ADVERTISEMENT

ADVERTISEMENT

ക്രൈസ്റ്റ് നഗര്‍ റസിഡന്‍റ്സ് അസോസിയേഷന്‍ കുഴിയടയ്ക്കല്‍ സമരം നടത്തി

ഇരിങ്ങാലക്കുട: ക്രൈസ്റ്റ് നഗര്‍ റെസിഡന്‍റ്സ് അസോസിയേഷന്‍റെ ആഭിമുഖ്യത്തില്‍ കുഴിയടയ്ക്കല്‍ സമരം നടത്തി. അധികാരികള്‍ മൗനം പാലിച്ചുകൊണ്ട് ഒരു വര്‍ഷത്തോളമായി റോഡിലെ കുഴികള്‍ അടക്കാത്തതില്‍ പ്രതിഷേധിച്ചാണ് ഈ വ്യത്യസ്തമായ സമരപരിപാടിയുമായി സിഎന്‍ആര്‍എ രംഗത്ത് വന്നത്.

സിഎന്‍ആര്‍എ പ്രസിഡന്‍റ് ഷാജു അബ്രാഹം കണ്ടംകുളത്തി, സെക്രട്ടറി തോംസണ്‍ ചിരിയങ്കണ്ടത്ത്, ട്രഷര്‍ ബെന്നി പള്ളായി, ഭാരവാഹികളായ മാത്യു ജോര്‍ജ്, സക്കീര്‍ ഓലക്കോട്ട്, വിജു അക്കരക്കാരന്‍, ഡേവിസ് ഊക്കന്‍, ടി.വി. സോമന്‍, ജെയ് മോന്‍ അമ്പൂക്കന്‍, ആനി പോള്‍, ഡെല്‍റ്റി ജീസന്‍ എന്നിവര്‍ നേതൃത്വം നല്‍കി.

ADVERTISEMENT

മുണ്ടൂർ - പുറ്റേക്കര കുപ്പിക്കഴുത്ത്; ഭൂമി ഏറ്റെടുക്കാൻ 25.57 കോടി

മുണ്ടൂർ: തൃശൂർ - കുറ്റിപ്പുറം സംസ്ഥാനപാതയിൽ മുണ്ടൂർ മുതൽ പുറ്റേക്കര വരെയുള്ള 1.8 കിലോമീറ്റർ ദൂരം കുപ്പിക്കഴുത്ത് പരിഹരിച്ച് നാലുവരി പാതയാക്കി വികസിപ്പിക്കുന്നതിന് ഭൂമി ഏറ്റെടുക്കാൻ 25 കോടി 57 ലക്ഷം രൂപ ധനകാര്യ മന്ത്രി കെ.എൻ. ബാലഗോപാൽ അനുവദിച്ചതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. ഭൂമിയുടെ വില, കെട്ടിടങ്ങളുടെയും ഫലവൃക്ഷങ്ങളുടെയും വില, പുനരധിവാസത്തിനും പുന:സ്ഥാപനത്തിനുമുള്ള തുക ഉൾപ്പെടെയാണിത്. ഈ തുക പൊതുമരാമത്ത് വകുപ്പ് റവന്യു വകുപ്പിനു കൈമാറുന്നതോടെ 19(1) വിജ്ഞാപനം പുറപ്പെടുവിച്ച് ഭൂമിയേറ്റെടുക്കലിന്‍റെ അന്തിമ നടപടികളിലേക്കു കടക്കാനാകും. 177 സെന്‍റ്് ഭൂമിയാണു കുപ്പിക്കഴുത്ത് പരിഹരിച്ച് നാലുവരിപ്പാത നിർമിക്കുന്നതിനായി ഏറ്റെടുക്കുന്നത്. സെന്‍റിന് ഏകദേശം 5.5 ലക്ഷം രൂപയാണ് ഭൂമി വിലയായി നിശ്ചയിച്ചത്. ഇതിനോടൊപ്പം 100 ശതമാനം നഷ്ടപരിഹാരംകൂടി ചേർത്ത് ഒരു സെന്‍റിന് 11 ലക്ഷത്തോളം രൂപ ആകെ നഷ്ടപരിഹാരത്തുകയായി ലഭിക്കും. ഭൂമി ഏറ്റെടുക്കലിനുള്ള 4(2) വിജ്ഞാപനം പുറപ്പെടുവിച്ച 2024 ഏപ്രിൽ മാസം മുതൽ 12 ശതമാനം പലിശ കണക്കാക്കി, ഈ പലിശത്തുക കൂടി നഷ്ടപരിഹാര തുകയോടൊപ്പം നൽകും. കെട്ടിടങ്ങളുടെ നഷ്ടപരിഹാരത്തിനായി 3.4 കോടി രൂപയും ഫലവൃക്ഷങ്ങളുടെ നഷ്ടപരിഹാരത്തിനായി 20 ലക്ഷം രൂപയും അനുവദിച്ചിട്ടുണ്ട്. പുനരധിവാസത്തിനും പുന:സ്ഥാപനത്തിനുമായി 23 ലക്ഷം രൂപയുടെ പാക്കേജും വകയിരുത്തിയിരിക്കുന്നു. ഭൂമി ഏറ്റെടുത്ത് വീതി കൂട്ടുന്നതോടെ നിരന്തരം ഉണ്ടാകുന്ന അപകടങ്ങൾക്കും ഗതാഗത കുരുക്കിനും ശാശ്വത പരിഹാരമാകും. സംസ്ഥാനപാത 69ലെ 1.8 കിലോമീറ്റർ വരുന്ന മുണ്ടൂർ - പുറ്റേക്കര ഭാഗത്തെ ഈ റോഡ് നാലുവരിപ്പാതയാക്കി വികസിപ്പിക്കണമെന്ന ആവശ്യം ദീർഘകാലമായി നിലവിലുണ്ടായിരുന്നു. സേവ്യർ ചിറ്റിലപ്പിള്ളി എംഎൽഎ ഈ വിഷയം നിയമസഭയിൽ സബ്മിഷനായി ഉന്നയിക്കുകയും ചെയ്തിരുന്നു. റീബിൽഡ് കേരള ഇനീഷ്യേറ്റീവിന്‍റെ ഭാഗമായി കെഎസ്ടിപിയുടെ നേതൃത്വത്തിൽ പുരോഗമിക്കുന്ന തൃശൂർ - കുറ്റിപ്പുറം സംസ്ഥാനപാത റോഡ് നിർമാണത്തിന്‍റെ ഭാഗമായിത്തന്നെ ഭൂമി ഏറ്റെടുക്കൽ പൂർത്തിയാക്കാനാണ് ശ്രമിക്കുന്നതെന്ന് സേവ്യർ ചിറ്റിലപ്പിള്ളി എംഎൽഎ പറഞ്ഞു.

ചുറ്റുമതിലും കവാടവും നവീകരിച്ച് പഴയന്നൂർ ബ്ലോക്ക് പഞ്ചായത്ത്

പഴയന്നൂർ: ബ്ലോക്ക്‌ പഞ്ചായത്ത് വാർഷിക പദ്ധതിയിൽ 25 ലക്ഷം രൂപ ചെലവിൽ നിർമിച്ച ബ്ലോക്ക്‌ പഞ്ചായത്ത് ചുറ്റുമതിലിന്‍റെയും നവീകരിച്ച ബ്ലോക്ക്‌ കവാടത്തിന്‍റെയും ഉദ്ഘാടനം കെ. രാധാകൃ ഷ്ണൻ എംപി നിർവഹിച്ചു. ബ്ലോക്ക്‌ പഞ്ചായത്ത് പ്രസിഡന്‍റ്് കെ.എം. അഷറഫ് അധ്യക്ഷത വഹിച്ചു. ബ്ലോക്ക്‌ വൈസ് പ്രസിഡന്‍റ്് പി. പ്രശാന്തി, ബ്ലോക്ക് പഞ്ചായത്ത് അസി. എൻജിനീയർ വി.എസ്. സിന്ധു, ബ്ലോക്ക് പഞ്ചായത്ത് സ്ഥിരംസമിതി അംഗങ്ങളായ കെ. പി. ശ്രീജയൻ, അരുൺ കാളിയത്ത്, ബ്ലോക്ക്‌ പഞ്ചായത്ത് അംഗങ്ങളായ എ. ഇ. ഗോവിന്ദൻ, എസ്. സിന്ധു, ഷിജിത ബിനീഷ്, ഗീത രാധാകൃഷ്ണൻ, ലതാ സാനു, ബ്ലോക്ക്‌ പഞ്ചായത്ത് സെക്രട്ടറി ആൽഫ്രെഡ് സോജൻ എന്നിവർ പ്രസംഗിച്ചു.

മദ്ദളവാദനത്തിൽ 50 വർഷം: രാജനെ ആദരിച്ചു

തിരുവില്വാമല: ശ്രീവില്വാദ്രിനാഥ ക്ഷേത്രത്തിലെ നിറമാല ഉത്സവത്തിൽ മദ്ദളവാദനത്തിൽ അരനൂറ്റാണ്ടുപിന്നിട്ട് തിരുവില്വാമല രാജൻ. തുടർച്ചയായി അൻപതാമത്തെ വർഷമാണ് രാജൻ ‌‌നിറമാല പഞ്ചവാദ്യത്തിൽ പങ്കെടുക്കുന്നത്. ഇന്നലെ ഉച്ചയ്ക്ക് കാഴ്ച‌ശീവേലിക്കിടെ കൊച്ചിൻ ദേവസ്വം ബോർഡ് മെമ്പർമാരായ അഡ്വ. കെ.പി. അജയൻ, കെ.കെ. സുരേഷ്ബാബു, സെക്രട്ടറി പി. ബിന്ദു, ഡെപ്യൂട്ടി കമ്മീഷണർ സുനിൽ കർത്ത എന്നിവർ ചേർന്ന് രാജനെ ആദരിച്ചു. തൃപ്പാളൂർ കണ്ണൻനായർ, ചെർപ്പുളശേരി ശിവൻ എന്നിവരാണ് ഗുരുക്കന്മാർ. ഇന്നലെ കേരളത്തിലെ പ്രഗത്ഭരായ വാദ്യകലാകാരന്മാർ അണിനിരന്ന നിറമാല പഞ്ചവാദ്യത്തിൽ രാജനായിരുന്നു മദ്ദളംപ്രമാണി.

നിയന്ത്രണംവിട്ട കാർ വീടിന്‍റെ മുൻവശം ഇടിച്ചുതകർത്തു

എരുമപ്പെട്ടി: കാർ പിറകോട്ടിറക്കുന്നതിനിടയിൽ നിയന്ത്രണംവിട്ട് വീടിന്‍റെ മുൻവശം തകർത്തു. എരുപ്പെട്ടി യത്തീംഖാന റോഡിൽ ബിഎസ്എൻഎൽ ടെലഫോൺ എക്സ്ചേഞ്ചിനു സമീപമാണ് ഇന്നലെ വൈകീട്ട് 5.30 ഓടെ അപകടമുണ്ടായത്. എരുമപ്പെട്ടി തോട്ടുങ്ങൽപീടികയിൽ കുഞ്ഞുമോന്‍റെ മതിലും വീടിന്‍റെ മുൻവശവുമാണു തകർന്നത്. വേലൂർ സ്വദേശികൾ സഞ്ചരിച്ചിരുന്ന കാറാണ് അപകടത്തിൽപ്പെട്ടത്. ഗൂഗിൾ മാപ്പ് നോക്കി വഴിതെറ്റിവന്ന യാത്രക്കാർ കാർ തിരിക്കുവാൻ പിറകോട്ട് എടുത്തപ്പോൾ നിയന്ത്രണംവിട്ട് താഴ്ചയിലേക്ക് ഇറങ്ങി കാറിന്‍റെ പിറകുവശം വീട്ടിലേക്ക് ഇടിച്ച് കയറുകയായിരുന്നു. ഉമ്മറത്ത് വീട്ടമ്മ ഇരിക്കുന്നുണ്ടായിരുന്നു. ഭാഗ്യംകൊണ്ട് ഇവർ പരിക്കേൽക്കാതെ രക്ഷപ്പെട്ടു. കാറിന്‍റെ പിറകുവശവും തകർന്നിട്ടുണ്ട്. യാത്രക്കാർക്കുപരിക്കില്ല.

തകർന്ന റോഡ് നന്നാക്കിയില്ല; വാടാനപ്പിള്ളിയിൽ റോഡിൽ ഞാറുനട്ട് മഹിളാകോൺഗ്രസ് പ്രതിഷേധം

വാടാനപ്പിള്ളി: തകർന്ന മേപ്രങ്ങാട്ട് ഗണേശമംഗലം റോഡ് ഗതാഗതം പുനരാരംഭിക്കക്കണമെന്നാവശ്യപ്പെട്ട് റോഡിൽ കൊയ്ത്തുപാട്ടുപാടി ഞാറുനട്ട് വേറിട്ടൊരു പ്രതിഷേധസമരം നടത്തി മഹിളാകോൺഗ്രസ് പ്രവർത്തകർ. രണ്ടുവർഷമായി ഈ റോഡ് പൊളിച്ചിട്ടിരിക്കുകയാണ്. നേരത്തെ ഈ റോഡിലൂടെ ബസുകൾ സർവീസ് നടത്തിയിരുന്നു. പ്രധാന റോഡുകളിൽ ഗതാഗതതടസംവരുന്ന സമയത്ത് വാഹനഗതാഗതം തിരിച്ചുവിടുന്നതും ഈ റോഡിലൂടെ യായിരുന്നു. പ്രതിഷേധസമരം മഹിളാകോൺഗ്രസ് സംസ്ഥാന ജനറൽ സെക്രട്ടറി സുബൈദ മുഹമ്മദ് ഉദ്ഘാടനം ചെയ്തു. മഹിള കോൺഗ്രസ് മണലൂർ ബ്ലോക്ക് പ്രസിഡന്‍റ്്‌ വി.സി. ഷീജ അധ്യക്ഷത വഹിച്ചു. ജില്ല ജനറൽ സെക്രട്ടറി സുഗന്ധിനി ഗിരീഷ്, കോൺഗ്രസ്‌ മണ്ഡലം പ്രസിഡന്റ്‌ അഡ്വ. മുസ്തഫ, മഹിളാകോൺഗ്രസ് ജില്ല ജനറൽ സെക്രട്ടറി പ്രിൻസി സുരേഷ്, ബ്ലോക്ക് ഭാരവാഹികളായ സി.എൻ. സുരജ, ശ്രീകല സജീവൻ, കുമാരി സുരേഷ്, ഷഫീന ഷബീർ‌അലി, ഫാത്തിമ ജലീൽ, ആമിനക്കുട്ടി യൂസഫ്, ഗീത കൊച്ചുമോൻ, ഹസീന താജുദ്ധീൻ, സനില ബൈജു എന്നിവർ നേതൃത്വം നൽകി.

വികസനപദ്ധതികൾ മനസിലുണ്ടെങ്കിലും സഹകരണം ഉണ്ടാകുന്നില്ല: സുരേഷ് ഗോപി

ആറാട്ടുപുഴ: പല വികസനപദ്ധതികൾ മനസിലുണ്ട്. പക്ഷെ അതിനുവേണ്ടതായ സഹകരണം ഉണ്ടാകുന്നില്ലെന്ന് കേന്ദ്ര‌മന്ത്രി സുരേഷ് ഗോപി. ആറാട്ടുപുഴ ക്ഷേത്രത്തിനു മുന്നിൽ നടന്ന കലുങ്ക് സൗഹൃദ ചർച്ചയിൽ പങ്കെടുത്തു സംസാരിക്കുകയായിരുന്നു അദ്ദേഹം. വികസനത്തിൽ രാഷ്ട്രീയതിമിരം ബാധിച്ചവരാകൻ പാടില്ല. തനിക്ക് ഏതുരാഷ്ട്രീയ കക്ഷിഭരിക്കുന്ന പഞ്ചായത്തുകളിൽ എന്തുചെയ്തുനൽകാനും ബുദ്ധിമുട്ടില്ല. മേളപ്രമാണി പെരുവനം കുട്ടൻ‌മാരാർ, സംഗീത സംവിധായകൻ വിദ്യാധരൻ, എം. രാജേന്ദ്രൻ തുടങ്ങിയവർ ചർച്ചയിൽ പങ്കെടുത്തു.

തയ്യൽ മെഷീൻ വിതരണം ചെയ്തു

തൃശൂർ: കേരള ലേബർ മൂവ്മെന്‍റ് (കെഎൽഎം) തയ്യൽതൊഴിലാളി ഫോറത്തിലെ തെരഞ്ഞെടുത്ത തൊഴിലാളികൾക്കു തയ്യൽ മെഷീനുകൾ വിതരണംചെയ്തു. അതിരൂപത വികാരി ജനറാൾ മോണ്‍. ജയ്സണ്‍ കൂനംപ്ലാക്കൽ ഉദ്ഘാടനം ചെയ്തു. അതിരൂപത ഡയറക്ടർ ഫാ. പോൾ മാളിയമ്മാവ് ആമുഖപ്രഭാഷണം നടത്തി. പ്രസിഡന്‍റ് മോളി ജോബി അധ്യക്ഷത വഹിച്ചു. ജനറൽ സെക്രട്ടറി ബേബി വാഴക്കാല, യുടിഎ കണ്‍വീനർ ഷാജു ആന്‍റണി, ഫ്രഞ്ചി ആന്‍റണി, ബിജു ചെറയത്ത്, ബേബി ഡേവിസ്, ലിസി ബാബു എന്നിവർ പ്രസംഗിച്ചു. ഷാജു എളവള്ളി, ജോയ് മാളിയേക്കൽ, മോളി വർഗീസ്, ആൻഡ്രൂസ് ജോണ്‍ എന്നിവർ നേതൃത്വം നൽകി.

ജൂബിലി മിഷൻ സ്കൂൾ ഓഫ് നഴ്സിംഗ് ഡയമണ്ട് ജൂബിലിക്കു തുടക്കം

തൃശൂർ: ജൂബിലി മിഷൻ സ്കൂൾ ഓഫ് നഴ്സിംഗ് ഡയമണ്ട് ജൂബിലി ആഘോഷങ്ങൾക്കു തുടക്കമിട്ട് പൂർവവിദ്യാർഥിസംഗമം നടത്തി. കേരള നഴ്സസ് ആൻഡ് മിഡ്‌വൈഫ്സ് കൗണ്‍സിൽ പ്രസിഡന്‍റ് എസ്.എ. അനീസ ഡയമണ്ട് ജൂബിലി ഉദ്ഘാടനവും ലോഗോ പ്രകാശനവും നിർവഹിച്ചു. ജൂബിലി മിഷൻ ഡയറക്ടർ ഫാ. റെന്നി മുണ്ടൻകുരിയൻ അധ്യക്ഷത വഹിച്ചു. പ്രിൻസിപ്പൽ സിസ്റ്റർ റെജി അഗസ്റ്റിൻ, ആശുപത്രി സിഇഒ ഡോ. ബെന്നി ജോസഫ്, അസിസ്റ്റന്‍റ് ഡയറക്ടർ ഫാ. ജോയ്സണ്‍ ചെറുവത്തൂർ, ജൂബിലി നഴ്സിംഗ് കോളജ് പ്രിൻസിപ്പൽ സിസ്റ്റർ ഡോ. ജൂഡി, അലുംനി പ്രസിഡന്‍റ് കെ.പി. ജീന എന്നിവർ പ്രസംഗിച്ചു. മുൻ പ്രിൻസിപ്പൽമാരെയും 25 വർഷം പിന്നിട്ട പൂർവവിദ്യാർഥികളെയും ആദരിച്ചു. വൈസ് പ്രിൻസിപ്പൽ സിജി ജോസ് നന്ദി പറഞ്ഞു.

ദേവാലയങ്ങളിൽ തിരുനാൾ

അവിട്ടത്തൂർ പള്ളിയിൽ അവിട്ടത്തൂർ: ഹോളിഫാമിലി പള്ളിയിലെ തിരുക്കുടുംബ പ്രതിഷ്ഠാ ഊട്ടുതിരുനാളിനു കൊടിയേറി. കൊടിയേറ്റം, ലദീഞ്ഞ്, നൊവേന, വിശുദ്ധകുർബാന എന്നീ തിരുക്കർമങ്ങൾക്ക് വികാരി ഫാ. റെനിൽ കാരാത്ര കാർമികത്വം വഹിച്ചു. 20 നു രാവിലെ 6.30ന് ലദീഞ്ഞ്, നൊവേന, വിശുദ്ധ കുർബാന, തുടർന്ന് രൂപം എഴുന്നള്ളിച്ചുവയ്ക്കൽ. വൈകീട്ട് 5.30 ന് ഒാങ്ങിച്ചിറ കപ്പേളയിലും ആറിന് അവിട്ടത്തൂർ സെന്‍റർ കപ്പേളയിലും നൊവേന. 21നു രാവിലെ 6.30‌ന് വിശുദ്ധ കുർബാന. 9.30 നുള്ള ആഘോഷമായ തിരുനാൾകുർബാനയ്ക്ക് ഫാ. സിബിൻ വാഴപ്പിള്ളി മുഖ്യകാർമികത്വം വഹിക്കും. ഫാ. കിരൺ തട്ട്ള തിരുനാൾസന്ദേശം നൽകും. തുടർന്ന് പ്രദക്ഷിണം. ഊട്ടുനേർച്ച വെഞ്ചരിപ്പ്, ഊട്ടുസദ്യ. ഇരിങ്ങാലക്കുട വെസ്റ്റ് ഡോളേഴ്‌സ് ഇടവകയിൽ ഇരിങ്ങാലക്കുട: ഔര്‍ ലേഡി ഓഫ് ഡോളേഴ്‌സ് ചര്‍ച്ച് ഇരിങ്ങാലക്കുട വെസ്റ്റ് ഇടവകയില്‍ മധ്യസ്ഥയായ പരിശുദ്ധ വ്യാകുലമാതാവിന്‍റെ തിരുനാളിന് കൊടികയറി. തിരുനാളിന്‍റെ കൊടിയേറ്റവും ദീപാലങ്കാരം സ്വിച്ച്ഓണ്‍ കര്‍മവും ഇടവകവികാരി ഫാ. ഫ്രാന്‍സീസ് കൊടിയന്‍ നിര്‍വഹിച്ചു. ഇടവകയിലെ 250 ഓളം മരിയഭക്തരാണ് നൊവേന തിരുനാള്‍ ഏറ്റെടുത്ത് നടത്തുന്നത്. നാളെ വൈകീട്ട് അഞ്ചിന് ലദീഞ്ഞ്, രൂപം എഴുന്നള്ളിച്ചുവയ്ക്കല്‍, ദിവ്യബലി, നേര്‍ച്ച വെഞ്ചരിപ്പ് എന്നിവയ്ക്ക് സാന്‍ജോസദന്‍ ഡയറക്ടര്‍ ഫാ. വര്‍ഗീസ് കോന്തുരുത്തി മുഖ്യകാര്‍മികനായിരിക്കും. തിരുനാള്‍ദിനമായ 21നു രാവിലെ 6.30ന് ദിവ്യബലി, 10ന് നടക്കുന്ന തിരുനാള്‍ദിവ്യബലിക്ക് ക്രൈസ്റ്റ് കോളജ് മാനേജര്‍ ഫാ. ജോണ്‍ പാലിയേക്കര സിഎംഐ മുഖ്യകാര്‍മികത്വം വഹിക്കും. വെള്ളാങ്കല്ലൂര്‍ പള്ളി വികാരി ഫാ. ഷെറന്‍സ് ഇളംതുരുത്തി സന്ദേശം നല്‍കും. തുടര്‍ന്ന് തിരുനാള്‍പ്രദക്ഷിണം. 22ന് രാവിലെ ഏഴിന് പൂര്‍വികരുടെ ഓര്‍മദിനത്തില്‍ മരിച്ചവര്‍ക്കുവേണ്ടിയുള്ള ദിവ്യബലി, സെമിത്തേരിയില്‍ പൊതു ഒപ്പീസ് എന്നിവ ഉണ്ടായിരിക്കും. 28ന് എട്ടാമിടം തിരുനാള്‍ ആഘോഷിക്കും. തിരുനാളിന്‍റെ വിജയത്തിനായി വികാരി ഫാ. ഫ്രാന്‍സീസ് കൊടിയന്‍, കൈക്കാരന്‍മാരായ കൂനമ്മാവ് ജേക്കബ് സുനില്‍, ആറ്റപറമ്പില്‍ തോമസ് സാംസന്‍, മാളിയേക്കല്‍ വര്‍ഗീസ് വിനോയ്, തിരുനാള്‍ പ്രസുദേന്തി കോറോത്തുപറമ്പില്‍ ജോസ് ജിതിന്‍, ജാസ്മിന്‍, ജനറല്‍ കണ്‍വീനര്‍ ചക്കാലക്കല്‍ അന്തോണി ഷാജു, ജോയിന്‍റ്് കണ്‍വീനര്‍ എലുവത്തിങ്കല്‍ പൗലോസ് ലിജോ എന്നിവരുടെ നേതൃത്വത്തില്‍ വിപുലമായ കമ്മിറ്റിയാണ് പ്രവര്‍ത്തിച്ചുവരുന്നത്.

വൈവിധ്യങ്ങളായ കുരിശുകള്‍ നിര്‍മിച്ച് മതബോധന വിദ്യാര്‍ഥികള്‍

അരിപ്പാലം: വിശാസപ്രഘോഷണത്തിനൊപ്പം സര്‍ഗാത്മക കഴിവുകളുടെ പരിപോഷണത്തിനും വേദിയൊരുക്കുന്നതായിരുന്നു മതബോധനവിദ്യാര്‍ഥികളുടെ കുരിശു നിര്‍മാണം. അരിപ്പാലം കര്‍മലമാത ഇടവകയിലെ മതബോധന വിദ്യാര്‍ഥികളാണ് കുരിശിന്‍റെ പുകഴ്ചയുടെ തിരുനാളിന്‍റെ ഭാഗമായി അധ്യാപകരുടെയും മാതാപിതാക്കളുടെയും സഹകരണത്തോടെ നൂറിലധികം കുരിശുകള്‍ നിര്‍മിച്ചത്. കുട്ടികളുടെ ഹൃദയങ്ങളില്‍ ക്രിസ്തുസങ്കല്പം ആഴത്തില്‍ പതിപ്പിക്കാന്‍ സഹായിക്കുക എന്നുള്ളതായിരുന്നു ലക്ഷ്യമെന്ന് വികാരി ഫാ. ലിജു മഞ്ഞപ്രക്കാരന്‍ പറഞ്ഞു. ദിവ്യബലിക്ക് ഇരിങ്ങാലക്കുട രൂപത ചാന്‍സലര്‍ റവ.ഡോ. കിരണ്‍ തട്ട്ള മുഖ്യകാര്‍മികത്വം വഹിച്ചു. വികാരി ജനറാള്‍ ഫാ. ജോളി വടക്കന്‍ വചനസന്ദേശം നല്‍കി. റവ.ഡോ. വര്‍ഗീസ് പാലത്തിങ്കല്‍, വികാരി ഫാ. ലിജു മഞ്ഞപ്രക്കാരന്‍ എന്നിവര്‍ സഹകാര്‍മികരായിരുന്നു. ദിവ്യബലിക്കുശേഷം കുട്ടികള്‍ നിര്‍മിച്ച കുരിശുകളുടെ വെഞ്ചരിപ്പുകര്‍മവും കുരിശുകളുടെ പ്രദര്‍ശനവും നടത്തി.

സ്‌കൂട്ടര്‍ യാത്രക്കാരനു നേരേ ആക്രമണം; മൂന്നുപേര്‍ അറസ്റ്റില്‍

ഇരിങ്ങാലക്കുട: സ്‌കൂട്ടറില്‍ കാര്‍ ഇടിച്ചതു ചോദ്യംചെയ്തതിലുള്ള വൈരാഗ്യത്താല്‍ സ്‌കൂട്ടര്‍യാത്രക്കാരനെ ആക്രമിച്ച പരിക്കേല്‍പ്പിച്ച കേസില്‍ നിരവധി ക്രിമിനല്‍കേസുകളിലെ പ്രതികളായ മൂന്നു പേര്‍ അറസ്റ്റില്‍. മതിലകം കൂളിമുട്ടം സ്വദേശി പാമ്പിനേഴത്ത് വീട്ടില്‍ മുഹമ്മദ് ജസീല്‍ (22), കൊടുങ്ങല്ലൂര്‍ ലോകമല്ലേശ്വരം സ്വദേശി അടിമപറമ്പില്‍ വീട്ടില്‍ ഷിഫാസ് (23), കരൂപടന്ന നെടുങ്കാണത്ത്കുന്ന് സ്വദേശി കളത്തിപറമ്പില്‍ വീട്ടില്‍ ശരത്ത് ദാസ് (23) എന്നിവരാണ് അറസ്റ്റിലായത്. കഴിഞ്ഞദിവസം ഉച്ചത്തിരിഞ്ഞ് 4.30 ന് കോണത്തുകുന്ന് വെച്ച് വള്ളിവട്ടം ബോധിഗ്രാം സ്വദേശി പുളിംപറമ്പില്‍ വീട്ടില്‍ മുഹമ്മദ് ഷംസുദ്ദീന്‍ ഓടിച്ചുവന്നിരുന്ന സ്‌കൂട്ടറില്‍ പ്രതികള്‍ സഞ്ചരിച്ചു വന്നിരുന്ന കാര്‍ ഇടിച്ചത് ചോദ്യം ചെയ്തതിലുള്ള വൈരാഗ്യത്താല്‍ പരാതിക്കാരനെ അസഭ്യം പറയുകയും ഇരുമ്പുപൈപ്പ് കൊണ്ടും കൈ കൊണ്ടും ആക്രമിച്ച് പരിക്കേല്‍പ്പിക്കുയും ചെയ്തു. ഇരിങ്ങാലക്കുട പോലീസ് സ്റ്റേഷന്‍ എസ്എച്ച്ഒ കെ.ജെ ജിനേഷ്, എസ്ഐ എം.ആര്‍. കൃഷ്ണ പ്രസാദ്, ജി.എസ്‌സിപിഒ മാരായ എം.ആര്‍. രഞ്ജിത്ത്, പി.ജി. ഗോപകുമാര്‍, കെ.എ തോമാച്ചന്‍, കമല്‍കൃഷ്ണ, ഉമേഷ് കൃഷ്ണന്‍, എം.എ കിഷോര്‍ കുമാര്‍ എന്നിവരാണ് അന്വേഷണ സംഘത്തിലുള്ളത്.

കേന്ദ്രമന്ത്രി സുരേഷ് ഗോപിയുടെ കലുങ്കുസംവാദങ്ങള്‍ക്കെതിരേ മന്ത്രി

ഇരിങ്ങാലക്കുട: കലുങ്ക് സംവാദങ്ങള്‍ എന്ന പേരില്‍ ഫ്യൂഡല്‍ കാലഘട്ടത്തിലെ ദര്‍ബാറുകളെ അനുസ്മരിപ്പിക്കുന്ന യോഗങ്ങള്‍ സംഘടിപ്പിച്ച് പാവപ്പെട്ടവരെ പരിഹസിക്കുകയും പരദൂഷണം നടത്തുകയും ചെയ്യുന്ന തൃശൂര്‍ എംപിയുടെ പരിപാടി അപലപനീയമാണെന്ന് മന്ത്രി ഡോ. ആര്‍. ബിന്ദു. ഇരിങ്ങാലക്കുടയില്‍ സംഘടിപ്പിച്ച കലുങ്ക് പരിപാടിയില്‍ തന്‍റെ പ്രശ്‌നം അവതരിപ്പിച്ച വായോധികയോട് അദ്ദേഹം നടത്തിയ പ്രതികരണങ്ങള്‍ ജനാധിപത്യമര്യാദകള്‍ക്ക് നിരക്കുന്നതല്ല. താനിവിടുത്തെ മന്ത്രിയല്ല, രാജ്യത്തെ മന്ത്രിയാണ് എന്ന് പറയുന്നയാള്‍ താന്‍ എംപിയായി തെരഞ്ഞെടുക്കപ്പെട്ടത് എവിടെ നിന്നാണെന്ന് വിസ്മരിച്ചു പോകുന്നു. തൃശൂരിലെ ജനങ്ങളുടെ വോട്ട് വാങ്ങി ജയിച്ച് എംപിയും മന്ത്രിയുമായ ഒരാള്‍ക്ക് അവരുടെ ഏതു നിവേദനവും ഏറ്റുവാങ്ങാനും അനുഭാവപൂര്‍വം പരിഗണിക്കാനും ചുമതലയുണ്ട്. തനിക്ക് വോട്ട് ചെയ്തവരുടെ മാത്രമല്ല, വോട്ടു ചെയ്യാത്തവരുടെയും എംപിയാണ് ഇപ്പോള്‍ അദ്ദേഹം. അവര്‍ എല്ലാവരുടെയും പരാതികളും അഭ്യര്‍ത്ഥനകളും ഒരുപോലെ കേള്‍ക്കാന്‍ ജനാധിപത്യപരമായ ബാധ്യതയുണ്ട് എംപിയ്ക്ക്. ജീവിതപ്രശ്‌നങ്ങളുമായി മുന്നിലെത്തുന്നവര്‍ തന്‍റെ അടിയാണെന്ന തോന്നല്‍ നല്ലതല്ല. ജീവിതത്തിലാണോ സിനിമയിലാണോ താനെന്ന സ്ഥലജല വിഭ്രമത്തിലാണ് അദ്ദേഹം എന്ന് തോന്നും വിധമാണ് സുരേഷ് ഗോപിയുടെ പ്രതികരണങ്ങള്‍. തിരക്കഥാകൃത്തുക്കള്‍ സമ്മാനിച്ച ഫ്യൂഡല്‍ മാടമ്പി വേഷക്കാരനായി സിനിമയിലല്ലാത്തപ്പോഴും തെരുവിലിറങ്ങി നടക്കുന്നത് ജനങ്ങളുടെ ക്ഷമ പരീക്ഷിച്ചുകൊണ്ടാവരുത്. സിനിമകളില്‍ ആരാധകരെ ത്രസിപ്പിച്ച തരം ഡയലോഗുകളുമായി തന്നെ സമീപിക്കുന്ന സാധാരണക്കാരുടെ നെഞ്ചത്ത് കേറുന്ന രീതി തുടര്‍ച്ചയായി അദ്ദേഹത്തില്‍നിന്നും ഉണ്ടാവുന്നതുകൊണ്ടാണ് ഇതു പറയാന്‍ നിര്‍ബന്ധിതയാകുന്നത്. മിഥ്യാഭ്രമം മാറാന്‍ സുരേഷ് ഗോപിയെ ബിജെപി നേതൃത്വം ഇടപെട്ടു സഹായിക്കണം. താനിപ്പോള്‍ സിനിമയിലല്ല ജനങ്ങളുടെ പ്രശ്‌നങ്ങള്‍ ക്ഷമയോടെ കേട്ട് കൈകാര്യം ചെയ്യേണ്ട ഉത്തരവാദപ്പെട്ട സ്ഥാനങ്ങളിലാണെന്നത് മറന്നുപോവരുതെന്ന് അദ്ദേഹത്തെ ഓര്‍മിപ്പിക്കാന്‍ അദ്ദേഹത്തിന്‍റെ രാഷ്ട്രീയപാര്‍ട്ടി എന്ന നിലയില്‍ ബിജെപി തയ്യാറാവണമെന്നും മന്ത്രി ഡോ. ആര്‍. ബിന്ദു പ്രസ്താവനയില്‍ പറഞ്ഞു.

മതിലകത്തുനിന്നും മെഡിക്കൽ കോളജിലേക്ക് പുതിയ കെഎസ്ആർടിസി ബസ് സർവീസ് നാളെമുതൽ

കയ്പമംഗലം: തൃശൂർ മെഡിക്കൽ കോളജിലേക്ക് മതിലകത്ത് നിന്നും പുതിയ കെഎസ്ആർടിസി ബസ് സർവീസ് നാളെ മുതൽ ആരംഭിക്കുന്നു. ഇ.ടി. ടൈസൺ എംഎൽഎയുടെ ആവശ്യപ്രകാരമാണ് ഗതാഗത മന്ത്രി കെ.ബി. ഗണേഷ് കുമാർ പുതിയ സർവീസ് ആരംഭിക്കാൻ അനുമതി നൽകിയത്. നാളെ രാവിലെ 6.50ന് മതിലകം പഞ്ചായത്ത് ബസ് സ്റ്റാൻഡിൽ വച്ച് ഇ.ടി.ടൈസൺ എംഎൽഎ ഫ്ലാഗ്ഓഫ് നിർവഹിക്കും. പഞ്ചായത്ത് പ്രസിഡന്‍റ്് സീനത്ത് ബഷീർ, വൈസ് പ്രസിഡന്‍റ് ടി.എസ്. രാജു ഉൾപ്പെടെയുള്ള ജനപ്രതിനിധികൾ, കെഎസ്ആർടിസി മാള എടിഒ സുനിൽ, വിവിധ രാഷ്ട്രീയ കക്ഷി ഭാരവാഹികൾ തുടങ്ങിയവർ പങ്കെടുക്കും. രാവിലെ 6.50ന് നിന്നാരംഭിച്ച് മതിലകം പാലം വഴി പടിയൂർ, ഇരിങ്ങാലക്കുട മുഖേന ഒമ്പതിന് മെഡിക്കൽ കോളജ് ആശുപത്രിയിൽ എത്തും. തിരിച്ച് വൈകീട്ട് 5.15ന് മെഡിക്കൽ കോളജിൽ നിന്ന് ആരംഭിച്ച് ഏഴിന് മതിലകത്ത് എത്തുമെന്ന് അധികൃതർ അറിയിച്ചു.

ഉത്തരവ് മേയറുടെ അറിവോടെ: ജോണ്‍ ഡാനിയൽ

തൃശൂർ: കോർപറേഷനിലെ വൈദ്യുതിവിഭാഗം ജീവനക്കാരെ വെട്ടിക്കുറയ്ക്കുന്ന വിവരം മേയർക്കും സിപിഎം നേതാക്കൾക്കും നേരത്തേ അറിയാമായിരുന്നെന്നു കൗണ്‍സിലർ ജോണ്‍ ഡാനിയൽ. നേരത്തേ പാളിപ്പോയ കന്പനിവത്കരണം വീണ്ടും നടപ്പാക്കാനാണു നീക്കം. അന്നു ശ്രമം നടക്കാതെ പോയപ്പോൾതന്നെ മേയർ നടപ്പാക്കുമെന്നു വെല്ലുവിളിച്ചിരുന്നു. ഇതിനായി മേയുടെ പിഎ ആയി ടോബി തോമസ് എന്ന ഉദ്യോഗസ്ഥനെ നിയമിച്ചു. ഇയാൾ മേയറുടെ ബന്ധുവാണെന്ന ആരോപണവും ഉയർന്നിരുന്നു. കന്പനിവത്കരണത്തിനായി ടോബിയുടെ നേതൃത്വത്തിലാണ് കരടുരൂപം തയാറാക്കിയത്. ഇപ്പോഴുള്ള സർക്കാർ ഉത്തരവിനുപിന്നിലും കന്പനിവത്കരണമാണ് ലക്ഷ്യം. ജീവനക്കാരുടെ എണ്ണം കുറച്ചു ജനങ്ങൾക്കു ലഭിക്കേണ്ട സേവനം പ്രതിസന്ധിയിലാക്കുകയും സ്വകാര്യവത്കരണം മാത്രമാണു പ്രതിവിധിയെന്നു പ്രചരിപ്പിക്കുകയുമാണ് ചെയ്യുന്നത്. ജീവനക്കാരുടെ എണ്ണം വെട്ടിക്കുറച്ചുള്ള ഉത്തരവിറങ്ങിയതു തദ്ദേശമന്ത്രിയുമായി മേയറും വികസനകാര്യ സ്റ്റാൻഡിംഗ് കമ്മിറ്റി ചെയർമാൻ വർഗീസ് കണ്ടംകുളത്തിയും നടത്തിയ ഗൂഢാലോചനയാണ്. തദ്ദേശമന്ത്രി കോർപറേഷനിൽ ഉദ്ഘാടനത്തിന് എത്തിയതും ഇതിന്‍റെ ഭാഗമാണ്. മേയറും കോർപറേഷനിലെ സിപിഎം നേതാക്കളും അറിയാതെ മന്ത്രി ഉത്തരവിറക്കിയെന്നു പറഞ്ഞു ജനങ്ങളെ വിഡ്ഢികളാക്കുകയാണ്. പ്രതിസന്ധിയുണ്ടാക്കി പ്രതിവിധി കണ്ടെത്താമെന്നു കരുതേണ്ടെന്നും ശക്തമായ പ്രതിഷേധം ഉയർത്തുമെന്നും ജോണ്‍ ഡാനിയൽ പറഞ്ഞു.

കനീസിയം ബാഡ്മിന്‍റൺ ടൂർണമെന്‍റ് നടത്തി

തൃശൂർ: സിഎംഐ ദേവമാത പ്രോവിൻസിന്‍റെ നേതൃത്വത്തിൽ ദൈവദാസൻ കനീസിയൂസച്ചന്‍റെ അനുസ്മരണാർഥം ഇരിങ്ങാലക്കുട ക്രൈസ്റ്റ് വിദ്യാനികേതൻ സ്കൂളിൽ വൈദികരെ പങ്കെടുപ്പിച്ച് കനീസിയം ബാഡ്മിന്‍റൺ ടൂർണമെന്‍റ് നടത്തി. 110 വൈദികർ പങ്കെടുത്ത മത്സരത്തിൽ ഫാ. റോബിൻ ആൻഡ് ഫാ. മനു (കാഞ്ഞിരപ്പിള്ളി രൂപത) ജേതാക്കളായി. ഫാ. റോയ് ആൻഡ് ഫാ. വിൽസൻ (കോട്ടാർ രൂപത) ഫസ്റ്റ് റണ്ണർഅപ്പും ഫാ. ജിം ആൻഡ് ഫാ. സൈമണ്‍ (കോട്ടാർ രൂപത) സെക്കൻഡ് റണ്ണർഅപ്പുമായി. കേരള ബാഡ്മിന്‍റൺ ടീം കോച്ച് ഡോ. റെനോഷ് ജെയിസ് ഉദ്ഘാടനം ചെയ്തു. ബിസിസിഐ നാഷണൽ പാനൽ അന്പയർ അഡ്വ. ടോണി ഇമ്മട്ടി വിശിഷ്ടാതിഥിയായിരുന്നു. കണ്‍വീനർമാരായ ഫാ. ജെയിംസ് ആലപ്പാട്ട്, ഫാ. ജോജോ അരിക്കാടൻ എന്നിവർ നേതൃത്വം നൽകി.

95 ശതമാനവും പൂർത്തിയാക്കി തൃശൂർ; അഭിമാനനേട്ടം

തൃശൂർ: കേരളത്തിന്‍റെ അതിദാരിദ്യ്ര നിർമാർജനപദ്ധതിയുടെ 95 ശതമാനവും പൂർത്തിയാക്കിയ ജില്ലയ്ക്ക് അഭിമാനനേട്ടം. നവംബർ ഒന്നിന് അതിദരിദ്രരില്ലാത്ത സംസ്ഥാനമായി കേരളത്തെ പ്രഖ്യാപിക്കാനുള്ള സർക്കാർ ലക്ഷ്യത്തിന്‍റെ ഭാഗമായി ജില്ലയിൽ മൊത്തം 5,013 അതിദരിദ്രരെയാണു കണ്ടെത്തിയത്. ഇതിൽ 4,649 പേർക്ക് മൈക്രോപ്ലാൻ തയാറാക്കി. ഭക്ഷണത്തിനു ബുദ്ധിമുട്ടുള്ള 993 പേർക്കും വരുമാനം ഇല്ലാത്തവ 367 പേർക്കും 100 ശതമാനം സഹായംനൽകി ദാരിദ്യ്രത്തിൽനിന്നു മുക്തരാക്കി. ആരോഗ്യപരമായി ബുദ്ധിമുട്ടുള്ള 2,559 പേരിൽ 2,558 പേർക്കും (99.8 ശതമാനം) സഹായം ലഭ്യമാക്കി. ഭവനപുനരുദ്ധാരണത്തിന് അപേക്ഷിച്ച 495 പേർക്കും സഹായം ലഭ്യമാക്കി. ഭവനം ആവശ്യമുള്ള 361 കുടുംബങ്ങളിൽ 346 പേർക്കു ഫണ്ട് ലഭ്യമാക്കിയിട്ടുണ്ട്. വീടും സ്ഥലവും ആവശ്യമുള്ള 372 പേരിൽ 174 പേർക്കു ഭവനനിർമാണം പൂർത്തീകരിച്ചു. 483 പേർക്കു ഭവനപുനരുദ്ധാരണം പൂർത്തീകരിച്ചു. ജില്ലയിലെ തദ്ദേശസ്ഥാപനങ്ങളിൽ 42 എണ്ണവും പദ്ധതി പൂർത്തിയാക്കി. ഒക്ടോബർ 15നകം ബാക്കിയുള്ളവ പൂർത്തിയാക്കാനുള്ള ശ്രമത്തിലാണ്. അർഹരായവർക്കു റേഷൻ കാർഡ്, ആധാർ കാർഡ്, വോട്ടേഴ്സ് ഐഡി, സാമൂഹ്യസുരക്ഷാപെൻഷൻ, ബാങ്ക് അക്കൗണ്ട്, ഭിന്നശേഷി ഐഡി, തൊഴിൽ കാർഡ് ഉൾപ്പെടെയുള്ള അവശ്യരേഖകൾ ലഭ്യമാക്കി. ചാലക്കുടി താലൂക്കിൽ 16 കുടുംബങ്ങളിൽ മൂന്നുപേർക്കു പട്ടയം ലഭിക്കുകയും 13 പേർക്കു ലാൻഡ് അക്വിസിഷൻ ഓർഡർ നൽകുകയും ചെയ്തു. കുന്നംകുളത്ത് 28 കുടുംബങ്ങളിൽ 14 പേർക്കു പട്ടയം ലഭിച്ചു. 14 പേർക്ക് ഉടൻ അനുവദിക്കും. തൃശൂർ താലൂക്കിൽ ആറു കുടുംബങ്ങളിൽ നാലുപേർക്കു പട്ടയം ലഭിച്ചു. രണ്ടുപേർക്കു പതിവു കമ്മിറ്റി കൂടിയശേഷം ലഭ്യമാക്കും. തലപ്പിള്ളിയിൽ ഒരു കുടുംബത്തിനു പട്ടയം ലഭിച്ചിട്ടുണ്ട്. 2021ൽ എല്ലാ തദ്ദേശസ്ഥാപനങ്ങളിലും സർവേ നടത്തി കണ്ടെത്തിയ ഗുണഭോക്താക്കളുടെ പട്ടിക അതതു ഭരണസമിതികൾ അർഹത പരിശോധിച്ച് അന്തിമമാക്കിയാണ് അതിദാരിദ്ര്യപട്ടിക തയാറാക്കിയത്.

സുരേഷ്ഗോപിയെ കാണാൻ ചെന്നത് പ്രതീക്ഷയോടെ: ആനന്ദവല്ലി

തൃശൂർ: കരുവന്നൂർ ബാങ്കിൽ നിക്ഷേപിച്ച പണം തിരികെവാങ്ങി നൽകുമെന്നു സുരേഷ്ഗോപി തെരഞ്ഞെടുപ്പുസമയത്ത് വാഗ്ദാനം ചെയ്തിരുന്നെന്നും അതു പ്രതീക്ഷിച്ചാണ് അദ്ദേഹത്തെ കാണാൻ ചെന്നതെന്നും ഇരിങ്ങാലക്കുട പൊറത്തിശേരി സ്വദേശിനി ആനന്ദവല്ലി. കഴിഞ്ഞ ദിവസം കലുങ്ക് ചർച്ചയ്ക്കിടെ കരുവന്നൂർ ബാങ്കിൽ നിക്ഷേപിച്ച പണം ലഭ്യമാക്കാൻ സഹായം ആവശ്യപ്പെട്ട ഇവരോട് "മുഖ്യമന്ത്രിയെ പോയി കാണൂ' എന്നും "എന്‍റെ നെഞ്ചത്തേക്കു കയറിക്കോളൂ' എന്നും സുരേഷ്ഗോപി പറഞ്ഞതു വിവാദമായിരുന്നു. സുരേഷ്ഗോപിയുടെ മറുപടി ഏറെ വേദനിപ്പിച്ചെന്നും കേന്ദ്രമന്ത്രി അങ്ങനെ പറയാൻ പാടില്ലായിരുന്നുവെന്നും ആനന്ദവല്ലി പ്രതികരിച്ചു. ചേച്ചി കൂടുതൽ വർത്തമാനം പറയരുതെന്ന താക്കീതുമുണ്ടായി. ഒന്നേമുക്കാൽ ലക്ഷം രൂപയാണ് കരുവന്നൂർ സഹകരണസംഘത്തിൽനിന്നു കിട്ടാനുള്ളത്. ചികിത്സാച്ചെലവിനുപോലും പണമില്ലാതെ ബുദ്ധിമുട്ടുകയാണ്. മാസം മരുന്നിനുതന്നെ നല്ലൊരു തുക വേണം. സഹകരണസംഘക്കാർ പറ്റിച്ച പണമാണെന്നും ആനന്ദവല്ലി പറഞ്ഞു. മുഖ്യമന്ത്രിയെയൊക്കെ തന്നെപ്പോലുള്ള പാവങ്ങൾ എവിടെപോയി കാണാനാണെന്നും ആനന്ദവല്ലി ചോദിച്ചു.

മുന്നൊരുക്കമില്ലാതെ ജില്ലാ സ്കൂൾ ഗെയിംസ് ഇന്നു കുന്നംകുളത്ത്

സ്വന്തം ലേഖകൻ തൃശൂർ: വേണ്ടത്ര മുന്നൊരുക്കങ്ങളില്ലാതെ ജില്ലാ സ്കൂൾ ഗെയിംസിന് ഇന്നു കുന്നംകുളത്തു തുടക്കമാകുന്നു. പല വിദ്യാർഥികൾക്കും മത്സരത്തിനു മുന്നോടിയായുള്ള സെലക്‌ഷനിൽ പങ്കെടുക്കാനായില്ലെന്നാണ് ആക്ഷേപം. തിടുക്കപ്പെട്ട് ഒരുങ്ങേണ്ടിവന്ന വിദ്യാർഥികളിൽ പലരും മികച്ച നിലവാരം പുലർത്താനാകില്ലെന്ന മാനസികസമ്മർദത്തിലാണ്. ഫുട്ബോൾ, തൈക്വോണ്ടോ, ബോക്സിംഗ്, റസ്‌ലിംഗ്, ടെന്നിക്കൊയ്റ്റ്, വോളിബോൾ, ജിംനാസ്റ്റിക് മത്സരങ്ങളാണ് ഇന്നുമുതൽ 23 വരെ നടക്കുക. എന്നാൽ മത്സരത്തീയതിയും മത്സരങ്ങൾക്കു തെരഞ്ഞെടുത്തവരുടെ പേരുകൾ ഡിഡിക്കു റിപ്പോർട്ട് ചെയ്യേണ്ട തീയതിയും സംബന്ധിച്ച് കഴിഞ്ഞ ദിവസമാണ് സ്കൂളുകൾക്കു നിർദേശം ലഭിച്ചത്. ഫുട്ബോൾ സെലക്‌ഷൻ തീയതി ഇന്നലെയായിരുന്നു. ഇന്നാണു മത്സരം. ജില്ലയിലെ പല സ്കൂളുകളിലും വിദ്യാർഥികൾ സ്റ്റഡി ടൂറിലും മറ്റുമായതിനാൽ ഫുട്ബോൾ തത്പരരായ പലർക്കും സെലക്‌ഷനിൽ പങ്കെടുക്കാനായില്ലെന്നാണ് ആക്ഷേപം. ജില്ലയിലെ 12 ഉപജില്ലകളിൽനിന്നായി 18 പേരടങ്ങുന്ന ടീമുകളെയാണു മത്സരത്തിനു തെരഞ്ഞെടുത്തിരിക്കുന്നത്. സ്കൂൾ, ഉപജില്ലാ മത്സരങ്ങൾക്കുശേഷം അതിൽനിന്നു തെരഞ്ഞെടുക്കുന്നവർക്കു പ്രത്യേകം ക്യാന്പ് നടത്തിയാണു ജില്ലാതല മത്സരത്തിലേക്കുള്ള ടീമുകളെ ഉപജില്ലകൾ സജ്ജമാക്കേണ്ടത്. മുൻവർഷങ്ങളിൽ പലപ്പോഴും ഇത്തരം മത്സരങ്ങളെല്ലാം തട്ടിക്കൂട്ടുപരിപാടിയായിട്ടാണെങ്കിലും നടത്താറുണ്ടായിരുന്നു. ഇത്തവണ അത്രപോലും ആത്മാർഥതയില്ലാതെയാണ് ടീം ഒരുക്കിയത്. അതുകൊണ്ടുതന്നെ മത്സരങ്ങളിൽ മികച്ച നിലവാരം പുലർത്താൻ സാധിക്കില്ലെന്നു കായികാധ്യാപകർ ആശങ്ക പ്രകടിപ്പിച്ചു. വിദ്യാഭ്യാസവകുപ്പിന്‍റെ നിർദേശമനുസരിച്ച് തട്ടിക്കൂട്ടുടീമുകളെ തെരഞ്ഞെടുക്കേണ്ടിവന്നതിന്‍റെ മനോവിഷമത്തിലാണവർ. ഇന്നും നാളെയും കുന്നംകുളം ജിവിഎച്ച്എസ്എസിൽ സീനിയർ ബോയ്സ്, വേലൂർ ജിആർഎസ്ആർവിഎച്ച്എസ്എസിൽ സീനിയർ ഗേൾസ് ഫുട്ബോൾ മത്സരങ്ങൾ നടക്കും. കുന്നംകുളം ജിവിഎച്ച്എസ്എസിൽ സബ്ജൂണിയർ, സീനിയർ വിഭാഗങ്ങളിലായി ബോയ്സ്, ഗേൾസ് തൈക്വോണ്ടോ മത്സരങ്ങളും നടക്കും. ഇവ രണ്ടിന്‍റെയും സെലക്‌ഷനുകളാണു കഴിഞ്ഞദിവസത്തെ നിർദേശത്തെതുടർന്ന് ഇന്നലെ നടത്തേണ്ടിവന്നത്. നാളെ കൊടുങ്ങല്ലൂർ പ്രോസിറ്റ് ബോക്സിംഗ് അക്കാദമിയിൽ നടക്കുന്ന ജൂണിയർ ബോയ്സ്, ഗേൾസ് ബോക്സിംഗ് മത്സരാർഥികളുടെ പേരുകൾ ഇന്നാണു ഡിഡിക്കു കൈമാറേണ്ടത്. നാളെ നടക്കുന്ന വോളിബോൾ മത്സരത്തിനുള്ള ടീമുകളെക്കുറിച്ച് ഇന്നും 22നുള്ള റസ്‌ലിംഗ് മത്സരാർഥികളുടെ വിവരങ്ങൾ 21നും 23നു നടക്കുന്ന ടെന്നിക്കൊയ്റ്റ് ടീം ലിസ്റ്റ് 22നും കൈമാറേണ്ടതുണ്ട്.

നല്ല ഇടയന്,അനുശോചനങ്ങൾ...

ആർച്ച്ബിഷപ് ഡോ. വര്‍ഗീസ് ചക്കാലക്കല്‍ കോഴിക്കോട്: തന്‍റെ ജീവിതത്തിന്‍റെ വിശുദ്ധിയും ലാളിത്യവും കൊണ്ട് കേരളത്തെയും അനവധി പ്രദേശങ്ങളെയും പ്രകാശിപ്പിച്ച മഹാനായ വ്യക്തിത്വമാണ് അഭിവന്ദ്യ മാര്‍ ജേക്കബ് തൂങ്കുഴി പിതാവ്. അദ്ദേഹം സ്‌നേഹത്തിന്‍റെ നിറകുടവും ലാളിത്യത്തിന്‍റെ ജീവിക്കുന്ന മാതൃകയും സൗഹൃദബന്ധത്തിന്‍റെ വലിയ സാക്ഷ്യവുമായിരുന്നു. പുഞ്ചിരിയോടെ വരവേല്‍ക്കുന്ന സ്വഭാവം, കുട്ടികളോടൊപ്പം കളിക്കുകയും സുഹൃത്തുക്കളോടൊപ്പം ചിരിക്കുകയും എല്ലാവരോടും സൗമ്യമായി സംസാരിക്കുകയും ചെയ്തിരുന്ന അദ്ദേഹത്തിന്‍റെ ജീവിതശൈലി, ഇന്നും നമ്മെ പ്രചോദിപ്പിക്കുന്നതും അനുഗമിക്കാവുന്നതുമാണെന്ന് ഡോ. ചക്കാലയ്ക്കൽ അനുസ്മരിച്ചു. സൗമ്യനായ ആത്മീയസഞ്ചാരി: മാർ ഔഗിൻ കുര്യാക്കോസ് തൃശൂർ: കരുണയും എളിമയും ലാളിത്യവും എല്ലാ പ്രവർത്തനങ്ങളിലും അടുത്തറിഞ്ഞിട്ടുള്ള മാർ തൂങ്കുഴി കൽദായ സുറിയാനിസഭയുമായും സഭയുടെ മേലധ്യക്ഷന്മാരുമായി ആത്മീയബന്ധം പുലർത്തിയിരുന്നുവെന്നു മാർ ഔഗിൻ കുര്യാക്കോസ് മെത്രാപ്പോലീത്ത. ചെറുകഥകളിലുടെയും സംഭവങ്ങളിലൂടെയും താത്വിക ആത്മിക ചിന്തകൾ പകർന്നുകൊടുക്കാൻ പ്രത്യേക പ്രാവീണ്യം അദ്ദേഹത്തിനുണ്ടായിരുന്നു. പ്രാർഥനയിൽ ശരണപ്പെട്ട്, സാധുസംരക്ഷണം ലക്ഷ്യംവച്ച് പ്രവർത്തിച്ച്, സ്വർഗരാജ്യം ലാക്കാക്കി സഞ്ചരിച്ചിരുന്ന ഒരു സൗമ്യനായ ആത്മീയസഞ്ചാരിയായിരുന്ന മാർ തൂങ്കുഴി എല്ലാവരെയും വേദപഠനത്തിലേക്കും പ്രാർഥനാജീവിതത്തിലേക്കും നയിച്ച ആത്മീയഗുരുവായിരുന്നു. അദ്ദേഹത്തിനു പൗരസ്ത്യ കൽദായ സുറിയാനിസഭയുടെ ആദരാഞ്ജലികൾ അർപ്പിക്കുന്നു. വിശുദ്ധിയുടെ പരിമളം പരത്തിയ മഹദ്‌വ്യക്തി: ഉണ്ണിയാടൻ ഇരിങ്ങാലക്കുട: തൃശൂർ അതിരൂപത മുൻ അധ്യക്ഷൻ ആർച്ച്ബിഷപ് മാർ ജേക്കബ് തൂങ്കുഴിയുടെ നിര്യാണത്തിൽ മുൻ സർക്കാർ ചീഫ് വിപ്പ് തോമസ് ഉണ്ണിയാടൻ അനുശോചിച്ചു. സഭയിലും സമൂഹത്തിലും വിശുദ്ധിയുടെ പരിമളം പരത്തിയ മഹദ്‌വ്യക്തിയാണ് മാർ തൂങ്കുഴി. വിനയത്തിന്‍റെയും സ്നേഹത്തിന്‍റെയും ഉദാത്തമാതൃകയായിരുന്നു അദ്ദേഹം. താനുമായി വലിയ വ്യക്തിബന്ധം പുലർത്തിയിരുന്ന അദ്ദേഹം എല്ലാവരോടും സൗമ്യതയോടും ബഹുമാനത്തോടെയുമാണ് പെരുമാറിയിരുന്നത്. വിശുദ്ധമായ ജീവിതത്തിന്‍റെ മാതൃകയായ അദ്ദേഹത്തിന്‍റെ വിയോഗം സഭയ്ക്കെന്നപോലെ സമൂഹത്തിനും തീരാനഷ്ടമാണെന്ന് ഉണ്ണിയാടൻ പറഞ്ഞു. മാര്‍ റെമീജിയോസ് ഇഞ്ചനാനിയില്‍ താമരശേരി: സൗമ്യനായ വ്യക്തിയായിരുന്നു അഭിവന്ദ്യ തൂങ്കുഴി പിതാവ്. ശാന്തമായ ജീവിതമായിരുന്നു പിതാവിനുണ്ടായിരുന്നത്. ആ സൗമ്യത അദ്ദേഹത്തിന്‍റെ പ്രവര്‍ത്തനങ്ങളിലും സംസാരശൈലിയിലും നമുക്കു കാണാന്‍ സാധിക്കും. എല്ലാവരോടും വളരെ ശാന്തമായിട്ടാണ് അദ്ദേഹം ഇടപെട്ടിരുന്നത്. നടത്തംതന്നെ ചടുലതയോടെ വേഗത്തിലായിരുന്നു. എന്നാല്‍ അദ്ദേഹത്തിന്‍റെ സംസാരം വളരെ ശാന്തമായിരുന്നു. ആരോടും ദേഷ്യമായി സംസാരിക്കില്ല. മറ്റുള്ളവരുടെ ഹൃദയം മുറിയരുത് എന്നായിരുന്നു അദ്ദേഹത്തിന്‍റെ ആഗ്രഹം. അതുകൊണ്ട് ആരെയും വേദനിപ്പിക്കാതെയായിരുന്നു അദ്ദേഹം എപ്പോഴും പ്രവര്‍ത്തിച്ചിരുന്നത്. ആഴമായ ആധ്യാത്മികതയുടെ ഉടമയായിരുന്നു പിതാവ്. ദൈവസ്‌നേഹത്തിന്‍റെ ആഴങ്ങളില്‍ പിതാവ് എപ്പോഴും സമ്പൂര്‍ണമായി സമര്‍പ്പിച്ചിരുന്നതുകൊണ്ട് പിതാവിന്‍റെ ജീവിതം ശാന്തമായിരുന്നു. ദൈവാശ്രയബോധമായിരുന്നു അദ്ദേഹത്തിന്‍റെ കൈമുതല്‍. എല്ലാം ദൈവം ക്രമീകരിച്ചുകൊള്ളും, ദൈവം നടത്തിക്കൊള്ളും, ദൈവമാണ് എല്ലാം ചെയ്യുന്നത് എന്നദ്ദേഹം വിശ്വസിച്ചു. ദൈവത്തിലുള്ള പരിപൂര്‍ണമായ ആശ്രയം അദ്ദേഹത്തിന് എപ്പോഴും ഉണ്ടായിരുന്നു. ദൈവത്തെ ആശ്രയിക്കുന്നതുകൊണ്ട് അദ്ദേഹത്തിന്‍റെ ജീവിതത്തില്‍ എല്ലാ കാര്യങ്ങളും ദൈവം ഭംഗിയായി ക്രമീകരിച്ചിരുന്നത് നമുക്ക് കാണാന്‍ സാധിക്കും. ദൈവം ഒരു സങ്കീര്‍ത്തനത്തില്‍ പറയുന്നതുപോലെ ആറ്റുതീരത്തെ വൃക്ഷമായിരുന്നു അദ്ദേഹം. ആറ്റുതീരത്തു വളരുന്ന വൃക്ഷം ഒരിക്കലും അതിന്‍റെ പച്ചകെട്ടുപോകുന്നില്ല. എപ്പോഴും സമൃദ്ധിയുള്ളതായിരിക്കും. അതുപോലെയായിരുന്നു അദ്ദേഹത്തിന്‍റെ ജീവിതം.

വില്വമലയിൽ നിറമാലച്ചന്തം

തിരുവില്വാമല: പ്രസിദ്ധമായ തിരുവില്വാമല ശ്രീ വില്വാദ്രിനാഥ ക്ഷേത്രത്തിലെ നിറമാല ദർശനത്തിനു ഭക്തജനത്തിരക്ക്. മധ്യകേരളത്തിലെ ക്ഷേത്രോത്സവങ്ങൾക്ക് ആരംഭംകുറിച്ച് കന്നിമാസത്തിലെ ആദ്യത്തെ വ്യാഴാഴ്ച നടന്ന നിറമാല തൊഴാൻ വില്വമലയിലേക്ക് അതിരാവിലെ മുതൽതന്നെ ഭക്തരുടെ ഒഴുക്കായിരുന്നു. ക്ഷേത്രാങ്കണവും ക്ഷേത്രനടയും താമരപ്പൂമാല തോരണങ്ങളും കുലവാഴകളുംകൊണ്ട് കമനീയമായി അലങ്കരിച്ചിരുന്നു. നിരവധി വാദ്യകലാകാരന്മാരും ആനകളും എഴുന്നള്ളിപ്പിൽ പങ്കെടുക്കാനെത്തിയിരുന്നു. വാദ്യകലാകാരന്മാർ വില്വാദ്രിനാഥനുമുന്നിൽ നാദാർച്ചനയ്ക്കായി എത്തിയതും നിരവധി ആനകൾ എഴുന്നള്ളിപ്പിൽ പങ്കെടുക്കാനെത്തിയതും നിറമാലയുടെ പ്രത്യേകതയാണ്. രാവിലെ അഞ്ചിനു കലാമണ്ഡലം അച്ചുതൻ, ഞെരളത്ത് രാമദാസ്, സിന്ധു ശ്രീകുമാർ എന്നിവർ ചേർന്ന് അവതരിപ്പിച്ച അഷ്ടപദിയോടെയാണ് ഉത്സവത്തിനു തുടക്കമായത്. രാവിലെ മേളത്തോടെയുള്ള ശീവേലി എഴുന്നള്ളിപ്പിൽ പഞ്ചാരിമേളത്തിനു കിഴക്കൂട്ട് അനിയൻമാരാരും ഉച്ചയ്ക്കു രണ്ടിനു പഞ്ചവാദ്യത്തോടെയുള്ള കാഴ്ചശീവേലിക്ക് കുനിശേരി അനിയൻമാരാരും പ്രമാണം വഹിച്ചു. പ്രഭാതശീവേലിക്കു ചിറയ്ക്കൽ കാളിദാസൻ ലക്ഷ്മണന്‍റെയും അക്കിക്കാവ് കാർത്തികേയൻ ശ്രീരാമന്‍റെയും കോലം വഹിച്ചു. ഉച്ചകഴിഞ്ഞു നടന്ന കാഴ്ചശീവേലിക്കു തിരുവാണിക്കാവ് രാജഗോപാലും ചെത്തല്ലൂർ മുരളികൃഷ്ണനുമാണ് തിടമ്പേറ്റിയത്. വൈകിട്ട് നാദസ്വരക്കച്ചേരി, നിറമാല, ദീപാരാധന, വിളക്കുവയ്പ്,സോപാനസംഗീതം, മോഹിനിയാട്ടം, തായമ്പക, രാത്രി 12നു മദ്ദളകേളി, തുടർന്ന് ശീവേലി എഴുന്നള്ളിപ്പ് എന്നിവയും ക്ഷേത്രാങ്കണത്തിൽ അരങ്ങേറി. ഇന്നു രാവിലെ 5.30 നു നാദസ്വരത്തോടെ നിറമാല ഉത്സവത്തിനു സമാപനമാകും.

അജ്ഞാതവാഹനമിടിച്ച് ചികിത്സയിലിരുന്ന ആൾ മരിച്ചു

തൃപ്രയാർ: ഗുരുവായൂർ ക്ഷേത്ര ദർശനം കഴിഞ്ഞ് വീട്ടിലേക്ക് പോകും വഴി അജ്ഞാത വാഹനമിടിച്ച് ചികിത്സയിലിരുന്ന ആൾ മരിച്ചു. വലപ്പാട് ബീച്ച് കൊല്ലാമ്പി വീട്ടിൽ കരുണാകരന്‍റെ മകൻ അരവിന്ദൻ(53) ആണ് മരിച്ചത്. തിങ്കളാഴ്ച ഉച്ചയ്ക്ക് രണ്ടരക്ക് ഏങ്ങണ്ടിയൂർ സൗപണിക ഓഡിറ്റോറിയത്തിനുമുന്നിലെ ദേശീയപാതയുടെ സർവീസ് റോഡിലാണ് സംഭവം. തൃശൂർ മെഡിക്കൽ കോളജിൽ ചികിത്സയിലിരിക്കെയാണ് മരണം. അരവിന്ദനോടൊപ്പം ഭാര്യ രജനിയുമുണ്ടായിരുന്നു. ഇവർ തലയ്ക്ക് ഗുരുതരപരിക്കുകളോടെ ചികിത്സയിലാണ്. മക്കൾ: അജിത്ത്, അഭിജിത്ത്.

കാട്ടുപന്നിയെ വേട്ടയാടി മാംസവില്പന: മൂന്നുപേർകൂടി അറസ്റ്റിൽ

വടക്കാഞ്ചേരി: കാട്ടുപന്നിയെ വേട്ടയാടി മാംസവില്പന നടത്തിയ സംഘത്തിലെ മൂന്നുപേർ‌കൂടി അറസ്റ്റിൽ. വടക്കാഞ്ചേരി ഫോറസ്റ്റ് റേഞ്ചിനുകീഴിലെ പൂങ്ങോട് ഫോറസ്റ്റ് സ്റ്റേഷനിൽ രജിസ്റ്റർ ചെയ്ത കേസിലെ പ്രതികളെയാണു കഴിഞ്ഞ ദിവസം പിടികൂടിയത്. കാഞ്ഞിരക്കോട് സ്വദേശി കളായ വടക്കൻ വീട്ടിൽ മിഥുൻ ( 30), മങ്ങാത്ത് വീട്ടിൽ ശിവൻ (54), മനവളപ്പിൽ വീട്ടിൽ മുരളീധരൻ (65) എന്നിവരെയാണ് ഫോറസ്റ്റ് ഓഫീസർ ബി. അശോക്‌രാജും സം ഘവും അറസ്റ്റുചെയ്തത്. കാട്ടുപന്നിവേട്ടയുമായി ബന്ധപ്പെട്ട് ദേശമംഗലം സ്വദേശിയായ പല്ലൂർ കിഴക്കേതിൽ വീട്ടിൽ മുഹമ്മദ്മുസ്തഫയെ നേരത്തെ അറസ്റ്റ് ചെയ്തിരുന്നു. ഇയാളിൽനിന്നും ലഭിച്ച വിവരത്തിന്‍റെ അടിസ്ഥാനത്തിലാണു മറ്റു മൂന്നു പ്രതികളെയും അറസ്റ്റുചെയ്തത്. പിടികൂടിയ മിഥുൻ ഓട്ടോ ഡ്രൈവറും മുരളീധരൻ മണ്ണുത്തി വെറ്റിനറി സർവകലാശാലയിൽ നിന്നും വിരമിച്ച ജീവനക്കാരനുമാണ്. പ്രതികളെ കോടതിയിൽ ഹാജരാക്കി.

മണലൂരിൽ പുരസ്കാരവിതരണം നടത്തി

കാഞ്ഞാണി: മണലൂർ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻചാണ്ടി സാഹിത്യ, വിദ്യാഭ്യാസ, മാധ്യമപുരസ്കാര വിതരണം നടത്തി. മുൻ ആഭ്യന്തരമന്ത്രി രമേശ് ചെന്നിത്തല ഉദ്ഘാടനം ചെയ്തു. എഴുത്തുകാരൻ ഗോപി മാമ്പുള്ളിയുടെ "ദേശങ്ങൾ കഥ പറയുന്നു' പുസ്തകപ്രകാശനവും ചെന്നിത്തല നിർവഹിച്ചു. ഡോ. പി.വി. കൃഷ്ണൻനായർ പുസ്തകം ഏറ്റുവാങ്ങി. മണ്ഡലം കോൺഗ്രസ് പ്രസിഡന്‍റ് എം. വി. അരുൺ അധ്യക്ഷത വഹിച്ചു. മുൻ ഡിസിസി പ്രസിഡന്‍റുമാരായ പി.എ. മാധവൻ, ജോസ് വള്ളൂർ, യുഡിഎഫ് ചെയർമാൻ ടി.വി. ചന്ദ്രമോഹൻ, ഗോപി മാമ്പുള്ളി, കെപിസിസി സെക്രട്ടറി എ. പ്രസാദ്, ഡിസിസി ഭാരവാഹികളായ സുന്ദരൻ കുന്നത്തുള്ളി, കെ.കെ. ബാബു, വി.ജി. അശോകൻ, പി.കെ. രാജൻ, ബ്ലോക്ക് കോൺഗ്രസ് പ്രസിഡന്‍റ്് ദീപൻ മാസ്റ്റർ, മഹിളാ കോൺഗ്രസ് സംസ്ഥാന സെക്രട്ടറി സുബൈദ മുഹമ്മദ് എന്നിവർ പ്രസംഗിച്ചു.

ഓട്ടുപാറ റോഡ് നവീകരണം: വ്യാപകപ്രതിഷേധം

വടക്കാഞ്ചേരി: ഓട്ടുപാറയിൽ റോഡ് നവീകരണം. കേടുപാടുകളില്ലാത്ത റോഡ് പൊളിച്ചതിൽ വ്യാപാരികളുടെയും നാട്ടുകാരുടെയും പ്രതിഷേധം. വടക്കാഞ്ചേരി നഗരസഭയിലെ ഓട്ടുപാറ ബസ് സ്റ്റാൻഡിനു പിറകിലെ ബൈപാസ് റോഡാണ് കഴിഞ്ഞദിവസം മുതൽ പൊളിച്ചുനീക്കുന്നത്. 25 ലക്ഷം രൂപ മുടക്കി പുതിയ റോഡ് ഇന്‍റർലോക്ക് ടൈൽസ് വിരിക്കാനാണ് നഗരസഭയുടെ നീക്കം. ഇതിനെതിരേയാണു പ്രദേശവാസികളും വ്യാപാരികളും രംഗത്തെത്തിയിട്ടുള്ളത്. മൂന്നുവർഷംമുമ്പ് നിർമിച്ച റോഡാണ് ഇപ്പോൾ പൂർണമായും പൊളിച്ചുനീക്കി കട്ട വിരിക്കുന്നത്. ഇതിനെതിരേ പ്രദേശത്തെ ഓട്ടോ തൊഴിലാളികളും പ്രതിഷേധത്തിലാണ്. പാവപ്പെട്ടവരുടെ നികുതിപ്പണം നഗരസഭ ധൂർത്തടിക്കുകയാണന്നും ഓട്ടോഡ്രൈവർമാർ പറയുന്നു. റോഡ് പൊളിച്ചു തുടങ്ങിയതോടെ പ്രദേശത്തെ ഓട്ടോറിക്ഷ ഡ്രൈവർമാർക്കും വ്യാപാരികൾക്കും ദുരിതമാണ് നഗരസഭ അധികൃതർ ചെയ്യുന്നതെന്നും ഡ്രൈവർമാർ പറഞ്ഞു. എന്നാൽ, ബസ് സ്റ്റാൻഡ് പരിസര‌ത്തെ വെള്ളക്കെട്ട് ഒഴിവാക്കാ നാണു വ്യാപാരികളുമായി ചർച്ച നടത്തി തീരുമാനമെടുത്തതെന്ന് നഗരസഭ ചെയർമാൻ പി.എൻ. സുരേന്ദ്രൻ പറഞ്ഞു.

പുത്തൻപള്ളി ഹെൽത്ത്കെയർ സൊസൈറ്റി ഡയാലിസിസ് മെഷീൻ സമർപ്പിച്ചു

തൃശൂർ: അതിരൂപതയുടെ നേതൃത്വത്തിൽ പുത്തൻപള്ളി കേന്ദ്രീകരിച്ചുള്ള ഹെൽത്ത്കെയർ സൊ സൈറ്റി ജില്ലാ സഹകരണ ആശു പത്രിയിലേക്കു നൽകിയ ഡയാലിസിസ് മെഷീന്‍റെ സമർപ്പണം രമേശ് ചെന്നിത്തല എംഎൽഎ നിർവഹിച്ചു. ആർച്ച്ബിഷപ് മാർ ആൻഡ്രൂസ് താഴത്ത് അധ്യക്ഷത വഹിച്ചു. ഫാ. തോമസ് കാക്കശേരി അനുഗ്രഹപ്രഭാഷണവും ഹെൽത്ത് കെയർ സൊസൈറ്റി പ്രസിഡന്‍റ് ടി.കെ. അന്തോണിക്കുട്ടി, തൃശൂർ അർബൻ കോ-ഓപ്പറേറ്റീവ് ബാ ങ്ക് ചെയർമാൻ പോൾസൻ ആലപ്പാട്ട് എന്നിവർ പ്രസംഗിച്ചു. ആശുപത്രി പ്രസിഡന്‍റ് ടി.കെ. പൊറിഞ്ചു സ്വാഗതവും നെഫ്രോ ളജിസ്റ്റ് ഡോ. പി.ബി. വിനോദ് നന്ദിയും പറഞ്ഞു. ആശുപത്രി ഡയറക്ടർമാരായ ഇ. സത്യഭാമ, കെ. വർഗീസ് ജോണ്‍, കെ.എസ്. ജോണ്‍സണ്‍, എ.ആർ. രാമചന്ദ്രൻ, പി.എം. ശരത് കുമാർ, എം.ടി. മേരി, മെഡിക്കൽ സൂപ്രണ്ട് കെ. രാമദാസ്, സെക്രട്ടറി എം.എസ്. സന എന്നിവർ പങ്കെടുത്തു.

ജോസഫൈറ്റ്സ് സ്പോർട്സ് സോണ്‍ ഉദ്ഘാടനം

തൃശൂർ: മിഷൻ ക്വാർട്ടേഴ്സ് സെന്‍റ് ജോസഫ്സ് സിജിഎച്ച്എസ് സ്കൂളിന്‍റെ പുതിയ കളിസ്ഥലം ജോസഫൈറ്റ്സ് സ്പോർട്സ് സോണ്‍ ഉദ്ഘാടനം ഒളിന്പ്യൻ ലിജോ ഡേവിഡ് തോട്ടാനും സ് പോർട്സ് ദിനാഘോഷം കെ.ആർ. സാംബശിവനും നിർവഹിച്ചു. സിസ്റ്റർ നീലിമ, പി.സി. ആന്‍റണി, സിന്ദു ആന്‍റോ ചക്കോള, മദർ സുപ്പീരിയർ സിസ്റ്റർ സൂര്യ, സിസ്റ്റർ സ്മിത, ഹയർ സെക്കൻഡറി പ്രിൻസിപ്പൽ സിസ്റ്റർ ഡെന്ന, ഹൈസ്കൂൾ ഹെഡ്മിസ്ട്രസ് ബിന്ദു ജോസ്, മേഴ്സി ആന്‍റണി, ഇംഗ്ലീഷ് മീഡിയം സ്കൂൾ ഹെഡ്മിസ്ട്രസ് ഷീബ സൈമണ്‍, പിടിഎ പ്രസിഡന്‍റുമാരായ പോൾ പാറക്കൽ, ഗിൽസ്, പി.ജി. സുരേഷ് എന്നിവർ പങ്കെടുത്തു.

അന്തിക്കാട് പഞ്ചായത്ത് കുടുംബശ്രീ വാർഷികം നടത്തി

അന്തിക്കാട്: ഗ്രാമപഞ്ചായത്ത് കുടുംബശ്രീ സിഡിഎസ് വാർഷികാഘോഷം അന്തിക്കാട് സെലിബ്രേ ഷൻ ഹാളിൽ സിനി ആർട്ടിസ്റ്റ് സുനിൽ സുഖദ ഉദ്ഘാടനം ചെയ്തു. അന്തിക്കാട് ഗ്രാമപഞ്ചാ യത്ത് പ്രസിഡന്‍റ് ്‌ ജീനനന്ദൻ അ ധ്യക്ഷത വഹിച്ചു. അന്തിക്കാട് ബ്ലോക്ക് പ്രസിഡന്‍റ് കെ.കെ. ശശിധരൻ, ജില്ലാ പഞ്ചായത്ത് മെമ്പർ വി.എൻ. സുർജിത്ത്, കവിയത്രി സിന്ധു ഭദ്ര എന്നിവർ മുഖ്യാതിഥിയായി. അന്തിക്കാട് പഞ്ചായത്ത് വൈസ് പ്രസിഡന്‍റ് പി.എസ്. സുജിത്ത്, സ്റ്റാൻഡിംഗ് കമ്മിറ്റി ചെയർ പേഴ്സൺമാരായ മേനക മധു, ശരണ്യ രജീഷ്, മുൻ പഞ്ചായത്ത് പ്രസിഡന്‍റ്് ജ്യോതി രാമൻ, ആ സൂത്രണ സമിതി ഉപാധ്യക്ഷൻ ടി.ഐ. ചാക്കോ, കുടുംബശ്രീ ചെയർപേഴ്സൺ മണി ശശി, വൈസ് ചെയർ‌പേഴ്സൺ സുമൈറ ബഷീർ എന്നിവർ സംസാരിച്ചു. അരങ്ങ് കലോത്സവത്തിൽ കവിത രചനയിൽ ജില്ലാ‌തലത്തിൽ രണ്ടാംസ്ഥാനം നേടിയ ഷീജ ബാബുരാജിനെയും പാചക മത്സരത്തിൽ ഒന്നാം സ്ഥാനം നേടിയ കുടുംബശ്രീ അംഗത്തെയും ആദരിച്ചു.

കൊച്ചുപറക്കോട്ടുകാവിൽ നവരാത്രി ആഘോഷങ്ങൾക്കു ഞായറാഴ്ച തുടക്കം

തിരുവില്വാമല: കൊച്ചുപറക്കോട്ടുകാവിൽ നവരാത്രി ആഘോഷത്തോടനുബന്ധിച്ച് ശ്രീമദ് ദേവീ ഭാഗവത നവാഹയജ്ഞത്തിന് ഞായറാഴ്ച വൈകീട്ട് ആറിനു തിരിതെളിയും. മൊളേരി രഞ്ജിത്ത് നമ്പൂതിരിയാണ് മുഖ്യയജ്ഞാചാര്യൻ. യജ്ഞമണ്ഡപത്തിൽക്ഷേത്രം മേൽശാന്തി ശശികുമാർ മരുതേരി ഭദ്രദീപം തെളിയിക്കും. തുടർന്ന് ആചാര്യവരണം തുടർന്നുള്ള ദിവസങ്ങളിൽ രാവിലെ മുതൽ പാരായണവും പ്രഭാഷണങ്ങളും നടക്കും. ദിവസേന പ്രസാദ ഊട്ടും ഉണ്ടാകും. നവരാത്രി ആഘോഷങ്ങളുടെ ഭാഗമായി പറക്കോട്ടുകാവ് പടിഞ്ഞാറ്റുമുറി ദേശത്തിന്‍റെ ആഭി മുഖ്യത്തിൽ കൊച്ചുപറക്കോട്ടുകാവ് ഭഗവതി ഓഡിറ്റോറിയത്തിൽ കലാസന്ധ്യ 2025ന് തിങ്കളാഴ്ച തുടക്കമാകും. കേരള കലാമണ്ഡലം മുൻ വൈസ് ചാൻസലർ ഡോ. ടി.കെ. നാരായണൻ ഉദ്ഘാടനം ചെയ്യും. തുടർന്ന് കേരള കലാമണ്ഡലം അവതരിപ്പിക്കുന്ന എന്‍റെ കേരളം പരിപാടിയിൽ ഭരതനാട്യം, മോഹിനിയാട്ടം ,കുച്ചിപ്പുടി, കഥകളി, ഓട്ടൻതുള്ളൽ തുടങ്ങിയവ അരങ്ങേറും. തുടർന്നുള്ള ദിവസ ങ്ങളിൽ സന്ധ്യക്ക് വിവിധ കലാപരിപാടികളും ഉണ്ടാകുമെന്ന് ഭാരവാഹികളായ പി. രാംകുമാർ, കെ. ഗോപകുമാർ, എം. ഉണ്ണികൃഷ്ണൻ, കെ. ജയപ്രകാശ്കുമാർ, സി. ജയനാരായണൻ എന്നിവർ അറിയിച്ചു.

ധനലക്ഷ്മി ബാങ്ക് ഡിജിറ്റൽ സൊലൂഷൻ കൈമാറി

തൃശൂർ: ധനലക്ഷ്മി ബാങ്കിന്‍റെ ധനം ടെന്പിൾ സൊലൂഷൻസ് ക്ഷേത്രങ്ങൾക്കായി നൽകുന്ന സന്പൂർണ ഡിജിറ്റൽ സൊലൂഷൻ വിയ്യൂർ മണലാറുകാവ് ക്ഷേത്രത്തിനു കൈമാറി. അർപ്പണ്‍ ഓണ്‍ലൈനുമായി സഹകരിച്ചാണ് പദ്ധതി നടപ്പാക്കുന്നത്. ക്ഷേത്രങ്ങളിലെ പണമിടപാടുകൾ ഉൾപ്പെടെ ഡിജിറ്റൽവത്കരിക്കുക എന്ന ഉദ്ദേശ്യത്തോടെ നൽകുന്ന സേവനമാണിത്. ഭക്തർക്കു വഴിപാടുകൾ സംബന്ധിച്ച വിവരങ്ങളും തുകയും ഭക്തരുടെ വിവരങ്ങളും മറ്റും കൃത്യമായി മെഷീനിൽ രേഖപ്പെടുത്തി ഓണ്‍ലൈനായി പണമടച്ച് രസീത് കൈപ്പറ്റാൻ സാധിക്കും. എല്ലാ യുപിഐ പണമിടപാടുകളും ഡെബിറ്റ്, ക്രെഡിറ്റ് കാർഡുകളും സൗകര്യപ്രദമായ രീതിയിൽ ഉപയോഗിക്കാനും ക്യൂആർ കോഡ് സ്കാൻ ചെയ്തു പണമടയ്ക്കാനും സാധിക്കും. ഭക്തർക്കു സ്വയം ഇടപാടുകൾ നടത്താൻ കഴിയുന്ന കിയോസ്കും ലഭ്യമാണ്. ധനലക്ഷ്മി ബാങ്ക് ത്യശൂർ റീജണൽ ഹെഡ് എം.പി. ശ്രീകുമാർ ഇപോസ് മെഷീൻ ക്ഷേത്രം ദേവസ്വം സെക്രട്ടറി കൃഷ്ണകിഷോറിനു കൈമാറി തുടക്കംകുറിച്ചു. ധനലക്ഷ്മി ബാങ്ക് ഡെപ്യൂട്ടി ജനറൽ മാനേജർ പി.എച്ച്. ബിജുകുമാർ, കുറിച്ചിക്കര ബ്രാഞ്ച് ഹെഡ് സൗമ്യ ഗോപിനാഥ്, ഡിജിറ്റൽ സെക്‌ഷൻ മാനേജർ വി. രതീഷ് എന്നിവരും സന്നിഹിതരായിരുന്നു. അർപ്പണ്‍ ഓണ്‍ലൈനിനുവേണ്ടി ഹരി, ശ്രീറാം, കിരണ്‍, ജേക്കബ്, പൈൻലാബ്സ് സർവീസിംഗ് പ്രൊവൈഡർ എം.പി. അജയ് എന്നിവരും മണലാറുകാവ് ദേവിക്ഷേത്രത്തിനുവേണ്ടി പ്രസിഡന്‍റ് പി.എൻ. രാമൻകുട്ടി, ട്രഷറർ പി.വി. രാമചന്ദ്രൻ, കൃഷ്ണണൻകുട്ടി എന്നിവരും പങ്കെടുത്തു.

വയോധികന്‍റെ നിവേദനം കൈപ്പറ്റാതിരുന്നത് കൈപ്പിഴ: സുരേഷ് ഗോപി

കൊടുങ്ങല്ലൂർ: കഴിഞ്ഞദിവസം വയോധികന്‍റെ നിവേദനം കൈപ്പറ്റാതിരുന്നതു കൈപ്പിഴയാണെന്നും അത് ഉയർത്തിക്കാട്ടി കൂടുതൽ വിവാദമുണ്ടാക്കാനാണു ചിലർ ശ്രമിക്കുന്നതെന്നും കേന്ദ്ര സഹമന്ത്രി സുരേഷ് ഗോപി. ശൃംഗപുരം എൽതുരുത്തിൽ നടന്ന കലുങ്ക് വികസന സംവാദസദസിലാണ് സുരേഷ് ഗോപി മറുപടി നൽകിയത്. കൂടുതൽ വേലായുധൻമാരെ തനിക്കു കാണിച്ചുതരാൻ സാധിക്കുമെന്നും വീടില്ലാത്തവരുടെ പട്ടിക ഉടൻ പുറത്തുവിടുമെന്നും സുരേഷ് ഗോപി വ്യക്തമാക്കി. ‘വേലായുധൻ ചേട്ടനു വീട് കിട്ടിയതിൽ സന്തോഷം. ഇനിയും ഞാൻ വേലായുധൻ ചേട്ടൻമാരെ അങ്ങോട്ട് അയക്കും. പാർട്ടി തയാറെടുത്ത് ഇരുന്നോളൂ. ഒരു ലിസ്റ്റ് പുറത്തുവിടും. 14 ജില്ലയിലേക്കും പോകും’- സുരേഷ് ഗോപി പറഞ്ഞു. കൊടുങ്ങല്ലൂർ ബൈപാസിലെ സിഐ ഓഫീസ് ജംഗ്ഷനിൽ അടിപ്പാത വരില്ലെന്നും കേന്ദ്രമന്ത്രി വ്യക്തമാക്കി. ബിജെപി ജില്ലാ പ്രസിഡന്‍റ് എ.ആർ. ശ്രീകുമാർ, മണ്ഡലം പ്രസിഡന്‍റ് ഇ.ആർ. ജിതേഷ്, കൗണ്‍സിലർമാർ, പാർട്ടി നേതാക്കൾ തുടങ്ങിയവർ പങ്കെടുത്തു.

മുക്കുപണ്ടം പണയംവച്ച് അഞ്ചരലക്ഷം തട്ടി; ദന്പതികളടക്കം ആറുപേർ അറസ്റ്റിൽ

പുന്നയൂർക്കുളം: അകലാട് മൂന്നയിനിയിലെ സ്വകാര്യ പണമിടപാട് സ്ഥാപനത്തിൽ മുക്കുപണ്ടം പണയപ്പെടുത്തി അഞ്ചരലക്ഷം രൂപ തട്ടിയെടുത്ത സംഭവത്തിൽ ദന്പതികൾ ഉൾപ്പെടെ ആറുപേർ റിമാൻഡിൽ. പുന്നയൂർ അകലാട് താഴത്ത് ഹംസക്കുട്ടി(42), ഭാര്യ ഷജീന(36), അകലാട് മുള്ളത്ത് കബീർ (43), രാമി മുഹമ്മദ് ഹനീഫ(39), ചെറുനന്പി ഇർഫാദ്(32), ചാലിൽ അഫ്സൽ(35) എന്നിവരെയാണ് വടക്കേക്കാട് എസ്എച്ച്ഒ എം.കെ. രമേഷിന്‍റെ നേതൃത്വത്തിൽ അറസ്റ്റ് ചെയ്തത്. മുഖ്യപ്രതി മൂന്നയിനി ചാലിൽ ഇഷാഖ് ഒളിവിലാണ്. ജൂലൈ നാലു മുതൽ ഓഗസ്റ്റ് 13 വരെയുള്ള ദിവസങ്ങളിലായി പ്രതികൾ മാറിമാറി മുക്കുവളകൾ പണയം നൽകി 5,58,700 രൂപ തട്ടിയെടുക്കുകയായിരുന്നു. ഒളിവിലുള്ള ഇഷാഖാണു മുക്കുവളകൾ പ്രതികൾക്കു നൽകിയത്. ഇവര്‍ നേരത്തെ സ്വർണം പണയംവച്ചതിനാൽ സ്ഥാപന ജീവനക്കാർക്ക് ഇടപാടിൽ സംശയം തോന്നിയില്ല. 916 ഹാൾമാർക്ക് രേഖപ്പെടുത്തിയതായിരുന്നു വളകൾ. ഒടുവിൽ ഹംസക്കുട്ടി പണയംവയ്ക്കാൻ വള നൽകിയപ്പോൾ സംശയംതോന്നി പരിശോധിച്ചപ്പോഴാണ് ആറംഗസംഘം പലപ്പോഴായി പണയപ്പെടുത്തിയതു മുക്കുപണ്ടമാണെന്ന് അറിഞ്ഞത്. ഇവർ മറ്റു ധനകാര്യസ്ഥാപനങ്ങളിൽ തട്ടിപ്പ് നടത്തിയിട്ടുണ്ടോയെന്ന് പോലീസ് അന്വേഷിക്കുന്നുണ്ട്. എസ്ഐമാരായ പി.പി. ബാബു, പി.എ. സുധീർ, സി. ബിന്ദുരാജ്, സി.എൻ. ഗോപിനാഥൻ, എഎസ്ഐ ടി.കെ. ഷാജു, രജനീഷ്, രോഷ്നി എന്നിവരും പ്രതികളെ പിടികൂടിയ സംഘത്തിൽ ഉണ്ടായിരുന്നു.

‘എന്‍റെ നെഞ്ചത്തോട്ട് കയറിക്കോ’; വീണ്ടും വിവാദത്തിൽ സുരേഷ്ഗോപി

ഇരിങ്ങാലക്കുട: കേന്ദ്രമന്ത്രി സുരേഷ് ഗോപിയുടെ കലുങ്ക് സൗഹൃദസദസിൽ വീണ്ടും വിവാദം. ഇന്നലെ രാവിലെ ഇരിങ്ങാലക്കുട പൊറത്തിശേരി കണ്ടാരംതറയിൽ നടന്ന കലുങ്ക് സൗഹൃദസഭയിലാണു സംഭവം. കരുവന്നൂർ ബാങ്കിലെ നിക്ഷേപം തിരികെയെടുക്കാൻ സഹായിക്കാമോ എന്ന അപേക്ഷയുമായി എത്തിയതായിരുന്നു വൃദ്ധ. മുഖ്യമന്ത്രിയെ സമീപിക്കൂ എന്നു സുരേഷ് ഗോപി അതിനു മറുപടി നൽകി. മുഖ്യമന്ത്രിയെ തിരക്കിപ്പോകാൻ തനിക്കു പറ്റുമോയെന്നു വൃദ്ധ ചോദിച്ചപ്പോൾ ‘എന്‍റെ നെഞ്ചത്തോട്ട് കയറിക്കോ’ എന്നു സുരേഷ് ഗോപി പരിഹാസത്തോടെ മറുപടിനൽകി. നിങ്ങളുടെ മന്ത്രി ഇവിടെയല്ലേ താമസിക്കുന്നത് എന്നും കേന്ദ്രമന്ത്രി ചോദിച്ചു. സുരേഷ്ഗോപിയുടെ പരിഹാസവാക്കുകൾകേട്ട് ഒപ്പമുണ്ടായിരുന്നവർ പൊട്ടിച്ചിരിച്ചു. തുടർന്ന് ‘ഞങ്ങളുടെ മന്ത്രിയല്ലേ സർ നിങ്ങൾ’ എന്നു വൃദ്ധ ചോദിച്ചപ്പോൾ "അല്ല. ഞാൻ ഈ രാജ്യത്തിന്‍റെ മന്ത്രിയാണെ'ന്നായിരുന്നു മറുപടി. ‘കരുവന്നൂർ ബാങ്കിൽനിന്ന് ഇഡി പിടിച്ചെടുത്ത പണം തിരികെത്തരാൻ മുഖ്യമന്ത്രി തയാറുണ്ടോ?. ഇഡി പിടിച്ചെടുത്ത പണം തിരിച്ചു ബാങ്കിലിട്ട് നിങ്ങൾക്കു തരാനുള്ള സംവിധാനമൊരുക്കാൻ തയാറുണ്ടെങ്കിൽ, ആ പണം സ്വീകരിക്കാൻ നിങ്ങളുടെ മുഖ്യമന്ത്രിയോടു പറയൂ’ -സുരേഷ് ഗോപി പറഞ്ഞു. കൊച്ചുവേലായുധനു വീടുപണിയാൻ ഇറങ്ങിയവർ കരുവന്നൂരിൽ പണം കൊടുക്കാൻ കൗണ്ടർ തുടങ്ങട്ടെയെന്നും സുരേഷ് ഗോപി പരിഹ സിച്ചു.

പൂരനഗരിയിൽ ലഹരിക്കെതിരേ പടപ്പുറപ്പാട്

തൃശൂർ: "പൊരുതാം നമുക്ക് ലഹരിക്കെതിരേ' എന്ന ആഹ്വാനവുമായി രമേശ് ചെന്നിത്തല നയിക്കുന്ന വാക്ക് എഗെയ്ൻസ്റ്റ് ഡ്രഗ്സ് കാന്പയിൻ തൃശൂരിൽ ആവേശമായി. തൃശൂരിന്‍റെ രാഷ്ട്രീയ-സാമൂഹ്യ-കായിക രംഗങ്ങളിൽനിന്നുള്ള പ്രമുഖരടക്കം നൂറുകണക്കിനാളുകളാണ് ചെന്നിത്തലയ്ക്കൊപ്പം അണിനിരന്നത്. പ്രൗഡ് കേരളയുടെ നേതൃത്വത്തിൽ രമേശ് ചെന്നിത്തല നയിച്ച വാക്ക് എഗെയ്ൻസ്റ്റ് ഡ്രഗ്സ് ‘ലഹരിക്കെതിരേ സമൂഹനടത്തം’ തൃശൂരിന്‍റെ മണ്ണിൽ പ്രതിരോധത്തിന്‍റെ പടപ്പുറപ്പാടായി. തൃശൂർ മണികണ്ഠനാൽ പരിസരത്തുനിന്നാരംഭിച്ച നടത്തം കെ. മുരളീധരൻ ഫ്ലാഗ് ഓഫ് ചെയ്തു. ലഹരി സമൂഹത്തെ തകർക്കുന്ന കാൻസറാണെന്നും സമൂഹത്തിൽ മുന്പെങ്ങും കേട്ടിട്ടില്ലാത്ത തരത്തിൽ കുറ്റകൃത്യങ്ങൾ വർധിക്കുന്നതു ലഹരി കാരണമാണെന്നും മുരളീധരൻ പറഞ്ഞു. ഇതിനെതിരേ നടപടിയെടുക്കുന്നതിൽ സർക്കാർ പരാജയപ്പെട്ടെന്നും അദ്ദേഹം കൂട്ടിച്ചേർത്തു. കൂട്ടനടത്തം നഗരംചുറ്റി തെക്കേഗോപുരനടയിൽ സമാപിച്ചു. ലഹരിക്കെതിരേ പ്രതിരോധം വീടുകളിൽനിന്നുതന്നെ തുടങ്ങേണ്ടതുണ്ടെന്നു രമേശ് ചെന്നിത്തല പറഞ്ഞു. നിലവിലെ സംവിധാനങ്ങൾ പരാജയപ്പെടുകയാണ്. ഓരോ വീടും സുരക്ഷിതമല്ലാതായിക്കൊണ്ടിരിക്കുന്നു. ഈ ശൃംഖലയുടെ വേരറുക്കേണ്ടതുണ്ട്. അതിനായി ജനങ്ങൾ ഒരുമിക്കണം: ചെന്നിത്തല പറഞ്ഞു. തെക്കേഗോപുരനടയിൽ ജാഥാംഗങ്ങൾക്കു ലഹരിവിരുദ്ധപ്രതിജ്ഞ ചൊല്ലിക്കൊടുത്തു. പ്രൗഡ് കേരള ചെയർമാൻ മലയിൻകീഴ് വേണുഗോപാൽ അധ്യക്ഷനായിരുന്നു. ജില്ലയുടെ വിവിധ ഭാഗങ്ങളിൽനിന്നുള്ള സ്ത്രീകളും കുട്ടികളുമടങ്ങുന്നവർ കൂട്ടനടത്തത്തിൽ പങ്കാളികളായി. തൃശൂർ ഡിസിസി പ്രസിഡന്‍റ് ജോസഫ് ടാജറ്റ്, ഫുട്ബോളർ ഐ.എം. വിജയൻ, മുൻ എംഎൽഎ തോമസ് ഉണ്ണിയാടൻ, മുൻ ഡിസിസി പ്രസിഡന്‍റ് ജോസ് വള്ളൂർ, കെപിസിസി സെക്രട്ടറി ഷാജി കോടങ്കണ്ടത്ത്, എം.പി. വിൻസന്‍റ്, സുന്ദരൻ കുന്നത്തുള്ളി, സുനിൽ അന്തിക്കാട്, റവ.ഡോ. പോൾ പൂവത്തിങ്കൽ, യൂത്ത് കോണ്‍ഗ്രസ് ജനറൽ സെക്രട്ടറി മിഥുൻ മോഹൻ, ടി.എൻ. പ്രതാപൻ, റവ.ഡോ. ദേവസി പന്തല്ലൂക്കാരൻ, സി.വി. കുര്യാക്കോസ്, കിഴക്കൂട്ട് അനിയൻമാരാർ, ജോസഫ് ചാലിശേരി, അബൂബക്കർ ഫൈസി, ഫാ. എഡ്വിൻ കുറ്റിക്കൽ, നിൽ അക്കര, എ. പ്രസാദ്, ടി.വി. ചന്ദ്രമോഹൻ, എ.സേതുമാധവൻ, സി.എ. മുഹമ്മദ് റഷീദ്, പി.എം. അമീർ, എം.പി. ജാക്സണ്‍, എം.കെ. അബ്ദുൾ സലാം, രാജേന്ദ്രൻ അരങ്ങത്ത്, സി.സി. ശ്രീകുമാർ, ഐ.പി. പോൾ, സി.എ. ഗോപപ്രതാപൻ, രാജൻ പല്ലൻ, ടി.കെ. പൊറിഞ്ചു, എൻ.ആർ. സതീശൻ, കെ.എൻ. നാരായണൻ, എൻ.പി. രാമചന്ദ്രൻ തുടങ്ങി നിരവധിപേർ അണിനിരന്നു.

നാടിന്‍റെ ആത്മീയപ്രകാശം: കോൺഗ്രസ്

തൃശൂർ: ആർച്ച്ബിഷപ് എമരിറ്റസ് മാർ ജേക്കബ് തൂങ്കുഴിയുടെ നിര്യാണത്തിൽ തൃശൂർ ജില്ലാ കോണ്‍ഗ്രസ് കമ്മിറ്റി അനുശോചിച്ചു. 1997ൽ തൃശൂരിലെത്തിയ കാലംമുതൽ നാടിന്‍റെ ആത്മീയപ്രകാശമായിരുന്നു അദ്ദേഹം. ദൈവികത തുളുന്പുന്ന വാക്കുകൾ സമൂഹത്തിനു പ്രതിബന്ധങ്ങളെ അതിജീവിക്കാനുള്ള കരുത്തായിരുന്നെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ് പറഞ്ഞു. സഭയ്ക്കും സമൂഹത്തിനുംവേണ്ടി ജീവിച്ച പിതാവ്: കെ. രാധാകൃഷ്ണൻ എംപി തൃശൂർ: സഭയ്ക്കും സമൂഹത്തിനുംവേണ്ടിയാണ് മാർ ജേക്കബ് തൂങ്കുഴി ഇക്കാലം മുഴുവൻ ജീവിച്ചതെന്നും എല്ലാവരോടും സൗമ്യതയോടെയും വാത്സല്യത്തോടെയും ഉള്ള പെരുമാറ്റമായിരുന്നു പിതാവിന്‍റേതെന്നും കെ. രാധാകൃഷ്ണൻ എംപി അനുശോചനസന്ദേശത്തിൽ പറഞ്ഞു. 52 വർഷത്തോളം മെത്രാനായി പിതാവ് സേവനം അനുഷ്ഠിച്ചു. 1997 മുതൽ തൃശൂർ അതിരൂപതയുടെ മെത്രാപ്പോലീത്ത ആയിരുന്ന കാലയളവിൽ ജില്ലയിൽ സാമൂഹ്യരംഗത്തും സാംസ്കാരികരംഗത്തും പിതാവ് നിറഞ്ഞുനിന്നു. ചേലക്കര നിയോജകമണ്ഡലത്തിൽ ജനപ്രതിനിധിയായിരുന്ന കാലഘട്ടത്തിലാണ് പിതാവ് മുൻകൈ എടുത്ത് ചെറുതുരുത്തിയിലെ ജ്യോതി എൻജിനീയറിംഗ് കോളജ്, മുള്ളൂർക്കരയിലെ മഹാജൂബിലി ട്രെയിനിംഗ് കോളജ് എന്നിവ ആരംഭിച്ചതെന്നും എംപി അനുസ്മരിച്ചു. സൗമ്യവും ദീപ്തവുമായ വ്യക്തിത്വം: സിപിഎം തൃശൂർ: ദീപ്തവും സൗമ്യവുമായ വ്യക്തിത്വത്തിന് ഉടമയായിരുന്നു മാർ ജേക്കബ് തൂങ്കുഴിയെന്നു സിപിഎം തൃശൂർ ജില്ലാ സെക്രട്ടറി കെ.വി. അബ്ദുൾ ഖാദർ. ആർക്കും ഏതുസമയത്തും സമീപിക്കാവുന്ന സഭാനേതാവായിരുന്നു അദ്ദേഹം. വിശുദ്ധിയാർന്ന ജീവിതമൂല്യങ്ങൾ അവസാനശ്വാസംവരെ ഉയർത്തിപ്പിടിച്ചു. ഐശ്വര്യപൂർണമായ സാമൂഹികജീവിതത്തിനുവേണ്ടി ഗാഢമായി പ്രവർത്തിച്ച പാവങ്ങളുടെ നല്ലയിടയന്‍റെ വിയോഗത്തിൽ അഗാധമായ ദുഃഖം രേഖപ്പെടുത്തുന്നെന്നും അദ്ദേഹം പറഞ്ഞു. സാമൂഹ്യനീതിക്കായി നിലകൊണ്ട ശ്രേഷ്ഠജീവിതം: സിപിഐ തൃശൂർ: ക്രൈസ്തവമൂല്യങ്ങൾ ഉയർത്തിപ്പിടിച്ചു സാമൂഹികനീതിക്കും മനുഷ്യപുരോഗതിക്കുംവേണ്ടി നിലകൊണ്ട മനുഷ്യസ്നേഹിയായിരുന്നു മാർ ജേക്കബ് തുങ്കുഴിയെന്നു സിപിഐ ജില്ലാ സെക്രട്ടറി കെ.ജി. ശിവാനന്ദൻ. കുടിയേറ്റ കർഷകകുടുംബത്തിൽ ജനിച്ച അദ്ദേഹം എക്കാലത്തും തൊഴിലാളികൾക്കും കർഷകർക്കുംവേണ്ടി നിലകൊണ്ടു. സാധാരണക്കാരിൽ സാധാരണക്കാരായ മനുഷ്യർക്കൊപ്പമാണ് താനെന്ന് എപ്പോഴും സ്വജീവിതത്തിലൂടെ സാക്ഷ്യപ്പെടുത്തി. മതങ്ങൾക്കതീതമായ മനുഷ്യസ്നേഹം ഉയർത്തിപ്പിടിച്ച മാർ തൂങ്കുഴിയുടെ വിയോഗത്തിൽ അനുശോചനം രേഖപ്പെടുത്തുന്നു. നാടിന്‍റെ ആദരം പിടിച്ചുപറ്റിയ വ്യക്തിത്വം: തേറന്പിൽ തൃശൂർ: പാവങ്ങളുടെ പിതാവായ കുണ്ടുകുളം തിരുമേനിയുടെ പിൻഗാമിയായി തൃശൂരിലെത്തിയ മാർ ജേക്കബ് തൂങ്കുഴി നാടിന്‍റെ മുഴുവൻ ആദരവും പിടിച്ചുപറ്റിയ വ്യക്തിത്വമായിരുന്നെന്നു മുൻ നിയമസഭാ സ്പീക്കർ തേറന്പിൽ രാമകൃഷ്ണൻ. സൗമ്യമായ പെരുമാറ്റവും ലളിതമായ സംഭാഷണശൈലിയും സർവരെയും ആകർഷിച്ചു. ആതുരശുശ്രൂഷാരംഗത്തും വിദ്യാഭ്യാസരംഗത്തും അദ്ദേഹം നൽകിയ സേവനങ്ങൾ മറക്കാനാകില്ല. ജനപ്രതിനിധിയെന്ന നിലയിൽ എനിക്കു നൽകിയ സ്നേഹവാത്സല്യങ്ങൾ മറക്കാനാകില്ല. സാത്വികനായ പുണ്യാത്മാവിന്‍റെ സ്മരണയ്ക്കുമുന്നിൽ പ്രണമിക്കുന്നു. സംസ്‌കൃതത്തെ സ്‌നേഹിച്ച മാർ തൂങ്കുഴി: തോമസ് പാവറട്ടി തൃശൂര്‍: സംസ്‌കൃതഭാഷയെ വളരെയധികം സ്‌നേഹിച്ച ബിഷപ്പായിരുന്നു മാർ തൂങ്കുഴിയെന്നു ടോംയാസ് ഉടമ തോമസ് പാവറട്ടി അനുശോചിച്ചു. തൃശൂരിൽ ആര്‍ച്ച്ബിഷപ്പായി ചാര്‍ജെടുത്ത അദ്ദേഹത്തിന്‍റെ ആദ്യത്തെ പൊതുചടങ്ങ് ടോംയാസ് സംഘടിപ്പിച്ച പി.ടി. കുരിയാക്കോസിന്‍റെ 25-ാം ചരമ വാര്‍ഷികാചരണമായിരുന്നു. വൈദികവിദ്യാര്‍ഥിയായിരിക്കുമ്പോള്‍ സംസ്‌കൃതം പഠിച്ചിട്ടുള്ള വൈദികശ്രേഷ്ഠന്‍ അന്ന് സംസ്‌കൃതശ്ലോകങ്ങള്‍ ചൊല്ലിയെന്നും തോമസ് പാവറട്ടി അനുസ്മരിച്ചു.

സ്‌കൂളില്‍ ടോയ്‌ലറ്റ് സമുച്ചയം ഉദ്ഘാടനം

അവിട്ടത്തൂര്‍: എല്‍ബിഎസ്എം ഹയര്‍സെക്കന്‍ഡറി സ്‌കൂളില്‍ ജില്ലാപഞ്ചായത്ത് പണിതീര്‍ത്ത പെണ്‍കുട്ടികള്‍ക്കായിട്ടുള്ള ടോയ്‌ലറ്റ് സമുച്ചയം ജില്ലാപഞ്ചായത്ത് വൈസ് പ്രസിഡന്‍റ് ലത ചന്ദ്രന്‍ ഉദ്ഘാടനംചെയ്തു. വേളൂക്കര പഞ്ചായത്ത് പ്രസിഡന്‍റ് കെ.എസ്. ധനീഷ് അധ്യക്ഷതവഹിച്ചു. ബ്ലോക്ക് മെമ്പര്‍ വിജയലക്ഷ്മി വിനയചന്ദന്‍, വാര്‍ഡ് മെമ്പര്‍ ലീന ഉണ്ണികൃഷ്ണന്‍, പിടിഎ പ്രസിഡന്‍റ് ജോസഫ് അക്കരക്കാരന്‍, മാനേജ്‌മെന്‍റ് കമ്മിറ്റി അംഗങ്ങളായ എ.സി. സുരേഷ്, കെ.കെ. കൃഷ്ണന്‍നമ്പൂതിരി, ഹെഡ്മാസ്റ്റര്‍ മെജോ പോള്‍, ദീപ സുകുമാരന്‍, എന്‍.എസ്. രജനിശ്രീ, സി. രാജലക്ഷ്മി, പി.ജി. ഉല്ലാസ് എന്നിവര്‍ പ്രസംഗിച്ചു.

എടത്തിരുത്തി ഗ്രാമപഞ്ചായത്ത് കേരളോത്സവത്തിനു തുടക്കം

പൈനൂർ: എടത്തിരുത്തി ഗ്രാമപഞ്ചായത്ത് കേരളോത്സവത്തിന് തുടക്കമായി. പൈനൂർ മണപ്പുറം അക്വാട്ടിക് കോംപ്ലക്സിൽനടന്ന നീന്തൽ, ഷട്ടിൽ മത്സരങ്ങളോടെയാണ് കേരളോത്സവം ആരംഭിച്ചത്. പഞ്ചായത്ത് പ്രസിഡന്‍റ് ടി.കെ. ചന്ദ്രബാബു ഉദ്ഘാടനം ചെയ്തു. വൈസ് പ്രസിഡന്‍റ് ഷൈലജ രവീന്ദ്രൻ അധ്യക്ഷതവഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർമാൻ പി.ആർ. നിഖിൽ, പഞ്ചായത്തംഗങ്ങളായ പി.എച്ച്. ബാബു, പി.എ. ഷെമീർ, പഞ്ചായത്ത് സെക്രട്ടറി കെ.വി. സനീഷ്, കോ - ഓർഡിനേറ്റർ ഇ.എസ്. സിനീഷ്, വി.ആർ. വിപിൻ തുടങ്ങിയവർ പ്രസംഗിച്ചു. ഇന്നലെ വൈകീട്ട് എടത്തിരുത്തി പഞ്ചായത്തോഫീസ് പരിസരത്തുനിന്ന് വിളംബര ഘോഷയാത്രയും ഉണ്ടായിരുന്നു.

ഫണ്ടില്ല; കൊരട്ടി ഇറിഗേഷൻ കെട്ടിടത്തിന്‍റെ ഉദ്ഘാടനം ഇനിയുമകലെ

കൊരട്ടി: ഇറിഗേഷൻ കെട്ടിടത്തിന്‍റെ നിർമാണം പൂർത്തിയാക്കാൻ ഫണ്ടിനായുള്ള കാത്തിരിപ്പ് നീളുന്ന സാഹചര്യത്തിൽ ചോർന്നൊലിക്കുന്ന കെട്ടിടത്തിൽനിന്നു ഓഫീസ് പ്രവർത്തനംമാത്രം പണിപൂർത്തിയാകാത്ത കെട്ടിടത്തിലേക്ക് മാറ്റാൻ നീക്കം. ദേശീയപാതയോരത്ത് ചിറങ്ങര സിഗ്നൽ ജംഗ്ഷനിൽ പാതിവഴിയിൽ നിർമാണം നിലച്ച ഇറിഗേഷൻ കെട്ടിടത്തിലേയ്ക്കാണ് ഉദ്ഘാടനത്തിന് കാത്തുനിൽക്കാതെ ഓഫീസ് മാറ്റാൻ നീക്കംനടക്കുന്നത്. മൂന്നുവർഷത്തിലേറെയായി പുതിയ കെട്ടിടത്തിന്‍റെ നിർമാണംനിലച്ചിട്ട്. വെെദ്യുതീകരണവുമായി ബന്ധപ്പെട്ട ചില കാര്യങ്ങളും അവസാനഘട്ടത്തിലെ നിർമാണങ്ങളുമാണ് ഇനി അവശേഷിക്കുന്നത്. ഇറിഗേഷൻ കെട്ടിടം കാടുകയറി അങ്കണവും പരിസരവും ഇഴജന്തുക്കളുടെ വിഹാരകേന്ദ്രമായി മാറിയതിനെ തുടർന്ന് നാട്ടുകാരും പ്രതിഷേധസ്വരമുയർത്തിയതോടെയാണ് ഓഫീസ് മാറ്റാൻ തീരുമാനിച്ചത്. കൊരട്ടി, കാടുകുറ്റി, മേലൂർ, കറുകുറ്റി, പാറക്കടവ് പഞ്ചായത്തുകൾ ഉൾപ്പെടുന്ന ചിറങ്ങരയിലെ ഇറിഗേഷൻ കാര്യാലയം ജീർണതയുടെ പാരമ്യതയിലെത്തിയതിനെ തുടർന്നാണ് പുതിയ കെട്ടിടം നിർമിക്കാൻ അധികൃതർ തയാറായത്. ഇടതുകര കനാലുകൾക്കുള്ള ഇറിഗേഷൻ ഓഫീസ് എന്നതിലുപരി അഞ്ചു പഞ്ചായത്തുകളിലെ കൃഷിയിടങ്ങളിലേക്കുള്ള ജലസേചനവും അതുവഴി കുടിവെള്ള സമൃദ്ധിയും ഉറപ്പുവരുത്തുവാൻ കാര്യക്ഷമമായി പ്രവർത്തിക്കാനുള്ള ഒരിടം എന്നതിനാൽ അധികൃതരും പൊതുസമൂഹവും ഏറെ പ്രതിക്ഷയോടെയാണ് പുതിയ കെട്ടിടത്തെ നോക്കികണ്ടത്. കെട്ടിടത്തിന്‍റെ നിർമാണം ചിറങ്ങര ജംഗ്ഷനിൽ ആയതിനാൽ താഴെയുള്ള നിലയിൽ വാണിജ്യ സമുച്ചയവും ഓഫീസുകളും ഒന്നാംനിലയിൽ മീറ്റിംഗ് ഹാളുമാണ് ഉൾപ്പെടുത്തിയിരുന്നത്. അരക്കോടിയോളംരൂപ വിനിയോഗിച്ചായിരുന്നു നിർമാണം. ഫണ്ടിനായി മേൽത്തട്ടിൽ ബന്ധപ്പെടുന്നുണ്ടെങ്കിലും വൈകുകയാണ്. പാതിവഴിയിൽ നിർമാണംനിലച്ച്, പരിപാലനമില്ലാതെ കിടക്കുന്ന കെട്ടിടത്തിന്‍റെ നിർമാണം അടിയന്തരമായി പൂർത്തിയാക്കാൻ അധികൃതർ തയാറാകണമെന്നാണ് നാട്ടുകാരുടെ ആവശ്യം.

ദേശീയപാത വികസനം: നിർമാണ പ്രവൃത്തികൾ വിലയിരുത്താൻ ഉദ്യോഗസ്ഥരെത്തി

കൊരട്ടി: ദേശീയപാത വികസനത്തിന്‍റെ ഭാഗമായി നിർമാണംനടക്കുന്ന ചിറങ്ങരയിലും മുരിങ്ങൂരിലും നാറ്റ്പാക്കിന്‍റെ നേതൃത്വത്തിൽ ഉദ്യോഗസ്ഥരെത്തി. ജില്ലാ കളക്ടറുടെ നിർദേശപ്രകാരമാണ് ഗവേഷണ, പരിശോധനാസ്ഥാപനമായ നാറ്റ്പാക് ചിറങ്ങര, മുരിങ്ങൂർ, പേരാമ്പ്ര, ആമ്പല്ലൂർ ഭാഗങ്ങളിൽ നടക്കുന്ന നിർമാണപ്രവൃത്തികൾ വിലയിരുത്താനും റിപ്പോർട്ട് തയാറാക്കാനുമെത്തിയത്. നാറ്റ്പാക് പ്രിൻസിപ്പൽ സയന്‍റിസ്റ്റ് സൻജയ്, സെൻട്രൽ പിഡബ്ല്യുഡി സൂപ്രണ്ടിംഗ് എൻജിനീയർ സജീവ് എന്നിവരുടെ നേതൃത്വത്തിലാണ് ഉദ്യോഗസ്ഥരെത്തിയത്. ഡിവൈഎസ്പിമാരായ പി.വി. ബിജുകുമാർ, പി.കെ. സന്തോഷ്കുമാർ, കൊരട്ടി സിഐ അമൃത് രംഗൻ, മോട്ടോർ വെഹിക്കിൾ ഇൻസ്പെക്ടർ അശോക്‌കുമാർ, നാഷണൽ ഹൈവേ അഥോറിറ്റി പ്രോജക്ട് ഡയറക്ടർ അൻസിൽ ഹസൻ, നിർമാണ കമ്പനി പ്രോജക്ട് മാനേജർ എന്നിവരും ഒപ്പമുണ്ടായിരുന്നു. യാതൊരു സുരക്ഷാ മുന്നൊരുക്കവുമില്ലാതെയുള്ള നിർമാണ പ്രവൃത്തികളാണ് മേഖലയിൽ നടക്കുന്നതെന്നും ഇത് അപകടത്തിന് വഴിവയ്ക്കുമെന്നും നാട്ടുകാർ പറഞ്ഞു. ചിറങ്ങരയിൽ കാനയ്ക്ക് മുകളിലിട്ടിരുന്ന സ്ലാബുകൾ തകർന്നിട്ട് പുന:സ്ഥാപിക്കേണ്ടതിനുപകരം മുകളിൽ കോൺക്രീറ്റിട്ട് മറച്ചതായും നാട്ടുകാർ ചൂണ്ടിക്കാട്ടി. മണ്ണുനീക്കം ചെയ്യാതെയുമുള്ള കാന നിർമാണത്തിന്‍റെ വിചിത്ര കാഴ്ചകളും ജനം ശ്രദ്ധയിൽപ്പെടുത്തി. പെരുമ്പിയിലെ അപകടകരമായ വളവും പെരുമ്പിയിലും പാെങ്ങത്തും ദേശീയപാതയിൽ ടാർ ഉരുണ്ടുകൂടിനിൽക്കുന്ന പ്രതലവും ഒട്ടേറെ അപകടങ്ങൾക്ക് കാരണമാകുന്നതായും നാട്ടുകാർ ഉദ്യോഗസ്ഥരോടു പറഞ്ഞു. ഹൈവേ സംബന്ധിയായ വിഷയം നാളെ കോടതി പരിഗണിക്കാനിരിക്കെ ഇന്നും നാളെയുമായി കളക്ടർക്ക് റിപ്പോർട്ട് സമർപ്പിക്കുമെന്ന് നാറ്റ്പാക് പ്രിൻസിപ്പൽ സയന്‍റിസ്റ്റ് സൻജയ് പറഞ്ഞു. ഉദ്യോഗസ്ഥരുമായുള്ള കൂടിക്കാഴ്ചകൾക്കും റിപ്പോർട്ട് പരിശോധനക്കും ശേഷമായിരിക്കും കളക്ടർ കോടതിയെ നിലപാട് അറിയിക്കുക.

വിജയരാഘവപുരം പുറമ്പോക്ക് പട്ടയവിതരണം ഉടൻ: മന്ത്രി

ചാലക്കുടി: നഗരസഭ വിജയരാഘവപുരം പുറമ്പോക്കിലെ അപേക്ഷകർക്കുള്ള പട്ടയവിതരണം ഉടൻ നടത്തുമെന്ന് റവന്യുമന്ത്രി കെ. രാജൻ നിയമസഭയിൽ അറിയിച്ചു. ദീർഘനാളായി പുറമ്പോക്കിൽ താമസിക്കുന്നവർക്ക് ചട്ടങ്ങളിൽ ആവശ്യമായ മാറ്റങ്ങൾവരുത്തി പട്ടയം അനുവദിയ്ക്കണമെന്നാവശ്യപ്പെട്ട് സനീഷ്‌കുമാർ ജോസഫ് എംഎൽഎ നടത്തിയ ശ്രദ്ധക്ഷണിക്കലിനു മറുപടി നൽകുകയായിരുന്നു മന്ത്രി. കൊരട്ടി, മേലൂർ ഗ്രാമപഞ്ചായത്തുകളിലെ കന്നുകാലി മേച്ചിൽപ്പുറം പുറമ്പോക്കിലെ താമസക്കാരായ അപേക്ഷകർക്ക് പട്ടയം അനുവദിക്കുന്നതിനുള്ള നടപടികൾ വേഗത്തിലാക്കണമെന്നും നികുതിയടയ്ക്കുകയും എന്നാൽ പട്ടയരേഖകളോ, പകർപ്പുകളോ കൈവശമില്ലാത്ത കൊടകര നാടുകുന്ന് പ്രദേശത്തെ ഇരുപത്തിയഞ്ചോളം കുടുംബങ്ങൾ രേഖകൾ ഹാജരാക്കേണ്ട ഘട്ടങ്ങളിൽ നേരിടുന്ന പ്രതിസന്ധി അടിയന്തരമായി പരിഹരിയ്ക്കണമെന്നും എംഎൽഎ ആവശ്യപ്പെട്ടു. കനാലുകൾക്കുവേണ്ടി മാറ്റിവച്ച ഭൂമിയിൽ ആവശ്യങ്ങൾ കഴിച്ചുള്ളതിലെ സ്ഥിരതാമസക്കാരായ, അർഹതയുള്ള അപേക്ഷകർക്ക് പട്ടയം നൽകാമെന്നുള്ള നിലപാട് ജലവിഭവവകുപ്പ് അറിയിച്ചതായും മന്ത്രി നിയമസഭയിൽ അറിയിച്ചു.

ആത്മഹത്യാപ്രതിരോധ കാമ്പയിന്‍

ഇരിങ്ങാലക്കുട: ക്രൈസ്റ്റ് കോളജ് മനഃശാസ്ത്ര വിഭാഗത്തിന്‍റെ നേതൃത്വത്തില്‍ സംഘടിപ്പിച്ച ആത്മഹത്യാപ്രതിരോധ കാമ്പയിന്‍ സമാപിച്ചു. തെരഞ്ഞെടുത്ത മനഃശാസ്ത്ര വിദ്യാര്‍ഥികളെ ഉള്‍പ്പെടുത്തി ആത്മഹത്യാപ്രതിരോധ സെല്‍ രൂപീകരിച്ചു. സൈക്കോളജിസ്റ്റ് സിജോ ജോസ്, അഡ്വ.പി. അര്‍ജുന്‍ എന്നിവര്‍ പരിശീലനങ്ങള്‍ക്ക് നേതൃത്വംനല്‍കി. ക്ലിനിക്കല്‍ സൈക്കോളജിസ്റ്റ് ബ്രൈറ്റ് പി.ജേക്കബ് ക്ലാസിന് നേതൃത്വംനല്‍കി. പ്രിന്‍സിപ്പല്‍ റവ.ഡോ. ജോളി ആന്‍ഡ്രൂസ്, മനഃശാസ്ത്ര വിഭാഗത്തിലെ അസിസ്റ്റന്‍റ് പ്രഫ.എന്‍.ആര്‍. അഭിനവ്, സ്വാശ്രയവിഭാഗം കോ- ഓര്‍ഡിനേറ്റര്‍ ഡോ.ടി. വിവേകാനന്ദന്‍, മനഃശാസ്ത്ര വിഭാഗം മേധാവി രന്യ എന്നിവര്‍ നേതൃത്വംനല്‍കി.

തൃശൂർ നഗരം മണിക്കൂറുകളോളം ഇരുട്ടിൽ

തൃശൂർ: നഗരത്തിൽ മണിക്കൂറുകളോളം വൈദ്യുതി നിലച്ചതിൽ പ്രതിഷേധിച്ച് പ്രതിപക്ഷനേതാവ് രാജൻ ജെ. പല്ലന്‍റെ നേതൃത്വത്തിൽ കോണ്‍ഗ്രസ് കൗണ്‍സിലർമാർ മേയറെ ഉപരോധിച്ചു. വൈദ്യുതിവിഭാഗം ഊരാളുങ്കൽ സൊസൈറ്റിക്കു കൈമാറാൻ എൽഡിഎഫ് സർക്കാരും എൽഡിഎഫ് കോർപറേഷൻ ഭരണസമിതിയും നടത്തിയ ഗൂഢാലോചനയുടെ ഫലമായാണ് തദ്ദേശസ്വയംഭരണവകുപ്പ് 229 ജീവനക്കാരിൽനിന്നു103 ജീവനക്കാരായി വെട്ടിക്കുറച്ച് തീരുമാനമെടുത്ത് ഉത്തരവിറക്കിയതെന്നു പ്രതിപക്ഷനേതാവ് ആരോപിച്ചു. പഴയ മുനിസിപ്പൽ പ്രദേശത്തു കോണ്‍ഗ്രസ് കൗണ്‍സിലർമാരാണ് നിലവിലുള്ളത്. വൈദ്യുതി ഇല്ലാതായാൽ കോണ്‍ഗ്രസ് കൗണ്‍സിലർമാരെ മാത്രമേ ബാധിക്കുകയുള്ളൂവെന്ന എൽഡിഎഫ് ഭരണസമിതിയുടെ വിവരക്കേടും തെറ്റിദ്ധാരണയുംമൂലമാണ് തൊഴിലാളിനേതാക്കളെ എൽഡിഎഫ് ഭരണസമിതി ചർച്ചയ്ക്കു വിളിക്കാത്തതെന്നും അദ്ദേഹം പറഞ്ഞു. തുടർന്ന് കോണ്‍ഗ്രസ് കൗണ്‍സിലർമാരുടെ ഇടപെടൽമൂലം വൈദ്യുതി വിഭാഗത്തിലെ സമരസമിതി നേതാക്കളെ മേയറും ഭരണസമിതിയും ചർച്ചയ്ക്കു വിളിക്കാൻ തയാറാകുകയായിരുന്നു. ഉപനേതാവ് ഇ.വി. സുനിൽരാജ്, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ ജയപ്രകാശ് പൂവത്തിങ്കൽ, മുകേഷ് കുളപറന്പിൽ, കൗണ്‍സിലർമാരായ എൻ.എ. ഗോപകുമാർ, വിനേഷ് തയ്യിൽ, ലാലി ജെയിംസ് തുടങ്ങിയവർ നേതൃത്വം നൽകി.

പവർകട്ടിൽ വലഞ്ഞ് ജനം; കോർപറേഷൻ വൈദ്യുതി ജീവനക്കാരുടെ പ്രതിഷേധം കത്തുന്നു

സ്വന്തം ലേഖകൻ തൃശൂർ: കോർപറേഷൻ വൈദ്യുതിവിഭാഗം പണിമുടക്കിയതോടെ പരാതികൾ പരിഹരിക്കാൻ ആളില്ലാതെ നഗരം പവർകട്ടിൽ വലഞ്ഞതു മണിക്കൂറുകൾ. ഇന്നലെ ഉച്ചയോടെയാണ് എംഒ റോഡ് ഫീഡറിലും വിവിധ സെക്‌ഷനുകളിലും വൈദ്യുതി നിലച്ചത്. തുടർന്ന് കോർപറേഷൻ വൈദ്യുതി വിഭാഗത്തിലേക്കു തുടരെ പരാതി ഫോൺകോളുകളായിരുന്നു. സമരത്തിലുള്ള ജീവനക്കാരാരും പരാതികൾ പരിഹരിക്കാൻ തയാറായില്ല. ഇതോടെ നഗരം ജനറേറ്ററിലാണു പ്രവർത്തിച്ചത്. ഏറെ വ്യാപാരസ്ഥാപനങ്ങളുള്ള എംഒ റോഡ് ഫീഡറിലും നഗരപ്രദേശത്തെ വിവിധ കോർപറേഷൻ ഡിവിഷനുകൾ ഉൾപ്പെടുന്ന രണ്ടു സെക്‌ഷനുകളിലുമാണ് വൈദ്യുതി നിലച്ചത്. കോർപറേഷൻ വൈദ്യുതിവിഭാഗത്തിലെ സമരത്തെക്കുറിച്ചുള്ള വാർത്തയും പരന്നതോടെ വൈദ്യുതിതടസം രാത്രിയിലും തുടരുമെന്ന പ്രചാരണവുമുണ്ടായി. ഇതോടെ ജനം ആശങ്കയിലായി. വിവിധ സ്ഥലങ്ങളിൽനിന്നുള്ള ഇരുപതോളം പരാതികളാണ് ഇന്നലെ രജിസ്റ്റർ ചെയ്തത്. ഇതേസമയം സമരത്തിലുള്ള വൈദ്യുതിവിഭാഗം ജീവനക്കാർ ഓഫീസിനുമുന്നിൽ മുദ്രാവാക്യംവിളികളുമായി ധർണയിരുന്നു. കോർപറേഷൻ പ്രതിപക്ഷനേതാവ് രാജൻ പല്ലന്‍റെ നേതൃത്വത്തിൽ കോൺഗ്രസ് കൗൺസിലർമാർ മേയറെ ചേംബറിൽ ഉപരോധിച്ചു. 229 തസ്തികകൾ 103 ആക്കി ചുരുക്കിയ തദ്ദേശസ്വയംഭരണവകുപ്പ് ഉത്തരവിനെതിരേയും ഏഴുവർഷമായി നടപ്പാക്കാത്ത ശന്പളപരിഷ്കരണം ആവശ്യപ്പെട്ടുമാണ് കോർപറേഷൻ വൈദ്യുതിവിഭാഗം സംയുക്ത ട്രേഡ് യൂണിയൻ ഇന്നലെമുതൽ പണിമുടക്ക് ആരംഭിച്ചത്. ഇതിനിടെയാണ് നഗരത്തിന്‍റെ വിവിധ ഭാഗങ്ങളിൽ വൈദ്യുതി നിലച്ചതും പരാതിപ്രവാഹമുണ്ടായതും. നൂറിലേറെപ്പേർക്കു തൊഴിൽ നഷ്ടപ്പെട്ടു തസ്തികകൾ വെട്ടിക്കുറച്ചതോടെ വൈദ്യുതിവിഭാഗത്തിലെ നൂറിലേറെ താത്കാലിക ജീവനക്കാർക്കാണു തൊഴിൽ നഷ്ടപ്പെട്ടിരിക്കുന്നത്. ഇലക്‌ട്രിക്കൽ വർക്കർ തസ്തികയിൽ 50 പേരുണ്ടായിരുന്നത് പുതിയ ഉത്തരവിൽ 18 പേരാക്കി ചുരുക്കി. 51 ലൈൻമാൻമാരുള്ളത് അഞ്ചുപേരാക്കി. 24 മണിക്കൂറും പ്രവർത്തിക്കേണ്ട വൈദ്യുതിവിഭാഗത്തിൽ ഇത്രയുമധികം തസ്തികകൾ വെട്ടിക്കുറച്ചതു നീതീകരിക്കാനാകില്ലെന്നു തൊഴിലാളികൾ പറയുന്നു.കോർപറേഷൻ വൈദ്യുതിവിഭാഗത്തിനു കീഴിൽ 12.5 ചതുരശ്ര കിലോമീറ്റർ ചുറ്റളവിനുള്ളിൽ 40,000 ഉപയോക്താക്കളാണുള്ളത്. മീറ്റർ റീഡറുടെ ഉൾപ്പെടെയുള്ള തസ്തികകൾ അധികമായി അനുവദിക്കണമെന്ന് ആവശ്യപ്പെട്ടിരിക്കുന്നതിനിടെയാണ് വൻവെട്ടിച്ചുരുക്കലുണ്ടായിരിക്കുന്നത്. ശമ്പളപരിഷ്കരണം ഇനിയും വൈകും കെഎസ്ഇബി ജീവനക്കാർക്കു ശന്പളം പരിഷ്കരിച്ചുനൽകിയെങ്കിലും തത്തുല്യമായ സേവനവ്യവസ്ഥകളുള്ള കോർപറേഷൻ വൈദ്യുതിവിഭാഗം ജീവനക്കാർക്കു സ്റ്റാഫ് പാറ്റേൺ നിശ്ചയിച്ചശേഷം പരിഷ്കരണം നടപ്പാക്കാമെന്നായിരുന്നു സർക്കാർ ഉറപ്പ്. എന്നാൽ ഇതിൽ വീഴ്ചയുണ്ടായതോടെ ശമ്പളപരിഷ്കരണ തീരുമാനം ഇനിയും വൈകും. 91 മുതലുള്ള സ്റ്റാഫ് പാറ്റേൺപ്രകാരം ഇപ്പോഴുള്ള 229 ജീവനക്കാരിൽ 110 പേർ സ്ഥിരവും ബാക്കിയുള്ളവർ താത്കാലികക്കാരുമാണ്.

കൂടല്‍മാണിക്യം കഴകനിയമനം: ഭരണസമിതി തീരുമാനം അപലപനീയം- വാര്യര്‍ സമാജം

ഇരിങ്ങാലക്കുട: കൂടല്‍മാണിക്യം ക്ഷേത്രത്തിലെ കഴകനിയമനം വിഷയത്തില്‍ ഹൈക്കോടതി ഉത്തരവ് പുറപ്പെടുവിച്ച സ്ഥിതിക്കു തല്‍സ്ഥിതി തുടരാന്‍ കൂടല്‍മാണിക്യം ദേവസ്വം ഭരണസമിതിക്കു ബാധ്യതയുണ്ടെന്നും നിയമവ്യവസ്ഥയെയും കോടതികളെയും വെല്ലുവിളിച്ചുകൊണ്ട് ആചാരങ്ങളില്‍ കൈകടത്താന്‍ ഭരണസമിതി മുതിരുന്നതു പ്രതിഷേധാര്‍ഹമാണെന്നും സമസ്തകേരള വാര്യർ സമാജം. ഹൈക്കോടതിയുടെ നിര്‍ദേശങ്ങളെ തെറ്റായ രീതിയില്‍ പ്രചരിപ്പിച്ചുകൊണ്ട് ഭക്തജനങ്ങള്‍ക്കിടയില്‍ തെറ്റിദ്ധാരണ ഉണ്ടാക്കുന്ന പ്രസ്താവനകള്‍ നടത്തി, ക്ഷേത്രത്തിന്‍റെ ആചാരാനുഷ്ഠാനങ്ങളുടെ അവസാനവാക്കായ തന്ത്രിയെ നോക്കുകുത്തിയാക്കി ഭരണസമിതി നടത്തുന്ന നടപടികള്‍ തികച്ചും അപലനീയവും പ്രതിഷേധാര്‍ഹവുമാണ്. കൂടല്‍മാണിക്യം ക്ഷേത്രത്തിലെ കാരായ്മ കഴകപ്രവൃത്തി കുടുംബാംഗമായ തെക്കേവാരിയത്തെ ടി.വി. ഹരികൃഷ്ണനു കാരായ്മ കഴകം നിലനിര്‍ത്തിക്കിട്ടുന്നതിനു കോടതിയെ സമീപിക്കുന്നതിനു പൂര്‍ണപിന്തുണ നല്‍കുന്നതിനും വാര്യർ സമാജം ഇരിങ്ങാലക്കുട യൂണിറ്റ് യോഗം തീരുമാനിച്ചു. പ്രസിഡന്‍റ് പി.വി. രുദ്രന്‍ അധ്യക്ഷത വഹിച്ചു. സെക്രട്ടറി എ. അച്യുതന്‍, വി.വി. ഗിരീശന്‍, എ.സി. സുരേഷ്, എസ്. കൃഷ്ണകുമാര്‍, ടി. രാമന്‍കുട്ടി, കെ.വി. രാജീവ് വാര്യര്‍ എന്നിവര്‍ പ്രസംഗിച്ചു. കഴകം നിയമനം: അഭിനന്ദിച്ച് മന്ത്രി ആർ. ബിന്ദു തൃശൂർ: കൂടൽമാണിക്യം ദേവസ്വം കഴകക്കാരനായി കെ.എസ്. അനുരാഗിനെ നിയമിക്കാൻ നടപടിയെടുത്ത ക്ഷേത്രം ഭരണസമിതിയെ അഭിനന്ദിച്ച് മന്ത്രി ഡോ. ആർ. ബിന്ദു. ദേവസ്വം റിക്രൂട്ട്മെന്‍റ് ബോർഡ് വഴിയുള്ള നിയമനത്തിൽ കോടതിയുടെ ഇടപെടൽ ഭരണഘടനയുടെ ഊർജസ്രോതസായ സാമൂഹികനീതിയും സമഭാവനയും ഉയർത്തിപ്പിടിക്കുന്നു. വിയോജിപ്പ് രേഖപ്പെടുത്തി ക്ഷേത്രം തന്ത്രിമാർ ക്ഷേത്രം ഭരണസമിതിക്കു കത്തു നൽകിയെന്നതു ഖേദകരമാണ്. പരന്പരാഗത കുലത്തൊഴിലുകൾ സംബന്ധിച്ചുള്ള ചാതുർവർണ്യ ആശയങ്ങൾ കാലഹരണപ്പെട്ടതാണ്. ആധുനിക ജനാധിപത്യസമൂഹത്തിനു ചേരാത്ത അത്തരം ആശയങ്ങൾ പുനരുജ്ജീവിപ്പിക്കാനുള്ള നീക്കങ്ങൾ അപലപനീയമാണെന്നും മന്ത്രി പറഞ്ഞു.

ഇടതുസർക്കാർ മലയോരകർഷകരക്ഷ ഉറപ്പാക്കി: കേരള കോണ്‍ഗ്രസ് -എം

തൃശൂർ: ജനവാസകേന്ദ്രങ്ങളിലിറങ്ങി മനുഷ്യരെ ആക്രമിക്കുന്ന വന്യമൃഗങ്ങളെ വെടിവച്ചുകൊല്ലാനുള്ള നിയമഭേദഗതി പ്രത്യേക മന്ത്രിസഭായോഗം വിളിച്ച് അംഗീകരിച്ച മുഖ്യമന്ത്രി പിണറായി വിജയനെയും അതിനായി സർക്കാരിൽ സമ്മർദം ചെലുത്തിയ ചെയർമാൻ ജോസ് കെ. മാണിയെയും അനുമോദിച്ച് കേരള കോണ്‍ഗ്രസ്-എം ജില്ലാ കമ്മിറ്റിയുടെ നേതൃത്വത്തിൽ നഗരത്തിൽ പ്രകടനവും കോർപറേഷൻ ഓഫീസിനുമുന്പിൽ അഭിവാദനസദസും സംഘടിപ്പിച്ചു.ജില്ലാ പ്രസിഡന്‍റ് ഉണ്ണികൃഷ്ണൻ ഈച്ചരത്ത് ഉദ്ഘാടനം ചെയ്തു. ഇടതുസർക്കാർ മലയോരകർഷകരുടെ രക്ഷ ഉറപ്പാക്കിയെന്ന് അദ്ദേഹം പറഞ്ഞു. ജില്ലാ വൈസ് പ്രസിഡന്‍റ് ജൂലിയസ് ആന്‍റണി അധ്യക്ഷത വഹിച്ചു. സംസ്ഥാന സ്റ്റിയറിംഗ് കമ്മിറ്റി അംഗങ്ങളായ ബേബി മാത്യു കാവുങ്കൽ, ഡെന്നിസ് കെ. ആന്‍റണി, സംസ്ഥാന സെക്രട്ടേറിയറ്റ് അംഗം ബേബി നെല്ലിക്കുഴി, ജോർജ് താഴെക്കാടൻ, ഷാജി ആനിത്തോട്ടം, പോളി റാഫേൽ, തോമസ് മായാലി തുടങ്ങിയവർ പ്രസംഗിച്ചു.

ആംബുലൻസ് ജീവനക്കാർ തമ്മിൽ സംഘർഷം; ഒരാൾക്കു പരിക്ക്

കുന്നംകുളം: കുന്നംകുളത്തെ സ്വകര്യ ആശുപത്രിയിലേക്ക് രോഗിയുമായി എത്തിയ ആംബുലൻസ് ജീവനക്കാർ തമ്മിൽ സംഘർഷം, ഒരാൾക്കു പരിക്കേറ്റു. കഴിഞ്ഞദിവസം രാത്രി പാലപ്പെട്ടിയിൽ നിന്ന് രോഗിയുമായി ആശുപത്രിയിൽ എത്തിയ ആംബുലൻസ് ജീവനക്കാരനെ മന്ദലാംകുന്നിൽ നിന്നു മറ്റൊരു രോഗിയുമായി എത്തിയ ആംബുലൻസിലെ ജീവനക്കാരൻ ആക്രമിക്കുകയായിരുന്നു. പൊന്നാനി സ്വദേശിയായ ഡ്രൈവർ ഹനീഫക്കാണ് പരിക്കേറ്റത്. ആംബുലൻസിന്‍റെ സർവീസുകൾ സംബന്ധിച്ച് ഇവർ തമ്മിൽ നേരത്തെ തർക്കങ്ങൾ നിലനിന്നിരുന്നതായി പറയുന്നു. കൈകൾക്ക് പരിക്കേറ്റ ഇയാളെ ആശുപത്രിയിൽ പ്രവേശിപ്പിച്ചു. പോലീസിൽ പരാതി നൽകി.

ഡിസംബറിനകം തൃശൂർ-കുറ്റിപ്പുറം റോഡ് പണികൾ പൂർത്തിയാക്കണമെന്നു കളക്ടർ

തൃശൂർ: ഡിസംബറിനകം തൃശൂർ-കുറ്റിപ്പുറം റോഡിന്‍റെ പണികൾ പൂർത്തിയാക്കണമെന്നു ജില്ലാ കളക്ടർ അർജുൻ പാണ്ഡ്യൻ. ജില്ലയിലെ കെഎസ്ടിപി റീബിൽഡ് കേരള പദ്ധതിയുടെ ഭാഗമായി നടന്നുവരുന്ന തൃശൂർ-കുറ്റിപ്പുറം, കൊടുങ്ങല്ലൂർ-ഷൊർണൂർ റോഡ് പ്രവൃത്തികളുടെ പുരോഗതി അവലോകനം ചെയ്യുന്നതിനായി ചേർന്ന കോ-ഓർഡിനേഷൻ കമ്മിറ്റി യോഗത്തിൽ അധ്യക്ഷത വഹിച്ചു സംസാരിക്കുകയായിരുന്നു കളക്ടർ. തൃശൂർ-കുറ്റിപ്പുറം, കൊടുങ്ങല്ലൂർ-ഷൊർണൂർ റോഡ് നിർമാണപ്രവൃത്തികൾ സമയബന്ധിതമായി പൂർത്തിയാക്കണമെന്നും തടസങ്ങൾ ഉണ്ടെങ്കിൽ ഉടൻ പരിഹരിക്കണമെന്നും കളക്ടർ പറഞ്ഞു. പുഴയ്ക്കൽ പാലത്തിന്‍റെ പണികൾ19നു പൂർത്തിയാക്കി ഒക്ടോബർ ഒന്പതിനു ഗതാഗതത്തിനായി തുറന്നുകൊടുക്കുമെന്നു കളക്ടർ അറിയിച്ചു. തൃശൂർ ശോഭ സിറ്റിക്കു സമീപമുള്ള മൈനർ ബ്രിഡ്ജിന്‍റെ ഇടതുഭാഗം പൊളിക്കാനുള്ള തീരുമാനം സബ് കമ്മിറ്റി ചേർന്നെടുക്കണമെന്നും അശ്വനി ജംഗ്ഷനു സമീപത്തുള്ള വാട്ടർ ലീക്കേജ് പ്രശ്നത്തിനു കോർപറേഷൻ ഉടൻ പരിഹാരം കാണണമെന്നും കളക്ടർ നിർദേശിച്ചു. വെള്ളാങ്കല്ലൂർ പഞ്ചായത്തിൽ പൈപ്പിടൽ പൂർത്തിയായ ഭാഗത്തു പ്രഷർ ടെസ്റ്റും ഇന്‍റർലിങ്കിംഗും വേഗത്തിൽ പൂർത്തിയാക്കാൻ ബന്ധപ്പെട്ട ഏജൻസികൾക്കു നിർദേശം നൽകി. ട്രാഫിക് ക്രമീകരണങ്ങളും മറ്റു സാങ്കേതികതടസങ്ങളും പരിഹരിക്കുന്നതിനായി സബ് കമ്മിറ്റി യഥാസമയങ്ങളിൽ ചേർന്ന് നടപടികൾ സ്വീകരിക്കണം. കളക്ടറേറ്റ് എക്സിക്യൂട്ടീവ് ഹാളിൽ ചേർന്ന യോഗത്തിൽ സബ് കളക്ടർ അഖിൽ വി. മേനോൻ, അസിസ്റ്റന്‍റ് കളക്ടർ സ്വാതി മോഹൻ റാത്തോഡ്, ജനപ്രതിനിധികൾ, വിവിധ വകുപ്പുതല ഉദ്യോഗസ്ഥർ തുടങ്ങിയവർ പങ്കെടുത്തു.

മന്ത്രി ഇടപെട്ടു; കോർപറേഷൻ വൈദ്യുതിവിഭാഗം ജീവനക്കാർ നടത്തിയ പണിമുടക്ക് താത്കാലികമായി പിൻവലിച്ചു

തൃശൂർ: ശമ്പളപരിഷ്കരണവുമായി ബന്ധപ്പെട്ട് ജീവനക്കാരെ വെട്ടിച്ചുരുക്കിയ നടപടി അടിയന്തരമായി റദ്ദാക്കണമെന്ന് ആവശ്യപ്പെട്ടു കോർപറേഷൻ വൈദ്യുതിവിഭാഗം ജീവനക്കാർ നടത്തിയ പണിമുടക്ക് താത്കാലികമായി പിൻവലിച്ചു. മന്ത്രി കെ. രാജൻ മേയർ എം.കെ. വർഗീസുമായി നടത്തിയ ചർച്ചയ്ക്കൊടുവിലാണ് പണിമുടക്ക് പിൻവലിച്ചത്. ഒരാഴ്ചയ്ക്കകം നടപടി റദ്ദുചെയ്യുന്നതിനായി സ്പെഷൽ കൗണ്‍സിൽ ചേരാമെന്നു മേയറും സ്റ്റാൻഡിംഗ് കമ്മിറ്റി ചെയർമാൻമാരായ പി.കെ. ഷാജനും വർഗീസ് കണ്ടംകുളത്തിയും ഉറപ്പുനൽകിയ സാഹചര്യത്തിലാണ് പണിമുടക്ക് പിൻവലിച്ചത്. എങ്കിലും, പണിമുടക്കുമായി ബന്ധപ്പെട്ട നോട്ടീസ് ഇന്നു നൽകുമെന്നു സിഐടിയു സെക്രട്ടറി ബി. അജികുമാർ പറഞ്ഞു.

കെ.വി. അബ്ദുൾ ഖാദർ പിണറായിക്കു പഠിക്കുകയാണോ: ജോസഫ് ടാജറ്റ്

തൃശൂർ: പോലീസ് മർദനത്തിനിരയായ സുജിത്തിന്‍റെ വിവാഹം മാധ്യമങ്ങൾ പ്രാധാന്യത്തോടെ പ്രസിദ്ധീകരിച്ചതിനെ പരിഹസിച്ച സിപിഎം ജില്ലാ സെക്രട്ടറി കെ.വി. അബ്ദുൾ ഖാദറിനെതിരേ ഡിസിസി പ്രസിഡന്‍റ് ജോസഫ് ടാജറ്റ്. കെ.വി. അബ്ദുൾ ഖാദർ പിണറായി വിജയനു പഠിക്കാൻ തുടങ്ങിയോ. നിങ്ങളോടെനിക്കു സഹതാപമാണു തോന്നുന്നതെന്നും ടാജറ്റ് പറഞ്ഞു. സുജിത്തിന്‍റേതു സ്വാതന്ത്ര്യസമരസേനാനിയുടെ വിവാഹമാണോ എന്നായിരുന്നു അബ്ദുൾ ഖാദറിന്‍റെ പരിഹാസം. ചെടിച്ചട്ടികൊണ്ടും ഹെൽമറ്റുകൊണ്ടും തെരുവുഗുണ്ടകളെപ്പോലെ ആക്രമണം നടത്തുന്നതു ജീവൻരക്ഷാപ്രവർത്തനമാണെന്നു പറയുന്ന മുഖ്യമന്ത്രിയുടെ നിലയിലേക്ക് അബ്ദുൾ ഖാദർ തരംതാഴരുതായിരുന്നു. പൊതുരംഗത്തു പ്രവർത്തിക്കുന്നവരുടെ പേരിൽ കേസുകളുണ്ടാകും. കൊലക്കേസ് പ്രതികളുള്ള പാർട്ടിയാണു സിപിഎം. സുജിത്തിനെതിരേയുള്ള കേസുകൾ രാഷ്‌ട്രീയപരമാണ്. പോലീസിനെ ആക്രമിച്ചെന്ന സുജിത്തിനെതിരേയുള്ള കേസ് കസ്റ്റഡിമർദനവുമായി ബന്ധപ്പെട്ടുണ്ടാക്കിയ തിരക്കഥയാണ്. കൂടുതൽ കേസുകളും സുജിത്തിനെതിരേ രജിസ്റ്റർ ചെയ്തിരിക്കുന്നതു പോലീസ് മർദനത്തിനുശേഷമാണ്. ഇതൊന്നും പരിശോധിക്കാതെയാണ് അബ്ദുൾ ഖാദറിന്‍റെ പ്രസ്താവന. അഭിപ്രായപ്രകടനത്തിനുമുന്പ് ഇതെല്ലാം പരിശോധിക്കാൻ ശ്രമിക്കണമായിരുന്നു. ഞങ്ങളെല്ലാം രാഷ്‌ട്രീയസമരങ്ങളുടെ പേരിൽ റിമാൻഡിൽ കഴിയുന്ന സഹപ്രവർത്തകരെ ജയിലിൽ സന്ദർശിക്കാറുണ്ട്. എന്നാൽ അബ്ദുൾ ഖാദർ പോയത് 51 വെട്ടുവെട്ടിയ കേസിലെ പ്രതികളെ കാണാനാണ്. ആ അനുഭവത്തിൽനിന്നാണ് ഇത്തരത്തിൽ പരാമർശം നടത്തിയതെന്നും ജോസഫ് ടാജറ്റ് പറഞ്ഞു.

കുട്ടികളുടെ സുരക്ഷ; സേഫ് തൃശൂർ പദ്ധതി തുടങ്ങി

തൃശൂർ: കുട്ടികളുടെ സുരക്ഷയും സമഗ്രവികസനവും ലക്ഷ്യമിട്ടു നടപ്പാക്കുന്ന "സേഫ് തൃശൂർ' പദ്ധതിക്കു തുടക്കമായി. ജില്ലയിൽ സർവേ നടത്തി പത്തു ഗ്രാമപഞ്ചായത്തുകളിലാണ് സേഫ് തൃശൂർ പദ്ധതി ആദ്യഘട്ടത്തിൽ നടപ്പാക്കുന്നത്. ചേലക്കര, പാണഞ്ചേരി, അതിരപ്പിള്ളി, വരന്തരപ്പിള്ളി, അന്നമനട, കയ്പമംഗലം, കാടുകുറ്റി, പുന്നയൂർ, എറിയാട്, വള്ളത്തോൾനഗർ എന്നിവിടങ്ങളിലാണ് ഈ ഘട്ടത്തിൽ പദ്ധതി നടപ്പാക്കുക. തുടർന്ന് ജില്ലയിലെ മറ്റു പഞ്ചായത്തുകളിലേക്കും പദ്ധതി വ്യാപിപ്പിക്കും. തൃശൂർ ജില്ലാ പഞ്ചായത്തിന്‍റെ 2025-26 വാർഷികപദ്ധതിയിൽ ഉൾപ്പെടുത്തിയുള്ള ബാലസുരക്ഷിതകേരളം പദ്ധതിയുടെ ഭാഗമായാണ് സേഫ് തൃശൂർ പ്രോജക്ട് നടപ്പാക്കുന്നത്. പദ്ധതിയുടെ ഭാഗമായുള്ള സ്റ്റേക്ക് ഹോൾഡേഴ്സ് ശില്പശാല ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് ഉദ്ഘാടനം ചെയ്തു. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ പി.എം. അഹമ്മദ് അധ്യക്ഷത വഹിച്ചു. സബ് കളക്ടർ അഖിൽ വി. മേനോൻ മുഖ്യാതിഥിയായിരുന്നു. ഇൻസൈറ്റ് തിരുവനന്തപുരം "വൾണറബിലിറ്റി സ്റ്റാറ്റസ് റിപ്പോർട്ട്' അവതരിപ്പിച്ചു. ജനപ്രതിനിധികൾ, സ്കൂൾ കൗണ്‍സിലർമാർ, ഉദ്യോഗസ്ഥർ എന്നിവർ ചേർന്നുള്ള ഗ്രൂപ്പ് ചർച്ചയും അവതരണവും ശില്പശാലയുടെ ഭാഗമായി നടന്നു.

പുല്‍മൈതാനമായി കാവനാട് ചിറ

കൊടകര: പഞ്ചായത്തില്‍ ഒരു വര്‍ഷം മുമ്പ് നവീകരിച്ച കാവനാട് ചിറയില്‍ വീണ്ടും പായലും ചണ്ടിയും നിറയുന്നു. വിസ്തൃതമായ കാവനാട് ചിറ അമ്പതുലക്ഷം രൂപ ചെലവഴിച്ചാണ് ഏതാനും വര്‍ഷം മുമ്പ് പുനരുദ്ധരിച്ചത്. കൊടകര, മറ്റത്തൂര്‍ ഗ്രാമപഞ്ചായത്തുകളുടെ അതിര്‍ത്തിയിലാണ് ഒരേക്കറിലധികം വിസ്തൃതിയുള്ള കാവനാട്ചിറയുള്ളത്. കടുത്ത വേനല്‍ക്കാലത്തു പോലും ജലത്തിന്‍റെ നിറസമൃദ്ധിയുള്ളതാണ് കാവനാട് ചിറ. കൃഷിയിടങ്ങളിലേക്ക് വെള്ളം കൊണ്ടുപോകുന്നതിനായുള്ള സംവിധാനവും ചിറയിലുണ്ട്്. ഈ ചിറയില്‍ സംഭരിച്ചു നിര്‍ത്തുന്ന വെള്ളത്തെ ആശ്രയിച്ചാണ് ഒരു കാലത്ത് മേഖലയില്‍ നെല്‍കൃഷി ചെയ്തുപോന്നിരുന്നത്. നെല്‍കൃഷി ചെയ്യുന്ന പാടങ്ങളുടെ വിസ്തൃതി കുറയുകയും പാടങ്ങള്‍ പലതും പറമ്പുകളായി രൂപാന്തരപ്പെടുകയും ചെയ്തതോടെ ചിറയിലെവെള്ളം ഉപയോഗിക്കുന്ന കര്‍ഷകരുടെ എണ്ണം കുറഞ്ഞു. ഇതോടെ ചിറ അവഗണിക്കപ്പെട്ടു. വര്‍ഷങ്ങളോളം പുല്ലും പായലും മൂടി നാശോന്മുഖമായി കിടന്ന ചിറ നബാര്‍ഡിന്‍റെ സഹായത്തോടെ കെഎല്‍ഡിസിയാണ് നവീകരണപ്രവര്‍ത്തനങ്ങള്‍ നടത്തിയത്. അരക്കോടി രൂപയോളം ഇതിനായി ചെലവഴിച്ചു. 2019ല്‍ ആരംഭിച്ച ചിറയുടെ നവീകരണ പ്രവൃത്തി രണ്ടുവര്‍ഷം കൊണ്ടാണ് പൂര്‍ത്തിയായത്. വേനല്‍ക്കാലത്തു മേഖലയിലെ കുളങ്ങളിലും കിണറുകളിലും ജലവിതാനം താഴാതെ നിലനിര്‍ത്തുന്നതില്‍ നിര്‍ണായക പങ്കുവഹിക്കുന്ന കാവനാട് ചിറയുടെ മുഖം ഏറെക്കാലത്തിനു ശേഷം തെളിഞ്ഞു കണ്ടെങ്കിലും വൈകാതെ ചിറ വീണ്ടും പായലും പുല്ലും ചണ്ടിയും നിറഞ്ഞ് പുല്‍മൈതാനം പോലെയായി.

സ്‌കൂട്ടറിന് സൈഡ് കൊടുക്കാത്തതുമായി ബന്ധപ്പെട്ട് തര്‍ക്കം: സ്റ്റേഷന്‍ റൗഡിയും കൂട്ടാളിയും അറസ്റ്റിൽ

ഇരിങ്ങാലക്കുട: സ്‌കൂട്ടറിന് സൈഡ് കൊടുക്കാത്തതുമായി ബന്ധപ്പെട്ട തര്‍ക്കത്തെതുടര്‍ന്നുണ്ടായ ആക്രമണത്തില്‍ സ്റ്റേഷന്‍ റൗഡിയും കൂട്ടാളിയും അറസ്റ്റില്‍. പഴുവില്‍ ചിറയ്ക്കല്‍ സ്വദേശി പരേക്കാട്ടില്‍ വീട്ടില്‍ വിഷ്ണു എന്ന് വിളിക്കുന്ന വിഷ്ണു പ്രസാദ് (23), മാള പോലീസ് സ്റ്റേഷന്‍ റൗഡി ലിസ്റ്റില്‍ പേരുള്ള പുത്തന്‍ച്ചിറ പുളിയിലക്കുന്ന് സ്വദേശി നെടുംപുരക്കല്‍ വീട്ടില്‍ മുഹമ്മദ് ഷാഫി (19) എന്നിവരാണ് അറസ്റ്റിലായത്. കഴിഞ്ഞ ദിവസം വൈകീട്ട് അഞ്ചുമണിയോടെ കോണത്തുകുന്ന് ജനതാ കോര്‍ണര്‍ സ്വദേശി ആലുക്കത്തറ വീട്ടില്‍ പ്രകാശന്‍ (58) എന്നയാളുടെ സഹോദരന്‍റെ മകനായ ഷാന്‍ ഓടിച്ചിരുന്ന കാര്‍ പ്രകാശന്‍റെ വീട്ടിലേക്ക് കയറ്റിയിടാന്‍ ശ്രമിക്കുമ്പോൾ പ്രതികള്‍ വന്നിരുന്ന സ്‌കൂട്ടറിന് സൈഡ് കൊടുത്തില്ല എന്നുപറഞ്ഞ് ഷാനുമായി തര്‍ക്കമുണ്ടായി. പ്രതികള്‍ ഹെല്‍മെറ്റ് എടുത്ത് കാറിലേക്ക് എറിഞ്ഞത് ചോദ്യം ചെയ്തതിലുള്ള വൈരാഗ്യത്താല്‍ പ്രകാശനെയും ഷാനിനെയും പ്രകാശന്‍റെ ബന്ധുവായ ലോഹിതാക്ഷന്‍ എന്നയാളെയും അസഭ്യം പറയുകയും തീര്‍ത്തുകളയുമെന്ന് പറഞ്ഞ് ഭീഷണിപ്പെടുത്തുകയും പ്രകാശന്‍റെ കഴുത്തിന് നേരെ കത്തിവീശുകയും പ്രതികള്‍ വിളിച്ച് വരുത്തിയ പ്രായപൂര്‍ത്തിയാകാത്ത മൂന്ന് കുട്ടികള്‍ വന്ന് കമ്പി പോലുള്ള ആയുധം ഉപയോഗിച്ച് ആക്രമിക്കാനെരുങ്ങുകയും ഭീഷണിപ്പെടുത്തുകയും സ്ഥലത്ത് ഭീകരാന്തരീക്ഷം സൃഷ്ടിക്കുകയും ചെയ്തു. കേസില്‍ ഉള്‍പ്പെട്ട പ്രായപൂര്‍ത്തിയാകാത്ത മൂന്ന് കുട്ടികള്‍ക്കെതിരെ ജുവനൈല്‍ ജസ്റ്റിസ് നിയമ പ്രകാരമുള്ള നടപടികള്‍ സ്വീകരിക്കും.ഇരിങ്ങാലക്കുട പോലീസ് സ്റ്റേഷന്‍ എസ്എച്ച്ഒ കെ.ജെ. ജിനേഷ്, എസ്‌ഐ മാരായ എ.കെ. സോജന്‍, എം.ആര്‍. കൃഷ്ണപ്രസാദ്, പി.ആര്‍. ദിനേഷ് കുമാര്‍, കെ.എം. നാസര്‍, ജിഎസ്‌ഐ സതീശന്‍, മുഹമ്മദ് റാഷി, ജിഎഎസ്‌ഐ ഷാബു, ഗോപകുമാര്‍, ജിഎസ് സിപിഒമാരായ അർജുന്‍, കമല്‍കൃഷ്ണ, സുജിത്ത് എന്നിവരാണ് അന്വേഷണ സംഘത്തിലുള്ളത്.

പെരിഞ്ഞനത്തുനിന്ന് കാറുകൾ മോഷ്ടിച്ച കേസിൽ രണ്ടുപേർ പിടിയിൽ

കയ്പമംഗലം: പെരിഞ്ഞനത്ത് നിന്ന് കാറുകൾ മോഷ്ടിച്ച കേസിൽ രണ്ടുപേർ പിടിയിൽ. കയ്പമംഗലം ആശാരികയറ്റം സ്വദേശി ഡുഡു എന്ന് വിളിക്കുന്ന ഇജാസ് (27), മതിലകം കൂളിമുട്ടം എമ്മാട് സ്വദേശി ഹാരിസ് (25) എന്നിവരെയാണ് അറസ്റ്റ് ചെയ്തത്. 15ന് പുലർച്ചെയായിരുന്നു മോഷണം. മൂന്നുപീടിക സ്വദേശി മുഹമ്മദ് അനസിന്‍റെ പറമ്പിൽ പാർക്ക് ചെയ്തിരുന്ന ആറുലക്ഷം രൂപ വിലവരുന്ന മാരുതി സ്വിഫ്റ്റ് കാറും 11 ലക്ഷം രൂപ വിലവരുന്ന മാരുതി എർട്ടിഗ കാറുമാണ് പ്രതികൾ മോഷ്ടിച്ചത്. തുടർന്ന് പോലീസ് സംഘം നടത്തിയ അന്വേഷണത്തിലാണ് മോഷ്ടിച്ച കാറുമായി പോവുകയായിരുന്ന പ്രതികളെ പിടികൂടിയത്. കയ്പമംഗലം സ്റ്റേഷൻ ഇൻസ്പെക്ടർ ആർ.ബിജു, സബ് ഇൻസ്പെക്ടർമാരായ അഭിലാഷ് ,ജെയ്സൺ സീനിയർ സിവിൽ പോലീസ് ഓഫീസർമാരായ സുനിൽകുമാർ, മുഹമ്മദ് ഫാറൂഖ്, ജ്യോതിഷ്, സിനോജ്, ജോസഫ് എന്നിവരാണ് അന്വേഷണ സംഘത്തിലുണ്ടായിരുന്നത്.

മുക്കുപണ്ടം പണയംവച്ച് തട്ടിപ്പ്; ഒരാള്‍ അറസ്റ്റില്‍

ആളൂര്‍: മുക്കുപണ്ടം പണയംവച്ച് 1,71295 രൂപയുടെ തട്ടിപ്പ് നടത്തിയ സംഭവത്തില്‍ ഒരാള്‍ അറസ്റ്റില്‍. പുത്തന്‍ച്ചിറ പൊരുമ്പുകുന്ന് സ്വദേശി മാക്കാട്ടില്‍ വീട്ടില്‍ സൈജുവിനെ(49) യാണ് അറസ്റ്റ് ചെയ്തത്. താഴേക്കാട് സര്‍വീസ് സഹകരണ ബാങ്കിന്‍റെ കുണ്ടൂര്‍ ശാഖയില്‍ 2024ല്‍ രണ്ട് തവണകളിലായിട്ടാണ് തട്ടിപ്പ് നടത്തിയത്. 24.100 ഗ്രാം തൂക്കം വരുന്ന ആഡ്യന്‍ മോഡല്‍ മുക്കുപണ്ടമാല പണയംവച്ച് 1,11,295 രൂപയും, 12 ഗ്രാം മുത്തരഞ്ഞാന്‍ മോഡല്‍ മുക്കുപണ്ട അരഞ്ഞാന്‍ പണയംവച്ച് 60,000 രൂപ അടക്കം 1,71295 രൂപയാണ് തട്ടിച്ചെടുത്തത്. സംഭവത്തില്‍ താഴേക്കാട് സർവീസ് സഹകരണ ബാങ്ക് സെക്രട്ടറി താഴേക്കാട് സ്വദേശി മാടവന വീട്ടില്‍ ജാന്‍സിയുടെ പരാതിയില്‍ ആളൂര്‍ പോലീസ് സ്റ്റേഷനില്‍ കേസ് രജിസ്റ്റര്‍ ചെയ്തിരുന്നു. ബാങ്കില്‍ പണയംവയ്ക്കുന്ന സ്വർണം മൂന്നുമാസം കൂടുമ്പോള്‍ ഗോള്‍ഡ് അപ്രൈസറെക്കൊണ്ട് പരിശോധിപ്പിക്കാറുണ്ട്. അത്തരത്തില്‍ പരിശോധിച്ചപ്പോഴാണ് സൈജു പണയംവച്ചത് മുക്കു പണ്ടങ്ങളാണെന്ന് തെളിഞ്ഞത്. തുടര്‍ന്നാണ് പരാതി നല്‍കിയത്. സംഭവത്തെതുടര്‍ന്ന് ഒളിവില്‍ പോയ സൈജു ഇയാളുടെ വീട്ടില്‍ എത്തിയിട്ടുണ്ടെന്നുള്ള രഹസ്യ വിവരം ജില്ലാ പോലീസ് മേധാവിക്ക് ലഭിച്ചത് പ്രകാരമാണ് പ്രതിയെ അറസ്റ്റ് ചെയ്തത്. ആളൂര്‍ പോലീസ് സ്റ്റേഷന്‍ എസ്എച്ച്ഒ ബി. ഷാജിമോന്‍, എസ്ഐ കെ.പി. ജോര്‍ജ്, ജിഎഎസ്ഐ മിനിമോള്‍, സിപിഒ മാരായ അരുണ്‍, ഹരികൃഷ്ണന്‍, നിഖില്‍ എന്നിവരാണ് അന്വേഷണ സംഘത്തിലുള്ളത്.

മത്സ്യമേഖലയിലെ പ്രശ്നങ്ങൾ പരിഹരിക്കാൻ ജില്ലാ ഭരണകൂടം ഇടപെടണം: കെ.ജി. ശിവാനന്ദൻ

കൊടുങ്ങല്ലൂർ: ഉൾനാടൻ മത്സ്യമേഖലയിലെ പ്രശ്നങ്ങൾ പരിഹരിക്കാൻ ജില്ലാ കളക്ടർ അടിയന്തര ഇടപെടൽ നടത്തണമെന്ന് എഐടിയുസി ജില്ലാ സെക്രട്ടറിയും സിപിഐ ജില്ലാ സെക്രട്ടറിയുമായ കെ.ജി. ശിവാനന്ദൻ ആവശ്യപ്പെട്ടു. വിവിധ ആവശ്യങ്ങൾ ഉന്നയിച്ചുകൊണ്ട് മത്സ്യ ത്തൊഴിൽ സംരക്ഷണ സംയുക്ത സമിതിയുടെ പ്രതിഷേധ സമരം ഉദ്ഘാടനംചെയ്തു സംസാരിക്കുകയായിരുന്നു അദ്ദേഹം. കായൽ ജലം മാലിന്യവിമുക്തമാക്കുക, രാസമാലിന്യ ജലം പുഴയിലേക്ക് ഒഴുക്കുന്ന കമ്പനികൾക്കെെതിരെ നടപടി സ്വീകരിക്കുക, കുളവാഴ പായൽ, ചണ്ടി എന്നിവയുടെ ഭീഷണിയിൽ നിന്നും മത്സ്യമേഖലയെ സംരക്ഷിക്കുക, മത്സ്യബന്ധനോപകരണങ്ങൾ നഷ്ടപ്പെടുന്ന മത്സ്യത്തൊഴിലാളികൾക്ക് സർക്കാർ നഷ്ടപരിഹാരം അനുവദിക്കുക, മത്സ്യമേഖലയെ സംരക്ഷിക്കുക, മത്സ്യ തൊഴിലാളികൾക്ക് തൊഴിൽ സുരക്ഷ ഉറപ്പുവരുത്തുക തുടങ്ങിയ ആവശ്യങ്ങൾ ഉന്നയിച്ചുകൊണ്ടാണ് പ്രതിഷേധ സമരം സംഘടിപ്പിച്ചത്. പി.കെ. മാധവൻ അധ്യക്ഷത വഹിച്ചു. ഇ.എസ്. ബാബു -ഐഎൻടിയുസി , കെ.ആർ വിദ്യാസാഗർ - ബിഎംഎസ്, കെ. സി. വർഗീസ് - ആർജെഡി, എൻ.കെ. തങ്കരാജ് - പ്രസിഡന്‍റ്്, കല്യാണദായനി സഭ, കെ.സി. സതീശൻ - എഐടിയുസി, വർഗീസ് - സിഐടിയു, വി.എസ്. സത്യൻ - ഐഎൻടിയുസി, പി.കെ. സജീവൻ, ടി.ആർ. ഉണ്ണികൃഷ്ണൻ എന്നിവർ പ്രസംഗിച്ചു.

ക്രൈസ്റ്റ് ടേബിള്‍ടെന്നീസ് ടൂര്‍ണമെന്‍റില്‍ ആമിറും മരിയയും ചാമ്പ്യന്മാര്‍

ഇരിങ്ങാലക്കുട: ക്രൈസ്റ്റ് അക്വാട്ടിക്ക് കോംപ്ലക്‌സില്‍ നടന്ന സംസ്ഥാന റാങ്കിംഗ് ടേബിള്‍ ടെന്നീസ് ടൂര്‍ണമെന്‍റില്‍ വനിതാ വിഭാഗത്തില്‍ ആലപ്പുഴയുടെ മരിയ റോണിയും പുരുഷ വിഭാഗത്തില്‍ ആലപ്പുഴയുടെ തന്നെ ആമിര്‍ അഫ്താബും വിജയികളായി. ആമിര്‍ പാലക്കാട് നിന്നുള്ള മുഹമ്മദ് നാഫിലിനെയും മരിയ ആലപ്പുയില്‍ നിന്നുള്ള റീവയെയും തോല്‍പ്പിച്ചാണ് വിജയികളായത്. ഈ ടൂര്‍ണമെന്റിലെ മികച്ച അക്കാദമിയായി ആലപ്പുഴ വൈഎംസിഎ അക്കാദമിയും രണ്ടാമതായി ഇരിങ്ങാലക്കുട ക്രൈസ്റ്റ് അക്കാദമിയും തെരഞ്ഞെടുക്കപ്പെട്ടു. ടൂര്‍ണമെന്‍റിന്‍റെ സമ്മാനദാനം സംസ്ഥാന ടേബിള്‍ തന്നെ അസോസിയേഷന്‍ സെക്രട്ടറി മൈക്കിള്‍ മത്തായി, തൃശൂര്‍ ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റ്് കെ.ആര്‍. സാംബശിവന്‍ ചേര്‍ന്ന് നിര്‍വഹിച്ചു. ക്രൈസ്റ്റ് കോളജ് മാനേജര്‍ ഫാ. ജോയ് പീണിക്കപ്പറമ്പില്‍, വിദ്യാനികേതന്‍ പ്രിന്‍സിപ്പല്‍ ഫാ. ജോയ് ആലപ്പാട്ട്, കോളജ് കായിക വിഭാഗം മേധാവി ഡോ. ബിന്‍റു ടി. കല്യാണ്‍, ഡോ. കെ.എം. സെബാസ്റ്റ്യന്‍ എന്നിവര്‍ സന്നിഹിതരായിരുന്നു.

കോനൂസ് അഗ്രോ ഓയിൽ കമ്പനി വാർഷികവും ഓണാഘോഷവും

ചാലക്കുടി: കോനൂസ് അഗ്രോ ഓയിൽ കമ്പനിയുടെ 48-ാം വാർഷികവും ഓണാഘോഷവും നടത്തി. മാനേജിംഗ് ഡയറക്ടർ കെ. ഒ. ഇട്ടൂപ്പ് ഉദ്ഘാടനം ചെയ്തു. ഡയറക്ടർ മിഥുൻ ഇട്ടൂപ്പ് അധ്യക്ഷത വഹിച്ചു. പാലക്കാട് മുൻ ജില്ലാ കളക്ടർ അലി അസ്കർ പാഷ മുഖ്യപ്രഭാഷണം നടത്തി. കെ.ജി. സ്കറിയ, വി.ബി. ബാലചന്ദ്രൻ, സി.എം. സത്യൻ, കെ.ഒ. പോൾ, ഡയറക്ടർ റിച്ച എന്നിവർ പ്രസംഗിച്ചു.

യാത്രയ്ക്കിടെ മറന്നുവച്ച പണം ഉടമയ്ക്കു നൽകി ഓട്ടോഡ്രൈവര്‍ മാതൃകയായി

ഇരിങ്ങാലക്കുട: ഓട്ടോയിൽനിന്നുകിട്ടിയ 15 ലക്ഷം രൂപ അടങ്ങിയ ബാഗും രേഖകളും ഉടമയ്ക്കുനല്‍കി ഓട്ടോ ഡ്രൈവറുടെ സത്യസന്ധത. കല്ലേറ്റുംകര റെയില്‍വേ സ്റ്റേഷന്‍ ഓട്ടോ സ്റ്റാന്‍ഡിലെ ഡ്രൈവര്‍ മാനാട്ടുകുന്ന് വലിയകത്ത് വീട്ടിലെ സിജു ആണ് മാതൃകാപ്രവര്‍ത്തനത്തിലൂടെ നാടിന്‍റെ പ്രശംസനേടിയത്. കല്ലേറ്റുംകരയിലാണ് സംഭവം. വേലു എന്ന വയോധികനാണ് സിജുവിന്‍റെ ഓട്ടോറിക്ഷയില്‍ 15 ലക്ഷം രൂപയും രേഖകളും അടങ്ങിയ ബാഗ് യാത്രയ്ക്കിടെ മറന്നുവച്ചത്. വാഹനം വാങ്ങിക്കാനായി കരുതിയതാണ് തുക. ബാഗ് കിട്ടിയ ഡെെ്രവർ സിജു ആളൂര്‍ പോലീസിൽ വിവരമറിയിച്ചു.ാഗ് നഷ്ടമായതോടെ പലയിടങ്ങളിലും വേലു അന്വേഷിച്ചുവെങ്കിലും കിട്ടിയില്ല. ഇതിനിടയിലാണ് ആളൂര്‍ പോലീസിന്‍റെ വിളിയെത്തിയത്. ആളൂര്‍ എസ്ഐ സുമേഷിന്‍റെ സാന്നിധ്യത്തില്‍ വേലുവിനു ബാഗ് കൈമാറി.

കെഎസ്‌യു, മഹിളാ കോൺഗ്രസ്, യൂത്ത് കോൺഗ്രസ് മാർച്ച്, ധർണ

കാർഷിക സർവകലശാല ഫീസ് വർധന: കെഎസ്‌യു മാർച്ച് നടത്തി തൃശൂർ: കാർഷിക സർവകലാശാലയിലെ ധന‌പ്രതിസന്ധി മറികടക്കുന്നതിനായി വിദ്യാർഥികൾക്കു മുകളിൽ ഭാരം അടിച്ചേൽപ്പിച്ച സർവകലാശാല നടപടി പ്രതിഷേധാർഹമെന്ന് കെ‌എസ്‌യു സംസ്ഥാന പ്രസിഡന്‍റ്് അലോഷ്യസ് സേവ്യർ. വിദ്യാർഥികളുടെ പോക്കറ്റടിക്കാനുള്ള ഏത് ശ്രമങ്ങളെയും ചെറുക്കുമെന്നും സർക്കാരിന് ഉത്തരവാദിത്വത്തിൽ നിന്ന് ഒളിച്ചോടാൻ ആകില്ലെന്നും അലോഷ്യസ് സേവ്യർ വ്യക്തമാക്കി. ഫീസ് വർധനവിനെതിരെ കെഎസ്‌യു സംസ്ഥാന കമ്മിറ്റിയുടെ നേതൃത്വത്തിൽ കാർഷിക സർവകലാശാല ആസ്ഥാനത്തേക്ക് സംഘടിപ്പിച്ച പ്രതിഷേധ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം.വിദ്യാർഥികളെ കൊള്ളയടിക്കുന്ന ഫീസ് വർധന അടിയന്തരമായി പിൻവലിക്കണം. സർക്കാരിന്‍റെ സാമ്പത്തിക പ്രതിസന്ധി പരിഹരിക്കുന്നതിനുള്ള ഉപാധിയായി വിദ്യാർഥികളെ പ്രയോഗിക്കാനാണ് ശ്രമമെങ്കിൽ ശക്തമായ പ്രതിഷേധം തുടരുമെന്നും കെഎസ് യു സംസ്ഥാന പ്രസിഡന്‍റ്് വ്യക്തമാക്കി. വിഷയത്തിൽ എസ്‌എഫ്‌ഐ നടത്തുന്നത് സമരനാടകമാണെന്നും അദ്ദേഹം കുറ്റപ്പെടുത്തി. സംസ്ഥാന കൺവീനർ അൻസിൽ ജലീൽ അധ്യക്ഷത വഹിച്ചു. യൂത്ത് കോൺഗ്രസ് പഞ്ചായത്ത് ഓഫീസ് ധർണ വടക്കാഞ്ചേരി: തെക്കുംകര ഗ്രാമപഞ്ചായത്ത് പുതുക്കി പ്രസിദ്ധീകരിച്ച വോട്ടർപട്ടികയിൽ വ്യാപക‌ക്രമക്കേടെന്ന് ആരോപിച്ച് യൂത്ത് കോൺഗ്രസ് തെക്കുംകര മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസിന് മുൻപിൽ പ്രതി ഷേധ ധർണ നടത്തി. ജീവിച്ചിരിക്കുന്നവരെ വോട്ടർ‌പട്ടികയിൽ‌നിന്ന് മരിച്ചവരുടെ പട്ടികയിൽ ഉൾ പ്പെടുത്തി ഒഴിവാക്കുകയും സ്ഥിരതാമസക്കാരായ വോട്ടർമാരെ വ്യാപകമായി വെട്ടിമാറ്റുകയും ചെയ്ത നടപടി പുനഃപരിശോധിച്ച് വോട്ടർ പട്ടിക പുനക്രമികരിച്ച് പ്രസിദ്ധീകരിക്കണമെന്നും ആവശ്യപ്പെട്ടായിരിന്നു ധർണ. യൂത്ത് കോൺഗ്രസ് സംസ്ഥാന ജനറൽ സെക്രട്ടറി മിഥുൻ മോഹൻ ഉദ്ഘാട നം ചെയ്തു. യൂത്ത് കോൺഗ്രസ് മണ്ഡലം പ്രസിഡന്‍റ് അനീഷ് കണ്ടംമാട്ടിൽ അധ്യക്ഷനായി. ഡിസിസി ജനറൽ സെക്രട്ടറി പി.ജെ. രാജു, പഞ്ചായത്ത് മെമ്പർ മാരായ എ.ആർ. കൃഷ്ണൻകുട്ടി, ലീന ജെറി, ഷൈബി ജോൺസൻ, നേതാക്ക ളായ കെ. ചന്ദ്രശേഖരൻ, തോമസ് പുത്തൂർ, കുട്ടൻ മച്ചാട്, വി.എ. ഷാജി, അഡ്വ. അഖിൽ സാമുവേൽ, എൻ.സി. ജോഷി തുടങ്ങിയവർ പങ്കെടുത്തു. കുന്നംകുളത്ത് മഹിളാകോൺഗ്രസ് മാർച്ച് കുന്നംകുളം: പോലീസ് അതിക്രമങ്ങളിൽ പ്രതിഷേധിച്ച് മഹിളാ കോൺഗ്രസിന്‍റെ ആഭിമുഖ്യത്തിൽ കുന്നംകുളം പോലീസ് സ്റ്റേഷനിലേക്ക് പ്രതിഷേധ മാർച്ച് സംഘടിപ്പിച്ചു. മാർച്ച് സ്റ്റേഷനുസമീപം ബാരിക്കേഡുവച്ച് പോലീസ് തടഞ്ഞു. പ്രവർത്തകരുടെ നേതൃത്വത്തിൽ ബാരിക്കേഡ് മറച്ചിടാനുള്ള ശ്രമവും ഉണ്ടായി. മഹിളാ കോൺഗ്രസ് സംസ്ഥാന ജനറൽ സെക്രട്ടറി സുബൈദ മുഹമ്മദ്, ജില്ലാ പ്രസിഡന്‍റ് ടി. നിർമല, സ്വപ്ന രാമചന്ദ്രൻ, റജീന വടക്കേക്കാട്, നിഷ അടാട്ട്, ഷീജ മണലൂർ, സഫീന കടവല്ലൂർ, കവിത പോർക്കുളം, മിഷ സെബാസ്റ്റ്യൻ തുടങ്ങിയവർ നേതൃത്വം നൽകി.

അപകടഭീഷണിയായി ദേശീയപാതയിലെ മൺതിട്ടകൾ

പുതുക്കാട്: ദേശീയപാത ആമ്പല്ലൂരിൽ അടിഞ്ഞുകൂടിയ മണ്ണ് അപകട ഭീഷണിയാകുന്നു. ചാല ക്കുടി ഭാഗത്തേക്കു പോകുന്ന റോഡില്‍ ശ്രീലക്ഷ്മി തീയറ്റര്‍ മുതല്‍ കെഎസ്ആര്‍ടിസി സ്റ്റാൻഡ് വരെയുള്ള ഭാഗത്താണു മണ്‍തിട്ട രൂപപ്പെട്ടിരിക്കുന്നത്. ഇതുമൂലം ഇരുചക്രവാഹനങ്ങള്‍ തെന്നിമറിഞ്ഞ് അപകടങ്ങൾ പതിവായിരിക്കുകയാണ്. ആമ്പല്ലൂരിലെ അടിപ്പാത നിര്‍മാണത്തെ തുടര്‍ന്ന് സർവീസ് റോഡിലൂടെ പോകുന്ന വാഹനങ്ങളില്‍ പറ്റിപ്പിടിച്ച മണ്ണ് അടിഞ്ഞുകൂടിയാണ് മണ്‍തിട്ട രൂപപ്പെട്ടത്. വാഹനയാത്രികര്‍ക്ക് ഭീഷണിയായ മണ്ണ് നീക്കം ചെയ്യാന്‍ ടോള്‍ കമ്പനിയും അടിപ്പാത കരാർ കമ്പനിയും ഇതുവരെ തയാറായിട്ടില്ല. ടോള്‍പിരിവ് നിര്‍ത്തിവച്ചതോടെ റോഡിന്‍റെ അറ്റകുറ്റപ്പണികള്‍ ഉൾപ്പടെയുള്ള സേവനങ്ങള്‍ ടോള്‍ കമ്പനി നിര്‍ത്തിവച്ചിരിക്കുകയാണ്. ദേശീയപാത അഥോറിറ്റി റോഡില്‍ അടിഞ്ഞുകൂടിയ മണ്ണ് നീക്കം‌ചെയ്ത് സുരക്ഷിത യാത്ര ഒരുക്കണമെന്നാണ് യാത്രക്കാരുടെ ആവശ്യം.

ഉത്സവകാലത്തിനു നാന്ദികുറിച്ച് വില്വാദ്രിനാഥന്‍റെ നിറമാല നാളെ

തിരുവില്വാമല: തിരുവില്വാമല ശ്രീ വില്വാദ്രിനാഥ ക്ഷേത്രത്തിലെ നിറമാല മഹോത്സവം നാളെ ആഘോഷിക്കും. മധ്യകേരളത്തിലെ ക്ഷേത്രോത്സവങ്ങൾക്ക് തുടക്കം കുറിക്കുന്ന നിറമാലക്കായി വില്വമലയിലെ ക്ഷേത്രസന്നിധി ഒരുങ്ങിക്കഴിഞ്ഞു. താമരപ്പൂമാല തോരണങ്ങളും കുലവാഴകളുംകൊണ്ട് കമനീയമായി അലങ്കരിച്ച അമ്പലമുറ്റത്തേക്ക് അതിരാവിലെ മുതൽതന്നെ നിറമാല ദർശനത്തിനായി ഭക്തരെത്തിത്തുടങ്ങും. കന്നിമാസത്തിലെ മുപ്പെട്ട് വ്യാഴാഴ്ചയാണ് തിരുവില്വാമല നിറമാലയായി ആഘോഷിക്കുന്നത്. കേരളത്തിലെ വാദ്യകലാകാരന്മാർ നാദാർച്ചനക്കായി വില്വാദ്രിനാഥ ക്ഷേത്രത്തിൽ എത്തും. ഏക്കം ഒഴിവാക്കി ഉടമസ്ഥർ ആനകളെ എഴുന്നള്ളിപ്പിന് എത്തിക്കുന്നതും നിറമാലയുടെ പ്രത്യേകതയാണ്. നാളെ രാവിലെ അഞ്ചിന് കലാമണ്ഡലം അച്യുതൻ, ഞ്ഞെരളത്ത് രാമദാസ്, സിന്ധു ശ്രീകുമാർ എന്നിവർ ചേർന്ന് അവതരിപ്പിക്കുന്ന അഷ്ടപദിയോടെ ഉത്സവത്തിന് തുടക്കമാകും. ആറിന് നാദസ്വരം. 8.30 ന് മേളത്തോടെയുള്ള ശീവേലി എഴുന്നള്ളിപ്പിൽ പഞ്ചാരിമേളത്തിന് കിഴക്കൂട്ട് അനിയൻമാരാരും ഉച്ചയ്ക്ക് രണ്ടിന് പഞ്ചവാദ്യത്തോടെയുള്ള കാഴ്ച ശീവേലിക്ക് കുനിശേരി അനിയൻമാരാരും പ്രമാണം വഹിക്കും. വൈകിട്ട് നാഗസ്വരക്കച്ചേരി, നിറമാല, ദീപാരാധന, വിളക്കുവയ്പ്, സോപാനസംഗീതം, കലാമണ്ഡലം ഡോ. ആർഎൽവി രാമകൃഷ്ണൻ നയിക്കുന്ന മോഹിനിയാട്ടം, ഭജൻസ്, തായമ്പക, മദ്ദളകേളി തുടർന്ന് ശീവേലി എഴുന്നള്ളിപ്പ് എന്നിവ നടക്കും. വെള്ളിയാഴ്ച രാവിലെ നാഗസ്വരത്തോടെ ഉത്സവത്തിനുസമാപനമാകും.

ഡയാലിസിസ് മെഷീൻ സമർപ്പണം ഇന്ന്

തൃശൂർ: അതിരൂപതയുടെ നേതൃത്വത്തിൽ വ്യാകുലമാതാവിൻ ബസിലിക്ക കേന്ദ്രീകരിച്ചു ജീവകാരുണ്യപ്രവർത്തനങ്ങൾ നടത്തുന്ന ഹെൽത്ത് കെയർ സൊസൈറ്റി ജില്ലാ സഹകരണ ആശുപത്രിയിലേക്കു ഡയാലിസിസ് മെഷീൻ നല്കുന്നതിന്‍റെ സമർപ്പണം ഇന്നു രാവിലെ ഒന്പതിനു രമേശ് ചെന്നിത്തല എംഎൽഎ നിർവഹിക്കും. ആർച്ച്ബിഷപ് മാർ ആൻഡ്രൂസ് താഴത്ത് അധ്യക്ഷത വഹിക്കും. ഹെൽത്ത് കെയർ സൊസൈറ്റി സെക്രട്ടറിയും റെക്ടറുമായ ഫാ. തോമസ് കാക്കശേരി അനുഗ്രഹപ്രഭാഷണം നടത്തും. സൊസൈറ്റി പ്രസിഡന്‍റ് ടി.കെ. അന്തോണിക്കുട്ടി, ട്രിച്ചൂർ അർബൻ കോ ഓപ്പറേറ്റീവ് ബാങ്ക് ചെയർമാൻ പോൾസൺ ആലപ്പാട്ട്, ആശുപത്രി പ്രസിഡന്‍റ് ടി.കെ. പൊറിഞ്ചു, നെഫ്രോളജിസ്റ്റ് ഡോ. വിനോജ് ബാബുരാജ് എന്നിവർ പ്രസംഗിക്കും.

നടപ്പാത കൈയേറി വൈദ്യുതി പോസ്റ്റ് സ്ഥാപിച്ചെന്നു പരാതി

വരന്തരപ്പിള്ളി: വേലൂപ്പാടത്തു സ്വകാര്യവ്യക്തിയുടെ വഴി കൈയേറി കെഎസ്ഇബി അധികൃതര്‍ വൈദ്യുതി പോസ്റ്റ് സ്ഥാപിച്ചതായി പരാതി. വേലൂപ്പാടം മഠം സ്വദേശി പെരുവാന്‍കുഴിയില്‍ സൂപ്പിയുടെ ഉടമസ്ഥതയിലുള്ള വഴിയിലാണ് അനുവാദം ചോദിക്കാതെ പോസ്റ്റ് സ്ഥാപിച്ചത്. സൂപ്പിയുടെ പറമ്പിലേക്കുള്ള രണ്ടുകോല്‍ വഴിയില്‍ പോസ്റ്റ് സ്ഥാപിച്ചതോടെ നടക്കാന്‍ കഴിയാത്ത സ്ഥിതിയായെന്നു സ്ഥലമുടമ പറഞ്ഞു. 60 സെന്‍റ് വരുന്ന പറമ്പിലേക്കുള്ള ഏകമാര്‍ഗമാണ് ഈ വഴി. ഭൂമി കൈയേറി പോസ്റ്റ് സ്ഥാപിച്ചതോടെ പറമ്പിലേക്കുള്ള വളവും മറ്റും കൊണ്ടുപോകാന്‍ കഴിയാത്ത അവസ്ഥയാണെന്നു സൂപ്പി പറഞ്ഞു. പോസ്റ്റ് നീക്കംചെയ്യണമെന്നാവശ്യപ്പെട്ട് സൂപ്പി വരന്തരപ്പിള്ളി കെഎസ്ഇബി അധികൃതര്‍ക്കു പരാതിനല്‍കി.

പാവറട്ടി ആശ്രമദേവാലയത്തിൽ തിരുനാളിനും 40 മണിക്കൂർ ആരാധനയ്ക്കും കൊടിയേറി

പാവറട്ടി: സെന്‍റ് തോമസ് ആശ്രമ ദേവാലയത്തിൽ വിശുദ്ധ കൊച്ചുത്രേസ്യയുടെ തിരുനാളിനും 40 മണിക്കൂർ ആരാധനയ്ക്കും കൊ ടിയേറി. ആശ്രമാധിപൻ ഫാ. ജോ സഫ് ആലപ്പാട്ട് കൊടിയേറ്റി. തിരുനാൾദിനം വരെയുള്ള ദിവസങ്ങളിൽ വൈകീട്ട് അഞ്ചിന് ദിവ്യബലിയും നവനാൾ തിരുക്കർമങ്ങളും നടക്കും. ആശ്രമദേവാലയത്തിൽ 40 മണിക്കൂർ ആരാധന 25, 26, 27 തീയ തികളിലും വിശുദ്ധ കൊച്ചുത്രേസ്യയുടെ തിരുനാളും ആശ്രമദേവാലയത്തിലെ ശതാബ്ദി ആഘോ ഷം 28നും നടക്കും. 25 ന് വൈകീട്ട് നടക്കുന്ന ആഘോഷമായ ദിവ്യബലി, വചന‌സന്ദേശം, ദിവ്യകാരുണ്യ പ്രദക്ഷിണം എന്നിവയ്ക്ക് ഫാ. പോൾസൺ പാലിയേക്കര മുഖ്യകാർമികത്വം വഹിക്കും. തുടർന്ന് 40 മണിക്കൂർ ആരാധനയ്ക്കു തുടക്കമാകും. 27ന് രാവിലെ 10നുള്ള ആഘോ ഷമായ ദിവ്യബലിക്ക് വികാർ ജനറാൾ ഫാ. ജോസി താമരശേരി മുഖ്യകാർമികത്വം വഹിക്കും. ഫാ. ആൽവിൻ അറക്കൽ സന്ദേ ശം നൽകും. തുടർന്നു നടക്കു‌ന്ന ദിവ്യകാരുണ്യപ്രദക്ഷിണത്തോടെ ആരാധനയ്ക്കു സമാപനമാകും. വിശുദ്ധ കൊച്ചുത്രേസ്യയുടെ വള എഴുന്നള്ളിപ്പ് രാത്രി എട്ടോടെ ആശ്രമ‌ദേവാലയത്തിൽ എത്തിച്ചേരും. തുടർന്ന് വർണമഴ. 28ന് രാവിലെ 10 നുള്ള ആഘോ ഷമായ തിരുനാൾഗാനപൂജയ് ക്ക് ദേവമാത സ്കൂൾ പ്രിൻസിപ്പൽ ഫാ. ജോയ്സ് എലുവത്തിങ്കൽ മുഖ്യകാർമികത്വം വഹിക്കും. ക്രൈസ്റ്റ് കോളജ് പ്രിൻസിപ്പൽ ഫാ. ജോളി മാളിയേക്കൽ വചനസന്ദേശം നൽകും. തുടർന്ന് പ്രദ ക്ഷിണം, തിരുശേഷിപ്പ് ചുംബനം.

പ്രഫ. എം. മുരളീധരൻ സ്മാരക നാടകോത്സവം

തൃശൂർ: മൂന്നാമത് പ്രഫ. എം. മുരളീധരൻ സ്മാരക നാടകോത്സവം റീജണൽ തിയറ്ററിൽ നാടക-സിനിമാതാരം സജിത മഠത്തിൽ ഉദ്ഘാടനം ചെയ്തു. അഡ്വ. വി.ഡി. പ്രേംപ്രസാദ് അധ്യക്ഷത വഹിച്ചു. കൊച്ചിൻ ദേവസ്വം ബോർഡ് പ്രസിഡന്‍റ് കെ. രവീന്ദ്രൻ പ്രഫ. എം. മുരളീധരൻ അനുസ്മരണം നിർവഹിച്ചു. കരിവെള്ളൂർ മുരളി, അശോകൻ ചരുവിൽ, ഡോ. സി. രാവുണ്ണി, ഡോ. എം.എൻ. വിനയകുമാർ, ഡോ. പ്രഭാകരൻ പഴശി, കെ. രമ തുടങ്ങിയവർ പ്രസംഗിച്ചു. പഞ്ചാബി സംവിധായിക നീലം മാൻസിംഗ് ചൗധരിയുടെ സംവിധാനത്തിൽ സ്കൂൾ ഓഫ് ഡ്രാമയുടെ കൾട്ടിന്‍റെ തമാശ എന്ന നാടകവും അരങ്ങേറി.

നാലാം ചൊവ്വാഴ്ചാചരണം ഭക്തിനിർഭരമായി

ഒല്ലൂർ: സെന്‍റ് ആന്‍റണീസ് ഫൊറോന പള്ളിയിലെ വിശുദ്ധ റപ്പായേൽ മാലാഖയുടെ തിരുനാളിനു പ്രാരംഭമായുള്ള നാലാം ചൊവ്വാഴ്ചാചരണം വിവിധ പരിപാടികളോടെ നടന്നു. രാവിലെ നടന്ന ദൂതപാത, ലദിഞ്ഞ്, ആഘോഷമായ വിശുദ്ധകുർബാന, സന്ദേശം നൽകൽ, നൊവേന, ദിവ്യകാരുണ്യ ആരാധന, പ്രദക്ഷിണം എന്നിവയ്ക്ക് ആഗ്ര ആർച്ച്ബിഷപ് ഡോ. റാഫി മഞ്ഞളി മുഖ്യകാർമികത്വം വഹിച്ചു. ഫൊറോന വികാരി ഫാ. വർഗീസ് കുത്തൂർ, ഫാ. എഡ്‌വിൻ ഐനിക്കൽ, ഫാ. തേജസ് കുന്നപ്പിള്ളി എന്നിവർ സഹകാർമികരായി. ആർച്ച്ബിഷപ്പിനെ വികാരി, അസിസ്റ്റന്‍റ് വികാരി, ട്രസ്റ്റിമാരായ ആന്‍റണി ജോർജ് അക്കര, ഷാജു പടിക്കല, ജോഫി ചിറമ്മൽ, ജെയ്സണ്‍ പ്ലാക്കൽ, തിരുനാൾ കമ്മിറ്റി ഭാരവാഹികൾ എന്നിവർ ചേർന്നു സ്വീകരിച്ചു. ലെയോ പതിനാലാമൻ മാർപാപ്പ പുനഃസംഘടിപ്പിച്ച അന്തർദേശീയ മതാന്തരസംവാദസമിതിയിലെ ഇന്ത്യയിൽനിന്നുള്ള പ്രതിനിധിയായി തെരഞ്ഞെടുക്കപ്പെട്ട ആർച്ച്ബിഷപ്പിന് പള്ളി പ്രത്യേക അനുമോദനവും നൽകി. നേർച്ചഭക്ഷണവിതരണം, രാവിലെ 6.30 നും 7.30 നും തിരുക്കർമങ്ങൾ എന്നിവ ഉണ്ടായിരുന്നു. രാത്രി ഏഴിനു നടന്ന തിരുക്കർമങ്ങൾക്കു ഫാ. ജിൻസണ്‍ ചിരിയങ്കണ്ടത്ത് കാർമികത്വം വഹിച്ചു.

അമലയിൽ അത്യാധുനിക എഫാരിസിസ് മെഷീൻ പ്രവർത്തനസജ്ജം

തൃശൂർ: അമല മെഡിക്കൽ കോളജിൽ രക്തശേഖരണത്തിന് ഉതകുന്ന അത്യാധുനിക സ്പെക്ട്ര ഒപ്ടിയ എഫാരിസിസ് മെഷീൻ സ്ഥാപിച്ചു. ഇത്തരം രണ്ടു മെഷീനുള്ള മധ്യകേരളത്തിലെ ആദ്യ ആരോഗ്യ സ്ഥാപനമാണ് അമല. ഒരേസമയം കൂടുതൽ പേരിൽനിന്നു രക്തം ശേഖരിക്കാനും വിവിധതരം രോഗികൾക്കു ചികിത്സ നൽകാനും ഇതിലൂടെ സാധിക്കും. ബിഷപ് എമരിറ്റസ് മാർ ജേക്കബ് മനത്തോടത്ത് ഉദ്ഘാടനം ചെയ്തു. ഡയറക്ടർ ഫാ. ജൂലിയസ് അറയ്ക്കൽ പ്രസംഗിച്ചു.

സിൽവർ ജൂബിലി ആഘോഷിച്ചു

തൃശൂർ: പൗരസ്ത്യ കൽദായ സുറിയാനിസഭ നെല്ലിക്കുന്ന് മാർ തിമോഥെയൂസ് പള്ളിയിലെ ഇടവകദിന സിൽവർ ജൂബിലി ആഘോഷങ്ങളുടെ ഭാഗമായി നടന്ന പൊതുസമ്മേളനം മാർ ഔഗിൻ കുര്യാക്കോസ് മെത്രാപ്പോലീത്ത ഉദ്ഘാടനം ചെയ്തു. റവ. ജാക്സ് ചാണ്ടി കശീശ അധ്യക്ഷത വഹിച്ചു. ജനറൽ കണ്‍വീനർ ഷിജ ജോണ്‍സണ്‍, കൈക്കാരന്മാരായ തിമത്തി മാളിയേക്കൽ, വർഗീസ് തേയ്ക്കാനത്ത്, എം.ആർ. പ്രിൻസ് എന്നിവർ പ്രസംഗിച്ചു. രാവിലെ വികാരി റവ. ജാക്സ് ചാണ്ടി കശീശയുടെ പ്രധാന കാർമികത്വത്തിൽ വിശുദ്ധ കുർബാന, പൊതു അന്നീദ, കൊടിയേറ്റം എന്നിവ ഉണ്ടായിരുന്നു. റവ. ബിനോയ് നിരപ്പത്ത് കശീശ സഹകാർമികനായി. ഫ്യൂഷൻ ഡാൻസ്, നറുക്കെടുപ്പ്, വിമണ്‍ യൂത്ത് സിന്‍റെ കർഷകമിത്രം അവാർഡ് വിതരണം എന്നിവയും ഉണ്ടായി.

ജൂബിലി മിഷൻ കോളജ് ഓഫ് നഴ്സിംഗ് വിദ്യാർഥികൾക്ക് ഐഎസ്ആർഒ പുരസ്കാരം

തൃശൂർ: ദേശീയ ബഹിരാകാശദിനം 2025നോടനുബന്ധിച്ച് ഐഎസ്ആർഒ നടത്തിയ വിവിധ ഇനം മത്സരങ്ങളിൽ സമ്മാനാർഹരായ ജൂബിലി മിഷൻ കോളജ് ഓഫ് നഴ്സിംഗ് വിദ്യാർഥികളായ അൻസുഅലിച്ചൻ (പെയിന്‍റിംഗ്), ക്രിസ്മരിയ വിജി (മലയാളം കവിതാരചന), ഫാത്തിമ ഷഹനാസ് (ഡിജിറ്റൽ പോസ്റ്റർ ), രാധിക രമേശൻ (പെൻസിൽ ഡ്രോയിംഗ്), അയിഷ റന ( മലയാളം ആൻഡ് ഇംഗ്ലീഷ് ഉപന്യാസരചന), കാതറിൻ ബെന്നി (ഇംഗ്ലീഷ് ഉപന്യാസരചന) എന്നിവർ കോളജ് പ്രിൻസിപ്പൽ റവ.ഡോ. സിസ്റ്റർ ജൂഡി എസ്‌ഐസി, വൈസ് പ്രിൻസിപ്പൽ റവ.ഡോ. സിസ്റ്റർ ട്രീസ ആന്‍റോ എന്നിവരുടെ സാന്നിധ്യത്തിൽ പുരസ്കാരങ്ങൾ ഏറ്റുവാങ്ങി.

പുല്ലൂരില്‍ മലിനജലം തള്ളിയതായി പരാതി

പുല്ലൂര്‍: മിഷന്‍ ആശുപത്രിക്ക് സമീപം ഉരിയച്ചിറയോടുചേര്‍ന്ന് മലിനജലം തള്ളിയതായി പരാതി. കഴിഞ്ഞ ദിവസം രാത്രിയാണ് മലിനജലം തള്ളിയതെന്ന് കരുതുന്നതായി പരാതിയില്‍ പറയുന്നു. തിരക്കേറിയ ഇരിങ്ങാലക്കുട- ചാലക്കുടി റോഡിലാണ് മലിന ജലം കെട്ടിക്കിടക്കുന്നത്. വഴിയാത്രക്കാരും സമീപത്തെ വ്യാപാരികളും ദുസഹമായ ദുര്‍ഗന്ധമാണ് അനുഭവിക്കുന്നത്. കുറ്റക്കാര്‍ക്കെതിരേ കര്‍ശനനടപടി സ്വീകരിക്കണമെന്ന് വ്യാപാരി വ്യവസായി ഏകോപനസമിതി പുല്ലൂര്‍- അവിട്ടത്തൂര്‍- തൊമ്മന യൂണിറ്റ് പ്രസിഡന്‍റ് ബൈജു മുക്കുളം, സെക്രട്ടറി ബെന്നി അമ്പഴക്കാടന്‍, ട്രഷറര്‍ ഷിബു കാച്ചപ്പിള്ളി എന്നിവര്‍ ആവശ്യപ്പെട്ടു. ഇതുസംബന്ധിച്ച് പോലീസിലും ആരോഗ്യവിഭാഗത്തിലും പരാതി നല്‍കി.

മദ്യപിച്ച് റോഡിൽകിടന്ന വയോധികന്‍റെ ദേഹത്ത് ചൂടുവെള്ളമൊഴിച്ച് പൊള്ളിച്ചതായി പരാതി

വടക്കാഞ്ചേരി: മദ്യപിച്ച് റോഡിൽകിടന്ന വയോധികന്‍റെ ദേഹത്ത് ചൂടുവെള്ളമൊഴിച്ച് പൊള്ളിച്ചതായി പരാതി. ഗുരുതരമായി പരിക്കേറ്റ തെക്കുംകര 18-ാം വാർഡ് പുന്നംപറമ്പ് ഹരിതനഗറിൽ താമസിക്കുന്ന ശശിക്കാണ് ഗുരുതരമായി പോള്ളലേറ്റത്. ശശിയെ തൃശൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഗുരുതരമായി പൊള്ളലേറ്റ ശശിയെ നാട്ടുകാരാണ് ആശുപത്രിയിലെത്തിച്ചത്. വയോധികന്‍റെ ചികത്സയ്ക്കായി നാട്ടുകാരുടെ നേതൃത്വത്തിൽ ചികിത്സാ ധനസമാഹരണം നടത്തുന്നുണ്ട്. സംഭവത്തിൽ കുറ്റക്കാരെ ഉടൻ കണ്ടെത്തി നടപടി സ്വീകരിക്കണമെന്നാണു നാട്ടുകാരുടെ ആവശ്യം.

വ്യോമസേന ഉദ്യോഗസ്ഥനു നൂറിന്‍റെ നിറവ്; ആദരവുമായി ഉദ്യോഗസ്ഥർ വീട്ടിലെത്തി

ഗുരുവായൂർ: നൂറിന്‍റെ നിറവിലെത്തിയ മുൻ വ്യോമസേന ഉദ്യോഗസ്ഥന് പിറന്നാ ളാഘോഷത്തിൽ ആദരവുമായി വ്യോമസേന ഉദ്യോഗസ്ഥർ വീട്ടിലെത്തി. തിരുവെങ്കിടം കുരുവിട്ടി വാസുദേവനാണ് ഇന്നലെ ഔദ്യോഗികസ്മരണകളോടെ പിറന്നാളാഘോഷിച്ചത്. സുളൂർ എയർഫോഴ്സിലെ ഉദ്യോഗസ്ഥരും പുതിയ തലമുറയിലെ അഗ്നിവീർ ഉദ്യോഗസ്ഥയും യൂണിഫോമിൽ വീട്ടിലെത്തി വാസുദേവനെ ആദരിച്ചു. വാസുദേവൻ സേവനം അനുഷ്ഠിച്ച റെജിമെന്‍റിലെ ജീവിച്ചിരിക്കുന്ന ഏകവ്യക്തിയാണ് വാസുദേവൻ. റെജിമെന്‍റിലെ പുതിയ തലമുറ സൈനികനെ ആദരിക്കാനെത്തിയത് പിറന്നാൾ ആഘോഷത്തിന് ഇരട്ടി മധുരമായി. 1942ൽ ബ്രിട്ടീഷ് റോയൽ എയർഫോഴ്സിൽ ക്രിറ്റോഗ്രാഫറായി തുടങ്ങി പിന്നീട് 1980ൽ പൂനെയിലെ ഇന്ത്യൻ എയർഫോഴ്സിൽ‌നിന്ന് ഓണററി ഫ്ലൈയിംഗ് ഓഫീസറായി വിരമിച്ചു. നിരവധി പുരസ്കാരങ്ങൾ ലഭിച്ചിട്ടുള്ള വാസുദേവൻ 1947-ൽ ഡൽഹിയിൽ നടന്ന ആദ്യ പരേഡിലും രജതജൂബിലി പരേഡിലും പങ്കെടുത്തിട്ടുണ്ട്.

വചനപ്പൂക്കളം ഒരുക്കിയതിൽ ബെസ്റ്റ് ഓഫ് ഇന്ത്യ റിക്കാർഡ്

തൃശൂർ: മുക്കാട്ടുകര സെന്‍റ് ജോർജ്സ് ദേവാലയത്തിലെ വിശ്വാസപരിശീലന യൂണിറ്റിന്‍റെ നേതൃത്വത്തിൽ ഒരുക്കിയ വചനപ്പൂക്കളത്തിനു ബെസ്റ്റ് ഓഫ് ഇന്ത്യ റിക്കാർഡ്. 416 വിദ്യാർഥികളും 40 അധ്യാപകരും ചേർന്ന് സന്പൂർണ ബൈബിൾ എഴുതിയ 22,322 സ്റ്റിക്കി നോട്ട് ഉപയോഗിച്ച് 1227 സ്ക്വയർഫീറ്റിൽ രണ്ടു മണിക്കൂർ 59 മിനിറ്റ് 11 സെക്കൻഡിലാണ് പള്ളിഹാളിൽ വചനപ്പൂക്കളം തീർത്തത്. ഇതു രണ്ടാംതവണയാണ് വിശ്വാസപരിശീലന യൂണിറ്റ് റിക്കാർഡ് കരസ്ഥമാക്കുന്നത്. കഴിഞ്ഞവർഷം കുറഞ്ഞ സമയത്തിൽ പുതിയനിയമം പകർത്തിയെഴുതിയതിനായിരുന്നു ആദ്യ റിക്കാർഡ്. ബെസ്റ്റ് ഓഫ് ഇന്ത്യ റിക്കാർഡ്സ് അധികൃതരുടെ സാന്നിധ്യത്തിലായിരുന്നു പ്രോഗ്രാം. തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ റിക്കാർഡ് പ്രഖ്യാപനത്തിൽ സന്നിഹിതനായിരുന്നു. വികാരി ഫാ. പോൾ പിണ്ടിയാൻ, സഹവികാരി ഫ്രാൻസിസ് പുത്തൂക്കര, പ്രിൻസിപ്പൽ സിസ്റ്റർ ആൻസി മരിയ, പ്രോഗ്രാം കമ്മിറ്റി അംഗങ്ങളായ വേൾഡ് റിക്കാർഡ് ഇവന്‍റ് കോഓർഡിനേറ്റർ ജെസ്‌വിൻ സാജു (സെക്രട്ടറി), ഷിജു വർഗീസ്, ആന്‍റോ പോൾ, ജോസഫ് ആന്‍റണി, വർഗീസ് തലക്കോടൻ, റിന്‍റോ ജോസ്, ആൻസൻ വർഗഗീസ്, പ്രിൻസ് മേനാച്ചേരി, പി.വി. വിജി, ലിജോ ജോസ് എന്നിവർ നേതൃത്വം നൽകി.

ജനവാസമേഖലകളിൽ കാട്ടാനകളിറങ്ങി നാട്ടുകാരുടെ ഉറക്കംകെടുത്തുന്നു

വടക്കാഞ്ചേരി: ജനവാസമേഖലകളിൽ കഴിഞ്ഞ ദിവസം വീണ്ടും കാട്ടാനകളിറങ്ങി നാട്ടുകാരുടെ ഉറക്കം കെടുത്തുന്നു. കഴിഞ്ഞ ഒരാഴ്ചയായി നഗരസഭയിലെ ചേപ്പലക്കോട് മേഖലയിലാണു കാട്ടാനക്കൂട്ടമിറങ്ങി പ്രദേശവാസികളുടെ ഉറക്കം കെടുത്തുന്നത്. വീടുകളുടെ സമീപത്തുവരെ ദിവസവും രാത്രി കാട്ടാനകളെത്തുന്നുണ്ടെന്നാണു നാട്ടുകാർ പറയുന്നത്. ദിവസവും രാത്രിയെത്തുന്ന കാട്ടാനകൾ വിവിധ കൃഷികളും നശിപ്പിക്കുന്നുണ്ട്. പുലർച്ചെ റബർ വെട്ടാൻ‌പോലും തൊഴിലാളികൾക്കു പോകാൻ കഴിയാത്ത അവസ്ഥയാണ്. നിരവധി റബർ മരങ്ങളും പനകളും തെങ്ങുകളുമാണു കുത്തിമറച്ചിട്ടിരിക്കുന്നത്. പാട്ടകൊട്ടിയും പടക്കംപൊട്ടിച്ചും ബഹളംവച്ചും പഴയ രീതിയിൽ ആനകളെ തുരത്താൻ കഴിയില്ലെന്ന് നാട്ടുകാർപറയുന്നു. വനംവകുപ്പ് ഉദ്യോഗസ്ഥർ വിഷയത്തിൽ ഇടപെട്ട് കാട്ടാനകളെ ജനവാസമേഖലയിൽ‌നിന്നും അകറ്റണമെന്നാണ് പ്രദേശവാസികൾ ആവശ്യപ്പെടുന്നത്. ജനങ്ങളുടെ സ്വത്തിനും ജീവനും സംരക്ഷണം നൽകണമെന്നാണ് നാട്ടുകാരുടെ ആവശ്യം.

ചേറ്റുവ ലൈറ്റ് ഹൗസിൽ ഗുണ്ട് പൊട്ടിച്ചു; നാലുപേർ പിടിയിൽ

ചാവക്കാട്: കടപ്പുറംതൊട്ടാപ്പിലെ ചേറ്റുവ ലൈറ്റ് ഹൗസിൽ സ്ഫോ ടക വസ്തുപൊട്ടിച്ച സംഭവത്തിൽ നാലുപേർ പിടിയിൽ. മണത്തല ബേബി റോഡ് സ്വദേശികളായ കോലയിൽ അബുതാഹീർ (30), മടപ്പേൻ ഹിലാൽ (27), കല്പിങ്ങൽ ഷാമിൽ (27), ഇള‌യേടത്ത് ഷുഹൈബ് (27) എന്നിവരെയാണ് ഗുരുവായൂർ എസിപി പ്രേമാനന്ദകൃഷ്ണൻ, ചാവക്കാട് എസ്എച്ച്ഒ വി.വി. വിമൽ എന്നിവരുടെ നേതൃത്വത്തിൽ അറസ്റ്റ് ചെയ്തത്. സ്ഫോടനത്തിനിടയിൽ കൈപ്പത്തി തകർന്ന് തൃശൂരിലെ സ്വകാര്യ ആശുപത്രിയിൽകഴിയുന്ന ഒന്നാം പ്രതി ആലുങ്ങൽ സൽമാൻ ഫാരിസ് (27) പോലീസ് നിരീക്ഷണത്തിൽ ആ‌ശുപത്രിയിലാണ്. കേന്ദ്ര സർക്കാരിന്‍റെ സ്ഥാപനമായ, നിരവധി ടൂറിസ്റ്റുകൾ വന്നുപോകുന്ന ലൈറ്റ് ഹൗസിൽ സ്ഫോടക‌വസ്തുവച്ച് പൊട്ടിച്ച് പൊതുജനങ്ങളെയും ടൂറിസ്റ്റുകളെയും ഭീതിപ്പെടുത്തി, സംഘർഷ‌സാധ്യതയുണ്ടാക്കി, ലൈറ്റ് ഹൗസിന് കേടുപാടുകൾ വരുത്തി എന്നീ കേസുകളിലാണ് അറസ്റ്റ്. എസ്ഐ ശരത് സോമൻ, എസ്‌ഐ ഫൈസൽ, എഎസ്ഐ അൻവർ സാദത്ത്, സീനിയർ സിപിഒ ഷിഹാബ്, സിപിഒമാരായ ടി. അരുൺ, ബിന്ദു, രഞ്ജിത്ത് എന്നിവരും അറസ്റ്റ് സംഘത്തിൽ ഉണ്ടായിരുന്നു. സമഗ്ര അന്വേഷണം വേണം: ബിജെപി ചാവക്കാട്: ലൈറ്റ് ഹൗസിൽ ഉണ്ടായ സ്ഫോടനത്തിന്‍റെ ദുരൂഹത നീക്കി സമഗ്രമായ അന്വേഷണം നടത്തണമെന്ന് ബിജെപി ജില്ലാ പ്രസിഡന്‍റ് അഡ്വ. നിവേദിത സുബ്രഹ്മണ്യൻ ആവശ്യപ്പെട്ടു. ലൈറ്റ് ഹൗസ് പോലെയുള്ള അതീവ സുരക്ഷാ മേഖലയിൽ എങ്ങനെയാണ് ഇത്തരമൊരു സ്ഫോടനം ഉണ്ടാവാനുള്ള സാഹചര്യമുണ്ടായതെന്ന് സുരക്ഷാ ഉദ്യോഗസ്ഥർ വ്യക്തമാക്കണം. തീരദേശ വാസികൾക്കും പൊതുജനങ്ങൾക്കും സുരക്ഷിതത്വം നൽകുന്നില്ലെന്ന് ബിജെപി ആരോപിച്ചു. സ്ഫോടനം നടന്ന സംഭവത്തിൽ സമഗ്രമായ അന്വേഷണം നടത്തി സംഭവത്തിനു പിന്നിലുള്ളവരെ പോലീസ് കണ്ടെത്തണം. അല്ലാത്ത‌പക്ഷം പ്രതിഷേധ നടപടിയുമായി മുന്നോട്ടുപോകുമെന്നും വിഷയം കേന്ദ്ര ഏജൻസികളുടെ ശ്രദ്ധയിൽ എത്തിക്കുമെന്നും നോർത്ത് ജില്ലാ പ്രസിഡന്‍റ്്, അഡ്വ. നിവേദിത സുബ്രഹ്മണ്യൻ, ബിജെപി നേതാവ് ഗണേഷ് ശിവജി എന്നിവർ അറിയിച്ചു. റീൽസ് ചിത്രീകരിച്ച് അകത്തായി ചാവക്കാട്: കടപ്പുറം തൊട്ടാപ്പിലെ ചേറ്റുവ ലൈറ്റ് ഹൗസിനു മുകളിൽ കയറിയ സന്ദർശകരിൽ ഒരാൾ ഗുണ്ട് പൊട്ടിച്ച സംഭവത്തിൽ പരിക്കേറ്റ യുവാവ് ഉൾപ്പടെ അഞ്ചുപേർക്കെതിരെ ചാവക്കാട് പോലീസ് കേസെടുത്തു, നാലുപേരെ അറസ്റ്റ് ചെയ്തു. ഒന്നാം പ്രതി പോലീസ് കാവലിൽ ആശുപത്രിയിലാണ് . ഞായറാഴ്ച വൈകീട്ട് ലൈറ്റ് ഹൗസ് സന്ദർശിക്കാൻ മുകളിൽ കയറിയ യുവാക്കളാണ് അതീവ സുരക്ഷാ മേഖലയായ ലൈറ്റ്ഹൗസിനു മുകളിൽ ഗുണ്ട് പൊട്ടിച്ചത്. അഞ്ചംഗ സംഘത്തിലെ ഒരാളാണ് കൈയിൽ കരുതിയിരുന്ന ഗുണ്ട് മുകളിൽ‌വച്ച് പൊട്ടിച്ചത്. ലൈറ്റ് ഹൗസിന്‍റെ മുകളിൽനിന്ന് കത്തിച്ച ഗുണ്ട് താഴേക്ക് ഇടുന്നത് റീൽസിനുവേണ്ടി ചിത്രീകരിക്കാനാണ് ഗുണ്ടിന് തീ കൊടുത്തത്. ഗുണ്ട് താഴെക്ക് ഇടാൻ ശ്രമിക്കുമ്പോഴാണ്, താഴെ നിറയെ സന്ദർശകർ നിൽക്കുന്നതുകണ്ടത്. ഗുണ്ട് താഴെക്ക് ഇടാതെ പിടിച്ചുനിൽക്കുന്നതിനിടയിൽ പൊട്ടി. ലൈറ്റ് ഹൗസിനു മുകളിൽ നിന്നും ഉഗ്ര‌ശബ്ദം കേട്ടതോടെ ജനങ്ങൾ പരിഭ്രാന്തരായി. ശബ്ദംകേട്ട് ലൈറ്റ് ഹൗസ് ഉദ്യോഗസ്ഥരും മറ്റും എത്തിയെങ്കിലും യുവാക്കളുടെ സംഘം പരിക്കേറ്റ ആളുമായി സ്ഥലം വിട്ടിരുന്നു. ചാവക്കാട്, കോസ്റ്റൽ പോലീസ് സംഘങ്ങൾ സ്ഥലത്തെത്തി അന്വേഷണം നടത്തി. യുവാവ് ആശുപത്രിയിൽ എത്തിയതായി വിവരം ലഭിച്ചതിനെ തുടർന്ന് നടത്തിയ അന്വേഷണത്തിലാണ് നാലുപേർ പിടിയിലായത്. അറസ്റ്റ് നടന്നെങ്കിലും പോലീസ് അന്വേഷണം ഊർജിതമാക്കി. തൃശൂരിൽ നിന്ന് ബോംബ് - ഡോഗ് സ്ക്വാഡ് സംഘം ലൈറ്റ്ഹൗസിൽ എത്തി അന്വേഷണം നടത്തി.

എഐഎസ്എഫിന്‍റെ കാർഷികവാഴ്സിറ്റി മാർച്ചിൽ സംഘർഷം

മണ്ണുത്തി: ഫീസ് വർധന പിൻവലിക്കണമെന്ന് ആവശ്യപ്പെട്ട് കാർഷികസർവകലാശാല ആസ്ഥാനത്തേക്ക് എഐഎസ്എഫ് നടത്തിയ മാർച്ചിൽ സംഘർഷം. അഡ്മിനിസ്ട്രേറ്റീവ് ബ്ലോക്കിനുസമീപം മാർച്ച് പോലീസ് തടഞ്ഞു. ഇതോടെ ഏതാനും പ്രവർത്തകർ പോലീസ് വലയം ഭേദിച്ച് അഡ്മിനിസ്ട്രേറ്റീവ് ബ്ലോക്കിലേക്കു തള്ളിക്കയറാൻ ശ്രമിച്ചതാണ് ബലപ്രയോഗത്തിനിടയാക്കിയത്. പിടിവലിക്കിടെ ചില പ്രവർത്തകർ നിലത്തുവീണു. പ്രതിഷേധക്കാരെ പോലീസ് ബലം പ്രയോഗിച്ച് അറസ്റ്റ് ചെയ്തുനീക്കി. എഐഎസ്എഫ് സംസ്ഥാന ജോയിന്‍റ് സെക്രട്ടറി കെ.എ. അഖിലേഷ് മാർച്ച് ഉദ്ഘാടനം ചെയ്തു. എഐഎസ്എഫ് ജില്ലാ പ്രസിഡന്‍റ് കെ.എസ്. അഭിറാം അധ്യക്ഷത വഹിച്ചു. ജില്ലാ സെക്രട്ടറി കെ.എം. മിഥുൻ, യൂണിയൻ ജനറൽ സെക്രട്ടറി മെഹ്റിൻ സലിം എന്നിവർ നേതൃത്വം നൽകി.

കേരള പോലീസ് മാറണമെങ്കിൽ കേരളരാഷ്ട്രീയം മാറണം: ശോഭ സുരേന്ദ്രൻ

തൃശൂർ: കേരള പോലീസ് മാറണമെങ്കിൽ കേരളരാഷ്ട്രീയം മാറണമെന്നു ബിജെപി സംസ്ഥാന ജനറൽ സെക്രട്ടറി ശോഭ സുരേന്ദ്രൻ. പിണറായിഭരണത്തിലെ പോലീസ് ക്രൂരതയും അനാസ്ഥയും അവസാനിപ്പിക്കുക, വികസിതകേരളത്തിനായി ആധുനിക ജനസൗഹൃദസേനയായി കേരള പോലീസിനെ നവീകരിക്കുക എന്നീ ആവശ്യങ്ങൾ ഉന്നയിച്ച് ബിജെപി തൃശൂർ സിറ്റി ജില്ലാ കമ്മിറ്റിയുടെ നേതൃത്വത്തിൽ അസിസ്റ്റന്‍റ് കമ്മീഷണർ ഓഫീസിലേക്കു നടത്തിയ പ്രതിഷേധമാർച്ച് ഉദ്ഘാടനം ചെയ്യുകയായിരുന്നു അവർ. കേരള പോലീസ് എത്രമാത്രം ക്രിമിനൽവത്കരിക്കപ്പെട്ടു എന്നതിന്‍റെ തെളിവാണു സമീപകാലത്തു പുറത്തുവന്ന പോലീസ് ക്രൂരതകളുടെ വാർത്തകൾ. ക്രമസമാധാനപാലനത്തിലും പോലീസിലുമുള്ള ജനത്തിന്‍റെ വിശ്വാസം നഷ്ടപ്പെട്ടു. കേരള പോലീസ് മാറിയേ തീരൂ, അതിനു കേരളത്തിന്‍റെ രാഷ്ട്രീയത്തിലും മാറ്റമുണ്ടാകണം. അതു ബിജെപിയിലൂടെ മാത്രമേ സാധ്യമാവുകയുള്ളൂ എന്നും ശോഭ സുരേന്ദ്രൻ പറഞ്ഞു. ബിജെപി തൃശൂർ സിറ്റി ജില്ലാ പ്രസിഡന്‍റ് ജസ്റ്റിൻ ജേക്കബ് അധ്യക്ഷത വഹിച്ചു. മേഖലാ ജനറൽ സെക്രട്ടറിമാരായ സേവ്യർ പള്ളൻ, രവികുമാർ ഉപ്പത്ത്, സംസ്ഥാനസമിതി അംഗം സുരേന്ദ്രൻ ഐനിക്കുന്നത്ത്, ജില്ലാ ജനറൽ സെക്രട്ടറിമാരായ പി.കെ. ബാബു, അഡ്വ. കെ.ആർ. ഹരി, ജില്ലാ വൈസ് പ്രസിഡന്‍റുമാരായ ഡോ. വി. ആതിര, സുധീഷ് മേനോത്തുപറന്പിൽ, സൗമ്യ സലേഷ് എന്നിവർ പ്രസംഗിച്ചു. ജില്ലാ സെക്രട്ടറിമാരായ പ്രവീണ്‍, മുരളി കൊളങ്ങാട്, യുവമോർച്ച ജില്ലാ പ്രസിഡന്‍റ് മനു പള്ളത്ത്, മഹിളാമോർച്ച ജില്ലാ പ്രസിഡന്‍റ് ശീതൾ രാജ, മണ്ഡലം പ്രസിഡന്‍റുമാരായ വിബിൻ ഐനിക്കുന്നത്ത്, അശ്വിൻ വാര്യർ എന്നിവർ നേതൃത്വം നൽകി. പോലീസ് മാർച്ച് തടഞ്ഞതിനെത്തുടർന്ന് പ്രവർത്തകർ ബാരിക്കേഡുകൾക്കു മുകളിലൂടെ മറികടക്കാൻ ശ്രമിച്ചതു നേരിയ സംഘർഷത്തിനിടയാക്കി.

മുഖംമൂടി ധരിച്ച് പ്രതിഷേധിച്ചു

തൃശൂർ: കെഎസ്‌യു നേതാക്കളെ മുഖംമൂടിയും കൈവിലങ്ങും ധരിപ്പിച്ചു കോടതിയിൽ ഹാജരാക്കിയതിൽ കോർപറേഷൻ പ്രതിപക്ഷനേതാവ് രാജൻ ജെ. പല്ലന്‍റെ നേതൃത്വത്തിൽ കോണ്‍ഗ്രസ് കൗണ്‍സിലർമാർ മുഖംമൂടി ധരിച്ചു കൗണ്‍സിലിൽ പ്രതിഷേധിച്ചു. പ്രതിപക്ഷ കൗണ്‍സിലർമാർ വരില്ലെന്ന് അറിഞ്ഞിട്ടും ബിനി ടൂറിസ്റ്റ് ഹോമിൽ കോർപറേഷൻ ഓണസദ്യ നടത്തിയത് അവഹേളനമാണ്. കോർപറേഷൻ ഉദ്യോഗസ്ഥരിൽനിന്ന് 400 രൂപവച്ചും ശുചീകരണതൊഴിലാളികളിൽനിന്ന് 200 രൂപവച്ചും ഓണസദ്യക്കു പിരിവു നടത്തി. പങ്കെടുത്ത ഉദ്യോഗസ്ഥർക്കുപോലും ഭക്ഷണം കിട്ടാതെ വലഞ്ഞെന്നും പ്രതിപക്ഷനേതാവ് കുറ്റപ്പെടുത്തി. അമൃത് വാട്ടർ എഫിഷ്യന്‍റ് പദ്ധതിയുടെ ഉദ്ഘാടനത്തിനു പത്തുലക്ഷം ചെലവുണ്ടായെന്ന അജൻഡയിൽ വോട്ടിംഗ് ആവശ്യപ്പെട്ടതോടെ മാറ്റിവച്ചു. കോർപറേഷൻ വൈദ്യുതി ജീവനക്കാരുടെ എണ്ണം 229ൽനിന്നു 103 ആയി ഉത്തരവിറക്കിയതിൽ എൽഡിഎഫ് സർക്കാരും കോർപറേഷൻ ഭരണസമിതിയും തമ്മിൽ ഗൂഢാലോചനയുണ്ടെന്നും വൈദ്യുതിവിഭാഗം കൈമാറാനുള്ള രഹസ്യനീക്കമാണെന്നും അദ്ദേഹം ആരോപിച്ചു. ഉപനേതാവ് ഇ.വി. സുനിൽരാജ്, ജോണ്‍ ഡാനിയൽ, ജയപ്രകാശ് പൂവത്തിങ്കൽ, മുകേഷ് കൂളപറന്പിൽ, ലാലി ജെയിംസ്, കെ. രാമനാഥൻ, ആൻസി ജേക്കബ്, വിനേഷ് തയ്യിൽ, മേഫി ഡെൽസണ്‍, എബി വർഗീസ്, സനോജ് പോൾ എന്നിവർ സംസാരിച്ചു.

തെരുവുവിളക്കിൽ ഉടക്കി കൗണ്‍സിലർമാർ

തൃശൂർ: മാസങ്ങളായി തെരുവുവിളക്കുകൾ പ്രകാശിക്കാത്തതിലും വിവിധ ഡിവിഷനുകളിലെ പുല്ലുവെട്ട് അടക്കമുള്ള ശുചീകരണം മുടങ്ങിയതിലും പ്രതിഷേധവുമായി കൗണ്‍സിലർമാർ. ഭരണപക്ഷത്തെ കരോളിൻ പെരിഞ്ചേരിയും സി.പി. പോളിയും പ്രതിപക്ഷത്തെ സനോജ് കെ. പോളും നടുത്തളത്തിൽ കുത്തിയിരുന്നു പ്രതിഷേധിച്ചു. ഭരണ-പ്രതിപക്ഷ കൗണ്‍സിലർമാർ ഒന്നൊന്നായി പരാതി ഉന്നയിച്ചതോടെ കോർപറേഷൻ സെക്രട്ടറിയോട് മേയർ ഉടനടി വിശദീകരണം തേടി. കൗണ്‍സിൽ അംഗീകാരമില്ലാത്തതുകൊണ്ടാണ് കരാറുകാരനു പണംനൽകാൻ കഴിയാതിരുന്നതെന്നു സെക്രട്ടറി വിശദീകരിച്ചെങ്കിലും വീഴ്ചവരുത്തിയ ഉദ്യോഗസ്ഥരെ സസ്പെൻഡ് ചെയ്യണമെന്നും അടുത്ത കൗണ്‍സിലിനുമുന്പായി റിപ്പോർട്ട് നൽകണമെന്നും മേയർ എം.കെ. വർഗീസ് നിർദേശിച്ചു. ഭരണം അവസാനിക്കാനിരിക്കേ ഉദ്യോഗസ്ഥർ മനപ്പൂർവം ഫയൽ വൈകിപ്പിക്കുകയാണെന്ന ആരോപണവും മേയർ ഉന്നയിച്ചു. കേന്ദ്രമന്ത്രി സുരേഷ് ഗോപി പുലിക്കളിസംഘങ്ങൾക്കു മൂന്നുലക്ഷംവീതം കേന്ദ്രസഹായം അനുവദിച്ചത് സംഘാടകരെന്ന നിലയിൽ കോർപറേഷനെ അറിയിച്ചില്ലെന്നും തനിക്കു കത്തു നൽകിയിട്ടില്ലെന്നും മേയർ പറഞ്ഞു. പുലിക്കളിസംഘങ്ങൾക്കു നേരത്തേ സഹായം ലഭിക്കണമെന്നും ബിജെപി കൗണ്‍സിലർമാർ ഇടപെടണമെന്നും പി.കെ. ഷാജൻ പറഞ്ഞു. സഹായം സംബന്ധിച്ച് കളക്ടറേറ്റിൽ നിർദേശമെത്തിയിരുന്നെന്നു ബിജെപി കൗണ്‍സിലർമാരും തിരിച്ചടിച്ചു. പുഴയ്ക്കൽ റോഡ് നിർമാണത്തെത്തുടർന്നു പഞ്ചിക്കൽ അടക്കമുള്ള ഇടങ്ങളിൽ കുടിവെള്ളം മുടങ്ങിയെന്നും സ്കൂളുകളിൽ പാചകത്തിനു പുറത്തുനിന്നു വെള്ളമെത്തിക്കേണ്ട സ്ഥിതിയാണെന്നു മേഫി ഡെൽസണ്‍ പറഞ്ഞു. കോർപറേഷന്‍റെ വൈദ്യുതിവിഭാഗം ഏറ്റെടുക്കാനുള്ള സർക്കാർ നീക്കം പല്ലും നഖവും ഉപയോഗിച്ച് എതിർക്കുമെന്നും സംയുക്ത ട്രേഡ് യൂണിയനുകളോടു സമരത്തിനിറങ്ങാൻ താനാണു നിർദേശിച്ചതെന്നും മേയർ പറഞ്ഞു. കെഎസ്ഇബിയിലേക്കു കൊണ്ടുപോകാൻ ആരു താത്പര്യമെടുത്താലും എതിർക്കും. ഇതിൽ ഭരണ-പ്രതിപക്ഷ വ്യത്യാസമില്ല. ജീവനക്കാർക്ക് എല്ലാ പിന്തുണയും നൽകും. ഇക്കാര്യത്തിൽ കൗണ്‍സിൽ പ്രമേയം പാസാക്കുമെന്നും സർക്കാരിനു കത്തുനൽകുമെന്നും മന്ത്രിമാരെ കാണുമെന്നും മേയർ പറഞ്ഞു. 9.5 ലക്ഷം പാസാക്കാനുള്ള അജൻഡ മാറ്റി തൃശൂർ: മുഖ്യമന്ത്രി പങ്കെടുത്ത വെറ്റ് (വാട്ടർ എഫിഷ്യന്‍റ് തൃശൂർ) പദ്ധതിയുടെ ഉദ്ഘാടത്തിനു ചെലവായെന്നു പറയുന്ന 9.5 ലക്ഷംരൂപ പാസാക്കിയെടുക്കാനുള്ള അജൻഡ പ്രതിപക്ഷ കൗണ്‍സിലർമാരുടെ എതിർപ്പിൽ മാറ്റിവച്ചു. മുൻകൂർ മൂന്നുലക്ഷം അനുവദിച്ചെങ്കിലും 9,54, 434 രൂപ ചെലവായെന്നു ചൂണ്ടിക്കാട്ടിയാണ ഉദ്യോഗസ്ഥൻ ബില്ല് സമർപ്പിച്ചത്. ഇതിൽ എട്ടുലക്ഷം ഓസ്കർ ഇവന്‍റ് മാനേജ്മെന്‍റിനു മാത്രമുള്ള തുകയാണ്. ഫ്ളക്സ്, ബാഡ്ജ് എന്നിവ പ്രിന്‍റ് ചെയ്യാൻ മുപ്പതിനായിരം രൂപയും കുടുംബശ്രീ കഫേയ്ക്ക് 22,000 രൂപ ചെലവായെന്നു പറയുന്നു. ഇതു വോട്ടിനിടാൻ ആവശ്യപ്പെട്ടതോടെ മാറ്റുകയായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]