ADVERTISEMENT

ADVERTISEMENT

എൻഎസ്എസ് യൂണിറ്റിന്‍റെ സ്നേഹവീട് കൈമാറി

കാഞ്ഞങ്ങാട്: നെഹ്റു കോളജിലെ എൻഎസ്എസ് യൂണിറ്റ് ചിറ്റിലപ്പള്ളി ഫൗണ്ടേഷന്‍റെ സഹകരണത്തോടെ നിർമിച്ച സ്നേഹവീടിന്‍റെ താക്കോൽ കൈമാറി. കോളജിലെ തന്നെ പൂർവവിദ്യാർഥിക്കാണ് കാഞ്ഞങ്ങാട് കുശാൽനഗറിൽ വീട് നിർമിച്ച് നൽകിയത്. എൻഎസ്എസ് സംസ്ഥാന ഓഫീസർ ഡോ.ആർ.എൻ.അൻസർ താക്കോൽ കൈമാറ്റം നിർവഹിച്ചു. കോളജ് പ്രിൻസിപ്പൽ ഡോ.ടി. ദിനേശൻ അധ്യക്ഷത വഹിച്ചു.

കണ്ണൂർ സർവകലാശാല സ്റ്റുഡന്‍റ് സർവീസസ് ഡീൻ ഡോ.കെ.വി. സുജിത്ത് മുഖ്യാതിഥിയായി.
കോളജ് മാനേജർ കെ. രാമനാഥൻ, അഡ്മിനിസ്ട്രേറ്റീവ് ഓഫീസർ ഡോ.കെ.വി. മുരളി, ഐക്യുഎസി കോ-ഓർഡിനേറ്റർ ഡോ.വി. വിജയകുമാർ, എൻഎസ്എസ് പ്രോഗ്രാം ഓഫീസർമാരായ ഡോ.കെ.വി. വിനീഷ് കുമാർ, ഡോ.സി. ജ്ഞാനേശ്വരി, കെ. സുമലത, ജൂണിയർ സൂപ്രണ്ട് വിനോദ് കുമാർ, കോളേജ് യൂണിയൻ ചെയർമാൻ ടി.വി. ആദിത്യൻ എന്നിവർ പ്രസംഗിച്ചു.

ADVERTISEMENT

മകന്‍ ഓടിച്ച ബൈക്ക് മറിഞ്ഞ് പരിക്കേറ്റ വീട്ടമ്മ മരിച്ചു

പുത്തിഗെ: മകന്‍ ഓടിച്ച ബൈക്ക് നിയന്ത്രണംവിട്ടു മറിഞ്ഞു പരിക്കേറ്റു ചികിത്സയിലായിരുന്ന വീട്ടമ്മ മരിച്ചു. അംഗഡിമൊഗറിലെ പരേതനായ നവീന്‍ചന്ദ്രഷെട്ടിയുടെ ഭാര്യ എന്‍. സുലോചന ഷെട്ടി (56) ആണ് മരിച്ചത്. ജൂലൈ 28നു കലാനഗര്‍ ചിങ്കനമുഗര്‍ റോഡിലാണ് അപകടമുണ്ടായത്. എതിര്‍ദിശയില്‍ നിന്നും അമിതവേഗതയിലെത്തിയ വാഹനത്തില്‍ ഇടിക്കാതിരിക്കാന്‍ വെട്ടിച്ചപ്പോള്‍ മകന്‍ അഭിഷേക് ഓടിച്ച ബൈക്ക് നിയന്ത്രണംവിട്ടു മറിയുകയായിരുന്നു. മറ്റു മക്കള്‍: അമൃത്, അക്ഷയ്.

കാട്ടുപന്നികളെ വെടിവച്ചുകൊല്ലാനുള്ള ഉത്തരവ് മണിക്കൂറുകൾക്കകം നടപ്പാക്കി ബളാൽ പഞ്ചായത്ത്

വെള്ളരിക്കുണ്ട്: കൃഷിയിടങ്ങളിലിറങ്ങി ജീവനും സ്വത്തിനും ഭീഷണിയാകുന്ന കാട്ടുപന്നികളെ കണ്ടാലുടന്‍ വെടിവച്ച് കൊല്ലാന്‍ ഉത്തരവിറക്കി ബളാൽ പഞ്ചായത്ത് പ്രസിഡന്‍റ് രാജു കട്ടക്കയം. ഇന്നലെ രാവിലെ 10 മണിക്ക് ഉത്തരവിറങ്ങി മണിക്കൂറുകൾക്കകം തന്നെ വെള്ളരിക്കുണ്ട് ടൗണിനു സമീപത്തെ പ്രകാശ് എസ്റ്റേറ്റ് കേന്ദ്രീകരിച്ച് ഉത്തരവ് നടപ്പാക്കി. കാട്ടുപണികളെ വെടിവെച്ചു കൊല്ലാൻ ലൈസൻസുള്ള ഷൂട്ടർമാരെ എത്തിച്ചാണ് കാട്ടുപന്നിയെ വെടിവച്ചുകൊന്നത്. ബ്ലോക്ക് പഞ്ചായത്ത് അംഗം ഷോബി ജോസഫ്, വാർഡ് മെംബർ കെ.ആർ. വിനു എന്നിവരും സ്ഥലത്തെത്തി പന്നിവേട്ടയ്ക്ക് നേതൃത്വം നൽകി. ബളാൽ പഞ്ചായത്തിൽ കഴിഞ്ഞ അഞ്ചുവർഷത്തിനുള്ളിൽ നാലുപേരുടെ ജീവനാണ് കാട്ടുപന്നി ആക്രമണങ്ങളിൽ നഷ്ടമായതെന്ന് പഞ്ചായത്ത് പ്രസിഡന്‍റ് രാജു കട്ടക്കയം പറഞ്ഞു. ലക്ഷക്കണക്കിന് രൂപയുടെ കൃഷിനാശമാണ് ഉണ്ടായത്. ഈ സാഹചര്യത്തിലാണ് കാട്ടുപന്നികളെ കണ്ടാലുടൻ വെടിവെച്ചു കൊല്ലാനുള്ള ഉത്തരവിറക്കിയത്. വരുംദിവസങ്ങളിലും കാട്ടുപന്നി വേട്ട തുടരുമെന്നും അദ്ദേഹം അറിയിച്ചു.

ജില്ലാ അത്‌ലറ്റിക്സിൽ പെർഡാല സ്കൂൾ മുന്നിൽ

നീലേശ്വരം: ഇഎംഎസ് സ്റ്റേഡിയത്തിൽ നടക്കുന്ന 40-ാമത് ജില്ലാ ജൂണിയർ ആൻഡ് സീനിയർ അത്‌ലറ്റിക്സ് ചാമ്പ്യൻഷിപ്പിന്‍റെ ആദ്യദിനത്തിലെ മത്സരങ്ങൾ അവസാനിച്ചപ്പോൾ പെർഡാല എംപിഐ സ്കൂൾ 69 പോയിന്‍റുമായി മുന്നിട്ടു നിൽക്കുന്നു. 41 പോയിന്‍റുമായി പിടിഎം എയുപി സ്കൂൾ രണ്ടാം സ്ഥാനത്തും 34 പോയിന്‍റു വീതം നേടി സെന്‍റ് എലിസബത്ത് കോൺവെന്‍റ് സ്കൂളും കരിന്തളം ഏകലവ്യാ സ്കൂളും മൂന്നാം സ്ഥാനത്തും നിൽക്കുന്നു. ഡോ.വി. സുരേശൻ മീറ്റ് ഉദ്ഘാടനം ചെയ്തു. അസോസിയേഷൻ ജില്ല പ്രസിഡന്‍റ് കെ. വിജയകൃഷ്ണൻ അധ്യക്ഷനായി. ജില്ല സ്പോർട്സ് കൗൺസിൽ വൈസ് പ്രസിഡന്‍റ് പി.പി.അശോകൻ, വ്യാപാരി വ്യവസായി ഏകോപനസമിതി സെക്രട്ടറി എ. വിനോദ് കുമാർ, അസോസിയേഷൻ ജില്ല സെക്രട്ടറി പി. ഗോപാലകൃഷ്ണൻ, ടി. ശ്രീധരൻ നായർ എന്നിവർ പ്രസംഗിച്ചു. സ്കൂളുകൾ, ക്ലബുകൾ, സ്പോർട്സ് അക്കാദമി എന്നിങ്ങനെ വിവിധ വിഭാഗങ്ങളിലായി 1200 പുരുഷ, വനിത കായിക താരങ്ങളാണ് മുന്ന് ദിവസങ്ങളിലായി നടക്കുന്ന വിവിധ ഇനങ്ങളിൽ പങ്കെടുക്കുന്നത്.

കാഞ്ഞങ്ങാട് മൂന്നു വിദ്യാർഥിനികൾ ഒളിച്ചോടിയത് മയക്കുമരുന്ന് കേസുകളിലെ പ്രതികൾക്കൊപ്പം

കാഞ്ഞങ്ങാട്: കഴിഞ്ഞ ഒരാഴ്ചയ്ക്കിടെ ഹൊസ്ദുർഗ് സ്റ്റേഷൻ പരിധിയിൽ നിന്നും മൂന്ന് വിദ്യാർഥിനികൾ ഒളിച്ചോടിയത് മയക്കുമരുന്ന് കേസുകളിൽ പ്രതികളായിരുന്ന യുവാക്കൾക്കൊപ്പമായിരുന്നുവെന്ന് പോലീസിന്‍റെ വെളിപ്പെടുത്തൽ. കാഞ്ഞങ്ങാട് ദുർഗ ഹയർ സെക്കൻഡറി സ്‌കൂളിലെ സ്റ്റുഡന്‍റ്സ് പോലീസ് കേഡറ്റ് ദിനാഘോഷം ഉദ്ഘാടനം ചെയ്തുകൊണ്ട് ഹോസ്ദുർഗ് സ്റ്റേഷൻ ഇൻസ്‌പെക്ടർ പി. അജിത്കുമാറാണ് ഇക്കാര്യം വെളിപ്പെടുത്തിയത്. മൂന്ന് കേസുകളും വെവ്വേറെ രജിസ്റ്റർ ചെയ്തതാണ്. വിദ്യാർഥിനികൾ 18 വയസ് തികയാൻ കാത്തുനിൽക്കുകയായിരുന്നു. പ്രായപൂർത്തിയായതിനാൽ പോലീസിന് ഇക്കാര്യത്തിൽ നിയമപരമായി ഒന്നും ചെയ്യാൻ കഴിയാത്ത അവസ്ഥയാണ്. അപകടത്തിലേക്കാണ് പോകുന്നതെന്ന് വിദ്യാർഥിനികളെ പറഞ്ഞു ബോധ്യപ്പെടുത്താൻ ഇന്നത്തെ സാഹചര്യത്തിൽ വലിയ പ്രയാസമാണ്. നിറകണ്ണുകളോടെയാണ് അവരുടെ മാതാപിതാക്കൾ പോലീസ് സ്‌റ്റേഷനിൽ നിന്ന് മടങ്ങിയതെന്നും ഇൻസ്‌പെക്ടർ പറഞ്ഞു. പിടിഎ പ്രസിഡന്‍റ് ഇ.വി. ജയകൃഷ്ണൻ അധ്യക്ഷനായി. നഗരസഭാ കൗൺസിലർമാരായ എൻ. അശോക് കുമാർ, കുസുമ ഹെഗ്‌ഡെ, പ്രിൻസിപ്പൽ എൻ. വേണുനാഥൻ, മുഖ്യാധ്യാപിക പി. സുമ, സ്റ്റാഫ് സെക്രട്ടറി കെ.വി. രാജേഷ്, എം.പി. സൗമ്യ, എം. തുഷാര, പി.വി. ശ്രീജിത്ത്, ഡി.വി. സൂര്യ, ടി. സന്ധ്യ എന്നിവർ പ്രസംഗിച്ചു.

ടിഎസ്എസ്എസ് വാർഷിക പൊതുയോഗം

പാലാവയൽ: ടിഎസ്എസ്എസ് പാലാവയൽ യുണിറ്റ് വാർഷിക പൊതുയോഗം പാലാവയൽ സെന്‍റ് ജോൺസ് പളളി അസി.വികാരി ഫാ. അമൽ ചെമ്പകശേരിൽ ഉദ്ഘാടനം ചെയ്തു. യുണിറ്റ് പ്രസിഡന്‍റ് ജോസ് മാളിയേക്കൽ അധ്യക്ഷത വഹിച്ചു. സെക്രട്ടറി ഷീബ ഷാജൻ, വൈസ് പ്രസിഡന്‍റ് ജോൺസൺ കൊടിമരത്തുംമുട്ടിൽ, ജോയിന്‍റ് സെക്രട്ടറി ജിജി ഈരൂരിക്കൽ എന്നിവർ പ്രസംഗിച്ചു. ഓടക്കൊല്ലി-പാലാവയൽ-നല്ലോംപുഴ റൂട്ടിലെ യാത്രാക്ലേശം പരിഹരിക്കാൻ അടിയന്തിര നടപടികൾ ഉണ്ടാകണമെന്ന് യോഗം പ്രമേയത്തിലൂടെ ആവശ്യപ്പെട്ടു. പാലാവയലിൽ നിന്ന് പഞ്ചായത്ത് ആസ്ഥാനമായ ചിറ്റാരിക്കാലിൽ എത്താൻ നല്ലോംപുഴ വഴി വാഹനസൗകര്യമുണ്ടെങ്കിൽ ഏഴ് കിലോമീറ്റർ സഞ്ചരിച്ചാൽ മതിയെന്നിരിക്കേ ഇപ്പോൾ പുളിങ്ങോം-ചെറുപുഴ വഴി 15 കിലോമീറ്ററോളം സഞ്ചരിക്കേണ്ടി വരുന്നതായി യോഗം ചൂണ്ടിക്കാട്ടി. കന്യാസ്ത്രീകളെ ആൾക്കൂട്ട വിചാരണ നടത്തി തെറ്റായ കുറ്റങ്ങൾ ചുമത്തി ജയിലിലടച്ച ഛത്തീസ്ഗഡ് സർക്കാരിന്‍റെ നടപടിക്കെതിരെ പാലാവയൽ ക്രെഡിറ്റ് യൂണിയൻ അംഗങ്ങൾ വായ് മൂടിക്കെട്ടി പ്രതിഷേധറാലി നടത്തി.

ഓണം സ്പെഷ്യൽ തീവണ്ടികൾക്ക് ജില്ലയിൽ രണ്ട് സ്റ്റോപ്പുകൾ മാത്രം

നീലേശ്വരം: ഇത്തവണത്തെ ഓണം സ്പെഷ്യൽ തീവണ്ടികൾക്ക് സ്റ്റോപ്പ് അനുവദിച്ചതിൽ ജില്ലയോട് അവഗണനയെന്ന് ആക്ഷേപം. കാസർഗോഡും കാഞ്ഞങ്ങാടും മാത്രമാണ് ജില്ലയിൽ സ്റ്റോപ്പ് അനുവദിച്ചിരിക്കുന്നത്. മംഗളൂരു-തിരുവനന്തപുരം നോർത്ത്, മംഗളുരു- കൊല്ലം എന്നീ റൂട്ടുകളിലാണ് സ്പെഷ്യൽ ട്രെയിനുകൾ പ്രഖ്യാപിച്ചിട്ടുള്ളത്. ആലപ്പുഴ ജില്ലയിൽ മാത്രം അഞ്ച് സ്റ്റേഷനുകളിലാണ് ഈ വണ്ടികൾക്ക് സ്റ്റോപ്പുകൾ നൽകിയിരിക്കുന്നതെന്ന് നീലേശ്വരം റെയിൽവേ ഡെവലപ്മെന്‍റ് കളക്ടീവ് (എൻആർഡിസി) യോഗം ചൂണ്ടിക്കാട്ടി. വരുമാനം തീരെ കുറഞ്ഞ കൊല്ലം ജില്ലയിലെ ശാസ്താംകോട്ടയിലും സ്റ്റോപ്പ് അനുവദിച്ചിട്ടുണ്ട്. ജില്ലയിലെ വിവിധ സ്റ്റേഷനുകളിൽ നിന്നുള്ള വരുമാനം ഉയരുമ്പോഴും റെയിൽവേ അധികൃതർക്ക് ജില്ലയോടുള്ള അവഗണനയിൽ മാറ്റമില്ലാത്തത് പ്രതിഷേധാർഹമാണെന്ന് യോഗം വിലയിരുത്തി. ഓണം സ്പെഷ്യൽ തീവണ്ടികൾക്ക് ജില്ലയിലെ മൂന്നാമത്തെ പ്രധാന സ്റ്റേഷനായ നീലേശ്വരത്തെങ്കിലും സ്റ്റോപ്പ് അനുവദിക്കണമെന്ന് എൻആർഡിസി യോഗം മുഖ്യരക്ഷാധികാരി പി. മനോജ്‌ കുമാർ മുഖേന റെയിൽവേ മന്ത്രാലയത്തോട് ആവശ്യപ്പെട്ടു. യോഗത്തിൽ എൻആർഡിസി പ്രസിഡന്‍റ് എൻ. സദാശിവൻ അധ്യക്ഷനായി. സെക്രട്ടറി എം. വിനീത്, ട്രഷറർ സി.എം. സുരേഷ്‌കുമാർ, ഡോ.വി. സുരേശൻ, കെ. ബാബുരാജ്, പി.യു. ചന്ദ്രശേഖരൻ എന്നിവർ പ്രസംഗിച്ചു.

താത്കാലിക ഡോക്ടർമാർക്ക് വേതനം മുടങ്ങിയിട്ട് മൂന്നുമാസം

കാഞ്ഞങ്ങാട്: ജില്ലയിലെ സർക്കാർ ആശുപത്രികളിൽ ഡോക്ടർമാരുടെ ക്ഷാമം പരിഹരിക്കാൻ താത്കാലിക നിയമനം നല്കിയ ഡോക്ടർമാർക്ക് മൂന്നുമാസമായി വേതനമില്ല. ട്രഷറിയിലെ നടപടിക്രമങ്ങളുമായി ബന്ധപ്പെട്ട സാങ്കേതികപ്രശ്നങ്ങളാണ് വേതനം മുടങ്ങാൻ കാരണമായതെന്നാണ് ബന്ധപ്പെട്ടവർ പറയുന്നത്. സ്കൂളുകളിലെ താത്കാലിക അധ്യാപകരുടെ വേതനവും ഇത്തരത്തിൽ മുടങ്ങിയിരുന്നു. പിന്നീട് ധനകാര്യവകുപ്പ് പ്രത്യേക ഉത്തരവിലൂടെ പ്രശ്നം പരിഹരിക്കുകയായിരുന്നു. എന്നാൽ ആരോഗ്യവകുപ്പ് ജീവനക്കാരുടെ കാര്യത്തിൽ ഇതുവരെ ഇത്തരത്തിലുള്ള ഉത്തരവ് ഇറങ്ങാത്തതാണ് പ്രശ്നം. ചെറിയൊരു സാങ്കേതികപ്രശ്നം മാത്രമാണെങ്കിലും അത് പരിഹരിക്കാൻ ബന്ധപ്പെട്ടവർ വേണ്ടത്ര താത്പര്യമെടുക്കുന്നില്ലെന്നാണ് പരാതി. താത്കാലിക നിയമനം ലഭിക്കുന്ന ഡോക്ടർമാർക്ക് പ്രതിമാസം 52,000 രൂപയാണ് വേതനമായി നൽകുന്നത്. സ്ഥിരം ഡോക്ടർമാരുടെ അടിസ്ഥാന ശമ്പളം തന്നെ 70,000 രൂപ മുതൽ തുടങ്ങുന്നതാണ്. താത്കാലിക നിയമനങ്ങൾക്കായി പലതവണ അഭിമുഖം നടത്തിയിട്ടും വളരെ കുറച്ചുപേർ മാത്രമാണ് തയ്യാറായി വന്നത്. ഇവർക്കെല്ലാം നിയമനം നൽകുകയും ചെയ്തു. സ്ഥിരം ഡോക്ടർമാരുടെ ക്ഷാമം മൂലം ഇവരെല്ലാം കടുത്ത ജോലിഭാരവും നേരിടുന്നുണ്ട്. താരതമ്യേന കുറവായ വേതനം പോലും കൃത്യമായി ലഭിക്കുന്നില്ലെന്ന നിലയായാൽ ഇനി ഇവരുടെ സേവനവും അധികകാലം നീളാനിടയില്ലെന്നാണ് നാട്ടുകാരുടെ ആശങ്ക.

കത്തോലിക്കാ കോണ്‍ഗ്രസ് പ്രതിഷേധ കൂട്ടായ്മ നടത്തി

പനത്തടി: ഛത്തീസ്ഗഡില്‍ രണ്ട് സന്യാസിനികളെ അകാരണമായി അറസ്റ്റ് ചെയ്തതില്‍ പ്രതിഷേധിച്ച് എകെസിസി പനത്തടി യൂണിറ്റിന്‍റെയും യൂത്ത് കൗണ്‍സിലിന്‍റെയും നേതൃത്വത്തില്‍ പനത്തടി ടൗണില്‍ പ്രതിഷേധ കൂട്ടായ്മ സംഘടിപ്പിച്ചു. പനത്തടി സെന്‍റ് ജോസഫ് ഫൊറോന വികാരി ഫാ. ജോസഫ് പൂവത്തോലില്‍ ഉദ്ഘാടനം ചെയ്തു. എകെസിസി യൂണിറ്റ് പ്രസിഡന്‍റ് സണ്ണി ഇലവുങ്കല്‍ അധ്യക്ഷനായി. പനത്തടി പള്ളി അസി.വികാരി ഫാ. മെല്‍ബിന്‍ ആലപ്പാട്ടുകുന്നേല്‍, എകെസിസി പനത്തടി ഫൊറോന പ്രസിഡന്‍റ് ജോണി തോലംപുഴ, വൈസ് പ്രസിഡന്‍റ് ജോസ് നാഗരോലില്‍, ലിജേഷ് ഫ്രാന്‍സിസ്, രാജീവ് തോമസ്, ജിതിന്‍ പൗലോസ്, ഡോ. ആഷ്‌ലി, വി.സി. ദേവസ്യ, ആന്‍റണി കണിയാന്തറ, എം. ജെ ടോമി, ജിജി മൂഴിക്കച്ചാലില്‍, കെ.എസ്. മാത്യു കണിയാന്തറ, ബീന ആടയ്ക്കാപ്പാറ, മെറിന ബെന്നി എന്നിവർ പ്രസംഗിച്ചു.

ക്ഷീരസംഘം സെക്രട്ടറിമാർക്ക് പരിശീലനം നൽകി

കാഞ്ഞങ്ങാട്: മിൽമ മലബാർ മേഖലാ സഹകരണ ക്ഷീരോത്പാദക യൂണിയൻ പി ആൻഡ് ഐ യൂണിറ്റിന്‍റെ ആഭിമുഖ്യത്തിൽ ക്ഷീരസംഘം സെക്രട്ടറിമാർക്ക് ഫുഡ് സേഫ്റ്റി ട്രെയിനിംഗ് ആൻഡ് സർട്ടിഫിക്കേഷൻ പരിശീലനം നൽകി. പാലിന്‍റെ സംഭരണവും ശുചിത്വം ഉറപ്പുവരുത്തുന്നതുമായി ബന്ധപ്പെട്ട് ക്ലാസുകൾ നൽകി. മിൽമ ഡയറക്ടർ പി.പി. നാരായണൻ ഉദ്ഘാടനം ചെയ്തു. മേഖലാ യൂണിയൻ ഡയറക്ടർ കെ. സുധാകരൻ അധ്യക്ഷത വഹിച്ചു. ഫുഡ് സേഫ്റ്റി ആൻഡ് സ്റ്റാൻഡേർഡ്സ് അഥോറിറ്റി ഓഫ് ഇന്ത്യയുടെ അംഗീകൃത ട്രെയിനർമാരായ മിൽമ കാസർഗോഡ് ഡയറി മാനേജർ സ്വീറ്റി വർഗ്ഗീസ്, ടെക്നിക്കൽ ഓഫീസർ സി. ആദർശ് എന്നിവർ ക്ലാസെടുത്തു. ജില്ലാ പി ആൻഡ് ഐ യൂണിറ്റ് മേധാവി വി. ഷാജി നന്ദി പറഞ്ഞു.

എന്‍എസ്എസ് പ്രോഗ്രാം ഓഫീസര്‍മാര്‍ക്ക് ശില്പശാല

പടന്നക്കാട്: നാഷണല്‍ സര്‍വീസ് സ്‌കീമും കേരള എയ്ഡ്‌സ് കണ്‍ട്രോള്‍ സൊസൈറ്റിയും സംയുക്തമായി ജില്ലയിലെ വിവിധ സെല്ലുകളിലെ എന്‍എസ്എസ് പ്രോഗ്രാം ഓഫീസര്‍മാര്‍ക്കുളള ഏകദിന ശില്പശാല നെഹ്‌റു കോളജില്‍ സംസ്ഥാന എന്‍എസ്എസ് ഓഫീസര്‍ ആര്‍.എന്‍. അന്‍സാര്‍ ഉദ്ഘാടനം ചെയ്തു. പ്രിന്‍സിപ്പല്‍ ഡോ. ടി. ദിനേശ് അധ്യക്ഷതവഹിച്ചു. കണ്ണൂര്‍ സര്‍വകലശാലാ ഡിഎസ്എസ് ഡോ.കെ.വി. സുജിത് മുഖ്യാതിഥിയായി. എന്‍എസ്എസ് ദേശീയ ട്രെയിനര്‍ ബ്രഹ്‌മനായകം മഹാദേവന്‍, യുവ ജാഗര്‍ നോഡല്‍ ഓഫീസര്‍മാരായ കെ.പി. രാജന്‍, സി.വി. ശ്രീജ, ഇ. ഉദയകുമാര്‍, ആദില്‍ നസീര്‍ എന്നിവര്‍ സംസാരിച്ചു. എയ്ഡ്‌സ് കണ്‍ട്രോള്‍ സൊസൈറ്റി ജോയിന്‍റ് ഡയറക്ടര്‍ രശ്മി മാധവന്‍, അസി. ഡയറക്ടര്‍ എസ്. സജിത് എന്നിവര്‍ ക്ലാസ് നടത്തി. എന്‍എസ്എസ് ജില്ലാ കോര്‍ഡിനേറ്റര്‍ ഡോ. കെ.വി. വിനീഷ് കുമാര്‍ സ്വാഗതവും നോഡല്‍ ഓഫീസര്‍ സമീര്‍ സിദ്ദിഖ് നന്ദിയും പറഞ്ഞു.

വിദ്യാലയങ്ങളിൽ സ്റ്റാമ്പ് വഴിയുള്ള പണപ്പിരിവ് അവസാനിപ്പിക്കണമെന്ന് കെപിഎസ്ടിഎ

കാസർഗോഡ്: വിദ്യാലയങ്ങളിൽ നിന്ന് സ്റ്റാമ്പ് വഴിയുള്ള സർക്കാരിന്‍റെ നിർബന്ധിത പണപ്പിരിവ് അവസാനിപ്പിക്കണമെന്ന് കെപിഎസ്ടിഎ ജില്ലാ കമ്മിറ്റി യോഗം ആവശ്യപ്പെട്ടു. 10 വർഷം മുമ്പുള്ള സ്റ്റാമ്പുകൾ നൽകിയാണ് മുഖ്യാധ്യാപകരോട് തുക അടക്കാൻ‌ ആവശ്യപ്പെട്ടിരിക്കുന്നത്. അധ്യാപകരിൽ നിന്നും 200 രൂപ വീതം പിരിച്ചെടുക്കാനാണ് വാക്കാലുള്ള നിർദേശം . ഇപ്രകാരം ഏതാണ്ട് അഞ്ച് ലക്ഷത്തിലേറെ രൂപയുടെ സ്റ്റാമ്പുകളാണ് ജില്ലയിൽ വിതരണം ചെയ്തിരിക്കുന്നത്. 2022 ൽ സ്കൂളുകളിലെ സ്റ്റാമ്പ് വിൽപന തടഞ്ഞുകൊണ്ട് ഹൈക്കോടതിയുടെ ഉത്തരവ് വന്നതിനു ശേഷം ഒളിഞ്ഞും തെളിഞ്ഞും മുഖ്യാധ്യാപകരെ സമ്മർദത്തിലാക്കിയാണ് സ്റ്റാമ്പുകൾ അടിച്ചേൽപ്പിക്കുന്നത്. മിക്കപ്പോഴും സ്റ്റാമ്പുകളുടെ തുക മുഖ്യാധ്യാപകരും മറ്റ് അധ്യാപകരും ചേർന്ന് വീതിച്ചെടുക്കേണ്ട അവസ്ഥയാണ്. സർക്കാർ വിദ്യാലയങ്ങൾക്ക് മൂന്നുവർഷമായി മെയിന്‍റനൻസ് ഫണ്ട് പോലും ലഭിക്കാത്തതിനാൽ മുഖ്യാധ്യാപകർ ദുരിതത്തിലാണ്. ഇതിനിടയിലാണ് വീണ്ടും സ്റ്റാമ്പുകൾ അടിച്ചേൽപ്പിക്കുന്നത്. സ്കൂൾ കെട്ടിടങ്ങളുടെ മെയിന്‍റനൻസിനു വേണ്ടി യാതൊരു സാമ്പത്തിക സഹായവും നൽകാതെ സ്കൂൾ സുരക്ഷാ ഓഡിറ്റ് നടത്തുന്നത് അപഹാസ്യമാണെന്നും യോഗം വിലയിരുത്തി. ജില്ലാ പ്രസിഡന്‍റ് പി.ടി. ബെന്നി അധ്യക്ഷത വഹിച്ചു. സംസ്ഥാന പ്രസിഡന്‍റ് ജി.കെ. ഗിരീഷ്, പി. ശശിധരൻ, അലോഷ്യസ് ജോർജ്, എം.കെ. പ്രിയ, സ്വപ്ന ജോർജ്, പി. ജലജാക്ഷി, സി.എം. വർഗീസ്, കെ.വി. ജനാർദനൻ, ആർ.വി. പ്രേമാനന്ദൻ, സി.കെ. അജിത, ടി. മധുസൂദനൻ, ജിജോ പി. ജോസഫ്, സി.പി. പ്രീതി, കെ. ഗോപാലകൃഷ്ണൻ, പി. ശ്രീജ എന്നിവർ പ്രസംഗിച്ചു.

പഞ്ചായത്തുകൾ അടച്ചുപൂട്ടേണ്ട അവസ്ഥയിൽ: യുഡിഎഫ്

കാസർഗോഡ്: ജീവനക്കാരുടെ അഭാവം മൂലം ജില്ലയിലെ മിക്ക പഞ്ചായത്തുകളും അടച്ചുപൂട്ടേണ്ട അവസ്ഥയിലാണെന്നും പ്രശ്നത്തിന് അടിയന്തിര പരിഹാരം കാണണമെന്നും യുഡിഎഫ് ജില്ലാ നേതൃയോഗം ആവശ്യപ്പെട്ടു. കാസർഗോഡ്-കാഞ്ഞങ്ങാട് സംസ്ഥാനപാത അടിയന്തിരമായി അറ്റകുറ്റപ്പണി നടത്തി ഗതാഗതയോഗ്യമാക്കുന്നില്ലെങ്കിൽ സമരരംഗത്തിറങ്ങുമെന്നും യോഗം മുന്നറിയിപ്പ് നൽകി. ജില്ലാ ചെയർമാൻ കല്ലട മാഹിൻ ഹാജി അധ്യക്ഷത വഹിച്ചു. കൺവീനർ എ. ഗോവിന്ദൻ നായർ, എൻ.എ. നെല്ലിക്കുന്ന് എംഎൽഎ, എ. അബ്ദുൽ റഹ്മാൻ, ഹക്കിം കുന്നിൽ, അഡ്വ.എ. ഗോവിന്ദൻ നായർ, വി.കെ. രവീന്ദ്രൻ, ഹരീഷ് ബി. നമ്പ്യാർ, കെ.കെ. രാജേന്ദ്രൻ, വി. കമ്മാരൻ, സി.വി. തമ്പാൻ, ടി.വി. ഉമേശന്‍, പി. കുഞ്ഞിക്കണ്ണൻ, കെ. ശ്രീധരൻ, മഞ്ജുനാഥ ആൽവ, ടിമ്പർ മുഹമ്മദ്, കെ. ഖാലിദ്, മാഹിൻ കേളോട്ട്, അഡ്വ. നിസാം, കൂക്കൾ ബാലകൃഷ്ണൻ, കെ.വി. മുഹമ്മദ് കുഞ്ഞി, അസീസ് മരിക്കേ എന്നിവർ പ്രസംഗിച്ചു.

വയനാട് ധനസമാഹരണം: ഡിസിസി സെക്രട്ടറിക്കെതിരായ വാർത്തകൾ അടിസ്ഥാനരഹിതം-പി.കെ. ഫൈസൽ

കാസർഗോഡ്: കെപിസിസിയുടെ വയനാട് പുനരധിവാസ ഭവനനിർമാണ ധനസമാഹരണവുമായി ബന്ധപ്പെട്ട് ഡിസിസി ജനറൽ സെക്രട്ടറി എം.സി. പ്രഭാകരനെതിരെ തത്പരകക്ഷികൾ പ്രചരിപ്പിക്കുന്ന വാർത്തകൾ അടിസ്ഥാനരഹിതവും വസ്തുതാവിരുദ്ധവുമാണെന്ന് ഡിസിസി പ്രസിഡന്‍റ് പി.കെ. ഫൈസൽ അറിയിച്ചു. എം.സി. പ്രഭാകരൻ തന്‍റെ മകന്‍റെ വിവാഹസൽക്കാര ചടങ്ങിൽ വച്ചാണ് വയനാട് പുനരധിവാസ ഭവനനിർമ്മാണ ഫണ്ടിലേക്ക് നാല് ലക്ഷം രൂപ സംഭാവന നൽകുന്നതായി അറിയിച്ചുകൊണ്ട് ചെക്ക് കൈമാറിയത്. വരുന്ന ഓഗസ്റ്റ് 15 ന് ഈ തുക കെപിസിസിക്ക് കൈമാറാൻ നേരത്തേ തീരുമാനമായതാണ്. ഇതിനിടയിലാണ് ചില മാധ്യമങ്ങൾ ഇതുമായി ബന്ധപ്പെട്ട് വ്യാജവാർത്തകൾ നൽകിയതെന്ന് ഡിസിസി പ്രസിഡന്‍റ് പറഞ്ഞു. ചെക്ക് ഇതുവരെ ബാങ്കിൽ ഹാജരാക്കുകയോ അതിൽ പണമില്ലെന്ന് പറഞ്ഞ് തിരിച്ചയക്കുകയോ ചെയ്തിട്ടില്ല. വ്യാജവാർത്തകൾ നൽകിയ ചാനലുകൾക്കും പത്രങ്ങൾക്കുമെതിരെ നിയമനടപടികളുമായി മുന്നോട്ടുപോകുമെന്നും ഡിസിസി പ്രസിഡന്‍റ് അറിയിച്ചു.

ദേശീയപാത നിര്‍മാണത്തിലെ അപാകതക്കെതിരെ പ്രതിഷേധം

കാഞ്ഞങ്ങാട്: ദേശീയപാത നിര്‍മാണ പ്രവര്‍ത്തനത്തിലെ അപാകത പരിഹരിക്കണമെന്നാവശ്യപ്പെട്ട് സിപിഎം അജാനൂര്‍ ലോക്കല്‍ കമ്മിറ്റി പ്രകടനവും പ്രതിഷേധയോഗവും നടത്തി. കാഞ്ഞങ്ങാട് ഏരിയ കമ്മിറ്റി അംഗം മൂലക്കണ്ടം പ്രഭാകരന്‍ ഉദ്ഘാടനം ചെയ്തു. മനോജ് കാരക്കുഴി അധ്യക്ഷതവഹിച്ചു. ദേവി രവീന്ദ്രന്‍, ശിവജി വെള്ളിക്കോത്ത്, ടി.വി. പദ്മിനി, വി.വി. തുളസി എന്നിവര്‍ സംസാരിച്ചു.

റാഗിംഗ് തടയാന്‍ സ്‌പെഷല്‍ സ്‌ക്വാഡ് രൂപീകരിച്ചു

കാസര്‍ഗോഡ്: പുതിയ അധ്യയന വര്‍ഷം ആരംഭിച്ചത് മുതല്‍ നിരവധി റാഗിംഗ്, വിദ്യാര്‍ഥികള്‍ തമ്മിലുള്ള സംഘര്‍ഷം അതുപോലെ വിദ്യാലയങ്ങളിലെ അക്രമസംഭവങ്ങള്‍ ഇതുമായി ബന്ധപ്പെട്ട് കേസുകള്‍ ജില്ലയില്‍ റിപ്പോര്‍ട്ട് ചെയ്യുന്നത് വര്‍ധിച്ചു വരുന്ന സാഹചര്യചത്തില്‍ പോലീസ് സ്‌പെഷല്‍ സ്‌ക്വാഡ് രൂപീകരിച്ചു. ട്രെയിന്‍, വിദ്യാലയങ്ങള്‍, പൊതു ഇടങ്ങളിലും റാഗിംഗ് പിടികൂടാനാണ് സ്‌പെഷല്‍ സ്‌ക്വാഡ് രൂപീകരിച്ചിട്ടുള്ളത്. ഇതിന്‍റെ ഭാഗമായി മഫ്തിയില്‍ ട്രെയിനുകളില്‍ പോലീസുകാരെ നിയോഗിച്ചിട്ടുണ്ട്. റാഗിംഗ് പിടികൂടിയാല്‍ വിട്ടുവീഴ്ച ഇല്ലാത്ത നിയമനടപടി സ്വീകരിക്കും. കഴിഞ്ഞ ദിവസം വിദ്യാര്‍ഥികള്‍ ഒരു അധ്യാപകനെ ട്രെയിനില്‍ വെച്ച് മര്‍ദ്ദിക്കുന്ന സാഹചര്യം ഉണ്ടാകുകയും പോലീസ് കേസ് രജിസ്റ്റര്‍ ചെയ്യുകയും ചെയ്തിരുന്നു. കാസര്‍ഗോഡ് ജില്ലയില്‍ നിന്നും സമീപ ജില്ലകളില്‍ നിന്നും നിരവധി വിദ്യാര്‍ഥികള്‍ മംഗളുരുവില്‍ വിദ്യാഭ്യാസ ആവശ്യങ്ങള്‍ക്കായി ആശ്രയിക്കുന്നുണ്ട്. ഇതില്‍ ബഹുഭൂരിപക്ഷം വിദ്യാര്‍ഥികളും ട്രെയിന്‍ മാര്‍ഗമാണ് യാത്ര ചെയ്യുന്നത്. അതില്‍ സീനിയര്‍ വിദ്യാര്‍ഥികള്‍ ജൂണിയര്‍ വിദ്യാര്‍ഥികളെ ട്രെയിനില്‍ വെച്ച് റാഗ് ചെയ്യുന്നത് വ്യാപകമായതോടെ ട്രെയിന്‍ യാത്ര വിദ്യാര്‍ഥികള്‍ക്കും മറ്റു യാത്രക്കാര്‍ക്കും വളരെ ദുഷ്‌കരമായി. ഇതുമായി ബന്ധപ്പെട്ട് രക്ഷിതാക്കളുടേയും മറ്റു യാത്രക്കാരുടേയും പരാതികള്‍ വര്‍ധിച്ചതോടെ ജില്ലാ പോലീസ് മേധാവി ബി.വി. വിജയഭരത് റെഡ്ഡി ജില്ലാ പോലീസ് കാര്യാലയത്തില്‍ ആര്‍പിഎഫ്, കേരള റെയില്‍വേ പോലീസ് എന്നിവരെ ഉള്‍കൊള്ളിച്ചുകൊണ്ട് വിളിച്ചു ചേര്‍ത്ത മീറ്റിംഗില്‍ ജില്ലാ അഡീഷണല്‍ എസ്പി സി.എം. ദേവദാസന്‍, ജില്ലാ നാര്‍ക്കോട്ടിക് സെല്‍ ഡിവൈഎസ്പി എ. അനില്‍കുമാര്‍ എന്നിവര്‍ പങ്കെടുത്തു. റാഗിംഗ് നടന്നതായി തെളിയിക്കപ്പെട്ടാല്‍ രണ്ടുവര്‍ഷം വരെ തടവും 10,000 രൂപ വരെ പിഴയും ലഭിക്കും. ഏതെങ്കിലും സ്ഥാപനം റാഗിംഗ് നടന്നത് മറച്ചുവെക്കാന്‍ ശ്രമിച്ചാല്‍, സ്ഥാപനം റാഗിംഗിന് കൂട്ടുനിന്നതായി നിയമം കാണുന്നതാണ്. റാഗിംഗുമായി ബന്ധപ്പെട്ട ഏതു പരാതിയും നിങ്ങള്‍ക്ക് ആന്റി റാഗിംഗ് ഹെല്‍പ് ലൈന്‍ നമ്പറായ 1800-180-5522 (24*7 Toll Free) ലേക്ക് വിളിക്കാവുന്നതാണ്. അതുപോലെ പോലീസ് സ്റ്റേഷനുകളിലും അറിയിക്കാവുന്നതാണ് (ഇ-മെയില്‍: help [email protected], വെബ്‌സൈറ്റ്: www.antiragging.in)

വീരമലക്കുന്നിനാ‍യി പ്രതിഷേധമതിൽ തീർത്തു

ചെറുവത്തൂർ: ദേശീയപാത നിർമാണത്തിന്‍റെ ഭാഗമായി ചെറുവത്തൂരിൽ കുന്നിടിച്ചു നിരത്തിയതിന്‍റെ തിക്തഫലം അനുഭവിച്ചു വരുന്ന മയ്യിച്ച പ്രദേശത്തുകാർ വീരമലക്കുന്നിന്‍റെ താഴ് വാരത്ത് പ്രതിഷേധമതിൽ തീർത്തു. ചെറുവത്തൂർ മയ്യിച്ച വയൽക്കര ക്ഷേത്ര കവാടത്തിൽ നിന്നുമാരംഭിച്ച പ്രതിഷേധ പ്രകടനത്തിൽ സ്ത്രീകളും കുട്ടികളും ഉൾപ്പെടെ നൂറുകണക്കിന് നാട്ടുകാർ അണിനിരന്നു. ചെറുവത്തൂർ മയ്യിച്ച ഭാഗത്തേക്കുള്ള സർവീസ് റോഡും ബസ് സ്റ്റോപ്പും നിർമിക്കുക, പതിറ്റാണ്ടുകളായി ഉപയോഗിച്ചു വരുന്ന ശ്മശാനത്തിലേക്ക് റോഡ് പുനഃസ്ഥാപിക്കുക, കുടിവെള്ളത്തിനുപയോഗിച്ചുവരുന്ന കിണറിന് അടപ്പ് സ്ഥാപിക്കുക, പഞ്ചായത്ത് കുളം സംരക്ഷിക്കുക, വെള്ളം ഒഴുകിപ്പോകുന്നതിന് ഓവുചാൽ പണിയുക, പുഴ തടപ്പെടുത്തി നിർമിച്ച താത്കാലിക ബണ്ട് നീക്കുക തുടങ്ങിയ ആവശ്യങ്ങളുന്നയിച്ചായിരുന്നു നാട്ടുകാർ പ്രതിഷേധ മതിൽ സൃഷ്ടിച്ചത്. വെങ്ങാട്ട് ചെക്ക് പോസ്റ്റ് ജംഗ്ഷൻ ചുറ്റി വീരമലയുടെ താഴ് വാരത്ത് എത്തിയ ശേഷമാണ് ദേശീയ പാതയുടെ കിഴക്ക് ഭാഗത്ത് മയ്യിച്ച വികസന സമിതിയുടെ നേതൃത്വത്തിൽ നാട്ടുകാർ വീരമല സംരക്ഷണത്തിനായി മനുഷ്യരുടെ ധീരമതിൽ തീർത്തത്. വീരമലക്കുന്നിന്‍റെ സംരക്ഷണവും നാട്ടുകാർ നേരിടുന്ന പ്രശ്നങ്ങൾക്ക് പരിഹാരവും ആവശ്യപ്പെട്ടാണ് മയ്യിച്ച വികസന സമിതിയുടെ നേതൃത്വത്തിൽ ആദ്യഘട്ട മനുഷ്യമതിൽ ഒരുക്കിയത്. തുടർന്നു നടന്ന പ്രതിഷേധ യോഗം ചെറുവത്തൂർ ഗ്രാമ പഞ്ചായത്ത് പ്രസിഡന്‍റ് സി.വി. പ്രമീള ഉദ്ഘാടനം ചെയ്തു. എം. രാമകൃഷ്ണൻ അധ്യക്ഷതവഹിച്ചു. മയ്യിച്ച വികസന സമിതി പ്രസിഡന്‍റ് വി.വി. കൃഷ്ണൻ, വാർഡ് മെംബർ കെ. മഞ്ജുഷ, ഡിസിസി വൈസ് പ്രസിഡന്‍റ് കെ.കെ. രാജേന്ദ്രൻ, സിപിഎം നേതാവ് കെ. ബാലകൃഷ്ണൻ, സിപിഐ നേതാവ് മുകേഷ് ബാലകൃഷ്ണൻ, ബിജെപി നേതാവ് രാജീവൻ ചീമേനി, ആർജെഡി ജില്ലാ പ്രസിഡന്‍റ് വി.വി. കൃഷ്ണൻ, എസ്എൻടിടിഐയിലെ അധ്യാപിക സിന്ധു ഹരീഷ്, കരിമ്പിൽ കൃഷ്ണൻ, എ.വി. ദാമോദരൻ, എം.പി. കുഞ്ഞിരാമൻ, എം. ശിശുപാലൻ, രവീന്ദ്രൻ മാണിയാട്ട് എന്നിവർ പ്രസംഗിച്ചു.

പന്തംകൊളുത്തി പ്രകടനം നടത്തി

പൊയിനാച്ചി: ഛത്തീസ്ഗഡില്‍ കള്ളക്കേസില്‍ കുടുക്കി കന്യാസ്ത്രീകളെ ജയിലില്‍ അടച്ച ഭരണകൂട ഭീകരതക്കെതിരെ പൊയിനാച്ചി സെന്‍റ് മേരീസ് പള്ളിയുടെ നേതൃത്വത്തില്‍ പന്തം കൊളുത്തി പ്രതിഷേധ സമരം നടത്തി. പള്ളിയില്‍നിന്നും പൊയിനാച്ചി ടൗണിലേക്ക് നടത്തിയ പ്രതിഷേധ സമരത്തില്‍ ഫാ. അഗസ്റ്റിന്‍ അറയ്ക്കല്‍, ഫാ. ലോറന്‍സ്, സിസ്റ്റര്‍ ആശ പോള്‍, സിസ്റ്റര്‍ സോളി തോമസ്, സിസ്റ്റര്‍ ലില്ലി, ജോജോ ചേനാട്ട്, ദിലീപ് തലച്ചറ, ജോര്‍ജ് കാര്യവേലില്‍, സ്റ്റീഫന്‍ കീച്ചേരി, കുന്നേല്‍ ജോര്‍ജ്, കൊച്ചുപറമ്പില്‍ ജോസ്, മണ്ണൂര്‍ സോജി, ആയിരമലയില്‍ ജോണ്‍ ഉദിനപറമ്പില്‍, ബേബി തൊട്ടിയില്‍, അജിത്ത് ചിരിയംകണ്ടത്ത്, വല്‍സമ്മ മുണ്ടിയാനിക്കല്‍ എന്നിവര്‍ നേതൃത്വം നല്‍കി. വിവിധ രാഷ്ട്രീയപാര്‍ട്ടി നേതാക്കളായ കൃഷ്ണന്‍ ചട്ടഞ്ചാല്‍, വിനോദ്കുമാര്‍ പറമ്പ്, എ.കെ. ശശിധരന്‍, ഉണ്ണികൃഷ്ണന്‍ പൊയിനാച്ചി എന്നിവര്‍ സംസാരിച്ചു.

ഈസ്‌റ്റ് എളേരി പഞ്ചായത്ത് ലൈബ്രറി പുനരാരംഭിച്ചു

ചിറ്റാരിക്കാൽ: അടഞ്ഞുകിടന്ന ഈസ്‌റ്റ് എളേരി പഞ്ചായത്ത് ലൈബ്രറി പുനരാരംഭിച്ചു. പഞ്ചായത്ത് നടപ്പാക്കുന്ന നൂറുദിന പദ്ധതിയിലുൾപ്പെടുത്തിയാണ് ഇപ്പോൾ ലൈബ്രറി സൗകര്യം പൊതുജനങ്ങൾക്കായി തുറന്നുകൊടുത്തത്. നവീകരിച്ച ലൈബ്രറിയുടെ പ്രവർത്തനോദ്ഘാടനം പഞ്ചായത്ത് പ്രസിഡന്‍റ് ജോസഫ് മുത്തോലി നിർവഹിച്ചു. വെള്ളരിക്കുണ്ട് താലൂക്ക് ലൈബ്രറി കൗൺസിൽ സെക്രട്ടറി എ.ആർ. വിജയകുമാർ, പഞ്ചായത്ത് അസി. സെക്രട്ടറി കെ.ജെ. പോൾ, ആസൂത്രണ സമിതി ഉപാധ്യക്ഷൻ എം.കെ. ഗോപാലകൃഷ്‌ണൻ, ഹെഡ് ക്ലാർക്ക് ടി.വി. അനീഷ്, ക്ലാർക്ക് അമൽ ഏബ്രഹാം എന്നിവർ സംബന്ധിച്ചു. റഫറൻസ് ഗ്രന്ഥങ്ങളുൾപ്പെടെ പതിനായിരത്തോളം പുസ്‌തകങ്ങളുള്ള ഈ ഗ്രന്ഥശാല ലൈബ്രറിയനില്ലാത്തതിനാൽ വർഷങ്ങളായി അടഞ്ഞുകിടക്കുകയായിരുന്നു. ഇവിടെ സ്‌ഥിരം ലൈബ്രേറിയനെ നിയമിക്കാൻ പഞ്ചായത്ത് ഭരണസമിതി ശ്രമം നടത്തിയിരുന്നെങ്കിലും അതു ചുവപ്പുനാടയിൽ കുടുങ്ങി. ഇതേത്തുടർന്നാണ് പഞ്ചായത്ത് പ്രസിഡന്‍റിന്‍റെ നേതൃത്വത്തിലുള്ള ഭരണസമിതി, ഓഫീസിലെ സ്‌ഥിരം ജീവനക്കാർക്ക് ലൈബ്രറിയുടെ ചുമതല നൽകി പ്രവർത്തനം പുനരാരംഭിക്കാൻ തീരുമാനിച്ചത്. ഇതോടെ എല്ലാ പ്രവൃത്തിദിനങ്ങളിലും ഉച്ചകഴിഞ്ഞ് മൂന്നു മുതൽ വായനക്കാർക്ക് ഇവിടെനിന്നും പുസ്‌തകങ്ങളെടുക്കാൻ കഴിയും. സംസ്ഥാന ലൈബ്രറി കൗൺസിൽ അംഗീകരിച്ച ലിബ്‌കാറ്റ് സോഫ്റ്റ്‌വെയർ ഉപയോഗിച്ച് ഈസ്റ്റ് എളേരി പഞ്ചായത്ത് ലൈബ്രറിയിൽ ഉടൻ ഡിജിറ്റൈസേഷൻ പൂർത്തിയാക്കാനാണ് അധികൃതർ ലക്ഷ്യമിടുന്നത്. ഇതിന്‍റെ ഭാഗമായി പഞ്ചായത്തിലെ 13 ലൈബ്രേറിയൻമാരുടെ നേതൃത്വത്തിൽ ജനകീയ പങ്കാളിത്തത്തോടെ ഡാറ്റ എൻട്രി ഉൾപ്പെടെയുള്ള പ്രവർത്തനങ്ങൾ പൂർത്തിയാക്കും.

കന്യാസ്ത്രീകളുടെ അറസ്റ്റിൽ കോൺഗ്രസ് പ്രതിഷേധം

രാജപുരം: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്തതിൽ പ്രതിഷേധിച്ച് ബളാൽ ബ്ലോക്ക് കോൺഗ്രസ് കമ്മിറ്റി രാജപുരത്ത് പ്രതിഷേധകൂട്ടായ്മ സംഘടി പ്പിച്ചു. ഡിസിസി വൈസ്പ്രസിഡന്‍റ് ബി.പി. പ്രദീപ് കുമാർ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് മധുസൂദനൻ ബാലൂർ അധ്യക്ഷതവഹിച്ചു. പഞ്ചായത്ത് പ്രസിഡന്‍റ് ടി.കെ. നാരായണൻ, മണ്ഡലം പ്രസിഡന്‍റുമാരായ എം.എം. സൈമൺ, വി. മധുസൂദനൻ ബാലൂർ, വി.കെ. ബാലകൃഷ്ണൻ, യൂത്ത് കോൺഗ്രസ് ജില്ലാ ജനറൽ സെക്രട്ടറി വിനോദ് കപ്പിത്താൻ, എം.യു. തോമസ്, റോയി ആശാരികുന്നേൽ എന്നിവർ സംസാരിച്ചു. തൃക്കരിപ്പൂർ: ഛത്തീസ്ഗഡിൽ മലയാളി കന്യാസ്ത്രീകളെ ബിജെപി സര്‍ക്കാർ അറസ്റ്റ് ചെയ്തു ജയിലിലടച്ച ഭരണഘടനാവിരുദ്ധ നടപടിയിൽ പ്രതിഷേധിച്ച് തൃക്കരിപ്പൂർ ബ്ലോക്ക് കോൺഗ്രസ് കമ്മിറ്റി തൃക്കരിപ്പൂർ ടൗണിൽ പ്രകടനവും പൊതുയോഗവും നടത്തി. ഡിസിസി പ്രസിഡന്‍റ് പി.കെ. ഫൈസൽ, കെപിസിസി സെക്രട്ടറി എം. അസിനാർ, കെപിസിസി അംഗം കെ.വി. ഗംഗാധരൻ, ഡിസിസി ജനറൽ സെക്രട്ടറി കെ.പി. പ്രകാശൻ, കെ.വി. വിജയൻ, സി. രവി, കെ.വി. ജതീന്ദ്രൻ, എം. രജീഷ് ബാബു, പി.വി. കണ്ണൻ, ഇ. രാജേന്ദ്രൻ, കെ.പി. ദിനേശൻ, കെ. കുഞ്ഞമ്പു, കെ. പദ്മനാഭൻ, പി.വി. പദ്മജ, രാജു മുട്ടത്ത് എന്നിവർ നേതൃത്വം നൽകി.

കന്യാസ്ത്രീകൾക്ക് ഐക്യദാർഢ്യവുമായി മെഴുകുതിരികൾ തെളിച്ചു

വെള്ളരിക്കുണ്ട്: വെള്ളരിക്കുണ്ട് ലിറ്റിൽ ഫ്ലവർ ഫൊറോന പള്ളി കമ്മിറ്റിയുടെയും ഇടവകയിൽ സേവനം ചെയ്യുന്ന സിസ്റ്റർമാരുടെയും കുടുംബ കൂട്ടായ്മകളുടെയും സംയുക്താഭിമുഖ്യത്തിൽ ഛത്തീസ്ഗഡിൽ തടവിലാക്കപ്പെട്ട കന്യാസ്ത്രീകൾക്ക് ഐക്യദാർഢ്യം പ്രഖ്യാപിച്ചും അവരുടെ സത്വര വിമോചനത്തിനായി പ്രാർഥന നടത്തിയും മെഴുകുതിരികൾ തെളിച്ചു. ഫൊറോന വികാരി റവ.ഡോ. ജോൺസൺ അന്ത്യാംകുളം, സിസ്റ്റർ സ്നേഹ എംഎസ്ജെ, ഫാ. തോമസ് കുഴിപറമ്പിൽ, കോ-ഓർഡിനേറ്റർ ജിജി കുന്നപ്പള്ളി, ട്രസ്റ്റിമാരായ ജോസ് ചെറിയാൻ തടത്തിൽ, ബേബി കുഞ്ചിറക്കാട്ട്, തോമസുകുട്ടി കൈപ്പടക്കുന്നേൽ എന്നിവർ നേതൃത്വം നൽകി.

ഒറ്റപ്പെട്ട് കാടുമൂടി ഒരു ഐസൊലേഷൻ വാർഡ് കെട്ടിടം

നീലേശ്വരം: എല്ലാ നിയോജകമണ്ഡലങ്ങളിലും പ്രധാനപ്പെട്ട ഒരു സർക്കാർ ആശുപത്രിയോടനുബന്ധിച്ച് ഐസൊലേഷൻ വാർഡ് നിർമിക്കാനുള്ള പദ്ധതി വന്നത് കോവിഡ് വ്യാപനത്തിന്‍റെ അവസാനകാലത്താണ്. അങ്ങനെ തൃക്കരിപ്പൂർ മണ്ഡലത്തിലെ ഐസൊലേഷൻ വാർഡ് നിർമിക്കാൻ തീരുമാനിച്ചത് നീലേശ്വരം താലൂക്ക് ആശുപത്രിയിലാണ്. ഒരു കോടി രൂപയാണ് ഓരോ ഐസൊലേഷൻ വാർഡ് കെട്ടിടത്തിന്‍റെയും നിർമാണത്തിനായി അനുവദിച്ചത്. കേരള മെഡിക്കൽ സർവീസസ് കോർപ്പറേഷനായിരുന്നു നിർമാണ ചുമതല. കൊട്ടിഘോഷിച്ച് നിർമാണം തുടങ്ങിയെങ്കിലും നീലേശ്വരത്തെ കെട്ടിടം ഇതുവരെ പൂർത്തിയായില്ല. ആശുപത്രിയുടെ മറ്റു ഭാഗങ്ങളിൽ നിന്ന് അല്പം മാറി നിർമാണം അവസാനഘട്ടത്തിലെത്തിയിരുന്ന കെട്ടിടം ഇപ്പോൾ കാടുമൂടി നശിക്കുകയാണ്. കോവിഡ് നിയന്ത്രണങ്ങളുടെ കാലം കഴിഞ്ഞതോടെ അതുമായി ബന്ധപ്പെട്ട എല്ലാ പദ്ധതികളിലുമുണ്ടായ മെല്ലെപ്പോക്ക് ഇക്കാര്യത്തിലും വന്നതാണ് പ്രശ്നമായത്. ചിലയിടങ്ങളിൽ ഏതാണ്ട് പൂർത്തിയായ കെട്ടിടങ്ങൾ അതത് ആശുപത്രികളിലെ മറ്റാവശ്യങ്ങൾക്കായി ഉപയോഗിക്കുന്നുണ്ട്. എന്നാൽ നീലേശ്വരത്ത് അതുമുണ്ടായില്ല. ഐസോലേഷൻ വാർഡിന്‍റെ ഭാഗമായി ലഭ്യമായ പത്തോളം കിടക്കകൾ ആശുപത്രിയിലെ വയോജനങ്ങളുടെ വാർഡിൽ ഉപയോഗിക്കുന്നുണ്ടെന്നതു മാത്രമാണ് ഏക ആശ്വാസം. കെട്ടിടനിർമാണം പൂർത്തീകരിച്ച് ആശുപത്രിക്ക് ഗുണകരമാകുന്ന ഏതെങ്കിലും വിധത്തിൽ ഉപയോഗപ്പെടുത്താൻ ബന്ധപ്പെട്ടവർ തയ്യാറാകണമെന്നാണ് നാട്ടുകാരുടെ ആവശ്യം.

മലയോര ഹൈവേയുടെ രണ്ടാം റീച്ചിൽ വനഭൂമി വിട്ടുകിട്ടാൻ കാത്തിരിപ്പ് നീളുന്നു

കാസർഗോഡ്: മലയോരഹൈവേയുടെ രണ്ടാം റീച്ചായ എടപ്പറമ്പ്-കോളിച്ചാൽ പാതയുടെ നിർമാണം പൂർത്തിയാക്കാൻ വനഭൂമി വിട്ടുകിട്ടാനായുള്ള കാത്തിരിപ്പ് നീളുന്നു. പള്ളഞ്ചി, പാണ്ടി, ഏവന്തൂർ ഭാഗങ്ങളിലായി 4.332 ഹെക്ടർ വനഭൂമിയാണ് മലയോരഹൈവേയുടെ നിർമാണത്തിന് ആവശ്യമുള്ളത്. ഇതിനു പകരം ഇത്രതന്നെ റവന്യൂഭൂമി വനംവകുപ്പിന് വിട്ടുകൊടുക്കാൻ വർഷങ്ങൾക്കുമുമ്പേ സർക്കാർ തീരുമാനമെടുത്തെങ്കിലും നടപടിക്രമങ്ങളിലെ പാളിച്ചകളും മെല്ലെപ്പോക്കും മൂലം പ്രശ്നം അനിശ്ചിതമായി നീളുകയാണ്. കമ്മാടം കാവിനോടനുബന്ധിച്ച റവന്യൂഭൂമിയിൽ നിന്ന് 4.332 ഹെക്ടർ സ്ഥലം വനംവകുപ്പിന് വിട്ടുകൊടുക്കാനാണ് ആദ്യം തീരുമാനിച്ചിരുന്നത്. ഇതിനായി ഈ ഭൂമിയുടെ വിവരങ്ങൾ കേന്ദ്ര വനം-പരിസ്ഥിതി മന്ത്രാലയത്തിന്‍റെ പരിവേഷ് പോർട്ടലിൽ അപ്‌ലോഡ് ചെയ്യുകയും ചെയ്തു. എന്നാൽ തൃശൂർ ജില്ലയിൽ കുതിരാൻ തുരങ്കം നിർമിക്കാൻ ഏറ്റെടുത്ത വനഭൂമിക്ക് പകരവും ഉഡുപ്പി-കരിന്തളം വൈദ്യുത ലൈനുമായി ബന്ധപ്പെട്ട് നഷ്ടമാകുന്ന വനഭൂമിക്ക് പകരവും ഇതേ ഭൂമി കൈമാറാൻ നേരത്തേ സർക്കാർ സന്നദ്ധത അറിയിച്ചിട്ടുണ്ടെന്ന് ചൂണ്ടിക്കാട്ടി വനംവകുപ്പ് അപേക്ഷ മടക്കി. ഇതോടെ പകരം മറ്റൊരിടത്ത് ഭൂമി കണ്ടെത്താൻ സർക്കാർ അന്വേഷണം തുടങ്ങി. മാസങ്ങൾ നീണ്ട അന്വേഷണത്തിനൊടുവിൽ കാസർഗോഡ് താലൂക്കിലെ അഡൂർ, ആദൂർ, ദേലംപാടി വില്ലേജുകളിലും വെള്ളരിക്കുണ്ട് താലൂക്കിലെ പനത്തടി, മാലോം വില്ലേജുകളിലും നിന്നായി 4.332 ഹെക്ടർ സ്ഥലം അളന്ന് തിട്ടപ്പെടുത്തി. മാലോം വില്ലേജിൽ കോട്ടഞ്ചേരി വനത്തിലുൾപ്പെട്ട റവന്യൂഭൂമിയായിരുന്നു ഇതിൽ മുഖ്യം. ഇത്രയും സ്ഥലം വനംവകുപ്പിന് കൈമാറാൻ കഴിഞ്ഞ വർഷം ജൂലൈയിൽ സർക്കാർ ഉത്തരവും ഇറക്കി. എന്നാൽ ഒരുവർഷം തന്നെ കഴിഞ്ഞിട്ടും ഈ സ്ഥലങ്ങളുടെ വിവരങ്ങൾ പരിവേഷ് പോർട്ടലിൽ അപ്‌ലോഡ് ചെയ്തിട്ടില്ല. ബന്ധപ്പെട്ട സ്ഥലങ്ങളുടെ വിശദമായ വിവരങ്ങൾ ഡിജിറ്റൽ ഫോർമാറ്റിലാക്കിയാണ് പോർട്ടലിൽ അപ്‌ലോഡ് ചെയ്യേണ്ടത്. റവന്യൂ വകുപ്പിന്‍റെ സർവേ വിഭാഗമാണ് ഈ ഡിജിറ്റൽ ഫോർമാറ്റ് തയ്യാറാക്കി നല്കേണ്ടത്. ഒരുവർഷമായിട്ടും അത് തയ്യാറാക്കി അപ്‌ലോഡ് ചെയ്തിട്ടില്ല. ഇനി അത് തയ്യാറാക്കി പരിവേഷ് പോർട്ടലിൽ അപ് ലോഡ് ചെയ്താലും വനംവകുപ്പിന്‍റെ വിവിധ നടപടിക്രമങ്ങൾ കൂടി പൂർത്തിയായിക്കഴിഞ്ഞു മാത്രമേ ഭൂമി വിട്ടുകിട്ടുകയുള്ളൂ. ഓരോ കാര്യത്തിനും ഇത്രയും സമയമെടുത്താൽ വനഭൂമി വിട്ടുകിട്ടണമെങ്കിൽ ഇനിയും വർഷങ്ങൾ തന്നെ എടുക്കുമെന്ന അവസ്ഥയാണ്. ഇവിടെ വനഭൂമി വിട്ടുകിട്ടിയ ശേഷം മാത്രമേ പുതിയ ടെൻഡർ വിളിച്ച് ഈ റീച്ചിലെയും കോളിച്ചാൽ-ചെറുപുഴ റീച്ചിൽ നേരത്തേ വനഭൂമി വിട്ടുകിട്ടിയ മരുതോം, കാറ്റാംകവല ഭാഗങ്ങളിലെയും മലയോരഹൈവേയുടെ നിർമാണപ്രവൃത്തികൾ തുടങ്ങാനിടയുള്ളൂ. പള്ളഞ്ചി വനപാതയിൽ കൈവരിയില്ലാത്ത രണ്ട് പാലങ്ങൾക്കു മുകളിലൂടെ മലവെള്ളം കുത്തിയൊഴുകുന്ന സാഹചര്യത്തിൽ ഗതാഗതം തടഞ്ഞിരിക്കുകയാണ്. വനഭൂമി വിട്ടുകിട്ടിയതിനു ശേഷം അടുത്ത ഘട്ടം പ്രവൃത്തിയിൽ ഈ പാലങ്ങൾ ഉയരം കൂട്ടി പുനർനിർമിക്കാനായിരുന്നു തീരുമാനം. പ്രവൃത്തികൾ അനിശ്ചിതമായി നീളുന്ന സാഹചര്യത്തിൽ പലപ്പോഴും മലയോരഹൈവേയുടെ മറ്റു ഭാഗങ്ങളിൽ നിന്നെത്തുന്ന വാഹനങ്ങൾ ഈ പാലങ്ങൾക്കു മുകളിലൂടെ അപകടയാത്ര നടത്തുന്നുണ്ട്. ഗൂഗിൾ മാപ്പ് നോക്കി എത്തുന്നവരും ഈ പാലങ്ങൾക്കു മുകളിലൂടെയാണ് പോകുന്നത്. കഴിഞ്ഞവർഷം ഇവിടെ ഒരു കാർ ഒഴുക്കിൽപ്പെട്ടിരുന്നു. തലനാരിഴ വ്യത്യാസത്തിലാണ് അതിലെ രണ്ട് യാത്രക്കാരുടെ ജീവൻ രക്ഷപ്പെട്ടത്.

യുവാവ് തോട്ടിൽവീണ് മരിച്ച നിലയിൽ

പാണത്തൂർ: യുവാവിനെ തോട്ടിൽ വീണ് മരിച്ച നിലയിൽ കണ്ടെത്തി. മാപ്പിളച്ചേരിയിലെ രാജേഷി (33) നെയാണ് ഇന്നലെ ഉച്ചയോടെ മാപ്പിളച്ചേരി തോട്ടിൽ വീണു മരിച്ച നിലയിൽ കണ്ടെത്തിയത്. അണ്ണയ്യ നായിക്ക് -ജയന്തി ദമ്പതികളുടെ മകനാണ്. സഹോദരൻ: രാജേന്ദ്രൻ. മൃതദേഹം പോസ്റ്റ്മോർട്ടത്തിനായി കാഞ്ഞങ്ങാട് ജില്ലാ ആശുപത്രിയിലേക്ക് മാറ്റി.

കന്യാസ്ത്രീകളെ അറസ്റ്റ് ചെയ്തതിനെതിരേ കോൺഗ്രസ് പ്രതിഷേധ കൂട്ടായ്മ നടത്തി

ചിറ്റാരിക്കാൽ: ഛത്തീസ്ഗഡിൽ വിദ്യാഭ്യാസ ആരോഗ്യ-മേഖലയിൽ സ്തുത്യർഹമായ സേവനം ചെയ്തുവരുന്ന കന്യാസ്ത്രീകളെ അകാരണമായി അറസ്റ്റ് ചെയ്ത് ഗുരുതരമായ വകുപ്പുകൾ ചേർത്ത് ജയിലിൽ അടച്ച ബിജെപി സർക്കാരിന്‍റെ കിരാതനടപടിക്കെതിരെ എളേരി ബ്ലോക്ക് കോൺഗ്രസ് കമ്മിറ്റി ചിറ്റാരിക്കാൽ ടൗണിൽ പ്രതിഷേധകൂട്ടായ്മ നടത്തി. കെപിസിസി സെക്രട്ടറി എം. അസിനാർ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ജോയി ജോസഫ് കിഴക്കരക്കാട്ട് അ ധ്യക്ഷതവഹിച്ചു. ജയിംസ് പന്തമാക്കൽ, ജോർജുകുട്ടി കരിമഠം, എ.പി. സുരേന്ദ്രൻ, സോജൻ കുന്നേൽ, തോമസ് മാത്യു, സെബാസ്റ്റ്യൻ പൂവത്താനി, മാത്യു സെബാസ്റ്റ്യൻ, ജോയി മാരൂർ, എ.ജെ. ഷാജി, സന്തോഷ് ചൈതന്യ, ജോണി പള്ളത്തുകുഴി, മിനി ഫ്രാൻസിസ്, സിജോ വഴുതനപ്പള്ളി, പ്രശാന്ത് പാറേക്കുടിയിൽ, ജോസ് കുത്തിയതോട്ടിൽ, ബെന്നി ഇലവുങ്കൽ, ജോസ് കാഞ്ഞിരക്കാട്ട്, ശാന്ത കുഞ്ഞിരാമൻ, ഇബ്രാഹിം ചീമേനി എന്നിവർ സംബന്ധിച്ചു.

വിദ്യാര്‍ഥികള്‍ സ്വന്തം കഴിവില്‍ വിശ്വാസമുള്ളവരായി വളരണം: ഡോ. ഗുരുരാജ് കരജഗി

പെരിയ: സ്വന്തം കഴിവില്‍ വിശ്വാസമുള്ളവരായി വിദ്യാര്‍ഥികള്‍ വളരണമെന്ന് വിദ്യാഭ്യാസ വിദഗ്ധനും അക്കാദമി ഫോര്‍ ക്രിയേറ്റീവ് ടീച്ചിംഗ് സിഇഒയുമായ ഡോ. ഗുരുരാജ് കരജഗി. കേന്ദ്ര സര്‍വകലാശാലയില്‍ പുതിയ അധ്യയന വര്‍ഷത്തില്‍ പ്രവേശനം നേടിയ പിജി വിദ്യാര്‍ഥികള്‍ക്കായുള്ള രണ്ടുദിവസത്തെ പഠന സമാരംഭ പരിപാടി ഉദ്ഘാടനം ചെയ്യുകയായിരുന്നു അദ്ദേഹം. വൈസ് ചാന്‍സലര്‍ പ്രഫ. സിദ്ദു പി. അല്‍ഗുര്‍ അധ്യക്ഷതവഹിച്ചു. പരീക്ഷാ കണ്‍ട്രോളര്‍ ഡോ.ആര്‍. ജയപ്രകാശ്, ഡീന്‍ അക്കാദമിക് പ്രഫ. അമൃത് ജി. കുമാര്‍ എന്നിവര്‍ സംബന്ധിച്ചു. ഡീന്‍ സ്റ്റുഡന്‍റ്സ് വെല്‍ഫെയര്‍ പ്രഫ. രാജേന്ദ്ര പിലാങ്കട്ട സ്വാഗതവും രജിസ്ട്രാര്‍ ഡോ.എം. മുരളീധരന്‍ നമ്പ്യാര്‍ നന്ദിയും പറഞ്ഞു.

കെ-ഫോണ്‍ പദ്ധതി വഴി നല്‍കിയത് 2048 കണക്ഷനുകള്‍

കാസര്‍ഗോഡ്: ജില്ലയില്‍ വീടുകളിലും ഓഫീസുകളിലും വാണിജ്യ സ്ഥാപനങ്ങളിലുമൊക്കെയായി ഇതുവരെ നല്‍കിയത് 2048 കെ-ഫോണ്‍ കണക്ഷനുകള്‍. ജില്ലയില്‍ ഇതുവരെ 1,500.673 കിലോമീറ്റര്‍ കേബിളുകളാണ് സ്ഥാപിച്ചത്. കെഎസ്ഇബി ട്രാന്‍സ്മിഷന്‍ ടവറുകളിലൂടെ 73.4 65 കിലോ മീറ്റര്‍ ഒപിജിഡബ്യു കേബിളുകളും 1427.208 കിലോമീറ്റര്‍ എഡിഎസ്എസ് കേബിളുകള്‍ കെഎസ്ഇബി പോസ്റ്റുകള്‍ വഴിയുമാണ് സ്ഥാപിച്ചിട്ടുള്ളത്. ജില്ലയില്‍ 913 സര്‍ക്കാര്‍ ഓഫീസുകള്‍ ഇപ്പോള്‍ കെ-ഫോണ്‍ നെറ്റ്‌വര്‍ക്കാണ് ഉപയോഗിക്കുന്നത്. ജില്ലയില്‍ ആകെ 552 ബിപിഎല്‍ വീടുകളിലാണ് കെ-ഫോണ്‍ കണക്ഷനുള്ളത്. 583 വാണിജ്യ കണക്ഷനുകളും ജില്ലയില്‍ നല്‍കി. പ്രാദേശിക ഓപ്പറേറ്റര്‍മാര്‍ വഴിയാണ് വാണിജ്യ കണക്ഷനുകള്‍ നല്‍കുന്നത്. ജില്ലയുടെ വിവിധ ഭാഗങ്ങളിലായി 55 ലോക്കല്‍ നെറ്റുവര്‍ക്ക് ഓപ്പറേറ്റര്‍മാര്‍ ഇതിനായി കെഫോണുമായി സഹകരിച്ച് പ്രവര്‍ത്തിക്കുന്നുണ്ട്. കണക്ഷനുകള്‍ക്ക് വേണ്ടി പുതിയ രജിസ്ട്രേഷനുകളും വരുന്നുണ്ട്. ഒരു ഐഎല്‍എല്‍ കണക്ഷനും എട്ട് എസ്എംഇ കണക്ഷനുകളും ജില്ലയില്‍ നല്‍കി. പുതിയ ഗാര്‍ഹിക കണക്ഷന്‍ എടുക്കാന്‍ എന്‍റെ കെ-ഫോണ്‍ എന്ന മൊബൈല്‍ ആപ്പിലൂടെയോ കെഫോണ്‍ വെബ്സൈറ്റിലൂടെയോ രജിസ്റ്റര്‍ ചെയ്യാം. 18005704466 എന്ന ടോള്‍ഫ്രീ നമ്പര്‍ വഴിയും കണക്ഷനായി രജിസ്റ്റര്‍ ചെയ്യാം.

സെപ്റ്റിക് ടാങ്കിൽ വീണ ഗർഭിണിയായ പശുവിനെ രക്ഷിച്ചു

തൃക്കരിപ്പൂർ: നടക്കാവ് മൈത്താണിയിൽ ഉപയോഗ ശൂന്യമായ സെപ്റ്റിക് ടാങ്കിൽ ഗർഭിണിയായ പശുകാൽ തെറ്റിവീണു. ഒടുവിൽ തൃക്കരിപ്പൂർ അഗ്നി രക്ഷസേനയും നാട്ടുകാരും ചേർന്ന് രണ്ടര മണിക്കൂർ നേരത്തെ പരിശ്രമത്തിലാണ് പശുവിനെ പുറത്തെത്തിച്ചത്. ഇന്നലെ ഉച്ചയ്ക്ക് 1.30ഓടെയാണ് സംഭവം. മൈത്താണിയിലെ മുതിർന്ന കർഷക കുതിരുമ്മൽ പത്മാവതിയുടെ പശുവാണ്പുല്ലു മേയ്ക്കാൻ കൊണ്ടു പോകുന്നതിനിടയിൽ സെപ്റ്റിക് ടാങ്കിൽ വീണത്. തൊട്ടടുത്ത അഗ്നി രാക്ഷാസേനാ നിലയത്തിൽ നാട്ടുകാർ വിവരം പറഞ്ഞതോടെ ടീം രംഗത്തെത്തി നാട്ടുകാരുടെ സഹകരണത്തോടെ പശുവിനെ രക്ഷിക്കുകയായിരുന്നു. ചെത്ത് കല്ല് കൊണ്ട് കെട്ടിയുണ്ടാക്കിയ സെപ്റ്റിക് ടാങ്കിന്‍റെ മുകൾഭാഗം സ്ലാബ് ഇട്ട് അടച്ചിരുന്നില്ല. പശുവിനെ മൈത്താണി വയലിലേക്ക് മേയ്ക്കാൻ കൊണ്ടു പോകുന്നതിനിടയിൽ ടാങ്കിന്‍റെ മുകളിലിട്ടിരുന്ന മടലുകളിൽ ചവിട്ടി പശു കാൽ തെറ്റി വീഴുകയായിരുന്നു. പിൻഭാഗം കുത്തി വീണ പശുവിനെ കയറ്റാൻ ബെൽറ്റിട്ട് നടത്തിയ ആദ്യശ്രമം പരാജയപ്പെട്ടതോടെ കെട്ടിയ ചെത്ത് കല്ലകൾ ഓരോന്നായി ഇളക്കിയെടുത്ത് മണ്ണ് ഇട്ട് രണ്ടര മണിക്കൂർ നേരത്തെ പരിശ്രമത്തിലൂടെയാണ് പശുവിനെ രക്ഷിച്ചെടുത്തത്. തുടർന്ന് ഡോ. സ്മിതയുടെ നേതൃത്വത്തിൽ പശുവിനെ പരിശോധിച്ച് ചികിത്സ നൽകി.

മഴ കൂടുമ്പോൾ പനിക്കു പിന്നാലെ മഞ്ഞപ്പിത്തവും പടരുന്നു

കാഞ്ഞങ്ങാട്: മഴ കൂടുമ്പോൾ ജില്ലയിൽ പനിക്കു പിന്നാലെ മഞ്ഞപ്പിത്തവും വ്യാപകമാകുന്നു. ചിത്താരിയിൽ കഴിഞ്ഞ ദിവസം 24 കാരനായ യുവ എൻജിനിയർ മഞ്ഞപ്പിത്തം ബാധിച്ച് മരിച്ചിരുന്നു. ജീവൻപോലും നഷ്ടമാകാവുന്ന രോഗമാണെന്ന കാര്യം കണക്കിലെടുക്കാതെ പലരും തുടക്കത്തിൽ മറ്റു ചികിത്സകൾ തേടിപ്പോകുന്നതാണ് സ്ഥിതി ഗുരുതരമാക്കുന്നത്. രോഗമെന്തെന്നു മനസിലാക്കാതെ പനിയും ക്ഷീണവും മാത്രമാണെന്നു കരുതി ചികിത്സ വൈകിപ്പിക്കുന്നവരുമുണ്ട്. രോഗം ഗുരുതരമാകുമ്പോഴാണ് കരളിനെ ബാധിക്കുന്നത്. ആരോഗ്യവകുപ്പിന്‍റെ ഔദ്യോഗിക കണക്കുകൾ പ്രകാരം ഈ മാസം മാത്രം ജില്ലയിൽ ഇതുവരെ 118 പേർക്കാണ് രോഗബാധയുണ്ടായത്. ജൂണിൽ 98 പേർക്കും മെയ് മാസത്തിൽ 109 പേർക്കും മഞ്ഞപ്പിത്ത ബാധയുണ്ടായി. ജനുവരി (70), ഫെബ്രുവരി (42), മാർച്ച് (64), ഏപ്രിൽ (66) എന്നിങ്ങനെയാണ് ഈ വർഷം മറ്റു മാസങ്ങളിൽ രോഗം ബാധിച്ചവരുടെ എണ്ണം. മലിനജലവും ഭക്ഷണവും വഴിയാണ് പ്രധാനമായും രോഗം പകരുന്നത്. മഴക്കാലത്ത് കുടിവെള്ളത്തിൽപോലും മാലിന്യം കലരാനും രോഗകാരികളായ ബാക്ടീരിയകൾ പെരുകാനുമുള്ള സാധ്യതയേറുന്നതാണ് രോഗബാധ കൂടാൻ കാരണമാകുന്നത്. ചൂടുവെള്ളം മാത്രം കുടിക്കുക, കുളിക്കാനും ഭക്ഷണം പാകം ചെയ്യാനും പാത്രങ്ങൾ കഴുകാനുമൊക്കെ ഉപയോഗിക്കുന്ന വെള്ളം ശുദ്ധമാണെന്ന് ഉറപ്പുവരുത്തുക, ശുചിത്വം ഉറപ്പുവരുത്താതെ പുറത്തുനിന്ന് ഭക്ഷണമോ ഐസ്ക്രീം, ജ്യൂസ്, മറ്റു പാനീയങ്ങൾ എന്നിവയോ കഴിക്കാതിരിക്കുക തുടങ്ങിയവയാണ് അവശ്യം സ്വീകരിക്കേണ്ട മുൻകരുതലുകൾ. കോവിഡ് കാലത്തെന്ന പോലെ ഇടയ്ക്കിടെ കൈകാലുകൾ സോപ്പും വെള്ളവുമുപയോഗിച്ച് വൃത്തിയാക്കുന്നതും ഗുണകരമാണ്.

പോക്സോ കേസുകളിൽ മൂന്നു പേർക്കു ശിക്ഷ

കാഞ്ഞങ്ങാട്: വിവിധ പോക് സോ കേസുകളിൽ 3 പേർക്ക് ഹൊസ്ദുര്‍ഗ് ഫാസ്റ്റ് ട്രാക്ക് സ്‌പെഷല്‍ കോര്‍ട്ട് ജഡ്ജ് പി.എം. സുരേഷ് തടവ് ശിക്ഷ വിധിച്ചു. ഏഴുവയസുകാരിയെ ലൈംഗികമായി പീഡിപ്പിച്ച കേസിൽ ചെങ്കള പൈക്കയിലെ ബാലകൃഷ്ണന് 11 വര്‍ഷം കഠിനതടവും 20,000 രൂപ പിഴയും ശിക്ഷ നൽകി.പിഴയടച്ചില്ലെങ്കില്‍ ഒരു വര്‍ഷവും ഒരു മാസവും അധികതടവ് അനുഭവിക്കണം. 2024 ഏപ്രില്‍ 11നാണ് കേസിനാസ്പദമായ സംഭവം. പെണ്‍കുട്ടിയെ കുട്ടിയുടെ പുതുതായി നിര്‍മിക്കുന്ന വീട്ടിലേക്ക് പ്രതി കൂട്ടിക്കൊണ്ടുപോയി ലൈംഗിക അതിക്രമം നടത്തിയെന്നാണ് കേസ്. അന്നത്തെ ബദിയഡുക്ക എസ്‌ഐ എന്‍. അന്‍സാര്‍ ആണ് അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. പതിനാലുകാരിയെ ലൈംഗികമായി പീഡിപ്പിച്ച കേസിൽ മടിക്കൈ ബങ്കളത്തെ കെ. അശോകന് ഏഴുവര്‍ഷം തടവും 15,000 രൂപ പിഴയും വിധിച്ചു. പിഴയടച്ചില്ലെങ്കില്‍ ഒമ്പതുമാസം അധികതടവ് അനുഭവിക്കണം. 2024 മെയ് 15നു പെണ്‍കുട്ടിയും കുടുംബവും താമസിക്കുന്ന വീട്ടിലേക്ക് അതിക്രമിച്ചുകയറിയ പ്രതി പെണ്‍കുട്ടിക്കുനേരെ ലൈംഗികാതിക്രമം നടത്തിയെന്നാണ് കേസ്. അന്നത്തെ നീലേശ്വരം എസ്‌ഐ ടി. വിശാഖ് ആണ് അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. പതിനാറുകാരിയെ ലൈംഗികമായി പീഡിപ്പിച്ച കേസിലെ കാഞ്ഞങ്ങാട് നോര്‍ത്ത് കോട്ടച്ചേരി തുളുച്ചേരിയിലെ പി .അശോകന് അഞ്ചുവര്‍ഷം കഠിനതടവും 11,000 രൂപ പിഴയും വിധിച്ചു. പിഴയടച്ചില്ലെങ്കില്‍ ആറു മാസവും രണ്ടാഴ്ചയും അധികതടവ് അനുഭവിക്കണം. 2023 സെപ്റ്റംബര്‍ ഒമ്പതിനാണ് കേസിനാസ്പദമായ സംഭവം. കാഞ്ഞങ്ങാട് പഴയ ബസ് സ്റ്റാന്‍ഡിന്‍റെ പടിഞ്ഞാറ് ഭാഗക്ക് കാസര്‍ഗോഡ് ഭാഗത്തേക്ക് പോകുന്ന ബസ് നിര്‍ത്തുന്ന സ്ഥലത്തിനടുത്തുള്ള ഫുട്പാത്തില്‍ കൂടി നടന്നുപോകുന്ന പെണ്‍കുട്ടിയെ ലൈംഗികാതിക്രമത്തിനിരയാക്കിയെന്നാണ് കേസ്. അന്നത്തെ ഹൊസ്ദുര്‍ഗ് എസ്‌ഐ ആയിരുന്ന കെ. വേലായുധന്‍ ആണ് കേസന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. മൂന്നു കേസുകളിലും പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ എ. ഗംഗാധരന്‍ ഹാജരായി.

വളർത്തുനായയുടെ ജഡം പാതി ഭക്ഷിച്ച നിലയിൽ

പാണത്തൂർ: കല്ലപ്പള്ളിയിൽ നാലു ദിവസത്തിന്‍റെ മാത്രം ഇടവേളയിൽ വീണ്ടും പുലിയിറങ്ങി. കല്ലപ്പള്ളി പെരുമുണ്ടയിലെ പി.ബി. പത്മയ്യയുടെ വളർത്തുനായയാണ് ബുധനാഴ്ച രാത്രി പുലിയുടെ ഇരയായത്. ഇന്നലെ രാവിലെ നായയെ കാണാത്തതിനെ തുടർന്ന് വീട്ടുകാർ നടത്തിയ തെരച്ചിലിൽ സമീപത്തെ റബർ തോട്ടത്തിലാണ് പാതി ഭക്ഷിച്ച നിലയിലുള്ള ജഡം കണ്ടെത്തിയത്. ഞായറാഴ്ച കല്ലപ്പള്ളിയിലെ ദൊഡ്ഡമന ബാബുവിന്‍റെ വളർത്തുനായയെ പുലി കൊണ്ടുപോയിരുന്നു. നേരത്തേ മാസങ്ങളുടെ ഇടവേളയിൽ മാത്രം കർണാടക വനത്തിൽ നിന്ന് പുലിയിറങ്ങാറുണ്ടായിരുന്നത് ഇപ്പോൾ ആഴ്ചകളും പിന്നിട്ട് ദിവസങ്ങളുടെ മാത്രം ഇടവേളയിലായതായി നാട്ടുകാർ പറയുന്നു. ഓരോ തവണയും വനംവകുപ്പ് ഉദ്യോഗസ്ഥർ സ്ഥലം സന്ദർശിക്കുന്നതല്ലാതെ ആവശ്യമായ പരിഹാര നടപടികളൊന്നും ഉണ്ടാകുന്നില്ലെന്നാണ് ആക്ഷേപം. പുലിയുടെ സാന്നിധ്യം പതിവായതോടെ സംസ്ഥാന അതിർത്തിയോടുചേർന്ന ഈ പ്രദേശത്തുള്ളവർ രാത്രികാലങ്ങളിൽ പുറത്തിറങ്ങാൻ തന്നെ ഭയക്കുകയാണ്. എത്രയും വേഗം പ്രശ്നത്തിന് ശാശ്വത പരിഹാരം കാണണമെന്നാണ് നാട്ടുകാരുടെ ആവശ്യം. വനം വകുപ്പ് ഉദ്യോഗസ്ഥരും ആർആർടി സംഘവും പ്രദേശത്ത് പരിശോധന നടത്തി.

മണല്‍ മാഫിയയ്ക്കെതിരെ നടപടി ശക്തമാക്കി പോലീസ്

കാസര്‍ഗോഡ്: അനധികൃതമായി മണല്‍ കടത്തുന്ന സംഘത്തിനെതിരെ നടപടി ശക്തമാക്കി ജില്ലാ പോലീസ്. ജില്ലാ പോലീസ് മേധാവിയുടെ നിര്‍ദേശപ്രകാരം കാസര്‍ഗോഡ് ഡിവൈഎസ്പി (ഇന്‍ചാര്‍ജ്) വി.വി. മനോജിന്‍റെ നേതൃത്വത്തില്‍ കാസര്‍ഗോഡ്, കുമ്പള, മഞ്ചേശ്വരം പോലീസ് സ്റ്റേഷന്‍ പരിധിയില്‍ നടത്തിവരുന്ന പരിശോധനയില്‍ കടവുകളിനിന്നും മണല്‍ നിറച്ചു വെച്ച ചാക്കുകളും തോണിയുള്‍പ്പെടയുള്ളവ പിടികൂടി നടപടിക്ക് വിധേയമാക്കി. പരിശോധനയില്‍ ഇതുവരെ 3000 ത്തില്‍ അധികം മണല്‍ ചാക്കുകളും പത്തിലധികം തോണിയും പിടികൂടി. വരുംദിവസങ്ങളില്‍ ജില്ലയില്‍ പരിശോധന ശക്തമായി തുടരും.

മാർക്കറ്റിലും അടുക്കളയിലും മീനുകൾ തിരിച്ചെത്തുന്നു

കാസർഗോഡ്: വർഷകാല ട്രോളിംഗ് നിരോധനം ഇന്നലെ അവസാനിച്ചതോടെ യന്ത്രവത്കൃത ബോട്ടുകൾ കടലിലിറങ്ങിത്തുടങ്ങി. കാലവർഷവും കടലേറ്റവും അല്പമൊന്ന് അടങ്ങിയതോടെ കഴിഞ്ഞ ആഴ്ചയിൽ തന്നെ മത്സ്യവിപണി സജീവമായിരുന്നു. അയലയും മത്തിയും ചെമ്മീനുമെല്ലാം മാർക്കറ്റുകളിലും അടുക്കളകളിലും യഥേഷ്ടം എത്തിത്തുടങ്ങി. ക്ഷാമകാലത്ത് കിലോയ്ക്ക് 400 രൂപ വരെ എത്തിയിരുന്ന ചെമ്മീൻ വില 200 രൂപ വരെയായി കുറഞ്ഞു. അയലയും മത്തിയുമെല്ലാം നൂറ്റമ്പതും ഇരുനൂറും രൂപയ്ക്ക് ലഭിച്ചുതുടങ്ങിയത് പച്ചക്കറി വിലക്കയറ്റത്തിൽ പകച്ചുനിന്നിരുന്ന അടുക്കളകളിൽ ആശ്വാസമായി. ഇന്നുമുതൽ ബോട്ടുകൾ വ്യാപകമായി കടലിലിറങ്ങുന്നതോടെ വില ഇനിയും കുറയുമെന്നാണ് പ്രതീക്ഷ. ട്രോളിംഗ് നിരോധനവും കടലേറ്റവും മൂലം ജോലിക്കു പോകാനാവാതെ ജീവിതം വഴിമുട്ടിനിന്ന മത്സ്യത്തൊഴിലാളികൾക്കും ഈയാഴ്ച ആശ്വാസത്തിന്‍റേതായി. മത്സ്യമേഖലയിൽ പ്രവർത്തിക്കുന്ന ഏജന്‍റുമാരും വില്പനത്തൊഴിലാളികളുമടക്കം നിരവധിയാളുകൾ ഇന്നുമുതൽ പുതിയ പ്രതീക്ഷകളോടെ തൊഴിലിടങ്ങളിലേക്ക് മടങ്ങും. ഈ സീസണിന്‍റെ തുടക്കത്തിൽ മാർക്കറ്റിൽ ഏറ്റവും കൂടുതലായി എത്തുന്നത് വിവിധ വലിപ്പത്തിലുള്ള ചെമ്മീനാണ്. കഴിഞ്ഞ രണ്ടുദിവസങ്ങളിൽ അയലയും വിവിധതരം പൊടിമീനുകളും എത്തിത്തുടങ്ങി. നാടൻ മീനുകൾ യഥേഷ്ടം എത്തിത്തുടങ്ങുന്നതോടെ മംഗളൂരുവിൽ നിന്നും മറ്റും ജില്ലയിലേക്കുള്ള മീൻവരവ് കുറയും. സംശയിക്കാതെ എടുത്തുപയോഗിക്കാവുന്ന പുതിയ മീൻ തന്നെ കിട്ടുന്നത് ഉപഭോക്താക്കൾക്കും ആശ്വാസമാകും.

കേരളത്തിൽ കേക്കും ഉത്തരേന്ത്യയിൽ തല്ലും എന്ന ഇരട്ടത്താപ്പ് നടക്കില്ല: റവ.ഡോ. ഫിലിപ്പ് കവിയിൽ

ചിറ്റാരിക്കാൽ: കേരളത്തിൽ കേക്കും ഉത്തരേന്ത്യയിൽ തല്ലും എന്ന ഇരട്ടത്താപ്പ് ഇനി നടക്കില്ലെന്ന് കത്തോലിക്ക കോൺഗ്രസ് ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ. ‌ഛത്തീസ്ഗഡിൽ കന്യാസ്ത്രീകളെ അകാരണമായി അറസ്റ്റ് ചെയ്തു ജയിലിൽ അടച്ചതിൽ പ്രതിഷേധിച്ച് തോമാപുരം ഫൊറോന കൗൺസിലിന്‍റെ നേതൃത്വത്തിൽ ചിറ്റാരിക്കാലിൽ സംഘടിപ്പിച്ച പ്രതിഷേധറാലിയും പൊതുസമ്മേളനവും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഭാരതത്തിൽ ഹൈന്ദവരുടെ നല്ല മനസിലാണ് ക്രിസ്തുമതം വളർന്നത്.മിഷനറിമാരുടെ സ്കൂളുകളിൽ നിന്നാണ് ഇന്നത്തെ ഭരണാധികാരികൾ രൂപപ്പെട്ടത്. ഛത്തീസ്ഗഡിൽ കത്തോലിക്ക സന്യാസിനിമാരെ മനുഷ്യാവകാശത്തിന്‍റെ സകല സീമകളും ലംഘിച്ചുകൊണ്ട്, നിയമവിരുദ്ധമായി ബജറംഗ്ദൾ എന്ന തീവ്ര ഹിന്ദുത്വ ഭീകരരുടെ ഒത്താശയോടെ ഛത്തീസ്‌ഗഡ് പോലിസ്, ജയിലിൽ അടച്ചത് എറെ പ്രതിഷേധാർഹമാണെന്നും അദ്ദേഹം പറഞ്ഞു. ഫൊറോന വികാരി റവ.ഡോ. മാണി മേൽവെട്ടം അധ്യക്ഷതവഹിച്ചു. ഈസ്റ്റ് എളേരി പഞ്ചായത്ത് പ്രസിഡന്‍റ് ജോസഫ് മുത്തോലി, എകെസിസി ഫൊറോന പ്രസിഡന്‍റ് സാജു പടിഞ്ഞാറേട്ട്, കണ്ണിവയൽ ലിസ്യുഭവൻ സുപ്പീരിയർ സിസ്റ്റർ ദിവ്യ എംഎസ്എംഐ, എകെസിസി ഫൊറോന ഡയറക്ടർ ഫാ. മാത്യു വളവനാൽ, മാതൃവേദി ഫൊറോന പ്രസിഡന്‍റ് സെലീന കാരക്കാട്ട് വടക്കേതിൽ, എകെസിസി തോമാപുരം മേഖല ജോയിന്‍റ് സെക്രട്ടറി കെ.സി. സെബാസ്റ്റ്യൻ കോട്ടയിൽ, യൂത്ത് കോ-ഓർഡിനേറ്റർ റിജേഷ് കാവുന്തല എന്നിവർ പ്രസംഗിച്ചു. തോമാപുരം സെന്‍റ് തോമസ് ഫൊറോന പള്ളിയിൽ നിന്നും ആരംഭിച്ച റാലി ചിറ്റാരിക്കാൽ ടൗൺ ചുറ്റി കുരിശുപള്ളിക്ക് സമീപം സമാപിച്ചു. ഫൊറോനയിലെ വൈദികരും കന്യാസ്ത്രീകളും നൂറുകണക്കിന് ഇടവകാംഗങ്ങളും പങ്കെടുത്തു.

മഴയൊഴിയുമ്പോൾ കുഴിനിറഞ്ഞ് റോഡുകൾ

കാസർഗോഡ്: സാങ്കേതികവിദ്യകൾ ഒരുപാട് പുരോഗമിച്ചിട്ടും ഒരു മഴക്കാലം പെയ്തൊഴിയുമ്പോഴേക്ക് റോഡുകളിലും ബസ് സ്റ്റാൻഡുകളിലുമെല്ലാം കുഴികൾ നിറയുന്ന അവസ്ഥയ്ക്ക് മാറ്റമില്ല. തുടർച്ചയായി പെയ്ത മഴ ഒട്ടൊന്ന് പിൻവാങ്ങിക്കഴിയുമ്പോൾ നഗര-ഗ്രാമ വ്യത്യാസമില്ലാതെ റോഡുകൾ ടാറിംഗ് ഇളകി കുണ്ടും കുഴിയും നിറഞ്ഞ നിലയിലാണ്. കാസർഗോഡ് നഗരത്തിന്‍റെ ജീവനാഡികളായ എംജി റോഡും ബാങ്ക് റോഡും റെയിൽവേ സ്റ്റേഷൻ റോഡുമെല്ലാം ഇതേ നിലയിലാണ്. എംജി റോഡിൽ പുതിയ ബസ് സ്റ്റാൻഡ് മുതൽ ട്രാഫിക് ജംഗ്ഷൻ വരെയുള്ള ദൂരത്തിൽ ചെറുതും വലുതുമായ നൂറോളം കുഴികളാണ് ഉള്ളത്. ഈ റോഡിൽ നിന്ന് സംസ്ഥാനപാതയിലേക്ക് തിരിയുന്ന ഭാഗത്തും ആഴമേറിയ കുഴി രൂപപ്പെട്ടിട്ടുണ്ട്. സുൽത്താൻ ജ്വല്ലറിക്ക് സമീപത്തെ കുഴിയിൽ കഴിഞ്ഞയാഴ്ച ഒരു ഓട്ടോ മറിഞ്ഞിരുന്നു. റെയിൽവേ സ്റ്റേഷൻ റോഡിലെ തായലങ്ങാടി മുതൽ ബാങ്ക് റോഡിലെ കറന്തക്കാട് വരെയുള്ള ഭാഗം ഈ മഴക്കാലം തുടങ്ങുന്നതിന് ദിവസങ്ങൾക്കുമുമ്പു മാത്രം ടാറിംഗ് പൂർത്തിയാക്കിയതാണ്. ഇപ്പോൾ അതിലേറെയും ഇളകി നാശമായി. തായലങ്ങാടിയിൽ ടാറിംഗ് നടത്താൻ ബാക്കിയായ ഭാഗവും ടാറിംഗ് നടത്തിയ ഭാഗവും തമ്മിൽ ഇപ്പോൾ കാര്യമായ വ്യത്യാസമില്ല. നഗരത്തിലെ പല റോഡുകൾക്കും ഓവുചാലുകളില്ലാത്തതും ഉള്ളവയിൽ പലതും മൂടിപ്പോയതും റോഡുകളുടെ തകർച്ചയ്ക്ക് ആക്കം കൂട്ടുന്നുണ്ട്. ഇക്കാര്യത്തിൽ ഫലപ്രദമായ നടപടികളൊന്നും നഗരസഭയുടെ ഭാഗത്തുനിന്ന് ഉണ്ടാകുന്നില്ലെന്നാണ് പരാതി. നഗരത്തിൽ നിന്നും വിദ്യാനഗറിൽ നിന്നും സമീപപ്രദേശങ്ങളിലേക്കുള്ള റോഡുകളധികവും ഇതിലും പരിതാപകരമായ അവസ്ഥയിലാണ്. കാഞ്ഞങ്ങാട് നഗരത്തിലൂടെ കടന്നുപോകുന്ന സംസ്ഥാനപാതയുടെ ഭാഗം മാസങ്ങൾക്കു മുമ്പേ അങ്ങിങ്ങ് ടാറിംഗ് ഇളകിയ നിലയിലായിരുന്നു. ഇപ്പോൾ തുടർച്ചയായ മഴദിനങ്ങൾ കഴിഞ്ഞപ്പോഴേക്കും അതിലേറെയും ആഴമുള്ള കുഴികളായി. നഗരത്തിരക്കിൽ നിന്നൊഴിവാകാൻ ചെറുവാഹനങ്ങൾ പതിവായി ഉപയോഗിച്ചിരുന്ന ശ്രീകൃഷ്ണമന്ദിർ റോഡിലുടനീളം ആഴമേറിയ കുഴികളാണ്. നഗരത്തിലും സമീപപ്രദേശങ്ങളിലുമുള്ള ചെറിയ റോഡുകളിലേറെയും പൊട്ടിപ്പൊളിഞ്ഞു. തൊട്ടടുത്ത പ്രദേശമായ വെള്ളിക്കോത്തെ റോഡുകളധികവും സിറ്റി ഗ്യാസ് പൈപ്പ് ലൈനുകൾ സ്ഥാപിക്കാൻ വെട്ടിപ്പൊളിച്ചതോടെ താറുമാറായ നിലയിലാണ്. നീലേശ്വരത്തെ താത്കാലിക ബസ് സ്റ്റാൻഡ് വീണ്ടും ചെളിയൊഴിയാത്ത നിലയിലായി. പുതിയ ബസ് സ്റ്റാൻഡിന്‍റെ പണി പൂർത്തിയാകാറായതോടെ ഇനി ഇവിടെ മെറ്റലിട്ട് കാശുകളയാൻ നഗരസഭയ്ക്കും താത്പര്യമില്ല. പക്ഷേ ചെളിനിറഞ്ഞ സ്റ്റാൻഡിൽ ബസുകൾക്കിടയിലൂടെ നടക്കാൻ വിധിക്കപ്പെട്ട യാത്രക്കാരുടെ അവസ്ഥ പരിതാപകരമാണ്. തകർന്ന റോഡുകളെല്ലാം റീടാറിംഗ് നടത്തണമെങ്കിൽ ഇനി മഴക്കാലം കഴിയണമെന്നാണ് തദ്ദേശസ്ഥാപനങ്ങളുടെ നിലപാട്. റീടാറിംഗ് നടത്തിയാലും അതിന്‍റെ കാലാവധി അടുത്ത മഴക്കാലം വരെ മാത്രമായിരിക്കുമോ എന്ന ചോദ്യവും ബാക്കിയാണ്.

ബിജെപിയുടെ ന്യൂനപക്ഷവിരുദ്ധ നിലപാട് വ്യക്തമായി: സെബാസ്റ്റ്യന്‍ കുളത്തുങ്കല്‍

കാഞ്ഞങ്ങാട്: ഛത്തീസ്ഗഡില്‍ കന്യാസ്ത്രീകളെ അറസ്റ്റ് ചെയ്തതിലൂടെ ബിജെപിയുടെ ന്യൂനപക്ഷവിരുദ്ധ നിലപാട് വ്യക്തമായതായും ന്യൂനപക്ഷ സംരക്ഷണം ഇടതുപക്ഷത്തിലൂടെ മാത്രമേ സാധ്യമാവുകയുള്ളുവെന്നും പൂഞ്ഞാര്‍ എംഎല്‍എ സെബാസ്റ്റ്യന്‍ കുളത്തുങ്കല്‍. രാജ് റെസിഡന്‍സിയില്‍ നടന്ന കേരള കോണ്‍ഗ്രസ്-എം ജില്ലാ നേതൃത്വസംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ന്യൂനപക്ഷത്തെ ഇല്ലായ്മ ചെയ്ത് ഹിന്ദുരാഷ്ട്രമാക്കി മാറ്റാനുള്ള ആര്‍എസ്എസിന്‍റെ രഹസ്യ അജണ്ട നടപ്പിലാക്കാനുള്ള ശ്രമത്തിന്‍റെ ആദ്യപടിയാണെന്നും അദ്ദേഹം കൂട്ടിച്ചേര്‍ത്തു. ജില്ലാ പ്രസിഡന്‍റ് സജി സെബാസ്റ്റ്യന്‍ അധ്യക്ഷതവഹിച്ചു. സംസ്ഥാന ജനറല്‍ സെക്രട്ടറി ഡോ. സ്റ്റീഫന്‍ ജോര്‍ജ് കാസര്‍ഗോഡ് ജില്ലാ കമ്മിറ്റി നടത്തി സമാഹരിച്ച ഫണ്ട് ഏറ്റുവാങ്ങി. സംസ്ഥാന ജനറല്‍ സെക്രട്ടറിമാരായ സജി കുറ്റിയാനിമറ്റം, കുര്യാക്കോസ് പ്ലാപ്പറമ്പില്‍, ജില്ലാ വൈസ്പ്രസിഡന്‍റ് ജോയി മൈക്കിള്‍, സെക്രട്ടറിമാരായ ബിജു തുളുശേരി, ഷിനോജ് ചാക്കോ, സിജി കട്ടക്കയം, ബാബു നെടിയകാലായില്‍, ജോസ് കാക്കകുട്ടുങ്കല്‍, നിയോജകമണ്ഡലം പ്രസിഡന്‍റുമാരായ ടിമ്മി എലിപ്പുലിക്കാട്ട്, ജോസ് ചെന്നിക്കാട്ടുകുന്നേല്‍, ചെറിയാന്‍ മടുക്കാങ്കല്‍, കെ.എം. ചാക്കോ, പുഷ്മ്മ ബേബി, ബേബി പന്തല്ലൂര്‍, ടോമി ഈഴറാട്ട് എന്നിവര്‍ സംസാരിച്ചു.

പെരിങ്കടിയിൽ കടലേറ്റം അതിരൂക്ഷം; റോഡും വൈദ്യുതിയുമില്ലാതെ കുടുംബങ്ങൾ

ഉപ്പള: മഴയ്ക്ക് നേരിയ ശമനമുണ്ടായിട്ടും ഉപ്പള പെരിങ്കടി തീരത്ത് കടലേറ്റം അതിരൂക്ഷമായി തുടരുന്നു. കടലേറ്റത്തിൽ തകർന്ന തീരദേശ റോഡിന് സമീപത്തുണ്ടായിരുന്ന അഞ്ച് വൈദ്യുത തൂണുകളാണ് ചൊവ്വാഴ്ച ഉച്ചയോടെ കടലെടുത്തത്. ഇതോടെ പ്രദേശത്തെ അമ്പതോളം കുടുംബങ്ങൾ ഇരുട്ടിലായി. പെരിങ്കടിയിൽ നിന്ന് മുട്ടത്തേക്കുള്ള റോഡും ഇല്ലാതായതോടെ ഇവർ മറ്റെങ്ങും പോകാൻ കഴിയാത്ത നിലയിൽ ഒറ്റപ്പെട്ടിരിക്കുകയാണ്. പെരിങ്കടി മുതൽ മുട്ടം വരെയുള്ള ഭാഗത്തെ ഇരുപതോളം വൈദ്യുത തൂണുകൾ ഇപ്പോഴും അപകടഭീഷണിയിലാണ്. അടുത്തുതന്നെ ട്രാൻസ്ഫോർമറുമുണ്ട്. കടലിലേക്ക് മറിഞ്ഞുവീണ തൂണുകളിൽ നിന്നുള്ള വൈദ്യുത ലൈനുകളും തീരത്ത് വീണുകിടക്കുകയാണ്. തൂണുകൾ മറിയാൻ തുടങ്ങിയപ്പോൾതന്നെ വൈദ്യുതി ബന്ധം വിച്ഛേദിച്ചതിനാൽ കൂടുതൽ അപകടങ്ങൾ ഒഴിവായി.

ഉദ്ഘാടനത്തിനു മുമ്പേ ചോർച്ച; പ്ലാസ്റ്റിക് ഷീറ്റിട്ടു മൂടി പെരുമ്പട്ട സ്കൂൾ കെട്ടിടം

പെരുമ്പട്ട: പെരുമ്പട്ട സി.എച്ച്. മുഹമ്മദ് കോയ സ്മാരക ഗവ. ഹയർ സെക്കൻഡറി സ്കൂളിനുവേണ്ടി ഒന്നരക്കോടി രൂപ ചെലവിൽ നിർമിച്ച പുതിയ കെട്ടിടം ഉദ്ഘാടനത്തിനു മുമ്പേ ചോർന്നൊലിക്കുന്നു. കെട്ടിടത്തിന്‍റെ മേൽക്കൂരയിലെ പ്രധാന സ്ലാബിൽ നിന്ന് വെള്ളമിറങ്ങി ചുവരുകൾ നനഞ്ഞുകുതിർന്ന നിലയിലാണ്. കനത്ത മഴ പെയ്തപ്പോൾ കെട്ടിടത്തിന്‍റെ രണ്ട് മുറികളിൽ വെള്ളം കെട്ടിക്കിടക്കുന്ന നിലയിലായിരുന്നു. നാട്ടുകാരുടെ പരാതിയെ തുടർന്ന് കരാറുകാരെത്തി ചോർച്ചയുള്ള ഭാഗങ്ങളിൽ സിമന്‍റ് പൂശി പ്ലാസ്റ്റിക് ഷീറ്റിട്ട് മൂടിയ നിലയിലാണ്. വൈദ്യുതി കണക്ഷൻ ലഭിക്കാത്തതിന്‍റെ പേരിലാണ് കെട്ടിടത്തിന്‍റെ ഉദ്ഘാടനം നീണ്ടുപോയത്. കെട്ടിടത്തിലെ പ്ലംബിംഗ് ജോലികൾ നടന്നുവരികയാണ്. വയറിംഗുമായി ബന്ധപ്പെട്ട് സ്ഥാപിച്ച പൈപ്പ് വഴിയും ചോർച്ചയുണ്ടെന്ന് നാട്ടുകാർ പറയുന്നു. കെട്ടിടത്തിന്‍റെ നിർമാണത്തിലെ അപാകതകൾ അന്വേഷിക്കണമെന്നാവശ്യപ്പെട്ട് നാട്ടുകാർ വിജിലൻസിനും വിദ്യാഭ്യാസമന്ത്രിക്കും പൊതുമരാമത്ത് അധികൃതർക്കും പരാതി സമർപ്പിച്ചിട്ടുണ്ട്. കുട്ടികളുടെ കുറവ് മൂലം സ്കൂളിലെ ഹയർ സെക്കൻഡറി വിഭാഗത്തിന്‍റെ നിലനില്പ് തന്നെ ഭീഷണിയിലായിരിക്കേയാണ് പുതിയ കെട്ടിടവും അപകടനിലയിലായത്. കുന്നിടിച്ച് നിരപ്പാക്കിയ സ്ഥലത്താണ് സ്കൂളിന്‍റെ കെട്ടിടങ്ങളെല്ലാം നിർമിച്ചിട്ടുള്ളത്. യുപി വിഭാഗം ക്ലാസുകൾ നടക്കുന്ന കെട്ടിടത്തിനു സമീപം മണ്ണിടിച്ചിലിനുള്ള സാധ്യത മുൻനിർത്തി സംരക്ഷണഭിത്തി കെട്ടാൻ രണ്ടുവർഷം മുമ്പ് ജില്ലാ പഞ്ചായത്ത് പദ്ധതി തയ്യാറാക്കി പണം അനുവദിച്ചിരുന്നെങ്കിലും അതും നടപ്പായിട്ടില്ല.

പ്രതിഷേധസംഗമം നടത്തി

വെള്ളരിക്കുണ്ട്: ഛത്തീസ്ഗഡിലെ ദുർഗിൽ അറസ്റ്റിലായ രണ്ടു മലയാളി കന്യാസ്തീകൾക്ക് പിന്തുണ നൽകിയും അവരെ എത്രയും വേഗം ജയിൽ വിമോചിതരാക്കണമെന്നും ആവശ്യപ്പെട്ടുകൊണ്ട് വെള്ളരിക്കുണ്ട് സോഷ്യൽ സർവീസ് സൊസൈറ്റിയുടെ നേതൃത്വത്തിൽ പ്രതിഷേധ സംഗമം നടത്തി. രാജ്യം ഭരണഘടനയിലൂടെ അനുവദിക്കുന്ന സ്വാതന്ത്ര്യം എല്ലാ പൗരൻമാർക്കും അവകാശപ്പെട്ടതാണെന്നും അതിനെതിരെയുള്ള ഇത്തരം പരസ്യമായ അവകാശ ലംഘനങ്ങളും സംഘാതമായ ദുരാരോപണങ്ങളും വലിയ ആശങ്കയുണർത്തതാണെന്നും കന്യാസ്തീകൾക്ക് മോചനം നൽകണമെന്നും പ്രതിഷേധ സംഗമം ഉദ്ഘാടനം ചെയ്ത് തലശേരി സോഷ്യൽ സർവീസ് സൊസൈറ്റി റീജിയണൽ ഡയറക്ടർ റവ.ഡോ. ജോൺസൺ അന്ത്യാംകുളം ആവശ്യപ്പെട്ടു. ബെന്നി മടുക്കാക്കുഴി, ബീന ബേബി, ടെസി പാറത്താനം, ജയറാണി പാലമറ്റം, ബെന്നി പായ്ക്കാട്ട്, മിനി പാലത്താനം, മനു മണക്കാട്ട്, ജിൻസൺ വിതയത്തിൽ എന്നിവർ നേതൃത്വം നൽകി.

മാലോത്ത് ബസ് സ്റ്റാൻഡ് നിർമിക്കണം:കെഎസ്എച്ച്ജിഒഎ

മാലോം: മാലോത്ത് ബസ് സ്റ്റാൻഡ് നിർമിക്കണമെന്നും പന്തൽ മേഖലയിൽ തൊഴിൽ കോഴ്സ് ആരംഭിക്കണമെന്നും വനാതിർത്തികളിൽ വൈദ്യതിവേലി ഉടൻ നിർമിക്കണമെന്നും കേരള സ്റ്റേറ്റ് ഹയർ ഗുഡ്സ് ഓണഴ്‌സ് അസോസിയേഷൻ പരപ്പ മേഖല സമ്മേളനം ആവശ്യപ്പെട്ടു. മാലോം പിഎം ഓഡിറ്റോറിയത്തിൽ നടന്ന പരിപാടി ജില്ലാ ജനറൽ സെക്രട്ടറി ഷിബു സൈൻ ഉദ്ഘാടനം ചെയ്തു. റോയ് മറ്റപ്പള്ളി അധ്യക്ഷതവഹിച്ചു. എസ്.എസ്. ഹംസ, ബാലൻ ബാളാന്തോട്‌, മുരളി ജവഹർ, ഫിറോസ് പടിഞ്ഞാറ്, നാസർ മുനമ്പം, സിജു കുര്യാക്കോസ്, പ്രശാന്ത് ന്യൂ സ്റ്റാർ, എസ്.എം. മധു, കെ.എം. കുര്യാക്കോസ്, ഷിബി കോശി, വിദ്യ വത്സരാജ് എന്നിവർ സംസാരിച്ചു. പി. മൂസ സ്വാഗതവും വിമൽകുമാർ നന്ദിയും പറഞ്ഞു. ഭാരവാഹികൾ: പി. മൂസ (പ്രസിഡന്‍റ്), ഷിബി കോശി (ജനറൽ സെക്രട്ടറി), പി പി. ദാമോദരൻ (ട്രഷറർ).

മലയോരത്ത് ഭൂഗർഭ കേബിൾ വൈദ്യുതി നടപ്പാക്കണം: കെവിവിഇഎസ്

മാലോം: മലയോര ഹൈവേ വികസനത്തിന്‍റെ ഭാഗമായി മാലോം ടൗണിലെ കെട്ടിടങ്ങളുടെ ചേർന്ന് സ്ഥാപിച്ച വൈദ്യുതി ലൈനുകൾ അപകടഭീഷണി ഉയർത്തുന്നതിനാൽ ഭൂഗർഭ കേബിൾ വൈദ്യുതി നടപ്പിലാക്കണമെന്ന് കേരള വ്യാപാരി വ്യവസായി ഏകോപനസമിതി മാലോം യൂണിറ്റ് വാർഷിക പൊതുയോഗം ആവശ്യപ്പെട്ടു. വാർഷിക പൊതുയോഗവും നവീകരിച്ച മാലോം വ്യാപാരഭവനും ജില്ലാ പ്രസിഡന്‍റ് കെ. അഹമ്മദ് ഷെരീഫ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് ടോമിച്ചൻ കാഞ്ഞിരമറ്റം അധ്യക്ഷതവഹിച്ചു. ജില്ലാ ജനറൽ സെക്രട്ടറി കെ.ജെ. സജി മുഖ്യ പ്രഭാഷണം നടത്തി. വൈസ് പ്രസിഡന്‍റ് തോമസ് കാനാട്ട്, മേഖല കൺവീനർ തോമസ് ചെറിയാൻ, ഡേവിസ് കുര്യൻ, ജിജി ആന്‍റണി, ജോയി മൈക്കിൾ എന്നിവർ പ്രസംഗിച്ചു. യൂണിറ്റ് ജനറൽ സെക്രട്ടറി ബിജു അറയ്ക്കൽ സ്വാഗതവും ട്രഷറർ മുരളീധരൻ നന്ദിയും പറഞ്ഞു.

ഡിവൈഎഫ്‌ഐ പ്രതിഷേധിച്ചു

കാഞ്ഞങ്ങാട്: ഛത്തീസ്ഗഡില്‍ മലയാളി കന്യാസ്ത്രീകളെ അന്യായമായി അറസ്റ്റ് ചെയ്തതില്‍ പ്രതിഷേധിച്ച് ഡിവൈഎഫ്‌ഐ കാഞ്ഞങ്ങാട് ബ്ലോക്ക് കമ്മിറ്റിയുടെ നേതൃത്വത്തില്‍ കാഞ്ഞങ്ങാട് ടൗണില്‍ യുവജന പ്രതിഷേധം സംഘടിപ്പിച്ചു. ബ്ലോക്ക് സെക്രട്ടറി വി. ഗിനീഷ് ഉദ്ഘാടനം ചെയ്തു. വിപിന്‍ ബല്ലത്ത് അധ്യക്ഷതവഹിച്ചു. വി.പി. അമ്പിളി, ഹരിത നാലപ്പാടം എന്നിവര്‍ സംസാരിച്ചു.

എംഡിഎംഎയുമായി അറസ്റ്റില്‍

മഞ്ചേശ്വരം: കാറില്‍ കടത്തുകയായിരുന്ന 4.27 ഗ്രാം എംഡിഎംഎയുമായി യുവാവ് അറസ്റ്റില്‍. വോര്‍ക്കാടി കൊടലമൊഗര്‍ പള്ളത്തുപദവ് സ്വദേശി മുഹമ്മദ് ജലാലുദ്ദീന്‍(24) ആണ് അറസ്റ്റിലായത്. കാളിയൂര്‍ ഉജ്ജീരെയില്‍ മഞ്ചേശ്വരം പോലീസ് നടത്തിയ വാഹനപരിശോധനയിലാണ് എംഡിഎംഎ കണ്ടെടുത്തത്. ഇയാള്‍ അടിപിടി കേസുകളിലും പ്രതിയാണ്. എസ്‌ഐ അജയ് എസ്. മേനോന്‍, എഎസ്‌ഐ അജിത് കുമാര്‍, സിപിഒ കെ.വി. നിതിന്‍, ഡ്രൈവര്‍ അബ്ദുള്‍ ഷുക്കൂര്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്.

വനംവകുപ്പ് ജീവനക്കാർ അവകാശസംരക്ഷണ സമരം നടത്തി

കാസർഗോഡ്: ജീവൻ പോലും പണയം വെച്ച് വനാന്തരങ്ങളിൽ ജോലി ചെയ്യുന്ന വനംവകുപ്പ് ജീവനക്കാരുടെ വിവിധ ആവശ്യങ്ങൾ നിറവേറ്റാൻ സർക്കാരും വകുപ്പും ഉണർന്നു പ്രവർത്തിക്കണമെന്നാവശ്യപ്പെട്ട് കേരള ഫോറസ്റ്റ് പ്രൊട്ടക്ടീവ് സ്റ്റാഫ് അസോസിയേഷന്‍റെ നേതൃത്വത്തിൽ സംസ്ഥാന വ്യാപകമായി അവകാശ സംരക്ഷണ സമരം നടത്തി. കാസർഗോഡ് ഡിവിഷണൽ ഫോറസ്റ്റ് ഓഫീസിന് മുന്നിൽ നടന്ന സമരം നഗരസഭാധ്യക്ഷൻ അബ്ബാസ് ബീഗം ഉദ്ഘാടനം ചെയ്തു. ജില്ലാ പ്രസിഡന്‍റ് കെ.എൻ. രമേശൻ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് എൻ.വി. സത്യൻ, സംസ്ഥാന കമ്മിറ്റി അംഗം എം. ചന്ദ്രൻ, ഡെപ്യൂട്ടി റെയ്ഞ്ച് ഫോറസ്റ്റ് ഓഫീസർ കെ. മധുസൂദനൻ, ജില്ലാ സെക്രട്ടറി പി.സി. യശോദ, കെ. ധനഞ്ജയൻ, ബി. വിനീത്, കെ. രാജു, വി. വിനീത്, ടി.എം. സിനി, ഒ. സുരേന്ദ്രൻ, ജി. സൗമ്യ എന്നിവർ നേതൃത്വം നല്കി. ഡ്യൂട്ടി റസ്റ്റ് ഉത്തരവ് പുനഃസ്ഥാപിക്കുക, നഷ്ടപ്പെട്ട 20 സെക്ഷൻ ഫോറസ്റ്റ് ഓഫീസർ തസ്തികകൾ പുനഃസ്ഥാപിക്കുക, ബീറ്റ് ഫോറസ്റ്റ് ഓഫീസർമാരുടെ സ്ഥാനക്കയറ്റത്തിനുള്ള കാലതാമസം ഒഴിവാക്കുക, ഫോറസ്റ്റ് വാച്ചർമാരുടെ പേര് കാലാനുസൃതമായി പരിഷ്കരിക്കുക എന്നീ ആവശ്യങ്ങൾ ഉന്നയിച്ചാണ് സമരം നടത്തിയത്.

വിനോദസഞ്ചാരികൾക്ക് പാർക്കിംഗ് സൗകര്യമൊരുക്കണം: കെവിവിഇഎസ്

കൊന്നക്കാട്: മലയോരത്തെ വിനോദസഞ്ചാരകേന്ദ്രങ്ങളായ കോട്ടഞ്ചേരി, അച്ചൻകല്ല് വെള്ളച്ചാട്ടം എന്നിവിടങ്ങളിലേക്ക് എത്തുന്ന സഞ്ചാരികൾക്ക് ആവശ്യമായ വാഹനപാർക്കിംഗ് സൗകര്യം ഒരുക്കി നൽകണമെന്ന് കേരള വ്യാപാരി വ്യവസായി സമിതി കൊന്നക്കാട് യൂണിറ്റ് പൊതുയോഗം ആവശ്യപ്പെട്ടു. കൊന്നക്കാട് പൈതൃകം ഹെറിറ്റേജിൽ നടന്ന പരിപാടി ജില്ലാ പ്രസിഡന്‍റ് കെ. അഹമ്മദ് ഷെരീഫ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് എ.ടി. ബേബി അധ്യക്ഷതവഹിച്ചു. ജില്ലാ ജനറൽ സെക്രട്ടറി കെ.ജെ. സജി മുഖ്യപ്രഭാഷണം നടത്തി. വൈസ് പ്രസിഡന്‍റ് തോമസ് കാനാട്ട്, മേഖല കൺവീനർ തോമസ് ചെറിയാൻ, ഷാലറ്റ് ജോസഫ്, കെ.കെ. മുനീർ, ജസീല സിദ്ദിഖ്, യൂസഫ് ചീനമ്മാടത്ത്, സന്തോഷ് ജോർജ് എന്നിവർ പ്രസംഗിച്ചു.

വിദ്യാരംഗം കലാസാഹിത്യവേദി പ്രവർത്തനോദ്ഘാടനം

ബിരിക്കുളം: വിദ്യാരംഗം കലാസാഹിത്യവേദി ചിറ്റാരിക്കാൽ ഉപജില്ല പ്രവർത്തന ഉദ്ഘാടനം ബിരിക്കുളം എയുപി സ്കൂളിൽ സാഹിത്യകാരൻ അംബികാസുതൻ മാങ്ങാട് നിർവഹിച്ചു. എഇഒ ജസീന്ത ജോൺ അധ്യക്ഷതവഹിച്ചു. എ.ടി. ശ്രീലത, വി. സന്ധ്യ, എ.ആർ. വിജയകുമാർ, വിനോദ്‌കുമാർ കുട്ടമത്ത്, സി. ഷൈജു, ഇ.വി. ശൈലജ, സി. വിദ്യാധരൻ, കെ. പ്രീത, വി. അനിതകുമാരി എന്നിവർ പ്രസംഗിച്ചു.

കരിയര്‍ ഗൈഡന്‍സ് ശില്പശാല നടത്തി

പെരിയ: പൊതുവിദ്യാഭ്യാസ വകുപ്പ് ഹയര്‍സെക്കന്‍ഡറി വിഭാഗം കരിയര്‍ ഗൈഡന്‍സ് ആന്‍ഡ് അഡോളസെന്‍റ് കൗണ്‍സിലിംഗ് സെല്ലിന്‍റെ നേതൃത്വത്തില്‍ കാഞ്ഞങ്ങാട് വിദ്യാഭ്യാസജില്ലയിലെ കരിയര്‍ ഗൈഡ് അധ്യാപകര്‍ക്കുള്ള ഏകദിന പരിശീലന പരിപാടി നടത്തി. പെരിയ ജിഎച്ച്എസ്എസില്‍ നടന്ന പരിപാടിയില്‍ കാഞ്ഞങ്ങാട് വിദ്യാഭ്യാസ ജില്ലയിലെ 43 വിദ്യാലയങ്ങളിലെ അധ്യാപകര്‍ പങ്കെടുത്തു. ഹയര്‍ സെക്കന്‍ഡറി ജില്ലാ കോ-ഓര്‍ഡിനേറ്റര്‍ സി.വി. അരവിന്ദാക്ഷന്‍ ഉദ്ഘാടനം ചെയ്തു. പ്രിന്‍സിപ്പല്‍ കെ.വി. വിശ്വംഭരന്‍ അധ്യക്ഷതവഹിച്ചു. സ്റ്റാഫ് സെക്രട്ടറി ഡോ. പി.സി. സപ്ന സംസാരിച്ചു. കരിയര്‍ ഫാക്കല്‍റ്റി പി.ഒ. മുരളീധരന്‍ ക്ലാസ് നയിച്ചു. കരിയര്‍ ഗൈഡന്‍സ് ആന്‍ഡ് അഡോളസെന്‍റ് കൗണ്‍സലിംഗ് സെല്‍ ജില്ലാ കോ-ഓര്‍ഡിനേറ്റര്‍ മെയ്‌സണ്‍ കളരിക്കല്‍ സ്വാഗതവും വിദ്യാഭ്യാസ ജില്ലാ കണ്‍വീനര്‍ സി. പ്രവീണ്‍കുമാര്‍ നന്ദിയും പറഞ്ഞു.

മംഗല്‍പാടി താലൂക്ക് ആശുപത്രി കെട്ടിട നിര്‍മാണോദ്ഘാടനം നടത്തി

ഉപ്പള: മംഗല്‍പാടി താലൂക്ക് ആശുപത്രിയുടെ പുതിയ കെട്ടിടത്തിന്‍റെ നിര്‍മാണോദ്ഘാടനം ആരോഗ്യമന്ത്രി വീണ ജോര്‍ജ് ഓണ്‍ലൈനായി നിര്‍വഹിച്ചു. കിഫ്ബി ഫണ്ടില്‍ നിന്ന് 17.47 കോടി രൂപ ചെലവില്‍ 26,000 ചതുശ്രയടി വിസ്തീര്‍ണത്തിലാണ് ഇരുനിലകെട്ടിടം നിര്‍മിക്കുന്നത്. ഒപി, കാഷ്വാലിറ്റി, മൈനര്‍ ഒടി, എക്‌സ്‌റേ, അള്‍ട്രാ സൗണ്ട്, സിടി സ്‌കാന്‍, ഫാര്‍മസി, രണ്ട് ഒപി കണ്‍സള്‍ട്ടേഷന്‍ മുറികള്‍, സ്റ്റാഫ് റൂം, അന്വേഷണ, സ്വീകരണ കൗണ്ടറുകള്‍, കാത്തിരിപ്പുകേന്ദ്രം, ഇലക്ട്രിക്കല്‍ റൂം, പോലീസ് എയ്ഡ് പോസ്റ്റ്, ടോയ്‌ലറ്റ് എന്നിവ ഒരുക്കും. 15 മാസത്തിനകം പ്രവൃത്തി പൂര്‍ത്തീകരിക്കാനാണ് കരാര്‍. എ.കെ.എം. അഷ്‌റഫ് എംഎല്‍എ അധ്യക്ഷതവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ഷമീന, പഞ്ചായത്ത് പ്രസിഡന്‍റുമാരായ റുബീന നൗഫല്‍, ജീന്‍ ലെവീന മൊന്തേരോ, ജില്ലാ പഞ്ചായത്തംഗം ഗോള്‍ഡന്‍ അബ്ദുല്‍ റഹിമാന്‍, ജില്ലാ മെഡിക്കല്‍ ഓഫീസര്‍ ഡോ.എ.വി. രാംദാസ്, പി.കെ. മുഹമ്മദ് ഹനീഫ്, എ. ഷംസീന, ഇര്‍ഫാന ഇക്ബാല്‍, കെ. അശോക, കെ.വി. രാധാകൃഷ്ണ, പഞ്ചായത്തംഗങ്ങളായ ഖൈറുന്നിസ ഉമര്‍, ടി.എ. ഷെരീഫ്, സുധ, അശോക, റഷീദ ഹനീഫ്, അസീസ് മരിക്കെ, സാദിഖ് ചെറുഗോളി, ഫാറൂഖ് ഷിറിയ, രാഘവ ചേരാല്‍, അഷ്‌ഫ പച്ചിലമ്പാറ, അഹമ്മദലി കുമ്പള, താജുദ്ദീന്‍ മൊഗ്രാല്‍, പ്രിജു കെ. ബെള്ളാര്‍, ഷാഹുല്‍ ഹമീദ് ബന്തിയോട്, പി.എം. സലീം, കെ. അശോക് എന്നിവര്‍ സംസാരിച്ചു.

കാറഡുക്ക സൗരോര്‍ജവേലി; വാച്ച് ടവര്‍ ഉദ്ഘാടനത്തിനൊരുങ്ങി

കാറഡുക്ക: വന്യജീവി പ്രതിരോധത്തിനായി കാറഡുക്ക ബ്ലോക്ക് പഞ്ചായത്ത് ത്രിതല പഞ്ചായത്തുകളുടെ സഹായത്തോടെ നിര്‍മിച്ച സോളാര്‍ വൈദ്യുതിവേലി സംസ്ഥാനത്ത് തന്നെ മാതൃക പദ്ധതിയായി. മേഖലയില്‍ വന്യജീവികളെ നിരീക്ഷിക്കുന്നതിനും ആവശ്യസാധനങ്ങള്‍ സംഭരിക്കാനും മറ്റുമായി പുലിപ്പറമ്പില്‍ നിര്‍മിച്ച വാച്ച് ടവര്‍ ഉദ്ഘാടനത്തിനായി തയാറായി. 3.3 കോടി രൂപയാണ് പദ്ധതിയുടെ ചെലവ്. ഇതില്‍ 1.20 കോടി രൂപ ത്രിതല പഞ്ചായത്തുകള്‍ പദ്ധതിക്കായി കൈമാറി. കാട്ടാനശല്യം രൂക്ഷമായ കാറഡുക്ക ബ്ലോക്ക് പഞ്ചായത്തിന് കീഴിലെ വനാതിര്‍ത്തിയോട് ചേര്‍ന്നു നില്‍ക്കുന്ന ദേലംപാടി, കാറഡുക്ക, മുളിയാര്‍, കുറ്റിക്കോല്‍, ബേഡഡുക്ക പഞ്ചായത്തുകളില്‍ നടപ്പിലാക്കിയ സോളാര്‍ തൂക്കുവേലിയിലൂടെ നാടിന്‍റെ കാട്ടാന ശല്യത്തിനാണ് ശാശ്വതപരിഹാരമായത്. സോളാര്‍ തൂക്കു വേലിയുടെ എട്ടുകിലോമീറ്റര്‍ കൂടി വ്യാപിപ്പിക്കുന്നതിനായി ത്രിതല പഞ്ചായത്ത് വിഹിതമായി 50 ലക്ഷം രൂപ കൂടി അനുവദിച്ചിട്ടുണ്ട്. അടങ്ങാത്ത കാട്ടാന ആക്രമണത്തിൽ കോടിക്കണക്കിന് രൂപയുടെ കൃഷിനാശമാണ് അതിര്‍ത്തി ഗ്രാമത്തിലുണ്ടായത്. പലരും സ്ഥലം തന്നെ ഉപേക്ഷിച്ച് പേകാന്‍ നിര്‍ബന്ധിതമായി. ഇതിനൊരു ശാശ്വത പരിഹാരം വേണമെന്ന ആവശ്യം ശക്തമായതോടെയാണ് കാറഡുക്ക ബ്ലോക്ക് പഞ്ചായത്ത് സോളാര്‍ തൂക്കുവേലിയുടെ ആലോചനയില്‍ എത്തുന്നത്. ബ്ലോക്ക് പഞ്ചായത്തിന്‍റെയും പഞ്ചായത്തുകളുടെയും വനംവകുപ്പിന്‍റെയും നാട്ടുകാരുടെയും കുടിയാലോചനകളുടെ ഫലമായി വനം വകുപ്പിന്‍റെ പിന്തുണയില്‍ പദ്ധതി യാഥാര്‍ഥ്യമായി. വനംവകുപ്പുമായി ചേര്‍ന്ന് ത്രിതല പഞ്ചായത്തുകള്‍ നടപ്പിലാക്കുന്ന സംസ്ഥാനത്തെ ആദ്യത്തെ വന്യജീവി പ്രതിരോധ പദ്ധതി കൂടിയാണിത്. മാതൃകാപദ്ധതിയെന്ന നിലയില്‍ 60 ലക്ഷം രൂപ പ്രോത്സാഹന ധനസഹായവും അനുവദിച്ചു. കര്‍ണാടക അതിര്‍ത്തിയായ മണ്ടക്കോല്‍ തലപ്പച്ചേരി മുതല്‍ പുലിപ്പറമ്പ് വരെയുള്ള 29 കിലോമീറ്ററില്‍ തൂക്കുവേലി നടപ്പാക്കാനാണ് തീരുമാനിച്ചത്. ചാമക്കൊച്ചി മുതല്‍ വെള്ളക്കാന വരെയുള്ള എട്ടു കിലോമീറ്ററില്‍ ആദ്യഘട്ടത്തില്‍ സ്ഥാപിച്ചു. സംസ്ഥാനത്തിന്‍റെ വിവിധഭാഗങ്ങളില്‍ പ്രതിരോധ മതിലുകള്‍ നിര്‍മിച്ചു വൈദഗ്ധ്യമുള്ള കേരളാ പോലീസ് ഹൗസിംഗ് ആന്‍ഡ് കണ്‍സ്ട്രക്ഷന്‍ കോര്‍പറേഷനായിരുന്നു നിര്‍മാണ ചുമതല. രണ്ടരമീറ്റര് ഉരത്തില്‍ ഇരുമ്പ് തൂണുകള്‍ നാട്ടി നെടുകെ ലൈന്‍ വലിക്കും. ഈ ലൈനില്‍ നിന്ന് താഴോട്ട് കുറുകെ പയറുവള്ളികള്‍ പോലെ താഴ്ന്നു കിടക്കുന്നതാണ് വേലിയുടെ മാതൃക. ഇതിനോടനുബന്ധിച്ച് ക്യാമ്പ് ഷെഡ്, സെര്‍ച്ച് ടവര്‍ എന്നിവ പൂര്‍ത്തീകരിച്ചു. കഴിഞ്ഞ രണ്ടുവര്‍ഷമായി തൂക്കുവേലി നിലവില്‍ വന്ന പ്രദേശങ്ങളില്‍ ആനശല്യം പൂര്‍ണമായി ഒഴിവായതായി കര്‍ഷകര്‍ പറയുന്നു. തൂക്കുവേലിയുടെ പരിപാലനത്തിനും നിരീക്ഷണത്തിനും അടിക്കാടുകള്‍ വെട്ടുന്നതിനുമായി എട്ടു താത്കാലിക വാച്ചര്‍മാരുമുണ്ട്. കഴിഞ്ഞ 15 വര്‍ഷക്കാലമായി മുളിയാര്‍, കുറ്റിക്കോല്‍, ദേലംപാടി, കാറഡുക്ക പഞ്ചായത്തുകളില്‍ വ്യാപകമായിട്ടുള്ള കാട്ടാനപ്രശ്‌നം നിലനിന്നിരുന്നു. കാടും നാടും ഇടതൂര്‍ന്നു നില്‍ക്കുന്ന ഈ സ്ഥലത്ത് കാട്ടാനകള്‍ കൃഷിയിടത്തിലിറങ്ങി വ്യാപകമായ കൃഷിനാശവും വരുത്തിയിരുന്നു. 2021 കാറഡുക്ക ആനപ്രതിരോധ പദ്ധതി നിലവില്‍ വരികയും 2023 ഓടെ അതു പൂര്‍ത്തീകരിക്കുകയും ചെയ്തു. ഈ വേലികള്‍ വളരെ കാര്യക്ഷമമായി കൊണ്ട് പഞ്ചായത്തിന്റെയും വനസംരക്ഷണ സമിതിയുടെയും സഹായത്തോടെ സംരക്ഷിച്ചുവരുന്നതുകൊണ്ട് തന്നെ നിലവില്‍ കാട്ടാനപ്രശ്‌നം ഈ പഞ്ചായത്തുകളില്ല. ഇരുപത്തി രണ്ടോളം വരുന്ന കാട്ടാനകളെ വേലിക്ക് പുറത്തുനിര്‍ത്തുവാനും മുളിയാര്‍ കാറഡുക്ക, ദേലംപാടി, കുറ്റിക്കോല്‍, ബേഡഡുക്ക പഞ്ചായത്തുകളിലെ വ്യാപകമായ പ്രശ്‌നങ്ങള്‍ പരിഹരിക്കുവാനും നിലവില്‍ സാധിച്ചിട്ടുണ്ടെന്ന് ഡിവിഷണല്‍ ഫോറസ്റ്റ് ഓഫീസര്‍ കെ. അഷറഫ് പറഞ്ഞു.

കന്യാസ്ത്രീകളുടെ അറസ്റ്റിൽ എകെസിസി പ്രതിഷേധം

പാലാവയൽ: ഛത്തീസ്ഗഡിൽ മതപരിവർത്തനവും മനുഷ്യക്കടത്തും ആരോപിച്ച് ആൾക്കൂട്ട വിചാരണക്കൊടുവിൽ അസീസി സിസ്റ്റേഴ്സ് ഓഫ് മേരി ഇമ്മാക്കുലേറ്റ് സന്യാസസഭയിലെ അംഗങ്ങളായ സിസ്റ്റർ പ്രീതി മേരി, സിസ്റ്റർ വന്ദന ഫ്രാൻസിസ് എന്നിവരെ അറസ്റ്റ് ചെയ്ത് തുറങ്കിലടച്ച കിരാത നടപടിയിൽ എകെസിസി പാലാവയൽ യൂണിറ്റിന്‍റെ നേതൃത്വത്തിൽ പ്രതിഷേധറാലി നടത്തി. പാലാവയൽ സെന്‍റ് ജോൺസ് പള്ളി അസി.വികാരി ഫാ. അമൽ ചെമ്പകശേരിൽ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോയി കൊച്ചുകുന്നത്തുപറമ്പിൽ, സെക്രട്ടറി പ്രശാന്ത് പാറേക്കുടിയിൽ, ട്രഷറർ പി.കെ. ജോസഫ് പുള്ളോലിൽ, മേഖല വൈസ് പ്രസിഡന്‍റ് മോളി തോമസ്, ഇടവക കോ-ഓഡിനേറ്റർ ടോമിച്ചൻ വട്ടോത്ത്, ട്രസ്റ്റി ജോസ് പെരിങ്ങല്ലൂർ എന്നിവർ നേതൃത്വം നൽകി. പടുപ്പ്: ഛത്തീസ്ഗഡില്‍ സിസ്റ്റര്‍മാരെ അന്യായമായി അറസ്റ്റ് ചെയ്തതില്‍ പ്രതിഷേധിച്ച് പടുപ്പ് സെന്‍റ് ജോര്‍ജ് ഇടവക എകെസിസിയുടെ നേതൃത്വത്തില്‍ പടുപ്പ് ടൗണില്‍ പന്തം കൊളുത്തി പ്രകടനം നടത്തി. അസി. വികാരി ഫാദര്‍ തോമസ് ചിന്താര്‍മണിയില്‍, എകെസിസി ഗ്ലോബല്‍ സെക്രട്ടറി പിയൂസ് പറേടം, ഫൊറോന സെക്രട്ടറി ജോസ് തൈപ്പറമ്പില്‍, യൂണിറ്റ് പ്രസിഡന്‍റ് ജോസ് അറക്കപ്പറമ്പില്‍, ജോയി കീച്ചേരി എന്നിവര്‍ നേതൃത്വം നല്‍കി. മാലോം: ഛത്തീസ്ഗഡിൽ കന്യാസ്ത്രീമാരെ അന്യായമായി കൽതുറങ്കിൽ അടച്ചതിൽ പ്രതിഷേധിച്ച് മാലോം ഫൊറോന കത്തോലിക്ക കോൺഗ്രസിന്‍റെ നേതൃത്വത്തിൽ പന്തംകൊളുത്തി പ്രതിഷേധം നടത്തി. ഫൊറോന വികാരി ഫാ. ജോസ് തൈക്കുന്നുംപുറം ഉദ്ഘാടനം ചെയ്തു. ബെന്നി തുളുമ്പൻമാക്കൽ അധ്യക്ഷതവഹിച്ചു. ടോമി തരിശിൽ, സ്കറിയ കാഞ്ഞമല എന്നിവർ പ്രസംഗിച്ചു.

ഭാരത് സ്‌പെഷല്‍ ഒളിമ്പിക്‌സ്: രജതശോഭയോടെ പാര്‍വതി

പെര്‍ള: ഛത്തീസ്ഗഡിലെ ബിലാസ്പൂരില്‍ നടന്ന ഭാരത് സ്‌പെഷല്‍ ഒളിംപിക്‌സില്‍ വെള്ളി മെഡല്‍ നേടി കേരളത്തിന് അഭിമാനമായി പെര്‍ള നവജീവന സ്‌പെഷല്‍ സ്‌കൂള്‍ വിദ്യാര്‍ഥിനി സി. പാര്‍വതി. ബൗളിംഗ് ഗെയിമായ ബോച്ചെയിലെ സീനിയര്‍ വിഭാഗത്തിലാണ് പാര്‍വതിയുടെ മെഡല്‍ നേട്ടം. ഭാരത് സ്‌പെഷല്‍ ഒളിമ്പിക്‌സില്‍ മെഡല്‍ നേടുന്ന ആദ്യ കാസര്‍ഗോഡ് സ്വദേശിനിയാണ് പാര്‍വതി. സീതാംഗോളിയിലെ എം. രവികുമാരയുടെയും സി. മിനിമോളുടെയും മകളാണ്. പാര്‍വതിക്കും കോച്ച് സാം ഡേവിഡ്‌സണും കാസര്‍ഗോഡ് റെയില്‍വേ സ്റ്റേഷനില്‍ നവജീവന സ്‌പെഷല്‍ സ്‌കൂള്‍ അധികൃതര്‍ സ്വീകരണം നല്‍കി. സ്‌കൂള്‍ മാനേജര്‍ ഫാ. ജോസ് ചെമ്പോട്ടിക്കല്‍, സിസ്റ്റര്‍ സെസിന്‍ എഫ്‌സിസി, സിസ്റ്റര്‍ ഷെന്‍സി ജോസ് എഫ്‌സിസി, സ്പീച്ച് തെറാപ്പിസ്റ്റ് അഞ്ജലി, ഫിസിയോതെറാപ്പിസ്റ്റ് അഞ്ജു, സ്‌പെഷല്‍ എഡ്യുക്കേറ്റര്‍മാരായ ശ്യാമിലി, നിഖില എന്നിവര്‍ നേതൃത്വം നല്‍കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]