്‍ കിടക്കുന്നുണ്ടെന്നാണ് മൽസ്യ തൊഴിലാളികൾ പറയുന്നത്. കണ്ടെയ്‌നറുകള്‍ കിടക്കുന്നതിനാൽ കൊല്ലം ആലപ്പുഴ ജില്ലകളില്‍ നിന്ന് കടലിൽ പോകുന്ന ബോട്ടുകള്‍ക്കും,വള്ളങ്ങള്‍ക്കും സുഗമമായി മത്സ്യ ബന്ധനം നടത്താന്‍ പറ്റാത്ത സാഹചര്യമാണ് ഉള്ളതെന്ന് മത്സ്യത്തൊഴിലാളി കോൺഗ്രസ് നേതാക്കളായ എസ്. എഫ്. യേശുദാസനും സെക്രട്ടറി ജി. ലീലാകൃഷ്ണനും പറയുന്നു.

ഏത് മേഖലയിലും പരിശീലനം വേണം, അതുപോലെ സിനിമയിലും: മന്ത്രി കേളു

ചവറ : കായികം എഴുത്ത് തുടങ്ങി എല്ലാ മേഖലകളിലും പരിശീലനം ചെയ്യുന്നത് പോലെ ചലച്ചിത്ര മേഖലയിലും പരിശീലനം ആവശ്യമാണെന്ന് മന്ത്രി ഒ.ആര്‍. കേളു. ചവറ കണ്‍സ്ട്രക്ഷന്‍ അക്കാദമിയില്‍ തൊഴില്‍ പരിശീലന കോഴ്‌സുകളുടെ സര്‍ട്ടിഫിക്കറ്റ് വിതരണം ചെയ്യാനെത്തുമ്പോൾ മാധ്യമ പ്രവര്‍ത്തകരോട് പ്രതികരിക്കുകയായിരുന്നു ആദ്ദേഹം.അടൂരിന്‍റെ പരാമര്‍ശങ്ങള്‍ വിവാദമാക്കേണ്ട കാര്യമില്ല. കേരളത്തില്‍ ജാതി ചിന്ത കൊണ്ടുവരാന്‍ ചില ശക്തികള്‍ ശ്രമിക്കുന്നുണ്ട് അത് അംഗീകരിക്കില്ല.ജാതിയമായ പരാമര്‍ശങ്ങള്‍ ഉയര്‍ത്തിക്കൊണ്ടുവരുന്നത് സാംസ്‌കാരിക കേരളത്തിന് ചേര്‍ന്നതല്ല. ഫണ്ട് നല്‍കുന്ന കാര്യം വിവാദമാക്കേണ്ട ഒന്നല്ല. സ്വാമി വിവേകാനന്ദര്‍ പറഞ്ഞത് പോലെ കേരളം തിരികെ പോകുന്നു എന്ന് സംശയിക്കേണ്ടിയിരിക്കുന്നു. ജാതി ചിന്ത വെച്ച് പുലര്‍ത്തുന്നത് നമ്മുടെ നാടിന്‍റെ പുരോഗതിയെ ബാധിക്കുമെന്ന് മന്ത്രി പറഞ്ഞു.

ചെറുപുഷ്പ സ്കൂളിൽ ഹിരോഷിമ ദിനാചരണം നടത്തി

ആയൂർ : ചെറുപുഷ്പ സെൻട്രൽ സ്കൂളിലെ ഹിരോഷിമ ദിനാചരണം സോഷ്യൽ സയൻസ് ക്ലബിന്‍റെആഭിമുഖ്യത്തിൽ നടത്തി. ദിനാചരണത്തോടനുബന്ധിച്ച് നടന്ന പ്രത്യേക അസംബ്ലിയിൽ ബർസാർ ഫാ.ജോൺ പാലവിള കിഴക്കേതിൽ ഹിരോഷിമ ദിനത്തിന്‍റെ പ്രത്യേകതയെക്കുറിച്ചും പ്രിൻസിപ്പൽ ഫാ.അരുൺ ഏറത്ത്, ലോകത്ത് യുദ്ധം ഉളവാക്കുന്ന പ്രതിസന്ധികളെ കുറിച്ചും സമാധാനം നിലനിൽക്കേണ്ടതിന്‍റെ ആവശ്യകതയെക്കുറിച്ചും പ്രസംഗിച്ചു. വിദ്യാർഥികളായ ഖദീജ, ജുവൽ, ശിവഗംഗ, അധ്യാപിക ജിബിയാ ജോർജ് എന്നിവർ പ്രസംഗിക്കുകയുണ്ടായി. പോസ്റ്റർ, ഡോക്യുമെന്‍ററി എന്നിവയുടെ പ്രദർശനവും പ്രത്യേക ക്വിസ് മത്സരവും നടന്നു.

പുനലൂരിൽ മൂന്ന് കിലോയോളം കഞ്ചാവുമായി യുവാക്കളെ പോലീസ് പിടികൂടി

പുനലൂർ: രഹസ്യവിവരത്തെ തുടർന്ന്ഇന്നലെ വൈകുന്നേരം പുനലൂർ പോലീസ് നടത്തിയ പരിശോധനയിലാണ് യുവാക്കൾ പിടിയിലായത്. ചെറുകിട കച്ചവടക്കാർക്ക് വിതരണത്തിനായി എത്തിച്ചതാണ് കഞ്ചാവ് എന്നാണ് പ്രാഥമിക നിഗമനം. പുനലൂർ ,മഞ്ഞമൺകാല ആലഞ്ചേരി പുത്തൻവീട്ടിൽ സുജിൻ (22),ഇളമ്പൽ, മാടപ്പാറ ,പുത്തൻവീട്ടിൽ ജോയൽ (21),ആയൂർ, നീറായിക്കോട്, അനന്തു ഭവനിൽഅഖിൽ (22) എന്നിവരെയാണ്മൂന്ന് കിലോയോളം കഞ്ചാവുമായി പിടികൂടിയത്. ചെമ്മന്തൂർ -കുതിരച്ചിറ റോഡിൽസെന്‍റ് തോമസ് സ്കൂളിന് സമീപം വെച്ചാണ് യുവാക്കൾ പോലീസിന്‍റെ പിടിയിലാകുന്നത്.ഇവരുടെ കൈവശം സൂക്ഷിച്ചിരുന്ന ബാഗിൽ രണ്ടു കെട്ടുകളിലായി പൊതിഞ്ഞ സൂക്ഷിച്ച നിലയിലാണ് കഞ്ചാവ് കണ്ടെടുത്തത്. തുടർന്ന് ഗസറ്റഡ് ഉദ്യോഗസ്ഥന്‍റെ സാന്നിധ്യത്തിൽ നടപടിക്രമങ്ങൾ പുനലൂർ പോലീസ് പൂർത്തീകരിച്ചു . ഇവരെ കോടതിയിൽ ഹാജരാക്കും.

ഓട്ടോറിക്ഷ തടഞ്ഞു നിര്‍ത്തി വയോധികനായ ഡ്രൈവറെ മര്‍ദിച്ച പ്രതിയെ അറസ്റ്റു ചെയ്തു

കൊട്ടിയം: മോട്ടോര്‍ സൈക്കിളിനു സൈഡ് നല്‍കാത്തതിന്‍റെ വിരോധത്താല്‍ ഓട്ടോറിക്ഷ തടഞ്ഞു നിര്‍ത്തി വയോധികനായ ഡ്രൈവറെ മര്‍ദ്ദിച്ച് അവശനാക്കിയ പ്രതി പോലീസിന്‍റെ പിടിയില്‍. ആദിച്ചനല്ലൂര്‍ തഴുത്തല ചേരിയില്‍ ചിറക്കര പുത്തന്‍ വീട്ടില്‍ രഘുനാഥന്‍ മകന്‍ അരുണ്‍(38) ആണ് കൊട്ടിയം പോലീസിന്‍റെ പിടിയിലായത്. ജൂലൈ 29നു രാത്രി 10.30 ഓടെ കൊട്ടിയം ജംഗ്ഷനു സമീപത്തു വച്ചാണ് സംഭവം. സിസിടിവി ദൃശ്യങ്ങളുടെ സഹായത്തോടെ നിരവധി ഇരുചക്രവാഹനങ്ങളുടെ വിവരങ്ങള്‍ ശേഖരിച്ചും നിരീക്ഷിച്ചും ദിവസങ്ങളായി നടത്തിയ അന്വേഷണത്തിനൊടുവിലാണ് പ്രതിയെ കണ്ടെത്തിയത്. ചാത്തന്നൂര്‍ എസിപി അലക്‌സാണ്ടര്‍ തങ്കച്ചന്‍റെ നിര്‍ദ്ദേശപ്രകാരം കൊട്ടിയം ഇന്‍സ്‌പെക്ടര്‍ പി. പ്രദീപിന്‍റെനേതൃത്വത്തിലുള്ള പോലീസ് സംഘമാണ് പ്രതിയെ കണ്ടെത്തി അറസ്റ്റ് ചെയ്യ്ത്. ഇയാളെ ജാമ്യത്തില്‍ വിട്ടയച്ചു.

ഏഴംകുളം ഹോളി ഫാമിലി മലങ്കര കത്തോലിക്കാ പള്ളി തിരുന്നാൾ

കുളത്തുപ്പുഴ: ഏഴംകുളം മലങ്കര സുറിയാനി കത്തോലിക്ക പള്ളിയിൽ പരിശുദ്ധ ദൈവമാതാവിന്‍റെ സ്വർഗാരോപണ തിരുനാൾ 10 മുതൽ 15 വരെ നടക്കും. 10നു വൈകുന്നേരം അഞ്ചിനു കൊടിയേറ്റ്. വി.കുർബാന. ഭക്തസംഘടനകളുടെ വാർഷികം. 11ന് വൈകുന്നേരം അഞ്ചിനു വിശുദ്ധ കുർബാന,വചനധ്യാനം. 12 മുതൽ വൈകുന്നേരം അഞ്ചിനു വിശുദ്ധ കുർബാന.13നു വൈകുന്നേരം അഞ്ചിനു വിശുദ്ധ കുർബാന.14നു വൈകുന്നേരം അഞ്ചിനു പത്തനംതിട്ട ഭദ്രാസന മെത്രാൻ ഡോ. സാമുവേൽ മാർ ഐറേനിയോസ് വിശുദ്ധ കുർബാനക്കു കാർമികത്വം വഹിക്കും.15നു വി.മൂന്നിൻമേൽ കുർബാന.കൊടിയിറക്ക്. നേർച്ച എന്നിവയോടെ തിരുന്നാൾ സമാപിയ്ക്കുമെന്ന് വികാരി ഫാ. ജോഷ്വാ കൊച്ചുവിളയിൽ, മിഷനറി സിസ്റ്റർ ചൈതന്യ ഫ്രാൻസിസ് ഡിഎം, ട്രസ്റ്റി ജോയി മാക്കുളത്ത്‌, സെക്രട്ടറി ഏഴംകുളം രാജൻ തുടങ്ങിയവർഅറിയിച്ചു.

സി. കേശവൻ അവാർഡ്പ്രവാസി വ്യവസായി നസീർ വെളിയിലിന്

കൊല്ലം: സാമൂഹ്യ പരിഷ്‌കർത്താവും തിരു-കൊച്ചി മുഖ്യമന്ത്രിയും എസ്എൻഡിപി യോഗം ജനറൽസെക്രട്ടറിയുമായിരുന്ന മഹാനായ സി.കേശവന്‍റെ സ്‌മരണയ്ക്കായിസി. കേശവൻ സ്‌മാരക സമിതി ഏർപ്പെടുത്തിയ സി. കേശവൻ അവാർഡിന് പ്രവാസി വ്യവസായിയും ജീവകാരുണ്യ പ്രവർത്തകനും പത്തനാപുരം ഗാന്ധിഭവൻ ഓട്ടിസം സ്‌കൂൾ ചെയർമാനുമായ നസീർ വെളിയിൽ അർഹനായി. ഭിന്നശേഷിക്കാരായ പ്രത്യേകിച്ച് ഓട്ടിസം ബാധിച്ച കുട്ടികളുടെ ക്ഷേമത്തിനും ഉന്നമനത്തിനുമായി നടത്തിവരുന്ന സേവനപ്രവർത്തനങ്ങൾ കണക്കിലെടുത്താണ് അവാർഡ് നൽകുന്നത്. 25001 രൂപയും ശില്‌പവും പ്രശസ്‌തിപത്രവും അടങ്ങുന്ന അവാർഡ് സെപ്റ്റംബറിൽ അവസാനവാരം തിരുവനന്തപുരത്ത് നടക്കുന്ന ചടങ്ങിൽ സമ്മാനിക്കും.

റവ.ജോസ് ജോർജ് സഭയെ സ്നേഹിക്കുന്ന ബിഷപ്: കർദിനാൾ മാർ ജോർജ് ആലഞ്ചേരി

സിഎസ്ഐ കൊല്ലം -കൊട്ടാരക്കര മഹായിടവകയ്ക്ക് ധന്യനിമിഷം കൊല്ലം: വിശ്വാസികളുടെ പ്രാർഥനയുടെയും സ്തുതിഗീതങ്ങളുടെ അലയടി നിറഞ്ഞ അന്തരീക്ഷത്തിൽ സിഎസ്ഐ കൊല്ലം-കൊട്ടാരക്കര മഹായിടവകയുടെ ദ്വിതീയബിഷപായി റവ.ജോസ് ജോർജ് അഭിഷിക്തനായി. സഭയുടെ തദ്ദേശീയനായ ആദ്യബിഷപാണ് റവ.ജോസ് ജോർജ്. നൂറുക്കണക്കിനു വിശ്വാസികളും വൈദികരും സന്തോഷനിമിഷത്തിനു സാക്ഷികളായി കത്തീഡ്രൽ പള്ളിയിൽ സന്നിഹിതരായിരുന്നു. വിശ്വാസതീഷ്ണതയാൽ നിറഞ്ഞ ഒരു സമൂഹത്തിന്‍റെ പ്രാർഥന കത്തീഡ്രൽ പള്ളിയിൽ മുഴങ്ങി. ഗായകസംഘത്തിന്‍റെ ആലാപനത്തിനൊപ്പം വിശ്വാസികളും വൈദികരും ചേർന്നു വിശ്വാസരഹസ്യങ്ങൾ ഏറ്റുപാടി. സഭ മോഡറേറ്റർ റവ. ഡോ. കെ.രൂബേൻ മാർക്കിന്‍റെ കൈവയ്പ് ശുശ്രൂഷ വഴിയാണ് റവ. ജോസ് റവ.ജോസ് ജോർജ് അഭിഷിക്തനായത്. തുടർന്നു കത്തീഡ്രൽഅങ്കണത്തിൽ നടന്ന പൊതുസമ്മേളനം കർദിനാൾ മാർ ജോർജ് ആലഞ്ചേരി ഉദ്ഘാടനം ചെയ്തു. ദൈവവചനപ്രഘോഷണത്തിലൂടെയും പ്രാർഥനയിലൂടെയും പ്രവൃത്തിയിലൂടെയും സഭയെ സ്നേഹിക്കുന്ന ബിഷപാണ് റവ. ജോസ് ജോർജെന്നു പൊതുസമ്മേളനം ഉദ്ഘാടനം ചെയ്തു കർദിനാൾ മാർ ജോർജ് ആലഞ്ചേരി അഭിപ്രായപ്പെട്ടു. സഭയുടെ ശക്തി നേതൃത്വമാണ്. സഭൈക്യം കാത്തുപരിപാലിക്കേണ്ട കാലഘട്ടമാണിതെന്നും അദ്ദേഹം പറഞ്ഞു. തിരുവചനപ്രഘോഷണത്തിലൂടെയും ആരാധനയിലൂടെയും അധികാര ശുശ്രൂഷയിലൂടെയും കൊല്ലം-കൊട്ടാരക്കര മഹായിടവകയെ നയിക്കാൻ റവ.ജോസ് ജോർജിനു സാധിക്കും. വിശ്വാസത്തിലുംശുശ്രൂഷയിലും ദൈവത്തിനും ദൈവജനത്തിനും വേണ്ടി പ്രവർത്തിക്കാൻ ബിഷപിനു സാധിക്കട്ടെ എന്നും അദ്ദേഹം ആശംസിച്ചു. സിഎസ്ഐ ബിഷപ് കൗൺസിലിന്‍റെ സെക്രട്ടറി റവ. തിമോത്തി രവീന്ദ്രർ അധ്യക്ഷത വഹിച്ചു. മന്ത്രി കെ.എൻ. ബാലഗോപാൽ മുഖ്യപ്രഭാഷണം നടത്തി. ജോസഫ് മാര്‍ ദിവന്നാസിയോസ് ,ഡോ. സ്റ്റാന്‍ലി റോമന്‍, ജോഷ്വാ മാര്‍ ഇഗ്‌നാത്തിയോസ്, ബിഷപ് ഡോ.സെൽവദാസ് പ്രമോദ, ശ്രീമദ് അസംഗാനന്ദ ഗിരി, മൂവാറ്റുപുഴ അഷ്‌റഫ് മൗലവി, എംഎല്‍എമാരായ എം.നൗഷാദ്, പി.എസ്. സുപാല്‍, കെപിസിസി ജനറല്‍ സെക്രട്ടറി എം. ലിജു, സിപിഎം. കൊല്ലം ജില്ലാ സെക്രട്ടറി എസ്. സുദേവന്‍, ഡിസിസി പ്രസിഡന്‍റ് പി. രാജേന്ദ്ര പ്രസാദ്, എഐസിസി അംഗം ബിന്ദു കൃഷ്ണ തുടങ്ങിയവര്‍ പ്രസംഗിച്ചു.

അഞ്ചല്‍ സെന്‍റ് ജോണ്‍സ് സ്‌കൂളില്‍ ‘വിമുക്തി മന്ത്ര' ലഹരിവിരുദ്ധ ബോധവത്കരണ പരിപാടി

അഞ്ചല്‍ ലഹരി ഉപയോഗത്തിന്‍റെ ദോഷവശങ്ങള്‍ മാജിക്കിലൂടെയും, ഹ്രസ്വ ചിത്രങ്ങളിലൂടെയും കുട്ടികളെ മനസിലാക്കുക എന്ന ലക്ഷ്യത്തോടെ കേരള സർക്കാരും പത്തനാപുരം ഗാന്ധിഭവന്‍റെയും സംയുക്താഭിമുഖ്യത്തില്‍ പ്രശസ്ത മജീഷ്യന്‍ സാമ്രാജ് നടത്തുന്ന 'വിമുക്തി മന്ത്ര' ലഹരി വിരുദ്ധ ബോധവല്‍ക്കരണ പരിപാടി അഞ്ചല്‍ സെന്‍റ് ജോണ്‍സ് സ്‌കൂളിലെ നല്ലപാഠം ക്ലബ് ആന്‍റിനാര്‍ക്കോട്ടിക് ക്ലബ്, സോഷ്യല്‍ സര്‍വീസ് ക്ലബ് എന്നിവയുടെ നേതൃത്വത്തില്‍ നടന്നു. ജീവിതം ഒരു തെരഞ്ഞെടുപ്പാണ് .ഇന്ന് നല്ലത് തെരഞ്ഞെടുക്കൂ, നല്ലതായി ജീവിക്കൂ' എന്ന സന്ദേശം മജീഷ്യന്‍ സാമ്രാജ് കുട്ടികള്‍ക്ക് നല്‍കി. കുട്ടികള്‍ ലഹരി വിരുദ്ധ പ്രതിജ്ഞ ചെയ്തു. സ്‌കൂള്‍ ലോക്കല്‍ മാനേജര്‍ ഫാ. ബോവസ് മാത്യു, പ്രിന്‍സിപ്പല്‍ മേരി പോത്തന്‍, വൈസ് ചെയര്‍മാന്‍ കെ.എം മാത്യു, ജനറല്‍ അക്കാഡമിക് കോഡിനേറ്റര്‍ പി.ടി. ആന്‍റണി, ഗാന്ധിഭവന്‍ സിഇഒ വിന്‍സെന്‍റ് ഡാനിയേല്‍, കോ ഓര്‍ഡിനേറ്റര്‍ സോമന്‍ പിള്ള എന്നിവര്‍ ചടങ്ങില്‍ പ്രസംഗിച്ചു. നല്ലപാഠം ടീച്ചേഴ്‌സ് കോ ഓര്‍ഡിനേറ്റര്‍മാരായ കെ.ബി. ഗീതാകുമാരി, ദീപ എസ്. പോള്‍, സ്റ്റുഡന്‍റ് കോ ഓര്‍ഡിനേറ്റര്‍മാരായ ശ്രീഹരി സുരേഷ്, ആര്‍. മയൂഖ, ആന്‍റിനാര്‍ക്കോട്ടിസ് ക്ലബ് കോ ഓര്‍ഡിനേറ്റര്‍പി.പി. ഷാഹിന, സോഷ്യല്‍ സര്‍വീസ് ക്ലബ് കോ ഓര്‍ഡിനേറ്റര്‍ രശ്മി മേരി തോമസ് എന്നിവര്‍ പരിപാടിക്ക് നേതൃത്വം നല്‍കി.

കൊല്ലത്ത് നടക്കില്ല

കൊല്ലം : നഗരത്തിൽ കാൽനടയാത്രക്കാർക്കു നടന്നു പോകാൻ പറ്റുമോ? ഇല്ല എന്നാണ് ഉത്തരം. നടപ്പാതകൾ മുഴുവൻ ഏതാനും തട്ടുകടക്കാർ, കച്ചവ‌ടക്കാർ, ഓട്ടോറിക്ഷക്കാർ, സ്വകാര്യ കാറുകൾ, സ്വകാര്യബസുകൾ എല്ലാവരുംകൂടി കൈയേറി കഴിഞ്ഞു. കൊല്ലത്ത് ആരും ചോദിക്കില്ല. അതുകൊണ്ട് കൊല്ലത്ത് ഒന്നും നടക്കില്ല. കൊല്ലത്ത് ആരും നടക്കുകയുമില്ല. ഫുട്പാത്തിലേക്ക് നോക്കുക കൊല്ലത്തെ നിരത്തിലിറങ്ങി നിങ്ങൾ ഫുട്പാത്തിലേക്കൊന്നു നോക്കുക. ആരെങ്കിലും നടപ്പാതയിലൂടെ നടന്നു ലക്ഷ്യസ്ഥാനത്ത് എത്തുന്നതു കണ്ടിട്ടുണ്ടോ. അല്ല, നിങ്ങൾക്കു എത്തിച്ചേരാൻ സാധിച്ചിട്ടുണ്ടോ. മഴയായാലും വെയിലായാലും പൊതുനിരത്തിലിറങ്ങി നടക്കണം. പൊതുനിരത്തുകളിലൂടെ വാഹനങ്ങളെ ഭയന്നല്ലേ നമ്മൾ നടന്നു പോകുന്നത്. നമ്മുടെ കുട്ടികൾ വാഹനങ്ങൾക്കിടയിലൂടെ സഞ്ചരിക്കുന്നതു കാണുന്പോൾ നമ്മൾ പ്രാർഥിക്കുകയാണ്. നഗരത്തിലൊന്ന് ഇറങ്ങിയാൽ ഒന്നെങ്കിൽ കച്ചവടക്കാർ സാധനങ്ങളെല്ലാം ഇറക്കി വച്ചു ഫുട്പാത്ത് കൈയേറും. അവിടെനിന്നും വഴിയിലിറങ്ങി നടന്നു മുന്നോട്ടു പോകുന്പോൾ തട്ടുകടക്കാർ നിരന്നിരിക്കും. പിന്നെ കാണുന്നതു ഫുട്പാത്തിൽ കിടക്കുന്ന ഓട്ടോറിക്ഷകളും സ്വകാര്യവാഹനങ്ങളുമാണ്. പിന്നെ തിരക്കേറിയ വഴിയിലെ ഹോട്ടലുകൾക്കു മുന്നിലെ വാഹനങ്ങളുടെ തിരക്ക്. ശ്വാസംമുട്ടിയാണ് യാത്രക്കാർ സഞ്ചരിക്കുന്നത്. പ്രഭാത നടത്തത്തിനിടെ വാഹനം തട്ടി മരിക്കുന്നതും ഗുരുതര പരുക്കേല്‍ക്കുന്നതും പതിവു വാര്‍ത്തയാണ്. പൊതുനിരത്തുകളില്‍ കാല്‍നട യാത്രക്കാർക്കു പ്രത്യേകം നടപ്പാതകള്‍ ഇല്ലാത്തതുകൊണ്ടല്ല ഇത്തരം അപകടം സംഭവിക്കുന്നത്. ഫുട്പാത്തുകളിൽ കൈയേറ്റം നടന്നിരിക്കുന്നു. കാല്‍നട യാത്രക്കാര്‍ വാഹനങ്ങള്‍ ചീറിപ്പായുന്ന ഭാഗങ്ങളുടെ ഓരം പറ്റി നടക്കാന്‍ നിര്‍ബന്ധിതരാകുന്നു. എത്ര ശ്രദ്ധിച്ചു നടന്നാലും മത്സരയോട്ടം നടത്തുന്ന ബസുകളില്‍ നിന്നും ചീറിപ്പായുന്ന മറ്റു വാഹനങ്ങളില്‍ നിന്നും രക്ഷപ്പെടാന്‍ സാധിച്ചെന്നു വരില്ല. നഗരത്തിൽ ഇവിടെ ചിന്നക്കടപോസ്റ്റ് ഓഫീസ് റോഡ്, സെന്‍റ് ജോസഫ്സ് കോൺവന്‍റ് റോഡ്, ബീച്ച് റോഡ്, റെയിൽവേ സ്റ്റേഷൻ റോഡ്, താലൂക്ക് കച്ചേരി ജംഗ്ഷൻ ഭാഗങ്ങളിലൂടെ ഒന്നു സഞ്ചരിക്കുക. ആരും ഭയപ്പെടുത്തുന്ന രീതിയിൽ ഫുട്പാത്തുകൾ ചിലർ സ്വന്തമാക്കി കഴിഞ്ഞു. നടപ്പാതകള്‍ ഉപയോഗിക്കാനുള്ള അവകാശം ജീവിക്കാനുള്ള അവകാശത്തിന്‍റെ ഭാഗമാണെന്നും ഭരണഘടനയുടെ ആര്‍ട്ടിക്കിള്‍ 21 പ്രകാരം കാല്‍നട യാത്രക്കാര്‍ക്കു ഫുട്പാത്തുകള്‍ ഉപയോഗിക്കാനുള്ള അവകാശം ഉറപ്പാക്കണമെന്നും ഇക്കഴിഞ്ഞ മേയ് 14നു സുപ്രീം കോടതി വ്യക്തമാക്കി. നടപ്പാതകള്‍ ഇല്ലാത്തതിനാല്‍ കാല്‍നട യാത്രക്കാര്‍ റോഡുകളില്‍ സഞ്ചരിക്കാന്‍ നിര്‍ബന്ധിതരാകുന്നതാണ് നല്ലൊരു പങ്ക് റോഡപകടങ്ങള്‍ക്കും കാരണമെന്നും ജസ്റ്റിസ് അഭയ് ,ജസ്റ്റിസ് ഉജ്ജ്വല്‍ ഭുയാന്‍ എന്നിവരടങ്ങിയ ബഞ്ച് ചൂണ്ടികാട്ടിയിരുന്നു. അധികാരികൾക്കു മൗനം നടപ്പാതകള്‍ നിര്‍മിക്കുന്നതോടൊപ്പം യാത്രക്കാര്‍ക്കു പ്രയാസം സൃഷ്ടിക്കുന്ന അതിലെ തടസങ്ങള്‍ നീക്കാനും കൈയേറ്റങ്ങള്‍ ഒഴിപ്പിക്കാനുമുള്ള ബാധ്യതയും ഭരണകൂടങ്ങള്‍ക്കുണ്ട്. തൂങ്ങിക്കിടക്കുന്ന കേബിളുകളും ചാഞ്ഞുകിടക്കുന്ന മരച്ചില്ലകളും പരസ്യബോര്‍ഡുകളും പലപ്പോഴും നടപ്പാത യാത്ര പ്രയാസകരമാക്കുന്നു. നടപ്പാതകള്‍ കൈയേറി ബൈക്കുകളും കാറുകളും പാര്‍ക്ക് ചെയ്യുന്നതും ഉന്തുവണ്ടിക്കച്ചവടം നടത്തുന്നതും നഗരങ്ങളില്‍ പതിവു കാഴ്ചയാണ്. ഓണം പോലുള്ള ഉത്സവ സീസണുകളില്‍ തെരുവു കച്ചവടക്കാര്‍ നടപ്പാതകളും റോഡുകളും കൈയടക്കുന്നു. ഇതിനെതിരെ പരാതി ശക്തമാകുമ്പോള്‍ അധികൃതര്‍ കൈയേറ്റക്കാരെ ഒഴിപ്പിക്കുമെങ്കിലും താമസിയാതെ കച്ചവടക്കാര്‍ തിരിച്ചെത്തും.

ധാർമിക് കൃഷ്ണയെ ആദരിച്ചു

പുത്തൂർ : ഇന്ത്യ ബുക്ക് ഓഫ് റെക്കോർഡ്സിൽ ഇടം നേടിയ ധാർമിക് കൃഷ്ണയെ പുത്തൂർ പോലീസിന്‍റെ ആദരവ്. കുറഞ്ഞ സമയത്തിനുള്ളിൽ 48 ഏഷ്യൻ രാജ്യങ്ങളുടെ പേരും അവയുടെ തലസ്ഥാനവും അക്ഷരമാല ക്രമത്തിൽ തെറ്റാതെ പറഞ്ഞാണ് ധാർമിക്ക് ഇന്ത്യ ബുക്ക് ഓഫ് റെക്കോർഡ്സിൽ ഇടംപിടിച്ചത്. 26.3 സെക്കൻഡിൽ തെറ്റാതെ പറഞ്ഞ് കൗമാരക്കാരുടെ വിഭാഗത്തിൽ ഗ്രാൻഡ്മാസ്റ്റർ പദവി ധാർമിക് സ്വന്തമാക്കി. പുത്തൂർ ഗവ. ഹയർ സെക്കൻഡറി സ്കൂളിലെ ഒൻപതാം ക്ലാസ് വിദ്യാർഥിയും എസ്പി സി കേഡറ്റുമാണ്. പുത്തൂർ സബ് ഇൻസ്പെക്ടർ ടി. ജെ. ജയേഷും സഹപ്രവർത്തകരും വീട്ടിലെത്ത ിയാണ് ധാർമിക് കൃഷ്ണയെ ആദരിച്ചത്.

കുളത്തൂപ്പുഴ വൈഎംസിഎ ഭാരവാഹികള്‍

കുളത്തൂപ്പുഴ : കുളത്തൂപ്പുഴ വൈഎംസിഎ ഭാരവാഹികളെ തെരഞ്ഞെടുത്തു. ഭാരവാഹികള്‍: പ്രസിഡന്‍റ്- കെ. ജോണി ,വൈസ് പ്രസിഡന്‍റ് - റോയി ഉമ്മന്‍ ,സെക്രട്ടറി - സാനു ജോര്‍ജ്, ജോ. സെക്രട്ടറി - ഷീനാ രാജേഷ്, ട്രഷറാര്‍ - സണ്ണി തോമസ്.വിവിധ കമ്മറ്റി കണ്‍വീനേഴ്‌സായി ട്രയിനിംഗ് ആൻഡ് ലീഡര്‍ഷിപ്പ് - കെ. ബാബു കുട്ടി, മിഷന്‍ ആൻഡ് ഡവലപ്‌മെന്‍റ് - ജോണ്‍ തോമസ് മുളയറ, സ്‌പോര്‍ട്‌സ് ആൻഡ് ഗെയിംസ് - ജോര്‍ജ് കുട്ടി മാക്കുളം, മീഡിയ ആന്‍ഡ് കമ്മ്യൂണിക്കേഷന്‍- സുനില്‍ വള്ളിക്കാല, യൂത്ത് വിമണ്‍ ആൻഡ് ചില്‍ഡ്രന്‍സ് -മാത്യു ജോര്‍ജ് പട്ടത്താനം. ബോര്‍ഡ് അംഗങ്ങളായി കെ.സി.ഏബ്രഹാം, കെ.ഒ. ജോബ് , ജോസഫ് ഡേവിഡ് , മാത്യു ജോണ്‍, ജോര്‍ജ് തോമസ് എന്നിവരെയും തെരഞ്ഞെടുത്തു.

വയോധികയ്ക്ക് ക്രൂരമർദനം; പ്രതി റിമാൻഡിൽ

കൊട്ടാരക്കര: കൊട്ടാരക്കര ഗാന്ധിമുക്കിൽ റിട്ട .അധ്യാപികക്കു നേരെ വീട് കയറി ക്രൂര മർദനം. കൊട്ടാരക്കര ഗാന്ധിമുക്ക് മൈത്രി നഗറിൽ കൃഷ്ണനിവാസിൽ സരസമ്മ (78)യെയാണ് അയൽവാസി വീട്ടിൽ കയറി മർദിച്ചത്. സംഭവവുമായി ബന്ധപ്പെട്ടു ഗാന്ധി മുക്ക് മൈത്രി നഗറിൽ പൗവത്ത് പുത്തൻ വീട്ടിൽ ശശിധരൻ (70) നെ കൊട്ടാരക്കര പോലീസ് അറസ്റ്റ് ചെയ്തു. തിങ്കൾ വൈകുന്നേരം നാലിനാണ് സംഭവം. വാക്കുതർക്കം രൂക്ഷമായതിനെ തുടർന്ന് അയൽവാസിയായ ശശിധരൻ എഴുപത്തിയെട്ടുകാരിയായ സരസമ്മയുടെ വീട്ടിലേക്ക് അതിക്രമിച്ചു കയറി. വയോധികയെ വീട്ടിൽ നിന്നു വലിച്ചിറക്കി ക്രൂരമായി മർദിക്കുകയായിരുന്നു. വീട്ടിലേക്കു കടന്ന് വന്ന ശശിധരനെ സരസമ്മ വടി കൊണ്ട് അടിക്കുന്നതും അതിനു ശേഷം സരസമ്മയെ തിരിച്ചു മർദിക്കുകയും കഴുത്തിൽ കുത്തി പിടിച്ചു ഭിത്തിയിൽ ചേർത്തു നിർത്തി മർദിക്കുന്നതും പടവുകളിൽ കൂടി കാലിൽ പിടിച്ചു വലിച്ചിഴച്ചു കൊണ്ട് പോകുന്നതും സിസി ടിവി വഴി പുറത്ത് വന്നിട്ടുണ്ട്. തലയിൽ അഞ്ചു തുന്നലും ഇരു കൈയിലും പുറത്തും പരിക്കേറ്റിട്ടുണ്ട്. ഗാന്ധിമുക്കിൽ ഒറ്റയ്ക്ക് താമസിക്കുന്ന വരുകയായിരുന്ന സരസമ്മ. അയൽവാസിയുമായി നേരത്തെ തർക്കങ്ങൾ നിലനിന്നിരുന്നതായി പോലീസ് പറയുന്നു. വൈദ്യ പരിശോധനകൾക്ക് ശേഷം പ്രതിയെ കോടതിയിൽ ഹാജ രാക്കി റിമാൻഡ് ചെയ്തു.

കളിമണ്‍ ഖനനത്തിനെടുത്ത കുഴിയില്‍ ടിപ്പര്‍ ലോറി വീണു

കൊട്ടിയം: കളിമണ്‍ ഖനനം നടത്തിയ സ്ഥലത്തെ ആഴമേറിയ കുഴിയില്‍ ടിപ്പര്‍ ലോറി വീണു. സംഭവ സമയം ലോറിയില്‍ ആളില്ലാതിരുന്നതിനാല്‍ വലിയ ദുരന്തം ഒഴിവായി. ഇന്നലെ രാവിലെ ഒമ്പതോയോടെ കുളപ്പാടം മഞ്ഞക്കുഴിയിലുള്ള ക്ലേ എടുത്ത കുഴിയിലായിരുന്നു സംഭവം. മഞ്ഞക്കുഴിയിലുള്ള സ്വകാര്യ സിമന്‍റ് ബ്രിക്‌സ് നിര്‍മ്മാണ യൂണിറ്റിലേക്കായി പാറപ്പൊടിയുമായി വന്ന വാഹനമാണ് കുഴിയില്‍ വീണത്. ഡ്രൈവര്‍ വാഹനത്തില്‍നിന്ന് ഇറങ്ങി പാറപ്പൊടി ഇറക്കുന്നതിനായി വാഹനത്തിന്‍റെ ടിപ്പ് പൊക്കിയ സമയത്താണ് വാഹനം തെന്നി മാറി. കുഴിയില്‍ പതിച്ചത്. സംഭവം നടന്നയുടന്‍ സ്ഥലത്തെത്തിയ ബ്ലോക്ക് പഞ്ചായത്ത് അംഗം ഫൈസല്‍ കുളപ്പാടം പോലീസിനെയും ഫയര്‍ഫോഴ്സിനെയും വിവരമറിയിച്ചു. തുടര്‍ന്ന് കണ്ണനല്ലൂര്‍പോലീസും കുണ്ടറയില്‍ നിന്നും ഫയര്‍ഫോഴ്‌സും സ്‌ക്യൂബ ടീംഅംഗങ്ങളും സ്ഥലത്തെത്തുകയും വാഹനം ഉയര്‍ത്തുവാനുള്ള നടപടികള്‍ ക്രമീകരിച്ചു. നാലു മണിക്കൂറോളം നീണ്ട പരിശ്രമത്തിന് ഒടുവിലാണ് വലിയ ക്രെയിനി െ ന്‍റ സഹായത്തോടെ ടിപ്പര്‍ ലോറി കുഴിയില്‍ നിന്നും പുറത്തെടുത്തത്. നെടുമ്പന കുളപ്പാടം സ്വദേശി നിസാമി െ ന്‍റ ഉടമസ്ഥതയിലുള്ളതാണ് ടിപ്പര്‍ ലോറി.

ഭർത്താവ് ഭാര്യയെ കുത്തിപ്പരിക്കേൽപ്പിച്ചു

കൊട്ടാരക്കര: നീലേശ്വരത്ത് പിണങ്ങിക്കഴിഞ്ഞ ഭർത്താവ് ഭാര്യയെ കുത്തി പരിക്കേൽപ്പിച്ചു. നീലേശ്വരം ചാന്തൂർ വിജയഭവനിൽ ബിജിമോൾക്കാണ്(38) കുത്തേറ്റത്. ഇവരെ കൊട്ടാരക്കര താലൂക്ക് ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് ഭ‌ർത്താവ് ചാത്തന്നൂർ കല്ലുവാതുക്കൽ സ്വദേശി രതീഷിനെ(40) കൊട്ടാരക്കര പോലീസ് അറസ്റ്റ് ചെയ്തു. ഇയാളെ കോടതി റിമാൻഡ് ചെയ്തു. തിങ്കളാഴ്ച രാത്രി ഏഴിനാണ് സംഭവം. ഒരു വർഷമായി രതീഷും ബിജിമോളും പിണങ്ങിക്കഴിയുകയും വിവാഹ ബന്ധം വേർപെടുത്താനുള്ള കേസ് നടന്നുവരികയുമാണ്. കൊട്ടാരക്കരയിലെ വ്യാപാര സ്ഥാപനത്തിലെ ജീവനക്കാരിയായ ബിജിമോൾ തിങ്കളാഴ്ച കടയിൽ നിന്നും വീട്ടിലെത്തിയപ്പോഴായിരുന്നു ആക്രമണം. വീടിനു പിന്നിൽ താക്കോൽ സൂക്ഷിക്കുന്ന ഭാഗത്തുനിന്നും താക്കോൽ എടുക്കാനെത്തിയപ്പോഴാണ് മറഞ്ഞിരുന്ന രതീഷ് കത്തിയുമായി ചാടി വീണത്. കുത്താൻ തുടങ്ങിയെങ്കിലും ചുരിദാറിന്‍റെ ഷാളിൽ കുരുങ്ങി കത്തി തെറിച്ചുപോയി. തുടർന്നു അവിടെയുണ്ടായിരുന്ന റബർ ടാപ്പിംഗ് കത്തിയെടുത്താണ് രതീഷ് കുത്തിയത്. ബിജിമോൾ തടഞ്ഞതിനാൽ കൈയിലാണ് കുത്തേറ്റത്. സമീപത്തുതന്നെയുണ്ടായിരുന്ന പിതാവും മകളും ഓടിയെത്തിയാണ് ബിജിമോളെ രക്ഷപ്പെടുത്തിയത്. കൊട്ടാരക്കര താലൂക്ക് ആശുപത്രിയിൽ പ്രവേശിപ്പിച്ചു. കൈയ്ക്ക് അഞ്ച് തുന്നിക്കെട്ടുകൾ വേണ്ടിവന്നു. ബഹളം കേട്ട് ഓടിക്കൂടിയ നാട്ടുകാർ രതീഷിനെ തടഞ്ഞുവച്ച ശേഷം പോലീസിനു കൈമാറുകയായിരുന്നു. ടൈൽസ് പണിക്കും ടാപ്പിംഗ് ജോലികൾക്കും പോയിരുന്നതാണ് രതീഷ്.

കാർ തീവച്ചു നശിപ്പിച്ച കേസ്: പ്രതി പിടിയിൽ

പരവൂർ: കാർ തീവച്ച് നശിപ്പിക്കുകയും യുവാവിനെ വെട്ടികൊലപ്പെടുത്താൻ ശ്രമിക്കുകയും ചെയ്ത കേസിലെ മുഖ്യപ്രതിയെ പരവൂർ പോലീസ് അറസ്റ്റ് ചെയ്തു. പൂതക്കുളം മിനി സ്റ്റേഡിയത്തിനു സമീപം ലത മന്ദിരത്തിൽ താമസിക്കുന്ന തിരുവനന്തപുരം കാച്ചാണി ജോസഫ് ലൈൻ 34ൽ ശ്രീരുദ്രയിൽ ശ്രീബാലൻ നായരുടെ മകൻ സന്ദേശ് എസ്.നായർ എന്ന ശംഭു( 28 ) ആണ് അറസ്റ്റിലായത്. പോലീസ്പറയുന്ത് ഇങ്ങനെ: കല്ലമ്പലം സ്വദേശിയായ ആദർശും പ്രതിയായ സന്ദേശും സുഹൃത്തുക്കളാണ്. ആദർശ് തന്‍റെ മറ്റൊരു സുഹൃത്തായ ജയ കണ്ണനോടൊപ്പം സന്ദേശിനെ കാണാനായി പൂതക്കുളത്ത് എത്തുകയായിരുന്നു. സൗഹൃദ സംഭാഷണങ്ങൾക്കിടയിൽ ഇവർ മദ്യപിച്ചു. ആദർശും സന്ദേശും പ്രതികളായിട്ടുള്ള ഒരു കഞ്ചാവ് കേസ് കൊല്ലം വെസ്റ്റ് പൊലീസിൽ നിലവിലുണ്ട്.ഇതേക്കുറിച്ച് സംസാരിക്കുന്നതിനിടയിൽ വാക്ക് തർക്കമുണ്ടായി. ജയ കണ്ണൻ ഇടപെട്ട് അക്രമണത്തിനു മുതിർന്ന ഇരുവരേയും പിൻതിരിപ്പിക്കുകയും ആദർശിനെ തിരികെ കൊണ്ടു പോകാൻ ശ്രമിച്ചെങ്കിലും മറ്റൊരു യുവാവുമായി പിന്നാലെ എത്തിയ സന്ദേശ് ജയ കണ്ണനെ ആക്രമിക്കുകയും ഇവർ സഞ്ചരിച്ചിരുന്ന കാർ ഗ്ലാസുകളും മറ്റും വെട്ടുകത്തി ഉപയോഗിച്ച് അടിച്ചു പൊട്ടിക്കുകയും ശേഷം തീയിടുകയായിരുന്നു. പിന്നീട് ഒളിവിൽ പോയ പ്രതിയെ പോളച്ചിറയിലെ പൊന്തക്കാട്ടിൽ നിന്നും പിടികൂടുകയായിരുന്നു. അക്രമത്തിനു ശേഷം മൊബൈൽ ഫോൺ സ്വിച്ച് ഓഫാക്കിയ ശേഷം ഒളിവിൽ പോയ സന്ദേശിനെ ഫോൺ വീണ്ടും ഓൺ ചെയ്തപ്പോൾ കിട്ടിയ ടവർ ലൊക്കേഷൻ പിൻതുടർന്നാണ് പിടികൂടിയത്. ഇയാളെ സംഭവ സ്ഥലത്തെത്തിച്ച് തെളിവെടുപ്പുകൾ നടത്തി. വൈദ്യ പരിശോധനയ്ക്കു ശേഷം കോടതിയിൽ ഹാജരാക്കി റിമാൻഡ് ചെയ്തു. കേസിൽ ഒരാൾ കൂടി പിടിയിലാകാനുണ്ടെന്നും ഉടൻ തന്നെ പിടിയിലാകുമെന്നും പോലീസ് അറിയിച്ചു.

മൊബൈൽ ഫോൺ ഉപയോഗവും ദുരുപയോഗവും; സംവാദവുമായി കുട്ടി പോലീസ്

കൊട്ടിയം : നിത്യസഹായ മാതാ ഗേൾസ് ഹൈസ്കൂളിൽ കുട്ടികളിലെ മൊബൈല്‍ ഫോൺ ഉപയോഗവും ദുരുപയോഗവും എന്ന വിഷയത്തിൽ കൊല്ലം സിറ്റി ഡിഎച്ച് ക്യു സബ് ഇൻസ്പെക്ടർ വൈ.സാബുവിന്‍റെ നേതൃത്വത്തില്‍ സ്റ്റുഡന്‍റ്് പോലീസ് കേഡറ്റുകൾക്കായി സംവാദം സംഘടിപ്പിച്ചു. കേഡറ്റുകൾ മൊബൈലിനെ അനുകൂലിച്ചും പ്രതികൂലിച്ചും സംസാരിച്ചു. പഠനവുമായി ബന്ധപ്പെട്ട് സംശയനിവാരണത്തിന് മൊബൈല്‍ അനിവാര്യമാണ് എന്ന് പറഞ്ഞ സാഹചര്യത്തില്‍ മറുഭാഗം കലാലയങ്ങളില്‍ മൊബൈല്‍ ആവശ്യമില്ലാ എന്നും സംശയനിവാരണത്തിന് അധ്യാപകര്‍ ഉണ്ട് എന്നും വാദിച്ചു. ആശയപരമായ സംവാദത്തിനൊടുവില്‍ മൊബൈലിന്‍റെ അമിത ഉപയോഗം കുറയ്ക്കണമെന്നും അതിന് സമയ ക്രമീകരണം ശീലിക്കണമെന്നും പ്രോഗ്രാം കോർഡിനേറ്റര്‍ നിര്‍ദേശം മുന്നോട്ടു വച്ചു. മൊബൈൽ ഫോൺ സംവാദ ചടങ്ങിന്‍റെ ഉദ്ഘാടനം കൊട്ടിയം ഇൻസ്പെക്ടർ പി. പ്രദീപ് നിർവഹിച്ചു. പ്രഥമ അധ്യാപിക വൈ. ജൂഡിത്ത് ലത, കമ്യുണിറ്റി പോലീസ് ഓഫീസർമാരായ എയ്ഞ്ചൽ മേരി, അനില, ഡി.ഐ. രമ്യ എന്നിവർ പങ്കെടുത്തു.

അതുല്യയുടെ ദുരൂഹ മരണം: അന്വേഷണം ക്രൈംബ്രാഞ്ചിന്

ചവറ: ഷാർജയിൽ ദുരസാഹചര്യത്തിൽ ഫ്ലാറ്റിൽ മരിച്ച അതുല്യയുടെ അന്വേഷണം സംസ്ഥാന ക്രൈം ബ്രാഞ്ചിനു കൈമാറി. അന്വേഷണ സംഘത്തെ ഉടൻ തീരുമാനിക്കും. കരുനാഗപ്പള്ളി എഎസ്പി അഞ്ജലി ഭാവനയുടെ നേതൃത്വത്തിലാണ് നിലവിൽ അന്വേഷണം നടക്കുന്നത്. അതുല്യയുടെ ഭർത്താവ് സതീഷിനെതിരെ ലുക്കൗട്ട് നോട്ടീസ് അടക്കം പുറപ്പെടുവിച്ച് ഇയാളെ നാട്ടിലെത്തിക്കാൻ പോലീസ് ശ്രമിച്ചു വരികയാണ്. ജൂലൈ 19നാണ് കൊല്ലം തേവലക്കര കോയിവിള സൗത്ത് സ്വദേശി അതുല്യയെ ഷാർജയിൽ തൂങ്ങി മരിച്ച നിലയിൽ കണ്ടെത്തിയത്. അതുല്യയുടെ കുടുംബത്തിന്‍റെ പരാതിയുടെ അടിസ്ഥാനത്തിലാണ് ഭർത്താവ് സതീഷിനെതിരെ കേസെടുത്തത് അന്വേഷണം ആരംഭിച്ചത്. വിശദമായ റീ പോസ്റ്റുമോർട്ടം ലഭിക്കേണ്ടതുണ്ട്. ഷാർജയിലെ ഫോറൻസിക് റിപ്പോർട്ടിൽ അതുല്യയുടെ മരണത്തിൽ അസ്വഭാവികത ഇല്ല എന്നായിരുന്നു. ക്രൈം ബ്രാഞ്ച് അന്വേഷണം ഏറ്റെടുക്കുന്നതോടെ നിലവിലുള്ള എഎസ്പി അന്വേഷിച്ച കേസ് ഫയൽ കൈമാറും. രണ്ടു രാജ്യങ്ങൾ തമ്മിലുള്ള കാര്യമായതുകൊണ്ട് ലോക്കൽ പോലീസിന്‍റെ അന്വേഷണത്തിന് ചില പരിമിതികൾ ഉണ്ട്. ഇതുകൊണ്ടാണ് അന്വേഷണം ക്രൈംബ്രാഞ്ചിന് കൈമാറിയത്. നാട്ടിലെത്തിച്ച അതുല്യയുടെ മൃതദേഹത്തിന്‍റെ ഇൻക്വസ്റ്റ് നടത്തിയത് കരുനാഗപ്പള്ളി എഎസ് പി യുടെ നേതൃത്വത്തിലായിരുന്നു . അതുല്യയുടെ മരണത്തിന്‍റെ ഉത്തരവാദി ഭർത്താവ് സതീഷ് ആണെന്നാണ് ഇപ്പോഴും കുടുംബം ആരോപിക്കുന്നത്.

റവ.ജോസ്‌ ജോർജ് ഇന്ന് അഭിഷിക്തനാകും

കൊല്ലം: കൊല്ലം - കൊട്ടാരക്കര മഹായിടവക സിഎസ്‌ഐ നിയുക്ത ബിഷപ്‌ റവ. ജോസ്‌ ജോർജിന്‍റെ സ്ഥാനാരോ ഹണ ശുശ്രൂഷ ഇന്നു രാവിലെ 9.30ന് കൊല്ലം കത്തീഡ്രല്‍ പള്ളിയിൽ നടക്കും. ദക്ഷിണേന്ത്യ സഭ മോഡറേറ്റർ റവ. ഡോ. കെ. രൂബേൻ മാർക്കിന്‍റെ മുഖ്യകാർമികത്വത്തിൽ നടക്കുന്ന വാഴിക്കൽ ശുശ്രൂഷയ്ക്കു മറ്റു സഭകളിലെ ബിഷപുമാരും സഹകാർമികത്വം വഹിക്കും. കൊല്ലം ക്രേവൻ ഹൈസ്കൂൾ നിന്നും ആരംഭിക്കുന്ന വൈദികരുടെയും മോഡറേറ്ററുടെയും നിയുക്തബിഷപിന്‍റെ യും ഗായകസംഘത്തിന്‍റെയും പ്രദക്ഷിണം കത്തീഡ്രൽ പള്ളിയിൽ പ്രവേശിച്ചു ശുശ്രൂഷ ആരംഭിക്കും. സിനഡ്‌ ഭാരവാഹികളായ ജനറൽ സെകട്ടറി അഡ്വ. സി. ഫെർണാണ്ടസ്‌ രത്തിന രാജ, ട്രഷറർ ഡോ. വിമൽ സുകുമാർ, മറ്റു ബിഷപുമാരും ശുശ്രൂഷയ്ക്കു നേതൃത്വം നൽകും. ശുശ്രൂഷ മധ്യേ ഇടയപരിപാലന അധികാരത്തിന്‍റെ അടയാളമായ മുദ്രമോതിരവും അംശവടിയും മോഡറേറ്റർ കൈമാറുകയും അതിനു മുന്നോടിയായി മോഡറേറ്ററും ബിഷപുമാരും കൈവയ്പ്പിലൂടെ ഇടയപരിപാലന ശുശ്രൂഷയിലേക്കു പുതിയ ബിഷപിനെ അഭിഷേകം ചെയ്തു കൈപിടിച്ചുയർത്തും. തുടർന്നു ബിഷപുമാർ പ്രാർഥനയും അനുഗ്രഹ പ്രഭാഷണവും നടത്തും. പുതിയ ബിഷപ്‌ ജനത്തെ അഭിസംബോധന ചെയ്യുകയും നയപ്രഖ്യാപനം നടത്തുകയും ചെയ്യും. ഉച്ചയ്ക്കു ശേഷം കത്തീഡ്രൽ പള്ളിയങ്കണത്തിൽ നടക്കുന്ന പൊതുസമ്മേളനത്തിലും പൗരസ്വീകരണത്തിലും സിഎസ്‌ഐ മോഡറേറ്റർ ഡോ. കെ. രൂബേൻ മാർക്ക്‌ അധ്യക്ഷത വഹിക്കും. കർദിനാൾ മാർ ജോർജ് ആലഞ്ചേരി ഉദ്ഘാടനം നിർവഹിക്കും. മന്ത്രിമാരായ കെ.എൻ. ബാലഗോപാൽ, ജെ. ചിഞ്ചു റാണി, ഡപ്യൂട്ടി സ്പീക്കർ ചിറ്റയം ഗോപകുമാർ, ജോസഫ് മാർ ബർണബാസ് സുഫ്രഗൻ, ജോസഫ് മാർ ദിവന്നാസിയോസ്,ഡോ. സ്റ്റാൻലി റോമൻ, ജോഷ്വാ മാർ ഇഗ്‌നാത്തിയോസ്, മാത്യൂസ് മാർ സിലവാനിയോസ് എപ്പിസ്‌കോപ്പ, റവ. ഡോ. സെൽവദാസ് പ്രമോദ, സ്വാമി ഗുരുരത്‌നം ജ്ഞാനതപസ്വി, ശ്രീമദ് അസംഗാനന്ദ ഗിരി, മൂവാറ്റുപുഴ അഷ്‌റഫ് മൗലവി, കടക്കൽ അബ്ദുൾ അസീസ് മൗലവി, എംഎൽഎമാരായ എം. നൗഷാദ്, പി.എസ്. സുപാൽ, ജി.എസ്. ജയലാൽ, കൊല്ലം മേയർ ഹണി ബഞ്ചമിൻ, ജില്ല പഞ്ചായത്ത് പ്രസിഡന്‍റ് ഡോ. പി.കെ. ഗോപൻ, കെപിസിസി ജനറൽ സെക്രട്ടറി എം. ലിജു, സിപിഎം ജില്ലാ സെക്രട്ടറി എസ്. സുദേവൻ, ഡിസിസി പ്രസിഡന്‍റ് പി. രാജേന്ദ്ര പ്രസാദ്, എഐസിസി അംഗം ബിന്ദു കൃഷ്ണ തുടങ്ങിയവർ പ്രസംഗിക്കും.

കുണ്ടറ താലൂക്ക് ആശുപത്രിയിൽ ഏഴ് ഡയാലിസിസ് യൂണിറ്റുകൾ പ്രവർത്തനം തുടങ്ങി

കുണ്ടറ : താലൂക്ക് ആശുപത്രിയിൽ പുതുതായി സജ്ജീകരിച്ച ഡയാലിസിസ് യൂണിറ്റി െന്‍റ ഉദ്ഘാടനം മന്ത്രി വീണാ ജോർജ് നിർവഹിച്ചു. പി.സി.വിഷ്ണുനാഥ് എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് അംഗം സി.ബാൾഡുവിൻ, ചിറ്റുമല ബ്ലോക്ക് പഞ്ചായത്ത് പ്രസിഡന്‍റ് ജയദേവീമോഹൻ, ബി.ദിനേശ്, ഇജീന്ദ്രലേഖ, മിനി തോമസ്, അനീഷ് പടപ്പക്കര, ഡോ.രാജശേഖരൻ, ആർ.ഓമനക്കുട്ടൻ പിള്ള, ബി.ജയചന്ദ്രൻ, എസ്.ശ്യാം, രാജു ജി.പണിക്കർ, ആന്‍റണി വൈദ്യൻ, ഡോ.ജി.ബാബുലാൽ എന്നിവർ പ്രസംഗിച്ചു. 79 ലക്ഷം രൂപ അനുവദിപ്പിച്ച് ഏഴു ഡയാലിസിസ് യൂണിറ്റുകളാണ് നിലവിൽ ആശുപത്രിയിൽ പ്രവർത്തനം ആരംഭിച്ചത്. എംഎൽഎ ഫണ്ടിൽ നിന്നും അനുവദിച്ച ഏഴു ഡയാലിസിസ് യൂണിറ്റി െന്‍റ കൂടി പ്രവർത്തനം ഉടൻ ആരംഭിക്കുമെന്ന് പി.സി. വിഷ്ണുനാഥ് എംഎൽഎ അറിയിച്ചു. കുണ്ടറ താലൂക്ക് ആശുപത്രിക്ക് മൊത്തം 14 ഡയാലിസിസ് യൂണിറ്റുകൾ ഉണ്ടാകുമെന്നും എംഎൽഎ പറഞ്ഞു.

അധ്യാപകർക്ക് നീതി ലഭ്യമാക്കണമെന്ന്

കൊല്ലം: വർഷങ്ങളായി നിയമന അംഗീകാരം ലഭിക്കാതെ ജോലിയിൽ തുടരുന്ന അധ്യാപകർക്ക് നിയമന അംഗീകാരം നൽകി നീതി ലഭ്യമാക്കണമെന്നു കാത്തലിക് സ്കൂൾ സ്റ്റാഫ് അസോസിയേഷൻ കൊല്ലം രൂപതാ നേതൃയോഗം ആവശ്യപ്പെട്ടു. കൊല്ലം രൂപതയുടെ വിവിധ സ്കൂളുകളിൽ നിയമനാംഗീകാരം ലഭിക്കാത്ത നൂറുകണക്കിന് അധ്യാപകർക്ക് നീതി ലഭ്യമാക്കണമെന്നും യോഗം ആവശ്യപ്പെട്ടു. നിയമനംഗീകാര കാര്യത്തിൽ ഉടൻ തീരുമാനമുണ്ടായില്ലെങ്കിൽ ശക്തമായ സമരവുമായി കൊല്ലം രൂപതയിലെ അധ്യാപക സമൂഹം രംഗത്തിറങ്ങുമെന്നും കാത്തലിക് സ്കൂൾ സ്റ്റാഫ് അസോസിയേഷൻ നേതൃയോഗം അറിയിച്ചു. യോഗം കൊല്ലം രൂപത വിദ്യാഭ്യാസ സെക്രട്ടറി ഫാ.ബി. ബിനു തോമസ് ഉദ്ഘാടനം ചെയ്തു. പ്രസിഡന്‍റ് ആർ.ബർണാഡ് , സെക്രട്ടറി സുമേഷ് ദാസ് എന്നിവർ പ്രസംഗിച്ചു.

അഷ്‌ടമുടി കായല്‍ ശുചീകരണ യജ്ഞം

കുണ്ടറ: കിഴക്കേ കല്ലട പഞ്ചായത്തിലെ അഷ്ടമുടിക്കായല്‍ അതിര്‍ത്തിയായി വരുന്ന ഓണമ്പലം, തെക്കേമുറി, പരിച്ചേരി, ശിങ്കാരപ്പള്ളി വാര്‍ഡുകളിലെ അഷ്ടമുടി കായല്‍തീര ശുചീകരണ യജ്ഞം നടത്തി. ശുചീകരണ പ്രവര്‍ത്തനങ്ങളുടെ ഉദ്ഘാടനം പഞ്ചായത്ത് പ്രസിഡന്‍റ് കെ.ജി. ലാലി നിര്‍വഹിച്ചു. വൈസ് പ്രസിഡന്‍റ് രാജു ലോറന്‍സ് അധ്യക്ഷത വഹിച്ചു. വികസന സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ റാണി സുരേഷ്, മെമ്പര്‍മാരായ മായാദേവി, മല്ലിക, സെക്രട്ടറി ഇന്‍ ചാര്‍ജ് ജി. ശങ്കരന്‍കുട്ടി, വിഇഒ അല്‍സുമ, ഹരിതകര്‍മസേന പ്രസിഡന്‍റ് വത്സല, സെക്രട്ടറി ജയലത, ഹരിത കര്‍മ സേനാഗംങ്ങള്‍ തുടങ്ങിയവര്‍ പങ്കെടുത്തു.

എല്ലാ ആശുപത്രികളിലും ഇ-ഹെല്‍ത്ത് പദ്ധതി: മന്ത്രി വീണാ ജോര്‍ജ്

കൊല്ലം: സംസ്ഥാനത്തെ എല്ലാ ആശുപത്രികളിലും ഇ-ഹെല്‍ത്ത്പദ്ധതി നടപ്പാക്കുമെന്ന് മന്ത്രി വീണാ ജോര്‍ജ്. നെടുമ്പന സാമൂഹികാരോഗ്യകേന്ദ്രത്തെ ബ്ലോക്ക്കുടുംബാരോഗ്യകേന്ദ്രമായി ഉയര്‍ത്തുന്നതി െ ന്‍റയും ബ്ലോക്ക് പൊതുജനാരോഗ്യ യൂണിറ്റി െന്‍റയും മീയണ്ണൂരിലെ ജനകീയാരോഗ്യ കേന്ദ്രത്തിന്‍റെയും ഉദ്ഘാടനം നിര്‍വഹിക്കുകയായിരുന്നു മന്ത്രി. മരുന്നുകുറിക്കല്‍, ലാബ്പരിശോധനാ റിപ്പോര്‍ട്ട് തുടങ്ങിയവ കടലാസ് രഹിതമാക്കി രോഗികളുടെ ചികിത്സാവിവരം ഒറ്റ ക്ലിക്കില്‍ ലഭ്യമാകുന്നതരത്തില്‍ പദ്ധതി വ്യാപിപ്പിക്കും. സര്‍ക്കാര്‍ മേഖലയിലെ ലാബുകളെ ബന്ധിപ്പിച്ച് 'നിര്‍ണയ ലബോറട്ടറി ശൃംഖല' പ്രാബല്യത്തില്‍വരും. രോഗചികിത്സക്കൊപ്പം പ്രതിരോധത്തിന് പ്രധാന്യം നല്‍കിയുള്ള രീതിയാണ് നടപ്പാക്കുക. ബ്ലോക്കി െ ന്‍റ ജനകീയാരോഗ്യകേന്ദ്രം എല്ലാ ചൊവ്വാഴ്ചകളും സ്ത്രീകളുടെ ക്ലിനിക്കായി പ്രവര്‍ത്തിക്കും.രോഗികളുടെ കൂട്ടായ്മയ്ക്ക് 'പേഷ്യന്‍റ് ക്ലബുകള്‍' രൂപീകരിക്കും. പകര്‍ച്ചവ്യാധികളെ പ്രതിരോധിക്കുന്നതിനാണ് പൊതുജനാരോഗ്യ യൂണിറ്റ് ആരംഭിച്ചത്. നെടുമ്പന കുടുംബാരോഗ്യ കേന്ദ്രത്തില്‍ ആരംഭിച്ച ലാബില്‍ 80 ഓളം പരിശോധനകള്‍നടത്താന്‍ സൗകര്യം ഒരുക്കിയിട്ടുണ്ടെന്നും ഒഴിവുള്ള നഴ്‌സിംഗ് അസിസ്റ്റന്‍റ് തസ്തികയിലേക്ക് ജീവനക്കാരെ നിയോഗിക്കാന്‍ നടപടി സ്വീകരിക്കുമെന്നും മന്ത്രി വ്യക്തമാക്കി. 37.5 ലക്ഷം രൂപ ചിലവിലാണ് നെടുമ്പന സാമൂഹികാരോഗ്യകേന്ദ്രത്തെ ബ്ലോക്ക് കുടുംബാരോഗ്യ കേന്ദ്രമായി ഉയര്‍ത്തിയത്. 27.5 ലക്ഷം വിനിയോഗിച്ച് ബ്ലോക്ക് പൊതുജനാരോഗ്യ യൂണിറ്റും, ഏഴ് ലക്ഷം രൂപ ചെലവില്‍ മീയണ്ണൂരിലെ ജനകീയാരോഗ്യ കേന്ദ്രവും ഒരുക്കി.പി സി വിഷ്ണുനാഥ് എംഎല്‍എ അധ്യക്ഷനായി. മുഖത്തല ബ്ലോക്ക് പഞ്ചായത്ത് പ്രസിഡന്‍റ് ബി. യശോദ, നെടുമ്പന പഞ്ചായത്ത് പ്രസിഡന്‍റ് എസ്. ഗിരിജകുമാരി, മുഖത്തല ബ്ലോക്ക് പഞ്ചായത്ത് പ്രസിഡന്‍റ് എച്ച്. ഹുസൈന്‍, സ്ഥിരംസമിതി അധ്യക്ഷരായ ജിഷ അനില്‍, പി. സുശീല, ബ്ലോക്ക്-പഞ്ചയാത്ത് അംഗങ്ങള്‍, ജില്ലാ മെഡിക്കല്‍ ഓഫീസര്‍ ഇന്‍ ചാര്‍ജ് ഡോ. എം. എസ്. അനു, ദേശീയ ആരോഗ്യമിഷന്‍ ജില്ലാ പ്രോഗ്രാം മാനേജര്‍ ഡോ. ദേവ് കിരണ്‍ തുടങ്ങിയവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]