കെഎസ്ഇബി കരാര് തൊഴിലാളി ഷോക്കേറ്റ് മരിച്ചു
1430042
Tuesday, June 18, 2024 11:35 PM IST
കടുത്തുരുത്തി: കെഎസ്ഇബി കരാര് തൊഴിലാളി ഷോക്കേറ്റ് മരിച്ചു. കല്ലറ പുത്തന്പള്ളി പാലക്കാട്ട് വീട്ടില് മൈക്കിള് മാത്യു (38) ആണ് മരിച്ചത്. ഇന്നലെ വൈകുന്നേരം അഞ്ചോടെ കല്ലറ മുണ്ടാര് തമ്പാന് ബ്ലോക്ക് പാടശേഖരത്തിലാണ് അപകടം നടന്നത്. തട്ടാപറമ്പ് സൗത്ത് പാടശേഖരത്തിലെ പഴയ തടി പോസ്റ്റുകള് മാറ്റി കോണ്ക്രീറ്റ് പോസ്റ്റുകള് സ്ഥാപിക്കുന്ന പണികള് നടന്നുവരികയായിരുന്നു. പോസ്റ്റുകള് മാറിയ ശേഷം വൈകുന്നേരത്തോടെ ലൈന് ചാര്ജ് ചെയ്തു.
ഇതിനുശേഷം പണി സാധനങ്ങള് എടുത്തുവയ്ക്കുന്നതിന്റെ ഭാഗമായി സമീപത്തുതന്നെയുള്ള തോടിനപ്പുറമുള്ള തമ്പാന് ബ്ലോക്കിലെ പോസ്റ്റില് ചാരിവച്ചിരുന്ന ഗോവണി എടുക്കാനായി മൈക്കിള് തനിച്ചു പോകുകയായിരുന്നു.
ഗോവണി എടുക്കുന്നതിനിടെയാവാം ഷോക്കേറ്റതെന്ന് കരുതുന്നു. ഷോക്കേറ്റ് മൈക്കിള് താഴെ വീണുകിടക്കുന്ന വിവരം സമീപവാസികള് അറിയിച്ചതിനെ തുടര്ന്ന് മറ്റു തൊഴിലാളികള് ഓടിയെത്തി. എന്നാല് യാത്രാസൗകര്യമില്ലാതിരുന്നതിനാല് വള്ളത്തില് തലയാഴത്തെത്തിച്ച് ഇവിടെനിന്നും വൈക്കം താലൂക്ക് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. അവിവാഹിതനാണ്. കടുത്തുരുത്തി പോലീസ് മേല്നടപടികള് സ്വീകരിച്ചു. മൃതദേഹം വൈക്കം താലൂക്ക് ആശുപത്രി മോര്ച്ചറിയില്. പിതാവ്: മാത്യു. മാതാവ്: ലില്ലിക്കുട്ടി. സഹോദരങ്ങള് - ബിജു, സിബി. സംസ്കാരം പിന്നീട്.