ADVERTISEMENT

ADVERTISEMENT

ഒ. മാധവൻ ഫൗണ്ടേഷന് ഇക്കോ ആംബുലൻസും ടൂവീലർ ആംബുലൻസും കൈമാറി

കൊല്ലം: ഒ. മാധവൻ ഫൗണ്ടേഷൻ റീഹാബിലിറ്റേഷൻ ആന്‍റ് പാലിയേറ്റീവ് കെയർ സെന്‍ററിന് ജീവകാരുണ്യ പ്രവർത്തനങ്ങൾക്കായി സിഎസ്ആർ ഫണ്ടിൽ നിന്നും കെഎസ്എഫ്ഇ അനുവദിച്ച ഇക്കോ ആംബുലൻസ്, ടൂവീലർ ആംബുലൻസ് എന്നിവയുടെ താക്കോൽ കൊല്ലം പ്രസ് ക്ലബിൽ വച്ച് സിറ്റി പോലീസ് കമ്മീഷണർ കിരൺ നാരായണൻ ഫൗണ്ടേഷൻ ജനറൽ സെക്രട്ടറി എം. മുകേഷ് എംഎൽഎക്ക് കൈമാറി.

ഫൗണ്ടേഷൻ ചെയർമാൻ കെ. വരദരാജൻ അധ്യക്ഷത വഹിച്ചു. കെഎസ്എഫ്ഇ എ ജി എം ജി. വിനോദ് കുമാർ, കൊല്ലം പ്രസ് ക്ലബ് പ്രസിഡന്‍റ് വി. ജയകൃഷ്ണൻ ,സെക്രട്ടറി സനൽ .ഡി. പ്രേം, എന്നിവർ പ്രസംഗിച്ചു.

ഫൗണ്ടേഷൻ വർക്കിംഗ് ചെയർമാൻ പി. കെ. സുധീർ, ഡോ. സനൽകുമാർ, അഡ്വ. ജി. ശുഭദേവൻ, എസ്. സുദേവ്, എം. മണികണ്ഠൻ, ആർ. വൈശാഖ്, നാസിമുദീൻ, ശ്രീലക്ഷ്മി സജിത്ത്, കണ്ണൻ തുടങ്ങിയവർ പരിപാടിക്ക് നേതൃത്വം നൽകി.

ADVERTISEMENT

അപകടം പതിയിരിക്കുന്ന മില്‍പ്പാലം

അഞ്ചല്‍ : ശാന്തമായി ഒഴുകുന്ന കല്ലടയാറിന്‍റെ ഉല്‍ഭസ്ഥാനത്ത് നിന്നും ഏതാനും കിലോമീറ്ററുകള്‍ ദൂരത്താണ് ചോഴിയക്കോട് മില്‍പ്പാലം കടവ്. പൊന്മുടി തഴുകി നാങ്കച്ചിയും പാണ്ടിമൊട്ട ഉൾപ്പെടെ ആറോളം ചെറു നദികള്‍ സംഗമിക്കുന്ന ഇടം. വനസൗന്ദര്യവും പ്രകൃതി സൗന്ദര്യവും ഒരുമിച്ച് കൂടിയപ്പോള്‍ ആരെയും ആകര്‍ഷിക്കുന്ന പ്രത്യേകതയാണ്. ഒരുകാലത്ത് സംസ്ഥാനത്തിന്‍റെ വിവിധ ജില്ലകളിലേക്ക് ആറ്റുമണല്‍ ശേഖരിച്ചു വില്പന നടത്തിവന്നിരുന്ന പ്രധാന കടവായിരുന്നു മില്‍പ്പാലം. വര്‍ഷങ്ങളായി മണല്‍ ശേഖരണം നിലച്ചതോടെ കല്ലടയാറിന്‍റെ സ്വഭാവിക നീരൊഴുക്ക് പോലും ഇല്ലാതാക്കി സ്വര്‍ണനിറത്തില്‍ കുമിഞ്ഞു കൂടിയിരിക്കുന്ന വന്‍ മണല്‍ ശേഖരം ഇവിടെ കാണാന്‍ കഴിയും. ഈ വശ്യതയാണ് വീണ്ടും വീണ്ടും വിനോദ സഞ്ചാരികളെ മില്‍പ്പാലം പ്രദേശത്തേക്ക് ആകര്‍ഷിക്കുന്നത്. തിരുവനന്തപുരം, കൊല്ലം ജില്ലകളുടെ അതിര്‍ത്തി പങ്കിടുന്ന ഇവിടെ നിരവധിയാളുകള്‍ എത്തുകയും പ്രകൃതി സൗന്ദര്യം ആവോളം ആസ്വദിക്കുകയും ചെയ്യാറുണ്ട്. ശാന്തമായി ഒഴുകുന്ന കല്ലടയറ്റില്‍ ഒന്നു കുളിക്കണം എന്നു ആര്‍ക്കും തോന്നും. എന്നാല്‍ ശാന്തമായി ഒഴുകുന്ന മില്‍പ്പാലം ഭാഗത്ത് പതിയിരിക്കുന്ന അപകട ചുഴികളെ പറ്റി ആരും ശ്രദ്ധിക്കാറില്ല. ശക്തമായ ജലനിരപ്പ് ഉള്ളപ്പോഴും വരള്‍ച്ച സമയത്തും ഇവിടെ അപകടങ്ങള്‍ ഉണ്ടാകാറുണ്ട്. അപകടത്തില്‍ പ്പെടുന്നവരില്‍ ഏറെയും പുറത്തു നിന്നും എത്തുന്നവരാണ് .കഴിഞ്ഞ ആറ് വര്‍ഷത്തിനിടെ പത്തോളം ജീവനുകള്‍ ഇവിടെ പൊലിഞ്ഞിട്ടുണ്ട്. ഏറെയും യുവാക്കളും വിദ്യാര്‍ഥികളും ആണെന്നത് ഗൗരവതരം. മില്‍പ്പാലം കടവിലെ രാജമ്മക്കയം, വിൻസന്‍റ് കയം എന്നിങ്ങനെ രണ്ട് കയങ്ങള്‍ ഇവിടെ എത്തുന്ന അപരിചതരെ മരണത്തിലേക്ക് പിടിച്ചെടുക്കുകയാണ്. ചോഴിയക്കോട് മില്‍പ്പാലം സ്വദേശികളായിരുന്ന രാജമ്മയും വിന്‍സെന്‍റ് എന്നയാളും ഇവിടെ കയത്തില്‍പ്പെട്ടു മരണപ്പെട്ടിരുന്നു. ഇതോടെയാണ് ഇവിടെ രാജമ്മക്കയം, വിന്‍സെന്‍റ് കയം എന്നിങ്ങനെ പേര് വീഴാന്‍ ഇടയാക്കിയത്. അപകടങ്ങള്‍ തുടര്‍ക്കഥ ആയതോടെ വര്‍ഷങ്ങള്‍ക്ക് മുമ്പ് സൂചന മുന്നറിയിപ്പ് ബോര്‍ഡും ചെക്ക് പോസ്റ്റും പ്രദേശത്ത് സ്ഥാപിച്ചിട്ടുണ്ട്. ഇവയൊന്നും പക്ഷേ ഇവിടെയെത്തുന്നവര്‍ ശ്രദ്ധിക്കാറില്ല. കാര്യമായ ശ്രദ്ധ അധികാരികളും ഇവിടെ നല്‍കുന്നില്ല എന്നതിന്‍റെ തെളിവാണ് തുടര്‍ച്ചയായി ഉണ്ടാകുന്ന മരണങ്ങള്‍. തിരുവനന്തപുരം ഭരതന്നൂര്‍ സ്വദേശി ഫൈസൽ എന്ന 31 കാരന്‍ മില്‍പ്പാലം കടവില്‍ മുങ്ങി മരിച്ചതാണ് ഒടുവിലത്തെ ദുരന്തം. സുരക്ഷാ ക്രമീകരണങ്ങളുടെ അഭാവമാണ് ഇവിടെ അപകടങ്ങള്‍ വര്‍ധിക്കാന്‍ ഇടയാക്കുന്നതെന്ന് വാര്‍ഡ് അംഗവും സ്ഥലവാസിയുമായ ഷീല സത്യന്‍ ആരോപിക്കുന്നു. പ്രദേശത്ത് മുമ്പ് രൂപീകരിച്ച വനം സംരക്ഷണ സമിതികളുണ്ട്. ഇവര്‍ക്ക് ഇവിടെ സുരക്ഷാ ചുമതല നല്‍കുകയോ വനംവകുപ്പ് നേരിട്ട് സുരക്ഷ ഒരുക്കുകയോ ചെയ്യണം എന്നും ഷീല സത്യന്‍ പറയുന്നു. പ്രദേശത്ത് കുളിക്കടവ് നിര്‍മിക്കുകയും വിനോദ സഞ്ചാരികള്‍ക്ക് സുരക്ഷിതത്വം ഉറപ്പ് വരുത്തുന്നതിനായി പ്രത്യേക ടൂറിസം പാക്കേജ് പ്രദേശത്ത് നടപ്പിലാക്കണമെന്നും വര്‍ഷങ്ങളായി ആവശ്യപ്പെടുകയാണ്. പക്ഷേ ബന്ധപ്പെട്ടവരുടെ നിസഹകരണം ടൂറിസം പദ്ധതി എന്ന ആവശ്യത്തെ പിന്നോട്ടടിക്കുകയായിരുന്നുവെന്നും മുന്‍ പഞ്ചായത്ത് അംഗം കെ.ജെ അലോഷ്യസ് പറയുന്നു. അതേസമയം അപകടങ്ങള്‍ വര്‍ധിച്ച് മനുഷ്യ ജീവനുകള്‍ പൊലിയുമ്പോഴും അധികൃതരുടെ ഭാഗത്ത് നിന്നും യാതൊരുവിധ നടപടിയും ഇല്ലാത്തതിനാല്‍ നാട്ടുകാരുടെ ഭാഗത്ത് നിന്നും വലിയ രീതിയില്‍ പ്രതിഷേധവും ഉയരുന്നുണ്ട് . സനിൽ അഞ്ചൽ

പ്രോലൈഫ് ഞായര്‍ ആചരണം സംഘടിപ്പിച്ചു

കൊല്ലം : കെസിബിസി പ്രോലൈഫ് സമിതി കൊല്ലം രൂപതയുടെ ആഭിമുഖ്യത്തില്‍ കര്‍മല റാണി ട്രെയിനിംഗ് കോളജില്‍ പ്രോലൈഫ് ഞായര്‍ ആചരണം സംഘടിപ്പിച്ചു. കൊല്ലം രൂപതാധ്യക്ഷനും കെസിബിസി ഫാമിലി കമ്മീഷന്‍ ചെയര്‍മാനുമായ ബിഷപ് ഡോ. പോള്‍ ആന്‍റണി മുല്ലശേരി പ്രോലൈഫ് ഞായര്‍ ആചരണത്തിന്‍റെ ഉദ്ഘാടനം നിര്‍വഹിച്ചു. ജീവന്‍റെ സമഗ്രപോഷണം സകല തലങ്ങളിലേക്കും എത്തിക്കുവാനുള്ള പ്രവര്‍ത്തന ഭാഗമാണ് പ്രോലൈഫ് ഞായര്‍ ആചരണമെന്നു ബിഷപ് പറഞ്ഞു.ഈ കാലഘട്ടത്തില്‍ ജീവനെതിരായ നിയമനിര്‍മാണങ്ങളും മദ്യം മയക്കുമരുന്ന് ഭ്രൂണഹത്യ തുടങ്ങി ജീവനെതിരായ തിന്മകളുടെ ഉദാരവത്കരണവുമാണ് നടന്നുവരുന്നത്. ഇവിടെയാണ് ജീവന്‍റെ സംരക്ഷണം ലക്ഷ്യം വച്ചുള്ള പ്രോലൈഫ് ഞായറിന്‍റെ പ്രസക്തി എന്നും ബിഷപ് പറഞ്ഞു. കൊല്ലം രൂപതാ പ്രോലൈഫ് കോര്‍ഡിനേറ്ററും കെസിബിസി പ്രോലൈഫ് സംസ്ഥാന സമിതി ആനിമേറ്ററുമായ ജോര്‍ജ് എഫ്.സേവ്യര്‍ വലിയവീട് അധ്യക്ഷത വഹിച്ചു. ഫാമിലി അപ്പോസ്റ്റലേറ്റ് ഡയറക്ടര്‍ ഫാ. ഷാജന്‍ വര്‍ഗീസ് മുഖ്യപ്രഭാഷണം നടത്തി. ജെയിന്‍ ആന്‍സില്‍ ഫ്രാന്‍സിസ്, വി.ടി. കുരീപ്പുഴ, ഇഗ്നേഷ്യസ് വിക്ടര്‍ എന്നിവര്‍ പ്രസംഗിച്ചു. കൊല്ലം രൂപതയോടൊപ്പം സഞ്ചരിക്കുകയും അവരവരുടെ പ്രവര്‍ത്തനമണ്ഡലങ്ങളില്‍ വ്യക്തിമുദ്ര പതിപ്പിക്കുകയും ചെയ്യുന്ന രൂപതാംഗങ്ങള്‍ക്ക് നല്‍കുന്ന പുരസ്‌കാരങ്ങള്‍ തെരഞ്ഞെടുക്കപ്പെട്ടവര്‍ക്കു ബിഷപ് സമ്മാനിച്ചു.

ഉമ്മൻചാണ്ടിയുടെ വിയോഗം സൃഷ്‌ടിച്ച ശൂന്യത നികത്താനാകില്ല: എൻ.കെ. പ്രേമചന്ദ്രൻ

ചവറ: ഉമ്മൻ ചാണ്ടിയുടെ വിയോഗം സൃഷ്ടിച്ച ശൂന്യത നികത്താനാകാത്തതാണെന്നും, അദ്ദേഹത്തിന്‍റെ സംഭാവനകൾ എന്നെന്നും ഓർമിക്കപ്പെടുമെന്നും എൻ.കെ പ്രേമചന്ദ്രൻ എംപി. ഉമ്മൻചാണ്ടി ഫൗണ്ടേഷൻ ആന്‍ഡ് പാലിയേറ്റീവ് കെയർ സംഘടിപ്പിച്ച അനുസ്മരണ സമ്മേളനവും അവാർഡ് വിതരണവും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വികസനവും കരുതലും മുഖമുദ്രയാക്കിയ അദ്ദേഹത്തിന്‍റെ ഭരണകാലഘട്ടം കേരളത്തിന്‍റെ സുവർണകാലഘട്ടമായിരുന്നു എന്നും അദ്ദേഹം തുടർന്നു പറഞ്ഞു. ഉമ്മൻ ചാണ്ടി ഫൗണ്ടേഷൻ ആന്‍ഡ് പാലിയേറ്റീവ് കെയർ പ്രസിഡന്‍റ് ബോബൻ ജി.നാഥ് അധ്യക്ഷനായി.യോഗത്തിൽ കെപിസിസി സെക്രട്ടറി പി. ജർമിയാസ് മുഖ്യപ്രഭാഷണം നടത്തി. ഡിസിസി വൈസ് പ്രസിഡന്‍റ് ആർ. അരുൺ രാജ്, ചക്കിനാൽ സനൽ കുമാർ, ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി, ബാബു ജി. പട്ടത്താനം, ചവറ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് മേച്ചേഴത്ത് ഗിരീഷ്, ചവറ ഗോപകുമാർ, റോസ് ആനന്ദ്, പൊന്മന നിശാന്ത്,ചിത്രാലയം രാമചന്ദ്രൻ, സെബാസ്റ്റ്യൻ അംബ്രോസ്, സുരേഷ് കുമാർ , എം.സുശീല, ആർ. ജിജി, തുടങ്ങിയവർ പ്രസംഗിച്ചു. അഡ്വ. ഇ. യൂസഫ്കുഞ്ഞ്, അഡ്വ.എം.എ. ആസാദ്, കെ. രാജശേഖരൻ തുടങ്ങിയവരെ ചടങ്ങിൽ ഉമ്മൻ ചാണ്ടി ജനസേവ പുരസ്കാരം നൽകി ആദരിച്ചു .

ജീപ്പില്‍ യാത്ര ചെയ്ത കുടുംബത്തെ കാട്ടുപോത്ത് ആക്രമിച്ചു

കുളത്തൂപ്പുഴ: മലയോര ഹൈവേയില്‍ കുടുംബ ംസഞ്ചരിച്ച ജീപ്പിനെ കാട്ടുപോത്ത് ആക്രമിച്ചു. അഞ്ചു പേര്‍ക്കു പരിക്ക്. മലയോര ഹൈവേയില്‍ ചോഴിയക്കോട് അരിപ്പ സ്‌കൂളിനു സമീപത്ത് പുത്തന്‍പുരയില്‍ ഷെരീഫും കുടുംബവും സഞ്ചരിച്ച ജീപ്പാണ് കാട്ടുപോത്ത് ആക്രമിച്ചത്. പാങ്ങോട്ടുനിന്നു കുളത്തൂപ്പുഴയിലേക്കു വരികയായിരുന്ന കുടുംബം സഞ്ചരിച്ച ജീപ്പിനെ അരിപ്പയില്‍ കാട്ടുപോത്ത് ആക്രമിക്കുകയായിരുന്നു. അപകടത്തില്‍ ഷെരീഫ് (40), ഭാര്യ അസീന (35), മക്കളായ മുഹമ്മദ് ഷാഹിന്‍ (15), മുഹമ്മദ് ഷെഹിന്‍ (12), ഭാര്യയുടെ അമ്മ നജീമ (57) എന്നിവര്‍ക്കാണ് പരിക്കേറ്റത്. നജീമയുടെ കൈക്കും ഷെരീഫിന്‍റയും അസീനയുടെയും കാലുകള്‍ക്കുമാണ് ഗുരുതരമായ പരിക്കേറ്റത്. കുട്ടികള്‍ക്ക് നിസാര പരിക്കുകളാണുള്ളത്. ബന്ധുവീട്ടില്‍ പോയി മടങ്ങവേയാണ് അപകടം സംഭവിച്ചത്. കാട്ടുപോത്തിന്‍റെ ആക്രമണത്തില്‍ നിയന്ത്രണംവിട്ട ജീപ്പ് മതിലിലിടിച്ച് അപകടമുണ്ടാവുകയായിരുന്നു. പരിക്കേറ്റവരെ കുളത്തൂപ്പുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

കെസിഎല്‍ രണ്ടാം സീസണില്‍ തിളങ്ങാന്‍ ഒമ്പത് താരങ്ങള്‍

കൊല്ലം: കെസിഎല്‍ രണ്ടാം സീസണില്‍ കൊല്ലം ജില്ലയെ പ്രതിനിധീകരിക്കുന്നതു പരിചയ സമ്പന്നരായ ഒന്‍പതു താരങ്ങളാണ്. ഇതില്‍ ആറുപേരും കൊല്ലം ടീമിനു വേണ്ടിത്തന്നെയാണ് അണിനിരക്കുന്നത്. എം.ആർ. രാഹുല്‍ ശര്‍മ, അതുല്‍ജിത്ത് അനു, എ.ജി. അമല്‍ ,ആഷിഖ് മുഹമ്മദ്, പി.എസ്. സച്ചിന്‍,എൻ.എസ്. അജയഘോഷ് എന്നിവരാണ് ഏരീസ് കൊല്ലം സെയിലേഴ്സിനായികളിക്കാനിറങ്ങുക. രാഹുല്‍ ശര്‍മ, ആഷിഖ് മുഹമ്മദ് എന്നിവരെ ഏരീസ് കൊല്ലം സെയിലേഴ്‌സ് ലേലത്തിലൂടെ സ്വന്തമാക്കുകയായിരുന്നു. നിര്‍ണായക ഘട്ടത്തില്‍ മികച്ച ബാറ്റിംഗ് പ്രകടനം പുറത്തെടുക്കാന്‍ സാധിക്കുന്ന താരമാണ് രാഹുല്‍ ശർമ. ആഷിഖ് മുഹമ്മദാകട്ടെ കഴിഞ്ഞ സീസണില്‍ ഏരീസ് കൊല്ലം സെയിലേഴ്സിനായി മികച്ച ബൗളിഗ് പ്രകടനവും കാഴ്ചവച്ചിരുന്നു. കഴിഞ്ഞ തവണ കൊച്ചി ബ്ലൂ ടൈഗേഴ്സ് വേണ്ടി കളിച്ച ഫാസ്റ്റ് ബൗളര്‍ അജയഘോഷിനെ അടിസ്ഥാന വിലയായ 75,000 രൂപയ്ക്കാണ് ഏരീസ് കൊല്ലം സെയിലേഴ്‌സ് സ്വന്തമാക്കിയത്. ഇടംകൈയന്‍ ഫാസ്റ്റ് ബൗളറും കേരള അണ്ടര്‍ 19 താരവുമായ ടി.എസ്. വിനിലിനെ അദാനി ട്രിവാന്‍ഡ്രം റോയല്‍സ് നിലനിര്‍ത്തി. കഴിഞ്ഞ സീസണില്‍ ട്രിവാന്‍ഡ്രം റോയല്‍സിനുവേണ്ടി ഏഴു വിക്കറ്റാണ് ഈ കൊല്ലം സ്വദേശി വീഴ്ത്തിയത്.1.5 ലക്ഷം രൂപയ്ക്കാണ് വിനിലിനെ ട്രിവാന്‍ഡ്രം റോയല്‍സ് ടീമിലെത്തിച്ചത്.വെടിക്കെട്ട് ബാറ്ററും വിക്കറ്റ് കീപ്പറുമായ അദ്വൈത് പ്രിന്‍സിനെയും അദാനി ട്രിവാന്‍ഡ്രം റോയല്‍സാണ് സ്വന്തമാക്കിയത്. 75,000 രൂപയാണ് അദ്വൈത് പ്രിന്‍സിന് ലഭിച്ച ലേലത്തുക. സ്ഥിരതയുള്ള ബാറ്റിംഗും വിക്കറ്റ് കാക്കുന്നതിലെ മികവുമാണ് അദ്വൈതിനെ ട്രിവാന്‍ഡ്രം റോയല്‍സിന്‍റെ ടീമിലെത്തിച്ചത്. ഓള്‍ റൗണ്ടറായ അക്ഷയ് മനോഹറിനെ തൃശൂര്‍ ടൈറ്റന്‍സ് ലേലത്തിലൂടെ തിരികെ പിടിക്കുകയായിരുന്നു. മികച്ച ബാറ്റിംഗ് - ബൗളിംഗ് ശരാശരി ഉള്ള ഈ കൊല്ലംകാരനെ 3.50 ലക്ഷം രൂപയ്ക്കാണ് ടൈറ്റന്‍സ് ടീമില്‍ എത്തിച്ചത്.

പരവൂരിൽ ആരോഗ്യമന്ത്രിക്ക് നേരേ യൂത്ത് കോൺഗ്രസിന്‍റെ കരിങ്കൊടി

പരവൂർ:ആരോഗ്യമന്ത്രി വീണാ ജോർജിന് നേരെപരവൂരിൽ യൂത്ത് കോൺഗ്രസിന്‍റെ കരിങ്കൊടി പ്രതിഷേധം. ഇന്നലെ വൈകുന്നേരം അഞ്ചോടെ പരവൂർ പൊഴിക്കര റോഡിൽ കുറുമണ്ടൽ എൽ പി സ്കൂളിന് സമീപംവച്ചായിരുന്നുമന്ത്രിക്ക് നേരെ യൂത്ത് കോൺഗ്രസിന്‍റെ കരിങ്കൊടി വീശൽ. പൊഴിക്കര പ്രാഥമിക ആരോഗ്യ കേന്ദ്രത്തിന്‍റെ പുതിയ കെട്ടിട ഉദ്ഘാടന ചടങ്ങിൽ പങ്കെടുത്തു മടങ്ങുകയായിരുന്ന മന്ത്രിയുടെ വാഹനവ്യൂഹത്തിന് നേരേ യൂത്ത് കോൺഗ്രസ് പ്രവർത്തകർ കരിങ്കൊടിയുമായി ചാടി വീഴുകയായിരുന്നു. മന്ത്രിക്കൊപ്പമുണ്ടായിരുന്നപോലീസ് സംഘം പ്രവർത്തകരെ സ്ഥലത്തു നിന്നുംനീക്കി.യൂത്ത് കോൺഗ്രസ്‌ അസംബ്ലി പ്രസിഡന്‍റ് വിജയ് പരവൂർ, സെക്രട്ടറി വിഷ്ണു ശ്യാം, അൻസി, സപ്ഹീൽ, ബിൻ വിജയൻ എന്നിവർ നേതൃത്വം നൽകി.

അഷ്‌ടമുടി കായൽ മെഗാ ക്ലീനിംഗ് ഡ്രൈവ് സംഘടിപ്പിച്ചു

ചവറ : തെക്കുംഭാഗം പഞ്ചായത്തിലെ എല്ലാ വാർഡുകളിലും അഷ്ടമുടി കായൽ മെഗാ ക്ലീനിംഗ് ഡ്രൈവ് സംഘടിപ്പിച്ചു. സുജിത്ത് വിജയൻ പിള്ള എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് തങ്കച്ചി പ്രഭാകരൻ അധ്യക്ഷയായി. പഞ്ചായത്തിലെ 13 വാർഡുകളിലേയും കായൽ തീരങ്ങളിൽ അടിഞ്ഞുകൂടിയ മാലിന്യങ്ങൾ ശേഖരിച്ച് ഹരിതകർമസേന പ്രവർത്തകർ എം എസി എഫിലേക്ക് മാറ്റി. പഞ്ചായത്തിലെ ആരോഗ്യ പ്രവർത്തകർ, സന്നദ്ധ സംഘടനകൾ, ഹരിതകർമസേന, തൊഴിലുറപ്പ് തൊഴിലാളികൾ, കുടുബശ്രീ, മത്സ്യത്തൊഴിലാളികൾ, കക്കതൊഴിലാളികൾ, യുവജന സംഘടനകൾ, കടത്ത് ജീവനക്കാർ തുടങ്ങിയവർ പരിപാടിയുടെ ഭാഗമായി. പഞ്ചായത്ത് വൈസ് പ്രസിഡന്‍റ് പ്രഭാകരൻ പിള്ള, സ്റ്റാന്‍റിംഗ് കമ്മിറ്റി ചെയർമാന്മാരായ സജുമോൻ, അപർണ, സന്ധ്യമോൾ, ജനപ്രതിനിധികളായ പ്രദീപ് എസ് പുല്യാഴം, ഉണ്ണികൃഷ്ണപിള്ള, ബേബി മഞ്ചു, സീതാലക്ഷ്മി, അനിൽകുമാർ, മീന, സ്മിത, സിന്ധു എന്നിവർ പ്രസംഗിച്ചു. പഞ്ചായത്ത് സെക്രട്ടറി റ്റി .ശിവകുമാർ പദ്ധതി വിശദീകരിച്ചു. കായലിലേക്ക് മാലിന്യം വലിച്ചെറിയുന്നവർക്കെതിരെ നടപടി സ്വീകരിക്കുവാൻ എൻഫോഴ്സ്മെന്‍റ്സ്ക്വാഡ് പ്രവർത്തനവും തുടർന്നു വരുന്നുണ്ട്.

ചിരട്ട വലിയ പുള്ളിയാ...

ചാത്തന്നൂർ: ചിരട്ടയ്ക്ക് വലിയ ഡിമാന്‍ഡും അതിനനുസരിച്ച് മെച്ചപ്പെട്ട വിലയും. വീട്ടമ്മമാർക്ക് ബാധ്യതയായി മാറിയിരുന്ന ചിരട്ടയുടെ ജാതകം തെളിഞ്ഞത് പെട്ടെന്നാണ്. ഇപ്പോൾ വാഹനങ്ങളിൽ ഉച്ചഭാഷിണിയിലൂടെ ചിരട്ട ആവശ്യപ്പെട്ടുള്ള അഭ്യർഥനയോടെ ചെറുകിട കച്ചവടക്കാർ വീട്ടുപടിക്കൽ എത്തുന്നു . ആക്രി കച്ചവടക്കാരിൽ ഒരു വിഭാഗവും ചിരട്ട കച്ചവടത്തിലേയ്ക്ക് തിരിഞ്ഞിരിക്കുന്നു. ഉച്ചഭാഷിണിയുടെ അകമ്പടിയോടെ വാഹനങ്ങളിലെത്തുന്ന ചെറുകിട കച്ചവടക്കാർ തെക്കൻ കേരളത്തിൽ ഒരു കിലോ ചിരട്ടയ്ക്ക് 30 രൂപ വരെ വില നല്കുന്നു. വടക്കൻ കേരളത്തിൽ 35 ത് വരെ കിട്ടുന്നു. കഴിഞ്ഞ ജനുവരിയിൽ ഒരു കിലോ ചിരട്ടയ്ക്ക് 10 രൂപ വരെയായിരുന്ന വിലയാണ് മാസങ്ങൾക്കുള്ളിൽ മൂന്നിരട്ടിയിലേറെയായി കുതിച്ചു കയറിയത്. എന്നാൽ ആക്രി കച്ചവടക്കാർ ഒരു കിലോയ്ക്ക് 15 രൂപയിലധികം കൊടുക്കുന്നില്ല. നല്ല ചിരട്ടയാണെങ്കിൽ 15 എണ്ണമുണ്ടെങ്കിൽ ഒരു കിലോ തൂക്കം കിട്ടും. കയർ വ്യവസായത്തിന്‍റെ സുവർണകാലഘട്ടത്തിൽ വലിയ കുട്ടയുമായി വീടുകൾ കയറിയിറങ്ങി തൊണ്ട് ശേഖരിച്ചിരുന്ന നാമമാത്ര കച്ചവടക്കാരെയാണ് ചിരട്ട തേടിയെത്തുന്നവർ ഓർമിപ്പിക്കുന്നത്. ഇപ്പോൾ തൊണ്ട് കച്ചവടവും ഓല കച്ചവടവും നിലച്ചിരിക്കുകയാണ് . ചിരട്ടയ്ക്ക് ഡിമാന്‍റ് വർധിച്ചതോടെ ചിരട്ട മോഷ്ടിക്കുന്ന സംഭവങ്ങളും ഉണ്ടായി തുടങ്ങി. കഴിഞ്ഞ ദിവസം കോഴിക്കോട് ജില്ലയിലാണ് ഒരു വീട്ടിൽ നിന്നും രണ്ടു ചാക്ക് ചിരട്ട മോഷണം പോയത്. ചെറുകിട കച്ചവടക്കാരും ആക്രി കച്ചവടക്കാരുമാണ് വീടുകളിൽ നിന്നും ചിരട്ട ശേഖരിക്കുന്നത്. ഇത് മൊത്തവ്യാപാരികൾ അന്യ സംസ്ഥാനങ്ങളിലേക്കുകയറ്റികൊണ്ടു പോകുകയാണ്. ടൺകണക്കിനാണ് ചിരട്ടയാണ് ദിനംപ്രതി കേരളം കടക്കുന്നത്. പ്രധാനമായും കരിയുണ്ടാക്കാനാണ് ചിരട്ട പ്രയോജനപ്പെടുത്തുന്നത്. തമിഴ്നാട്ടിലെ കരി ഫാക്ടറികളിലേയ്ക്കാണ് ചിരട്ടകൾ കൊണ്ടുപോകുന്നത്. കരിയുടെ വിവിധ പ്രയോജനങ്ങൾ കൂടാതെ ജല ശുദ്ധീകരണം നടത്തുന്നതിനും ഇത് ഉപയോഗിക്കുന്നുണ്ട്. അലങ്കാരവസ്തുക്കൾ നിർമ്മിക്കുന്നതിനും ചിരട്ട പ്രയോജനപ്പെടുത്തുന്നുണ്ട്. നാളികേരത്തിനും വെളിച്ചെണ്ണയ്ക്കും വിലവർധിക്കുന്നത് പോലെ ചിരട്ടയ്ക്കും വിലകയറുകയാണ്. പ്രദീപ് ചാത്തന്നൂർ

ജനകീയ റിലേ ധർണയ്ക്ക് തുടക്കമായി

ചാത്തന്നൂർ: അശാസ്ത്രീയമായ ചാത്തന്നൂർ തിരുമുക്കിലെ അടിപ്പാതയ്ക്കെതിരേ ചാത്തന്നൂർ പഞ്ചായത്ത് ഭരണസമിതി അംഗങ്ങളുടെ ധർണയോടെ തിരുമുക്കിലെ ജനകീയ റിലേ ധർണആരംഭിച്ചു.തിരുമുക്കിലെ അടിപ്പാത വലിയ വാഹനങ്ങൾക്ക് കടന്നു പോകാൻ കഴിയുന്ന തരത്തിൽ പുതുക്കിപ്പണിയുക,പരവൂർ - കൊട്ടിയം ഭാഗങ്ങളിൽ നിന്ന് വരുന്ന എല്ലാ സ്വകാര്യ ബസുകളും ചാത്തന്നൂരിൽ എത്തുക തുടങ്ങിയ ആവശ്യങ്ങൾ ഉന്നയിച്ചാണ് ചാത്തന്നൂർ വികസന സമിതിയുടെ നേതൃത്വത്തിൽ ജനകീയ റിലേധർണ സംഘടിപ്പിച്ചിട്ടുള്ളത്. ചാത്തന്നൂർ പഞ്ചായത്ത് ഭരണസമിതിയംഗങ്ങളുടെ ധർണ പഞ്ചായത്ത് പ്രസിഡന്‍റ് എസ്.കെ.ചന്ദ്രകുമാർ ഉദ്ഘാടനം ചെയ്തു. ചാത്തന്നൂർ തിരുമുക്കിലെ അശാസ്ത്രീയ അടിപ്പാത പുനർനിർമിക്കുന്നതു വരെ ശക്തമായ പ്രതിഷേധ പരിപാടികൾ തുടരുമെന്ന് ഉദ്ഘാടക പ്രസംഗത്തിൽ അദ്ദേഹം പറഞ്ഞു.വൈസ് പ്രസിഡന്‍റ് ഒ.മഹേശ്വരി അധ്യക്ഷയായിരുന്നു. പഞ്ചായത്ത് അംഗങ്ങളായ ടി.ദിജു , ടി.എം.ഇക്ബാൽ, ആർ.സന്തോഷ് ,ബ്ലോക്ക് പഞ്ചായത്ത് മുൻ പ്രസിഡന്‍റ് എൻ.സദാനന്ദൻ പിള്ള, പി.കെ.വിജയനാഥ് ,ചാത്തന്നൂർ വികസന സമിതി ചെയർമാൻ ജി.രാജശേഖരൻ ,വികസന സമിതിയുടെ സമരസമിതി കൺവീനർ കെ.കെ.നിസാർ, ജി.പി.രാജേഷ് എന്നിവർ പ്രസംഗിച്ചു. രണ്ടാം ദിവസമായ ഇന്ന് ചാത്തന്നൂർ വികസന സമിതിധർണ നടത്തും. രാവിലെ ആരംഭിക്കുന്ന ധർണ ഇത്തിക്കര ബ്ലോക്ക് പഞ്ചായത്ത് പ്രസിഡന്‍റ് എം.കെ.ശ്രീകുമാർ ഉദ്ഘാടനം ചെയ്യും. പ്രമുഖ സാംസ്കാരിക പ്രവർത്തകൻ ആശ്രാമം ഭാസി, ടി.ദിജു,വി.സണ്ണി, ബിജൂ വിശ്വരാജൻ, എസ്.വി.അനിത്കുമാർ,ഷാലു വി.ദാസ് ,എൻ.സദാനന്ദൻ പിള്ള തുടങ്ങിയവർ പങ്കെടുക്കും.

വാക്കുതർക്കം; ദമ്പതികള്‍ക്ക് വെട്ടേറ്റു

ചവറ : ബന്ധുക്കൾ തമ്മിലുണ്ടായ വാക്കുതർക്കത്തെ തുടർന്ന് ഭാര്യക്കും ഭർത്താവിനും വെട്ടേറ്റു. തേവലക്കര പുലിക്കുളത്ത് വീട്ടിൽ രമണൻ, ലക്ഷ്മി എന്നിവർക്കാണ് പരിക്കേറ്റത്. സംഭവത്തിൽ പുലിക്കുളത്ത് വീട്ടിൽ അജയനെ (41) പോലീസ് പിടികൂടി. കഴിഞ്ഞ ദിവസം രാത്രി ഒന്‍പതോടെയാണ് സംഭവം. മുൻ വൈരാഗ്യം മൂലം അജയന്‍ രാത്രി വീട്ടിലെത്തി മുറ്റത്ത് നിന്നിരുന്ന രമണനെ അസഭ്യം പറഞ്ഞ് കൈയിൽ കരുതിയിരുന്ന വെട്ടുകത്തി ഉപയോഗിച്ച് തലയിലും മുതുകത്തും വെട്ടി പരിക്കേൽപ്പിച്ചു. ഇത് കണ്ട് തടസം പിടിക്കാനെത്തിയ രമണന്‍റെഭാര്യ ലക്ഷ്മിയുടെതലയ്ക്ക് വെട്ടി പരിക്കേൽപ്പിക്കുകയായിരുന്നു. ഇരുവരും വണ്ടാനം മെഡിക്കൽ കോളജ് ആശുപത്രിയിൽ ചികിത്സയിലാണ്. ലക്ഷ്മിയുടെ പരിക്ക് ഗുരുതരമാണെന്ന് പോലീസ് അറിയിച്ചു.

എച്ച്ഐവി ബാധിതരായ അമ്മയ്ക്കും മകനും നടവഴി അനുവദിക്കും: കളക്്‌ടർ

കൊല്ലം : എച്ച്ഐവി ബാധിതരായ അമ്മയ്ക്കും മകനും സഞ്ചരിക്കാൻ നടവഴി അനുവദിക്കുമെ ന്ന് ജില്ലാ കളക്‌ടർ മനുഷ്യാവകാശ കമ്മീഷനെ അറിയിച്ചു. തന്‍റെ വീട്ടിൽ നിന്നും മെയിൻ റോഡിലേക്കുള്ള വഴി അയൽവാസി കൈയേറി ഇരുമ്പ് നെറ്റ് കെട്ടി തടസപ്പെടുത്തിയെന്ന് ആരോപിച്ച് കൊട്ടാരക്കര നെടുവത്തുർ സ്വദേശിനി സമർപ്പിച്ച പരാതിയിൽ നടപടിയെടുക്കാൻ കമ്മീഷൻ അംഗം വി. ഗീത ജില്ലാ കളക്ടർക്ക് നിർദേശം നൽകിയിരുന്നു. ഉത്തരവിന്‍റെ അടിസ്ഥാനത്തിൽ കളക്്‌ടർ സമർപ്പിച്ച റിപ്പോർട്ടിലാണ് ഇക്കാര്യമുള്ളത്. പെട്ടെന്ന് അസ്വസ്ഥതയുണ്ടാവുന്ന തങ്ങൾക്ക് ആശുപത്രിയിൽ പോകാൻ വഴി വേണമെന്നാണ് പരാതിക്കാരുടെ ആവശ്യം. കുടുംബ ഓഹരിയായി ലഭിച്ച സ്ഥലത്താണ് എതിർകക്ഷി ഗേറ്റ് സ്ഥാപിച്ചതെന്നും അവർ ഒരു മീറ്റർ വഴി പരാതിക്കാരിക്ക് വിട്ടുനൽകിയിട്ടുണ്ടെന്നും റിപ്പോർട്ടിൽ പറയുന്നു. വഴി സംബന്ധിച്ച് കൊട്ടാരക്കര മുൻസിഫ് കോടതിയിൽ കേസ് നിലവിലുണ്ടെന്നും കളക്‌ടർ അറിയിച്ചു. കോടതിയിൽ കേസ് നിലനിൽക്കുന്നതിനാൽ കമ്മീഷൻ പരാതി തീർപ്പാക്കി.

വിളക്കുപാറ ചന്തയിൽ പഴകിയ മീന്‍ വില്‍ക്കുന്നതായി പരാതി

അഞ്ചല്‍ : ഏരൂര്‍ പഞ്ചായത്തിലെ വിളക്കുപാറ ചന്തയിൽ പഴകിയ മീന്‍ വില്‍ക്കുന്നതായി പരാതി .പരാതി വ്യാപകമായതോടെ വാര്‍ഡ് അംഗവും പഞ്ചായത്ത് സ്ഥിരം സമിതി അധ്യക്ഷനുമായ ഷൈന്‍ ബാബുവിന്‍റെ നേതൃത്വത്തിലുള്ള സംഘം ചന്തയില്‍ എത്തി മീന്‍ വില്പനക്കാര്‍ക്ക് താക്കീത് നല്‍കിയിട്ടുണ്ട്. ഞായറാഴ്ച ദിവസമാണ് വിളക്കുപാറയില്‍ ചന്ത പ്രവര്‍ത്തിക്കുന്നത്. കഴിഞ്ഞ ഞായറാഴ്ച ഇവിടെ നിന്നും വാങ്ങിയ മീനില്‍ പുഴക്കളെ കാണുകയും ദുര്‍ഗന്ധം അനുഭവപ്പെടുകയും ചെയ്തതോടെയാണ് പഞ്ചായത്ത് അധികൃതര്‍ക്ക് നാട്ടുകാര്‍ പരാതി നല്‍കിയത്. തുടര്‍ന്നു വിവരം ഷൈന്‍ ബാബു പഞ്ചായത്ത് കമ്മിറ്റിയില്‍ അവതരിപ്പിക്കുകയായിരുന്നു. ഇത്തരക്കാര്‍ക്കെതിരെ കര്‍ശന നടപടി സ്വീകരിക്കണമെന്നു പഞ്ചായത്ത് കമ്മിറ്റി തീരുമാനം കൈക്കൊള്ളുകയും ചെയ്തു. ഇതിന്‍റെ അടിസ്ഥാനത്തില്‍ ഭക്ഷ്യ സുരക്ഷാ വകുപ്പ് അധികൃതര്‍ക്കും വിവരം കൈമാറിയിരുന്നു. എന്നാല്‍ സംഭവത്തില്‍ ഇതുവരെ അന്വേഷണത്തിനോ പരിശോധനക്കോ ഭക്ഷ്യ സുരക്ഷാ വകുപ്പ് നടപടിസ്വീകരിച്ചിട്ടില്ല. ഇത് വലിയ പ്രതിഷേധത്തിന് ഇടയാക്കിയിരിക്കുകയാണ്. ഇനിയും നടപടി വൈകിയാല്‍ ശക്തമായ സമരം സംഘടിപ്പിക്കുമെന്ന് പ്രദേശത്തെ ഡിവൈഎഫ്ഐ നേതൃത്വം വ്യക്തമാക്കി.

സ്നേഹസ്പർശം പദ്ധതി വിതരണം

പരവൂർ: വ്യാപാരി വ്യവസായി ഏകോപനസമിതി കൊല്ലം ജില്ലാ കമ്മറ്റിയുടെ നേതൃത്വത്തിൽ നടന്നുവരുന്ന സ്നേഹസ്‌പർശം വ്യാപാരി കുടുംബ സുരക്ഷാപദ്ധതിയുടെ പതിനേഴാംഘട്ട വിതരണം പരവൂരിൽ നടന്നു. ജില്ലാ പ്രസിഡന്‍റ് എസ്. ദേവരാജൻ അധ്യക്ഷത വഹിച്ചു. സമ്മേളനം ജി. എസ്. ജയലാൽ എം എൽ എ ഉദ്ഘാടനം ചെയ്തു. ജില്ലാ ജനറൽ സെക്രട്ടറി ജോജോ .കെ. എബ്രഹാം മുഖ്യപ്രഭാഷണം നടത്തി. പരവൂർ നഗരസഭ ചെയർ പേഴ്‌സൺ പി.ശ്രീജ മരണാനന്തര കുടുംബസഹായം വിതരണം നടത്തി. 10 ലക്ഷം രൂപ വീതം ജില്ലയിൽ മരണപ്പെട്ട അഞ്ചു വ്യാപാരികളുടെ കുടുംബാംഗങ്ങൾക്കാണ് സഹായധനമായി നൽകിയത്. നാളിതുവരെ 85 കുടുംബങ്ങൾക്കായി എട്ടരക്കോടി രൂപയാണ് വ്യാപാരി വ്യവസായി ഏകോപനസമിതി വിതരണം നടത്തിയിട്ടുള്ളത്. ജില്ലാ ട്രഷറർ കബീർ, പരവൂർ മർച്ചന്‍റ്സ് അസോസിയേഷൻ യൂണിറ്റ് പ്രസിഡന്‍റ് എം.സഫീർ, ജനറൽ സെക്രട്ടറി ടി.എസ്. ലൗലി, ട്രഷറർ ബി. രാജീവ്, പ്രസിഡന്‍റ് മിഥിലാജ്, എസ്. അശോക് കുമാർ, രാജൻ കുറുപ്പ്, നഗരസഭ കൗൺസിലർ മാരായ എസ്. ശ്രീലാൽ, ആർ.എസ്. സുധീർകുമാർ തുടങ്ങിയവർ പ്രസംഗിച്ചു.

അവകാശ നിഷേധത്തിനെതിരേ ദ്വിദിന സത്യഗ്രഹം

കൊല്ലം : അവകാശങ്ങളും ആനുകൂല്യങ്ങളും തുടർച്ചയായി കവർന്നെടുക്കുന്ന സംസ്ഥാന സർക്കാരിന്‍റെ നിലപാടിൽ പ്രതിഷേധമറിയിച്ചും പെൻഷൻ പരിഷ്കരണം ആവശ്യപ്പെട്ടും കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ ജില്ലാ കമ്മിറ്റി നാളെയും മറ്റന്നാളും കളക്‌ടറേറ്റിന് മുന്നിൽ ദ്വിദിന സത്യഗ്രഹം സംഘടിപ്പിക്കും. പ്രക്ഷോഭ ഭാഗമായി ജില്ലയിലെ 15 ട്രഷറികളിലും 85 മണ്ഡലം കേന്ദ്രങ്ങളിലും പ്രചരണ യോഗങ്ങൾ നടത്തി.ജില്ലയിലെ 11 നിയോജക മണ്ഡലങ്ങളിൽ നിന്നുള്ള വനിതകൾ ഉൾപ്പെടെയുള്ള ആയിരത്തോളം പെൻഷൻകാർ രണ്ടു ദിവസമായി നടത്തുന്ന സത്യഗ്രഹത്തിൽ പങ്കെടുക്കുമെന്ന് ജില്ലാ പ്രസിഡന്‍റ് വാര്യത്ത് മോഹൻ കുമാർ അറിയിച്ചു. സത്യഗ്രഹം ഒന്നാം ദിവസം ഡിസിസി പ്രസിഡന്‍റ് പി. രാജേന്ദ്രപ്രസാദും രണ്ടാം ദിവസം കെപിസിസി രാഷ്്‌ട്രീയകാര്യ സമിതിയംഗം അഡ്വ. ബിന്ദു കൃഷ്ണയും ഉദ്ഘാടനം ചെയ്യും. സംസ്ഥാന -ജില്ലാ ഭാരവാഹികൾ പങ്കെടുക്കും.

വ്യാസജയന്തിയും കുടുംബസംഗമവും നടത്തി

കരുനാഗപ്പള്ളി :അഖിലകേരള ധീവര സഭ ടൗൺ കരയോഗത്തിന്‍റെനേതൃത്വത്തിൽ നടത്തിയ കുടുംബയോഗവുംവ്യാസ ജയന്തിആഘോഷവും സി .ആർ.മഹേഷ് എംഎൽഎ ഉദ്ഘാടനം ചെയ്തു. ചടങ്ങിൽ ടൗൺ പ്രസിഡന്‍റ് ടി .ഓമനക്കുട്ടൻഅധ്യക്ഷത വഹിച്ചു. സാമുദായത്തിൽ നിന്നുംവിവിധ മേഖലകളിൽമികവ് കാട്ടിയ സംസ്ഥാന ജൈവവൈവിധ്യ ബോർഡ് ചെയർമാൻ ഡോ.അനിൽകുമാർ, എസ്പിമാരായ ഉജ്വൽകുമാർ,അമ്മിണിക്കുട്ടൻ ,ഏറ്റവും നല്ല വില്ലേജ് ഓഫീസറായി തെരഞ്ഞെടുത്ത ആർ.സുഭാഷ്, ഡോക്ടറേറ്റ് നേടിയ അഞ്ജലി മോഹൻ ,എപിപി രേവതി, ജൻ ഔഷധി ശ്രേഷ്ഠ അവാർഡ് കരസ്ഥമാക്കിയ സുനിൽകുമാർ എന്നിവരെ മുൻ വ്യവസായ ഡയറക്ടർ ഡി .ചിദംമ്പരൻആദരിച്ചു. വിദ്യാഭ്യാസ അവാർഡ് വിതരണം ഡോ. പദ്മകുമാർ നിർവഹിച്ചു.റിട്ട.ജഡ്ജി എസ് .സോമൻ, വേദവ്യാസ ഗ്രന്ഥശാല പ്രസിഡന്‍റ് എൽ. സ്കന്ദ ദാസ്, ടൗൺ കരയോഗം സെക്രട്ടറി ഡി .ലീലാകൃഷ്ണൻ , ട്രഷറർ ആർ.രവീന്ദ്രൻ എന്നിവർ പ്രസംഗിച്ചു.

കേരള പ്ലാന്‍റേഷൻ വർക്കേഴ്‌സ് കോൺഗ്രസ് ധർണ നടത്തി

കുളത്തൂപ്പുഴ : ഇടക്കാല ആശ്വാസം ശമ്പളത്തിൽ നിന്നും പിടിക്കാൻ പാടില്ല എന്ന് ആവശ്യപ്പെട്ടു കൊണ്ട് കുളത്തൂപ്പുഴ ആർ പി എൽ ഓഫീസിന്‍റെ മുൻപിൽ കേരള പ്ലാന്‍റേഷൻ വർക്കേഴ്‌സ് കോൺഗ്രസ് - ഐഎൻടിയുസിഐയുടെ ആഭിമുഖ്യത്തിൽ തൊഴിലാളികൾ ധർണ നടത്തി. തൊഴിലാളികൾക്ക് നൽകേണ്ട ഇടക്കാല ആശ്വാസത്തിൽ നിന്നും തുക തിരിച്ചു പിടിക്കാനുള്ള മാനേജ്‌മെന്‍റ് തീരുമാനം ഉപേക്ഷിക്കണമെന്നു ആവശ്യപ്പെട്ടായിരുന്നു ധർണ. ഐഎൻടിയുസി പുനലൂർ നിയോജക മണ്ഡലം കമ്മിറ്റി പ്രസിഡന്‍റ് സാബു ഏബ്രഹാം ധർണ ഉദ്ഘാടനം ചെയ്തു. ജെ.ഗോപാൽ, കുമാരവേൽ, ഐ.ഗോപാൽ, അയ്യപ്പൻ, മഹേന്ദ്രൻ, അണ്ണാമലൈ, ഇന്ദ്രൻ, രാജഗോപാൽ, എ. എസ്.നിസാം എന്നിവർ പ്രസംഗിച്ചു.

️എസ്പിസി സ്ഥാപക ദിനാഘോഷം നടത്തി

ചവറ : എസ്ബി വിഎസ് ഗവ. എച്ച്എസ്എസ് പന്മന മനയിൽ സ്കൂളിൽ എസ്പിസി യുടെ സ്ഥാപക ദിനാഘോഷം നടത്തി. ജില്ലാ ഡപ്യൂട്ടി കമ്മീഷണർ എക്സൈസ് നൗഷാദ് മുഖ്യാതിഥിയായി ഗാർഡ് ഓഫ് ഹോണർ സ്വീകരിച്ചു. തുടർന്ന് നടന്ന യോഗത്തിൽ പിടിഎ പ്രസിഡന്‍റ് എം. അജി അധ്യക്ഷനായി.എസ്എംസി ചെയർമാൻ പന്മന മഞ്ചേഷ്, സ്കൂൾ എച്ച്എം ആർ. ഗംഗാദേവി, പിടിഎ വൈസ് പ്രസിഡന്‍റ് ആനന്ദ് കുമാർ, അധ്യാപകരായ സി.വി. മായ, ഷൈൻകുമാർ, ജസീല എന്നിവർ പ്രസംഗിച്ചു.

മെറിറ്റ് അവാർഡ് സംഘടിപ്പിച്ചു

ചവറ : മടപ്പള്ളി അക്ഷരപ്പുര ഗ്രന്ഥശാല മെറിറ്റ് അവാർഡ് സംഘടിപ്പിച്ചു.സുജിത് വിജയൻ പിള്ള എംഎൽ എ ഉദ്ഘാടനം ചെയ്തു. എസ്എസ്എൽസി, പ്ലസ്ടു പരീക്ഷയിൽ ഫുൾ എ പ്ലസ് നേടിയ വിദ്യാർഥികൾക്കും കരാട്ടേയിൽ ബ്ലാക്ക് ബെൽറ്റ്, കളരി പയറ്റിൽ സ്വർണ മെഡൽ നേടിയ ബാലപ്രതിഭകൾ, സംസ്ഥാന സർക്കാരിന്‍റെമികച്ച വില്ലേജ് ഓഫീസർ അവാർഡ് നേടിയ പടിഞ്ഞാറേ കല്ലട വില്ലേജ് ഓഫീസർ അജയകുമാർ എന്നിവരേയും ചടങ്ങിൽ ആദരിച്ചു. ഗ്രന്ഥശാലാ പ്രസിഡന്‍റ് ആർ .അരവിന്ദാക്ഷൻ അധ്യക്ഷനായി. സെക്രട്ടറി ബി .അനിൽകുമാർ, താലൂക്ക് കമ്മിറ്റി അംഗം ജി .ആർ . ഗീത, ബാലവേദി സെക്രട്ടറി സഹനസ് ഫാത്തിമ, ഗ്രന്ഥശാല ജോയിന്‍റ് സെക്രട്ടറി വസുദേവ് എന്നിവർ പ്രസംഗിച്ചു.

കാത്തിരിപ്പ് കേന്ദ്രമില്ല: ബിജെപി പ്രതിഷേധിച്ചു

അഞ്ചല്‍ : വര്‍ഷങ്ങളുടെ കാത്തിരിപ്പിനൊടുവിലാണ് അഞ്ചല്‍ ആര്‍ഒ ജംഗ്ഷനില്‍ അപകടാവസ്ഥയിലായിരുന്ന പഞ്ചായത്ത് ഷോപ്പിംഗ് കോംപ്ലക്സ് പൊളിച്ചുനീക്കിയത്. ഇതോടെ ഇവിടെ കാത്തിരിപ്പ് കേന്ദ്രം ഇല്ലാതായി മാറി. പകരം താത്കാലിക സംവിധാനം ഒരുക്കുമെന്ന് പഞ്ചായത്ത് അധികൃതര്‍ അറിയിച്ചിരുന്നുവെങ്കിലും ഇതിനുള്ള നടപടികള്‍ വൈകുകയാണ്. ഇതോടെ ഇവിടെ ബസ് കാത്ത് നില്‍ക്കുന്ന വിദ്യാര്‍ഥികളും മുതിര്‍ന്നവരും ചെറിയ കുട്ടികളുമായി എത്തുന്നവര്‍ ഉള്‍പ്പടെ വലിയ ദുരിതം നേരിടുകയാണ്. കാത്തിരിപ്പ് കേന്ദ്രം നിര്‍മിച്ചു ആഴ്ചകള്‍ പിന്നിടുമ്പോഴും അതിനു മേല്‍ക്കൂര സ്ഥാപിക്കാന്‍ പഞ്ചായത്ത് അധികൃതര്‍ തയാറായിട്ടില്ല. ഇതോടെയാണ് പഞ്ചായത്ത് അധികൃതരുടെ അനാസ്ഥയില്‍ ബിജെപി പ്രതിഷേധവുമായി രംഗത്തെത്തിയത്. പ്രതിഷേധ ഭാഗമായി കാത്തിരിപ്പ് കേന്ദ്രത്തിന് പ്ലാസ്റ്റിക് ടാര്‍പ്പ ഉപയോഗിച്ച് താത്കാലിക സംവിധാനം ഒരുക്കിയിരിക്കുകയാണ് ബിജെപി. പ്രതീകാത്മകമായി മാത്രമാണ് ഇത്തരത്തില്‍ ഒരു സൗകര്യമൊരുക്കിയതെന്നും കാത്തിരിപ്പ് കേന്ദ്രത്തിന്‍റെ നിര്‍മാണം ഉടന്‍ പൂര്‍ത്തിയാക്കിയില്ലെങ്കില്‍ ശക്തമായ സമരം സംഘടിപ്പിക്കുമെന്നും ബിജെപി ഈസ്റ്റ് ജില്ലാ വൈസ് പ്രസിഡന്‍റ് ഉമേഷ് ബാബു പറഞ്ഞു. നേതാക്കളായ ആര്‍.ബിജു, ജി. രതീഷ്കുമാര്‍, കൃഷ്ണകുമാര്‍, ബിജു, സുധീഷ്കുമാര്‍, സുഭാഷ് എന്നിവര്‍ നേതൃത്വം നല്‍കി .

തെന്മലയില്‍ വനപാലകർ അവകാശ സംരക്ഷണ സമരം സംഘടിപ്പിച്ചു

തെന്മല : വിവിധ ആവശ്യങ്ങള്‍ ഉന്നയിച്ചു കേരള ഫോറസ്റ്റ് പ്രൊട്ടക്റ്റീവ് സ്റ്റാഫ് അസോസിയേഷൻ ജില്ലാ കമ്മിറ്റിയുടെ നേതൃത്വത്തിൽ തെന്മലയില്‍ അവകാശ സംരക്ഷണ സമരം സംഘടിപ്പിച്ചു. ഡ്യൂട്ടി റസ്റ്റ് ഉത്തരവ് പുനസ്ഥാപിക്കുക,തടസപ്പെട്ട ബിഎഫ്ഒ പ്രമോഷൻ പുനരാരംഭിക്കുക, വാച്ചർ തസ്തികയുടെ പേര് കാലാനുസൃതമായി പരിഷ്കരിക്കുക എന്നീ ആവശ്യങ്ങൾ ഉന്നയിച്ചുകൊണ്ടായിരുന്നു തെന്മല ഡിവിഷണല്‍ ഫോറസ്റ്റ് ഓഫീസിന് മുന്നില്‍ സമരം സംഘടിപ്പിച്ചത്. ഡിപ്പോ ജംഗ്ഷനിൽ നിന്നും തെന്മല ടൗൺ ചുറ്റിയെത്തിയ പ്രകടം ഡിഎഫ്ഒ ഓഫീസിന് മുമ്പില്‍ സമാപിച്ചു. തുടര്‍ന്നു നടന്ന അവകാശ സംരക്ഷണ സമ്മേളനം കേരള ഫോറസ്റ്റ് പ്രൊട്ടക്‌ടീവ് സ്റ്റാഫ് അസോസിയേഷൻ സംസ്ഥാന പ്രസിഡന്‍റ് കെ.സേതുമാധവൻ ഉദ്ഘാടനം ചെയ്തു. ജില്ലാ പ്രസിഡന്‍റ് ഷാജൻ തമ്പി അധ്യക്ഷത വഹിച്ചു. ജില്ലാ സെക്രട്ടറി എം .എൻ. ലാൽ, എൻജിഒ അസോസിയേഷൻ സംസ്ഥാന സെക്രട്ടറി പ്രദീപ്, യൂണിയൽ കൊല്ലം ജില്ലാ വൈസ് പ്രസിഡന്‍റ് എം.എസ് .ബിജു, ആർ.സി .അരുൺ ,ആർ .സജീവ്, പി.എസ് .ബിനു, ആര്‍. ബിനിൽ, വിഷ്ണു വിജയൻ ,എന്‍.കെ അനൂപ് എന്നിവർ പ്രസംഗിച്ചു

ലഹരിവിരുദ്ധ വിദ്യാര്‍ഥി ജാഗ്രതാസദസ് സംഘടിപ്പിച്ചു

കൊല്ലം : കെസിബിസി മദ്യവിരുദ്ധ സമിതി കൊല്ലം രൂപത കമ്മിറ്റി വിമുക്തി ദര്‍ശന്‍ പരിപാടിയുടെ ഭാഗമായി ലഹരിവിരുദ്ധ വിദ്യാര്‍ഥി ജാഗ്രത സദസ് സംഘടിപ്പിച്ചു. ലഹരി വിപത്തിനെതിരെ യുവതലമുറയ്ക്ക് ബോധ്യമുണര്‍ത്തുവാനും കലാലയങ്ങളുടെ പരിസരങ്ങളിലെ ലഹരി വിപണതന്ത്രങ്ങള്‍ക്കെതിരെ പ്രതിരോധം തീര്‍ക്കാനും ലക്ഷ്യമാക്കിയാണ് ജാഗ്രതാ സദസ് സംഘടിപ്പിച്ചത്. ഇതിന്‍റെ ഭാഗമായി കുട്ടികളുമായി സംവാദം, ബോധവത്കരണ ക്ലാസുകള്‍, ലഹരിവിരുദ്ധ പ്രതിജ്ഞ എന്നിവയും നടത്തി. മേയര്‍ ഹണി ബെഞ്ചമിന്‍ ജാഗ്രതാ സദസ് ഉദ്ഘാടനം ചെയ്തു. സമിതി രൂപത ഡയറക്ടര്‍ ഫാ. മില്‍ട്ടണ്‍ ജോര്‍ജ് അധ്യക്ഷത വഹിച്ചു. പ്രസിഡന്‍റ് യോഹന്നാന്‍ ആന്‍റണി,പ്രിന്‍സിപ്പല്‍ സിസ്റ്റര്‍ ആഞ്ജലിനാ മൈക്കിള്‍ ,ജനറല്‍ സെക്രട്ടറി എ. ജെ. ഡിക്രൂസ് എന്നിവര്‍ പ്രസംഗിച്ചു. അധ്യാപക രക്ഷകര്‍ത്തൃ സംഘടനാ ഭാരവാഹികളും വിദ്യാര്‍ഥി പ്രതിനിധികളും സദസില്‍ പങ്കെടുത്തു.

എംസി റോഡിൽ കാർ നിയന്ത്രണം വിട്ടുമറിഞ്ഞ് യുവാവ് മരിച്ചു

കൊട്ടാരക്കര : എംസി റോഡിൽ ഇഞ്ചക്കാട്ട് നിയന്ത്രണം വിട്ട കാർ മറിഞ്ഞ് യുവാവ് മരിച്ചു. പുത്തൂർ വൈശാഖത്തിൽ അനു വൈശാഖ് (26) ആണ് മരിച്ചത്. ഇന്നലെ പുലർച്ചെയോടെയാണ് അപകടം. കൊട്ടാരക്കര ഭാഗത്തുനിന്നും അടൂർ ഭാഗത്തേയ്ക്ക് പോകും വഴി എംസി റോഡിൽ ഇഞ്ചക്കാട് കോടിയാട്ട് ക്ഷേത്രത്തിന് സമീപം നിന്ന വൈദ്യുത പോസ്റ്റുകളും, ക്ഷേത്രത്തിന്‍റെ ബോർഡുകളും ഇടിച്ച് തകർത്ത് പുലമൺ തോട്ടിലേയ്ക്ക് കാർ മറിയുകയായിരുന്നു. നാട്ടുകാരും, വഴിയാത്രക്കാരും ചേർന്ന് കാർ വെട്ടിപ്പൊളിച്ചാണ് വൈശാഖിനെ പുറത്തെടുത്തത്. തുടർന്ന് കൊട്ടാരക്കര താലൂക്ക്ആശുപത്രിയിൽ എത്തിച്ചെങ്കിലുംജീവൻ രക്ഷിക്കാനായില്ല. വൈശാഖ് ചാത്തന്നൂരിലെ സ്വകാര്യസ്ഥാപനത്തിൽ മാർക്കറ്റിംഗ് ഏജന്‍റായി ജോലി നോക്കുകയായിരുന്നു. മാതാവ്. ഷൈലജ.

വിദേശത്ത് മരണമടഞ്ഞ യുവാവിന്‍റെ സംസ്കാരം ഇന്ന്

ചവറ: അബുദാബിയിൽ അന്തരിച്ച യുവാവിന്‍റെ മൃതദേഹം ഇന്ന് നാട്ടിലെത്തിക്കും. ഉറക്കത്തിൽ ഹൃദയാഘാതം മൂലമാണ് യുവാവ് മരണമടഞ്ഞതെന്ന വിവരമാണ് ബന്ധുക്കൾക്ക് ലഭിച്ചത്. നീണ്ടകര പല്ലാടിക്കൽ കിഴക്കതിൽ പരേതരായ വിജയന്‍റെയും തങ്കമണിയുടെയും മകൻ സജു വിജയന്‍റെ(45) മൃതദേഹം ആണ് ഇന്ന് രാവിലെ 11 ഓടെ വീട്ടിലെത്തിക്കുക. സംസ്കാരം വിട്ടുവളപ്പിൽനടക്കും. ഭാര്യ: സുജ. സഞ്ചയനം ശനിയാഴ്ച രാവിലെ ഏഴിന്.

കടവരാന്തയിൽ വയോധികൻ മരിച്ചനിലയിൽ

പുനലൂർ : കടവരാന്തയിൽ വയോധികനെ മരിച്ച നിലയിൽ കണ്ടെത്തി. വാളക്കോട് വാർഡിൽ കുടമുക്ക് ജംഗ്ഷനിലെ കട വരാന്തയിലാണ് കഴിഞ്ഞദിവസം പുലർച്ചെ മൃതദേഹം പ്രദേശവാസികൾ കണ്ടത്. ഇയാൾ വർഷങ്ങളായി ഐക്കരക്കോണം പ്രദേശത്ത് വിവിധ ജോലികൾ ചെയ്ത് ഉപജീവനം നടത്തിവരുകയായിരുന്നു.ഗോപാലൻ, പാരിപ്പള്ളി എന്നീ പേരുകളിലാണ് ഇയാളെ അറിയപ്പെട്ടിരുന്നത്. പുനലൂർ പോലീസ് എത്തി മേൽനടപടികൾ സ്വീകരിച്ച് മൃതദേഹം പുനലൂർ താലൂക്ക് ആശുപത്രി മോർച്ചറിയിലേക്ക് മാറ്റി.

ദൃശ്യവിരുന്നൊരുക്കി പ്രാർഥനാഗാനം

കുണ്ടറ : ബഥനിസന്യാസിനി സമൂഹത്തിന്‍റെ സുവർണജൂബിലി ആഘോഷങ്ങളോടനുബന്ധിച്ച് നടന്ന പരിപാടിയിൽ കുണ്ടറ ലിറ്റിൽ ഫ്ലവർ ഇംഗ്ലീഷ് മീഡിയം ഹൈസ്കൂളിലെ കുട്ടികൾ അവതരിപ്പിച്ച പ്രാർഥനാ ഗാനം ദൃശ്യവിരുന്നൊരുക്കി. സിസ്റ്റർ പൂർണിമ എസ്ഐസി യുടെ നേതൃത്വത്തിൽ സ്കൂൾ കുട്ടികളായ എയ്ഞ്ചൽ മരിയ റെബിൻ, ആത്മജ, നേഹ, ആരാധിക, ആദിലക്ഷ്മി, കൃഷ്ണേന്ദു, പവിത്ര, ശ്രീബാല എന്നിവരാണ് പ്രാർഥനാഗാനം ആലപിച്ചത്.

ഭരണഘടന സംരക്ഷണ പ്രാർഥന നടത്തി വിശ്വാസി സംഗമം

വേങ്ങൂർ : ആയുർ വേങ്ങൂർ സെന്‍റ് മേരീസ്‌ മലങ്കര കത്തോലിക്കാ പള്ളിയിലെ സൺ‌ഡേസ്കൂൾ ദിനാഘോഷം പ്രാർഥനാ സംഗമമായി. ഭരണഘടന ആനുശാസിക്കുന്ന സംരക്ഷണം ക്രിസ്ത്യൻ മതന്യൂനപക്ഷങ്ങൾക്ക് ലഭ്യമാകുന്നുവെന്ന് ഭരണാധികാരികൾ ഉറപ്പാക്കണമെന്ന് വിശ്വാസ പരിശീലനദിനം ഉദ്ഘാടനം ചെയ്തു. ഫാ .തോമസ് മുകളുവിള പറഞ്ഞു. സൺ‌ഡേ സ്കൂൾ ഹെഡ്മാസ്റ്റർ ഷാജു തേക്കിൻകാട്ടിൽ അധ്യക്ഷനായിരുന്നു. ഇടവക ട്രസ്റ്റി ജേക്കബ് തൈക്കുളങ്ങര, അൻസി അച്ചൻകുഞ്ഞ്, അന്ന മറിയം ,ഷാജി എന്നിവർ നേതൃത്വം നൽകി.

സിപിഐ നേതാക്കളും പ്രവർത്തകരും കോൺഗ്രസിൽ ചേർന്നു

കുണ്ടറ : എഴുകോൺ, വെളിയം എന്നിവിടങ്ങളിലെ സി പി ഐ നേതാക്കളും നിരവധി പ്രവർത്തകരും കോൺഗ്രസിൽ ചേർന്നു. സി പിഐ നെടുവത്തൂർ മണ്ഡലം കമ്മിറ്റി പരിധിയിലെ പാർട്ടി നേതൃത്വത്തിന്‍റെ സ്വജനപക്ഷപാതവും വിഭാഗീയതയും ആരോപിച്ചാണ് എഴുകോൺ, വെളിയം എന്നിവിടങ്ങളിൽ ഉള്ള സിപിഐ പ്രവർത്തകർ കോൺഗ്രസിൽ പ്രവർത്തിക്കാൻ തീരുമാനിച്ചിരിക്കുന്നത്.കോൺഗ്രസ് വർക്കിംഗ് കമ്മിറ്റിയംഗം കൊടിക്കുന്നിൽ സുരേഷ് എംപി ഇവർക്ക് കോൺഗ്രസ് അംഗത്വം നൽകി. ഡിസിസി പ്രസിഡന്‍റ് പി. രാജേന്ദ്ര പ്രസാദിന്‍റെ അധ്യക്ഷതയിൽ ചേർന്ന യോഗത്തിൽ സി പി ഐ നെടുവത്തൂർ മണ്ഡലം സെക്രട്ടറി എൻ. പങ്കജരാജൻ, എഴുകോൺ ലോക്കൽ കമ്മിറ്റിയംഗം കെ.കെ. അശോക് കുമാർ, എ ഐ വൈ എഫ് മണ്ഡലം വൈസ് പ്രസിഡന്‍റ്അഖിൽ മൊട്ടക്കുഴി, എഴുകോൺ ലോക്കൽ കമ്മിറ്റി അസി. സെക്രട്ടറി പ്രദീപ്, എൽ സി അംഗം മണിക്കുട്ടൻ, വിവിധ ഘടകങ്ങളിലെ ഭാരവാഹികളായ റീനമോൾ,പി.എസ്.ബിജു, കാഞ്ചന, മാത്യൂസ്, പോർഷെ, ഹരിദാസ്, അജിത് കുമാർ എന്നിവരോടൊപ്പം 50 ഓളം പാർട്ടി അനുഭാവികളാണ് കോൺഗ്രസിൽ ചേർന്നത്. കൊട്ടാരക്കര കോൺഗ്രസ് ഭവനിൽ നടന്ന യോഗത്തിൽ കെപിസിസി ജനറൽ സെക്രട്ടറിമാരായ പഴകുളം മധു, എം.എം. നസീർ, എഴുകോൺ നാരായണൻ, ഡി സി സി ഭാരവാഹികളായ പി.ഹരികുമാർ, അഡ്വ. സവിൻ സത്യൻ, സി. ആർ. നജീബ്, പാത്തല രാഘവൻ, ജയപ്രകാശ് നാരായണൻ, അഡ്വ. രതീഷ് കിളിത്തട്ടിൽ തുടങ്ങിയവർ പ്രസംഗിച്ചു.

ശൗചാലയം പൂട്ടിക്കെട്ടി; ജനം വലയുന്നു

പുനലൂർ: താലൂക്കാശുപത്രിയ്ക്കു മുന്നിലുളള പൊതു ശൗചാലയം പൂട്ടിയിരിക്കുന്നതിനാൽ രോഗികളും കൂട്ടിരിപ്പുകാരും വഴിയാത്രക്കാരും വരെ വലയുകയാണ്. താലൂക്കാശുപത്രിയ്ക്കു മുന്നിൽ റോഡു സൈഡിൽ കാണുന്ന ശൗചാലയമാണ് അടച്ചിട്ടിരിയ്ക്കുന്നത്. നൂറുകണക്കിന് വഴിയാത്രക്കാർക്ക് പ്രയോജനപ്രദമായിരുന്ന ശൗചാലയമാണ് പൂട്ടിയിരിക്കുന്നത്. ആശുപത്രിയിലെത്തുന്ന രോഗികളും കൂട്ടിരിപ്പുകാരും വഴിയാത്രക്കാരും വരെ ഇത് മൂലം ആശുപത്രിയ്ക്ക് ഉള്ളിലുള്ള ശൗചാലയങ്ങളെ ആശ്രയിക്കേണ്ടഅവസ്ഥയിലാണ്. വർഷങ്ങളായി നല്ല നിലയിൽ പ്രവർത്തിച്ചു വന്നിരുന്ന യാത്രക്കാരുടെ ആശ്രയമായിരുന്നു ഈ ശൗചാലയം. ഇതു വഴി ദിവസേന നൂറുകണക്കിന് യാത്രക്കാരാണ് കടന്നുപോകുന്നത്. അവർക്കെല്ലാം സഹായകമായിരുന്ന ശൗചാലയമാണ് യാതൊരു അറിയിപ്പും കൂടാതെ പൂട്ടിയത്. സംഭവത്തിൽ പ്രതിഷേധമുയർന്നിട്ടുണ്ട്. എന്നാൽ ബന്ധപ്പെട്ടവർ മൗനം പാലിക്കുകയാണ്.

വെള്ളക്കെട്ടാൽ പൊറുതിമുട്ടി രോഗികൾ

കൊട്ടാരക്കര : താലൂക്ക് ആശുപത്രിയിൽ ഹൈ ടെക് കെട്ടിടങ്ങൾ ഉയർന്ന് പൊങ്ങുമ്പോഴും ആശുപത്രിയുടെ പ്രവേശന കവാടത്തിലുള്ള റോഡിലെ വെള്ളക്കെട്ട് രോഗികളേയും ജീവനക്കാരേയും ദുരിതത്തിലാക്കുന്നു. ആശുപത്രിയിലേക്ക് രോഗികൾ നടന്നു വരുമ്പോഴാകും ചീറിപ്പാഞ്ഞു ആംബുലൻസ് കടന്ന് പോവുക. നടന്ന് പോകുന്നവരുടെ ദേഹത്തേയ്ക്ക് ചെളിവെള്ളം തെറിക്കുന്നതുമായി ബന്ധപ്പെട്ട് പരാതികളും വഴക്കും വാക്കേറ്റവും ആശുപത്രിയിൽ അതിനാൽ പതിവ് സംഭവമാണ്. അടുത്തടുത്തായി രണ്ട് കവാടങ്ങളാണ് ആശുപത്രിയ്ക്ക് ഉള്ളത്. അവിടേക്ക് എത്തുന്ന വാഹനങ്ങൾ തിരികെ പോകുന്നതിനായി കുറച്ചു നാൾ മുൻപ് ആശുപത്രി പരിസരത്തെ മതിൽ നീക്കം ചെയ്ത് റോഡ് നിർമിച്ചിരുന്നു. എന്നാൽ ഇത് വഴിവാഹനങ്ങൾ തിരിച്ചു വിടാൻ സെക്യൂരിറ്റി ജീവനക്കാർ ശ്രദ്ധിക്കാറില്ല. ചികിത്സയ്ക്കായി എത്തുന്നവരും ചികിത്സ നടത്തി മടങ്ങുന്നവരും അതിനാൽ ചെളിവെള്ളത്തിൽ കുളിക്കേണ്ട അവസ്ഥയാണ്. കഴിഞ്ഞ ദിവസം നടന്ന ആശുപത്രി വികസന സമിതിയിൽ ഇക്കാര്യം ചർച്ച ചെയ്തിരുന്നു. കൊട്ടാരക്കര നഗരസഭയുടെ സഹായത്താൽ ചെളിക്കുണ്ട് നിറഞ്ഞ ഭാഗത്തെ റോഡ് പുനർ നിർമിച്ച് ഇന്നത്തെ ദുരവസ്ഥ പരിഹരിക്കുമെന്നാണ് ഒടുവിൽ നൽകിയിട്ടുള്ള വാഗ്ദാനം.

കാടുകയറിയ വഴിയോര വിശ്രമകേന്ദ്രം

ചവറ: ലക്ഷങ്ങള്‍ ചെലവഴിച്ച് നിര്‍മിച്ച കേരള ടൂറിസം വകുപ്പിന്‍റെ വഴിയോര വിശ്രമ കേന്ദ്രത്തിന്‍റെ കെട്ടിടം തകര്‍ച്ചയുടെ വക്കില്‍. ചവറ കെഎംഎംഎല്‍ കമ്പനി സമീപം കോലം വാര്‍ഡിലാണ് ഈ വഴിയോര വിശ്രമകേന്ദ്രം സ്ഥിതി ചെയ്യുന്നത്. ദേശീയപാത വികസനവുമായി ബന്ധപ്പെട്ടു കുറച്ചു വര്‍ഷങ്ങള്‍ക്കു മുമ്പാണ് പൂട്ടിയത്. യാത്രക്കാര്‍ക്ക് ഏറെ പ്രയോജനം ചെയ്തിരുന്ന ഈ വിശ്രമ കേന്ദ്രം ബന്ധപ്പെട്ടവരുടെ അനാസ്ഥ മൂലം ബില്‍ഡിംഗ് തകര്‍ച്ചയുടെ വക്കിലായെന്ന് ജനം ആരോപിക്കുന്നു. ഷിബു ബേബി ജോണ്‍ എംഎല്‍എയാണ് ജന ഉപകാരപ്രദമായ ഈ പദ്ധതി ഇവിടെ കൊണ്ടുവന്നു നിര്‍മാണം ഭൂരിഭാഗവും പൂര്‍ത്തീകരിച്ചത്. എന്നാല്‍ തുടര്‍ന്നു വന്ന എംഎല്‍എ എന്‍.വിജയന്‍ പിള്ള പദ്ധതി പൂര്‍ത്തീകരിച്ച് 2018-ല്‍ വിനോദസഞ്ചാര മന്ത്രി ആയിരുന്ന കടകംപള്ളി സുരേന്ദ്രനെ കൊണ്ട് നാടിനായി തുറന്നു നല്‍കി. ഉദ്ഘാടനത്തിനു ശേഷവും കുറച്ചുനാള്‍ കെട്ടിടം പൂട്ടിക്കിടന്നിരുന്നു. കരാര്‍ വ്യവസ്ഥയില്‍ നടത്തിവന്ന ഈ സ്ഥാപനം പിന്നീട് നാഷണല്‍ ഹൈവേയുടെ വികസനത്തിന്‍റെ പേരില്‍ പൂട്ടി ഇടേണ്ടി വന്നു. ആരും തിരിഞ്ഞു നോക്കാത്തതിനാല്‍ ഈ കെട്ടിടം കാടുകയറി അധികൃതരുടെ വേണ്ടത്ര ശ്രദ്ധ ലഭിക്കാത്തതിനെ തുടർന്ന് ഇപ്പോൾ നശിച്ചുകൊണ്ടിരിക്കുകയാണ്. ദീര്‍ഘദൂര യാത്രക്കാര്‍ക്ക് ഉള്‍പ്പെടെ ഈ വിശ്രമ കേന്ദ്രം ഏറെ ഉപകാരപ്രദമായിരുന്നു. ഇതില്‍ സ്ഥാപിതമായ ടോയ്‌ലറ്റുകള്‍ വഴിയാത്രക്കാര്‍ക്ക് ഏറെ പ്രയോജനം ചെയ്തിരുന്നു. ചെറിയൊരു ബേക്കറി ഉള്‍പ്പെടെയായിരുന്നു നടന്നുവന്നിരുന്നത്. ഹരിപ്പാട് കഴിഞ്ഞാല്‍ കൊല്ലം ജില്ലയില്‍ ദേശീയപാതയോട് ചേര്‍ന്ന് ടൂറിസം വകുപ്പിന്‍റെ മേല്‍നോട്ടത്തില്‍ ഈയൊരു സ്ഥാപനം മാത്രമേ ഉള്ളൂ. ദേശീയപാത വികസനവുമായി ബന്ധപ്പെട്ട് കിട്ടിയ പണം ഉപയോഗിച്ച് ഇത് പുനര്‍ നിര്‍മിച്ചാല്‍ ജനങ്ങള്‍ക്ക് ഏറെ പ്രയോജനമാകും. ഏറെ ജനപ്രദമായ പദ്ധതികള്‍ക്ക് വേണ്ടത്ര ശ്രദ്ധ കൊടുക്കാത്തതിനാലാണ് ഇത്തരം പദ്ധതികള്‍ നാശത്തിന്‍റെ വക്കില്‍ എത്തുന്നതെന്ന് നാട്ടുകാര്‍ ആരോപിച്ചു. ജനപ്രതിനിധികള്‍ ഉള്‍പ്പെടെയുള്ളവര്‍ ഇടപെട്ട് ഈ കെട്ടിടം സംരക്ഷിച്ച് യാത്രക്കാര്‍ ഉള്‍പ്പെടെയുള്ള ജനങ്ങള്‍ക്ക് ഉപയോഗപ്രദമാക്കാൻ ശ്രദ്ധിക്കണമെന്നാണ് നാട്ടുകാര്‍ ആവശ്യപ്പെടുന്നത്.

ഏതു നിമിഷവും തകര്‍ന്നു വീഴാം...

കുളത്തൂപ്പുഴ: കുളത്തൂപ്പുഴ പഞ്ചായത്തിന്‍റെ ഉടമസ്ഥയില്‍ വര്‍ഷങ്ങള്‍ക്കുമുമ്പ് നിര്‍മിച്ച പൊതു മാര്‍ക്കറ്റ് കെട്ടിടവും വ്യാപാരസ്ഥാപനങ്ങളും ഏതുനിമിഷവും തകര്‍ന്നുവീഴുന്ന അവസ്ഥയില്‍ ഭീഷണിയായി നില്‍ക്കുന്നു. നടപടി സ്വീകരിക്കേണ്ട ഗ്രാമപഞ്ചായത്ത് മൗനം പാലിക്കുന്നതില്‍ വ്യാപാരികള്‍ക്കും പൊതുജനത്തിനും അമര്‍ഷമുണ്ട്. ഒരു അപകടം സംഭവിച്ചതിനുശേഷം പൊട്ടിക്കരഞ്ഞു മാധ്യമങ്ങളുടെ മുന്നില്‍ എത്തിയാല്‍ മതിയോ എന്ന ചോദ്യമാണ് ഉയരുന്നത്. സമയാ സമയങ്ങളില്‍ വേണ്ട അറ്റകുറ്റ പണികള്‍ നടത്തി സംരക്ഷിക്കാന്‍ അധികൃതര്‍ തയാറാകാതെ വന്നതോടെ മേല്‍ക്കുരയിലെ ഇരുമ്പുകമ്പികള്‍ ദ്രവിച്ചു കോണ്‍ക്രീറ്റ് പാളികള്‍ പൊട്ടിത്തകര്‍ന്നും ഭിത്തികളിലെ ഇഷ്‌ടികയും കട്ടകളും ദ്രവിച്ചു പൊടിഞ്ഞും ഏതു നിമിഷവും നിലം പൊത്താവുന്ന അവസ്ഥയിലാണ്. ആരും ഒന്നുപേടിച്ചുപോകുന്ന സ്ഥിതിയിലാണ് കുളത്തൂപ്പുഴ പൊതുമാര്‍ക്കറ്റ് കെട്ടിടം ഇവിടെ നില്‍ക്കുന്നത്. വര്‍ഷങ്ങള്‍ക്കുമുമ്പ് നിര്‍മിച്ച കെട്ടിടത്തിനുള്ളിലെ സ്റ്റാള്‍ മുറികള്‍ എല്ലാം തന്നെ ഇഷ്ടികകള്‍ ദ്രവിച്ചു തകര്‍ന്നടിഞ്ഞ നിലയിലാണുള്ളത്. മേല്‍ക്കൂരയില്‍ പലയിടത്തും ആല്‍മരം വളര്‍ന്നതോടെ കോണ്‍ക്രീറ്റിനുള്ളിലേക്കു മഴവെള്ളം ഊര്‍ന്നിറങ്ങി ഭിത്തികളെല്ലാം നനഞ്ഞു കുതിര്‍ന്ന അവസ്ഥയിലാണ്. നിലവില്‍ മത്സ്യവ്യാപാര കേന്ദ്രവും പഞ്ചായത്ത് വാടകക്കുലേലം ചെയ്തു പ്രവര്‍ത്തിക്കുന്ന കടകളും അട്ടിറച്ചി, മാട്ടിറച്ചി സ്റ്റാളുകളും പ്രവര്‍ത്തിക്കുന്നതും ഏതു നിമിഷവും നിലം പൊത്താവുന്ന നിലയിലുള്ള ഈ കെട്ടിടത്തിലാണ്. ആട്ടിറച്ചി സ്റ്റാളിനുള്ളില്‍ മേല്‍ക്കൂര താഴേക്കു വീഴാതിരിക്കാന്‍ മുറിയുടെ നടുക്കുതടികൊണ്ട് താങ്ങ് കൊടുത്ത നിലയിലാണുള്ളത്. ചന്ത ദിവസങ്ങളിലും മറ്റും കച്ചവടത്തിനായി നിരവധി വ്യാപാരികളും സാധനങ്ങള്‍ വാങ്ങാനായി പൊതുജനവും ഇവിടേക്ക് എത്താറുണ്ട്. കൂടാതെ പൊതുമാര്‍ക്കറ്റിനോടുചേര്‍ന്നു താമസിക്കുന്ന നിരവധി കുടുംബങ്ങള്‍ അവരുടെ താമസ സ്ഥലത്തേക്ക് കടന്നു പോകുന്നതും മാര്‍ക്കറ്റ്‌ കെട്ടിടത്തിനുള്ളിലൂടെയാണ്. പൊതുമാര്‍ക്കറ്റ് നവീകരണത്തിനായി പദ്ധതി തയാറാക്കിയിട്ടുണ്ടെന്നും അതു നടപ്പിലാകുന്ന മുറക്ക് അപകടാവസ്ഥയിലായ കെട്ടിടം പൊളിച്ചു നീക്കം ചെയ്യാമെന്നുമുള്ള മറുപടിയാണ് അധികൃതർക്ക് പറയാനുള്ളത്. അതേ സമയം പൊതുമാര്‍ക്കറ്റ് നവീകരണം എന്നു നടക്കുമെന്ന് ആര്‍ക്കും അറിയില്ല. അപ്പോള്‍ മാത്രം ഇതു പൊളിച്ചുകളയുകയുള്ളൂവെന്ന വാദം മുഖവിലയ്‌ക്കെടുക്കാന്‍ വ്യാപാരികളും ജനവും തയാറാല്ല. അടിയന്തിരമായി ഈ കെട്ടിടങ്ങള്‍ പൊളിച്ചു നീക്കി സാധാരണക്കാരായ പൊതുജനങ്ങളുടെ ജീവനും സ്വത്തിനും സംരക്ഷണമൊരുക്കണമെന്നാണ് നാട്ടുകാർ ആവശ്യപ്പെടുന്നത്.

ശ്വാസംമുട്ടുന്ന വില്ലേജ് ഓഫീസ്

കുണ്ടറ : ഞെക്കി ഞെരുങ്ങി ശ്വാസംമുട്ടി ഒരു വില്ലേജ് ഓഫീസ്. എഴുകോണ്‍ വില്ലേജ് ഓഫീസിനാണ് ഈ ദുര്‍ഗതി. നഗരത്തിന്‍റെ ഹൃദയഭാഗത്തായി ഏകദേശം 50 വര്‍ഷങ്ങള്‍ക്കു മുകളിലായ ഒരു കെട്ടിടത്തിലാണ് നാളിതുവരെ വില്ലേജ് ഓഫീസ് പ്രവര്‍ത്തിച്ചുകൊണ്ടിരുന്നത്. എപ്പോള്‍ വേണമെങ്കിലും പൊളിഞ്ഞു വീഴാം എന്ന അവസ്ഥയിലാണ് ഈ കെട്ടിടം. നാട്ടുകാരുടെയും വില്ലേജ് ഓഫീസ് ജീവനക്കാരുടെയും വികസന സമിതി അംഗങ്ങളുടെയും നിരന്തര സമ്മർദത്തെ തുടർന്ന് ഒരു ദുരന്തം ഒഴിവാക്കണമെന്ന ആവശ്യത്തിന്‍റെ അടിസ്ഥാനത്തില്‍ താല്‍ക്കാലികമായി ഒരു വാടക കെട്ടിടത്തിലേക്കു മാറി. ‌എന്നാല്‍ അവിടുത്തെ ഗതി പഴയതിനേക്കാള്‍ വളരെ മോശം. വളരെ പഴകിയ ഒരു കെട്ടിടം. ബഹുനില കെട്ടിടത്തിന്‍റെ മുകളിലത്തെ നിലയിലെ മുറിയായതിനാല്‍ പ്രായമായവര്‍ക്കും മറ്റും കയറി ചെല്ലാന്‍ സാധിക്കാത്ത അവസ്ഥ. ജനലുകള്‍ തുറക്കാനോ തുറന്നു കിടക്കുന്ന ജനല്‍ അടയ്ക്കാനോ കഴിയാത്ത സ്ഥിതി. പൊടി ശല്യം വളരെ രൂക്ഷം. ഭൂരിപക്ഷം വനിതാ പ്രവര്‍ത്തകര്‍ ജോലി നോക്കുന്ന ഈ സ്ഥാപനത്തില്‍ അടച്ചുറപ്പുള്ള ശുചി മുറി പോലുമില്ല. ഉള്ളതാകട്ടെ കാര്‍ഡ് ബോര്‍ഡ് വച്ചു മറച്ച അവസ്ഥയിലാണ്. ഫര്‍ണിച്ചറുകള്‍ക്ക് വില്ലേജ് തുടങ്ങിയ കാലം മുതല്‍ക്കുള്ള പഴക്കം. എപ്പോള്‍ വേണമെങ്കിലും ഒടിഞ്ഞു തകരുന്ന പരുവം. തട്ടിയും മുട്ടിയും ഓടിക്കുന്ന കംപ്യൂട്ടറുകളും പ്രിന്‍ററുകളുമാണ് ഇവിടെയുള്ളത്. അടിയന്തര പ്രിന്‍റുകള്‍ക്കും മറ്റും സ്വകാര്യസ്ഥാപനത്തെ ആശ്രയിക്കേണ്ടി വരുന്നു എന്നതാണ് മറ്റൊരു യാഥാര്‍ഥ്യം. സ്ഥിരമായി വില്ലേജ് ഓഫീസര്‍മാര്‍ ഇല്ലാത്തതും സുതാര്യമായ പ്രവര്‍ത്തനങ്ങള്‍ക്കെന്നും തടസമാണ്. ഈ ഓഫീസില്‍ ജനങ്ങളുമായുള്ള നിരന്തര തര്‍ക്കങ്ങളും ബഹളവും പതിവാണ്. അങ്ങനെ തുടങ്ങി ശ്വാസം മുട്ടി ജോലി ചെയ്യേണ്ട അവസ്ഥയിലാണ് എഴുകോണ്‍ വില്ലേജ് ഓഫീസ്. കേരളത്തിലുടനീളം സ്മാര്‍ട്ട് വില്ലേജുകള്‍ വന്നുവെങ്കിലും എഴുകോണില്‍ ഇപ്പോഴും പഴയതിനെക്കാള്‍ മോശമായ അവസ്ഥയാണ് തുടരുന്നത്. ഇതുവരെയും നിര്‍മാണ പ്രവര്‍ത്തനങ്ങള്‍ ആരംഭിച്ചിട്ടില്ലാത്ത പുതിയ ഷോപ്പിംഗ് കോംപ്ലക്‌സ് വരുമ്പോള്‍ അതിനുള്ളിലെ സ്ഥലപരിമിതി നോക്കി ഓഫീസിനു സൗകര്യം നല്‍കാം എന്ന വാക്കാലുള്ള അധികാരികളുടെ ഉറപ്പല്ലാതെ നിയമപരമായ ഒരു നടപടിയും ഇതുവരെ ഉണ്ടായിട്ടില്ല. ഇവിടേക്കു സ്ഥലം മാറി വരുന്ന ഉദ്യോഗസ്ഥരെല്ലാം തന്നെ മറ്റു കാരണങ്ങള്‍ പറഞ്ഞ് ജീവനും കൊണ്ടു ഓടുന്ന സാഹചര്യമാണ് ഇപ്പോള്‍ നിലവിലുള്ളത്.

നാശത്തിന്‍റെ വക്കിൽ സർക്കാർ മന്ദിരങ്ങൾ

കൊല്ലം: നമ്മുടെ നാട്ടില്‍ നമ്മുടെ ചുറ്റും എത്രയെത്ര സര്‍ക്കാര്‍ സ്ഥാപനങ്ങളാണ് കാടുകയറി നശിച്ചുകൊണ്ടിരിക്കുന്നത്. എന്നാല്‍ ഇതെല്ലാം പ്രവര്‍ത്തിക്കുന്നുണ്ട്. ഏതെങ്കിലും ഉദ്യോഗസ്ഥനു ജീവന്‍ പണയം വയ്ക്കാതെ ഇവിടെ ജോലി ചെയ്യാന്‍ സാധിക്കുമോ. സ്‌കൂളുകളില്‍ കയറി പാമ്പുകള്‍ വിളയാട്ടം നടത്തുന്നു. ഇടിഞ്ഞു പൊളിഞ്ഞു കിടക്കുന്ന വില്ലേജ് ഓഫീസുകളില്‍ ജോലി ചെയ്യുന്നവര്‍ക്കു ധീരതയ്ക്കുള്ള അവാര്‍ഡ് കൊടുക്കണം. നാട്ടുകാരും ജീവനക്കാരും തകര്‍ന്ന കെട്ടിടത്തിലേക്കാണ് എന്നും എത്തിച്ചേരേണ്ടത്. അടിസ്ഥാനസൗകര്യം പോലുമില്ലാത്ത ഓഫീസുകള്‍ വരെ നമ്മുടെ ചുറ്റുമുണ്ട്. കാടുമൂടിക്കിടക്കുന്ന പറമ്പുകള്‍ വൃത്തിയാക്കുന്നതില്‍ വീഴ്ച വരുത്തുന്ന ഉടമകള്‍ ജാഗ്രതൈ... ഉടമ പറമ്പ് വൃത്തിയാക്കിയില്ലെങ്കില്‍ തദ്ദേശഭരണ സ്ഥാപനങ്ങള്‍ വൃത്തിയാക്കി അതിന്‍റെ ചെലവ് ഉടമയില്‍നിന്ന് ഈടാക്കാമെന്ന പഞ്ചായത്തീരാജ് ചട്ടം കര്‍ശനമായി നടപ്പാക്കാന്‍ സര്‍ക്കാര്‍ തദ്ദേശ സ്ഥാപന സെക്രട്ടറിമാര്‍ക്ക് നിര്‍ദേശം നല്‍കി. സംസ്ഥാനത്തൊട്ടാകെ കാടുപിടിച്ച പറമ്പുകള്‍ വൃത്തിയാക്കി പൊതുജനങ്ങളുടെ സുരക്ഷയ്ക്കായി നടപടി സ്വീകരിക്കാന്‍ പറമ്പുകളുടെ ഉടമകള്‍ക്കും കൈവശക്കാര്‍ക്കും നിര്‍ദേശം നല്‍കണമെന്ന് സര്‍ക്കാര്‍ തദ്ദേശഭരണ സ്ഥാപനങ്ങള്‍ക്ക് ഉത്തരവ് നല്‍കി കഴിഞ്ഞു. എന്നാല്‍ പഞ്ചായത്തിന്‍റെ നിയന്ത്രണത്തിലുള്ള സ്ഥാപനങ്ങള്‍ ഇടിഞ്ഞുവീഴാറായിട്ടും ഇവര്‍ മൗനം പാലിക്കുകയാണ്. സമയാസമയങ്ങളില്‍ ഉത്തരവിറക്കിയും ചട്ടങ്ങളും നിയമങ്ങളും മാറ്റി എഴുതുന്നവര്‍ അപകടം സംഭവിച്ച ശേഷം ഓടി എത്തി നഷ്ടപരിഹാരം നല്‍കിയാല്‍ മാത്രം പോരാ. സാധാരണ ജനത്തിന്‍റെ ആവശ്യമെങ്കിലും സാധിച്ചുകൊടുക്കാന്‍ ധൈര്യം കാണിക്കണം.

കൊട്ടിയം ഹോളിക്രോസ്‌ കോളജ്‌ ഓഫ്‌ നഴ്‌സിംഗിന് അക്രഡിറ്റേഷൻ എ പ്ലസ്

കൊട്ടിയം: കേരള യൂണിവേഴ്സിറ്റി ഓഫ്‌ ഹെല്‍ത്ത്‌ സയന്‍സിന്‍റെ കെ യു എച്ച് എസ്, മികച്ച ഗുണ നിലവാരത്തിനുള്ള അക്രഡിറ്റേഷൻ എ പ്ലസ് നേടി കൊട്ടിയം ഹോളിക്രോസ്‌ കോളജ്‌ ഓഫ്‌ നഴ്സിംഗ്. ആരോഗ്യ സര്‍വകലാശാലയുടെ ഔദ്യോഗിക വേദിയില്‍ നടന്ന ചടങ്ങില്‍ യൂണിവേഴ്സിറ്റിയിലെ മികച്ച നഴ്സിംഗ് കോളജിനുള്ള അംഗീകാരമായ അക്രഡിറ്റേഷന്‍ സര്‍ട്ടിഫിക്കറ്റും മൊമെന്‍റോയും വൈസ്‌ ചാന്‍സലര്‍ ഡോ. മോഹനന്‍ കുന്നമേലിൽ നിന്നും ഹോളിക്രോസ്‌ നഴ്‌സിംഗ്‌ കോളജ് പ്രിന്‍സിപ്പല്‍ ഡോ. സിസ്റ്റര്‍ ബെര്‍ത്താ പെരേപ്പാടന്‍ ഏറ്റുവാങ്ങി. പരിപാടിയില്‍ ഹോളിക്രോസ്‌ നഴ്‌സിംഗ്‌ കോളജ് കോഓര്‍ഡിനേറ്ററും അസോസിയേറ്റ്‌ പ്രഫസറുമായ എസ്. ചിക്കു സന്നിഹിതനായിരുന്നു.

സ്വർണമാല തിരികെ നൽകി ജീവകാരുണ്യ പ്രവർത്തകൻ മാതൃകയായി

ചവറ : ലൂർദ് മാതാ കോൺവെന്‍റിന് സമീപമുള്ള സ്റ്റേഷനറി കടയുടെ സമീപത്ത് നിന്നും കളഞ്ഞു കിട്ടിയ സ്വർണമാല തിരികെ നൽകി ജീവകാരുണ്യ പ്രവർത്തകൻ ആന്‍റണി മരിയാൻ. ഒരു പവൻ സ്വർണമാലയാണ് കളഞ്ഞുകിട്ടിയത്. സ്വർണമാല ചവറ പോലീസ് സ്റ്റേഷനിൽ ഏൽപ്പിച്ചു. മാല കളഞ്ഞു കിട്ടിയവിവരം സോഷ്യൽ മീഡിയയിൽ അറിയിച്ചതിനെ തുടർന്ന് ചെറുശേരിഭാഗം സ്വദേശി സാമിന്‍റെ മാലയാണെന്ന് തിരിച്ചറിഞ്ഞു. തുടർന്ന് ചവറ പോലീസ് സ്റ്റേഷനിലെത്തി സബ് ഇൻസ്‌പെക്ടർ അബ്ദുൾ റൗഫിലിന്‍റെ സാന്നിധ്യത്തിൽ മാല ഉടമസ്ഥന് കൈമാറുകയും ചെയ്തു.

കേരളപുരത്ത് ബൈക്കും ലോറിയും കൂട്ടിയിടിച്ചു

കുണ്ടറ : കേരളപുരത്ത് ബൈക്കും ലോറിയും കൂട്ടിയിടിച്ചു. ഇടിയുടെ ആഘാതത്തിൽ ബൈക്ക് യാത്രികൻ തെറിച്ചു പോയെങ്കിലും അത്ഭുതകരമായിട്ടാണ് രക്ഷപ്പെട്ടത്. കൊട്ടാരക്കര ഭാഗത്തു നിന്നും വന്ന നാഷണൽ പെർമിറ്റ് ലോറി മുന്പേപോയ ബൈക്കിൽ ഇടിക്കുകയായിരുന്നു. ബൈക്ക് ലോറിയിൽ കുരുങ്ങുകയും 100 മീറ്ററോളം ദൂരത്തിൽ ലോറി നിർത്താതെ പോവുകയും ചെയ്തു. പുറകെ വാഹനത്തിൽ വന്നവർ ലോറിയെ ഓവർടേക്ക് ചെയ്ത് ബഹളം വെച്ച് തടഞ്ഞു നിർത്തിയപ്പോൾ ആണ് ലോറി ഡ്രൈവർ വിവരം അറിയുന്നത്. ലോറി ഡ്രൈവറും കൂടെ ഉണ്ടായിരുന്ന ക്ലീനറും മദ്യലഹരിയിലായിരുന്നുവെന്ന് പോലീസ് പറഞ്ഞു. ഡ്രൈവറെ കുണ്ടറ പോലീസ് കസ്റ്റഡിയിലെടുത്തു.

റവ. ജോസ് ജോർജ് സിഎസ്ഐ കൊല്ലം കൊട്ടാരക്കര മഹാഇടവക ബിഷപ്

കൊല്ലം : സി എസ് ഐ കൊല്ലം കൊട്ടാരക്കര മഹാ ഇടവക നിയുക്ത ബിഷപായി റവ. ജോസ് ജോർജിനെ തെര ഞ്ഞെടുത്തു. കൊല്ലം ആയൂർ അസുരമംഗലം സിഎസ്ഐ ഇടവകാംഗവും കൊല്ലം കത്തീഡ്രൽ വികാരിയാണ്. ചെന്നൈയിലെ സിനഡ് സെക്രട്ടറിയേറ്റ് ആസ്ഥാനത്ത് നടന്ന സെലക്‌ഷൻ കമ്മിറ്റി യോഗത്തിന് ശേഷമായിരുന്നു പ്രഖ്യാപനം. കൊല്ലം - കൊട്ടാരക്കര മഹായിടവകയുടെ രണ്ടാമത്തെ ബിഷപാണ് റവ.ജോസ് ജോർജ്.

തിരുമുക്ക് അടിപ്പാത: ജനകീയ റിലേ ധർണ ഇന്ന് തുടങ്ങും

ചാത്തന്നൂർ: തിരുമുക്കിലെ അശാസ്ത്രീയ അടിപ്പാത വലിയ വാഹനങ്ങൾക്ക് കടന്നു പോകാൻ കഴിയുന്ന തരത്തിൽ പുനർനിർമിക്കുക, പരവൂർ കൊട്ടിയം ഭാഗങ്ങളിൽ നിന്ന് വരുന്ന എല്ലാ സ്വകാര്യ ബസുകളും ചാത്തന്നൂരിൽ എത്തുക തുടങ്ങിയ ആവശ്യങ്ങൾ ഉന്നയിച്ച് ചാത്തന്നൂർ വികസന സമിതിയുടെ നേതൃത്വത്തിൽ നടത്തുന്ന ജനകീയ റിലേ ധർണ ഇന്ന് ആരംഭിക്കും. തിരുമുക്കിൽ നടക്കുന്ന റിലേ ധർണയുടെ ഉദ്ഘാടന ദിവസമായ ഇന്ന് ചാത്തന്നൂർ ഗ്രാമപഞ്ചായത്ത് ഭരണസമിതി അംഗങ്ങളാണ് ധർണയിൽ പങ്കെടുക്കുന്നത്. രാവിലെ 10ന് ധർണ ആരംഭിക്കും.ചാത്തന്നൂർ തിരുമുക്കിന്‍റെപ്രാദേശികമായ പ്രാധാന്യം കണക്കിലെടുത്ത് വലിയ വാഹനങ്ങൾക്ക് കടന്നു പോകാൻ കഴിയുന്ന തരത്തിൽ അടിപ്പാത പുതുക്കിപ്പണിയണമെന്ന ജനകീയആവശ്യം പരിഗണിക്കാൻ അധികാരികൾ തയാറാകാത്തതിൽ പ്രതിഷേധിച്ചും ചാത്തന്നൂരിലേക്ക് വരുന്ന എല്ലാ സ്വകാര്യ ബസുകളും ചാത്തന്നൂർ പട്ടണത്തിൽ എത്തി തിരികെ പോകുന്നതിനുള്ള നടപടികൾ സ്വീകരിക്കണമെന്നും ആവശ്യപ്പെട്ടാണ് ധർണ നടത്തുന്നത്. നാളെ ചാത്തന്നൂർ വികസന സമിതിയാണ് ധർണ നടത്തുന്നത്. തുടർന്നുള്ള ദിവസങ്ങളിൽ വിവിധ സംഘടനകൾ റിലേ ധർണയുടെ ഭാഗമാകും.

ആയൂർ ചെറുപുഷ്പ സ്കൂളിൽ ഇൻവെസ്റ്റിച്ചർ സെറിമണി

ആയൂർ: ചെറുപുഷ്പ സെൻട്രൽ സ്കൂളിൽ 2025 - 26 അധ്യയന വർഷത്തെ വിവിധ ഹൗസുകളുടെയും ക്ലബുകളുടെയും പ്രവർത്തനങ്ങൾക്ക് തുടക്കം കുറിച്ചുഇൻവെസ്റ്റിച്ചർ സെറിമണി നടന്നു.സ്കൂൾ അസംബ്ലിയിൽ നടന്ന ചടങ്ങിൽ ചടയമംഗലം സബ് ഇൻസ്പെക്ടർ എം. മോനിഷ് മുഖ്യാതിഥിയായിരുന്നു. ഹെഡ് ബോയ് മുഹമ്മദ് മുസമിൽ, ഹെഡ് ഗേൾ ആർദ്ര ലാൽ എന്നിവരെ സാഷേ അണിയിച്ച് അംഗീകാരം നൽകി. ക്ലബ്ഹൗസ് ലീഡേഴ്സിനെയും സാഷേ ,ബാഡ്ജ് എന്നിവ അണിയിച്ചു. ചടങ്ങിന്‍റെ ഭാഗമായി ഹൗസ് അടിസ്ഥാനത്തിലുള്ള വിദ്യാർഥികളുടെ മാർച്ച് പാസ്റ്റും നടന്നു. സ്കൂൾ ബസാർ ഫാ. ജോൺ പാലവിള കിഴക്കേതിൽ , അധ്യാപിക ബുഷ്റ എന്നിവർ പ്രസംഗിച്ചു. പ്രിൻസിപ്പൽ ഫാ. അരുൺ ഏറത്ത് സത്യപ്രതിജ്ഞ ചൊല്ലിക്കൊടുത്തു.

സ്കൂൾ പാർലമെന്‍റ് തെരഞ്ഞെടുപ്പ് നടത്തി

മണ്ണൂർ: ഇൻഫന്‍റ് ജീസസ് ഇംഗ്ലീഷ് മീഡിയം സ്കൂളിൽ 2025-26 അധ്യയന വർഷത്തേക്കുള്ള സ്കൂൾ പാർലമെന്‍റ് തെരഞ്ഞെടുപ്പ് നടത്തി. വിവിധ സ്ഥാനങ്ങളിലേക്ക് മത്സരിച്ച സ്ഥാനാർഥികൾക്ക് വിദ്യാർഥികൾ വോട്ട് രേഖപ്പെടുത്തി. സ്കൂൾ ഹെഡ് ബോയ്, ഹെഡ് ഗേൾ, സിഇഒ, സിഡിഒ, എസ്എസ്ഒ സ്ഥാനങ്ങളിലേക്ക് അസ്‌ലം മുഹമ്മദ്, ആദ്യ, കീർത്തന, ബോവസ്, ശിവനന്ദ എന്നീ വിദ്യാർഥികൾ തെരഞ്ഞെടുക്കപ്പെട്ടു. തുടർന്ന് നടന്ന പിടിഎ എക്സിക്യൂട്ടീവ് യോഗത്തിൽ മനോജ് കുഞ്ഞപ്പനെ പിടിഎ പ്രസിഡന്‍റായും പ്രവീണ ജോസഫിനെ സെക്രട്ടറിയായും തെരഞ്ഞെടുത്തു. തെരഞ്ഞെടുക്കപ്പെട്ട പാർലമെന്‍റ്അംഗങ്ങളെ സ്കൂൾ ബർസാർ ഫാ. ക്രിസ്റ്റി ചരുവിള, പ്രിൻസിപ്പൽ റാണി ഉമ്മൻ ,വൈസ് പ്രിൻസിപ്പൽ സിജി എന്നിവർ അനുമോദിച്ചു.

എസ്പിസി ദിനാഘോഷം

കുളത്തൂപ്പുഴ : ബിഎംജി എച്ച്എസിൽ എസ്പിസി ദിനാഘോഷം സ്കൂൾ ഹെഡ്മാസ്റ്റർ കെ.ഷാജുമോൻ ഉദ്ഘാടനം ചെയ്തു. ഗാർഡിയൻ പിടിഎ പ്രസിഡന്‍റ് സാനു ജോർജ് അധ്യക്ഷനായിരുന്നു. സിപിഒ നന്ദു, പിടിഎ അംഗം ഷൈജു ഷാഹുൽ, സിപിഒ റോജി വർഗീസ്, എസിപി ഒ.ലീനാമോൾ,അനിത തോമസ്, കേഡറ്റുകളായ എസ്.അജ്മിയ , എസ്.അനഘ, റൂഷ്‌ദാ മുജീബ്, വിറ്റ്നാ റോസ് നൈനാൻ എന്നിവർ നേതൃത്വം നൽകി. കുളത്തൂപ്പുഴ: ചോഴിയക്കോട് പട്ടിക വർഗവികസന വകുപ്പിന്‍റെ നിയന്ത്രണത്തിൽ കുളത്തൂപ്പുഴയിൽ പ്രവർത്തിക്കുന്ന മോഡൽ റസിഡൻഷ്യൽ സ്കൂളിൽ സ്റ്റുഡന്‍റ് പോലീസ് കേഡറ്റ് ദിനം ആചരിച്ചു. സ്കൂൾ പ്രഥമ അധ്യാപിക സി. ഗിരിജ പതാക ഉയർത്തി ഉദ്ഘാടനം നിർവഹിച്ചു. സിപിഒ ആർ.സന്തോഷ് , സ്റ്റാലിൻ, അധ്യാപകൻ എച്ച്.ഹസൈൻ, എസ്പിസി ഡ്രിൽ ട്രെയിനർ വി.വിഷ്ണു, സിവിൽ ഓഫീസർ സുബിൻ സജി എന്നിവർ പ്രസംഗിച്ചു. എസ്പിസി കേഡറ്റ് ഫ്രാൻസിസ് റോയിയുടെ നേതൃത്വത്തിൽ വിദ്യാർഥികളുടെ പരേഡും നടന്നു. കൊട്ടിയം: സ്റ്റുഡന്‍റ് പോലീസ് കേഡറ്റ് പദ്ധതിയുടെ പതിനഞ്ചാമത് സ്ഥാപക ദിനം ആഘോഷിച്ചു. സെറിമോണിയൽ പരേഡിൽ സിറ്റി പോലീസ് കമ്മീഷണർ കിരൺ നാരായണൻ സല്യൂട്ട് സ്വീകരിച്ചു. കൊല്ലം ഗവ. മോഡൽ ബോയ്സ് ഹയർ സെക്കൻഡറി സ്കൂളിലാണ് സെറിമോണിയൽ പരേഡ് നടന്നത്. വിമലഹൃദയ സ്കൂളിലെ എമിൻ നൗറിൻ പരേഡ് കമാൻഡറായി. പരേഡിൽ വിമലഹൃദയ ഗേൾസ് ഹയർ സെക്കൻഡറി സ്കൂൾ, ക്രിസ്തുരാജ് ഹയർസെക്കൻഡറി സ്കൂൾ, എസ് എൻ ട്രസ്റ്റ് സ്കൂൾ, സെന്‍റ് അലോഷ്യസ്, വെസ്റ്റ് കൊല്ലം ഹയർ സെക്കൻഡറി സ്കൂൾ, വള്ളിക്കീഴ് ഹയർസെക്കൻഡറി സ്കൂൾ, കൊല്ലം ബോയ്സ് ഹയർ സെക്കൻഡറി സ്കൂൾ, എ വി ജി എച്ച്എസ്എസ് തഴവ എന്നീ സ്കൂളുകളിലെ കേഡറ്റുകളും, മങ്ങാട് ഗവ. ഹയർസെക്കൻഡറി സ്കൂളിലെ എസ്പിസി ബാൻഡ് ട്രൂപ്പും ഉൾപ്പെടെ 230 കേഡറ്റുകളാണ് സെറിമോണിയൽ പരേഡിൽ പങ്കെടുത്തത്. അഡീഷണൽ എസ്പി സക്കറിയ മാത്യു ലഹരിക്കെതിരായ പ്രതിജ്ഞ കേഡറ്റുകൾക്ക് ചൊല്ലിക്കൊടുത്തു. കൊല്ലം അസി.കമ്മീഷണർ എസ്. ഷെരീഫ്, പള്ളിത്തോട്ടം പോലീസ് ഇൻസ്പെക്ടർ ബി.ഷെഫീഖ്, കൊല്ലം ബോയ്സ് സ്കൂൾ പ്രിൻസിപ്പൽ ഹെർമ്മോയിൻ പി. മാക്സ്‌വെൽ, എസ്പിസി കോ ഓർഡിനേറ്റർ ഷഹീർ , ഡി. ഡാഡ് ഓർഡിനേറ്റർ ബിനു, ജ്യോതിഷ് സ്കൂളുകളിലെ ഡ്രിൽ ഇൻസ്ട്രക്ടർമാരായ പോലീസ് ഉദ്യോഗസ്ഥർ, കമ്യൂണിറ്റി പോലീസ് ഓഫീസർമാരായ അധ്യാപകർ എന്നിവർ നേതൃത്വം നൽകി.

ക്രൈസ്തവ സന്യാസിനികളുടെ അറസ്റ്റും കള്ളക്കേസും : കൊല്ലം രൂപതയുടെ പ്രതിഷേധം ആളിക്കത്തി

കൊല്ലം: ഛത്തീസ്ഗഡിൽ ക്രൈസ്തവ സന്യാസിനികളെ അന്യായമായി അറസ്റ്റ് ചെയ്യുകയും കള്ളക്കേസിൽ കുടുക്കുകയും ചെയ്ത നടപടിയിൽ പ്രതിഷേധിച്ച് കൊല്ലം രൂപതയുടെയും കെ ആർ എൽ സി ബി സി റിലീജിയസ് കമ്മീഷന്‍റെയും ആഭിമുഖ്യത്തിൽ കൊല്ലത്ത് പ്രതിഷേധ ജ്വാല നടന്നു. ആയിരക്കണക്കിന് വിശ്വാസികളും സന്യാസ്തരും വൈദികരും അണിനിരന്ന പ്രതിഷേധ റാലിയിൽ കൊല്ലം നഗരത്തിൽ ചിന്നക്കട അക്ഷരാർഥത്തിൽ സ്തംഭിച്ചു. വാടിയിൽ നിന്ന് ആരംഭിച്ച റാലി വേളാങ്കണ്ണി മാതാവിന്‍റെ കുരിശടിയുടെ മുന്നിലൂടെ കെ എസ്ആർടിസി ബസ് സ്റ്റാൻഡിൽ എത്തിയ ശേഷം ആരംഭിച്ച പ്രതിഷേധ ജ്വാല വികാരി ജനറാൾ മോൺ. ബൈജു ജൂലിയൻ ആണ് ഉദ്‌ഘാടനം ചെയ്തത്. ജ്വാല ബസ് വേയിൽ എത്തിയ ശേഷം നടന്ന പ്രതിഷേധ സമ്മേളനത്തിൽ ബിഷപ് ഡോ.പോൾ ആന്‍റണി മുല്ലശേരി അധ്യക്ഷനായിരുന്നു. ക്രൈസ്തവ സമുദായത്തിനെതിരെ ഭാരതത്തിൽ ഉണ്ടാകുന്ന അതിക്രമങ്ങൾക്ക് എതിരേ വിശ്വാസികളുടെ രോഷം അലയടിക്കുന്നതായിരുന്നു പ്രതിഷേധജ്വാല. വ്യക്തിപരമായ പീഡനങ്ങൾ ക്ഷമിക്കുമെങ്കിലും അപരനെതിരേ ഉണ്ടാകുന്ന അനീതികൾ ഏത് നിലയിലും ചെറുക്കുമെന്ന് പ്രതിഷേധ യോഗത്തിൽ അധ്യക്ഷത വഹിച്ച കൊല്ലം രൂപതാധ്യക്ഷൻ ബിഷപ് ഡോ.പോൾ ആന്‍റണി മുല്ലശേരി പറഞ്ഞു. പ്രതികൂല കാലാവസ്ഥയിലും സഭയോടും സമർപ്പിതരോടുമുള്ള സ്നേഹവും ക്രിസ്തുവിലുള്ള വിശ്വാസത്തെയും പ്രതി എത്തി ചേർന്ന വിശ്വാസ സമൂഹത്തെ അദ്ദേഹം അഭിനന്ദിച്ചു. ഭാരതത്തിൽ ഇപ്പോഴുണ്ടാകുന്ന ക്രൈസ്തവ വേട്ടകൾ ഒറ്റപ്പെട്ടതല്ലെന്നും സന്യസ്തർക്കെതിരേ കേസെടുത്തതും അന്യായ വകുപ്പുകൾ എഴുതിച്ചേർത്തതും പോലീസല്ലെന്നും തീവ്ര ഹിന്ദുത്വവാദികളായ ബജ്റംഗ്ദൾ പ്രവർത്തകരായിരുന്നുവെന്നും ഇത് നീതിന്യായ സംവിധാനത്തിന്‍റെ ആപത്കരമായ ദുഃരൂപയോഗമാണെന്നുംപ്രതിഷേധ സമ്മേളനം ഉദ്ഘാടനം ചെയ്തു എൻ. കെ. പ്രേമചന്ദ്രൻ എംപി പറഞ്ഞു. കൊല്ലം മേയർ ഹണി ബഞ്ചമിൻ, കെആർഎൽ സി ബിസി സെക്രട്ടറി ജനറൽ ഫാ. ജിജു അറക്കത്തറ, വികാരി ജനറാൾ മോൺ. ബൈജു ജൂലിയൻ, ഫാ. മേരി ദാസൻ ഒ സി ഡി, സി. റോസ് ഫ്രാൻസിസ്, സിസ്റ്റർ എമ്മ മേരി, അനിൽ ജോൺ ഫ്രാൻസിസ്, ഫാ. വർഗീസ് ഒ സി ഡി, ഫാ. ജോസ് സെബാസ്റ്റ്യൻ എന്നിവർ പ്രസംഗിച്ചു. യേശുവിന്‍റെ കാരുണ്യത്തിന്‍റെ മുഖം പ്രകടമാക്കുന്ന സന്യസ്തരും മിഷനറിമാരും ഒറ്റകെട്ടായി സഭക്കൊപ്പമാണെന്നു വിളിച്ചറിയിച്ച പ്രതിഷേധ പരിപാടിക്ക് ഫാ. ജോളി ഏബ്രഹാം, ലെസ്റ്റർ കാർഡോസ്, മിൽട്ടൻ സ്‌റ്റീഫൻ, സാജു കുരിശിങ്കൽ, ബെയ്സിൽ നെറ്റാർ, വിൻസിബൈജു, വൽസലാ ജോയി, ഫാ. ജോ സെബാസ്റ്റ്യൻ, ഇ.എമേഴ്സൺ, ജാക്സൺ ഫ്രാൻസിസ്, യോഹന്നാൻ ആന്‍റണി, എ.ജെ. ഡിക്രൂസ്, ജോർജ് എഫ്. സേവ്യർ എന്നിവർ നേതൃത്വം നൽകി. പ്രതിഷേധിച്ചു അഞ്ചൽ: ഛത്തീസ്ഗഡിൽ രണ്ട് കന്യാസ്ത്രീകളെ തടവിലാക്കിയ സംഭവത്തിൽ അഞ്ചൽ മേരി മാതാ ഇടവക സമൂഹം പ്രതിഷേധിച്ചു. വേദന അനുഭവിക്കുന്ന സന്യാസി സമൂഹത്തോട് ഐക്യദാർഢ്യവും പ്രകടിപ്പിച്ചു. ജയിൽ മോചിതരായെങ്കിലും കേസിന്‍റെ തുടർനടപടികളിൽ വ്യാജ എഫ്ഐആർ പിൻവലിക്കുവാൻ ഉള്ള ക്രമീകരണങ്ങൾ ചെയ്യണമെന്നും സന്യാസിനികൾക്ക് ആവശ്യമായ സുരക്ഷ ഒരുക്കണമെന്നും യോഗം ആവശ്യപ്പെട്ടു. ഇടവകയിലെ മാതൃജ്യോതിസ് പിതൃവേദി അംഗങ്ങളുടെ നേതൃത്വത്തിൽ നടത്തിയ യോഗത്തിൽ വികാരി ഫാ. ജോസഫ് നാല്പതാംകളം, ആന്‍റണി പൂത്തറ, യുബി ബിനു അമലഗിരി എന്നിവർ പ്രസംഗിച്ചു. സനൽ കോലത്ത് പ്രതിഷേധ പ്രമേയം അവതരിപ്പിച്ചു.

പോലീസ് ഉദ്യോഗസ്ഥൻ തൂങ്ങി മരിച്ച നിലയിൽ

കൊട്ടാരക്കര: പത്തനംതിട്ട സ്റ്റേഷനിലെ സീനിയർ സിവിൽ പോലീസ് ഓഫീസറെ തൂങ്ങി മരിച്ച നിലയിൽ കണ്ടെത്തി. നീലേശ്വരം ഹരിമന്ദിരത്തിൽ ആനന്ദ ഹരിപ്രസാദ് (50)നെ ആണ് കുടുംബ വീടിന് മുന്നിലുള്ള മരത്തിൽ തൂങ്ങി മരിച്ച നിലയിൽ പുലർച്ചെ കണ്ടെത്തിയത്. ഹരിയുടെ മാതാവ് ഓമനയമ്മയുടെ മരണാന്തര ചടങ്ങുകൾ രണ്ടു ദിവസം മുൻപ് കുടുംബവീടായ നീലേശ്വരത്ത് നടന്നിരുന്നു. ചടങ്ങുമായി ബന്ധപ്പെട്ട് അവധിയിലായിരുന്നു ഇദ്ദേഹം. ആനന്ദഹരിപ്രസാദും കുടുംബവും നെടുവത്തൂരിലുള്ള വാടക വീട്ടിലായിരുന്നു താമസം. മരണത്തിൽ ദുരൂഹത ഇല്ലെന്ന് പോലീസ് പറഞ്ഞു. പാരിപ്പള്ളി മെഡിക്കൽ കോളജിൽ പോസ്റ്റ്‌മോർട്ടം നടത്തി മൃതദേഹം ബന്ധുക്കൾക്ക് വിട്ടു കൊടുത്തു. ഭാര്യ: സ്വപ്ന. മക്കൾ: സ്വാന്തന, അഗ്നിവേശ്, അഗ്നിശിഖ.

കാറും ബൈക്കും കൂട്ടിയിടിച്ചു; ഒരാൾക്ക് ഗുരുതര പരിക്ക്

പരവൂർ : റോഡിലെ കുഴി കണ്ട് വെട്ടി തിരിച്ച കാർ നിയന്ത്രണം വിട്ട് ബൈക്കിലിടിച്ചു. തലയ്ക്ക് ഗുരുതരമായി പരിക്കേറ്റ ബൈക്ക് യാത്രികനായ ഇടവ സ്വദേശി ഷിബിലിയെ പാരിപ്പള്ളി ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പരവൂർ -വർക്കല റോഡിലായിരുന്നു അപകടം. പരവൂർ നിന്നും വർക്കലയിലേക്ക് പോവുകയായിരുന്ന ഇരുചക്രവാഹനവും വർക്കലയിൽ നിന്നും വരികയായിരുന്ന കാറും തമ്മിൽ കൂട്ടിയിടിച്ചാണ് അപകടം ഉണ്ടായത്. റോഡിലെ കുഴിയിൽ വീഴാതെ വെട്ടിത്തിരിക്കുന്നതിനിടയിൽ നിയന്ത്രണം തെറ്റിയ കാർ എതിർ ദിശയിൽ വന്ന ബൈക്കിൽ ഇടിക്കുകയായിരുന്നു. ഇടിയുടെ ആഘാതത്തിൽ വൈദ്യുതി ഷോർട്ട് സർക്യൂട്ട് ഉണ്ടായി കാറിൽ അഗ്നിബാധയ്ക്ക് കാരണമായെങ്കിലും നാട്ടുകാരുടെ സമയോചിത ഇടപെടൽ മൂലം തീപിടിത്തത്തിൽ നിന്നും ഒഴിവായി. ബൈക്ക് യാത്രികന്‍റെ പരിക്ക് ഗുരുതരമായതിനാൽ താലൂക്ക് ആശുപത്രിയിൽ നിന്നും പാരിപ്പള്ളി മെഡിക്കൽ കോളജ് ആശുപത്രിയിലേക്ക് മാറ്റി.

കൊല്ലം രൂപതയുടെ പ്രതിഷേധം ഇന്ന്

കൊല്ലം: മതപരിവർത്തനവും മനുഷ്യകടത്തും ആരോപിച്ച് കന്യാസ്ത്രീമാരെ ഛത്തീസ്ഗഡിൽ അറസ്റ്റ് ചെയ്ത് ജയിലിൽ അടച്ച നടപടിയിൽ പ്രതിഷേധിച്ച ും വർധിച്ചു വരുന്ന ക്രൈസ്തവ പീഡനങ്ങൾക്കുമെതിരെയും കൊല്ലം രൂപതയുടെ നേതൃത്വത്തിൽ ഇന്ന് പ്രതിഷേധ റാലിയും പൊതുസമ്മേളനവും നടത്തും. ഉച്ചകഴിഞ്ഞ് 3.30ന് കൊല്ലം കെഎസ്ആർടിസി ബസ് സ്റ്റാൻഡ് പരിസരത്തുനിന്ന് ആരംഭിക്കുന്ന പ്രതിഷേധ റാലി ചിന്നക്കടയിൽ സമാപിക്കും. തുടർന്ന് നടക്കുന്ന പ്രതിഷേധ സമ്മേളനം കൊല്ലം ബിഷപ് ഡോ.പോൾ ആന്‍റണി മുല്ലശേരി ഉദ്ഘാടനം ചെയ്യും.സാമൂഹ്യ സേവനത്തിനും രാഷ്ട്ര നിർമാണത്തിലും നിസ്വാർഥമായി പ്രവർത്തിച്ചുകൊണ്ടിരിക്കുന്ന ക്രൈസ്തവ സമൂഹത്തെ വേട്ടയാടുന്ന മതതീവ്രവാദ പ്രസ്ഥാനങ്ങളുടെ നടപടിയിൽ ബിഷപ് ഹൗസിൽ കൂടിയ നേതൃയോഗം ശക്തമായ പ്രതിഷേധം രേഖപ്പെടുത്തി. അസത്യം നിറഞ്ഞ കുറ്റാരോപണങ്ങളുടെയും അന്യായമായ ആൾകൂട്ട വിചാരണയുടെയും അനന്തര ഫലമാണ് സമർപ്പിതരുടെ അറസ്റ്റെന്ന് യോഗം ആരോപിച്ചു. ഭരണഘടന ഉറപ്പു നൽകുന്ന മതസ്വാതന്ത്ര്യവും പൗരാവകാശങ്ങളും നിഷേധിച്ചുകൊണ്ട് രാജ്യത്തെ ന്യൂനപക്ഷങ്ങൾക്ക് നേരെ വർധിച്ചുവരുന്ന അക്രമങ്ങളിൽ യോഗം ശക്തമായ പ്രതിഷേധം രേഖപ്പെടുത്തി. രാജ്യത്തെ മതേതര ജനാധിപത്യ സംവിധാനം സംരക്ഷിക്കുന്നതിന് വേണ്ടി നടത്തുന്ന പ്രതിഷേധ റാലിയിൽ എല്ലാ വിഭാഗം ജനങ്ങളും അണിനിരക്കണമെന്ന് കൊല്ലം രൂപതാ വികാരി ജനറൽ മൊൺ. ബൈജു ജൂലിയാൻ ആവശ്യപ്പെട്ടു.

അപകടം പതിയിരിക്കുന്ന മില്‍പ്പാലം

പി. സനില്‍കുമാര്‍ അഞ്ചല്‍ : ശാന്തമായി ഒഴുകുന്ന കല്ലടയാറിന്‍റെ ഉത്ഭവസ്ഥാനത്ത് നിന്നും ഏതാനും കിലോമീറ്ററുകള്‍ ദൂരത്താണ് ചോഴിയക്കോട് മില്‍പ്പാലം കടവ്. പൊന്മുടി തഴുകി നാങ്കച്ചിയും പാണ്ടിമൊട്ടയും കടന്ന് എത്തുന്ന ആറോളം ചെറു നദികള്‍ സംഗമിക്കുന്ന ഇടം. വന സൗന്ദര്യവും പ്രകൃതി സൗന്ദര്യവും ഒരുമിച്ച് കൂടിയപ്പോള്‍ ആരെയും ആകര്‍ഷിക്കുന്ന അപൂര്‍വത. ഒരുകാലത്ത് സംസ്ഥാനത്തിന്‍റെ വിവിധ ജില്ലകളിലേക്ക് ആറ്റുമണല്‍ ശേഖരിച്ചു വില്‍പ്പന നടത്തിവന്നിരുന്ന പ്രധാന കടവ്. വര്‍ഷങ്ങളായി മണല്‍ ശേഖരണം നിലച്ചതോടെ കല്ലടയാറിന്‍റെ സ്വഭാവിക നീരൊഴുക്ക് പോലും ഇല്ലാതാക്കി സ്വര്‍ണനിറത്തില്‍ കുമിഞ്ഞു കൂടിയിരിക്കുന്ന വന്‍ മണല്‍ ശേഖരം. ഈ വശ്യതയാണ് വീണ്ടും വീണ്ടും വിനോദ സഞ്ചാരികളെ ഇവിടേയ്ക്ക് ആകര്‍ഷിക്കുന്നത്. തിരുവനന്തപുരം, കൊല്ലം ജില്ലകളുടെ അതിര്‍ത്തി പങ്കിടുന്ന ഇവിടെ ഇരു ജില്ലകളില്‍ നിന്നും കൂടാതെ പുറത്തുനിന്നുമായി നിരവധിയാളുകള്‍ എത്തുകയും പ്രകൃതി സൗന്ദര്യം ആവോളം ആസ്വദിക്കുകയും ചെയ്യാറുണ്ട്. ശാന്തമായി ഒഴുകുന്ന കല്ലടയറ്റില്‍ ഒന്നു കുളിക്കണമെന്നു ആര്‍ക്കും തോന്നും. എന്നാല്‍ ശാന്തമായി ഒഴുകുന്ന ഇവിടെ പതിയിരിക്കുന്ന അപകട ചുഴികളെ പറ്റി ആരും ശ്രദ്ധിക്കാറില്ല. ശക്തമായ ജലനിരപ്പ് ഉള്ളപ്പോഴും വരള്‍ച്ച സമയത്തും ഇവിടെ അപകടങ്ങള്‍ ഉണ്ടാകാറുണ്ട്. അപകടത്തില്‍ പ്പെടുന്നവരില്‍ ഏറെയും പുറത്തുനിന്നും എത്തുന്നവരാണ് . കഴിഞ്ഞ ആറ് വര്‍ഷത്തിനിടെ പത്തോളം ജീവനുകള്‍ ഇവിടെ പൊലിഞ്ഞിട്ടുണ്ട്. ഏറെയും യുവാക്കളും വിദ്യാര്‍ഥികളും ആണെന്നത് ഗൗരവതരം. രാജമ്മക്കയം, വില്‍സന്‍റ് കയം എന്നിങ്ങനെ രണ്ട് കയങ്ങള്‍ ഇവിടെ എത്തുന്ന അപരിചിതരെ മരണത്തിലേക്ക് പിടിച്ചെടുക്കുകയാണ്. സൂചന മുന്നറിയിപ്പ് ബോര്‍ഡും ചെക്ക് പോസ്റ്റും സ്ഥാപിച്ചിട്ടുണ്ട്. ഇവയൊന്നും പക്ഷേ ഇവിടെയെത്തുന്നവര്‍ ശ്രദ്ധിക്കാറില്ല. കാര്യമായ ശ്രദ്ധ അധികാരികളും ഇവിടെ നല്‍കുന്നില്ല എന്നതിന്‍റെ തെളിവാണ് തുടര്‍ച്ചയായി ഉണ്ടാകുന്ന മരണങ്ങള്‍. തിരുവനന്തപുരം ഭരതന്നൂര്‍ സ്വദേശി ഫൈസൽ എന്ന 31 കാരന്‍ മില്‍പ്പാലം കടവില്‍ മുങ്ങി മരിച്ചതാണ് ഒടുവിലത്തെ ദുരന്തം. സുരക്ഷ ക്രമീകരകണങ്ങളുടെ അഭാവമാണ് ഇവിടെ അപകടങ്ങള്‍ വര്‍ധിക്കാന്‍ ഇടയാക്കുന്നതെന്ന് വാര്‍ഡ് അംഗവും സ്ഥലവാസിയുമായ ഷീല സത്യന്‍ ആരോപിക്കുന്നു. പ്രദേശത്ത് മുമ്പ് രൂപീകരിച്ച വനം സംരക്ഷണ സമിതികള്‍ ഉണ്ട്. ഇവര്‍ക്ക് ഇവിടെ സുരക്ഷാ ചുമതല നല്‍കുകയോ വനം വകുപ്പ് നേരിട്ട് സുരക്ഷാ ഒരുക്കുകയോ ചെയ്യണം എന്നും ഷീല സത്യന്‍ പറയുന്നു. പ്രദേശത്ത് കുളിക്കടവ് നിര്‍മിക്കുകയും വിനോദ സഞ്ചാരികള്‍ക്ക് സുരക്ഷിതത്വം ഉറപ്പ് വരുത്തുന്നതിനായി പ്രത്യേക ടൂറിസം പാക്കേജ് പ്രദേശത്ത് നടപ്പിലാക്കണമെന്നും ബന്ധപ്പെട്ടവരുടെ നിസഹകരണം ടൂറിസം പദ്ധതി എന്ന ആവശ്യത്തെ പിന്നോട്ടടിക്കുകയായിരുന്നുവെന്നും മുന്‍ പഞ്ചായത്ത് അംഗം കെ.ജെ അലോഷ്യസ് പറയുന്നു. അതേസമയം അപകടങ്ങള്‍ വര്‍ധിക്കുമ്പോഴും മനുഷ്യ ജീവനുകള്‍ പൊലിയുമ്പോഴും അധികൃതരുടെ ഭാഗത്ത് നിന്നും യാതൊരുവിധ നടപടിയും ഇല്ലാത്തതില്‍ നാട്ടുകാരുടെ ഭാഗത്ത് നിന്നും വലിയ രീതിയില്‍ പ്രതിഷേധവും ഉയരുന്നുണ്ട്.

കന്യാസ്ത്രീകളുടെ അറസ്റ്റ് : ആയൂരിൽ വായ്മൂടിക്കെട്ടി പ്രതിഷേധിച്ചു

ആയൂർ : ഛത്തിസ്ഗഡിലെ ദുർഗിൽ രണ്ട് കന്യാസ്ത്രീകളെ കള്ള കേസ് ചുമത്തി തുറുങ്കിലടച്ച തിൽപ്രതിഷേധിച്ച് മലങ്കര കാത്തലിക് അസോസിയേഷൻ ആയൂർ വൈദിക ജില്ലയുടെ നേതൃത്വത്തിൽ വായ്മൂടി ക്കെട്ടി പ്രതിഷേധിച്ചു. തുടർന്ന് പ്രതിഷേധ സംഗമവും റാലിയും നടത്തി. അകാരണമായ കുറ്റം ചുമത്തി സിസ്റ്റേഴ്സിനെ ജയിലിൽ അടച്ചതിന് ശേഷം ഒന്പത് ദിവസം കഴിഞ്ഞാണ് ജാമ്യം ലഭിച്ചത്. ഇത് ഭരണകൂട ഭീകരതയാണ്. കന്യാസ്ത്രീകൾക്കെതിരേ എടുത്തിരിക്കുന്ന എഫ്ഐആർ റദ്ദ് ചെയ്യുക, ഇന്ത്യൻ ഭരണഘടന നൽകുന്ന സ്വത്രന്ത്ര്യം അനുവദിക്കുക, മലയാളി കന്യാസ്ത്രീകൾക്ക് ഉണ്ടായ ദുരാവസ്ഥ ഇനി ആർക്കും ഉണ്ടാകരുത്, കള്ളക്കേസ് എടുപ്പിച്ചവർക്കെതിരേ ഉചിതമായ നിയമ നടപടി സ്വീകരിക്കുക എന്നീ ആവശ്യങ്ങൾ ഉന്നയിച്ചാണ് പ്രതിഷേധ സംഗമം നടത്തിയത്. ഇത്തരം അനുഭവങ്ങൾക്കെതിരേ നിരന്തര സമരപോരാട്ടങ്ങൾ സംഘടിപ്പിക്കും. ജില്ലാ വികാരി ഫാ. ജോൺ അരീയ്ക്കൽ പ്രതിഷേധ സംഗമം ഉദ്ഘാടനം ചെയ്തു. ജില്ലാ വൈദിക ഉപദേഷ്‌ടാവ് ഫാ. അരുൺ ഏറത്ത്, ജില്ലാ പ്രസിഡന്‍റ് ജേക്കബ് കളപ്പുരയ്ക്കൽ, ജില്ലാ സെക്രട്ടറി രാജീവ് കോശി, ഫാ. തോമസ് മരോട്ടി മൂട്ടിൽ, ഫാ. തോമസ് കുരുവിള, ഫാ. തോമസ് മുളകുവിള, ഫാ. തോമസ് കോയിപ്പുറത്ത്, സിസ്റ്റർ അനശ്വര, ഫാ .അനു ജോസ്, ഫാ. ജോൺ പാലവിള ,ഫാ. ടോം തെക്കംവിള എന്നിവർ പ്രസംഗിച്ചു. ട്രഷറർ ഐസക്ക്, പോൾ രാജ് പൂയപ്പള്ളി, മിനി സബിസ്റ്റ്യൻ, ഷാജു തേക്കിൻ കാട്ടിൽ, റെജി ഡാനിയേൽ, കെ.ഷിബി , മത്തായി കുട്ടി, മിനി സജി, അനില ബിജു, ബിന്ദുവിൽസൺ, സിസ്റ്റേഴ്സ് എന്നിവർ പ്രതിഷേധ സംഗമത്തിനും റാലിക്കും നേതൃത്വം നൽകി.

വിദേശമദ്യവും പുകയില ഉത്പന്നങ്ങളുമായി ഒരാൾ പിടിയിൽ

കുളത്തൂപ്പുഴ: റൂറൽ എസ്പിക്ക് ലഭിച്ച രഹസ്യ വിവരത്തെ തുടർന്ന് നടത്തിയ പരിശോധനയിൽ വില്പനയ്ക്കായി കൊണ്ടുവന്ന 54 കുപ്പി വിദേശമദ്യവും നിരോധിത പുകയില ഉത്പന്നങ്ങളുമായി ഒരാൾ കുളത്തൂപ്പുഴ പോലീസിന്‍റെ പിടിയിലായി. വെള്ളില പതിനൊന്നാം മൈൽ ശ്രീവിലാസം വീട്ടിൽ ശ്രീജിത്ത് (41) ആണ് പോലീസ് പിടിയിലായത്.കുളത്തൂപ്പുഴ എസ് എച്ച് ഒയുടെ നിർദ്ദേശപ്രകാരം . സബ് ഇൻസ്പെക്ടർമാരായ ഷാജഹാൻ, വിനോദ്, എഎസ്ഐ സജീവ്, സിപിഒമാരായ സുബിൻ, വിനീഷ്, നന്ദു, അജിത്ത്, ഉബൈദ് എന്നിവരുടെ നേതൃത്വത്തിലുള്ള പോലീസ് സംഘം പതിനൊന്നാം മൈൽ വെള്ളില പ്രദേശങ്ങളിൽ നടത്തിയ പരിശോധനയിലാണ് ശ്രീജിത്തിന്‍റെ കാറിൽ നിന്ന് മദ്യവും പുകയില ഉത്പന്നങ്ങളും പിടിച്ചെടുത്തത്. പിടിച്ചെടുത്ത മദ്യം 54 കുപ്പികളിലായി 23.6 ലിറ്റർ ഉണ്ടായിരുന്നു. മദ്യം കാറിൽ കൊണ്ടുനടന്ന് വില്പന നടത്തുകയായിരുന്നു ഇയാളുടെ രീതിയെന്ന് പോലീസ് അറിയിച്ചു.

കൊട്ടാരക്കര ഗവ. ഗേൾസ് ഹൈസ്കൂളിലെ കെട്ടിടം അപകടഭീഷണി ഉയര്‌ത്തുന്നു

കൊട്ടാരക്കര: നൂറ്റാണ്ട് പഴക്കമുള്ള കൊട്ടാരക്കര ഗവ. ഗേൾസ് ഹൈസ്കൂളിലെ പഴയ കെട്ടിടങ്ങൾ അപകട ഭീഷണി ഉയർത്തുന്നു. കെട്ടിടം ശോചനീയാവസ്ഥയിലായിട്ടും പൊളിച്ച് മാറ്റാൻ അധികൃതർ തയാറാകുന്നില്ല. ശക്തമായ കാറ്റ് വീശിയാൽ നിലം പൊത്തുന്ന അവസ്ഥയിലാണ് സർക്കാർ വിദ്യാലയത്തിലെ ഈ കെട്ടിടം. കുട്ടികൾ എപ്പോഴും ഈ കെട്ടിടത്തോട് ചേർന്നാണ് നടക്കുകയും, കളിക്കുകയും, ഇടയ്ക്ക് വിശ്രമിക്കുന്നതും.അധ്യയനത്തിന്‍റെ ഇടവേളകളിൽ കുട്ടികൾ ഈ കെട്ടിടത്തിന്‍റെ വരാന്തയിൽ ഉണ്ടാകും. പഴകി ദ്രവിച്ച കെട്ടിടത്തിന്‍റെ ഓടുകളും മേൽക്കൂരയും പൊട്ടിയടർന്നു.ഭിത്തികൾ വിണ്ടുകീറി. രാജഭരണ കാലത്ത് ഇളയിടത്തു സ്വരൂപത്തിലെ കുടുംബാംഗങ്ങൾക്കും ഉന്നത കുലത്തിൽപ്പെട്ടവർക്കും വിദ്യാഭ്യാസത്തിനായി തുടങ്ങിയ മലയാളം വിദ്യാലയമാണിത്. മലയാളം വേർണാഗുലർ എന്നായിരുന്നു അന്ന് പേര്. പിന്നീട് ഇംഗ്ലീഷ് തേർഡ് ഫോറം സ്കൂളാക്കി മാറ്റി. 1937-ൽ സർ സി.പി. രാമസ്വാമി അയ്യർ ദിവാനായിരിക്കേ നാട്ടുകാർ സമാഹരിച്ച 5000രൂപ കെട്ടിവച്ചപ്പോൾ ആണ് ഹൈസ്കൂളിനായി പ്രവർത്തനാനുമതി ലഭിച്ചത്. കുട്ടികൾ കുറഞ്ഞതിനാൽ സ്കൂൾ അടച്ചു പൂട്ടലിന്‍റെ വക്കോളമെത്തിയെങ്കിലും നാട്ടുകാർ ഇടപെട്ട് സ്കൂൾ നിലനിർത്തി. സ്കൂളിന് കോൺക്രീറ്റ് കെട്ടിടം ഉണ്ടായപ്പോൾ പഴയ കെട്ടിടം പൊളിച്ചു നീക്കാൻ ശ്രമം തുടങ്ങിയെങ്കിലും ഇതുവരെയും തീരുമാനം എടുത്തിട്ടില്ല.

വിമുക്തഭടന് നേരേ ആക്രമണം: പ്രതി അറസ്റ്റിൽ

ചാത്തന്നൂർ : വിമുക്തഭടനെ ആക്രമിച്ച് പരിക്കേപ്പിച്ച കേസിൽ പ്രതിയെ ചാത്തന്നൂർ പോലീസ് അറസ്റ്റ് ചെയ്തു. കാരംകോട് കിണറുമുക്ക് ചരുവിള വീട്ടിൽ രാഹുൽ എന്ന വി. അനന്തു (31) ആണ് പിടിയിലായത്. ചാത്തന്നൂരിൽ സൂപ്പർ മാർക്കറ്റ് നടത്തുന്ന വിമുക്തഭടൻ ഉളിയനാട് സ്വദേശി ഫ്രാൻസിസ് (44)നാണ് പരിക്കേറ്റത്. ഒപ്പമുണ്ടായിരുന്ന ഭാര്യക്ക് ബൈക്കിൽ നിന്നും വീണ് പരിക്കേറ്റു. സംഭവത്തെ കുറിച്ച് പോലീസ് പറയുന്നത് - ഭാര്യയുമൊത്ത് വ്യാഴാഴ്ച രാത്രി ഒൻപതോടെ ശീമാട്ടിയിലെ ബന്ധു വീട്ടിലേക്ക് പോകുമ്പോൾ കാരംകോട് കിണറ് മുക്കിന് സമീപം പ്രതിയുടെ വീട്ടിന് മുന്നിൽ വച്ച് യാതൊരു പ്രകോപനവും കൂടാതെ സ്കൂട്ടർ തടഞ്ഞു നിർത്തി വെട്ടിയും കുത്തിയും പരിക്കൽപ്പിക്കുകയായിരുന്നു. മയക്കു മരുന്ന് ഉപയോഗിച്ചിരുന്ന പ്രതി മാരകയുധവുമായി റോഡിൽ ഇറങ്ങിയപ്പോൾ ആണ് ഫ്രാൻസിസ് ഭാര്യയ്ക്ക് ഒപ്പം ബൈക്കിൽ വരുന്നത് കണ്ട് തടഞ്ഞു നിർത്തി ആക്രമിക്കുന്നതെന്ന് പോലീസ് പറഞ്ഞു. ചാത്തന്നൂരിൽ കെഎസ് ആർടിസി ബസുകൾ അടിച്ചു തകർത്തതിലും വീടുകളിൽ കയറി ആക്രമണം നടത്തിയതിലും ഉൾപ്പടെ നിരവധി ക്രിമിനൽ കേസുകളിലും മയക്കു മരുന്ന് വിപണന കേസുകളിലും പ്രതിയാണ് അനന്തു. ചാത്തന്നൂർ പോലീസ് കേസെടുത്ത് പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]