ചങ്ങനാശേരി: സംസ്ഥാന സര്‍ക്കാരിന്‍റെ നവകേരളം പദ്ധതിയുടെ ഭാഗമായി വലിച്ചെറിയല്‍ മുക്ത കേരളം കാമ്പയിന് നഗരസഭയില്‍ തുടക്കമായി. പൊതുസ്ഥലങ്ങളിലെ മുഴുവന്‍ മാലിന്യങ്ങളും നീക്കം ചെയ്ത് ആ സ്ഥലങ്ങള്‍ ആകര്‍ഷകമാക്കുവാനുള്ള പ്രവര്‍ത്തനങ്ങളാണ് നടപ്പിലാക്കുന്നത്.
പൊതുജന പങ്കാളിത്തത്തോടുകൂടി ഹരിത കര്‍മ്മസേന, കുടുംബശ്രീ, തൊഴിലുറപ്പ് തൊഴിലാളികള്‍, സ്‌കൂള്‍, കോളജ്, എന്‍എസ്എസ്, എന്‍സിസി വോളന്‍റിയര്‍മാര്‍, വിവിധ സന്നദ്ധ സംഘടനകള്‍, റസിഡന്‍റ്സ് അസോസിയേഷനുകള്‍, വിവിധ ക്ലബുകള്‍ എന്നിവരുടെ സഹകരണത്തോടെ റിപ്പബ്ലിക് ദിനത്തില്‍ റെയില്‍വേ സിഗ്നലിനു സമീപം ബൈപ്പാസ് റോഡിലെ മാലിന്യങ്ങള്‍ നീക്കം ചെയ്ത് അലങ്കാരച്ചെടികള്‍ വച്ചുപിടിപ്പിച്ചു.
നഗരസഭാ ചെയര്‍പേഴ്‌സണ്‍ സന്ധ്യാ മനോജ് ഉദ്ഘാടനം ചെയ്തു. സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍മാരായ കെ.എം. നജിയ, എല്‍സമ്മ ജോബ്, അഡ്വ.മധുരാജ്, കൗണ്‍സിലര്‍മാരായ റെജി കേളമ്മാട്ട്, ലിസി വര്‍ഗീസ്, സ്മിത സുരേഷ്, ബീനാ ജിജന്‍, ഹെല്‍ത്ത് സൂപ്പര്‍വൈസര്‍ സോണ്‍ സുന്ദര്‍, ശുചിത്വ മിഷന്‍ പ്രതിനിധി സന്ദേശ് കുമാര്‍, ആരോഗ്യ വിഭാഗം ജീവനക്കാര്‍ തുടങ്ങിയവര്‍ ശുചീകരണത്തിന് നേതൃത്വം നല്‍കി.