ADVERTISEMENT

ADVERTISEMENT

കാർഗിൽ വിജയ്ദിനം

തൊടുപുഴ : വിവിധ സംഘടനകളുടെ നേതൃത്വത്തിൽ തൊടുപുഴ കാർഗിൽ സ്മൃതി മണ്ഡപത്തിൽ കാർഗിൽ വിജയ് ദിനമാചരിച്ചു. തൊടുപുഴ നഗരസഭ, നെഹ്റു യുവകേന്ദ്ര, ത്രിതല പഞ്ചായത്തുകൾ, പൂർവ സൈനിക് സേവാ പരിഷത്ത്, സേവാഭാരതി, എൻസിസി 18 കേരള ബറ്റാലിയൻ എന്നിവയുടെ ആഭിമുഖ്യത്തിലാണ് കാർഗിൽ വിജയ് സ്മരണാഞ്ജലി സംഘടിപ്പിച്ചത്. പി.ജെ.ജോസഫ് എംഎൽഎ പുഷ്പാർച്ചനയും മുഖ്യപ്രഭാഷണവും നടത്തി.

നഗരസഭാ ചെയർമാൻ കെ.ദീപക് ഉദ്ഘാടനം ചെയ്തു. വൈസ് ചെയർപേഴ്സണ്‍ പ്രഫ. ജെസി ആന്‍റണി, ജില്ലാ പഞ്ചായത്തംഗം പ്രഫ.എം. ജെ. ജേക്കബ്, അപു ജോണ്‍ ജോസഫ്, എം. മോനിച്ചൻ, ടോമി കാവാലം, സി.ജി. സോമശേഖരൻ, എച്ച്. സച്ചിൻ, തുടങ്ങി യവർ പ്രസംഗിച്ചു.

ADVERTISEMENT

ജില്ലയിൽ തീവ്രമഴ, വ്യാപക മണ്ണിടിച്ചിൽ

ചെറുതോണി: വെള്ളിയാഴ്ച രാത്രി തുടങ്ങിയ ശക്തമായ മഴയിലും കാറ്റിലും മലയോരമേഖലയിൽ വ്യാപകമായ മണ്ണിടിച്ചിൽ. അടിമാലി-കുമളി ദേശീയ പാതയിൽ കരിമ്പനു സമീപം അട്ടിക്കളത്ത് ഇന്നലെ ഉച്ചകഴിഞ്ഞ് മണ്ണിടിഞ്ഞ് മണിക്കൂറുകളോളം ഗതാഗതം പൂർണമായും തടസപ്പെട്ടു. ഇടുക്കി ഫയർഫോഴ്സിന്‍റെ നേതൃത്വത്തിൽ മണ്ണുമാന്തിയന്ത്രം ഉപയോഗിച്ച് മണ്ണുനീക്കിയാണ് ഗതാഗതം പുനഃസ്ഥാപിച്ചത്. ഇന്നലെ വൈകുന്നേരം ഇടുക്കി മെഡിക്കൽ കോളജ് ആശുപത്രി റോഡിൽ മണ്ണിടിഞ്ഞുവീണ് ഗതാഗതം തടസപ്പെട്ടിരുന്നു. ആശുപത്രിയുടെ പുതിയ കെട്ടിടത്തിനു മുന്നിലാണ് മണ്ണിടിഞ്ഞത്. മരങ്ങളും മണ്ണും ഏറെനേരത്തേ പരിശ്രമത്തിനു ശേഷമാണ് നീക്കം ചെയ്ത് ഗതാഗതം പുനഃ സ്‌ഥാപിക്കാനായത്. തൊടുപുഴ - പുളിയൻമല സംസ്ഥാന പാതയിൽ പത്താം മൈലിനു സമീപം മണ്ണിടിഞ്ഞു ഗതാഗതം തടസപ്പെട്ടു. കൊന്നത്തടി - വെള്ളത്തൂവൽ റോഡിൽ വിമലാസിറ്റി പൈപ് ലൈനിനു സമീപം ജോസ് വരാനപ്പിള്ളിയുടെ സ്ഥലം ഇടിഞ്ഞുവീണ് ഗതാഗതം തടസപ്പെട്ടു. ദേവിയാര്‍ പുഴയില്‍ ജലനിരപ്പുയര്‍ന്നു; താഴ്ന്ന ഭാഗങ്ങളില്‍ വെള്ളക്കെട്ട് അടിമാലി: ദേവികുളം താലൂക്കില്‍ ശക്തമായ മഴ ദിവസങ്ങളായി തുടരുകയാണ്.മഴക്കൊപ്പം ശക്തമായ കാറ്റു വീശുന്ന സ്ഥിതിയുമുണ്ട്. കല്ലാര്‍കുട്ടി -വെള്ളത്തൂവല്‍ റോഡില്‍ വെള്ളത്തൂവല്‍ യാക്കോബായ പള്ളിക്കു സമീപം റോഡിലേക്ക് മണ്ണിടിഞ്ഞ് ഗതാഗതം തടസപ്പെട്ടു. മണ്ണു നീക്കി പിന്നീട് ഗതാഗതം പുനഃസ്ഥാപിച്ചു. മുതുവാന്‍കുടി - വെള്ളത്തൂവല്‍ റോഡില്‍ വെള്ളത്തൂവല്‍ സര്‍ക്കാര്‍ ഹയര്‍ സെക്കൻഡറി സ്‌കൂളിനു സമീപം മുളങ്കൂട്ടം റോഡിലേക്കു മണ്ണിടിഞ്ഞുവീണ് ഗതാഗതം തടസപ്പെട്ടു.ദേശീയപാത 85ല്‍ വാളറയ്ക്കു സമീപം മണ്ണിടിഞ്ഞെങ്കിലും ഗതാഗത തടസമുണ്ടായില്ല. ചീയപ്പാറയ്ക്കു സമീപം മരം കടപുഴകിവീണ് ഏറെ നേരം ഗതാഗതം തടസപ്പെട്ടു.

ശക്തമായ മഴ തുടരുന്നതിനാല്‍ പുഴകളിലും തോടുകളിലും വലിയ തോതില്‍ ജലനിരപ്പുയര്‍ന്നു. ദേവിയാര്‍ പുഴയില്‍ ജലനിരപ്പുയര്‍ന്നതോടെ അടിമാലി ഗ്രാമപഞ്ചായത്തിലെ പല ഭാഗങ്ങളും വെള്ളത്തിലായി. വാളറ കെടിഡിസി പടിക്കല്‍നിന്നു കുളമാന്‍കുഴിക്കു പോകുന്ന പാതയിലെ ചപ്പാത്തില്‍ വെള്ളം കയറി. ഇരുമ്പുപാലം, പടിക്കപ്പ് മേഖലയില്‍ ശക്തമായ മഴയില്‍ പലയിടത്തും വെള്ളക്കെട്ട് രൂപം കൊണ്ടിട്ടുണ്ട്. കല്ലാര്‍ - മാങ്കുളം റോഡിലെ താഴ്ന്നഭാഗങ്ങള്‍ വെള്ളത്തിലാകും. കുരിശുപാറ ടൗണിനു സമീപവും കല്ലാര്‍വാലിയിലും റോഡില്‍ വെള്ളം കയറി. ജലനിരപ്പുയര്‍ന്നതോടെ കല്ലാര്‍കുട്ടി, പൊന്‍മുടി അണക്കെട്ടുകള്‍ തുറന്നു. മറ്റ് അക്കെട്ടുകളിലേക്കുള്ള നീരൊഴുക്കും വര്‍ധിച്ചു. ശക്തമായ മഴ മുന്നറിയിപ്പിന്‍റെ സാഹചര്യത്തില്‍ പ്രാദേശിക ഭരണകൂടങ്ങള്‍ ജാഗ്രത പുലര്‍ത്തുന്നുണ്ട്.

മഴക്കെടുതിയിൽ മരണം നാലായി

തൊടുപുഴ: കനത്ത മഴയിൽ ജില്ലയുടെ വിവിധ ഭാഗങ്ങളിലായി കനത്ത നാശം. മണ്ണിടിഞ്ഞും മരം കടപുഴകിയും ഒടിഞ്ഞു വീണും വ്യാപകമായ കെടുതികളാണ് ജില്ലയിൽ ഉണ്ടായത്. ഇന്നലെ അതി തീവ്ര മഴയ്ക്കുള്ള സാധ്യത കണക്കിലെടുത്ത് കേന്ദ്ര കാലാവസ്ഥാ നിരീക്ഷണ കേന്ദ്രം ജില്ലയിൽ റെഡ് അലർട്ട് പ്രഖ്യാപിച്ചിരുന്നു. ഇതേത്തുടർന്ന് ജില്ലാ ഭരണകൂടം ജാഗ്രത നിർദേശം പുറപ്പെടുവിച്ചിരുന്നു. മേയ് മുതൽ ഇതുവരെ കാലവർഷക്കെടുതികളിൽ നാലു പേരുടെ ജീവൻ പൊലിഞ്ഞു. ഇന്നലെ ഉടുന്പൻചോലയിൽ മരം വീണ് തൊഴിലാളി സ്ത്രീ മരിച്ചു. തമിഴ്നാട് തേനി ഉത്തമപാളയം തേവാരം തമ്മിനടയൂംപെട്ടി സ്വദേശി ലീലാവതിയാണ് മരിച്ചത് . ഭക്ഷണം കഴിച്ച ശേഷം തോട്ടത്തിൽ ജോലി ചെയ്യുന്നതിനിടെയായിരുന്നു അപകടം. കഴിഞ്ഞ ഒരാഴ്ചയായി ജില്ലയുടെ എല്ലാ ഭാഗങ്ങളിലും കനത്ത കാറ്റും മഴയുമാണ് അനുഭവപ്പെടുന്നത്. ഇന്നലെ രാവിലെ വരെയുള്ള 24 മണിക്കൂറിൽ ദേവികുളം താലൂക്കിലാണ് കൂടുതൽ മഴ രേഖപ്പെടുത്തിയത്. 93.8 മില്ലിമീറ്റർ മഴയാണ് ഇവിടെ പെയ്തത്. പീരുമേട് - 77.3 , തൊടുപുഴ -75.4, ഇടുക്കി - 61.4, ഉടുന്പൻചോല -45 എന്നിങ്ങനെയാണ് മറ്റു താലൂക്കുകളിൽ പെയ്ത മഴ. കൊച്ചി- ധനുഷ് കോടി ദേശീയപാതയിൽ മൂന്നാർ പോലീസ് സ്റ്റേഷനു സമീപം റോഡിലേക്ക് മണ്ണിടിഞ്ഞു വീണു. ഇന്നലെ രാവിലെയായിരുന്നു സംഭവം. മൂന്നാർ മേഖലയിൽ കനത്ത മഴ തുടരുകയാണ്. മൂന്നാർ ഗ്യാപ് റോഡിൽ ഇന്നലെ മുതൽ രാത്രികാല യാത്രയും പാതയോരത്തെ വാഹനങ്ങളുടെ പാർക്കിംഗും നിരോധിച്ചു. കുമളി - മൂന്നാർ സംസ്ഥാന പാതയിലും നെടുങ്കണ്ടം - കന്പം അന്തർ സംസ്ഥാന പാതയിലും മണ്ണിടിച്ചിൽ ഉണ്ടായി. സംസ്ഥാന പാതയിൽ നെടുങ്കണ്ടം, കൽകൂന്തൽ, ചതുരംഗപ്പാറ, പാന്പാടുംപാറ എന്നിവിടങ്ങളിൽ മണ്ണിടിഞ്ഞ് ഗതാഗതം ഭാഗികമായി തടസപ്പെട്ടു. മരം വീണ് കല്ലാർകുട്ടി - മൈലാടുംപാറ റോഡിലും ഭാഗികമായി ഗതാഗതം തടസപ്പെട്ടു. ജില്ലയിലെ അണക്കെട്ടുകളിലേക്കുള്ള നീരൊഴുക്കും ശക്തമായിട്ടുണ്ട്. കല്ലാർകുട്ടി, പൊൻമുടി, മലങ്കര അണക്കെട്ടുകളുടെ ഷട്ടറുകൾ തുറന്ന നിലയിലാണ്. തൊമ്മൻകുത്ത് പുഴ കരകവിഞ്ഞൊഴുകി സമീപത്തെ വീടുകളിലും കുരിശുപള്ളിയിലും വെള്ളം കയറി. തൊടുപുഴ - തൊമ്മൻകുത്ത് റോഡിലെ ചപ്പാത്ത് പൂർണമായും വെള്ളത്തിനടിയിലായി. ഇതേത്തുടർന്ന് ഇതുവഴിയുള്ള ഗതാഗതം പൂർണമായും സ്തംഭിച്ചു. ദേവിയാർ പുഴയും കരകവിഞ്ഞൊഴുകി. വാളറ - കുളമാംകുഴി ഉന്നതി പാലത്തിലും വെള്ളം കയറി. കൊന്നത്തടി - വെള്ളത്തൂവൽ റോഡിലേക്കു മണ്ണിടിഞ്ഞ് വീണു. ഇതുവഴിയുള്ള ഗതാഗതം പൂർണമായും തടസപ്പെട്ട നിലയിലാണ്. വെള്ളിയാമറ്റത്ത് മഴവെള്ളപ്പാച്ചിലിൽ ബൈക്ക് ഒലിച്ചുപോയി. വെള്ളിയാമറ്റം പതിക്കമല തോട്ടിലാണ് സംഭവം. അപ്രതീക്ഷിതമായുണ്ടായ മഴ വെള്ളപ്പാച്ചിലിൽ ബൈക്ക് അകപ്പെടുകയായിരുന്നു. അപകടത്തിൽ ആർക്കും പരിക്കില്ല. കരിങ്കുന്നം മഞ്ഞക്കടന്പ് ഭാഗത്ത് നിയന്ത്രണംവിട്ട് റോഡിൽനിന്നു തെന്നിമാറിയ ജീപ്പ് തോട്ടിലേക്കു പതിച്ചെങ്കിലും ഡ്രൈവർ നിസാര പരിക്കുകളോടെ രക്ഷപ്പെട്ടു. ഇദ്ദേഹത്തെ ആശുപത്രിയിൽ പ്രവേശിപ്പിച്ചു. ഡ്രൈവർ മാത്രമേ വാഹനത്തിൽ ഉണ്ടായിരുന്നുള്ളൂവെന്ന് രക്ഷാപ്രവർത്തകർ പറഞ്ഞു. മുണ്ടിയെരുമ ആദിയാർപുരം കാഞ്ഞിരത്തുംമൂട് റോഡിൽ വീണ്ടും മണ്ണിടിച്ചിലുണ്ടായി ഗതാഗതം തടസപ്പെട്ടു. ശക്തമായ കാറ്റിലും മഴയിലും വൈദ്യുതി പോസ്റ്റുകൾ നിലം പതിച്ചു. കഴിഞ്ഞ ദിവസം ഈ പാതയിൽ നിരവധി ഇടങ്ങളിൽ മണ്ണിടിഞ്ഞ് വീണ് വീടുകൾ അപകടാവസ്ഥയിലായിരുന്നു. കല്ലാർകുട്ടി - വെള്ളത്തൂവൽ റോഡിൽ വെള്ളത്തൂവൽ യാക്കോബായ പള്ളിക്ക് സമീപം റോഡിലേക്ക് മണ്ണിടിഞ്ഞും ഗതാഗത തടസമുണ്ടായി. മണ്ണു നീക്കി പിന്നീട് ഗതാഗതം പുനസ്ഥാപിച്ചു. മുതുവാൻകുടി - വെള്ളത്തൂവൽ റോഡിൽ വെള്ളത്തൂവൽ സർക്കാർ ഹയർ സെക്കൻഡറി സ്കൂളിനു സമീപം റോഡിലേക്ക് മുളങ്കൂട്ടം പതിച്ച് വാഹന ഗതാഗതം മുടങ്ങി. ദേശീയപാത - 85ൽ വാളറയ്ക്കു സമീപം മണ്ണിടിഞ്ഞെങ്കിലും ഗതാഗത തടസമുണ്ടായില്ല. ആംബുലൻസ് അപകടത്തിൽപ്പെട്ടു കുളമാവ് : രോഗിയുമായി വന്ന ആംബുലൻസ് റോഡിൽ നിന്നും തെന്നിമാറി തിട്ടയിലിടിച്ചു. തൊടുപുഴ-പുളിയൻമല സംസ്ഥാന പാതയിൽ കുളമാവ് നാടുകാണിക്കു സമീപം അയ്യകാട് ഭാഗത്താണ് അപകടം. അപകടത്തിൽ ആംബുലൻസ് ഡ്രൈവറിന് പരിക്കേറ്റു. വാഹനത്തിൽ ഉണ്ടായിരുന്ന രോഗിയെയും പരിക്കേറ്റ ഡ്രൈവറെയും മൂലമറ്റത്തെ സ്വകാര്യ ആശുപത്രിയിൽ പ്രവേശിപ്പിച്ചു. കട്ടപ്പന ഇരുപതേക്കർ ഗവ.ആശുപത്രിയിൽനിന്നു രോഗിയുമായി വന്ന ആംബുലൻസാണ് അപകടത്തിൽപ്പെട്ടത്. ശക്തമായ മഴയില്‍ വീടിന്‍റെ സംരക്ഷണഭിത്തി ഇടിഞ്ഞു കട്ടപ്പന: നരിയമ്പാറ എട്ടിയില്‍പ്പടി കാഞ്ചിയാര്‍ റോഡില്‍ ഉദയപുരത്തിനു സമീപം ശക്തമായ മഴയില്‍ വീടിന്‍റെ സംരക്ഷണഭിത്തി ഇടിഞ്ഞു. കാഞ്ചിയാര്‍ പഞ്ചായത്ത് എട്ടാം വാര്‍ഡില്‍ കാണക്കാലില്‍ ബൈജുവിന്‍റെ വീടിന്‍റെ സംരക്ഷണഭിത്തിയാണ് ശനിയാഴ്ച ഉച്ചയ്ക്കുശേഷം പെയ്ത മഴയില്‍ ഇടിഞ്ഞത്. വീടിന്‍റെ സംരക്ഷണഭിത്തി കെട്ടി നല്‍കണമെന്നാവശ്യപ്പെട്ട് നിരവധിതവണ പഞ്ചായത്ത് അധികൃതരെ സമീപിച്ചെങ്കിലും നടപടിയുണ്ടാകാതെ വന്നതോടെ ബൈജു സ്വന്തമായി കെട്ടിയ കല്‍ക്കെട്ടാണ് തകര്‍ന്നത്. 20 അടി നീളമുള്ള കല്‍ക്കെട്ടിന്‍റെ ബാക്കി ഭാഗവും അപകടഭീഷണി ഉയര്‍ത്തിയാണ് നില്‍ക്കുന്നത്. കൂലിപ്പണി ചെയ്തു കുടുംബം പുലര്‍ത്തുന്ന ബൈജുവിന് ഇനിയും കല്‍ക്കെട്ട് നിര്‍മിക്കുകയെന്നത് അസാധ്യമാണ്. അധികൃതരുടെ ഭാഗത്തുനിന്നു വീടിന്‍റെ സംരക്ഷണഭിത്തി കെട്ടിനല്‍കുന്നതിനുള്ള നടപടി സ്വീകരിക്കണമെന്നാണ് ഇവരുടെ ആവശ്യം. മലവെള്ളപ്പാച്ചിലിൽ ബൈക്ക് ഒഴുകിപ്പോയി വെള്ളിയാമറ്റം: മലവെള്ളപ്പാച്ചിലിൽ ബൈക്ക് ഒഴുകിപ്പോയി. ഇന്നലെ പെയ്ത കനത്ത മഴയിൽ വെള്ളിയാമറ്റം മുണ്ടയ്ക്കൽ പതിക്കമല ചപ്പാത്തിൽ അപ്രതീക്ഷിതമായുണ്ടായ വെള്ളപ്പാച്ചിലിൽ ചപ്പാത്ത് കടക്കുന്നതിനിടെ യുവാവിന്‍റെ ബൈക്ക് ഒഴുക്കിൽപ്പെടുകയായിരുന്നു.

കാഞ്ഞിരത്തുങ്കൽ നികേഷി(20) ന്‍റെ ബൈക്കാണ് ഒഴുക്കിൽപ്പെട്ടത്. നികേഷ് കോളജിൽ പോയി വരുന്പോഴാണ് അപകടം. നികേഷ് ചാടി രക്ഷപ്പെട്ടെങ്കിലും ബൈക്ക് തോട്ടിലൂടെ ഒഴുകിപ്പോയി. നാട്ടുകാരിൽ ചിലർ കയർ കെട്ടിയാണ് ബൈക്ക് തടഞ്ഞുനിർത്തിയത്. ബൈക്ക് യാത്രികൻ രക്ഷപ്പെട്ടത് തലനാരിഴയ്ക്ക് മുട്ടം: തൊടുപുഴ-മൂലമറ്റം റോഡിൽ മ്രാലയ്ക്ക് സമീപം റോഡരികിൽനിന്ന വൻ മരം കടപുഴകി വീണു. റോഡിലൂടെ വരികയായിരുന്ന കോടിക്കുളം സ്വദേശി മനോജിന്‍റെ ബൈക്കിന് മുകളിലേക്കാണ് മരം വീണത്. മരത്തിന്‍റെ വലിയഭാഗം ദേഹത്ത് പതിക്കാതിരുന്നതിനാൽ മനോജ് തലനാരിഴയ്ക്ക് രക്ഷപ്പെടുകയായിരുന്നു. വെള്ളിയാഴ്ച രാത്രി പത്തോടെയായിരുന്നു സംഭവം. മരം റോഡിലേക്ക് വീണതോടെ ഇതുവഴിയുള്ള ഗതാഗതവും തടസപ്പെട്ടു. അഗ്നിരക്ഷാ സേന എത്തിയാണ് മരം മുറിച്ചുമാറ്റി ഗതാഗത തടസം നീക്കിയത്. പരിക്കേറ്റ മനോജിനെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു.

ആദിവാസി സ്ത്രീയെ ആശുപത്രിയിലെത്തിക്കാൻ ചുമന്നത് അഞ്ചു കിലോമീറ്റർ

മറയൂർ: വട്ടവട വത്സപ്പെട്ടി ആദിവാസി കുടിയിൽ തൊഴിലുറപ്പ് തൊഴിലാളിയായ ഗാന്ധിയമ്മാൾ എന്ന വയോധികയ്ക്ക് പാറയിൽനിന്ന് തെന്നിവീണ് ഗുരുതരമായി പരിക്കേറ്റതിനെത്തുടർന്ന്, വാഹന സൗകര്യമില്ലാത്തതിനാൽ 50-ലധികം പ്രദേശവാസികൾ ചേർന്ന് അവരെ പുതപ്പിൽ കെട്ടി അഞ്ചു കിലോമീറ്ററിലേറെ ചുമന്നാണ് മറയൂരിലെ സ്വകാര്യ ആശുപത്രിയിൽ എത്തിച്ചത്. 2019ലെ മലവെള്ളപ്പാച്ചിലിൽ തകർന്ന വനപാതയാണ് ഇപ്പോഴും ഈ പ്രദേശത്തെ ഏക ആശ്രയം. വട്ടവടയെയും കാന്തല്ലൂരിനെയും ബന്ധിപ്പിക്കുന്ന 14 കിലോമീറ്റർ റോഡ് നിർമാണത്തിന് വനംവകുപ്പിന്‍റെ തടസം നേരിടുന്നതാണ് പ്രശ്നത്തിന്‍റെ മൂലകാരണമെന്ന് പ്രദേശവാസികൾ ആരോപിക്കുന്നു. വത്സപ്പെട്ടി കുടിയിലെ ആദിവാസി വിഭാഗത്തിൽപ്പെട്ട ഗാന്ധിയമ്മാൾ തൊഴിലുറപ്പ് പദ്ധതിയിൽ ജോലി ചെയ്യുന്പോൾ പാറയിൽനിന്ന് വീണ് ഗുരുതരമായി പരിക്കേൽക്കുകയായിരുന്നു. അടിയന്തര ചികിത്സ ആവശ്യമായിരുന്നെങ്കിലും പ്രദേശത്ത് വാഹനങ്ങൾക്ക് പ്രവേശിക്കാൻ കഴിയുന്ന റോഡുകളുടെ അഭാവം വലിയ വെല്ലുവിളിയായി. പ്രദേശവാസികളുടെ പ്രതിഷേധം വാഹന സൗകര്യമില്ലാത്തതിനാൽ അടിയന്തര സാഹചര്യങ്ങളിൽ രോഗികളെ ചുമന്നു കൊണ്ടുപോകേണ്ട ഗതികേടിലാണ് വത്സപ്പെട്ടി കുടിയിലെ താമസക്കാർ. 14 കിലോമീറ്റർ ദൈർഘ്യമുള്ള ഒരു റോഡ് നിർമിച്ചിരുന്നെങ്കിൽ അടിയന്തര ചികിത്സാ സൗകര്യങ്ങൾ ഉൾപ്പെടെ അവശ്യസേവനങ്ങൾ ഈ ആദിവാസിക്കുടിയിലെ ജനങ്ങൾക്ക് ലഭ്യമാകുമായിരുന്നെന്ന് പ്രദേശവാസികൾ പറയുന്നു. എന്നാൽ, വനം വകുപ്പിന്‍റെ നിയന്ത്രണങ്ങൾ ഈ റോഡിന്‍റെ നിർമാണത്തിന് തടസം സൃഷ്ടിക്കുകയാണ്. വനംവകുപ്പിന്‍റെ തടസങ്ങൾ മൂലം ഞങ്ങളുടെ ജീവിതം ദുസ്‌സഹമായിരിക്കുകയാണ്. ഒരു റോഡുണ്ടായിരുന്നെങ്കിൽ, ഗാന്ധിയമ്മാളിനെ ഇത്ര ദൂരം ചുമക്കേണ്ടിവരില്ലായിരുന്നുവെന്ന് കുടിക്കാർ പറഞ്ഞു. 2019ലെ പ്രളയവും റോഡിന്‍റെ ശോചനീയാവസ്ഥയും 2019ലെ മലവെള്ളപ്പാച്ചിലാണ് വത്സപ്പെട്ടി കുടിയിലേക്കുള്ള റോഡ് പൂർണമായും തകർത്തത്. അന്നുമുതൽ ഈ പ്രദേശത്തേക്ക് വാഹനങ്ങൾക്ക് പ്രവേശിക്കാൻ കഴിയാത്ത വനപാത മാത്രമാണ് ജനങ്ങൾക്ക് ആശ്രയം. ഈ വനപാത മഴക്കാലത്ത് കൂടുതൽ അപകടകരവുമാണ്. 2019നു ശേഷം റോഡ് നന്നാക്കാൻ യാതൊരു ശ്രമവും നടന്നിട്ടില്ല. തങ്ങൾക്ക് അടിസ്ഥാന സൗകര്യങ്ങൾ പോലും ലഭിക്കുന്നില്ലന്ന് പ്രദേശവാസികൾ പപറയുന്നു. ഒൗദ്യോഗിക പ്രതികരണം എ. രാജ എംഎൽഎ വത്സപ്പെട്ടിക്കുടിയിലേക്ക് റോഡ് നിർമിക്കാൻ 30 ലക്ഷം രൂപ അനുവദിച്ചിട്ടുണ്ടെന്നും ടെൻഡർ നടപടികൾ പുരോഗമിക്കുകയാണെന്നും അറിയിച്ചു. ഇത്തരം സംഭവങ്ങൾ ആവർത്തിക്കാതിരിക്കാൻ എല്ലാവരും കൂട്ടായി ശ്രമിക്കണമെന്നും അദ്ദേഹം പറഞ്ഞു..

ആശുപത്രി, സ്കൂൾ കെട്ടിടങ്ങൾ: സുരക്ഷാ പരിശോധന നടത്തണം

ഇടുക്കി: ജില്ലയിലെ ആശുപത്രികൾ, സ്കൂളുകൾ, സർക്കാർ സ്ഥാപനങ്ങളുടെ കെട്ടിടങ്ങൾ എന്നിവയുടെ ഫിറ്റ്നസ് പരിശോധന പൂർത്തിയാക്കി സുരക്ഷിതത്വം ഉറപ്പാക്കാനുള്ള നടപടികൾ അടിയന്തരമായി സ്വീകരിക്കണമെന്ന് ജില്ലാ വികസന സമിതിയിൽ കളക്ടർ വി.വിഗ്നേശ്വരി ഉദ്യോഗസ്ഥർക്ക് നിർദേശം നൽകി. റോഡപകടങ്ങൾ വർധിച്ചുവരുന്ന സാഹചര്യത്തിൽ കൊച്ചി - ധനുഷ്കോടി ദേശീയ പാതയിൽ വാളറ, കോട്ടയം - കുമളി റോഡിൽ വണ്ടിപ്പെരിയാർ, കുട്ടിക്കാനം, പെരുവന്താനം എന്നിവിടങ്ങളിൽ ഐസിയു ആംബുലൻസ് സേവനം ഒരുക്കാനും അപകടങ്ങളിൽ പരിക്കേറ്റവർക്ക് പ്രാഥമിക ചികിത്സ ലഭ്യമാക്കാനുമുള്ള സൗകര്യങ്ങൾ ഒരുക്കുന്നതിന് സാധ്യതകൾ പരിശോധിക്കാനും ആരോഗ്യ വകുപ്പിന് നിർദേശം നൽകി. വിഷയവുമായി ബന്ധപ്പെട്ട് 108 ആംബുലൻസ് ലൊക്കേഷൻ പുന:ക്രമീകരിക്കുമെന്ന് ആരോഗ്യ വകുപ്പ് അധികൃതർ അറിയിച്ചു. ഇടമലക്കുടിയിൽ കേബിൾ വഴി മണ്ണിനടിയിലൂടെ വൈദ്യുതി ലൈൻ എത്തിക്കാനുള്ള നടപടി ആരംഭിക്കാൻ കെഎസ്ഇബിക്ക് നിർദേശം നൽകി. ഇതിന് ആവശ്യമായ സൗകര്യം ഒരുക്കാൻ തദ്ദേശസ്വയംഭരണ വകുപ്പിനോട് യോഗം ആവശ്യപ്പെട്ടു. കേരള - തമിഴ്നാട് അതിർത്തിയിൽ ഉദുമൽപേട്ടയിൽ തമിഴ്നാട് വനംവകുപ്പ് ചെക്ക് പോസ്റ്റ് നിർമിച്ച് അനധികൃതമായി ടോൾ ഈടാക്കുന്നു എന്ന പരാതിയിൽ വനം വകുപ്പിന്‍റെ നേതൃത്വത്തിൽ തമിഴ്നാട് വനം അധികൃതരുമായി ചർച്ച നടത്തും. കാഞ്ഞാർ - വാഗമണ്‍ റോഡിൽ സുരക്ഷാ മുന്നറിയിപ്പ് ബോർഡുകൾ സ്ഥാപിക്കണമെന്ന് ബന്ധപ്പെട്ട ഉദ്യോഗസ്ഥരോട് ഡീൻ കുര്യാക്കോസ് എംപി ആവശ്യപ്പെട്ടു. കഞ്ഞിക്കുഴിയിൽ അപകടാവസ്ഥയിൽ നിലകൊള്ളുന്ന ജലസംഭരണി സംബന്ധിച്ച പരാതി പരിഹരിക്കുന്നതിനുള്ള നടപടി സ്വീകരിക്കണമെന്നും എംപി നിർദേശിച്ചു. നിപ്പ പ്രതിരോധ പ്രവർത്തനങ്ങളുടെ ഭാഗമായി ജില്ലയിൽ വവ്വാലുകൾ കൂടുതലായി കാണപ്പെടുന്ന സ്ഥലങ്ങൾ റിപ്പോർട്ട് ചെയ്യാൻ മൃഗസംരക്ഷണ, ആരോഗ്യ വകുപ്പുകളോട് കളക്ടർ ആവശ്യപ്പെട്ടു. വനം, പൊതുമരാമത്ത് വകുപ്പുകളുമായി ബന്ധപ്പെട്ട് നിരവധി പരാതികൾ ജില്ലാ വികസന സമിതിയിൽ ഉയർന്ന് വന്നു. പരാതികളിൽ അടിയന്തര നടപടി സ്വീകരിച്ച് റിപ്പോർട്ട് സമർപ്പിക്കാൻ ജില്ലാ കളക്ടർ ബന്ധപ്പെട്ട ഉദ്യോഗസ്ഥർക്ക് നിർദേശം നൽകി. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, വൈസ് പ്രസിഡന്‍റ് ഉഷാകുമാരി മോഹൻകുമാർ, എഡിഎം ഷൈജു പി.ജേക്കബ്, ജില്ലാ പ്ലാനിംഗ് ഓഫീസർ ദീപ ചന്ദ്രൻ എന്നിവർ പ്രസംഗിച്ചു.

അവശനിലയിൽ കണ്ടെത്തിയ ആനക്കുട്ടി ചരിഞ്ഞു

മൂന്നാർ: മൂന്നാർ മാട്ടുപ്പെട്ടി ടോപ്പ് ഡിവിഷനിൽ അവശനിലയിൽ കണ്ടെത്തിയ കുട്ടിയാന ചരിഞ്ഞു. അണക്കെട്ടിന്‍റെ ക്യാച്ച്മെന്‍റ് ഏരിയയുടെ ഭാഗമായ പുൽമേട്ടിലാണ് കാട്ടാനകക്കുട്ടിയെ അവശനിലയിൽ കഴിഞ്ഞദിവസം കണ്ടെത്തിയത്. വെറ്ററിനറി ഡോക്ടറെ എത്തിച്ച് കാട്ടാനക്കുട്ടിയുടെ ആരോഗ്യസ്ഥിതി വിലയിരുത്തുന്നതിനും ആനയുടെ ആരോഗ്യപ്രശ്നം തിരിച്ചറിയുന്നതിനും വനം വകുപ്പ് നടപടി സ്വീകരിച്ചിരുന്നു. കഴിഞ്ഞ ദിവസം ജനിച്ച കാട്ടാനക്കുഞ്ഞായിരുന്നു ഇതെന്നാണ് ആദ്യം കരുതിയിരുന്നത്. എന്നാൽ, ജനിച്ചിട്ട് ഏതാനും ദിവസങ്ങളായെന്നും കുട്ടിയാന അവശനിലയിലാണെന്നും കണ്ടെത്തുകയായിരുന്നു. കഴിഞ്ഞ രാവിലെയാണ് സംഭവം വനംവകുപ്പിന്‍റെ ശ്രദ്ധയിൽപ്പെട്ടത്. ഉടൻ ആനക്കുട്ടിയെ നിരീക്ഷിക്കാൻ ആർആർടി സംഘത്തിനു നിർദേശം നൽകി. ആനക്കുട്ടിക്ക് നടക്കാൻ കഴിയാതെ വന്നതോടെ പിടിയാനയും മറ്റൊരു മോഴയാനയുമടക്കം ഇവിടെ തന്പടിച്ചിരുന്നു. ആനകൾ ഇവിടെനിന്നു മാറിയ സമയത്ത് വനംവകുപ്പ് ഉദ്യോഗസ്ഥർ നടത്തിയ പരിശോധനയിലാണ് ആനക്കുട്ടി അവശനിലയിലാണെന്ന് കണ്ടെത്തിയത്.

സ്ഥാനാരോഹണവും ക്ഷേമപദ്ധതികളുടെ ഉദ്ഘാടനവും

കട്ടപ്പന: റോട്ടറി ക്ലബ് ഓഫ് അണക്കര സ്പൈസസ് സിറ്റിയുടെ ഭാരവാഹികളുടെ സ്ഥാനം ആരോഹണവും അവാർഡ് വിതരണവും ഇന്നു നടക്കും. വൈകുന്നേരം ആറിന് ചേറ്റുകുഴി വൈറ്റ് ഹൗസ് കണ്‍വൻഷൻ സെന്‍ററിൽ നടക്കുന്ന പരിപാടിയിൽ റോട്ടറി ഡിസ്ട്രിക്ട് ഗവർണർ ജോഷി ചാക്കോ മുഖ്യാതിഥിയായിരിക്കും. ക്ഷേമപദ്ധതികളുടെ ഉദ്ഘാടനം റോട്ടറി ഡിട്രിക്ട് ഡെപ്യൂട്ടി ഡയറക്ടർ യൂനസ് സിദ്ദിഖ് നിർവഹിക്കും. മുൻ ഡിസ്ട്രിക്ട് ഗവർണർ അഡ്വ. ബേബി ജോസഫ്, ഡിട്രിക്ട് ഡയറക്ടർ ജോസ് മാത്യു,അസി. ഗവർണർ പ്രിൻസ് ചെറിയാൻ,സാബു വയലിൽ തുടങ്ങിയവർ പ്രസംഗിക്കും. പ്രസിഡന്‍റായി റെജി മാത്യുവും സെക്രട്ടറിയായി ബിബിൻ വർഗീസും ട്രഷററായി പി.ജി. ഷിനോദും ചുമതലക്കും. മികച്ച വിദ്യാഭ്യാസ സ്ഥാപനമായ കാർമൽ സി എം ഐ പബ്ലിക് സ്കൂളിന് എജുക്കേഷണൽ എക്സലൻസ് അവാർഡും ദേശീയ സൈക്ലിംഗ് ചാന്പ്യൻഷിപ്പിൽ ഗോൾഡ് മെഡലുകൾ കരസ്ഥമാക്കിയ ചേറ്റുകുഴി സ്വദേശിനി അക്സ ആൻ തോമസിന് സ്പോർട്സ് എക്സലൻസ് അവാർഡും വിവിധ പരീക്ഷകളിൽ ഉന്നത വിജയം കരസ്ഥമാക്കിയ പ്രതീക്ഷ പ്രവീണ്‍ ലാലിന് അക്കാദമി എക്സലൻസ് അവാർഡും സമ്മാനിക്കുമെന്ന് ഭാരവാഹികൾ അറിയിച്ചു.

പുളിക്കര വയലിൽ ട്രാവലറും കാറും കൂട്ടിയിടിച്ച് മൂന്നു പേർക്കു പരിക്ക്

മറയൂർ: മൂന്നാർ-ഉദുമൽപ്പേട്ട അന്തർസംസ്ഥാന പാതയിലെ പുളിക്കര വയലിൽ ട്രാവലറും കാറും കൂട്ടിയിടിച്ച് മൂന്നു പേർക്കു പരിക്കേറ്റു. പാലക്കാട് കോങ്ങാട് സ്വദേശികളായ ബൾഗിസ് (52), സീനത്ത് (50), ആതിര (17) എന്നിവർക്കാണ് പരിക്കേറ്റത്. പാലക്കാടുനിന്ന് മൂന്നാർ സന്ദർശനത്തിനെത്തിയ ട്രാവലറിലേക്ക് മൂന്നാറിൽനിന്നു മറയൂരിലേക്കു വരികയായിരുന്ന കാർ നിയന്ത്രണംവിട്ട് ഇടിക്കുകയായിരുന്നുവെന്ന് നാട്ടുകാർ പറഞ്ഞു. അപകടത്തിൽ ട്രാവലറിന്‍റെയും കാറിന്‍റെയും മുൻവശം പൂർണമായും തകർന്നു. പരിക്കേറ്റവരെ മറയൂർ സാമൂഹികാരോഗ്യകേന്ദ്രത്തിൽ പ്രവേശിപ്പിച്ചു. മറയൂർ പോലീസ് സ്ഥലത്തെത്തി മേൽനടപടികൾ സ്വീകരിക്കുകയും ഗതാഗതം പുനഃസ്ഥാപിക്കുകയും ചെയ്തു.

മറയൂരിൽ അച്ഛനെ കൊലപ്പെടുത്താൻ ശ്രമം

മറയൂർ: പട്ടം കോളനിയിൽ അച്ഛനെ കൊലപ്പെടുത്താൻ യുവാവിന്‍റെ ശ്രമം. രാധാഭവൻ വീട്ടിൽ 25ന് രാവിലെ 11.25നാണ് സംഭവം. മകൻ രാജേഷ് എന്ന ലാലു (36) തന്നെ കൊലപ്പെടുത്താൻ ശ്രമിച്ചതായി രാജൻ പരാതി നൽകി. സ്ഥിരമായി മദ്യപിച്ച് കുടുംബം ശ്രദ്ധിക്കാതെ നടക്കുന്ന രാജേഷിനെ അച്ഛൻ രാജൻ ചോദ്യം ചെയ്തതാണ് സംഭവത്തിനു കാരണമായത്. രാജേഷ് വീടിന്‍റെ ടെറസിൽവച്ച് ഇഷ്ടിക എടുത്ത് രാജന്‍റെ ഇടതുനെറ്റിയിൽ എറിഞ്ഞു. ഇതേത്തുടർന്ന് മുറിവേറ്റ് നിലത്തുവീണ രാജന്‍റെ തലയുടെ പിറകിൽ ചതവും സംഭവിച്ചു. തുടർന്ന് രാജേഷ് ടെറസിൽക്കിടന്ന കട്ടിയുള്ള ഇരുന്പുകഷണം ഉപയോഗിച്ച് രാജന്‍റെ മുഖത്ത് രണ്ടുതവണ അടിക്കുകയും ചെയ്തതായി പറയുന്നു. രാജന്‍റെ ഇടതു കണ്ണിനു താഴെയും നെറ്റിയിലും ഗുരുതരമായ മുറിവുകളുണ്ടായി. രാജേഷിനെ മറയൂർ പോലീസ് കസ്റ്റഡിയിലെടുത്ത് അന്വേഷണം ആരംഭിച്ചു.

കാപ്പ ചുമത്തി നാടുകടത്തി

മൂലമറ്റം: നിരവധി കേസുകളിൽ പ്രതിയായ യുവാവിനെ കാപ്പ ചുമത്തി നാടു കടത്തി. അറക്കുളം മുളക്കൽ വിഷ്ണു ജയനെ (30) യാണ് സാമൂഹ്യവിരുദ്ധ പ്രവർത്തനങ്ങൾ തടയൽ നിയമപ്രകാരം ജില്ലയിൽ പ്രവേശിക്കുന്നതിനു ആറുമാസത്തെ വിലക്ക് ഏർപ്പെടുത്തിയത്. എറണാകുളം ഡിഐജിയുടെ ഉത്തരവ് പ്രകാരമാണ് നടപടി. നിരവധി കേസുകളിൽ പ്രതിയായ ഇയാളെ ഇതിനു മുന്പും കാപ്പ ചുമത്തി നാടു കടത്തിയിട്ടുണ്ട്.

നാലരക്കിലോ കഞ്ചാവുമായി പിടിയിൽ

രാജാക്കാട്: വിൽപ്പനയ്ക്കായി കൊണ്ടുവന്ന നാലര കിലോഗ്രാം കഞ്ചാവുമായി ഒരാൾ പോലീസ് പിടിയിലായി. ബൈസൺവാലി ജോസ്ഗിരി സ്വദേശി കെ.ജെ. ജോസാണ് പിടിയിലായത്. ഇടുക്കി എസ്പിക്കു കിട്ടിയ രഹസ്യവിവരത്തെത്തുടർന്ന് എസ്പിയുടെ ഡാൻസാഫ് ടീമും രാ‍ജാക്കാട് എസ്എച്ച്ഒ വി. വിനോദ്കുമാർ, എസ്ഐ സജി എൻ. പോൾ, എസ്ഐ അജിമോൻ, സീനിയർ സിവിൽ പോലീസ് ഓഫീസർമാരായ ജിൻസ്, സന്തോഷ് എന്നിവരും ചേർന്നാണ് പ്രതിയെ പിടികൂടിയത്.

പാംബ്ല അണക്കെട്ടില്‍ കണ്ടെത്തിയ മൃതദേഹം തിരിച്ചറിഞ്ഞു

അടിമാലി: പാംബ്ല അണക്കെട്ടില്‍ കണ്ടെത്തിയ മൃതദേഹം പനംകൂട്ടി സ്വദേശി കാട്ടുവിളയില്‍ ബെഞ്ചമിന്‍ വിന്‍സന്‍റിന്‍റേതാണെന്നു പോലീസ് സ്ഥിരീകരിച്ചു. ഇയാള്‍ കഴിഞ്ഞ മാസം 27ന് പനംകുട്ടി ചപ്പാത്തില്‍നിന്നു പുഴയിലേക്കു ചാടിയിരുന്നു. പനംകുട്ടി കമ്പിളിക്കണ്ടം റോഡ്, ദേശിയപാത 185ല്‍ സംഗമിക്കുന്ന ഭാഗത്തുള്ള പനംകൂട്ടി ചപ്പാത്തില്‍നിന്നാണ് ബെഞ്ചമിന്‍ പുഴയിലേക്കു ചാടിയത്. കനത്ത മഴയെത്തുടര്‍ന്ന് മുതിരപ്പുഴയാറ്റില്‍ ശക്തമായ വെള്ളമൊഴുക്കുണ്ടായിരുന്നു. പോലീസും ഫയര്‍ഫോഴ്സും ചേര്‍ന്ന് ഇയാള്‍ക്കായി തെരച്ചില്‍ നടത്തിയിരുന്നെങ്കിലും കണ്ടെത്താന്‍ കഴിഞ്ഞില്ല. ഇതിനു ശേഷമാണ് ഇന്നലെ പാംബ്ല അണക്കെട്ടില്‍നിന്ന് അജ്ഞാത മൃതദേഹം കണ്ടെത്തിയത്. മൃതദേഹം കരയ്ക്കെത്തിച്ചു നടത്തിയ തുടര്‍ നടപടികളിലാണ് മൃതദേഹം പനംകൂട്ടി സ്വദേശിയുടേതാണെന്ന് സ്ഥിരീകരിച്ചത്. ബന്ധുക്കളുടെ സഹായത്തോടെ മൃതദേഹം തിരിച്ചറിയുകയായിരുന്നു. മൃതദേഹം തുടര്‍ നടപടികള്‍ക്കായി ഇടുക്കി മെഡിക്കല്‍ കോളജിലേക്ക് മാറ്റി.

ബിജെപി യുവസംഗമം ഇന്ന്

തൊടുപുഴ: ബിജെപി ഇടുക്കി നോർത്ത് ജില്ലാ കമ്മിറ്റി സംഘടിപ്പിക്കുന്ന യുവസംഗമം ഇന്ന് രണ്ടിന് തൊടുപുഴയിൽ നടക്കുമെന്ന് ജില്ലാ പ്രസിഡന്‍റ് പി.പി. സാനു പത്രസമ്മേളനത്തിൽ അറിയിച്ചു. തൊടുപുഴ പാപ്പൂട്ടി ഹാളിൽ നടക്കുന്ന സംഗമം സംസ്ഥാന ജനറൽ സെക്രട്ടറി അനൂപ് ആന്‍റണി ഉദ്ഘാടനം ചെയ്യും. യുവമോർച്ച സംസ്ഥാന പ്രസിഡന്‍റായി തെരഞ്ഞെടുക്കപ്പെട്ട മനുപ്രസാദിന് സ്വീകരണം നല്കും. സംസ്ഥാന സെക്രട്ടറിമാരായ പന്തളം പ്രതാപൻ, പി. ശ്യാംരാജ്, ന്യൂനപക്ഷ മോർച്ച ദേശീയ വൈസ് പ്രസിഡന്‍റ് നോബിൾ മാത്യു, ഇടുക്കി നോർത്ത് ജില്ലാ പ്രഭാരി നാരായണൻ നന്പൂതിരി, ജില്ലാ ജനറൽ സെക്രട്ടറി ശ്രീവിദ്യ രാജേഷ്, യുവമോർച്ച സംസ്ഥാന സെക്രട്ടറി അദീന ഭാരതി തുടങ്ങിയവർ പ്രസംഗിക്കും. തൊടുപുഴ താലൂക്കിലെ പ്രമുഖ വ്യക്തികളെ ചടങ്ങിൽ ആദരിക്കും. പത്ര സമ്മേളനത്തിൽ പ്രോഗ്രാം കോ-ഓർഡിനേറ്റർ ജി. സുരേഷ്കുമാർ , ജനറൽ കണ്‍വീനർ ഗോകുൽ ഗോപിനാഥ്, ശ്രീലക്ഷ്മി കെ. സുദീപ്, ബിജീഷ് ബാലൻ, പി.സി. കൃഷ്ണകുമാർ എന്നിവരും പങ്കെടുത്തു.

ഒന്നു ബോർഡ് വയ്ക്കാമോ; അഡ്വഞ്ചർ ടൂറിസ്റ്റുകൾക്ക് ഇവിടേക്ക് സ്വാഗതം !

വണ്ണപ്പുറം: വെണ്‍മറ്റംനാൽപതേക്കർ റോഡ് മഴ പെയ്താൽ തോടാകും. ടൂറിസ്റ്റ് കേന്ദ്രങ്ങളായ തൊമ്മൻകുത്തിനെയും കാറ്റാടിക്കടവിനെയും ബന്ധിപ്പിക്കുന്ന ബൈപാസ് റോഡാണിത്. റോഡ് തകർച്ചയുടെ വക്കിലെത്തിയിട്ട് മാസങ്ങളായെങ്കിലും അധികൃതർ തിരിഞ്ഞുനോക്കാത്ത അവസ്ഥയാണ്. മഴക്കാലം ആരംഭിച്ചതോടെ വിദ്യാർഥികൾക്ക് ഇതുവഴി കാൽനടയായി സഞ്ചരിക്കാൻ കഴിയാത്ത സ്ഥിതിയാണുള്ളത്. ഇടുക്കി-കഞ്ഞിക്കുഴി ഭാഗത്തേക്കും തിരിച്ചും നിരവധി വാഹനങ്ങൾ ഇതുവഴി സഞ്ചരിക്കുന്നുണ്ട്. ഇരുചക്ര വാഹനങ്ങൾ കുഴിയിൽ വീണ് യാത്രക്കാർക്ക് പരിക്കേൽക്കുന്ന സംഭവങ്ങളും പതിവാണ്. ശക്തമായ മഴ പെയ്താൽ റോഡിൽ വെള്ളം നിറയുന്നതോടെ ഇതുവഴി സഞ്ചരിക്കാനാകില്ല. വണ്ണപ്പുറം പഞ്ചായത്തിലെ ഏഴ്, ഒന്പത് വാർഡുകളുടെ അതിർത്തിയിൽ സ്ഥിതിചെയ്യുന്ന റോഡായതിനാൽ ജനപ്രതിനിധികൾ ഒഴിഞ്ഞുമാറുകയാണ്. ഒരു വർഷം മുൻപ് ടൈൽ പാകി ഗതാഗത യോഗ്യമാക്കിയ റോഡിലൂടെ ടോറസ് ലോറികൾ ചീറിപ്പായാൻ തുടങ്ങിയതോടെയാണ് റോഡ് തകർന്നത്. വെള്ളക്കെട്ടുള്ള ഭാഗത്തും ടൈൽ വിരിച്ചിരുന്നെങ്കിൽ റോഡ് തകരുകയില്ലായിരുന്നുവെന്ന് നാട്ടുകാർ പറഞ്ഞു. റോഡ് ഗതാഗത യോഗ്യമാക്കുന്നതിന് അധികൃതർ അടിയന്തര നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.

അല്‍ഫോന്‍സാമ്മ ഈശോയോടൊപ്പം വഴിനടന്നവള്‍: മാര്‍ സെബാസ്റ്റ്യന്‍ വടക്കേല്‍

ഭരണങ്ങാനം: അല്‍ഫോന്‍സാമ്മ തന്‍റെ ജീവിതം ദൈവത്തിനു പൂര്‍ണമായി സമര്‍പ്പിച്ചുവെന്നും അല്‍ഫോന്‍സാമ്മയെപ്പോലെ ഈശോയോടൊപ്പം വഴിനടക്കാന്‍ നാം തയാറായാല്‍ ആന്തരിക ആനന്ദവും ദൈവസ്‌നേഹവും നമ്മുടെ ഹൃദയത്തിലും ജ്വലിക്കുമെന്നും ഉജ്ജയിന്‍ രൂപത മെത്രാന്‍ മാര്‍ സെബാസ്റ്റ്യന്‍ വടക്കേല്‍. ഭരണങ്ങാനത്ത് വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു അദ്ദേഹം. കിട്ടിയ അവസരങ്ങളിലെല്ലാം മറ്റുള്ളവര്‍ക്കു നന്മചെയ്ത് വിശുദ്ധിയുടെ വഴിയിലൂടെ നടന്നു. മറ്റുള്ളവരില്‍ ദൈവത്തെക്കണ്ട് അവര്‍ക്കു ദൈവസ്‌നേഹം പകര്‍ന്നുകൊടുത്ത് പറ്റുന്ന സഹായം ചെയ്തുകൊടുക്കാന്‍ തയാറാകണമെന്നും ബിഷപ് പറഞ്ഞു. ഫാ. ജെയ്‌മോന്‍ വടക്കേടം, ഫാ. ആശിഷ് കീരഞ്ചിറ എന്നിവര്‍ സഹകാര്‍മികരായിരുന്നു. ഇന്നലെ ഫാ. തോമസ് തോട്ടുങ്കല്‍, ഫാ. ജോസഫ് താഴത്തുവരിക്കയില്‍, ഫാ. ആന്‍ഡ്രൂസ് മേക്കാട്ടുകുന്നേല്‍, ഫാ. ജോസഫ് മുളഞ്ഞനാല്‍, ഫാ. സിറില്‍ പൂച്ചാലിക്കളത്തില്‍, ഫാ. ജേക്കബ് പൊട്ടക്കുളം, ഫാ. ജോസഫ് വടക്കേമംഗലത്ത്, ഫാ. ജീവന്‍ കദളിക്കാട്ടില്‍ എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. ജോസഫ് മണര്‍കാട് റംശാ പ്രാര്‍ഥനയ്ക്കും ഫാ. സെബാസ്റ്റ്യന്‍ പെട്ടപ്പുഴ ജപമാലപ്രദക്ഷിണത്തിനും നേതൃത്വം നല്‍കി. അല്‍ഫോന്‍സാ തീര്‍ഥാടനം ഇന്നലെ രാവിലെ ആലുവാ സെന്‍റ് ജോസഫ്‌സ് പൊന്തിഫിക്കല്‍ സെമിനാരിയില്‍നിന്ന് ഈ വര്‍ഷം പൗരോഹിത്യം സ്വീകരിക്കുന്ന ഡീക്കന്‍ന്മാര്‍ അല്‍ഫോന്‍സാമ്മയുടെ കബറിടത്തിലേക്ക് തീര്‍ഥാടനം നടത്തി. തീര്‍ഥാടന കേന്ദ്രം റെക്ടര്‍ ഫാ. അഗസ്റ്റിന്‍ പാലയ്ക്കപ്പറമ്പില്‍, അഡ്മിനിസ്‌ട്രേറ്റര്‍ ഫാ. മാത്യു കുറ്റിയാനിക്കല്‍ എന്നിവര്‍ തീര്‍ഥാടകരെ സ്വീകരിച്ചു. ഇന്നത്തെ തിരുക്കർമങ്ങൾ രാവിലെ 5.30നും 6.45നും വിശുദ്ധ കുര്‍ബാന. 8.30ന് വിശുദ്ധ കുര്‍ബാന (തമിഴ്), 10ന് വിശുദ്ധ കുര്‍ബാന, 11.30ന് വിശുദ്ധ കുര്‍ബാന. 2.30ന് വിശുദ്ധ കുര്‍ബാന (ശ്രവണ പരിമിതര്‍ക്കു വേണ്ടി), 3.30ന് വിശുദ്ധ കുര്‍ബാന, 4.30ന് വിശുദ്ധ കുര്‍ബാന, അഞ്ചിന് വിശുദ്ധ കുര്‍ബാന, 6.15ന് ജപമാലപ്രദക്ഷിണം, ഏഴിന് വിശുദ്ധ കുര്‍ബാന.

അതിസാഹസികം; ഫയർ ഫോഴ്സിന് ബിഗ് സല്യൂട്ട്

തൊടുപുഴ: കാഞ്ഞാർ -വാഗമണ്‍ റൂട്ടിൽ കുന്പങ്കാനം ചാത്തൻപാറ വ്യൂ പോയിന്‍റിൽനിന്ന് അഞ്ഞൂറടി താഴ്ചയുള്ള കൊക്കയിലേക്കു വീണു മരിച്ച വിനോദ സഞ്ചാരിയെ പുറത്തെത്തിക്കാൻ ഫയർ ഫോഴ്സ് നടത്തിയത് അതീവ ദുഷ്കരമായ രക്ഷാ പ്രവർത്തനം. കൂരാക്കൂരിരിട്ടും മഴയും കോടമഞ്ഞും വെല്ലുവിളി സൃഷ്ടിച്ചെങ്കിലും അതിനെയെല്ലാം മറികടന്ന് ഫയർ ഫോഴ്സ് ഉദ്യോഗസ്ഥർ നടത്തിയ ദൗത്യം മാതൃകയായി. വ്യാഴാഴ്ച രാത്രി 08.26 നാണ് റിട്ട. കെഎസ്ഇബി എൻജനിയർ എറണാകുളം തോപ്പുംപടി ചക്കുങ്കൽ (കുത്തുകാട്ട്) തോബിയാസ് ചാക്കോ (58) അബദ്ധത്തിൽ കാൽ വഴുതി കൊക്കയിൽ വീണത്. അദ്ദേഹവും സുഹൃത്തുക്കളും വാഗമണ്‍ സന്ദർശിച്ച് മടങ്ങുന്നതിനിടെയാണ് അപകടമുണ്ടായത്. കാറിന്‍റെ ടയറിൽനിന്ന് കത്തുന്ന മണം വന്നതിനെ തുടർന്ന് വാഹനം നിർത്തി പുറത്തിറങ്ങിയതായിരുന്നു ഇവർ. ഇതിനിടെ തോബിയാസ് അബദ്ധത്തിൽ കാൽ വഴുതി അഗാധമായ കൊക്കയിലേക്ക് പതിക്കുകയായിരുന്നു. കൂടെയുണ്ടായിരുന്നവർ സഹായത്തിനായി അഗ്നിരക്ഷാ സേനയെ അറിയിക്കുകയായിരുന്നു. ഉടൻതന്നെ ജില്ലാ ഫയർ ഓഫീസർ കെ.ആർ. ഷിനോയിയുടെ നേതൃത്വത്തിൽ മൂലമറ്റം, തൊടുപുഴ എന്നിവിടങ്ങളിൽ നിന്നും അഗ്നിരക്ഷാ സേനാംഗങ്ങൾ സംഭവസ്ഥലത്ത് എത്തി. കനത്ത മഴയും, കാറ്റും, ഇരുട്ടും, കോടമഞ്ഞും ഉൾപ്പെടെയുള്ള പ്രതികൂല കാലാവസ്ഥ സേനാംഗങ്ങൾക്ക് രക്ഷാപ്രവർത്തനത്തിന് തടസമായില്ല. പ്രദേശത്ത് വെളിച്ചമില്ലാത്തതിനാൽ ഇൻഫ്ളാറ്റബിൾ ടവർ ലൈറ്റ് സംവിധാനം ഉപയോഗിച്ച് വെളിച്ചം ഒരുക്കി. തുടർന്ന് തൊടുപുഴ യൂണിറ്റിലെ അസിസ്റ്റന്‍റ് സ്റ്റേഷൻ ഓഫീസർ കെ.എ. ജാഫർഖാൻ, ഫയർ ആൻഡ് റെസ്ക്യു ഓഫീസർമാരായ ടി.കെ. വിവേക്, ഷിന്‍റോ ജോസ്, ജിബി പി. വരന്പനാട്ട് എന്നിവർ സേഫ്റ്റി ഹാർനസും, റോപ്പും, അനുബന്ധ ഉപകരണങ്ങളും ധരിച്ച് വാക്കി ടോക്കിയുമായി ചെങ്കുത്തായ വഴുവഴുക്കലും മുൾപ്പടർപ്പുകളും നിറഞ്ഞ പാറക്കെട്ടുകൾക്കിടയിലൂടെ അതിസാഹസികമായി താഴേക്കിറങ്ങുകയായിരുന്നു. അഞ്ഞൂറ് അടിയോളം താഴ്ചയുള്ള മേഖലയാണ് ഇവിടം. തെരച്ചിലിനിടെ തോബിയാസിന്‍റെ ചെരുപ്പും, മൊബൈൽ ഫോണും ഇടയ്ക്ക് കണ്ടെത്താൻ കഴിഞ്ഞു. മൊബൈൽ അപ്പോഴും റിംഗ് ചെയ്യുന്നുണ്ടായിരുന്നു. എങ്കിലും ആളെ കണ്ടെത്താൻ കഴിഞ്ഞില്ല. വീണ്ടും തെരച്ചിൽ നടത്തുന്നതിനിടയിൽ 350 അടിയോളം താഴ്ചയിൽ വീണുകിടക്കുന്ന നിലയിൽ ആളെ കണ്ടെത്തി. തുടർന്ന് റെസ്ക്യു നെറ്റിൽ കയറ്റി മുകളിലേക്ക് എത്തിക്കുന്പോൾ ശരീരം ഉരയാതിരിക്കാനായി സ്പൈൻ ബോർഡ് ഉപയോഗിക്കുകയും ചെയ്തു. തുടർന്ന് വാക്കി ടോക്കിയിലൂടെ സന്ദേശം നൽകി മുകളിലുള്ള മറ്റു ജീവനക്കാരുടെ സഹായത്തോടെ കഠിന പരിശ്രമത്തിനൊടുവിൽ ആളെ മുകളിലെത്തിച്ചു. ആറുമണിക്കൂറോളം സമയമെടുത്താണ് ദൗത്യം പൂർത്തിയാക്കിയത്. കൊക്കയിൽ വീണ തോബിയാസിന് ഗുരുതര പരിക്കേറ്റതിനെ തുടർന്ന് മരണം സംഭവിച്ചിരുന്നു. രക്ഷാപ്രവർത്തനത്തിൽ കാഞ്ഞാർ പോലീസും, സിവിൽ ഡിഫൻസ് അംഗങ്ങളും നാട്ടുകാരും പങ്കെടുത്തു. മുകളിലെത്തിച്ച മൃതദേഹം അഗ്നി രക്ഷാ സേന ആംബുലൻസിൽ തൊടുപുഴ ജില്ലാ ആശുപത്രിയിൽ എത്തിച്ചു. വ്യൂ പോയിന്‍റ് മനോഹരം; പക്ഷേ, സുരക്ഷ ഒട്ടുമില്ല മൂലമറ്റം: കാഞ്ഞാർ - വാഗമണ്‍ റൂട്ടിലെ ചാത്തൻപാറ വ്യൂ പോയിന്‍റിൽ അപകടം തുടർക്കഥയാകുന്നു. ഇതിനോടകം 17 പേർ ഇവിടെനിന്ന് കൊക്കയിൽ വീണിട്ടുണ്ട്. ഇതിൽ മൂന്ന് പേരുടെ ജീവൻ നഷ്ടമായി. എന്നിട്ടും സ്ഥിരം അപകട മേഖലയായ ഇവിടെ മുൻകരുതൽ നടപടി സ്വീകരിക്കാൻ അധികൃതർ തയാറാകുന്നില്ല. പലപ്പോഴും അഗ്നിരക്ഷാ സേന നടത്തുന്ന രക്ഷാപ്രവർത്തനംമൂലമാണ് പലരും ജീവിതത്തിലേക്കു തിരിച്ചുവരുന്നത്. അപായ സൂചനാ മുന്നറിയിപ്പ് ബോർഡുകളോ ക്രാഷ് ബാരിയറോ സുരക്ഷാ വേലിയോ സ്ഥാപിക്കാൻ ഒരു നടപടിയും കൈക്കൊണ്ടിട്ടില്ല. ഇവിടെ സുരക്ഷാ സംവിധാനമൊരുക്കണമെന്ന് സ്ഥലം സന്ദർശിച്ച അറക്കുളം പഞ്ചായത്ത് കമ്മിറ്റി പൊതുമരാമത്ത് വകുപ്പിന് നിർദേശം നൽകിയിരുന്നു. എന്നാൽ പൊതുമരാമത്ത് വകുപ്പ് ഇക്കാര്യത്തിൽ ഇതുവരെ യാതൊരു നടപടിയും സ്വീകരിച്ചിട്ടില്ല. നിത്യേന നൂറുകണക്കിന് വിനോദ സഞ്ചാരികൾ വാഗമണ്‍ സന്ദർശിക്കാൻ പോകുന്ന റോഡാണിത്. വാഗമണ്‍ സന്ദർശിക്കാൻ പോകുന്ന വിനോദ സഞ്ചാരികൾ മനോഹരമായ ഈ വ്യൂ പോയിന്‍റിൽ ഇറങ്ങാതെ പോകില്ല. ഇവിടെ വാഹനം പാർക്ക് ചെയ്യാനും ചിത്രങ്ങൾ പകർത്താനും കഴിയും. എന്നാൽ കൊക്കയുടെ സമീപത്തേക്ക് നീങ്ങിയാൽ അപകടം ഉറപ്പാണ്. കാഞ്ഞാർ - പുള്ളിക്കാനം റോഡിന്‍റെ വശങ്ങളിൽ പല ഭാഗത്തും പാറക്കെട്ടുകളും അഗാധമായ കൊക്കയുമുണ്ട്. ഇവിടെയൊന്നും റോഡിന് മതിയായ വീതിയില്ല. അതിനാൽ അപകട സാധ്യതയേറെയാണ്. റോഡിന് വീതിക്കുറവും കയറ്റവുമായതിനാൽ അപകടം ഉണ്ടായാൽ ഫയർ ഫോഴ്സ് വാഹനം ഓടിയെത്തി രക്ഷാപ്രവർത്തനം നടത്തുന്നതും ദുഷ്കരമാണ്.

പാലാ രൂപത ധന്യതയില്‍; ഇന്ന് പ്ലാറ്റിനം ജൂബിലി സമാപനം

പാലാ: പാലാ രൂപതയ്ക്ക് ധന്യവേള. ഇന്ന് സെന്‍റ് തോമസ് കത്തീഡ്രലില്‍ നടക്കുന്ന സുകൃതസംഗമത്തോടെ രൂപതയുടെ പ്ലാറ്റിനം ജൂബിലിക്ക് സമാപനമാകും. പാലാ രൂപത 75 വര്‍ഷം പൂര്‍ത്തിയാക്കുന്ന ചടങ്ങില്‍ സഭാമേലധ്യക്ഷന്മാര്‍, കേന്ദ്ര-സംസ്ഥാന മന്ത്രിമാര്‍, ജനപ്രതിനിധികള്‍, അല്‍മായ സംഘടനാ നേതാക്കള്‍ തുടങ്ങിയവര്‍ പങ്കുചേരും. ചങ്ങനാശേരി അതിരൂപത വിഭജിച്ച് പാലാ രൂപത രൂപീകൃതമായപ്പോള്‍ മാര്‍ സെബാസ്റ്റ്യന്‍ വയലിലായിരുന്നു പ്രഥമ ബിഷപ്. നിലവില്‍ എഴുപതിനായിരം കുടുംബങ്ങളിലായി മൂന്നര ലക്ഷം സീറോ മലബാര്‍ കത്തോലിക്കാ വിശ്വാസികളുണ്ട്. രൂപതയ്ക്ക് ലഭിച്ച ദൈവാനുഗ്രഹത്തിന് അര്‍പ്പിക്കപ്പെടുന്ന കൃതജ്ഞതാ ബലിയിലും സമ്മേളനത്തിലും പങ്കെടുക്കാന്‍ വിവിധ ഇടവകകളില്‍നിന്നെത്തുന്ന വിശ്വാസികളുടെ സൗകര്യാര്‍ഥം കത്തീഡ്രല്‍ പള്ളിയുടെ ഇരുവശവും വിശാലമായ പന്തല്‍ ക്രമീകരിച്ചിട്ടുണ്ട്. കൂടാതെ പൊതുസമ്മേളനം നടക്കുന്ന ഓഡിറ്റോറിയത്തിന് മുന്‍വശവും പന്തല്‍ ക്രമീകരണമുണ്ട്. പേപ്പല്‍ പതാകകളും മുത്തുക്കുടകളും കൊണ്ട് കത്തീഡ്രല്‍ പള്ളി അങ്കണം അലങ്കരിച്ചിരിക്കുന്നു. 2012ല്‍ സിബിസിഐ സമ്മേളനത്തിനും കഴിഞ്ഞ വര്‍ഷം സീറോ മലബാര്‍ സഭാ എപ്പാര്‍ക്കിയല്‍ അസംബ്ലിക്കും പാലാ രൂപത ആതിഥേയത്വം വഹിച്ചു. പ്ലാറ്റിനം ജൂബിലി വര്‍ഷത്തില്‍ കടപ്ലാമറ്റം, കൊഴുവനാല്‍, കൂത്താട്ടുകുളം ഫൊറോനകള്‍ നിലവില്‍ വന്നു. ചടങ്ങില്‍ പങ്കെടുക്കാന്‍ വിശിഷ്ടാതിഥികളുടെ നിര പാലാ: പാലാ രൂപത പ്ലാറ്റിനം ജൂബിലി ആഘോഷങ്ങളുടെ ഭാഗമായി സെന്‍റ് തോമസ് കത്തീഡ്രലില്‍ രാവിലെ ഒന്‍പതിന് അര്‍പ്പിക്കുന്ന വിശുദ്ധ കുര്‍ബാനയ്ക്ക് ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിക്കും. സീറോ മലങ്കര കത്തോലിക്കാ സഭാധ്യക്ഷന്‍ കര്‍ദിനാള്‍ ബസേലിയോസ് മാര്‍ ക്ലീമിസ് കാതോലിക്കാ ബാവ സന്ദേശം നല്‍കും. 10.45 ന് പൊതുസമ്മേളനത്തില്‍ കര്‍ദിനാള്‍ മാര്‍ ജോര്‍ജ് ആലഞ്ചേരി അധ്യക്ഷത വഹിക്കും. സീറോ മലബാര്‍ സഭാ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്യും. യാക്കോബായ സഭാധ്യക്ഷന്‍ ബസേലിയോസ് ജോസഫ് കാതോലിക്കാ ബാവ മുഖ്യപ്രഭാഷണവും പാലാ ബിഷപ് മാര്‍ ജോസ് കല്ലറങ്ങാട്ട് ആമുഖ പ്രഭാഷണവും നടത്തും. കേന്ദ്രമന്ത്രി ജോര്‍ജ് കുര്യന്‍, സിബിസിഐ പ്രസിഡന്‍റ് മാര്‍ ആന്‍ഡ്രൂസ് താഴത്ത്, മന്ത്രി റോഷി അഗസ്റ്റിന്‍, മാര്‍ ജോസഫ് പള്ളിക്കാപറമ്പില്‍, മാര്‍ ഔഗേന്‍ കുര്യാക്കോസ്, കുര്യാക്കോസ് മാര്‍ സെവേറിയോസ്, എംപിമാരായ ശശി തരൂര്‍, ഫ്രാന്‍സിസ് ജോര്‍ജ്, ജോസ് കെ. മാണി, മലബാര്‍ സ്വതന്ത്ര സുറിയാനി സഭ മെത്രാപ്പോലീത്ത സിറിള്‍ മാര്‍ ബസേലിയോസ്, കെപിസിസി പ്രസിഡന്‍റ് സണ്ണി ജോസഫ് എംഎല്‍എ, മാണി സി. കാപ്പന്‍ എംഎല്‍എ, ആര്‍ച്ച്ബിഷപ് ഡോ. വര്‍ഗീസ് ചക്കാലയ്ക്കല്‍, ആര്‍ച്ച്ബിഷപ് മാര്‍ ജോസഫ് പാംപ്ലാനി, ജോഷ്വ മാര്‍ നിക്കാദേമോസ്, ബിഷപ് റവ. വി.എസ്. ഫ്രാന്‍സിസ്, മാര്‍ ജോസ് പുളിക്കല്‍, മാര്‍ ജോസഫ് സ്രാമ്പിക്കല്‍, മാര്‍ ജേക്കബ് അങ്ങാടിയത്ത്, മാര്‍ ജോസഫ് കൊല്ലംപറമ്പില്‍, ബിഷപ് ഡോ. ജോസ് സെബാസ്റ്റ്യന്‍ തെക്കുംചേരിക്കുന്നേല്‍, പി.സി ജോര്‍ജ്, വികാരി ജനറാള്‍ മോണ്‍. ഡോ. ജോസഫ് തടത്തില്‍, പാസ്റ്ററല്‍ കൗണ്‍സില്‍ ചെയര്‍മാന്‍ ഡോ. കെ.കെ. ജോസ്, സിസ്റ്റര്‍ മരീന ഞാറക്കാട്ടില്‍, ഷീബ ബിനോയി പള്ളിപ്പറമ്പില്‍ എന്നിവര്‍ പ്രസംഗിക്കും.

സ്വത്തു തർക്കം; അനുജൻ ജ്യേഷ്ഠനെയും ഭാര്യയെയും വീട്ടില്‍ കയറി വെട്ടി പരിക്കേല്‍പ്പിച്ചു

നെടുങ്കണ്ടം: സ്വത്തു തർക്കത്തിന്‍റെ പേരിൽ ചെമ്മണ്ണാറില്‍ അനുജൻ ജ്യേഷ്ഠനെയും ഭാര്യയെയും വീട്ടിൽ കയറി വെട്ടിപരിക്കേല്‍പ്പിച്ചു. പ്രതി അറസ്റ്റില്‍. ചെമ്മണ്ണാര്‍ വലിയപറമ്പില്‍ സണ്ണി (58), ഭാര്യ സിനി(48) എന്നിവര്‍ക്കാണ് വെട്ടേറ്റത്. പ്രതി ചെമ്മണ്ണാര്‍ വലിയപറമ്പില്‍ ബിനോയി (56) ആണ് അറസ്റ്റിലായത്. ഇന്നലെ രാവിലെ 7.45ന് ബിനോയി, ദമ്പതികളെ വീട്ടില്‍ കയറി വെട്ടി പരിക്കേല്‍പ്പിക്കുകയായിരുന്നു. വെട്ടേറ്റവരെ ഉടന്‍തന്നെ നാട്ടുകാര്‍ നെടുങ്കണ്ടം താലൂക്ക് ആശുപത്രിയില്‍ എത്തിച്ചെങ്കിലും നില ഗുരുതരമായതിനാല്‍ കട്ടപ്പനയിലെ സ്വകാര്യ ആശുപത്രിയിലേക്കും തുടര്‍ന്ന് കോട്ടയത്തെ സ്വകാര്യ ആശുപത്രിയിലേക്കും മാറ്റി. സംഭവത്തിനു ശേഷം കടന്നുകളഞ്ഞ ബിനോയിയെ വട്ടപ്പാറയിലുള്ള വീടിനു സമീപത്തുനിന്ന് ഉടുമ്പന്‍ചോല പോലീസ് പിടികൂടുകയായിരുന്നു. സ്വത്ത് തര്‍ക്കത്തെ തുടര്‍ന്നുണ്ടായ പൂര്‍വ വൈരാഗ്യമാണ് ആക്രമണത്തിന് കാരണമെന്നാണ് പോലീസിന്‍റെ പ്രാഥമിക നിഗമനം. 2023ല്‍ സിനിയെ ബിനോയി വെട്ടി പരിക്കേല്‍പ്പിച്ചിരുന്നു. ഇതിനു ശേഷം അതേ വര്‍ഷം സണ്ണിയും സിനിയുടെ സഹോദരനും ചേര്‍ന്ന് ബിനോയിയെയും വെട്ടിപരിക്കേല്‍പ്പിച്ചിരുന്നതായി പോലീസ് പറഞ്ഞു.

കട്ടപ്പന ഇഎസ്ഐ ആശുപത്രി: ടെൻഡർ നടപടി വീണ്ടും ആരംഭിച്ചു

കട്ടപ്പന: കേന്ദ്ര ഇഎസ്ഐ കോർപ്പറേഷൻ കട്ടപ്പനയിൽ അനുവദിച്ച 100 ബെഡ്ഡുകളുള്ള ആശുപത്രിയുടെ ടെണ്ടർ നടപടികൾ പുനരാരംഭിച്ചതായി ഡീൻ കുര്യാക്കോസ് എംപി. 2024 മാർച്ചിൽ 150 കോടി രൂപ വകയിരുത്തി ടെൻഡർ നടപടി പൂർത്തികരിച്ചിരുന്നു. എന്നാൽ കരാറെടുത്ത കന്പനിയെ മുൻകാല പ്രവർത്തനങ്ങളിൽ വീഴ്ച വരുത്തിയതിന്‍റെ പേരിൽ കരിന്പട്ടികയിൽ ഉൾപ്പെടുത്തിയതിനെത്തുടർന്നാണ് റീ ടെൻഡർ നടത്തേണ്ടി വന്നത്. അടുത്തമാസം 25ന് ഉച്ചയ്ക്ക് 12 വരെ ടെൻഡർ സ്വീകരിക്കും. 26ന് ഉച്ചയ്ക്ക് 1.30നു ടെൻഡർ തുറക്കും. 100 ബെഡ്ഡുകളുള്ള ആശുപത്രിക്കും സ്റ്റാഫ് ക്വാർട്ടേഴ്സിനുമായി 150 കോടിയാണ് അനുവദിച്ചിട്ടുള്ളത്. നേരത്തേ കട്ടപ്പന മുനിസിപ്പാലിറ്റി നിർമലാസിറ്റിയിൽ അനുവദിച്ച സ്ഥലത്താണ് പദ്ധതി യാഥാർഥ്യമാക്കുന്നത്.

ഏഴല്ലൂരിൽ വ്യാപക നാശ നഷ്ടം

ഏഴല്ലൂർ: കനത്ത കാറ്റിലും മഴയിലും കുമാരമംഗലം പഞ്ചായത്തിലെ ഏഴല്ലൂരിൽ വ്യാപക നാശനഷ്ടം. കല്ലിങ്കൽ സെബാസ്റ്റ്യൻ ജയിംസിന്‍റെ വീട് മരം വീണ് ഭാഗികമായി തകർന്നു. സമീപത്തെ പുരയിടത്തിൽ നിന്ന ആഞ്ഞിലി മരമാണ് ശക്തമായ കാറ്റിൽ വീടിനു മുകളിലേക്ക് വീണത്. അപകട സമയത്ത് വീട്ടിൽ ഭാര്യയും മക്കളും ഹരിത കർമ സേനാംഗവും ഉണ്ടായിരുന്നെങ്കിലും ഇവർ പരിക്കേൽക്കാതെ രക്ഷപ്പെട്ടു. മരം വീണ് പത്തോളം ഷീറ്റുകൾ പൊട്ടിയതായി സെബാസ്റ്റ്യൻ പറഞ്ഞു. സെബാസ്റ്റ്യനും കുടുംബവും കഴിഞ്ഞ തിങ്കളാഴ്ചയാണ് പുതിയ വീട്ടിൽ താമസം ആരംഭിച്ചത്. പുത്തൻപുരയിൽ റോയിയുടെ വീട്ടിലെ തേക്ക് മരങ്ങൾ, കളപ്പുരയിൽ പോൾസന്‍റെ വീട്ടിലെ ആഞ്ഞിലി, റബർ, മാണിക്കുന്നതിൽ ജെൻസന്‍റെ വളപ്പിലെ ജാതി, ആഞ്ഞിലി, മുണ്ടക്കാമറ്റത്തിൽ റോസിലിയുടെ പ്ലാവ്, ഇരുപൂൾ എന്നിവയും കട പുഴകി വീണു. പഞ്ചിക്കാട്ട് ബിജുവിന്‍റെ വളപ്പിലെ ജാതി മരങ്ങൾ റോഡിലേക്ക് മറിഞ്ഞ് ഗതാഗത തടസമുണ്ടായി. മൂന്ന് പോസ്റ്റുകൾ റോഡിലേക്ക് മറിഞ്ഞുവീണതോടെ വൈദ്യുതി ബന്ധം നിലച്ചു. കലൂരിൽ താമസിക്കുന്ന ഷിനിൽ തങ്കപ്പന്‍റെ കാറിന് മുകളിലേക്ക് മരത്തിന്‍റെ ചില്ല വീണ് കേടുപാട് സംഭവിച്ചു. പഞ്ചായത്ത് വൈസ് പ്രസിഡന്‍റ് സിബിൻ വർഗീസ്, മെംബർമാരായ ജിന്‍റു ജേക്കബ്, സജി ചെന്പകശേരിൽ തുടങ്ങിയവർ സ്ഥലം സന്ദർശിച്ചു.

കാറ്റും മഴയും തുടരുന്നു: ജില്ലയിൽ കനത്ത നാശം

തൊടുപുഴ: ജില്ലയിൽ കനത്ത മഴയും കാറ്റും തുടരുന്നു. രണ്ടു ദിവസങ്ങളിലായി ജില്ലയിൽ വ്യാപക നാശമാണ് ഉണ്ടായത്. ഇന്നലെ ശക്തമായ കാറ്റിൽ മരച്ചില്ല ഒടിഞ്ഞുവീണ് ചക്കുപള്ളത്ത് ഏലത്തോട്ടത്തിൽ ജോലി ചെയ്തിരുന്ന സ്ത്രീ മരിച്ചു. കന്പം ഗൂഡല്ലൂർ കെജി പെട്ടി സ്വദേശി സുധ (50) ആണ് മരിച്ചത്. നെടുങ്കണ്ടം ചെന്പകക്കുഴിയിൽ റോഡരികിൽ നിർത്തിയിട്ടിരുന്ന കാറിനു മുകളിൽ മരം വീണ് വാഹനം ഭാഗികമായി തകർന്നു. കുമളി - മൂന്നാർ റോഡിൽ പുളിയൻമലയ്ക്കും വണ്ടൻമേടിനും ഇടയ്ക്ക് ഇരട്ടപ്പാലത്തിനു സമീപം വൈദ്യുതി ലൈനും പോസ്റ്റുകളും തകർത്ത് മരം ഒടിഞ്ഞ് റോഡിലേക്ക് പതിച്ചു. ഇതു വഴിയുള്ള ഗതാഗതം ഒരു മണിക്കൂറോളം തടസപ്പെട്ടു. ഉപ്പുതറ കോതപാറ വരകാലായിൽ ലതയുടെ വീടിനു മുകളിലേക്ക് മരം കടപുഴകി വീണ് വീടിന്‍റെ ഷീറ്റുകൾ നശിക്കുകയും ഭിത്തിക്ക് കേടുപാട് സംഭവിക്കുകയും ചെയ്തു. പലയിടങ്ങളിലും മരം വീണ് ഗതാഗത തടസവും വീടുകൾക്കു കേടുപാടുകളും റിപ്പോർട്ട് ചെയ്തിട്ടുണ്ട്. വ്യാപകമായ കൃഷി നാശവുമുണ്ടായി. ജില്ലയിൽ ഇടവിട്ട് ശക്തമായ മഴ തുടരുന്നതിനാൽ ആശങ്കയിലാണ് മലയോര മേഖല. ജില്ലയിൽ ഇന്നും ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഇന്നലെ രാവിലെ അവസാനിച്ച 24 മണിക്കൂറിൽ ദേവികുളം താലൂക്കിലാണ് കൂടുതൽ മഴ പെയ്തത്. 105.2 മില്ലീമീറ്റർ മഴയാണ് പെയ്തത്. പീരുമേട് - 52, ദേവികുളം- 105.2, തൊടുപുഴ- 62.2, ഇടുക്കി- 75.2 ഉടുന്പൻചോല- 38 എന്നിങ്ങനെയാണ് മറ്റ് താലൂക്കുകളിൽ പെയ്ത മഴയുടെ കണക്ക്.

ശക്തമായ കാറ്റിൽ വൻ മരം വീണ് വീടിന്‍റെ മേൽക്കൂര തകർന്നു

രാജാക്കാട്: മുല്ലക്കാനത്ത് കഴിഞ്ഞ രാത്രിയിലുണ്ടായ ശക്തമായ കാറ്റിൽ വലിയ വേങ്ങ മരം കടപുഴകി വീണ് വീടിന്‍റെ മേൽക്കൂര തകർന്നു. മുകളേൽ ബെറ്റി സാബുവിന്‍റെ വീടാണ് തകർന്നത്. ഭർത്താവ് മരണപ്പെട്ട ബെറ്റിയും വിദ്യാർഥിനികളായ രണ്ടു പെൺമക്കളുമാണ് വീട്ടിൽ താമസിക്കുന്നത്. രാത്രി 12ന് ഉണ്ടായ കനത്ത കാറ്റിലാണ് സമീപവാസിയുടെ പുരയിടത്തിൽ 30 മീറ്ററോളം അകലെനിന്നിരുന്ന 100 ഇഞ്ച് വലിപ്പമുള്ള വേങ്ങമരം കടപുഴകി വീണത്. മരം വീണപ്പോൾ സമീപത്തുള്ള പ്ലാവും സിൽവർ ഓക്ക് മരങ്ങളും ഒടിഞ്ഞുവീണു. രണ്ടു കിടപ്പുമുറികളുടെയും ബാത്ത്റൂമിന്‍റെയും മേൽക്കൂരയിലെ ഷീറ്റുകൾ തകർന്നു. ആളപായം ഉണ്ടായില്ല. മുറ്റത്തെ മഴവെള്ള സംഭരണിക്കും കേടുപാടുകൾ സംഭവിച്ചിട്ടുണ്ട്. പഞ്ചായത്ത് മെംബറും വില്ലേജ് ഉദ്യേഗസ്ഥരും പൊതുപ്രവർത്തകരും വീട്ടിലെത്തി മരങ്ങൾ മുറിച്ചു മാറ്റി ഷീറ്റ് വാങ്ങി ഇടുന്നതിനാവശ്യമായ നടപടികൾ സ്വീകരിച്ചു. രാജാക്കാട് അടിവാരം റോഡിൽ തേജസ് ഏലം ഡ്രയറിന് സമീപം തെങ്ങ് ഒടിഞ്ഞ് റോഡിലേക്കു വീണ് 11 കെ.വി. ലൈനുകൾ പൊട്ടുകയും പോസ്റ്റ് ഒടിയുകയും ചെയ്തതുമൂലം ഏറെ നേരം ഗതാഗതം തടസപ്പെട്ടു. പുലർച്ചെ കെഎസ്‌ഇബി ഉദ്യോഗസ്ഥർ എത്തി തെങ്ങ് മുറിച്ചുമാറ്റി ഗതാഗതം പുനഃസ്ഥാപിച്ചു. ഉച്ചയോടുകൂടിയാണ് വൈദ്യുതി ബന്ധം പുനഃസ്ഥാപിച്ചത്. മേഖലയിൽ പല സ്ഥലത്തും കനത്ത കാറ്റിൽ മരങ്ങളും, ചില്ലകളും ഒടിഞ്ഞു വീണിട്ടുണ്ട്.

റോഡരികില്‍ നിര്‍ത്തിയിട്ടിരുന്ന കാറിനു മുകളിലേക്ക് വന്‍മരം ഒടിഞ്ഞുവീണു

നെടുങ്കണ്ടം: ശക്തമായ കാറ്റില്‍ നെടുങ്കണ്ടത്തിനു സമീപം ചെമ്പകക്കുഴിയില്‍ റോഡരികില്‍ നിര്‍ത്തിയിട്ടിരുന്ന കാറിന് മുകളിലേക്ക് വന്‍മരം ഒടിഞ്ഞുവീണു. ഇന്നലെ ഉച്ചകഴിഞ്ഞ് മൂന്നോടെ കുമളി - മൂന്നാര്‍ ഹൈവേയിലാണ് അപകടം. പ്രദേശവാസിയായ എഴുന്നൂറ്റിമലയില്‍ റിജോയുടെ ഉടമസ്ഥതയിലുള്ള മാരുതി 800 കാറിലേക്ക് റോഡിന് മുകളില്‍നിന്നിരുന്ന വന്‍ വട്ടമരം ഒടിഞ്ഞുവീഴുകയായിരുന്നു. വട്ടമരത്തോടൊപ്പം സമീപത്തുനിന്നിരുന്ന മാവിന്‍റെയും കൊന്നമരത്തിന്‍റെയും ശിഖരങ്ങളും കാറിന് മുകളിലേക്ക് വീണു. വീട്ടില്‍ പാര്‍ക്ക് ചെയ്യാന്‍ സ്ഥലമില്ലാതിരുന്നതിനാല്‍ ഇവര്‍ വാഹനം റോഡരികിലാണ് പാര്‍ക്ക് ചെയ്യുന്നത്. അപകടത്തില്‍ കാറിന്‍റെ മുന്‍വശവും ഗ്ലാസും തകര്‍ന്നു. ഫയർ ഫോഴ്‌സില്‍ വിവരം അറിയിച്ചതിനെത്തുടര്‍ന്ന് ഉദ്യോഗസ്ഥര്‍ സ്ഥലത്തെത്തി മരവും ശിഖരങ്ങളും മുറിച്ചുമാറ്റി കാര്‍ പുറത്തെടുത്തു. അപകട സമയത്ത് റോഡിലൂടെ മറ്റ് വാഹനങ്ങള്‍ കടന്നുപോകാതിരുന്നതിനാല്‍ വന്‍ ദുരന്തമാണ് ഒഴിവായത്.

ഓലിയിട്ട് കുറുനരിക്കൂട്ടങ്ങൾ; ആക്രമണത്തിൽ വലഞ്ഞ് ജനങ്ങൾ

കുമാരമംഗലം: പഞ്ചായത്തിൽ കുറുനരി ശല്യം വ്യാപകം. പഞ്ചായത്തിലെ ആറ്, 12 വാർഡുകളിൽ യുവാവിനെയും നാല് പശുക്കളെയും കുറുനരി ആക്രമിച്ചു. ഫാക്ടറീസ് ആന്‍ഡ് ബോയിലേഴ്സ് വകുപ്പ് ജീവനക്കാരനായ കാഞ്ഞിരക്കാട്ട് ശ്രീജേഷി (34) നെയാണ് കുറുനരി ആക്രമിച്ചത്. കാലിനു പരിക്കേറ്റ ശ്രീജേഷ് ആശുപത്രിയിൽ ചികിത്സതേടി പ്രതിരോധ കുത്തിവയ്പ് എടുത്തു. വ്യാഴാഴ്ച വൈകുന്നേരം അഞ്ചോടെ ശ്രീകുമാറിന്‍റെ വീട്ടുമുറ്റത്താണ് കുറുനരി ആദ്യം എത്തിയത്. മുറ്റത്ത് നിൽക്കുകയായിരുന്ന ശ്രീജേഷിനെ ആക്രമിച്ച ശേഷം സഹോദരൻ സജിയുടെ വീട്ടിലെത്തി രണ്ട് പശുക്കളേയും ആക്രമിച്ചു. പിന്നീട് കുടിയിരുപ്പിൽ പവിത്രന്‍റെ വീട്ടിലെ പശുക്കളേയും കടിച്ചു പരിക്കേൽപ്പിച്ചു. ഒരു വർഷത്തോളമായി പ്രദേശത്ത് കുറുനരി ശല്യം രൂക്ഷമാണെന്ന് നാട്ടുകാർ പറഞ്ഞു. പുലർച്ചെയും സന്ധ്യാ നേരങ്ങളിലും ഇവ കൂട്ടത്തോടെ ഓലിയിട്ട് ഭീതി വിതക്കും. ആ സമയത്ത് കുട്ടികൾക്ക് പുറത്തിറങ്ങാൻ കഴിയാത്ത സ്ഥിതിയാണെന്ന് നാട്ടുകാർ പറഞ്ഞു. കുറുനരി ശല്യം നിയന്ത്രിക്കണമെന്ന് അവശ്യപ്പെട്ട് പഞ്ചായത്ത് പ്രസിഡന്‍റ് ഗ്രേസി തോമസ്, വൈസ് പ്രസിഡന്‍റ് സിബിൻ വർഗീസ്, അംഗങ്ങളായ സാജൻ ചിമ്മിനിക്കാട്ട്, ഷെമീന നാസർ, ലൈല കരീം, സജി ചെന്പകശേരി എന്നിവർ റേഞ്ച് ഓഫീസർ സിജോ സാമുവലിന് പരാതി നൽകി.

കാട്ടാനകളെ തുരത്താൻ പദ്ധതി തയാറാക്കും: ഡിഎഫ്ഒ

തൊടുപുഴ: മുള്ളരിങ്ങാട് മേഖലയിൽനിന്ന് കാട്ടാനകളെ ഉൾക്കാട്ടിലേക്ക് തുരത്താനുള്ള പദ്ധതി വനംവകുപ്പ് ആവിഷ്കരിച്ചുവരികയാണെന്ന് കോതമംഗലം ഡിഎഫ്ഒ സൂരജ് ബെൻ പറഞ്ഞു. നിലവിൽ എട്ടു കിലോമീറ്ററോളം ഫെൻസിംഗ് ഇവിടെയുണ്ട്. ബാക്കിയുള്ള മേഖലയിൽ ഫെൻസിംഗ് സ്ഥാപിക്കാനുള്ള പ്രവർത്തനങ്ങൾ നടന്നുവരികയാണ്. ഇതിനു പുറമേ വയനാട്ടിൽ പരീക്ഷിച്ച് വിജയിച്ച എഐ ഫെൻസിംഗ് സംവിധാനം ഇവിടെ ഏർപ്പെടുത്തുന്ന കാര്യവും ആലോചനയിലാണ്. ഇതിലുള്ള എഐ കാമറയിലൂടെ ആനകളുടെ നീക്കം നിരീക്ഷിച്ച് ഉൾക്കാട്ടിലേക്ക് തുരത്താൻ കഴിയുന്ന സംവിധാനമാണിത്. മൂന്നാഴ്ച പ്രായമുള്ള കുട്ടിയാന ഒപ്പമുള്ളതിനാലാണ് ഇവിടെനിന്ന് കാട്ടാനകൾ ഉൾക്കാട്ടിലേക്കു പോകാതെ തന്പടിക്കാൻ കാരണം. കുട്ടിയാനയുണ്ടെങ്കിൽ ആനകൾ അധികം ദൂരം സഞ്ചരിക്കാറില്ല. അതിനാൽ ഇപ്പോൾ ആനകളെ ഉൾക്കാട്ടിലേക്കു തുരത്തുക പ്രായോഗികമല്ല. പിന്നീട് കുങ്കിയാനകളെ ഉപയോഗിച്ച് ആനകളെ തുരത്താനുള്ള പദ്ധതി നടപ്പാക്കാനാണ് വനംവകുപ്പ് ആലോചിക്കുന്നത്. നിലവിൽ ആർആർടി ടീമിനേയും വനംവകുപ്പ് വാച്ചർമാരേയും ഉപയോഗിച്ച് ആനകളെ ജനവാസ മേഖലയിൽനിന്ന് തുരത്താൻ റേഞ്ച് ഓഫീസർമാർക്ക് നിർദേശം നൽകിയതായും അദ്ദേഹം പറഞ്ഞു.

കാട്ടാനക്കലിയിൽ വിറച്ച് മുള്ളരിങ്ങാട്

തൊടുപുഴ: കാട്ടാന ആക്രമണത്തിന്‍റെ ഭീതി ഒഴിയാതെ മുള്ളരിങ്ങാട്. വെള്ളിയാഴ്ച വൈകുന്നേരം മേഖലയിൽ എത്തിയ ഒറ്റയാൻ പ്രദേശവാസികളെ ആശങ്കയുടെ മുൾമുനയിൽ നിർത്തി. ആനയെ ജനവാസ മേഖലയിൽനിന്ന് തുരത്തുന്നതിനിടെ വനംവകുപ്പിന്‍റെ താത്കാലിക വാച്ചർക്കു പരിക്കേറ്റു. വർഷങ്ങളായുള്ള കാട്ടാനയുടെ ആക്രമണമാണ് ഇവിടെ തുടരുന്നത്. ഏതാനും മാസങ്ങൾക്കു മുന്പ് കാട്ടാനയുടെ ആക്രമണത്തിൽ യുവാവിന്‍റെ ജീവൻ പൊലിഞ്ഞ മുള്ളരിങ്ങാട് അമയൽതൊട്ടിക്കു സമീപമാണ് വീണ്ടും കാട്ടാനയെത്തിയത്. കാട്ടാനകൾ കൂട്ടമായും ഒറ്റയ്ക്കുമാണ് പതിവായി എത്തുന്നത്. വെള്ളിയാഴ്ച പുലർച്ചെയോടെയാണ് അമയൽതൊട്ടി മുസ്‌ലിം പള്ളിക്ക് സമീപം ഒറ്റയാൻ എത്തിയത്. നാട്ടുകാരും താത്കാലിക വാച്ചർമാരും ചേർന്ന് ജനവാസ മേഖലയിലേക്ക് കടന്ന കാട്ടാനയെ തുരത്താൻ ശ്രമിച്ചു. ഇതിനിടെ ആന ജനങ്ങൾക്ക് നേരേ പാഞ്ഞടുത്തു. ആനയുടെ ആക്രമണത്തിൽനിന്ന് ഓടി രക്ഷപ്പെടാൻ ശ്രമിക്കുന്നതിനിടെയാണ് വാച്ചർ സാജു വീണത്. ഇയാൾ ആശുപത്രിയിൽ ചികിത്സ തേടി. കൃഷിയിടങ്ങളിലേക്ക് കടന്ന കാട്ടാന വലിയ നാശനഷ്ടമുണ്ടാക്കി. വനാതിർത്തിയിൽ സ്ഥാപിച്ച ഫെൻസിംഗ് കാട്ടാന തകർത്തെറിഞ്ഞു. നാട്ടുകാരും താത്കാലിക വാച്ചർമാരും നടത്തിയ ഏറെ നേരത്തെ ശ്രമത്തിനൊടുവിലാണ് ആനയെ വനത്തിലേക്ക് തുരത്താനായത്. ഉൾക്കാട്ടിലേക്ക് പോകാതെ ജനവാസ മേഖലയ്ക്കു സമീപം നിലയുറപ്പിച്ചിരിക്കുകയാണ് കാട്ടാന. സംഭവമറിഞ്ഞ് കാളിയാർ എസ്എച്ച്ഒയുടെ നേതൃത്വത്തിൽ പോലീസും സ്ഥലത്തെത്തിയിരുന്നു. കാട്ടാന എത്തിയതിനെത്തുടർന്ന് മുള്ളരിങ്ങാട് ചുള്ളിക്കണ്ടം ഫോറസ്റ്റ് ഓഫീസിൽ ജനപ്രതിനിധികളും നാട്ടുകാരും പ്രതിഷേധവുമായെത്തി. നീറുന്ന വേദനയായി അമർ ഇബ്രാഹിം കഴിഞ്ഞ ഡിസംബർ 29നാണ് അമയൽതൊട്ടിയിൽ അമർ ഇബ്രാഹിം എന്ന യുവാവ് കാട്ടാന ആക്രമണത്തിൽ കൊല്ലപ്പെട്ടത്. സംഭവം വലിയ പ്രതിഷേധത്തിന് വഴിവച്ചിരുന്നു. ഇതോടെ പി.ജെ. ജോസഫ് എംഎൽഎയും ഡീൻ കുര്യാക്കോസ് എംപിയും ഫെൻസിംഗിനായി ഫണ്ട് അനുവദിച്ചു. എന്നാൽ ഇതുപയോഗിച്ച് ജനവാസ മേഖലയിൽ പൂർണമായി ഫെൻസിംഗ് സ്ഥാപിക്കാനാവില്ല. ഇതിനിടെ കളക്ടറേറ്റിൽനിന്ന് നൽകുമെന്ന് അറിയിച്ച ഫണ്ട് ലഭിച്ചുമില്ല. പ്രദേശത്ത് അഞ്ച് കാട്ടാനകളെ വരെ പതിവായി കാണാറുണ്ടെന്നാണ് നാട്ടുകാർ പറയുന്നത്. ഒരു ജീവൻ പൊലിഞ്ഞിട്ട് മാസങ്ങളായിട്ടും കാട്ടാന ശല്യം പൂർണമായി പ്രതിരോധിക്കാനാവാത്തത് വലിയ പ്രതിഷേധത്തിനിടയാക്കിയിട്ടുണ്ട്. ജോയി രക്ഷപ്പെട്ടത് തലനാരിഴയ്ക്ക് ഏതാനും ദിവസം മുന്പ് കാട്ടാനയുടെ മുന്നിൽപ്പെട്ട വ്യാപാരി രക്ഷപ്പെട്ടത് തലനാരിഴയ്ക്കാണ്. മുള്ളരിങ്ങാട് കൂറ്റപ്പിള്ളിൽ ജോയിയാണ് ആനയുടെ മുന്നിൽനിന്ന് രക്ഷപ്പെട്ടത്. കഴിഞ്ഞ ഒന്നിനായിരുന്നു സംഭവം. വലിയ കണ്ടംചാലിൽ ബേക്കറിയും ചായക്കടയും നടത്തുന്ന ജോയി കടയിലേക്ക് പോകാനായി വീട്ടിൽനിന്ന് ബൈക്കിൽ വരുന്നതിനിടെ കാട്ടാന തൊട്ടടുത്ത പുരയിടത്തിൽനിന്ന് റോഡിലേക്ക് ഇറങ്ങുകയായിരുന്നു. ആന തൊട്ടു മുന്നിലെത്തിയതോടെ ബൈക്ക് ഉപേക്ഷിച്ച് ജോയി ഓടി രക്ഷപ്പെടുകയായിരുന്നു. ദുരിതം തുടങ്ങിയിട്ട് വർഷങ്ങൾ മൂന്ന് വർഷത്തിലേറെയായി ഈ പ്രദേശത്ത് കാട്ടാനകളുടെ നിരന്തര ശല്യം തുടങ്ങിയിട്ട്. ജനവാസ മേഖലകളിൽ വിഹരിക്കുന്ന കാട്ടാനകൾ കൃഷിയിടത്തിലിറങ്ങി വിളകൾ ചവിട്ടിമെതിക്കുകയാണ്. കർഷകർ പടക്കം പൊട്ടിച്ചും തീ കൂട്ടിയും ഓടിക്കുന്പോൾ ഉൾവനത്തിലേക്ക് പോകുമെങ്കിലും. താമസിയാതെ തിരിച്ചെത്തും. അമയൽതൊട്ടി പ്രദേശത്ത് 150 കുടുംബങ്ങളുണ്ട്. ഭൂരിഭാഗവും കൃഷിക്കാരും കൂലിപ്പണിക്കാരുമാണ്. വനത്തിന് അരികിലുള്ള റോഡിന് അരക്കിലോമീറ്റർ മാറി പുഴയൊഴുകുന്നുണ്ട്. ഇതു കടന്നാണ് കാട്ടാനകളെത്തുന്നത്. കോതമംഗലം ഫോറസ്റ്റ് ഡിവിഷൻ പരിധിയിലാണ് മുള്ളരിങ്ങാട് വനമേഖല.

റോഡ് തകർന്നു; യുഡിഎഫ് ധർണ നടത്തി

മുട്ടം: തോട്ടുംകര-ചള്ളാവയൽ റോഡ് അടിയന്തരമായി അറ്റകുറ്റപ്പണി നടത്തി ഗതാഗതയോഗ്യമാക്കണമെന്ന് യുഡിഎഫ് മുട്ടം മണ്ഡലം കമ്മിറ്റി ആവശ്യപ്പെട്ടു. മീനച്ചിൽ കുടിവെള്ള പദ്ധതിക്കായി പൈപ്പ‌്‌ലൈൻ സ്ഥാപിച്ച് റോഡ് അടിയന്തരമായി സഞ്ചാര യോഗ്യമാക്കണമെന്നാവശ്യപ്പെട്ട് യുഡിഎഫ് തോട്ടുംകരയിൽ ധർണ നടത്തി. മുട്ടം മണ്ഡലം ചെയർമാൻ അഗസ്റ്റിൻ കള്ളികാട്ട് അധ്യക്ഷത വഹിച്ചു. കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ് ഉദ്ഘാടനം ചെയ്തു. റോഡ് അടിയന്തരമായി ഗതാഗത യോഗ്യമാക്കിയില്ലെങ്കിൽ യുഡിഎഫിന്‍റെ നേതൃത്വത്തിൽ ശക്തമായ സമരപരിപാടികൾ ആരംഭിക്കുമെന്ന് അദ്ദേഹം പറഞ്ഞു. നിയോജക മണ്ഡലം കണ്‍വീനർ എൻ.ഐ. ബെന്നി മുഖ്യ പ്രഭാഷണം നടത്തി. ബിജോയി ജോണ്‍, എം. മോനിച്ചൻ, ബ്ലെയിസ് ജി. വാഴയിൽ, വിനയ് വർധൻഘോഷ്, മേഴ്സി ദേവസ്യ, ഷേർലി അഗസ്റ്റിൻ, സുബൈർ, കെ.എ. പരീത് തുടങ്ങിയവർ പ്രസംഗിച്ചു

ലോറി പിന്നിലിടിച്ചു; കാർ തോട്ടിലേക്ക് മറിഞ്ഞു ഒരാൾക്ക് പരിക്ക്

കരിങ്കുന്നം: ലോറി പിന്നിൽ ഇടിച്ചതിനെത്തുടർന്ന് നിയന്ത്രണം നഷ്ടപ്പെട്ട കാർ തോട്ടിലേക്ക് മറിഞ്ഞു. തോടിന്‍റെ ഇരു ഭിത്തികളിലും കുടുങ്ങിയ കാറിന്‍റെ പിന്നിലെ ചില്ലു പൊട്ടിച്ചാണ് ആളുകളെ രക്ഷപ്പെടുത്തിയത്. ഒരാൾക്ക് പരിക്കേറ്റു. ഇന്നലെ രാവിലെ കരിങ്കുന്നം ഗവ. സ്കൂളിനു സമീപമായിരുന്നു അപകടം. ചേലാമറ്റത്ത് ബലി തർപ്പണം കഴിഞ്ഞു മടങ്ങിയ കോട്ടയം താഴത്തങ്ങാടി സ്വദേശികളായ അഞ്ചംഗ സംഘമാണ് അപകടത്തിൽപ്പെട്ടത്. കരിങ്കുന്നം പോലീസ് മേൽനടപടി സ്വീകരിച്ചു.

ശക്തമായ മഴയിൽ സംരക്ഷണഭിത്തി തകർന്നുവീണു

ചെറുതോണി: ശക്തമായ മഴയിൽ സംരക്ഷണഭിത്തി ഇടിഞ്ഞ് വീട് അപകടാവസ്ഥയിലായി. കഞ്ഞിക്കുഴി പഞ്ചായത്തിൽ ആൽപ്പാറ കൈനികുന്നേൽ ജോസഫിന്‍റെ വിടാണ് അപകട നിലയിലായിരിക്കുന്നത്.കഴിഞ്ഞ ദിവസം ഉണ്ടായ ശക്തമായ മഴയിൽ വീടിന്‍റെ സംരക്ഷണഭിത്തി ഇടിഞ്ഞ് വീഴുകിയിരുന്നു. സംരക്ഷണഭിത്തിയുടെ ബാക്കി ഭാഗം ഏത് നിമിഷവും നിലംപൊത്താവുന്ന അവസ്ഥയിലുമാണ്.നാലംഗ കുടുംബം താമസിക്കുന്ന വീട്ടിൽ ജോസഫിന്‍റെ ഭാര്യ രോഗിയാണ്.സാമ്പത്തികമായി പിന്നോക്കം നിൽക്കുന്ന ഇവർക്ക് സർക്കാരിന്‍റെ ഭാഗത്തുനിന്ന് അടിയന്തര സഹായം ഉണ്ടാകണമെന്നാണ് കുടുംബത്തിന്‍റെ ആവശ്യം.

ഭാരവാഹികളുടെ സ്ഥാനാരോഹണവും കുടുംബ സംഗമവും

രാജാക്കാട്: രാജാക്കാട് റോട്ടറി ക്ലബ്ബ് ഭാരവാഹികളുടെ സ്ഥാനാരോഹണവും കുടുംബ സംഗമവും വിവിധ സേവന പ്രവർത്തനങ്ങളുടെ ഉദ്ഘാടനവും നടത്തി. രാജാക്കാട് വിസിഎസ് ഓഡിറ്റോറിയത്തിൽ നടന്ന ചടങ്ങിൽ പ്രസിഡന്‍റ് സിനോജ് മാത്യു, സെക്രട്ടറി കെ.ജി. രാജേഷ്, ട്രഷറർ നോബി ടി. ബേബി എന്നിവരുടെ നേതൃത്വത്തിലുള്ള ഭാരവാഹികൾക്ക് ചുമതല കൈമാറി. മുൻ പ്രസിഡന്‍റ് മനോജ് ഫിലിപ്പ്, ഫസ്റ്റ് ലേഡി മിനി മനോജ്, സെക്കന്‍റ് ലേഡി സീമ സിനോജ് എന്നിവർ ചേർന്ന് തിരിതെളിയിച്ച് ഉദ്ഘാടനം നിർവഹിച്ചു. മുൻ ഡിസ്ട്രിക്‌ട് ഗവർണർ ബേബി ജോസഫ്, രാജകുമാരി സെന്‍റ് മേരീസ് സ്കൂൾ പ്രിൻസിപ്പൽ ഫാ.ജോബി മാതാളികുന്നേൽ, രാജാക്കാട് പോലീസ് സ്റ്റേഷൻ സിഐ വി.വിനോദ്കുമാർ എന്നിവർ മുഖ്യാതിഥികളായിരുന്നു.

മുന്‍ വികാരി ജനറാള്‍ ഫാ. ജോര്‍ജ് ചൂരക്കാട്ട് ഓര്‍മയായി

പാലാ: പാലാ രൂപത മുന്‍ വികാരി ജനറാള്‍ ഫാ. ജോര്‍ജ് ചൂരക്കാട്ട് ഓര്‍മയായപ്പോള്‍ നാടിനും സമൂഹത്തിനും രൂപതയ്ക്കും നഷ്ടമാവുന്നത് മനുഷ്യസ്നേഹിയായ മുതിര്‍ന്ന വൈദികനെ. രൂപത സെമിനാരി റെക്ടറായും വികാരി ജനറാളായും പാലാ കത്തീഡ്രലടക്കം വിവിധ പള്ളികളില്‍ വികാരിയായും സേവനമനുഷ്ഠിച്ചിട്ടുള്ള ഫാ. ചൂരക്കാട്ട് എല്ലായിടത്തും മനുഷ്യസ്നേഹത്തിന്‍റെ അടയാളപ്പെടുത്തലുകള്‍ ചാര്‍ത്തിയാണ് നിത്യജീവിതത്തില്‍നിന്നു മടങ്ങുന്നത്. വാര്‍ധക്യസഹജമായ അസുഖത്തെത്തുടര്‍ന്നാണ് അദ്ദേഹത്തിന്‍റെ വിയോഗം. ചെറുപ്പത്തിലേതന്നെ തന്‍റെ ചുറ്റുപാടുമുള്ള എല്ലാവരോടും ഏറെ സ്നേഹബന്ധം പുലര്‍ത്തിയിരുന്ന വ്യക്തിയായിരുന്നു അദ്ദേഹം. കുടുംബങ്ങള്‍ തമ്മിലുള്ള ബന്ധങ്ങള്‍ നിലനിര്‍ത്തുന്നതിലും അതു പരിപോഷിപ്പിക്കുന്നതിലും അതീവ ശ്രദ്ധാലുവായിരുന്നു. നാനാജാതി മതസ്ഥരായ കുടുംബങ്ങളുമായും വ്യക്തികളുമായും സ്നേഹബന്ധം കാത്തുസൂക്ഷിക്കുകയും രൂപതയുടെ ഉന്നത ശ്രേണിയിലുള്ള പദവികളിലെത്തിയപ്പോള്‍ പോലും നാട്ടിലുള്ളവരെ ഓര്‍ക്കുകയും ഉഷ്മളത പങ്കുവയ്ക്കുകയും ചെയ്തിരുന്നു. കുരുന്നിന്‍റെ ജീവന്‍ രക്ഷിച്ച ചൂരക്കാട്ടച്ചൻ കാര്‍ ഓടിച്ചുവരവേ തോട്ടില്‍ ഒഴുക്കില്‍പ്പെട്ട സ്‌കൂള്‍ വിദ്യാര്‍ഥിയായ കുരുന്നിനെകണ്ട് വാഹനം നിര്‍ത്തി ഓടിയെത്തി തോട്ടില്‍നിന്ന് കുട്ടിയെ വലിച്ചെടുത്ത് ജീവന്‍ രക്ഷിച്ച സംഭവവും ഫാ. ജോര്‍ജ് ചൂരക്കാട്ടിന്‍റെ ജീവിതത്തിലെ മനുഷ്യസ്നേഹത്തിന്‍റെ നേര്‍സാക്ഷ്യമാണ്. സംസ്‌കാരം ഇന്ന് ഉച്ചകഴിഞ്ഞ് 1.30ന് പാദുവ സെന്‍റ് ആന്‍റണീസ് പള്ളിയില്‍.

സഹനവഴികളില്‍ അല്‍ഫോന്‍സാമ്മ ദൈവത്തിന്‍റെ മുഖം കണ്ടു: മാര്‍ പുളിക്കല്‍

ഭരണങ്ങാനം: അല്‍ഫോന്‍സാമ്മ ലോകത്തിനു നല്‍കുന്ന മഹത്തായ സന്ദേശം സഹനവഴികളില്‍ ദൈവത്തിന്‍റെ മുഖം തെളിമയോടെ കണ്ടെത്തിയവള്‍ എന്നതാണെന്ന് കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍. ഭരണങ്ങാനത്ത് വിശുദ്ധ അല്‍ഫോന്‍സാമ്മയുടെ തിരുനാളില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. അല്‍ഫോന്‍സാമ്മയെക്കുറിച്ചുള്ള പ്രധാനപ്പെട്ട ദര്‍ശനവും ഇതാണ്. സമകാലിക ജീവിതസാഹചര്യങ്ങളില്‍ വിട്ടുകൊടുക്കാന്‍ സാധിച്ചാല്‍, ക്ഷമിക്കാന്‍ സാധിച്ചാല്‍, ത്യജിക്കാന്‍ സാധിച്ചാല്‍, നമ്മുടെ ജീവിതം അത്രമാത്രം സമാധാനപൂര്‍ണമാകുമെന്നും ബിഷപ് പറഞ്ഞു. ഇന്നലെ രാവിലെ ഫാ. ഏബ്രാഹം ഏരിമറ്റം, ഫാ. ജോണ്‍ കണ്ണന്താനം, ഫാ. കുരുവിള തുടിയംപ്ലാക്കല്‍, ഫാ. മാത്യു പുല്ലുകാലായില്‍, ഫാ. ജോര്‍ജ് തെരുവില്‍, ഫാ. സെബാസ്റ്റ്യന്‍ വലിയവീട്ടില്‍ കളപ്പുര, ഫാ. കുര്യന്‍ കാലായില്‍, ഫാ . ജോസ് കിഴക്കേതില്‍ എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. ജോസഫ് കുഴിഞ്ഞാലില്‍ റംശാ പ്രാര്‍ഥനയ്ക്കും ഫാ. ജോസഫ് കുറുപ്പശേരില്‍ ജപമാല പ്രദക്ഷിണത്തിനും നേതൃത്വം വഹിച്ചു. അല്‍ഫോന്‍സ തീര്‍ഥാടനം ഇന്നലെ ഉച്ചകഴിഞ്ഞ് പാലാ രൂപത ഫ്രാന്‍സിസ്‌കന്‍ മൂന്നാം സഭാംഗങ്ങള്‍ വിശുദ്ധ അല്‍ഫോന്‍സാമ്മയുടെ കബറിടത്തിലേയ്ക്ക് തീര്‍ത്ഥാടനം നടത്തി, ഫാ. ആന്‍റണി വെച്ചൂര്‍ ഒഎഫ്എം നേതൃത്വം നല്‍കി. ഇന്നത്തെ തിരുക്കർമങ്ങൾ രാവിലെ 5.30നും 6.45നും 8.30നും പത്തിനും വിശുദ്ധ കുര്‍ബാന. 11.30ന് വിശുദ്ധ കുര്‍ബാന- മാര്‍ സെബാസ്റ്റ്യന്‍ വടക്കേല്‍. ഉച്ചകഴിഞ്ഞ് 2.30നും 3.30നും 4.30നും അഞ്ചിനും വിശുദ്ധ കുര്‍ബാന. 6.15ന് ജപമാല പ്രദക്ഷിണം. രാത്രി ഏഴിന് വിശുദ്ധ കുര്‍ബാന.

വിദ്യാർഥികൾക്ക് റോബോട്ടിക് പരിശീലനം: കർമപദ്ധതിയുമായി കൈറ്റ് രംഗത്ത്

തൊടുപുഴ: പത്താം ക്ലാസിലെ വിദ്യാർഥികൾക്ക് റോബോട്ടിക്സ് മേഖലയിൽ പഠനവും പ്രായോഗിക പരിശീലനവും നടത്തുന്നതിനായി ജില്ലയിലെ 155 സ്കൂളുകളിൽ 1,146 റോബോട്ടിക് കിറ്റുകളുടെ വിതരണം കൈറ്റ് പൂർത്തിയാക്കി. പത്താം ക്ലാസിലെ പുതിയ ഐസിടി പാഠപുസ്തകത്തിലെ റോബോട്ടുകളുടെ ലോകം എന്ന ആറാം അധ്യായത്തിലാണ് സർക്യൂട്ട് നിർമാണം, സെൻസറുകളുടേയും ആക്ചുവേറ്ററുകളുടേയും ഉപയോഗം, കംപ്യൂട്ടർ പ്രോഗ്രാമിംഗ് വഴി ഇലക്ട്രോണിക് ഉപകരണങ്ങളെ നിയന്ത്രിക്കുക തുടങ്ങിയ പ്രവർത്തനങ്ങളിലൂടെ റോബോട്ടിക്സിന്‍റെ പുതിയ ആശയങ്ങളും മാതൃകകളും കണ്ടെത്താൻ കുട്ടികൾക്ക് അവസരം ഒരുക്കിയിരിക്കുന്നത്. സ്കൂളുകൾക്കു നൽകിയ റോബോട്ടിക് കിറ്റിലെ ആർഡിനോ ബ്രഡ് ബോർഡ്, ഐആർ സെൻസർ, സെർവോ മോട്ടോർ, ജംബർ വെയറുകൾ തുടങ്ങിയവ പ്രയോജനപ്പെടുത്തി കൈയുടെ സാന്നിധ്യം തിരിച്ചറിഞ്ഞ് പ്രവർത്തിക്കുന്ന ഓട്ടോമാറ്റിക് സാനിറ്റൈസർ ഡിസ്പെൻസർ തയാറാക്കലാണ് ആദ്യ പ്രവർത്തനം. എഐ ഉപയോഗിച്ചുള്ള ഹോം ഓട്ടോമേഷൻ സംവിധാനത്തിലൂടെ മുഖം തിരിച്ചറിഞ്ഞ് സ്വയം തുറക്കുന്ന സ്മാർട്ട് വാതിലുകൾ തയാറാക്കലാണ് പത്താം ക്ലാസിലെ അടുത്തപ്രവർത്തനം. കൂടുതൽ റോബോട്ടിക് കിറ്റുകൾ ആവശ്യമുള്ള സ്കൂളുകൾക്ക് അവ നേരിട്ട് വാങ്ങാനും കൈറ്റ് സംവിധാനമൊരുക്കിയിട്ടുണ്ട്. പത്താം ക്ലാസിൽ ഐസിടി പാഠപുസ്തകം പഠിപ്പിക്കേണ്ട ജില്ലയിലെ 286 അധ്യാപകർക്ക് റോബോട്ടിക്സിനായുള്ള പ്രത്യേക പരിശീലനം കൈറ്റ് 30നു പൂർത്തിയാക്കും. നിലവിൽ നൽകിയ റോബോട്ടിക് കിറ്റുകൾക്കു പുറമേ ചലിക്കുന്ന റോബോട്ടുകൾ ഉൾപ്പെടെ നിർമിക്കാൻ കഴിയുന്ന അഡ്വാൻസ്ഡ് കിറ്റുകൾ ഈ വർഷം ലിറ്റിൽ കൈറ്റ്സ് യൂണിറ്റുകൾക്ക് ലഭ്യമാക്കുമെന്ന് കൈറ്റ് സിഇഒ കെ.അൻവർ സാദത്ത് അറിയിച്ചു.ഈ വർഷം സ്കൂളുകളിൽ പ്രത്യേക റോബോഫെസ്റ്റുകളും കൈറ്റ് സംഘടിപ്പിക്കുമെന്ന് ജില്ലാ കോ-ഓർഡിനേറ്റർ അറിയിച്ചു.

കേന്ദ്ര സംസ്ഥാന സർക്കാരുകൾ മഹാത്മഗാന്ധിജിയെ തമസ്കക്കരിക്കുന്നു: സി.പി.മാത്യു

ചെറുതോണി: മഹാത്മാഗാന്ധിയെപ്പോലും തമസ്കരിച്ച് രാജ്യത്ത് അക്രമത്തിനും അനീതിക്കും പിന്തുണ നൽകുന്ന സർക്കാരുകളായി കേന്ദ്ര- സംസ്ഥാന സർക്കാരുകൾ മാറിയെന്ന് ഇടുക്കി ഡിസിസി പ്രസിഡന്‍റ് സി.പി. മാത്യു. സംസ്ഥാനത്ത് അധികാരത്തിലിരിക്കുന്ന പിണറായി സർക്കാരും കേന്ദ്രത്തിലധികാരത്തിലിരിക്കുന്ന മോദി സർക്കാരും ഒരേ നാണയത്തിന്‍റെ രണ്ട് വശങ്ങളാണ്. ഗാന്ധിജിയുടെ അഹിംസാ മുദ്രാവാക്യങ്ങൾ കാറ്റിൽപ്പറത്തി കള്ളപ്പണക്കാരെയും കരിഞ്ചന്തക്കാരെയും മയക്കുമരുന്നു കച്ചവടക്കാരെയും പ്രോൽസാഹിപ്പിക്കുന്ന നിലപാടാണ് ഇരു സർക്കാരുകളും സ്വീകരിച്ചു വരുന്നതെന്നും സി.പി. മാത്യു പറഞ്ഞു. വാഴത്തോപ്പ് മണ്ഡലം കോൺഗ്രസ് കമ്മിറ്റി വാഴത്തോപ്പ് പാപ്പൻസ് ഹാളിൽ നടത്തിയ മഹാത്മ ഗാന്ധി ഗ്രാമസ്വരാജ് വികസന സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. മണ്ഡലം പ്രസിഡന്‍റ് സി.പി. സലിം അധ്യക്ഷത വഹിച്ചു. സെമിനാറിൽ കെപിസിസി അംഗം എ.പി.ഉസ്മാൻ മുഖ്യപ്രഭാഷണം നടത്തി. ഡിസിസി ജനറൽ സെക്രട്ടി എം.ഡി. അർജുനൻ ക്ലാസ് നയിച്ചു. ഡിസിസി സെക്രട്ടറിമാരായ എൻ.പുരുഷോത്തമൻ, ആഗസ്തി അഴകത്ത്, ജോസ് അഗസ്റ്റ്യൻ, അഡ്വ. അനീഷ് ജോർജ്, അനിൽ ആനക്കനാട്ട്, ആൻസി തോമസ്, ബിജു നിള, സാലി ബാബു, കെ.എം. ജലാലുദ്ദീൻ, ടി.ജെ.കുര്യൻ, സി.കെ.ജോയി, ബാബു പാലക്കൽ, സന്ധ്യ ബിനോയി, ഷീൻ കുര്യാക്കോസ്, ആലീസ് ജോസ്, മുജീബ് റഹ്മാൻ, സൈമൺ പുത്തൻപുര, ടിന്‍റു സുഭാഷ് ,ഏലിയാമ്മ ജോയി ,റിൻസി സിബി, കുര്യൻ കളപ്പുര, ജോഷി പയസ് എന്നിവർ പ്രസംഗിച്ചു.

രാജീവ് സ്നേഹഭോജനം

പീരുമേട്: ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ സ്നേഹ ഭോജനം-2025 കുമളി അസീസി സ്നേഹാശ്രമത്തിൽ നടത്തും. എല്ലാ ആഴ്ചയിലും ഒരു ദിവസം വീതം പൊതിച്ചോർ വിതരണം ചെയ്യുന്നതാണ് പദ്ധതി. പീരുമേട് ബ്ലോക്കിലെ മണ്ഡലം കമ്മിറ്റികളുടെ നേതൃത്വത്തിലാണ് പൊതിച്ചോർ വിരണം നടത്തുന്നത്. ആഴ്ചയിലെ എല്ലാ വ്യാഴാഴ്ചകളിലും പൊതിച്ചോറുകൾ വിതരണം ചെയ്യും. ചക്കുപള്ളം മണ്ഡലം കമ്മിറ്റിയുടെ നേതൃത്വത്തിലാണ് പൊതിച്ചോർ വിതരണം ആരംഭിച്ചിരിക്കുന്നത്. പദ്ധതിയുടെ ഉദ്ഘാടനം ബ്ലോക്ക് പ്രസിഡന്‍റ് റോബിൻ കാരയ്ക്കാട്ട് നിർവഹിച്ചു. ബ്ലോക്ക് ഭാരവാഹികളായ സാബു വയലിൽ, മിനേഷ് മധുരത്തിൽ, ബിനോയി കക്കാടി, ജോളി സേവ്യർ, യൂത്ത് കോണ്‍ഗ്രസ് മണ്ഡലം പ്രസിഡന്‍റ് ടോണി തോമസ്, ചാണ്ടി, ലിബിൻ എന്നിവരുടെ നേതൃത്വത്തിലാണ് ഭക്ഷണ പ്പൊതികൾ ശേഖരിച്ച് അസീസി സ്നേഹാശ്രമത്തിൽ എത്തിച്ചത്.

ദേശീയപാത -85ലെ നിര്‍മാണ വിലക്ക്: ദേവികുളം താലൂക്കില്‍ 31ന് ഹര്‍ത്താലും ലോംഗ് മാര്‍ച്ചും

അടിമാലി: ദേശീയപാത-85ലെ നിര്‍മാണവിലക്കിനെതിരേ 31ന് ദേവികുളം താലൂക്കില്‍ ഹര്‍ത്താലാചരിക്കും. പ്രശ്‌നപരിഹാരമാവശ്യപ്പെട്ട് അന്നേദിവസം ലോംഗ് മാര്‍ച്ചും സംഘടിപ്പിക്കുമെന്ന് ദേശീയപാത കോ-ഓർഡിനേഷന്‍ കമ്മിറ്റി ഭാരവാഹികൾ അറിയിച്ചു. ദേശിയപാത -85ന്‍റെ ഭാഗമായ നേര്യമംഗലം ഭാഗത്തെ നവീകരണ പ്രവര്‍ത്തനങ്ങള്‍ നിര്‍ത്തിവച്ചതോടെ വലിയ പ്രതിഷേധമാണ് ഉയരുന്നത്. ഇതുമായി ബന്ധപ്പെട്ട് എല്‍ഡിഎഫും യുഡിഎഫും ഹര്‍ത്താല്‍ നടത്തിയിരുന്നു. പ്രതിസന്ധി പരിഹരിക്കാന്‍ അടിയന്തര സര്‍ക്കാര്‍ ഇടപെടല്‍ വേണമെന്ന ആവശ്യവും ശക്തമാണ്. ആറാം മൈലില്‍നിന്ന് നേര്യമംഗലത്തേക്കാണ് ലോംഗ് മാര്‍ച്ചു നടത്തുന്നത്. ഹര്‍ത്താലിനോടും പ്രതിഷേധ പരിപാടികളോടും എല്ലാ വിഭാഗം ആളുകളും സഹകരിക്കണമെന്ന് സംഘാടകർ ആവശ്യപ്പെട്ടു. വനംവകുപ്പിന്‍റെയും പരിസ്ഥിതിവാദികളുടെയും ഉദ്യോഗസ്ഥ ലോബിയുടെയും നീക്കമാണ് ഇപ്പോഴത്തെ പ്രതിസന്ധിക്കു കാരണമെന്ന് ദേശീയപാത കോ-ഓർഡിനേഷന്‍ കമ്മിറ്റി ആരോപിക്കുന്നു. റവന്യു രേഖകളനുസരിച്ച് റോഡുമായി ബന്ധപ്പെട്ട് 100 അടി വീതിയിലുള്ള ഭൂമി പൊതുമരാമത്ത് വകുപ്പിന് അവകാശപ്പെട്ടതാണെന്ന ഹൈക്കോടതി ഡിവിഷന്‍ ബെഞ്ച് വിധി നിലനില്‍ക്കെയാണ് സര്‍ക്കാരിനും ചീഫ് സെക്രട്ടറിക്കും വേണ്ടി അഡീഷണല്‍ ചീഫ് സെക്രട്ടറി, ഈ ഭാഗം വനമാണെന്ന് റിപ്പോര്‍ട്ട് നല്‍കിയത്. ഇതിന്‍റെ അടിസ്ഥാനത്തിലാണ് ഇപ്പോഴത്തെ കോടതി വിധി. പൊതുമരാമത്ത് വകുപ്പിന്‍റെയോ റവന്യൂ വകുപ്പിന്‍റെയോ അഭിഭാഷകര്‍ ഇതു സംബന്ധിച്ച് കോടതിയില്‍ ഹാജരാകുകയോ സത്യവാങ്മൂലം സമര്‍പ്പിക്കുകയോ ചെയ്തില്ല. സര്‍ക്കാര്‍ ഇടപെട്ട് യഥാര്‍ത്ഥ രേഖകള്‍ കോടതിയില്‍ ഹാജരാക്കി നിര്‍മാണ പ്രവര്‍ത്തനങ്ങള്‍ പുനരാരംഭിക്കുന്നതിനുള്ള അടിയന്തര നടപടി സ്വീകരിക്കണമെന്നും ദേശീയപാതാ കോ-ഓർഡിനേഷന്‍ കമ്മിറ്റി ആവശ്യപ്പെട്ടു. 31 ന് രാവിലെ 10.30ന് ആറാംമൈലില്‍നിന്നാരംഭിക്കുന്ന ലോംഗ് മാര്‍ച്ച് 12.30ന് നേര്യമംഗലത്ത് എത്തും. തുടര്‍ന്ന് നേര്യമംഗലം ഫോറസ്റ്റ് റേഞ്ച് ഓഫീസിന് മുന്‍പില്‍ ധര്‍ണ നടക്കും. വിവിധ മത, സാമുദായിക, കര്‍ഷക സംഘടനകളുടെയും രാഷ്ട്രീയപാര്‍ട്ടികളുടെയും വ്യാപാരികളുടെയും ഓട്ടോ, ടാക്‌സി, ബസ് തൊഴിലാളികളുടെയും പിന്തുണ സമരത്തിനുണ്ടെന്നും ദേശീയപാത കോ-ഓർഡിനേഷന്‍ കമ്മിറ്റിക്കുവേണ്ടി റസാഖ് ചുരവേലില്‍, ബെന്നി കോട്ടക്കല്‍, രാജീവ് പ്ലാമൂട്ടില്‍, സന്തോഷ് മാധവന്‍, കെ. കെ. രാജന്‍, കെ. കൃഷ്ണമൂര്‍ത്തി, നവാസ് ഹൈടെക് എന്നിവര്‍ പറഞ്ഞു. പ്രതിഷേധത്തിന് പിന്തുണയുമായി അടിമാലി എസ്എന്‍ഡിപി യൂണിയനും അടിമാലി: ദേശീയപാത -85ലെ നിര്‍മാണ പ്രതിസന്ധി പരിഹരിക്കണമെന്നാവശ്യപ്പെട്ട് 31ന് എന്‍ എച്ച് സംരക്ഷണ സമിതിയുടെ നേതൃത്വത്തില്‍ നടക്കുന്ന പ്രതിഷേധ മാര്‍ച്ചിന് അടിമാലി എസ് എന്‍ ഡി പി യൂണിയന്‍ പിന്തുണ പ്രഖ്യാപിച്ചു. ദേശീയപാത നിര്‍മാണവുമായി ബന്ധപ്പെട്ട പ്രതിസന്ധി പരിഹരിക്കണമെന്ന് അടിമാലി എസ്എന്‍ഡിപി യൂണിയന്‍ കണ്‍വീനര്‍ സജി പറമ്പത്ത് ആവശ്യപ്പെട്ടു.

ക്ഷേത്രങ്ങളില്‍ കര്‍ക്കിടകവാവ് ബലിതര്‍പ്പണ ചടങ്ങുകള്‍ നടന്നു

അടിമാലി: അടിമാലി മേഖലയിലെ വിവിധ ക്ഷേത്രങ്ങളില്‍ കര്‍ക്കടകവാവ് ബലിതര്‍പ്പണ ചടങ്ങുകള്‍ നടന്നു.പിതൃക്കളുടെ സ്മരണയില്‍ ബലിതര്‍പ്പണ ചടങ്ങുകള്‍ക്കായി വിശ്വാസികളുടെ വലിയ തിരക്കാണനുഭവപ്പെട്ടത്. അടിമാലി ശാന്തഗിരി ശ്രീ മഹേശ്വര ക്ഷേത്രത്തില്‍ ക്ഷേത്രം മേല്‍ശാന്തി മഠത്തുംമുറി അജിത്ത് ശാന്തിയുടെ കാര്‍മികത്വത്തിലായിരുന്നു ചടങ്ങുകള്‍. അടിമാലിയുടെ സമീപമേഖലകളിലെ മറ്റ് ക്ഷേത്രങ്ങളിലും പുലര്‍ച്ചെ മുതല്‍ ബലിതര്‍പ്പണ ചടങ്ങുകള്‍ക്കായി വലിയ തിരക്കനുഭവപ്പെട്ടു.

പി.ജെ. ജോസഫിന് ആശംസകളുമായി രമേശ് ചെന്നിത്തല

തൊടുപുഴ: ശതാഭിഷേക നിറവിലെത്തിയ പി.ജെ. ജോസഫ് എംഎൽഎയെ മുൻ പ്രതിപക്ഷനേതാവും കോണ്‍ഗ്രസ് വർക്കിംഗ് കമ്മിറ്റിയംഗവുമായ രമേശ് ചെന്നിത്തല സന്ദർശിച്ചു. വേറിട്ട വഴികളിലൂടെ സഞ്ചരിച്ച് കേരള രാഷട്രീയത്തിൽ സ്വന്തമായി ഇടം നേടിയ വ്യക്തിയാണ് പി.ജെ. ജോസഫെന്ന് രമേശ് ചെന്നിത്തല പറഞ്ഞു. കേക്ക് മുറിച്ച് ഇരുവരും സൗഹൃദം പങ്കിട്ടു. പി.ജെയെ പൊന്നാടയണിയിച്ച് ആദരിക്കുകയും ചെയ്തു. കെപിസിസി.ജനറൽ സെക്രട്ടറി അഡ്വ. എസ്. അശോകൻ, യുഡിഎഫ് കണ്‍വീനർ ജോയി വെട്ടിക്കുഴി, ചെയർമാൻ പ്രഫ.എം.ജെ.ജേക്കബ്, അപു ജോണ്‍ ജോസഫ്, മഹിള കോണ്‍ഗ്രസ് സംസ്ഥാന സെക്രട്ടറി നിഷ സോമൻ, ബ്ലെയിസ് ജി. വാഴയിൽ തുടങ്ങിയവരും വീട്ടിലെത്തിയിരുന്നു. വി.എസ്-ഉമ്മൻചാണ്ടി താരതമ്യം അനാവശ്യം തൊടുപുഴ: വി.എസ്. അച്യുതാനന്ദനെയും ഉമ്മൻചാണ്ടിയേയും താരതമ്യം ചെയ്യുന്നത് അനാവശ്യമാണെന്നും രണ്ടുപേർക്കും രണ്ടു ശൈലിയാണുള്ളതെന്നും മുൻ പ്രതിപക്ഷ നേതാവ് രമേശ് ചെന്നിത്തല പറഞ്ഞു. ശതാഭിഷേക നിറവിലെത്തിയ പി.ജെ.ജോസഫ് എംഎൽഎയ്ക്ക് ആശംസകൾ അറിയിക്കാനെത്തിയ അദ്ദേഹം മാധ്യമങ്ങളോടു പ്രതികരിക്കുകയായിരുന്നു. സമൂഹമാധ്യമങ്ങളിൽ അനാവശ്യ ചർച്ചയാണ് നടക്കുന്നത്. രണ്ടുപേരും ജനസമ്മതരാണ്. വി.എസ്. തൊഴിലാളികൾക്കിടയിലും സാധാരണക്കാർക്കിടയിലുംജീവിച്ച നേതാവാണ്. അതേസമയം ഉമ്മൻ ചാണ്ടി ജനഹൃദയങ്ങളിൽ ജീവിച്ച നേതാവാണെന്നും അദ്ദേഹം പറഞ്ഞു.

മഴക്കൂടുതലിൽ തളർന്ന് കാർഷികമേഖല

തൊടുപുഴ: കാലവർഷം ശക്തമായതോടെ കാർഷികമേഖല പ്രതിസന്ധിയിൽ. മേയ് അവസാനവാരം ആരംഭിച്ച മഴ ഇടതടവില്ലാതെ ഇപ്പോഴും തുടരുകയാണ്. ഇതു ജില്ലയിലെ കാർഷികമേഖലയ്ക്ക് കനത്ത തിരിച്ചടിയായി. മഴയെത്തുടർന്നു വിളകൾ അഴുകിനശിക്കുന്നതും കീടബാധ വർധിച്ചതുമാണ് പ്രതിസന്ധിക്ക് ഇടയാക്കുന്നത്. പച്ചക്കറിവിളകൾ മിക്കതും അഴുകി നശിച്ച നിലയിലാണ്. റംബുട്ടാൻ ഉൾപ്പെടെയുള്ള പല പഴവർഗങ്ങളും മഴക്കൂടുതൽ മൂലം പൊഴിഞ്ഞുവീഴുകയാണ്. ഇത്തവണ സാമാന്യം ഭേദപ്പെട്ട വേനൽമഴ ലഭിച്ചതിനാൽ റംബുട്ടാൻ ചെടികൾ നല്ല കായ്ഫലം നൽകിയിരുന്നു. എന്നാൽ മഴ കനത്തതോടെ ഇവ പൊഴിഞ്ഞതിനാൽ നേർപകുതി പോലും വിളവ് ലഭിക്കാത്ത സാഹചര്യമാണ്. മൂപ്പെത്തി പഴുത്തു തുടങ്ങുന്പോഴേക്കും വലയിട്ട് മൂടി സംരക്ഷിക്കുകയാണ് പതിവ്. ഇത്തവണ ആയിരക്കണക്കിനു രൂപ ചെലവഴിച്ച് വല മൂടിയ തോട്ടങ്ങളിൽ പോലും കായ്പൊഴിച്ചിൽ മൂലം പകുതിപോലും വിള ലഭിക്കില്ലെന്ന് കർഷകർ പറഞ്ഞു. കൃഷി വ്യാപകമായതോടെ ചെടികൾ മൂടാൻ ഉപയോഗിക്കുന്ന വലയ്ക്കും സമീപനാളിൽ വലിയ ക്ഷാമമാണ്. നേരത്തെ കിലോയ്ക്ക് 300-350 രൂപ തോതിൽ ലഭിച്ചിരുന്നതിന് ഇപ്പോൾ 400 രൂപയ്ക്കു മുകളിൽ നൽകണം. ഉത്പാദിപ്പിക്കുന്ന റംബുട്ടാന്‍റെ ഭൂരിഭാഗവും വിദേശ വിപണികളിലേക്ക് കയറ്റി അയയ്ക്കുകയാണ്. അതിനാൽ ആഭ്യന്തര വിപണിവിലയിലെ ഏറ്റക്കുറച്ചിലുകൾ കൃഷിയെ കാര്യമായി ബാധിക്കാറില്ല. കഴിഞ്ഞ സീസണിൽ ചൂട് കൂടിയതിനെത്തുടർന്നും കായ്പൊഴിച്ചിൽ വ്യാപകമായിരുന്നു. ഇത്തവണ വേനൽമഴ ലഭിച്ചതിനാൽ ചൂട് കാര്യമായി വർധിച്ചില്ല. ഇത് കൃഷിക്ക് അനുകൂലമായി മാറുമെന്ന പ്രതീക്ഷയിലിരിക്കുന്പോഴാണ് കാലവർഷം പ്രഹരമേൽപ്പിച്ചത്. അഴുകൽരോഗം വ്യാപകമായതോടെ കൊക്കോ കർഷകർക്കും തിരിച്ചടിയായിരിക്കുകയാണ്. മൂപ്പെത്തുന്നതിനു മുന്പുതന്നെ കായകളിൽ അഴുകൽ രോഗം പിടിപെട്ട് വിളവെടുക്കാനാകാതെ നശിക്കുകയാണ്. വിലയും ഗണ്യമായി കുറഞ്ഞു. നിലവിൽ വിപണിയിലെത്തുന്ന പച്ചക്കായയ്ക്ക് ഗുണനിലവാരം പോരെന്ന കാരണം നിരത്തി കന്പനികൾ വില കുറച്ചിരിക്കുകയാണ്. കിലോയ്ക്ക് 75-85 തോതിലാണ് ലോറേഞ്ച് പ്രദേശങ്ങളിൽ വില. ഹൈറേഞ്ച് മേഖലയിൽ വില 100 രൂപയ്ക്കുമുകളിലാണ്. ഉണക്ക കൊക്കോയ്ക്കും വിലയിൽ ഏറ്റക്കുറച്ചിലുണ്ട്. നിലവിൽ 360-380 രൂപയാണ് തൊടുപുഴ മേഖലയിലെ വില. ഹൈറേഞ്ചിൽ 400നു മുകളിലാണ് വില. പയർ, വെണ്ട, പാവൽ, വഴുതന, ചീര തുടങ്ങിയ പച്ചക്കറികളും മഴക്കൂടുതൽ മൂലം അഴുകി നശിക്കുകയാണ്. കീടബാധയും കൂന്പ് ചീയലും മൂലം കൃഷി നശിക്കുന്ന സ്ഥിതിയാണ്. ഇതിനാൽ ആഭ്യന്തര വിപണയിൽ പച്ചക്കറികളുടെ വരവ് ഗണ്യമായി കുറഞ്ഞിട്ടുണ്ട്. വിഎഫ്പിസികെയുടേതുൾപ്പെടെയുള്ള കാർഷിക വിപണികളിൽ നാമമാത്രമായ പച്ചക്കറികൾ മാത്രമാണ് ഇപ്പോൾ എത്തുന്നത്. ഇത്തവണ കാലവർഷത്തോടൊപ്പം വീശിയടിച്ച കാറ്റിൽ വാഴകൃഷിക്കും കാര്യമായ നാശം സംഭവിച്ചിരുന്നു. ഇതുമൂലം നിലവിൽ വാഴക്കുലകൾക്ക് ക്ഷാമം അനുഭവപ്പെട്ടു തുടങ്ങിയിട്ടുണ്ട്. പാളയം കോടൻ 40-50, ഞാലിപ്പൂവൻ-60-70, റോബസ്റ്റ്-30, നേന്ത്രൻ 65-70, പൂവൻ-40 എന്നിങ്ങനെയാണ് വാഴപ്പഴങ്ങളുടെ വിപണിവില. ഓണം അടുക്കുന്നതോടെ ഇത്തവണ പച്ചക്കറികൾക്കും വാഴപ്പഴങ്ങൾക്കും വില വർധിക്കാനുള്ള സാധ്യതയും കൂടുതലാണ്. ഇതേ നില തുടർന്നാൽ ഇത്തവണ ഓണം വിപണി കൈപൊള്ളിക്കുമോ എന്ന ആശങ്കയിലാണ് ജനങ്ങൾ.

കരിന്പൻ ടൗണിൽ തെരുവുനായയുടെ ആക്രമണത്തിൽ അഞ്ചു പേർക്ക് പരിക്കേറ്റു

ചെറുതോണി: കരിമ്പൻ ടൗണിൽ തെരുവുനായയുടെ ആക്രമണത്തിൽ അഞ്ച് പേർക്ക് പരിക്കേറ്റു. കരിമ്പൻ സ്വദേശികളായ രഞ്ജു(40), റുഖിയ(68), സൂരജ്(19), തോപ്രാംകുടി സ്വദേശി പ്രഭാകരൻ(76), മരിയാപുരം സ്വദേശി ലിന്‍റെ (31) എന്നിവർക്കാണ് പരിക്കേറ്റത്. ഇവരെ ഇടുക്കി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇന്നലെ ഉച്ചകഴിഞ്ഞ് 3.30 നാണ് സംഭവം. ടൗണിലൂടെ അലഞ്ഞു നടന്നിരുന്ന തെരുവുനായ വ്യാപാരിയെയും വഴിയാത്രക്കാരെയും ഓടിച്ചിട്ട് കടിക്കുകയായിരുന്നു. ഇവരുടെ ശരീരത്തിൽ മാരകമായ മുറിവുണ്ടായിട്ടുണ്ട്. സംഭവം കണ്ട് ഓടിക്കൂടിയ നാട്ടുകാർ നായയെ തല്ലിക്കൊല്ലുകയായിരുന്നു. ഹൈറേഞ്ചിലെ ഒട്ടുമിക്ക ടൗണുകളിലും തെരുവ് നായ്ക്കളാൽ ജനങ്ങൾ പൊറുതിമുട്ടിയിരിക്കയാണ്. ഇടുക്കി മെഡിക്കൽ കോളജാശുപത്രി പരിസരത്തും കളക്‌ടറേറ്റിന് സമീപ പ്രദേശങ്ങളിലും തെരുവുനായ ശല്യം രൂക്ഷമാണ്. റോഡരുകിൽ പൊതുജനങ്ങൾ വലിച്ചെറിയുന്ന ഭക്ഷണാവശിഷ്ടങ്ങൾക്കായി കലഹിക്കുന്ന തെരുവുനായകൾ വഴിയാത്രക്കാർക്ക് വലിയ ശല്യമാണ് ഉണ്ടാക്കുന്നത്. ഇരുചക്ര വാഹനങ്ങളിൽ യാത്ര ചെയ്യുന്നവരും കാൽ നടയാത്രികരുമാണ് ഏറെ ബുദ്ധിമുട്ടുന്നത്. പലയിടങ്ങളിൽ നിന്നായി പിടിച്ചു കൊണ്ടുവന്ന് വന്ധ്യംകരണം നടത്തിയശേഷം ടൗണുകളിൽ ഇവറ്റകളെ ഉപേക്ഷിക്കുന്നതായും ആക്ഷേപമുണ്ട്. ശല്യക്കാരായ തെരുവുനായ്ക്കളെ ഷെൽട്ടർ ഹോമിൽ പാർപ്പിക്കുകയോ നശിപ്പിക്കുകയോ ചെയ്യണമെന്നാണ് പൊതുജനങ്ങൾ ആവശ്യപ്പടുന്നത്.

അനുശോചന സമ്മേളനം

മുതലക്കോടം: ജയ്ഹിന്ദ് ലൈബ്രറിയുടെ നേതൃത്വത്തിൽ വി.എസ.്അച്യുതാനന്ദൻ അനുസ്മരണ സമ്മേളനം നടത്തി. ലൈബ്രറി ഹാളിൽ ചേർന്ന യോഗത്തിൽ പ്രസിഡന്‍റ് കെ.സി.സുരേന്ദ്രൻ അധ്യക്ഷത വഹിച്ചു. സിപിഎം മുൻ ജില്ല സെക്രട്ടേറിയറ്റംഗം സി. ജെ. ചാക്കോ ഉദ്ഘാടനം ചെയ്തു. എൻജിഒ യൂണിയൻ ജില്ല പ്രസിഡന്‍റ് കെ.കെ. പ്രസുഭകുമാർ, അഡ്വ. നീറണാൽ ബാലകൃഷ്ണൻ, കെ.ആർ. സോമരാജൻ, അഡ്വ.ബാബു പള്ളിപ്പാട്ട്, കെ.ബി.അജീഷ് കുമാർ, പി.ആർ.വിശ്വൻ, ജോസ് തോമസ് എന്നിവർ പ്രസംഗിച്ചു.

അച്യുതാനന്ദന്‍റെ വിയോഗം മൗനജാഥ നടത്തി

തൊടുപുഴ: മുൻ മുഖ്യമന്ത്രി വി.എസ്. അച്യുതാനന്ദന്‍റെ നിര്യാണത്തിൽ തൊടുപുഴയിൽ സർവകക്ഷി അനുശോചന യോഗം ചേർന്നു. സിപിഎം തൊടുപുഴ വെസ്റ്റ് ഏരിയ കമ്മിറ്റി ഓഫീസ് പരിസരത്തുനിന്നും ആരംഭിച്ച മൗനജാഥ മിനി സിവിൽ സ്റ്റേഷൻ പരിസരത്ത് സമാപിച്ചു. തുടർന്നു ചേർന്ന അനുശോചന യോഗത്തിൽ സിപിഎം ജില്ലാ സെക്രട്ടേറിയറ്റംഗം മുഹമ്മദ് ഫൈസൽ അധ്യക്ഷത വഹിച്ചു. സംസ്ഥാന കമ്മിറ്റിയംഗം കെ.പി. മേരി, നഗരസഭ ചെയർപേഴ്സണ്‍ കെ. ദീപക്ക്, ഡിസിസി പ്രസിഡന്‍റ് സി.പി. മാത്യു, സിപിഐ തൊടുപുഴ താലൂക്ക് സെക്രട്ടറി വി. ആർ. പ്രമോദ്, ബിജെപി നോർത്ത് ജില്ല പ്രസിഡന്‍റ് പി.പി.സാനു, മുസ്ലിം ലീഗ് ജില്ലാ സെക്രട്ടറി കെ.എം.എ. ഷുക്കൂർ, കേരള കോണ്‍ഗ്രസ്-എം ഉന്നതാധികാര സമിതിയംഗം പ്രഫ. കെ.ഐ. ആന്‍റണി, ജനാധിപത്യ കേരള കോണ്‍ഗ്രസ് സംസ്ഥാന ജനറൽ സെക്രട്ടറി ജോർജ് അഗസ്റ്റിൻ, ജനതാദൾ ജില്ലാ പ്രസിഡന്‍റ് റോയി, കേരള കോണ്‍ഗ്രസ്-ബി സംസ്ഥാന സെക്രട്ടറി പോൾസണ്‍ മാത്യു, നവാസ്, ബാബു മഞ്ഞള്ളൂർ, ടോമി ജോർജ്, ലിനു ജോസ് എന്നിവർ പ്രസംഗിച്ചു. ടി.ആർ. സോമൻ അനുശോചന പ്രമേയം അവതരിപ്പിച്ചു.

പന്ത്രണ്ടുകാരിയെ പീഡിപ്പിക്കാൻ ശ്രമിച്ച പ്രതി പിടിയിൽ

തൊടുപുഴ: പന്ത്രണ്ടുകാരിയെ പീഡിപ്പിക്കാൻ ശ്രമിച്ച പ്രതിയെ കരിമണ്ണൂർ എസ്എച്ച്ഒ വി.സി. വിഷ്ണുകുമാറിന്‍റെ നേതൃത്വത്തിൽ അറസ്റ്റ് ചെയ്തു. പന്നൂർ കാവാട്ടുകുന്നേൽ ജിജി ചാക്കോ(51)യെയാണ് അറസ്റ്റ് ചെയ്തത്. കഴിഞ്ഞ തിങ്കളാഴ്ച രാവിലെയായിരുന്നു സംഭവം. പെണ്‍കുട്ടി കുളിക്കുന്നതിനിടെ സമീപത്ത് ഒളിച്ചിരുന്ന പ്രതി കുളിമുറിയിൽ കയറിയാണ് പീഡിപ്പിക്കാൻ ശ്രമിച്ചത്. പുതുപ്പള്ളിയിലെ ആനത്താവളത്തിൽനിന്നാണ് ഇയാളെ പോലീസ് കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സീനിയർ സിവിൽ പോലീസ് ഓഫീസർ ജനിൽ, പി.ടി.രാജേഷ്, സിപിഒ നഹാസ് എന്നിവരും അന്വേഷണ സംഘത്തിലുണ്ടായിരുന്നു.

ചപ്പാത്ത് ആലടിയിൽ ചെളിയിൽ ഓട കോൺക്രീറ്റ് ചെയ്തതായി പരാതി

ഉപ്പുതറ: കുട്ടിക്കാനം - പുളിയൻമല മലയോര ഹൈവേയുടെ ചപ്പാത്ത് - കട്ടപ്പന റീച്ച് നിർമാണത്തിൽ വ്യാപക ക്രമക്കേടെന്ന് പരാതി. ചൊവ്വാഴ്ച ആലടി ടൗണിൽ ചെളിക്കുണ്ടിന് മുകളിൽ കോൺക്രീറ്റ് ചെയ്തതാണ് അവസാനത്തെ പരാതി. പെരിയാറിലെ കുളിക്കടവിലേക്ക് ഇറങ്ങാൻ പഞ്ചായത്ത് നിർമിച്ച റോഡിലെ ചെളിക്കുഴിയിലാണ് കരാറുകാരൻ കോൺക്രീറ്റ് ചെയ്തത്. ചെളി കോരിക്കളഞ്ഞ് മക്ക് നിരത്തിയ ശേഷം കോൺക്രീറ്റ് ചെയ്യണമെന്ന് ആവശ്യപ്പെട്ട നാട്ടുകാരോട് സൂപ്പർവൈസർ തട്ടിക്കയറിയതായും പരാതിയുണ്ട്. മുകളിലെ കോൺക്രീറ്റ് ഉറച്ചതിനാൽ പൊളിച്ചു ചെയ്യാൻ കഴിയില്ലെന്നും കുറച്ചുകൂടി താഴ്ഭാഗത്തുനിന്നും കോൺക്രീറ്റ് ഇട്ട് ഉറപ്പിക്കാമെന്നും സ്ഥലത്തു വന്ന അസി. എൻജിനിയർ പറഞ്ഞു. ചപ്പാത്ത് - കട്ടപ്പന റീച്ചിന്‍റെ നിർമാണം തുടങ്ങിയതു മുതൽ ക്രമക്കേടും പരാതിയുമുണ്ട്. വർഷങ്ങൾ പഴക്കമുള്ള കലുങ്കുകൾ പൊളിച്ചുപണിയാതെ ഇരുവശവും വീതികൂട്ടി നവീകരിക്കുകയാണു ചെയ്തത്. അശാസ്ത്രീയമായ ഇത്തരം നവീകരണം ഭാവിയിൽ ദോഷം ചെയ്യുമെന്ന് നാട്ടുകാർ ആരോപിച്ചു.

ഭാര്യയെ കുത്തിപ്പരിക്കേല്‍പ്പിച്ച യുവാവ് പിടിയിൽ

കട്ടപ്പന: വാഴവര വാകപ്പടിയില്‍ ഭാര്യയെ കുത്തിപ്പരിക്കേല്‍പ്പിച്ച യുവാവിനെ കട്ടപ്പന പോലീസ് അറസ്റ്റുചെയ്തു. വാകപ്പടി കുളത്തപ്പാറ സുനില്‍കുമാറാ(46)ണ് പിടിയിലായത്. ചൊവ്വാഴ്ച രാത്രി ഒൻപതോടെയാണ് സംഭവം. കുടുംബവഴക്കിനെത്തുടര്‍ന്ന് ഭാര്യയെ ഇയാള്‍ കുത്തിവീഴ്ത്തുകയായിരുന്നു. ഗുരുതരമായി പരിക്കേറ്റ യുവതിയെ നാട്ടുകാരാണ് കട്ടപ്പന താലൂക്ക് ആശുപത്രിയില്‍ എത്തിച്ചത്. പിന്നീട് കട്ടപ്പന സെന്‍റ് ജോണ്‍സ് ആശുപത്രിയിലേക്കും ആഴത്തില്‍ മുറിവേറ്റ യുവതിയുടെ നില ഗുരുതരമായതിനാല്‍ കോട്ടയം മെഡിക്കല്‍ കോളജ് ആശുപത്രിയിലേക്കും മാറ്റി. സംഭവത്തിനുശേഷം ഒളിവില്‍പോയ സുനിലിനെ കട്ടപ്പന എസ്എച്ച്ഒ ടി. സി. മുരുകനും എസ്‌ഐമാരായ എബി ജോര്‍ജ്, എസ്.എസ്. ശ്യാം, എഎസ്‌ഐ ലെനിന്‍, എസ് സിപിഒമാരായ ഷമീര്‍ ഉമ്മര്‍, ജോമോന്‍ കുര്യന്‍, ജോജി കെ. മാത്യു, സിപിഒമാരായ രാഹുല്‍ മോഹനന്‍, ബിജു മോന്‍, ജയിംസ് ദേവസ്യ എന്നിവര്‍ ഉള്‍പ്പെടുന്ന സംഘമാണ് പ്രതിയെ അറസ്റ്റ് ചെയ്തത്. ഐ.പി. ഷൈന്‍കുമാറിന്‍റെ നേതൃത്വത്തില്‍ ഫോറന്‍സിക് വിഭാഗം പരിശോധന നടത്തി. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

സർക്കാർ ഓഫീസുകൾ വൃത്തിയാക്കാൻ ഗാന്ധിജയന്തിവരെ കാക്കണോ?

ചെറുതോണി: സർക്കാർ ഓഫീസുകളും പരിസരവും വൃത്തിയാക്കാൻ ഗാന്ധിജയന്തിവരെ കാത്തിരിക്കണോ‍‍? പൊതുജനങ്ങൾ ചോദിക്കുന്നു. ആശുപത്രികൾ, സ്കൂളുകൾ ഉൾപ്പെടെ ഒട്ടുമിക്ക സർക്കാർ സ്ഥാപനങ്ങളും എല്ലാ ദിവസവും മനുഷ്യർ എത്താറുള്ള സ്ഥലമാണോ എന്നു സംശയിക്കേണ്ട അവസ്ഥയിലാണ്. സർക്കാർ സ്ഥാപനങ്ങളുടെ കെട്ടിടങ്ങളുടെ മേൽക്കൂരയിൽ ആൽമരങ്ങൾവരെ വളർന്നുതുടങ്ങിയിട്ടുണ്ട്. കെട്ടിടങ്ങൾ യഥാസമയം അറ്റകുറ്റപ്പണികൾ നടത്താതെയും വൃത്തിയാക്കി പെയിന്‍റ് ചെയ്തു സൂക്ഷിക്കാതെയുമാണ് നശിക്കുന്നത്. കെട്ടിടത്തിൽ കേടുപാടുകളുണ്ടായാൽ പുതിയത് പണിയുകയാണ് ചെയ്യുക. നിരവധി സർക്കാർ സ്കൂളുകൾക്ക് ആവശ്യത്തിലധികം കെട്ടിടങ്ങളുണ്ട്. എന്നാൽ, പലതും ഉപയോഗ യോഗ്യമല്ലതാനും. നിസാര തകരാറുകളുള്ളവപോലും അറ്റകുറ്റപ്പണികൾ നടത്തി ഉപയോഗയോഗ്യമാക്കുന്നതിനു പകരം പുതിയത് നിർമിക്കുന്നു. ജില്ലാ ഭരണ സിരാകേന്ദ്രംപോലും കാടുകയറി നശിച്ചു കൊണ്ടിരിക്കയാണ്. കളക്‌ടറേറ്റിനോടു ചേർന്നു പ്രവർത്തിക്കുന്ന നിക്ഷേപ ഭവന്‍റെ മേൽക്കൂരയിൽ വൃക്ഷത്തൈകൾ ഉൾപ്പെടെ വളരുന്നുണ്ട്. പുറത്തുനിന്ന് നോക്കുന്ന ആർക്കും വ്യക്തമായി കാണാവുന്ന കാടുപടലങ്ങൾ ഇവിടെ ദിവസവും എത്തി ഒപ്പിട്ട് ജോലി ചെയ്യുന്ന ജീവനക്കാർ മാത്രം കാണുന്നില്ല. മോട്ടോർവാഹന വകുപ്പിന്‍റെ വാഹനങ്ങൾ സൂക്ഷിക്കുന്ന പോർച്ചിന്‍റെയും കളക്‌ടറേ റ്റിലെ മറ്റ് കാർപോർച്ചുകളുടെയും മുകളിൽ വള്ളിപ്പടർപ്പുകൾ വളർന്നിരിക്കുകയാണ്. ഭാരം താങ്ങാനാകാതെ തകരഷീറ്റിൽ നിർമിച്ചിരിക്കുന്ന ഷെഡ് തകർന്നുവീണാൽ സർക്കാർ വാഹനങ്ങൾക്ക് കേടുപാടുകൾ സംഭവിക്കാം. കളക്‌ടറേറ്റിന്‍റെ സമീപത്തായി പ്രവർത്തിക്കുന്ന മറ്റ് ഓഫീസുകളുടെയും പരിസരം കാടുപിടിച്ച് വൃത്തിഹീനമായിരിക്കുകയാണ്. ഇവിടെ കുടിവെള്ളം ശേഖരിക്കാനായി സ്ഥാപിച്ചിരിക്കുന്ന പ്ലാസ്റ്റിക് സംഭരണികൾക്ക് അടപ്പുപോലുമില്ല. അടപ്പില്ലാത്തതിനാൽ ജലസംഭരണികളിൽ പക്ഷികളും മറ്റു ജീവികളും മാലിന്യം കൊണ്ടുവന്നിടാനുള്ള സാധ്യത ഏറെയാണ്. ഇവയെല്ലാം യഥാസമയം വൃത്തിയാക്കി സൂക്ഷിച്ചാൽ സർക്കാരിനുണ്ടാകുന്ന നഷ്ടങ്ങളുടെ തോത് കുറയ്ക്കാനാകും. സ്വന്തം വീടും പരിസരവും വൃത്തിയായി സൂക്ഷിക്കുന്നവർ തങ്ങൾ ജോലി ചെയ്യുന്ന സ്ഥാപനവും പരിസരവും വൃത്തിയായി സൂക്ഷിക്കുമെന്നാണ് ജനങ്ങൾ കരുതുന്നത്.

ജില്ലയിൽ മഴയ്ക്ക് ശമനമില്ല; നാളെ ഓറഞ്ച് അലർട്ട്

തൊടുപുഴ: ജില്ലയിൽ കനത്ത മഴ ശമനമില്ലാതെ തുടരുന്നു. ഇന്നലെ ജില്ലയിൽ കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചിരുന്നു. ഇന്ന് യെല്ലോ അലർട്ടും നാളെ ഓറഞ്ച് അലർട്ടും പ്രഖ്യാപിച്ചിട്ടുണ്ട്. ഇന്നലെ തൊടുപുഴ ഉൾപ്പെടെ ലോറേഞ്ച് മേഖലകളിൽ ഇടവേളയില്ലാതെ മഴപെയ്തു. ഇന്നലെ രാവിലെ അവസാനിച്ച 24 മണിക്കൂറിൽ ശരാശരി 47.68 മില്ലിമീറ്റർ മഴയാണ് ജില്ലയിൽ പെയ്തത്. പീരുമേട് താലൂക്കിലാണ് കൂടുതൽ മഴ പെയ്തത്. 86.2 മില്ലിമീറ്റർ മഴയാണ് പീരുമേട്ടിൽ പെയ്തത്. ദേവികുളം- 63.2, തൊടുപുഴ- 28, ഇടുക്കി- 41.8, ഉടുന്പൻചോല - 19.2 എന്നിങ്ങനെയാണ് മറ്റു താലൂക്കുകളിൽ പെയ്ത് മഴയുടെ കണക്ക്. ഹൈറേഞ്ചിന്‍റെ വിവിധ ഭാഗങ്ങളിലും മഴ ശക്തമായി തുടരുന്നുണ്ട്. വരും ദിവസങ്ങളിലും ശക്തമായ മഴയ്ക്കു സാധ്യതയുണ്ടെന്നാണ് കാലാവസ്ഥാ പ്രവചനം. മഴയ്ക്കൊപ്പം കാറ്റിനും സാധ്യതയുണ്ട്. ഈ സാഹചര്യത്തിൽ പൊതുജനങ്ങൾ ജാഗ്രത പാലിക്കണം. കാര്യമായ കെടുതികൾ വൈകിട്ടുവരെ റിപ്പോർട്ട് ചെയ്തിട്ടില്ല. ശക്തമായ മഴയെത്തുടർന്ന് നദികളിലെയും തോടുകളിലെയും ജലനിരപ്പ് ഉയർന്നിട്ടുണ്ട്. നീരൊഴുക്ക് കൂടിയതോടെ ഡാമുകളിലെ ജലനിരപ്പും ഉയരുന്നുണ്ട്. മുല്ലപ്പെരിയാർ ഡാമിൽ ഇന്നലെ രാവിലെ 130.10 അടിയാണ് ജലനിരപ്പ്. ഇടുക്കി ഡാമിൽ 2366.18 അടിയാണ് ഇന്നലെ രാവിലെ ഏഴിന് രേഖപ്പെടുത്തിയത്.

കനത്ത മഴ; റബർ കർഷകർ ദുരിതത്തിൽ

തൊടുപുഴ: കനത്ത മഴ തുടരുന്ന സാഹചര്യത്തിൽ പ്രതിസന്ധിയിലായ റബർ കർഷകർക്കും തൊഴിലാളികൾക്കും അടിയന്തര സഹായമെത്തിക്കണമെന്ന ആവശ്യം ശക്തമായി. ആറുമാസമായി ടാപ്പിംഗ് നടക്കാത്തതിനാലാണ് കർഷകരും ടാപ്പിംഗ് തൊഴിലാളികളും ദുരിതത്തിലായത്. കഴിഞ്ഞ ഫെബ്രുവരി മുതൽ വേനൽക്കാലത്ത് മൂന്നു മാസം ടാപ്പിംഗ് നിർത്തി വച്ചിരുന്നു. റെയിൻ ഗാർഡ് ഇട്ട് ടാപ്പിംഗ് നടത്താൻ കഴിയുമെന്നായിരുന്നു പ്രതീക്ഷിച്ചിരുന്നത്. എന്നാൽ തുടർച്ചയായി പെയ്യുന്ന മഴ മൂലം ടാപ്പിംഗ് മേയ്, ജൂണ്‍, ജൂലൈ മാസങ്ങളിലും മുടങ്ങി. ഇതിനു പുറമേ കനത്ത മഴമൂലം റബറിന്‍റെ ഇലകൾ പൊഴിയുന്ന സ്ഥിതിയാണ്. ഇതുമൂലം റബർ ഉത്പാദനം ഗണ്യമായി കുറയുന്ന അവസ്ഥയാണുള്ളത്. തുടർച്ചയായി ടാപ്പിംഗില്ലാത്തതിനാൽ തൊഴിലാളികളും പട്ടിണിയിലാണ്. കടമെടുത്ത് റെയിൻ ഗാർഡിട്ട കർഷകരും മുന്പെങ്ങുമില്ലാത്ത രീതിയിൽ പ്രതിസന്ധിയിലും കടക്കെണിയിലുമാണ്. ഈ സാഹചര്യത്തിൽ ടാപ്പിംഗ് തൊഴിലാളികൾക്ക് അടിയന്തരമായി സൗജന്യ റേഷനും കിറ്റും റബർ കർഷകർക്ക് പലിശയില്ലാത്ത വായ്പയും അനുവദിക്കണമെന്ന് ഫാർമേഴ്സ് ക്ലബ് യോഗം ആവശ്യപ്പെട്ടു. കേന്ദ്ര-സംസ്ഥാന സർക്കാരുകൾക്ക് റബറിന്‍റെയും ലാറ്റക്സിന്‍റെയും തടിയുടെയും നികുതിയിനത്തിൽ വലിയ വരുമാനമാണ് ലഭിക്കുന്നത്. അതിനാൽ കർഷകരെ സഹായിക്കാൻ സർക്കാരുകൾക്ക് ബാധ്യതയുണ്ടെന്ന് യോഗം വിലയിരുത്തി. പ്രസിഡന്‍റ് ടോം ചെറിയാൻ, സെക്രട്ടറി രാജീവ് പാടത്തിൽ, ട്രഷറർ ഷൈജോ ജോസഫ് ചെറുനിലം, വൈസ് പ്രസിഡന്‍റ് സോണി കിഴക്കേക്കര എന്നിവർ പ്രസംഗിച്ചു.

പളിയക്കുടിയിലെത്തിയ കരിങ്കുരങ്ങിനെ കൂട്ടിലാക്കി

കട്ടപ്പന: പുളിയന്മല ശിവലിംഗ പളിയക്കുടിയില്‍ എത്തിയ ഉപദ്രവകാരിയായ കരിങ്കുരങ്ങിനെ വനം വകുപ്പ് കൂട്ടിലാക്കി. ഒന്നരമാസം മുമ്പാണ് മൂന്ന് കരിങ്കുരങ്ങുകള്‍ വനത്തില്‍നിന്ന് ശിവലിംഗ പളിയക്കുടിയിലെത്തിയത്. രണ്ടെണ്ണം തിരികെ വനത്തിലേക്ക് മടങ്ങിയെങ്കിലും ഒന്ന് ഇവിടെത്തന്നെ തുടരുകയായിരുന്നു. കുടിയിലെ മരങ്ങളിലും വീടുകളുടെയും അങ്കണവാടി കെട്ടിടത്തിന്‍റെ പരിസരങ്ങളിലുമായി താമസമാക്കി. ആദ്യമൊക്കെ കൗതുകത്തോടെ ആളുകൾ പഴങ്ങളും മറ്റ് ഭക്ഷണസാധനങ്ങളും നല്‍കി. പിന്നീട് ഭക്ഷണം കിട്ടാതെവരുമ്പോള്‍ ആളുകളെ ഉപദ്രവിക്കുന്നത് ശീലമാക്കി. തോട്ടം തൊഴിലാളികളുടെ മൊബൈല്‍ ഫോണുകള്‍ എടുത്തുകൊണ്ടുപോകുകയും മരങ്ങളുടെ മുകളിലോ മറ്റ് എവിടെയെങ്കിലുംവച്ച് വലിച്ചെറിയുന്നതുമായ സംഭവങ്ങളും ഉണ്ടായിട്ടുണ്ടെന്നും നാട്ടുകാർ പറയുന്നു. അതോടൊപ്പം വീട്ടുമുറ്റത്ത് ഉണങ്ങാനിടുന്ന വസ്ത്രങ്ങള്‍ എടുത്തുകൊണ്ടു പോകുന്നതും നശിപ്പിക്കുന്നതും പതിവായിരുന്നു. ഏതാനും ദിവസങ്ങളുടെ ഇടവേളകളിൽ മൂന്നുപേരെ കുരങ്ങ് മാന്തി പരിക്കേല്‍പ്പിച്ചു. മണിമാല(47), വിദ്യാര്‍ഥികളായ കാര്‍ത്തിക(8), ആദിത്യന്‍(7) എന്നിവര്‍ക്കാണ് കുരങ്ങിന്‍റെ നഖംകൊണ്ട് മുറിവേറ്റത്. ഇവര്‍ ചികിത്സ തേടുകയും പ്രതിരോധ കുത്തിവയ്പ്പിന് വിധേയരാകുകയും ചെയ്തു. കുടിയിലെ അങ്കണവാടി കുട്ടികള്‍ക്കും കുരങ്ങ് ഭീഷണിയായിരുന്നു. ഒടുവില്‍ നാട്ടുകാര്‍ പൊറുതിമുട്ടിയതോടെ വനംവകുപ്പ് കുമളി റേഞ്ച് ഓഫീസിൽ വിവരമറിയിച്ചു. ഇവര്‍ സ്ഥലത്തെത്തി കൂട് സ്ഥാപിച്ച് ദിവസങ്ങളോളം നിരീക്ഷിച്ചെങ്കിലും കുരങ്ക് കൂടിനുള്ളിൽ പെട്ടില്ല. മയക്കുവെടി വച്ച് പിടികൂടാൻ തീരുമാനിച്ചിരുന്നെങ്കിലും ഇന്നലെ കുരങ്ങ് വനംവകുപ്പിന്‍റെ കൂട്ടിനുള്ളിലാകുകയായിരുന്നു.

മാത്യവേദി മെസഞ്ചർ മീറ്റ്

പെരുവന്താനം: സെന്‍റ് ജോസഫ് പാരീഷ്ഹാളിൽ ഫൊറോന മാത്യവേദി മെസഞ്ചർ മീറ്റ് നടത്തി.ഫൊറോന വികാരി ഫാ. സോബിൻ താഴത്തുവീട്ടിൽ ഉദ്ഘാടനം ചെയ്തു. ഫൊറോന ഡയറക്ടർ ഫാ. സിജോ പൊട്ടുകുളം അധ്യക്ഷത വഹിച്ചു. ഫൊറോന പ്രസിഡന്‍റ് സോളി ജോസഫ്, രൂപത ഡയറക്ടർ ഫാ. മാത്യു ഓലിക്കൽ,രൂപത ആനിമേറ്റർ സിസ്റ്റർ റോസ്മി എസ്എബിഎസ്, രൂപത പ്രസിഡന്‍റ് ജിജി പുളിയം കുന്നേൽ എന്നിവർ പ്രസംഗിച്ചു. രൂപത ഭാരവാഹികളും ഫൊറോനയിലെ എല്ലാ ഇടവകകളിൽനിന്നുള്ള ഭാരവാഹികളും അനിമേറ്റർമാരും പങ്കെടുത്തു.

വിദ്യാർഥികളെ ജീവിതമൂല്യങ്ങൾ പഠിപ്പിക്കാൻ ഐലിവ് പദ്ധതി

ഇടുക്കി: വിദ്യാർഥികളുടെ കഴിവും സേവനവും സമൂഹത്തിന് മെച്ചപ്പെട്ട നിലയിൽ ലഭ്യമാക്കാൻ അവരെ പ്രാപ്തരാക്കുന്ന നൂതന പദ്ധതിയുമായി ജില്ലാ ഭരണകൂടം. ഇന്‍റഗ്രേറ്റഡ് ലൈഫ് സ്കിൽ ഫോർ വാല്യൂസ് ആൻഡ് എംപവർമെന്‍റ് - ഐലിവ് എന്ന പേരിലുള്ള പരിപാടിയുടെ ഉദ്ഘാടനം നാളെ രാവിലെ 9.30ന് നടക്കുമെന്ന് ജില്ലാ കളക്ടർ വി. വിഗ്‌നേശ്വരി അറിയിച്ചു. വിദ്യാഭ്യാസത്തോടൊപ്പം ജീവിതമൂല്യങ്ങളും കുട്ടികൾക്ക് സ്വായത്തമാക്കുക എന്ന ലക്ഷ്യത്തോടെയാണ് ജില്ലയിലെ എല്ലാ സ്കൂളുകളിലും പദ്ധതി നടപ്പാക്കുന്നത്. 27 ആഴ്ച നീണ്ടുനിൽക്കുന്ന ക്ലാസ് എല്ലാ വെള്ളിയാഴ്ചകളിലും ആദ്യത്തെ പീരിയഡിലായിരിക്കും നടത്തുന്നത്. എൽപി, യുപി, എച്ച്എസ്, എച്ച്എസ്എസ് വിഭാഗങ്ങൾക്കായി ഏഴു വിഷയങ്ങളുള്ള പ്രത്യേക പാഠ്യക്രമം ഇതിനായി തയാറാക്കിയിട്ടുണ്ട്. എല്ലാ അധ്യാപകരും ക്ലാസുകളിൽ പങ്കാളികളാകും. പദ്ധതിയിലൂടെ അക്കാദമിക്ക് പഠനത്തോടൊപ്പം വിദ്യാർഥികൾക്ക് പൗരത്വ മൂല്യങ്ങളും സമൂഹത്തിൽ തങ്ങളുടെ ഉത്തരവാദിത്വവും കടമയും സംബന്ധിച്ച അവബോധവും നൽകും. സ്കൂൾ വിദ്യാഭ്യാസം കഴിഞ്ഞ് പുറത്തിറങ്ങുന്പോൾ വിദ്യാർഥികളുടെ കഴിവും സേവനവും സമൂഹത്തിന് മെച്ചപ്പെട്ടതായി ലഭ്യമാക്കുകയെന്നതാണു ലക്ഷ്യം. പൊതുവിദ്യാഭ്യാസ വകുപ്പിന്‍റെ പിന്തുണയോടെ പരീക്ഷണാടിസ്ഥാനത്തിലാണ് പദ്ധതി നടപ്പാക്കുന്നത്. ജില്ലാ കളക്ടറുടെയും വിദ്യാഭ്യാസ ഡെപ്യൂട്ടി ഡയറക്ടറുടെയും ഡിഇഒമാരുടെയും നിയന്ത്രണത്തിലായിരിക്കും ക്ലാസുകൾ. ആദ്യത്തെയും അവസാനത്തെയും ആഴ്ച പദ്ധതി വിലയിരുത്തൽ നടത്തും. സർക്കാർ സ്കൂളുകൾക്ക് പുറമെ ജില്ലയിലെ എയ്ഡഡ്, അണ്‍ എയ്ഡഡ് വിദ്യാലയങ്ങളിലും പദ്ധതി നടപ്പാക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]