ADVERTISEMENT

ADVERTISEMENT

സായാഹ്ന മാധ്യമസംഗമം നടത്തി

കാഞ്ഞങ്ങാട്: സീനിയര്‍ ജേര്‍ണലിസ്റ്റ്‌സ് ഫോറം കേരളയുടെ ആഭിമുഖ്യത്തില്‍ നടക്കുന്ന ദേശീയ സമ്മേളനത്തിന്‍റെ ഭാഗമായി ജില്ലാ കമ്മിറ്റി പ്രസ്‌ഫോറം ഹാളില്‍ സായാഹ്ന മാധ്യമസംഗമം നടത്തി. മുന്‍ കണ്ണൂര്‍ സര്‍വകലാശാല വൈസ് ചാന്‍സിലര്‍ ഡോ. ഖാദര്‍ മാങ്ങാട് ഉദ്ഘാടനം ചെയ്തു. ജില്ലാ പ്രസിഡന്‍റ് വി.വി. പ്രഭാകരന്‍ അധ്യക്ഷതവഹിച്ചു.

അരവിന്ദന്‍ മാണിക്കോത്ത്, മാനുവല്‍ കുറിച്ചാത്താനം, ബഷീര്‍ ആറങ്ങാടി, മുജിബ് അഹമ്മദ്, മാട്ടുമ്മല്‍ ഹസന്‍, പി.കെ. അബ്ദുള്‍ റഹ്‌മാന്‍ എന്നിവരെ ഡോ. സി. ബാലന്‍ ആദരിച്ചു.

സംസ്ഥാന വൈസ്പ്രസിഡന്‍റ് സണ്ണി ജോസഫ്, എം.ഒ. വര്‍ഗീസ്, പി. പ്രവീണ്‍കുമാര്‍ എന്നിവർ പ്രസംഗിച്ചു. സെക്രട്ടറി എന്‍. ഗംഗാധരന്‍ സ്വാഗതവും ട്രഷറര്‍ ഖാലിദ് പൊവ്വല്‍ നന്ദിയും പറഞ്ഞു.

ADVERTISEMENT

വൈദികദിനാചരണം നടത്തി

കടുമേനി: സെന്‍റ് മേരീസ് സൺഡേ സ്കൂളിന്‍റെയും മിഷൻലീഗിന്‍റെയും മാതൃവേദിയുടെയും സംയുക്താഭിമുഖ്യത്തിൽ വിശുദ്ധ ജോൺ മരിയ വിയാനി ദിനത്തോടനുബന്ധിച്ച് തോമാപുരം ഫൊറോനയിലേയും മറ്റു സന്ന്യസ്ത ആശ്രമങ്ങളിലെയും വൈദികരെ ആദരിച്ചു. കടുമേനി സെന്‍റ് മേരീസ് പാരിഷ് ഹാളിൽ നടന്ന ചടങ്ങിൽ പരിപാടിയുടെ ഉദ്ഘാടനം തോമാപുരം ഫൊറോന വികാരി റവ.ഡോ. മാണി മേൽവട്ടം നിർവഹിച്ചു. പിടിഎ പ്രസിഡന്‍റ് ജിജോ പി. ജോസഫ് അധ്യക്ഷതവഹിച്ചു. ഫാ. മാത്യു വളവനാൽ അനുഗ്രഹപ്രഭാഷണം നടത്തി. ഫാ. എബിൻ കാവുംതല, ട്രീസ കുഴിവേലിൽ ,ജെറാൾഡ് ജിജോ എന്നിവർ സംസാരിച്ചു. മരിയ ജോസഫ് കരിമഠം സ്വാഗതവും അലൻ പറയിടം നന്ദിയും പറഞ്ഞു.

കുണ്ടംകുഴി ജിഎച്ച്എസ്എസിന് ഓവറോള്‍ കിരീടം

കാഞ്ഞങ്ങാട്: ജില്ലാ വടംവലി ചാമ്പ്യാന്‍ഷിപ്പില്‍ 96 പോയന്‍റോടെ ആതിഥേയരായ കുണ്ടംകുഴി ജിഎച്ച്എസ്എസ് ഓവറോള്‍ കിരീടം ചൂടി. 30 പോയിന്‍റ് നേടി സഹൃദയ തട്ടുമ്മല്‍ രണ്ടാംസ്ഥാനവും 16 പോയിന്‍റ് നേടി തോമാപുരം സെന്‍റ് തോമസ് എച്ച്എസ്എസ് മൂന്നാംസ്ഥാനവും സ്വന്തമാക്കി. മത്സരവിജയികള്‍ (ഒന്ന്, രണ്ട്, മൂന്ന് സ്ഥാനക്കാര്‍) അണ്ടര്‍-13 ബോയ്‌സ്: 1. അമ്പലത്തറ ജിവിഎച്ച്എസ്എസ് 2. എടത്തോട് ശാന്ത മെമ്മോറിയല്‍ യുപിഎസ് 3. കുണ്ടംകുഴി ജിഎച്ച്എസ്എസ്. അണ്ടര്‍-13 ഗേള്‍സ്: 1. ചായ്യോത്ത് ജിഎച്ച്എസ്എസ് 2. കുണ്ടംകുഴി ജിഎച്ച്എസ്എസ് 3. പരപ്പ ജിഎച്ച്എസ്എസ്. അണ്ടര്‍-15 ബോയ്‌സ്: 1. കുണ്ടംകുഴി ജിഎച്ച്എസ്എസ് 2. കുണ്ടംകുഴി സ്‌പോര്‍ട്‌സ് ക്ലബ് 3. വെള്ളച്ചാല്‍ ജിഎംആര്‍എച്ച്എസ്എസ്. അണ്ടര്‍-15 ഗേള്‍സ്:1. പരവനടുക്കം ജിഎംആര്‍എച്ച്എസ്എസ് 2. കുണ്ടംകുഴി ജിഎച്ച്എസ്എസ് 3. ബന്തടുക്ക ജിഎച്ച്എസ്എസ്. അണ്ടര്‍-17 ബോയ്‌സ്:1. കൈക്കോട്ടുകടവ് ജിഎച്ച്എസ്എസ് 2. കുണ്ടംകുഴി ജിഎച്ച്എസ്എസ് 3. വെള്ളരിക്കുണ്ട് സെന്‍റ് ജൂഡ്‌സ് എച്ച്എസ്എസ്. അണ്ടര്‍-17 ഗേള്‍സ്:1. കുണ്ടംകുഴി ജിഎച്ച്എസ്എസ് 2. പരപ്പ ജിഎച്ച്എസ്എസ്എസ് 3. പരവനടുക്കം ജിഎംആര്‍എച്ച്എസ്എസ്. അണ്ടര്‍-17 മിക്‌സഡ്: 1. കുണ്ടംകുഴി ജിഎച്ച്എസ്എസ്2.ബാനം ജിഎച്ച്എസ് 3. വെള്ളരിക്കുണ്ട് സെന്‍റ് ജൂഡ്‌സ് എച്ച്എസ്എസ്. അണ്ടര്‍-19 ബോയിസ്: 1. കുണ്ടംകുഴി ജിഎച്ച്എസ്എസ് 2. തോമാപുരം സെന്‍റ് തോമസ് എച്ച്എസ്എസ് 3. അമ്പലത്തറ ജിവിഎച്ച്എസ്എസ്. അണ്ടര്‍-19 ഗേള്‍സ്: 1. കുണ്ടംകുഴി ജിഎച്ച്എസ്എസ് 2. ബളാല്‍ ജിഎച്ച്എസ്എസ് 3. ചായ്യോത്ത് ജിഎച്ച്എസ്എസ്. അണ്ടര്‍-19 മിക്‌സഡ്: 1. കുണ്ടംകുഴി ജിഎച്ച്എസ്എസ് 2. തോമാപുരം സെന്‍റ് തോമസ് എച്ച്എസ്എസ് 3. വെള്ളരിക്കുണ്ട് സെന്‍റ് ജൂഡ്‌സ് എച്ച്എസ്എസ്. സി.എച്ച്. കുഞ്ഞമ്പു എംഎല്‍എ ഉദ്ഘാടനം ചെയ്തു. പിടിഎ പ്രസിഡന്‍റ് എം. മാധവന്‍ അധ്യക്ഷതവഹിച്ചു. പി. രഘുനാഥ്, പ്രവീണ്‍ മാത്യു, കെ. മുരളീധരന്‍, പി.കെ. ഗോവിന്ദന്‍, രവിചന്ദ്രന്‍ കുണ്ടംകുഴി, എം. രാധാകൃഷ്ണന്‍, കെ.പി. അരവിന്ദാക്ഷന്‍, എം.വി. രതീഷ് എന്നിവര്‍ സംസാരിച്ചു. പഞ്ചായത്ത് പ്രസിഡന്‍റ് എം. ധന്യ ട്രോഫികള്‍ വിതരണം ചെയ്തു.

കാഞ്ഞങ്ങാട് നഗരസഭയിലെ കോൺഗ്രസിൽ വീണ്ടും പൊട്ടിത്തെറി

കാഞ്ഞങ്ങാട്: തദ്ദേശ തെരഞ്ഞെടുപ്പിന് കഷ്ടിച്ച് മൂന്നുമാസം മാത്രം അവശേഷിക്കേ കാഞ്ഞങ്ങാട് നഗരസഭയിലെ കോൺഗ്രസിൽ വീണ്ടും പൊട്ടിത്തെറി. മണ്ഡലം പ്രസിഡന്‍റ് കെ.പി. ബാലകൃഷ്ണനും ബ്ലോക്ക് ഭാരവാഹികളുമടക്കം പഴയ ഐ വിഭാഗത്തിൽപ്പെട്ട 38 നേതാക്കൾ ഒരുമിച്ച് പാർട്ടി സ്ഥാനങ്ങൾ രാജിവച്ചു. ഹൊസ്ദുർഗ് സർവീസ് സഹകരണബാങ്കിലെ പ്രസിഡന്‍റ് സ്ഥാനം പങ്കുവയ്ക്കുന്നതുമായി ബന്ധപ്പെട്ട തർക്കമാണ് കടുത്ത നടപടിയിലേക്കെത്തിച്ചത്. ബ്ലോക്ക് കോൺഗ്രസ് വൈസ് പ്രസിഡന്‍റുമാരായ എം. കുഞ്ഞിക്കൃഷ്ണൻ, ബഷീർ ആറങ്ങാടി, രവീന്ദ്രൻ ചേടിറോഡ്, കെ. രാജഗോപാലൻ, ജനറൽ സെക്രട്ടറിമാരായ ബിജു കൃഷ്ണ, എ. പുരുഷോത്തമൻ, അനിൽ വാഴുന്നോറടി, ട്രഷറർ എച്ച്. ഭാസ്കരൻ, മത്സ്യത്തൊഴിലാളി കോൺഗ്രസ് ജില്ലാ പ്രസിഡന്‍റും നഗരസഭാ കൗൺസിലറുമായ കെ.കെ. ബാബു എന്നിവരും പാർട്ടി സ്ഥാനങ്ങൾ രാജിവച്ചവരിൽ ഉൾപ്പെടുന്നു. പഴയ ഐ വിഭാഗത്തിലെ തലമുതിർന്ന നേതാവും മുൻ നഗരസഭാധ്യക്ഷനുമായ വി. ഗോപിയെ ഹൊസ്ദുർഗ് ബാങ്ക് പ്രസിഡന്‍റാക്കണമെന്നാണ് ഇവരുടെ ആവശ്യം. പഴയ എ വിഭാഗത്തിൽപ്പെട്ട യൂത്ത് കോൺഗ്രസ് ജില്ലാ സെക്രട്ടറി പ്രവീൺ തോയമ്മലാണ് ഇപ്പോൾ ബാങ്ക് പ്രസിഡന്‍റ്. രണ്ടര വർഷം മുമ്പ് ബാങ്ക് തെരഞ്ഞെടുപ്പ് കഴിഞ്ഞപ്പോൾ തന്നെ വി. ഗോപി പ്രസിഡന്‍റ് സ്ഥാനത്തിന് അവകാശവാദമുന്നയിച്ചിരുന്നു. എന്നാൽ തെരഞ്ഞെടുക്കപ്പെട്ട ഭരണസമിതി അംഗങ്ങളിൽ ഭൂരിപക്ഷ പിന്തുണയുള്ള പ്രവീണിനെയാണ് ജില്ലാ കോൺഗ്രസ് നേതൃത്വം പ്രസിഡന്‍റ് സ്ഥാനത്തേക്ക് നിർദേശിച്ചത്. പാർട്ടി നിർദേശം ലംഘിച്ച് ഗോപി പ്രസിഡന്‍റ് സ്ഥാനത്തേക്ക് മത്സരിക്കുകയും പ്രവീണിനോട് പരാജയപ്പെടുകയുമായിരുന്നു. ഇപ്പോൾ രണ്ടര വർഷം കഴിയുന്ന സാഹചര്യത്തിൽ പ്രവീൺ ഗോപിക്കുവേണ്ടി വഴിമാറിക്കൊടുക്കണമെന്നാണ് ഐ വിഭാഗത്തിന്‍റെ ആവശ്യം. എന്നാൽ ഇങ്ങനെയൊരു ധാരണ നേരത്തേ ഉണ്ടായിട്ടില്ലെന്നും അതുകൊണ്ടാണ് അന്നുതന്നെ ഗോപി പ്രവീണിനെതിരായി മത്സരിച്ചതെന്നും എ വിഭാഗം ചൂണ്ടിക്കാട്ടുന്നു. 2000-03 കാലഘട്ടത്തിൽ നഗരസഭാധ്യക്ഷനായിരുന്ന ഗോപി അന്ന് കോൺഗ്രസിലുണ്ടായിരുന്ന ധാരണ പ്രകാരം രണ്ടരവർഷം കഴിഞ്ഞപ്പോൾ സ്ഥാനമൊഴിയാൻ വിസമ്മതിച്ചത് നഗരസഭയിൽ യുഡിഎഫിന് ഭരണം നഷ്ടപ്പെടുത്തിയിരുന്നു. ഇപ്പോൾ നിലവിലുള്ള എൽഡിഎഫ് ഭരണസമിതിയുടെ പാളിച്ചകളും വാർഡ് വിഭജനവും യുഡിഎഫിന് അനുകൂലമായ സാഹചര്യം സൃഷ്ടിക്കുമ്പോൾ വീണ്ടും അതേ അവസ്ഥയിലേക്ക് നയിക്കാനാണ് ഐ വിഭാഗത്തിന്‍റെ ശ്രമമെന്നാണ് മറുപക്ഷം കുറ്റപ്പെടുത്തുന്നത്. തദ്ദേശ തെരഞ്ഞെടുപ്പ്മുന്നിൽ നിൽക്കേ പാർട്ടിയേയും മുന്നണിയേയും സമ്മർദത്തിലാക്കി സ്ഥാനം കൈക്കലാക്കാനാണ് ഇവരുടെ ശ്രമമെന്നും അവർ ആരോപിക്കുന്നു. നഗരസഭാ തെരഞ്ഞെടുപ്പിൽ ഒന്നിലേറെ തവണ എൽഡിഎഫിനൊപ്പം ചേർന്ന് മത്സരിച്ചിട്ടുള്ള ഗോപിയും ഒപ്പമുള്ളവരും ഇത്തവണയും അതേ മാർഗത്തിലേക്ക് കടക്കുമെന്ന സൂചനയും നേതൃത്വത്തിന് ലഭിച്ചതായാണ് വിവരം. ജില്ലയുടെ ചുമതലയുള്ള മുൻ കെപിസിസി വർക്കിംഗ് പ്രസിഡന്‍റ് ടി.എൻ. പ്രതാപൻ, കെപിസിസി ജനറൽ സെക്രട്ടറി സോണി സെബാസ്റ്റ്യൻ, ജില്ലയിൽ നിന്നുള്ള സെക്രട്ടറി എം. അസിനാർ, ഡിസിസി പ്രസിഡന്‍റ് പി.കെ. ഫൈസൽ എന്നിവരുടെ സാന്നിധ്യത്തിൽ ഐ വിഭാഗത്തെ അനുനയിപ്പിക്കാൻ കഴിഞ്ഞ ദിവസം ചർച്ച നടത്തിയിരുന്നു. എന്നാൽ ബാങ്ക് പ്രസിഡന്‍റ് സ്ഥാനത്തിന്‍റെ കാര്യത്തിൽ ഒരു വിട്ടുവീഴ്ചയ്ക്കും തയാറല്ലെന്ന നിലപാടാണ് ഗോപിയും ഒപ്പമുള്ളവരും സ്വീകരിച്ചത്. തദ്ദേശ തെരഞ്ഞെടുപ്പ് കഴിഞ്ഞ ശേഷം തീരുമാനമെടുക്കാമെന്ന സംസ്ഥാന നേതാക്കളുടെ നിർദേശവും ഇവർ നിരാകരിക്കുകയായിരുന്നു. കോൺഗ്രസ് ഇരുവിഭാഗങ്ങളായിരുന്ന കാലത്ത് എ വിഭാഗം ഒറ്റയ്ക്ക് ഭരിച്ചിട്ടുള്ള ഹൊസ്ദുർഗ് ബാങ്കിന്‍റെ പ്രസിഡന്‍റ് സ്ഥാനം അവർക്കും വൈകാരികപ്രശ്നമാണ്. എല്ലാ സ്ഥാനങ്ങളിലും തലമുറമാറ്റം നടക്കുമ്പോൾ പ്രവീണിനെ പോലൊരു യുവനേതാവിനെ രാജിവയ്പിച്ച് വി. ഗോപിയെ പ്രസിഡന്‍റാക്കുന്നതിലെ ധാർമികതയും അവർ ചോദ്യംചെയ്യുന്നു.

സെന്‍റ് ജൂഡ്സ് സ്കൂളിൽ എസ്പിസി ദിനാചരണം

വെള്ളരിക്കുണ്ട്: സെന്‍റ് ജൂഡ്സ് എച്ച്എസ്എസിൽ എസ്പിസി ദിനാചരണം നടത്തി. അനാമിക ശ്രീധരൻ പരേഡ് കമാൻഡർ ആയി 40 കാേഡറ്റുകളെ അണിനിരത്തിക്കൊണ്ട് നയിച്ച സെറിമോണിയൽ പരേഡിൽ അമേയ രാജീവ്, റോണൽ ജോസഫ് ജിമ്മി, പ്ലാട്ടൂൺ കമാൻഡർമാരായി. വിശിഷ്ടാതിഥി വെള്ളരിക്കുണ്ട് ഇൻസ്പെക്ടർ കെ.പി. സതീഷ് അഭിവാദ്യം സ്വീകരിച്ചു. പിടിഎ പ്രസിഡന്‍റ് പി.സി. ബിനോയ് അധ്യക്ഷതവഹിച്ചു. മുഖ്യാധ്യാപകൻ എം.യു. ജോസുകുട്ടി, സ്കൂൾ മാനേജർ റവ.ഡോ. ജോൺസൺ അന്ത്യാകുളം, പ്രിൻസിപ്പൽ റവ.ഡോ. സന്തോഷ് പീറ്റർ എന്നിവർ പ്രസംഗിച്ചു. തുടർന്ന് ലഹരിയ്ക്കെതിരെ അണിനിരക്കാം എന്ന സന്ദേശം ഉൾക്കൊള്ളുന്ന നൃത്തശില്പം, എസ്പിസി ഗീതത്തിന്‍റെ നൃത്താവിഷ്കാരം എന്നിവ അരങ്ങേറി. കമ്മ്യൂണിറ്റി പോലീസ് ഓഫീസർമാരായ ജിമ്മി മാത്യു, റാണി എം. ജോസഫ്, ഡ്രിൽ ഇൻസ്‌ട്രക്ടർമാരായ എഎസ്ഐ സി.കെ. സരിത, കെ. സാജു എന്നിവർ നേതൃത്വം നൽകി.

ചങ്ങാതിക്കൊരു തൈ; ജില്ലയില്‍ കൈമാറിയത് 50,000 വൃക്ഷത്തൈകള്‍

കാസര്‍ഗോഡ്: സൗഹൃദം മഹാവൃക്ഷമായി വളരട്ടെ എന്ന ആഹ്വാനവുമായി ലോക സൗഹാര്‍ദ്ദ ദിനാചരണത്തിന്‍റെ ഭാഗമായി ജില്ലയിലെ കലാലയങ്ങളിലും വിദ്യാലയങ്ങളിലുമായി ഓഗസ്റ്റ് നാലു വരെ കൈമാറിയത് 50,000 വൃക്ഷത്തൈകള്‍. വിദ്യാലയങ്ങളില്‍ 32,500 വൃക്ഷത്തൈകള്‍ കൈമാറിയപ്പോള്‍, കലാലയങ്ങളിലും സാങ്കേതിക സ്ഥാപനങ്ങളിലുമായി 7200 തൈകളും ഹരിതകര്‍മസേന അംഗങ്ങള്‍ 2100 തൈകളുമാണ് സുഹൃത്തുക്കള്‍ക്ക് കൈമാറി നട്ടുപിടിപ്പിച്ചത്. ഹരിത കേരളം മിഷന്‍റെ നേതൃത്വത്തില്‍ സംഘടിപ്പിച്ച ഒരു തൈ നടാം എന്ന പരിപാടിയുടെ ഭാഗമായാണ് ജില്ലയിലെ വിദ്യാലയങ്ങളില്‍ സുഹൃത്തുകള്‍ക്ക് വൃക്ഷത്തൈകള്‍ കൈമാറി നട്ടുപിടിപ്പിക്കുന്ന പരിപാടി സംഘടിപ്പിച്ചത്. വൃക്ഷത്തൈകള്‍ വിദ്യാര്‍ഥികള്‍ തന്നെ ശേഖരിച്ചാണ് സുഹൃത്തുകള്‍ക്ക് കൈമാറിയത്. കാലാവസ്ഥാ വ്യതിയാനത്തിന് മരമാണ് മറുപടി എന്ന സന്ദേശമുയര്‍ത്തി ഒരു കോടി വൃക്ഷത്തൈകള്‍ നട്ടുപിടിപ്പിക്കാന്‍ സംസ്ഥാന സര്‍ക്കാര്‍ സംഘടിപ്പിക്കുന്ന കാമ്പയിന്‍റെ ഭാഗമായാണ് ഈ പരിപാടി.

1.83 കോടിയുടെ വിവിധ പ്രവൃത്തികള്‍ക്ക് ഭരണാനുമതി

ഉദുമ: സി.എച്ച്. കുഞ്ഞമ്പു എംഎല്‍എയുടെ 2024-25 വര്‍ഷത്തെ ആസ്തി വികസന പദ്ധതിയില്‍ ഉള്‍പ്പെടുത്തിയ 1.83 കോടി രൂപയുടെ വിവിധ പ്രവൃത്തികള്‍ക്ക് ഭരണാനുമതി ലഭിച്ചതായി എംഎല്‍എ അറിയിച്ചു. തെക്കില്‍പറമ്പ ഗവ. യുപി സ്‌കൂളിന് ബസ് വാങ്ങുന്നതിന് 24.28 ലക്ഷം രൂപയുടെയും മുളിയാര്‍ പഞ്ചായത്തില്‍ സ്ഥിതി ചെയ്യുന്ന സഹജീവനം സ്‌നേഹഗ്രാമം എന്‍ഡോസള്‍ഫാന്‍ പുനരധിവാസ ഗ്രാമത്തിന് യാത്രാവാഹനം വാങ്ങുന്നതിന് 22.56 ലക്ഷം രൂപയുടെയും ഭരണാനുമതി ലഭിച്ചു. ഇതുകൂടാതെ ഉദുമ പഞ്ചായത്തിലെ അരമങ്ങാനം യംഗ് ബ്രദേഴ്‌സ് കുണ്ടാര്‍ തോട് റോഡ് നവീകരണത്തിന് 30 ലക്ഷം രൂപ, കൊപ്പല്‍ ക്ലബ്ബ് കൊപ്പല്‍ വയല്‍ റോഡ് - 30 ലക്ഷം രൂപ, ബേഡഡുക്ക പഞ്ചായത്തിലെ വട്ടംതട്ട പാടിക്കൊടല്‍ ഒളിയത്തടുക്കം റോഡ് - 22 ലക്ഷം രൂപ, കുറ്റിക്കോല്‍ പഞ്ചായത്തിലെ നാട്ടക്കല്ല് എരിഞ്ഞിത്തല റോഡ് - 32 ലക്ഷം രൂപ, ചെമ്മനാട് പഞ്ചായത്തിലെ ബണ്ടിച്ചാല്‍ മണ്ഡലിപ്പാറ ഞാണിക്കടവ് റോഡ് - 22.5 ലക്ഷം രൂപ എന്നീ പ്രവൃത്തികള്‍ക്കും ഭരണാനുമതി ലഭിച്ചതായി എംഎല്‍എ അറിയിച്ചു. നേരത്തെ ഭരണാനുമതി ലഭിച്ച പുല്ലര്‍-പെരിയ പഞ്ചായത്തിലെ കാഞ്ഞിരടുക്കം കുറവന്ദിക്കാല്‍ റോഡ് - 25 ലക്ഷം, നിടുവോട്ടുപാറ തച്ചറവളപ്പ് പെരിയ ഹൈസ്‌കുള്‍ റോഡ്- 25 ലക്ഷം, പെരളം പനക്കൂല്‍ തറവാട് റോഡ് - 15 ലക്ഷം, പള്ളിക്കര പഞ്ചായത്തിലെ അരയാല്‍തറ ചിറക്കാല്‍ റോഡ് - 25 ലക്ഷം, ബംഗാട് ഭജനമന്ദിരം ആയംകടവ് റോഡ് - 15 ലക്ഷം, മുളിയാര്‍ പഞ്ചായത്തിലെ ഇരിയണ്ണി പേരടുക്കം റോഡ് - 29 ലക്ഷം, ബേഡഡുക്ക പഞ്ചായത്തിലെ പയറ്റിയാല്‍ അഡുമ്മല്‍ ക്വാറി റോഡ് - 25 ലക്ഷം എന്നീ പ്രവൃത്തികളുടെ ടെണ്ടര്‍ നടപടികള്‍ പൂര്‍ത്തിയായി.

കാഞ്ഞങ്ങാട് ബസ് സ്റ്റാന്‍ഡ് സെപ്റ്റംബര്‍ ആറിനകം തുറന്നുകൊടുക്കണമെന്ന് മനുഷ്യാവകാശ കമ്മീഷന്‍

കാഞ്ഞങ്ങാട്: കാഞ്ഞങ്ങാട് പഴയ ബസ് സ്റ്റാന്‍ഡ് നിര്‍മാണ ജോലികള്‍ പൂര്‍ത്തിയാക്കി സെപ്റ്റംബര്‍ ആറിനകം തുറന്നുകൊടുക്കണമെന്ന് മനുഷ്യാവകാശ കമ്മീഷന്‍ ജുഡീഷല്‍ അംഗം കെ. ബൈജുനാഥ് നഗരസഭ സെക്രട്ടറിക്ക് നിര്‍ദേശം നല്‍കി. ഉത്തരവിന്‍റെ അടിസ്ഥാനത്തില്‍ സ്വീകരിച്ച നടപടികള്‍ രണ്ടു മാസത്തിനുള്ളില്‍ സമര്‍പ്പിക്കണമെന്നും ഉത്തരവില്‍ പറയുന്നു. മാര്‍ച്ച് ഏഴിന് ആരംഭിച്ച ജോലികള്‍ സെപ്റ്റംബര്‍ ആറിനകം പൂര്‍ത്തിയാക്കാമെന്ന് നഗരസഭ സെക്രട്ടറി കമ്മീഷന്‍ സിറ്റിംഗില്‍ നേരിട്ട് സമര്‍പ്പിച്ച റിപ്പോര്‍ട്ടില്‍ പറയുന്നു. പഴയ ബസ് സ്റ്റാന്‍ഡ് അടച്ചിട്ടതിനെതിരെ ഇരിയ സ്വദേശി പി. നവീന്‍രാജ് സമര്‍പ്പിച്ച പരാതിയിലാണ് നടപടി. നഗരസഭ കൗണ്‍സിലിന്‍റെ തീരുമാനപ്രകാരമാണ് കോട്ടച്ചേരി ബസ് സ്റ്റാന്‍ഡ് അടച്ചിട്ടത്. 180 ദിവസം കൊണ്ട് പണി പൂര്‍ത്തിയാക്കാനാണ് കരാറുകാരന് നിര്‍ദേശം നല്‍കിയിട്ടുള്ളത്. തിരക്കേറിയ ബസ് സ്റ്റാന്‍ഡ് ആയതിനാല്‍ ജോലികള്‍ വൈകുന്നത് യാത്രക്കാര്‍ക്കും പൊതുജനങ്ങള്‍ക്കും ബുദ്ധിമുട്ടുണ്ടാക്കുമെന്ന് കമ്മീഷന്‍ ഉത്തരവില്‍ പറഞ്ഞു. ഉത്സവകാലത്തെ തിരക്ക് കൂടി കണക്കിലെടുത്ത് ജോലികള്‍ യഥാസമയം പൂര്‍ത്തിയാക്കണമെന്നും കമ്മീഷന്‍ ആവശ്യപ്പെട്ടു.

ആദിവാസി ദിനാചരണം പരപ്പയില്‍

കാഞ്ഞങ്ങാട്: ജില്ലയിലെ വിവിധ ആദിവാസി സംഘടനകളുടെ നേതൃത്വത്തില്‍ ഒമ്പതിന് പരപ്പ വൈഎംസിഎ ഹാളില്‍ രാജ്യാന്ത ആദിവാസിദിനാചരണം നടത്തും. രാവിലെ 10ന് ഉണര്‍ത്തുപാട്ട്. തുടര്‍ന്ന് വിവിധ സംഘടനകളുടെ നേതാക്കളും ഊരുമൂപ്പന്മാരും ചേര്‍ന്നു ഡോ.ബി.ആര്‍. അംബേദ്കര്‍, അയ്യങ്കാളി എന്നിവരുടെ ഛായാചിത്രത്തിനു മുന്‍പില്‍ ദീപം തെളിച്ച് ഉദ്ഘാടനം നിര്‍വഹിക്കും. ജാതിവ്യവസ്ഥയും അധികാരവും: ഇന്നലെ, ഇന്ന്, നാളെ എന്ന വിഷയത്തില്‍ നടക്കുന്ന സെമിനാറില്‍ ഡോ.ടി.എസ്. ശ്യാംകുമാര്‍ വിഷയാവതരണം നടത്തും. ജയചന്ദ്രന്‍ ചാമക്കുഴി മോഡറേറ്ററാകും. ഇന്ത്യന്‍ ഭരണഘടനയും സംവരണവും നേരിടുന്ന വെല്ലുവിളികള്‍ എന്ന വിഷയത്തില്‍ നടക്കുന്ന സെമിനാറില്‍ ഡോ. മാളവിക ബിന്നി വിഷയാവതരണം നടത്തും. പി.കെ. രാമചന്ദ്രന്‍ മോഡറേറ്ററാകും. പത്രസമ്മേളനത്തില്‍ കമലാക്ഷന്‍ കക്കോല്‍, സി. രാഘവന്‍ അടുക്കം, രതീഷ് കാട്ടുമാടം, നാരായണന്‍ കണ്ണാടിപ്പാറ, വി. ശാന്ത, രാധ രാവണേശ്വരം, കെ. ബാലാമണി, രമ്യ ബാലകൃഷ്ണന്‍ എന്നിവര്‍ സംബന്ധിച്ചു.

കെഎസ്ആര്‍ടിസി പെന്‍ഷന്‍കാരുടെ ധര്‍ണ 26ന്

കാസര്‍ഗോഡ്: പെന്‍ഷന്‍ പരിഷ്‌കരണത്തിനും കഴിഞ്ഞ ഒന്‍പതു വര്‍ഷമായി ആര്‍ടിസിയിലെ പെന്‍ഷന്‍കാര്‍ക്ക് നിഷേധിച്ച ഫെസ്റ്റിവല്‍ അലവന്‍സ് പുനഃസ്ഥാപിക്കുവാനും 2022നു ശേഷം പിരിഞ്ഞ പെന്‍ഷന്‍കാര്‍ക്ക് പെന്‍ഷന്‍ ആനുകൂല്യങ്ങള്‍ നിഷേധിക്കുന്ന നടപടികള്‍ക്കുമെതിരെ ട്രാന്‍സ്പോര്‍ട്ട് പെന്‍ഷനേഴ്സ് വെല്‍ഫേര്‍ അസോസിയേഷന്‍റെ നേതൃത്വത്തില്‍ 26നു കാസര്‍ഗോഡ് കെഎസ്ആര്‍ടിസി ഡിപ്പോയില്‍ ധര്‍ണാ സമരം നടത്തുവാന്‍ യോഗം തിരുമാനിച്ചു. പെന്‍ഷനാകാന്‍ പോകുന്ന ജീവനക്കാരുടെ സര്‍വീസ് രേഖകള്‍ ചീഫ് ഓഫീസിലേക്ക് കാലതാമസം വരുത്തി അയക്കുന്ന യൂണിറ്റ് അധികൃതരുടെ പ്രവര്‍ത്തന നടപടികളില്‍ യോഗം പ്രതിഷേധിച്ചു. പ്രസിഡന്‍റ് പി.വി. നാരായണന്‍ അധ്യക്ഷതവഹിച്ചു. എം.വി. വിജയന്‍, പി.വി. ഉദയകുമാര്‍, എം.വി. പത്മനാഭന്‍, കെ.വി. സജീവ് കുമാര്‍, വി.എം. ഗോപാലന്‍, തോമസ് കോളിച്ചാല്‍, തമ്പാന്‍ നായര്‍, കൃഷ്ണന്‍ കൊയിലേരിയന്‍, ഗോപാലന്‍ പാണത്തൂര്‍, പി. സുബ്ബനായക്, പരമേശ്വരനായക്, കെ. കൃഷ്ണ, ഗംഗാധരഭട്ട്, ഭാസ്‌കരന്‍ ചീമേനി എന്നിവര്‍ പ്രസംഗിച്ചു.

എന്നു തീരും ഈ ദുരിതയാത്ര?

ഭീമനടി: വെസ്റ്റ് എളേരി, കിനാനൂർ-കരിന്തളം പഞ്ചായത്തുകളെ തമ്മിൽ ബന്ധിപ്പിക്കുന്ന കാലിക്കടവ് -കുറുഞ്ചേരി റോഡിന്‍റെ അശാസ്ത്രീയ ഓവുചാൽ നിർമാണത്തെതുടർന്ന് കാലിക്കടവ് ജംഗ്ഷനിൽ അപകടകരമായ വെള്ളക്കെട്ട് രൂപപ്പെട്ടു. ദിനംപ്രതി അനവധി സ്കൂൾ വാഹനങ്ങളും കെഎസ്ആർടിസി ബസുകളും മറ്റു വാഹനങ്ങളും കടന്നുപോകുന്ന പഞ്ചായത്തിലെ പ്രധാന റോഡാണ് കാലിക്കടവ് കുറുഞ്ചേരി റോഡ്. കൂവപ്പാറ കോളനി, സബ് സ്റ്റേഷൻ തുടങ്ങിയ സ്ഥലങ്ങളിലേക്ക് എത്തിപ്പെടാൻ ആശ്രയിക്കുന്ന പ്രധാന റോഡാണിത്. തകർന്ന സ്ഥലത്ത് വെള്ളം കെട്ടി നിൽക്കുന്നതിനാൽ റോഡിൽ രൂപപ്പെട്ടിരിക്കുന്ന കുഴി മനസിലാകാതെ നിരവധി സ്ത്രീകൾ ഇരുചക്ര വാഹനങ്ങളിൽ കടന്ന് പോകുമ്പോൾ അപകടം സംഭവിക്കുക ഇവിടെ പതിവാണ്. മാസങ്ങളായി തകർന്നുകിടക്കുന്ന കാലിക്കടവ് കുറുഞ്ചേരി റോഡിനോട് അധികൃതർ കാണിക്കുന്ന അനാസ്ഥക്കെതിരെ കാലിക്കടവ് നവോദയ സംഘം പ്രതിഷേധിച്ചു. കഴിഞ്ഞ പഞ്ചായത്ത് ബജറ്റിൽ റോഡിന്‍റെ ടാറിംഗിന് ഫണ്ട് അനുവദിച്ചിട്ടുണ്ടെങ്കിലും മഴ മാറി ടാറിംഗ് പ്രവർത്തി ആരംഭിക്കുന്നതുവരെ താത്കാലികമായ ഒരു പരിഹാരം അധികൃതരുടെ ഭാഗത്തും നിന്നും ഉണ്ടാകണമെന്നും സംഘം ആവശ്യപ്പെട്ടു. പ്രസിഡന്‍റ് ആന്‍റണി ജോസഫ്, സെക്രട്ടറി ടോണി ജോസഫ്, സ്കറിയ ഫിലിപ്പ്, സാജു മാരൂർ, സി.ജെ. സണ്ണി, സന്തോഷ്, കെ. രാജു എന്നിവർ പ്രസംഗിച്ചു. ചിറ്റാരിക്കാൽ: ഈസ്‌റ്റ് എളേരി പഞ്ചായത്തിലെ പ്രധാന ഗ്രാമീണ റോഡുകളിലൊന്നായ ആയന്നൂർ-കൊല്ലാട റോഡ് പലയിടത്തും തകർന്നു. മഴക്കാലത്തിനു മുൻപ് റോഡിൽ കൊല്ലാട മുതലുള്ള ഒരുകിലോമീറ്ററിലേറെ ഭാഗം പഞ്ചായത്ത് റീടാറിംഗ് നടത്തിയിരുന്നു. ശേഷിക്കുന്ന ഭാഗത്ത് അറ്റകുറ്റപ്പണി നടക്കാത്തതിനാലാണ് ഇപ്പോൾ മഴയിൽറോഡ് തകർന്നത്. ഇതേ റോഡിലെ വീതികുറഞ്ഞ ആയന്നൂർ കലുങ്കും നവീകരിക്കണമെന്ന ആവശ്യം ശക്തമാണ്. ഇവിടെ തോടരികിൽ റോഡ് അപകടത്തിലായതിനാൽ നാട്ടു കാർ റിബൺകെട്ടി താത്കാലിക കൈവരി തീർത്താണ് അപകട മുന്നറിയിപ്പ് നൽകിയിരിക്കുന്നത്. 10 വർഷം മുൻപ് കെ.കുഞ്ഞിരാമൻ എംഎൽഎയുടെ ആസ്തിവികസന ഫണ്ടിൽ ഉൾപ്പെടുത്തി 50 ലക്ഷം രൂപ ചെലവിട്ടാണ് റോഡ് വീതികുട്ടി നവീകരിച്ചത്. പിന്നീട് കാര്യമായി അറ്റകുറ്റപ്പണി നടത്തിയിട്ടില്ല. സ്കൂ‌ൾ ബസുകൾ ഉൾപ്പെടെ നിത്യേന വാഹനങ്ങൾ കടന്നുപോകുന്ന ഈ റോഡ്, കണ്ണൂർ ജില്ലയിലെ പാടിയോട്ടുചാലിനെയും ചെറുപുഴയെയും ഈസ്‌റ്റ് എളേരി, വെസ്‌റ്റ് എളേരി പഞ്ചായത്തുകളിലെ വിവിധ ഗ്രാമങ്ങളെയും ബന്ധിപ്പിക്കുന്ന യാത്രാമാർഗം കൂടിയാണ്. നേരത്തെ സംസ്‌ഥാന ബജറ്റിൽ ഈ റോഡ് ഉൾപ്പെടുന്ന പെരളം-ആയന്നൂർ -നീലംപാറ റോഡ് നവീകരിക്കാൻ അഞ്ചു കോടി രൂപ വകയിരുത്തിയിരുന്നെങ്കിലും അതും യാഥാർഥ്യമായില്ല.

വായ് മൂടിക്കെട്ടി പ്രതിഷേധപ്രകടനം നടത്തി

കള്ളാർ: ക്രൈസ്തവ സമൂഹത്തിനെതിരെയുള്ള അനീതിക്കെതിരെ കെസിസി കളളാർ യൂണിറ്റിന്‍റെ നേതൃത്വത്തിൽ വായ് മൂടിക്കെട്ടി പ്രതിഷേധപ്രകടനം നടത്തി. ഇടവക വികാരി ഫാ. ജോബിൻ പ്ലാച്ചേരിപുറത്ത്, കെസിസി പ്രസിഡന്‍റ് ടോമി വാണിയംപുരയിടത്തിൽ എന്നിവർ പ്രസംഗിച്ചു. ഫാ. സനു കളത്തുപറമ്പിൽ, സിജു ചാമക്കാലയിൽ, അജീഷ് ചേരുവേലിൽ എന്നിവർ നേതൃത്വം നൽകി.

ഉമ്മൻചാണ്ടി അനുസ്മരണവും പ്രതിഭാ പുരസ്കാര സമർപ്പണവും

ചെറുവത്തൂർ: ഭരണാധിപൻമാർക്ക് പാഠപുസ്തകമാണ് ഉമ്മൻചാണ്ടിയെന്ന് യൂത്ത് കോൺഗ്രസ് സംസ്ഥാന ജനറൽ സെക്രട്ടറി ജോമോൻ ജോസ്. യൂത്ത് കോൺഗ്രസ് തൃക്കരിപ്പൂർ നിയോജക മണ്ഡലം കമ്മറ്റി നേതൃത്വത്തിൽ നടത്തിയ ഉമ്മൻ ചാണ്ടി അനുസ്മരണവും ഉന്നതവിജയികളായ വിദ്യാർഥികൾക്ക് പ്രതിഭാ പുരസ്കാര സമർപ്പണവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭീമനടിയിലെ സന്തോഷ് പുളിക്കത്തടത്തിന് ചടങ്ങിൽ ഇലക്ട്രിക് വീൽ ചെയർ നൽകി. ജോബിൻ ബാബു അധ്യക്ഷതവഹിച്ചു. ബി.പി. പ്രദീപ്കുമാർ മുഖ്യപ്രഭാക്ഷണം നടത്തി. മഡിയൻ ഉണ്ണികൃഷ്ണൻ, കെ. ബാലകൃഷ്ണൻ, പ്രവാസ് ഉണ്ണിയാടൻ, ഷോണി കെ. തോമസ്, രാജേഷ് തമ്പാൻ, ജിബിൻ പയ്യന്നൂർ, സുരാജ് മയിച്ച, ശരത് നീലേശ്വരം, അശ്വിൻ കമ്പല്ലൂർ എന്നിവർ പ്രസംഗിച്ചു.

ജനമൈത്രി വോളന്‍റിയര്‍ പരിശീലനം നല്‍കി

കാഞ്ഞങ്ങാട്: ഹൊസ്ദുര്‍ഗ് ജനമൈത്രി പോലീസിന്‍റെ നേതൃത്വത്തില്‍ ദുരന്തഘട്ടങ്ങളില്‍ ജനങ്ങളെ സഹായിക്കുവാന്‍ ഉള്ള വോളന്‍റിയര്‍മാര്‍ക്ക് പരിശീലനം നല്‍കി. ബിഗ് മാളില്‍ നടന്ന പരിപാടി ജില്ലാ പോലീസ് മേധാവി വിജയഭാരത് റെഡ്ഡി ഉദ്ഘാടനം ചെയ്തു. ട്രാക്ക് പ്രസിഡന്‍റ് എം.കെ. രാധാകൃഷ്ണന്‍ അധ്യക്ഷതവഹിച്ചു. കാഞ്ഞങ്ങാട് ഡിവൈഎസ്പി ബാബു പെരിങ്ങേത്ത്, ജനമൈത്രി അസി. നോഡല്‍ ഓഫീസര്‍ കെ.പി.വി. രാജീവന്‍, നഗരസഭ സെക്രട്ടറി എം.കെ. ഷിബു, ട്രാക്ക് സെക്രട്ടറി വി. വേണുഗോപാല്‍, വി. ശ്രീജേഷ് എന്നിവര്‍ സംസാരിച്ചു. ഡോ.എം.കെ. വേണുഗോപാലന്‍, വി. വേണുഗോപാലന്‍, എം. വിജയന്‍ എന്നിവര്‍ ക്ലാസെടുത്തു. ഹൊസ്ദുര്‍ഗ് ഇന്‍സ്‌പെക്ടര്‍ പി. അജിത് കുമാര്‍ സ്വാഗതവും ജനമൈത്രി ബീറ്റ് ഓഫീസര്‍ പ്രദീപന്‍ കോതോളി നന്ദിയും പറഞ്ഞു. സമാപന പരിപാടിയില്‍ ഹൊസ്ദുര്‍ഗ് എസ്‌ഐ എം.വി. വിഷ്ണുപ്രസാദ് വോളന്‍റിയര്‍ കാര്‍ഡ് വിതരണം ചെയ്തു. ട്രാക്ക് ട്രഷറര്‍ കെ. വിജയന്‍, ജോയിന്‍റ് സെക്രട്ടറി കെ.ടി. രവികുമാര്‍, എക്‌സിക്യൂട്ടീവ് മെംബര്‍ വിനോദ്കുമാര്‍ പട്ടേന, ഇടയില്ലം രാധാകൃഷ്ണന്‍ നമ്പ്യാര്‍, പി. ഭാര്‍ഗവന്‍, എം. സുനില്‍കുമാര്‍ എന്നിവര്‍ സംസാരിച്ചു.

കളഞ്ഞു കിട്ടിയ പണവും എടിഎം കാര്‍ഡുകളും അടങ്ങിയ പഴ്‌സ് ഉടമയ്ക്ക് കൈമാറി

കാസര്‍ഗോഡ്: പാതയോരത്ത് നിന്ന് കളഞ്ഞു കിട്ടിയ പണവും എടിഎം കാര്‍ഡുകളുമടങ്ങുന്ന പഴ്‌സ് ഉടയെ കണ്ടെത്തി കൈമാറി.വിദ്യാനഗര്‍ കേന്ദ്രീയ വിദ്യാലയത്തിലെ ഒമ്പതാം തരം വിദ്യാര്‍ത്ഥി എം. ദേവ് കിരണിന്‍റെ സത്യസന്ധതയില്‍ എടനീര്‍ മഠത്തിന് സമീപത്തെ എം. അബ്ദുള്‍ ഖാദറിനാണ് നഷ്ടപ്പെട്ട പഴ്‌സ് തിരിച്ചുകിട്ടിയത്. ശനിയാഴ്ച രാവിലെ 6.30ഓടെയാണ് പടുവടക്കം പാതയോരത്ത് നിന്നാണ് 2850 രൂപയും മൂന്ന് എടിഎം കാര്‍ഡുകളും പാന്‍ കാര്‍ഡുകളും അടങ്ങുന്ന പഴ്‌സ് ദേവ്കിരണിന് കിട്ടിയത്. ഉദയഗിരി സ്‌പോര്‍ട്‌സ് കൗണ്‍സില്‍ ഗ്രൗണ്ടില്‍ കളിക്കാന്‍ പോകുന്നതിനിടയിലാണ് പഴ്‌സ് കിട്ടിയത്. ഉടമയെ കണ്ടെത്തി നല്‍കുന്നതിന് സമീപവാസിയായ പത്രപ്രവര്‍ത്തകന്‍ പി.കെ. വിനോദ്കുമാറിന് കൈമാറി. ആധാര്‍ കാര്‍ഡില്‍ നിന്ന് പഴ്സ് എടനീറിലുള്ള എം. അബ്ദുല്‍ ഖാദറിന്‍റേതാണെന്ന് മനസ്സിലായി. ചെങ്കള പഞ്ചായത്തംഗം സലിം എടനീരുമായി ബന്ധപ്പെട്ടതാണ് ഉടമയെ തിരിച്ചറിഞ്ഞത്. ഭക്ഷണം വീടുകളിലേക്ക് എത്തിച്ചു നല്‍കുന്നു കമ്പനിയിലെ ജീവനക്കാരനാണ് അബ്ദുള്‍ ഖാദര്‍.

സര്‍ക്കാര്‍ വിപണിയില്‍ ഇടപ്പെട്ടില്ലെങ്കില്‍ വില വര്‍ധിപ്പിക്കുമെന്ന് ഹോട്ടലുടമകള്‍

കാസര്‍ഗോഡ്: നിത്യാപയോഗ സാധനങ്ങളുടെ വിലക്കയറ്റം ഭക്ഷ്യ മേഖല ഒന്നാകെ പ്രതിസന്ധിയിലാക്കിയതായും വിലക്കയറ്റം തുടര്‍ന്നാല്‍ ഹോട്ടല്‍ ഭക്ഷണവില വര്‍ധിപ്പിക്കേണ്ടിവരുമെന്ന് കേരള ഹോട്ടല്‍ ആന്‍ഡ് റെസ്റ്റോറന്‍റ് അസോസിയേഷന്‍ ജില്ലാ കമ്മിറ്റി അറിയിച്ചു. വെളിച്ചണ്ണ, തേങ്ങ, ബിരിയാണി അരി ഉള്‍പ്പെടെ നിത്യാപയോഗ സാധനങ്ങളുടെ വില കുതിച്ച് ഉയരുകയാണ്. സംസ്ഥാന കമ്മിറ്റിയുടെ ആഹ്വാനം അനുസരിച്ച് ജില്ലയില്‍ രണ്ടു മേഖലകളായി തിരിച്ച് നാളെ രാവിലെ 10നു കുമ്പള പഞ്ചായത്തിലേയ്ക്കും ഏഴിനു രാവിലെ 10നു കാഞ്ഞങ്ങാട് മുന്‍സിപ്പാലിറ്റിയിലേക്കും പ്രതിഷേധ മാര്‍ച്ചും ധര്‍ണയും സംഘടിപ്പിക്കും. പിസിബിയുടെ പേരിലുള്ള പീഡനം അവസാനിപ്പിക്കുക, ഉറവിട മാലിന്യസംസ്‌കരണത്തിന് പൊതു സംവിധാനം ഏര്‍പ്പെടത്തുക, അനധികൃത സമാന്തര ഹോട്ടല്‍ തട്ടുകള്‍ക്കെതിരെ നടപടി സ്വീകരിക്കുക തുടങ്ങിയ ആവശ്യങ്ങള്‍ ഉന്നയിച്ചുകൊണ്ടാണ് പ്രതിഷേധസമരം നടത്തുന്നതെന്ന് ജില്ലാ ഭാരവാഹികളായ നാരായണ പൂജാരി, ബിജു ചുള്ളിക്കര, മുഹമ്മദ് ഗസാലി, രഘുവീര്‍ പൈ, അബ്ദുള്ള താജ്, രാജന്‍ കളക്കര, സത്യന്‍ ഇരിയണ്ണി, അജേഷ് നുള്ളിപ്പാടി, നാരായണന്‍ ഊട്ടുപുര എന്നിവര്‍ അറിയിച്ചു.

മെമു ട്രെയിനുകൾ മംഗളൂരു വരെ നീട്ടണം: ജില്ലാ വികസന സമിതി

കാസർഗോഡ്: പാസഞ്ചര്‍ ട്രെയിനുകളുടെ അപര്യാപ്തത കാരണം ജില്ലയിലെ ജനങ്ങള്‍ നേരിടുന്ന യാത്രാബുദ്ധിമുട്ടുകള്‍ക്ക് പരിഹാരം കാണുന്നതിന് നിലവിൽ കണ്ണൂർ വരെയുള്ള മെമു ട്രെയിനുകളുടെ സര്‍വീസ് മംഗളൂരു വരെ നീട്ടണമെന്ന് ജില്ലാ വികസന സമിതി യോഗം ആവശ്യപ്പെട്ടു. എം. രാജഗോപാലന്‍ എംഎല്‍എയാണ് പ്രമേയം അവതരിപ്പിച്ചത്. നിലവില്‍ കണ്ണൂരിനും മംഗളൂരുവിനും ഇടയില്‍ ഒരു പാസഞ്ചര്‍ ട്രെയിന്‍ മാത്രമാണ് സര്‍വീസ് നടത്തുന്നത്. ഷൊര്‍ണൂരില്‍ നിന്ന് കണ്ണൂരിലേക്ക് അടുത്തിടെ ആരംഭിച്ച മെമു സര്‍വീസ് കണ്ണൂര്‍ സ്റ്റേഷനില്‍ എല്ലാ ദിവസവും ഏകദേശം ഒന്‍പത് മണിക്കൂര്‍ നിഷ്‌ക്രിയമായി നിര്‍ത്തിയിടുകയാണ്. ഇത് കാസര്‍ഗോഡ് അല്ലെങ്കില്‍ മംഗളൂരു വരെ നീട്ടാൻ വലിയ ബുദ്ധിമുട്ടുകളില്ലെന്ന് യോഗം ചൂണ്ടിക്കാട്ടി. വീരമലക്കുന്നിലെ ജലസംഭരണിയുടെ സുരക്ഷിതത്വം ഉറപ്പുവരുത്തണം ചെറുവത്തൂർ വീരമലക്കുന്നിൽ മണ്ണിടിച്ചലിനെ തുടര്‍ന്ന് അത്യന്തം അപകടകരമായ സ്ഥിതിയാണ് നിലവിലുള്ളതെന്ന് ജില്ലാ വികസനസമിതി യോഗം വിലയിരുത്തി. നിരവധി തവണ മുന്നറിയിപ്പ് നല്‍കിയെങ്കിലും അതൊന്നും നിര്‍മാണ കമ്പനി ഗൗരവത്തിലെടുക്കാത്തതിന്‍റെ അനന്തരഫലമാണ് ഈ സ്ഥിതിയിലെത്തിച്ചത്. ചെറുവത്തൂര്‍ പഞ്ചായത്തിലേക്കുള്ള ജലജീവന്‍ മിഷന്‍റെ 15 ലക്ഷം ലിറ്റര്‍ സംഭരണശേഷിയുള്ള ജലസംഭരണിയുടെ നിര്‍മാണം വീരമലയില്‍ ആരംഭിച്ചിട്ടുണ്ട്. മണ്ണിടിച്ച സ്ഥലവും ഈ നിർമാണം നടക്കുന്ന സ്ഥലവും തമ്മില്‍ 30 മീറ്റര്‍ അകലം മാത്രമാണ് ഉള്ളത്. ഇവിടെ ഇത്രയും കൂടി ഭാരം വരുമ്പോള്‍ അത് സുരക്ഷിതമാണോയെന്ന കാര്യം പരിശോധിച്ച് ഉറപ്പുവരുത്തണമെന്ന് എം. രാജഗോപാലന്‍ എംഎല്‍എ ആവശ്യപ്പെട്ടു. മറ്റു പ്രധാന നിർദേശങ്ങൾ: കടലേറ്റം രൂക്ഷമായ സ്ഥലങ്ങളില്‍ ശാശ്വത പരിഹാരത്തിനായി പദ്ധതി ആിഷ്‌കരിക്കണമെന്ന് ജില്ലാ വികസനസമിതി യോഗം നിര്‍ദ്ദേശിച്ചു. ബേഡകത്ത് തുടങ്ങുന്ന ആട് ഫാമിലേക്ക് കേരള ലൈവ്സ്റ്റോക്ക് ഡെവലപ്മെന്‍റ് ബോര്‍ഡില്‍ നിന്ന് 200 ആടുകളെ കൊണ്ടുവരുമെന്ന് ജില്ലാ മൃഗസംരക്ഷണ ഓഫീസര്‍ അറിയിച്ചു. ടാറ്റ കോവിഡ് ആശുപത്രിലെ കണ്ടെയ്നറുകള്‍ സമയബന്ധിതമായി നീക്കംചെയ്യാന്‍ ജില്ലാ നിര്‍മിതികേന്ദ്രത്തിന് നിര്‍ദേശം നല്‍കി. ഇവിടെ പുതിയ ക്രിട്ടിക്കല്‍ കെയര്‍ യൂണിറ്റ് ആരംഭിക്കുന്നതിനുള്ള സാങ്കേതികാനുമതി ലഭിച്ചുകഴിഞ്ഞതായും നിർമാണ പ്രവൃത്തികൾ ആരംഭിക്കുന്നതിനായി ഈ മാസം 30 നകം കണ്ടെയ്നറുകള്‍ നീക്കം ചെയ്യണമെന്നും സി.എച്ച്.കുഞ്ഞമ്പു എംഎല്‍എ പറഞ്ഞു. കാസര്‍കോട്-കാഞ്ഞങ്ങാട്, ചെര്‍ക്കള- ജാല്‍സൂര്‍ റോഡുകളിലെ കുഴികൾ അടയ്ക്കുന്നതിനായി ക്വട്ടേഷന്‍ വിളിച്ചിട്ടുണ്ടെന്ന് പൊതുമരാമത്ത് റോഡ്സ് വിഭാഗം എക്സിക്യുട്ടീവ് എൻജിനിയർ അറിയിച്ചു. മംഗളൂരുവിലേക്ക് പോകുന്ന ട്രെയിനുകളില്‍ നിരന്തരമായുണ്ടാകുന്ന വിദ്യാര്‍ഥി സംഘര്‍ഷവും റാഗിംഗും കണക്കിലെടുത്ത് റെയില്‍വേ പോലീസ് നിതാന്ത ജാഗ്രത പാലിക്കണമെന്ന് യോഗം ആവശ്യപ്പെട്ടു. മുളിയാര്‍ എബിസി കേന്ദ്രം ഉദ്ഘാടനം ചെയ്‌തെങ്കിലും അനിമല്‍ വെല്‍ഫെയര്‍ ബോർഡിന്‍റെ അംഗീകാരം ലഭിക്കാത്തതിനാലാണ് പ്രവര്‍ത്തനമാരംഭിക്കാന്‍ സാധിക്കാത്തതെന്ന് ജില്ലാ മൃഗസംരക്ഷണ ഓഫീസര്‍ പറഞ്ഞു. ബ്യാരി ഭാഷ സംസാരിക്കുന്നവര്‍ക്ക് മാതൃഭാഷ കന്നഡയാണെന്ന സര്‍ട്ടിഫിക്കറ്റ് അനുവദിക്കാൻ നിലവിലുള്ള സര്‍ക്കാര്‍ ഉത്തരവ് അനുസരിച്ച് നടപടി സ്വീകരിക്കുന്നതിന് കളക്ടര്‍ നിര്‍ദേശം നല്‍കി. ജില്ലാ പഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തി നിർമിക്കുന്ന മെക്കാഡം റോഡുകൾ നിർമ്മാണത്തിനുശേഷം ജല അഥോറിറ്റിയുടെയുടെ പൈപ്പുകൾ സ്ഥാപിക്കുന്നതിനും അറ്റകുറ്റപ്പണികൾ നടത്തുന്നതിനുമായി കീറിമുറിക്കുന്നത് ഒഴിവാക്കാൻ തദ്ദേശ സ്വയംഭരണ വകുപ്പിന്‍റെയും ജല അഥോറിറ്റിയുടെയും എൻജിനിയറിംഗ് വിഭാഗങ്ങൾ സംയുക്ത നടപടികൾ സ്വീകരിക്കണമെന്ന് ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ നിർദേശം നൽകി.

അഡ്ജസ്റ്റ്‌മെന്‍റ് ട്രാന്‍സ്ഫര്‍: ജില്ലയിലെ ഗവ. സ്‌കൂളുകള്‍ വീണ്ടും അധ്യാപക ക്ഷാമത്തിലേക്ക്

കാസര്‍ഗോഡ്: ഹയര്‍സെക്കന്‍ഡറി അധ്യാപകരുടെ പൊതുസ്ഥലംമാറ്റത്തിനു ശേഷമുള്ള അഡ്ജസ്റ്റ്‌മെന്‍റ് ട്രാന്‍സ്ഫറിന്‍റെ കരട് പട്ടിക പുറത്തിറങ്ങിയതോടുകൂടി ജില്ലയില്‍ വീണ്ടും അധ്യാപകക്ഷാമം രൂക്ഷമാകാന്‍ സാധ്യത. നിലവില്‍ കാസര്‍ഗോഡ് ജില്ലയില്‍ ജോലി ചെയ്യുന്നവരില്‍ നല്ലൊരു ശതമാനവും തെക്കന്‍ ജില്ലകളിലെ അധ്യാപകരാണ്. ഇക്കഴിഞ്ഞ പൊതുസ്ഥലംമാറ്റത്തില്‍ അവരില്‍ മിക്കവരും നാട്ടിലേക്ക് മടങ്ങി. ശേഷിക്കുന്നവരും അടുത്ത ആഴ്ചയോടെ സ്വന്തം നാട്ടിലേക്ക് തിരികെ പോകുന്നതിനാല്‍ ജില്ലയിലെ ഗവ. ഹയര്‍സെക്കന്‍ഡറി സ്‌കൂളുകളില്‍ പല വിഷയങ്ങള്‍ക്കും അധ്യാപകരെ കിട്ടാത്ത അവസ്ഥ വരും. ജില്ലയുടെ വടക്കന്‍ ഭാഗങ്ങളിലും ഉള്‍പ്രദേശങ്ങളിലും ഉള്ള സ്‌കൂളുകളിലാണ് അധ്യാപകക്ഷാമം രൂക്ഷം. നിലവില്‍ പല സ്‌കൂളുകളിലും ജോലി ചെയ്തുകൊണ്ടിരിക്കുന്ന അതിഥി അധ്യാപകര്‍ക്ക് നിയമന അംഗീകാരം ലഭിക്കാത്തതിനാല്‍ കഴിഞ്ഞ രണ്ടു മാസമായി ശമ്പളം കിട്ടുന്നില്ല. ഈ അവസ്ഥക്ക് ശാശ്വതമായ പരിഹാരം കാണണമെന്ന് ഹയര്‍സെക്കന്‍ഡറി സ്‌കൂള്‍ ടീച്ചേഴ്‌സ് അസോസിയേഷന്‍ ജില്ലാ കമ്മറ്റി ആവശ്യപ്പെട്ടു. എച്ച്എസ്എസ്ടിഎ സംസ്ഥാന വൈസ് പ്രസിഡന്‍റ് എന്‍. സദാശിവന്‍ യോഗം ഉദ്ഘാടനം ചെയ്തു. സംസ്ഥാന ഓര്‍ഗനൈസിംഗ് സെക്രട്ടറി സി.പി. അഭിരാം മുഖ്യപ്രഭാഷണം നടത്തി. ജില്ലാ പ്രസിഡന്‍റ് പി. സുകുമാരന്‍ അധ്യക്ഷത വഹിച്ചു. കെ. ഹരിപ്രസാദ്, ടി.കെ. വസന്തകുമാരി, വി.കെ. പ്രിയ എന്നിവര്‍ സംസാരിച്ചു. ജില്ലാ സെക്രട്ടറി സോജി ചാക്കോ സ്വാഗതവും എം. രവി നന്ദിയും പറഞ്ഞു.

ജില്ലാ പഞ്ചായത്തിൽ ഇത്തവണയും ഇരുമുന്നണികളും ഒപ്പത്തിനൊപ്പം

കാസർഗോഡ്: കഴിഞ്ഞതവണ ഒരൊറ്റ സീറ്റിന്‍റെ ഭൂരിപക്ഷത്തിൽ എൽഡിഎഫ് ഭരണം പിടിച്ച ജില്ലാ പഞ്ചായത്തിൽ വാർഡ് വിഭജനം കഴിയുമ്പോഴും ഇരുമുന്നണികളും ഏതാണ്ട് ഒപ്പത്തിനൊപ്പമാണ്. നിലവിൽ 17 ഡിവിഷനുകളുള്ള ജില്ലാ പഞ്ചായത്തിൽ പുതിയ കരട് വിജ്ഞാപന പ്രകാരം ഒരു ഡിവിഷൻ വർധിക്കും. നാല് ഡിവിഷനുകളുടെ പേരിലും ഏതാണ്ടെല്ലാ ഡിവിഷനുകളുടെയും അതിർത്തികളിലും മാറ്റം വരുന്നുണ്ട്. ബേക്കൽ എന്ന പേരിലാണ് പുതിയ ഡിവിഷൻ വരുന്നത്. നിലവിലുള്ള ഡിവിഷനുകളിൽ വോർക്കാടിക്കു പകരം കുഞ്ചത്തൂർ, എടനീരിനു പകരം ബദിയടുക്ക, ബേഡകത്തിനു പകരം കുറ്റിക്കോൽ, കരിന്തളത്തിനു പകരം കയ്യൂർ എന്നിങ്ങനെ പുതിയ ഡിവിഷനുകൾ വരും. ഇപ്പോൾ കള്ളാർ ഡിവിഷന്‍റെ ഭാഗമായ പനത്തടി പഞ്ചായത്ത് പുതിയ കുറ്റിക്കോൽ ഡിവിഷന്‍റെ പരിധിയിലേക്ക് മാറും. കള്ളാർ, കോടോം-ബേളൂർ പഞ്ചായത്തുകളാണ് കള്ളാർ ഡിവിഷന്‍റെ പരിധിയിൽ വരിക. ബളാൽ, ഈസ്റ്റ് എളേരി പഞ്ചായത്തുകൾ ചിറ്റാരിക്കാൽ ഡിവിഷന്‍റെ പരിധിയിലും ബ്ലോക്ക് പഞ്ചായത്തിലെ എളേരി ഡിവിഷനും കിനാനൂർ-കരിന്തളം, കയ്യൂർ-ചീമേനി പഞ്ചായത്തുകളും കയ്യൂർ ഡിവിഷന്‍റെ പരിധിയിലുമാകും. ഇതോടെ കേരള കോൺഗ്രസിന്‍റെ ബലത്തിൽ എൽഡിഎഫിന് പിടിച്ചെടുക്കാൻ കഴിഞ്ഞ കള്ളാർ ഡിവിഷൻ ഇത്തവണ അവർക്ക് കുറച്ചുകൂടി സുരക്ഷിതമാകും. നേരത്തേ എൽഡിഎഫിന് കൈവിട്ടുപോവുകയും കഴിഞ്ഞ തവണ ചെറിയ ഭൂരിപക്ഷത്തിൽ മാത്രം ജയിക്കുകയും ചെയ്ത പിലിക്കോട് ഡിവിഷനിൽ ഇനി പിലിക്കോട്, തൃക്കരിപ്പൂർ പഞ്ചായത്തുകൾ മാത്രമാകുന്നതോടെ എൽഡിഎഫിന് കൂടുതൽ സുരക്ഷിതമാകും. അതേസമയം ചെറുവത്തൂർ, പടന്ന, വലിയപറമ്പ് പഞ്ചായത്തുകൾ ഉൾപ്പെടുന്ന ചെറുവത്തൂർ ഡിവിഷൻ യുഡിഎഫിന് നന്നായി പൊരുതിയാൽ പിടിച്ചെടുക്കാവുന്ന വിധത്തിലായി. പുതുതായി രൂപീകരിക്കുന്ന ബേക്കൽ ഡിവിഷൻ പള്ളിക്കര, ഉദുമ പഞ്ചായത്തുകളിലെ സിപിഎം ശക്തികേന്ദ്രങ്ങളുൾപ്പെട്ടതിനാൽ എൽഡിഎഫിന് ഏതാണ്ട് സുരക്ഷിതമാണ്. കോൺഗ്രസിന്‍റെ സിറ്റിംഗ് ഡിവിഷനായ ഉദുമ ഇതോടെ യുഡിഎഫിനും ഉറപ്പായി. കഴിഞ്ഞതവണ കോൺഗ്രസ് വിട്ട് എൽഡിഎഫ് സ്വതന്ത്രനായി മത്സരിച്ച ഷാനവാസ് പാദൂരിന്‍റെ ബലത്തിൽ എൽഡിഎഫ് പിടിച്ച ചെങ്കള ഡിവിഷൻ ഇത്തവണ യുഡിഎഫിന് തിരിച്ചുപിടിക്കാനാവുമെന്നാണ് പ്രതീക്ഷ. ഫലത്തിൽ കുഞ്ചത്തൂർ, ദേലംപാടി, ചിറ്റാരിക്കാൽ, ഉദുമ, ചെങ്കള, സിവിൽ സ്റ്റേഷൻ, കുമ്പള, മഞ്ചേശ്വരം ഡിവിഷനുകളിൽ യുഡിഎഫിനും കുറ്റിക്കോൽ, കള്ളാർ, കയ്യൂർ, പിലിക്കോട്, ചെറുവത്തൂർ, മടിക്കൈ, പെരിയ, ബേക്കൽ ഡിവിഷനുകളിൽ എൽഡിഎഫിനുമാണ് മുൻതൂക്കമുള്ള്. നിലവിൽ ബിജെപിയുടെ കൈയിലുള്ള പുത്തിഗെ, ബദിയടുക്ക ഡിവിഷനുകളിൽ ഏതെങ്കിലുമൊന്ന് പിടിച്ചെടുക്കാനുള്ള സാധ്യതയും യുഡിഎഫിനുണ്ട്. സിവിൽ സ്റ്റേഷൻ ഡിവിഷനിൽ ബിജെപിക്ക് തിരിച്ചും പൊരുതിനോക്കാനുള്ള സാധ്യതയുണ്ട്. അങ്ങനെയുണ്ടാകാവുന്ന മാറ്റങ്ങളും ഇരുമുന്നണികൾക്കും ചെറിയ ഭൂരിപക്ഷം മാത്രമുള്ള ഏതെങ്കിലും ഡിവിഷനിൽ സംഭവിക്കാവുന്ന അട്ടിമറികളുമാകും ഇത്തവണ ജില്ലാ പഞ്ചായത്ത് ഭരണം ആർക്കെന്ന് നിശ്ചയിക്കുക.

ചെങ്ങറ പുനരധിവാസ പാക്കേജ്: 58 കുടുംബങ്ങള്‍ക്ക് പട്ടയം കൈമാറി

കാഞ്ഞങ്ങാട്: ഹൊസ്ദുര്‍ഗ് താലൂക്കിലെ പെരിയ ഗ്രാമത്തില്‍ ചെങ്ങറ പുനരധിവാസ പാക്കേജിന്‍റെ ഭാഗമായി അനുവദിച്ച ഭൂമിയില്‍ ഗുണഭോക്താക്കളുടെ ഭൂമിപ്രശ്‌നങ്ങള്‍ പരിഹരിച്ച് 58 കുടുംബങ്ങള്‍ക്ക് പട്ടയം കൈമാറി. പെരിയ ഗ്രാമത്തിലെ സര്‍വേ നമ്പര്‍ 341/1ല്‍ അനുവദിച്ച ഭൂമിയിലാണ് ഏറെ നാളുകളായി നിലനിന്നിരുന്ന അനിശ്ചിതാവസ്ഥയ്ക്ക് അറുതി വരുത്തി പട്ടയങ്ങള്‍ വിതരണം ചെയ്തത്. പട്ടികജാതി-പട്ടികവര്‍ഗ വികസന വകുപ്പിന്‍റെ നിയന്ത്രണത്തിലായിരുന്ന ഭൂമി, ഗുണഭോക്താക്കളുടെ സമഗ്ര പുരോഗതി ലക്ഷ്യമാക്കി 2021 മെയ് 10 ന് പുറപ്പെടുവിച്ച ഉത്തരവിന്‍റെ അടിസ്ഥാനത്തില്‍ റവന്യു വകുപ്പിലേക്ക് തിരിച്ചുനല്‍കിയിരുന്നു. പട്ടയം അനുവദിച്ച 60 പേരില്‍ പട്ടികജാതിക്കാര്‍ക്ക് 50 സെന്‍റ് വീതവും മറ്റു വിഭാഗങ്ങള്‍ക്ക് 25 സെന്‍റ് വീതവും ഭൂമി നല്‍കി. ഇതില്‍ പട്ടികജാതി വിഭാഗത്തില്‍ പെട്ടവര്‍ക്ക് 42 സെന്‍റ് ഭൂമി കൃഷി ആവശ്യങ്ങള്‍ക്കും എട്ടു സെന്‍റ് കിടപ്പാട ആവശ്യങ്ങള്‍ക്കും നല്‍കി. മറ്റു വിഭാഗക്കാര്‍ക്ക് നല്‍കിയ 25 സെന്‍റ് ഭൂമിയില്‍ എട്ട് സെന്‍റ് കിടപ്പാട ആവശ്യങ്ങള്‍ക്കും 17 സെന്‍റ് കൃഷി ആവശ്യങ്ങള്‍ക്കും വേണ്ടിയായിരുന്നു. ഇതില്‍ കൃഷി ആവശ്യങ്ങള്‍ക്ക് അനുവദിച്ച ഭൂമിക്ക് വ്യക്തമായ അതിര്‍ത്തി നിര്‍ണയം നടന്നിരുന്നില്ല. ഇത് ഗുണഭോക്താക്കള്‍ക്കിടയില്‍ ആശയ കുഴപ്പത്തിന് വഴി വെച്ചു. പിന്നീട് ജില്ലാ കളക്ടറുടെ നിര്‍ദ്ദേശപ്രകാരം കൃഷിഭൂമിയുടെ അതിര്‍ത്തി നിര്‍ണയവും റീസര്‍വേ നടപടികളും പൂര്‍ത്തിയാക്കി. 58 പേര്‍ക്കാണ് നിലവില്‍ ഭൂമിയുടെ കൃത്യമായ അതിര്‍ത്തി നിര്‍ണയം നടത്തി പട്ടയം കൈമാറിയത്. കഴിഞ്ഞ ദിവസം പട്ടികജാതി പട്ടിക ഗോത്രവര്‍ഗ കമ്മീഷന്‍ സ്ഥലം സന്ദര്‍ശിക്കുകയും അവിടുത്തെ ജനങ്ങളുടെ പ്രശ്‌നങ്ങള്‍ വിലയിരുത്തുകയും ചെയ്തിരുന്നു. ഭൂപ്രശ്‌നങ്ങള്‍ക്കും മറ്റ് അടിസ്ഥാന സൗകര്യ ആവശ്യങ്ങള്‍ക്കും പരിഹാരം കാണുന്നതിനുള്ള നടപടികള്‍ വേഗത്തിലാക്കാന്‍ കമ്മീഷന്‍ നിര്‍ദേശങ്ങള്‍ നല്‍കി. ഹൊസ്ദുര്‍ഗ് താലൂക്കില്‍ നടന്ന ചടങ്ങില്‍ കാഞ്ഞങ്ങാട് ആര്‍ഡിഒ ഇന്‍ ചാര്‍ജ് ബിനു ജോസഫ് പട്ടയം വിതരണം ചെയ് തു. തഹസില്‍ദാര്‍ ജി. സുരേഷ് ബാബു അധ്യക്ഷതവഹിച്ചു. ഭൂരേഖ തഹസില്‍ദാര്‍ വി. അശോകന്‍, ഡെപ്യൂട്ടി തഹസില്‍ദാര്‍മാരായ കെ. രമേഷ്, അനില്‍ സി. ഫിലിപ്പ്, പെരിയ സ്‌പെഷല്‍ വില്ലേജ് ഓഫീസര്‍ കെ. രഞ്ജിനി എന്നിവര്‍ സംസാരിച്ചു.

മകന്‍ ഓടിച്ച ബൈക്ക് മറിഞ്ഞ് പരിക്കേറ്റ വീട്ടമ്മ മരിച്ചു

പുത്തിഗെ: മകന്‍ ഓടിച്ച ബൈക്ക് നിയന്ത്രണംവിട്ടു മറിഞ്ഞു പരിക്കേറ്റു ചികിത്സയിലായിരുന്ന വീട്ടമ്മ മരിച്ചു. അംഗഡിമൊഗറിലെ പരേതനായ നവീന്‍ചന്ദ്രഷെട്ടിയുടെ ഭാര്യ എന്‍. സുലോചന ഷെട്ടി (56) ആണ് മരിച്ചത്. ജൂലൈ 28നു കലാനഗര്‍ ചിങ്കനമുഗര്‍ റോഡിലാണ് അപകടമുണ്ടായത്. എതിര്‍ദിശയില്‍ നിന്നും അമിതവേഗതയിലെത്തിയ വാഹനത്തില്‍ ഇടിക്കാതിരിക്കാന്‍ വെട്ടിച്ചപ്പോള്‍ മകന്‍ അഭിഷേക് ഓടിച്ച ബൈക്ക് നിയന്ത്രണംവിട്ടു മറിയുകയായിരുന്നു. മറ്റു മക്കള്‍: അമൃത്, അക്ഷയ്.

കാട്ടുപന്നികളെ വെടിവച്ചുകൊല്ലാനുള്ള ഉത്തരവ് മണിക്കൂറുകൾക്കകം നടപ്പാക്കി ബളാൽ പഞ്ചായത്ത്

വെള്ളരിക്കുണ്ട്: കൃഷിയിടങ്ങളിലിറങ്ങി ജീവനും സ്വത്തിനും ഭീഷണിയാകുന്ന കാട്ടുപന്നികളെ കണ്ടാലുടന്‍ വെടിവച്ച് കൊല്ലാന്‍ ഉത്തരവിറക്കി ബളാൽ പഞ്ചായത്ത് പ്രസിഡന്‍റ് രാജു കട്ടക്കയം. ഇന്നലെ രാവിലെ 10 മണിക്ക് ഉത്തരവിറങ്ങി മണിക്കൂറുകൾക്കകം തന്നെ വെള്ളരിക്കുണ്ട് ടൗണിനു സമീപത്തെ പ്രകാശ് എസ്റ്റേറ്റ് കേന്ദ്രീകരിച്ച് ഉത്തരവ് നടപ്പാക്കി. കാട്ടുപണികളെ വെടിവെച്ചു കൊല്ലാൻ ലൈസൻസുള്ള ഷൂട്ടർമാരെ എത്തിച്ചാണ് കാട്ടുപന്നിയെ വെടിവച്ചുകൊന്നത്. ബ്ലോക്ക് പഞ്ചായത്ത് അംഗം ഷോബി ജോസഫ്, വാർഡ് മെംബർ കെ.ആർ. വിനു എന്നിവരും സ്ഥലത്തെത്തി പന്നിവേട്ടയ്ക്ക് നേതൃത്വം നൽകി. ബളാൽ പഞ്ചായത്തിൽ കഴിഞ്ഞ അഞ്ചുവർഷത്തിനുള്ളിൽ നാലുപേരുടെ ജീവനാണ് കാട്ടുപന്നി ആക്രമണങ്ങളിൽ നഷ്ടമായതെന്ന് പഞ്ചായത്ത് പ്രസിഡന്‍റ് രാജു കട്ടക്കയം പറഞ്ഞു. ലക്ഷക്കണക്കിന് രൂപയുടെ കൃഷിനാശമാണ് ഉണ്ടായത്. ഈ സാഹചര്യത്തിലാണ് കാട്ടുപന്നികളെ കണ്ടാലുടൻ വെടിവെച്ചു കൊല്ലാനുള്ള ഉത്തരവിറക്കിയത്. വരുംദിവസങ്ങളിലും കാട്ടുപന്നി വേട്ട തുടരുമെന്നും അദ്ദേഹം അറിയിച്ചു.

ജില്ലാ അത്‌ലറ്റിക്സിൽ പെർഡാല സ്കൂൾ മുന്നിൽ

നീലേശ്വരം: ഇഎംഎസ് സ്റ്റേഡിയത്തിൽ നടക്കുന്ന 40-ാമത് ജില്ലാ ജൂണിയർ ആൻഡ് സീനിയർ അത്‌ലറ്റിക്സ് ചാമ്പ്യൻഷിപ്പിന്‍റെ ആദ്യദിനത്തിലെ മത്സരങ്ങൾ അവസാനിച്ചപ്പോൾ പെർഡാല എംപിഐ സ്കൂൾ 69 പോയിന്‍റുമായി മുന്നിട്ടു നിൽക്കുന്നു. 41 പോയിന്‍റുമായി പിടിഎം എയുപി സ്കൂൾ രണ്ടാം സ്ഥാനത്തും 34 പോയിന്‍റു വീതം നേടി സെന്‍റ് എലിസബത്ത് കോൺവെന്‍റ് സ്കൂളും കരിന്തളം ഏകലവ്യാ സ്കൂളും മൂന്നാം സ്ഥാനത്തും നിൽക്കുന്നു. ഡോ.വി. സുരേശൻ മീറ്റ് ഉദ്ഘാടനം ചെയ്തു. അസോസിയേഷൻ ജില്ല പ്രസിഡന്‍റ് കെ. വിജയകൃഷ്ണൻ അധ്യക്ഷനായി. ജില്ല സ്പോർട്സ് കൗൺസിൽ വൈസ് പ്രസിഡന്‍റ് പി.പി.അശോകൻ, വ്യാപാരി വ്യവസായി ഏകോപനസമിതി സെക്രട്ടറി എ. വിനോദ് കുമാർ, അസോസിയേഷൻ ജില്ല സെക്രട്ടറി പി. ഗോപാലകൃഷ്ണൻ, ടി. ശ്രീധരൻ നായർ എന്നിവർ പ്രസംഗിച്ചു. സ്കൂളുകൾ, ക്ലബുകൾ, സ്പോർട്സ് അക്കാദമി എന്നിങ്ങനെ വിവിധ വിഭാഗങ്ങളിലായി 1200 പുരുഷ, വനിത കായിക താരങ്ങളാണ് മുന്ന് ദിവസങ്ങളിലായി നടക്കുന്ന വിവിധ ഇനങ്ങളിൽ പങ്കെടുക്കുന്നത്.

കാഞ്ഞങ്ങാട് മൂന്നു വിദ്യാർഥിനികൾ ഒളിച്ചോടിയത് മയക്കുമരുന്ന് കേസുകളിലെ പ്രതികൾക്കൊപ്പം

കാഞ്ഞങ്ങാട്: കഴിഞ്ഞ ഒരാഴ്ചയ്ക്കിടെ ഹൊസ്ദുർഗ് സ്റ്റേഷൻ പരിധിയിൽ നിന്നും മൂന്ന് വിദ്യാർഥിനികൾ ഒളിച്ചോടിയത് മയക്കുമരുന്ന് കേസുകളിൽ പ്രതികളായിരുന്ന യുവാക്കൾക്കൊപ്പമായിരുന്നുവെന്ന് പോലീസിന്‍റെ വെളിപ്പെടുത്തൽ. കാഞ്ഞങ്ങാട് ദുർഗ ഹയർ സെക്കൻഡറി സ്‌കൂളിലെ സ്റ്റുഡന്‍റ്സ് പോലീസ് കേഡറ്റ് ദിനാഘോഷം ഉദ്ഘാടനം ചെയ്തുകൊണ്ട് ഹോസ്ദുർഗ് സ്റ്റേഷൻ ഇൻസ്‌പെക്ടർ പി. അജിത്കുമാറാണ് ഇക്കാര്യം വെളിപ്പെടുത്തിയത്. മൂന്ന് കേസുകളും വെവ്വേറെ രജിസ്റ്റർ ചെയ്തതാണ്. വിദ്യാർഥിനികൾ 18 വയസ് തികയാൻ കാത്തുനിൽക്കുകയായിരുന്നു. പ്രായപൂർത്തിയായതിനാൽ പോലീസിന് ഇക്കാര്യത്തിൽ നിയമപരമായി ഒന്നും ചെയ്യാൻ കഴിയാത്ത അവസ്ഥയാണ്. അപകടത്തിലേക്കാണ് പോകുന്നതെന്ന് വിദ്യാർഥിനികളെ പറഞ്ഞു ബോധ്യപ്പെടുത്താൻ ഇന്നത്തെ സാഹചര്യത്തിൽ വലിയ പ്രയാസമാണ്. നിറകണ്ണുകളോടെയാണ് അവരുടെ മാതാപിതാക്കൾ പോലീസ് സ്‌റ്റേഷനിൽ നിന്ന് മടങ്ങിയതെന്നും ഇൻസ്‌പെക്ടർ പറഞ്ഞു. പിടിഎ പ്രസിഡന്‍റ് ഇ.വി. ജയകൃഷ്ണൻ അധ്യക്ഷനായി. നഗരസഭാ കൗൺസിലർമാരായ എൻ. അശോക് കുമാർ, കുസുമ ഹെഗ്‌ഡെ, പ്രിൻസിപ്പൽ എൻ. വേണുനാഥൻ, മുഖ്യാധ്യാപിക പി. സുമ, സ്റ്റാഫ് സെക്രട്ടറി കെ.വി. രാജേഷ്, എം.പി. സൗമ്യ, എം. തുഷാര, പി.വി. ശ്രീജിത്ത്, ഡി.വി. സൂര്യ, ടി. സന്ധ്യ എന്നിവർ പ്രസംഗിച്ചു.

എൻഎസ്എസ് യൂണിറ്റിന്‍റെ സ്നേഹവീട് കൈമാറി

കാഞ്ഞങ്ങാട്: നെഹ്റു കോളജിലെ എൻഎസ്എസ് യൂണിറ്റ് ചിറ്റിലപ്പള്ളി ഫൗണ്ടേഷന്‍റെ സഹകരണത്തോടെ നിർമിച്ച സ്നേഹവീടിന്‍റെ താക്കോൽ കൈമാറി. കോളജിലെ തന്നെ പൂർവവിദ്യാർഥിക്കാണ് കാഞ്ഞങ്ങാട് കുശാൽനഗറിൽ വീട് നിർമിച്ച് നൽകിയത്. എൻഎസ്എസ് സംസ്ഥാന ഓഫീസർ ഡോ.ആർ.എൻ.അൻസർ താക്കോൽ കൈമാറ്റം നിർവഹിച്ചു. കോളജ് പ്രിൻസിപ്പൽ ഡോ.ടി. ദിനേശൻ അധ്യക്ഷത വഹിച്ചു. കണ്ണൂർ സർവകലാശാല സ്റ്റുഡന്‍റ് സർവീസസ് ഡീൻ ഡോ.കെ.വി. സുജിത്ത് മുഖ്യാതിഥിയായി. കോളജ് മാനേജർ കെ. രാമനാഥൻ, അഡ്മിനിസ്ട്രേറ്റീവ് ഓഫീസർ ഡോ.കെ.വി. മുരളി, ഐക്യുഎസി കോ-ഓർഡിനേറ്റർ ഡോ.വി. വിജയകുമാർ, എൻഎസ്എസ് പ്രോഗ്രാം ഓഫീസർമാരായ ഡോ.കെ.വി. വിനീഷ് കുമാർ, ഡോ.സി. ജ്ഞാനേശ്വരി, കെ. സുമലത, ജൂണിയർ സൂപ്രണ്ട് വിനോദ് കുമാർ, കോളേജ് യൂണിയൻ ചെയർമാൻ ടി.വി. ആദിത്യൻ എന്നിവർ പ്രസംഗിച്ചു.

ടിഎസ്എസ്എസ് വാർഷിക പൊതുയോഗം

പാലാവയൽ: ടിഎസ്എസ്എസ് പാലാവയൽ യുണിറ്റ് വാർഷിക പൊതുയോഗം പാലാവയൽ സെന്‍റ് ജോൺസ് പളളി അസി.വികാരി ഫാ. അമൽ ചെമ്പകശേരിൽ ഉദ്ഘാടനം ചെയ്തു. യുണിറ്റ് പ്രസിഡന്‍റ് ജോസ് മാളിയേക്കൽ അധ്യക്ഷത വഹിച്ചു. സെക്രട്ടറി ഷീബ ഷാജൻ, വൈസ് പ്രസിഡന്‍റ് ജോൺസൺ കൊടിമരത്തുംമുട്ടിൽ, ജോയിന്‍റ് സെക്രട്ടറി ജിജി ഈരൂരിക്കൽ എന്നിവർ പ്രസംഗിച്ചു. ഓടക്കൊല്ലി-പാലാവയൽ-നല്ലോംപുഴ റൂട്ടിലെ യാത്രാക്ലേശം പരിഹരിക്കാൻ അടിയന്തിര നടപടികൾ ഉണ്ടാകണമെന്ന് യോഗം പ്രമേയത്തിലൂടെ ആവശ്യപ്പെട്ടു. പാലാവയലിൽ നിന്ന് പഞ്ചായത്ത് ആസ്ഥാനമായ ചിറ്റാരിക്കാലിൽ എത്താൻ നല്ലോംപുഴ വഴി വാഹനസൗകര്യമുണ്ടെങ്കിൽ ഏഴ് കിലോമീറ്റർ സഞ്ചരിച്ചാൽ മതിയെന്നിരിക്കേ ഇപ്പോൾ പുളിങ്ങോം-ചെറുപുഴ വഴി 15 കിലോമീറ്ററോളം സഞ്ചരിക്കേണ്ടി വരുന്നതായി യോഗം ചൂണ്ടിക്കാട്ടി. കന്യാസ്ത്രീകളെ ആൾക്കൂട്ട വിചാരണ നടത്തി തെറ്റായ കുറ്റങ്ങൾ ചുമത്തി ജയിലിലടച്ച ഛത്തീസ്ഗഡ് സർക്കാരിന്‍റെ നടപടിക്കെതിരെ പാലാവയൽ ക്രെഡിറ്റ് യൂണിയൻ അംഗങ്ങൾ വായ് മൂടിക്കെട്ടി പ്രതിഷേധറാലി നടത്തി.

ഓണം സ്പെഷ്യൽ തീവണ്ടികൾക്ക് ജില്ലയിൽ രണ്ട് സ്റ്റോപ്പുകൾ മാത്രം

നീലേശ്വരം: ഇത്തവണത്തെ ഓണം സ്പെഷ്യൽ തീവണ്ടികൾക്ക് സ്റ്റോപ്പ് അനുവദിച്ചതിൽ ജില്ലയോട് അവഗണനയെന്ന് ആക്ഷേപം. കാസർഗോഡും കാഞ്ഞങ്ങാടും മാത്രമാണ് ജില്ലയിൽ സ്റ്റോപ്പ് അനുവദിച്ചിരിക്കുന്നത്. മംഗളൂരു-തിരുവനന്തപുരം നോർത്ത്, മംഗളുരു- കൊല്ലം എന്നീ റൂട്ടുകളിലാണ് സ്പെഷ്യൽ ട്രെയിനുകൾ പ്രഖ്യാപിച്ചിട്ടുള്ളത്. ആലപ്പുഴ ജില്ലയിൽ മാത്രം അഞ്ച് സ്റ്റേഷനുകളിലാണ് ഈ വണ്ടികൾക്ക് സ്റ്റോപ്പുകൾ നൽകിയിരിക്കുന്നതെന്ന് നീലേശ്വരം റെയിൽവേ ഡെവലപ്മെന്‍റ് കളക്ടീവ് (എൻആർഡിസി) യോഗം ചൂണ്ടിക്കാട്ടി. വരുമാനം തീരെ കുറഞ്ഞ കൊല്ലം ജില്ലയിലെ ശാസ്താംകോട്ടയിലും സ്റ്റോപ്പ് അനുവദിച്ചിട്ടുണ്ട്. ജില്ലയിലെ വിവിധ സ്റ്റേഷനുകളിൽ നിന്നുള്ള വരുമാനം ഉയരുമ്പോഴും റെയിൽവേ അധികൃതർക്ക് ജില്ലയോടുള്ള അവഗണനയിൽ മാറ്റമില്ലാത്തത് പ്രതിഷേധാർഹമാണെന്ന് യോഗം വിലയിരുത്തി. ഓണം സ്പെഷ്യൽ തീവണ്ടികൾക്ക് ജില്ലയിലെ മൂന്നാമത്തെ പ്രധാന സ്റ്റേഷനായ നീലേശ്വരത്തെങ്കിലും സ്റ്റോപ്പ് അനുവദിക്കണമെന്ന് എൻആർഡിസി യോഗം മുഖ്യരക്ഷാധികാരി പി. മനോജ്‌ കുമാർ മുഖേന റെയിൽവേ മന്ത്രാലയത്തോട് ആവശ്യപ്പെട്ടു. യോഗത്തിൽ എൻആർഡിസി പ്രസിഡന്‍റ് എൻ. സദാശിവൻ അധ്യക്ഷനായി. സെക്രട്ടറി എം. വിനീത്, ട്രഷറർ സി.എം. സുരേഷ്‌കുമാർ, ഡോ.വി. സുരേശൻ, കെ. ബാബുരാജ്, പി.യു. ചന്ദ്രശേഖരൻ എന്നിവർ പ്രസംഗിച്ചു.

താത്കാലിക ഡോക്ടർമാർക്ക് വേതനം മുടങ്ങിയിട്ട് മൂന്നുമാസം

കാഞ്ഞങ്ങാട്: ജില്ലയിലെ സർക്കാർ ആശുപത്രികളിൽ ഡോക്ടർമാരുടെ ക്ഷാമം പരിഹരിക്കാൻ താത്കാലിക നിയമനം നല്കിയ ഡോക്ടർമാർക്ക് മൂന്നുമാസമായി വേതനമില്ല. ട്രഷറിയിലെ നടപടിക്രമങ്ങളുമായി ബന്ധപ്പെട്ട സാങ്കേതികപ്രശ്നങ്ങളാണ് വേതനം മുടങ്ങാൻ കാരണമായതെന്നാണ് ബന്ധപ്പെട്ടവർ പറയുന്നത്. സ്കൂളുകളിലെ താത്കാലിക അധ്യാപകരുടെ വേതനവും ഇത്തരത്തിൽ മുടങ്ങിയിരുന്നു. പിന്നീട് ധനകാര്യവകുപ്പ് പ്രത്യേക ഉത്തരവിലൂടെ പ്രശ്നം പരിഹരിക്കുകയായിരുന്നു. എന്നാൽ ആരോഗ്യവകുപ്പ് ജീവനക്കാരുടെ കാര്യത്തിൽ ഇതുവരെ ഇത്തരത്തിലുള്ള ഉത്തരവ് ഇറങ്ങാത്തതാണ് പ്രശ്നം. ചെറിയൊരു സാങ്കേതികപ്രശ്നം മാത്രമാണെങ്കിലും അത് പരിഹരിക്കാൻ ബന്ധപ്പെട്ടവർ വേണ്ടത്ര താത്പര്യമെടുക്കുന്നില്ലെന്നാണ് പരാതി. താത്കാലിക നിയമനം ലഭിക്കുന്ന ഡോക്ടർമാർക്ക് പ്രതിമാസം 52,000 രൂപയാണ് വേതനമായി നൽകുന്നത്. സ്ഥിരം ഡോക്ടർമാരുടെ അടിസ്ഥാന ശമ്പളം തന്നെ 70,000 രൂപ മുതൽ തുടങ്ങുന്നതാണ്. താത്കാലിക നിയമനങ്ങൾക്കായി പലതവണ അഭിമുഖം നടത്തിയിട്ടും വളരെ കുറച്ചുപേർ മാത്രമാണ് തയ്യാറായി വന്നത്. ഇവർക്കെല്ലാം നിയമനം നൽകുകയും ചെയ്തു. സ്ഥിരം ഡോക്ടർമാരുടെ ക്ഷാമം മൂലം ഇവരെല്ലാം കടുത്ത ജോലിഭാരവും നേരിടുന്നുണ്ട്. താരതമ്യേന കുറവായ വേതനം പോലും കൃത്യമായി ലഭിക്കുന്നില്ലെന്ന നിലയായാൽ ഇനി ഇവരുടെ സേവനവും അധികകാലം നീളാനിടയില്ലെന്നാണ് നാട്ടുകാരുടെ ആശങ്ക.

കത്തോലിക്കാ കോണ്‍ഗ്രസ് പ്രതിഷേധ കൂട്ടായ്മ നടത്തി

പനത്തടി: ഛത്തീസ്ഗഡില്‍ രണ്ട് സന്യാസിനികളെ അകാരണമായി അറസ്റ്റ് ചെയ്തതില്‍ പ്രതിഷേധിച്ച് എകെസിസി പനത്തടി യൂണിറ്റിന്‍റെയും യൂത്ത് കൗണ്‍സിലിന്‍റെയും നേതൃത്വത്തില്‍ പനത്തടി ടൗണില്‍ പ്രതിഷേധ കൂട്ടായ്മ സംഘടിപ്പിച്ചു. പനത്തടി സെന്‍റ് ജോസഫ് ഫൊറോന വികാരി ഫാ. ജോസഫ് പൂവത്തോലില്‍ ഉദ്ഘാടനം ചെയ്തു. എകെസിസി യൂണിറ്റ് പ്രസിഡന്‍റ് സണ്ണി ഇലവുങ്കല്‍ അധ്യക്ഷനായി. പനത്തടി പള്ളി അസി.വികാരി ഫാ. മെല്‍ബിന്‍ ആലപ്പാട്ടുകുന്നേല്‍, എകെസിസി പനത്തടി ഫൊറോന പ്രസിഡന്‍റ് ജോണി തോലംപുഴ, വൈസ് പ്രസിഡന്‍റ് ജോസ് നാഗരോലില്‍, ലിജേഷ് ഫ്രാന്‍സിസ്, രാജീവ് തോമസ്, ജിതിന്‍ പൗലോസ്, ഡോ. ആഷ്‌ലി, വി.സി. ദേവസ്യ, ആന്‍റണി കണിയാന്തറ, എം. ജെ ടോമി, ജിജി മൂഴിക്കച്ചാലില്‍, കെ.എസ്. മാത്യു കണിയാന്തറ, ബീന ആടയ്ക്കാപ്പാറ, മെറിന ബെന്നി എന്നിവർ പ്രസംഗിച്ചു.

ക്ഷീരസംഘം സെക്രട്ടറിമാർക്ക് പരിശീലനം നൽകി

കാഞ്ഞങ്ങാട്: മിൽമ മലബാർ മേഖലാ സഹകരണ ക്ഷീരോത്പാദക യൂണിയൻ പി ആൻഡ് ഐ യൂണിറ്റിന്‍റെ ആഭിമുഖ്യത്തിൽ ക്ഷീരസംഘം സെക്രട്ടറിമാർക്ക് ഫുഡ് സേഫ്റ്റി ട്രെയിനിംഗ് ആൻഡ് സർട്ടിഫിക്കേഷൻ പരിശീലനം നൽകി. പാലിന്‍റെ സംഭരണവും ശുചിത്വം ഉറപ്പുവരുത്തുന്നതുമായി ബന്ധപ്പെട്ട് ക്ലാസുകൾ നൽകി. മിൽമ ഡയറക്ടർ പി.പി. നാരായണൻ ഉദ്ഘാടനം ചെയ്തു. മേഖലാ യൂണിയൻ ഡയറക്ടർ കെ. സുധാകരൻ അധ്യക്ഷത വഹിച്ചു. ഫുഡ് സേഫ്റ്റി ആൻഡ് സ്റ്റാൻഡേർഡ്സ് അഥോറിറ്റി ഓഫ് ഇന്ത്യയുടെ അംഗീകൃത ട്രെയിനർമാരായ മിൽമ കാസർഗോഡ് ഡയറി മാനേജർ സ്വീറ്റി വർഗ്ഗീസ്, ടെക്നിക്കൽ ഓഫീസർ സി. ആദർശ് എന്നിവർ ക്ലാസെടുത്തു. ജില്ലാ പി ആൻഡ് ഐ യൂണിറ്റ് മേധാവി വി. ഷാജി നന്ദി പറഞ്ഞു.

എന്‍എസ്എസ് പ്രോഗ്രാം ഓഫീസര്‍മാര്‍ക്ക് ശില്പശാല

പടന്നക്കാട്: നാഷണല്‍ സര്‍വീസ് സ്‌കീമും കേരള എയ്ഡ്‌സ് കണ്‍ട്രോള്‍ സൊസൈറ്റിയും സംയുക്തമായി ജില്ലയിലെ വിവിധ സെല്ലുകളിലെ എന്‍എസ്എസ് പ്രോഗ്രാം ഓഫീസര്‍മാര്‍ക്കുളള ഏകദിന ശില്പശാല നെഹ്‌റു കോളജില്‍ സംസ്ഥാന എന്‍എസ്എസ് ഓഫീസര്‍ ആര്‍.എന്‍. അന്‍സാര്‍ ഉദ്ഘാടനം ചെയ്തു. പ്രിന്‍സിപ്പല്‍ ഡോ. ടി. ദിനേശ് അധ്യക്ഷതവഹിച്ചു. കണ്ണൂര്‍ സര്‍വകലശാലാ ഡിഎസ്എസ് ഡോ.കെ.വി. സുജിത് മുഖ്യാതിഥിയായി. എന്‍എസ്എസ് ദേശീയ ട്രെയിനര്‍ ബ്രഹ്‌മനായകം മഹാദേവന്‍, യുവ ജാഗര്‍ നോഡല്‍ ഓഫീസര്‍മാരായ കെ.പി. രാജന്‍, സി.വി. ശ്രീജ, ഇ. ഉദയകുമാര്‍, ആദില്‍ നസീര്‍ എന്നിവര്‍ സംസാരിച്ചു. എയ്ഡ്‌സ് കണ്‍ട്രോള്‍ സൊസൈറ്റി ജോയിന്‍റ് ഡയറക്ടര്‍ രശ്മി മാധവന്‍, അസി. ഡയറക്ടര്‍ എസ്. സജിത് എന്നിവര്‍ ക്ലാസ് നടത്തി. എന്‍എസ്എസ് ജില്ലാ കോര്‍ഡിനേറ്റര്‍ ഡോ. കെ.വി. വിനീഷ് കുമാര്‍ സ്വാഗതവും നോഡല്‍ ഓഫീസര്‍ സമീര്‍ സിദ്ദിഖ് നന്ദിയും പറഞ്ഞു.

വിദ്യാലയങ്ങളിൽ സ്റ്റാമ്പ് വഴിയുള്ള പണപ്പിരിവ് അവസാനിപ്പിക്കണമെന്ന് കെപിഎസ്ടിഎ

കാസർഗോഡ്: വിദ്യാലയങ്ങളിൽ നിന്ന് സ്റ്റാമ്പ് വഴിയുള്ള സർക്കാരിന്‍റെ നിർബന്ധിത പണപ്പിരിവ് അവസാനിപ്പിക്കണമെന്ന് കെപിഎസ്ടിഎ ജില്ലാ കമ്മിറ്റി യോഗം ആവശ്യപ്പെട്ടു. 10 വർഷം മുമ്പുള്ള സ്റ്റാമ്പുകൾ നൽകിയാണ് മുഖ്യാധ്യാപകരോട് തുക അടക്കാൻ‌ ആവശ്യപ്പെട്ടിരിക്കുന്നത്. അധ്യാപകരിൽ നിന്നും 200 രൂപ വീതം പിരിച്ചെടുക്കാനാണ് വാക്കാലുള്ള നിർദേശം . ഇപ്രകാരം ഏതാണ്ട് അഞ്ച് ലക്ഷത്തിലേറെ രൂപയുടെ സ്റ്റാമ്പുകളാണ് ജില്ലയിൽ വിതരണം ചെയ്തിരിക്കുന്നത്. 2022 ൽ സ്കൂളുകളിലെ സ്റ്റാമ്പ് വിൽപന തടഞ്ഞുകൊണ്ട് ഹൈക്കോടതിയുടെ ഉത്തരവ് വന്നതിനു ശേഷം ഒളിഞ്ഞും തെളിഞ്ഞും മുഖ്യാധ്യാപകരെ സമ്മർദത്തിലാക്കിയാണ് സ്റ്റാമ്പുകൾ അടിച്ചേൽപ്പിക്കുന്നത്. മിക്കപ്പോഴും സ്റ്റാമ്പുകളുടെ തുക മുഖ്യാധ്യാപകരും മറ്റ് അധ്യാപകരും ചേർന്ന് വീതിച്ചെടുക്കേണ്ട അവസ്ഥയാണ്. സർക്കാർ വിദ്യാലയങ്ങൾക്ക് മൂന്നുവർഷമായി മെയിന്‍റനൻസ് ഫണ്ട് പോലും ലഭിക്കാത്തതിനാൽ മുഖ്യാധ്യാപകർ ദുരിതത്തിലാണ്. ഇതിനിടയിലാണ് വീണ്ടും സ്റ്റാമ്പുകൾ അടിച്ചേൽപ്പിക്കുന്നത്. സ്കൂൾ കെട്ടിടങ്ങളുടെ മെയിന്‍റനൻസിനു വേണ്ടി യാതൊരു സാമ്പത്തിക സഹായവും നൽകാതെ സ്കൂൾ സുരക്ഷാ ഓഡിറ്റ് നടത്തുന്നത് അപഹാസ്യമാണെന്നും യോഗം വിലയിരുത്തി. ജില്ലാ പ്രസിഡന്‍റ് പി.ടി. ബെന്നി അധ്യക്ഷത വഹിച്ചു. സംസ്ഥാന പ്രസിഡന്‍റ് ജി.കെ. ഗിരീഷ്, പി. ശശിധരൻ, അലോഷ്യസ് ജോർജ്, എം.കെ. പ്രിയ, സ്വപ്ന ജോർജ്, പി. ജലജാക്ഷി, സി.എം. വർഗീസ്, കെ.വി. ജനാർദനൻ, ആർ.വി. പ്രേമാനന്ദൻ, സി.കെ. അജിത, ടി. മധുസൂദനൻ, ജിജോ പി. ജോസഫ്, സി.പി. പ്രീതി, കെ. ഗോപാലകൃഷ്ണൻ, പി. ശ്രീജ എന്നിവർ പ്രസംഗിച്ചു.

പഞ്ചായത്തുകൾ അടച്ചുപൂട്ടേണ്ട അവസ്ഥയിൽ: യുഡിഎഫ്

കാസർഗോഡ്: ജീവനക്കാരുടെ അഭാവം മൂലം ജില്ലയിലെ മിക്ക പഞ്ചായത്തുകളും അടച്ചുപൂട്ടേണ്ട അവസ്ഥയിലാണെന്നും പ്രശ്നത്തിന് അടിയന്തിര പരിഹാരം കാണണമെന്നും യുഡിഎഫ് ജില്ലാ നേതൃയോഗം ആവശ്യപ്പെട്ടു. കാസർഗോഡ്-കാഞ്ഞങ്ങാട് സംസ്ഥാനപാത അടിയന്തിരമായി അറ്റകുറ്റപ്പണി നടത്തി ഗതാഗതയോഗ്യമാക്കുന്നില്ലെങ്കിൽ സമരരംഗത്തിറങ്ങുമെന്നും യോഗം മുന്നറിയിപ്പ് നൽകി. ജില്ലാ ചെയർമാൻ കല്ലട മാഹിൻ ഹാജി അധ്യക്ഷത വഹിച്ചു. കൺവീനർ എ. ഗോവിന്ദൻ നായർ, എൻ.എ. നെല്ലിക്കുന്ന് എംഎൽഎ, എ. അബ്ദുൽ റഹ്മാൻ, ഹക്കിം കുന്നിൽ, അഡ്വ.എ. ഗോവിന്ദൻ നായർ, വി.കെ. രവീന്ദ്രൻ, ഹരീഷ് ബി. നമ്പ്യാർ, കെ.കെ. രാജേന്ദ്രൻ, വി. കമ്മാരൻ, സി.വി. തമ്പാൻ, ടി.വി. ഉമേശന്‍, പി. കുഞ്ഞിക്കണ്ണൻ, കെ. ശ്രീധരൻ, മഞ്ജുനാഥ ആൽവ, ടിമ്പർ മുഹമ്മദ്, കെ. ഖാലിദ്, മാഹിൻ കേളോട്ട്, അഡ്വ. നിസാം, കൂക്കൾ ബാലകൃഷ്ണൻ, കെ.വി. മുഹമ്മദ് കുഞ്ഞി, അസീസ് മരിക്കേ എന്നിവർ പ്രസംഗിച്ചു.

വയനാട് ധനസമാഹരണം: ഡിസിസി സെക്രട്ടറിക്കെതിരായ വാർത്തകൾ അടിസ്ഥാനരഹിതം-പി.കെ. ഫൈസൽ

കാസർഗോഡ്: കെപിസിസിയുടെ വയനാട് പുനരധിവാസ ഭവനനിർമാണ ധനസമാഹരണവുമായി ബന്ധപ്പെട്ട് ഡിസിസി ജനറൽ സെക്രട്ടറി എം.സി. പ്രഭാകരനെതിരെ തത്പരകക്ഷികൾ പ്രചരിപ്പിക്കുന്ന വാർത്തകൾ അടിസ്ഥാനരഹിതവും വസ്തുതാവിരുദ്ധവുമാണെന്ന് ഡിസിസി പ്രസിഡന്‍റ് പി.കെ. ഫൈസൽ അറിയിച്ചു. എം.സി. പ്രഭാകരൻ തന്‍റെ മകന്‍റെ വിവാഹസൽക്കാര ചടങ്ങിൽ വച്ചാണ് വയനാട് പുനരധിവാസ ഭവനനിർമ്മാണ ഫണ്ടിലേക്ക് നാല് ലക്ഷം രൂപ സംഭാവന നൽകുന്നതായി അറിയിച്ചുകൊണ്ട് ചെക്ക് കൈമാറിയത്. വരുന്ന ഓഗസ്റ്റ് 15 ന് ഈ തുക കെപിസിസിക്ക് കൈമാറാൻ നേരത്തേ തീരുമാനമായതാണ്. ഇതിനിടയിലാണ് ചില മാധ്യമങ്ങൾ ഇതുമായി ബന്ധപ്പെട്ട് വ്യാജവാർത്തകൾ നൽകിയതെന്ന് ഡിസിസി പ്രസിഡന്‍റ് പറഞ്ഞു. ചെക്ക് ഇതുവരെ ബാങ്കിൽ ഹാജരാക്കുകയോ അതിൽ പണമില്ലെന്ന് പറഞ്ഞ് തിരിച്ചയക്കുകയോ ചെയ്തിട്ടില്ല. വ്യാജവാർത്തകൾ നൽകിയ ചാനലുകൾക്കും പത്രങ്ങൾക്കുമെതിരെ നിയമനടപടികളുമായി മുന്നോട്ടുപോകുമെന്നും ഡിസിസി പ്രസിഡന്‍റ് അറിയിച്ചു.

ദേശീയപാത നിര്‍മാണത്തിലെ അപാകതക്കെതിരെ പ്രതിഷേധം

കാഞ്ഞങ്ങാട്: ദേശീയപാത നിര്‍മാണ പ്രവര്‍ത്തനത്തിലെ അപാകത പരിഹരിക്കണമെന്നാവശ്യപ്പെട്ട് സിപിഎം അജാനൂര്‍ ലോക്കല്‍ കമ്മിറ്റി പ്രകടനവും പ്രതിഷേധയോഗവും നടത്തി. കാഞ്ഞങ്ങാട് ഏരിയ കമ്മിറ്റി അംഗം മൂലക്കണ്ടം പ്രഭാകരന്‍ ഉദ്ഘാടനം ചെയ്തു. മനോജ് കാരക്കുഴി അധ്യക്ഷതവഹിച്ചു. ദേവി രവീന്ദ്രന്‍, ശിവജി വെള്ളിക്കോത്ത്, ടി.വി. പദ്മിനി, വി.വി. തുളസി എന്നിവര്‍ സംസാരിച്ചു.

റാഗിംഗ് തടയാന്‍ സ്‌പെഷല്‍ സ്‌ക്വാഡ് രൂപീകരിച്ചു

കാസര്‍ഗോഡ്: പുതിയ അധ്യയന വര്‍ഷം ആരംഭിച്ചത് മുതല്‍ നിരവധി റാഗിംഗ്, വിദ്യാര്‍ഥികള്‍ തമ്മിലുള്ള സംഘര്‍ഷം അതുപോലെ വിദ്യാലയങ്ങളിലെ അക്രമസംഭവങ്ങള്‍ ഇതുമായി ബന്ധപ്പെട്ട് കേസുകള്‍ ജില്ലയില്‍ റിപ്പോര്‍ട്ട് ചെയ്യുന്നത് വര്‍ധിച്ചു വരുന്ന സാഹചര്യചത്തില്‍ പോലീസ് സ്‌പെഷല്‍ സ്‌ക്വാഡ് രൂപീകരിച്ചു. ട്രെയിന്‍, വിദ്യാലയങ്ങള്‍, പൊതു ഇടങ്ങളിലും റാഗിംഗ് പിടികൂടാനാണ് സ്‌പെഷല്‍ സ്‌ക്വാഡ് രൂപീകരിച്ചിട്ടുള്ളത്. ഇതിന്‍റെ ഭാഗമായി മഫ്തിയില്‍ ട്രെയിനുകളില്‍ പോലീസുകാരെ നിയോഗിച്ചിട്ടുണ്ട്. റാഗിംഗ് പിടികൂടിയാല്‍ വിട്ടുവീഴ്ച ഇല്ലാത്ത നിയമനടപടി സ്വീകരിക്കും. കഴിഞ്ഞ ദിവസം വിദ്യാര്‍ഥികള്‍ ഒരു അധ്യാപകനെ ട്രെയിനില്‍ വെച്ച് മര്‍ദ്ദിക്കുന്ന സാഹചര്യം ഉണ്ടാകുകയും പോലീസ് കേസ് രജിസ്റ്റര്‍ ചെയ്യുകയും ചെയ്തിരുന്നു. കാസര്‍ഗോഡ് ജില്ലയില്‍ നിന്നും സമീപ ജില്ലകളില്‍ നിന്നും നിരവധി വിദ്യാര്‍ഥികള്‍ മംഗളുരുവില്‍ വിദ്യാഭ്യാസ ആവശ്യങ്ങള്‍ക്കായി ആശ്രയിക്കുന്നുണ്ട്. ഇതില്‍ ബഹുഭൂരിപക്ഷം വിദ്യാര്‍ഥികളും ട്രെയിന്‍ മാര്‍ഗമാണ് യാത്ര ചെയ്യുന്നത്. അതില്‍ സീനിയര്‍ വിദ്യാര്‍ഥികള്‍ ജൂണിയര്‍ വിദ്യാര്‍ഥികളെ ട്രെയിനില്‍ വെച്ച് റാഗ് ചെയ്യുന്നത് വ്യാപകമായതോടെ ട്രെയിന്‍ യാത്ര വിദ്യാര്‍ഥികള്‍ക്കും മറ്റു യാത്രക്കാര്‍ക്കും വളരെ ദുഷ്‌കരമായി. ഇതുമായി ബന്ധപ്പെട്ട് രക്ഷിതാക്കളുടേയും മറ്റു യാത്രക്കാരുടേയും പരാതികള്‍ വര്‍ധിച്ചതോടെ ജില്ലാ പോലീസ് മേധാവി ബി.വി. വിജയഭരത് റെഡ്ഡി ജില്ലാ പോലീസ് കാര്യാലയത്തില്‍ ആര്‍പിഎഫ്, കേരള റെയില്‍വേ പോലീസ് എന്നിവരെ ഉള്‍കൊള്ളിച്ചുകൊണ്ട് വിളിച്ചു ചേര്‍ത്ത മീറ്റിംഗില്‍ ജില്ലാ അഡീഷണല്‍ എസ്പി സി.എം. ദേവദാസന്‍, ജില്ലാ നാര്‍ക്കോട്ടിക് സെല്‍ ഡിവൈഎസ്പി എ. അനില്‍കുമാര്‍ എന്നിവര്‍ പങ്കെടുത്തു. റാഗിംഗ് നടന്നതായി തെളിയിക്കപ്പെട്ടാല്‍ രണ്ടുവര്‍ഷം വരെ തടവും 10,000 രൂപ വരെ പിഴയും ലഭിക്കും. ഏതെങ്കിലും സ്ഥാപനം റാഗിംഗ് നടന്നത് മറച്ചുവെക്കാന്‍ ശ്രമിച്ചാല്‍, സ്ഥാപനം റാഗിംഗിന് കൂട്ടുനിന്നതായി നിയമം കാണുന്നതാണ്. റാഗിംഗുമായി ബന്ധപ്പെട്ട ഏതു പരാതിയും നിങ്ങള്‍ക്ക് ആന്റി റാഗിംഗ് ഹെല്‍പ് ലൈന്‍ നമ്പറായ 1800-180-5522 (24*7 Toll Free) ലേക്ക് വിളിക്കാവുന്നതാണ്. അതുപോലെ പോലീസ് സ്റ്റേഷനുകളിലും അറിയിക്കാവുന്നതാണ് (ഇ-മെയില്‍: help [email protected], വെബ്‌സൈറ്റ്: www.antiragging.in)

വീരമലക്കുന്നിനാ‍യി പ്രതിഷേധമതിൽ തീർത്തു

ചെറുവത്തൂർ: ദേശീയപാത നിർമാണത്തിന്‍റെ ഭാഗമായി ചെറുവത്തൂരിൽ കുന്നിടിച്ചു നിരത്തിയതിന്‍റെ തിക്തഫലം അനുഭവിച്ചു വരുന്ന മയ്യിച്ച പ്രദേശത്തുകാർ വീരമലക്കുന്നിന്‍റെ താഴ് വാരത്ത് പ്രതിഷേധമതിൽ തീർത്തു. ചെറുവത്തൂർ മയ്യിച്ച വയൽക്കര ക്ഷേത്ര കവാടത്തിൽ നിന്നുമാരംഭിച്ച പ്രതിഷേധ പ്രകടനത്തിൽ സ്ത്രീകളും കുട്ടികളും ഉൾപ്പെടെ നൂറുകണക്കിന് നാട്ടുകാർ അണിനിരന്നു. ചെറുവത്തൂർ മയ്യിച്ച ഭാഗത്തേക്കുള്ള സർവീസ് റോഡും ബസ് സ്റ്റോപ്പും നിർമിക്കുക, പതിറ്റാണ്ടുകളായി ഉപയോഗിച്ചു വരുന്ന ശ്മശാനത്തിലേക്ക് റോഡ് പുനഃസ്ഥാപിക്കുക, കുടിവെള്ളത്തിനുപയോഗിച്ചുവരുന്ന കിണറിന് അടപ്പ് സ്ഥാപിക്കുക, പഞ്ചായത്ത് കുളം സംരക്ഷിക്കുക, വെള്ളം ഒഴുകിപ്പോകുന്നതിന് ഓവുചാൽ പണിയുക, പുഴ തടപ്പെടുത്തി നിർമിച്ച താത്കാലിക ബണ്ട് നീക്കുക തുടങ്ങിയ ആവശ്യങ്ങളുന്നയിച്ചായിരുന്നു നാട്ടുകാർ പ്രതിഷേധ മതിൽ സൃഷ്ടിച്ചത്. വെങ്ങാട്ട് ചെക്ക് പോസ്റ്റ് ജംഗ്ഷൻ ചുറ്റി വീരമലയുടെ താഴ് വാരത്ത് എത്തിയ ശേഷമാണ് ദേശീയ പാതയുടെ കിഴക്ക് ഭാഗത്ത് മയ്യിച്ച വികസന സമിതിയുടെ നേതൃത്വത്തിൽ നാട്ടുകാർ വീരമല സംരക്ഷണത്തിനായി മനുഷ്യരുടെ ധീരമതിൽ തീർത്തത്. വീരമലക്കുന്നിന്‍റെ സംരക്ഷണവും നാട്ടുകാർ നേരിടുന്ന പ്രശ്നങ്ങൾക്ക് പരിഹാരവും ആവശ്യപ്പെട്ടാണ് മയ്യിച്ച വികസന സമിതിയുടെ നേതൃത്വത്തിൽ ആദ്യഘട്ട മനുഷ്യമതിൽ ഒരുക്കിയത്. തുടർന്നു നടന്ന പ്രതിഷേധ യോഗം ചെറുവത്തൂർ ഗ്രാമ പഞ്ചായത്ത് പ്രസിഡന്‍റ് സി.വി. പ്രമീള ഉദ്ഘാടനം ചെയ്തു. എം. രാമകൃഷ്ണൻ അധ്യക്ഷതവഹിച്ചു. മയ്യിച്ച വികസന സമിതി പ്രസിഡന്‍റ് വി.വി. കൃഷ്ണൻ, വാർഡ് മെംബർ കെ. മഞ്ജുഷ, ഡിസിസി വൈസ് പ്രസിഡന്‍റ് കെ.കെ. രാജേന്ദ്രൻ, സിപിഎം നേതാവ് കെ. ബാലകൃഷ്ണൻ, സിപിഐ നേതാവ് മുകേഷ് ബാലകൃഷ്ണൻ, ബിജെപി നേതാവ് രാജീവൻ ചീമേനി, ആർജെഡി ജില്ലാ പ്രസിഡന്‍റ് വി.വി. കൃഷ്ണൻ, എസ്എൻടിടിഐയിലെ അധ്യാപിക സിന്ധു ഹരീഷ്, കരിമ്പിൽ കൃഷ്ണൻ, എ.വി. ദാമോദരൻ, എം.പി. കുഞ്ഞിരാമൻ, എം. ശിശുപാലൻ, രവീന്ദ്രൻ മാണിയാട്ട് എന്നിവർ പ്രസംഗിച്ചു.

പന്തംകൊളുത്തി പ്രകടനം നടത്തി

പൊയിനാച്ചി: ഛത്തീസ്ഗഡില്‍ കള്ളക്കേസില്‍ കുടുക്കി കന്യാസ്ത്രീകളെ ജയിലില്‍ അടച്ച ഭരണകൂട ഭീകരതക്കെതിരെ പൊയിനാച്ചി സെന്‍റ് മേരീസ് പള്ളിയുടെ നേതൃത്വത്തില്‍ പന്തം കൊളുത്തി പ്രതിഷേധ സമരം നടത്തി. പള്ളിയില്‍നിന്നും പൊയിനാച്ചി ടൗണിലേക്ക് നടത്തിയ പ്രതിഷേധ സമരത്തില്‍ ഫാ. അഗസ്റ്റിന്‍ അറയ്ക്കല്‍, ഫാ. ലോറന്‍സ്, സിസ്റ്റര്‍ ആശ പോള്‍, സിസ്റ്റര്‍ സോളി തോമസ്, സിസ്റ്റര്‍ ലില്ലി, ജോജോ ചേനാട്ട്, ദിലീപ് തലച്ചറ, ജോര്‍ജ് കാര്യവേലില്‍, സ്റ്റീഫന്‍ കീച്ചേരി, കുന്നേല്‍ ജോര്‍ജ്, കൊച്ചുപറമ്പില്‍ ജോസ്, മണ്ണൂര്‍ സോജി, ആയിരമലയില്‍ ജോണ്‍ ഉദിനപറമ്പില്‍, ബേബി തൊട്ടിയില്‍, അജിത്ത് ചിരിയംകണ്ടത്ത്, വല്‍സമ്മ മുണ്ടിയാനിക്കല്‍ എന്നിവര്‍ നേതൃത്വം നല്‍കി. വിവിധ രാഷ്ട്രീയപാര്‍ട്ടി നേതാക്കളായ കൃഷ്ണന്‍ ചട്ടഞ്ചാല്‍, വിനോദ്കുമാര്‍ പറമ്പ്, എ.കെ. ശശിധരന്‍, ഉണ്ണികൃഷ്ണന്‍ പൊയിനാച്ചി എന്നിവര്‍ സംസാരിച്ചു.

ഈസ്‌റ്റ് എളേരി പഞ്ചായത്ത് ലൈബ്രറി പുനരാരംഭിച്ചു

ചിറ്റാരിക്കാൽ: അടഞ്ഞുകിടന്ന ഈസ്‌റ്റ് എളേരി പഞ്ചായത്ത് ലൈബ്രറി പുനരാരംഭിച്ചു. പഞ്ചായത്ത് നടപ്പാക്കുന്ന നൂറുദിന പദ്ധതിയിലുൾപ്പെടുത്തിയാണ് ഇപ്പോൾ ലൈബ്രറി സൗകര്യം പൊതുജനങ്ങൾക്കായി തുറന്നുകൊടുത്തത്. നവീകരിച്ച ലൈബ്രറിയുടെ പ്രവർത്തനോദ്ഘാടനം പഞ്ചായത്ത് പ്രസിഡന്‍റ് ജോസഫ് മുത്തോലി നിർവഹിച്ചു. വെള്ളരിക്കുണ്ട് താലൂക്ക് ലൈബ്രറി കൗൺസിൽ സെക്രട്ടറി എ.ആർ. വിജയകുമാർ, പഞ്ചായത്ത് അസി. സെക്രട്ടറി കെ.ജെ. പോൾ, ആസൂത്രണ സമിതി ഉപാധ്യക്ഷൻ എം.കെ. ഗോപാലകൃഷ്‌ണൻ, ഹെഡ് ക്ലാർക്ക് ടി.വി. അനീഷ്, ക്ലാർക്ക് അമൽ ഏബ്രഹാം എന്നിവർ സംബന്ധിച്ചു. റഫറൻസ് ഗ്രന്ഥങ്ങളുൾപ്പെടെ പതിനായിരത്തോളം പുസ്‌തകങ്ങളുള്ള ഈ ഗ്രന്ഥശാല ലൈബ്രറിയനില്ലാത്തതിനാൽ വർഷങ്ങളായി അടഞ്ഞുകിടക്കുകയായിരുന്നു. ഇവിടെ സ്‌ഥിരം ലൈബ്രേറിയനെ നിയമിക്കാൻ പഞ്ചായത്ത് ഭരണസമിതി ശ്രമം നടത്തിയിരുന്നെങ്കിലും അതു ചുവപ്പുനാടയിൽ കുടുങ്ങി. ഇതേത്തുടർന്നാണ് പഞ്ചായത്ത് പ്രസിഡന്‍റിന്‍റെ നേതൃത്വത്തിലുള്ള ഭരണസമിതി, ഓഫീസിലെ സ്‌ഥിരം ജീവനക്കാർക്ക് ലൈബ്രറിയുടെ ചുമതല നൽകി പ്രവർത്തനം പുനരാരംഭിക്കാൻ തീരുമാനിച്ചത്. ഇതോടെ എല്ലാ പ്രവൃത്തിദിനങ്ങളിലും ഉച്ചകഴിഞ്ഞ് മൂന്നു മുതൽ വായനക്കാർക്ക് ഇവിടെനിന്നും പുസ്‌തകങ്ങളെടുക്കാൻ കഴിയും. സംസ്ഥാന ലൈബ്രറി കൗൺസിൽ അംഗീകരിച്ച ലിബ്‌കാറ്റ് സോഫ്റ്റ്‌വെയർ ഉപയോഗിച്ച് ഈസ്റ്റ് എളേരി പഞ്ചായത്ത് ലൈബ്രറിയിൽ ഉടൻ ഡിജിറ്റൈസേഷൻ പൂർത്തിയാക്കാനാണ് അധികൃതർ ലക്ഷ്യമിടുന്നത്. ഇതിന്‍റെ ഭാഗമായി പഞ്ചായത്തിലെ 13 ലൈബ്രേറിയൻമാരുടെ നേതൃത്വത്തിൽ ജനകീയ പങ്കാളിത്തത്തോടെ ഡാറ്റ എൻട്രി ഉൾപ്പെടെയുള്ള പ്രവർത്തനങ്ങൾ പൂർത്തിയാക്കും.

കന്യാസ്ത്രീകളുടെ അറസ്റ്റിൽ കോൺഗ്രസ് പ്രതിഷേധം

രാജപുരം: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്തതിൽ പ്രതിഷേധിച്ച് ബളാൽ ബ്ലോക്ക് കോൺഗ്രസ് കമ്മിറ്റി രാജപുരത്ത് പ്രതിഷേധകൂട്ടായ്മ സംഘടി പ്പിച്ചു. ഡിസിസി വൈസ്പ്രസിഡന്‍റ് ബി.പി. പ്രദീപ് കുമാർ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് മധുസൂദനൻ ബാലൂർ അധ്യക്ഷതവഹിച്ചു. പഞ്ചായത്ത് പ്രസിഡന്‍റ് ടി.കെ. നാരായണൻ, മണ്ഡലം പ്രസിഡന്‍റുമാരായ എം.എം. സൈമൺ, വി. മധുസൂദനൻ ബാലൂർ, വി.കെ. ബാലകൃഷ്ണൻ, യൂത്ത് കോൺഗ്രസ് ജില്ലാ ജനറൽ സെക്രട്ടറി വിനോദ് കപ്പിത്താൻ, എം.യു. തോമസ്, റോയി ആശാരികുന്നേൽ എന്നിവർ സംസാരിച്ചു. തൃക്കരിപ്പൂർ: ഛത്തീസ്ഗഡിൽ മലയാളി കന്യാസ്ത്രീകളെ ബിജെപി സര്‍ക്കാർ അറസ്റ്റ് ചെയ്തു ജയിലിലടച്ച ഭരണഘടനാവിരുദ്ധ നടപടിയിൽ പ്രതിഷേധിച്ച് തൃക്കരിപ്പൂർ ബ്ലോക്ക് കോൺഗ്രസ് കമ്മിറ്റി തൃക്കരിപ്പൂർ ടൗണിൽ പ്രകടനവും പൊതുയോഗവും നടത്തി. ഡിസിസി പ്രസിഡന്‍റ് പി.കെ. ഫൈസൽ, കെപിസിസി സെക്രട്ടറി എം. അസിനാർ, കെപിസിസി അംഗം കെ.വി. ഗംഗാധരൻ, ഡിസിസി ജനറൽ സെക്രട്ടറി കെ.പി. പ്രകാശൻ, കെ.വി. വിജയൻ, സി. രവി, കെ.വി. ജതീന്ദ്രൻ, എം. രജീഷ് ബാബു, പി.വി. കണ്ണൻ, ഇ. രാജേന്ദ്രൻ, കെ.പി. ദിനേശൻ, കെ. കുഞ്ഞമ്പു, കെ. പദ്മനാഭൻ, പി.വി. പദ്മജ, രാജു മുട്ടത്ത് എന്നിവർ നേതൃത്വം നൽകി.

കന്യാസ്ത്രീകൾക്ക് ഐക്യദാർഢ്യവുമായി മെഴുകുതിരികൾ തെളിച്ചു

വെള്ളരിക്കുണ്ട്: വെള്ളരിക്കുണ്ട് ലിറ്റിൽ ഫ്ലവർ ഫൊറോന പള്ളി കമ്മിറ്റിയുടെയും ഇടവകയിൽ സേവനം ചെയ്യുന്ന സിസ്റ്റർമാരുടെയും കുടുംബ കൂട്ടായ്മകളുടെയും സംയുക്താഭിമുഖ്യത്തിൽ ഛത്തീസ്ഗഡിൽ തടവിലാക്കപ്പെട്ട കന്യാസ്ത്രീകൾക്ക് ഐക്യദാർഢ്യം പ്രഖ്യാപിച്ചും അവരുടെ സത്വര വിമോചനത്തിനായി പ്രാർഥന നടത്തിയും മെഴുകുതിരികൾ തെളിച്ചു. ഫൊറോന വികാരി റവ.ഡോ. ജോൺസൺ അന്ത്യാംകുളം, സിസ്റ്റർ സ്നേഹ എംഎസ്ജെ, ഫാ. തോമസ് കുഴിപറമ്പിൽ, കോ-ഓർഡിനേറ്റർ ജിജി കുന്നപ്പള്ളി, ട്രസ്റ്റിമാരായ ജോസ് ചെറിയാൻ തടത്തിൽ, ബേബി കുഞ്ചിറക്കാട്ട്, തോമസുകുട്ടി കൈപ്പടക്കുന്നേൽ എന്നിവർ നേതൃത്വം നൽകി.

ഒറ്റപ്പെട്ട് കാടുമൂടി ഒരു ഐസൊലേഷൻ വാർഡ് കെട്ടിടം

നീലേശ്വരം: എല്ലാ നിയോജകമണ്ഡലങ്ങളിലും പ്രധാനപ്പെട്ട ഒരു സർക്കാർ ആശുപത്രിയോടനുബന്ധിച്ച് ഐസൊലേഷൻ വാർഡ് നിർമിക്കാനുള്ള പദ്ധതി വന്നത് കോവിഡ് വ്യാപനത്തിന്‍റെ അവസാനകാലത്താണ്. അങ്ങനെ തൃക്കരിപ്പൂർ മണ്ഡലത്തിലെ ഐസൊലേഷൻ വാർഡ് നിർമിക്കാൻ തീരുമാനിച്ചത് നീലേശ്വരം താലൂക്ക് ആശുപത്രിയിലാണ്. ഒരു കോടി രൂപയാണ് ഓരോ ഐസൊലേഷൻ വാർഡ് കെട്ടിടത്തിന്‍റെയും നിർമാണത്തിനായി അനുവദിച്ചത്. കേരള മെഡിക്കൽ സർവീസസ് കോർപ്പറേഷനായിരുന്നു നിർമാണ ചുമതല. കൊട്ടിഘോഷിച്ച് നിർമാണം തുടങ്ങിയെങ്കിലും നീലേശ്വരത്തെ കെട്ടിടം ഇതുവരെ പൂർത്തിയായില്ല. ആശുപത്രിയുടെ മറ്റു ഭാഗങ്ങളിൽ നിന്ന് അല്പം മാറി നിർമാണം അവസാനഘട്ടത്തിലെത്തിയിരുന്ന കെട്ടിടം ഇപ്പോൾ കാടുമൂടി നശിക്കുകയാണ്. കോവിഡ് നിയന്ത്രണങ്ങളുടെ കാലം കഴിഞ്ഞതോടെ അതുമായി ബന്ധപ്പെട്ട എല്ലാ പദ്ധതികളിലുമുണ്ടായ മെല്ലെപ്പോക്ക് ഇക്കാര്യത്തിലും വന്നതാണ് പ്രശ്നമായത്. ചിലയിടങ്ങളിൽ ഏതാണ്ട് പൂർത്തിയായ കെട്ടിടങ്ങൾ അതത് ആശുപത്രികളിലെ മറ്റാവശ്യങ്ങൾക്കായി ഉപയോഗിക്കുന്നുണ്ട്. എന്നാൽ നീലേശ്വരത്ത് അതുമുണ്ടായില്ല. ഐസോലേഷൻ വാർഡിന്‍റെ ഭാഗമായി ലഭ്യമായ പത്തോളം കിടക്കകൾ ആശുപത്രിയിലെ വയോജനങ്ങളുടെ വാർഡിൽ ഉപയോഗിക്കുന്നുണ്ടെന്നതു മാത്രമാണ് ഏക ആശ്വാസം. കെട്ടിടനിർമാണം പൂർത്തീകരിച്ച് ആശുപത്രിക്ക് ഗുണകരമാകുന്ന ഏതെങ്കിലും വിധത്തിൽ ഉപയോഗപ്പെടുത്താൻ ബന്ധപ്പെട്ടവർ തയ്യാറാകണമെന്നാണ് നാട്ടുകാരുടെ ആവശ്യം.

മലയോര ഹൈവേയുടെ രണ്ടാം റീച്ചിൽ വനഭൂമി വിട്ടുകിട്ടാൻ കാത്തിരിപ്പ് നീളുന്നു

കാസർഗോഡ്: മലയോരഹൈവേയുടെ രണ്ടാം റീച്ചായ എടപ്പറമ്പ്-കോളിച്ചാൽ പാതയുടെ നിർമാണം പൂർത്തിയാക്കാൻ വനഭൂമി വിട്ടുകിട്ടാനായുള്ള കാത്തിരിപ്പ് നീളുന്നു. പള്ളഞ്ചി, പാണ്ടി, ഏവന്തൂർ ഭാഗങ്ങളിലായി 4.332 ഹെക്ടർ വനഭൂമിയാണ് മലയോരഹൈവേയുടെ നിർമാണത്തിന് ആവശ്യമുള്ളത്. ഇതിനു പകരം ഇത്രതന്നെ റവന്യൂഭൂമി വനംവകുപ്പിന് വിട്ടുകൊടുക്കാൻ വർഷങ്ങൾക്കുമുമ്പേ സർക്കാർ തീരുമാനമെടുത്തെങ്കിലും നടപടിക്രമങ്ങളിലെ പാളിച്ചകളും മെല്ലെപ്പോക്കും മൂലം പ്രശ്നം അനിശ്ചിതമായി നീളുകയാണ്. കമ്മാടം കാവിനോടനുബന്ധിച്ച റവന്യൂഭൂമിയിൽ നിന്ന് 4.332 ഹെക്ടർ സ്ഥലം വനംവകുപ്പിന് വിട്ടുകൊടുക്കാനാണ് ആദ്യം തീരുമാനിച്ചിരുന്നത്. ഇതിനായി ഈ ഭൂമിയുടെ വിവരങ്ങൾ കേന്ദ്ര വനം-പരിസ്ഥിതി മന്ത്രാലയത്തിന്‍റെ പരിവേഷ് പോർട്ടലിൽ അപ്‌ലോഡ് ചെയ്യുകയും ചെയ്തു. എന്നാൽ തൃശൂർ ജില്ലയിൽ കുതിരാൻ തുരങ്കം നിർമിക്കാൻ ഏറ്റെടുത്ത വനഭൂമിക്ക് പകരവും ഉഡുപ്പി-കരിന്തളം വൈദ്യുത ലൈനുമായി ബന്ധപ്പെട്ട് നഷ്ടമാകുന്ന വനഭൂമിക്ക് പകരവും ഇതേ ഭൂമി കൈമാറാൻ നേരത്തേ സർക്കാർ സന്നദ്ധത അറിയിച്ചിട്ടുണ്ടെന്ന് ചൂണ്ടിക്കാട്ടി വനംവകുപ്പ് അപേക്ഷ മടക്കി. ഇതോടെ പകരം മറ്റൊരിടത്ത് ഭൂമി കണ്ടെത്താൻ സർക്കാർ അന്വേഷണം തുടങ്ങി. മാസങ്ങൾ നീണ്ട അന്വേഷണത്തിനൊടുവിൽ കാസർഗോഡ് താലൂക്കിലെ അഡൂർ, ആദൂർ, ദേലംപാടി വില്ലേജുകളിലും വെള്ളരിക്കുണ്ട് താലൂക്കിലെ പനത്തടി, മാലോം വില്ലേജുകളിലും നിന്നായി 4.332 ഹെക്ടർ സ്ഥലം അളന്ന് തിട്ടപ്പെടുത്തി. മാലോം വില്ലേജിൽ കോട്ടഞ്ചേരി വനത്തിലുൾപ്പെട്ട റവന്യൂഭൂമിയായിരുന്നു ഇതിൽ മുഖ്യം. ഇത്രയും സ്ഥലം വനംവകുപ്പിന് കൈമാറാൻ കഴിഞ്ഞ വർഷം ജൂലൈയിൽ സർക്കാർ ഉത്തരവും ഇറക്കി. എന്നാൽ ഒരുവർഷം തന്നെ കഴിഞ്ഞിട്ടും ഈ സ്ഥലങ്ങളുടെ വിവരങ്ങൾ പരിവേഷ് പോർട്ടലിൽ അപ്‌ലോഡ് ചെയ്തിട്ടില്ല. ബന്ധപ്പെട്ട സ്ഥലങ്ങളുടെ വിശദമായ വിവരങ്ങൾ ഡിജിറ്റൽ ഫോർമാറ്റിലാക്കിയാണ് പോർട്ടലിൽ അപ്‌ലോഡ് ചെയ്യേണ്ടത്. റവന്യൂ വകുപ്പിന്‍റെ സർവേ വിഭാഗമാണ് ഈ ഡിജിറ്റൽ ഫോർമാറ്റ് തയ്യാറാക്കി നല്കേണ്ടത്. ഒരുവർഷമായിട്ടും അത് തയ്യാറാക്കി അപ്‌ലോഡ് ചെയ്തിട്ടില്ല. ഇനി അത് തയ്യാറാക്കി പരിവേഷ് പോർട്ടലിൽ അപ് ലോഡ് ചെയ്താലും വനംവകുപ്പിന്‍റെ വിവിധ നടപടിക്രമങ്ങൾ കൂടി പൂർത്തിയായിക്കഴിഞ്ഞു മാത്രമേ ഭൂമി വിട്ടുകിട്ടുകയുള്ളൂ. ഓരോ കാര്യത്തിനും ഇത്രയും സമയമെടുത്താൽ വനഭൂമി വിട്ടുകിട്ടണമെങ്കിൽ ഇനിയും വർഷങ്ങൾ തന്നെ എടുക്കുമെന്ന അവസ്ഥയാണ്. ഇവിടെ വനഭൂമി വിട്ടുകിട്ടിയ ശേഷം മാത്രമേ പുതിയ ടെൻഡർ വിളിച്ച് ഈ റീച്ചിലെയും കോളിച്ചാൽ-ചെറുപുഴ റീച്ചിൽ നേരത്തേ വനഭൂമി വിട്ടുകിട്ടിയ മരുതോം, കാറ്റാംകവല ഭാഗങ്ങളിലെയും മലയോരഹൈവേയുടെ നിർമാണപ്രവൃത്തികൾ തുടങ്ങാനിടയുള്ളൂ. പള്ളഞ്ചി വനപാതയിൽ കൈവരിയില്ലാത്ത രണ്ട് പാലങ്ങൾക്കു മുകളിലൂടെ മലവെള്ളം കുത്തിയൊഴുകുന്ന സാഹചര്യത്തിൽ ഗതാഗതം തടഞ്ഞിരിക്കുകയാണ്. വനഭൂമി വിട്ടുകിട്ടിയതിനു ശേഷം അടുത്ത ഘട്ടം പ്രവൃത്തിയിൽ ഈ പാലങ്ങൾ ഉയരം കൂട്ടി പുനർനിർമിക്കാനായിരുന്നു തീരുമാനം. പ്രവൃത്തികൾ അനിശ്ചിതമായി നീളുന്ന സാഹചര്യത്തിൽ പലപ്പോഴും മലയോരഹൈവേയുടെ മറ്റു ഭാഗങ്ങളിൽ നിന്നെത്തുന്ന വാഹനങ്ങൾ ഈ പാലങ്ങൾക്കു മുകളിലൂടെ അപകടയാത്ര നടത്തുന്നുണ്ട്. ഗൂഗിൾ മാപ്പ് നോക്കി എത്തുന്നവരും ഈ പാലങ്ങൾക്കു മുകളിലൂടെയാണ് പോകുന്നത്. കഴിഞ്ഞവർഷം ഇവിടെ ഒരു കാർ ഒഴുക്കിൽപ്പെട്ടിരുന്നു. തലനാരിഴ വ്യത്യാസത്തിലാണ് അതിലെ രണ്ട് യാത്രക്കാരുടെ ജീവൻ രക്ഷപ്പെട്ടത്.

യുവാവ് തോട്ടിൽവീണ് മരിച്ച നിലയിൽ

പാണത്തൂർ: യുവാവിനെ തോട്ടിൽ വീണ് മരിച്ച നിലയിൽ കണ്ടെത്തി. മാപ്പിളച്ചേരിയിലെ രാജേഷി (33) നെയാണ് ഇന്നലെ ഉച്ചയോടെ മാപ്പിളച്ചേരി തോട്ടിൽ വീണു മരിച്ച നിലയിൽ കണ്ടെത്തിയത്. അണ്ണയ്യ നായിക്ക് -ജയന്തി ദമ്പതികളുടെ മകനാണ്. സഹോദരൻ: രാജേന്ദ്രൻ. മൃതദേഹം പോസ്റ്റ്മോർട്ടത്തിനായി കാഞ്ഞങ്ങാട് ജില്ലാ ആശുപത്രിയിലേക്ക് മാറ്റി.

കന്യാസ്ത്രീകളെ അറസ്റ്റ് ചെയ്തതിനെതിരേ കോൺഗ്രസ് പ്രതിഷേധ കൂട്ടായ്മ നടത്തി

ചിറ്റാരിക്കാൽ: ഛത്തീസ്ഗഡിൽ വിദ്യാഭ്യാസ ആരോഗ്യ-മേഖലയിൽ സ്തുത്യർഹമായ സേവനം ചെയ്തുവരുന്ന കന്യാസ്ത്രീകളെ അകാരണമായി അറസ്റ്റ് ചെയ്ത് ഗുരുതരമായ വകുപ്പുകൾ ചേർത്ത് ജയിലിൽ അടച്ച ബിജെപി സർക്കാരിന്‍റെ കിരാതനടപടിക്കെതിരെ എളേരി ബ്ലോക്ക് കോൺഗ്രസ് കമ്മിറ്റി ചിറ്റാരിക്കാൽ ടൗണിൽ പ്രതിഷേധകൂട്ടായ്മ നടത്തി. കെപിസിസി സെക്രട്ടറി എം. അസിനാർ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ജോയി ജോസഫ് കിഴക്കരക്കാട്ട് അ ധ്യക്ഷതവഹിച്ചു. ജയിംസ് പന്തമാക്കൽ, ജോർജുകുട്ടി കരിമഠം, എ.പി. സുരേന്ദ്രൻ, സോജൻ കുന്നേൽ, തോമസ് മാത്യു, സെബാസ്റ്റ്യൻ പൂവത്താനി, മാത്യു സെബാസ്റ്റ്യൻ, ജോയി മാരൂർ, എ.ജെ. ഷാജി, സന്തോഷ് ചൈതന്യ, ജോണി പള്ളത്തുകുഴി, മിനി ഫ്രാൻസിസ്, സിജോ വഴുതനപ്പള്ളി, പ്രശാന്ത് പാറേക്കുടിയിൽ, ജോസ് കുത്തിയതോട്ടിൽ, ബെന്നി ഇലവുങ്കൽ, ജോസ് കാഞ്ഞിരക്കാട്ട്, ശാന്ത കുഞ്ഞിരാമൻ, ഇബ്രാഹിം ചീമേനി എന്നിവർ സംബന്ധിച്ചു.

വിദ്യാര്‍ഥികള്‍ സ്വന്തം കഴിവില്‍ വിശ്വാസമുള്ളവരായി വളരണം: ഡോ. ഗുരുരാജ് കരജഗി

പെരിയ: സ്വന്തം കഴിവില്‍ വിശ്വാസമുള്ളവരായി വിദ്യാര്‍ഥികള്‍ വളരണമെന്ന് വിദ്യാഭ്യാസ വിദഗ്ധനും അക്കാദമി ഫോര്‍ ക്രിയേറ്റീവ് ടീച്ചിംഗ് സിഇഒയുമായ ഡോ. ഗുരുരാജ് കരജഗി. കേന്ദ്ര സര്‍വകലാശാലയില്‍ പുതിയ അധ്യയന വര്‍ഷത്തില്‍ പ്രവേശനം നേടിയ പിജി വിദ്യാര്‍ഥികള്‍ക്കായുള്ള രണ്ടുദിവസത്തെ പഠന സമാരംഭ പരിപാടി ഉദ്ഘാടനം ചെയ്യുകയായിരുന്നു അദ്ദേഹം. വൈസ് ചാന്‍സലര്‍ പ്രഫ. സിദ്ദു പി. അല്‍ഗുര്‍ അധ്യക്ഷതവഹിച്ചു. പരീക്ഷാ കണ്‍ട്രോളര്‍ ഡോ.ആര്‍. ജയപ്രകാശ്, ഡീന്‍ അക്കാദമിക് പ്രഫ. അമൃത് ജി. കുമാര്‍ എന്നിവര്‍ സംബന്ധിച്ചു. ഡീന്‍ സ്റ്റുഡന്‍റ്സ് വെല്‍ഫെയര്‍ പ്രഫ. രാജേന്ദ്ര പിലാങ്കട്ട സ്വാഗതവും രജിസ്ട്രാര്‍ ഡോ.എം. മുരളീധരന്‍ നമ്പ്യാര്‍ നന്ദിയും പറഞ്ഞു.

കെ-ഫോണ്‍ പദ്ധതി വഴി നല്‍കിയത് 2048 കണക്ഷനുകള്‍

കാസര്‍ഗോഡ്: ജില്ലയില്‍ വീടുകളിലും ഓഫീസുകളിലും വാണിജ്യ സ്ഥാപനങ്ങളിലുമൊക്കെയായി ഇതുവരെ നല്‍കിയത് 2048 കെ-ഫോണ്‍ കണക്ഷനുകള്‍. ജില്ലയില്‍ ഇതുവരെ 1,500.673 കിലോമീറ്റര്‍ കേബിളുകളാണ് സ്ഥാപിച്ചത്. കെഎസ്ഇബി ട്രാന്‍സ്മിഷന്‍ ടവറുകളിലൂടെ 73.4 65 കിലോ മീറ്റര്‍ ഒപിജിഡബ്യു കേബിളുകളും 1427.208 കിലോമീറ്റര്‍ എഡിഎസ്എസ് കേബിളുകള്‍ കെഎസ്ഇബി പോസ്റ്റുകള്‍ വഴിയുമാണ് സ്ഥാപിച്ചിട്ടുള്ളത്. ജില്ലയില്‍ 913 സര്‍ക്കാര്‍ ഓഫീസുകള്‍ ഇപ്പോള്‍ കെ-ഫോണ്‍ നെറ്റ്‌വര്‍ക്കാണ് ഉപയോഗിക്കുന്നത്. ജില്ലയില്‍ ആകെ 552 ബിപിഎല്‍ വീടുകളിലാണ് കെ-ഫോണ്‍ കണക്ഷനുള്ളത്. 583 വാണിജ്യ കണക്ഷനുകളും ജില്ലയില്‍ നല്‍കി. പ്രാദേശിക ഓപ്പറേറ്റര്‍മാര്‍ വഴിയാണ് വാണിജ്യ കണക്ഷനുകള്‍ നല്‍കുന്നത്. ജില്ലയുടെ വിവിധ ഭാഗങ്ങളിലായി 55 ലോക്കല്‍ നെറ്റുവര്‍ക്ക് ഓപ്പറേറ്റര്‍മാര്‍ ഇതിനായി കെഫോണുമായി സഹകരിച്ച് പ്രവര്‍ത്തിക്കുന്നുണ്ട്. കണക്ഷനുകള്‍ക്ക് വേണ്ടി പുതിയ രജിസ്ട്രേഷനുകളും വരുന്നുണ്ട്. ഒരു ഐഎല്‍എല്‍ കണക്ഷനും എട്ട് എസ്എംഇ കണക്ഷനുകളും ജില്ലയില്‍ നല്‍കി. പുതിയ ഗാര്‍ഹിക കണക്ഷന്‍ എടുക്കാന്‍ എന്‍റെ കെ-ഫോണ്‍ എന്ന മൊബൈല്‍ ആപ്പിലൂടെയോ കെഫോണ്‍ വെബ്സൈറ്റിലൂടെയോ രജിസ്റ്റര്‍ ചെയ്യാം. 18005704466 എന്ന ടോള്‍ഫ്രീ നമ്പര്‍ വഴിയും കണക്ഷനായി രജിസ്റ്റര്‍ ചെയ്യാം.

സെപ്റ്റിക് ടാങ്കിൽ വീണ ഗർഭിണിയായ പശുവിനെ രക്ഷിച്ചു

തൃക്കരിപ്പൂർ: നടക്കാവ് മൈത്താണിയിൽ ഉപയോഗ ശൂന്യമായ സെപ്റ്റിക് ടാങ്കിൽ ഗർഭിണിയായ പശുകാൽ തെറ്റിവീണു. ഒടുവിൽ തൃക്കരിപ്പൂർ അഗ്നി രക്ഷസേനയും നാട്ടുകാരും ചേർന്ന് രണ്ടര മണിക്കൂർ നേരത്തെ പരിശ്രമത്തിലാണ് പശുവിനെ പുറത്തെത്തിച്ചത്. ഇന്നലെ ഉച്ചയ്ക്ക് 1.30ഓടെയാണ് സംഭവം. മൈത്താണിയിലെ മുതിർന്ന കർഷക കുതിരുമ്മൽ പത്മാവതിയുടെ പശുവാണ്പുല്ലു മേയ്ക്കാൻ കൊണ്ടു പോകുന്നതിനിടയിൽ സെപ്റ്റിക് ടാങ്കിൽ വീണത്. തൊട്ടടുത്ത അഗ്നി രാക്ഷാസേനാ നിലയത്തിൽ നാട്ടുകാർ വിവരം പറഞ്ഞതോടെ ടീം രംഗത്തെത്തി നാട്ടുകാരുടെ സഹകരണത്തോടെ പശുവിനെ രക്ഷിക്കുകയായിരുന്നു. ചെത്ത് കല്ല് കൊണ്ട് കെട്ടിയുണ്ടാക്കിയ സെപ്റ്റിക് ടാങ്കിന്‍റെ മുകൾഭാഗം സ്ലാബ് ഇട്ട് അടച്ചിരുന്നില്ല. പശുവിനെ മൈത്താണി വയലിലേക്ക് മേയ്ക്കാൻ കൊണ്ടു പോകുന്നതിനിടയിൽ ടാങ്കിന്‍റെ മുകളിലിട്ടിരുന്ന മടലുകളിൽ ചവിട്ടി പശു കാൽ തെറ്റി വീഴുകയായിരുന്നു. പിൻഭാഗം കുത്തി വീണ പശുവിനെ കയറ്റാൻ ബെൽറ്റിട്ട് നടത്തിയ ആദ്യശ്രമം പരാജയപ്പെട്ടതോടെ കെട്ടിയ ചെത്ത് കല്ലകൾ ഓരോന്നായി ഇളക്കിയെടുത്ത് മണ്ണ് ഇട്ട് രണ്ടര മണിക്കൂർ നേരത്തെ പരിശ്രമത്തിലൂടെയാണ് പശുവിനെ രക്ഷിച്ചെടുത്തത്. തുടർന്ന് ഡോ. സ്മിതയുടെ നേതൃത്വത്തിൽ പശുവിനെ പരിശോധിച്ച് ചികിത്സ നൽകി.

മഴ കൂടുമ്പോൾ പനിക്കു പിന്നാലെ മഞ്ഞപ്പിത്തവും പടരുന്നു

കാഞ്ഞങ്ങാട്: മഴ കൂടുമ്പോൾ ജില്ലയിൽ പനിക്കു പിന്നാലെ മഞ്ഞപ്പിത്തവും വ്യാപകമാകുന്നു. ചിത്താരിയിൽ കഴിഞ്ഞ ദിവസം 24 കാരനായ യുവ എൻജിനിയർ മഞ്ഞപ്പിത്തം ബാധിച്ച് മരിച്ചിരുന്നു. ജീവൻപോലും നഷ്ടമാകാവുന്ന രോഗമാണെന്ന കാര്യം കണക്കിലെടുക്കാതെ പലരും തുടക്കത്തിൽ മറ്റു ചികിത്സകൾ തേടിപ്പോകുന്നതാണ് സ്ഥിതി ഗുരുതരമാക്കുന്നത്. രോഗമെന്തെന്നു മനസിലാക്കാതെ പനിയും ക്ഷീണവും മാത്രമാണെന്നു കരുതി ചികിത്സ വൈകിപ്പിക്കുന്നവരുമുണ്ട്. രോഗം ഗുരുതരമാകുമ്പോഴാണ് കരളിനെ ബാധിക്കുന്നത്. ആരോഗ്യവകുപ്പിന്‍റെ ഔദ്യോഗിക കണക്കുകൾ പ്രകാരം ഈ മാസം മാത്രം ജില്ലയിൽ ഇതുവരെ 118 പേർക്കാണ് രോഗബാധയുണ്ടായത്. ജൂണിൽ 98 പേർക്കും മെയ് മാസത്തിൽ 109 പേർക്കും മഞ്ഞപ്പിത്ത ബാധയുണ്ടായി. ജനുവരി (70), ഫെബ്രുവരി (42), മാർച്ച് (64), ഏപ്രിൽ (66) എന്നിങ്ങനെയാണ് ഈ വർഷം മറ്റു മാസങ്ങളിൽ രോഗം ബാധിച്ചവരുടെ എണ്ണം. മലിനജലവും ഭക്ഷണവും വഴിയാണ് പ്രധാനമായും രോഗം പകരുന്നത്. മഴക്കാലത്ത് കുടിവെള്ളത്തിൽപോലും മാലിന്യം കലരാനും രോഗകാരികളായ ബാക്ടീരിയകൾ പെരുകാനുമുള്ള സാധ്യതയേറുന്നതാണ് രോഗബാധ കൂടാൻ കാരണമാകുന്നത്. ചൂടുവെള്ളം മാത്രം കുടിക്കുക, കുളിക്കാനും ഭക്ഷണം പാകം ചെയ്യാനും പാത്രങ്ങൾ കഴുകാനുമൊക്കെ ഉപയോഗിക്കുന്ന വെള്ളം ശുദ്ധമാണെന്ന് ഉറപ്പുവരുത്തുക, ശുചിത്വം ഉറപ്പുവരുത്താതെ പുറത്തുനിന്ന് ഭക്ഷണമോ ഐസ്ക്രീം, ജ്യൂസ്, മറ്റു പാനീയങ്ങൾ എന്നിവയോ കഴിക്കാതിരിക്കുക തുടങ്ങിയവയാണ് അവശ്യം സ്വീകരിക്കേണ്ട മുൻകരുതലുകൾ. കോവിഡ് കാലത്തെന്ന പോലെ ഇടയ്ക്കിടെ കൈകാലുകൾ സോപ്പും വെള്ളവുമുപയോഗിച്ച് വൃത്തിയാക്കുന്നതും ഗുണകരമാണ്.

പോക്സോ കേസുകളിൽ മൂന്നു പേർക്കു ശിക്ഷ

കാഞ്ഞങ്ങാട്: വിവിധ പോക് സോ കേസുകളിൽ 3 പേർക്ക് ഹൊസ്ദുര്‍ഗ് ഫാസ്റ്റ് ട്രാക്ക് സ്‌പെഷല്‍ കോര്‍ട്ട് ജഡ്ജ് പി.എം. സുരേഷ് തടവ് ശിക്ഷ വിധിച്ചു. ഏഴുവയസുകാരിയെ ലൈംഗികമായി പീഡിപ്പിച്ച കേസിൽ ചെങ്കള പൈക്കയിലെ ബാലകൃഷ്ണന് 11 വര്‍ഷം കഠിനതടവും 20,000 രൂപ പിഴയും ശിക്ഷ നൽകി.പിഴയടച്ചില്ലെങ്കില്‍ ഒരു വര്‍ഷവും ഒരു മാസവും അധികതടവ് അനുഭവിക്കണം. 2024 ഏപ്രില്‍ 11നാണ് കേസിനാസ്പദമായ സംഭവം. പെണ്‍കുട്ടിയെ കുട്ടിയുടെ പുതുതായി നിര്‍മിക്കുന്ന വീട്ടിലേക്ക് പ്രതി കൂട്ടിക്കൊണ്ടുപോയി ലൈംഗിക അതിക്രമം നടത്തിയെന്നാണ് കേസ്. അന്നത്തെ ബദിയഡുക്ക എസ്‌ഐ എന്‍. അന്‍സാര്‍ ആണ് അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. പതിനാലുകാരിയെ ലൈംഗികമായി പീഡിപ്പിച്ച കേസിൽ മടിക്കൈ ബങ്കളത്തെ കെ. അശോകന് ഏഴുവര്‍ഷം തടവും 15,000 രൂപ പിഴയും വിധിച്ചു. പിഴയടച്ചില്ലെങ്കില്‍ ഒമ്പതുമാസം അധികതടവ് അനുഭവിക്കണം. 2024 മെയ് 15നു പെണ്‍കുട്ടിയും കുടുംബവും താമസിക്കുന്ന വീട്ടിലേക്ക് അതിക്രമിച്ചുകയറിയ പ്രതി പെണ്‍കുട്ടിക്കുനേരെ ലൈംഗികാതിക്രമം നടത്തിയെന്നാണ് കേസ്. അന്നത്തെ നീലേശ്വരം എസ്‌ഐ ടി. വിശാഖ് ആണ് അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. പതിനാറുകാരിയെ ലൈംഗികമായി പീഡിപ്പിച്ച കേസിലെ കാഞ്ഞങ്ങാട് നോര്‍ത്ത് കോട്ടച്ചേരി തുളുച്ചേരിയിലെ പി .അശോകന് അഞ്ചുവര്‍ഷം കഠിനതടവും 11,000 രൂപ പിഴയും വിധിച്ചു. പിഴയടച്ചില്ലെങ്കില്‍ ആറു മാസവും രണ്ടാഴ്ചയും അധികതടവ് അനുഭവിക്കണം. 2023 സെപ്റ്റംബര്‍ ഒമ്പതിനാണ് കേസിനാസ്പദമായ സംഭവം. കാഞ്ഞങ്ങാട് പഴയ ബസ് സ്റ്റാന്‍ഡിന്‍റെ പടിഞ്ഞാറ് ഭാഗക്ക് കാസര്‍ഗോഡ് ഭാഗത്തേക്ക് പോകുന്ന ബസ് നിര്‍ത്തുന്ന സ്ഥലത്തിനടുത്തുള്ള ഫുട്പാത്തില്‍ കൂടി നടന്നുപോകുന്ന പെണ്‍കുട്ടിയെ ലൈംഗികാതിക്രമത്തിനിരയാക്കിയെന്നാണ് കേസ്. അന്നത്തെ ഹൊസ്ദുര്‍ഗ് എസ്‌ഐ ആയിരുന്ന കെ. വേലായുധന്‍ ആണ് കേസന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. മൂന്നു കേസുകളിലും പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ എ. ഗംഗാധരന്‍ ഹാജരായി.

വളർത്തുനായയുടെ ജഡം പാതി ഭക്ഷിച്ച നിലയിൽ

പാണത്തൂർ: കല്ലപ്പള്ളിയിൽ നാലു ദിവസത്തിന്‍റെ മാത്രം ഇടവേളയിൽ വീണ്ടും പുലിയിറങ്ങി. കല്ലപ്പള്ളി പെരുമുണ്ടയിലെ പി.ബി. പത്മയ്യയുടെ വളർത്തുനായയാണ് ബുധനാഴ്ച രാത്രി പുലിയുടെ ഇരയായത്. ഇന്നലെ രാവിലെ നായയെ കാണാത്തതിനെ തുടർന്ന് വീട്ടുകാർ നടത്തിയ തെരച്ചിലിൽ സമീപത്തെ റബർ തോട്ടത്തിലാണ് പാതി ഭക്ഷിച്ച നിലയിലുള്ള ജഡം കണ്ടെത്തിയത്. ഞായറാഴ്ച കല്ലപ്പള്ളിയിലെ ദൊഡ്ഡമന ബാബുവിന്‍റെ വളർത്തുനായയെ പുലി കൊണ്ടുപോയിരുന്നു. നേരത്തേ മാസങ്ങളുടെ ഇടവേളയിൽ മാത്രം കർണാടക വനത്തിൽ നിന്ന് പുലിയിറങ്ങാറുണ്ടായിരുന്നത് ഇപ്പോൾ ആഴ്ചകളും പിന്നിട്ട് ദിവസങ്ങളുടെ മാത്രം ഇടവേളയിലായതായി നാട്ടുകാർ പറയുന്നു. ഓരോ തവണയും വനംവകുപ്പ് ഉദ്യോഗസ്ഥർ സ്ഥലം സന്ദർശിക്കുന്നതല്ലാതെ ആവശ്യമായ പരിഹാര നടപടികളൊന്നും ഉണ്ടാകുന്നില്ലെന്നാണ് ആക്ഷേപം. പുലിയുടെ സാന്നിധ്യം പതിവായതോടെ സംസ്ഥാന അതിർത്തിയോടുചേർന്ന ഈ പ്രദേശത്തുള്ളവർ രാത്രികാലങ്ങളിൽ പുറത്തിറങ്ങാൻ തന്നെ ഭയക്കുകയാണ്. എത്രയും വേഗം പ്രശ്നത്തിന് ശാശ്വത പരിഹാരം കാണണമെന്നാണ് നാട്ടുകാരുടെ ആവശ്യം. വനം വകുപ്പ് ഉദ്യോഗസ്ഥരും ആർആർടി സംഘവും പ്രദേശത്ത് പരിശോധന നടത്തി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]