ADVERTISEMENT

ADVERTISEMENT

യുഎസ്എസ് ബാച്ച് ഉദ്ഘാടനം ചെയ്തു

താമരശേരി: കൊടുവള്ളി ഗവ. ഹയര്‍ സെക്കന്‍ഡറി സ്‌കൂളില്‍ യുഎസ്എസ്, എന്‍എംഎംഎസ് കോണ്‍വൊക്കേഷനും പുതിയ യുഎസ്എസ് ബാച്ചിന്‍റെ ഉദ്ഘാടനവും നടത്തി. സൈദാസ് നല്ലളം മോട്ടിവേഷന്‍ ക്ലാസെടുത്തു. പ്രധാനാധ്യാപകന്‍ പി.ടി.മുഹമ്മദ് മുസ്തഫ അധ്യക്ഷത വഹിച്ചു. അധ്യാപകരായ കെ.അഹമ്മദ് അഷ്‌റഫ്, പി.നിഷ, വി.സുബൈദ, എം.വി. ഹൈദ്രോസ്, എ.അസീസ, എം.കെ. ബാബു, പി.സി. ബിജു, വി.കെ. സാജിദ, വിദ്യാര്‍ഥികളായ എന്‍.സി. റിസ അലി, ടി.കെ. ദക്ഷ എന്നിവര്‍ പ്രസംഗിച്ചു.

ADVERTISEMENT

‘വടകര ജില്ലാ ആശുപത്രിയില്‍ സൂപ്പര്‍ സ്പെഷാലിറ്റി തസ്തിക പരിഗണനയില്‍’

വടകര: ജില്ലാ ആശുപത്രിയില്‍ കാര്‍ഡിയോളജിസ്റ്റ് സൂപ്പര്‍ സ്പെഷാലിറ്റി തസ്തിക പരിഗണനയിലെന്ന് ആരോഗ്യ മന്ത്രി വീണാ ജോര്‍ജ്. വടകര ജില്ലാ ആശുപത്രിയില്‍ എന്‍എച്ച്എം ആര്‍ഒപി ഫണ്ട് ഉപയോഗിച്ച് നിര്‍മിച്ച ഓപറേഷന്‍ തിയേറ്റര്‍ കോംപ്ലക്‌സിന്‍റെ ഉദ്ഘാടനം നിര്‍വഹിക്കുകയായിരുന്നു മന്ത്രി. സംസ്ഥാനത്തെ ജില്ലാ ആശുപത്രികളില്‍ സൂപ്പര്‍ സ്പെഷാലിറ്റി തസ്തിക സൃഷ്ടിക്കുന്നത് സംബന്ധിച്ച് അന്തിമ ചര്‍ച്ചകള്‍ നടന്നതായും മന്ത്രിസഭ തീരുമാനം വരുമെന്നും മന്ത്രി പറഞ്ഞു. മാതൃമരണ നിരക്കും ശിശുമരണ നിരക്കും ഏറ്റവും കുറവുള്ള സംസ്ഥാനവും രാജ്യത്ത് ഏറ്റവും കൂടുതല്‍ സൗജന്യ ചികിത്സ നല്‍കുന്ന സംസ്ഥാനവും കേരളമാണ്. പ്ലാന്‍ ഫണ്ടിന് പുറമെ കിഫ്ബിയുടെ 10,000 കോടി രൂപ ആശുപത്രി വികസനത്തിനായി ഉപയോഗിക്കുകയാണെന്നും മന്ത്രി കൂട്ടിച്ചേര്‍ത്തു. ചടങ്ങില്‍ കെ.കെ.രമ എംഎല്‍എ അധ്യക്ഷത വഹിച്ചു. ജില്ലാ മെഡിക്കല്‍ ഓഫീസര്‍ കെ.കെ. രാജാറാം റിപ്പോര്‍ട്ട് അവതരിപ്പിച്ചു. 2.67 കോടി രൂപ ചെലവിട്ടാണ് ഓപറേഷന്‍ തിയേറ്റര്‍ കോംപ്ലക്‌സ് നിര്‍മിച്ചത്. ഏറ്റവും ആധുനിക രീതിയിലുള്ള ഓപറേഷന്‍ കോംപ്ലക്സില്‍ അത്യാധുനിക സൗകര്യങ്ങളോടു കൂടിയ ഒരു മോഡുലാര്‍ ഓപറേഷന്‍ തിയേറ്റര്‍, ഒരു ജനറല്‍ ഓപറേഷന്‍ തിയേറ്റര്‍, ഒരു മൈനര്‍ ഓപറേഷന്‍ തിയേറ്റര്‍ തുടങ്ങിയവയും 25 കിടക്കകളുള്ള ഒരു വാര്‍ഡുമാണ് സജ്ജമാക്കിയത്.

തീരസംരക്ഷണം കണ്ടലിലൂടെ: വിദ്യാര്‍ഥികളുടെ സര്‍വേ റിപ്പോര്‍ട്ട് മന്ത്രിക്ക് സമര്‍പ്പിച്ചു

കോഴിക്കോട്: ലോക കണ്ടല്‍ ദിനത്തോടനുബന്ധിച്ച് ബേപ്പൂര്‍ ഫിഷറീസ് വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥികള്‍ നടത്തിയ സര്‍വേ റിപ്പോര്‍ട്ട് വനം മന്ത്രി എ.കെ. ശശീന്ദ്രന് സമര്‍പ്പിച്ചു. ബേപ്പൂര്‍ ബിസി റോഡിന്‍റെ തീരത്തുള്ള വീടുകളില്‍ നടത്തിയ സര്‍വേയിലെ കണ്ടെത്തലുകളാണ് കോഴിക്കോട് ഗസ്റ്റ് ഹൗസില്‍ നടന്ന ചടങ്ങില്‍ കൈമാറിയത്. സ്‌കൂളിലെ രണ്ടാം വര്‍ഷ എന്‍എസ്എസ് വോളണ്ടിയര്‍മാരാണ് സര്‍വേ നടത്തിയത്. കരിങ്കല്ലും സിമന്‍റും ഉപയോഗിച്ചുള്ള കടല്‍ ഭിത്തികളേക്കാള്‍ സംരക്ഷണം നല്‍കാന്‍ കണ്ടലുകള്‍ക്ക് കഴിയുമെന്നും കണ്ടലുകള്‍ ഉപയോഗിച്ചുള്ള തീരസംരക്ഷണം വളരെ ഫലപ്രദമാണെന്നും നിയമം അനുവദിച്ചാല്‍ കണ്ടലുകള്‍ വച്ചുപിടിപ്പിക്കാന്‍ തയാറാണെന്നും സര്‍വേയില്‍ പങ്കാളികളായവര്‍ ഒരുപോലെ അഭിപ്രായപ്പെട്ടതായി റിപ്പോര്‍ട്ടില്‍ പറയുന്നു. നിലവിലുള്ള കണ്ടല്‍ സസ്യങ്ങള്‍ നിലനിര്‍ത്തുകയും ഇനിമുതല്‍ പൊതുജനങ്ങള്‍ക്ക് തീരപ്രദേശത്ത് കണ്ടല്‍ വളര്‍ത്താനും അവയെ വെട്ടിയൊതുക്കാനുമുള്ള അവകാശം നല്‍കുകയും ചെയ്യുന്നത് നന്നാകുമെന്ന നിര്‍ദേശവും റിപ്പോര്‍ട്ടിലുണ്ട്.എന്‍എസ്എസ് വോളണ്ടിയര്‍മാരായ മുഹമ്മദ് സ്വാലിഹ്, ഫാത്തിമ നിദ, പ്രിന്‍സിപ്പല്‍ എ. അരുണ്‍, പ്രോഗ്രാം ഓഫീസര്‍ എം. റീഷ്മ എന്നിവര്‍ ചേര്‍ന്നാണ് റിപ്പോര്‍ട്ട് കൈമാറിയത്.

ഡിവൈഎഫ്‌ഐ യൂത്ത് മാര്‍ച്ച് സമാപിച്ചു

കൂരാച്ചുണ്ട്: "ഞങ്ങള്‍ക്ക് വേണം ജോലി, ഞങ്ങള്‍ക്ക് വേണം മതേതര ഇന്ത്യ' എന്ന മുദ്രാവാക്യം ഉയര്‍ത്തിക്കൊണ്ട് 15ന് ബാലുശേരിയില്‍ നടക്കുന്ന സമര സംഗമത്തിന്‍റെ പ്രചാരണാര്‍ഥം ഡിവൈഎഫ്‌ഐ കൂരാച്ചുണ്ട് മേഖല കമ്മിറ്റി സംഘടിപ്പിച്ച യൂത്ത് മാര്‍ച്ച് സമാപിച്ചു. സിപിഎം കൂരാച്ചുണ്ട് ലോക്കല്‍ കമ്മിറ്റി സെക്രട്ടറി കെ.ജി. അരുണ്‍ ഉദ്ഘാടനം ചെയ്തു. കല്ലാനോട്, പൂവത്തുംചോല, കാളങ്ങാലി, ശങ്കരവയല്‍, കേളോത്തുവയല്‍, ഓഞ്ഞില്‍, പൊറാളി, മേലേ അങ്ങാടി, എന്നിവിടങ്ങളില്‍ സ്വീകരണം ഏറ്റുവാങ്ങി കൂരാച്ചുണ്ട് അങ്ങാടിയില്‍ സമാപിച്ചു. സമാപനയോഗം കെഎസ്‌കെടിയു ജില്ല കമ്മിറ്റി അംഗം എ.കെ. മണി ഉദ്ഘാടനം ചെയ്തു. യൂത്ത് മാര്‍ച്ച് ജാഥ ലീഡര്‍ ടി.ആര്‍ സുജേഷ്, ഡെപ്യൂട്ടി ലീഡര്‍ വി.കെ. ഹസീന, മാനേജര്‍ ജസ്റ്റിന്‍ ജോണ്‍, ഡിവൈഎഫ്‌ഐ കൂരാച്ചുണ്ട് മേഖല പ്രസിഡന്‍റ് വി.എസ്. സോണറ്റ് എന്നിവര്‍ പ്രസംഗിച്ചു.

ഓണം ഖാദി മേളക്ക് ജില്ലയില്‍ തുടക്കമായി

കോഴിക്കോട്: ഓണം ഖാദി മേളക്ക് ജില്ലയില്‍ തുടക്കമായി. ജില്ലാതല ഉദ്ഘാടനവും ഖാദി വണ്ടി ഫ്ളാഗ് ഓഫും പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ് നിര്‍വഹിച്ചു. അഹമ്മദ് ദേവര്‍കോവില്‍ എംഎല്‍എ അധ്യക്ഷത വഹിച്ചു. ആദ്യ വില്‍പനയും ഖാദി സെറ്റ് മുണ്ട് ലോഞ്ചിംഗും ലീഡ് ഡിസ്ട്രിക്ട് മാനേജര്‍ എസ്. ജ്യോതിസിന് നല്‍കി ഫെഡറല്‍ ബാങ്ക് ബ്രാഞ്ച് മാനേജര്‍ അലക്‌സ് ടി. ഏബ്രഹാം നിര്‍വഹിച്ചു. ഖാദി ബോര്‍ഡ് മെമ്പര്‍ എസ്. ശിവരാമന്‍ സമ്മാന കൂപ്പണ്‍ വിതരണം നിര്‍വഹിച്ചു. "എനിക്കും വേണം ഖാദി'എന്ന കാമ്പയിനുമായാണ് ഇത്തവണത്തെ ഓണം ഖാദി മേള. വൈവിധ്യമാര്‍ന്ന ഖാദി വസ്ത്രങ്ങള്‍ 30 ശതമാനം റിബേറ്റില്‍ മേളകളില്‍ ലഭിക്കും. ഉപഭോക്താക്കള്‍ക്ക് ആകര്‍ഷകമായ സമ്മാന പദ്ധതികളും ഒരുക്കിയിട്ടുണ്ട്. ഓണം പ്രമാണിച്ച് നടത്തുന്ന സമ്മാന പദ്ധതിയില്‍ ഓരോ 1000 രൂപ പര്‍ച്ചേസിനും സമ്മാന കൂപ്പണ്‍ ലഭിക്കും. ഒന്നാം സമ്മാനമായി ഇലക്ട്രിക് കാര്‍, രണ്ടാം സമ്മാനം ഇലക്ട്രിക് സ്‌കൂട്ടര്‍, മൂന്നാം സമ്മാനം 5000 രൂപയുടെ 50 ഗിഫ്റ്റ് വൗച്ചറുകള്‍ എന്നിവയും ആഴ്ചതോറും 3000 രൂപയുടെ ഗിഫ്റ്റ് വൗച്ചറും ലഭിക്കും. ജില്ലാ ഖാദി ഗ്രാമവ്യവസായ കാര്യാലയത്തില്‍ നടന്ന ചടങ്ങില്‍ ഖാദി ബോര്‍ഡ് ഡയറക്ടര്‍ കെ. ഷിബി റിപ്പോര്‍ട്ട് അവതരിപ്പിച്ചു. വാര്‍ഡ് കൗണ്‍സിലര്‍ എസ്.കെ. അബൂബക്കര്‍, കേരള സര്‍വോദയ സംഘം ചെയര്‍മാന്‍ യു. രാധാകൃഷ്ണന്‍, കോഴിക്കോട് സര്‍വോദയ സംഘം സെക്രട്ടറി എം.കെ. ശ്യാംപ്രസാദ്, കണ്ണൂര്‍ സര്‍വോദയ സംഘം സെക്രട്ടറി ശ്രീഗേഷ്, പ്രസ് ക്ലബ് സെക്രട്ടറി പി.കെ. സജിത്ത്, പ്രോജക്ട് ഓഫീസര്‍ കെ. ജിഷ, വിവിധ സംഘടന പ്രതിനിധികള്‍ എന്നിവര്‍ സംസാരിച്ചു.

ശലഭോദ്യാനം, നക്ഷത്രവനം പദ്ധതികള്‍ വ്യാപിപ്പിക്കും: മന്ത്രി

കോഴിക്കോട്: സാമൂഹിക വനവത്കരണ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്താന്‍ വനം മന്ത്രി എ.കെ. ശശീന്ദ്രന്‍ നിര്‍ദേശം നല്‍കി. കോഴിക്കോട് ഗവ. ഗസ്റ്റ് ഹൗസില്‍ നടന്ന സോഷ്യല്‍ ഫോറസ്ട്രി വിഭാഗം ഉത്തരമേഖലാ സര്‍ക്കിള്‍തല അവലോകന യോഗത്തിലാണ് മലപ്പുറം, കോഴിക്കോട്, കണ്ണൂര്‍, വയനാട്, കാസര്‍കോട് ജില്ലകളിലെ ഉദ്യോഗസ്ഥര്‍ക്ക് മന്ത്രി നിര്‍ദേശം നല്‍കിയത്. വനസംരക്ഷണത്തിന്‍റെ പ്രാധാന്യം സമൂഹത്തില്‍ കൂടുതല്‍ പ്രചരിപ്പിക്കുന്നതിനായി നഗര കേന്ദ്രങ്ങളിലെ ലഭ്യമായ ഇടങ്ങളില്‍ മിനിയേച്ചര്‍ വനങ്ങള്‍ ഒരുക്കാനും നിലവില്‍ വിദ്യാലയങ്ങളില്‍ നടപ്പാക്കിവരുന്ന വിദ്യാവനം, ശലഭോദ്യാനം, നക്ഷത്രവനം പദ്ധതികള്‍ കൂടുതല്‍ ഇടങ്ങളിലേക്ക് വ്യാപിപ്പിക്കാനും യോഗത്തില്‍ തീരുമാനിച്ചു. വനം വകുപ്പ് ആവിഷ്‌കരിച്ച ബോധവത്കരണ പരിപാടിയായ സര്‍പ്പ പദ്ധതിയുടെ പ്രവര്‍ത്തനത്തിന്‍റെ ഭാഗമായി സംസ്ഥാനത്ത് പാമ്പുകടിയേറ്റുള്ള മരണങ്ങള്‍ വലിയ തോതില്‍ കുറഞ്ഞുവരുന്നതായി യോഗം വിലയിരുത്തി. പരിസ്ഥിതിയുമായി ബന്ധപ്പെട്ട് മികച്ച പ്രവര്‍ത്തനം നടത്തുന്ന കോളജുകള്‍ക്ക് ജില്ലാ തലത്തില്‍ അവാര്‍ഡ് നല്‍കും. കണ്ണൂര്‍ ജില്ലയില്‍ കണ്ടല്‍ ശില്പശാല നടത്താന്‍ ജില്ലാ അസിസ്റ്റന്‍റ് ഫോറസ്റ്റ് കണ്‍സര്‍വേറ്റര്‍ക്ക് നിര്‍ദേശം നല്‍കി. എല്ലാ ജില്ലകളിലും ഫോറസ്ട്രി ക്ലബുകളുടെ ശില്പശാല നടത്തും. പദ്ധതി പ്രവര്‍ത്തനങ്ങള്‍ കൂടുതല്‍ മികച്ചതാക്കുന്നതിന് വിദ്യാര്‍ഥികളില്‍നിന്ന് ആശയങ്ങള്‍ സ്വീകരിക്കും. യോഗത്തില്‍ സാമൂഹിക വനവത്കരണ വിഭാഗം ഉത്തരമേഖല കണ്‍സര്‍വേറ്റര്‍ ആര്‍. കീര്‍ത്തി, അസിസ്റ്റന്‍റ് ഫോറസ്റ്റ് കണ്‍സര്‍വേറ്റര്‍മാര്‍, റേഞ്ച് ഫോറസ്റ്റ് ഓഫീസര്‍മാര്‍, മറ്റ് ജീവനക്കാര്‍ എന്നിവര്‍ പങ്കെടുത്തു.

പെരുവയല്‍ സെന്‍റ് സേവ്യേഴ്‌സ് യുപിഎസ് നവതി: ലോഗോ പ്രകാശന കര്‍മം ആര്‍ച്ച് ബിഷപ് നിര്‍വഹിച്ചു

കോഴിക്കോട്: പെരുവയല്‍ സെന്‍റ് സേവ്യേഴ്‌സ് യുപി സ്‌കൂളിന്‍റെ നവതി ആഘോഷങ്ങളുടെ ഭാഗമായി നടത്തിയ ലോഗോ പ്രകാശന കര്‍മം കോഴിക്കോട് ആര്‍ച്ച് ബിഷപ് ഡോ. വര്‍ഗീസ് ചക്കാലക്കല്‍ നിര്‍വഹിച്ചു. ചടങ്ങില്‍ കോഴിക്കോട് അതിരൂപത വികാരി ജനറലും കോര്‍പറേറ്റ് മാനേജരുമായ മോണ്‍. ജെന്‍സൻ പുത്തന്‍വീട്ടില്‍, പെരുവയല്‍ പഞ്ചായത്ത് പ്രസിഡന്‍റ് സുബിത തോട്ടഞ്ചേരി, കോഴിക്കോട് ഫെറോന വികാരി ഫാ.ജെറോം ചിങ്ങന്തറ, അതിരൂപത പ്രൊക്യുറേറ്റര്‍ ഫാ.പോള്‍ പേഴ്‌സി ഡിസില്‍വ, സ്‌കൂള്‍ മാനേജര്‍ ഫാ. സനല്‍ ലോറന്‍സ് എന്നിവര്‍ പങ്കെടുത്തു. സ്‌കൂള്‍ ഹെഡ്മാസ്റ്റര്‍ ജിബിന്‍ ജോസഫ്, പിടിഎ പ്രസിഡന്‍റ് സി.എം.സദാശിവന്‍, പിടിഎ വൈസ് പ്രസിഡന്‍റ് ഇ. സുരേന്ദ്രന്‍, പെരുവയല്‍ വാര്‍ഡ് മെമ്പര്‍മാരായ വിനോദ് എളവന, ഉനൈസ് അരീക്കല്‍, സ്വാഗതസംഘം ചെയര്‍മാന്‍ പി.ജി.അനൂപ്, നവതി ആഘോഷത്തിന്‍റെ വിവിധ കമ്മിറ്റികളുടെ ഭാരവാഹികളായ ബിനു എഡ്വേര്‍ഡ്, എന്‍.ടി. ഹംസ, ഇ.കെ.നിതീഷ്, പിടിഎ എക്‌സിക്യൂട്ടീവ് അംഗങ്ങള്‍ എന്നിവരും സന്നിഹിതരായിരുന്നു.

നമ്പികുളം ഇക്കോടൂറിസം പദ്ധതി: ആക്‌ഷന്‍ കമ്മിറ്റി രൂപീകരിക്കാന്‍ നാട്ടുകാര്‍

കൂരാച്ചുണ്ട്: കൂരാച്ചുണ്ട് പഞ്ചായത്തിലെ കാറ്റുള്ളമല നമ്പികുളം ഇക്കോ ടൂറിസം പദ്ധതിയുടെ നിര്‍മാണ പ്രവൃത്തി സമയബന്ധിതമായി പൂര്‍ത്തീകരിക്കാത്തതിനെതിരേ നാട്ടുകാര്‍ ആക്‌ഷൻ കൗണ്‍സില്‍ രൂപീകരിക്കുന്നു. ഡിടിപിസിയുടെ കീഴിലുള്ള നമ്പികുളം ടൂറിസം പദ്ധതിയുടെ പ്രവൃത്തി ടെന്‍ഡര്‍ ഏറ്റെടുത്ത് നടത്തിവരുന്ന സ്വകാര്യ കമ്പനി മാസങ്ങള്‍ പിന്നിട്ടിട്ടും പദ്ധതിയുടെ ഭാഗമായ വ്യൂ പോയിന്‍റ് ജനങ്ങള്‍ക്കായി തുറന്നു കൊടുത്തിട്ടില്ലെന്ന് നാട്ടുകാര്‍ ആരോപിച്ചു. പ്രദേശവാസികള്‍ സൗജന്യമായി വിട്ടുനല്‍കിയ ഭൂമിയില്‍ കോടികള്‍ മുടക്കി സ്ഥാപിച്ച വ്യൂ ടവര്‍ ഇപ്പോള്‍ തുരുമ്പെടുത്ത് നശിക്കുന്ന അവസ്ഥയിലാണ്. വൈകുന്നേരം അഞ്ചിനുശേഷം ടുറിസ്റ്റുകളെ നിയന്ത്രിക്കുന്നതിന് പഞ്ചായത്തുമായി സഹകരിച്ചുകൊണ്ട് പാര്‍ക്കിംഗിനു മുകളില്‍ ഗേറ്റ് സ്ഥാപിക്കണം. പദ്ധതി പൂര്‍ത്തീകരിക്കുന്ന കാര്യത്തില്‍ എംഎല്‍എ കാട്ടുന്ന കെടുകാര്യസ്ഥത വെടിയണമെന്നും യോഗം ആവശ്യപ്പെട്ടു. തോമസ് ആനിക്കാട്ട് അധ്യക്ഷത വഹിച്ചു. ജോസ് കോട്ടക്കുന്നേല്‍, ഷാജു കൊച്ചുവീട്ടില്‍, കെ.എസ്. സുബിന്‍, ബിനു വെള്ളാരംകാലായില്‍, ബേബി മുണ്ടയ്ക്കപടവില്‍, വിന്‍സെന്‍റ് പുളിക്കല്‍, ബെന്നി പുന്നമറ്റം എന്നിവര്‍ പ്രസംഗിച്ചു.

ബാഡ്മിന്‍റൺ ടൂര്‍ണമെന്‍റ് സംഘടിപ്പിച്ചു

കൂരാച്ചുണ്ട്: ബാഡ്മിന്‍റൺ അക്കാദമി കൂരാച്ചുണ്ടിന്‍റെ ആഭിമുഖ്യത്തില്‍ പുതുശേരി രഞ്ജിത്ത് മെമ്മോറിയല്‍ എവര്‍റോളിംഗ് ട്രോഫിക്കും വിഎസ് മൊബൈല്‍സ് കൂരാച്ചുണ്ട് റണ്ണേഴ്‌സ് അപ് ട്രോഫിക്കും വേണ്ടിയുള്ള പ്രീമിയര്‍ ലീഗ് ബാഡ്മിന്‍റന്‍ ടൂര്‍ണമെന്‍റ് അക്കാദമി ഇന്‍ഡോര്‍ സ്റ്റേഡിയത്തില്‍ നടന്നു. ടൂര്‍ണമെന്‍റില്‍ വിഎസ് മൊബൈല്‍സ് കൂരാച്ചുണ്ടിന്‍റെ സുജിത്ത് കല്ലാനോട്, പികെ ജന്‍സില്‍ ടീം ജേതാക്കളായി. ബാഡ്മിന്‍റൺ അക്കാദമിയുടെ താരങ്ങളായ രതീഷ് നരയംകുളം, ടോണി കാരക്കാട്ട് ടീം റണ്ണേഴ്‌സപ്പായി. അക്കാദമി പ്രസിഡന്‍റ് സി.എം. അഷറഫ് ടൂര്‍ണമെന്‍റ് ഉദ്ഘാടനം ചെയ്തു. കോഴിക്കോട് ക്രൈംബ്രാഞ്ച് ഡിവൈഎസ്പി വി.വി. ബെന്നി, ബഷീര്‍ കൊല്ലിയില്‍, കെ.എം യൂസഫ്, രബീഷ് നരയംകുളം, ജെന്‍സില്‍ പുഴക്കിലടത്തില്‍, ഷിബിന്‍ പരീക്കല്‍, ധനൂപ് അമ്മാറമ്പത്ത് എന്നിവര്‍ പ്രസംഗിച്ചു. സുജിത്ത് കല്ലാനോട് മികച്ച താരമായി തെരഞ്ഞെടുക്കപ്പെട്ടു. അക്യൂപംക്ചര്‍ വിദഗ്ധന്‍ ഡോ. അബ്ദുൾ ഗഫൂര്‍ ട്രോഫി വിതരണം ചെയ്തു.

ഓണ്‍ലൈന്‍ മദ്യവിപണനം നാടിന് ആപത്ത്: കെസിബിസി ലഹരിവിരുദ്ധ സമിതി

തിരുവമ്പാടി: ജനങ്ങളുടെ സമാധാന ജീവിതത്തെയും സംസ്‌കാരത്തെയും തകര്‍ക്കുന്നതാണ് സര്‍ക്കാര്‍ ഓണ്‍ലൈന്‍ മദ്യവില്പന അടക്കമുള്ള നയങ്ങളെന്ന് കെസിബിസി മദ്യ ലഹരി വിരുദ്ധ സമിതി താമരശേരി രൂപതാ കമ്മിറ്റി ചൂണ്ടിക്കാട്ടി. എങ്ങനെയും പണമുണ്ടാക്കാനുള്ള ആര്‍ത്തിയാണ് ഓണ്‍ലൈന്‍ മദ്യവിതരണം പോലെയുള്ള വിനാശകരമായ പദ്ധതികള്‍ക്ക് രൂപം നല്‍കാന്‍ പ്രേരിപ്പിക്കുന്നത്. സര്‍ക്കാരിന്‍റെ മദ്യനയം തിരുത്താന്‍ തയാറായില്ലെങ്കില്‍ ശക്തമായ സമര പരിപാടികളുമായി സമിതി രംഗത്തിറങ്ങുമെന്ന് യോഗം മുന്നറിയിപ്പു നല്‍കി. താമരശേരി രൂപതാ മദ്യലഹരി വിരുദ്ധ സമിതി ഡയറക്ടര്‍ ഫാ. ജിന്‍റോ മച്ചുകുഴി യോഗം ഉദ്ഘാടനം ചെയ്തു. പ്രസിഡന്‍റ് കുര്യന്‍ ചെമ്പനാനി അധ്യക്ഷത വഹിച്ചു. സെക്രട്ടറി ജോളി ഉണ്ണിയേപ്പിള്ളില്‍, സംസ്ഥാന സെക്രട്ടറി റോയി മുരിക്കോലില്‍, ടി.ടി. തോമസ്, വി.ജെ.മത്തായി, ഏബ്രഹം മണലോടി, കെ.സി. ജോസഫ്, ജോസ് കാവില്‍ പുരയിടം, എന്‍.വി. ഏബ്രാഹം, സിസ്റ്റര്‍ ഗീത സിഎംസി, കെ.സി. ടോമി തുടങ്ങിയവര്‍ പ്രസംഗിച്ചു.

മാനവം പത്താം വാര്‍ഷികം; എം.എന്‍. കാരശേരിയെ ആദരിക്കും

മുക്കം: മുക്കത്തെ സാംസ്‌കാരിക സംഘടനയായ "മാനവം' പത്താം വാര്‍ഷികത്തിന്‍റെ ഭാഗമായി ഒരുവര്‍ഷം നീണ്ടു നില്‍ക്കുന്ന വിവിധ പരിപാടികള്‍ സംഘടിപ്പിക്കുന്നു. വാര്‍ഷികാഘോഷങ്ങളുടെ ഭാഗമായി മുക്കത്തെയും സമീപപ്രദേശങ്ങളെയും വളര്‍ത്തിയ സാമൂഹിക പ്രവര്‍ത്തകരെയും സാംസ്‌കാരിക നായകരെയും പുതുതലമുറയ്ക്ക് പരിചയപ്പെടുത്തുക, നാടിന്‍റെ ചരിത്രത്തെയും സാംസ്‌കാരിക പാരമ്പര്യത്തെയും അടയാളപ്പെടുത്തുന്ന ആധികാരിക ചരിത്ര ഗ്രന്ഥം, കാലികപ്രസക്ത വിഷയങ്ങളില്‍ ചര്‍ച്ചകള്‍, നാട് നേരിടുന്ന വിഷയങ്ങള്‍ പ്രമേയമാക്കുന്ന നാടക, ചിത്രീകരണ, കലാരൂപങ്ങളുടെ പ്രദര്‍ശനം തുടങ്ങിയവയാണ് അണിയറിയില്‍ ഒരുങ്ങുന്നത്. ഇതിന്‍റെ തുടക്കമായി പത്രപ്രവര്‍ത്തകന്‍, ചലച്ചിത്രകാരന്‍, അധ്യാപകന്‍, ഗവേഷകന്‍, സാമൂഹിക വിമര്‍ശകന്‍, ഗ്രന്ഥകാരന്‍, പ്രഭാഷകന്‍ തുടങ്ങിയ മേഖലകളിലെല്ലാം വ്യക്തി മുദ്രചാര്‍ത്തിയ, എഴുത്ത് ജീവിതത്തിന്‍റെ ഷഷ്ഠിപൂര്‍ത്തി പിന്നിടുന്ന ഡോ. എം.എന്‍. കാരശേരിയെ ആദരിക്കും. നാളെ വൈകുന്നേരം നാലിന് കാരശേരി ബാങ്ക് ഓഡിറ്റോറിയത്തില്‍ നടക്കുന്ന പരിപാടി കോളമിസ്റ്റും രാഷ്ട്രീയ നിരീക്ഷകനുമായ ഡോ. സെബാസ്റ്റ്യന്‍ പോള്‍ ഉദ്ഘാടനം ചെയ്യും. പ്രതിഭ ജോയ് മാത്യു, ഹമീദ് ചേന്ദമംഗല്ലൂര്‍, കാനേഷ് പൂനൂർ, യു.കെ. കുമാരന്‍, കാഞ്ചനമാല, മുക്കം മുനിസിപ്പാലിറ്റി ചെയര്‍മാന്‍ പി.ടി. ബാബു, കാരശേരി ഗ്രാമപഞ്ചായത്ത് പ്രസിഡന്‍റ് സുനിത രാജന്‍ തുടങ്ങിയവര്‍ പങ്കെടുക്കുമെന്ന് മാനവം ചെയര്‍മാന്‍ ജി. അബ്ദുല്‍ അക്ബര്‍, കണ്‍വീനര്‍ സുബൈര്‍ , ട്രഷറര്‍ എന്‍.അഹമ്മദ് കുട്ടി, മീഡിയ കണ്‍വീനര്‍ മലിക് നാലകത്ത്, വൈസ് ചെയര്‍മാന്‍ എന്‍. അബ്ദുസത്താര്‍, കോ ഓര്‍ഡിനേറ്റര്‍ കെ. പുരുഷോത്തമന്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു.

കാരശേരി ബാങ്കില്‍ ഖാദി മേളക്ക് തുടക്കമായി

മുക്കം: കോഴിക്കോട് സര്‍വോദയ സംഘവും കാരശേരി സര്‍വീസ് സഹകരണ ബാങ്കും സംയുക്തമായി സംഘടിപ്പിക്കുന്ന ഖാദി ഓണം മേളക്ക് മുക്കത്ത് തുടക്കമായി. കാരശേരി സര്‍വീസ് സഹകരണ ബാങ്ക് ഹെഡ് ഓഫീസ് പരിസരത്താണ് മേള ആരംഭിച്ചത്. ഖാദിക്ക് 30 ശതമാനം ഗവണ്‍മെന്‍റ് റിബേറ്റും ബാങ്ക് നല്‍കുന്ന പ്രത്യേക കിഴിവും മേളയിലൂടെ ലഭിക്കും. ഇത്തവണ 50 ലക്ഷം രൂപയുടെ ആകര്‍ഷകമായ സമ്മാനപദ്ധതിയും ഏര്‍പ്പെടുത്തിയിട്ടുണ്ട്. ഒന്നാം സമ്മാനമായി ടാറ്റ ടിയാഗോ ഇലക്ട്രിക് കാര്‍, രണ്ടാം സമ്മാനമായി ബജാജ് ചേതക് ഇലക്ട്രിക് സ്‌കൂട്ടര്‍, മൂന്നാം സമ്മാനമായി 5000 രൂപയുടെ ഗിഫ്റ്റ് വൗച്ചര്‍ എന്നിവ ലഭിക്കും. കൂടാതെ ആഴ്ചതോറുമുള്ള നറുക്കെടുപ്പിലൂടെ 3000 രൂപയുടെ ഗിഫ്റ്റ് വൗച്ചറും ഉപഭോക്താക്കള്‍ക്ക് ലഭിക്കും. മേളയുടെ ഉദ്ഘാടനം കാരശേരി സര്‍വീസ് സഹകരണ ബാങ്ക് ചെയര്‍മാന്‍ എന്‍.കെ.അബ്ദുറഹിമാന്‍ നിര്‍വഹിച്ചു. ഗസീബ് ചാലൂളി അധ്യക്ഷത വഹിച്ചു.

ഗ്രീന്‍ഫീല്‍ഡ് ഹൈവേ: ധനസഹായം ലഭിക്കാന്‍ രേഖകള്‍ ഹാജരാക്കണം

കോഴിക്കോട്: ഗ്രീന്‍ഫീല്‍ഡ് ഹൈവേ (എന്‍എച്ച്- 966) നിര്‍മാണാവശ്യത്തിന് ഭൂമി ഏറ്റെടുത്തതിനാല്‍ താമസകെട്ടിടങ്ങളും വാണിജ്യ സ്ഥാപനങ്ങളും നഷ്ടപ്പെട്ടവര്‍ക്ക് പുനരധിവാസ ധനസഹായം ലഭിക്കാന്‍ തെളിവായി ഹാജരാക്കേണ്ട രേഖകള്‍ 23ന് എല്‍എഎന്‍എച്ച് സ്‌പെഷല്‍ ഡെപ്യൂട്ടി കളക്ടറുടെ കാര്യാലയത്തില്‍ നേരിട്ടെത്തിക്കണം. നിശ്ചിത ഫോമിലുള്ള അപേക്ഷ, നോട്ടിഫിക്കേഷന്‍ കാലയളവില്‍ (2022 ഏപ്രില്‍ ആറ്) പ്രസ്തുത കെട്ടിടത്തില്‍ (ഡോര്‍ നമ്പറില്‍) വ്യാപാരം നടത്തുന്നതിനായി തദ്ദേശ സ്വയംഭരണ വകുപ്പ് നല്‍കിയ ലൈസന്‍സ്, വാടക കെട്ടിടമാണെങ്കില്‍ വാടക എഗ്രിമെന്‍റിന്‍റെ പകര്‍പ്പും മാസ വാടക നല്‍കുന്നതിന്‍റെ രശീതിയും, വ്യാപാരം സ്വന്തം കെട്ടിടത്തിലാണെങ്കില്‍ ഭൂമി-കെട്ടിടം അക്വയര്‍ ചെയ്ത രേഖയുടെ പകര്‍പ്പ്/കെട്ടിട നികുതി രശീതിയുടെ പകര്‍പ്പ്, നോട്ടിഫിക്കേഷന്‍ കാലയളവില്‍ വ്യാപാരം-വ്യവസായം നടത്തുന്നതിന് ലഭിച്ച മറ്റു രേഖകള്‍ ഉണ്ടെങ്കില്‍ അവ, താമസ കെട്ടിടമാണെങ്കില്‍ അവിടെ താമസിച്ചത് തെളിയിക്കാന്‍ നോട്ടിഫിക്കേഷന്‍ കാലയളവിലുള്ള അപേക്ഷകന്‍റെ പേരുള്ള റേഷന്‍ കാര്‍ഡ്, സ്വന്തം കെട്ടിടമാണെങ്കില്‍ സ്ഥലം അക്വയര്‍ ചെയ്ത രേഖയുടെ പകര്‍പ്പ്-ഓണര്‍ഷിപ്പ് സര്‍ട്ടിഫിക്കറ്റ്, കെട്ടിട നികുതി രശീതി, വാടകക്ക് താമസിക്കുന്ന കെട്ടിടമാണെങ്കില്‍ നോട്ടിഫിക്കേഷന്‍ കാലയളവില്‍ ലഭിച്ച റേഷന്‍ കാര്‍ഡിന്‍റെ പകര്‍പ്പ്, വാടക എഗ്രിമെന്‍റ്, കെട്ടിട നികുതി രശീതി, ഓണര്‍ഷിപ്പ്, അപേക്ഷകന്‍റെ ബാങ്ക് പാസ് ബുക്കിന്‍റെ സ്വയം സാക്ഷ്യപ്പെടുത്തിയ പകര്‍പ്പ്, ആധാര്‍ കാര്‍ഡിന്‍റെ സ്വയം സാക്ഷ്യപ്പെടുത്തിയ പകര്‍പ്പ് എന്നീ രേഖകള്‍ ഹാജരാക്കണം.

ബൈക്കിടിച്ച് ചികിത്സയിലായിരുന്ന യുവതി മരണമടഞ്ഞു

തിരുവമ്പാടി: തിരുവനന്തപുരത്ത് വച്ച് ബൈക്ക് ഇടിച്ച് പരിക്കേറ്റ് ചികിത്സയിലായിരുന്ന യുവതി മരിച്ചു. ആനക്കാംപൊയില്‍ പോര്‍ക്കാട്ടില്‍ ചാക്കോ -ബിന്ദു ദമ്പതികളുടെ മകള്‍ റോസ് മരിയ (28) ആണ് മരിച്ചത്. അനന്തപുരി ആശുപത്രിയില്‍ ചികിത്സയിലിരിക്കെയാണ് മരിച്ചത്. ഈ മാസം ഒന്നിനാണ് അപകടമുണ്ടായത്. തിരുവനന്തപുരം ടെക്‌നോപാര്‍ക്കില്‍ ജോലി ചെയ്തു വരികയായിരുന്നു റോസ് മരിയ. സഹോദരി : റോസ് തെരേസ്. നാളെ രാവിലെ എട്ടിന് ആനക്കാംപൊയില്‍ സെന്‍റ് മേരിസ് പള്ളി അങ്കണത്തില്‍ മൃതദേഹം പൊതുദര്‍ശനത്തിന് വയ്ക്കും. തുടര്‍ന്ന് കാസര്‍കോട് അതിരുമാവ് സെന്‍റ് പോള്‍ പള്ളിയില്‍ സംസ്‌കാരം നടത്തും.

കുടിവെള്ള പദ്ധതി ഉദ്ഘാടനം ചെയ്തു

കോഴിക്കോട്: കാക്കൂര്‍ പഞ്ചായത്തിലെ മാക്കൂട്ടം -നെല്ലിക്കുന്ന് കുടിവെള്ള പദ്ധതി മന്ത്രി എ.കെ. ശശീന്ദ്രന്‍ ഉദ്ഘാടനം ചെയ്തു. 13-ാം വാര്‍ഡിലെ മാക്കൂട്ടം, മുണ്ടപ്പുറം, ശങ്കരന്‍പറമ്പത്ത്, നെല്ലിക്കുന്ന് ഭാഗങ്ങളിലെ രൂക്ഷമായ കുടിവെള്ള ക്ഷാമം പരിഹരിക്കുന്നതിനായാണ് പദ്ധതി നടപ്പാക്കിയത്. കാക്കൂര്‍ പഞ്ചായത്ത് ജനകീയാസൂത്രണ പദ്ധതിയില്‍ വിവിധ വര്‍ഷങ്ങളിലായി വകയിരുത്തിയ 35 ലക്ഷം രൂപ വിനിയോഗിച്ചാണ് പദ്ധതി പൂര്‍ത്തിയാക്കിയത്. പദ്ധതിക്ക് കിണര്‍ നിര്‍മിക്കാന്‍ മുഡുവന്‍പുറത്ത് ഇല്ലത്ത് ജീജയും ടാങ്ക് നിര്‍മാണത്തിന് മുണ്ടപ്പുറത്ത് പുരുഷോത്തമനും സൗജന്യമായി പഞ്ചായത്തിന് സ്ഥലം വിട്ടുനല്‍കുകയായിരുന്നു. 130ഓളം പേര്‍ക്കാണ് പദ്ധതിയുടെ ഗുണം ലഭിക്കുക. ചടങ്ങില്‍ ഗ്രാമപഞ്ചായത്ത് പ്രസിഡന്‍റ് സി.എം. ഷാജി അധ്യക്ഷത വഹിച്ചു. കുടിവെള്ള പദ്ധതി കമ്മിറ്റി സെക്രട്ടറി പി.പി. സിഗ്‌നേഷ് റിപ്പോര്‍ട്ട് അവതരിപ്പിച്ചു. കമ്മിറ്റി പ്രസിഡന്‍റ് കെ.എം. അജിത് കുമാര്‍, എന്‍.കെ. സജീവന്‍, ജനപ്രതിനിധികള്‍ തുടങ്ങിയവര്‍ പങ്കെടുത്തു.

കര്‍ഷക കോണ്‍ഗ്രസ് നേതാക്കളെ അറസ്റ്റ് ചെയ്തതില്‍ പ്രതിഷേധം

കോടഞ്ചേരി: തുഷാരഗിരിയില്‍ എത്തിയ വനം മന്ത്രി എ.കെ. ശശീന്ദ്രനെ കാണാന്‍ ശ്രമിച്ച കര്‍ഷക കോണ്‍ഗ്രസ് കോടഞ്ചേരി മണ്ഡലം പ്രസിഡന്‍റ് സാബു അവണ്ണൂര്‍, ടോമി ഇല്ലിമൂട്ടില്‍ അടക്കമുള്ള പ്രവര്‍ത്തകരെ അറസ്റ്റു ചെയ്ത പോലീസ് നടപടിയില്‍ പ്രവാസി കോണ്‍ഗ്രസ് പ്രതിഷേധിച്ചു. തിരുവമ്പാടി ബ്ലോക്ക് പ്രസിഡന്‍റ് ലൈജു അരീപ്പറമ്പില്‍ ഉദ്ഘാടനം ചെയ്തു. കോടഞ്ചേരി മണ്ഡലം പ്രസിഡന്‍റ് ജോസഫ് ആലവേലിയില്‍ അധ്യക്ഷത വഹിച്ചു.

വില്യാപ്പള്ളി-ആയഞ്ചേരി റോഡ് നാടിന് സമര്‍പ്പിച്ചു

കോഴിക്കോട്: പൊതുമരാമത്ത് വകുപ്പിന് കീഴിലെ എല്ലാ റോഡുകളും ബിഎം ആന്‍ഡ് ബിസി നിലവാരത്തില്‍ ഉയര്‍ത്താനാണ് സര്‍ക്കാര്‍ ലക്ഷ്യമിടുന്നതെന്ന് മന്ത്രി പി.എ. മുഹമ്മദ് റിയാസ്. പ്രവൃത്തി പൂര്‍ത്തീകരിച്ച വില്യാപ്പള്ളി-ആയഞ്ചേരി റോഡ് ഉദ്ഘാടനം നിര്‍വഹിക്കുകയായിരുന്നു മന്ത്രി. മൂന്നര വര്‍ഷം കൊണ്ട് പിഡബ്ല്യുഡിയുടെ 50 ശതമാനം റോഡുകളും ബിഎം ആന്‍ഡ് ബിസി നിലവാരത്തില്‍ ഉയര്‍ത്താന്‍ സാധിച്ചു. കുറ്റ്യാടിയിലെ ഗതാഗതക്കുരുക്കിന് പരിഹാരമാകുന്ന ബൈപാസ് 2026ല്‍ പുതുവര്‍ഷ സമ്മാനമായി നാടിന് സമര്‍പ്പിക്കുമെന്നും മന്ത്രി കൂട്ടിച്ചേര്‍ത്തു. കെ.പി. കുഞ്ഞമ്മദ്കുട്ടി മാസ്റ്റര്‍ എംഎല്‍എ അധ്യക്ഷത വഹിച്ചു. അസി. എക്‌സിക്യൂട്ടീവ് എന്‍ജിനീയര്‍ നിദില്‍ ലക്ഷ്മണന്‍ റിപ്പോര്‍ട്ട് അവതരിപ്പിച്ചു. ആയഞ്ചേരി ഗ്രാമപഞ്ചായത്ത് പ്രസിഡന്‍റ് എന്‍. അബ്ദുല്‍ ഹമീദ്, തിരുവള്ളൂര്‍ പഞ്ചായത്ത് പ്രസിഡന്‍റ് പി.സി. ഹാജറ, ജില്ലാ പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷന്‍ പി. സുരേന്ദ്രന്‍, തോടന്നൂര്‍ ബ്ലോക്ക് പഞ്ചായത്ത് സ്ഥിരം സമിതി അധ്യക്ഷ എം.എം. നഷീദ, ആയഞ്ചേരി പഞ്ചായത്ത് സ്ഥിരം സമിതി അധ്യക്ഷ പി.എം. ലതിക, തിരുവള്ളൂര്‍ പഞ്ചായത്ത് സ്ഥിരം സമിതി അധ്യക്ഷന്‍ പി.പി. അബ്ദുറഹ്‌മാന്‍, പൊതുമരാമത്ത് എക്‌സിക്യൂട്ടീവ് എൻജിനീയര്‍ വി.കെ. ഹാഷിം എന്നിവര്‍ പ്രസംഗിച്ചു. വില്യാപ്പള്ളി മുതല്‍ ആയഞ്ചരി വരെയുള്ള 5.33 കിലോമീറ്റര്‍ റോഡ് മൂന്ന് ഘട്ടങ്ങളായാണ് പൂര്‍ത്തീകരിച്ചത്. ബിഎം ആന്‍ഡ് ബിസി നിലവാരത്തില്‍ നിര്‍മിച്ച റോഡിനോട് ചേര്‍ന്ന് മൂന്ന് കള്‍വര്‍ട്ടുകള്‍, വിവിധ ഭാഗങ്ങളില്‍ അഴുക്കുചാലുകള്‍ എന്നിവയും നിര്‍മിച്ചിട്ടുണ്ട്.

ബിജെപി അധികാരത്തിൽ തുടരുന്നത് ക്രമക്കേടിലൂടെ: സി.പി. ചെറിയ മുഹമ്മദ്

മുക്കം: രാജ്യത്താകമാനം വോട്ടർ പട്ടികയിൽ വൻ ക്രമക്കേട് നടത്തിയാണ് ബിജെപി സഖ്യം അധികാരത്തിൽ തുടരുന്നതെന്ന് മുസ്ലീം ലീഗ് സംസ്ഥാന സെക്രട്ടറി സി.പി. ചെറിയമുഹമ്മദ് പറഞ്ഞു. ഇത് ജനങ്ങൾക്ക് മുന്നിലെത്തിച്ച രാഹുൽ ഗാന്ധിക്ക് ഓരോരുത്തരും പിന്തുണ നൽകണമെന്നും അദ്ദേഹം പറഞ്ഞു. കൊടിയത്തൂർ പഞ്ചായത്ത് ഭരണസമിതിയുടെ അഞ്ച് വർഷത്തെ വികസന നേട്ടങ്ങൾ ജനങ്ങളിലെത്തിക്കാനായി പഞ്ചായത്ത് പ്രസിഡന്‍റ് ദിവ്യ ഷിബു, വൈസ് പ്രസിഡന്‍റ് ഫസൽ കൊടിയത്തൂർ എന്നിവർ നയിച്ച ജന വിജയ ജാഥയുടെ സമാപന സമ്മേളനം കൊടിയത്തൂരിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ടി.കെ. അബൂബക്കർ ചടങ്ങിൽ അധ്യക്ഷത വഹിച്ചു. അസ്ലം ചെറുവാടി, സി.ജെ. ആന്‍റണി, ബഷീർ പുതിയോട്ടിൽ, മജീദ് പുതുക്കുടി, ഇ.കെ. മായിൻ, യു.പി. മമ്മദ്, ബാബു പൊലുകുന്നത്ത്, ടി.ടി. അബ്ദുറഹിമാൻ, കെ.പി. അബ്ദു റഹിമാൻ, ഷംസുദ്ധീൻ ചെറുവാടി, സുജ ടോം, കെ.ടി. മൻസൂർ, എൻ.കെ. അഷ്റഫ്, വി.ഷംലൂലത്ത്, കെ.പി. സൂഫിയാൻ, സുഹറ വെള്ളങ്ങോട്ട് തുടങ്ങിയവർ പ്രസംഗിച്ചു. ജാഥ ക്യാപ്റ്റൻ പഞ്ചായത്ത് പ്രസിഡന്‍റ് ദിവ്യ ഷിബു, വൈസ് ക്യാപ്റ്റൻ ഫസൽ കൊടിയത്തൂർ, മുൻ പ്രസിഡന്‍റ് വി. ഷംലൂലത്ത്, ബാബു പൊലുകുന്ന്, ടി.കെ. അബൂബക്കർ, എം.ടി. റിയാസ് തുടങ്ങിയവരെ ഹാരാർപ്പണം നടത്തി. പരിപാടിക്ക് റഫീഖ് കുറ്റ്യോട്ട്, അബ്ദുൽ കരീം കോട്ടമ്മൽ, കുയ്യിൽ അബ്ദുൽ കരീം, ജ്യോതിബാസു കാരക്കുറ്റി, കെ. ഹുസൈൻ, യു. അബ്ദുറഹിമാൻ തുടങ്ങിയവർ നേതൃത്വം നൽകി.

കടയുടെ പൂട്ട് തകർത്ത് പണം കവർന്നു

മുക്കം: മുക്കത്തും പരിസര പ്രദേശങ്ങളിലും മോഷണം തുടർക്കഥയാവുന്നു. അഗസ്ത്യമുഴിയിൽ കടയുടെ പൂട്ട് തകർത്ത്‌ പണം കവർന്നു. അങ്ങാടിയിലെ തിരുവമ്പാടി റോഡിലുള്ള അബി സ്റ്റോറിലാണ് ഇന്നലെ പുലർച്ചെ 3:45 ഒടെ മോഷണം നടന്നത്. കടയിൽ സൂക്ഷിച്ചിരുന്ന 6000 രൂപയാണ് മോഷണം പോയത്. മുക്കം കാഞ്ഞരമുഴി പാറശേരിപ്പറമ്പിൽ മുഹമ്മദലിയുടെ ഉടമസ്ഥതയിലുള്ള കടയാണിത്. രാവിലെ കടതുറാകാൻ വന്നപ്പോഴാണ് പൂട്ട് തകർത്തത് കണ്ടത്.തുടർന്ന് കട ഉടമ മുക്കം പോലീസിൽ പരാതി നല്കി. മോഷണത്തിന്‍റെ സിസിടിവി ദൃശ്യവും ലഭിച്ചിട്ടുണ്ട്.

കൂമ്പാറ - കക്കാടംപൊയിൽ റോഡിൽ കൈവരിസ്ഥാപിക്കണം: ആർജെഡി

കൂടരഞ്ഞി: കൂമ്പാറ - കക്കാടംപൊയിൽ റോഡിൽ ഹെയർപിൻ വളവുകളിലും മറ്റ് ഭാഗങ്ങളിൽ കൈവരിയും സിഗ്‌നൽ ബോർഡുകളും സ്ഥാപിക്കണമെന്ന് ആർജെഡി കക്കാടംപൊയിൽ വാർഡ് കമ്മിറ്റി യോഗം ആവശ്യപെട്ടു. റോഡിന്‍റെ വിവിധ ഭാഗങ്ങളിൽ കാട് പിടിച്ച് കിടക്കുന്നതിനാൽ യാത്രകാർക്ക് റോഡും വളവുതിരിവുകളും തിരിച്ചറിയാനാവാത്ത സാഹചര്യമാണുള്ളത്. ടൂറിസ്റ്റ് കേന്ദ്രമായ കക്കാടംപൊയിലിലേക്ക് അന്യദേശങ്ങളിൽ നിന്നു വരുന്ന ടൂറിസ്റ്റ് വാഹനങ്ങൾക്ക് സ്ഥലപരിചയമില്ലാത്തതിനാൽ വീതി കുറഞ്ഞ ഈ റോഡിൽ വലിയ അപകടം സംഭവിക്കാനുള്ള സാധ്യതയുണ്ട്. പ്രശ്നപരിഹാരത്തിന് അടിയന്തിര നടപടി സ്വീകരിക്കണമെന്നും യോഗം ആവശ്യപെട്ടു. വാർഡ് കമ്മിറ്റി പ്രസിഡന്‍റ് ബെന്നി കാക്കനാട്ട് അധ്യക്ഷത വഹിച്ചു. യോഗത്തിൽ വിൽസൺ പുല്ലുവേലിൽ, ജിമ്മി ജോസ് പൈമ്പിള്ളിൽ, സോളമൻ മഴുവഞ്ചേരിൽ, തങ്കച്ചൻ ചീങ്കല്ലേൽ, ജോർജ് ചന്ദ്രൻകുന്നേൽ, വിൽസൺ പ്ലാമൂട്ടിൽ, വർഗീസ് കോട്ടക്കൽ, ക്ലീറ്റൻസ് പൂവത്തിനാൽ, റെജി ഊന്നനാൽ, ജോർജ് തോട്ടത്തിൽ തുടങ്ങിയവർ പ്രസംഗിച്ചു.

ഉന്നതികളിലെ ആദിവാസികളുടെ ക്ഷേമം ഉറപ്പാക്കും: എ.കെ. ശശീന്ദ്രൻ

കോടഞ്ചേരി: മനുഷ്യ-വന്യജീവി സംഘർഷം കുറക്കുക എന്നതോടൊപ്പം വനമേഖലയോട് ചേർന്നുനിൽക്കുന്ന ഉന്നതികളിലെ ആദിവാസികളുടെ ക്ഷേമം ഉറപ്പാക്കാനുള്ള പ്രവർത്തനങ്ങളും സർക്കാർ നടത്തുകയാണെന്ന്‌ മന്ത്രി എ.കെ. ശശീന്ദ്രൻ. സംസ്ഥാന വനവികസന ഏജൻസിയുടെയും ഇന്ത്യൻ മെഡിക്കൽ അസോസിയേഷന്‍റെയും സഹകരണത്തോടെ വനം-വന്യജീവി വകുപ്പ് സംഘടിപ്പിച്ച ‘സ്നേഹഹസ്തം’ മെഗാ മെഡിക്കൽ ക്യാമ്പ് തുഷാരഗിരി ഇക്കോ ടൂറിസം കേന്ദ്രത്തിൽ ഉദ്ഘാടനം ചെയ്യുകയായിരുന്നു മന്ത്രി. വനമേഖലയുമായി ചേർന്നുനിൽക്കുന്ന ഉന്നതികളിൽ താമസിക്കുന്നവർക്ക് ചികിത്സാ കേന്ദ്രങ്ങളിൽ എത്താനുള്ള പ്രയാസം കുറക്കാനാണ് വനം വകുപ്പും ആരോഗ്യ വകുപ്പും സംയുക്തമായി സ്നേഹഹസ്തം നടപ്പിലാക്കിയതെന്ന്‌ മന്ത്രി കൂട്ടിച്ചേർത്തു. സമാനമായ 551 മെഡിക്കൽ ക്യാമ്പുകൾ ഉന്നതികളിൽ നടത്തിയിട്ടുണ്ടെന്നും 1000 ക്യാമ്പുകൾ പൂർത്തിയാക്കാനുള്ള ശ്രമങ്ങൾ നടക്കുകയാണെന്നും മന്ത്രി അറിയിച്ചു. ജില്ലയിലെ മലയോര മേഖലയിലുള്ള വിവിധ ഉന്നതികളിൽ താമസിക്കുന്ന ഗോത്ര വിഭാഗക്കാരായ കുടുംബങ്ങൾക്ക് ഗുണമേന്മയുള്ള ആരോഗ്യ സേവനങ്ങൾ സൗജന്യമായി ലഭ്യമാക്കുക എന്ന ലക്ഷ്യത്തോടെ വിദഗ്ദ്ധരായ ഡോക്ടർമാരുടെ സേവനങ്ങളാണ് ക്യാമ്പിൽ ലഭ്യമാക്കിയത്. ചടങ്ങിൽ കോടഞ്ചേരി പഞ്ചായത്ത് പ്രസിഡന്‍റ് അലക്സ്‌ തോമസ് ചെമ്പകശേരി അധ്യക്ഷത വഹിച്ചു. സ്നേഹഹസ്തം കൺവീനർ ഡോ. ഹേമ ഫ്രാൻസിസ് പദ്ധതി വിശദീകരിച്ചു. വാർഡ് മെമ്പർമാരായ സിസിലി ജേക്കബ്, റോസ്‌ലി മാത്യു, സർക്കിൾ ചീഫ് ഫോറസ്റ്റ് കൺസർവേറ്റർ ബി.എൻ. അഞ്ജൻകുമാർ, അഡീ. പ്രിൻസിപ്പൽ ചീഫ് ഫോറസ്റ്റ് കൺസർവേറ്റർ ജസ്റ്റിൻ മോഹൻ, ഐഎംഎ ദേശീയ ചെയർമാൻ ഡോ. എം.എസ്. അഷ്റഫ്, ദേശീയ ആരോഗ്യ ദൗത്യം കോഴിക്കോട് പ്രോഗ്രാം മാനേജർ സി.കെ. ഷാജി തുടങ്ങിയവർ പ്രസംഗിച്ചു.

പതങ്കയത്ത് സുരക്ഷ ഒരുക്കണമെന്ന്

കോടഞ്ചേരി: ഇരുവഞ്ഞിപ്പുഴയിലെ പതങ്കയത്ത് അപകട മരണങ്ങൾ തടയാൻ ജില്ലാ ഭരണകൂടം അടിയന്തര നടപടി സ്വീകരിക്കണമെന്ന് പ്രദേശവാസികൾ ആവശ്യപ്പെട്ടു. കഴിഞ്ഞ ദിവസം ഒഴുക്കിൽപെട്ട് മരിച്ച അലൻ അഷ്റഫ് അടക്കം ഏതാനും വർഷത്തിനുള്ളിൽ 28 യുവാക്കളുടെ ജീവനാണ് പതങ്കയത്തു പൊലിഞ്ഞത്. തുടരെ അപകട മരണങ്ങൾ ഉണ്ടായിട്ടും അധികൃതരുടെ ഭാഗത്തുനിന്നു സുരക്ഷാ നടപടി ഇല്ലെന്ന് വ്യാപക ആക്ഷേപമുണ്ട്.നാട്ടുകാരെ ഉൾപ്പെടുത്തി സുരക്ഷാ ഗാർഡുകളെ നിയമിച്ച് സഞ്ചാരികളെ നിയന്ത്രിക്കുന്നതിനു പ്രാദേശിക സമിതി രൂപീകരിച്ചിരുന്നെങ്കലും ഫലപ്രദമായില്ല. പതങ്കയത്തേയ്ക്കുള്ള പ്രവേശനം തടഞ്ഞുള്ള ബോർഡുകളും ബാനറുകളും സ്‌ഥാപിച്ചതല്ലാതെ മുന്നറിയിപ്പ് ലംഘിച്ച് പുഴയിൽ ഇറങ്ങുന്നവരെ കർശനമായി തടയാൻ നടപടികളില്ല. പതങ്കയത്തിന്‍റെ സുരക്ഷാ ചുമതലയും നിയന്ത്രണവും ജില്ല ടുറിസം പ്രമോഷൻ കൗൺസിലിന്‍റെ കീഴിലുള്ള അരിപ്പാറ ടൂറിസ്റ്റ് കേന്ദ്രത്തിന്‍റെ പരിധിയിലേക്ക് കൊണ്ടു വരണമെന്നാണ് പ്രദേശവാസികൾ ആവശ്യപ്പെടുന്നത്.

റോഡരികിൽ മാലിന്യം തള്ളുന്നതായി പരാതി

കൂരാച്ചുണ്ട്: കൂരാച്ചുണ്ട് - ബാലുശേരി പ്രധാന റോഡരികിൽ മാലിന്യം തള്ളുന്നതായി ആക്ഷേപം. പിഡബ്ല്യുഡിയുടെ അധീനതയിലുള്ള റോഡിലെ എരപ്പാൻതോട് കള്ളുഷാപ്പിന് സമീപം ആളൊഴിഞ്ഞ മേഖലയിലാണ് സ്ഥിരമായി പ്ലാസ്റ്റിക് അടക്കമുള്ള ചാക്കുളിലാക്കിയ മാലിന്യം തള്ളുന്നത്. ഇവിടെ റോഡിന്‍റെ മറുഭാഗം കാടായതിനാൽ ഇവിടെയും മാലിന്യം തള്ളുന്നുണ്ട്. ഇതുവഴി കടന്നു പോകുമ്പോൾ ദുർഗന്ധം വമിക്കുന്നതു മൂലം യാത്രക്കാർ ബുദ്ധിമുട്ടുകയാണ്. മേഖലയിൽ മാലിന്യം നിക്ഷേപിക്കുന്നത് തടയുന്നതിനായി ബന്ധപ്പെട്ട അധികൃതർ ശക്തമായ നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.

കാറിൽ കടത്തുകയായിരുന്ന വിദേശ മദ്യം പിടികൂടി

കൊയിലാണ്ടി: ദേശീയപാതയിൽ വാഹന പരിശോധനക്കിടെ കാറിൽ കടത്തുകയായിരുന്ന മാഹി വിദേശ മദ്യം പിടികൂടി. മാഹി ചാലക്കര മണ്ടപറപ്പത്ത് ശ്യാമിനെയാണ് 130.5 ലിറ്റർ മാഹി മദ്യവുമായി മൂടാടി പഞ്ചായത്ത് കാര്യാലയത്തിന്‍റെ ഗെയിറ്റിനു മുൻവശം വച്ച് പിടികൂടിയത്. മദ്യം കടത്തുകയായിരുന്ന കാറും കസ്റ്റഡിയിലെടുത്തു. കൊയിലാണ്ടി എക്സൈസ് റേഞ്ച് ഓഫീസിലെ അസി. എക്സൈസ് ഇൻസ്പെക്ടർ ഗ്രേഡ് സി. പ്രവീൺ ഐസക്കും സംഘവും ചേർന്നാണ് പ്രതിയെ പിടികൂടിയത്.

വനം മന്ത്രി രാജിവയ്ക്കണം: കോൺഗ്രസ്

കോടഞ്ചേരി: തുഷാരഗിരിയിൽ പരിപാടിയിൽ പങ്കടെുക്കാനെത്തിയ മന്ത്രി എ.കെ. ശശീന്ദ്രനെതിരേ പ്രതിഷേധിച്ച കർഷക കോൺഗ്രസ് നേതാക്കളെ അറസ്റ്റ് ചെയ്തതിൽ മണ്ഡലം കോൺഗ്രസ് കമ്മിറ്റി പ്രതിഷേധിച്ചു. കർഷക കോൺഗ്രസ് നേതാക്കളായ സാബു അവണ്ണൂർ, ടോമി ഇല്ലിമൂട്ടിൽ, ബേബി കളപ്പുര, ബിജു ഓത്തിക്കൽ എന്നിവരെയാണ് അറസ്റ്റ് ചെയ്തത്. വനവും കൃഷിഭൂമിയും വേർതിരിക്കാൻ സൗരോർജ വേലി അടക്കമുള്ള പദ്ധതികൾ പ്രഖ്യാപിച്ച മന്ത്രിയും തിരുവമ്പാടി എംഎൽഎയും പദ്ധതി അട്ടിമറിക്കുകയാണ്. കർഷക വിരുദ്ധരായ മന്ത്രിയും എംഎൽഎയും രാജിവെക്കണമെന്നും യോഗം ആവശ്യപ്പെട്ടു. ബ്ലോക്ക് കോൺഗ്രസ് പ്രസിഡന്‍റ് ജോബി ഇലന്തൂർ യോഗം ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് വിൻസെന്‍റ് വടക്കേമുറിയിൽ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, യുഡിഎഫ് ചെയർമാൻ കെ.എം. പൗലോസ്, കർഷക കോൺഗ്രസ് സംസ്ഥാന സെക്രട്ടറി സണ്ണി കാപ്പാട്ട് മല, ബ്ലോക്ക് പഞ്ചായത്ത് അംഗം റോയി കുന്നപ്പള്ളി, നിയോജക മണ്ഡലം പ്രസിഡന്‍റ് തമ്പി പറകണ്ടത്തിൽ എന്നിവർ പ്രസംഗിച്ചു.

ഹൈസ്കൂൾ - സിഎച്ച്സി റോഡിലെ അപകടമേഖലയിൽ സംരക്ഷണവേലി വേണമെന്ന്

കൂരാച്ചുണ്ട്: കൂരാച്ചുണ്ട് പഞ്ചായത്ത് പത്താം വാർഡിലുൾപ്പെട്ട ഹൈസ്കൂൾ - സിഎച്ച്സി റോഡിന്‍റെ അപകട സാധ്യതയുള്ള ഭാഗത്ത് സംരക്ഷണവേലി നിർമിക്കാത്തതിനെതിരേ ആക്ഷേപം. ഹൈസ്കൂൾ മൈതാനത്തോട് ചേർന്ന് കിടക്കുന്ന കോൺക്രീറ്റിൽ നിർമിച്ച റോഡിന്‍റെ ഏകദേശം അൻപത് മീറ്റർ ദൂരത്തിലുള്ള ഭാഗത്താണ് ഒരുഭാഗം അപകട സാധ്യതയുള്ള വിധം താഴ്ചയുള്ള നിലയിലുള്ളത്. ഈ ഭാഗത്ത് സംരക്ഷണവേലി നിർമിച്ചിട്ടില്ല. ഓട്ടോറിക്ഷ അടക്കമുള്ള നിരവധി വാഹനങ്ങൾ ഓടുന്ന റോഡാണിത്. മാത്രമല്ല വിദ്യാർഥികളും മറ്റ് ആൾക്കാരും യാത്രചെയ്യുന്ന റോഡുമാണ്. ഇതിനു സമീപം പ്രവർത്തിക്കുന്ന സാമൂഹിക ആരോഗ്യ കേന്ദ്രത്തിലേക്ക് ഈ മേഖലയിലുള്ളവർ പോകുന്നതും ഇതുവഴിയാണ്. റോഡിന്‍റെ താഴ്ചയുള്ള ഭാഗത്തു കൂടി രണ്ടു വാഹനങ്ങൾ കടന്നുപോകുന്ന സാഹചര്യങ്ങളിൽ അപകടത്തിൽപെടാൻ സാധ്യത കൂടുതലാണ്. വാർഡ് തല ഗ്രാമസഭയിലും ഈ വിഷയം നിരവധി തവണ നാട്ടുകാർ ചർച്ച ചെയ്തെങ്കിലും പഞ്ചായത്ത് ഒരു നടപടിയും സ്വീകരിച്ചില്ലെന്നാണ് നാട്ടുകാരുടെ പരാതി. റോഡിന്‍റെ അപകട സാധ്യത പരിഗണിച്ച് സംരക്ഷണവേലി നിർമിക്കാൻ അടിയന്തര നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.

അച്ചടക്ക നടപടി സ്വീകരിക്കണമെന്ന്

കൂരാച്ചുണ്ട്: യുഡിഎഫിന്‍റെ കെട്ടുറപ്പിനെ തകർക്കുന്ന രീതിയിൽ തുടർച്ചയായി പ്രവർത്തനം നടത്തുകയും കോൺഗ്രസ്‌ നേതൃത്വം നൽകുന്ന അനുനയ ചർച്ചകളെ വെല്ലുവിളിച്ച് സംഘടന വിരുദ്ധ പ്രവർത്തനങ്ങൾ തുടരുകയും ചെയ്യുന്നവർക്കെതിരേ ജില്ലാ കോൺഗ്രസ്‌ നേതൃത്വം അച്ചടക്ക നടപടി സ്വീകരിക്കണമെന്ന് കൂരാച്ചുണ്ട് മണ്ഡലം കോൺഗ്രസ്‌ കമ്മിറ്റി യോഗം ആവശ്യപ്പെട്ടു. കാവിൽ പി. മാധവൻ ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ജോസ് വെളിയത്ത് അധ്യക്ഷത വഹിച്ചു. ഷാജു കാരക്കട, ജെറിൻ കുര്യാക്കോസ്, സിമിലി ബിജു, കുര്യൻ ചെമ്പനാനി, സണ്ണി പുതിയകുന്നേൽ, ചെറിയാൻ അറയ്ക്കൽ, ജോൺസൺ തേനംമാക്കൽ, രാജു കിഴക്കേകര, സജി ചേലാപറമ്പത്ത്, സണ്ണി കോട്ടയിൽ എന്നിവർ പ്രസംഗിച്ചു.

എടവണ്ണ - കൊയിലാണ്ടി പാതയിൽ അപകടങ്ങൾ പതിവ്

മുക്കം :കിലോമീറ്ററിന് നാല് കോടിയിലധികം രൂപ ചെലവഴിച്ച് നവീകരണം പൂർത്തിയാക്കിയഎടവണ്ണ- കൊയിലാണ്ടി സംസ്ഥാന പാതയിലെ അപകടങ്ങളും റോഡ് നവീകരണത്തിലെ അപാകതകളും അനുദിനം വർധിക്കുന്നു. ഈ മാസം ഇതു വരെ മാത്രം പത്തോളം അപകടങ്ങളാണ് ഇവിടെ നടന്നത്. ഓമശേരിക്കും അരീക്കോടിനുമിടയിലാണ് പ്രധാനമായും അപകടങ്ങൾ നടക്കുന്നത്. മുക്കത്തിനടുത് വലിയ പറമ്പിൽ ശനിയാഴ്ച രാത്രി 11.30 ഓടെയുണ്ടായ അപകടമാണ് ഏറ്റവും അവസാനത്തേത്. നിയന്ത്രണം വിട്ട കാർ ഇലക്ട്രിക്ക് പോസ്റ്റിലിടിച്ചു മറിഞ്ഞാണ് അപകടം. കാർ രണ്ടുമൂന്നു തവണ തല കീഴായി മറിഞ്ഞതായി സിസിടിവി ദൃശ്യങ്ങളിൽ നിന്ന് വ്യക്തമാണ്. അരീക്കോട് കാരിപറമ്പ് സ്വദേശികളുടെതാണ് കാർ. കാറിലുള്ളവരുടെ പരിക്ക് ഗുരുതരമല്ല. ഇവർ സ്വകാര്യ മെഡിക്കൽ കോളജിൽ ചികിത്സ തേടി. റോഡിലെ അശാസ്ത്രീയ നിർമാണമാണ് അപകടങ്ങൾക്ക് കാരണമാവുന്നതെന്നാണ് പരാതി. അതിനിടെ റോഡ് നവീകരണം പൂർത്തിയായ അന്ന് മുതലുള്ള അപാകതകൾക്കും ഇനിയും പരിഹാരമായിട്ടില്ല. ഒരു വർഷത്തിനുള്ളിൽ തന്നെ റോഡ് പൊളിഞ്ഞ് തുടങ്ങിയിട്ടുണ്ട്. പത്തിലധികം സ്ഥലങ്ങളിൽ റോഡ് താഴ്ന്ന് പോയിട്ടുമുണ്ട്.

അങ്കണവാടികളിൽ മികച്ച സൗകര്യമൊരുക്കുകയാണ് സർക്കാർ ലക്ഷ്യം : മന്ത്രി പി.എ. മുഹമ്മദ് റിയാസ്

കോഴിക്കോട്: കുട്ടികള്‍ക്ക് വിഭവസമൃദ്ധമായ ഭക്ഷണമുള്‍പ്പെടെ നല്‍കി അങ്കണവാടികളില്‍ മികച്ച സാഹചര്യമൊരുക്കുകയാണ് സര്‍ക്കാര്‍ ലക്ഷ്യമിടുന്നതെന്ന് മന്ത്രി പി.എ. മുഹമ്മദ് റിയാസ്. മുയ്യോട്ട്താഴ കാര്‍ത്തിക അങ്കണവാടി കെട്ടിടോദ്ഘാടനവും ലൈഫ് പദ്ധതി ഗുണഭോക്താക്കള്‍ക്ക് രേഖ കൈമാറ്റവും നിര്‍വഹിക്കുകയായിരുന്നു മന്ത്രി. അഞ്ച് ലക്ഷത്തോളം കുടുംബങ്ങള്‍ക്ക് ലൈഫ് ഭവന പദ്ധതിയിലൂടെ വീടുകള്‍ സാധ്യമായി. ഭൂമിയുള്ളവര്‍ക്ക് വീട് എന്നതിന് പുറമെ ഭൂരഹിത-ഭവനരഹിതര്‍ക്ക് വീട് എന്ന ഉത്തരവാദിത്തവും സര്‍ക്കാര്‍ നടപ്പാക്കിയതായും മന്ത്രി പറഞ്ഞു. അങ്കണവാടി കെട്ടിടത്തിനായി സ്ഥലം കൈമാറിയവരെയും മനസോടിത്തിരി മണ്ണ് ക്യാമ്പയിനില്‍ ഭൂമി വിട്ടുനല്‍കിയവരെയും മന്ത്രി ആദരിച്ചു. ചടങ്ങില്‍ കെ.പി. കുഞ്ഞമ്മദ് കുട്ടി എംഎല്‍എ അധ്യക്ഷത വഹിച്ചു. അസി. എൻജിനീയര്‍ സതീഷ് റിപ്പോര്‍ട്ട് അവതരിപ്പിച്ചു. തോടന്നൂര്‍ ബ്ലോക്ക് പഞ്ചായത്ത് പ്രസിഡന്‍റ് പി.എം. ലീന, വില്യാപ്പള്ളി പഞ്ചായത്ത് പ്രസിഡന്‍റ് കെ.കെ. ബിജുള, വൈസ് പ്രസിഡന്‍റ് പൂളക്കണ്ടി മുരളി, സ്റ്റാന്‍ഡിംഗ് കമ്മിറ്റി അധ്യക്ഷരായ കെ.കെ. സിമി, രജിത കോളിയോട്ട്, സുബിഷ എന്നിവര്‍ സംസാരിച്ചു.

സർക്കാർ പ്രഖ്യാപിച്ച മോറട്ടോറിയം ബാങ്കുകൾ നടപ്പിലാക്കണമെന്ന്

കോഴിക്കോട്: ഉരുൾപൊട്ടലിനെ തുടർന്ന് സംസ്ഥാന സർക്കാർ പ്രഖ്യാപിച്ച മോറട്ടോറിയം ബാങ്കുകൾ നടപ്പിലാക്കണമെന്ന് കർഷക കോൺഗ്രസ് ജില്ല നേതൃത്വ പഠന ക്യാന്പ് ആഭിപ്രായപ്പെട്ടു. മലയോര മേഖലയിലെ ആറു വില്ലേജുകളിൽ മോറട്ടോറിയം പ്രഖ്യാപിച്ചു കൊണ്ട് 2025 മാർച്ച് 15 നാണ് സർക്കാർ ഉത്തരവിറക്കിയത്. 2026 മാർച്ച് വരെ കാലാവധി നിലനിൽക്കെ പല ബാങ്കുകളും റവന്യൂ റിക്കവറി നടപടികളുമായി മുന്നോട്ട് പോവുകയാണ്. കേരള സർക്കാർ പ്രഖ്യാപിച്ച ദുരിതാശ്വാസ സഹായം ഒരു വർഷമായിട്ടും ലഭിക്കാത്ത കർഷക ജനതയെ മൊറോട്ടോറിയം നൽകാതെ ബാങ്കുകളും ദ്രോഹിക്കുന്നതായി കർഷക കോൺഗ്രസ്‌ ആരോപിച്ചു. ക്യാന്പ് അഡ്വ. ബിജു കണ്ണന്തറ ഉദ്ഘാടനം ചെയ്തു. രവീഷ് വളയം അധ്യക്ഷത വഹിച്ചു. ക്യാമ്പിൽ കെ.കെ. അബ്ദുള്ള സംഘടനാ വിഷയത്തിൽ ക്ലാസെടുത്തു. എൻ.പി. വിജയൻ, ജോസ് കാരുവേലി, സദാശിവൻ, കമറുദ്ധീൻ അടിവാരം, സി.പി. നാരായണൻ, നാണു വളയം, പട്ടയാട്ട് അബ്ദുള്ള, വി.വി. ദാമോദരൻ, അനന്ദൻ കുനിയിൽ, കെ.വി. പ്രസാദ്, സോജൻ ആലക്കൽ, സണ്ണി കുഴമ്പാല, ശരീഫ് വെളിമണ്ണ, ടി.എൻ. അബ്ദുൾ നാസർ തുടങ്ങിയവർ പ്രസംഗിച്ചു.

ന്യൂനപക്ഷ വേട്ടയ്ക്കെതിരേ എൽഡിഎഫ് പ്രതിരോധ സംഗമം നടത്തി

കൂരാച്ചുണ്ട്: കന്യാസ്ത്രീകൾക്കെതിരേ ചുമത്തിയ കള്ളക്കേസ് പിൻവലിക്കുക, മതസ്വാതന്ത്ര്യവും സഞ്ചാര സ്വാതന്ത്ര്യവും സംരക്ഷിക്കുക തുടങ്ങിയ ആവശ്യങ്ങൾ ഉന്നയിച്ചു ബാലുശേരി നിയോജകമണ്ഡലം എൽഡിഎഫ് കമ്മിറ്റിയുടെ നേതൃത്വത്തിൽ കൂരാച്ചുണ്ടിൽ പ്രതിഷേധ പ്രകടനവും പ്രതിരോധ സംഗമവും നടത്തി. കെ.എം. സച്ചിൻ ദേവ് എംഎൽഎ ഉദ്ഘാടനം ചെയ്തു. എൽഡിഎഫ് ചെയർമാൻ വിൽസൺ പാത്തിച്ചാലിൽ അധ്യക്ഷത വഹിച്ചു. ആർജെഡി ജില്ലാ സെക്രട്ടറി പ്രേംഭാസിൽ, കേരള കോൺഗ്രസ്‌-എം ജില്ലാ സെക്രട്ടറി കെ.എം പോൾസൺ, ഇസ്മായിൽ കുറുമ്പൊയിൽ, കെ.ജി അരുൺ, ടി.കെ. സുമേഷ്, ഷാജി കെ. പണിക്കർ, ബേബി പൂവ്വത്തിങ്കൽ എ.കെ. പ്രേമൻ എന്നിവർ പ്രസംഗിച്ചു.

ദേശീയ വ്യാപാരി ദിനം ആചരിച്ചു

കോഴിക്കോട്: കേരള വ്യാപാരി വ്യവസായി ഏകോപന സമിതി ജില്ലാ കമ്മിറ്റിയുടെ ആഭിമുഖ്യത്തില്‍ വ്യാപാരിദിനം ആചരിച്ചു. കോഴിക്കോട് വ്യാപാര ഭവനില്‍ ജില്ലാ ജനറല്‍ സെക്രട്ടറി വി.സുനില്‍ കുമാര്‍ പതാക ഉയര്‍ത്തി. ജില്ലയിലെ യൂണിറ്റികളില്‍ വിവിധ പരിപാടികളോടെ ആചരിച്ചു. കൂടപ്പിറപ്പിന് ഒരു വീട് എന്ന പരിപാടിക്ക് രണ്ടു യൂണിറ്റികളില്‍ പ്രവര്‍ത്തനം തുടങ്ങി. വിവിധ തരം സേവന പ്രവര്‍ത്തനങ്ങള്‍ക്ക് യൂണിറ്റ് തലത്തില്‍ തുടക്കം കുറിച്ചു ജില്ല വൈസ് പ്രസിഡന്റ് എ.വി.എം കബീര്‍ അധ്യക്ഷത വഹിച്ച ചടങ്ങില്‍ ജില്ലാ സെക്രട്ടറി എ.കെ മന്‍സൂര്‍ നോര്‍ത്ത് മണ്ഡലം പ്രസിഡന്‍റ് പി.വി.എ സിദ്ധിക്ക് , വൈസ് പ്രസിഡന്‍റ്ഹീം , ഷഫീക് പട്ടട്ട്, എന്നിവര്‍ സംസാരിച്ചു.

എമർജൻസി സർവീസ് വാഹനം ഫ്ലാഗ് ഓഫ് ചെയ്തു

താമരശേരി: ഗ്രീൻവേംസ് താമരശേരി എംആർഎഫ് യൂണിറ്റിൽ ജോലി ചെയ്യുന്ന വനിതാ തൊഴിലാളികൾക്കായി ഏർപ്പെടുത്തിയ എമർജൻസി സർവീസ് വാഹനം മേയർ ഡോ. ബീനാ ഫിലിപ്പ് ഫ്ലാഗ് ഓഫ് ചെയ്തു. പ്ലാന്‍റിലെ 200 തൊഴിലാളികൾക്ക് അടിയന്തര ആവശ്യങ്ങൾക്കാണ് വാഹനം ഒരുക്കിയത്. സ്ത്രീകൾക്ക് മികച്ച അന്തരീക്ഷത്തിലുള്ള തൊഴിലവസരങ്ങൾ നൽകുന്നതിനും, പരിസ്ഥിതി സംരക്ഷണ പ്രവർത്തനത്തിനും ഗ്രീൻവേംസ് നടത്തുന്ന പ്രവർത്തനം മാതൃകാ പരമാണെന്ന് മേയർ അഭിപ്രായപ്പെട്ടു. ചടങ്ങിൽ കട്ടിപ്പാറ പഞ്ചായത്ത് മെമ്പൻ സീന സുരേഷ് വിശിഷ്ടാതിഥിയായി.

യൂത്ത് കോൺഗ്രസ്‌ സ്ഥാപക ദിനാഘോഷം നടത്തി

കൂരാച്ചുണ്ട്: കൂരാച്ചുണ്ട് മണ്ഡലം കമ്മിറ്റിയുടെ നേതൃത്വത്തിൽ യൂത്ത് കോൺഗ്രസ്‌ സ്ഥാപക ദിനം ആചരിച്ചു. യൂത്ത് കോൺഗ്രസ് നേതാവ് ജെസ്റ്റിൻ രാജ് ഉദ്ഘാടനം ചെയ്തു. യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. കോൺഗ്രസ്‌ മണ്ഡലം വൈസ് പ്രസിഡന്‍റ് ജെറിൻ കുര്യാക്കോസ് മുഖ്യപ്രഭാഷണം നടത്തി. മുതിർന്ന പ്രവർത്തകൻ ജ്യോതിഷ് രാരപ്പൻകണ്ടി പതാക ഉയർത്തി. കെഎസ്‌യു മണ്ഡലം പ്രസിഡന്‍റ് രാഹുൽ രാഘവൻ, ദീപു കിഴക്കേനകത്ത്, അക്ഷത മരുതോട്ട്കുനിയിൽ, ഷാരോൺ ചാലിക്കോട്ടയിൽ, മാത്യുസ് പുല്ലംകുന്നേൽ എന്നിവർ പ്രസംഗിച്ചു. യൂത്ത് കോൺഗ്രസ്‌ കരിയാത്തും യൂണിറ്റ് കമ്മിറ്റിയുടെ നേതൃത്വത്തിൽ നടന്ന സ്ഥാപക ദിനാഘോഷത്തിൽ യൂണിറ്റ് പ്രസിഡന്‍റ് മാത്യുസ് പുല്ലംകുന്നേൽ പതാക ഉയർത്തി. കോൺഗ്രസ്‌ മണ്ഡലം പ്രസിഡന്‍റ് ജോസ് വെളിയത്ത്, പഞ്ചായത്ത് മെമ്പർ ജെസി ജോസഫ് കരിമ്പനയ്ക്കൽ, യൂത്ത് കോൺഗ്രസ്‌ മണ്ഡലം ജനറൽ സെക്രട്ടറി നിഖിൽ വെളിയത്ത്, അബി കരിമ്പനയ്ക്കൽ, കെവിൻ വെളിയത്ത്, ഗോഡ്‌വിൻ വെളിയത്ത്, റോഷൻ കണിച്ചേരി എന്നിവർ പ്രസംഗിച്ചു.

ശാസ്ത്ര ക്വിസ് മത്സരം സംഘടിപ്പിച്ചു

കോഴിക്കോട്: സംസ്ഥാന യുവജന ക്ഷേമ ബോര്‍ഡ് ജില്ലാ യുവജന കേന്ദ്രത്തിന്‍റെ നേതൃത്വത്തില്‍ ഹൈസ്‌കൂള്‍ വിദ്യാര്‍ഥികള്‍ക്കായി ജില്ലാതല ശാസ്ത്ര ക്വിസ് മത്സരം സംഘടിപ്പിച്ചു. നടക്കാവ് ഗവ. ഗേള്‍സ് വൊക്കേണല്‍ ഹയര്‍ സെക്കന്‍ഡറി സ്‌കൂളില്‍ നടന്ന പരിപാടി തോട്ടത്തില്‍ രവീന്ദ്രന്‍ എംഎല്‍എ ഉദ്ഘാടനം ചെയ്തു. ഹെഡ്മാസ്റ്റര്‍ കെ.വി. പ്രേമചന്ദ്രന്‍ അധ്യക്ഷനായി. ജില്ലാ പഞ്ചായത്ത് വൈസ് പ്രസിഡന്‍റ് അഡ്വ. പി ഗവാസ് മുഖ്യാതിഥിയായി. നടക്കാവ് ജിവിഎച്ച്എസ്എസ് പ്രിന്‍സിപ്പല്‍ സി. ഗിരീഷ് കുമാര്‍, കോഴിക്കോട് കോര്‍പറേഷന്‍ കോഓഡിനേറ്റര്‍ സിനാന്‍ ഉമ്മര്‍, യുവജനക്ഷേമ ബോര്‍ഡ് ജില്ലാ കോഓഡിനേറ്റര്‍ ടി.കെ. സുമേഷ്, യൂത്ത് പ്രോഗ്രാം ഓഫീസര്‍ വിനോദന്‍ പൃത്തിയില്‍, കോഓഡിനേറ്റര്‍മാരായ പി.ടി. അമര്‍ജിത്ത്, സനല്‍കുമാര്‍ തുടങ്ങിയവര്‍ പ്രസംഗിച്ചു. ജില്ലയിലെ നിയോജകമണ്ഡലങ്ങളില്‍നിന്ന് വിജയികളായെത്തിയ രണ്ടുപേരടങ്ങുന്ന ടീമുകളാണ് മത്സരത്തില്‍ പങ്കെടുത്തത്. ചിങ്ങപുരം സികെജിഎം എച്ച്എസ്എസിലെ ജെ.എസ്. സനാലക്ഷ്മി, ശരണ്യ സായി ടീം ഒന്നും വെസ്റ്റ് ഹില്‍ സെന്‍റ് മൈക്കിള്‍സ് ഗേള്‍സ് എച്ച്എസ്എസിലെ ദേവിക ഗിരീഷ്, സി. അമയ എന്നിവര്‍ രണ്ടും സ്ഥാനം നേടി. വിജയികള്‍ക്ക് യഥാക്രമം 10000, 5000 രൂപ പ്രൈസ് മണിയും മെമെന്‍റോയും വിതരണം ചെയ്തു. ഒന്നാം സ്ഥാനം നേടിയ ടീം സംസ്ഥാനതല മത്സരത്തില്‍ പങ്കെടുക്കും.

സ്‌കൂളുകളില്‍ എ.ഐ റോബോര്‍ട്ടിക് ലാബുകളുമായി കൊക്കോസ്

കോഴിക്കോട് : നിര്‍മിതബുദ്ധി(എഐ)യും റോബോട്ടിക് വിദ്യാഭ്യാസവും നല്‍കുന്ന സ്റ്റാര്‍ട്ടപ്പായ കൊക്കോസ് സര്‍ക്കാര്‍, സ്വകാര്യ സ്‌കൂളുകളിലായി 100 എഐ റോബോര്‍ട്ടിക് ലാബുകള്‍ സ്ഥാപിക്കുന്നു. അടുത്ത ഒരു വര്‍ഷത്തിനുള്ളില്‍ പദ്ധതി പൂര്‍ത്തീകരിക്കാനാണ് ലക്ഷ്യമിടുന്നതെന്നും എഐ യുടെ ഭാവിയിലേക്ക് കുട്ടികളെ സജ്ജരാക്കുകയെന്നതാണ് ഇതിലൂടെ ഉദ്ദേശിക്കുന്നതെന്നും അധികൃതര്‍ വാര്‍ത്താസമ്മേളനത്തില്‍ അറിയിച്ചു. ആദ്യ എഐ റോബോര്‍ട്ടിക് ലാബ് മലപ്പുറം പുറത്തൂര്‍ സര്‍ക്കാര്‍ യുപി സ്‌കൂളില്‍ 13- ന് ഉദ്ഘാടനം ചെയ്യും. 18 ലക്ഷം രൂപ ചെലവിലാണ് ലാബ് സ്ഥാപിച്ചത്. പ്രത്യേകം രൂപകല്‍പന ചെയ്ത എഐ പഠന പ്ലാറ്റ്ഫോമും ലോകോത്തരനിലവാരമുള്ള പാഠപുസ്തകങ്ങളും പദ്ധതിയുടെ ഭാഗമായി നല്‍കുമെന്നും സിടിഒ ഷഫീഖ് റഹ്മാന്‍, സൂരജ് രാജന്‍, തസ്നിം കമറുദ്ദീന്‍ എന്നിവര്‍ പറഞ്ഞു.

തെരഞ്ഞെടുപ്പുകളിൽ യുവജന പങ്കാളിത്തം ഉറപ്പാക്കണം: മന്ത്രി റോഷി അഗസ്റ്റിന്‍

തിരുവമ്പാടി: വരാനിരിക്കുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകളിൽ യുവജന പങ്കാളിത്തം ഉറപ്പാക്കണമെന്ന് മന്ത്രി റോഷി അഗസ്റ്റിൻ. ജനങ്ങളുടെ ഇടയിൽ പ്രവർത്തിച്ചു യുവാക്കൾ മാതൃകയാവണം. ഇനി വരാനിരിക്കുന്ന തലമുറയെ കൈപിടിച്ച് നടത്തണം. ഈ രാജ്യത്ത് വലിയ സംഭാവനകൾ ചെയ്യാൻ ഓരോ യുവജനത്തിനും കഴിയണം.അതിനുവേണ്ടി അക്ഷീണം പ്രവർത്തിക്കണമെന്നും മന്ത്രി പറഞ്ഞു. കേരള കോൺഗ്രസ് യൂത്ത് ഫ്രണ്ട് -എം തിരുവമ്പാടി നേതൃ തല കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. യൂത്ത് ഫ്രണ്ട് -എം തിരുവമ്പാടി നിയോജക മണ്ഡലം പ്രസിഡന്‍റ് സുബിൻ തയ്യിൽ അധ്യക്ഷത വഹിച്ചു. കേരള കോൺഗ്രസ് -എം ജില്ല പ്രസിഡന്‍റ് ടി.എം. ജോസഫ് മുഖ്യപ്രഭാഷണം നടത്തി. കേരള കോൺഗ്രസ്-എം ജില്ലാ സെക്രട്ടറിമാരായ പോൾസൺ, റോയി മുരിക്കോലിയിൽ, സംസ്ഥാന കമ്മിറ്റി അംഗം സിജോ വടക്കൻതോട്ടം, തിരുവമ്പാടി മണ്ഡലം പ്രസിഡന്‍റ് ജോയ് മ്ലാങ്കുഴിയിൽ എന്നിവർ പ്രസംഗിച്ചു.

വീടിന്‍റെ സംരക്ഷണഭിത്തി തകർന്നു

കൂടരഞ്ഞി: കനത്തമഴയിൽ വീടിന്‍റെ സംരക്ഷണ ഭിത്തി തകർന്നു. വീട്ടിപ്പാറ ആലപ്പാട്ട് അംബ്രോസിന്‍റെ വീടിന്‍റെ സംരക്ഷണഭിത്തിയാണ് കഴിഞ്ഞദിവസം പെയ്ത കനത്ത മഴയിൽ തകർന്നത്. വിട്ടുമാറാതെ പെയ്യുന്ന മഴ കാരണം പുഴയിൽ വെള്ളത്തിന്‍റെ ഒഴുക്ക് കൂടാനും വീണ്ടും ഇടിയാനുമുള്ള സാഹചര്യമാണുള്ളത്. പഞ്ചായത്തിലും ഇറിഗേഷൻ വകുപ്പിലും പരാതി കൊടുത്തു എത്രയും വേഗം സംരക്ഷണഭിത്തി കെട്ടി നൽകുമെന്ന പ്രതീക്ഷയിലാണ് കുടുംബം.

കൊയിലാണ്ടി റെയിൽവേ സ്റ്റേഷനിൽ പാർക്കിംഗ് സൗകര്യമൊരുങ്ങുന്നു

പാലക്കാട് ഡിവിഷണൽ ഓഫീസിൽ നിന്ന് അനുമതി ലഭിച്ചു സുധീർ കൊയിലാണ്ടി കൊയിലാണ്ടി: യാത്രക്കാർക്കായി കൊയിലാണ്ടി റെയിൽവേ സ്റ്റേഷനിൽ പുതിയ വാഹന പാർക്കിംഗ് സൗകര്യമൊരുങ്ങുന്നു. സ്റ്റേഷന്‍റെ കിഴക്ക് ഭാഗത്താണ് ഏകദേശം രണ്ടായിരത്തിലധികം സ്ക്വയർ ഫീറ്റ് സൗകര്യത്തിൽ വിശാലമായ പാർക്കിംഗ് ഏരിയ സജ്ജമാക്കുന്നതിനുള്ള പ്രാഥമിക പ്രവൃത്തി അവസാന ഘട്ടത്തിലാണ്. പാലക്കാട് ഡിവിഷണൽ ഓഫീസിൽ നിന്നുള്ള അനുമതി ലഭിച്ചതോടെ നിർദ്ദിഷ്ട സ്ഥലത്തുള്ള പാഴ്മരങ്ങളും മറ്റും നീക്കം ചെയ്തു തുടങ്ങി. ഈ മാസം തന്നെ പ്രവൃത്തി പൂർത്തീകരിച്ച് പാർക്കിംഗ് ആരംഭിക്കാനാണ് നീക്കം. ഉള്ള്യേരി, ബാലുശേരി തുടങ്ങി സ്റ്റേഷന്‍റെ കിഴക്കുഭാഗത്തുനിന്ന് എത്തുന്ന റെയിൽവേ യാത്രക്കാർക്ക് നിലവിൽ വാഹന പാർക്കിംഗ് സൗകര്യമില്ലാത്തത് ഏറെ പ്രയാസം സൃഷ്ടിച്ചിരുന്നു. ഇവിടങ്ങളിൽ നിന്ന് എത്തുന്ന യാത്രക്കാർ വാഹനങ്ങൾ പാർക്ക് ചെയ്തിരുന്നത് മുത്താമ്പി റോഡിന്‍റെ ഇരുവശങ്ങളിലുമാണ്. ഇതു കാരണം കാൽനടയാത്രക്കാർക്ക് റോഡിൽ ഇറങ്ങി നടക്കേണ്ടിവരുന്ന അവസ്ഥയാണുള്ളത്. ദേശീയപാത തകർന്നതോടെ ബസുകൾ ബൈപാസിലൂടെ സർവീസ് നടത്തുന്നതിനാൽ വലിയ തിരക്കാണ് ഈ ഭാഗത്ത് അനുഭവപ്പെടുന്നത്. പടിഞ്ഞാറ് ഭാഗത്ത് നിന്ന് വരുന്ന വാഹനയാത്രക്കാർക്ക് നിലവിൽ സ്റ്റേഷന് സമീപത്തായി പെയ്ഡ് പാർക്കിംഗ് സൗകര്യമുണ്ടെങ്കിലും പലരും റോഡരികിൽ വാഹനങ്ങൾ പാർക്ക് ചെയ്യുന്നത് സമീപ വീട്ടുകാർക്ക് പ്രയാസമുണ്ടാക്കുന്നതായി ആക്ഷേപമുയർന്നിരുന്നു. ഇവിടെ നിർത്തിയിടുന്ന ഇരുചക്രവാഹനങ്ങൾ മോഷ്ടിക്കപ്പെടുന്നതും പതിവായിരുന്നു. പാർക്കിംഗ് വിപുലമാക്കുന്നത് യാത്രക്കാർക്കും പ്രദേശവാസികൾക്കും ഏറെ പ്രയോജനകരമാവും.

മധ്യവയസ്കനെ മരിച്ച നിലയിൽ കണ്ടെത്തി

കോടഞ്ചേരി: നെല്ലിപ്പൊയിലിൽ ഒറ്റയ്ക്ക് താമസിക്കുന്ന മധ്യവയസ്കനെ വീട്ടിൽ മരിച്ച നിലയിൽ കണ്ടെത്തി. മുട്ടത്ത് വർഗീസിന്‍റെ മകൻ ഏബ്രഹാം (58) നെയാണ് അയൽവാസികൾ ഇന്നലെ വൈകിട്ടോടെ വീട്ടിൽ മരിച്ച നിലയിൽ കണ്ടെത്തിയത്. കോടഞ്ചേരി പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. മൃതദേഹം മെഡിക്കൽ കോളജിലേക്ക് മാറ്റി. സംസ്കാരം ഇന്ന് നടക്കും

ഒറ്റ നമ്പര്‍ ലോട്ടറി ചൂതാട്ടം: പ്രതി പിടിയില്‍

കോഴിക്കോട്: ചേവായൂര്‍ പോലീസ് സ്റ്റേഷന്‍ പരിധിയിലെ കുരുവട്ടൂരിലുള്ള ലോട്ടറി കടയില്‍ വച്ച് വ്യാജ ഒറ്റ നമ്പര്‍ ലോട്ടറി കച്ചവടം നടത്തുകയായിരുന്ന ജീവനക്കാരനെ പോലീസീ പിടികൂടി.പൊള്ളാച്ചി സ്വദേശി കിഷോര്‍ (30) നെ അറസറ്റ് ചെയ്തു. കുരുവട്ടൂര്‍-പയമ്പ്ര റോഡില്‍ പ്രവര്‍ത്തിക്കുന്ന ലോട്ടറി കടയില്‍ വ്യാജ ഒറ്റ നമ്പര്‍ ലോട്ടറി കച്ചവടം നടക്കുന്നുണ്ടെന്ന രഹസ്യവിവരത്തിന്‍റെ അടിസ്ഥാനത്തില്‍ ചേവായൂര്‍ പോലീസ് സ്റ്റേഷന്‍ ഇന്‍സ്‌പെക്ടര്‍ മഹേഷിന്‍റെ നേതൃത്വത്തില്‍ പോലീസ് സംഘം കടയിലെത്തി പരിശോധന നടത്തുകയായിരുന്നു. പരിശോധനയില്‍ ഒറ്റ നമ്പര്‍ ലോട്ടറി കച്ചവടം നടത്താന്‍ ഉപയോഗിച്ച മൊബെല്‍ ഫോണും, ഒറ്റ നമ്പറുകള്‍ എഴുതിയ കടലാസ് തുണ്ടുകളും, ഒറ്റ നമ്പര്‍ ലോട്ടറിവിറ്റ വകയില്‍ കിട്ടിയ 2910 രൂപയും പോലീസ് കണ്ടെടുത്തു.ചാത്തമംഗലം എന്‍ഐടിക്കു സമീപം താമസിക്കുന്ന അബ്ദുള്‍ ഷുക്കൂറിന്റെ ഉടമസ്ഥതയിലുള്ള കടയിലെ ജീവനക്കാരനാണ് പിടിക്കപ്പെട്ട പ്രതി.

ആര്‍ച്ച് ബിഷപ്പിന് സ്വീകരണവും ആദരവും നാളെ

കോഴിക്കോട്: ആര്‍ച്ച് ബിഷപ്പായി ഉയര്‍ത്തപ്പെട്ടതിനുശേഷം ആദ്യമായി ചെറുവണ്ണൂരില്‍ സന്ദര്‍ശനം നടത്തുന്ന കോഴിക്കോട് അതിരൂപത ആര്‍ച്ച് ബിഷപ് വര്‍ഗീസ് ചക്കാലക്കലിനും വെനെറിനി സന്യാസിനി സഭയുടെ സുപ്പീരിയര്‍ ജനറലായി തെരഞ്ഞെടുക്കപ്പെട്ട ആദ്യ ഇന്ത്യക്കാരിയും മലയാളിയുമായ സിസ്റ്റര്‍ സിസി മ്യൂരിങ്ങമ്യാലിനും ജനറല്‍ കൗണ്‍സിലറായി തിരഞ്ഞെടുക്കപ്പെട്ട സിസ്റ്റര്‍ ബ്രിജിത് വടക്കേപുരക്കലിനും നാളെ സ്വീകരണവും ആദരവും നല്‍കുന്നു. കോഴിക്കോട് അതിരൂപത, വെനെറിനി സിസ്‌റ്റേഴ്‌സ്, ചെറുവണ്ണൂര്‍ തിരുഹൃദയ ഇടവക എന്നിവ സംയുക്തമായാണ് സ്വീകരണം ഒരുക്കുന്നത്. വൈകിട്ട് 3.45ന് ചെറുവണ്ണൂര്‍ ജംഗ്ഷനില്‍ വിശിഷ്ടാതിഥികള്‍ക്ക് സ്വീകരണം നല്‍കും. തുടര്‍ന്ന് വാഹന അകമ്പടിയോടെ വിശിഷ്ടാതിഥികളെ ചെറുവണ്ണൂര്‍ ലിറ്റില്‍ ഫ്‌ളവര്‍ സ്‌കൂള്‍ ഓപ്പണ്‍ ഓഡിറ്റോറിയത്തിലേക്ക് ആനയിക്കും. അവിടെ നടത്തുന്ന കൃതജ്ഞത ദിവ്യബലിക്ക് ആര്‍ച്ച് ബിഷപ് മുഖ്യ കാര്‍മികത്വം വഹിക്കും. വൈകിട്ട് ആറിനാണ് അനുമോദന യോഗം. സാമൂഹിക സാംസ്‌കാരിക രാഷ്ട്രീയ മേഖലയിലെ സമുന്നതരായ വ്യക്തികള്‍ ഇതില്‍ പങ്കെടുക്കും.

കലാമേളയ്ക്ക് വർണ്ണാഭമായ തുടക്കം

കോടഞ്ചേരി: സെന്‍റ് ജോസഫ്സ് എൽപി സ്കൂളിൽ കലാമേള സംഘടിപ്പിച്ചു. പ്രശസ്ത ചിത്രകാരൻ കെ.ആർ. ബാബു ഉദ്ഘാടനം ചെയ്തു. സ്കൂൾ മാനേജർ ഫാ. കുര്യാക്കോസ് ഐക്കൊളമ്പിൽ അധ്യക്ഷത വഹിച്ചു. നിരവധി പ്രതിഭകൾ മാറ്റുരക്കുന്ന കലാമാമാങ്കത്തിന് ഇന്ന് തിരശീല വീഴും. പ്രധാനധ്യാപകൻ ജിബിൻ പോൾ, പിടിഎ പ്രസിഡന്‍റ് ആന്‍റണി ചൂരപ്പൊയ്കയിൽ, സി.ആൻ മേരി ലൂക്കോസ് എന്നിവർ പ്രസംഗിച്ചു. അധ്യാപകരായ ഷിജോ ജോൺ, ധന്യ സണ്ണി, ജിൽസ ദേവസ്യ എന്നിവർ നേതൃത്വം നൽകി.

കർഷക കോൺഗ്രസ് ജില്ല ക്യാമ്പിന് തുടക്കം

നാദാപുരം: കർഷക കോൺഗ്രസ് കോഴിക്കോട് ജില്ലാ ക്യാമ്പിന് നാദാപുരത്ത് തുടക്കമായി. രണ്ടു ദിവസങ്ങളിലായി നടക്കുന്ന കർഷക കോൺഗ്രസ് ക്യാമ്പിന്‍റെ പതാക ജില്ലാ പ്രസിഡന്‍റ് അഡ്വ. ബിജു കണ്ണന്തറ ഉയർത്തി. സംസ്ഥാന ജനറൽ സെക്രട്ടറി രവീഷ് വളയം, ബ്ലോക്ക് കോൺഗ്രസ് പ്രസിഡന്‍റ് മോഹനൻ പാറക്കടവ്, ആവോലം രാധാകൃഷ്ണൻ, അഡ്വ. എ. സജീവൻ, വി.വി. റിനീഷ്, പി. കെ. ദാമു, മൊയ്‌തു കൊരങ്ങോട്, അസ്‌ലം കടമേരി, കമറുദ്ധീൻ അടിവാരം, സോജൻ ആലക്കൽ, അബ്ദുൽ നാസർ, ജോസ് കാരുവേലി, രാജശേഖരൻ തുടങ്ങിയവർ പ്രസംഗിച്ചു. കർഷക കോൺഗ്രസ് സംസ്ഥാന പ്രസിഡന്‍റ് മാജീഷ് മാത്യൂ, നിജേഷ് അരവിന്ദ് എന്നിവരും കർഷക മേഖലയിലെ വിദഗ്ധരും വിവിധ സെക്ഷനുകളിൽ ക്ലാസ് എടുക്കും. ഇന്ന് വൈകീട്ട് നാലിന് ക്യാമ്പ് സമാപിക്കും.

വോട്ടര്‍ പട്ടിക; ജില്ലയില്‍നിന്ന് പുതുതായി അപേക്ഷിച്ചത് രണ്ടര ലക്ഷത്തോളം പേര്‍

കോഴിക്കോട്: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിന് മുന്നോടിയായി കരട് വോട്ടര്‍ പട്ടിക പ്രസിദ്ധീകരിച്ച ശേഷം കോഴിക്കോട് ജില്ലയില്‍നിന്ന് പുതുതായി പേര് ചേര്‍ക്കാന്‍ അപേക്ഷ നല്‍കിയത് 2,45,091 പേര്‍. ജൂലൈ 23ന് കരട് വോട്ടര്‍ പട്ടിക പ്രസിദ്ധീകരിച്ച ശേഷമാണ് ഇത്രയും പേര്‍ ഓണ്‍ലൈനായി അപേക്ഷ നല്‍കിയത്. ഇതിനു പുറമെ, കരട് വോട്ടര്‍ പട്ടികയിലെ വിവരങ്ങള്‍ തിരുത്തുന്നതിന് 697 അപേക്ഷകളും ഒരു വാര്‍ഡില്‍നിന്ന് മറ്റൊരിടത്തേക്ക് പേര് മാറ്റത്തിന് 9,566 അപേക്ഷകളും വോട്ടര്‍ പട്ടികയില്‍നിന്ന് ഒഴിവാക്കാന്‍ 36,920 അപേക്ഷകളുമാണ് ഇതിനകം ലഭിച്ചത്. 12 വരെയാണ് വോട്ടര്‍ പട്ടികയില്‍ പേര് ചേര്‍ക്കാന്‍ അവസരമുണ്ടാകുക. ഓഗസ്റ്റ് ഏഴ് വരെ നിശ്ചയിച്ചിരുന്ന തീയതി പിന്നീട് ദീര്‍ഘിപ്പിക്കുകയായിരുന്നു. 2025 ജനുവരി ഒന്നിനോ അതിന് മുമ്പോ 18 വയസ് പൂര്‍ത്തിയായവര്‍ക്ക് പേര് ചേര്‍ക്കാം. ഇതോടൊപ്പം പട്ടികയിലെ വിലാസം ഉള്‍പ്പെടെയുള്ള കാര്യങ്ങളില്‍ തിരുത്തല്‍ വരുത്തുന്നതിനും സ്ഥാനമാറ്റം വരുത്തുന്നതിനും സംസ്ഥാന തെരഞ്ഞെടുപ്പ് കമ്മീഷന്‍റെ വെബ്‌സൈറ്റ് (https://sec.kerala.gov.in) വഴി അപേക്ഷിക്കണം. ഓണ്‍ലൈനായി അപേക്ഷിക്കുമ്പോള്‍ ഹിയറിങ്ങിനുള്ള കമ്പ്യൂട്ടര്‍ ജനറേറ്റഡ് നോട്ടീസ് ലഭിക്കും. നോട്ടീസില്‍ പറഞ്ഞ തീയതിയില്‍ ആവശ്യമായ രേഖകള്‍ സഹിതം നേരിട്ട് ഹാജരാകണം.

റെഡ് റിബണ്‍ ക്വിസ് മത്സരം സംഘടിപ്പിച്ചു

കോഴിക്കോട്: അന്താരാഷ്ട്ര യുവജന ദിനാചരണത്തോടനുബന്ധിച്ച് എച്ച്‌ഐവി/എയ്ഡ്‌സ് ബോധവത്കരണത്തിന്‍റെ ഭാഗമായി 8, 9, 11 ക്ലാസുകളിലെ വിദ്യാര്‍ഥികള്‍ക്ക് ജില്ലാതല റെഡ് റിബണ്‍ ക്വിസ് മത്സരം സംഘടിപ്പിച്ചു. ജില്ലാ മെഡിക്കല്‍ ഓഫീസ് (ആരോഗ്യം), ജില്ലാ എയ്ഡ്‌സ് നിയന്ത്രണ സൊസൈറ്റി, നാഷണല്‍ സര്‍വീസ് സ്‌കീം എന്നിവയുടെ ആഭിമുഖ്യത്തിലാണ് മത്സരം സംഘടിപ്പിച്ചത്. വടകര പുത്തൂര്‍ ഗവ. ഹയര്‍ സെക്കന്‍ഡറി സ്‌കൂളിലെ എസ്. ദേവതീര്‍ത്ഥ, എം. അഭയ് ശങ്കര്‍ ടീം ഒന്നും പൂനൂര്‍ ഗവ. ഹയര്‍ സെക്കന്‍ഡറി സ്‌കൂളിലെ ദില്‍ന റഹ്‌മാന്‍, എം. ശ്രേയ എന്നിവര്‍ രണ്ടും ഈസ്റ്റ് ഹില്‍ ഗവ. ഹയര്‍സെക്കന്‍ഡറി സ്‌കൂളിലെ ബി.എല്‍. ഗൗരി, സ്വാതിക സന്തോഷ് എന്നിവര്‍ മൂന്നും സ്ഥാനം നേടി. ഇവര്‍ യഥാക്രമം 5000 രൂപ, 4000 രൂപ, 3000 രൂപ ക്യാഷ് അവാര്‍ഡിനര്‍ഹരായി. ഒന്നാം സ്ഥാനം ലഭിച്ച ടീം 11ന് തൃശൂരില്‍ നടക്കുന്ന സംസ്ഥാനതല മത്സരത്തില്‍ ജില്ലയെ പ്രതിനിധീകരിക്കും. കോഴിക്കോട് ഗവ. നഴ്‌സിംഗ് സ്‌കൂള്‍ ഹാളില്‍ നടന്ന മത്സരത്തില്‍ 64 സ്‌കൂളുകളില്‍ നിന്നുള്ള ടീമുകള്‍ പങ്കെടുത്തു. ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. കെ.കെ. രാജാറാം, ജില്ലാ എയ്ഡ്‌സ് ക്ലസ്റ്റര്‍ പ്രോഗ്രാം മാനേജര്‍ പ്രിന്‍സ് എം. ജോര്‍ജ് എന്നിവര്‍ മത്സരം നയിച്ചു. ജില്ലാ എയ്ഡ്സ് കണ്‍ട്രോള്‍ ഓഫീസര്‍ ഡോ. കെ.വി. സ്വപ്ന, കോഴിക്കോട് ഗവ. നഴ്‌സിംഗ് സ്‌കൂള്‍ പ്രിന്‍സിപ്പല്‍ ഇന്‍ ചാര്‍ജ് പി.ജി. സന്തോഷ്, ഡെപ്യൂട്ടി ജില്ലാ എഡ്യൂക്കേഷന്‍ ആന്‍ഡ് മീഡിയ ഓഫീസര്‍ ഡോ. കെ.ടി. മുഹസിന്‍, ദിശ ഡോക്യുമെന്‍റേഷന്‍ ഓഫീസര്‍ എന്‍.ടി. പ്രിയേഷ് എന്നിവര്‍ പ്രസംഗിച്ചു. ജില്ലാ എയ്ഡ്‌സ് കണ്‍ട്രോള്‍ സൊസൈറ്റി പ്രോഗ്രാം കോഓഡിനേറ്റര്‍മാര്‍, അധ്യാപകര്‍, രക്ഷിതാക്കള്‍ തുടങ്ങിയവര്‍ പങ്കെടുത്തു.

എൻജിഒ അസോസിയേഷൻ പ്രതിഷേധ ധർണ നടത്തി

കോഴിക്കോട്: കേരള എൻജിഒ അസോസിയേഷൻ വെസ്റ്റ്ഹിൽ എൻജിനീയറിംഗ് കോളജിന് മുന്നിൽ സംഘടിപ്പിച്ച പ്രതിഷേധ ധർണ ജില്ലാ പ്രസിഡന്‍റ് പ്രേംനാഥ് മംഗലശേരി ഉദ്ഘാടനം ചെയ്തു. വെസ്റ്റ്ഹിൽ ബ്രാഞ്ച് പ്രസിഡന്‍റ് കെ.ടി. രമേശൻ അധ്യക്ഷനായി. തദ്ദേശ സ്വയംഭരണ വകുപ്പിലെ 283 തസ്തികകൾ വെട്ടി കുറച്ച ഉത്തരവ് പിൻവലിക്കുക, 12-ാം ശമ്പള പരിഷ്കരണം ഉടൻ നടപ്പിലാക്കുക, ആശ്രിത നിയമന അവകാശം സംരക്ഷിക്കുക, ലീവ് സറണ്ടർ പുനഃസ്ഥാപിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു ധർണ. സെറ്റോ ജില്ലാ ചെയർമാൻ സിജു കെ. നായർ മുഖ്യപ്രഭാഷണം നടത്തി. എൻജിഒ അസോസിയേഷൻ ജില്ലാ വൈസ് പ്രസിഡന്‍റുമാരായ രഞ്ജിത്ത് ചേമ്പാല, വി. വിപീഷ്, ജില്ലാ ജോയിന്‍റ് സെക്രട്ടറി കെ.പി. സുജിത, പി. ലിജിന, റോഷ്ന ഡെൻസിൽ എന്നിവർ പ്രസംഗിച്ചു. കെ.വി. ബാലകൃഷ്ണൻ, പി. അരുൺ, കെ. ജോതിഷ് കുമാർ, കെ. അഫ്സൽ, എന്നിവർ പ്രതിഷേധ പ്രകടനത്തിന് നേതൃത്വം നൽകി.

സമാധാന സന്ദേശം പകർന്ന് ജെആർസി യുദ്ധവിരുദ്ധ റാലി

മുക്കം: യുദ്ധത്തിനെതിരേ സമാധാന സന്ദേശമുയർത്തി വെള്ളരി പ്രാവുകളായി ജൂനിയർ റെഡ്ക്രോസ് വിദ്യാർഥികൾ. ജെആർസി മുക്കം ഉപജില്ല കമ്മിറ്റിയുടെ നേതൃത്വത്തിൽ മുക്കത്ത് യുദ്ധവിരുദ്ധ റാലി സംഘടിപ്പിച്ചു. സമാധാന സന്ദേശമുയർത്തുന്ന പ്ലക്കാർഡുകളുമായി വിദ്യാർഥികൾ മുക്കം അങ്ങാടി ചുറ്റി. നഗരസഭാ ചെയർമാൻ പി.ടി. ബാബു റാലി ഫ്ലാഗ് ഓഫ് ചെയ്തു. മുക്കം ഉപജില്ലാ വിദ്യാഭ്യാസ ഓഫീസർ ടി. ദീപ്തി മുഖ്യാതിഥിയായി. ഉപജില്ലാ പ്രസിഡന്‍റ് പി. അബൂബക്കർ, സി.ടി. ദിൽഷാദ്, കെ.പി. ഖദീജ, ടി.പി. അബൂബക്കർ, കെ.ടി. ഷിംന തുടങ്ങിയവർ പ്രസംഗിച്ചു

ലഹരി വില്പന വഴി വാങ്ങിയ വാഹനം പോലീസ് കണ്ടു കെട്ടി

കോഴിക്കോട് : ലഹരി വില്പന വഴി വാങ്ങിയ വാഹനം പോലീസ് കണ്ടുകെട്ടി. കാസര്‍ഗോഡ് ഉള്ളാടി ഫാത്തിമ മന്‍സിലില്‍ മുഹമ്മദ് അഷ്റഫ് (37) ലഹരി വില്പനയിലൂടെ പണം സമ്പാദിച്ച് വാങ്ങിയ മോട്ടോര്‍ സൈക്കിള്‍ ആണ് ചെന്നൈ ആസ്ഥാനമായ സ്മഗ്ലഴ്‌സ് ആന്‍ഡ് ഫോറിന്‍ എക്‌സ്‌ചേഞ്ച് മാനിപുലേറ്റേഴ്‌സ് അതോറിറ്റിയുടെ ഉത്തരവ് പ്രകാരം കണ്ടുകെട്ടിയത്. കഴിഞ്ഞ ഏപ്രിലില്‍ മലാപ്പറമ്പ് ജംഗ്ഷനില്‍ വെച്ച് ചേവായൂര്‍ പോലീസുംഡാന്‍സാഫ് ടീമും നടത്തിയ പരിശോധനയില്‍ വാഹനത്തിന്‍റ് സീറ്റിനടിയില്‍ ഒളിപ്പിച്ച രീതിയില്‍ 20.465 കിലോഗ്രാം കഞ്ചാവുമായി പ്രതിയും സുഹൃത്തും പിടിയിലായിരുന്നു. ഇവര്‍ ആന്ധ്രയിൽ നിന്നു വന്‍തോതില്‍ കഞ്ചാവ് കൊണ്ട് വന്ന് കാസര്‍കോഡ് ഭാഗത്ത് സ്റ്റോക്ക് ചെയ്ത് പല സ്ഥലങ്ങളിലേക്ക് വാഹനത്തില്‍ എത്തിച്ച് കൊടുക്കുന്നതാണ് രീതി. പ്രധാനമായും അന്യസംസ്ഥാന തൊഴിലാളികളെ ലക്ഷ്യമിട്ടാണ് ലഹരി വില്പന നടത്തിയത് . പ്രതി ലഹരി വിറ്റ് വാങ്ങിയ വാഹനമാണ് ചേവായൂര്‍ പോലീസ് സ്റ്റേഷന്‍ ഇന്‍സ്‌പെക്ടര്‍ മഹേഷ് നല്‍കിയ റിപ്പോര്‍ട്ട് പ്രകാരം കണ്ടുകെട്ടിയത്. മറ്റു വരുമാനമാര്‍ഗങ്ങള്‍ ഒന്നുമില്ലാത്ത പ്രതി വാഹനം വാങ്ങിയതും, ആഡംബരപൂര്‍ണ്ണമായ ജീവിതം നയിച്ചതും ലഹരി വില്പനയില്‍ നിന്നുള്ള വരുമാനം ഉപയോഗിച്ചാണ്. കഴിഞ്ഞ ദിവസങ്ങളില്‍ ചേവായൂര്‍ പോലീസ് പ്രതിയുടെ സ്വത്തുക്കള്‍ കണ്ടുകിട്ടുന്നതിനുള്ള നടപടികള്‍ എടുക്കുകയും റിപ്പോര്‍ട്ട് ചെന്നെ ആസ്ഥാനമായുള്ള സ്മഗ്‌ളേഴ്‌സ് ആന്‍ഡ് ഫോറിന്‍ എക്‌സ്‌ചേഞ്ച് മാനിപ്പുലേറ്റേഴ്‌സ് അതോറിറ്റിക്ക് അയച്ചുകൊടുക്കുകയായിരുന്നു. ഈ റിപ്പോര്‍ട്ട് പ്രകാരമാണ് വാഹനം കണ്ടുകെട്ടിയത്. നിലവില്‍ പ്രതി കോഴിക്കോട് ജയിലില്‍ ജുഡീഷ്യല്‍ കസ്റ്റഡിയിലാണ് ഉള്ളത്.

യുഡിഎഫ് കൊടിയത്തൂർ പഞ്ചായത്ത് ജനവിജയ ജാഥക്ക് തുടക്കമായി

മുക്കം: കൊടിയത്തൂർ പഞ്ചായത്ത് യുഡിഎഫ് ഭരണസമിതിയുടെ അഞ്ച് വർഷത്തെ വികസനനേട്ടങ്ങൾ ജനങ്ങളിലെത്തിക്കുക എന്ന ലക്ഷ്യത്തോടെ സംഘടിപ്പിച്ച ജന വിജയ യാത്രക്ക് തുടക്കമായി. "കൊടിയത്തൂർ വികസന മുന്നേറ്റത്തിന്‍റെ അഞ്ചാണ്ട്' എന്ന മുദ്രാവാക്യവുമായി പഞ്ചായത്ത് പ്രസിഡന്‍റ് ദിവ്യ ഷിബു, വൈസ് പ്രസിഡന്‍റ് ഫസൽ കൊടിയത്തൂർ എന്നിവരാണ് ജാഥ നയിക്കുന്നത്. 2 ദിവസങ്ങളിലായി നടക്കുന്ന ജാഥയുടെ ഉദ്ഘാടനം തോട്ടുമുക്കം പള്ളിത്താഴെ അങ്ങാടിയിൽ ഡിസിസി പ്രസിഡന്‍റ് അഡ്വ. കെ. പ്രവീൺ കുമാർ നിർവഹിച്ചു. പിണറായി വിജയൻ സർക്കാരിന്‍റെ ജനദ്രോഹ നടപടികൾക്കെതിരായി വിധി എഴുതാൻ ജനങ്ങൾ കാത്തിരിക്കുകയാണന്നും അതിന്‍റെ ട്രയലായിരിക്കും വരുന്ന തദ്ദേശ സ്വയംഭരണ തെരഞ്ഞെടുപ്പെന്നും അദ്ദേഹം പറഞ്ഞു. ജില്ലയിൽ തന്നെ ഏറ്റവും മികച്ച വികസനം നടന്ന പഞ്ചായത്തുകളിലൊന്നായ കൊടിയത്തൂരിൽ ഭരണ തുടർച്ചയുണ്ടാവുമെന്നും അദ്ദേഹം പറഞ്ഞു. ചടങ്ങിൽ അബ്ദുൽ ഗഫൂർ തിരുനിലത്ത് അധ്യക്ഷത വഹിച്ചു. ഡിസിസി സെക്രട്ടറി സി.ജെ ആന്‍റണി, എൻ.കെ അഷ്റഫ്, മജീദ് പുതുക്കുടി, ഷംസുദ്ധീൻ ചെറുവാടി, കെ.ടി. മൻസൂർ, സുജ ടോം, സിജിമോൻ തുടങ്ങിയവർ പ്രസംഗിച്ചു. ആദ്യ ദിവസം തോട്ടുമുക്കത്ത് നിന്നാരംഭിച്ച ജാഥ പള്ളിത്താഴെ, എരഞ്ഞിമാവ്, ഗോതമ്പ റോഡ്, മാട്ടുമുറി എന്നിവിടങ്ങളിലെ സ്വീകരണ ശേഷം പന്നിക്കോട് സമാപിച്ചു. പന്നിക്കോട് നടന്ന സ്ഥാപന സമ്മേളനം പി.ജി മുഹമ്മദ് ഉദ്ഘാടനം ചെയ്തു. രണ്ടാം ദിവസമായ ഇന്ന് ഉച്ചയ്ക്ക് മൂന്നിന് തെനേങ്ങപറമ്പിൽ ഡിസിസി സെക്രട്ടറി സി.ജെ. ആന്‍റണി ഉദ്ഘാടനം ചെയ്യും. തുടർന്ന് കാരാളിപറമ്പ്, പൊറ്റമ്മൽ, പഴം പറമ്പ്, ചെറുവാടി, ചുള്ളിക്കാപറമ്പ്, വെസ്റ്റ്കൊടിയത്തൂർ, സൗത്ത് കൊടിയത്തൂർ എന്നിവിടങ്ങളിലെ സ്വീകരണത്തിന് ശേഷം കൊടിയത്തൂരിൽ സമാപിക്കും. സമാപന യോഗം മുസ്ലീം ലീഗ് സംസ്ഥാന സെക്രട്ടറി സി.പി. ചെറിയമുഹമ്മദ് ഉദ്ഘാടനം ചെയ്യും.

ചക്കിട്ടപാറയിലെ ആഫ്രിക്കൻ ഒച്ച് ശല്യം: അടിയന്തര നടപടി സ്വീകരിക്കാൻ സർവകക്ഷി യോഗ തീരുമാനം

പെരുവണ്ണാമൂഴി: ചക്കിട്ടപാറ പഞ്ചായത്ത് പരിധിയിൽപ്പെട്ട 10,11,12 വാർഡുകളിൽ ആഫ്രിക്കൻ ഒച്ചുകളുടെ വ്യാപനം രൂക്ഷമായ സാഹചര്യത്തിൽ പ്രതിരോധ മാർഗങ്ങൾ അടിയന്തരമായി സ്വീകരിക്കുന്നതിനു വേണ്ടി ഗ്രാമപഞ്ചായത്ത് ഹാളിൽ കർഷകരുടെയും ജനപ്രതിനിധികളുടെയും കൃഷി- ആരോഗ്യം - കുടുംബശ്രീ ഉദ്യോഗസ്ഥരുടെയും സംയുക്ത യോഗം ചേർന്നു. ഗ്രാമ പഞ്ചായത്ത് വൈസ് പ്രസിഡന്‍റ് ചിപ്പി മനോജിന്‍റെ അധ്യക്ഷതയിൽ ചേർന്ന യോഗത്തിൽ ബ്ലോക്ക് ലെവൽ നോളജ് സെന്‍ററിന്‍റെ കോർഡിനേറ്റർ ഡോ. ശ്രീറാം പ്രതിരോധ മാർഗങ്ങളെക്കുറിച്ച് ക്ലാസ് നയിച്ചു. മനുഷ്യരെയും കൃഷിയെയും ഇതിന്‍റെ വ്യാപനം ഏത് തരത്തിലൊക്കെ ബാധിക്കുമെന്ന വിശദ വിവരങ്ങൾ അദ്ദേഹം പ്രതിപാദിച്ചു. ഗ്രാമപഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഇ.എം. ശ്രീജിത്ത്, വാർഡ് മെമ്പർ വിനീത മനോജ്, കൃഷി ഓഫീസർമാരായ രശ്മ നായർ, ഷെറിൻ റിഷാത്ത്, അസിസ്റ്റന്‍റ് കൃഷി ഓഫീസർ ഗിരീഷ് കുമാർ, ബ്ലോക്ക് ടെക്നോളജി മാനേജർ എം. നീതു, അസിസ്റ്റന്‍റ് ടെക്നോളജി മാനേജർ കെ.എം. ധനേഷ്, പെരുവണ്ണാമൂഴി കുടുംബാരോഗ്യ കേന്ദ്രം ഹെൽത്ത് ഇൻസ്പെക്ടർ സീന ഭായ്, വിവിധ രാഷ്ട്രീയ പാർട്ടി പ്രതിനിധികളായ പി.എം. രഘുനാഥ്, ബേബി കാപ്പുകാട്ടിൽ, റെജി കോച്ചേരി, വി.വി. കുഞ്ഞിക്കണ്ണൻ, രാജൻ വർക്കി, കർഷക സീനാ റിജു, സിഡിഎസ് ചെയർപേഴ്‌സൺ ശോഭ പട്ടാണിക്കുന്നുമ്മൽ തുടങ്ങിയവർ ചർച്ചയിൽ സംബന്ധിച്ചു. ആഫ്രിക്കൻ ഒച്ച് ശല്യം രൂക്ഷമായ പ്രദേശങ്ങളിൽ കൃഷി വകുപ്പിന്‍റെയും ഗ്രാമ പഞ്ചായത്തിന്‍റെയും നേതൃത്വത്തിൽ അടിയന്തര നിയന്ത്രണ മാർഗ്ഗങ്ങൾ സ്വീകരിക്കാനും, പഞ്ചായത്ത് മൊത്തം ബോധവത്ക്കരണം നടത്താനും യോഗം തീരുമാനിച്ചു. തുടർന്ന് ആഫ്രിക്കൻ ഒച്ച് ആക്രമണം രൂക്ഷമായ പ്രദേശങ്ങൾ കൃഷി ഉദ്യോഗസ്ഥരുടെ നേതൃത്വത്തിൽ സന്ദർശിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]