ADVERTISEMENT

ADVERTISEMENT

അവകാശ സംരക്ഷണയാത്രക്ക് ഉളിക്കലിൽ സ്വീകരണം നൽകി

ഉളിക്കൽ: കത്തോലിക്ക കോൺഗ്രസിന്‍റെ നേതൃത്വത്തിൽ കാസർഗോഡ് നിന്നും തിരുവനന്തപുരത്തേക്ക് രാജീവ് കൊച്ചുപറമ്പിൽ നയിക്കുന്ന അവകാശ സംരക്ഷണയാത്രയ്ക്ക് ളളിക്കലിൽ സ്വീകരണം നൽകി.

സ്വീകരണ പൊതുയോഗം തലശേരി ആർച്ച്ബിഷപ് എമരിറ്റസ് മാർ ജോർജ് ഞറളക്കാട്ട് ഉദ്ഘാടനം ചെയ്തു. അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു.

എകെസിസി ഗ്ലോബൽ ഡയറക്ടർ റവ. ഡോ. ഫിലിപ്പ് കവിയിൽ, ഫാ. ജോസ് കളരിക്കൽ , ഫാ. പയസ് പടിഞ്ഞാറെമുറിയിൽ, ഫാ. തോമസ് കാവനാടി, ഡോ. ജോസുകുട്ടി ഒഴുകയിൽ, തോമസ് വർഗീസ്, ബെന്നി മഠത്തിനകം, ടോണി ജോസഫ് പുഞ്ചക്കുന്നേൽ, ബിജു ഒറ്റപ്ലാക്കൽ എന്നിവർ പ്രസംഗിച്ചു.

ADVERTISEMENT

ദുരൂഹത ബാക്കി

ഒക്‌ടോബര്‍ 14ന് വൈകുന്നേരം നാലിന് കണ്ണൂർ കളക്‌ടറേറ്റില്‍ സഹപ്രവര്‍ത്തകര്‍ നല്‍കിയ യാത്രയയപ്പ് യോഗത്തില്‍ ക്ഷണിക്കാതെയെത്തിയാണ് സിപിഎം നേതാവും കണ്ണൂർ ജില്ലാ മുൻ പഞ്ചായത്ത് പ്രസിഡന്‍റുമായ പി.പി. ദിവ്യ നവീന്‍ബാബുവിനെ അധിക്ഷേപിച്ചത്. പിറ്റേദിവസം നവീന്‍ബാബു ജീവനൊടുക്കിയ വാര്‍ത്തയാണ് നാട് കേട്ടത്. ആ അവസാന മണിക്കൂറുകളെ സംബന്ധിച്ച ചോദ്യങ്ങള്‍ക്ക് അന്വേഷണസംഘത്തിന് ഇനിയും ഉത്തരമില്ല. പെട്രോള്‍ പമ്പ് അനുമതിക്കായി നവീൻ ബാബു കൈക്കൂലി വാങ്ങിയതിന് തെളിവില്ലെന്ന് ചൂണ്ടിക്കാട്ടി ലാൻഡ് റവന്യൂ ജോയിന്‍റ് കമ്മീഷ്ണര്‍ എ. ഗീത സമര്‍പ്പിച്ച അന്വേഷണറിപ്പോര്‍ട്ട് മുഖ്യമന്ത്രിയുടെ ഓഫീസിലിരിക്കാന്‍ തുടങ്ങിയിട്ട് മാസം കഴിഞ്ഞു. തുടര്‍നടപടി ആവശ്യപ്പെടുന്ന കുറിപ്പ് സഹിതം 2024 നവംബര്‍ ഒന്നിനാണ് എ.ഗീതയുടെ റിപ്പോര്‍ട്ട് റവന്യൂമന്ത്രി മുഖ്യമന്ത്രിക്ക് കൈമാറിയത്. എന്നാൽ റിപ്പോർട്ട് ഇപ്പോഴും ഫയലിൽ തന്നെയാണ്. നവീൻ ബാബുവിന് കൈക്കൂലി കൊടുത്തെന്ന് ആരോപിച്ച ടി.വി. പ്രശാന്തിനെതിരേ കടുത്ത നടപടി ഒന്നുമില്ല. പ്രശാന്തിനെതിരെ നടപടിയെടുത്താല്‍ കണ്ണൂരിലെ ബിനാമി നേതൃത്വത്തിലേക്കും അന്വേഷണം നീളുമെന്ന ഭയമാണ് പോലീസിന്‍റെ മെല്ലെപ്പോക്കിനു പിന്നിലെന്നും ആക്ഷേപമുണ്ട്. പ്രശാന്തിനെതിരായ അഡീഷണല്‍ ചീഫ് സെക്രട്ടറിയും ഡിഎംഇയും നടത്തിയ അന്വേഷണ റിപ്പോര്‍ട്ടും പുറത്തുവിടുന്നില്ല. വിവിധ തലത്തിലുള്ള അന്വേഷണങ്ങള്‍ നടക്കുന്നതിനാല്‍ വിവരാവകാശ നിയമ പ്രകാരം വസ്തുതകള്‍ നല്‍കാന്‍ നിര്‍വാഹമില്ലെന്നാണ് ആരോഗ്യവകുപ്പ് വിശദീകരിക്കുന്നത് ദിവ്യയുടെ അധിക്ഷേപത്തിനു പിന്നാലെ ജില്ലാ കളക്ടര്‍ അരുണ്‍ കെ.വിജയനും നവീന്‍ബാബുവിനെ മാനസിക സമ്മര്‍ദത്തലാക്കിയെന്ന പരാതി എഡിഎമ്മിന്‍റെ കുടുംബത്തിനുണ്ട്. അന്വേഷണത്തില്‍ ഇടപെടാന്‍ സാധ്യതയുള്ളതിനാല്‍ കളക്‌ടറെ മാറ്റണമെന്ന ആവശ്യത്തിനും സര്‍ക്കാര്‍ ചെവികൊടുത്തില്ല. മൃതദേഹപരിശോധന പരിയാരം മെഡിക്കല്‍ കോളേജില്‍ നടത്തുന്നതില്‍ വിയോജിപ്പുണ്ടെന്നും കോഴിക്കോട്ടേക്ക് മാറ്റണമെന്നും ബന്ധുക്കള്‍ സിറ്റി പോലീസ് കമ്മീഷണറോട് ആവശ്യപ്പെട്ടിരുന്നു. കളക്ടര്‍ അരുണ്‍ കെ.വിജയനെ വിളിച്ചപ്പോള്‍ ഒന്നും പേടിക്കാനില്ലെന്നും പോലീസ് സര്‍ജനാണ് മൃതദേഹപരിശോധന ചെയ്യുന്നതെന്നുമാണ് കളക്ടര്‍ ബന്ധുക്കളോട് പറഞ്ഞത്. ഇന്‍ക്വസ്റ്റ് റിപ്പോര്‍ട്ട് പോസ്റ്റുമോര്‍ട്ടം ചെയ്ത സര്‍ജന് പോലീസ് നല്‍കിയില്ലെന്ന സംശയമുണ്ടെന്ന് കുടുംബം പറയുന്നു. ആന്തരികാവയവങ്ങള്‍ക്ക് പരിക്കില്ലെന്ന് പോസ്റ്റുമോര്‍ട്ടം റിപ്പോര്‍ട്ടില്‍ പറയുമ്പോള്‍ പിന്നെ എങ്ങനെ അടിവസ്ത്രത്തില്‍ രക്തക്കറ വരുമെന്നാണ് കുടുംബം ചോദിക്കുന്നത്. അതിനാൽ, തങ്ങളുടെ അസാന്നിധ്യത്തിൽ നടത്തിയ പോസ്റ്റുമോർട്ടം റിപ്പോർട്ടിൽ ദുരൂഹതയുണ്ടെന്നാണ് കുടുംബം ആരോപിക്കുന്നത് ഡിസംബർ 16ന് ദിവ്യ ഹാജരാകണം എഡിഎം നവീൻ ബാബുവിന്‍റെ ആത്മഹത്യയാണെന്നും യാത്രയയപ്പു യോഗത്തിൽ ദിവ്യ നടത്തിയ പ്രസംഗമാണ് പ്രേരണയെന്നുമാണ് പ്രത്യേക അന്വേഷണസംഘത്തിന്‍റെ കണ്ടെത്തൽ. കേസ് തലശേരി അഡീഷണൽ സെഷൻസ് (രണ്ട്) കോടതിയാണ് പരിഗണിക്കുന്നത്. ഏക പ്രതിയായ പി.പി. ദിവ്യയോട് ഡിസംബർ 16 ന് ഹാജരാകാൻ ആവശ്യപ്പെട്ടിട്ടുണ്ട്. കേസിൽ തുടരന്വേഷണം ആവശ്യപ്പെട്ട് നവീൻ ബാബുവിന്‍റെ ഭാര്യ മഞ്ജുഷ നല്കിയ ഹർജിയും ഇതേ കോടതിയാണ് പരിഗണിക്കുന്നത്. കേസിൽ എത്രയും വേഗം ചുരുളഴിച്ചില്ലെങ്കിൽ ബൂമറാങ്ങായി നവീൻ ബാബുവിന്‍റെ മരണം സിപിഎമ്മിനെ വരും തെരഞ്ഞെടുപ്പുകളിൽ വീഴ്ത്തിയേക്കാം. മന്ത്രിയുടെ വെളിപ്പെടുത്തൽ മന്ത്രി കെ. രാജന്‍ നടത്തിയ വെളിപ്പെടുത്തലടക്കം കേസിന്‍റെ തുടരന്വേഷണത്തില്‍ പ്രതീക്ഷകള്‍ അസ്തമിച്ചിട്ടില്ലെന്നാണ് നവീന്‍ ബാബുവിന്‍റെ കുടുംബം പറയുന്നത്. കണ്ണൂര്‍ ജില്ലാ കളക്ടര്‍ അരുണ്‍ കെ. വിജയന്‍ നവീന്‍ ബാബുവിന്‍റെ യാത്രയയപ്പ് സമ്മേളനത്തിന് പിന്നാലെ മന്ത്രിയെ വിളിച്ചിരുന്നുവെന്ന കാര്യം മന്ത്രി കെ. രാജൻ സമ്മതിച്ചിരുന്നു. കേസിന്‍റെ നാള്‍വഴികളില്‍ ഇതുവരെ ഇക്കാര്യം മന്ത്രി പുറത്തു പറഞ്ഞിരുന്നില്ല. നവീന്‍ ബാബു അഴിമതിക്കാരനായ ഉദ്യോഗസ്ഥനല്ലെന്നും മന്ത്രി വ്യക്തമാക്കിയിരുന്നു. അന്വേഷണസംഘം നവീന്‍ ബാബുവിനെ അഴിമതിക്കാരന്‍ എന്ന സംശയത്തിന്‍റെ മുനയില്‍ നിര്‍ത്താന്‍ ശ്രമിച്ചതായാണ് തുടരന്വേഷണ ഹര്‍ജിയില്‍ നവീന്‍ ബാബുവിന്‍റെ കുടുംബം പ്രധാനമായും വാദിക്കുന്നത്.

സിപിഎമ്മിനെ പ്രതിസന്ധിയിലാക്കിയ നീതിമാന്‍റെ വേർപാട്

സ്വന്തം ലേഖകൻ കണ്ണൂർ: ടി.പി. ചന്ദ്രശേഖരന്‍റെ കൊലപാതകത്തിനുശേഷം സിപിഎമ്മിനെ ഏറെ പ്രതിസന്ധിയിലാക്കിയ കണ്ണൂരിലെ മുൻ എഡിഎം നവീൻ ബാബുവിന്‍റെ ദുരൂഹമരണം നടന്നിട്ട് ഇന്ന് ഒരു വർഷം തികയുകയാണ്. 2024 ഒകേ്ടാബര്‍ 15ന് രാവിലെയാണ് പള്ളിക്കുന്നിലെ ക്വാർട്ടേഴ്സിനുള്ളിൽ തൂങ്ങിമരിച്ച നിലയിൽ നവീൻ ബാബുവിനെ കണ്ടെത്തിയത്. ഒക്‌ടോബര്‍ 14ന് വൈകുന്നേരം നാലിന് കണ്ണൂർ കളക്‌ടറേറ്റില്‍ നവീൻ ബാബുവിന് സഹപ്രവര്‍ത്തകര്‍ നല്‍കിയ യാത്രയയപ്പ് യോഗത്തില്‍ ക്ഷണിക്കാതെയെത്തി സിപിഎം നേതാവും അന്ന് കണ്ണൂർ ജില്ലാ പഞ്ചായത്ത് പ്രസിഡന്‍റുമായ പി.പി. ദിവ്യ നവീന്‍ബാബുവിനെ അധിക്ഷേപിച്ച് സംസാരിച്ചിരുന്നു. പിറ്റേദിവസം നവീന്‍ബാബുവിനെ ജീവനൊടുക്കിയ നിലയിൽ കണ്ടെത്തിയ വാര്‍ത്തയാണ് നാട് കേട്ടത്. ആത്മഹത്യയെന്ന് പറഞ്ഞു തള്ളിയ നവീൻ ബാബുവിന്‍റെ മരണം കൊലപാതകമാണെന്നും സിബിഐ അന്വേഷണം വേണമെന്നുമാണ് കുടുംബത്തിന്‍റെ ആവശ്യം. എന്നാൽ, കുടുംബത്തിന്‍റെ ഈ ആവശ്യം ഹൈക്കോടതിയും സുപ്രീംകോടതിയും തള്ളിക്കളയുകയായിരുന്നു. സിബിഐ അന്വേഷണത്തിന്‍റെ ആവശ്യമില്ലെന്നും കൊലപാതകമാണെന്ന് സംശയിക്കാൻ പ്രത്യേക കാരണമില്ലെന്നുള്ള പ്രത്യേക അന്വേഷണസംഘത്തിന്‍റെയും സർക്കാരിന്‍റെയും നിലപാടുകൾ കോടതികൾ അംഗീകരിക്കുകയായിരുന്നു. സിപിഎമ്മിൽ തന്നെ വിഭാഗീയത ഉണ്ടാക്കാൻ എഡിഎം നവീൻ ബാബുവിന്‍റെ മരണത്തിന് സാധിച്ചു. നവീൻ ബാബു ജീവനൊടുക്കിയ കേസിൽ സിപിഎം നേതാവും കണ്ണൂർ ജില്ലാ പഞ്ചായത്ത് പ്രസിഡന്‍റുമായിരുന്ന പി.പി. ദിവ്യ മാത്രമായിരുന്നു നിലവിൽ പ്രതിക്കൂട്ടിൽ. എന്നാൽ, നവീൻ ബാബുവിന്‍റെ കുടുംബത്തിന്‍റെ ആരോപണത്തിൽ ഉൾപ്പെട്ടവരെ സംരക്ഷിക്കുന്ന പ്രവണത സിപിഎമ്മും സംസ്ഥാന സർക്കാരും സ്വീകരിച്ചതോടെ സർക്കാരിനൊപ്പം സിപിഎമ്മും പ്രതിക്കൂട്ടിലായി. സിപിഎം കണ്ണൂർ ജില്ലാ നേതൃത്വം തുടക്കംമുതൽ പി.പി. ദിവ്യയെ സംരക്ഷിച്ചിരുന്നുവെങ്കിലും പത്തനംതിട്ട ജില്ലാ കമ്മിറ്റിയുടെ കടുത്ത നിലപാടാണ് ദിവ്യയുടെ അറസ്റ്റിനും ജില്ലാ കമ്മിറ്റിയിൽനിന്നു പുറത്തേക്കുള്ള വഴിക്കും കാരണമായത്. എന്നാൽ, ദിവ്യക്ക് ജാമ്യം ലഭിച്ചതോടെ പ്രത്യേക അന്വേഷണസംഘത്തിന്‍റെ അന്വേഷണം നിലയ്ക്കുകയായിരുന്നു. പിന്നീട്, നവീൻ ബാബുവിന്‍റെ കുടുംബം ഹൈക്കോടതിയെ സമീപിച്ചതോടെയാണ് പ്രത്യേക അന്വേഷണസംഘത്തിന് അനക്കം തുടങ്ങിയത്. നവീൻ ബാബുവിനെതിരെ ആദ്യം അനുകൂലമായി പ്രസ്താവന നടത്തിയ കണ്ണൂർ ജില്ലാ കളക്‌ടർ അരുൺ കെ.വിജയന്‍റെ മൊഴിയിലെ മാറ്റവും സിപിഎമ്മിനെ പ്രതിക്കൂട്ടിലാക്കി. കളക്ടർ സ്ഥാനത്തുനിന്നും മാറ്റാതെ അരുൺ കെ.വിജയനെ സംരക്ഷിക്കുന്നതും സിപിഎമ്മാണെന്ന ആരോപണവും ശക്തമാണ്. ഇൻക്വസ്റ്റ് റിപ്പോർട്ട് വെട്ടിലാക്കി ഒകേ്ടാബര്‍ 15ന് രാവിലെ കണ്ണൂര്‍ ടൗണ്‍ പോലീസ് തയാറാക്കിയ ഇന്‍ക്വസ്റ്റ് റിപ്പോര്‍ട്ടിൽ നവീൻ ബാബുവിന്‍റെ അടിവസ്ത്രത്തിലെ രക്തക്കറയുടെ പരാമര്‍ശമുണ്ടായിരുന്നു. എന്നാല്‍, എഫ്ഐആറിലും പോസ്റ്റുമോർട്ടം റിപ്പോർട്ടിലും ഇക്കാര്യങ്ങൾ രേഖപ്പെടുത്തിയിട്ടില്ല. മൃതദേഹത്തിലെ രക്ത സാന്നിധ്യം പോലീസ് എഫ്ഐആറിലോ പോസ്റ്റുമോര്‍ട്ടം റിപ്പോര്‍ട്ടിലോ പരാമര്‍ശിച്ചിട്ടില്ലാത്തതാണ് നവീന്‍ ബാബുവിന്‍റെ കുടുംബത്തിന്‍റെ സംശയത്തിന് കാരണം.ആന്തരികാവയവങ്ങള്‍ക്ക് പരിക്കില്ലെന്ന് പോസ്റ്റുമോര്‍ട്ടം റിപ്പോര്‍ട്ടില്‍ പറയുമ്പോള്‍ പിന്നെ എങ്ങനെ അടിവസ്ത്രത്തില്‍ രക്തക്കറ വരുമെന്നാണ് കുടുംബം ചോദിക്കുന്നത്. തൂങ്ങിമരണം തന്നെയാണെന്നും എല്ലാ തൂങ്ങിമരണങ്ങളിലും മലമൂത്രവിസര്‍ജനം കാണാറില്ലെന്നും രക്തംവരുന്നത് സ്വാഭാവികമാണെന്നുമാണ് പോലീസ് വാദം. നവീന്‍ ബാബുവിന്‍റെ അടിവസ്ത്രത്തില്‍ രക്തക്കറ ഉണ്ടായിരുന്നുവെന്ന പോലീസ് ഇന്‍ക്വസ്റ്റ് റിപ്പോര്‍ട്ട് ഹൈക്കോടതിയില്‍ ഹാജരാക്കിയ പോസ്റ്റ്‌മോര്‍ട്ടം റിപ്പോര്‍ട്ടില്‍ ഇല്ലാത്തത് ശ്രദ്ധേയമാണ്. ഇതോടെയാണ്, നവീൻ ബാബുവിന്‍റെ മരണം കൊലപാതകം എന്ന സംശയത്തിന് കൂടുതൽ ബലമേകുന്നത്.

കേരള ദിനേശ് "സമൃദ്ധി ഓണം 2025' സമ്മാനക്കൂപ്പൺ നറുക്കെടുപ്പ് നടത്തി

കണ്ണൂർ: കേരള ദിനേശ് ഓണത്തോടനുബന്ധിച്ച് അനുവദിച്ചിരുന്ന സമ്മാന കൂപ്പൺ നറുക്കെടുപ്പ് പയ്യാന്പലം ദിനേശ് കേന്ദ്ര സംഘം സൂപ്പർമാർക്കറ്റിൽ കണ്ണൂർ ജില്ലാ ഇൻഫർമേഷൻ ഓഫീസർ പി.പി. വിനീഷ് ഉദ്ഘാടനം ചെയ്തു. കേരള ദിനേശ് ചെയർമാൻ എം.കെ. ദിനേശ് ബാബു അധ്യക്ഷത വഹിച്ചു. കേന്ദ്ര സംഘം ഡയറക്‌ടർമാരായ പി. കമലാക്ഷൻ, എം. ഗംഗാധരൻ, എം.പി. രഞ്ജിനി, വി. ബാലൻ, ഓഫീസ് മാനേജർ എം. പ്രകാശൻ, മാർക്കറ്റിംഗ് മാനേജർ എം. സന്തോഷ്കുമാർ എന്നിവർ പ്രസംഗിച്ചു. നറുക്കെടുപ്പ് വിജയികൾ: 1. ഒന്നാം സമ്മാനം(കാൽപ്പവൻ സ്വർണനാണയം)-05026. രണ്ടാം സമ്മാനം (മിക്സർ ഗ്രൈന്‍റർ)-03335. മൂന്നാം സമ്മാനം (ഖാദി സിൽക്ക് സാരി)-00941. നാലാം സമ്മാനം (റേഡിയോ)-02912. അഞ്ചാം സമ്മാനം (5 പേർക്ക്) ദിനേശ് ബെഡ് ഷീറ്റ്-08984, 03498, 00917, 00953, 00916. അഞ്ചാം സമ്മാനം (5 പേർക്ക്) ദിനേശ് കുട-00801, 09083, 08276, 10330, 05726. സമ്മാനാർഹർ ദിനേശ് കേന്ദ്ര സംഘം ഓഫീസിൽ നിന്നും സമ്മാനങ്ങൾ കൈപ്പറ്റണം.

ശ്രവണ ഹിയറിംഗ് എയ്ഡ് സെന്‍റർ പുതിയ ശാഖ മംഗളൂരുവിൽ ഉദ്ഘാടനം ചെയ്തു

മംഗളൂരു: ശ്രവണ ഹിയറിംഗ് എയ്ഡ് സെന്‍ററിന്‍റെ പുതിയ ശാഖ മംഗളൂരുവിൽ പ്രവർത്തനം ആരംഭിച്ചു. കർണാടക ആരോഗ്യ-കുടുംബക്ഷേമ മന്ത്രി ദിനേശ് ഗുണ്ടു റാവു ഉദ്ഘാടനം നിർവഹിച്ചു. ശ്രവണയുടെ ട്രസ്റ്റഡ് സപ്പോർട്ട് ഫോർ ഹിയറിംഗ് ആൻഡ് സ്പീച്ച് എന്ന എന്ന ആത്മവിശ്വാസത്തോടെ, മംഗളൂരു കേന്ദ്രം സാമൂഹ്യ സേവനത്തിന്‍റെ മികച്ച മാതൃകയാണെന്ന് മന്ത്രി ദിനേശ് ഗുണ്ടു റാവു പറഞ്ഞു. ശ്രവണ നടത്തുന്ന സേവനങ്ങൾ കേൾവി-സംസാര പ്രശ്നങ്ങളുള്ളവരുടെ ജീവിതത്തിൽ വലിയ മാറ്റങ്ങൾ സൃഷ്ടിക്കുന്നതാണെന്നും അദ്ദേഹം കൂട്ടിച്ചേർത്തു. മംഗളൂരു സൗത്ത് എംഎൽഎ. ഡോ. വേദവ്യാസ് കാമത്ത്, ഗോകർണത ക്ഷേത്ര ട്രഷറർ പത്മരാജ് ആർ പൂജാരി എന്നിവർ മുഖ്യാതിഥികളായിരുന്നു. ശ്രവണ ഹിയറിംഗ് എയ്ഡ് സെന്‍റർ മാനേജിംഗ് ഡയറക്ടർ ശ്രീജിത്ത് എളംബിലത്ത്, മംഗളൂരു ശാഖാ പാർട്ണറും ഓഡിയോളോജിസ്റ്റുമായ അതുൽ, മറ്റു പ്രമുഖർ, ഡോക്ടർമാർ, ശ്രവണ ടീമംഗങ്ങൾ, മംഗളൂരുവിലെ ആരോഗ്യരംഗ പ്രതിനിധികൾ എന്നിവരും പങ്കെടുത്തു. അത്യാധുനിക ഹിയറിംഗ് എയ്ഡ് സംവിധാനങ്ങളും ആന്തരീക ഓഡിയോളജി സേവനങ്ങളും ശ്രവണയിൽ ലഭ്യമാണ്. ഹൈലാന്‍റ് ഹോസ്പിറ്റലിന് എതിർവശത്തായി ഫാൾനിർ റോഡിൽ ബി‌എംകെ കൊമേഴ്സ്യൽ സെന്‍ററിലാണ് ശ്രവണ മംഗളൂരു ശാഖ പ്രവർത്തനമാരംഭിച്ചത്. ഉദ്ഘാടനത്തോടനുബന്ധിച്ച് ഈ മാസം 23 വരെ സൗജന്യ കേൾവി പരിശോധനാ സൗകര്യം ഒരുക്കിയിട്ടുണ്ടെന്ന് മാനേജ്മെന്‍റ് അറിയിച്ചു. ബുക്കിംഗിന് ഫോൺ: 9847954747.

കത്തോലിക്ക കോൺഗ്രസ് അവകാശ സംരക്ഷണ യാത്രയ്ക്ക് ആവേശമുന്നേറ്റം

പേരാവൂർ : കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ നീതി ഔദാര്യമല്ല അവകാശമാണ് എന്ന് പ്രഖ്യാപിച്ചുകൊണ്ട് സംഘടിപ്പിച്ച അവകാശ സംരക്ഷണ യാത്രയ്ക്ക് തലശേരി അതിരൂപതയിൽ ആവേശോജ്വല സമാപനം. പേരാവൂരിൽ കനത്ത മഴയെ അവഗണിച്ച് ആയിരങ്ങൾ അണിനിരന്ന സമാപന റാലിയും പൊതുസമ്മേളനവും സംരക്ഷണയാത്ര ജനം ഏറ്റെടുത്തതിന്‍റെ തെളിവായി. ഇന്നലെ വൈകുന്നേരം നാലിന് ചെവിടിക്കുന്ന് ശ്രീകൃഷ്ണ ക്ഷേത്രപരിസരത്തു നിന്ന് റാലിയായി എത്തിയാണ് പേരാവൂർ ടൗണിൽ യാത്രയെ വരവേറ്റത്. സെന്‍റ് ജോസഫ്സ് മേജർ ആർക്കി എപ്പിസ്കോപ്പൽ തീർഥാടന ദേവാലയ ആർച്ച് പ്രീസ്റ്റ് ഫാ. മാത്യു തെക്കേമുറി റാലി ഫ്ലാഗ് ഓഫ് ചെയ്തു. പേരാവൂർ ടൗണിലൂടെ നീങ്ങിയ റാലി പഴയ ബസ് സ്റ്റാൻഡിലെ മാർ സെബാസ്റ്റ്യൻ വള്ളോപ്പള്ളി നഗറിൽ സമാപിച്ചു. പേരാവൂർ, എടൂർ, കുന്നോത്ത് ഫൊറോനകളുടെ നേതൃത്വത്തിലാണ് സമാപന സമ്മേളനം ഒരുക്കിയത്. സമാപന സമ്മേളനം തലശേരി ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്തു. എകെസിസി തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. എകെസിസി ബിഷപ് ഡെലിഗേറ്റ് മാർ റെമിജിയോസ് ഇഞ്ചനാനിയിൽ അനുഗ്രഹ പ്രഭാഷണം നടത്തി. ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ ആമുഖപ്രഭാഷണം നടത്തി. ഗ്ലോബൽ ട്രഷറർ ടോണി പുഞ്ചക്കുന്നേൽ, തലശേരി അതിരൂപത ജനറൽ സെക്രട്ടറി ജിമ്മി ആയിത്തമറ്റം,പേരാവൂർ ഫൊറോന പ്രസിഡന്‍റ് ജോർജ് കാനാട്ട് തുടങ്ങിയവർ പ്രസംഗിച്ചു. ഫാ. തോമസ് വടക്കേമുറി, ഫാ. സെബാസ്റ്റ്യൻ മൂക്കിലക്കാട്ട്, ഫാ. തോമസ് പട്ടാംകുളം, ഫാ. ജോസഫ് തേനമ്മാക്കൽ, സുരേഷ് കാഞ്ഞിരത്തിങ്കൽ, ഷീജ കാറുകുളം, ബെന്നി പുതിയാംപുറം, ബെന്നിച്ചൻ മഠത്തിനകം, ഷാജു എടശേരി, മാത്യു വള്ളാംകോട്ട്, ജോസ് പുത്തൻപുര, ജോണി തോമസ് വടക്കേക്കര, മാത്യു ഒറ്റപ്ലാക്കൽ, ബ്രിട്ടോ ജോസ് തുടങ്ങിയവർ നേതൃത്വം നല്കി. പാണത്തൂരിൽനിന്ന് ആരംഭിച്ച യാത്ര ഇന്നലെ കാസർഗോഡ്, കണ്ണൂർ ജില്ലകളിൽ അഞ്ചിടങ്ങളിൽ സ്വീകരണമേറ്റുവാങ്ങിയാണ് പേരാവൂരിൽ സമാപിച്ചത്. ഇന്ന് യാത്ര മാനന്തവാടി രൂപതയിൽ പ്രവേശിക്കും. കത്തോലിക്കാ കോൺഗ്രസ് മുന്പേ പറക്കുന്ന പക്ഷി: മാർ പാംപ്ലാനി പേരാവൂർ: കത്തോലിക്കാ കോൺഗ്രസ് മുന്പേ പറക്കുന്ന പക്ഷിയെന്ന് തലശേരി ആർച്ച് ബിഷപ് മാർ ജോസഫ് പാംപ്ലാനി. നമ്മൾ ഉന്നയിക്കുന്ന ആവശ്യം ന്യായമാണ് എന്നതിന് തെളിവാണ് പൊതുജനം അത് ഏറ്റെടുക്കുന്നതെന്ന് ആർച്ച് ബിഷപ് പറഞ്ഞു. കത്തോലിക്ക കോൺഗ്രസ് അവകാശ സംരക്ഷണയാത്രയുടെ തലശരി അതിരൂപതാതല സമാപനം പേരാവൂരിൽ ഉദ്ഘാടനം ചെയ്തു പ്രസംഗിക്കുകയായിരുന്നു ആർച്ച്ബിഷപ്. 60 വർഷം പിന്നിട്ട വിമോചന സമരത്തെക്കുറിച്ച് ഇപ്പോഴും സംസാരിക്കേണ്ടി വരുന്നത് അത് കത്തോലിക്കന്‍റെ ഇച്ഛാശക്തിയുടെ പ്രതീകമായതുകൊണ്ടാണ്. നാട്ടിൽ ഇറങ്ങുന്ന കാട്ടുപന്നികളെ കാട്ടുപന്നികളായി കണക്കാക്കാതെ അതിനെ നാട്ടുപന്നിയായി കണക്കാക്കി കൈകാര്യം ചെയ്യുമെന്ന് പറഞ്ഞപ്പോൾ ഡിഎഫ്ഒ എന്നെ ഫോണിൽ വിളിച്ചിരുന്നു. പിതാവ് ഇത്തരത്തിൽ ഇനിയും സംസാരി ച്ചാൽ ഞങ്ങൾ കേസെടുക്കും എന്നായിരുന്നു ഭീഷണി. അപ്പോൾ ഞാൻ പറഞ്ഞത് സർ സിപി പേടിപ്പിച്ചിട്ട് പേടിക്കാത്തവരാണ് ഈ നാട്ടിലെ കത്തോലിക്കാ കോൺഗ്രസുകാരും കത്തോലിക്കാ മെത്രാന്മാരും പിന്നെയല്ലേ ഒരു ഡിഎഫ്ഒ. കത്തോലിക്കാ കോൺഗ്രസ് ഇന്നു പറയുന്നത് നാളെ ഇവിടത്തെ രാഷ്്‌ട്രീയക്കാരും ഭരണാധികാരികളും അംഗീകരിക്കുകയും നടപ്പാക്കുകയും ചെയ്യുന്നു എന്നതിന്‍റെ തെളിവാണ് നിയമസഭയിൽ കഴിഞ്ഞദിവസം പാസാക്കിയ ബില്ല്. റബറിന് 250 രൂപ നല്കാമെന്നു പറഞ്ഞ് പറ്റിച്ച സർക്കാരിനുള്ള അവസാനത്തെ താക്കീതാണ് കത്തോലിക്കാ കോൺഗ്രസ് നടത്തുന്ന അവകാശ സംരക്ഷണയാത്ര. 440 കെവി ലൈൻ നഷ്ടപരിഹാര തുക നല്കാതെ കർഷകന്‍റെ പറമ്പിൽ ഒരു തൂമ്പപോലും ഇടാൻ ഇവിടുത്തെ ഉദ്യോഗസ്ഥരെ അനുവദിക്കില്ലെന്ന് ആദ്യം പറഞ്ഞതും കത്തോലിക്കാ കോൺഗ്രസ് ആണ്. അത് കത്തോലിക്കർക്കു വേണ്ടി മാത്രമല്ല, ഇവിടുത്തെ എല്ലാ വിഭാഗത്തിൽപ്പെട്ട ആളുകൾക്കും കൂടി വേണ്ടിയാണ്- ആർച്ച്ബിഷപ് പറഞ്ഞു.

ഐഎൻടിയുസി നേതാക്കളെ അനുസ്മരിച്ചു

ഇരിട്ടി: അന്തരിച്ച ഐഎൻടിയുസി നേതാക്കളായിരുന്ന കുര്യാച്ചൻ ആനപ്പാറയുടെയും ഫിലിപ്പ് മുരിയംകരിയുടെയും (ബേബി) ഒന്നാം ചരമവാർഷികവും ഐഎൻടിയുസി മുൻ ആറളം മണ്ഡലം പ്രസിഡന്‍റ് പി.സി. സോണി നെല്ലിയാനിയുടെ 41-ാം ചരമദിനവും ആചരിച്ചു. മുതിർന്ന കോൺഗ്രസ് നേതാവ് സി.വി. ജോസഫ് അനുസ്മരണം ഉദ്ഘാടനം ചെയ്തു. ആറളം മണ്ഡലം കോൺഗ്രസ് കമ്മിറ്റി ഓഫീസിൽ നടന്ന ചടങ്ങിൽ ഐഎൻടിയുസി പേരാവൂർ നിയോജക മണ്ഡലം പ്രസിഡന്‍റ് കെ.എം. പീറ്റർ അധ്യക്ഷത വഹിച്ചു. ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് ജോസഫ് അന്ത്യാംകുളം, ജോസഫ് പാരിക്കപ്പള്ളി, ഫ്രാൻസിസ് കുറ്റിക്കാട്ടിൽ, കെ.ജെ. ജോസ്, സിറിയക്ക് പാറക്കൽ, ലില്ലി മുരിയംകരിയിൽ, സിഐടിയു നേതാവ് ജോസഫ് ചെറുവേലി, ബെന്നി കൊച്ചുമല, ഹരീന്ദ്രൻ നീലംചേരി, രാജേഷ് കട്ടക്കൽ എന്നിവർ പ്രസംഗിച്ചു. ചടങ്ങിൽ അന്തരിച്ച നേതാക്കളുടെ കുടുംബാംഗങ്ങളും പങ്കെടുത്തു.

അയ്യപ്പന്‍റെ സ്വർണം കക്കാൻ കൂട്ടുനിന്നവർക്ക് ചിത്തഭ്രമം ബാധിച്ചുതുടങ്ങി: കെ. മുരളീധരൻ

ഇരിട്ടി: അയ്യപ്പന്‍റെ സ്വർണം കട്ടവർക്കും കൂട്ടുനിന്നവർക്കും ചിത്ത ഭ്രമം ബാധിച്ചു തുടങ്ങിയതായി മുൻ കെപിസിസി പ്രസിഡന്‍റ് കെ. മുരളീധരൻ. ശബരിമലയിലെ സ്വർണ കൊള്ളയ്ക്കും വിശ്വാസവഞ്ചനയ്ക്കുമെതിരേ കെപിസിസിയുടെ നേതൃത്വത്തിൽ നടത്തിയ വിശ്വാസ സംരക്ഷണ യാത്രയ്ക്ക് ഇരിട്ടിയിൽ നല്കിയ സ്വീകരണ സമ്മേളനത്തിൽ പ്രസംഗിക്കുകയായിരുന്നു ജാഥ നായകൻ കൂടിയായ മുരളീധരൻ. സിപിഎമ്മിന്‍റെ അയ്യപ്പ ഭക്തി കാപട്യമാണെന്ന് സ്വീകരണ യോഗം ഉദ്ഘാടനം ചെയ്ത കെപിസിസി പ്രസിഡന്‍റ് സണ്ണി ജോസഫ് എംഎൽഎ പറഞ്ഞു.ചന്ദ്രൻ തില്ലങ്കേരി അധ്യക്ഷത വഹിച്ചു. ജാഥ വൈസ് ക്യാപ്റ്റൻ ടി. സിദ്ധീഖ് എംഎൽഎ, സജീവ് ജോസഫ് എംഎൽഎ, മാർട്ടിൻ ജോർജ്, പി.എം. നിയാസ്, വി.എ. നാരായണൻ, സജീവ് മാറോളി. ബാലകൃഷ്ണൻ പെരിയ, ചാക്കോ പാലക്കലോടി, പി.സി. ഷാജി, പി.കെ. ജനാർദ്ദനൻ, കെ.പി. സാജു , കെ. വേലായുധൻ, ലിസി ജോസഫ് തുടങ്ങിയവർ പ്രസംഗിച്ചു. പയ്യന്നൂർ: വിശ്വാസത്തിന് മുറിവേൽപ്പിക്കാൻ കോൺഗ്രസ് അനുവദിക്കില്ലെന്ന് കോൺഗ്രസ് രാഷ്ട്രീയ കാര്യ സമിതി അംഗം കെ.മുരളീധരൻ. കരിവെള്ളൂർ ആണൂരിൽ നല്കിയ സ്വീകരണ യോഗത്തിൽ പ്രസംഗിക്കുകയായിരുന്നു അദ്ദേഹം.കണ്ണൂർ ഡിസിസി പ്രസിഡന്‍റ് മാർട്ടിൻ ജോർജിന്‍റെ നേതൃത്വത്തിലാണ് ജാഥയ്ക്ക് സ്വീകരണം നല്കിയത്. മാർട്ടിൻ ജോർജ് അധ്യക്ഷത വഹിച്ചു. ജാഥാ വൈസ് ക്യാപ്റ്റൻ ടി. സിദ്ദിഖ് എംഎൽഎ, പി.എം. നിയാസ്, സോണി സെബാസ്റ്റ്യൻ എന്നിവർ പ്രസംഗിച്ചു. സര്‍ക്കാരിന്‍റെ കാപട്യം ജനം തിരിച്ചറിയും: കെ. സുധാകരന്‍ കണ്ണൂര്‍: അയ്യപ്പ സംഗമം നടത്തുകയും അതേ സമയം ശബരിമലയില്‍ സ്വര്‍ണക്കൊള്ള നടത്തുന്നതിന് കൂട്ട് നില്‍ക്കുകയും ചെയ്യുന്ന സര്‍ക്കാരിന്‍റെ കാപട്യം ജനങ്ങള്‍ തിരിച്ചറിയുമെന്ന് കെ. സുധാകരന്‍ എംപി പറഞ്ഞു. കെ. മുരളീധരന്‍ നയിക്കുന്ന വിശ്വാസ സംരക്ഷണയാത്രയ്ക്ക് കണ്ണൂര്‍ ടൗണ്‍സ്‌ക്വയറില്‍ നല്കിയ സ്വീകരണം ഉദ്ഘാടനം ചെയ്തും പ്രസംഗിക്കുകയായിരുന്നു അദ്ദേഹം.

നാടിന്‍റെ വികസനത്തിൽ തദ്ദേശസ്ഥാപനങ്ങൾ വഹിക്കുന്നത് വലിയ പങ്ക്: മന്ത്രി ഒ.ആർ. കേളു

പേരാവൂർ: നാടിന്‍റെ വികസന കാര്യത്തിൽ തദ്ദേശസ്വയം ഭരണ സ്ഥാപനങ്ങൾ വഹിക്കുന്ന പങ്ക് ഏറെ വലുതാണെന്നും പഞ്ചായത്തുകൾ വഴിയാണ് നാട്ടിൽ ജനാധിപത്യം പുലരുന്നതെന്നും പട്ടികജാതി-വർഗ പിന്നോക്ക ക്ഷേമ മന്ത്രി ഒ.ആർ. കേളു. പേരാവൂര്‍ പഞ്ചായത്ത് 2024-25 വാര്‍ഷിക പദ്ധതിയില്‍ ഉള്‍പ്പെടുത്തി കല്ലടികോറയില്‍ നിര്‍മിച്ച ദുരന്ത നിവാരണ ഷെല്‍ട്ടറിന്‍റെ ഉദ്ഘാടം നിർവഹിച്ച് പ്രസംഗിക്കുകയായിരുന്നു മന്ത്രി. തൊണ്ടി - കോറയിലെ സുവര്‍ണ ഭൂമിയില്‍ നടന്ന പരിപാടിയില്‍ പഞ്ചായത്ത് പ്രസിഡന്‍റ് പി.പി. വേണുഗോപാൽ അധ്യക്ഷത വഹിച്ചു. പഞ്ചായത്തിന് സൗജന്യമായി ലഭിച്ച 10 സെന്‍റ് സ്ഥലത്താണ് ഷെല്‍ട്ടര്‍ നിര്‍മിച്ചത്. ദുരന്തങ്ങളുണ്ടായാല്‍ ഷെല്‍ട്ടറായി ഉപയോഗിക്കുന്ന കെട്ടിടത്തില്‍ വയോജന വിശ്രമ കേന്ദ്രവും ലൈബ്രറിയും പ്രവര്‍ത്തിക്കും. പഞ്ചായത്തിന്‍റെ തനത് ഫണ്ടില്‍ നിന്ന് 23 ലക്ഷം രൂപ ഉപയോഗിച്ചാണ് കെട്ടിട നിര്‍മാണം പൂര്‍ത്തിയാക്കിയത്. ഷെല്‍ട്ടര്‍ സ്ഥിതി ചെയ്യുന്ന സ്ഥലത്തേക്ക് 365 മീറ്റര്‍ നീളത്തില്‍ കോണ്‍ക്രീറ്റ് റോഡും നിര്‍മിച്ചിട്ടുണ്ട്. 15 ലക്ഷം രൂപയാണ് റോഡിന്‍റെ നിര്‍മാണ ചെലവ്. വൈദ്യുതീകരണത്തിനും കുടിവെള്ള സൗകര്യമൊരുക്കുന്നതിനുമായി അഞ്ച് ലക്ഷം രൂപയുടെ ടെണ്ടര്‍ നടപടിയും പൂര്‍ത്തിയായിട്ടുണ്ട്. ഷെല്‍ട്ടറിനായി സ്ഥലം വിട്ടുനല്‍കിയ മാണിക്കത്താഴെ ഈപ്പച്ചന്‍, റോഡിനായി സ്ഥലം സംഭാവന ചെയ്ത ബേബി താഴത്തുവീട്ടില്‍, ലിസമ്മ മഠത്തില്‍, 2025 ലെ മിസ് കേരള ഫാഷന്‍ വിജയി സുവര്‍ണ ബെന്നി, എം.സി കുട്ടിച്ചന്‍, കരാറുകാരൻ വി.ഡി മത്തായി എന്നിവരെ ആദരിച്ചു. പേരാവൂര്‍ ബ്ലോക്ക്പഞ്ചായത്ത് പ്രസിഡന്‍റ് കെ. സുധാകരന്‍ മുഖ്യാതിഥിയായിരുന്നു. വൈസ് പ്രസിഡന്‍റ് പ്രീത ദിനേശന്‍, പേരാവൂര്‍ പഞ്ചായത്ത് വൈസ് പ്രസിഡന്‍റ് നിഷ ബാലകൃഷ്ണന്‍ ജനപ്രതിനിധികൾ, ഉദ്യോഗസ്ഥർ, വിവിധ രാഷ്‌ട്രീയപാർട്ടി പ്രതിനിധികൾ എന്നിവർ പങ്കെടുത്തു.

ജപ്തിശ്രമം തടഞ്ഞതായി കർഷക സംഘടനകൾ

ഇരിട്ടി: വായ്പത്തുക കുടിശിക ആയതിനെത്തുടർന്ന് കർഷകഭൂമി ഏറ്റെടുക്കാനുള്ള ബാങ്കിന്‍റെ ശ്രമം തടഞ്ഞ് ആർകെഎംഎസ് പ്രവർത്തകർ. ആനപ്പന്തി സർവീസ് സഹകരണ ബാങ്കിൽ വായ്പത്തുക കുടിശിക ആയതിനെത്തുടർന്ന് 20 കുടുംബങ്ങളുടെ വീടും സ്ഥലവും ഇന്നലെ രാവിലെ11 ന് അയ്യം കുന്ന് വില്ലേജ് ഓഫീസ് വഴി ജപ്തി നടത്തുമെന്ന് നോട്ടീസ് നല്കിയിരുന്നു. എന്നാൽ നോട്ടീസിന് വിരുദ്ധമായി സെയിൽ ഓഫീസറുടെ ഒത്താശയോടെ കർഷകരുടെ വീടും സ്ഥലവും വില്ലേജ് ഓഫീസിൽ നിന്നും ലേലം ചെയ്യാതെ രഹസ്യമായി പുറത്തുവച്ച് നടപടികൾ പൂർത്തിയാക്കി പ്രഖ്യാപനം നടത്താനായി 11.30ന് വില്ലേജിൽ എത്തുകയായിരുന്നുവെന്ന് പ്രതിഷേധക്കാർ ആരോപിച്ചു. ഇതേത്തുടർന്ന് രാവിലെ 10 മുതൽ വില്ലേജ് ഓഫീസിൽ ജപ്തി തടയുന്നതിന് കാത്തുനിന്ന രാഷ്ട്രീയ കിസാൻ മഹാ സംഘ് നേതാക്കളും കർഷകരും ഓഫീസർക്ക് ഒപ്പം എത്തിയ ബാങ്ക് അധികൃതരെ വില്ലേജ് ഓഫീസിനുള്ളിൽ ഉപരോധിച്ചു. മണിക്കൂറുകൾ നീണ്ട വാദപ്രതിവാദങ്ങൾക്കൊടുവിൽ കരിക്കോട്ടക്കരി എസ്ഐയുടെ നേതൃത്വ ത്തിൽ പോലീസെത്തി ഇരുകൂട്ടരുമായി ചർച്ച നടത്തി. ലേലത്തിനു ആളുകൾ എത്താത്തതിനാൽ പിന്നീട് നടത്തുമെന്ന് ബാങ്ക് അധികൃതർ അറിയിച്ചു. കർഷക പ്രതിഷേധ കൂട്ടായ്മ രാഷ്‌ട്രീയ കിസാൻ മഹാസംഘ് സംസ്ഥാന ചെയർമാൻ ബിനോയ് തോമസ് ഉദ്ഘാടനം ചെയ്തു. കത്തോലിക്കാ കോൺഗ്രസ് ഗ്ലോബൽ വർക്കിംഗ് കമ്മിറ്റി അംഗം ബെന്നി പുതിയാംപുറം അധ്യക്ഷത വഹിച്ചു. വിവിധ കർഷക സംഘടന നേതാക്കളായ ഗർവാസീസ് കല്ലുവയൽ, അഗസ്റ്റിൻ വെള്ളാരംകുന്നേൽ, ബിനോയി പുത്തൻനടയിൽ, ബിജു കുറുപ്പംപറമ്പിൽ, ബാബു മാളിയേക്കൽ, ജോൺസൺ അണിയറ, സെബാസ്റ്റ്യൻ കപ്പലുമാക്കൽ, ജോഷി മങ്കര, ടി.സി. ബിജു, സി.ജെ. ജെയ്സൺ തുടങ്ങിയവർ പ്രസംഗിച്ചു. ആരോപണം അടിസ്ഥാനരഹിതം: ബാങ്ക് അധികൃതർ ഇരിട്ടി: പത്രങ്ങളിൽ ഉൾപ്പെടെ പരസ്യം നല്കി എല്ലാ നിയമ നടപടികളും പൂർത്തിയാക്കിയ ശേഷമാണ് ലേല നടപടികൾ ബാങ്ക് നടപ്പിലാക്കുന്നതെന്ന് ആനപ്പന്തി സർവീസ് സഹകരണ ബാങ്ക് അധികൃതർ അറിയിച്ചു. വർഷങ്ങൾ പഴക്കമുള്ള വായ്പാ കുടിശികയിലാണ് ബാങ്ക് നടപടിയിലേക്ക് നീങ്ങിയിരിക്കുന്നത്. വായ്പ എടുത്തവർ തിരിച്ചടവ് തവണ വ്യവസ്ഥയിൽ മാറ്റുന്നതിന് ഹൈക്കോടതിയെ ഉൾപ്പെടെ സമീപിച്ചിരുന്നു. കോടതി നല്കിയ തവണ വ്യവസ്ഥയും വായ്പ എടുത്തവർ ലംഘിച്ചതോടെയാണ് ബാങ്ക് നിയമാനുസൃത നടപടിയിലേക്ക് നീങ്ങിയത്. ഇന്നലെ നടന്നുവെന്ന് കർഷക സംഘടനകൾ പറയുന്ന സംഭവങ്ങൾ അടിസ്ഥാനരഹിതമാണ്. ഇന്നലെ നടക്കേണ്ടിയിരുന്ന ലേലം ആളുകൾ എത്താതിരുന്നതുകൊണ്ട് മാത്രമാണ് മാറ്റിവച്ചത്. കരിക്കോട്ടക്കരി വില്ലേജിൽ നടക്കേണ്ട ലേലവും ആളുകൾ എത്താതിരുന്നതുകൊണ്ട് മാറ്റിവച്ചിരിക്കുകയാണ്. കരി ക്കോട്ടക്കരി വില്ലേജിൽ ലേലം തടഞ്ഞുവെന്ന് അവകാശപ്പെടുന്ന സംഘടനകൾ ആരും എത്തിയിരു ന്നില്ല. ഈ മാസം 21 ന് വീണ്ടും ലേല നടപടി നടക്കുമെന്നും ബാങ്ക് അധികൃതർ അറിയിച്ചു.

സിറ്റി റോഡ് ഇംപ്രൂവ്‌മെന്‍റ് പദ്ധതി: സൗത്ത് ബസാർ മേൽപ്പാലം പ്രാരംഭ പ്രവൃത്തികൾ തുടങ്ങി

കണ്ണൂർ: കണ്ണൂർ നഗരത്തിലെ ഗതാഗതം സുഗമമാക്കുന്ന സിറ്റി റോഡ് ഇംപ്രൂവ്‌മെന്‍റ് പദ്ധതി ദ്രുതഗതിയിൽ. മേലേ ചൊവ്വ മേൽപ്പാലത്തിന്‍റെ നിർമാണ പ്രവൃത്തികൾക്ക് സമാന്തരമായി സൗത്ത് ബസാർ മേൽപ്പാലത്തിന്‍റെ പ്രാരംഭ പ്രവൃത്തികളും ആരംഭിച്ചു. പദ്ധതിയുടെ ആദ്യ ഘട്ടത്തിൽ ഉൾപ്പെട്ട കെട്ടിടങ്ങൾ പൊളിച്ചു മാറ്റുന്ന പ്രവൃത്തിയാണിപ്പോൾ നടന്നുവരുന്നത്. രണ്ടാം ഘട്ടത്തിൽ ഉൾപ്പെട്ട കെട്ടിടങ്ങൾ പൊളിച്ചുമാറ്റുന്നതിനുള്ള ടെൻഡർ നടപടികൾ ആരംഭിച്ചു.പദ്ധതിക്കായി പുറമ്പോക്ക് ഉൾപ്പെടെ ഏറ്റെടുത്ത 205 സെന്‍റ് സ്ഥലത്തെ കെട്ടിടങ്ങളാണ് പൊളിച്ചു മാറ്റേണ്ടത്. ആദ്യത്തെ ഘട്ടത്തിൽ ടെൻഡർ നടപടികൾ പൂർത്തിയാക്കിയ കെട്ടിടങ്ങൾ പൂർണമായും പൊളിച്ചു നീക്കി. ശേഷിക്കുന്നവ രണ്ടു മുതൽ നാലുവരെയുള്ള ഘട്ടങ്ങളായി ടെൻഡർചെയ്ത് പൊളിച്ചു മാറ്റും. റോഡ്‌സ് ആൻഡ് ബ്രിഡ്ജസ് ഡവലപ്‌മെന്‍റ് കോർപറേഷൻ നിശ്ചയിച്ചിരുന്നത്. എന്നാൽ ശേഷിക്കുന്ന ടെൻഡറുകൾ ഒരുമിച്ച് ചെയ്യുന്നതിന് സബ്കളക്ടർ നിർദേശം നൽകി. 2016 ലാണ് നഗരത്തിലെ ഗതാഗത കുരുക്കിന് പരിഹാരമായി സിറ്റി റോഡ് ഇംപ്രൂവ്‌മെന്‍റ് പദ്ധതിയിൽ ഉൾപ്പെടുത്തിയ സൗത്ത് ബസാർമേൽപ്പാലം പ്രവൃത്തി റോഡ്‌സ് ആൻഡ് ബ്രിഡ്ജസ് ഡവലപ്‌മെന്‍റ് കോർപറേഷനെ ഏൽപിച്ചത്. കാൾടെക്സ് ജങ്ഷനിലെ ഗതാഗതക്കുരുക്ക് പരിഹരിക്കുന്നതിന് സർക്കാർ പ്രഖ്യാപിച്ച പ്രധാന പദ്ധതികളിലൊന്നാണ് സൗത്ത് ബസാർ ഫ്ലെെഓവർ. സിറ്റി റോഡ്, മേലേചൊവ്വ മേൽപ്പാലം, സൗത്ത് ബസാർ മേൽപ്പാലം എന്നിവയാണ് സിറ്റി റോഡ് ഇംപ്രൂവ്‌മെന്‍റ് പദ്ധതിയിൽ ഉൾപ്പെടുന്നത്.

ജില്ലാ കായികമേള നാളെ മുതൽ

തലശേരി: ജില്ലയിലെ 15 വിദ്യാഭ്യാസ ഉപജില്ലകളിൽ നിന്നുള്ള കായികതാരങ്ങൾ പങ്കെടുക്കുന്ന ജില്ലാതല കായികമേളയ്ക്ക് നാളെ തലശേരിയിൽ തുടക്കമാകും. വിവിധ ഉപജില്ലകളിൽ നിന്നായുള്ള2600 ലേറെ കായികതാരങ്ങൾ പങ്കെടുക്കും. തലശേരി നഗരസഭാ സ്റ്റേഡിയത്തിൽ രാവിലെ 7.30 ന് ജില്ലാ വിദ്യാഭ്യാസ ഉപഡയറക്ടർ സി.ഷൈനി പതാക ഉയർത്തുന്നതോടെ മത്സരങ്ങൾ ആരംഭിക്കും. കായിക മേളയുടെ ഔപചാരിക ഉദ്ഘആടനം രാവിലെ 9.30 ന് സ്പീക്കർ എ.എൻ ഷംസീർ നിർവഹിക്കും. കായിക മേളയുടെ ഭാഗമായി ഇന്ന് രാവിലെ 6.30 ന് കണ്ണൂർ പയ്യാമ്പലം ബീച്ച് റോഡിൽ ക്രോസ് കൺട്രി മത്സരം നടത്തും.ആൺകുട്ടികൾക്ക് ആറു കിലോമീറ്ററും പെൺകുട്ടികൾക്ക് നാലു കിലോമീറ്ററുമാണ് മത്സരം. മേള ശനിയാഴ്ച സമാപിക്കും. സമാപന സമ്മേളനം നഗരസഭാ വൈസ് ചെയർപേഴ്സൺ എം.വി.ജയരാജൻ ഉദ്ഘാടനം ചെയ്യും. വിജയി കൾക്കുള്ളട്രോഫി തലശേരി ബ്ലോക്ക് പഞ്ചായത്ത് പ്രസിഡന്‍റ് സി.പി. അനിത സമ്മാനിക്കും.ഹരിത ചട്ടങ്ങൾ പാലിച്ചാണ് കായിക മേള നടത്തുകയെന്ന് സംഘാടകർ പത്രസമ്മേളനത്തിൽ അറിയിച്ചു. പത്രസമ്മേളനത്തിൽ വിദ്യാഭ്യാസ ഉപഡയറക്ടർ ഡി. ഷൈനി, സ്പോട്സ് കോ-ഓർഡിനേറ്റർ പി.പി.മുഹമ്മദലി, പബ്ലിസിറ്റി കൺവീനർ പി.പി.സുധീർ, സ്വീകരണ കമ്മിറ്റി കൺവീനർ.എൻ.പി. ബിനീഷ്, കെ.പി.സായന്ത്, ഷൈനേഷ് ചന്ദ്ര എന്നിവർ പങ്കെടുത്തു.

പ്രാഥമിക ആരോഗ്യ കേന്ദ്രം സബ് സെന്‍റർ ഉദ്ഘാടനം ചെയ്തു

ഇരിട്ടി: അങ്ങാടിക്കടവ് പ്രാഥമിക ആരോഗ്യ കേന്ദ്രത്തിന്‍റെ കീഴിൽ വാണിയപ്പാറയിൽ പുതിയ സബ് സെന്‍റർ പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ ഉദ്ഘാടനം ചെയ്തു. സ്ഥിരം സമിതി അധ്യക്ഷ സീമ സനോജ് അധ്യക്ഷത വഹിച്ചു. സ്ഥിരം സമിതി അധ്യക്ഷൻ ഐസക്ക് ജോസഫ്, പഞ്ചായത്തംഗങ്ങളായ ലിസി തോമസ്, ജോസഫ് വട്ടുകുളം, സെലീന ബിനോയി, മെഡിക്കൽ ഓഫീസർ നയനപോൾ, വ്യാപാരി വ്യവസായി പ്രസിഡന്‍റ് സജി മണപ്പാത്തുപറമ്പിൽ, ഷിജു മഞ്ഞപ്പള്ളി, ഗിരീശൻ എന്നിവർ പ്രസംഗിച്ചു.

21 പഞ്ചായത്തുകളുടെ കൂടി സംവരണവാര്‍ഡ് നറുക്കെടുത്തു

കണ്ണൂർ: തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി കളക്ടറേറ്റ് കോണ്‍ഫറന്‍സ് ഹാളില്‍ നടക്കുന്ന വനിത, പട്ടികവിഭാഗം സംവരണ വാര്‍ഡുകളുടെ നറുക്കെടുപ്പില്‍ രണ്ടാം ദിനം 21 ഗ്രാമപഞ്ചായത്തുകളുടെ നറുക്കെടുപ്പ് നടന്നു. കല്യാശേരി, കണ്ണൂര്‍, തളിപ്പറമ്പ് ബ്ലോക്കിന് കീഴിലെ ഗ്രാമപഞ്ചായത്തുകളുടെ നറുക്കെടുപ്പാണ് ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടര്‍ അരുണ്‍ കെ വിജയന്‍റെ നേതൃത്വത്തില്‍ നടന്നത്. ചപ്പാരപ്പടവ് വനിത: രണ്ട് എരുവാട്ടി, മൂന്ന് കരിങ്കയം, അഞ്ച് മണാട്ടി, ആറ് ബാലപുരം, 12 ശാന്തിഗിരി, 13 നാടുകാണി, 14 കൂവേരി, 16 തേറണ്ടി, 18 പെരുമളാബാദ്, 19 എടക്കോം, പട്ടികജാതി: എട്ട് മംഗര. ചെങ്ങളായി വനിത: ഒന്ന് കണ്ണാടിപ്പാറ, മൂന്ന് ചാലില്‍ വയല്‍, 5 കാവിന്മൂല, ഏഴ് അടുക്കം, എട്ട് ചെങ്ങളായി, 10 കോട്ടപ്പറമ്പ്, 14 തേര്‍ളായി, 16 നിടുവാലൂര്‍, 17 കുണ്ടൂലാട്, 19 പടിഞ്ഞാറേമൂല, പട്ടികജാതി: നാല് മമ്മലത്ത്കരി ഉദയഗിരി വനിത: ഒന്ന് മുതുശേരി, നാല് ഉദയഗിരി, അഞ്ച് പുല്ലരി, ആറ് ലഡാക്ക്, ഒന്പത് ചീക്കാട്, 11 മണക്കടവ്, 12 മുക്കട, 15 പൂവഞ്ചല്‍. പട്ടിക വര്‍ഗം: ഏഴ് മമ്പോയില്‍ നടുവില്‍ വനിത: മൂന്ന് വെള്ളാട്, അഞ്ച് പാറ്റക്കളം, ആറ് പാത്തന്‍പാറ, എട്ട് കനകക്കുന്ന്, ഒന്പത് കൈതളം, 10 പുലിക്കുരുമ്പ, 11 വേങ്കുന്ന്, 12 മണ്ഡളം, 19 താവുകന്ന്. പട്ടികവര്‍ഗ വനിത: ഏഴ് പൊട്ടന്‍ പ്ലാവ്. പട്ടികവര്‍ഗം 20 വായാട്ടുപറമ്പ്. കടന്നപ്പള്ളി പാണപ്പുഴ വനിത: രണ്ട് , നാല്, ഏഴ് , ഒന്പത്, 11 , 13, 15, 16,പട്ടികജാതി: എട്ട്. ആലക്കോട് വനിത: രണ്ട് കൂടപ്രം, മൂന്ന് ചിറ്റടി, നാല് തേര്‍ത്തല്ലി, അഞ്ച് രയറോം, ആറ് മൂന്നാംകുന്ന്, ഏഴ് നെടുവോട്, ഒമ്പത് കുട്ടാപറമ്പ്, പത്ത് അരങ്ങം, 14-നെല്ലിക്കുന്ന്, 19-നെല്ലിപ്പാറ, 20-മേരിഗിരി പട്ടികജാതി; എട്ട് പരപ്പ, പട്ടികവര്‍ഗം: 17-കൂളാമ്പി. പാപ്പിനിശേരി വനിത: വാര്‍ഡ് ഒന്ന് , അഞ്ച് , ഒന്പത് , 10 , 12 , 14,15 , 17 , 18, 21, പട്ടികജാതി വനിത: 20 ,പട്ടികജാതി: 22. പട്ടുവം വനിത: ഒന്ന് , രണ്ട് , മൂന്ന് , നാല് , ഏഴ് , എട്ട്, ഒന്പത്, പട്ടികജാതി: 12 . അഴീക്കോട് വനിത: നാല്, ആറ്, ഏഴ്, ഒന്പത്, 13, 15, 16, 17,18, 19, 20, 23, പട്ടികജാതി: രണ്ട്. മാടായി വനിത: നാല്, അഞ്ച്, ആറ് , എട്ട് , 10, 11, 16,17, 18, 19, പട്ടികജാതി വനിത: 15, പട്ടികജാതി: മൂന്ന്. വളപട്ടണം വനിത: അഞ്ച് , ഏഴ് , എട്ട് , 11 , 12 ,13,14. പട്ടികജാതി: 10. നാറാത്ത് വനിത: രണ്ട്, ആറ്, ഏഴ്, 11, 13, 14, 15, 16. പട്ടികജാതി വനിത: 18, പട്ടികജാതി: മൂന്ന്. മാട്ടൂല്‍ വനിത: രണ്ട് , ആറ്, ഏഴ് , എട്ട് , ഒന്പത്, 12 , 13 , 14 , 16, 18, പട്ടികജാതി: ഒന്ന്. കണ്ണപുരം വനിത: ഒന്ന്, രണ്ട് , മൂന്ന് , അഞ്ച്, ആറ് , 10 , 13, 14 ,പട്ടികജാതി: ഏഴ് . കല്യാശേരി വനിത: രണ്ട് , നാല്, അഞ്ച്, ആറ്, എട്ട്, 12, 13, 15,16, 19, പട്ടികജാതി: മൂന്ന്. ചെറുകുന്ന് വനിത: ഒന്ന് , മൂന്ന് , നാല് , അഞ്ച്, ഏഴ് , ഒന്പത് , 10. പട്ടികജാതി :12 ഏഴോം വനിത: അഞ്ച് , ആറ് , എട്ട് , 10 , 11 , 13 , 14, 15,പട്ടികജാതി: ഒന്ന്. ചിറക്കല്‍ വനിത: നാല്, ആറ്, എട്ട്, ഒന്പത്, 10, 11, 13, 17, 18, 21 , 23, 24, പട്ടികജാതി: അഞ്ച്. ചെറുതാഴം വനിത: രണ്ട് , മൂന്ന് , ഏഴ്, എട്ട് , ഒന്പത് , 12, 13, 17, 18 , 19, പട്ടികജാതി: ആറ് . പരിയാരം വനിത: ഒന്ന് , രണ്ട് , മൂന്ന് , അഞ്ച്, ആറ്, ഏഴ് , എട്ട് , 12 മുക്കുന്ന്, 14, 15, 20,പട്ടികജാതി : 18. കുറുമാത്തൂര്‍ വനിത: നാല്, അഞ്ച് , ആറ് , ഒന്പത് , 10, 12, 13, 16 , 18,19, പട്ടികജാതി: 14. ഇരിക്കൂര്‍, പാനൂര്‍, ഇരിട്ടി ബ്ലോക്കിന് കീഴിലെ പഞ്ചായത്തുകളുടെ നറുക്കെടുപ്പ് ഇന്ന് നടക്കും.

ചെറുപുഴ നവജ്യോതി കോളജിൽ പുതിയ മനഃശാസ്ത്ര പഠന കേന്ദ്രം ഉദ്ഘാടനം ചെയ്തു

ചെറുപുഴ: ചെറുപുഴ നവജ്യോതി കോളജിൽ അത്യാധുനിക സൗകര്യങ്ങളോടു കൂടിയ പുതിയ സൈക്കോളജി ലാബ് ഉദ്ഘാടനം ചെയ്തു. മാനസികാരോഗ്യ പഠനത്തിനും പ്രായോഗിക പരിശീലനത്തിനും പുതിയ സാധ്യതകൾ തുറക്കുന്നതാണ് ഈ ലാബ്. പ്രശസ്ത മനഃശാസ്ത്ര വിദഗ്ധനും ഫാമിലി കൗൺസിലറുമായ ഫാ. മാത്യു അക്കുട്ട് ലാബിന്‍റെ ഉദ്ഘാടനം നിർവഹിച്ചു. കോളജ് പ്രിൻസിപ്പൽ ഡോ. കെ.കെ. സോമശേഖരൻ അധ്യക്ഷത വഹിച്ചു. ഡയറക്‌ടർ ഫാ. സിജോയി പോൾ, മാനേജർ ഫാ. ജോസഫ് ചാത്തനാട്ട് എന്നിവർ പ്രസംഗിച്ചു. മനശാസ്ത്ര പഠനങ്ങൾക്കും പരീക്ഷണങ്ങൾക്കും ഉപയോഗപ്രദമായ പുതിയ സാങ്കേതിക വിദ്യകളാണു ലാബിൽ ഒരുക്കിയിട്ടുള്ളത്. ഡിപ്പാർട്ട്മെന്‍റ് മേധാവി ഫാ. ബിനോയി വാഴയിൽ, കോ-ഓർഡിനേറ്റേഴ്സ് വിസ്മയ മരിയ, ജെയ്മി ജോൺസൺ എന്നിവർ നേതൃത്വം നൽകി.

കർഷക കോൺഗ്രസ് പ്രവർത്തക കൺവൻഷൻ നടത്തി

ശ്രീകണ്ഠപുരം: ത്രിതല പഞ്ചായത്ത് തെരഞ്ഞെടുപ്പിൽ കർഷകർ നിർണായക ശക്തിയാവുമെന്നും കർഷകരോഷം ആളിക്കത്തുമെന്നും മുതിർന്ന കോൺഗ്രസ് നേതാവ് എം.ഒ. മാധവൻ. ശ്രീകണ്ഠപുരം ഇന്ദിരാഭവനിൽ കർഷക കോൺഗ്രസ് ഇരിക്കൂർ നിയോജക മണ്ഡലം പ്രവർത്തക കൺവൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ കർഷക കോൺഗ്രസ് അധ്യക്ഷന്‍റെ നേതൃത്വത്തിൽ 18 ന് ചെറുപുഴയിൽ നിന്ന് ആരംഭിക്കുന്ന കർഷകപ്രതിഷേധ വാഹനജാഥ മലയോര മേഖലയ്ക്ക് പുതിയ ഒരനുഭവമാകുമെന്നും അദ്ദേഹം പറഞ്ഞു. ജാഥ ചെറുപുഴയിൽ രാവിലെ 9.30ന് ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടം ചെയ്യും. യുഡിഎഫ് ജില്ലാ ചെയർമാൻ പി.ടി.മാത്യു മുഖ്യപ്രഭാഷണം നടത്തും. വൈകുന്നേരം അഞ്ചിന് ഇരിട്ടിയിൽ നടക്കുന്ന സമാപന സമ്മേളനം സംസ്ഥാന കോൺഗ്രസ് അധ്യക്ഷൻ സണ്ണി ജോസഫ് എംഎൽഎ ഉദ്ഘാടനം ചെയ്യും. നിയോജക മണ്ഡലം പ്രസിഡന്‍റ് റോയി ഈറ്റയ്ക്കൽ അധ്യക്ഷത വഹിച്ചു. ജില്ലാപ്രസിഡന്‍റ് ജോസ് പൂമല മുഖ്യപ്രഭാഷണം നടത്തി. എം.ഒ. ചന്ദ്രശേഖരൻ, എ.ജെ. തോമസ്, എം.വി. ശിവദാസൻ, ജോണി മുണ്ടയ്ക്കൽ, സെബാസ്റ്റ്യൻ വിലങ്ങോലി, അലക്സാണ്ടർ കുഴിയാത്ത് തുടങ്ങിയവർ പ്രസംഗിച്ചു.

കേരളത്തിലെ ആരോഗ്യ മേഖല വെന്‍റിലേറ്ററിൽ: വി.ഡി. സതീശൻ

നടുവിൽ: കേരളത്തിലെ ആരോഗ്യ മേഖല ഇന്ന് വെന്‍റിലേറ്ററിലാണെന്ന് പ്രതിപക്ഷ നേതാവ് വി.ഡി.സതീശൻ. ആരോഗ്യ ചികിത്സാ രേഗത്ത് രാജ്യത്ത് ഏറ്റവും കൂടുതൽ ചെലവു വരുന്നത് കേരളത്തിലാണ്. സൗജന്യ ചികിത്സകൾ ലഭ്യമാക്കുന്നതിന് സർക്കാരിന്‍റെ ഭാഗത്തുനിന്നു യാതൊരു നടപടികളും ഉണ്ടാകുന്നില്ലെന്നും അദ്ദേഹം പറഞ്ഞു. നടുവിൽ പിഎച്ച്സിക്കുവേണ്ടി പുതുതായി നിർമിച്ച കെട്ടിടത്തിന്‍റെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു പ്രതിപക്ഷ നേതാവ്. ചെലവ് താങ്ങാൻ കഴിയാതായതോടെ സ്വകാര്യ ആശുപത്രികൾ സാധാരണക്കാർക്ക് അപ്രാപ്യമാവുകയാണ്. സാധാരണക്കാർക്ക് നല്ല ചികിത്സ ലഭ്യമാക്കാനുള്ള ഉത്തരവാദിത്വം സർക്കാരിനുണ്ട്. യുഡിഎഫ് ഭാരിക്കുന്പോൾ നല്ല രീതിയിൽ നടപ്പാക്കിയിരുന്ന കാരുണ്യ പദ്ധതികൾ ഇന്ന് താറുമാറായി. കേരളത്തെ ആരോഗ്യ രംഗത്ത് മികച്ചതാക്കാൻ കൂട്ടായ പ്രവർത്തനം വേണമെന്നും സതീശൻ പറഞ്ഞു. സജീവ് ജോസഫ് എംഎൽഎ അധ്യക്ഷത വഹിച്ചു. നടുവിൽ പഞ്ചായത്ത് പ്രസിഡന്‍റ് ബേബി ഓടം പള്ളിൽ, വൈസ് പ്രസിഡന്‍റ് സി.എച്ച്. സീനത്ത്, സെബാസ്റ്റ്യൻ വിലങ്ങോലിൽ, ലിസി ജോസഫ്, എം.വി. വഹീദ, കെ.പി.കേശവൻ, ബാബു മാത്യു, വി.പി.മുഹമ്മദ് കുഞ്ഞി. മെഡിക്കൽ ഓഫീസർ ഡോ. അനൂപ് എന്നിവർ പ്രസംഗിച്ചു. 2024 - 25 വാർഷിക പദ്ധതിയിൽ ഉൾപ്പെടുത്തി 70 ലക്ഷത്തോളം രൂപ ചെലവിൽ പണികഴിപ്പിച്ചതാണ് കെട്ടിടം. ഉദ്ഘാടന പരിപാടി കോൺഗ്രസ് മേളയാക്കി എന്നാരോപിച്ച് എൽഡിഎഫ് പരിപാടി ബഹിഷ്കരിച്ചിരുന്നു.

ഉമ്മൻചാണ്ടി ഓഡിറ്റോറിയം നാടിന് സമർപ്പിച്ചു

ശ്രീകണ്ഠപുരം: നഗരസഭയുടെ വാർഷിക പദ്ധതിയിൽ ഉൾപ്പെടുത്തി മുൻ മുഖ്യമന്ത്രി ഉമ്മൻചാണ്ടിയുടെ നാമധേയത്തിൽ നിർമാണം പൂർത്തീകരിച്ച നഗരസഭയുടെ ശീതികരിച്ച അത്യാധുനിക ഓഡിറ്റോറിയത്തിന്‍റെ ഉദ്ഘാടന പ്രതിപക്ഷ നേതാവ് വി.ഡി.സതീശൻ നിർവഹിച്ചു. 1.10 കോടി രൂപ വകയിരുത്തിയാണ് നിർമാണ പ്രവൃത്തി പൂർത്തീകരിച്ചത്. 2950 ചതുരശ്ര അടി വിസ്തീർണമുള്ള ഹാളിൽ 200 പേർക്ക് ഇരിക്കാം. സജീവ് ജോസഫ് എംഎൽഎ അധ്യക്ഷത വഹിച്ചു. നഗരസഭയുടെ അഞ്ചുവർഷത്തെ ഭരണനേട്ട ത്തിന്‍റെ വികസന സപ്ലിമെന്‍റിന്‍റെ പ്രകാശനം ജോയിന്‍റ് ഡയറക്ടർ ടി.ജെ. അരുൺ നിർവഹിച്ചു. നഗരസഭാധ്യക്ഷ ഡോ.കെ.വി. ഫിലോമിന, വൈസ് ചെയർമാൻ കെ. ശിവദാസൻ, നഗരസഭ സ്ഥിരം സമിതി അധ്യക്ഷൻമാരായ ജോസഫിന വർഗീസ്, പി.പി. ചന്ദ്രാഗദൻ, കെ.സി. ജോസഫ് കൊന്നക്കൽ, ത്രേസ്യാമ്മമാത്യു, സെക്രട്ടറി ടി.വി. നാരായണൻ, പി.എസ്. ബിന്ദു, വിവിധ രാഷ്ട്രീയ കക്ഷി നേതാക്കൾ എന്നിവർ പ്രസംഗിച്ചു.

ജില്ലാ കായികമേള നാളെ മുതൽ

തലശേരി: ജില്ലയിലെ 15 വിദ്യാഭ്യാസ ഉപജില്ലകളിൽ നിന്നുള്ള കായികതാരങ്ങൾ പങ്കെടുക്കുന്ന ജില്ലാതല കായികമേളയ്ക്ക് നാളെ തലശേരിയിൽ തുടക്കമാകും. വിവിധ ഉപജില്ലകളിൽ നിന്നായുള്ള2600 ലേറെ കായികതാരങ്ങൾ പങ്കെടുക്കും. തലശേരി നഗരസഭാ സ്റ്റേഡിയത്തിൽ രാവിലെ 7.30 ന് ജില്ലാ വിദ്യാഭ്യാസ ഉപഡയറക്ടർ സി.ഷൈനി പതാക ഉയർത്തുന്നതോടെ മത്സരങ്ങൾ ആരംഭിക്കും. കായിക മേളയുടെ ഔപചാരിക ഉദ്ഘആടനം രാവിലെ 9.30 ന് സ്പീക്കർ എ.എൻ ഷംസീർ നിർവഹിക്കും. കായിക മേളയുടെ ഭാഗമായി ഇന്ന് രാവിലെ 6.30 ന് കണ്ണൂർ പയ്യാമ്പലം ബീച്ച് റോഡിൽ ക്രോസ് കൺട്രി മത്സരം നടത്തും.ആൺകുട്ടികൾക്ക് ആറു കിലോമീറ്ററും പെൺകുട്ടികൾക്ക് നാലു കിലോമീറ്ററുമാണ് മത്സരം. മേള ശനിയാഴ്ച സമാപിക്കും. സമാപന സമ്മേളനം നഗരസഭാ വൈസ് ചെയർപേഴ്സൺ എം.വി.ജയരാജൻ ഉദ്ഘാടനം ചെയ്യും. വിജയി കൾക്കുള്ളട്രോഫി തലശേരി ബ്ലോക്ക് പഞ്ചായത്ത് പ്രസിഡന്‍റ് സി.പി. അനിത സമ്മാനിക്കും.ഹരിത ചട്ടങ്ങൾ പാലിച്ചാണ് കായിക മേള നടത്തുകയെന്ന് സംഘാടകർ പത്രസമ്മേളനത്തിൽ അറിയിച്ചു. പത്രസമ്മേളനത്തിൽ വിദ്യാഭ്യാസ ഉപഡയറക്ടർ ഡി. ഷൈനി, സ്പോട്സ് കോ-ഓർഡിനേറ്റർ പി.പി.മുഹമ്മദലി, പബ്ലിസിറ്റി കൺവീനർ പി.പി.സുധീർ, സ്വീകരണ കമ്മിറ്റി കൺവീനർ.എൻ.പി. ബിനീഷ്, കെ.പി.സായന്ത്, ഷൈനേഷ് ചന്ദ്ര എന്നിവർ പങ്കെടുത്തു.

അവകാശ സംരക്ഷണ യാത്രയ്ക്ക് ആവേശോജ്വല സ്വീകരണം

ചെമ്പേരി: ‘നീതി ഔദാര്യമല്ല, അവകാശമാണ് ' എന്ന മുദ്രാവാക്യമുയർത്തി കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ നടത്തുന്ന അവകാശ സംരക്ഷണ യാത്രയ്ക്ക് ചെമ്പേരിയിൽ ആവേശോജ്വല സ്വീകരണം നൽകി. ചെമ്പേരി, പൈസക്കരി, ചെമ്പന്തൊട്ടി ഫൊറോനകളിലെ മുഴുവൻ യൂണിറ്റുകളിൽ നിന്നുമെത്തിയ പ്രവർത്തകരുടെ നേതൃത്വത്തിലായിരുന്നു സ്വീകരണം. ചെമ്പേരി ലൂർദ് മാതാ ബസിലിക്ക റെക്ടർ റവ.ഡോ.ജോർജ് കാഞ്ഞിരക്കാട്ട് സമ്മേളനം ഉദ്ഘാടനം ചെയ്തു. കത്തോലിക്ക കോൺഗ്രസ് തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. ബിജു മണ്ഡപത്തിൽ, റവ.ഡോ. ഫിലിപ്പ് കവിയിൽ, ജോസുകുട്ടി ഒഴുകയിൽ, ഫാ.പോൾ വള്ളോപ്പിള്ളി, പൈസക്കരി ഫൊറോന വികാരി ഫാ.നോബിൾ ഓണംകുളം, ചെമ്പന്തൊട്ടി ഫൊറോന വികാരി ഫാ.ആന്‍റണി മഞ്ഞളാംകുന്നേൽ, ബെന്നി ചേരിയ്ക്കത്തടം, ജോസഫ് മാത്യു കൈതമറ്റം, ഷാജു വടക്കേൽ എന്നിവർ പ്രസംഗിച്ചു. തേർത്തല്ലി: മേരിഗിരി ആലക്കോട്, വായാട്ടുപറമ്പ് ,തളിപ്പറമ്പ് ഫൊറോനകളിലെ മുഴുവൻ യൂണിറ്റുകളിൽ നിന്നുമെത്തിയ പ്രവർത്തകരുടെ നേതൃത്വത്തിൽ തേർത്തല്ലിൽ സ്വീകരണം നൽകി. മലയോര ഹൈവേയിൽ സ്വീകരിച്ച ജാഥാംഗങ്ങളെ വാദ്യമേളങ്ങളുടെ അകമ്പടിയോടെയാണ് ടൗണിലെ സമ്മേളന വേദിയിലേക്കാനയിച്ചത്. കത്തോലിക്ക കോൺഗ്രസ് തലശേരി അതിരൂപത പ്രസിഡന്‍റ് ഫിലിപ്പ് വെളിയത്തിന്‍റെ അധ്യക്ഷതയിൽ മേരിഗിരി ഫൊറോന വികാരി ഫാ. ഏബ്രഹാം മഠത്തിമ്യാലിൽ ഉദ്ഘാടനം ചെയ്തു. ചിറ്റാരിക്കാൽ: സംഘടിത ശക്തിയായി നിന്നാൽ മാത്രമേ അവകാശങ്ങൾ നേടിയെടുക്കാൻ കഴിയൂവെന്നും അല്ലാത്തപക്ഷം നാം തമസ്കരിക്കപ്പെടുമെന്നും താമരശേരി ബിഷപ് മാർ റെമിജിയോസ് ഇഞ്ചനാനിയിൽ. കത്തോലിക്ക കോൺഗ്രസ് അവകാശ സംരക്ഷണയാത്രയ്ക്ക് ചിറ്റാരിക്കാലിൽ നൽകിയ സ്വീകരണം ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. അവകാശങ്ങൾ നേടിയെടുക്കാൻ എന്നും കത്തോലിക്ക കോൺഗ്രസ് സമരമുഖത്തുണ്ടാകും. പ്രതിസന്ധികളെ ആത്മധൈര്യത്തോടെ നേരിട്ട ഒരു തലമുറയാണ് നമുക്ക് മുൻപുണ്ടായിരുന്നത്. മലബാറിൽ വള്ളോപ്പള്ളി പിതാവിന്‍റെ ശക്തമായ നേതൃത്വമായിരുന്നു കുടിയേറ്റ ജനതയുടെ ശക്തി. കൂട്ടായ ആ പോരാട്ടങ്ങൾ വിജയം കണ്ടു. ആ പാത പിൻതുടർന്ന് സമുദായത്തിന്‍റെ അവകാശങ്ങൾ സംരക്ഷിക്കുവാൻ എപ്പോഴും ഒന്നായി നിന്ന് പ്രവർത്തിക്കണം. കത്തോലിക്ക കോൺഗ്രസ് തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ ആമുഖ പ്രഭാഷണം നടത്തി. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ യാത്രാവിശകലനം നടത്തി. തോമാപുരം സെന്‍റ് തോമസ് ഫൊറോന വികാരി റവ.ഡോ. മാണിമേൽവെട്ടം മുഖ്യപ്രഭാഷണം നടത്തി. ജാഥാ ക്യാപ്റ്റൻ പ്രഫ. രാജീവ് കൊച്ചുപറമ്പിൽ, ഗ്ലോബൽ ട്രഷറർ അഡ്വ. ടോണി ജോസഫ് പുഞ്ചക്കുന്നേൽ, ഫാ. മാത്യു വളവനാൽ, ജിമ്മി ആയിത്തമറ്റം, സംഘാടക സമിതി ജനറൽ കൺവീനർ സാജു പടിഞ്ഞാറേട്ട്, അതിരൂപത സെക്രട്ടറി സെബാസ്റ്റ്യൻ ജാതികുളത്തിൽ എന്നിവർ പ്രസംഗിച്ചു. ചെറുപുഴ ഫൊറോന വികാരി ഫാ. ഫിലിപ്പ് ഇരുപ്പക്കാട്ട്, മാലോം ഫൊറോന വികാരി ഫാ. ജോസ് തൈക്കുന്നുംപുതത്, വെള്ളരിക്കുണ്ട് ഫൊറോന വികാരി റവ.ഡോ. ജോൺസൺ അന്ത്യാംകുളം, ഫാ. തോമസ് പൂവൻപുഴ, സാജു പുത്തൻപുര, ബെന്നി തുളുമ്പുംമാക്കൽ, ജിജി കുന്നപ്പള്ളി എന്നിവർ പങ്കെടുത്തു. തോമാപുരം, വെള്ളരിക്കുണ്ട്, മാലോം, ചെറുപുഴ ഫൊറോനകളിൽ നിന്ന് വൈദികർ, കന്യാസ്ത്രീകൾ എന്നിവർ ഉൾപ്പെടെ ആയിരക്കണക്കിനാളുകൾ സ്വീകരണ യോഗത്തിൽ പങ്കെടുത്തു.

കാത്തലിക് മെന്‍റൽ ഹെൽത്ത് മിനിസ്ട്രിക്ക് തുടക്കമായി

ചെമ്പേരി: കാത്തലിക് ബിഷപ്സ് കോൺഫറൻസ് ഓഫ് ഇന്ത്യയുടെ ആഭിമുഖ്യത്തിലുള്ള കാത്തലിക് മെന്‍റൽ ഹെൽത്ത് മിനിസ്ട്രിയുടെ തലശേരി അതിരൂപതാതല ഉദ്ഘാടനം ചെമ്പേരി വിമൽ ജ്യോതി എൻജിനിയറിംഗ് കോളജിൽ ആർച്ച്ബിഷപ് മാർ ജോസഫ് പാംപ്ലാനി നിർവഹിച്ചു. മാനസികാരോഗ്യ മേഖലയിലുള്ള പ്രവർത്തനങ്ങൾ ഈ കാലഘട്ടത്തിന്‍റെ ആവശ്യകതയാണെന്ന് ആർച്ച്ബിഷപ് പറഞ്ഞു. പ്രോട്ടോസിഞ്ചെല്ലൂസ് മോൺ. ആന്‍റണി മുതുകുന്നേൽ അധ്യക്ഷത വഹിച്ചു. നാഷണൽ മെന്‍റൽ ഹെൽത്ത് മിനിസ്ട്രി വൈസ് പ്രസിഡന്‍റ് എഡ്വിൻ വാക്കർ, മെന്‍റൽ ഹെൽത്ത് മിനിസ്ട്രി തലശേരി അതിരൂപത ഡയറക്ടർ ഫാ. സുബിൻ റാത്തപ്പിള്ളിൽ, അതിരൂപത കൗൺസലിംഗ് സെന്‍റർ ഡയറക്ടർ റവ. ഡോ. സെബാസ്റ്റ്യൻ ചെരിപുറത്ത്, മെന്‍റൽ ഹെൽത്ത് മിനിസ്ട്രി കോ-ഓർഡിനേറ്റർ ജോണി തോമസ് വടക്കേക്കര എന്നിവർ പ്രസംഗിച്ചു. തലശേരി അതിരൂപതയിലെ സ്കൂൾ അധ്യാപകർ, മതബോധന അധ്യാപകർ, ഇടവകയിലെ ഹെൽപ്പ് ഡസ്ക് അംഗങ്ങൾ, കൗൺസലിംഗ് രംഗത്ത് പ്രവർത്തിക്കുന്നവർ എന്നിവർക്കായി "മാനസികാരോഗ്യം - ഇന്നിന്‍റെ പ്രസക്തി" എന്ന വിഷയത്തെക്കുറിച്ച് പ്രശസ്ത സൈക്കോളജിസ്റ്റായ സിസ്റ്റർ ഡോ. ജോവാൻ ചുങ്കപ്പുര ക്ലാസ് നയിച്ചു. ചടങ്ങിൽ കൗൺസലിംഗ് രംഗത്ത് പ്രവർത്തിച്ച് വ്യക്തിമുദ്ര പതിപ്പിച്ച സിസ്റ്റർ ഡോ. ട്രീസ പാലക്കൽ, ബധിര മൂക വിഭാഗത്തിൽപ്പെട്ടവർക്കായി ആദംമിനിസ്ട്രി എന്ന പേരിൽ സേവനം ചെയ്തു കൊണ്ടിരിക്കുന്ന ഫാ. പ്രിയേഷ് കളരിമുറി എന്നിവരെ മാർ ജോസഫ് പാംപ്ലാനി മെമന്‍റോ നല്കി ആദരിച്ചു. കാത്തലിക് മെന്‍റൽ ഹെൽത്ത് രൂപത ടീം അംഗങ്ങളായ സിസ്റ്റർ ജാൻസി പോൾ എസ്എച്ച്, സിസ്റ്റർ ഡിവിന എംഎസ്എംഐ, സിസ്റ്റർ ലിസ്ബിൻ എസ്എബിഎസ്, വത്സമ്മ ജോസ്, സോണിയ ഇമ്മാനുവേൽ എന്നിവർ നേതൃത്വം നല്കി.

മലയോരത്തിന് ആവേശമായി അവകാശ സംരക്ഷണയാത്ര

പാണത്തൂര്‍: നീതി ഔദാര്യമല്ല അവകാശമാണ് എന്ന മുദ്രാവാക്യമുയര്‍ത്തി കത്തോലിക്കാ കോൺഗ്രസ് നടത്തുന്ന അവകാശസംരക്ഷണയാത്രയ്ക്ക് കാസര്‍ഗോഡിന്‍റെ മലയോരമണ്ണില്‍ പ്രൗഢോജ്വലതുടക്കം. കത്തോലിക്ക കോണ്‍ഗ്രസിന്‍റെ കരുത്ത് വിളിച്ചോതിയ സംസ്ഥാനതല ഉദ്ഘാടനപരിപാടി കര്‍ണാടകയുമായി അതിര്‍ത്തി പങ്കിടുന്ന കുടിയേറ്റഗ്രാമമായ പാണത്തൂരിനെ ജനസാഗരമാക്കി. പ്രവൃത്തിദിനം ആയിരുന്നിട്ടുകൂടി പനത്തടി, കാസര്‍ഗോഡ്, കാഞ്ഞങ്ങാട് ഫൊറോനകളില്‍ നിന്നും അയ്യായിരത്തോളം വിശ്വാസികളാണ് ഇവിടേക്ക് ഒഴുകിയെത്തിയത്. തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി, താമരശേരി ബിഷപ് മാര്‍ റെമിജിയോസ് ഇഞ്ചനാനിയില്‍ എന്നിവരുടെ നേതൃത്വത്തില്‍ പാണത്തൂര്‍ സെന്‍റ് മേരീസ് പള്ളിമൈതാനത്തുനിന്നും സമ്മേളനം നടക്കുന്ന പാണത്തൂര്‍ ടൗണിലേക്ക് നടത്തിയ റാലിയില്‍ വൈദികരും കന്യാസ്ത്രീകളും വിശ്വാസികളും അണിനിരന്നു. മഞ്ഞയും വെള്ളയും ഇടകലര്‍ന്ന ഇരുവര്‍ണക്കൊടികള്‍ കൈയിലേന്തി, അതേ നിറത്തിലുള്ള തൊപ്പികളും കുടകളും റാലിയെ മനോഹരമാക്കി. വന്യമൃഗ ആക്രമണവും അധികാരികളുടെ അവഗണനയും ദുരിരത്തിലാക്കിയ കര്‍ഷകന്‍റെ ജീവിതം പ്രമേയമാക്കിയ കള്ളാര്‍ ഉണ്ണിമിശിഹ പള്ളിയുടെ ടാബ്ലോ ഏറെ ശ്രദ്ധേയമായിരുന്നു. സമ്മേളനനഗരിയില്‍ ജാഥാ ക്യാപ്റ്റനായ കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ.രാജീവ് കൊച്ചുപറമ്പില്‍ പതാക ഉയര്‍ത്തി. കത്തോലിക്ക കോണ്‍ഗ്രസ് വെറുമൊരു കടലാസ് സംഘടനയല്ലെന്ന് തെളിയിക്കുന്നതാണ് ഈ പരിപാടിയെന്നും പൊതുസമൂഹത്തിന്‍റെ നന്മയ്ക്കുവേണ്ടി പ്രവര്‍ത്തിക്കുന്ന ഈ സംഘടനയെ അവഗണിച്ചുകൊണ്ട് മുന്നോട്ടുപോകാന്‍ ഒരു സര്‍ക്കാരിനും കഴിയില്ലെന്നും അദ്ദേഹം പറഞ്ഞു. സമുദായം നേരിടുന്ന പ്രതിസന്ധികള്‍ക്ക് ഉത്തരം ലഭിച്ചേ മതിയാകൂ: മാര്‍ റെമിജിയോസ് ഇഞ്ചനാനിയില്‍ കാര്‍ഷികമേഖലയിലും വിദ്യാഭ്യാസമേഖലയിലും ഉള്‍പ്പെടെ നമ്മുടെ സമുദായം നേരിടുന്ന പ്രതിസന്ധികള്‍ക്ക് ഉത്തരം ലഭിച്ചേ മതിയാകൂവെന്ന് മാര്‍ റെമിജിയോസ് ഇഞ്ചനാനിയില്‍. മുനമ്പം വിഷയത്തില്‍ കണ്ണ് തുറക്കാതിരുന്ന സര്‍ക്കാര്‍ ഇനിയെങ്കിലും മുനമ്പം നിവാസികളുടെ റവന്യൂ അവകാശം പുനഃസ്ഥാപിക്കണം. എറണാകുളം പള്ളുരുത്തിയിലെ സെന്‍റ് റീത്ത സ്‌കൂള്‍ രണ്ടുദിവസമായി അടച്ചിട്ടിരിക്കുകയാണ്. ഇതിന്‍റെ പിന്നിലെന്തെന്ന് നമുക്കറിയാം. തീവ്രവാദനിലപാടുകള്‍ നമ്മുടെ സ്ഥാപനങ്ങളുടെ സ്വസ്ഥത തകര്‍ക്കുന്ന രീതി അംഗീകരിക്കാനാകില്ല. ഭിന്നശേഷിക്കാരായ ഉദ്യോഗാര്‍ഥികള്‍ക്ക് എയ്ഡഡ് സ്‌കൂളുകളില്‍ നാലുശതമാനം സംവരണം ഏര്‍പ്പെടുത്തുന്നത് സ്വാഗതാര്‍ഹമാണ്. എന്നാല്‍ ഭിന്നശേഷിക്കാരായ ഉദ്യോഗാര്‍ഥികളുടെ ലിസ്റ്റ് സമയത്തു തരേണ്ട ഉത്തരവാദിത്തം സര്‍ക്കാരിനാണുള്ളത്. അവര്‍ അതു ചെയ്തില്ലെങ്കില്‍ നിയമനം നടത്താനുള്ള അനുമതി മാനേജ്‌മെന്‍റിന് ലഭിക്കണം.-അദ്ദേഹം പറഞ്ഞു.

അവകാശസംരക്ഷണത്തിന് ജയില്‍വാസം അനുഭവിക്കാനും തയാര്‍: മാര്‍ പാംപ്ലാനി

സ്വന്തം ലേഖകൻ പാണത്തൂര്‍ (കാസര്‍ഗോഡ്): അനാവശ്യമായി സമരം ചെയ്യുന്നവരല്ല കത്തോലിക്ക കോണ്‍ഗ്രസുകാരെന്നും നീതി നിഷേധിക്കപ്പെട്ടാല്‍ അതു നേടിയെടുക്കാതെ സംഘടന പിന്നോട്ടുപോകില്ലെന്നും കര്‍ഷകരുടെയും സാധാരണക്കാരുടെയും അവകാശസംരക്ഷണത്തിനായി വേണ്ടി വന്നാല്‍ ജയില്‍വാസത്തിന് തയാറാണെന്നും തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി. കത്തോലിക്ക കോണ്‍ഗ്രസ് അവകാശസംരക്ഷണയാത്രയുടെ സംസ്ഥാനതല ഉദ്ഘാടനം പാണത്തൂരില്‍ നിര്‍വഹിച്ചു പ്രസംഗിക്കുകയായിരുന്നു അദ്ദേഹം. ഈ സമരം ആരംഭിച്ച ദിവസം തന്നെ നമ്മള്‍ ഉന്നയിച്ച ആവശ്യങ്ങളില്‍ ഒന്ന് സര്‍ക്കാര്‍ അംഗീകരിച്ചു. ഏഴുവര്‍ഷമായി ശമ്പളം നിഷേധിക്കപ്പെട്ട എയ്ഡഡ് സ്‌കൂള്‍ അധ്യാപകരുടെ നിയമനം അംഗീകരിക്കാനുള്ള തീരുമാനം വന്നു. കൂടാതെ അക്രമകാരികളായ വന്യജീവികളെ വെടിവെച്ചുകൊല്ലാനുള്ള ബില്ല് അവതരിപ്പിച്ചു. ഈ രണ്ടു കാര്യങ്ങളിലും മുഖ്യമന്ത്രി കാണിച്ച ആര്‍ജവത്തെ അഭിനന്ദിക്കുന്നു. കത്തോലിക്ക കോണ്‍ഗ്രസ് സജീവമായി ഇടപെട്ട വിഷയങ്ങളായിരുന്നു ഇവ. എന്നാല്‍ നിയമങ്ങള്‍ പുസ്തകത്തില്‍ എഴുതിവയ്ക്കാന്‍ മാത്രമുള്ളതല്ല, നടപ്പിലാക്കാനുള്ളതാണെന്നും ഭരണാധികാരികള്‍ മനസിലാക്കണം. വാഗ്ദാനങ്ങളില്‍ മയങ്ങിപ്പോകുന്നവരല്ല തങ്ങളെന്ന് സര്‍ക്കാരിനെയും രാഷ്‌‌ട്രീയപാര്‍ട്ടികളെയും ഓര്‍മിപ്പിക്കുകയാണെന്നും അദ്ദേഹം കൂട്ടിച്ചേര്‍ത്തു. കേരളത്തിലെ പല നേതാക്കളും ഈ ദിവസങ്ങളില്‍ കത്തോലിക്ക കോണ്‍ഗ്രസിനെയും ദീപികയെയും സഭാധ്യക്ഷരെയും ആക്ഷേപിച്ചുകൊണ്ട് രംഗത്തുവന്നിരുന്നു. വിമോചനസമരം മോഡലിൽ ഞങ്ങളെ ഭയപ്പെടുത്താന്‍ നോക്കേണ്ടെന്ന് ഒരു മന്ത്രി പറഞ്ഞു. വിമോചനസമരം ഒരു കാലഘട്ടത്തിന്‍റെ ആവശ്യമായിരുന്നു. 60 വര്‍ഷം മുമ്പ് നടന്ന വിമോചനസമരത്തെ നിങ്ങള്‍ ഭയപ്പെടുന്നെങ്കിലും അതിനുകാരണം നിങ്ങളുടെ പ്രവര്‍ത്തനങ്ങളിലെ വൈകല്യവും നീതിക്കുവേണ്ടിയുള്ള ഈ സമുദായത്തിന്‍റെ പ്രവര്‍ത്തനങ്ങളിലെ ആത്മാര്‍ഥതയും തമ്മിലുള്ള വൈരുധ്യമാണ്. ജോലി ചെയ്യുന്നവര്‍ക്ക് ശമ്പളം കൊടുക്കണമെന്ന് ഇടതുസര്‍ക്കാരിനെ കത്തോലിക്കാ സഭ ഓര്‍മിപ്പിക്കേണ്ടിവരുന്നത് നിങ്ങളുടെ പ്രവര്‍ത്തനങ്ങളില്‍ വന്ന മൂല്യച്യുതിയെയാണ് സൂചിപ്പിക്കുന്നതെന്നും എയ്ഡഡ് സ്‌കൂള്‍ അധ്യാപകനിയമനം അംഗീകരിക്കാന്‍ വൈകിപ്പിച്ചത് ചൂണ്ടിക്കാട്ടി അദ്ദേഹം പറഞ്ഞു. താമരശേരി ബിഷപ് മാര്‍ റെമിജിയോസ് ഇഞ്ചനാനിയില്‍ മുഖ്യപ്രഭാഷണം നടത്തി. കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറന്പിൽ അധ്യക്ഷത വഹിച്ചു. കത്തോലിക്ക കോണ്‍ഗ്രസ് ഗ്ലോബല്‍ ഡയറക്ടര്‍ റവ. ഡോ.ഫിലിപ്പ് കവിയില്‍ ആമുഖഭാഷണം നടത്തി. കോട്ടയം അതി രൂപത വികാരി ജനറാള്‍ മോണ്‍. തോമസ് ആനിമൂട്ടില്‍, തലശേരി അതിരൂപത വികാരി ജനറാള്‍ മോണ്‍. മാത്യു ഇളംതുരുത്തിപ്പടവില്‍, ഗ്ലോബല്‍ ജനറല്‍ സെക്രട്ടറി ഡോ.ജോസുകുട്ടി ഒഴുകയില്‍, അഡ്വ. ബിജു പറയനിലം, പ്രഫ.കെ.എം. ഫ്രാന്‍സിസ്, ട്രീസ ലിസ് സെബാസ്റ്റ്യന്‍, അഡ്വ. ടോണി ജോസഫ് പുഞ്ചക്കുന്നേല്‍, ജിമ്മി ആയിത്തമറ്റം, സുരേഷ് ജോര്‍ജ് കാഞ്ഞിരത്തിങ്കല്‍, പീയുസ് പറേടം, ഫാ.നോബിള്‍ പന്തലാടിക്കല്‍ എന്നിവര്‍ പ്രസംഗിച്ചു. തലശേരി അതിരൂപത കത്തോലിക്ക കോണ്‍ഗ്രസ് പ്രസിഡന്‍റ് ഫിലിപ്പ് വെളിയത്ത് സ്വാഗതവും പനത്തടി ഫൊറോന പ്രസിഡന്‍റ് ജോണി തോലമ്പുഴ നന്ദിയും പറഞ്ഞു.

സംരംഭകത്വവളർച്ചയും ലക്ഷ്യം: മന്ത്രി ചിഞ്ചു റാണി

കണ്ണൂർ: മുട്ട ഉത്പാദനത്തിൽ സ്വയം പര്യാപ്തത നേടുന്നതിനൊപ്പം സംരഭകത്വം വളർത്തുന്നതിനുമുള്ള വിവിധ പദ്ധതികളാണ് മൃഗസംരക്ഷണ വകുപ്പ് ആവിഷ്കരിച്ചു നടപ്പാക്കുന്നതെന്ന് മന്ത്രി ജെ. ചിഞ്ചു റാണി. ലോക മുട്ടദിനത്തോടനുബന്ധിച്ച് ജില്ലാ മൃഗസംരക്ഷണ പരിശീലന കേന്ദ്രത്തിൽ നടന്ന സംരംഭകത്വ സംഗമവും സംരംഭകരെ ആദരിക്കലും ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. ഉത്പാദന ശേഷി കൂടിയ ബി വി-380 മുട്ടക്കോഴി കുഞ്ഞുങ്ങളെ മൃഗസംരക്ഷണ വകുപ്പിന്‍റെ ഫാമിൽ ഉത്പാദിപ്പിച്ച് കർഷകർക്ക് നൽകുന്നുണ്ട്. കൂടാതെ സർക്കാർ ഫാമുകൾ, വിവിധ ഏജൻസികൾ എന്നിവിടങ്ങളിൽ ഉത്പാദിപ്പിക്കുന്ന കോഴിക്കുഞ്ഞുങ്ങളെ തദ്ദേശ സ്ഥാപനങ്ങൾ വഴി വിവിധ സ്‌കീമുകളിൽ ഉൾപ്പെടുത്തിയും വിതരണം ചെയ്തു വരികയാണ്. ഇത്തരം പ്രവർത്തനങ്ങൾ മുട്ട ഉത്പാജനത്തിൽ ഗണ്യമായ വർധന ഉണ്ടാക്കിയിട്ടുണ്ട്. മുട്ടയിൽ സംരംഭകത്വം വളർത്താൻ വിവിധ സർക്കാർ ഏജൻസികൾ വഴി കർഷകർക്ക് സബ്‌സിഡി നൽകുന്നുണ്ട്. മുട്ടക്കോഴി വളർത്തലിനൊപ്പം ഇറച്ചിക്കോഴി വളർത്തലിലും പുതിയ സംരംഭകരെ വളർത്താനുള്ള ശ്രമവും നടക്കുന്നുണ്ട്. ലൈസൻസ് വ്യവസ്ഥകൾ പരിഷ്‌ക്കരിച്ചു. മൃഗസംരക്ഷണ വകുപ്പിന്‍റെ കേരള ചിക്കൻ പോലെയുള്ള സംരംഭങ്ങളും ഇടപെടലുകളും മുട്ട, ഇറച്ചി ഉത്പാദനത്തിൽ സ്വയം പര്യാപ്തത എന്നതിനൊപ്പം സാമ്പത്തിക സുരക്ഷയും കൂടി സാധ്യമാക്കുന്നതാണെന്നും മന്ത്രി പറഞ്ഞു. മുട്ടക്കോഴി വളർത്തൽ മേഖലയിലെ മികച്ച സംരംഭകരെ മന്ത്രി ആദരിച്ചു. ജില്ലാ പഞ്ചായത്ത് പ്രസിഡന്‍റ് കെ. കെ. രത്നകുമാരി അധ്യക്ഷത വഹിച്ചു. പ്രിൻസിപ്പൽ ട്രെയിനിംഗ് ഓഫീസർ ഡോ. ഒ. എം. അനിത വിഷയം അവതരിപ്പിച്ചു. തുടർന്ന് മുട്ടക്കോഴി സംരംഭകർ, നഴ്സറി ഉടമകൾ എന്നിവർക്കായി വിവിധ സെമിനാറുകൾ നടന്നു. മുട്ടക്കോഴി വളർത്തലിന് തെരഞ്ഞെടുക്കേണ്ട ഇനങ്ങളെക്കുറിച്ച് ഡോ.പി. ഗിരീഷ് കുമാർ ക്ലാസെടുത്തു. വിവിധ വിഷയങ്ങളിൽ കുടുംബശ്രീ ജില്ലാ മിഷൻ കോ-ഓർഡിനേറ്റർ എം.വി. ജയൻ,അസിസ്റ്റന്‍റ് ഡിസ്ട്രിക്ട് ഇൻഡസ്ട്രീസ് ഓഫീസർ എൻ. വിനോദ് കുമാർ, എം.വി. പ്രദീപ് കുമാർ, മലിനീകരണ നിയന്ത്രണ ബോർഡ് അസി. എൻജിനിയർ പി. അശ്വിനി, എം. മനോജ്കുമാർ, കേരള ഗ്രാമീൺബാങ്ക് മാനേജർ അനൂപ് മോഹൻ എന്നിവർ ക്ലാസെടുത്തു. പരിശീലന കേന്ദ്രത്തിന് ഉപകരണങ്ങൾ നിർമിച്ച് നൽകിയ സിഡ്കോയ്ക്കുള്ള ചെക്ക് മാർക്കറ്റിംഗ് മാനേജർ കെ.കൃഷ്ണദാസ് ഏറ്റുവാങ്ങി. മന്ത്രി രാമചന്ദ്രൻ കടന്നപ്പള്ളിയുടെ എംഎൽഎയുടെ പ്രാദേശിക വികസന ഫണ്ടിൽനിന്ന് 20 ലക്ഷം രൂപയാണ് ഇതിനായി അനുവദിച്ചത്. കൗൺസിലർ പി. കെ. അൻവർ, ജില്ലാ മൃഗസംരക്ഷണ ഓഫീസർ ഡോ. എസ്. അനിൽകുമാർ, മൃഗസംരക്ഷണ വകുപ്പ് ഡെപ്യൂട്ടി ഡയറക്ടർ ഡോ. എം. വിനോദ്കുമാർ, ചീഫ് വെറ്ററിനറി ഓഫീസർ ഡോ. സി.പി. ധനഞ്ജയൻ, ഡോ. കെ.വി. സന്തോഷ് കുമാർ, ഡോ. പി.കെ. പത്മരാജ്, ഡോ. കിരൺ വിശ്വനാഥ്, കേളോത്ത് നാണു, കെ. സുധി എന്നിവർ പ്രസംഗിച്ചു.

കുട്ടനാട് മോഡൽ സഫാരി ക്രൂയിസ് സർവീസ് ആരംഭിക്കും: മന്ത്രി ഗണേഷ്കുമാർ

പറശിനിക്കടവ്: ഉത്തരമലബാറിലും കുട്ടനാട് മോഡൽ സഫാരി ക്രൂയിസ് സർവീസ് ആരംഭിക്കുമെന്ന് ഗതാഗതമന്ത്രി കെ.ബി. ഗണേഷ് കുമാർ. കണ്ണൂർ, കാസർഗോഡ് ജില്ലകളുടെ അതിർത്തി പങ്കിടുന്ന കവ്വായി കായലാണ് പദ്ധതിയുടെ പരിഗണനയിലുള്ളതെന്നും മന്ത്രി പറഞ്ഞു. പറശിനിക്കടവ് വികസനത്തിന്‍റെ ഭാഗമായി നടപ്പാക്കുന്ന വിവിധ പദ്ധതികളുടെയും രണ്ടു ബോട്ടുകളുടെ സർവീസ് ഉദ്ഘാടനവും നിർവഹിച്ചു പ്രസംഗിക്കുകയായിരുന്നു അദ്ദേഹം. പറശിനിക്കടവിൽ മാർച്ചോടെ 120 പേർക്ക് സഞ്ചരിക്കാവുന്ന അത്യാധുനിക ടൂറിസ്റ്റ് എസി ബോട്ട് എത്തിക്കുമെന്നും മന്ത്രി അറിയിച്ചു. കെഎസ്ആർടിസിയിൽ വൻ വികസനമാണ് ഇപ്പോൾ നടന്നുകൊണ്ടിരിക്കുന്നത്. സംസ്ഥാനത്തെ പ്രധാന കെഎസ്ആർടിസി ബസ് സ്റ്റേഷനുകളെ വിമാനത്താവളങ്ങളുടെ നിലവാരത്തിലേക്ക് ഉയർത്തുമെന്നും മന്ത്രി കെ.ബി. ഗണേഷ്കുമാർ പറഞ്ഞു. സംസ്ഥാന സര്‍ക്കാരിന്‍റെ വിവിധ ഫണ്ടുകളില്‍ നിന്നായി 3.5 കോടി രൂപ ചെലവഴിച്ച് വിപുലീകരിക്കുന്ന ബോട്ട് ടെര്‍മിനല്‍, ഒരുകോടി രൂപയുടെ പറശിനിക്കടവ് നദീ സംരക്ഷണ പദ്ധതി, 2.84 കോടി രൂപയുടെ പറശിനിക്കടവ് സൗന്ദര്യവത്കരണം എന്നിവയുടെ പ്രവൃത്തി ഉദ്ഘാടനവും പറശനിക്കടവിൽ നിന്ന് സർവീസ് ആരംഭിക്കുന്ന ബോട്ടുകളുടെ സർവീസുകളുമാണ് മന്ത്രി നിർവഹിച്ചത്.100 പേര്‍ക്ക് യാത്ര ചെയ്യാവുന്നതും അന്താരാഷ്‌‌ട്ര സുരക്ഷാ മാനദണ്ഡങ്ങള്‍ പാലിച്ച് നിര്‍മിച്ചിട്ടുള്ളതുമായ കാറ്റാമറൈന്‍ ബോട്ടും 77 യാത്രക്കാര്‍ക്ക് സഞ്ചരിക്കാവുന്ന എസ് 25 അപ്പര്‍ ഡക്ക് ബോട്ടുമാണ് ഉദ്ഘാടനം ചെയ്തത്. പറശനിക്കടവിലേക്ക് രാത്രി സമയങ്ങളില്‍ സ്വകാര്യ ബസുകള്‍ സര്‍വീസ് നടത്താന്‍ തയാറാകുന്നില്ലെങ്കില്‍ കര്‍ശന നടപടി സ്വീകരിക്കാന്‍ മന്ത്രി വകുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കി. വേദിയില്‍ നിന്ന് ലഭിച്ച പരാതികളിലാണ് മന്ത്രി നടപടിയെടുത്തത്. എം.വി. ഗോവിന്ദൻ എംഎൽഎ ഓൺലൈനായി അധ്യക്ഷത വഹിച്ചു. പറശിനിക്കടവ് ബോട്ട് ജെട്ടിയുടെ മറുകരയിൽ ജെട്ടിയും സ്റ്റേഷൻ ഓഫീസും സ്ഥാപിക്കാൻ ശ്രമങ്ങൾ നടക്കുകയാണെന്നും സ്ഥലം ലഭിച്ചിട്ടുണ്ടെന്നും എം.വി. ഗോവിന്ദൻ പറഞ്ഞു. ഫണ്ട് ലഭ്യമായാലുടൻ പദ്ധതി നിർമാണം ആരംഭിക്കുമെന്നും അദ്ദേഹം പറഞ്ഞു. എംഎല്‍എമാരായ കെ.വി. സുമേഷ്, എം. വിജിന്‍, ആന്തൂര്‍ മുനിസിപ്പൽ ചെയർപേഴ്സൺ പി. മുകുന്ദന്‍ എന്നിവർ പങ്കെടുത്തു.

ആറളം വന്യജീവി സങ്കേതത്തിൽ ഏഴ് പുതിയ ഇനം തുമ്പികൾ

ഇരിട്ടി: ആറളം വന്യജീവി സങ്കേതത്തിൽ നടന്നുവന്ന തുമ്പി ഗവേഷണം "ഡ്രാഗൺഫ്ലൈ മീറ്റ് 2025" സമാപിച്ചു. മൂന്നു ദിവസമായി നടന്നുവന്ന മീറ്റിൽ 60 പേർ പങ്കെടുത്തു. ചാവച്ചി, പരിപ്പുതോട്, നരിക്കടവ്, കൊട്ടിയൂർ, മീൻമുട്ടി, സൂര്യമുടി, അമ്പലപ്പാറ എന്നിവിടങ്ങളിൽ നടന്ന ഫീൽഡ് സർവേയിൽ 58 സ്പീഷീസുകൾ കണ്ടെത്തി . ഇതിൽ ഏഴ് സ്പീഷീസുകളായ കുറുനഖവാലൻ, ചോല കടുവ, പൊക്കൻ കടുവ , നീലക്കറുപ്പൻ വ്യാളി, മഞ്ഞക്കറുപ്പൻ മുളവാലൻ, വയനാടൻ അരുവിയൻ, നാട്ടു പെരുംകണ്ണൻ എന്നിവ ആറളം സങ്കേതത്തിൽ ആദ്യമായി കണ്ടെത്തിയവയാണ്.ഇതോടെ കേരളത്തിലെ ഏറ്റവും സമ്പന്നമായ തുമ്പി ആവാസവ്യവസ്ഥകളിലൊന്നായി മാറുന്ന ആറളത്ത് കണ്ടെത്തിയ തുമ്പികളുടെ എണ്ണം 103 ആയി. വളയംചാലിൽ നടന്ന സമാപന പരിപാടി വൈൽഡ് ലൈഫ് വാർഡൻ വി. രതീശൻ ഉദ്ഘാടനം ചെയ്തു . ഡോ. എം. ജാഫർ പാലോട്ട്, കലേഷ് സദാശിവൻ, ഡോ. ഏബ്രഹാം സാമുവൽ, വി.സി. ബാലകൃഷ്ണൻ, വിനയൻ പി. നായർ, അസിസ്റ്റന്‍റ് വാർഡൻ . രമ്യ രാഘവൻ എന്നിവർ പ്രസംഗിച്ചു.

ഇരിട്ടി നഗരസഭാ ഓഫീസിലേക്ക് വ്യാപാരി മാർച്ച് നാളെ

ഇരിട്ടി: അനിയന്ത്രിതമായ തെരുവ് കച്ചവടം നിയന്ത്രിക്കണമെന്നാവശ്യപ്പെട്ട്വ്യാപാരി വ്യവസായി സമിതി ഇരിട്ടി ഏരിയാ കമ്മിറ്റിയുടെ നേതൃത്വത്തിൽ ഇരിട്ടി നഗരസഭാ ഓഫിസിലേക്ക് നാളെ മാർച്ചും ധർണയും നടത്തും. രാവിലെ 10 ന് സംസ്ഥാന ജോയിന്‍റെ സെക്രട്ടറി പി.എം. സുഗുണൻ ഉദ്ഘാടനം ചെയ്യുമെന്ന് ഭാരവാഹികൾ അറിയിച്ചു. അംഗീകൃത തെരുവ് കച്ചവടത്തിന് സംഘടന എതിരല്ല. നഗരത്തിൽ വലിയൊരു വിഭാഗം ലൈസൻസുളളവരല്ല തെരുവിൽ കച്ചവടം നടത്തുന്നത്. കണ്ടെയ്നറിൽ ഉൾപ്പടെ വാഹനങ്ങളിൽ സാധനങ്ങൾ കൊണ്ടുവന്ന് യാതൊരു മാനദണ്ഡവുമില്ലാതെയാണ് ഇപ്പോൾ വില്പന നടത്തുന്നത്. ഇത് യാഥാർഥ കച്ചവടക്കാർക്ക് ഏറെ ദുരിതമാണുണ്ടാക്കുന്നത്. ലൈസൻസ് സംബന്ധമായ ആവശ്യങ്ങൾക്കായി എത്തുന്ന വ്യാപാരികളെ നഗരസഭയിലെ ഉദ്യോഗസ്ഥർ ബുദ്ധിമുട്ടിക്കുന്നതായും ഭാരവാഹികൾ കുറ്റപ്പെടുത്തി. പത്രസമ്മേളനത്തിൽ പി. പ്രഭാകരൻ, ഒ. വിജേഷ്, എം. അസൂട്ടി, യു.എ. വിശ്വനാഥൻ, എം.അനൂപ്, ഹരീഷ് കുറ്റ്യാടൻ, പി. ജനാർദനൻ, പി. രഞ്ജിത്ത്, കെ.ടി. ടോമി എന്നിവർ പങ്കെടുത്തു.

കണ്ണൂരിലെ ഹൈടെക് ബസ് ഷെൽട്ടറിന്‍റെ ഗ്ലാസ് തകർന്നു

കണ്ണൂർ: കാൾടെക്സിൽ കഴിഞ്ഞ വെള്ളിയാഴ്ച്ച വൈകുന്നേരം കോർപറേഷൻ മേയർ ഉദ്ഘാടനം ചെയ്ത എസി ഹൈടെക് ബസ് സ്റ്റോപ്പിന്‍റെ മുൻവശത്തെ ഗ്ലാസ് തകർന്നു. ഇന്നലെ രാവിലെയാണ് ഈ കാര്യം ശ്രദ്ധയിൽപ്പെടുന്നത്. ഇതോടെ പൂർണമായി ശീതികരിച്ച ബസ് ഷെൽട്ടറിന്‍റെ പ്രവർത്തനവും അവതാളത്തിലായി. ആരെങ്കിലും കല്ലെടുത്ത് എറിഞ്ഞു തകർത്തതാണോയെന്ന സംശയത്തിലാണ് പോലീസ്. കണ്ണൂർ ടൗൺ പോലിസ് സിസിടിവി കാമറ കേന്ദ്രീകരിച്ചു അന്വേഷണം ഊർജിതമാക്കി. 40 ലക്ഷം രൂപ ചെലവിൽ കൂൾ വെൽ എന്ന സ്വകാര്യ കമ്പനിയാണ് കണ്ണൂർ കോർപറേഷൻ വിട്ടു കൊടുത്ത സ്ഥലത്ത് സോളാറിൽ പ്രവർത്തിക്കുന്ന എസി ബസ് ഷെൽട്ടർ സ്ഥാപിച്ചത്. സോളാറിൽ പ്രവർത്തിക്കുന്ന സംസ്ഥാനത്തെ ആദ്യ ഹൈബ്രിഡ് ബസ് ഷെൽട്ടറാണിത്. ഷെൽട്ടറിനുള്ളിലെ കാമറകൾ പോലിസ് കൺട്രോൾ റൂമുമായി ബന്ധപ്പെടുത്തിയിട്ടുണ്ടെങ്കിലും സോഷ്യൽ മീഡിയയിൽ ദൃശ്യങ്ങൾ പുറത്ത് വന്നപ്പോഴാണ് പുറം ലോകമറിയുന്നത്.

സിഒഎ കെഎസ്ഇബി ഓഫീസ് മാർച്ച് നടത്തി

കണ്ണൂർ: കേരള വിഷൻ കേബിൾ ടിവിയുടെ കേബിളുകൾ വ്യാപകമായി മുറിച്ചു നശിപ്പിച്ച കെഎസ്ഇബിയുടെ നടപടിയിൽ പ്രതിഷേധിച്ച് കേബിൾ ടിവി ഓപ്പറേറ്റേഴ്സ് അസോസിയേഷൻ (സിഒഎ) ചൊവ്വ ഇലക്ട്രിക്കൽ സെക്ഷനിലേക്ക് മാർച്ചും ധർണയും നടത്തി. ധർണ ഡെപ്യൂട്ടി മേയർ പി.ഇന്ദിര ഉദ്ഘാടനം ചെയ്തു. സിഒഎ ജില്ലാ പ്രസിഡന്‍റ് ശശികുമാർ അധ്യക്ഷത വഹിച്ചു. ജില്ലാ സെക്രട്ടറി എം.ആർ. രജീഷ്, സംസ്ഥാന കമ്മിറ്റിയംഗങ്ങളായ കെ. ജയകൃഷ്ണൻ, കെ.സജീവ് കുമാർ, കെടിഎസ് എംഡി കെ.വി. വിനയകുമാർ, വിവിധ ട്രേഡ് യൂണിയൻ നേതാക്കളായ അനിൽകുമാർ, പി.കെ. രാജൻ, എം.എ. കരീം, വ്യാപാരി വ്യവസായി ഏകോപന സമിതി ജില്ലാ വൈസ് പ്രസിഡന്‍റ് കെ. സുധാകരൻ എന്നിവർ പ്രസംഗിച്ചു.

ദേശീയപാത നിർമാണം ഉടൻ പൂർത്തിയാക്കണം: ചേംബർ

കണ്ണൂർ: ഉത്തരമലബാറിലെ ദേശീയപാത വികസന പ്രവൃത്തികൾ വേഗത്തിലാക്കി യാത്രക്കാർക്ക് ഉടൻ തുറന്നു നൽകണമെന്നും കണ്ണൂർ അന്താരാഷ്‌ട്ര വിമാനത്താവളത്തിൽ കൂടുതൽ വിമാന സർവീസുകൾ ആരംഭിക്കാൻ അധികൃതർ ഇടപെടണമെന്നും നോർത്ത് മലബാർ ചേംബർ ഓഫ് ൊകൊമേഴ്സിന്‍റെ 70ാം മത് വാർഷിക പൊതുയോഗം പ്രമേയത്തിലൂടെ കേന്ദ - സംസ്ഥാന സർക്കാരുകളോട് ആവശ്യപ്പെട്ടു. ദേശീയപാത നിർമാണം മന്ദഗതിയിലായതിനെ തുടർന്ന് ഉത്തരമലബാറിൽ പലയിടത്തും ഗതാഗത പ്രതിസന്ധി നിലനിൽക്കുന്നുണ്ട്. കണ്ണൂർ താഴെചൊവ്വ മുതൽ വളപട്ടണംവരെയുള്ള ഭാഗത്ത് നിലനിൽക്കുന്ന ഗതാഗത കുരുക്കിന് ദേശീയപാത 66 പൂർത്തിയാകുന്നതോടെ മാത്രമേ പരിഹാരമാവുകയുള്ളൂ. ഈ ഭാഗത്ത് റോഡിന്‍റെ അറ്റകുറ്റപ്പണി നടത്തണമെന്നും ചേംബർ ആവശ്യപ്പെട്ടു. കണ്ണൂർ അന്താരാഷ്‌ട്ര വിമാനത്താവളത്തിൽ എയർ ഇന്ത്യ എക്സ്പ്രസ് സർവീസുകൾ പുനഃ സ്ഥാപിക്കാനും കൂടുതൽ വിമാന സർവീസ് ആരംഭിക്കാനുമുള്ള നടപടികൾ കേന്ദ്ര-സംസ്ഥാന സർക്കാറിന്‍റെയും കിയാലിന്‍റെയും ഭാഗത്തുനിന്നും ഉടൻ ഉണ്ടാവണമെന്നും ചേംമ്പർ ആവശ്യപ്പെട്ടു.മേലെ ചൊവ്വ - മട്ടന്നൂർ ദേശീയപാത വികസനത്തിനായി സംസ്ഥാന സർക്കാർ അടിയന്തരമായി പദ്ധതി തയാറാക്കി നടപ്പാക്കണം എന്നും ചേംബർ പ്രമേയത്തിലൂടെ ആവശ്യപ്പെട്ടു. പുതിയ ഭാരവാഹികളായി സച്ചിൻ സൂര്യകാന്ത് മഖേച്ച (പ്രസിഡന്‍റ് ), ഹനീഷ് കെ. വാണിയങ്കണ്ടി (വൈസ് പ്രസിഡന്‍റ് ), സി. അനിൽകുമാർ ( ഓണററി സെക്രട്ടറി ), എ. കെ. റഫീഖ് (ജോയിന്‍റ് സെക്രട്ടറി ) കെ.നാരായണൻകുട്ടി ( ട്രഷറർ) എന്നിവരെ തെരഞ്ഞെടുത്തു. നിർവാഹക സമിതി അംഗങ്ങൾ: വാസുദേവ പൈ, പി.കെ. മെഹബൂബ്, ദിനേശ് ആലിങ്കൽ, കെ.പി. രവീന്ദ്രൻ, എം. പി. ഇർഷാദ്, ജോസഫ് പൈകട, ടി. സന്തോഷ് കുമാർ, ആഷിഖ് മാമു, കെ.വി. ദിവാകർ, കെ. കെ. പ്രദീപ്, ഇ.കെ. അജിത് കുമാർ, ടി. ഡി. ജോസ്, കെ.കെ. രാധാകൃഷ്ണൻ, ഡോ . ഇടൂഴി ഉണ്ണികൃഷ്ണൻ നമ്പൂതിരി , എസ്.പി. ഷിജിൻ, നിക്‌ഷാൻ അഹമ്മദ്.

വന്യജീവി ആക്രമണം തടയാൻ നൂതന ആശയവുമായി വിദ്യാർഥികൾ

കൊട്ടിയൂർ: വർധിച്ചുവരുന്ന വന്യജീവി ആക്രമണം തടയാൻ ടെക്നോളജിയുടെ സഹായത്തോടെ നൂതന ആശയം അവതരിപ്പിക്കുകയാണ് ഇരിട്ടി ഉപജില്ല ശാസ്ത്രമേളയിൽ വിദ്യാർഥികൾ. കൊളക്കാട് സാന്തോം ഹയർസെക്കൻഡറി സ്കൂളിലെ പ്ലസ് വൺ വിദ്യാർഥികളായ ജോനാൻ ജോസ് റോബിൻ, ജിസ് കെ. തോമസ് എന്നിവരാണ് പുതിയ ആശയവുമായി രംഗത്തെത്തിയത്. മനുഷ്യ വന്യജീവി സംഘർഷ ലഘൂകരണ സിസ്റ്റം എന്നാണ് ഉപകരണത്തിന്‍റെ പേര്. അൾട്രാസോണിക് റഡാർ സിസ്റ്റത്തോടൊപ്പം തെർമൽ ഇമേജ് കാമറ ഘടിപ്പിച്ചാണ് ഉപകരണം പ്രവർത്തിക്കുന്നത്. വന്യമൃഗങ്ങൾ ജനവാസ മേഖലയിലേക്ക് കടക്കാൻ സാധ്യതയുള്ള പ്രദേശങ്ങളിൽ ഉപകരണം സ്ഥാപിക്കുകയും കടക്കുന്ന സമയത്ത് തെർമൽ ഇമേജ് കാമറ ഉപയോഗിച്ച് പകർത്തുന്ന ചിത്രങ്ങൾ കംപ്യൂട്ടറിന്‍റെ സഹായത്തോടെ പരിശോധിച്ച ഏത് മൃഗമാണെന്ന് നിശ്ചയിക്കുകയും ചെയ്യും. വന്യമൃഗം ജനവാസ മേഖലയ്ക്ക് അടുത്ത് എത്തി എന്ന് വ്യക്തമായാൽ സിസ്റ്റത്തിൽ നിന്ന് തന്നെ ഫോറസ്റ്റ് ഓഫീസിലേക്കും റാപ്പിഡ് ആക്ഷൻ ടീമിലേക്കും അതോടൊപ്പം പ്രദേശവാസികളുടെ വാട്സ്ആപ് കൂട്ടായ്മയിലേക്കും സന്ദേശങ്ങൾ അയയ്ക്കും. കൂടാതെ വനാതിരത്തിൽ സ്ഥാപിച്ചിരി ക്കുന്ന ഇലക്‌ട്രിക് പെൻസികൾ ആക്ടിവേറ്റ് ആവുകയും. വന്യമൃഗങ്ങളെ പിന്തിരിപ്പിക്കാൻ ഉള്ള ശബ്ദം പുറപ്പെടുവിക്കുകയും ചെയ്യും. ഇത്തരത്തിൽ വന്യ മൃഗങ്ങളെ പ്രതിരോധിക്കാനുമാകും. വളരെ ചെലവ് കുറഞ്ഞ രീതിയിൽ കർഷകർക്കും,വ്യവസായിക അടിസ്ഥാനത്തിൽ വനം വകുപ്പിനും ഇത് നിർമിക്കാനാകും. 360 ഡിഗ്രി കാമറ തിരിയുന്നതിനാൽ ഏതെങ്കിലും കാരണവശാൽ വന്യമൃഗം ജനവാസ മേഖലയിൽ കടന്നാൽ എവിടെയാണ് മൃഗമുള്ളതെന്ന് കൃത്യമായി കണ്ടുപിടിക്കാനും ഉപകരണം വഴി കഴിയും. കൊട്ടിയൂർ ഐജെഎം ഹയർ സെക്കൻഡറി സ്കൂളിൽ ശാസ്ത്രമേള ബ്ലോക്ക് പഞ്ചായത്ത് പ്രസിഡന്‍റ് കെ. സുധാകരൻ ഉദ്ഘാടനം ചെയ്തു. സ്കൂൾ മാനേജർ ഫാ. സജി പുഞ്ചയിൽ അധ്യക്ഷത വഹിച്ചു.

കൂൺ ഗ്രാമം പദ്ധതി ഉദ്ഘാടനം ചെയ്തു

ചെമ്പേരി: കൂൺ ഗ്രാമം പദ്ധതിയുടെ ഇരിക്കൂർ നിയോജക മണ്ഡലതല ഉദ്ഘാടനവും കർഷകർക്കുള്ള പരിശീലന പരിപാടിയും ചെമ്പേരി അമല ഓഡിറ്റോറിയത്തിൽ നടന്നു. സജീവ് ജോസഫ് എംഎൽഎ ഉദ്ഘാടനം ചെയ്തു. ഏരുവേശി ഗ്രാമപഞ്ചായത്ത് വൈസ് പ്രസിഡന്‍റ് മധു തൊട്ടിയിൽ അധ്യക്ഷത വഹിച്ചു.കൃഷി ഡപ്യൂട്ടി ഡയറക്‌ടർ സി.വി. ജിതേഷ് പദ്ധതി വിശദീകരിച്ചു. സനി കടമ്പേരി കൃഷി അനുഭവം പങ്കുവച്ചു. കാർഷിക വകുപ്പിലെ ഉദ്യോഗസ്ഥർ, പഞ്ചായത്ത് പ്രതിനിധികൾ, കർഷകർ തുടങ്ങി നിരവധിപേർ പങ്കെടുത്തു. കൂൺ കൃഷിയുടെ വിവിധ ഘട്ടങ്ങൾ, വിത്ത് തെരഞ്ഞെടുപ്പ്, വളർച്ചാ സാഹചര്യം, രോഗനിർണയം, വിപണന മാർഗങ്ങൾ തുടങ്ങിയവയിൽ വിദഗ്ധരുടെ നേതൃത്വത്തിൽ വിശദമായ പരിശീലനം നൽകി. ഉത്പാദന ത്തോടൊപ്പം പ്രോസസിംഗ്, പാക്കിംഗ്, വിപണന ശൃംഖല എന്നിവയും വികസിപ്പിക്കുമെന്ന് അധികൃതർ അറിയിച്ചു. കെ.ജെ. രേഖ, പൗളിൻ തോമസ്, രാധാമണി, ജയശ്രീ ശ്രീധരൻ, ജസ്റ്റിൻ സഖറിയാസ്, ഷീജ ഷിബു, ജോസ് പരത്തനാൽ എന്നിവർ പ്രസംഗിച്ചു.

കത്തോലിക്ക കോൺഗ്രസ് അവകാശ സംരക്ഷണ യാത്ര: തേർത്തല്ലിയിൽ വിളംബര ജാഥ നടത്തി

തേർത്തല്ലി: കത്തോലിക്ക കോൺഗ്രസിന്‍റെ നേതൃത്വത്തിൽ നടത്തുന്ന അവകാശ സംരക്ഷണ യാത്രയുടെ തേർത്തല്ലിയിലെ സ്വീകരണ പരിപാടിക്കുള്ള ഒരുക്കങ്ങൾ പൂർത്തിയായി. ഇതിന് മുന്നോടിയായി തേർത്തല്ലിയിൽ നടത്തിയ വിളംബര ജാഥ നടന്നു. തോമാപുരത്തു നിന്ന് രാവിലെ 11 നാണ് സംരക്ഷണ യാത്ര എത്തുക. മേരിഗിരി, ആലക്കോട്, വായാട്ടുപറമ്പ്, തളിപ്പറമ്പ് ഫൊറോനകളുടെ നേതൃത്വത്തിലാണ് സ്വീകരണം ഒരുക്കുന്നത്. വാഹന പാർക്കിംഗ് ആലക്കോട് ഭാഗത്തു നിന്നു വരുന്ന വാഹനം - മാളിയേക്കൽ ഗ്രൗണ്ടിലും, ചെറുപുഴ ഭാഗത്തു നിന്നു വരുന്ന വാഹനങ്ങൾ - പള്ളി ഗ്രണ്ടിലും, വിമലശേരി, പച്ചാണി ഭാഗത്തു നിന്നു വരുന്ന വാഹനങ്ങൾ - ഡ്രീം ലാൻഡ് , 2 കായിത്തറ കോംപ്ലക്സിലും, മേരിഗിരി ഇടവക -മുളന്താനം കോംപ്ലക്സിലും, ടൂ വീലർ - ഗോൾഡൻ ഡ്രൈവിംഗ് സ്കൂൾ ഗ്രൗണ്ടിലും പാർക്ക് ചെയ്യണം

വിശ്വാസ സംരക്ഷണ യാത്രയ്ക്ക് ഇന്ന് ഇരിട്ടിയിൽ സ്വീകരണം

ഇരിട്ടി: ശബരിമലയിലെ സ്വർണ ക്കൊള്ളയ്ക്കും വിശ്വാസവഞ്ചനയ്ക്കുമെതിരേ കോൺഗ്രസിന്‍റെ നേതൃത്വത്തിൽ മുൻ കെപിസിസി പ്രസിഡന്‍റ് കെ.മുരളീധരൻ നയിക്കുന്ന വിശ്വാസ സംരക്ഷണ യാത്രയ്ക്ക് ഇന്ന് വൈകുന്നേരം നാലിന് ഇരിട്ടിയിൽ സ്വീകരണം നല്കും. പേരാവൂർ, ഇരിക്കൂർ, കൂത്തുപറമ്പ്, മട്ടന്നൂർ നിയോജകമണ്ഡലങ്ങളിൽ നിന്നുള്ള നേതാക്കളും പ്രവർത്തകരും ചേർന്ന് യാത്രയെ പയഞ്ചേരി മുക്കിൽനിന്ന് സ്വീകരിച്ച് സ്വീകരണ കേന്ദ്രമായ ഇരിട്ടി ഓപ്പൺ ഓഡിറ്റോറിയത്തിലേക്ക് ആനയിക്കുമെന്ന് കോൺഗ്രസ് നേതാക്കൾ പത്രസമ്മേളനത്തിൽ പറഞ്ഞു. പൊതുസമ്മേളനം കെപിസിസി പ്രസിഡന്‍റ് സണ്ണി ജോസഫ് എംഎൽ എ ഉദ്ഘാടനം ചെയ്യും. സജീവ് ജോസഫ് എംഎൽഎ, കെപിസിസി ഭാരവാഹികളായ ടി. സിദിഖ് എംഎൽഎ, പി.എം. നിയാസ്, സോണി സെബാസ്റ്റ്യൻ, ഡിസിസി പ്രസിഡന്‍റ് മാർട്ടിൻ ജോർജ്, യുഡിഎഫ് ചെയർമാൻ പി.ടി.മാത്യു തുടങ്ങിയ നേതാക്കൾ പങ്കെടുക്കും. ഇരിട്ടിയിലെ സ്വീകരണത്തിന് ശേഷം യാത്ര വയനാട് ജില്ലയിലേക്ക് പ്രവേശിക്കും. സ്വാഗതസംഘം ചെയർമാൻ ചന്ദ്രൻ തില്ലങ്കേരി, നേതാക്കളായ ജയ്‌സൺ കാരക്കാട്ട്, പി.കെ. ജനാർദ്ദനൻ, പി.എ. നസീർ, ജൂബിലി ചാക്കോ എന്നിവർ പത്രസമ്മേളനത്തിൽ പങ്കെടുത്തു.

തദ്ദേശ തെരഞ്ഞെടുപ്പ് : 12 ഗ്രാമപഞ്ചായത്തുകളിൽ സംവരണ വാർഡുകളായി

കണ്ണൂർ: തദ്ദേശ സ്വയംഭരണ തെരഞ്ഞെടുപ്പിനുള്ള ജില്ലയിലെ വനിത, പട്ടിക വിഭാഗം സംവരണ വാർഡുകളുടെ നറുക്കെടുപ്പിന് കളക്ടറേറ്റ് കോൺഫറൻസ് ഹാളിൽ തുടക്കമായി. പയ്യന്നൂർ, എടക്കാട് ബ്ലോക്ക് പഞ്ചായത്തുകൾക്ക് കീഴിലെ 12 ഗ്രാമ പഞ്ചായത്തുകളിലെ സംവരണ വാർഡുകൾ ഇന്നലെ നറുക്കെടുത്തു. ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടർ അരുൺ കെ വിജയന്‍റെ നേതൃത്വത്തിലാണ് നറുക്കെടുപ്പ് നടന്നത്. വിവിധ പഞ്ചായത്തു കളിലെ സംവരണ വാർഡുകൾ ചുവടെ: പയ്യന്നൂർ ബ്ലോക്ക് കുഞ്ഞിമംഗലം വനിതാ സംവരണം: വാർഡ് രണ്ട് ചെറാട്ട്, മൂന്ന് കുന്നിനുകിഴക്ക്, നാല് പറമ്പത്ത്, 11 പുതിയ പുഴക്കര, 12 കുതിരുമ്മൽ, 13 കണ്ടംകുളങ്ങര, 14 വടക്കുമ്പാട്, 15 താമരംകുളങ്ങര. പട്ടികജാതി സംവരണം: വാർഡ് ഏഴ് പാണച്ചിറ. രാമന്തളി വനിതാ സംവരണം: വാർഡ് ഒന്ന് വടക്കുമ്പാട് നോർത്ത്, രണ്ട് വടക്കുമ്പാട് ഈസ്റ്റ്, ഏഴ് ഏഴിമല, 11 കുന്നരു സൗത്ത്, 12 പാലക്കോട് സെൻട്രൽ, 13 വലിയ കടപ്പുറം, 14 എട്ടിക്കുളം ബീച്ച്, 17 രാമന്തളി സെൻട്രൽ, 18 കൊവ്വപ്പുറം വെസ്റ്റ്. പട്ടികജാതി സംവരണം: വാർഡ് പത്ത് കുന്നരു. കരിവെള്ളൂർ-പെരളം വനിതാ സംവരണം: വാർഡ് നാല് പലിയേരി, ആറ് പുത്തൂർ പടിഞ്ഞാറ്, ഏഴ് പുത്തൂർ കിഴക്ക്, ഒന്പത് കൊഴുമ്മൽ, പത്ത് കൂവച്ചേരി, 11 പെരളം, 15 ഓണക്കുന്ന്, 16 പള്ളിക്കൊവ്വൽ. പട്ടികജാതി സംവരണം: വാർഡ് എട്ട് വെരീക്കര കാങ്കോൽ-ആലപ്പടമ്പ വനിതാ സംവരണം: വാർഡ് മൂന്ന് വെളിച്ചന്തോട്, നാല് ചൂരൽ, അഞ്ച് കുറുവേലി, ഏഴ് വടശേരി, ഒന്പത് കാളീശ്വരം, പത്ത് കുണ്ടയംകൊവ്വൽ, 11 താഴെക്കുറുന്ത്, 12 കാങ്കോൽ. പട്ടികജാതി സംവരണം: വാർഡ് 15 കക്കിരിയാട് എരമം-കുറ്റൂർ വനിതാ സംവരണം: വാർഡ് മൂന്ന് കുറ്റൂർ, അഞ്ച് ചട്ട്യോൾ, ഏഴ് കായപ്പൊയിൽ, ഒന്പത് എടോളി, പത്ത് വെള്ളോറ, 13 കോയിപ്ര, 14 നെല്ല്യാട്, 15 താറ്റ്യേരി, 18 പേരൂൽ, 19 എരമം പുല്ലൂക്കര. പട്ടികജാതി സംവരണം: വാർഡ് 16 മാത്ത് വയൽ പെരിങ്ങോം-വയക്കര വനിതാ സംവരണം: വാർഡ് മൂന്ന് വയക്കര, അഞ്ച് പട്ടുവം, ആറ് തട്ടുമ്മൽ, ഏഴ് കടുക്കാരം, എട്ട് ഞെക്ലി, 11 കാഞ്ഞിരപ്പൊയിൽ, 14 തവിടിശേരി, 15 അരവഞ്ചാൽ, 16 കെപി നഗർ, 17 പെരിങ്ങോം വെസ്റ്റ്. പട്ടികജാതി സംവരണം: വാർഡ് നാല് കരിപ്പോട് ചെറുപുഴ വനിതാ സംവരണം: വാർഡ് രണ്ട് ചെറുപുഴ, അഞ്ച് പുളിങ്ങോം, ആറ് ഇടവരമ്പ്, ഏഴ് കരിയക്കര, എട്ട് രാജഗിരി, ഒന്പത് ജോസ്ഗിരി, 12 മരുതുംപാടി, 14 എയ്യൻകല്ല്, 15 പ്രാപ്പൊയിൽ, 19 കാക്കേഞ്ചാൽ. പട്ടിക വർഗ സംവരണം: വാർഡ് നാല് ചുണ്ട, പട്ടികജാതി സംവരണം: വാർഡ് മൂന്ന് കോലുവള്ളി. എടക്കാട് ബ്ലോക്ക് പെരളശേരി വനിതാ സംവരണം: വാർഡ് ഒന്ന് പൊതുവാച്ചേരി, നാല് മക്രേരി, അഞ്ച് ബാവോഡ്, ഒന്പത് വടക്കുമ്പാട്, പത്ത് പെരളശേരി, 11 കോട്ടം നോർത്ത്, 12 കോട്ടം സൗത്ത്, 14 മുണ്ടല്ലൂർ വെസ്റ്റ്, 15 ചെറുമാവിലായി, 16 മോച്ചേരി. പട്ടികജാതി സംവരണം: വാർഡ് 18 മാവിലായി. മുണ്ടേരി വനിതാ സംവരണം: വാർഡ് രണ്ട് ഇരുവങ്കൈ, നാല് പട ന്നോട്ട്, അഞ്ച് പുറവൂർ, ആറ് ഏച്ചൂർ കോട്ടം, എട്ട് കാഞ്ഞിരോട്, 14 കാഞ്ഞിരോട് സെന്‍റർ, 15 കാഞ്ഞിരോട് തെരു, 17 നല്ലാഞ്ചി, 18 ഏച്ചൂർ, 21 കാനച്ചേരി, 22 ഇടയിൽ പീടിക. പട്ടികജാതി സംവരണം: വാർഡ് മൂന്ന് കച്ചേരിപ്പറമ്പ്. കൊളച്ചേരി വനിതാ സംവരണം: വാർഡ് ഒന്ന് പാമ്പുരുത്തി, രണ്ട് കമ്പിൽ, മൂന്ന് പന്ന്യങ്കണ്ടി, നാല് നണിയൂർ, ഏഴ് കോടിപ്പൊയിൽ, എട്ട് പള്ളിപ്പറമ്പ്, 12 കയ്യങ്കോട്, 15 വളവിൽ ചേലേരി, 17 എടക്കൈ, 18 പാട്ടയം. പട്ടികജാതി സംവരണം: വാർഡ് 16 കൊളച്ചേരിപറമ്പ്. കടമ്പൂർ വനിതാ സംവരണം: വാർഡ് രണ്ട് ആഡൂർ, മൂന്ന് കോട്ടൂർ, നാല് കരിപ്പാച്ചാൽ, അഞ്ച് കാടാച്ചിറ, ഏഴ് കടമ്പൂർ, ഒന്പത് മണ്ടൂൽ, 11 എടക്കാട് ഈസ്റ്റ്, 13 കണ്ണാടിച്ചാൽ. പട്ടികജാതി സംവരണം: വാർഡ് ആറ് ഒരികര ചെമ്പിലോട് വനിതാ സംവരണം: വാർഡ് രണ്ട് ചെമ്പിലോട് സെൻട്രൽ, നാല് ചക്കരക്കൽ, അഞ്ച് കണയന്നൂർ നോർത്ത്, ആറ് കണയന്നൂർ ഈസ്റ്റ്, എട്ട് കണയന്നൂർ വെസ്റ്റ്, 11 ഇരിവേരി, 12 മുതുകുറ്റി, 13 തലവിൽ, 19 കോയ്യോട് മണിയലം ചിറ, 20 കോയ്യോട്, 21 ചെമ്പിലോട് സൗത്ത്. പട്ടികജാതി സംവരണം: വാർഡ് പത്ത് വെള്ളച്ചാൽ. കല്യശേരി, കണ്ണൂർ, തളിപ്പറമ്പ് ബ്ലോക്കിന് കീഴിലെ ഗ്രാമപഞ്ചായത്തുകളുടെ നറുക്കെടുപ്പ് ഇന്നും ഇരിക്കൂർ, പാനൂർ, ഇരിട്ടി ബ്ലോക്കിന് കീഴിലെ ഗ്രാമപഞ്ചായത്തുകളുടെ നറുക്കെടുപ്പ് നാളെയും തലശേരി, കൂത്തുപറമ്പ്, പേരാവൂർ ബ്ലോക്കിന് കീഴിലെ ഗ്രാമപഞ്ചായത്തുകളുടെ നറുക്കെടുപ്പ് 16നും രാവിലെ 10 ന് കളക്ടറേറ്റ് കോൺഫറൻസ് ഹാളിൽ നടക്കും. തളിപ്പറമ്പ്, കൂത്തുപറമ്പ്, തലശേരി, പയ്യന്നൂർ, ഇരിട്ടി, പാനൂർ, ശ്രീകണ്ഠപുരം, ആന്തൂർ നഗരസഭക ളിലെ നറുക്കെടുപ്പ് 16ന് രാവിലെ 10 ന് നടക്കും. കളക്ടറേറ്റ് കോൺഫറൻസ് ഹാളിൽ നടന്ന നറുക്കെടുപ്പിൽ അസിസ്റ്റന്‍റ് കളക്ടർ എഹ്തെദ മുഫസിർ, തദ്ദേശ സ്വയംഭരണ വകുപ്പ് ജോയിന്‍റ്ഡയറക്ടർ ടി.ജെ. അരുൺ, ജില്ല ഇലക്ഷൻ ഡെപ്യൂട്ടി കളക്ടർ കെ.കെ ബിനി, തദ്ദേശസ്ഥാപന വകുപ്പ് ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

മണിക്കടവ് സെന്‍റ് തോമസ് ജേതാക്കൾ

പൈസക്കരി: പൈസക്കരി ദേവമാതാ സ്കൂൾ ഗ്രൗണ്ടിൽ നടന്ന ഇരിക്കൂർ ഉപജില്ലാ സ്കൂൾ കായികമേളയിൽ മണിക്കടവ് സെന്‍റ്തോമസ് ഹയർ സെക്കൻഡറി സ്കൂൾ 267 പോയിന്‍റുമായി ചാമ്പ്യൻമാരായി. 199 പോയിന്‍റുള്ള ചെമ്പേരി നിർമല ഹയർസെക്കൻഡറി രണ്ടും 76 പോയിന്‍റുമായി ചെമ്പന്തൊട്ടി സെന്‍റ് ജോർജ് ഹൈസ്കൂൾ മൂന്നാം സ്ഥാനവും നേടി. സമാപന സമ്മേളനം പയ്യാവൂർ ഗ്രാമപഞ്ചായത്ത് അംഗം ആനീസ് നെട്ടനാനിയിൽ ഉദ്ഘാടനം ചെയ്തു. സ്കൂൾ മാനേജർ ഫാ. നോബിൾ ഓണംകുളം അധ്യക്ഷത വഹിച്ചു. ഉപജില്ലാ വിദ്യാഭ്യാസ ഓഫീസർ കെ.വാസന്തി, ബിപിസി എം.കെ. ഉണ്ണികൃഷ്ണൻ, ദേവമാതാ ഹൈസ്കൂൾ മുഖ്യാധ്യാപിക ബീന അഗസ്റ്റിൻ, ബിനു മണ്ഡപത്തിൽ, ജിജി ഐപ്പൻപറമ്പിൽ തുടങ്ങിയവർ പ്രസംഗിച്ചു.

പറശിനിക്കടവിൽ പുതിയ ബോട്ടുകൾ

കണ്ണൂർ: വിനോദ സഞ്ചാര മേഖലയിലെ വലിയ മുന്നേറ്റങ്ങൾ ലക്ഷ്യമിട്ട് പറശിനിക്കടവിൽ ഗതാഗത മന്ത്രി കെ.ബി ഗണേഷ് കുമാർ ഉദ്ഘാടനം ചെയ്ത കാറ്റാ മറൈൻ ബോട്ടും എസ് 25 അപ്പർ ഡക്ക് ബോട്ടും ജലഗതാഗത്തിനും ടൂറിസത്തിനും പുത്തൻ ഉണർവേകും. കാറ്റാമറൈൻ ബോട്ട് പറശിനിക്കടവ് മുതൽ വളപട്ടണം വരെയുള്ള ഭാഗങ്ങളിൽ വിനോദസഞ്ചാരികൾ ക്കായി ട്രിപ്പുകൾ നടത്താൻ വിനിയോഗിക്കും. എസ് 25 ഡബിൾ ഡെക്കർ ബോട്ട് പറശിനിക്കടവ്-വളപട്ടണം-അഴീക്കൽ-മാട്ടൂൽ റൂട്ടിൽ സർവീസ് നടത്തും. ദിവസവും രാവിലെ 9.30 ന് പറശിനിക്കടവിൽ നിന്ന് സർവീസ് ആരംഭിച്ച് 10.15 ന് വളപട്ടണം വഴി മാട്ടൂലെത്തും. 11.45 ന് മാട്ടൂലിൽ നിന്ന് പറശിനിക്കടവിലേക്ക് തിരിച്ചും സർവീസ് നടത്തും. ഉച്ചയ്ക്ക് ഒന്നിന് പറശിനിക്കടവിൽ എത്തിച്ചേരുന്ന ബോട്ട്, രണ്ടിന് പറശിനിക്കടവിൽനിന്ന് വളപട്ടണത്തേക്കും ഉച്ചകഴിഞ്ഞ് മൂന്നിനും വളപട്ടണത്തുനിന്ന് തിരിച്ച് പറശിനിക്കടവിലേക്കും സർവീസ് നടത്തും. പറശിനിക്കടവ് നിന്ന് മാട്ടൂൽ വരെ 60 രൂപയും പറശിനിക്കടവ് നിന്ന് വളപട്ടണം വരെ 40 രൂപയുമാണ് സർവീസ് ചാർജ്. കാറ്റാമറൈൻ ടൂറിസ്റ്റ് ബോട്ട് അരമണിക്കൂർ യാത്രയ്ക്ക് ഒരാൾക്ക് 40 രൂപയാണ് ഈടാക്കുക. യാത്രാ സംഘങ്ങൾക്ക് ബോട്ട് മുഴുവനായി മുൻകൂട്ടി ബുക്ക് ചെയ്യാനും കഴിയും. 100 പേർക്കാണ് യാത്ര ചെയ്യാൻ പറ്റുക. ഒരു മണിക്കൂറിന് 2000 രൂപയാണ് ബുക്കിംഗ് ചാർജ്. ബുക്കിംഗിനും വിവരങ്ങൾക്കും 94000 50340, 94474 58867 നമ്പറുകളിൽ ബന്ധപ്പെടാം.

തളിപ്പറമ്പ നഗരസഭയിൽ സംഘർഷം; സെക്രട്ടറിയെ പോലിസ് വാഹനത്തിൽ വീട്ടിലെത്തിച്ചു

തളിപ്പറമ്പ്: നഗരസഭയിൽ സംഘർഷം രൂക്ഷമായതിനെ തുടർന്ന് സുരക്ഷാ കാരണങ്ങളാൽ സെക്രട്ടറി കെ.പി. സുബൈറിനെ പോലിസ് വാഹനത്തിൽ കൂറുമാത്തൂർ ചെറുകളയിലെ വീട്ടിൽ എത്തിച്ചു. ഇന്നലെ രാത്രി ഏഴോയോടെയായിരുന്നു സംഭവം. തളിപ്പറമ്പിലെ തീപിടിത്തം നടന്ന സ്ഥലത്തെ ശുചീകരണ പ്രവർത്തനങ്ങളുമായി ബന്ധപ്പെട്ട് ഇന്നലെ ഉച്ചയ്ക്ക് നടന്ന കൗൺസിൽ യോഗത്തിൽ സെക്രട്ടറിയുടെ നിയമ നടപടി ക്രമങ്ങളുകളുമായി ബന്ധപ്പെട്ട് ഭരണ-പ്രതിപക്ഷാംഗങ്ങൾ തമ്മിൽ വാക്പോര് നടന്നിരുന്നു. ഇന്നു രാവിലെ ശുചികരണം പ്രവൃത്തി ആരംഭിക്കാം എന്ന തീരുമാനവുമായാണ് കൗൺസിൽ അവസാനിപ്പിച്ചത്. തുടർന്ന് രാത്രി ഏഴോടെ നഗരസഭ സെക്രട്ടി വ്യാപാരി വ്യവസായ ഏകോപന സമിതി, വ്യാപാരി വ്യവസായ സമിതി നേതാക്കളെ വിളിച്ച് വരുത്തി ശുചീകരണവുമായി ബന്ധപ്പെട്ട നിയമ നടപടിക്രമങ്ങൾ വിവരിച്ചു. ഇതേ ചൊല്ലി വ്യാപാരി നേതാക്കളും, സെക്രട്ടറിയും തമ്മിൽവാക്ക് തർക്കം ഉണ്ടായി. ഇതോടെ സെക്രട്ടറി പോലിസിനെ വിളിച്ചു വരുത്തി. അവിടെ എത്തിയ പോലിസ് പിന്നീട് സെക്രട്ടറിയെ പോലിസ് വാഹനത്തിൽ വിട്ടിൽ എത്തിക്കുക യായിരുന്നു. തുടർന്ന് നഗരസഭയിൽ ഭരണ -പ്രതിപക്ഷ കൗൺസിലർമാരും സൂപ്രണ്ട് അനിഷ്, എസ്ഐ. ദിനേശൻ കൊതേരി എന്നിവരുടെ നേതൃത്വത്തിൽ യോഗം ചേരുകയും, തീപിടിത്തം നടന്ന സ്ഥലത് ഇന്നു മുതൽ വ്യാപാരികളുടെ നേതൃത്വത്തിൽ ശുചികരണം നടത്തുവാനും തീരുമാനിച്ചു. വനിത കൗൺസിലർമാർ തമ്മിൽ വാക്കേറ്റം തളിപ്പറമ്പ്: തളിപ്പറമ്പ് നഗരസഭ കൗൺസിൽ യോഗത്തിൽ ഭരണ- പ്രതിപക്ഷ വനിത കൗൺസിലർമാർ തമ്മിൽ വാക്കേറ്റം. ഇന്നലെ നടന്ന യോഗത്തിൽ ആരോഗ്യ സ്ഥിരം സമിതി അധ്യക്ഷ കെ. നബിസ ബീവിയെ കുറിച്ച് സെക്രട്ടറി നടത്തിയ പരാമർശമാണ് പ്രശ്നത്തിന് വഴിവച്ചത്. കൗൺസിൽ അവസാനിച്ച ശേഷം സെക്രട്ടറിയുടെ സമീപത്തേക്ക് പോയ നബീസ ബീവിയെ പ്രതിപക്ഷത്തെ വനിത കൗൺസിലർമാർ തടഞ്ഞതോടെയാണ് ബഹളം രൂക്ഷമായത്. ഇതിനിടയിൽ സെക്രട്ടറി സ്ഥിരം സമിതി അധ്യക്ഷയോട് ഇറങ്ങിപ്പോകാൻ പറഞ്ഞ് അപമാനിച്ചതായി നബീസ ബീവി ആരോപിച്ചു. സെക്രട്ടറിക്കെതിരേ പരാതി നല്കുമെന്നും അവർ പറഞ്ഞു.

യുവ തെയ്യം കലാകാരൻ തൂങ്ങിമരിച്ച നിലയിൽ

കണ്ണൂർ: പ്രമുഖ തെയ്യം കലാകാരനായ അശ്വന്ത് കോൽതുരുത്തിയെ (25) പൊടിക്കുണ്ടിലെ വാടക വീട്ടിൽ തൂങ്ങി മരിച്ച നിലയിൽ കണ്ടെത്തി. ഞായറാഴ്ച രാത്രി വീട്ടിലെത്തിയ സുഹൃത്തുക്കളാണ് അശ്വന്തിനെ സീലിംഗ് ഫാനിൽ തൂങ്ങിയ നിലയിൽ കണ്ടെത്തിയത്. ഉടൻ പോലീസിനെ വിവരമറിയിക്കുകയായിരുന്നു. പോലീസ് എത്തി ആശുപത്രിയിലെത്തിച്ചെങ്കിലും മരിച്ചിരുന്നു. പറശിനിക്കടവ് നാണിശേരി കോൾതുരുത്തി കുടുക്കവളപ്പിൽ സൂരജിന്‍റെയും ഗൾഫിൽ ജോലി ചെയ്യുന്ന ജിഷയുടെയും മകനാണ്. ഏതാനും മാസങ്ങൾക്കു മുന്പാണ് പൊടിക്കുണ്ടിലെ വാടക വീട്ടിൽ താമസമാരംഭിച്ചത്. കതിവന്നൂർ വീരൻ, കുടിവീരൻ തോറ്റം ഉൾപ്പെടെ നിരവധി തെയ്യങ്ങളുടെ കോലധാരിയായിരുന്നു. സഹോദരൻ: അദ്വൈത്.

പുതിയങ്ങാടിയിലെ ഗ്യാസ് അപകടം; പൊള്ളലേറ്റ ഒഡീഷ സ്വദേശി മരിച്ചു

പഴയങ്ങാടി: പുതിയങ്ങാടിയിൽ വാടക ക്വാർട്ടേഴ്സിൽ പാചക വാതകം ചോർന്ന് തീപിടിച്ച് പൊള്ളലേറ്റ മത്സ്യത്തൊഴിലാളി മരിച്ചു. കണ്ണൂർ ഗവ. മെഡിക്കൽ കോളജിൽ ചികിത്സയിലായിരുന്ന ഒഡിഷ ബന്തിപ്പൂർ സ്വദേശി സുഭാഷ് ബഹ്റയാണ് (53) ഇന്നലെ രാവിലെ ആറോടെ മരിച്ചത്. കഴിഞ്ഞ വെള്ളിയാഴ്ച രാവിലെയായിരുന്നു തീപിടിത്തമുണ്ടായത്. സുബാഷ് ബഹ്റയെ കൂടാതെ സഹപ്രവർത്തകരായ ശിവ ബഹ്റ (35), നിഖം ബഹ്റ (40), ജിതേന്ദ്ര ബഹ്റ (28) എന്നിവർക്കും പൊള്ളലേറ്റിരുന്നു. ഇവർ കണ്ണൂർ ഗവ. മെഡിക്കൽ കോളജിൽ ചികിത്സയിലാണ്. പുതിയങ്ങാടി കടപ്പുറം കേന്ദ്രീകരിച്ച് മീൻപിടിക്കുന്ന അൽ റജബ് ബോട്ടിലെ തൊഴിലാളികളാണ് നാലുപേരും. സുഭാഷ് ബഹ്റയുടെ മൃതദേഹം പോസ്റ്റുമോർട്ടത്തിന് ശേഷം പയ്യാന്പലത്ത് സംസ്കരിച്ചു. വ്യാഴാഴ്ച രാത്രി മുറിയിൽ വച്ചു ഭക്ഷണം പാകം ചെയ്തതിനുശേഷം ഗ്യാസ് ഓഫ് ചെയ്യാൻ മറന്നതാണ് അപകടത്തിനിടയാക്കിയത്. വെള്ളിയാഴ്ച രാവിലെ ഉറക്കമുണർന്ന ഒരാൾ ഭക്ഷണം ഉണ്ടാക്കാൻ ലൈറ്റർ ഉപയോഗിച്ച് സ്റ്റൗ കത്തിക്കാൻ ശ്രമിച്ചപ്പോൾ ചോർച്ചയുണ്ടായി അന്തരീക്ഷത്തിൽ തങ്ങി നിന്ന പാചകവാതകത്തിന് തീപിടിച്ച് ഗ്യാസ് സിലിണ്ടർ പൊട്ടിത്തെറിക്കുകയായിരുന്നു. ബഹളം കേട്ട് ഓടിയെത്തിയ നാട്ടുകാരായിരുന്നു പൊള്ളലേറ്റവരെ ആശുപത്രിയിലെത്തിച്ചത്.

ഇവിടെ തെളിഞ്ഞത് കാർലോയിസം; പങ്കെടുത്തത് രണ്ടായിരം യുവജനങ്ങൾ

നടുവിൽ: കത്തോലിക്ക സഭ വിശുദ്ധനായി പ്രഖ്യാപിച്ച കാർലോ അക്വിറ്റിസിന്‍റെ തിരുശേഷിപ്പ് സംവഹിച്ച് തലശേരി അതിരൂപത കെസിവൈഎമ്മിന്‍റെ നേതൃത്വത്തിൽ വിളക്കന്നൂർ തീർഥാടന ദേവാലയത്തിലേക്ക് നടത്തിയ യുവജന തീർഥാടനം ചരിത്രസാക്ഷ്യമായി. അതിരൂപതയുടെ 19 ഫൊറോനകളുടെ ബാനറുകൾക്ക് പിന്നിൽ രണ്ടായിരത്തിലധികം കെസിവൈഎം പ്രവർത്തകർ വിശുദ്ധ കാർലോ അക്വിറ്റിസിന്‍റെ വസ്ത്രധാരണ രീതി അനുസ്മരിപ്പിക്കുന്ന തരത്തിൽ വെള്ള ടീഷർട്ടും നീല ജീൻസും അണിഞ്ഞെത്തിയത് കൗതുക്കാഴ്ചയായി. റോമിലെ അസീസിയിൽ നിന്നെത്തിച്ച വിശുദ്ധന്‍റെ തിരുശേഷിപ്പ് സംവഹിച്ച് മൂന്ന് കിലോമീറ്ററിലധികമാണ് നഗരപ്രദക്ഷിണം നടത്തിയത്. കേരളത്തിൽ ആദ്യമായാണ് ഇത്രയധികം യുവജനങ്ങൾ പങ്കെടുത്ത കാർലോ അക്വിറ്റസ് യുവജന തീർഥാടനം നടക്കുന്നത്. മാർ ജോസഫ് പാംപ്ലാനി മൂന്ന് കിലോമീറ്ററിലധികം ദൂരം തീർഥാടനത്തെ അനുഗമിച്ചു. വിശുദ്ധന്‍റെ ജീവിതത്തിന്‍റെ വിവിധ ഭാഗങ്ങൾ ഉൾപ്പെടുത്തിയ പത്തു നിശ്ചല ചിത്രങ്ങളും റാലിയുടെ ഭാഗമായി. റാലിയുടെ സമാപനമായി വിളക്കന്നൂർ തീർഥാടന ദേവാലയത്തിൽ നടന്ന വിശുദ്ധ കുർബാനയ്ക്ക് മാർ ജോസഫ് പാംപ്ലാനി മുഖ്യകാർമികത്വം വഹിച്ചു.

നിർമാണം പൂർത്തിയായിട്ട് രണ്ടു വർഷം; ഉദ്ഘാടനം നീളുന്നു

ജിജേഷ് ചാവശേരി മട്ടന്നൂർ: കണ്ണൂർ രാജ്യാന്തര വിമാനത്താവളത്തിൽ നിർമാണം പൂർത്തിയായ കാർഗോ കോംപ്ലക്സിന്‍റെയും കിയാൽ ഓഫീസ് അഡ്മിനിസ്‌ട്രേഷൻ ബ്ലോക്കിന്‍റെയും ഉദ്ഘാടനം നീളുന്നു. രണ്ടു വർഷം മുമ്പ് പ്രവൃത്തി പൂർത്തീകരിച്ചിട്ടും ഉദ്ഘാടനം നടത്താനുള്ള തയാറെടുപ്പില്ല. കിയാൽ ഓഫീസ് അഡ്മിനിസ്‌ട്രേഷൻ ബ്ലോക്ക് പരിസരം കാടുകയറി കിടക്കുകയാണ്. എയർ ട്രാഫിക് കൺട്രോൾ കെട്ടിടത്തിന് സമീപത്ത് 5800 ചതുരശ്ര മീറ്റർ വിസ്തീർണത്തിലാണ് കാർഗോ കോംപ്ലക്സ് നിർമിച്ചത്. പാസഞ്ചർ ടെർമിനൽ കെട്ടിടത്തിന് മുന്നിലായാണ് 3085 ചതുരശ്ര മീറ്ററിൽ കിയാൽ ഓഫീസിനായി നാലുനില കെട്ടിടം നിർമിക്കുന്നത്. കഴിഞ്ഞ മന്ത്രിസഭയിലെ ആരോഗ്യ മന്ത്രി കെ. കെ. ശൈലജ കാർഗോ കോംപ്ലക്സിന്‍റെയും വ്യവസായ വകുപ്പ് മന്ത്രി ഇ.പി. ജയരാജൻ അഡ്മിനിസ്‌ട്രേഷൻ ബ്ലോക്കിന്‍റെയും നിർമാണ പ്രവൃത്തി ഉദ്ഘാടനം ചെയ്തത്. ദീർഘകാല വികസന സാധ്യത കണക്കിലെടുത്താണ് 63,000 ടൺ ശേഷിയുള്ള കാർഗോ കോംപ്ലക്‌സ് നിർമിച്ചത്. കണ്ണൂർ, കാസർഗോഡ്, കുടക് ജില്ലകളിൽ നിന്നും വടകര മേഖലയിൽ നിന്നുമാണ് കാർഗോ വഴി കാർഷികോത്പന്നങ്ങൾ കയറ്റുമതിക്ക് സാധ്യതയുള്ളത്. പഴം, പച്ചക്കറി ഉൾപ്പെടെയാണ് കയറ്റിറക്കുണ്ടാകുക. ഭക്ഷ്യവസ്തുക്കൾ ഉൾപ്പടെയുള്ളവ കേടുകൂടാതെ സൂക്ഷിക്കാനും കയറ്റി അയക്കാനും കോൾഡ് സ്‌റ്റോറേജ് ഉൾപ്പടെ അത്യാധുനിക സൗകര്യങ്ങളോടെയാണ് കാർഗോ കോംപ്ലക്‌സ് നിർമിച്ചത്. വിശാലമായ അന്താരാഷ്ട്ര കാർഗോ സോണിനു പുറമെ ആഭ്യന്തര കയറ്റുമതി-ഇറക്കുമതിക്കായുള്ള പ്രത്യേക വിഭാഗവും കോംപ്ലക്‌സിലുണ്ട്. കാർഗോ കോംപ്ലക്സ് പ്രവർത്തനം ആരംഭിച്ചാലും വിദേശ വിമാനങ്ങൾ സർവീസ് തുടങ്ങിയാലാണ് കൂടുതൽ കയറ്റുമതിക്ക് സാധ്യതയുണ്ടാകുക. കാർഗോ കൈകാര്യം ചെയ്യുന്നതിന് താത്ക്കാലിക സജീകരണങ്ങളുണ്ട്. കാർഗോ കോംപ്ലക്‌സിന്‍റെ ആദ്യഘട്ടമെന്ന നിലയിൽ 1200 ചതുരശ്ര മീറ്റർ വിസ്തൃതിയുള്ള കെട്ടിടമാണ് നിർമിച്ചത്. ഇവിടെ നിന്നാണ് നിലവിൽ അന്താരാഷ്ട്ര, ആഭ്യന്തര ചരക്കുകൾ ഒന്നിച്ച് കൈകാര്യം ചെയ്യുന്നത്. അന്താരാഷ്ട്ര കാർഗോ കോംപ്ലക്‌സ് പ്രവർത്തനം ആരംഭിക്കുന്നതോടെ ഇത് ആഭ്യന്തര കാർഗോ കോംപ്ലക്‌സാക്കി നിലനിർത്തും. 5800 ചതുരശ്ര മീറ്റർ വിസ്തൃതിയിൽ നിർമിച്ച കാർഗോ കോംപ്ലക്‌സ് പ്രവർത്തനക്ഷമമായാൽ മലബാറിലെ വാണിജ്യകേന്ദ്രമെന്ന നിലയിൽ ഉയരാൻ കണ്ണൂരിന് കഴിയുമെന്നാണ് പ്രതീക്ഷ. കിയാലിന്‍റെ ആസ്ഥാന മന്ദിരം, സിഐഎസ്എഫ് ബാരക്ക്, കാർഗോ കോംപ്ലക്‌സ് എന്നിവ ഉൾപ്പടെ 117 കോടി രൂപയ്ക്കാണ് ടെൻഡർ നൽകിയിരുന്നത്. മോണ്ടി കാർലോ കമ്പനിയാണ് പ്രവൃത്തി ഏറ്റെടുത്തത്. കഴിഞ്ഞ ജനുവരിയിൽ കാർഗോ കോംപ്ലക്‌സ് ഉദ്ഘാടനം നടത്താൻ തീരുമാനിച്ചിരുന്നുവെങ്കിലും നീളുകയാണ്. നിലവിൽ ടെർമിനൽ കെട്ടിടത്തിൽ പ്രവർത്തിക്കുന്ന കിയാൽ ഓഫീസ് അഡ്മിനിസ്‌ട്രേഷൻ ബ്ലോക്ക് പ്രവർത്തനം ആരംഭിക്കുന്നതോടെ ഇവിടേക്ക് മാറ്റും. വിവിധ ഏജൻസികൾക്കുള്ള ഓഫീസ് സൗകര്യവും ഇവിടെയുണ്ടാകും.

‌പാർ‌ട്ടിയിൽ താൻ ഇളയവൻ; സദാനന്ദനെ മന്ത്രിയാക്കിയാൽ ചരിത്രം മാറും-സുരേഷ്‌ഗോപി

മട്ടന്നൂർ: കേരളത്തിന് ഉയർന്ന പരിഗണനയാണ് പ്രധാനമന്ത്രി നരേന്ദ്രമോദി നല്കുന്നതെന്ന് കേന്ദ്ര സഹ മന്ത്രി സുരേഷ്‌ഗോപി. രാജ്യസഭ എംപി സി. സദാനന്ദന്‍റെ ഓഫീസ് ഉദ്ഘാടനവും മട്ടന്നൂർ പൗരാവലിയുടെ നേതൃത്വത്തിൽ എംപിക്ക് നല്കുന്ന സ്വീകരണവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. രാജ്യസഭാ എംപിയെന്ന നിലയിൽ വലിയ വികസന പദ്ധതികൾ കണ്ണൂരിലേക്ക് കൊണ്ടുവരാൻ സി. സദാനന്ദന് കഴിയും. കണ്ണൂർ എന്നത് തങ്ങൾക്ക് മനസെത്താത്ത ഇടമല്ല. ഇതിന്‍റെ ഖ്യാതി സദാനന്ദന് ലഭിക്കുമെന്ന അങ്കലാപ്പാണ് ജയരാജ സഹോദരന്മാർ ഉൾപ്പടെയുള്ളവരുടെ പരാമർശങ്ങളിൽ കണ്ടതെന്നും സുരേഷ്‌ഗോപി പറഞ്ഞു. മന്ത്രിയാകണമെന്ന് ഒരിക്കലും താൻ ആഗ്രഹിച്ചിട്ടില്ല. സിനിമാഭിനയം തുടരണമെന്നായിരുന്നു ആഗ്രഹം. ഇപ്പോൾ വരുമാനം വലിയ തോതിൽ നിലച്ചു. പാർട്ടിയിലെ ഏറ്റവും ഇളയ അംഗമാണ് താൻ. തന്നെ ഒഴിവാക്കി സദാനന്ദനെ മന്ത്രിയാക്കിയാൽ പുതിയ രാഷ്‌‌ട്രീയ ചരിത്രമാകും. മനസിലുള്ളത് മറച്ചുവച്ച് ചിരിച്ചുകാണിക്കുന്ന രാഷ്‌‌ട്രീയക്കാരനാകാൻ തനിക്ക് ഒരിക്കലും കഴിയില്ലെന്നും അദ്ദേഹം പറഞ്ഞു. തന്‍റെ കലുങ്ക് ചര്‍ച്ചക്കെതിരായ പ്രചാരണത്തിനെതിരേ പൂച്ചാണ്ടി കാണിച്ച് പേടിപ്പിക്കേണ്ടെന്നായിരുന്നു സുരേഷ്ഗോപിയുടെ മറുപടി. തനിക്ക് പറയാനുള്ളത് പറഞ്ഞുതന്നെ മുന്നോട്ടുപോകും. പ്രജ എന്ന് പറഞ്ഞാൽ എന്താണ് പ്രശ്നമെന്നും, പ്രജ എന്താണെന്ന് ആദ്യം പഠിക്കണമെന്നും കേന്ദ്രമന്ത്രി പറഞ്ഞു. താൻ എല്ലാകാര്യവും തുറന്നു പറയുന്നയാളാണ്. കേരളത്തിൽ എല്ലാം വളച്ചൊടിക്കുന്ന താണ് ഇപ്പോഴത്തെ പുതിയ രീതിയെന്നും സുരേഷ് ഗോപി ചൂണ്ടിക്കാട്ടി. ഇപ്പോഴത്തെ കേരളത്തിന്‍റെ കടം എത്രയാണെന്ന് നോക്കണം. എന്ത് ജനങ്ങൾക്ക് കൊടുത്തില്ലെങ്കിലും അത് കേന്ദ്രം തരാത്തത് കൊണ്ടാണെന്ന തുടുന്യായം മറ്റാരും രാജ്യത്ത് പറയുന്നില്ല. നവംബറിലെയും വരുന്ന ഏപ്രിൽ, മേയ് മാസങ്ങളിലെയും തെരഞ്ഞെടുപ്പ് സമയത്ത് ഇത് ഓർമ വേണമെന്നും അദ്ദേഹം പറഞ്ഞു. മട്ടന്നൂർ- ശിവപുരം റോഡിൽ ഇല്ലംമൂലയിൽ ഓഫീസ് ഉദ്ഘാടനം ചെയ്ത ശേഷം മട്ടന്നൂർ ശ്രീശങ്കര വിദ്യാപീഠം സീനിയർ സെക്കൻഡറി സ്കൂൾ അങ്കണത്തിൽ നടന്ന പൗരസ്വീകരണത്തിൽ സ്വാഗത സംഘം ചെയർമാൻ ഡോ. കൂമുള്ളി ശിവരാമൻ അധ്യക്ഷത വഹിച്ചു. നേതാക്കളായ വത്സൻ തില്ലങ്കേരി, ബിജു ഏളക്കുഴി, മട്ടന്നൂർ നഗരസഭ കൗൺസിലർ എ. മധുസൂദനൻ, ഡോ. ടി.പി. രവീന്ദ്രൻ, കൃഷ്ണകുമാർ കണ്ണോത്ത്, സി.എച്ച്. മോഹൻദാസ്, പ്രഫ. കെ.കെ. കുഞ്ഞി കൃഷ്ണൻ തുടങ്ങിയവർ പ്രസംഗിച്ചു.

പുര കത്തുന്പോൾ കഴുക്കോൽ മോഷണം !

തളിപ്പറമ്പ്: തളിപ്പറന്പിൽ തീപിടിത്തമുണ്ടായ സമയത്ത് സൂപ്പർ മാർക്കറ്റിൽനിന്ന് സാധനങ്ങൾ മോഷ്ടിച്ചതായി പരാതി. അന്നു വൈകുന്നേരം അഞ്ചോടെ നബ്രാസ് സൂപ്പർ മാർക്കറ്റിൽ നിന്നാണ് സാധനങ്ങൾ മോഷണം പോയത്. പർദ ധരിച്ച ഒരു സ്ത്രീ സാധനങ്ങൾ ഒരു സഞ്ചിയിൽ എടുത്ത് വയ്ക്കുന്ന ദൃശ്യങ്ങൾ ഷോപ്പിലെ സിസി ടിവിയിൽനിന്നു ലഭിച്ചു. പതിനായിരം രൂപയുടെ സാധനങ്ങൾ മോഷ്ടിച്ചതായാണ് പരാതി. വൈകുന്നേരം അഞ്ചോടെയായിരുന്നു തീപിടിത്തമുണ്ടായത്.

ഭിന്നശേഷി പ്രതിഭാ സംഗമം സമാപിച്ചു

കണ്ണൂർ: സംഗീതം മനസിനെ മാത്രമല്ല, ശാരീരിക വൈകല്യത്തെ പോലും തരണം ചെയ്യുന്ന മരുന്നായി പലപ്പോഴും മാറിയിട്ടുണ്ടെന്ന് പ്രമുഖ ഗാനരചതിയാവ് കൈതപ്രം ദാമോദരൻ നമ്പൂതിരി. വർത്തിക്കുന്നു തിരമാല -സിനാൻ ഡിഫറന്‍റ്‌ലി ഏബിൾഡ് ചിൽഡ്രൻസ്‌ ചാരിറ്റബിൾ ട്രസ്റ്റിന്‍റെ ആഭിമുഖ്യത്തിൽ കണ്ണൂർ ടൗൺ സ്ക്വയറിൽ നടന്ന ഭിന്നശേഷി പ്രതിഭാ സംഗമത്തിൽ മുഖ്യാതിഥിയായി സംസാരിക്കുകയായിരുന്നു കൈതപ്രം. പ്രതികൂലമായ സാഹചര്യത്തിൽ പടവെട്ടിയാണ് ജീവിതത്തിൽ വിജയിക്കേണ്ടത്. അതാണ് മഹത്തരം. അതിനു തെളിവാണ് ഇവിടെ വിവിധ പരിപാടികളിൽ പങ്കെടുക്കുന്ന കലാകാരന്മാരെന്നും കൈതപ്രം പറഞ്ഞു. 600 ഓളം ഭിന്നശേഷി പ്രതിഭകളും അവരുടെ രക്ഷിതാക്കളും രണ്ടുദിവസമായി നടന്ന പരിപാടിയിൽ പങ്കെടുത്തു. ചിത്രശലഭം രണ്ടാം ദിവസം കലാപരിപാടിയുടെ ഔപചാരികമായ ഉദ്ഘാടനം അഴീക്കോട് എംഎൽഎ കെ.വി. സുമേഷ് നിർവഹിച്ചു. വർണശലഭം രക്ഷാകൃത സംഗമവും ട്രസ്റ്റിന്‍റെ ഔപചാരിക ഉദ്ഘാടനവും സ്പീക്കർ എ.എൻ. ഷംസീർ ഉദ്ഘാടനം ചെയ്തു. റഷീദ് കവ്വായി അധ്യക്ഷത വഹിച്ചു. സജീവൻ ചെല്ലൂർ, ഡോ. അമർ രാമചന്ദ്രൻ, മനോജ്കുമാർ, ഡോ. സുരേഷ് ഗുപ്തൻ തുടങ്ങിയവർ പ്രസംഗിച്ചു.

സിബിഎസ്ഇ കണ്ണൂർ ജില്ലാ കലോത്സവ വിജയികൾ

ട്രിപ്പിൾ നേട്ടവുമായി മെർലിൻ സോജൻ ശ്രീകണ്ഠപുരം: സിബിഎസ്ഇ കണ്ണൂർജില്ലാ കലോത്സവത്തിൽ പങ്കെടുത്ത മൂന്നിനങ്ങളിലും ഒന്നാംസ്ഥാനം കരസ്ഥമാക്കി ശ്രീകണ്ഠപുരം മേരിഗിരി ഇംഗ്ലീഷ് മീഡിയം സ്കൂളിലെ 12ാം ക്ലാസ് വിദ്യാർഥിനി മെർലിൻ സോജൻ. മോണോ ആക്ട്, ആങ്കറിംഗ് ഇംഗ്ലീഷ് പ്രസംഗം എന്നിവയിലാണ് ഒന്നാം സ്ഥാനം നേടിയത്. തുടർച്ചയായി മൂന്നാം തവണയാണ് ജില്ലാതലത്തിൽ മോണോആക്ടിൽ ഒന്നാംസ്ഥാനം നേടുന്നത്. കഴിഞ്ഞവർഷം സിബിഎസ്ഇ സംസ്ഥാനതല കലോത്സവത്തിൽ മോണോആക്ടിന് ഒന്നാം സ്ഥാനം നേടിയിരുന്നു. സിനിമതാരം കൂടിയാണ് മെർലിൻ സോജൻ. 2024 ജനുവരിയിൽ റിലീസ് ആയ 1098 എന്ന സിനിമയിൽ പ്രധാനവേഷം ചെയ്തിട്ടുണ്ട്. ഷെരീഫ് ഈസ സംവിധാനം ചെയ്യുന്ന ഇപ്പോൾ ചിത്രീകരണം നടന്നുകൊണ്ടിരിക്കുന്ന വിശുദ്ധവാര എന്ന സിനിമയിലും വേഷമിടുന്നുണ്ട്. പുലിക്കുരുമ്പയിലെ മനാട്ട് സോജൻ- സിമോണി ദമ്പതികളുടെ മകളാണ്. സഹോദരൻ മിലൻ.

മുനമ്പം ജനതയുടെ റവന്യു അവകാശങ്ങൾ പുനഃസ്ഥാപിക്കണം: പാസ്റ്ററൽ കൗൺ‌സിൽ

കണ്ണൂർ: മുനമ്പത്തേത് വഖഫ് ഭൂമിയല്ലെന്ന ഹൈക്കോടതി ഡിവിഷൻ ബെഞ്ച് ഉത്തരവ് കണ്ണൂർ രൂപത പാസ്റ്ററൽ കൗൺസിൽ യോഗം സ്വാഗതം ചെയ്തു. പുതിയ ഉത്തരവിന്‍റെ അടിസ്ഥാനത്തിൽ മുനമ്പം ജനതയുടെ റവന്യു അവകാശങ്ങൾ പുനഃസ്ഥാപിക്കാൻ സർക്കാർ നടപടി സ്വീകരിക്കണമെന്ന് പ്രമേയത്തിലൂടെ കൗൺസിൽ ആവശ്യപ്പെട്ടു. മനുഷ്യനന്മയിൽ ഊന്നിയ ദൈവ വിശ്വാസത്തിലൂടെയാണ് വെല്ലുവിളികൾ നിറഞ്ഞ കാലഘട്ടത്തിൽ ലോകത്തിനു ദൈവാത്മാവിനെ പകരേണ്ടതെന്ന് പാസ്റ്ററൽ കൗൺസിൽ ഉദ്ഘാടന യോഗത്തിൽ അധ്യക്ഷത വഹിച്ച കണ്ണൂർ ബിഷപ് ഡോ. അലക്സ് വടക്കുംതല പറഞ്ഞു. സഭയുടെ ശബ്ദമായി മാറാൻ കൗൺസിൽ അംഗങ്ങൾക്ക് സാധിക്കണമെന്നും ക്രിസ്തുവിന്‍റെ സ്വരം സഭാംഗങ്ങളിലൂടെ കേൾക്കണമെന്നും രൂപത സഹായമെത്രാൻ ഡോ. ഡെന്നിസ് കുറുപ്പശേരി ആഹ്വാനം ചെയ്തു. ലോഗോസ് ക്വിസിൽ ഉന്നത വിജയം കരസ്ഥമാക്കിയ ഷിബു ഫെർണാണ്ടസിനെ ചടങ്ങിൽ ആദരിച്ചു. രൂപത വികാരി ജനറാൾ മോൺ. ക്ലാരൻസ് പാലിയത്ത്, പാസ്റ്ററൽ കൗൺസിൽ സെക്രട്ടറി ഫാ. ഷിറോൺ ആന്‍റണി, രൂപത പ്രൊക്കുറേറ്റർ ഫാ. ജോർജ് പൈനാടത്ത്, ഫാ. ബെന്നി പുത്തറയിൽ, ഫാ. റോയ് നെടുന്താനം, ഫാ. തോംസൺ കൊറ്റിയാത്ത്, ഫാ. ഷോബി ജോർജ്, ഫാ. ജോമോൻ ചെമ്പകശേരി, ഫാ. ജോയ് പൈനാടത്ത്, ഫാ. രാജൻ ഫൗസ്ത, ഫാ. മാർട്ടിൻ രായപ്പൻ, ആന്‍റണി നൊറോണ, കെ.എച്ച്. ജോൺ, അനീഷ് സ്റ്റീഫൻ, ബൈജു, ബിനു തുടങ്ങിയവർ പ്രസംഗിച്ചു.

‘എന്‍റെ ബാപ്പുജി’ കിസ് മത്സരം നടത്തി

ഉളിക്കൽ : നെല്ലിക്കാംപൊയിൽ സെന്‍റ് സെബാസ്റ്റ്യൻസ് എൽപി സ്കൂളിന്‍റെ 75-ാമത് വാർഷികത്തോടനുബന്ധിച്ച് ഇരിക്കൂർ ഉപജില്ലയിലെ എൽപി സ്കൂളുകളെ പങ്കെടുപ്പിച്ച് "എന്‍റെ ബാപ്പുജി' ഗാന്ധി ക്വിസ് മത്സരം നടത്തി. നെല്ലിക്കംപൊയിൽ സ്കൂൾ ഓഡിറ്റോറിയത്തിൽ നടന്ന മത്സരം സ്കൂൾ മാനേജർ ഫാ. ജോസഫ് കാവനാടിയിൽ ഉദ്ഘാടനം ചെയ്തു. സ്കൂൾ മുഖ്യഅധ്യാപിക സിസ്റ്റർ ലിറ്റിൽ ഫ്ലവർ പ്രസംഗിച്ചു. അധ്യാപകൻ റോബിൻ ജോസഫ് ക്വിസ് മത്സരത്തിന് നേതൃത്വം നൽകി. ആറു റൗണ്ടുകളിലായി നടന്ന മത്സരത്തിൽ ഗാന്ധിയുടെ ജീവിതം, സമരങ്ങൾ, ആനുകാലിക വിഷയങ്ങൾ ഉൾപ്പെടുത്തി ആയിരുന്നു മത്സരം. വയത്തൂർ യുപി സ്കൂൾ ഉളിക്കൽ ഒന്നാം സ്ഥാനവും ശാരദ വിലാസം യുപി സ്കൂൾ പരിക്കളം രണ്ടാം സ്ഥാനവും ഊരത്തൂർ യുപി സ്കൂൾ മൂന്നാം സ്ഥാനവും കരസ്ഥമാക്കി. അധ്യാപകരും പിടിഎ അംഗങ്ങളുംനേതൃത്വം വഹിച്ചു.

ബോംബിനും ആയുധങ്ങൾക്കുമായി പോലീസ് റെയ്ഡ്

കണ്ണൂർ: കൂത്തുപറന്പ് മേഖലയിൽ ആയുധങ്ങളും ബോംബിന്‍റെ അവശിഷ്ടങ്ങളും കണ്ടെത്തിയതും ജില്ലയിലെ വിവിധ ഭാഗങ്ങളിൽനിന്ന് ചില സ്ഫോടന സംഭവങ്ങൾ റിപ്പോർട്ട് ചെയ്തതിന്‍റേയും അടിസ്ഥാനത്തിൽ പോലീസ് പരിശോധന കർശനമാക്കി. അക്രമ സംഭവങ്ങൾ അമർച്ച ചെയ്യുന്നതിന്‍റെ ഭാഗമായാണ് കണ്ണൂർ പോലീസ് ഡിവഷനു കീഴിലുള്ള സ്റ്റേഷൻ പരിധിയിൽ ഇന്നലെ റെയ്ഡ് നടത്തിയത്. കൂത്തുപറന്പ് മേഖലയിൽ നടത്തിയ പരിശോധനയ്ക്ക് പുറമെ കണ്ണൂർ ടൗൺ എസിപി പ്രദീപൻ കണ്ണിപൊയിലിന്‍റെ നേതൃത്വത്തിൽ വളപട്ടണം, മയ്യിൽ പോലീസ് സ്റ്റേഷൻ പരിധിയിലെ അഴീക്കൽ, അഴീക്കോട് ഭാഗങ്ങളിലും ചക്കരക്കൽ പോലീസ് സ്റ്റേഷൻ പരിധിയിലെ വിവിധ പ്രദേശങ്ങളിലും പോലീസും ബോംബ് സ്ക്വാഡും സംയുക്ത പരിശോധന നടത്തി. ഇന്നലെ രാവിലെ ഒന്പതിന് ആരംഭിച്ച പരിശോധന ഉച്ചയ്ക്ക് 12.30 വരെ തുടർന്നെങ്കിലും കാര്യമായി ഒന്നും കണ്ടെത്താനായില്ല. തദ്ദേശ തെരഞ്ഞെടുപ്പുകൂടി പ്രഖ്യാപിച്ച സാഹചര്യത്തിൽ വരും ദിവസങ്ങളിൽ കൂടുതൽ പരിശോധന നടത്താനാണ് പോലീസ് നീക്കം. സംഘർഷ സാധ്യത പ്രദേശങ്ങളിൽ ബോംബുവേട്ടയ്ക്കായി പ്രത്യേക പോലീസ് സംഘത്തെ തന്നെ ഇറക്കാനാണ് തീരുമാനം.

ശബരിമല വിശ്വാസ സംരക്ഷണയാത്ര 14ന് ജില്ലയില്‍; കണ്ണൂരിലും ഇരിട്ടിയിലും സ്വീകരണസമ്മേളനങ്ങള്‍

കണ്ണൂര്‍: ശബരിമലയുടെ ആചാരവും വിശ്വാസവും സംരക്ഷിക്കണമെന്നും ദേവസ്വം സ്വത്തുവകകള്‍ മോഷ്ടിച്ചവരെ കണ്ടെത്തി ശിക്ഷിക്കണമെന്നും ആവശ്യപ്പെട്ടുള്ള കെപിസിസിയുടെ മേഖലാ ജാഥയ്ക്ക് 14ന് കണ്ണൂര്‍ ജില്ലയില്‍ നല്‍കുന്ന സ്വീകരണങ്ങളുടെ ഒരുക്കങ്ങള്‍ പൂര്‍ത്തിയായതായി ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ് അറിയിച്ചു. കെപിസിസി മുന്‍ പ്രസിഡന്‍റ് കെ. മുരളീധരന്‍ നയിക്കുന്ന ജാഥയെ 14 ന് ഉച്ചകഴിഞ്ഞ് 1.30 ന് ജില്ലാ അതിര്‍ത്തിയായ കാലിക്കടവ് ആണൂരില്‍ നിന്നും ജില്ലയിലേക്ക് സ്വീകരിക്കും. നിരവധി വാഹനങ്ങളുടെ അകമ്പടിയോടെ ജില്ലയിലെ ആദ്യസ്വീകരണകേന്ദ്രമായ കണ്ണൂര്‍ ടൗണ്‍ സ്‌ക്വയറിലേക്ക് ആനയിക്കും. ഉച്ചകഴിഞ്ഞ് മൂന്നിനു നടക്കുന്ന സ്വീകരണസമ്മേളനം കോണ്‍ഗ്രസ് പ്രവര്‍ത്തക സമിതിയംഗം കെ. സുധാകരന്‍ എംപി ഉദ്ഘാടനം ചെയ്യും. വൈകുന്നേരം അഞ്ചിന് ഇരിട്ടിയില്‍ നടക്കുന്ന സ്വീകരണസമ്മേളനം കെപിസിസി പ്രസിഡന്‍റ് സണ്ണി ജോസഫ് എംഎല്‍എ ഉദ്ഘാടനം ചെയ്യും. തുടര്‍ന്ന് ജാഥ വയനാട് ജില്ലയിലേക്ക് പ്രവേശിക്കും. രാഷ്ട്രീയകാര്യ സമിതി അംഗം ടി. സിദ്ദിഖ് ജാഥാ വൈസ് ക്യാപ്റ്റനും കെപിസിസി ജനറല്‍ സെക്രട്ടറി പി.എം. നിയാസ് ജാഥാ മാനേജരുമാണ്.

കോൺഗ്രസ് തില്ലങ്കേരി മണ്ഡലം കമ്മിറ്റി എക്സിക്യുട്ടീവ് ക്യാമ്പ് സംഘടിപ്പിച്ചു

ഇരിട്ടി: വിശ്വാസികളുടെ വിശ്വാസം സംരക്ഷിക്കാൻ കോൺഗ്രസ് മുന്നണി പോരാളിയായി നിൽക്കുമെന്നും കപട ഭക്തിയുമായി വോട്ട് തട്ടാൻ എത്തുന്നവരെ തിരിച്ചറിയണമെന്നും കെപിസിസി സെക്രട്ടറി ചന്ദ്രൻ തില്ലങ്കേരി. കോൺഗ്രസ് തില്ലങ്കേരി മണ്ഡലം കമ്മിറ്റിയുടെ നേതൃത്വത്തിൽ ത്രിതല പഞ്ചായത്ത് തെരഞ്ഞെടുപ്പിന്‍റെ മുന്നൊരുക്കത്തിന്‍റെ ഭാഗമായി നടന്ന എക്സിക്യുട്ടീവ് ക്യാമ്പ് ഉദ്ഘാടനം ചെയ്തു പ്രസംഗിക്കുകയിരുന്നു അദ്ദേഹം. മണ്ഡലം പ്രസിഡന്‍റ് രാഗേഷ് തില്ലങ്കേരി അധ്യക്ഷത വഹിച്ചു. സുരേഷ് മാവില, കെ.പി. പത്മനാഭൻ, വി. മോഹനൻ, എം. മോഹനൻ, പി.വി. സുരേന്ദ്രൻ, എം.സി. വേണു, മൂർക്കോത്ത് കുഞ്ഞിരാമൻ, ടി. കൃഷ്ണൻ മാസ്റ്റർ, സി.പി. കമലാക്ഷി, ഡോളിദാസ്, എം. റയീസ്, പി.എം. ജയപ്രകാശ്, നെല്ലിക്ക രാജൻ, രജനി രാധാകൃഷ്ണൻ, പി. ജിജീഷ് തുടങ്ങിയവർ പ്രസംഗിച്ചു. സമാപന സമ്മേളനം കെപിസിസി മെമ്പർ രാജീവൻ എളയവൂർ ഉദ്ഘാടനം ചെയ്തു.

പൾസ്‌ പോളിയോ: ജില്ലയിൽ 2087 ബൂത്തുകൾ വഴി കുട്ടികൾക്ക് തുള്ളിമരുന്ന് നൽകി

കണ്ണൂർ: പൾസ് പോളിയോ ഇമ്യൂണൈസേഷൻ പരിപാടിയുടെ ഭാഗമായി ജില്ലയിലെ അഞ്ചു വയസിൽ താഴെയുള്ള കുട്ടികൾക്ക് 2087 ബൂത്തുകളിലൂടെ തുള്ളിമരുന്ന് നൽകി. ജില്ലാതല ഉദ്ഘാടനം മുഴപ്പാല സ്വദേശിനി നിഖിഷയുടെ മകൻ രണ്ടുവയസുകാരൻ നിർവികിന് പോളിയോ മരുന്ന് നൽകി കെ.വി. സുമേഷ് എംഎൽഎ നിർവഹിച്ചു. കണ്ണൂർ ജില്ലാ ആശുപത്രിയിൽ നടന്ന പരിപാടിയിൽ ഡിഎംഒ ഡോ. പിയൂഷ് എം. നമ്പൂതിരിപ്പാട് അധ്യക്ഷത വഹിച്ചു. ആരോഗ്യ വകുപ്പ് അഡീഷണൽ ഡയറക്ടർ ഡോ.എ.പി. ദിനേശ്, നാഷണൽ ഹെൽത്ത്‌ മിഷൻ കണ്ണൂർ ജില്ലാ പ്രോഗ്രാം മാനേജർ ഡോ.പി.കെ. അനിൽകുമാർ, ജില്ലാ ആശുപത്രി ഡെപ്യുട്ടി സൂപ്രണ്ട് ഡോ. ഗ്രിഫിൻ സുരേന്ദ്രൻ, ജില്ലാ ആർസിഎച്ച് ഓഫീസർ ഡോ.ജി. അശ്വിൻ തുടങ്ങിയവർ പ്രസംഗിച്ചു. ജില്ലയിലാകെ 2087 ബൂത്തുകൾ വഴിയാണ് തുള്ളിമരുന്ന് നല്കിയത്. ആരോഗ്യ കേന്ദ്രങ്ങൾ, അങ്കണവാടികൾ, സ്കൂളുകൾ, ബസ്‌സ്റ്റാൻഡുകൾ, റെയിൽവേ സ്റ്റേഷനുകൾ തുടങ്ങി കുട്ടികൾ വരാൻ സാധ്യതയുള്ള ഇടങ്ങളിൽ ആണ് ബൂത്തുകൾ ക്രമീകരിച്ചിരുന്നത്. പൾസ് പോളിയോ ദിനത്തിൽ വാക്സിൻ ലഭിക്കാത്ത അഞ്ചു വയസിനു താഴെയുള്ള കുട്ടികളെ കണ്ടെത്തി തുടർന്നുള്ള രണ്ട് ദിവസങ്ങളിൽ വോളന്‍റിയർമാർ/ആരോഗ്യ പ്രവർത്തകർ വീടുകളിൽ എത്തി പോളിയോ തുള്ളിമരുന്ന് നല്കും. തദ്ദേശസ്വയംഭരണ സ്ഥാപനങ്ങൾ, വിവിധ വകുപ്പുകൾ,റോട്ടറി ഇന്‍റർനാഷണൽ, സന്നദ്ധ സംഘടനകൾ എന്നിവരുടെ സഹകരണത്തോടെയാണ് പൾസ് പോളിയോ ഇമ്യൂണൈസേഷൻ പരിപാടി സംഘടിപ്പിക്കുന്നത്.

ആറളം ഫാമിലെ റബർ ടാപ്പിംഗ് തൊഴിലാളികൾക്ക് ഭീഷണിയായി ആനക്കൂട്ടം

ഇരിട്ടി: ആറളം ഫാമിലെ പാട്ടത്തിന് നൽകിയ റബർ തോട്ടം മേഖലയിൽ കാട്ടാനകൾ തമ്പടിക്കുന്നത് ടാപ്പിംഗ് തൊഴിളികൾക്ക് ഭീഷണിയാകുന്നു. മേഖലയിൽ നാലിൽ അധികം വരുന്ന ആനകൂട്ടം ചുറ്റിത്തിരിയുന്നത് പുലർച്ചെ ടാപ്പിംഗിനെത്തുന്ന തൊഴിലാളികളുടെ ജീവന് ഭീഷണിയായിരിക്കുകയാണ്. തൊഴിലാളികൾ പലരും അത്ഭുതകരമായാണ് ആനയുടെ പിടിയിൽ നിന്നും രക്ഷപ്പെടുന്നത്. ടാപ്പിംഗിനിടയിൽ ആനവരുന്നത് ശ്രദ്ധിക്കാൻ പറ്റാതെ വരുന്നതാണ് ആനയ്ക്ക് മുന്നിൽ പെടാൻ കാരണം. കഴിഞ്ഞ ദിവസം ബ്ലോക്ക് 10 ലെ നന്ദുവിനെ കാട്ടാന ഓടിച്ചിരുന്നു. ഓടി രക്ഷപ്പെടുന്നതിനിടയിൽ മുൾപടർപ്പിൽ പെട്ട് നന്ദുവിന്‍റെ കഴുത്തിന് പരിക്കേ റ്റിരുന്നു. അദ്ഭുതകരമായാണ് നന്ദു അന്ന് രക്ഷപെട്ടത്. കഴിഞ്ഞ ഒരാഴ്ചയിലധികമായി ആനകൾ സ്ഥിരമായി റബർ തോട്ടത്തിനുള്ളിൽ ഉണ്ടെന്നാണ് ടാപ്പിംഗ് തൊഴിലാളികൾ പറയുന്നത്. കഴിഞ്ഞ ദിവസം മൊട്ടുകൊമ്പൻ അടക്കം നാലിൽ അധികം ആനകളെ ഇവിടെ കണ്ടെന്നാണ് തൊഴിലാളികൾ പറയുന്നത്. റബർ തോട്ടത്തിൽ പാൽ നിറച്ചു വെച്ചിരുന്ന ബാരലുകളും പാത്രങ്ങളും ആന ചവിട്ടി നശിപ്പിച്ചിരിന്നു. ആനകൾ നാശം വിതയ്ക്കുന്നത് തോട്ടം കരാർ എടുത്തിരിക്കുന്നവർക്ക് വലിയ നഷ്ടമാണ് വരുത്തിവയ്ക്കുന്നത്. വനം വകുപ്പിനെ വിവരം അറിയിച്ചാലും ഇവിടേക്ക് എത്തിച്ചേരാൻ വഴി ഇല്ലാത്തത് ആനകളെ തുരത്തുന്നതിന് തടസമാകുന്നു. കാട് വെട്ടിത്തെളിക്കാത്തത് ഭീഷണിയാകുന്നു ആറളം ഫാമിലെ എംആർഎസിനോട് ചേർന്ന വട്ടകാട് മേഖലയിലും പുനരധിവാസ മേഖലയിലും അടിക്കാടുകൾ വെട്ടിത്തെളിക്കാത്തത് ജനങ്ങളുടെ ജീവന് ഭീഷണിയാകുന്നു. നിലവിൽ പലസ്ഥലങ്ങളിലും കാടുവെട്ടിതെളിക്കൽ നടക്കുന്നുണ്ടെങ്കിലും വേണ്ടത്ര വേഗത്തിൽ നടക്കുന്നില്ല എന്ന ആക്ഷേപം ഉയരുന്നുണ്ട്. റോഡുകളുടെ ഇരുവശവും കാടുകേറി കിടക്കുന്നതുമൂലം ആന ഉൾപ്പെടെയുള്ളവയുടെ സാന്നിധ്യം തിരിച്ചറിയാൻ കഴിയില്ല. റബർ തോട്ടത്തോട് ചേർന്ന കാടുപിടിപ്പിച്ചു പ്രദേശമാണ് ആനകളുടെ പ്രധാന കേന്ദ്രം. കാടുകൾ വെട്ടിമാറ്റി ആനകളെ ഇവിടെ നിന്നും തുരത്തണമെന്നാണ് പ്രദേശവാസികളുടെയും തൊഴിലാളികളുടെയും ആവശ്യം. വനം വകുപ്പിന്‍റെ ഓപ്പറേഷൻ ഗജമുക്തിയിൽ റബർ തോട്ടത്തിൽ നിലയുറപ്പിച്ചിരിക്കുന്ന ആനകളെ തുരത്താനുള്ള നടപടി സ്വീകരിക്കണമെന്നും ഫാമിന്‍റെ ഉടമസ്ഥതയിലുള്ള പ്രദേശത്തെ കാട് വെട്ടിത്തെളിക്കാൻ ഫാം അധികൃതർ നടപടി സ്വീകരിക്കാൻ തയാറാകണമെന്നുമാണ് ടാപ്പിംഗ് തൊഴിലാളികൾ ആവശ്യപ്പെടുന്നത്.

കളഞ്ഞു കിട്ടിയ പണം ഉടമസ്ഥന് തിരിച്ച് നൽകി പോലീസ്

തളിപ്പറമ്പ്: കഴിഞ്ഞ ദിവസം തളിപ്പറമ്പിലുണ്ടായ തീപിടിത്ത സ്ഥലത്തു നിന്നു ലഭിച്ച പണം ഉടമസ്ഥന് തിരിച്ചു നല്‍കി തളിപ്പറമ്പ് പോലീസ്. തളിപ്പറമ്പ് ചെത്തുതൊഴിലാളി സഹകരണ സംഘത്തിലെ ജീവനക്കാരന്‍ കൂവോട്ടെ പ്രശാന്ത്കുമാറിന്‍റെ പണമാണ് നഷ്ടപ്പെട്ടത്. തീപിടിത്ത വിവരം അറിഞ്ഞ് സ്ഥലത്തെത്തിയ പ്രശാന്ത് കുമാര്‍ സ്ഥലത്തുവച്ച് ഫയര്‍ഫോഴ്‌സ് വെള്ളം ചീറ്റുമ്പോള്‍ നനഞ്ഞതിനാല്‍ പോക്കറ്റില്‍ നിന്നും അരയില്‍ തിരുകിവച്ച പണവും കടലാസുകളും നഷ്ടപ്പെടുകയായിരുന്നു. രാത്രി പതിനൊന്നരവരെ അന്വേഷണം നടത്തിയെങ്കിലും പണം കിട്ടിയില്ല. ഇതിനിടെ പണം ലഭിച്ച എഎസ്ഐ പ്രീത പണം സ്റ്റേഷനില്‍ ഏല്പിച്ചിരുന്നു. പിന്നീട് സ്റ്റേഷനില്‍ വച്ച് എഎസ്ഐ പ്രീത പണം പ്രശാന്തിന് തിരിച്ചു നല്‍കി.

പോളിയോ തുള്ളിമരുന്ന് കൊടുക്കാൻ എത്തിയ ആരോഗ്യപ്രവർത്തകർക്ക് ലഭിച്ചത് മദ്യക്കുപ്പികൾ

ചെറുപുഴ: ആരോഗ്യപ്രവർത്തകർ പൾസ് പോളിയോ തുള്ളിമരുന്ന് കൊടുക്കാൻ എത്തിയപ്പോൾ ലഭിച്ചത് മദ്യക്കുപ്പികൾ. ഇന്നലെ രാവിലെ തിരുമേനിയിലാണ് സംഭവം. തിരുമേനി വ്യാപാര ഭവനിൽ പോളിയോ തുള്ളി മരുന്ന് നൽകാൻ എത്തിയതായിരുന്നു പുളിങ്ങോം കുടുംബാരോഗ്യ കേന്ദ്രത്തിലെ ഹെൽത്ത് ഇൻസ്പെക്ടർമാരും നഴ്സുമാരും. കൗണ്ടർ ഒരുക്കുമ്പോൾ പൊതിഞ്ഞ പാഴ്സൽ കണ്ടത്. പരിശോധിച്ചപ്പോൾ ആറ് മദ്യക്കുപ്പികൾ. അനധികൃത മദ്യവിൽപ്പനക്കാർ കൊണ്ടുവന്ന് വച്ചതായിരുന്നു. ഹെൽത്ത് ഇൻസ്പെക്ടർ ജോബിന്‍റെ നേതൃത്വത്തിൽ മദ്യക്കുപ്പികൾ പൊട്ടിച്ച് മദ്യം ഒഴുക്കിക്കളഞ്ഞു. തിരുമേനി ടൗണും പരിസവും അനധികൃത മദ്യവിൽപനക്കാരുടെ താവളമാണ്. ധാരാളം പേർ ഇവിടെ നിന്നും മദ്യം വാങ്ങുന്നുണ്ട്. ആലക്കോട് നിന്നുമാണ് മദ്യം വാങ്ങിക്കൊണ്ടു വന്ന് വില കൂട്ടി വിൽക്കുന്നത്.

"ചാലിലച്ചൻ മലബാറിന്‍റെ കർമയോഗി' പുസ്തക ചർച്ച നടത്തി

ചെമ്പേരി: ലൈബ്രറി കൗൺസിൽ ഏരുവേശി പഞ്ചായത്ത് നേതൃസമിതിയുടെയും ചെമ്പേരി ദേശീയ വായനശാല ആൻഡ് ഗ്രന്ഥാലയത്തിന്‍റേയും സംയുക്താഭിമുഖ്യത്തിൽ സംഘടിപ്പിച്ച പുസ്തക ചർച്ച ചെമ്പേരി ദേശീയ വായനശാല ഹാളിൽ നടന്നു. ഡോ. സെബാസ്റ്റ്യൻ ഐക്കര രചിച്ച "ചാലിലച്ചൻ മലബാറിന്‍റെ കർമയോഗി' എന്ന ജീവചരിത്ര ഗ്രന്ഥമാണ് ചർച്ച ചെയ്തത്. ചെമ്പേരി ലൂർദ് മാതാ ബസിലിക്ക റെക്ടർ റവ.ഡോ.ജോർജ് കാഞ്ഞിരക്കാട്ട് ഉദ്ഘാടനം ചെയ്തു. ലൈബ്രറി കൗൺസിൽ ഏരുവേശി പഞ്ചായത്ത് നേതൃസമിതി ചെയർമാൻ ജോഷി കുന്നത്ത് അധ്യക്ഷത വഹിച്ചു. നേതൃസമിതി കൺവീനർ ടി. രാജു ആമുഖ പ്രഭാഷണവും പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ പുസ്തകാവതരണവും നടത്തി. എഴുത്തുകൂട്ടം അഖിലേന്ത്യ ഓർഗനൈസിംഗ് സെക്രട്ടറി അജിത് കൂവോട് മുഖ്യാതിഥിയായിരുന്നു. എഴുത്തുകാരായ ഷിനോജ് കെ. ആചാരി, അനീഷ് ജോസഫ്, ജോൺസൺ തുടിയൻ, ലിജു ജേക്കബ്, ടോമി ചാമക്കാലായിൽ, ജോമി ചാലിൽ എന്നിവർ ചർച്ചയിൽ പങ്കെടുത്തു.

ശ്രീകണ്ഠപുരത്ത് പാലിയേറ്റീവ് സന്ദേശ റാലി സംഘടിപ്പിച്ചു

ശ്രീകണ്ഠപുരം: സമരിറ്റൻ പാലിയേറ്റീവിന്‍റെ നേതൃത്വത്തിൽ ലോക പാലിയേറ്റീവ് ദിനത്തിന് മുന്നോടിയായി ശ്രീകണ്ഠപുരത്തും പരിസരപ്രദേശങ്ങളിലും ഉള്ള വിദ്യാഭ്യാസ സ്ഥാപനങ്ങളുടെയും സന്നദ്ധ സംഘടനകളുടെയും സഹകരണത്തോടെ പാലിയേറ്റീവ് സന്ദേശ റാലി സംഘടിപ്പിച്ചു. ശ്രീകണ്ഠപുരം എസ്ഐ പി.പി. പ്രകാശൻ ഫ്ലാഗ് ഓഫ് ചെയ്തു. വോളണ്ടിയർമാർ, ശ്രീകണ്ഠപുരം യൂണിറ്റ് എക്സ് സർവീസ് മെൻസ് ലീഗ്, ശ്രീകണ്ഠപുരത്തെയും ചെങ്ങളായിയിലെയും ആശാവർക്കർമാർ, ആരോഗ്യപ്രവർത്തകർ,സന്നദ്ധ സംഘടന പ്രതിനിധികൾ എന്നിവരും ശ്രീകണ്ഠപുരം എസ്ഇഎസ് കോളജ്, കോട്ടൂർ ഐടിഐ, ലിറ്റിൽ ഫ്ലവർ സ്കൂൾ കോട്ടൂർ, ശ്രീകണ്ഠപുരം ഗവ. ഹയർ സെക്കൻഡറി സ്കൂൾ, ഗവ. ഹൈസ്കൂൾ, ചെമ്പന്തൊട്ടി സെന്‍റ് ജോർജ് ഹൈസ്കൂൾ എന്നീ സ്കൂളുകളിൽ നിന്നുള്ള വിദ്യാർഥികളും സന്ദേശറാലിയിൽ പങ്കെടുത്തു. ശ്രീകണ്ഠപുരം ബസ് സ്റ്റാൻഡിൽ നടന്ന പൊതുസമ്മേളനത്തിൽ ഡോ. ലില്ലി അധ്യക്ഷത വഹിച്ചു. സമരിറ്റൻ ഒപ്പം കൂട്ടായ്മയുടെ മുൻ ചെയർമാൻ പ്രഫ.വി.ഡി. ജോസഫിന്‍റെ സ്മരണാർഥം കുടുംബാംഗങ്ങൾ ഏർപ്പെടുത്തിയ സ്കോളർഷിപ്പ് തുക എർവിൻ സന്തോഷിന് കൈമാറി. ഫാ. അനൂപ് നരിമറ്റത്തിൽ, ഫാ. ഷെബിൻ പന്തക്കൽ, ഫാ. അനന്ദു വില്ലിടുംപാറ, ഫാ. ബിനു പൈമ്പിള്ളിൽ സമരിറ്റൻ, ഒപ്പം പാലിയേറ്റീവ് കൂട്ടായ്മ ചെയർമാൻ കെ.വി. ശശിധരൻ സോയി ജോസഫ്, സൈജോ ജോസഫ്, ജോസ് കൊല്ലിയിൽ, പുരുഷോത്തമൻ, രാജേഷ് എന്നിവർ പ്രസംഗിച്ചു.

ഷാജിക്ക് നാടിന്‍റെ യാത്രാമൊഴി

വയനാട്ടുപറമ്പ്: സൗമ്യനും നാട്ടുകാരുടെ പ്രിയങ്കരനുമായ മണ്ണൂർ ഷാജി ജോസഫിന് ആയിരങ്ങളുടെ യാത്രാമൊഴി. ശനിയാഴ്ച വിദേശത്തുനിന്നും വന്ന തന്‍റെ സുഹൃത്തായ രതീഷിനെ കോഴിക്കോട് എയർപോർട്ടിൽനിന്നു കൂട്ടിക്കൊണ്ടുവരുമ്പോൾ തലശേരിക്കും മാഹിക്കുമിടയിൽ ഇവർ സഞ്ചരിച്ചിരുന്ന ഇന്നോവ കാർ ബസുമായി കൂട്ടിയിടിച്ചാണ് ഷാജി ജോസഫ് മണ്ണൂർ (63)മരിച്ചത്. കരുവഞ്ചാലിൽനിന്ന് എയർപോർട്ട് വരെയും തിരിച്ച് മാഹി വരെയും കാർ ഓടിച്ചിരുന്നത് ഷാജി ജോസഫായിരുന്നു. തുടർന്ന് മാഹിയിൽനിന്നു സുഹൃത്ത് രതീഷ് കാർ ഓടിക്കുകയായിരുന്നു. മൂന്ന് നാലു കിലോമീറ്റർ പിന്നിട്ടപ്പോൾ തന്നെ കാർ നിയന്ത്രണംവിട്ട് തലശേരിയിൽനിന്നു കോഴിക്കോട്ടേക്ക് പോകുകയായിരുന്ന ബസിൽ ഇടിക്കുകയായിരുന്നു. പോസ്റ്റ്മോർട്ടം നടപടികൾ പൂർത്തിയാക്കി ശനിയാഴ്ച രാത്രി തന്നെ വീട്ടിലെത്തിച്ച മൃതദേഹം ഒരു നോക്കു കാണാനായി ആയിരക്കണക്കിന് സുഹൃത്തുക്കളാണ് എത്തിയിരുന്നത്. നേരത്തെ കുടിയാന്മലയിൽ താമസിച്ചിരുന്ന ഷാജി വായാട്ടുപറമ്പ് താവുകുന്നിൽ താമസം തുടങ്ങിയിട്ട് കുറച്ചു വർഷങ്ങളെ ആയിട്ടുള്ളൂ. കരുവഞ്ചാലിൽ പിക്കപ്പ് വാഹനം ഓടിച്ച് ഉപജീവനം നടത്തി വരികയായിരുന്നു. വായാട്ടുപറമ്പ് സെന്‍റ് ജോസഫ് പള്ളിയിൽ നടന്ന സംസ്കാര ശുശ്രൂഷകൾക്ക് ഇടവക വികാരി റവ. ഡോ. തോമസ് തെങ്ങുംപള്ളിൽ മുഖ്യകാർമികത്വം വഹിച്ചു.

ശ്രീകണ്ഠപുരം ബ്ലോക്ക് കോൺഗ്രസ് കമ്മിറ്റി റോഡ് ഉപരോധിച്ചു

പയ്യാവൂർ: കോൺഗ്രസ്‌ വർക്കിംഗ്‌ പ്രസിഡന്‍റ് ഷാഫി പറമ്പിൽ എംപിയെ പേരാമ്പ്രയിലെ പോലീസ് ലാത്തിച്ചാർജിൽ പരിക്കേൽപ്പിച്ചതിൽ പ്രതിഷേധിച്ച് ശ്രീകണ്ഠപുരം ബ്ലോക്ക് കോൺഗ്രസ് കമ്മിറ്റിയുടെ ആഭിമുഖ്യത്തിൽ ശ്രീകണ്ഠപുരം ടൗണിൽ പ്രകടനവും റോഡ് ഉപരോധവും സംഘടിപ്പിച്ചു. ഉപരോധ സമരം യൂത്ത് കോൺഗ്രസ് കണ്ണൂർ ജില്ലാ പ്രസിഡന്‍റ് വിജിൽ മോഹനൻ ഉദ്ഘാടനം ചെയ്തു. കോൺഗ്രസ് ബ്ലോക്ക് പ്രസിഡന്‍റ് ഇ.വി. രാമകൃഷ്ണൻ അധ്യക്ഷത വഹിച്ചു. കണ്ണൂർ ഡിസിസി ജനറൽ സെക്രട്ടറിമാരായ ജോഷി കണ്ടത്തിൽ, കെ.പി. ഗംഗാധരൻ, ശ്രീകണ്ഠപുരം നഗരസഭ ചെയർപേഴ്സൺ ഡോ.കെ.വി. ഫിലോമിന, കോൺഗ്രസ് നേതാക്കളായ എം.ഒ. മാധവൻ, എൻ.ജെ. സ്റ്റീഫൻ, ജോസ് പരത്തനാല്‍, ബാലകൃഷ്ണൻ ചുഴലി, രാജകുമാർ ചെങ്ങളായി, നസീമ ഖാദർ എന്നിവർ പ്രസംഗിച്ചു.

കാപ്പിമലയെ ജനവാസ ടൂറിസം കേന്ദ്രമാക്കുക ലക്ഷ്യം: സജീവ് ജോസഫ് എംഎൽഎ

ആലക്കോട്: ആലക്കോട് -കാപ്പിമല റോഡ് നിർമാണ പ്രവൃത്തി ഉടൻ തുടങ്ങുമെന്ന് സജീവ് ജോസഫ് എംഎൽഎ. വന്യമൃഗശല്യവും യാത്രാദുരിതം കൊണ്ടും പ്രതിസന്ധിയിലായി നാടുവിട്ടു പോകേണ്ടി വന്ന ജനങ്ങളുടെ ശക്തമായ തിരിച്ചുവരവിനുള്ള സാധ്യതയാണ് മെക്കാഡം ടാറിംഗ് പൂർത്തിയാകുമ്പോൾ ഉണ്ടാവാൻ പോകുന്നതെന്നും, കാപ്പിമലയെ ജനവാസ ടൂറിസം കേന്ദ്രമാക്കി മാറ്റുകയാണ് ലക്ഷ്യംമെന്നും എംഎൽഎ പറഞ്ഞു. ഒറ്റത്തൈ സെന്‍റ് ആന്‍റണീസ് പാരീഷ് ഹാളിൽ റോഡ് നിർമാണത്തിന് മേൽനോട്ടം വഹിക്കാൻ വിളിച്ചുചേർത്ത ജനകീയ കമ്മിറ്റി രൂപീകരണ യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കിഫ്ബിയിൽ സമ്മർദ്ദം ചെലുത്തിയാണ് ഫണ്ട് നേടാനായതെന്നും സമയബന്ധിതമായി ടാറിംഗ് പൂർത്തീകരിക്കുമെന്നും എംഎൽഎ പറഞ്ഞു. 7.79 കിലോമീറ്റർ റോഡ് പത്തു മീറ്റർ വീതിയുള്ളതിൽ ഏഴു മീറ്റർ ടാറിംഗ് നടത്തുന്നതിനാണ് അനുമതി ലഭിച്ചത്. 40 കൾവർട്ട്, 8800 മീറ്റർ ഡ്രെയിനേജ് ഉൾപ്പെടെയുള്ള പ്രവർത്തിക്ക് 49.86 കോടി രൂപയാണ് അനുവദിച്ചത്. ഇരിക്കൂർ കൺസ്ട്രക്ഷൻ കമ്പനിയാണ് റോഡിന്‍റെ പ്രവർത്തി ഏറ്റെടുത്തിരിക്കുന്നത്. ആലക്കോട് ഗ്രാമപഞ്ചായത്ത് പ്രസിഡന്‍റ് ജോജി കന്നിക്കാട്ട് അധ്യക്ഷത വഹിച്ചു. ഫാ. ജിബിൻ വട്ടംകാട്ടേൽ, ഫാ. നിധിൻ തകിടിയേൽ, സാജൻ ജോസഫ്, ബാബു പള്ളിപ്പുറം, കെ.പി. സാബു, തുളസീധരൻ, വി.ജി. സോമൻ, ടെന്നീസ് വാഴപ്പള്ളി, എസ്.ആർ. ശ്രീക്കുട്ടൻ, കവിത ഗോവിന്ദൻ, വത്സല പ്രകാശ്, മാത്യു പുതിയേടം എന്നിവർ പ്രസംഗിച്ചു. ജോജി കന്നിക്കാട്ട് -ചെയർമാൻ, കെ.പി. സാബു -കൺവീനർ എന്നിവരുടെ നേതൃത്വത്തിൽ ജനകീയ കമ്മിറ്റി രൂപീകരിച്ചു.

മാതൃവേദി അതിരൂപത കലോത്സവം ; പേരാവൂർ മേഖലയ്ക്ക് കിരീടം

ചെമ്പേരി: സീറോ മലബാർ മാതൃവേദി തലശേരി അതിരൂപത കലോത്സവത്തിൽ- "നസ്രാണി ഫെസ്റ്റ് 2025' പേരാവൂർ മേഖല ജേതാക്കൾ. ചെമ്പേരി നിർമല സ്കൂൾ ഓഡിറ്റോറിയത്തിൽ നടന്ന ആവേശകരമായ കലാപോരാട്ടത്തിൽ നൂറ് പോയിന്‍റുകളോടെയാണ് പേരാവൂർ എവർറോളിംഗ് ട്രോഫി കരസ്ഥമാക്കിയത്. 93 പോയിന്‍റുകൾ വീതം നേടിയ പൈസക്കരി, തോമാപുരം മേഖലകൾ രണ്ടാം സ്ഥാനം പങ്കിട്ടു. 78 പോയിന്‍റുമായി എടൂർ മേഖലയ്ക്കാണ് മൂന്നാം സ്ഥാനം. യൂണിറ്റുകളിൽ മണ്ഡപം (46 പോയിന്‍റ്) ഒന്നാം സ്ഥാനവും പൈസക്കരി (28 പോയിന്‍റ്) രണ്ടാം സ്ഥാനവും ചുണ്ടപ്പറമ്പ് (27 പോയിന്‍റ്) മൂന്നാം സ്ഥാനവും സ്വന്തമാക്കി. ഇന്നലെ രാവിലെ കലോത്സവത്തിന് തുടക്കം കുറിച്ച് മാതൃവേദി അതിരൂപത പ്രസിഡന്‍റ് സിസി ആന്‍റണി പതാക ഉയർത്തി. തലശേരി അതിരൂപത പ്രോട്ടോ സിഞ്ചെല്ലൂസ് മോൺ. ആന്‍റണി മുതുകുന്നേൽ ഉദ്ഘാടനം ചെയ്തു. ചെമ്പേരി ലൂർദ് മാതാ ബസിലിക്ക റെക്ടർ റവ. ഡോ. ജോർജ് കാഞ്ഞിരക്കാട്ട്, മാതൃവേദി അതിരൂപത ഡയറക്ടർ ഫാ. ജോബി കോവാട്ട് എന്നിവർ പ്രസംഗിച്ചു. അതിരൂപതയിലെ 19 മേഖലകളിൽ നിന്നെത്തിയ ആയിരത്തിലേറെ അമ്മമാർ ഒമ്പത് വേദികളിലായി പത്ത് മത്സരയിനങ്ങളിൽ മാറ്റുരച്ചു. സുന്ദരമായ നൃത്തച്ചുവടുകളും അതിശയിപ്പിക്കുന്ന ദൃശ്യാവിഷ്കാരങ്ങളും പ്രതിഭ തെളിയിക്കുന്ന അവതരണങ്ങളും കലോത്സവത്തെ ഉജ്വലമാക്കി. വിജയികൾക്കുള്ള ട്രോഫികളും സമ്മാനങ്ങളും അതിരൂപത ചാൻസലർ റവ. ഡോ. ജോസഫ് മുട്ടത്തുകുന്നേൽ വിതരണം ചെയ്തു. മാതൃവേദി അതിരൂപത ഡയറക്ടർ ഫാ. ജോബി കോവാട്ട്, ആനിമേറ്റർ സിസ്റ്റർ ലിന്‍റ സിഎച്ച്എഫ്, ബ്രദർ ജോയൽ, കലോത്സവ കോ-ഓർഡിനേറ്റർ ലിൻസി, ജോയിന്‍റ് കോ-ഓർഡിനേറ്റർ ജിജി. അതിരൂപത പ്രസിഡന്‍റ് സിസി ആന്‍റണി, ഭാരവാഹികളായ മേഴ്‌സി വാതപ്പള്ളിൽ, വത്സമ്മ മുണ്ടിയാനിയ്ക്കൽ, റെജീന തെക്കേപ്പറമ്പിൽ, ബീന പുത്തൂർ എന്നിവർ നേതൃത്വം നൽകി. ചെമ്പേരി മേഖല പ്രസിഡന്‍റ് ശ്രീമതി ഷീബ തെക്കേടത്തിന്‍റെ നേതൃത്വത്തിലുള്ള മാതൃവേദി പ്രവർത്തകർ മത്സരാർഥികൾക്കായി വിഭവസമൃദ്ധമായ ഭക്ഷണവും മറ്റ് സൗകര്യങ്ങളും ഒരുക്കി.

എടൂർ കാരാപറന്പ് ആവിലാ പള്ളിയിൽ വിശുദ്ധ അമ്മത്രേസ്യയുടെ തിരുനാളിന് തുടക്കമായി

എടൂർ: കാരാപറമ്പ് ആവിലാപള്ളിയിൽ വിശുദ്ധ അമ്മത്രേസ്യായുടെ തിരുനാളിന് തുടക്കമായി. ആശ്രമശ്രേഷ്ഠൻ ഫാ. റാഫ്സൺ പീറ്റർ ഒസിഡി കൊടി‍യേറ്റി. തുടർന്ന് നടന്ന ആഘോഷമായ തിരുനാൾ കുർബാനയ്ക്ക് ഫാ.ജോസഫ് ഷെൽട്ടൻ മുഖ്യകാർമികത്വം വഹിച്ചു. ഇന്നും നാളെയും രാവിലെ 10 ന് തിരുനാൾ കുർബാന ഉണ്ടായിരിക്കും. ഫാ.മൈക്കിൾ പുന്നക്കൽ, ഫാ. നെൽസൺ ജോബ് എന്നിവർ കാർമികത്വം വഹിക്കും. 14 ന് ഉരുൾനേർച്ച ദിനം. അന്നേദിവസം തിരുനാൾ കുർബാനയ്ക്ക് ഫാ.പോൾ നടുവിലെതയ്യിൽ മുഖ്യകാർമികത്വം വഹിക്കും. ഫാ.സെബാസ്റ്റ്യൻ പള്ളിപ്പറമ്പിൽ വചനപ്രഘോഷണം നടത്തും. തിരുനാൾ ദിവ്യബലിക്കു ശേഷം ആയിരക്കണക്കിന് അമ്മത്രേസ്യാ ഭക്തർ പങ്കെടുക്കുന്ന ഉരുൾനേർച്ച നടക്കും. പ്രധാന തിരുനാൾ ദിനമായ 15 ന് രാവിലെ 8.30 ന് ശുശ്രൂഷകൾ ആരംഭിക്കും.ആഘോഷമായ തിരുനാൾ ദിവ്യബലിക്ക് ഫാ.റാഫ്സൺ പീറ്റർ കാർമികത്വം വഹിക്കും ഫാ.ബാബു പോൾ വചനപ്രഘോഷണം നടത്തും. തിരുസ്വരൂപ പ്രദക്ഷിണവും പതിനായിരക്കണക്കിന് ഭക്തർ പങ്കെടുക്കുന്ന ആഘോഷമായ ഊട്ടു നേർച്ചയുമുണ്ടാകും. തിരുനാൾ കൊടിയിക്കദിവസമായ 19ന് വിശുദ്ധ കുർബനയ്ക്ക് ഫാ.ജോജോ ആന്‍റണി കാർമികത്വം വഹിക്കും. വിശുദ്ധ അമ്മത്രേസ്യയുടെ യാത്രാദണ്ഡ് വന്ദനത്തിനുള്ള സൗകര്യവും അന്ന് ഉണ്ടായിരിക്കും. തിരുനാൾ ശുശൂഷകൾക്ക് ഫാ.റാഫ്സൺ പീറ്റർ, ഫാ.സെബാസ്റ്റ്യൻ ബേബി കാക്കരി, ഫാ.ജോസഫ് ഇളയിടത്ത് എന്നിവർ നേതൃത്വം നല്കും.

ആൽഫാ ഇൻസ്റ്റിറ്റ്യൂട്ടിൽ ബിരുദദാന ചടങ്ങ് നടത്തി

തലശേരി: ആൽഫാ ഇൻസ്റ്റിറ്റ്യൂട്ട് ഓഫ് റിലിജിയസ് സയൻസസിലെ ബിരുദദാന ചടങ്ങ് തലശേരി സാൻജോസ് മെട്രോപോളിറ്റൻ സ്കൂൾ ഓഡിറ്റോറിയത്തിൽ ആർച്ച് ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്തു. തിയോളജി എന്നാൽ ദൈവം മനുഷ്യനു വേണ്ടി ചെയ്തവയെ കുറിച്ചുള്ള ഓർമയാണെന്നുആൽഫാ ഇൻസ്റ്റിറ്റ്യൂട്ട് ചാൻസിലർ കൂടിയായ മാർ ജോസഫ് പാംപ്ലാനി പറഞ്ഞു. കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി മുഖ്യാതിഥിയായിരുന്നു. ദൈവശാസ്ത്ര പഠനത്തിൽ അല്മായർ കാണിക്കുന്ന താത്പര്യം അഭിനന്ദനാർഹമാണെന്ന് ബിഷപ് ഡോ. ഡെന്നിസ് കുറുപ്പശേരി പറഞ്ഞു. ഡിപ്ലോമ, ബിരുദം, ബിരുദാനന്തര ബിരുദം എന്നീ വിഭാഗങ്ങളിലായി വിവിധ സംസ്ഥാനങ്ങളിൽ നിന്നുള്ള 98 പേരാണ് കോഴ്സ് പൂർത്തിയാക്കി സർട്ടിഫിക്കറ്റുകൾ സ്വീകരിച്ചത്. ഇൻസ്റ്റിറ്റ്യൂട്ട് ഡയറക്ടർ റവ. ഡോ. മാത്യു കൊട്ടുകാപ്പള്ളി, പ്രസിഡന്‍റ് റവ. ഡോ. ഫിലിപ്പ് കവിയിൽ, ഡീൻ ഓഫ് സ്റ്റഡീസ് റവ. ഡോ. ജോജി കാക്കരമറ്റത്തിൽ, എക്സാമിനേഷൻ കൺട്രോളർ സിസ്റ്റർ ഡോ. ജിൻസി വള്ളിപ്പറമ്പിൽ എസ്എബിഎസ്, അതിരൂപത ചാൻസലർ റവ. ഡോ ബിജു മുട്ടത്തൂകുന്നേൽ എന്നിവർ പ്രസംഗിച്ചു.

വീർപ്പാടും ചെടിക്കുളത്തും കാട്ടുപോത്ത്

ഇരിട്ടി: ആറളം പഞ്ചായത്തിലെ വീർപ്പാട്, ചെടിക്കുളം ഭാഗങ്ങളിലെ ജനവാസ മേഖലയിൽ കാട്ടുപോത്തിറങ്ങി. ശനിയാഴ്ച രാവിലെ വീർപ്പാട് ഉരുപ്പുംകുണ്ടിൽ പോണാട്ട് തോമസിന്‍റെ പറമ്പിലാണ് ആദ്യം കാട്ടുപോത്തിനെ കണ്ടത്. തുടർന്ന് നാട്ടുകാരും വനപാലക സംഘവും ചേർന്ന് പോത്തിനെ തുരത്തി ആറളം ഫാമിലേക്ക് കയറ്റിവിട്ടു. ഇവിടെനിന്ന് ഇതിനെ വനത്തിലേക്ക് തുരത്തിയതായി വനംവകുപ്പധികൃതരും അറിയിച്ചു. കഴിഞ്ഞദിവസം ആറളം ഫാം പുനരധിവാസ മേഖലയിൽ കാട്ടുപോത്തിനെ കണ്ടിരുന്നു. ഈ കാട്ടുപോത്ത് പുഴകടന്ന് വീർപ്പാട് ഉരുപ്പുംകുണ്ട് മേഖലയിൽ എത്തിയതാകാമെന്നാണ് വനംവകുപ്പിന്‍റെ നിഗമനം. ഏതാനും ദിവസങ്ങൾക്കു മുന്പ് മട്ടന്നൂർ മരുതായിയിൽ നിന്ന് കാട്ടുപോത്തിനെ മയക്കുവെടിവച്ച് പിടികൂടി വനത്തിൽ വിട്ടിരുന്നു. ഈ കാട്ടുപോത്തിനെ ആറളം ഭാഗത്താണ് വിട്ടതെന്ന് നാട്ടുകാർ ആരോപിച്ചിരുന്നു. ഇതാണ് കഴിഞ്ഞ ദിവസം ആറളത്ത് എത്തിയതെന്ന പരാതി നിലനില്‌ക്കെയാണ് ഇപ്പോൾ വീർപ്പാട്, ചെടിക്കുളം ഭാഗങ്ങളിലും കാട്ടുപോത്ത് എത്തിയത്. കാട്ടുപോത്തിനെ കണ്ടതോടെ പ്രദേശവാസികൾ ഭീതിയിലാണ്.

കണ്ണൂർ ചിന്മയ ജേതാക്കൾ; ശ്രീകണ്ഠപുരം മേരിഗിരി റണ്ണറപ്പ്

ശ്രീകണ്ഠപുരം: സിബിഎസ്ഇ ജില്ലാ കലോത്സവത്തിൽ 786 പോയിന്‍റോടെ കണ്ണൂർ ചിന്മയ വിദ്യാലയ ജേതാക്കളായി. ആതിഥേയരായ ശ്രീകണ്ഠപുരം മേരിഗിരി ഇംഗ്ലീഷ് മീഡിയം സ്കൂളാണ് 747 പോയിന്‍റോടെ റണ്ണറപ്പ്. 683 പോയിന്‍റുമായി കണ്ണൂർ ഭാരതീയ വിദ്യാഭവൻ മൂന്നാം സ്ഥാനം കരസ്ഥമാക്കി. കാറ്റഗറി രണ്ടിൽ (യുപി) 118 പോയിന്‍റോടെ കണ്ണൂർ ചിന്മയ വിദ്യാലയം ഒന്നാം സ്ഥാനവും 117 പോയിന്‍റോടെ ശ്രീനാരായണ വിദ്യാമന്ദിറും ഭാരതീയ വിദ്യാഭവനും രണ്ടാം സ്ഥാനവും കരസ്ഥമാക്കി. 107 പോയിന്‍റോടെ കണ്ണൂർ ഉർസുലൈൻ സീനിയർ സെക്കൻഡറി സ്കൂളാണ് മൂന്നാം സ്ഥാനത്ത്. കാറ്റഗറി ഒന്നിൽ (എൽപി ) 66 പോയിന്‍റോടെ മേരിഗിരി ഇംഗ്ലീഷ് മീഡിയം സ്കൂൾ ഒന്നാം സ്ഥാനത്തെത്തി. 59 പോയിന്‍റോടെ കണ്ണൂർ ചിന്മയ വിദ്യാലയയും 58 പോയിന്‍റോടെ പരിയാരം ഉർസുലൈൻ ഇംഗ്ലീഷ് മീഡിയം സ്കൂളും രണ്ടും മൂന്നും സ്ഥാനം നേടി. കാറ്റഗറി മൂന്നിൽ (ഹൈസ്കൂൾ) 234 പോയിന്‍റോടെ കണ്ണൂർ ചിന്മയ വിദ്യാലയ ഒന്നാം സ്ഥാനം നേടി. 228 പോയിന്‍റുമായി കണ്ണൂർ ഉർസുലൈൻ സീനിയർ സെക്കൻഡറി സ്കൂൾ രണ്ടും 213 പോയിന്‍റുമായി മട്ടന്നൂർ ശ്രീശങ്കര വിദ്യാപീഠം സീനിയർ സെക്കൻഡറി സ്കൂൾ മൂന്നും സ്ഥാനം നേടി. കാറ്റഗറി നാലിൽ (ഹയർ സെക്കൻഡറി) 257 പോയിന്‍റുമായി മേരിഗിരി ഇംഗ്ലീഷ് മീഡിയം സ്കൂളാണ് മുന്നിൽ. 230 പോയിന്‍റുമായി ഇന്ദിരാഗാന്ധി പബ്ലിക് സ്കൂളും 227 പോയിന്‍റുമായി കണ്ണൂർ ചിന്മയ വിദ്യാലയവും രണ്ടും മൂന്നും സ്ഥാനം നേടി. 16 വേദികളിൽ മൂന്നു ദിനങ്ങളിലായി നടന്ന കലാമാമാങ്കത്തിന്‍റെ സമാപന സമ്മേളനം ശ്രീകണ്ഠപുരം നഗരസഭാധ്യക്ഷ ഡോ. കെ.വി. ഫിലോമിന ഉദ്ഘാടനം ചെയ്തു. കണ്ണൂർ സഹോദയ സ്കൂൾ കോംപ്ലക്സ് ട്രഷറർ സിസ്റ്റർ അർച്ചന പോൾ അധ്യക്ഷത വഹിച്ചു. ജനറൽ സെക്രട്ടറി ടി.പി. സുരേഷ് പൊതുവാൾ, പ്രസിഡന്‍റ് കെ.പി. സുബൈർ, സ്കൂൾ അക്കാദമി സെക്രട്ടറി പി. റിനി, മേരിഗിരി സ്കൂൾ പ്രിൻസിപ്പൽ ബ്രദർ റെജി സ്കറിയ സിഎസ്ടി, മാനേജർ ബ്രദർ ജോണി വെട്ടംതടത്തിൽ സിഎസ്ടി, ഫാ. സിനോജ്, പിടിഎ പ്രസിഡന്‍റ് ഡോ. മനു ജോസഫ്, സഹോദയ എക്സിക്യൂട്ടീവ് അംഗങ്ങൾ എന്നിവർ പ്രസംഗിച്ചു. കലോത്സവ പ്രതിഭകൾ കാറ്റഗറി ഒന്ന്: നക്ഷത്ര സൂരജ് (ഭാരതീയ വിദ്യാഭവൻ കണ്ണൂർ), മനുശങ്കർ ലോഹി (കസ്തൂർബാ പബ്ലിക് സ്കൂൾ), കാറ്റഗറി രണ്ട്: സമൃദ്ധി സിംഗ് (ഉർസുലൈൻ സീനിയർ സെക്കൻഡറി സ്കൂൾ കണ്ണൂർ), കാറ്റഗറി മൂന്ന്: ധ്രുവ ദയാനന്ദ് (ഉർസുലൈൻ സീനിയർ സെക്കൻഡറി സ്കൂൾ കണ്ണൂർ), ആലാപ് വിനോദൻ (അമൃത വിദ്യാലയം തലശേരി). കാറ്റഗറി നാല്: യു.കെ. മുഹമ്മദ് അംജദ് (മേരിഗിരി ഇംഗ്ലീഷ് മീഡിയം സ്കൂൾ), ഐഷ ധൻഹ ( ഇന്ദിരാഗാന്ധി പബ്ലിക് സ്കൂൾ).

വികസന മുരടിപ്പിനും അഴിമതിക്കും എതിരെ കോൺഗ്രസ് കുറ്റവിചാരണ സദസ് സംഘടിപ്പിച്ചു

മണക്കടവ്: ഉദയഗിരി പഞ്ചായത്ത് ഭരണസമിതിയുടെ വികസന മുരടിപ്പിനും അഴിമതിക്കും കെടുകാര്യസ്ഥതക്കുമെതിരെ ഉദയഗിരി മണ്ഡലം കോൺഗ്രസ് കമ്മിറ്റി കുറ്റവിചാരണ സദസ് സംഘടിപ്പിച്ചു. മണക്കടവിൽ നടത്തിയ സദസ് സജീവ് ജോസഫ് എംഎൽഎ ഉദ്ഘാടനം ചെയ്തു. മണ്ഡലം പ്രസിഡന്‍റ് ജോയിച്ചൻ പള്ളിയാലിൽ അധ്യക്ഷത വഹിച്ചു. കെപിസിസി സെക്രട്ടറി ചന്ദ്രൻ തില്ലങ്കേരി മുഖ്യപ്രഭാഷണം നടത്തി. മോഹനൻ പറപ്പള്ളി കുറ്റപത്രം തെളിവുകളുടെയും ഓഡിറ്റ് റിപ്പോർട്ടിന്‍റെയും അടിസ്ഥാനത്തിൽ അവതരിപ്പിച്ചു. ഡിസിസി സെക്രട്ടറി തോമസ് വക്കത്താനം, ബെന്നി പീടികയ്ക്കൻ, ജോസ് പറയൻകുഴി, സോജൻ ഒഴുകയിൽ, സ്റ്റെനി മാപ്രക്കാവിൽ , അജിത് വരിക്കമാക്കൽ, ജോസി സഖറിയാസ്, ബേബി കോയിക്കൽ, അജയൻ പാറയിൽ , സിബിച്ചൻ പുലിയുറുമ്പിൽ , ഐസക് വെള്ളമറ്റം, സരിത ജോസ്, ടെസി ആലുംമൂട്ടിൽ, ഷൈലജ സുനിൽ, സിന്ധു തോമസ് എന്നിവർ പ്രസംഗിച്ചു.

തളിപ്പറമ്പിൽ യുഡിഎഫ് ജനകീയ സദസ് 13 ന്

തളിപ്പറമ്പ്: തളിപ്പറമ്പ് വ്യാപാര സമുച്ചയത്തിലെ ഒരു സ്ഥാപനത്തിൽ ഉണ്ടായ തീ മറ്റു സ്ഥാപനങ്ങളിലേക്ക് വ്യാപിച്ച് കോടികളുടെ നഷ്ടം ഉണ്ടാകാൻ ഇട‍യാക്കിയത് അഗ്നിശമന സേനയുടെയും പൊലീസിന്‍റേയും സമീപനത്തിലെ പോരായ്മ കാരണമാണെന്ന് യുഡിഎഫ് തളിപ്പറമ്പ് മുനിസിപ്പൽ കമ്മിറ്റി ഭാരവാഹികൾ പത്രസമ്മേളനത്തിൽ ആരോപിച്ചു. ചടുലമായ രക്ഷാപ്രവർത്തനം നടത്തുന്നതിൽ അഗ്നിശമന സേനയ്ക്ക് വീഴ്ച്ചയുണ്ടായി. ആദ്യ ഒരു മണിക്കൂർ വേണ്ട രീതിയിൽ ഉപയോഗപ്പെടുത്താൻ സാധിച്ചില്ല. വിലപ്പെട്ട സമയം പാഴാക്കിയതാണ് തീപിടിത്തം വ്യാപിക്കാൻ ഇടയായത്. ആദ്യം എത്തിയ തളിപ്പറമ്പ് അഗ്നിശമന യൂണിറ്റിന്‍റെ വാഹനങ്ങളിൽ ശക്തിയായി വെള്ളം പമ്പ് ചെയ്യുന്നതിനുള്ള സൗകര്യം ഉണ്ടായിരുന്നില്ല. മറ്റു സ്ഥലങ്ങളിൽ നിന്നെത്തിയ അഗ്നി ശമന യൂണിറ്റുകൾ ചേർന്നാണ് തീ നിയന്ത്രണ വിധേയമാക്കിയത്. വർഷങ്ങളായി പ്രവർത്തിക്കുന്ന തളിപ്പറമ്പ് യൂണിറ്റിന് മതിയായ അഗ്നി ശമന സംവിധാനങ്ങൾ ഇല്ലാത്തത് ഗൗരവകരമായ വിഷയമാണ്. പൊലീസിന്‍റെ ഭാഗത്ത് നിന്ന് ഗതാഗത തടസം ഒഴിവാക്കാനുള്ള ഇടപെടൽ ഉണ്ടായില്ല. ഗതാഗത തടസം കാരണം അഗ്നിശമന സേനയുടെ വാഹനങ്ങൾ തളിപ്പറമ്പിൽ എത്താൻ വൈകി. ഇത് ഗതാഗത നിയന്ത്രണത്തിലുള്ള അപാകതയാണ്. നിരുത്തരവാദ പരമായ നടപടിയാണ് തളിപ്പറമ്പിലെ അഗ്നിബാധ രൂക്ഷമാക്കിയതെന്ന് അവർ ആരോപിച്ചു. പ്രതിഷേധ സൂചകമായി ടൗൺ സ്ക്വയറിൽ തിങ്കളാഴ്ച്ച ഉച്ചയ്ക്ക് ശേഷം 3.30 ന് യുഡിഎഫ് തളിപ്പറമ്പ് മുനിസിപ്പൽ കമ്മറ്റി ജനകീയ സദസ് സംഘടിപ്പിക്കുമെന്നും നേതാക്കൾ പറഞ്ഞു. പത്രസമ്മേളനത്തിൽ യുഡിഎഫ് തളിപ്പറമ്പ് മുനിസിപ്പൽ കമ്മറ്റി നേതാക്കളായ പി. മുഹമ്മദ് ഇക്ബാൽ, കെ.വി. മുഹമ്മദ് കുഞ്ഞി, കെ. മുഹമ്മദ് ബഷീർ, രജനി രമാനന്ദ്, ടി.ആർ. മോഹൻദാസ്, എം.എൻ. പൂമംഗലം, സി.സി. ശ്രീധരൻ എന്നിവർ പങ്കെടുത്തു.

സ്വർണപ്പാളി മോഷണം: കോൺഗ്രസ് പ്രതിഷേധ പ്രകടനം നടത്തി

തേർത്തല്ലി: ശബരിമല ദ്വാരപാലക ശില്‌പങ്ങളിലെ സ്വർണപ്പാളി കാണാതായ സംഭവത്തിൽ ഉത്തരവാദികളായ ദേവസ്വം മന്ത്രിയും ദേവസ്വം ബോർഡ് ചെയർമാനും രാജിവയ്ക്കണമെന്നാവശ്യപ്പെട്ട് തേർത്തല്ലി മണ്ഡലം കോൺഗ്രസ് കമ്മിറ്റി തേർത്തല്ലി ടൗണിൽ പ്രതിഷേധ പ്രകടനം നടത്തി. മണ്ഡലം കോൺഗ്രസ് പ്രസിഡന്‍റ് റോയി ചക്കാനിക്കുന്നേൽ, ഐസക് മുണ്ടിയാങ്കൽ, വത്സമ്മ വാണിശേരിൽ, ബിനേഷ് പച്ചാണി, എലിസബത്ത് നെല്ലുവേലിൽ, മൃദുല രാജഗോപാൽ, ബിനി കൊല്ലംകുന്നേൽ, സി.സി. രാജു, ബിനു സ്രാമ്പിക്കൽ, ബെന്നി തോമസ്, ജമാൽ, ഷാജി പാലയ്ക്കൽ, കെ.വി. കുഞ്ഞമ്പു, ബെന്നി നല്ലിവീട്ടിൽ, ബിജു മുളന്താനം എന്നിവർ നേതൃത്വം നല്കി.

പ്രവാസി കോൺഗ്രസ് പ്രതിഷേധ ധർണ നടത്തി

തളിപ്പറമ്പ്: നോർക്ക കെയർ ആരോഗ്യ ഇൻഷുറൻസ് പദ്ധതിയിൽ മടങ്ങിയെത്തിയ പ്രവാസികളെ ഉൾപ്പെടുത്താത്തതിൽ പ്രതിഷേധിച്ച് കേരള പ്രദേശ് പ്രവാസി കോൺഗ്രസ് തളിപ്പറമ്പ് ബ്ലോക്ക് കമ്മറ്റിയുടെ നേതൃത്വത്തിൽ ധർണ നടത്തി. കണ്ണൂർ എയർപോർട്ടിന് പോയിന്‍റ് ഓഫ് കോൾ അനുവദിച്ച് പ്രവാസികളുടെ യാത്രാദുരിതം പരിഹരിക്കണമെന്നും, നിത്യോപയോഗ സാധനങ്ങളുടെ വിലക്കയറ്റം തടയണമെന്നും നേതാക്കൾ ആവശ്യപ്പെട്ടു. ബ്ലോക്ക് പ്രസിഡന്‍റ് ക്ലീറ്റസ് ജോസിന്‍റെ അധ്യക്ഷതയിൽ നടന്ന പ്രതിഷേധ ധർണ കെപിസിസി അംഗം വി.പി. അബ്ദുൽ റഷീദ് ഉദ്ഘാടനം ചെയ്തു. ടി. ജനാർദനൻ മുഖ്യ പ്രഭാഷണം നടത്തി. നൗഷാദ് ബ്ലാത്തൂർ, ഇ.ടി. രാജീവൻ, മുഹമ്മദലി കൂടാളി, എം.എൻ. പൂമംഗലം, പി.പി. മോഹനാംഗൻ, രഘുനാഥ് തളിയിൽ, ടി. ബാലകൃഷ്ണൻ, അമൽ കുറ്റ്യാട്ടൂർ, കെ. ആലിക്കുഞ്ഞി, സജി ഓതറ, പ്രമീള രാജൻ, പി. ആദംകുട്ടി, വൽസൻ കടമ്പേരി , പ്രജോഷ് ആന്തൂർ, ജയ്സൺ ജോർജ്, അഷ്റഫ്, സുജാത, എ.കെ. ബാലകൃഷ്ണൻ എന്നിവർ പ്രസംഗിച്ചു. നൗഷാദ്, രവീന്ദ്രൻ,രാജു സിറിയക്, അജയകുമാർ, സതീഷ് , ഷബീർ കുറ്റിക്കോൽ, മുസ്തഫ, വി.വി. നാരായണൻ, മധു അമ്മൻ കോവിൽ എന്നിവർ നേതൃത്വം നല്കി.

തലശേരിയിൽ നിന്നും ബംഗളൂരുവിലേക്ക് കെഎസ്ആർടിസിയുടെ എസി ബസ്

തലശേരി: തലശേരി-ബംഗളൂരു റൂട്ടിൽ കെഎസ്ആർടിസി പുതിയ എസി ബസ് സർവീസ് നടത്തും. തലശേരി ഡിപ്പോവിന് അനുവദിച്ച ബസിന്‍റെ ഫ്ലാഗ് ഓഫ് സ്പീക്കർ എ.എൻ. ഷംസീർ നിർവഹിച്ചു. എല്ലാ ദിവസവും രാത്രി 9.30 ന് തലശേരിയിൽ നിന്നും ബംഗളൂരുവിലേക്കും ബംഗളൂരുവിൽ നിന്ന് രാത്രി 9.45ന് തലശേരിയിലേക്കും സർവീസ് നടത്തുന്നതിനായി രണ്ടു ബസുകളാണ് അനുവദിച്ചത്. ഒരാൾക്ക് 1060 രൂപയാണ് ടിക്കറ്റ് നിരക്ക്. ഓൺലൈനായി എന്‍റെ കെഎസ്ആർടിസി ആപ്പ് വഴിയും ബുക്ക് ചെയ്യാം. 50 സീറ്റോട് കൂടിയുള്ള ബസിൽ എല്ലാ സീറ്റിലും മൊബൈൽ ചാർജിംഗ് പോയിന്‍റ്, വൈഫൈ സംവിധാനം, വീഡിയോ, ഓഡിയോ സിസ്റ്റം എന്നീ ആധുനിക സൗകര്യങ്ങളുമുണ്ട്. ഫ്ലാഗ് ഓഫ് ചടങ്ങിൽ അസി. ട്രാൻസ്പോർട്ട് ഓഫീസർ മുഹമ്മദ് റഷീദും പങ്കെടുത്തു.

ഇരിട്ടി ഉപജില്ലാ ശാസ്ത്ര-ഗണിത ശാസ്ത്രമേള കൊട്ടിയൂരിൽ

കേളകം: ഇരിട്ടി ഉപജില്ലാ ശാസ്ത്ര-ഗണിതശാസ്ത്ര-സാമൂഹ്യശാസ്ത്ര - പ്രവൃത്തിപരിചയ- ഐടി മേള 13, 14 തീയതികളിൽ കൊട്ടിയൂർ ഐജെഎം ഹയർ സെക്കൻഡറി സ്കൂളിൽ നടക്കുമെന്ന് കൊട്ടിയൂർ ഐജെഎം ഹയർ സെക്കൻഡറി സ്കൂൾ പ്രിൻസിപ്പൽ എം.യു. തോമസ്, മുഖ്യാധ്യാപകൻ തോമസ് കുരുവിള, സ്കൂൾ പിപിടിഎ പ്രസിഡന്‍റ് ബോജോ തോമസ്, പ്രോഗ്രാം കമ്മിറ്റി കൺവീനർ എം.ജെ. ലിസി തുടങ്ങിയവർ കേളകത്ത് പത്രസമ്മേളനത്തിൽ അറിയിച്ചു. ഉപജില്ലയിലെ നൂറിലധികം യുപി, എച്ച്എസ്, വിദ്യാലയങ്ങളിൽ നിന്നും 6000 ത്തോളം വിദ്യാർഥികൾ പങ്കെടുക്കും. അഞ്ച് വേദികളിലായാണ് മേള നടക്കുന്നത്. വേദി ഒന്ന് ഐജെഎം ഹയർ സെക്കൻഡറി സ്കൂൾ കൊട്ടിയൂർ, വേദി രണ്ട് സൺഡേ സ്കൂൾ ചുങ്കക്കുന്ന്, വേദി മൂന്ന് ഗവൺമെന്‍റ് യുപി സ്കൂൾ ചുങ്കക്കുന്ന്, വേദി നാല് ഗവൺമെന്‍റ് യുപി സ്കൂൾ തലക്കാണി, വേദി 5 എൻഎസ്എസ്കെയുപി സ്കൂൾ കൊട്ടിയൂർ എന്നിവിടങ്ങളിൽ നടക്കും. മേളയുടെ ഉദ്ഘാടനം രാവിലെ 11 ന് കൊട്ടിയൂർ ഐജെഎം ഹയർ സെക്കൻഡറി സ്കൂളിൽ നടക്കും. സ്കൂൾ മാനേജർ റവ.ഫാ. സജി പുഞ്ചയിൽ അധ്യക്ഷത വഹിക്കും. പേരാവൂർ ബ്ലോക്ക് പഞ്ചായത്ത് പ്രസിഡന്‍റ് കെ. സുധാകരൻ ഉദ്ഘാടനം ചെയ്യും. എഇഒ സി.കെ. സത്യൻ മേള വിശദീകരിക്കും. 14-ന് വൈകുന്നേരം നാലിന് സമാപന സമ്മേളനം കൊട്ടിയൂർ ഹയർ സെക്കൻഡറി സ്കൂളിൽ നടക്കും. കൊട്ടിയൂർ പഞ്ചായത്ത് പ്രസിഡന്‍റ് റോയ് നമ്പുടാകം സമാപന സമ്മേളനത്തിന്‍റെ ഉദ്ഘാടനം നിർവഹിക്കും.

കത്തോലിക്കാ കോൺഗ്രസ് അവകാശ സംരക്ഷണ ജാഥയ്ക്ക് 15ന് ചുങ്കക്കുന്നിൽ സ്വീകരണം

കൊട്ടിയൂർ: കത്തോലിക്കാ കോൺഗ്രസ് കാസർഗോഡ് നിന്നും തിരുവനന്തപുരത്തേക്ക് നടത്തുന്ന അവകാശ സംരക്ഷണയാത്രയ്ക്ക് 15ന് ചുങ്കക്കുന്നിൽ സ്വീകരണം നൽകും. ഭരണഘടന സംരക്ഷിക്കുക, വന്യമൃഗ ആക്രമണങ്ങളിൽ നിന്നും സംരക്ഷിക്കുക, കാർഷികോത്പന്നങ്ങൾക്ക് വിലസ്ഥിരത ഉറപ്പാക്കുക, വിദ്യാഭ്യാസ ന്യൂനപക്ഷ അവഗണന അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് ജാഥ നടത്തുന്നത്. 15 ന് രാവിലെ 7.30 ന് ചുങ്കക്കുന്ന് ഫാത്തിമ മാതാ പള്ളി ഫൊറോനയിലെ വിവിധ ഇടവകകളുടെ നേത്യത്വത്തിൽ സ്വീകരണം നൽകുമെന്ന് കത്തോലിക്ക കോൺഗ്രസ് ചുങ്കക്കുന്ന് മേഖലാ കമ്മിറ്റി ഭാരവാഹികൾ പത്രസമ്മേളനത്തിൽ അറിയിച്ചു. ഫൊറോന വികാരി ഫാ. പോൾ കൂട്ടാലയുടെ അധ്യക്ഷതയിൽ ചേർന്ന യോഗത്തിൽ 101 അംഗ സംഘാടകസമിതി രൂപികരിച്ചു. ഫാ. പോൾ കൂട്ടാല -രക്ഷാധികാരി, ഫാ. ടോമി പുത്തൻപുരക്കൽ -ചെയർമാൻ , മാത്യു കൊച്ചുതറയിൽ -കൺവീനർ), ജിൽസ് മേക്കൽ, ജോൺസ് തൊട്ടിയിൽ, പോൾ ചീരം വേലിയിൽ, സാലി കണ്ണന്താനം, ബിജു പൂയ്‌കുന്നേൽ -വൈസ് ചെയർമാൻമാർ, സിസ്റ്റർ ജിൻസി പോൾ എസ്എച്ച് , സിസ്റ്റർ വിമല എസ്‌സി, ജോർജ് കോട്ടൂർ, ജോസ് നമ്പേലിൽ, ത്രേസ്യാകുട്ടി കോടിയാടൻ, മിനി കൊട്ടാരത്തിൽ, ജെയ്‌സൺ നിരപത്ത്, ജോസഫ് കുടാച്ചിറ, ജോസഫ് ആഞ്ഞിലിവേലിൽ, സോണി പൂത്തറ, ജോജി പുന്നാട, ഷാജി തെങ്ങുംപള്ളിൽ, ജിം നമ്പൂടാകം, ഷാജു കുന്നേൽ, വിൻസൻ കണ്ണംപള്ളിൽ, വിൽസൺ വാഹനി, സജി ആനിത്തോട്ടം എന്നിവർ വിവിധ കമ്മിറ്റി അംഗങ്ങളായി 101 അംഗ സംഘാടക സമിതി രൂപികരിച്ചു. പത്രസമ്മേളനത്തിൽ ഫാ. ടോമി പുത്തൻപുര , മാത്യു കൊച്ചുതറയിൽ, ജോൺസ് കുര്യാക്കോസ്, ജിൽ മേക്കൽ, ജോസഫ് ആഞ്ഞിലിവേലിൽ എന്നിവർ പങ്കെടുത്തു.

ഭീമമായ പിഴ ചുമത്തുന്ന ന‌ടപടി അവസാനിപ്പിക്കണം: ബസ് ഓപ്പറേറ്റേഴ്സ് ഓർഗനൈസേഷൻ

കണ്ണൂർ: നിസാര കാര്യങ്ങൾക്കു പോലും പകപോക്കൽ മനോഭാവത്തോടെ പോലീസും മോട്ടോർവാഹന വകുപ്പും സ്വകാര്യ ബസുകൾക്കു മേൽ ഭീമമായ പിഴ ചുമത്തുന്ന നടപടി അവസാനിപ്പിക്കണമെന്നും പൊട്ടിത്തകർന്ന റോഡുകൾ ഗതാഗതയോഗ്യമാക്കാൻ നടപടികൾ സ്വീകരിക്കണമെന്നും കണ്ണൂർ ജില്ലാ ബസ് ഓപ്പറേറ്റേഴ്സ് ഓർഗനൈസേഷൻ വാർഷിക ജനറൽ ബോഡിയോഗം ആവശ്യപ്പെട്ടു. ഇക്കോസ് ഓഡിറ്റോറയത്തിൽ നടന്ന യോഗത്തിന് പ്രസിഡന്‍റ് പി.കെ. പവിത്രൻ അധ്യക്ഷത വഹിച്ചു. ലിമിറ്റഡ് സ്റ്റോപ്പ് ബസുകളുടെ പെർമിറ്റ് പുതുക്കി നൽകുക, വിദ്യാർഥികളുടെ കൺസഷൻ നിരക്ക് വർധിപ്പിക്കുക എന്നീ ആവശ്യങ്ങളിൽ സർക്കാർ കാണിക്കുന്ന നിലപാടിൽ യോഗം പ്രതിഷേധം രേഖപ്പെടുത്തി. കണ്ണൂർ-തലശേരിറൂട്ടിൽ സർവീസ് നടത്തുന്ന ബസുകൾക്ക് നടാൽ ഒ.കെ. യുപി സ്കൂൾ പരിസരത്ത് അണ്ടർ പാസ് നിർമിച്ചു യാത്ര പ്രശ്നത്തിന് പരിഹാരമുണ്ടാക്കാൻ ഒരു നടപടിയും സ്വീകരിക്കാത്തതിൽ യോഗം ആശങ്ക രേഖപ്പെടുത്തി. പുതിയതെരു ട്രാഫിക പരിഷ്കരണത്തോടനുബന്ധിച്ച് ട്രാഫിക് റഗുലേറ്ററി കമ്മിറ്റി തീരുമാനം അടിയന്തിരമായി നടപ്പാക്കണമെന്നും യോഗം ആവശ്യപ്പെട്ടു. 25ന് നടക്കുന്ന ജില്ലാ സമ്മേളനവും കുടുംബ സംഗമവും വിജയിപ്പിക്കുന്നതിനായി പി.കെ. പവിത്രൻ ചെയർമാനും ടി. രാധാകൃഷ്ണൻ ജനറൽ കൺവീനറായും 25 അംഗ സ്വാഗതസംഘം രൂപീകരിച്ചു. ജനറൽ സെക്രട്ടറി ഒ. പ്രദീപൻ, സി. മോഹനൻ, ടി. രാധാകൃഷ്ണൻ, എം. കെ. അസീൽ, എസ്. അഷറഫ് എന്നിവർ പ്രസംഗിച്ചു.

കണ്ണൂർ പൈതൃകോത്സവം: ലോഗോ പ്രകാശനം ചെയ്തു

കണ്ണൂർ: പുരാവസ്തു, പുരാരേഖ, മ്യൂസിയം വകുപ്പുകളുടെ സംയുക്ത ആഭിമുഖ്യത്തിൽ 15 മുതൽ 27 വരെ കണ്ണൂരിൽ സംഘടിപ്പിക്കുന്ന പൈതൃകോത്സവത്തിന്‍റെ ലോഗോ പ്രകാശനം വകുപ്പു മന്ത്രി കടന്നപ്പള്ളി രാമചന്ദ്രൻ തിരുവനന്തപുരത്ത് നിർവഹിച്ചു. കോഴിക്കോട് പഴശിരാജാ മ്യൂസിയം ഓഫീസർ കെ. കൃഷ്ണരാജാണ് ലോഗോ രൂപകല്പന ചെയ്തത്. കേരളം പിന്നിട്ട ഏഴുപതിറ്റാണ്ട് എന്ന വിഷയത്തിൽ അൻപതോളം വരുന്ന ഗ്രന്ഥശാലകളിൽ നടക്കുന്ന പ്രഭാഷണ പരമ്പരയോടെയാണ് പൈതൃകോത്സവ പരിപാടകളുടെ തുടക്കം. 23 മുതൽ 27 വരെ ഗാന്ധിജിയുടെ ജീവിതസന്ദർഭങ്ങളെ അടിസ്ഥാനമാക്കി മുരളി ചീരോത്ത്, പി.എൻ. ഗോപീകൃഷ്ണൻ എന്നിവർ ക്യുറേറ്റ് ചെയ്ത ഗാന്ധി പ്രദർശനം മഹാത്മാമന്ദിരത്തിലും മൂന്നു വകുപ്പുകളുടെ നേതൃത്വത്തിലുള്ള പൈതൃക പ്രദർശനം ടൗൺ സ്ക്വയറിലും നടക്കും. മുഖ്യവേദിയായ ടൗൺ സ്ക്വയറിലെ പരിപാടികളുടെ ഉദ്ഘാടനം 25 ന് നടക്കും. കണ്ണൂരിന്‍റെ പ്രാദേശിക ചരിത്രം വിഷയമാക്കി രണ്ടു ഏകദിന സെമിനാറുകൾ നടക്കും. 19 ന് ചിറക്കലും 24 ന് സഎസ്ഐ ഇംഗ്ലീഷ് ചർച്ച് അങ്കണത്തിലുമാണ് സെമിനാറുകൾ നടക്കുക. ലോഗോ പ്രകാശന ചടങ്ങിൽ മൃഗശാലാ വകുപ്പ് ഡയറക്ടർ പി.എസ്. മഞ്ജുളാദേവി, പുരാരേഖ വകുപ്പ് ഡയറക്ടർ എസ്. പാർവതി, പുരാവസ്തു വകുപ്പ് ഡയറക്ടർ ഇ. ദിനേശൻ, മന്ത്രിയുടെ പ്രൈവറ്റ് സെക്രട്ടറി കെ. കെ. ദിവാകരൻ, രജിസ്ട്രേഷൻ ജോയിന്‍റ് ഇൻസ്പെക്ടർ ജനറൽ സാജൻകുമാർ എന്നിവർ പങ്കെടുത്തു.

ഫ്ലോർമിൽ ജീവനക്കാരിയുടെ മാല കവർന്ന് വിദേശത്തേക്ക് കടന്ന പ്രതി അറസ്റ്റിൽ

ചക്കരക്കൽ: ഫ്ലോർ മില്ലിലെത്തി ജീവനക്കാരിയായ വയോധികയുടെ മൂന്നര പവന്‍റെ മാല പൊട്ടിച്ച ശേഷം വിദേശത്തേക്ക് കടന്ന പ്രതി അറസ്റ്റിൽ. വാരം പുറത്തീലിലെ അസ്‌ലത്തെയാണ് (37)നെ ചക്കരക്കൽ എസ്ഐ അംബുജാക്ഷനും സംഘവും അറസ്റ്റ് ചെയ്തത്. വലിയന്നൂർ കടാങ്കോട് റോഡിലെ ശ്രുതി ഫ്ലോർ മിൽ ജീവനക്കാരി പുത്തൻ വീട്ടിൽ ശ്രീദേവിയുടെ (79) മാലയായിരുന്നു കഴിഞ്ഞ മാസം 17ന് ഉച്ചയോടെ മില്ലിലെത്തിയ പ്രതി പൊട്ടിച്ചു കടന്നു കളഞ്ഞത്. മില്ലിൽ കടന്നു ചെന്ന മോഷ്ടാവ് വയോധികയെ പിടിച്ചു തള്ളി മാല പൊട്ടിച്ചെടുത്ത ശേഷം സ്കൂട്ടറിൽ രക്ഷപ്പെടുകയായിരുന്നു.വീഴ്ചയിൽ പരിക്കേറ്റ വയോധിക ആശുപത്രിയിൽ ചികിത്സയിലായിരുന്നു. ഏതാനും ദിവസം മുന്പ് ഇയാൾ നാട്ടിൽ തിരിച്ചെത്തിയിട്ടുണ്ടെന്ന വിവരത്തെ തുടർന്ന് പോലീസ് വീട്ടിലെത്തി അറസ്റ്റ് ചെയ്യുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ലോക പാലിയേറ്റീവ് ദിനാചരണവും മാനസികാരോഗ്യ ദിനാചരണവും നടത്തി

കണ്ണൂർ : പാലിയേറ്റീവ് കെയർ ഇനീഷ്യേറ്റീവ് ഇൻ കണ്ണൂരും കൃഷ്ണമേനോൻ സ്മാരക ഗവ. വനിത കോളജ് എൻഎസ്എസ് യൂണിറ്റും സംയുക്തമായി ലോക പാലിയേറ്റീവ് ദിനാചരണവും ലോക മാനസികാരോഗ്യ ദിനാചരണവും നടത്തി. ജില്ലാതല ഉദ്ഘാടനം വനിതാ കോളജിൽ കുടുംബശ്രീ മിഷൻ ജില്ല കോ-ഡിനേറ്റർ എം.വി. ജയൻ ഉദ്ഘാടനം ചെയ്തു. പിക് ചെയർമാൻ കെ.വി. ശശിധരൻ അധ്യക്ഷത വഹിച്ചു. ഇന്ത്യൻ അസോസിയേഷൻ ഓഫ് പാലിയേറ്റീവ് കെയർ സംസ്ഥാന സെക്രട്ടറി സുനിൽ മാങ്ങാട്ടിടം, എൻഎസ്എസ് പ്രോഗ്രാം ഓഫീസർ ഡോ.കെ.പി. നിധീഷ്, പിക് വൈസ് പ്രസിഡന്‍റ് പി. ശോഭന എന്നിവർ പ്രസംഗിച്ചു. എകെജി ആശുപത്രിയിലെ സൈക്യാട്രിസ്റ്റ് ഡോ. നന്ദന മുരളീധരൻ ക്ലാസെടുത്തു.

ഉളിയിൽ കാറും ബൈക്കും കൂട്ടിയിടിച്ച് ബൈക്ക് യാത്രികന് പരിക്ക്

മട്ടന്നൂർ: ഉളിയിൽ കാറും ബൈക്കും കൂട്ടിയിടിച്ച് ബൈക്ക് യാത്രികന് പരിക്ക്. നിയന്ത്രണം വിട്ട ബൈക്ക് താഴ്ചയിലേക്ക് മറിഞ്ഞു. ശനിയാഴ്ച ഉച്ചയ്ക്ക് ഒന്നോടെ മട്ടന്നൂർ - ഇരിട്ടി റൂട്ടിൽ ഉളിയിൽ പാലത്തിന് സമീപമായിരുന്നു അപകടം. മട്ടന്നൂർ ഭാഗത്ത് നിന്നെത്തിയ കാർ ഉളിയിൽ പാലത്തിന് സമീപത്തെ പടിക്കച്ചാൽ റോഡിലേക്ക് കയറുന്നതിനിടെ മട്ടന്നൂർ ഭാഗത്ത് നിന്ന് ഇരിട്ടി ഭാഗത്തേക്ക് പോകുകയായിരുന്ന ബൈക്ക് കാറുമായി കൂട്ടിയിടിക്കുകയായിരുന്നു. നിയന്ത്രണം വിട്ട ബൈക്ക് മരത്തി ൽ ഇടിച്ച് താഴ്ചയിലേക്ക് മറിയുകയായിരുന്നു. അപകടത്തിൽ പരിക്കേറ്റ ബൈക്ക് യാത്രികനെ ആശുപത്രിയിൽ പ്രവേശിപ്പിച്ചു. ഉളിയിൽ പാലത്തിന് സമീപം നിരവധി അപകടങ്ങളാണ് അടുത്തകാലത്തായി നടന്നത്. നിരവധി പേർക്ക് ജീവൻ നഷ്ടമാകുകയും ചെയ്തിരുന്നു.

ഷാഫി പറമ്പിൽ എംപിക്ക് നേരെയുള്ള പോലീസ് മർദനം: പ്രതിഷേധിച്ച് കോൺഗ്രസ്

ഇരിട്ടി: ഷാഫി പറമ്പിൽ എംപിക്കു നേരേയുണ്ടായ പോലീസ് ലാത്തിച്ചാർജിൽ പ്രതിഷേധിച്ച് കോൺഗ്രസ് ബ്ലോക്ക് കമ്മിറ്റിയുടെ നേതൃത്വത്തിൽ ഇരിട്ടിയിൽ പ്രതിഷേധ പ്രകടനം നടത്തി. പി.എ. നസീർ, പി.കെ. ജനാർദ്ദനൻ, സാജു യോമസ്, തോമസ് വർഗീസ്, സി.കെ. ശശിധരൻ, കെ.വി. രാമചന്ദ്രൻ, റയീസ് കണിയറക്കൽ, ജിമ്മി അന്തിനാട്ട്, മിനി പ്രസാദ്, മിനി വിശ്വനാഥൻ, നിധിൻ നടുവനാട് തുടങ്ങിയവർ നേതൃത്വം നൽകി. ഉളിക്കൽ: ഷാഫി പറമ്പിൽ എംപിക്ക് നേരേ നടന്ന പോലീസ് മർദ്ദനത്തിൽ പ്രതിഷേധിച്ച് ഇരിക്കൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ ഉളിക്കൽ ടൗണിൽ പ്രതിഷേധ പ്രകടനം നടത്തി. തുടർന്ന് നടന്ന പൊതുയോഗം കെപിസിസി മെംബർ പി.സി. ഷാജി ഉദ്ഘാടനം ചെയ്തു. ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് എ.ജെ. ജോസഫ് അധ്യക്ഷത വഹിച്ചു. ഡിസിസി മെംബർ ടി. ജസ്റ്റിൻ, ജോസ് പൂമല, മണ്ഡലം കോൺഗ്രസ് കമ്മിറ്റി പ്രസിഡന്‍റുമാരായ ടോമി ജോസഫ്, കുര്യാക്കോസ് മണിപ്പാടത്ത്, ഇ.കെ. കുര്യൻ, കെ.കെ. ഷഫീഖ്, യൂത്ത് കോൺഗ്രസ് ഭാരവാഹികളായ മുഹസിൻ കാതിയോട്, ദിലീപ് മാത്യു, ടി.പി. അഷ്റഫ്, മഹിളാ കോൺഗ്രസ് ജില്ലാ സെക്രട്ടറിമാരായ ലിസമ്മ ബാബു, ഷെർലി അലക്സാണ്ടർ, മേഴ്സി ജോസ്, യൂത്ത് കോൺഗ്രസ് മണ്ഡലം പ്രസിഡന്‍റുമാരായ ജോജോ പാലാക്കുഴി, ഷബീർ തുടങ്ങിയവർ നേതൃത്വം നൽകി. മട്ടന്നൂർ: ഷാഫി പറമ്പിൽ എംപിയെ പോലീസ് മർദിച്ചതിൽ പ്രതിഷേധിച്ച് കോൺഗ്രസ് മട്ടന്നൂർ ബ്ലോക്ക് കമ്മിറ്റിയുടെ നേതൃത്വത്തിൽ മട്ടന്നൂരിൽപ്രതിഷേധ പ്രകടനം നടത്തി. കോൺഗ്രസ് ഭവൻ പരിസരത്ത് നിന്നാരംഭിച്ച പ്രകടനം നഗരം ചുറ്റി ബസ് സ്റ്റാൻഡ് പരിസരത്ത് സമാപിച്ചു. തുടർന്നു നടന്ന യോഗം കെപിസിസി അംഗം മുഹമ്മദ് ബ്ലാത്തൂർ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സുരേഷ് മാവില അധ്യക്ഷത വഹിച്ചു. ഡിസിസി സെക്രട്ടറി വി.ആർ. ഭാസ്കരൻ, എ.കെ. രാജേഷ്, ടി.വി. രവീന്ദ്രൻ, ഫർസീൻ മജീദ്, കെ.വി. ജയചന്ദ്രൻ, ഒ.കെ. പ്രസാദ്, ടി. സുജിന, ടി. ദിനേശൻ തുടങ്ങിയവർ നേതൃത്വം നൽകി. കൂത്തുപറമ്പ്: ഷാഫി പറമ്പിൽ എംപിയെ അക്രമിച്ചതിൽ പ്രതിഷേധിച്ച് കൂത്തുപറമ്പ് ടൗണിൽ യുഡിഎഫ് പ്രതിഷേധ പ്രകടനം നടത്തി. കൂത്തുപറമ്പ് വില്ലേജ് ഓഫീസ് പരിസരത്ത് ചേർന്ന പ്രതിഷേധ യോഗം ഡിസിസി ജനറൽ സെക്രട്ടറി ഹരിദാസ് മൊകേരി ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് കെ. ലോഹിതാക്ഷൻ അധ്യക്ഷത വഹിച്ചു. ഡിസിസി ജനറൽ സെക്രട്ടറി പി.കെ. സതീശൻ, രജീഷ് കോട്ടയൻ, സിദ്ധിഖ് പാറാൽ, എൻ. ബാലകൃഷ്ണൻ, വി.ബി. അഷറഫ്, യു.എൻ. സത്യചന്ദ്രൻ, കെ.കെ. ഗീത, നരോത്ത് രവീന്ദ്രൻ, മൊട്ടമ്മൽ അലി, രജിനേഷ് കൊക്കോത്ത് എന്നിവർ പ്രസംഗിച്ചു.

പഴയങ്ങാടിയിൽ പോലീസും യൂത്ത് കോൺഗ്രസ് പ്രവർത്തകരും തമ്മിൽ സംഘർഷം

പഴയങ്ങാടി: യൂത്ത് കോൺഗ്രസ് പ്രവർത്തകരും പോലീസും തമ്മിൽ പഴയങ്ങാടിയിൽ സംഘർഷം. കഴിഞ്ഞ ദിവസം സമരത്തിനിടയിൽ ഷാഫി പറന്പിലിനെ പോലീസ് അടിച്ചു പരിക്കേല്പിച്ച സംഭവത്തിൽ പ്രതിഷേധിച്ച് പഴയങ്ങാടിയിൽ യൂത്ത് കോൺഗ്രസ് നടത്തിയ റോഡ് ഉപരോധത്തിൽ ആണ് സംഘർഷം ഉണ്ടായത്. കല്യാശേരി മണ്ഡലം യൂത്ത് കോൺഗ്രസിന്‍റെ നേതൃത്വത്തിൽ പഴയങ്ങാടി കെഎസ്ടിപി റോഡിൽ നടത്തിയ ഉപരോധത്തിന് നേരെ രണ്ട് ചെറുപ്പക്കാർ ഇരുചക്ര വാഹനം കയറ്റാനുള്ള ശ്രമത്തിനിടെ യുവാക്കളെ യൂത്ത് കോൺഗ്രസ് പ്രവർത്തകർ മർദിക്കുകയും തടയാൻ ശ്രമിച്ച പോലീസിന് നേരെ തിരിഞ്ഞ് സംഘർഷം ഉണ്ടാവുകയുമായിരുന്നു. മണിക്കൂറുകളോളം പ്രവർത്തകർ പോലീസുമായി തർക്കത്തിൽ ഏർപ്പെടുകയും ഉന്തും തള്ളും ഉണ്ടാവുകയും ചെയ്തു. കോൺഗ്രസ് നേതാക്കൾ ഇടപെട്ടാണ് രംഗം ശാന്തമാക്കിയത്. റോഡിൽ ഉണ്ടായ സംഘർഷത്തെ തുടർന്ന് മണിക്കൂറുകളോളം ഗതാഗതം തടസപ്പെട്ടു.

ഗ്രേറ്റ് ബോംബെ സർക്കസിന് ജനം ഒഴുകുന്നു

കണ്ണൂർ: ഏത്യോപ്യൻ കലാകാരൻമാരുടെ മാസ്മരിക പ്രകടനങ്ങളുമായി പോലീസ് മൈതാനിയിൽ നടക്കുന്ന ഗ്രേറ്റ് ബോംബ സർക്കസ് തന്പിലേക്ക് സർക്കസ് ആസ്വാദകരുടെ ഒഴുക്ക്. അബ്ദുറഹ്മാന്‍ നുര്‍ഹുസെന്‍ അബ്ദുളള (35), തഡെസ് എറിമിയാസ് ഗിര്‍മെ (22), മെകോനെന്‍ ഹബ്തമു ഫിക്കാഡു (27), യിഗ്രെം മെക്‌ഡെലവിറ്റ് ഡെസലേഗ് (23), ടെഫെറ യീംലക്‌നേഷ് ഡെഗിഫ് (26), അയ്‌ലെ ടിനുന്‍സെര്‍ അബ്രിഹേന്‍ (22), എന്നീ ആറ് ഏത്യോപ്യന്‍ കലാകാരന്‍മാരും ചെകോല്‍ ഡെബാസു അമിലാക് (31), അഗിമാസ് ഗെറ്റ്‌നെറ്റ് മൊല്ല (30), കിഫ്‌ലെ അബെല്‍ ഗിര്‍മ (22) എന്നീ മൂന്ന് പുതിയ ഏത്യോപ്യന്‍ കലാകാരന്‍മാരും ഉള്‍പ്പെടുന്ന ഒന്പതംഗ സംഘത്തിന്‍റെ കലാപ്രകടനമാണ് സർക്കസിന്‍റെ പ്രധാന ആകർഷണം. ഇവര്‍ അവതരിപ്പിക്കുന്ന ഇനങ്ങളായ ട്രക്കോ ബാലന്‍സ് ആക്രോബാറ്റിക്, ക്ലബ് ജഗ്ലിങ്, ഇക്കരംഗ ആക്ട്, കൊണ്ടോര്‍ഷന്‍ ആക്ട്, ഫുട്ട് ജഗ്ലിങ്, റോളര്‍ സ് കേറ്റിങ്, ക്യൂ ബ് ജഗ്ലിങ്, ആന്റിപോഡ് കൊണ്ടോര്‍ഷന്‍ എന്നിവ മെയ്യഭ്യാസത്തിന്‍റെ മികവുകളായി കാണികളിൽ അദ്ഭുതം പടർത്തുകയാണ്. ഏത്യോപ്യയുടെ തലസ്ഥാനമായ എഡിസബാബയിലുളള സര്‍ക്കസ് അക്കാഡമിയില്‍നിന്ന് നാലു വര്‍ഷത്തെ കോഴ്‌സ് പൂര്‍ത്തിയാക്കിയവരാണ് ഈ കലാകാരൻമാർ. ഇതിനു മുമ്പ് പല വിദേശരാജ്യങ്ങളിലും സര്‍ക്കസിലും സ്റ്റേജ് ഇവന്‍റിലും മികച്ച പ്രകടനങ്ങള്‍ നടത്തിയ പരിചയ സന്പന്നതോടെയാണ് ഇവർ തന്പിൽ വിസ്മയം തീർക്കുന്നത്. മണിപ്പുരി കലാകാരൻമാരുടെ പ്രകടനങ്ങളാണ് സർക്കസിന്‍റെ മറ്റൊരു ആകർഷണം. സോഡ് ആക്ട്, ഗ്രൂപ്പ് ആക്രോബാറ്റിക്‌സ്,അമേരിക്കന്‍ ലിംബിംഗ് ബോര്‍ഡ്, റഷ്യന്‍ സ്‌പൈഡ് റിംഗ്, റഷ്യന്‍ ഡവിള്‍ ക്ലൗണ്‍ ഐറ്റം, റഷ്യന്‍ വെര്‍ട്ടിക്കല്‍ സ്വിംഗിംഗ് ആക്രോബാറ്റ്, റഷ്യന്‍ ക്ലൗണ്‍ സ്‌കിപിംഗ്, റഷ്യന്‍ കാന്‍ഡില്‍ ബോണ്‍ലെസ് ഐറ്റം എന്നിവ ഇതില്‍ ചിലതു മാത്രമാണ്. റഷ്യന്‍ ബാലെയുടെ ചുവട് പിടിച്ച് അവര്‍ അവതരിപ്പിക്കുന്ന അതിസാഹസിക അഭ്യാസപ്രകടനങ്ങളും അദ്ഭുതപ്പെടുത്തും. ഉച്ചയ്ക്ക് ഒന്നിനും വൈകുന്നേരം നാലിനും രാത്രി ഏഴിനുമാണ് പ്രദർശനം. 150, 200, 250, 350 എന്നിങ്ങനെയാണ് ടിക്കറ്റ് നിരക്ക്. 350 രൂപയുടെ സീറ്റിന് അഡ്വാൻസ് ബുക്കിംഗ് സൗകര്യവുമുണ്ട്. രാവിലെ ഒന്പത് മുതൽ വൈകുന്നേരം ആറുവരെയാണ് ബുക്കിംഗ് സമയം. ഫോൺ: 8075 966829, 8921628262, 8893606308.

സഹകരണ മേഖലയെ കൈപ്പിടിയിലാക്കാൻ സർക്കാർ ശ്രമം: കെ.സി. വേണുഗോപാൽ

കണ്ണൂർ: സഹകരണ മേഖലയെ കൈപ്പിടിയിലൊതുക്കാനുള്ള കേന്ദ്ര സർക്കാർ നീക്കങ്ങൾക്ക് സംസ്ഥാന സർക്കാർ കുടപിടിക്കുകയാണെന്ന് കെ.സി. വേണുഗോപാൽ എംപി. കേരള ബാങ്ക് എംപ്ലോയീസ് കോൺഗ്രസ് (കെബിഇസി) രണ്ടാം സംസ്ഥാന സമ്മേളനം കണ്ണൂർ ദിനേശ് ഓഡിറ്റോറിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരള ബാങ്ക് കൊണ്ട് കേരളത്തിന് എന്തു നേട്ടമാണുണ്ടായതെന്ന് ഇനിയെങ്കിലും പരിശോധിക്കപ്പെടേണ്ടതാണെന്നും കെ.സി. വേണുഗോപാൽ പറഞ്ഞു. സഹകരണ മേഖലയിൽ വൻ പ്രതീക്ഷയാണ് കേരള ബാങ്ക് രൂപികരിക്കുമ്പോൾ ഉണ്ടായത്. എന്നാൽ മേഖലയെ ദുർബലപ്പെടുത്തുന്ന അവസ്ഥയാണ് ഭരണാധികാരികളിൽ നിന്നുണ്ടാവുന്നതെന്നും അദ്ദേഹം കുറ്റപ്പെടുത്തി. കെബിഇസി സംസ്ഥാന പ്രസിഡന്‍റ് വി.എസ്. ശിവകുമാർ അധ്യക്ഷത വഹിച്ചു. സ്വാഗത സംഘം ചെയർമാൻ മാർട്ടിൻ ജോർജ് പ്രസംഗിച്ചു. പ്രതിനിധി സമ്മേളനം ബി. രാംപ്രകാശ് ഉദ്ഘാടനം ചെയ്തു. സഹകരണ സെമിനാർ മാർക്കറ്റ് ഫെഡ് ചെയർമാൻ സോണി സെബാസ്റ്റ്യനും സാംസ്കാരിക സമ്മേളനം നടൻ സന്തോഷ് കീഴാറ്റൂരും ഉദ്ഘാടനം ചെയ്തു. ഇന്ന് നടക്കുന്ന വനിതാ സമ്മേളനം മുൻ എംപി രമ്യാ ഹരിദാസും ട്രേഡ് യൂണിയൻ സമ്മേളനം കെ.സുധാകരൻ എംപിയും സമാപന സമ്മേളനം കണ്ണൂർ മേയർ മുസ്‌ലിഹ് മഠത്തിലും ഉദ്ഘാടനം ചെയ്യും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]