ADVERTISEMENT

ADVERTISEMENT

ഓവുചാൽ ശുചീകരണവുമായി എസ്എംവൈഎം പ്രവർത്തകർ

ചിറ്റാരിക്കാൽ: എസ്എംവൈഎമ്മിന്‍റെ ശുചീകരണ പദ്ധതിയുടെ ഭാഗമായി തോമാപുരം ഇടവകയിലെ എസ്എംവൈഎം പ്രവർത്തകർ വൃത്തിഹീനമായി കിടന്നിരുന്ന പള്ളിക്കുന്ന് വളവിലെയും പരിസരപ്രദേശങ്ങളിലെയും ഓവുചാൽ വൃത്തിയാക്കി.

ഫാ. ജുബിൻ കണിപറമ്പിൽ, ഡീക്കൻ അമൽ പൂക്കുളത്തേൽ, യൂണിറ്റ് പ്രസിഡന്‍റ് മാത്യൂസ് അമ്പലത്തിൽ, അതുൽ ചിരട്ടയോലിൽ, എലിസബത്ത് പ്ലാലിക്കൽ, ടോം മൂലേൽ, ആശിഷ്, ജോബിൻ, ടോം, സ്കറിയ, അജയ്, ജോസ്, സെബാൻ, ഡാനി, അസിൻ, ക്രിസ്, ക്രിസ്റ്റീന, ഡിൽന എന്നിവർ നേതൃത്വം നല്കി.

ADVERTISEMENT

ബലിതർപ്പണ ചടങ്ങ് നടത്തി

വെള്ളരിക്കുണ്ട്: കർക്കടവാവ് ദിനത്തിൽ പിതൃക്കളുടെ മോക്ഷം തേടി നൂറുകണക്കിനാളുകൾ അടുക്കളക്കുന്ന് ഭഗവതി ക്ഷേത്രത്തിൽ എത്തി ബലിതർപ്പണ ചടങ്ങ് നടത്തി. പുലർച്ചെ 5.30 മുതൽ തന്നെ ചൈത്രവാഹിനി തീരത്ത്‌ ബലിതർപ്പണ ചടങ്ങുകൾ ആരംഭിച്ചിരുന്നു. ആചാര്യൻ ജയറാം ബെള്ളുള്ളായയുടെ കാർമ്മികത്വത്തിൽ അഞ്ചുപേർ അടങ്ങുന്ന കർമികളുടെ സാനിധ്യത്തിലാണ് ചടങ്ങുകൾ നടന്നത്. സുരക്ഷയ്ക്കായി വെള്ളരിക്കുണ്ട് പോലീസും നർക്കിലക്കാട് കുടുംബാരോഗ്യ കേന്ദ്രത്തിലെ ആംബുലൻസ് സർവീസും സ്ഥലത്ത്‌ ഉണ്ടായിരുന്നു.

കണിച്ചിറ വളവിൽ വീണ്ടും ലോറി കുടുങ്ങി

മടിക്കൈ: കണിച്ചിറയിലെ അപകട വളവിൽ വീണ്ടും ചരക്കുലോറി കുടുങ്ങി. ഏറെനേരത്തെ ഗതാഗതക്കുരുക്കിനു ശേഷം ക്രെയിൻ എത്തിച്ച് ലോറി വലിച്ചു നീക്കുകയായിരുന്നു. ദിവസങ്ങൾക്കു മുമ്പും ഇവിടെ കൂറ്റൻ കണ്ടെയ്നർ ലോറി കുടുങ്ങിയിരുന്നു. ചെറുവത്തൂർ വിരമലക്കുന്നിലെ മണ്ണിടിച്ചിലിനെ തുടർന്ന് ദേശീയപാതയിൽ ഗതാഗതനിയന്ത്രണമുണ്ടായതോടെ ദീർഘദൂര ലോറികൾ ഉൾപ്പെടെ മടിക്കൈ, ചായ്യോത്ത്, കയ്യൂർ വഴിയുള്ള സമാന്തരപാതകൾ ഉപയോഗിക്കുന്നുണ്ട്. അതേസമയം വീരമലക്കുന്നിന് സമീപത്തു കൂടിയുള്ള ദേശീയപാതയിലൂടെ ടാങ്കർ, ഹെവി വാഹനങ്ങൾ മാത്രം ഉദ്യോഗസ്ഥരുടെ മേൽനോട്ടത്തിൽ കടത്തി വിടുന്നുണ്ടെന്ന് അധികൃതർ അറിയിച്ചു.

ജില്ലയിലെ സ്‌കൂളുകളില്‍ കൈറ്റ് 1627 റോബോട്ടിക് കിറ്റുകള്‍ വിതരണം ചെയ്തു

കാസര്‍ഗോഡ്: ഈ അധ്യയന വര്‍ഷം മുതല്‍ പത്താം ക്ലാസിലെ മുഴുവന്‍ കുട്ടികള്‍ക്കും റോബോട്ടിക്‌സ് മേഖലയില്‍ പഠനവും പ്രായോഗിക പരിശീലനവും നടത്തുന്നതിനായി ജില്ലയിലെ 133 സ്‌കൂളുകളില്‍ 1627 റോബോട്ടിക് കിറ്റുകളുടെ വിന്യാസം പൊതുവിദ്യാഭ്യാസ വകുപ്പിലെ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യുക്കേഷന്‍ (കൈറ്റ്) പൂര്‍ത്തിയാക്കി. പത്താംക്ലാസിലെ പുതിയ ഐസിടി പാഠപുസ്തകത്തിലെ റോബോട്ടുകളുടെ ലോകം എന്ന ആറാം അധ്യായത്തിലാണ് സര്‍ക്യൂട്ട് നിര്‍മാണം, സെന്‍സറുകളുടേയും ആക്യൂവേറ്ററുകളുടേയും ഉപയോഗം, കമ്പ്യൂട്ടര്‍ പ്രോഗ്രാമിംഗ് വഴി ഇലക്ട്രോണിക് ഉപകരണങ്ങളെ നിയന്ത്രിക്കുക തുടങ്ങിയ പ്രവര്‍ത്തനങ്ങളിലൂടെ റോബോട്ടിക്‌സിന്‍റെ പുതിയ ആശയങ്ങളും ആശയമാതൃകകളും കണ്ടെത്താന്‍ കുട്ടികള്‍ക്ക് അവസരം ലഭിക്കുന്നത്. സ്‌കൂളുകള്‍ക്ക് നല്‍കിയ റോബോട്ടിക് കിറ്റിലെ ആര്‍ഡിനോ ബ്രഡ് ബോര്‍ഡ്, ഐആര്‍ സെന്‍സര്‍, സെര്‍വോ മോട്ടോര്‍, ജമ്പര്‍ വെയറുകള്‍ തുടങ്ങിയവ പ്രയോജനപ്പെടുത്തി കൈയുടെ സാന്നിധ്യം തിരിച്ചറിഞ്ഞ് പ്രവര്‍ത്തിക്കുന്ന ഓട്ടോമാറ്റിക് സാനിറ്റൈസര്‍ ഡിസ്‌പെന്‍സര്‍ തയാറാക്കലാണ് ആദ്യ പ്രവര്‍ത്തനം. എഐ ഉപയോഗിച്ചുള്ള ഹോം ഓട്ടോമേഷന്‍ സംവിധാനത്തിലൂടെ മുഖം തിരിച്ചറിഞ്ഞ് സ്വയം തുറക്കുന്ന സ്മാര്‍ട്ട് വാതിലുകള്‍ തയ്യാറാക്കലാണ് പത്താം ക്ലാസിലെ ഓരോ കുട്ടിയും ചെയ്തുനോക്കേണ്ട അടുത്ത പ്രവര്‍ത്തനം. കൂടുതല്‍ റോബോട്ടിക് കിറ്റുകള്‍ ആവശ്യമുള്ള സ്‌കൂളുകള്‍ക്ക് അവ നേരിട്ട് വാങ്ങാനും കൈറ്റ് സംവിധാനമൊരുക്കിയിട്ടുണ്ട്. പത്താംക്ലാസില്‍ ഐസിടി പാഠപുസ്തകം പഠിപ്പിക്കേണ്ട ജില്ലയിലെ 480 അധ്യാപകര്‍ക്ക് റോബോട്ടിക്‌സിനായുള്ള പ്രത്യേക പരിശീലനം കൈറ്റ് ജൂലൈ മാസത്തോടെ പൂര്‍ത്തിയാക്കും. നിലവില്‍ നല്‍കിയ റോബോട്ടിക് കിറ്റുകള്‍ക്ക് പുറമെ ചലിക്കുന്ന റോബോട്ടുകള്‍ ഉള്‍പ്പെടെ നിര്‍മിക്കാന്‍ കഴിയുന്ന അഡ്വാന്‍സ്ഡ് കിറ്റുകള്‍ ഈ വര്‍ഷം തന്നെ ലിറ്റില്‍ കൈറ്റ്‌സ് യൂണിറ്റുകള്‍ക്ക് ലഭ്യമാക്കുമെന്ന് കൈറ്റ് സിഇഒ കെ. അന്‍വര്‍ സാദത്ത് അറിയിച്ചു. ഈ വര്‍ഷം സ്‌കൂളുകളില്‍ പ്രത്യേക റോബോഫെസ്റ്റുകളും കൈറ്റ് സംഘടിപ്പിക്കും.

കിദൂർ പക്ഷിഗ്രാമത്തിൽ സഞ്ചാരികൾക്കായി കൂടൊരുങ്ങുന്നു

കുമ്പള: ജില്ലയിലെ ആദ്യ പക്ഷിഗ്രാമമായി പ്രഖ്യാപിക്കപ്പെട്ട കിദൂരിൽ പക്ഷിനിരീക്ഷകർക്കും ഗവേഷകർക്കും സഞ്ചാരികൾക്കുമായുള്ള വിശ്രമകേന്ദ്രത്തിന്‍റെ നിർമാണം പൂർത്തിയായി. കിദൂർ കുണ്ടങ്കരടുക്കയിൽ സംസ്ഥാന വിനോദസഞ്ചാര വകുപ്പിനു കീഴിലാണ് വിശ്രമകേന്ദ്രം നിർമിച്ചത്. തദ്ദേശ തെരഞ്ഞെടുപ്പിനു മുമ്പ് കെട്ടിടത്തിന്‍റെ ഉദ്ഘാടനം നടത്താനാണ് ഒരുക്കങ്ങൾ നടക്കുന്നത്. വിശ്രമകേന്ദ്രത്തിന്‍റെ നടത്തിപ്പിനായി സ്വകാര്യ ഏജൻസികളിൽ നിന്ന് ടെൻഡർ വിളിക്കും. 2019 ൽ കാസർഗോഡ് വികസന പാക്കേജിൽ ഉൾപ്പെടുത്തി 60 ലക്ഷം രൂപ ചെലവിലാണ് കെട്ടിടത്തിന്‍റെ നിർമാണം തുടങ്ങിയത്. ജില്ലാ നിർമിതി കേന്ദ്രത്തിനായിരുന്നു നിർമാണ ചുമതല. പ്രവൃത്തികൾ പൂർത്തിയാക്കുന്നതിലുണ്ടായ കാലതാമസം വലിയ വിമർശനങ്ങളും ക്ഷണിച്ചുവരുത്തിയിരുന്നു. മീറ്റിംഗ് ഹാൾ,ഓഫീസ് മുറി, താമസത്തിനായുള്ള മുറികൾ, അടുക്കള എന്നിവയെല്ലാം കെട്ടിടത്തിൽ സജ്ജമാക്കിയിട്ടുണ്ട്. ദേശാടനക്കിളികളടക്കം 174 വ്യത്യസ്ത ഇനം പക്ഷികളെയാണ് 10 ഏക്കർ വിസ്തൃതിയിലുള്ള കിദൂർ കുണ്ടങ്കരടുക്ക പ്രദേശങ്ങളിൽ ഇതുവരെയായി കണ്ടെത്തിയിട്ടുള്ളത്. കടുത്ത വേനലിൽപോലും ഇതുവരെ വറ്റിയിട്ടില്ലാത്ത കാജൂർ പള്ളം എന്ന പ്രകൃതിദത്ത ജലാശയവും കിദൂറിന്‍റെ പ്രത്യേകതയാണ്. ഈ ജലാശയത്തിന്‍റെ സാന്നിധ്യമാണ് കൂടുതലായും പക്ഷികളെ ആകർഷിക്കുന്നത്. സഞ്ചാരികൾക്കായി അടിസ്ഥാനസൗകര്യങ്ങളൊരുങ്ങുന്നതോടെ കൂടുതൽ പക്ഷിനിരീക്ഷകരും ഗവേഷകരും വിദ്യാർഥികളും വിനോദസഞ്ചാരികളുമെല്ലാം കിദൂരിലേക്കെത്തുമെന്നാണ് പ്രതീക്ഷ. അനന്തപുരം തടാക ക്ഷേത്രം, മുജുംഗാവ് ക്ഷേത്രം, ബേള വ്യാകുലമാതാവിന്‍റെ പള്ളി, ആരിക്കാടി കോട്ട തുടങ്ങിയ സമീപ സ്ഥലങ്ങളുമായി ബന്ധപ്പെടുത്തി കുമ്പള കേന്ദ്രമായി ഒരു വിനോദസഞ്ചാര സർക്യൂട്ടിനും സാധ്യത തെളിയും.

നീലേശ്വരം റെയിൽവേ മേൽപ്പാലത്തിന്‍റെ ചവിട്ടുപടികൾ അപകടാവസ്ഥയിൽ

നീലേശ്വരം: രാജാ റോഡിലെ റെയിൽവേ മേൽപ്പാലത്തിന്‍റെ ചവിട്ടുപടികൾ കൂടുതൽ അപകടാവസ്ഥയിലായതോടെ നാട്ടുകാർ ആശങ്കയിൽ. റെയിൽപാത മുറിച്ചുകടക്കുന്നതിന്‍റെ അപകടം ചൂണ്ടിക്കാട്ടി തൊട്ടടുത്ത രാജാസ് ഹയർ സെക്കൻഡറി സ്കൂളിലെ വിദ്യാർഥികളെയുൾപ്പെടെ മേൽപ്പാലം ഉപയോഗിക്കാൻ പ്രേരിപ്പിക്കുന്നതിനിടയിലാണ് മേൽപ്പാലവും അപകടസ്ഥിതിയിലായത്. ചവിട്ടുപടികൾക്കു പുറമേ മേൽപ്പാലത്തിന്‍റെ ഒരു വശത്തുള്ള നടപ്പാതയും അപകടസ്ഥിതിയിലാണ്. രണ്ട് കോൺക്രീറ്റ് തൂണുകൾ ചരിഞ്ഞതോടെ ചവിട്ടുപടികൾക്കു സമീപവും നടപ്പാതയിലും വിള്ളലുകൾ പ്രത്യക്ഷപ്പെട്ടിട്ടുണ്ട്. ചവിട്ടുപടികൾ അപകടസ്ഥിതിയിലായതിനെ തുടർന്ന് നേരത്തേ ഇതുവഴി ആളുകൾ കയറുന്നത് കയറുകെട്ടി തടഞ്ഞിരുന്നു. പിന്നീട് ആളുകൾ പാളം മുറിച്ചുകടക്കുന്നതിനിടയിൽ അപകടങ്ങൾ ആവർത്തിച്ചതോടെ ഇത് വീണ്ടും തുറന്നു. 2001 മാർച്ചിൽ ഇ.കെ. നായനാർ മുഖ്യമന്ത്രിയായിരുന്ന കാലത്ത് നിർമാണം തുടങ്ങിയ മേൽപ്പാലം 2005 മാർച്ച് ഏഴിന് ഉമ്മൻ ചാണ്ടി മുഖ്യമന്ത്രിയായിരുന്ന സമയത്താണ് ഉദ്ഘാടനം ചെയ്തത്. കേരള റോഡ്സ് ആൻഡ് ബ്രിഡ്ജസ് കോർപ്പറേഷനു കീഴിലാണ് പാലം നിർമിച്ചത്. പാലത്തിന്‍റെ അറ്റകുറ്റപണികൾ നിർവഹിക്കാനുള്ള ചുമതലയും ഇവർക്കുതന്നെയാണെന്നാണ് പൊതുമരാമത്ത് വകുപ്പിന്‍റെ നിലപാട്. ചവിട്ടുപടികളും നടപ്പാതയും അപകടാവസ്ഥയിലായതോടെ സ്‌കൂൾ വിദ്യാർഥികളും അടുത്തുള്ള സഹകരണ ആശുപത്രികളിലേക്ക് പോകുന്നവരുമെല്ലാം വീണ്ടും റെയിൽപാത മുറിച്ചു കടക്കേണ്ട സ്ഥിതിയിലാണ്. നടപ്പാലം അപകടസ്ഥിതിയിലായതോടെ മേൽപ്പാലത്തിന് താഴെ കച്ചവടം നടത്തുന്നവരും അപകടഭീതിയിലാണ്.

അധികാരികളുടെ മൗനാനുവാദത്തോടെ വീരമലക്കുന്നിലെ ധാതുസമ്പത്ത് കൊള്ളയടിക്കപ്പെട്ടു: പി.കെ. ഫൈസല്‍

ചെറുവത്തൂര്‍: ദേശീയപാത നിര്‍മാണത്തിന്‍റെ പേരില്‍ വീരമലക്കുന്നിലെ കോടികള്‍ വിലമതിക്കുന്ന ധാതുസമ്പത്ത് മേഘ കണ്‍സ്ട്രക്ഷന്‍ കമ്പനിയുടെ നേതൃത്വത്തില്‍ കൊള്ളയടിക്കപ്പെട്ടതായും ഇതിനു കേന്ദ്ര-സംസ്ഥാനസര്‍ക്കാരുകളുടെ മൗനാനുവാദമുണ്ടായിരുന്നതായും ഡിസിസി പ്രസിഡന്‍റ് പി.കെ. ഫൈസല്‍. ഇപ്പോള്‍ വീരമലകുന്നിന്‍റെ വലിയൊരു ഭാഗം ഇടിയുകയും ചെയ്തിരിക്കുകയാണ്. അടിയന്തരമായി കേന്ദ്ര-സംസ്ഥാന സര്‍ക്കാരുകളും ദേശീയപാത അതോറിറ്റിയും വീരമലകുന്നിലെ മണ്ണിടിച്ചിലിന് ശാശ്വതമായ പരിഹാരം കാണുകയും ജനങ്ങളുടെ ആശങ്കകള്‍ അകറ്റണമെന്നും ദേശീയപാതയിലെ ഗതാഗതം പുനഃസ്ഥാപിക്കണമെന്നും അല്ലാത്തപക്ഷം ശക്തമായ രീതിയില്‍ ജനങ്ങളെ മുന്‍നിര്‍ത്തി പ്രക്ഷോഭം ആരംഭിക്കുമെന്നും ഫൈസല്‍ പറഞ്ഞു. വീരമലക്കുന്നില്‍ മണ്ണിടിച്ചില്‍ നടന്ന സ്ഥലം സന്ദര്‍ശിച്ച് സംസാരിക്കുകയായിരുന്നു അദ്ദേഹം. രമേശന്‍ കരുവാച്ചേരി, കെ.വി. സുധാകരന്‍, കെ.പി. പ്രകാശന്‍, എം.വി. ഉദ്ദേശ്കുമാര്‍, കെ. ബാലകൃഷ്ണന്‍, ഒ. ഉണ്ണികൃഷ്ണന്‍, കെ.കെ. കുമാര്‍, ജയപ്രകാശ് മയ്യിച്ച, എ.കെ. പ്രജീഷ് കുമാര്‍, പി.വി. കൃഷ്ണന്‍, ടി.വി. കൃഷ്ണന്‍ എന്നിവര്‍ ഒപ്പമുണ്ടായിരുന്നു.

കൊടിയമ്മ-കഞ്ചിക്കട്ട പാലം തകർച്ചയിലേക്ക്

കുമ്പള: 45 വർഷം പഴക്കമുള്ളൊരു ഒറ്റവരി പാലം. ഇരുവശങ്ങളിലും കൈവരികൾ പോലും ഇല്ലാതായിട്ട് കാലങ്ങളായി. കാലപ്പഴക്കം മൂലം പാലത്തിൽ തന്നെ അങ്ങിങ്ങ് വിള്ളലുകളുണ്ട്. താഴെ മലവെള്ളം കുത്തിയൊഴുകുന്ന വീതിയേറിയ പുഴ. മഴ ശക്തമാകുമ്പോൾ പാലത്തിനു മുകളിലൂടെയും മലവെള്ളം കുത്തിയൊഴുകും. ജീവൻ പണയംവച്ചുകൊണ്ട് ആരും ഇതുവഴി പോകരുതെന്ന് ഒന്നര വർഷം മുമ്പേ തന്നെ ജില്ലാ ഭരണകൂടം ഉത്തരവ് നല്കിയതാണ്. പക്ഷേ ആരിക്കാടി, താഴെ കൊടിയമ്മ, ഛത്രപള്ളം, ചൂരിത്തടുക്ക, കഞ്ചിക്കട്ട തുടങ്ങിയ പ്രദേശങ്ങളിലുള്ളവർക്ക് കുമ്പള ടൗണിലും തിരിച്ചും എത്താനുള്ള കുറഞ്ഞ ദൂരം ഈ പാലത്തിലൂടെയാണ്. വേനൽക്കാലങ്ങളിലെങ്കിലും പലപ്പോഴും പ്രദേശവാസികൾ വിലക്ക് മറികടന്ന് ഈ പാലം ഉപയോഗിക്കുന്നുണ്ട്. ജലസേചന വകുപ്പിനു കീഴിൽ വിസിബി കം ബ്രിഡ്ജ് ആയാണ് 45 വർഷം മുമ്പ് പാലം പണിതത്. സമീപപ്രദേശങ്ങളിലുള്ളവർക്ക് കൃഷി ആവശ്യത്തിന് വെള്ളം ലഭ്യമാക്കുന്നതിനും ഇത് സഹായകമായിരുന്നു. ഇത് ബലക്ഷയം മൂലം തകർച്ചയിലായതോടെ ഇവിടെ പുതിയൊരു റഗുലേറ്റർ കം ബ്രിഡ്ജ് നിർമിക്കണമെന്ന ആവശ്യം വർഷങ്ങളായി ഉയർന്നുകേൾക്കുന്നതാണ്. എന്നാൽ സർക്കാരിന്‍റെ നടപടിക്രമങ്ങൾ ഇഴഞ്ഞുനീങ്ങുന്നതാണ് പ്രശ്നം. ഇത്തവണ പാലത്തിനടിയിലൂടെയും മുകളിലൂടെയും പലതവണ മലവെള്ളം കുത്തിയൊഴുകിയതോടെ പാലം ഏറെക്കുറെ തകർച്ചയിലേക്കുതന്നെ നീങ്ങുകയാണെന്ന് നാട്ടുകാർ പറയുന്നു. എന്നിട്ടും ഇരുവശങ്ങളിലേക്കുമുള്ള കാൽനടയാത്രക്കാർ പലപ്പോഴും ഈ പാലം ഉപയോഗിക്കുന്നുണ്ടെന്നത് കടുത്ത ആശങ്കയാവുന്നുണ്ട്. ഇവിടെ പുതിയ വിസിബി കം ബ്രിഡ്ജ് നിർമിക്കുന്നതിനായി 27 കോടി രൂപയുടെ എസ്റ്റിമേറ്റ് തയ്യാറാക്കി നബാർഡിലേക്ക് സമർപ്പിക്കുന്നുണ്ടെന്നാണ് കൊടിയമ്മയിലെ പൊതുപ്രവർത്തകൻ എ.പി. അബ്ദുസ്സലാമിന് വിവരാവകാശ നിയമപ്രകാരം ജലസേചന വകുപ്പിൽ നിന്ന് ലഭിച്ച മറുപടി. സർക്കാരിന്‍റെ താലൂക്ക് തല അദാലത്തിൽ പരാതി നല്കിയവർക്കും ഇതേ മറുപടിയാണ് ലഭിച്ചത്. പുതിയ വിസിബി കം ബ്രിഡ്ജിന്‍റെ നിർമാണം ഈ വർഷം തന്നെ നബാർഡ് പദ്ധതിയിൽ ഉൾപ്പെടുത്തണമെന്നാവശ്യപ്പെട്ട് ഇതിനായി രൂപീകരിച്ച ആക്ഷൻ കമ്മിറ്റി ഭാരവാഹികൾ ജില്ലയിലെ എംഎൽഎമാരുടെ നേതൃത്വത്തിൽ കഴിഞ്ഞ ദിവസം ധനകാര്യ മന്ത്രി കെ.എൻ. ബാലഗോപാൽ, ജലവിഭവ മന്ത്രി റോഷി അഗസ്റ്റിൻ എന്നിവരെ കണ്ട് നിവേദനം നല്കിയിരുന്നു. എംഎൽഎമാരായ എ.കെ.എം. അഷ്റഫ്, എം. രാജഗോപാൽ, സി.എച്ച്. കുഞഞമ്പുഎന്നിവരാണ് നിവേദക സംഘത്തിൽ ഉണ്ടായിരുന്നത്. കുമ്പള പഞ്ചായത്ത് പ്രസിഡന്‍റ് താഹിറ യൂസഫ്, വൈസ് പ്രസിഡന്‍റ് നാസർ മൊഗ്രാൽ, പഞ്ചായത്തംഗം യൂസഫ് ഉളുവാർ, ആക്ഷൻ കമ്മിറ്റി അംഗങ്ങളായ മഞ്ജുനാഥ ആൾവ, ബി.എ. സുബൈർ, കെ. യോഗിഷ, അഷ്റഫ് കൊടിയമ്മ എന്നിവരും സംബന്ധിച്ചു.

പയ്യന്നൂരിലെ വയോധികയുടെ മരണം: അന്വേഷണം ക്രൈംബ്രാഞ്ചിന്

പയ്യന്നൂര്‍: വയോധികയെ കിണറ്റില്‍ മരിച്ചനിലയില്‍ കണ്ടെത്തിയ സംഭവത്തിന്‍റെ അന്വേഷണം ക്രൈംബ്രാഞ്ചിന്. പയ്യന്നൂര്‍ പോലീസ് മാസങ്ങളായി നടത്തുന്ന അന്വേഷണം എങ്ങുമെത്താത്ത സാഹചര്യത്തിലാണ് ക്രൈംബ്രാഞ്ചിന് കൈമാറിയത്. കഴിഞ്ഞ നവംബര്‍ ഒന്നിന് രാവിലെ പതിനൊന്നരയോടെ കാണാതായ പയ്യന്നൂര്‍ കൊറ്റി സുരഭി ഹൗസില്‍ സുലോചനയെയാണ് (76) വൈകുന്നേരത്തോടെ വീട്ടുപറന്പിലെ ഉപയോഗശൂന്യമായ കിണറ്റിൽ മരിച്ചനിലയിൽ കണ്ടെത്തിയത്. ചെരുപ്പുകള്‍ കിണറില്‍ നിന്ന് ഇരുപതോളം മീറ്റര്‍ അകലെ ദുരൂഹമായ സാഹചര്യത്തിൽ വ്യത്യസ്ഥമായ ഇടങ്ങളിലായാണ് കണ്ടെത്തിയത്. കഴുത്തിൽ ചെറിയ മുറിവ് ഉണ്ടായിരുന്നെങ്കിലും ഇതല്ല മരണകാരണമെന്നും കിണറ്റിൽ വച്ചാണ് ഇവർ മരിച്ചതെന്നുമായിരുന്നു പോസ്റ്റുമോർട്ടം റിപ്പോർട്ടിലുണ്ടായ സൂചനകൾ. അതേ സമയം സുലോചന ധരിച്ചിരുന്ന അഞ്ചു പവനോളം ആഭരണങ്ങൾ കാണാനില്ലാഞ്ഞതിലും ദുരൂഹതയുണ്ട്. ആഭരണങ്ങൾ കിണറ്റിലുണ്ടായേക്കാമെന്ന സംശയത്തിൽ കിണർ വറ്റിച്ച് പരിശോധന നടത്തിയെങ്കിലും കണ്ടെത്താനായില്ല. അതേസമയം വിരലില്‍ മുറുകിക്കിടന്നിരുന്ന മോതിരം നഷ്ടപ്പെടാതിരുന്നത് വീണ്ടും സംശയത്തിനിട നല്‍കി. പോലീസ് ബന്ധുക്കളില്‍നിന്ന് വിശദമായ മൊഴിയെടുത്തിരുന്നു. പോലീസ് പലരേയും ചോദ്യം ചെയ്തിട്ടും കേസിനു തുന്പ് ലഭിക്കാതെ അന്വേഷണം വഴി മുട്ടിയ നിലയിലായിരുന്നു.

കാഞ്ഞങ്ങാട്ട് ഗ്യാസ് ടാങ്കർ മറിഞ്ഞു

കാഞ്ഞങ്ങാട്: കാഞ്ഞങ്ങാട് സൗത്ത് കൊവ്വല്‍സ്റ്റോര്‍ മേല്‍പ്പാലത്തിന് സമീപം ദേശീയപാത സര്‍വീസ് റോഡില്‍ ഗ്യാസ് ടാങ്കര്‍ ലോറി നിയന്ത്രണംവിട്ടു റോഡരികിലേക്ക് മറിഞ്ഞു. 18 ടൺ ഭാരമുള്ള എൽപിജി ടാങ്കറാണ് മറിഞ്ഞത്. എതിരേവന്ന ബസിന് സൈഡ് കൊടുക്കുന്നതിനിടയിലാണ് അപകടമുണ്ടായത്. ഇന്നലെ ഉച്ചയ്ക്ക് ഒന്നോടെയായിരുന്നു സംഭവം. മംഗളൂരുവില്‍ നിന്ന് കോയമ്പത്തൂരിലേക്ക് പാചകവാതകവുമായി പോകുകയായിരുന്ന ലോറിയാണ് അപകടത്തില്‍പ്പെട്ടത്. ഇന്നു രാവിലെ പത്തിന് ടാങ്കറിലെ പാചകവാതകം മറ്റൊരു ടാങ്കറിലേക്ക് മാറ്റാനുള്ള ജോലി ആരംഭിക്കും. ടാങ്കറിന് ചോര്‍ച്ചയില്ലെന്നും മുന്‍കരുതല്‍ എന്ന നിലയ്ക്കാണ് ഇന്നു പ്രദേശത്ത് നിയന്ത്രണങ്ങള്‍ ഏര്‍പ്പെടുത്തിയിരിക്കുന്നതെന്നും ജില്ലാ കളക്ടര്‍ അറിയിച്ചു. വാഹനങ്ങള്‍ വഴിതിരിച്ചുവിടും എല്‍പിജി ഗ്യാസ് ടാങ്കര്‍ ലോറി മാറ്റുന്നതുമായി ബന്ധപ്പെട്ട് വാഹന ഗതാഗതത്തില്‍ ക്രമീകരണങ്ങള്‍ ഏര്‍പ്പെടുത്തിയിട്ടുണ്ട്. ഇന്നു രാവിലെ 9.30 മുതല്‍ കാഞ്ഞങ്ങാട് നിന്ന് നീലേശ്വരത്തേക്ക് വരുന്ന വാഹനങ്ങള്‍ പുതിയകോട്ടയില്‍ നിന്ന് കല്ലൂരാവി വഴി നീലേശ്വരത്തേക്കും നീലേശ്വരത്തുനിന്ന് കാഞ്ഞങ്ങാട്ടേക്ക് വരുന്ന വാഹനങ്ങള്‍ മടിക്കൈ കല്യാണ്‍ റോഡ്, ആലയി വഴി കാഞ്ഞങ്ങാടും എത്തിച്ചേരേണ്ടതാണ്. ഹെവി വാഹനങ്ങള്‍ ആ സമയത്ത് നിര്‍ത്തിയിടണം. പടന്നക്കാട് ഹൈവേ ബ്ലോക്ക് ചെയ്യും. ബാക്കി നിയന്ത്രണങ്ങള്‍ ആവശ്യത്തിന് അനുസരിച്ച് പോലീസ് ഏർപ്പെടുത്തും. കാഞ്ഞങ്ങാട് സൗത്ത് മുതല്‍ ഐങ്ങോത്ത് വരെ ഇന്നു പ്രാദേശിക അവധി കാഞ്ഞങ്ങാട് സൗത്തില്‍ ടാങ്കര്‍ ലോറി മറിഞ്ഞതിന്‍റെ പശ്ചാത്തലത്തില്‍ ഇന്നു കൊവ്വല്‍ സ്റ്റോറിന്‍റെ ഒരു കിലോമീറ്റര്‍ പരിധിയില്‍ (കാഞ്ഞങ്ങാട് സൗത്ത് മുതല്‍ ഐങ്ങോത്ത് വരെ 18,19,26 വാര്‍ഡുകള്‍) പ്രാദേശിക അവധി. സ്‌കൂള്‍, അങ്കണവാടി, കടകള്‍ ഉള്‍പ്പടെയുള്ള മുഴുവന്‍ സ്ഥാപനങ്ങള്‍ക്കും അവധി ബാധകമായിരിക്കും. രാവിലെ എട്ടു മുതല്‍ സൗത്ത് മുതല്‍ പടന്നക്കാട് വരെയുള്ള ഹൈവേ വഴിയുളള ഗതാഗതം പൂര്‍ണമായും തടസപ്പെടുകയും വാഹനങ്ങള്‍ വഴി തിരിച്ചുവിടുന്നതുമായിരിക്കും. വീടുകളില്‍ ഗ്യാസ് സിലണ്ടര്‍ ഉപയോഗിക്കാനോ പുകവലിക്കാനോ ഇന്‍വെര്‍ട്ടര്‍ ഉപയോഗിച്ചുളള വൈദ്യുതിയോ മറ്റു ഉപകരണങ്ങളോ ഉപയോഗിക്കാനോ വാഹനങ്ങള്‍ സ്റ്റാര്‍ട്ട് ചെയ്യാനും പാടില്ല. അപകടം നടന്ന സ്ഥലത്തു വീഡിയോ ചിത്രീകരണവും പൊതുജനങ്ങള്‍ക്കുള്ള പ്രവേശനവും പൂര്‍ണമായും നിരോധിക്കും. വൈദ്യുതി ബന്ധം ടാങ്കര്‍ സുരക്ഷിതമായി ഉയര്‍ത്തുന്നതുവരെ വരെ ഉണ്ടായിരിക്കുന്നതല്ലെന്ന് ജില്ലാ ദുരന്തനിവാരണ അഥോറിറ്റി അറിയിച്ചു.

വീരമലക്കുന്ന് ഇടിയാന്‍ കാരണം അശാസ്ത്രീയ നിര്‍മാണം: ടി.എന്‍. പ്രതാപന്‍

കാസര്‍ഗോഡ്: ദേശീയപാത നിര്‍മ്മാണത്തില്‍ അശാസ്ത്രീയവും പ്രകൃതിക്ക് വന്‍ ഹാനികരമുണ്ടാക്കുന്ന തരത്തിലുള്ള നിര്‍മ്മാണ രീതി സ്വീകരിച്ചത് കൊണ്ടാണ് ചെറുവത്തൂര്‍ വീരമലക്കുന്നില്‍ മണ്ണിടിച്ചില്‍ ഉണ്ടാവുകയും റോഡ് തകരുകയും ചെയ്തതെന്ന് കെപിസിസി രാഷ്‌ട്രീയകാര്യസമിതി അംഗം ടി.എന്‍. പ്രതാപന്‍. ജില്ലാ കോണ്‍ഗ്രസ് കമ്മിറ്റി നേതൃയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വ്യാപകമായി ഇവിടെനിന്ന് മണ്ണ് കുഴിച്ചെടുത്ത് കോടിക്കണക്കിന് രൂപയുടെ വില്‍പ്പന നടത്തുകയും തത്വദീക്ഷയില്ലാത്ത നിര്‍മാണരീതി മൂലവും പരിസ്ഥിതിക്കും ജനങ്ങള്‍ക്കും വന്‍ ഭീഷണിയാണ് റോഡ് തകര്‍ച്ചയിലൂടെ സംഭവിച്ചിരിക്കുന്നത്. ദേശീയപാത നിര്‍മ്മാണം നടക്കുന്ന പല സ്ഥലങ്ങളിലും അഴിമതിയുടെ ബാക്കിപത്രമായി വന്‍ ദുരന്തം സംഭവിക്കുമെന്ന ഭീതിയിലാണ് ജനങ്ങള്‍ കഴിയുന്നത്. റോഡ് നിര്‍മ്മാണ കമ്പനിയും സര്‍ക്കാരും ഗൗരവമായി ഈ വിഷയം പരിശോധിച്ച് പരിഹാരമാര്‍ഗം കണ്ടെത്തണം. ജില്ലയിലെ തീരപ്രദേശങ്ങളില്‍ കടലാക്രമണം രൂക്ഷമാണ്. കാസര്‍ഗോട്ടെ പാവപ്പെട്ട തീരദേശ വാസികള്‍ ഉള്‍പ്പടെയുള്ള ജനങ്ങളെ സര്‍ക്കാര്‍ അനാഥമാക്കി എന്നും തീരദേശ മേഖലയിലെ ജനങ്ങള്‍ അനുഭവിക്കുന്ന ദുരിതങ്ങള്‍ക്ക് സര്‍ക്കാര്‍ സത്വരനടപടി കൈക്കൊള്ളണമെന്നും അദ്ദേഹം ആവശ്യപ്പെട്ടു. ഡിസിസി പ്രസിഡന്‍റ് പി.കെ. ഫൈസല്‍ അധ്യക്ഷതവഹിച്ചു. സോണി സെബാസ്റ്റ്യന്‍ മുഖ്യപ്രഭാഷണം നടത്തി. എം.സി. പ്രഭാകരന്‍, ഹക്കീം കുന്നില്‍, ശാന്തമ്മ ഫിലിപ്പ്, സാജിദ് മവ്വല്‍, ജയിംസ് പന്തമാക്കല്‍, ബി.പി. പ്രദീപ്കുമാര്‍, പി.വി. സുരേഷ്, സോമശേഖര ഷേണി, ഹരീഷ് പി. നായര്‍, ധന്യ സുരേഷ്, ഉമേശന്‍ വേളൂര്‍, മധുസൂദനന്‍ ബാലൂര്‍, എം. രാജീവന്‍ നമ്പ്യാര്‍, കാര്‍ത്തികേയന്‍ പെരിയ, മിനി ചന്ദ്രന്‍, ഉനൈസ് ബേഡകം എന്നിവര്‍ സംസാരിച്ചു.

കാല്‍നടയാത്രികനെ ഇടിച്ചിട്ട് നിര്‍ത്താതെപോയ ലോറിഡ്രൈവര്‍ അറസ്റ്റില്‍

ബേക്കല്‍: സംസ്ഥാനപാതയിലെ തൃക്കണ്ണാട്ട് കാല്‍നടയാത്രികനെ ഇടിച്ചിട്ട് ഗുരുതരമായി പരിക്കേല്‍പിച്ചിട്ടും നിര്‍ത്താതെ പോയ ലോറിഡ്രൈവര്‍ ഒന്നരമാസത്തിനുശേഷം അറസ്റ്റില്‍. ഉത്തര്‍പ്രദേശ് പ്രയാഗ്‌രാജ് സ്വദേശി നിലേഷ് കുമാര്‍(37) ആണ് അറസ്റ്റിലായത്. അപകടത്തില്‍ ഗുരുതരമായി പരിക്കേറ്റ തൃക്കണ്ണാട്ടെ മത്സ്യതൊഴിലാളി പ്രകാശന്‍ കോമ സ്‌റ്റേജില്‍ ചികിത്സയിലാണുള്ളത്. ജൂണ്‍ ആറിനു പുലര്‍ച്ചെ നാലിന് മത്സ്യബന്ധനത്തിനായി കടലില്‍ പോകാന്‍ റോഡ് മുറിച്ചുകടക്കവെയാണ് പ്രകാശന്‍ അപകടത്തില്‍പെട്ടത്. ലോറി തട്ടിയാണ് അപകടമുണ്ടായതെന്ന് രണ്ടു ദൃക്‌സാക്ഷികളുടെ മൊഴിയുണ്ടായിരുന്നു. എന്നാല്‍ വാഹനങ്ങള്‍ കടന്നുപോകുന്ന വഴിയായതിനാലും പ്രദേശത്ത് സിസിടിവി കാമറ ഇല്ലാത്തതിനാലും ഇടിച്ച ലോറിയെ കണ്ടുപിടിക്കുക ബേക്കല്‍ പോലീസിനെ സംബന്ധിച്ചിടത്തോളം ദുഷ്‌കരമായിരുന്നു. അപകടം നടന്നതിനു പിന്നാലെ സ്ഥലത്തെത്തിയ ഇന്നോവ കാറിന്‍റെ ഡാഷ് കാമില്‍ തുടങ്ങി അന്വേഷണം ആ സമയം കടന്നുപോയ 15 ഓളം വാഹങ്ങളെ തിരിച്ചറിഞ്ഞു. മിക്കതും ഇതരസംസ്ഥാന വാഹനങ്ങളായിരുന്നു. സംശയം തോന്നിയ വാഹനങ്ങള്‍ പോലീസ് സ്റ്റേഷനില്‍ എത്തിച്ച് പരിശോധിച്ച ശേഷം വിട്ടയക്കുകയും ചെയ്തു. ആല്‍ഫ കണ്‍ട്രോളിന്‍റെയും കാലിക്കടവ് ബോര്‍ഡര്‍ തലപ്പാടി ടോള്‍, മംഗലാപുരം എച്ച്പി ഗ്യാസ് ഫില്ലിംഗ് സ്റ്റേഷന്‍ എന്നിവിടങ്ങളിലെ നൂറില്‍പരം സിസിടിവി ക്യാമറകള്‍ ഉള്‍പ്പെടെ കേന്ദ്രകരിച്ചും നടത്തിയ അന്വേഷണത്തില്‍ വാഹനങ്ങളുടെ രജിസ്‌ട്രേഷന്‍ നമ്പര്‍ തിരിച്ചറിഞ്ഞു. ഇതരസംസ്ഥാന വാഹനങ്ങള്‍ സ്റ്റേഷനില്‍ വിളിച്ചു വരുത്തുക എന്ന ശ്രമകരമായ ദൗത്യമായിരുന്നു. ദാമന്‍ ദിയു രജിസ്‌ട്രേഷന്‍ ലോറിയും ഡ്രൈവര്‍ നിലേഷ് കുമാറിനെയും തിരിച്ചറിഞ്ഞു. ഇയാളെ പിടികൂടുകയായി പിന്നീടുള്ള ശ്രമം. അപകടശേഷം ഇയാള്‍ എറണാകുളം പോവുകയും പിന്നീട് പാലക്കാട് വഴി തമിഴ്‌നാട് എന്നിങ്ങനെ കടന്നുകളഞ്ഞിരുന്നു. പോലീസ് നിരന്തരം ഇയാളെ ബന്ധപ്പെടുകയും അപ്പോഴൊക്കെ ഉത്തരേന്ത്യയില്‍ പല സംസ്ഥാനങ്ങളിലാണെന്ന് കള്ളം പറയുകയും ചെയ്തു. ഇയാളുടെ നീക്കങ്ങള്‍ സൈബര്‍ സെല്ലിന്‍റെ സഹായത്തോടെ നിരന്തരം നിരീക്ഷിച്ചുകൊണ്ടിരുന്നു. ഒടുവില്‍ കഴിഞ്ഞദിവസം മംഗളുരു വഴി കേരളത്തിലേക്ക് വന്ന നിലേഷ് കുമാറിനെ പോലീസ് സമര്‍ഥമായി കാസര്‍ഗോഡ് വെച്ച് പിടികൂടുകയായിരുന്നു. എസ്‌ഐ എം. സവ്യസാചി, മനു കൃഷ്ണന്‍, അഖില്‍ സെബാസ്റ്റ്യന്‍, മനോജ്, ഡ്രൈവര്‍ ശ്രീജിത്ത്, സുജിന്‍, സജേഷ്, ജിജിത്ത്, ദിലീപ്, ശ്രീരാജ്, അനുരാജ് എന്നിവരടങ്ങിയ സംഘമാണ് പ്രതിയെ പിടികൂടിയത്.

എയ്ഡ്‌സ് ബോധവത്കരണം: മത്സരങ്ങള്‍ സംഘടിപ്പിക്കുന്നു

കാഞ്ഞങ്ങാട്: കേരള സ്റ്റേറ്റ് എയ്ഡ്‌സ് കണ്‍ട്രോള്‍ സൊസൈറ്റിയും സംസ്ഥാന ആരോഗ്യ കുടുംബക്ഷേമ വകുപ്പും ചേര്‍ന്ന് വിദ്യാര്‍ഥികള്‍ക്കായി വിവിധ മത്സരങ്ങള്‍ സംഘടിപ്പിക്കുന്നു. അന്താരാഷ്ട്ര യുവജന ദിനത്തിനു മുന്നോടിയായി ജില്ലാ അടിസ്ഥാനത്തിലാണ് മത്സരങ്ങള്‍ സംഘടിപ്പിക്കുന്നത്. 17- 25 വയസ്സിനിടെ പ്രായമുള്ള സ്ത്രീ, പുരുഷ, ട്രാന്‍സ്ജന്‍ഡര്‍ വിഭാഗങ്ങള്‍ക്കായുള്ള മാരത്തണ്‍ മത്സരം, 8,9, 11 ക്ലാസുകളില്‍ പഠിക്കുന്ന സ്‌കൂള്‍ കുട്ടികള്‍ക്കായുള്ള ക്വിസ് മത്സരം എന്നീ മത്സരങ്ങളാണ് സംഘടിപ്പിക്കുന്നത്. രണ്ടുപേര്‍ ഉള്‍പ്പെടുന്ന ടീം ആയിട്ടാണ് ക്വിസ് മത്സരത്തില്‍ പങ്കെടുക്കേണ്ടത്. ഒരു സ്‌കൂളില്‍ നിന്നു ഒരു ടീം മാത്രമേ പങ്കെടുക്കാന്‍ പാടുള്ളൂ. ക്വിസ് മത്സരം ഓഗസ്റ്റ് രണ്ടിനു രാവിലെ 10 മണി മുതല്‍ കാഞ്ഞങ്ങാട് ദേശീയ ആരോഗ്യ ദൗത്യം കോണ്‍ഫറന്‍സ് ഹാളില്‍ നടക്കും. പൊതുആരോഗ്യം, കൗമാര ആരോഗ്യം, ആര്‍ത്തവ ശുചിത്വം, ആരോഗ്യകരമായ ഭക്ഷണക്രമം, എച്ച്‌ഐവി എയ്ഡ്‌സ്, ലഹരി ഉപയോഗം, സന്നദ്ധരക്തദാനം, സര്‍ക്കാര്‍ ആരോഗ്യ പരിപാടികള്‍ എന്നിവയാണ് ക്വിസ് മത്സരത്തിലെ വിഷയം. മാരത്തണ്‍ മത്സരം ഓഗസ്റ്റ് നാലിന് കരിന്തളം ഗവ. കോളജില്‍ നടക്കും. മാരത്തണ്‍ മത്സരം ഒന്ന്, രണ്ടു, മൂന്ന് സ്ഥാനക്കാര്‍ക്ക് യഥാക്രമം 5000, 4000, 3000 രൂപയും ക്വിസ് മത്സരം ഒന്ന്, രണ്ട്, മൂന്ന് സ്ഥാനക്കാര്‍ക്ക് യഥാക്രമം 5000, 4000, 3000 എന്നിങ്ങനെ ക്യാഷ് അവാര്‍ഡും നല്‍കും. മാരത്തണ്‍, ക്വിസ് മത്സരത്തിലെ ആദ്യ സ്ഥാനക്കാര്‍ക്ക് സംസ്ഥാനതല മത്സരത്തില്‍ പങ്കെടുക്കാനുള്ള അവസരവും ലഭിക്കും. പങ്കെടുക്കുവാന്‍ താല്‍പര്യമുള്ളവര്‍ 9495709864, 994610 5789 എന്ന നമ്പറുകളില്‍ 29നു മുന്‍പ് രജിസ്റ്റര്‍ ചെയ്യണം.

കര്‍ക്കിടകവാവ് ബലിതര്‍പ്പണം: സുരക്ഷ ഉറപ്പാക്കാന്‍ ഉദ്യോഗസ്ഥരെ നിയോഗിച്ചു

കാസര്‍ഗോഡ്: മഴ ശക്തമായി തുടരുന്ന സാഹചര്യത്തില്‍ ജില്ലയിലെ ദേവസ്വം ബോര്‍ഡിന്‍റെ അധീനതയിലുള്ള വിവിധ ക്ഷേത്രങ്ങളിലും മറ്റു ക്ഷേത്രങ്ങളിലും ഇന്നു കര്‍ക്കിടകവാവ് ബലിതര്‍പ്പണം നടക്കുമ്പോള്‍ ബലിതര്‍പ്പണം നടക്കുന്ന പ്രദേശങ്ങളില്‍ ഭക്തജനങ്ങള്‍ക്ക് സുരക്ഷ ഒരുക്കുന്നതിന്‍റെ ഭാഗമായി ജില്ലാകളക്ടര്‍ വിവിധ ഉദ്യോഗസ്ഥരെ നിയോഗിച്ചു. എന്‍ഡിആര്‍എഫ് സ്പെഷല്‍ സംഘം ബലതര്‍പ്പണം നടക്കുന്ന പ്രദേശങ്ങളില്‍ ക്യാമ്പ് ചെയ്യും. കടല്‍, കുളം, പുഴ എന്നിവിടങ്ങളില്‍ ചടങ്ങുകള്‍ നടക്കുന്നുണ്ടെങ്കില്‍ നീന്തലും പ്രഥമ ശുശ്രൂഷ നല്‍കാന്‍ പരിശീലനം ലഭിച്ച വോളണ്ടിയര്‍മാരെ നിയോഗിക്കാന്‍ ഫയര്‍ ആന്‍ഡ് റസ്‌ക്യൂ വകുപ്പിന് നിര്‍ദ്ദേശം നല്‍കി. റെസ്‌ക്യു ബോട്ടുകള്‍ സജ്ജമാക്കും. പോലീസ്, എക്സൈസ്, ആരോഗ്യം, പിഡബ്ല്യുഡി കെട്ടിടവിഭാഗം, ഫുഡ് ആന്‍ഡ് സേഫ്റ്റി, തദ്ദേശ സ്വയംഭരണ വകുപ്പ്, റവന്യു, ശുചിത്വ മിഷന്‍, ഫിഷറീസ് വകുപ്പുകള്‍ക്കും ജില്ലാകളക്ടര്‍ നിര്‍ദേശം നല്‍കി.

കുട്ടികളുടെ പഠന-സ്വഭാവ വൈകല്യങ്ങള്‍ കണ്ടെത്താന്‍ ‘സ്പന്ദനം’

തൃക്കരിപ്പൂര്‍: ആരോഗ്യരംഗത്ത് വീണ്ടും മാതൃകാപരമായ ഇടപെടലിന് ഒരുങ്ങി തൃക്കരിപ്പൂര്‍ പഞ്ചായത്ത്. 2025-26 വാര്‍ഷിക പദ്ധതിയില്‍ ഉള്‍പ്പെടുത്തി കൊയോങ്കര ഗവ. ആയുര്‍വേദ ആശുപത്രി കേന്ദ്രീകരിച്ച് ആരംഭിക്കുന്ന ‘സ്പന്ദനം’ ആരോഗ്യരംഗത്ത് പഞ്ചായത്തിന്‍റെ പുതിയ ചുവടുവെപ്പാവും. കുട്ടികളിലെ വിവിധ വളര്‍ച്ചാപ്രയാസവും പഠന-സ്വഭാവവൈകല്യങ്ങളും കണ്ടെത്തി ആയുര്‍വേദ ചികിത്സയും അനുബന്ധ തെറാപ്പികളും നല്‍കാന്‍ പദ്ധതിയിലൂടെ ലക്ഷ്യമിടുന്നു. ജില്ലയിലെ പഞ്ചായത്തുകളില്‍ ഇത്തരമൊരു പദ്ധതി നടപ്പാക്കുന്ന ആദ്യ ആയുര്‍വേദാശുപത്രിയാണ് കൊയോങ്കര ആയുര്‍വേദ ആശുപത്രി. നാഷണല്‍ ആയുഷ് മിഷന്‍റെ കീഴില്‍ നിലവില്‍ സേവനം ചെയ്യുന്ന ഡോക്ടര്‍മാരുടെയും കുട്ടികളുടെ വിഭാഗം ഡോക്ടറുടേയും സേവനം ഉപയോഗപ്പെടുത്തിയാണ് പദ്ധതി നടപ്പിലാക്കുന്നത്. ഇതിനാവശ്യമായ പ്രവര്‍ത്തനങ്ങള്‍ക്ക് മെഡിക്കല്‍ ഓഫീസര്‍ ഡോ.എ.വി. സാജന്‍ നേതൃത്വം നല്‍കും. പഞ്ചായത്തിലെ വിവിധ സ്‌കൂളുകളും വീടുകളും കേന്ദ്രീകരിച്ച് നടത്തി പരിശോധനയിലൂടെയാണ് അര്‍ഹരായ കുട്ടികളെ കണ്ടെത്തുന്നത്. സ്‌ക്രീനിംഗ് നടത്തി കണ്ടെത്തിയ കുട്ടികള്‍ക്ക് ആയുര്‍വേദ ചികിത്സ ലഭ്യമാക്കുകയും മാനസിക ശാരീരിക വ്യതിയാനങ്ങള്‍ക്ക് തെറാപ്പി ലഭ്യമാക്കുകയും ചെയ്യും. കുട്ടികളുടെ ആരോഗ്യനില വിലയിരുത്താനും ആവശ്യമായ തെറാപ്പി നല്‍കുന്നതിനുമായി ക്രമീകരണങ്ങള്‍ ഉണ്ട്. ഓഗസ്റ്റ് ആദ്യവാരം ആരംഭിക്കുന്ന ആദ്യഘട്ടത്തിന് ആറുലക്ഷം രൂപയാണ് പദ്ധതി വകയിരുത്തിയത്. സ്പന്ദനം പദ്ധതി കുട്ടികളുടെ ശാരീരിക മാനസിക ആരോഗ്യത്തിന് മുതല്‍ക്കൂട്ടാവുമെന്ന് പഞ്ചായത്ത് പ്രസിഡന്‍റ് വി.കെ. ബാവ പറഞ്ഞു.

തദ്ദേശ തെരഞ്ഞെടുപ്പ്: കരട് വോട്ടര്‍പട്ടിക പ്രസിദ്ധീകരിച്ചു

കാസര്‍ഗോഡ്: സംസ്ഥാന തെരഞ്ഞെടുപ്പ് കമ്മീഷന്‍ പഞ്ചായത്ത്, നഗരസഭ തെരഞ്ഞെടുപ്പിന്‍റെ കരട് വോട്ടര്‍പട്ടിക പ്രസിദ്ധീകരിച്ചു. ജില്ലയില്‍ 4,86,113 പുരുഷന്‍മാരും 5,35,857 സ്ത്രീകളും ഏഴ് ട്രാന്‍സ്ജെന്‍ററുമായി 1,02 1,977 വോട്ടര്‍മാര്‍. ഓഗസ്റ്റ് ഏഴ് വരെ വോട്ടര്‍പട്ടികയില്‍ പേരുചേര്‍ക്കുകയും തിരുത്തുകയും ചെയ്യാം. അന്തിമ വോട്ടര്‍പട്ടിക ഓഗസ്റ്റ് 30ന് പ്രസിദ്ധീകരിക്കും. കരട് വോട്ടര്‍പട്ടിക എല്ലാ തദ്ദേശസ്ഥാപനങ്ങളിലും വില്ലേജ്, താലൂക്ക് ഓഫീസുകളിലും സംസ്ഥാന തിരഞ്ഞെടുപ്പ് കമ്മീഷന്‍റെ sec.kerala.gov.in വെബ് സൈറ്റിലും പരിശോധനയ്ക്ക് ലഭിക്കും. ഓഗസ്റ്റ് ഏഴുവരെ വോട്ടര്‍പട്ടികയില്‍ പേര് ചേര്‍ക്കാന്‍ അവസരമുണ്ടാകും. 2025 ജനുവരി ഒന്നിനോ അതിന് മുന്‍പോ 18 വയസ്സ് പൂര്‍ത്തിയായവര്‍ക്ക് വോട്ടര്‍പട്ടികയില്‍ പേര് ചേര്‍ക്കാം. വോട്ടര്‍പട്ടികയില്‍ പുതുതായി പേരു ചേര്‍ക്കുന്നതിനും (ഫാറം 4) അപേക്ഷ, ഉള്‍ക്കുറിപ്പുകള്‍ തിരുത്തുന്നതിനും (ഫാറം 6), സ്ഥാനമാറ്റം വരുത്തുന്നതിനും (ഫാറം 7) സംസ്ഥാന തിരഞ്ഞെടുപ്പ് കമ്മീഷന്‍റെ sec.kerala. gov.in വെബ്‌സൈറ്റില്‍ ഓണ്‍ലൈനായി അപേക്ഷിക്കണം. ഓണ്‍ലൈനായി അപേക്ഷിക്കുമ്പോള്‍ ഹിയറിംഗിനുള്ള കമ്പ്യൂട്ടര്‍ ജനറേറ്റഡ് നോട്ടീസ് ലഭിക്കും. നോട്ടീസില്‍ പറഞ്ഞിട്ടുള്ള തീയതിയില്‍ ആവശ്യമായ രേഖകള്‍ സഹിതം ഹീയറിംഗിന് നേരിട്ട് ഹാജരാകണം. വോട്ടര്‍പട്ടികയില്‍ പേര് ഒഴിവാക്കുന്നത് സംബന്ധിച്ച ആക്ഷേപങ്ങള്‍ (ഫാറം 5) ഓണ്‍ലൈനായി രജിസ്റ്റര്‍ ചെയ്യുകയും അതിന്‍റെ പ്രിന്‍റൗട്ടില്‍ അപേക്ഷകനും ആ വാര്‍ഡിലെ ഒരു വോട്ടറും ഒപ്പിട്ട് നേരിട്ടോ തപാലിലൂടെയോ ഇലക്ടറല്‍ രജിസ്ട്രേഷന്‍ ഓഫീസര്‍ക്ക് സമര്‍പ്പിക്കണം. ഓണ്‍ലൈന്‍ മുഖേന അല്ലാതെയും നിര്‍ദ്ദിഷ്ട ഫാറത്തില്‍ ഇലക്ഷന്‍ രജിസ്ട്രേഷന്‍ ഓഫീസര്‍ക്ക് അപേക്ഷിക്കാവുന്നതാണ്. പഞ്ചായത്തുകളിലും മുനിസിപ്പാലിറ്റികളിലും അതാത് സ്ഥാപനങ്ങളിലെ സെക്രട്ടറിമാരും കോര്‍പ്പറേഷനുകളില്‍ അഡീഷണല്‍ സെക്രട്ടറിയുമാണ് ഇലക്ടറല്‍ രജിസ്ട്രേഷന്‍ ഓഫീസര്‍മാര്‍. അപേക്ഷകളിലും ആക്ഷേപങ്ങളിലും ഇലക്ടറല്‍ രജിസ്ട്രേഷന്‍ ഓഫീസര്‍മാര്‍ സ്വീകരിക്കുന്ന നടപടിക്കെതിരെ തദ്ദേശസ്വയംഭരണവകുപ്പ് ജില്ലാ ജോയിന്‍റ് ഡയറക്ടര്‍ക്ക് അപ്പീല്‍ നല്‍കാം. ഉത്തരവ് തീയതി മുതല്‍ 15 ദിവസത്തിനകമാണ് അപ്പീല്‍ നല്‍കേണ്ടത്.

കെസിഎല്ലില്‍ തിളങ്ങാന്‍ നാലു കാസര്‍ഗോ‌ട്ടുകാര്‍

കാസര്‍ഗോഡ്: കേരള ക്രിക്കറ്റ് ലീഗ് രണ്ടാം സീസണില്‍ കാസര്‍ഗോട്ടു നിന്നു നാലു താരങ്ങള്‍. കഴിഞ്ഞ സീസണില്‍ തിളങ്ങിയ മുഹമ്മദ് അസ്ഹറുദ്ദീനും ശ്രീഹരി എസ്. നായര്‍ക്കും പി.എം. അന്‍ഫലിനും ഒപ്പം മുഹമ്മദ് കൈഫും ഇത്തവണ തെരഞ്ഞെടുക്കപ്പെട്ടിട്ടുണ്ട്. കേരള ടീമിന്‍റെ ബാറ്റിംഗ് നെടുംതൂണായ മുഹമ്മദ് അസ്ഹറുദ്ദീനെ ആലപ്പി റിപ്പിള്‍സ് നിലനിര്‍ത്തുകയായിരുന്നു. ഏഴര ലക്ഷം രൂപയ്ക്കാണ് ആലപ്പി അസ്ഹറുദ്ദീനെ നിലനിര്‍ത്തിയത്. കഴിഞ്ഞ വര്‍ഷം അസ്ഹറുദ്ദീനായിരുന്നു ആലപ്പിയ്ക്കായി ഏറ്റവും കൂടുതല്‍ റണ്‍സ് നേടിയത്. നാല് അര്‍ധസെഞ്ച്വറികളടക്കം 410 റണ്‍സായിരുന്നു അസ്ഹറുദ്ദീന്‍ നേടിയത്. രഞ്ജി സെമിഫൈനലിലെ ഉജ്വല സെഞ്ച്വറിയടക്കം കഴിഞ്ഞ സീസണിലാകെ മികച്ച ഫോമിലായിരുന്നു താരം. അസ്ഹറുദ്ദീനൊപ്പം നാട്ടുകാരനായ ശ്രീഹരി എസ്. നായരും ഇത്തവണ ആലപ്പി റിപ്പിള്‍സ് ടീമിലുണ്ട്. കഴിഞ്ഞ വര്‍ഷം ട്രിവാന്‍ഡ്രത്തിനായി കളിച്ച ശ്രീഹരിയെ നാലുലക്ഷം രൂപയ്ക്കാണ് ആലപ്പി ടീമിലെത്തിച്ചത്. ആദ്യ സീസണില്‍ ഒന്‍പത് മത്സരങ്ങളില്‍ നിന്ന് ശ്രീഹരി 13 വിക്കറ്റ് വീഴ്ത്തിയിരുന്നു. ഈ മികവാണ് രണ്ടാം സീസണിലും ശ്രീഹരിക്ക് കെസിഎല്ലിലേക്ക് വഴിയൊരുക്കിയത്. കഴിഞ്ഞ സീസണില്‍ ബാറ്റിംഗിലും ബൗളിംഗിലും തിളങ്ങിയ ഓള്‍റൗണ്ടറായ പി.എം. അന്‍ഫലിനെ ഒന്നര ലക്ഷത്തിന് നിലനിര്‍ത്തുകയായിരുന്നു കാലിക്കറ്റ് ഗ്ലോബ് സ്റ്റാര്‍സ്. പത്ത് ഇന്നിംഗ്‌സുകളിലായി 106 റണ്‍സ് നേടിയ അന്‍ഫല്‍ അഞ്ചു വിക്കറ്റുകളും വീഴ്ത്തിയിരുന്നു. തുടര്‍ന്ന് നടന്ന പ്രസിഡന്‍സ് കപ്പ് അടക്കമുള്ള ടൂര്‍ണമെന്‍റുകളിലും മികച്ച പ്രകടനമായിരുന്നു അന്‍ഫലിന്‍റേത്. മുഹമ്മദ് കൈഫാണ് ജില്ലയില്‍ നിന്ന് കെസിഎല്‍ കളിക്കുന്ന മറ്റൊരു താരം. ഒന്നരലക്ഷം രൂപയ്ക്കാണ് കൈഫിനെ ആലപ്പുഴ സ്വന്തമാക്കിയത്.

മണ്ണിടിച്ചില്‍ ഭീതി: അടിയന്തരയോഗം ചേര്‍ന്നു

കാസര്‍ഗോഡ്: മഴ ശക്തമായി തുടരുന്ന സാഹചര്യത്തില്‍ ജില്ലാ ദുരന്തനിവാരണ അതോറിറ്റിയുടെ അടിയന്തരയോഗം ചേര്‍ന്നു. മണ്ണിടിച്ചില്‍ ഭീഷണിയുള്ള മേഖലകളില്‍ അതീവ ജാഗ്രത പാലിക്കാന്‍ ജില്ലാ കളക്ടര്‍ കെ. ഇമ്പശേഖര്‍ നിര്‍ദേശം നല്‍കി. അപകട ഭീഷണിയിലുള്ള കുടുംബങ്ങളെ മാറ്റിപ്പാര്‍പ്പിക്കുന്നതിന് നടപടി സ്വീകരിക്കാന്‍ തഹസില്‍ദാര്‍മാര്‍ക്ക് ജില്ലാ കളക്ടര്‍ നിര്‍ദേശം നല്‍കി. വില്ലേജ് ഓഫീസര്‍മാരുടെ യോഗം വിളിച്ച് നടപടി സ്വീകരിക്കുന്നതിനും കളക്ടര്‍ നിര്‍ദേശിച്ചു. ദേശീയപാത നിര്‍മാണം നടത്തുന്ന വീരമലക്കുന്ന്, മട്ടലായി കുന്ന്, ബേവിഞ്ച തെക്കില്‍ കുന്ന് എന്നിവിടങ്ങളിലും വെള്ളരിക്കുണ്ട് താലൂക്കിലെ മലയോരപ്രദേശങ്ങളില്‍ കള്ളാര്‍ മേഖലയിലും മണ്ണിടിച്ചില്‍ നേരിടാന്‍ ജാഗ്രത പാലിക്കേണ്ടതാണ്. കടലേറ്റം രൂക്ഷമായ മേഖലയില്‍ അതീവ ജാഗ്രത പാലിക്കുന്നതിന് കലക്ടര്‍ മേജര്‍ ഇറിഗേഷന്‍ വകുപ്പിന് നിര്‍ദ്ദേശം നല്‍കി. കടലേറ്റമുള്ള മേഖലകളില്‍ പ്രതിരോധ നിര്‍മാണപ്രവര്‍ത്തനങ്ങള്‍ക്ക് സര്‍ക്കാരില്‍ എസ്റ്റിമേറ്റ് സമര്‍പ്പിച്ചിട്ടുണ്ടെന്ന് മേജര്‍ ഇറിഗേഷന്‍ എക്സിക്യൂട്ടീവ് എന്‍ജിനിയര്‍ അറിയിച്ചു.

കിട്ടന്‍ഗുണ്ടി മാലിന്യപ്ലാന്‍റിനെതിരേ നാട്ടുകാര്‍ പ്രക്ഷോഭത്തിലേക്ക്

കാസര്‍ഗോഡ്: മഞ്ചേശ്വരം മച്ചമ്പാടിയിലെ കിട്ടന്‍ഗുണ്ടിയില്‍ മാലിന്യ സംസ്‌കരണ യൂണിറ്റ് തുടങ്ങാനുള്ള നീക്കത്തില്‍ നിന്നും അധികൃതര്‍ പിന്മാറണമെന്ന് ആക്ഷന്‍ കമ്മിറ്റി ഭാരവാഹികള്‍ ആവശ്യപ്പെട്ടു. 2005ല്‍ ക്ലീന്‍ കേരള മിഷന്‍ മുഖേന ഖരമാലിന്യ സംസ്‌കരണം ആരംഭിച്ച തിനുശേഷം പൊതുജന പ്രക്ഷോഭത്തെ തുടര്‍ന്ന് ഖരമാലിന്യ സംസ്‌കരണ പദ്ധതി നിര്‍ത്തലാക്കിയ പ്രദേശത്ത് തന്നെയാണ് പുതിയ ഡയപ്പര്‍ സംസ്‌കരണ യൂണിറ്റും തുടങ്ങാന്‍ ഉദ്ദേശിക്കുന്നത്. ഇതുമായി ബന്ധപ്പെട്ട് ഗ്രാമ-ബ്ലോക്ക്-ജില്ലാ പഞ്ചായത്തിലെ ജനപ്രതിനിധികളുമായോ നാട്ടുകാരുമായോ രാഷ്ട്രീയപാര്‍ട്ടി പ്രതിനിധികളുമായോ ബന്ധപ്പെട്ട അധികാരികള്‍ യാതൊരുവിധ കൂടിയാലോചനങ്ങളും നടത്താതെയാണ് പദ്ധതിയുമായി മുന്നോട്ടുപോകുന്നത്. വിദ്യാഭ്യാസസ്ഥാപനങ്ങളും ആരാധനാലയങ്ങളും അടക്കം സ്ഥിതിചെയ്യുന്ന പ്രദേശത്ത് കൂടിയാണ് നിയുക്ത പദ്ധതി പ്രദേശത്ത് എത്തിച്ചേരേണ്ടത്. നാലു വാര്‍ഡുകളിലായി 300ല്‍ അധികം വീടുകളുള്ള ജനവാസ മേഖലയാണ് ഈ പ്രദേശം. പൊതുജനങ്ങള്‍ കിട്ടന്‍ഗുണ്ടിയില്‍ കുടിവെള്ളത്തിന് വേണ്ടി ആശ്രയിക്കുന്ന തോടിനോട് ചേര്‍ന്നുള്ളതുമാണ്. കാട്ടുപന്നി, മുള്ളന്‍പന്നി തുടങ്ങിയ വന്യമൃഗങ്ങളുടെ വിഹാരകേന്ദ്ര കൂടിയാണ് പ്രദേശം. പദ്ധതിക്കെതിരെ പൊതുജനങ്ങളുടെ സംരക്ഷണം ഉറപ്പുവരുത്തുന്നതിനായി സര്‍വകക്ഷിയോഗം ചേര്‍ന്ന് ജനകീയ സമിതി രൂപീകരിച്ചിട്ടുണ്ട്. പൊതുജനാരോഗ്യത്തെ സാരമായി ബാധിക്കുന്ന പദ്ധതിയില്‍ നിന്ന് ബന്ധപ്പെട്ടവര്‍ പിന്മാറണമെന്ന് പി.എച്ച്. അബ്ദുള്‍ ഹമീദ്, അബ്ദുള്‍ ഹമീദ് ബഡാജെ, ആരിഫ് മച്ചമ്പാടി, ഖലീല്‍ ബജല്‍, അബ്ദുള്‍ റസാഖ്, പി. അബൂബക്കര്‍ സിദ്ദിഖ്, പി. മുഹമ്മദ്, അബ്ദുള്‍ റഹ്‌മാന്‍ എന്നിവര്‍ പത്രസമ്മേളനത്തില്‍ ആവശ്യപ്പെട്ടു.

തോക്ക് ലൈസൻസുള്ളവരുണ്ട്, പക്ഷേ കാട്ടുപന്നിയെ വെടിവയ്ക്കാൻ ആളില്ല

കാസർഗോഡ്: ജില്ലയിൽ തോക്ക് ലൈസൻസുള്ള 1071 പേരുണ്ട്. ഇതിൽ 90 ശതമാനം പേരും കൃഷിക്ക് സംരക്ഷണമൊരുക്കാൻ എന്ന പേരിലാണ് തോക്ക് ലൈസൻസ് സമ്പാദിച്ചത്. പക്ഷേ ഇവരിൽനിന്ന് കാട്ടുപന്നികളെ വെടിവയ്ക്കാൻ തയ്യാറായി മുന്നോട്ടുവന്നത് വെറും 33 പേർ മാത്രമാണ്. കാട്ടുപന്നികളെ വെടിവച്ചുകൊല്ലാൻ സന്നദ്ധരായ തോക്കുടമകളുടെ പാനലിൽ ഉൾപ്പെടാൻ കാഞ്ഞങ്ങാട് റെയ്ഞ്ച് ഫോറസ്റ്റ് ഓഫീസർക്കാണ് അപേക്ഷ നല്കേണ്ടത്. അപേക്ഷ നല്കിയവരുടെ എണ്ണം തീർത്തും കുറവായതിനാൽ എല്ലാവരെയും പാനലിൽ ഉൾപ്പെടുത്തിയിട്ടുണ്ടെന്ന് വനംവകുപ്പ് അധികൃതർ പറഞ്ഞു. കാട്ടുപന്നികളെ വെടിവച്ചുകൊല്ലുന്നതുമായി ബന്ധപ്പെട്ട നിയമവ്യവസ്ഥകളുടെ നൂലാമാലകളാണ് തോക്കുടമകളെ പിന്തിരിപ്പിക്കുന്നതെന്നാണ് സൂചന. രാത്രിയിൽ ഉറക്കമിളച്ച് മണിക്കൂറുകളോളം കാത്തിരുന്ന് സ്വന്തം ജീവൻപോലും പണയംവച്ചുകൊണ്ട് അക്രമാസക്തരായ കാട്ടുപന്നികളെ വെടിവച്ചുവീഴ്ത്തിയാലും കാര്യമായ സാമ്പത്തികനേട്ടം പോലും ലഭിക്കാനില്ല. ഇറച്ചിയും ഉപയോഗിക്കാനാവില്ല. വനംവകുപ്പിന്‍റെ തെളിവെടുപ്പുകൾക്കും മറ്റു നടപടിക്രമങ്ങൾക്കുമെല്ലാം നിന്നുകൊടുക്കേണ്ടിയും വരും. മിക്കവാറും കാട്ടുപന്നിയുടെ ജഡം മണ്ണെണ്ണയൊഴിച്ച് മറവുചെയ്യുന്നതുവരെ വെടിക്കാരനും കാത്തുനിൽക്കേണ്ടിവരും. കാട്ടുപന്നികളെ കൊല്ലാൻ വനംവകുപ്പ് അനുമതി നല്കിയ ആദ്യകാലങ്ങളിൽ ജില്ലയിലാകെ എഴുപതോളം പന്നികളെ കൊന്നിരുന്നു. കാട്ടുപന്നിയെ വെടിവയ്ക്കാനെത്തിയ ആൾ പന്നിയുടെ ആക്രമണത്തിൽ കൊല്ലപ്പെട്ട സംഭവം പോലും ജില്ലയിലുണ്ടായി. ചുരുങ്ങിയ കാലത്തിനുള്ളിൽ നിയമത്തിന്‍റെ നൂലാമാലകളിൽ മനംമടുത്ത് തോക്കുടമകളെല്ലാം ഏറെക്കുറെ പിൻവലിയുകയായിരുന്നു. കാട്ടുപന്നികളെ കൊല്ലാനുള്ള അധികാരം തദ്ദേശസ്ഥാപനങ്ങൾക്ക് കൈമാറിയ ശേഷം ജില്ലയിൽ ഒരെണ്ണത്തെ പോലും നടപടിക്രമങ്ങൾ പാലിച്ചുകൊണ്ട് കൊന്നതായി കണക്കില്ല. പന്നികളുടെ എണ്ണമാകട്ടെ, വീണ്ടും ക്രമാതീതമായി പെരുകുകയും ചെയ്തു. മലയോരം വിട്ട് നഗരപ്രദേശങ്ങളിലേക്കുവരെ പന്നിക്കൂട്ടങ്ങൾ എത്തിത്തുടങ്ങി. നഗരങ്ങളിൽ പോലും കാട്ടുപന്നിയുടെ കുത്തേറ്റ് ആളുകൾക്ക് പരിക്കേൽക്കുന്ന സംഭവങ്ങളും ഉണ്ടായി.

മഴ മാറുന്നതും കാത്ത് റോഡിലെ കുഴികൾ

കാസർഗോഡ്: ഏഴുവർഷം മുമ്പ് കെഎസ്ടിപി പദ്ധതിയിൽ നവീകരിച്ച കാഞ്ഞങ്ങാട്-കാസർഗോഡ് സംസ്ഥാനപാത ടാറിംഗ് ഇളകി അങ്ങിങ്ങ് കുഴികൾ രൂപപ്പെട്ട് തകർന്നുകൊണ്ടിരിക്കുകയാണെന്ന കാര്യം രണ്ടുവർഷത്തിലേറെയായി നാട്ടുകാരും വാഹനയാത്രക്കാരുമെല്ലാം വിളിച്ചുപറഞ്ഞുകൊണ്ടിരിക്കുകയാണ്. വാഹനങ്ങൾ റോഡിലെ കുഴികളിൽ വീണുണ്ടായ അപകടങ്ങളിൽ പലർക്കും ജീവഹാനി ഉൾപ്പെടെ സംഭവിക്കുകയും ചെയ്തു. എന്നാൽ ഒരപകടം സംഭവിച്ചാൽ ഉടനെ ഓടിയെത്തി ആ സ്ഥലത്തെ കുഴി മാത്രം നികത്തുന്നതിൽ ഒതുങ്ങിനിൽക്കുകയായിരുന്നു പൊതുമരാമത്ത് വകുപ്പിന്‍റെ നടപടികൾ. കഴിഞ്ഞ വർഷമായപ്പോഴേക്കും സ്ഥിതി കൂടുതൽ ഗുരുതരമായി. പാലക്കുന്നിനും ഉദുമയ്ക്കുമിടയിൽ സംസ്ഥാനപാതയിലെ കലുങ്ക് തന്നെ ഇടിഞ്ഞുതാഴ്ന്ന സംഭവമുണ്ടായി. കാഞ്ഞങ്ങാട് മുതൽ കാസർഗോഡ് വരെയുള്ള 27.78 കിലോമീറ്റർ ദൂരത്തിലങ്ങോളം നിരന്ന കുഴികളുടെ ആഴവും പരപ്പും കൂടി. കാഞ്ഞങ്ങാട് നഗരത്തിൽ പോലും റോഡിലെ ടാറിംഗിന്‍റെ പാളികൾ ഇളകി അങ്ങിങ്ങ് തൊലിയടർന്നതുപോലെയായി. ഈ റോഡിൽ ആകെ 339 കുഴികളുണ്ടെന്ന് എണ്ണമെടുത്ത് കാഞ്ഞങ്ങാട്ടെ അഭിഭാഷകനായ എ. രാധാകൃഷ്ണൻ ജില്ലാ ലീഗൽ സർവീസ് അതോറിറ്റിക്ക് പരാതി നല്കി. പ്രശ്നം കോടതിക്കു മുന്നിൽ വരെ എത്തിയതോടെ റോഡിന്‍റെ അറ്റകുറ്റപണികൾക്കാവശ്യമായ നടപടികൾ ആരംഭിച്ചതായി പൊതുമരാമത്ത് വകുപ്പ് അറിയിച്ചു. റോഡിലെ കുഴികൾ നികത്തുന്നതിനുവേണ്ടി മാത്രമായി ഒരു ടെൻഡറാണ് ആദ്യം വിളിച്ചത്. നടപടിക്രമങ്ങളെല്ലാം പൂർത്തിയാക്കി അത് പ്രാദേശികതലത്തിൽ തന്നെ കരാർ നല്കി. തൊട്ടുപിന്നാലെ സംസ്ഥാനപാത പൂർണമായും റീടാറിംഗ് നടത്തി നവീകരിക്കാൻ 38 കോടി രൂപയുടെ മറ്റൊരു പദ്ധതിയും വന്നു. അത് ഊരാളുങ്കൽ ലേബർ കോൺട്രാക്ട് സൊസൈറ്റിക്ക് കരാർ നല്കി ഈ നടപടിക്രമങ്ങളെല്ലാം പൂർത്തിയാകുമ്പോഴേക്കും കാലവർഷം തുടങ്ങി. റോഡിലെ കുഴികളെല്ലാം പിന്നെയും വലുതായി. ചട്ടഞ്ചാൽ-ചെർക്കള ദേശീയപാതയിൽ മണ്ണിടിച്ചിലുണ്ടായതോടെ ഭാരവാഹനങ്ങളെയെല്ലാം ഇതുവഴി തിരിച്ചുവിട്ടു. ദേശീയപാതയിൽ പണി തുടങ്ങിയ കാലംമുതൽ ഒട്ടനവധി ഭാരവാഹനങ്ങൾ പതിവായി ഇതുവഴി തന്നെ കടന്നുപോകുന്നുണ്ട്. എല്ലാംകൂടി റോഡിൽ കുഴിയൊഴിഞ്ഞ ഇടമില്ലാതായി. ചെമ്മനാട് ഭാഗത്തെ വിസ്തൃതിയും ആഴവുമേറിയ നാല് കുഴികളിൽ വാഹനങ്ങൾ വീണ് അപകടത്തിൽപ്പെടുന്ന് പതിവായതോടെ കഴിഞ്ഞദിവസം നാട്ടുകാരുടെ കൂട്ടായ്മ രംഗത്തിറങ്ങി കോൺക്രീറ്റ് മിശ്രിതം നിറച്ച് കുഴികൾ നികത്തിയിരുന്നു. കുഴികളിൽ നിറഞ്ഞുകിടന്ന മഴവെള്ളം മോട്ടോർ ഉപയോഗിച്ച് പമ്പ് ചെയ്ത് വറ്റിച്ചാണ് കോൺക്രീറ്റിംഗ് നടത്തിയത്. എല്ലായിടത്തും ഇങ്ങനെ ചെയ്യാൻ കഴിയില്ലല്ലോ. റോഡിന്‍റെ അറ്റകുറ്റപണികൾ തുടങ്ങുന്നതിനായി മഴ മാറുന്നതും നോക്കിയിരിക്കുകയാണ് കുഴികൾ നികത്താൻ കരാറെടുത്ത പ്രാദേശിക കരാറുകാരും റീ ടാറിംഗിന് കരാറെടുത്ത ഊരാളുങ്കൽ സൊസൈറ്റിയും. റീ ടാറിംഗിന് തന്നെ കരാറായിക്കഴിഞ്ഞ സാഹചര്യത്തിൽ കുഴികൾ നികത്താൻ മാത്രമായി ലക്ഷങ്ങൾ ചെലവാക്കി മറ്റൊരു പ്രവൃത്തി നടത്തേണ്ടതുണ്ടോ എന്ന സംശയവും ഇതിനിടയിൽ ഉയർന്നിട്ടുണ്ട്. മഴക്കാലം തുടങ്ങുന്നതിനുമുമ്പ് ആ പ്രവൃത്തി നടത്തിയിരുന്നെങ്കിൽ റോഡ് തത്കാലത്തേക്കെങ്കിലും ഗതാഗതയോഗ്യമാകുമായിരുന്നു. ഇനി മഴ മാറിക്കഴിഞ്ഞിട്ട് രണ്ടു പ്രവൃത്തികളും ഒന്നിനു പിറകേ ഒന്നായി നടത്തേണ്ട ആവശ്യമെന്താണെന്നാണ് നാട്ടുകാരുടെ ചോദ്യം.

കത്തോലിക്ക കോൺഗ്രസ് യൂണിറ്റ് കൺവൻഷൻ

പാലാവയൽ: കത്തോലിക്ക കോൺഗ്രസ് പാലാവയൽ യുണിറ്റ് കൺവെൻഷൻ തോമാപുരം മേഖല ഡയറക്ടർ ഫാ. മാത്യു വളവനാൽ ഉദ്ഘാടനം ചെയ്തു. മേഖല പ്രസിഡന്‍റ് സാജു പടിഞ്ഞാറേട്ട് അധ്യക്ഷത വഹിച്ചു. പാലാവയൽ യുണിറ്റ് ഡയറക്ടർ ഫാ. ജോസ് മാണിക്കത്താഴെ അനുഗ്രഹ പ്രഭാഷണം നടത്തി. മേഖല വൈസ് പ്രസിഡന്‍റ് മോളി തോമസ്, സെക്രട്ടറി തോമസ് മാത്യു, ട്രഷറർ സെബാസ്റ്റ്യൻ വട്ടപ്പറമ്പിൽ, യുണിറ്റ് പ്രസിഡന്‍റ് ജോയി കൊച്ചുകുന്നത്തുപറമ്പിൽ, സെക്രട്ടറി പ്രശാന്ത് പാറേക്കുടിയിൽ, ട്രഷറർ പി.കെ. ജോസ് പുള്ളോലിൽ എന്നിവർ പ്രസംഗിച്ചു.

വചനം മധുരം പദ്ധതിക്കു തുടക്കമായി

മണ്ഡപം: കാറ്റക്കെറ്റിക്കൽ അപ്പോസ്തോലറ്റ് തോമാപുരം ഫൊറോനയുടെ ആഭിമുഖ്യത്തിൽ സൺഡേ സ്കൂൾ കുട്ടികൾക്കും അധ്യാപകർക്കും ആയി ബൈബിൾ വചനപഠനപദ്ധതി ‘വചനം മധുരം’ ഉദ്ഘാടനം അതിരൂപത മതബോധന ഡയറക്ടർ റവ.ഡോ. ആന്‍റണി കിടാരത്തിൽ നിർവഹിച്ചു. ദിവസേന ഒരു ബൈബിൾ വാക്യം മനഃപാഠമാക്കുക എന്ന ലക്ഷ്യത്തോടെയാണ് പദ്ധതി ആവിഷ്കരിക്കുന്നത്. സൺഡേ സ്കൂൾ കുട്ടികളെ വിവിധ വിഭാഗങ്ങളായി തിരിച്ച്, പുരോഗതി വിലയിരുത്തുകയും പ്രോത്സാഹന സമ്മാനങ്ങൾ നൽകുകയും ചെയ്യും. ഇടവകാതല വിജയികളായ കുട്ടികൾക്കും അധ്യാപകർക്കും വേണ്ടി ഡിസംബർ മാസത്തിൽ ഫൊറോന തലത്തിൽ ഗ്രാൻഡ്ഫിനാലെ സംഘടിപ്പിച്ച് വിജയികളാകുന്നവർക്ക് ആകർഷകമായ സമ്മാനങ്ങളും ക്യാഷ് അവാർഡുകളും വിതരണം ചെയ്യും. ഓരോ ദിവസവും പഠിക്കേണ്ട ബൈബിൾ വാക്യങ്ങൾ ഫൊറോന സമിതി നിർദ്ദേശിച്ചു നൽകുന്നതാണ്. പദ്ധതി നിർവഹണത്തിന് വേണ്ടി ഫൊറോന ഡയറക്ടർ രക്ഷാധികാരിയും ഫൊറോന പ്രസിഡന്‍റ്്, സെക്രട്ടറി, ഹെഡ്മാസ്റ്റർമാർ എന്നിവർ എക്സിക്യൂട്ടീവ് അംഗങ്ങൾ ആയും കമ്മിറ്റി രൂപീകരിച്ചു.

സാരിവലയും ചെറുവലയും കവ്വായിക്കായലിലെ മത്സ്യസമ്പത്തിന് ഭീഷണിയാകുന്നു

തൃക്കരിപ്പൂർ: സാരിവലയും ചെറുവലയും ഉപയോഗിച്ചുള്ള അശാസ്ത്രീയമായ മീൻപിടിത്തം കവ്വായിക്കായലിലെ മത്സ്യസമ്പത്തിന് ഭീഷണിയാകുന്നു. ഇത് പരമ്പരാഗത മത്സ്യത്തൊഴിലാളി കുടുംബങ്ങളെ വറുതിയിലാക്കുകയാണ്. കാലങ്ങളായി കാലവർഷത്തിന്‍റെ തുടക്കത്തിൽ വിവിധതരം കായൽ മത്സ്യങ്ങൾ യഥേഷ്ടം ലഭിച്ചു വന്നിരുന്ന വലിയപറമ്പ്, ഇടയിലക്കാട്, പടന്നക്കടപ്പുറം ഭാഗങ്ങളിൽ വലയിറക്കുന്ന തൊഴിലാളികൾ ഇപ്പോൾ വെറുംകൈയോടെ മടങ്ങുന്ന നിലയിലാണ്. ഒരു വിഭാഗം ആളുകൾ സാരിവല എന്ന പേരിൽ അറിയപ്പെടുന്ന ചെറുതും വലുതുമായ കണ്ണികളുള്ള വ്യത്യസ്ത വലകൾ കൂട്ടിയോജിപ്പിച്ച് വേലിയേറ്റ വേളയിൽ അഴിമുഖത്ത് വിരിക്കുന്നതുമൂലമാണ് കടലിൽ നിന്ന് കായലിലേക്ക് മത്സ്യങ്ങൾ വരാത്ത സ്ഥിതിയായതെന്നാണ് ഇവർ പറയുന്നത്. രുചിയിൽ ദേശാന്തര പെരുമയുള്ള കായൽ മത്സ്യങ്ങളിൽ പലതും ഇന്ന് കാണാൻ പോലും കിട്ടാനില്ലെന്ന് തൊഴിലാളികൾ പറയുന്നു. കല്ലുമീൻ അഥവാ കരിപ്പെട്ടി, കറുങ്ങാൻ അഥവാ കുടുകുടപ്പൻ, നോങ്ങോൽ, തിരുത, വഴുത തുടങ്ങി പല മത്സ്യങ്ങളും കിട്ടാതായിട്ട് മാസങ്ങളായി. മഴ മാസങ്ങളിൽ കിട്ടാറുള്ള തെളളി ചെമ്മീൻ, വെള്ള വലിയ ചെമ്മീൻ എന്നിവയും മുൻവർഷങ്ങളിലേത് പോലെ ഇത്തവണ കിട്ടിയിട്ടില്ല. വട്ടത്തോണികളിലെത്തുന്ന ഇതര സംസ്ഥാന തൊഴിലാളികൾ ചെറുവലകളുപയോഗിച്ച് നടത്തുന്ന മീൻപിടിത്തവും പരമ്പരാഗത തൊഴിലാളികളുടേതിൽ നിന്ന് വ്യത്യസ്തമാണ്. പരമ്പരാഗത മത്സ്യത്തൊഴിലാളികൾ കിഴക്കോട്ട് ഒഴുക്കിനനുകൂലമായി വീശുമ്പോൾ ഇവർ ഒന്നര മീറ്റർ നീളം മാത്രമുള്ള ചെറുവലകൾ ഉപയോഗിച്ച് അശാസ്ത്രീയമായ രീതിയിൽ തെക്ക്, വടക്ക് ഭാഗങ്ങളിലേക്ക് വലയെറിയുകയാണ് ചെയ്യുന്നതെന്നാണ് പരമ്പരാഗത തൊഴിലാളികൾ പറയുന്നത്. ഇത്തരത്തിലുള്ള അശാസ്ത്രീയ മീൻപിടിത്തം നിയന്ത്രിക്കാൻ ഫിഷറീസ് അധികൃതർ അടിയന്തിരമായി ഇടപെടണമെന്നാണ് ഇവരുടെ ആവശ്യം.

അക്രമരാഷ്‌ട്രീയത്തിനെതിരേയുള്ള സന്ദേശമാണ് ലക്ഷ്യമെങ്കില്‍ ആദ്യം പരിഗണിക്കേണ്ടത് ഡോ. അസ്‌നയെ: രാഹുല്‍ മാങ്കൂട്ടത്തില്‍

കാഞ്ഞങ്ങാട്: അക്രമരാഷ്‌ട്രീയത്തിനെതിരേയുള്ള സന്ദേശം നല്‍കാനാണ് രാജ്യസഭയിലേക്ക് എംപിമാരെ രാഷ്‌ട്രപതി നാമനിര്‍ദേശം ചെയ്യുന്നതെങ്കില്‍ ആദ്യം പരിഗണിക്കേണ്ട പേര് ബോംബേറില്‍ കാല്‍ നഷ്ടപ്പെട്ട ഡോ. അസ്‌നയുടേതാണെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്‍റ് രാഹുല്‍ മാങ്കൂട്ടത്തില്‍ എംഎല്‍എ. കാഞ്ഞങ്ങാട് കാര്‍ഷികവികസനബാങ്ക് ഓഡിറ്റോറിയത്തില്‍ നടന്ന യൂത്ത് കോണ്‍ഗ്രസ് ജില്ലാ നേതൃയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജില്ലയിലെ മുഴുവന്‍ വാര്‍ഡ് യൂത്ത് കോണ്‍ഗ്രസ് കമ്മറ്റികളും ഓഗസ്റ്റ് ഒമ്പതിന് മുന്നോടിയായി രൂപീകരിക്കാന്‍ തീരുമാനിച്ചു. ജില്ലാ പ്രസിഡന്‍റ് കെ.ആര്‍. കാര്‍ത്തികേയന്‍ അധ്യക്ഷതവഹിച്ചു. ഡിസിസി പ്രസിഡന്‍റ് പി.കെ. ഫൈസല്‍, സംസ്ഥാന വൈസ് പ്രസിഡന്‍റുമാരായ അബിന്‍ വര്‍ക്കി കൊടിയാട്ട്, ഒ.ജെ. ജനീഷ്, അനു താജ്, സംസ്ഥാന ജനറല്‍ സെക്രട്ടറിമാരായ ജോമോന്‍ ജോസ്, വി.പി. അബ്ദുള്‍ റഷീദ്, ഡിസിസി വൈസ്പ്രസിഡന്‍റ് ബി.പി. പ്രദീപ്കുമാര്‍, സെക്രട്ടറി പി.വി. സുരേഷ്, യൂത്ത് കോണ്‍ഗ്രസ് സംസ്ഥാന സെക്രട്ടറി സി.എം. ഉനൈസ്, റിനോ പി. രാജന്‍, ഷോണി കെ. തോമസ്, രാജേഷ് തമ്പാന്‍, വിനോദ് കപ്പിത്താന്‍ എന്നിവര്‍ പ്രസംഗിച്ചു.

കല്യോട്ട് ഇരട്ടക്കൊലപാതകേസിലെ പ്രതിക്ക് പരോള്‍ നല്‍കിയത് വെല്ലുവിളി: കോണ്‍ഗ്രസ്

കാസര്‍ഗോഡ്: യൂത്ത് കോണ്‍ഗ്രസ് പ്രവര്‍ത്തകരായ കല്യോട്ടെ ശരത്‌ലാല്‍, കൃപേഷ് എന്നിവരെ നിഷ്‌ടൂരമായി കൊലപ്പെടുത്തിയ കേസില്‍ സിബിഐ കോടതി ഇരട്ട ജീവപര്യന്തത്തിന് ശിക്ഷിച്ച കേസിലെ എട്ടാം പ്രതി സുബീഷ് വെളുത്തോളിക്ക് ജയില്‍ അഡ്‌വൈസറി ബോഡിന്‍റെ ശുപാര്‍ശപ്രകാരം സംസ്ഥാന സര്‍ക്കാര്‍ 20 ദിവസത്തെ പരോള്‍ അനുവദിച്ച നടപടി നിന്ദ്യവും പ്രതിഷേധാര്‍ഹവുമാണെന്ന് ഡിസിസി പ്രസിഡന്‍റ് പി. കെ. ഫൈസല്‍ പറഞ്ഞു. ജയില്‍ അഡ്‌വൈസറി കമ്മിറ്റികള്‍ ക്രിമിനലുകളുടെ കയ്യിലായതിന്‍റെ ഭവിഷ്യത്താണ് ഇവിടെ ഉണ്ടായിരിക്കുന്നത്. സമാധാന അന്തരീക്ഷം നിലനില്‍ക്കുന്ന ജില്ലയില്‍ ഇതുപോലുള്ള അനധികൃത പരോള്‍ നല്‍കുന്നതിലൂടെ ക്രിമിനലുകള്‍ക്ക് അക്രമം നടത്താനും കൊലപാതകത്തിനും പ്രോത്സാഹിപ്പിക്കുന്ന സര്‍ക്കാര്‍ നടപടി നിയമത്തോടും കോടതിയോടുമുള്ള വെല്ലുവിളിയാണ്. നിയമത്തെ അട്ടിമറിക്കുന്നതോടൊപ്പം സമൂഹം വെറുക്കുന്ന ക്രിമിനലുകള്‍ക്ക് ആവേശം പകരാനുള്ള നടപടിയാണ് പരോള്‍ കൊണ്ട് സിപിഎമ്മും സര്‍ക്കാരും ലക്ഷ്യമിടുന്നത് ഇതിനെതിരെ ശക്തമായ നിയമനടപടികളുമായി പാര്‍ട്ടി മുന്നോട്ടുപോകുമെന്നും അദ്ദേഹം പറഞ്ഞു.

ബളാൽ ബ്ലോക്ക് കോൺഗ്രസ് പരിശീലന ക്യാമ്പ് നടത്തി

രാജപുരം: ബളാൽ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പഞ്ചായത്ത്, നിയമസഭ തെരഞ്ഞെടുപ്പുകൾക്ക് മുന്നോടിയായി വാർഡ്, ബൂത്ത് കമ്മിറ്റി പ്രസിഡന്‍റുമാർക്കും ബൂത്ത് ഏജന്‍റുമാർക്കും പരിശീലന ക്യാമ്പ് സംഘടിപ്പിച്ചു. മുന്നൊരുക്കം 2025-26 എന്ന പേരിൽ പൂടംകല്ല് ജോയ് ഹോം സ്റ്റേയിൽ സംഘടിപ്പിച്ച ക്യാമ്പ് ഡിസിസി പ്രസിഡന്‍റ് പി.കെ. ഫൈസൽ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് മധുസൂദനൻ ബാലൂർ അധ്യക്ഷത വഹിച്ചു. എം. കുഞ്ഞമ്പു നായർ അഞ്ജനമുക്കൂട് പതാക ഉയർത്തി. കെപിസിസി വക്താവ് അനിൽ ബോസ്, മാസ്റ്റർ ട്രെയ്നർ ഷിജിത്ത് തോമസ് എന്നിവർ ക്ലാസ് നയിച്ചു. ഡിസിസി വൈസ് പ്രസിഡന്‍റുമാരായ ജെയിംസ് പന്തമ്മാക്കൽ, ബി.പി. പ്രദീപ് കുമാർ, ജനറൽ സെക്രട്ടറിമാരായ ഹരിഷ് പി. നായർ, പി.വി. സുരേഷ്, അലപ്പുഴ ഡിസിസി സെക്രട്ടറി സോമകുമാർ, പഞ്ചായത്ത് പ്രസിഡന്‍റ് ടി.കെ. നാരായണൻ, ആദിവാസി കോൺഗ്രസ് സംസ്ഥാന സെക്രട്ടറി വി.കെ. രാജൻ, മണ്ഡലം പ്രസിഡന്‍റുമാരായ എം.എം. സൈമൺ, വി. ബാലകൃഷ്ണൻ ബാലൂർ, എം.പി. ജോസഫ്, കെ.ജെ. ജെയിംസ്, കാഞ്ഞങ്ങാട് നിയോജക മണ്ഡലം യുഡിഎഫ് കൺവീനർ സി.വി. ഭാവനൻ, ബളാൽ ബ്ലോക്ക് സെക്രട്ടറി വി.കെ. ബാലകൃഷ്ണൻ, ബാബു കദളിമറ്റം, മഹിളാ കോൺഗ്രസ് ബ്ലോക്ക് പ്രസിഡന്‍റ് ലക്ഷ്മി തമ്പാൻ, എസ്. മധുസൂദനൻ റാണിപുരം, ബാബു മാണിയൂർ എന്നിവർ പ്രസംഗിച്ചു. മുൻ പഞ്ചായത്ത് പ്രസിഡന്‍റുമാരായ എച്ച്. വിഘ്നേശ്വര ഭട്ട്, കാർത്ത്യായനിയമ്മ, ത്രേസ്യാമ്മ ജോസഫ്, എം. രാധാമണി, സുപ്രിയ അജിത്ത് എന്നിവരെ ചടങ്ങിൽ ആദരിച്ചു. സമാപന സമ്മേളനം കെപിസിസി അംഗം കരിമ്പിൽ കൃഷ്ണൻ ഉദ്ഘാടനം ചെയ്തു. പി.കെ. ബാലചന്ദ്രൻ പ്രവർത്തന റിപ്പോർട്ട് അവതരിപ്പിച്ചു.

പ്രവാസി ക്ഷേമബോര്‍ഡ് അംഗത്വ കാമ്പയിനും കുടിശിക നിവാരണവും

കാസര്‍ഗോഡ്: കേരള പ്രവാസി കേരളീയ ക്ഷേമബോര്‍ഡ് അംഗത്വ കാമ്പയിനും കുടിശിക നിവാരണവും ജില്ലാ പഞ്ചായത്ത് ഹാളില്‍ ഡയറക്ടര്‍ എന്‍.കെ. കുഞ്ഞഹമ്മദ് ഉദ്ഘാടനം ചെയ്തു. ഡയറക്ടര്‍ വില്‍സണ്‍ ജോര്‍ജ് അധ്യക്ഷത വഹിച്ചു. ഫിനാന്‍സ് മാനേജര്‍ ടി. ജയകുമാര്‍ സ്വാഗതവും സീനിയര്‍ ഓഫീസ് അസിസ്റ്റന്‍റന് കെ. അജിത്ത് നന്ദിയും പറഞ്ഞു. നാനൂറോളം പ്രവാസികള്‍ പങ്കെടുത്ത പരിപാടിയില്‍ 120 പേര്‍ പ്രവാസി ക്ഷേമനിധിയില്‍ പുതുതായി അംഗത്വമെടുത്തു. 75 പേര്‍ തങ്ങളുടെ അംഗത്വം പുതുക്കി. പുതിയ അംഗത്വം എടുക്കുന്നതിനൂം നഷ്ടപ്പെട്ട അംഗത്വം പുതുക്കുന്നതിനും www.pr avasikerala.org എന്ന വെബ് സൈറ്റ് സന്ദര്‍ശിക്കണമെന്നും പെനാല്‍റ്റി ഇളവ് ആനുകൂല്യം പരമാവധി പ്രയോജനപ്പെടുത്തണമെന്നും ബോര്‍ഡ് അധികൃതര്‍ അറിയിച്ചു.

റെഡ്‌ക്രോസ് കൗണ്‍സിലര്‍മാര്‍ക്ക് പരിശീലനം നല്‍കി

കാഞ്ഞങ്ങാട്: ജില്ലയിലെ ആറു വിദ്യാഭ്യാസ ഉപജില്ലകളില്‍ നിന്നുള്ള വിദ്യാലയങ്ങളിലെ ജൂണിയര്‍ റെഡ്‌ക്രോസ് കൗണ്‍സിലര്‍മാര്‍ക്ക് പരിശീലനം നല്‍കി. റോട്ടറി ക്ലബില്‍ നടന്ന പരിപാടി സംസ്ഥാന കോ-ഓര്‍ഡിനേറ്റര്‍ ആര്‍. ശിവന്‍ പിള്ള ഉദ്ഘാടനം ചെയ്തു. ജില്ലാ ചെയര്‍മാന്‍ എം. വിനോദ് അധ്യക്ഷതവഹിച്ചു. ജനറല്‍ സെക്രട്ടറി ടി.കെ. നാരായണന്‍, വൈസ്‌ചെയര്‍മാന്‍ കെ. അനില്‍കുമാര്‍, ട്രഷറര്‍ എന്‍. സുരേഷ്, മാനേജിംഗ് കമ്മറ്റിയംഗം എം. സുദില്‍, ജില്ലാ കോ-ഓര്‍ഡിനേറ്റര്‍ ജ്യോതികുമാരി, ഉപജില്ലാ കോ-ഓര്‍ഡിനേറ്റര്‍മാരായ ഇന്ദിര മന്നവന്‍, ലക്ഷ്മീശ, വി.എം. ജെസി, ടി.പി. പദ്മകുമാര്‍ എന്നിവര്‍ പ്രസംഗിച്ചു. ഡോ. ലക്ഷമിദേവി എം.പൈ ക്ലാസെടുത്തു. ജില്ലാ കോ-ഓര്‍ഡിനേറ്റര്‍ ടി.കെ. സമീര്‍ സ്വാഗതവും ജോയിന്‍റ് കോ-ഓര്‍ഡിനേറ്റര്‍ പി.ജി. പ്രശാന്ത് നന്ദിയും പറഞ്ഞു.

സ്വാതന്ത്ര്യദിനം വിപുലമായി ആഘോഷിക്കും

കാസര്‍ഗോഡ്: ഓഗസ്റ്റ് 15ന് രാജ്യത്തിന്‍റെ സ്വാതന്ത്ര്യദിനാഘോഷം ജില്ലയില്‍ വിപുലമായി സംഘടിപ്പിക്കുന്നതിന് കലക്ടറേറ്റില്‍ ചേര്‍ന്ന യോഗം തീരുമാനിച്ചു. വിദ്യാനഗറിലെ കാസര്‍ഗോഡ് മുന്‍സിപ്പല്‍ സ്റ്റേഡിയത്തില്‍ ജില്ലാതല പരേഡ് നടക്കും. സ്വാതന്ത്ര്യ ദിനാഘോഷം വിജയകരമാക്കുന്നതിനു എല്ലാ സര്‍ക്കാര്‍ ഉദ്യോഗസ്ഥരുടെയും സഹകരണവും പൊതുജന പങ്കാളിത്തവും വേണമെന്ന് യോഗത്തിന് അധ്യക്ഷതവഹിച്ച എഡിഎം പി. അഖില്‍ പറഞ്ഞു. അസി. കമാന്‍ഡന്‍റ്, എആര്‍ ക്യാമ്പ് നടത്തുന്ന സ്വാതന്ത്ര്യദിനാഘോഷ റിഹേഴ്‌സല്‍ പരേഡ് ഓഗസ്റ്റ് 11, 12 തീയതികളില്‍ ഉച്ചക്ക് രണ്ടിനും ഓഗസ്റ്റ് 13നു രാവിലെ എട്ടിനും കാസര്‍ഗോഡ് മുനിസിപ്പല്‍ സ്‌റ്റേഡിയത്തില്‍ നടക്കും. പങ്കെടുക്കുന്നവര്‍ ഓഗസ്റ്റ് 11, 12 തീയതികളില്‍ ഉച്ചയ്ക്ക് 1.30നു 13നു രാവിലെ 7.30നും യൂണിഫോമില്‍ എത്തിച്ചേരേണ്ടതാണ്. സ്റ്റേഡിയത്തില്‍ ആവശ്യമുള്ള പന്തല്‍, ഫര്‍ണിച്ചറുകള്‍ ലൈറ്റ് സംവിധാനം, മൈക്ക് എന്നിവയുടെ ചുമതല പിഡബ്ല്യുഡിക്കും സുരക്ഷാക്രമീകരണ ചുമതല ജില്ലാ പോലീസ് മേധാവിക്കും സ്റ്റേഡിയവും പരിസരവും വൃത്തിയാക്കുന്നതിനുള്ള ചുമതല കാസര്‍ഗോഡ് മുനിസിപ്പാലിറ്റി സെക്രട്ടറിക്കും മികച്ച പ്ലാറ്റൂണുകള്‍ക്കുള്ള ട്രോഫി നല്‍കാനുള്ള ക്രമീകരണചുമതല കാസര്‍ഗോഡ് തഹസില്‍ദാര്‍ക്കുമാണ്.

ഉദുമ ടെക്സ്റ്റൈൽ മിൽ വെള്ളക്കെട്ടിനു നടുവിൽ

പൊയിനാച്ചി: മഴവെള്ളം ഒഴുകിപ്പോയിരുന്ന തോട് ദേശീയപാതയുടെ സർവീസ് റോഡ് നിർമാണത്തിനായി നികത്തിയതിനെ തുടർന്ന് മൈലാട്ടിയിലെ ഉദുമ ടെക്സ്റ്റൈൽ മിൽ കെട്ടിടം വെള്ളക്കെട്ടിന് നടുവിലായി. മില്ലിനും പഴയ ദേശീയപാതയ്ക്കും സമീപത്തുകൂടി ഒഴുകിയിരുന്ന തോടിന്‍റെ ഒരു ഭാഗം ദേശീയപാതയിൽ നിർമാണപ്രവൃത്തികൾ തുടങ്ങിയതോടെ മൂടിപ്പോവുകയായിരുന്നു. മഴക്കാലത്തുമാത്രം വെള്ളമൊഴുകിയിരുന്ന തോടായതിനാൽ ഇവിടെ കലുങ്കോ പാലമോ ഒന്നും പണിതതുമില്ല. ഇതോടെയാണ് തോടിന്‍റെ ബാക്കിഭാഗത്ത് വെള്ളം നിറഞ്ഞാൽ അതു തൊട്ടടുത്ത പറമ്പുകളിലൂടെയും മില്ലിനു മുന്നിലൂടെയും കുത്തിയൊഴുകുന്ന സ്ഥിതിയായത്. വെള്ളക്കെട്ടിനെ തുടർന്ന് സമീപത്തെ പറമ്പിന്‍റെ മതിലും തകർന്നുവീണു. മുറ്റത്തുതന്നെ ചെളിവെള്ളം നിറഞ്ഞതോടെ ഇപ്പോൾ ജീവനക്കാർക്ക് മില്ലിനകത്തേക്ക് പ്രവേശിക്കാൻ പോലും വിഷമമായി. ടയറുകൾ ചെളിയിൽ പുതയുന്നതുമൂലം വാഹനങ്ങൾക്കും മില്ലിനു മുന്നിൽ എത്താൻ കഴിയുന്നില്ല. ഇതോടെ മില്ലിലേക്ക് അസംസ്കൃത വസ്തുക്കൾ എത്തിക്കാനും ഉല്പന്നങ്ങൾ പുറത്തേക്ക് കൊണ്ടുപോകാനുമെല്ലാം ബുദ്ധിമുട്ടായി. വെള്ളക്കെട്ട് കൂടുതലായതോടെ ഇടയ്ക്ക് മില്ലിൽ ലേ ഓഫ് പ്രഖ്യാപിക്കേണ്ട സാഹചര്യം പോലുമുണ്ടായി. പ്രശ്നം ചൂണ്ടിക്കാട്ടി മിൽ അധികൃതരും നാട്ടുകാരും എംപി, എംഎൽഎ, ജില്ലാ കളക്ടർ എന്നിവർക്കും ദേശീയപാത അഥോറിറ്റിക്കും ഉദുമ പഞ്ചായത്തിനും പരാതി നല്കിയിട്ടുണ്ട്. എന്നാൽ ദേശീയപാതയിൽ നിന്നുള്ള വെള്ളമല്ല മില്ലിന്‍റെ മുറ്റത്തേക്കും സമീപ പറമ്പുകളിലേക്കും ഒഴുകിയെത്തുന്നതെന്ന വിശദീകരണമാണ് നിർമാണ കമ്പനി അധികൃതർ നല്കിയത്. ഇതോടെ തോട്ടിലെ വെള്ളത്തിന് ഒഴുകിപ്പോകാൻ മറ്റു വഴികൾ കണ്ടെത്തുന്നതിനായി ജനപ്രതിനിധികളും പഞ്ചായത്തും മുൻകൈയെടുക്കേണ്ട അവസ്ഥയാണ്.

യുവാവ് കുളത്തിൽ മരിച്ചനിലയിൽ

പറമ്പ: യുവാവിനെ സ്വകാര്യവ്യക്തിയുടെ കുളത്തിൽ മരിച്ച നിലയിൽ കണ്ടെത്തി. കുറ്റിത്താന്നി നഗറിലെ പുതിയകൂട്ടത്തിൽ അനു (40) ആണ് മരിച്ചത്. ഇന്നലെ രാവിലെ വീട്ടിൽനിന്നിറങ്ങിയ അനുവിനെ ഉച്ചയോടെ വീട്ടിൽനിന്നു രണ്ടു കിലോമീറ്റർ അകലെയുള്ള കുളത്തിൽ മുങ്ങിമരിച്ച നിലയിൽ കാണപ്പെടുകയായിരുന്നു. പെരിങ്ങോത്തുനിന്നും അഗ്നിശമനസേന എത്തിയാണ് പുറത്തെടുത്തത്. കണ്ണൻ-രമണി ദമ്പതികളുടെ മകനാണ്. അവിവാഹിതനാണ്. സഹോദരൻ: ബാബു.

ചാന്ദ്രദിനാഘോഷം

രാജപുരം: ഹോളി ഫാമിലി എഎൽപി സ്കൂളിൽ വൈവിധ്യമാർന്ന പരിപാടികളോടെ ചാന്ദ്രദിനാഘോഷം ആചരിച്ചു. പോസ്റ്റർ നിർമ്മാണം, ചന്ദ്രനെ അറിഞ്ഞൊരു ആകാശ യാത്ര, ചന്ദ്രനിലെ തട്ടുകട പോലുള്ള പ്രവർത്തനങ്ങൾ കുട്ടികളിൽ ആവേശവും കൗതുകവും ഉണർത്തി. നിത്യ ബാബു കുട്ടികൾക്ക് ചാന്ദ്രദിന സന്ദേശം നൽകി. അനില തോമസിന്‍റെ നേതൃത്വത്തിൽ നടന്ന ചാന്ദ്രദിന പ്രവർത്തനങ്ങൾ കുട്ടികൾക്ക് നവ്യാനുഭവമായി. മുഖ്യാധ്യാപകൻ കെ.ഒ. ഏബ്രഹാം, ഷൈബി ഏബ്രഹാം, സോണി കുര്യൻ‌, ആൽബിൻ ജോജോ, ജിറ്റി മോൾ ജിജി, എ. ആമിന എന്നിവർ നേതൃത്വം നൽകി. മാലക്കല്ല്: സെന്‍റ് മേരീസ് എയുപി സ്കൂളിൽ സയൻസ് ക്ലബിന്‍റെയും സോഷ്യൽ സയൻസ് ക്ലബ്ബിന്‍റെയും സംയുക്താഭിമുഖ്യത്തിൽ നടത്തിയ ചാന്ദ്രദിനാഘോഷത്തിൽ ആക്സിയാൻ-4 ദൗത്യത്തിൽ പങ്കാളിയായ ശുഭാംശു ശുക്ലയുടെ വേഷത്തിൽ വന്ന ബഹിരാകാശ സഞ്ചാരിയോടുള്ള സംവാദം കുട്ടികളിൽ ബഹിരാകാശ യാത്രയെ കുറിച്ചും ബഹിരാകാശ പേടകത്തെ കുറിച്ചും കൗതുകം ഉണർത്തി. അന്ന തോമസ് ചാന്ദ്രദിന സന്ദേശം നൽകി. മുഖ്യാധ്യാപകൻ എം.എ. സജി, ജോസിലി ജോസ്, സിസ്റ്റർ റോസ്‌ലിറ്റ്, ദിവാമരിയ സുനിൽ, ഗൗരി കൃഷ്ണ, നിയോ ബിനു, അന്ന വിനോദ് എന്നിവർ നേതൃത്വം നൽകി. വെള്ളരിക്കുണ്ട്: നിർമലഗിരി എൽപി സ്കൂളിൽ ചാന്ദ്രദിനാഘോഷം നടത്തി. ചാന്ദ്രദിന ക്വിസ്, ആകാശത്തെ കാഴ്ചകൾ ചിത്രരചന, ബഹിരാകാശ സഞ്ചാരിയായ ശുഭാംശു ശുക്ലയുമായി അഭിമുഖം, ചാന്ദ്രദിന പതിപ്പ്, അമ്പിളി കവിത ആലാപനം, പോസ്റ്റർ നിർമ്മാണം, റോക്കറ്റ് നിർമ്മാണം, വീഡിയോ പ്രദർശനം എന്നിവ ചാന്ദ്ര ദിനത്തിന് മനോഹാരിതയേകി. സിസ്റ്റർ അമ്പിളി ജോർജ്, അമൃത ഷാജു എന്നിവർ ദിനചാരണത്തിന് നേതൃത്വം നൽകി.

മതാധ്യാപകസംഗമം നടത്തി

മണ്ഡപം:കാറ്റക്കെറ്റിക്കൽ അപ്പോസ്തലേറ്റ് തോമാപുരം ഫൊറോനയുടെ ആഭിമുഖ്യത്തിൽ മണ്ഡപം സെന്‍റ് ജോസഫ് പാരിഷ് ഹാളിൽ നടന്ന ഡോമസ് ഡോക്ടിനെ മതാധ്യാപകസംഗമം തോമാപുരം ഫൊറോന വികാരി റവ.ഡോ. മാണി മേൽവെട്ടം ഉദ്ഘാടനം ചെയ്തു. മേഖലാ പ്രസിഡന്‍റ് സജി വള്ളോപ്പിള്ളി അധ്യക്ഷതവഹിച്ചു. തലശേരി അതിരൂപത വിശ്വാസപരിശീലന കേന്ദ്രം ഡയറക്ടർ റവ.ഡോ. ആന്‍റണി കിടാരത്തിൽ മുഖ്യപ്രഭാഷണം നടത്തി. ഫാ. വർഗീസ് ചെരിയംപുറത്ത്, ജോമേഷ് കൊല്ലക്കൊമ്പിൽ, തങ്കച്ചൻ തേക്കുംകാട്ടിൽ, ടോമി വട്ടോത്ത് എന്നിവർ പ്രസംഗിച്ചു. തോമാപുരം ഫൊറോനയിലെ 15 സൺഡേ സ്കൂളിൽ നിന്നുമായി ഇരുനൂറോളം പേർ സെമിനാറിൽ പങ്കെടുത്തു. ഈ വർഷം നടത്തിയ സ്കോളർഷിപ്പ് പരീക്ഷയിൽ മികച്ച വിജയം കരസ്ഥമാക്കിയ 25 കുട്ടികൾക്ക് അവാർഡുകൾ വിതരണം ചെയ്തു.മതാധ്യാപനത്തിൽ നിന്നും വിരമിച്ച ലാലി തടത്തിലിന് ആദരവും യാത്രയയപ്പും നൽകി.

വൈഎംസിഎ ഭാരവാഹികള്‍ സ്ഥാനമേറ്റു

കാഞ്ഞങ്ങാട്: കാഞ്ഞങ്ങാട് വൈഎംസിഎ കുടുംബസംഗമവും പുതിയ ഭാരവാഹികളുടെ സ്ഥാനാരോഹണ ചടങ്ങും കാഞ്ഞങ്ങാട് വ്യാപാരഭവന്‍ ഹാളില്‍ ഏഷ്യാ പസഫിക് അലയന്‍സ് കമ്മിറ്റി അംഗം ഡോ.കെ.എം. തോമസ് ഉദ്ഘാടനം ചെയ്തു. പ്രസിഡന്‍റ് സണ്ണി മാണിശേരി അധ്യക്ഷതവഹിച്ചു. കാഞ്ഞങ്ങാട് അപ്പസ്തോല റാണി കത്തോലിക്ക പള്ളി വികാരി ഫാ. ജോസ് അവന്നൂര്‍ അനുഗ്രഹപ്രഭാഷണം നടത്തി. സംസ്ഥാന എക്സിക്യുട്ടീവ് കമ്മറ്റി അംഗം മാനുവല്‍ കുറിച്ചിത്താനം മുഖ്യപ്രഭാഷണം നടത്തി. യൂണി-വൈ സംസ്ഥാന അധ്യക്ഷന്‍ അഖില്‍ ജോണ്‍ മുഖ്യാതിഥിയായിരുന്നു. കാസര്‍ഗോഡ് സബ് റീജിയണ്‍ ജനറല്‍ കണ്‍വീനര്‍ സി.എം. ബൈജു, ഉഡുപ്പി നാഷണല്‍ പ്രൊജക്ട് വൈസ് ചെയര്‍മാന്‍ ടോംസണ്‍ ടോം, സാജു തോമസ് വെള്ളേപ്പിള്ളില്‍, സെബാസ്റ്റ്യന്‍ കൊറ്റത്തില്‍, ചാണ്ടികൈനിക്കര, റോയി ചെല്ലംങ്കോട്ട് എന്നിവര്‍ പ്രസംഗിച്ചു. ഭാരവാഹികള്‍: സാജു തോമസ് വെള്ളേപ്പിള്ളില്‍ (പ്രസിഡന്‍റ്), ചാണ്ടി കൈനിക്കര (സെക്രട്ടറി), സെബാസ്റ്റ്യന്‍ കൊറ്റത്തില്‍ (ജോയിന്‍റ് സെക്രട്ടറി), ഷിബു തങ്കച്ചന്‍ (ട്രഷറര്‍).

പ്രവാസ ജീവിതത്തിൽ നിന്ന് കർഷകനിലേക്ക്

വെള്ളരിക്കുണ്ട്: കാൽനൂറ്റാണ്ട് കാലത്തെ പ്രവാസജീവിതം മതിയാക്കി നെൽപാടത്തിലേക്കിറങ്ങിയ മോഹനൻ നായർ ഇത്തവണ ഞാറ് നടാൻ കൂടെ കൂട്ടിയത് നാട്ടിലെ കുട്ടിക്കളെയും അമ്മമാരെയും. വെസ്റ്റ് എളേരി ചീർക്കയത്തെ പാട്ടത്തിൽ മോഹനൻ നായർ ആണ് ഇക്കുറി വേറിട്ട നെൽക്കൃഷിക്ക്‌ തുടക്കം കുറിച്ചിരിക്കുന്നത്. ദുബായ് ഓട്ടോ സെന്‍ററിൽ കഴിഞ്ഞ 25 വർഷം ടയർ മെക്കാനിക്ക് ആയി ജോലി ചെയ്ത ആളാണ് മോഹനൻ. ഇനിയുള്ള കാലം നാട്ടിൽ എന്തു ചെയ്യണമെന്ന് ആലോചിച്ച് ഇരിക്കവെയാണ് കൃഷിയെ പറ്റി ചിന്തിക്കുന്നത്. ഇതിനു കുടുംബത്തിന്‍റെ ഒന്നാകെയുള്ള പിന്തുണയും കിട്ടി. അങ്ങനെ പുങ്ങംചാൽ കളരി ഭഗവതി ക്ഷേത്രത്തിന്‍റെ അധീനതയിലുള്ള പാടത്ത് നെൽകൃഷി ചെയ്യാൻ തീരുമാനിച്ചു. രണ്ടേക്കർ പാടമാണ് മോഹനൻ നെൽക്കൃഷിക്കായി ക്ഷേത്രഭാരവാഹികളോട് പാട്ടത്തിന് വാങ്ങിയത്. നെൽക്കൃഷിയിലെ പരിചയസമ്പത്ത്‌ ഒന്നും ഇല്ലാതിരുന്ന ഈ പ്രവാസി എല്ലാതടസങ്ങളും അതിജീവിച്ചുകൊണ്ട് ഇതു മൂന്നാംതവണയാണ് തരിശുപാടം നിറയെ സമൃദ്ധിയുടെ പൊൻകതിർ വിരിയിക്കാൻ ഒരുങ്ങുന്നത്. ഇക്കുറി അത്യുല്പാദന ശേഷിയുള്ള ഉമ നെൽവിത്താണ് കൃഷിക്കായി ഉപയോഗിച്ചത്. ഞാറ്റടി തയ്യാറാക്കി ആയിരുന്നു കൃഷി. നാട്ടിലെ കുട്ടികളിൽ നെൽക്കൃഷിയുടെ മഹത്വം പഠിപ്പിക്കുക എന്നലക്ഷ്യത്തോടെയാണ് മോഹനൻ നായർ ഇത്തവണ കുട്ടികളെ കൂടെ കൂട്ടിയത്. ഈ വർഷത്തെ നെൽകൃഷി ബ്ലോക്ക്‌ പഞ്ചായത്ത് അംഗം ഷോബി ജോസഫ് ഉദ്ഘാടനം ചെയ്തു.

മത്സ്യത്തൊഴിലാളികള്‍ക്ക് ധനസഹായം അനുവദിക്കണം

കാസര്‍ഗോഡ്: തൃക്കണ്ണാട്, അജാനൂര്‍ കടപ്പുറം, മഞ്ചേശ്വരം ഉള്‍പ്പെടെയുള്ള പല തീരപ്രദേശങ്ങളിലും വന്‍തോതിലുള്ള കടല്‍കയറ്റം ഉണ്ടായതായും വറുതിയിലായ മത്സ്യത്തൊഴിലാളികളുടെ ജീവിതം പ്രതിസന്ധിയിലായിരിക്കുകയാണെന്നും ഡിസിസി പ്രസിഡന്‍റ് പി.കെ. ഫൈസല്‍. കടല്‍ കയറി വന്‍ നാശനഷ്ടമുണ്ടായ മത്സ്യത്തൊഴിലാളികള്‍ക്കും തീരപ്രദേശവാസികള്‍ക്കും സര്‍ക്കാരിന്‍റെ ഭാഗത്തുനിന്നും ഒരു സഹായവും ഉണ്ടായിട്ടില്ല. യുദ്ധകാല അടിസ്ഥാനത്തില്‍ മത്സ്യത്തൊഴിലാളികളുടെയും തീരദേശവാസികളുടെയും ജീവനും സ്വത്തിനും സംരക്ഷണം നല്‍കുന്നതിന് ആവശ്യമായ സത്വര നടപടികള്‍ സ്വീകരിക്കണമെന്നും തീരദേശത്തെ മുഴുവന്‍ ജനങ്ങള്‍ക്കും സര്‍ക്കാര്‍ സൗജന്യ റേഷനും അടിയന്തര ധനസഹായവും അനുവദിക്കണമെന്നും അദ്ദേഹം കൂട്ടിച്ചേർത്തു.

സുരക്ഷയിൽ ആശങ്ക: മൊഗ്രാൽ ഗവ. സ്കൂളിലെ ഏഴു ക്ലാസ് മുറികൾ മാറ്റി

കാസർഗോഡ്: കാലപ്പഴക്കവും ശക്തമായ മഴയും മൂലമുള്ള സുരക്ഷാഭീഷണി കണക്കിലെടുത്ത് മൊഗ്രാൽ ഗവ. വൊക്കേഷണൽ ഹയർ സെക്കൻഡറി സ്കൂളിലെ ഏഴു ക്ലാസ് മുറികൾ ഓടുമേഞ്ഞ കെട്ടിടത്തിൽ നിന്ന് മാറ്റി. കെട്ടിടത്തിന്‍റെ മേൽക്കൂരയ്ക്ക് ബലക്കുറവ് സംഭവിച്ചിട്ടുണ്ടെന്ന ആശങ്കയെ തുടർന്നാണ് നടപടി. കെട്ടിടത്തിന് ഫിറ്റ്നസ് സർട്ടിഫിക്കറ്റുണ്ടെങ്കിലും വിദ്യാർഥികളുടെ സുരക്ഷയുടെ കാര്യത്തിൽ വിട്ടുവീഴ്ച വേണ്ടെന്ന നിലപാടിന്‍റെ അടിസ്ഥാനത്തിലാണ് സ്കൂൾ അധികൃതരുടെയും പിടിഎയുടെയും തീരുമാനം. കാലപ്പഴക്കമുള്ള ഓടുമേഞ്ഞ കെട്ടിടത്തിനു പകരം പുതിയ കെട്ടിടം നിർമിക്കണമെന്ന ആവശ്യം ഏറെക്കാലമായി ഉള്ളതാണ്.

സംശയിക്കേണ്ട, റോഡ് തന്നെ!

മുള്ളേരിയ: കാറഡുക്ക പഞ്ചായത്തിലെ ഗാന്ധിനഗർ-നെച്ചിപ്പടുപ്പ്-വടക്കേക്കര റോഡിലൂടെ വണ്ടിയെടുത്ത് കുറച്ചുദൂരം മുന്നോട്ടുപോയിക്കഴിഞ്ഞാൽ ഗൂഗിൾ മാപ്പ് വഴിതെറ്റിച്ച് വല്ല തോട്ടിലേക്കുമാണോ എത്തിച്ചതെന്ന് സംശയിച്ചുപോകും. നെച്ചിപ്പടുപ്പിൽ ഏതാണ്ട് 150 മീറ്ററോളം ദൂരം റോഡിൽ ഒന്നര അടിയിലേറെ ഉയരത്തിൽ വെള്ളം കെട്ടിക്കിടക്കുകയാണ്. മഴ പെയ്യുന്ന മുറയ്ക്ക് വെള്ളത്തിന്‍റെ അളവ് കൂടുന്നു. ഒഴുകിപ്പോകാൻ ഒരിടവുമില്ലാത്തതുകൊണ്ടാണ് റോഡിൽ തന്നെ ഇത്രയും വെള്ളം കെട്ടിക്കിടക്കുന്നത്. ഇരുവശങ്ങളിലും സ്വകാര്യ വ്യക്തികൾ മതിൽ കെട്ടിയുയർത്തിയതോടെയാണ് വെള്ളത്തിന് ഒഴുകിപ്പോകാൻ ഇടമില്ലാതായത്. ഇത്രയും ദൂരത്തിൽ റോഡ് ടാർ ചെയ്തിട്ടുമില്ല. പഞ്ചായത്തിന്‍റെ ഉടമസ്ഥതയിലുള്ള റോഡ് ടാർ ചെയ്തോ കോൺക്രീറ്റ് ചെയ്തോ ഗതാഗതയോഗ്യമാക്കി വശങ്ങളിൽ ഓവുചാലുകൾ നിർമിക്കണമെന്ന ആവശ്യം ദീർഘകാലമായി ഉള്ളതാണ്. ഇതുവരെ യാതൊരു നടപടിയുമുണ്ടായില്ല. പഞ്ചായത്ത് തെരഞ്ഞെടുപ്പ് അടുത്തതോടെ ഇനി മിക്കവാറും അടുത്ത ഭരണസമിതി വരുന്നതുവരെ ഈ ആവശ്യം ഇങ്ങനെതന്നെ കിടക്കാനാണ് സാധ്യത. കാറഡുക്ക ഗവ. വിഎച്ച്എസ് സ്കൂൾ പരിസരത്തുനിന്നാരംഭിച്ച് വടക്കേക്കര വരെ നാലു കിലോമീറ്റർ നീളത്തിലുള്ള റോഡിൽ നെച്ചിപ്പടുപ്പിലെ ഈ 150 മീറ്റർ ഭാഗമൊഴിച്ച് ബാക്കിയെല്ലാം ടാർ ചെയ്തും കോൺക്രീറ്റ് ചെയ്തും ഗതാഗതയോഗ്യമാക്കിയിട്ടുണ്ട്. അതുകണ്ട് ഇതുവഴി കടന്നുവരുന്ന വാഹനങ്ങൾ നെച്ചിപ്പടുപ്പിലെത്തുമ്പോൾ തോടിനു നടുവിൽ പെട്ടുപോവുന്നു. നെച്ചിപ്പടുപ്പ്, വടക്കേക്കര ഭാഗങ്ങളിലെ നൂറ്റമ്പതോളം കുടുംബങ്ങൾക്ക് കാറഡുക്ക ടൗണിലേക്ക് എത്താനുള്ള ഏക മാർഗമാണ് ഈ റോഡ്. വെള്ളം കെട്ടിനിൽക്കുന്ന ഭാഗത്തുകൂടി കാൽനടയാത്രക്കാർക്കുപോലും പോകാനാകാത്തതിനാൽ ഇപ്പോൾ അടുത്തുള്ള സ്വകാര്യ വ്യക്തികളുടെ തോട്ടങ്ങളിലൂടെയാണ് പോകുന്നത്. സ്കൂളിലേക്ക് പോകുന്ന കുട്ടികളും അതുവഴിയാണ് നടന്നുപോകുന്നത്.

ഫാക്ടറിയില്‍നിന്നു മലിനജലം ഒഴുക്കിവിട്ടു; 50,000 രൂപ പിഴ ചുമത്തി

മഞ്ചേശ്വരം: വോര്‍ക്കാടി പഞ്ചായത്തിലെ കെദുമ്പാടിയില്‍ ഏതാനും വീടുകളിലെ കിണറുകളിലെ വെള്ളത്തില്‍ നിറവ്യത്യാസം വരുന്നുവെന്നും സമീപത്തുള്ള അരുവിയിലൂടെ കറുത്ത നിറത്തിലുള്ള മലിനജലം ഒഴുകുന്നുവെന്നുമുള്ള വിവരത്തെ തുടര്‍ന്ന് തദ്ദേശസ്വയംഭരണവകുപ്പിന്‍റെ ജില്ലാ എന്‍ഫോഴ്‌സ്‌മെന്‍റ് സ്‌ക്വാഡിന്‍റെ നേതൃത്വത്തില്‍ പരിശോധന നടത്തി. കെദുമ്പാടിയില്‍ സംസ്ഥാന അതിര്‍ത്തിയില്‍ കര്‍ണാടക പരിധിയില്‍ മഞ്ചേശ്വരം സ്വദേശിയുടെ ഉടമസ്ഥതയിലുള്ള കശുവണ്ടി തോടില്‍ നിന്നും എണ്ണ ഉത്പാദിപ്പിക്കുന്ന ഫാക്ടറിയില്‍ നിന്നുള്ള മലിനജലമാണ് താഴെഭാഗത്തുള്ള ചെങ്കല്‍ പണയിലൂടെ ഒഴുക്കിവിട്ട് പരിസര മലിനീകരണത്തിനും മുടിമാര്‍ തോടിലൂടെ പൊസോട്ട് നദിയിലേക്ക് എത്തിച്ചേരുന്നതിനും കാരണമാകുന്നത്. ഒരു വര്‍ഷത്തോളമായി സ്ഥാപനം പ്രവര്‍ത്തിച്ചു വരുന്നുണ്ടെങ്കിലും സ്ഥാപനത്തിലെ മലിനജല സംസ്‌കരണത്തിനുള്ള പ്ലാന്‍റ് ആവശ്യമായ മോട്ടോറുകള്‍ സ്ഥാപിച്ച് പ്രവര്‍ത്തന ക്ഷമമാക്കിയിട്ടില്ല. നിയമ ലംഘനത്തിന് ഉടമയ്ക്ക് പഞ്ചായത്ത് രാജ് ആക്ട് പ്രകാരം 50,000 രൂപ പിഴ ചുമത്തുന്നതിന് പഞ്ചായത്ത് സെക്രട്ടറിക്ക് നിര്‍ദേശം നല്‍കി. പ്ലാന്‍റില്‍ നിന്നുള്ള മലിനജലം ഫാക്ടറി പരിസരത്തു തന്നെ സംസ്‌കരിക്കുന്നതിനും ആവശ്യമെങ്കില്‍ ജില്ലാ ഭരണകൂടം മുഖേന സെന്‍ട്രല്‍ പൊല്യൂഷന്‍ കണ്‍ട്രോള്‍ ബോര്‍ഡുമായി ബന്ധപ്പെട്ട് തുടര്‍നടപടി സ്വീകരിക്കുന്നതിനും നിര്‍ദേശം നല്‍കി.

എന്‍ഡോസള്‍ഫാന്‍ ഇരകള്‍ക്കായി ശബ്ദമുയര്‍ത്തിയ നേതാവ്

കാസര്‍ഗോഡ്: പ്രതിപക്ഷനേതാവായും മുഖ്യമന്ത്രിയായും എന്‍ഡോസള്‍ഫാന്‍ ഇരകളെ ചേര്‍ത്തുപിടിച്ച നേതാവായിരുന്നു വി.എസ്.അച്യുതാനന്ദന്‍. 2001ല്‍ പ്രതിപക്ഷനേതാവായിരിക്കെ കാസര്‍ഗോട്ടുനിന്നുള്ള എന്‍ഡോസള്‍ഫാന്‍ വിരുദ്ധപ്രവര്‍ത്തകര്‍ അദ്ദേഹത്തെ സന്ദര്‍ശിച്ചിരുന്നു. കീടനാശിനിയുടെ ഉപയോഗം മൂലം കാന്‍സര്‍ ഉള്‍പ്പെടെയുള്ള മാരകരോഗങ്ങളുടെ ഇരകളായ ജനതയുടെ ദുരിതജീവിതം ഇവര്‍ വിഎസിനു വിവരിച്ചുകൊടുത്തു. ഇതേത്തുടര്‍ന്നാണ് എന്‍ഡോസള്‍ഫാന്‍ ദുരിതബാധിതമേഖല സന്ദര്‍ശിക്കാന്‍ അദ്ദേഹം തീരുമാനിക്കുന്നത്. ഇതോടെയാണ് കശുമാവിന്‍തോട്ടങ്ങളില്‍ പെയ്ത വിഷമഴയുടെ രൂക്ഷത ലോകശ്രദ്ധ നേടുന്നത്. ദുരിതബാധിരുടെ ചിത്രങ്ങള്‍ സഹിതം തുടരെത്തുടരെ ഈ വിഷയം നിയമസഭയില്‍ അവതരിപ്പിച്ച വി.എസ്. എന്‍ഡോസള്‍ഫാന്‍ നിരോധിക്കണമെന്ന ശക്തമായ നിലപാടെടുത്തു. ഈ ആവശ്യമുന്നയിച്ച കേന്ദ്ര-സംസ്ഥാന സര്‍ക്കാരുകള്‍ക്ക് നിന്തരം കത്തുകള്‍ അയച്ചു. 2006ല്‍ മുഖ്യമന്ത്രിയായ ശേഷം എന്‍ഡോസള്‍ഫാന്‍ പുനരധിവാസപദ്ധതിക്കായി അരക്കോടി രൂപ അനുവദിക്കുകയും മരിച്ച 178 പേര്‍ക്ക് അരലക്ഷം വീതം നഷ്ടപരിഹാരം അനുവദിക്കുകയും ചെയ്തു. രോഗബാധിതര്‍ക്കും പരിചാരകര്‍ക്കും പ്രതിമാസം 250 രൂപ അലവന്‍സ് നല്‍കാന്‍ തീരുമാനിച്ചു. ഇതു പിന്നീട് രോഗികള്‍ക്ക് 700ഉം പരിചാരകര്‍ക്ക് 300 ഉം ആയി വര്‍ധിപ്പിച്ചു. എപിഎല്‍, ബിപിഎല്‍ വ്യത്യാസമില്ലാതെ ദുരിതബാധിതര്‍ക്ക് രണ്ടുരൂപ നിരക്കില്‍ അരി നില്‍കാനും തീരുമാനിച്ചു. 2011 ഏപ്രിലില്‍ സ്റ്റോക്ക്‌ഹോം കണ്‍വന്‍ഷന്‍ നടക്കുന്ന വേളയില്‍ എന്‍ഡോസള്‍ഫാന്‍ നിരോധിക്കണമെന്നാവശ്യപ്പെട്ട് തിരുവനന്തപുരം രക്തസാക്ഷി മണ്ഡപത്തിന് സമീപം വിഎസിന്‍റെ നേതൃത്വത്തില്‍ നടന്ന ഉപവാസസമരം സ്റ്റോക്ക്‌ഹോമില്‍ വരെ ചര്‍ച്ചയായിരുന്നു.

അടയാളങ്ങൾ മാഞ്ഞ് വിഎസ് ഓട്ടോ സ്റ്റാൻഡ്

നീലേശ്വരം: ഒരു നേതാവ് ജീവിച്ചിരിക്കുന്ന കാലത്തുതന്നെ അദ്ദേഹത്തിന്‍റെ പേരിൽ ഏതെങ്കിലുമൊരു സ്ഥലവും ഓട്ടോ സ്റ്റാൻഡുമൊക്കെ അറിയപ്പെടുകയെന്ന അപൂർവമായ ബഹുമതിയാണ് നീലേശ്വരം നഗരമധ്യത്തിലെ വിഎസ് ഓട്ടോ സ്റ്റാൻഡിലൂടെ വിഎസിന് ലഭിച്ചത്. ഒരുകാലത്ത് രാഷ്‌‌ട്രീയതലത്തിൽ വിഎസുമായി ബന്ധപ്പെട്ട് എന്ത് സംഭവമുണ്ടായാലും ആദ്യ പ്രതികരണത്തിനായി സംസ്ഥാനതലത്തിൽ തന്നെ എല്ലാവരും ഉറ്റുനോക്കിയിരുന്നത് നീലേശ്വരത്തെ വിഎസ് ഓട്ടോ സ്റ്റാൻഡിലേക്കായിരുന്നു. അന്ന് നീലേശ്വരം ടൗണിന്‍റെ ഏറ്റവും വലിയ അടയാളങ്ങളിലൊന്നായിരുന്നു ബസ് സ്റ്റാൻഡിന് തൊട്ടടുത്ത് തലയുയർത്തിപ്പിടിച്ചു നിൽക്കുന്ന വിഎസിന്‍റെ ചിത്രവും വിശേഷണങ്ങളും നിറഞ്ഞ ബോർഡോടുകൂടിയ വിഎസ് ഓട്ടോ സ്റ്റാൻഡ്. ഇവിടുത്തെ ഓട്ടോ ഡ്രൈവർമാരും സിപിഎമ്മിനുള്ളിലെ തിരുത്തൽശക്തിയായി നിന്ന ഒരുകൂട്ടം പുതുതലമുറക്കാരും വിഎസ് ഉയർത്തിയ മുദ്രാവാക്യങ്ങൾ ഏറ്റുപറഞ്ഞും പാർട്ടി നേതൃത്വത്തിന്‍റെ ശാസനകളെ ധിക്കരിച്ചും പലതവണ ഇവിടെ പ്രകടനങ്ങൾ നയിച്ചു. ജില്ലയിലെ ഒരുവിഭാഗം പാർട്ടി നേതാക്കളും അതിനെ മനസുകൊണ്ടെങ്കിലും പിന്തുണച്ചു. കണ്ണൂരിനു വടക്കും പാർട്ടിയിൽ വേറിട്ട മുഖങ്ങളും സ്വരങ്ങളുമുണ്ടെന്ന് അവർ സംസ്ഥാന നേതൃത്വത്തോട് വിളിച്ചുപറഞ്ഞു. സിപിഎമ്മിന്‍റെ കാസർഗോഡ് ജില്ലാ കമ്മിറ്റി തന്നെ വിഎസ് വിഭാഗത്തിന്‍റെ നിയന്ത്രണത്തിലായിരുന്ന കാലമുണ്ടായിരുന്നു. പക്ഷേ വർഷങ്ങൾക്കിപ്പുറം വിഎസിന്‍റെ ഏറ്റവും വലിയ സ്മാരകങ്ങളിലൊന്നാകേണ്ടിയിരുന്ന ഓട്ടോ സ്റ്റാൻഡിന്‍റെ അടയാളങ്ങൾ പോലും മാഞ്ഞുപോയിരിക്കുന്നു. വിഎസിന്‍റെ ചിത്രം സ്ഥാപിച്ചിരുന്ന മാവ് പെട്ടെന്നൊരു ദിവസം ഉണങ്ങിപ്പോയതുമുതൽ സിപിഎം തന്നെ ഭരിക്കുന്ന നഗരസഭ ബസ് സ്റ്റാൻഡിന്‍റെ വിപുലീകരണത്തിനായി ഓട്ടോ സ്റ്റാൻഡ് പഴയ സ്ഥാനത്തുനിന്ന് മാറ്റാൻ തീരുമാനിച്ചതുവരെ നീളുന്നു അതിന്‍റെ കാരണങ്ങൾ. ഇവിടം കേന്ദ്രീകരിച്ച് പ്രവർത്തനങ്ങൾക്കു നേതൃത്വം നല്കിയ പലരും കാലത്തിനൊപ്പം മറഞ്ഞുപോയി. മറ്റു പലരും പാർട്ടിക്ക് വിധേയരായി. പാർട്ടി നേതാക്കൾ ഓർക്കാനിഷ്ടപ്പെടാത്ത ചരിത്രത്തെ പാടേ മറന്നുകളഞ്ഞ ഒരു പുതുതലമുറ ഇവിടെ ഉയർന്നുവന്നു. വിഎസിന്‍റെ നൂറാം പിറന്നാളാഘോഷമായിരുന്നു വിഎസ് ഓട്ടോ സ്റ്റാൻഡിൽ നടന്ന അവസാനത്തെ പൊതുപരിപാടി. വെല്ലുവിളികളുടെ കാലം അതിനകം കഴിഞ്ഞിരുന്നതിനാൽ പായസവിതരണമുൾപ്പെടെയുള്ള ആഘോഷങ്ങളിൽ പങ്കുചേരാൻ പാർട്ടി നേതാക്കളുൾപ്പെടെ എത്തിയിരുന്നു. ഓട്ടോ സ്റ്റാൻഡ് ഇവിടെനിന്ന് മാറ്റാനുള്ള തീരുമാനവും അതിനകം അംഗീകരിക്കപ്പെട്ടു കഴിഞ്ഞിരുന്നു. ഇനി നവീകരിച്ച ബസ് സ്റ്റാൻഡ് വീണ്ടും തുറക്കുമ്പോൾ അതിനകത്ത് ഓട്ടോ സ്റ്റാൻഡിനു കൂടി സ്ഥലം മാറ്റിവച്ചിട്ടുണ്ട്. പക്ഷേ അതിന് വിഎസിന്‍റെ പേരോ ചിത്രമോ ഉണ്ടാകാനുള്ള സാധ്യത പൊതുവേ കുറവാണ്.

പുഴയിൽ കാണാതായ കർണാടക സ്വദേശിയുടെ മൃതദേഹം കണ്ടെത്തി

പാണത്തൂർ: വ്യാഴാഴ്ച പാണത്തൂർ മഞ്ഞടുക്കം പുഴയിൽ കാണാതായ കർണാടക സ്വദേശിയുടെ മൃതദേഹം കണ്ടെത്തി. ബെൽഗാം സ്വദേശിയായ ദുർഗപ്പ എന്ന അനിലി (18) ന്‍റെ മൃതദേഹം ഇന്നലെ രാവിലെയാണ് വട്ടക്കുണ്ട് ഭാഗത്ത് പുഴയിലെ കുറ്റിച്ചെടികൾക്കിടയിൽ കുരുങ്ങിക്കിടന്ന നിലയിൽ കണ്ടെത്തിയത്. പ്രദേശവാസി നെല്ലിക്കുന്നിലെ ബാബുവാണ് മൃതദേഹം കണ്ടത്. പാണത്തൂരിലെ പ്ലാന്‍റേഷന്‍ കോര്‍പ്പറേഷന്‍ കശുമാവിന്‍ തോട്ടത്തില്‍ ജോലി ചെയ്യുന്ന ഹിറ്റാച്ചി ഡ്രൈവറുടെ സഹായിയായി എത്തിയതായിരുന്നു. വ്യാഴാഴ്ച ഉച്ചഭക്ഷണത്തിനായി ബൈക്കിൽ മഞ്ഞടുക്കം ചപ്പാത്ത് കടന്നുപോകുമ്പോഴാണ് ഒഴുക്കിൽപ്പെട്ടത്. കഴിഞ്ഞ മൂന്നു ദിവസമായി അഗ്നിരക്ഷാസേനയുടെയും പോലീസിന്‍റെയും എൻഡിആർഎഫിന്‍റെയും നേതൃത്വത്തിൽ പുഴയിൽ തെരച്ചിൽ നടത്തിവരികയായിരുന്നു. മൃതദേഹം കാസർഗോഡ് ജനറൽ ആശുപത്രിയിൽ പോസ്റ്റ്മോർട്ടത്തിന് ശേഷം നാട്ടിലേക്ക് കൊണ്ടുപോകും.

മഴവിസ്മയം തീർത്ത് അച്ചൻകല്ല് വെള്ളച്ചാട്ടം

കൊന്നക്കാട്: മഴ കനത്തതോടെ മലയോരത്തെ മൺസൂൺകാല വെള്ളച്ചാട്ടമായ അച്ചൻകല്ല് വെള്ളച്ചാട്ടം കാണാൻ സഞ്ചാരികളുടെ പ്രവാഹം. കഴിഞ്ഞ ദിവസം മലയോര പ്രദേശത്ത് അതിശക്തമായ മഴ ലഭിച്ചതോടെയാണ് വെള്ളച്ചാട്ടം കാണാൻ ആൾക്കാർ ഒഴുകിയെത്തിയത്. വലിയ ജലപ്രവാഹം വെള്ളച്ചാട്ടത്തെ കൂടുതൽ നയനമനോഹരമാക്കി. ഇതു സഞ്ചാരികളെ ഏറെ ആകർഷിക്കുന്നുണ്ട്. വെള്ളരിക്കുണ്ടിൽ നിന്നും 16 കിലോമീറ്റർ സഞ്ചരിച്ചാൽ വെള്ളച്ചാട്ടത്തിനടുത്തെത്താം. ഇവിടേക്കു ടാറിട്ട റോഡുണ്ട്. റോഡ് സൗകര്യമുള്ളതിനാൽ വിദൂരസ്ഥലങ്ങളിൽ നിന്നും ധാരാളം ആൾക്കാർ എത്തിച്ചേരുന്നുണ്ട്. കുന്നിൻ മുകളിൽ നിന്നും വരുന്ന വലിയ ജലപ്രവാഹത്തെ കല്ലിൽത്തട്ടി ചിതറി വീഴുന്ന കാഴ്ച ഏവരെയും ആകർഷി ക്കുന്നുണ്ട്. മഴ കുറയുന്നതോടെ ജലപ്രവാഹവും കുറയും. ഇതിന് സമാനമായി കാണപ്പെടുന്ന മറ്റൊന്നാണ് സമീപമുള്ള ഓടക്കൊല്ലി വെള്ളച്ചാട്ടം. ഇവിടേക്കും ധാരാളം ആൾക്കാർ എത്തുന്നുണ്ട്. എത്തിച്ചേരാൻ റോഡുണ്ട് എന്നതൊഴിച്ചാൽ മറ്റു സൗകര്യങ്ങളൊന്നും ഇവിടെയില്ല. ദിവസേന നൂറുകണക്കിനാളുകളാണ് ഇവിടേക്ക് വന്നുകൊണ്ടിരിക്കുന്നത്. വെള്ളച്ചാട്ടത്തിന്‍റെ സമീപ പ്രദേശങ്ങൾ ഉൾപ്പെടുത്തി വികസന പ്രവർത്തനങ്ങൾ നടത്തേണ്ടത് അനിവാര്യമാണ്. ജില്ലയുടെ ടൂറിസ്റ്റ് കേന്ദ്രങ്ങളുടെ ലിസ്റ്റിൽഇതേ വരെ ഉൾപ്പെടുത്തിയിട്ടില്ല. റാണിപുരം, കോട്ടഞ്ചേരി എന്നീ ടൂറിസ്റ്റ് കേന്ദ്രങ്ങളുമായി ഈ പ്രദേശത്തെയും ബന്ധിപ്പിച്ചാൽ സന്ദർശകർക്ക് ഏറെ സൗകര്യപ്രദമാകും ബളാൽ പഞ്ചായത്ത് അധികൃതർ ഇവിടെ മുൻ കൈയെടുത്തു സ്ഥലം ഏറ്റെടുത്ത് വികസന പ്രവർത്തനങ്ങൾ നടത്തണമെന്നാണ് നാട്ടുകാർ ആവശ്യപ്പെടുന്നത്. ഇവിടെ സൗകര്യങ്ങൾ വർധിപ്പിച്ച് ടൂറിസ്റ്റ് കേന്ദ്രങ്ങളാക്കുന്നതോടെ കൊന്നക്കാട് ടൗണിന്‍റെയും സമീപപ്രദേശങ്ങളുടെയും വികസനത്തിന് വേഗത കൂടും.

സ്വയം സമർപ്പണത്തോടെ പാഠഭാഗങ്ങൾ അധ്യാപകർ പകർന്നു നൽകണം: ബിഷപ് ഡോ. ഡെന്നിസ് കുറുപ്പശേരി

തൃക്കരിപ്പൂർ: മതബോധനത്തിന്‍റെ പാഠഭാഗങ്ങൾ യേശുവിന്‍റെ പാദാന്തികത്തിൽ സ്വയം സമർപ്പിച്ചു വേണം അധ്യാപകർ വിദ്യാർഥികൾക്ക് പകർന്നു നൽകേണ്ടതെന്ന് കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി. കാഞ്ഞങ്ങാട് ഫൊറോനാ മതബോധന അധ്യാപക സംഗമം തൃക്കരിപ്പൂർ സെന്‍റ് പോൾസ് ഓഡിറ്റോറിയത്തിൽ ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്‌. വചനവും സഭാനിയമങ്ങളും ജീവിത മൂല്യവും ഒരുമിച്ചു ചേർത്ത് വിദ്യാർത്ഥികളുമായി പങ്കുവെക്കുന്ന അധ്യാപകർ നൽകുന്ന മതബോധന പാഠം മഹത്തരമാണെന്നും അദ്ദേഹം പറഞ്ഞു. ഫൊറോനാ വികാരി ഫാ. മാത്യു തൈക്കൽ അധ്യക്ഷതവഹിച്ചു. കണ്ണൂർ രൂപതാ ചാൻസിലർ ഫാ. ആന്‍റണി കുരിശിങ്കൽ, മതബോധന വിഭാഗം മേഖലാ ഡയറക്ടർ ഫാ. ജസ്റ്റിൻ എടത്തിൽ, എയ്ഞ്ചൽ തോമസ് എന്നിവർ പ്രസംഗിച്ചു. പരിയാരം സംസ്കൃതി ഭവൻ ഡയറക്ടർ ഫാ. ജോ മാത്യു സെമിനാറിൽ വിഷയാവതരണം നടത്തി.

കല്ലപ്പള്ളി വിശുദ്ധ അൽഫോൻസാമ്മ ദേവാലയത്തിൽ തിരുനാൾ ആഘോഷം

പാണത്തൂർ: കല്ലപ്പള്ളി വിശുദ്ധ അൽഫോൻസാമ്മ ദേവാലയത്തിൽ തിരുനാൾ ആഘോഷത്തിന് വികാരി ഫാ. നോബിൾ പന്തലാടിക്കൽ കൊടിയേറ്റി. തുടർന്ന് നടന്ന തിരുക്കർമങ്ങൾക്ക് ഫാ. ജോസ് കളത്തിപ്പറമ്പിൽ കാർമികത്വം വഹിച്ചു. ഇന്നും നാളെയും 26, 27 തീയതികളിലും വൈകുന്നേരം നാലിനും 23 മുതൽ 25വരെ ഉച്ചകഴിഞ്ഞ് മൂന്നിനും ആരംഭിക്കുന്ന തിരുക്കർമങ്ങൾക്ക് ഫാ. നിഖിൽ ജോൺ ആട്ടുകാരൻ, ഫാ. ജോസഫ് പൗവ്വത്ത്, ഫാ. റ്റോമി പുളിന്താനം, ഫാ. ജെയിൻ കണിയോടിക്കൽ, ഫാ. ജോസഫ് പൂവത്തോലിൽ, ഫാ. വർഗീസ് ചെരിയംപുറത്ത്, ഫാ. അഷർ കൊച്ചുപറമ്പിൽ എന്നിവർ കാർമികത്വം വഹിക്കും. സമാപനദിനമായ 28നു രാവിലെ ഒന്പതിനു തിരുസ്വരൂപപ്രതിഷ്ഠ. 10.30ന് ആഘോഷമായ വിശുദ്ധ കുർബാന, വചനസന്ദേശം, നൊവേന, ലദീഞ്ഞ്-ഫാ. നോബിൾ പന്തലാടിക്കൽ. തുടർന്ന് പ്രദക്ഷിണം, സമാപനാശീർവാദം, സ്നേഹവിരുന്ന്.

100 ദിനങ്ങളിൽ 100 പദ്ധതികളുമായി ഈസ്റ്റ് എളേരി പഞ്ചായത്ത്

ചിറ്റാരിക്കാൽ: ഈസ്റ്റ്‌ എളേരി പഞ്ചായത്ത്‌ ജൂലൈ 21 മുതൽ ഒക്ടോബർ 31 വരെയുള്ള 100 ദിവസങ്ങളിൽ 100 പദ്ധതികൾ പൂർത്തിയാക്കാൻ ഒരുങ്ങുന്നു. ചിറ്റാരിക്കാൽ ഹെൽത്ത്‌ സബ്‌സെന്‍റർ കെട്ടിടം,ഗോക്കടവ് അങ്കണവാടി, അരിയിരുത്തി അങ്കണവാടി കെട്ടിടങ്ങൾ, പാവൽ കമ്യൂണിറ്റി ഹാൾ എന്നിവയുടെ നിർമാണം ഇക്കാലയളവിൽ പൂർത്തിയാക്കും. അറക്കത്തട്ട് കുടിവെള്ളപദ്ധതിയുടെ പൈപ്പ് ലൈൻ നിർമാണം,50 പുതിയ റോഡുകളുടെ കോൺക്രീറ്റ്, 10 റോഡുകളുടെ വീതികൂട്ടൽ, 70 സോളാർ വഴിവിളക്കുകൾ, 10 മിനിമാസ്റ്റ് ലൈറ്റ്കൾ എന്നിവയുടെ സ്ഥാപിക്കൽ, കാർഷിക മൃഗസംരക്ഷണ, പട്ടികജാതി, പട്ടിക വർഗമേഖലകളിലെ വിവിധ പദ്ധതികൾ, വയോജനങ്ങൾ, ഭിന്നശേഷിക്കാർ, കുട്ടികൾ എന്നിവർക്കുള്ള വിവിധ പദ്ധതികൾ എന്നിവ ഇതിൽ ഉൾപ്പെടുമെന്ന് പഞ്ചായത്ത്‌ പ്രസിഡന്‍റ് ജോസഫ് മുത്തോലി വ്യക്തമാക്കി. 2025-26 വാർഷിക പദ്ധതികൾ സമയബന്ധിതമായി പൂർത്തിയാക്കുന്നതിനുള്ള എല്ലാ മുന്നൊരുക്കങ്ങളും പൂർത്തിയായതായി അദ്ദേഹം അറിയിച്ചു. വിവിധ ടെൻഡർ നടപടികൾ പുരോഗമിക്കുകയാണ്. വ്യക്തിഗതആനുകൂല്യങ്ങൾക്കുള്ള ഗുണഭോക്തൃ തെരെഞ്ഞെടുപ്പുകളും പൂർത്തിയാക്കിയിട്ടുണ്ട്. വൈസ് പ്രസിഡന്‍റ് ഫിലോമിന ജോണി, സ്ഥിരം സമിതി അധ്യക്ഷരായ മേഴ്‌സി മാണി, പ്രശാന്ത് സെബാസ്റ്റ്യൻ എന്നിവരും ഭരണസമിതി അംഗങ്ങളും സന്നിഹിതരായിരുന്നു.

പുഴയിൽ കാണാതായ യുവാവിനായുള്ള തെരച്ചിൽ ഇന്നലെയും വിഫലം

പാണത്തൂർ: മഞ്ഞടുക്കം പുഴയിൽ കാണാതായെന്നു സംശയിക്കുന്ന പ്ലാന്‍റേഷൻ കോർപറേഷന്‍റെ പാണത്തൂർ ഡിവിഷനിൽ പണിക്കുവന്ന ഹിറ്റാച്ചി ഡ്രൈവറുടെ സഹായിക്കായുള്ള തിെരച്ചിൽ ഇന്നലെയും വിഫലം. വ്യാഴാഴ്ച ഉച്ചയോടെയാണ് താമസ സ്ഥലമായ കരിക്കെ തോട്ടത്തിലേക്ക് മഞ്ഞടുക്കം പാലം കടന്ന് ബൈക്കിൽ വന്ന കർണാടക ബൽഗാം സ്വദേശിയായ ദുർഗപ്പ (18) നെ കാണാതായത്. തുടർന്ന് ഡ്രൈവർ രാജപുരം പോലീസ് സ്റ്റേഷനിൽ പരാതി നൽകിയത്. ഇന്നലെയും ഫയർഫോഴ്സ്, പോലീസ്, എൻഡിആർഎഫ്, നാട്ടുകാർ തുടങ്ങിയവർ ചേർന്നാണ് തിെരച്ചിൽ നടത്തിയത്. കാണാതായി എന്നു പറയുന്ന സ്ഥലം മുതൽ അരിപ്രേഡ് വരെയുള്ള ഭാഗങ്ങൾ ഇന്നലെ തിരച്ചിൽ നടത്തിയിരുന്നു. റവന്യു, പഞ്ചായത്ത്, ജനപ്രതിനിധികൾ തുടങ്ങിയവർ നേതൃത്വത്തിലാണ് തെരച്ചിൽ പുരോഗമിക്കുന്നത്. ഇന്നും തെരച്ചിൽ തുടരാനാണ് തീരുമാനം. കലങ്ങിയ വെള്ളവും ശക്തമായ ഒഴുക്കും തെരച്ചിലിന് പ്രതികൂലമായി ബാധിക്കുന്നതായി അധികൃതർ പറഞ്ഞു.

ഖാദിയും ഓണ്‍ലൈന്‍ വിപണന രംഗത്തേക്ക്; ന്യൂജെന്‍ വസ്ത്രങ്ങളും വിപണിയിലെത്തിക്കും

കാസര്‍ഗോഡ്: ഈ ഓണം മുതല്‍ ഖാദിയും ഓണ്‍ലൈന്‍ വിപണന രംഗത്തേക്ക് കടക്കുന്നു. പുതുതലമുറയെ ആകര്‍ഷിക്കാന്‍ വിവിധ നിറത്തിലുള്ള പാന്‍റ്സ്, കുര്‍ത്ത, ലോംഗ് ബ്ലൗസ് എന്നിവ വിപണിയിലെത്തിച്ചു ന്യൂ ജെന്‍ ആകാന്‍ ഖാദിയും തയ്യാറെടുത്തെന്ന് ഖാദി ബോര്‍ഡ് വൈസ് ചെയര്‍മാന്‍ പി. ജയരാജന്‍. ദേശീയ പ്രസ്ഥാനത്തോളം പഴക്കമുള്ള ഖാദിയുടെ മൂല്യം ഇനി പുതുതലമുറയ്ക്കും പകര്‍ന്നു കൊടുക്കും. ഇത്തവണ അഭിഭാഷകര്‍ക്കുള്ള കോട്ടുകള്‍ നിര്‍മിച്ചു പുതുപരീക്ഷണം നടത്തുന്ന ഖാദിയുടെ ഓഗസ്റ്റ് ഒന്ന് മുതലുള്ള എല്ലാ വില്പനക്കും 30 ശതമാനം റിബേറ്റ് പ്രഖ്യാപിച്ചിട്ടുണ്ട്. ഓഗസ്റ്റ് 16 മുതല്‍ ഖാദി ഓണം വിപണന മേള സജീവമാകും. കുഞ്ഞുടുപ്പുകള്‍, കുഷ്യന്‍, ബെഡ്ഷീറ്റ്, സമ്മാന വസ്ത്രങ്ങള്‍ എന്നിവയും മേളയില്‍ ഉണ്ടാകും. കേരള ഖാദി ഗ്രാമ വ്യവസായ ബോര്‍ഡിന്‍റെ നേതൃത്വത്തില്‍ ഖാദി വസ്ത്രപ്രചാരണവിജയം ലക്ഷ്യമിട്ട് കാസര്‍ഗോഡ് ജില്ലാ പഞ്ചായത്ത് വീഡിയോ കോണ്‍ഫറന്‍സ് ഹാളില്‍ നടന്ന യോഗം ഖാദി ഗ്രാമ വ്യവസായ ബോര്‍ഡ് വൈസ് ചെയര്‍മാന്‍ പി. ജയരാജന്‍ ഉദ്ഘാടനം ചെയ്തു . ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷതവഹിച്ചു. ജില്ലാ പഞ്ചായത്ത് സെക്രട്ടറി ശ്യാമലക്ഷ്മി, ഖാദി ബോര്‍ഡ് പ്രോജക്ട് ഓഫീസര്‍ സുഭാഷ്, പയ്യന്നൂര്‍ ഖാദി കേന്ദ്രം മാനേജര്‍ ഷിബു എന്നിവര്‍ സംബന്ധിച്ചു.

ജവഹര്‍ ബാൽ മഞ്ച് ജില്ലാ കണ്‍വന്‍ഷന്‍

കാസര്‍ഗോഡ്: സ്വാതന്ത്ര്യസമരപ്രസ്ഥാനത്തിന്‍റെ ചരിത്രം തിരുത്താനും അന്ധവിശ്വാസങ്ങള്‍ അടിച്ചേല്‍പ്പിക്കുകയും ചെയ്യുന്ന ശ്രമം നടന്നുകൊണ്ടിരിക്കുമ്പോള്‍ ദേശീയ-മതേതരത്വ ബോധമുള്ള കുട്ടികളെ വളര്‍ത്തിയെടുക്കുകയാണ് ജവഹര്‍ ബാൽ മഞ്ചിന്‍റെ ലക്ഷ്യമെന്നും ഡിസിസി പ്രസിഡന്‍റ് പി.കെ. ഫൈസല്‍. ജവഹര്‍ ബാൽ മഞ്ച് ജില്ലാ കണ്‍വന്‍ഷന്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സംസ്ഥാന കോ-ഓര്‍ഡിനേറ്റര്‍ രാജേഷ് പള്ളിക്കര അധ്യക്ഷതവഹിച്ചു. രജിത രാജന്‍, കെ. നീലകണ്ഠന്‍, ജയിംസ് പന്തമാക്കല്‍, സാജിദ് മവ്വല്‍, എം.സി. പ്രഭാകരന്‍, പി.വി. സുരേഷ്, സോമശേഖര ഷേണി, എം. കുഞ്ഞമ്പു നമ്പ്യാര്‍, ഉനൈസ് ബേഡകം, ശ്രീജിത് മാടക്കാല്‍, എ. വാസുദേവന്‍, കുഞ്ഞികൃഷ്ണന്‍ മാടക്കല്‍, ശ്രീനാഥ് ബദിയടുക്ക, മണിമോഹന്‍ ചട്ടഞ്ചാല്‍, രാഹുല്‍ കൊഴുമ്മല്‍, ശ്രീനിവാസന്‍ അരവത്ത്, ജിബിന്‍ ജയിംസ്, സുജിത്, മയൂഖ ഭാസ്‌കര്‍, ഭാഗ്യലക്ഷ്മി എന്നിവര്‍ സംസാരിച്ചു.

വിദ്യാര്‍ഥികളുടെ ഗ്രാന്‍റ് നല്‍കാത്തത് ഗുരുതര അനാസ്ഥ: ആദിവാസി കോണ്‍ഗ്രസ്

ചുള്ളിക്കര: സ്‌കൂള്‍ തുറന്ന് ഒരുമാസം കഴിഞ്ഞിട്ടും സംസ്ഥാനത്തെ പട്ടികജാതി-പട്ടികവര്‍ഗ വിദ്യാര്‍ഥികളുടെ ലപ്‌സം ഗ്രാന്‍ഡ് സ്‌റ്റൈപെന്‍റ് എന്നിവ വിതരണം ചെയ്യാതെ സര്‍ക്കാര്‍ ഗുരുതരമായ അനാസ്ഥയാണ് വിദ്യാര്‍ഥികളോട് കാണിച്ചിരിക്കുന്നതെന്ന് കേരള ആദിവാസി കോണ്‍ഗ്രസ് സംസ്ഥാന ജനറല്‍ സെക്രട്ടറി പത്മനാഭന്‍ ചാലിങ്കാല്‍. കേരള ആദിവാസി കോണ്‍ഗ്രസ് ജില്ലാകമ്മിറ്റി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇതുമൂലം വിദ്യാര്‍ഥികള്‍ക്ക് പഠനോപകരണങ്ങളും വസ്ത്രങ്ങളും വാങ്ങാന്‍ പറ്റാതെ പഠനംപോലും നിര്‍ത്തേണ്ടിവരുന്ന അവസ്ഥയാണ് നിലവിലുള്ളത്. ഇടതുസര്‍ക്കാര്‍ അധികാരത്തില്‍ ഏറിയതുമുതല്‍ ലംപ്‌സം ഗ്രാന്‍റും സ്‌റ്റൈപെന്‍റും നല്‍കുന്നതില്‍ കൃത്യത പാലിക്കാറില്ലെന്നും മുന്‍വര്‍ഷങ്ങളിലേതു കുടിശിക ഇപ്പോഴും കിടക്കുകയാണെന്നും അദ്ദേഹം കൂട്ടിച്ചേര്‍ത്തു. ജില്ലാ പ്രസിഡന്‍റ് പി.കെ. രാഘവന്‍ അധ്യക്ഷതവഹിച്ചു. കണ്ണന്‍ മാളൂര്‍ക്കയം, കെ.സി. കുഞ്ഞികൃഷ്ണന്‍, മാധവന്‍ ചുള്ളി, സുന്ദരന്‍ ഒരള എന്നിവര്‍ സംസാരിച്ചു. രാജീവന്‍ ചീരോല്‍ സ്വാഗതവും നാരായണന്‍ കുഴിക്കോല്‍ നന്ദിയും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]