വീടുകയറി ആക്രമിച്ച കേസിൽ പ്രതികൾ അറസ്റ്റിൽ

മുണ്ടക്കയം: കൂട്ടിക്കൽ ഇളംകാട് വല്യേന്ത പനമൂട്ടിൽ ബിജുവിനെ വീടുകയറി ആക്രമിച്ച സംഭവത്തിലെ പ്രതികൾ പോലീസ് പിടിയിൽ. വല്യേന്ത സ്വദേശി മേട്ടുംപുറത്ത് അനു രാഘവൻ (43), വൈറ്റില സ്വദേശി മേട്ടുംപുറത്ത് രതീഷ് ഗോപാലൻ എന്നിവരെയാണ് മുണ്ടക്കയം പോലീസ് അറസ്റ്റ് ചെയ്ത്. അക്രമത്തിന് ശേഷം പ്രതികൾ ഒളിവിലായിരുന്നു

ADVERTISEMENT

സൈബര്‍ പോരിൽ വലഞ്ഞ് സിപിഎം; ആറന്മുള ചെമ്പടയ്‌ക്കെതിരേ കേസ്

പത്തനംതിട്ട: സിപിഎം നേതാക്കളുടെ കൂടി അറിവോടെയുള്ള സൈബര്‍ പോര് പാര്‍ട്ടിക്കു തലവേദനയാകുന്നു. മന്ത്രി വീണാ ജോര്‍ജിനെ അനുകൂലിച്ചു സ്ഥിരമായി പോസ്റ്റുകള്‍ പ്രത്യക്ഷപ്പെടുന്ന ആറന്മുളയുടെ ചെമ്പട എന്ന പേരിലുള്ള ഫേസ്ബുക്ക് പേജിനെതിരേ സിപിഎം ജില്ലാ സെക്രട്ടേറിയറ്റംഗം ആർ. സനല്‍കുമാറിന്‍റെ പരാതിയുടെ അടിസ്ഥാനത്തില്‍ പോലീസ് കേസെടുത്തു. പുളിക്കീഴ് പോലീസില്‍ സനല്‍കുമാര്‍ നല്‍കിയ പരാതിയിലാണ് കേസെടുത്തിരിക്കുന്നത്. വീണാ ജോര്‍ജിനെ അനുകൂലിച്ചും സനല്‍കുമാറിനെതിരേ രൂക്ഷ വിമര്‍ശനം ഉയര്‍ത്തിയും നിരവധി പോസ്റ്റുകളാണ് "ആറന്മുളയുടെ ചെമ്പട'യെന്ന ഫേസ്ബുക്ക് പേജില്‍ കഴിഞ്ഞയിടെ പ്രത്യക്ഷപ്പെട്ടത്. ആറന്മുള സീറ്റ് ലക്ഷ്യമിട്ട് സനല്‍കുമാര്‍ വീണാ ജോര്‍ജിനെതിരേ നീക്കങ്ങള്‍ നടത്തുന്നുവെന്നായിരുന്നു ചെമ്പടയുടെ പ്രധാന ആരോപണം. മുഖ്യമന്ത്രി പിണറായി വിജയൻ, പാര്‍ട്ടി സെക്രട്ടറി എം.വി. ഗോവിന്ദൻ, മന്ത്രിമാരായ സജി ചെറിയാൻ, വി.ശിവന്‍കുട്ടി, മുഖ്യമന്ത്രിയുടെ ഓഫീസ് എന്നിവരെ ടാഗ് ചെയ്താണ് സനല്‍കുമാറിനെതിരായ വിമര്‍ശനങ്ങള്‍ വന്നിരുന്നത്. ഇതിനു പിന്നാലെ സനല്‍കുമാര്‍ തിരുവല്ല ഡിവൈഎസ്പിക്കു പരാതി നല്‍കുകയായിരുന്നു. കപ്പല്‍ മുങ്ങിയാലും കപ്പിത്താന്‍ ചത്താല്‍ മതി എന്ന തലക്കെട്ടോടെ പ്രചാരണം നടത്തി, സനല്‍കുമാര്‍ ആരോഗ്യമന്ത്രിക്കെതിരാണെന്നു ചിത്രീകരിച്ചു എന്നീ കുറ്റങ്ങളാണ് എഫ്‌ഐആറില്‍ പറയുന്നത്. അമർഷം അടങ്ങാതെ മന്ത്രി വീണാ ജോര്‍ജിനെതിരേ ഫേസ്ബുക്ക് പോസ്റ്റ് വന്നതിനു പിന്നാലെ രണ്ടു പേര്‍ക്കെതിരേ സമീപകാലത്തു സിപിഎം നടപടി സ്വീകരിച്ചിരുന്നു. കോട്ടയം മെഡിക്കല്‍ കോളജിലെ കെട്ടിടം തകര്‍ന്നു വീണ വിഷയത്തിലാണ് ഇവര്‍ മന്ത്രിക്കെതിരേ പോസ്റ്റിട്ടത്. ഇരവിപേരൂര്‍ ഏരിയാ കമ്മിറ്റിയംഗവും സിഡബ്ല്യുസി മുന്‍ ചെയര്‍മാനുമായ എൻ. രാജീവിനെ ബ്രാഞ്ച് ഘടകത്തിലേക്കു തരംതാഴ്ത്തുകയും ഇലന്തൂര്‍ ലോക്കല്‍ കമ്മിറ്റിയംഗം പി.ജെ. ജോണ്‍സണെ സസ്‌പെന്‍ഡ് ചെയ്തുകൊണ്ടുമായിരുന്നു തീരുമാനം. സസ്‌പെന്‍ഷന്‍ വന്ന ശേഷവും ജോണ്‍സണ്‍ രൂക്ഷമായ ഭാഷയില്‍ വിമര്‍ശനം നടത്തി. എൻ. രാജീവിനെതിരേയുള്ള നടപടിയില്‍ പാര്‍ട്ടിക്കുള്ളില്‍ത്തന്നെ അഭിപ്രായവ്യത്യാസമുണ്ടായിരുന്നു. ചേരിതിരിഞ്ഞുള്ള സൈബര്‍ പോര് രൂക്ഷമായതോടെയാണ് നേതൃത്വം ഇടപ്പെട്ടു തുടങ്ങിയത്. പഞ്ചായത്ത്, നിയമസഭ തെരഞ്ഞെടുപ്പ് ആസന്നമായിരിക്കേ ഇത്തരം പോര് പാര്‍ട്ടിക്കു ഗുണകരമാകില്ലെന്ന വിലയിരുത്തലിലാണ് നേതൃത്വം.

നവദമ്പതികളെ കാര്‍ തടഞ്ഞ് ആക്രമിച്ചു; നാലുപേര്‍ അറസ്റ്റില്‍

മല്ലപ്പള്ളി: വിവാഹദിനത്തില്‍ ഫോട്ടോഷൂട്ടിനായി കാറില്‍ സഞ്ചരിച്ച നവദമ്പതികളെ ബൈക്കിനു സൈഡ് കൊടുത്തില്ലെന്ന് ആരോപിച്ച് തടഞ്ഞ് ആക്രമിച്ച സഹോദങ്ങളായ മൂന്ന് പേരുള്‍പ്പെടെ നാലുപേരെ കീഴ്‌വായ്പൂര് പോലീസ് അറസ്റ്റ് ചെയ്തു. കല്ലുപ്പാറ നെടുമ്പാറ മണ്ണഞ്ചേരി മലയില്‍ വീട്ടില്‍ അഭിജിത്ത് അജി (27), സഹോദരന്മാരായ അഖില്‍ജിത്ത് അജി (25), അമല്‍ ജിത്ത് അജി (22), പുറമറ്റം വലിയപറമ്പില്‍ വീട്ടില്‍ മയൂഖ്‌നാഥ് (20) എന്നിവരാണ് പിടിയിലായത്. കോട്ടയം കുറിച്ചി സ്വദേശിനി 29 കാരിയും നവവരന്‍ മുകേഷ് മോഹന്‍ (31) എന്നിവര്‍ക്കു നേരേയാണ് കഴിഞ്ഞ 17നു വൈകുന്നേരം ആക്രമണമുണ്ടായത്. വിവാഹശേഷം നവവരന്‍റെ വീട്ടില്‍ വന്ന വാഹനങ്ങൾ, പിന്നില്‍ സഞ്ചരിച്ച അഭിജിത്തിന്‍റെ ബൈക്കിനു വശം കൊടുത്തില്ലെന്ന് ആരോപിച്ചായിരുന്നു ആക്രമണം. കല്ലൂപ്പാറ നെടുമ്പാറയിലാണ് സംഭവം. വധൂവരന്മാര്‍ യാത്രചെയ്ത കാറില്‍ ഫോട്ടോഗ്രാഫര്‍മാരും ഉണ്ടായിരുന്നു. കാറിന്‍റെ മുന്നില്‍ കയറി തടഞ്ഞുനിര്‍ത്തിയ ശേഷം, അഭിജിത്ത് ഇടതുവശത്ത് എത്തി, അസഭ്യംപറഞ്ഞശേഷം ഗ്ലാസ് താഴ്ത്തിച്ചശേഷം മുകേഷിനെ ആക്രമിച്ചെന്നാണ് പരാതി. ഭര്‍ത്താവിനെ അക്രമികളില്‍ നിന്നു രക്ഷിക്കാന്‍ ശ്രമിച്ചപ്പോള്‍ ഇയാള്‍ യുവതിയുടെ ഇടതു കൈ പിടിച്ച് തിരിച്ചു. അഭിജിത്ത് വിളിച്ചുവരുത്തിയ മറ്റുള്ളവര്‍ കാറിന്‍റെ പിന്നിലെ ഗ്ലാസ് അടിച്ചു പൊട്ടിക്കുകയും,ഡോറുകള്‍ ഇടിച്ചു കേടുപാട് ഉണ്ടാക്കുകയും ചെയ്തു. പൊട്ടിയ ഗ്ലാസിന്‍റെ ചില്ലുകള്‍ തെറിച്ചും യുവതിക്കു പരിക്കേറ്റു. ഇവരുടെ മൊഴിയുടെ അടിസ്ഥാനത്തില്‍ എസ് ഐ കെ. രാജേഷ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിരുന്നു. മുന്‍ വിരോധം കൂടി ആക്രമണത്തിനു പിന്നിലുണ്ടെന്ന് പോലീസ് പറഞ്ഞു. പോലീസ് ഇന്‍സ്പെക്ടര്‍ വിപിന്‍ ഗോപിനാഥന്റെ നേതൃത്വത്തിലുള്ള സംഘമാണ് അന്വേഷണം നടത്തുന്നത്.

മണ്ഡലകാലത്തിനു മുന്പ് മെഡി.കോളജ് സജ്ജമാകും

പത്തനംതിട്ട: ശബരിമല മണ്ഡല, മകരവിളക്കു കാലത്ത് ബേസ് ആശുപത്രിയെന്ന നിലയില്‍ കോന്നി സര്‍ക്കാര്‍ മെഡിക്കല്‍ കോളജിനെ പൂര്‍ണസജ്ജമാക്കും. ഇതിനു മുന്നോടിയായി മെഡിക്കല്‍ കോളജിലെ എല്ലാ ഡിപ്പാര്‍ട്ട്‌മെന്‍റുകളും സജ്ജമാക്കാനും 300 കിടക്കകളും ഉപയോഗപ്പെടുത്താനും നിര്‍ദേശം. പത്തനംതിട്ട ജനറല്‍ ആശുപത്രിയിലെ ശസ്ത്രക്രിയ വിഭാഗങ്ങള്‍ നിലവില്‍ കോന്നി മെഡിക്കല്‍ കോളജിലേക്കു മാറ്റിയിട്ടുണ്ട്. ശസ്ത്രക്രിയ വാര്‍ഡുകള്‍ സജ്ജമാകുന്നതോടെ ഐപി വിഭാഗത്തില്‍ രോഗികളുടെ എണ്ണം കൂടും. ശബരിമല തീര്‍ഥാടനകാലത്തു പ്രത്യേക വാര്‍ഡ് ഒരുക്കി തീര്‍ഥാടകര്‍ക്കു മെച്ചപ്പെട്ട സൗകര്യങ്ങള്‍ ക്രമീകരിക്കാനാണ് നിര്‍ദേശം. ഡോക്ടർമാരെ നിയോഗിക്കും മണ്ഡലകാലം തുടങ്ങുന്നതിനു മുമ്പ് മതിയായ ചികിത്സാ സംവിധാനങ്ങള്‍ ഒരുക്കാനും ജീവനക്കാരെ നിയോഗിക്കാനും മന്ത്രി വീണാ ജോര്‍ജിന്‍റെ അധ്യക്ഷതയില്‍ ചേര്‍ന്ന ഉന്നതതല യോഗത്തില്‍ നിര്‍ദേശം നല്‍കി. വിവിധ സ്പെഷാലിറ്റികളിലെ ഡോക്ടര്‍മാരെ ആരോഗ്യ വകുപ്പില്‍നിന്നും മെഡിക്കല്‍ വിദ്യാഭ്യാസ വകുപ്പില്‍നിന്നും നിയോഗിക്കും. മെഡിക്കല്‍ കോളജുകളില്‍നിന്നു വിദഗ്ധ കാര്‍ഡിയോളജി ഡോക്ടര്‍മാരെയും ഫിസിഷ്യന്‍മാരെയും നിയോഗിക്കും. ശബരിമല തീര്‍ഥാടനകാലത്തു പത്തനംതിട്ട ജനറല്‍ ആശുപത്രിയില്‍ അടിയന്തര കാര്‍ഡിയോളജി ചികിത്സാ സൗകര്യം ഉറപ്പാക്കും. കാത്ത് ലാബ് പ്രവര്‍ത്തനം ജനറല്‍ ആശുപത്രിയിലാകും. ശബരിമലയുമായി ബന്ധപ്പെട്ട എല്ലാ ആശുപത്രികളിലും ഡിഫിബ്രിലേറ്റർ, വെന്‍റിലേറ്റര്‍, കാര്‍ഡിയാക് മോണിറ്റര്‍ എന്നിവയുണ്ടാകും. നിലയ്ക്കലും പമ്പയിലും പൂര്‍ണ സജ്ജമായ ലാബ് സൗകര്യമുണ്ടാകും. പമ്പയിലും സന്നിധാനത്തും ഓപ്പറേഷന്‍ തിയേറ്ററുകള്‍ പ്രവര്‍ത്തിക്കും. പന്തളം വലിയ കോയിക്കല്‍ ക്ഷേത്രത്തില്‍ താത്കാലിക ഡിസ്‌പെന്‍സറിയുമുണ്ടാകും. മതിയായ ആംബുലന്‍സ് സൗകര്യങ്ങളും ക്രമീകരിക്കും. പുതിയ നിലയ്ക്കല്‍ ആശുപത്രി മണ്ഡലകാലത്തിന് മുമ്പ് നിര്‍മാണം തുടങ്ങാന്‍ നിര്‍ദേശിച്ചിട്ടുണ്ട്. എല്ലാ ആശുപത്രികളും സജ്ജമാക്കും കോട്ടയം മെഡിക്കല്‍ കോളേജില്‍ തീര്‍ഥാടകര്‍ക്കായി മികച്ച സൗകര്യമൊരുക്കാനും മന്ത്രി നിര്‍ദേശിച്ചു. അടൂര്‍ ജനറല്‍ ആശുപത്രി, റാന്നി താലൂക്ക് ആശുപത്രി, തിരുവല്ല ജില്ലാ ആശുപത്രി, കോഴഞ്ചേരി ജില്ലാ ആശുപത്രി, റാന്നി പെരിനാട് സാമൂഹികാരോഗ്യ കേന്ദ്രം, എരുമേലി, കോഴഞ്ചേരി, മുണ്ടക്കയം, വണ്ടിപ്പെരിയാർ, കുമളി, ചെങ്ങന്നൂര്‍ തുടങ്ങി 15 പതിനഞ്ചോളം ആശുപത്രികളില്‍ പ്രത്യേക ചികിത്സാ സൗകര്യങ്ങളും ഒരുക്കും. ആയുഷ് മേഖലയുടെ സേവനവും ഉറപ്പാക്കും. പകര്‍ച്ചവ്യാധി പ്രതിരോധ പ്രവര്‍ത്തനങ്ങള്‍ക്കു ജില്ലാ വെക്ടര്‍ കണ്‍ട്രോള്‍ ടീമിനെ ചുമതലപ്പെടുത്തി. ആന്‍റി സ്നേക്ക് വെനം എല്ലാ ആശുപത്രികളിലും ഉറപ്പ് വരുത്തണം. ജീവനക്കാരുടെ നിയമനങ്ങള്‍ എത്രയും വേഗം നടത്തണം. പത്തനംതിട്ട, ആലപ്പുഴ, കോട്ടയം, ഇടുക്കി ജില്ലകളിലെ ആശുപത്രികളില്‍ അധിക കിടക്കകള്‍ സജ്ജമാക്കും. അടൂർ, വടശേരിക്കര, പത്തനംതിട്ട എന്നിവിടങ്ങളില്‍ ഒരു മെഡിക്കല്‍ സ്റ്റോറെങ്കിലും 24 മണിക്കൂറും പ്രവര്‍ത്തിക്കാനുള്ള നടപടി സ്വീകരിക്കാന്‍ ഡ്രഗ്സ് കണ്‍ട്രോളറോടു നിര്‍ദേശിച്ചു. ആക്‌ഷന്‍ പ്ലാന്‍ തയാറാക്കും ശബരിമല തീര്‍ഥാടനകാലത്തേക്ക് ആരോഗ്യവകുപ്പുമായി ബന്ധപ്പെട്ട പ്രവര്‍ത്തനങ്ങള്‍ക്ക് ആക്‌ഷന്‍ പ്ലാന്‍ തയാറാക്കാന്‍ മന്ത്രി വീണാ ജോര്‍ജ് നിര്‍ദേശിച്ചു. നിലയ്ക്കലിലെ പുതിയ ആശുപത്രിയുടെ നിര്‍മാണവും മണ്ഡലകാലത്തിനു മുമ്പു തുടങ്ങും. ആക്‌ഷന്‍ പ്ലാനനുസരിച്ച് ബന്ധപ്പെട്ട എല്ലാ ആശുപത്രികളിലെയും മെയിന്‍റനന്‍സ് ജോലികള്‍ എത്രയും വേഗം പൂര്‍ത്തിയാക്കണം. ദേവസ്വം ബോര്‍ഡിന്‍റെ സഹകരണത്തോടെ എമർജന്‍സി മെഡിക്കല്‍ സെന്‍ററുകള്‍ നേരത്തെ സജ്ജമാക്കും. ഈ കേന്ദ്രങ്ങളിലെല്ലാം മരുന്നുകളുടെ ലഭ്യത മണ്ഡലകാലം തുടങ്ങുന്നതിനു മുമ്പ് ഉറപ്പാക്കണം. ഭക്ഷ്യസുരക്ഷാ വകുപ്പ് പ്രത്യേക സ്‌ക്വാഡുകള്‍ രൂപീകരിച്ചു പരിശോധന നടത്തണമെന്ന നിര്‍ദേശവും നല്‍കിയിട്ടുണ്ട്. ഭക്ഷ്യസ്ഥാപനങ്ങളിലെ ജീവനക്കാര്‍ക്കു ഹെല്‍ത്ത് കാര്‍ഡ് നിര്‍ബന്ധമാക്കി. ഹൃദയസംബന്ധമായ പ്രശ്നങ്ങള്‍ക്ക് ഉടനടി ചികിത്സ ലഭ്യമാക്കുന്ന സംവിധാനമുള്‍പ്പെടെയുള്ള കനിവ് 108 ആംബുലന്‍സ് സേവനം ലഭ്യമാക്കണം. സന്നിധാനത്തുനിന്നു പമ്പയിലേക്കു പ്രത്യേക ആംബുലന്‍സ് സേവനം ലഭ്യമാക്കും.

സുബല പാര്‍ക്ക്: ടെന്‍ഡര്‍ നടപടി പൂര്‍ത്തിയായി; 75 ലക്ഷം രൂപയുടെ നിര്‍മാണ പദ്ധതി

പത്തനംതിട്ട: നഗരത്തിലെ സുബല പാര്‍ക്കില്‍ നഗരസഭയുടെ നേതൃത്വത്തില്‍ ആരംഭിക്കുന്ന പ്രവൃത്തികളുടെ ടെന്‍ഡര്‍ നടപടികള്‍ പൂര്‍ത്തിയായി. നിര്‍മാണ പ്രവര്‍ത്തനങ്ങള്‍ ഉടന്‍ ആരംഭിക്കും. അമൃത് 2.ഒ പദ്ധതിയില്‍ ഉള്‍പ്പെടുത്തി 75 ലക്ഷം രൂപയുടെ പുനരുദ്ധാരണ പദ്ധതിക്കാണ് തുടക്കമാക്കുന്നത്. ജില്ലാ പട്ടികജാതി വകുപ്പിന്‍റെ ഉടമസ്ഥതയിലുള്ള സുബല പാര്‍ക്കിലെ തടാകത്തിന് സംരക്ഷണഭിത്തി കെട്ടി ചുറ്റും ടൈല്‍ പാകി നടപ്പാത ഒരുക്കുന്ന പദ്ധതിക്കാണ് പ്രതിബന്ധങ്ങള്‍ നീക്കി തുടക്കം കുറിക്കുന്നത്. പാര്‍ക്കിന്‍റെ വികസന പ്രവര്‍ത്തനങ്ങള്‍ക്കായി നഗരസഭ അമൃത് പദ്ധതിയില്‍ നിര്‍ദേശങ്ങള്‍ സമര്‍പ്പിച്ച് അനുമതി നേടിയെങ്കിലും നിര്‍വഹണം നഗരസഭയെ ഏല്പിക്കുന്നതിന് സാങ്കേതിക തടസങ്ങള്‍ ഉണ്ടായി. പദ്ധതിയില്‍ പങ്കാളിത്തമോ നടത്തിപ്പ് ചുമതലയോ നഗരസഭ ചോദിച്ചിട്ടില്ലെന്നും ജില്ലാ ആസ്ഥാനത്തെ പ്രധാനപ്പെട്ട വിനോദ വിശ്രമകേന്ദ്രമാക്കി പദ്ധതിയെ മാറ്റാന്‍ നഗരസഭ സഹായം ചെയ്യുക മാത്രമാണെന്നും കാണിച്ച് നഗരസഭ ചെയര്‍മാന്‍ പട്ടികജാതി വികസന വകുപ്പ് മന്ത്രിക്ക് 2023ല്‍ കത്ത് നല്‍കി. തുടര്‍ന്ന് നഗരസഭയുടെ മേല്‍നോട്ടത്തില്‍ നിലവിലെ നിര്‍വഹണ ഏജന്‍സിയായ ജില്ലാ നിര്‍മിതി കേന്ദ്രത്തെ വകുപ്പ് ചുമതലപ്പെടുത്തി. എന്നാല്‍ തങ്ങള്‍ക്ക് ഏറ്റെടുക്കാന്‍ കഴിയുന്ന പ്രവൃത്തികളുടെ തുക അധികരിച്ചതിനാല്‍ പദ്ധതി ഏറ്റെടുക്കാനാകില്ലെന്ന് നിര്‍മിതി കേന്ദ്രം അറിയിച്ചു. ഇതോടെ ലഭിച്ച തുക നഷ്ടപ്പെടാതിരിക്കുന്നതിനു വേണ്ടി നിര്‍വഹണം ഏറ്റെടുക്കാന്‍ നഗരസഭ തയാറാണെന്നു പട്ടികജാതി വികസന വകുപ്പിനെ അറിയിക്കുകയായിരുന്നു. 2024 ജൂലൈ 22 ന് നഗരസഭയ്ക്ക് വകുപ്പിന്‍റെ നിര്‍വഹണ അനുമതി ലഭിച്ചു. 1995 -96ല്‍ പട്ടികജാതി വികസന വകുപ്പിനു കീഴില്‍ തയാറാക്കിയതാണ് സുബല പാര്‍ക്ക് പദ്ധതി. പ്രാഥമിക നടപടികള്‍ അന്ന് പൂര്‍ത്തീകരിച്ചെങ്കിലും പിന്നീടുള്ള പ്രവര്‍ത്തനങ്ങള്‍ തടസപ്പെട്ടു. തടാകത്തില്‍ ജലനിരപ്പ് ഉയര്‍ന്നു നില്‍ക്കുന്നതുമൂലമുള്ള കാലതാമസം ഒഴിവാക്കാന്‍ ടെന്‍ഡര്‍ നടപടികള്‍ കൂടി പൂര്‍ത്തീകരിച്ച് കരാര്‍ പ്രവര്‍ത്തനങ്ങള്‍ ആരംഭിച്ചിരിക്കുകയാണ് നഗരസഭ. പുതുതായി നിര്‍മിക്കുന്ന നടപ്പാത പ്രഭാത സായാഹ്ന നടത്തത്തിന് നഗരത്തെ ആശ്രയിക്കുന്ന ജനങ്ങള്‍ക്കും പ്രയോജനപ്രദമാകും. ഈ മാസംതന്നെ നിര്‍മാണ പ്രവർത്തനങ്ങള്‍ ആരംഭിക്കുമെന്ന് നഗരസഭാ ചെയര്‍പേഴ്‌സണ്‍ ടി. സക്കീര്‍ ഹുസൈന്‍ പറഞ്ഞു.

കൊറ്റംകുടി പാലത്തിന്‍റെ സംരക്ഷണഭിത്തി തകര്‍ന്നു; നിര്‍മിച്ചിട്ട് ഒന്നരമാസം

മല്ലപ്പള്ളി: മല്ലപ്പള്ളി - ചെറുകോല്‍പ്പുഴ റോഡിലെ കൊറ്റംകുടി പാലത്തിന്‍റെയും അപ്രോച്ച് റോഡിന്‍റെയും സംരക്ഷണ ഭിത്തി ആഴ്ചകള്‍ക്കുള്ളില്‍ തകര്‍ന്നു. നിര്‍മാണം പൂര്‍ത്തീകരിച്ച് പാലം തുറന്നുകൊടുത്തിട്ട് ഒന്നര മാസമേ ആയിട്ടുള്ളൂ. കൊറ്റംകുടിയിലെ പഴയ പാലം ശോച്യാവസ്ഥയിലായതോടെയാണ് പുതിയ പാലത്തിന് അനുമതി ലഭിച്ചത്. ബിഎം ബിസി നിലവാരത്തില്‍ റോഡ് പൂര്‍ത്തീകരിച്ചതിനു പിന്നാലെ പഴയ പാലങ്ങളും കലുങ്കുകളും പുതുക്കി നിര്‍മിക്കാന്‍ എസ്റ്റിമേറ്റെടുത്തിരുന്നു. ഭാരവാഹനങ്ങളും യാത്രാബസുകളും കടന്നുപോകുന്ന പാതയിലെ കലുങ്കുകളും പാലങ്ങളും ബലക്ഷയം നേരിടുന്നതായും റിപ്പോര്‍ട്ടുകളുണ്ടായി. കൊറ്റംകുടിയില്‍ പാലം നിര്‍മാണം നടക്കുമ്പോള്‍ തന്നെ നാട്ടുകാര്‍ പരാതി ഉന്നയിച്ചിരുന്നതായി പറയുന്നു. കൊറ്റംകുടിയില്‍ ജനകീയ പ്രതിഷേധ സദസ് കൊറ്റംകുടി പാലത്തിന്‍റെ അപ്രോച്ച് റോഡിന്‍റെ സംരക്ഷണഭിത്തിക്കുണ്ടായ തകര്‍ച്ചയെ സംബന്ധിച്ച് അന്വേഷണം വേണമെന്ന് കേരള കോണ്‍ഗ്രസ് മണ്ഡലം യോഗം ആവശ്യപ്പെട്ടു. കൊറ്റംകുടിയില്‍ ഇന്നലെ ജനകീയ പ്രതിഷേധ സദസും നടന്നു. കേരള കോണ്‍ഗ്രസ് സീനിയര്‍ ജനറല്‍ സെക്രട്ടറി കുഞ്ഞുകോശി പോള്‍ ഉദ്ഘാടനം ചെയ്തു. ടി.എസ്. ചന്ദ്രശേഖരന്‍ നായരുടെ അധ്യക്ഷതയില്‍ ഉന്നതാധികാര സമിതി അംഗം ജോണ്‍സണ്‍ കുര്യൻ, ഗ്രാമപഞ്ചായത്ത് പ്രസിഡന്‍റ് എസ്. വിദ്യാമോള്‍, ലൈല അലക്‌സാണ്ടർ, സജി ഡേവിഡ്, അനില്‍ കയ്യാലാത്ത്, സാബു കളര്‍ മണ്ണിൽ, രാജന്‍ എണാട്ട്, ജോണ്‍സണ്‍ ജേക്കബ്, സി. വിജയൻ, കുര്യന്‍ കോരുത്, ജോസ് തോമസ്, എം.കെ. ചെറിയാൻ, സജി വേങ്ങഴ , അനീഷ്.ടി. ജേക്കബ് എന്നിവര്‍ പ്രസംഗിച്ചു.

കോഴഞ്ചേരി കേന്ദ്രമാക്കി താലൂക്ക് രൂപീകരിക്കണം: വികസന സെമിനാർ

കോഴഞ്ചേരി: കോഴഞ്ചേരി കേന്ദ്രീകരിച്ച് ഒരു പുതിയ താലൂക്കും ടൗണിലെ ഗതാഗതക്കുരുക്ക് പരിഹരിക്കുന്നതിനായി റിംഗ് റോഡും അടിയന്തരമായി ഉണ്ടാകണമെന്ന് മല്ലപ്പുഴശേരി ഗ്രാമവികസന സമിതി വിവിധ രാഷ്‌ട്രീയ പാർട്ടികളുടെ സഹകരണത്തോടെ സംഘടിപ്പിച്ച വികസന സെമിനാർ ആവശ്യപ്പെട്ടു. കോഴഞ്ചേരിക്ക് ചുറ്റുമുള്ള പഞ്ചായത്തുകൾ ചേർത്ത് പുതിയ താലൂക്ക് രൂപീകരിക്കണമെന്നാണ് സെമിനാറിലെ പ്രധാന ആവശ്യം. കേന്ദ്ര, സംസ്ഥാന ബന്ധങ്ങൾ കൂടുതൽ സജീവമാക്കുക, കോഴഞ്ചേരി താലൂക്കിലെ ടൂറിസം പദ്ധതികൾ വികസിപ്പിക്കുക, മാലിന്യ സംസ്കരണ സംവിധാനം കുറ്റമറ്റതാക്കുക എന്നിവ കോഴഞ്ചേരിയുടെയും സമീപപ്രദേശങ്ങളുടെയും വികസനത്തിന് അനിവാര്യമാണെന്ന് സിപിഎം ജില്ലാ സെക്രട്ടേറിയറ്റ് അംഗം ഓമല്ലൂർ ശങ്കരൻ അഭിപ്രായപ്പെട്ടു. കോഴഞ്ചേരിക്ക് ചുറ്റുമുള്ള പഞ്ചായത്തുകളെ ഏകോപിപ്പിച്ച് ഒരു താലൂക്ക് രൂപീകരിക്കുന്നതിലൂടെ മാത്രമേ സമഗ്രമായ വികസനം സാധ്യമാകൂവെന്ന് കെപിസിസി സെക്രട്ടറി അനിഷ് വരിക്കണ്ണാമല ചൂണ്ടിക്കാട്ടി. മല്ലപ്പുഴശേരി ഗ്രാമവികസന മിതി പ്രസിഡന്‍റ് ഡോ. മാത്യു കോശി പുന്നയ്ക്കാട് വികസന സെമിനാർ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് മിനി ജിജു ജോസഫ് വികസന പദ്ധതികൾ വിശദീകരിച്ചു. അശോകൻ കുളനട, മാത്യൂസ് ജോർജ്, ശശികുമാർ തുരുത്തിയിൽ, വർഗീസ് കോശി മേലേക്കൂറ്റ്, വിൽസൺ പാറടിയിൽ, മോൻസി കുഴിക്കാല, വർഗീസ് ജോർജ്, ഡോ. ഡാർലി മാത്യു, ജേക്കബ് ശമുവേൽ, ഏലിയാമ്മ കുരുവിള എന്നിവർ പ്രസംഗിച്ചു.

ക്ഷീരവികസനവകുപ്പ് പറഞ്ഞുപറ്റിച്ചു; യുവക്ഷീരകര്‍ഷക കടക്കെണിയില്‍

അടൂർ: ക്ഷീരവികസന വകുപ്പിന്‍റെ സബ്‌സിഡി വിശ്വസിച്ച് ലക്ഷങ്ങള്‍ വായ്പയെടുത്ത് പശുഫാം തുടങ്ങിയ യുവതിയുടെ ജീവിതം കടക്കെണിയില്‍. കടമ്പനാട് നെല്ലിമുകള്‍ അരുണ്‍ നിവാസില്‍ എൽ.ജി. അശ്വതി എന്ന ക്ഷീരകര്‍ഷകയാണ് ലക്ഷങ്ങളുടെ ബാധ്യത തിരിച്ചടയ്ക്കാന്‍ കഴിയാതെ ബുദ്ധിമുട്ടുന്നത്. ക്ഷീരവികസന വകുപ്പിന്‍റെ 2024-25 ലെ മില്‍ക്ക് ഷെഡ് ഡെവലപ്മെന്‍റ് പദ്ധതി (എംഎസ്ഡിപി) പദ്ധതി പ്രകാരം സ്മാര്‍ട്ട് ഡയറി യൂണിറ്റ് തുടങ്ങുന്നതിന് അപേക്ഷ ക്ഷണിച്ചിരുന്നു. 10 പശുക്കള്‍ അടങ്ങുന്ന ഒരു യൂണിറ്റും അനുബന്ധ സാമഗ്രികളുമാണ് പദ്ധതി പ്രകാരം സ്ഥാപിക്കേണ്ടത്. ഇതിനായി അശ്വതി ക്ഷീരശ്രീ പോര്‍ട്ടലില്‍ രജിസ്റ്റര്‍ ചെയ്തു. 11.60 ലക്ഷം രൂപ ചെലവു വരുന്ന പദ്ധതിക്ക് 4.60 ലക്ഷം രൂപ സബ്സിഡിയായി നല്‍കുമെന്നും അറിയിച്ചിരുന്നു. വായ്പ നല്‍കുന്ന ബാങ്കിനാകും സബ്സിഡി തുക ക്ഷീരവികസന വകുപ്പ് കൈമാറുക. ജില്ലാ ക്ഷീരവികസന ഓഫീസറും പറക്കോട് ബ്ലോക്ക് ഓഫീസറും വീട്ടിലെത്തി പ്രോജക്ട് അനുവദിച്ചതായി അറിയിച്ചു. അവരുടെ നിര്‍ദേശപ്രകാരം പദ്ധതിക്ക് ആവശ്യമായ 10 പശുക്കൾ, പുല്ല്കട്ടര്‍, കറവയന്ത്രം, റബര്‍ മാറ്റ് എന്നിവ വാങ്ങുകയും ബയോഗ്യാസ് പ്ലാന്‍റ് സ്ഥാപിക്കുകയും ചെയ്തു. രണ്ടു മാസത്തിനുള്ളില്‍ സബ്സിഡി തുക ലഭിക്കുമെന്ന ഉറപ്പും നല്‍കി. ബാങ്ക് വായ്പയ്ക്ക് അപേക്ഷിച്ചിരുന്നുവെങ്കിലും അത് ലഭിക്കുന്നതിന് മുമ്പ് പലരില്‍ നിന്ന് കടം വാങ്ങിയും മറ്റും പദ്ധതി പൂര്‍ത്തീകരിച്ചു. അപ്പോഴേക്കും ബാങ്ക് വായ്പയും ലഭ്യമായി. അശ്വതിക്ക് വായ്പ നല്‍കണമെന്നാവശ്യപ്പെട്ട് ക്ഷീരവികസന വകുപ്പ് ബാങ്കിന് കത്തും നല്‍കിയിരുന്നു. പദ്ധതിയില്‍ പറഞ്ഞിരുന്ന കാര്യങ്ങള്‍ മുഴുവന്‍ പൂര്‍ത്തിയാക്കി ബാങ്ക് വായ്പ നല്‍കിയതിന്‍റെ കത്ത് ഡെപ്യൂട്ടി ഡയറക്ടര്‍ക്ക് നല്‍കിയതിനു പിന്നാലെ ക്ഷീരവികസന ഡയറക്ടററ്റേില്‍ നിന്നും പദ്ധതി മാറ്റിവച്ചതായി അറിയിപ്പു ലഭിച്ചു. രണ്ടാമത് അപേക്ഷിക്കാന്‍ യോഗ്യതയില്ലെന്ന് 2025-26 സാമ്പത്തിക വര്‍ഷം പദ്ധതിയുടെ ആനുകൂല്യം അശ്വതിക്കു തന്നെ ലഭിക്കുമെന്ന് ഉറപ്പും കൊടുത്തു. അശ്വതി ഈ വര്‍ഷവും ഇതേ സ്‌കീമിന് അപേക്ഷിച്ചു. എന്നാൽ, കഴിഞ്ഞ തവണ അപേക്ഷിച്ചതു കാരണം നിങ്ങള്‍ ഇക്കൊല്ലം അപേക്ഷിക്കാന്‍ യോഗ്യയല്ല എന്ന മറുപടിയാണ് ലഭിച്ചത്. സ്മാര്‍ട്ട് ഡയറി യൂണിറ്റ് തുടങ്ങുന്നതിന് സംസ്ഥാനത്താകെ യുവകര്‍ഷകരെയാണ് തെരഞ്ഞെടുത്തിരുന്നത്. ഇവരില്‍ ചിലര്‍ക്ക് പദ്ധതിയുടെ പ്രയോജനം ലഭിച്ചിട്ടുമുണ്ട്. സര്‍ക്കാര്‍ പദ്ധതി വിഹിതംവെട്ടിക്കുറച്ചത് കാരണമാണ് ഈ പദ്ധതിക്ക് സബ്സിഡി നല്‍കാന്‍ കഴിയാതെ പോയതെന്നാണ് ക്ഷീരവികസന വകുപ്പ് ഡെപ്യൂട്ടി ഡയറക്ടര്‍ ശാലിനി പറയുന്നത്. എന്തായാലും വായ്പയും പലിശയും ചേര്‍ത്ത് പ്രതിമാസം 25,000 രൂപയോളം തിരിച്ചടയ്ക്കേണ്ട ഗതികേടിലാണ് അശ്വതി ഇപ്പോൾ. മുഴുവന്‍ തുകയും പലിശയും ചേര്‍ത്ത് തിരിച്ചടയ്ക്കാനുള്ള വരുമാനം പദ്ധതിയില്‍ നിന്നും ലഭിക്കുന്നതുമില്ല. ക്ഷീരവികസന വകുപ്പ് വാഗ്ദാനം ചെയ്ത സബ്സിഡി ലഭിച്ചിരുന്നുവെങ്കില്‍ പ്രതിമാസ തവണകളില്‍ വലിയ കുറവ് ലഭിക്കുമായിരുന്നുവെന്നും അശ്വതി പറയുന്നു.

ന്യൂനപക്ഷങ്ങള്‍ക്കുനേരേയുള്ള ആക്രമണങ്ങളില്‍ പ്രതിഷേധം

റാന്നി: ഇന്ത്യയില്‍ ന്യൂനപക്ഷങ്ങള്‍ക്കെതിരേ വര്‍ധിച്ചു വരുന്ന ആക്രമണങ്ങളിലും ഭീഷണിയിലും മാര്‍ത്തോമ്മ സഭ റാന്നി - നിലയ്ക്കല്‍ ഭദ്രാസന കൗണ്‍സില്‍ യോഗം പ്രതിഷേധിച്ചു. ന്യൂനപക്ഷങ്ങള്‍ ഭയത്തില്‍ കഴിയുകയാണ്. ഇത് ഇന്ത്യയുടെ മഹത്തായ പാരമ്പര്യത്തിന് അപമാനമാണെന്ന് കൗണ്‍സില്‍ യോഗം ചൂണ്ടിക്കാട്ടി. രാജ്യത്തിന്‍റെ മതേതരത്വവും സാഹോദര്യവും തകര്‍ക്കുന്ന നടപടികള്‍ അവസാനിപ്പിക്കുവാന്‍ ഭരണകൂടങ്ങള്‍ കര്‍ശന നടപടികള്‍ സ്വീകരിക്കണമെന്നും ഭരണഘടനാ മൂല്യങ്ങള്‍ സംരക്ഷിക്കപ്പെടണമെന്നും യോഗം ആവശ്യപ്പെട്ടു. . തെറ്റായ ആരോപണങ്ങള്‍ ഉന്നയിച്ച് ഛത്തിസ്ഗഡില്‍ കന്യാസ്ത്രീകള്‍ക്കതിരേ എടുത്ത കേസ് റദ്ദ് ചെയ്യണം. എല്ലാ മതവിഭാഗങ്ങളെയും സമഭാവനയോടെയാണ് ക്രൈസ്തവര്‍ കാണുന്നത്. രാജ്യത്തിന്‍റെ നിയമങ്ങളും സംസ്‌കാരവും എന്നും ഉയര്‍ത്തി പിടിച്ചിട്ടുണ്ടെന്നും കൗണ്‍സില്‍ ചൂണ്ടിക്കാട്ടി. ഡോ. ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്തയുടെ അധ്യക്ഷതയില്‍ ഫ്രെഡി ഉമ്മന്‍ പ്രമേയം അവതരിപ്പിച്ചു. ഭദ്രാസന സെക്രട്ടറി റവ. തോമസ് കോശി പനച്ചമൂട്ടില്‍, ട്രഷറര്‍ അനു ഫിലിപ്പ് എന്നിവര്‍ പ്രസംഗിച്ചു.

രാജ്യസ്‌നേഹ കൂട്ടായ്മ

വടശേരിക്കര: മാനവ സംസ്‌കൃതി റാന്നി താലൂക്ക് കമ്മിറ്റി നടത്തിയ രാജ്യസ്‌നേഹകൂട്ടായ്മ സംസ്ഥാന കര്‍ഷക ക്ഷേമനിധി ബോര്‍ഡ് മെംബര്‍ സുരേഷ് കോശി ഉദ്ഘാടനം ചെയ്തു. സംസ്ഥാന കൗണ്‍സില്‍ അംഗം ടി.കെ. സാജു അധ്യക്ഷത വഹിച്ചു. ജില്ലാ പ്രസിഡന്‍റ് ഫ്രെഡി ഉമ്മന്‍, ഉണ്ണികൃഷ്ണന്‍ ചാലാപ്പള്ളി, മാത്യു പി. വര്‍ഗീസ്, മനോജ് ചാക്കപ്പാലം, കെ.ഇ.തോമസ്, സ്വപ്ന സൂസന്‍ ജേക്കബ്, വി.ആർ. അശ്വതി, ഷീലു മാനാപ്പള്ളി, വര്‍ഗീസ് സുദേഷ് കുമാർ, ബാബു പുത്തന്‍പറമ്പില്‍, ജോര്‍ജ് കുട്ടി ഉതിമൂട് , തോമസ് മാത്യു, ഷിബു തോണിക്കടവില്‍, കൊച്ചുമോന്‍ മുള്ളന്‍പാറ, കെ.വി. ഗോപാലകൃഷ്ണന്‍ നായർ, ബി.സജികുമാര്‍, പി.കെ.വല്‍സമ്മ , അനിതാകുമാരി, അമല്‍ ഷിബു എന്നിവര്‍ പ്രസംഗിച്ചു.

കോഴഞ്ചേരിയിൽ അച്ചായന്‍സ് ഗോള്‍ഡ് ഷോറൂം തുടങ്ങി

കോഴഞ്ചേരി: അച്ചായന്‍സ് ഗോള്‍ഡ് 28-ാമത് ഷോറൂം കോഴഞ്ചേരി വണ്‍വേ റോഡില്‍ ജനഡിസ് ആര്‍ക്കേഡില്‍ പ്രവര്‍ത്തനമാരംഭിച്ചു. ചലച്ചിത്രതാരം ഭാവനയും അച്ചായന്‍സ് ഗോള്‍ഡ് എംഡി ടോണി വര്‍ക്കിച്ചനും ചേര്‍ന്ന് ഉദ്ഘാടനം നിര്‍വഹിച്ചു. അച്ചായന്‍സ് ഗോള്‍ഡ് ജനറല്‍ മാനേജര്‍ ഷിനില്‍ കുര്യന്‍, പഞ്ചായത്ത് പ്രസിഡന്‍റ് സാലിം ഫിലിപ്പ് എന്നിവര്‍ പ്രസംഗിച്ചു.

കർഷക ദിനാചരണവും കർഷകരെ ആദരിക്കലും

മല്ലപ്പള്ളി: ഉത്പാദിപ്പിക്കുന്ന വിളകള്‍ക്ക് ന്യായമായ വില ലഭിക്കാതെയും കൃഷിക്കാര്‍ക്ക് സര്‍ക്കാരില്‍ നിന്നും ന്യായമായ സഹായങ്ങള്‍ ഇല്ലാതെയുമാകുന്നത് കര്‍ഷകരെ കൃഷിയില്‍ നിന്നും അകറ്റുന്നതിന് പ്രധാന കാരണമാണെന്ന് ജോസഫ് എം. പുതുശേരി എക്‌സ് എംഎല്‍എ മല്ലപ്പള്ളി വെല്‍ഫെയര്‍ സൊസൈറ്റിയുടെ നേതൃത്വത്തില്‍ നടന്ന കര്‍ഷക ദിനാചരണവും കര്‍ഷകരെ ആദരിക്കുന്ന ചടങ്ങും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മല്ലപ്പള്ളി വെല്‍ഫെയര്‍ സൊസൈറ്റി പ്രസിഡന്‍റ് പ്രസാദ് ജോര്‍ജ് അധ്യക്ഷത വഹിച്ച യോഗത്തില്‍ മല്ലപ്പള്ളി ഗ്രാമപഞ്ചായത്ത് പ്രസിഡന്‍റ് എസ്. വിദ്യാമോള്‍ തെരഞ്ഞെടുക്കപ്പെട്ട 11 കര്‍ഷകരെ ആദരിച്ചു. ജനറല്‍ സെക്രട്ടറി ആര്‍ പുഷ്‌കരൻ, ടി.കെ. സജീവ്, വൈസ് പ്രസിഡന്‍റ് ചെറിയാന്‍ സ്‌കറിയ, ഗ്രാമപഞ്ചായത്ത് അംഗങ്ങളായ റെജി പണിക്കമുറി, ബിജു പുറത്തൂടന്‍, ലളിത പി. കുമാർ, സാജന്‍ ഏബ്രഹാം, ഉണ്ണികൃഷ്ണന്‍ എന്നിവര്‍ പ്രസംഗിച്ചു. ഓണത്തിന് മലയാളികളുടെ പ്രധാന വിഭവമായ ഉപ്പേരിക്കു വേണ്ടിയുള്ള നാടന്‍ ഏത്തക്കുലകള്‍ കര്‍ഷകരില്‍ നിന്നും നേരിട്ട് സംഭരിച്ച് മുന്‍കൂട്ടി അറിയിക്കുന്ന ആവശ്യക്കാര്‍ക്ക് മിതമായ നിരക്കില്‍ എത്തിച്ചു കൊടുക്കുന്നതിനുള്ള പ്രവര്‍ത്തനങ്ങള്‍ സൊസൈറ്റി ആരംഭിച്ചതായി ഭാരവാഹികള്‍ അറിയിച്ചു.

കക്കി സംഭരണിയുടെ ഒരു ഷട്ടര്‍ കൂടി തുറന്നു; പമ്പയില്‍ നീല അലര്‍ട്ട്

പത്തനംതിട്ട: കിഴക്കന്‍ മലയോര മേഖലയില്‍ മഴ ശക്തമായി തുടരുന്നതിനിടെ ശബരിഗിരി ജലവൈദ്യുത പദ്ധതിയുടെ ആനത്തോട് - കക്കി സംഭരണിയുടെ ഒരു ഷട്ടര്‍കൂടി ഇന്നലെ തുറന്നു. നിലവില്‍ മൂന്ന് ഷട്ടറുകളാണ് തുറന്നിരിക്കുന്നത്. ശനിയാഴ്ച തുറന്ന രണ്ട്, മൂന്ന് ഷട്ടറുകള്‍ 45 സെന്‍റീമീറ്റര്‍ വീതം ഉയര്‍ത്തിവച്ചിരിക്കുകയാണ്. ഇന്നലെ ഒന്നാം നമ്പര്‍ ഷട്ടര്‍ 30 സെന്‍റിമീറ്റര്‍ ഉയര്‍ത്തി. ജലനിരപ്പ് 83.32 ശതമാനമാണ്. സംഭരണിയിലേക്ക് നീരൊഴുക്ക് ശക്തമായതിനാലാണ് ജലനിരപ്പ് ക്രമീകരിക്കുന്നതിലേക്ക് അപ്പര്‍ റൂള്‍ ലവലായ 976 മീറ്ററിലെത്തിയപ്പോള്‍ ഷട്ടറുകള്‍ തുറക്കാന്‍ തീരുമാനിച്ചത്. കക്കാട് പദ്ധതിയുടെ മൂഴിയാര്‍ സംഭരണിയുടെ ഒരു ഷട്ടര്‍ 20 സെന്‍റിമീറ്റര്‍ ഉയര്‍ത്തിയിട്ടുണ്ട്. ശബരിഗിരി പദ്ധതിയുടെ പമ്പ സംഭരണിയില്‍ ജലനിരപ്പ് 982 മീറ്ററിലെത്തിയതോടെ ഇന്നലെ വൈകുന്നേരം ആദ്യ മുന്നറിയിപ്പായ നീല അലര്‍ട്ട് നല്‍കി. സംഭരണിയുടെ പരമാവധി ജലനിരപ്പ് 986.33 മീറ്ററാണ്. 984.50 മീറ്ററില്‍ റെഡ് അലര്‍ട്ട് നല്‍കും.

നിരുത്തരവാദ ഉത്തരവുകള്‍: ഉദ്യോഗസ്ഥരെ നിലയ്ക്കു നിര്‍ത്തണമെന്ന് എഎച്ച്എസ്ടിഎ

പത്തനംതിട്ട: സേവനാവകാശങ്ങള്‍ക്കും സര്‍വീസ് ചട്ടങ്ങള്‍ക്കും പുല്ലുവില കല്പിച്ച്, ഹയര്‍ സെക്കന്‍ഡറി പ്രിന്‍സിപ്പല്‍മാരാണ് ക്ലാര്‍ക്ക് പണി ചെയ്യേണ്ടതെന്നും, അതിനാണ് അവരുടെ പീരിയഡുകള്‍ കുറവു ചെയ്തു നല്‍കിയിരിക്കുന്നതെന്നും പോലെയുള്ള ഉത്തരവുകള്‍ പടച്ചുവിടുന്ന ഉദ്യോഗസ്ഥരെ സര്‍ക്കാര്‍ നിലയ്ക്കു നിര്‍ത്തണമെന്ന് എയ്ഡഡ് ഹയര്‍സെക്കന്‍ഡറി ടീച്ചേഴ്‌സ് അസോസിയേഷന്‍ ജില്ലാ കമ്മിറ്റി ആവശ്യപ്പെട്ടു. ആഴ്ചയില്‍ 24 ഉംഅതിലേറെയും പീരീഡുകള്‍ പഠിപ്പിക്കുന്ന ഹയര്‍ സെക്കന്‍ഡറി അധ്യാപകന്‍ ദിവസം രണ്ടര മണിക്കൂറില്‍ താഴെയേ പഠിപ്പിക്കുന്നുള്ളൂവെന്ന് എഴുതി വിട്ടതിലൂടെ, അധ്യാപകരെ പൊതു സമൂഹത്തിനുമുന്നില്‍ താറടിച്ചു കാണിക്കാനുള്ള നീക്കമാണ് നടത്തിയിരിക്കുന്നത്. ക്ലാര്‍ക്കും പ്യൂണും മീനിസ്റ്റീരിയലും ഒന്നുമില്ലാതെ ഹയര്‍സെക്കന്‍ഡറി വിഭാഗം ഇത്ര കാര്യക്ഷമമായി പ്രവര്‍ത്തിക്കുന്നുണ്ടെങ്കില്‍ അതിനു പിന്നില്‍ അധ്യാപകരുടെ പരിശ്രമം ചെറുതല്ലെന്ന് സംഘടന ചൂണ്ടിക്കാട്ടി.. കള്ളക്കണക്കുകള്‍ നിരത്തി കോടതിയെ പോലും തെറ്റിദ്ധരിപ്പിക്കാന്‍ ശ്രമിക്കുന്ന ഇത്തരക്കാരെ സര്‍ക്കാര്‍ നിയന്ത്രിക്കണമെന്നും വിവാദ ഉത്തരവ് പിന്‍വലിക്കണമെന്ന് എഎച്ച്എസ്ടിഎ ജില്ലാ പ്രസിഡന്‍റ് പി. ചാന്ദ്‌നി ആവശ്യപ്പെട്ടു.

ഗാന്ധിഭവൻ ഫെയ്‌റി ലാൻഡ് ഉദ്ഘാടനം 21ന്

പത്തനംതിട്ട: ചെന്നീർക്കരയിൽ ഭിന്നശേഷിക്കാർക്കൊരു ഗ്രാമം ഒരുങ്ങുന്നു. ഫലവൃക്ഷങ്ങളും പൂന്തോട്ടങ്ങളും കുട്ടികളുടെ പാർക്കുമടക്കം പ്രകൃതിസൗന്ദര്യം നിറഞ്ഞ മനോഹരമായ ഈ ഗ്രാമത്തിൽ ഭിന്നശേഷിയുള്ള നൂറു കുട്ടികൾക്ക് താമസിച്ചു പഠിക്കാൻ സൗകര്യമുണ്ട്. അതോടൊപ്പം അവരുടെ ശാരീരിക മാനസിക ആരോഗ്യ വികസനത്തിന് ആവശ്യമായ എല്ലാ പദ്ധതികളും ഒരുക്കിയിട്ടുണ്ടെന്ന് സ്വാഗതസംഘം ചെയർമാൻ സജയൻ ഓമല്ലൂർ പത്രസമ്മേളനത്തിൽ പറഞ്ഞു. ചെന്നീർക്കര ഊന്നുകൽ വലിയവീട്ടിൽ സജി ഏബ്രഹാമിന്‍റെ സ്വപ്‌നസാക്ഷാത്‌കാരമാണ് പദ്ധതി.രണ്ടര ഏക്കർ സ്ഥലത്ത് രണ്ടുകോടിയിലധികം രൂപ മുടക്കിയാണ് ഭിന്ന ശേഷി വില്ലേജ് അദ്ദേഹം നിർമിച്ചിരിക്കുന്നത്. ഗാന്ധിഭവൻ ഫെയ്‌റിലാൻഡ് എന്ന് നാമകരണം ചെയ്തിരിക്കുന്ന സ്ഥാപനം പൂർണമായും പത്തനാപുരം ഗാന്ധിഭവനു കൈമാറിയിരിക്കുകയാണ്. 21നു രാവിലെ ഒന്പതിന് ഭിന്നശേഷി വില്ലേജിന്‍റെ ഉദ്ഘാടനം മന്ത്രി സജി ചെറിയാൻ നിർവഹിക്കും. ആന്‍റോ ആന്‍റണി എംപി, ജില്ലാ പഞ്ചായത്തംഗം ഓമല്ലൂർ ശങ്കരൻ, കുര്യൻ ജോൺ മേളാംപറമ്പിൽ, യൂഹാനോൻ മാർ മിലിത്തിയോസ് മെത്രാപ്പോലീത്ത, കെ. വരദരാജൻ, നസീർ വെളിയിൽ, ഷംല ബീഗം, കെ. ധർമരാജൻ, ജെ. ഇന്ദിരാദേവി, ജോർജ് തോമസ്, ജോൺസൺ വിളവിനാൽ, പിങ്കി ശ്രീധർ, ജയശ്രീ മനോജ്, രഞ്ജിനി അജിത്ത്, കല അജിത്ത്, ബിന്ദു ടി. ചാക്കോ തുടങ്ങിയവർ പ്രസംഗിക്കും. ഫെയ്റി ലാൻഡ് ചെയർമാൻ സജി ഏബ്രഹാം, ഗാന്ധിഭവൻ ജനറൽ ഡയറക്‌ടർ സന്തോഷ് ജി. നാഥ്, പേഴ്‌സണൽ ചീഫ് മാനേജർ കെ. സാബു എന്നിവരും പത്രസമ്മേളനത്തിൽ പങ്കെടുത്തു.

മോണ്ടിസോറി അധ്യാപക പരിശീലന കേന്ദ്രം ഉദ്ഘാടനം ഇന്ന്

റാന്നി: രാജ്യത്തിനകത്തും വിദേശത്തും ഏറ്റവും തൊഴില്‍ സാധ്യതയുള്ള മോണ്ടിസോറി അധ്യാപകരാകാന്‍ അവസരം ഒരുക്കി നാഷണല്‍ സ്‌കില്‍ ഡെവലപ്‌മെന്‍റ് കോര്‍പറേഷന്‍ അധ്യാപക പരിശീലന കേന്ദ്രം റാന്നിയില്‍ പ്രവര്‍ത്തനമാരംഭിക്കുന്നു. റാന്നി നോളജ് വില്ലേജ് പദ്ധതിയുടെ ഭാഗമായാണ് മോണ്ടിസോറി ട്രെയിനിംഗ് സെന്‍റര്‍ സ്ഥാപിക്കുന്നത്. ഇന്നു രാവിലെ പത്തിന് റാന്നി ചെത്തോങ്കര എസ് സി ഇംഗ്ലീഷ് മീഡിയം സ്‌കൂളില്‍ മന്ത്രി റോഷി അഗസ്റ്റിന്‍ പദ്ധതിയുടെ ഉദ്ഘാടനം നിര്‍വഹിക്കും. പ്രമോദ് നാരായണ്‍ എംഎല്‍എ അധ്യക്ഷത വഹിക്കും. എസ് സി ഇംഗ്ലീഷ് മീഡിയം സ്‌കൂളിലാണ് സെന്‍റര്‍ പ്രവര്‍ത്തനം ആരംഭിക്കുന്നത്. മോണ്ടിസോറി വര്‍ക്ക് സ്റ്റേഷനാവശ്യമായിട്ടുള്ള സൗകര്യങ്ങള്‍ സജ്ജമാക്കിയത് കെഎസ്എഫ്ഇയുടെ സിഎസ്ആര്‍ ഫണ്ട് ഉപയോഗിച്ചാണ്. പ്ലസ് ടു പഠനം പൂര്‍ത്തിയാക്കിയ യുവതികള്‍ക്കാണ് കോഴ്‌സില്‍ പരിശീലനം ലഭിക്കുന്നത്. മോണ്ടിസോറി പഠന സമ്പ്രദായം സംബന്ധിച്ചും ഈ മേഖലയിലുള്ള തൊഴില്‍ സാധ്യത സംബന്ധിച്ചും സാധ്യത സംബന്ധിച്ചുമുള്ള ബോധവത്കരണം നല്‍കുന്നതിനായുള്ള സെമിനാര്‍ ഇന്നു രാവിലെ 9. 30ന് റാന്നി എസ് സി ഇംഗ്ലീഷ് മീഡിയം സ്‌കൂളില്‍ ആരംഭിക്കും. വിദഗ്ധര്‍ സെമിനാറില്‍ ക്ലാസുകള്‍ നയിക്കും സെമിനാറിലെ രജിസ്‌ട്രേഷനും വിശദാംശങ്ങള്‍ക്കുമായി ബന്ധപ്പെടേണ്ട നമ്പർ. 9496211823, 7736788785.

ജില്ലാ വിദ്യാഭ്യാസ സമിതി രൂപീകരണവും കണ്‍വന്‍ഷനും ഇന്ന്

പത്തനംതിട്ട: വിദ്യാഭ്യാസ മേഖലയെ വര്‍ഗീയവത്കരിക്കുന്ന കേന്ദ്ര സര്‍ക്കര്‍ നയങ്ങള്‍ക്കെതിരേ ജില്ലാ വിദ്യാഭ്യാസ സമിതി രൂപീകരണവും ജില്ലാ കണ്‍വന്‍ഷനും ഇന്ന് പത്തനംതിട്ടയില്‍ നടക്കുമെന്ന് ഭാരവാഹികള്‍ പത്രസമ്മേളനത്തില്‍ പറഞ്ഞു. ഉച്ചകഴിഞ്ഞ് 3.30ന് പത്തനംതിട്ട അബാന്‍ ടവര്‍ ഓഡിറ്റോറിയത്തില്‍ നടക്കുന്ന കണ്‍വന്‍ഷന്‍ കേരള ചരിത്ര ഗവേഷണ കൗണ്‍സില്‍ ചെയര്‍മാനും, കാലിക്കറ്റ് സര്‍വകലാശാല ചരിത്രവിഭാഗം മേധാവിയുമായ ഡോ. കെ. എൻ. ഗണേഷ് ഉദ്ഘാടനം ചെയ്യും. എറണാകുളം മഹാരാജാസ് കോളജ് സാമ്പത്തിക ശാസ്ത്ര വിഭാഗം മേധാവി സന്തോഷ് വര്‍ഗീസ് വിഷയാവതരണം നടത്തും. കേന്ദ്രസര്‍ക്കാര്‍ പൊതുമേഖലാ വിദ്യാഭ്യാസ സമ്പ്രദായത്തെ ഘട്ടംഘട്ടമായി തകര്‍ത്തു കൊണ്ടിരിക്കുകയാണെന്ന് ഭാരവാഹികള്‍ പറഞ്ഞു. എന്‍ഡി.എ സര്‍ക്കാര്‍ അധികാരത്തില്‍ വന്നതോടെ വര്‍ഗീയതയെ കൂട്ടുപിടിച്ചു കൊണ്ടുള്ള അമിതാധികാരപ്രയോഗങ്ങള്‍ക്ക് ഇന്ത്യന്‍ കാമ്പസുകള്‍ സാക്ഷ്യം വഹിക്കയാണെന്നും ഇതിനെതിരേയുള്ള ചെറുത്തുനില്പിന്‍റെ ഭാഗമായാണ് വിദ്യാഭ്യാസ സമിതി രൂപീകരണമെന്നും ഭാരവാഹികള്‍ പറഞ്ഞു. കേരളത്തിലെ സര്‍വകലാശാലകളെക്കൂടി ഈ പട്ടികയില്‍ ഉള്‍പ്പെടുത്താനുള്ള ശ്രമങ്ങള്‍ ഊര്‍ജിതമായി നടന്നുവരികയാണ്. ചാന്‍സലര്‍ ഓഫീസിനെ ദുരുപയോഗം ചെയ്തുകൊണ്ട് കേരളത്തിലെ വിദ്യാഭ്യാസമേഖലയെ തകര്‍ക്കാനുള്ള ശ്രമമാണ് ഇപ്പോള്‍ നടത്തിക്കൊണ്ടിരിക്കുന്നത് . ഇന്ത്യയിലെ ബഹുഭൂരിപക്ഷം സംസ്ഥാനങ്ങളിലും സിലബസും പാഠപുസ്തകങ്ങളുമെല്ലാം ആധുനിക വൈജ്ഞാനികമേഖലയ്ക്ക് നിരക്കാത്ത രീതിയില്‍ മാറ്റിയെഴുതപ്പെടുകയാണെന്നും ഇവര്‍ കുറ്റപ്പെടുത്തി. എഫ്എസ്ഇടിഒ ജില്ലാ സെക്രട്ടറി ജി. അനീഷ്‌കുമാർ, എകെപിസിടിഎ ജില്ലാ സെക്രട്ടറി റെയ്‌സണ്‍ സാം രാജു, എന്‍ജിഒ യൂണിയന്‍ ജില്ലാ സെക്രട്ടറി ആർ. പ്രവീണ്‍, ഡിവൈഎഫ്ഐ ജില്ലാ സെക്രട്ടറി ബി. നിസാം എന്നിവര്‍ പത്രസമ്മേളനത്തില്‍ പങ്കെടുത്തു.

ഇ -സമൃദ്ധ പദ്ധതി: സ്വാഗതസംഘം രൂപീകരിച്ചു

അടൂർ: മൃഗസംരക്ഷണ വകുപ്പിന്‍റെ ഓണ്‍ലൈന്‍ ഹെല്‍ത്ത് മാനേജ്മെന്‍റ് സിസ്റ്റം പോര്‍ട്ടലായ ഇ-സമൃദ്ധ പദ്ധതിയുടെ സ്വാഗതസംഘം രൂപീകരണവും അടൂര്‍ വെറ്ററിനറി പോളി ക്ലിനിക്കിന്‍റെ നവീകരിച്ച കോണ്‍ഫറന്‍സ് ഹാളിന്‍റെ ഉദ്ഘാടനവും നടന്നു. അടൂര്‍ നഗരസഭ ചെയര്‍പേഴ്സണ്‍ കെ മഹേഷ് കുമാര്‍ ഉദ്ഘാടനം നിര്‍വഹിച്ചു. കൗണ്‍സിലര്‍ അജി പി. വര്‍ഗീസ് അധ്യക്ഷത വഹിച്ചു. വൈസ് ചെയര്‍പേഴ്സണ്‍ രാജി ചെറിയാന്‍, കൗണ്‍സിലര്‍മാരായ ഡി. സജി, രമേശ് കുമാർ, അലാവുദ്ദീന്‍, ബീന ബാബു, ശോഭ തോമസ്, ഗ്രാമപഞ്ചായത്ത് പ്രസിഡന്‍റുമാര്‍, ജനപ്രതിനിധികള്‍, ഉദ്യോഗസ്ഥര്‍ എന്നിവര്‍ പങ്കെടുത്തു. ജില്ലാ മൃഗസംരക്ഷണ ഓഫീസര്‍ ഡോ. എസ്. സന്തോഷ് പദ്ധതി വിശദീകരിച്ചു. ഇ സമ്യദ്ധ പദ്ധതിയുടെ 30ന് നടക്കുന്ന സംസ്ഥാനതല ഉദ്ഘാടനത്തോടനുബന്ധിച്ച് ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ രക്ഷാധികാരിയായി സ്വാഗതസംഘം രൂപീകരിച്ചു.

ഓണസദ്യ വീട്ടുപടിക്കൽ എത്തിക്കാൻ കുടുംബശ്രീ

പത്തനംതിട്ട: ഓണത്തിനു വേണ്ടതെല്ലാം മലയാളിയുടെ വീട്ടിലെത്തിക്കാനുള്ള തിരക്കിലാണ് കുടുംബശ്രീ പ്രവർത്തകർ. കുടുംബശ്രീ മിഷന്‍റെ ഓൺലൈൻ ആപ്പായ പോക്കറ്റ്മാർട്ടിലൂടെ ചിപ്സ്, ശർക്കരവരട്ടി, പായസം-മിക്സ്, സാമ്പാർ മസാല, മുളകുപൊടി, മല്ലിപ്പൊടി, വെജ് മസാല, മഞ്ഞൾപ്പൊടി എന്നിവ ലഭിക്കും. 26 കൂട്ടം വിഭവങ്ങളുമായുള്ള ഓണസദ്യ 280 രൂപയ്ക്ക് വീട്ടുപടിക്കൽ എത്തിക്കാൻ കുടുംബശ്രീ ജില്ലാ മിഷനു പരിപാടിയുണ്ട്. ജില്ലയിൽ എവിടെനിന്നുവേണമെങ്കിലും സദ്യ ഓർഡർ ചെയ്യാം. ഇതിനായി കുടുംബശ്രീ ജില്ലാ മിഷന്‍റെ നേതൃത്വത്തിൽ എട്ട് ബ്ലോക്കുകൾ കേന്ദ്രീകരിച്ച് രണ്ട് കോൾ സെന്‍ററുകൾ പ്രവർത്തിക്കും. ഈ കോൾ സെന്‍ററുകൾ മുഖേനയാണ് ഓർഡറുകൾ സ്വീകരിക്കുന്നത്. മൈക്രോ എന്‍റർപ്രൈസ് കൺസൾട്ടൻസ് (എംഇസി) മേൽനോട്ടം വഹിക്കും. പഴം, ഉപ്പേരി, ശർക്കരവരട്ടി, ഇഞ്ചിക്കറി, നാരങ്ങാ അച്ചാർ, മാങ്ങാ അച്ചാർ, പച്ചടി, കിച്ചടി, തോരൻ, അവിയൽ, പപ്പടം മുളകുകറി, ഉള്ളിത്തീയൽ, എരിശേരി പരിപ്പ്, സാമ്പാർ, കാളൻ, സംഭാരം അടപ്രഥമൻ, പാലട പായസം ചോറ്, വാഴയില എന്നിവ ഉൾപ്പെടുന്നതാണ് സദ്യ. 20 മുതൽ ഗുണഭോക്താക്കളുടെ ഓർഡർ സ്വീകരിച്ചുതുടങ്ങും. ഓർഡറുകൾ നൽകേണ്ടതിന് മൂന്നു ദിവസം മുൻപ് ബുക്ക് ചെയ്യണം. ഫോൺ: 9562247585, 6282591751.

എഡിജിപി അജിത് കുമാറിനു പിന്നിൽ മുഖ്യമന്ത്രിയെന്ന് ജെബി മേത്തർ

തിരുവല്ല: എഡിജിപി എം.ആർ. അജിത് കുമാർ നടത്തുന്ന എല്ലാ തെറ്റായ പ്രവർത്തനങ്ങളുടെയും പിന്നിൽ മുഖ്യമന്ത്രി പിണറായി വിജയനാണെന്ന് മഹിള കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എംപി. മഹിളാ സാഹസ് യാത്രയുടെ സ്വീകരണയോഗങ്ങളിൽ പ്രസംഗിക്കുകയായിരുന്നു ജെബി മേത്തർ. അജിത് കുമാർ പിണറായി വിജയന്‍റെ നമ്പർവൺ അവതാരമാണ്. വിജിലൻസ് കോടതി ഉത്തരവ് പിണറായി വിജയനുമെതിരാണ്. അജിത് കുമാറിനെ വിജിലൻസ് കേസിൽനിന്ന് ഒഴിവാക്കാനുള്ള തീരുമാനം പിണറായി വിജയന്‍റേതാണ്. വിജിലൻസിനെ കൂട്ടിലടച്ച് ക്ലിഫ് ഹൗസിന്‍റെ അടുക്കളയിൽ കുടിയിരിത്തിയിരിക്കുകയാണ്. അജിത് കുമാറിനെ വളഞ്ഞവഴിയിലൂടെ ഡിജിപി ആക്കാനാണ് പിണറായി വിജയൻ ശ്രമിച്ചത്. വിജിലൻസ് കോടതി ഉത്തരവിന്‍റെ വെളിച്ചത്തിൽ മുഖ്യമന്ത്രി പിണറായി വിജയൻ രാജിവയ്ക്കണമെന്നും അവർ ആവശ്യപ്പെട്ടു.

കര്‍ഷകരെയും കൃഷിയിടങ്ങളെയും സംരക്ഷിക്കണം: ക്ലീമിസ് വലിയ മെത്രാപ്പോലീത്ത

റാന്നി: വന്യമൃഗങ്ങളുടെ ആക്രമണങ്ങളില്‍ നിന്ന് കര്‍ഷകരെയും കൃഷിയിടങ്ങളെയും സംരക്ഷിക്കുവാന്‍ കേന്ദ്ര സംസ്ഥാന സര്‍ക്കാരുകള്‍ അലംഭാവം കാട്ടാതെ നടപടികള്‍ സ്വീകരിക്കണമെന്നും കൃഷിയിടങ്ങളിലേക്ക് ഇറങ്ങിത്തിരിക്കുവാന്‍ തക്കവണ്ണം യുവജനങ്ങൾക്കു പ്രോത്സാഹനവും സാമ്പത്തിക സഹായവും നല്‍കാന്‍ അടിയന്തര നടപടികള്‍ സ്വീകരിക്കണമെന്നും കുര്യാക്കോസ് മാര്‍ ക്ലീമിസ് വലിയ മെത്രാപ്പോലീത്ത. കര്‍ഷകദിനത്തില്‍ ജില്ലാ കര്‍ഷക കൂട്ടായ്മകളുടെ ആഭിമുഖ്യത്തില്‍ കര്‍ഷക സ്‌നേഹിയും കൃഷിക്കാരനുമായ വലിയ മെത്രാപ്പോലീത്തയെ പൊന്നാട അണിയിച്ച് ആദരിച്ചു. ഡോ. ഏബ്രഹാം മാര്‍ സെറാഫിം മെത്രാപ്പോലീത്തയും സന്നിഹിതനായിരുന്നു. കര്‍ഷക കൂട്ടായ്മ പ്രസിഡന്‍റ് സജി ഇടിക്കുള അധ്യക്ഷത വഹിച്ചു. സെക്രട്ടറി ബോബി ഏബ്രഹാം, രാജു ഇടയാടി, ഗ്രീനി റ്റി. വര്‍ഗീസ്, ഷിബു സി. സാം, കാര്‍ട്ടൂണിസ്റ്റ് ഷാജി മാത്യു, റെജി പ്ലാംതോട്ടത്തില്‍, മനോജ് കുഴിയില്‍, രാജു കോന്നി, എം.സി. ജയകുമാര്‍, ചെറിയാന്‍ വടശേരിക്കര, ബാബു റാന്നി, നിജു കല്ലുപുരയില്‍ എന്നിവര്‍ പ്രസംഗിച്ചു,

ആഗോള അയ്യപ്പസംഗമം സെപ്റ്റംബര്‍ 20ന്; 3000 പ്രതിനിധികള്‍ പങ്കെടുക്കും: മന്ത്രി വാസവന്‍

പത്തനംതിട്ട: ആഗോള അയ്യപ്പ സംഗമം സെപ്റ്റംബര്‍ 20ന് പമ്പാ തീരത്ത് സംഘടിപ്പിക്കുമെന്ന് ദേവസ്വം മന്ത്രി വി.എന്‍. വാസവന്‍. വിവിധ രാജ്യങ്ങളില്‍നിന്നായി 3000 പ്രതിനിധികള്‍ അണിചേരും. കേന്ദ്ര മന്ത്രിമാര്‍, മറ്റ് സംസ്ഥാനങ്ങളിലെ മുഖ്യമന്ത്രിമാരടക്കം പങ്കെടുക്കും. ചരിത്രത്തില്‍ ആദ്യമായാണ് ഇത്രയും പ്രതിനിധികളെ പങ്കെടുപ്പിച്ച് അയ്യപ്പ സംഗമം സംഘടിപ്പിക്കുന്നത്. ശബരിമലയുടെ പ്രശസ്തി വ്യാപിപ്പിക്കുകയാണ് ലക്ഷ്യം. സര്‍ക്കാരും ദേവസ്വം ബോര്‍ഡും സംയുക്തമായാണ് സംഗമം ഒരുക്കുന്നതെന്ന് മന്ത്രി പറഞ്ഞു. പത്തനംതിട്ട നഗരം കേന്ദ്രീകരിച്ച് ജില്ലാ ഭരണകൂടത്തിനു കീഴില്‍ പ്രധാന സ്വാഗത സംഘം ഓഫീസ് തുറക്കും. പമ്പ, പെരുനാട്, സീതത്തോട് എന്നിവിടങ്ങളിലും സ്വാഗത സംഘം ഓഫീസുണ്ടാകും. പ്രതിനിധികളെ സ്വീകരിക്കാന്‍ കെഎസ്ആര്‍ടിസി സൗകര്യം ഏര്‍പ്പെടുത്തും. ജില്ലയില്‍ വിവിധ സ്ഥലങ്ങളിലാകും താമസസൗകര്യം. പ്രതിനിധികള്‍ക്ക് ദര്‍ശനത്തിനുള്ള അവസരം ഒരുക്കും. പമ്പയിലടക്കമുള്ള ആശുപത്രികളില്‍ ആധുനിക ചികത്സ സൗകര്യം ഉറപ്പാക്കും. ഹില്‍ ടോപ്പിലാകും വാഹനങ്ങളുടെ പാര്‍ക്കിംഗ്. സന്നദ്ധ സംഘടനകളുടെ സേവനമടക്കം ശുചീകരണ പ്രവര്‍ത്തനത്തില്‍ ഉപയോഗിക്കും. കെ.യു. ജനീഷ് കുമാർ എംഎൽഎ, ദേവസ്വം ബോർഡ് പ്രസിഡന്‍റ് പി.എസ്. പ്രശാന്ത്, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, ജില്ലാ കളക്ടർ എസ്. പ്രേംകൃഷ്ണൻ, പത്തനംതിട്ട നഗരസഭാ ചെയർമാൻ ടി. സക്കീർ ഹുസൈൻ, ദേവസ്വം സെക്രട്ടറി എം.ജി. രാജമാണിക്യം, പെരുനാട് ഗ്രാമപഞ്ചായത്ത് പ്രസിഡന്‍റ് പി.എസ്. മോഹനന്‍, ദേവസ്വം ബോര്‍ഡ് പ്രതിനിധികളായ എ. അജികുമാര്‍, പി.ഡി. സന്തോഷ് കുമാര്‍, ഡിഐജി അജിതാ ബീഗം, പത്തനംതിട്ട, ആലപ്പുഴ ജില്ലാ പോലീസ് മേധാവികളായ ആര്‍. ആനന്ദ്, എം.പി. മോഹനചന്ദ്രന്‍, ദേവസ്വം കമ്മീഷണര്‍ ബി. സുനില്‍ കുമാര്‍, എന്‍എസ്എസ്, എസ്എന്‍ഡിപി, ഐക്യ മലയരയ മഹാസഭ പ്രതിനിധികളായ എം. സംഗീത് കുമാര്‍, സുരേഷ് പരമേശ്വരന്‍ തുടങ്ങിയവര്‍ പങ്കെടുത്തു. മുഖ്യമന്ത്രി പിണറായി വിജയന്‍ മുഖ്യരക്ഷാധികാരിയായി 1001 അംഗ സംഘാടക സമിതി രൂപീകരിച്ചു. ഡെപ്യൂട്ടി സ്പീക്കർ ചിറ്റയം ഗോപകുമാർ ചെയർപേഴ്സണും കെ.യു. ജനീഷ് കുമാർ എംഎൽഎ പ്രോഗ്രാം കമ്മിറ്റി ചെയർമാനുമാണ്.

ലഹരിക്കെതിരേയുള്ള പോരാട്ടത്തിൽ ഒറ്റക്കെട്ടാകണം: ആന്‍റോ ആന്‍റണി

കവിയൂർ: ലഹരിയുടെ തലസ്ഥാനമായി മാറിയ കേരളത്തെ ലഹരി വിമുക്തമാക്കാൻ മഹിളാ കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എംപിയുടെ നേതൃത്വത്തിൽ നടത്തുന്ന മഹിളാ സാഹസ് കേരള യാത്ര വിജയപഥത്തിൽ എത്തുകതന്നെ ചെയ്യുമെന്ന് ആന്‍റോ ആന്‍റണി എംപി. കവിയൂർ തോട്ടഭാഗം ജംഗ്ഷനിൽ മഹിളാ സാഹസ് കേരള യാത്രയ്ക്കു നൽകിയ സ്വീകരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മഹിളാ കോൺഗ്രസ്‌ മണ്ഡലം പ്രസിഡന്‍റ് ഗീത തോമസ് അധ്യക്ഷത വഹിച്ചു. ജില്ലാ പ്രസിഡന്‍റ് രജനി പ്രദീപ് മുഖ്യപ്രഭാഷണം നടത്തി. കെപിസിസി നയരൂപീകരണ സമിതി ചെയർമാൻ ജെ.എസ്. അടൂർ, ഡിസിസി ജനറൽ സെക്രട്ടറി കോശി പി. സക്കറിയ, കോൺഗ്രസ്‌ ബ്ലോക്ക്‌ പ്രസിഡന്‍റ് എബി മേക്കരിങ്ങാട്ട്, മഹിളാ കോൺഗ്രസ്‌ സംസ്ഥാന സെക്രട്ടറി വിബിത ബാബു തുടങ്ങിയവർ പ്രസംഗിച്ചു.

കര്‍ഷകദിനാചരണം

നാറാണംമൂഴിയില്‍ റാന്നി: നാറാണംമൂഴി ഗ്രാമപഞ്ചായത്തും കൃഷിഭവനും ചേര്‍ന്ന് സംഘടിപ്പിച്ച കര്‍ഷക ദിനാഘോഷം ഗ്രാമപഞ്ചായത്ത് പ്രസിഡന്‍റ് സോണിയ മനോജ് ഉദ്ഘാടനം ചെയ്തു. ബ്ലോക്ക് പഞ്ചായത്തംഗം ഗ്രേസി തോമസ്, സ്റ്റാന്‍ഡിംഗ് കമ്മിറ്റി അധ്യക്ഷരായ ഓമന പ്രസന്നന്‍, തോമസ് ജോര്‍ജ് എന്നിവര്‍ അവാര്‍ഡ്ദാനം നിര്‍വഹിച്ചു. മെംബര്‍മാരായ ബീന ജോബി, റോസമ്മ വര്‍ഗീസ്, റെനി വര്‍ഗീസ്, സാംജി ഇടമുറി , സിഡിഎസ് ചെയര്‍പേഴ്‌സന്‍ ബിന്ദു നാരായണന്‍, കൃഷി ഓഫീസര്‍ എ.എസ്. ആതിര തുടങ്ങിയവര്‍ പ്രസംഗിച്ചു. പഞ്ചായത്തിലെ മികച്ച ജൈവ കര്‍ഷകനായി അത്തിക്കയം ജെജെ ഗാര്‍ഡന്‍ ഉടമ കെ. എസ് ജോസഫിനെ തെരഞ്ഞെടുത്തു. പത്തേക്കറോളം വരുന്ന തന്‍റെ ഡ്രാഗണ്‍ ഫ്രൂട്ട് കൃഷിയിടത്തില്‍ രാസവള പ്രയോഗമോ കീടനാശിനിയോ ഉപയോഗിക്കാതെ തികച്ചും ജൈവരീതിയില്‍ കൃഷിയെ പരിപാലിച്ച് നല്ല ഫലങ്ങള്‍ ഉത്പാദിപ്പിച്ച് വിപണനം ചെയ്യുന്നതിനാണ് കെ.എസ്. ജോസഫിനെ പഞ്ചായത്ത് ആദരിച്ചത്. ഇതര മേഖലകളില്‍ മികച്ച പ്രവര്‍ത്തനം നടത്തിയ കര്‍ഷകരെയും ചടങ്ങില്‍ ആദരിച്ചു. മെഴുവേലിയില്‍ മെഴുവേലി: കര്‍ഷകര്‍ അധ്വാനിച്ച് വിളയിക്കുന്ന വിഭവങ്ങളാണ് നമ്മുടെ ആരോഗ്യം കാത്തുസൂക്ഷിക്കുന്നതെന്ന് മന്ത്രി വീണാ ജോര്‍ജ്. മെഴുവേലി ഗ്രാമപഞ്ചായത്തിന്‍റെയും കൃഷി ഭവന്‍റെയും സംയുക്താഭിമുഖ്യത്തില്‍ നെടിയകാല മേനോന്‍ സ്മാരക ഗ്രന്ഥശാലയില്‍ സംഘടിപ്പിച്ച കര്‍ഷകദിനാചരണം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. പോഷകസമൃദ്ധമായ ഭക്ഷണത്തിനൊപ്പം ആരോഗ്യകരമായ ജീവിതശൈലിയും പ്രധാനമാണെന്ന് മന്ത്രി ചൂണ്ടിക്കാട്ടി. മെഴുവേലി ഗ്രാമപഞ്ചായത്ത് പ്രസിഡന്‍റ് പിങ്കി ശ്രീധര്‍ അധ്യക്ഷത വഹിച്ചു. മുന്‍ എംഎല്‍എ കെ.സി. രാജഗോപാലന്‍ മുഖ്യപ്രഭാഷണം നടത്തി. വൈസ് പ്രസിഡന്‍റ് അനില ചെറിയാന്‍, സ്ഥിരം സമിതി അധ്യക്ഷരായ വിനീതാ അനില്‍, രജനി അശോകന്‍, അംഗം ഷൈനി ലാല്‍, കൃഷി വകുപ്പ് ഡെപ്യൂട്ടി ഡയറക്ടര്‍ അനീന സൂസന്‍ സക്കറിയ, കൃഷി ഓഫീസര്‍ പ്രിയങ്ക എസ്. ചന്ദ്രന്‍ തുടങ്ങിയവര്‍ പ്രസംഗിച്ചു. ചടങ്ങില്‍ മികച്ച കര്‍ഷകരായ എം ഡി ശിവന്‍കുട്ടി, ഗോപിനാഥന്‍, സുരേഷ് ബാബു, മത്തായി ചാക്കോ സണ്ണി, മാത്യു വര്‍ഗീസ്, ഹരിഹരന്‍ എന്നിവരെ ആദരിച്ചു. ഇലന്തൂരില്‍ ഇലന്തൂര്‍: ഗ്രാമപഞ്ചായത്തിന്‍റെയും കൃഷിഭവന്‍റെയും സംയുക്താഭിമുഖ്യത്തില്‍ കര്‍ഷകദിനം ആഘോഷിച്ചു. വിളംബര ജാഥ, കാര്‍ഷിക സെമിനാര്‍, കര്‍ഷകരെ ആദരിക്കല്‍ എന്നിവ കര്‍ഷക ദിനാചരണത്തിന്‍റെ ഭാഗമായി നടന്നു. ഗ്രാമപഞ്ചായത്ത് പ്രസിഡന്‍റ് ജയശ്രീ മനോജ് ഉദ്ഘാടനം ചെയ്തു. വൈസ് പ്രസിഡന്‍റ് വിന്‍സന്‍ തോമസ് ചിറക്കാല അധ്യക്ഷത വഹിച്ചു. സ്ഥിരം സമിതി അധ്യക്ഷരായ കെ. പി മുകുന്ദന്‍, കെ. ജെ. സിനി, ഗ്രാമപഞ്ചായത്ത് അംഗങ്ങളായ സജി തെക്കുംകര, ഗ്രേസി സമുവേല്‍, കൃഷി ഓഫീസര്‍ അരുണിമ, കൃഷി അസിസ്റ്റന്‍റ് കെ.ജി.ആനന്ദ് തുടങ്ങിയവര്‍ പ്രസംഗിച്ചു. മല്ലപ്പള്ളിയില്‍ മല്ലപ്പള്ളി: ഗ്രാമപഞ്ചായത്ത് പ്രസിഡന്‍റ് എസ്. വിദ്യാമോളുടെ അധ്യക്ഷതയില്‍ കൂടിയ യോഗം തിരുവല്ല എംഎല്‍എ അഡ്വ. മാത്യു ടി തോമസ് ഉദ്ഘാടനം നിര്‍വഹിച്ചു. യോഗത്തില്‍ മികച്ച കര്‍ഷകരെ ആദരിച്ചു. ഗ്രാമപഞ്ചായത്ത് വൈസ് പ്രസിഡന്‍റ് സാം പട്ടേരില്‍, സ്റ്റാന്‍ഡിംഗ് കമ്മിറ്റി അധ്യക്ഷരായ ഗീതാ കുര്യാക്കോസ്, റെജി പണിക്കമുറി, ഗീതു ജി. നായര്‍, ബ്ലോക്ക് പഞ്ചായത്ത് അംഗം ലൈല അലക്‌സാണ്ടര്‍, ഗ്രാമപഞ്ചായത്ത് അംഗങ്ങള്‍, കാര്‍ഷിക വികസന സമിതി അംഗങ്ങള്‍ തുടങ്ങിയവര്‍ പ്രസംഗിച്ചു. കുന്നന്താനത്ത് കുന്നന്താനം: ഗ്രാമപഞ്ചായത്ത്, കാര്‍ഷിക വികസന സമിതി, കേരള ഗ്രാമീണ്‍ ബാങ്ക്, സഹകരണ ബാങ്കുകള്‍, കൃഷിഭവന്‍ എന്നിവ സംയുക്തമായി കര്‍ഷകദിനാചരണം കുന്നന്താനം കമ്യൂണിറ്റി ഹാളില്‍ നടത്തി. മാത്യു ടി. തോമസ് എംഎല്‍എ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് ശ്രീദേവി സതീഷ് ബാബു അധ്യക്ഷത വഹിച്ചു. കുന്നന്താനം ഗ്രാമപഞ്ചായത്തിലെ മികച്ച കര്‍ഷകരെ ആദരിച്ചു. കേരള ഗ്രാമീണ്‍ ബാങ്ക് ഉപഹാരങ്ങളും കര്‍ഷകര്‍ക്ക് സമ്മാനിച്ചു കൃഷി ഡെപ്യൂട്ടി ഡയറക്ടര്‍ മിനി എം. പിള്ള പദ്ധതി വിശദീകരണം നടത്തി. ഗ്രാമപഞ്ചായത്ത് ഭരണ സമിതി അംഗങ്ങള്‍, കാര്‍ഷിക വികസന സമിതി അംഗങ്ങള്‍, ബാങ്ക് പ്രതിനിധികള്‍ എന്നിവര്‍ പങ്കെടുത്തു. കോട്ടാങ്ങലില്‍ വായ്പൂര്: കോട്ടാങ്ങല്‍ ഗ്രാമപഞ്ചായത്തിന്‍റെയും കൃഷിഭവന്‍റെയും നേതൃത്വത്തില്‍ കര്‍ഷക ദിനാചരണം വായ്പൂര് സഹകരണ ബാങ്ക് ഓഡിറ്റോറിയത്തില്‍ സംഘടിപ്പിച്ചു പ്രമോദ് നാരായണ്‍ എംഎല്‍എ ഉദ്ഘാടനം ചെയ്തു. കോട്ടങ്ങല്‍ ഗ്രാമപഞ്ചായത്ത് പ്രസിഡന്‍റ് ബിനു ജോസഫ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ബാബു കൂടത്തില്‍ പഞ്ചായത്തിലെ മികച്ച കര്‍ഷകരെ ആദരിച്ചു. കൃഷി ഡെപ്യൂട്ടി ഡയറക്ടര്‍ മിനി എം. പിള്ള, ബ്ലോക്ക് പഞ്ചായത്ത് മെംബര്‍മാരായ ബിന്ദു ചന്ദ്രമോഹനന്‍, ഈപ്പന്‍ വര്‍ഗീസ്, ഗ്രാമപഞ്ചായത്തംഗങ്ങള്‍, തുടങ്ങിയവര്‍ പ്രസംഗിച്ചു. ഓമല്ലൂരില്‍ ഓമല്ലൂര്‍: ഗ്രാമപഞ്ചായത്തിന്‍റെയും കൃഷിഭവന്‍റെയും സംയുക്താഭിമുഖ്യത്തില്‍ കര്‍ഷകദിനാചരണവും കര്‍ഷകരെ ആദരിക്കലും നടന്നു. മന്ത്രി വീണാ ജോര്‍ജ് ഉദ്ഘാടനം ചെയ്തു. ജില്ലാ പഞ്ചായത്തംഗം ഓമല്ലൂര്‍ ശങ്കരന്‍ കര്‍ഷകരെ ആദരിച്ചു. ഗ്രാമ പഞ്ചായത്ത് പ്രസിഡന്‍റ് ജോണ്‍സണ്‍ വിളവിനാല്‍ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ജെ. ഇന്ദിരദേവി, ജില്ലാ പഞ്ചായത്തംഗം റോബിന്‍ പീറ്റര്‍, പ്രിന്‍സിപ്പല്‍ കൃഷി ഓഫീസര്‍ ഷേര്‍ളി സഖറിയ, ഗ്രാമ പഞ്ചായത്ത് അംഗങ്ങള്‍, കാര്‍ഷിക വികസന സമിതി അംഗങ്ങള്‍, പാടശേഖര സമിതി അംഗങ്ങള്‍ തുടങ്ങിയവര്‍ പ്രസംഗിച്ചു. പെരിങ്ങരയില്‍ തിരുവല്ല: പെരിങ്ങര ഗ്രാമപഞ്ചായത്തിന്റെയും കൃഷിഭവന്‍റെയും ആഭിമുഖ്യത്തിലുള്ള കര്‍ഷക ദിനാചരണവും കര്‍ഷകരെ ആദരിക്കലും പെരിങ്ങര എന്‍എസ്എസ് കരയോഗം ഓഡിറ്റോറിയത്തില്‍ മാത്യു ടി. തോമസ് എംഎല്‍എ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് ഏബ്രഹാം തോമസ് അധ്യക്ഷത വഹിച്ചു. ജില്ലാ പഞ്ചായത്തംഗം മായ അനില്‍കുമാര്‍ മുഖ്യപ്രഭാഷണം നടത്തി, ഗ്രാമപഞ്ചായത്തംഗങ്ങള്‍, ബ്ലോക്ക് പഞ്ചായത്തംഗങ്ങള്‍, കാര്‍ഷിക വികസന സമിതി അംഗങ്ങള്‍ എന്നിവര്‍ പ്രസംഗിച്ചു, പദ്ധതി വിശദീകരണവും കാര്‍ഷിക സെമിനാറിനും കൃഷി അസിസ്റ്റന്‍റ് ഡയറക്ടര്‍ ഡോ. അഞ്ജു മറിയം ജോസഫ്, കൃഷി അസിസ്റ്റന്‍റ് ഷിനോജ് എന്നിവര്‍ നിര്‍വഹിച്ചു. വിവിധ മേഖലകളില്‍ മികച്ച കര്‍ഷകര്‍ക്കുള്ള കര്‍ഷക അവാര്‍ഡ് വിതരണം ചെയ്തു.

നാടെങ്ങും കര്‍ഷകദിനാചരണം : മാരകരോഗങ്ങൾ തടയുന്നതില്‍ കര്‍ഷകര്‍ക്കു പങ്ക്: വീണാ ജോര്‍ജ്

പത്തനംതിട്ട: പ്രാദേശിക കര്‍ഷകരും ജൈവകൃഷിയുമാണ് മാരകരോഗങ്ങളെ തടഞ്ഞുനിര്‍ത്തുന്നതെന്ന് മന്ത്രി വീണാ ജോര്‍ജ്. പത്തനംതിട്ട നഗരസഭയുടെയും കാര്‍ഷിക വികസന സമിതിയുടെയും സംയുക്താഭിമുഖ്യത്തില്‍ നടന്ന കര്‍ഷക ദിനാചരണം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. നഗരസഭാ ചെയര്‍പേഴ്‌സണ്‍ ടി. സക്കീര്‍ ഹുസൈന്‍ അധ്യക്ഷത വഹിച്ചു. സ്റ്റാന്‍ഡിംഗ് കമ്മിറ്റി അധ്യക്ഷരായ കെ.ആര്‍ അജിത് കുമാര്‍, ജെറി അലക്‌സ്, കൗണ്‍സിലര്‍മാരായ എ. സുരേഷ് കുമാര്‍, വിമല ശിവന്‍, അംബിക വേണു, എ അഷറഫ്, ബിജിമോള്‍ മാത്യു തുടങ്ങിയവര്‍ പ്രസംഗിച്ചു. നഗരസഭയിലെ തെരഞ്ഞെടുക്കപ്പെട്ട കര്‍ഷകരെ ചടങ്ങില്‍ ആദരിച്ചു.

വാഹനങ്ങളുടെ ശവപ്പറമ്പായി കളക്ടറേറ്റ് : അടിയന്തര ആവശ്യങ്ങള്‍ക്ക് വാഹനമില്ല

പത്തനംതിട്ട: ആരോഗ്യ വകുപ്പിന് അടിയന്തര ആവശ്യങ്ങള്‍ക്ക് ഉപയോഗിക്കാന്‍പോലും വാഹനമില്ലെന്നിരിക്കേ വാഹനങ്ങളുടെ ശവപ്പറമ്പായി കളക്ടറേറ്റ് പരിസരം മാറുന്നു. ഉപയോഗശൂന്യമായ സര്‍ക്കാര്‍ വാഹനങ്ങൾ സൂക്ഷിക്കുന്ന സ്ഥലമായി പത്തനംതിട്ട ജില്ലാ കളക്ടറേറ്റ് വളപ്പിനെ അധികൃതര്‍ മാറ്റിയിരിക്കുകയാണ്. ഈ വാഹനങ്ങളില്‍ ഭൂരിഭാഗവും ആരോഗ്യ വകുപ്പിന്‍റേതാണ്. കളക്ടറേറ്റില്‍ നിരവധി ഓഫീസുകള്‍ പ്രവര്‍ത്തിക്കുന്നുണ്ട്. ഓഫീസുകളിലെത്തുന്നവര്‍ക്കും ജീവനക്കാര്‍ക്കും വാഹനങ്ങള്‍ പാര്‍ക്ക് ചെയ്യാന്‍ ഇടമില്ലെന്നിരിക്കവേയാണ് പഴയതും കേടുവന്നതുമായ വാഹനങ്ങള്‍ കളക്ടറേറ്റ് പരിസരത്ത് കിടക്കുന്നത്. പല വാഹനങ്ങളും ചെറിയ തോതില്‍ അറ്റകുറ്റപ്പണികള്‍ നടത്തിയാല്‍ നിരത്തിലിറക്കാന്‍ കഴിയുന്നവയാണ്. എന്നാല്‍ ഇവയെല്ലാം ഒരേപോലെ മാറ്റിയിട്ടിരിക്കുകയാണ്. ശബരിമല തീര്‍ഥാടനകാലത്തും മറ്റും ആരോഗ്യവകുപ്പ് വാഹനക്ഷാമം നേരിടുന്നുണ്ട്. നിലവില്‍ വനമേഖലയിലും മറ്റും ക്യാമ്പുകള്‍ക്ക് എത്താന്‍ വാഹനമില്ലാത്ത സ്ഥിതിയാണ്. സര്‍ക്കാര്‍ വാഹനങ്ങളുടെ കുറവ് കാരണം ഡോക്ടര്‍മാര്‍ക്കും ആരോഗ്യ പ്രവര്‍ത്തകര്‍ക്കും പല ഘട്ടങ്ങളിലും സ്വകാര്യ വാഹനങ്ങളെ ആശ്രയിക്കേണ്ട അവസ്ഥയും ഉണ്ട്. വാഹനക്ഷാമം അന്വേഷിക്കാന്‍ നിര്‍ദേശം ശബരിമല ഉള്‍പ്പെടുന്ന പത്തനംതിട്ട ജില്ലയിൽ ആരോഗ്യ വകുപ്പിന് ആവശ്യത്തിന് വാഹനങ്ങള്‍ ഇല്ലെന്ന പരാതി പരിശോധിക്കാന്‍ മുഖ്യമന്ത്രിയുടെ ഓഫീസിന്‍റെ നിര്‍ദേശം. ആരോഗ്യ വകുപ്പിന് കൂടുതല്‍ സര്‍ക്കാര്‍ വാഹനങ്ങള്‍ അനുവദിക്കണമെന്നും ഉപയോഗ ശൂന്യമായി കളക്ടറേറ്റ് വളപ്പില്‍ സൂക്ഷിച്ചിരിക്കുന്ന വാഹനങ്ങള്‍ ഉടന്‍ നീക്കണമെന്നും ആവശ്യപ്പെട്ട് ഹൈക്കോടതി അഭിഭാഷകനും പൊതു പ്രവര്‍ത്തകനുമായ കുളത്തൂര്‍ ജയ്സിംഗ് നല്‍കിയ പരാതിയിലാണ് നിര്‍ദേശം. ആരോഗ്യ വകുപ്പിന് വാഹനങ്ങള്‍ കുറവാണെന്ന കാര്യം പരിശോധിക്കാന്‍ ആരോഗ്യവകുപ്പ് ഡയറക്ടര്‍ക്കും കളക്ടറേറ്റ് പരിസരത്ത് ഉപയോഗ ശൂന്യമായി കിടക്കുന്ന സര്‍ക്കാര്‍ വാഹനങ്ങള്‍ നീക്കം ചെയ്യാന്‍ പത്തനംതിട്ട ജില്ലാ കളക്ടര്‍ക്കും മുഖ്യമന്ത്രിയുടെ ഓഫീസ് നിര്‍ദേശം നല്‍കി.

വഴിയോര കച്ചവട തൊഴിലാളികൾ ഹെഡ് പോസ്റ്റ് ഓഫീസിലേക്ക് മാർച്ച് നടത്തി

പത്തനംതിട്ട: വഴിയോര കച്ചവട തൊഴിലാളി ഫെഡറേഷൻ (വികെടിഎഫ്) ജില്ലാ കമ്മി റ്റിയുടെ നേതൃത്വത്തിൽ പത്തനംതിട്ട ഹെഡ് പോസ്റ്റ് ഓഫീസിലേക്കു മാർച്ച് നടത്തി. വഴിയോര കച്ചവട തൊഴിലാളി സംരക്ഷണ നിയമം പഞ്ചായത്തുകളിൽക്കൂടി നടപ്പിലാക്കാനാവശ്യമായ ഭേദഗതി വരുത്താൻ കേന്ദ്ര സർക്കാർ തയാറാകുക, ഈ മേഖലയിലെ കോർപറേറ്റ് വത്കരണം അവസാനിപ്പിക്കുക എന്നീ ആവശ്യങ്ങൾ ഉന്നയിച്ച് സംസ്ഥാനത്തെ എല്ലാ ജില്ലാ കേന്ദ്രങ്ങളിലും കേന്ദ്ര സർക്കാർ ഓഫീസുകളിലേക്ക് നടത്തിയ സമരത്തിന്‍റെ ഭാഗമായാണ് വഴിയോര കച്ചവട തൊഴിലാളികൾ മാർച്ചും ധർണയും നടത്തിയത്. ധർണ സിഐടിയു സംസ്ഥാന വൈസ് പ്രസിഡന്‍റ് പി.ബി. ഹർഷകുമാർ ഉദ്ഘാടനം ചെയ്തു. വികെടിഎഫ് ജില്ലാ പ്രസിഡന്‍റ് ബി. മുരളീധരൻ അധ്യക്ഷത വഹിച്ചു. സംസ്ഥാന സെക്രട്ടറി ഫ്രാൻസിസ് വി. ആന്‍റണി, ജില്ലാ ട്രഷറർ ടി.എ. റെജികുമാർ, സംസ്ഥാന കമ്മറ്റിയംഗം പി.ആർ. കുട്ടപ്പൻ, ജില്ലാ നേതാക്കളായ സലിം സുലൈമാൻ, പ്രമോദ് കണ്ണങ്കര, ലത്തീഫ് കൊയ്പ്പള്ളി, ഷാഹിർ പ്രണവം, വിഷ്ണു ഇരവിപേരൂർ, ഷാജി പത്തനംതിട്ട, സനീഷ് സാജൻ, അബ്ദുൾ റഷീദ് എന്നിവർ പ്രസംഗിച്ചു.

പ്ലാപ്പള്ളി റോഡ് വികസനം ശബരിമല തീർഥാടകർക്ക് സഹായകരം: മന്ത്രി മുഹമ്മദ് റിയാസ്

റാന്നി: പ്ലാപ്പള്ളി - തുലാപ്പള്ളി - മൂക്കൻപെട്ടി - പമ്പാവാലി റോഡ് വികസനം ശബരിമല തീർഥാടകർക്ക് ഏറെ സഹായകരമെന്ന് മന്ത്രി പി.എ. മുഹമ്മദ് റിയാസ്. പുനർനിർമിച്ച റോഡിന്‍റെ ഉദ്ഘാടനം ഓൺലൈനായി നിർവഹിച്ചു പ്രസംഗിക്കുകയായിരുന്നു മന്ത്രി. ശബരിമല പദ്ധതിയിൽ ഉൾപ്പെടുത്തി 6.5 കോടി രൂപ ചെലവഴിച്ചാണ് റോഡ് നവീകരിച്ചത്. എരുമേലിയിൽനിന്നുള്ള തീർഥാടകർക്ക് ഇതിലൂടെ സുഗമമായി എത്തിച്ചേരാൻ സാധിക്കും. ഗവിയിലേക്കുള്ള വിനോദസഞ്ചാരികളുടെ യാത്രയും അനായാസമാകും. ബിഎം ബിസി നിലവാരത്തിൽ നിശ്ചയിച്ചതിലും നേരത്തെ നിർമാണം പൂർത്തിയാക്കി. ശബരിമല റോഡ് നവീകരണത്തിന് സർക്കാർ മുഖ്യപരിഗണന നൽകുകയാണെന്നും മന്ത്രി പറഞ്ഞു. തുലാപ്പള്ളി മാർത്തോമ്മ പാരീഷ് ഹാളിൽ നടന്ന ചടങ്ങിൽ പ്രമോദ് നാരായൺ എംഎൽഎ അധ്യക്ഷത വഹിച്ചു. സെബാസ്റ്റ്യൻ കുളത്തുങ്കൽ എംഎൽഎ മുഖ്യപ്രഭാഷണം നടത്തി. റാന്നി ബ്ലോക്ക് പഞ്ചായത്ത് പ്രസിഡന്‍റ് കെ.എസ്. ഗോപി, പെരുനാട് ഗ്രാമപഞ്ചായത്ത് പ്രസിഡന്‍റ് പി. എസ്. മോഹനൻ, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ സി.എസ്. സുകുമാരൻ, അസിസ്റ്റന്‍റ് എക്സിക്യൂട്ടീവ് എൻജിനിയർ റോമി ചിങ്ങം പറമ്പിൽ, ത്രിതല പഞ്ചായത്ത് പ്രതിനിധികൾ, രാഷ്‌ട്രീയ പ്രതിനിധികൾ, ഉദ്യോഗസ്ഥർ തുടങ്ങിയവർ പ്രസംഗിച്ചു.

ഡിസിസി നേതൃസമ്മേളനം നാളെ

പത്തനംതിട്ട: ജില്ലാ കോണ്‍ഗ്രസ് കമ്മിറ്റി നേതൃസമ്മേളനം നാളെ രാവിലെ 10ന് പത്തനംതിട്ട രാജീവ്ഭവന്‍ ഓഡിറ്റോറിയത്തില്‍ നടക്കും. പ്രസിഡന്‍റ് പ്രഫ. സതീഷ് കൊച്ചുപറമ്പിലിന്‍റെ അധ്യക്ഷതയില്‍ ചേരുന്ന സമ്മേളനം കെപിസിസി വര്‍ക്കിംഗ് പ്രസിഡന്‍റ് പി. സി. വിഷ്ണുനാഥ് എംഎല്‍എ ഉദ്ഘാടനം ചെയ്യും. കെപിസിസി രാഷ്ട്രീയകാര്യ സമിതി അംഗങ്ങള്‍, ജനറല്‍ സെക്രട്ടറിമാര്‍, മറ്റ് നേതാക്കള്‍ എന്നിവര്‍ പ്രസംഗിക്കും.

എംസിഎ വീരവന്ദനം പരിപാടി നടത്തി

തിരുവല്ല: മലങ്കര കാത്തലിക് അസോസിയേഷൻ (എംസിഎ) തിരുവല്ല മേഖലയുടെ ആഭിമുഖ്യത്തിൽ ഇന്ത്യൻ സൈന്യത്തിലും മറ്റ് പ്രതിരോധ സേനകളിലും സേവനം അനുഷ്ഠിച്ച് വിരമിച്ച മേഖലയിലെ മലങ്കര സഭാംഗങ്ങളായ സൈനികരെയും പോലീസുകാരെയും ആദരിച്ച് വീരവന്ദനം 2025 സംഘടിപ്പിച്ചു. മാർ തെയോഫിലോസ് വിദ്യാഭ്യാസ സാന്ത്വന പദ്ധതിയുടെ ഭാഗമായി, തിരുവല്ല മേഖലയിൽനിന്ന് 2024-25 വർഷത്തെ 10, 12 ക്ലാസുകളിൽ മികച്ച വിജയം നേടിയ വിദ്യാർഥികളെയും ആദരിച്ചു. തിരുവല്ല ഡിവൈഎസ്പി എസ്. നന്ദകുമാർ ഉദ്ഘാടനം ചെയ്തു. എംസിഎ പ്രസിഡന്‍റ് ബിജു ജോർജ് അധ്യക്ഷത വഹിച്ച യോഗത്തിൽ ഫാ. ആന്‍റണി ചെത്തിപ്പുഴ, വൈദിക ഉപദേഷ്ടാവ് ഫാ. മാത്യു വാഴയിൽ, ഫാ. സന്തോഷ് അഴകത്ത്, ജോൺ മാമ്മൻ, ഷിബു ഏബ്രഹാം, സജി ഏബ്രഹാം, എ.സി. റെജി, മിനി ഡേവിഡ്, വത്സമ്മ ജോൺ, ജെയ്മോൻ, ബെർസിലി ജോസഫ്, പി.സി. ജോർജ് , ബിനു ജോൺ എന്നിവർ പ്രസംഗിച്ചു.

വാർധക്യം എടുത്തെറിയപ്പെടേണ്ടതല്ല: കാതോലിക്കാ ബാവ

പത്തനംതിട്ട: ജീവിതമൂല്യങ്ങളും അനുഭവ സമ്പത്തും കൈമുതലായുള്ള വാര്‍ധക്യം പുതുതലമുറയ്ക്കു പ്രയോജനപ്പെടുത്തേണ്ടത് കാലഘട്ടത്തിന് അനിവാര്യമെന്ന് ബസേലിയോസ് മാര്‍ത്തോമ്മ മാത്യൂസ് തൃതീയന്‍ കാതോലിക്കാ ബാവ. മലങ്കര ഓര്‍ത്തഡോക്‌സ് സഭയുടെ പ്രാര്‍ഥനായോഗത്തിന്‍റെ ആഭിമുഖ്യത്തിലുള്ള ചാരെ വയോജന ശ്രദ്ധ പദ്ധതിയുടെ ഉദ്ഘാടനം പത്തനംതിട്ട മാക്കാംകുന്ന് സെന്‍റ് സ്റ്റീഫന്‍സ് കത്തീഡ്രലില്‍ നിര്‍വഹിച്ചു പ്രസംഗിക്കുകയായിരുന്നു അദ്ദേഹം. ഏകാന്തതയും ഒറ്റപ്പെടലുകളുമാണ് വയോജനങ്ങള്‍ ഇന്ന് നേരിടുന്ന പ്രധാന വെല്ലുവിളി. സ്‌നേഹനിധികളായ മക്കളുണ്ടെങ്കിലും ജീവിത സാഹചര്യങ്ങളുടെ സമ്മര്‍ദം മൂലം പലപ്പോഴും മക്കള്‍ക്ക് മാതാപിതാക്കളെ അവരുടെ ബലഹീന അവസ്ഥകളില്‍ അവരാഗ്രഹിക്കുന്ന സംരക്ഷണം നല്‍കാന്‍ സാധിക്കുന്നില്ല. കൃത്യമായ കുടുംബകൂട്ടായ്മകളും ഒത്തുചേരലുകളും ഇന്നിന്‍റെ വാര്‍ധക്യ ഏകാന്തതകള്‍ക്ക് ഒരു പരിധി വരെ പരിഹാരമാകുമെന്നും കാതോലിക്കാ ബാവ അഭിപ്രായപ്പെട്ടു. ഡോ. ഏബ്രഹാം മാര്‍ സെറാഫിം മെത്രാപ്പോലീത്ത അധ്യക്ഷത വഹിച്ചു, ജോസഫ് മാര്‍ ബര്‍ബാസ് സഫ്രഗന്‍ മെത്രാപ്പോലീത്ത, കുര്യാക്കോസ് മാര്‍ ക്ലീമിസ് വലിയ മെത്രാപ്പോലീത്ത, മാത്യൂസ് മാര്‍ തേവോദോസിയോസ് മെത്രാപ്പോലീത്ത, ഡോ. സാമുവേല്‍ മാര്‍ ഐറേനിയോസ് മെത്രാപ്പോലീത്ത, വൈദിക ട്രസ്റ്റി ഫാ. തോമസ് വര്‍ഗീസ് അമയില്‍, അസോസിയേഷന്‍ സെക്രട്ടറി ബിജു ഉമ്മന്‍, ഭദ്രാസന സെക്രട്ടറി ജോണ്‍സണ്‍ കല്ലിട്ടതില്‍ കോര്‍ എപ്പിസ്‌കോപ്പ എന്നിവര്‍ പ്രസംഗിച്ചു.

വധശ്രമക്കേസില്‍ ഒളിവിലായിരുന്ന രണ്ടാം പ്രതി അറസ്റ്റില്‍

പത്തനംതിട്ട: വാക്കുതര്‍ക്കത്തെ തുടര്‍ന്നുള്ള വിരോധത്താല്‍ കത്തികൊണ്ട് കുത്തിക്കൊലപ്പെടുത്താന്‍ ശ്രമിച്ച കേസില്‍ ഒളിവിലായിരുന്ന രണ്ടാം പ്രതിയെ ആറന്മുള പോലീസ് അറസ്റ്റ് ചെയ്തു. ഊന്നുകല്‍ കുഴിമുറിയില്‍ ബാബു തോമസാ (45) ണ് അറസ്റ്റിലായത്. ജൂലൈ 22 ന് രാത്രി ഒമ്പതിന് നെല്ലിക്കാല ജംഗ്ഷനില്‍ വച്ചുണ്ടായ വാക്കുതര്‍ക്കം മൂലമുണ്ടായ വിരോധത്താല്‍ നെല്ലിക്കാല വെള്ളപ്പാറ മനുഭവനം വീട്ടില്‍ രാജന്‍ ഗോപാല(64)നെയാണ് ബാബു തോമസ് ഉള്‍പ്പെടെ മൂന്നുപേരടങ്ങുന്ന സംഘം ആക്രമിച്ചത്. വെള്ളപ്പാറ നെടുമുരുപ്പ് തുണ്ടത്തും പടിയിലായിരുന്നു സംഭവം. കേസിലെ ഒന്നാംപ്രതി പത്തനാപുരം പാടത്ത് ഒളിവില്‍ കഴിഞ്ഞുവന്ന അജയകുമാറിനെ തന്ത്രപരമായ നീക്കത്തില്‍ 24 ന് കണ്ടെത്തി പിടികൂടി. ഇയാളുടെ കുറ്റസമ്മതമൊഴിയുടെ അടിസ്ഥാനത്തില്‍ സംഭവസ്ഥലത്തുനിന്നും കത്തി പോലീസ് കണ്ടെടുക്കുകയും ചെയ്തു.

മംഗളൂരു, രാജ്യറാണി ട്രെയിനുകളുടെ തിരുവല്ല സ്റ്റോപ് പുനഃസ്ഥാപിച്ചു

പത്തനംതിട്ട: മംഗളൂരുവില്‍ നിന്നുള്ള 16348 തിരുവനന്തപുരം എക്‌സ്പ്രസ്, നിലമ്പൂര്‍ റോഡ് - തിരുവനന്തപുരം നോര്‍ത്ത് (16350) രാജ്യറാണി എക്‌സ്പ്രസ് ട്രെയിനുകളുടെ തിരുവല്ല സ്റ്റോപ്പ് പുനഃസ്ഥാപിച്ചു. കോവിഡ് കാലത്ത് നിര്‍ത്തലാക്കിയ സ്‌റ്റോപ് പുനഃസ്ഥാപിക്കുന്നതിലേക്ക് ആവശ്യം ശക്തമായിരുന്നു. രണ്ട് ട്രെയിനുകള്‍ക്കും ഇന്നു മുതല്‍ സ്റ്റോപ്പുണ്ടാകുമെന്ന് ആന്‍റോ ആന്‍റണി എംപി അറിയിച്ചു. രണ്ട് ട്രെയിനുകള്‍ക്കും വടക്കോട്ടുള്ള യാത്രയില്‍ തിരുവല്ല സ്‌റ്റോപ്പ് നിലനിര്‍ത്തിയിരുന്നു. എന്നാല്‍ മടക്കയാത്രയില്‍ സ്റ്റോപ്പ് അനുവദിച്ചിരുന്നില്ല. മംഗളൂരു തിരുവനന്തപുരം ട്രെയിന്‍ രാത്രി 12.56നും രാജ്യറാണി എക്‌സ്പ്രസ് പുലര്‍ച്ചെ 2.28നുമാണ് തിരുവല്ലയില്‍ എത്തുക. മധുര - തിരുവനന്തപുരം അമൃത എക്‌സ്പ്രസിന്‍റെ തിരുവല്ല സ്റ്റോപ്പ് ഇനി പുനഃസ്ഥാപിക്കാനുണ്ട്. വടക്കന്‍ മേഖലയില്‍ നിന്നും തിരുവല്ലയില്‍ ഇറങ്ങാനായി ഏറെ ബുദ്ധിമുട്ടാണ ്അനുഭവിച്ചുവരുന്നത്. ഇക്കാര്യം ചൂണ്ടിക്കാട്ടി കേന്ദ്ര റെയില്‍വേ മന്ത്രി അശ്വിനി വൈഷ്ണവിനെ നേരില്‍ കണ്ടിരുന്നതായി എംപി പറഞ്ഞു.

3.2 കിലോഗ്രാം കഞ്ചാവുമായി യുവാവ് പിടിയില്‍

പത്തനംതിട്ട: 3.2 കിലോഗ്രാം കഞ്ചാവുമായി യുവാവിനെ കൂടല്‍ പോലീസ് അറസ്റ്റ് ചെയ്തു. രഹസ്യവിവരത്തെതുടര്‍ന്ന് നടത്തിയ പരിശോധനയിലാണ് കൂടല്‍ ഏലിയാമൂല മഞ്ഞപ്പുഴകോണ്‍ തണ്ണീര്‍പന്തലില്‍ വീട്ടില്‍ രാജന്‍ ( 37) അറസ്റ്റിലായത്. ചാക്കിനുള്ളില്‍ മൂന്ന് പൊതികളാക്കി സൂക്ഷിച്ച ഏകദേശം 3.192 കിലോ തൂക്കം വരുന്ന കഞ്ചാവാണ് വയലരികില്‍ നിന്നും പോലീസ് കണ്ടെത്തിയത്. കോന്നി ഡിവൈഎസ്പി എസ.് അജയ്‌നാഥിന്റെ മേല്‍നോട്ടത്തില്‍ കൂടല്‍ പോലീസ് ഇന്‍സ്പെക്ടര്‍ സി. എല്‍. സുധീറിന്റെ നേതൃത്വത്തിലായിരുന്നു പോലീസ് നടപടികള്‍. പോലീസിനെ കണ്ട് രാജന്‍ ഓടിപ്പോകാന്‍ ശ്രമിച്ചുവെങ്കിലും തടഞ്ഞുനിര്‍ത്തി ചോദ്യം ചെയ്യുകയും പരിശോധന നടത്തുകയുമായിരുന്നു, കഞ്ചാവ് വില്പനയ്ക്കായി സൂക്ഷിച്ചതാണെന്നാണ് മൊഴി. പത്തനാപുരത്തുള്ള ഒരാളുടെ നിര്‍ദേശപ്രകാരം ആര്യങ്കാവിനടുത്ത് സ്‌കൂട്ടറിലെത്തി രണ്ട് ദിവസം മുമ്പ് ഓട്ടോറിക്ഷയില്‍ വന്ന മൂന്ന് പേരില്‍ നിന്നും 25,000 രൂപയ്ക്ക് വാങ്ങിയതാണെന്നും വെളിപ്പെടുത്തി.

വന്യജീവി ആക്രമണം; മലയോര ജനതയോട് ഐക്യദാര്‍ഢ്യവുമായി യുവജന പ്രസ്ഥാനം

പത്തനംതിട്ട: വന്യജീവികളുടെ ആക്രമണംമൂലം ഭീഷണിയില്‍ കഴിയുന്ന മലയോര ജനതയ്ക്ക് ഐക്യദാര്‍ഢ്യവുമായി ഓര്‍ത്തഡോക്‌സ് യുവജനപ്രസ്ഥാനം തുമ്പമണ്‍ ഭദ്രാസന സമിതിയുടെ ആഭിമുഖ്യത്തില്‍ പത്തനംതിട്ട കളക്ടറേറ്റ് പടിക്കല്‍ ഏകദിന ഉപവാസം നടത്തി. സാധാരണക്കാരായ ആളുകളുടെ ജീവല്‍പ്രശ്‌നങ്ങള്‍ പരിഹരിക്കുന്നതിലും സമാധാന ജീവിതം ഉറപ്പാക്കുന്നതിലും ഭരണകൂടങ്ങള്‍ അടിയന്തര ഇടപെടല്‍ നടത്തണമെന്ന് ധര്‍ണ ഉദ്ഘാടനം ചെയ്ത തുമ്പമണ്‍ ഭദ്രാസനാധിപന്‍ ഡോ. ഏബ്രഹാം മാര്‍ സെറാഫിം മെത്രാപ്പോലീത്ത ആവശ്യപ്പെട്ടു. ഡോ. ജോഷ്വാ മാര്‍ നിക്കോദിമോസ് മെത്രാപ്പോലീത്ത, ഡോ. സാമുവല്‍ മാര്‍ ഐറേനിയോസ് മെത്രാപ്പോലീത്ത, തോമസ് മാര്‍ തിത്തോസ് എപ്പിസ്‌കോപ്പ, ഭദ്രാസന സെക്രട്ടറി ജോണ്‍സണ്‍ കല്ലിട്ടതില്‍ കോര്‍ എപ്പിസ്‌കോപ്പ, പത്തനംതിട്ട ഇമാം എ. അബ്ദുല്‍ ഷുക്കൂര്‍ മൗലവി, എസ്എന്‍ഡിപി പത്തനംതിട്ട യൂണിയന്‍ പ്രസിഡന്‍റ് കെ. പത്മകുമാര്‍, ഫാ. ബിജു മാത്യൂസ് പ്രക്കാനം, ഫാ. ബിജു മാത്യു മണ്ണാറകുളഞ്ഞി, പ്രഫ. ജി. ജോണ്‍, ഡോ. ജോര്‍ജ് വര്‍ഗീസ് കൊപ്പറ, ഐവാന്‍ വകയാര്‍, കേന്ദ്ര യുവജന പ്രസ്ഥാനം വൈസ് പ്രസിഡന്‍റ് ഫാ. ജയിന്‍ മാത്യു, ട്രഷറര്‍ രഞ്ജു എം. ജോയ്, ഫാ. എബി റ്റി. സാമുമേല്‍, ഫാ. ഷാജി കെ. ജോര്‍ജ്, അനീഷ് തോമസ്, സതീഷ് കൊച്ചുപറമ്പില്‍, പഴകുളം മധു, റോബിന്‍ പീറ്റര്‍, ജിജോ മോഡി, അജി അലക്‌സ്, അനു വി. കടമ്മനിട്ട, അജില്‍ ഡേവിഡ് ജോണ്‍ എന്നിവര്‍ പ്രസംഗിച്ചു. ഭദ്രാസന വൈസ് പ്രസിഡന്‍റ് ഫാ. എബി എ. തോമസ് ജനറല്‍ സെക്രട്ടറി നിതിന്‍ മണക്കാട്ടുമണ്ണില്‍ ജോയിന്‍റ് സെക്രട്ടിമാരായ അഡ്വ. ലിന്‍റോ എം. ലോയിഡ്, അന്‍സു മേരി വര്‍ഗീസ് ട്രഷറര്‍ ജെറിന്‍ ജോയ്‌സ്, ഭദ്രാസന ഭാരവാഹികളായ മോനിഷ് മുട്ടുമണ്ണില്‍, ജസ്റ്റി ജോസ്, അനീഷ റെയ്ച്ചല്‍, ഷിബിന്‍ ഷൈനു എന്നിവര്‍ ഉപവാസം അനുഷ്ഠിച്ചു. സമാപന യോഗം കുറിയാക്കോസ് മാര്‍ ക്ലീമിസ് വലിയ മെത്രാപ്പോലീത്ത ഉദ്ഘാടനം ചെയ്തു, ആന്‍റോ ആന്‍റണി എംപി, കെ. യു. ജനീഷ് കുമാര്‍ എംഎല്‍എ, സഭാ വൈദിക ട്രസ്റ്റി ഫാ. ഡോ. തോമസ് വർഗീസ് അമയില്‍, കെ. പി. ഉദയഭാനു, ജോണി കെ. ജോര്‍ജ് എന്നിവര്‍ പ്രസംഗിച്ചു.

പണമില്ല, അധ്യാപകരില്ല; സ്‌കൂള്‍ കായികമേളകള്‍ അവതാളത്തില്‍

പത്തനംതിട്ട: പൊതുവിദ്യാലയങ്ങളിലെ കായികമേളയുടെ നടത്തിപ്പിനായി ഫണ്ടും ഏറ്റെടുത്തു നടത്താന്‍ കായികാധ്യാപകരും ഇല്ലെന്നായതോടെ പ്രതിസന്ധി. സ്‌കൂള്‍ കായികമേളകള്‍ അടുത്തമാസം നടക്കാനിരിക്കേയാണ് പ്രതിസന്ധി രൂക്ഷമാകുന്നത്. ഗെയിംസ് മത്സരങ്ങള്‍ ആരംഭിച്ചപ്പോള്‍ത്തന്നെ താളപ്പിഴകള്‍ തുടങ്ങി. മുമ്പ് ഫീസിലെ സ്‌കൂള്‍ വിഹിതം ഉപയോഗിച്ചാണ് സ്‌കൂള്‍തല കായികമേളകള്‍ നടത്തിയിരുന്നത്. എന്നാല്‍ സര്‍ക്കാരിന്‍റെ പുതിയ നിര്‍ദേശപ്രകാരം സ്‌കൂള്‍ മേളകളുടെ നടത്തിപ്പിനായി വിദ്യാര്‍ഥികളില്‍നിന്നു പിരിക്കുന്ന പണം മുഴുവന്‍ പൊതുവിദ്യാഭ്യാസ ഡയറക്ടറുടെ അക്കൗണ്ടില്‍ അടയ്ക്കണമെന്നതാണ്. ഇതോടെ സര്‍ക്കാരിന് രണ്ടുകോടിയുടെ അധികവരുമാനം ലഭിക്കും. സ്‌കൂളുകളിലും ഉപജില്ലകളിലും കായികമേളയ്ക്ക് പണം എവിടെനിന്ന് ലഭിക്കുമെന്ന് പറഞ്ഞിട്ടില്ല. സ്‌കൂളുകളിലെ ഫണ്ടുകള്‍ ഉപയോഗിച്ചോ അധ്യാപകര്‍ കൈയില്‍ നിന്നിട്ടോ നടത്തേണ്ടിവരും. സ്‌കൂളുകള്‍ക്ക് ഫണ്ടില്ല കഴിഞ്ഞ വര്‍ഷങ്ങളില്‍ ഒരു കുട്ടിക്ക് 21 രൂപ വീതം ഹയര്‍ സെക്കന്‍ഡറി സ്‌കൂളില്‍ കായികമേളയ്ക്കായി ചെലവഴിക്കാനുള്ള അവകാശം ഉണ്ടായിരുന്നു. ഹയര്‍ സെക്കന്‍ഡറിയിലെ ഒരു വിദ്യാര്‍ഥിയില്‍നിന്ന് 75 രൂപയാണ് കായികമേള സ്‌പെഷല്‍ ഫീസായി പിരിക്കുന്നത്. ഇതില്‍നിന്ന് 21 രൂപ സ്‌കൂള്‍തല കായികമേളകള്‍ നടത്താനുള്ള വിഹിതമായി മാറ്റിയശേഷം ബാക്കിയാണ് അടയ്‌ക്കേണ്ടിയിരുന്നത്. സ്പെഷല്‍ ഫീസിനത്തില്‍ 9, 10 ക്ലാസിലെ കുട്ടികളില്‍ നിന്ന് 15 രൂപയും ഈടാക്കുന്നുണ്ട്. സബ് ജില്ലാ വിഹിതം 12 രൂപ, ജില്ലാ വിഹിതം 15 രൂപ, സംസ്ഥാന കായികമേള നടത്തിപ്പിന് 27 രൂപ എന്നിങ്ങനെ 54 രൂപയായിരുന്നു പൊതുവിദ്യാഭ്യാസ ഡയറക്ടറുടെ അക്കൗണ്ടിലേക്ക് അടച്ചിരുന്നത്. പുതിയ ഉത്തരവ് പ്രകാരം രണ്ട് കോടിയിലേറെ രൂപ വിദ്യാഭ്യാസ വകുപ്പിന് അധിക വരുമാനം ലഭിക്കും. കായികാധ്യാപകരും ഇല്ല വിവിധ ആവശ്യങ്ങള്‍ ഉന്നയിച്ച് കായികാധ്യാപകര്‍ നേരത്തെതന്നെ സമരത്തിലാണ്. കായികാധ്യാപക നിയമനങ്ങൾ തടസപ്പെട്ടിരിക്കുന്നതിനാല്‍ സര്‍വീസില്‍ നിന്നു വിരമിക്കുന്നവര്‍ക്ക് പകരം ആളുകള്‍ എത്തുന്നില്ല. ഇതോടെ കായികാധ്യാപകര്‍ ജില്ലയില്‍ പരിമിതമാണ്. കഴിഞ്ഞദിവസം കൊടുമണ്ണില്‍ ജില്ലാ സ്‌കൂള്‍ ഫുട്ബോള്‍ മത്സരം നടത്താന്‍ ആളില്ലായിരുന്നു. സ്‌കൂളുകളില്‍ മറ്റു ജോലികളിലായിരുന്ന അഞ്ച് അധ്യാപകരെ നിര്‍ബന്ധപൂര്‍വം എത്തിച്ചാണ് ഫുട്‌ബോള്‍ നടത്തിയത്. ഫണ്ട് കൂടി ലഭ്യമല്ലെന്നായതോടെ മേളകളുടെനടത്തിപ്പ് ഏറ്റെടുക്കാനാകില്ലെന്ന് കായികാധ്യാപകര്‍ അറിയിച്ചിട്ടുണ്ട്. ഉപജില്ലാതല മത്സരങ്ങള്‍ ഒന്നിച്ചെത്തുമ്പോള്‍ അധ്യാപകരുടെ കുറവ് പ്രശ്‌നമാകും. ജില്ലാതല മത്സരങ്ങള്‍ നിയന്ത്രിക്കാന്‍ പോലും കായികാധ്യാപകരില്ലാത്ത സ്ഥിതിയാണ്.

പട്ടാപ്പകല്‍ കാട്ടാന : കുടമുരുട്ടി, ചണ്ണ മേഖലകള്‍ ഭീതിയില്‍

റാന്നി: പട്ടാപ്പകൽ പൊതുനിരത്തുകളിലും ജനവാസ മേഖലകളിലും കാട്ടാനയെ കണ്ടു തുടങ്ങിയതോടെ ഭയപ്പാടിലായിരിക്കുകയാണ് പ്രദേശവാസികള്‍. നാറാണംമൂഴി പഞ്ചായത്തിലെ കുടമുരുട്ടി, ചണ്ണ തുടങ്ങി പമ്പാനദിയോടടുത്ത ജനവാസ മേഖലകള്‍ അപ്പാടെ കാട്ടാനയെ ഭയന്നാണു കഴിയുന്നത്. ശനിയാഴ്ച പകല്‍ ചണ്ണയില്‍നിന്നു പെരുന്തേനരുവി ജലവൈദ്യുത പദ്ധതി പ്രദേശത്തുകൂടി ചാത്തന്‍തറയിലേക്ക് പോകുന്ന റോഡിലാണ് കാട്ടാനയെ കാണുന്നത്. റോഡിലൂടെ എത്തിയവരാണ് ആനയെ കണ്ടത്. ഭയന്നുപോയവര്‍ ജീവനും കൊണ്ട് രക്ഷപ്പെടുകയായിരുന്നു. പെരുന്തേനരുവി വനമേഖലയിലൂടെ കടന്നുപോകുന്ന റോഡില്‍ നിന്ന ആന സന്ധ്യ വരെ ഇവിടെ നിന്നു പോയിരുന്നില്ല. ഇന്നലെ പകലും റോഡിനു സമീപം കാട്ടില്‍ ഇതു നിലയുറപ്പിച്ചിട്ടുണ്ടെന്നാണ് നാട്ടുകാര്‍ പറയുന്നത്. വനം വകുപ്പുദ്യോഗസ്ഥര്‍ എത്തിയെങ്കിലും ആനയെ വിരട്ടി ഓടിക്കാന്‍ ശ്രമിക്കുക മാത്രമേ അവര്‍ക്കു ചെയ്യാനാകുമായിരുന്നുള്ളൂ. കുറെദൂരം കാട്ടിലേക്കു കയറ്റിവിടാമെന്നല്ലാതെ ഇതുകൊണ്ടൊന്നും യാതൊരു പ്രയോജനവുമില്ലെന്നാണ് പ്രദേശവാസികള്‍ പറയുന്നത്. പിന്നെയും ഇവ ജനവാസ മേഖലകളിലേക്കിറങ്ങി കൃഷികള്‍ അപ്പാടെ നശിപ്പിക്കുകയാണ് പതിവ്. കുടുമുരുട്ടി, ചണ്ണ, കൊച്ചുകുളം, പെരുന്തേനരുവി, ഇടത്തിക്കാവ്, അടുക്കളപ്പാറ, മണക്കയം, കട്ടിക്കല്‍ തുടങ്ങിയ പ്രദേശങ്ങളിലെല്ലാം കാട്ടാന കൃഷികള്‍ നശിപ്പിക്കുന്നുണ്ട്. ഇതിനു പുറമേ നാട്ടുകാരും പെരുന്തേനരുവിയിലേക്കും ജലവൈദ്യുത പദ്ധതി പ്രദേശത്തേക്കുമെത്തുന്ന സന്ദര്‍ശകരും പദ്ധതിയിലെ ജീവനക്കാരും എപ്പോഴും ഉപയോഗിച്ചുവരുന്ന റോഡില്‍ കാട്ടാനയുടെ സാന്നിധ്യമുള്ളത് ആളുകളെ ഭയപ്പെടുത്തുകയാണ്. ജനവാസ മേഖലകള്‍ക്കു സമീപമുള്ള പ്രദേശങ്ങളില്‍ മിക്കപ്പോഴും കാട്ടുപോത്തിന്‍റെ സാന്നിധ്യവുമുണ്ട്. പ്രദേശവാസികളും പവര്‍ഹൗസ് ജീവനക്കാരും പല തവണ കാട്ടുപോത്തിനെ ഈ ഭാഗത്ത് നേരിട്ടു കാണുകയും ഓടി മാറുകയുമായിരുന്നു. ഒരു മാസത്തിനുമുമ്പ് ടാപ്പിംഗ് തൊഴിലാളി പുലിയെ നേരിട്ടു കണ്ട ചാത്തന്‍തറ- താന്നിക്കാപ്പുഴ പ്രദേശത്തിനു സമീപമാണ് പെരുന്തേനരുവി പ്രദേശം. ആനയും പുലിയും കാട്ടുപോത്തുമെല്ലാം നാട്ടുകാരുടെ ഉറക്കം കെടുത്തുമ്പോള്‍ കുട്ടികളെ സ്്കൂളിലയയ്ക്കുന്നതിനും രാവിലെയും വൈകുന്നേരവും ജോലികാര്യങ്ങള്‍ക്കായും മറ്റും പുറത്തിറങ്ങുന്നതിനും കഴിയാത്ത അവസ്ഥയിലാണ് പ്രദേശവാസികള്‍.

എംഡിഎംഎയുമായി രണ്ട് യുവാക്കൾ പിടിയിൽ

തിരുവല്ല: മാഞ്ഞാടി തൈമല ഭാഗത്ത് രണ്ട് യുവാക്കളെ 2.038 ഗ്രാം എംഡിഎംഎയുമായി പിടികൂടി. കവിയൂർ പുളിമല സ്വദേശി നിഖിൽ ഐസക് (27), തൈമല സ്വദേശി ജിജിൻ ജോയ് (24) എന്നിവരാണ് അറസ്റ്റിലായത്. ഇരുവരെയും കോടതിയിൽ ഹാജരാക്കി റിമാൻഡ് ചെയ്തു. ഇവർ ഉപയോഗിച്ച ബൈക്കും കസ്റ്റഡിയിൽ എടുത്തു. എക്സൈസ് സിഐ രാജേന്ദ്രന്‍റെ നേതൃത്വത്തിലായിരുന്നു റെയ്ഡ്.

കാർഷിക മേഖലയിലെ വിജയഗാഥ; ജിഷ്ണുവിന്‍റേത് അതിജീവനത്തിന്‍റെ കഥ

ടി.എസ്. സതീഷ് കുമാർ കോഴഞ്ചേരി: ജിഷ്ണുവിന്‍റെ ജീവിതത്തിൽ പലതും അപ്രതീക്ഷിതമായിരുന്നു. മസ്കറ്റിൽ ജോലി ചെയ്തുകൊണ്ടിരിക്കവേയുണ്ടായ ചില ശാരീരിക അസ്വസ്ഥതകൾ ജിഷ്ണുവിന്‍റെ ജീവിതത്തെ മാറ്റിമറിച്ചു. രണ്ട് കണ്ണുകളുടെയും കാഴ്ച 80 ശതമാനം നഷ്ടപ്പെട്ടപ്പോൾ ബിബിഎ ബിരുദധാരിയായ ഈ ചെറുപ്പക്കാരനു നാട്ടിലേക്കു മടങ്ങേണ്ടിവന്നു. പരാജയപ്പെട്ടു പിൻമാറാനില്ലെന്ന തീരുമാനത്തോടെയാണ് കോഴഞ്ചേരി മേലുകര കുറുന്തോട്ടിക്കൽ വീട്ടിൽ തിരികെ എത്തിയത്. സ്വപ്നങ്ങൾ പലതും കണ്ടു. സ്വന്തമായുള്ള ഒരേക്കര്‍ ഭൂമിയോടൊപ്പം കുടുംബാംഗങ്ങളുടെ രണ്ടേക്കര്‍ ഭൂമിയിൽക്കൂടി പച്ചക്കറി കൃഷി ആരംഭിക്കാൻ തീരുമാനിക്കുകയായിരുന്നു. പന്പാ തീരത്തെ ഫലഭൂയിഷ്ടമായ മണ്ണിൽ വിളവ് മോശമാകില്ലെന്നുറപ്പിലാണ് ജിഷ്ണു വി. നായർ പുതിയ ജീവനോപാധി തേടിയത്. എന്നാല്‍ 2018 ലെ മഹാപ്രളയം കാർഷിക സ്വപ്‌നങ്ങളെല്ലാം തകര്‍ത്തെറിഞ്ഞു. വിളകള്‍ പൂര്‍ണമായും നഷ്ടപ്പെട്ടുവെന്നു മാത്രമല്ല കുമ്മായം നിറഞ്ഞ മണ്ണടിഞ്ഞതിനാല്‍ തന്‍റെ ഭൂമി ഇനി കൃഷിക്ക് ഉപയുക്തമല്ലെന്ന തിരിച്ചറിവും താമസിയാതെ ഉണ്ടായി. അതിജീവനത്തിനുള്ള മാർഗം തേടി ഇറങ്ങിയ പ്രവാസിക്കു മുന്പിൽ മറ്റൊരു അതിജീവനത്തിനുകൂടി പാത തുറന്നു നൽകിയത് കോഴഞ്ചേരി കൃഷി ഓഫീസര്‍ പി. രമേശ് കുമാറാണ്. ശാസ്ത്രീയമായ കൃഷിരീതികൾക്കുള്ള ഉപദേശങ്ങൾ അദ്ദേഹം നൽകി. മണ്ണു പരിശോധന നടത്തി പുതിയ കൃഷിരീതികൾ പരീക്ഷിക്കുകയായിരുന്നു പിന്നീട്. ഇതു വിജയത്തിലേക്കെത്തിയതോടെ 33 കാരനായ ജിഷ്ണുവിന് ആത്മവിശ്വാസം വർധിച്ചു. കൃഷി രീതികളിൽ കൃഷി ഓഫീസറുടെ സഹായത്തോടെ പരീക്ഷണങ്ങൾ നടത്തി. മുന്തിയ ഇനം പാവല്‍, പടവലം, വ്യത്യസ്തങ്ങളായ ചീരകള്‍, പയര്‍ വര്‍ഗങ്ങള്‍, കിഴങ്ങുവര്‍ഗങ്ങളായ ചേന, ചേന്പ്, കാച്ചില്‍, ഏത്തവാഴ എന്നിവയെല്ലാം ഇന്നിപ്പോൾ കൃഷി ചെയ്യുന്നുണ്ട്. വിപണി കണ്ടെത്താൻ ആദ്യകാലത്തൊക്കെ വിഷമം നേരിട്ടു. ഇതിനു പരിഹാരം കണ്ടതും കൃഷി ഭവനാണ്. ഉത്പന്നങ്ങള്‍ നേരിട്ടും ഓണ്‍ലൈനായും കൃഷിഓഫീസിന്‍റെ ഇക്കോഷോപ്പുവഴിയും വിപണനം ചെയ്തുതുടങ്ങിയതോടെ മെച്ചപ്പെട്ട വില ലഭിച്ചു. ജൈവകൃഷി ജൈവ വളമാണ് ഉപയോഗിക്കുന്നത്. പ്രളയാനന്തരം മണ്ണിന്‍റെ ഘടന മാറിയതോടെ വളപ്രയോഗത്തിൽ മിതത്വം പാലിച്ചു. കടലാമൃതം എന്നപേരിലുള്ള ജൈവവളമാണ് കൂടുതലായി ഉപയോഗിക്കുന്നത്. പച്ചക്കപ്പലണ്ടിയും പച്ചച്ചാണകവും വെളളവും ഒരു പ്രത്യേക അളവില്‍ അരച്ച് ഒരു മിശ്രിതമാക്കിയതാണ് കടലാമൃതം. 20 ലിറ്റര്‍ കണ്ടെയിനറില്‍ ഉത്പാദിപ്പിക്കുന്ന ലായനി ഒരു ഏക്കറില്‍ ഉപയോഗിക്കാന്‍ കഴിയും. ഇതിനോടൊപ്പം ആടിന്‍റെ കാഷ്ഠവും വളമായി ഉപയോഗിക്കുന്നുണ്ട്. കാര്‍ഷിക സർവകലാശാല വികസിപ്പിച്ചെടുത്ത പ്രീതി പാവക്കായും കൃഷിയിടത്തില്‍ ധാരാളമായിട്ടുണ്ട്. ഒരു പാവക്കായ്ക്ക് ഏകദേശം 350 ഗ്രാം തൂക്കം ഉണ്ടാകും. കൃഷിയിടത്തിലെ ഈച്ചകളെയും മറ്റു പ്രാണികളെയും നശിപ്പിക്കുന്നതിന് പാളയന്‍തോടന്‍ പഴവും ശര്‍ക്കരയും ഇതിനോടൊപ്പം പാരസെറ്റമോള്‍ ഗുളികയും പൊടിച്ച് മിശ്രിതമാക്കി ചിരട്ടക്കെണി കൃഷിയിടത്തിന്‍റെ പല ഭാഗങ്ങളിലായി വച്ചിട്ടുണ്ട്. ഇതിനോടൊപ്പം മഞ്ഞബോര്‍ഡും സ്ഥാപിച്ചിരിക്കുന്നതിനാല്‍ ഈച്ചകളും മറ്റും വന്നു പറ്റിപ്പിടിച്ചിരിക്കും. അജയ് വഴുതനങ്ങ എന്ന പേരിലുള്ള വഴുതന കൃഷിയിടത്തിലെ പ്രത്യേകതയാണ്. പച്ചക്കറി കൃഷിയില്‍നിന്ന് പ്രതിദിനം വരുമാനം ലഭിക്കുന്നുണ്ടെന്നും ജിഷ്ണു പറഞ്ഞു. ആടുവളർത്തൽ മലബാറി ആടുകളെയും ജിഷ്ണു വളര്‍ത്തുന്നുണ്ട്. ഒരു ലിറ്റര്‍ ആട്ടിന്‍ പാലിന് 100 രൂപയ്ക്കാണ് നൽകുന്നത്. 30 കിലോ തൂക്കം വരുന്ന ആടുകളും ഉണ്ട്. പച്ചക്കറി കൃഷിക്കാവശ്യമായ ജൈവവള ഉത്പാദനത്തിലും ആടുവളർത്തൽ പ്രയോജനപ്പെടുന്നുണ്ട്. കാഴ്ചയുടെ വൈകല്യത്തെ മറന്ന് കൃഷിയെ ഗൗരവത്തോടു കാണുന്ന ജിഷ്ണുവിനെത്തേടി നിരവധി അവാര്‍ഡുകളാണ് എത്തിയത്. കോഴഞ്ചേരി ഗ്രാമപഞ്ചായത്തിലെ മികച്ച കര്‍ഷകന്‍, ജില്ലയിലെ മികച്ച ഭിന്നശേഷി കര്‍ഷകന്‍ അവാര്‍ഡും എന്നിവ ഇതില്‍ ചിലതു മാത്രമാണ്. അവിവാഹിതനായ ജിഷ്ണുവിനെ കൃഷിയിടത്തില്‍ സഹായിക്കുന്നത് അച്ചനും അച്ഛന്‍റെ സഹോദരനും ബന്ധുക്കളുമാണ്. കൃഷി ഓഫീസർ രമേശ് കുമാറിന്‍റെ സാന്നിധ്യവും ഉപദേശങ്ങളുമാണ് എല്ലാറ്റിനും മുതൽക്കൂട്ടാകുന്നതെന്ന് ജിഷ്ണു പറഞ്ഞു. എല്ലാ ദിവസവും വൈകുന്നേരം അദ്ദേഹം തന്‍റെ കൃഷിയിടത്തിലെത്തി വേണ്ട നിര്‍ദ്ദേശം നല്‍കുന്നതിലൂടെ കൂടുതല്‍ കാര്‍ഷിക വിഭവങ്ങള്‍ കൃഷി ചെയ്യാന്‍ താത്പര്യം ഉണ്ടാകുന്നുണ്ടെന്നും യുവകർഷകൻ കൂട്ടിച്ചേർത്തു.

കൃഷിഭവനുകളിൽ ഇന്ന് കർഷകദിനാചരണം

പത്തനംതിട്ട: ചിങ്ങം ഒന്നായ ഇന്ന് കർഷകദിനമായി ആചരിക്കും. കൃഷിഭവനുകളിൽ ഇതോടനുബന്ധിച്ച് പ്രത്യേക പരിപാടികളുണ്ടാകും. കർഷകരെ ആദരിക്കൽ, സെമിനാറുകൾ തുടങ്ങിയവ സംഘടിപ്പിച്ചിട്ടുണ്ട്. മെഴുവേലി ഗ്രാമപഞ്ചായത്തിന്‍റെയും കൃഷിഭവന്‍റെയും സംയുക്താഭിമുഖ്യത്തില്‍ രാവിലെ 10ന് നെടിയകാല മേനോന്‍ സ്മാരക ഗ്രന്ഥശാലയില്‍ സംഘടിപ്പിക്കുന്ന കര്‍ഷക ദിനാചരണം മന്ത്രി വീണാ ജോര്‍ജ് ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്‍റ് പിങ്കി ശ്രീധര്‍ അധ്യക്ഷത വഹിക്കും. മുന്‍ എംഎല്‍എ കെ.സി. രാജഗോപാലന്‍ മുഖ്യപ്രഭാഷണം നടത്തും. പന്തളം ബ്ലോക്ക് പഞ്ചായത്ത് പ്രസിഡന്‍റ് ബി.എസ്. അനീഷ് മോന്‍, അംഗം രജിത കുഞ്ഞുമോന്‍, ഗ്രാമപഞ്ചായത്ത് വൈസ് പ്രസിഡന്‍റ് അനില ചെറിയാന്‍ തുടങ്ങിയവര്‍ പങ്കെടുക്കും. ചടങ്ങില്‍ മികച്ച കര്‍ഷകരെ ആദരിക്കും. കോഴഞ്ചേരി: ഗ്രാമപഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തില്‍ രാവിലെ 10.30ന് പഞ്ചായത്ത് കമ്യൂണിറ്റി ഹാളില്‍ സംഘടിപ്പിക്കുന്ന കര്‍ഷകദിനാചരണം മന്ത്രി വീണാ ജോര്‍ജ് ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്‍റ് സാലി ഫിലിപ്പ് അധ്യക്ഷത വഹിക്കും. ജില്ലാ പഞ്ചായത്തംഗം സാറാ തോമസ്, ഇലന്തൂര്‍ ബ്ലോക്ക് പഞ്ചായത്ത് അംഗം പി.വി. അന്നമ്മ, ഗ്രാമപഞ്ചായത്ത് വൈസ് പ്രസിഡന്‍റ് മേരിക്കുട്ടി തുടങ്ങിയവര്‍ പങ്കെടുക്കും. ചടങ്ങില്‍ മികച്ച കര്‍ഷകരെ ആദരിക്കും. പത്തനംതിട്ട: നഗരസഭ, കാര്‍ഷിക വികസന കര്‍ഷക ക്ഷേമ വകുപ്പ്, കാര്‍ഷിക വികസന സമിതി എന്നിവയുടെ സംയുക്താഭിമുഖ്യത്തില്‍ രാവിലെ 11ന് നഗരസഭാ കൗണ്‍സില്‍ ഹാളില്‍ സംഘടിപ്പിക്കുന്ന കര്‍ഷക ദിനാചരണം മന്ത്രി വീണാ ജോര്‍ജ് ഉദ്ഘാടനം ചെയ്യും. നഗരസഭാ ചെയര്‍മാന്‍ ടി. സക്കീര്‍ ഹുസൈന്‍ അധ്യക്ഷത വഹിക്കും. നഗരസഭാ സ്ഥിരം സമിതി അധ്യക്ഷരായ കെ.ആര്‍. അജിത്കുമാര്‍, മേഴ്സി വര്‍ഗീസ്, അനില അനില്‍, എസ്. ഷെമീര്‍ തുടങ്ങിയവര്‍ പങ്കെടുക്കും. ചടങ്ങില്‍ മികച്ച കര്‍ഷകരെ ആദരിക്കും.

ഇൻഫാം കർഷക ദിനാചരണം

റാന്നി: പ്രകൃതിയോടും സാഹചര്യങ്ങളോടും മല്ലടിച്ച് നാടിന് അന്യമാകുന്ന കാർഷിക സംസ്കൃതി വീണ്ടെടുക്കാൻ യോജിച്ച മുന്നേറ്റം ഉണ്ടാകണമെന്ന് ഇൻഫാം പത്തനംതിട്ട കാർഷിക താലൂക്ക് ഡയറക്ടർ ഫാ. സിജോ പന്നലകുന്നേൽ. കർഷകദിനാചരണത്തോടനുബന്ധിച്ച് ഇൻഫാം റാന്നി, പത്തനംതിട്ട കാർഷിക താലൂക്കിന്‍റെ ആഭിമുഖ്യത്തിൽ നടന്ന സമ്മേളനം കണ്ണംപള്ളി സെന്‍റ് മേരീസ് പാരിഷ് ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കർഷകൻ നാടിന്‍റെ നട്ടെല്ലാണ് കാർഷിക മേഖലയ്ക്കും കർഷകരുടെ നിലനി‌ല്പിനും അനുയോജ്യമായ സാഹചര്യം ഉണ്ടാക്കിയെടുക്കാൻ അവർ യോജിച്ചു മുന്നേറണം. കാർഷിക മേഖലയുടെയും കർഷകരുടെയും ഉന്നമനത്തിന് ഇൻഫാം ചെയ്യുന്ന പ്രവർത്തനങ്ങൾ രാജ്യത്തിനു തന്നെ മാതൃകയാണെന്നും ഫാ. സിജോ പറഞ്ഞു. റാന്നി കാർഷിക താലൂക്ക് രക്ഷാധികാരി ഫാ. തോമസ് മുണ്ടിയാനിക്കൽ അധ്യക്ഷത വഹിച്ചു. കണ്ണംപള്ളി ഗ്രാമസമിതി ഡയറക്ടർ ഫാ. ബിജു ജോൺ ചുളയില്ലാപ്ലാക്കൽ, മഹിളാ സമാജ് താലൂക്ക് പ്രസിഡന്‍റ് ഷൈനി ജോസഫ് എന്നിവർ പ്രസംഗിച്ചു. റിട്ട. കൃഷി ഓഫീസർ അഭിലാഷ് കരിമുളയ്ക്കൽ ക്ലാസിനു നേതൃത്വം നൽകി. കാർഷിക താലൂക്ക് ഡയറക്ടർ ഫാ. ജേക്കബ് കൈപ്പൻ പ്ലാക്കൽ സ്വാഗതവും താലൂക്ക് പ്രസിഡന്‍റ് ജോസ് ആലപ്പാട്ട് നന്ദിയും പറഞ്ഞു. ഇൻഫാം കാഞ്ഞിരപ്പള്ളി കാർഷിക ജില്ല എക്സിക്യൂട്ടീവ് കമ്മിറ്റിയംഗം ജോർജുകുട്ടി കടിയക്കുഴി, ഷൈനി ജോസഫ്, ലൗലി ജോസ്, സജി മുകളത്ത്, ഷാന്‍റി ആന്‍റണി, പോൾസൺ മുണ്ടാട്ടു ചുണ്ടയിൽ, താലൂക്ക്, ഗ്രാമസമിതി എക്സിക്യൂട്ടീവ് കമ്മിറ്റിയംഗങ്ങൾ തുടങ്ങിയവർ നേതൃത്വം നൽകി.

തെങ്ങ് കടപുഴകി വീണ് വീടിനു നാശനഷ്ടം

‌തിരുവല്ല : സമീപ പുരയിടത്തിൽ നിന്നിരുന്ന തെങ്ങ് കടപുഴകി വീണ് കാർപോർച്ച് തകർന്നു. ആർക്കും പരിക്കില്ല. തുകലശേരി ഹെവൻ ഊള്ളിരിക്കൽ വീട്ടിൽ ജോസഫ് ജോണിന്‍റെ വീട്ടിലെ പോർച്ചാണ് തകർന്നത്. വെള്ളിയാഴ്ച രാവിലെ ഏഴോടെയാണ് സംഭവം. സമീപ പുരയിടത്തിൽ അപകടകരമായനിലയിൽ നിന്ന തെങ്ങാണ് വീണത്. ഇത് വെട്ടുന്നതിനായി വസ്തു ഉടമയോട് നിരന്തരം ആവശ്യപ്പെട്ടിട്ടും നടപടി ഇല്ലാതെ വന്നതിനെത്തുടർന്ന് നഗരസഭയ്ക്ക് പരാതി നൽകിയിരുന്നു. എന്നാൽ നഗരസഭാധികൃതർ പരിശോധനയ്ക്കെത്തിയെങ്കിലും നടപടികൾ സ്വീകരിച്ചില്ലെന്ന് ജോസഫ് ജോൺ പറഞ്ഞു.

ഓമല്ലൂരിൽ ചുഴലിക്കാറ്റ് നാശം വിതച്ചു

പത്തനംതിട്ട: ഇന്നലെ ഉച്ചയോടെ വീശിയടിച്ച ചുഴലിക്കാറ്റ് ഓമല്ലൂരിലും സമീപ പ്രദേശങ്ങളിലും വൻ നാശനഷ്ടം വിതച്ചു. രണ്ടാം വാർഡ് ഐമാലി മില്ല് ജംഗ്ഷന് സമീപം പത്തോളം വീടുകൾ ഭാഗികമായും ഒരു വീട് പൂർണമായും തകർന്നു. നെല്ലിക്കുന്നത്ത് രമാദേവിയുടെ വീടാണ് പൂർണമായും നശിച്ചത്. സമീപത്തുനിന്ന പ്ലാവ് കടപുഴകി വീണാണ് നാശ നഷ്ടങ്ങൾ ഉണ്ടായത്. വീട്ടിലെ ഇലക്‌ട്രോണിക്സ് ഉപകരണങ്ങളടക്കം നശിച്ചു. അയൽവാസി തുളസി ഭവനത്തിൽ തുളസിദാസിന്‍റെ വീടിന്‍റെ മേൽക്കൂരയിലെ ഓടുകൾ നഷ്ടപ്പെട്ടു. നിരവധി സ്ഥലങ്ങളിൽ മരങ്ങൾ കടപുഴകി വീണ് വീടുകൾക്കും കെട്ടിടങ്ങൾക്കും നാശനഷ്ടമുണ്ടായി. വൈദ്യുത പോസ്റ്റുകളും കന്പികളും തകർന്നു. വൈദ്യുതി വിതരണവും നിലച്ചു. മരങ്ങൾ റോഡിലേക്ക് വീണു ഗതാഗതവും തടസപ്പെട്ടിരുന്നു.

ഡിഎച്ച്ക്യുസി പത്തനംതിട്ടയും ഫയര്‍ഫോഴ്‌സും മികച്ച പ്ലാറ്റൂണുകൾ

പത്തനംതിട്ട: കാതോലിക്കേറ്റ് കോളജ് മൈതാനത്ത് നടന്ന 79-ാം സ്വാതന്ത്ര്യദിനാഘോഷത്തില്‍ സായുധ സേനാ വിഭാഗത്തില്‍ ആര്‍. സനല്‍ നയിച്ച പത്തനംതിട്ട ഡിഎച്ച്ക്യുസിയും സായുധേതര വിഭാഗത്തില്‍ സ്റ്റേഷന്‍ ഓഫീസര്‍ കെ.എസ്. സന്ദീപ് നയിച്ച ഫയര്‍ഫോഴ്‌സ് ടീമും ഒന്നാം സ്ഥാനത്തെത്തി. സായുധ സേനാ വിഭാഗത്തില്‍ രണ്ടാം സ്ഥാനം എക്സൈസ് ഇന്‍സ്പെക്ടര്‍ മിഥുന്‍ നയിച്ച ടീമിനാണ്. സായുധേതര വിഭാഗത്തില്‍ രണ്ടാം സ്ഥാനം സെക്‌ഷന്‍ ഫോറസ്റ്റ് ഓഫീസര്‍ ഒ.എ. ശ്യാംകുമാറിന്‍റെ ടീം സ്വന്തമാക്കി. എന്‍സിസി വിഭാഗത്തില്‍ ഒന്നാം സ്ഥാനം പത്തനംതിട്ട 14ബിഎന്‍ നേടി. ഹയര്‍സെക്കന്‍ഡറി വിഭാഗം എസ്പിസിയില്‍ അങ്ങാടിക്കല്‍ എസ്എന്‍വിഎച്ച്എസ്എസിലെ എ. ആകാശ് നയിച്ച ടീം ഒന്നാം സ്ഥാനവും പത്തനംതിട്ട എംടിഎച്ച് എസ്എസിലെ അയന മറിയം ജേക്കബ് നയിച്ച ടീം രണ്ടാം സ്ഥാനവും നേടി. ഹൈസ്‌കൂള്‍ വിഭാഗത്തില്‍ പെരിങ്ങനാട് ടിഎംജിഎച്ച്എസ്എസിലെ നിരവധ്യ നയിച്ച ടീം ആദ്യ സ്ഥാനവും മൈലപ്ര സേക്രട്ട് ഹാര്‍ട്ട് എച്ച്എസ്എസിലെ അഭിനവ് കൃഷ്ണന്‍ നയിച്ച ടീം രണ്ടാം സ്ഥാനവും സ്വന്തമാക്കി. സ്‌കൗട്ട് വിഭാഗത്തില്‍ മൈലപ്ര മൗണ്ട് ബഥനി ഇഎച്ച്എസ്എസിലെ അതുല്‍ നയിച്ച ടീമിന് ഒന്നാം സ്ഥാനവും ചന്ദനപ്പള്ളി റോസ് ഡെയ്ല്‍ റസിഡന്‍ഷ്യല്‍ സ്‌കൂളിലെ ഋതു രതീഷ് നയിച്ച ടീം രണ്ടാം സ്ഥാനവും കരസ്ഥമാക്കി. ഗൈഡ്സ് വിഭാഗത്തില്‍ പ്രമാടം നേതാജി എച്ച്‌എസിലെ ആവണി അനീഷ് നയിച്ച ടീം ഒന്നാം സ്ഥാനവും മൈലപ്ര മൗണ്ട് ബഥനി ഇഎംഎച്ച്എസ്എസിലെ ധ്വനി നയിച്ച ടീം രണ്ടാം സ്ഥാനവും നേടി. ജെആര്‍സി വിഭാഗത്തില്‍ ഒന്നാം സ്ഥാനം പത്തനംതിട്ട സെന്‍റ് മേരീസ് എച്ച്എസിലെ ബെറ്റീന ഗ്രേസ് നയിച്ച ടീമിനാണ്. രണ്ടാം സ്ഥാനം കോന്നി പയ്യനാമണ്ണ് കാര്‍മല്‍ സെന്‍ട്രല്‍ സ്‌കൂളിലെ എ. ആല്‍ബി നയിച്ച ജെആര്‍സിയും അടൂർ സെന്‍റ് മേരീസ് എച്ച്എസിലെ സാന്ദ്രജിത്ത് നയിച്ച ജെആര്‍സിയും കരസ്ഥമാക്കി. വടശേരിക്കര എംആര്‍എസ്‌കെഎസ്എസിലെ ബി. അമല്‍ നയിച്ച ബാന്‍ഡിനാണ് ഒന്നാം സ്ഥാനം. ചെങ്ങരൂര്‍ സെന്‍റ് തേരേസസ് ബിസിഎച്ച്എസ്എസിലെ ജിസ്‌ല സൂസന്‍ ജേക്കബ് നയിച്ച ബാന്‍ഡ് രണ്ടാം സ്ഥാനവും കരസ്ഥമാക്കി. സിവില്‍ ഡിഫന്‍സില്‍ അശ്വിന്‍ മോഹന്‍ നയിച്ച ഫയര്‍ഫോഴ്‌സ് ടീം ഒന്നാം സ്ഥാനം നേടി. മികച്ച പ്രകടനം കാഴ്ചവച്ച ഗ്രൂപ്പുകള്‍ക്കുള്ള സമ്മാനദാനം മന്ത്രി വീണാ ജോര്‍ജ് നിര്‍വഹിച്ചു. വിവിധ സാംസ്‌കാരിക പരിപാടി അവതരിപ്പിച്ച വിദ്യാര്‍ഥികള്‍ക്ക് പുരസ്‌കാരം നല്‍കി.

സിപിഐ ജില്ലാ സമ്മേളനത്തിൽ ചേരിതിരിഞ്ഞു ചർച്ച : വിമർശനം താത്പര്യമില്ലാത്തവർക്ക് പോകാമെന്ന് ബിനോയ് വിശ്വം

പത്തനംതിട്ട: വിഭാഗീയത ഒഴിവാക്കാൻ ലക്ഷ്യമിട്ടു നടത്തിയ ജില്ലാ സമ്മേളനത്തിൽ വിഭാഗീയത ഒഴിവാക്കാനുള്ള ശ്രമം വിലപ്പോയില്ല. സിപിഐ ജില്ലാ സമ്മേളനത്തിന്‍റെ രണ്ടാംദിന ചർച്ചയിലും വിഭാഗീയത നിഴലിച്ചു. സംസ്ഥാന സർക്കാരിനെതിരേയും പാർട്ടി സംസ്ഥാന, ജില്ലാ നേതൃത്വങ്ങൾക്കെതിരേയും രൂക്ഷ വിമർശനമാണ് ഉയർന്നത്. വെള്ളിയാഴ്ച അവതരിപ്പിച്ച രാഷ്‌ട്രീയ റിപ്പോർട്ടിനു പിന്നാലെ നടന്ന പൊതുചർച്ചയിൽ ഏകാധിപതിയായ മുഖ്യമന്ത്രിക്കു മുന്നിൽ സിപിഐ സംസ്ഥാന നേതൃത്വം മുട്ടുമടക്കുകയാണെന്നു പ്രതിനിധികൾ വിമർശിച്ചിരുന്നു. മുൻകാലങ്ങളുമായി താരതമ്യം ചെയ്താൽ ഒട്ടും മികവില്ലാത്ത നേതൃത്വമാണ് സംസ്ഥാനതലത്തിലുള്ളത്. പാർട്ടിയുടെ വ്യക്തിത്വം സിപിഎമ്മിനു മുന്നിൽ അടിയറവു വയ്ക്കുകയാണെന്നും ആരോപണമുണ്ടായി. മുഖ്യമന്ത്രിയുടെ നവകേരളയാത്ര ഉല്ലാസയാത്രയായിരുന്നുവെന്നും അതിനിടയിൽ നടത്തിയ രക്ഷാദൗത്യം നാണക്കേട് ഉണ്ടാക്കിയെന്നും ആരോപണം ഉയർന്നു. കേന്ദ്രം കേരളത്തെ സാമ്പത്തികമായി വരിഞ്ഞുമുറുക്കുന്നതുപോലെ ധനവകുപ്പ് സിപിഐ മന്ത്രിമാരുടെ വകുപ്പുകൾക്കു പണം നല്കാതെ വരിഞ്ഞുമുറുക്കുകയാണെന്നും സംഘടന റിപ്പോർട്ടിൻമേലുള്ള പൊതുചർച്ചയിൽ ആരോപണങ്ങൾ ഉയർന്നു. വാക്കേറ്റം, വിമർശനം ഗ്രൂപ്പ് , പൊതു ചർച്ചകൾക്കിടെ അടൂരിൽനിന്നുള്ള പ്രതിനിധികൾ ചേരിതിരിഞ്ഞ് വാക്കേറ്റവും നടത്തി. ഇതോടെ സംസ്ഥാന സെക്രട്ടറി ബിനോയ് വിശ്വം ഇടപെട്ടു. പ്രതിനിധികളെ രൂക്ഷമായി വിമർശിച്ചു. കമ്യൂണിസ്റ്റ് പാർട്ടിയുടെ സമ്മേളനമാണ് നടക്കുന്നത്. അതിന്‍റെ നിലവാരം പുലർത്തണം. വിമർശനങ്ങളെ മാനിക്കാൻ കഴിയാത്തവർക്ക് ഇറങ്ങിപ്പോകാമെന്നും ബിനോയ് വിശ്വം പറഞ്ഞു. ഇതോടെയാണ് ബഹളം നിലച്ചത്. മുൻ ജില്ലാ സെക്രട്ടറി എ.പി.ജയനെ വ്യാജപരാതിയുടെ പേരിൽ സംസ്ഥാന നേതൃത്വം മാറ്റിയെന്ന് ശനിയാഴ്ച ഒരുവിഭാഗം പ്രതിനിധികൾ കുറ്റപ്പെടുത്തി. മറ്റ് ജില്ലാ കമ്മിറ്റി അംഗങ്ങൾക്കെതിരേ അഴിമതി ആരോപണം ഉയർന്നപ്പോൾ ഒരു നടപടിയും എടുക്കാത്തത് വിഭാഗീയതയുടെ ഭാഗമാണ്. ജില്ലയിൽ വിഭാഗീയത കാൻസർ പോലെ പടരുകയാണെന്നും തിരുവല്ല കമ്മറ്റി ആരോപിച്ചു. പോലീസിനെതിരേ വെള്ളിയാഴ്ച അവതരിപ്പിച്ച രാഷ്‌ട്രീയ റിപ്പോർട്ടിൽ പോലീസ് അമിതാധികാരം കാട്ടുന്നുവെന്ന് കുറ്റപ്പെടുത്തിയിരുന്നു. എഡിജി.പി അജിത് കുമാറിനെപോലുള്ള ഉദ്യോഗസ്ഥർ മന്ത്രിമാരെ പോലുംഅംഗീകരിക്കുന്നില്ല. കൊടി സുനിയെപ്പോലുള്ള പ്രതികൾക്ക് ജയിൽ വിശ്രമകേന്ദ്രമാണെന്നും റിപ്പോർട്ടിൽ വിമർശിച്ചിരുന്നു. ലോക്സഭ തെരഞ്ഞെടുപ്പിൽ ജില്ലയിലെ എൽഡിഎഫ് സ്ഥാനാർഥി പരാജയപ്പെടാൻ കാരണം സിപിഎമ്മിന്‍റെ സംഘടനാവീഴ്ചകളും എകോപനത്തിലെ പോരായ്മകളാണെന്നും റിപ്പോർട്ടിൽ പറയുന്നു. മത്സരസാധ്യത മുന്നിൽകണ്ട് ചിറ്റയത്തെ നിർദേശിച്ച് നേതൃത്വം പത്തനംതിട്ട: സിപിഐ ജില്ലാ സെക്രട്ടറി സ്ഥാനത്തേക്ക് ജില്ലയിൽനിന്ന് ഒന്നിലധികം ആളുകൾ രംഗത്തെത്തുമെന്നായതോടെ മത്സരം ഒഴിവാക്കാൻ സംസ്ഥാന നേതൃത്വത്തിന്‍റെ ഇടപെടൽ. സംസ്ഥാന കൗൺസിൽ കൂടിയാലോചനയ്ക്കു ശേഷം ഡെപ്യൂട്ടി സ്പീക്കർ ചിറ്റയം ഗോപകുമാറിനെ സെക്രട്ടറി സ്ഥാനത്തേക്കു നിർദേശിക്കുകയായിരുന്നു. ജില്ലാ സെക്രട്ടറി സ്ഥാനത്തേക്കു മത്സരം നടന്നാൽ പാർട്ടിയിലെ ചേരിതിരിവ് രൂക്ഷമാകുമെന്നു കണ്ടതോടെയാണിത്. 50 അംഗ ജില്ലാ കൗൺസിൽ അംഗങ്ങളെയും 28 അംഗ സംസ്ഥാന സമ്മേളന പ്രതിനിധികളെയും തെരഞ്ഞെടുത്തു. മുൻ ജില്ലാ സെക്രട്ടറി എ.പി. ജയൻ ജില്ലാ കൗൺസിലിലേക്കു തിരിച്ചെത്തി. പാർട്ടി നടപടിക്കു വിധേയനായ അദ്ദേഹം താഴെത്തട്ടിൽനിന്നു സമ്മേളന പ്രതിനിധിയായി എത്തിയാണ് ജില്ലാ കൗൺസിലിൽ ഇടം നേടിയത്. ജില്ലാ കൺസിലിൽ തിരികെ എത്തിയതിൽ ജയൻ സന്തോഷം പ്രകടിപ്പിച്ചു. പാർട്ടിയിൽ നടപടിക്കു വിധേയനായപ്പോൾ ഏറെ ദുഃഖിതനായിരുന്നുവെന്ന് അദ്ദേഹം പറഞ്ഞു. ഭാരിച്ച ഉത്തരവാദിത്വമെന്ന് ചിറ്റയം ഗോപകുമാർ പത്തനംതിട്ട: ജില്ലയിലെ പാർട്ടിയെ ഐക്യത്തോടെ കൂട്ടിയോജിപ്പിച്ചു ശക്തിപ്പെടുത്തുകയെന്ന ഭാരിച്ച ഉത്തരവാദിത്വമാണ് നിർവഹിക്കാനുള്ളതെന്നു സിപിഐ ജില്ലാ സെക്രട്ടറിയായി തെരഞ്ഞെടുക്കപ്പെട്ട ചിറ്റയം ഗോപകുമാർ മാധ്യമങ്ങളോടു പറഞ്ഞു. ഏറെ വെല്ലുവിളി നിറഞ്ഞ കാലഘട്ടത്തിലാണ് പുതിയ ചുമതല ഏൽക്കുന്നത്. കർഷക തൊഴിലാളി - ട്രേഡ് യൂണിയൻ രംഗങ്ങളിലെ പ്രവർത്തന പരിചയവും പാർലമെന്‍ററി രംഗത്തെ അനുഭവങ്ങളും കരുത്താകുമെന്നാണ് പ്രതീക്ഷ. വർഗീയ - ഫാസിസ്റ്റ് ശക്തികൾക്കെതിരായ പോരാട്ടം ശക്തിപ്പെടുത്തുമെന്നും ചിറ്റയം പറഞ്ഞു.

ഭരണഘടന സംരക്ഷിക്കേണ്ടത് ഓരോരുത്തരുടെയും കടമ: മന്ത്രി വീണാ ജോര്‍ജ്

പത്തനംതിട്ട: രാജ്യത്തിന്‍റെ ഭരണഘടന സംരക്ഷിക്കേണ്ടത് ഓരോരുത്തരുടെയും ഉത്തരവാദിത്വമെന്ന് ആരോഗ്യവകുപ്പ് മന്ത്രി വീണാ ജോര്‍ജ്. പത്തനംതിട്ട കാതോലിക്കേറ്റ് കോളജ് മൈതാനത്ത് നടന്ന 79-ാം സ്വാതന്ത്ര്യദിനാഘോഷത്തില്‍ ദേശീയ പതാക ഉയര്‍ത്തി സന്ദേശം നൽകി പ്രസംഗിക്കുകയായിരുന്നു മന്ത്രി. ജനുവരി 26ലെ റിപ്പബ്ലിക്ദിനാഘോഷം ജില്ലയിലെ പുതിയ സ്റ്റേഡിയത്തില്‍ നടത്താമെന്ന പ്രതീക്ഷയും മന്ത്രി പങ്കുവച്ചു. മുഖ്യാതിഥിയായി പങ്കെടുത്ത മന്ത്രി പരേഡ് പരിശോധിച്ച് അഭിവാദ്യം സ്വീകരിച്ചു. പോലീസ് മൂന്ന്, ഫോറസ്റ്റ് ഒന്ന്, ഫയര്‍ഫോഴ്സ് രണ്ട്, എക്സൈസ് ഒന്ന്, എസ്പിസി ആറ്, സ്‌കൗട്ട് ആന്‍ഡ് ഗൈഡ്സ് നാല്, ജൂണിയര്‍ റെഡ് ക്രോസ് മൂന്ന്, ഡിസ്പ്ലേ ബാന്‍ഡ് സെറ്റ് രണ്ട് എന്നിങ്ങനെ പ്ലറ്റൂണുകള്‍ പരേഡില്‍ അണിനിരന്നു. പെരുനാട് പോലീസ് സ്റ്റേഷന്‍ ഇന്‍സ്‌പെക്ടര്‍ ജി. വിഷ്ണുവായിരുന്നു പരേഡ് കമാന്‍ഡര്‍. തുടര്‍ന്ന് ജില്ലയിലെ വിവിധ സ്‌കൂളുകളില്‍നിന്നുള്ള വിദ്യാര്‍ഥികള്‍ ദേശഭക്തിഗാനം, സുംബാ ഡാന്‍സ്, വഞ്ചിപ്പാട്ട്, ദേശീയോദ്ഗ്രഥന നൃത്തം എന്നിവ അവതരിപ്പിച്ചു. മികച്ച പ്രകടനം കാഴ്ചവച്ച ഗ്രൂപ്പുകള്‍ക്കുള്ള ട്രോഫി വിതരണവും സമ്മാനദാനവും മന്ത്രി നിര്‍വഹിച്ചു. ജില്ലാ കളക്ടര്‍ എസ്. പ്രേം കൃഷ്ണന്‍, ജില്ലാ പോലീസ് മേധാവി ആര്‍. ആനന്ദ്, പത്തനംതിട്ട നഗരസഭാ ചെയര്‍മാന്‍ ടി. സക്കീര്‍ ഹുസൈന്‍, കൗണ്‍സിലര്‍മാരായ കെ. ജാസിം‌കുട്ടി, സി.കെ. അര്‍ജുനന്‍, പി.കെ. അനീഷ്, എം.സി. ഷരീഫ്, എ. സുരേഷ് കുമാര്‍, നീനു മോഹന്‍, എഡിഎം ബി. ജ്യോതി, കാതോലിക്കേറ്റ് കോളജ് പ്രിന്‍സിപ്പല്‍ ഡോ. സിന്ധു ജോണ്‍സ്, വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ദമ്പതികളിൽനിന്ന് പണവും സ്വർണവും തട്ടിയെടുത്ത സ്ത്രീ മറ്റൊരു കേസിൽ വീണ്ടും അറസ്റ്റിൽ

അടൂർ: ദിവ്യദൃഷ്ടിയുണ്ടെന്ന് പറഞ്ഞ് കടമ്പനാടുള്ള വയോധികരായ ദമ്പതികളിൽനിന്ന് പണവും സ്വർണവും തട്ടിയെടുത്ത സ്ത്രീ സമാനമായ മറ്റൊരു കേസിൽ വീണ്ടും അറസ്റ്റിൽ. അടൂർ പള്ളിക്കൽ ചേന്നം പുത്തൂർ ഭാഗം തുളസീഭവനിൽ തുളസി(54) യെയാണ് അടൂർ പോലീസ് അറസ്റ്റ് ചെയ്തത്. തെങ്ങമം സ്വദേശി മായാദേവിയുടെ പരാതിയേത്തുടർന്നാണ് അറസ്റ്റ്. കഴിഞ്ഞ ഞായറാഴ്ച സമാനമായ കേസിൽ തുളസിയെ ഏനാത്ത് പോലീസ് അറസ്റ്റ് ചെയ്തിരുന്നു. 2025 ജനുവരിയിൽ മായാദേവിയുടെ വീട്ടിലെത്തിയ തുളസി തനിക്ക് ദിവ്യദൃഷ്ടിയുണ്ടെന്നും മകന് ജീവഹാനി ഉണ്ടാകുമെന്നും പറഞ്ഞ് ഭയപ്പെടുത്തി. തുടർന്ന് ഒരു പവർ തൂക്കം വരുന്ന സ്വർണ മാല, ആറ് ഗ്രാം തൂക്കം വരുന്ന രണ്ട് സ്വർണ കമ്മൽ എന്നിവ കൈക്കലാക്കി കടന്നുകളഞ്ഞുവെന്നാണ് പരാതി.

മഹിളാ സാഹസ് യാത്ര ജില്ലാതല പര്യടനം ആരംഭിച്ചു

തിരുവല്ല: മഹിളാ കോണ്‍ഗ്രസ് സംസ്ഥാനപ്രസിഡന്‍റ് ജെബി മേത്തര്‍ എംപി നയിക്കുന്ന മഹിളാ സാഹസ് യാത്രയുടെ പത്തനംതിട്ട ജില്ലയിലെ പര്യടന പരിപാടി തിരുവല്ലയില്‍ ഡിസിസി പ്രസിഡന്‍റ് പ്രഫ. സതീഷ് കൊച്ചുപറന്പിൽ ഉദ്ഘാടനം ചെയ്തു. കേരളത്തിലെ വീട്ടമ്മമാരുടെ പ്രതിഷേധാഗ്നിയില്‍ സംസ്ഥാന ഭരണകൂടം വെന്തു വെണ്ണീറാകുമെന്ന് ഡിസിസി പ്രസിഡന്‍റ് പറഞ്ഞു. മഹിളാ കോണ്‍ഗ്രസ് മണ്ഡലം പ്രസിഡന്‍റ് പ്രസന്നകുമാരി അധ്യക്ഷത വഹിച്ചു. കെപിസിസി ജനറല്‍ സെക്രട്ടറി പഴകുളം മധു, മഹിളാ കോണ്‍ഗ്രസ് ജില്ലാ പ്രസിഡന്‍റ് രജനി പ്രദീപ്, തുടങ്ങിയവർ പ്രസംഗിച്ചു. വിവിധ മണ്ഡലങ്ങളിൽ കെപിസിസി, ഡിസിസി നേതാക്കൾ പര്യടന പരിപാടി ഉദ്ഘാടനം ചെയ്തു.

വിസമയം തീര്‍ത്ത് ദേശീയോദ്ഗ്രഥന നൃത്തം

പത്തനംതിട്ട: കാതോലിക്കേറ്റ് കോളജ് മൈതാനത്ത് നടന്ന 79-ാം സ്വാതന്ത്ര്യദിനാഘോഷത്തില്‍ വെച്ചൂച്ചിറ ജവഹര്‍ നവോദയ വിദ്യാലയത്തിലെ കുട്ടികളുടെ ദേശീയോദ്ഗ്രഥന നൃത്തം ശ്രദ്ധേയമായി. രാജ്യത്തെ വിവിധ നൃത്തരൂപങ്ങള്‍ ഒരുമിച്ച് വേദിയില്‍ അവതരിപ്പിച്ചാണ് കുട്ടികള്‍ വിസ്മയം തീര്‍ത്തത്. 32 പേരടങ്ങുന്നതായിരുന്നു സംഘം. വിദ്യാലയത്തിലെ കംപ്യൂട്ടര്‍ സയന്‍സ് അധ്യാപികയായ വീണ മോഹനായിരുന്നു പരിശീലക.

വീടുകയറി ആക്രമണം മൂന്നുപേർ അറസ്റ്റിൽ

അടൂർ: ഉച്ചത്തിൽ പാട്ടുവച്ചത് ചോദ്യം ചെയ്തതുമായി ബന്ധപ്പെട്ട തർക്കത്തിൽ വീടുകയറി അക്രമണം. സംഭവത്തിൽ മൂന്നുപേർ അറസ്റ്റിൽ. പെരിങ്ങനാട് മുളമുക്കിൽ താമസിക്കുന്ന ആനന്ദ് ഭവനിൽ എ.എസ്. ആനന്ദ്(29), മഹാദേവവിലാസം വീട്ടിൽ അശ്വിൻ ദേവ് (26), ഇടുക്കി പെരുവന്താനത്തുനിന്ന് മഠത്തിൽ വടക്കേതിൽ വീട്ടിൽ എം.ജി. അജിത്ത്(36) എന്നിവരെയാണ് അടൂർ പോലീസ് അറസ്റ്റ് ചെയ്തത്. പെരിങ്ങനാട് മുളമുക്ക് ഗിരീഷ് ഭവനത്തിൽ ഗിരീഷ്, ഗിരീഷിന്‍റെ അമ്മ ഗീത, അച്ഛൻ രാജൻ എന്നിവരെയാണ് ഇവർ അക്രമിച്ചത്. വ്യാഴാഴ്ച രാത്രി 7.30-നായിരുന്നു സംഭവം. ആക്രമണം നടത്തിയവർ വാടകയ്ക്കു താമസിച്ചിരുന്ന വീട്ടിൽ ഉച്ചത്തിൽ പാട്ടുവച്ചത് ഗിരീഷും വീട്ടുകാരും ചോദ്യം ചെയ്തു. ഇതേത്തുടർന്നുണ്ടായ തർക്കമാണ് സംഘർഷത്തിൽ കലാശിച്ചതെന്ന് പറയുന്നു.

കോയിപ്രത്തെ യുവതിയുടെ കൊലപാതകം: കത്തി കണ്ടെത്തി

പത്തനംതിട്ട: ഭാര്യയെ കുത്തിക്കൊല്ലുകയും ഭാര്യാപിതാവിനെയും സഹോദരിയെയും കുത്തിപരിക്കേൽപ്പിക്കുകയും ചെയ്ത ഭര്‍ത്താവ് അജികുമാര്‍ ആക്രമണത്തിന് ഉപയോഗിച്ച കത്തി കോയിപ്രം പോലീസ് കണ്ടെടുത്തു. കവിയൂര്‍ കോട്ടൂര്‍ സ്വദേശി ജയകുമാര്‍ (അജി, 42)യാണ് ഭാര്യ ശാരിമോളെ (34) കുത്തിക്കൊലപ്പെടുത്തിയത്. ശാരിയുടെ പിതാവ് കെ. ശശി, സഹോദരി രാധാമണി എന്നിവരെ ഗുരുതരമായി പരിക്കേൽപ്പിക്കുകയും ചെയ്തു. ഇതിനായി ഇയാള്‍ ഉപയാഗിച്ച കത്തിയാണ് തന്ത്രപരമായ അന്വേഷണത്തിലൂടെ കണ്ടെത്തിയത്. ജില്ലാ പോലീസ് മേധാവിയുടെ നിര്‍ദേശപ്രകാരം കത്തി കണ്ടെത്താനുള്ള തെരച്ചിലിന്‍റെ ഭാഗമായി സംഭവശേഷം അജികുമാര്‍ ട്രെയിനില്‍ കായംകുളം മുതല്‍ ചെങ്ങന്നൂര്‍ വരെ സഞ്ചരിച്ചത് പലതവണ പോലീസ് പുനരാവിഷ്‌കരിച്ചു. ട്രെയിന്‍ യാത്രയ്ക്കിടെ കത്തി വലിച്ചെറിഞ്ഞതായി ചോദ്യം ചെയ്യലില്‍ ഇയാള്‍ വെളിപ്പെടുത്തിയതിന്‍റെ അടിസ്ഥാനത്തിലായിരുന്നു പോലീസ് നടപടി. ജുഡീഷല്‍ കസ്റ്റഡിയില്‍ കഴിഞ്ഞുവന്നഅജികുമാറിനെ 12ന് പോലീസ് കസ്റ്റഡിയില്‍ വാങ്ങി നടത്തിയ തെളിവെടുപ്പില്‍ ഈ വഴിയിലൂടെ പോലീസ് സംഘത്തിലെ ഉദ്യോഗസ്ഥര്‍ പലതവണ യാത്ര ചെയ്തു. സ്വതന്ത്രസാക്ഷി എന്ന നിലയ്ക്ക് കോയിപ്രം വില്ലേജ് ഓഫീസിലെ വില്ലേജ് അസിസ്റ്റന്‍റിനെയും പോലീസ് ഫോട്ടോഗ്രാഫറെയും കൂട്ടിയാണ് യാത്ര നടത്തിയത്. ഇതിലൂടെ കത്തി ഉപേക്ഷിച്ച സ്ഥലം പോലീസ് സംഘം കൃത്യമായി മനസിലാക്കി. കൂടാതെ പല ഘട്ടങ്ങളിലായി അന്വേഷണ സംഘത്തിലെ ഉദ്യോഗസ്ഥര്‍ 20 കിലോമീറ്ററോളം നടന്നു നിരീക്ഷിച്ച് പരിശോധന നടത്തുകയും ചെയ്തു. തഴക്കരയിലെ പൊന്തക്കാടിനുള്ളില്‍നിന്ന് കത്തി കണ്ടെടുത്തു. ഡിവൈഎസ്പി എസ്. നന്ദകുമാറിന്‍റെ മേല്‍നോട്ടത്തിലും കോയിപ്രം പോലീസ് ഇന്‍സ്‌പെക്ടര്‍ പി.എം. ലിപിയുടെ നേതൃത്വത്തിലും നടത്തിയ ശ്രമകരമായ ദൗത്യത്തില്‍ എസ്‌ഐ സുരേന്ദ്രന്‍, എഎസ്‌ഐ ഷിബുരാജ്, എസ്‌സിപിഒ സുരേഷ്, സിപിഒമാരായ ഇര്‍ഷാദ്, കേശു, അരവിന്ദ് റഷാദ് എന്നിവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]