ADVERTISEMENT

ADVERTISEMENT

ആദരിച്ചു

കോലഞ്ചേരി: സെന്‍റ് പീറ്റേഴ്സ് കോളജിലെ എൻഎസ്എസ് യൂണിറ്റിനേയും വൊളണ്ടിയർമാരെയും കടമറ്റം ജവഹർ വായനശാല ആദരിച്ചു. കുന്നത്തുനാട് താലൂക്ക് ലൈബ്രറി കൗൺസിൽ സെക്രട്ടറി പി.ജി. സജീവ് കോളജ് പ്രിൻസിപ്പൽ ബിനുജ ജോസഫിന് വായനശാലയുടെ ഉപഹാരം നൽകി.

കേരള സ്റ്റേറ്റ് ലൈബ്രറി കൗൺസിൽ സംസ്ഥാനത്തെ മുഴുവൻ ലൈബ്രറികളിലും നടത്തിവരുന്ന പബ്ലിക് പോർട്ട് സോഫ്റ്റ്‌വെയറിലേക്കുള്ള ഡേറ്റാ എൻട്രി പ്രവർത്തനം കടമറ്റം ജവഹർ വായനശാലയിലെ 13,000ത്തോളം പുസ്തകങ്ങൾ ഡാറ്റാ എൻട്രി നിർവഹിക്കുവാൻ കോലഞ്ചേരി കോളജിലെ എൻഎസ്എസ് വൊളണ്ടിയർമാർ വിവിധ ദിവസങ്ങളിലായി പൂർത്തീകരിച്ചു.

ഡേറ്റ എൻട്രിയിൽ പങ്കെടുത്ത മുഴുവൻ വിദ്യാർഥികൾക്കും താലൂക്ക് ലൈബ്രറി കൗൺസിലിന്‍റെ സർട്ടിഫിക്കറ്റും ഇതോടൊപ്പം വിതരണം ചെയ്തു.

ADVERTISEMENT

മൂവാറ്റുപുഴ സ്വദേശി സൗദിയിൽ മരിച്ചനിലയിൽ

മൂവാറ്റുപുഴ: മൂവാറ്റുപുഴ സ്വദേശിയായ യുവാവിനെ സൗദിയിൽ മരിച്ചനിലയിൽ കണ്ടെത്തി. മൂവാറ്റുപുഴ മുടവൂർ മഠത്തോളിൽ രമേശൻ നായരുടെ മകൻ മുകേഷ് (36) ആണ് മരിച്ചത്. കഴിഞ്ഞ 20ന് സൗദി അൽകോബാറിലെ താമസ സ്ഥലത്ത് മരിച്ചനിലയിൽ കണ്ടെത്തുകയായിരുന്നു. 17 വർഷമായി വിദേശത്താണ്. വെതർഫോർഡ് കന്പനിയിൽ ടെക്നീഷ്യനായി ജോലി ചെയ്യുകയായിരുന്നു. യുകെയിലുള്ള ഭാര്യയുടെ അടുത്തേക്ക് പോകുന്നതിനുള്ള തയാറെടുപ്പിലായിരുന്നു. സംസ്കാരം പിന്നീട് നാട്ടിൽ. ഭാര്യ: സൂര്യ ജി. പിള്ള. മകൻ: സൂര്യ മഹാദേവ്. മാതാവ്: ഉഷ ദേവി കുഞ്ഞമ്മ.

അശമന്നൂരിലെ പാറമടയിൽ നിന്ന് കൂടുതൽ ജലാറ്റിൻ സ്റ്റിക്കുകൾ കണ്ടെടുത്തു

പെരുമ്പാവൂർ : ഉപയോഗശൂന്യമായ പാറമടയിൽ നിന്ന് കൂടുതൽ ജലാറ്റിൻ സ്റ്റിക്കുകൾ മുങ്ങിയെടുത്ത് ഫയർ ഫോഴ്‌സ് സ്‌കൂബ ടീം. അശമന്നൂർ പഞ്ചായത്ത് വാർഡ് ഏഴ് മണ്ണൂർമോളത്ത് ഉപയോഗമില്ലാത്ത പാറമടയിൽ ഉപേക്ഷിക്കപ്പെട്ട നിലയിൽ കണ്ടെത്തിയ ഉഗ്രസ്‌ഫോടനശേഷിയുള്ള ജലാറ്റിൻ സ്റ്റിക്കുകൾ കോതമംഗലം അഗ്‌നിരക്ഷാ സേന സ്‌ക്യൂബാ ടീം അംഗങ്ങൾ ആണ് മുങ്ങിയെടുത്തത്. ഒരേക്കറോളം സ്ഥലത്ത് വ്യാപിച്ചുകിടക്കുന്നതും പതിനെട്ടടിയോളം വെള്ളമുള്ളതുമായ പാറക്കുളത്തിൽ നിന്ന് മൂന്നു മണിക്കൂർ നേരത്തെ പരിശ്രമഫലമായിട്ടാണ് ഏഴോളം ചാക്കുകളിലായി സൂക്ഷിച്ചിരുന്ന രണ്ടായിരത്തി ഒരുന്നൂറോളം വരുന്ന ജലാറ്റിൻ സ്റ്റിക്കുകൾ മുങ്ങിയെടുത്തത്. വർഷങ്ങളായി പ്രവർത്തിക്കാത്ത പാറമടയാണിത്. ഞായറാഴ്ച വൈകിട്ട് മീൻ പിടിക്കാനെത്തിയവർ വലയെറിഞ്ഞപ്പോഴാണ് ജലാറ്റിൻ സ്റ്റിക്കുകൾ കണ്ടെത്തിയത്. 380 ജലാറ്റിൻ സ്റ്റിക്കുകൾ കണ്ടെത്തിയതോടെയാണ് ഇന്നലെ ഫയർ ഫോഴ്സ് സംഘത്തെ ഉൾപ്പെടുത്തി കുറുപ്പംപടി പോലീസ് പരിശോധന നടത്തിയത്. സ്റ്റേഷൻ ഓഫീസർ സതീഷ് ജോസിന്‍റെ നേതൃത്വത്തിൽ സേനാംഗങ്ങളായ എം. അനിൽകുമാർ, പി.എം. റഷീദ്, ബേസിൽ ഷാജി, സൽമാൻ ഖാൻ എന്നിവർ ചേർന്നാണ് വെടിമരുന്ന് ശേഖരം മുങ്ങിയെടുത്തത്.

നഗര പ്രവേശനം: സ്വകാര്യ ബസുകൾക്ക് എട്ട് പെർമിറ്റുകൾ കൂടി

വൈപ്പിൻ: കഴിഞ്ഞ ദിവസം ചേർന്ന ആർടിഎ ബോർഡ് മീറ്റിംഗ് അജണ്ടയിൽ സ്വകാര്യ ബസ് ഉടമകൾ അപേക്ഷിച്ചിരുന്ന എട്ടു പുതിയ പെർമിറ്റുകൾ കൂടി ഗോശ്രീ മേഖലയിൽ അനുവദിച്ചു. എടവനക്കാട് അണിയൽ-വൈറ്റില നാല് പെർമിറ്റുകളും അയ്യമ്പള്ളി-കലൂർ, കുടുങ്ങാശേരി -കാക്കനാട് എന്നിവിടങ്ങളിലേക്ക് ഓരോന്നും വീതമാണ് അനുവദിച്ചിട്ടുള്ളത്. കൂടാതെ ഞാറക്കൽ അപ്പങ്ങാട് -ഹൈക്കോർട്ട് റൂട്ടിൽ ഓടിയിരുന്ന രണ്ട് ബസുകളുടെ പെർമിറ്റ് ഒന്ന് വൈറ്റിലയിലേക്കും മറ്റൊന്ന് കാക്കാനാട്ടേക്കും നീട്ടി നൽകുക കൂടി ചെയ്തിട്ടുണ്ട്. ഇനി ടൈം ഹിയറിംഗ് നടത്തി. ബസിന്‍റെ രേഖകൾ സമർപ്പിക്കുന്ന മുറയ്ക്ക് ബസുകൾക്ക് സർവീസ് നടത്താനുള്ള അനുവാദം നൽകും. ഏതാണ്ട് ഒരു മാസം പിടിക്കുമെന്നാണ് സൂചന.

ശിവരാത്രി മണപ്പുറത്ത് കഞ്ചാവ് ചെടികൾ

ആലുവ: കഞ്ചാവ് ഇലകൾ ശേഖരിക്കാൻ അതിഥി തൊഴിലാളികൾ സ്ഥിരം എത്തുന്നുവെന്ന വിവരത്തെ തുടർന്ന് എക്സൈസ് വകുപ്പ് ആലുവ ശിവരാത്രി മണപ്പുറത്ത് പരിശോധന നടത്തി. പല വലിപ്പത്തിൽ വളർന്നിരുന്ന ഒമ്പത് കഞ്ചാവ് ചെടികൾ എക്സൈസ് സംഘം കണ്ടെത്തി പറിച്ചുനീക്കി. ഏകദേശം ഒരു മീറ്ററോളം വലിപ്പമുള്ള ചെടികളടക്കമാണ് കണ്ടെത്തിയത്. ഇല്ലിക്കാടിനോട് ചേർന്ന മേഖലയിലാണ് ചെടികൾ വളർത്തിയിരുന്നത്. മുമ്പും മണപ്പുറത്ത് കഞ്ചാവ് ചെടികൾ എക്സൈസ് വകുപ്പ് കണ്ടെത്തിയിട്ടുണ്ട്. പ്രത്യേക പരിചരണം കൊടുത്താണ് അന്നും ചെടി വളർത്തിയിരുന്നത്. മണപ്പുറം കേന്ദ്രീകരിച്ച് ചുറ്റിക്കറങ്ങുന്നവരെ നിരീക്ഷിക്കാനും എക്സൈസ് വകുപ്പ് നടപടി ആരംഭിച്ചു. ആലുവ റെയ്ഞ്ച് എക്സൈസ് ഇൻസ്പെക്ടർ ജോമോൻ ജോർജിന്‍റെ നേതൃത്വത്തിലാണ് കഞ്ചാവ് ചെടികൾ കണ്ടെത്തിയത്.

ബ്രഹ്മപുരത്തെ ജൈവവളം ദുബായിലേക്ക്

കൊച്ചി: ബ്രഹ്മപുരത്തെ മാലിന്യ നിക്ഷേപത്തില്‍നിന്ന് ഉത്പാദിപ്പിച്ച ജൈവവളം ദുബായിലെ ഫാമുകളിലേക്ക്. ജൈവവളത്തിന്‍റെ ആദ്യ കയറ്റുമതി മേയര്‍ എം. അനില്‍കുമാര്‍ ഫ്ളാഗ് ഓഫ് ചെയ്തു. സമ്പൂര്‍ണ മാലിന്യ സംസ്‌കരണത്തിലേക്കുള്ള കൊച്ചിയുടെ യാത്രയിലെ നാഴികക്കല്ലായി മാറിയിരിക്കുകയാണ് ജൈവവള കയറ്റുമതിയെന്ന് മേയര്‍ പറഞ്ഞു. ബ്രഹ്മപുരത്ത് ബ്ലാക്ക് സോള്‍ജിയര്‍ ഫ്‌ളൈ ലാര്‍വകള്‍ ഉപയോഗിച്ച് ഉത്്‍പാദിപ്പിക്കുന്ന ജൈവവളമാണ് ദുബായിലെ എസ്എസ്‌കെ ബ്ലെന്‍ഡിംഗ് എന്ന ഫാമിലേക്ക് കയറ്റുമതി ചെയ്യുന്നത്. ഒന്നര വര്‍ഷമായി ഫാബ്‌കോ ബയോ സൈക്കിള്‍ പ്രൈവറ്റ് ലിമിറ്റഡ് എന്ന സ്ഥാപനമാണ് ബ്ലാക്ക് സോള്‍ജിയര്‍ ഫ്‌ളൈ സംവിധാനത്തിലൂടെ മാലിന്യ സംസ്‌കരണം നടത്തിവരുന്നത്. ഇത്തരത്തില്‍ 50 ടണ്‍ ജൈവമാലിന്യം ദിവസേന സംസ്‌കരണം നടത്തിവരുന്നു. ഇതുവഴി 10 ടണ്‍ കമ്പോസ്റ്റാണ് പ്രതിദിനം ഉത്പാദിപ്പിക്കപ്പെടുന്നത്. ചടങ്ങില്‍ ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ടി.കെ. അഷ്‌റഫ്, സൂപ്രണ്ടിംഗ് എന്‍ജിനീയര്‍ ബിജോയ് തുടങ്ങിയവര്‍ പങ്കെടുത്തു.

രാത്രി കുളത്തിലിറങ്ങിയ യുവാവ് മുങ്ങിമരിച്ചു

കാക്കനാട് : തൃക്കാക്കര നഗരസഭയുടെ ഉടമസ്ഥതയിലുള്ള കാക്കനാട് പൊയ്യച്ചിറ കുളത്തിൽ ഞായറാഴ്ച രാത്രിയിൽ സുഹൃത്തുക്കൾക്കൊപ്പം കുളിക്കാനിറങ്ങിയ യുവാവ് മുങ്ങിമരിച്ചു. കാക്കനാട് ഇടച്ചിറ പാട്ടുപറമ്പിൽ ജോർജ് ദീപക് (34) ആണ് മരിച്ചത്. കാക്കനാട് ജോർജ് ദീപക് നടത്തുന്ന ഹോസ്റ്റലിലെ രണ്ടു സുഹൃത്തുക്കൾക്കൊപ്പം കുളിക്കാനെത്തിയതായിരുന്നു. നീന്തൽ വശമില്ലായിരുന്നു. പുലർച്ചെ ഒന്നരവരെ യുവാക്കളെ കുളത്തിനു സമീപം കണ്ടവരുണ്ട്. ജോർജ് ദീപക്കിനെ കാണാനില്ലെന്ന് കുളത്തിൽ ഇയാൾക്കൊപ്പം ഇറങ്ങിയവരാണ് മറ്റുള്ളവരെ വിളിച്ചറിയിച്ചത്. പരിസരവാസികൾ അറിയിച്ചതനുസരിച്ച് തൃക്കാക്കര പോലീസ് സ്ഥലത്തെത്തി. ഫയർഫോഴ്സും നാട്ടുകാരും ചേർന്ന് പുലർച്ചെവരെ തെരച്ചിൽ നടത്തിയെങ്കിലും മൃതദേഹം കണ്ടെത്താൻ കഴിഞ്ഞില്ല. തുടർന്ന് സ്കൂബാ യൂണിറ്റുമായി രാവിലെ എത്താമെന്നറിയിച്ച് ഫയർഫോഴ്സ് സംഘം മടങ്ങി. ജോർജ് ജേക്കബിന്‍റെ സുഹൃത്തുക്കളും ബന്ധുക്കളും തെരച്ചിൽ തുടരുന്നതിനിടയിൽ പുലർച്ചെ നാലോടെ കുളത്തിലെ കല്പടവുകൾക്കു താഴെ മൃതദേഹം കണ്ടെത്തുകയായിരുന്നു. മൃതദേഹം പോസ്റ്റുമോർട്ടത്തിനു ശേഷം ബന്ധുക്കൾക്കു വിട്ടുകൊടുത്തു. സംസ്കാരം ഇന്ന് വൈകുന്നേരം മൂന്നിന് ഇടച്ചിറ ഡോൺബോസ്കോ പള്ളിയിൽ നടക്കും.

മയക്കുമരുന്ന് ഉപയോഗം; 585 പേർക്കെതിരെ നടപടി

ആലുവ: ഓപ്പറേഷൻ ഡി ഹണ്ട് പ്രകാരം എറണാകുളം റൂറൽ ജില്ലയിൽ 781 കേസുകൾ രജിസ്റ്റർ ചെയ്തു. 825 പേരെ അറസ്റ്റ് ചെയ്തതിന് പുറമേ മയക്കുമരുന്ന് ഉപയോഗിച്ച 585 പേർക്കെതിരെ നടപടിയും എടുത്തെന്ന് റൂറൽ പോലീസ് അറിയിച്ചു. വിവിധ കേസുകളിലായാണ് 75 കിലോയോളം കഞ്ചാവ്, 217 ഗ്രാം എംഡിഎംഎ, 78 ഗ്രാം ഹെറോയിൻ, 0.17 ഗ്രാം ബ്രൗൺ ഷുഗർ, 0.03 ഗ്രാം എൽ എസ്ഡി, മൂന്ന് കഞ്ചാവ് ചെടികൾ എന്നിവ പിടികൂടിയതായി ജില്ലാ പോലീസ് മേധാവി ഡോ. വൈഭവ് സക്സേന അറിയിച്ചു.

കാട്ടാന വീടിന്‍റെ മതിൽ തകർത്തു

കോതമംഗലം: കോട്ടപ്പടിക്ക് സമീപം വാവേലിയിൽ കാട്ടാന വീടിന്‍റെ മതിൽ തകർത്തു. വാവേലി ചിറപ്പുറത്ത് ജോസിന്‍റെ വീടിന്‍റെ മതിലാണ് തകർത്തത്. ഇന്നലെ പുലർച്ചെയായിരുന്നു സംഭവം. കാട്ടാന കൃഷിയിടത്തിലും നാശം വരുത്തി. വീടിന്‍റെ മതിൽ തകർത്ത ശേഷം മുറ്റത്ത് നിന്നിരുന്ന പ്ലാവിലെ 30ഓളം ചക്ക പറിച്ചു തിന്നുകയും നശിപ്പിക്കുകയും ചെയ്തു. പ്ലാവിന്‍റെ ചുവട്ടിലെത്തുന്നതിനാണ് ആന മതിൽ തകർത്തതെന്നാണ് കരുതുന്നത്. സമീപത്തെ ആലക്കര ബേബിയുടെ പുരയിടത്തിലെ വാഴ ഉൾപ്പെടെയുള്ള കൃഷികളും നശിപ്പിച്ചു.

യൂസ്ഡ്കാർ ഷോറൂമുകൾക്ക് ലൈസൻസ് നിർബന്ധമാക്കി മോട്ടോർ വാഹന വകുപ്പ്

കാക്കനാട്: യൂസ്ഡ്കാർ ഷോറുമുകൾ ലൈസൻസ് നിർബന്ധമാക്കി മോട്ടോർ വാഹന വകുപ്പ്. ഇത്തരം ഷോറൂമുകൾ വഴി വിറ്റഴിക്കപ്പെടുന്ന വാഹനങ്ങൾ സംബന്ധിച്ച കൃത്യത ഉറപ്പുവരുത്താനാണ് നടപടിയെന്ന് അധികൃതർ അറിയിച്ചു. സംസ്ഥാനത്തിനകത്തു നിന്നുള്ള വാഹനങ്ങൾക്ക് പുറമെ വിവിധ സംസ്ഥാനങ്ങളിൽ നിന്നും എത്തിക്കുന്ന വാഹനങ്ങളും യൂസ്ഡ് കാർ ഷോറും ഉടമകൾ വില്പനയ്ക്കെത്തിക്കുന്നുണ്ട്. ഇത്തരം വാഹനങ്ങൾ വാങ്ങുന്നവരുടെയും വിൽക്കുന്നവരുടെയും വിശദ വിവരങ്ങൾ ഷോറൂം ഉടമകൾ സൂക്ഷിക്കുന്നില്ലെന്ന കണ്ടെത്തലാണ് ലൈസൻസ് നിർബന്ധമാക്കാൻ കാരണമെന്നും ആർടിഒ അധികൃതർ പറഞ്ഞു. കേന്ദ്ര സർക്കാരിന്‍റെ നിർദേശപ്രകാരമാണ് അടിയന്തിര നടപടിയെന്നാണ് സൂചന. യൂസ്ഡ് കാർ ഷോറൂം ഉടമകൾ ലൈസൻസ് എടുക്കണമെന്ന് ചൂണ്ടിക്കാട്ടി അധികൃതർ നോട്ടീസ് നൽകിയെങ്കിലും ആരും ഇക്കാര്യത്തിൽ സഹകരിക്കാൻ തയാറായിരുന്നില്ല. തുടർന്ന് മോട്ടോർ വാഹന വകുപ്പ് ഇത്തരം ഷോറൂകളിൽ മിന്നൽ പരിശോധന നടത്തുകയായിരുന്നു. ചട്ടലംഘനം കണ്ടെത്തിയ മുപ്പതോളം ഷോറൂമുകൾക്ക് നോട്ടീസ് നൽകി. വാഹനം വിൽക്കുന്നവർ കൃത്യമായ രേഖകൾ സൂക്ഷിക്കാത്ത കാരണത്താൽ ഇവിടങ്ങളിൽ നിന്നും വാങ്ങുന്ന വാഹനങ്ങൾ ക്രിമിനൽ കുറ്റകൃത്യങ്ങൾക്ക് ഉപയോഗിക്കുന്നതായും സംശയം ഉയർന്നിട്ടുണ്ട്. മയക്കുമരുന്ന് കടത്തിനും വില്പനയ്ക്കും മറ്റുമായി ഉപയോഗിക്കുന്ന വാഹനങ്ങളിൽ നല്ലൊരു ശതമാനവും യൂസ്ഡ് കാർ ഷോറൂമുകളിൽ നിന്നും വാങ്ങുന്നവയാണെന്ന കണ്ടെത്തലിന്‍റെയും സർക്കാരിന് കിട്ടേണ്ട നികുതിയടക്കമുളള കാര്യങ്ങളിൽ ക്രമക്കേടുകൾ നടക്കുന്നതായി ബോധ്യപ്പെട്ടതിന്‍റെയും അടിസ്ഥാനത്തിലാണ് ലൈസൻസ് നിർബന്ധമാക്കാനുള്ള തീരുമാനമെന്നും കൃത്യമായ വിവരങ്ങൾ നൽകാത്ത സ്ഥാപനങ്ങൾ തുറന്നു പ്രവർത്തിക്കാൻ അനുവദിക്കില്ലെന്നും മോട്ടോർ വാഹന വകുപ്പ് അധികൃതർ അറിയിച്ചു.

97 തദ്ദേശ സ്ഥാപനങ്ങളുടെ വാര്‍ഷിക പദ്ധതികൾക്ക് അംഗീകാരം

കൊച്ചി: ജില്ലയിലെ 2025-2026 സാമ്പത്തിക വര്‍ഷത്തില്‍ 97 തദ്ദേശ സ്ഥാപനങ്ങളുടെ വാര്‍ഷിക പദ്ധതികള്‍ക്ക് ജില്ലാ ആസൂത്രണ സമിതി യോഗം അംഗീകാരം നല്‍കി. തദ്ദേശ സ്വയം ഭരണ സ്ഥാപനങ്ങളിലേക്ക് ഈ വര്‍ഷം അവസാനം തെരഞ്ഞെടുപ്പ് നടക്കാനിരിക്കുന്ന സാഹചര്യത്തില്‍ പദ്ധതികള്‍ ഉടനെ പൂര്‍ത്തിയാക്കണമെന്നും പദ്ധതി ചെലവ് വേഗത്തിലാക്കണമെന്നും യോഗത്തില്‍ അധ്യക്ഷത വഹിച്ച ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ നിര്‍ദേശിച്ചു. കഴിഞ്ഞ സാമ്പത്തിക വര്‍ഷം പദ്ധതി നിര്‍വഹണത്തില്‍ ജില്ലാതലത്തില്‍ ആദ്യ സ്ഥാനങ്ങള്‍ നേടിയ തദ്ദേശസ്വയം ഭരണ സ്ഥാപനങ്ങള്‍ക്ക് ജില്ലാ ആസൂത്രണസമിതി പുരസ്‌കാരങ്ങള്‍ നല്‍കി. പാലക്കുഴ, എടവനക്കാട്, കറുകുറ്റി എന്നീ ഗ്രാമപഞ്ചായത്തുകള്‍ക്കാണ് യഥാക്രമം ഒന്നും രണ്ടും മൂന്നും സ്ഥാനങ്ങള്‍. ബ്ലോക്ക് പഞ്ചായത്തുകളില്‍ കോതമംഗലം, വൈപ്പിന്‍, വടവുകോട് എന്നിവയും നഗരസഭകളില്‍ അങ്കമാലി, പെരുമ്പാവൂര്‍, ഏലൂര്‍ എന്നിവ യഥാക്രമം ഒന്നും രണ്ടും മൂന്നും സ്ഥാനങ്ങള്‍ നേടി. കോര്‍പറേഷനുകളില്‍ സംസ്ഥാനത്ത് രണ്ടാം സ്ഥാനം നേടിയ കൊച്ചി കോര്‍പറേഷനും ജില്ലാ പഞ്ചായത്തുകളില്‍ സംസ്ഥാനത്ത് മൂന്നാം സ്ഥാനം നേടിയ എറണാകുളം ജില്ലാ പഞ്ചായത്തിനും പുരസ്‌കാരങ്ങള്‍ നല്‍കി. മാല്യന്യമുക്ത നവകേരളം പ്രവര്‍ത്തനങ്ങളില്‍ സംസ്ഥാനതലത്തില്‍ മികച്ച ഗ്രാമപഞ്ചായത്തായി തെരഞ്ഞെടുക്കപ്പെട്ട ആമ്പല്ലൂര്‍ ഗ്രാമ പഞ്ചായത്തിനും പദ്ധതി നിര്‍വഹണത്തില്‍ 100 ശതമാനം നേടിയ മറ്റ് തദ്ദേശ സ്വയംഭരണ സ്ഥാപനങ്ങള്‍ക്കും പുരസ്‌കാരങ്ങള്‍ നല്‍കി ആദരിച്ചു. യോഗത്തില്‍ ആസൂത്രണ സമിതി മെമ്പര്‍ സെക്രട്ടറി കൂടിയായ ജില്ലാ കളക്ടര്‍ എന്‍. എസ്.കെ. ഉമേഷ്, ജില്ലാ പ്ലാനിംഗ് ഓഫീസര്‍ ടി. ജ്യോതിമോള്‍ തുടങ്ങിയവർ പങ്കെടുത്തു.

ട്രാവന്‍കൂര്‍ റയോണ്‍സ് ഭൂമിയില്‍ ആധുനിക വ്യവസായങ്ങള്‍ ആരംഭിക്കും: മന്ത്രി രാജീവ്

കൊച്ചി: ട്രാവന്‍കൂര്‍ റയോണ്‍സ് ഭൂമിയില്‍ പാരിസ്ഥിതിക മലിനീകരണങ്ങളില്ലാത്ത ആധുനിക രീതിയിലുള്ള വ്യവസായങ്ങളായിരിക്കും ആരംഭിക്കുകയെന്ന് മന്ത്രി പി. രാജീവ്. കിന്‍ഫ്ര ഏറ്റെടുത്ത പദ്ധതി പ്രദേശം സന്ദര്‍ശിക്കുകയായിരുന്നു അദ്ദേഹം. രണ്ട് ഘട്ടങ്ങളിലായാണ് വ്യവസായങ്ങള്‍ ആരംഭിക്കുക. ആകെയുള്ള 68 ഏക്കര്‍ ഭൂമിയില്‍ 30 ഏക്കറാണ് നിലവില്‍ കിന്‍ഫ്രയ്ക്ക് കൈമാറിയിയിട്ടുള്ളത്. ടെന്‍ഡര്‍ ഉള്‍പ്പെടെയുള്ള സാങ്കേതിക നടപടിക്രമങ്ങള്‍ പൂര്‍ത്തിയായി. സര്‍ക്കാരിന്‍റെ അംഗീകാരം കൂടി ലഭിച്ചാല്‍ നിര്‍മാണപ്രവര്‍ത്തനം ആരംഭിക്കും. പെരിയാറിനോട് ചേര്‍ന്ന് കിടക്കുന്ന പ്രദേശമായതിനാല്‍ ബഫര്‍ സോണ്‍ പാലിച്ച് വേണം നിര്‍മാണം നടത്താന്‍. റോഡുകള്‍ ഉള്‍പ്പെടെ പൂര്‍ത്തിയായ ശേഷം 18.43 ഏക്കര്‍ പ്രദേശമാണ് ഉപയോഗിക്കാന്‍ കഴിയുക. ഇവിടെ ഫേസ് ഒന്നില്‍ കണ്‍സ്യൂമര്‍ ഇലക്ട്രോണിക്‌സ്, എഐ, റോബോട്ടിക്‌സ്, ആയുര്‍വേദ പ്രോഡക്ട്‌സ്, ഫുഡ് പ്രൊസസിംഗ് യൂണിറ്റുകള്‍ തുടങ്ങിയ വ്യവസായങ്ങളും ഇ-കൊമേഴ്‌സ് വെയര്‍ ഹൗസുകളുമാണ് നിര്‍മിക്കുക. 22 കോടിയോളം രൂപയാണ് ചിലവ് പ്രതീക്ഷിക്കുന്നത്. ബാക്കി സ്ഥലം കൂടി ലഭിച്ച ശേഷമാകും രണ്ടാം ഘട്ടം ആരംഭിക്കുക. ഗവേഷണ കേന്ദ്രങ്ങള്‍, സ്റ്റാര്‍ട്ടപ്പുകള്‍ക്ക് വേണ്ട ഇന്‍ക്യുബേഷന്‍ സെന്‍ററുകള്‍, വേഗത്തില്‍ വ്യവസായം ആരംഭിക്കുന്നതിനുള്ള പ്ലഗ് ആന്‍ഡ് പ്ലേ സംവിധാനങ്ങള്‍, നാനോ ടെക്‌നോളജി, കണ്‍സ്യൂമര്‍ ഇലക്ട്രോണിക്‌സ്, എഐ, റോബോട്ടിക്‌സ്, ഫുഡ് പ്രൊസസിംഗ് യൂണിറ്റുകള്‍ തുടങ്ങിയവയാണ് രണ്ടാം ഘട്ടത്തില്‍ നിര്‍മിക്കുക.പാര്‍ക്കിനല്ലാതെ മറ്റ് ആവശ്യങ്ങള്‍ക്കായി സ്ഥലം വിട്ടു നല്‍കാനാകില്ലെന്നും മന്ത്രി വ്യക്തമാക്കി. അഡ്വ. എല്‍ദോസ് കുന്നപ്പിള്ളില്‍ എംഎല്‍എ, കളക്ടര്‍ എന്‍.എസ്.കെ. ഉമേഷ്, കിന്‍ഫ്ര എംഡി സന്തോഷ് കോശി തോമസ്, സംസ്ഥാന യുവജന കമ്മീഷന്‍ ഉപാധ്യക്ഷന്‍ എസ്. സതീഷ്, കേരള ബാങ്ക് ഡയറക്ടര്‍ ബോര്‍ഡംഗം എസ്. പുഷ്പദാസ് തുടങ്ങിയവര്‍ സന്നിഹിതരായിരുന്നു.

സിനിമയ്ക്ക് പുറത്ത് നിയമ നടപടിയുമായി മുന്നോട്ടില്ലെന്ന് വിന്‍ സി. അലോഷ്യസ്

കൊച്ചി: സിനിമാ സെറ്റില്‍ ലഹരി ഉപയോഗിച്ച് തന്നോട് മോശമായി പെരുമാറിയ നടനെതിരെ സിനിമയ്ക്ക് പുറത്ത് നിയമ നടപടിയുമായി മുന്നോട്ടില്ലെന്ന് നടി വിന്‍ സി അലോഷ്യസ്. സിനിമയ്ക്കുള്ളില്‍ പ്രശ്‌നം പരിഹരിക്കണമെന്നാണ് തന്‍റെ നിലപാട്. അന്വേഷണത്തോട് സഹകരിക്കുമെന്ന് മാത്രമാണ് മന്ത്രിയോട് പറഞ്ഞത്. ഫിലിം ചേംബറിനും സിനിമയുടെ ഇന്‍റേണല്‍ കംപ്ലയിന്‍റ് അഥോറിറ്റിക്കും നല്‍കിയ പരാതി പിന്‍വലിക്കില്ലെന്നും അതുമായി മുന്നോട്ടു പോകുമെന്നും നടി വ്യക്തമാക്കി. സിനിമാ മേഖലയില്‍ മാറ്റം ഉണ്ടാകണമെന്നും ഇത്തരം സംഭവങ്ങള്‍ ആവര്‍ത്തിക്കരുത് എന്നുമാണ് തന്‍റെ ആവശ്യം. അതിനുവേണ്ടിയാണ് ഫിലിം ചേംബറിനും സിനിമയുടെ ഇന്‍റേണല്‍ കംപ്ലയിന്‍റ് അഥോറിറ്റിയിലും പരാതി നല്‍കിയത്. "സിനിമാ സംഘടനകളുടെ അന്വേഷണവുമായി സഹകരിക്കും. സിനിമയില്‍ ഇത്തരം കാര്യങ്ങള്‍ ആവര്‍ത്തിക്കരുത്. ആ ഉറപ്പാണ് എനിക്ക് വേണ്ടത്. മാലാ പാര്‍വതിയുമായി ബന്ധപ്പെട്ട വിവാദങ്ങളിലൊന്നും പ്രതികരിക്കാനില്ല. സൂത്രവാക്യം സിനിമയുമായി ബന്ധപ്പെട്ട ഐ സി യോഗത്തില്‍ പങ്കെടുക്കും', - വിന്‍ സി പറഞ്ഞു. സൂത്രവാക്യം സിനിമയുടെ സൈറ്റില്‍ വച്ച് ലഹരി ഉപയോഗിച്ച നടനില്‍ നിന്നും മോശം അനുഭവം ഉണ്ടായെന്നായിരുന്നുവെന്നായിരുന്നു വിന്‍ സിയുടെ പരാതി. വിൻ സി. ഇന്‍റേണല്‍ കമ്മിറ്റി മുമ്പാകെ മൊഴി നല്‍കി കൊച്ചി: സിനിമാ സെറ്റിലെ ദുരനുഭവവുമായി ബന്ധപ്പെട്ട് നടി വിന്‍ സി അലോഷ്യസ് സൂത്രവാക്യം സിനിമയുടെ ഇന്‍റേണല്‍ കമ്മിറ്റി മുമ്പാകെ മൊഴി നല്‍കി. ഇന്‍റേണല്‍ കമ്മിറ്റിയുടെയും ഫിലിം ചേംബറിന്‍റെയും നടപടികളില്‍ തൃപ്തിയുണ്ട്. നിയമനടപടികളിലേക്ക് ഇല്ലെന്ന് നേരത്തെ തന്നെ താന്‍ വ്യക്തമാക്കിയതാണെന്നും ഇന്‍റേണല്‍ കമ്മിറ്റി മുമ്പാകെ മൊഴി നല്‍കിയശേഷം മാധ്യമങ്ങളോട് പറഞ്ഞു. മൊഴിയിലെ വിവരങ്ങള്‍ പുറത്തുപറയാന്‍ കഴിയില്ല. മൊഴിയുടെ വിശദവിവരങ്ങള്‍ അവര്‍ തന്നെ പുറത്തുവിടട്ടെ. പരാതിയിലെ വിവരങ്ങള്‍ പുറത്തുവന്നത് ശരിയായ നടപടിയല്ല. പരാതി ചോര്‍ന്നത് എങ്ങനെയെന്ന് വ്യക്തമല്ലെന്നും നടി പറഞ്ഞു. വിന്‍ സിയുടെ പരാതിയില്‍ വിശദീകരണം നല്‍കാന്‍ നടന്‍ ഷൈന്‍ ടോം ചാക്കോയും ഇന്നലെ ഇന്‍റേണല്‍ കമ്മിറ്റി മുമ്പാകെ എത്തിയിരുന്നു. അമ്മയ്ക്കൊപ്പമെത്തിയ നടന്‍ ഷൈന്‍ വിശദീകരണം നല്‍കിയശേഷം മടങ്ങി. മാധ്യമങ്ങളോട് പ്രതികരിക്കാന്‍ തയാറായില്ല. വിന്‍ സിയെയും ഷൈനെയും ഒരുമിച്ചിരുത്തിയും ഒറ്റക്കൊറ്റയ്ക്കായും ഇന്‍റേണല്‍ കമ്മിറ്റി മൊഴിയെടുത്തു. ഇന്‍റേണല്‍ കമ്മിറ്റി റിപ്പോര്‍ട്ട് ലഭിച്ചതിനുശേഷം മാത്രമേ തുടര്‍നടപടികളിലേക്ക് കടക്കുകയുളളൂവെന്നാണ് ഫിലിം ചേമ്പര്‍ അറിയിച്ചിരിക്കുന്നത്.

വിവാദ അഭിമുഖത്തില്‍ വിശദീകരണവുമായി നടി മാല പാര്‍വതി

കൊച്ചി: വിവാദ അഭിമുഖത്തില്‍ വിശദീകരണവുമായി നടി മാല പാര്‍വതി. ദുരനുഭവങ്ങള്‍ നേരിട്ടാല്‍ അപ്പോള്‍ തന്നെ പ്രതികരിക്കണമെന്നാണ് താന്‍ ചൂണ്ടിക്കാട്ടിയതെന്നും അതിനുശേഷം വേണം ഇന്‍റേണേല്‍ കമ്മിറ്റിയെ അടക്കം സമീപിക്കാനെന്നും മാല പാര്‍വതി സ്വകാര്യ ചാനലിനു നല്‍കിയ അഭിമുഖത്തില്‍ പറഞ്ഞു. നടി വിന്‍ സി അലോഷ്യസ് നടന്‍ ഷൈന്‍ ടോം ചാക്കോയ്ക്കെതിരെ നല്‍കിയ പരാതിയുമായി ബന്ധപ്പെട്ടുള്ള ചോദ്യത്തിന് യൂട്യൂബ് ചാനലിന് നല്‍കിയ അഭിമുഖത്തിലായിരുന്നു മാല പാർവതി വിവാദ പരാമര്‍ശം നടത്തിയത്. സിനിമാ രംഗത്തെ മോശം അനുഭവങ്ങള്‍ മിടുക്കോടെ മാനേജ് ചെയ്യാന്‍ നടിമാര്‍ക്ക് സ്‌കില്‍ വേണമെന്നായിരുന്നു മാല പാര്‍വതി അഭിമുഖത്തില്‍ പറഞ്ഞത്. ഇതിലാണ് വിശദീകരണവുമായി നടി ഇപ്പോള്‍ രംഗത്തെത്തിയത്. 'ദുരനുഭവങ്ങള്‍ നേരിട്ടാല്‍ നടിമാര്‍ ഉടന്‍ പ്രതികരിക്കണം എന്നാണ് ഉദ്ദേശിച്ചത്. സെറ്റില്‍ നേരിട്ട അപമാനം വിന്‍ സി മനസില്‍ കൊണ്ടുനടക്കാതെ അപ്പോള്‍ തന്നെ പ്രതികരിക്കണമായിരുന്നു. പെണ്‍പിള്ളേർ ഇത്തരം കാര്യങ്ങളില്‍ എന്തിനാണ് പേടിക്കുന്നത്?. താന്‍ ഉദ്ദേശിക്കാത്ത കാര്യങ്ങളാണ് തനിക്കെതിരെ പറയുന്നത്. സ്വപ്നത്തില്‍ പോലും താന്‍ ചിന്തിക്കാത്ത കാര്യങ്ങളാണ് ഇപ്പോള്‍ പറയുന്നത്. പൊതുമധ്യത്തില്‍ താന്‍ അപമാനം നേരിട്ടെന്നാണ് വിന്‍ സി പറഞ്ഞത്. അന്ന് ആ സംഭവം നടന്നപ്പോള്‍ തന്നെ പ്രതികരിക്കണമായിരുന്നു. പോടായെന്ന് പറഞ്ഞാല്‍ തീരാവുന്ന കാര്യമല്ലേയുള്ളൂ. സെറ്റില്‍ ഉണ്ടായിരുന്നവര്‍ ഉറപ്പായും വിന്‍ സിയെ പിന്തുണച്ചേനെ' എന്നും മാല പാര്‍വതി പറഞ്ഞു.

തൃപ്പൂണിത്തുറയിൽ യുവാവ് മരിക്കാനിടയായ അപകടം :റോഡിലേക്ക് തള്ളിനിൽക്കുന്ന സ്ലാബ് വില്ലനെന്ന് നാട്ടുകാർ

ഉദയംപേരൂർ: പുത്തൻകാവിൽ ബൈക്ക് ബസുമായി കൂട്ടിയിടിച്ച് യുവാവ് മരിക്കാനിടയായ സംഭവത്തിന് കാരണമായത് റോഡിലേയ്ക്ക് കയറിനിൽക്കുന്ന കോൺക്രീറ്റ് സ്ലാബെന്ന് ആക്ഷേപം. ഇവിടെ മെയിൻ റോഡിൽനിന്നും ശ്രീനാരായണ പബ്ലിക് സ്കൂളിലേയ്ക്ക് തിരിയുന്ന ഭാഗത്ത് അപകടകരമായ രീതിയിലാണ് ഒരു കോൺക്രീറ്റ് സ്ലാബ് കിടക്കുന്നത്. പുത്തൻകാവ് എകെജി റോഡിലായി നിർമിച്ചിരിക്കുന്ന കാനയുടെ തുടക്കം പിഡബ്ല്യുഡി റോഡിലേക്ക് കയറിയാണ് കിടക്കുന്നത്. ഇവിടെയിട്ടിരിക്കുന്ന സ്ലാബാണ് റോഡ് നിരപ്പിൽ നിന്നുമുയർന്ന് അപകടകരമായ രീതിയിലുള്ളത്. മെയിൻ റോഡിലൂടെ വരുന്ന വാഹനങ്ങൾ സ്ലാബ് ഒഴിവാക്കാനായി റോഡിന്‍റെ നടുവിലേയ്ക്ക് വെട്ടിച്ചു മാറ്റുന്നതാണ് അപകടത്തിനിടയാക്കുന്നത്. ഇതുവരെ ഇവിടെ 12 ഓളം അപകടങ്ങളുണ്ടായിട്ടുണ്ട്. പിഡബ്ല്യുഡി അധികൃതരെ അറിയിച്ചിട്ടും യാതൊരു നടപടിയുമുണ്ടായില്ലെന്ന് പറയുന്നു. ഇന്നലെ രാവിലെ ഇവിടെയുണ്ടായ അപകടത്തിൽ മറവന്തുരുത്ത് സ്വദേശി ജിജി തോമസ് മരണപ്പെട്ടിരുന്നു. യുവാവ് മരണപ്പെട്ടതോടെ നാട്ടുകാരുടെ ആവശ്യപ്രകാരം തിങ്കളാഴ്ച്ച ഉച്ചയോടെ ഉയർന്നു നിൽക്കുന്ന സ്ലാബ് മാറ്റുന്ന ജോലികൾ മിന്നൽ വേഗത്തിലാണ് ബന്ധപ്പെട്ടവർ നടത്തിയത്.

എംഎജെ ഹോസ്പിറ്റലില്‍ നവീകരിച്ച ഡെര്‍മറ്റോളജി, ഡെന്‍റല്‍ വിഭാഗങ്ങള്‍

കൊച്ചി: ഇടപ്പള്ളി എംഎജെ ഹോസ്പിറ്റലില്‍ അത്യാധുനിക സൗകര്യങ്ങളോടു കൂടി നവീകരിച്ച ഡെര്‍മറ്റോളജി, ഡെന്‍റല്‍ വിഭാഗങ്ങള്‍ പ്രവർത്തനമാരംഭിച്ചു. പുതിയ ബ്ലോക്കിന്‍റെ ഉദ്ഘാടനം ഹോസ്പിറ്റല്‍ ഡയറക്ടര്‍ ഫാ. ആന്‍റണി മഠത്തുംപടി നിര്‍വഹിച്ചു. നൂതന സാങ്കേതിക വിദ്യകള്‍ ഉപയോഗിച്ചുള്ള ചികിത്സാ രീതികളും എല്ലാവിധ ലേസര്‍ തെറാപ്പികളും സേവനങ്ങളും മിതമായ നിരക്കില്‍ ലഭ്യമാക്കുകയാണ് ലക്ഷ്യം. ചടങ്ങിൽ ഹോസ്പിറ്റല്‍ ട്രസ്റ്റിമാരായ ജോസ്‌കുട്ടി പള്ളിപ്പാടന്‍, ജോയ് കളമ്പാടന്‍, മെഡിക്കല്‍ സൂപ്രണ്ട് ഡോ. ജെയിംസ് സെബാസ്റ്റ്യന്‍, ഡോ. പ്രമീള എലിസബത്ത് (ഡെര്‍മറ്റോളജി വിഭാഗം), ഡോ. നിസി അനില്‍ (ഡെന്‍റല്‍ വിഭാഗം) തുടങ്ങിയവര്‍ പ്രസംഗിച്ചു.

വൈപ്പിൻ മണ്ഡലത്തിലെ പ്രവൃത്തികൾക്ക് അക്വിസിഷൻ നടപടികൾ സമയബന്ധിതമായി തീർപ്പാക്കുമെന്ന്

വൈപ്പിൻ: മണ്ഡലത്തിലെ വിവിധ നിർമാണ പ്രവൃത്തികളുമായി ബന്ധപ്പെട്ട അക്വിസിഷൻ നടപടികൾ സമയ ബന്ധിതമായി പൂർത്തിയാക്കാൻ തീരുമാനം. കെ.എൻ. ഉണ്ണിക്കൃഷ്ണൻ എംഎൽഎയുടെ സാന്നിധ്യത്തിൽ കളക്ടർ എൻ.എസ്.കെ. ഉമേഷ് വിളിച്ചു ചേർത്ത യോഗത്തിലാണ് ധാരണ. 238.66 കോടി രൂപയുടെ തീരദേശ ഹൈവേ യുടെ 6(1), 4(1) നോട്ടിഫിക്കേഷൻ പ്രസിദ്ധീകരിച്ചിട്ടുണ്ടെങ്കിലും 11 (1) നോട്ടിഫിക്കേഷൻ പ്രസിദ്ധീകരിക്കേണ്ടതുണ്ട്. 143.15കോടിയുടെ മുനമ്പം-അഴീക്കോട് പാലം നിർമാണത്തിന്‍റെ ഭാഗമായി കോടതിയിലുള്ള വിഷയങ്ങളിലും പെട്രോൾ പമ്പിന്‍റെ സ്ഥലം ഏറ്റെടുക്കുന്നതിലും ഉടൻ പരിഗണന ഉണ്ടാകും. മുനമ്പത്ത് പള്ളിപ്പുറം പഞ്ചായത്തിന്‍റെ ഉടമസ്ഥതയിലുള്ള കെട്ടിടത്തിന്‍റെ വില നിർണയം നടത്തിയിട്ടുണ്ട്. ലാൻഡ് അക്വിസിഷൻ ഓഫീസർ ഉടൻ നഷ്ടപരിഹാരത്തുക അനുവദിക്കും. 10.4 കോടിയുടെ നായരമ്പലം ഹെർബർട്ട് പാലം നിർമാണവുമായി ബന്ധപ്പെട്ട് ഏറ്റെടുക്കാനായിട്ട് നോട്ടിഫിക്കേഷൻ പ്രസിദ്ധീകരിച്ച 6.48 ആർ സ്ഥലത്തിന്‍റെ നടപടി ക്രമങ്ങൾ പൂർത്തീകരിക്കും. 24.46 കോടിയുടെ കോൺവെന്‍റ് ബീച്ച് പാലത്തിനായി 69.91 സെന്‍റ് സ്ഥലം ഏറ്റെടുക്കണം. കഴിഞ്ഞ മാസം ഇതിനു റവന്യൂ വകുപ്പിന്‍റെ അനുമതിയായി. കരാറുകാരനെ ടെർമിനേറ്റ് ചെയ്യൽ, ജിഎസ്ടി പ്രശ്നം എന്നിവ പരിഹരിച്ച് സ്ഥലമെടുപ്പ് നടപടികൾ നേരിടുന്ന കാലതാമസം ഒഴിവാക്കും. 13.821 കോടിയുടെ ചെറിയ കടമക്കുടി - പിഴല പാലത്തിനു 6.90 ആർ ഭൂമി ഏറ്റെടുക്കേണ്ടതുണ്ട്. പൊതുമരാമത്ത് പാലം വിഭാഗത്തിലുൾപ്പെട്ട ഏഴു കോടിയുടെ മാലിപ്പുറം പാലത്തിന്‍റെ ഡിസൈൻ ലഭിച്ചു. ഇതിനു ഭരണാനുമതി കിട്ടണം. ദൈർഘ്യത്തിനനുസരിച്ച് അക്വിസിഷൻ പൂർത്തിയാക്കേണ്ടതുണ്ട്. ഇതു ഇനിയും വൈകാൻ ഇടയുണ്ടാകരുതെന്നു എം എൽ എ യോഗത്തിൽ ആവശ്യപ്പെട്ടു. ജിഡ പ്രവൃത്തികളിലുൾപ്പെട്ട പിഴല 550 മീറ്റർ റോഡ്, വലിയ കടമക്കുടി റോഡ് വീതികൂട്ടൽ, വലിയ കടമക്കുടി നോർത്ത് റോഡ്, പിഴല-പാലിയംതുരുത്ത് റോഡ് വികസനം, ചരിയംതുരുത്ത് - പുതുശേരി റോഡ്, കോതാട്-ചേന്നൂർ പാലം, പിഴല-ചെന്നൂർ, ചേന്നൂർ-ചരിയംതുരുത്ത് പാലങ്ങൾ എന്നിവയുടെ നിർമാണത്തിന്‍റെ ഭാഗമായ അക്വിസിഷൻ നടപടികളും സമയക്രമമനുസരിച്ചു പൂർത്തീകരിക്കാനും യോഗത്തിൽ തീരുമാനമായി.

പദ്ധതി നിർവഹണത്തിൽ ജില്ലയിൽ ഒന്നാമത്; കറുകുറ്റി പഞ്ചായത്ത് അവാർഡ് ഏറ്റുവാങ്ങി

അങ്കമാലി: എറണാകുളം ജില്ലയിൽ നൂറു ശതമാനം പദ്ധതി നിർവഹണവും നൂറു ശതമാനം വസ്തുനികുതി പിരിവും നൂറു ശതമാനം ഹരിത കർമസേനയുടെ യൂസർഫീ കളക്ഷനും നേടിയ ജില്ലയിലെ ഏക പഞ്ചായത്തിനുള്ള ബഹുമതി കറുകുറ്റി പഞ്ചായത്ത് അധികൃതർ ഏറ്റുവാങ്ങി. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, ജില്ലാ കളക്ടർ എൻ.എസ്.കെ. ഉമേഷ് എന്നിവരിൽനിന്നും അവാർഡ് പഞ്ചായത്ത് പ്രസിഡന്‍റ് ലതിക ശശികുമാർ ഏറ്റുവാങ്ങി. സംസ്ഥാന തലത്തിൽ കറുകുറ്റി ഗ്രാമ പഞ്ചായത്തിന് 26-ാം സ്ഥാനമാണുള്ളത്. ജില്ലയിലെ 84 പഞ്ചായത്തുകളിൽ മൂന്നാം സ്ഥാനവും, ശുചിത്വ പ്രവർത്തനങ്ങളിൽ ജില്ലയിൽ മൂന്നാം സ്ഥാനവും പഞ്ചായത്ത് കരസ്ഥമാക്കി. പഞ്ചായത്ത് വൈസ് പ്രസിഡന്‍റ് ഷൈജോ പറമ്പി. പഞ്ചായത്ത് സ്ഥിരം സമിതി അധ്യക്ഷന്മാരായ കെ.പി. അയ്യപ്പൻ, മേരി ആന്‍റണി തുടങ്ങിയവർ സന്നിഹിതരായിരുന്നു.

ആലുവ ടൗൺ ബസാർ കെട്ടിടം: കടമുറികൾ അനധികൃതമായി വാടകയ്ക്ക് നൽകുന്നതായി പരാതി

ആലുവ: ആലുവ നഗരസഭയുടെ പഴയ ബസ് സ്റ്റാൻഡ് പ്രവർത്തിച്ചിരുന്ന ടൗൺ ബസാർ കെട്ടിടത്തിൽ പ്രവർത്തനാനുമതി നിഷേധിച്ചിട്ടും കടമുറികൾ അനധികൃതമായി വാടകയ്ക്ക് നൽകുന്നതായി പരാതി. ജീർണാവസ്ഥയിലായ കെട്ടിടത്തിലെ കടമുറികൾ കൈവശം വച്ചിരിക്കുന്നവർ തന്നെ വലിയ തുകയ്ക്ക് മറിച്ചുവിൽക്കുന്നതായാണ് ആരോപണം ഉയർന്നിരിക്കുന്നത്. ആലുവ നഗരസഭയുടെ ശതാബ്ദിയാഘോഷങ്ങളുടെ ഭാഗമായി റെയിൽവേ ജംഗ്ഷനിലുള്ള ഈ ഓൾഡ് ബസ് സ്റ്റാൻഡ് കെട്ടിടം പൊളിച്ച് ശതാബ്ദി സ്ക്വയർ നിർമിക്കുമെന്നാണ് ബജറ്റിൽ പ്രഖ്യാപിച്ചിരുന്നത്. നാല് വർഷമായിട്ടും പദ്ധതി നീണ്ടു പോയതോടെ കെട്ടിടം പൊളിക്കലും നീണ്ടു പോയി. ഇതിനിടയിൽ വ്യാപാരികൾ ട്രിബ്യൂണലിൽ നിന്നും കെട്ടിടം പൊളിക്കാനുള്ള ഉത്തരവിന് സ്റ്റേ സമ്പാദിച്ചു. നാലുനില കെട്ടിടത്തിൽ പ്രവർത്തിച്ചിരുന്ന ബാങ്കുകൾ, ധനകാര്യ സ്ഥാപനങ്ങൾ, സർക്കാർ വകുപ്പുകൾ തുടങ്ങിയവ മാറിപ്പോയി. ഗ്രൗണ്ട് ഫ്ലോറിലുള്ള കടകൾ വീണ്ടും മറിച്ചുനൽകി വരുമാനം ഉണ്ടാക്കുന്നതായി പൊതുപ്രവർത്തകനായ ആർ. സതീഷ് കുമാർ നൽകിയ പരാതിയിൽ ചൂണ്ടിക്കാണിക്കുന്നു. കെട്ടിടം പൊളിക്കാനുള്ളതിനാൽ സ്ഥാപനങ്ങൾക്കൊന്നും ആലുവ നഗരസഭാ ലൈസൻസ് കഴിഞ്ഞ മൂന്ന് വർഷമായി നൽകിയിട്ടില്ല. ഇതേ അവസ്ഥയാണ് ആലുവ മാർക്കറ്റ് കെട്ടിട സമുച്ചയ പദ്ധതിക്കും സംഭവിച്ചിരിക്കുന്നത്. കഴിഞ്ഞ 11 വർഷമായി ആലുവ നഗരസഭയ്ക്ക് മാർക്കറ്റിൽ നിന്ന് വാടകയുമില്ല, പദ്ധതിയും നടന്നില്ല. ലക്ഷക്കണക്കിന് രൂപയുടെ നികുതിയേതര വരുമാനമാണ് കെടുകാര്യസ്ഥ കാരണം ആലുവ നഗരസഭ ഇല്ലാതാക്കുന്നതെന്ന വിമർശനവും ശക്തമാണ്.

ഇടപ്പള്ളി പള്ളിയില്‍ 40 മണിക്കൂര്‍ ആരാധന

കൊച്ചി: ഇടപ്പള്ളി സെന്‍റ് ജോര്‍ജ് ഫൊറോന ദേവാലയത്തില്‍ 40 മണിക്കൂര്‍ ആരാധന തിരുകര്‍മങ്ങള്‍ ആരംഭിച്ചു. ഇന്നലെ രാവിലെ 6.30ന് സമൂഹ ദിവ്യബലിയില്‍ ഇടവക വൈദികര്‍ കാര്‍മികത്വം വഹിച്ചു. വൈകീട്ട് റവ. ഡോ. വര്‍ഗീസ് തൊട്ടിയില്‍ ദിവ്യകാരുണ്യ സന്ദേശം നല്‍കി. തുടര്‍ന്ന് കുര്‍ബാനയര്‍പ്പിച്ചു. ഇന്ന് രാവിലെ 6.30ന് റവ. ഡോ. ഏബ്രഹാം ഓലിയപ്പുറത്തിന്‍റെ മുഖ്യകാര്‍മികത്വത്തില്‍ ദിവ്യബലി. തുടര്‍ന്ന് ആരാധന. വൈകീട്ട് 5.30ന് റവ. ഡോ. ആന്‍റോ ചേരാതുരുത്തി ദിവ്യകാരുണ്യ സന്ദേശം നല്‍കും. തുടര്‍ന്ന് വിശുദ്ധ കുര്‍ബാന. നാളെ രാവിലെ 6.30നുള്ള ദിവ്യബലിക്ക് ഫാ. തോമസ് പെരേപ്പാടന്‍ കാര്‍മികത്വം വഹിക്കും. വൈകീട്ട് 5.30ന് ദിവ്യകാരുണ്യപ്രദക്ഷിണം. റവ. ഡോ. അഗസ്റ്റിന്‍ കല്ലേലി സന്ദേശം നല്‍കും. തുടര്‍ന്ന് വിശുദ്ധ കുര്‍ബാന.

ആലുവയിൽ പുതിയ കോടതി മൂന്നു വർഷത്തിനകം

ആലുവ: പുതിയ കോടതി സമുച്ചയം നിർമിക്കുന്നതിന് മുന്നോടിയായി നിലവിലെ ആലുവ കോടതികൾ ബിഎസ്എൻഎൽ കെട്ടിടത്തിൽ മെയ് 19 മുതൽ പ്രവർത്തനം ആരംഭിക്കും. വേനലവധി കഴിഞ്ഞ് സിവിൽ കോടതികൾ ബിഎസ്എൻഎൽ കെട്ടിടത്തിലെ ഒരു ഭാഗത്താണ് 19 ന് പ്രവർത്തനം തുടങ്ങുന്നത്. ജുഡീഷ്യൽ ഫസ്റ്റ് ക്ളാസ് മജിസ്ട്രേറ്റ് ഒന്ന്, രണ്ട് കോടതികളും മുൻസിഫ് കോടതിയുമാണ് ബിഎസ്എൻഎൽ കെട്ടിടത്തിലേക്ക് മാറുന്നത്. നിലവിലെ ജീർണിച്ച കോടതി കെട്ടിടം പൊളിച്ചുമാറ്റി പുതിയത് സജ്ജീകരിക്കാൻ കുറഞ്ഞത് മൂന്ന് വർഷമെങ്കിലും എടുക്കുമെന്നാണ് കരുതുന്നത്. അത് വരെ ഈഎസ്ഐ റോഡിലെ ബിഎസ്എൻഎൽ കെട്ടിടത്തിൽ താത്കാലിക കോടതികൾ പ്രവർത്തിക്കും. മൂന്ന് വർഷത്തേക്കാണ് പിഡബ്ല്യുഡിയുമായി ബിഎസ്എൻഎൽ കരാർ ഉണ്ടാക്കിയിരിക്കുന്നത്. അതിന് മുമ്പായി നിലവിലുള്ള കോടതി കെട്ടിടം പൊളിച്ച് പുതിയ കെട്ടിടം നിർമിക്കും. 85.593 സെന്‍റ് സ്ഥലത്ത് 79,172 ചതുരശ്ര അടിയിയിൽ നാല് നില കെട്ടിടമാണ് നിർമിക്കുക. 38 കോടി രൂപയാണ് പദ്ധതിക്ക് അനുവദിച്ചിട്ടുള്ളത്.

പറവൂർ താലൂക്ക് ആശുപത്രിയിൽ അതിക്രമം: ഒരാൾ പിടിയിൽ

പറവൂർ : താലൂക്ക് ഗവ ആശുപത്രിയിൽ ചികിത്സക്കെത്തിയവർ അതിക്രമം നടത്തിയ സംഭവത്തിൽ കോട്ടുവള്ളി കൈതാരം നടുമുറി കോളനിയിൽ ആദിഷ് (24) നെ പൊലീസ് അറസ്റ്റ് ചെയ്തു. ഇയാളുടെ കൂടെയുണ്ടായിരുന്ന രാഹുൽ ഒളിവിലാണ്. ശനിയാഴ്ച പകൽ രണ്ടിനാണ് സംഭവം . രാഹുലിൻ്റെ കൈക്ക് പരിക്കേറ്റത്തിന് തുടർന്ന് ചികിത്സ തേടിയാണ് ഇവർ ആശുപത്രിയിൽ എത്തിയത് . ഇരുവരും മദ്യപിച്ചിരുന്നതായി ആശുപത്രി ജീവനക്കാർ പറഞ്ഞു . ഡോക്ടറുടെ മുറിക്കകത്തേക്ക് പരിശോധനക്ക് കയറിയ ഇരുവരും ഡോക്ടർക്ക് നേരെ കയർത്ത് സംസാരിച്ചു. തുടർന്ന് പരിക്കേറ്റ കൈ തുന്നി കെട്ടാനായി രാഹുലിനെ മുറിയിലേക്ക് കൊണ്ടുപോയി. ഇവിടെ ഡ്യൂട്ടിയിൽ ഉണ്ടായിരുന്ന ജീവനക്കാരനോട് കയർത്തു സംസാരിക്കുകയും അസഭ്യം പറയുകയും ചെയ്തതായി പരാതിയിൽ പറയുന്നു. പ്രകോപിതരായ ഇവർ മുറിയുടെ വാതിൽ ശക്തമായി അടച്ചതിനെ തുടർന്ന് വാതിലിന് കേടുപാട് സംഭവിച്ചു . തുടർന്നാണ് ആശുപത്രി ജീവനക്കാർ പോലീസിൽ പരാതി നൽകിയത് .

ജനറല്‍ ആശുപത്രിയില്‍ ടോയ്‌ലറ്റ് ബ്ലോക്ക് ഉദ്ഘാടനം ചെയ്തു

കൊച്ചി: എറണാകുളം ജനറല്‍ ആശുപത്രിയിലെ ഡയാലിസിസ് സെന്‍ററിനോടനുബന്ധിച്ച് അപ്പീല്‍ കമ്മീഷണറേറ്റ് നിര്‍മിച്ചു നല്‍കിയ ടോയ്‌ലറ്റ് ബ്ലോക്ക് സെന്‍ട്രല്‍ ജിഎസ്ടി കമ്മീഷണര്‍ സരോജ് കുമാര്‍ ബെഹറ ഉദ്ഘാടനം ചെയ്തു. ആശുപത്രി സൂപ്രണ്ട് ഡോ. ഷാഹിര്‍ ഷാ ഉദ്ഘാടനം ചെയ്തു. ഹെല്‍ത്ത് സര്‍വീസ് മുന്‍ അഡീഷണല്‍ ഡയറക്ടര്‍ ഡോ. പി.എസ്. രഘുത്തമന്‍, സെന്‍ട്രല്‍ ടാക്‌സ് ആന്‍ഡ് സിജിഎസ്ടി അപ്പില്‍ കമ്മീഷണറേറ്റ് ഡെപ്യൂട്ടി കമ്മീഷണര്‍ ടി.പി. സലിംകുമാര്‍, ആശുപത്രി എന്‍ജിനീയര്‍ ജോസഫ്, സെന്‍ട്രല്‍ ജിഎസ്ടി സൂപ്രണ്ട് ഗീതാ കുമാരി എന്നിവര്‍ പ്രസംഗിച്ചു.

ലൂർദ് ആശുപത്രിയിൽ സൗജന്യ സന്ധി മാറ്റിവയ്ക്കൽ നിർണയ ക്യാമ്പ്

കൊച്ചി: ലൂർദ് ആശുപത്രിയിൽ സൗജന്യ സന്ധി മാറ്റിവയ്ക്കൽ നിർണയ ക്യാമ്പ് നാളെ നടക്കും. ഉച്ചയ്ക്ക് രണ്ടു മുതൽ വൈകിട്ട് അഞ്ചു വരെ നടക്കുന്ന ക്യാമ്പിൽ സൗജന്യ ഡോക്ടർ കൺസൾട്ടേഷൻ, ബോധവത്കരണ ക്ലാസ്, സംശയ നിവാരണ സെഷൻ എന്നിവയുണ്ടാകും. ക്യാമ്പിൽ നിന്ന് തെരഞ്ഞെടുക്കുന്ന 50 രോഗികൾക്ക് മിതമായ നിരക്കിൽ സന്ധി മാറ്റിവയ്ക്കൽ ശസ്ത്രക്രിയ ലഭ്യമാക്കും. രജിസ്ട്രേഷനും വിശദ വിവരങ്ങൾക്കും ഫോൺ: 9496002266 / 0484- 4121397.

ഡെന്‍റല്‍ ആന്‍ഡ് ഇഎന്‍ടി ക്ലിനിക്കുമായി ഫ്‌ളോറാ മെഡികെയര്‍

കൊച്ചി: ഫ്‌ളോറാ മെഡികെയര്‍ ഇടപ്പള്ളിയില്‍ അത്യാധുനിക ഡെന്‍റല്‍ ആന്‍ഡ് ഇഎന്‍ടി ക്ലിനിക് തുറന്നു. ഹൈബി ഈഡന്‍ എംപി ഉദ്ഘാടനം നിര്‍വഹിച്ചു. മാനേജിംഗ് ഡയറക്ടര്‍ ഡോ. കെ.എ. ഫയാസ്, എക്‌സിക്യൂട്ടീവ് ഡയറക്ടര്‍ ഗോകുല്‍ വിജയന്‍, ഡയറക്ടര്‍ റിയാസ് ഹമീദ്, ഡോ. റിസ്‌വി അലി, പറവൂര്‍ മുനിസിപ്പല്‍ കൗണ്‍സിലര്‍ കെ.ജെ. ഷൈന്‍ ടീച്ചര്‍ എന്നിവര്‍ സന്നിഹിതരായിരുന്നു. ഡെന്‍റല്‍ ആന്‍ഡ് ഡെര്‍മറ്റോളജി വിഭാഗവുമായി നോര്‍ത്ത് പറവൂരില്‍ 2023ല്‍ പ്രവര്‍ത്തനമാരംഭിച്ച് ഇഎന്‍ടി, ഹോമിയോപ്പതി, പീഡിയാട്രിക്‌സ്, സൈക്കോളജി വിഭാഗങ്ങളിലേയ്ക്ക് സേവനം വിപുലപ്പെടുത്തിയ ഫ്‌ളോറാ മെഡികെയര്‍ എല്‍എല്‍പി പോളിക്ലിനിക് ആഭ്യന്തര, വിദേശ മെഡിക്കല്‍ ടൂറിസ്റ്റുകളുടെ സൗകര്യവും കൂടി കണക്കിലെടുത്താണ് ഇടപ്പള്ളിയില്‍ പുതിയ ക്ലിനിക് തുറന്നത്.

ക്ഷേത്രത്തിൽ മോഷണം

നെടുമ്പാശേരി: ദേശം ശ്രീ അനന്തപുരം മഹാവിഷ്ണു ക്ഷേത്രത്തിൽ മോഷണം. ഓഫീസ് കുത്തി തുറന്ന് മേശയിലുണ്ടായിരുന്ന 200 രൂപ മോഷ്ടിച്ചു. ഭണ്ഡാരം കുത്തിതുറക്കാൻ ശ്രമിച്ചിട്ടുണ്ട്. മോഷ്ടാവിന്‍റെ ദൃശ്യം കാമറയിൽ പതിഞ്ഞിട്ടുണ്ട്. തിങ്കളാഴ്ച പുലർച്ചെ 12.30 നും 1.30 നും ഇടയിലാണ് സംഭവം. ക്ഷേത്രഭാരവാഹികൾ നെടുമ്പാശേരി പോലീസിൽ പരാതി നൽകി.

അധികാരത്തിന്‍റെ വേരുകള്‍ അനുകമ്പയിലാകണമെന്നു പഠിപ്പിച്ച പാപ്പ: കൊച്ചി രൂപത

കൊച്ചി: അധികാരത്തിന്‍റെ അടിവേരുകള്‍ വിനയത്തിലും ദീനാനുകമ്പയിലും മനുഷ്യ സ്‌നേഹത്തിലും ആയിരിക്കണമെന്ന് ലോകത്തെ പഠിപ്പിച്ച ആചാര്യനാണു ഫ്രാന്‍സിസ് പാപ്പയെന്നു കൊച്ചി രൂപത അനുശോചന സന്ദേശത്തില്‍ പറഞ്ഞു. സമാധാന രൂപത്തില്‍ സാധാരണത്വത്തിന്‍റെ അസാമാന്യതയും അധികാര പ്രമാദത്തിനുമേല്‍ സ്‌നേഹാര്‍ദ്രതയുടെ നനവും കാട്ടിയാണ് പാപ്പയുടെ മടക്കം. വിശ്വാസം ജീവിക്കേണ്ടത് പാവപ്പെട്ടവരെ ശുശ്രൂഷിച്ചും അവഗണിക്കപ്പെട്ടവരെ ചേര്‍ത്തുപിടിച്ചും പ്രകൃതിയെ സംരക്ഷിച്ചുകൊണ്ടുമാണെന്ന് അദ്ദേഹം ജീവിതത്തിലൂടെ മാതൃക നല്‍കുകയായിരുന്നു. സ്ത്രീകളുടെയും തടവറയില്‍ കഴിയുന്നവരുടെയും കാല്‍പാദങ്ങള്‍ കഴുകിക്കൊണ്ടും രോഗികളെ ആലിംഗനം ചെയ്തുകൊണ്ടുമുള്ള അദ്ദേഹത്തിന്‍റെ രീതികള്‍ യേശുക്രിസ്തുവിന്‍റെ തനിശിഷ്യന്‍ എന്ന് പറയത്തക്ക രീതിയില്‍ ആയിരുന്നു. അദ്ദേഹത്തിന്‍റെ ഭരണകാലം തലമുറകളെയും വ്യത്യസ്ത വിശ്വാസങ്ങളെയും രാജ്യങ്ങളെയും സ്‌നേഹമഴവില്ലില്‍ ചേര്‍ത്തുവച്ച ഒന്നായിട്ട് എന്നും എണ്ണപ്പെടും. കൂടെ നടക്കലിലൂടെയും സംഭാഷണ സമന്വയങ്ങളിലൂടെയും കൃത്യമായി അത് അദ്ദേഹം നടപ്പിലാക്കുകയും ചെയ്തുവെന്ന് രൂപത പിആര്‍ഒ ഫാ. ജോണി സേവ്യര്‍ പുതുക്കാട്ട് പറഞ്ഞു.

പാവങ്ങളുടെ പക്ഷത്ത് നിലയുറപ്പിച്ച പാപ്പ: മാർ പാംപ്ലാനി

കൊച്ചി: ഫ്രാൻസിസ് മാർപാപ്പയുടെ വിയോഗം ആഗോള കത്തോലിക്കാ സഭയ്ക്കും ഈ കാലഘട്ടത്തിനും തീരാനഷ്ടമെന്ന് എറണാ കുളം-അങ്കമാലി അതിരൂപത മെത്രാപ്പോലീത്തൻ വികാരി ആർച്ച്ബിഷപ് മാർ ജോസഫ് പാംപ്ലാനി അനുസ്മരിച്ചു. ലാറ്റിൻ അമേരിക്കൻ പശ്ചാത്തലത്തിൽനിന്നു വന്ന അദ്ദേഹം പാവങ്ങളുടെ പക്ഷത്ത് സഭ നിലയുറപ്പിക്കണം എന്ന നിർബന്ധ ബുദ്ധിയുള്ള വ്യക്തിയായിരുന്നു. തികച്ചും ലളിതമായ ജീവിതശൈലി സ്വന്തമാക്കിയ മാർപാപ്പ പാവങ്ങൾക്ക് വേണ്ടി നിരന്തരം സംസാരിച്ചിരുന്നു. ലോകമെങ്ങുമുള്ള അഭയാർഥികളുടെ ആശാകേന്ദ്രമായിരുന്നു ഫ്രാൻസിസ് പാപ്പ. സഭ പാവങ്ങളുടെ സഭയാകണമെന്ന് മാർപാപ്പ ചിന്തിച്ചിരുന്നു. സഭയുടെ ഭരണക്രമത്തിൽ വിപ്ലവകരമായ മാറ്റങ്ങൾ വരുത്തിയ പാപ്പയാണ് അദ്ദേഹം. സിനഡാലിറ്റി എന്ന ആശയം മാർപാപ്പ ഉയർത്തിപ്പിടിച്ചു. അധികാരസ്ഥാനങ്ങളിൽ ഇരിക്കുന്നവർ ഏകപക്ഷീയമായിട്ടല്ല തീരുമാനങ്ങൾ എടുക്കേണ്ടതെന്നും മറിച്ച് കൂട്ടായ്മയുടെയും പരസ്പരം മനസിലാക്കുന്നതിന്‍റെയും അടിസ്ഥാനത്തിലായിരിക്കണം തീരുമാനങ്ങൾ എന്നുമുള്ള നിർബന്ധ ബുദ്ധി ഉണ്ടായിരുന്നു. ഇതര മതസ്ഥരുമായി സൗഹൃദത്തിൽ കഴിയേണ്ടവരാണ് ക്രൈസ്തവരെന്ന് അദ്ദേഹം ശഠിച്ചു. മതങ്ങൾ സ്നേഹത്തിലും സൗഹാർദത്തിലും കഴിയുമ്പോൾ മാത്രമേ ഭൂമിയിൽ ദൈവരാജ്യം സ്ഥാപിക്കപ്പെടുകയുള്ളൂവെന്ന് അദ്ദേഹം വിശ്വസിച്ചിരുന്നു. ഫ്രാൻസിസ് മാർപാപ്പ സമാധാനത്തിന്‍റെ അപ്പോസ്തലൻ ആയിരുന്നു. സാമ്രാജ്യ ശക്തികൾ ഏതുമാകട്ടെ, അവർ അക്രമത്തിന്‍റെ പാത തെരഞ്ഞെടുത്തപ്പോഴൊക്കെ പാടില്ല എന്ന് ഉറക്കെപ്പറഞ്ഞു. യുദ്ധം മൂലം കെടുതി അനുഭവിക്കുന്ന മനുഷ്യരുടെ ഒപ്പമായിരുന്നു പിതാവിന്‍റെ സ്വരവും ഹൃദയവും എന്ന് നമുക്ക് പലതവണ വ്യക്തമായതാണെന്നും പാംപ്ലാനി അനുസ്മരിച്ചു.

ഗ്ലോബൽ സിറ്റി പദ്ധതിയുമായി മുന്നോട്ട്: മന്ത്രി പി. രാജീവ്

അയ്യമ്പുഴ: കൊച്ചി - ബംഗലുരു വ്യവസായ ഇടനാഴിയുടെ ഭാഗമായി വിഭാവനം ചെയ്ത അയ്യമ്പുഴയിലെ ഗ്ലോബൽ സിറ്റി പദ്ധതിയുമായി തത്വത്തിൽ മുന്നോട്ട് പോകാനാണ് സംസ്ഥാന സർക്കാർ ആലോചിക്കുന്നതെന്ന് വ്യവസായ മന്ത്രി പി. രാജീവ് പറഞ്ഞു. അയ്യമ്പുഴയിൽ സ്ഥലമുടമകളുടെ യോഗത്തിൽ സംസാരിക്കുകയായിരുന്നു അദ്ദേഹം. ഗ്ലോബൽ സിറ്റി പദ്ധതിയിൽ നിന്ന് കേന്ദ്ര സർക്കാർ പിൻവാങ്ങിയതോടെ സംസ്ഥാന സർക്കാരിന് അധിക ബാധ്യതയാണ് വന്നിട്ടുള്ളത്. ഇതുമൂലം പദ്ധതി ലാഭകരമായി നടത്താനാകുമോ എന്ന ആശങ്ക ഉയർന്നിട്ടുണ്ട്. പദ്ധതിയുടെ തുടർ നടപടികൾ സംബന്ധിച്ച കാര്യങ്ങൾ ഏകോപിപ്പിക്കുന്നതിനായി ജില്ലാ കളക്ടർ, എംഎൽഎ, പഞ്ചായത്ത് പ്രസിഡന്‍റ് എന്നിവരുൾപ്പെട്ട സമിതിക്ക് രൂപം നൽകുമെന്നും മന്ത്രി പറഞ്ഞു. പദ്ധതിക്ക് അംഗീകാരം തേടി മുഖ്യമന്ത്രി പ്രധാനമന്ത്രിയെ കണ്ടിരുന്നു. എന്നാൽ ഈ പദ്ധതിയും വ്യവസായ ഇടനാഴിയുടെ ഭാഗമായി അനുവദിക്കാനാവില്ല എന്നാണ് കേന്ദ്രസർക്കാർ അറിയിച്ചിരിക്കുന്നത്്. ഈ സാഹചര്യത്തിൽ സംസ്ഥാന സർക്കാർ സ്വന്തം നിലയിൽ പദ്ധതിയുമായി മുന്നോട്ട് പോകേണ്ട സ്ഥിതിയാണ്. 500 ഏക്കർ സ്ഥലം ഏറ്റെടുക്കാൻ 500 കോടി വകയിരുത്താനായിരുന്നു ആദ്യ ധാരണ. എന്നാൽ ഇപ്പോഴത് 358 ഏക്കറായി കുറഞ്ഞു. സ്ഥലം ഏറ്റെടുക്കാൻ 849 കോടി രൂപ കിൻഫ്രക്ക് കിഫ്ബി കൈമാറിയിട്ടുണ്ട്. 358 ൽ 215 ഏക്കർ മാത്രമേ വ്യവസായ പദ്ധതിക്കൾക്കായി ഇവിടെ കൈമാറാനാകൂ. ലാഭകരമായി ഗ്ലോബൽ സിറ്റിയെ മാറ്റാൻ എങ്ങനെ സാധിക്കുമെന്ന് പരിശോധിച്ചു വരികയാണെന്നും മന്ത്രി പി. രാജീവ് പറഞ്ഞു. നിർദ്ദിഷ്ട പദ്ധതി പ്രദേശം മന്ത്രി സന്ദർശിച്ചു. റോജി. എം. ജോൺ എംഎൽഎ അധ്യക്ഷനായി. ജില്ലാ കളക്ടർ എൻ.എസ്.കെ. ഉമേഷ്, കിൻഫ്ര എംഡി സന്തോഷ് കോശി തോമസ്, എസ്. സതീഷ്, പഞ്ചായത്ത് പ്രസിഡന്‍റ് പി.യു. ജോമോൻ, മുൻ മന്ത്രി ജോസ് തെറ്റയിൽ തുടങ്ങിയവർ പങ്കെടുത്തു.

കാഞ്ഞിരമറ്റം-പൂത്തോട്ട റോഡ് നാളെ മുതൽ അടച്ചിടും

ഉദയംപേരൂർ: റോഡിന്‍റെ നവീകരണ പ്രവൃത്തികൾ നടക്കുന്നതിനാൽ നാളെ മുതൽ കാഞ്ഞിരമറ്റം-പൂത്തോട്ട റോഡ് ഒരു മാസത്തേക്ക് പൂർണമായും അടച്ചിടും. കോട്ടയം, തലയോലപ്പറമ്പ്, കാഞ്ഞിരമറ്റം ഭാഗത്തു നിന്ന് തൃപ്പൂണിത്തുറ ഭാഗത്തേയ്ക്ക് പോകേണ്ട വാഹനങ്ങൾ മുളന്തുരുത്തി പള്ളിത്താഴം ജംഗ്ഷനിൽ നിന്നും ഇടത്തേയ്ക്ക് തിരിഞ്ഞ് മുളന്തുരുത്തി - നടക്കാവ് റോഡ് വഴിയും എറണാകുളം, കാക്കനാട് ഭാഗത്തേയ്ക്ക് പോകേണ്ടവർ മുളന്തുരുത്തി പള്ളിത്താഴം ജംഗ്ഷനിൽ നിന്നും ചോറ്റാനിക്കര - തിരുവാങ്കുളം വഴി നേരെയും പോകേണ്ടതാണ്. തൃപ്പൂണിത്തുറ, എറണാകുളം ഭാഗത്തു നിന്നും കാഞ്ഞിരമറ്റം, തലയോലപ്പറമ്പ്, കോട്ടയം ഭാഗത്തേയ്ക്ക് പോകേണ്ട വാഹനങ്ങൾ നടക്കാവ് ജംഗ്ഷനിൽ നിന്നും ഇടത്തേയ്ക്ക് തിരിഞ്ഞ് നടക്കാവ് - മുളന്തുരുത്തി റോഡ് വഴി പള്ളിത്താഴം ജംഗ്ഷനിലെത്തി വലത്തേയ്ക്ക് തിരിഞ്ഞ് കാഞ്ഞിരമറ്റം വഴി തലയോലപ്പറമ്പ്, കോട്ടയം ഭാഗത്തേയ്ക്ക് പോകണമെന്ന് മുളന്തുരുത്തി പൊതുമരാമത്ത് വകുപ്പ് (നിരത്ത്) വിഭാഗം അസി. എൻജിനീയർ അറിയിച്ചു.

നഗര വികസനം സമയബന്ധിതമായി പൂർത്തീകരിക്കും: മാത്യു കുഴൽനാടൻ

മൂവാറ്റുപുഴ: മൂവാറ്റുപുഴ നഗര വികസനവുമായി ബന്ധപ്പെട്ട് പ്രദേശവാസികൾക്കും വ്യാപാരികൾക്കും ആശങ്ക വേണ്ടെന്നും സമയബന്ധിതമായി പദ്ധതി പൂർത്തീകരിക്കുമെന്നും മാത്യു കുഴൽനാടൻ എംഎൽഎ. മൂവാറ്റുപുഴയിലെ നഗര വികസനവുമായി ബന്ധപ്പെട്ട് കച്ചേരിത്താഴം മുതൽ സയാന ഹോട്ടൽ വരെയുള്ള റോഡ് നിർമാണം കെആർബി, കെഎസ്ഇബി, ജല അഥോറിറ്റി എന്നീ വകുപ്പുകളുടെ ഏകോപന പ്രവർത്തനങ്ങളോടെ പുരോഗമിക്കുകയാണ്. റോഡിന്‍റെ മധ്യ ഭാഗത്ത് കൂടിയാണ് പൈപ്പുകൾ പോകുന്നതെന്നാണ് ജല അഥോറിറ്റി പറഞ്ഞിരുന്നതെങ്കിലും നിർമാണത്തിനിടെ നാല് മീറ്ററിനുള്ളിൽ തന്നെ പൈപ്പ്‌ലൈനുകൾ കണ്ടെത്തി. തുടർന്ന് എട്ട് മീറ്റർ വീതിയിൽ നടത്താനിരുന്ന നിർമാണപ്രവൃത്തികൾ നാല് മീറ്റർ വീതിയിൽ ആദ്യഘട്ടം പൂർത്തീകരിക്കാൻ തീരുമാനിക്കുകയായിരുന്നു. ഇതോടൊപ്പം തന്നെ ഈ ഭാഗത്ത് ഡക്ടിന് ഉള്ളിലൂടെയുള്ള പുതിയ പൈപ്പിടലും ഹൗസ് കണക്ഷൻ സ്ഥാപിക്കലും നടക്കുന്നുണ്ട്. നഗര റോഡുകളുടെ നിർമാണത്തിനായി ഓരോ വകുപ്പുകളും തയാറാക്കിയ നിർമാണ ഷെഡ്യൂൾ പ്രകാരമാണ് പ്രവർത്തികൾ പുരോഗമിക്കുന്നത്. കച്ചേരിത്താഴം മുതൽ സയാന ഹോട്ടൽ വരെയുള്ള മുഴുവൻ വൈദ്യുതി പോസ്റ്റുകളും മാറ്റി റോഡ് വികസനത്തിന് അനുകൂലമായ സാഹചര്യം കെഎസ്ഇബി ഒരുക്കിയിട്ടുണ്ട്. ജല അഥോറിറ്റി നിശ്ചിത സമയത്ത് പൈപ്പിടൽ പൂർത്തീകരിക്കാത്തത് പ്രതിസന്ധിയായി. റോഡ് നിർമാണപ്രവർത്തികൾക്കിടെ നഗരത്തിലെ ഗതാഗതക്കുരുക്കുകൾ പരമാവധി കുറച്ച് വാഹനങ്ങൾക്ക് എളുപ്പം കടന്നു പോകാൻ കഴിയുന്ന വിധമാണ് ട്രാഫിക് നിയന്ത്രണം ഏർപ്പെടുത്തിയിരിക്കുന്നതെന്നും എംഎൽഎ പറഞ്ഞു.

അപകടങ്ങൾ പതിവാകുന്നു ; നേര്യമംഗലം-ഇടുക്കി റോഡിലെ വളവുകൾ നിവർത്തണമെന്ന്

കോതമംഗലം: അപകടങ്ങൾ പതിവായതോടെ നേര്യമംഗലം-ഇടുക്കി റോഡിലെ അപകട വളവുകൾ നിവർത്തണമെന്ന ആവശ്യം ശക്തമായി. ഏറെ നാളത്തെ വിവാദങ്ങൾക്കൊടുവിൽ രണ്ടു വർഷം മുന്പ് റോഡ് നവീകരണം നടത്തിയെങ്കിലും കൊടുംവളവുകളൊന്നും നേരെയാക്കിയില്ല. റോഡിന്‍റെ വീതി കുറവും അപകടങ്ങൾക്ക് കാരണമാകുന്നു. കഴിഞ്ഞ ആഴ്ച നേര്യമംഗലം മണിയൻപാറയിൽ കെഎസ്ആർടിസി ബസ് അപകടത്തിൽപ്പെട്ടത് വളവ് വീശിയെടുത്തപ്പോഴാണ്. കൊടും വളവുകളുള്ള റോഡിന്‍റെ ഒരു വശം മലനിരയും മറുവശം താഴ്ചയുമാണ്. എതിരെ വരുന്ന ബസ് ഉൾപ്പെടെയുള്ള വലിയ വാഹനങ്ങൾ വളവ് തിരിഞ്ഞ് അടുത്തെത്തുന്പോഴാണ് കാണാനാകുക. റോഡിലേക്ക് ചാഞ്ഞുനിൽക്കുന്ന മരച്ചില്ലകളും വിദൂര കാഴ്ച മറയ്ക്കുന്നു. മഴക്കാലത്ത് റോഡിൽ വാഹനങ്ങൾ തെന്നിനീങ്ങിയും അപകടത്തിൽപ്പെടുന്നുണ്ട്. റോഡ് ടാർ ചെയ്ത്, അടയാളപ്പെടുത്തി, സൈൻ ബോർഡുകൾ സ്ഥാപിക്കുന്നതിനൊപ്പം വീതി കൂട്ടി വളവുകൾ നിവർത്തി അപകടരഹിതമാക്കാൻ റോഡ് സുരക്ഷ അധികൃതർ നടപടിയെടുക്കണമെന്ന ആവശ്യം ശക്തമായിരിക്കുകയാണ്.

വടവുകോട് ബ്ലോക്ക് പഞ്ചായത്തിന് പുരസ്കാരം

കോലഞ്ചേരി: കഴിഞ്ഞ സാന്പത്തിക വർഷം പദ്ധതി വിഹിതത്തിന്‍റെ 106.9 ശതമാനം ചെലവഴിച്ച് ജില്ലയിൽ മൂന്നാം സ്ഥാനം വടവുകോട് ബ്ലോക്ക് പഞ്ചായത്ത് നേടി. ബ്ലോക്കിന് ജില്ലാ ആസൂത്രണ സമിതിയുടെ പുരസ്കാരം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, ജില്ലാ കളക്ടർ എൻ.എസ്.കെ. ഉമേഷ് എന്നിവർ സമ്മാനിച്ചു. 2024-25 സാന്പത്തിക വർഷത്തിൽ 5.19 കോടി രൂപയുടെ ബജറ്റായിരുന്നു വടവുകോട് ബ്ലോക്ക് പഞ്ചായത്ത് അവതരിപ്പിച്ചിരുന്നത്. ഇതിന് പുറമേ മുൻ വർഷത്തെ സ്പിൽ ഓവർ തുക ഉൾപ്പെടെ അഞ്ചര കോടി രൂപയായിരുന്നു ബ്ലോക്ക് പഞ്ചായത്ത് ചെലവഴിച്ചത്. ചിട്ടയായ പ്രവർത്തനങ്ങൾ കാഴ്ചവച്ചതിലൂടെ സംസ്ഥാന തലത്തിൽ അഞ്ചാം സ്ഥാനം സ്വന്തമാക്കാനും കഴിഞ്ഞതായി ബ്ലോക്ക് പഞ്ചായത്ത് പ്രസിഡന്‍റ് റസീന പരീത് പറഞ്ഞു.

കോതമംഗലം ബ്ലോക്ക് പഞ്ചായത്തിന് ബെസ്റ്റ് അവാർഡ്

കോതമംഗലം: എറണാകുളം ജില്ലാ ആസൂത്രണ സമിതിയുടെ ബെസ്റ്റ് അവാർഡ് കോതമംഗലം ബ്ലോക്ക് പഞ്ചായത്തിന് ലഭിച്ചു. സാന്പത്തിക വർഷത്തിൽ 109.88 ശതമാനം പദ്ധതി വിഹിതം ചെലവഴിച്ച് ജില്ലയിൽ ഒന്നാം സ്ഥാനം നേടിയാണ് കോതമംഗലം ബ്ലോക്ക് പഞ്ചായത്ത് ഈ നേട്ടം കരസ്ഥമാക്കിയത്. ജില്ലാ കളക്ടർ എൻ.എസ്.കെ. ഉമേഷിൽനിന്ന് ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ, വൈസ് പ്രസിഡന്‍റ് ഡയാന നോബി, സ്ഥിരം സമിതി അധ്യക്ഷരായ ജോമി തെക്കേക്കര, ജെയിംസ് കോറന്പേൽ, ബ്ലോക്ക് പഞ്ചായത്തംഗങ്ങളായ നിസമോൾ ഇസ്മായിൽ, ടി.കെ കുഞ്ഞുമോൻ, ബിഡിഒ സി.ഒ. അമിത, ജനറൽ എക്സ്റ്റൻഷൻ ഓഫീസർ കെ.ആർ രാജേഷ് എന്നിവർ ചേർന്ന് പുരസ്കാരം ഏറ്റുവാങ്ങി. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ അധ്യക്ഷത വഹിച്ചു.

ഫ്രാൻസിസ് മാർപാപ്പ പ്രത്യാശയുടെ പ്രവാചകൻ: മാർ മഠത്തിക്കണ്ടത്തിൽ

കോതമംഗലം: അടിയുറച്ച ദൈവസ്നേഹത്തിൽ നിന്നും ഉയിരെടുക്കുന്ന ആഴമുള്ള സഹോദര സ്നേഹത്തിന്‍റെ വക്താവും പ്രത്യാശയുടെ പ്രവാചകനുമായിരുന്നു ഫ്രാൻസിസ് മാർപാപ്പയെന്നു കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ അനുസ്മരിച്ചു. സമൂഹത്തിന്‍റെ മുഖ്യധാരയിൽ നിന്ന് പലവിധ കാരണങ്ങൾകൊണ്ട് മാറ്റിനിർത്തപ്പെട്ടവരെ അദ്ദേഹം ഹൃദയത്തോട് ചേർത്തു നിർത്തി. രോഗികൾ, വൃദ്ധർ, യുദ്ധക്കെടുതികളിൽപ്പെട്ടവർ എന്നിവർക്കായി അദ്ദേഹമെടുത്ത ധീരമായ നിലപാടുകൾ ലോകത്തിന് മുഴുവൻ മാതൃകയായി. വിശ്വാസ വിഷയങ്ങളിലും സഭാ പ്രബോധനങ്ങളിലും ആത്മീയ നിറവോടെ അദ്ദേഹം സഭയെ നയിച്ചു. വാർധക്യവും രോഗാവസ്ഥയും ആത്മീയ തീക്ഷ്ണതയെ ക്ഷീണിപ്പിച്ചില്ല എന്നത് അദ്ദേഹത്തിന്‍റെ ദൈവിക ഭാവത്തിന്‍റെ ഉത്തമ ദൃഷ്ടാന്തമാണ്. അവസാന മണിക്കൂര്‍ വരെ കർമനിരതനായിരുന്ന അദ്ദേഹം ശാന്തമായി നിത്യതയിൽ ലയിച്ചു. ഉത്ഥാന ശേഷം ഈശോ ശിഷ്യന്മാർക്ക് പ്രത്യക്ഷനായി സമാധാനം ആശംസിച്ചത് പോലെ ഈസ്റ്റർ ദിനത്തിൽ ലോകത്തിന് മുഴുവൻ സമാധാനം ആശംസിച്ചും ആഹ്വാനം ചെയ്തുമാണ് ഫ്രാൻസിസ് മാർപാപ്പ എന്ന യുഗപ്രഭാവൻ കടന്നുപോകുന്നത്. എളിമയോടും സുവിശേഷത്തിൽ അധിഷ്ഠിതമായ ധീരതയോടും ഒരു വ്യാഴവട്ടക്കാലം കത്തോലിക്കാ തിരുസഭയെ നയിച്ച ഫ്രാൻസിസ് പാപ്പയെയോർത്ത് ദൈവത്തിന് നന്ദി പറയുന്നു. പ്രത്യാശയുടെ സുവിശേഷം അളവുകളില്ലാതെ പ്രഘോഷിച്ച പരിശുദ്ധ പിതാവിന്‍റെ ആത്മാവിന് പ്രാർഥനാപൂർവം നിത്യശാന്തി നേരുന്നുവെന്നും മാർ മഠത്തിക്കണ്ടത്തിൽ അനുസ്മരണ സന്ദേശത്തിൽ പറഞ്ഞു.

ഡിസിഎൽ പ്രവിശ്യാ പെറ്റ്സ് ക്യാന്പ് മൂവാറ്റുപുഴ സെന്‍റ് അഗസ്റ്റിൻസിൽ

മൂവാറ്റുപുഴ: ഡിസിഎൽ തൊടുപുഴ പ്രവിശ്യയുടെ മൂന്നാമത് ത്രിദിന പെറ്റ്സ് ക്യാന്പ് ഇന്നു മുതൽ മൂവാറ്റുപുഴ സെന്‍റ് അഗസ്റ്റിൻസ് ജിഎച്ച്എസ്എസിൽ നടക്കും. 24ന് സമാപിക്കും. ഇന്ന് രാവിലെ 9.30ന് രജിസ്ട്രേഷൻ. 10ന് കോ-ഓർഡിനേറ്റർ റോയ് ജെ. കല്ലറങ്ങാട്ട് പതാക ഉയർത്തും. മൂന്നിന് രാഷ്ട്രദീപിക ഡയറക്ടർ റവ. ഡോ. തോമസ് പോത്തനാമുഴി ക്യാന്പ് ഉദ്ഘാടനം ചെയ്യും. സമ്മേളനത്തിൽ പ്രവിശ്യാ കൗണ്‍സിലർ നിഹാൻ നിഷാദ് അധ്യക്ഷത വഹിക്കും. കൊച്ചേട്ടൻ ഫാ. റോയി കണ്ണൻചിറ ആമുഖ പ്രസംഗവും മൂവാറ്റുപുഴ ഹോളി മാഗി ഫൊറോന വികാരി ഫാ. കുര്യാക്കോസ് കൊടകല്ലിൽ മുഖ്യപ്രഭാഷണവും നടത്തും. സംസ്ഥാന റിസോഴ്സ് ടീം കോ-ഓർഡിനേറ്റർ തോമസ് കുണിഞ്ഞി ബുക്ക്‌ലെറ്റ് പ്രകാശനം ചെയ്യും. പ്രിൻസിപ്പൽ സിസ്റ്റർ റാണിറ്റ് സിഎംസി, പ്രധാനാധ്യാപിക സിസ്റ്റർ ആനീസ് മരിയ സിഎംസി, ക്യാന്പ് ചീഫ് സിബി കണിയാരകം, പ്രവിശ്യാ കൗണ്‍സിലർ അനുശ്രീ രാജേഷ് എന്നിവർ പ്രസംഗിക്കും. നാളെ രാത്രി 8.45ന് ഡീൻ കുര്യാക്കോസ് എംപി കിക്ക് ഔട്ട് 2025-26 ഉദ്ഘാടനം ചെയ്യും. ക്യാന്പിൽ വിവിധ ദിനങ്ങളിൽ കൊച്ചേട്ടൻ ഫാ. റോയി കണ്ണൻചിറ , അജയ് വേണു പെരിങ്ങാശേരി, നിത സജീഷ്, ബിജു തോവാള, ഷാജി മാലിപ്പാറ, സബ് ഇൻസ്പെക്ടർ സിബി അച്ചുതൻ, എംജി സർവകലാശാലാ മുൻ ഡെപ്യൂട്ടി രജിസ്ട്രാർ പുരുഷോത്തമൻ പിള്ള എന്നിവർ ക്ലാസുകൾ നയിക്കും. വെബ് ആൻഡ് ക്രാഫ്റ്റ്സ് സിഇഒ ജിലു ജോസഫുമായി അഭിമുഖം നടത്തും. സംസ്ഥാന ഗുരുപൂജ പുരസ്കാര എസ്. ജേതാവ് ബിനു, നഗരസഭാംഗം രാജശ്രീ രാജു എന്നിവർ അതിഥി വചനം നൽകും. എസ്‌സിഇആർടി മുൻ പരിശീലകൻ ജയ്സണ്‍ പി. ജോസഫ് സംവാദവും കുരുവിള ജേക്കബ് ക്യാന്പ് ക്വിസും നയിക്കും. പ്രസംഗം, സംഗീത മത്സരങ്ങൾ, ക്യാന്പ് ക്വിസ്, യോഗ, ക്യാന്പ് പത്രം, കലാനിശ, എയ്റോബിക്സ്, കളിക്കളത്തിൽ എന്നിവയും ഉണ്ടായിരിക്കും. മദർ സുപ്പീരിയർ സിസ്റ്റർ റെജീന സിഎംസി ബഹുമതിപത്ര വിതരണം നടത്തും. 24ന് രാവിലെ 11.45ന് സമാപന സമ്മേളനം മാത്യു കുഴൽനാടൻ എംഎൽഎ ഉദ്ഘാടനം ചെയ്യും. പ്രവിശ്യാ ലീഡർ മീവൽ എസ്. കോടാമുള്ളിൽ അധ്യക്ഷത വഹിക്കും. ഡിഎഫ്സി സംസ്ഥാന ഉപദേശക സമിതി ചെയർമാൻ ജോയി നടുക്കുടി പുരസ്കാര വിതരണം നടത്തും. ഡിസിഎൽ ദേശീയ കോ-ഓർഡിനേറ്റർ വർഗീസ് കൊച്ചുകുന്നേൽ ക്യാന്പ് പത്രം പ്രകാശനം ചെയ്യും. ഡിഎഫ്സി രൂപത ഡയറക്ടർ ഫാ. ജോസ് കിഴക്കേയിൽ സമാപന സന്ദേശം നൽകും. നഗരസഭാംഗം ജിനു മാടേക്കൽ, ബിനോജ് ആന്‍റണി, സിസ്റ്റർ ജെയിൻ റോസ് സിഎംസി, ആൻ മരിയ ബൈജു, നോബിൾ ജെയ്മോൻ, സി.കെ. മനോജ് കുമാർ എന്നിവർ പ്രസംഗിക്കും. ഉച്ചകഴിഞ്ഞ് രണ്ടിന് ക്യാന്പിന് കൊടിയിറങ്ങും.

ഗാലറി തകർന്ന് അപകടം: ഒഴിവായത് വൻ ദുരന്തം

പോത്താനിക്കാട്: ഗാലറി തകർന്നു വീണ അപകടത്തിൽ 56 പേർക്ക് പരിക്കേറ്റെങ്കിലും ഒഴിവായത് വൻ ദുരന്തമാണ്. അടിവാട് ഹീറോ യംഗ്സ് ക്ലബ് ആൻഡ് റീഡിംഗ് റൂമിന്‍റെ നേതൃത്വത്തിൽ മാലിക് ദിനാർ സ്കൂൾ ഗ്രൗണ്ടിൽ സംഘടിപ്പിച്ച അഖില കേരള സെവൻസ് ഫുട്ബോൾ ടൂർണമെന്‍റിനായി നിർമിച്ച താത്കാലിക ഗാലറിയാണ് ഞായറാഴ്ച രാത്രി 9.45ഓടെ തകർന്നു വീണത്. ഗ്രൗണ്ടിന്‍റെ മൂന്ന് വശങ്ങളിലും ഏഴ് തട്ടുകളായാണ് താത്കാലിക ഗാലറികൾ നിർമിച്ചിരുന്നത്. ഇതിൽ ഗ്രൗണ്ടിന്‍റെ പടിഞ്ഞാറു വശത്തെ ഗോൾ പോസ്റ്റിന് പിൻഭാഗത്തെ ഗാലറിയാണ് പൂർണമായി നിലം പൊത്തിയത്. ഇരുന്പ് പൈപ്പുകളും തടികളുമാണ് ഗാലറിക്ക് ഉപയോഗിച്ചിരുന്നത്. ടൂർണമെന്‍റിന്‍റെ ഫൈനൽ മത്സരം ആരംഭിക്കുന്നതിന് തൊട്ടുമുന്പായിരുന്നു അപകടം. അവധി ദിവസം നടന്ന ഫൈനൽ മത്സരം കാണാൻ ഗാലറിക്ക് താങ്ങാവുന്നതിലും അധികം ആളുകൾ കയറിയതും തുടർച്ചയായ ദിവസങ്ങളിലെ മഴ മൂലം മണ്ണ് കുതിർന്നതുമാണ് ഗാലറി തകരാൻ കാരണമായതെന്നാണ് പ്രാഥമിക നിഗമനം. അപകടം നടക്കുന്പോൾ കുട്ടികൾ ഉൾപ്പെടെ ആയിരത്തോളം പേരാണ് ടിക്കറ്റെടുത്ത് ഗ്രൗണ്ടിൽ പ്രവേശിച്ചിരുന്നതെന്ന് സംഘാടകർ അറിയിച്ചു. അപകടം നടന്ന ഉടൻ ക്ലബ് അംഗങ്ങളുടെ നേതൃത്വത്തിൽ രക്ഷാപ്രവർത്തനം ആരംഭിക്കുകയും അഗ്നിശമന രക്ഷാസേനയും പോലീസും സ്ഥലത്തെത്തി രക്ഷാപ്രവർത്തനങ്ങളിൽ പങ്കുചേരുകയും ചെയ്തു. പരിക്കേറ്റ 56 പേരെ കോതമംഗലം, മൂവാറ്റുപുഴ, തൊടുപുഴ, മുതലക്കുടം എന്നിവടങ്ങളിലെ വിവിധ ആശുപത്രികളിൽ പ്രവേശിപ്പിച്ചു. ഇതിൽ ഏഴ് പേരൊഴികെ മറ്റുള്ളവരെല്ലാം പ്രാഥമിക ചികിത്സകൾക്കു ശേഷം വീടുകളിലേക്ക് മടങ്ങി. തൊടുപുഴ ബേബി മെമ്മോറിയൽ ആശുപത്രിയിൽ ഷിഹാബ്, ഉമ്മർ, സഹോദരിമാരായ ബിയ ഫാത്തിമ, സന ജമീല, മുതലക്കോടം ഹോളി ഫാമിലി അശുപത്രിയിൽ റവന്യു വകുപ്പ് ജീവനക്കാരനായ തോമസ്, മൂവാറ്റുപുഴ നിർമല മെഡിക്കൽ സെന്‍ററിൽ നാസർ, ആലുവ രാജഗിരി ആശുപത്രിയിൽ 14 വയസുകാരനായ അസിബിൻ എന്നിവരാണ് ചികിത്സയിലുള്ളത്. ഇതിൽ കാലിന് സാരമായി പരുക്കേറ്റ തോമസിനെയും തലയ്ക്ക് സാരമായി പരിക്കേറ്റ അസിബിനെയും അടിയന്തര ശസ്ത്രകിയയ്ക്ക് വിധേയരാക്കി.

വധശ്രമക്കേസിലെ പ്രതിയെ കാപ്പ ചുമത്തി ജയിലിലടച്ചു

മൂവാറ്റുപുഴ : വധശ്രമക്കേസ് പ്രതിയായ ആനിക്കാട് പൂതക്കുഴി ഷാപ്പ് ഭാഗത്ത് ഇളന്പ്രാപുത്തൻപുര അമൽ നാഥി(24)നെ കാപ്പ ചുമത്തി വിയ്യൂർ സെൻട്രൽ ജയിലിൽ അടച്ചു. റൂറൽ ജില്ലാ പോലീസ് മേധാവി വൈഭവ് സക്സേനയുടെ റിപ്പോർട്ടിന്‍റെ അടിസ്ഥാനത്തിൽ എറണാകുളം ജില്ലാ കളക്ടർ എൻ.എസ്.കെ. ഉമേഷാണ് ഉത്തരവിട്ടത്. മൂവാറ്റുപുഴ, കല്ലൂർക്കാട്, പോത്താനിക്കാട് പോലീസ് സ്റ്റേഷൻ പരിധികളിൽ കൊലപാതക ശ്രമം, കഠിന ദേഹോപദ്രവം ഏൽപ്പിക്കൽ, വീട്ടിൽ അതിക്രമിച്ച് കടക്കൽ തുടങ്ങി നിരവധി കേസുകളിൽ പ്രതിയാണ്. കഴിഞ്ഞ ഫെബ്രുവരിയിൽ മൂവാറ്റുപുഴ ലതാ സ്റ്റാൻഡിൽ ഒരാളെ കൊലപ്പെടുത്താൻ ശ്രമിച്ചതിന് മൂവാറ്റുപുഴ പോലീസ് രജിസ്റ്റർ ചെയ്ത കേസിൽ പ്രതിയായതിനെ തുടർന്നാണ് കാപ്പ ചുമത്തി ജയിലിലടച്ചത്. മൂവാറ്റുപുഴ പോലീസ് സ്റ്റേഷൻ ഇൻസ്പെക്ടർ ബേസിൽ തോമസ്, എസ്ഐ കെ. അനിൽ, എസ്‌സിപിഒ എം.കെ ഗിരിജ, സിവിൽ പോലീസ് ഓഫീസർമാരായ കെ.പി നിസാർ, ടി.ഒ. ജിജു, രഞ്ജിത്ത് പ്രഭാകരൻ, സി.എം. ബഷീറ എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്.

റോഡ് വികസനം: മെല്ലെപ്പോക്ക് അവസാനിപ്പിക്കാൻ ഇടപെടണമെന്ന്

മൂവാറ്റുപുഴ : നഗര റോഡ് വികസന പദ്ധതി യുടെ ഭാഗമായി നടക്കുന്ന നിർമാണ പ്രവർത്തികളുടെ മെല്ലെപ്പോക്ക് നടപടി അവസാനിപ്പിക്കാൻ ബന്ധപ്പെട്ട വകുപ്പുകൾ അടിയന്തിരമായി ഇടപെടണമെന്ന് മുൻ എംഎൽഎ ബാബു പോൾ, മുൻ നഗരസഭാധ്യക്ഷൻ പി.എം ഇസ്മയിൽ, സിപിഎം ഏരിയാ സെക്രട്ടറി അനീഷ് എം.മാത്യു എന്നിവർ ആവശ്യപ്പെട്ടു. ഇപ്പോൾ നടന്നുകൊണ്ടിരിക്കുന്ന വിധത്തിലുള്ള നിർമാണരീതിയാണ് തുടരുന്നതെങ്കിൽ നിശ്ചയിച്ചിട്ടുള്ള സമയപരിധിക്കുള്ളിൽ നിർമാണം പൂർത്തീകരിക്കാൻ കഴിയുമോയെന്ന ആശങ്ക നിലനിൽക്കുന്നു. വൈദ്യുതി പോസ്റ്റുകളും ജലവിതരണ പൈപ്പുകളും മാറ്റി സ്ഥാപിക്കേണ്ട പ്രവർത്തി പൂർത്തീകരിക്കാൻ കഴിഞ്ഞിട്ടില്ല. കൂടുതൽ മെഷീനറികളും തൊഴിലാളികളെയും എത്തിച്ച് നിർമാണ വേഗത ത്വരിതപ്പെടുത്താനോ രാത്രിയിലുൾപ്പെടെ നിർമാണം നടത്തുന്നതിന് നടപടി സ്വീകരിക്കാനോ കരാറുകാരൻ തയാറാകുന്നില്ലെന്നും നേതാക്കൾ കുറ്റപ്പെടുത്തി.

ആരക്കുഴ സെന്‍റ് മേരീസ് മേജർ ആർക്കി എപ്പിസ്കോപ്പൽ - മലേക്കുരിശ് പള്ളിയിൽ പുതുഞായർ തിരുനാൾ

ആരക്കുഴ: തീർഥാടന കേന്ദ്രമായ ആരക്കുഴ സെന്‍റ് മേരീസ് മേജർ ആർക്കി എപ്പിസ്കോപ്പൽ - മലേക്കുരിശ് പള്ളിയിൽ പുതുഞായർ തിരുനാൾ 25 മുതൽ മേയ് നാല് വരെ ആഘോഷിക്കുമെന്ന് ആർച്ച് പ്രീസ്റ്റ് ഫാ. സെബാസ്റ്റ്യൻ കണിമറ്റത്തിൽ, അസിസ്റ്റന്‍റ് വികാരി ഫാ. പോൾസണ്‍ മാറാട്ടിൽ എന്നിവർ അറിയിച്ചു. 25ന് വൈകുന്നേരം 4.30ന് അന്പു പ്രദക്ഷിണം, 5.30ന് കൊടിയേറ്റ്, തിരുനാൾ കുർബാന, സന്ദേശം: മോണ്‍. വിൻസന്‍റ് നെടുങ്ങാട്ട്, ഏഴിന് പ്രദക്ഷിണം. 26ന് രാവിലെ ഏഴിനും 8.30നും 10നും കുർബാന, വൈകുന്നേരം നാലിന് അന്പു പ്രദക്ഷിണം, 5.30ന് കുർബാന, ഏഴിന് പ്രദക്ഷിണം. 27ന് രാവിലെ അഞ്ചിനും 6.30 നും 7.45നും കുർബാന, 8.45ന് സുറിയാനി പാട്ടുകുർബാന, 10.30ന് തിരുനാൾ കുർബാന, സന്ദേശം: മോണ്‍. പയസ് മലേക്കണ്ടത്തിൽ, ഉച്ചയ്ക്ക് 12.15ന് പ്രസുദേന്തി വാഴ്ച, 12.30ന് പ്രദക്ഷിണം, വൈകുന്നേരം അഞ്ചിന് തിരുനാൾ കുർബാന, സന്ദേശം: റവ. ഡോ. ആന്‍റണി പുത്തൻകുളം, ജപമാല റാലി, രാത്രി ഏഴിന് കുർബാന. 28ന് രാവിലെ 7.30ന് കുർബാന, വൈകുന്നേരം നാലിന് അന്പു പ്രദക്ഷിണം, 5.30ന് കുർബാന, ജപമാല റാലി. 29ന് വൈകുന്നേരം നാലിന് അന്പു പ്രദക്ഷിണം, 5.30ന് കുർബാന, ജപമാല റാലി. 30 ന് രാവിലെ 7.30ന് കുർബാന, വൈകുന്നേരം 4.30ന് അന്പു പ്രദക്ഷിണം, 5.30ന് കുർബാന, ജപമാല റാലി. മേയ് ഒന്നിന് രാവിലെ 7.30ന് കുർബാന, വൈകുന്നേരം നാലിന് അന്പു പ്രദക്ഷിണം, 5.30ന് കുർബാന, ജപമാല റാലി. രണ്ടിന് രാവിലെ 7.30നും 10നും കുർബാന, വൈകുന്നേരം നാലിന് അന്പു പ്രദക്ഷിണം, 5.30ന് കുർബാന, ജപമാല റാലി. മൂന്നിന് രാവിലെ ഏഴിനും 8.30നും 10നും കുർബാന, വൈകുന്നേരം നാലിന് അന്പു പ്രദക്ഷിണം, 5.30ന് കുർബാന, ജപമാല റാലി. നാലിന് രാവിലെ അഞ്ചിനും 6.30നും 7.45നും ഒന്പതിനും കുർബാന, 10.30ന് ആഘോഷമായ തിരുനാൾ കുർബാന, സന്ദേശം: മാർ ജോർജ് മഠത്തിക്കണ്ടത്തിൽ, ഉച്ചയ്ക്ക് 12.15ന് പ്രസുദേന്തി വാഴ്ച, 12.30ന് പ്രദക്ഷിണം, വൈകുന്നേരം അഞ്ചിനും ഏഴിനും കുർബാന.

മൂവാറ്റുപുഴയിൽ നിന്ന് തെങ്കാശിക്ക് കെഎസ്ആർടിസി ബസ് ഇന്നുമുതൽ

മൂവാറ്റുപുഴ: തമിഴ് സംഘത്തിന്‍റെ നിവേദനം മുഖ്യമന്ത്രിയും ഗതാഗത മന്ത്രിയും അംഗീകരിച്ചു; മൂവാറ്റുപുഴയിൽ നിന്ന് തെങ്കാശിക്ക് കെഎസ്ആർടിസി ബസ് ഇന്ന് മുതൽ ഓടും. മൂവാറ്റുപുഴ ഡിപ്പോയിൽ നിന്ന് ഉച്ചകഴിഞ്ഞ് 2.15ന് പുറപ്പെടുന്ന ബസ് രാത്രി 8.40ന് തെങ്കാശിയിൽ എത്തും. തെങ്കാശിയിൽ നിന്ന് രാത്രി 11 ന് പുറപ്പെടുന്ന ബസ് പുലർച്ചെ 5.25ന് മൂവാറ്റുപുഴയിൽ തിരിച്ചെത്തും. മൂവാറ്റുപുഴയിൽ നിന്ന് 205 കിലോമീറ്റർ ദൂരമാണ് തെങ്കാശിക്ക്. മൂവാറ്റുപുഴയിലും പരിസരപ്രദേശങ്ങളിലുമുള്ള ആയിരത്തോളം തമിഴ് കുടുംബങ്ങൾക്ക് സ്വന്തം നാട്ടിൽ പോയി വരാൻ പുതിയ ബസ് സർവീസാണ് സർക്കാർ അനുവദിച്ചത്. തമിഴ്നാട്ടിൽ നിന്ന് മൂവാറ്റുപുഴയിലെത്തി വിവിധ തൊഴിൽ ചെയ്തും ജോലിയെടുത്തും ജീവിക്കുന്ന കുടുംബങ്ങളുടെ സംഘടനയാണ് തമിഴ് സംഘം. 2024 നവംബറിൽ ഗതാഗത മന്ത്രി കെ.ബി. ഗണേഷ് കുമാറിനും കഴിഞ്ഞ ഫെബ്രുവരിയിൽ മുഖ്യമന്ത്രി പിണറായി വിജയനും തമിഴ്സംഘം നിവേദനം നൽകി. തുടർന്നാണ് ബസ് റൂട്ട് അനുവദിച്ചത്. തമിഴ് സംഘത്തിലെ എക്സിക്യൂട്ടീവ് കമ്മിറ്റിയംഗം എം. മണികണ്ഠൻ ആണ് തെങ്കാശിക്ക് ബസ് റൂട്ട് വേണമെന്ന ആവശ്യം അറിയിച്ചത്. പ്രസിഡന്‍റ് എസ്. അബ്ദുൽ ജബ്ബാർ, സെക്രട്ടറി എം. ജഗൻ, ട്രഷറർ എൽ.അശോക് കുമാർ, സഹഭാരവാഹികളായ വി രാജാത്തി, സി മണിമുത്ത്, എം വൈകുണ്ഠരാമൻ, ജെ വിക്ടർ തുടങ്ങിയവരുടെ നേതൃത്വത്തിലാണ് നിവേദനം നൽകിയത്. നേരത്തെ മൂവാറ്റുപുഴയിൽ നിന്ന് തെങ്കാശി വഴി തൂത്തുക്കുടിക്ക് സർവീസ് നടത്തിയിരുന്ന കെഎസ്ആർടിസി ബസ് പിന്നീട് മുടങ്ങി.

ശ്രേഷ്ഠ ബാവയ്ക്ക് എംഎ കോളജിൽ സ്വീകരണം ഇന്ന്

കോതമംഗലം : ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവയ്ക്ക് കോതമംഗലം എംഎ കോളജ് അസോസിയേഷന്‍റെ നേതൃത്വത്തിൽ ഇന്ന് സ്വീകരണം നൽകും. രാവിലെ 11ന് ബസേലിയോസ് പൗലോസ് ഇൻഡോർ സ്റ്റേഡിയത്തിൽ നടക്കുന്ന ചടങ്ങിൽ ജസ്റ്റിസ് സിറിയക് ജോസഫ് മുഖ്യപ്രഭാഷണം നടത്തും. മാത്യൂസ് മാർ അപ്രേം മെത്രാപ്പോലീത്ത അധ്യക്ഷത വഹിക്കും. ഏലിയാസ് മാർ യൂലിയോസ് മെത്രാപ്പോലീത്ത, ഡീൻ കുര്യാക്കോസ് എംപി, എംഎൽഎമാരായ ആന്‍റണി ജോണ്‍, മാത്യു കുഴൽനാടൻ, എംഎ കോളജ് അസോസിയേഷൻ സെക്രട്ടറി ഡോ. വിന്നി വറുഗീസ്, പ്രിൻസിപ്പൽമാരായ ഡോ. മഞ്ജു കുര്യൻ, ഡോ. ബോസ് മാത്യു ജോസ് എന്നിവർ പ്രസംഗിക്കും

ബസും ബൈക്കും കൂട്ടിയിടിച്ച് യുവാവിന് ദാരുണാന്ത്യം

ഉദയംപേരൂർ: പൂത്തോട്ടയ്ക്കു സമീപം പുത്തൻകാവിൽ സ്വകാര്യ ബസും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. വൈക്കം മറവൻതുരുത്ത് വാളം പള്ളിപ്പാലത്തിന് സമീപം നടുവിലേക്കൂറ്റ് വീട്ടിൽ പരേതരായ ജോയി-ശാന്തമ്മ ദന്പതികളുടെ മകൻ ജിജോ തോമസ് (38) ആണ് മരിച്ചത്. ഇന്നലെ പുലർച്ചെ ആറരയോടെയായിരുന്നു അപകടം. എറണാകുളത്ത് സുഹൃത്തിനെ എത്തിച്ച ശേഷം തിരികെ മറവൻതുരുത്തിലേക്ക് വരുന്നതിനിടെ പൂത്തോട്ടയിൽനിന്ന് തൃപ്പൂണിത്തുറയിലേക്ക് പോവുകയായിരുന്ന സ്വകാര്യ ബസുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ റോഡിൽ തെറിച്ച് വീണ് ഗുരുതരമായി പരിക്കേറ്റ ജിജോയെ ഉടൻ തൃപ്പൂണിത്തുറ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. എറണാകുളത്തെ സ്വകാര്യ സ്ഥാപനത്തിലെ ജീവനക്കാരനായിരുന്നു ജിജോ. സംസ്കാരം നടത്തി. ഭാര്യ: ജിജ. മകൻ: ജോഷുവ.

എൻ.കെ. ദേശത്തെ അനുസ്മരിച്ചു

നെടുന്പാശേരി: ദേശം ചൈതന്യ ആർട്സ് ആൻഡ് സ്പോർട്സ് ക്ലബിന്‍റെ ആഭിമുഖ്യത്തിൽ നടക്കുന്ന ഗ്രാമയാനം പരിപാടിയുടെ ഏഴാംദിവസം എൻ.കെ. ദേശം അനുസ്മരണപരിപാടി സംഘടിപ്പിച്ചു. ദേശികം എന്ന പേരിൽ നടത്തിയ പരിപാടി ഗാന്ധികലാകേന്ദ്രം ഡയറക്ടർ എൻ. മോഹനൻ നായർ ഉദ്‌ഘാടനം ചെയ്തു. വേണു വി. ദേശം , എസ്. കൃഷ്ണൻകുട്ടി, കൃഷ്ണൻ കുരൂർ, രാധിക സന്തോഷ്, കെ.ആർ. സുമാദേവി, ടി. ശാന്താമണി, പി.ആർ. രാജേഷ്, ലത ഗംഗാധരൻ എന്നിവർ സംസാരിച്ചു. തുടർന്ന് വാഴക്കുളം കാവ്യകലാകേന്ദ്രത്തിന്‍റെ അക്ഷരശ്ലോക കാവ്യകേളീ സദസ് നടന്നു.

ഒപ്പം മെഡിക്കൽ ക്യാന്പ് : 642 പേർക്ക് കണ്ണടകൾ നൽകി

നെടുമ്പാശേരി : വ്യവസായ വകുപ്പ് മന്ത്രി പി. രാജീവിന്‍റെ നേതൃത്വത്തിൽ സംഘടിപ്പിച്ച ഒപ്പം മെഡിക്കൽ ക്യാന്പിൽ പങ്കെടുത്തവർക്കുള്ള കണ്ണടകൾ വിതരണം ചെയ്തു. നേത്രപരിശോധനയുടെ ഭാഗമായി പുതിയ കണ്ണട നിർദ്ദേശിക്കപ്പെട്ട 642 പേർക്കാണ് സൗജന്യമായി കണ്ണടകൾ നൽകിയത്. കുന്നുകര അഹന ഓഡിറ്റോറിയത്തിൽ നടന്ന ചടങ്ങിൽ മന്ത്രി പി. രാജീവ് കണ്ണട വിതരണോദ്ഘാടനം നിർവഹിച്ചു. ഇതോടെ ഒപ്പം പദ്ധതിയുടെ ഭാഗമായി നാല് വർഷങ്ങളിലായി 2,246 കണ്ണടകളാണ് വിതരണം ചെയ്തത്. ആധുനിക പരിശോധനe സൗകര്യങ്ങൾ ഒരു കുടക്കീഴിൽ ഒരുക്കിയാണ് കഴിഞ്ഞ ഫെബ്രുവരി16 ന് കുന്നുകര റയാൻ ഇന്‍റർനാഷണൽ സ്കൂളിൽ മെഡിക്കൽ ക്യാന്പ് സംഘടിപ്പിച്ചത്. ക്യാന്പിന്‍റെ തുടർച്ചയായി 50 ശസ്ത്രക്രിയകൾ സൗജന്യമായി നടത്താനുള്ള സമ്മതപത്രം കിൻഡർ ആശുപത്രി കൈമാറിയിട്ടുണ്ട്. കുന്നുകര പഞ്ചായത്ത് വൈസ് പ്രസിഡന്‍റ് എം.എ. അബ്ദുൾ ജബ്ബാർ കണ്ണട വിതരണ ചടങ്ങിൽ അധ്യക്ഷനായിരുന്നു. ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ്, കരുമാല്ലൂർ, ആലങ്ങാട് പഞ്ചായത്ത് പ്രസിഡന്‍റുമാരായ സബിത നാസർ, പി.എം. മനാഫ്, ബ്ലോക്ക് പഞ്ചായത്തംഗങ്ങളായ സി.എം. വർഗീസ്, സി.കെ. കാസിം, വി.കെ. അനിൽ തുടങ്ങിയവർ സംസാരിച്ചു.

ലഹരിവിരുദ്ധ ബോധവത്കരണം

മൂവാറ്റുപുഴ: രണ്ടാർ ഇഎംഎസ് സ്മാരക വായനശാലയുടേയും എഡിഎസിന്‍റെയും സംയുക്താഭിമുഖ്യത്തിൽ നടത്തിയ ലഹരിവിരുദ്ധ ബോധവത്കരണ ക്യാന്പയിൻ കേരള കണ്‍സ്യൂമർ ഫെഡ് ആക്ടിംഗ് ചെയർമാൻ പി.എം. ഇസ്മായിൽ ഉദ്ഘാടനം ചെയ്തു. നഗരസഭാ സ്ഥിരംസമിതി അധ്യക്ഷൻ അജി മുണ്ടാട്ട് മുഖ്യപ്രഭാഷണം നടത്തി. എറണാകുളം അസിസ്റ്റന്‍റ് എക്സൈസ് ഇൻസ്പെക്ടർ വി. ജയരാജ് ലഹരിവിരുദ്ധ ബോധവത്കരണത്തിന്‍റെ ഭാഗമായി ഓട്ടൻതുള്ളൽ അവതരിപ്പിച്ചു. മൂവാറ്റുപുഴ റേഞ്ച് എക്സൈസ് റോയി എം. ജേക്കബ് ലഹരിവിരുദ്ധ സന്ദേശം നൽകി. മൂവാറ്റുപുഴ: എസ്എൻഡിപി ഹയർ സെക്കൻഡറി സ്കൂൾ സ്റ്റുഡന്‍റ് പോലീസ് കേഡറ്റിന്‍റെ നേതൃത്വത്തിൽ ലഹരിവിരുദ്ധ കാന്പയിൻ ആരംഭിച്ചു. ലഹരിയുടെ പിടിയിൽ നിന്ന് വിദ്യാർഥി സമൂഹത്തെ രക്ഷപ്പെടുത്തുക എന്ന ഉദ്ദേശ്യത്തോടെ ഒരു മാസം നീണ്ടുനിൽക്കുന്ന കാന്പയിനനാണ് തുടക്കമായത്.

പെരുന്പാവൂരിൽ റോഡരികിൽ കഞ്ചാവ് ചെടി

പെരുമ്പാവൂർ : പെരുന്പാവൂരിൽ റോഡരികിൽ കഞ്ചാവ് ചെടി കണ്ടെത്തി. ചെമ്പറക്കി നടക്കാവ് റോഡരികിൽ 67സെന്‍റീമീറ്റർ ഉയരത്തോട് കൂടിയ കഞ്ചാവ് ചെടിയാണ് എക്സൈസ് ഇന്‍സ്പെക്ടര്‍ കെ. വിനോദിന്‍റെ നേതൃത്വത്തിലുള്ള സംഘം കണ്ടെത്തിയത്. ഇത്രയും പൊക്കത്തിൽ വളർന്നിട്ടും ചെടി നാട്ടുകാരുടെ കണ്ണിൽ പെട്ടിരുന്നില്ല. നേരത്തയും നഗരത്തിലെ വിവിധയിടങ്ങളിൽ നിന്ന് കഞ്ചാവ് ചെ‍ടി കണ്ടെത്തിയിരുന്നു. ഇതര സംസ്ഥാനക്കാർ കൂടുതലായി തന്പടിക്കുന്ന പെരുന്പാവൂരിൽ മയക്കു മരുന്നു പയോഗം വർധി ക്കുന്നതായി റിപ്പോർട്ട്.

താലൂക്ക് നായർ മഹാസമ്മേളനം

തൃപ്പൂണിത്തുറ: കൊച്ചി- കണയന്നൂർ താലൂക്ക് നായർ മഹാസമ്മേളനവും സപ്തതി ആഘോഷവും പുതിയകാവ് ക്ഷേത്ര മൈതാനത്തിൽ എൻഎസ്എസ് വൈസ് പ്രസിഡന്‍റും തിരുവനന്തപുരം താലൂക്ക് യൂണിയൻ പ്രസിഡന്‍റുമായ എം. സംഗീത് കുമാർ ഉദ്ഘാടനം ചെയ്തു. തൃപ്പൂണിത്തുറ എൻഎസ്എസ് ആസ്ഥാനത്ത് സമുദായാചാര്യൻ മന്നത്ത് പത്മനാഭന്‍റെ വെങ്കല പ്രതിമ സമർപ്പണം യൂണിയൻ പ്രസിഡന്‍റ് എൻ.സി. ഉണ്ണിക്കൃഷ്ണൻ നിർവഹിച്ചു. ചട്ടമ്പിസ്വാമി സ്മാരക ആദ്ധ്യാത്മിക ഗ്രന്ഥശാലയുടെ ഉദ്ഘാടനം കരയോഗം രജിസ്ട്രാർ വി.വി. ശശിധരൻ നിർവഹിച്ചു. കരയോഗാംഗങ്ങൾക്ക് നിർമിച്ചു നൽകുന്ന വീടിന്‍റെ താക്കോൽ ദാനം എം. സംഗീത് കുമാർ നിർവഹിച്ചു. താലൂക്ക് യൂണിയൻ പ്രസിഡന്‍റ് ഡോ. എൻ.സി. ഉണ്ണിക്കൃഷ്ണൻ അധ്യക്ഷത വഹിച്ചു.

പെരുന്പാവൂരിൽ പാറമടയിൽനിന്ന് സ്ഫോടകവസ്തുക്കൾ പിടികൂടി

പെരുമ്പാവൂർ: പ്രവർത്തനം നിലച്ച പാറമടയിൽ നിന്നും ജലാറ്റിൻ സ്റ്റിക്കുകൾ പിടികൂടി. അശമന്നൂർ മണ്ണൂർമോളത്ത് പ്രവർത്തനം നിലച്ച പാറമടയിലാണ് സംഭവം. മീൻ പിടിക്കാനെത്തിയവർക്കാണ് വലയെറിഞ്ഞപ്പോൾ ജലാറ്റിൻ സ്റ്റിക്കുകൾ കിട്ടിയത്. ഇന്നലെ വൈകിട്ട് 5.30 ഓടെയാണ് സംഭവം. പാറക്കുളത്തിൽ തള്ളിയ നിലയിലാണ് സ്ഫോടക വസ്തു കണ്ടെത്തിയത്. വലിയ ചാക്കിലായാണ് സ്ഫോടക വസ്തു കണ്ടെത്തിയത്. എണ്ണം തിട്ടപ്പെടുത്തിയിട്ടില്ല. ഏകദേശം നൂറിലധികം ജലാറ്റിൻസ്റ്റിക്കുകൾ ഉണ്ടെന്നാണ് വിവരം. തുടർന്ന് പോലീസിനെ വിവരം അറിയിക്കുകയായിരുന്നു. കുറുപ്പംപടി പോലീസ് അന്വേഷണം ആരംഭിച്ചു. ‎

കുട്ടിക്കൂട്ടത്തെ അനുമോദിച്ചു

കൂത്താട്ടുകുളം: പഠനോത്സവത്തിലൂടെ സ്കൂളിന്‍റെ മികവറിയിച്ച കൂത്താട്ടുകുളം ഗവ. യുപി സ്കൂൾ പ്രീ പ്രൈമറി കുട്ടിക്കൂട്ടത്തെ പിടിഎയുടെ നേതൃത്വത്തിൽ അനുമോദിച്ചു. പ്രധാനാധ്യാപിക ടി.വി. മായ കുട്ടികൾക്ക് പുരസ്കാരം നൽകി. പിടിഎ പ്രസിഡന്‍റ് മനോജ് കരുണാകരൻ അധ്യക്ഷത വഹിച്ചു. കെ.പി. രേഖ, മഞ്ജുമോൾ മാത്യു എന്നിവർ പ്രസംഗിച്ചു. സ്കൂളിനെ സംസ്ഥാനത്തെ മാതൃകാ പ്രീ പ്രൈമറിയായി തെരഞ്ഞെടുത്തിരുന്നു. സർക്കാർ അനുവദിച്ച 15 ലക്ഷം ഉപയോഗിച്ച് മനോഹരമായ പാർക്കും, ജൈവ വൈവിധ്യ ഉദ്യാനവും, ശലഭ ഉദ്യാനവും, ഔഷധത്തോട്ടവും, സ്മാർട്ട് ക്ലാസ് മുറികളും ഒരുക്കിയിട്ടുണ്ട്.

മതസൗഹൃദ സംഗമവും ഉയിര്‍പ്പ് പ്രാതലും

കൊച്ചി: ഈസ്റ്റര്‍ ദിനത്തില്‍ ചാവറ കള്‍ച്ചറല്‍ സെന്‍റര്‍ മതസൗഹൃദ സംഗമവും ഉയിര്‍പ്പ് പ്രാതലും സംഘടിപ്പിച്ചു. യോഗി ശ്രീ ഓം ശക്തി ദക്ഷിണാമൂര്‍ത്തി സന്ദേശം നല്‍കി. പ്രഫ.എം.കെ.സാനു അനുഗ്രഹപ്രഭാഷണം നടത്തി. സിഎംഐ സഭ സാമൂഹ്യ സേവന വിഭാഗം ജനറല്‍ കൗണ്‍സിലര്‍ ഫാ.ബിജു വടക്കേല്‍ അധ്യക്ഷത വഹിച്ചു. പ്രഫ. എം.കെ.സാനു, ടി.ജെ.വിനോദ് എംഎല്‍എ എന്നിവര്‍ ചേര്‍ന്ന് ഈസ്റ്റര്‍ മുട്ട പൊട്ടിച്ചുകൊണ്ട് ഉയിര്‍പ്പ് പ്രാതലിന് തുടക്കം കുറിച്ചു. കെ.വി.തോമസ്, ഡൊമിനിക് പ്രസന്‍റേഷന്‍, ജോണ്‍ ഫെര്‍ണാണ്ടസ്, ജസ്റ്റീസ് പി.കെ.ഷംസുദ്ദീന്‍, ജമാല്‍ പാനായിക്കുളം ഇമാം, സൗമിനി ജയിന്‍, പത്മജ എസ്. മേനോന്‍, പി. രാമചന്ദ്രന്‍, കെ.വി. പി. കൃഷ്ണകുമാര്‍, ഫാ. അനില്‍ ഫിലിപ്പ്, ആര്‍. ഗോപകുമാര്‍ എന്നിവര്‍ പ്രസംഗിച്ചു.

സ്വകാര്യ ബസുകൾ ട്രിപ്പ് മുടക്കുന്നതായി പരാതി

നെടുമ്പാശേരി : വിശേഷ ദിവസങ്ങളിൽ സ്വകാര്യ ബസുകൾ ട്രിപ്പ് മുടക്കുന്നത് യാത്രക്കാരെ ദുരിതത്തിലാക്കുന്നതായി പരാതി. കഴിഞ്ഞ ദിവസം അത്താണിയിൽ നിന്നും കണക്കൻകടവ്, പുത്തൻവേലിക്കര തുടങ്ങിയ പ്രദേശങ്ങളിലേക്ക് പോകേണ്ട യാത്രക്കാരാണ് ബുദ്ധിമുട്ടിലായത്. ഈ റൂട്ടിൽ 12 ഓളം സ്വകാര്യ ബസുകളാണ് സർവീസ് നടത്തുന്നത്. ഇതിൽ നാല് ബസുകൾ മാത്രമാണ് കഴിഞ്ഞ വെള്ളിയാഴ്ച സർവീസ് നടത്തിയതെന്നാണ് യാത്രക്കാരുടെ പരാതി. പലരും മണിക്കൂറുകളോളം ബസ് കാത്ത് നിന്ന് വലഞ്ഞു. വിശേഷ ദിവസങ്ങളിൽ സ്വകാര്യ ബസുകൾ ട്രിപ്പ് മുടക്കുകയും കെ.എസ്.ആർ.ടി.സി ബസുകൾ കൂടുതൽ സർവീസുകൾ നടത്താതിരിക്കുകയും ചെയ്താൽ സ്വന്തമായി വാഹനങ്ങളില്ലാത്ത സാധാരണക്കാരാണ് ദുരിതത്തിലാവുന്നത്. ആലുവയിൽ നിന്നും അങ്കമാലിയിൽനിന്നും മാള, കണക്കൻകടവ്, പുത്തൻവേലിക്കര എന്നിവിടങ്ങളിലേയ്ക്കു നിരവധി സ്വകാര്യബസുകൾ സർവ്വീസ് നടത്തുന്നുണ്ട്. ഇതിൽ മാളയിലേയ്ക്ക് മാത്രമാണ് കെഎസ്ആർടിസി ബസുകൾ സർവീസ് നടത്തുന്നത്. ഇതും പലപ്പോഴും ഉണ്ടാകാറില്ലെന്ന് യാത്രക്കാർ പറയുന്നു.

അങ്കമാലിയിൽ 9.5 കിലോ കഞ്ചാവുമായി യുവതിയുൾപ്പെടെ രണ്ട് പേർ പിടിയിൽ

അങ്കമാലി: ഒമ്പതരക്കിലോ കഞ്ചാവുമായി യുവതിയുൾപ്പടെ രണ്ട് പേർ അങ്കമാലിയിൽ പിടിയിൽ. ഒഡീഷ കണ്ഡമാൽ സ്വദേശികളായ റിങ്കു ദിഗൽ (25), ശാലിനി ഭാലിയാർ സിംഗ്(22) എന്നിവരാണ് അങ്കമാലി പോലീസിന്‍റെ പിടിയിലായത്. ജില്ലാ പോലീസ് മേധാവി വൈഭവ് സക്സേനയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ അങ്കമാലിയിലെ ഒരു ലോഡ്ജിൽ നിന്നാണ് ഇവരെ കസ്റ്റഡിയിലെടുത്തത്. സ്ഥിരമായി കഞ്ചാവ് കടത്തിവിൽപ്പന നടത്തുന്നവരാണിവർ. ഒഡീഷയിൽ നിന്ന് മൂവായിരം മുതൽ അയ്യായിരം രൂപ വരെ വിലയ്ക്കു വാങ്ങി ഇവിടെ പതിനയ്യായിരം ,ഇരുപതിനായിരം രൂപാ നിരക്കിൽ ഹോൾസെയിലായി കച്ചവടം നടത്തി ഉടൻ തന്നെ തിരിച്ചു പോകും. കുറച്ച് നാളുകളായി പോലീസിന്‍റെ നിരീക്ഷണത്തിലായിരുന്നു ഇവർ. ഇൻസ്പെക്ടർ എ. രമേഷ്, എസ്ഐമാരായ കെ. പ്രദീപ് കുമാർ, എം.എസ്. ബിജീഷ്, അജിത്, എഎസ്ഐ നവീൻ ദാസ് തുടങ്ങിയവരാണ് അന്വേഷണ സംഘത്തിലുണ്ടായിരുന്നത്.

മഹാപ്രളയത്തിനു ശേഷം ആദ്യം... ആലുവ ചിൽഡ്രൻസ് ട്രാഫിക് പാർക്ക് തുറന്നു

ആലുവ: ആലുവ മുനിസിപ്പൽ ചിൽഡ്രൻസ് ട്രാഫിക് പാർക്ക് ഏഴ് വർഷങ്ങൾക്ക് ശേഷം കുട്ടികൾക്ക് തുറന്നുകൊടുത്തു. മുനിസിപ്പൽ ചെയർമാൻ എം.ഒ. ജോണും കൗൺസിൽ അംഗങ്ങളും പങ്കെടുത്ത ലളിതമായ ചടങ്ങിലാണ് ഇന്നലെ വിവിധ തരത്തിലുള്ള ഒന്പതു സൈക്കിളുകൾ ലഭ്യമാക്കി പാർക്ക് തുറന്ന് കൊടുത്തത്. പൊതു അവധി ദിവസങ്ങളിൽ രാവിലെ 11 മുതൽ രാത്രി എട്ടു വരെയും പ്രവർത്തി ദിനങ്ങളിൽ ഉച്ചയ്ക്ക് മൂന്നു മുതൽ രാത്രി എട്ടു വരെയും കുട്ടികൾക്ക് ട്രാഫിക് പാർക്ക് ഉപയോഗിക്കാം. 15 മിനിറ്റ് നേരത്തേക്ക് 20 രൂപ നിരക്കിൽ ഫീസ് ഈടാക്കും. 2018 ലെ പ്രളയത്തിൽ നശിച്ചുപോയ മുനിസിപ്പൽ പാർക്ക് രണ്ട് കരാറുകാരെ ഉപയോഗിച്ച് അഞ്ച് വർഷങ്ങൾ എടുത്താണ് പുനരുദ്ധരിച്ചത്. 2023 ഒക്ടോബർ 31 ന് നവീകരണം പൂർത്തിയായെങ്കിലും ഇതിനകത്ത് പ്രവർത്തിച്ചിരുന്ന കുട്ടികളുടെ ട്രാഫിക് പാർക്കിൽ കളിക്കോപ്പുകൾ ഇല്ലാത്തതിനാൽ അന്ന് തുറന്നുകൊടുക്കാനായില്ല. ഈ വേനലവധിക്കാലത്തും കുട്ടികൾ നിരാശരായി മടങ്ങുമ്പോഴാണ് ഈസ്റ്റർ ദിനത്തിൽ ട്രാഫിക് പാർക്ക് സൈക്കിളുകളുടെ വരവോടെ സജീവമായത്. കാർ, ജീപ്പ് തുടങ്ങിയ കൂടുതൽ കളി വാഹനങ്ങൾ ഉടനെ തന്നെ കോയമ്പത്തൂരിൽ നിന്ന് ട്രാഫിക് പാർക്കിൽ ലഭ്യമാക്കുന്നതാണെന്ന് ആലുവ നഗരസഭാ അധികൃതർ അറിയിച്ചു. ട്രാഫിക് പാർക്കിൽ ചെറു കളിവണ്ടികൾ വാങ്ങുന്നതിന് ഒരു വർഷം മുമ്പേ നെസ്റ്റ് ഗ്രൂപ്പ് അഞ്ച് ലക്ഷം രൂപ അനുവദിച്ചിട്ടുണ്ട്. എന്നാൽ നിലവാരമുള്ള കളിവണ്ടികൾ ലഭിക്കാൻ വൈകുന്നതുകൊണ്ടാണ് ചിൽഡ്രൻസ് ട്രാഫിക്ക് പാർക്ക് തുറക്കാനാകാതിരുന്നതെന്നാണ് നഗരസഭയുടെ വിശദീകരണം.

കുന്നുശേരിയിൽ ഫുട്ബോൾ ടൂർണമെന്‍റ് തുടങ്ങി

നെടുമ്പാശേരി: ഡിവൈഎഫ്ഐ അത്താണി വെസ്റ്റ് യൂണിറ്റിന്‍റെ നേതൃത്വത്തിൽ ഏഴുനാൾ നീണ്ടുനിൽക്കുന്ന ഫുട്ബോൾ ടൂർണമെന്‍റിന് തുടക്കമായി. കുന്നുശേരി ക്യാപ്റ്റൻസി ഗ്രൗണ്ടിൽ ടൂർണമെന്‍റ് നെടുമ്പാശേരി പഞ്ചായത്ത് പ്രസിഡന്‍റ് ഏ.വി. സുനിൽ ഉദ്ഘാടനം ചെയ്തു. ചടങ്ങിൽ പി.ആർ. സുരേഷ് അധ്യക്ഷനായി. പി.കെ. അജി, പി.ജെ. അനസ്, പി.വി. ദിദേഷ് കുമാർ എന്നിവർ സംസാരിച്ചു. ടൂർണമെന്‍റിന്‍റെ ഭാഗമായി കലാസന്ധ്യയും, കൈകൊട്ടിക്കളിയും സംഘടിപ്പിച്ചിട്ടുണ്ടെന്ന് ഭാരവാഹികൾ അറിയിച്ചു.

കാൽനടക്കാർക്ക് ഭീഷണിയായി ചരിഞ്ഞ വൈദ്യുതി പോസ്റ്റ്

ആലുവ: റെയിൽവേ സ്‌റ്റേഷൻ റോഡിലെ വൈദ്യുതി പോസ്റ്റ് ചരിഞ്ഞ നിലയിൽ. പൊതുമരാമത്ത് വകുപ്പിന്‍റെ കാന നവീകരണം കഴിഞ്ഞതോടെ നടപ്പാതയിലൂടെ നടക്കുന്നവരുടെ തല പോസ്റ്റിൽ ഇടിക്കുന്നതായും പരാതിയുണ്ട്. റെയിൽവേ റോഡിലെ ബൂട്ട്സ് ബസാർ കടയോട് ചേർന്നുള്ള വൈദ്യുതി പോസ്റ്റാണ് കാൽനടയാത്രക്കാർക്ക് ഭീഷണിയായിരിക്കുന്നത്. ഏതാനും വ്യാപാരികൾ കെഎസ്ഇബിയെ വിവരം അറിയിച്ചിട്ടുണ്ട്.

ആലുവ മുനിസിപ്പൽ ബസ് സ്റ്റാൻഡിൽ സാമൂഹ്യവിരുദ്ധർ വിലസുന്നു; ഇരിപ്പിടം പോലുമില്ല

ആലുവ: കേരളത്തിലെ ഏറ്റവും വലിയ ബസ് സ്റ്റാൻഡുകളിൽ ഒന്നായ ആലുവ മുനിസിപ്പൽ ബസ് സ്റ്റാൻഡ് സന്ധ്യമയങ്ങിയാൽ സാമൂഹിക വിരുദ്ധരുടെ കേന്ദ്രമാകുന്നതായി പരാതി. പതിനായിരക്കണക്കിന് യാത്രക്കാർ ഉപയോഗിക്കുന്ന ബസ് സ്റ്റാൻഡ് അസൗകര്യങ്ങളിൽ വീർപ്പുമുട്ടുന്നതിന് പുറമേയാണ് മയക്കുമരുന്ന് വിതരണവും ജീവനക്കാർ തമ്മിലുള്ള സംഘർഷങ്ങളും നടക്കുന്നത്. ഇവിടെ നിന്നും 420 ഓളം സ്വകാര്യ ബസുകളാണ് കോവിഡ് കാലത്തിന് മുമ്പ് വരെ സർവീസ് നടത്തിയിരുന്നത്. കൊച്ചി മെട്രോ പ്രവർത്തന ക്ഷമമായതോടെ എറണാകുളം റൂട്ടിൽ സ്വകാര്യ ബസുകളുടെ എണ്ണം കുറഞ്ഞു. ഇപ്പോൾ അത് 280 ഓളം സർവീസുകളായി കുറഞ്ഞിരിക്കുകയാണ്. സമയക്രമം പാലിക്കാത്തതിനെക്കുറിച്ച് തർക്കം സ്റ്റാൻഡിനകത്ത് പതിവാണ്. ബസുകൾക്ക് കേടുവരുത്തുന്ന സംഭവങ്ങളും ഉണ്ടായിട്ടുണ്ട്. കുറച്ചു നാളുകളായി ജീവനക്കാർ തമ്മിലുള്ള തർക്കം ക്രൂരമായ ആക്രമണങ്ങളിലാണ് കലാശിക്കുന്നത്. ബസ് ജീവനക്കാർ തമ്മിൽ ഏറ്റുമുട്ടിയതിനെ തുടർന്ന് കഴിഞ്ഞ ആഴ്ച നാല് പേരെ പോലീസ് അറസ്റ്റ് ചെയ്തിരുന്നു. ജോലിയില്ലാത്ത ദിവസങ്ങളിൽ ബസ് സ്റ്റാൻഡിൽ തമ്പടിക്കുന്ന ജീവനക്കാർ സംഘർഷത്തിന് വഴിവെക്കുന്നതായും പരാതി ഉയർന്നിട്ടുണ്ട്. ഡ്യൂട്ടിയിലുള്ള ബസ് ജീവനക്കാരിൽനിന്നും കഞ്ചാവ് പിടികൂടിയ സംഭവവും പോലീസിന് തലവേദനയായിട്ടുണ്ട്.പകൽ സമയങ്ങളിലും സ്റ്റാൻഡിൽ ലഹരി കച്ചവടക്കാരുടെ സാന്നിധ്യമുള്ളതായി ജീവനക്കാർ തന്നെ പറയുന്നുണ്ട്. പോലീസ് എയ്ഡ് പോസ്റ്റ് സ്റ്റാൻഡിനകത്ത് വേണമെന്ന് ആലുവ നഗരസഭ പലവട്ടം ആവശ്യപ്പെട്ടിട്ടുണ്ടെങ്കിലും ഫലം കണ്ടില്ല. സേനാംഗങ്ങളുടെ കുറവ് കാരണം നിയമിക്കാനാവില്ലെന്നാണ് പോലീസ് അധികൃതരുടെ വിശദീകരണം. ഇതിനിടയിൽ മുനിസിപ്പൽ ബസ് സ്റ്റാൻഡിൽ ബസ് കാത്തിരിക്കാൻ ഇരിപ്പിടം പോലുമില്ലെന്ന് യാത്രക്കാർ പറയുന്നു. കസേരയുടെ കാലുകൾ ആരോ ഒടിച്ചു കൊണ്ടുപോയതിനാൽ ഹോളോബ്രിക്സിലാണ് ഇരിപ്പിടം താത്കാലികമായി ഉറപ്പിച്ചിരിക്കുന്നത്. സ്വകാര്യ ബസുകൾ ബസ് സ്റ്റാൻഡിൽ കയറാതെ ട്രിപ്പ് നടത്തുന്നതായും യാത്രക്കാർക്ക് പരാതിയുണ്ട്. എടയാർ, അത്താണി റൂട്ട് സ്വകാര്യ ബസുകൾ സ്റ്റാൻഡിന് മുമ്പ് തിരിഞ്ഞ് ദേശീയ പാതയിലേക്ക് നേരിട്ട് കയറുന്നതിനാൽ സ്റ്റാൻഡിനകത്തും പുറത്തും കാത്തു നിൽക്കുന്നവരെ വിഢികളാക്കാറുണ്ട്.കെഎസ്ആർടിസി ബസുകളും മുനിസിപ്പൽ സ്റ്റാൻഡിൽ കയറുന്നത് ഒഴിവാക്കി. നഗരസഭ സ്ഥാപിച്ച കെഎസ്ആർടിസി കാബിൻ ലോട്ടറി കച്ചവടക്കാരുടെ താവളവുമായി. ആലുവ നഗരസഭയുടെ നേതൃത്വത്തിലുള്ള ട്രാഫിക് റെഗുലേറ്ററി കമ്മിറ്റി കൂടി മുനിസിപ്പൽ സ്റ്റാൻഡിലെ പ്രശ്നങ്ങൾ വിവിധ വകുപ്പുകളുടെ സഹായത്തോടെ ജൂണിന് മുമ്പ് പരിഹരിക്കണമെന്നാണ് യാത്രക്കാർ ആവശ്യപ്പെടുന്നത്. നിരീക്ഷണ കാമറ സ്ഥാപിക്കാൻ നഗരസഭ തയാറാകണമെന്നും യാത്രക്കാർ ആവശ്യപ്പെട്ടു.

അലൂമിനിയം ലേബര്‍ കോണ്‍ട്രാക്ടേഴ്‌സ് അസോ. സംസ്ഥാന സമ്മേളനം

കൊച്ചി: അലൂമിനിയം ഫാബ്രിക്കേഷന്‍ മേഖലയില്‍ പ്രവര്‍ത്തിക്കുന്ന അലൂമിനിയം ലേബര്‍ കോണ്‍ട്രാക്ടേഴ്‌സ് അസോസിയേഷ(എഎല്‍സിഎ)ന്‍റെ മൂന്നാമത് സംസ്ഥാന സമ്മേളനവും എക്‌സ്‌പോയും 27, 28 തിയതികളില്‍ കലൂര്‍ സ്റ്റേഡിയത്തിലെ എക്‌സിബിഷന്‍ ഗ്രൗണ്ടില്‍ നടക്കും. 27ന് രാവിലെ 10ന് കെ.ജെ. മാക്‌സി എംഎല്‍എ ഉദ്ഘാടനം ചെയ്യുമെന്ന സംസ്ഥാന പ്രസിഡന്‍റ് മൊയ്തു തോടന്നൂര്‍, ജനറല്‍ സെക്രട്ടറി സുരേഷ് പാത്തിപ്പാറ എന്നിവര്‍ പത്രസമ്മേളനത്തില്‍ പറഞ്ഞു. എക്‌സിബിഷനില്‍ പ്രമുഖ കമ്പനികളുടെ 130ൽപ്പരം സ്റ്റാളുകളുണ്ടാകും. രണ്ട് ദിവസമായി നടക്കുന്ന സമ്മേളനത്തില്‍ വിവിധ സെഷനിലായി സെമിനാറുകളും ബോധവത്കരണ ക്ലാസുകളും നടക്കും. 28ന് വൈകിട്ട് നാലിന് പൊതുസമ്മേളനം ബെന്നി ബെഹനാന്‍ എംപി ഉദ്ഘാടനം ചെയ്യും.

ബൈക്കിൽ എത്തിയ രണ്ടംഗസംഘം വീട്ടമ്മയുടെ സ്വർണമാല കവർന്നു

നെടുമ്പാശേരി: ബൈക്കിൽ എത്തിയ രണ്ടംഗസംഘം റോഡിലൂടെ നടന്നുപോയ വീട്ടമ്മയുടെ സ്വർണമാല പൊട്ടിച്ചെടുത്തു. അത്താണി പാറക്കൽ വീട്ടിൽ പൗലോസിന്‍റെ ഭാര്യ മറിയാമ്മയുടെ രണ്ടര പവന്‍റെ സ്വർണമാലയാണ് കവർന്നത്. ഇന്നലെ ഉച്ചകഴിഞ്ഞ് രണ്ടരയോടെ അത്താണി പൊയ്ക്കാട്ടുശേരി മാർ ബഹനാം പള്ളി റോഡിൽ മാണിയംകുളത്ത് വച്ചാണ് മാല പൊട്ടിച്ചത്. മറിയാമ്മ പൊയ്ക്കാട്ടുശേരിയിലുള്ള സ്വന്തം വീട്ടിലേക്ക് പോകുമ്പോഴായിരുന്നു കവർച്ച. മറിയാമ്മ ഒച്ചവച്ചത് കേട്ട് നാട്ടുകാർ ഓടിയെത്തിയപ്പോഴേക്കും യുവാക്കൾ പെട്ടെന്ന് ബൈക്കോടിച്ച് രക്ഷപ്പെട്ടു. അത്താണി ഭാഗത്തേക്കാണ് ഇവർ പോയത്. ഇരുവരും ഹെൽമറ്റ് ധരിച്ചിരുന്നു. ബൈക്ക് ഓടിച്ചിരുന്നയാൾ നീല ഷർട്ടും പിന്നിലിരുന്നയാൾ ചുവപ്പ് ഷർട്ടുമാണ് ധരിച്ചിരുന്നത്. ചെങ്ങമനാട് പോലീസിൽ പരാതി നൽകി. പോലീസ് വിവിധ സിസിടിവി ദൃശ്യങ്ങൾ പരിശോധിക്കുന്നുണ്ട്.

ദേശീയ ഫെഡറേഷന്‍ അത്‌ലറ്റിക് ചാമ്പ്യന്‍ഷിപ്പിന് ഇന്ന് തുടക്കം

കൊച്ചി: ദേശീയ ഫെഡറേഷന്‍ സീനിയര്‍ അത്‌ലറ്റിക് ചാമ്പ്യന്‍ഷിപ്പിന് എറണാകുളം മഹാരാജാസ് സ്റ്റേഡിയത്തില്‍ ഇന്ന് തുടക്കമാകും. രാജ്യമൊട്ടാകെയുള്ള 580 താരങ്ങളാണ് ദേശീയ ഫെഡറേഷന്‍ സീനിയര്‍ അത്‌ലറ്റിക് ചാമ്പ്യന്‍ഷിപ്പിനായി കൊച്ചിയിലെത്തുന്നത്. നിശ്ചിത പ്രകടനം നടത്തിയാല്‍ താരങ്ങള്‍ക്ക് അടുത്ത മാസം ദക്ഷിണ കൊറിയയില്‍ നടക്കുന്ന ഏഷ്യന്‍ ചാമ്പ്യന്‍ഷിപ്പിന് യോഗ്യത നേടാം. ഇതിനകം യോഗ്യതാ മാര്‍ക്ക് കടന്ന താരങ്ങള്‍ക്ക് ഏഷ്യന്‍ മീറ്റിന് മുമ്പ് പരമാവധി കരുത്ത് തെളിയിക്കാനുള്ള അവസരം കൂടിയാണ് ദേശീയ മീറ്റ്.

ഈസ്റ്റര്‍ ദിനത്തിലും മുനമ്പത്ത് സമരാവേശം

കൊച്ചി: ഈസ്റ്റര്‍ ദിനത്തിലും സമരാവേശം ചോരാതെ മുനന്പം. മുനമ്പം ഭൂസമരം ഇന്ന് 191ാം ദിനത്തിലേക്ക് കടന്നു. സമരത്തിന്‍റെ 190-ാം ദിനത്തില്‍ വേളാങ്കണ്ണി മാതാ പള്ളി ഇടവക വികാരിയും ഭൂസംരക്ഷണസമിതി രക്ഷാധികാരിയുമായ ഫാ. ആന്‍റണി സേവിയര്‍ തറയില്‍, ഫാ. ആന്‍റണി തോമസ് പോളക്കാട്ട്, സമരസമിതി കണ്‍വീനര്‍ ജോസഫ് ബെന്നി കുറുപ്പശേരി, എസ്എന്‍ഡിപി ശാസ്ത്രി സ്മാരക കുടുംബ യൂണിറ്റ് കണ്‍വീനര്‍ ശ്രീദേവി പ്രദീപ്, ജോയിന്‍റ് കണ്‍വീനര്‍ ഗിരിജാമണി തുടങ്ങി നിരവധി പേര്‍ നിരാഹാര സമരത്തില്‍ പങ്കെടുത്തു.

കൈക്കൂലി വാങ്ങുന്നതിനിടെ ബാങ്ക് ഓഡിറ്റര്‍ പിടിയിൽ

കൊച്ചി: കൈക്കൂലി വാങ്ങുന്നതിനിടെ കാനറ ബാങ്ക് ഓഡിറ്റര്‍ വിജിലന്‍സിന്‍റെ പിടിയിലായി‍. മാവേലിക്കര ബ്രാഞ്ച് കണ്‍കറന്‍റ് ഓഡിറ്ററുടെ ചുമതല വഹിക്കുന്ന കെ. സുധാകരനെയാണ് 50,000 രൂപ കൈക്കൂലി വാങ്ങുന്നതിനിടെ എറണാകുളം വിജിലന്‍സ് യൂണിറ്റ് പിടികൂടിയത്. ഓപ്പറേഷന്‍ സ്‌പോട്ട് ട്രാപ്പിന്‍റെ ഭാഗമായി വിജിലന്‍സ് ഒരുക്കിയ കെണിയിലാണ് ഇയാള്‍ കുടുങ്ങിയത്. കൊല്ലം ചിന്നക്കടയിലെ സ്വന്തം വീടിനോടുചേര്‍ന്നുള്ള ഓഫീസ് മുറിയില്‍ പരാതിക്കാരനില്‍ നിന്ന് കൈക്കൂലി വാങ്ങുമ്പോള്‍ കൈയോടെ പിടികൂടുകയായിരുന്നു. 50,000 രൂപയും വിജിലന്‍സ് പിടിച്ചെടുത്തു. കാനറ ബാങ്കിന്‍റെ മാവേലിക്കര ബ്രാഞ്ചില്‍നിന്ന് വായ്പയെടുത്ത, എറണാകുളം പനമ്പിള്ളിനഗര്‍ സ്വദേശിയുടെ പരാതിയിലാണ് അറസ്റ്റ്. വായ്പയെടുത്ത ആളെ ഫോണില്‍ വിളിച്ച് വായ്പ അക്കൗണ്ട് 1.40 കോടി രൂപയുടെ ഓവര്‍ ഡ്രാഫ്റ്റ് ആയതായും റീ ഓഡിറ്റ് വേണമെന്നും അല്ലെങ്കില്‍ ആറുലക്ഷം രൂപ നല്‍കണമെന്നും ഭീഷണിപ്പെടുത്തുകയായിരുന്നു. ഇതോടെ ഏപ്രില്‍ 18ന് ആദ്യ ഗഡുവായി 10,000 രൂപ ഗൂഗിള്‍പേയില്‍ സുധാകരന് അയച്ചുകൊടുത്തു. 19ന് ബാക്കിത്തുക നല്‍കണമെന്ന് ഭീഷണിപ്പെടുത്തിയതോടെ വിജിലന്‍സ് മധ്യമേഖലാ പോലീസ് സൂപ്രണ്ടിനെ വിവരമറിയിച്ചു. തുടര്‍ന്നായിരുന്നു വിജിലന്‍സിന്‍റെ രഹസ്യനീക്കം. പ്രതിയെ മൂവാറ്റുപുഴ വിജിലന്‍സ് കോടതിയില്‍ ഹാജരാക്കും.

ക്ഷേത്രത്തിൽ കാണാതായ യുവാവിനെ കണ്ടെത്തി

ചോറ്റാനിക്കര: ചോറ്റാനിക്കര ദേവീ ക്ഷേത്രത്തിൽ നിന്ന് ഒരാഴ്ച മുൻപ് കാണാതായ യുവാവിനെ കൂനമ്മാവിൽ നിന്നു കണ്ടെത്തിയതായി പോലീസ് അറിയിച്ചു. തമിഴ്നാട് സ്വദേശിയായ കൈലേഷ് കുമാറി(23)നെ കഴിഞ്ഞ 14നാണ് കാണാതായത്. മാനസിക പ്രശ്നമുള്ള യുവാവുമായി ചോറ്റാനിക്കര ദേവീ ക്ഷേത്രത്തിൽ ഭജനയിരിക്കാനെത്തിയതായിരുന്നു കുടുംബം. കൂടെയുള്ളവർ നെയ്യ് വാങ്ങാൻ പോയ സമയത്താണ് യുവാവിനെ കാണാതാകുകയായിരുന്നു. കഴിഞ്ഞ ദിവസമാണ് യുവാവ് നടന്ന് കൂനമ്മാവ് ഇവാഞ്ചലാശ്രമത്തിൽ എത്തിയത്. തുടർന്ന് അധികൃതർ പോലീസിൽ വിവരം അറിയിച്ചു. ചോറ്റാനിക്കര പോലീസ് യുവാവിനെ മജിസ്ട്രേറ്റിന് മുന്നിൽ ഹാജരാക്കി. വൈദ്യ പരിശോധനയ്ക്ക് ശേഷം വീട്ടുകാരോടൊപ്പം വിട്ടയച്ചു.

എസ്. സതീഷ് സിപിഎം ജില്ലാ സെക്രട്ടറി

കൊച്ചി: സിപിഎം എറണാകുളം ജില്ലാ സെക്രട്ടറിയായി സംസ്ഥാന കമ്മിറ്റിയംഗവും സംസ്ഥാന യുവജനക്ഷേമ ബോര്‍ഡ് വൈസ് ചെയര്‍മാനുമായ എസ്. സതീഷിനെ ജില്ലാ കമ്മിറ്റി യോഗം തെരഞ്ഞെടുത്തു. സംസ്ഥാന സെക്രട്ടറി എം.വി. ഗോവിന്ദന്‍ പങ്കെടുത്ത ജില്ലാ കമ്മിറ്റി യോഗത്തിലായിരുന്നു തെരഞ്ഞെടുപ്പ്. നിലവിലെ സെക്രട്ടറി സി.എന്‍. മോഹനന്‍ സംസ്ഥാന സെക്രട്ടേറയറ്റിലേക്ക് തെരഞ്ഞെടുക്കപ്പെട്ട ഒഴിവിലേക്കാണ് സതീഷിനെ തെരഞ്ഞെടുത്തത്. പന്ത്രണ്ടംഗ ജില്ലാ സെക്രട്ടേറിയറ്റിനെയും യോഗത്തില്‍ തെരഞ്ഞെടുത്തു. എസ്. സതീഷ്, എം.പി. പത്രോസ്, പി.ആര്‍. മുരളീധരന്‍, ജോണ്‍ ഫെര്‍ണാണ്ടസ്, സി.കെ. പരീത്, പുഷ്പാദാസ്, ആര്‍. അനില്‍കുമാര്‍, ടി.സി.ഷിബു, സി.ബി. ദേവദര്‍ശനന്‍, കെ.എന്‍. ഉണ്ണികൃഷ്ണന്‍, കെ.എസ്. അരുണ്‍കുമാര്‍, ഷാജി മുഹമ്മദ് എന്നിവരാണ് സെക്രട്ടേറിയറ്റ് അംഗങ്ങള്‍. നാല്‍പത്തിനാലുകാരനായ എസ്. സതീശ് യുവജനസംഘടനാ പ്രവര്‍ത്തനത്തിലൂടെയാണ് പൊതുരംഗത്തെത്തിയത്. ഡിവൈഎഫ്‌ഐ ജില്ലാ സെക്രട്ടറി, സംസ്ഥാന പ്രസിഡന്‍റ്, അഖിലേന്ത്യാ വൈസ് പ്രസിഡന്‍റ് എന്നീ നിലകളിലും പ്രവര്‍ത്തിച്ചു. യോഗത്തില്‍ സിപിഎം സംസ്ഥാന കമ്മിറ്റിയംഗം എം. അനില്‍കുമാര്‍ അധ്യക്ഷനായി. കേന്ദ്രകമ്മിറ്റിയംഗം പി.രാജീവ്, സംസ്ഥാന സെക്രട്ടേറിയറ്റ് അംഗങ്ങളായ എം. സ്വരാജ്, സി.എന്‍. മോഹനന്‍, കെ.കെ. ജയചന്ദ്രന്‍, സംസ്ഥാന കമ്മിറ്റി അംഗങ്ങളായ സി.എം. ദിനേശ്മണി, കെ. ചന്ദ്രന്‍പിള്ള, എസ്. ശര്‍മ തുടങ്ങിയവര്‍ പങ്കെടുത്തു. "പാര്‍ട്ടി കൈവരിച്ച ഐക്യം കൂടുതല്‍ ശക്തിപ്പെടുത്തും' കൊച്ചി: ജില്ലയില്‍ പാര്‍ട്ടി കൈവരിച്ചിട്ടുള്ള ഐക്യം കൂടുതല്‍ ശക്തിപ്പെടുത്തി ജനകീയ ബന്ധം പാര്‍ട്ടിക്ക് അനുകൂലമായി മാറ്റാനുള്ള പ്രവര്‍ത്തനങ്ങള്‍ നടത്തുമെന്ന് എസ്. സതീഷ് മാധ്യമങ്ങളോട് പറഞ്ഞു. ജില്ലയില്‍ പാര്‍ട്ടി കൈവരിച്ചിട്ടുള്ള ഐക്യം പ്രധാന കാര്യമായി കഴിഞ്ഞ എറണാകുളം ജില്ലാ സമ്മേളനം വിലയിരുത്തിയിരുന്നു. പാര്‍ട്ടിക്ക് ജില്ലയില്‍ സംഘടനാപരമായും രാഷ്ട്രീയപരമായും നല്ല അടിത്തറയുണ്ട്. കൂടുതല്‍ ജനകീയ പാര്‍ട്ടിയാക്കി മാറ്റാനുള്ള വലിയ ഉത്തരവാദിത്വമാണ് പാര്‍ട്ടി ഏൽപ്പിച്ചിട്ടുള്ളതെന്നും സതീഷ് പറഞ്ഞു. നയിക്കാൻ യുവമുഖം കൊച്ചി: എറണാകുളത്ത് സിപിഎമ്മിനെ നയിക്കാന്‍ യുവമുഖം. ജില്ലാ സെക്രട്ടറിയായി തെരഞ്ഞെടുക്കപ്പെട്ട 44കാരനായ എസ്. സതീഷ് യുവജന സംഘടനാ പ്രവര്‍ത്തനത്തിലൂടെയാണ് രാഷ്ട്രീയത്തില്‍ പ്രവേശിച്ചത്. 1995ല്‍ ഡിവൈഎഫ്‌ഐ അംഗത്വത്തില്‍ വന്നു. പ്രീഡിഗ്രിക്ക് പിഠിക്കുമ്പോള്‍ ഡിവൈഎഫ്‌ഐ വായനശാലപ്പടി യൂണിറ്റ് കമ്മിറ്റിയുടെ സെക്രട്ടറിയായി. ഡിഗ്രി പഠനകാലത്ത് ഡിവൈഎഫ്‌ഐ ചുമതലയോടൊപ്പം പാര്‍ട്ടിഅംഗത്വത്തിലേക്കും തുടര്‍ന്ന് ബ്രാഞ്ച് സെക്രട്ടറിയുമായി. ഡിവൈഎഫ്‌ഐ കോതമംഗലം മുന്‍സിപ്പല്‍ ഈസ്റ്റ് മേഖലാ പ്രസിഡന്‍റ്, കോതമംഗലം ബ്ലോക്ക് സെക്രട്ടറി, കേരള സംസ്ഥാന കമ്മിറ്റിയുടെ പ്രസിഡന്‍റ്, ഡിവൈഎഫ്‌ഐ എറണാകുളം ജില്ലാ സെക്രട്ടറി, സംസ്ഥാന പ്രസിഡന്‍റ്, അഖിലേന്ത്യാ വൈസ് പ്രസിഡന്‍റ് എന്നീ നിലകളിൽ പ്രവര്‍ത്തിച്ചു. സിപിഎം വായനശാലപ്പടി ബ്രാഞ്ച് സെക്രട്ടറി മുനിസിപ്പല്‍ ഈസ്റ്റ് ലോക്കല്‍ കമ്മിറ്റി അംഗം,കോതമംഗലം ഏരിയ കമ്മിറ്റി അംഗം, എറണാകുളം ജില്ലാ കമ്മിറ്റിയംഗം എന്നീ നിലകളിലും പ്രവര്‍ത്തിച്ചിട്ടുണ്ട്. ഡിവൈഎഫ്‌ഐ എറണാകുളം ജില്ലാ സെക്രട്ടറിയുടെ ചുമതല വഹിക്കുന്ന കാലത്ത് സോളാര്‍ സമരം ഉള്‍പ്പെടെയുള്ള നിരവധി പ്രക്ഷോഭങ്ങൾക്ക് നേതൃത്വം നല്‍കി. ഡിവൈഎഫ്‌ഐ പത്താം അഖിലേന്ത്യാ സമ്മേളനം എറണാകുളത്ത് നടക്കുമ്പോള്‍ അതിന്‍റെ മുഖ്യ സംഘാടകനായിരുന്നു. ഗ്രീന്‍ പ്രോട്ടോകോള്‍ പാലിച്ച് നടന്ന ആദ്യ അഖിലേന്ത്യാ സമ്മേളനമായിരുന്നു അത്. സമ്മേളനത്തിന്‍റെ ഭാഗമായി 13 നിര്‍ധനരായ കുടുംബങ്ങള്‍ക്ക് വീട് വച്ച് നല്‍കി. ഡിവൈഎഫ്‌ഐ മുഖമാസികയായ യുവധാരയുടെ ചീഫ് എഡിറ്റര്‍, മാനേജര്‍ എന്നീ നിലയിലും പ്രവര്‍ത്തിച്ചു. കോതമംഗലം സര്‍വീസ് സഹകരണ ബാങ്കിലെ സീനിയര്‍ ക്ലര്‍ക്കായിരിക്കെയാണ് പാര്‍ട്ടി നിര്‍ദേശപ്രകാരം ജോലി രാജിവച്ച് മുഴുവന്‍ സമയ പ്രവര്‍ത്തകനായി മാറിയത്. കോതമംഗലം അയ്യങ്കാവില്‍ വിരിപ്പേലി മറ്റത്തില്‍ വീട്ടില്‍ ശശിധരന്‍, ലളിതാ ശശീധരന്‍ എന്നിവരുടെ രണ്ടു മക്കളില്‍ ഇളയവനാണ്. കോതമംഗലം സര്‍വീസ് സഹകരണ ബാങ്ക് ജീവനക്കാരി ആര്യയാണ് ഭാര്യ. അയ്യങ്കാവ് ഗവ. ഹൈസ്‌കൂള്‍ എട്ടാം ക്ലാസ് വിദ്യാര്‍ഥി വൈഗ, ഒന്നാം ക്ലാസ് വിദ്യാര്‍ഥി നദിയ എന്നിവര്‍ മക്കളാണ്.

വൃദ്ധയെ കബളിപ്പിച്ച് ഒന്നര പവൻ തട്ടിയതായി പരാതി

ചെറായി: ബന്ധുവാണെന്ന് പറഞ്ഞ് തെറ്റിദ്ധരിപ്പിച്ച് 72കാരിയായ വയോധികയിൽ നിന്ന് 14 ഗ്രാം തൂക്കമുള്ള രണ്ട് സ്വർണവളകൾ തട്ടിയെടുത്തതായി പരാതി. താൻ ബന്ധുവാണെന്നും തന്‍റെ അമ്മ ഓപ്പറേഷനു പണമില്ലാതെ ആശുപത്രിയിൽ ഗുരുതരാവസ്ഥയിലാന്നെന്നും പറഞ്ഞ് തെറ്റിദ്ധരിപ്പിച്ച തട്ടിപ്പുവീരൻ ആദ്യം പണമാണ് ആവശ്യപ്പെട്ടത്. കൈയിൽ പൈസയില്ലെന്ന് പറഞ്ഞപ്പോഴാണ് വളകൾ ഊരിവാങ്ങിയത്. വയോധിക വീട്ടിൽ ചെന്ന് വിവരം പറഞ്ഞപ്പോൾ ആണ് കബളിപ്പിക്കപ്പെട്ടതായി മനസി ലാകുന്നത്. തുടർന്ന് ഇവർ മുനമ്പം പോലീസിൽ പരാതി നൽകുകയായിരുന്നു. വിവരങ്ങൾ അനുസരിച്ച് പോലീസ് ഗൗരീശ്വരം മുതൽ ബേക്കറി വരെയുളള സിസിടിവി ദൃശ്യങ്ങൾ പരിശോധിച്ച് ആളെ തിരിച്ചറിഞ്ഞെങ്കിലും ഇതുവരെ കണ്ടെത്താനായില്ല. കഴിഞ്ഞ ദിവസമാണ് സംഭവം നടന്നത്. ചെറായി ബേക്കറി സ്റ്റോപ്പിനു കിഴക്ക് കാട്ടിപ്പറമ്പിൽ രാജമ്മയാണ് തട്ടിപ്പിന് ഇരയായത്. ചെറുവൈപ്പിലെ ഒരു ബന്ധുവിന്‍റെ വീട്ടിൽ നിന്ന് സ്വന്തം വീട്ടിലേക്ക് വരുന്ന വഴി ചെറായി ഗൗരീശ്വരത്ത് മരുന്നു വാങ്ങാൻ ഇറങ്ങിയപ്പോഴാണ് ഇയാളെ പരിചയപ്പെട്ടതും തട്ടിപ്പിനിരയായതും. ഇതിനുശേഷം വീട്ടിലാക്കി തരാമെന്ന് പറഞ്ഞ് ഇയാൾ വയോധികയെ ബൈക്കിൽ കയറ്റി ബേക്കറി സ്റ്റോപ്പിൽ കൊണ്ടുവന്ന് ഇറക്കിവിടുകയും ചെയ്തു.

ചൂണ്ട ചെവിയിൽ കുരുങ്ങിയ യുവാവിന് അഗ്നിരക്ഷാസേന തുണയായി

മുളന്തുരുത്തി: ചൂണ്ട ചെവിയിൽ കുരുങ്ങിയ യുവാവിന് മുളന്തുരുത്തി അഗ്നിരക്ഷാസേന തുണയായി. അവധിക്കാല വിനോദസഞ്ചാരത്തിനായി ഈസ്റ്റർ ദിനത്തിൽ കുടുംബത്തോടൊപ്പം പൂത്തോട്ടയിലെ റിസോർട്ടിലെത്തിയ കാക്കനാട് സ്വദേശി മനുരാജി(30)ന്‍റെ വലത്തെ ചെവിയിലാണ് ചൂണ്ടയിട്ടുകൊണ്ടിരുന്നതിനിടയിൽ അവിചാരിതമായി ചൂണ്ട കുരുങ്ങിയത്. സാധാരണയിലധികം വലിപ്പമുള്ള ചൂണ്ടയായിരുന്നു. മനുരാജിനു കടുത്ത വേദന അനുഭവപ്പെട്ടതിനെ തുടർന്ന് ഒപ്പമുണ്ടായിരുന്ന ബന്ധുക്കൾ സമീപത്തെ ആശുപത്രികളിൽ എത്തി ച്ചെങ്കിലും ഫലമുണ്ടായില്ല. തുടർന്ന് റിസോർട്ടുടമ മുളന്തുരുത്തി അഗ്നിരക്ഷാസേനയെ വിവരമറിയിക്കുകയായിരുന്നു. ഉടൻ അഗ്നിരക്ഷാ നിലയത്തിലെത്തിച്ചേരാൻ സേനാംഗങ്ങൾ നിർദേശിച്ചു. അവിടെയെത്തിയ മനുരാജിനെ ആശ്വസിപ്പിക്കുകയും ചെറിയ കട്ടർ ഉപയോഗിച്ച് ചൂണ്ട മുറിച്ച് ചൂണ്ടയുടെ പകുതിഭാഗം സാവധാനം വലിച്ച് പുറത്തെടുക്കുകയുമായിരുന്നു. കട്ടർ കൊണ്ട് മുറിക്കുന്ന സമയം മനുരാജിന്‍റെ ചെവിയിൽ ചൂടേൽക്കാതിരിക്കുന്നതിനായി ബോട്ടിലിൽ തണുപ്പിച്ചുവച്ചിരുന്ന വെള്ളം ജീവനക്കാർ ഒഴിച്ചുകൊണ്ടിരുന്നു. ഇതുമൂലം വേദന പരമാവധിയില്ലാതെ ചൂണ്ട മുറിച്ചു മാറ്റാൻ കഴിഞ്ഞു. കാക്കനാട് ഫ്ലാറ്റിൽ താമസിക്കുന്ന മനുരാജും കുടുംബവും സേനാംഗങ്ങൾക്ക് ഈസ്റ്റർ ആശംസകൾ കൈമാറിയാണ് സന്തോഷത്തോടെ മടങ്ങിയത്. ഹോം ഗാർസുമാരായ സുരേഷ്, പാർത്ഥൻ, ജയ എന്നിവർ ചേർന്നാണ് ചെവിയിൽ കുടുങ്ങിയ ചൂണ്ട മുറിച്ചു മാറ്റിയത്. ഇന്നലെ ഉച്ചയ്ക്ക് ഒന്നേകാലോടെയായിരുന്നു സംഭവം.

മുരുക്കുംപാടത്ത് പാചകത്തിനിടെ തീപടർന്ന് മത്സ്യബന്ധന ബോട്ട് കത്തി

നഷ്ടം 25 ലക്ഷം വൈപ്പിൻ: തൊഴിലാളികൾ ഭക്ഷണം പാകം ചെയ്യുന്നതിനിടെ ഗ്യാസ് സ്റ്റൗവിൽ നിന്ന് തീ പടർന്ന് കടവിൽ കെട്ടിയിരുന്ന മത്സ്യബന്ധന ബോട്ട് കത്തിനശിച്ചു. ആളപായമില്ല. ബോട്ടിന്‍റെ മേൽ ഭാഗം ഉൾപ്പെടുന്ന വീൽ ഹൗസ്, ഡക്ക്, എൻജിൻ റൂം എന്നിവ പൂർണമായും കത്തിയമർന്നു. 25 ലക്ഷം രൂപയുടെ നഷ്ടം ഉണ്ടായ തായി കണക്കാക്കുന്നു. ഇന്നലെ ഉച്ചയോടെ മുരുക്കുംപാടത്തായിരുന്നു സംഭവം. പള്ളിക്കടവിൽ കെട്ടിയിട്ടിരുന്ന തമിഴ്നാട് വാണിയകുടി സ്വദേശി അജയുടെ ഉടമസ്ഥതയിലുള്ള ആരോഗ്യ അണ്ണൈ എന്ന മത്സ്യബന്ധന ബോട്ടാണ് അഗ്നിക്കിരയായത്. വടക്കേ ഇന്ത്യക്കാരായ ഇതരസംസ്ഥാന തൊഴിലാളികളാണ് പാചകം ചെയ്തത്. സംഭവമറിഞ്ഞ് ക്ലബ് റോഡ്, മാലിപ്പുറം എന്നിവിടങ്ങളിൽ നിന്ന് രണ്ടു യൂണിറ്റ് അഗ്നിശമന സേനയും ഞാറക്കൽ പോലീസും നാട്ടുകാരും സ്ഥലത്തെത്തി തീ അണച്ചു. തൊട്ടടുത്ത് കിടന്ന കൃപാമോൾ എന്ന ബോട്ടിലേക്കും ചെറുതായി തീ പടർന്നിരുന്നു. അതിവേഗം തീ നിയന്ത്രണ വിധേയമാക്കാനായതിനാൽ മറ്റു ബോട്ടുകളിലേക്ക് തീ പടരുന്നത് തടയാനായി. മാത്രമല്ല, തീ ഡീസൽ ടാങ്കിലേക്ക് എത്തും മുമ്പ് പൂർണമായി അണച്ചതും ദുരന്തത്തിന്‍റെ തീവ്രത കുറച്ചു.

കെഎസ്ആർടിസി അതിജീവന യാത്ര പിറവത്തുനിന്ന് ആരംഭിച്ചു

പിറവം: കെഎസ്ആർടിസിയെയും ജീവനക്കാരെയും സംരക്ഷിക്കണമെന്നും, ഇടതു സർക്കാരിന്‍റെ തൊഴിലാളിവിരുദ്ധ നയങ്ങൾ അവസാനിപ്പിക്കണമെന്നാവശ്യപ്പെട്ടും കോൺഗ്രസിന്‍റെ ട്രേഡ് യൂണിയനായ ട്രാൻസ്പോർട്ട് ഡെമോക്രാറ്റിക് ഫെഡറേഷൻ നടത്തുന്ന അതിജീവന യാത്രയുടെ 10-ാം ദിവസത്തെ പര്യടനം പിറവത്തുനിന്നും ആരംഭിച്ചു. കാസർഗോഡ് നിന്ന് ആരംഭിച്ച ജാഥ കെഎസ്ആർടിസിയുടെ എല്ലാ ഡിപ്പോകളിലുമെത്തി 24ന് തിരുവനന്തപുരത്ത് സമാപിക്കും. 30ന് കെഎസ്ആർടിസി യൂണിയനുകളുടെ റഫറണ്ടം നടക്കുന്നതിന് മുന്നോടിയായിട്ടാണ് ജാഥ സംഘടിപ്പിച്ചിട്ടുള്ളത്. പിറവം കെഎസ്ആർടിസി ഡിപ്പോയിൽ പര്യടനത്തോടനുബന്ധിച്ച് നടന്ന സ്വീകരണ സമ്മേളനം ഡിസിസി സെക്രട്ടറി കെ.ആർ. പ്രദീപ്കുമാർ ഉദ്ഘാടനം ചെയ്തു. ടിഡിഎഫ് പിറവം ഡിപ്പോ യൂണിറ്റ് പ്രസിഡന്‍റ് ജോസ് മാത്യു അധ്യക്ഷത വഹിച്ചു. ജാഥാ ക്യാപ്റ്റൻ എം. വിൻസന്‍റ് എംഎൽഎ, ബ്ലോക്ക് കോൺഗ്രസ് പ്രസിഡന്‍റ് പി.സി. ജോസ്, തോമസ് മല്ലിപ്പുറം, രാജു പാണാലിക്കൽ തുടങ്ങിയവർ പ്രസംഗിച്ചു.

വൃക്ക രോഗികളുടെ സംഗമം നടത്തി

മൂവാറ്റുപുഴ: ജനറൽ ആശുപത്രിയിൽ വൃക്ക രോഗികളുടെ സംഗമവും ഡയലൈസർ വിതരണവും നടത്തി. നഗരസഭാ അധ്യക്ഷൻ പി.പി എൽദോസ് ഉദ്ഘാടനം ചെയ്തു. നഗരസഭാ സ്ഥിരംസമിതി അധ്യക്ഷൻ പി.എം. അബ്ദുൾസലാം അധ്യക്ഷത വഹിച്ചു. നഗരസഭാ സ്ഥിരംസമിതി അധ്യക്ഷരായ ജോസ് കുര്യാക്കോസ്, നിസ അഷറഫ്, നഗരസഭാംഗങ്ങളായ ജോളി മണ്ണൂർ, നെജില ഷാജി, അമൽ ബാബു, സെബി കെ. സണ്ണി, ഡോ. മീന, ഡോ. ജോസഫ് ചാക്കോ, ഡോ. ജെല്ലി ജോർജ്, സാബു ജോർജ് (റെഡ് ക്രോസ്) എന്നിവർ പ്രസംഗിച്ചു. ആശാവർക്കർമാർ, പാലിയേറ്റീവ് പ്രവർത്തകർ തുടങ്ങിയവർ പങ്കെടുത്തു. നഗരസഭാ സ്ഥിരംസമിതി അധ്യക്ഷൻ പി.എം. അബ്ദുൾ സലാമിന്‍റെ ഓണറേറിയം ഉപയോഗിച്ചാണ് വൃക്ക രോഗികൾക്ക് ഡയലൈസറുകൾ വാങ്ങി നൽകിയത്. മൂവാറ്റുപുഴ ജനറൽ ആശുപത്രിയിൽ രജിസ്റ്റർ ചെയ്ത 20 പേർക്കാണ് ആദ്യഘട്ടത്തിൽ ഡയലൈസർ വിതരണം ചെയ്തത്.

കോതമംഗലം ബ്ലോക്ക് പഞ്ചായത്തിന് പുരസ്കാരം

കോതമംഗലം: കേരള പഞ്ചായത്ത് വാർത്ത ചാനൽ പുരസ്കാരോത്സവത്തോടനുബന്ധിച്ചുള്ള അവാർഡ് കോതമംഗലം ബ്ലോക്ക് പഞ്ചായത്ത് കരസ്ഥമാക്കി. സംസ്ഥാനത്തെ ഗ്രാമ - ബ്ലോക്ക് - ജില്ലാ പഞ്ചായത്തുകൾ, നഗരസഭകൾ നടപ്പാക്കുന്ന വ്യത്യസ്തങ്ങളായ പദ്ധതികൾ ഡോക്യുമെന്‍റേഷൻ നടത്തിയാണ് അവാർഡ് നൽകിയത്. മികച്ച കുടിവെള്ള പദ്ധതികൾ, സ്മാർട് അങ്കണവാടി, കളിസ്ഥലങ്ങൾ, കാർഷിക, ക്ഷീര മേഖലയിലെ പദ്ധതികൾ, ഗ്രാമീണ വികസന പദ്ധതികൾ, തുടങ്ങി എല്ലാ മേഖലയിലും നടത്തിയ പ്രവർത്തനങ്ങൾ പരിശോധിച്ച് അവ ഡോക്യുമെന്‍ററിയായി ചിത്രീകരിച്ചാണ് അവാർഡിന് സമർപ്പിച്ചത്. തൃശൂർ ടൗണ്‍ ഹാളിൽ നടന്ന ചടങ്ങിൽ മന്ത്രി ആർ. ബിന്ദുവിൽ നിന്നും കോതമംഗലം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ, വൈസ് പ്രസിഡന്‍റ് ഡയാന നോബി, സ്ഥിരം സമിതി അധ്യക്ഷരായ ജോമി തെക്കേക്കര, സാലി ഐപ്, ജെയിംസ് കോറന്പേൽ, ബ്ലോക്ക് പഞ്ചായത്തംഗങ്ങളായ നിസമോൾ ഇസ്മായിൽ, ടി.കെ. കുഞ്ഞുമോൻ, ആനിസ് ഫ്രാൻസിസ് എന്നിവർ ചേർന്ന് പുരസ്കാരം ഏറ്റുവാങ്ങി.

ലഹരിവിരുദ്ധ ബോധവത്കരണം നടത്തി

കോതമംഗലം: നാഷണൽ എക്സ് സർവീസ്മെൻ കോ-ഓർഡിനേഷൻ കമ്മിറ്റി, ജവാൻ എക്സ് സർവീസ്മെൻ മൾട്ടി പർപ്പസ് കോ-ഓപ്പറേറ്റീവ് സൊസൈറ്റി എന്നിവയുടെ സംയുക്താഭിമുഖ്യത്തിൽ കോതമംഗലം മലയിൻകീഴ് വിമുക്തഭട ഭവനിൽ ലഹരി വിരുദ്ധ ബോധവത്കരണ ക്ലാസും റാലിയും നടത്തി. മൂവാറ്റുപുഴ പോലീസ് ട്രാഫിക് യൂണിറ്റ് സ്റ്റേഷൻ ഓഫീസർ കെ.പി. സിദ്ദീഖ് ക്ലാസ് നയിച്ചു. രക്ഷാധികാരി എ.ടി. ജോർജ് ഉദ്ഘാടനം നിർവഹിച്ചു. യൂണിറ്റ് പ്രസിഡന്‍റ് എം.കെ. നാരായണൻ നായർ അധ്യക്ഷത വഹിച്ചു. സമ്മേളന ശേഷം വിമുക്തഭട ഭവന് മുന്നിൽ പ്ലാക്കാർഡുകളും പിടിച്ച് വിമുക്തഭടന്മാരും കുടുംബാംഗങ്ങളും ലഹരിവിരുദ്ധ പ്രതിജ്ഞയെടുത്തു. പ്രസിഡന്‍റ് പ്രതിജ്ഞ ചൊല്ലിക്കൊടുത്തു. സെക്രട്ടറി എം.എം. മീരാൻ, സംസ്ഥാന അസിസ്റ്റന്‍റ് സെക്രട്ടറി ഇ.ടി. ചന്ദ്രസേനൻ, കുട്ടന്പുഴ പഞ്ചായത്തംഗം ജോഷി പൊട്ടക്കൽ, പി.എം. നസീർ, ജോസ് വർഗീസ്, സിബിച്ചൻ സി. കല്ലട, ആർ. സജി, എം.കെ. നൗഫൽ, ഫാമിലി അസോസിയേഷൻ പ്രസിഡന്‍റ് ശ്രീജ ദിവാകരൻ, ഗ്രേസി ഷിബു, പ്രേമസുധ ശ്രീമതി, തുളസി വാസു എന്നിവർ നേതൃത്വം നൽകി.

ആനിക്കാട് സ്കൂളിലെ മോഷണം : പ്രതിയുമായി പോലീസ് തെളിവെടുപ്പ് നടത്തി

മൂവാറ്റുപുഴ: ആനിക്കാട് സെന്‍റ് സെബാസ്റ്റ്യന്‍ സ്‌കൂളില്‍ മോഷണം നടത്തിയ പ്രതിയുമായി തെളിവെടുപ്പ് നടത്തി. പേഴയ്ക്കാപ്പിള്ളി തട്ടുപറമ്പ് കാനാംപറമ്പില്‍ വീരാന്‍കുഞ്ഞ്(കുരിശ് ജലീല്‍ -67)നെയാണ് മൂവാറ്റുപുഴ സിഐ ബേസില്‍ തോമസിന്‍റെ നേതൃത്വത്തില്‍ അറസ്റ്റ് ചെയ്തത്. ആനിക്കാട് സെന്‍റ് സെബാസ്റ്റ്യന്‍ സ്‌കൂളില്‍ വ്യാഴാഴ്ച പുലർച്ചെ പ്രാധാന അധ്യാപികയുടെ റൂം കുത്തിത്തുറക്കുകയും, ക്യാമറ കേടുവരുത്തുകയും, മോണിറ്റര്‍ ഉള്‍പ്പെടെയുള്ള സാധനങ്ങള്‍ മോഷ്ടിക്കുകയും ചെയ്തതിനാണ് അറസ്റ്റ്. മോണിറ്റര്‍ സ്‌കൂള്‍ കോമ്പൗണ്ടിലെ കിണറ്റില്‍ വലിച്ചെറിയുകയും ചെയ്തു. പിക്കാസ് ഉപയോഗിച്ചാണ് റൂമിന്‍റെ പൂട്ട് തകര്‍ത്തത്. ഓഫീസ് റൂമില്‍ നിന്നും ആയിരത്തോളം രൂപ മോഷ്ടിക്കുകയും ചെയ്തു. കിണറ്റില്‍ ഉപേക്ഷിച്ച മോണിറ്റര്‍ മൂവാറ്റുപുഴ അസി. ഫയര്‍ ഓഫീസര്‍ മുഹമ്മദ് ഇഖ്ബാലിന്‍റെ നേതൃത്വത്തില്‍ ഉള്ള ഫയര്‍ഫോഴ്‌സ് സംഘം മുങ്ങിയെടുത്തു. സ്‌കൂളില്‍ ഇതിന് മുന്പും ഒന്നിലധികം തവണ മോഷണം നടന്നിട്ടുണ്ട്. പ്രതി കഴിഞ്ഞ ദിവസങ്ങളില്‍ കോതമംഗലം, അങ്കമാലി, ഇരിഞ്ഞാലക്കുട എന്നിവിടങ്ങളില്‍ മോഷണം നടത്തിയതായി ചോദ്യം ചെയ്യലില്‍ സമ്മതിച്ചിട്ടുണ്ട്. ഇയാളുടെ പേരിൽ പാലക്കാട് നോര്‍ത്ത്, പാലക്കാട് സൗത്ത്, ചിറ്റൂര്‍, കോങ്ങാട്, മഞ്ചേരി, തൃശൂര്‍ ഈസ്റ്റ്, കളമശേരി എന്നിവിടങ്ങളില്‍ നിരവധി മോഷണ-ഭവനഭേദന കേസുകള്‍ നിലവിലുണ്ട്. ശാസ്ത്രീയ അന്വേഷണത്തിലൂടെ പ്രതിയെ പിടികൂടിയ അന്വേഷണസംഘത്തില്‍ എസ്‌ഐമാരായ വിഷ്ണു രാജു, എ.കെ. ജയചന്ദ്രന്‍, പി.സി. ജയകുമാര്‍, കെ. അനില്‍, എം.വി. ദിലീപ്കുമാര്‍, അസിസ്റ്റന്‍റ് സബ് ഇന്‍സ്പെക്ടര്‍ ജമാല്‍, സീനിയര്‍ സിപിഓമാരായ ബിബില്‍ മോഹന്‍, ഷാന്‍, അജന്തി, സ്വാമിനാഥന്‍ എന്നിവരാണ് ഉണ്ടായിരുന്നത്.

മുരിക്കാശേരി സെന്‍റ് മേരീസ് പള്ളിയുടെ കൂദാശയും തിരുനാളും

മുരിക്കാശേരി: പുതുതായി നിർമിച്ച മുരിക്കാശേരി സെന്‍റ് മേരീസ് ഫൊറോന പള്ളിയുടെ കൂദാശയും ഇടവക തിരുനാളും 22ന് ആരംഭിക്കും. ഉച്ചകഴിഞ്ഞ് 2.30ന് ഇടുക്കി രൂപതാധ്യക്ഷൻ മാർ ജോണ്‍ നെല്ലിക്കുന്നേൽ ദേവാലയം കൂദാശ ചെയ്തു ദൈവത്തിനു സമർപ്പിക്കും. 2017 ഓഗസ്റ്റ് 15ന് ഇടുക്കി രൂപത വികാരി ജനറാൾ മോണ്‍. ജോസ് പ്ലാച്ചിക്കൽ തറക്കല്ലിട്ട ദൈവാലയത്തിന്‍റെ കട്ടിളവയ്പ്പ് ആശീർവദിച്ചത് ഇടുക്കി രൂപതയുടെ പ്രഥമ മെത്രാൻ മാർ മാത്യു ആനിക്കുഴിക്കാട്ടിലാണ്. 22ന് ഉച്ചകഴിഞ്ഞ് രണ്ടിന് മാർ ജോണ്‍ നെല്ലിക്കുന്നേലിനു സ്വീകരണം നൽകും. 2.30ന് ആരംഭിക്കുന്ന കൂദാശാ കർമത്തിനു മോണ്‍. ജോസ് കരിവേലിക്കൽ, മോണ്‍. ജോസ് പ്ലാച്ചിക്കൽ, മോണ്‍. ഏബ്രഹാം പുറയാറ്റ് എന്നിവർ സഹകാർമികത്വം വഹിക്കും. 23ന് രാവിലെ 6.30ന് വിശുദ്ധ കുർബാന, ഗ്രോട്ടോ വെഞ്ചരിപ്പ് - മോണ്‍. ജോസ് കരിവേലിക്കൽ, 9.30ന് വിശുദ്ധ കുർബാന, ആദ്യകുർബാന സ്വീകരണം - സത്ന രൂപത മെത്രാൻ മാർ ജോസഫ് കൊടക്കല്ലിൽ. 24ന് രാവിലെ 6.30ന് വിശുദ്ധ കുർബാന, 9.30ന് തിരുപ്പട്ട ശുശ്രൂഷ, ഡീക്കൻ കുര്യൻ (ഐബിൻ) കാരിശേരിൽ മാർ ജോണ്‍ നെല്ലിക്കുന്നേലിന്‍റെ കൈവയ്പ് ശുശ്രൂഷവഴി പൗരോഹിത്യം സ്വീകരിക്കും. 25ന് വൈകുന്നേരം 4.15ന് തിരുനാൾ കൊടിയേറ്റ്, ലദീഞ്ഞ്, ആഘോഷമായ തിരുനാൾ കുർബാന, സന്ദേശം - ബിഷപ് എമിരറ്റസ് മാർ ജോർജ് പുന്നക്കോട്ടിൽ, രാത്രി ഏഴിന് നാടകം - കോതമംഗലം ഡിവൈൻ തീയേറ്റേഴ്സിന്‍റെ "കാറ്റാടിമലയിലെ മണിമുഴക്കം'. 26ന് രാവിലെ 6.30ന് വിശുദ്ധ കുർബാന, അന്പ് എഴുന്നള്ളിക്കൽ, വൈകുന്നേരം 4.45ന് ആഘോഷമായ തിരുനാൾ കുർബാന - കോട്ടയം അതിരൂപത മെത്രാപ്പോലീത്ത ആർച്ച്ബിഷപ് മാർ മാത്യു മൂലക്കാട്ട്, 6.15ന് പ്രദക്ഷിണം കോളജ് കുരിശടിയിലേയ്ക്ക്, പ്രസംഗം - റവ. ഡോ. ബെന്നോ പുതിയാപറന്പിൽ, രാത്രി എട്ടിന് ആകാശവിസ്മയം. 27ന് രാവിലെ 6.30ന് വിശുദ്ധ കുർബാന, അന്പ് എഴുന്നള്ളിക്കൽ, വൈകുന്നേരം 4.45ന് ആഘോഷമായ തിരുനാൾ കുർബാന, സന്ദേശം - കോതമംഗലം രൂപത മെത്രാൻ മാർ ജോർജ് മഠത്തിക്കണ്ടത്തിൽ, 6.15ന് പ്രദക്ഷിണം ഹോസ്പിറ്റൽ കവലചുറ്റി, 7.30ന് ഗാനമേള - കൊച്ചിൻ കലാഭവൻ. 28ന് രാവിലെ 6.30ന് വിശുദ്ധ കുർബാന, സെമിത്തേരി സന്ദർശനം - മോണ്‍. ജോസ് പ്ലാച്ചിക്കൽ എന്നിവയാണ് പരിപാടികളെന്ന് വികാരി ഫാ. ജോസ് നരിതൂക്കിൽ, അസി. വികാരി ഫാ. സേവ്യർ മേക്കാട്ട്, കൈക്കാരന്മാരായ സണ്ണി കരിവേലിക്കൽ, സണ്ണി കാരിശേരിൽ, സെബാസ്റ്റ്യൻ മേടയ്ക്കൽ, ജോയി പറന്പിൽ എന്നിവർ അറിയിച്ചു.

തൊമ്മൻകുത്ത് സംഭവം: വനം വകുപ്പിന്‍റേത് ഫാസിസ്റ്റ് നടപടിയെന്ന് എംപി

കോതമംഗലം: തൊമ്മൻകുത്തിൽ വനം വകുപ്പും പോലീസും കുരിശിന്‍റെ വഴി തടഞ്ഞതിൽ സർക്കാർ മറുപടി പറയണമെന്ന് ഡീൻ കുര്യാക്കോസ് എംപി ആവശ്യപ്പെട്ടു. 60 വർഷമായുള്ള കൈവശഭൂമിയിൽ അവകാശം സ്ഥാപിക്കാനുള്ള വനം വകുപ്പിന്‍റെ നീക്കം ദുരുദ്ദേശപരമാണ്. കുരിശ് പൊളിച്ചും കുരിശിന്‍റെ വഴി തടഞ്ഞും വനവിസ്തൃതി വർധിപ്പിക്കാൻ സർക്കാർ നോക്കുന്നത് അപകടമാണെന്നും എംപി പറഞ്ഞു. ജില്ലയിൽ വനം റവന്യൂ വകുപ്പുകളുടെ ജോയിന്‍റ് വെരിഫിക്കേഷൻ പൂർത്തിയാക്കുന്നതിന് മുന്പ് കൈവശഭൂമിയിൽ അവകാശം സ്ഥാപിക്കാൻ വേണ്ടിയാണ് കുരിശ് പൊളിച്ചതെന്നും ഇത് അംഗീകരിക്കാൻ കഴിയില്ലെന്നും എംപി ആരോപിച്ചു. പീഡാനുഭവ വാരാചരണത്തിലെ പ്രാർഥനയ്ക്കായി സ്ഥാപിച്ച കുരിശ് പൊളിക്കുകയും കുരിശിന്‍റെ വഴി തടയുകയും ചെയ്ത വനം വകുപ്പ് ഉദ്യോഗസ്ഥർക്കെതിരേ നടപടി സ്വീകരിക്കണമെന്നും ഈ ആവശ്യമുന്നയിച്ച് മുഖ്യമന്ത്രിക്ക് കത്ത് നൽകിയതായും എംപി പറഞ്ഞു.

ഹൗസിംഗ് ബോർഡിന് പിടിവാശി : കോതമംഗലം റവന്യു ടവർ മാറാലകെട്ടി നശിക്കുന്നു

കോതമംഗലം: വാടകയുടെ കാര്യത്തിൽ ഹൗസിംഗ് ബോർഡിന്‍റെ പിടിവാശി മൂലം കോതമംഗലം റവന്യു ടവർ ആളൊഴിഞ്ഞ് പ്രേതാലയമായി മാറുന്നു. ഏഴുവർഷം മുന്പ് സർക്കാർ ഓഫീസുകൾ റവന്യു ടവറിൽ നിന്നും കൂടൊഴിഞ്ഞശേഷം ഈ ബഹുനില മന്ദിരത്തിന്‍റെ ഏറിയ പങ്കും കാലിയായി കിടക്കുകയാണ്. കോതമംഗലത്തെ മുഴുവൻ സർക്കാർ ഓഫീസുകളും മുന്പ് ഇവിടെയാണ് പ്രവർത്തിച്ചിരുന്നത്. നഗരത്തിൽ ഹൈറേഞ്ച് ബസ്‌സ്റ്റാൻഡിന് ചേർന്ന് മിനി സിവിൽ സ്റ്റേഷൻ വന്നതോടെ ഓഫീസുകളെല്ലാം അവിടേക്ക് മാറ്റി. ഇതോടെയാണ് ഹൗസിംഗ് ബോർഡിന്‍റെ ഉടമസ്ഥതയിലുള്ള റവന്യു ടവറിൽനിന്ന് ആളൊഴിഞ്ഞത്. ഒരു കാലത്ത് താലൂക്കിന്‍റെ ഭരണസിരാ കേന്ദ്രമായിരുന്ന മന്ദിരത്തിൽ ഇപ്പോൾ ഏതാനും വ്യാപാരികളും സംരംഭകരും മാത്രമാണുള്ളത്. സർക്കാർ ഓഫീസുകൾ പ്രവർത്തിക്കുന്നു എന്ന കാരണത്താലാണ് കച്ചവടക്കാരും മറ്റ് സംരംഭകരും ഇവിടെ സ്ഥാപനങ്ങൾ തുടങ്ങിയത്. അന്ന് വൻതിരക്കും ഉണ്ടായിരുന്നു. പിന്നീട് സർക്കാർ ഓഫീസുകൾ ഒഴിഞ്ഞതോടെ ഈ സ്ഥാപനങ്ങളുടെ അവസ്ഥയും അധോഗതിയായി. വരുമാനം ഗണ്യമായി കുറഞ്ഞപ്പോഴും ഹൗസിംഗ് ബോർഡ് വാടകനിരക്കിൽ മാറ്റംവരുത്താനും തയാറായില്ല. വാടകക്കാർ പല തവണ സമീപിച്ചെങ്കിലും ഹൗസിംഗ് ബോർഡ് ഇളവ് നൽകില്ലെന്ന പിടിവാശിയിൽ തന്നെ തുടരുകയാണ്. 2000ൽ ആണ് റവന്യു ടവർ സ്ഥാപിതമായത്. സർക്കാർ ഓഫീസുകളിൽ നിന്ന് ഹൗസിംഗ് ബോർഡ് വാടക ഈടാക്കിയിരുന്നു. ഇക്കാരണത്താലാണ് റവന്യു വകുപ്പിന് കീഴിൽ മിനി സിവിൽ സ്റ്റേഷൻ നിർമിച്ച് ഓഫീസുകൾ മാറ്റിയത്. ഓഫീസുകൾക്ക് വേണ്ടി രൂപകല്പന ചെയ്ത റവന്യു ടവർ വ്യാപാര സ്ഥാപനങ്ങൾക്ക് പ്രവർത്തനത്തിന് അനുയോജ്യമല്ല. സ്വകാര്യ സ്ഥാപനങ്ങളുടെ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കുമാണ് അനുയോജ്യം. വിവിധ സ്ഥാപനങ്ങൾ തുടങ്ങാൻ പലരും ഹൗസിംഗ് ബോർഡിനെ സമീപിക്കുന്നുണ്ടെങ്കിലും ഹൗസിംഗ് ബോർഡുമായി ധാരണയിലെത്താൻ കഴിയുന്നില്ലെന്നാണ് ഇക്കൂട്ടർ പറയുന്നത്. ഉയർന്ന വാടകനിരക്കാണ് സംരംഭകരെ അകറ്റുന്നതിന് കാരണം. വൻ നഷ്ടം നേരിട്ടിട്ടും വിട്ടുവീഴ്ചക്ക് ഹൗസിംഗ് ബോർഡ് തയ്യാറാകാത്തത് വിചിത്രമാണ്. വാടകയിനത്തിൽ ലഭിക്കേണ്ട ലക്ഷകണക്കിന് രൂപയാണ് വർഷംതോറും ഹൗസിംഗ് ബോർഡ് നഷ്ടപ്പെടുത്തികൊണ്ടിരിക്കുന്നത്. സമീപകാലത്ത് എംഎൽഎ അനുവദിച്ച ഫണ്ട് ഉപയോഗിച്ച് പരിസരം മോടിപിടിപ്പിച്ചിരുന്നു. എന്നാൽ കാലാകാലങ്ങളിൽ ആവശ്യമായ അറ്റകുറ്റപ്പണികൾ നടത്തുന്നില്ലെന്ന ആക്ഷേപവും ഉണ്ട്. വാടകയിലും മറ്റ് വ്യവസ്ഥകളിലും ഇളവ് വരുത്തി സംരംഭകരെ ആകർഷിക്കാനുള്ള നടപടിയാണ് സർക്കാരിൽ നിന്നും ഹൗസിംഗ് ബോർഡിൽ നിന്നും ഉണ്ടാകേണ്ടതെന്നാണ് ആവശ്യം. റവന്യു ടവർ സജീവമായാൽ നിരവധി പേർക്ക് തൊഴിലും വരുമാനവും ലഭ്യമാകും. മന്ത്രിമാരെയടക്കം നേരിൽകണ്ട് ആവശ്യം ഉന്നയിച്ചിട്ടും അനുകൂല തീരുമാനമുണ്ടാകുന്നില്ലെന്നും ആക്ഷേപമുണ്ട്.

ദുഃഖവെള്ളി ആചരിച്ചു

കോതമംഗലം: കോതമംഗലം സെന്‍റ് ജോർജ് കത്തീഡ്രലിൽ പ്രാർഥനാ നിറവിൽ ദുഖവെള്ളി ആചരണം നടത്തി. കത്തീഡ്രലിലെ പ്രധാന പീഡാനുഭവ ചടങ്ങുകളിലൊന്നായ നഗരംചറ്റി നടത്തിയ പരിഹാര പ്രദഷിണം ഭക്തനിർഭരമായി. കോതമംഗലം ടൗണ്‍ ചുറ്റിയുള്ള കുരിശിന്‍റെ വഴിയിൽ നൂറുകണക്കിന് വിശ്വാസികൾ പങ്കുകൊണ്ടു. ബിഷപ്പ് മാർ ജോർജ് മഠത്തികണ്ടത്തിൽ മുഖ്യകാർമികത്വം വഹിച്ചു. വികാരി റവ. ഡോ. തോമസ് ചെറുപറന്പിൽ നേതൃത്വം നൽകി. കോതമംഗലം സെന്‍റ് ജോർജ് കത്തീഡ്രലിൽ പുലർച്ചെ മൂന്നിന് ആരംഭിക്കുന്ന ഉയർപ്പിന്‍റെ തിരുകർമങ്ങൾക്ക് ബിഷപ് മാർ ജോർജ് മഠത്തിക്കണ്ടത്തിൽ മുഖ്യ കാർമികത്വം വഹിക്കും. കോലഞ്ചേരി: സീറോമലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ ദുഃഖവെള്ളിയാഴ്ച കോലഞ്ചേരി ക്യൂൻ മേരീസ് കത്തോലിക്കാ പള്ളിയിൽ പീഡാനുഭവ ശുശ്രൂഷയ്ക്ക് നേതൃത്വം വഹിച്ചു. വികാരി ഫാ. പോൾ വി. മാടൻ സഹ കാർമികത്വം വഹിച്ചു. രാവിലെ 6.30 ഓടെ പള്ളിയിൽ തിരുകർമങ്ങൾക്ക് തുടക്കമായി. പീഡാനുഭവ ശുശ്രൂഷകൾക്കും വചനപ്രഘോഷണത്തിനും കുരിശിന്‍റെ വഴിക്കും ശേഷം കോലഞ്ചേരി ടൗണിലേക്ക് നഗരി കാണിക്കൽ പരിഹാര പ്രദക്ഷിണവും നടന്നു. കൂത്താട്ടുകുളം: കൂത്താട്ടുകുളം തിരുകുടുംബ ദേവാലയത്തിൽ വികാരി ഫാ. ജെയിംസ് കുടിലിൽ, അസിസ്റ്റന്‍റ് വികാരി ഫാ. ജോസഫ് മരോട്ടിക്കൽ, ദേവമാത ചാപ്ലിൻ ഫാ. കുര്യാക്കോസ് നരുതൂക്കിൽ എന്നിവരുടെ നേതൃത്വത്തിൽ പ്രത്യേക പ്രാർഥനകളും, പീഡാനുഭവ ചരിത്രവായനയും, കുരിശിന്‍റെ വഴിയും നടന്നു. ഇലഞ്ഞി സെന്‍റ് പീറ്റേഴ്സ് ആന്‍റ് സെന്‍റ് പോൾസ് ഫൊറോന പള്ളിയിൽ ദുഃഖവെള്ളി ആചരണത്തിന് വികാരി ഫാ. ജോസഫ് ഇടുത്തുംപറന്പിൽ, സഹവികാരി ഫാ. ജോസഫ് ആലാനിക്കൽ, ഫാ. ജെയിംസ് മംഗലത്ത്, ഫാ. ജോർജ് വടയാറ്റുകുഴി എന്നിവർ നേതൃത്വം നൽകി. വടകര സെന്‍റ് ജോണ്‍സ് കത്തോലിക്ക ദേവാലയത്തിൽ ദുഃഖവെള്ളി ആചരണത്തിന് വികാരി ഫാ. ജോണ്‍ പുതിയാമറ്റം, സഹവികാരി ഫാ. മാത്യു പനങ്ങാട്ട് എന്നിവർ നേതൃത്വം നൽകി.

ആലുവ-മൂന്നാർ രാജപാത : അട്ടിമറിക്ക് സർക്കാർ ശ്രമം: ഡീൻ കുര്യാക്കോസ് എംപി

കോതമംഗലം: പഴയ ആലുവ - മൂന്നാർ രാജപാത അട്ടിമറിക്കാൻ സർക്കാർ തലത്തിൽ ശ്രമം നടക്കുന്നതായി ഡീൻ കുര്യാക്കോസ് എംപി. തുടർ നടപടികൾക്കായി വനം വകുപ്പ് തന്നെ അന്വേഷണ സമിതിയെ നിയോഗിച്ചതിൽ എന്ത് പ്രയോജനമാണുള്ളതെന്ന് സർക്കാർ വ്യക്തമാക്കണമെന്നും അദ്ദേഹം ആവശ്യപ്പെട്ടു. കോതമംഗലം രൂപത മുൻ അധ്യക്ഷൻ മാർ ജോർജ് പുന്നക്കോട്ടിലിനെതിരെ പോലും കള്ളക്കേസെടുത്ത് ജനകീയ ആവശ്യം സന്പൂർണമായി നിരാകരിക്കുന്ന വനം വകുപ്പ് ഉദ്യോഗസ്ഥർ എന്ത് തീരുമാനമാണ് എടുക്കുകയെന്നത് വ്യക്തമാണെന്നും അദ്ദേഹം പറഞ്ഞു. പഴയ രാജപാത സംബന്ധിച്ച് പ്രിൻസിപ്പൽ കണ്‍സർവേറ്റർ ഓഫ് ഫോറസ്റ്റ് രാജേഷ് രവീന്ദ്രൻ നൽകുന്ന റിപ്പോർട്ടിന് ആസ്പദമായി തുടർ നടപടികൾ സ്വീകരിക്കുമെന്നാണ് മന്ത്രി പി. രാജീവിന്‍റെ അധ്യക്ഷതയിൽ ചേർന്ന യോഗത്തിന്‍റെ തീരുമാനം. കേസ് പിൻവലിക്കുമെന്ന് പറഞ്ഞത് ശക്തമായ സാമൂഹ്യ സമ്മർദ്ദത്തിന്‍റെ പശ്ചാത്തലത്തിലാണ്. ഈ സാഹചര്യത്തിൽ പദ്ധതി അട്ടിമറിക്കുന്നതിനുള്ള ഗൂഢനീക്കമാണ് സർക്കാരിന്‍റെ ഭാഗത്ത് നിന്നും ഉണ്ടായിരുക്കുന്നതെന്നും തീരുമാനം അംഗീകരിക്കാനാവില്ലെന്നും ഡീൻ കുര്യാക്കോസ് എംപി വ്യക്തമാക്കി.

ബാലികയോട് ലൈംഗികാതിക്രമം: യുവാവ് പിടിയിൽ

പെരുമ്പാവൂർ: പ്രായപൂർത്തിയാകാത്ത പെൺകുട്ടിയോട് ലൈംഗികാതിക്രമം നടത്തിയ കേസിൽ യുവാവ് അറസ്റ്റിൽ. മാറമ്പിള്ളി പള്ളിപ്രത്ത് വാടകയ്ക്കു താമസിക്കുന്ന മലപ്പുറം സൗത്ത് പൊന്നാനി ചന്തക്കാരൻ വീട്ടിൽ സിദ്ധിഖ് (സിദ്ധിക്കുട്ടി-33) നെയാണ് പെരുമ്പാവൂർ പോലീസ് അറസ്റ്റ് ചെയ്തത്. ഇയാൾ പെൺകുട്ടി താമസിക്കുന്ന വീട്ടിൽ അതിക്രമിച്ച് കയറി ലൈംഗികാതിക്രമം നടത്തുകയായിരുന്നു. ഇയാളെ തമിഴ്നാട്ടിലെ തിരുപ്പൂരിൽ നിന്നാണ് അന്വേഷണ സംഘം പിടികൂടിയത്. സിഐ ടി.എം. സൂഫിയുടെ നേതൃത്വത്തിലുള്ള അന്വേഷണ സംഘത്തിൽ എസ്ഐമാരായ റിൻസ് എം. തോമസ്, പി.എം. റാസിഖ്, എഎസ്ഐ അബ്ദുൾ മനാഫ്, സിപിഒ മാരായ എം.എച്ച്. ഷഫീക്ക്, എ.കെ.നജ്മി, ഷഹാന സലീം എന്നിവരുമുണ്ടായിരുന്നു.

നെടുന്പാശേരിയിൽ പിക്കപ്പിൽ ലോറി ഇടിച്ചു

നെടുമ്പാശേരി: റോഡരികിൽ നിർത്തിയിട്ടിരുന്ന പിക്കപ്പ് വാനിൽ അമിതവേഗത്തിൽ എത്തിയ ലോറി ഇടിച്ചു മറിഞ്ഞു. ദേശീയ പാതയിൽ അങ്കമാലി -ആലുവ റൂട്ടിൽ നെടുമ്പാശേരി സെന്‍റ് ജോർജ് യാക്കോബായ പള്ളിക്ക് സമീപം ഇന്നലെ വൈകിട്ട് മൂന്നോടെയായിരുന്നു അപകടം. റോഡരികിൽ നിർത്തിയിട്ടിരുന്ന പിക്കപ്പിന് പിന്നിൽ ആലുവ ഭാഗത്തേക്ക് പോവുകയായിരുന്ന ലോറി ഇടിക്കുകയായിരുന്നു. ഇടിയുടെ ആഘാതത്തിൽ പിക്കപ്പ് റോഡിൽ വട്ടം മറിഞ്ഞു. പാലക്കാട് നിന്നും എറണാകുളത്തേക്ക് ജിപ്സം ബോർഡ് ആയി പോവുകയായിരുന്നു പിക്കപ്പ് ഡ്രൈവർ പുറത്ത് നിന്നിരുന്നതിനാൽ പരിക്കേൽക്കാതെ രക്ഷപ്പെട്ടു. സംഭവം അറിഞ്ഞ് സ്ഥലത്ത് എത്തിയ നെടുമ്പാശേരി പോലീസ് ലോറി ഡ്രൈവറെ കസ്റ്റഡിയിൽ എടുത്തു.

റൂറൽ ജില്ലാ പോലീസ് മേധാവിക്ക് നേട്ടങ്ങളോടെ പടിയിറക്കം

ആലുവ: കേന്ദ്ര ഡപ്യൂട്ടേഷനിൽ ഡൽഹി എൻഐഎയിലേക്ക് സ്ഥലം മാറിപ്പോകുന്ന റൂറൽ ജില്ലാ പോലീസ് മേധാവി ഡോ. വൈഭവ് സക്സേനയ്ക്ക് ആലുവയിൽ യാത്രയയപ്പ് നൽകി. കുറ്റാന്വേഷണ രംഗത്ത് നിരവധി ട്രാക്ക് റിക്കോർഡുകൾ സൃഷ്ടിച്ച ശേഷമാണ് ഡോക്ടർ കൂടിയായ വൈഭവ് സക്സേന ഡൽഹിയിലേക്ക് പോകുന്നത്. 2023 നവംബർ 21ന് ആണ് റൂറൽ ജില്ലയുടെപോലീസ് മേധാവിയായി ഡോ. വൈഭവ് സക്സേന ചുമതലയേറ്റത്. ലഹരിക്കടത്തുകാരെ പിടികൂടുന്നതിലും ലഹരി വ്യാപനം തടയുന്നതിലും അദ്ദേഹം പ്രത്യേക ശ്രദ്ധ ചെലുത്തിയിരുന്നു. അദ്ദേഹം നടപ്പാക്കിയ ഓപ്പറേഷൻ ക്ലീൻ പദ്ധതിയിൽ. ഒന്നര വർഷത്തിനുള്ളിൽ 250 കിലോയിലേറെ കഞ്ചാവും, നാലു കിലോയോളം എംഡിഎംഎയും പിടികൂടി. കോളിളക്കം സൃഷ്ടിച്ച നിരവധി കേസുകൾ തെളിയിക്കാനും അദ്ദേഹത്തിനു കഴിഞ്ഞു. എസ്പി ആവിഷ്കരിച്ച് നടപ്പിലാക്കി വിജയിപ്പിച്ച പ്രധാന രണ്ട് പദ്ധതികളാണ് ഉറപ്പ് , ഉറപ്പ് @ സ്ക്കൂൾ എന്നിവ. പരാതിക്കാരെ പ്രത്യേക ടീം എസ്പി ഓഫീസിൽ നിന്ന് നേരിട്ട് വിളിച്ച് ഫീഡ്ബാക്ക് എടുക്കുന്ന പദ്ധതിയാണ് ഉറപ്പ്. പരാതിക്കാർക്ക് ഏറെ ആശ്വാസം നൽകുന്ന പദ്ധതിയാണിത്. അമ്പതിനായിരം പേരെ ഇതിനകം വിളിച്ചു കഴിഞ്ഞു. സ്കൂളുകളിൽ പോലീസുമായി ചേർന്ന് ഒരുക്കുന്ന പദ്ധതിയാണ് ഉറപ്പ് @ സ്കൂൾ. പോലീസുദ്യോഗസ്ഥരുടെ കാര്യത്തിലും അതീവ ശ്രദ്ധാലുവാണ്. ഓരോ സ്റ്റേഷനിലേയും മികച്ച പ്രവർത്തനം കാഴ്ചവയ്ക്കുന്ന ഉദ്യോഗസ്ഥർക്ക് മാസം തോറും ഗുഡ് സർവീസ് എൻട്രി നൽകിയിരുന്നു. ഇത്തരത്തിൽ 400ൽ ഏറെ ഉദ്യോഗസ്ഥർക്ക് ജിഎസ്‌സി നൽകി. എന്തെങ്കിലും പ്രശ്നങ്ങളോ, ആവശ്യങ്ങളോ ഉണ്ടങ്കിൽ ഏതു നേരത്തും വന്ന് കാണാൻ കഴിയുമായിരുന്നതായി ഉദ്യോഗസ്ഥർ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]