ഓണം ഗിഫ്റ്റ് ഹാമ്പർ : കുടുംബശ്രീയുടെ വിറ്റുവരവ് 6.2 കോടി
സീമ മോഹന്‍ലാല്‍
Monday, September 8, 2025 1:44 AM IST
കൊച്ചി: ഓണവിഭവങ്ങള്‍ പ്രിയപ്പെട്ടവര്‍ക്ക് സമ്മാനിക്കാനും സ്വന്തമായി വാങ്ങാനുമായി സംസ്ഥാനതലത്തില്‍ കുടുംബശ്രീ ഒരുക്കിയ ഓണം ഗിഫ്റ്റ് ഹാമ്പറിലൂടെ നേടിയെടുത്തത് 6.2 കോടി രൂപയുടെ വിറ്റുവരവ്. കുടുംബശ്രീയുടെ പോക്കറ്റ്മാര്‍ട്ട് ആപ്പിലൂടെ ഓഗസ്റ്റ് നാലുമുതല്‍ 5,400 ഓണ്‍ലൈന്‍ ഓണം ഗിഫ്റ്റ് ഹാമ്പറുകളാണ് വില്പന നടത്തിയത്. ഇതിലൂടെ 49 ലക്ഷത്തിന്‍റെ വിറ്റുവരവ് കുടുംബശ്രീ നേടിയെടുത്തു.
ചിപ്‌സ്, ശര്‍ക്കരവരട്ടി, പാലട, സേമിയ പായസം മിക്‌സ്, മുളകുപൊടി, മല്ലിപ്പൊടി, മഞ്ഞള്‍പ്പൊടി, കറിമസാല, സാമ്പാര്‍ മസാല തുടങ്ങി 10 ഇനം ഉത്പന്നങ്ങളടങ്ങിയ ഗിഫ്റ്റ് ഹാമ്പറിന് 799 രൂപയും കൊറിയര്‍ ചാര്‍ജുമാണ് ഈടാക്കിയത്. 960 രൂപയാണ് ഇതിന്‍റെ എംആര്‍പി. ഓണം കുടുംബശ്രീയോടൊപ്പം എന്ന ടാഗ് ലൈനോടെ എത്തിയ വിഭവങ്ങള്‍ പോക്കറ്റ് മാര്‍ട്ട് ദി കുടുംബശ്രീ സ്‌റ്റോര്‍ വഴിയാണ് ഓണ്‍ലൈന്‍ വില്പന നടത്തിയത്.
സിഡിഎസ് മുഖാന്തിരം സംസ്ഥാനത്ത് 92,117 ഓണം ഗിഫ്റ്റ് ഹാമ്പറുകള്‍ വിറ്റു. ഇതില്‍നിന്ന് 5.71 കോടി രൂപയാണ് വരുമാനമുണ്ടായത്. വീണ്ടും ഉപയോഗിക്കാവുന്ന തുണിസഞ്ചികളിലാക്കി സിഡിഎസുകള്‍ വീടുകളില്‍ എത്തിച്ചു നല്‍കുന്ന കിറ്റുകള്‍ക്കും 799 രൂപ തന്നെയായിരുന്നു.
ഓണസദ്യയും വന്‍ ഹിറ്റ്
തിരുവോണത്തിന് ഒന്നര ആഴ്ച മുമ്പേ തുടങ്ങിയ കുടുംബശ്രീയുടെ ഓണസദ്യയും വന്‍ ഹിറ്റായിരുന്നു. ഓണസദ്യയില്‍ രണ്ടിനം പായസം ഉള്‍പ്പെടെ ഇരുപതിലേറെ വിഭവങ്ങളടങ്ങുണ്ടായിരുന്നു. 1,22,000 ഓണസദ്യയാണ് കുടുംബശ്രീയിലൂടെ വില്പന നടത്തിയത്. വില്പന ഇനത്തില്‍ 2.24 കോടി രൂപയുടെ വിറ്റുവരവ് കുടുംബശ്രീക്ക് ലഭിച്ചു.