ADVERTISEMENT

ADVERTISEMENT

കോഷന്‍ ഡെപ്പോസിറ്റ് വിതരണം

പാലാ: സെന്‍റ് തോമസ് കോളജില്‍നിന്ന് 2024-25 അധ്യയനവര്‍ഷം കോഴ്‌സ് പൂര്‍ത്തിയാക്കി ടിസി വാങ്ങിയ വിദ്യാര്‍ഥികളുടെ കോഷന്‍ ഡെപ്പോസിറ്റ് 15 മുതല്‍ വിതരണം ചെയ്യും. വിദ്യാര്‍ഥികള്‍ ബന്ധപ്പെട്ട രസീത്, ഐഡി കാര്‍ഡ്, ബാങ്ക് പാസ് ബുക്കിന്‍റെ കോപ്പി എന്നിവ സഹിതം കോളജ് പ്രവൃത്തിദിവസങ്ങളില്‍ ഹാജരാകണം.

ADVERTISEMENT

വൈഎംസിഎ സ്ഥാപക ദിനാചരണം

ചങ്ങനാശേരി: ആഗോള വൈഎംസിഎയുടെ 181-ാമത് സ്ഥാപക ദിനാഘോഷവും വാര്‍ഷിക പൊതുയോഗവും കേരള റീജൺ വൈസ് ചെയര്‍മാന്‍ കുര്യന്‍ തൂമ്പുങ്കല്‍ ഉദ്ഘാടനം ചെയ്തു. വൈഎംസിഎ ഹാളില്‍ ചേര്‍ന്ന യോഗത്തില്‍ പ്രസിഡന്‍റ് ഡോ. റോയ് ജോസഫ് അധ്യക്ഷത വഹിച്ചു. സെക്രട്ടറി ടോമിച്ചന്‍ അയ്യരുകുളങ്ങര, കെ.ഒ. ആന്‍റണി, ജോസ് കുളങ്ങര, എം.എം. മാത്യു, കുഞ്ഞുമോന്‍ തൂമ്പുങ്കല്‍, ജോണിച്ചന്‍ കൂട്ടുമ്മകാട്ടില്‍, പ്രഫ. സോജി ജോസഫ്, തോമസുകുട്ടി പാലത്ര എന്നിവര്‍ പ്രസംഗിച്ചു.

പൗരവേദി മെറിറ്റ് അവാര്‍ഡ് വിതരണം

ചങ്ങനാശേരി: പൗരവേദിയുടെ ആഭിമുഖ്യത്തില്‍ എസ്എസ്എല്‍സി, പ്ലസ്ടു പാസായ വിദ്യാര്‍ഥികള്‍ക്കായി ലഹരിവിരുദ്ധ ബോധവത്കരണ ക്ലാസും കരിയര്‍ ഗൈഡന്‍സ് സെമിനാറും മെറിറ്റ് അവാര്‍ഡ് വിതരണവും നടത്തി. സമ്മേളനം ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. മുനിസിപ്പല്‍ ചെയര്‍പേഴ്സണ്‍ കൃഷ്ണകുമാരി രാജശേഖരന്‍ മുഖ്യപ്രഭാഷണം നടത്തി. പ്രസിഡന്‍റ് സി. മോനിച്ചന്‍ അധ്യക്ഷത വഹിച്ചു. കോട്ടയം നാര്‍ക്കോട്ടിക് സെല്‍ എസ്‌ഐ മാത്യു പോള്‍ ലഹരിവിരുദ്ധ ബോധവത്കരണ ക്ലാസ് നയിച്ചു. എഡിഫൈ ഇന്‍ഡ്യ ചെയര്‍മാന്‍ നാരായണന്‍ നമ്പൂതിരി കരിയര്‍ ഗൈഡന്‍സ് ക്ലാസ് നയിച്ചു. നഗരസഭാ കൗണ്‍സില്‍ കെ. മുരുകന്‍ മെറിറ്റ് അവാര്‍ഡ് ദാനവും നടത്തി. അഡ്വ.പി.എസ്. ശ്രീധരന്‍, ജനറല്‍ സെക്രട്ടറി കെ. വിജയകുമാര്‍, സെക്രട്ടറി സുരേഷ് ബാബു, രാജു തുരുത്തി എന്നിവര്‍ പ്രസംഗിച്ചു.

മേരിമൗണ്ട് പള്ളിയില്‍ ഇടവക ദിനാഘോഷം

ചങ്ങനാശേരി: മേരിമൗണ്ട് റോമന്‍ കത്തോലിക്കാ ദേവാലയത്തില്‍ ഇടവക ദിനാഘോഷവും ലീജിയന്‍ ഓഫ് മേരി സുവണജൂബിലി സുവനീര്‍ പ്രകാശനവും നടന്നു. വികാരി ഫാ. മാത്യു ഒഴത്തിലിന്‍റെ അധ്യക്ഷതയില്‍ കെആര്‍എല്‍സിസി ജനറല്‍ സെക്രട്ടറി ഫാ. ജിജു ജോര്‍ജ് അറയ്ക്കത്തറ മുഖ്യസന്ദേശം നല്കി. ഫാ. ആന്‍റണി ക്ലാരറ്റ് ഉദ്ഘാടനം ചെയ്തു. ഫാ. ഫിലിപ്പ് കുരിശുംമൂട്ടില്‍ സുവനീര്‍ പ്രകാശനം ചെയ്തു. സെബാസ്റ്റ്യന്‍ പ്രിന്‍സ് ആദ്യപ്രതി ഏറ്റുവാങ്ങി. ഫാ. സോബിന്‍ ചേപ്പില, പാരിഷ് കൗണ്‍സില്‍ സെക്രട്ടറി പി.ടി. തോമസ്, സുവനീര്‍ ചീഫ് എഡിറ്റര്‍ ജസ്റ്റിന്‍ ബ്രൂസ്, മേരി തോമസ്, യേശുദാസ് സൈമണ്‍ എന്നിവര്‍ പ്രസംഗിച്ചു. ഇടവകയിലെ മുതിര്‍ന്ന അംഗങ്ങളെയും വിവാഹ രജത ജൂബിലി ആഘോഷിക്കുന്നവരെയും വിവിധ മേഖലകളില്‍ മികവു തെളിയിച്ചവരെയും ആദരിച്ചു.

വാഹനങ്ങളിലെ ബാറ്ററി മോഷ്ടിക്കുന്ന സംഘം കറുകച്ചാലിൽ വിലസുന്നു

കറുകച്ചാൽ: വാഹനങ്ങളിൽനിന്നു ബാറ്ററികൾ മോഷ്ടിക്കുന്ന സംഘം കറുകച്ചാലിലും പരിസര പ്രദേശങ്ങളിലും സജീവം. കറുകച്ചാൽ, നെത്തല്ലൂർ, നെടുംകുന്നം, പത്തനാട് തുടങ്ങിയ പ്രദേശങ്ങളിലെ നിരവധി വാഹനങ്ങളിൽനിന്ന് ബാറ്ററികൾ സംഘം മോഷ്ടിച്ചതായി പരാതികൾ ഉണ്ട്. രാത്രികാലത്ത് വഴിയോരങ്ങളിൽ പാർക്കു ചെയ്യുന്ന വാഹനങ്ങളാണ് മോഷ്ടാക്കൾ ലക്ഷ്യം വയ്ക്കുന്നത്. ഇക്കഴിഞ്ഞദിവസം നെടുംകുന്നം മാണികുളം കുന്നുംപുറത്ത് ഉണ്ണിയുടെ ടോറസ് ലോറിയിൽനിന്നു രണ്ടു ബാറ്ററികൾ മോഷ്ടാക്കൾ അപഹരിച്ചു. ഒരു ബാറ്ററിക്ക് പതിനാലായിരത്തോളം രൂപ വില വരും. വാടക വ്യവസ്ഥയിൽ പെരുമ്പാവൂരിൽനിന്ന് ഉണ്ണി എടുത്തതാണ് ടോറസ് ലോറി. പത്തനാട്ടുനിന്ന് അടുത്തനാളിൽ ഇത്തരത്തിൽ ടോറസ് ലോറിയിലെ ബാറ്ററി മോഷണം പോയിരുന്നു. കറുകച്ചാൽ സ്റ്റാൻഡിലെ മൂന്ന് ഓട്ടോകളിൽനിന്നു ബാറ്ററികൾ മോഷണം പോയിട്ട് അധികനാളായിട്ടില്ല. മോഷ്ടിക്കപ്പെടുന്ന ബാറ്ററികൾ പാഴ്സൽ ലോറികൾക്കു സമാനമായ വാഹനങ്ങളിൽ കടത്തുന്നതായാണ് വിവരം. വാഹനമുടമകൾ നൽകിയ പരാതികളെത്തുടർന്ന് കറുകച്ചാൽ പോലീസ് അന്വേഷണം നടത്തി വരുന്നു.

നഗരസഭാ കൗണ്‍സില്‍ ഹാള്‍ കെട്ടിടത്തിന്‍റെ കോണ്‍ക്രീറ്റ് പാളി അടര്‍ന്നുവീണ സംഭവം: അന്വേഷണം ആവശ്യപ്പെട്ട് യുഡിഎഫ്

ചങ്ങനാശേരി: നഗരസഭാ കൗൺ സിൽ ഹാൾ കെട്ടിടത്തിന്‍റെ കോണ്‍ക്രീറ്റ് പാളികള്‍ അടര്‍ന്നുവീണ സംഭവത്തില്‍ വിജിലന്‍സ് അന്വേഷണം നടത്തണമെന്ന് യുഡിഎഫ് പാര്‍ലമെന്‍ററി പാര്‍ട്ടി ആവശ്യപ്പെട്ടു. 50 വര്‍ഷത്തോളം കാലപ്പഴക്കമുള്ളതും ജീര്‍ണാവസ്ഥയിലെന്ന് എന്‍ജിനിയറിംഗ് വിഭാഗം റിപ്പോര്‍ട്ട് ചെയ്തതുമായ കെട്ടിടത്തിലാണ് ഫ്രണ്ട് ഓഫീസ് നവീകരണമെന്ന പേരില്‍ 50 ലക്ഷം രൂപ വിനിയോഗിച്ച് കൗണ്‍സില്‍ ഹാള്‍ പുതുക്കിപ്പണിതത്. നിലവില്‍ എല്ലാ സൗകര്യങ്ങളുമുള്ള കൗണ്‍സില്‍ ഹാള്‍ നിലനില്‍ക്കുമ്പോഴാണ് മുന്‍ നഗരസഭാ ചെയര്‍പേഴ്‌സണ്‍ ബീന ജോബിയുടെ കാലത്ത് ഫണ്ടു വഴിമാറ്റി ചെലവഴിച്ച് പുതിയ കൗണ്‍സില്‍ ഹാള്‍ നവീകരിച്ചത്. നഗരസഭയുടെ‍ പണം ധൂര്‍ത്തടിക്കുന്നതിന്‍റെ വലിയ ഉദാഹരണമാണ് കൗണ്‍സില്‍ഹാള്‍ നവീകരണമെന്നും യുഡിഎഫ് യോഗം കുറ്റപ്പെടുത്തി. പുനര്‍നിര്‍മിച്ച കൗണ്‍സില്‍ ഹാളിന്‍റെ താഴെ പ്രവര്‍ത്തിക്കുന്ന റവന്യു, ജനറല്‍ വിഭാഗങ്ങളിലും കോണ്‍ക്രീറ്റ് പാളികള്‍ അടര്‍ന്നുനില്‍ക്കുകയാണ്. ഏതു സമയവും അപകടം സംഭവിക്കാവുന്ന അവസ്ഥയിലാണ് കെട്ടിടം. നിര്‍മാണത്തിനു പിന്നില്‍ വന്‍ അഴിമതിയും ക്രമക്കേടും നടന്നിട്ടുണ്ടെന്നും ഇതുസംബന്ധിച്ച് സംബന്ധിച്ച് വിശദമായ വിജിലന്‍സ് അന്വേഷണം നടത്തണമെന്നും യോഗം ആവശ്യപ്പെട്ടു. യുഡിഎഫ് പാര്‍ലമെന്‍ററി പാര്‍ട്ടി ലീഡര്‍ ജോമി ജോസഫ് അധ്യക്ഷത വഹിച്ചു. ഡെപ്യൂട്ടി ലീഡര്‍ സന്തോഷ് ആന്‍റണി, കെ.എം. നെജിയാ, എത്സമ്മ ജോബ്, ഷൈനി ഷാജി, റെജി കേളമ്മാട്ട്, മോളമ്മ സെബാസ്റ്റ്യന്‍, ശ്യാം സാംസണ്‍, ബീന ജിജന്‍ എന്നിവര്‍ പ്രസംഗിച്ചു.

എന്‍എച്ച്-183 ടാറിംഗ് പൂര്‍ത്തീകരിച്ചിട്ട് ഒന്നരമാസം; സീബ്രാലൈനുകള്‍ വരയ്ക്കൽ നീളുന്നു

ചങ്ങനാശേരി: എന്‍എച്ച്-183 (എംസി റോഡ്) ടാറിംഗ് പൂര്‍ത്തീകരിച്ചിട്ട് ഒന്നരമാസം പിന്നിട്ടിട്ടും റോഡില്‍ സിഗ്നലുകള്‍ സ്ഥാപിക്കാന്‍ കാലതാമസം നേരിടുന്നതായി ആക്ഷേപം. ചങ്ങനാശേരി കെഎസ്ആര്‍ടിസി ജംഗ്ഷനില്‍ ഉള്‍പ്പെടെ റോഡില്‍ അപകടം പതിയിരിക്കുന്നു. അധികൃതര്‍ നിസംഗ നിലപാടിലെന്ന് ആക്ഷേപം. സംസ്ഥാനത്തെ ഏറെ പ്രധാനപ്പെട്ട ഈ റോഡിലെ സിഗ്നലുകളും സീബ്രാലൈനുകളും മാഞ്ഞിട്ട് അഞ്ചുവര്‍ഷത്തിലേറെക്കാലമായി. ഇതുമൂലം നൂറുകണക്കിനു വിദ്യാര്‍ഥികളും സ്ത്രീകളും കുട്ടികളുമുള്‍പ്പെടുന്ന യാത്രക്കാരാണ് ദുരിതപ്പെടുന്നത്. ഏറെ തിരക്കുള്ള ഈ ജംഗ്ഷനില്‍ ഒരു ഹോംഗാര്‍ഡോ പോലീസുകാരനോ ഡ്യൂട്ടിയിലുണ്ടെങ്കിലും ഇത് യാത്രക്കാരുടെ സുരക്ഷയ്ക്ക് പര്യാപ്തമാകുന്നില്ല. റോഡ് നവീകരണത്തിനു 2023ല്‍ പദ്ധതിയിട്ടെങ്കിലും കാലതാമസം നേരിടുകയായിരുന്നു. ഒന്നരമാസംമുമ്പ് റോഡ് നിര്‍മാണം പൂര്‍ത്തീകരിച്ചെങ്കിലും ഡിവൈഡര്‍ ലൈനുകളും സീബ്രാക്രോസിംഗുകളുമുള്‍പ്പെടെ സുരക്ഷാസംവിധാനങ്ങളും സ്ഥാപിച്ചിട്ടില്ല. ഇതുമൂലം പെരുന്ന, നഗരസഭ, കെഎസ്ആര്‍ടിസി, എസ്ബി കോളജ്, മതുമൂല, വാഴപ്പള്ളി സെന്‍റ് തെരേസാസ് സ്‌കൂള്‍, തുരുത്തി, പുന്നമൂട് ജംഗ്ഷനുകൾ അപകടക്കെണികളായി തുടരുകയാണ്. മഴ തോരുന്ന സമയം നോക്കി ഈ റോഡില്‍ സുരക്ഷാ സജ്ജീകരണങ്ങള്‍ സ്ഥാപിക്കാന്‍ അധികൃതര്‍ സത്വര നടപടികള്‍ സ്വീകരിക്കണമെന്ന ആവശ്യം ശക്തമാണ്. ഈ ആവശ്യം ഉന്നയിച്ച് രാഷ്‌ട്രീയ സംഘടനകള്‍ രംഗത്തുവരാന്‍ ആലോചിക്കുന്നുണ്ട്.

കോഴാ സർക്കാർ ഫാമിൽ കൊയ്ത്തിനും നടീലിനും യന്ത്രം

കുറവിലങ്ങാട്: കോഴായിലെ സംസ്ഥാന സർക്കാർ സീഡ്ഫാമിൽ ഞാറുനടീലും യന്ത്രവത്കരിച്ചു. വർഷങ്ങൾക്ക് മുമ്പ് കൊയ്ത്ത് യന്ത്രം പ്രയോജനപ്പെടുത്തിയിരുന്നു. സീഡ് ഫാമിൽ യന്ത്രവത്കരണം പ്രോത്സാഹിപ്പിക്കുന്നതിന്‍റെ ഭാഗമായാണ് ഞാറുനടീൽ യന്ത്രം ഉപയോഗിച്ച് ആരംഭിച്ചത്. പദ്ധതി ഉദ്ഘാടനം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ നിർവഹിച്ചു. ജില്ലാ പഞ്ചായത്തംഗം നിർമല ജിമ്മി അധ്യക്ഷത വഹിച്ചു. ഉഴവൂർ ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ ചിറ്റേത്ത്, ജില്ലാ കൃഷി ഓഫീസർ ജോ ജോസ് ചിറത്തടം, കൃഷി ഡെപ്യൂട്ടി ഡയറക്ടർ ജോ പൈനാപ്പള്ളിൽ, ബ്ലോക്ക് പഞ്ചായത്തംഗം പി.സി. കുര്യൻ, ഫാം സൂപ്രണ്ട് മഞ്ജുദേവി, പഞ്ചായത്തംഗം സന്ധ്യ സജികുമാർ, യൂണിയൻ പ്രധിനിധികളായ സദാനന്ദ ശങ്കർ, സണ്ണി ചിറ്റക്കോടം തുടങ്ങിയവർ പ്രസംഗിച്ചു.

നേരേകടവ്-മാക്കേക്കടവ് കായൽ പാലം: നേരേകടവിൽ ലാൻഡിംഗ് സ്പാൻ നിർമാണം തുടങ്ങി

വൈക്കം: കോട്ടയം - ആലപ്പുഴ ജില്ലകളെ ബന്ധിപ്പിച്ചു വേമ്പനാട്ട് കായലിലെ നേരേകടവ് - മാക്കേക്കടവ് ഫെറിയിൽ നിർമിക്കുന്ന കായൽ പാലത്തിന്‍റെ നേരേകടവ് ഭാഗത്ത് കരയിൽ നിർമിക്കുന്ന ലാൻഡിംഗ് സ്പാനിന്‍റെ നിർമാണപ്രവർത്തനങ്ങൾ തുടങ്ങി. കരയിൽ തീർത്ത പൈലുകളുടെ പൈൽ ക്യാപ് തീർത്ത് ബീം നിർമിക്കുന്ന പ്രവർത്തനങ്ങളാണ് ഇവിടെ ദ്രുതഗതിയിൽ പുരോഗമിക്കുന്നത്. 76 കോടി രൂപയ്ക്ക് നിർമാണ കരാർ ഏറ്റെടുത്ത കമ്പനി പാലത്തിന്‍റെ നിർമാണം പാതിയോളം പൂർത്തിയാക്കിയപ്പോഴാണ് സമീപറോഡിനായി സ്ഥലം ഏറ്റെടുക്കുന്നതുമായി ബന്ധപ്പെട്ട തർക്കത്തെത്തുടർന്ന് അഞ്ചു വർഷത്തിലധികം നിർമാണപ്രവർത്തനങ്ങൾ നിലച്ചു. പിന്നീട് പാലം പൂര്‍ത്തിയാക്കുന്നതിനായി 42 കോടി രൂപയുടെ പദ്ധതിക്കാണ് മന്ത്രിസഭ അംഗീകാരം നല്‍കിയത്. സമീപ റോഡിന് ഭൂമി ഏറ്റെടുക്കുന്നതിനും ശേഷിക്കുന്ന നിര്‍മാണ പ്രവര്‍ത്തനങ്ങള്‍ക്കുമടക്കമാണ് ഈ തുക അനുവദിച്ചത്. 750 മീറ്റർ നീളമുള്ള പാലത്തിന്‍റെ 350 മീറ്ററോളം നിർമാണം ഇതിനകം പൂർത്തിയായി. തുടർന്നുള്ള നിർമാണപ്രവർത്തനങ്ങളും വേഗത്തിൽ പുരോഗമിക്കുകയാണ്. 2026 ആദ്യം പാലത്തിന്‍റെ നിർമാണം പൂർത്തിയാക്കാനാണ് അധികൃതരുടെ ശ്രമം. തുറവൂർ -പമ്പ ഹൈവേയുടെ ഭാഗമായ പാതയിലൂടെ ഭാരവാഹനങ്ങളാകും അധികവും കടന്നുപോകുന്നത്. നേരേകടവ് മുതൽ ഉദയനാപുരം വരെയുള്ള രണ്ടര കിലോമീറ്റർ ദൂരം വീതികൂട്ടി ആധുനിക നിലവാരത്തിൽ നിർമിക്കണം. 2016ൽ തുടങ്ങിയ പാലത്തിന്‍റെ നിർമാണം പൂർത്തിയാക്കാൻ 10 വർഷത്തോളമാണെടുക്കുന്നത്. റോഡിനായി സ്ഥലമേറ്റെടുക്കുന്നതിനുള്ള നടപടികൾ ഇനിയും ആരംഭിച്ചില്ലെങ്കിൽ പാലം തീർന്നു കഴിഞ്ഞ് റോഡിനായി ഇനിയും വർഷങ്ങൾ കാത്തിരിക്കേണ്ടിവരും. കോട്ടയം, ആലപ്പുഴ, എറണാകുളം യാത്ര കിലോമീറ്ററുകൾ ലാഭിക്കാൻ സഹായകരമായ കായൽ പാലവും റോഡും സമയബന്ധിതമായി പൂർത്തിയാക്കാൻ പൊതു മരാമത്ത് വകുപ്പ് മന്ത്രി പി.എ. മുഹമ്മദ് റിയാസ് അനുഭാവപൂർവം നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

കാട്ടിക്കുന്ന് തുരുത്തിലെ റോഡുകൾ ചെളിക്കുളം

വൈക്കം: ചെമ്പ് പഞ്ചായത്തിലെ കാട്ടിക്കുന്ന് തുരുത്തിലെ കുണ്ടും കുഴിയുമായ റോഡുകൾ ഗതാഗതയോഗ്യമാക്കുന്നതിന് അധികൃതർ നടപടി സ്വീകരിക്കണമെന്ന ആവശ്യം ശക്തമായി. തുരുത്തിലെ പ്രധാന റോഡുകളായ തീരംറോഡ്, സ്രായിൽറോഡ് എന്നിവ കോൺക്രീറ്റ് ചെയ്ത് ഗതാഗതയോഗ്യമാക്കാൻ പദ്ധതി വിഭാവനം ചെയ്തിരുന്നെങ്കിലും നിർമാണം നടന്നില്ല. പഞ്ചായത്തിലെ 15വാർഡിനും 10 ലക്ഷംരൂപ വീതം റോഡ് ഗതാഗതയോഗ്യമാക്കാൻ അനുവദിച്ചിരുന്നെങ്കിലും കാട്ടിക്കുന്ന് തുരുത്തിലെ റോഡുകളൊഴിച്ചുള്ളവയുടെ നിർമാണം നടന്നതായി പ്രദേശവാസികൾ ആരോപിക്കുന്നു. കാട്ടിക്കുന്ന് തുരുത്തിലേക്കു പാലം നിർമിച്ചതോടെ തുരുത്തിലേക്ക് ഭാരവണ്ടികളടക്കം എത്തിയതിനെത്തുടന്നാണ് റോഡുകൾ തകർന്നത്. തുടർച്ചയായി മഴ പെയ്തതോടെ ചെളി നിറഞ്ഞ റോഡിലൂടെ കാൽനട പോലും ദുഷ്കരമായി. തുരുത്തിൽ 125 കുടുംബങ്ങളിലായി അഞ്ഞൂറോളം ആളുകൾ താമസിക്കുന്നുണ്ട്. 15ാം വാർഡിൽ ജനപ്രതിനിധി ബിജെപി അംഗമായതിനാലാണ് വാർഡിലെ വികസന പ്രവർത്തനങ്ങൾ നടത്താൻ പഞ്ചായത്ത് ഭരണസമിതി നടപടി സ്വീകരിക്കാത്തതെന്ന് ബിജെപി നേതൃത്വം ആരോപിക്കുന്നു.

കടുത്തുരുത്തി ഡിവിഷനില്‍ മിനിമാസ്റ്റ് ലൈറ്റുകള്‍ക്ക് ജില്ലാ പഞ്ചായത്തിന്‍റെ 65 ലക്ഷം

കടുത്തുരുത്തി: കടുത്തുരുത്തി ഡിവിഷനിലെ വിവിധ പ്രദേശങ്ങളില്‍ മിനിമാസ്റ്റ് ലൈറ്റുകള്‍ സ്ഥാപിക്കുവാന്‍ ജില്ലാപഞ്ചായത്ത് 65 ലക്ഷം രൂപ അനുവദിച്ചതായി ജില്ലാപഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ അറിയിച്ചു. ഡിവിഷന്‍ അതിര്‍ത്തിയിലെ കടുത്തുരുത്തി, ഞീഴൂര്‍, മുളക്കുളം, തലയോലപ്പറമ്പ്, മാഞ്ഞൂര്‍, കല്ലറ തുടങ്ങിയ പഞ്ചായത്തുകളിലെ വിവിധ വാര്‍ഡുകളിലെ 52 കേന്ദ്രങ്ങളിലാണ് ലൈറ്റുകള്‍ സ്ഥാപിക്കുന്നത്. അനുദിക്കപ്പെട്ട 65 ലക്ഷം രൂപയില്‍ 10 ലക്ഷം രൂപ പട്ടികജാതി കോളനികളില്‍ ലൈറ്റുകള്‍ സ്ഥാപിക്കുന്നതിന് വിനിയോഗിക്കുമെന്ന് ജില്ലാ പഞ്ചായത്ത് വൈസ് പ്രസിഡന്‍റ് പറഞ്ഞു. ഇതില്‍ ഞീഴൂര്‍ പഞ്ചായത്തിലെ പാട്ടുപുര അമ്പലം ജംഗ്ഷന്‍, തുരുത്തിപ്പള്ളി ജംഗ്ഷന്‍, വട്ടക്കുന്ന് കവല, വട്ടീന്തുകവല, ആലുംമേല്‍ക്കാവ് ക്ഷേത്രമൈതാനം തുടങ്ങിയ അഞ്ചു കേന്ദ്രങ്ങളില്‍ മിനി മാസ്റ്റ് ലൈറ്റുകള്‍ സ്ഥാപിച്ച് സ്വിച്ച് ഓണ്‍ ചെയ്ത് കഴിഞ്ഞു. ബാക്കി ലൈറ്റുകള്‍ വിവിധ പഞ്ചായത്തുകളിലായി ഉടന്‍തന്നെ സ്ഥാപിക്കുമെന്നും ജോസ് പുത്തന്‍കാലാ അറിയിച്ചു.

ശ്രാദ്ധപെരുന്നാൾ

കോട്ടയം: മലങ്കര സുറിയാനി ക്‌നാനായ സമുദായത്തിന്‍റെ പ്രഥമ മെത്രാപ്പോലീത്ത പുണ്യശ്ലോകനായ ഗീവർഗീസ് മാർ സേവേറിയോസ് മെത്രാപ്പോലീത്തയുടെ 98-ാം ശ്രാദ്ധപ്പെരുന്നാളും അനുസ്മരണവും അദ്ദേഹം കബറടങ്ങിയിരിക്കുന്ന കോട്ടയം വലിയ പള്ളിയിൽ ഇന്നാരംഭിക്കും. വൈകുന്നേരം നാലിന് മുൻ സുപ്രീംകോടതി ജഡ്‌ജി ജസ്റ്റീസ് സിറിയക് ജോസഫ് അനുസ്‌മരണ സമ്മേളനം ഉദ്ഘാടനം ചെയ്യും. ക്നാനായ സമുദായ മെത്രാപ്പോലീത്ത ആർച്ച്ബിഷപ് കുറിയാക്കോസ് മാർ സേവേറിയോസ് അധ്യക്ഷത വഹിക്കും. സിഎസ്ഐ മധ്യകേരള മഹായിടവക ബിഷപ് റവ.ഡോ. മലയിൽ സാബു കോശി ചെറിയാൻ അനുഗ്രഹ പ്രഭാഷണം നടത്തും. തിരുവഞ്ചൂർ രാധാകൃഷ്ണൻ എംഎൽഎ മുഖ്യാതിഥി ആയിരിക്കും.

ജനങ്ങളുടെ ജീവന്‍ സംരക്ഷിച്ചിട്ടു മതി വന്യജീവി സംരക്ഷണം: ജോസ് കെ. മാണി

പൂവത്തിളപ്പ്: ബഫര്‍ സോണ്‍, വന്യജീവി സംരക്ഷണനിയമം, വന്യമൃഗ നിയന്ത്രിത നായാട്ട്, വഖഫ് ഭൂമി,കടലോര സുരക്ഷ തുടങ്ങി വിവിധ വിഷയങ്ങളില്‍ കേരള കോണ്‍ഗ്രസ്-എം പാര്‍ട്ടി എടുക്കുന്ന ശരി നിലപാടുകള്‍ക്ക് പൊതുസമൂഹത്തില്‍ സ്വീകാര്യത വര്‍ധിച്ചുവരുന്നതായും മനുഷ്യജീവനു ഭീഷണി സൃഷ്ടിക്കുന്ന വന്യമൃഗങ്ങളുടെ എണ്ണം കുറച്ചുകൊണ്ടുവരാനുള്ള നിയന്ത്രിത നായാട്ടിന് അനുവാദം നല്‍കണമെന്നും കേരള കോണ്‍ഗ്രസ്-എം ചെയര്‍മാന്‍ ജോസ് കെ മാണി എംപി പറഞ്ഞു. അകലക്കുന്നം പഞ്ചായത്ത് കമ്യൂണിറ്റി ഹാളില്‍ നടന്ന മണ്ഡല സമ്മേളനവും പ്രതിഭകള്‍ക്ക് സ്വകരണവും ഉദ്ഘാടനം ചെയ്തു പ്രസംഗിക്കുകയായിരുന്നു അദേഹം. സമ്മേളനത്തില്‍ മണ്ഡലം പ്രസിഡന്‍റ് ജയ്‌മോന്‍ പുത്തന്‍പുരയ്ക്കല്‍ അധ്യക്ഷനായിരുന്നു. ജില്ലാ പ്രസിഡന്‍റ് പ്രൊഫ.ലോപ്പസ് മാത്യു, സംസ്ഥാന സ്റ്റിയറിംഗ് കമ്മറ്റിയംഗം ജോസഫ് ചാമക്കാല, സംസ്ഥാന സെക്രട്ടറിയേറ്റംഗം ഡാന്‍റിസ് കൂനാനിക്കല്‍ ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി,പഞ്ചായത്ത് വൈസ് പ്രസിഡന്‍റ് മാത്തുക്കുട്ടി ഞായര്‍കുളം, മുന്‍ പ്രസിഡന്‍റുമാരായ ടോണി ഇടയ്ക്കാട്ടുതറ, ജേക്കബ് തോമസ്, ജാന്‍സി ബാബു, മുന്‍ വൈസ് പ്രസിഡന്‍റ് ബെന്നി വടക്കേടം, മെമ്പര്‍മാരായ ജോര്‍ജ് മൈലാടി, കെ.കെ. രഘു, സംസ്ഥാന കമ്മറ്റിയംഗങ്ങളായ അഡ്വ. സണ്ണി മാന്തറ, അഡ്വ. ജോര്‍ജ് കുട്ടി പുറ്റത്താങ്കല്‍, നിയോജകമണ്ഡലം സെക്രട്ടറി ജിജോ വരിക്കമുണ്ട തുടങ്ങിയവര്‍ പ്രസംഗിച്ചു. പാര്‍‌ട്ടിയുടെ മുന്‍കാല സാരഥികളെ യോഗത്തില്‍ ആദരിച്ചു.

റിന്യുവെബിൾ എനര്‍ജി മാനേജ്‌മെന്‍റ് കോഴ്സില്‍ അഡ്മിഷന്‍ ആരംഭിച്ചു

ചങ്ങനാശേരി: എസ്ബി കോളജില്‍ ബിവോക് റിന്യുവെബിൾ എനര്‍ജി മാനേജ്‌മെന്‍റ് കോഴ്സില്‍ അഡ്മിഷന്‍ ആരംഭിച്ചു. സര്‍ക്കാര്‍ അംഗീകൃതമായ ഈ ഡിഗ്രി പ്രോഗ്രാം, ജോലി ലക്ഷ്യമിട്ട് ക്രമീകരിച്ച സ്‌കില്‍ അടിസ്ഥാനമുള്ള കോഴ്‌സാണ്. റിന്യുവെബിൾ എനര്‍ജി പോലുള്ള ഭാവിയിലെ ആവശ്യകതകള്‍ നിറവേറ്റുന്ന മേഖലയില്‍ പാഠഭാഗങ്ങളും പ്രായോഗിക പരിശീലനവും ഉള്‍പ്പെടുത്തിയാണ് കോഴ്സ് രൂപകല്പന ചെയ്തിരിക്കുന്നത്. സോളാര്‍, വിൻഡ്, ബയോമാസ് തുടങ്ങിയ ശുദ്ധമായ ഊര്‍ജസ്രോതസുകള്‍, എനര്‍ജി ഓഡിറ്റിംഗ്, ഗ്രീന്‍ ടെക്നോളജികള്‍ തുടങ്ങിയ വിഷയങ്ങള്‍ കോഴ്സിന്‍റെ ഭാഗമായി പഠിക്കാം. കോഴ്സ് കാലയളവില്‍ത്തന്നെ ഇന്‍ഡസ്ട്രിയില്‍ പാര്‍ട്ട് ടൈം ജോലിയും ഇന്‍റേണ്‍ഷിപ്പും ചെയ്യാനുള്ള അവസരവുമുണ്ട്. ഏത് വിഷയത്തില്‍ പ്ലസ്ടു പാസായാലും അപേക്ഷിക്കാം. സയന്‍സ്, കൊമേഴ്സ്, ഹ്യൂമാനിറ്റീസ് എല്ലാ വിഭാഗത്തിനും യോഗ്യതയുണ്ട്. കൂടുതല്‍ വിവരങ്ങള്‍ക്ക് 8921709232 എന്ന നമ്പറില്‍ ബന്ധപ്പെടാം, അല്ലെങ്കില്‍ www.sbcollege.ac.in എന്ന വെബ്‌സൈറ്റ് സന്ദര്‍ശിക്കാം.

പഞ്ചാബ് നാഷണൽ ബാങ്ക് എംപ്ലോയീസ് സംസ്ഥാന സമ്മേളനം

കോട്ടയം: പഞ്ചാബ് നാഷണൽ ബാങ്ക് എംപ്ലോയീസ് ഫെഡറേഷൻ സംസ്ഥാന സമ്മേളനം സമാപിച്ചു. ഫെഡറേഷൻ ജനറൽ സെക്രട്ടറി പി.ആർ. മെഹ്ത്ത ഉദ്ഘാടനം ചെയ്തു. യൂണിയൻ കേരള പ്രസിഡന്‍റ് എൻ. സുന്ദരൻ അധ്യക്ഷത വഹിച്ചു. എകെബിഇഎഫ് ജനറൽ സെക്രട്ടറി ബി. രാംപ്രകാശ്, എഐപിഎൻബിഒഎ ദേശീയ പ്രസിഡന്‍റ് കെ. ശ്രീകുമാർ, എകെബിഇഎഫ് പ്രസിഡന്‍റ് എ.ആർ. സുജിത്ത് രാജു, കെ.വി. രമണമൂർത്തി, പി. ജയപ്രകാശ് എന്നിവർ പ്രസംഗിച്ചു. ഭാരവാഹികളായി എൻ. സുന്ദരൻ (ചെയർമാൻ ) വി. കൃഷ്ണകുമാർ (പ്രസിഡന്‍റ്), വാൾട്ടൻ പൗലോസ്, ടി. പ്രമോദ്, സുനിൽ കുമാർ (വൈസ് പ്രസിഡന്‍റുമാർ), എൻ. വിനോദ് കുമാർ (ജനറൽ സെക്രട്ടറി), അനൂപ്മോൻ (സെക്രട്ടറി), ടി.എസ്. ഉദയൻ, കെ. ഷിനിജിത്ത്, വി. ശ്രീരാജൻ, സുബിൻ ബാബു (ഓർഗനൈസിംഗ് സെക്രട്ടറി), വാസുദേവ കമ്മത്ത്, എ.എസ്. ജോമോൻ, വി. വിജിത്ത്, വി. വിദ്യ (അസിസ്റ്റന്‍റ് സെക്രട്ടറി) കെ.സി. രവി വർമ (ട്രഷറർ), വി.ബി. വൈശാഖ് (അസിസ്റ്റന്‍റ് ട്രഷറർ ) എന്നിവരെ തെരഞ്ഞെടുത്തു.

മെഡിക്കൽ കോളജ് ആശുപത്രി : സൗജന്യ ഉച്ചഭക്ഷണം വാങ്ങാനെത്തുന്നവരും സെക്യൂരിറ്റി ജീവനക്കാരും തമ്മിൽ തർക്കം

ഗാന്ധിനഗര്‍: മെഡിക്കല്‍ കോളജ് ആശുപത്രിയില്‍ സൗജന്യ ഉച്ചഭക്ഷണം വാങ്ങാനെത്തുന്നവരും സെക്യൂരിറ്റി ജീവനക്കാരും തമ്മില്‍ തര്‍ക്കം പതിവാകുന്നു. ആശുപത്രിയില്‍ ചികിത്സയിലുള്ള രോഗികള്‍ക്കും അവരുടെ കൂട്ടിരിപ്പുകാര്‍ക്കും ഉച്ചഭക്ഷണം സൗജന്യമായി വിതരണം ചെയ്യുന്നത് സന്നദ്ധ സംഘടനകളാണ്. എന്നാല്‍, ഉച്ചഭക്ഷണം വാങ്ങാനെത്തുന്നവര്‍ രോഗിയെ അഡ്മിറ്റ് ചെയ്യുമ്പോള്‍ ആശുപത്രിയില്‍നിന്നു ലഭിക്കുന്ന പാസ് കാണിക്കണം. ഭക്ഷണം വിതരണം ചെയ്യുന്നിടത്ത് സെക്യൂരിറ്റി ജീവനക്കാരുമുണ്ട്. ഗൈനക്കോളജി വിഭാഗത്തില്‍ ചികിത്സയിലുള്ള രോഗികളുടെ ബന്ധുക്കളെ കഴിഞ്ഞദിവസം പാസിന്‍റെ പേരില്‍ സെക്യൂരിറ്റി ജീവനക്കാര്‍ ഭക്ഷണം വാങ്ങുന്നതിൽനിന്നു തടയാന്‍ ശ്രമിച്ചത് വലിയ പരാതിക്കിടയാക്കിരിക്കുകയാണ്. രോഗികളല്ലാത്ത ആളുകളും ആശുപത്രിയില്‍ വിതരണം ചെയ്യുന്ന ഭക്ഷണം വാങ്ങിക്കഴിച്ച് അവിടെത്തന്നെ അന്തിയുറങ്ങുന്നുണ്ട്. ഇവരില്‍ ചിലര്‍ സാമൂഹികവിരുദ്ധ പ്രവര്‍ത്തനം നടത്തുന്നതായി പരാതിയുണ്ട്. ഇത്തരക്കാരെ കണ്ടുപിടിക്കുന്നതിനാണ് മുമ്പു പാസില്ലാതെ നല്‍കിയിരുന്ന ഉച്ചഭക്ഷണം ലഭിക്കുന്നതിന് ഇപ്പോള്‍ പാസ് നിര്‍ബന്ധമാക്കിയത്. ചില രോഗികള്‍ ഡിസ്ചാര്‍ജ് ആകുമ്പോള്‍ പാസ് ആശുപത്രി പരിസരത്ത് ഉപേക്ഷിച്ചു പോകാറുണ്ട്. ഇതെടുത്ത് ആശുപത്രി പരിസരത്ത് വിലസുന്നവരും ഭക്ഷണം വാങ്ങുന്നവരുമുണ്ട്. ഇതു തിരിച്ചറിഞ്ഞ അധികൃതര്‍ മൂന്നുമാസം കൂടുമ്പോള്‍ അഡ്മിഷന്‍ സമയത്ത് രോഗിക്കു നല്‍കുന്ന പാസിന്‍റെ നിറം മാറ്റാറുണ്ട്. നിലവില്‍ ഇളംനീല നിറത്തിലുള്ള പാസാണ് ആശുപത്രിയുടെ പ്രധാന അഡ്മിഷന്‍ കൗണ്ടറില്‍നിന്നു അഡ്മിഷന്‍ ബുക്കിനൊപ്പം നല്‍ക്കുന്നത്. എന്നാല്‍, ഗൈനക്കോളജി ഉള്‍പ്പെടെയുള്ള ചില വിഭാഗങ്ങളില്‍ കിടത്തി ചികിത്സയ്ക്കു നിര്‍ദേശിക്കപ്പെടുന്ന രോഗികള്‍ക്ക് അതത് ഡിപ്പാര്‍ട്ട്‌മെന്‍റില്‍നിന്നാണ് അഡ്മിഷന്‍ ബുക്കും പാസും നല്‍കുന്നത്. കഴിഞ്ഞയാഴ്ച ഗൈനക്കോളജില്‍ അഡ്മിറ്റായ രോഗികൾക്ക് അഡ്മിഷന്‍ ബുക്കിനൊപ്പം നല്‍കിയത് റോസ് നിറത്തിലുള്ള പാസാണ്. ഈ നിറത്തിലുള്ള പാസുമായി ഉച്ചഭക്ഷണം വാങ്ങാന്‍ വന്ന രോഗികളുടെ കൂട്ടിരിപ്പുകാരെയാണ് സെക്യൂരിറ്റി ജീവനക്കാര്‍ തടയാന്‍ ശ്രമിച്ചത്. ഈ പാസ് കാട്ടി ഉച്ചഭക്ഷണം വാങ്ങിയവരുടെ കൈയ്യില്‍നിന്നു പാസ് വാങ്ങിവച്ചു. ഇവരോട് രോഗിയുടെ അഡ്മിഷന്‍ ബുക്ക് സെക്യൂരിറ്റി ഓഫീസില്‍ കൊണ്ടുവന്നു കാണിക്കാനും തുടര്‍ന്ന് നിലവില്‍ അഡ്മിറ്റാകുന്നവര്‍ക്ക് നല്‍കുന്ന ഇളംനീല നിറത്തിലുള്ള പാസ് എടുക്കാനും നിര്‍ദേശിച്ചിരിക്കുകയാണ്. ആശുപത്രിയിലെ പ്രധാന അഡ്മിഷന്‍ കൗണ്ടറില്‍നിന്നു നല്‍കുന്ന പാസിന്‍റെ നിറവും ഗൈനക്കോളജി വിഭാഗത്തില്‍നിന്നു രോഗികള്‍ക്ക് നല്‍കിയ പാസിന്‍റെ നിറവും രണ്ടായതാണ് തര്‍ക്കത്തിനിടയാക്കിയത്.

അറുതിയില്ല യാത്രാദുരിതം; വലഞ്ഞ് കുമരകം നിവാസികൾ

കുമരകം: കോണത്താറ്റ് പാലം നിർമാണത്തിന്‍റെ ഭാഗമായി യാത്രാ ദുരിതത്തിൽ വലയുകയാണ് കുമരകം നിവാസികൾ. ഭാരമേറിയ സ്കൂൾ ബാഗും തൂക്കി ഒരു ബസിൽനിന്നു മറ്റൊരു ബസിലേക്കുള്ള വിദ്യാർഥികളുടെ യാത്ര ദയനീയ കാഴ്ചയാണ്. മഴ പെയ്താൽ പിന്നെ യാത്ര കൂടുതൽ ദുഷ്കരമാകും. യാത്രാദുരിതം പരിഹരിക്കാൻ രാവിലെയും വൈകുന്നേരവും താത്കാലിക ബണ്ടിലൂടെ ബസുകൾ സമയബന്ധിതമായി കടത്തിവിടണമെന്ന് ആവശ്യപ്പെട്ട് കളക്ടർ, പഞ്ചായത്ത് പ്രസിഡന്‍റ്, എസ്എച്ച്ഒ എന്നിവർക്ക് പരാതി നൽകുമെന്ന് സിപിഐ കുമരകം ലോക്കൽ സെക്രട്ടറി എ.പി. സലിമോൻ പറഞ്ഞു. അട്ടിപ്പീടിക , കൊഞ്ചുമട പ്രദേശങ്ങളിലെ യാത്രാദുരിതം പരിഹരിക്കാനും ഇതിലൂടെ സാധ്യമ കുമെന്നാണ് വിലയിരുത്തൽ. സ്വകാര്യ ബസുടമകളിൽ പലരും ഈ ആശയത്തോട് അനുകൂലമായിയാണ് പ്രതികരിച്ചത്. അനന്തമായി നീളുന്ന നിർമാണപ്രവർത്തനങ്ങൾക്കൊപ്പം ജനങ്ങളുടെ ദുരിതയാത്രയും തുടരുകയാണ്.

നാഗന്പടം മേല്‍പ്പാലത്തിലെ അപകട കട്ടിംഗും കുഴികളും അടച്ചു : റോഡിൽ വൻ ഗർത്തങ്ങൾ

കോട്ടയം: നാഗമ്പടം റെയില്‍വേ മേല്‍പ്പാലത്തിലെ അപകട കട്ടിംഗും കുഴികളും അടച്ചു, ഏതാനും മീറ്റര്‍ മാത്രം അകലെ, മീനച്ചിലാറിനു കുറുകെയുള്ള പാലത്തിലെ കുഴികള്‍ അടച്ചില്ല. കുഴികള്‍ വീണ്ടും യാത്രക്കാര്‍ക്കു മുന്നില്‍ വില്ലനാകുന്നു. ഏതാനും ദിവസങ്ങളായി നാഗമ്പടം റെയില്‍വേ പാലത്തിലെ കുഴികളും അപ്രോച്ച് റോഡുമായി ചേരുന്ന ഭാഗത്തെ വലിയ കട്ടിങ്ങും എംസി റോഡില്‍ ഗതാഗതക്കുരുക്കിനും അപകടങ്ങള്‍ക്കും കാരണമായിരുന്നു. പരാതികള്‍ വര്‍ധിച്ചതിനു പിന്നാലെയാണ് കഴിഞ്ഞ ദിവസം രാത്രി കുഴികള്‍ അടച്ചത്. എന്നാല്‍, മാനമായ രീതിയില്‍ കുരുക്കിനു കാരണമാകുന്ന, മീനച്ചിലാറിനു കുറുകെയുള്ള കുഴി അധികൃതര്‍ അടച്ചില്ല. രണ്ടു സ്പാനുകള്‍ ചേരുന്ന ഭാഗത്താണ് വന്‍ കുഴി രൂപപ്പെട്ടിരിക്കുന്ന്. തെക്കുഭാഗത്തുനിന്നു പാഞ്ഞെത്തുന്ന വാഹനങ്ങള്‍ കുഴി കണ്ട് പെട്ടെന്നു വെട്ടിക്കുന്നതും കുഴിയില്‍ ചാടുന്നതും അപകടങ്ങള്‍ക്കു കാരണമാകുന്നുണ്ട്. ഒരു കുഴി മാത്രമേയുള്ളൂവെങ്കിലും കുഴി ഒഴിവാക്കാന്‍ ബ്രേക്ക് ചവിട്ടേണ്ടിവരുന്നതു ഗതാഗതക്കുരുക്കിനും കാരണമാകുന്നുണ്ട്. കെഎസ്ആര്‍ടി സ്റ്റാൻഡിനു സമീപം രൂപപ്പെട്ട കുഴി ഇപ്പോള്‍ ഗര്‍ത്തമായി മാറി. വാഹനങ്ങള്‍ കുഴികള്‍ കയറിയിറങ്ങി പോകുന്നതോടെ ഇവിടെയും ഗതാഗതക്കുരുക്ക് ഉണ്ടാകുന്നു. ചെറിയ വാഹനങ്ങള്‍ക്കു കുഴിയില്‍ ചാടി തകരാറുമുണ്ടാകുന്നുണ്ട്. രാത്രിയില്‍ ഉള്‍പ്പെടെ കാല്‍നടയാത്രക്കാര്‍ കുഴിയില്‍ വീണ് അപകടത്തില്‍പ്പെടുന്നു. കെ.എസ്.ആര്‍.ടി.സി ബസില്‍ കയറാന്‍ ബോര്‍ഡ് നോക്കി ഓടിയെത്തുന്നവര്‍ക്കും അപകടക്കുഴിയില്‍ വീണു പരുക്കേല്‍ക്കാറുണ്ട്. നഗര, എംസി റോഡ് തിരക്കൊഴിവാക്കി പോകാന്‍ നിര്‍മിച്ച മണിപ്പുഴ ബൈപാസില്‍ നിറയെ അപകടക്കുഴികള്‍ ഒളിച്ചിരിക്കുകയാണ്. ചെറുകുഴികള്‍ മാത്രമായിരുന്നു രണ്ടാഴ്ച മുമ്പെങ്കില്‍ വെള്ളപ്പൊക്കത്തെത്തുടര്‍ന്ന് വന്‍ കുഴികളായി മാറി. സ്ഥിരമായി ഇതുവഴി വരുന്നവരെങ്കില്‍ ഈ കുഴികളില്‍ വീണ് അപകടങ്ങളുണ്ടാകാനുള്ള സാധ്യതകള്‍ ഏറെയാണ്.

അപ്പവും മീനും ഊട്ടുനേർച്ചയിൽ പങ്കെടുത്ത് ആയിരങ്ങൾ

ചെമ്മലമറ്റം: പന്ത്രണ്ട് ശ്ലീഹന്മാരുടെ പള്ളിയിൽ വിശുദ്ധ ശ്ലീഹന്മാരുടെ തിരുനാളിനോട് അനുബന്ധിച്ച് നടത്തിയ അപ്പവും മീനും ഊട്ടുനേർച്ചയിൽ ആയിരങ്ങൾ പങ്കുചേർന്നു. വിവിധ ജില്ലകളിൽ നിന്നും വിശ്വാസികൾ നി‍യോഗം അർപ്പിച്ച് നേർച്ചസദ്യയിൽ പങ്കെടുത്തു. ക്രിസ്തു തന്‍റെ ശിഷ്യന്മാർക്ക് പല സന്ദർഭങ്ങളിലും അപ്പവും മീനും പങ്കുവച്ചതിന്‍റെ ഓർമയ്ക്കായിട്ടാണ് ശ്ലീഹന്മാരുടെ തിരുനാളിന് അപ്പവും മീനും നേർച്ച നടത്തുന്നത്. ചെമ്മലമറ്റം പള്ളി വികാരിയായിരുന്ന ഫാ. ജയിംസ് കട്ടയ്ക്കലാണ് നേർച്ച ആരംഭിച്ചത്. വർഷങ്ങളായി എകെസിസി സംഘടനയാണ് ഇതിന് നേതൃത്വം നൽകുന്നത്.

വിശുദ്ധ അല്‍ഫോന്‍സാ തീര്‍ഥാടനകേന്ദ്രത്തില്‍ ആദ്യാക്ഷരം കുറിച്ച് കുരുന്നുകൾ

ഭരണങ്ങാനം: പന്തക്കുസ്താ തിരുനാൾ ദിനത്തിൽ വിശുദ്ധ അല്‍ഫോന്‍സാമ്മയുടെ സവിധേ ആദ്യാക്ഷരം കുറിക്കാൻ നൂറുകണക്കിന് കുരുന്നുകളെത്തി. രാവിലെ ഏഴുമുതൽ വൈകുന്നേരം അഞ്ചുവരെയായിരുന്നു ചടങ്ങ്. രാവിലെ ഏഴിന് ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്തു. റെക്ടര്‍ റവ.ഡോ. അഗസ്റ്റിന്‍ പാലക്കാപറമ്പിലും ഷ്‌റൈനിലെ വൈദികരും ആദ്യാക്ഷരം കുറിക്കലിനു നേതൃത്വം നല്കി. അധ്യാപികയായിരുന്ന വിശുദ്ധ അല്‍ഫോന്‍സാമ്മയുടെ സന്നിധിയില്‍ അനുഗ്രഹം തേടി ഓരോ ദിവസവും നൂറുകണക്കിന് തീര്‍ഥാടകരാണ് എത്തുന്നത്. എല്ലാ ദിവസങ്ങളിലും തീര്‍ഥാടന കേന്ദ്രത്തില്‍ ആദ്യാക്ഷരം കുറിക്കാനുള്ള അവസരം ഉണ്ടെന്ന് റെക്ടര്‍ റവ. ഡോ.അഗസ്റ്റിന്‍ പാലക്കാപറമ്പില്‍ അറിയിച്ചു.

ദീപിക - സീക് എഡ്യൂക്കേഷൻ അക്കാഡമിക് എക്സലൻസ് അവാർഡ്

ആദരവ് ഏറ്റുവാങ്ങി നൂറുകണക്കിനു വിദ്യാർഥികൾ കാഞ്ഞിരപ്പള്ളി: ദീപിക - സീക് എഡ്യൂക്കേഷൻ അക്കാഡമിക് എക്സലൻസ് അവാർഡ് - ആദരം 2025 ന് വിദ്യാർഥികളുടെയും സ്കൂളുകളുടെയും വൻ പങ്കാളിത്തം. കാഞ്ഞിരപ്പള്ളി പാസ്റ്ററൽ സെന്‍റർ ഓഡിറ്റോറിയത്തിൽ ഇന്നലെ നടന്ന അവാർഡ്ദാന ചടങ്ങിൽ നൂറുകണക്കിനു വിദ്യാർഥികളും മാതാപിതാക്കളും പങ്കെടുത്തു. തങ്ങളുടെ മേഖലയിലെ കഴിവുകൾ തിരിച്ചറിയുന്നവരായി ഓരോ കുട്ടിയും മാറണമെന്നും ജീവിതത്തിൽ വിജയവും സന്തോഷവും ഉണ്ടാകുന്പോൾ മറ്റുള്ളവരുമായി പങ്കുവയ്ക്കണമെന്നും അവാർഡ് ദാന ചടങ്ങ് ഉദ്ഘാടനം ചെയ്ത ചീഫ് വിപ്പ് ഡോ. എൻ. ജയരാജ് പറഞ്ഞു. ഓരോ വിജയവും ഓരോ കുട്ടിയുടെയും സഫലമാകുന്ന യാത്രയാണെന്നും അദ്ദേഹം കൂട്ടിച്ചേർത്തു. അപരന്‍റെ സന്തോഷത്തിലും ദുഃഖത്തിലും നമ്മൾ പങ്കാളികളാകണമെന്നും സ്വപ്നങ്ങൾ യാഥാർഥ്യമാകണമെങ്കിൽ ദൈവവിശ്വാസമുള്ളവരായി വളരണമെന്നും യോഗത്തിൽ അധ്യക്ഷതവഹിച്ച കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ പറഞ്ഞു. കൃത്യനിഷ്ഠയോടെയുള്ള കഠിനാധ്വാനശീലം ഓരോ കുട്ടിയും പരിശീലിക്കണമെന്നും പരാജയങ്ങളോടു പരിഭവിക്കാതെ വിജയത്തിലേക്കുള്ള പാതയായി കരുതണമെന്നും മാർ ജോസ് പുളിക്കൽ കൂട്ടിച്ചേർത്തു. രാഷ്‌ട്രദീപിക ലിമിറ്റഡ് എംഡി ഫാ. മൈക്കിൾ വെട്ടിക്കാട്ട് ആമുഖപ്രഭാഷണം നടത്തി. കാഞ്ഞിരപ്പള്ളി രൂപത വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ, രാഷ്‌ട്രദീപിക ഡയറക്ടർ ഷെവ. അഡ്വ. വി.സി. സെബാസ്റ്റ്യൻ, ദീപിക ജനറൽ മാനേജർ (സർക്കുലേഷൻ) ഫാ. ജിനോ പുന്നമറ്റത്തിൽ, ദീപിക രൂപത ഡയറക്ടർ ഫാ. ജസ്റ്റിൻ മതിയത്ത്, ദീപിക എജിഎം ആൻഡ് പിആർഒ മാത്യു കൊല്ലമലക്കരോട്ട്, ഡിസിഎൽ നാഷണൽ കോ ഓർഡിനേറ്റർ വർഗീസ് കൊച്ചുകുന്നേൽ എന്നിവർ പ്രസംഗിച്ചു. സീക് കൺസൾട്ടൻസി മാനേജിംഗ് ഡയറക്ടർ ജിബിൻ ബിനു ജോസഫ് കരിയർ ശില്പശാല നയിച്ചു. എസ്എസ്എൽസി, പ്ലസ്ടു പരീക്ഷകളിൽ നൂറു ശതമാനം വിജയം നേടിയ സ്കൂളുകൾ, എസ്എസ്എൽസി, പ്ലസ്ടു പരീക്ഷകളിൽ ഫുൾ എ എപ്ലസ് നേടിയ വിദ്യാർഥികൾ, പ്ലസ്ടു സയൻസ് വിഷയങ്ങളിൽ 80 ശതമാനത്തിനു മുകളിൽ മാർക്കു നേടിയവർ എന്നിവരെ അവാർഡ് ദാന ചടങ്ങിൽ ആദരിച്ചു.

അനുസ്മരണ യോഗം

എരുമേലി: നേതാക്കളുടെ വിയോഗത്തിൽ അനുസ്മരിച്ച് എരുമേലിയിൽ കോൺഗ്രസ്‌ യോഗം. കെപിസിസി മുൻ അധ്യക്ഷൻ തെന്നല ബാലകൃഷ്ണപിള്ള, കോൺഗ്രസ് മുണ്ടക്കയം ബ്ലോക്ക് കമ്മിറ്റി ജനറൽ സെക്രട്ടറിമാരായിരുന്ന എ.ആർ. രാജപ്പനായർ, ബേബി മണപ്പറമ്പിൽ എന്നിവരുടെ വേർപാടിലാണ് അനുസ്മരണ യോഗം നടന്നത്. ആന്‍റോ ആന്‍റണി എംപി ഉദ്ഘാടനം ചെയ്തു. കോൺഗ്രസ് ബ്ലോക്ക് പ്രസിഡന്‍റ് ബിനു മറ്റക്കര അധ്യക്ഷത വഹിച്ചു. ഡിസിസി പ്രസിഡന്‍റ് നാട്ടകം സുരേഷ് മുഖ്യപ്രഭാഷണം നടത്തി. കെപിസിസി ജനറൽ സെക്രട്ടറി പി.എ. സലിം, പ്രകാശ് പുളിക്കൻ, റോയി കപ്പലുമാക്കൽ, വിജയമ്മ ബാബു, കോരുത്തോട് പഞ്ചായത്ത് പ്രസിഡന്‍റ് ജാൻസി സാബു, സുനിൽ മണ്ണിൽ, കെ.എസ്. രാജു, ടി.വി. ജോസഫ്, ടി.ജെ. ജോൺസൺ, ടി.ടി. സാബു, ഷാജി തുണ്ടിയിൽ തുടങ്ങിയവർ പ്രസംഗിച്ചു.

പ്രതിഭാസംഗമം നടത്തി

പനമറ്റം: ദേശീയ വായനശാലയിൽ വിവിധ മേഖലയിൽ ഉന്നത വിജയം നേടിയ വിദ്യാർഥികളെ അനുമോദിച്ച് പ്രതിഭാസംഗമം നടത്തി. വായനശാലയുടെ കരാട്ടെ ക്ലാസിൽ ബ്ലാക്ക് ബെൽറ്റ് നേടിയ ആര്യ ശേഖർ, അനഘ് അനീഷ്, അർത്ഥിക രാജേഷ്, ഹരികൃഷ്ണൻ ദിലീപ് എന്നിവരെ അനുമോദിച്ചു. ഹൈദരാബാദിൽ നടന്ന ആദ്യ ദേശീയ മിനി ത്രോബോൾ ചാമ്പ്യൻഷിപ്പിൽ ഒന്നാംസ്ഥാനം നേടിയ കേരള ടീമംഗം ടി. ജാനകി ഊർമിള രാജൻ, എംജി യൂണിവേഴ്‌സിറ്റി ബിഎ മലയാളം രണ്ടാം റാങ്ക് നേടിയ സാന്ദ്ര റോസ് തോമസ് മാണിക്കത്ത് എന്നിവരെയും അനുമോദിച്ചു. എസ്എസ്എൽസി പരീക്ഷയിലെ സമ്പൂർണ വിജയത്തിന് പനമറ്റം ഗവ. ഹൈസ്‌കൂളിന് പുരസ്‌കാരം നൽകി. വിരമിച്ച പ്രിൻസിപ്പൽ ഹരികൃഷ്ണൻ ചെട്ടിയാരെ ആദരിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് പ്രഫ. എം.കെ. രാധാകൃഷ്ണൻ ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് സൂര്യാമോൾ, എസ്. ഷാജി, കെ.ആർ. മന്മഥൻ, തോമസ് ജേക്കബ്, എം.പി. ബിനുകുമാർ, ജാനകി ആർ. പിള്ള, ദുർഗ എസ്. നായർ, എം. മേഘ, ഗണകൻ, എസ്. രാജീവ്, എം.ഡി. പ്രിയ തുടങ്ങിയവർ പ്രസംഗിച്ചു.

കേരള പ്രിന്‍റേഴ്സ് അസോസിയേഷൻ കാഞ്ഞിരപ്പള്ളി മേഖലാ വാർഷികം

പൊൻകുന്നം: കേരള പ്രിന്‍റേഴ്സ് അസോസിയേഷൻ കാഞ്ഞിരപ്പള്ളി മേഖലയുടെ 40-ാം വാർഷികസമ്മേളനവും തെരഞ്ഞെടുപ്പും നടത്തി. ജില്ലാ പ്രസിഡന്‍റ് സജി തോമസ് ഉദ്ഘാടനം ചെയ്തു. മേഖലാപ്രസിഡന്‍റ് സന്തോഷ് സൈബർ അധ്യക്ഷത വഹിച്ചു. സംസ്ഥാന ട്രഷററും ജില്ലാ സെക്രട്ടറിയുമായ പി. അശോക് കുമാർ മുഖ്യപ്രഭാഷണം നടത്തി. കെ.എസ്. രാജേഷ് സംഘടനാ റിപ്പോർട്ടും സോണി കളർവിഷൻ കണക്കും അവതരിപ്പിച്ചു. ജെസ്റ്റിൻ ബോബി ജോസഫ്, സോണി തോമസ്, സാബു ഏബ്രഹാം തുടങ്ങിയവർ പ്രസംഗിച്ചു. 2025-27 വർഷത്തെ ഭാരവാഹികളായി കെ.ആർ. സന്തോഷ്-പ്രസിഡന്‍റ്, സാജു തുണ്ടിയിൽ-വൈസ് പ്രസിഡന്‍റ്, കെ.എസ്. രാജേഷ്-സെക്രട്ടറി, മനു വള്ളിയിൽ-ജോയിന്‍റ് സെക്രട്ടറി, സോണി തോമസ്-ട്രഷറർ, അഭിലാഷ് കൂട്ടിക്കൽ, സാബു ഏബ്രഹാം, സാബു ജോസഫ്, സന്തോഷ് കൊടുങ്ങൂർ-ജില്ലാ കമ്മിറ്റി അംഗങ്ങൾ എന്നിവരെ തെരഞ്ഞെടുത്തു.

പെട്ടിക്കടയിൽ മോഷണം

പൊൻകുന്നം: പൊൻകുന്നം-പുനലൂർ ഹൈവേ അരികിലെ പെട്ടിക്കടയിൽ മോഷണം. 5000 രൂപയുടെ സിഗരറ്റും ആയിരം രൂപയും പായ്ക്കറ്റ് ഭക്ഷണസാധനങ്ങളുമാണ് മോഷണം പോയത്. ശാരീരികാവശതകളുള്ള ചിറക്കടവ് മണ്ണാറാത്ത് രാജുവിന്‍റെ പെട്ടിക്കടയുടെ പിൻഭാഗം കുത്തിപ്പൊളിച്ചാണ് സാധനങ്ങളെടുത്തത്. ശനിയാഴ്ച രാത്രിയായിരുന്നു മോഷണം. ഇന്നലെ കൂടുതൽ കച്ചവടമുണ്ടാകുമെന്നതിനാൽ സിഗരറ്റ് കൂടുതലായി വാങ്ങിവച്ചിരുന്നുവെന്ന് രാജു പറഞ്ഞു. പൊൻകുന്നം പോലീസ് സ്ഥലത്തെത്തി അന്വേഷണം നടത്തി. അടുത്ത ദിവസങ്ങളിൽ ഇതേ റോഡരികിലെ രണ്ടു കടയുടെ പരിസരത്തുനിന്ന് ഒരു സ്‌കൂട്ടറും ബൈക്കും മോഷണം പോയിട്ടുണ്ട്.

മിനി മാസ്റ്റ് ലൈറ്റ് ഉദ്ഘാടനം ചെയ്തു

പൊൻകുന്നം: ആന്‍റോ ആന്‍റണി എംപിയുടെ പ്രാദേശിക വികസന ഫണ്ട് ഉപയോഗിച്ച് ചിറക്കടവ് പഞ്ചായത്ത് ഏഴാം വാർഡിൽ പൈനുങ്കൽപടി ജംഗ്ഷനിൽ സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം ആന്‍റോ ആന്‍റണി എംപി നിർവഹിച്ചു. ബ്ലോക്ക് പഞ്ചായത്തംഗം ബി. രവീന്ദ്രൻ നായർ അധ്യക്ഷത വഹിച്ചു. പഞ്ചായത്തംഗം ആന്‍റണി മാർട്ടിൻ, കോൺഗ്രസ് ബ്ലോക്ക് പ്രസിഡന്‍റ് പി. ജീരാജ്, സേവ്യർ മൂലകുന്ന്, അഭിലാഷ് ചന്ദ്രൻ, സുരേഷ് ടി. നായർ, ശ്യാം ബാബു, ടി.പി. രവിന്ദ്രൻപിള്ള, ബിജു മുണ്ടുവേലിക്കുന്നേൽ, ഇന്ദുകല എസ്. നായർ, സൂരജ് ദാസ്, രാജൻപിള്ള കല്ലൂരാത്ത്, ലിജി ഷാജൻ എന്നിവർ പ്രസംഗിച്ചു.

മുണ്ടക്കയം ടൗണിൽ വൻ തീപിടിത്തം

മുണ്ടക്കയം: മുണ്ടക്കയം ടൗണിൽ കോസ്‌വേ ജംഗ്ഷന് സമീപം വൻ തീപിടിത്തം. പഞ്ചായത്ത് ഷോപ്പിംഗ് കോംപ്ലക്സിന്‍റെ മുകളിലത്തെ നിലയിൽ ഇന്നലെ വൈകുന്നേരം ഏഴോടെയാണ് അഗ്നിബാധയുണ്ടായത്. ഹരിത കർമസേനാംഗങ്ങൾ വിവിധ വ്യാപാര സ്ഥാപനങ്ങളിൽനിന്നു ശേഖരിച്ച പ്ലാസ്റ്റിക് മാലിന്യങ്ങൾ സൂക്ഷിച്ചിരുന്ന കെട്ടിടത്തിലാണ് തീപിടിത്തമുണ്ടായത്. ഈ കെട്ടിടത്തിന്‍റെ ഒന്നാം നിലയിൽ നിരവധി വ്യാപാരസ്ഥാപനങ്ങൾ പ്രവർത്തിക്കുന്നുണ്ട്. കൂടാതെ സമീപത്ത് നിരവധി കെട്ടിടങ്ങളും സ്ഥിതിചെയ്യുന്നുണ്ട്. ഈ ഭാഗങ്ങളിലേക്ക് തീ പടരാതിരുന്നതിനാർ വലിയ ദുരന്തം ഒഴിവായി. കാഞ്ഞിരപ്പള്ളിയിൽനിന്ന് അഗ്നിശമന സേനാംഗങ്ങൾ സ്ഥലത്തെത്തി തീ നിയന്ത്രണ വിധേയമാക്കി. നാട്ടുകാരുടെ നേതൃത്വത്തിൽ എരുമേലി ഭാഗത്തുനിന്നു വന്ന വാഹനങ്ങൾ കോസ്‌വേ ജംഗ്ഷനിലൂടെ തിരിച്ചുവിട്ട് ഗതാഗതം നിയന്ത്രിച്ചു. തീപിടിത്തത്തെത്തുടർന്ന് പഞ്ചായത്ത് ഷോപ്പിംഗ് കോംപ്ലക്സ് കെട്ടിടത്തിന് സാരമായ കേടുപാട് സംഭവിച്ചിട്ടുണ്ട്. മുൻപും സമാനമായ രീതിയിൽ അപകടം രണ്ടു വർഷം മുമ്പുവരെ മുണ്ടക്കയം ബസ് സ്റ്റാൻഡിനു സമീപം കർഷക ഓപ്പൺ മാർക്കറ്റ് പ്രവർത്തിച്ചിരുന്ന കെട്ടിടത്തിലായിരുന്നു ഹരിതകർമസേനാംഗങ്ങൾ ശേഖരിക്കുന്ന പ്ലാസ്റ്റിക് മാലിന്യങ്ങൾ സൂക്ഷിച്ചിരുന്നത്. ഇവിടെയുണ്ടായ അഗ്നിബാധയിൽ കെട്ടിടം പൂർണമായും തകർന്നു. ഇന്നും ഈ കെട്ടിടം ഉപയോഗശൂന്യമായി കിടക്കുകയാണ്. മതിയായ സുരക്ഷ ഇല്ലാതെ പ്ലാസ്റ്റിക് മാലിന്യങ്ങൾ സൂക്ഷിക്കുന്നത് വലിയ അപകടങ്ങൾക്കാണ് ഇടയാക്കുന്നത്.

അവധിദിനം സേവന പ്രവർത്തനങ്ങൾക്കായി മാറ്റിവച്ച് വിദ്യാർഥികൾ

പൊൻകുന്നം: അവധിദിനം വെറുതേ കളിച്ചും രസിച്ചും മൊബൈൽ കണ്ടും തീർക്കുകയല്ല ഇവർ. കൂട്ടുകാരായ ഒൻപതാം ക്ലാസ് വിദ്യാർഥികൾ നവീൻ ടി. ലെനിൻ, അഭിഷേക് അശോകൻ, എട്ടാം ക്ലാസുകാരൻ കെ.എ. അഭിനവ് ദേവ്, ഏഴാം ക്ലാസുകാരൻ ടി.എസ്. നവനീത് എന്നിവർ ചേർന്ന് റോഡിൽ പൈപ്പിട്ട് ഉണ്ടായ കുഴിയടച്ച് മാതൃകയായി. പൊൻകുന്നം-കാവാലിമാക്കാൽ റോഡിന് കുറുകേ വാട്ടർ അഥോറിറ്റിയുടെ കുടിവെള്ള പൈപ്പിട്ട ഭാഗം കോൺക്രീറ്റോ ടാറോ ചെയ്യാതെ കിടന്നിരുന്നു. ഇവിടമാണ് വിദ്യാർഥികളായ ഈ സുഹൃത്തുക്കൾ ചേർന്ന് കല്ലും മണ്ണും ഇട്ടു നികത്തി കോൺക്രീറ്റ് ചെയ്ത് സഞ്ചാരയോഗ്യമാക്കിയത്. സ്‌കൂൾ വണ്ടികൾ ഉൾപ്പെടെ നിരവധി വാഹനങ്ങൾ കടന്നുപോകുന്ന റോഡിന്‍റെ ഈ ഭാഗത്തെ കുഴി കാരണം വാഹനങ്ങൾ ഏറെ ബുദ്ധിമുട്ടിയിരുന്നു. ഇവർ സമീപത്തെ വീടുകളിൽ പോയി മണൽ, സിമെന്‍റ്, മെറ്റിൽ ഉൾപ്പെടെ ശേഖരിച്ചു കൊണ്ടുവന്നാണ് കോൺക്രീറ്റ് ചെയ്തത്. ആറുമാസം മുമ്പ് ഇവർ ഇവിടം കല്ലും മണ്ണും ഇട്ട് നികത്തിയിരുന്നു. ഇത് വീണ്ടും നശിച്ചതോടെയാണ് കോൺക്രീറ്റ് ചെയ്യാൻ തയാറായത്.

കോഴാ സർക്കാർ ഫാമിൽ കൊയ്ത്ത് മാത്രമല്ല, നടീലും യന്ത്രം തന്നെ

കുറവിലങ്ങാട്: കോഴായിലെ സംസ്ഥാന സർക്കാർ സീഡ്ഫാമിൽ ഞാറുനടീലും യന്ത്രവത്കരിച്ചു. വർഷങ്ങൾക്ക് മുമ്പ് കൊയ്ത്ത് യന്ത്രം പ്രയോജനപ്പെടുത്തിയിരുന്നു. സീഡ് ഫാമിൽ യന്ത്രവത്കരണം പ്രോത്സാഹിപ്പിക്കുന്നതിന്‍റെ ഭാഗമായാണ് ഞാറുനടീൽ യന്ത്രം ഉപയോഗിച്ച് ആരംഭിച്ചത്. പദ്ധതി ഉദ്ഘാടനം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ നിർവഹിച്ചു. ജില്ലാ പഞ്ചായത്തംഗം നിർമല ജിമ്മി അധ്യക്ഷത വഹിച്ചു. ഉഴവൂർ ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ ചിറ്റേത്ത്, ജില്ലാ കൃഷി ഓഫീസർ ജോ ജോസ് ചിറത്തടം, കൃഷി ഡെപ്യൂട്ടി ഡയറക്ടർ ജോ പൈനാപ്പള്ളിൽ, ബ്ലോക്ക് പഞ്ചായത്തംഗം പി.സി. കുര്യൻ, ഫാം സൂപ്രണ്ട് മഞ്ജുദേവി, പഞ്ചായത്തംഗം സന്ധ്യ സജികുമാർ, യൂണിയൻ പ്രധിനിധികളായ സദാനന്ദ ശങ്കർ, സണ്ണി ചിറ്റക്കോടം തുടങ്ങിയവർ പ്രസംഗിച്ചു.

മാർ സ്ലീവാ മെഡിസിറ്റി മേലുകാവുമറ്റത്ത് നടത്തിയ റൂറൽ മിഷൻ സമാപിച്ചു

മേലുകാവ്: മാർ സ്ലീവാ മെഡിസിറ്റിയും മേലുകാവുമറ്റം അസംപ്ഷൻ മെഡിക്കൽ സെന്‍ററും ചേർന്നു നടത്തിയ റൂറൽ മിഷൻ സമാപിച്ചു. ഇന്നലെ നടന്ന രക്തദാന ക്യാമ്പും സമാപന സമ്മേളനവും മാർ സ്ലീവാ മെഡിസിറ്റി എംഡി മോൺ. ജോസഫ് കണിയോടിക്കൽ ഉദ്ഘാടനം ചെയ്തു. മേലുകാവുമറ്റം സെന്‍റ് തോമസ് പള്ളി വികാരി റവ. ഡോ. ജോർജ് കാരാംവേലിൽ അധ്യക്ഷത വഹിച്ച സമ്മേളനത്തിൽ മെഡിസിറ്റി ഡയറക്ടർ ഫാ. ഗർവാസീസ് ആനിത്തോട്ടത്തിൽ, ജോർജ് വട്ടക്കാനയിൽ എന്നിവർ പ്രസംഗിച്ചു. എസ്എംവൈഎം, എകെസിസി, മാതൃവേദി, പിതൃവേദി സംഘടനകൾ നേതൃത്വം കൊടുത്ത രക്തദാന ക്യാമ്പിൽ യുവജനങ്ങളും ആരോഗ്യ പരിപാലനവും എന്ന വിഷയത്തിൽ ഡോ. ആൻ ടോമിന ബോധവത്കരണ ക്ലാസ് നയിച്ചു.

രാമപുരം കോളജിൽ ഏകദിന അക്കാദമിക് ശില്പശാല

രാമപുരം: മാര്‍ ആഗസ്തിനോസ് കോളജില്‍ ഏകദിന അക്കാദമിക് ശില്പശാല നടത്തി. ഉന്നത വിദ്യാഭ്യാസം പുതിയ വഴികള്‍ തേടുന്ന കാലഘട്ടത്തില്‍ അതിന്‍റെ വളര്‍ച്ചയെക്കുറിച്ച് സമഗ്രമായി വിലയിരുത്തുക എന്ന ലക്ഷ്യത്തോടെ അധ്യാപക ശക്തീകരണത്തിനും നൈപുണ്യവികസനത്തിനും പ്രത്യേകം ഊന്നല്‍ നല്‍കിക്കൊണ്ടാണ് ശില്പശാല സംഘടിപ്പിച്ചത്. നയതന്ത്രജ്ഞനും കേരള ഉന്നത വിദ്യാഭ്യാസ കൗണ്‍സില്‍ സെക്രട്ടറിയുമായിരുന്ന ടി.പി. ശ്രീനിവാസന്‍ ശില്പശാല ഉദ്ഘാടനം ചെയ്തു. വിവിധ വിദ്യാഭ്യാസ വകുപ്പുകളില്‍ പ്രവര്‍ത്തിക്കുന്ന വിദഗ്ധരും ഗവേഷണരംഗത്തെ പ്രമുഖരും വിവിധ സെഷനുകള്‍ക്ക് നേതൃത്വം നല്‍കി. പ്രഫ. ലോപ്പസ് മാത്യു സമാപന സമ്മേളനം ഉദ്ഘാടനം ചെയ്തു. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം അധ്യക്ഷത വഹിച്ചു. പ്രിന്‍സിപ്പൽ ഡോ. റെജി വര്‍ഗീസ് മേക്കാടന്‍, ഐക്യുഎസി കോ-ഓര്‍ഡിനേറ്റര്‍ കിഷോര്‍, നാക് കോ-ഓര്‍ഡിനേറ്റര്‍ ജിബി ജോണ്‍ മാത്യു, വൈസ് പ്രിന്‍സിപ്പൽമാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്‌ട്രേറ്റര്‍മാരായ രാജീവ് ജോസഫ്, പ്രകാശ് ജോസഫ് എന്നിവര്‍ നേതൃത്വം നല്‍കി.

നിക്ഷേപകരെ വരവേൽക്കാൻ ഒരുങ്ങി പൂഞ്ഞാർ

ഈരാറ്റുപേട്ട: പൂഞ്ഞാര്‍ നിയോജകമണ്ഡലത്തിന്‍റെ സമഗ്രമായ പുരോഗതി ലക്ഷ്യമിട്ട് സെബാസ്റ്റ്യന്‍ കുളത്തുങ്കല്‍ എംഎല്‍എയുടെ നേതൃത്വത്തില്‍ സംസ്ഥാന വ്യവസായ വകുപ്പിന്‍റെ ആഭിമുഖ്യത്തില്‍ റൈസിംഗ് പൂഞ്ഞാര്‍ 2k25 നിക്ഷേപക സംഗമത്തിന്‍റെ ഒരുക്കങ്ങള്‍ പൂര്‍ത്തിയായി. ഇന്നു രാവിലെ ഈരാറ്റുപേട്ട നടയ്ക്കല്‍ ബര്‍ക്കത്ത് സ്‌ക്വയര്‍ ഓഡിറ്റോറിയത്തില്‍ നടക്കുന്ന നിക്ഷേപകസംഗമം മന്ത്രി പി. രാജീവ് ഉദ്ഘാടനം ചെയ്യും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. ജില്ലാ കളക്ടര്‍ ജോണ്‍ വി. സാമുവല്‍, മന്ത്രി റോഷി അഗസ്റ്റിന്‍, ആന്‍റോ ആന്‍റണി എംപി, ജോസ് കെ. മാണി എംപി, വ്യവസായവകുപ്പ് പ്രിന്‍സിപ്പല്‍ സെക്രട്ടറി എ.പി.എം. മുഹമ്മദ് ഹനീഷ്, വ്യവസായ വകുപ്പ് ഡയറക്ടര്‍ വിഷ്ണുരാജ് എന്നിവര്‍ പ്രസംഗിക്കും. മന്ത്രി പി. രാജീവ് സംരംഭകരുമായി അഭിമുഖം നടത്തും. ഉച്ചകഴിഞ്ഞ് ടി.കെ. ജോസ്, കേരള സ്റ്റാര്‍ട്ട് അപ്പ് മിഷന്‍ സിഇഒ അനൂപ് അംബിക, സന്തോഷ് ജോര്‍ജ് കുളങ്ങര എന്നിവര്‍ വിവിധ ക്ലാസുകള്‍ നയിക്കും. സമാപന സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. സെബാസ്റ്റ്യന്‍ കുളത്തുങ്കല്‍ എംഎൽഎ അധ്യക്ഷത വഹിക്കും. ചീഫ് സെക്രട്ടറി ഡോ. എ. ജയതിലക്, തദ്ദേശ സ്ഥാപന അധ്യക്ഷരായ സുഹ്റ അബ്ദുള്‍ ഖാദര്‍, മറിയാമ്മ ഫെര്‍ണാണ്ടസ്, അജിത രതീഷ്, ജില്ലാ പഞ്ചായത്ത് അംഗങ്ങളായ പി.ആര്‍. അനുപമ, ഷോണ്‍ ജോര്‍ജ്, ശുഭേഷ് സുധാകരന്‍, വിവിധ പഞ്ചായത്ത് പ്രസിഡന്‍റുമാരായ ഗീത നോബിള്‍, ജോര്‍ജ് മാത്യു, കെ.സി. ജയിംസ്, സ്‌കറിയ ജോസഫ്, മറിയാമ്മ സണ്ണി, കെ.കെ. ശശികുമാര്‍, ബിജോയ് ജോസ്, രേഖ ദാസ്, സി.എം. ജാന്‍സി എന്നിവര്‍ പ്രസംഗിക്കും.

ക്രൈസ്തവര്‍ക്കെതിരായ അക്രമങ്ങള്‍ അവസാനിപ്പിക്കണം: കത്തോലിക്ക കോണ്‍ഗ്രസ്

പാലാ: ഒറീസയില്‍ വ്യത്യസ്ത സംഭവങ്ങളില്‍ വൈദികര്‍ക്കും കന്യാസ്ത്രീകള്‍ക്കും വിശ്വാസികള്‍ക്കും നേരേയുണ്ടായ ആക്രമണങ്ങള്‍ മനുഷ്യമനഃസാക്ഷിയെ ഞെട്ടിക്കുന്നതാണെന്നും രാജ്യവ്യാപകമായി ക്രൈസ്തവര്‍ ആക്രമിക്കപ്പെടുന്നത് ആശങ്കാജനകമാണെന്നും കത്തോലിക്ക കോണ്‍ഗ്രസ് പാലാ രൂപതാസമിതി. ‌വന്ദ്യവൈദികന്‍ ഉള്‍പ്പെടെയുള്ളവരെയാണ് കഴിഞ്ഞ ദിവസം ആക്രമിച്ചത്. ഒരു ജനാധിപത്യ രാജ്യത്തില്‍ ഇത്തരം സംഭവങ്ങള്‍ ന്യായീകരിക്കപ്പെടാവുന്നതല്ല. കന്യാസ്ത്രീകള്‍ക്കും കൂടെയുണ്ടായിരുന്ന വിദ്യാര്‍ഥിനികള്‍ക്കും നേരിടേണ്ടിവന്നത് ക്രൂരമായ അക്രമവും മാനസിക പീഡനവുമാണ്. തൊഴില്‍ പരിശീലനത്തിന്‍റെ ഭാഗമായി പോവുകയായിരുന്ന കുട്ടികളും ഒപ്പമുണ്ടായിരുന്ന കന്യാസ്ത്രീയുമാണ് ബറാമ്പൂരില്‍ ആക്രമിക്കപ്പെട്ടത്. ക്രൈസ്തവര്‍ക്കെതിരേയുള്ള എല്ലാ കടന്നുകയറ്റങ്ങളെയും അപലപിക്കാനും കുറ്റവാളികള്‍ക്കെതിരേ നടപടികളെടുക്കാനും അവരെ മാതൃകാപരമായി ശിക്ഷിക്കാനും നിയമ നീതിന്യായ സംവിധാനങ്ങള്‍ തയാറാവണമെന്ന് പാലാ രൂപതാസമിതി ആവശ്യപ്പെട്ടു. ‌രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിച്ച യോഗം രൂപത ഡയറക്ടര്‍ റവ.ഡോ. ജോര്‍ജ് വര്‍ഗീസ് ഞാറക്കുന്നേല്‍ ഉദ്ഘാടനം ചെയ്തു. രൂപത ജനറല്‍ സെക്രട്ടറി ജോസ് വട്ടുകുളം, രൂപത ട്രഷറര്‍ ജോയ് മാത്യു കണിപറമ്പില്‍, ആന്‍സമ്മ സാബു, സി.എം. ജോര്‍ജ്, പയസ് കവളംമാക്കല്‍, ജോണ്‍സണ്‍ ചെറുവള്ളി, രാജേഷ് പാറയില്‍, ജോണ്‍സണ്‍ വീട്ടിയാങ്കല്‍ തുടങ്ങിയവര്‍ പ്രസംഗിച്ചു.

പാലാ രൂപതയ്ക്ക് അഭിമാനം; മൂന്ന് ഇടവകകള്‍ കൂടി ഫൊറോനകളായി

പാലാ: രൂപതയുടെ പ്ലാറ്റിനം ജൂബിലിയോടനുബന്ധിച്ച് മൂന്നു ഇടവകകളെ കൂടി ഫൊറോനകളായി പ്രഖ്യാപിച്ചു. കൊഴുവനാല്‍, കടപ്ലാമറ്റം, കൂത്താട്ടുകുളം എന്നീ ഇടവകകളെയാണ് ബിഷപ് മാര്‍ ജോസഫ് കല്ലറങ്ങാട്ട് ഫൊറോനകളായി പ്രഖ്യാപിച്ചത്. ഓരോ കുര്‍ബാനയും ഓരോ പന്തക്കുസ്തയാണെന്നും ഓരോ കുര്‍ബാനയും കഴിയുമ്പോള്‍ റീചാര്‍ജബിളായ ബാറ്ററികള്‍ പോലെ അരൂപയില്‍ നിറഞ്ഞാണ് വിശ്വാസികള്‍ ഭവനങ്ങളിലേക്ക് മടങ്ങുക എന്നും മാര്‍ കല്ലറങ്ങാട്ട് പറഞ്ഞു. വിവിധ ഫൊറോനകളില്‍ രൂപത ചാന്‍സലര്‍ ഫാ. ജോസഫ് കുറ്റിയാങ്കല്‍ ഔദ്യോഗികമായി പ്രഖ്യാപനം വായിച്ചു. കൊഴുവനാലില്‍ വികാരി ഫാ. ജോസ് നെല്ലിക്കത്തെരുവിലിനെ ഫോറോന വികാരിയായി നിയമിച്ചു. അല്‍ഫോന്‍സാഗിരി, മണലുങ്കല്‍, കാഞ്ഞിരമറ്റം, കരിമ്പാനി, മഞ്ഞാമറ്റം, മറ്റക്കര, ഉരുളികുന്നം, പൈക, മൂഴൂര്‍ എന്നീ ഇടവകകളാണ് പുതിയ ഫെറോനയില്‍ ഉണ്ടാവുക. മുഖ്യ വികാരി ജനറാൾ മോണ്‍. ജോസഫ് തടത്തില്‍, മോണ്‍. ജോസഫ് മലേപ്പറമ്പില്‍, മോണ്‍. സെബാസ്റ്റ്യന്‍ വേത്താനത്ത്, മോണ്‍. ജോസഫ് കണിയോടിക്കല്‍ തുടങ്ങിയവരും പ്രഖ്യാപനവേളയില്‍ സന്നിഹിതരായിരുന്നു. മറ്റ് ഇടവകകളിലെ വികാരിമാരും വിശ്വാസിസമൂഹവും വൈദികരും സന്യസ്തരും പ്രഖ്യാപനത്തിന് എത്തിച്ചേര്‍ന്നിരുന്നു. കടപ്ലാമറ്റം: പന്തക്കുസ്ത തിരുനാള്‍ ദിനമായ ഇന്നലെ ബിഷപ് മാര്‍ ജോസഫ് കല്ലറങ്ങാട്ടാണ് കടപ്ലാമറ്റം സെന്‍റ് മേരീസ് ദേവാലയം ഫൊറോന പള്ളിയായി ഉയര്‍ത്തിയത്. രൂപത ചാന്‍സലര്‍ ഫാ. ജോസഫ് കുറ്റിയാങ്കല്‍ ഡിക്രി വായിച്ചു. പ്രോട്ടോ സിഞ്ചെല്ലൂസ് മോണ്‍. ജോസഫ് തടത്തില്‍, വികാരി ജനറാൾമാരായ മോണ്‍. സെബാസ്റ്റ്യന്‍ വേത്താനത്ത്, മോണ്‍. ജോസഫ് മലേപ്പറമ്പില്‍, മോണ്‍. ജോസഫ് കണിയോടിക്കല്‍ എന്നിവര്‍ സന്നിഹിതരായിരുന്നു. ഫാ. ജോസഫ് മുളഞ്ഞനാനിയിലാണ് ഫൊറോന വികാരി. മംഗളാരാം, കൂടല്ലൂര്‍, വയലാ, മരങ്ങാട്ടുപിള്ളി, പാലക്കാട്ടുമല, പാളയം എന്നീ ഇടവകകളാണ് കടപ്ലാമറ്റം ഫൊറോനയിലുള്ളത്.

വികസിത് കൃഷി സങ്കല്പ് സെമിനാർ പത്തിന്

ചങ്ങനാശേരി: വികസിത് കൃഷി സങ്കല്പ് അഭിയാൻ പദ്ധതി പ്രകാരം 10ന് ഉച്ചകഴിഞ്ഞ് 2 മുതൽ 4.30വരെ ഹോംസ്റ്റഡ് ഫാമിംഗ് എന്ന വിഷയത്തിൽ ചങ്ങനാശേരി ഹെഡ് പോസ്റ്റ് ഓഫീസിന് എതിർവശമുള്ള മുനിസിപ്പൽ ഹാളിൽ വച്ച് കാർഷിക സെമിനാർ നടത്തുന്നു. ഡോ. ആശ വി. പിള്ള, ഡോ. ഹഫീഫ് റോഷൻ, ഡോ.വി.എ. മുഹമ്മദ്‌ നിസാർ എന്നിവർ ക്ലാസുകൾ നയിക്കുകയും കർഷകരുടെ സംശയങ്ങൾക്ക് മറുപടി നൽകുകയും ചെയ്യും. ആദ്യം രജിസ്റ്റർ ചെയ്യുന്ന 100 കർഷകർക്ക് മാത്രമാണ് സെമിനാറിൽ പ്രവേശനം. താത്പര്യമുള്ള കർഷകർ അന്നേദിവസം ഒരു മണിക്ക് മുന്പായി രജിസ്ട്രേഷൻ നടത്തേണ്ടതാണ്.

സ്മാര്‍ട്ട് അങ്കണവാടി തുറന്നു

കുറിച്ചി: കുറിച്ചി പഞ്ചായത്ത് 12-ാം വാര്‍ഡിലെ 15-ാം നമ്പര്‍ മാത്തന്‍കുന്ന് അങ്കണവാടിയുടെ പുതിയ കെട്ടിടം തുറന്നു. പഞ്ചായത്ത് ഭരണസമിതി 2024-25 സാമ്പത്തിക വര്‍ഷത്തില്‍ തനത് ഫണ്ടില്‍നിന്ന് അനുവദിച്ച 15 ലക്ഷം രൂപ മുടക്കിയാണ് പുതിയ കെട്ടിടം നിര്‍മിച്ചത്. 2025-26 വാര്‍ഷിക പദ്ധതിയില്‍ ഉള്‍പ്പെടുത്തി ഇലക്‌ട്രിക്കല്‍ പ്രവൃത്തികള്‍ക്കായി രണ്ടു ലക്ഷം രൂപ വകയിരുത്തിയിട്ടുണ്ട്. പുതിയ കെട്ടിടത്തില്‍ ആധുനിക രീതിയിലുള്ള ടീച്ചിംഗ് റൂം, അടുക്കള, സ്റ്റോര്‍ റൂം, വാഷിംഗ് ഏരിയ, ബേബി ഫ്രണ്ട്‌ലി ടോയ്‌ലറ്റ് സൗകര്യങ്ങള്‍ എന്നിവ ഉള്‍പ്പെടുത്തിയിരിക്കുന്നു. കുട്ടികള്‍ക്കുള്ള പ്ലേയിംഗ് ഏരിയയും തയാാറാക്കുന്നുണ്ട്. പഞ്ചായത്ത് പഞ്ചായത്ത് പ്രസിഡന്‍റ് സുജാത സുശീലന്‍ ഉദ്ഘാടനം ചെയ്തു. വൈസ് പ്രസിഡന്‍റ് കെ.ആര്‍. ഷാജി അധ്യക്ഷത വഹിച്ചു. പള്ളം ബ്ലോക്ക് പഞ്ചായത്ത് പ്രസിഡന്‍റ് പ്രഫ. ടോമിച്ചന്‍ ജോസഫ്, അംഗങ്ങളായ ബിജു എസ്. മേനോന്‍, പ്രശാന്ത് മനന്താനം, കെ. പ്രീതാകുമാരി, കൊച്ചുറാണി ജോസഫ്, അഭിജിത്ത് മോഹന്‍ എന്നിവര്‍ പ്രസംഗിച്ചു.

ഒരു പടികൂടി കടന്ന് കാവാലം തട്ടാശേരി പാലം: 3.56 കോടിയുടെ അധിക അനുമതി

മങ്കൊമ്പ്: എസി റോഡിനെയും എംസി റോഡിനെയും ബന്ധിപ്പിക്കുന്ന ഹ്രസ്വപാത യാഥർഥ്യമാക്കുന്ന കാവാലം തട്ടാശേരി പാലം നിർമാണത്തിന് കിഫ്ബി 63.59 കോടി രൂപയുടെ സാമ്പത്തികാനുമതി നൽകി. നേരത്തെ 60.03 കോടി അനുവദിച്ചിരുന്നെങ്കിലും പിഡബ്ള്യുഡിയുടെ പുതുക്കിയ റേറ്റ് പ്രകാരം അധികത്തുകയുടെ അനുമതി ആവശ്യമാണെന്നത് ടെണ്ടർ നടപടികൾക്കു തടസമായിരുന്നു. ഇതേത്തുടർന്ന് 3.56 കോടി രൂപ അധികമായി ചേർത്തു പുതുക്കിയ എസ്റ്റിമേറ്റ് കേരളാ റോഡ് ഫണ്ട് ബോർഡ് കിഫ്ബിക്ക് സമർപ്പിച്ചിരുന്നു. ഇതിനാണ് കഴിഞ്ഞ ദിവസം അനുമതിയായത്. എന്നാൽ പാലത്തിനായി ഏറ്റെടുത്ത സ്ഥലത്തുള്ള മരങ്ങൾ മുറിച്ചുനീക്കുന്ന കാര്യത്തിൽ നടപടിയായിരുന്നില്ല. ഇതിനായി കെആർഎഫ്ബി മൂന്നു തവണ ക്വട്ടേഷൻ ക്ഷണിച്ചിരുന്നെങ്കിലും ആരും തയാറായിരുന്നില്ല. മുറിക്കേണ്ട മരങ്ങളധികവും പാഴ്മരങ്ങളായതിനാലാണ് ആരു താത്പര്യം പ്രകടിപ്പിക്കാതിരുന്നത്. വെട്ടുകൂലി ഇനത്തിൽ വലിയ സാമ്പത്തികച്ചെലവ് വരുമെന്നതും തടസമായി. തുടർന്ന് കാവാലം പാലം സമ്പാദക സമിതിയുടെ നേതൃത്വത്തിൽ പൊതുജനങ്ങളുടെ സഹകരണത്തോടെ മരങ്ങൾ വെട്ടിമാറ്റാൻ തീരുമാനിക്കുകയും ഇതിനായി ക്വട്ടേഷൻ സമർപ്പിച്ച് അനുമതിക്കായി കാത്തിരിക്കുകയുമാണ്. മരങ്ങൾ വെട്ടിമാറ്റാൻ ഒരു മാസം സമയമാകും അനുവദിക്കുക. ഇതിനൊപ്പം ടെൻഡർ നടപടികളും നടത്താനാണ് കെആർഎഫ് ബി അധികാരികളുടെ നീക്കം. അടിയന്തരമായി ടെണ്ടർ ക്ഷണിച്ച് പാലം നിർമാണത്തിലേക്ക് കടക്കുമെന്ന് തോമസ് കെ. തോമസ് എംഎൽഎ അറിയിച്ചു. നാട്ടുകാരുടെ നിരന്തരമായ സമരങ്ങളെത്തുടർന്ന് ഒന്നാം പിണറായി സർക്കാരിന്‍റെ 2016 ലെ ആദ്യ ഇടക്കാല ബജറ്റിൽ പാലത്തിനായി 30 കോടി രൂപ അനുവദിച്ചിരുന്നു. തുടർന്ന് ദേശീയ ജലപാത നിയമം മറികടക്കാൻ രൂപരേഖയിൽ മാറ്റം വരുത്തിയതോടെ ഇത് 52 കോടി രൂപയായി വർധിപ്പിച്ചു. പടഹാരം പാലത്തിന്‍റെ മാതൃകയിലാണ് തട്ടാശേരി പാലവും നിർമിക്കാൻ ലക്ഷ്യമിടുന്നത്. 400 മീറ്റർ നീളത്തിലും 8.5 മീറ്റർ വീതിയിലുമാണ് പാലം നിർമിക്കുക. ടവർ മാതൃകയിൽ 45 മീറ്ററിന്‍റെ നാല് സ്പാനുകളും ഇരുവശത്തും 35 മീറ്റർ നീളത്തിൽ രണ്ടു വീതം സ്പാനുകളുമാണ് വെള്ളത്തിൽ നിർമിക്കുന്നത്.

താഴത്തുവടകര ഹയർസെക്കൻഡറി സ്കൂളിൽ നൈപുണ്യ വികസന സെന്‍റർ ആരംഭിച്ചു

കറുകച്ചാൽ: താഴത്തുവടകര ഹയർസെക്കൻഡറി സ്കൂളിൽ നൈപുണ്യ വികസന സെൻറർ തുറന്നു. യുവജനങ്ങൾക്ക് ആധുനീക ലോകത്തെ തൊഴി‌ൽ സാധ്യതയും അറിവും നൈപുണ്യവും നൽകുക എന്ന ലക്ഷ്യത്തോടെ കേന്ദ്രാവിഷ്‌കൃത പദ്ധതിയായ സ്റ്റാർസ്, സമഗ്ര ശിക്ഷ കേരളം എന്നിവ സംയുക്തമായി കേരളത്തിലെ ഗവൺമെന്‍റ് സ്കൂ‌ളുകൾ കേന്ദ്രീകരിച്ച് നടപ്പിലാക്കുന്നതാണ് സ്കിൽ ഡെവലപ്‌മെന്‍റ് സെന്‍റർ. താഴത്തുവടകര ഹയർസെക്കൻഡറി സ്കൂളിൽ മൊബൈൽ ഫോൺ ഹാർഡ്‌വേർ റിപ്പയർ ടെക്ന‌ീഷൻ, ഫിറ്റ്നസ് ട്രെയിനർ എന്നീ കോഴ്‌സുകളാണ് ആരംഭിച്ചത്. ചീഫ് വിപ്പ് ഡോ.എൻ ജയരാജ് സെൻറർ ഉദ്ഘാടനം ചെയ്തു. വാഴൂർ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി അധ്യക്ഷത വഹിച്ചു. വെള്ളാവൂർ പഞ്ചായത്ത് പ്രസിഡന്‍റ് പി.ടി. അനൂപ്, വൈസ് പ്രസിഡന്‍റ് കെ.കെ. ആനന്ദവല്ലി ബ്ലോക്ക് പഞ്ചായത്തംഗം ശ്രീജിത്ത് വെള്ളാവൂർ, പ്രിൻസിപ്പൽ ആർ. ജിഷ തുടങ്ങിയവർ പ്രസംഗിച്ചു.

പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് പൂട്ടിയതില്‍ യൂത്ത് കോണ്‍ഗ്രസ് പ്രതിഷേധം

ചങ്ങനാശേരി: നഗരത്തിലെത്തുന്ന സ്ത്രീകള്‍ ഉള്‍പ്പെടെ നൂറുകണക്കിന് ആളുകള്‍ക്ക് ആശ്രയമായ പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് അടച്ചു പൂട്ടിയതിനെതിരേ യൂത്ത് കോണ്‍ഗ്രസ് ടൗണ്‍ ഈസ്റ്റ് മണ്ഡലം കമ്മിറ്റിയുടെ നേതൃത്വത്തില്‍ പെരുന്ന ബസ് സ്റ്റാന്‍ഡില്‍ പ്രതിഷേധം നടത്തി. കോണ്‍ഗ്രസ് ടൗണ്‍ മണ്ഡലം പ്രസിഡന്‍റ് സിയാദ് അബ്ദുൾ റഹ്‌മാന്‍ ഉദ്ഘാടനം ചെയ്തു. യൂത്ത് കോണ്‍ഗ്രസ് ഈസ്റ്റ് മണ്ഡലം പ്രസിഡന്‍റ് റൗഫ് റഹീം അധ്യക്ഷത വഹിച്ചു. യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് അഡ്വ. ഡെന്നീസ് ജോസഫ്, ജില്ലാ ജനറല്‍ സെക്രട്ടറി അഡ്വ. ബിബിന്‍ വര്‍ഗീസ് കടന്തോട്, എബിന്‍ ആന്‍റണി, അശ്വിന്‍ ജിയോ ഏബ്രഹാം, ബിബിന്‍ ജോസഫ്, കണ്ണന്‍ പി.എസ്., ടോണി കൂട്ടംപേരൂര്‍, സുധി ജോസഫ് എന്നിവര്‍ പ്രസംഗിച്ചു.

ജനറല്‍ ആശുപത്രിയിലെ കാരുണ്യ ഫാര്‍മസി പുനരാരംഭിച്ചു

ചങ്ങനാശേരി: ജനറല്‍ ആശുപത്രിയിലെ കാരുണ്യമെഡിക്കല്‍ സ്റ്റോര്‍ പുനരാരംഭിച്ചു. പേവാര്‍ഡ് കെട്ടിടത്തിലാണ് ഫാര്‍മസി പ്രവര്‍ത്തിക്കുന്നത്. ഫാര്‍മസിയുടെ ഉദ്ഘാടനം ജോബ് മൈക്കിള്‍ എംഎല്‍എ നിര്‍വഹിച്ചു. പരിസ്ഥിതി ദിനത്തിന്‍റെ ഭാഗമായി ചങ്ങനാശേരി ജനറല്‍ ആശുപത്രി വളപ്പില്‍ എംഎല്‍എ വൃക്ഷത്തൈ നട്ടു. മുന്‍സിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, വൈസ് ചെയര്‍മാന്‍ മാത്യൂസ് ജോര്‍ജ് എന്നിവര്‍ പ്രസംഗിച്ചു. photo ചങ്ങനാശേരി ജനറല്‍ ആശുപത്രിയിലെ പരിസ്ഥിതിദിനാചരണം ജോബ് മൈക്കിള്‍ എംഎല്‍എ ഉദ്ഘാടനം ചെയ്യുന്നു.

എസ്ബി കോളജില്‍ പരിസ്ഥിതി ദിനാചരണം

ചങ്ങനാശേരി: എസ്ബി കോളജില്‍ ഭൂമിത്ര സേനയുടെ നേതൃത്വത്തില്‍ കോളജിലെ വിവിധ ഡിപ്പാര്‍ട്ട്‌മെന്‍റുകൾ പരിസ്ഥിതി ദിന പരിപാടികള്‍ നടത്തി. കോളജ് കാമ്പസിലും ചങ്ങനാശേരി ബൈപാസിലും വൃക്ഷത്തൈകള്‍ നട്ടുപിടിപ്പിച്ചു. ഫോട്ടോഗ്രഫി മത്സരം, പോസ്റ്റര്‍ ഡിസൈന്‍, സാമൂഹിക ബോധവത്കരണം തുടങ്ങിയ പരിപാടികളും നടത്തി. ബോട്ടണി ഡിപ്പാര്‍ട്ട്‌മെന്‍റിന്‍റെ നേതൃത്വത്തില്‍ കോളജ് ഓഫീസിലേക്ക് ഇന്‍ഡോര്‍ പ്ലാന്‍റുകള്‍ കൈമാറി. ഗ്രീന്‍ വര്‍ക്ക് സ്‌പേസ് എന്ന പ്രോഗ്രാം പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍ ഉദ്ഘാടനം ചെയ്തു. ഹരിതം ലഹരി എന്ന പരിപാടിയോടു ചേര്‍ന്ന് പരിസ്ഥിതി ദിനത്തില്‍ വിദ്യാർഥികള്‍ ലഹരിവിരുദ്ധ പ്രതിജ്ഞയെടുത്തു. ഭൂമിത്ര സേന കോ-ഓർഡിനേറ്റര്‍ ജെബിന്‍ ജോസഫ് പ്രസംഗിച്ചു.

നഗരസഭയുടെ പെരുന്ന വർക്കിംഗ് വിമൻസ് ഹോസ്റ്റൽ നടത്തിപ്പ് : പരസ്യലേലത്തിലൂടെ നൽകണം: യുഡിഎഫ്

ചങ്ങനാശേരി: നഗരസഭയുടെ ഉടമസ്ഥതയിലുള്ള പെരുന്ന വർക്കിംഗ് വിമൻസ് ഹോസ്റ്റൽ നടത്തിപ്പുമായി ബന്ധപ്പെട്ട് ഗുരുതര ക്രമക്കേടും അഴിമതിയും നടന്നിട്ടുണ്ടെന്ന് യുഡിഎഫ് നഗരസഭ പാർലമെന്‍ററി പാർട്ടി യോഗത്തിൽ ആരോപണം. യാതൊരുവിധ മാനദണ്ഡങ്ങളും പാലിക്കാതെ തുടർച്ചയായി ഇടതുപക്ഷ മഹിളാ സംഘടനയ്ക്കു കരാർ പുതുക്കി നൽകുകയാണ് പതിവ്. ഇതിനു പിന്നിൽ വൻഅഴിമതിയാണ് നടക്കുന്നത്. ഓരോ വർഷവും കോടിക്കണക്കിനു രൂപയാണ് ഹോസ്റ്റലിലെ മരാമത്ത് പ്രവൃത്തികൾക്കും ഫർണിച്ചർ വാങ്ങുന്നതിലേക്കും നഗരസഭാ ഫണ്ടിൽനിന്നും അനുവദിക്കുന്നത്. ഇത് സംബന്ധിച്ച് യാതൊരു ഓഡിറ്റിംഗും നഗരസഭ നടത്തുന്നില്ല. ഹോസ്റ്റൽ നടത്തിപ്പുമായി ബന്ധപ്പെട്ട പരാതികളിൽ അന്വേഷണം നടത്തണമെന്നും യുഡിഎഫ് പാർലമെന്‍ററി പാർട്ടി യോഗം ആവശ്യപ്പെട്ടു. നിലവിലെ കരാർ കാലാവധി കഴിയുന്ന സാഹചര്യത്തിൽ പരസ്യം നൽകി പൊതുലേലത്തിൽ ഉൾക്കൊള്ളിച്ച് നടപടിക്രമങ്ങൾ പാലിച്ച് പുതിയ കരാറുകാരെ കണ്ടെത്തണമെന്നും യോഗം ആവശ്യപ്പെട്ടു. ഇതു സംബന്ധിച്ച് നഗരസഭയിലെ കോൺഗ്രസ്, കേരള കോൺഗ്രസ്, മുസ്‌ലിം ലീഗ് കക്ഷികളുടെ കൗൺസിലർമാർ ഒപ്പിട്ട കത്ത് സെക്രട്ടറിക്കും ചെയർപേഴ്സനും നൽകി. ലേലം ചെയ്യാതെ വീണ്ടും പുതുക്കി നൽകാനാണ് തീരുമാനമെങ്കിൽ നിയമനടപടികൾ സ്വീകരിക്കുമെന്നും ശക്തമായ സമരങ്ങൾ നടത്തുമെന്നും യുഡിഎഫ് പാർലമെന്‍ററി പാർട്ടി ലീഡർ ജോമി ജോസഫ്, ഡെപ്യൂട്ടി ലീഡർ സന്തോഷ് ആന്‍റണി എന്നിവർ അറിയിച്ചു. പെരുന്ന ബസ് സ്റ്റാൻഡിലെ ടേക്ക് എ ബ്രേക്ക് ഉപയോഗിക്കാനാകാതെ പൂട്ടേണ്ടിവന്നതും ഫിറ്റ്നസ് ഇല്ലാത്ത കെട്ടിടത്തിലെ മുനിസിപ്പൽ കൗൺസിൽ ഹാൾ നവീകരണം നടത്തിയതും സംബന്ധിച്ചു സമരരംഗത്തുവരാനും യുഡിഎഫ് യോഗം തീരുമാനിച്ചു.

ചങ്ങനാശേരിയിലെ വിവിധ പദ്ധതികള്‍ക്ക് 7.5 കോടി രൂപയുടെ ഭരണാനുമതി

ചങ്ങനാശേരി: നവകേരള സദസിന്‍റെ ഭാഗമായി നടന്ന ചര്‍ച്ചകളുടെ അടിസ്ഥാനത്തില്‍ കേരളമൊട്ടകെയുള്ള വിവിധ പ്രോജക്ടുകളുമായി ബന്ധപ്പെട്ട് ചങ്ങനാശേരി നിയോജകമണ്ഡലത്തിന് 7.5 കോടി രൂപ അനുവദിച്ചു. മാമ്മൂട്- ശാന്തിപുരം റോഡിന്‍റെ മൂന്നു കിലോമീറ്റര്‍ അത്യാധുനിക നിലവാരത്തില്‍ നവീകരിക്കുന്നതിന് ആറു കോടി രൂപ അനുവദിച്ചതാണ് പ്രധാന പദ്ധതി. ചങ്ങനാശേരി മുനിസിപ്പാലിറ്റി വാര്‍ഡ് ഒന്നിലെ കണ്ണന്‍പേരൂര്‍ ക്ഷേത്രത്തിന് സമീപം മടത്തിനികടവ് -മാഞ്ഞില്ലം-ഇരിപ്പോങ്ങാനം പാടശേഖരം തോട് നവീകരണം, കുറിച്ചി പഞ്ചായത്തിലെ വാര്‍ഡ് 17ലെ കട്ടച്ചിറമറ്റം -ഔട്ട് പോസ്റ്റ്‌ തോട് പുനരുദ്ധാരണം, വാഴപ്പള്ളി പഞ്ചായത്തിലെ വാര്‍ഡ് ഏഴില്‍ ഇളങ്കാവ് ക്ഷേത്ര ഭാഗത്ത് ചാലച്ചിറത്തോട് ഇടതുകര സംരക്ഷണം, ചങ്ങനാശേരി മുനിസിപ്പാലിറ്റിയിലെ വാര്‍ഡ് 10ല്‍ കുന്നക്കാട് പൊട്ടശേരി തോട് പുനരുദ്ധാരണം, വാഴപ്പള്ളി പഞ്ചായത്തിലെ വാര്‍ഡ് 20ല്‍ എള്ളുകുഴി കണ്ടനക്കരി പടശേഖരത്തിന്‍റെ വശങ്ങളുടെ സംരക്ഷണം എന്നിവയ്ക്കും തുക അനുവദിച്ചിട്ടുണ്ട്. മാടപ്പള്ളി പഞ്ചായത്ത് നാലാംവാര്‍ഡില്‍ കണ്ടത്തില്‍ തോടിന്‍റെ സൈഡ് സംരക്ഷണം, കുറിച്ചി പഞ്ചായത്തിലെ ഒമ്പതാംവാര്‍ഡില്‍ ചെമ്പുചിറ പൊന്‍പുഴതോട് സംരക്ഷണം, വാഴപ്പള്ളി പഞ്ചായത്തിലെ ഒന്നാംവാര്‍ഡിലെ ഈരത്തറ-ഇഞ്ചത്തുരുത്ത് പാടശേഖരം അകംബണ്ട് സംരക്ഷണം തുടങ്ങിയ പദ്ധതികള്‍ക്കും പണം അനുവദിച്ചിട്ടുണ്ട്. നവകേരള സദസില്‍ ഏറ്റവും കൂടുതല്‍ തുക അനുവദിക്കപ്പെട്ട നിയോജകമണ്ഡലങ്ങളില്‍ ഒന്നാണ് ചങ്ങനാശേരിയെന്ന് ജോബ് മൈക്കിള്‍ എംഎല്‍എ പറഞ്ഞു. അടിസ്ഥാന സൗകര്യ വികസന കാര്യത്തിലും കര്‍ഷകര്‍ക്ക് കൃഷി ഇറക്കുന്നതിനും ജലാശയങ്ങള്‍ക്ക് സമീപം താമസിക്കുന്ന പ്രദേശവാസികള്‍ക്ക് സ്വൈര ജീവിതം നടത്തുന്നതിനും നീരൊഴുക്ക് വര്‍ധിപ്പിക്കുന്നതിനും തോടിന് ആഴം കൂട്ടുന്നതിനും സംരക്ഷണഭിത്തികള്‍ നിര്‍മിക്കുന്നതിനും കൃഷിക്കും ജനങ്ങള്‍ക്കും പദ്ധതികള്‍ ഗുണകരമാകുമെന്നും എംഎല്‍എ കൂട്ടിച്ചേര്‍ത്തു.

കുറവിലങ്ങാട് അഗ്രിഫെസ്റ്റിന് ഉജ്വല തുടക്കം

കുറവിലങ്ങാട്: പാലാ രൂപതയുടെ സാമൂഹിക സേവന വിഭാഗമായ പിഎസ്ഡബ്ല്യുഎസിന്‍റെ നേതൃത്വത്തിൽ ആരംഭിച്ച അഗ്രിഫെസ്റ്റിന് തകർപ്പൻ പ്രതികരണം. ആദ്യദിനത്തിൽ ആയിരങ്ങളാണ് ഫെസ്റ്റിൽ പങ്കെടുത്തു മടങ്ങിയത്. മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയുടെ അങ്കണത്തിലൊരുക്കിയിരിക്കുന്ന മേള നാളെ സമാപിക്കും. ഹൈബ്രിഡ് പച്ചക്കറി തൈകൾ, നാടൻ-വിദേശ ഫലവൃക്ഷ തൈകൾ, പച്ചക്കറി വിത്തുകൾ, കാർഷിക മൂല്യവർധിത ഉത്പന്നങ്ങൾ, കാർഷിക വിഭവങ്ങൾ, കാർഷിക വിളകൾ എന്നിവയുടെ പ്രദർശനവും വിപണനവുമാണ് നടക്കുന്നത്. വിവിധ ജൈവവളങ്ങൾ, കീടനാശിനികൾ, ചെടിച്ചട്ടികൾ, കൃഷി ഉപകരണങ്ങൾ തുടങ്ങിയവയും മേളയിലുണ്ട്. മേളയുടെ ഉദ്ഘാടനം ആർച്ച്പ്രീസ്റ്റ് റവ.ഡോ. തോമസ് മേനാച്ചേരി നിർവഹിച്ചു. പിഎസ്ഡബ്ല്യുഎസ് ഡയറക്ടർ ഫാ. തോമസ് കിഴക്കേൽ ആദ്യ വിൽപ്പന നിർവഹിച്ചു. സ്വാശ്രയസംഘം ഡയറക്ടർ ഫാ. ജോസഫ് ചൂരയ്ക്കൽ അധ്യക്ഷത വഹിച്ചു. പിആർഒ ഡാന്‍റീസ് കൂനാനിക്കൽ, റീജൺ, സോൺ കോ-ഓർഡിനേറ്റർമാരായ സിബി കണിയാംപടി, ലിജി ജോൺ, മാർക്കറ്റിംഗ് ഓഫീസർ സാജു വടക്കൻ, എം.വി ജോൺ കുന്നേൽ, കുഞ്ഞുമോൻ ഈന്തുകുഴി, റാണി ജോസഫ്, മഞ്ജു മാണി, എൽസമ്മ ജോസഫ്, സെലിൻ ഷാജി തുടങ്ങിയവർ പ്രസംഗിച്ചു.

ദിശ എഡ്യൂകെയര്‍ ധനസഹായ പദ്ധതിയുമായി അര്‍ച്ചന വിമന്‍സ് സെന്‍റര്‍

കടുത്തുരുത്തി: അര്‍ച്ചന വിമന്‍സ് സെന്‍ററിന്‍റെയും അര്‍ച്ചന വിമന്‍സ് വെല്‍ഫെയര്‍ സൊസൈറ്റിയുടെയും ആഭ്യമുഖ്യത്തില്‍ കടുത്തുരുത്തി റീജണിന്‍റെ നേതൃത്വത്തില്‍ പഠനത്തില്‍ ഉന്നത നിലവാരം പുലര്‍ത്തുന്ന 20 കുട്ടികള്‍ക്കുവേണ്ടി ദിശ എഡ്യൂകെയര്‍ വിദ്യാഭ്യാസ ധനസഹായ പദ്ധതിക്ക് തുടക്കം കുറിച്ചു. അര്‍ച്ചന വിമന്‍സ് സെന്‍റര്‍ അസിസ്റ്റന്‍റ് ഡയറക്ടര്‍ ആശാ കിരണ്‍ അധ്യ ക്ഷത വഹിച്ച യോഗത്തില്‍ കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി പദ്ധതിയുടെ ഉദ്ഘാടനം നിര്‍വഹിച്ചു. അര്‍ച്ചന വിമന്‍സ് വെല്‍ഫെയര്‍ സൊസൈറ്റിയുടെ നേതൃത്വത്തില്‍ കുട്ടികള്‍ക്ക് സ്‌കൂള്‍ പഠനോപകരണങ്ങള്‍ വിതരണം ചെയ്തു. ഉദ്ഘടനം പഞ്ചായത്ത് പ്രസിഡന്‍റ് എന്‍.ബി. സ്മിത നിര്‍വഹിച്ചു. പഞ്ചായത്ത് വൈസ് പ്രസിഡന്‍റ് ജിന്‍സി എലിസബത്ത് കമ്യൂണിറ്റി ആക‌്ഷന്‍ ഗ്രൂപ്പിലെ അംഗങ്ങള്‍ക്ക് ഫുഡ് കിറ്റ് വിതരണം നിര്‍വഹിച്ചു.

മുട്ടുചിറ, കടുത്തുരുത്തി പള്ളികളില്‍ പന്തക്കുസ്താ തിരുനാൾ

മുട്ടുചിറ: റൂഹാദ്ക്കുദിശാ ഫൊറോനാ പള്ളിയില്‍ പന്തക്കുസ്താ തിരുനാളും വിദ്യാരംഭം കുറിക്കലും നാളെ. ഇന്നു രാവിലെ 5.30നും 6.45 നും വിശുദ്ധ കുര്‍ബാന, നൊവേന. വൈകുന്നേരം 5.30ന് വിശുദ്ധ കുര്‍ബാന. തുടര്‍ന്ന് പുറത്ത് നമസ്‌കാരം. നാളെ രാവിലെ 5.30നും ഏഴിനും വിശുദ്ധ കുര്‍ബാന, 8.15ന് വിദ്യാരംഭം കുറിക്കല്‍, 9.30 നും 11 നും രണ്ടിനും വിശുദ്ധ കുര്‍ബാന, നാലിന് തിരുനാള്‍ റാസ. ഫാ.ജോസഫ് തെരുവില്‍ മുഖ്യകാര്‍മികത്വം വഹിക്കും. ഫാ.ജോസഫ് ചൊങ്ങഴശേരില്‍ സന്ദേശം നല്‍കും. 6.30ന് പ്രദക്ഷിണം. കടുത്തുരുത്തി: കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളിയില്‍ പന്തക്കുസ്താ തിരുനാളിനോടുനുബന്ധിച്ചു നാളെ കുരുന്നുകള്‍ക്ക് ആദ്യാക്ഷരം കുറിക്കൽ നടത്തും. രാവിലെ 6.30നും 9.30നുമുള്ള വിശുദ്ധ കുര്‍ബാനയെത്തുടര്‍ന്നാണ് ആദ്യാക്ഷരം കുറിക്കല്‍. ഫൊറോനാ വികാരി ഫാ.മാത്യു ചന്ദ്രന്‍കുന്നേല്‍, സഹവികാരിമാരായ ഫാ.ജോണ്‍ നടുത്തടം, ഫാ. ഏബ്രഹാം പെരിയപ്പുറം എന്നിവര്‍ ആദ്യാക്ഷരം കുറിക്കലിന് നേതൃത്വം നല്‍കും.

നേരേകടവ്-മാക്കേക്കടവ് ഫെറിയിൽ തിരക്കേറുന്നു

നേരേകടവ്:നേരേകടവ്-മാക്കേകടവ് ഫെറിയിലെ ചങ്ങാട സർവീസിൽ തിരക്കേറുന്നു. മാസങ്ങളായി നിലച്ചിരുന്ന ചങ്ങാട സർവീസ് കഴിഞ്ഞ ദിവസമാണ് പുനരാരംഭിച്ചത്. നേരേകടവ്-മാക്കേകടവ് കായൽപാലത്തിന്‍റെ നിർമാണം പുരോഗമിക്കുന്നതിനാൽ നേരേകടവ് ജെട്ടിയുടെ വടക്കുഭാഗത്ത് സ്വകാര്യ വ്യക്തിയുടെ സ്ഥലത്ത് കായലോരത്ത് തീർത്ത താത്കാലിക ജെട്ടിയിൽനിന്നാണ് ഇപ്പോൾ സർവീസ് നടത്തുന്നത്. കായൽദൂരം 750 മീറ്റർ മാത്രമായ ഇവിടെ 20മിനിറ്റ് ഇടവിട്ടാണ് സർവീസ് നടത്തുന്നത്. ഭാരവാഹനങ്ങൾ ഒഴികെയുള്ള ഓട്ടോറിക്ഷ, കാർ, പെട്ടിവണ്ടി, ഇരുചക്രവാഹനങ്ങൾ തുടങ്ങിയവയും യാത്രികരുമാണ് ചങ്ങാടത്തിലൂടെ മറുകര കടക്കുന്നത്.

എംഎല്‍എ അറിയാന്‍ , ഇത്തവണയെങ്കിലും കനിയണം : തകര്‍ന്നുതരിപ്പണമായി കടുത്തുരുത്തി-ആപ്പുഴ റോഡ്

കടുത്തുരുത്തി: തകര്‍ന്നു തരിപ്പണമായി കടുത്തുരുത്തി-ആപ്പുഴ തീരദേശ റോഡ്. വര്‍ഷങ്ങളായി തകര്‍ന്നുകിടക്കുന്ന റോഡ് ഇപ്പോള്‍ കാല്‍നടയാത്ര പോലും പറ്റാത്ത വിധം പൂര്‍ണമായി നാശാവസ്ഥയിലാണ്. തകര്‍ന്നുകിടക്കുന്ന റോഡിന്‍റെ അവസ്ഥ പലതവണയായി മോന്‍സ് ജോസഫ് എംഎല്‍എയുടെ ശ്രദ്ധയില്‍പ്പെടുത്തിയിട്ടുള്ളതാണ്. ഇത്തവണ റോഡ് ടാറിംഗ് നടത്തി ഗതാഗതയോഗ്യമാക്കിത്തരുമെന്നാണ് എംഎല്‍എ ഉറപ്പ് നല്‍കിയിരിക്കുന്നതെന്ന് പ്രദേശവാസികളായ ബിജു ഇത്തിത്തറയും തോമസ് അന്നാശേരിയും പറഞ്ഞു. റോഡിന്‍റെ കടുത്തുരുത്തിയില്‍ നിന്നുള്ള പ്രാരംഭ ഭാഗം ഉള്‍പ്പെടെ തകര്‍ന്നുകിടക്കുകയാണ്. പഞ്ചായത്ത് വൈസ് പ്രസിഡന്‍റ് ജിന്‍സി എലിസബത്ത് പത്തുലക്ഷത്തോളം രൂപ ലഭ്യമാക്കി ബൈപാസ് പാലത്തിനടി ഭാഗം മുതല്‍ റെയില്‍വേ മേല്‍പാലത്തിനു സമീപം വരെ അടുത്തിടെ ടാറിംഗ് നടത്തിയിരുന്നു. പഞ്ചായത്തിലെ ഒരു ഉദ്യോഗസ്ഥന്‍റെ ദുര്‍വാശിയെത്തുടര്‍ന്ന് ബൈപാസ് പാലത്തിന് അടിയിലെ ഭാഗം ഒഴിവാക്കി ടാറിംഗ് നടത്തിയതാണ് ഇവിടെ റോഡിന്‍റെ തകര്‍ച്ചയ്ക്ക് ഇടയാക്കിയത്. റെയില്‍വേ മേല്‍പാലത്തിനു സമീപവും ബൈപാസ് പാലത്തിനു സമീപവും റോഡിന്‍റെ പ്രാരംഭ ഭാഗവും ഉള്‍പ്പെടെ പൂര്‍ണമായി തകര്‍ന്ന് റോഡില്‍ വലിയഗര്‍ത്തങ്ങള്‍ രൂപപ്പെട്ടിരിക്കുകയാണ്. തീരദേശ റോഡിനു ശാപമോക്ഷമുണ്ടാകുന്നതും പ്രതീക്ഷിച്ചുള്ള നാട്ടുകാരുടെ കാത്തിരിപ്പ് നീളുകയാണ്. വെള്ളക്കെട്ടും ചെളിയും പള്ളയുമെല്ലാമായി റോഡിലൂടെയുള്ള യാത്ര ദുരിതം നിറഞ്ഞതായി മാറിയിരിക്കുന്നു. മറ്റു റോഡുകളിലൂടെയുള്ള യാത്ര തടസപ്പെടുമ്പോള്‍ ബൈപാസ് റോഡായി ഉപയോഗിക്കുന്നതാണെങ്കിലും അധികാരികള്‍ റോഡിനോടുള്ള നിസംഗത തുടരുകയാണ്. വെള്ളപ്പൊക്കവും വെള്ളക്കെട്ടുമെല്ലാമായതോടെ കടുത്തുരുത്തി-ആപ്പുഴ തീരദേശ റോഡ് പൂര്‍ണമായി തകര്‍ന്നു. റോഡ് പൂര്‍ണമായും കുണ്ടും കുഴിയും നിറഞ്ഞു ചെളിയും വെള്ളക്കെട്ടും വ്യാപകമായതോടെ ഇതുവഴിയുള്ള വാഹന, കാല്‍നട യാത്ര സാധ്യമല്ലാതായിരിക്കുകയാണ്. സ്‌കൂളിലേക്കു വന്നുപോകുന്ന വിദ്യാര്‍ഥികളും ദേവാലയങ്ങളിൽ പോയി വരുന്നവരും പടിഞ്ഞാറന്‍ പ്രദേശത്തുള്ളവര്‍ കടുത്തുരുത്തിയിലെത്തി മടങ്ങുന്നതുമെല്ലാം ചെളിക്കുണ്ടായി മാറിയ ഈ റോഡിലൂടെയാണ്. പ്രായമായവര്‍ക്ക് പള്ളിയില്‍ പോകണമെങ്കിലും റോഡിലെ ചെളിക്കെട്ടിലൂടെ നീന്തണം. കല്ലറയിലേക്കു കുടിവെള്ളമെത്തിക്കാനുള്ള പൈപ്പിടുന്നതിനായി റോഡ് കുത്തിപ്പൊളിച്ചതാണ് റോഡിന്‍റെ അവസ്ഥ പൂര്‍ണ തകര്‍ച്ചയിലാക്കിയത്. റെയില്‍വേ മേല്‍പാലത്തിന്‍റെ അടിയിലെ ഭാഗം പൂര്‍ണമായും തകര്‍ന്നു കിടക്കുകയാണ്. വെള്ളം കുത്തിയൊഴുകി ഇവിടെ കുഴികള്‍ രൂപപ്പെട്ടതോടെ ചെളി നിറഞ്ഞു കിടക്കുകയാണ്. റോഡിന്‍റെ പലഭാഗത്തും വെള്ളക്കെട്ടും ചെളിയും നിറഞ്ഞതോടെ ഇതുവഴി നടന്നുപോകാന്‍പോലും പറ്റാത്ത സ്ഥിതിയാണ്. വലിയതോട്ടിലുണ്ടാകുന്ന വെള്ളപ്പൊക്കം റോഡിന്‍റെ സമ്പൂര്‍ണ തകര്‍ച്ചയ്ക്ക് കാരണമായി. മൂന്നര കിലോമീറ്ററോളം ദൂരം വരുന്ന റോഡ് പടിഞ്ഞാറന്‍ പ്രദേശങ്ങളായ ആയാംകുടി, ആപ്പുഴ, എരുമത്തുരുത്ത്, എഴുമാന്തുരുത്ത് തുടങ്ങിയ സ്ഥലങ്ങളില്‍നിന്നുള്ളവര്‍ക്ക് കടുത്തുരുത്തി പട്ടണവുമായി ബന്ധപ്പെടാനുള്ള എളുപ്പമാര്‍ഗമാണ്. വാലാച്ചിറ റെയില്‍വേഗേറ്റ് വഴിയുള്ള കടുത്തുരുത്തി-കല്ലറ റൂട്ടില്‍ ഗതാഗതപ്രശ്‌നങ്ങള്‍ ഉണ്ടാകുമ്പോള്‍ വാഹനങ്ങള്‍ തിരിച്ചുവിടുന്ന വഴിയാണിത്. നൂറുകണക്കിന് വാഹനങ്ങളും വിദ്യാര്‍ഥികളടക്കം നിരവധി കാല്‍നടയാത്രക്കാരും സഞ്ചരിക്കുന്ന വഴിയാണ് വര്‍ഷങ്ങളായി തകര്‍ന്നുകിടക്കുന്നത്. റോഡിന്‍റെ ഇരുവശങ്ങളിൽ പലയിടത്തും കാട് കയറിയ നിലയിലാണ്. എതിരേ വരുന്ന വാഹനങ്ങള്‍ കാണാനാവാത്ത വിധമാണ് പലയിടത്തും കാട് മൂടിയിരിക്കുന്നത്. ഇതു പലപ്പോഴും അപകടങ്ങള്‍ക്കും കാരണമാകുന്നുണ്ട്.

ജോലി വാഗ്ദാനം ചെയ്ത് തട്ടിപ്പ്; മണിമല സ്വദേശി അറസ്റ്റിൽ

കോട്ടയം: ജോലി വാഗ്ദാനം ചെയ്ത് രണ്ടര ലക്ഷം രൂപ തട്ടിയ കേസില്‍ മണിമല സ്വദേശിയെ അറസ്റ്റ് ചെയ്തു. മണിമല പള്ളിത്താഴെ സന്തോഷ് ചാക്കോയെയാണ് ചിങ്ങവനം പോലീസ് അറസ്റ്റ് ചെയ്തത്. കുറിച്ചി സ്വദേശിക്ക് അമേരിക്കയില്‍ നാലു ലക്ഷം രൂപ ശമ്പളമുള്ള ജോലി വാഗ്ദാനം ചെയതു പലതവണകളായി രണ്ടരലക്ഷം രൂപ കൈപ്പറ്റിയശേഷം ജോലി നല്‍കാതെയും പണം തിരികെ നല്‍കാതെയും കബളിപ്പിക്കുകയായിരുന്നു. സന്തോഷിനു പള്ളിക്കത്തോട്, പാമ്പാടി, റാന്നി, ചങ്ങനാശേരി, പൊന്‍കുന്നം, പെരുമ്പെട്ടി പോലീസ് സ്റ്റേഷനുകളിലായി സമാന കേസുകളും അടിപിടി കേസുകളും ഉള്‍പ്പെടെ എട്ട് കേസുകള്‍ നിലവിലുണ്ട്. അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി.

കൂട്ടയോട്ടം നടത്തി

കോട്ടയം: പുന്നത്തുറ സെന്‍റ് തോമസ് ക്‌നാനായ കത്തോലിക്ക പഴയപള്ളിയുടെ ചതുര്‍ ശതാബ്ദി ആഘോഷങ്ങളുടെ ഭാഗമായി ലഹരിവിരുദ്ധ സന്ദേശം ഉയര്‍ത്തി കൂട്ടയോട്ടം നടത്തി. ഇന്നലെ വൈകുന്നേരം നാലിനു കളക്ടറേറ്റില്‍നിന്ന് ആരംഭിച്ച കൂട്ടയോട്ടം ജില്ലാ കളക്ടര്‍ ജോണ്‍ വി. സാമുവല്‍ ഉദ്ഘാടനം ചെയ്തു. കൂട്ടയോട്ടം ഗാന്ധി സ്‌ക്വയറില്‍ സമാപിച്ചപ്പോള്‍ മന്ത്രി വി.എന്‍. വാസവന്‍, തിരുവഞ്ചൂര്‍ രാധാകൃഷ്ണന്‍ എംഎല്‍എ, കോട്ടയം അതിരൂപത വികാരി ജനറാൾ ഫാ. മൈക്കിള്‍ വെട്ടിക്കാട്ട് എന്നിവര്‍ പ്രസംഗിച്ചു. കൂട്ടയോട്ടത്തിന്‍റെ ഭാഗമായി ഗാന്ധിസ്‌ക്വയറില്‍ ഫ്‌ളാഷ് മോബ്, നാടന്‍ പാട്ടുകളുടെ അവതരണം എന്നിവ നടന്നു. വികാരി ഫാ. ബിബിന്‍ കണ്ടോത്ത്, അസിസ്റ്റന്‍റ് വികാരി ഫാ. ടോം പുത്തന്‍പുരയ്ക്കല്‍, ജൂബിലി ജോയിന്‍റ് കണ്‍വീനര്‍ ബിനു പല്ലോന്നില്‍, പ്രോഗ്രാം കമ്മിറ്റി അംഗങ്ങളായ ബിബീഷ് ഓലിക്കമുറി, ജോസ് മൂലക്കാട്ട് തുടങ്ങിയവര്‍ നേതൃത്വം നല്‍കി.

ബാങ്ക് ജീവനക്കാർ ധര്‍ണ നടത്തി

കോട്ടയം: ബിഇഎഫ്‌ഐയുടെ നേതൃത്വത്തില്‍ ബാങ്ക് ജീവനക്കാര്‍ ബാങ്ക് ശാഖകള്‍ക്ക് മുന്നില്‍ ധര്‍ണ നടത്തി. സംക്രാന്തിയില്‍ കനറാ ബാങ്ക് റീജണല്‍ ഓഫീസിനു മുന്നില്‍ നടന്ന സായാഹ്ന ധര്‍ണ സിഐടിയു ജില്ലാ ജോയിന്‍റ് സെക്രട്ടറി കെ.ആര്‍. അജയ് ഉദ്ഘാടനം ചെയ്തു. ബിഇഎഫ്‌ഐ ജില്ലാ പ്രസിഡന്‍റ് രമ്യാരാജ് അധ്യക്ഷത വഹിച്ചു. ജിതിന്‍ സി. ബേബി, ബിടിഇഎഫ് ജില്ലാ സെക്രട്ടറി തുഷാര എസ്. നായര്‍, ജില്ലാ സെക്രട്ടറി കെ.കെ. ബിനു, സംസ്ഥാന വൈസ് പ്രസിഡന്‍റ് കെ.പി. ഷാ, യു. അഭിനന്ദ്, പി.സി. റെന്നി തുടങ്ങിയവര്‍ പ്രസംഗിച്ചു.

തെക്കുംതല-കിഴക്കടമ്പ് റോഡില്‍ ഇനി സുഖയാത്ര

കാഞ്ഞിരമറ്റം: അകലക്കുന്നം പഞ്ചായത്ത് തെക്കുംതല വാര്‍ഡില്‍പ്പെട്ട തെക്കുംതല-കിഴക്കടമ്പ് റോഡില്‍ ഇനി യാത്ര സുഗമം. പതിറ്റാണ്ടുകളായി ഗതാഗതയോഗ്യമല്ലാതിരുന്ന ഈ റോഡിന്‍റെ നവീകരണത്തിന് ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 13 ലക്ഷം രൂപയും അകലക്കുന്നം പഞ്ചായത്തിന്‍റെ ആറു ലക്ഷം രൂപയും ചേര്‍ത്ത് 19 ലക്ഷം രൂപ ഉപയോഗിച്ചാണ് ടാർ ചെയ്തു ഗതാഗതയോഗ്യമാക്കിയത്. 1200 മീറ്റര്‍ നീളത്തില്‍ റോഡ് ടാറിംഗിനും സൈഡ് കോണ്‍ക്രീറ്റ് ചെയ്യുന്നതിനുമാണ് ഫണ്ട് ഉപയോഗിച്ചത്. തെക്കുംതല കെ.ആര്‍. നാരായണന്‍ ഫിലിം ഇന്‍സ്റ്റിറ്റ്യൂട്ടില്‍നിന്നു പള്ളിക്കത്തോട് ഭാഗത്തേക്കുള്ള എളുപ്പമാര്‍ഗമാണ് ഈ റോഡ്. ഒരു കിലോമീറ്ററിലധികം വരുന്ന റോഡ് പൂര്‍ണമായും തകര്‍ന്നതിനാല്‍ വാഹനങ്ങള്‍ക്ക് മറ്റു വഴികളിലൂടെ പോകേണ്ട സാഹചര്യമായിരുന്നു. റോഡിന്‍റെ ഉദ്ഘാടനം ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നിര്‍വഹിച്ചു. പഞ്ചായത്ത് മെംബര്‍ സിന്ധു അനില്‍കുമാര്‍ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി, കെ.ആര്‍. നാരായണന്‍ ഫിലിം ഇന്‍സ്റ്റിറ്റ്യൂട്ട് ഡയറക്ടര്‍ പി.ആര്‍. ജിജോയി, കാഞ്ഞിരമറ്റം സഹകരണബാങ്ക് പ്രസിഡന്‍റ് ജോജി ആലയ്ക്കല്‍, ഫിലിപ്പ് വെള്ളാപ്പള്ളി, പഞ്ചായത്ത് മെംബര്‍ രാജശേഖരന്‍ എന്നിവര്‍ പ്രസംഗിച്ചു.

മെഡി. കോളജ് കവാടത്തിൽ ഹൈമാസ്റ്റ് ലൈറ്റ്

ഗാന്ധിനഗർ: മെഡിക്കൽ കോളജ് ആശുപത്രി കവാടത്തിൽ ഹൈമാസ്റ്റ് ലൈറ്റ് ഏർപ്പെടുത്തുന്നു. ആശുപത്രി കവാടത്തിൽ വെളിച്ചം ഇല്ലാതായിട്ട് ഒരു വർഷം പിന്നിട്ടു. ഈ സാഹചര്യത്തിൽ ഏറ്റുമാനൂർ എംഎൽഎയും മന്ത്രിയുമായ വി.എൻ. വാസവൻ അനുവദിച്ച എട്ടരലക്ഷംരൂപ വിനിയോഗിച്ചാണ് ഹൈമാസ്റ്റ് ലെെറ്റ് സ്ഥാപിക്കുന്നത്. മധ്യകേരളത്തിലെ പ്രധാന ആശുപത്രിയായ കോട്ടയം മെഡിക്കൽ കോളജിന്‍റെ കവാടത്തിൽ വെളിച്ചമില്ലാത്തത് വലിയ പ്രതിസന്ധിയാണ് സൃഷ്ടിച്ചിരുന്നത്. ദൂരസ്ഥലങ്ങളിൽനിന്നു രോഗികളുമായി വരുന്ന ആംബുലൻസ് ഡ്രൈവർമാർക്ക് ആശുപത്രി കവാടത്തിൽ വെളിച്ചമില്ലാത്തതിനെത്തുടർന്ന് വഴിതെറ്റിപ്പോയ നിരവധി സംഭവങ്ങൾ ഉണ്ടായിട്ടുണ്ട്. കെഎസ്ഇബി കണക്‌ഷൻ ലഭിച്ചാലുടൻ ലൈറ്റ് പ്രവർത്തിച്ചുതുടങ്ങും. 450 വാട്സിന്‍റെ എട്ട് ലൈറ്റുകളാണ് സ്ഥാപിക്കുന്നത്. ആശുപത്രി കവാടത്തിലെ പുതിയ ആർച്ചിന്‍റെ നിർമാണം അന്തിമഘട്ടത്തിലാണ്. ആർച്ചിന്‍റെയും ലൈറ്റിന്‍റെയും ഉദ്ഘാടനം ഒന്നിച്ചു നടത്താനാണ് ശ്രമം.

സീനിയർ സിറ്റിസൺസ് ധ്യാനം നാളെ മുതൽ

ചങ്ങനാശേരി: ചങ്ങനാശേരി അതിരൂപതയുടെ നേതൃത്വത്തിൽ കുന്നന്താനം സീയോൻ ധ്യാനകേന്ദ്രത്തിൽ 60 വയസ് കഴിഞ്ഞവർക്കായി നടത്തുന്ന ഗ്രേസ്ഫുൾ ധ്യാനം നാളെ വൈകുന്നേരം അഞ്ചിന് ആരംഭിക്കും. ആർച്ച്ബിഷപ് മാർ ജോസഫ് പെരുന്തോട്ടം സന്ദേശം നൽകും. ഫാ. മാണി പുതിയിടം ഉദ്ഘാടനം ചെയ്യും. വാർധക്യത്തിന്‍റെ ശാരീരിക, മാനസിക പ്രശ്നങ്ങളും അവയ്ക്കുള്ള പ്രതിവിധിയും സംബന്ധിച്ച പ്രഭാഷണങ്ങൾ, കൗൺസലിംഗ്, സൗഖ്യദായക ശുശ്രൂഷകൾ, വ്യായാമപരിശീലനം, ഉല്ലാസപരിപാടികൾ എന്നിവ ധ്യാനത്തിന്‍റെ ഭാഗമായി നടക്കും. വൈദികരും ഡോക്‌ടർമാരും ക്ലാസുകൾ നയിക്കും. 11നു വൈകുന്നേരം നാലിന് സമാപിക്കും. ഫോൺ: 9495107045.

ഫാ. ആന്‍റണി മാന്നല സ്മാരക ബൈബിൾ ക്വിസ് ജൂലൈ 12ന്

അരുവിക്കുഴി: ഒന്പതാമത് ഫാ. ആന്‍റണി മാന്നല സ്മാരക അഖില കേരള ബൈബിൾ ക്വിസ് മത്സരം ജൂലൈ 12ന് അരുവിക്കുഴി ലൂർദ്മാതാ പള്ളി മതബോധന കേന്ദ്രത്തിൽ നടക്കും. കേരളത്തിലെ കത്തോലിക്കാ സൺഡേസ്കൂളുകളിൽ അഞ്ചു മുതൽ 12 വരെ ക്ലാസുകളിൽ പഠിക്കുന്ന വിദ്യാർഥികൾക്ക് പങ്കെടുക്കാം. ഒരു സൺഡേസ്കൂളിൽനിന്ന് രണ്ടു പേർ അടങ്ങിയ രണ്ടു ടീമുകൾക്ക് അവസരമുണ്ട്. ഒന്നു മുതൽ 4 വരെ സ്ഥാനം ലഭിക്കുന്നവർക്ക് യഥാക്രമം 5000, 4000, 3000, 2000 രൂപ കാഷ് അവാർഡും 5 മുതൽ 10 വരെ സ്ഥാനക്കാർക്ക് 1000 രൂപ വീതം കാഷ് അവാർഡും എവറോളിംഗ് ട്രോഫികളും നൽകും. രജിസ്റ്റർ ചെയ്യേണ്ട അവസാന തീയതി ജൂലൈ അഞ്ച്. വിശദാംശങ്ങൾക്ക് ഫോൺ: 9495446603, 8157811589.

ഫാ. ജയിംസ് മുല്ലശേരിക്ക് അവാർഡ് സമ്മാനിച്ചു

അയ്മനം: ദയ സാംസ്‌കാരിക സമിതി അയ്മനത്തെ ജനകീയ ഡോക്്ടർ പി.ആര്‍. കുമാറിന്‍റെ സ്മരണയ്ക്കായി ഏര്‍പ്പെടുത്തിയ പുരസ്‌കാരം മാന്നാനം കെഇ സ്‌കൂള്‍ പ്രിന്‍സിപ്പൽ ഫാ. ജയിംസ് മുല്ലശേരിക്ക് സമ്മാനിച്ചു. 10,000 രൂപയും ശില്‍പവും പ്രശസ്തിപത്രവും അടങ്ങുന്നാണ് പുരസ്‌കാരം. തിരുവാറ്റയിലെ ക്ഷേത്ര ഓഡിറ്റോറിയത്തില്‍ ചേര്‍ന്ന സമിതിയുടെ വിദ്യാഭ്യാസ ജനകീയ സദസിലാണ് പുരസ്‌കാരം നല്‍കിയത്. സദസിന്‍റെ ഉദ്ഘാടനവും പുരസകാരം സമര്‍പ്പണവും മന്ത്രി വി.എന്‍. വാസവന്‍ നിര്‍വഹിച്ചു. എസ്എസ്്എല്‍സി, പ്ലസ് ടു പരീക്ഷകളില്‍ ഉന്നത വിജയം നേടിയ വിദ്യാര്‍ഥികളെ മന്ത്രി ഉപഹാരം നല്‍കി അനുമോദിച്ചു. പഞ്ചായത്ത് പ്രസിഡന്‍റ് വിജി രാജേഷ് അധ്യക്ഷത വഹിച്ചു.

ഒളോക്കരി പാടശേഖരത്തിന്‍റെ പുറംബണ്ടിൽ കുപ്പിച്ചില്ലുകൾ നിരത്തി വഴിതടഞ്ഞു

അയ്മനം: ഒളോക്കരി പാടശേഖരത്തിന്‍റെ പുറംബണ്ടിൽ കൂടി നടക്കാതിരിക്കാൻ കുപ്പിച്ചില്ലുകൾ വിതറി സാമൂഹിക വിരുദ്ധരുടെ ക്രൂരത. കാലവർഷം തുടങ്ങി റോഡിൽ വെള്ളം പൊങ്ങിയതോടെ കുട്ടികളടക്കമുള്ള പ്രദേശവാസികളുടെ ഏക ആശ്രയമായ പാടത്തിന്‍റെ പുറം ബണ്ടിലാണ് മനഃപൂർവം കുപ്പിച്ചില്ലുകൾ വിതറിയത്. കയർ ഭൂവസ്ത്രം വിരിച്ച ഭാഗത്ത് ദ്വാരങ്ങൾ ഉണ്ടാക്കി അതിൽ ഉറപ്പിച്ച രീതിയിലാണ് പല സ്ഥലങ്ങളിലും കുപ്പിച്ചില്ലുകൾ കാണപ്പെടുന്നത്. തങ്ങളുടെ സഞ്ചാരസ്വാതന്ത്ര്യത്തെ ഹനിച്ച ഒരു കുടുംബത്തിനെതിരേ പ്രദേശ വാസികൾ അയ്മനം പഞ്ചായത്തിൽ പരാതി നൽകിയിട്ടുണ്ട്. അയ്മനം പഞ്ചായത്തിന്‍റെ ഒന്നാം വാർഡിൽപ്പെട്ടതാണ് പാടശേഖരവും പുറം ബണ്ടും. കഴിഞ്ഞ വർഷം ജെസിബി ഉപയോഗിച്ച് കട്ടകുത്തി നിർമിച്ചതാണ് പുറംബണ്ട്. 20 വീട്ടുകാർ ഈ ബണ്ടിലൂടെ വന്ന് കോലടിപ്പാലം കയറിയാണ് ചീപ്പുങ്കലിൽ എത്തുന്നത്. വെള്ളപ്പൊക്ക സമയങ്ങളിൽ വഴിയിൽ വെള്ളം കയറിക്കിടക്കുമ്പോളാണ് പ്രദേശവാസികളായ നാട്ടുകാരും കുട്ടികളും കാൽനടയാത്രയ്ക്ക് ബണ്ട് ഉപയോഗിക്കുന്നത്. അധികാരികൾ ഇടപെട്ട് കുപ്പിചില്ലുകൾ നീക്കി അപകടമൊഴിവാക്കണമെന്നാണ് നാട്ടുകാരുടെ ആവശ്യം.

കാരിത്താസിൽ ഇന്‍റര്‍നാഷണല്‍ എമര്‍ജന്‍സി മെഡിസിന്‍ സമ്മിറ്റ് നടത്തി

തെള്ളകം: കാരിത്താസ് ആശുപത്രിയും കാരിത്താസ് നഴ്‌സിംഗ് കോളജും യൂണിവേഴ്‌സിറ്റി ഓഫ് സല്‍ഫോഡ്-യുകെയും സംയുക്തമായി കാരിത്താസ് ഇന്‍റര്‍നാഷണല്‍ എമര്‍ജന്‍സി മെഡിസിന്‍ സമ്മിറ്റ് നടത്തി. അത്യാഹിത ചികിത്സാരംഗത്ത് ആഗോളതലത്തിലുള്ള മാറ്റങ്ങളെക്കുറിച്ച് ഇംഗ്ലണ്ടിലെ സാല്‍ഫോര്‍ഡ് സര്‍വകലാശാലയിലെയും ഇന്ത്യയിലെ വിവിധ സംസ്ഥാനങ്ങളിലെയും പ്രഗത്ഭര്‍ സെമിനാറുകള്‍ നയിച്ചു. ഐടിസി, ബംഗളൂരു മെഡിക്കല്‍ ഡയറക്ടര്‍ പ്രഫ. ഡോ. സുനില്‍ ചാണ്ടി ഉദ്ഘാടനം ചെയ്തു. കാരിത്താസ് ആശുപത്രി ഡയറക്ടറും ചീഫ് എക്‌സിക്യൂട്ടീവ് ഓഫീസറുമായ റവ. ഡോക്ടര്‍ ബിനു കുന്നത്ത് അധ്യക്ഷത വഹിച്ചു. കേരളത്തിലെ വിവിധ ആശുപത്രികളില്‍നിന്നുള്ള ഡോക്ടര്‍മാര്‍, നഴ്‌സുമാര്‍, അധ്യാപകര്‍, വിദ്യാര്‍ഥികള്‍ എന്നിവര്‍ പങ്കെടുത്തു.

മുട്ടവില കുത്തനേ ഉയര്‍ന്നു

കോട്ടയം: മുട്ടവില കുത്തനെ ഉയര്‍ന്നു. തമിഴ്‌നാട്ടില്‍നിന്നുള്ള വരവു വെള്ളമുട്ടയ്ക്ക് ചില്ലറവില 6-7 രൂപയായി. നാടന്‍ കോഴിമുട്ടയ്ക്ക് 8-9 രൂപ. താറാവ് മുട്ട 12-13. ഗ്രാമങ്ങളില്‍ മുട്ട ഉത്പാദനത്തില്‍ ഗണ്യമായ കുറവുണ്ടായതിനാല്‍ വിലയില്‍ കാര്യമായ താഴ്ച ഉടനെയുണ്ടാകില്ല. കേരളത്തില്‍ പക്ഷിപ്പനിയെത്തുടര്‍ന്ന് താറാവുകളെയും കോഴികളെയും കൂട്ടത്തോടെ കൊന്നൊടുക്കിയശേഷം പല ഫാമുകളും തുറന്നിട്ടില്ല. മണര്‍കാട് ഉള്‍പ്പെടെ ഹാച്ചറികളില്‍ രണ്ടു വര്‍ഷമായി കുഞ്ഞുങ്ങളെ വിരിയിക്കുന്നില്ല. മുട്ടവില കൂടിയതോടെ മുട്ടക്കറികള്‍ക്ക് വില ഉയർത്തി. തമിഴ്‌നാട്ടിലെ നാമകല്ലില്‍നിന്നാണ് സംസ്ഥാനത്ത് വന്‍തോതില്‍ കോഴിമുട്ട എത്തിക്കുന്നത്. സംസ്ഥാനത്ത് ആവശ്യമുള്ള മുട്ടയുടെ 50 ശതമാനവും തമിഴ്നാട്ടില്‍നിന്ന് എത്തുകയാണ്. കൂടാതെ കര്‍ണാടക, ആന്ധ്ര എന്നിവിടങ്ങളില്‍നിന്നും മുട്ട എത്തുന്നുണ്ട്. അടുത്തയിടെ കുടുംബശ്രീ ഗ്രാമീണമേഖലയില്‍ നാടന്‍ കോഴി ഫാമുകള്‍ വന്‍തോതില്‍ ആരംഭിച്ചിരുന്നു. മുട്ട ശേഖരിച്ച് വിപണനം ചെയ്യുന്നതിന് സര്‍ക്കാര്‍ തലത്തില്‍ സംവിധാനമില്ലാത്തതും മുട്ട കൂടുതലുണ്ടെങ്കില്‍ പ്രാദേശിക വിപണികളില്‍ വിറ്റുതീര്‍ക്കാനാവുന്നില്ലെന്നതും മുന്‍പ് വലിയ പരിമിതിയായി. കോഴിത്തീറ്റവില കൂടിയതും കോഴിവളര്‍ത്തല്‍ നിർത്താന്‍ കാരണമായി.

മീന്‍വിലയിൽ വർധന; ട്രോളിംഗിൽ വീണ്ടും ഉയർന്നേക്കാം

കോട്ടയം: ട്രോളിംഗിനു മുന്‍പ് ഇതാണ് മീന്‍വിലയെങ്കില്‍ ട്രോളിംഗ് തുടങ്ങിയശേഷം ഇനിയും വില ഉയരാം. കടല്‍ക്ഷോഭത്തെത്തുടര്‍ന്ന് മത്സ്യബന്ധനവും ലഭ്യതയും കുറഞ്ഞതോടെ ഒരു മാസമായി മീന്‍ വില കയറുകയാണ്. മേയ് അവസാനവാരത്തിനുശേഷം ശരാശരി 50-100 രൂപയുടെ കയറ്റമാണ് വിവിധിനം കടല്‍മത്സ്യങ്ങള്‍ക്കുണ്ടായത്. മത്തി-200-250, അയില 260, ചെറിയ കിളി 220, വലിയ കിളി 280, ചൂര 300, മങ്കട 240, വറ്റ 450, കേര 320 എന്നിങ്ങനെ വില കയറി. ഏട്ടയും കൊഴുവയും ഉഴുവലും ചെറുമത്തിയും മാര്‍ക്കറ്റിലില്ല. ഒന്‍പതിന് അര്‍ധരാത്രി മുതല്‍ ജൂലൈ 31 വരെയാണ് കേരളതീരത്ത് മത്സ്യബന്ധന നിരോധനം. മാര്‍ക്കറ്റില്‍ മിതമായ നിരക്കില്‍ ലഭ്യമായ വളര്‍ത്തുമീനുകള്‍ക്കും അടുത്തയാഴ്ചയോടെ വില കയറും. തിലോപ്പിയ, ആഫ്രിക്കന്‍ വാള, പിരാന, റോഹു, കട്‌ല, കാര്‍പ്പ്, മൃഗാള്‍ തുടങ്ങിയ വളര്‍ത്തുമീനുകളാണ് വില്‍പനയ്ക്കുള്ളത്. പച്ചമീനിനു വില കയറിയതോടെ ഉണക്കമീനിനും വില വര്‍ധിച്ചു.

വേനല്‍മഴയില്‍ വിപണി തകര്‍ന്ന് പൈനാപ്പിള്‍ കൃഷി

കോട്ടയം: റബറിനു പകരം കൈതക്കൃഷി ചെയ്തവരെയും ഈ മാസങ്ങളില്‍ പെരുമഴ ചതിച്ചു. കേരളത്തിലും പുറത്തും പൈനാപ്പിള്‍ വിറ്റഴിക്കാന്‍ മാര്‍ക്കറ്റില്ലാതെ സീസണിലെ വിളവെടുപ്പ് തന്നെ ഉപേക്ഷിക്കേണ്ടിവന്നു. ഏപ്രിലില്‍ തുടങ്ങിയ മഴ മേയില്‍ കാലവര്‍ഷമായി മാറിയതോടെ പൈനാപ്പിള്‍ വേഗത്തില്‍ വിളഞ്ഞ് പഴുത്തു. മഴ ശക്തമായതോടെ കേരളത്തിലും വിവിധ സംസ്ഥാനങ്ങളിലും എത്തിച്ച് വിറ്റഴിക്കാനായില്ല. പഴുത്ത ചക്ക വടക്കേ ഇന്ത്യന്‍ സംസ്ഥാനങ്ങളില്‍ എത്തുമ്പോഴേക്കും ചീഞ്ഞുപോകുന്ന സാഹചര്യത്തിലാണ് വിളവെടുപ്പ് വേണ്ടെന്നു വച്ചത്. മാത്രവുമല്ല തൊഴിലാളിക്ഷാമം രൂക്ഷമാണ്. ഇതര സംസ്ഥാനത്തൊഴിലാളികളാണ് മേഖലയില്‍ കൂടുതലും. സ്ഥിരംജോലിക്കാര്‍ക്ക് ദിവസക്കൂലി 600 രൂപയ്ക്ക് മുകളിലാണ്. മഴയേത്തുടര്‍ന്ന് കൈതത്തോട്ടങ്ങളില്‍ കാടും പുല്ലും വളര്‍ന്നതിനാല്‍ വിളവെടുപ്പ് ദുഷ്കരമാണ്. കോവിഡ് വ്യാപനവും വിപണി തകര്‍ന്നതില്‍ മറ്റൊരു കാരണമാണ്. കോവിഡ് പ്രതിസന്ധിയില്‍ ഇതര സംസ്ഥാനങ്ങളിലേക്കു പൈനാപ്പിള്‍ കയറ്റി അയയ്ക്കാന്‍ ആകുന്നില്ല. നിലവില്‍ വടക്കുകിഴക്കന്‍ സംസ്ഥാനങ്ങള്‍ ഒഴികെ മറ്റ് സംസ്ഥാനങ്ങളിലെല്ലാം കേരളത്തില്‍നിന്നുള്ള പൈനാപ്പിള്‍ ലഭ്യമാണ്. മഴയ്ക്ക് അല്‍പം ശമനം വന്നതോടെ പച്ച പൈനാപ്പിള്‍ വില വീണ്ടെടുത്തു വരുന്നതായി പൈനാപ്പിള്‍ ഗ്രോവേഴ്‌സ് അസോസിയേഷന്‍ പ്രസിഡന്‍റ് ബേബി ജോണ്‍ പറഞ്ഞു. വലിപ്പമുള്ള ഒന്നാം ഗ്രേഡ് പൈനാപ്പിളിന് 50 രൂപയിലേക്ക് വില കയറിയിട്ടുണ്ട്. സംസ്ഥാനത്ത് അറുപതിനായിരം ഏക്കറില്‍ നിലവില്‍ കൈതക്കൃഷിയുണ്ട്. റബര്‍ വെട്ടിമാറ്റി കൈതക്കൃഷി വ്യാപകമാക്കിയതോടെ മാര്‍ക്കറ്റില്‍ കൈതച്ചക്കയുടെ ലഭ്യത കൂടിയിട്ടുണ്ട്. അയല്‍സംസ്ഥാന വിപണി ഇടിഞ്ഞതോടെ വലിപ്പം കുറഞ്ഞ പൈനാപ്പില്‍ കിലോ 25 രൂപ നിരക്കില്‍ ലോക്കല്‍ മാര്‍ക്കറ്റുകളില്‍ വില്‍ക്കുന്നവരുണ്ട്. സൗകര്യങ്ങളുള്ള ഒരേക്കര്‍ സ്ഥലം പൈനാപ്പിള്‍ കൃഷിക്ക് എടുക്കുന്നവര്‍ അറുപതിനായിരം രൂപ മുതല്‍ ഒരു ലക്ഷം രൂപ വരെ പാട്ടത്തുക നല്‍കുന്നുണ്ട്. കൈതക്കൃഷിക്കൊപ്പം റബര്‍തൈ നട്ട് മൂന്നു വര്‍ഷം വളര്‍ത്തിക്കൊടുക്കാന്‍ കരാറെടുത്താല്‍ ഒരു വര്‍ഷം അറുപതിനായിരം രൂപ വാരം കൊടുക്കും. എറണാകുളം ജില്ലയിലെ വാഴക്കുളം, കോതമംഗലം, മൂവാറ്റുപുഴ പ്രദേശങ്ങളില്‍ തുടങ്ങിയ വ്യാപക കൈതകൃഷി നിലവില്‍ കോട്ടയം, പത്തനംതിട്ട ജില്ലകളിലാണ് വിപുലമായിക്കൊണ്ടിരിക്കുന്നത്. പുഷ്പിക്കലും വിളവെടുപ്പും ക്രമീകരിക്കാവുന്ന കൃഷിയാണ് കൈത. എന്നാല്‍ മേയ്, ജൂണ്‍ മാസങ്ങളിലെ വിളവെടുക്കല്‍ മുന്നില്‍കണ്ട് നടത്തിയ കൃഷിയിലാണ് മഴക്കെടുതിമൂലം പരാജയം സംഭവിച്ചത്. മാര്‍ച്ച്, ഏപ്രിലിലെ കനത്ത ചൂടിന് പ്രതിരോധമായി പച്ചനെറ്റും കച്ചിയും പുല്ലും പുതച്ചും നന കൊടുത്തും വലിയ തുക ചെലവഴിച്ച് കൈതയെ സംരക്ഷിച്ചവര്‍ക്കാണ് മേയിലെ കനത്ത മഴയെ നേരിടേണ്ടിവന്നത്. താഴ്ന്ന പ്രദേശങ്ങളില്‍ വെള്ളം കയറിയും വെള്ളക്കെട്ടുണ്ടായും പൈനാപ്പിള്‍ നഷ്ടപ്പെട്ടവരും ഏറെപ്പേരാണ്.

കോവിഡ്: വാണിജ്യമേഖലയ്ക്കും വലിയ ആഘാതം

കോട്ടയം: ജില്ലയിലെ കോവിഡ് വ്യാപനത്തില്‍ ആശങ്കയേറുന്നു. ഇതര സംസ്ഥാനങ്ങളില്‍നിന്നുള്ള ചരക്കുവരവും യാത്രകളും രോഗം കൂടുതല്‍ തീവ്രമാകാന്‍ കാരണമായേക്കും. കേരളത്തില്‍നിന്നുള്ള പൈനാപ്പിള്‍, മാമ്പഴം, ജാതിക്ക, ചക്ക തുടങ്ങിയ സാധനങ്ങളുടെ വില്‍പന വടക്കേ ഇന്ത്യന്‍ മാര്‍ക്കറ്റുകളില്‍ കുറഞ്ഞു. പാല്‍, മുട്ട, പച്ചക്കറി, മീന്‍ തുടങ്ങി മറ്റു സംസ്ഥാനങ്ങളില്‍നിന്നുള്ള വരവും വ്യാപനത്തിന് ആക്കം കൂട്ടുന്നു. മാര്‍ക്കറ്റുകളോടും ടൗണുകളോടും ചേര്‍ന്നാണ് സമീപദിവസങ്ങളില്‍ കോവിഡ് വര്‍ധിച്ചിരിക്കുന്നത്. ഇന്നലെ മാത്രം 192 പുതിയ കേസുകളാണ് സംസ്ഥാനത്ത് റിപ്പോര്‍ട്ട് ചെയ്തത്. കേരളത്തില്‍ കോവിഡ് ബാധിതരുടെ എണ്ണം 1,679 ആയതില്‍ 450 കേസുകളും കോട്ടയം ജില്ലയിലാണ്. സംസ്ഥാനത്ത് ഇരുപത്തിനാല് മണിക്കൂറിനിടെ രണ്ട് കോവിഡ് മരണം സ്ഥിരീകരിക്കുകയും ചെയ്തു. രോഗ ലക്ഷണങ്ങളുമായി എത്തുന്നവര്‍ക്ക് കോവിഡ് പരിശോധന നടത്തണമെന്ന് ആരോഗ്യവകുപ്പ് നിര്‍ദ്ദേശം നല്‍കിയെങ്കിലും സര്‍ക്കാര്‍ ആശുപത്രികളില്‍ സൗകര്യം പരിമിതമാണ്. വ്യാപന ശേഷി കൂടുതലാണെങ്കിലും പുതിയ കോവിഡ് വകഭേദത്തിന് തീവ്രത കുറവാണെന്നാണ് വിദഗ്ധര്‍ പറയുന്നത്. എന്നാല്‍ പ്രായമായവരിലും കടുത്ത രോഗങ്ങളുള്ളവരിലും കോവിഡ് മരണകാരണമായേക്കാം. പ്രായം കൂടിയവര്‍, കടുത്ത പ്രമേഹം, അമിതരക്തസമ്മര്‍ദം, ആസ്ത്മ, ശ്വാസകോശരോഗങ്ങള്‍ എന്നിവയുള്ളവര്‍ ജാഗ്രത പുലര്‍ത്തണം. പനി, മൂക്കൊലിപ്പ്, മൂക്കടപ്പ്, തൊണ്ടവേദന, തലവേദന, പേശിവേദന, ക്ഷീണം, വയറ്റില്‍ അസ്വസ്ഥത, ഓക്കാനം, വിശപ്പില്ലായ്മ എന്നിവാണ് രോഗലക്ഷണങ്ങള്‍.

നാനൂറാം വർഷത്തിൽ ലഹരിവിരുദ്ധ സന്ദേശമുയർത്തി കൂട്ടയോട്ടം

കോട്ടയം: പുന്നത്തുറ സെന്‍റ് തോമസ് ക്നാനായ കത്തോലിക്ക പഴയ പള്ളിയുടെ ചതുർ ശതാബ്ദി ആഘോഷങ്ങളുടെ ഭാഗമായി ലഹരി വിരുദ്ധ സന്ദേശം ഉയർത്തി കൂട്ടയോട്ടം സംഘടിപ്പിച്ചു. ഇന്നലെ വൈകുന്നേരം നാലിന് കോട്ടയം കളക്ടറേറ്റിൽനിന്ന് ആരംഭിച്ച കൂട്ടയോട്ടം കളക്ടർ ജോണ്‍ വി. സാമുവൽ ഉദ്ഘാടനം ചെയ്തു. ഗാന്ധി സ്ക്വയറിൽ അവസാനിച്ച കൂട്ടയോട്ടത്തിന് മന്ത്രി വി.എൻ. വാസവൻ, തിരുവഞ്ചൂർ രാധാകൃഷ്ണൻ എംഎൽഎ, കോട്ടയം അതിരൂപത വികാരി ജനറൽ ഫാ. മൈക്കിൾ വെട്ടിക്കാട്ട് എന്നിവർ ആശംസ അർപ്പിച്ച് പ്രസംഗിച്ചു. കൂട്ടയോട്ടത്തിന്‍റെ ഭാഗമായി ഗാന്ധിസ്ക്വയറിൽ ഫ്ലാഷ് മോബ്, നാടൻ പാട്ടുകളുടെ അവതരണം എന്നിവ നടത്തി. കൂട്ടയോട്ടത്തിൽ ഏകദേശം മുന്നൂറോളം പേർ പങ്കെടുത്തു. പരിപാടിക്ക് വികാരി ഫാ. ബിബിൻ കണ്ടോത്ത്, അസി. വികാരി ഫാ. ടോം പുത്തൻപുരയ്ക്കൽ, ജൂബിലി ജോയിന്‍റ് കണ്‍വീനർ ബിനു പല്ലോന്നിൽ, പ്രോഗ്രാം കമ്മിറ്റി അംഗങ്ങളായ ബിബീഷ് ഓലിക്കമുറി, ജോസ് മൂലക്കാട്ട് തുടങ്ങിയവർ നേതൃത്വം നൽകി.

വൈകില്ല, റബറിന് തുരിശടിക്കാന്‍ ഡ്രോണ്‍ വരും

കോട്ടയം: റബറിന് സ്‌പ്രെയിംഗ് നടത്താന്‍ തൊഴിലാളിക്ഷാമം രൂക്ഷമായിരിക്കെ ഈ ജോലി ഡ്രോണ്‍ മുഖേന ചെയ്യാനുള്ള സംവിധാനം റബര്‍ ബോര്‍ഡ് ആവിഷ്‌കരിക്കുന്നു. റബര്‍ ബോര്‍ഡിന്‍റെ സാമ്പത്തിക സഹായത്തോടെ മുന്‍നിര ആര്‍പിഎസുകള്‍ക്ക് ഡ്രോണ്‍ വാങ്ങാന്‍ സംവിധാനമൊരുക്കും. അടുത്ത വര്‍ഷത്തോടെ പദ്ധതി നിലവില്‍ വന്നേക്കും. എട്ടര ലക്ഷം രൂപ വിലയാണ് സ്‌പ്രെയിംഗ് ഡ്രോണിനു വില. റബറിന്‍റെ ഇലകൊഴിച്ചില്‍ തടയാനും ചില്ലകളിലെ അണുബാധ പ്രതിരോധിക്കാനും മുന്‍പ് തുരിശും കക്കയും ചേര്‍ത്തുള്ള നേര്‍പ്പിച്ച ലായനി യന്ത്രം ഉപയോഗിച്ച് മരങ്ങളില്‍ തളിച്ചിരുന്നു. കൂലിച്ചെലവും തുരിശുവിലയും കുത്തനെ ഉയര്‍ന്നതോടെ കുറെക്കാലമായി കര്‍ഷകര്‍ സ്‌പ്രെയിംഗ് നിർത്തി. ഈ സാഹചര്യത്തിലാണ് റിമോട്ട് സംവിധാനത്തില്‍ പ്രവര്‍ത്തിക്കുന്ന ഡ്രോണുകളെ ഇതിനു പ്രയോജനപ്പെടുത്തിത്തുടങ്ങിയത്. മുണ്ടക്കയത്ത് ഹാരിസണ്‍ മലയാളം എസ്റ്റേറ്റിന്‍റെ വെള്ളനാടി ഒന്നാം ഡിവിഷനിലും ടിആര്‍ ആന്‍ഡ് ടി എസ്റ്റേറ്റിലും ഡ്രോണ്‍ സ്‌പ്രെയിംഗ് നടത്തിയിരുന്നു. ബംഗളൂരു ആസ്ഥാനമായ കമ്പനിയാണ് ഡ്രോണുകള്‍ എത്തിച്ചത്. തുരിശിനു പകരം താരതമ്യേന വിലക്കുറവുള്ള ഓയിലാണ് ഉപയോഗിക്കുന്നത്. ഡ്രോണില്‍ ഘടിപ്പിക്കുന്ന ജാറില്‍ ഒരേ സമയം പത്ത് ലിറ്റര്‍ ലായനി നിറയ്ക്കാം. 10 മിനിറ്റുകൊണ്ട് 1.5 ഹെക്ടറിലെ റബര്‍ മരങ്ങളില്‍ മരുന്ന് തളിക്കാം. മുപ്പത് ലിറ്റര്‍ ലായനി സ്‌പ്രെ ചെയ്യാനുള്ള ശേഷിയേ ഡ്രോണ്‍ ബാറ്ററിക്കുള്ളൂ. അതിനാല്‍ ഒരേസമയം ചാര്‍ജ് ചെയ്ത് മൂന്നു ബാറ്ററി കൈവശമില്ലെങ്കില്‍ സ്‌പ്രെയിംഗ് മുടങ്ങും. മുന്‍കാലങ്ങളില്‍ വലിയ തോട്ടങ്ങളില്‍ ഹെലിക്കോപ്റ്റര്‍ ഉപയോഗിച്ച് തുരിശടിച്ചിരുന്നു. റബറിന് വില കുറയുകയും ഹെലിക്കോപ്റ്റര്‍ ജോലിക്ക് ചെലവേറുകയും ചെയ്തതോടെ ഈ സംവിധാനം നിലച്ചു. നിലവില്‍ റബര്‍ സ്‌പ്രെയിംഗ് ഹെക്ടറിന് നാലായിരം രൂപ റബര്‍ ബോര്‍ഡ് കര്‍ഷകര്‍ക്ക് സബ്‌സിഡി നല്‍കുന്നുണ്ട്. നെല്‍പാടങ്ങളില്‍ വിതയ്ക്കും വളപ്രയോഗത്തിനും ഡ്രോണ്‍ ഉപയോഗിക്കുന്നുണ്ട്, മാവ് കശുമാവ് തോട്ടങ്ങളിലും ഡ്രോണ്‍ മരുന്ന് പ്രയോഗം നടത്താറുണ്ടെങ്കിലും കഴിഞ്ഞ വര്‍ഷം മുതലാണ് റബര്‍ തോട്ടങ്ങളില്‍ ഡ്രോണ്‍ ഉപയോഗിക്കുന്നത്.

മലയോരത്തെ കാലാവസ്ഥ ഇനി കൂടുതല്‍ വ്യക്തതയോടെ

കോട്ടയം: മലയോര മേഖലയിലെ കാലാവസ്ഥ ഇനി വിരല്‍ത്തുമ്പില്‍ അറിയാം. പ്രാദേശികമായ കാലാവസ്ഥാ പ്രവചന സംവിധാനങ്ങള്‍ കൂടുതല്‍ മെച്ചപ്പെടുത്തുന്നതിന്‍റെ ഭാഗമായി മീനച്ചില്‍ നദീതടത്തിലെ ജനകീയ കൂട്ടായ്മയായ മീനച്ചില്‍ നദീസംരക്ഷണ സമിതി മീനച്ചില്‍ റിവര്‍ റെയിന്‍ മോണിറ്ററിംഗ് നെറ്റ് വര്‍ക്കിംഗിന്‍റെ (എംആര്‍ആര്‍എംഎ) സഹകരണത്തോടെയാണ് ഓട്ടോമാറ്റിക് വെതര്‍ സ്‌റ്റേഷനുകള്‍ സ്ഥാപിക്കുന്നത്. തീക്കോയി പഞ്ചായത്തില്‍ വാഗമണ്ണിനു സമീപം വഴിക്കടവ് മിത്രാനികേതന്‍, മൂന്നിലവ് പഞ്ചായത്തില്‍ മേച്ചാല്‍ സിഎസ്‌ഐ പള്ളിക്കു സമീപം, പൂഞ്ഞാര്‍ തെക്കേക്കര പഞ്ചായത്തില്‍ പാതാമ്പുഴ അരുവിക്കച്ചാല്‍ റോഡിനു സമീപം എന്നീ മൂന്നു സ്ഥലങ്ങളിലാണ് ഉപകരണങ്ങള്‍ സ്ഥാപിച്ചിരിക്കുന്നത്. ഡിപ്പാര്‍ട്ട്മെന്‍റ് ഓഫ് സ്‌പേസിന്‍റെ കീഴിലുള്ള ന്യൂസ്‌പേസ് ഇന്ത്യ ലിമിറ്റഡ് (എന്‍എഎസ്‌ഐഎല്‍), തിരുവനന്തപുരം എന്‍വയണ്‍മെന്‍റല്‍ റിസോഴ്‌സ് റിസേര്‍ച്ച് സെന്‍റര്‍ (ഇആര്‍ആര്‍സി), ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സ്‌പേസ് സയന്‍സ് ആന്‍ഡ് ടെക്‌നോളജി (ഐഐഎസ് സി) എന്നിവയുടെ സഹകരണത്തോടെ കുസാറ്റിലെ അഡ്വാന്‍സ്ഡ് സെന്‍റര്‍ ഫോര്‍ അറ്റ്‌മോസ്റ്ററിക് റഡാര്‍ റിസേര്‍ച്ചാണ് പദ്ധതി നടപ്പാക്കുന്നത്. കാംപല്‍ സയന്‍റിഫിക്കാണ് ഉപകരണങ്ങള്‍ സ്ഥാപിച്ചത്. അഞ്ചു ലക്ഷം രൂപയാണ് ഓരോ ഉപകരണത്തിന്‍റെയും ചെലവ്. മഴ, കാറ്റ്, അന്തരീക്ഷ ഊഷ്മാവ്, ആര്‍ദ്രത എന്നിവ ഓരോ മിനിറ്റിലും ഓട്ടോമാറ്റിക്കായി അപ്‌ഡേറ്റ് ചെയ്യും. ഇതിന്‍റെ സിഗ്നലുകളും ഡേറ്റകളും കുസാറ്റിലെ കേന്ദ്രത്തിലെത്തും. ഇവിടെനിന്നു ലിങ്ക് മീനച്ചില്‍ റിവര്‍ റെയിന്‍ മോണിറ്ററിംഗ് നെറ്റ് വര്‍ക്കിംഗിന്‍റെ സംവിധാനങ്ങളിലേക്കും നല്‍കും. മഴയുടെ സ്വഭാവം മനസിലാക്കാനും അതുവഴി മുന്നറിയിപ്പിനും സാധിക്കും. അതി തീവ്രമഴയും മേഘവിസ്‌ഫോടനവും മുന്‍കൂട്ടി മനസിലാക്കാന്‍ സാധിക്കും. മഴ കനത്താലുണ്ടാകുന്ന മണ്ണിടിച്ചില്‍ സാധ്യത, കാറ്റിന്‍റെ ശക്തി, മണ്ണിലെ ജലാംശം അടക്കം നിരീക്ഷിക്കാനും അതുവഴി കര്‍ഷകര്‍ക്ക് നിര്‍ദേശങ്ങള്‍ നല്‍കാനുമാകും. വെതര്‍ സ്‌റ്റേഷനുകള്‍ സ്ഥാപിക്കുന്നതിനു മുന്നോടിയായി ആധുനിക ഉപകരണങ്ങള്‍ ഉപയോഗിച്ച് മലയോര മേഖലയില്‍ വിശദമായ പഠനം നടത്തിയിരുന്നു. അതിതീവ്രമഴയെത്തുടര്‍ന്നുണ്ടാകുന്ന ഉരുള്‍പൊട്ടലുകളും പ്രാദേശിക വെള്ളപ്പൊക്കങ്ങളും വര്‍ധിച്ചുവരുന്ന സാഹചര്യത്തില്‍ ജനകീയ പങ്കാളിത്തത്തോടെയുള്ള വിശ്വാസയോഗ്യവും ശക്തവുമായ നിരീക്ഷണവും മുന്നറിയിപ്പും നല്‍കുന്ന സംവിധാനത്തിന്‍റെ ആശയം വികസിപ്പിക്കുകയും അതിന്‍റെ പ്രവര്‍ത്തനക്ഷമത പരീക്ഷിക്കുകയും ചെയ്യുക എന്നതാണ് ഈ പൈലറ്റ് പദ്ധതിയുടെ ലക്ഷ്യമെന്ന് എബി പൂണ്ടിക്കുളം പറഞ്ഞു. ഇതിനൊപ്പം പശ്ചിമഘട്ട മലനിരകളിലെ തെരഞ്ഞെടുക്കപ്പെട്ട മേഖലയില്‍ ഇലക്‌ട്രിക്കല്‍, ഇലക്‌ട്രോണിക്, ഫൈബര്‍ ഓപ്റ്റിക് സെന്‍സറുകള്‍, കാലാവസ്ഥാ സെന്‍സറുകള്‍, ഗണിതശാത്ര മാതൃകകള്‍ എന്നിവയുടെ അടിസ്ഥാനത്തില്‍ ഒരു ഏകീകൃത ഉരുള്‍പൊട്ടല്‍ മുന്നറിയിപ്പു സംവിധാനം വികസിപ്പിക്കുകയെന്നതും പദ്ധതിയിലൂടെ ലക്ഷ്യമിടുന്നു. പൈലറ്റ് പദ്ധതിയുടെ പ്രായോഗികമായ പരീക്ഷണത്തിനു ശേഷം മഴക്കാലത്ത് ഉരുൾപൊട്ടലിനു വിധേയമായിക്കൊണ്ടിരിക്കുന്ന കേരളത്തിലെ പശ്ചിമഘട്ടത്തിലെ തെരഞ്ഞെടുക്കപ്പെട്ട മറ്റു മേഖലകളിലേക്കും വ്യാപിപ്പിക്കാന്‍ സാധിക്കും. ഓട്ടോമാറ്റിക് വെതര്‍ സ്റ്റേഷനുകളുടെ ഉദ്ഘാടനം ഇന്ന് രാവിലെ 10ന് പൂഞ്ഞാര്‍ സെന്‍റ് ആന്‍റണീസ് ഹയര്‍ സെക്കന്‍ഡറി സ്‌കൂളില്‍ നടക്കുന്ന ചടങ്ങില്‍ എന്‍എസ്‌ഐഎല്‍ എന്‍ജിനിയര്‍ സന്നാല മംഗേഷ് നിര്‍വഹിക്കും. പഞ്ചായത്ത് പ്രസിഡന്‍റുമാര്‍, ജനപ്രതിനിധികള്‍, പരിസ്ഥിതി പ്രവര്‍ത്തകര്‍, പരിസ്ഥിതി ശാസ്ത്രജ്ഞര്‍ തുടങ്ങിയവര്‍ ചടങ്ങില്‍ പങ്കെടുക്കും.

ഉഴവൂർ ജയ്ഹിന്ദ് ലൈബ്രറി ഇനി ഹരിത ലൈബ്രറി

ഉഴവൂർ: ജയ്ഹിന്ദ് പബ്ലിക് ലൈബ്രറി ഇനി ഹരിത ലൈബ്രറി. പരിസ്ഥിതി ദിനാഘോഷത്തിന്‍റെ ഭാഗമായാണ് പ്രഖ്യാപനം നടത്തിയത്. താലൂക്ക് ലൈബ്രറി കൗൺസിൽ പ്രസിഡന്‍റ് ഡോ. സിന്ധുമോൾ ജേക്കബ് മുതിർന്ന അംഗം എ.എ. സ്റ്റീഫന് വൃക്ഷത്തൈ നൽകി ഉദ്ഘാടനം നടത്തി. ജില്ലാ പഞ്ചായത്തംഗം പി.എം. മാത്യു സന്ദേശം നൽകി. ലൈബ്രറി പരിസരം പൂച്ചെടികളാൽ സൗന്ദര്യവത്കരണം നടത്തി. ലൈബ്രറി സെക്രട്ടറി കെ.സി. ജോണി, സൈമൺ പരപ്പനാട്ട്, എ.എ. സ്റ്റീഫൻ, ബാബു കണിയാംപതി, എം.എൻ. ശ്രീകുമാർ, വിജിത വിജയൻ, സങ്കീർത്തന സുരേഷ്, ടി.എൻ. അനിൽ, പ്രീത സന്തോഷ് എന്നിവർ പ്രസംഗിച്ചു.

എംസി റോഡിൽ ഹരിതപാതയുമായി ദേവമാതാ കോളജ്

കുറവിലങ്ങാട്: എംസി റോഡിൽ ഹരിതപാതയൊരുക്കാൻ ദേവമാതാ കോളജ് എൻഎസ്എസ് യൂണിറ്റ്. കോഴാ ജംഗ്ഷൻ മുതൽ സെന്‍റ് ജോസഫ് കപ്പേളവരെ എംസി റോഡിന്‍റെ ഇരുവശങ്ങളും മനോഹരമായ പൂന്തോട്ടം ഒരുക്കുന്നതിനുള്ള പദ്ധതിക്കാണ് തുടക്കമായത്. ദേവമാതാ ഗ്രീൻ വേ എന്ന പേരിലാണ് പദ്ധതി. പദ്ധതിയുടെ ഉദ്ഘാടനം പഞ്ചായത്ത് പ്രസിഡന്‍റ് മിനി മത്തായി നിർവഹിച്ചു. പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. ഡിനോയി കവളമ്മാക്കൽ, ബർസാർ ഫാ. ജോസഫ് മണിയൻചിറ, പിഡബ്ല്യുഡി അസിസ്റ്റന്‍റ് എൻജിനിയർ ജോസ് ബി. ചെറിയാൻ, ജോർജ് ചെന്നേലിൽ, പ്രോഗ്രാം ഓഫീസർമാരായ വിദ്യാ ജോസ്, ജിതിൻ ജോയ് തുടങ്ങിയവർ പങ്കെടുത്തു.

സെന്‍റ് തോമസ് കോളജില്‍ 14 ദിന പരിസ്ഥിതി പരിപാടികള്‍

പാലാ: പതിനാല് ദിനങ്ങള്‍ നീണ്ടുനില്‍ക്കുന്ന വിവിധ പരിപാടികളോടെ പാലാ സെന്‍റ് തോമസ് കോളജില്‍ നാഷണല്‍ സര്‍വീസ് സ്‌കീമിന്‍റെ നേതൃത്വത്തില്‍ പരിസ്ഥിതിദിന ആഘോഷങ്ങള്‍ക്ക് തുടക്കംകുറിച്ചു. ഫലവൃക്ഷത്തൈകളും പൂച്ചെടികളും കോളജ് കാമ്പസിലും അഡോപ്റ്റഡ് സ്‌കൂള്‍ കാമ്പസിലും നട്ടുപിടിപ്പിച്ച് "ഇക്കോ ടൂ വീക്ക്' പരിപാടിക്ക് തുടക്കമായി. പ്രകൃതിയെ അറിയുക എന്ന ലക്ഷ്യത്തോടെ നേച്ചര്‍ വാക്ക്, പരിസ്ഥിതിദിന അവബോധന ക്ലാസുകള്‍, കാലാവസ്ഥാ അവബോധന സെമിനാറുകള്‍, പോസ്റ്റര്‍ അവതരണങ്ങള്‍, പരിസ്ഥിതിദിന മത്സരങ്ങള്‍, പരിസര ശുചീകരണങ്ങള്‍, പ്ലാസ്റ്റിക് നിര്‍മാര്‍ജന പ്രവര്‍ത്തനങ്ങള്‍ എന്നിങ്ങനെ വിവിധ പ്രോഗ്രാമുകളാണ് നാഷണല്‍ സര്‍വീസ് സ്‌കീമിന്‍റെയും ഭൂമിത്രസേന ക്ലബ്ബിന്‍റെയും നേതൃത്വത്തില്‍ നടത്തുന്നത്. പരിസ്ഥിതിദിന ആഘോഷങ്ങൾക്ക് എന്‍എസ്എസ് പ്രോഗ്രാം ഓഫീസര്‍മാരായ സിസ്റ്റര്‍ ഡോ. പ്രിന്‍സി ഫിലിപ്പ്, ഡോ. ആന്‍റോ മാത്യു, വോളണ്ടിയര്‍ സെക്രട്ടറിമാര്‍, ഭൂമിത്ര സേനാ ക്ലബ്ബംഗങ്ങള്‍ തുടങ്ങിയവര്‍ നേതൃത്വം നല്‍കി.

എല്ലാവരും തൈ നട്ടപ്പോൾ ഉഴവൂർ ബ്ലോക്ക് വിളവെടുത്ത് മാതൃകയായി

കോഴാ: പരിസ്ഥിതിദിനം വഴിപാടാകുന്നുവെന്ന് പറയുന്നവർക്ക് ഉഴവൂർ ബ്ലോക്ക് പഞ്ചായത്ത് മാതൃക. കഴിഞ്ഞ വർഷം പരിസ്ഥിതി ദിനത്തിൽ നട്ട തൈകളിൽനിന്ന് വിളവെടുത്താണ് ഇത്തവണ ബ്ലോക്ക് പഞ്ചായത്ത് പരിസ്ഥിതിദിനാഘോഷം നടത്തിയത്. തൊഴിലുറപ്പ് പദ്ധതിയുടെ സാധ്യതകളെ പ്രയോജനപ്പെടുത്തി കഴിഞ്ഞ പരിസ്ഥിതി ദിനത്തിൽ നട്ട വിദേശ ഇനം ഫലവൃക്ഷങ്ങളുടെ വിളവെടുപ്പാണ് നടത്തിയത്. കൃഷിയുടെ സംരക്ഷണവും പരിപാലനവും കാർഷിക കർമസേനാ അംഗങ്ങളാണ് നടത്തിയത്. ചാമ്പ, മാവ്, ഞാവൽ, നാരകം, പേര, ആത്ത, സപ്പോട്ട, മാതളം, ഇലുമ്പി, റംബുട്ടാൻ, സീതാപ്പിൾ മുതലായ 25ൽപ്പരം ഫലവൃക്ഷങ്ങളാണ് നട്ടത്. ഇതിലെ ഹ്രസ്വകാല ഇനങ്ങളിൽ നിന്നായിരുന്നു വിളവെടുപ്പ്. വിളവെടുപ്പും ആഘോഷങ്ങളും ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ നിർവഹിച്ചു. ബ്ലോക്ക് വൈസ് പ്രസിഡന്‍റ് ഡോ. സിന്ധുമോൾ ജേക്കബ് അധ്യക്ഷത വഹിച്ചു. പി.എൻ. രാമചന്ദ്രൻ, കൊച്ചുറാണി സെബാസ്റ്റ്യൻ, ബിഡിഒ ഇൻ ചാർജ് ബിലാൽ കെ. റാം, നിർമല സെബാസ്റ്റ്യൻ എന്നിവർ പ്രസംഗിച്ചു.

കുറവിലങ്ങാട് അഗ്രിഫെസ്റ്റിന് ഉജ്വല തുടക്കം

കുറവിലങ്ങാട്: പാലാ രൂപതയുടെ സാമൂഹിക സേവന വിഭാഗമായ പിഎസ്ഡബ്ല്യുഎസിന്‍റെ നേതൃത്വത്തിൽ ആരംഭിച്ച അഗ്രിഫെസ്റ്റിന് തകർപ്പൻ പ്രതികരണം. ആദ്യദിനത്തിൽ ആയിരങ്ങളാണ് ഫെസ്റ്റിൽ പങ്കെടുത്തു മടങ്ങിയത്. മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയുടെ അങ്കണത്തിലൊരുക്കിയിരിക്കുന്ന മേള നാളെ സമാപിക്കും. ഹൈബ്രിഡ് പച്ചക്കറി തൈകൾ, നാടൻ-വിദേശ ഫലവൃക്ഷ തൈകൾ, പച്ചക്കറി വിത്തുകൾ, കാർഷിക മൂല്യവർധിത ഉത്പന്നങ്ങൾ, കാർഷിക വിഭവങ്ങൾ, കാർഷിക വിളകൾ എന്നിവയുടെ പ്രദർശനവും വിപണനവുമാണ് നടക്കുന്നത്. വിവിധ ജൈവവളങ്ങൾ, കീടനാശിനികൾ, ചെടിച്ചട്ടികൾ, കൃഷി ഉപകരണങ്ങൾ തുടങ്ങിയവയും മേളയിലുണ്ട്. മേളയുടെ ഉദ്ഘാടനം ആർച്ച്പ്രീസ്റ്റ് റവ.ഡോ. തോമസ് മേനാച്ചേരി ഉദ്ഘാടനം ചെയ്തു. പിഎസ്ഡബ്ല്യുഎസ് ഡയറക്ടർ ഫാ. തോമസ് കിഴക്കേൽ ആദ്യ വിൽപ്പന നിർവഹിച്ചു. സ്വാശ്രയസംഘം ഡയറക്ടർ ഫാ. ജോസഫ് ചൂരയ്ക്കൽ അധ്യക്ഷത വഹിച്ചു. പിആർഒ ഡാന്‍റീസ് കൂനാനിക്കൽ, റീജൺ, സോൺ കോ-ഓർഡിനേറ്റർമാരായ സിബി കണിയാംപടി, ലിജി ജോൺ, മാർക്കറ്റിംഗ് ഓഫീസർ സാജു വടക്കൻ, എം.വി ജോൺ കുന്നേൽ, കുഞ്ഞുമോൻ ഈന്തുകുഴി, റാണി ജോസഫ്, മഞ്ജു മാണി, എൽസമ്മ ജോസഫ്, സെലിൻ ഷാജി തുടങ്ങിയവർ പ്രസംഗിച്ചു.

പകര്‍ച്ചവ്യാധികള്‍ പടരുന്നു: ആരോഗ്യ ജാഗ്രതാ സെമിനാര്‍ നടത്തി

കാഞ്ഞിരപ്പള്ളി: ബ്ലോക്ക് പഞ്ചായത്തിന് കീഴില്‍ വരുന്ന ഏഴു പഞ്ചായത്തുകളില്‍ പകര്‍ച്ചവ്യാധികള്‍ പടര്‍ന്നുപിടിക്കുന്നതിന്‍റെ പശ്ചാത്തലത്തില്‍ ബ്ലോക്ക്തല ആരോഗ്യ സെമിനാര്‍ നടത്തി. ഡെങ്കിപ്പനി, എലിപ്പനി, മഞ്ഞപ്പിത്തം, മലേറിയ, കോവിഡ്, പകര്‍ച്ചപ്പനി തുടങ്ങിയ രോഗങ്ങൾ ക്രമാതീതമായി വർധിക്കുകയാണ്. എരുമേലി, മുണ്ടക്കയം, പാറത്തോട് പഞ്ചായത്തുകളിലാണ് ഡെങ്കിപ്പനി കൂടുതലായി റിപ്പോർട്ട് ചെയ്യപ്പെട്ടിട്ടുള്ളത്. മണിമല, കോരുത്തോട് പഞ്ചായത്തുകളില്‍ മഞ്ഞപ്പിത്തം പടര്‍ന്നുപിടിക്കുന്നുണ്ട്. ഡെങ്കിപ്പനി പടരുന്ന മേഖലകളില്‍ ഈഡിസ് കൊതുകുകളെ നശിപ്പിക്കുവാന്‍ ചുറ്റുമുളള വീടുകളിലും ഇന്‍ഡോര്‍ സ്പേസ് സ്പ്രേയിംഗ് നടത്താനും ആയിരം ജനസംഖ്യയില്‍ മൂന്നു പേര്‍ക്ക് ഡെങ്കിപ്പനിയുടെ രോഗബാധ ശ്രദ്ധയില്‍പ്പെട്ടാല്‍ ഫോഗിംഗ് നടത്താനും തീരുമാനിച്ചു. ഓടകളിലെ വെള്ളക്കെട്ടുകള്‍ ഒഴിവാക്കുകയും ഓടകളില്‍ സ്പ്രേയിംഗ് നടത്തി കൊതുക് നശീകരണം പ്രാവര്‍ത്തികമാക്കാനും പഞ്ചായത്തുകള്‍ക്ക് നിര്‍ദേശം നല്‍കി. മഞ്ഞപ്പിത്തം വ്യാപകമായ സ്ഥലങ്ങളില്‍ രോഗാതുരത കുറയുന്നതുവരെ സൂപ്പര്‍ ക്ലോറിനേഷന്‍ നടത്താനും പഞ്ചായത്തുകളിലെ മുഴുവന്‍ കിണറുകളും ക്ലോറിനേറ്റ് ചെയ്യാനും തീരുമാനിച്ചു. മഴക്കാലം നേരത്തേയായതും സാമൂഹിക ശുചിത്വമില്ലായ്മയുമാണ് രോഗവര്‍ധനവിന് കാരണമാക്കിയതെന്ന് ബ്ലോക്ക് എപ്പിഡമോളജിസ്റ്റ് ഡോ. ജിനി പറഞ്ഞു. യോഗത്തിൽ ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി അധ്യക്ഷത വഹിച്ചു. പഞ്ചായത്ത് പ്രസിഡന്‍റുമാരായ സിറിള്‍ തോമസ്, ജാന്‍സി സാബു, രേഖാദാസ്, സുമി ഇസ്മായില്‍, ബ്ലോക്ക് പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍മാരായ ടി.ജെ. മോഹനന്‍, ഷക്കീല നസീര്‍, ടി.എസ്. കൃഷ്ണകുമാര്‍, പി.കെ. പ്രദീപ്, ജോഷി മംഗലം, ഡാനി ജോസ്, പഞ്ചായത്ത് മെംബര്‍മാരായ ബിജു ചക്കാല, അനിറ്റ ജോസ്, ഷീലമ്മ ഡൊമിനിക്, സുലോചന സുരേഷ്, ഷിജി ഷാജി, റോസമ്മ ജോണ്‍, സുനി വര്‍ഗീസ്, മിനി മാത്യു, ആരോഗ്യവകുപ്പ് ഉദ്യോഗസ്ഥര്‍ എന്നിവർ പ്രസംഗിച്ചു.

തൈകളില്ല; പരിസ്ഥിതി ദിനത്തിൽ നിരാശയിൽ വനംവകുപ്പ്

എരുമേലി: കഴിഞ്ഞ വർഷം പരിസ്ഥിതിദിനം മുൻനിർത്തി എരുമേലി കനകപ്പലത്തെ സോഷ്യൽ ഫോറസ്റ്ററി ഓഫീസിൽനിന്ന് നാടൊട്ടുക്കും വിതരണം ചെയ്തത് ഒരു ലക്ഷത്തിലധികം തൈകൾ. ഇത്തവണ ഒരു തൈ പോലും ഇല്ല. തൈകൾ നട്ടുവളർത്തി പാകമാക്കാൻ ഫണ്ട് ലഭിക്കാഞ്ഞതാണ് കാരണം. ജില്ലയ്ക്കകത്തും പുറത്തുനിന്നുമായി നിരവധി പേരാണ് തൈകൾ ആവശ്യപ്പെട്ട് ഇത്തവണ കനകപ്പലത്തെ ഓഫീസിൽ എത്തിയത്. കോട്ടയം ജില്ലയിൽ വനംവകുപ്പിന്‍റെ സാമൂഹ്യ വനവത്കരണം വിഭാഗത്തിന്‍റെ പ്രധാന റേഞ്ച് ഓഫീസാണ് കനകപ്പലത്തേത്. വിവിധ ഇനങ്ങളിലായി പതിനായിരക്കണക്കിന് തൈകൾ നട്ടുവളർത്തി സൗജന്യമായും സൗജന്യ നിരക്കിലും നൽകുന്ന പ്രവർത്തനമാണ് ഓരോ വർഷവും ഇവിടെ നടത്തുന്നത്. എന്നാൽ ഇത്തവണ ആവശ്യമായ ഫണ്ട് ലഭിക്കാഞ്ഞതിനാൽ ഏതാനും തേക്കിൻ തൈകളല്ലാതെ മറ്റു തൈകൾ വളർത്തിയില്ല. കഴിഞ്ഞ മൂന്ന് വര്‍ഷമായി വനംവകുപ്പിന് തൈകൾ വളർത്തുന്നതിനുള്ള ഫണ്ട് പരിമിതപ്പെടുത്തിയിരുന്നു. ഇത്തവണ ഫണ്ട് ലഭിച്ചില്ല. ഇതാണ് പ്രതിസന്ധിക്ക് കാരണമെന്ന് ഉദ്യോഗസ്ഥർ പറയുന്നു. സ്‌കൂള്‍, കോളജ്, സന്നദ്ധ സംഘടനകള്‍ എന്നിവര്‍ക്കാണ് സൗജന്യമായി തൈകള്‍ നല്‍കിയിരുന്നത്. ഇത്തരത്തില്‍ സംസ്ഥാനത്ത് 140 സോഷ്യല്‍ ഫോറസ്റ്ററികളില്‍നിന്നായി ലക്ഷക്കണക്കിന് തൈകളാണ് വിതരണം ചെയ്യേണ്ടിയിരുന്നത്. 1300 കോടിയോളം രൂപ ആണ് ഫണ്ടിനത്തിൽ സംസ്ഥാനത്ത് ലഭിക്കേണ്ടിയിരുന്നതെന്ന് ഉദ്യോഗസ്ഥർ പറയുന്നു. സംസ്ഥാനത്തെ കുളത്തുപ്പുഴ, തൃശൂര്‍ എന്നീ രണ്ട് നേഴ്‌സറികളില്‍ മാത്രമാണ് തൈകളുടെ വിതരണം നിലവിലുള്ളതെന്ന് ഉദ്യോഗസ്ഥർ പറഞ്ഞു.

വെള്ളനാടി വള്ളക്കടവ് പാലം വാഗ്ദാനങ്ങളിൽ മാത്രം

മുണ്ടക്കയം: ഇപ്പോൾ ശരിയാക്കാമെന്ന അധികാരികളുടെ കപട വാഗ്ദാനങ്ങളിൽ നീളുകയാണ് വെള്ളനാടി വള്ളക്കടവ് പാലത്തിന്‍റെ പുനരുദ്ധാരണം. 2021 ഒക്ടോബർ 16നുണ്ടായ പ്രളയത്തിലാണ് വെള്ളനാടി വള്ളക്കടവ് പാലം തകർന്നത്. തൂണുകൾ മാത്രം അവശേഷിപ്പിച്ച് പാലം പൂർണമായും തകർന്നു. പ്രളയത്തിൽ കൂട്ടിക്കൽ, കൊക്കയാർ, മുണ്ടക്കയം പഞ്ചായത്തുകളിലായി ചെറുതും വലുതുമായ നിരവധി പാലങ്ങൾ ഒലിച്ചുപോയി. ഇവയിൽ ഒട്ടുമിക്കതും പുനർനിർമിക്കുകയോ അല്ലെങ്കിൽ നിർമാണ പ്രവർത്തനങ്ങൾ നടക്കുകയോ ചെയ്യുന്നു. എന്നാൽ വെള്ളനാടി വള്ളക്കടവ് പാലത്തോടുള്ള അധികാരികളുടെ അവഗണന നാലു വർഷത്തോടടുക്കുകയാണ്. പ്രളയം നടന്ന് ഒരു വർഷത്തിനു ശേഷം വെള്ളനാടി പാലം പുനരുദ്ധരിക്കുന്നതിന് 50 ലക്ഷം രൂപ അനുവദിച്ചെന്ന് സ്ഥലം എംഎൽഎ പ്രഖ്യാപിച്ചിരുന്നു. എന്നാൽ പ്രഖ്യാപനം കഴിഞ്ഞ് വർഷങ്ങൾ പിന്നിട്ടെങ്കിലും തുടർനടപടികൾ ഒന്നുമായിട്ടില്ല .പുതിയ പാലം നിർമിക്കുന്നതിന് രണ്ടു കോടി രൂപയോളം ചെലവ് വരുമെന്നതിനാൽ നിലവിലുള്ള പാലത്തിന്‍റെ തൂണുകൾ നിലനിർത്തി നവീകരിക്കാനായിരുന്നു പദ്ധതി. എന്നാൽ ഒന്നും നടന്നില്ല. പഞ്ചായത്തിന് ഇത്രയും വലിയ തുക മുടക്കി പാലം നിർമാണം നടത്താനും കഴിയില്ല. ഇതോടെ തോട്ടം തൊഴിലാളികളും സാധാരണക്കാരുമായ ആളുകൾ കടുത്ത ദുരിതമാണ് അനുഭവിക്കുന്നത്. സ്കൂൾ തുറന്നതോടെ മുരിക്കുംവയൽ, കണ്ണിമല അടക്കമുള്ള സ്കൂളുകളിൽ പഠനം നടത്തുന്ന വിദ്യാർഥികൾ കിലോമീറ്ററോളം അധികം സഞ്ചരിച്ച് സ്കൂളുകളിലെത്തേണ്ട ഗതികേടിലാണ്. വാഹന ചെലവിനത്തിൽ മാത്രം ഭാരിച്ച തുകയാണ് ഇത്തരത്തിൽ വിദ്യാർഥികൾക്കു നൽകേണ്ടി വരുന്നത്. 1990കളിലാണ് പതിറ്റാണ്ടുകളുടെ കാത്തിരിപ്പിനു ശേഷം ഈ പാലത്തിന്‍റെ നിർമാണ പ്രവർത്തനങ്ങൾ ആരംഭിച്ചത്. എസ്റ്റേറ്റ് മാനേജ്മെന്‍റിന്‍റെയും തൊഴിലാളികളുടെയും സഹകരണത്തോടെ ഗ്രാമപഞ്ചായത്തിന്‍റെ നേതൃത്വത്തിലാണ് അന്ന് പാലത്തിന്‍റെ പണി പൂർത്തിയാക്കിയത്. ഇപ്പോൾ ഈ പാലം തകർന്ന് നാലു വർഷത്തോടടുക്കുമ്പോൾ 90കളിലേക്കാൾ പരിമിതമാണ് തങ്ങളുടെ യാത്രാസൗകര്യമെന്ന് നാട്ടുകാർ കുറ്റപ്പെടുത്തുന്നു. പ്രളയ ബാധിത മേഖലയിലെ മറ്റെല്ലാ പ്രദേശങ്ങൾക്കും നൽകിയ പരിഗണന തങ്ങൾക്കും നൽകണമെന്നും വെള്ളനാടി പാലത്തിനോടുള്ള അധികാരികളുടെ അവഗണന അവസാനിപ്പിക്കണമെന്നും നാട്ടുകാർ ആവശ്യപ്പെട്ടു. ഇല്ലെങ്കിൽ പ്രത്യക്ഷ സമരപരിപാടികൾ ആരംഭിക്കുമെന്നും പ്രദേശവാസികൾ പറഞ്ഞു.

ചങ്ങനാശേരി കെഎസ്ആര്‍ടിസി ഡിപ്പോയുടെ പോക്ക് എങ്ങോട്ടാ? ആവശ്യത്തിന് ഡ്രൈവര്‍മാരും കണ്ടക്ടര്‍മാരുമില്ല; ഇന്നലെ റദ്ദാക്കിയത് ആറ് ഷെഡ്യൂളുകൾ

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയില്‍ ഇന്നലെ ആറ് ഷെഡ്യൂളുകള്‍ റദ്ദു ചെയ്തു. 45 ഷെഡ്യൂളുകളില്‍ ഇന്നലെ 39 ഷെഡ്യൂളുകള്‍ മാത്രമാണ് ഓപ്പറേറ്റ് ചെയ്തത്. വിവിധ റൂട്ടുകളിലുള്ള വിദ്യാര്‍ഥികളടക്കം യാത്രക്കാര്‍ ദുരിതത്തില്‍. കഴിഞ്ഞ രണ്ടാഴ്ചക്കിടെ റദ്ദാക്കപ്പെട്ടത് പത്ത് ഷെഡ്യൂളുകളാണ്. ഡിപ്പോയിലെ വരുമാനവും അനുദിനം ഇടിയുകയാണ്. രാവിലെ 6.40നുള്ള കൊട്ടാരക്കര, 6.20 പാലക്കാട്, ആലപ്പുഴ, ചമ്പക്കുളം, പുളിങ്കുന്ന് റൂട്ടുകളിലുള്ള സര്‍വീസുകളാണ് ഇന്നലെ നടത്താതിരുന്നത്. ഈ സര്‍വീസുകള്‍ നടത്താതിരുന്നതുമൂലം എഴുപതിനായിരത്തോളം രൂപയുടെ കുറവ് ഡിപ്പോയില്‍ ഉണ്ടായതായാണ് കണക്കാക്കപ്പെടുന്നത്. കോവിഡിനുമുമ്പ് അറുപത് ഷെഡ്യൂളുകള്‍ ചങ്ങനാശേരിയില്‍നിന്ന് ഓപ്പറേറ്റ് ചെയ്തിരുന്നു. കോവിഡിനുശേഷം അത് അമ്പതായി കുറഞ്ഞിരുന്നു. ഇന്നലെ 39 ഷെഡ്യൂളായി. ഇനിയും കുറയുമെന്നാണ് ഉദ്യോഗസ്ഥര്‍ ചൂണ്ടിക്കാട്ടുന്നത്. കഴിഞ്ഞ നാലുമാസത്തിനിടെ ഈ ഡിപ്പോയിലെ രണ്ട് പളനി, കോയമ്പത്തൂര്‍, മുരിക്കാശേരി സര്‍വീസുകള്‍ നിര്‍ത്തലാക്കിയിരുന്നു. കോവിഡിനുശേഷം അമൃത സര്‍വീസ് പുനരാരംഭിച്ചിട്ടില്ല. ഗ്രാമീണ സര്‍വീസുകളായ പൂവം, മണിമല സ്റ്റേ സര്‍വീസുകളും അടുത്തിടെ നിര്‍ത്തലാക്കിയിരുന്നു. ചങ്ങനാശേരി ഡിപ്പോയ്ക്കുതന്നെ ഒരു എടിഒ ഇല്ലാത്തതും പ്രതിസന്ധിയാണ്.

ജനറല്‍ ആശുപത്രിയിൽ രാത്രി സെക്യൂരിറ്റി ജീവനക്കാരുടെ സേവനം ലഭ്യമല്ലെന്ന് വിമർശനം

ചങ്ങനാശേരി: ജനറല്‍ ആശുപത്രിയിലെ സെക്യൂരിറ്റി ജീവനക്കാരുടെ സേവനം രാത്രി പത്തിനുശേഷം ലഭിക്കുന്നില്ലെന്ന് ആശുപത്രി മാനേജ്‌മെന്‍റ് കമ്മിറ്റി യോഗത്തില്‍ വിമര്‍ശനം. ഡ്യൂട്ടി സമയങ്ങളില്‍ സെക്യൂരിറ്റി ജീവനക്കാര്‍ ഒപി കൗണ്ടറില്‍ ഇരിക്കുന്നതായും പരാതിയുയര്‍ന്നു. ആശുപത്രിയിലെ ഇലക്‌ട്രീഷന്‍, പ്ലംബര്‍, ഓക്‌സിജന്‍ പ്ലാന്‍റ് ജീവനക്കാരന്‍ എന്നിവര്‍ക്ക് യൂണിഫോമും നെയിംപ്ലേറ്റും നല്‍കണമെന്ന മാനേജ്‌മെന്‍റ് കമ്മിറ്റിയംഗം ജോസുകുട്ടി നെടുമുടിയുടെ നിര്‍ദേശം യോഗം അംഗീകരിച്ചു. ചില ജീവനക്കാര്‍ തങ്ങളുടെ ഡ്യൂട്ടി മുറികളില്‍ കൂട്ടംകൂടിയിരുന്ന് മദ്യപിക്കുന്നതായും അംഗങ്ങള്‍ ആക്ഷേപം ഉയര്‍ത്തി. കിടപ്പുരോഗികളുടെ വാര്‍ഡിലെ ശുചിമുറികളുടെ തകരാര്‍ പരിഹരിക്കാത്തത് രോഗികള്‍ക്കും കൂട്ടിരിപ്പുകാര്‍ക്കും ദുരിതമാകുന്നതായി പലതവണ ചൂണ്ടിക്കാട്ടിയിട്ടും പരിഹരിക്കപ്പെടാത്തതു തര്‍ക്കത്തിനും ബഹളത്തിനും ഇടയാക്കി. കഴിഞ്ഞ ഒരു വര്‍ഷമായി താന്‍ ഈ വിഷയം ഉന്നയിച്ചിട്ടും പരിഹരിച്ചില്ലെന്ന് ജയിംസ് കലാവടക്കന്‍ ആരോപിച്ചു. ആശുപത്രി കോമ്പൗണ്ടില്‍ അനധികൃതമായി കാര്‍ ടാക്‌സി സര്‍വീസ് നടത്തുന്നതിനെതിരേയും പ്രതിഷേധം ഉയര്‍ന്നു. സ്വകാര്യ ലാബുകളുടെ ലെറ്റര്‍പാഡുകളില്‍ ഡോക്ടര്‍മാര്‍ കുറിപ്പ് നല്‍കുന്നതായും പരാതി ഉയര്‍ന്നു. പി.എന്‍. നൗഷാദ്, ലാലിച്ചന്‍ കുന്നിപ്പറമ്പില്‍, പി.എച്ച്. നാസര്‍, കെ.സി. ജോസഫ്, കെ.ടി. തോമസ്, മുഹമ്മദ് സിയ, സാബു കോയിപ്പള്ളി തുടങ്ങിയവര്‍ വിവിധ വിഷയങ്ങള്‍ ഉന്നയിച്ചു. നഗരസഭാധ്യക്ഷ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. ജോബ് മൈക്കിള്‍ എംഎല്‍എ, ആരോഗ്യ സ്ഥിരംസമിതി അധ്യക്ഷ എല്‍സമ്മ ജോബ്, ആശുപത്രി സൂപ്രണ്ട് ഡോ. പ്രസീദ എന്നിവര്‍ ചര്‍ച്ചകളില്‍ പങ്കെടുത്തു. കാരുണ്യ ഫാര്‍മസി ഇന്നു പുനരാരംഭിക്കും ചങ്ങനാശേരി: ജനറല്‍ ആശുപത്രിയിലെ കാരുണ്യ ഫാര്‍മസിയുടെ പ്രവര്‍ത്തനം ഇന്ന് പുനരാരംഭിക്കും. രാവിലെ 10ന് ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. പഴയ കെട്ടിടം പൊളിച്ചതിനെത്തുടര്‍ന്നാണ് കാരുണ്യ ഫാര്‍മസിയുടെ പ്രവര്‍ത്തനം നിലച്ചത്. പേ വാര്‍ഡിലെ ഒരു മുറിയിലാണ് കാരുണ്യ ഫാര്‍മസി ഇന്നുമുതല്‍ പ്രവര്‍ത്തിക്കുന്നത്. കാരുണ്യ ഫാര്‍മസി നിര്‍ത്തിയത് പാവപ്പെട്ട രോഗികളോടുള്ള വെല്ലുവിളിയാണെന്ന് ദീപിക റിപ്പോര്‍ട്ട് ചെയ്തിരുന്നു.

പരിസ്ഥിതി ദിനത്തില്‍ മീഡിയ വില്ലേജിന്‍റെ ആയിരം അടുക്കളത്തോട്ടം പദ്ധതിക്കു തുടക്കം

ചങ്ങനാശേരി: മീഡിയ വില്ലേജ് കാമ്പസില്‍ നാഷണല്‍ സര്‍വീസ് സ്‌കീമിന്‍റെ ആഭിമുഖ്യത്തില്‍ നടത്തിയ പരിസ്ഥിതി ദിനാചരണത്തില്‍ ആയിരം അടുക്കളത്തോട്ടം പദ്ധതിക്കു തുടക്കമായി. മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു ഉദ്ഘാടനം ചെയ്തു. മാടപ്പള്ളി അഗ്രി ഫാര്‍മേഴ്‌സ് പ്രൊഡ്യൂസര്‍ കമ്പനി (മാഫ്‌കോ), കുരിശുമൂട് സെന്‍റ് ജോസഫ് കോളജ് ഓഫ് കമ്യൂണിക്കേഷന്‍, കൂനന്താനം സങ്കേതം പ്രകൃതി ജീവന പരിശീലന കേന്ദ്രത്തിന്‍റെ നേതൃത്വത്തില്‍ പ്രവര്‍ത്തിക്കുന്ന മണ്ണറിവ് പ്രകൃതി കൃഷി കൂട്ടായ്മ, മാടപ്പള്ളി ബ്ലോക്ക് പഞ്ചായത്ത് എന്നിവര്‍ സംയുക്തമായി സംഘടിപ്പിച്ച പരിസ്ഥിതി ദിനാചരണത്തിലാണ് പദ്ധതിക്കു തുടക്കംകുറിച്ചത്. മീഡിയ വില്ലേജ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പ് വൃക്ഷത്തൈ നട്ടു. എസ്ബി കോളജ് റിട്ടയേർഡ് വൈസ്പ്രിന്‍സിപ്പല്‍ പ്രഫ. ജോസഫ് ടിറ്റോ, കൂനന്താനം സങ്കേതം പ്രകൃതി ജീവന പരിശീലന കേന്ദ്രം ഡയറക്ടര്‍ സിസ്റ്റര്‍ നവീന സിഎംസി, മാഫ്‌കോ ചെയര്‍മാന്‍ തോമസ് മാന്തറ, ബ്ലോക്ക് പഞ്ചായത്തംഗം മാത്തുക്കുട്ടി പ്ലാന്താനം, സെക്രട്ടറി നിഖിത ബിനു എന്നിവര്‍ പ്രസംഗിച്ചു.

കുറവിലങ്ങാട് അഗ്രി ഫെസ്റ്റിന് ഇന്നു തുടക്കം

കുറവിലങ്ങാട്: സ്വാശ്രയ സംഘത്തിന്‍റെ ആഭിമുഖ്യത്തിൽ പാലാ സോഷ്യൽ വെൽഫെയർ സൊസൈറ്റിയുടെ സഹകരണത്തോടെ അഗ്രി ഫെസ്റ്റ്-2025ന് ഇന്നു തുടക്കമാകും. പരിസ്ഥിതി വാരാചരണത്തിന്‍റെ ഭാഗമായാണ് ഫെസ്റ്റ് ഒരുക്കിയിരിക്കുന്നത്. സ്വദേശ-വിദേശ ഫലവൃക്ഷത്തൈകളുടെ പ്രദർശനവും വിപണനവും നടക്കും. കുറവിലങ്ങാട് മർത്ത്മറിയം പള്ളി മൈതാനിയിൽ ഒരുക്കുന്ന ഫെസ്റ്റിന്‍റെ ഉദ്ഘാടനം ആർച്ച്പ്രീസ്റ്റ് റവ. ഡോ. തോമസ് മേനാച്ചേരി നിർവഹിക്കും.പാലാ സോഷ്യൽ വെൽഫെയർ സൊസൈറ്റി ഡയറക്ടർ ഫാ. തോമസ് കിഴക്കേൽ പരിസ്ഥിതിദിന സന്ദേശം നൽകും. രൂപത അസിസ്റ്റന്‍റ് ഡയറക്ടർ ഫാ. ഇമ്മാനുവൽ കാഞ്ഞിരത്തിങ്കൽ, കുറവിലങ്ങാട് സ്വാശ്രയസംഘം ഡയറക്ടർ ഫാ. ജോസഫ് ചൂരക്കൽ, പ്രസിഡന്‍റ് എം.വി. ജോൺ എന്നിവർ പ്രസംഗിക്കും.

വീട്ടുമുറ്റത്തെ കിണര്‍ ഇടിഞ്ഞുതാഴ്ന്നു

മിഠായിക്കുന്നം: അയ്യന്‍കോവില്‍ ക്ഷേത്രത്തിനു സമീപം തൂമ്പുങ്കല്‍ താഴത്ത് അരുണ്‍കുമാറിന്‍റെ വീട്ടുമുറ്റത്തെ കിണര്‍ ഇടിഞ്ഞു താഴ്ന്നു. ബുധനാഴ്ച പെയ്ത ശക്തമായ മഴയെത്തുടർന്നാണ് കിണര്‍ ഇടിഞ്ഞുതാഴ്ന്നത്. കിണറ്റില്‍നിന്നും വെള്ളം പമ്പ് ചെയ്യാന്‍ സ്ഥാപിച്ചിരുന്ന മോട്ടര്‍ ഉള്‍പ്പെടെയാണ് താണത്. കിണറിനു ചുറ്റും വലിയ കുഴി രൂപപ്പെട്ട നിലയിലാണ്. ഏകദേശം 14 അടിയോളം താഴ്ചയുള്ള കിണറ്റിലെ വെള്ളമാണ് വീട്ടാവശ്യത്തിന് ഉപയോഗിച്ചിരുന്നത്. മണ്ണ് ഉള്‍പ്പെടെ ഇടിഞ്ഞുതാഴ്ന്നതോടെ കിണറ്റിലെ വെള്ളം മലിനമായി ഉപയോഗിക്കാന്‍ പറ്റാത്ത അവസ്ഥയിലാണെന്ന് അരുണ്‍കുമാര്‍ പറഞ്ഞു.

കേരള ആശാ ഹെല്‍ത്ത് വര്‍ക്കേഴ്സ് അസോ. രാപകല്‍ സമരയാത്രയ്ക്ക് സ്വീകരണം നല്കി

ക‌ടുത്തുരുത്തി: കേരളത്തിലെ ആശാപ്രവര്‍ത്തകര്‍ ഉന്നയിച്ചുവരുന്ന ന്യായമായ വിഷയങ്ങള്‍ ചര്‍ച്ച ചെയ്തു പരിഹരിക്കുന്നതിന് ദുര്‍വാശി ഉപേക്ഷിച്ച് ഉന്നതതലയോഗം വിളിച്ചുകൂട്ടാന്‍ മുഖ്യമന്ത്രി തയാറാകണമെന്ന് മോന്‍സ് ജോസഫ് എംഎല്‍എ. കേരള ആശാ ഹെല്‍ത്ത് വര്‍ക്കേഴ്സ് അസോസിയേഷന്‍ കാസര്‍ഗോഡുനിന്നും തിരുവനന്തപുരത്തേക്ക് നടത്തുന്ന രാപകല്‍ സമരയാത്രയ്ക്ക് കടുത്തുരുത്തി ടൗണില്‍ നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദേഹം. കേരള ആശാ ഹെല്‍ത്ത് വര്‍ക്കേഴ്സ് അസോസിയേഷന്‍ സംസ്ഥാന ജനറല്‍ സെക്രട്ടറി കെ.വി. ബിന്ദു, വൈസ് ക്യാപ്റ്റന്‍ എസ്. മിനി എന്നിവര്‍ക്ക് സ്വീകരണം നല്‍കി. മഹിളാകോണ്‍ഗ്രസ് പ്രസിഡന്‍റ് ശ്രീലേഖ മണിലാല്‍ അധ്യക്ഷത വഹിച്ചു. യുഡിഎഫ് കടുത്തുരുത്തി നിയോജകമണ്ഡലം കണ്‍വീനര്‍ മാഞ്ഞൂര്‍ മോഹന്‍കുമാര്‍, കോണ്‍ഗ്രസ് ബ്ലോക്ക് പ്രസിഡന്‍റ് ജയിംസ് പുല്ലാപ്പള്ളി, കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി, അര്‍ബന്‍ ബാങ്ക് ചെയര്‍മാന്‍ എം.കെ. സാംബജി, സ്റ്റീഫന്‍ പാറാവേലി, ബേബി തൊണ്ടാംകുഴി, ജോസ് വഞ്ചിപ്പുര, ടോമി മാത്യു പ്രാലടി, ജോണി കണിവേലി, നോബി മുണ്ടയ്ക്കന്‍, വാസുദേവന്‍ നമ്പൂതിരി, ടോമി നിരപ്പേല്‍, ജെയ്സണ്‍ മണലേല്‍, സെബാസ്റ്റ്യന്‍ കോച്ചേരി, കെ.പി. വിനോദ് തുടങ്ങിയവര്‍ പ്രസംഗിച്ചു.

അഞ്ച് ഇരട്ടകളുടെ തൈ നടീൽ; വ്യത്യസ്തമായ ഒരു പരിസ്ഥിതിദിനാഘോഷം

ളാക്കാട്ടൂര്‍: എന്‍എസ്എസ് ഇംഗ്ലീഷ് മീഡിയം എല്‍പി സ്‌കൂളിലെ ഹെഡ്മാസ്റ്ററായ കെ.ആര്‍. വിജയന്‍ നായരും പള്ളിക്കത്തോട് ആനിക്കാട് എന്‍എസ്എസ് ഹൈസ്‌കൂളിലെ ഹെഡ്മാസ്റ്റര്‍ ഇന്‍-ചാര്‍ജായ ളാക്കാട്ടൂര്‍കാരൻ അനീഷ് എ. നായരും പരിസ്ഥിതിദിനം അഞ്ച് ഇരട്ടിമധുരം കൊണ്ടു വേറിട്ടതാക്കി. രണ്ടു സ്‌കൂളുകളിലെയും ഇരട്ടക്കുട്ടികളെക്കൊണ്ട് മാവിന്‍തൈകള്‍ നടീക്കാന്‍ തീരുമാനിച്ചു. ളാക്കാട്ടൂര്‍ എന്‍എസ്എസ് ഇംഗ്ലീഷ് മീഡിയം എല്‍പിയിലെ ഇരട്ടകളായ എല്‍കെജിയിലെ ഗൗരിനന്ദ എം. മനീഷും ലക്ഷ്മിനന്ദ എം. മനീഷും രണ്ടാം ക്ലാസിലെ ഇരട്ടകളായ ജിഹാന ജിപ്‌സനും ജിയാന്ന ജിപ്‌സനും, മൂന്നാം ക്ലാസിലെ അദിത് പ്രശാന്തും അയോണ്‍ പ്രശാന്തും, നാലാം ക്ലാസിലെ ആദിശ്രീ മനോജും, ആരാധ്യ മനോജും ചേര്‍ന്നു മാവിന്‍തൈ വച്ചു. ചിത്രകലാ അധ്യാപകന്‍ ശ്രീകാന്ത്, സ്‌കൂള്‍ മാനേജര്‍ ആര്‍. രാമചന്ദ്രന്‍ നായര്‍ എന്നിവര്‍ പ്രസംഗിച്ചു. ആനിക്കാട് എന്‍എസ്എസ് ഹൈസ്‌കൂളിലെ ഇരട്ടക്കുട്ടികളായ എട്ടാം ക്ലാസിലെ ആദിത്യ അനീഷ്, ആദിത്യന്‍ അനീഷ് എന്നിവര്‍ ചേര്‍ന്ന് മാവിന്‍ തൈ നട്ടു. ചിത്രകലാ അധ്യാപകന്‍ ശ്രീകാന്ത് ളാക്കാട്ടൂര്‍ പരിസ്ഥിതി ചിത്രങ്ങള്‍ വരച്ചു ക്ലാസെടുത്തു. പച്ചക്കറി തോട്ടത്തിന്‍റെ മേല്‍നോട്ടം ജയപ്രിയ ടീച്ചര്‍ക്കാണ്. അനീഷ് എ. നായര്‍, ജയപ്രിയ, അമ്പിളി കൈമള്‍, വി. അശോക്, പി.എന്‍. പ്രഭാവതി, ആര്‍. ശ്രീകാന്ത്, ഉമേഷ് കൃഷ്ണന്‍ എന്നിവര്‍ പ്രസംഗിച്ചു. ഇരുസ്‌കൂളുകളിലും നടത്തിയ വിവിധ മത്സരങ്ങള്‍ക്ക് മാവിന്‍ തൈകളും സമ്മാനമായി നല്കി.

മോഡൽ എംസിഎഫിന്‍റെ നിർമാണോദ്ഘാടനം നടത്തി

അതിരമ്പുഴ: അജൈവ മാലിന്യങ്ങൾ ശേഖരിച്ച് വേർതിരിച്ചു സംസ്കരിക്കുന്നതിനാവശ്യമായ ആധുനിക സൗകര്യങ്ങളോടു കൂടിയ മാതൃകാ മെറ്റീരിയൽ കളക‌്ഷൻ ഫെസിലിറ്റി സെന്‍ററിന്‍റെ (മോഡൽ എംസിഎഫ്) നിർമാണോദ്ഘാടനം ഫ്രാൻസിസ് ജോർജ് എംപി നിർവഹിച്ചു. ചടങ്ങിൽ അതിരമ്പുഴ പഞ്ചായത്ത്‌ പ്രസിഡന്‍റ്‌ ജോസ് അമ്പലക്കുളം അധ്യക്ഷത വഹിച്ചു. ബ്ലോക്ക്‌ പഞ്ചായത്ത്‌ അംഗങ്ങളായ ജയിംസ് കുര്യൻ, അന്നമ്മ മാണി, പഞ്ചായത്ത്‌ വൈസ് പ്രസിഡന്‍റ് ഷിമി സജി, സ്റ്റാൻഡിംഗ് കമ്മിറ്റി ചെയർപേഴ്സൺമാരായ ഹരിപ്രകാശ്, ജയിംസ് തോമസ്, ഫസീന സുധീർ, മുൻ പഞ്ചായത്ത്‌ പ്രസിഡന്‍റ് ബിജു വലിയമല, മെംബർമാരായ അശ്വതിമോൾ കെ.എ., ജോഷി ഇലഞ്ഞിയിൽ, സെക്രട്ടറി നിസി ജോൺ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]