ADVERTISEMENT

ADVERTISEMENT

വാഴപ്പള്ളി സെന്‍റ് തെരേസാസില്‍ "മീറ്റ് ദ ലൂമിനറീസ്' സംഘടിപ്പിച്ചു

ചങ്ങനാശേരി: നിയമവ്യവസ്ഥയുടെ പ്രയോജനങ്ങള്‍ അനുഭവിക്കുന്ന സാധാരണക്കാരായ ജനങ്ങള്‍തന്നെ ഈ വ്യവസ്ഥിതി സംരക്ഷിക്കാന്‍ കടപ്പെട്ടവരാണെന്ന് ഡോ. അരുള്‍ ജോര്‍ജ് സ്‌കറിയ. വാഴപ്പള്ളി സെന്‍റ് തെരേസാസ് സ്‌കൂളിലെ ഹയര്‍സെക്കന്‍ഡറി വിഭാഗം രജത ജൂബിലി ആഘോഷങ്ങളുടെ ഭാഗമായി മീറ്റ് ദ ലൂമിനറീസ് പരിപാടി സംഘടിപ്പിച്ചു. ബംഗളൂരു നാഷണല്‍ ലോ സ്‌കൂള്‍ ഓഫ് ഇന്ത്യ യൂണിവേഴ്‌സിറ്റി പ്രഫസര്‍ ഡോ. അരുള്‍ ജോര്‍ജ് സ്‌കറിയ വിദ്യാര്‍ഥികളോട് സംവദിച്ചു.

ബൗദ്ധിക സ്വത്തവകാശനിയമ മേഖലയില്‍ പ്രവര്‍ത്തിക്കുന്ന അദ്ദേഹം നിയമ പഠനത്തിലെ നവീന മേഖലകളെക്കുറിച്ചും തൊഴില്‍ സാധ്യതകളെക്കുറിച്ചും വിദ്യാര്‍ഥികളുടെ സംശയങ്ങള്‍ക്ക് മറുപടി നല്‍കി. സ്‌കൂള്‍ പ്രിന്‍സിപ്പല്‍ ഷിജി വര്‍ഗീസ്, അധ്യാപകനായ ഷിബു ജോസഫ് എന്നിവര്‍ പ്രസംഗിച്ചു.

ADVERTISEMENT

എകെഎം സ്‌കൂളില്‍ ലഹരിവിമുക്ത ക്ലബ്

ചങ്ങനാശേരി: മോര്‍ക്കുളങ്ങര എകെഎം പബ്ലിക് സ്‌കൂളില്‍ ലഹരിവിമുക്ത ക്ലബ്ബിന്‍റെ ഉദ്ഘാടനവും ബോധവത്കരണ ക്ലാസും നടത്തി. എക്‌സൈസ് വകുപ്പ് പ്രിവന്‍റീവ് ഓഫീസര്‍ ആര്‍. രാജേഷ് ഉദ്ഘാടനം നിര്‍വഹിച്ചു. പ്രിന്‍സിപ്പല്‍ സിസ്റ്റര്‍ ടിന്‍സി വാഴക്കാട് അധ്യക്ഷത വഹിച്ചു. സിഎഫ്‌സിഐസിഐ റീജണല്‍ മാനേജര്‍ എം.ജി. മനോജ്, ജൂവല്‍ ധനേഷ്, മരിയ ആലീസ് കുര്യന്‍ തുടങ്ങിയവര്‍ പ്രസംഗിച്ചു.

ആഫ്രിക്കന്‍ ഒച്ച് പച്ചക്കറികള്‍ തിന്നൊടുക്കുന്നു

ചങ്ങനാശേരി: വാഴപ്പള്ളി പഞ്ചായത്ത് 15-ാം വാര്‍ഡില്‍പ്പെട്ട പമ്പ്ഹൗസ്, ഡിവൈന്‍നഗര്‍ പ്രദേശങ്ങളില്‍ ആഫ്രിക്കന്‍ ഒച്ചിന്‍റെ ശല്യം രൂക്ഷമാകുന്നു. കൃഷിയിടങ്ങളിലെ പച്ചക്കറികളും വീട്ടുപരിസരങ്ങളില്‍ വളര്‍ത്തുന്ന ചെടികളും ഇവറ്റകള്‍ തിന്നൊടുക്കുന്നതായി ആളുകള്‍ ചൂണ്ടിക്കാട്ടി. വിഷയത്തില്‍ വാഴപ്പള്ളി പഞ്ചായത്ത്, കൃഷിവകുപ്പ് അധികാരികള്‍ സത്വര നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു.

മാമ്മൂട്-വെങ്കോട്ട റോഡ് ചെളിക്കുളം; വാഴനട്ട് കോണ്‍ഗ്രസ് പ്രതിഷേധം

മാടപ്പള്ളി: തകര്‍ന്നടിഞ്ഞ് യാത്ര ദുഷ്‌കരമായ മാമ്മൂട് -വെങ്കോട്ട റോഡിന്‍റെ ശോച്യാവസ്ഥയ്ക്ക് ശാശ്വത പരിഹാരം കാണണമെന്നാവശ്യപ്പെട്ട് കോണ്‍ഗ്രസ് മാടപ്പള്ളി മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ മാര്‍ച്ചും ധര്‍ണയും നടത്തി. ഡിസിസി നിര്‍വാഹകസമിതി അംഗം ആന്‍റണി കുന്നുംപുറം റോഡിലെ കുഴിയില്‍ വാഴ നട്ടുകൊണ്ട് ഉദ്ഘാടനം ചെയ്തു. മണ്ഡലം പ്രസിഡന്‍റ് ബാബു കുരീത്ര അധ്യക്ഷത വഹിച്ചു. യൂത്ത് കോണ്‍ഗ്രസ് ജില്ലാ ജനറല്‍ സെക്രട്ടറി സോബിച്ചന്‍ കണ്ണമ്പള്ളി, പി.എം. ഷെഫീഖ്, പി.എം. മോഹനന്‍പിള്ള, സണ്ണി എത്തയ്ക്കാട്ട്, ജസ്റ്റിന്‍ പാറുകണ്ണില്‍ എന്നിവര്‍ പ്രസംഗിച്ചു.

വനിതാ കമ്മീഷന്‍ അദാലത്ത്: 12 പരാതികള്‍ തീര്‍പ്പാക്കി

ചങ്ങനാശേരി: വനിതാ കമ്മീഷന്‍ ജില്ലാ അദാലത്തില്‍ 12 പരാതികള്‍ തീര്‍പ്പാക്കി. വനിതാ കമ്മിഷനംഗം അഡ്വ. ഇന്ദിര രവീന്ദ്രന്‍റെ നേതൃത്വത്തില്‍ ചങ്ങനാശേരി നഗരസഭാ ഓഡിറ്റോറിയത്തില്‍ നടന്ന അദാലത്തില്‍ ആകെ 90 പരാതികളാണ് പരിഗണനയ്ക്കുവന്നത്. ഒരെണ്ണത്തില്‍ ജാഗ്രതാ സമിതിയുടെ റിപ്പോര്‍ട്ട് തേടി. 76 പരാതികള്‍ അടുത്ത അദാലത്തിലേക്കു മാറ്റി. ഒരു പുതിയ പരാതി പരിഗണിക്കുകയും മറ്റൊരു പരാതിയില്‍ കൗണ്‍സലിംഗിന് നിര്‍ദേശിക്കുകയും ചെയ്തു. അഡ്വക്കേറ്റുമാരായ ഷൈനി ഗോപി, സി.കെ. സുരേന്ദ്രന്‍, സി.എ. ജോസ്, കൗണ്‍സലര്‍മാരായ ബിന്‍റുമോള്‍ കെ. ജോസഫ്, എ. സായുജ എന്നിവര്‍ അദാലത്തില്‍ പങ്കെടുത്തു.

കുടയുടെ കരുതലുമായി ഒരു വാട്‌സാപ്പ് കൂട്ടായ്മ

നെടുംകുന്നം: നാട്ടിലെ കൊച്ചുവര്‍ത്തനമാനങ്ങള്‍ക്കും വിശേഷങ്ങള്‍ക്കുമായി രൂപീകരിച്ച വാട്‌സാപ്പ് കൂട്ടായ്മ ഈ പെരുമഴക്കാലത്തു കുടകള്‍ വാങ്ങിനല്‍കി നിര്‍ധനരായ കുട്ടികള്‍ക്കു കരുതലായി. നെടുംകുന്നം ന്യൂസ് എന്ന വാട്‌സാപ്പ് കൂട്ടായ്മയാണ് സിജോ പതാലില്‍, ജില്‍സന്‍ തെങ്ങുംമൂട്ടില്‍, ടോമി വടക്കുംമുറി, ഷിജിന്‍ കണ്ടങ്കേരിയില്‍ എന്നിവരുടെ നേതൃത്വത്തില്‍ കരുതലിന്‍റെ പുത്തന്‍ ആശയങ്ങള്‍ നടപ്പിലാക്കിയത്. അര്‍ഹരായ കുട്ടികള്‍ക്കുവേണ്ടി കുട സെന്‍റ് ജോണ്‍സ് ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പൽ ഡോ. ഡൊമിനിക്ക് ജോസഫ് ഗ്രൂപ്പ് അഡ്മിനില്‍നിന്നും ഏറ്റുവാങ്ങി. രാജീവ് തൂമ്പുങ്കല്‍, ജോണ്‍സി ഐക്കുളം എന്നിവരും സന്നിഹിതരായിരുന്നു. നെടുംകുന്നത്തുള്ള വിവിധ സ്‌കൂളുകളിലെ വിദ്യാര്‍ഥികള്‍ക്കായാണ് കുടവിതരണം നടത്തിയത്. നെടുംകുന്നം ഇടവക അടിസ്ഥാനമാക്കി സ്വദേശത്തും വിദേശത്തുമുള്ള നെടുംകുന്നംകാരുടെ സൗഹൃദകൂട്ടായ്മയാണ് നെടുംകുന്നം ന്യൂസ്.

ചെറുപുഷ്പ മിഷന്‍ലീഗ് കുറുമ്പനാടം ഫൊറോന പ്രവര്‍ത്തനവര്‍ഷോദ്ഘാടനം

കുറുമ്പനാടം: ചെറുപുഷ്പം മിഷന്‍ലീഗ് കുറുമ്പനാടം മേഖല പ്രവര്‍ത്തനവര്‍ഷ ഉദ്ഘാടനവും ഈ വര്‍ഷം ആദ്യകുര്‍ബാന സ്വീകരിച്ച കുട്ടികളുടെ സംഗമം എയ്ഞ്ചല്‍സ് മീറ്റും സെന്‍റ് ആന്‍റണീസ് ഫൊറോന പള്ളിയില്‍ സംഘടിപ്പിച്ചു. സന്ദേശനിലയം ചെറുപുഷ്പ മിഷന്‍ലീഗ് ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍ ഉദ്ഘാടനം ചെയ്തു. കുട്ടികള്‍ക്കായി ഫാ. ജോണ്‍ തറക്കുന്നേല്‍ ക്ലാസ് നയിച്ചു. ഫൊറോന പ്രസിഡന്‍റ് ഡോണ്‍ ലിജോ അധ്യക്ഷത വഹിച്ചു. ഫെറോനാ വികാരി റവ.ഡോ. ജോബി കറുകപ്പറമ്പില്‍ മുഖ്യപ്രഭാഷണം നടത്തി. ഫൊറോനാ ഡയറക്ടര്‍ ഫാ. സെബാസ്റ്റ്യന്‍ കൈതപ്പറമ്പില്‍, ഓര്‍ഗനൈസിംഗ് പ്രസിഡന്‍റ് ഷെബിന്‍ ആന്‍റണി, ജോയിന്‍റ് ഡയറക്ടര്‍ സിസ്റ്റര്‍ അലീന എഫ്‌സിസി, വൈസ് പ്രസിഡന്‍റ് സോണിയ സോജി എന്നിവരും ഫൊറോനായിലെ എട്ട് ഇടവകകളില്‍നിന്നായി 142 കുട്ടികളും അധ്യാപകരും പങ്കെടുത്തു.

54 തെരുവുനായ്ക്കളെ പിടികൂടി പ്രതിരോധ കുത്തിവയ്പെടുത്തു

ചങ്ങനാശേരി: വാഴപ്പള്ളിയില്‍ തെരുവുനായ പേവിഷബാധ സ്ഥിരീകരിച്ചതിനെത്തുടര്‍ന്ന് വാഴപ്പള്ളിയിലും സമീപപ്രദേശങ്ങളിലുമായി 54 തെരുവുനായ്കളെ പിടികൂടി പേവിഷ പ്രതിരോധ കുത്തിവയ്പിനു വിധേയമാക്കി. ചങ്ങനാശേരി നഗരസഭയുടെയും ഗവൺമെന്‍റ് വെറ്റിനറി പോളിക്ലിനിക്കിന്‍റെയും ആഭിമുഖ്യത്തിലാണ് കുത്തിവയ്പ് നടത്തിയത്.രണ്ട് നായപിടിത്തക്കാര്‍ നായ്ക്കളെ വലയില്‍ കുരുക്കി. രണ്ടു ഡോക്ടര്‍മാര്‍ ഇവയ്ക്കു കുത്തിവയ്പ് നൽകി. താലൂക്ക് കോഓര്‍ഡിനേറ്റര്‍ ഡോ. ഷിജോ ജോസ്, ഡോ. നയന്‍താര എന്നിവര്‍ നേതൃത്വം നല്‍കി. നഗരസഭ ചെയര്‍പേഴ്‌സൺ കൃഷ്ണകുമാരി രാജശേഖരന്‍, വൈസ് ചെയര്‍മാന്‍ മാത്യൂസ് ജോര്‍ജ്, വാര്‍ഡ് കൗണ്‍സിലര്‍മാരായ വിഷ്ണുദാസ്, അഡ്വ. ശിവകുമാര്‍, ഗീതാ അജി, റെജി കേളമ്മാട്ട് എന്നിവര്‍ സന്നിഹിതരായിരുന്നു. തെരുവുനായ്ക്കളുടെ നിയന്ത്രണത്തിന് നഗരസഭയും ഇതര തദ്ദേശ സ്ഥാപനങ്ങളും സത്വര നടപടികള്‍ സ്വീകരിക്കണമെന്ന ആവശ്യം ശക്തമാണ്.

ദുരിതാശ്വാസ ക്യാമ്പ് തുടരുന്നു : പെരുന്ന ഗവ. എല്‍പി സ്‌കൂൾ വിദ്യാര്‍ഥികളുടെ പഠനം മുടങ്ങുന്നു

ചങ്ങനാശേരി: ദുരിതാശ്വാസ ക്യാമ്പ് തുടരുന്ന പെരുന്ന ഗവൺമെന്‍റ് എല്‍പി സ്‌കൂളില്‍ വിദ്യാര്‍ഥികള്‍ക്ക് പഠനം നിഷേധിക്കപ്പെടുന്നതായി പരാതി. എല്‍കെജി, യുകെജി മുതല്‍ നാലുവരെ ക്ലാസുകളിലായി അമ്പതു വിദ്യാര്‍ഥികളാണ് പഠിക്കുന്നത്. ജൂണ്‍ രണ്ടിന് സ്‌കൂള്‍ തുറന്നെങ്കിലും ഈ സ്‌കൂളില്‍ ഒമ്പതിനാണ് പ്രവേശനോത്സവം നടത്തി ക്ലാസുകള്‍ ആരംഭിച്ചത്. തുടര്‍ന്ന് നാല് ദിവസം മാത്രമേ ക്ലാസ് നടത്താന്‍ കഴിഞ്ഞുള്ളൂ. 13 മുതല്‍ സ്‌കൂളില്‍ ദുരിതാശ്വാസ ക്യാമ്പ് ആരംഭിച്ചു. ഇപ്പോള്‍ ഈ സ്‌കൂളില്‍ 14 കുടുംബങ്ങളിലെ 53 അംഗങ്ങളാണ് കഴിയുന്നത്. പലരുടെയും വീടുകള്‍ വെള്ളക്കുഴിയിലായതിനാല്‍ പലര്‍ക്കും തിരിച്ചുപോകാന്‍ പറ്റാത്ത അവസ്ഥയാണ്. ഇവരെ നഗരസഭ അനുയോജ്യമായ സ്ഥലത്തേക്ക് പുനരധിവസിപ്പിക്കണമെന്ന ആവശ്യം ശക്തമാണ്. അതേസമയം പുഴവാത് ഗവൺമെന്‍റ് എല്‍പിഎസില്‍ പ്രവര്‍ത്തിച്ചിരുന്ന ക്യാമ്പ് ഇന്നലെ പിരിച്ചുവിട്ടു. കുട്ടികള്‍ക്ക് പഠിക്കാനുള്ള അവസരമൊരുക്കണമെന്ന് പിടിഎയുടെ നിവേദനം ദുരിതാശ്വാസ ക്യാമ്പ് തുടരുന്ന പെരുന്ന ഗവൺമെന്‍റ് എല്‍പി സ്‌കൂളില്‍ വിദ്യാര്‍ഥികള്‍ക്ക് പഠിക്കാനുള്ള അവസരം ഒരുക്കണമെന്ന് ചൂണ്ടിക്കാട്ടി സ്‌കൂളിലെ അധ്യാപകരും പിടിഎയും ചേര്‍ന്ന് ചങ്ങനാശേരി തഹസില്‍ദാര്‍, നഗരസഭാ ചെയര്‍പേഴ്‌സണ്‍, എഇഒ എന്നിവര്‍ക്ക് നിവേദനം സമര്‍പ്പിച്ചു. സാധാരണക്കാരും നിര്‍ധനരുമായ കുടുംബങ്ങളിലെ അമ്പതു കുട്ടികളാണ് ഈ സ്‌കൂളില്‍ പഠിക്കുന്നത്. ഈ അധ്യയന വര്‍ഷത്തില്‍ നാലു ക്ലാസുകള്‍ മാത്രമാണ് കുട്ടികള്‍ക്കു ലഭിച്ചത്. സ്‌കൂളിലെ ക്യാമ്പില്‍ കഴിയുന്ന കുടുംബങ്ങളെ അനുയോജ്യമായ മറ്റൊരു സ്ഥലത്തേക്ക് മാറ്റിപ്പാര്‍പ്പിച്ച് കുട്ടികള്‍ക്ക് ക്ലാസുകള്‍ നടത്താന്‍ അധികാരികള്‍ സത്വര നടപടികള്‍ സ്വീകരിക്കണമെന്നും നിവേദനത്തില്‍ ചൂണ്ടിക്കാട്ടുന്നു. പിടിഎ സമര്‍പ്പിച്ച നിവേദനം ജില്ലാ കളക്ടര്‍ക്കു കൈമാറുമെന്ന് തഹസില്‍ദാര്‍ പറഞ്ഞു. ക്ലാസ് നടക്കാത്തതിനാല്‍ കുട്ടികളുടെ ടിസി വാങ്ങി മറ്റു സ്‌കൂളുകളിലേക്ക് കുട്ടികളെ കൊണ്ടുപോകാനും നിര്‍ബന്ധിതരാകുമെന്നും രക്ഷിതാക്കള്‍ പറഞ്ഞു. കഴിവതും എല്‍പി സ്‌കൂളുകളില്‍ ദുരിതാശ്വാസ ക്യാമ്പുകള്‍ തുറക്കരുതെന്ന് സര്‍ക്കാര്‍ നിര്‍ദേശം നിലവിലുണ്ടെന്നാണ് രക്ഷിതാക്കള്‍ ചൂണ്ടിക്കാട്ടുന്നത്. മഴക്കെടുതിയിൽ ആദ്യം ക്യാമ്പ് തുറക്കുന്നത് പെരുന്ന എല്‍പി സ്‌കൂളില്‍ മഴക്കെടുതി ഉണ്ടാകുമ്പോള്‍ നഗരസഭയും റവന്യു വകുപ്പും ആദ്യം ക്യാമ്പ് തുറക്കുന്നത് പെരുന്ന ഗവൺമെന്‍റ് എല്‍പി സ്‌കൂളിലാണ്. ക്യാമ്പ് നടക്കുമ്പോഴൊക്കെ കുട്ടികളുടെ പഠനം മുടങ്ങുകയാണ് പതിവെന്ന് അധ്യാപകരും രക്ഷിതാക്കളും പറയുന്നു. ഹെഡ്മിസ്ട്രസ് ഉള്‍പ്പെടെ ഇവിടെ അഞ്ച് അധ്യാപകരാണുള്ളത്. എല്‍കെജി, യുകെജി വിഭാഗങ്ങള്‍ക്കായി ഒരു അധ്യാപികയും ഒരു സഹായിയും ഉണ്ട്. എല്‍കെജി, യുകെജി കുട്ടികള്‍ക്കായി സര്‍ക്കാര്‍ അനുവദിച്ച വര്‍ണക്കൂടാരം പദ്ധതിക്കുള്ള പത്തുലക്ഷം രൂപയുടെ സാമഗ്രികള്‍ സ്‌കൂളിലെത്തിയെങ്കിലും ദുരിതാശ്വാസക്യാമ്പ് പ്രവര്‍ത്തിക്കുന്നതുമൂലം ഈ സാമഗ്രികളെല്ലാം സ്‌കൂളിന്‍റെ ഓഫീസ് മുറിയില്‍ സൂക്ഷിച്ചിരിക്കുകയാണ്. ഈ സ്‌കൂളിന്‍റെ ഒരു ഭാഗത്താണ് സര്‍ക്കാരിന്‍റെ വനിതാ ഐടിഐ പ്രവര്‍ത്തിക്കുന്നത്. ഈ ഐടിഐ മറ്റൊരു സ്ഥലം കണ്ടെത്തി മാറ്റണമെന്ന ആവശ്യവും ശക്തമാണ്. ക്യാമ്പിലുള്ളവരെ പുനരധിവസിപ്പിക്കണം പെരുന്ന ഗവൺമെന്‍റ് എല്‍പി സ്‌കൂളിലെ ക്യാമ്പില്‍ കഴിയുന്നവരെ അനുയോജ്യമായ സ്ഥലത്തേക്കു മാറ്റി പുനരധിവസിപ്പിക്കണം. കുട്ടികളുടെ ക്ലാസുകള്‍ നഷ്ടപ്പെടുത്തുന്നത് നീതി നിഷേധമാണ്. നെജിയ നൗഷാദ് നഗരസഭാ വാര്‍ഡ് കൗണ്‍സിലര്‍

ചങ്ങനാശേരിയില്‍ തഹസില്‍ദാർ നിയമനം വൈകുന്നു

ചങ്ങനാശേരി: ചങ്ങനാശേരിയില്‍ തഹസില്‍ദാറുടെയും താലൂക്കില്‍ മൂന്ന് വില്ലേജ് ഓഫീസര്‍മാരുടെയും നിയമനം വൈകുന്നു. നിലവിലുണ്ടായിരുന്ന തഹസില്‍ദാര്‍ പി.ടി. സുരേഷ്‌കുമാര്‍ ജൂണ്‍ ഒന്നിന് വിരമിച്ചിരുന്നു. പകരം ആളെ നിയമിക്കാത്തതുമൂലം എല്‍എ ഡെപ്യൂട്ടി തഹസില്‍ദാര്‍ നിജു കുര്യനാണ് തഹസില്‍ദാറുടെ താത്കാലിക ചുമതല. ഡെപ്യൂട്ടി തഹസില്‍ദാറുടെ ചുമതല നിര്‍വഹിക്കുന്നതിനൊപ്പമാണ് ഈ ഉദ്യോഗസ്ഥന് തഹസില്‍ദാറുടെ ചുമതലകൂടി ചെയ്യേണ്ടിവരുന്നത്. ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസുകളുലെ വില്ലേജ് ഓഫീസര്‍മാര്‍ വിരമിച്ചിട്ട് പകരം ഓഫീസര്‍മാരെ നിയമിക്കുന്നതും‍ വൈകുകയാണ്. മഴക്കാലമായതിനാല്‍ ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിക്കേണ്ട ചുമതല വില്ലേജ് ഓഫീസര്‍മാര്‍ക്കാണ്. വാഴപ്പള്ളി കിഴക്ക്, ചെത്തിപ്പുഴ, നെടുംകുന്നം വില്ലേജ് ഓഫീസര്‍മാര്‍ക്കാണ് ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസുകളുടെ അധികച്ചുമതല നല്‍കിയിരിക്കുന്നത്. മഴക്കാലദുരിതാശ്വാസ പ്രവര്‍ത്തനങ്ങളുമായി ബന്ധപ്പെട്ട ഫയലുകള്‍ യുദ്ധകാലാടിസ്ഥാനത്തില്‍ തയാറാക്കണമെന്ന പ്രധാന ചുമതല വില്ലേജ് ഓഫീസര്‍മാര്‍ക്കുള്ളതിനാല്‍ അവരവരുടെ ഓഫീസുകളിലെ ജോലിക്കുശേഷം അധികച്ചുമതലയുള്ള ഓഫീസുകളിലെ ജോലികള്‍ പൂര്‍ണമായും നിര്‍വഹിക്കാനാവാത്ത അവസ്ഥയാണ്. ഇതുമൂലം സ്‌കൂള്‍, കോളജ് പ്രവേശനങ്ങള്‍ക്കായി വേണ്ടിവരുന്ന വരുമാനം, ജാതി, ഇഡബ്ല്യുഎസ്, നോണ്‍ക്രീമിലെയര്‍ സര്‍ട്ടിഫിക്കറ്റുകള്‍ ഉള്‍പ്പെടെ പല സര്‍ട്ടിഫിക്കറ്റുകളും വിദ്യാര്‍ഥികള്‍ക്ക് യഥാസമയം ലഭിക്കുന്നില്ലെന്ന പരാതിയുയര്‍ന്നിട്ടുണ്ട്.

കാർ വീട്ടുമുറ്റത്തേക്കു മറിഞ്ഞു

രാമപുരം: പാലാ-തൊടുപുഴ റോഡില്‍ കുറിഞ്ഞിക്ക് സമീപം ചൂരപ്പട്ട വളവിനും കുഴിവേലി വളവിനും ഇടയില്‍ കാര്‍ നിയന്ത്രണംവിട്ട് റോഡില്‍നിന്നു വീട്ടുമുറ്റത്തേക്ക് മറിഞ്ഞ് അപകടം. കഴിഞ്ഞ ദിവസം പുലര്‍ച്ചെ രാവിലെ നാലിനാണ് അപകടമുണ്ടായത്. കോഴിക്കോട് ഭാഗത്തുനിന്നു തിരുവനന്തപുരത്തേക്കു പോവുകയായിരുന്നു കാര്‍. താഴത്തേടത്ത് ഷിജു ബാലന്‍റെ വീടിന്‍റെ മുറ്റത്തേക്കാണ് കാര്‍ മറിഞ്ഞത്. അപകട സമയത്ത് ഷിജുവിന്‍റെ അമ്മ‍യും ഭാര്യയും രണ്ടു മക്കളുമാണ് വീട്ടിലുണ്ടായിരുന്നത്. ഡ്രൈവര്‍ ഉറങ്ങിപ്പോയതാണ് അപകടകാരണം. കാറില്‍ ഡ്രൈവറടക്കം രണ്ടുപേരാണ് ഉണ്ടായിരുന്നത്.

കുറവിലങ്ങാട് താലൂക്ക് ആശുപത്രിയില്‍ പേവാര്‍ഡ് നിര്‍മാണം പൂര്‍ത്തീകരണത്തിലേക്ക്

കുറവിലങ്ങാട്: കുറവിലങ്ങാട് താലൂക്ക് ആശുപത്രിയുടെ മുഖഛായ മാറ്റി അത്യാഹിത വിഭാഗം, പേവാര്‍ഡ് എന്നിവയുടെ നിര്‍മാണ പ്രവര്‍ത്തനങ്ങള്‍ ദ്രുതഗതിയില്‍ പുരോഗമിക്കുന്നു. ഉഴവൂര്‍ ബ്ലോക്ക് പഞ്ചായത്തിന്‍റെ 2024-25 വികസന പദ്ധതിയില്‍ ഉള്‍പ്പെടുത്തിയാണ് അത്യാഹിത വിഭാഗത്തിന്‍റെയും പേവാര്‍ഡിന്‍റെയും നിര്‍മാണം. 35 ലക്ഷം രൂപ ചെലവഴിച്ച് നിലവിലെ കെട്ടിടത്തിന്‍റെ മുകളിലായിട്ടാണ് പുതിയ കെട്ടിടം പണിയുന്നത്. രോഗികള്‍ക്കായി എട്ട് മുറികളും അതോടൊപ്പം ശുചിമുറിയുമാണ് ഇവിടെ സജ്ജമാക്കുന്നത്. 2217 ചതുരശ്ര അടിയിലാണ് നിര്‍മാണം. നിലവില്‍ പേ വാര്‍ഡിന്‍റെ പെയിന്‍റിംഗ് പ്രവര്‍ത്തനങ്ങള്‍ നടന്നുവരികയാണ്. ബ്ലോക്ക് പഞ്ചായത്തിന്‍റെ 2024-25, 2025-26 പദ്ധതികളുടെ ഭാഗമായാണ് താലൂക്ക് ആശുപത്രിയിലെ അത്യാഹിത വിഭാഗത്തിന്‍റെ നിര്‍മാണം നടന്നുവരുന്നത്. മൂന്നു കോടി രൂപ ചെലവില്‍ 10,838 ചതുരശ്ര അടിയില്‍ രണ്ടു നിലകളിലായാണ് കെട്ടിടം നിര്‍മിക്കുന്നത്. നാഷണല്‍ ഹെല്‍ത്ത് മിഷനാണ് പദ്ധതിയുടെ നടത്തിപ്പുചുമതല. നിര്‍മിതിയാണ് കരാര്‍ ഏറ്റെടുത്തിരിക്കുന്നത്. അത്യാഹിത വിഭാഗത്തിന്‍റെ നിര്‍മാണ പ്രവര്‍ത്തനങ്ങളും ആരംഭിച്ചിട്ടുണ്ട്. ഇതുകൂടാതെ സ്റ്റേറ്റ് പ്ലാന്‍ ഫണ്ടില്‍നിന്നുള്ള ഒരു കോടി രൂപ ചെലവില്‍ 2485 ചതുരശ്ര അടിയില്‍ പുതിയ അഡ്മിനിസ്‌ട്രേറ്റീവ് ബ്ലോക്കും നിര്‍മിക്കുന്നുണ്ട്. പൊതുമരാമത്തുവകുപ്പിന്‍റെ മേല്‍നോട്ടത്തിലാണ് നിര്‍മാണം.

ആഗോള ലഹരിവിരുദ്ധ ദിനാചരണം: മാസാചരണ പരിപാടികളോടെ പാലായില്‍ നാളെ തുടക്കം

പാലാ: ആഗോള ലഹരിവിരുദ്ധ ദിനമായ നാളെ പാലാ രൂപത കെസിബിസി മദ്യലഹരി വിരുദ്ധ സമിതിയുടെ ആഭിമുഖ്യത്തില്‍ ലഹരിവിരുദ്ധ മാസാചരണ പരിപാടികള്‍ക്ക് പാലായില്‍ തുടക്കം കുറിക്കും.നാളെ രാവിലെ 11.30ന് പാലാ അല്‍ഫോന്‍സ കോളജിലാണ് രൂപതാതല പരിപാടികളുടെ ഉദ്ഘാടനം നടക്കുന്നത്. സമ്മേളനം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപത പ്രസിഡന്‍റും സംസ്ഥാന സെക്രട്ടറിയുമായ പ്രസാദ് കുരുവിള അധ്യക്ഷത വഹിക്കും. ഫ്രാന്‍സിസ് ജോര്‍ജ് എംപി, മാണി സി. കാപ്പന്‍ എംഎല്‍എ, മുനിസിപ്പല്‍ ചെയര്‍മാന്‍ തോമസ് പീറ്റര്‍, മോണ്‍. സെബാസ്റ്റ്യന്‍ വേത്താനത്ത്, ഫാ. ജേക്കബ് വെള്ളമരുതുങ്കല്‍, ഫാ. ജോര്‍ജ് പുല്ലുകാലായില്‍, പ്രിന്‍സിപ്പല്‍ സിസ്റ്റര്‍ ഡോ. മിനിമോള്‍ മാത്യു, സാബു ഏബ്രഹാം എന്നിവര്‍ പ്രസംഗിക്കും. ഒരു മാസം നീണ്ടുനില്‍ക്കുന്ന പരിപാടികളാണ് സംഘടിപ്പിച്ചിട്ടുള്ളത്. ലഹരിവിരുദ്ധ സമ്മേളനങ്ങള്‍, സെമിനാറുകള്‍, കോര്‍ണര്‍ യോഗങ്ങള്‍, തൊഴില്‍ മേഖലകളിലൂടെയും വിദ്യാഭ്യാസ സ്ഥാപനങ്ങളിലൂടെയുമുള്ള സന്ദേശ-പ്രതിജ്ഞാ പരിപാടികള്‍, ലഘുലേഖകള്‍, ഹ്രസ്വചിത്ര പ്രദര്‍ശനം എന്നിവ നടത്തും. സമിതിയുടെ തെരഞ്ഞെടുക്കപ്പെട്ട പ്രതിനിധികള്‍ നേതൃത്വം നല്‍കും. രൂപതയിലെ വിവിധ സ്‌കൂളുകള്‍ ആതിഥേയത്വം വഹിക്കുകയും പരിപാടികള്‍ക്ക് സജീവ പങ്കാളികളാകുകയും ചെയ്യും. കേരള കത്തോലിക്ക സഭയുടെ ആഹ്വാനമനുസരിച്ച് അന്നേദിവസം രൂപതയിലെ മുഴുവന്‍ വിദ്യാലയങ്ങളിലും ലഹരിവിരുദ്ധ പ്രതിജ്ഞയെടുക്കുകയും വിവിധ പരിപാടികള്‍ ക്രമീകരിക്കുകയും ചെയ്യും.

ഓള്‍ കേരള ഫോട്ടോഗ്രാഫേഴ്‌സ് അസോസിയേഷന്‍

കടുത്തുരുത്തി: ഓള്‍ കേരള ഫോട്ടോഗ്രാഫേഴ്‌സ് അസോസിയേഷന്‍ 41-ാമത് ജില്ലാ സമ്മേളനത്തോടനുബന്ധിച്ചു കടുത്തുരുത്തിയില്‍ സ്വാഗതസംഘ രൂപീകരണ യോഗം നടന്നു. കടുത്തുരുത്തി പഞ്ചായത്ത് വൈസ് പ്രസിഡന്‍റ് ജിന്‍സി എലിസബത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് ഷാജി തോമസ് അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് ജെയ്‌സണ്‍ ഞൊങ്ങിണിയില്‍ ജില്ലാ സമ്മേളന പോസ്റ്ററിന്‍റെ പ്രകാശനം നിര്‍വഹിച്ചു. ജില്ലാ സെക്രട്ടറി സൂരജ് ഫിലിപ്പ്, ജില്ലാ ട്രഷറര്‍ ബിനീഷ് ജി. പോള്‍, സംസ്ഥാന കമ്മിറ്റിയംഗങ്ങളായ സാജു പി. നായര്‍, അജയ് എ.വി., ജില്ലാ വൈസ് പ്രസിഡന്‍റുമാരായ റെജി തീക്കോയി, റോബിന്‍ ആന്‍റണി, ജില്ലാ ജോയിന്‍റ് സെക്രട്ടറിമാരായ ജയചന്ദ്രകുമാര്‍, പി.ശ ്യാമളന്‍, പിആര്‍ഒ രഞ്ജിത്ത് കൊല്ലാട്, ജില്ലാ വനിതാ വിംഗ് കോ-ഓര്‍ഡിനേറ്റര്‍ ഗിരിജ ബിജിമോന്‍, ഷൈമോന്‍ തലയോലപ്പറമ്പ്, പ്രദീപ് കറുകച്ചാല്‍ തുടങ്ങിയവര്‍ പ്രസംഗിച്ചു.

കത്തിയുമായി വീടുകളിൽ അതിക്രമിച്ചു കയറി യുവാവ് ഭീഷണിപ്പെടുത്തിയതായി പരാതി

സ്ലീവാപുരം: കത്തിയുമായി വീടുകളിൽ അതിക്രമിച്ചു കയറി യുവാവ് ആളുകളെ ഭീഷിണിപ്പെടുത്തുകയും ചീത്ത വിളിക്കുകയും ചെയ്തതായി പരാതി. കെഎസ്ഇബി ജീവനക്കാരനായ ബിജുവിനെതിരേ നാട്ടുകാര്‍ കടുത്തുരുത്തി, കുറവിലങ്ങാട് സ്റ്റേഷനുകളില്‍ പരാതി നല്‍കി. തിങ്കളാഴ്ച വൈകുന്നേരം 6.30ന് സ്ലീവാപുരത്താണ് സംഭവം. കശാപ്പിന് ഉപയോഗിക്കുന്ന കത്തിയുമായി യുവാവ് ആളുകളെ ആക്രമിച്ചെന്നു പരാതിയില്‍ പറയുന്നു. ഇയാളുടെ ആക്രമണത്തില്‍ തെന്നാട്ടില്‍ എബിന്‍ ജോണിന് കഴുത്തില്‍ മുറിവേറ്റു. സജി മൂത്തേടം, സോജന്‍ പടിഞ്ഞാറ്റുകര, ഷിനോയി തൂമ്പശേരില്‍ എന്നിവര്‍ക്കും ഇയാളു‌ടെ ആക്രമണത്തിൽ പരിക്കേറ്റു. നാട്ടുകാര്‍ അറിയിച്ചതിനെത്തുടര്‍ന്ന് കടുത്തുരുത്തി പോലീസ് സ്ഥലത്തെത്തിയെങ്കിലും ഇയാള്‍ ഓടി രക്ഷപ്പെടുകയായിരുന്നു. കെഎസ്ഇബിയില്‍ ജോലിയുണ്ടെങ്കിലും ജോലിക്കു ഹാജരാകാതെ ഇയാള്‍ തടിക്കച്ചവടം നടത്തിവരികയാണെന്നും ഈ മേഖലയിലും ഇയാള്‍ക്കെതിരേ നിരവധി പരാതികള്‍ ഉണ്ടെന്നും നാട്ടുകാര്‍ പറയുന്നു.

ജൂലൈ മൂന്ന് പൊതുഅവധിയായി പ്രഖ്യാപിക്കണം: എസ്എംവൈഎം

പാലാ: മാര്‍ത്തോമ്മാ ശ്ലീഹായുടെ ഓര്‍മദിനമായ ജൂലൈ മൂന്ന് പൊതുഅവധിയായി പ്രഖ്യാപിക്കണമെന്ന് പാലാ രൂപത എസ്എംവൈഎം അര്‍ധവാര്‍ഷിക സെനറ്റ് സമ്മേളനം ആവശ്യപ്പെട്ടു. രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ അധ്യക്ഷത വഹിച്ച സമ്മേളനം രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി ഉദ്ഘാടനം ചെയ്തു. രൂപത ജനറല്‍ സെക്രട്ടറി റോബിന്‍ താന്നിമല, ജോയിന്‍റ് ഡയറക്ടര്‍ സിസ്റ്റര്‍ നവീന സിഎംസി, കടപ്ലാമറ്റം പള്ളി വികാരി ഫാ. ജോസഫ് മുളഞ്ഞനാല്‍, ഫൊറോന ഡയറക്ടര്‍ ഫാ. ജോസഫ് തേവര്‍പറമ്പില്‍, ജോയല്‍ ജോസഫ്, സോന മാത്യു, ബില്‍ന സിബി, ജോസഫ് തോമസ് എന്നിവര്‍ പ്രസംഗിച്ചു.

മത്സ്യത്തൊഴിലാളി ക്ഷേമനിധി ബോര്‍ഡ് വിദ്യാഭ്യാസ-കായിക അവാര്‍ഡ് വിതരണം ഇന്ന്

കോട്ടയം: കേരള മത്സ്യത്തൊഴിലാളി ക്ഷേമനിധി ബോര്‍ഡ് മത്സ്യത്തൊഴിലാളികളുടെയും അനുബന്ധ തൊഴിലാളികളുടെയും കുട്ടികള്‍ക്ക് നല്‍കിവരുന്ന വിദ്യാഭ്യാസ-കായിക പ്രോത്സാഹന അവാര്‍ഡുകളുടെ ജില്ലാതല വിതരണം ഇന്നു നടക്കും. ഉച്ചകഴിഞ്ഞ് രണ്ടിനു വൈക്കം സത്യഗ്രഹ സ്മാരക ഹാളില്‍ നടക്കുന്ന പരിപാടി സി.കെ. ആശ എംഎല്‍എ ഉദ്ഘാടനം ചെയ്യും. മത്സ്യത്തൊഴിലാളി ക്ഷേമനിധി ബോര്‍ഡ് ചെയര്‍മാന്‍ കൂട്ടായി ബഷീര്‍ അധ്യക്ഷ്യത വഹിക്കും. വൈക്കം നഗരസഭാ ചെയര്‍പേഴ്‌സണ്‍ പ്രീത രാജേഷ് മുഖ്യപ്രഭാഷണം നടത്തും. മത്സ്യത്തൊഴിലാളി ക്ഷേമനിധി ബോര്‍ഡ് അംഗങ്ങളായ കെ.കെ. രമേശന്‍, സക്കീര്‍ അലങ്കാരത്ത്, ആലപ്പുഴ മേഖലാ എക്സിക്യൂട്ടീവ് പി.ആര്‍. കുഞ്ഞച്ചന്‍, വൈക്കം നഗരസഭ ആരോഗ്യ സ്ഥിരംസമിതി അധ്യക്ഷ ബിന്ദു ഷാജി, ബ്ലോക്ക് പഞ്ചായത്തംഗം വീണ അജി, മത്സ്യഫെഡ് ഡയറക്ടര്‍ ബോര്‍ഡ് അംഗം ബാഹുലേയന്‍, ഫിഷറീസ് ഡെപ്യൂട്ടി ഡയറക്ടര്‍ എസ്.ആര്‍. രമേശ് ശശിധരന്‍, മത്സ്യഫെഡ് ജില്ലാ മാനേജര്‍ ബി. ഷാനവാസ്, വൈക്കം ഫിഷറീസ് ഓഫീസര്‍ ബി.എസ്. അഖില്‍, മത്സ്യത്തൊഴിലാളി സംഘടനാ പ്രതിനിധികളായ പി.വി. പുഷ്‌കരന്‍, ഡി. ബാബു, എന്‍.സി. സുകുമാരന്‍, പി.എസ്. സന്തോഷ്, എം.പി. സജീവ്, പ്രവീണ്‍ എന്നിവര്‍ പ്രസംഗിക്കും.

തലയാഴം തോട്ടകം മൂന്നാം ബ്ലോക്കിലെ പുറംബണ്ട് ഇടിഞ്ഞുനശിക്കുന്നു

തലയാഴം: കരിയാർ കരകവിഞ്ഞ് വെള്ളം കുത്തിയൊഴുകി തലയാഴം തോട്ടകം മൂന്നാം ബ്ലോക്കിലെ പാടശേഖരത്തിന്‍റെ പുറംബണ്ട് നശിക്കുന്നു. 80 ഏക്കർ വരുന്ന പാടശേഖരത്തിന്‍റെ പുറംബണ്ട് പല ഭാഗങ്ങളിലും ഇടിഞ്ഞുതാണ നിലയിലാണ്. പാടശേഖരത്തിന്‍റെ ഒരു ഭാഗത്ത് കരിയാറും മറുഭാഗത്ത് നാട്ടുതോടുമാണ്. ബണ്ട് താഴ്ന്നു കിടക്കുന്നതിനാൽ പാടശേഖരഖരത്തിലേക്ക് കരിയാറിൽനിന്നും നാട്ടുതോട്ടിൽനിന്നും വെള്ളം ഇരച്ചെത്തുന്നതിനാൽ സമീപം താമസിക്കുന്ന 40 കുടുംബങ്ങളെ മാസങ്ങളോളം വെള്ളക്കെട്ട് ദുരിതത്തിലാക്കുന്നു. പ്രദേശത്തേക്ക് ഗതാഗതയോഗ്യമായ വഴിയില്ല. വളരെ താഴ്ന്നു കിടക്കുന്ന വഴി വെള്ളത്തിൽ മുങ്ങിയതിനാൽ ഒന്നരക്കിലോമീറ്റർ അകലെ വാഹനങ്ങൾ വച്ചാണ് പ്രദേശവാസികൾ നീന്തി വീട്ടിലെത്തുന്നത്. കർഷകരുടെയും പ്രദേശവാസികളുടെയും നിരന്തര ആവശ്യത്തെത്തുടർന്ന് ജലവിഭവ വകുപ്പ് പുറംബണ്ട് ഉയർത്തി കല്ലുകെട്ടി സംരക്ഷിക്കുന്നതിന് 75 ലക്ഷം രൂപ അനുവദിച്ചിരുന്നു. എന്നാൽ മാസങ്ങൾ കഴിഞ്ഞിട്ടും അധികൃതർ തുടർനടപടികൾ സ്വീകരിച്ചില്ലെന്നു പ്രദേശവാസികൾ ആരോപിക്കുന്നു. പാടശേഖരത്തിന്‍റെ പുറംബണ്ട് നിർമിക്കാൻ അധികൃതർ നടപടി സ്വീകരിക്കണമെന്ന് കർഷകരും പ്രദേശവാസികളും ആവശ്യപ്പെട്ടു.

പ്രായപൂർത്തിയാകാത്ത പെൺകുട്ടിയെ പീഡിപ്പിച്ച യുവാവ് പിടിയിൽ

തലയോലപ്പറമ്പ്: പ്രായപൂർത്തിയാകാത്ത വിദ്യാർഥിനിയെ പ്രണയം നടിച്ച് തട്ടിക്കൊണ്ടുപോയി പീഡിപ്പിച്ച സംഭവത്തിൽ യുവാവ് പിടിയിൽ. തലയോലപ്പറമ്പ് പാണ്ടൻചിറയിൽ ബിജോ ജോണിനെ (26) ആണ് തലയോലപ്പറമ്പ് പോലീസ് പിടികൂടിയത്. പെൺകുട്ടിയെ തട്ടിക്കൊണ്ടുപോയി പിറവത്തുള്ള ഇയാളുടെ കുടുംബവീട്ടിലെത്തിച്ച് പീഡിപ്പിക്കുകയായിരുന്നുവെന്ന് പോലീസ് പറഞ്ഞു. പെൺകുട്ടിയെ കാണാതായതിനെത്തുടർന്ന് ബന്ധുക്കൾ പോലീസിൽ പരാതി നല്കിയിരുന്നു. മൊബൈൽ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ16 കാരിയെ കണ്ടെത്തി. പി‌‌ടിയിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ഫാ. ജി.ടി. വടക്കേല്‍ എന്‍ഡോവ്മെന്‍റ് അഖിലകേരള പ്രസംഗ മത്സരം

കടുത്തുരുത്തി: അധ്യാപകനും പ്രഭാഷകനും കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളി ഇടവകാംഗവുമായിരുന്ന ഫാ. ജി.‌ടി. വടക്കേലിന്‍റെ സ്മരണാര്‍ഥം അഖിലകേരള പ്രസംഗമത്സരം നടത്തുന്നു. കുടുംബാംഗങ്ങള്‍ ഏര്‍പ്പെടുത്തിയ എന്‍ഡോവ്മെന്‍റിന്‍റെ നേതൃത്വത്തില്‍ ജൂണിയര്‍, സീനിയര്‍ വിഭാഗങ്ങളിലാണ് പ്രസംഗമത്സരം നടത്തുക. 29ന് 2.30ന് കടുത്തുരുത്തി താഴത്തുപള്ളി പാരീഷ് ഹാളിലാണ് മത്സരം നടക്കുക. ജൂണിയര്‍ വിഭാഗത്തിൽ മൂന്നു വിഷയങ്ങള്‍ നേരത്തേ അറിയിക്കും. ഇതില്‍ ഒന്ന് പ്രസംഗ സമയത്ത് നറുക്കിട്ട് നിശ്ചയിക്കും. സീനിയര്‍ വിഭാഗത്തിനുള്ള വിഷയം പ്രസംഗസമയത്താവും നല്‍കുക. ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ക്ക് 5,001, 3,001, 2,001 രൂപ കാഷ് അവാര്‍ഡും ഫലകവും സര്‍ട്ടിഫിക്കറ്റും സമ്മാനിക്കും. മത്സരത്തില്‍ പങ്കെടുക്കാന്‍ ആഗ്രഹിക്കുന്നവര്‍ 27ന് വൈകുന്നേരം നാലിനു മുമ്പ് പേര് രജിസ്റ്റര്‍ ചെയ്യണം. ഫോണ്‍ - 85904 70531.

സര്‍ക്കാര്‍ പട്ടികജാതി സമൂഹത്തിനൊപ്പം: മന്ത്രി വി.എന്‍. വാസവന്‍

ഏറ്റുമാനൂര്‍: ഉപസംവരണം സംബന്ധിച്ച സുപ്രീംകോടതി വിധിയിലും ജാതി സെന്‍സസ് വിഷയത്തിലും പട്ടികജാതി സമൂഹത്തിനൊപ്പമാണ് സര്‍ക്കാര്‍ നിലപാടെന്ന് മന്ത്രി വി.എന്‍. വാസവന്‍. ഭാരതീയ വേലന്‍ സൊസൈറ്റി ജില്ലാ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ പ്രസിഡന്‍റ് പി.വി. പ്രസന്നന്‍ അധ്യക്ഷത വഹിച്ചു. ബിവിഎസ് സംസ്ഥാന പ്രസിഡന്‍റ് രാജീവ് നെല്ലിക്കുന്നേല്‍ മുഖ്യപ്രഭാഷണം നടത്തി. ഏറ്റുമാനൂര്‍ നഗരസഭാ ചെയര്‍പേഴ്‌സണ്‍ ലൗലി ജോര്‍ജ് ഉന്നത വിജയം നേടിയ കുട്ടികള്‍ക്കുള്ള സമ്മാനദാനം നിര്‍വഹിച്ചു.

റോഡിലെ കുഴി ഭീഷണിയായി

പള്ളിക്കത്തോട്: ടൗണിൽനിന്ന് ചെങ്ങളത്തിനുള്ള റോഡിന്‍റെ തുടക്കത്തിൽ ജൽ ജീവൻ പൈപ്പ് ലൈനിനായി കുഴിച്ച ഭാഗം വെള്ളം ഒഴുകി വാഹനത്തിനു കടന്നുപോകാൻ കഴിയാത്തവിധം കുഴിയായി. ഇവിടെ ടൂവീലറുകൾ അപകടത്തിൽപ്പെടുന്നത് പതിവായി. വനിതാ പഞ്ചായത്ത് മെംബറുടെ സ്കൂട്ടറും ഈ കുഴിയിൽ വീണു മറിഞ്ഞിരുന്നു. വലിയ അപകടം ഉണ്ടാകുന്നതിനു മുന്പ് കുഴിയടച്ച് അധികൃതർ പ്രശ്നത്തിനു പരിഹാരം ഉണ്ടാക്കണമെന്ന് കോൺഗ്രസ് മണ്ഡലം പ്രസിഡന്‍റ് ജോജി മാത്യു ആവശ്യപ്പെട്ടു.

വനിതാ കമ്മീഷന്‍ അദാലത്ത്; 12 പരാതികള്‍ തീര്‍പ്പാക്കി

ചങ്ങനാശേരി: വനിതാ കമ്മീഷന്‍ ജില്ലാ അദാലത്തില്‍ 12 പരാതികള്‍ തീര്‍പ്പാക്കി. വനിതാ കമ്മീഷനംഗം അഡ്വ. ഇന്ദിര രവീന്ദ്രന്‍റെ നേതൃത്വത്തില്‍ ചങ്ങനാശേരി നഗരസഭാ ഓഡിറ്റോറിയത്തില്‍ നടന്ന അദാലത്തില്‍ ആകെ 90 പരാതികളാണ് പരിഗണനയ്ക്കുവന്നത്. ഒരെണ്ണത്തില്‍ ജാഗ്രതാസമിതിയുടെ റിപ്പോര്‍ട്ട് തേടി. 76 പരാതികള്‍ അടുത്ത അദാലത്തിലേക്കു മാറ്റി. ഒരു പുതിയ പരാതി പരിഗണിക്കുകയും മറ്റൊരു പരാതിയില്‍ കൗണ്‍സലിംഗിന് നിര്‍ദേശിക്കുകയും ചെയ്തു. അഡ്വക്കേറ്റുമാരായ ഷൈനി ഗോപി, സി.കെ. സുരേന്ദ്രന്‍, സി.എ. ജോസ്, കൗണ്‍സലര്‍മാരായ ബിന്‍റുമോള്‍ കെ. ജോസഫ്, എ. സായുജ എന്നിവര്‍ അദാലത്തില്‍ പങ്കെടുത്തു.

ലഹരിവിരുദ്ധ ബോധവത്കരണത്തിന്‍റെ ഭാഗമായി വോളിബോള്‍ മത്സരം : ലഹരിക്കെതിരേ കൈയൊപ്പ് പതിപ്പിച്ച് കളക്ടറും മത്സരാര്‍ഥികളും

കോട്ടയം: ജില്ലാ സാമൂഹികനീതി ഓഫീസ്, നശാമുക്ത് ഭാരത് അഭിയാന്‍ (എന്‍എംബിഎ) കാമ്പയിന്‍റെ ഭാഗമായി ജില്ലാ സ്‌പോര്‍ട്‌സ് കൗണ്‍സിലിന്‍റെ സഹകരണത്തോടെ ജില്ലാതല വോളിബോള്‍ മത്സരം നടത്തി. നാഗമ്പടം ഇന്‍ഡോര്‍ സ്റ്റേഡിയത്തില്‍ നടന്ന മത്സരത്തില്‍ ജില്ലാ കളക്ടര്‍ ജോണ്‍ വി. സാമുവല്‍ ടീം അംഗങ്ങള്‍ക്ക് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. മത്സരത്തിന്‍റെ ഉദ്ഘാടനവും അദ്ദേഹം നിര്‍വഹിച്ചു. ജില്ലാ സാമൂഹികനീതി ഓഫീസര്‍ പി. പ്രദീപ്, സ്‌പോര്‍ട്‌സ് കൗണ്‍സില്‍ ജില്ലാ പ്രസിഡന്‍റ് ഡോ. ബൈജു വര്‍ഗീസ് ഗുരുക്കള്‍, സെക്രട്ടറി മായാദേവി, ജില്ലാ സാമൂഹ്യനീതി ഓഫീസിലെ സീനിയര്‍ സൂപ്രണ്ട് എം.വി. സഞ്ജയന്‍ എന്നിവര്‍ പ്രസംഗിച്ചു.

പി.എന്‍. പണിക്കര്‍ അനുസ്മരണവും നവീകരിച്ച ലൈബ്രറിയുടെ ഉദ്ഘാടനവും ന‌ടത്തി

അയര്‍ക്കുന്നം: ചേന്നാമറ്റം സിസ്റ്റര്‍ അല്‍ഫോന്‍സാസ് യുപി സ്‌കൂളില്‍ വായന വാരാചരണത്തിന്‍റെ ഭാഗമായി പി.എന്‍. പണിക്കര്‍ അനുസ്മരണവും അലുമ്നി അസോസിയേഷന്‍റെ സഹകരണത്തോടെ ആരംഭിച്ച റീഡിംഗ് കോര്‍ണറിന്‍റെയും നവീകരിച്ച ലൈബ്രറിയുടെയും ഉദ്ഘാനവും ന‌‌ടത്തി. സ്‌കൂള്‍ മാനേജര്‍ റവ. ഡോ. ജോസഫ് പാറയ്ക്കല്‍ ഉദ്ഘാടനം നിര്‍വഹിച്ചു. കുട്ടികളില്‍ വായനാശീലം പ്രോത്സാഹിപ്പിക്കുന്നതിന് അലുമ്നി അസോസിയേഷന്‍ വിവിധ ദിനപത്രങ്ങളും കുട്ടികള്‍ക്കുള്ള പ്രസിദ്ധീകരണങ്ങളും സ്‌പോണ്‍സര്‍ ചെയ്തു. പ്രധാനാധ്യാപിക കുഞ്ഞുമോള്‍ ആന്‍റണി, അസോസിയേഷന്‍ ഭാരവാഹികളായ ജോയ് മാത്യു പൂവന്‍പുഴയ്ക്കല്‍, മാത്യു അപ്പച്ചേരില്‍, ടി.വി. ജോണ്‍ തോപ്പില്‍, പി.ജെ. ജോസ് പൂവമ്പുഴയ്ക്കല്‍, എ.പി. ഫിലിപ്പ് അപ്പച്ചേരില്‍, തോമസ് ജോസഫ് തോപ്പില്‍ എന്നിവര്‍ പ്രസംഗിച്ചു. അധ്യാപികമാരായ നീനു തോമസ്, ജോസ്മിന്‍ ജോണ്‍, റിന്‍സി കുര്യാക്കോസ്, മഞ്ജു ഉദയകുമാര്‍ എന്നിവര്‍ നേതൃത്വം നല്‍കി.

ബിനോയിയുടെ സത്യസന്ധതയ്ക്ക് പാമ്പാടി പോലീസിന്‍റെ അനുമോദനം

പാമ്പാടി: റോഡിൽനിന്നു കളഞ്ഞുകിട്ടിയ ആറുലക്ഷം രൂപ പോലീസിലേൽപ്പിച്ച് മാതൃകയായി യുവാവ്. ടൈൽപണി തൊഴിലാളിയായ നാലുന്നാക്കൽ കുരിക്കാട്ടുപറമ്പിൽ ബിനോയ് ജോണാണ് മീനടത്തു റോഡിൽനിന്നു ലഭിച്ച ആറുലക്ഷം രൂപ പാമ്പാടി പോലീസ് സ്റ്റേഷനിൽ ഏല്പിച്ചു മാതൃകയായത്. പണം നഷ്ടപ്പെട്ട വാകത്താനം സ്വദേശി റെജിമോൻ സ്റ്റേഷനിലെത്തി തുകയുടെ വിശദാംശങ്ങൾ പറയുകയും പോലീസ് ആവശ്യപ്പെട്ട രേഖകൾ ഹാജാരാക്കുകയും ചെയ്തതിനെത്തുടർന്ന് പണം അദ്ദേഹത്തിനു കൈമാറി. എസ്എച്ച്ഒ റിച്ചാർഡ് വർഗീസ്, എസ്ഐ ഉദയകുമാർ എന്നിവരുടെ സാന്നിധ്യത്തിൽ ബിനോയി ജോണാണ് പണം കൈമാറിയത്. തനിക്ക് കടബാധ്യതകൾ ഉണ്ടായിട്ടും ഈ പണം പോലീസ് സ്റ്റേഷനിലെത്തി കൈമാറിയ ബിനോയ് ജോണിനെ പ്രശംസാപത്രം നൽകി പാമ്പാടി പോലീസ് ആദരിച്ചു.

തയ്യല്‍ മെഷീനുകള്‍ വിതരണം ചെയ്തു

കോട്ടയം: കോട്ടയം സോഷ്യല്‍ സര്‍വീസ് സൊസൈറ്റിയുടെ നേതൃത്വത്തില്‍ തയ്യല്‍ മെഷീന്‍ യൂണിറ്റുകള്‍ ലഭ്യമാക്കി. തയ്യല്‍ മെഷീന്‍ യൂണിറ്റുകളുടെ വിതരണോദ്ഘാടനം തെള്ളകം ചൈതന്യയില്‍ കോട്ടയം അതിരൂപത വികാരി ജനറാള്‍ ഫാ. തോമസ് ആനിമൂട്ടില്‍ നിര്‍വഹിച്ചു. സംസ്ഥാന ന്യൂനപക്ഷ വികസന ധനകാര്യ കോര്‍പറേഷന്‍ ചെയര്‍മാന്‍ സ്റ്റീഫന്‍ ജോര്‍ജ്, കെഎസ്എസ്എസ് എക്‌സിക്യൂട്ടീവ് ഡയറക്ടര്‍ ഫാ. സുനില്‍ പെരുമാനൂര്‍, അതിരമ്പുഴ പഞ്ചായത്ത് പ്രസിഡന്‍റ് ജോസ് ജോസഫ് അമ്പലക്കുളം, കോട്ടയം മുനിസിപ്പല്‍ ചെയര്‍പേഴ്സണ്‍ ബിന്‍സി സെബാസ്റ്റ്യന്‍, ജില്ലാ പഞ്ചായത്തംഗം റോസമ്മ സോണി, അസിസ്റ്റന്‍റ് ഡയറക്ടര്‍ ഫാ. ജെഫിന്‍ ഒഴുങ്ങാലില്‍ എന്നിവര്‍ പ്രസംഗിച്ചു.

എംഡിഎംഎയുമായി ലഹരി ഇടനിലക്കാരൻ പിടിയിൽ

കോട്ടയം: എംഡിഎംഎയുമായി ലഹരിവില്പന സംഘത്തിലെ ഇടനിലക്കാരനെ ലഹരിവിരുദ്ധ സ്‌ക്വാഡും കോട്ടയം ഈസ്റ്റ് പോലീസും ചേര്‍ന്നു പിടികൂടി. കോട്ടയം കഞ്ഞിക്കുഴി സ്വദേശിയായ കിരണ്‍ മനോജ് (24) ആണ് അറസ്റ്റിലായത്. ഇയാളുടെ പക്കല്‍നിന്നും 12 ഗ്രാം എംഡിഎംഎ കണ്ടെടുത്തു. 20 കിലോഗ്രാം കഞ്ചാവ് കൈവശം വയ്ക്കുന്നതിനു തുല്യമായ രാസലഹരിയാണ് ഇയാള്‍ കൈവശം വച്ചിരുന്നതെന്ന് പോലീസ് പറഞ്ഞു. ബംഗളൂരുവില്‍നിന്നാണ് ഇയാള്‍ എംഡിഎംഎ കോട്ടയത്ത് എത്തിക്കുന്നത്. തുടര്‍ന്ന് ഇവിടെയുള്ള ചെറുകിട കച്ചവടക്കാര്‍ക്ക് ചെറിയ പാക്കറ്റുകളിലാക്കി വിതരണം ചെയ്യുകയാണ് പതിവ്. ഇതിന് വിദ്യാര്‍ഥികളും യുവാക്കളും അടങ്ങുന്ന ഒരു സംഘത്തെ ഇയാള്‍ നിയോഗിച്ചിരുന്നു. കൂട്ടാളികളുടെ ഈ സംഘത്തെ പിടികൂടാന്‍ ശ്രമം ആരംഭിച്ചതായും പോലീസ് പറഞ്ഞു. ഒരു മാസം മുമ്പ് ഇയാളുടെ പ്രധാന കൂട്ടാളിയെ സമാനകേസില്‍ പിടികൂടിയിരുന്നു. തുടർന്നാണ് ഇയാളെക്കുറിച്ചു പോലീസിനു സൂചന ലഭിച്ചത്. കോട്ടയം ഡിവൈഎസ്പി കെ.ജി. അനീഷ്, നാര്‍ക്കോട്ടിക് സെല്‍ ഡിവൈഎസ്പി എ.ജെ. തോമസ്, ഈസ്റ്റ് എസ്എച്ച്ഒ യു. ശ്രീജിത്ത് എന്നിവരുടെ നേതൃത്വത്തില്‍ എസ്‌ഐമാരായ പ്രവീണ്‍, മനോജ്, പ്രീതി, പ്രദീപ്, സീനിയര്‍ സിപിഒമാരായ രമേശന്‍, കഹാര്‍, കിഷോര്‍, ഡാന്‍സാഫ് ടീം എന്നിവര്‍ ചേര്‍ന്നാണ് പ്രതിയെ പിടികൂടിയത്.

ഇമ്പിച്ചിബാവ ഭവന പുനരുദ്ധാരണ പദ്ധതിക്ക് അപേക്ഷിക്കാം

കോട്ടയം: മുസ്‌ലിം, ക്രിസ്ത്യന്‍, ബുദ്ധ, സിഖ്, പാഴ്‌സി, ജൈന എന്നീ ന്യൂനപക്ഷ മതവിഭാഗങ്ങളില്‍പ്പെടുന്ന വിധവകള്‍/വിവാഹബന്ധം വേര്‍പെടുത്തിയ/ഉപേക്ഷിക്കപ്പെട്ട സ്ത്രീകള്‍ക്കുള്ള ഇമ്പിച്ചിബാവ ഭവന പുനരുദ്ധാരണ പദ്ധതിയില്‍ ന്യൂനപക്ഷക്ഷേമ വകുപ്പ് ധനസഹായം നല്‍കുന്നു. അപേക്ഷകയ്ക്ക് 10 വര്‍ഷത്തിനുള്ളില്‍ ഭവന നിര്‍മാണത്തിനോ/പുനരുദ്ധാരണത്തിനോ ആനുകൂല്യം ലഭിച്ചിട്ടില്ലെന്നു തെളിയിക്കുന്നതിന് ആവശ്യമായ സാക്ഷ്യപത്രം ബന്ധപ്പെട്ട തദ്ദേശ സ്വയംഭരണ സ്ഥാപനത്തിന്‍റെ അധികാരപ്പെടുത്തിയ ഉദ്യോഗസ്ഥനില്‍നിന്ന് അപേക്ഷയോടൊപ്പം ഹാജരാക്കണം. ജില്ലാ ന്യൂനപക്ഷക്ഷേമ സെക്‌ഷന്‍, ജില്ലാ കളക്ടറേറ്റ്, കോട്ടയം എന്ന വിലാസത്തില്‍ തപാല്‍ മുഖാന്തരമോ നല്‍കാം. അപേക്ഷാ ഫോം www.minoritywelfare.kerala.gov.in എന്ന വകുപ്പിന്‍റെ വെബ്‌സൈറ്റില്‍നിന്ന് ലഭിക്കും. അപേക്ഷ സ്വീകരിക്കുന്ന അവസാന തീയതി 2025 ജൂലൈ 31.

ഗതാഗതപരിഷ്കാരം പാളി; കുരുക്ക് രൂക്ഷമായെന്ന് ആക്ഷേപം

കോട്ടയം: നഗരത്തില്‍ നടപ്പാക്കിയ ഗതാഗതപരിഷ്‌കാരം പാളിയതായും കുരുക്ക് രൂക്ഷമായതായും ആക്ഷേപം. കുരുക്ക് ഒഴിവാക്കുന്നതിനായി കുമരകം ഭാഗത്തുനിന്നു സിഎംഎസ് കോളജ് റോഡില്‍കൂടിയെത്തുന്ന സ്വകാര്യബസുകള്‍ ബേക്കര്‍ ജംഗ്ഷനിലെ ട്രാഫിക് സിഗ്നല്‍ കടന്ന് ശാസ്ത്രിറോഡില്‍ നിര്‍ത്തി ആളെയിറക്കി, കുര്യന്‍ ഉതുപ്പ് റോഡുവഴി നാഗമ്പടത്ത് എത്തുന്ന രീതിയിലാണു പരിഷ്‌കാരം നടപ്പാക്കിയത്. പോലീസ് പരീക്ഷണാടിസ്ഥാനത്തില്‍ നടപ്പാക്കിയ പരിഷ്‌കാരം ഗുണത്തേക്കാള്‍ ഏറെ ദോഷമാണുണ്ടാക്കുന്നതെന്ന് ഒരു വിഭാഗം ബസുടമകളും യാത്രക്കാരും ചൂണ്ടിക്കാട്ടുന്നു. കോളജ് റോഡില്‍ കൂടിയെത്തുന്ന ബസുകള്‍ ബേക്കര്‍ ജംഗ്ഷനിലെ ട്രാഫിക് സിഗ്നലില്‍ കാത്തുകിടക്കേണ്ടി വന്നതോടെ കുരുക്ക് വര്‍ധിച്ചു. ബസുകള്‍ ട്രാഫിക് സിഗ്നല്‍കടന്ന് ആകാശപാതയ്ക്കു മുന്നിലെത്തി ശാസ്ത്രി റോഡിലേ ഇറക്കം ഇറങ്ങുന്നതോടെ ഇവിടെയും കുരുക്കായി. ഈ സമയത്ത് സെന്‍ട്രല്‍ ജംഗ്ഷനില്‍നിന്നു വന്നു ശാസ്ത്രി റോഡിലൂടെ പോകേണ്ട വാഹനങ്ങളും സുഗമമായി കടന്നുപോകാന്‍ സാധിക്കാതെ കുരുക്കിലാകും. ബേക്കര്‍ ജംഗ്ഷന്‍ ഭാഗത്തുനിന്ന് കെഎസ്ആര്‍ടിസി ഭാഗത്തേക്ക് പോകേണ്ട വാഹനങ്ങളും കുരുക്കിലാകും. ശാസ്ത്രി റോഡിലെ ബസ് കാത്തിരിപ്പു കേന്ദ്രത്തില്‍ നിലവില്‍ നല്ല തിരക്കാണ്. ഇപ്പോള്‍ കുമരകം ബസുകള്‍കൂടി എത്തിയതോടെ തിരക്ക് കൂടി. ബസുകള്‍ നിര്‍ത്താന്‍പോലും സ്ഥലമില്ലാതായി. ബസുകള്‍ ശാസ്ത്രി റോഡില്‍നിന്നും കുര്യന്‍ ഉതുപ്പ് റോഡിലേക്ക് തിരിയുന്നിടത്തും നാഗമ്പടത്തെത്തി ബസ് സ്റ്റാന്‍ഡിലേക്ക് തിരിയുന്നിടത്തും ഗതാഗതക്കുരുക്ക് രൂക്ഷമായി. പുതിയ പരിഷ്‌കാരത്തില്‍ ബസുകള്‍ നാഗമ്പടം സ്റ്റാന്‍ഡിലെത്തുമ്പോള്‍ ഇരട്ടിയിലധികം സമയമാണ് എടുക്കുന്നത്. ഇപ്പോള്‍ കുമരകം, ചേര്‍ത്തല ഭാഗത്തുനിന്നു വരുന്ന രോഗികളും വിദ്യാര്‍ഥികളും ഉള്‍പ്പെടെയുള്ള യാത്രക്കാര്‍ വളരെയധികം ബുദ്ധിമുട്ടുകയാണ്. പുതിയ പരിഷ്‌കാരം ഗതാഗതക്കുരുക്കു വര്‍ധിപ്പിച്ചെന്നും ഇതു നടപ്പാക്കിയവരുടെ അജ്ഞതയാണിതിനു കാരണമെന്നും പ്രൈവറ്റ് ബസ് ഓണേഴ്സ് ഓര്‍ഗനൈസേഷന്‍ സംസ്ഥാനപ്രസിഡന്‍റ് ജോയി ചെട്ടിശേരി ആരോപിച്ചു. വര്‍ഷങ്ങള്‍ക്കു മുമ്പ് നാഗമ്പടം സ്റ്റാന്‍ഡില്‍ അപകടമരണങ്ങള്‍ സംഭവിക്കുകയും ഗതാഗതം താറുമാറാകുകയും ചെയ്ത അവസരത്തില്‍ ഓര്‍ഗനൈസേഷന്‍ ജില്ലാ കമ്മിറ്റിയുടെ നേതൃത്വത്തില്‍ കളക്ടര്‍ക്ക് നല്‍കിയ നിവേദനത്തെത്തുടര്‍ന്നാണ് ആര്‍ടിഎ ബോര്‍ഡ് നിലവിലുള്ള സംവിധാനം നടപ്പിലാക്കിയത്. ഗതാഗത പരിഷ്‌കാരം ഉടന്‍ പിന്‍വലിച്ച്, ഗതാഗതക്കുരുക്ക് ഒഴിവാക്കാന്‍ അടിയന്തര നടപടി സ്വീകരിക്കണമെന്നും പ്രൈവറ്റ് ബസ് ഓണേഴ്സ് ഓര്‍ഗനൈസേഷന്‍ ആവശ്യപ്പെട്ടു.

കാർ വീട്ടുമുറ്റത്തേക്കു മറിഞ്ഞു

രാമപുരം: പാലാ-തൊടുപുഴ റോഡില്‍ കുറിഞ്ഞിക്ക് സമീപം ചൂരപ്പട്ട വളവിനും കുഴിവേലി വളവിനും ഇടയില്‍ കാര്‍ നിയന്ത്രണംവിട്ട് റോഡില്‍നിന്നു വീട്ടുമുറ്റത്തേക്ക് മറിഞ്ഞ് അപകടം. കഴിഞ്ഞ ദിവസം പലര്‍ച്ചെ രാവിലെ നാലിനാണ് അപകടമുണ്ടായത്. കോഴിക്കോട് ഭാഗത്തുനിന്നു തിരുവനന്തപുരത്തേക്കു പോവുകയായിരുന്നു കാര്‍. താഴത്തേടത്ത് ഷിജു ബാലന്‍റെ വീടിന്‍റെ മുറ്റത്തേക്കാണ് കാര്‍ മറിഞ്ഞത്. അപകട സമയത്ത് ഷിജുവിന്‍റെ അമ്മ‍യും ഭാര്യയും രണ്ടു മക്കളുമാണ് വീട്ടിലുണ്ടായിരുന്നത്. ഡ്രൈവര്‍ ഉറങ്ങിപ്പോയതാണ് അപകടകാരണം. കാറില്‍ ഡ്രൈവറടക്കം രണ്ടുപേരാണ് ഉണ്ടായിരുന്നത്.

ജൂലൈ മൂന്ന് പൊതുഅവധിയായി പ്രഖ്യാപിക്കണം: എസ്എംവൈഎം

പാലാ: മാര്‍ത്തോമ്മാ ശ്ലീഹായുടെ ഓര്‍മദിനമായ ജൂലൈ മൂന്ന് പൊതുഅവധിയായി പ്രഖ്യാപിക്കണമെന്ന് പാലാ രൂപത എസ്എംവൈഎം അര്‍ധവാര്‍ഷിക സെനറ്റ് സമ്മേളനം ആവശ്യപ്പെട്ടു. രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ അധ്യക്ഷത വഹിച്ച സമ്മേളനം രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി ഉദ്ഘാടനം ചെയ്തു. രൂപത ജനറല്‍ സെക്രട്ടറി റോബിന്‍ താന്നിമല, ജോയിന്‍റ് ഡയറക്ടര്‍ സിസ്റ്റര്‍ നവീന സിഎംസി, കടപ്ലാമറ്റം പള്ളി വികാരി ഫാ. ജോസഫ് മുളഞ്ഞനാല്‍, ഫൊറോന ഡയറക്ടര്‍ ഫാ. ജോസഫ് തേവര്‍പറമ്പില്‍, ജോയല്‍ ജോസഫ്, സോന മാത്യു, ബില്‍ന സിബി, ജോസഫ് തോമസ് എന്നിവര്‍ പ്രസംഗിച്ചു.

ഭൂമികയുടെ വിത്തുകുട്ടകൾ സജീവമാകുന്നു

പൂഞ്ഞാര്‍: ഭക്ഷ്യ-ആരോഗ്യ സ്വരാജ് പ്രവര്‍ത്തനങ്ങളും ജൈവ വൈവിധ്യ പരിപോഷണവും കാലാവസ്ഥാ പ്രവര്‍ത്തനവും ലക്ഷ്യംവച്ച് ഭൂമിക നടത്തിവരുന്ന വിത്തുകുട്ടകള്‍ മഴക്കാലത്തിന്‍റെ കാര്‍ഷിക ഉണര്‍വിനൊപ്പം കൂടുതല്‍ സജീവമാകുകയാണ്. അഞ്ചു വര്‍ഷം മുന്‍പാണ് വിത്തുകുട്ട പ്രവര്‍ത്തനം ആരംഭിച്ചത്. 160 വിത്തുകുട്ടകളാണ് ജില്ലയുടെ പല ഭാഗങ്ങളിലായി ഇതോടകം നടത്തിയത്. പൂഞ്ഞാര്‍ തെക്കേക്കര ബസ് സ്റ്റാൻഡില്‍ ഭൂമിക നേറ്റീവ് വിന്‍ഡോയുടെ സമീപം നടത്തിയ 161-ാമത് വിത്തുകുട്ട ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഓഷ്യാനോഗ്രഫി ഗോവയില്‍ റിട്ട. സീനിയര്‍ സയന്‍റിസ്റ്റ് ഡോ. രമേഷ് കുമാര്‍ ഉദ്ഘാടനം ചെയ്തു. ഓണത്തോടനുബന്ധിച്ച് ഇരുനൂറാമത് വിത്തുകുട്ട നടത്താനുള്ള തയാറെടുപ്പിലാണ് ഭൂമിക. 27നു പാലാ അഡാര്‍ട്ടില്‍ ജൈവകര്‍ഷക സമിതി, ഗാന്ധി സ്റ്റഡി സെന്‍റര്‍ പാലാ, അഡാര്‍ട്ട് പാലാ എന്നിവയുടെ സഹകരണത്തോടെ 3.30ന് 162-ാമത് വിത്തുകുട്ട ഞാറ്റുവേലയുടെ ഭാഗമായി നടത്തും. തുടര്‍ന്നുള്ള ആഴ്ചകളില്‍ പൂഞ്ഞാര്‍, കൊഴുവനാല്‍, മുത്തോലി, ഭരണങ്ങാനം, പാതാമ്പുഴ, കൂട്ടിക്കല്‍, കുന്നോന്നി, മേലുകാവ്, തീക്കോയി, മൂന്നിലവ്, തലനാട് എന്നിവിടങ്ങളിലും വിത്തുകുട്ട സംഘടിപ്പിക്കും. കൈവശമുള്ള പച്ചക്കറികള്‍, ഔഷധങ്ങള്‍, കിഴങ്ങ്-ഫലവര്‍ഗങ്ങള്‍, വൃക്ഷവിളകള്‍ എന്നിവയുടെ വിത്തുകളും തൈകളും മറ്റു നടീല്‍വസ്തുക്കളും വിത്തുകുട്ടകളില്‍ കൊണ്ടുവന്ന് പരസ്പരം പങ്കുവയ്ക്കുന്ന പ്രക്രിയയിലൂടെ ഇതോടകം ആയിരക്കണക്കിന് കൈമാറ്റങ്ങളാണ് നടന്നിട്ടുള്ളത്. ഒട്ടേറെ പ്രമുഖരും വിവിധ പ്രദേശങ്ങളില്‍നിന്നുള്ള കര്‍ഷകരും സാമൂഹികപ്രവര്‍ത്തകരും വിത്തുകുട്ടകളില്‍ ഭാഗഭാക്കായി. പ്രാദേശിക സംഘാടനത്തിന് സന്നദ്ധ സംഘടനകളുടെയും കര്‍ഷകരുടെയും പിന്തുണ തേടുന്നുമുണ്ട് ഭൂമിക. ഫോണ്‍: 9400213141.

ആഗോള ലഹരിവിരുദ്ധ ദിനാചരണം: മാസാചരണ പരിപാടികളോടെ പാലായില്‍ നാളെ തുടക്കം

പാലാ: ആഗോള ലഹരിവിരുദ്ധ ദിനമായ നാളെ പാലാ രൂപത കെസിബിസി മദ്യലഹരി വിരുദ്ധ സമിതിയുടെ ആഭിമുഖ്യത്തില്‍ ലഹരിവിരുദ്ധ മാസാചരണ പരിപാടികള്‍ക്ക് പാലായില്‍ തുടക്കം കുറിക്കും.നാളെ രാവിലെ 11.30ന് പാലാ അല്‍ഫോന്‍സ കോളജിലാണ് രൂപതാതല പരിപാടികളുടെ ഉദ്ഘാടനം നടക്കുന്നത്. സമ്മേളനം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപത പ്രസിഡന്‍റും സംസ്ഥാന സെക്രട്ടറിയുമായ പ്രസാദ് കുരുവിള അധ്യക്ഷത വഹിക്കും. ഫ്രാന്‍സിസ് ജോര്‍ജ് എംപി, മാണി സി. കാപ്പന്‍ എംഎല്‍എ, മുനിസിപ്പല്‍ ചെയര്‍മാന്‍ തോമസ് പീറ്റര്‍, മോണ്‍. സെബാസ്റ്റ്യന്‍ വേത്താനത്ത്, ഫാ. ജേക്കബ് വെള്ളമരുതുങ്കല്‍, ഫാ. ജോര്‍ജ് പുല്ലുകാലായില്‍, പ്രിന്‍സിപ്പല്‍ സിസ്റ്റര്‍ ഡോ. മിനിമോള്‍ മാത്യു, സാബു ഏബ്രഹാം എന്നിവര്‍ പ്രസംഗിക്കും. ഒരു മാസം നീണ്ടുനില്‍ക്കുന്ന പരിപാടികളാണ് സംഘടിപ്പിച്ചിട്ടുള്ളത്. ലഹരിവിരുദ്ധ സമ്മേളനങ്ങള്‍, സെമിനാറുകള്‍, കോര്‍ണര്‍ യോഗങ്ങള്‍, തൊഴില്‍ മേഖലകളിലൂടെയും വിദ്യാഭ്യാസ സ്ഥാപനങ്ങളിലൂടെയുമുള്ള സന്ദേശ-പ്രതിജ്ഞാ പരിപാടികള്‍, ലഘുലേഖകള്‍, ഹ്രസ്വചിത്ര പ്രദര്‍ശനം എന്നിവ നടത്തും. സമിതിയുടെ തെരഞ്ഞെടുക്കപ്പെട്ട പ്രതിനിധികള്‍ നേതൃത്വം നല്‍കും. രൂപതയിലെ വിവിധ സ്‌കൂളുകള്‍ ആതിഥേയത്വം വഹിക്കുകയും പരിപാടികള്‍ക്ക് സജീവ പങ്കാളികളാകുകയും ചെയ്യും. കേരള കത്തോലിക്ക സഭയുടെ ആഹ്വാനമനുസരിച്ച് അന്നേദിവസം രൂപതയിലെ മുഴുവന്‍ വിദ്യാലയങ്ങളിലും ലഹരിവിരുദ്ധ പ്രതിജ്ഞയെടുക്കുകയും വിവിധ പരിപാടികള്‍ ക്രമീകരിക്കുകയും ചെയ്യും. പരിപാടികള്‍ക്ക് ആന്‍റണി മാത്യു, ജോസ് കവിയില്‍, അലക്സ് കെ. എമ്മാനുവല്‍, ടിന്‍റു അലക്സ് എന്നിവര്‍ നേതൃത്വം നല്‍കും.

കുറവിലങ്ങാട് താലൂക്ക് ആശുപത്രിയില്‍ പേവാര്‍ഡ് നിര്‍മാണം പൂര്‍ത്തീകരണത്തിലേക്ക്

കുറവിലങ്ങാട്: കുറവിലങ്ങാട് താലൂക്ക് ആശുപത്രിയുടെ മുഖഛായ മാറ്റി അത്യാഹിത വിഭാഗം, പേവാര്‍ഡ് എന്നിവയുടെ നിര്‍മാണ പ്രവര്‍ത്തനങ്ങള്‍ ദ്രുതഗതിയില്‍ പുരോഗമിക്കുന്നു. ഉഴവൂര്‍ ബ്ലോക്ക് പഞ്ചായത്തിന്‍റെ 2024-25 വികസന പദ്ധതിയില്‍ ഉള്‍പ്പെടുത്തിയാണ് അത്യാഹിത വിഭാഗത്തിന്‍റെയും പേവാര്‍ഡിന്‍റെയും നിര്‍മാണം. 35 ലക്ഷം രൂപ ചെലവഴിച്ച് നിലവിലെ കെട്ടിടത്തിന്‍റെ മുകളിലായിട്ടാണ് പുതിയ കെട്ടിടം പണിയുന്നത്. രോഗികള്‍ക്കായി എട്ട് മുറികളും അതോടൊപ്പം ശുചിമുറിയുമാണ് ഇവിടെ സജ്ജമാക്കുന്നത്. 2217 ചതുരശ്ര അടിയിലാണ് നിര്‍മാണം. നിലവില്‍ പേ വാര്‍ഡിന്‍റെ പെയിന്‍റിംഗ് പ്രവര്‍ത്തനങ്ങള്‍ നടന്നുവരികയാണ്. ബ്ലോക്ക് പഞ്ചായത്തിന്‍റെ 2024-25, 2025-26 പദ്ധതികളുടെ ഭാഗമായാണ് താലൂക്ക് ആശുപത്രിയിലെ അത്യാഹിത വിഭാഗത്തിന്‍റെ നിര്‍മാണം നടന്നുവരുന്നത്. മൂന്നു കോടി രൂപ ചെലവില്‍ 10,838 ചതുരശ്ര അടിയില്‍ രണ്ടു നിലകളിലായാണ് കെട്ടിടം നിര്‍മിക്കുന്നത്. നാഷണല്‍ ഹെല്‍ത്ത് മിഷനാണ് പദ്ധതിയുടെ നടത്തിപ്പുചുമതല. നിര്‍മിതിയാണ് കരാര്‍ ഏറ്റെടുത്തിരിക്കുന്നത്. അത്യാഹിത വിഭാഗത്തിന്‍റെ നിര്‍മാണ പ്രവര്‍ത്തനങ്ങളും ആരംഭിച്ചിട്ടുണ്ട്. ഇതുകൂടാതെ സ്റ്റേറ്റ് പ്ലാന്‍ ഫണ്ടില്‍നിന്നുള്ള ഒരു കോടി രൂപ ചെലവില്‍ 2485 ചതുരശ്ര അടിയില്‍ പുതിയ അഡ്മിനിസ്‌ട്രേറ്റീവ് ബ്ലോക്കും നിര്‍മിക്കുന്നുണ്ട്. പൊതുമരാമത്തുവകുപ്പിന്‍റെ മേല്‍നോട്ടത്തിലാണ് നിര്‍മാണം.

ബാപ്പുജിയെയും ചാച്ചാജിയെയും കണ്ട എരുമേലിയുടെ മുത്തശി ഓർമയായി

എരുമേലി: പഴയ കാലത്തിന്‍റെ ഓർമപ്പുസ്തകമായിരുന്ന എരുമേലിയുടെ പ്രിയ കുട്ടിയമ്മ ഇനിയില്ല. 110 വയസിലെത്തിയ കനകപ്പലം നീറംപ്ലാക്കൽ (മേപ്രായിൽ) ശോശാമ്മ മാത്തൻ (കുട്ടിയമ്മ) ഇന്നലെ അന്തരിച്ചു. ഗാന്ധിജിയെയും നെഹ്‌റുവിനെയും കണ്ടത് ഉൾപ്പെടെ പഴയ കാലത്തെ ഓർമകൾ കുട്ടിയമ്മ പങ്കുവച്ചിരുന്നു. ബാല്യത്തിലാണ് ഗാന്ധിജിയെ കണ്ടത്. തിരുവല്ലയിൽ നെഹ്‌റു എത്തിയപ്പോൾ അടുത്തുനിന്ന് കണ്ടു. പോയകാലത്തിലെ ചരിത്രസംഭവങ്ങൾ വർഷവും മാസവും തീയതിയും അടക്കം കൃത്യമായി ഓർത്തുവച്ചിരുന്ന കുട്ടിയമ്മയുടെ ഓർമശക്തി അപാരമായിരുന്നു. എരുമേലി പഞ്ചായത്തിലെ ഏറ്റവും മുതിർന്ന വോട്ടറായിരുന്നു കുട്ടിയമ്മ. 1916 ഒക്ടോബർ ആറിനായിരുന്നു ജനനം. 13 വയസുള്ളപ്പോഴായിരുന്നു വിവാഹം. എട്ടു മക്കളിൽ നാലു പേർ മരണപ്പെട്ടു. ഭർത്താവ് ചാക്കോ മാത്തൻ 29 വർഷം മുമ്പാണ് മരണപ്പെട്ടത്. പിതാവ് മേപ്രായിൽ പാപ്പി പഴയകാലത്തെ സർക്കാർ ഫോറസ്റ്റ് കോൺട്രാക്ടറായിരുന്നു. മേഖലയിലെ ആദ്യ സ്കൂളായ കനകപ്പലത്തെ എൻഎം എൽപി സ്കൂളിലെ ആദ്യ വിദ്യാർഥികളിൽ ഒരാളായിരുന്നു കുട്ടിയമ്മ. നാലാം ക്ലാസ് വരെയാണ് പഠിച്ചതെങ്കിലും ഇംഗ്ലീഷിൽ എഴുതാനും വായിക്കാനും വശമാക്കിയിരുന്നു. പ്രായം 24 ആയപ്പോഴായിരുന്നു ആദ്യ വോട്ട്. അന്ന് 1952ലെ പാർലമെന്‍റ് തെരഞ്ഞെടുപ്പിൽ മൂവാറ്റുപുഴ മണ്ഡലം കോൺഗ്രസ്‌ സ്ഥാനാർഥി ജോർജ് തോമസ് കൊട്ടുകാപ്പള്ളിക്ക് തന്‍റെ ആദ്യ വോട്ട് ചെയ്തത് കാള ചിഹ്നത്തിൽ ആയിരുന്നെന്ന് കുട്ടിയമ്മ പറഞ്ഞിട്ടുണ്ട്. ആ വോട്ടുചരിത്രം കുട്ടിയമ്മ പങ്കുവച്ചത് പുതിയ തലമുറയ്ക്ക് അറിയാത്ത ശ്രദ്ധേയമായ വസ്തുതകൂടി പങ്കുവച്ചാണ്. അന്ന് ബൂത്തുകളിൽ ഓരോ സ്ഥാനാർഥിക്കും ഓരോ നിറത്തിലുള്ള പെട്ടിയാണ് ഉണ്ടാവുകയെന്നും അതിലാണ് വോട്ട് ചെയ്ത് ഇടേണ്ടതെന്നും ഈ പെട്ടികൾ ഒന്നിച്ചു കൊണ്ടുവന്ന് ഓരോ സ്ഥാനാർഥിയുടെയും വെവ്വേറെ തുറന്ന് എണ്ണിയാണ് വിജയിയെ പ്രഖ്യാപിച്ചിരുന്നതെന്നും പഴയ കാലം വീണ്ടെടുത്ത് കുട്ടിയമ്മ പങ്കുവച്ചിരുന്നു. 2015 ൽ പെട്ടെന്നുണ്ടായ അസുഖംമൂലം കിടപ്പിലായതിനാൽ അന്നത്തെ പഞ്ചായത്ത്‌ തെരഞ്ഞെടുപ്പിൽ വോട്ട് ചെയ്യാൻ കഴിഞ്ഞില്ലെന്നത് ഒഴിച്ചാൽ എല്ലാ തെരഞ്ഞെടുപ്പിലും കുട്ടിയമ്മ വോട്ട് ചെയ്തിരുന്നു. കുട്ടിയമ്മയുടെ സഹോദരൻ പി.ജി. മത്തായി രണ്ടു തവണ ജയിച്ച് പഞ്ചായത്ത്‌ പ്രസിഡന്‍റായിരുന്നു. മകൻ ജോയി മേപ്രായിൽ മുൻ പഞ്ചായത്ത്‌ വൈസ് പ്രസിഡന്‍റാണ്.

ജില്ലയിൽ 54 പുതിയ ബസ് സര്‍വീസുകള്‍ ആരംഭിക്കാന്‍ ഗതാഗത വകുപ്പ്

കോട്ടയം: മലയോര മേഖലയിലടക്കം ജില്ലയില്‍ പുതിയ ബസ് സര്‍വീസുകള്‍ ആരംഭിക്കാന്‍ ഗതാഗത വകുപ്പ്. ജില്ലയിലെ ഒമ്പത് നിയോജകമണ്ഡലങ്ങളിലും ഗതാഗത വകുപ്പ് നടത്തിയ ജനകീയ സദസുകളില്‍നിന്നു ലഭിച്ച നിര്‍ദേശങ്ങളില്‍നിന്നാണ് 54 റൂട്ടുകളില്‍ ബസ് സര്‍വീസുകള്‍ ആരംഭിക്കാന്‍ തീരുമാനിച്ചത്. ഒരു റൂട്ടില്‍ രണ്ടുമുതല്‍ മൂന്നു ബസുകള്‍ക്കുവരെ അനുമതി ലഭിച്ചേക്കും. ഈ റൂട്ടുകളില്‍ ഭൂരിഭാഗം റൂട്ടുകളിലും നിലവില്‍ കെഎസ്ആര്‍ടിസിയോ സ്വകാര്യ ബസുകളോ സര്‍വീസ് നടത്തുന്നില്ല. ഒമ്പതു നിയോജക മണ്ഡലങ്ങളില്‍ നടത്തിയ ജനകീയ സദസില് 300 അപേക്ഷകളാണ് ലഭിച്ചത്. ലഭിച്ച അപേക്ഷയുടെ അടിസ്ഥാനത്തില്‍ മോട്ടോര്‍ വാഹനവകുപ്പ് ഉദ്യോഗസ്ഥര്‍ ജനപ്രതിനിധികളുമായി ചര്‍ച്ച നടത്തിയാണ് 54 റൂട്ടുകള്‍ തെരഞ്ഞെടുത്തിരിക്കുന്നത്. മലയോര മേഖലയില്‍ പല റൂട്ടുകളിലും ബസ് സര്‍വീസുകളില്ല, അതേപോലെ പുതിയതായി തുറന്ന റോഡുകളിലും സര്‍വീസുകള്‍ ഇല്ല. സ്‌കൂള്‍ കുട്ടികള്‍ അടക്കമുള്ളവര്‍ ഇതുമൂലം ദുരിതത്തിലാണ്. റൂട്ടുകളുടെ പേരുകള്‍ ഒരാഴ്ചയ്ക്കകം വിജ്ഞാപനത്തിലൂടെ പുറത്തിറക്കും. തുടര്‍ന്ന് റൂട്ടുകള്‍ ലേലം വയ്ക്കാനാണ് തീരുമാനം. കോവിഡ് കാലത്താണ് ജില്ലയില്‍ സ്വകാര്യ ബസ് സര്‍വീസുകള്‍ കൂടുതലും നിലച്ചുപോയത്. ലാഭകരമല്ലാത്ത റൂട്ടിലെ കെഎസ്ആര്‍ടിസി ബസുകളും പിന്‍വലിച്ചതോടെ പല ഗ്രാമങ്ങളും യാത്രാ സൗകര്യമില്ലാതെ ഒറ്റപ്പെട്ടുപോയിരുന്നു. കോവിഡിനു ശേഷം എല്ലാ രംഗവും സജീവമായെങ്കിലും നിര്‍ത്തിയ ബസ് സര്‍വീസുകള്‍ പലതും തുടങ്ങിയില്ല. ഇതോടെ പല മേഖലകളിലും യാത്രാക്ലേശം രൂക്ഷമാണ്. കെഎസ്ആര്‍ടിസി ഗ്രാമവണ്ടി എന്ന പേരില്‍ സര്‍വീസ് ആരംഭിച്ചെങ്കിലും പല പഞ്ചായത്തുകളും ഇതിനോട് വിമുഖത കാട്ടി. മീനച്ചില്‍ പഞ്ചായത്തിന്‍റെയും കടുത്തുരുത്തി, വൈക്കം ബ്ലോക്ക് പഞ്ചായത്തുകളുടെയും ഗ്രാമവണ്ടികള്‍ മാത്രമാണ് ഇപ്പോഴുമുള്ളത്. ഗതാഗത വകുപ്പ് നടത്തിയ അദാലത്തില്‍ ത്രിതല പഞ്ചായത്ത് പ്രതിനിധികളും എംഎല്‍എമാരും തങ്ങളുടെ പ്രദേശത്തെ യാത്രാക്ലേശം രൂക്ഷമായ റൂട്ടുകളില്‍ ബസ് സര്‍വീസിന് അനുമതി ആവശ്യപ്പെട്ട് മോട്ടോര്‍ വാഹന വകുപ്പിന് നിവേദനമായി സമര്‍പ്പിക്കുകയായിരുന്നു. പുതിയ സര്‍വീസുകള്‍ ഏറ്റെടുക്കാന്‍ സ്വകാര്യ ബസുകളും കെഎസ്ആര്‍ടിസിയും തയാറായാല്‍ ഗ്രാമീണ മേഖലയിലെ യാത്രാക്ലേശത്തിനു പരിഹാരമാകും.

കാഞ്ഞിരപ്പള്ളിയുടെ മലയോരങ്ങളില്‍ കാലാവസ്ഥാ നിരീക്ഷണ സംവിധാനം

കോട്ടയം: കൂട്ടിക്കല്‍ ഉരുള്‍പൊട്ടലിന്‍റെ പശ്ചാത്തലത്തില്‍ കാഞ്ഞിരപ്പള്ളി ബ്ലോക്ക് പരിധിയില്‍ കാലാവസ്ഥാ മുന്നറിയിപ്പ് കൃത്യമായി നല്‍കാന്‍ സംവിധാനം. വയനാട് ജില്ലയിലെ കല്‍പ്പറ്റ ആസ്ഥാനമായ ഹ്യൂം സെന്‍റര്‍ ഫോര്‍ ഇക്കോളജിയുടെ സാങ്കേതിക സഹായത്തിലാണ് ജനകീയ സഹകരണത്തോടെ കാഞ്ഞിരപ്പള്ളി ബ്ലോക്ക് പരിധിയില്‍ സുരക്ഷാ സംവിധാനം. കൂട്ടിക്കല്‍, മുണ്ടക്കയം, കണമല, ഇളങ്കാട്, ഏന്തയാര്‍, കോരുത്തോട് എന്നിവിടങ്ങളില്‍ മൂന്നുമുതല്‍ അഞ്ചുവരെ കിലോമീറ്റര്‍ ഇടവിട്ട് മഴമാപിനികള്‍ വയ്ക്കും. ഓരോ ദിവസത്തെയും മഴ, കാറ്റിന്‍റെ വേഗം, അന്തരീക്ഷ ഈര്‍പ്പം, മണ്ണിലെ നനവ്, താപനില തുടങ്ങിയവ ശേഖരിക്കാന്‍ ജനങ്ങളുടെ സഹകരണം തേടും. ഇതുകൂടാതെ കാലാവസ്ഥാ നിരീക്ഷണ കേന്ദ്രം റഡാറില്‍ എടുക്കുന്ന ചിത്രങ്ങളും വിലയിരുത്തും. ഓരോ പ്രദേശത്തെയും മഴമേഘങ്ങളെ ശാസ്ത്രീയമായി അപഗ്രഥിക്കും. മേഘവിസ്‌ഫോടനം ഉള്‍പ്പെടെ ചെറിയൊരു പ്രദേശത്ത് പെരുമഴയും മലയിടിച്ചിലും വെള്ളപ്പൊക്കവും സംഭവിക്കാനുള്ള സാധ്യത ദുരന്തനിവാരണ വിഭാഗത്തെ അറിയിക്കും. ജനങ്ങള്‍ക്ക് മുന്‍കൂര്‍ അറിയിപ്പ് നല്‍കാനും സുരക്ഷിത സ്ഥലത്തേക്ക് മാറ്റാനും ഇത്തരത്തില്‍ സാധിക്കും. മുണ്ടക്കയം, പെരുവന്താനം, കൂട്ടിക്കല്‍, എരുമേലി പഞ്ചായത്ത് പരിധിയില്‍ കൂട്ടിക്കലിനു സമാനമായ ദുരന്തങ്ങള്‍ക്കും ഉരുള്‍പൊട്ടലിനും സാധ്യതയേറെയാണ്. ഈ സാഹചര്യത്തിലാണ് മണിമല, പമ്പ, അഴുത, പുല്ലകയാര്‍ നദീതീരങ്ങളോടു ചേര്‍ന്ന മലയോരങ്ങളില്‍ സംഭവിക്കാവുന്ന പ്രകൃതി ദുരന്തങ്ങളില്‍ ജാഗ്രത നല്‍കാന്‍ നീക്കം. നിലവില്‍ കേരളത്തില്‍തന്നെ ഏറ്റവുമധികം മഴലഭ്യതയുള്ള പ്രദേശങ്ങളുടെ പട്ടികയിലാണ് കാഞ്ഞിരപ്പള്ളി താലൂക്ക്. കുസാറ്റ്, ഐഎസ്ആര്‍ഒ ഉള്‍പ്പെടെ വിവിധ സ്ഥാപനങ്ങളുടെ സഹകരണത്തോടെ കാലാവസ്ഥാ നിരീക്ഷണ കേന്ദ്രങ്ങളും വിവിധയിടങ്ങളില്‍ സ്ഥാപിക്കുന്നുണ്ട്. 2021 ഒക്ടോബര്‍ 16ന് കൂട്ടിക്കല്‍, പ്ലാപ്പള്ളി, കാവാലി, കൊക്കയാര്‍ പ്രദേശങ്ങളിലുണ്ടായ അതിവര്‍ഷത്തില്‍ ആറിടത്ത് ഉരുള്‍പൊട്ടി വന്‍നാശനഷ്ടങ്ങളുണ്ടായി. 21 പേര്‍ക്ക് ജീവന്‍ നഷ്ടമായി. വലുതും ചെറുതുമായ 44 പാലങ്ങള്‍ തകര്‍ന്നു. ആറ് റോഡുകള്‍ ഒലിച്ചുപോയി. ഇരുന്നൂറിലേറെ പേര്‍ക്ക് വീടുകള്‍ നഷ്ടമായി. കടകളില്‍ വെള്ളം കയറി വ്യാപാരികള്‍ക്ക് കോടികളുടെ നഷ്ടമുണ്ടായി.

സ്‌കൂള്‍ മെനു കെങ്കേമമാക്കി സർക്കാർ ; ഫണ്ടിന്‍റെ കാര്യത്തിൽ മിണ്ടാട്ടമില്ല

കോട്ടയം: സര്‍ക്കാര്‍ അഞ്ചു പൈസ അധികം കൊടുക്കില്ല. എന്നാല്‍ സ്‌കൂളില്‍ കുട്ടികള്‍ക്ക് പോഷകസദ്യ കൊടുക്കുകയും വേണം. ഉച്ചഭക്ഷണ പദ്ധതിയില്‍ പുതുക്കിയ മെനു പുറത്തിറക്കി വിദ്യാഭ്യാസ മന്ത്രി കൈയടി വാങ്ങിയപ്പോള്‍ പെട്ടുപോയത് പ്രധാനാധ്യാപകരാണ്. അധികച്ചെലവ് അധ്യാപകര്‍ കണ്ടെത്തണമെന്ന് മന്ത്രി കഴിഞ്ഞ ദിവസം ആവര്‍ത്തിക്കുകകൂടി ചെയ്തതോടെ അധ്യാപക സംഘടനകള്‍ പരസ്യപ്രതിഷേധത്തിലേക്ക് കടന്നിരിക്കുന്നു. ഉപ്പിനും കറിവേപ്പിലയ്ക്കുംവരെ വില കൂടിയിരിക്കെ സര്‍ക്കാര്‍ വിഹിതം കൂട്ടാതെ സ്‌കൂള്‍ മെനു പരിഷ്‌കരണം നടപ്പാകില്ല. എല്‍പി സ്‌കൂളില്‍ ഒരു കുട്ടിക്ക് 6.78 രൂപയും യുപി ക്ലാസില്‍ 10.17 രൂപയുമാണ് സര്‍ക്കാര്‍ നല്‍കുന്നത്. സപ്ലൈകോയിലൂടെ അരി വെറുതെ കൊടുത്താലും കാര്യമില്ല. അരിയുടെ അഞ്ചിരട്ടി ചെലവാണ് പച്ചക്കറിക്കും പലവ്യഞ്ജനത്തിനും എണ്ണയ്ക്കും പാചകവാതകത്തിനും വരുന്നത്. ഒരു കുട്ടിക്ക് മിനിമം 30 രൂപ കൊടുക്കാതെ പുതിയ മെനു നടപ്പാകില്ല. പാചകക്കാരുടെ വേതനത്തിലും വര്‍ധനവുണ്ടാകണം. പാചകവാതകം, വാഹനച്ചെലവ്, പച്ചക്കറി, പലവ്യഞ്ജനം എന്നിവയ്ക്ക് നിലവിലെ തുക അപര്യാപ്തമാണെന്നറിയാതെയാണ് വിദ്യാഭ്യാസ മന്ത്രി ചെറുധാന്യങ്ങളും വന്‍ധാന്യങ്ങളും ഫ്രൈഡ് റൈസുമൊക്കെ ചേര്‍ന്ന സദ്യവട്ടം നിര്‍ദേശിക്കുന്നത്. ഒരു കിലോ ഫ്രൈഡ് റൈസ് അരിക്ക് 120 രൂപ മാര്‍ക്കറ്റ് വിലയുണ്ട്. പരിപ്പിനും പയറിനുമൊക്കെ വില നൂറിനു മുകളിലാണ്. ഇപ്പോഴും 500 കുട്ടികള്‍ക്ക് ഒരു പാചകക്കാരി മാത്രമേയുള്ളൂ. കുട്ടികള്‍ കൂടുതലുള്ള സ്‌കൂളുകളില്‍ അധ്യാപകരുടെ ചെലവില്‍ സഹായിയെകൂടി നിയമിച്ചാണ് ചോറും കറിയും വയ്ക്കുന്നത്. പുതിന, ഇഞ്ചി, നെല്ലിക്ക, പച്ചമാങ്ങ എന്നിവ ചേര്‍ത്തുള്ള ചമ്മന്തിവരെയാണ് മന്ത്രിയുടെ മനസിലുള്ളത്. ഇവ വെജ് റൈസ്, ബിരിയാണി, ലെമണ്‍ റൈസ് എന്നിവയുടെ കൂടെ തൊടുകറിയായി കൊടുക്കണം. ആഴ്ചയില്‍ റാഗി ഉപയോഗിച്ചു റാഗി ബാള്‍സ്, ശര്‍ക്കരയും തേങ്ങയും ചേര്‍ത്ത റാഗി കൊഴുക്കട്ട, ഇലയട, അവില്‍ കുതിര്‍ത്തത്, പാല്‍ ഉപയോഗിച്ച് കാരറ്റ് പായസം, റാഗിയോ മറ്റ് മില്ലറ്റുകളോ ഉപയോഗിച്ചുള്ള പായസം എന്നീ വിഭവങ്ങള്‍ മെനുവില്‍ ഉള്‍പ്പെടുത്തിയിട്ടുണ്ട്. ഒരു ലിറ്റര്‍ പാലിന് 55 രൂപയും ഒരു കിലോ തേങ്ങയ്ക്ക് 90 രൂപയും ശര്‍ക്കരയ്ക്ക് 60 രൂപയുമൊക്കെയാണ് നിരക്ക്. ചില സീസണില്‍ കാരറ്റ് വില നൂറിനു മുകളിലെത്താറണ്ട്. ഒരു കിലോ വെളിച്ചെണ്ണയ്ക്ക് വില 400 കടന്നു. ചെറുധാന്യങ്ങള്‍ക്കെല്ലാം 200 രൂപയ്ക്ക് മുകളിലാണ് വില. കഞ്ഞിയിലും ചെറുപയറിലുമായിരുന്നു സ്‌കൂള്‍ ഉച്ചഭക്ഷണത്തിന്‍റെ തുടക്കം. പിന്നീട് ചോറും കറിയുമായി. ചോറും കറിയും മാത്രം വയ്ക്കാന്‍ അറിയാവുന്ന സാധാരണക്കാരും വയോധികരുമായ പാചകക്കാരികള്‍ക്ക് വിദ്യാഭ്യാസമന്ത്രി പറയുന്ന ഒരു വിഭവവും തയാറാക്കാന്‍ വൈദഗ്ധ്യമില്ല. ഇവരാരുംതന്നെ ഹോം സയന്‍സ് പഠിച്ചവരുമല്ല. സ്റ്റാര്‍ ഹോട്ടലുകളിലെ മോഡേണ്‍ കിച്ചനില്‍ ഷെഫുമാര്‍ക്കുപോലും വശമില്ലാത്ത ഡിഷുകള്‍ സ്‌കൂളിലെ കഞ്ഞിപ്പുരയില്‍ തയാറാക്കാന്‍ പാചക പുസ്തകമോ യൂ ട്യൂബ് വീഡിയോയോ സര്‍ക്കാര്‍ പുറത്തിറക്കണമെന്ന് ചില അധ്യാപക സംഘടനകള്‍ ആവശ്യപ്പെട്ടു.

പഴയിടം കോസ്‌വേയിലെ മാലിന്യം ആറ്റിലൂടെ ഒഴുക്കിവിട്ടു

പഴയിടം: മണിമലയാറ്റിലെ പഴയിടം കോസ്‌വേയിൽ ഒഴുകിയെത്തി അടിഞ്ഞ മാലിന്യം മണ്ണുമാന്തി യന്ത്രമുപയോഗിച്ച് മണിമലയാറ്റിലൂടെ ഒഴുക്കിവിട്ടു. ഉയരം കുറഞ്ഞ പാലമായതിനാൽ തൂണുകളിൽ മരക്കഷണങ്ങളും ചപ്പുചവറുകളും തങ്ങിനിന്നിരുന്നു. കഴിഞ്ഞ ദിവസം പൊതുമരാമത്തുവകുപ്പ് അധികാരികൾ നിയോഗിച്ചവരാണ് മാലിന്യം നീക്കിയത്. എല്ലാ മഴക്കാലത്തും അടിയുന്ന പ്ലാസ്റ്റിക് ഉൾപ്പെടെയുള്ള ടൺകണക്കിന് മാലിന്യം ഇതേപോലെ നീക്കുകയാണ് പതിവ്. മാലിന്യം കരയ്ക്കെടുത്ത് സംസ്‌കരിക്കാൻ സംവിധാനമില്ലാത്തതിനാൽ കരാറെടുക്കുന്നവർ അവയത്രയും മണിമലയാറ്റിലൂടെ തന്നെ ഒഴുക്കിവിടുകയാണ്. കടകളിൽനിന്നും വീടുകളിൽനിന്നും ആറ്റുപുറമ്പോക്കിൽ ഉപേക്ഷിക്കുന്ന പാഴ്‌വസ്തുക്കളും കാറ്റിൽ ഒടിഞ്ഞുവീഴുന്ന മരച്ചില്ലകളും മരങ്ങളും ഒഴുകിയെത്തി പാലത്തിൽ ഇടിച്ചുനിന്ന് ബലക്ഷയമുണ്ടാകാതിരിക്കാനാണ് ഇവ നീക്കിയത്. മരങ്ങളും ചില്ലകളും തങ്ങിനിന്ന് വെള്ളമൊഴുക്ക് പാലത്തിന് മുകളിലൂടെയായി കൈവരി പലവട്ടം തകർന്നിട്ടുണ്ട്. മാലിന്യം ആറ്റിലൂടെ ഒഴുക്കിവിടാതെ സംസ്‌കരിക്കാൻ നടപടിയുണ്ടാവണമെന്ന് കാലങ്ങളായി ആവശ്യമുയർന്നെങ്കിലും ഇതുവരെയായിട്ടും ഒരു നടപടിയും സ്വീകരിച്ചിട്ടില്ല.

ബസിൽ യാത്രക്കാരിക്ക് ദേഹാസ്വാസ്ഥ്യം; രക്ഷകരായി യാത്രക്കാരായ ആരോഗ്യവകുപ്പ് ജീവനക്കാർ

പെരുവന്താനം: ബസ് യാത്രയ്ക്കിടെ ദേഹാസ്വാസ്ഥ്യം അനുഭവപ്പെട്ട സഹയാത്രക്കാരിക്ക് രക്ഷകരായി ആരോഗ്യവകുപ്പ് ജീവനക്കാർ. നെടുങ്കണ്ടം-കോട്ടയം റൂട്ടിൽ സർവീസ് നടത്തുന്ന സെന്‍റ് ജോർജ് ബസിൽ ഇന്നലെ രാവിലെയായിരുന്നു സംഭവം. ഏലപ്പാറ സ്വദേശിനിയായ ചന്ദ്രപ്രഭ (48) മുണ്ടക്കയത്തേക്കുള്ള യാത്രയ്ക്കായാണ് ബസിൽ കയറുന്നത്. ഏലപ്പാറയിൽനിന്നു ബസിൽ യാത്ര തുടർന്ന് ഏതാനും മിനിറ്റുകൾക്ക് ശേഷം ഇവർക്ക് ശാരീരിക ബുദ്ധിമുട്ടുകൾ അനുഭവപ്പെട്ടു. മഴയുള്ളതിനാൽ ബസിന്‍റെ വശങ്ങളിലെ ഷട്ടറുകൾ അടച്ചതുകൊണ്ടുള്ള ബുദ്ധിമുട്ടാണെന്നാണ് ആദ്യം കൂടെയുള്ള യാത്രക്കാർ കരുതിയത്. കുട്ടിക്കാനത്ത് എത്തിയപ്പോഴേക്കും ചന്ദ്രപ്രഭയുടെ ആരോഗ്യനില വഷളായി ബോധരഹിതയായി. ഉടൻ തന്നെ ബസിൽ യാത്ര ചെയ്യുകയായിരുന്ന പെരുവന്താനം, കൊക്കയാർ പ്രാഥമിക ആരോഗ്യ കേന്ദ്രങ്ങളിലെ എംഎൽഎസ്പി ജീവനക്കാരായ ട്രീസ ഡൊമിനിക്, അനു ബേബി, നിമിഷ ഷെവിൻ, ശുഭ എന്നിവർ ചേർന്ന് രോഗിക്ക് പ്രാഥമികശുശ്രൂഷ നൽകി. തങ്ങളുടെ കൈയിലെ മെഡിക്കൽ ഉപകരണങ്ങളുടെ സഹായത്തോടെ നടത്തിയ പരിശോധനയിൽ ചന്ദ്രപ്രഭയുടെ ബ്ലഡ് പ്രഷർ തീർത്തും താഴ്ന്ന നിലയിലാണെന്ന് മനസിലായി. ഉടൻ തന്നെ ബസ് ജീവനക്കാരോട് കാര്യങ്ങൾ പറഞ്ഞ് മനസിലാക്കി. മറ്റു സ്റ്റോപ്പുകളിലൊന്നും ബസ് നിർത്താതെ പെരുവന്താനം പ്രാഥമികാരോഗ്യ കേന്ദ്രത്തിലേക്ക് കൊണ്ടുപോകാൻ തീരുമാനിച്ചു. ഇതിനിടയിൽ പെരുവന്താനം പ്രാഥമികാരോഗ്യ കേന്ദ്രത്തിലെ ആംബുലൻസ് ഡ്രൈവർ ഹാഷിമിനെ ഫോണിൽ വിളിച്ച് പെരുവന്താനം ജഗ്ഷനിൽ ആംബുലൻസുമായി വന്നു നിൽക്കണമെന്നും അറിയിച്ചു. ആംബുലൻസിൽ കയറ്റിയ ചന്ദ്രപ്രഭയെ ഉടൻ പെരുവന്താനം പ്രാഥമികാരോഗ്യ കേന്ദ്രത്തിലെത്തിച്ചു. ഡോ. മാത്യു പി. തോമസിന്‍റെ നേതൃത്വത്തിൽ നഴ്സുമാരായ സൗമ്യമോൾ സെബാസ്റ്റ്യൻ, താഹിറ, ഗായത്രി എന്നിവർ ചികിത്സ നൽകി. പിന്നീട് വിദഗ്ധ ചികിത്സയ്ക്കായി ഇവരെ മറ്റൊരു ആശുപത്രിയിലേക്ക് മാറ്റി. ബസിലെ യാത്രക്കാരായ ആരോഗ്യവകുപ്പ് ജീവനക്കാരുടെ അവസരോചിതമായ ഇടപെടൽ ചന്ദ്രപ്രഭയ്ക്ക് പുതുജീവനാണ് നൽകിയത്.

‌എമർജൻസി റെസ്പോൺസ് ടീമംഗങ്ങൾക്ക് പരിശീലനം സംഘടിപ്പിച്ചു

വാഴൂർ: ദുരന്തനിവാരണ പദ്ധതി പ്രകാരം ബ്ലോക്ക് പഞ്ചായത്ത് പരിധിയിലെ ആറ് പഞ്ചായത്തുകളിലെയും എമർജൻസി റെസ്പോൺസ് ടീം അംഗങ്ങൾക്കുള്ള ഏകദിന പരിശീലന പരിപാടി സംഘടിപ്പിച്ചു. അപകടത്തിൽ പരിക്കേൽക്കുന്നവർക്കും വിഷബാധയേൽക്കുന്നവർക്കും പ്രാഥമിക ശുശ്രൂഷ നൽകുന്നത് എങ്ങനെയെന്നും വെള്ളപ്പൊക്കവും അഗ്നിബാധയും ഉണ്ടാകുമ്പോൾ അവലംബിക്കേണ്ട രക്ഷാമാർഗങ്ങളെക്കുറിച്ചുമാണ് ക്ലാസുകൾ സംഘടിപ്പിച്ചത്. ബ്ലോക്ക് പഞ്ചായത്ത് പ്രസിഡന്‍റ് മുകഷ് കെ. മണി പരിശീലനപരിപാടി ഉദ്ഘാടനം ചെയ്തു. വികസനകാര്യ സ്ഥിരം സമിതി അധ്യക്ഷൻ ഷാജി പാമ്പൂരി അധ്യക്ഷത വഹിച്ചു. ബ്ലോക്ക് പഞ്ചായത്തംഗങ്ങളായ പി.എം. ജോൺ, ബി. രവീന്ദ്രൻ നായർ, ജോയിന്‍റ് ബിഡിഒ കെ. സിയാദ് എന്നിവർ പ്രസംഗിച്ചു. പാമ്പാടി ഫയർ ഫോഴ്സിലെ സീനിയർ ഫയർ ഓഫീസർ ടി. അഭിലാഷ്, ഇടയിരിക്കപ്പുഴ പബ്ലിക് ഹെൽത്ത് ലാബിലെ എപ്പിഡർമോളജിസ്റ്റ് സിൻസി മെറിൻ വർഗീസ് എന്നിവർ ക്ലാസുകൾ നയിച്ചു.

പുഴുവരിച്ച നിലയിൽ കണ്ടെത്തിയ മുൻ സൈനികൻ മരിച്ചു

വാഴൂർ: താമസസ്ഥലത്ത് പുഴുവരിച്ച നിലയിൽ കണ്ടെത്തിയ മുൻ സൈനികൻ മരിച്ചു. കൊടുങ്ങൂർ കവലയ്ക്ക് സമീപത്തെ കെട്ടിടത്തിൽ അവശനിലയിൽ കണ്ടെത്തിയ വൈരമല സാബു (60) ആണ് മരിച്ചത്. വർഷങ്ങളായി കൊടുങ്ങൂരിൽ ഒറ്റയ്ക്ക് കഴിഞ്ഞിരുന്ന സാബുവിനെ ഞായറാഴ്ച രാത്രിയിലാണ് പുഴുവരിച്ച് അവശനിലയിൽ കണ്ടെത്തിയത്. പഞ്ചായത്തംഗം എസ്. അജിത്ത്കുമാറിന്‍റെ നേതൃത്വത്തിൽ ആംബുലൻസ് എത്തിച്ച് സാബുവിനെ കോട്ടയം മെഡിക്കൽ കോളജിൽ പ്രവേശിപ്പിക്കുകയായിരുന്നു. ചികിത്സയിലിരിക്കേ ഇന്നലെ പുലർച്ചെ 1.30ഓടെ മരിച്ചു. ദിവസങ്ങളായി അസുഖം മൂലം കിടപ്പിലായിരുന്നു സാബു. ശരീരത്തെ മുറിവുകൾ പഴുത്ത് പുഴുവരിച്ചു കിടന്നത് ദുർദന്ധം വമിച്ചതോടയാണ് നാട്ടുകാർ അറിഞ്ഞത്. മൃതദേഹം പോസ്റ്റുമോർട്ടത്തിനു ശേഷം മുട്ടമ്പലം ശ്മശാനത്തിൽ സംസ്‌കരിച്ചു.

പൂവഞ്ചിയിൽ പാറമടലോബി വീണ്ടും സജീവമാകുന്നു

കൊക്കയാർ: ഉരുൾപൊട്ടലിൽ നിരവധി ജീവനുകൾ പൊലിഞ്ഞ കൊക്കയാർ പഞ്ചായത്തിലെ പൂവഞ്ചിയിൽ പാറമടലോബി വീണ്ടും സജീവമാകുന്നു. 2021 ഒക്ടോബർ 16നുണ്ടായ പ്രകൃതിദുരന്തത്തിൽ മാക്കോച്ചിയിലുണ്ടായ ഉരുൾപൊട്ടലിൽ പിഞ്ചുകുട്ടിയടക്കം എട്ടുപേര്‍ മരിച്ചിരുന്നു. ഇതേത്തുടർന്ന് പൂവഞ്ചിയിൽ പ്രവർത്തിക്കുന്ന പാറമടകൾക്കെതിരേ വ്യാപക ആക്ഷേപം ഉയർന്നിരുന്നു. അന്നത്തെ ഉരുൾപൊട്ടലിനെത്തുടർന്ന് നിരവധി വീടുകള്‍ അപകടഭീഷണിയായി ഇപ്പോഴും നിലനില്‍ക്കുകയാണ്. ഇതിനിടയിലാണ് വീണ്ടും പൂവഞ്ചിയില്‍ സ്വകാര്യ വ്യക്തിയുടെ പുരയിടത്തിൽ പാറമട പ്രവർത്തനമാരംഭിക്കാൻ നീക്കം നടക്കുന്നത്. പാറമട അനുവദിക്കണമെന്നാവശ്യപ്പെട്ടുള്ള അപേക്ഷ സംബന്ധിച്ച് കളക്ടര്‍ റിപ്പോര്‍ട്ട് ആവശ്യപ്പെട്ടതായും അറിയുന്നു. ഇതിനായി കഴിഞ്ഞ ദിവസം പോലീസ് അന്വേഷണം നടത്തി പരിസരവാസികളില്‍നിന്ന് അഭിപ്രായങ്ങള്‍ തേടിയിട്ടുണ്ട്. മേഖലയില്‍ നിലവില്‍ രണ്ട് പാറമടകള്‍ക്ക് അനുമതിയുണ്ടങ്കിലും പ്രവർത്തനം നിര്‍ത്തിവച്ചിരിക്കുകയാണ്. ഇതില്‍ ഒരു പാറമട അധികാരികളുടെ മൗനാനുവാദത്തില്‍ പ്രവര്‍ത്തിക്കുന്നതായും പറയപ്പെടുന്നു. പ്രകൃതിലോല പ്രദേശ പട്ടികയിലുള്ള ഇവിടത്തെ പാറമടകള്‍ നാടിനെ ദോഷകരമായി ബാധിച്ചിരുന്നു. ഇതിനിടയിലാണ് അനധികൃത പാറമട പ്രവര്‍ത്തനവും പുതിയ പാറമടയുടെ അപേക്ഷയുമായി കൂടുതല്‍ പേര്‍ രംഗത്തു വന്നിരിക്കുന്നതും. ഇനിയൊരു ദുരന്തംകൂടി താങ്ങാൻ നാടിനു കഴിയില്ലെന്നും പാറമട ആരംഭിച്ചാൽ ശക്തമായ പ്രതിഷേധ പരിപാടികൾ ആരംഭിക്കുമെന്നുമാണ് പ്രദേശവാസികൾ പറയുന്നത്.

യാത്രക്കാര്‍ക്ക് നാണമുണ്ട്, കോട്ടയം നഗരസഭയ്ക്കില്ലെങ്കിലും

കോട്ടയം: ആയിരം സ്വകാര്യബസുകള്‍ ദിവസവും പാര്‍ക്ക് ചെയ്യുകയും കയറിയിറങ്ങുകയും ചെയ്യുന്ന ജില്ലയിലെ ഏറ്റവും വലിയ ബസ് സ്റ്റാന്‍ഡിലെ ശൗചാലയം അടഞ്ഞുകിടക്കാന്‍ തുടങ്ങിയിട്ട് ആഴ്ചകളായി. തിരുനക്കര ബസ്‌സ്റ്റാന്‍ഡ് കുളമായതുപോലെ നഗരസഭയുടെ അനാസ്ഥയും പിടിപ്പുകേടുംമൂലം നാഗമ്പടം ബസ് സ്റ്റാന്‍ഡും സമാനമായ സ്ഥിതിയിലാണ്. ദീര്‍ഘയാത്രയ്ക്കുശേഷം നാഗമ്പടം ബസ് സ്റ്റാന്‍ഡിലെത്തുന്ന ബസ് ജീവനക്കാര്‍ക്ക് പ്രാഥമിക ആവശ്യങ്ങള്‍ നിറവേറ്റാന്‍ ഒരിടവുമില്ല. ഇവിടെയെത്തുന്ന സ്ത്രീകള്‍ ഉള്‍പ്പെടെയുള്ള യാത്രക്കാർക്കും ഇതേ ഗതികേടുതന്നെ. യാതൊരു കാരണവും മുന്നറിയിപ്പുമില്ലാതെയാണ് നഗരസഭയുടെ ശൗചാലയം അടച്ചത്. അടിയന്തരമായി ശൗചാലയം തുറക്കണമെന്ന ബസ് ജീവനക്കാരുടെ ആവശ്യത്തിനു ചെവികൊടുക്കാന്‍ നഗരസഭയില്‍ ചുമതലപ്പെട്ട ജനപ്രതിനിധികളും ജീവനക്കാരുമില്ല. നിവൃത്തികേടുമൂലം ബസുകളുടെ മറവിലും സ്റ്റാന്‍ഡിനോടു ചേര്‍ന്ന കാനയിലുമൊക്കെ ‘കാര്യം’ സാധിക്കേണ്ട സാഹചര്യമാണ്. മഴയത്ത് ഇവ ഒഴുകി സ്റ്റാന്‍ഡിലെത്തുന്നു. സ്റ്റാന്‍ഡിലെ വെള്ളക്കെട്ടില്‍ ചവിട്ടിയാല്‍ ചൊറിച്ചില്‍ അനുഭവപ്പെടുന്നു. പലയിടങ്ങളിലും ദുര്‍ഗന്ധം വമിക്കുന്ന സ്ഥിതിയുമുണ്ട്. റെയില്‍വേ സ്റ്റേഷനിലേക്കുള്ള യാത്രക്കാര്‍ മൂക്കുപൊത്തിയാണ് ഇതുവഴി പോകുന്നത്. തിരുനക്കര ബസ് സ്റ്റാന്‍ഡില്‍ മഴക്കാലത്തുണ്ടായ വന്‍കുഴികളും വെള്ളക്കെട്ടും നികത്തണമെന്ന ആവശ്യം തുടരെ ഉയരുമ്പോഴും നഗരസഭയ്ക്ക് അനക്കമില്ല.

കരീമഠം സ്കൂളും തുറന്നു

അയ്മനം: വെള്ളപ്പൊക്കത്തെത്തുടർന്ന് തുറന്നു പ്രവർത്തിപ്പിക്കാൻ കഴിയാതിരുന്ന അയ്മനം പഞ്ചായത്തിലെ കരീമഠം വെൽഫെയർ യുപി സ്കൂളും തുറന്നു. ഇന്നലെ സ്കൂളിൽ പ്രവേശനോത്സവം നടത്തി. പഞ്ചായത്ത് വൈസ് പ്രസിഡന്‍റ് മനോജ് കരീമഠത്തിന്‍റെ അധ്യക്ഷതയിൽ പഞ്ചായത്ത് പ്രസിഡന്‍റ് വിജി രാജേഷ് പ്രവേശനോത്സവം ഉദ്ഘാടനം ചെയ്തു. പാടശേഖരത്തിന്‍റെ പുറംബണ്ടിൽ സ്ഥിതിചെയ്യുന്ന കരീമഠം ഗവൺമെന്‍റ് വെൽഫെയർ യുപി സ്കൂൾ വെള്ളപ്പൊക്കത്തെത്തുടർന്ന് തുറക്കാൻ സാധിച്ചിരുന്നില്ല. സ്കൂൾ തുറക്കാൻ കഴിയാത്തതു സംബന്ധിച്ച് സ്കൂൾ അധികൃതരും വിദ്യാർഥികളും കളക്ടറെ നേരിട്ടു കണ്ട് പരാതി നൽകിയിരുന്നു. ഇതിന്‍റെ അടിസ്ഥാനത്തിൽ കളക്ടർ പഞ്ചായത്ത്, പാടശേഖരസമിതി എന്നിവരുടെ യോഗം വിളിച്ചുചേർത്തു പ്രശ്നം പരിഹരിക്കണമെന്നാവശ്യപ്പെട്ടു. ഇതേത്തുടർന്ന് പഞ്ചായത്ത് പ്രസിഡന്‍റ് വിജി രാജേഷിന്‍റെ അധ്യക്ഷതയിൽ പാടശേഖര ഭാരവാഹികളുടെയും സ്കൂൾ, കൃഷിവകുപ്പ് അധികൃതരുടെയും സംയുക്ത യോഗം ചേർന്ന് പാടശേഖരത്തിലെ വെള്ളം വറ്റിച്ച് സ്കൂൾ തുറക്കുന്നതിനുള്ള അടിയന്തര നടപടി സ്വീകരിക്കുകയായിരുന്നു. സ്കൂൾ പ്രവേശനോത്സവത്തോടനുബന്ധിച്ച് ഡിവൈഎഫ്ഐ ജില്ലാ കമ്മിറ്റിയംഗം എം.എസ്. ദീപക്, പാക്കിൽ സമർപ്പണം ചാരിറ്റബിൾ ട്രസ്റ്റ് ഡയറക്ടർ സൽക്കലാ വാസുദേവ് എന്നിവരുടെ നേതൃത്വത്തിൽ കുട്ടികൾക്കു പഠനോപകരണങ്ങൾ വിതരണം ചെയ്തു. ഡോ. സ്വാമി, സൽകല വാസുദേവ്, എം.എസ്. ദീപക്, വി.എം. സാബു, ശില്പ മനോജ്, സി.കെ. സിന്ധു, പിടിഎ പ്രസിഡന്‍റ് മായാ മനോജ് എന്നിവർ പ്രസംഗിച്ചു.

സ്റ്റാര്‍ ജംഗ്ഷനിൽ കലുങ്ക് നിര്‍മാണം: നഗരത്തില്‍ രൂക്ഷമായ ഗതാഗതക്കുരുക്ക്

കോട്ടയം: സ്റ്റാര്‍ ജംഗ്ഷനിലെ കലുങ്ക് നിര്‍മാണം നഗരത്തില്‍ രൂക്ഷമായ ഗതാഗതക്കുരുക്കിനിടയാക്കുന്നു. കഴിഞ്ഞ ഒരാഴ്ചയായി തുടങ്ങിയ നിര്‍മാണ പ്രവര്‍ത്തനങ്ങളാണ് നഗരത്തെ കുരുക്കുന്നത്. ഇപ്പോള്‍ ഒരു സൈഡിലെ കലുങ്ക് പൂര്‍ത്തിയാക്കി മറുവശത്തെ നിര്‍മാണം തുടങ്ങിയിരിക്കുകയാണ്. രാവിലെ തുടങ്ങുന്ന കുരുക്ക് രാത്രിവരെ നീളുകയാണ്. നഗരത്തിലേക്ക് എത്തുന്ന റോഡില്‍ കിലോമീറ്ററോളം കുരുങ്ങി വാഹനങ്ങള്‍ കിടക്കുകയാണ്. ആംബുലന്‍സുകള്‍പോലും കുരുക്കില്‍പ്പെടുകയാണ്. ഗതാഗത നിയന്ത്രണമോ മുന്നറിയിപ്പോ ഇല്ലാതെയാണ് കലുങ്ക് നിര്‍മാണം ആരംഭിച്ചത്. കലുങ്ക് നിര്‍മാണം നടക്കുന്നിടത്ത് റോഡിന്‍റെ ഒരു ഭാഗത്തുകൂടി മാത്രമാണ് ഗതാഗതം. മറുഭാഗത്ത് പണി പൂര്‍ത്തിയായെങ്കിലും ഇവിടെ കോണ്‍ക്രീറ്റ് ചെയ്ത ഭാഗവും റോഡും തമ്മില്‍ ഉയരവ്യത്യാസമുണ്ട്. അതിനാല്‍ വാഹനങ്ങള്‍ ഇവിടെ സാവധാനമാണു കടന്നുപോകുന്നത്. കുരുക്ക് രൂക്ഷമായതോടെ ട്രാഫിക്‌പോലീസ് ഗതാഗതനിയന്ത്രണം ഏര്‍പ്പെടുത്തി. പ്രസ് ക്ലബിനു താഴെ ഭാഗത്തുനിന്നു സ്റ്റാര്‍ ജംഗ്ഷനിലേക്കുള്ള ആദം ടവര്‍ റോഡ് പോലീസ് ബ്ലോക്ക് ചെയ്തിരിക്കുകയാണ്. ഇതിലൂടെ വാഹനങ്ങള്‍ എത്തിയാല്‍ കുരുക്ക് കൂടുമെന്നതിനാലാണു വഴി ബ്ലോക്ക് ചെയ്തിരിക്കുന്നത്. കുരുക്ക് ഒഴിവായിപ്പോകാന്‍ •കോടിമതയില്‍നിന്ന് എംജി റോഡുവഴി വാഹനങ്ങള്‍ക്ക് കടന്നുപോകാം. • ചിങ്ങവനം, നാട്ടകം ഭാഗത്തുനിന്നു വരുന്ന വാഹനങ്ങള്‍ക്ക് സിമന്‍റ് കവലയില്‍നിന്നു തിരിഞ്ഞ് പാറേച്ചാല്‍ ബൈപാസുവഴി തിരുവാതുക്കല്‍-അറുത്തുട്ടി ജംഗ്ഷനിലെത്തി പോകാം. മെഡിക്കല്‍ കോളജിലേക്കും കുമരകം ഭാഗത്തേക്കുമുള്ള വാഹനങ്ങള്‍ക്ക് ഈ വഴി എളുപ്പമാണ്. •നാട്ടകത്തുനിന്നു കെകെ റോഡിലേക്കുള്ള ചെറുവാഹനങ്ങള്‍ക്ക് മണിപ്പുഴയില്‍നിന്ന് ഈരയില്‍ക്കടവുവഴി കഞ്ഞിക്കുഴിയിലേക്ക് പോകാം. വലിയ വാഹനങ്ങള്‍ക്ക് മണിപ്പുഴ ജംഗ്ഷനില്‍നിന്ന് കടുവാക്കുളം-കൊല്ലാടുവഴി കഞ്ഞിക്കുഴിയിലെത്താം. •കെകെ റോഡില്‍നിന്നു ചങ്ങനാശേരി ഭാഗത്തേക്കുള്ള വാഹനങ്ങള്‍ക്ക് കഞ്ഞിക്കുഴി, ദേവലോകം കടുവാക്കുളംവഴി പോകാം.

യുഡിഎഫ് ആഹ്ലാദപ്രകടനം നടത്തി

ഏറ്റുമാനൂർ: നിലമ്പൂരിൽ ഉപതെരഞ്ഞെടുപ്പിൽ വിജയിച്ച ആര്യാടൻ ഷൗക്കത്തിന് അഭിവാദ്യമർപ്പിച്ച് യുഡിഎഫ് ഏറ്റുമാനൂർ മണ്ഡലം കമ്മിറ്റിയുടെ നേതൃത്വത്തിൽ പ്രകടനം നടത്തി. തുടർന്നു നടത്തിയ സമ്മേളനം ഡിസിസി എക്സിക്യൂട്ടീവ് കമ്മിറ്റിയംഗം കെ.ജി. ഹരിദാസ് ഉദ്ഘാടനം ചെയ്തു. യുഡിഎഫ് മണ്ഡലം ചെയർമാൻ പി.വി. ജോയ് പൂവംനിൽക്കുന്നതിൽ അധ്യക്ഷത വഹിച്ചു. മുൻ നഗരസഭാ ചെയർമാൻ ജയിംസ് തോമസ് പ്ലാക്കിത്തൊട്ടി, അബ്ദുൽ സമദ്, സിബി ചിറയിൽ, ലൗലി ജോർജ്, ബിജു കുമ്പിക്കൻ, ജോൺസൺ തീയാട്ട്പറമ്പിൽ, വിഷ്ണു ചെമ്മുണ്ടവള്ളി, ശശി മുണ്ടയ്ക്കൽ, മാത്യു വാക്കത്തുമാലി തുടങ്ങിയവർ പ്രസംഗിച്ചു.

പകിടകളി മത്സരത്തിന് തുടക്കമായി

കോട്ടയം: പകിട... പകിട... ജില്ലാ ടൂറിസം പ്രമോഷന്‍ കൗണ്‍സിലും കേരള ഫുഡ്കോര്‍ട്ടും ചേര്‍ന്നു സംഘടിപ്പിക്കുന്ന പകിടകളി മത്സരത്തിനു തുടക്കമായി. കോട്ടയം കച്ചേരിക്കടവ് പഴയ ബോട്ട് ജെട്ടിയിലെ ഡിടിപിസി പാര്‍ക്കില്‍ ശനി, ഞായര്‍ ദിവസങ്ങളിലും പൊതുഅവധി ദിവസങ്ങളിലുമാണു മത്സരം. ഫൈനൽ ഓണത്തോടനുബന്ധിച്ച് നടക്കും. രാവിലെയും വൈകുന്നേരവുമായി രണ്ടു മത്സരങ്ങളാണുള്ളത്. കുറിച്ചി ഔട്ട്‌പോസ്റ്റ്, നീലംപേരൂര്‍, ചിങ്ങവനം, അതിരമ്പുഴ, പനച്ചിക്കാട്, പള്ളം, മാങ്ങാനം, കുറിച്ചി, മിത്രക്കരി, കുമരങ്കരി തുടങ്ങി ഓരോ കരകളുടെ പേരിലുള്ള ടീമുകളാണു മത്സരത്തിനായി എത്തുന്നത്. 25ലധികം ടീമുകള്‍ രജിസ്റ്റര്‍ ചെയ്തിട്ടുണ്ട്. പത്തനംതിട്ട, ആലപ്പുഴ ജില്ലകളിലെ പകിടകളി ടീമുകളും മത്സരത്തിനുണ്ട്. രണ്ടു കളിക്കാരും ഒരു പോരുവയ്പുകാരനും ഉള്‍പ്പെടെ മൂന്നുപേരാണ് ടീമിലുള്ളത്. മത്സരത്തിന്‍റെ ചൂട് അനുസരിച്ച് അരമണിക്കൂര്‍ മുതല്‍ രണ്ടുമണിക്കൂര്‍വരെ മത്സരം നീളാം.

വികസനം കൊതിച്ച് പെരുന്തുരുത്ത് ഗ്രാമം

കല്ലറ: പെരുന്തുരുത്ത് ഗ്രാമം വികസനം തേടുന്നു. അടിസ്ഥാന സൗകര്യങ്ങളുടെ അപര്യാപ്തതയില്‍ ദുരിതമനുഭവിക്കുന്ന ഗ്രാമമാണ് കല്ലറ-ഇടയാഴം റോഡിന് ഇരുവശവുമായുള്ള പെരുന്തുരുത്ത് ഗ്രാമം. കല്ലറ പഞ്ചായത്തിലെ പെരുന്തുരുത്ത് പാലത്തിനും കൊടുതുരുത്ത് പാലത്തിനും ഇടയിലുള്ള 11, 12 വാര്‍ഡുകളില്‍ ഉള്‍പ്പെടുന്നതാണ് പ്രദേശം. മണിയന്തുരുത്ത്, ഉദയംതറ, കൊടുതുരുത്ത്, ചെറുതറ എന്നിങ്ങനെ ചെറിയ പ്രദേശങ്ങള്‍ ചേര്‍ന്ന് ഈ മേഖല പെരുന്തുരുത്തെന്നാണ് അറിയപ്പെടുന്നത്. കാര്‍ഷിക മേഖലയുമായി ബന്ധപ്പെട്ട് തൊഴിലെടുക്കുന്ന അടിസ്ഥാന ജനവിഭാഗങ്ങളാണ് ഇവിടെയുള്ളവരിലധികവും. പാടശേഖരങ്ങളാണിവിടെ കൂടുതലായുള്ളത്. പുഞ്ചക്കൃഷിയാണ് പെരുന്തുരുത്തില്‍ പ്രധാനമായും നടത്തുന്നത്. 1,000 ഏക്കറോളം പ്രദേശത്താണ് കൃഷി നടക്കുന്നത്. പാടശേഖരത്തേക്കുള്ള യാത്രാസൗകര്യങ്ങളുടെ അഭാവം കര്‍ഷകരെ വലയ്ക്കുന്നു. കൊയ്ത്ത് യന്ത്രം പാടത്തേക്ക് എത്തിക്കാന്‍പോലും കര്‍ഷകര്‍ പ്രയാസപ്പെടുകയാണ്. ഫാം റോഡുകളുടെ അഭാവം കര്‍ഷകരുടെ പ്രധാന പ്രതിസന്ധിയാണ്. പല പാടശേഖരങ്ങളും പ്രധാന റോഡില്‍നിന്ന് മാറി ദൂരെയായതിനാല്‍ നെല്ല് സംഭരണ സമയത്ത് മില്ലുകാര്‍ കിഴിവിന്‍റെ പേരില്‍ ഇവിടത്തെ കര്‍ഷകരെ ചൂഷണം ചെയ്യുന്ന സാഹചര്യമാണുള്ളത്. മണിയന്തുരുത്ത്, പെരുന്തുരുത്ത് കടവ്, പറവന്തുരുത്ത് പ്രദേശങ്ങളില്‍ രാത്രികാലങ്ങളില്‍ മാലിന്യം തള്ളുന്നതാണ് പെരുന്തുരുത്തുകാര്‍ നേരിടുന്ന മറ്റൊരു വെല്ലുവിളി. ശൗചാലയ മാലിന്യമടക്കമുള്ളവയാണ് ഇവിടെ തള്ളുന്നത്. വാഹനങ്ങളില്‍ കൊണ്ടുവരുന്ന മാലിന്യം പാടശേഖരങ്ങളിലേക്ക് തള്ളിയിട്ട് പോവുകയാണ് പതിവ്. കാമറ ഇല്ലാത്ത മേഖലകളിലാണ് ഇത്തരം പ്രവൃത്തികള്‍ അധികവും ഉണ്ടാകുന്നത്. അടുത്തകാലത്തും കൊല്ലത്തെ അറവുശാലകളില്‍നിന്നുള്ള മാലിന്യം മണിയന്തുരുത്തില്‍ കൊണ്ടുവന്ന് തള്ളുന്നതിനിടെ നാട്ടുകാര്‍ ചേര്‍ന്ന് വാഹനം പിടികൂടിയ സംഭവമുണ്ടായിരുന്നു. മണിയന്തുരുത്ത്, ഉദയംതറ, ചെറുതറ എന്നിവിടങ്ങളിലുള്ള കുടുംബങ്ങള്‍ നേരിടുന്ന പ്രധാന പ്രശ്‌നം കുടിവെള്ള പ്രതിസന്ധിയാണ്. പൈപ്പു ലൈനുകളും പൈപ്പുകളുമെല്ലാം മേഖലയില്‍ എത്തിയിട്ടുണ്ടെങ്കിലും വെള്ളം വലപ്പോഴും മാത്രമേ ഇവിടെ കിട്ടുന്നുള്ളൂ. പെരുന്തുരുത്തില്‍ പലയിടത്തും ജല അഥോറിറ്റിയുടെ പൈപ്പുപൊട്ടി കുടിവെള്ളം പാഴാകുന്നുമുണ്ട്. കിണറുള്ള വീടുകളില്‍നിന്നാണ് ജനങ്ങള്‍ കുടിവെള്ളം ശേഖരിക്കുന്നത്. പാടത്തിനോടു ചേര്‍ന്നുള്ള പ്രദേശമായതിനാല്‍ കിണറുകളിലെ വെള്ളവും പലയിടത്തും ഉപയോഗശൂന്യമാണ്. വേനല്‍ക്കാലത്ത് പ്രതിസന്ധി രൂക്ഷമാവും. പെരുന്തുരുത്ത് പ്രദേശത്തിനു ചുറ്റുമുള്ള കെവി കനാല്‍, മുടക്കാലി തോട്, പറിച്ചകരി, മണിയന്തുരുത്ത് തോട് തുടങ്ങിയവ പോളയും പായലും നിറഞ്ഞു കിടക്കുകയാണ്. ചെറുവള്ളങ്ങള്‍ക്കുപോലും തോടുകളിലൂടെ കടന്നുപോകാന്‍ കഴിയാത്ത സ്ഥിതിയാണ്. പോളയും പായലും പുല്ലും നിറഞ്ഞ് നീരൊഴുക്ക് നിലച്ചിരിക്കുകയാണ്. ഉള്‍നാടന്‍ ജലഗതാഗതവും തടസപ്പെട്ടിരിക്കുകയാണ്. തോടുകള്‍ക്കു കുറുകെ പുല്ലിന് മുകളിലൂടെ നടന്നു പോകാവുന്ന നിലയാണുള്ളത്.

ചങ്ങനാശേരിയിൽ‍ തെരുവുനായ്ക്കള്‍ക്ക് ഇന്നുമുതല്‍ പ്രതിരോധ കുത്തിവയ്പ്

ചങ്ങനാശേരി: നഗരത്തില്‍ തെരുവുനായ പേവിഷബാധയേറ്റു ചത്തതായി കണ്ടെത്തിയ സാഹചര്യത്തില്‍ ഇന്നുമുതല്‍ പ്രതിരോധ കുത്തിവയ്പ് ആരംഭിക്കും. രണ്ട്, മൂന്ന്, 32, 35, 36, 37 വാര്‍ഡുകളിലെ തെരുവുനായ്ക്കള്‍ക്കാണ് കുത്തിവയ്പ് നടത്തുന്നത്. ഇന്നു രാവിലെ 6.30ന് നടപടികള്‍ ആരംഭിക്കും. ഇതിനായി രണ്ടു നായപിടിത്തക്കാരും മൃഗസംരക്ഷണ വകുപ്പില്‍നിന്നുള്ള രണ്ടു ഡോക്ടര്‍മാരും എത്തും. നായപിടിത്തക്കാര്‍ വലയില്‍ വീഴ്ത്തുന്ന നായ്ക്കളെ ഡോക്ടര്‍മാര്‍ കുത്തിവച്ച് അതേ സ്ഥലത്തു തന്നെ വിടും. ഒരു നായയെ പിടിക്കുന്നതിന് നായപിടിത്തക്കാരന് 500 രൂപ വീതവും വാഹനവും കുത്തിവയ്പിനുള്ള സിറിഞ്ച് തുടങ്ങിയ സാമഗ്രികളും നഗരസഭ നല്‍കും. പ്രതിരോധമരുന്ന് മൃഗസംരക്ഷണ വകുപ്പ് സൗജന്യമായി നല്‍കും. കഴിഞ്ഞ മാര്‍ച്ചില്‍ നഗരത്തിലെ 147 നായ്ക്കളെ പിടികൂടി നഗരസഭയുടെ നേതൃത്വത്തില്‍ പ്രതിരോധ കുത്തിവയ്പ് നടത്തിയിരുന്നു. കഴിഞ്ഞ വ്യാഴാഴ്ച വാഴപ്പള്ളി, കുറ്റിശേരിക്കടവ് ഭാഗങ്ങളില്‍ തെരുവുനായ എട്ടുപേരെ കടിച്ചിരുന്നു. നിരീക്ഷണത്തിനു വിധേയമായ ഈ തെരുവുനായ പിന്നീട് ചത്തു. സ്രവപരിശോധനയില്‍ ഈ നായയ്ക്ക് പേവിഷബാധ സ്ഥിരീകരിച്ചിരുന്നു. തെരുവുനായ ശല്യത്തിനെതിരേ തദ്ദേശ സ്ഥാപനങ്ങള്‍ കര്‍ശന നടപടികള്‍ സ്വീകരിക്കണമെന്ന ആവശ്യം ശക്തമാണ്.

നിലമ്പൂരിലെ വിജയം: ചങ്ങനാശേരിയില്‍ ആഹ്ലാദപ്രകടനം

ചങ്ങനാശേരി: നിലമ്പൂര്‍ ഉപതെരഞ്ഞെടുപ്പില്‍ വിജയിച്ച യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്തിന് അഭിവാദ്യങ്ങളര്‍പ്പിച്ചുകൊണ്ട് കോണ്‍ഗ്രസ് ചങ്ങനാശേരി ഈസ്റ്റ്, വെസ്റ്റ് ബ്ലോക്ക് കമ്മിറ്റികളുടെ സംയുക്താഭിമുഖ്യത്തില്‍ നഗരത്തില്‍ ആഹ്ലാദപ്രകടനവും സമ്മേളനവും നടത്തി. കെപിസിസി സെക്രട്ടറി പി.എസ് രഘുറാം ഉദ്ഘാടനം ചെയ്തു. ഈസ്റ്റ് ബ്ലോക്ക് പ്രസിഡന്‍റ് കെ.എ. ജോസഫ് അധ്യക്ഷത വഹിച്ചു. വെസ്റ്റ് ബ്ലോക്ക് പ്രസിഡന്‍റ് ബാബു കോയിപ്പുറം, പി.എച്ച്. നാസര്‍, ആന്‍റണി കുന്നുംപുറം, പി.എന്‍. നൗഷാദ്, ജോമി ജോസഫ്, ബാബു കുരീത്ര, തോമസ് അക്കര, സിയാദ് അബ്ദുൾ റഹ്‌മാന്‍, മോട്ടി മുല്ലശേരി, അഡ്വ. ഡെന്നീസ് ജോസഫ് എന്നിവര്‍ പ്രസംഗിച്ചു.

ചങ്ങനാശേരി എക്‌സൈസ് റേഞ്ച് ഓഫീസിന് പുതിയ കെട്ടിടം സജ്ജമാകുന്നു

ചങ്ങനാശേരി: പിഡബ്ല്യുഡി റെസ്റ്റ് ഹൗസിനോടു ചേര്‍ന്ന് പുതിയ എക്‌സൈസ് ഓഫീസ് കെട്ടിടത്തിന്‍റെ നിര്‍മാണം പുരോഗതിയില്‍. ഗ്രൗണ്ട്ഫ്‌ളോര്‍ നിര്‍മാണം പൂര്‍ത്തിയായി. 3.05 കോടി രൂപ ചെലവഴിച്ചാണ് നിര്‍മാണം. കാലപ്പഴക്കവും അടിസ്ഥാന സൗകര്യങ്ങളില്ലാത്തതിനെയും തുടര്‍ന്നാണ് പഴയ കെട്ടിടം പൊളിച്ചുമാറ്റിയത്. നിര്‍മാണം പൂര്‍ത്തിയാകുന്ന ഗ്രൗണ്ട് ഫ്‌ളോറില്‍ ഇലക്‌ട്രിക്കല്‍, പ്ലമ്പിംഗ്, ഫര്‍ണിച്ചര്‍, പെയ്ന്‍റിംഗ് ജോലികളാണ് ബാക്കിയുള്ളത്. ഈ ജോലികള്‍കൂടി പൂര്‍ത്തിയായാല്‍ വാടകക്കെട്ടിടത്തില്‍ പ്രവര്‍ത്തിക്കുന്ന എക്‌സൈസ് ഓഫീസിന്‍റെ പ്രവര്‍ത്തനം ഇങ്ങോട്ടു മാറ്റും. വിശാലമായ സൗകര്യങ്ങള്‍ 1586 ചതുരശ്രമീറ്റര്‍ വിസ്തീര്‍ണമുള്ള മൂന്നുനില കെട്ടിടമായാണ് പദ്ധതി വിഭാവനം ചെയ്തിരുന്നത്. നിര്‍മാണം പൂര്‍ത്തിയാകുന്ന ഒന്നാം നിലയില്‍ സര്‍ക്കിള്‍ ഇന്‍സ്‌പെക്ടര്‍, എക്‌സൈസ് ഇന്‍സ്‌പെക്ടര്‍, അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ എന്നിവര്‍ക്കുള്ള മുറികള്‍, ഓഫീസ് മുറി, വിവിധ ആവശ്യങ്ങള്‍ക്കെത്തുന്നവരുടെ കാത്തിരിപ്പു മുറി എന്നിങ്ങനെയുള്ള സൗകര്യങ്ങളുണ്ടാകും. ഫയലുകള്‍ സൂക്ഷിക്കാനും തൊണ്ടിമുതല്‍ സൂക്ഷിക്കാനും മുറികളും ലോക്കപ്പ്, ശുചിമുറി എന്നീ സൗകര്യങ്ങളുമുണ്ടാകും. ഉദ്യോഗസ്ഥര്‍ക്കായി വിശ്രമമുറികള്‍, കോണ്‍ഫറന്‍സ് ഹാള്‍, ശുചിമുറികള്‍ എന്നിവ ഇനി നിര്‍മിക്കുന്ന രണ്ടും മൂന്നും നിലകളില്‍ സജ്ജമാക്കും. ചങ്ങനാശേരിക്കു പുറമേ രാമങ്കരി, കവിയൂര്‍, കുറിച്ചി, മണിമല വരെ ചങ്ങനാശേരി എക്‌സൈസ് റേഞ്ച് ഓഫീസിന്‍റെ പരിധിയില്‍ ഉള്‍പ്പെടും. നിര്‍മാണത്തിലിരിക്കുന്ന കെട്ടിടത്തിനു ചുറ്റും അപകടഭീഷണിയായി നില്‍ക്കുന്ന മരങ്ങള്‍ മുറിച്ചുമാറ്റണമെന്ന ആവശ്യവും ഉയര്‍ന്നിട്ടുണ്ട്.

മുട്ടത്തുവര്‍ക്കി ലൈബ്രറിയില്‍ പ്രതിഭകൾക്ക് അനുമോദനം

ഇത്തിത്താനം: പ്രതിഭാഗ്രാമം മുട്ടത്തുവര്‍ക്കി മെമ്മോറിയല്‍ ലൈബ്രറിയില്‍ നടന്ന മെറിറ്റ് ഈവനിംഗില്‍ 2024-25 പ്രവര്‍ത്തനവര്‍ഷം അക്കാദമിക് രംഗത്ത് മികച്ച നിലവാരം പുലര്‍ത്തിയവരെ അനുമോദിച്ചു. ലൈബ്രറി പ്രസിഡന്‍റ് ഡോ.സാജു കണ്ണന്തറയുടെ അധ്യക്ഷതയില്‍ ചേര്‍ന്ന യോഗത്തില്‍ നന്മ മനോജ്, ആദിത്യന്‍ ഷൈജു, എം.ആര്‍. ജയലക്ഷ്മി, മരിയ തോമസ് എന്നിവരെ അനുമോദിച്ചു. ഗിന്നസ് വേള്‍ഡ് റിക്കാര്‍ഡ് കരസ്ഥമാക്കിയ ജയിംസ് കണ്ണന്തറയെയും അഭിനന്ദിച്ചു. ലൈബ്രറി സെക്രട്ടറി ജോര്‍ജുകുട്ടി പനച്ചിങ്കല്‍, വൈസ് പ്രസിഡന്‍റ് മനോജ് മുളപ്പഞ്ചേരില്‍, ജോയിന്‍റ് സെക്രട്ടറി എം.ജെ. വിനയചന്ദ്രന്‍, വനിതാ വേദി പ്രസിഡന്‍റ് ബീതാ ജോണ്‍സണ്‍, എക്‌സിക്യൂട്ടീവ് കമ്മിറ്റിയംഗം ജിജു കുരുവിള എന്നിവര്‍ പ്രസംഗിച്ചു.

അന്താരാഷ്‌ട്ര ഒളിമ്പിക് ദിനമാചരിച്ച് ഗുഡ് ഷെപ്പേഡ് സ്‌കൂള്‍

തെങ്ങണ: ഗുഡ് ഷെപ്പേ‍ഡ് പബ്ലിക് സ്‌കൂളും കേരള ഒളിമ്പിക് അസോസിയേഷനും ചേര്‍ന്ന് അന്താരാഷ്‌ട്ര ഒളിമ്പിക് ദിനാചരണം നടത്തി. തൃക്കൊടിത്താനം സബ് ഇന്‍സ്‌പെക്ടര്‍ ജയപ്രകാശ് ഉദ്ഘാടനം ചെയ്തു. ഇന്‍റര്‍നാഷണല്‍ നീന്തല്‍ താരമായ സുമി സിറിയക് പ്രതിജ്ഞ ചൊല്ലിക്കൊടുത്തു. കുട്ടികള്‍ക്കായി പെയിന്‍റിംഗ്, പോസ്റ്റര്‍ ഡിസൈനിംഗ്, സ്‌പോട്‌സ് ക്വിസ് തുടങ്ങി വിവിധ മത്സരങ്ങള്‍ സംഘടിപ്പിച്ചു. കോട്ടയം ജില്ലയിലെ വിവിധ സ്‌കൂളുകളില്‍നിന്നായി എത്തിച്ചേര്‍ന്ന ഇരുന്നൂറോളം വിദ്യാര്‍ഥികള്‍ മിനി മാരത്തോണില്‍ പങ്കെടുത്തു. സ്കൂള്‍ മാനേജര്‍ ജോണ്‍സണ്‍ ഏബ്രഹാം, ട്രഷറര്‍ പ്രിയ കെ. ഏബ്രഹാം, പ്രിന്‍സിപ്പല്‍ ഡോ. സുനിത സതീഷ്, വൈസ് പ്രിന്‍സിപ്പല്‍ സോണി ജോസ്, അസിസ്റ്റന്‍റ് മാനേജര്‍ തമ്പി കുര്യന്‍, ഹെഡ്മിസ്ട്രസ് ശ്യാമ സജീവ് എന്നിവര്‍ പ്രസംഗിച്ചു.

ലിറ്റില്‍ കൈറ്റ്‌സ് നോഡല്‍ ഓഫീസര്‍മാരുടെ ജില്ലാതല ശില്പശാല പൂര്‍ത്തിയായി

കോട്ടയം: ഈ അധ്യയനവര്‍ഷം പത്താം ക്ലാസിലെ മുഴുവന്‍ കുട്ടികള്‍ക്കും നിര്‍മിതബുദ്ധിയും റോബോട്ടിക്‌സും പഠിക്കാനും പ്രായോഗിക പരീക്ഷണങ്ങള്‍ നടത്താനും അവസരമൊരുക്കിയിട്ടുണ്ടെന്ന് കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) സിഇഒ കെ. അന്‍വര്‍ സാദത്ത്. കോട്ടയം എംഡി സെമിനാരി ഹയര്‍ സെക്കന്‍ഡറി സ്‌കൂളില്‍ നടന്ന ലിറ്റില്‍ കൈറ്റ്‌സ് നോഡല്‍ ഓഫീസര്‍മാര്‍ക്കുള്ള ജില്ലാതല ശില്പശാലയില്‍ മുഖ്യപ്രഭാഷണം ഓണ്‍ലൈനായി നടത്തുകയായിരുന്നു അദ്ദേഹം. ജില്ലയില്‍ പ്രവര്‍ത്തിക്കുന്ന 140 യൂണിറ്റുകളില്‍നിന്നായി 240 മാസ്റ്റര്‍, മിസ്ട്രസ്മാര്‍ പങ്കെടുത്തു. ലിറ്റില്‍ കൈറ്റ്‌സ് യൂണിറ്റുകളുടെ ഈ വര്‍ഷത്തെ പ്രവര്‍ത്തനങ്ങള്‍ക്ക് ദിശാബോധം നല്‍കുന്ന തരത്തിലുള്ള വിവിധ അവതരണങ്ങളും സെഷനുകളും ഉള്‍പ്പെട്ടതായിരുന്നു ശില്പശാല. കൈറ്റ് ജില്ലാ-കോ ഓര്‍ഡിനേറ്റര്‍ തോമസ് വര്‍ഗീസ്, ജില്ലയിലെ മാസ്റ്റര്‍ ട്രെയിനര്‍മാര്‍ തുടങ്ങിയവര്‍ വിവിധ സെഷനുകള്‍ക്ക് നേതൃത്വം നല്‍കി.

കടുത്തുരുത്തി പ്രതിഭാസംഗമവും എംഎല്‍എ എക്സലന്‍സ് അവാര്‍ഡ്ദാനവും 26ന്

കടുത്തുരുത്തി: കടുത്തുരുത്തി നിയോജകമണ്ഡലം പ്രതിഭാസംഗമവും എംഎല്‍എ എക്സലന്‍സ് അവാര്‍ഡുദാന സമ്മേളനവും 26ന് നടക്കും. മൂന്നിന് കടുത്തുരുത്തി ഗൗരീശങ്കരം ഓഡിറ്റോറിയത്തില്‍ നടക്കുന്ന പ്രതിഭാസംഗമത്തിന്‍റെ ഉദ്ഘാടനം മോന്‍സ് ജോസഫ് എംഎല്‍എ നിര്‍വഹിക്കും. ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിക്കും. കെ. ഫ്രാന്‍സിസ് ജോര്‍ജ് എംപി, ഇടുക്കി ജില്ലാ കളക്ടര്‍ വി. വിഗ്നേശ്വരി, ജില്ലാ പോലീസ് മേധാവി എ.ഷാഹുല്‍ ഹമീദ് തുടങ്ങിയവര്‍ പങ്കെടുക്കും. സിനിമാതാരങ്ങളായ ഷെയ്ന്‍ നിഗം, രമേഷ് പിഷാരടി, ദിലീഷ് പോത്തന്‍, കടുത്തുരുത്തി സെന്‍റ് മേരീസ് ഫൊറോന താഴത്തുപള്ളി വികാരി ഫാ. മാത്യു ചന്ദ്രന്‍കുന്നേല്‍, ദീപിക മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട്, മാന്നാനം കെഇ സ്‌കൂള്‍ പ്രിന്‍സിപ്പൽ ഫാ. ജയിംസ് മുല്ലശേരി സിഎംഐ എന്നിവര്‍ പ്രസംഗിക്കും. യൂണിവേഴ്സിറ്റി പരീക്ഷകളിലെ റാങ്ക് ജേതാക്കള്‍, വിവിധ മത്സര പരീക്ഷകളില്‍ ഉന്നതവിജയം കരസ്ഥമാക്കിയവര്‍, എസ്എസ്എല്‍സി, ഹയര്‍ സെക്കന്‍ഡറി പരീക്ഷകളില്‍ മികച്ച വിജയം നേടിയ വിദ്യാര്‍ഥികള്‍ എന്നിവര്‍ക്ക് എംഎല്‍എ എക്സലന്‍സ് അവാര്‍ഡ് നല്‍കി അനുമോദിക്കും. നൂറ് ശതമാനം വിജയം നേടിയ വിദ്യാര്‍ഥികള്‍ക്ക് പ്രത്യേക പുരസ്‌കാരം സമ്മാനിക്കും. 1500 ലധികം പേരെ യോഗത്തില്‍ ആദരിക്കും. പാലാ ബ്രില്യന്‍റ് ഡയറക്ടര്‍ ജോര്‍ജ് തോമസ്, സിനിമാ നിര്‍മാതാക്കളായ ലിസ്റ്റിന്‍ സ്റ്റീഫന്‍, സന്തോഷ് ടി. കുരുവിള, യുവസംവിധായകന്‍ ബിന്‍റോ സ്റ്റീഫന്‍, ഹോളിവുഡ് നടന്‍ സിറിയക് ആലഞ്ചേരി, ഏഷ്യാനെറ്റ് ബിഗ്ബോസ് ഫെയിം അര്‍ജുന്‍ ശ്യാം ഗോപന്‍, മിസ് ക്വീന്‍ ഓഫ് ഇന്ത്യ 2024 ഹര്‍ഷ ശ്രീകാന്ത്, ജീവകാരുണ്യ പ്രവര്‍ത്തനത്തിന് നേതൃത്വം നല്‍കുന്ന ഷിജി അന്ന ജോസഫ്, പിന്നണി ഗായിക മരിയ മാത്യു കോലടി എന്നിവര്‍ക്ക് പ്രതിഭാപുരസ്‌കാരം സമ്മാനിക്കും. കടുത്തുരുത്തിയില്‍ മാംഗോ മെഡോസ് അഗ്രികള്‍ച്ചറല്‍ തീം പാര്‍ക്ക് സ്ഥാപിച്ച എന്‍.കെ. കുര്യന്‍, 120 തവണ രക്തദാനം നല്‍കി മാതൃക കാണിച്ച ഷിബു തെക്കേമറ്റം, ദേശീയ-സംസ്ഥാന ക്ഷീരകര്‍ഷക അവാര്‍ഡ് ജേതാവ് വിധു രാജീവ്, അസിസ്റ്റന്‍റ് എക്സൈസ് കമ്മീഷണറായി നിയമിതനായ സിബി ഇ.പി., ഓള്‍ ഇന്ത്യാതലത്തില്‍ 2025 നീറ്റ് പരീക്ഷയില്‍ ഒന്നാം റാങ്ക് കരസ്ഥമാക്കിയ ഡോ. അഞ്ജു ആന്‍ മാത്യു, കോട്ടയം ചൈൽഡ് വെല്‍ഫെയര്‍ കമ്മിറ്റി ചെയര്‍മാന്‍ റവ. ഡോ. അരുണ്‍ കുര്യന്‍ എന്നിവര്‍ക്ക് സ്പെഷല്‍ അവാര്‍ഡുകള്‍ സമര്‍പ്പിക്കുമെന്ന് മോന്‍സ് ജോസഫ് എംഎല്‍എ അറിയിച്ചു.

കെഎസ്എസ് പഠനയാത്രാസംഘം ഇന്ന് തായ്‌ലൻഡിലേക്ക്

വൈക്കം: കിസാൻ സർവീസ് സൊസൈറ്റിയുടെ പഠനയാത്രാസംഘം ഇന്നു തായ്‌ലൻഡിലേക്ക്. തായ്‌ലൻഡിലെ ചോൻബുരി കോളജ് ഓഫ് അഗ്രിക്കൾച്ചർ ആൻഡ് ടെക്നോളജിയുമായി ചേർന്ന് സംഘടിപ്പിക്കുന്ന പഠനയാത്രയിൽ കെഎസ്എസ് അംഗങ്ങളും കർഷകരുമടക്കം 96 പേരാണ് പങ്കെടുക്കുന്നത്. ഇന്നു നെടുമ്പാശേരിയിൽനിന്ന് സംഘം പുറപ്പെടും. അഞ്ചു ദിവസം നീണ്ടുനിൽക്കുന്നതാണ് യാത്ര. കിസാൻ സർവീസ് സൊസൈറ്റി ദേശീയ ചെയർമാൻ ജോസ് തയ്യിൽ നേതൃത്വം നൽകുന്ന പഠനയാത്രയിൽ ദേശീയ ജനറൽ സെക്രട്ടറി എസ്. സുരേഷ്, സംസ്ഥാന പ്രസിഡന്‍റ് ജോയി മൂക്കൻതോട്ടം എന്നിവരും ദേശീയ, സംസ്ഥാന കൗൺസിൽ ഭാരവാഹികളും നാഷണൽ സർവീസ് ഡയറക്ടർമാരും പങ്കെടുക്കും. കർഷകർക്കും കൃഷിയിൽ താത്പര്യമുള്ള യാത്രികർക്കും പുതിയ കൃഷിരീതികൾ, കാർഷികയന്ത്ര, ഉപകരങ്ങളുടെ പ്രയോഗം എന്നിവയെക്കുറിച്ചുള്ള പുതിയ അറിവുകൾ നേടാൻ ഈ യാത്ര പ്രയോജനപ്പെടുമെന്ന് കെഎസ്എസ് ദേശീയ പ്രസിഡന്‍റ് ജോസ് തയ്യിലും ദേശീയ ജനറൽ സെക്രട്ടറി എസ്. സുരേഷും പറഞ്ഞു.

പണം കളഞ്ഞുകിട്ടി

പാമ്പാടി: കളഞ്ഞുകിട്ടിയ വന്‍തുക പോലീസ് സ്റ്റേഷനിലെത്തിച്ചു മാതൃകയായി യുവാവ്. വാകത്താനം നാലുന്നാക്കല്‍ സ്വദേശിയും സിപിഎം കടുവാക്കുഴി ബ്രാഞ്ച് അംഗവും കെഎസ്‌കെടിയു കടുവാക്കുഴി യൂണിറ്റ് പ്രസിഡന്‍റുമായ മുറിക്കാട്ടുപറമ്പ് ബിനോയി ജോണിനാണ് (ബിനോയി കടുവാക്കുഴി) പണം ലഭിച്ചത്. സമീപവാസിയുടെ മരണാനന്തര ചടങ്ങിനു പോകുമ്പോള്‍ മീനടത്ത് റോഡില്‍നിന്നാണ് പണം അടങ്ങിയ പൊതി ലഭിക്കുന്നത്. തുടർന്ന് പാമ്പാടി പഞ്ചായത്തംഗം ഷിബു കുഴിയിടിത്തറ, സിപിഎം പാമ്പാടി ലോക്കല്‍ സെക്രട്ടറി കെ.എസ്. പ്രതീഷ് എന്നിവരുടെ സാന്നിധ്യത്തില്‍ പാമ്പാടി പോലീസ് സ്റ്റേഷനിലെത്തി എസ്എച്ച്ഒ റിച്ചാര്‍ഡ് വര്‍ഗീസിനു പണം കൈമാറി. പണം നഷ്ടപ്പെട്ടവര്‍ തെളിവ് സഹിതം പാമ്പാടി പോലീസ് സ്റ്റേഷനുമായി ബന്ധപ്പെടണമെന്ന് പോലീസ് അറിയിച്ചു. ഫോൺ: 04812505322.

ലിറ്റില്‍ കൈറ്റ്‌സ് നോഡല്‍ ഓഫീസര്‍മാരുടെ ജില്ലാതല ശില്പശാല പൂര്‍ത്തിയായി

കോട്ടയം: ഈ അധ്യയനവര്‍ഷം പത്താം ക്ലാസിലെ മുഴുവന്‍ കുട്ടികള്‍ക്കും നിര്‍മിതബുദ്ധിയും റോബോട്ടിക്‌സും പഠിക്കാനും പ്രായോഗിക പരീക്ഷണങ്ങള്‍ നടത്താനും അവസരമൊരുക്കിയിട്ടുണ്ടെന്ന് കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) സിഇഒ കെ. അന്‍വര്‍ സാദത്ത്. കോട്ടയം എംഡി സെമിനാരി ഹയര്‍ സെക്കന്‍ഡറി സ്‌കൂളില്‍ നടന്ന ലിറ്റില്‍ കൈറ്റ്‌സ് നോഡല്‍ ഓഫീസര്‍മാര്‍ക്കുള്ള ജില്ലാതല ശില്പശാലയില്‍ മുഖ്യപ്രഭാഷണം ഓണ്‍ലൈനായി നടത്തുകയായിരുന്നു അദ്ദേഹം. ജില്ലയില്‍ പ്രവര്‍ത്തിക്കുന്ന 140 യൂണിറ്റുകളില്‍നിന്നായി 240 മാസ്റ്റര്‍, മിസ്ട്രസ്മാര്‍ പങ്കെടുത്തു. ലിറ്റില്‍ കൈറ്റ്‌സ് യൂണിറ്റുകളുടെ ഈ വര്‍ഷത്തെ പ്രവര്‍ത്തനങ്ങള്‍ക്ക് ദിശാബോധം നല്‍കുന്ന തരത്തിലുള്ള വിവിധ അവതരണങ്ങളും സെഷനുകളും ഉള്‍പ്പെട്ടതായിരുന്നു ശില്പശാല. കൈറ്റ് ജില്ലാ-കോ ഓര്‍ഡിനേറ്റര്‍ തോമസ് വര്‍ഗീസ്, ജില്ലയിലെ മാസ്റ്റര്‍ ട്രെയിനര്‍മാര്‍ തുടങ്ങിയവര്‍ വിവിധ സെഷനുകള്‍ക്ക് നേതൃത്വം നല്‍കി.

മത്സ്യഫെഡിന്‍റെ വാഹനം മോഷ്ടിച്ച കേസിലെ പ്രതിക്ക് ജയിൽ ശിക്ഷ

വൈക്കം: മത്സ്യഫെഡിന്‍റെ വാഹനം മോഷ്ടിച്ച കേസിലെ പ്രതിക്ക് ജയിൽ ശിക്ഷ വിധിച്ച് കോടതി. ആലപ്പുഴ ആര്യാട് കനാൽ വാർഡ് പാലയ്ക്കലിൽ സന്തോഷ് പാസ്കലി(48) നാണ് രണ്ടു വർഷത്തേക്ക് കോടതി തടവുശിക്ഷ വിധിച്ചത്. 2022ലാണ് കേസിനാസ്പദമായ സംഭവം. വൈക്കത്തഷ്ടമി ദിനത്തിൽ വൈക്കം മത്സ്യഫെഡിന്‍റെ ഓഫീസ് പോർച്ചിൽ കിടന്ന ബൊലേറോ ജീപ്പ് മോഷ്ടിച്ച് തമിഴ്നാട്ടിലെ തിരുനെൽവേലിയിൽ കൊണ്ടുപോയി പൊളിച്ച് വിൽക്കാൻ ശ്രമിക്കുകയായിരുന്നു. വൈക്കം എസ്എച്ച്ഒ അജ്മൽ ഹുസൈൻ, എസ്ഐ വി.എം. ജയ്മോൻ, സാബു ജോസഫ്, ജാക്സൺ എന്നിവരുടെ നേതൃത്വത്തിൽ പോലീസ് തമിഴ്നാട്ടിലെത്തി വാഹനം പിടിച്ചെടുത്തെങ്കിലും പ്രതി രക്ഷപ്പെടുകയായിരുന്നു. തുടർന്നു നടത്തിയ അന്വേഷണത്തിലാണ് പ്രതിയെ പിടികൂടിയത്. പോലീസ് കോടതിയിൽ കുറ്റപത്രം സമർപ്പിച്ചതിനെത്തുടർന്നാണ് കഴിഞ്ഞ ദിവസം ശിക്ഷ വിധിച്ചത്.

അപകടാവസ്ഥയിലായ ആൽമരം മുറിച്ചുനീക്കണമെന്ന്

ടിവിപുരം: തിരുവിതാംകൂർ ദേവസ്വം ബോർഡിന്‍റെ കിഴിലുള്ള ടിവിപുരം സ്വയംഭൂ സരസ്വതീക്ഷേത്രത്തിലെ ആൽമരം അപകടാവസ്ഥയിൽ. തിടപ്പള്ളിയോടു ചേർന്നുനിൽക്കുന്ന ആൽമരത്തിന്‍റെ തറ പൊട്ടിപ്പൊളിഞ്ഞ നിലയിലാണ്. കമ്പുകൾ വളർന്ന് പടർന്നു പന്തലിച്ചു. വള്ളിപ്പടർപ്പുകൾ പടർന്നതിനാൽ ഏതുനിമിഷവും ആൽമരം മറിഞ്ഞു വീഴാവുന്ന നിലയിലാണ്. അപകടമുണ്ടായാൽ ശ്രീകോവിൽ തിടപ്പള്ളി എന്നിവ ഉൾപ്പെടെ തകർന്നു വീഴും. ദൂരെ സ്ഥലങ്ങളിൽനിന്നുപോലും ധാരാളം ഭക്തജനങ്ങൾ എത്തിച്ചേരുന്ന ക്ഷേത്രമാണിത്. അപകടാവസ്ഥയിലുള്ള ആൽമരം മുറിച്ചുനീക്കുന്നതിന് ദേവസ്വം ബോർഡ് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

സ്വിം കേരള സ്വിം മൂന്നാംഘട്ട നീന്തൽ പരിശീലന പദ്ധതി വൈക്കത്ത് തുടങ്ങി

വൈക്കം: മൈൽ സ്റ്റോൺ സ്വിമ്മിംഗ് പ്രൊമോട്ടിംഗ് ചാരിറ്റബിൾ സൊസൈറ്റിയുടെ നേതൃത്വത്തിൽ വിദേശ മലയാളികളുടെ സംഘടനയായ ഫൊക്കാന, വൈക്കം നഗരസഭ എന്നിവയുടെ സഹകരണത്തോടെ സ്വിം കേരള സ്വിം മൂന്നാംഘട്ട നീന്തൽ പരിശീലന പദ്ധതിക്ക് വൈക്കത്ത് തുടക്കമായി. വൈക്കം തോട്ടുവക്കത്ത് പൂരകുളത്തിൽ ആരംഭിച്ച നീന്തൽ പരിശീലന പരിപാടിയുടെ ഫ്ലാഗ് ഓഫ് വൈക്കം നഗരസഭാ ചെയർപേഴ്സൺ പ്രീത രാജേഷ് നിർവഹിച്ചു. നഗരസഭാ വൈസ് ചെയർമാൻ പി.ടി. സുഭാഷ് അധ്യക്ഷത വഹിച്ചു. പരിശീലനം ആരംഭിച്ച ദിനംതന്നെ 93 കുട്ടികൾ നീന്തൽ അഭ്യസിക്കാനെത്തി.

അങ്കണവാടികളിൽ ബയോ കമ്പോസ്റ്റര്‍ ബിന്‍ പദ്ധതിയുമായി ജില്ലാ പഞ്ചായത്ത് ഭരണങ്ങാനം ഡിവിഷൻ

ഭരണങ്ങാനം: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അനുവദിച്ച ഫണ്ട് ഉപയോഗിച്ച് ഭരണങ്ങാനം ഡിവിഷനിലെ മുഴുവന്‍ അങ്കണവാടികളിലും ബയോ കമ്പോസ്റ്റര്‍ ബിന്‍ നല്‍കും. ഉറവിട മാലിന്യ സംസ്‌കരണത്തിനായുള്ള ഉപകരണമാണ് ബയോ കമ്പോസ്റ്റര്‍ ബിന്‍. ഭരണങ്ങാനം, കടനാട്, കരൂര്‍, മീനച്ചില്‍ എന്നീ നാല് പഞ്ചായത്തുകളാണ് ഭരണങ്ങാനം ഡിവിഷനില്‍ ഉള്ളത്. ഇതില്‍ കരൂര്‍ പഞ്ചായത്തിലെ അങ്കണവാടികളില്‍ നേരത്തേ ബിന്‍ നല്‍കിയിരുന്നു. നാളെ വൈകുന്നേരം നാലിന് ളാലം ബ്ലോക്ക് പഞ്ചായത്ത് ഓഡിറ്റോറിയത്തില്‍ ചേരുന്ന യോഗം ജില്ലാ കളക്ടര്‍ ജോണ്‍ വി. സാമുവല്‍ ഉദ്ഘാടനം ചെയ്യും. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ് മുഖ്യപ്രഭാഷണം നടത്തും. പഞ്ചായത്ത് പ്രസിഡന്‍റുമാരായ ബീന ടോമി, അനസ്യ രാമന്‍, സോജന്‍ തൊടുക, ജിജി തമ്പി, ജില്ലാ വനിത ശിശു വികസന ഓഫീസര്‍ ടിജു റേച്ചല്‍ തോമസ്, ചൈല്‍ഡ് ഡെവലപ്‌മെന്‍റ് പ്രോജക്‌ട് ഓഫീസര്‍ ജിനു മേരി ബെഞ്ചമിന്‍ തുടങ്ങിയവര്‍ പ്രസംഗിക്കും. ഉറവിട മാലിന്യ സംസ്‌കരണത്തിനായി ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ഭരണങ്ങാനം, കടനാട്, മീനച്ചില്‍ പഞ്ചായത്തുകളിലെ 485 വീടുകളില്‍ ജി-ബിന്നും റിംഗ് കമ്പോസ്റ്റും നല്‍കിയിരുന്നു. ഭരണങ്ങാനം ഡിവിഷനില്‍ മാലിന്യ സംസ്‌കരണത്തിനും ശുചിത്വ പദ്ധതികള്‍ക്കുമായി 1.10 കോടി രൂപയുടെ പദ്ധതികള്‍ നടപ്പിലാക്കിയതായി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ പറഞ്ഞു.

പാടിയും പ്രാർഥിച്ചും നാട്ടിലെ കുട്ടിക്കൂട്ടം; ആശംസകളുമായി ആർച്ച്പ്രീസ്റ്റും മൂപ്പന്മാരും

കുറവിലങ്ങാട്: ആടിയും പാടിയും പ്രാർഥിച്ചും ആഘോഷിച്ച കുട്ടിക്കൂട്ടത്തിലേക്ക് ആശംസകളുമായി ആർച്ച്പ്രീസ്റ്റും മുതിർന്ന തലമുറയും. അയൽവീടുകളിലെ കുട്ടികളാണ് അവധി ദിനത്തെ ആഘോഷമാക്കി സംഗമിച്ചത്. കളിചിരികളും വർത്തമാനവുമായി ഒത്തുകൂടിയ കുട്ടിക്കൂട്ടത്തിന് ഭക്ഷണവും അറിവും പകർന്ന് മുതിർന്ന തലമുറയുമെത്തി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ രണ്ടാം വാർഡിലെ വിശുദ്ധ ഇരണേവൂസ് കൂട്ടായ്മയിലെ കുട്ടികളാണ് ഒരുമിച്ച് ചേർന്നത്. മൂന്ന് വയസുമുതലുള്ള കുട്ടികൾ സംഗമത്തിന്‍റെ ഭാഗമായി. നാല്പതോളം വീടുകളിൽനിന്നായി കുരുന്നുകളടക്കം അൻപതോളം പേരെത്തിയെന്നത് സംഗമത്തെ ശ്രദ്ധേയമാക്കി. സിസ്റ്റർ മെൽബി, ലിജോ മുക്കത്ത് എന്നിവർ കുട്ടികളുമായി സംവദിച്ചു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, അസി. വികാരി ഫാ. പോൾ കുന്നുംപുറത്ത്, ബോബിച്ചൻ നിധീരി, ഷൈജു പാവുത്തിയേൽ, ജിജോ വടക്കേടം, റെന്നി ആശാരിപറമ്പിൽ, എം.വി. ജോൺ, ലിസി മാമ്മച്ചൻ, രാജു ആശാരിപറമ്പിൽ തുടങ്ങിയവർ മാതാപിതാക്കൾക്കൊപ്പം കുട്ടികൾക്ക് ആശംസകളുമായി സംഗമത്തിലെത്തി. ഇതൾ 2025 എന്ന പേരിലുള്ള കുട്ടിക്കൂട്ടത്തിന്‍റെ തുടർപ്രവർത്തനങ്ങൾക്കായി ബേസിൽ ജിജോ വടക്കേടത്ത്, എയ്ഞ്ചലീന ജോമി നരിവേലിൽ എന്നിവരുടെ നേതൃത്വത്തിൽ കമ്മിറ്റിയും രൂപീകരിച്ചു.

മിനി എംസിഎഫും പരിസരവും ഇഴജന്തുക്കളുടെ താവളം

പാലാ: മുരിക്കുംപുഴയിലുള്ള നഗരസഭാ ഷോപ്പിംഗ് കേംപ്ലക്‌സിന്‍റെ സമീപത്തെ മിനി എംസിഎഫ് നാട്ടുകാരെയും വ്യാപാരികളെയും ദുരിതത്തിലാക്കുന്നു. നഗരസഭ 19-ാം വാര്‍ഡ് തെക്കേക്കരയിലെ നഗരസഭാ ഷോപ്പിംഗ് കോംപ്ലക്‌സിനോടു ചേര്‍ന്നുകിടക്കുന്ന ഈ ഭാഗം ഇപ്പോള്‍ ഇഴജന്തുക്കളുടെ താവളമാണെന്ന് നാട്ടുകാര്‍ പറയുന്നു. എംസിഎഫിന്‍റെ പരിസരങ്ങളില്‍ പ്ലാസ്റ്റിക് കുപ്പികള്‍ അടക്കം വലിച്ചെറിഞ്ഞിരിക്കുകയാണ്. മഴക്കാലമായതോടെ ഇവിടെ കൊതുകുശല്യവും രൂക്ഷമായി. എത്രയും വേഗം എംസിഎഫും പരിസരവും വൃത്തിയാക്കാര്‍ നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു.

പാലായിൽ തലവേദനയായി തെരുവുനായ്ക്കള്‍

പാലാ: തെരുവുനായ്ക്കളെ പിടികൂടി കൂട്ടിലടയ്ക്കാന്‍ നഗരസഭാധികൃതര്‍ തയാറാകണമെന്ന ആവശ്യം ശക്തമായി. ടൗണിലും സമീപപ്രദേശങ്ങളിലും തെരുവുനായ ശല്യം രൂക്ഷമാണ്. കൂട്ടമായി വിഹരിക്കുന്ന നായ്ക്കള്‍ കാല്‍നടക്കാര്‍ക്കും ഇരുചക്രവാഹന യാത്രക്കാര്‍ക്കുമെല്ലാം ഭീഷണിയാണ്. സ്‌കൂള്‍ കുട്ടികള്‍ ഭയത്തോടെയാണ് നടക്കുന്നത്. പന്ത്രണ്ടു വര്‍ഷം മുന്‍പ് ഗവണ്‍മെന്‍റ് മൃഗാശുപത്രി പരിസരത്ത് അന്പതിലേറെ തെരുവുനായ്ക്കളെ പിടികൂടി കൂട്ടില്‍ അടച്ചിരുന്നതിനാല്‍ നായ്ക്കളെ പേടിക്കാതെ നഗരത്തിലൂടെ സഞ്ചരിക്കാന്‍ കഴിയുമായിരുന്നു. ഇതിനായി കൂടുകളും മറ്റു സൗകര്യങ്ങളും നഗരസഭയ്ക്കുണ്ടായിരുന്നു. എന്നാല്‍ അധികൃതരുടെ അനാസ്ഥ മൂലം ഈ പദ്ധതി ഏറെ മുന്പോട്ടു പോയില്ല. ഇതോടെ നഗരത്തില്‍ നായ്ക്കള്‍ പെരുകി. നഗരസഭ നിര്‍മിച്ച കൂടുകളില്‍ ഏറെയും തുരുമ്പെടുത്ത് നശിച്ചിരിക്കുകയാണ്. നഗരത്തില്‍ അലഞ്ഞുതിരിയുന്ന നായ്ക്കളെ പിടികൂടി ഈ കൂടുകളിലാക്കണമെന്ന് ആവശ്യപ്പെട്ട് നാട്ടുകാര്‍ ഒപ്പിട്ട നിവേദനം പൗരസമിതിയുടെ നേതൃത്വത്തില്‍ നഗരസഭാധികൃതര്‍ക്ക് നല്‍കിയെങ്കിലും നടപടികളില്ല പാലാ ടൗണ്‍, മുരിക്കുംപുഴ, ചെത്തിമറ്റം, കടപ്പാട്ടൂര്‍, റിവര്‍വ്യൂ റോഡ്, ടൗണ്‍ ഹാള്‍, സിവില്‍ സ്റ്റഷന്‍ പരിസരങ്ങള്‍, സെന്‍റ് മേരീസ് സ്‌കൂളിനും ഗവ. ഹയര്‍ സെക്കൻഡറി സ്‌കൂളിനും സമീപം എന്നിവിടങ്ങളിലെല്ലാം തെരുവുനായ്ക്കള്‍ കൂട്ടമായി അലഞ്ഞുതിരിയുകയാണ്. വിവിധ ഭാഗങ്ങളില്‍ കൂടിക്കിടക്കുന്ന ഭക്ഷണാവശിഷ്ടങ്ങള്‍ തേടി തെരുവുനായ്ക്കള്‍ കൂട്ടത്തോടെ എത്തുകയാണ്. തെരുവുനായ്ക്കളെ നിയന്ത്രിക്കാന്‍ നടപടി സ്വീകരിക്കണമെന്ന് പൗരസമിതി ഭാരവാഹികളായ പി. പോത്തന്‍, സേബി വെള്ളരിങ്ങാട്ട്, ബേബി കീപ്പുറം എന്നിവര്‍ ആവശ്യപ്പെട്ടു.

ആഹ്ലാദപ്രകടനം നടത്തി

കാഞ്ഞിരപ്പള്ളി: നിലമ്പൂർ ഉപതെരഞ്ഞെടുപ്പിൽ വിജയിച്ച യുഡിഎഫ് സ്ഥാനാർഥി ആര്യാടൻ ഷൗക്കത്തിന് അഭിവാദ്യം അർപ്പിച്ച് യുഡിഎഫ് കാഞ്ഞിരപ്പള്ളി മണ്ഡലം കമ്മിറ്റിയുടെ നേതൃത്വത്തിൽ ടൗണിൽ ആഹ്ലാദപ്രകടനവും യോഗവും നടത്തി. ഡിസിസി ജനറൽ സെക്രട്ടറി പി.എ. ഷെമീർ ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ബിജു പത്യാല അധ്യക്ഷത വഹിച്ചു. ബ്ലോക്ക്‌ പ്രസിഡന്‍റ് പി. ജീരാജ്, വൈസ് പ്രസിഡന്‍റ് ഒ.എം. ഷാജി, സുനിൽ തേനമ്മാക്കൽ, അബ്ദുൽ ഫത്താഹ്, ദിലീപ് ചന്ദ്രൻ, ഷാജി പെരുന്നേപ്പറമ്പിൽ തുടങ്ങിയവർ പ്രസംഗിച്ചു. മുണ്ടക്കയം ഈസ്റ്റ്: നിലമ്പൂർ വിജയത്തിൽ ആഹ്ലാദം പ്രകടിപ്പിച്ച് കോൺഗ്രസ് കൊക്കയാർ, പെരുവന്താനം മണ്ഡലം കമ്മിറ്റികളുടെ നേതൃത്വത്തിൽ മുപ്പത്തഞ്ചാം മൈലിൽ പ്രകടനം നടത്തി. സണ്ണി തുരുത്തിപ്പള്ളി, ഷിനോജ് ജേക്കബ്, ഷാജഹാൻ മഠത്തിൽ, കെ.കെ. ജനാർദനൻ, സണ്ണി തട്ടുങ്കൽ, വി.സി. ജോസഫ്, നൗഷാദ് വെംബ്ലി, ഓലിക്കൽ സുരേഷ്, സി.ടി. മാത്യു, ജോൺ പി, തോമസ്, അയ്യൂബ് ഖാൻ കട്ടുപ്ലാക്കൽ, ഷാജി പുല്ലാട്ട്, സ്വർണലത അപ്പുക്കുട്ടൻ, ഡൊമിന സജി തുടങ്ങിയവർ പ്രസംഗിച്ചു.

വില്‍പ്പത്രനിയമത്തില്‍ യാതൊരു മാറ്റവും വരുത്തിയിട്ടില്ല: ആധാരമെഴുത്ത് അസോസിയേഷന്‍

പൊന്‍കുന്നം: വില്‍പ്പത്രം രജിസ്ട്രേഷന്‍ സംബന്ധിച്ച് ആശങ്കയ്ക്ക് യാതൊരു അടിസ്ഥാനവുമില്ലെന്നും ആക്ട് 205 അനുസരിച്ച് നിയമത്തില്‍ നാളിതുവരെ യാതൊരു മാറ്റവും വരുത്തിയിട്ടില്ലെന്നും ആധാരം എഴുത്ത് അസോസിയേഷന്‍ സംസ്ഥാന ഉപദേശകസമിതി ചെയർമാന്‍ ഒ.എം. ദിനകരന്‍. ആധാരമെഴുത്തുകാരുടെ പൊന്‍കുന്നത്തു നടന്ന വിദ്യാഭ്യാസ അവാർഡ്ദാന ചടങ്ങില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. ഹൈക്കോടതിവിധിയുടെ അടിസ്ഥാനത്തില്‍ റവന്യു വകുപ്പിലെ ജീവനക്കാർ പലയിടങ്ങളിലും വില്‍പ്പത്രം പോക്കുവരവ് ചെയ്യുന്നതിന് പലതരത്തിലുള്ള തടസവാദങ്ങള്‍ ഉന്നയിക്കുന്നത് ജനങ്ങളില്‍ പരിഭ്രാന്തി ഉളവാക്കിയിട്ടുള്ളതായും ഒ.എം. ദിനകരന്‍ ആരോപിച്ചു. വില്‍പ്പത്രം എഴുതിവച്ചതിനുശേഷം അയാളുടെ മരണശേഷം വില്‍പത്ര വ്യവസ്ഥകൾ പ്രകാരം വസ്തുവകകള്‍ പോക്കുവരവു ചെയ്ത് കരമടച്ചുകൊടുക്കുന്നതിനുള്ള നടപടിക്രമങ്ങളിലും യാതൊരു മാറ്റവും വരുത്തിയിട്ടില്ല. വില്‍പ്പത്രകർത്താവിന്‍റെ മരണസർട്ടിഫിക്കറ്റ്, അവസാന വില്‍പ്പത്രമാണോ എന്നറിയാന്‍ വില്‍പ്പത്രത്തിന്‍റെ സർട്ടിഫൈഡ് കോപ്പി, ബാധ്യതാ സർട്ടിഫിക്കറ്റ്, നോട്ടറി മുന്പാകെയുള്ള സത്യവാങ്‌മൂലം, ലിസ്റ്റ് സർട്ടിഫിക്കറ്റ്, ലീഗല്‍ ഹയർ സർട്ടിഫിക്കറ്റ് എന്നിവ സഹിതം അപേക്ഷ ബോധിപ്പിച്ചാല്‍ പോക്കുവരവ് ചെയ്യാന്‍ പോകുന്നുവെന്നുള്ള നടപടിക്രമങ്ങള്‍ സംബന്ധിച്ച് വില്ലേജ് ഓഫീസർ പബ്ലിക് നോട്ടീസ് പ്രസിദ്ധീകരിക്കണം. ഹൈക്കോടതിവിധിയുടെ പശ്ചാത്തലത്തില്‍ റവന്യു പ്രിന്‍സിപ്പൽ സെക്രട്ടറി വിധിയുടെ വിശദാംശങ്ങള്‍ താലൂക്കിലേക്കും വില്ലേജ് ഓഫീസുകളിലേക്കും അയച്ചതിനെത്തുടർന്ന് പോക്കുവരവ് നടപടികള്‍ വില്ലേജ് ഓഫീസർമാർ കർശനമാക്കിയിട്ടുണ്ട്. പബ്ലിക് നോട്ടീസിന്‍റെ കാലാവധി 30 ദിവസമായി ദീർഘിപ്പിച്ചു. ഇതല്ലാതെ പോക്കുവരവ് നടപടികള്‍ തടസപ്പെടുത്താനോ വ്യാഖ്യാനിച്ച് മാറ്റിവയ്ക്കാനോ ആരും അധികാരം നല്‍കിയിട്ടില്ലെന്നും അദ്ദേഹം പറഞ്ഞു. സമ്മേളനത്തില്‍ ജില്ലാ പ്രസിഡന്‍റ് എന്‍.കെ. സുധാകരന്‍നായർ അധ്യക്ഷത വഹിച്ചു. സംസ്ഥാന പ്രസിഡന്‍റ് കെ.ജി. ഇന്ദുകലാധരന്‍, ജനറല്‍ സെക്രട്ടറി എ. അന്‍സാർ, ജില്ലാ സെക്രട്ടറി വി.വി. ശശിമോന്‍ എന്നിവർ പ്രസംഗിച്ചു.

എലിക്കുളം നാട്ടുചന്തയ്ക്ക് പുരസ്‌കാരം

എലിക്കുളം: കുരുവിക്കൂട് കവലയിൽ പ്രവർത്തിക്കുന്ന എലിക്കുളം നാട്ടുചന്തയ്ക്ക് പ്രവർത്തന മികവിന് കണ്ണിമല ഫാർമേഴ്‌സ് ക്ലബ്ബിന്‍റെ പുരസ്‌കാരം. ജില്ലാ പഞ്ചായത്തംഗം പി.ആർ. അനുപമ അവാർഡ് സമ്മാനിച്ചു. ക്ലബ് പ്രസിഡന്‍റ് പി.ഡി. ജോൺ പവ്വത്ത് അധ്യക്ഷത വഹിച്ചു. നാട്ടുചന്ത രക്ഷാധികാരി മാത്യൂസ് പെരുമനങ്ങാട്ട്, പ്രസിഡന്‍റ് വി.എസ്. സെബാസ്റ്റ്യൻ വെച്ചൂർ, സെക്രട്ടറി രാജു അമ്പലത്തറ, വിൽസൺ പാമ്പൂരി, ഔസേപ്പച്ചൻ ഞാറയ്ക്കൽ, മോഹനകുമാർ കുന്നപ്പള്ളിക്കരോട്ട് തുടങ്ങിയവർ ചേർന്ന് പുരസ്‌കാരം സ്വീകരിച്ചു.

മാനവികതയെ മഹത്വമാക്കുന്നതാണ് വിദ്യാഭ്യാസം: മാർ ജേക്കബ് മുരിക്കന്‍

പെരുവന്താനം: മാനവികതയെ മഹത്വവത്കരിക്കുകയാണ് ആധുനിക വിദ്യാഭ്യാസത്തിന്‍റെ ലക്ഷ്യമെന്ന് മാർ ജേക്കബ് മുരിക്കന്‍. പെരുവന്താനം സെന്‍റ് ആന്‍റണീസ് കോളജ് ഒന്നാംവർഷ ബിരുദ വിദ്യാർഥികളുടെ ഉന്നത വിദ്യാരംഭത്തിന്‍റെയും ജ്ഞാനദീപ പ്രകാശനത്തിന്‍റെയും ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു അദ്ദേഹം. സമൂഹത്തെ ശുദ്ധീകരിക്കുന്നതിനുള്ള ഉത്തരവാദിത്വം വിദ്യാർഥികളിലാണ് നിക്ഷിപ്തമായിരിക്കുന്നതെന്നും സ്വയം ശുദ്ധീകരിക്കുന്നതിനൊപ്പം സമൂഹ ശുദ്ധീകരണത്തിനും വിദ്യാർഥികൾ മുന്നിട്ടിറങ്ങണമെന്നും മാർ ജേക്കബ് മുരിക്കന്‍ കൂട്ടിച്ചേർത്തു. പുതിയ ലോകം ജയിക്കുന്നവരുടേതാണെന്നും വിദ്യാർഥികൾ തങ്ങളുടെ അഭിരുചിക്ക് അനുസൃതമായ കോഴ്സുകൾ തെരഞ്ഞെടുത്ത് ജീവിതവിജയത്തിലേക്ക് സഞ്ചരിക്കണമെന്നും യോഗത്തിൽ അധ്യക്ഷത വഹിച്ച എംജി യൂണിവേഴ്സിറ്റി മുന്‍ വൈസ് ചാന്‍സിലര്‍ ഡോ. സിറിയക് തോമസ് പറഞ്ഞു. ഓറിയന്‍റേഷൻ പ്രോഗ്രാമുകളുടെ ഉദ്ഘാടനവും അദ്ദേഹം നിര്‍വഹിച്ചു. സമ്മേളനത്തിൽ എഡ്യൂക്കേഷണൽ എക്സലന്‍സ്, ഗുരുശ്രേഷ്ഠ അവാർഡ് ഉൾപ്പെടെ നിരവധി അവാർഡുകൾ നേടിയ പ്രിൻസിപ്പൽ ഡോ. ആന്‍റണി ജോസഫ് കല്ലമ്പള്ളിയെ അനുമോദിച്ചു. കോളജ് ചെയർമാൻ ബെന്നി തോമസ് ആമുഖപ്രഭാഷണവും റവ.ഡോ. സെബാസ്റ്റ്യന്‍ കൊല്ലംകുന്നേല്‍ അനുഗ്രഹപ്രഭാഷണവും നടത്തി. പുതുതായി പ്രവേശനം നേടിയ മുഴുവൻ വിദ്യാർഥികൾക്കും മാർ ജേക്കബ് മുരിക്കന്‍, ഡോ. സിറിയക് തോമസ്, റവ.ഡോ. സെബാസ്റ്റ്യന്‍ കൊല്ലംകുന്നേല്‍ എന്നിവർ ജ്ഞാനദീപം പകർന്നു നൽകി. ചടങ്ങില്‍ ഇന്‍റഗ്രേറ്റഡ്, പ്രഫഷണൽ കോഴ്സുകൾക്ക് ഉന്നതവിജയം നേടിയ വിദ്യാർഥികളെ സ്വർണപ്പതക്കവും മെമന്‍റോയും നൽകി ആദരിച്ചു. പ്രിന്‍സിപ്പല്‍ ഡോ. ആന്‍റണി ജോസഫ്‌, വൈസ് പ്രിൻസിപ്പൽ സുപര്‍ണ രാജു, സെക്രട്ടറി ടിജോമോന്‍ ജേക്കബ്‌ എന്നിവർ പ്രസംഗിച്ചു. പുതുതായി പ്രവേശനം നേടിയ വിദ്യാർഥികൾക്ക് പത്തു ദിവസം നീണ്ടുനിൽക്കുന്ന ഓറിയന്‍റേഷൻ പ്രോഗ്രാമിൽ ആർട്ടിഫിഷൽ ഇന്‍റലിജന്‍സ്, റോബോട്ടിക്സ്, മിഷൻ ലേണിംഗ്, സൈബർ സെക്യൂരിറ്റി ഉൾപ്പെടെ വിവിധ വിഷയങ്ങളിൽ വിദഗ്ധർ ക്ലാസുകൾ നയിക്കും.

കോൺക്രീറ്റ് കഷണങ്ങൾ തലയിൽ വീഴും

എരുമേലി: പടിക്കെട്ട് കയറുമ്പോൾ തലയിൽ കോൺക്രീറ്റ് കഷണങ്ങൾ അടർന്നുവീഴാതിരുന്നാൽ ഭാഗ്യം. എരുമേലി തെക്ക് വില്ലേജ് ഓഫീസിലേക്കുള്ള പടിക്കെട്ടിൽ കഴിഞ്ഞ ദിവസം മേൽക്കൂരയിൽനിന്ന് അടർന്നുവീണത് കട്ടിയുള്ള കോൺക്രീറ്റ് കഷണങ്ങളാണ്. അടർന്നുവീഴുമ്പോൾ പടിക്കെട്ടിൽ ആരുമില്ലായിരുന്നതിനാൽ അപകടമൊഴിവായി. എരുമേലി പ്രൈവറ്റ് ബസ് സ്റ്റാൻഡിലെ പഞ്ചായത്ത്‌ ഷോപ്പിംഗ് കോംപ്ലക്സിലെ രണ്ടാമത്തെ നിലയിലാണ് വില്ലേജ് ഓഫീസ്. പൊതുമരാമത്ത് സെക്‌ഷൻ ഓഫീസ്, പഞ്ചായത്ത്‌ ലൈബ്രറി എന്നിവയാണ് വില്ലേജ് ഓഫീസിനടുത്ത് രണ്ടാമത്തെ നിലയിൽ പ്രവർത്തിക്കുന്നത്. ഇവിടേക്ക് രണ്ടു ഭാഗത്തുനിന്നും പടിക്കെട്ടുണ്ട്. രണ്ടിടത്തും മേൽക്കൂരയിലെ കോൺക്രീറ്റ് അടർന്നുവീണുകൊണ്ടിരിക്കുകയാണ്. കെട്ടിടം ദുർബലമായ അവസ്ഥയിലാണ്. നേരത്തേ മേൽക്കൂരയിലെ കോൺക്രീറ്റ് ചോർന്നൊലിക്കുന്ന നിലയിലായിരുന്നു. ഇതു പരിഹരിക്കാൻ റൂഫിംഗ് നടത്തിയെങ്കിലും ചോർച്ച പൂർണമായും പരിഹരിച്ചിട്ടില്ല. മുമ്പ് ബസ് സ്റ്റാൻഡിൽ യാത്രക്കാരുടെമേൽ മേൽക്കൂരയുടെ കോൺക്രീറ്റ് കഷണങ്ങൾ വീഴുന്ന സ്ഥിതിയായിരുന്നു. ഇത് മുൻനിർത്തിയാണ് റൂഫിംഗ് നടത്തിയത്. ഷോപ്പിംഗ് കോംപ്ലക്സ് കെട്ടിടം ദുർബലാവസ്ഥയിലായിട്ട് നാളുകളായി. പൊളിച്ചുമാറ്റി പുതിയ കെട്ടിടം നിർമിക്കാൻ പഞ്ചായത്ത്‌ ബജറ്റിൽ പദ്ധതികൾ പ്രഖ്യാപിക്കുന്നതല്ലാതെ നടപടികളായിട്ടില്ല. പൊളിച്ചുനീക്കിയാൽ കൂടുതൽ സൗകര്യവും ബസ് പാർക്കിംഗ് സ്ഥലം വർധിപ്പിക്കാനും ഉതകുന്ന നിലയിൽ ബസ് സ്റ്റാൻഡും പുതിയ ഷോപ്പിംഗ് കോംപ്ലക്സ് കെട്ടിടവും നിർമിക്കാനാകും.

തലചായ്ക്കാനൊരിടം പദ്ധതി ഗവർണർ ഉദ്ഘാടനം ചെയ്തു

കൂട്ടിക്കൽ: തലചായ്ക്കാനൊരിടം പദ്ധതിയുടെ ഭാഗമായി ദേശീയ സേവാഭാരതി ഇൻഫോസിസ് ഫൗണ്ടേഷനുമായി ചേർന്ന് കൂട്ടിക്കൽ പ്രളയബാധിതർക്ക് നിർമിച്ചു നൽകിയ വീടുകളുടെ താക്കോൽദാനം ഗവർണർ രാജേന്ദ്ര വിശ്വനാഥ്‌ അർലേക്കർ ഉദ്ഘാടനം ചെയ്തു. കൊടുങ്ങ സുബ്രഹ്മണ്യസ്വാമി ക്ഷേത്രമൈതാനിയിൽ നടന്ന ചടങ്ങിൽ സേവാഭാരതി ജില്ലാ പ്രസിഡന്‍റ് രശ്മി ശരത് അധ്യക്ഷത വഹിച്ചു. വാഴൂർ തീർഥപാദാശ്രമം മുഖ്യകാര്യദർശി സ്വാമി ഗരുഢധ്വജാനന്ദതീർഥ പാദസ്വാമി മുഖ്യാതിഥിയായി. ആർഎസ്എസ് ദക്ഷിണകേരള പ്രാന്തപ്രചാരക് എസ്. സുദർശൻ സേവാസന്ദേശം നൽകി. ജില്ലാ പഞ്ചായത്ത് മെംബർ ഷോൺ ജോർജ്, സേവാഭാരതി സംസ്ഥാന പ്രസിഡന്‍റ് ഡോ. രഞ്ജിത് വിജയഹരി, ജില്ലാ ജനറൽ സെക്രട്ടറി കെ.ജി. രാജേഷ്, ഇൻഫോസിസ് വൈസ് പ്രസിഡന്‍റ് സുനിൽ ജോസ് എന്നിവർ പ്രസംഗിച്ചു. പന്ത്രണ്ടു വീടുകളാണ് സേവാഭാരതി നിർമിച്ചത്. ഇതിൽ നാല് വീടുകളുടെ താക്കോൽദാനം മുന്പ് നടന്നിരുന്നു. ശേഷിച്ച എട്ടു വീടുകൾ കൂട്ടിക്കൽ പഞ്ചായത്തിലെ കൊടുങ്ങയിൽ 50 സെന്‍റ് സ്ഥലം വാങ്ങിയാണ് നിർമിച്ചു നൽകിയത്.

ഏറ്റുമാനൂര്‍-പൂഞ്ഞാര്‍ സംസ്ഥാന പാത; പരാതികളേറെ

പാലാ: ഏറ്റവും തിരക്കേറിയ റോഡുകളിലൊന്നായ ഏറ്റുമാനൂര്‍-പൂഞ്ഞാര്‍ സംസ്ഥാന പാത വീതികൂട്ടി ആധുനികവത്കരിക്കണമെന്ന ആവശ്യത്തിന് വര്‍ഷങ്ങളുടെ പഴക്കമുണ്ട്. വാഹനാപകടങ്ങളും ഗതാഗതക്കുരുക്കും വര്‍ധിക്കുമ്പോള്‍ അധികൃതരും ജനപ്രതിനിധികളും ഉറക്കം നടിക്കുകയാണെന്ന ആക്ഷേപം ഉയരുകയാണ്. ഏറ്റുമാനൂര്‍-പാലാ-ഈരാറ്റുപേട്ട റോഡ് നാലു വരിയാക്കുന്നതിന്‍റെ പ്രാരംഭ പ്രവൃത്തികള്‍ക്കായി 2016-17 വര്‍ഷത്തിലെ കേരളാ ബജറ്റില്‍ 20 കോടി രൂപയുടെ ഫണ്ട് മാറ്റി വച്ചിരുന്നു. ഒന്‍പതു വര്‍ഷങ്ങളായിട്ടും യാതൊരു നടപടികളും പുരോഗമിച്ചിട്ടില്ല. മുത്തോലി-ഭരണങ്ങാനം ബൈപാസ് റോഡ് നിര്‍മാണ പദ്ധതിയും ഫണ്ട് ലഭ്യമാകാത്തതിനാല്‍ പ്രതിസന്ധിയാണ്. ഏറ്റുമാനൂര്‍-പൂഞ്ഞാര്‍ സംസ്ഥാന പാതയില്‍ വാഹനാപകടങ്ങള്‍ ആശങ്കാജനകമായി ഉയരുകയാണ്. ഗതാഗതക്കുരുക്കിലകപ്പെട്ട് സമയത്ത് എത്തിച്ചേരാന്‍ സാധിക്കാത്ത അവസ്ഥയിലാണ് പൊതുജനങ്ങള്‍. പനയ്ക്കപ്പാലം, മേരിഗിരി എന്നിവിടങ്ങളിലെ അപകടവളവുകള്‍ നിവര്‍ത്തണമെന്നത് വര്‍ഷങ്ങളായുള്ള ആവശ്യമാണ്. പ്രധാന ജംഗ്ഷനുകളിലെ ട്രാഫിക് ബ്ലോക്ക് വളരെയേറെ പ്രതിസന്ധി സൃഷ്ടിക്കുകയാണ്. ഓടകളും നടപ്പാതകളും പല സ്ഥലങ്ങളിലുമില്ല. റോഡില്‍ വെള്ളക്കെട്ട്, വീതിക്കുറവ്, അലൈന്‍മെന്‍റില്‍ പാളിച്ച, അപകടകരമായ വളവുകള്‍, സ്ഥിരം അപകട മേഖലകളില്‍ ശാസ്ത്രീയ പരിഹാരങ്ങളുടെ അഭാവം, അനധികൃത പാര്‍ക്കിംഗ്, പുറമ്പോക്ക് കൈയേറ്റങ്ങള്‍, പ്രധാന ജംഗ്ഷനുകളില്‍ ഗതാഗതക്കുരുക്ക്, റോഡ് സുരക്ഷാ ക്രമീകരണങ്ങളിലെ വീഴ്ചകള്‍, കെഎസ്ഇബി പോസ്റ്റുകള്‍, മരങ്ങള്‍ എന്നിവ റോഡിലേക്ക് ഇറങ്ങി നില്‍ക്കുന്നത്, ബസ് കാത്തിരിപ്പ് കേന്ദ്രങ്ങളില്‍ ബസ് ബേകളുടെ അഭാവം എന്നിങ്ങനെ നിരവധിയായ പ്രശ്‌നങ്ങള്‍ നാളിതു വരെയായിട്ടും പരിഹരിച്ചിട്ടില്ല. ഭാവിയിലെ വാഹനപ്പെരുപ്പം മുന്‍കൂട്ടി കണ്ട് ഏറ്റുമാനൂര്‍-പാലാ ഈരാറ്റുപേട്ട പാതയെ നാലു വരിയാക്കണമെന്നും ഓടകളും നടപ്പാതയും പ്രധാന ജംഗ്ഷനുകളില്‍ റോഡ് കുറുകെ കടക്കാന്‍ മേല്‍പ്പാലങ്ങളും നിര്‍മിക്കണമെന്നും നാട്ടുകാര്‍ ആവശ്യപ്പെടുന്നു.

ജില്ലയില്‍ മണ്ണെണ്ണ വിതരണം പുനരാരംഭിക്കാനായില്ല

കോട്ടയം: ജില്ലയില്‍ റേഷന്‍ മണ്ണെണ്ണ വിതരണം പുനരാരംഭിക്കാന്‍ കഴിഞ്ഞില്ല. സംസ്ഥാനത്ത് കഴിഞ്ഞ രണ്ടുവര്‍ഷമായി മുടങ്ങിയ മണ്ണെണ്ണ വിതരണം 20 മുതല്‍ പുനരാരംഭിക്കുമെന്ന സര്‍ക്കാര്‍ പ്രഖ്യാപിച്ചിരുന്നെങ്കിലും ജില്ലയില്‍ ഒരിടത്തും നടപ്പായില്ല. മണ്ണെണ്ണ ലഭിക്കുമെന്ന പ്രതീക്ഷയില്‍ നിരവധി കാര്‍ഡുടമകള്‍ കഴിഞ്ഞ ദിവസങ്ങളില്‍ റേഷന്‍ കടകളില്‍ എത്തിയെങ്കിലും നിരാശരായി മടങ്ങേണ്ടിവന്നു. താലൂക്ക് ഡിപ്പോകളില്‍ എത്തി റേഷന്‍ വ്യാപാരികള്‍ മണ്ണെണ്ണ എടുക്കാത്തതാണ് പ്രതിസന്ധിക്കു കാരണം. ജില്ലയിലെ ഒരു താലൂക്കില്‍ മാത്രമാണ് ഇപ്പോള്‍ മണ്ണെണ്ണ വിതരണം ചെയ്യുന്ന ഡീലറുള്ളത്. മണ്ണെണ്ണ വിതരണം ചെയ്യുന്നതിനായി 10 രൂപ നിരക്കില്‍ കമ്മീഷന്‍ ലഭ്യമാക്കണമെന്നാണ് റേഷന്‍ വ്യാപാരി സംഘടനകള്‍ സര്‍ക്കാരിനോട് ആവശ്യപ്പെട്ടത്. എന്നാല്‍ ഏഴു രൂപ നിരക്കില്‍ കമ്മീഷന്‍ അനുവദിക്കാമെന്ന് പൊതുവിതരണ വകുപ്പ് അറിയിച്ചു. ഇതു റേഷന്‍ വ്യാപാര സംഘടനകള്‍ അംഗീകരിച്ചെങ്കിലും ധനകാര്യ വകുപ്പ് അംഗീകരിച്ചില്ല. വകുപ്പ് ആറു രൂപ കമ്മീഷന്‍ നല്‍കാമെന്ന് പറഞ്ഞത് റേഷന്‍ വ്യാപാര സംഘടനകളും അംഗീകരിച്ചിട്ടില്ല. ഇതോടെയാണ് വിതരണം പുനരാരംഭിക്കാന്‍ സാധിക്കാതെ വന്നത്. ഇക്കാര്യത്തില്‍ അന്തിമ തീരുമാനം എടുക്കുന്നതിനായി ഓള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍റെ നേതൃത്വത്തില്‍ ഇന്ന് യോഗം ചേരുന്നുണ്ട്. മണ്ണെണ്ണ വാതില്‍പ്പടിയായി എത്തിച്ചുനല്‍കണമെന്ന് ആവശ്യപ്പെട്ട് ഹൈക്കോടതിയെ സമീപിക്കാനും തീരുമാനിച്ചിട്ടുണ്ട്. യോജിക്കാതെ വ്യാപാരികള്‍ നിലവിലത്തെ സാഹചര്യത്തില്‍ റേഷന്‍ വ്യാപാരികള്‍ തന്നെ താലൂക്ക് തലങ്ങളിലുള്ള ഡിപ്പോകളിലെത്തി മണ്ണെണ്ണ കൊണ്ടുപോകണമെന്നാണ് പൊതുവിതരണ വകുപ്പിന്‍റെ നിര്‍ദേശം. തീ പിടിക്കാന്‍ സാധ്യതയുള്ള വസ്തുക്കള്‍ ടാങ്കര്‍ ലോറികളില്‍ തന്നെ കൊണ്ടുപോകണമെന്നാണ് നിയമം. അല്ലാത്ത പക്ഷം പോലീസ് പിടികൂടി വന്‍തുക ഫൈന്‍ ഈടാക്കും. ടാങ്കര്‍ ലോറികളില്‍ മണ്ണെണ്ണ റേഷന്‍ കടകളിലേക്ക് എത്തിക്കാന്‍ ഭാരിച്ച ചെലവ് വരുമെന്നും അതിനാലാണ് കമ്മീഷന്‍ 10 രൂപ നിരക്കില്‍ ആവശ്യപ്പെടുന്നതെന്നുമാണ് റേഷന്‍ വ്യാപാരികള്‍ പറയുന്നത്. റേഷന്‍ സാധനങ്ങളുടെ വിതരണവുമായി ബന്ധപ്പെട്ട കമ്മീഷന്‍ നിരക്കില്‍ നിലവില്‍ വ്യാപാരികള്‍ക്കു കുടിശികയുമുള്ളതിനാല്‍ റേഷന്‍ മേഖലയില്‍ പിടിച്ചുനില്‍ക്കണമെങ്കില്‍ ആവശ്യപ്പെട്ട കമ്മീഷന്‍ അനുവദിക്കണമെന്നാണ് വ്യാപാരി സംഘടനകളുടെ നിലപാട്. കേന്ദ്രം സംസ്ഥാനത്തിന് അനുവദിച്ച മണ്ണെണ്ണ വിഹിതം 30 ന് മുന്‍പായി എടുത്തില്ലെങ്കില്‍ നഷ്ടമാകും. കഴിഞ്ഞ വര്‍ഷം സംസ്ഥാനത്തിന് അനുവദിച്ച മണ്ണെണ്ണ വിഹിതം ഏറ്റെടുക്കാന്‍ വൈകിയത് കാരണം കേന്ദ്രം വിഹിതം പിന്‍വലിച്ചിരുന്നു.

"ഒരു തൈ നടാം-ചങ്ങാതിക്കൊരു മരം' നാളെ ആരംഭിക്കും

കോട്ടയം: സ്‌കൂള്‍ വിദ്യാര്‍ഥികള്‍ പങ്കെടുത്തു നടത്തുന്ന വൃക്ഷവത്കരണ പ്രവര്‍ത്തനത്തിന്‍റെ ഭാഗമായ ചങ്ങാതിക്കൊരുമരം പരിപാടിക്ക് ജില്ലയില്‍ നാളെ തുടക്കം കുറിക്കും. ജില്ലയില്‍ പന്ത്രണ്ടാം തരംവരെയുള്ള എല്ലാ കുട്ടികളും സ്നേഹസമ്മാനമായി തങ്ങളുടെ സുഹൃത്തിനു വൃക്ഷത്തൈകള്‍ കൈമാറുന്നതാണു പരിപാടി. സ്വന്തം വീട്ടുപരിസരങ്ങളില്‍ താനെ കിളിര്‍ത്തുവന്ന വൃക്ഷത്തൈകള്‍ ഇതിനായി ഉപയോഗപ്പെടുത്താം. മികച്ച തൈകള്‍ വാങ്ങിനല്‍കാന്‍ ആഗ്രഹിക്കുന്ന വിദ്യാര്‍ഥികള്‍ക്കു ലിസ്റ്റ്ചെയ്തിട്ടുള്ള നഴ്സറികള്‍ 30 ശതമാനം വിലക്കുറവോടെ തൈകള്‍ ലഭ്യമാക്കും. പരിപാടിയുടെ ജില്ലാതല ഉദ്ഘാടനം ജില്ലാപഞ്ചായത്ത് പ്രസിഡന്‍റ് ഹേമലത പ്രേംസാഗര്‍ രാവിലെ 10നു താഴത്തുവടകര ഗവൺമെന്‍റ് ഹയര്‍ സെക്കന്‍ഡറി സ്‌കൂളില്‍ നിര്‍വഹിക്കും. വെള്ളാവൂര്‍ പഞ്ചായത്ത് പ്രസിഡന്‍റ് പി.ടി. അനൂപ് അധ്യക്ഷത വഹിക്കും. പരിസ്ഥിതി പുനഃസ്ഥാപനം ലക്ഷ്യംവച്ച് ഹരിതകേരള മിഷന്‍റെ ഏകോപനത്തില്‍ തദ്ദേശസ്വയംഭരണസ്ഥാപനങ്ങള്‍ നടപ്പാക്കുന്ന ഒരുതൈ നടാം പരിപാടിയില്‍ ജില്ലയില്‍ ഏഴരലക്ഷം വൃക്ഷത്തൈകളാണു നടുക.

വൃത്തിയുള്ള ജില്ലയെ കണ്ടെത്താന്‍ ശുചിത്വനിലവാര പരിശോധന

കോട്ടയം: സ്വച്ഛ് ഭാരത് മിഷന്‍ ഗ്രാമീണ്‍ ഫേസ് രണ്ടിന്‍റെ ഭാഗമായി സംസ്ഥാനങ്ങള്‍ക്കും ജില്ലകള്‍ക്കും ശുചിത്വത്തിന്‍റെ അടിസ്ഥാനത്തില്‍ റാങ്ക് നല്‍കാന്‍ കേന്ദ്ര സര്‍ക്കാര്‍ നടത്തുന്ന സര്‍വേ ആരംഭിക്കും. ഗ്രാമീണ മേഖലയിലെ വീടുകള്‍, പൊതുസ്ഥലങ്ങള്‍, സ്ഥാപനങ്ങള്‍ എന്നിവിടങ്ങളിലെ വൃത്തിയാണ് സര്‍വേയില്‍ പരിശോധിക്കുന്നത്. ഓരോ പഞ്ചായത്തിലെയും തെരഞ്ഞെടുക്കുന്ന 20 മുതല്‍ 30 വരെ വീടുകളില്‍ പരിശോധനാ ടീം നേരിട്ടെത്തി പരിശോധന നടത്തും. വീടുകളില്‍ ശുചിത്വ സൗകര്യമുണ്ടോ, വെളിയിട വിസര്‍ജ്യമുക്തമാണോ, കൈകഴുകാനുള്ള സൗകര്യം, മാലിന്യ സംസ്‌കരണം, മലിനജലം എന്താണ് ചെയ്യുന്നത് തുടങ്ങിയ കാര്യങ്ങള്‍ പരിശോധിക്കും. പഞ്ചായത്തുകളിലെ നിലവിലെ ജൈവ, അജൈവ ദ്രവമാലിന്യ സംസ്‌കരണ ഉപാധികളും അവയുടെ പ്രവര്‍ത്തനവും വിലയിരുത്തും. ശൗചാലയ മാലിന്യ സംസ്‌കരണം, ജൈവമാലിന്യ സംസ്‌കരണത്തിനുള്ള ഗോബര്‍ധന്‍ ബയോഗ്യാസ് പ്ലാന്‍റ്, പ്ലാസ്റ്റിക് വേസ്റ്റ് മാനേജ്‌മെന്‍റ് യൂണിറ്റുകള്‍ എന്നിവയുടെ പ്രവര്‍ത്തനം പ്രത്യേകം പരിശോധിക്കും. പൊതു ഇടങ്ങളില്‍ എത്രത്തോളം വൃത്തിയുണ്ട്, മാലിന്യം വലിച്ചെറിയുന്നത് കുറവാണോ, മലിനജലത്തിന്‍റെ തോത് തുടങ്ങിയ കാര്യങ്ങളും പരിശോധിക്കും. പൊതുജനങ്ങളില്‍നിന്ന് നേരിട്ട് അഭിപ്രായമറിയാന്‍ സിറ്റിസണ്‍ ഫീഡ്ബാക്ക് മൊബൈല്‍ ആപ്ലിക്കേഷനും (സ്വച്ഛ് സര്‍വേക്ഷന്‍ ഗ്രാമീണ്‍ 2025) ഉപയോഗിക്കുന്നുണ്ട്. ഇതിലൂടെ ജനങ്ങള്‍ക്ക് നേരിട്ട് വിവരം നല്‍കാം. വൃത്തി കുറഞ്ഞ ഇടങ്ങളില്‍ കൂടുതല്‍ സൗകര്യങ്ങള്‍ ഉറപ്പാക്കാനുള്ള പദ്ധതികളും തയാറാക്കും.

അനൗണ്‍സ്‌മെന്‍റ് കേട്ട് ബസില്‍ കയറാമെന്ന് കരുതേണ്ട; കെഎസ്ആര്‍ടിസിയിൽ അറിയിപ്പുകേന്ദ്രം പൂട്ടുന്നു

കോട്ടയം: നട്ടപ്പാതിരാവില്‍ കെഎസ്ആര്‍ടിസി ബസ് കാത്ത് പാതിയുറക്കത്തില്‍ ഇരിക്കുന്ന യാത്രക്കാരില്‍ പലരും ഇനി നേരം പുലര്‍ന്ന ശേഷം കിട്ടുന്ന വണ്ടിയില്‍ പോകേണ്ടിവരും. സ്റ്റാന്‍ഡിലെ അറിയിപ്പു കൗണ്ടറില്‍നിന്നുള്ള മൈക്ക് അനൗണ്‍സ്‌മെന്‍റ് കേട്ട് ബസില്‍ കയറിപ്പോകാമെന്ന് വിചാരിക്കേണ്ട. ബസ് വരുമോ, എപ്പോള്‍ വരും എന്നൊക്കെ ചോദിച്ചറിയാന്‍ ചുമതലപ്പെട്ട ഒരാളും ഇനിയുണ്ടാവില്ല. അറിയിപ്പുകേന്ദ്രംതന്നെ അടച്ചുപൂട്ടുന്ന സാഹചര്യത്തില്‍ യാത്രക്കാര്‍ ശരിക്കും വിഷമിക്കും. കാഴ്ച വൈകല്യമുള്ളവര്‍ക്ക് ബസിലെ സ്ഥലംബോര്‍ഡ് വായിച്ചെടുക്കാനാവില്ല. കേള്‍വിക്കുറവുള്ളവര്‍ക്ക് വണ്ടി കയറിവരുന്നത് കേള്‍ക്കാനാവില്ല. നിരയായി കിടക്കുന്ന ബസുകള്‍ക്കിടയിലൂടെ ജീവന്‍ പണയപ്പെടുത്തി തപ്പിത്തിരഞ്ഞും പലരോടും ചോദിച്ചും യാത്ര പോകേണ്ട സ്ഥലത്തേക്കുള്ള ബസ് കണ്ടുപിടിക്കുക അതിദുഷ്‌കരമായി മാറും. ഇത്തരത്തില്‍ വയോധികര്‍ അപകടത്തില്‍പ്പെടാനും സാഹചര്യമേറെയാണ്. മറ്റു ഡ്യൂട്ടി ചെയ്യുന്ന സീനിയര്‍ കണ്ടക്ടര്‍മാരെ മാതൃ തസ്തികയിലേക്ക് മാറ്റിയതോടെയാണ് അന്വേഷണ കൗണ്ടറുകളും അനൗണ്‍സ്‌മെന്‍റ് സംവിധാനവും നിര്‍ത്തിയത്. ജില്ലയിലെ പ്രധാന ഡിപ്പോകളായ കോട്ടയത്തെയും പാലായിലെയും അന്വേഷണ കൗണ്ടറുകളാണ് പൂട്ടിയത്. അന്വേഷണ കൗണ്ടറുകളില്‍ സീനിയര്‍ കണ്ടക്ടര്‍മാര്‍ക്കായിരുന്നു ചുമതല. ഇവരായിരുന്നു യാത്രക്കാരുടെ വിവരങ്ങള്‍ക്ക് മറുപടി നല്‍കിയിരുന്നത്. കൂടാതെ ബസുകള്‍ സ്റ്റാന്‍ഡില്‍ എത്തുമ്പോഴും പുറപ്പെടുമ്പോഴും റൂട്ട് സഹിതം അനൗണ്‍സ്‌ ചെയ്യുമായിരുന്നു. കാഴ്ച ശക്തി കുറഞ്ഞവര്‍, മുതിര്‍ന്നയാളുകള്‍ തുടങ്ങിയവര്‍ കൗണ്ടറിലെത്തിയാണ് ബസുകളുടെ സമയവിവരം അറിഞ്ഞിരുന്നത്. ദീര്‍ഘയാത്രയ്ക്കു ശേഷവും ബസുകള്‍ മാറിക്കയറുന്നതിനായും ഡിപ്പോകളിൽ വിശ്രമിക്കുന്നവര്‍ക്ക് എന്‍ക്വയറി കൗണ്ടറും അനൗണ്‍സ്‌മെന്‍റും ഏറെ പ്രയോജനപ്പെട്ടിരുന്നു. ഇനി മുതല്‍ സ്‌റ്റേഷന്‍ മാസ്റ്റര്‍ക്കായിരിക്കും സകല ചുമതലകളും. എരുമേലി ഡിപ്പോയില്‍ സ്‌റ്റേഷന്‍ മാസ്റ്ററാണ് ഈ ജോലികള്‍ ഇപ്പോള്‍ നിര്‍വഹിക്കുന്നത്. പൊന്‍കുന്നം ബസ്‌സ്റ്റാന്‍ഡില്‍ പ്രവര്‍ത്തിച്ചിരുന്ന കെഎസ്ആര്‍ടിസിയുടെ എന്‍ക്വയറി മൂന്നു മാസം മുമ്പേ പൂട്ടി. മുണ്ടക്കയം സ്വകാര്യ സ്റ്റാന്‍ഡില്‍ എന്‍ക്വയറി സംവിധാനം ഇപ്പോഴും പ്രവര്‍ത്തിക്കുന്നുണ്ട്. ഏറ്റുമാനൂർ ഓഫീസും പൂട്ടും കെഎസ്ആര്‍ടിസിയുടെ ഏറ്റുമാനൂര്‍ സ്‌റ്റേഷന്‍ മാസ്റ്റര്‍ ഓഫീസും പൂട്ടാന്‍ നീക്കം. സ്‌റ്റേഷന്‍ മാസ്റ്റര്‍ ഓഫീസാണെങ്കിലും ഇവിടെ സ്റ്റേഷന്‍ മാസ്റ്ററെ നിയമിച്ചിട്ടില്ല, പകരം കോട്ടയം ഡിപ്പോയില്‍ നിന്നെത്തുന്ന സീനിയര്‍ കണ്ടക്ടര്‍ക്കായിരുന്നു ചുമതല. ഓഫീസ് പൂട്ടിയാല്‍ യാത്രക്കാര്‍ പെരുവഴിയിലാകും. ബസുകള്‍ സ്റ്റാന്‍ഡില്‍ കയറണമെന്ന് നിര്‍ബന്ധമില്ല. സ്റ്റേഷന്‍ മാസ്റ്റര്‍ ഓഫീസ് പൂട്ടിയാല്‍ സ്റ്റാന്‍ഡും സ്ഥലവും കെട്ടിടവും അനാഥമാകുമെന്നും മന്ത്രിയുടെ മണ്ഡലം എന്ന നിലയില്‍ ഓഫീസ് നിലനിര്‍ത്തണമെന്നും ആവശ്യപ്പെട്ട് കെഎസ്ആര്‍ടിസി അധികൃതര്‍ മാനേജ്‌മെന്‍റിനോട് അഭ്യര്‍ഥന നടത്തിയിരിക്കുകയാണ്.

തദ്ദേശതെരഞ്ഞെടുപ്പിലും നിലന്പൂർ ചര്‍ച്ചയാകും

കോട്ടയം: നിലമ്പൂര്‍ ജനവിധിയുടെ ചുവടുപിടിച്ച് തദ്ദേശസ്ഥാപനതെരഞ്ഞെടുപ്പിന് കളമൊരുങ്ങുന്നു. കാര്‍ഷിക പ്രശ്‌നങ്ങളും വന്യമൃഗ ആക്രമണങ്ങളും റബര്‍, നെല്ല് പ്രതിസന്ധിയും വിലക്കയറ്റവുമായിരിക്കും അഞ്ചു മാസത്തിനുശേഷം നടക്കുന്ന തദ്ദേശ തെരഞ്ഞടുപ്പിലും അടുത്ത മേയില്‍ നടക്കുന്ന നിയമസഭാ തെരഞ്ഞെടുപ്പിലും ചര്‍ച്ച ചെയ്യപ്പെടുക. നിലമ്പൂര്‍ തെരഞ്ഞെടുപ്പില്‍ യുഡിഎഫ് മുന്നോട്ട് വച്ച ജനകീയ പ്രശ്‌നങ്ങളായിരിക്കും വരും മാസങ്ങളിലും രാഷ്‌ട്രീയ ചര്‍ച്ചയാകുക. കടുത്ത രാഷ്‌ട്രീയ നിലപാടില്ലാത്ത നിഷ്പക്ഷ വോട്ടര്‍മാരും എല്‍ഡിഎഫിനെതിരേ നിലപാട് സ്വീകരിച്ചതും ഇതേ പ്രശ്‌നങ്ങളുടെ പേരിലാണ്. കഴിഞ്ഞ തദ്ദേശ തെരഞ്ഞെടുപ്പില്‍ എല്‍ഡിഎഫ് താരതമ്യേന വലിയ വിജയമാണ് ജില്ലാ പഞ്ചായത്തിലും ഭൂരിപക്ഷം ഗ്രാമപഞ്ചായത്തുകളിലും ബ്ലോക്ക് പഞ്ചായത്തുകളിലും നേടിയത്. എന്നാല്‍ വരാനിരിക്കുന്ന തെരഞ്ഞെടുപ്പു പ്രചാരണങ്ങളില്‍ കടുത്ത വെല്ലുവിളി എല്ലാ മേഖലകളിലും എല്‍ഡിഎഫ് നേരിടേണ്ടിവരും. ജില്ലയിലെ 20 മലയോരഗ്രാമപഞ്ചായത്തുകളില്‍ വന്യജീവികളുടെ ആക്രമണത്തില്‍ ജനങ്ങള്‍ വലയുകയാണ്. മൃഗങ്ങളുടെ കടന്നുകയറ്റത്തില്‍ കൃഷി പൂര്‍ണമായി ഉപേക്ഷിക്കേണ്ടിവന്ന ഗ്രാമീണ കര്‍ഷകര്‍ ഏറെയാണ്. കാട്ടുപന്നിയെ ക്ഷുദ്രജീവിയായി പ്രഖ്യാപിച്ച് നാട്ടിലിറങ്ങുന്നവയെ കൊന്നൊടുക്കണമെന്ന ആവശ്യത്തിന് സര്‍ക്കാരിന് നടപടിയില്ല. റബര്‍ കര്‍ഷകര്‍ വിലയിടിവില്‍ വലഞ്ഞ കാലങ്ങളില്‍ ആശ്വാസമെത്തിക്കാന്‍ സര്‍ക്കാരിന് കഴിഞ്ഞില്ല. റബറിന് താങ്ങുവില 250 രൂപയാക്കുമെന്ന എല്‍ഡിഎഫ് പ്രഖ്യാപനം നടപ്പായതുമില്ല. കുട്ടനാട്, അപ്പര്‍ കുട്ടനാട് മേഖലയിലെ കര്‍ഷകര്‍ നെല്ലിന് വില ലഭിക്കാത്തതിലും താങ്ങുവില ഉയര്‍ത്താത്തതിലും കടുത്ത പ്രതിഷേധത്തിലാണ്. 14 ഗ്രാമപഞ്ചായത്തുകളില്‍ നെല്‍കര്‍ഷകര്‍ വിറ്റ നെല്ലിന് വില കിട്ടാതെ വലിയ പ്രതിസന്ധി നേരിടുകയാണ്. മില്ലുകളുടെ കൊള്ളയും കിഴിവും പ്രതിരോധിക്കുന്നതില്‍ കൃഷിവകുപ്പ് വന്‍പരാജയമായിരുന്നു. പഴം, പച്ചക്കറി, മത്സ്യം, മാസം തുടങ്ങി ഭക്ഷണ സാധനങ്ങളുടെ അനിയന്ത്രിതമായ വിലക്കയറ്റം തടയുന്നതിലും സര്‍ക്കാര്‍ പിന്നില്‍പോയി. കഴിഞ്ഞ അഞ്ചു വര്‍ഷത്തിനുള്ളില്‍ മൂന്നിരട്ടിയോളമാണ് പല സാധനങ്ങളുടെയും വിലക്കയറ്റം. അതേസമയം കര്‍ഷകര്‍ ഉത്പാദിപ്പിക്കുന്ന ഉത്പന്നങ്ങള്‍ക്ക് ന്യായവില ലഭിക്കുന്നുമില്ല. സര്‍ക്കാരിന്‍റെ സംഭരണ സംവിധാനങ്ങളിലെ പാളിച്ച പരിഹരിക്കുന്നതില്‍ നടപടിയുണ്ടായില്ല. മത്സ്യം, മാംസം എന്നിവയുടെ വില നിയന്ത്രിക്കുന്നതില്‍ ജില്ലാ പഞ്ചായത്തിന് അധികാരവും ചുമതലയുമുണ്ട്. സമീപജില്ലകളെ അപേക്ഷിച്ച് മാംസത്തിന് ഏറ്റവും വില കോട്ടയം ജില്ലയിലാണ്. സപ്ലൈകോയില്‍ ഉള്‍പ്പെടെ സാധനങ്ങളുടെ ക്ഷാമവും ജനവിധിയെ സ്വാധീനിക്കും. സപ്ലൈകോ ഔട്ട്‌ലറ്റുകളില്‍ മൂന്നു വര്‍ഷമായി സാധനങ്ങള്‍ക്ക് കുറവുണ്ട്. തെരുവുനായകളെ നിയന്ത്രിക്കുന്നതില്‍ വ്യക്തമായ നയവും നിലപാടും സ്വീകരിക്കുന്നതില്‍ ഏറെ തദ്ദേശസ്ഥാപനങ്ങളും പിന്നിലാണ്. ശബരി വിമാനത്താവളം, റെയില്‍വേ എന്നിവയ്ക്ക് സ്ഥലം വിട്ടുകൊടുക്കേണ്ടിവന്ന കുടുംബങ്ങള്‍ വലിയ പ്രതിസന്ധി നേരിടുകയാണ്. ആരോഗ്യമേഖലയില്‍ പ്രൈമറി ഹെല്‍ത്ത് സെന്‍ററുകള്‍കൊണ്ട് യാതൊരു പ്രയോജനവും ഇല്ലാതായി. മെഡിക്കല്‍ ജീവനക്കാരും മരുന്നുമില്ലാത്ത ഹെല്‍ത്ത് സെന്‍ററുകള്‍ ഏറെയാണ്. സര്‍ക്കാരിന്‍റെ സാമ്പത്തിക പ്രതിസന്ധിമൂലം ഗ്രാമീണമേഖലയില്‍ എടുത്തു പറയാവുന്ന വികസനങ്ങളൊന്നും കാഴ്ച വയ്ക്കാന്‍ തദ്ദേശസ്ഥാപനങ്ങള്‍ക്കും ജനപ്രതിനിധികള്‍ക്കും സാധിച്ചില്ല.

നിലന്പൂർ വിജയം ആഘോഷമാക്കി കോട്ടയത്ത് യുഡിഎഫ്

കോട്ടയം: നിലമ്പൂര്‍ ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്തിന്‍റെ ഉജ്വലവിജയം കോട്ടയത്തും യുഡിഎഫ് പ്രവര്‍ത്തകരെ ആവേശത്തിലാക്കി. പടക്കം പൊട്ടിച്ചും മധുരപലഹാരം വിതരണം ചെയ്തും പ്രവര്‍ത്തകര്‍ തെരഞ്ഞെടുപ്പ് വിജയം ആഘോഷമാക്കി. തുടര്‍ന്ന് യുഡിഎഫ് പ്രവര്‍ത്തകര്‍ നഗരത്തില്‍ ആഹ്ലാദപ്രകടനം നടത്തി. യുഡിഎഫ് ചെയര്‍മാന്‍ ഇ.ജെ. ആഗസ്തി, കണ്‍വീനര്‍ ഫില്‍സണ്‍ മാത്യൂസ്, ഡിസിസി പ്രസിഡന്‍റ് നാട്ടകം സുരേഷ്, കേരള കോണ്‍ഗ്രസ് ജില്ലാ പ്രസിഡന്‍റ് ജെയ്സണ്‍ ജോസഫ്, മുസ്‌ലിം ലീഗ് ജില്ലാ സെക്രട്ടറി ഫാറൂഖ് പാലപ്പറമ്പില്‍, പി.കെ. അബ്ദുല്‍സലാം, ഫിലിപ്പ് ജോസഫ്, എസ്. രാജീവ്, ഷാനവാസ് പാഴൂര്‍, സിസി ബോബി, അനീഷ് വരമ്പിനകം തുടങ്ങിയവര്‍ നേതൃത്വം നല്‍കി. ഇത്തവണയും കാപ്പന്‍റെ പ്രവചനം തെറ്റിയില്ല പാലാ: നിലമ്പൂര്‍ ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ഥിക്കുവേണ്ടി കളത്തിലിറങ്ങിയ മാണി സി. കാപ്പന്‍ ആര്യാടന്‍ ഷൗക്കത്ത് വിജയിക്കുമെന്ന് ആദ്യഘട്ട സന്ദര്‍ശനത്തില്‍ത്തന്നെ പ്രവചിച്ചിരുന്നു. പിന്നീട് മണ്ഡലത്തിലെത്തി ആറു ദിവസം താമസിച്ച് കുടിയേറ്റ മേഖലകളില്‍ പ്രവര്‍ത്തനം പൂര്‍ത്തിയാക്കി മടങ്ങുമ്പോള്‍ പതിനായിരത്തിനു മുകളില്‍ ഭൂരിപക്ഷത്തോടെ യുഡിഎഫ് വിജയിക്കുമെന്ന് പറഞ്ഞു. തന്‍റെ തെരഞ്ഞെടുപ്പിലും തൃക്കാക്കര, പാലക്കാട്, പുതുപ്പള്ളി ഉപതെരഞ്ഞെടുപ്പിലും ഫലം പ്രവചിച്ച ആത്മവിശ്വാസത്തോടെ കാപ്പന്‍ ഉറച്ചുനിന്നു. സ്‌പോര്‍ട്സിലും സിനിമയിലും വലിയ കമ്പമുള്ള നിലമ്പൂര്‍ ജനത താരപരിവേഷത്തോടെയാണ് കാപ്പനെ വരവേറ്റത്. വീടുകളില്‍ വോട്ടഭ്യര്‍ഥനയുമായി എത്തുമ്പോള്‍ ലഭിക്കുന്ന പ്രതികരണമാണ് പ്രവചനത്തിന്‍റെ അളവുകോല്‍. പ്രിയങ്കഗാന്ധിയുടെ തെരഞ്ഞെടുപ്പ് പര്യടന പരിപാടിയില്‍ കണ്ട ആവേശവും കാപ്പന്‍റെ പ്രവചനത്തെ സ്വാധീനിച്ചു. നേതാക്കളായ ഡിജോ കാപ്പന്‍, സന്തോഷ് കാവുകാട്ട്, ജിമ്മി ജോസഫ്, ജോസ് വേരനാനി എന്നിവരും എംഎല്‍എയോടൊപ്പമുണ്ടായിരുന്നു. അഭിമാനപൂർവം ചാണ്ടി ഉമ്മന്‍ കോട്ടയം: നിലമ്പൂര്‍ ഉപതെരഞ്ഞെടുപ്പില്‍ ആര്യാടന്‍ ഷൗക്കത്തിന്‍റെ വിജയത്തിനായി ടീം യുഡിഎഫില്‍ അഹോരാത്രം പണിയെടുത്തതില്‍ അഭിമാനിക്കുകയാണ് പുതുപ്പള്ളി എംഎല്‍എ ചാണ്ടി ഉമ്മന്‍. മുന്‍ മുഖ്യമന്ത്രി ഉമ്മന്‍ ചാണ്ടിയുടെ അതേ തെരഞ്ഞെടുപ്പുതന്ത്രങ്ങളാണ് തെരഞ്ഞെടുപ്പ് പ്രഖ്യാപനം വന്നയുടന്‍ നിലമ്പൂരിലെത്തിയ ചാണ്ടി ഉമ്മന്‍ പിന്തുടർന്നത്. എടക്കര പഞ്ചായത്തില്‍ തന്നെ മൂവായിരത്തോളം വീടുകളിൽ കയറി അദ്ദേഹം വോട്ടഭ്യര്‍ഥന നടത്തി. തൊഴിലുറപ്പു തൊഴിലാളികള്‍ ഉള്‍പ്പെടെയുള്ളവരുടെ അടുത്ത് നേരിട്ടെത്തി സംസ്ഥാന സര്‍ക്കാരിന്‍റെ ജനദ്രോഹ നയങ്ങളും യുഡിഎഫ് അധികാരത്തില്‍ വന്നാല്‍ ചെയ്യാന്‍ പോകുന്ന കാര്യങ്ങളും ബോധ്യപ്പെടുത്തിയായിരുന്നു പ്രചാരണം. വീടുകള്‍ കയറിയിറങ്ങിയുള്ള ചാണ്ടി ഉമ്മന്‍റെ പ്രചാരണത്തിന് കോണ്‍ഗ്രസും യുഡിഎഫും വലിയ പ്രോത്സാഹനമാണ് നല്‍കിയത്. എടക്കര പഞ്ചായത്തിന്‍റെ ചുമതലയായിരുന്നു ചാണ്ടി ഉമ്മന്. ഇന്നലെ ആര്യാടന്‍ ഷൗക്കത്തിന്‍റെ വിജയാഘോഷത്തില്‍ പങ്കെടുക്കാനും വോട്ടര്‍മാര്‍ക്ക് നന്ദി പറയാനും ചാണ്ടി ഉമ്മന്‍ എത്തിയിരുന്നു.

കടലവണ്ടി കത്തിനശിച്ചു

ഈരാറ്റുപേട്ട: നഗരസമധ്യത്തിൽ കടലവണ്ടി കത്തിനശിച്ചു. ഈരാറ്റുപേട്ട സ്വദേശി റഹീമിന്‍റെ ഉടമസ്ഥതയിലുള്ള കടലവണ്ടിക്കാണ് ഇന്നലെ നാലരയോടെ ഈരാറ്റുപേട്ട സെൻട്രൽ ജംഗ്ഷനിൽ തീപിടിച്ചത്. ഓടിയെത്തിയ വ്യാപാരികൾ വെള്ളമൊഴിച്ച് തീകെടുത്തി. സ്‌കൂൾവിട്ട സമയമായതിനാൽ വിദ്യാർഥികളും മറ്റു യാത്രക്കാരും സെൻട്രൽ ജംഗ്ഷനിലെ ബസ് സ്റ്റോപ്പിൽ ഉണ്ടായിരുന്നു. കടല വറക്കാനുള്ള ഗ്യാസ് സ്റ്റൗവിലെ ചോർച്ചയാണ് തീ പിടിക്കാൻ കാരണമെന്ന് കരുതുന്നു. തീ അണയ്ക്കാൻ ശ്രമിക്കവേ റഹീമിന്‍റെ കൈക്ക് പൊള്ളലേറ്റു. റഹീമിന്‍റെ ഏക വരുമാന മാർഗമായിരുന്നു കടലക്കച്ചവടം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]