ADVERTISEMENT

ADVERTISEMENT

മാലിന്യ ശുദ്ധീകരണ പ്ലാന്‍റിലെ സാധന സാമഗ്രികൾ കാണാതായതായി പരാതി

ആലുവ: പാലസ് റോഡില്‍ പ്രവര്‍ത്തനം നിലച്ച ആലുവ നഗരസഭയുടെ ട്രീറ്റ്‌മെന്‍റ് പ്ലാന്‍റ് കെട്ടിടത്തിലെ ശിലാഫലകങ്ങള്‍ അടക്കം സാധനസമഗ്രികള്‍ കാണാതായതായി ജില്ലാ പോലീസ് മേധാവിക്ക് പരാതി.

സമീപത്തെ അദ്‌വൈതാശ്രമം അധികൃതരുമായി വഴിത്തര്‍ക്കം, സ്ഥലത്തര്‍ക്കം, കൊടികള്‍ എടുത്തുമാറ്റല്‍ തുടങ്ങിയവ ഉണ്ടായതിന് പിന്നാലെയാണ് പുതിയ സംഭവവികാസം.

ADVERTISEMENT

മംഗലത്തുതാഴത്തെ കലുങ്ക് പുനർനിർമാണം പൂർത്തിയായി

കൂത്താട്ടുകുളം: പാലാ റോഡിൽ മംഗലത്തുതാഴത്തെ കലുങ്ക് പുനർനിർമാണം പൂർത്തിയായി. 17 ദിവസം കൂടി കഴിഞ്ഞാൽ ഗതാഗതത്തിന് തുറന്നു കൊടുക്കും. കോൺഗ്രീറ്റ് ബലവത്താകാനുള്ള ദിവസങ്ങൾ പൂർത്തിയായ ശേഷമേ തുറന്നു നൽകുവെന്ന് അധികൃതർ പറഞ്ഞു. റോഡിലെ ഗതാഗതം പൂർണമായി നിരോധിച്ചശേഷം കലുങ്ക് പൂർണമായും പൊളിച്ചുനീക്കിയത് പ്രദേശവാസികൾക്കും വ്യാപാരികൾക്കും ഏറെ ബുദ്ധിമുട്ട് ഉണ്ടാക്കി. നഗരസഭയിലെ മൂന്നു ഡിവിഷനുകളിലെ ജനങ്ങൾ കിലോമീറ്ററുകൾ ചുറ്റിയും നടന്നുമാണ് നഗരത്തിലെത്തുന്നത്. ഒരു കോടി 20 ലക്ഷം രൂപ ചിലവഴിച്ചാണ് ഒരു വർഷം മുമ്പ് രാമപുരം കവല മുതൽ മംഗലത്തുതാഴം വരെയുള്ള റോഡ് നവീകരണവും കലുങ്ക് നിർമാണവും പൂർത്തീകരിച്ചത്. നിർമാണം പൂർത്തിയായി ആഴ്ചകൾ കൊണ്ട് റോഡ് തകർന്നു. ഒരുമാസം മുമ്പ് കലുങ്കിന്‍റെ മുകൾഭാഗത്തെ കോൺക്രീറ്റ് സ്ലാബ് തകർന്നതിന്‍റെ അടിസ്ഥാനത്തിലാണ് കലുങ്ക് പൂർണമായി പൊളിച്ചു നിർമിച്ചത്. കലുങ്ക് നിർമിച്ച കരാറുകാരന്‍റെ ചെലവിലാണ് പുനർനിർമാണം നടന്നിരിക്കുന്നത്. കലുങ്കിന്‍റെ ഇരുവശങ്ങളിലും ഉള്ള അപ്രോച്ച് റോഡുകളും പൊളിച്ചു നീക്കിയ ടൈലുകളും പൂർവസ്ഥിതിയിലാക്കുന്ന മുറയ്ക്ക് റോഡ് തുറന്നു നൽകും.

ഭൂതത്താൻകെട്ട് മിനി ജല വൈദ്യുത പദ്ധതി എത്രയും വേഗം പൂർത്തീകരിക്കും: മന്ത്രി

കോതമംഗലം: ഭൂതത്താൻകെട്ട് മിനി ജല വൈദ്യുത പദ്ധതിയുമായി ബന്ധപ്പെട്ട് കെഎസ്എബിയും കരാർ കമ്പനിയുമായുള്ള മീറ്റിംഗിന്‍റെ അടിസ്ഥാനത്തിലും തുടർന്നുള്ള ഹൈക്കോടതി ഉത്തരവിന്‍റെ അടിസ്ഥാനത്തിലും പദ്ധതി എത്രയും വേഗം പൂർത്തീകരിക്കുന്നതിനുള്ള തുടർനടപടികൾ കെഎസ്ഇബി സ്വീകരിക്കുമെന്ന് വൈദ്യുതി മന്ത്രി എ.കെ. കൃഷ്ണൻകുട്ടി നിയമസഭയിൽ അറിയിച്ചു. ഭൂതത്താൻകെട്ട് മിനി ജല വൈദ്യുത പദ്ധതിയുടെ ശേഷിക്കുന്ന പ്രവർത്തികൾ പൂർത്തീകരിച്ചു പദ്ധതി അടിയന്തരമായി കമ്മീഷൻ ചെയ്യണമെന്ന് ആവശ്യപ്പെട്ടുകൊണ്ട് ആന്‍റണി ജോൺ എംഎൽഎയുടെ സബ്മിഷന് മറുപടിയായിട്ടാണ് മന്ത്രി ഇക്കാര്യം വ്യക്തമാക്കിയത്.

കോതമംഗലത്ത് കൗണ്‍സിലറുടെ നേതൃത്വത്തിൽ 25 കുടുംബങ്ങള്‍ക്ക് വീടൊരുങ്ങി

25 വീടുകളുടെ സമര്‍പ്പണവും 6 വീടുകളുടെ താക്കോല്‍ദാനവും 20ന് കോതമംഗലം: കോതമംഗലത്ത് കൗണ്‍സിലറുടെ നേതൃത്വത്തിൽ 25 കുടുംബങ്ങള്‍ക്ക് വീടൊരുങ്ങി. കോതമംഗലം നഗരസഭ 18-ാം വാര്‍ഡില്‍ കൗണ്‍സിലര്‍ ഷിബു കുര്യാക്കോസിന്‍റെ നേതൃത്വത്തിലാണ് വീടുകളുടെ നിര്‍മാണം പൂര്‍ത്തിയാക്കിയത്. 25 വീടുകളുടെ സമര്‍പ്പണവും ആറ് വീടുകളുടെ താക്കോല്‍ദാനവും 20ന് രാവിലെ 9.30-ന് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. 1.25 ഏക്കര്‍ സ്ഥലത്ത് മൂന്ന് സെന്‍റ് വീതം സ്ഥലത്താണ് വില്ലകള്‍ പോലെ റോഡിന് ഇരുവശത്തുമായാണ് ചെറു വീടുകള്‍ നിര്‍മിച്ചിരിക്കുന്നത്. 3.5 കോടി രൂപയാണ് നിര്‍മാണച്ചെലവ്. വാടക കെട്ടിടങ്ങളിലും വാസയോഗ്യമല്ലാത്ത വീടുകളിലും താമസിച്ചിരുന്നവർ വീടെന്ന സ്വപ്‌നം യാഥാര്‍ഥ്യമായതിന്‍റെ സന്തോഷത്തിലാണ്. തെരഞ്ഞെടുപ്പ് വേളയില്‍ വീട് സന്ദര്‍ശന സമയത്താണ് ഇവരുടെ ദുരവസ്ഥ ശ്രദ്ധയില്‍പ്പെട്ടതെന്ന് ഷിബു കുര്യാക്കോസ് പറഞ്ഞു. വീടില്ലാത്ത നിരവധി പേര്‍ ഇനിയുമുണ്ട്. ഇത്തരത്തില്‍ നൂറ് വീട് നിര്‍മിച്ച് നല്‍കണമെന്നാണ് തന്‍റെ സ്വപ്‌നമെന്ന് ഷിബു പറഞ്ഞു. മാര്‍ ബേസില്‍ സ്‌കൂളിന് പിന്നില്‍ 500 മീറ്റര്‍ മാറി കുരൂര്‍ തോടിന് അരുകിലായി ഇന്ദിരാനഗറിലാണ് 25 ഭവനങ്ങള്‍ നിര്‍മിച്ചിരിക്കുന്നത്. പ്രധാനമന്ത്രി ആവാസ് യോജന പദ്ധതിയിലൂടെ 16 വീടുകളും ലയണ്‍സ് ക്ലബ് മുഖേന അഞ്ച് വീടുകളുമാണ് നിര്‍മിച്ചിരിക്കുന്നത്. ലയണ്‍സ് ക്ലബ് ഇതു കൂടാതെ 13 ലക്ഷം രൂപ കൂടി നിര്‍മാണ സഹായമായി നല്‍കിയിരുന്നു. നാല് പേര്‍ക്ക് ഏഴ് ലക്ഷം രൂപയുടെ വായ്പയിലൂടെയാണ് വീട് പണിത് നല്‍കിയിരിക്കുന്നത്. സ്ഥലം വാങ്ങിയാണ് ഓരോരുത്തര്‍ക്കും 500 മുതല്‍ 650 ചതുരശ്രയടി വിസ്തീര്‍ണത്തിലാണ് വീട് നിര്‍മിച്ച് നല്‍കിയത്. 16 അടി വീയില്‍ വഴിയും വെളിച്ചവും വെള്ളവും ലഭ്യമാക്കിയിട്ടുണ്ട്. വീടുകളുടെ സമര്‍പ്പണ ചടങ്ങില്‍ സിനിമാ താരം സിദ്ദിഖ് മുഖ്യാതിഥിയാവും. കോതമംഗലം രൂപതാധ്യക്ഷന്‍ ജോര്‍ജ് മഠത്തിക്കണ്ടത്തില്‍, ഏലിയാസ് മാര്‍ യൂലിയോസ് മെത്രാപ്പോലീത്ത എന്നിവര്‍ അനുഗ്രപ്രഭാഷണം നടത്തും. ആന്‍റണി ജോണ്‍ എംഎല്‍എ അധ്യക്ഷത വഹിക്കും. എംപിമാരായ ഡീന്‍ കുര്യാക്കോസ്, ബെന്നി ബഹനാന്‍, എംഎല്‍എമാരായ മാത്യു കുഴല്‍നാടന്‍, എല്‍ദോസ് കുന്നപ്പിള്ളി, റോജി എം. ജോണ്‍, മുന്‍ മന്ത്രി ടി.യു. കുരുവിള, ജില്ല പഞ്ചായത്ത് പ്രസിഡന്‍റ് മനോജ് മൂത്തേടന്‍, നഗരസഭാധ്യക്ഷന്‍ കെ.കെ. ടോമി, ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീര്‍ എന്നിവര്‍ പെങ്കെടുക്കും.

മൗണ്ട് കാർമൽ കോളജിന് മിനിസ്റ്റേഴ്‌സ് എക്സലൻസ് അവാർഡ്

കോതമംഗലം: ഉന്നത വിദ്യാഭ്യാസ മേഖലയിൽ മികവു പുലർത്തുന്ന സ്ഥാപനങ്ങൾക്കായി സംസ്ഥാന സർക്കാർ ഏർപ്പെടുത്തിയ എക്സലൻഷ്യ-2025 മിനിസ്റ്റേഴ്‌സ് എക്സലൻസ് അവാർഡ് കറുകടം മൗണ്ട് കാർമൽ കോളജിന് ലഭിച്ചു. തിരുവനന്തപുരം ടാഗോർ തീയറ്ററിൽ നടന്ന ചടങ്ങിൽ മന്ത്രി ആർ. ബിന്ദുവിൽനിന്നും കറുകടം മൗണ്ട് കാർമൽ കോളജിന് വേണ്ടി പ്രിൻസിപ്പൽ ഫാ. ഷാജി മംഗലത്ത്, ഐക്യുഎസി കോർഡിനേറ്റർ മിസ്. അനീറ്റ സാറ തങ്കച്ചൻ, ഐക്യുഎസി സെക്രട്ടറി രമ്യ ചന്ദ്രൻ എന്നിവർ ചേർന്ന് ഏറ്റുവാങ്ങി. നാക് എപ്ലസ്പ്ലസ്, എപ്ലസ്, എ ഗ്രേഡ് നേടിയിട്ടുള്ള സ്ഥാപനങ്ങളേയും എൻഐആർഎഫ്, കെഐആർഎഫ് എന്നിവയിൽ മുന്നിൽ നിൽക്കുന്ന സ്ഥാപനങ്ങളേയും മിനിസ്റ്റേഴ്സ‌് അവാർഡ് നൽകി ആദരിച്ചു.

കടവൂരില്‍ ഓപ്പണ്‍ ജിംനേഷ്യം ഉദ്ഘാടനം ചെയ്തു

പോത്താനിക്കാട്: കടവൂര്‍ ഗവ. വൊക്കേഷണല്‍ ഹയര്‍ സെക്കന്‍ഡറി സ്കൂള്‍ കോമ്പൗണ്ടില്‍ ബ്ലോക്ക് പഞ്ചായത്ത് ഫണ്ട് ഉപയോഗിച്ചു നിര്‍മിച്ച ഓപ്പണ്‍ ജിംനേഷ്യത്തിന്‍റെ ഉദ്ഘാടനം കോതമംഗലം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീര്‍ നിര്‍വഹിച്ചു. പൈങ്ങോട്ടൂര്‍ പഞ്ചായത്ത് പ്രസിഡന്‍റ് ജിജി ഷിജു അധ്യക്ഷത വഹിച്ചു. ജില്ലാപഞ്ചായത്തംഗം റാണിക്കുട്ടി ജോര്‍ജ്, ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി, പഞ്ചായത്ത് വൈസ് പ്രസിഡന്‍റ് സാബു മത്തായി, ബ്ലോക്ക് പഞ്ചായത്തംഗങ്ങളായ ജോമി തെക്കേക്കര, ജെയിംസ് കോറമ്പേല്‍, സാലി ഐപ്പ്, ആനീസ് ഫ്രാന്‍സിസ് തുടങ്ങിയവര്‍ പ്രസംഗിച്ചു.

പിറവം ഐടിഐയിൽ യുവ സംരംഭക സംഗമം

പിറവം: എംഎസ്എം ഐടിഐയില്‍ യുവ സംരംഭക സംഗമം നടത്തി. പരിപാടിയുടെ ഉദ്ഘാടനം എംഎസ്എം ഐടിഐ രക്ഷാധികാരി ബിഷപ്പ് യൂഹാനോൻ മാർ തിയോഡോഷ്യസ് നിർവഹിച്ചു. ചടങ്ങിൽ മുനിസിപ്പൽ ചെയർപേഴ്സൺ ജൂലി സാബു, വൈസ് ചെയർമാൻ കെ.പി. സലിം, കൗൺസിലർ ഏലിയാമ്മ ഫിലിപ്പ് എന്നിവർ പങ്കെടുത്തു. പുതിയ അധ്യായന വർഷ ആരംഭിക്കുന്നതിന്‍റെ ഭാഗമായി നടന്ന ചടങ്ങിലാണ് മികച്ച സംരംഭകരെ ആദരിക്കലും ഐടിഐ കാമ്പസിൽ തുടങ്ങുന്ന ആൽഫ ഇൻഡസ്ട്രീസിന്‍റെ ഉദ്ഘടനവും നടന്നത്. യുവ സംരഭക സംഗമത്തിൽ മികച്ച യുവ സംരംഭകനും സംസ്ഥാന കർഷക അവാർഡ് ജേതാവുമായ മോനു മാമ്മൻ, മികച്ച വ്യവസായ സംരംഭകൻ സോണി ജോൺ, ഐടിഐ മുൻ സ്റ്റുഡന്‍റും പ്രധാനമന്ത്രിയുടെ അവാർഡ് ജേതാവുമായ കെ.കെ. ബിനു എന്നിവർക്കു എക്സലൻസ് അവാർഡ് നൽകി ആദരിച്ചു. തുടർന്ന് മുഖാമുഖം മോട്ടിവേഷൻ സംവാദം നടന്നു. ഐടിഐയില്‍ കഴിഞ്ഞ വർഷം വിജയം നേടിയവരെ പുരസ്കാരം നൽകി ആദരിച്ചു. സർട്ടിഫിക്കറ്റുകളും വിതരണം ചെയ്തു. ചടങ്ങിൽ ഐടിഐ ഡയറക്ടർ ഫാ.ഡോ. വർഗീസ് ബേബി മടത്തിക്കുന്നത്ത്, പ്രിസിപ്പൽ നീതു സോമൻ എന്നിവർ പ്രസംഗിച്ചു.

കുന്നത്തുനാട് മണ്ഡലത്തിൽ പുതുതായി 2864 മുൻഗണനാ റേഷൻ കാർഡുകൾ

കോലഞ്ചേരി: സർക്കാർ അധികാരത്തിൽ വന്നശേഷം കുന്നത്തുനാട് മണ്ഡലത്തിൽ പുതുതായി 2864 പേർക്ക് മുൻഗണന റേഷൻ കാർഡുകളും 164 പേർക്ക് എഎവൈ റേഷൻ കാർഡുകളും വിതരണം ചെയ്തതായി ഭക്ഷ്യ പൊതുവിതരണ മന്ത്രി ജി.ആർ. അനിൽ നിയമസഭയിൽ വ്യക്തമാക്കി. ഇതു സംബന്ധിച്ച പി.വി. ശ്രീനിജിൻ എംഎൽഎ യുടെ നിയമസഭാ ചോദ്യത്തിന് മറുപടിയായിട്ടാണ് മന്ത്രി ഇക്കാര്യം അറിയിച്ചത്. സർക്കാർ അധികാരത്തിൽ വന്നശേഷം കുന്നത്തുനാട് മണ്ഡലത്തിൽനിന്നും മുൻഗണന വിഭാഗത്തിലേക്കുള്ള കാർഡുകൾക്കായി 3527 അപേക്ഷകളും എഎ വൈ കാർഡുകൾക്കായി 183 അപേക്ഷകളും സർക്കാരിൽ ലഭ്യമായിട്ടുണ്ട്. ഇതിനിന്നാണ് 2864 പേർക്ക് മുൻഗണന കാർഡുകളും 164 പേർക്ക് എ എ വൈ കാർഡുകളും അനുവദിച്ചത്. അനർഹരായ 1085 പേരെ മുൻഗണനാ കാർഡുകളിൽ നിന്നും 198 പേരെ എഎവൈ കാർഡുകളിൽനിന്നും ഒഴിവാക്കിയതായും മന്ത്രി അറിയിച്ചു.

താറാവ് കൂട്ടിൽനിന്നും പെരുമ്പാമ്പിനെ പിടികൂടി

പോത്താനിക്കാട്: തെക്കേ പുന്നമറ്റത്ത് താറാവ് കൂട്ടിൽ കയറിയ പെരുമ്പാമ്പിനെ പിടികൂടി കുളമാവ് വനമേഖലയിൽ തുറന്നു വിട്ടു. കുഴിവേലിക്കുന്നേൽ വിജയന്‍റെ താറാവ് കൂട്ടിനുള്ളിലെ വലയിൽ കുടുങ്ങിക്കിടന്ന പെരുമ്പാമ്പിനെ അയൽവാസിയായ കോൺഗ്രസ് ബൂത്ത് പ്രസിഡന്‍റ് ബാബു ഭാർഗവനാണ് ഇന്നലെ രാവിലെ കണ്ടെത്തിയത്. ഉടൻ വനപാലകരെ വിളിച്ചു വിവരമറിയച്ചതിനെ തുടർന്ന് കാളിയാർ ഫോറസ്റ്റ് ഓഫീസിലെ ഉദ്യോഗസ്ഥരെത്തി പാമ്പിനെ പിടികൂടുകയായിരുന്നു.

കൂത്താട്ടുകുളത്തെ റോഡുകളുടെ അറ്റകുറ്റപ്പണികൾ തിങ്കളാഴ്ച മുതൽ

കൂത്താട്ടുകുളം: വിവിധ റോഡുകളുടെ അറ്റകുറ്റപ്പണികൾ തിങ്കളാഴ്ച മുതൽ ആരംഭിക്കും. കൂത്താട്ടുകുളം മാർക്കറ്റ് റോഡ്, കൂത്താട്ടുകുളം-പാലാ റോഡ്, കമ്പം-തേനി ഹൈവേയുടെ ഭാഗമായിട്ടുള്ള പാലക്കുഴ റോഡ് തുടങ്ങിയ റോഡുകളുടെ അറ്റപ്പണികൾ ആദ്യഘട്ടത്തിൽ പൂർത്തിയാകും. കാലാവസ്ഥ അനുകൂലമല്ലാത്തതിനാൽ കുഴികളിൽ മെറ്റൽ നികത്തിയാകും പണികൾ നടത്തുക. കാലാവസ്ഥ അനുകൂലമാകുന്ന മുറയ്ക്ക് ടാറിംഗ് ജോലികൾ ആരംഭിക്കും. കൂത്താട്ടുകുളം-പാലാ റോഡിൽ രാമപുരം കവല മുതൽ മംഗലത്തുതാഴം വരെയുള്ള റോഡ് പൂർണമായി തകർന്നിട്ട് രണ്ട് മാസത്തിലേറെയായി. കാൽനടയാത്രയ്ക്ക് പോലും കഴിയാത്ത അവസ്ഥയിലാണ് നിലവിൽ ഈ റോഡ്. മംഗലത്തു താഴത്തെ കലുങ്ക് നിർമാണത്തിനായി നിലവിൽ ഈ റോഡിലെ ഗതാഗതം പൂർണമായി നിരോധിച്ചിരിക്കുകയാണ്. ഗതാഗത നിരോധന കാലയളവിൽ റോഡിൽ അറ്റകുറ്റപ്പണികൾ നടത്താത്തതിൽ വലിയ ആക്ഷേപം നിലവിലുണ്ട്. ഗതാഗതം നിരോധിച്ച സാഹചര്യത്തിൽ ഈ പ്രദേശത്തെ കച്ചവട സ്ഥാപനങ്ങളിലും പ്രദേശത്ത് താമസിക്കുന്നവർക്കും വലിയ ബുദ്ധിമുട്ടുകളാണ് ഉണ്ടാകുന്നത്. കാലാവസ്ഥ അനുകൂലമായ സാഹചര്യത്തിൽ റോഡിന്‍റെ അറ്റകുറ്റപ്പണികൾ നടത്താതെ മഴ ആരംഭിച്ചപ്പോൾ നിർമാണ പ്രവർത്തനങ്ങൾ തുടങ്ങുന്നത് വലിയ ആക്ഷേപത്തിന് ഇടയാക്കുന്നുണ്ട്.

ബാറ്ററി മോഷ്ടിച്ചെന്നാരോപിച്ച് മർദനം; നിയമസഭയിൽ ഉന്നയിച്ച് എംഎൽഎ

മൂവാറ്റുപുഴ: ഇന്‍വെര്‍ട്ടര്‍ ബാറ്ററി മോഷ്ടിച്ചെന്നാരോപിച്ച് മൂവാറ്റുപുഴ പോലീസ് ആരക്കുഴ വള്ളിക്കട സ്വദേശിയായ അമല്‍ ആന്‍റണിയെ ആളുമാറി മര്‍ദിച്ച സംഭവം നിയമസഭയില്‍ അടിയന്തര പ്രമേയ ചര്‍ച്ചയ്ക്കിടെ ഉന്നയിച്ച് മാത്യു കുഴല്‍നാടന്‍ എംഎല്‍എ. എന്നാല്‍ പോലീസിന്‍റെ പ്രവര്‍ത്തിയെ ന്യായീകരിക്കുന്ന വാദമാണ് മുഖ്യമന്ത്രി നിയമസഭയില്‍ എംഎല്‍എയ്ക്ക് മറുപടിയായി നല്‍കിയത്. സിസിടിവി ദൃശ്യങ്ങളുടെ അടിസ്ഥാനത്തില്‍ അന്വേഷണത്തിനിടെയുണ്ടായ നിസഹകരണം മൂലമാണ് അമലിനെ സ്റ്റേഷനിലേക്ക് കൊണ്ടുപോയതെന്നും കടയുടമയുടെ സ്ഥിരീകരണത്തിന് ശേഷം വിട്ട് അയക്കുകയാണ് ചെയ്തതെന്നും മുഖ്യമന്ത്രി സഭയില്‍ പറഞ്ഞു. സംഭവത്തില്‍ വ്യാപകമായ പ്രതിഷേധങ്ങള്‍ ഉയര്‍ന്നിട്ടും ഒരു മാസത്തില്‍ അധികം പിന്നിട്ടിട്ടും നിയമസഭയില്‍ ചോദ്യം ഉയര്‍ന്നപ്പോള്‍ മാത്രമാണ് ഉന്നത ഉദ്യോഗസ്ഥര്‍ റിപ്പോര്‍ട്ട് നല്‍കാന്‍ പോലും തയ്യാറായത്. കാക്കി കുപ്പായം ധരിച്ച് അഴിമതിയും, അക്രമവും, ഗുണ്ടായിസവും നടത്തുന്ന ഉദ്യോഗസ്ഥരെ സംരക്ഷിക്കുന്ന സമീപനമാണ് സര്‍ക്കാരിന്‍റെതെന്നും എംഎല്‍എ കുറ്റപ്പെടുത്തി. കഴിഞ്ഞ 12നാണ് സംഭവം നടന്നത്. അമല്‍ നിരപരാധിയാണെന്ന് തെളിഞ്ഞതോടെ വീട്ടിലേക്ക് പൊയ്‌ക്കൊള്ളാന്‍ പോലീസ് നിര്‍ദേശിക്കുകയായിരുന്നു. പോലീസ് മര്‍ദനത്തില്‍ അമലിന്‍റെ മുതുകിനും കഴുത്തിനും ഗുരുതര പരിക്കേറ്റിരുന്നതാണ് മെഡിക്കല്‍ റിപ്പോര്‍ട്ട്. ഒരു മാസത്തിനു ശേഷവും ചികിത്സയിലാണ്.

മഴ: കച്ചേരിത്താഴത്തെ ഗര്‍ത്തം മൂടുന്നത് വൈകുന്നു

മൂവാറ്റുപുഴ: കച്ചേരിത്താഴത്തെ ഗര്‍ത്തം മൂടുന്നത് അവസാന ഘട്ടത്തിലെത്തിലെത്തിയപ്പോഴേയ്ക്കും മഴ പെയ്തതോടെ നിര്‍ത്തിവച്ചു. കഴിഞ്ഞ മാസം 11ന് സ്‌കൂള്‍ ബസിന്‍റെ ചക്രം കുഴിയില്‍ വീണതോടെയാണു വലിയ പാലത്തിനു സമീപം കുഴി രൂപപ്പെട്ടത്. ചെറുതായി രൂപപ്പെട്ട കുഴി പിന്നീട് വലിയ ഗര്‍ത്തമായി മാറുകയായിരുന്നു. കുഴിയുടെ കാരണവും പരിഹാരവും കണ്ടെത്താന്‍ നടത്തിയ പഠനങ്ങളുടെ റിപ്പോര്‍ട്ട് സമര്‍പ്പിക്കാന്‍ വൈകിയതും എല്ലാം ഒട്ടേറെ വ്യാപാര സ്ഥാപനങ്ങളെ അടച്ചു പൂട്ടലിന്‍റെ വക്കിലെത്തിച്ചു. കഴിഞ്ഞ ദിവസം മാത്യു കുഴല്‍നാടന്‍ എംഎല്‍എ പങ്കെടുത്ത കിഫ്ബി യോഗത്തിലാണ് കുഴി മൂടാന്‍ അനുമതി നല്‍കിയത്. ഇതോടെ ശനിയാഴ്ച്ച മുതല്‍ കരിങ്കല്ല് നിറച്ച് ഇതിനു മുകളില്‍ മെറ്റലും അതിനു മുകളില്‍ ജിഎസ്ബി മിശ്രിതവും ചേര്‍ത്ത് അഞ്ച് അടിയോളം കുഴി മൂടി. ഈ ആഴ്ചയില്‍ തന്നെ കുഴി പൂര്‍ണമായി മൂടാന്‍ കഴിയുമെന്നാണ് ഉദ്യോഗസ്ഥര്‍ പറഞ്ഞിരുന്നത്. എന്നാല്‍ ചൊവ്വാഴ്ച രാത്രി മഴ പെയ്തതോടെ ഇന്നലെ നിര്‍മാണ പ്രവര്‍ത്തികള്‍ നിര്‍ത്തിവയ്ക്കുകയായിരുന്നു. നഗര റോഡ് വികസനത്തിന്‍റെ ഭാഗമായുള്ള റോഡ് ടാറിംഗ് കുഴി മൂലം പാലത്തിലേക്ക് എത്തിക്കാന്‍ കഴിഞ്ഞിട്ടില്ല. കുഴി പൂര്‍ണമായി മൂടുന്നതോടെ പാലം വരെയുള്ള ടാറിംഗ് പൂര്‍ത്തിയാകും. പാലത്തിലെ കുഴികള്‍ അടച്ചുള്ള പാലം ടാറിംഗും ഉടനെ തന്നെ ഉണ്ടാകുമെന്ന് ഉദ്യോഗസ്ഥര്‍ പറഞ്ഞു. ഇതിനു ശേഷമായിരിക്കും നഗര റോഡ് വികസനത്തിന്‍റെ അന്തിമ ഘട്ടം ആരംഭിക്കുകയുള്ളു. നഗരത്തിലെ റോഡ് പൂര്‍ണമായും തുറന്നുകൊടുത്തെങ്കിലും കച്ചേരിത്താഴത്ത് കുഴി മൂടാത്തതിനാല്‍ ഇവിടെ ഗതാഗതകുരുക്ക് രൂക്ഷമാണ്.

കന്നി 20 പെരുന്നാൾ: വിളംബര ഘോഷയാത്ര നടത്തി

കോതമംഗലം: മാർ തോമ ചെറിയ പള്ളിയിൽ കബറടക്കിയിരിക്കുന്ന പരിശുദ്ധ എൽദോ മാർ ബസേലിയോസ് ബാവയുടെ 340-ാം ഓർമ്മ പെരുന്നാളിന് (കന്നി - 20) തുടക്കം കുറിച്ചുകൊണ്ടുള്ള വിളംബര ഘോഷയാത്ര നടത്തി. പരിശുദ്ധ ബാവ മലങ്കരയിൽ പ്രഥമ കുർബാന അർപ്പിച്ച പള്ളിവാസലിൽനിന്നും കോതമംഗലം മാർ തോമ ചെറിയ പള്ളിയിലേക്കാണ് ഘോഷയാത്ര നടത്തിയത്. ഹൈറേഞ്ച് മേഖല മെത്രാപ്പോലീത്ത ഏലിയാസ് മാർ അത്തനാസിയോസ് ഘോഷയാത്ര ഫ്ലാഗ് ഓഫ് ചെയ്തു. ഹൈറേഞ്ചിലെ വിവിധ ദേവാലയങ്ങൾ സന്ദർശിച്ച ഘോഷയാത്ര അടിമാലി ടൗണിൽ പഞ്ചായത്ത് പ്രസിഡന്‍റ് സൗമ്യ സുനിൽ ഹാരാർപ്പണം നടത്തി സ്വീകരിച്ചു. കോതമംഗലത്തെ വിവിധ ദേവാലയങ്ങൾ സന്ദർശിച്ച ഘോഷയാത്രക്ക് മുനിസിപ്പൽ ഓഫീസിന് മുമ്പിൽ വൈസ് ചെയർ പേഴ്സൺ സിന്ധു ഗണേശ്, സ്ഥിരം സമിതി ചെയർമാൻ നൗഷാദ്, പ്രതിപക്ഷ നേതാവ് എ ജി ജോർജ്, മറ്റ് കൗൺസിലർമാർ എന്നിവർ ചേർന്ന് സ്വീകരണം നൽകി. തുടർന്ന് ഗാന്ധി സ്ക്വയറിൽ ഡീൻ കുര്യാക്കോസ് എം പി ടൗൺ മർച്ചന്‍റ് അസോസിയേഷൻ, അങ്ങാടി മർച്ചന്‍റ് അസോസിയേഷൻ, പള്ളി വക സ്ഥാപനങ്ങളിലെ അംഗങ്ങൾ, രാഷ്ട്രീയ സാമൂഹിക സാമുദായിക നേതാക്കൾ എന്നിവർ ചേർന്ന് തീർത്ഥാടന വിളംബര ഘോഷയാത്രയെ സ്വീകരിച്ചു. പള്ളിയിൽ എത്തിച്ചേർന്ന ഘോഷയാത്രയെ ഏലിയാസ് മാർ യൂലിയോസ് മെത്രാപ്പോലീത്ത ആശിർവദിച്ചു. വിളംബര ഘോഷയാത്രയ്ക്ക് വികാരി ഫാ. ജോസ് മാത്യു തേച്ചത്തുകുടി, സഹ വികാരിമാരായ ഫാ. സാജു ജോർജ്, ഫാ. എൽദോസ് ചെങ്ങമനാട്ട്, ഫാ. അമൽ കുഴികണ്ടത്തിൽ, ഫാ. നിയോൺ പാലോസ്, ഫാ. സിച്ചു രാജു, തന്നാണ്ട് ട്രസ്റ്റിമാരായ കെ.കെ. ജോസഫ്, എബി ചേലാട്ട്, വർക്കിംഗ് കമ്മിറ്റി അംഗങ്ങൾ, മാനേജിംഗ് കമ്മിറ്റി അംഗങ്ങൾ എന്നിവർ നേതൃത്വം നൽകി.

പോക്സോ കേസിൽ വൈദികന്‍റെ ശിക്ഷ മരവിപ്പിച്ചു

ന്യൂഡൽഹി: എറണാകുളം പുത്തന്‍വേലിക്കര പോക്‌സോ കേസില്‍ പ്രതിചേര്‍ക്കപ്പെട്ടിരുന്ന വൈദികന്‍റെ ശിക്ഷ സുപ്രീംകോടതി മരവിപ്പിച്ചു. പുത്തന്‍വേലിക്കര കുരിശിങ്കല്‍ ലൂര്‍ദ്മാതാ പള്ളി വികാരിയായിരുന്ന എഡ്വിന്‍ ഫിഗറസിന്‍റെ ശിക്ഷയാണു കോടതി മരവിപ്പിച്ചത്. ചീഫ് ജസ്റ്റീസ്‌ ബി.ആർ. ഗവായ്, ജസ്റ്റീസ്‌ കെ.വിനോദ് ചന്ദ്രൻ എന്നിവരടങ്ങിയ ബെഞ്ചിന്‍റേതാണു തീരുമാനം. കേസില്‍ വൈദികന് ഹൈക്കോടതി വിധിച്ച 20 വര്‍ഷം തടവെന്ന ശിക്ഷയ്‌ക്കെതിരേ നല്‍കിയ അപ്പീല്‍ പരിഗണിച്ചാണ് സുപ്രീംകോടതി ഉത്തരവ്. അപ്പീലിൽ സുപ്രീംകോടതി തീരുമാനമെടുക്കുംവരെയാണു ശിക്ഷ മരവിപ്പിച്ചത്. ഹൈക്കോടതി നൽകിയ ശിക്ഷയിൽ പകുതിയോളം ശിക്ഷാ കാലാവധി അനുഭവിച്ച സാഹചര്യത്തിലാണു നടപടി. കേസിലെ ഒന്നാം പ്രതിയാണ് എഡ്വിന്‍ ഫിഗറസ്. കേസിലെ രണ്ടാം പ്രതിയും എഡ്വിന്‍ ഫിഗറസിന്‍റെ സഹോദരനുമായ സിൽവസ്റ്റർ ഫിഗറസിന്‍റെ ശിക്ഷ നേരത്തേ ഹൈക്കോടതി റദ്ദാക്കിയിരുന്നു.

തീരദേശ മാനേജ്മെന്‍റ് പ്ലാൻ അന്തിമഘട്ടത്തിൽ: കെ.എൻ. ഉണ്ണികൃഷ്ണൻ എംഎൽഎ

വൈപ്പിൻ: കാലാവസ്ഥ വ്യതിയാനം മൂലമുള്ള ഓരുവെള്ള ഭീഷണിയിൽ നിന്ന് വൈപ്പിൻ ദ്വീപിനെ സംരക്ഷിക്കുന്നതിന് എൻസിസിആർ പഠനറിപ്പോർട്ടിന്‍റെ അടിസ്ഥാനത്തിൽ തയാറാക്കുന്ന തീരദേശ മാനേജ്മെന്‍റ് പ്ലാൻ അന്തിമ ഘട്ടത്തിലാണെന്നു മന്ത്രി കെ. രാജൻ ഉറപ്പു നൽകിയതായി കെ.എൻ. ഉണ്ണികൃഷ്ണൻ എംഎൽഎ അറിയിച്ചു. പദ്ധതിക്ക് അംഗീകാരം ലഭിച്ചാൽ അനുയോജ്യമായ രീതിയിൽ തീരദേശ സംരക്ഷണ നടപടികൾ നിർദേശിക്കാനാകും. തീരശോഷണം സംസ്ഥാന സവിശേഷ ദുരന്തമായി സംസ്ഥാന സർക്കാർ പ്രഖ്യാപിച്ചതു പ്രകാരം ദുരന്തബാധിതർക്ക് ദുരിതാശ്വാസത്തിന് അർഹതയുണ്ടെന്നും മന്ത്രി അറിയിച്ചു. പുഴ, കായൽ, കടൽ, മറ്റ് ജല സ്രോതസുകൾ എന്നിവിടങ്ങളിൽ നിന്നുള്ള അധികജലം മൂലമുണ്ടാകുന്ന വെള്ളപ്പൊക്കത്തെ തുടർന്ന് ദുരിതത്തിലാകുന്നവരും ദുരിതാശ്വാസത്തിന് അർഹരാണ്. ഇതിനായി ജലസേചന വകുപ്പും സംസ്ഥാന ദുരന്ത നിവാരണ അഥോറിറ്റിയും ചേർന്നു സാങ്കേതികപഠനം നടത്തി പദ്ധതി ദേശീയ ദുരന്ത നിവാരണ അഥോറിറ്റിക്കു സമർപ്പിക്കാനുള്ള നടപടികൾ അവസാന ഘട്ടത്തിലാണെന്നും മന്ത്രി എംഎൽഎയെ അറിയിച്ചു.

ആയുര്‍വേദ മെഗാ മെഡിക്കല്‍ ക്യാന്പ് നടത്തി

കൊച്ചി: ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യ (എഎംഎഐ) ജില്ലാ കമ്മിറ്റിയും എറണാകുളം സിറ്റി ഏരിയയും എറണാകുളം പ്രസ് ക്ലബ്ബുമായി സഹകരിച്ച് സ്‌പെഷാലിറ്റി മെഗാ മെഡിക്കല്‍ ക്യാമ്പ് സംഘടിപ്പിച്ചു. എറണാകുളം പ്രസ്‌ക്ലബില്‍ സബ് കളക്ടര്‍ ജി. സായി കൃഷ്ണ ഉദ്ഘാടനം ചെയ്തു. പ്രസ് ക്ലബ് പ്രസിഡന്‍റ് ആര്‍.ഗോപകുമാര്‍ അധ്യക്ഷത വഹിച്ചു. പ്രസ് ക്ലബ് സെക്രട്ടറി ഷജില്‍ കുമാര്‍, കെയുഡബ്ല്യുജെ സംസ്ഥാന സമിതിയംഗം ജിപ്‌സണ്‍ സിക്കേര, ജില്ലാ നിര്‍വാഹക സമിതിയംഗം ഒ.പി. ജിഷ, അസോസിയേഷന്‍ ഓഫ് ഇന്ത്യ എറണാകുളം ജില്ലാ സെക്രട്ടറി ഡോ. എലിസബത്ത് മാത്യു, ജില്ലാ പ്രസിഡന്‍റ് ഡോ. മനു ആര്‍. മംഗലത്ത് തുടങ്ങിയവര്‍ പങ്കെടുത്തു. അസ്ഥി, ത്വക് രോഗങ്ങള്‍, ജീവിതശൈലി രോഗങ്ങള്‍, ഉദരരോഗങ്ങള്‍, നേത്ര ചികിത്സ, സ്ത്രീരോഗങ്ങള്‍ തുടങ്ങി എട്ടോളം സ്‌പെഷാലിറ്റികളിലായി നൂറോളം പേര്‍ പങ്കെടുത്തു. ഡോ. രോഹിത്ത് രവി, ഡോ.ഗംഗ ശശിധരന്‍, ഡോ. യമുന, ഡോ. ബിന്‍സ ഹസന്‍, ഡോ. എമിലിന്‍ കെ. ജോര്‍ജ്, ഡോ. ഗ്രീഷ്മ പ്രമോദ്, ഡോ. ജയചന്ദ്രന്‍, ഡോ. ജിഷ്ണു വേണുഗോപാല്‍, ഡോ. അഞ്ജന ശ്രീധര്‍, ഡോ. ദേവദാസ് ഡോ. ടോണി തോമസ് എന്നിവര്‍ നേതൃത്വം നല്‍കി.

റോഡ് നിർമാണത്തിലെ അപാകത : അങ്കമാലിയിൽ നഗരസഭാ സെക്രട്ടറിയെ ഉപരോധിച്ചു

അങ്കമാലി: നഗരസഭയ്ക്കും വ്യാപാരഭവനും ഇടയ്ക്കുള്ള പൊതുറോഡിന്‍റെ നിർമാണത്തിലെ അപാകതയും മറ്റു പോരായ്മകളും ഉന്നയിച്ചുകൊണ്ട് നൽകിയ പരാതിക്ക് നടപടി എടുക്കാത്തതിനെ തുടർന്ന് ബിജെപി മണ്ഡലം കമ്മിറ്റിയുടെ നേതൃത്വത്തിൽ അങ്കമാലി നഗരസഭാ സെക്രട്ടറിയെ ഉപരോധിച്ചു. ഗതാഗതക്കുരുക്കിനാൽ വീർപ്പുമുട്ടുന്ന അങ്കമാലി പട്ടണത്തിൽ കെ എസ് ആർ ടി സി ബസ്റ്റാൻഡിൽ നിന്നും ടി ബി ജംഗ്ഷനിലേക്ക് എളുപ്പത്തിൽ എത്തിച്ചേരാവുന്ന ഏകമാർഗമാണ് നഗരസഭാ കെട്ടിടത്തിനു മുൻപിലൂടെയും വ്യാപാരഭവൻ കെട്ടിടത്തിന്‍റെ ഇടയിലൂടെയും കടന്നുപോകുന്ന ഈ റോഡ്. എന്നാൽ റോഡിന്‍റെ ഒരു വശം വളരെ വീതി കൂടുതലും നഗരസഭ കെട്ടിടത്തിനു മുൻവശം വീതി തീരെ കുറഞ്ഞ സാഹചര്യവുമാണ്. ഈ റോഡിന്‍റെ വീതികൂട്ടി പ്രശ്നം പരിഹരിക്കണമെന്ന് അഭിപ്രായമുണ്ടെങ്കിലും ഭരണപക്ഷത്തെ ഏതാനും കൗൺസിലർമാരുടെ പിടിവാശിയാണ് ഇതിന് തടസമായി നിൽക്കുന്നതെന്ന് ഒരു വിഭാഗം ആരോപിക്കുന്നു. നഗരസഭയും വ്യാപാരഭവനും ഇക്കാര്യത്തിലുള്ള പിടിവാശി അവസാനിപ്പിച്ച് അങ്കമാലി ടൗണിലെ ഗതാഗതക്കുരുക്കിന് പരിഹാരം കാണണമെന്ന് ബി ജെപി ഉന്നയിക്കുന്ന ആവശ്യം. അടുത്ത ദിവസം തന്നെ വ്യാപാരഭവനും മുനിസിപ്പൽ അധികൃതരുമായി ചർച്ച നടത്തി പ്രശ്നം രമ്യമായി പരിഹരിക്കാമെന്ന് സെക്രട്ടറിയുടെയും എക്സിക്യൂട്ടീവ് എൻജിനീയറുടെയും ഉറപ്പിന്മേലാണ് സമരം അവസാനിപ്പിച്ചത്. ബിജെപി ജില്ലാ സെക്രട്ടറി എൻ. മനോജ്, മണ്ഡലം പ്രസിഡന്‍റ് രാഹുൽ പാറക്കടവ്, നഗരസഭ കൗൺസിലർമാരായ എ.വി. രഘു, സന്ദീപ് ശങ്കർ തുടങ്ങിയവർ പങ്കെടുത്തു.

മലിനജലം റോഡിൽ ഒഴുക്കി: ഡ്രൈവർക്കെതിരെ കേസ്

വൈപ്പിൻ: മത്സ്യം കയറ്റി പോകുന്ന ഇൻസുലേറ്റ് വാനിലെ മലിനജലം രാത്രിയിൽ രഹസ്യമായി റോഡിൽ ഒഴുക്കിയ ഡ്രൈവറെയും വാഹനത്തെയും മുളവുകാട് പോലീസ് കസ്റ്റഡിയിലെടുത്തു. ചൊവ്വാഴ്ച രാത്രി 7.30ന് കാളമുക്ക് എൽഎൻജി റോഡിലെ പാലത്തിന് സമീപത്താണ് വാഹനത്തിൽ നിന്നും മലിനജലം ഒഴുക്കിയത്. ഈ സമയം ഇതുവഴി വന്ന പോലീസ് പെട്രോളിൽ വാഹനം ഇത് കാണുകയും ഡ്രൈവർ പള്ളിപ്പുറം സ്വദേശിയായ ഷാജി-64യെയും വാഹനവും കസ്റ്റഡിയിൽ എടുക്കുകയായിരുന്നു. കേസെടുത്തശേഷം ഡ്രൈവറെ ജാമ്യത്തിൽ വിട്ടയച്ചു.

മഞ്ഞപ്ര പഞ്ചായത്തിലെ ചാറ്റുപാടം പച്ചത്തുരുത്തിന് മുഖ്യമന്ത്രിയുടെ പുരസ്‌കാരം

അങ്കമാലി : മികച്ച പച്ച തുരുത്തുകൾക്ക് മുഖ്യമന്ത്രി ഏർപ്പെടുത്തിയ പുരസ്കാരത്തിന് മഞ്ഞപ്ര ഗ്രാമപഞ്ചായത്തിലെ ചാറ്റുപാടം പച്ചത്തുരുത്ത് അർഹയായി. തിരുവനന്തപുരം ടാഗോർ ഹാളിൽ നടന്ന ചടങ്ങിൽ മഞ്ഞപ്ര ഗ്രാമപഞ്ചായത്ത് പ്രസിഡന്‍റ് വത്സലകുമാരി വേണു പുരസ്കാരം ഏറ്റുവാങ്ങി. സംസ്ഥാന ജൈവ വൈവിധ്യ ചെയർമാൻ ഡോ. ആർ അനിൽകുമാർ പുരസ്കാരം കൈമാറി.

പെരിങ്ങോട്ടുകര വ്യാജ പീഡനക്കേസ്: രണ്ടു പ്രതികള്‍ കൊച്ചിയില്‍ പിടിയില്‍

കൊച്ചി: പെരിങ്ങോട്ടുകര ദേവസ്ഥാനവുമായി ബന്ധപ്പെട്ട വ്യാജ പീഡനക്കേസില്‍ രണ്ടു പ്രതികള്‍ പിടിയില്‍. കേസില്‍ പ്രതികളായ ശ്രീരാഗ് കാനാടി, സ്വാമിനാഥന്‍ കാനാടി എന്നിവരാണ് ബാനസവാടി എസിപി ഉമാശങ്കറിന്‍റെ നേതൃത്വത്തിലുള്ള പ്രത്യേക അന്വേഷണസംഘം കൊച്ചി വരാപ്പുഴയിലെ അപ്പാര്‍ട്ട്മെന്‍റില്‍ അറസ്റ്റ് ചെയ്തത്. ഇവരുടെ ബാങ്ക് അക്കൗണ്ടുകള്‍ കേന്ദ്രീകരിച്ച് നടത്തിയ അന്വേഷണത്തിലാണ് അറസ്റ്റ്. കേസില്‍ പ്രതി ചേര്‍ക്കപ്പെട്ടതോടെ ഇവര്‍ ഒളിവില്‍ പോവുകയായിരുന്നു. കേസിലെ മറ്റൊരു പ്രതി പ്രവീണ്‍ കാനാടി ഇപ്പോഴും ഒളിവിലാണ്. പെരിങ്ങോട്ടുകര ദേവസ്ഥാനം തന്ത്രിക്കും മരുമകന്‍ ടി.എ.അരുണിനും എതിരെ ഉന്നയിച്ച പീഡന പരാതിക്ക് പിന്നില്‍ ഹണി ട്രാപ്പാണെന്ന് നേരത്തെ കര്‍ണാടക പോലീസ് കണ്ടെത്തിയിരുന്നു. ഈ കേസില്‍ സ്ത്രീകളടക്കം അഞ്ചുപേരെ പോലീസ് നേരത്തെ അറസ്റ്റ് ചെയ്തിരുന്നു. ഹണി ട്രാപ്പില്‍ കോടികളുടെ പണമിടപാട് ഇതുമായി ബന്ധപ്പെട്ട് നടന്നുവെന്നും പോലീസ് നേരത്തെ കണ്ടെത്തിയിരുന്നു. ഈ കേസിലാണ് പ്രവീണിനെ ഒന്നാം പ്രതിയാക്കി ബംഗളൂരു പോലീസ് കേസെടുത്തത്.

ഗിഫ്റ്റ് ഓഫ് റീഡിംഗ് വിജയികള്‍ക്ക് സ്‌കോളര്‍ഷിപ്പ് കൈമാറി

കൊച്ചി: റോട്ടറി ക്ലബ്ബ് ഓഫ് കൊച്ചിന്‍ മിഡ് ടൗണ്‍ കുട്ടികളില്‍ വായനാശീലം വര്‍ധിപ്പിക്കല്‍ ലക്ഷ്യമിട്ട് എറണാകുളം എസ്ആര്‍വി സ്‌കൂളില്‍ നടപ്പിലാക്കുന്ന ഗിഫ്റ്റ് ഓഫ് റീഡിംഗ് സ്‌കോളര്‍ഷിപ്പ് പദ്ധതിയിലെ ജൂലൈ, ഓഗസ്റ്റ് മാസങ്ങളിലെ വിജയികള്‍ക്ക് സ്‌കോളര്‍ഷിപ്പ് കൈമാറി. ജൂലൈ ഒന്നിനാണ് പുസ്തക വായനയില്‍ മികവ് തെളിയിക്കുന്ന എല്‍പി, യുപി, ഹൈസ്‌കൂള്‍, ഹയര്‍സെക്കന്‍ഡറി വിഭാഗം വിദ്യാര്‍ഥികള്‍ക്ക് എല്ലാ മാസവും സ്‌കോളര്‍ഷിപ്പ് നല്‍കുമെന്ന് എസ്ആര്‍വിഎസ് ഫ്രണ്ട്‌സ് ചെയര്‍മാനും റോട്ടറി മുന്‍ ഡിസ്ട്രിക്ട് പ്രസിഡന്‍റുമായ ആര്‍ക്കിടെക്റ്റ് പ്രഫ.ബി.ആര്‍. അജിത് പ്രഖ്യാപിച്ചത്. എസ്ആര്‍വി സ്‌കൂള്‍ ഓഡിറ്റോറിയത്തില്‍ സംഘടിപ്പിച്ച സ്‌കോളര്‍ഷിപ്പ് വിതരണ ചടങ്ങില്‍ റോട്ടറി ക്ലബ്ബ് ഓഫ് കൊച്ചിന്‍ മിഡ്ടൗണ്‍ പ്രസിഡന്‍റ് അഡ്വ. പി. ഗോപകുമാര്‍ അധ്യക്ഷത വഹിച്ചു. പ്രഫ. ബി.ആര്‍ അജിത് വിജയികള്‍ക്ക് സ്‌കോളര്‍ഷിപ്പുകള്‍ കൈമാറി. എസ്ആര്‍വി ഹൈസ്‌കൂള്‍ പ്രിന്‍സിപ്പല്‍ എ.എന്‍. ബിജു, വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ ജിന്‍സി ജോസഫ്, ഹൈസ്‌കൂള്‍ പ്രധാനാധ്യാപിക ടി.കെ. സീമ, യുപി സ്‌കൂള്‍ പ്രധാനാധ്യാപിക പി.പി. സജിനി, റോട്ടറി ക്ലബ്ബ് ഓഫ് കൊച്ചിന്‍ മിഡ്ടൗണ്‍ മുന്‍ പ്രസിഡന്‍റുമാരായ ടി.ടി. തോമസ്, കെ.കെ.ജോര്‍ജ് തുടങ്ങിയവര്‍ സംസാരിച്ചു.

മാർ തൂങ്കുഴി സഭയ്ക്കു പുതുദിശാബോധം പകർന്ന ഇടയശ്രേഷ്ഠൻ: എറണാകുളം-അങ്കമാലി അതിരൂപത

കൊച്ചി: സവിശേഷമായ നേതൃശുശ്രൂഷയിലൂടെ സഭയ്ക്കും സമൂഹത്തിനും ക്രിസ്തുവിന്‍റെ ലാളിത്യവും കാലഘട്ടത്തിന്‍റെ ആവശ്യമനുസരിച്ചുള്ള പുതുദിശാബോധവും പകർന്ന ഇടയശ്രേഷ്ഠനാണു കാലം ചെയ്ത ആർച്ച്ബിഷപ് മാർ ജേക്കബ് തൂങ്കുഴിയെന്ന് എറണാകുളം-അങ്കമാലി അതിരൂപത അനുസ്മരിച്ചു. അര നൂറ്റാണ്ടു പിന്നിട്ട പൗരോഹിത്യ ജീവിതത്തിലൂടെയും മൂന്നു രൂപതകളിലെ ഇടയശുശ്രൂഷകളിലൂടെയും മാർ തൂങ്കുഴി സുവിശേഷസന്ദേശങ്ങളെ അനേകരിലേക്കെത്തിക്കുന്നതിനും ക്രിസ്തു സാക്ഷ്യം തെളിമയോടെ പ്രകാശിപ്പിക്കുന്നതിലും ശ്രദ്ധിച്ചു. ആഴമാർന്ന ജീവിതാനുഭവങ്ങളും സ്നേഹാർദ്രമായ ജീവിതശൈലിയും സമന്വയിപ്പിച്ചു സഭാശുശ്രൂഷകളെ അദ്ദേഹം കൂടുതൽ മഹത്വപൂർണവും സ്വീകാര്യതയുമുള്ളതാക്കി. സഭയുടെ ദൗത്യങ്ങൾ ജീവിതഗന്ധിയും മനുഷ്യോന്മുഖവുമാകണമെന്നും കാലോചിതമായ പുതുക്കലുകൾ വേണമെന്നുമുള്ള ദർശനമാണ് മാർ തൂങ്കുഴിയുടെ ശുശ്രൂഷാജീവിതത്തെ വേറിട്ടു നിർത്തുന്നത്. മാനന്തവാടി, താമരശേരി രൂപതകളിലും തൃശൂർ അതിരൂപതയിലും അദ്ദേഹത്തിന്‍റെ നേതൃശൈലി സഭയുടെ മാത്രമല്ല, സമൂഹത്തിന്‍റെയും മൂല്യനിർമിതിക്കും വളർച്ചയ്ക്കും പ്രചോദനമായിട്ടുണ്ട്. സേവനം ചെയ്ത രൂപതകൾക്കുള്ളിൽ ഒതുങ്ങുന്നതായിരുന്നില്ല മാർ തൂങ്കുഴിയുടെ ജീവിതം ചെലുത്തിയ സ്വാധീനം. കേരളസഭയ്ക്കാകെയും പുതുദിശാബോധം നൽകാനാവുന്ന ഇടപെടലുകൾ അദ്ദേഹം നടത്തി. പ്രവർത്തനരീതി കൊണ്ടും ചിന്താധാരകൊണ്ടും എന്നും എറണാകുളം- അങ്കമാലി അതിരൂപതയോട് സാമീപ്യം പുലർത്തിയ മാർ തൂങ്കുഴി, ഉറച്ച നിലപാടുകളുടെ പ്രവാചകധർമം സധൈര്യം ഏറ്റെടുത്തു ദൈവജനത്തിന് എന്നും നല്ല ഇടയനായിത്തീർന്നു. മാർ തൂങ്കുഴിയുടെ നിര്യാണം സഭയ്ക്കും പ്രത്യേകമായി എറണാകുളം- അങ്കമാലി അതിരൂപതയ്ക്കും തീരാനഷ്ടമാണ്. അദ്ദേഹം തന്‍റെ ശുശ്രൂഷാജീവിതത്തിൽ പുലർത്തിയ സവിശേഷതകൾ വർത്തമാനകാല സഭയ്ക്കും അതിന്‍റെ നല്ല നാളെകൾക്കും പ്രചോദനമാകും. കേരളസഭയ്ക്കു വിസ്മരിക്കാനാകാത്ത സംഭാവനകൾ‌ നൽകിയ മാർ ജേക്കബ് തൂങ്കുഴിയുടെ സ്വർഗപ്രാപ്തിയിൽ എറണാകുളം -അങ്കമാലി അതിരൂപതയിലെ പിതാക്കന്മാരുടെയും വൈദികരുടെയും സമർപ്പിതരുടെയും വിശ്വാസികളുടെയും പ്രാർഥനകൾ നേരുന്നതായും അതിരൂപത അനുശോചനസന്ദേശത്തിൽ പറഞ്ഞു.

ദീപിക നമ്മുടെ ഭാഷ പദ്ധതി : മുടിക്കരായി സെന്‍റ് റീത്താസ് എൽപി സ്കൂളിൽ

പെരുമ്പാവൂർ : മുടിക്കരായി സെന്‍റ് റീത്താസ് എൽപി സ്കൂളിൽ ദീപിക നമ്മുടെ ഭാഷ പദ്ധതിയുടെ ഉദ്ഘാടനം പിട്ടാപ്പിള്ളിൽ ഏജൻസീസിന്‍റെ ഡയറക്ടർ ഫ്രാൻസിസ് പി. പിട്ടാപ്പിള്ളിയും ഇടവക വികാരിയും സ്കൂൾ മാനേജരുമായ ഫാ. ജെയിംസ് കക്കുഴിയും ചേർന്ന് സ്കൂൾ ചെയർപേഴ്സൺ ശ്രേയ ഗിരീഷ്, ലീഡർ കെ.പി. ദേവജ് എന്നിവർക്ക് ദീപിക പത്രം നൽകി നിർവഹിച്ചു. ദീപിക ഫ്രണ്ട്‌സ് ക്ലബ്‌ ഫൊറോന പ്രസിഡന്‍റ് രാജു മാങ്കുഴ, സെക്രട്ടറി ഷൈജു ഇഞ്ചക്കൽ, സ്കൂൾ പ്രധാനാധ്യാപിക ഡീന മാത്യു, ദീപിക ഏജന്‍റ് എം.ഒ. ദേവസി,അധ്യാപകരായ മരിയറ്റ് ഡോമി, ജീന തോമസ്,നിഷ ജോസഫ്,അനീഷ്‌ ‌ കെ. തങ്കച്ചൻ, ദീപിക ഏരിയ മാനേജർ റ്റി.എ. നിബിൻ എന്നിവർ സംസാരിച്ചു. പത്രം സ്കൂളിൽ സ്പോൺസർ ചെയ്തത് പെരുമ്പാവൂർ പിട്ടാപ്പിള്ളിൽ ഏജൻസീസ് ആണ്.

കത്തോലിക്ക കോൺഗ്രസ് ശക്തിപ്പെടേണ്ടത് കാലത്തിന്‍റെ ആവശ്യം: മാർ പാംബ്ലാനി

കൊച്ചി: വർത്തമാനകാല ആവശ്യങ്ങൾ തിരിച്ചറിഞ്ഞ് സഭയുടെയും സമുദായത്തിന്‍റെയും ശബ്ദമാകാൻ കത്തോലിക്ക കോൺഗ്രസിനു കഴിയണമെന്ന് ആർച്ച്ബിഷപ് മാർ ജോസഫ് പാംപ്ലാനി. എറണാകുളം - അങ്കമാലി അതിരൂപതയിൽ സംഘടനയുടെ പുതിയ ഭാരവാഹികളുടെ നേതൃസംഗമം ഉദ്ഘാടനം ചെയ്യുകയായിരുന്നു അദ്ദേഹം. സമുദായ അംഗങ്ങളുടെ ന്യായമായ ആവശ്യങ്ങൾക്കുവേണ്ടി പ്രവാചക ധീരതയോടെ ശക്തമായ നിലപാടുകളെടുക്കാൻ സാധിച്ചെങ്കിൽ മാത്രമേ കത്തോലിക്ക കോൺഗ്രസിന് സഭയിലും സമൂഹത്തിലും ഒരു തിരുത്തൽ ശക്തിയാകാനാൻ കഴിയൂവെന്നും മാർ പാംബ്ലാനി ഓർമിപ്പിച്ചു. അതിരൂപത പ്രസിഡന്‍റ് എസ്.ഐ. തോമസ് അധ്യക്ഷത വഹിച്ചു. ജനറൽ സെക്രട്ടറി ബേബി പൊട്ടനാനിയിൽ, ട്രഷറർ ജോൺസൺ പടയാട്ടി, ഗ്ലോബൽ വൈസ് പ്രസിഡന്‍റ് ബെന്നി ആന്‍റണി, ഗ്ലോബൽ സെക്രട്ടറി ഫ്രാൻസിസ് മൂലൻ, ജോസ് ആന്‍റണി, സെജോ ജോൺ തുടങ്ങിയവർ പ്രസംഗിച്ചു. കത്തോലിക്ക കോൺഗ്രസ് കേന്ദ്ര സമിതിയുടെ നേതൃത്വത്തിൽ ഒക്ടോബറിൽ നടക്കുന്ന അവകാശ സംരക്ഷണ യാത്രയ്ക്ക് അതിരൂപതയുടെ സ്വീകരണം കാലടിയിൽ ഒരുക്കും. അതിരൂപത സമിതിയുടെ നേതൃത്വത്തിലുള്ള വിവിധ സബ്കമ്മറ്റികളേയും യോഗത്തിൽ പ്രഖ്യാപിച്ചു.

റോഡുകൾക്ക് അറ്റകുറ്റപ്പണി: 99 ലക്ഷം രൂപ അനുവദിച്ചു

ആലുവ: ആലുവ നിയോജക മണ്ഡലത്തിലെ 11 പിഡബ്ല്യൂഡി റോഡുകൾക്ക് അറ്റകുറ്റപ്പണികൾ നടത്തുന്നതിന് 99 ലക്ഷം രൂപ അനുവദിച്ചു. ഭരണാനുമതി ലഭിച്ച പദ്ധതിയുടെ ടെണ്ടർ നടപടികൾ പൂർത്തീകരിച്ച് എത്രയും വേഗം റോഡുകളുടെ അറ്റകുറ്റപ്പണികൾ ആരംഭിക്കുമെന്നും അൻവർ സാദത്ത് എംഎൽഎ അറിയിച്ചു. എടത്തല-തായ്ക്കാട്ടുക്കര, എടത്തല-പേങ്ങാട്ടുശ്ശേരി, മൂന്നാം മൈൽ-കിഴക്കമ്പലം, പൂക്കാട്ടുപടി ലൂപ്പ്, ഇടപ്പള്ളി-മുവാറ്റുപുഴ, കുഴിവേലിപ്പടി-വെട്ടിക്കുഴ, എൻഎഡി-എച്ച്എംടി, നസ്രത്ത്-കാർമൽ, പള്ളിക്കവല-ഡിസ്‌പെൻസറി, ആലുവ-മൂന്നാർ, ആലുവ-വരാപ്പുഴ എന്നീ റോഡുകൾക്കാണ് ഫണ്ട് അനുവദിച്ചിരിക്കുന്നത്.

കിഴക്കന്പലത്ത് വയോജനങ്ങൾക്ക് സഞ്ചരിക്കുന്ന ആശുപത്രി

കിഴക്കമ്പലം: കിഴക്കമ്പലം പഞ്ചായത്തിന്‍റെ 2025-26 വാര്‍ഷിക പദ്ധതിയില്‍ ഉള്‍പ്പെട്ട വയോജനങ്ങള്‍ക്ക് സഞ്ചരിക്കുന്ന ആശുപത്രി എന്ന പദ്ധതിയുടെ ഉദ്ഘാടനം കിഴക്കമ്പലം സബ് സെന്‍ററില്‍ വെച്ച് പഞ്ചായത്ത് പ്രസിഡന്‍റ് മിനി രതീഷ് നിര്‍വഹിച്ചു. ആരോഗ്യ സ്റ്റാൻഡിംഗ് കമ്മിറ്റി പേഴ്‌സണ്‍ ജെനിസ് പി.കാച്ചപ്പിള്ളി അധ്യക്ഷത വഹിച്ചു. പഞ്ചായത്ത് സെക്രട്ടറി ടി. അജി, മെഡിക്കല്‍ ഓഫീസര്‍ ഡോ. പ്രീതി, സ്ഥിരം സമിതി അധ്യക്ഷരായ എ.ബിനു, ആര്‍. ബിന്ദു, ബ്ലോക്ക് മെമ്പര്‍ കെ.വി. രാജു, ഡോ.മേഘ എന്നിവര്‍ പങ്കെടുത്തു. 60 വയസിനു മുകളിലുള്ള വയോജനങ്ങള്‍ക്ക് ഓരോ വാര്‍ഡിലും നിശ്ചയിക്കപ്പെട്ട കേന്ദ്രങ്ങളില്‍ മാസത്തില്‍ രണ്ട് പ്രാവശ്യം ഡോക്ടറുടെ സേവനവും ആവശ്യമായ മരുന്നുകളും സൗജന്യമായി ലഭ്യമാക്കുക എന്ന ഉദ്ദേശത്തോടെ നടത്തപ്പെടുന്ന പദ്ധതിയാണ് ഇത്.

ഗോശ്രീ മേൽപ്പാലത്തിലെ ടാറിംഗ്: നാളെ ദേശീയപാതാ ഓഫീസ് മുന്നിൽ പ്രതിഷേധം

വൈപ്പിൻ: ഗോശ്രീ റോഡിൽ വല്ലാര്‍പാടം കണ്ടെയ്‌നര്‍ ടെര്‍മിനലിനു മുന്നിലുള്ള മേൽപ്പാലത്തിലെ കുഴികൾ നികത്തണമെന്നാവശ്യപ്പെട്ട് 19ന് രാവിലെ 10 ന് ദേശീയപാത അഥോറിറ്റി ഓഫീസിനു മുന്നിൽ സമരം. കുഴികളിൽ വീണ് പരിക്കുപറ്റിയവരെയും ഇവരുടെ ബന്ധുക്കളെയും സംഘടിപ്പിച്ച് വൈപ്പിനിലെ റസിഡൻസ് അസോസിയേഷനുകളുടെ അപ്പക്സ് സംഘടനയായ ഫ്രാഗ് ആണ് പ്രതിഷേധ പരിപാടിക്ക് നേതൃത്വം നൽകുന്നത്. മേല്‍പ്പാലത്തിലെ ടാറിംഗ് പൊട്ടിപ്പൊളിഞ്ഞ് പലയിടത്തും അപകടകരമായ കുഴികള്‍ രൂപം കൊണ്ടിട്ട് മാസങ്ങളായിട്ടും അറ്റ കുറ്റപ്പണികൾക്ക് നടപടിയില്ല. ചെറുവാഹനങ്ങള്‍ ദിവസേന ഈ കുഴികളില്‍ വീണ് അപകടം സംഭവിക്കുന്നു. ഈയടുത്ത് ഒരു കുടുംബം മുഴുവന്‍ ഇവിടെ അപകടത്തിൽപ്പെട്ട് ആശുപത്രിയിലായി ഈ സാഹചര്യത്തിൽ ദേശീയപാത അഥോറിറ്റിയുടെ കണ്ണുതുറപ്പിക്കാനാണ് പ്രത്യക്ഷ സമരവുമായി രംഗത്തിറങ്ങിയിരിക്കുന്നതെന്ന് ഫ്രാഗ് ജനറൽ സെക്രട്ടറി അനിൽ പ്ലാവിയൻസ് അറിയിച്ചു.

ഇരുന്പനം റിഫൈനറി റോഡിൽ അപകടക്കെണി തീർത്ത് ടാങ്കർ ലോറികളുടെ പാർക്കിംഗ്

ഇരുമ്പനം: ഇരുചക്ര വാഹന യാത്രക്കാർക്കും കാൽനടയാത്രക്കാർക്കും അപകടക്കെണിയായി റോഡരികിൽ ടാങ്കർ ലോറികളുടെ പാർക്കിംഗ്. ഇരുമ്പനം വിളക്ക് ജംഗ്ഷനിൽ നിന്നും കിഴക്കോട്ട് റിഫൈനറി റോഡിൽ ചിത്രപ്പുഴ വരെയുള്ള റോഡിന്‍റെ ഇരുവശങ്ങളിലുമാണ് കൂറ്റൻ ടാങ്കർ ലോറികൾ മറ്റ് യാത്രക്കാർക്ക് അപകടകരമായ രീതിയിൽ നിർത്തിയിടുന്നത്. റോഡിന്‍റെ ടാർ ഭാഗത്തുനിന്നും കഷ്ടിച്ച് ഒന്നരയടി മാത്രം അകലമിട്ടാണ് ഇവിടെ ടാങ്കർ ലോറികൾ മുതൽ ട്രെയിലർ ലോറികൾ വരെ പാർക്ക് ചെയ്യുന്നത്. ഭാരവാഹനങ്ങൾ നിരന്തരം അതിവേഗത്തിൽ പായുന്ന റിഫൈനറി റോഡിൽ, ഇതുമൂലം ഇരുചക്ര വാഹനങ്ങൾ ഉൾപ്പെടെയുള്ള ചെറുവാഹനങ്ങൾ വലിയ വാഹനങ്ങൾക്ക് സൈഡ് നൽകുവാൻ കഷ്ടപ്പെടുകയാണ്. കൂടാതെ റോഡരികിൽ നിർത്തിയിട്ടിരിക്കുന്ന ലോറികൾ പെട്ടെന്ന് റോഡിലേയ്ക്ക് ഓടിച്ചു കയറ്റുന്നതും ഇവിടെ അപകട സാധ്യത വർധിപ്പിക്കുന്നുണ്ട്. സഹായി പോലുമില്ലാതെ ഡ്രൈവർ മാത്രമായി വരുന്ന ടാങ്കർ ലോറികൾ റോഡരികിലെ പാർക്കിംഗിനും നിർത്തിയിട്ടയിടത്ത് നിന്ന് തിരിച്ച് യാത്ര പുറപ്പെടാനും പിന്നിൽ ഒരാൾ പോലും നോക്കാനില്ലാതെയാണ് വാഹനം റോഡിലേയ്ക്ക് കയറ്റി പുറകോട്ടും മറ്റും തിരിക്കുന്നത്. വേഗതയിൽ വരുന്ന ഇരുചക്ര വാഹന യാത്രക്കാർ ഇത്തരം സന്ദർഭങ്ങളിൽ ആയുസിന്‍റെ ബലം കൊണ്ടു മാത്രം രക്ഷപ്പെടുന്ന സ്ഥിതിയാണുള്ളത്. ഇരുമ്പനം സീപോർട്ട്-എയർപോർട്ട് റോഡിൽ ലോറികളുടെ പാർക്കിംഗ് തടയുന്നതിനായി റോഡരികിൽ കോൺക്രീറ്റ് കുറ്റികൾ സ്ഥാപിച്ചതിന് ശേഷമാണ് റിഫൈനറി റോഡിൽ ലോറികളുടെ പാർക്കിംഗ് അനിയന്ത്രിതമായ വിധം വർധിച്ചിരിക്കുന്നത്. അധികൃതരുടെ ശ്രദ്ധ ഇക്കാര്യത്തിൽ അടിയന്തിരമായി വേണമെന്നാണ് നാട്ടുകാർ ആവശ്യപ്പെടുന്നത്.

നഷ്ടപരിഹാര പാക്കേജില്‍ വ്യക്തത വരുത്താതെ സര്‍ക്കാര്‍ : കോന്തുരുത്തിക്കാര്‍ക്കു നല്‍കിയ വാക്ക് പാഴാകുമോ‍?

കൊച്ചി: നാലു പതിറ്റാണ്ടായി കോന്തുരുത്തി പുഴ പുറമ്പോക്കില്‍ താമസിക്കുന്ന 129 കുടുംബങ്ങളുടെ പുനരധിവാസ പാക്കേജില്‍ വ്യക്തത വരുത്താതെ സര്‍ക്കാര്‍. പുനരധിവസിപ്പിക്കുന്നതില്‍ ഹൈക്കോടതി വിധി നടപ്പാക്കുമെന്ന് പറയുമ്പോഴും ഭൂരഹിതര്‍ക്കുള്ള ഭവന നിര്‍മാണ നയത്തിന്‍റെ അടിസ്ഥാനത്തിലുള്ള 9.15 ലക്ഷം വീതമുള്ള നഷ്ടപരിഹാരമാകും നല്‍കുകയെന്ന സൂചനയാണ് ടി.ജെ. വിനോദ് എംഎല്‍എയുടെ ചോദ്യത്തിന് മറുപടിയായി മന്ത്രി വി.എന്‍. വാസവന്‍ സഭയെ അറിയിച്ചത്. പുനരധിവാസത്തിനായി സ്ഥലം കണ്ടെത്താന്‍ കഴിയാതെ വന്നതോടെ ഹൈക്കോടതിയുടെ ഇടപെടലിനെ തുടര്‍ന്ന് ഒരു കുടുംബത്തിന് 19 ലക്ഷം വീതം നഷ്ടപരിഹാരം നല്‍കാമെന്ന് സര്‍ക്കാര്‍ ഉറപ്പ് നല്‍കിയിരുന്നു. ഇതിനായി 24.82 കോടി സ്‌പെഷല്‍ പുനരധിവാസ പാക്കേജായി സര്‍ക്കാര്‍ പ്രഖ്യാപിക്കുകയും ചെയ്തതാണ്. എന്നാല്‍ കഴിഞ്ഞ അഞ്ച് വര്‍ഷമായി പ്രഖ്യാപനം നടപ്പാക്കാന്‍ സര്‍ക്കാരിനായില്ല. ഇതിനെതിരെ പരാതിക്കാര്‍ നല്‍കിയ കോടതിയലക്ഷ്യ ഹര്‍ജി 23ന് പരിഗണിക്കാനിരിക്കെയാണ് 9.15 ലക്ഷം മാത്രമേ നിയമപ്രകാരം നല്‍കാനാകുകയൂള്ളൂ എന്ന നിലപാട് സര്‍ക്കാര്‍ നിയമസഭയെ അറിയിച്ചത്. ഇതിന് സര്‍ക്കാര്‍ വിഹിതമായ 11.655 കോടി രൂപ നല്‍കാന്‍ തീരുമാനം എടുത്തിട്ടുണ്ടെന്നും മന്ത്രി പറഞ്ഞു. എന്നാല്‍ കോടതി വിധിക്ക് വിധേയമായി മാത്രമേ തുടര്‍നടപടികള്‍ ഉണ്ടാവുകയുള്ളൂവെന്നും മന്ത്രി പറഞ്ഞു. കൊച്ചി മെട്രോ റെയില്‍ ലിമിറ്റഡ് നിര്‍വഹണ ഏജന്‍സിയായി നടപ്പാക്കുന്ന കനാല്‍ നവീകരണ പദ്ധതിയില്‍ ഉള്‍പ്പെട്ട പുഴയാണ് കോന്തുരുത്തി പുഴ. ആദ്യം കോന്തുരുത്തിയെ പദ്ധതിയില്‍ ഉള്‍പ്പെടുത്തിയിരുന്നില്ല. ഇരുകരകളിലെയും കൈയേറ്റങ്ങള്‍ ഒഴിപ്പിച്ച് പുഴയെ വീണ്ടെടുക്കണമെന്നും നീരൊഴുക്കു തടസപ്പെടുത്തി നിര്‍മിച്ച റോഡ് പൊളിച്ചു കളയണമെന്നും ഹൈക്കോടതി വിധിച്ചതിനെ തുടര്‍ന്നാണ് കോന്തുരുത്തി പുഴയെയും കനാല്‍ നവീകരണ പദ്ധതിയില്‍ ഉള്‍പ്പെടുത്തിയത്. 3716.10 കോടി ആകെ ചെലവ് വരുന്ന പദ്ധതിയില്‍ 41.33 കോടിയാണ് കോന്തുരുത്തി പുഴയുടെ പുനര്‍നവീകരണത്തിനായി ചെലവഴിക്കുന്നത്. ഈ പദ്ധതി നടപ്പാക്കുമ്പോള്‍ വീടും സ്ഥലവും നഷ്ടപ്പെടുന്നവര്‍ക്കായാണ് പുനരധിവാസ പാക്കേജ് പ്രഖ്യാപിച്ചത്. പാക്കേജ് പ്രഖ്യാപിച്ചെങ്കിലും തുക കൈമാറിയിട്ടില്ലാത്തതിനാല്‍ നിലവിലുള്ള വീടിന്‍റെ കേടുപാടുകള്‍ പോലും പരിഹരിക്കാനാകാതെ ദുരിതത്തിലാണ് ഈ 129 കുടുംബങ്ങള്‍. തുരുത്തിക്കോളനിക്കാര്‍ക്ക് 23 ലക്ഷത്തിന്‍റെ ഭവനം നിര്‍മിച്ച് നല്‍കുമ്പോള്‍ കോന്തുരുത്തി പുഴയോരത്ത് താമസിക്കുന്നവര്‍ക്ക് 9.15 ലക്ഷം മാത്രം നല്‍കുന്നത് നീതികേടാണെന്നും സ്ഥലം വാങ്ങി വീടുവയ്ക്കാന്‍ ആവശ്യമായ നഷ്ടപരിഹാര തുകയാണ് നല്‍കേണ്ടതെന്നും മുന്‍ ഡിവിഷന്‍ കൗണ്‍സിലര്‍ സി.കെ. പീറ്റര്‍ ആവശ്യപ്പെട്ടു.

വിധവയുടെ വീടിനു പൂട്ടിട്ട് സ്വകാര്യ പണമിടപാട് സ്ഥാപനം ജീവനക്കാർ

രക്ഷയ്ക്കെത്തി കൗൺസിലർ പള്ളുരുത്തി: പള്ളുരുത്തി പെരുമ്പടപ്പ് കോണത്ത് വിധവയായ വീട്ടമ്മയുടെ വീട് കുത്തിത്തുറന്നശേഷം വേറെ താഴുകളിട്ട് പൂട്ടി സ്വകാര്യ പണമിടപാട് സ്ഥാപനം. എറണാകുളത്ത് പ്രവർത്തിക്കുന്ന ആധാർ ഹൗസിംഗ് ഫിനാൻസ് കമ്പനിയാണ് വായ്പാ കുടിശിഖയുടെ പേരു പറഞ്ഞ് വീട്ടുകാരില്ലാത്ത സമയം വീടുപൂട്ടി സ്ഥലംവിട്ടത്. പള്ളുരുത്തി കോണം സ്വദേശിനിയായ നാലുകണ്ടത്തിൽ സജിത 2017ൽ സ്ഥാപനത്തിൽ പത്ത് ലക്ഷം രൂപ വായ്പയെടുത്തിരുന്നു. പിന്നീട് 13 ലക്ഷത്തി എൺപതിനായിരം രൂപയോളം തിരിച്ചടച്ചു. ഇതിനിടെ ഏതാനും മാസങ്ങളായി വായ്പ മുടങ്ങിയതിനെ തുടർന്നാണ് മുന്നറിയിപ്പില്ലാതെ സ്ഥാപനത്തിന്‍റെ ആളുകൾ എത്തി വീടിന്‍റെ വാതിൽ കുത്തിത്തുറന്ന് വേറെ താഴുകൾ പിടിപ്പിച്ച് വീട് പൂട്ടിയത്. ഇതിനിടെ അയൽവീട്ടുകാർ വിവരം അറിയിച്ചതിനെ തുടർന്ന് വീട്ടുടമ എത്തിയെങ്കിലും വീട് തുറന്നു നൽകാൻ പണമിടപാട് സ്ഥാപനം തയാറായില്ല. ഒന്നാം ക്ലാസിൽ പഠിക്കുന്ന കുട്ടി തലയുമായി ബന്ധപ്പെട്ട അസുഖത്തിന് സ്ഥിരമായി കഴിക്കുന്ന മരുന്ന് പോലും കൊടുക്കാൻ പണമിടപാട് സ്ഥാപനം സമ്മതിച്ചില്ലെന്ന് വീട്ടുകാർ പറയുന്നു. കുട്ടികളുടെ പഠനോപകരണങ്ങളും ഭക്ഷണവും ഉൾപ്പെടെ എടുക്കാൻ കഴിഞ്ഞില്ല. പെട്ടിക്കട നടത്തുകയാണ് സജിത. ഭർത്താവ് ഉപേക്ഷിച്ചു പോയ ഇവരുടെ മകളും വിദ്യാർഥികളായ കുട്ടികളുമാണ് വീട്ടിൽ താമസം. സംഭവം നടക്കുമ്പോൾ വീട്ടിൽ താമസിച്ചിരുന്ന വാടകക്കാരും സ്ഥലത്തുണ്ടായിരുന്നില്ല. ഇനി 13 ലക്ഷം രൂപ കൂടി അടയ്ക്കണമെന്നാണ് പണമിടപാട് സ്ഥാപനം വീട്ടുകാർക്ക് നല്കിയിരിക്കുന്ന നിർദേശം. ഇതിനിടെ സംഭവമറിഞ്ഞെത്തിയ കൗൺസിലർ അഭിലാഷ് തോപ്പിലും കോൺഗ്രസ് പ്രവർത്തകരും നാട്ടുകാരും ചേർന്ന് വീട് പൂട്ടിയിരുന്ന താഴെയും മുകളിലുമുള്ള നാല് താഴുകളും പൊളിച്ചുനീക്കി വീട്ടുകാരെ അകത്തു കയറ്റി. സംഭവമറിഞ്ഞ് പള്ളുരുത്തി പോലീസും സ്ഥലത്തെത്തിയിരുന്നു. ഡിസിസി സെക്രട്ടറി എൻ.ആർ.ശ്രീകുമാർ, വി.എഫ്.ഏണസ്റ്റ്, എം.എ.ജോസി, കെ.എ.അഫ്സൽ എന്നിവരും ഉണ്ടായിരുന്നു.

വയോധികനെ ആക്രമിച്ച് പരിക്കേൽപ്പിച്ചു : മധ്യവയസ്കൻ പിടിയിൽ

കാലടി: വയോധികനെ ആക്രമിച്ച് പരിക്കേൽപ്പിച്ച കേസിൽ മധ്യവയസ്കൻ പിടിയിൽ. തുറവുർ പൊയ്ത്തുരുത്ത് കണ്ണംപുഴ വീട്ടിൽ ജോസഫി(55)നെയാണ് കാലടി പോലീസ് പിടികൂടിയത്. തിങ്കളാഴ്ച വൈകീട്ട് പൊയ്ത്തുരുത്ത് സ്വദേശിയായ 72 കാരനെയാണ് പറമ്പിൽ അതിക്രമിച്ച് കയറി അസഭ്യം പറഞ്ഞ് ആക്രമിച്ച് പരിക്കേൽപ്പിച്ചത്. സോളാർ പാനലിന്‍റെ കേബിളും, കുടിവെള്ള പൈപ്പും നശിപ്പിച്ചു. വ്യക്തിവൈരാഗ്യമാണ് കാരണം. വിവിധ സ്റ്റേഷനുകളിൽ മധ്യവയസ്കനെതിരെ കേസുകളുണ്ട്. ഇൻസ്പെക്ടർ അനിൽ കുമാർ ടി മേപ്പിള്ളി, എസ്ഐമാരായ ജയിംസ്, ഉണ്ണി, എഎസ്ഐ ഷൈജു എന്നിവരാണ് അന്വേഷണ സംഘത്തിലുള്ളത്.

ഓട്ടോയില്‍ പുകവലി വിലക്കിയ ഡ്രൈവർക്കു മർദനം

ചെറായി: ഓട്ടോറിക്ഷയിലിരുന്ന് പുകവലിക്കുന്നത് വിലക്കിയ ഓട്ടോ ഡ്രൈവറെ യാത്രക്കാരന്‍ മര്‍ദിച്ചതായി പരാതി. ചെറായി ഓട്ടോ സ്റ്റാന്‍ഡിലെ ഡ്രൈവര്‍ ചെറായി ചുങ്കത്ത് പറമ്പില്‍ ദിനരാജനാണ് (65) മര്‍ദനമേറ്റത്. കഴിഞ്ഞ ദിവസം ചെറായി ഓട്ടോ സ്റ്റാന്‍ഡിലായിരുന്നു സംഭവം. ഡ്രൈവറുടെ പരാതിയെ തുടര്‍ന്ന് ചെറായി കരുത്തല സ്വദേശി സുനി രാജിനെതിരെ മുനമ്പം പോലീസ് കേസെടുത്തു.

കാപ്പ ചുമത്തി ജയിലിലടച്ചു

വാഴക്കുളം: വധശ്രമ കേസിൽ ഉൾപ്പെട്ട യുവാവിനെതിരേ കാപ്പ ചുമത്തി. വാഴക്കുളം ചേന്നാട്ട് സൻസൽ (കണ്ണൻ -23) നെയാണ് കാപ്പ ചുമത്തി വിയ്യൂർ സെൻട്രൽ ജയിലിൽ അടച്ചത്. റൂറൽ ജില്ലാ പോലീസ് മേധാവി എം. ഹേമലതയുടെ റിപ്പോർട്ടിന്‍റെ അടിസ്ഥാനത്തിൽ ജില്ല കളക്ടർ ജി.പ്രിയങ്കയാണ് ഉത്തരവിട്ടത്. വാഴക്കുളം, കല്ലൂർക്കാട്, മൂവാറ്റുപുഴ, കോട്ടയം ജില്ലയിലെ രാമപുരം എന്നീ പോലീസ് സ്റ്റേഷൻ പരിധികളിൽ കൊലപാതകശ്രമം, അടിപിടി, ദേഹോപദ്രവം, കഞ്ചാവ് ഉപയോഗം, സ്ത്രീകൾക്കെതിരേയുള്ള കുറ്റകൃത്യം തുടങ്ങി നിരവധി കേസുകളിൽ പ്രതിയാണ് ഇയാൾ. കഴിഞ്ഞ മേയിൽ കല്ലൂർക്കാട് പോലീസ് രജിസ്റ്റർ ചെയ്ത ബലാത്സംഗ കേസിൽ പ്രതിയായതിനെ തുടർന്നാണ് കാപ്പ ചുമത്തിയത്. കല്ലൂർക്കാട് സിഐ കെ. ഉണ്ണികൃഷ്ണന്‍റെ നേതൃത്വത്തിൽ വാഴക്കുളം എസ്ഐ പ്രദീപ്മോൻ, എഎസ്ഐ എസ്. വിനു, സീനിയർ സിവിൽ പോലീസ് ഓഫീസർ ബിജേഷ്, സിവിൽ പോലീസ് ഓഫീസർ അനൂപ് എന്നിവർ ഉൾപ്പെട്ട സംഘമാണ് ഇയാളെ അറസ്റ്റ് ചെയ്തത്.

സ്വർണ വ്യാപാരികൾ കാതുകുത്തി കമ്മലിടൽ നടത്തി

കൊച്ചി: ഓൾ കേരള ഗോൾഡ് ആൻഡ് സിൽവർ മർച്ചന്‍റ്സ് അസോസിയേഷൻ എറണാകുളം ജില്ലാ കമ്മിറ്റിയുടെ നേതൃത്വത്തിൽ കാതുകുത്തി കമ്മലിടൽ, രക്തദാന ക്യാമ്പ്, സ്വർണ തൊഴിലാളികളെ ആദരിക്കൽ എന്നിവ നടത്തി. സംസ്ഥാന വൈസ് പ്രസിഡന്‍റ് അബ്ദുൽ അസീസ് ഏർബാദ് ഉദ്ഘാടനം ചെയ്തു. ജില്ലാ പ്രസിഡന്‍റ് ഷഫീഖ് എജിഡി അധ്യക്ഷത വഹിച്ചു. സംസ്ഥാന സെക്രട്ടറി എൻ.ടി.കെ. ബാപ്പു, സംസ്ഥാന കൗൺസിൽ അംഗം ഹുസൈൻ അലൈൻ, ജില്ലാ ജനറൽ സെക്രട്ടറി സിറിയക് വി.ജോസഫ്, ട്രഷറർ സമീർ ഫാത്തൂം, സെക്രട്ടറി അനിൽകുമാർ സംഗീത്, ഷാൻ അലൈൻ തുടങ്ങിയവർ പ്രസംഗിച്ചു. 300 വ്യാപാരികളുടെ രക്തദാന സമ്മതപത്രം സ്വീകരിച്ചു. 20 സ്വർണ തൊഴിലാളികളെ ചടങ്ങിൽ ആദരിച്ചു.

ഭർത്താവ് മരിച്ചത് അറിയാതെ ഭാര്യ കൂട്ടിരുന്നത് മൂന്നു നാൾ

തറയിൽ കിടന്ന മൃതദേഹം പുഴുവരിച്ചു അരൂർ: ഭർത്താവ് മരിച്ചത് മനസിലാകാതെ മാനസിക വെല്ലുവിളി നേരിടുന്ന ഭാര്യ അതേ വീട്ടിൽ കഴിഞ്ഞത് മൂന്നു ദിവസം. എഴുപുന്ന പഞ്ചായത്ത് 12ാം വാർഡിൽ എരമല്ലൂർ തേരേഴത്ത് ഗോപി (72) ആണ് മരിച്ചത്. മാനസിക വെല്ലുവിളി നേരിടുന്നയാളാണ് ഗോപിയുടെ ഭാര്യ ഷീല. ഗോപി മരിച്ചത് ഷീലയ്ക്ക് മനസിലാകാതെ വന്നതാവാം വിവരം പുറത്തറിയാൻ വൈകിയതെന്ന് കരുതുന്നു. മൂന്ന് ദിവസം മൃതദേഹത്തോടൊപ്പം ഇതേ വീട്ടിൽ കഴിഞ്ഞ ഷീലയ്ക്ക് മൃതദേഹത്തിൽ പുഴുവരിച്ചിട്ട് പോലും ഗോപി മരിച്ചെന്ന കാര്യം മനസിലായില്ല. ചൊവ്വാഴ്ച ഉച്ചയോടുകുടി ഗോപിയുടെ ഭാര്യാ സഹോദരനായ രമേശൻ ഇവരുടെ വീട്ടിൽ എത്തിയപ്പോഴാണ് ഗോപി നിലത്ത് മരിച്ചുകിടക്കുന്നതായി കണ്ടത്. ഗോപിയെയും ഷീലയെയും പരിശേധനയ്ക്ക് കൊണ്ടുപോകാനായി എത്തി‌‌യതായിരുന്നു രമേശൻ. മരണവിവരമറിഞ്ഞ് നാട്ടുകാരും പഞ്ചായത്ത് അധികൃതരും അടക്കം സ്ഥലത്തെത്തി. മൃതദേഹം പോസ്റ്റ്മോർട്ടത്തിനുശേഷം വീട്ടുവളപ്പിൽ സംസ്കരിച്ചു.

നഗരത്തിൽ യുവാക്കളെ കത്തിമുനയിൽ നിർത്തി കവർച്ച; പ്രതികൾ ഒളിവിൽ

കൊച്ചി: നഗരത്തിൽ യുവാക്കളെ കത്തിമുനയിൽ നിർത്തി മർദിച്ച് പണംതട്ടിയതായി പരാതി. ഇന്നലെ പുലർച്ചെ 2.15 ഓടെ എറണാകുളം നോർത്ത് മേൽപ്പാലത്തിനു സമീപമായിരുന്നു സംഭവം. പത്തനംതിട്ട മെഴുവേലി സ്വദേശിയായ 33കാരനും, സുഹൃത്തും എറണാകുളം സ്വദേശിയുമായ 25 കാരനുമാണ് മർദനമേറ്റത്. സംഭവത്തിൽ മൂന്നുപേർക്കായി എറണാകുളം നോർത്ത് പോലീസ് അന്വേഷണം ആരംഭിച്ചു. മർദനമേറ്റ പത്തനംതിട്ട സ്വദേശി രാവിലെ പോലീസ് സ്റ്റേഷനിലെത്തി പരാതിപ്പെടുകയായിരുന്നു. നോർത്ത് മേൽപ്പാലത്തിലൂടെ നടന്നുപോകുകയായിരുന്നു യുവാക്കളെ ബൈക്കിലെത്തിയ പ്രതികൾ തടഞ്ഞുനിർത്തി. തുടർന്ന് 33കാരനെ മാത്രം മേൽപ്പാലത്തിന് മുകളിലേക്ക് കൂട്ടിക്കോണ്ടുപോയി. ഇവിടെവച്ച് മർദിച്ചു. തുടർന്ന് 25കാരനെ സൗത്ത് റെയിൽവേ സ്റ്റേഷൻ ഭാഗത്ത് എത്തിച്ച് കത്തികാട്ടി പണം തട്ടിയെടുക്കുകയായിരുന്നു. 9,500 രൂപയും കൈയിലുണ്ടായിരുന്ന സ്മാർട്ട് ഫോണുമാണ് തട്ടിയെടുത്ത്. തുടർന്ന് പ്രതികൾ കടന്നുകളഞ്ഞു.

20 ഗ്രാം ഹെറോയിനുമായി ആസാം സ്വദേശിനി പിടിയില്‍

പെരുമ്പാവൂര്‍: 20 ഗ്രാം ഹെറോയിനുമായി ഇതര സംസ്ഥാനത്തൊഴിലാളിയായ യുവതി പിടിയില്‍. ആസാം ഹൈബ്ര ഗാവ് കച്ചമരി സ്വദേശിനി സലീമ ബീഗമാ(28)ണ് വില്പനയ്ക്കായി റോഡില്‍ നില്‍ക്കുന്ന സമയത്ത് കാഞ്ഞിരക്കാട് നിന്ന് പെരുമ്പാവൂര്‍ എഎസ്പിയുടെ പ്രത്യേക അന്വേഷണസംഘം പിടികൂടിയത്. രഹസ്യ വിവരത്തെ തുടര്‍ന്ന് കുറച്ചുനാളുകളായി ഇവര്‍ നിരീക്ഷണത്തിലായിരുന്നു. ആസാമില്‍ നിന്ന് എത്തിക്കുന്ന ഹെറോയിന്‍ ഇവിടെ ചെറിയ ബോട്ടിലുകള്‍ ആക്കി വില്പന നടത്തുകയായിരുന്നു. ഒരു ബോട്ടിലിന് 1000 നിരക്കിലായിരുന്നു വില്പന. ഇതരസംസ്ഥാന തൊഴിലാളികള്‍ ആയിരുന്നു ഇവരില്‍ നിന്ന് മയക്കുമരുന്ന് വാങ്ങിയിരുന്നത്. പെരുമ്പാവൂര്‍ എഎസ്പി ഹാര്‍ദിക് മീണ, ഇന്‍സ്‌പെക്ടര്‍ ടി.എം. സൂഫി, എസ്‌ഐമാരായ റിന്‍സ് എം. തോമസ്, പി.എം. റാസിക് തുടങ്ങിയവരാണ് അന്വേഷണ സംഘത്തില്‍ ഉണ്ടായിരുന്നത്.

മെട്രോ ഫീഡര്‍ ബസ് സര്‍വീസ് ഇന്‍ഫോപാര്‍ക്ക് ഫേസ് ടുവിലേക്കും

കൊച്ചി: കളമശേരിയില്‍ നിന്ന് നേരിട്ട് ഇന്‍ഫോപാര്‍ക്കിലേക്കുള്ള കൊച്ചി മെട്രോ ഫീഡര്‍ ബസ് സര്‍വീസ് ഇന്‍ഫോ പാര്‍ക്ക് ഫേസ് ടുവിലേക്കും ദീര്‍ഘിപ്പിച്ചു. സര്‍വീസുകളുടെ എണ്ണവും കൂട്ടിയിട്ടുണ്ട്. കളമശേരി മെട്രോ സ്റ്റേഷനില്‍ നിന്ന് രാവിലെ 7.50, 8.10, 9.01 സമയങ്ങളിലും ഉച്ചയ്ക്ക് 2.42 നുമാണ് ഫേസ് 2 ലേക്കുള്ള സര്‍വീസ്.

വാഹനാപകടം; കുട്ടമ്പുഴ മുന്‍ പഞ്ചായത്ത് പ്രസിഡന്‍റ് സി.ജെ. എല്‍ദോസ് അന്തരിച്ചു

കോതമംഗലം: വാഹനാപകടത്തില്‍ ഗുരുതര പരിക്ക േറ്റ് ചികിത്സയിലായിരുന്ന കുട്ടമ്പുഴ പഞ്ചായത്ത് മുന്‍ പ്രസിഡന്‍റ് കീരംപാറ ഊഞ്ഞാപ്പാറ ചെങ്ങമനാട്ട് സി.ജെ.എല്‍ദോസ് (69) അന്തരിച്ചു. കോഴിപ്പിള്ളി-മലയിന്‍കീഴ് ബൈപാസ് റോഡില്‍ തിങ്കളാഴ്ചയുണ്ടായ വാഹനാപകടത്തില്‍ പരിക്കേറ്റ് ആലുവയിലെ സ്വകാര്യ ആശുപത്രിയില്‍ ചികിത്സയിലായിലിരിക്കെ ഇന്നലെ രാവിലെയാണ് മരണം സംഭവിച്ചത്. എല്‍ദോസ്‌ സഞ്ചരിച്ച ബൈക്കിന് പിന്നില്‍ സ്വകാര്യ ബസ് ഇടിച്ചായിരുന്നു അപകടം. കോണ്‍ഗ്രസ് കവളങ്ങാട് ബ്ലോക്ക് കമ്മറ്റി വൈസ് പ്രസിഡന്‍റ്, വീക്ഷണം കവളങ്ങാട് പ്രാദേശിക ലേഖകൻ, ഐഎന്‍ടിയുസി താലൂക്ക് റീജണല്‍ കമ്മറ്റി വൈസ് പ്രസിഡന്‍റ്, കര്‍ഷക കോണ്‍ഗ്രസ് സംസ്ഥാന കമ്മിറ്റി അംഗം, സേവാദള്‍ ജില്ലാ വൈസ് പ്രസിഡന്‍റ്, എന്‍റെ നാട് ഹൈപവര്‍ കമ്മിറ്റി അംഗം, എല്‍ഐസി ഏജന്‍റ്, എന്നീ നിലകളില്‍ പ്രവര്‍ത്തിച്ചുവരികയായിരുന്നു. സംസ്‌കാരം ഇന്ന് 10ന് ഊഞ്ഞാപ്പാറയിലെ ശുശ്രൂഷയ്ക്കുശേഷം കുറ്റിയാംചാല്‍ സീനായ്ക്കുന്ന് സെന്‍റ് ജോര്‍ജ് യാക്കോബായ സുറിയാനി പള്ളിയിൽ. ഭാര്യ: മിനി (കുട്ടന്പുഴ വനിതാ സര്‍വീസ് സഹകരണ സംഘം സെക്രട്ടറി). മക്കള്‍: ബേസില്‍, മരിയ. മരുമക്കള്‍: മെറിന്‍, ജോയല്‍. മലയോര കർഷകരുടെ ഉന്നമനത്തിനായി പ്രവർത്തിച്ച നേതാവ് കോതമംഗലം: കോതമംഗലത്തിന് നഷ്ടമായത് മലയോര കുടിയേറ്റ കർഷകരുടെയും ആദിവാസികളുടെയും ഉന്നമനത്തിനായി പ്രവർത്തിച്ച സൗമ്യനായ നേതാവിനെ. കുട്ടമ്പുഴ മേഖലയിലെ ഈറ്റത്തൊഴിലാളികൾക്കിടയിൽ പ്രവർത്തിച്ച് യൂണിയന് രൂപം നൽകി അവരുടെ ഉന്നമനത്തിനായി സി.ജെ. എല്‍ദോസ് ദീർഘകാലം പ്രവർത്തിച്ചു. 1995ൽ എ.കെ. ആന്‍റണി മന്ത്രിസഭയിൽ വൈദ്യുതി മന്ത്രിയായിരുന്ന ജി. കാർത്തികേയനിൽനിന്നു മാമലക്കണ്ടത്തേക്ക് വൈദ്യുതി എത്തിക്കാൻ ആദ്യമായി ഒടിപി സാങ്ഷൻ (സ്പെഷൽ ഓർഡർ) വാങ്ങിയത് സി.ജെ. എൽദോസ് ആയിരുന്നു. പഴയ ആലുവ മൂന്നാർ രാജപാത തുറന്ന് സഞ്ചാരയോഗ്യമാക്കുന്നതിനുള്ള ശ്രമങ്ങളിലും അദ്ദേഹം മുൻനിരയിലുണ്ടായിരുന്നു.

കമ്മീഷണർ ഓഫീസ് മാർച്ച്: കെഎസ്‌യു പ്രവർത്തകർ റിമാൻഡിൽ

കൊച്ചി: കമ്മീഷണർ ഓഫീസ് മാർച്ചിനിടെ പൊതുമുതൽ നശിപ്പിച്ച സംഭവത്തിൽ അറസ്റ്റിലായ കെഎസ്‌യു പ്രവർത്തകർ റിമാൻഡിൽ. കെഎസ്‌യു ജില്ലാ പ്രസിഡന്‍റ് കെ.എം. കൃഷ്ണലാൽ (25)അടക്കം എട്ടുപേരെയാണ് റിമാൻഡ് ചെയ്തത്. പോലീസ് മർദനത്തിൽ പ്രതിഷേധിച്ച് ചൊവ്വാഴ്ചയാണ് കെഎസ്‌യു ജില്ലാ കമ്മിറ്റിയുടെ നേതൃത്വത്തിൽ മാർച്ച് നടത്തിയത്. കെഎസ്‌യു സംസ്ഥാന ജനറൽ സെക്രട്ടറി മിവ ജോളി(28), സംസ്ഥാന ഉപാധ്യക്ഷ ആൻ സെബാസ്റ്റ്യൻ(27), ജില്ലാ ഭാരവാഹികളായ അമർ മിഷുത്ത്(28), മോണി ചാക്കോ(27), ആഷിൻ പോൾ (24), അസിൽ ജബ്ബാർ (23),ഡേവീസ് പോൾ,സി.ബി. സഫാൻ(27) എന്നിവരാണ് റിമാൻഡിലായ മറ്റു പ്രർത്തകർ. പ്രവർത്തകരും പോലീസും തമ്മിലുണ്ടായ ഏറ്റുമുട്ടലിനിടെ കല്ലേറിൽ പോലീസിന്‍റെ ജലപീരങ്കി വാഹനത്തിന്‍റെ ചില്ല് തകർന്നിരുന്നു. കണ്ടാലറിയാവുന്ന നൂറാേളം പേർക്കെതിരെ പോലീസ് കേസെടുത്തിട്ടുണ്ട്.

ചന്ദേര്‍കുഞ്ജ് അപ്പാര്‍ട്ട്‌മെന്‍റ് ബി, സി ടവറുകളിലെ താമസക്കാര്‍ ഒരാഴ്ചയ്ക്കകം ഒഴിയണം: ഹൈക്കോടതി

കൊച്ചി: പൊളിച്ചു നീക്കാന്‍ ഉത്തരവിട്ട വൈറ്റില ചന്ദേര്‍കുഞ്ജ് അപ്പാര്‍ട്ട്‌മെന്‍റിലെ ബി,സി ടവറുകളിലെ താമസക്കാര്‍ ഏഴ് ദിവസത്തിനകം ഒഴിയണമെന്ന് ഹൈക്കോടതി. ബലക്ഷയമുള്ള ടവറുകള്‍ പൊളിച്ച് പുതിയത് പണിയുന്നതിന് അഞ്ചു വര്‍ഷണെങ്കിലും കാലതാമസമുണ്ടാകും. ഒഴിയുന്ന ഫ്ളാറ്റുടമകള്‍ക്ക് അതുവരെ താമസിക്കാന്‍ വാടക നല്‍കുന്നതും നഷ്ടപരിഹാരത്തില്‍ ഉള്‍പ്പെടുന്നുണ്ട്. ആദ്യ ആറു മാസത്തേക്ക് വാടകയിനത്തില്‍ 2.97 കോടി എഡബ്ല്യുഎച്ച്ഒ കെട്ടിവച്ചതായി ജില്ലാ കളക്ടറുടെ നേതൃത്വത്തിലുള്ള സമിതി കോടതിയെ അറിയിച്ചു. ബി ടവറിലെ 74 പേരും സി ടവറിലെ 78 ഉടമകളുമാണ് നഷ്ടപരിഹാരമായി ലഭിക്കുന്ന വാടക വാങ്ങി മാറി താമസിക്കാന്‍ തയാറായിട്ടുള്ളത്. ശേഷിക്കുന്നവര്‍ക്ക് താത്പര്യമുണ്ടെങ്കില്‍ അവര്‍ക്കും അനുവദിക്കും. വാടക കരാര്‍ ഹാജരാക്കുന്ന പക്ഷം സമയാസമയങ്ങളില്‍ ഇവര്‍ക്ക് തുക വര്‍ധിപ്പിച്ചു നല്‍കണമെന്നും ഡിവിഷന്‍ ബെഞ്ച് ഉന്നതതല സമിതിയോട് നിര്‍ദേശിച്ചു. നഷ്ടപരിഹാരവുമായി ബന്ധപ്പെട്ട സിംഗിള്‍ബെഞ്ച് ഉത്തരവിലെ വ്യവസ്ഥകള്‍ ചോദ്യം ചെയ്ത് അന്തേവാസികളുടെ കൂട്ടായ്മയും ആര്‍മി വെല്‍ഫെയല്‍ ഹൗസിംഗ് ഓര്‍ഗനൈസേഷനും സമര്‍പ്പിച്ച അപ്പീലുകള്‍ തീര്‍പ്പാക്കിയാണ് ജസ്റ്റീസ് അമിത് റാവല്‍, ജസ്റ്റീസ് പി.വി.ബാലകൃഷ്ണന്‍ എന്നിവരുള്‍പ്പെട്ട ഡിവിഷന്‍ ബെഞ്ചിന്‍റെ ഉത്തരവ്. ‌ അപ്പാര്‍ട്ട്‌മെന്‍റ് പണിയാനും പുനരധിവാസത്തിനും 175 കോടി രൂപ മുടക്കാനാണ് എഡബ്ല്യുഎച്ച്ഒ സമ്മതിച്ചിട്ടുള്ളത്. എന്നാല്‍ നിര്‍മാണചെലവ് കാലാകാലങ്ങളില്‍ ഉയരുമെന്നതിനാല്‍ 211.49 കോടി വേണ്ടി വരുമെന്നാണ് ജില്ലാ ഭരണകൂടത്തിന്‍റെ നിഗമനം. എത്രതുക വേണ്ടി വന്നാലും അത് എഡബ്ല്യുഎച്ച്ഒ വഹിക്കണമെന്ന് ഡിവിഷന്‍ ബെഞ്ച് വ്യക്തമാക്കി. വായ്പയെടുത്ത് ഫഌറ്റ് വാങ്ങുകയും നിലവില്‍ മറ്റിടങ്ങളില്‍ താമസിക്കുകയും ചെയ്യുന്നവര്‍ വായ്പയുടെയും ഇഎംഐ അടയ്ക്കുന്നതിന്‍റെയും രേഖകള്‍ ഹാജരാക്കിയാല്‍ നിശ്ചിത നിരക്കില്‍ വാടക അനുവദിക്കണമെന്നും കോടതി വ്യക്തമാക്കി. ഉടമകള്‍ക്ക് നഷ്ടപരിഹാരത്തിനായി ബന്ധപ്പെട്ട അഥോറിറ്റികളെ സമീപിക്കുന്നതിന് തടസമില്ല. ഇതിന് അനുമതി നിഷേധിച്ച എഡബ്ല്യുഎച്ച്ഒയുടെ നടപടി ഡിവിഷന്‍ ബെഞ്ച് റദ്ദാക്കിയിട്ടുണ്ട്.

വാഹനാപകടത്തിൽ ബൈക്ക് യാത്രികനായ യുവാവ് മരിച്ചു

കളമശേരി: കളമശേരി എച്ച്എംടി റോഡിലുണ്ടായ വാഹനാപകടത്തിൽ ബൈക്ക് യാത്രികനായ യുവാവ് മരിച്ചു. പാനായിക്കുളം തച്ചോത്ത് പറമ്പിൽ പോളിന്‍റെ മകൻ ജസ്റ്റിൻ(23)ആണ് മരിച്ചത്. ബൈക്കിൽ ഒപ്പം സഞ്ചരിച്ചിരുന്നു സുഹൃത്ത് അഭിജിത്ത് സജീവ് മെഡിക്കൽ കോളജിൽ ചികിത്സയിലാണ്. ചൊവ്വാഴ്ച രാത്രിയിൽ കളമശേരി മെഡിക്കൽ കോളജ് ഭാഗത്തുനിന്നും വരികയായിരുന്ന ബൈക്കിൽ പുറകിലൂടെ അമിതവേഗതയിലെത്തിയ വാഹനം ഇടിച്ചാണ് അപകടമുണ്ടായത്. അപകടമുണ്ടാക്കിയ വാഹനം തിരിച്ചറിഞ്ഞിട്ടില്ല. പോലീസ് മേൽ നടപടികൾ സ്വീകരിച്ചു. പോസ്റ്റ്മോർട്ടത്തിനു ശേഷം മൃതദേഹം ഇന്നലെ പനായിക്കുളം ലിറ്റിൽ ഫ്ളവർ പള്ളിയിൽ സംസ്കരിച്ചു. മതാവ്: ഷൈനി. സഹോദരൻ: ക്രിസ്റ്റി.

വയോധികന്‍റെ മൃതദേഹം അഴുകിയ നിലയില്‍

അരൂര്‍: വയോധികന്‍റെ മൃതദേഹം വീടിനുള്ളില്‍ അഴുകിയ നിലയില്‍ കണ്ടെത്തി. എഴുപുന്ന പഞ്ചായത്ത് 12-ാം വാര്‍ഡ് തരേത്ത് ഗോപി (72) ആണ് മരിച്ചത്. സ്വാഭാവിക മരണമാണെന്ന് പോലീസ് സ്ഥിരീകരിച്ചു. ഭാര്യ:ഷീല. ഇവർക്കു മക്കളില്ല. മൃതദേഹം പോസ്റ്റ്മോർട്ടത്തിനുശേഷം വടുതലയിലെ പൊതുശ്മശാനത്തില്‍ സംസ്‌കരിച്ചു.

കഞ്ചാവ് കേസ്: പ്രതികള്‍ക്ക് മൂന്ന് വര്‍ഷം കഠിന തടവ്

കൊച്ചി: കഞ്ചാവ് കേസ് പ്രതികൾക്കെതിരെ മൂന്നു വര്‍ഷം കഠിന തടവും 20,000 രൂപ പിഴയും ശിക്ഷ വിധിച്ചു. വയനാട് സ്വദേശികളായ ലക്കിടി റായന്‍ മരക്കാര്‍ വീട്ടില്‍ അനസ്, കണിയമ്പുഴ മമ്മോക്കര്‍ വീട്ടില്‍ ഇജാസ് അഹമ്മദ് എന്നിവരെയാണ് എറണാകുളം അഡീഷണല്‍ ജില്ലാ സെഷന്‍സ് കോടതി ജഡ്ജി വി.പി.എം. സുരേഷ്‌ ബാബു ശിക്ഷിച്ചത്. 2017 നവംബര്‍ ഒന്നിന് ഉച്ചയ്ക്ക് ഒന്നിനാണ് 1.931 കിലോ കഞ്ചാവുമായി ബോള്‍ഗാട്ടി ജംഗ്ഷനില്‍ നിന്ന് പ്രതികളെ പിടികൂടിയത്. മുളവുകാട് പോലീസ് രജിസ്റ്റര്‍ ചെയ്ത കേസിലാണ് വിധി. മൂന്നാം പ്രതി നൗഷീര്‍ ഒളിവിലാണ്.

കാറും ടാങ്കര്‍ ലോറിയും കൂട്ടിയിടിച്ചു; ഒരാള്‍ക്ക് പരിക്ക്

വരാപ്പുഴ: ദേശീയപാതയിൽ ടാങ്കര്‍ ലോറിയും കാറും കൂട്ടിയിടിച്ചു ഒരാള്‍ക്ക് പരിക്കേറ്റു. കാർ യാത്രക്കാരനായ ചെറായി സ്വദേശി വിനോദിന്‍റെ കൈക്കാണ് പരിക്കേറ്റത്. ഇന്നലെ രാവിലെ കൂനമ്മാവ് ബിടിഎം കോളജിന് സമീപമായിരുന്നു അപകടം. വരാപ്പുഴ ഭാഗത്ത് നിന്നു പറവൂര്‍ ഭാഗത്തേക്ക് വരികയായിരുന്നു കാർ എതിർദിശയിൽ നിന്നു വന്ന ടാങ്കര്‍ ലോറി യുമായി കൂട്ടിയിടിക്കുകയായിരുന്നു. അപകടത്തില്‍ കാറിന്‍റെ മുന്‍ഭാഗം പൂർണമായും തകര്‍ന്നു. കാറിലുണ്ടായിരുന്ന വിനോദിന്‍റെ കുടുംബത്തിന് നിസാര പരിക്കേറ്റു. സംഭവത്തിൽ വരാപ്പുഴ പോലീസ് കേസ് എടുത്തു.

അങ്കമാലി കുണ്ടന്നൂര്‍ ബൈപ്പാസ് : അവശേഷിക്കുന്ന സര്‍വേ ഒക്ടോബറിൽ

അടുത്തമാസം 3 എ പുനർവിജ്ഞാപനമെന്ന് ദേശീയപാത അഥോറിറ്റി കൊച്ചി: എന്‍എച്ച് 544ലെ തിരക്ക് കുറയ്ക്കാന്‍ രൂപകല്പന ചെയ്ത അങ്കമാലി- കുണ്ടന്നൂര്‍ പുതിയ ഹൈവേ നിര്‍മാണത്തോടനുബന്ധിച്ചുള്ള ഭൂമി എറ്റെടുക്കലിനുള്ള 3 എ വിജ്ഞാപനം അടുത്തമാസം വീണ്ടും പുറപ്പെടുവിക്കും. വിജ്ഞാപനം പുറപ്പെടുവിച്ചാല്‍ രണ്ടു മാസത്തിനകം അവശേഷിക്കുന്ന പ്രദേശത്ത് സര്‍വേ പൂര്‍ത്തിയാക്കും. നേരത്തെ പുറപ്പെടുവിച്ച 3 എ വിജ്ഞാപനം കാലഹരണപ്പെട്ടതോടെയാണ് പുതിയ വിജ്ഞാപനം ആവശ്യമായി വന്നത്. മന്ത്രി പി. രാജീവിന്‍റെ അധ്യക്ഷതയില്‍ ചേര്‍ന്ന അവലോകന യോഗത്തിലാണ് ദേശീയപാതാ അഥോറിറ്റി ഇതു സംബന്ധിച്ച തീരുമാനം അറിയിച്ചത്. അങ്കമാലി മുതല്‍ കുണ്ടന്നൂര്‍ വരെ 44 കിലോമീറ്റര്‍ ആറുവരിപ്പാതയാണ് നിര്‍മിക്കേണ്ടത്. ഇതിനായി 18 വില്ലേജുകളിലായി 201 ഹെക്ടര്‍ സ്ഥലമാണ് പദ്ധതിക്കായി ഏറ്റെടുക്കേണ്ടത്. കുണ്ടന്നൂര്‍ നെട്ടൂരില്‍ നിന്ന് ആരംഭിച്ച് അങ്കമാലി കരയാംപറമ്പിലെത്തുന്നതാണ് നിലവിലെ അലൈന്‍മെന്‍റ്. 45 മീറ്റര്‍ വീതിയിലാണ് റോഡ് നിര്‍മാണം. പുതിയ റോഡ് വരുന്നതോടെ വൈറ്റില, ഇടപ്പള്ളി, കളമശേരി, ആലുവ പ്രദേശങ്ങളിലെ തിരക്ക് ഒഴിവാക്കി യാത്ര ചെയ്യാനാകും. സര്‍വേ അവശേഷിക്കുന്നത് 21.5 ഹെക്ടറില്‍ ബൈപ്പാസിനായി ഏറ്റെടുക്കുന്ന 201 ഹെക്ടറില്‍ 21.5 ഹെക്ടറിലാണ് ഇനി സര്‍വേ അവശേഷിക്കുന്നത്. 290 ഹെക്ടര്‍ ഏറ്റെടുക്കാനായിരുന്നു നിര്‍ദ്ദേശമെങ്കിലും പിന്നീടത് 201 ഹെക്ടറായി നിജപ്പെടുത്തി. ഇതില്‍ 160 ഹെക്ടര്‍ പ്രദേശത്തെ സര്‍വേ നേരത്തെ പൂര്‍ത്തിയാക്കിയിരുന്നു. പുഴയും കല്ലിടാത്ത സ്ഥലവും ഉള്‍പ്പെടെ 19.5 ഹെക്ടര്‍ പ്രദേശം ഒഴിവാക്കി. അവശേഷിക്കുന്ന 21.5 ഹെക്ടറില്‍ 3 എ പുനര്‍ വിജ്ഞാപനത്തിനു ശേഷം അടിയന്തര പ്രാധാന്യത്തോടെ സര്‍വേ പൂര്‍ത്തിയാക്കാനാണ് തീരുമാനം. നേരത്തെ 49 ജീവനക്കാരാണ് സര്‍വേ ജോലികളില്‍ പങ്കെടുത്തത്. 67 ഹെക്ടര്‍ സ്ഥലം 3ഡി വിജ്ഞാപനത്തിനായി ദേശീയപാതാ അഥോറിറ്റിക്ക് കൈമാറുകയും ചെയ്തിരുന്നു. സര്‍വേ പൂര്‍ത്തിയാക്കിയ ബാക്കി സ്ഥലത്തിന്റെ സ്‌കെച്ച് ഉടന്‍ തയാറാക്കാന്‍ മന്ത്രി നിര്‍ദേശം നല്‍കി. 3 എ പുനര്‍വിജ്ഞാപനം ഒക്ടോബറില്‍ നടന്നാല്‍ രണ്ട് മാസത്തിനകം തന്നെ 3 ഡി വിജ്ഞാപനത്തിലേക്ക് കടക്കാനാകുമെന്നാണ് പ്രതീക്ഷ. പ്രതിഷേധം ഫലം കണ്ടു രണ്ടര വര്‍ഷത്തിനകം പൂര്‍ത്തിയാക്കാന്‍ ലക്ഷ്യമിട്ടിരുന്ന പദ്ധതി അധികൃതരുടെ അനാസ്ഥമൂലം അവതാളത്തിലായതോടെ രാഷ്ട്രീയ പാര്‍ട്ടികളടക്കം രംഗത്തെത്തിയിരുന്നു. അനിശ്ചിതത്വം നീക്കി പദ്ധതി വേഗത്തില്‍ പൂര്‍ത്തിയാക്കണമെന്നായിരുന്നു പ്രതിഷേധക്കാരുടെ ആവശ്യം. ജില്ലയിലെ കോണ്‍ഗ്രസ് ജനപ്രതിനിധികളുടെ നേതൃത്വത്തില്‍ പ്രതിഷേധ യോഗങ്ങളും സംഘടിപ്പിച്ചിരുന്നു. ഭൂമിയേറ്റെടുക്കലിന് 3 എ വിജ്ഞാപനം ഇറങ്ങിയാല്‍ ഒരു വര്‍ഷത്തിനകം അതിര്‍ത്തിക്കല്ലുകള്‍ സ്ഥാപിച്ച് 3 ഡി വിജ്ഞാപനം ഇറക്കിയാലെ നടപടികള്‍ പൂര്‍ത്തിയാകൂ. ഡിപിആര്‍ പ്രകാരം അതിര്‍ത്തിക്കല്ലുകള്‍ സ്ഥാപിക്കേണ്ടത് ദേശീയപാത അഥോറിറ്റിയാണ്. 3 എ വിജ്ഞാപനം ഇറങ്ങി ഒരു വര്‍ഷം പൂര്‍ത്തിയായ കഴിഞ്ഞ 29നകം നടപടികള്‍ പൂര്‍ത്തിയാകാത്തതിനാല്‍ 3 ഡി വിജ്ഞാപനം ഇറക്കാന്‍ അഥോറിറ്റിക്കായിരുന്നില്ല. ഇതോടെ 3 എ വിജ്ഞാപനം റദ്ദായിരുന്നു.

ബോട്ടിൽ നിന്നു വീണ മത്സ്യത്തൊഴിലാളിയെ കാണാതായി

ചെറായി: മത്സ്യബന്ധനത്തിനിടെ ബോട്ടിൽ നിന്നു കാൽവഴുതി കടലിലേക്ക് വീണ തൊഴിലാളിയെ കാണാതായി. തമിഴ്നാട് കന്യാകുമാരി സ്വദേശി കിരു ഭരൻ യുഗൈൻ കുളന്തൈ (26) നെയാണ് കാണാതായത്. തിങ്കളാഴ്ച രാവിലെ കൊച്ചിക്ക് പടിഞ്ഞാറാണ് അപകടം സംഭവിച്ചത്. കൂടെയുണ്ടായിരുന്നവർ ഉടൻ തെരച്ചിൽ നടത്തിയെങ്കിലും കണ്ടെത്താനായില്ല. 11ന് രാത്രി മുനമ്പം മിനി ഹാർബറിൽ നിന്ന് മത്സ്യബന്ധനത്തിനു പോയ പള്ളിപ്പുറം കാവാലംകുഴി ജോംസണിന്‍റെ ഉടമസ്ഥതയിലുള്ള അർപ്പുതനായകി എന്ന ബോട്ടിലെ ജീവനക്കാരനാണ്. ഫോർട്ട്കൊച്ചി കോസ്റ്റൽ പോലീസ് കേസ് എടുത്തു.

40 കിലോ കഞ്ചാവുമായി രണ്ട് യുവാക്കള്‍ പിടിയില്‍

ഏലൂര്‍: കൊച്ചി സിറ്റി ഡാന്‍സാഫ് സംഘവും ഏലൂര്‍ പോലീസും നടത്തിയ വാഹന പരിശോധനയില്‍ 40 കിലോഗ്രാം കഞ്ചാവുമായി രണ്ട് യുവാക്കളെ പിടികൂടി. മുര്‍ഷിദാബാദ് സ്വദേശികളായ എസ്.കെ. സൂരജ് (18), എസ്.കെ. രാജു (19) എന്നിവരെയാണ് ഏലൂര്‍ പഴയ ആനവാതില്‍ ജംഗ്ഷന് സമീപം നത്തിയ പരിശോധനയില്‍ പിടികൂടിയത്. ഇവരുടെ പക്കല്‍ നിന്ന് 40 കിലോ കഞ്ചാവും കണ്ടെടുത്തു. പ്രതികളെ കളമശേരി മജിസ്‌ട്രേറ്റ് കോടതിയില്‍ ഹാജരാക്കി റിമാഡ് ചെയ്തു.

ജേര്‍ണി ടു നെബുലക്കലുമായി പ്രദീപ് കുമാര്‍ കൊച്ചിയില്‍

കൊച്ചി:തമിഴ് ഗായകനും സംഗീത സംവിധായകനുമായ പ്രദീപ് കുമാര്‍ തന്‍റെ സംഗീത യാത്രയുടെ ഭാഗമായി വണ്‍ കൈന്‍ഡ് ജേര്‍ണി ടു നെബുലക്കല്‍ പ്രദീപ് കുമാര്‍ ലൈവ് ഇന്‍ കൊച്ചി എന്ന സംഗീത പരിപാടിയുമായി കൊച്ചിയിലെത്തുന്നു. ഒക്ടോബര്‍ 11ന് വൈകിട്ട് അഞ്ചിന് തേവര സേക്രഡ് ഹാര്‍ട്ട് കോളജിലാണ് പരിപാടി. കേരളം തനിക്ക് വളരെ സ്‌പെഷലാണ്.മലയാളിപ്രേക്ഷകര്‍ നല്‍കുന്ന പ്രോത്സാഹനവും സ്‌നേഹവും ഒരു കലാകരനെന്ന നിലയില്‍ ഊര്‍ജമാണെന്നും പ്രദീപ് കുമാര്‍ കൊച്ചിയില്‍ പത്രസമ്മേളനത്തില്‍ പറഞ്ഞു. പുറത്തിറങ്ങിയ സിനിമകളിലെ ഗാനങ്ങളും തന്‍റെ ചില പാട്ടുകളും ഉള്‍പ്പെടുത്തിയാണ് സംഗീത പരിപാടി അരങ്ങേറുകയെന്നും പ്രദീപ് പറഞ്ഞു. സംഗീതത്തോടൊപ്പം ഭക്ഷണ സ്റ്റാളുകളും വിവിധ ഓണ്‍ഗ്രൗണ്ട് അനുഭവങ്ങളും ഷോയുടെ ഭാഗമായി ഒരുക്കും. ടിക്കറ്റുകള്‍ ബുക്ക് മൈ ഷോയില്‍ ലഭ്യമാണ്. 599, 899, 1499, 1799,2499 എന്നിങ്ങനെയാണ് ടിക്കറ്റ് നിരക്കുകള്‍. ഒരേസമയം 10 ടിക്കറ്റുകള്‍ ബുക്ക് ചെയ്യാം. പരിപാടിയോടനുബന്ധിച്ച് കേരളത്തിന്‍റെ മ്യൂസ് ബാന്‍ഡുകളെ പ്രോത്സാഹിപ്പിക്കുന്നതിനായി മ്യൂസിക് ബാന്‍ഡ് മത്സരവും സംഘടിപ്പിക്കുന്നുണ്ട്.50000 രൂപയാണ് ഒന്നാം സമ്മാനം. കാര്‍ഡിന്‍ റോബി, വയലിനിസ്റ്റ് റിതു എന്നിവരും പത്രസമ്മേളനത്തില്‍ പങ്കെടുത്തു.

ത്രിഭംഗി ദേശീയ നൃത്തോത്സവം അങ്കമാലിയില്‍ 19 മുതല്‍

കൊച്ചി: കേരള സംഗീത നാടക അക്കാഡമി സംഘടിപ്പിക്കുന്ന ത്രിഭംഗി മധ്യമേഖലാ ദേശീയ നൃത്തോത്സവത്തിന് 19ന് അങ്കമാലിയില്‍ തുടക്കമാകും. മൂന്ന് ദിവസം നീണ്ടുനില്‍ക്കുന്ന നൃത്തോത്സവത്തില്‍ ഇന്ത്യയുടെ വിവിധ ഭാഗങ്ങളില്‍ നിന്നുള്ള 11 വ്യത്യസ്ത നൃത്തരൂപങ്ങളും 51 രംഗാവതരണങ്ങളും അരങ്ങേറും. മോഹിനിയാട്ടം, ഭരതനാട്യം, കുച്ചിപ്പുടി, കേരളനടനം, ഒഡീസി, ആന്ധ്രനാട്യം, മണിപ്പൂരി, പെരണിനൃത്തം, മഹാരിനൃത്തം, കഥക്, സാത്രിയ എന്നീ നൃത്തങ്ങളാണ് അവതരിപ്പിക്കുക. അങ്കമാലി എ.പി. കുര്യന്‍ സ്മാരക സിഎസ്എ ഓഡിറ്റോറിയത്തില്‍ 19ന് വൈകിട്ട് അഞ്ചിന് കേരള സംഗീതനാടക അക്കാഡമി ചെയര്‍പേഴ്‌സണ്‍ മട്ടന്നൂര്‍ ശങ്കരന്‍കുട്ടി നൃത്തോത്സവത്തിന് തിരിതെളിക്കും. പ്രശസ്ത നര്‍ത്തകി കലാമണ്ഡലം ക്ഷേമാവതി വിശിഷ്ടാതിഥിയായിരിക്കും. വൈകുന്നേരം മൂന്ന് മുതല്‍ യുവ നര്‍ത്തക വിഭാഗത്തിന്‍റെ പരിപാടികളും വൈകിട്ട് ആറ് മുതല്‍ പ്രഫഷണല്‍ നര്‍ത്തകവിഭാഗത്തിന്‍റെ നൃത്തരൂപങ്ങളും അരങ്ങിലെത്തും. നൃത്തോത്സവത്തിന്‍റെ ഭാഗമായി നൃത്തവിദ്യാര്‍ഥികള്‍ക്ക് 20, 21 തീയതികളില്‍ നൃത്ത ശില്‍പ്പശാലയും ഒരുക്കിയിട്ടുണ്ടെന്ന് സംഘാടകര്‍ അറിയിച്ചു. പ്രവേശനം സൗജന്യമാണ്. അക്കാഡമി സെക്രട്ടറി കരിവെള്ളൂര്‍ മുരളി, ഫെസ്റ്റിവല്‍ ഡയറക്ടര്‍ ചിത്ര സുകുമാരന്‍ തുടങ്ങിയവര്‍ പത്രസമ്മേളനത്തില്‍ പങ്കെടുത്തു.

ശുചിത്വോത്സവം കാമ്പയിന് ഇന്ന് തുടക്കം

കൊച്ചി: ഗാന്ധി ജയന്തിയോടനുബന്ധിച്ച് ഗ്രാമീണ മേഖലയിലെ ശുചിത്വത്തിനായുള്ള ശ്രമങ്ങള്‍ ത്വരിതപ്പെടുത്തുക എന്ന ലക്ഷ്യത്തോടെ നടത്തുന്ന സ്വച്ഛതാ ഹി സേവ കാമ്പയിന് ജില്ലയില്‍ ഇന്ന് തുടക്കമാകും. കാമ്പയിന്‍റെ ഭാഗമായി തദ്ദേശ സ്ഥാപനങ്ങളുടെ പരിധിയില്‍ അനധികൃത മാലിന്യ നിക്ഷേപസ്ഥലങ്ങള്‍ കണ്ടെത്തി സമയബന്ധിതമായി ശുചിയാക്കും. ഓഫീസുകള്‍, ആശുപത്രികള്‍, സ്‌കൂളുകള്‍ തുടങ്ങിയ പൊതു സ്ഥാപനങ്ങളില്‍ മാലിന്യനിര്‍മാര്‍ജന പ്രവര്‍ത്തനങ്ങള്‍ ഊര്‍ജിതമാക്കും. സമ്പൂര്‍ണ മാലിന്യ മുക്തമാക്കിയ പ്രദേശങ്ങളില്‍ സീറോ വേസ്റ്റ് ആഘോഷങ്ങള്‍, വെളിയിട വിസര്‍ജനമുക്ത മോഡല്‍, ശുചിത്വമുള്ള നല്ല ഗ്രാമം പ്രഖ്യാപനങ്ങള്‍, പാഴ്‌വസ്തുക്കള്‍ ഉപയോഗിച്ചുള്ള നിര്‍മിതികള്‍, ക്ലീന്‍ സ്ട്രീറ്റ് ഫുഡ്, പ്ലാസ്റ്റിക് മാലിന്യ വിമുക്ത കാമ്പയിന്‍ തുടങ്ങിയവ സംഘടിപ്പിക്കും. സ്വച്ഛതാ പ്രവര്‍ത്തകര്‍ക്കുള്ള ആരോഗ്യ പരിശോധനയും ആരോഗ്യ സുരക്ഷാ പദ്ധതി വിവരങ്ങളും നല്‍കുന്നതിനായി ഏകജാലക ക്യാമ്പുകള്‍ നടത്തും. പഞ്ചായത്ത് പരിധിയിലെ എല്ലാ പൊതുസ്ഥലങ്ങളും സന്നദ്ധ സംഘടനകളുടെ പിന്തുണയോടെ ശുചിയാക്കും. ജൈവ, അജൈവമാലിന്യങ്ങള്‍ തരംതിരിച്ചു നിക്ഷേപിക്കുന്നതിനുള്ള നീല, പച്ച നിറങ്ങളിലുള്ള ബിന്നുകള്‍ സ്ഥാപിക്കും. മാലിന്യത്തിന്‍റെ ഉറവിടത്തിലുള്ള തരംതിരിവ്, ഹരിതചട്ട പാലനം എന്നീ വിഷയങ്ങളിലുള്ള സന്ദേശങ്ങള്‍ പ്രദര്‍ശിപ്പിക്കും.

ഓണ്‍ലൈന്‍ ട്രേഡിംഗ് തട്ടിപ്പ്; രണ്ടു യുവാക്കൾ അറസ്റ്റിൽ

തൃപ്പൂണിത്തുറ: ഓണ്‍ലൈന്‍ ഓഹരി വ്യാപാരത്തിന്‍റെ പേരില്‍ കോടികളുടെ തട്ടിപ്പ് നടത്തിയ യുവാക്കളെ പോലീസ് അറസ്റ്റ് ചെയ്തു. തിരുവാങ്കുളം സ്വദേശിയില്‍ നിന്ന് 1.8 കോടി രൂപ തട്ടിയെടുത്ത കേസില്‍ പോത്താനിക്കാട് പല്ലാരിമംഗലം അടിവാട് പുത്തന്‍പുരയ്ക്കല്‍ വീട്ടില്‍ ആദില്‍ മീരാന്‍ (23), തൊടുപുഴ കാളിയാര്‍ വണ്ണപ്പുറം കുഴിമണ്ഡപത്തില്‍ വീട്ടില്‍ മുഹമ്മദ് യാസീന്‍ (22) എന്നിവരെയാണ് ഹില്‍പാലസ് പോലീസ് അറസ്റ്റ് ചെയ്തത്. ഓണ്‍ലൈന്‍ ട്രേഡിംഗ് ആപ് വഴി ഉയര്‍ന്ന ലാഭമുണ്ടാക്കാമെന്നു പറഞ്ഞ് വിശ്വസിപ്പിച്ചാണ് കേസിലെ മൂന്നും നാലും പ്രതികളായ ഇവര്‍ തിരുവാങ്കുളം സ്വദേശിയുടെ പണം തട്ടിയെടുത്തത്. ടെലിഗ്രാം ആപ്പിലൂടെ തിരുവാങ്കുളം സ്വദേശിയെ ബന്ധപ്പെട്ട ഇവര്‍ കഴിഞ്ഞ ജനുവരി 25 മുതല്‍ ജൂലൈ 17 വരെയുള്ള കാലയളവിൽ ട്രേഡ് ചെയ്യാന്‍ 1.8 കോടി രൂപ നിക്ഷേപിപ്പിച്ചു. എന്നാല്‍ പറഞ്ഞ സമയത്ത് ലാഭവിഹിതമോ മുടക്കുമുതലോ നല്‍കാതെ വന്നതോടെ പണം നഷ്ടപ്പെട്ടയാള്‍ ഹില്‍പാലസ് പോലീസില്‍ പരാതി നല്‍കുകയായിരുന്നു. തുടര്‍ന്ന് നടത്തിയ അന്വേഷണമാണ് പ്രതികളുടെ അറസ്റ്റിലേക്കെത്തിയത്. കേസിലെ ഒന്നാം പ്രതി അനശ്വര ഗോപിനാഥ് എന്ന് പരിചയപ്പെടുത്തിയ യുവതിയും രണ്ടാം പ്രതി ഇവര്‍ തട്ടിപ്പു നടത്താനായി പരിചയപ്പെടുത്തിയ അന്‍സൊ ഗ്ലോബല്‍ എന്ന കമ്പനിയുമാണെന്ന് പോലീസ് പറഞ്ഞു. കഴിഞ്ഞ ഒരു മാസത്തിനുള്ളില്‍ ആദിലിന്‍റെ അക്കൗണ്ടില്‍ മാത്രം 3.45 കോടി രൂപ എത്തിയതായി അന്വേഷണ സംഘം കണ്ടെത്തി. കമ്മീഷന്‍റെ അടിസ്ഥാനത്തില്‍ മ്യൂച്വല്‍ അക്കൗണ്ടുകള്‍ വാങ്ങിയും ഇവര്‍ തട്ടിപ്പിന് ഉപയോഗിച്ചതായി സംശയമുണ്ട്. സിറ്റി പോലീസ് കമ്മീഷണര്‍ പുട്ട വിമലാദിത്യ, ഡിസിപി ജുവനപ്പടി മഹേഷ്, എസിപി പി.എസ്. ഷിജു, ഇന്‍സ്‌പെക്ടര്‍ റിജിന്‍എം.തോമസ്, എസ്ഐ കെ.അനില, എസ്‌സിപിഒ വിനോദ് വാസുദേവന്‍ എന്നിവരടങ്ങിയ സംഘമാണ് പ്രതികളെ പിടികൂടിയത്.

കമ്മീഷണര്‍ ഓഫീസിലേക്കുള്ള കെഎസ്‌യു മാര്‍ച്ചില്‍ സംഘര്‍ഷം, ജലപീരങ്കി പ്രയോഗം

കൊച്ചി: പോലീസിന്‍റെ ഗുണ്ടായിസം അവസാനിപ്പിക്കണമെന്നാവശ്യപ്പെട്ട് കെഎസ്‌യു ജില്ലാ കമ്മിറ്റിയുടെ നേതൃത്വത്തിൽ കമ്മീഷണര്‍ ഓഫീസിലേക്ക് നടത്തിയ മാര്‍ച്ചില്‍ സംഘര്‍ഷം. സംസ്ഥാന ജനറല്‍ സെക്രട്ടറി മുബാസ് ഓടക്കാലിക്ക് പരിക്കേറ്റു. ഇദ്ദേഹത്തെ ജനറല്‍ ഹോസ്പിറ്റലില്‍ പ്രവേശിപ്പിച്ചു. ഇരുന്നൂറോളം വരുന്ന കെഎസ്‌യു പ്രവര്‍ത്തകര്‍ ഡിസിസിയില്‍ നിന്ന് പ്രകടനമായി ആരംഭിച്ച പ്രതിഷേധം കമ്മീഷണര്‍ ഓഫീസിനു മുന്നില്‍ പോലീസ് തടഞ്ഞതോടെയാണ് സംഘർഷം ഉടലെടുത്തു. തുടര്‍ന്ന് പോലീസ് മൂന്നു റൗണ്ട് ജലപീരങ്കി ഉപയോഗിച്ചു. പിരിഞ്ഞു പോകാത്ത പ്രവര്‍ത്തകരെ അറസ്റ്റ് ചെയ്തു നീക്കി. ജില്ലാ പ്രസിഡന്‍റ് കെ.എം. കൃഷ്ണലാല്‍, സംസ്ഥാന ഭാരവാഹികളായ ആന്‍ സെബാസ്റ്റ്യന്‍, മിവ ജോളി, ജില്ലാ ഭാരവാഹികളായ അമര്‍ മിഷാല്‍, മോന്‍സി കോട്ടപ്പുറം, ആഷിന് പോള്‍, അസില്‍ ജബ്ബാര്‍, സി.ബി. സഫ്വാന്‍, ഡേവിസ് പൈയസ് തുടങ്ങിയവരെയാണ് അറസ്റ്റ് ചെയ്തത്. ഇവരെ കോടതിയില്‍ ഹാജരാക്കി റിമാൻഡ് ചെയ്തു. സംസ്ഥാനത്തെ പോലീസ് പിണറായി വിജയന്‍റെ അടിമകളായി മാറി ക്വട്ടേഷന്‍ പ്രവര്‍ത്തനങ്ങള്‍ക്കാണ് നേതൃത്വം കൊടുക്കുന്നതെന്ന് മാര്‍ച്ച് ഉദ്ഘാടനം ചെയ്ത ഡിസിസി പ്രസിഡന്‍റ് മുഹമ്മദ് ഷിയാസ് ആരോപിച്ചു. കെഎസ്‌യു എറണാകുളം ജില്ലാ പ്രസിഡന്‍റ് കെ.എം. കൃഷ്ണലാല്‍ അധ്യക്ഷത വഹിച്ചു.

മെട്രോയിൽ സിപിആർ പരിശീലനവുമായി ലേക്‌ഷോർ ആശുപത്രി

കൊച്ചി: ഹൃദയാഘാത മരണങ്ങൾ വർധിച്ചുവരുന്ന പശ്ചാത്തലത്തിൽ കൊച്ചി വിപിഎസ് ലേക്‌ഷോർ ആശുപത്രിയുടെ നേതൃത്വത്തിൽ വാട്ടർ മെട്രോയിൽ സിപിആർ ട്രെയിനിംഗും ഫ്ലാഷ്മോബും നടത്തി. വേൾഡ് പേഷ്യന്‍റ് സേഫ്റ്റി ഡേയോടനുബന്ധിച്ചാണു പൊതുജനങ്ങൾക്കായി പരിപാടി സംഘടിപ്പിച്ചത്. വണ്ടർ ലാ, മറൈൻ ഡ്രൈവ്, ഇൻഫോപാർക്ക്, കലൂർ സ്റ്റേഡിയം തുടങ്ങിയ കേന്ദ്രങ്ങളിലും സിപിആർ ട്രെയിനിംഗ് സംഘടിപ്പിച്ചു. ചോക്കിംഗ് മാനേജ്‌മെന്‍റ്, സ്പൈൻ ബോർഡ് മാനേജ്‌മെന്‍റ് ക്ലാസുകളും ഇതിനൊപ്പം ഉണ്ടായിരുന്നു. വർധിച്ചുവരുന്ന ആരോഗ്യപ്രശ്നങ്ങളെക്കുറിച്ച് ജനങ്ങളിലേക്കിറങ്ങിയുള്ള ബോധവത്കരണത്തിന് ആശുപത്രി പ്രതിജ്ഞാബദ്ധമാണെന്നു ലേക്‌ഷോർ മാനേജിംഗ് ഡയറക്ടർ എസ്.കെ. അബ്ദുള്ള പറഞ്ഞു. ഇന്നു ഫോറം മാൾ, കളക്ടറേറ്റ്, ലുലു മെട്രോ സ്റ്റേഷൻ, ലേക്‌ഷോർ ആശുപത്രി എന്നിവിടങ്ങളിൽ പരിശീലന പരിപാടി സംഘടിപ്പിക്കുമെന്ന് അധികൃതർ അറിയിച്ചു.

ജില്ലാ ബാസ്‌കറ്റ്‌ബോള്‍ ചാമ്പ്യന്‍ഷിപ്പ് : വനിതാ കിരീടം നാസ് കാലടിക്ക്

കൊച്ചി: ആലുവ ജീവസ് സിഎംഐ ഇന്‍ഡോര്‍ സ്റ്റേഡിയത്തില്‍ നടന്ന എറണാകുളം ജില്ലാ ബാസ്‌കറ്റ്‌ബോള്‍ ചാമ്പ്യന്‍ഷിപ്പിന്‍റെ വനിതാ ഫൈനലില്‍ നാസ് കാലടിക്ക് കിരീടം. ആലുവ മാവേലി ക്ലബ്ബിനെ 66-42 എന്ന സ്കോറിനാണ് പരാജയപ്പെടുത്തിയത്. പുരുഷ സെമിയില്‍ റോഷന്‍സ് സെവന്‍ സ്റ്റാര്‍ 56-28 എന്ന സ്കോറിനു കൊച്ചിയിലെ റീജിയണല്‍ സ്‌പോര്‍ട്‌സ് സെന്‍ററിനെയും സെന്‍ട്രല്‍ ജിഎസ്ടി കസ്റ്റംസ് 62-34 എന്ന സ്കോറിന് ഫ്രാഗോമാന്‍ കൊച്ചിയെയും പരാജയപ്പെടുത്തി.

ലീഗല്‍ ഗാര്‍ഡിയന്‍ഷിപ്പ് അദാലത്ത് സംഘടിപ്പിച്ചു

മൂവാറ്റുപുഴ: ജോഷ്വാ ആൻഡ് ജോക്കുട്ടന്‍ ഫൗണ്ടേഷന്‍, പരിവാര്‍, മൂവാറ്റുപുഴ ബ്ലോക്ക് പഞ്ചായത്ത് എന്നിവയുടെ സംയുക്താഭിമുഖ്യത്തില്‍ മൂവാറ്റുപുഴ ബ്ലോക്ക് പഞ്ചായത്ത് ഓഡിറ്റോറിയത്തില്‍ ലീഗല്‍ ഗാര്‍ഡിയന്‍ഷിപ്പ് അദാലത്ത് സംഘടിപ്പിച്ചു. അസിസ്റ്റന്‍റ് കളക്ടര്‍ പാര്‍വതി ഗോപകുമാര്‍ അദാലത്ത് ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍ അധ്യക്ഷത വഹിച്ചു. ബ്ലോക്ക് പഞ്ചായത്തംഗം പ്രഫ. ജോസ് അഗസ്റ്റിന്‍, സ്ഥിരംസമിതി അധ്യക്ഷ സാറാമ്മ ജോണ്‍, ലീഗല്‍ ഗാര്‍ഡിയന്‍ഷിപ്പ് ജില്ലാ കോ-ഓര്‍ഡിനേറ്റര്‍ എലിസബത്ത്, ജോയിന്‍റ് ബിഡിഒ ടി.വി. പ്രശാന്ത് എന്നിവര്‍ പ്രസംഗിച്ചു. നൂറോളം രക്ഷിതാക്കള്‍ ക്യാമ്പില്‍ പങ്കെടുത്തു.

തെരുവുവിളക്ക് അറ്റകുറ്റപ്പണി : അടിയന്തര കൗൺസിൽ യോഗത്തിൽ പരിഹാരം

കൂത്താട്ടുകുളം: നഗരസഭയിലെ തെരുവുവിളക്ക് അറ്റകുറ്റപ്പണിയുമായി ബന്ധപ്പെട്ട ഉയർന്നുവന്ന ആക്ഷേപങ്ങൾക്ക് പരിഹാരമായി. ഇന്നലെ കൂടിയ നഗരസഭ കൗൺസിൽ യോഗത്തിലാണ് തീരുമാനമെടുത്തത്. നഗരസഭയിൽ മുടങ്ങിക്കിടന്നിരുന്ന തെരുവുവിളക്ക് അറ്റകുറ്റപ്പണി കഴിഞ്ഞ ആഴ്ചയാണ് പുനരാരംഭിച്ചത്. യുഡിഎഫ് ഭരണസമിതിയുടെ പ്രഥമ വാഗ്ദാനമായിരുന്നു നഗരസഭയിലെ തെരുവുവിളക്കുകളുടെ അറ്റകുറ്റപ്പണി. എന്നാൽ യുഡിഎഫ് കൗൺസിലർമാരുടെ വാർഡുകളിൽ മാത്രമാണ് അറ്റകുറ്റപ്പണികൾ നടക്കുന്നത് എന്നും എൽഡിഎഫ് അംഗങ്ങളുടെ വാർഡുകളിൽ കൃത്യമായി അറ്റകുറ്റപ്പണി നടക്കുന്നില്ല എന്ന് ആരോപിച്ച് എൽഡിഎഫിന് നേതൃത്വത്തിൽ കഴിഞ്ഞദിവസം നഗരസഭ അസിസ്റ്റന്‍റ് എൻജിനീയറുടെ ഓഫീസിനു മുന്നിൽ പ്രതിഷേധ സമരം നടന്നിരുന്നു. സ്ട്രീറ്റ് ലൈറ്റ് മെയിന്‍റനൻസുമായി ബന്ധപ്പെട്ട് ഉദ്യോഗസ്ഥരുടെ ഇടയിൽ ആശയക്കുഴപ്പങ്ങൾ നിലനിൽക്കെ സംഭവത്തിൽ കൂടുതൽ വ്യക്തത വരുത്തുന്നതിനായി കൗൺസിലിൽ വിഷയം ചർച്ചയ്ക്ക് എടുക്കണം എന്ന് ഉദ്യോഗസ്ഥരും കൗൺസിൽ അംഗങ്ങളും ആവശ്യപ്പെടുകയായിരുന്നു. ഇതിന്‍റെ അടിസ്ഥാനത്തിലാണ് ഇന്നലെ കൗൺസിൽ യോഗത്തിൽ വിഷയം ചർച്ചക്കെടുത്തത് എന്ന് നഗരസഭ വൈസ് ചെയർമാൻ പി.ജി. സുനിൽകുമാർ പറഞ്ഞു. ചർച്ചയ്ക്കൊടുവിൽ നഗരസഭയുടെ 25 ഡിവിഷനുകളിലും കൃത്യമായി മെയിന്‍റനൻസ് വർക്കുകൾ നടത്തുന്നതിന് ഭാഗമായി 55 എൽഇഡി ബൾബുകൾ വീതം നൽകാൻ തീരുമാനം എടുത്തു. കൗൺസിൽ യോഗത്തിന്‍റെ തീരുമാനം അനുസരിച്ച് ഇന്നു മുതൽ വാർഡുകളിലെ മെയിന്‍റനൻസ് പുനരാരംഭിക്കും.

ടേക്ക് എ ബ്രേക്ക് പദ്ധതിയിലെ നാശനഷ്ടം : നഗരസഭ ചെയർപേഴ്സൺ പോലീസിൽ പരാതി നൽകി

കൂത്താട്ടുകുളം: ടേക്ക് എ ബ്രേക്ക് പദ്ധതി പ്രദേശത്ത് നാശനഷ്ടം ഉണ്ടാക്കിയ സ്വകാര്യ വ്യക്തിക്കെതിരേ നഗരസഭ പോലീസിൽ പരാതി നൽകി. എം സി റോഡിൽ കാലിക്കറ്റ് കവലയ്ക്ക് സമീപം പ്രവർത്തിച്ചുവരുന്ന ടേക്ക് എ ബ്രേക്ക് പദ്ധതിയുടെ ഭാഗമായുള്ള ശുചിമുറികളിലെ ടാപ്പുകളും ബൾബുകളും ഊരി മാറ്റുകയും സാമൂഹിക മാധ്യമങ്ങൾ വഴി നഗരസഭയെ അപകീർത്തിപ്പെടുത്താൻ ശ്രമിച്ച കൂത്താട്ടുകുളം സ്വദേശി ജിബി ജോർജിനെതിരേയാണ് നഗരസഭ ചെയർപേഴ്സൺ കലാ രാജു കൂത്താട്ടുകുളം പോലീസ് സ്റ്റേഷനിൽ പരാതി നൽകിയിട്ടുള്ളത്. ടേക്ക് എ ബ്രേക്കിംഗ് നടത്തിപ്പിന് ആവശ്യമായ ജലലഭ്യതയും തൊഴിലാളികളുടെ സേവനവും നഗരസഭ ഉറപ്പുവരുത്തിയിട്ടുണ്ട്. രണ്ട് ദിവസങ്ങൾ കൂടുമ്പോഴാണ് നിലവിൽ ടേക്ക് എ ബ്രേക്കിലേക്ക് വെള്ളം എത്തുന്നത്. വെള്ളം ഇല്ലാത്ത ദിവസങ്ങളിൽ നഗരസഭയിൽ നിന്നും വെള്ളം എത്തിച്ച ടാങ്ക് നറക്കുന്ന രീതിയാണ് നിലവിലുള്ളത്. ഇതിന് പുറമെ മറ്റൊരു ടാങ്ക് ആവശ്യമെങ്കിൽ പുതിയ ടാങ്ക് സ്ഥാപിക്കുന്നതിനുള്ള നടപടികൾ സ്വീകരിക്കും. നിലവിൽ ഇവിടെ തൊഴിലെടുത്തിരുന്ന ജീവനക്കാരിയെ പറഞ്ഞുവിട്ടതായി ആക്ഷേപം നിലനിൽക്കുന്നുണ്ട്. എന്നാൽ നൂറു ദിന കർമ്മ പദ്ധതിയുടെ ഭാഗമായി തൊഴിൽ ദിനങ്ങൾ പൂർത്തിയാക്കിയ ജീവനക്കാരിയുടെ സേവനം പൂർത്തിയായതിന്‍റെ അടിസ്ഥാനത്തിലാണ് പുതിയ ആളെ നിയമിച്ചിട്ടുള്ളതെന്നും നഗരസഭ അധികൃതർ അറിയിച്ചു. ടേക്ക് എ ബ്രേക്കിൽ വെള്ളം ഇല്ലാത്തതിനാൽ ശുചിമുറികൾ വൃത്തിഹീനമായ നിലയിൽ ആണെന്നും ശുചിമുറികൾക്കുള്ളിൽ ടാപ്പുകളും ബൾബുകളും ഇല്ല എന്നും കാണിച്ച് സാമൂഹ്യ മാധ്യമങ്ങളിൽ സ്വകാര്യ വ്യക്തി വീഡിയോ പ്രചരിപ്പിച്ചിരുന്നു. ഇതേ തുടർന്ന് എൽഡിഎഫ് കൗൺസിലർമാരുടെ നേതൃത്വത്തിൽ സ്ഥലം സന്ദർശിക്കുകയും ടേക്ക് എ ബ്രേക്കിന് മുന്നിൽ സമരം നടത്തുകയും ചെയ്തിരുന്നു. സമരം നടന്നതിനെ തുടർന്നാണ് നഗരസഭ അധികൃതർ ടേക്ക് എ ബ്രേക്ക് സന്ദർശിച്ചത്.

മിനിസ്റ്റേഴ്‌സ് എക്‌സലന്‍സ് അവാര്‍ഡ് ഏറ്റുവാങ്ങി

വാഴക്കുളം: ഉന്നതവിദ്യാഭ്യാസ മേഖലയില്‍ മികവ് പുലര്‍ത്തുന്ന സ്ഥാപനങ്ങള്‍ക്കായി സംസ്ഥാന സര്‍ക്കാര്‍ ഏര്‍പ്പെടുത്തിയ എക്‌സലന്‍ഷ്യ-2025 മിനിസ്റ്റേഴ്‌സ് എക്‌സലന്‍സ് അവാര്‍ഡ് തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ മന്ത്രി ആര്‍. ബിന്ദുവില്‍ നിന്നും വാഴക്കുളം വിശ്വജ്യോതി എന്‍ജിനീയറിംഗ് കോളജിന് വേണ്ടി ഐക്യൂഎസി കോ-ഓര്‍ഡിനേറ്റര്‍ ഡോ. സി.കെ അനൂപ് ഏറ്റുവാങ്ങി. നാക് എ പ്ലസ്പ്ലസ്, എ പ്ലസ്, എ ഗ്രേഡ് നേടിയിട്ടുള്ള സ്ഥാപനങ്ങളെയും എന്‍ഐആര്‍എഫ്, കെഐആര്‍എഫ് മുന്നേറ്റ സ്ഥാപനങ്ങളെയും ചടങ്ങില്‍ മിനിസ്റ്റേഴ്‌സ് എക്‌സലന്‍സ് അവാര്‍ഡ് നല്‍കി ആദരിച്ചു.

ആനിക്കാട് ചിറപ്പടിയിൽ വ്യാപാര സ്ഥാപനത്തിൽ തീപിടിത്തം‌‌; ലക്ഷങ്ങളുടെ നഷ്ടം

വാഴക്കുളം: ആനിക്കാട് ചിറപ്പടിക്ക് സമീപം വ്യാപാര സ്ഥാപനത്തിനും പിക്ക് അപ്പ് വാനിനും തീപിടിച്ചു. തിങ്കളാഴ്ച രാത്രി 12.30 ഓടെ ചിറപ്പടിയില്‍ സംസ്ഥാന പാതയോടു ചേര്‍ന്നുള്ള തലച്ചിറ പുത്തന്‍പുരയില്‍ ഷാഹുല്‍ ഷിനാജിന്‍റെ ഉടമസ്ഥതയിലുള്ള വ്യാപാരസ്ഥാപനത്തിലാണ് തീ പടര്‍ന്നത്. സമീപത്തായി നിര്‍ത്തിയിട്ടിരുന്ന പിക്ക്അപ്പ് വാനിലേക്കും തീ ആളിപ്പടര്‍ന്നു. നാട്ടുകാര്‍ വിളിച്ചറിയിച്ചതിനെ തുടര്‍ന്ന് മൂവാറ്റുപുഴ അഗ്‌നിരക്ഷാ സേന സ്ഥലത്തെത്തിയാണ് തീയണച്ചത്. വ്യാപാര സ്ഥാപനം ഭാഗികമായും പിക്ക്അപ്പ് വാനിന്‍റെ പിന്‍ഭാഗവും കത്തി നശിച്ചു. ലക്ഷക്കണക്കിനു രൂപയുടെ നഷ്ടമുണ്ടായിട്ടുള്ളതായാണ് പ്രാഥമിക നിഗമനം. തന്‍റെ വ്യാപാര സ്ഥാപനത്തിനു തീയിട്ടതാണെന്നാരോപിച്ച് സിപിഐ ബ്രാഞ്ച് സെക്രട്ടറി കൂടിയായ സ്ഥാപന ഉടമ ഷാഹുല്‍ ഷിനാജ് മൂവാറ്റുപുഴ പോലീസില്‍ പരാതി നല്‍കി. ലഹരി ഉപയോഗവും വിനിമയവും തടഞ്ഞതുമായി ബന്ധപ്പെട്ട് ഷാഹുലിന് നേര്‍ക്ക് അടുത്തയിടെ ആക്രമണം ഉണ്ടായിട്ടുള്ളതായും പരാതിയില്‍ സൂചിപ്പിച്ചിട്ടുണ്ട്. പ്രതികാര നടപടികളുടെ ഭാഗമായിട്ടാവാം തീയിട്ടതെന്ന് ഷാഹുല്‍ പറഞ്ഞു.

സാറാമ്മ ഏലിയാസ് വധം : ക്രൈം ബ്രാഞ്ച് അന്വേഷണം ഊർജിതമെന്ന് മുഖ്യമന്ത്രി

കോതമംഗലം: ചേലാട് കള്ളാട് സാറാമ്മ ഏലിയാസ് കൊലപാതകം സംബന്ധിച്ച് ക്രൈംബ്രാഞ്ച് ഊർജിത അന്വേഷണം നടത്തിവരുന്നതായി മുഖ്യമന്ത്രി പിണറായി വിജയൻ നിയമസഭയിൽ അറിയിച്ചു. ആന്‍റണി ജോൺ എംഎൽഎയുടെ നിയമസഭാ ചോദ്യത്തിന് മറുപടിയായിട്ടാണ് മുഖ്യമന്ത്രി ഇക്കാര്യം വ്യക്തമാക്കിയത്.

ഇലഞ്ഞി ലയൺസ് ക്ലബ് പാർപ്പിട പദ്ധതി ആരംഭിച്ചു

ഇലഞ്ഞി: ലയണ്‍സ് ക്ലബ് നടപ്പാക്കുന്ന പാര്‍പ്പിട പദ്ധതി അനൂപ് ജേക്കബ് എംഎല്‍എ ഉദ്ഘാടനം ചെയ്തു. ലയണ്‍സ് ക്ലബ് ഡിസ്ട്രിക്ട് 318 സിയുടെയും ചിറ്റിലപ്പിള്ളി ഫൗണ്ടേഷന്‍റെയും സഹകരണത്തോടെയാണ് പദ്ധതി. ലയണ്‍സ് ക്ലബ് പ്രസിഡന്‍റ് പീറ്റര്‍ പോള്‍ കുഴപ്പത്തടം അധ്യക്ഷത വഹിച്ചു. ലയണ്‍സ് ക്ലബ് റീജിയണല്‍ ചെയര്‍മാന്‍ ബിജു വാതക്കാട്ടെല്‍, ഇലഞ്ഞി പഞ്ചായത്ത് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മോളി ഏബ്രഹാം, ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മാജി സന്തോഷ്, ലയണ്‍സ് ക്ലബ് ഭാരവാഹികളായ പീറ്റര്‍ ജോണ്‍, ബേബി സെബാസ്റ്റ്യന്‍, തുടങ്ങിയവര്‍ പ്രസംഗിച്ചു.

‘ടി.എം. ജേക്കബിന്‍റെ പ്രതിമ സ്ഥാപിക്കാൻ സ്ഥലം അനുവദിക്കണം’

പിറവം: മുന്‍ മന്ത്രി ടി.എം. ജേക്കബിന്‍റെ പൂര്‍ണകായ പ്രതിമ സ്ഥാപിക്കാന്‍ കെഎസ്ഇബി പിറവം സബ് ഡിവിഷന്‍ ഓഫീസിന്‍റെ സ്ഥലം അനുവദിക്കണമെന്ന് വൈദ്യുതി മന്ത്രിയോട് അനൂപ് ജേക്കബ് എംഎല്‍എ ആവശ്യപ്പെട്ടു. കെഎസ്ഇബിയുടെ ഉടമസ്ഥതയില്‍ തന്നെ നിലനിര്‍ത്തി സ്ഥലം നല്‍കുന്നതിനായിട്ടാണ് മുഖ്യമന്ത്രിക്കും വൈദ്യുതി മന്ത്രിയെ നേരില്‍ കണ്ടും എംഎല്‍എ കത്ത് നല്‍കിയത്. പിറവത്തെ സബര്‍മെന്‍ മാളില്‍ സ്ഥലം ലഭ്യമല്ലാത്തതിനാലാണ് കെഎസ്ഇബിയുടെ സ്ഥലം ആവശ്യമായി വന്നത്. പോസ്റ്റ് ഓഫീസ് ജംഗ്ഷനില്‍ ഇരിക്കുന്ന ഏകദേശം രണ്ട് സെന്‍റില്‍ താഴെ വരുന്ന കോണാകൃതിയില്‍ ഇരിക്കുന്ന സ്ഥലമാണിത്. കോണാകൃതിയില്‍ ഇരിക്കുന്നതിനാല്‍ ഇത് മറ്റ് നിര്‍മിതികള്‍ക്ക് സാധ്യമല്ലന്നും കത്തില്‍ ചൂണ്ടിക്കാണിക്കുന്നു.

കോതമംഗലം ചെറിയപള്ളിയിൽ കന്നി 20 പെരുന്നാൾ 25 മുതൽ

കോതമംഗലം: മാർ തോമാ ചെറിയപള്ളിയിൽ കന്നി 20 പെരുന്നാൾ 25 മുതൽ ഒക്‌ടോബർ നാല് വരെ ആഘോഷിക്കും. ഒരുക്കങ്ങൾ പുരോഗമിക്കുന്നതായി സംഘാടകർ പത്രസമ്മേളനത്തിൽ അറിയിച്ചു. 25നു രാവിലെ 7.15ന് ഏലിയാസ് മാർ യൂലിയോസ് മെത്രാപ്പോലീത്തയുടെ മുഖ്യകാർമികത്വത്തിൽ അഞ്ചിന്മേൽ കുർബാന, നാലിനു ചക്കാലക്കുടി ചാപ്പലിൽനിന്നു പള്ളിയിലേക്കു പ്രദക്ഷിണം, അഞ്ചിന് കൊടിയേറ്റ് - വികാരി ഫാ. ജോസ് മാത്യു തച്ചേത്തുകുടി, തുടർന്നു കരിങ്ങാച്ചിറ പള്ളിയിൽനിന്നുള്ള തമുക്ക് നേർച്ച, ആറിന് സന്ധ്യാനമസ്കാരം. 26ന് കൽക്കുരിശ് പെരുന്നാൾ, രാവിലെ 7.15നു ഗീവർഗീസ് മാർ അത്തനാസിയോസ് മെത്രാപ്പോലീത്തയുടെ മുഖ്യകാർമികത്വത്തിൽ അഞ്ചിന്മേൽ കുർബാന, പ്രദക്ഷിണം, ആശീർവാദം, മുന്നിനു സ്റ്റാൾ ലേലം, ആറിന് സന്ധ്യാനമസ്കാരം. 27ന് രാവിലെ 7.30നു ഡോ. കുര്യാക്കോസ് മാർ തെയോഫിലോസ് മെത്രാപ്പോലീത്തയുടെ മുഖ്യകാർമികത്വത്തിൽ അഞ്ചിന്മേൽ കുർബാന, ആറിന് സന്ധ്യാനമസ്കാരം, വൈദ്യുത ദീപാലങ്കാരം സ്വിച്ച് ഓൺ കർമം. 28നു രാവിലെ ആറിനു കുർബാന - മാത്യൂസ് മാർ തിമോത്തിയോസ് മെത്രാപ്പോലീത്ത, 7.30നു കുർബാന സക്കറിയാസ് മാർ പീലക്സിനോസ് മെത്രാപ്പോലീത്ത, ഒൻപതിനു കുർബാന മാത്യൂസ് അപ്രേം മെത്രാപ്പോലീത്ത, ആറിന് സന്ധ്യാപ്രാർഥന, 6.30ന് കുർബാന-കുര്യാക്കോസ് മാർ ഇവാനിയോസ് മെത്രാപ്പോലീത്ത. 29ന് രാവിലെ 7.15നു ഡോ. മാത്യൂസ് മാർ ഇവാനിയോസ് മെത്രാപ്പോലീത്തയുടെ മുഖ്യകാർമികത്വത്തിൽ അഞ്ചിന്മേൽ കുർബാന, ആറിന് സന്ധ്യാനമസ്കാരം. 30ന് രാവിലെ 7.15നു മർക്കോസ് മാർ ക്രിസോസ്‌റ്റമോസ് മെത്രാപ്പോലീത്തയുടെ മുഖ്യകാർമികത്വത്തിൽ അഞ്ചിന്മേൽ കുർബാന, അഞ്ചിനു കലവറ നിറയ്ക്കൽ, ആറിന് സന്ധ്യാനമസ്‌കാരം. ഒക്‌ടോബർ ഒന്നിന് രാവിലെ 7.15നു കുര്യാക്കോസ് മാർ ക്ലിമ്മീസ് മെത്രാപ്പോലീത്തയുടെ മുഖ്യകാർമികത്വത്തിൽ അഞ്ചിന്മേൽ കുർബാന, ആറിന് സന്ധ്യാനമസ്‌കാരം. രണ്ടിന് രാവിലെ 7.15ന് ഡോ. മാത്യൂസ് മാർ അന്തീമോസ് മെത്രാപ്പോലീത്തയുടെ മുഖ്യകാർമികത്വത്തിൽ മൂന്നിന്മേൽ കുർബാന, മൂന്നിനു പള്ളി ഉപകരണങ്ങൾ മേമ്പൂട്ടിൽനിന്നു പള്ളിയകത്തേക്ക്, അഞ്ചിനു തീർഥാടകർക്കു സ്വീകരണം, 6.30നു ശ്രേഷ്ഠ കാതോലിക്ക ബസേലിയോസ് ജോസഫ് ബാവായുടെ മുഖ്യകാർമികത്വത്തിൽ സന്ധ്യാനമസ്കാരം, പ്രസംഗം, 10ന് നഗരപ്രദക്ഷിണം, ആശീർവാദം, വെടിക്കെട്ട്. മൂന്നിന് രാവിലെ 5.30നു കുർബാന - ഡോ. ഏബ്രഹാം മാർ സേവേറിയോസ് വലിയ മെത്രാപ്പോലീത്ത, ഏഴിനു കുർബാന - ഡോ. തോമസ് മാർ തിമോത്തിയോസ് മെത്രാപ്പോലീത്ത, 8.30നു കുർബാന, പ്രസംഗം - ശ്രേഷ്ഠ കാതോലിക്ക ബാവാ, 10.30നു നേർച്ചസദ്യ, രണ്ടിനു പ്രദക്ഷിണം, ആശീർവാദം, അഞ്ചിനു പള്ളി ഉപകരണങ്ങൾ തിരികെ മേമ്പൂട്ടിലേക്ക്, ആറിനു സന്ധ്യനമസ്കാരം. നാലിന് രാവിലെ എട്ടിന് ഏലിയാസ് മാർ അത്തനാസിയോസ് മെത്രാപ്പോലീത്തയുടെ മുഖ്യകാർമികത്വത്തിൽ മൂന്നിന്മേൽ കുർബാന, ഒൻപതിന് പാച്ചോർ നേർച്ച, 10.30നു ലേലം, നാലിനു കൊടിയിറക്ക്, 6.15നു സന്ധ്യാനമസ്കാരം എന്നിങ്ങനെയാണ് തിരുക്കർമ്മങ്ങൾ. പത്ര സമ്മേളനത്തിൽ വികാരി ഫാ. ജോസ് മാത്യു തച്ചേത്തുകുടി, സഹവികാരിമാരായ ഫാ. സാജു കുരിക്കപിള്ളിൽ,ഫാ. എൽദോസ് ചെങ്ങമനാട്ട്, ഫാ. അമൽ കുഴികണ്ടത്തിൽ, ഫാ. നിയോൺ പൗലോസ്, ഫാ. സിച്ചു രാജു, തന്നാണ്ട് ട്രസ്റ്റിമാരായ കെ.കെ. ജോസഫ്, എബി ചേലാട്ട്, വർക്കിംഹ് കമ്മറ്റിയഗംങ്ങളായ സലിം ചെറിയാൻ, ബിനോയ്‌ മണ്ണഞ്ചേരി, ഡോ. റോയി മാലിയിൽ, മാനേജിംഗ് കമ്മിറ്റി അംഗങ്ങളായ ജോർജ് കൂർപിള്ളിൽ, കുര്യാക്കോസ് വർഗീസ്, സി.എ. ജോസ്, ബിനു കോമയിൽ, കെ.കെ. വർക്കി, കെ.സി. എൽദോ എന്നിവർ പങ്കെടുത്തു.

എക്സലൻസ് അവാർഡ് തിളക്കത്തിൽ സെന്‍റ് സേവ്യേഴ്സ്

ആലുവ: ഉന്നത വിദ്യാഭ്യാസ രംഗത്തെ മികച്ച പ്രവർത്തനങ്ങൾക്ക് നൽകിവരുന്ന മിനിസ്റ്റേഴ്സ് എക്സലൻസ് അവാർഡ് 2025ന് ആലുവ സെന്‍റ് സേവ്യേഴ്സ് കോളജ് ഫോർ വിമെൻ അർഹമായി. ഉന്നത വിദ്യാഭ്യാസ മന്ത്രി ആർ. ബിന്ദു അവാർഡ് കൈമാറി. നാക് അക്രഡിറ്റേഷൻ അഞ്ചാം സൈക്കിൾ പിന്നിട്ട ഇന്ത്യയിലെ ആദ്യ കോളജ്, അഞ്ചാം സൈക്കിളിൽ 3.68 പോയിന്‍റുകളോടെ എ പ്ലസ് പ്ലസ് ഗ്രേഡ് നേടുന്ന ആദ്യ കോളജ് എന്നീ യോഗ്യതകൾ മുൻനിർത്തിയാണ് എക്സലൻസ് അവാർഡ് ലഭിച്ചത്. ആറ് പതിറ്റാണ്ടായി കൊച്ചിയുടെ ഉന്നതവിദ്യാഭ്യാസ മേഖലയിൽ‍ തിളങ്ങി നിൽക്കുന്ന കലാലയമാണ് സെന്‍റ് സേവ്യേഴ്‌സ്.

രോഗീപരിചരണം മെച്ചപ്പെടുത്താന്‍ ഡിജിറ്റല്‍വത്കരണം

കൊച്ചി: എഐ അധിഷ്ഠിത കസ്റ്റമര്‍ റിലേഷന്‍ഷിപ്പ് മാനേജ്മെന്‍റ് കമ്പനിയായ സെയില്‍സ് ഫോഴ്സ് മുന്‍നിര ആയുര്‍വേദ വെല്‍നെസ് കമ്പനി ജീന സിഖോ ലൈഫ്കെയറുമായി സഹകരിച്ച് ഡിജിറ്റല്‍വത്കരണത്തിലൂടെ രോഗീപരിചരണം മെച്ചപ്പെടുത്താനുള്ള പദ്ധതികള്‍ ആവിഷ്‌കരിച്ചു. സെയില്‍സ്ഫോഴ്‌സിന്‍റെ എഐ അധിഷ്ഠിത സൊലൂഷനുകള്‍ ഉപയോഗിച്ച് പ്രവര്‍ത്തനങ്ങള്‍ കാര്യക്ഷമമാക്കാനും ഡിജിറ്റല്‍ പ്ലാറ്റ്‌ഫോമുകള്‍ വഴി സമഗ്ര ആരോഗ്യപരിപാലനം വിപുലീകരിക്കാനുമാണ് ഇതിലൂടെ ലക്ഷ്യമിടുന്നതെന്ന് അധികൃതര്‍ അറിയിച്ചു.

കളമശേരി നഗരഭരണത്തിനെതിരെ എല്‍ഡിഎഫിന്‍റെ കുറ്റപത്രം

കളമശേരി: അഴിമതിയും ഗ്രൂപ്പ് പോരും സ്വജനപക്ഷപാതവും കൊണ്ട് സാധാരണക്കാരന്‍റെ ജീവിതം ദുസഹമാക്കുന്നുവെന്ന് ആരോപിച്ച് കളമശേരി നഗരസഭാ ഭരണത്തിനെതിരെ എല്‍ഡിഎഫ് കുറ്റപത്രം സമര്‍പ്പിച്ചു. സിപിഎം സംസ്ഥാന കമ്മിറ്റിയംഗം സി.എം. ദിനേശ് മണി കുറ്റപത്രം പ്രകാശിപ്പിച്ചു. കെ.എം.ഇസ്മയില്‍ അധ്യക്ഷത വഹിച്ചു. എല്‍ഡിഎഫ് മണ്ഡലം സെക്രട്ടറി കെ.ബി. വര്‍ഗീസ്, നേതാക്കളായ വി.എ. സക്കീര്‍ ഹുസൈന്‍, ഹെൻറി സീമന്തി, എസ്.രമേശന്‍, എ.ടി.സി. കുഞ്ഞുമോന്‍, ആര്‍.വി. അന്‍വര്‍ തുടങ്ങിയവര്‍ പ്രസംഗിച്ചു. തുടര്‍ന്ന് എല്‍ഡിഎഫ് പാര്‍ലമെന്‍ററി സെക്രട്ടറി പി.എം. മുജീബ് റഹ്മാന്‍റഎറെ നേതൃത്വത്തില്‍ കുറ്റപത്രം നഗരസഭാ സെക്രട്ടറിക്ക് നല്‍കി.

ആലുവ-ആലങ്ങാട് റോഡ്: വിശദ വിലനിര്‍ണയ റിപ്പോര്‍ട്ട് അടുത്ത മാസം

ആലങ്ങാട്: ആലുവ-ആലങ്ങാട് റോഡ് വീതി കൂട്ടി നിര്‍മിക്കുന്ന പദ്ധതിക്കുള്ള വിശദ വിലനിര്‍ണയ റിപ്പോര്‍ട്ട് ഒക്ടോബര്‍ 20ന് മുന്‍പായി സമര്‍പ്പിക്കുമെന്ന് മന്ത്രി പി. രാജീവ്. അടിസ്ഥാന വിലനിര്‍ണയ റിപ്പോര്‍ട്ടും പുനരധിവാസ പാക്കേജും ഈയാഴ്ച തന്നെ തയാറാവുമെന്നും പദ്ധതി അവലോകന യോഗത്തില്‍ അധ്യക്ഷത വഹിച്ച് സംസാരിക്കവേ മന്ത്രി പറഞ്ഞു. റോഡ് നിര്‍മാണത്തിനായുള്ള സ്ഥലപരിശോധന പൂര്‍ത്തിയാക്കി. 230 വസ്തുവകകളുടെ വിലനിര്‍ണയം ആണ് നടത്തേണ്ടത്. ഇതില്‍ 190 ഓളം കെട്ടിടങ്ങളാണ്. ഡിസംബറില്‍ വിജ്ഞാപനം പുറപ്പെടുവിക്കും. പുനരധിവാസ പാക്കേജ് തയാറാക്കുന്നതിനായി മുഴുവന്‍ വീടുകളും സ്ഥാപനങ്ങളും സന്ദര്‍ശിച്ചുള്ള ഡാറ്റ ശേഖരണം നേരത്തെ പൂര്‍ത്തിയാക്കിയിരുന്നു. പദ്ധതിക്കായി ആവശ്യമുള്ള 202 സെന്‍റ് ഭൂമി ഏറ്റെടുക്കുന്നതിന്‍റെ ഭാഗമായുള്ള നടപടികളാണ് ഇപ്പോള്‍ പുരോഗമിക്കുന്നത്. ഏറ്റെടുക്കല്‍ നിയമ പ്രകാരമുള്ള സാമൂഹ്യാഘാത പഠനം നേരത്തെ പൂര്‍ത്തിയാക്കുകയും വിദഗ്ധ സമിതി പരിശോധനാ റിപ്പോര്‍ട്ട് സമര്‍പ്പിക്കുകയും ചെയ്തിരുന്നു. പൊതുതെളിവെടുപ്പ് നേരത്തെ പൂര്‍ത്തിയാക്കി. 12 മീറ്റര്‍ വീതിയിലാണ് റോഡ് നിര്‍മിക്കുക. ഏഴ് മീറ്റര്‍ വീതിയിലുള്ള ടാര്‍ റോഡിനൊപ്പം സര്‍വീസ് റോഡ്, ഡ്രെയിന്‍ കം ഫുട്പാത്ത്, കേബിള്‍ ഡക്ട് എന്നിവ ഉള്‍പ്പെടെയാണ് 12 മീറ്റര്‍ വീതിയിലുള്ള റോഡ് വിഭാവനം ചെയ്തിരിക്കുന്നത്. പൊതുമരാമത്ത് വകുപ്പ് ചീഫ് എന്‍ജിനീയറുടെ അംഗീകാരം പുതിയ അലൈന്‍മെന്‍റിന് നേരത്തെ ലഭിച്ചിരുന്നു. രൂക്ഷമായ ഗതാഗതക്കുരുക്ക് നേരിടുന്ന തോട്ടക്കാട്ടുകര കിഴക്കേ കടുങ്ങല്ലൂര്‍ ഭാഗത്ത് മതിയായ വീതി റോഡിന് ലഭിക്കുന്നതോടെ കൂടുതല്‍ സുരക്ഷിതമായ യാത്രാസൗകര്യം ലഭിക്കുമെന്നും മന്ത്രി പി. രാജീവ് പറഞ്ഞു.

അങ്കമാലി നഗരസഭാ പാർക്കിന്‍റെ നവീകരണോദ്ഘാടനം നടത്തി

അങ്കമാലി : അമൃത് 2.0 പദ്ധതിയിൽ ഉൾപ്പെടുത്തി അങ്കമാലി നഗരസഭ പാർക്കിന്‍റെ നവീകരണം ആരംഭിച്ചു. നഗരസഭ ചെയർപേഴ്സൺ അഡ്വ. ഷിയോ പോൾ ഉദ്ഘാടനം നിർവഹിച്ചു. ഉപാധ്യക്ഷ സിനി മനോജ്‌ അധ്യക്ഷത വഹിച്ചു. ചടങ്ങിൽ നഗരസഭ സ്ഥിരസമിതി അധ്യക്ഷന്മാരായ പോൾ ജോവർ, ഷൈനി മാർട്ടിൻ, മനു നാരായണൻ, ലക്സി ജോയ്, മുൻ ചെയർപേഴ്സൺ മാത്യു തോമസ്, ജനപ്രതിനിധികളായ റീത്ത പോൾ, ലിസി പോളി, ബാസ്റ്റിൻ ഡി. പാറയ്ക്കൽ, ലില്ലി ജോയ്, സാജു നെടുങ്ങാടൻ, സന്ദീപ് ശങ്കർ, എ. വി രഘു, ഏല്യാസ് ടി. വൈ, വിത്സൺ മുണ്ടാടൻ, ലേഖ മധു, ജോഷി പി. എൻ, അസിസ്റ്റന്‍റ് എക്സിക്യൂട്ടീവ് എഞ്ചിനീയർ ശോഭിനി ടി. വി, കില റിസോഴ്സ് പേഴ്സൺ പി. ശശി എന്നിവർ പ്രസംഗിച്ചു.

പെരിയാർവാലി കനാലുകൾ ശുചീകരിക്കണമെന്ന്

കിഴക്കമ്പലം : കടുത്ത വേനൽ ആകും മുമ്പ് പെരിയാർ വാലി കനാലുകൾ ശുചീകരിക്കണമെന്ന ആവശ്യം ശക്തമാകുന്നു. ജില്ലയുടെ കിഴക്കൻ മേഖലയിൽ ഉൾപ്പെടെ കുടിവെള്ളക്ഷാമത്തിനും കൃഷിക്കും വെള്ളം ലഭിക്കുന്നത് പെരിയാർ വാലി കനാലുകളെ ആശ്രയിച്ചാണ്. പെരുമ്പാവൂർ മണ്ഡലത്തിലും കിഴക്കമ്പലം, പട്ടിമറ്റം, വടവുകോട് പുത്തൻകുരിശ് , മഴുവന്നൂർ ,ഐക്കരനാട് , കുന്നത്തുനാട് മേഖലയിലെല്ലാം കുടിവെള്ള ക്ഷാമത്തിന് ഒരു പരിധി വരെ പരിഹാരം ഉണ്ടാകുന്നതും പെരിയാർ വാലി കനാൽ തുറന്ന് വിടുമ്പോഴാണ്. കൂടാതെ പഞ്ചായത്തുകളിലെ പല കുടിവെള്ള പദ്ധതികളും പെരിയാർ വാലിയെ ആശ്രയിച്ചാണ് നിലനിൽക്കുന്നത്. മഴക്കാലത്ത് പെരിയാർ വാലി കനാലുകളിൽ വെള്ളം തുറന്ന് വിടാത്തതിനാൽ കനാലിന്‍റെ ഇരു വശങ്ങളും കാട് കയറി മാലിന്യങ്ങൾ നിറഞ്ഞ് കിടക്കുകയാണ്. അതിനാൽ വേനൽ കടുക്കുന്നതിന് മുമ്പ് കനാൽ ശുചീകരിക്കണമെന്നാണ് നാട്ടുകാരുടെ ആവശ്യം. ത്രിതല പഞ്ചായത്ത് തെരഞ്ഞെടുപ്പ് പ്രഖ്യാപിച്ചാൽ പല സ്ഥലങ്ങളിലും പദ്ധതികൾ പ്രഖാപിക്കാനോ നടപ്പിലാക്കാനോ കഴിയാത്തതിനാൽ കനാൽ ശുചീകരണം നീണ്ടു പോയേക്കും. ഇതോടെ പ്രദേശത്ത് കുടിവെള്ള ക്ഷാമം രൂക്ഷമാകും. അതിനാൽ ഉടൻ തന്നെ പെരിയാർ വാലി കനാൽ ശുചീകരിക്കണമെന്നാണ് നാട്ടുകാരുടെ ആവശ്യം.

അമിതവേഗം, അപകടങ്ങൾ, മരണം... പൊറുതിമുട്ടിയ പാറപ്പുറത്തുകാർ ചെയ്തത് !

ഈ മുന്നറിയിപ്പു ബോർഡ് കണ്ടാൽ ബ്രേക്ക് കാഞ്ഞൂർ: ശ്രദ്ധിക്കുക, അശ്രദ്ധമായി അമിതവേഗത്തിൽ വാഹനം ഓടിച്ച് അപകടമുണ്ടാക്കിയാൽ നാട്ടുകാരുടെ തല്ല് ഉറപ്പ്. ഒരു ദയയും ഉണ്ടാകില്ല. അടുത്തയിടെ നവീകരിച്ചു മികച്ച നിലവാരത്തിലേക്കുയർത്തിയൊരു റോഡിന്‍റെ വശങ്ങളിൽ കാഞ്ഞൂർ പാറപ്പുറം നിവാസികൾ സ്ഥാപിച്ച ബോർഡിലെ വാചകങ്ങളാണിത്. ഈ പ്രഖ്യാപനം അല്പം കടുത്തതായില്ലേ എന്നു ചോദിച്ചാൽ, വാഹനങ്ങളുടെ അമിതവേഗതയും അപകടങ്ങളും ആവർത്തിക്കുന്നതു കണ്ടു പൊറുതി മുട്ടിയതുകൊണ്ടാണിങ്ങനെയെന്നു നാട്ടുകാരുടെ മറുപടി. ആലുവ ദേശത്തു നിന്നു ചൊവ്വര വഴി പാറപ്പുറം വല്ലംകടവ് വരെയുള്ള 14 കിലോമീറ്റർ റോഡിലാണ് അപകടങ്ങൾ തുടർക്കഥയാവുന്നത്. കഴിഞ്ഞ തിരുവോണ നാളിൽ മൂന്നു പേരുമായി അമിത വേഗത്തിലെത്തിയ ബൈക്കിടിച്ചു പാറപ്പുറം സ്വദേശി വട്ടേലി സേവ്യർ (59) മരിച്ചത് ഈ റോഡിലുണ്ടായ അപകട പരന്പരരയിൽ ഒടുവിലത്തേത്താണ്. വല്ലംകടവ്- പാറപ്പുറം പാലം തുറന്നതിനു പിന്നാലെ റോഡിന്‍റെ നവീകരണവും നടന്നതോടെ ഇതുവഴിയുള്ള യാത്രക്കാരുടെ എണ്ണത്തിൽ വലിയ വർധനയുണ്ട്. എംസി റോഡിൽ നിന്നു കൊച്ചി വിമാനത്താവളത്തിലേക്കും ദേശീയപാതയിലേക്കുമെത്താനുള്ള എളുപ്പമാർഗമായി ഈ റോഡ് ഉപയോഗിക്കുന്നവരേറെയാണ്. പെരുന്പാവൂർ ഭാഗത്തു നിന്നു വരുന്നവർ കാലടിയിലെ രൂക്ഷമായ ഗതാഗതക്കുരുക്ക് ഒഴിവാക്കാനും ഈ റോഡ് ഉപയോഗിക്കുന്നു. യാത്രക്കാരുടെ എണ്ണം കൂടിയപ്പോഴും അതനുസരിച്ചുള്ള അനുബന്ധ സൗകര്യങ്ങൾ ഇല്ലാത്തത് പ്രദേശവാസികൾക്കും ബുദ്ധിമുട്ടുണ്ടാക്കുകയാണ്. അമിതവേഗത്തിനെതിരെ ബോർഡ് സ്ഥാപിച്ച പാറപ്പുറത്തെ നാട്ടുകാർ‌ ഒരുമിച്ചു പണം സമാഹരിച്ച് ആംബുലൻ‌സും വാങ്ങിയിട്ടുണ്ട്. ബോർഡ് സ്ഥാപിച്ചശേഷം അമിതവേഗതയിൽ പോകുന്നവർക്കു മനംമാറ്റമുണ്ടായിത്തുടങ്ങിയെന്നാണ് നാട്ടുകാർ പറയുന്നത്. സ്പീഡ് ബ്രേക്കർ വേണം സെബാസ്റ്റ്യൻ പോൾ, പൊതുപ്രവർത്തകൻ ബിഎംബിസി നിലവാരത്തിൽ മികച്ച നിലവാരത്തിൽ റോഡ് നവീകരിച്ചതു യാത്രക്കാർക്കു ഗുണകരമായിട്ടുണ്ട്. എങ്കിലും പലയിടത്തും മതിയായ വീതിയില്ലാത്തതും കാൽനടയ്ക്കു സൗകര്യമില്ലാത്തതും അപകടകരമായ വവുകളും അപകടഭീഷണിയുയർത്തുന്നുണ്ട്. സ്പീഡ് ബ്രേക്കറുകളോ കാമറകളോ റോഡിലില്ല. പിഡബ്ല്യുഡി റോഡിൽ മുന്നറിയിപ്പു ബോർ‌ഡുകളും നാമമാത്രം. നവീകരണം നടത്തിയപ്പോൾ റോഡിൽ ആകെയുള്ള വീതി അടയാളപ്പെടുത്തി വെളുത്ത വരകൾ വരച്ചിട്ടുണ്ട്. എന്നാൽ പലയിടത്തും ഈ വരകൾക്കു പുറത്തു കാടുപിടിച്ചു കിടക്കുന്ന സ്ഥിതിയാണ്. തിരക്കേറിയ ജംഗ്ഷനുകളിൽ പോലും ഫുട്പാത്ത് ഇല്ല. ഇതുവഴിയുള്ള കാൽനടക്കാർ എന്തു ചെയ്യുമെന്നു കൂടി പിഡബ്ല്യുഡി ഉദ്യോഗസ്ഥർ‌ പറഞ്ഞുതരണം.

ഇഡിത്ത് 3.0 വാര്‍ഷിക ഇന്നോവേഷന്‍ സമ്മിറ്റ് ഇന്ന്

കൊച്ചി: എറണാകുളം സെന്‍റ് തെരേസാസ് (ഓട്ടോണമസ്) കോളജിലെ ഇഡിത്ത് 3.0 വാര്‍ഷിക ഇന്നോവേഷന്‍ സമ്മിറ്റ് ഇന്ന് കോളജ് ആര്‍ട്‌സ് ബ്ലോക്ക് ഓഡിറ്റോറിയത്തില്‍ നടക്കും. കേരള സ്‌റ്റേറ്റ് ഇന്‍ഡസ്ട്രിയല്‍ ഡെവലപ്‌മെന്‍റ് കോര്‍പറേഷന്‍ ചെയര്‍മാന്‍ ബാലഗോപാല്‍ ചന്ദ്രശേഖര്‍, ടൈ കേരളയുടെ എക്‌സിക്യൂട്ടീവ് ഡയറക്ടര്‍ ദിവ്യ തലക്കാട്ട്, റിവാഗോ സ്ഥാപക ജൂലിയാന ബിജു എന്നിവര്‍ പരിപാടിയില്‍ പങ്കെടുക്കും. വനിത സംരംഭകശൃംഖല കേരള ഒരുക്കുന്ന പാനല്‍ ചര്‍ച്ച, വിദഗ്ധരുടെ പ്രഭാഷണങ്ങള്‍, വര്‍ക്ക് ഷോപ്പുകള്‍, വിവിധ മത്സരങ്ങള്‍ എന്നിവ സമ്മിറ്റിന്‍റെ ഭാഗമായി നടക്കും. കോളജിന്‍റെ ഇന്നോവേഷന്‍ ആന്‍ഡ് എന്‍റര്‍പ്രണര്‍ഷിപ്പ് വിഭാഗവും ടൈ കേരളയും റേഡിയോ കൊച്ചി 90 എഫ്എമ്മും ചേര്‍ന്ന് സംഘടിപ്പിക്കുന്ന സമ്മിറ്റില്‍ കേരള സ്റ്റാര്‍ട്ടപ്പ് മിഷന്‍ എക്കോ സിസ്റ്റം പങ്കാളിയും ഓപ്പോ ടൈറ്റില്‍ സ്‌പോണ്‍സറും ഫെഡറല്‍ ബാങ്ക് സഹ സ്‌പോണ്‍സറുമാണ്. പൊതുജനങ്ങള്‍ക്കും പ്രവേശനമുണ്ട്.

ബിഎംഎസ് പദയാത്ര ഇന്നു മുതൽ

കൊച്ചി: സംസ്ഥാന സര്‍ക്കാരിന്‍റെ ജനദ്രോഹ നയങ്ങള്‍ക്കെതിരെ തൊഴിലാളി മുന്നേറ്റം എന്ന മുദ്രാവാക്യം ഉയര്‍ത്തി ബിഎംഎസ് സംഘടിപ്പിക്കുന്ന പദയാത്രക്ക് ഇന്ന് ജില്ലയില്‍ തുടക്കമാകും. ജില്ലയില്‍ കൊച്ചി കോര്‍പറേഷനില്‍ എട്ട് ഉപമേഖലകളിലും, 13 മുന്‍സിപ്പാലിറ്റികളിലും, 82 പഞ്ചായത്തുകളിലും പദയാത്ര നടക്കും. ഇന്ന് കോതമംഗലം മുന്‍സിപ്പാലിറ്റിയില്‍ ഉള്‍പ്പെടെ ജില്ലയിലെ 13 ഇടങ്ങളില്‍ പദയാത്ര നടക്കും. ഒക്ടോബര്‍ 14 വരെ നീണ്ടുനില്‍ക്കുന്ന പരിപാടി രാവിലെ തുടങ്ങി വൈകിട്ട് അവസാനിക്കുന്ന തരത്തിലാണ് ക്രമീകരിച്ചിട്ടുള്ളതെന്ന് ബിഎംഎസ് ജില്ലാ സെക്രട്ടറി ധനീഷ് നീറിക്കോട് പത്രസമ്മേളനത്തില്‍ അറിയിച്ചു. ജില്ലാ പ്രസിഡന്‍റ് സതീഷ് ആര്‍. പൈ, പി.വി. റെജി, സജിത്ത് ബോള്‍ഗാട്ടി എന്നിവരും പങ്കെടുത്തു.

ഹിൽപാലസ് മ്യൂസിയത്തിന് സമീപം ഹോട്ടൽ മാലിന്യം തള്ളി

തൃപ്പൂണിത്തുറ: ഹിൽപാലസ് മ്യൂസിയത്തിന് സമീപം ഹോട്ടൽ മാലിന്യം നിക്ഷേപിച്ചു. തിങ്കളാഴ്ച്ച രാത്രിയിലാണ് ഹിൽപാലസ് ആയുർവേദപ്പടി ഭാഗത്തുള്ള കാനയിൽ മാലിന്യം തള്ളിയത്. കാനയിലൂടെ ഒഴുകി ഹിൽപാലസ് മ്യൂസിയത്തിന് മുന്നിലേയ്ക്കെത്തിയ മാലിന്യം കലർന്ന വെള്ളം ഗേറ്റിനു മുന്നിലായി റോഡിൽ പരക്കുകയായിരുന്നു. ഇന്നലെ പുലർച്ചെ മ്യൂസിയത്തിന് മുന്നിൽ കാലുകുത്താനാകാത്തവിധം മാലിന്യവും ദുർഗന്ധവും പരന്നതോടെ അഗ്നിരക്ഷാ സേനയെത്തി വെള്ളമൊഴിച്ച് റോഡ് ശുചിയാക്കി. പിന്നീട് നഗരസഭാ ആരോഗ്യ വിഭാഗം സ്ഥലത്തെത്തി ബ്ലീച്ചിംഗ് പൗഡർ വിതറി ഇവിടം അണുവിമുക്തമാക്കുകയായിരുന്നു. തിങ്കളാഴ്ച വൈകിട്ട് ഈ ഭാഗത്ത് വൈദ്യുതി പോസ്റ്റിൽ കാറിടിച്ചതിനെ തുടർന്ന് അർധരാത്രി കഴിയും വരെ ഇവിടെ വൈദ്യുതി വിതരണം തടസപ്പെട്ടിരുന്നു. ഈ സമയം മുതലാക്കിയാണ് പ്രദേശത്ത് മാലിന്യം തള്ളിയതെന്നാണ് കരുതുന്നത്. സംസ്ഥാനത്ത് മസ്തിഷ്ക ജ്വരം പടർന്നു പിടിക്കുന്ന സമയത്ത് റോഡിൽ ഹോട്ടൽ മാലിന്യം തള്ളിയവരെ കണ്ടുപിടിച്ച് മാതൃകാപരമായി ശിക്ഷിക്കണമെന്നും അടിയന്തരമായി ഇവിടെ നിരീക്ഷണ കാമറകൾ സ്ഥാപിക്കണമെന്നും ട്രുറ തിരുവാങ്കുളം മേഖലാ കമ്മിറ്റി ആവശ്യപ്പെട്ടു.

വല്ലാർപാടത്തമ്മയുടെ തിരുനാളിന് കൊടിയേറി

വല്ലാർപാടം: ചരിത്ര പ്രസിദ്ധ ദേശീയ മരിയൻ തീർഥാടന കേന്ദ്രമായ വല്ലാർപാടം ബസിലിക്കയിൽ പരിശുദ്ധ വല്ലാർപാടത്തമ്മയുടെ തിരുനാളിന് ആർച്ച്ബിഷപ് ഡോ. ഫ്രാൻസിസ് കല്ലറയ്ക്കൽ കൊടിയേറ്റി. അദ്ദേഹത്തിന്‍റെ കാർമികത്വത്തിൽ അർപ്പിച്ച ദിവ്യബലിയിൽ റവ.ഡോ. സ്റ്റാൻലി മാതിരപ്പള്ളി സന്ദേശം നൽകി. ഒമ്പതു ദിവസം നീണ്ടുനിൽക്കുന്ന തിരുനാൾ 24ന് സമാപിക്കും. ഇന്നു മുതൽ വിവിധ ദിവസങ്ങളിൽ വൈകുന്നേരം 5.30 നുള്ള ദിവ്യബലികൾക്ക് ഫാ. തോമസ് പുളിക്കൽ, മോൺ. സെബാസ്റ്റ്യൻ ലൂയിസ്, ഫാ.പോൾ പഴങ്ങാട്ട്, ഫാ. ഫ്രാൻസീസ് സേവ്യർ താന്നിക്കപറമ്പിൽ, കോട്ടപ്പുറം ബിഷപ് ഡോ. അംബ്രോസ് പുത്തൻവീട്ടിൽ, മോൺ. മാത്യു കല്ലിങ്കൽ, കോഴിക്കോട് ആർച്ച്ബിഷപ് ഡോ. വർഗീസ് ചക്കാലക്കൽ എന്നിവർ മുഖ്യ കാർമികരാകും. തിരുനാൾ സമാപന ദിനമായ 24ന് രാവിലെ 10ന് പൊന്തിഫിക്കൽ ദിവ്യബലിയിൽ വരാപ്പുഴ ആർച്ച്ബിഷപ് ഡോ. ജോസഫ് കളത്തിപ്പറമ്പിൽ മുഖ്യകാർമികനാകും. ഫാ. ഷെൽട്ടൺ വചനപ്രഘോഷണം നടത്തും. ദിവ്യബലിക്ക് മുന്നോടിയായി ചേന്ദമംഗലം പാലിയം കുടുംബാംഗങ്ങൾക്കു സ്വീകരണവും പള്ളിവീട്ടിൽ മീനാക്ഷിയമ്മയുടെ പിൻ തലമുറക്കാർ പരമ്പരാഗതമായി ചെയ്തു വരുന്ന മോരു വിതരണവും ഉണ്ടാകും. ഒക്ടോബർ ഒന്നിനാണ് എട്ടാമിടം. പളളിപ്പറമ്പിൽ ആന്‍റണി ഗൊൺസാൽവസാണ് ഈ വർഷത്തെ പ്രസുദേന്തി. ബസിലിക്ക റെക്ടർ ഫാ. ജെറോം ചമ്മിണിക്കോടത്ത്, സഹവികാരിമാരായ ഫാ. ആന്‍റണി ഷൈൻ കാട്ടുപറമ്പിൽ, ഫാ. ജിബു വർഗീസ് തൈത്തറ, ഫാ. മിക്സൺ റാഫേൽ പുത്തൻ പറമ്പിൽ എന്നിവർ തിരുനാളാഘോഷങ്ങൾക്കു നേതൃത്വം നല്കും.

നഗരസഭയും അദ്വൈതാശ്രമവും തമ്മിലുള്ള തർക്കം രൂക്ഷം : മലിനജല ശുദ്ധീകരണ പ്ലാന്‍റിലേക്കുള്ള വഴി അടച്ചു

ആലുവ: ചതയദിനാഘോഷത്തിന്‍റെ ഭാഗമായി അദ്വൈതാശ്രമ കവാടത്തിന് മുന്നില്‍ സ്ഥാപിച്ച കൊടി ആലുവ നഗരസഭ എടുത്തു മാറ്റിയ തര്‍ക്കം കൂടുതല്‍ രൂക്ഷമാകുന്നു. ആശ്രമം വിട്ടു നല്‍കിയ സ്ഥലത്ത് ആലുവ നഗരസഭ നിര്‍മിച്ച മലിനജല ശുദ്ധീകരണ പ്ലാന്‍റിലേക്കുള്ള വഴി ആശ്രമം അധികൃതർ ഇന്നലെ അടച്ചതോടെ നഗരസഭയും ആശ്രമം അധികൃതരും തമ്മിലുള്ള തകര്‍ക്കം കൂടുതല്‍ വഷളായി. പ്ലാന്‍റ് അറ്റകുറ്റപ്പണിക്ക് ഉദ്യോഗസ്ഥര്‍ വരുമ്പോള്‍ ഗേറ്റ് തുറക്കാന്‍ ആവശ്യപ്പെടുമെന്ന് ആരോഗ്യസ്ഥിരം സമിതിയധ്യക്ഷന്‍ എം.പി. സൈമണ്‍ പറഞ്ഞു. ആലുവ നഗരസഭയുടെ ആസ്തി രജിസ്റ്ററില്‍ രേഖപ്പെടുത്തിയതിനാല്‍ പ്ലാന്‍റും അതിലേക്കുള്ള വഴിയും നഗരസഭയുടേതാണെന്ന് വാദം. എന്നാല്‍ പ്രളയത്തില്‍ തകര്‍ന്ന പ്ലാന്‍റ് നന്നാക്കാതെ ഇട്ടതോടെ പ്ലാസ്റ്റിക് കത്തിക്കുന്ന സ്ഥലമായെന്നും സാമൂഹ്യ വിരുദ്ധരുടെ താവളമായെന്നുമാണ് ആശ്രമം അധികൃതരുടെ ആരോപണം. തര്‍ക്കം തീര്‍ന്നില്ലെങ്കില്‍ നിയമപരമായി നേരിടാമെന്നാണ് ആലുവ നഗരസഭയുടേയും അദ്വൈതാശ്രമത്തിന്‍റെയും നിലപാട്. മലിനജല ശുദ്ധീകരണ പ്ലാന്‍റ് സ്ഥിതി ചെയ്യുന്നത് പുഴയോട് ചേര്‍ന്ന് ആശ്രമം വിട്ടുകൊടുത്ത സ്ഥലത്താണ്. പിന്നീട് ഏതാനും വര്‍ഷങ്ങള്‍ക്ക് മുന്‍പ് നഗരസഭ ഈ ഭാഗത്തെ വഴിയില്‍ കോണ്‍ക്രീറ്റ് കട്ടകള്‍ വിരിച്ച് ആര്‍ച്ചും സ്ഥാപിക്കുകയായിരുന്നു. ഉദ്യോഗസ്ഥരില്‍ നിന്ന് വിശദീകരണം തേടാന്‍ കൗണ്‍സില്‍ തീരുമാനം ആലുവ: ശ്രീനാരായണ ഗുരുദേവ ജയന്തിയോടനുബന്ധിച്ച് ആലുവ അദ്വൈതാശ്രമം വളപ്പില്‍ സ്ഥാപിച്ചിരുന്ന പീതപതാകകളും ബോര്‍ഡും നശിപ്പിച്ചെന്ന പരാതിയില്‍ നഗരസഭ ഉദ്യോഗസ്ഥരില്‍ നിന്ന് വിശദീകരണം തേടാന്‍ അടിയന്തിര കൗണ്‍സില്‍ യോഗം തീരുമാനിച്ചു. നഗരസഭാ എന്‍ജിനീയറിംഗ് വിഭാഗം ഓവര്‍സിയര്‍ കവിത, ഹെല്‍ത്ത് ഇന്‍സ്‌പെക്ടര്‍ അജിത്ത് എന്നിവരുടെ നിര്‍ദേശപ്രകാരം കണ്ടിജന്‍സി വിഭാഗം ജീവനക്കാരാണ് ആശ്രമത്തിന്‍റെയും സ്‌കൂളിന്‍റെയും മതിലിന് മുകളില്‍ സ്ഥാപിച്ചിരുന്ന കൊടികളും ബോര്‍ഡും നശിപ്പിച്ചത്. പിഴുതെറിഞ്ഞ കൊടികള്‍ പിന്നീട് അശ്രമത്തിന് സമീപം നഗരസഭയുടെ ഉടമസ്ഥതയിലുള്ള മലിനജല സംസ്‌കരണ പ്ലാന്‍റിലെ മാലിന്യങ്ങളിലേക്ക് തള്ളിയെന്നാണ് ആക്ഷേപം. പൊതുനിരത്തില്‍ ബോര്‍ഡുകളും കൊടികളും സ്ഥാപിക്കാന്‍ പാടില്ലെന്ന കോടതി ഉത്തരവിന്‍റെ പേരില്‍ കഴിഞ്ഞ പത്തിനാണ് ആശ്രമത്തിന്‍റെ മതിലില്‍ സ്ഥാപിച്ച കൊടികളും ബോര്‍ഡുകളും എടുത്തു മാറ്റിയത്.

ഗൃഹനാഥനെ വീടിനുള്ളില്‍ മരിച്ചനിലയില്‍ കണ്ടെത്തി

ഇടക്കൊച്ചി: കണ്ണങ്ങാട്ട് റോഡില്‍ സെന്റ് മേരീസ് പള്ളിക്ക് സമീപം താമസിക്കുന്ന വാത്തുവീട്ടില്‍ വി.ജെ. തോമസി(ടോമി - 68)നെ വീടിനുള്ളില്‍ മരിച്ചനിലയില്‍ കണ്ടെത്തി. മൃതദേഹത്തിന് മൂന്ന് ദിവസത്തെ പഴക്കം തോന്നിക്കും. ഭാര്യയുടെ മരണശേഷം ഒറ്റയ്ക്കായിരുന്നു താമസം. ഏക മകൾ കുടുംബമായി വിദേശത്താണ് കഴിയുന്നത്. സംസ്‌കാരം ഇന്ന് 2.30ന് ഇടക്കൊച്ചി സെന്റ് മേരീസ് പള്ളിയില്‍. ഭാര്യ: പരേതയായ മേരി. മകള്‍: ഷാറോണ്‍ ബ്രൈറ്റന്‍. മരുമകന്‍: ബ്രൈറ്റന്‍.

എംസി റോഡ് കൂത്താട്ടുകുളത്തെ ടേക്ക് എ ബ്രേക്ക് പ്രവർത്തനം നിലച്ചു

കൂത്താട്ടുകുളം: എം സി റോഡിൽ കാലിക്കറ്റ് കവലയിലെ നഗരസഭ ടേക്ക് എ ബ്രേക്ക് പ്രവർത്തനം നിലച്ചതായി ആക്ഷേപം. മുൻ ഭരണ സമിതി ഏർപ്പാടാക്കിയ തൊഴിലുറപ്പ് തൊഴിലാളികളെ യുഡിഎഫ് ഭരണസമിതി ഒഴിവാക്കിയതാണ് ടേക്ക് എ ബ്രേക്കിന്‍റെ പ്രവർത്തനം നിലക്കാൻ കാരണമായി പറയുന്നത്. ശുചീകരണ തൊഴിലാളികൾ ഇല്ലാതായതോടെ ടേക്ക് എ ബ്രേക്കിന്‍റെ പരിപാലനം വേണ്ട രീതിയിൽ നടക്കുന്നില്ല. ഒരാഴ്ചയായി ശുചി മുറികളിൽ വെള്ളം ഇല്ലാതെ ഉപയോഗിച്ചതിനാൽ ദുർഗന്ധം മൂലം പ്രദേശത്ത് ആളുകൾ ചെല്ലാനാകാത്ത അവസ്ഥയാണ്. പൈപ്പുകൾ, ലൈറ്റുകൾ ഇവയെല്ലാം തകർന്ന നിലയിലാണ്. സമീപത്തുള്ള കടകളിൽ വരെ ദുർഗന്ധമെത്തി ആളുകൾ കയറാതെ വന്നതോടെയാണ് പരാതി ഉയർന്നത്. കഴിഞ്ഞ എൽഡിഎഫ് ഭരണസമിതി 15 ലക്ഷം രൂപ മുടക്കി നിർമിച്ച പദ്ധതി നല്ല രീതിയിൽ പ്രവർത്തിച്ചു വരികയായിരുന്നു. അട്ടിമറിയിലൂടെ അധികാരമേറ്റ യുഡിഎഫ് ഭരണസമിതിയുടെ കെടുകാര്യസ്ഥത പദ്ധതിയെ താറുമാറാക്കിയെന്ന് മുൻ ചെയർപേഴ്സൺ വിജയാ ശിവൻ, വൈസ് ചെയർമാൻ സണ്ണി കുര്യാക്കോസ് എന്നിവർ പറഞ്ഞു. എൽഡിഎഫ് കൗൺസിലർമാർ പ്രദേശം സന്ദർശിച്ച് സൂചനാ സമരം നടത്തി. സമരം കൗൺസിലർ സണ്ണി കുര്യാക്കോസ് ഉദ്ഘാടനം ചെയ്തു. നഗരസഭ കൗൺസിലർ അംബിക രാജേന്ദ്രൻ അധ്യക്ഷത വഹിച്ചു. മറ്റ് കൗൺസിലർമാരായ വിജയ ശിവൻ, ജിജി ഷാനവാസ്, സുമ വിശ്വംഭരൻ, പി.ആർ. സന്ധ്യ തുടങ്ങിയവർ പ്രസംഗിച്ചു.

കാപ്പ ചുമത്തി ജയിലിലടച്ചു

മൂവാറ്റുപുഴ: നിരവധി കേസുകളിലെ പ്രതിയെ കാപ്പ ചുമത്തി ജയിലിലടച്ചു. വെള്ളൂര്‍ക്കുന്നം പെരുമറ്റം മില്ലുംപടി ഭാഗത്ത് ചേനക്കരകുന്നേല്‍ നിബുന്‍ (അപ്പു, 38) നെയാണ് കാപ്പ ചുമത്തി വിയ്യൂര്‍ സെന്‍ട്രല്‍ ജയിലിലടച്ചത്. റൂറല്‍ ജില്ലാ പോലീസ് മേധാവി എം. ഹേമലതയുടെ റിപ്പോര്‍ട്ടിന്‍റെ അടിസ്ഥാനത്തില്‍ ജില്ലാ കളക്ടര്‍ ജി. പ്രിയങ്കയാണ് ഉത്തരവിട്ടത്. മൂവാറ്റുപുഴ, കോതമംഗലം, തൊടുപുഴ പോലീസ് സ്റ്റേഷന്‍ പരിധികളില്‍ കവര്‍ച്ച, മോഷണം, സര്‍ക്കാര്‍ ഉദ്യോഗസ്ഥരുടെ ഔദ്യോഗിക കൃത്യനിര്‍വഹണം തടസപ്പെടുത്തല്‍, ദേഹോപദ്രവം തുടങ്ങി നിരവധി കേസുകളില്‍ ഉള്‍പ്പെട്ടയാളാണ്. 2025 മേയ് പായിപ്ര പോയാലി മില്ലുംപടി ജംഗഷനിലെ ഗോഡൗണിന്‍റെ തകര ഷീറ്റ് പൊളിച്ച് അകത്തു കടന്നു മൊബൈല്‍ ടവര്‍ നിര്‍മാണ ഉപകരങ്ങള്‍ മോഷ്ടിച്ചതിന് മൂവാറ്റുപുഴ പോലീസ് രജിസ്റ്റര്‍ ചെയ്ത കേസില്‍ പ്രതിയായതിനെ തുടര്‍ന്നാണ് കാപ്പ ചുമത്തി ജയിലിലടച്ചത്. മൂവാറ്റുപുഴ പോലീസ് സ്റ്റേഷന്‍ ഇന്‍സ്‌പെക്ടര്‍ ബേസില്‍ തോമസിന്‍റെ നേതൃത്വത്തില്‍ സബ് ഇന്‍സ്‌പെക്ടര്‍ എസ്.എന്‍. സുമിത, അസിസ്റ്റന്‍റ് സബ് ഇന്‍സ്‌പെക്ടര്‍മാരായ എം.കെ. ഗിരിജ, പോള്‍ മാത്യു, സീനിയര്‍ സിവില്‍ പോലീസ് ഓഫീസര്‍ പി.കെ. സനൂപ് എന്നിവരടങ്ങുന്ന സംഘമാണ് ഇയാളെ അറസ്റ്റ് ചെയ്തത്.

സ്വകാര്യ ബസ് ബൈക്കിലിടിച്ച് മുന്‍ പഞ്ചായത്ത് പ്രസിഡന്‍റിന് ഗുരുതര പരിക്ക്

കോതമംഗലം: സ്വകാര്യ ബസ് ബൈക്കിന് പിന്നില്‍ ഇടിച്ച് മുന്‍ പഞ്ചായത്ത് പ്രസിഡന്‍റിന് ഗുരുതര പരിക്ക്. കീരംപാറ ഊഞ്ഞാപ്പാറ മുരിയന്‍ചേരി നഗറില്‍ ചെങ്ങമനാട്ട് സി.ജെ. എല്‍ദോസിനെ (68) യാണ് സാരമായി പരിക്കേറ്റ് ആലുവയിലെ സ്വകാര്യ ആശുപത്രിയില്‍ പ്രവേശിപ്പിരിക്കുന്നത്. കുട്ടമ്പുഴ പഞ്ചായത്ത് മുന്‍ പ്രസിഡന്‍റായിരുന്ന എല്‍ദോസ് കോണ്‍ഗ്രസ് കവളങ്ങാട് ബ്ലോക്ക് വൈസ് പ്രസിഡന്‍റ്, എന്‍റെനാട് ഹൈപ്പവര്‍ കമ്മിറ്റിയംഗം, വീക്ഷണം പ്രാദേശിക ലേഖകന്‍, എല്‍ഐസി ഏജന്‍റ് എന്നീ പ്രവര്‍ത്തിച്ചുവരുകയായിരുന്നു. മലയിന്‍കീഴ്-കോഴിപ്പിള്ളി ബൈപ്പാസ് റോഡില്‍ ഇന്നലെ രാവിലെ 10.30 ഓടെയാണ് അപകടം. സി.ജെ. എല്‍ദോസ് സഞ്ചരിച്ച ബൈക്കിന് പിന്നില്‍ സ്വകാര്യ ബസ് ഇടിച്ച് അപകടത്തിൽപ്പെടുകയായിരുന്നു. പരിക്കേറ്റ് റോഡിൽ കിടന്ന എൽദോസിനെ അതുവഴി കാറില്‍ വന്ന കോതമംഗലം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീറും അംഗങ്ങളും ചേര്‍ന്നാണ് കോതമംഗലത്തെ സ്വകാര്യ ആശുപത്രിയില്‍ എത്തിച്ചത്. സ്വകാര്യ ബസിന് അടിയില്‍ കിടന്ന ബൈക്ക് പിന്നീട് പോലീസ് എത്തിയാണ് നീക്കം ചെയ്തത്. തലക്ക് സാരമായി പരിക്കേറ്റ് ആലുവാ രാജഗിരി ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുന്ന എല്‍ദോസിനെ വൈകിട്ട് മണിക്കൂറുകള്‍ നീണ്ട ശസ്ത്രക്രിയക്ക് വിധേയനാക്കിയിരുന്നു. വെന്‍റിലേറ്റര്‍ സഹായത്തോടെ കഴിയുന്ന എല്‍ദോസ് അപകടനില തരണം ചെയ്തിട്ടില്ലെന്നാണ് ആശുപത്രി അധികൃതരില്‍നിന്നും ലഭിച്ച വിവരം.

ചരിത്ര സ്മരണയിൽ നേർച്ചപ്പണം കൈമാറി

കോതമംഗലം: ചരിത്ര സ്മരണകൾ അനുസ്മരിച്ച് കുട്ടമ്പുഴ കൊച്ചുനാഗപ്പുഴ പള്ളി ഇടവകാംഗങ്ങൾ ഇല്ലിക്കുമ്പത്തിൽ നിക്ഷേപിച്ച നേർച്ചപ്പണം നാഗപ്പുഴ സെന്‍റ് മേരീസ് പള്ളിക്ക് കൈമാറി. 1957-ൽ കുട്ടമ്പുഴ മേഖലയിൽ കുടിയേറ്റക്കാർ താമസം ആരംഭിച്ചതായാണ് ചരിത്രരേഖകളിൽ വ്യക്തമാകുന്നത്. കാട്ടാനയുടെയും വന്യമൃഗങ്ങളുടെയും ശല്യങ്ങൾ മാറുന്നതിന് മാതാവിനോട് പ്രാർഥിക്കുന്നതിനുവേണ്ടി അക്കാലത്ത് ഒത്തു ചേർന്ന സ്ഥലമാണ് നാകപ്പുഴ കവല എന്നപേരിൽ അറിയപ്പെടുന്ന അട്ടിക്കളം. ഇല്ലികൊണ്ട് കുരിശുണ്ടാക്കി നാകപ്പുഴ കുരിശ് സ്ഥാപിക്കുകയും ഇല്ലി കുംഭം കൊണ്ട് ഭണ്ഡാരവും സ്ഥാപിച്ചതായാണ് ചരിത്രം. ഇല്ലി കുംഭത്തിലെ നേർച്ച പൈസകൾ അന്ന് നാകപ്പുഴ പള്ളിയിൽ എട്ട് നോമ്പ് തിരുനാളിന് വഴിപാട് ആയി എത്തിച്ചുകൊടുക്കുകയും ചെയ്‌തിരുന്നു. ആ ചരിത്രം ആവർത്തിച്ച് ഇക്കുറി കുട്ടമ്പുഴ കൊച്ചുനാകപ്പുഴ പള്ളിയിൽ ഇടവക ജനങ്ങളും തീർഥാടകരും ഇല്ലിക്കുംഭത്തിൽ നിക്ഷേപിച്ച നേർച്ച പണം കൊച്ചുനാകപ്പുഴ ഇടവകക്കാർ വികാരി ഫാ. അരുൺ വലിയതാഴത്തിന്‍റെ നേതൃത്വത്തിൽ നാകപ്പുഴ സെന്‍റ് മേരീസ് പള്ളി വികാരി ഫാ. പോൾ നെടുംപുറത്തിന് കൈമാറി. കൈക്കാരന്മാരായ ജോഷി കാക്കനാട്ട്, ഷാമോൻ കൊരട്ടിക്കുന്നേൽ ജോജി നെല്ലിമല എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]