ADVERTISEMENT

ADVERTISEMENT

ദീപിക നമ്മുടെ ഭാഷ പദ്ധതി : പൈങ്ങോട്ടൂർ സെന്‍റ് ജോസഫ്സ് എൽപി സ്കൂളിൽ

പൈങ്ങോട്ടൂർ: സെന്‍റ് ജോസഫ്സ് എൽപി സ്കൂളിൽ ആരംഭിച്ച ദീപിക നമ്മുടെ ഭാഷ പദ്ധതിയുടെ ഉദ്ഘാടനം ഡിഎഫ്സി രൂപത ഡയറക്ടർ ഫാ. ആന്‍റണി പുത്തൻകുളം നിർവഹിച്ചു. സ്കൂൾ മാനേജർ ഫാ. കുര്യാക്കോസ് കൊടകല്ലിൽ അധ്യക്ഷത വഹിച്ചു.

അസി. മാനേജർ ഫാ. ജോണ്‍സണ്‍ വാമറ്റത്തിൽ, ഡിഎഫ്സി സംസ്ഥാന പ്രസിഡന്‍റ് ലോറൻസ് ഏബ്രഹാം, പ്രധാനാധ്യാപിക ഷിബിമോൾ ജോസഫ്, പിടിഎ പ്രസിഡന്‍റ് ഫെമിക്സ് ജോണ്‍, ജോമോൻ ജോസ്, അനിൽ കല്ലട, ജോഷി കുര്യൻ, സ്പോണ്‍സർ ബിജു കുരീക്കാട്ടിൽ തുടങ്ങിയവർ പ്രസംഗിച്ചു.

ADVERTISEMENT

യുവതിയടക്കം പിടിയിലായ ലഹരി കേസ് : ‘ലഹരി ജര്‍മന്‍ മേയ്ഡ്'

എവിടുന്ന്‍? എങ്ങനെ? പറയാതെ പ്രതികള്‍ കൊച്ചി: നഗരത്തില്‍ യുവതി അടക്കം നാലുപേര്‍ അറസ്റ്റിലായ ലഹരിക്കേസില്‍ പ്രതികളില്‍ നിന്നും കണ്ടെടുത്തത് ‘ജര്‍മന്‍ മേയ്ഡ്' ലഹരി വസ്തുക്കളെന്ന് നര്‍ക്കോട്ടിക് വിഭാഗം. ബംഗളൂരുവില്‍ നിന്നാണ് പ്രതികള്‍ ലഹരിമരുന്ന് എത്തിച്ചിരുന്നതെങ്കിലും ഇതിന്‍റെ കൃത്യമായ ഉറവിടം എവിടെയാണെന്ന് പോലീസിനോടു പറയാന്‍ പ്രതികള്‍ തയാറായിട്ടില്ല. കൊച്ചിയിലെത്തിച്ചിരുന്ന ലഹരിമരുന്ന് യുവാക്കള്‍ക്കിടയിലടക്കം വില്പന നടത്തിയിരുന്നു. ഇവരുടെ പക്കല്‍ നിന്ന് ലഹരി വാങ്ങിയവരെക്കുറിച്ചും കൊച്ചിയില്‍ ഇവരുടെ മറ്റ് പങ്കാളികളെക്കുറിച്ചും പോലീസ് അന്വേഷണം നടത്തി വരികയാണ്. ഇതുസംബന്ധിച്ച ചോദ്യംചെയ്യലിനോട് സഹകരിക്കാത്ത പ്രതികളുടെ മൊബൈല്‍ ഫോണ്‍ അടക്കം ശാസ്ത്രീയ പരിശോധനയ്ക്ക് വിധേയമാക്കാനാണ് നീക്കം. അറസ്റ്റിലായ മുഹമ്മദ് ഷാമില്‍ വഴിയാണ് ലഹരി വസ്തുക്കളെത്തിയിരുന്നതെന്നാണ് കണ്ടെത്തല്‍. എളംകുളത്തെ ഫ്ലാറ്റില്‍ കഴിഞ്ഞ ദിവസം കൊച്ചി സിറ്റി ഡാന്‍സാഫ് സംഘം നടത്തിയ പരിശോധനയില്‍ 115 ഗ്രാം എംഡിഎംഎയും, ഉന്മാദമുണ്ടാക്കുന്ന 41 ഗുളികകളുമാണ് പിടികൂടിയത്. സംഭവത്തില്‍ മലപ്പുറം മൂര്‍ക്കനാട് സ്വദേശി മുഹമ്മദ് ഷാമില്‍ (28), കോഴിക്കോട് ചേളന്നൂര്‍ ഇരുവള്ളൂര്‍ സ്വദേശി സി.പി. അബു ഷഹാമില്‍ (28), മലപ്പുറം വലിയങ്ങാടി സ്വദേശി ഫല്‍ജാഷ് മുഹമ്മദ് അഫ്‌നാന്‍, (26), കോഴിക്കോട് ചേളന്നൂര്‍ സ്വദേശി എസ്.കെ. ദിയ (24) എന്നിവരാണ് അറസ്റ്റിലായത്. പ്രതികളുടെ ലഹരി ബന്ധങ്ങടക്കം പരിശോധിക്കുന്നതിന് ഇവരെ കസ്റ്റഡിയില്‍ വാങ്ങി ചോദ്യംചെയ്യും. നിറമുള്ള ഗുളിക രൂപത്തിലുള്ളതാണ് ഉന്മാദ ഗുളിക (എക്‌സ്റ്റസി പില്‍സ്). തീവ്രശേഷിയുള്ള ലഹരിയാണിത്. എംബിഎ ബിരുദധാരിയായ ദിയ കൊച്ചിയില്‍ ജോലി ചെയ്യുകയാണ്. മറ്റൊരാള്‍ അക്കൗണ്ടന്‍റാണ്. ഒരാള്‍ പഠനത്തിനായി നഗരത്തിലെത്തിയതാണ്. ദുബായില്‍ അക്കൗണ്ടന്‍റായി ജോലി ചെയ്തിരുന്ന മുഹമ്മദ് ഷാമില്‍ ഒരു വര്‍ഷം മുമ്പാണ് കൊച്ചിയിലെത്തിയത്.

കൊക്കെയ്ൻ വിഴുങ്ങിയെത്തിയ ബ്രസീലിയൻ ദമ്പതികളുടെ പ്രതിഫലം മൂന്നുലക്ഷം

നെടുമ്പാശേരി: കൊക്കെയ്ൻ കാപ്സ്യൂൾ രൂപത്തിലാക്കി വിഴുങ്ങിയെത്തിയ ബ്രസീലിയൻ ദമ്പതികൾക്ക് പ്രതിഫലമായി ലഭിക്കുന്നത് മൂന്ന് ലക്ഷം രൂപയെന്ന് വെളിപ്പെടുത്തൽ. ഡിആർഐ ഉദ്യോഗസ്ഥരുടെ ചോദ്യംചെയ്യലിലാണ് ഇവർ ഇക്കാര്യം വ്യക്തമാക്കിയത്. ലഹരി കാപ്സ്യൂൾ വയറിനുള്ളിൽവച്ച് പൊട്ടിയാൽ മരണം വരെ സംഭവിക്കും. ബ്രസീലിയൻ സ്വദേശികളായ ബ്രൂണ ഗബ്രിയേൽ റോഡ്രിഗസ്, ഭാര്യ ലുകാസ് ഡസിൽവ ബറ്റിസ്റ്റ എന്നിവരിൽ നിന്നും 16 കോടി രൂപ വില വരുന്ന 1,670 ഗ്രാം കൊക്കെയ്നാണ് പിടിച്ചെടുത്തത്. ഇത് സുരക്ഷിതമായി കേരളത്തിൽ എത്തിച്ചാൽ ഒന്നരലക്ഷം രൂപ വീതം ഓരോരുത്തർക്കും ലഭിക്കുമെന്നാണ് ഇവർ മൊഴി നൽകിയിരിക്കുന്നത്. എന്നാൽ കേവലം മൂന്നുലക്ഷം രൂപയ്ക്കു വേണ്ടിയാണ് കോടികൾ വിലവരുന്ന മാരക മയക്കുമരുന്നായ കൊക്കെയ്ൻ ജീവൻപോലും അപകടപ്പെടുത്തി ഇവർ കടത്താൻ ശ്രമിച്ചതെന്ന മൊഴി ഉദ്യോഗസ്ഥർ പൂർണമായും വിശ്വാസത്തിലെടുത്തിട്ടില്ല. കൂടുതൽ അന്വേഷണങ്ങൾക്കായി ഇവരെ കസ്റ്റഡിയിൽ വാങ്ങി വിശദമായി ചോദ്യം ചെയ്യാനാണ് തീരുമാനം. നെടുമ്പാശേരിയിൽ വിമാനമിറങ്ങിയ ശേഷം തിരുവനന്തപുരത്ത് എത്താനാണ് ബ്രസീലിയൻ മയക്കുമരുന്ന് കടത്തു സംഘം ഇവരോട് നിർദേശിച്ചിരുന്നത്. ഇവിടെ ഇവർക്ക് താമസിക്കാൻ ഹോട്ടലിൽ മുറിയും ബുക്ക് ചെയ്തിരുന്നു. തിരുവനന്തപുരത്ത് ലഹരി കൈമാറേണ്ട ആളുകളുടെ വിവരം തങ്ങൾക്ക് നൽകിയിരുന്നില്ലെന്നാണ് ഇവർ പറഞ്ഞത്. ഹോട്ടലിൽ എത്തിയ ശേഷം വാട്ട്സ്ആപ്പിൽ തങ്ങളുമായി ബന്ധപ്പെടാനാണ് നിർദേശം നൽകിയിരുന്നതെന്നും ഇവർ വ്യക്തമാക്കി. ഡിആർഐയ്ക്ക് ലഭിച്ച രഹസ്യവിവരത്തെ തുടർന്ന് കഴിഞ്ഞ 11ന് നെടുമ്പാശേരിയിൽ പിടിയിലായ ബദമ്പതികളെ അങ്കമാലിയിൽ സ്വകാര്യ ആശുപത്രിയിൽ പ്രവേശിപ്പിച്ച് അഞ്ച് ദിവസം നീണ്ട ശ്രമത്തിനൊടുവിലാണ് ലഹരി കാപ്സ്യൂളുകൾ വയറ്റിൽ നിന്നും പൂർണമായും പുറത്തെടുത്തത്. തുടർന്ന് കോടതിയിൽ ഹാജരാക്കി റിമാൻഡ് ചെയ്തു. ബ്രസീലിലെ സാവോപോളോയിൽ നിന്നാണ് ഇവർ എത്തിയത്. ഗുളികയുടെ മുകളിലെ ചിഹ്നങ്ങള്‍ രാജ്യാന്തര ലഹരി മാഫിയ സംഘങ്ങളുടെ അടയാളങ്ങളാണ്. എംഡിഎംഎയുടെ വീര്യത്തിനനുസരിച്ചാണ് എക്സ്റ്റസി പില്‍സിന് നിറം നല്‍കുന്നത്. അഞ്ച് നിറത്തിലായിരുന്നു ഗുളികകള്‍. സംഭവത്തില്‍ എന്‍സിബി വിവരശേഖരണം തുടങ്ങി.

നാട്ടുകാര്‍ക്ക് സ്വൈര്യക്കേട്; അലിസ്റ്റര്‍ അഴിക്കുള്ളില്‍

കൊച്ചി: മോഷണവും മയക്കുമരുന്ന് കച്ചവടവുമടക്കം നിരവധി ക്രിമിനല്‍ പ്രവര്‍ത്തനങ്ങള്‍, ഒടുവില്‍ നാട്ടുകാരുടെ സ്വൈര്യജീവിതത്തിന് സ്ഥിരം ഭീഷണിയായതോടെ യുവാവിനെ കാപ്പാ നിയമപ്രകാരം പോലീസ് ജയിലിലടച്ചു. വല്ലാര്‍പാടം പനമ്പുകാട് സ്വദേശി അലിസ്റ്റര്‍ സേവ്യര്‍(24) നെ ആണ് ജില്ലാ കളക്ടറുടെ ഉത്തരവിനെത്തുടര്‍ന്ന് ജയിലിലടച്ചത്. ഭവനഭേദനം, മോഷണം, മയക്കുമരുന്ന് കച്ചവടം, അടിപിടി തുടങ്ങി 12ഓളം കേസുകളില്‍ പ്രതിയാണ് അലിസ്റ്റര്‍. ഇത്തരക്കാർ‍ക്കെതിരെ ശക്തമായ നടപടികള്‍ തുടരുമെന്ന് കൊച്ചി സിറ്റി പോലീസ് കമ്മീഷണര്‍ പുട്ട വിമലാദിത്യ അറിയിച്ചു.

ജില്ലയിലെ ദുരന്ത നിവാരണ പ്രവര്‍ത്തനങ്ങള്‍ വിലയിരുത്തി

കൊച്ചി: എറണാകുളം, ഇടുക്കി ജില്ലകളുടെ ദുരന്തനിവാരണ പ്രതിരോധ പ്രവര്‍ത്തനങ്ങള്‍ ദേശീയ ദുരന്ത നിവാരണ ഏജന്‍സി പ്രതിനിധികള്‍ വിലയിരുത്തി. ദേശീയ ദുരന്ത നിവാരണ ഏജന്‍സി ഡെപ്യൂട്ടി ഡയറക്ടര്‍ റാഖീ സദ്ദു, ഡ്യൂട്ടി ഓഫീസര്‍ രജത് മല്‍ഹോത്ര,സീനിയര്‍ കണ്‍സള്‍ട്ടന്‍റ് സി.ജെ. സത്യകുമാര്‍ എന്നിവരുടെ നേതൃത്വത്തിലാണ് പ്രതിരോധ പ്രവര്‍ത്തനങ്ങള്‍ വിലയിരുത്തിയത്. നിലവില്‍ ജില്ലയില്‍ ദുരന്തനിവാരണ അഥോറിറ്റിയുടെ കീഴില്‍ എന്തെല്ലാം നടപടികളും പ്രവര്‍ത്തനങ്ങളുമാണ് നടക്കുന്നതെന്ന് ഉദ്യോഗസ്ഥര്‍ പരിശോധിച്ചു. മുന്നോട്ട് എങ്ങനെ മികച്ച രീതിയില്‍ പ്രവര്‍ത്തനങ്ങള്‍ ഏകോപിപ്പിക്കാന്‍ സാധിക്കുമെന്നതിനെക്കുറിച്ചുള്ള അവലോകനവും നടന്നു. ജില്ലാ കളക്ടര്‍ എന്‍.എസ്.കെ. ഉമേഷ്, ഇടുക്കി ജില്ലാ അഡീഷണല്‍ ജില്ലാ മജിസ്‌ട്രേറ്റ് ഷൈജു പി. ജേക്കബ്, ജില്ലാ ദുരന്തനിവാരണ വിഭാഗം ഡെപ്യൂട്ടി കളക്ടര്‍ കെ. മനോജ് തുടങ്ങിയവര്‍ പങ്കെടുത്തു.

ജില്ലാ ആയുര്‍വേദ, ഹോമിയോ ആശുപത്രികൾക്ക് മികവിന്‍റെ പുരസ്‌കാരം

കൊച്ചി: സംസ്ഥാനത്തെ മികച്ച ആയുര്‍വേദ ആശുപത്രികള്‍ക്കും ഹോമിയോ ആശുപത്രികള്‍ക്കുമായി സംസ്ഥാന സര്‍ക്കാര്‍ പ്രഖ്യാപിച്ച പ്രഥമ ആയുഷ് കായകല്‍പ്പ പുരസ്കാരങ്ങളിൽ എറണാകുളം ജില്ലാ ആയുര്‍വേദ, ഹോമിയോ ആശുപത്രികൾക്ക് തിളക്കം. ജില്ലാ ആയുര്‍വേദ ആശുപത്രി ആയുര്‍വേദ വിഭാഗത്തില്‍ ഒന്നാം സ്ഥാനം നേടിയപ്പോള്‍, ഹോമിയോപ്പതി വിഭാഗത്തില്‍ ജില്ലാ ഹോമിയോ ആശുപത്രി രണ്ടാം സ്ഥാനം നേടി. ജില്ലാ പഞ്ചായത്തിന്‍റെ കീഴിലുള്ള രണ്ട് ജില്ലാ ആശുപത്രികള്‍ക്ക് ഒരേ സമയം സംസ്ഥാന പുരസ്കാരങ്ങൾ ലഭിക്കുന്നത് ഇതാദ്യമായാണെന്നും, മികവാര്‍ന്ന സേവനം ലഭ്യമാക്കാനുള്ള ശ്രമങ്ങള്‍ക്ക് ലഭിക്കുന്ന അംഗീകാരമാണിതെന്നും ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ പറഞ്ഞു. ജില്ലാ പഞ്ചായത്തിന്‍റെ നേതൃത്വത്തില്‍ പ്രതിവര്‍ഷം മൂന്നുകോടി രൂപയിലധികം ചെലവഴിച്ച് അടിസ്ഥാന സൗകര്യവികസനത്തോടൊപ്പം രോഗികള്‍ക്കാവശ്യമായ മരുന്നും അനുബന്ധ സംവിധാനങ്ങളും ഒരുക്കിയ ജില്ലാ ആയുര്‍വേദ ആശുപത്രിയില്‍ നിരവധി സൂപ്പര്‍ സ്‌പെഷ്യലിറ്റി വിഭാഗങ്ങളിലായി നൂറുകണക്കിനാളുകളാണ് പ്രതിദിനം ചികിത്സയ്ക്കായി എത്തുന്നത്. ജനറല്‍ വാര്‍ഡ്, പേ വാര്‍ഡ്, പേയിംഗ് വാര്‍ഡ് സൗകര്യങ്ങളോടെ ഐപി വിഭാഗത്തില്‍ 66 ബെഡ് സൗകര്യവും ആശുപത്രിയിലുണ്ട്. പ്രതിദിനം 500 ല്‍ അധികം ആളുകള്‍ ചികിത്സ തേടിയെത്തുന്ന ജില്ലാ ഹോമിയോ ആശുപത്രിയില്‍ 20 ഡോക്ടര്‍മാരും 35 ഓളം സ്റ്റാഫുകളുമുണ്ട്. ജനറല്‍ ഒപിയ്ക്ക് പുറമെ വന്ധ്യത ചികിത്സയ്ക്ക് മാത്രമായുള്ള പ്രത്യേക വിഭാഗമായ ജനനി, ജീവിതശൈലീ നിവാരണ ചികിത്സാ വിഭാഗം എന്നിവയുമുണ്ട്. ജില്ലാ ആയുര്‍വേദ ആശുപത്രിയിലും ഹോമിയോ ആശുപത്രിയിലും ജില്ലാ പഞ്ചായത്തിന്‍റെ നേതൃത്വത്തില്‍ കേക്ക് മുറിച്ചും മധുരം വിതരണം ചെയ്തും വിജയാഹ്ലാദം പങ്കുവച്ചു. മനോജ് മുത്തേടന്‍ ഉദ്ഘാടനം ചെയ്തു. വൈസ് പ്രസിഡന്‍റ് എല്‍സി ജോര്‍ജ്, ആരോഗ്യകാര്യ സ്ഥിരംസമിതി ചെയര്‍മാന്‍ എം.ജെ. ജോമി, സെക്രട്ടറി പി.എം. ഷെഫീക്ക്, ജില്ലാ മെഡിക്കല്‍ ഓഫീസര്‍മാരായ ഡോ. പി. സലീം, ഡോ. മേഴ്‌സി ഗോണ്‍സാല്‍വസ്, ഡിപിഎം ഡോ. വി.പി. ജയകൃഷ്ണന്‍, ഡോ. എ. ഷമ്മി, ഡോ.എസ്. ശ്രീവിദ്യ, ഡോ. സിന്ധു ആന്‍റണി എന്നിവര്‍ പ്രസംഗിച്ചു.

പെരുമ്പാവൂരിൽ ഇതര സംസ്ഥാനക്കാരിൽ നിന്നും പിടികൂടിയത് 10 കിലോ കഞ്ചാവ്

പെരുമ്പാവൂർ: 10 കിലോ കഞ്ചാവുമായി നാല് ഇതര സംസ്ഥാനക്കാർ പിടിയിൽ. ഒഡീഷ കണ്ടമാൽ പടെരിപ്പട സീതാറാം ദിഗൽ (43), പൗളാ ദിഗൽ (45), ജിമി ദിഗൽ (38), രഞ്ജിത ദിഗൽ എന്നിവരെയാണ് പെരുമ്പാവൂർ എഎസ്‌പിയുടെ പ്രത്യേക അന്വേഷണ സംഘം പിടികൂടിയത്. ജില്ലാ പോലീസ് മേധാവി എം. ഹേമലതയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ ബുധനാഴ്ച പുലർച്ചെ പെരുമ്പാവൂർ വട്ടക്കാട്ടുപടിയിൽ നിന്നാണ് ഇവരെ കസ്റ്റഡിയിലെടുത്തത്. ഒഡീഷയിൽനിന്ന് ട്രെയിൻ മാർഗമാണ് ആലുവയിൽ എത്തിയത്. അവിടെനിന്ന് പെരുമ്പാവൂർ കെഎസ്ആർടിസി ബസ് സ്റ്റാൻഡിൽ വന്നിറങ്ങിയ ശേഷം ഓട്ടോറിക്ഷയിൽ വട്ടക്കാട്ടുപടിയിലുള്ള താമസസ്ഥലത്തേക്ക് വരുന്ന വഴിയാണ് ഇവർ അന്വേഷണ സംഘത്തിന്‍റെ വലയിലായത്. സീതാറാമും പൗളാ ദിഗലും സഹോദരങ്ങളാണ്. ഇവരുടെ ഭാര്യമാരാണ് പിടിയിലായ സ്ത്രീകൾ. ഒഡീഷയിൽനിന്നു കിലോയ്ക്ക് 3000 രൂപയ്ക്ക് വാങ്ങുന്ന കഞ്ചാവ് ഇവിടെ 25000 രൂപയ്ക്ക് വില്പന നടത്തി തിരിച്ചുപോവുകയാണ് ഇവരുടെ രീതി. മാസത്തിൽ ഒന്നോ രണ്ടോ പ്രാവശ്യം കേരളത്തിൽ കഞ്ചാവുമായി എത്തും. സംശയം തോന്നാതിരിക്കാൻ വട്ടക്കാട്ടുപടിയിൽ വാടക വീട് എടുത്തിരുന്നു. പ്ലൈവുഡ് കമ്പനിയിൽ ജോലിക്കെന്ന വ്യാജേനയാണ് ഇവിടെ എത്തിയിരുന്നത്. ഇവരിൽനിന്ന് കഞ്ചാവ് വാങ്ങുന്നവരെക്കുറിച്ച് അന്വേഷണം ആരംഭിച്ചു.

ലിഫ്റ്റിനുള്ളില്‍ തല കുടുങ്ങി സെക്യൂരിറ്റി ജീവനക്കാരന് ദാരുണാന്ത്യം

കൊച്ചി: സര്‍വീസ് ലിഫ്റ്റിനുള്ളില്‍ തല കുടുങ്ങി സെക്യൂരിറ്റി ജീവനക്കാരന് ദാരുണാന്ത്യം. എറണാകുളത്ത് പ്രവര്‍ത്തിക്കുന്ന പ്രിന്‍റിംഗ് സ്ഥാപനത്തിലെ സെക്യൂരിറ്റി ജീവനക്കാരനായ കൊല്ലം പടപ്പാക്കര ചാരുവില്ല പുത്തന്‍വീട്ടില്‍ ബിജു(42) ആണ് മരിച്ചത്. ഇന്നലെ രാവിലെ 9.30 നായിരുന്നു സംഭവം. പ്രിന്‍റിംഗ് സാമഗ്രികള്‍ താഴത്തെ നിലയില്‍ നിന്ന് ഒന്നാം നിലയിലേക്ക് ലിഫ്റ്റ് വഴി എത്തിക്കുകയായിരുന്നു. ഒന്നാം നിലയിലെത്തിയപ്പോള്‍ സാധനങ്ങള്‍ ഇറക്കുന്നതിനിടെ ഒരു പായ്ക്കറ്റ് ലിഫ്റ്റിന് ഉള്ളിലേക്ക് വീണു. ഇതെടുക്കാനായി പുറത്തുനിന്ന് ബിജു ലിഫ്റ്റിനുള്ളിലേക്ക് തലയിട്ടപ്പോള്‍ ലിഫ്റ്റിന്‍റെ മുകള്‍ ഭാഗം കഴുത്തില്‍ വന്നു പതിക്കുകയായിരുന്നു. തല ലിഫ്റ്റിനകത്ത് കുടുങ്ങിയ അവസ്ഥയിലുമായിരുന്നു. ഉടന്‍ തന്നെ പോലീസും ക്ലബ് റോഡില്‍ നിന്നുള്ള ഫയര്‍ ഫോഴ്‌സ് സംഘവും എത്തി ലിഫ്റ്റ് പൊളിച്ചാണ് ഇദ്ദേഹത്തെ പുറത്തെടുത്തത്. ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മാന്‍പവര്‍ ഏജന്‍സി വഴിയാണ് ഇയാള്‍ ഇവിടെ ജോലിക്കെത്തിയത്. എറണാകുളം സെന്‍ട്രല്‍ പോലീസ് അസ്വാഭാവിക മരണത്തിന് കേസെടുത്തു.

കേരള അഗ്രികള്‍ച്ചറല്‍ വര്‍ക്കേഴ്‌സ് ഫോറം : സംസ്ഥാന നേതൃസമ്മേളനം

കൊച്ചി: കേരള അഗ്രികള്‍ച്ചറല്‍ വര്‍ക്കേഴ്‌സ് ഫോറം സംസ്ഥാന നേതൃസമ്മേളനം പാലാരിവട്ടം പിഒസിയില്‍ നടന്നു. കേരള ലേബര്‍ മൂവ്‌മെന്‍റ് സംസ്ഥാന ഡറക്ടര്‍ ഫാ. അരുണ്‍ വലിയ താഴത്ത് ഉദ്ഘാടനം ചെയ്തു. രാജ്യത്തിന്‍റെ കാര്‍ഷിക ഉത്പാദനത്തിനു വേണ്ടി അത്യധ്വാനം ചെയ്യുന്ന കര്‍ഷക തൊഴിലാളികളുടെ ജീവിതസുരക്ഷയക്കും സാമ്പത്തിക ഭദ്രതയ്ക്കും അവശ്യമായത് നല്‍കാന്‍ സര്‍ക്കാരിനും സമൂഹത്തിനും ഉത്തരവാതിത്വമുണ്ടെന്ന് ഫാ.അരുണ്‍ വലിയ താഴത്ത് പറഞ്ഞു. കേരള ലേബര്‍ മൂവ്‌മെന്‍റ് അസിസ്റ്റന്റ് ഡയറക്ടര്‍ ജോസഫ് ജൂഡ് അധ്യക്ഷത വഹിച്ചു. യുടിഎ കണ്‍വിനര്‍ ബാബു തണ്ണിക്കോട്ട്,ജോസ് മാത്യു ഊക്കന്‍, ഫാ. ജോസ് ചമ്പക്കുളം, ഡിക്‌സന്‍ മനിക്ക്, തോമസ് മാത്യൂ എന്നിവര്‍ സംസാരിച്ചു.കേരള കര്‍ഷക ക്ഷേമനിധി ബോര്‍ഡ് എറണാകുളം ജില്ലാ ഓഫീസര്‍ ശ്രീനിവാസ് ക്ലാസുകള്‍ നയിച്ചു.

മയക്കുമരുന്നുമായി യുവാവ് പിടിയില്‍

കൊച്ചി: എംഡിഎംഎയും ഹാഷിഷ് ഓയിലുമായി യുവാവ് പിടിയില്‍. ഇടപ്പള്ളി ചങ്ങമ്പുഴ റോഡ് എളവുങ്കല്‍ വീട്ടില്‍ അഖില്‍ ജോസഫ് (35) ആണ് പിടിയിലായത്. ഇയാളുടെ പക്കല്‍ നിന്നും 2.63 ഗ്രാം എംഡിഎംഎയും 3.76 ഗ്രാം ഹാഷിഷ് ഓയിലുമാണ് പിടികൂടിയത്. കൊച്ചി സിറ്റി ഡാന്‍സാഫ് ടീം നടത്തിയ പരിശോധനയില്‍ എറണാകുളം ബോള്‍ഗാട്ടിക്ക് സമീപത്തുനിന്നാണ് പ്രതി പിടിയിലായത്.

വിവാഹ വാഗ്ദാനങ്ങളില്‍ വഞ്ചിതരാകുന്നവർ വര്‍ധിക്കുന്നെന്ന്

കൊച്ചി: വിവാഹ വാഗ്ദാനങ്ങളില്‍ വഞ്ചിതരാകുന്നവരുടെ എണ്ണത്തില്‍ വലിയ തോതില്‍ വര്‍ധനവ് ഉണ്ടാകുന്നതായി വനിതാ കമ്മീഷന്‍ അധ്യക്ഷ അഡ്വ. പി. സതീദേവി പറഞ്ഞു. കളക്ടറേറ്റില്‍ നടന്ന സംസ്ഥാന വനിതാ കമ്മീഷന്‍റെ ജില്ലാതല അദാലത്തില്‍ പങ്കെടുത്ത് സംസാരിക്കുകയായിരുന്നു അവര്‍. വിവാഹം കഴിയ്ക്കാമെന്ന് വ്യാജ വാഗ്ദാനങ്ങള്‍ നല്‍കി പണവും ആഭരണങ്ങളും സ്വത്തും അപഹരിക്കാന്‍ ശ്രമിക്കുന്നവര്‍ക്കെതിരെയുള്ള പരാതികളാണ് അദാലത്തിന്‍റെ അവസാന ദിനത്തില്‍ കമ്മീഷന് മുന്നില്‍ അധികമായി എത്തിയത്. ഇത്തരം പ്രലോഭനങ്ങളില്‍ വീഴാതിരിക്കാന്‍ സ്ത്രീകള്‍ കൂടുതല്‍ ജാഗരൂകര്‍ ആവേണ്ടത് അനിവാര്യമാണെന്നും അവര്‍ പറഞ്ഞു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന അദാലത്തില്‍ 80 പരാതികളാണ് പരിഗണിച്ചത്. ഇതില്‍ 10 പരാതികള്‍ തീര്‍പ്പാക്കി. 62 പരാതികള്‍ അടുത്ത അദാലത്തില്‍ പരിഗണിക്കുന്നതിനായി മാറ്റിവച്ചു. കമ്മീഷന്‍ അംഗങ്ങളായ അഡ്വ. ഇന്ദിര രവീന്ദ്രന്‍, അഡ്വ. എലിസബത്ത് മാമന്‍ മത്തായി, വി.ആര്‍. മഹിളാമണി, അഡ്വ. അമ്പിളി, അഡ്വ. സ്മിത ഗോപി, അഡ്വ. യമുന തുടങ്ങിയവര്‍ പങ്കെടുത്തു.

കൊച്ചിയുടെ ‘സമൃദ്ധി' രുചികള്‍ : ഇനി ട്രെയിനിലും

ആദ്യഘട്ടം മൂന്ന് ട്രെയിനുകളില്‍ കൊച്ചി: കുറഞ്ഞ നിരക്കില്‍ ഭക്ഷണം നല്‍കി കൊച്ചിയുടെ ട്രേഡ് മാര്‍ക്കായി മാറിയ സമൃദ്ധി@കൊച്ചിയുടെ ഭക്ഷണം ഇനി കേരളത്തിലെ ട്രെയിനുകളിലും. മൂന്നു നേരത്തെ ഭക്ഷണത്തിന് കരാര്‍ ലഭിച്ച സമൃദ്ധി മൂന്ന് ട്രെയിനുകളിലായി ഭക്ഷണം വിതരണം ആരംഭിച്ചു. തുടക്കത്തില്‍ ലഭിക്കുന്ന ഓര്‍ഡറുകള്‍ പ്രകാരമാണ് വരുമാനം. വൈകാതെ ഐആര്‍സിടിസിയില്‍ ടിക്കറ്റ് ബുക്കിംഗ് നടത്തുമ്പോള്‍ത്തന്നെ സമൃദ്ധിയുടെ ഭക്ഷണവും ബുക്ക് ചെയ്യാനുള്ള ഓണ്‍ലൈന്‍ സംവിധാനവും നിലവില്‍ വരും. നാലാം വാര്‍ഷികത്തില്‍ ഗ്രേറ്റര്‍ കൊച്ചിന്‍ ഡിവലപ്‌മെന്‍റ് അഥോറിറ്റിയുടെ (ജിസിഡിഎ) കടവന്ത്രയിലുളള ആസ്ഥാന മന്ദിരത്തില്‍ ആദ്യ കാന്‍റീന്‍ പ്രവര്‍ത്തനം ആരംഭിച്ചതിനു പിന്നാലെയാണ് സമൃദ്ധി@കൊച്ചിയുടെ പുതിയ കാല്‍വയ്പ്. ആദ്യഘട്ടത്തില്‍ ജനശതാബ്ദി, ഇന്‍റര്‍സിറ്റി, പരശുറാം എന്നീ ട്രെയിനുകളിലാണ് ഭക്ഷണം നല്‍കുന്നത്. കൂടുതല്‍ ട്രെയിനുകളിൽ ഭക്ഷണവിതരണം നടത്തുന്നതിനുള്ള നടപടികള്‍ പുരോഗമിക്കുകയാണെന്ന് അധികൃതര്‍ വ്യക്തമാക്കി. പാചകം നോര്‍ത്തില്‍; ഉഴുന്നുവട മുതല്‍ ബിരിയാണി വരെ എറണാകുളം നോര്‍ത്തില്‍ പ്രവര്‍ത്തിക്കുന്ന സമൃദ്ധി@കൊച്ചിയുടെ പാചകപ്പുരയില്‍ നിന്നാണ് ട്രെയിനുകളിലേക്കുള്ള ഭക്ഷണവും തയാറാക്കുന്നത്. വെജ് മീല്‍സ്, വെജ് ബിരിയാണി, മുട്ട ബിരിയാണി, ചിക്കന്‍ ബിരിയാണി, ഇഡ്ഡലി, ഉഴുന്നുവട, പരിപ്പുവട, പഴംപൊരി, പാല്‍ എന്നീ വിഭവങ്ങളാണ് നിലവില്‍ സമൃദ്ധിയില്‍ നിന്നും ട്രെയിനുകളിലേക്ക് നല്‍കുന്നത്. നിശ്ചിത സമയത്ത് ജീവനക്കാരുടെ നേതൃത്വത്തില്‍ എറണാകുളം നോര്‍ത്ത്, സൗത്ത് റെയില്‍വേ സ്റ്റേഷനുകളില്‍ ഭക്ഷണം എത്തിച്ചു നല്‍കുകയാണ് ചെയ്യുന്നത്. സമൃദ്ധിയിലേക്ക് എത്തിച്ചത് ആ സംഭവം വന്ദേഭാരത് അടക്കമുള്ള ട്രെയിനുകളിലേക്ക് ഭക്ഷണവിതരണം നടത്തിവന്നിരുന്ന എറണാകുളം കടവന്ത്രയിലെ കാറ്ററിംഗ് യൂണിറ്റ് വൃത്തിഹീനമായ സാഹചര്യത്തില്‍ പ്രവര്‍ത്തിച്ചതിനെ തുടര്‍ന്ന് ആരോഗ്യവിഭാഗം അടച്ചുപൂട്ടിയിരുന്നു. ഇവിടെനിന്നുള്ള ദൃശ്യങ്ങള്‍ വന്‍ തോതില്‍ പ്രചരിച്ചതോടെ ട്രെയിനുകളില്‍ വൃത്തിയുള്ള ഭക്ഷണം വിതരണം ചെയ്യണമെന്ന ആവശ്യവും ശക്തമായി. ഇതോടെ വൃത്തിയായി ഭക്ഷണം നല്‍കുന്ന പുതിയ കാറ്ററിംഗ് യൂണിറ്റുകള്‍ക്കായുള്ള അന്വേഷണം ഇന്ത്യന്‍ റെയില്‍വേ കാറ്ററിംഗ് ആന്‍ഡ് ടിക്കറ്റിംഗ് കോര്‍പറേഷന്‍ (ഐആര്‍സിടിസി) ആരംഭിച്ചു. സമൃദ്ധി@കൊച്ചിയെക്കുറിച്ച് കേട്ടറിഞ്ഞ ഐആര്‍സിടിസി ഉദ്യോഗസ്ഥ സംഘം ഇതോടെ ഡല്‍ഹിയില്‍ നിന്നും കൊച്ചിയിലെത്തി എറണാകുളം നോര്‍ത്തിലെ സമൃദ്ധിയുടെ ഊട്ടുപുരയും അടുക്കളയും പരിശോധിച്ചിരുന്നു. പിന്നാലെയാണ് ഐആര്‍സിടിസി പട്ടികയില്‍ സമൃദ്ധി ഇടംപിടിച്ചത്.

കുടിവെളളത്തിൽ അണുബാധ; 35 വിദ്യാർഥികൾ ചികിത്സ തേടി

കാക്കനാട്: തൃക്കാക്കരയിലെ സ്വകാര്യ ഹോസ്റ്റൽ കാന്‍റീനിലെ കുടിവെള്ളത്തിൽ നിന്നുളള അണുബാധയെ തുടർന്ന് 35 വിദ്യാർഥികൾ ചികിത്സ തേടി. തൃക്കാക്കര പൈപ്പ് ലൈൻ ജംഗ്ഷനു സമീപം പ്രവർത്തിക്കുന്ന ജർമൻ ഭാഷാപഠന സ്ഥാപനത്തിലെ വിദ്യാർഥികൾക്കാണ് ഭക്ഷ്യ വിഷബാധയേറ്റത്. ശനിയാഴ്ച മുതൽ വിദ്യാർഥികളിൽ ചിലർ പനി, ഛർദ്ദി വയറിളക്കം, തുടങ്ങിയ രോഗലക്ഷണങ്ങളുമായി കളമശേരി മെഡിക്കൽ കോളജ് , ബിആൻഡ്ബി ആശുപത്രി, തൃക്കാക്കര സഹകരണ ആശുപത്രി, തൃക്കാക്കര പബ്ലിക് ഹെൽത്ത് സെന്‍റർ എന്നിവിടങ്ങളിൽ ചികിൽസ തേടിയിരുന്നു. 25 പെൺകുട്ടികളും 10 ആൺകുട്ടികളുമാണ് വിവിധ ആശുപത്രികളിൽ ചികിത്സ തേടിയത്. തൃക്കാക്കര നഗരസഭാ ഹെൽത്ത് ഇൻസ്‌പെക്ടർ ആസിഫ്,പബ്ലിക് ഹെൽത്ത് സെന്‍റെർ ജീവനക്കാർ എന്നിവരുടെ നേതൃത്വത്തിൽ കോളജ് ഹോസ്റ്റലിൽ ഉൾപ്പടെ പരിശോധന നടത്തി. കുടിവെള്ള സാമ്പളുകൾ ശേഖരിച്ചിട്ടുണ്ട്. മഴക്കാലമായതോടെ വൃത്തിഹീനമായ സാഹചര്യങ്ങളിൽ പ്രവർത്തിക്കുന്ന ഹോസ്റ്റലുകളുടെ എണ്ണം പെരുകിയിട്ടുണ്ട്. കാക്കനാടും പരിസരങ്ങളിലുമായി രാത്രികാലങ്ങളിൽ പ്രവർത്തിക്കുന്ന ഭക്ഷ്യ തട്ടുകടകളിലും മലിനജലം ഉപയോഗിക്കുന്നതായി പരാതിയുണ്ട് .

മണികണ്ഠൻചാൽ ചപ്പാത്ത് വെള്ളത്തിൽ

കോതമംഗലം: കനത്തമഴയിൽ പെരിയാർ ഉൾപ്പെടെ നദികളിൽ ജലനിരപ്പ് ഉയർന്നു. പൂയംകുട്ടി പുഴയ്ക്ക് കുറുകെ നിർമിച്ചിട്ടുള്ള മണികണ്ഠൻചാൽ ചപ്പാത്ത് വെള്ളത്തിനടിയിലായി. കുട്ടന്പുഴ മേഖലയിൽ ഇന്നലെ രാവിലെ മുതൽ ശക്തമായ മഴയായിരുന്നു. കൂടാതെ ഇടുക്കിയിൽനിന്നുള്ള മലവെള്ളവും പൂയംകുട്ടി പുഴയിൽ ഒഴുകിയെത്തുന്നതാണ് ജലനിരപ്പ് ഉയരാൻ കാരണം. സന്ധ്യയോടെ മണികണ്ഠൻചാൽ ചപ്പാത്തിൽ വെള്ളം കയറി തുടങ്ങി. രാത്രി 7.30ഓടെ ചപ്പാത്ത് മുങ്ങി. മഴ കൂടിയാൽ ഇന്ന് ചപ്പാത്തിലൂടെയുള്ള ഗതാഗതം പ്രതിസന്ധിയിലാകും. ചപ്പാത്ത് മുങ്ങിയതോടെ രാത്രിയോടെ ഇരുവശത്തും വാഹനങ്ങളും ആളുകളും കുടുങ്ങിയിട്ടുണ്ട്. രാത്രിയോടെ കെഎസ്ആർടിസി, സ്വകാര്യ ബസുകൾ പലതും പൂയംകുട്ടിയിൽ സർവീസ് അവസാനിപ്പിച്ചു. രണ്ടു ഗ്രാമങ്ങളും ആറ് ആദിവാസി ഉന്നതികളും ഒറ്റപ്പെട്ട നിലയിലാണ്. ബ്ലാവനയിൽ ജങ്കാർ സർവീസ് വൈകിട്ടോടെ നിലച്ചു. അത്യാവശ്യ യാത്രകൾക്ക് വഞ്ചി മാത്രമാണ് ആശ്രയം. മണികണ്ഠൻചാൽ ഭാഗത്തും വഞ്ചി ഏർപ്പെടുത്തിയിട്ടുണ്ട്. ശക്തമായ ഒഴുക്കുള്ളതുകൊണ്ട് രാത്രിയിൽ വഞ്ചിയാത്ര ദുസ്സഹമാണ്. കഴിഞ്ഞ മാസം ചപ്പാത്ത് മുങ്ങിയപ്പോൾ ഒഴുക്കിൽപ്പെട്ട് മണികണ്ഠൻചാൽ സ്വദേശി ബിജു മരണപ്പെട്ടിരുന്നു. ദിവസങ്ങളോളം വെള്ളത്തിൽ മുങ്ങിയ ചപ്പാത്തിന് കേടുപാടുകളും സംഭവച്ചിട്ടുണ്ട്. ചപ്പാത്തിന്‍റെ തുടക്ക ഭാഗത്ത് കോണ്‍ക്രീറ്റ് തകർന്ന് കുഴി രൂപപ്പെട്ടു, വശത്ത് സുരക്ഷയ്ക്കായി നിർമിച്ച സംരക്ഷണഭിത്തികൾ പലതും തകർന്നിരിക്കുകയാണ്. പ്രതലത്തിൽ കോണ്‍ക്രീറ്റ് സ്ലാബുകൾ കൂട്ടിച്ചേർത്ത ഭാഗത്തും പൊട്ടലും കുഴിയുമുണ്ട്.ചപ്പാത്തിന് ബലക്ഷയം സംഭവിച്ച സാഹചര്യത്തിൽ പുതിയ പാലം നിർമിക്കണമെന്ന ആവശ്യം ശക്തമാണ്. ഉയരം കുറഞ്ഞ ചപ്പാത്തിന്‍റെ സ്ഥാനത്ത് പുതിയ പാലം നിർമിക്കാൻ പദ്ധതിയും പ്രഖ്യാപനവും നടത്തിയെങ്കിലും പ്രവൃത്തിയിൽ വരുന്നില്ല.

അവാർഡ് നൽകി ആദരിച്ചു

കല്ലൂർക്കാട്: പഞ്ചായത്തിലെ എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം കരസ്ഥമാക്കിയ വിദ്യാർഥികളെയും വിദ്യാലയങ്ങളെയും മാത്യു കുഴൽനാടൻ എംഎൽഎയുടെ വിദ്യാസ്പർശം മെരിറ്റ് അവാർഡ് നൽകി ആദരിച്ചു. കല്ലൂർക്കാട് വ്യാപാര ഭവൻ ഹാളിൽ നടന്ന ചടങ്ങിൽ റാങ്ക് ജേതാക്കളായ ബ്രദർ ക്രിസ്റ്റോ ജോസ്, സി.വി. അജേഷ്, ജോണ്‍ ഷിനോജ്, പി. നിരോഷ എന്നിവരെയും മാത്യു കുഴൽനാടൻ എംഎൽഎ അവാർഡ് നൽകി അനുമോദിച്ചു. പഞ്ചായത്ത് വൈസ് പ്രസിഡന്‍റ് ജാൻസി ജോമി അധ്യക്ഷത വഹിച്ചു.

എംഎൽഎ അവാർഡ് നൽകി

ആരക്കുഴ: എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ ആരക്കുഴ മണ്ഡലത്തിലെ മുഴുവൻ വിദ്യാർഥികൾക്കും മാത്യു കുഴൽനാടൻ എംഎൽഎ അവാർഡ് നൽകി. ആരക്കുഴ സെന്‍റ് ജോസഫ്സ് ഹൈസ്കൂളിൽ നടന്ന പരിപാടിയിൽ പഞ്ചായത്ത് പ്രസിഡന്‍റ് ലസിത മോഹനൻ അധ്യക്ഷത വഹിച്ചു. ആരക്കുഴ സെന്‍റ് ജോസഫ് ഹൈസ്കൂൾ പ്രധാനാധ്യാപിക സിസ്റ്റർ ടിസ മരിയ ആമുഖ പ്രഭാഷണം നടത്തി. ആരക്കുഴ സെന്‍റ് മേരീസ് മേജർ ആർക്കി എപ്പിസ്കോപ്പൽ ആർച്ച് പ്രീസ്റ്റ് ഫാ. സെബാസ്റ്റ്യൻ കണിമറ്റത്തിൽ മുഖ്യപ്രഭാഷണം നടത്തി. കോണ്‍ഗ്രസ് ആരക്കുഴ മണ്ഡലം പ്രസിഡന്‍റ് പോൾ ലൂയീസ്, ബിജു തോട്ടുപുറം, സാബു പൊതൂർ, ദീപ്തി സണ്ണി എന്നിവർ പ്രസംഗിച്ചു.

ചെറുപുഷ്പ മിഷൻലീഗ് കോതമംഗലം രൂപത വാർഷികവും കൗൺസിലും

മൂവാറ്റുപുഴ : ചെറുപുഷ്പ മിഷൻ ലീഗ് കോതമംഗലം രൂപത 61-ാമത് വാർഷികവും 62-ാമത് കൗണ്‍സിലും മൂവാറ്റുപുഴ നിർമല പബ്ലിക് സ്കൂളിൽ നടന്നു. കോതമംഗലം രൂപതാധ്യക്ഷൻ ബിഷപ് മാർ ജോർജ് മഠത്തിക്കണ്ടത്തിൽ ഉദ്ഘാടനം ചെയ്തു. രൂപത പ്രസിഡന്‍റ് സജിൽ ജോർജ് കല്ലപ്പിള്ളിൽ അധ്യക്ഷത വഹിച്ചു. ജനറൽ സെക്രട്ടറി ജെറി ജി. അറയ്ക്കൽ പ്രവർത്തനവർഷ റിപ്പോർട്ടും ജനറൽ ഓർഗനൈസർ ജിജോ തോമസ് മാർഗരേഖയും അവതരിപ്പിച്ചു. മൂവാറ്റുപുഴ നിർമല പബ്ലിക് സ്കൂൾ പ്രിൻസിപ്പൽ ഫാ. പോൾ ചൂരത്തൊട്ടി അനുഗ്രഹപ്രഭാഷണം നടത്തി. രൂപത ഡയറക്ടർ ഫാ മാത്യു രാമനാട്ട്, വൈസ് പ്രസിഡന്‍റ് റോഷ്നി ബി. കരിന്പനിയിൽ എന്നിവർ പ്രസംഗിച്ചു. ചടങ്ങിൽ അടുത്ത ഏപ്രിൽ നടക്കുന്ന ജെൻസ് ടീൻസ് കോണ്‍ഫറൻസ് ലോഗോ പ്രകാശനം ചെയ്തു. കഴിഞ്ഞ പ്രവർത്തന വർഷത്തിൽ നടന്ന വിവിധ മത്സരങ്ങളുടെ സമ്മാനവും 2024-25 പ്രവർത്തന വർഷത്തിലെ ഏറ്റവും മികച്ച ശാഖകൾക്കും മേഖലകൾക്കുമുള്ള മിഷൻ സ്റ്റാർ, സിൽവർ സ്റ്റാർ, ഗോൾഡൻ സ്റ്റാർ എന്നീ പുരസ്കാരങ്ങളും യോഗത്തിൽ വിതരണം ചെയ്തു. രൂപതയിലെ വിവിധ ഇടവകകളിൽ നിന്നുള്ള വൈദികരും സിസ്റ്റേഴ്സും ആയിരത്തോളം മിഷൻലീഗ് അംഗങ്ങളും യോഗത്തിൽ പങ്കെടുത്തു.

പോക്സോ കേസ് : പ്രതിയെ സംരക്ഷിച്ച പോലീസും കുറ്റക്കാർ: ഷിബു തെക്കുംപുറം

കോതമംഗലം : നഗരസഭാ കൗൺസിലറായിരുന്നു സിപിഎം നേതാവ് കെ.വി. തോമസ് പ്രതിയായ പോക്സോ കേസിൽ പ്രതിയെ സംരക്ഷിച്ച ആന്‍റണി ജോണ്‍ എംഎൽഎയ്ക്കൊപ്പം പോലീസും കുറ്റക്കാരാണെന്ന് യുഡിഎഫ് ജില്ലാ കണ്‍വീനർ ഷിബു തെക്കുംപുറം. പോക്സോ കേസിൽ പ്രതിയെ സംരക്ഷിച്ച ആന്‍റണി ജോണ്‍ എംഎൽഎ രാജിവയ്ക്കണമെന്നാവശ്യപ്പെട്ട് യുഡിഎഫ് നിയോജകമണ്ഡലം കമ്മിറ്റിയുടെ നേതൃത്വത്തിൽ നടത്തിയ പ്രതിഷേധ മാർച്ച് ഉദ്ഘാടനം ചെയ്യുകയായിരുന്നു ഷിബു തെക്കുംപുറം. സിപിഎം നേതാവിന്‍റെ തുടർച്ചയായ പീഡനത്തിനൊടുവിൽ പെണ്‍കുട്ടി കഴിഞ്ഞ ആറിന് എസ്പിക്ക് പരാതി നൽകിയിട്ടും കോതമംഗലം പോലീസ് കേസെടുക്കാൻ 11 വരെ വൈകിയത് എംഎൽഎയ്ക്കൊപ്പം പോലീസും പ്രതിയെ സംരക്ഷിക്കാൻ അവസാന നിമിഷം വരെ ശ്രമിച്ചു എന്നതിന്‍റെ തെളിവാണ്. പ്രതിക്കെതിരെ വീണ്ടും ഇരകൾ രംഗത്തു വരുന്നത് ഞെട്ടിപ്പിക്കുന്നതാണ്. എംഎൽഎയുടെയും സിപിഎമ്മിന്‍റെയും നേതൃത്വത്തിൽ ക്രിമിനലുകളുടെ അഴിഞ്ഞാട്ടമാണ് കോതമംഗലത്ത് നടക്കുന്നതെന്ന് ജനം തിരിച്ചറിഞ്ഞു കഴിഞ്ഞു. കുറ്റക്കാരായ പോലീസ് ഉദ്യോഗസ്ഥരെ മാറ്റിനിർത്തി അന്വേഷണം നടത്തണമെന്നും അദ്ദേഹം ആവശ്യപ്പെട്ടു. യുഡിഎഫ് ചെയർമാൻ ടി.യു. കുരുവിള അധ്യക്ഷത വഹിച്ചു. കണ്‍വീനർ എം.എസ്. എൽദോസ്, ഷെമീർ പനയ്ക്കൽ, ബാബു ഏലിയാസ്, കെ.പി ബാബു, പി.എ.എം ബഷീർ, പ്രിൻസ് വർക്കി, ഇബ്രാഹിം കവല, പി.കെ മൊയ്തു, എ.റ്റി പൗലോസ്, ജോമി തെക്കേക്കര, സി.കെ. സത്യൻ, ഇ.എം. മൈക്കിൾ, മാത്യു ജോസഫ്, എ.സി. രാജശേഖരൻ, എൽദോസ് ദാനിയേൽ, മുഹമ്മദ് ഇഖ്ബാൽ, റഷീദ്, പി.സി. ജോർജ്, പീറ്റർ മാത്യു, കെ.ഇ. കാസിം, ഷൈമോൾ ബേബി എന്നിവർ നേതൃത്വം നൽകി.

വിദ്യാരംഗം, കെസിഎസ്എൽ ക്ലബുകളുടെ ഉദ്ഘാടനം

ആരക്കുഴ : സെന്‍റ് മേരീസ് ഹയർ സെക്കൻഡറി സ്കൂളിൽ വിദ്യാരംഗം, കെസിഎസ്എൽ തുടങ്ങി വിവിധ ക്ലബുകളുടെ ഉദ്ഘാടനം കോതമംഗലം രൂപത കെസിഎസ്എൽ ഡയറക്ടർ ഫാ. മാത്യു രാമനാട്ട് നിർവഹിച്ചു. സ്കൂൾ മാനേജർ ആർച്ച് പ്രീസ്റ്റ് ഫാ. സെബാസ്റ്റ്യൻ കണിമറ്റത്തിൽ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ലസിത മോഹൻ, പഞ്ചായത്തംഗം ദീപ്തി സണ്ണി, പിടിഎ പ്രസിഡന്‍റ് ജിജു ഓണാട്ട്, പ്രിൻസിപ്പൽ ഷിജി മാണി, പ്രധാനാധ്യാപിക സിനോബി ജോസ്, അസിസ്റ്റന്‍റ് വികാരി ഫാ. ആന്‍റണി മരുത്വാമലയിൽ, എംപിടിഎ പ്രസിഡന്‍റ് അന്പിളി വിജയൻ, ഡീക്കൻ ജോജി കരോട്ടെ നെടുങ്ങാട്ട്, ജെനിറ്റ മേരി റോയി, നിമി മരിയ സെബാസ്റ്റ്യൻ എന്നിവർ പ്രസംഗിച്ചു.

കച്ചേരിത്താഴത്ത് ബസ് കാത്തിരിപ്പു കേന്ദ്രം നിർമിച്ചു

മൂവാറ്റുപുഴ: യാത്രക്കാർക്ക് താത്കാലിക ബസ് കാത്തിരിപ്പു കേന്ദ്രം ഒരുക്കി മർച്ചന്‍റ്സ് അസോസിയേഷൻ. കച്ചേരിത്താഴത്ത് നഗരസഭ ഓഫീസിന് മുന്നിലെ ഗാന്ധി പ്രതിമയ്ക്ക് സമീപമാണ് കാത്തിരിപ്പു കേന്ദ്രം ഒരുക്കിയിത്. കാത്തിരിപ്പു കേന്ദ്രം ഒരുക്കാൻ ആരും തയാറാകാതെ വന്നതോടെയാണ് മൂവാറ്റുപുഴ മർച്ചന്‍റ്സ് അസോസിയേഷൻ കേന്ദ്രം നിർമിച്ച് നൽകിയതെന്ന് പ്രസിഡന്‍റ് അജ്മൽ ചക്കുങ്ങൽ പറഞ്ഞു. റോഡ് നിർമാണം പൂർത്തിയാകും വരെ ബസ് കാത്തിരിപ്പു കേന്ദ്രം നിലനിർത്താനാണ് തീരുമാനം. നഗരവികസന നിർമാണ പ്രവർത്തനങ്ങൾ മൂലം നഗരത്തിൽ വ്യാപാരികൾ കച്ചവടമില്ലാതെ ദുരിതത്തിലാണ്. നൂറുകണക്കിന് കടകളാണ് പൂട്ടിപ്പോയത്. ഒട്ടുമിക്ക കടകളും കച്ചവടമില്ലാതെ അടച്ചുപൂട്ടലിന്‍റെ വക്കിലാണ്. വലിയ ദുരിതത്തിനിടയിലാണ് കാത്തിരിപ്പു കേന്ദ്രം നിർമിക്കാൻ മർച്ചന്‍റ്സ് അസോസിയേഷൻ തീരുമാനമെടുത്തത്. ജനറൽ സെക്രട്ടറി കലൂർ ഗോപകുമാർ, പി.യു. ഷംസുദ്ദീൻ, ബോബി നെല്ലിക്കൽ, പി.എം.ടി. ഫൈസൽ, ബിജി സജീവ്, സലാം എവറസ്റ്റ് തുടങ്ങിയവർ പങ്കെടുത്തു.

കൂത്താട്ടുകുളം - പാലാ റോഡിന്‍റെ അറ്റകുറ്റപ്പണികൾ ആരംഭിച്ചു

കൂത്താട്ടുകുളം : കൂത്താട്ടുകുളം - പാലാ റോഡിന്‍റെ അറ്റകുറ്റപ്പണികൾ ആരംഭിച്ചു. മംഗലത്തുതാഴം മുതൽ രാമപുരം കവല വരെയുള്ള റോഡിന്‍റെ വിവിധ ഭാഗങ്ങളിൽ വലിയ കുഴികൾ രൂപപ്പെട്ടതിനെ തുടർന്നാണ് അറ്റകുറ്റപ്പണികൾ ആരംഭിച്ചത്. എന്നാൽ മഴ കനത്തതോടെ നിർമാണം ദിവസങ്ങളായി മുടങ്ങി കിടക്കുകയായിരുന്നു. റോഡിലെ അപകടങ്ങൾ വർധിച്ച സാഹചര്യത്തിൽ പ്രതികൂല കാലാവസ്ഥയായിരുന്നിട്ടും ഉദ്യോഗസ്ഥരുടെ നേതൃത്വത്തിൽ ഇന്നലെ നിർമാണം പുന ക്രമീകരിക്കുകയായിരുന്നു. റോഡിലെ കുഴികളിൽ വെള്ളം കെട്ടി നിൽക്കുന്ന സാഹചര്യത്തിൽ ടാർ മിശ്രിതം ഉപയോഗിച്ച് കുഴികൾ അടയ്ക്കാൻ കഴിയാത്ത അവസ്ഥയാണ്. ടാറിംഗിലെ ബിസി ലയർ അധികമായി ഇളകിപ്പോയ ഭാഗത്തെ പ്രതലം ജെസിബി ഉപയോഗിച്ച് ഇളക്കിമാറ്റിയ ശേഷം അതേ മിശ്രിതം കുഴികൾക്ക് മുകളിൽ നിരത്തുകയാണ് നിലവിൽ ചെയ്തിട്ടുള്ളത്. കാലാവസ്ഥ അനുകൂലമാകുന്ന സാഹചര്യത്തിൽ ഇവ റോഡിൽ നിന്നും നീക്കം ചെയ്ത റോഡ് പൂർവസ്ഥിതിയിലാക്കും. പിഡബ്ല്യുഡി ഉദ്യോഗസ്ഥരുടെയും നഗരസഭാംഗങ്ങളുടെയും മേൽനോട്ടത്തിലാണ് അറ്റകുറ്റപ്പണികൾ നടന്നത്.

കച്ചേരിത്താഴത്ത് പുതിയ പാലത്തിന്‍റെ സ്ഥലം ഏറ്റെടുപ്പിന് അനുമതിയായി

മൂവാറ്റുപുഴ : കച്ചേരിത്താഴത്ത് പുതിയ പാലം നിർമിക്കുന്നതിനു ആവശ്യമായ സ്ഥലം ഏറ്റെടുക്കുന്നതിന് അനുമതി ലഭിച്ചതായി മാത്യു കുഴൽനാടൻ എംഎൽഎ. മാറാടി വില്ലേജിലെ 28.75 സെന്‍റ് സ്ഥലമാണ് പദ്ധതിക്കുവേണ്ടി ഏറ്റെടുക്കുന്നത്. രണ്ടു വരിയായി ഗതാഗതം സാധ്യമാക്കുന്ന രീതിയിലാണ് പാലം നിർമാണം. കാൽനട യാത്രികർക്കായി നടപ്പാതയുമുണ്ടാകും. പാലം നിർമിക്കുന്നതിന് കിഫ്ബി സാന്പത്തികാനുമതി നൽകിയതോടെ പദ്ധതി ചെലവ് 53.66 കോടിയായി ഉയർന്നു. ഭാവി മൂവാറ്റുപുഴയുടെ വികസന സാധ്യതകൾ കൂടി മുന്നിൽ കണ്ടാണ് പദ്ധതി തയാറാക്കിയതെന്ന് എംഎൽഎ പറഞ്ഞു. നഗര വികസനത്തിന്‍റെ ഭാഗമായാണ് പുതിയ പാലവും നിർമിക്കുന്നത്. വികസന പ്രവർത്തനങ്ങളുടെ ഭാഗമായി നഗരറോഡുകൾ നാലുവരി പാതയായി മാറും. പുതിയ പാലം വരുന്നതോടെ മൂവാറ്റുപുഴയ്ക്ക് പുതിയ മുഖം കൈവരുമെന്നും ഗതാഗതക്കുരുക്കിൽ നിന്നും പൂർണമായും ശാപമോക്ഷം ലഭിക്കുമെന്നും എംഎൽഎ പറഞ്ഞു.

കെ.വി. തോമസിനെതിരെ വീണ്ടും പോക്സോ കേസ്

കോതമംഗലം : പോക്സോ കേസിൽ റിമാൻഡിൽ കഴിയുന്ന സിപിഎം നേതാവും നഗരസഭാ സ്ഥിരം സമിതി അധ്യക്ഷനുമായിരുന്ന കുടിയാറ്റ് കെ.വി. തോമസിനെതിരെ (58) വീണ്ടും പോക്സോ കേസ്. പത്താം ക്ലാസ് വിദ്യാർഥിനിയുടെ മൊഴിയുടെ അടിസ്ഥാനത്തിൽ അറസ്റ്റിലായി റിമാൻഡിൽ കഴിയുന്പോഴാണ് പ്ലസ് ടു വിദ്യാർഥിനി കെ.വി തോമസിനെതിരെ മൊഴി നൽകിയത്. കഴിഞ്ഞ ദിവസം ചൈൽഡ് ലൈൻ വഴി ലഭിച്ച വിവരത്തിന്‍റെ അടിസ്ഥാനത്തിൽ കോതമംഗലം പോലീസ് കേസെടുത്തു. സംഭവം നടന്നത് മറ്റൊരു സ്റ്റേഷൻ പരിധിയിലായതുകൊണ്ട് പ്രാഥമിക അന്വേഷണ ശേഷം കേസ് അവിടേക്ക് കൈമാറും. രണ്ടാമത്തെ കേസിൽകൂടി അറസ്റ്റ് രേഖപ്പെടുത്തുന്നതോടെ കെ.വി. തോമസിന് ജാമ്യം വൈകാനാണ് സാധ്യത. കെ.വി തോമസിനെതിരായ കേസുകളുടെ എണ്ണം കൂടുന്നത് സിപിഎമ്മിനും നാണക്കേടായിയിരിക്കുകയാണ്. മുന്പ് ബന്ധുവായ യുവതിയെ പീഡിപ്പിച്ചുവെന്ന കേസ് ഉണ്ടായിട്ടും കെ.വി തോമസിനെ കൈവിടാതെ ഒപ്പം നിർത്തിയതാണ് പാർട്ടിക്കും തിരിച്ചടിയായി മാറിയതെന്ന് ഒരു വിഭാഗം നേതാക്കൾ ചൂണ്ടികാണിക്കുന്നു. ഈ കേസുണ്ടായശേഷം നടന്ന പാർട്ടി സമ്മേളനത്തിലാണ് തോമസിനെ ലോക്കൽ കമ്മിറ്റിയംഗമാക്കിയത്. ഇപ്പോൾ തോമസിനെ പൂർണമായും തള്ളിപ്പറഞ്ഞാണ് സിപിഎം നേതൃത്വം പ്രതിരോധം തീർക്കുന്നത്. കേസുണ്ടായി ഉടൻതന്നെ പാർട്ടിയിൽ നിന്ന് പുറത്താക്കുകയും നഗരസഭ കൗണ്‍സിലർ സ്ഥാനം രാജിവയ്പ്പിക്കുകയും ചെയ്തിരുന്നു.

133 പട്ടയങ്ങൾ വിതരണം ചെയ്തു

കോതമംഗലം : കോതമംഗലത്ത് പട്ടയ മേള സംഘടിപ്പിച്ചു. കോതമംഗലം, കുന്നത്തുനാട്, മൂവാറ്റുപുഴ താലൂക്ക് പരിധിയിലെ പട്ടയങ്ങളാണ് മേളയിൽ വിതരണം ചെയ്തത്. കോതമംഗലം ചെറിയ പള്ളി സെന്‍റ് തോമസ് പാരീഷ് ഹാളിൽ നടന്ന പട്ടയ മേളയുടെ ഉദ്ഘാടനം മന്ത്രി കെ. രാജൻ വീഡിയോ കോൺഫറൻസ് വഴി നിർവഹിച്ചു. ആന്‍റണി ജോണ്‍ എംഎൽഎ അധ്യക്ഷത വഹിച്ചു. കോതമംഗലം - 50, കുന്നത്തുനാട് - 39, മൂവാറ്റുപുഴ - 44 എന്നിങ്ങനെ 133 പട്ടയങ്ങളാണ് മേളയിൽ വിതരണം ചെയ്തത്. ചടങ്ങിൽ പി.വി. ശ്രീനിജൻ എംഎൽഎ മുഖ്യാതിഥിയായിരുന്നു. എംപിഐ ചെയർമാർ ഇ.കെ. ശിവൻ, ബ്ലോക്ക് പഞ്ചായത്ത് പ്രസിഡന്‍റ് പി.എ.എം ബഷീർ, കോതമംഗലം നഗരസഭ വൈസ് ചെയർപേഴ്സണൽ സിന്ധു ഗണേശൻ, പഞ്ചായത്ത് പ്രസിഡന്‍റ് കെ.എ. ഗോപാലകൃഷ്ണൻ, ബ്ലോക്ക് പഞ്ചായത്തംഗം കെ.കെ ഗോപി, കെ.കെ. ശിവൻ, ശാന്തമ്മ പയസ്, പി.റ്റി ബെന്നി, പി.കെ. മൊയ്തു, എൻ.സി ചെറിയാൻ, മനോജ് ഗോപി, ബേബി പൗലോസ്, എറണാകുളം ഡെപ്യൂട്ടി കളക്ടർ (ജനറൽ) വിനോദ് രാജ്, ഡെപ്യൂട്ടി കളക്ടർ എൽ.ആർ. സുനിത ജേക്കബ്, സുനിൽ മാത്യു, തഹസിൽദാർമാരായ വി.എസ്. മഞ്ജുഷ (എൽആർ), എം. മായ, ബോബി റോസ്, മൂവാറ്റുപുഴ ആർഡിഒ പി.എൻ. അനിൽ, കോതമംഗലം തഹസിൽദാർ എം. അനിൽകുമാർ എന്നിവർ പങ്കെടുത്തു.

അപകടങ്ങൾ തുടരുന്പോഴും നഗരത്തിൽ അലറിപ്പാഞ്ഞ് സ്വകാര്യ ബസുകൾ

വാഴക്കുളം: നഗരത്തിൽ സ്വകാര്യ ബസുകളുടെ മത്സരപ്പാച്ചിൽ നിരന്തരം അപകടങ്ങൾക്ക് വഴിവയ്ക്കുന്പോഴും കാര്യമാക്കാതെ അലറിപ്പാഞ്ഞ് ബസുകൾ. തൊടുപുഴ, മുവാറ്റുപുഴ ഭാഗങ്ങളിൽ നിന്നെത്തുന്ന ബസുകൾ ടൗണിലേക്ക് പ്രവേശിക്കുന്നത് അമിത വേഗതയിലാണ്. ശബ്ദം മുഴക്കി കാൽനടയാത്രക്കാരെയും റോഡിലുള്ള മറ്റു ചെറുവാഹന യാത്രികരെയും ബസിലെ യാത്രക്കാരെയും ഭയപ്പെടുത്തുന്ന വേഗതയിലാണ് മിക്ക ബസുകളുടേയും ടൗണ്‍ പ്രവേശനം. വീതി കുറഞ്ഞ വാഴക്കുളം ടൗണിൽ ഇരുവശത്തും വ്യാപാര സ്ഥാപനങ്ങൾക്കു മുന്നിലെ വാഹന പാർക്കിംഗും കൂടിയാകുന്പോൾ ഇതുവഴിയുള്ള ഗതാഗതം ദുഷ്കരമാകുന്നു. ചെറുവാഹനങ്ങളെ മറികടക്കാൻ എതിർവശത്തേക്ക് നീങ്ങുന്ന ബസുകൾ കാരണം തലനാരിഴക്കാണ് പല അപകടങ്ങളും ഒഴിവാകുന്നത്. സ്വകാര്യ ബസുകളുടെ അമിതവേഗത മൂലം നഗരത്തിൽ നിരവധി പേരുടെ ജീവൻ നഷ്ടപ്പെട്ടിട്ടുണ്ട്. അപകടങ്ങൾക്കിരയായ പലരും ഗുരുതരാവസ്ഥയിൽ ആശുപത്രികളിലും, പിന്നീട് വീടുകളിലും കഴിയുന്നുമുണ്ട്. ഏറ്റവും ഒടുവിലെ ദുരന്തമാണ് ചൊവ്വാഴ്ച രാത്രി എട്ടുമണിയോടെ ടൗണിന്‍റെ പടിഞ്ഞാറേ ഭാഗത്തുണ്ടായത്. അമിതവേഗതയിൽ ദിശതെറ്റിയെത്തിയ ബസിടിച്ച് ആവോലിയിൽ കേബിൾ ടിവി സ്ഥാപനം നടത്തുന്ന ബൈക്ക് യാത്രക്കാരനായ റോയിക്ക് ഗുരുതരമായി പരിക്കേറ്റത്. ജോലി സംബന്ധമായ ആവശ്യങ്ങൾക്കു ശേഷം ആവോലിക്കു മടങ്ങിയ റോയി അപകടത്തെ തുടർന്ന് അബോധാവസ്ഥയിൽ ആലുവ രാജഗിരി ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിൽ തുടരുകയാണ്. ടൗണുകളിൽ അനുവദനീയമായ പരമാവധി വേഗതയായ 30 കിലോമീറ്റർ ഉറപ്പാക്കണമെന്നാവശ്യപ്പെട്ട് വാഴക്കുളം മർച്ചന്‍റ്സ് അസോസിയേഷന്‍റെ നേതൃത്വത്തിൽ വാഴക്കുളം ടൗണിൽ പ്രകടനം നടത്തി. അമിതവേഗതയിൽ ടൗണിലേക്ക് പ്രവേശിക്കുന്ന ബസിന്‍റെ പെർമിറ്റ് റദ്ദാക്കുന്നത് ഉൾപ്പെടെയുള്ള ശിക്ഷാ നടപടികൾ സ്വീകരിക്കണമെന്നും, ടൗണിലെ സ്വകാര്യ ബസുകളുടെ അമിതവേഗത നിയന്ത്രിക്കണമെന്നും ആവശ്യപ്പെട്ട് പോലീസ് അധികാരികൾക്കും ആർടിഒക്കും വാഴക്കുളം മർച്ചന്‍റ്സ് അസോസിയേഷൻ പരാതി നൽകിയിട്ടുണ്ട്.

മരം കടപുഴകി വീണ് മൂന്നു പേർക്ക് പരിക്ക്

കളമശേരി: കളമശേരി സീപോർട്ട്-എയർപോർട്ട് റോഡിൽ പൂജാരി വളവിന് സമീപം മരം കടപുഴകി വീണു. വൈകിട്ട് ഏഴരയോടെയാണ് മരം വീണത്. രണ്ട് ഇരുചക്ര വാഹനങ്ങൾക്ക് മുകളിലേക്കാണ് മരം വീണത്. ഇതിൽ ഒരാൾക്ക് കാലിന് പരിക്കേറ്റു. ഇയാളെ മെഡിക്കൽ കോളജ് ആശുപത്രിയിലേക്ക് മാറ്റി. മറ്റു രണ്ടു യുവാക്കൾ നിസാര പരിക്കുകളോടെ രക്ഷപ്പെട്ടു. കായംകുളം സ്വദേശിയായ അഖിലും അനുജനുമാണ് അപകടത്തിൽപ്പെട്ട യുവാക്കൾ. കളശേരിയിൽ പഠിക്കുന്ന അനുജനെയും കൂട്ടി താമസസ്ഥലത്തേക്ക് പോകുന്ന വഴിയാണ് യുവാക്കൾക്ക് അപകടം ഉണ്ടായത്. മരത്തിൽ കടന്നൽ കൂട് കൂട്ടിയിരുന്നതിനാൽ അഗ്നിരക്ഷാസേന ഏറെ പ്രയാസപ്പെട്ടാണ് അവയെ ഓടിച്ച് ശേഷം മരംമുറിച്ചു മാറ്റിയത്.

ശുഭാംശുവുമായുള്ള സംവാദ ഓർമകൾ പങ്കുവച്ച് നീതു

കൊച്ചി: ആക്‌സിയം മിഷന്‍ പൂര്‍ത്തിയാക്കി ഭാരതത്തിന്‍റെ അഭിമാനം ശുഭാംശു ശുക്ല മടങ്ങിയെത്തിയപ്പോള്‍ ഇങ്ങ് ആലുവയില്‍ നീതു നിര്‍മല്‍ ചെറുവത്തൂര്‍ എന്ന 10ാം ക്ലാസുകാരിക്ക് ഇത് അഭിമാന നിമിഷം. ബഹിരാകാശ നിലയത്തിലിരിക്കെ ശുഭാംശുവുമായി നേരിട്ട് സംവദിച്ച വിദ്യാര്‍ഥികളില്‍ ഒരാളാണ് ആലുവ നിര്‍മല ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥിനിയായ നീതു. ആ അഭിമാന നിമിഷത്തെക്കുറിച്ച് നീതു പറയുന്നതിങ്ങനെ... ജൂലൈ മൂന്നിന് ഉച്ചയ്ക്ക് രണ്ടിന് തിരുവനന്തപുരം വിക്രം സാരാഭായ് സ്‌പേസ് സെന്‍ററിലെ സ്‌പേസ് ഗാര്‍ഡനിലായിരുന്നു ആ അഭിമാന നിമിഷം. ഉച്ചയ്ക്ക് ഒന്നര മുതല്‍ ഇവിടെ നിന്ന് ബഹിരാകാശ നിലയത്തിലേക്ക് ടെസ്റ്റ് കോള്‍ ആരംഭിച്ചു. ഉച്ചയ്ക്ക് രണ്ടോടെ മൂന്ന് വലിയ സ്‌ക്രീനുകളിലായി ഇന്ത്യയുടെ അഭിമാനം ശുഭാം ശു ശുക്ലയെ ഞങ്ങള്‍ കണ്ടു. ഭൂമിയില്‍ നിന്ന് 400 കി.മീ മുകളില്‍ ഒരു സെക്കന്‍ഡില്‍ എട്ടു കിലോമീറ്റര്‍ വേഗത്തില്‍ കറങ്ങിക്കൊണ്ടിരിക്കുന്ന ഒരാളെ കണ്ടപ്പോള്‍ വളരെയധികം സന്തോഷവും ആവേശവും തോന്നി. കുട്ടികളുടെ ചോദ്യങ്ങള്‍ വി എസ്എസ്‌സി സ്റ്റാഫ് റോബിന്‍ സര്‍ ആണ് ശുഭാംശു സാറിനോട് ചോദിച്ചത്. മൈക്രോ ഗ്രാവിറ്റി ആയതിനാല്‍ ശരീരത്തിന്‍റെ ബലം കുറയാതെ നിലനിര്‍ത്താന്‍ എന്ത് എക്‌സര്‍സൈസ് ആണ് അവിടെ ചെയ്യുന്നത് എന്നായിരുന്നു ഞാന്‍ ചോദിച്ചത്. എയറോബിക് ബാന്‍ഡ് അദ്ദേഹം കാണിച്ചു തന്നു. ട്രെഡ് മില്ലും സൈക്കിളിംഗും ചെയ്യുന്നതിനെക്കുറിച്ചും പറഞ്ഞു. അവിടെ ഉറങ്ങുന്നത് എങ്ങനെയാണ് എന്ന് ചോദിച്ചപ്പോള്‍ ഫ്‌ലോട്ട് ചെയ്തു കാണിച്ചു. 15 മിനിറ്റ് നീണ്ടു നിന്ന സംവാദത്തില്‍ ശുഭാശുവിനോടുള്ള തന്‍റെ ചോദ്യത്തെക്കുറിച്ച് നീതു വാചാലയായി. സഹപാഠിയായ അന്ന റോസ് ടിജോ എന്ന കുട്ടിയും സംവാദത്തില്‍ പങ്കെടുത്തു.

ഡിജിറ്റൽ പത്രം ഇറക്കി കുമ്പളങ്ങി സെന്‍റ് ജോർജ് സ്കൂൾ

ഫോർട്ടുകൊച്ചി: കുട്ടികളിലുള്ള കഴിവുകൾ അഭ്യസിപ്പിക്കുവാനും എഴുത്തും വായനയും പരിപോഷിപ്പിക്കുവാനും സ്കൂളിലെ പ്രോഗ്രാമുകൾ സമൂഹത്തെ അറിയിക്കുവാനുമായി ഡിജിറ്റൽ പത്രം ഇറക്കി കുമ്പളങ്ങി സെന്‍റ് ജോർജ് എൽപി സ്കൂൾ മാതൃകയായി. ഒരു മാസത്തിൽ ഒരു പതിപ്പ് എന്ന രീതിയിലാണ് പത്രം ഇറക്കുന്നത്. വിദ്യാജ്യോതി എന്ന പേരിൽ ഇറക്കുന്ന പത്രത്തിൽ കനിവിന്‍റെ കൈതാങ്ങുകൾ, ലഹരിക്കെതിരെയുള്ള ബോധവത്കരണം, പരിസ്ഥിതി സംരക്ഷണം, യോഗ, സംഗീത പരിപാടികൾ, സ്കൂൾ മുറ്റത്തെ കൃഷി പരിപാലനം തുടങ്ങിയ പംക്തികൾ ഉൾപ്പെടുത്തിയാണ് ആദ്യ കോപ്പി തയാറാക്കിയിരിക്കുന്നതെന്ന് പ്രധാനാധ്യാപിക സോണി ബെയ്സിൽ അറിയിച്ചു. വിദ്യാജ്യോതി ഡിജിറ്റൽ പത്രത്തിന്‍റെ ആദ്യ കോപ്പി സ്കൂൾ മാനേജർ ഫാ. സെബാസ്റ്റ്യൻ പുത്തംപുരയ്‌ക്കൽ ബാങ്ക് സെക്രട്ടറി മരിയ ലിജിക്ക് ആദ്യ കോപ്പി നൽകി പ്രകാശനം ചെയ്തു. കുന്പളങ്ങി സഹകരണ ബാങ്ക് പ്രസിഡന്‍റ് നെൽസൺ കോച്ചേരി അധ്യക്ഷത വഹിച്ചു.

സെക്യൂരിറ്റിക്ക് മർദനം: യൂത്ത് കോൺഗ്രസ് നേതാവിനെതിരെ സംഘടനാ നടപടിക്ക് ശിപാർശ

ആലുവ: ചെമ്പകശേരി കവലയിലെ സൂപ്പർ മാർക്കറ്റിന് മുന്നിൽ വാഹനം പാർക്ക് ചെയ്യുന്നത് സംബന്ധിച്ച തർക്കത്തിനിടെ വയോധികനെ ക്രൂരമായി മർദിച്ച യൂത്ത് കോൺഗ്രസ് സോഷ്യൽ മീഡിയ ജില്ലാ കോ ഓർഡിനേറ്റർ കുട്ടമശേരി സൂര്യാനഗറിൽ കുന്നത്ത് വീട്ടിൽ (കോളായിൽ) കെ.ബി. നിജാസിനെതിരെ സംഘടനാപരമായ നടപടിയെടുക്കുമെന്ന് യൂത്ത് കോൺഗ്രസ് നിയോജക മണ്ഡലം ഭാരവാഹികൾ അറിയിച്ചു. ഇത് ഡിസിസി പ്രസിഡന്‍റിന്‍റെ ശ്രദ്ധയിൽപ്പെടുത്തിയതായും ഭാരവാഹികൾ അറിയിച്ചു. അതേസമയം ആലുവ പോലീസ് രജിസ്റ്റർ ചെയ്ത കേസിൽ കെ.ബി. നിജാസിനെ ഇന്നലെ രാവിലെ സ്റ്റേഷൻ ജാമ്യം നൽകി വിട്ടയച്ചു. തിങ്കളാഴ്ച്ച വൈകിട്ടായിരുന്നു സംഭവം നടന്നത്. മർദനമേറ്റ ആലുവ ആശാൻ ലൈനിൽ അന്നപ്പിള്ളി വീട്ടിൽ ബാലകൃഷ്ണനെ (73) ചൊവ്വാഴ്ച്ച വൈകിട്ട് നാല് മുതൽ ഒമ്പത് വരെ മൊഴിയെടുക്കാനെന്ന പേരിൽ പോലീസ് സ്റ്റേഷനിൽ നിർത്തിയത് വിവാദമായി. മർദിക്കുന്ന വീഡിയോ പുറത്തുവിട്ടതിൽ പ്രകോപിതരായാണ് പോലീസ് വാദിയെ കാത്തുനിർത്തിച്ചതെന്നാണ് ആരോപണം.

പൂത്തോട്ട സാമൂഹികാരോഗ്യ കേന്ദ്രത്തിൽ ഭീഷണി മുഴക്കി നാലംഗ സംഘം

ഉദയംപേരൂർ: പൂത്തോട്ട സാമൂഹികാരോഗ്യ കേന്ദ്രത്തിൽ നഴ്സുമാർ ഉൾപ്പെടെയുള്ള ജീവനക്കാരുടെ നേരെ ഒരു സംഘം ആളുകൾ ഭീഷണി മുഴക്കുകയും അസഭ്യവർഷം നടത്തുകയും ഒരു ജീവനക്കാരനെ കൈയേറ്റം ചെയ്തതായും പരാതി. കഴിഞ്ഞ 12ന് വൈകിട്ട് നാലോടെയാണ് മൂന്ന് പുരുഷൻമാരും ഒരു സ്ത്രീയുമുൾപ്പെട്ട സംഘം ആശുപത്രിയിൽ ബഹളമുണ്ടാക്കിയത്. ഒരു ജീവനക്കാരന്‍റെ കൈ പിടിച്ച് തിരിക്കുകയും മൊബൈൽ തട്ടിത്തെറിപ്പിക്കുകയും ചെയ്തതായും പറയുന്നു. സംഭവം സംബന്ധിച്ച് അന്നുതന്നെ ഉദയംപേരൂർ പോലീസ് സ്റ്റേഷനിൽ പരാതിപ്പെട്ടിട്ടും പോലീസിന്‍റെ ഭാഗത്തുനിന്ന് ഒരു നടപടികളുമുണ്ടായിട്ടില്ലെന്ന് ജീവനക്കാർ പരാതിപ്പെട്ടു. ഡോക്ടർ ഇല്ലെന്ന കാരണം പറഞ്ഞാണ് സംഘം ബഹളം വയ്ക്കുകയും കൈയേറ്റം നടത്തുകയും ചെയ്തതെന്ന് ജീവനക്കാർ പറഞ്ഞു. സംഘത്തിലുള്ളവർ വനിതാ ജീവനക്കാർക്കു നേരെ തട്ടിക്കയറുന്നതുൾപ്പെടെ മൊബൈൽ ഫോണിൽ പകർത്തുമ്പോഴാണ് ജീവനക്കാരന് നേരെ കൈയേറ്റമുണ്ടായത്. പ്രധാനമായും ഉച്ചവരെ ഒപി മാത്രം പ്രവർത്തിക്കുന്ന ആശുപത്രിയിൽ കിടത്തിച്ചികിത്സ പേരിന് മാത്രമേയുള്ളൂ.

മെഡിക്കൽ കോളജിൽനിന്നു രോഗിയുമായി പോയ ആംബുലൻസ് മറിഞ്ഞു

കളമശേരി: മെഡിക്കൽ കോളജിൽനിന്ന് രോഗിയുമായി എറണാകുളത്തെ സ്വകാര്യ ആശുപത്രിയിലേക്ക് പോയ ആംബുലൻസ് മറിഞ്ഞ് രോഗിക്ക് കൂടുതൽ പരിക്ക്. വിദഗ്ധ ചികിത്സയ്‌ക്ക് വയോധികനുമായി പോയ ആംബുലൻസാണ് മറിഞ്ഞത്. കളമശേരി കാക്കനാട് റോഡിൽ തോഷിബക്ക് സമീപത്തെ യൂട്ടേണിൽ ഇന്നലെ ഉച്ചക്ക്12.30 ഓടെയാണ് സംഭവം നടന്നത്. എച്ച്എംടി റോഡിൽനിന്നു വന്ന് യുട്ടേൺ തിരിയുകയായിരുന്ന വാഹനത്തിൽ തട്ടി വട്ടം കറങ്ങി ആംബുലൻസ് അതെ റോഡിൽതന്നെ മറിയുകയായിരുന്നു. ആംബുലൻസിൽ ഉണ്ടായിരുന്ന രോഗിയെ മറ്റൊരു വാഹനത്തിൽ മെഡിക്കൽ കോളജിലേക്ക് മാറ്റി. രോഗിയുടെകൂടെ ഉണ്ടായിരുന്ന രണ്ട് പേർക്കും കാര്യമായ പരിക്കില്ല. തൊട്ടടുത്ത് ട്രാൻസ്ഫോർമറും ബസ് കാത്തിരിപ്പ് കേന്ദ്രവും ഉണ്ടായിരുന്നു. അതിൽ ഒന്നും തട്ടാതെ തലനാരിഴക്കാണ് വൻദുരന്തം ഒഴിവായത്. യുട്ടേൺ ഉന്നത അധികാരികൾ ഇടപെട്ട് അടപ്പിച്ചതാണ്. നാട്ടുകാർ അത് പൊളിച്ചുമാറ്റിയാണ് യുട്ടേൺ പുനസ്ഥാപിച്ചത്. പോലീസും അഗ്നിരക്ഷാ സേനയും സ്ഥലത്തെത്തി നടപടികൾ സ്വീകരിച്ചു. എച്ച്എംടി മെഡിക്കൽ കോളജ് റോഡിൽ മണിക്കുറുകൾ നീണ്ട ഗതാഗത തടസവുമുണ്ടായി.

യുവാവിനെ സംഘം ചേർന്ന് മർദിച്ചതായി പരാതി

പറവൂർ: യുവാവിനെ സംഘം ചേർന്ന് മർദിച്ചതായി പരാതി. ഗോതുരുത്ത് ആലുങ്കത്തറ അതുൽ ബിജു (22)വിനാണ് മർദനമേറ്റത്. ചൊവ്വ രാത്രി 12നായിരുന്നു സംഭവം. വീട്ടിൽനിന്നു പറവൂർ ടൗണിലേക്ക് ബൈക്കിൽ പോകുകയായിരുന്ന അതുലിനെ ചേന്ദമംഗലം പാലിയംനടയിൽ ഒരു സംഘം ആളുകൾ തടഞ്ഞുനിർത്തി മർദിക്കുകയായിരുന്നു. തുടർന്ന് അവരുടെ വാഹനത്തിൽ കയറ്റി കിഴക്കുംപുറത്ത് കൊണ്ടുപോയി കെട്ടിയിട്ട് മർദിക്കുകയും ചെയ്തു. ശരീരമാസകലം തല്ലിയ പാടുകളുണ്ട്. ഇതിനു ശേഷം ഇവർ അതുലിനെ വിട്ടയച്ചു. വീട്ടിലെത്തിയ അതുൽ കുടുംബാംഗങ്ങളോട് സംഭവം പറഞ്ഞിരുന്നില്ല. ഞാറയ്ക്കൽ ബോച്ചേയുടെ ഹോട്ടലിൽ ജീവനക്കാരനായ അതുൽ ബുധൻ രാവിലെ പതിവുപോലെ ജോലിക്കു പോയി. ജോലി സ്ഥലത്തെ ജീവനക്കാർ ശരീരത്തിലേറ്റ പരിക്ക് കണ്ടതിനെതുടർന്ന് വിവരം വീട്ടിലറിയിക്കുകയും വൈകിട്ട് പറവൂർ ഗവ. താലൂക്ക് ആശുപത്രിയിൽ പ്രവേശിപ്പിക്കുകയും ചെയ്തു. പരിക്ക് ഗുരുതരമായതിനാൽ പിന്നീട് കളമശേരി മെഡിക്കൽ കോളജിലേക്ക് മാറ്റി. പട്ടികജാതി വിഭാഗക്കാരനായ അതുലിനെ സംഘം ചേർന്ന് ക്രൂരമായി മർദിക്കാനുള്ള കാരണം വ്യക്തമല്ല. പാലിയംനട കേന്ദ്രീകരിച്ച് രാത്രികാലങ്ങളിൽ തമ്പടിക്കാറുള്ള ലഹരി മാഫിയ സംഘമാണോ ആക്രമണത്തിന് പിന്നിലെന്ന് സംശയമുണ്ട്. അതുലിന്‍റെ മൊബൈൽ ഫോൺ, പഴ്സ് എന്നിവയും അക്രമി സംഘം കവർന്നിട്ടുണ്ട്.

സഹകരണ ബാങ്കുകളുടെ യോഗവും നബാര്‍ഡ് സ്ഥാപക ദിനാഘോഷവും

കൊച്ചി: കേരളബാങ്കും നബാര്‍ഡും സംയുക്തമായി പ്രൈമറി ബാങ്ക് പ്രസിഡന്‍റുമാര്‍ക്കും ജീവനക്കാര്‍ക്കുമായി സെന്‍സിറ്റൈസേഷന്‍ പ്രോഗ്രാമും നബാര്‍ഡ് സ്ഥാപക ദിനാഘോഷവും സംഘടിപ്പിച്ചു. ഇടുക്കിയില്‍ നടന്ന ചടങ്ങ് നബാര്‍ഡ് ഡിജിഎം ഡിനി സുരേഷ് പണിക്കര്‍ ഉദ്ഘാടനം ചെയ്തു. കേരള ബാങ്ക് ഡയറക്ടര്‍ കെ.വി. ശശി അധ്യക്ഷത വഹിച്ചു. സഹകരണ സര്‍ക്കിള്‍ യൂണിയന്‍ ചെയര്‍മാന്‍ എം.ജെ. വാവച്ചന്‍ മുഖ്യപ്രഭാഷണം നടത്തി. കേരള ബാങ്ക് റീജണല്‍ ജനറല്‍ മാനേജര്‍ പ്രിന്‍സ് ജോര്‍ജ്, നബാര്‍ഡ് ഡിഡിഎം എം.എസ്. അരുണ്‍, സഹകരണ അസി. ഡയറക്ടര്‍ സന്തോഷ് ശ്രീധരന്‍ തുടങ്ങിയവര്‍ പ്രസംഗിച്ചു. പീരുമേട്, ഇടുക്കി, ഉടുമ്പന്‍ചോല താലൂക്കുകളില്‍ നിന്നായി 20 പ്രാഥമിക കാര്‍ഷിക വായ്പാ സഹകരണസംഘം പ്രതിനിധികള്‍ യോഗത്തില്‍ പങ്കെടുത്തു. നെടുങ്കണ്ടം കോ-ഓപ്പറേറ്റീവ് കോളജ് പ്രിന്‍സിപ്പാള്‍ കെ. സുരേഷ്‌കുമാര്‍ ക്ലാസുകള്‍ക്ക് നേതൃത്വം നല്‍കി.

ദീപിക നമ്മുടെ ഭാഷ പദ്ധതി : എടനാട് സെന്‍റ് അഗസ്റ്റിൻസ് എൽപി സ്കൂളിൽ

കാലടി: എടനാട് സെന്‍റ് അഗസ്റ്റിൻസ് എൽപി സ്കൂളിൽ ദീപിക നമ്മുടെ ഭാഷ പദ്ധതിയുടെ ഉദ്ഘാടനം കാഞ്ഞൂർ പാറപ്പുറം ക്രിസ്റ്റൽ പ്ലാസ്റ്റിക്സ് പാട്ണർ ഷിബു ജോസ് പുത്തൻപുരക്കൽ ദീപിക പത്രം വിദ്യാർഥികൾക്ക് നൽകി നിർവഹിച്ചു. ദീപിക ഫ്രണ്ട്സ് ക്ലബ്‌ കാഞ്ഞൂർ ഫൊറോന പ്രസിഡന്‍റ് സെബി കൂട്ടുങ്ങൽ, ദീപിക ഫ്രണ്ട്സ് ക്ലബ്‌ പ്രമോട്ടർ കെ.എസ്. ജോർജ് കൂട്ടുങ്ങൽ, പ്രധാനാധ്യാപിക ടി.എ .ഡിജീന, ഏരിയ മാനേജർ ടി.എ. നിബിൻ എന്നിവർ സംസാരിച്ചു.

താമരച്ചാൽ റാണി മാതാ കോൺവന്‍റ് സ്കൂൾ ഹൈസ്കൂളായി ഉയർത്തി

കിഴക്കമ്പലം: താമരച്ചാൽ റാണിമാത കോൺവന്‍റ് ഇംഗ്ലീഷ് മീഡിയം സ്കൂൾ ഹൈസ്കൂളായി ഉയർത്തിയതിന്‍റെ ഉദ്ഘാടനം പി.വി. ശ്രീനിജിൻ എംഎൽഎ നിർവഹിച്ചു. ചടങ്ങിൽ മാനേജരും പ്രൊവിൻഷ്യൽ സുപ്പീരിയറുമായ സിസ്റ്റർ ലീ റോസ് പ്ലാക്കൽ, പ്രിൻസിപ്പൽ സിസ്റ്റർ റീനി ജെയിംസ്, താമരച്ചാൽ സേക്രഡ് ഹാർട്ട് പള്ളി വികാരി ഫാ, ഏബ്രഹാം കിടങ്ങൻ, പിടിഎ പ്രസിഡന്‍റ് ബിനു മാത്യു തുടങ്ങിയവർ സംസാരിച്ചു. വിദ്യാലയത്തിൽനിന്നു ഫുൾ എ പ്ലസ് നേടിയ കുട്ടികളെ എംഎൽഎ ആദരിച്ചു.

വേള്‍ഡ് പബ്ലിക് റിലേഷന്‍സ് ഡേ ആചരിച്ചു

കൊച്ചി: പബ്ലിക് റിലേഷന്‍സ് കൗണ്‍സില്‍ ഓഫ് ഇന്ത്യ യംഗ് കമ്മ്യൂണിക്കേറ്റേഴ്സ്‌ ക്ലബ് (പിആര്‍സിഐ വൈസിസി) കേരള ചാപ്റ്ററും തേവര കോളജിലെ ജേര്‍ണലിസം ഡിപ്പാര്‍ട്‌മെന്‍റും സംയുക്തമായി വേള്‍ഡ് പിആര്‍ (പബ്ലിക് റിലേഷന്‍സ്) ഡേ ആചരിച്ചു. പിആര്‍ഡേയോടനുബന്ധിച്ച് "ആര്‍ട്ടിഫിഷ്യല്‍ ഇന്‍റലിജന്‍സ് കാലത്തെ പബ്ലിക് റിലേഷന്‍സിന്‍റെ പുതിയ ഉത്തരവാദിത്തങ്ങളും, വെല്ലുവിളികളും' എന്ന വിഷയത്തില്‍ പാനല്‍ ചര്‍ച്ച സംഘടിപ്പിച്ചു. കൊച്ചി നാവിക സേനയുടെ പബ്ലിക് റിലേഷന്‍സ് ഓഫീസര്‍ കമാൻഡര്‍ അതുല്‍ പിള്ള ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഡോ. സി.എസ്. ബിജു അധ്യക്ഷനായി. പബ്ലിക് റിലേഷന്‍സ് കൗണ്‍സില്‍ കേരള ഡയറക്ടര്‍ റാം സി മേനോന്‍, യംഗ് കമ്യൂണിക്കേറ്റേഴ്സ് ക്ലബ് കേരള ഹെഡ് സുജിത് നാരായണന്‍ എന്നിവര്‍ സംസാരിച്ചു. പാനല്‍ ചര്‍ച്ചയില്‍ എസ്എച്ച് സ്‌കൂള്‍ ഓഫ് കമ്യൂണിക്കേഷന്‍ ഡയറക്ടര്‍ ബാബു ജോസഫ്, റിലയന്‍സ് ജിയോ കോര്‍പറേറ്റ് കമ്യൂണിക്കേഷന്‍ കേരള ഹെഡുമായ എം. മഞ്ജു ഗോപിനാഥ് എന്നിവര്‍ പങ്കെടുത്തു.

ജൈവ വൈവിധ്യ പാർക്കിൽ നവീകരിച്ച ഫൗണ്ടൻ ഉദ്ഘാടനം

ഫോർട്ടുകൊച്ചി: സാന്‍റാക്രൂസ് എൽപി സ്കൂളിൽ ജൈവ വൈവിധ്യ പാർക്കിൽ നവീകരിച്ച ഫൗണ്ടൻ ജോൺസൺ കൺട്രോൾസ് ഇന്ത്യ പ്രൈവറ്റ് ലിമിറ്റഡ് കമ്പനി നേവി കമാൻഡർ സതീഷ് മേനോൻ ഉദ്ഘാടനം ചെയ്തു. ഫൗണ്ടന്‍റെ സ്വിച്ചോൺ കർഷകനും പരിസ്ഥിതി പ്രവർത്തകനുമായ സുബൈർ അരൂക്കുറ്റിയും പരിസ്ഥിതി ക്ലബ് കോ ഓർഡിനേറ്ററായ മേരി അഞ്ജുവും ചേർന്ന് നിർവഹിച്ചു. യോഗത്തിൽ കൗൺസിലർ ആന്‍റണി കുരീത്തറ അധ്യക്ഷത വഹിച്ചു. പ്രധാനാധ്യാപിക ആനി സബീന ബിന്ദു മുഖ്യപ്രഭാഷണം നടത്തി.

‘സഹകരണ സംഘങ്ങളുടെ ക്ലാസിഫിക്കേഷൻ നടപടികൾ അടിയന്തരമായി പരിഷ്കരിക്കണം’

നെടുമ്പാശേരി: സഹകരണ മേഖലയിൽ മിസലെനിയസ് സഹകരണ സംഘങ്ങളുടെ ക്ലാസിഫിക്കേഷൻ നടപടികൾ പരിഷ്കരിക്കുന്നതിന് അടിയന്തര നടപടികൾ സ്വീകരിക്കണമെന്ന് സഹകരണ സംഘങ്ങളുടെ കോ ഓർഡിനേഷൻ കമ്മിറ്റി ആലുവ താലൂക്ക് സമ്മേളനം ആവശ്യപ്പെട്ടു. മറ്റ് പ്രാഥമിക സഹകരണ സംഘങ്ങൾക്ക് നിരവധി തവണയായി ക്ലാസിഫിക്കേഷൻ പുതുക്കി നൽകിയെങ്കിലും മിസലെനിയസ് സംഘങ്ങളോട് തികഞ്ഞ അവഗണനയാണ് ഇക്കാര്യത്തിൽ കാണിക്കുന്നതെന്ന് സമ്മേളനം കുറ്റപ്പെടുത്തി. ഇതോടൊപ്പം ശ്രീറാം കമ്മിറ്റി ശിപാർശ ചെയ്ത മിസലെനിയസ് സംഘങ്ങളുടെ അപെക്സ് സംവിധാനത്തിന് രൂപം നൽകുക, പിഎസ്‌‌‌സി നിയമന സംവരണം പുനസ്ഥാപിക്കുക, ജില്ലാ സഹകരണ ബാങ്കുകൾ ഉണ്ടായിരുന്നപ്പോൾ ഉണ്ടായിരുന്ന അംഗത്വം കേരള ബാങ്ക് രൂപീകരിച്ചപ്പോൾ നിഷേധിച്ചത് പുനസ്ഥാപിക്കുക തുടങ്ങിയ നിരവധിയായ ആവശ്യങ്ങൾ ഉന്നയിച്ച് സഹകരണ സംഘം ഭരണസമിതി അംഗങ്ങളും ജീവനക്കാരും നടത്തുന്ന സെക്രട്ടറിയേറ്റ് മാർച്ചു വിജയിപ്പിക്കുവാൻ സമ്മേളനം തീരുമാനിച്ചു. ആലുവ താലൂക്കിലെ സഹകരണം സംഘം പ്രതിനിധികളുടെ യോഗം സംസ്ഥാന കോ ഓർഡിനേറ്റർ നെല്ലിമൂട് പ്രഭാകരൻ ഉദ്ഘാടനം ചെയ്തു. ജില്ലാ കോ ഓർഡിനേറ്റർ കെ.കെ. ചന്ദ്രൻ അധ്യക്ഷനായി.

പറവൂർ-കൊടുങ്ങല്ലൂർ റൂട്ടിൽ സ്വകാര്യ ബസുകളുടെ മിന്നൽ പണിമുടക്ക്

പറവൂർ: മൂത്തകുന്നം-പറവൂർ റോഡിന്‍റെ ശോചനീയവസ്ഥമൂലം സർവീസുകൾ സമയബന്ധിതമായി നടത്താൻ കഴിയുന്നില്ലെന്ന് ആരോപിച്ച് പറവൂർ-കൊടുങ്ങല്ലൂർ റൂട്ടിൽ സ്വകാര്യ ബസുകൾ മിന്നൽ പണിമുടക്ക് നടത്തി. ഇതുമൂലം നൂറുകണക്കിന് യാത്രക്കാർ വലഞ്ഞു. പറവൂർ പാലം മുതൽ കോട്ടപ്പുറം പാലം വരെയുള്ള ഭാഗത്താണ് റോഡ് പൂർണമായും തകർന്നിരിക്കുന്നത്. ആലുംമാവ് മുതൽ പട്ടണം കവല വരെയുള്ള ഭാഗം കുണ്ടും കുഴിയുമായതിനാൽ വലിയ വാഹനങ്ങൾ പോലും പണിപ്പെട്ടാണ് കടന്നുപോകുന്നത്. ഇതോടെ ഈ ഭാഗത്ത് വലിയ ഗതാഗതക്കുരുക്കാണ് അനുഭവപ്പെടുന്നത്. ഇതുമൂലം ബസ് സർവീസുകൾ സമയക്രമം പാലിച്ച് സർവീസ് നടത്താനാകുന്നില്ല. പറവൂരിൽനിന്ന് കൊടുങ്ങല്ലൂരിലേക്ക് 30 മിനിറ്റാണ് ഓടിയെത്താൻ അനുവദിച്ചിട്ടുള്ളത്. എന്നാൽ 50 മിനിറ്റ് എടുത്താലും എത്താൻ സാധിക്കാത്ത സ്ഥിതിയാണ്. സമയം സംബന്ധിച്ച് ബസ് ജീവനക്കാർ തമ്മിലും പ്രശ്നങ്ങളുണ്ടാകുന്നുണ്ട്. റോഡിൽ രൂപപ്പെട്ട വലിയ കുഴികളിൽ ഇറങ്ങുമ്പോൾ എതിർ ദിശയിൽ വരുന്ന ഇരുചക്രവാഹനങ്ങളിലും മറ്റും സഞ്ചരിക്കുന്നവരുടെ ദേഹത്തേക്ക് വെള്ളം തെറിച്ചു വീഴുന്നതും തർക്കത്തിന് കാരണമാകുന്നുണ്ട്. ബുധൻ രാവിലെ മുനമ്പം കവലയിൽ ഒരു ബസ് ബ്രേക്ക് ഡൗണായി. കുര്യാപ്പിള്ളിയിൽ ദേഹത്ത് വെള്ളം തെറിച്ചതിനെതുടർന്ന് ഇരുചക്ര വാഹനക്കാരനും ബസ് ഡ്രൈവറുമായി വാക്കേറ്റമുണ്ടായി. ഇതോടെയാണ് സർവീസ് നിർത്തിവക്കാൻ തീരുമാനിച്ചത്. വലിയ കുഴികളിൽ ചാടുന്നതിനാൽ തകരാർ സംഭവിച്ച് സർവീസ് നിർത്തിവയ്‌ക്കേണ്ട സ്ഥിതിയാണെന്നും ഇത് വലിയ സാമ്പത്തിക ബാധ്യത ഉണ്ടാക്കുന്നുണ്ടെന്നും ബസുടമകൾ പറഞ്ഞു. പുതിയ ദേശീയപാത 66 നിർമിക്കാനായി കരാർ ഏറ്റെടുത്ത കമ്പിനിക്കാണ് നിലവിലെ റോഡിന്‍റെ അറ്റകുറ്റപ്പണിയുടെ ചുമതല. എന്നാൽ സമയബന്ധിതമായി അത് നിർവഹിക്കാൻ അവർ തയാറാകുന്നില്ല. മൂത്തകുന്നം മുതൽ ഇടപ്പിള്ളി വരെയുള്ള നിലവിലെ റോഡിന്‍റെ തകർച്ച അടിയന്തരമായി പരിഹരിക്കണമെന്ന് കഴിഞ്ഞ ദിവസം മന്ത്രി പി. രാജീവിന്‍റെ സാന്നിദ്ധ്യത്തിൽ നടന്ന യോഗത്തിൽ തീരുമാനിച്ചിരുന്നു. എന്നാൽ ദേശീയപാത അഥോറിറ്റിയുടെ അനാസ്ഥ മൂലം കാര്യങ്ങൾ നീങ്ങുന്നില്ല. റോഡിന്‍റെ തകർച്ച പരിഹരിച്ചാൽ മാത്രമേ ഇനി സർവീസ് പുനരാരംഭിക്കാനാകു എന്ന നിലപാടിലാണ് ഉടമകളും ജീവനക്കാരും.

പഴകിയ അരിയുടെ ഉച്ചഭക്ഷണം നൽകിയതായി പരാതി

പറവൂർ: ചേന്ദമംഗലം ഗവ.എൽപി സ്‌കൂളിൽ ചൊവ്വാഴ്ച വിദ്യാർഥികൾക്കു നൽകിയത് പഴകിയ അരിയുടെ ഉച്ചഭക്ഷണമാണെന്നു പരാതി. ഏതാനും ചില കുട്ടികൾക്ക് അസ്വസ്‌ഥത അനുഭവപ്പെട്ടതിനാൽ രക്ഷിതാക്കൾ ഇന്നലെ പരാതിയുമായി സ്‌കൂളിലെത്തി. വിദ്യാലയത്തിൽ സൂക്ഷിച്ചിരുന്ന അരിച്ചാക്കുകൾ പരിശോധിച്ചപ്പോൾ പുഴുവിനെയും ഉച്ചിനെയും കണ്ടെത്തി. യൂത്ത് കോൺഗ്രസ് പ്രവർത്തകർ സ്‌കൂളിലെത്തി അരി സൂക്ഷിച്ചിരുന്ന ഗോഡൗൺ പൂട്ടുകയും കുത്തിയിരുന്നു പ്രതിഷേധിക്കുകയും ചെയ്‌തു. സ്‌കൂളിന് പുറത്തു സമരം ചെയ്യണമെന്ന് ഏതാനും ഡിവൈഎഫ്ഐ പ്രവർത്തകർ ആവശ്യപ്പെട്ടതു തർക്കത്തിനിടയാക്കി. പോലീസ് ഇടപെട്ടാണ് രംഗം ശാന്തമാക്കിയത്. ദുർഗന്ധവും മറ്റും ഉണ്ടായതിനാൽ ചൊവ്വാഴ്ച നൽകിയ ഉച്ചഭക്ഷണം പല കുട്ടികളും പൂർണമായി കഴിച്ചില്ലെന്നു രക്ഷിതാക്കൾ പറഞ്ഞു. വയറിന് അസ്വസ്‌ഥതകൾ പ്രകടിപ്പിച്ച ഏതാനും ചില വിദ്യാർഥികൾ ആശുപത്രിയിൽ ചികിത്സതേടി. സപ്ലൈകോയിൽനിന്നു വിദ്യാലയത്തിൽ എത്തിച്ച അരിച്ചാക്കുകളിൽ വിളവെടുപ്പു നടത്തിയ ‘ക്രോപ് ഇയർ 2023-2024’ എന്നു മാത്രമേ രേഖപ്പെടുത്തിയിട്ടുള്ളു. പാക്ക് ചെയ്ത മാസവും തീയതിയും എക്‌സ്‌പയറി തീയതിയും ഇല്ല. ജൂൺ മാസത്തിൽ കൊണ്ടുവന്ന അരിയും ഒരാഴ്‌ച മുൻപ് എത്തിച്ച അരിയും സ്‌കൂളിൽ ഉണ്ടായിരുന്നു. ജൂൺ മാസത്തിൽ കൊണ്ടുവന്ന അരിക്ക് നിറവ്യത്യാസമുണ്ട്. സ്‌കൂളിലെത്തിയ ഫുഡ് ആൻഡ് സേഫ്റ്റി അധികൃതർ എല്ലാ അരിച്ചാക്കുകളും അഴിച്ചു പരിശോധിക്കുകയും ജൂണിൽ കൊണ്ടുവന്ന അരി മോശമാണെന്നു വ്യക്തമാക്കുകയും ചെയ്‌തു. പ്രശ്ന‌ം രൂക്ഷമായതോടെ പുറത്തുനിന്നു വേറെ അരി വാങ്ങി കൊണ്ടുവന്നാണ് ഇന്നലെ വിദ്യാർഥികൾക്ക് ഉച്ചഭക്ഷണം നൽകിയത്. എന്നാൽ ദുർഗന്ധം എന്നതു റേഷൻ അരിയുടേതായ മണമായിരുന്നെന്നും ഭക്ഷണം കഴിച്ചപ്പോൾ കാര്യമായ പ്രശ്നം തോന്നിയില്ലെന്നും ദുർഗന്ധം തോന്നിയ അരിയുടെ ചോറ് കുട്ടികൾക്കു കൊടുക്കാതെ മാറ്റിയിരുന്നെന്നുമാണ് സ്കൂ‌ളിലെ പ്രധാനാധ്യാപിക പറയുന്നത്. ഇന്നത്തേക്ക് ഉച്ചഭക്ഷണം തയാറാക്കാനുള്ള പുതിയ അരി സപ്ലൈകോ അധികൃതർ ഇന്നലെ വൈകിട്ടോടെ സ്‌കൂളിൽ എത്തിച്ചിട്ടുണ്ട്. സ്‌കൂളിൽ ഉച്ചഭക്ഷണത്തിനായി വിതരണം നടത്തിയ അരിയിൽ പുഴുവിനെയും ഉച്ചിനെയും കണ്ടെത്തിയ സംഭവത്തിൽ സമഗ്രമായ അന്വേഷണം വേണമെന്നു ബ്ലോക്ക് കോൺഗ്രസ് പ്രസിഡന്‍റ് ഫ്രാൻസിസ് വലിയപറമ്പിലും ചേന്ദമംഗലം മണ്ഡലം പ്രസിഡന്‍റ് ശ്രീജിത്ത് മനോഹറും ആവശ്യപ്പെട്ടു. ജൂൺ അവസാനം ഫുഡ് സേഫ്റ്റി വിഭാഗം നടത്തിയ പരിശോധനയിൽ ഗുഡ് സർട്ടിഫിക്കറ്റ് നൽകിയ അരി ഇപ്പോൾ മോശമാണെന്നു പറയുന്നത് പരിശോധനയുടെ വിശ്വാസ്യത സംശയത്തിലാക്കുന്നു. അരി നിറച്ച ചാക്കിൽ തീയതിയോ മാസമോ കാണാത്തതു തട്ടിപ്പിന്‍റെ ആഴം കൂട്ടുന്നു. വൻകിട കച്ചവടക്കാരും സിവിൽ സപ്ലൈസും തമ്മിലുള്ള ഒത്തുകളിയാണ് ഇതിനു പിന്നിലെന്നു കോൺഗ്രസ് നേതാക്കൾ ആരോപിച്ചു. കുട്ടികൾക്ക് ഭക്ഷ്യവിഷബാധയേറ്റെന്ന പ്രചാരണം അടിസ്ഥാന രഹിതമെന്ന് പറവൂർ: ചേന്ദമംഗലം ഗവ. എൽപി സ്കൂളിൽ ഉച്ചഭക്ഷണം കഴിച്ച കുട്ടികൾക്ക് ഭക്ഷ്യവിഷബാധയേറ്റെന്ന തരത്തിലുള്ള പ്രചാരണം അടിസ്ഥാനരഹിതമെന്ന് പഞ്ചായത്ത് പ്രസിഡന്‍റ് ലീന വിശ്വൻ. ഒരു മാസം മുമ്പ് ചില കുട്ടികൾക്ക് പനി ബാധിച്ചിരുന്നു. അന്നും സമാന രീതിയിലുള്ള തെറ്റായ പ്രചാരണങ്ങൾ നടന്നതിനെതുടർന്ന് ഫുഡ് ആന്‍ഡ് സേഫ്റ്റി അധികൃതർ സാമ്പിളുകൾ ശേഖരിക്കുകയും കുട്ടികൾക്ക് നൽകിയ ഭക്ഷണത്തിന് അപാകതയില്ലെന്ന് റിപ്പോർട്ട് നൽകുകയും ചെയ്തിരുന്നു. ചൊവ്വാഴ്ച വിതരണം ചെയ്ത ഉച്ചഭക്ഷണത്തിൽ ഉച്ചിനെ കണ്ടതായും മണം ഉണ്ടായിരുന്നതായും കുട്ടികൾ വീടുകളിൽ അറിയിച്ചിരുന്നു. തുടർന്ന് നടത്തിയ പരിശോധനയിൽ സപ്ലൈക്കോയിൽനിന്ന് വിതരണം ചെയ്ത അരിച്ചാക്കുകളിൽ ചിലതിൽ ഉച്ചിനെ കണ്ടെത്തിയിട്ടുണ്ട്. പഴക്കംചെന്ന അരിയാണെന്ന് മനസിലായതിനെതുടർന്ന് സപ്ലൈക്കോ ഇത് തിരിച്ചെടുത്ത് പകരം ഗുണമേന്മയുള്ള അരിയും ഭക്ഷ്യവസ്തുക്കളും നൽകാമെന്ന് ഉറപ്പ് നൽകിയിട്ടുണ്ട്. മികച്ച രീതിയിൽ പ്രവർത്തിക്കുന്ന സ്കൂളിനെ തകർക്കാനുള്ള നീക്കങ്ങൾ പ്രതിരോധിക്കണമെന്നും കുട്ടികൾക്ക് ഗുണമേന്മയുള്ള ഭക്ഷണം നൽകുന്നുണ്ടെന്ന് ഉറപ്പാക്കുമെന്നും പഞ്ചായത്ത് പ്രസിഡന്‍റ് പറഞ്ഞു.

ഒഴുക്കിൽപ്പെട്ട കർണാടക സ്വദേശിയുടെ മൃതദേഹം കണ്ടെത്തി

മൂവാറ്റുപുഴ: മൂവാറ്റുപുഴയാറിൽ ഒഴുക്കിൽപ്പെട്ട ഇതര സംസ്ഥാന തൊഴിലാളിയുടെ മൃതദേഹം കണ്ടെത്തി. സൗത്ത് മാറാടി ആഷ്ലി ഫർണീച്ചർ സ്ഥാപനത്തിലെ ജീവനക്കാരൻ, കർണാടക ഗോപാലപുരം സ്വദേശി ഫയാഖാന്‍റെ (45) മൃതദേഹമാണ് കണ്ടെത്തിയത്. കഴിഞ്ഞ ഞായറാഴ്ച വൈകുന്നേരം മഞ്ചേരിപടി തിരുമധുര ശ്രീകൃഷ്ണസ്വാമി ക്ഷേത്രക്കടവിൽ ബന്ധുവിനോടൊപ്പം കുളിക്കുന്നതിനിടെ ഫയാഖാൻ ഒഴുക്കിൽപ്പെടുകയായിരുന്നു. എൻഡിആർഎഫും അഗ്നിശമന രക്ഷാസേനയും സ്കൂബാ ടീമും നടത്തിയ തെരച്ചിലിലാണ് ചൊവ്വാഴ്ച രാത്രി കായനാട് നിന്ന് മൃതദേഹം കണ്ടെത്തിയത്.

തടി ദേഹത്ത് വീണു യുവാവ് മരിച്ചു

പെരുന്പാവൂർ: തടി ദേഹത്ത് വീണു യുവാവ് മരിച്ചു. കാവുംപുറം ലക്ഷംവീട് കോളനിയിൽ താമസിക്കുന്ന വട്ടപ്പാറ വീട്ടിൽ പരേതനായ കരീമിന്‍റെ മകൻ മനീഷ് (25) ആണ് മരിച്ചത്. ഇന്നലെ ഉച്ചയ്ക്ക് 12 ഓടെ ഐമുറിയിലായിരുന്നു അപകടം. തടി തോളിൽ ചുമന്ന് വാഹനത്തിലേക്ക് കയറ്റുന്നതിനിടെ കാൽ വഴുതി വീഴുകയായിരുന്നു. ഉടൻ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. കബറടക്കം നടത്തി. മാതാവ്: സബിയ. സഹോദരങ്ങൾ: മനാഫ്, മാഹിൻകുട്ടി, മൻസിയ.

കാർ കടത്തെന്നു കരുതി കണ്ടെയ്നർ തടഞ്ഞു ; കുടുങ്ങിയത് എടിഎം കവർച്ചാ സംഘം

പനങ്ങാട്: കാർ കടത്തിക്കൊണ്ട് വരുന്നുവെന്ന സംശയത്തിൽ കണ്ടെയ്നർ ലോറി തടഞ്ഞ് പിടികൂടിയ മൂന്നംഗ സംഘം നിരവധി കേസുകളിലുൾപ്പെട്ടവരെന്ന് പോലീസ്. ഇന്നലെ പുലർച്ചെ മൂന്നോടെയാണ് ദേശീയപാതയിൽ നെട്ടൂർ പള്ളി സ്റ്റോപ്പിൽ നിന്നും രാജസ്ഥാൻ രജിസ്ട്രേഷനിലുള്ള കണ്ടെയ്നർ ലോറിയും ഹരിയാന സ്വദേശികളായ നസീർ അഹമ്മദ് (32), സുധാം (35), രാജസ്ഥാൻ സ്വദേശി സെയ്കുൽ (32) എന്നിവരെയും പനങ്ങാട് പോലീസ് പിടികൂടിയത്. മൂന്ന് ദിവസം മുന്പ് ഡൽഹിയിൽ നിന്നു പുറപ്പെട്ട ലോറിയിലുണ്ടായിരുന്ന സംഘം തമിഴ്നാട്ടിലെ കൃഷ്ണഗിരിയിൽ നിന്നു ഇക്കോ കാർ മോഷ്ടിച്ച് കണ്ടെയ്നറിൽ കയറ്റുകയായിരുന്നു. കാർ മോഷണം പോയതറിഞ്ഞ ഉടമസ്ഥർ നൽകിയ പരാതിയിൽ തമിഴ്നാട് പോലീസ് നടത്തിയ അന്വേഷണത്തിലാണ് കാർ കയറ്റിക്കൊണ്ടു പോകുന്ന സിസി ടിവി ദൃശ്യങ്ങൾ ലഭിച്ചത്. ലോറി കേരളത്തിലേക്ക് കടന്നെന്ന വിവരത്തെ തുടർന്ന് പാലിയേക്കര ടോളിലും കുമ്പളം ടോളിലും അറിയിപ്പ് നൽകിയിരുന്നു. പരിശോധനയിൽ ലോറി പാലിയേക്കര ടോൾ കടന്നെന്നു കണ്ടതിനെ തുടർന്ന് കുമ്പളം ടോൾ കേന്ദ്രീകരിച്ച് നടത്തിയ അന്വേഷണത്തിൽ പുലർച്ചെ മൂന്നോടെയാണ് പോലീസ് പട്രോളിംഗ് സംഘം ലോറിയെയും സംഘത്തെയും കസ്റ്റഡിയിലെടുത്തത്. സംഘാംഗങ്ങളിലൊരാൾ രാവിലെ ആറോടെ പ്രാഥമിക കൃത്യം നിർവഹിക്കാനെന്നു പറഞ്ഞ് കടന്നു കളഞ്ഞെങ്കിലും രാവിലെ 11ഓടെ കുഫോസ് ക്യാമ്പസിലെ കുറ്റിച്ചെടികൾക്കിടയിൽ നിന്ന് ഇയാളെ പോലീസ് പിടികൂടി. പിന്നീട് കണ്ടെയ്നർ തുറന്ന് പോലീസ് പരിശോധന നടത്തിയപ്പോൾ കാർ കണ്ടെത്താനായില്ല. കണ്ടെയ്നറിനുള്ളിൽ എസി യൂണിറ്റുകളും മെക്കാനിക്കൽ സ്പെയർ പാർട്ടുകളുമാണുണ്ടായിരുന്നത്. ഗ്ലാസ് കട്ടർ, ഗ്യാസ് കട്ടർ തുടങ്ങിയ സാമഗ്രികളും കണ്ടെത്തി. സംഘത്തിലെ ഒരാൾക്കെതിരേ 12ഓളം കേസുകളുണ്ടെന്ന് പോലീസ് പറഞ്ഞു. എടിഎം കവർച്ച നടത്തുന്നതും സംഘമാണെന്നു പറയുന്നു. കണ്ടെയ്നർ ലോറി എടിഎമ്മിനു മുന്നിൽ കാഴ്ച തടസപ്പെടുത്തും വിധം പാർക്ക് ചെയ്ത് എടിഎം കവർച്ച ചെയ്യുന്നതാണ് രീതി. ഇവരെക്കുറിച്ച് കൂടുതൽ അന്വേഷണം നടക്കുകയാണ്. പിടികൂടിയ കണ്ടെയ്നർ ലോറി മോഷ്ടിക്കപ്പെട്ടതാണോയെന്നും അന്വേഷിക്കുന്നുണ്ട്. പോലീസ് കേസെടുത്തു.

ഡബിള്‍ ഡക്കറിനു ഡബിൾ ബെൽ‍...

കൊച്ചി: കെഎസ്ആര്‍ടിസിയുടെ ബജറ്റ് ടൂറിസം പദ്ധതിയുടെ ഭാഗമായി ചുരുങ്ങിയ ചിലവില്‍ കൊച്ചിയുടെ സായാഹ്ന കാഴ്ചകള്‍ ആസ്വദിക്കാനാകുന്ന ഓപ്പണ്‍ ഡബിള്‍ ഡക്കര്‍ വിനോദ സഞ്ചാര ബസ് സര്‍വീസ് ആരംഭിച്ചു. എറണാകുളം ജെട്ടി കെഎസ്ആര്‍ടിസി സ്റ്റാന്‍ഡില്‍ നടന്ന ചടങ്ങില്‍ മന്ത്രി പി. രാജീവ് സര്‍വീസ് ഉദ്ഘാടനം ചെയ്തു. തുടര്‍ന്ന് മന്ത്രിയും ജനപ്രതിനിധികളുമായി തുറന്ന ബസില്‍ നഗരപ്രദക്ഷിണം പ്ലാന്‍ ചെയ്തിരുന്നെങ്കിലും മഴ മൂലം സ്റ്റാൻഡില്‍ ഒരുവട്ടം കറക്കി യാത്ര അവസാനിപ്പിച്ചു. രണ്ടാം നിലയുടെ മേല്‍ക്കൂര മാറ്റി സഞ്ചാരികള്‍ക്ക് കായല്‍ കാറ്റേറ്റ് കാഴ്ചകള്‍ കാണാന്‍ കഴിയുന്ന തരത്തിലാണ് ബസ് ഒരുക്കിയിരിക്കുന്നത്. മുകളിലെ ഓപ്പണ്‍ ഡെക്കില്‍ 39 സീറ്റുകളും താഴത്തെ നിലയില്‍ 24 സീറ്റുകളുമാണുള്ളത്. 300 രൂപയാണ് മുകളിലിരുന്നു യാത്ര ചെയ്യാനുള്ള നിരക്ക്. താഴെയുള്ള സീറ്റുകളാണേല്‍ 150 രൂപ. ദിവസേന ഒരു സര്‍വീസ് മാത്രമേ ഉണ്ടാകു. വൈകുന്നേരം അഞ്ചിന് എറണാകുളം കെഎസ്ആര്‍ടിസി സ്റ്റാന്‍ഡില്‍ നിന്നാരംഭിച്ച് എട്ടോടെ തിരികെ ഇതേസ്ഥലത്ത് എത്തുംവിധമാണ് സര്‍വീസ്. മൂന്നു മണിക്കൂര്‍ യാത്രയില്‍ 29 കിലോമീറ്ററാണ് സഞ്ചരിക്കുന്നത്. സംഘമായെത്തുന്ന വിനോദ സഞ്ചാരികള്‍ക്കും ചെറിയ ആഘോഷങ്ങള്‍ക്കും 15,300 രൂപ നിരക്കില്‍ വാഹനം വിട്ടു നല്‍കും. സര്‍വീസിന് പുറമേയുള്ള ഏത് സമയത്തും ബസ് ബുക്ക് ചെയ്യാം. കെഎസ്ആര്‍ടിസിയുടെ വെബ്‌സൈറ്റ് വഴിയും 9447223212 എന്ന നമ്പറിലും മുന്‍കൂട്ടി ബുക്ക് ചെയ്യാം. ടി.ജെ. വിനോദ് എംഎല്‍എ അധ്യക്ഷത വഹിച്ച ചടങ്ങില്‍ ഹൈബി ഈഡന്‍ എംപി, കെ.ജെ. മാക്‌സി എംഎല്‍എ, മേയര്‍ എം. അനില്‍കുമാര്‍, കെഎസ്ആര്‍ടിസി ബജറ്റ് ടൂറിസം ചീഫ് ട്രാഫിക് മാനേജര്‍ ആര്‍. ഉദയകുമാര്‍, സ്റ്റേറ്റ് കോ-ഓര്‍ഡിനേറ്റര്‍ ആര്‍. സുനില്‍കുമാര്‍, ജില്ലാ കോ-ഓര്‍ഡിനേറ്റര്‍ പ്രശാന്ത് വേലിക്കകം, എറണാകുളം എടിഒ ടി.എ. ഉബൈദ് തുടങ്ങിയവര്‍ പ്രസംഗിച്ചു. സീറ്റുറപ്പിക്കാൻ... ഡബിള്‍ ഡക്കര്‍ യാത്രയ്ക്ക് ബുക്ക് ചെയ്യാന്‍ onlineskrtcswift.com എന്ന റിസര്‍വേഷന്‍ സൈറ്റില്‍ സ്റ്റാര്‍ട്ടിംഗ് ഫ്രം എന്ന ഓപ്ഷനില്‍ കൊച്ചി സിറ്റി റൈഡ് (Kochi Ctiy Ride) എന്നും ഗോയിംഗ് ടു ഓപ്ഷനില്‍ കൊച്ചി (Kochi) എന്നും സെലക്ട് ചെയ്തു സീറ്റുകള്‍ ഉറപ്പിക്കാം. കൂടാതെ സീറ്റുകള്‍ മുന്‍കൂട്ടി ബുക്ക് ചെയ്യുന്നതിനും കൂടുതല്‍ വിവരങ്ങള്‍ക്കും 99610 42804 (ഷാലിമാര്‍ തോമസ്, യൂണിറ്റ് കോ-ഓര്‍ഡിനേറ്റര്‍), 8289905075 (മനോജ്, അസി.കോ-ഓര്‍ഡിനേറ്റര്‍), 9447223212 (പ്രശാന്ത് വേലിക്കകം, ജില്ലാ കോ-ഓര്‍ഡിനേറ്റര്‍) എന്നീ നമ്പറുകളില്‍ ബന്ധപ്പെടാവുന്നതാണ്. എറണാകുളം കെഎസ്ആര്‍ടിസി സ്റ്റാന്‍ഡില്‍ നേരിട്ട് എത്തിയും സീറ്റ് ബുക്ക് ചെയ്യാം.

നഗരത്തിലെ ഫ്ലാറ്റില്‍ വന്‍ ലഹരിവേട്ട; യുവതിയടക്കം നാലുപേർ പിടിയില്‍

കൊച്ചി: എറണാകുളം എളംകുളം മെട്രോ സ്റ്റേഷനു സമീപത്തെ ഫ്ലാറ്റില്‍ വൻ ലഹരിവേട്ട. യുവതിയടക്കം നാലുപേര്‍ അറസ്റ്റിലായി‍. മലപ്പുറം മൂര്‍ക്കനാട് വലിയപാലത്തിങ്കല്‍ മുഹമ്മദ് ഷാമില്‍ (28), കോഴിക്കോട് ചേലന്നൂര്‍ നരിക്കുനി ഇരുവള്ളൂര്‍ ചിറ്റാടിപുറയില്‍ അബു ഷാമില്‍ (28), മലപ്പുറം വലിയങ്ങാടി ചങ്ങറംപിള്ളി ഫല്‍ജാസ് മുഹമ്മദ് അഫ്‌നാന്‍ (26), കോഴിക്കോടി മുണ്ടക്കല്‍ ചേലന്നൂര്‍ പ്രശാന്തിയില്‍ എസ്.കെ. ദിയ (24) എന്നിവരെയാണ് പിടികൂടിയത്. 115 ഗ്രാം എംഡിഎംഎ, 35 ഗ്രാം എക്‌സ്റ്റസി ടാബ്‌ലറ്റുകള്‍, രണ്ടുഗ്രാം കഞ്ചാവ്, 50,000 രൂപ എന്നിവ ഇവരില്‍ നിന്ന് കണ്ടെടുത്തു. കൊച്ചി നഗരത്തില്‍ സംശയമുള്ളവരുടെ ഫ്ലാറ്റുകള്‍ കേന്ദ്രീകരിച്ചു നടക്കുന്ന രഹസ്യ പരിശോധനയുടെ ഭാഗമായാണ് എളംകുളത്തുള്ള ഇവരുടെ ഫ്‌ളാറ്റും പരിശോധിച്ചത്. മുമ്പ് ലഹരിക്കേസുകളില്‍ പ്രതിയായിട്ടുള്ള ആള്‍ ഫ്ലാറ്റില്‍ നിന്നും ഇറങ്ങിവരുന്നത് ഡാന്‍സാഫ് സംഘത്തിന്‍റെ ശ്രദ്ധയില്‍പ്പെട്ടു. ഇയാളെ ചോദ്യം ചെയ്‌തെങ്കിലും ലഹരി കണ്ടെത്താനായില്ല. തുടര്‍ന്ന് ഫ്‌ളാറ്റിനുള്ളിലേക്ക് കടന്ന പോലീസ് സംഘത്തെ അവിടെയുണ്ടായിരുന്ന യുവതിയും ആണ്‍സുഹൃത്തുക്കളും ചേര്‍ന്ന് തടഞ്ഞു. ഇവരുടെ കൈവശമുണ്ടായിരുന്ന ലഹരിവസ്തുക്കള്‍ ശുചിമുറിയില്‍ എറിഞ്ഞ് നശിപ്പിക്കാന്‍ ശ്രമിച്ചെങ്കിലും പോലീസ് അവ വീണ്ടെടുത്തു. ഇവിടെ ഫ്‌ളാറ്റ് വാടകയ്ക്ക് എടുത്തതിനു പിന്നാലെ മറ്റുള്ളവരും വന്നുചേരുകയായിരുന്നു. സംഭവത്തില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടോയെന്ന് പോലീസ് അന്വേഷിച്ചുവരുന്നു.

അനാശാസ്യകേന്ദ്രത്തില്‍ റെയ്ഡ്; നാലു പേര്‍ അറസ്റ്റില്‍

കൊച്ചി: എറണാകുളം സൗത്തില്‍ പ്രവര്‍ത്തിച്ചുവന്നിരുന്ന അനാശാസ്യ കേന്ദ്രത്തില്‍ പോലീസ് നടത്തിയ റെയ്ഡില്‍ നാലു പേര്‍ അറസ്റ്റിലായി. നടത്തിപ്പുകാരന്‍ പാലക്കാട് മണ്ണാര്‍ക്കാട് കാരക്കുറിശി അക്ബര്‍ അലി (28), ഇയാളുടെ സുഹൃത്തുക്കളായ മണ്ണാര്‍ക്കാട് കാരക്കുറിശി അമ്പഴക്കോടന്‍ വീട്ടില്‍ മന്‍സൂര്‍ അലി (30), മണ്ണാര്‍ക്കാട് കാരക്കുറിശി പുത്തന്‍പുരയ്ക്കല്‍ വീട്ടില്‍ പി. പി ഷെഫീഖ് (26), ഇടപാടുകാരനായ ചങ്ങനാശേരി വാഴപ്പിള്ളി തുരുത്തി വിഷ്ണു ഭവനില്‍ പി.വി. വിഷ്ണു (27) എന്നിവരെയാണ് കടവന്ത്ര പോലീസ് അറസ്റ്റ് ചെയ്തത്. ഉത്തരേന്ത്യക്കാരായ ആറു സ്ത്രീകള്‍ ഉള്‍പ്പെടെ 10 പേരാണ് തിങ്കളാഴ്ച രാത്രി എളമക്കര പോലീസും കടവന്ത്ര പോലീസും സംയുക്തമായി നടത്തിയ റെയ്ഡില്‍ പിടിയിലായത്. കസ്റ്റഡിയിലെടുത്ത സ്ത്രീകളെ വനിതാ പോലീസ് സ്റ്റേഷനിലേക്ക് മാറ്റി. ഇടപ്പള്ളിയില്‍ ഹോട്ടലിനു സമീപത്തായി അനാശാസ്യകേന്ദ്രം പ്രവര്‍ത്തിക്കുന്നുണ്ടെന്ന് എളമക്കര പോലീസിന് കഴിഞ്ഞ ദിവസം വിവരം ലഭിച്ചിരുന്നു . പോലീസ് പരിശോധന നടത്തിയെങ്കിലും സ്ത്രീകളാരും ഇവിടെ ഉണ്ടായിരുന്നില്ല. പരിശോധനയെ തുടര്‍ന്ന് അക്ബര്‍ അലിയെ എളമക്കര പോലീസ് തിങ്കളാഴ്ച ഉച്ചയോടെ കസ്റ്റഡിയില്‍ എടുത്തിരുന്നു. ഇയാളെ വിശദമായി ചോദ്യം ചെയ്തപ്പോഴാണ് സൗത്ത് റെയില്‍വേ സ്റ്റേഷന് സമീപം കര്‍ഷ റോഡില്‍ മറ്റൊരു സ്ഥാപനം കൂടി പ്രവര്‍ത്തിക്കുന്നുണ്ടെന്ന വിവരം പോലീസിനു ലഭിച്ചത്. തുടര്‍ന്ന് വൈകുന്നേരത്തോടെ പോലീസ് ഇവിടെ റെയ്ഡ് നടത്തുകയായിരുന്നു. പോലീസ് എത്തുമ്പോള്‍ മുറിയില്‍ ഒരു ഇടപാടുകാരനും യുവതിയും ഉണ്ടായിരുന്നു. മറ്റുള്ള അഞ്ചു യുവതികള്‍ ഇടപാടുകാരെ കാത്തിരിക്കുകയായിരുന്നു. ലൊക്കാന്‍റോ സൈറ്റില്‍ മൊബൈല്‍ ഫോണ്‍ നമ്പറുകള്‍ നല്‍കിയായിരുന്നു ഇവര്‍ ഇടപാട് നടത്തിയിരുന്നത്. സ്ഥാപനത്തിനുള്ളില്‍ നടത്തിയിരുന്ന ഇടപാടുകള്‍ക്ക് ഒറ്റത്തവണ 5,000 രൂപ വരെ ഇടാക്കിയിരുന്നു. ഇടപാടുകാർ ആവശ്യപ്പെടുന്ന ഇടങ്ങളിലേക്ക് യുവതികളെ എത്തിക്കുന്നതിന് 9,000 രൂപയ്ക്ക് മുകളിലായിരുന്നു പണം ഈടാക്കിയിരുന്നത്. ഇത്തരത്തില്‍ അക്ബര്‍ അലി ലക്ഷങ്ങള്‍ സമ്പാദിച്ചതായാണ് പോലീസ് പറയുന്നത്. പാലക്കാട് സ്വദേശിനിയുടെ ഉടമസ്ഥതയിലുള്ളതാണ് ഈ വീട്. വീടിനു സമീപത്തായി 24 മണിക്കൂറും പ്രവര്‍ത്തിക്കുന്ന ചായക്കടയുണ്ട്. ഇവിടെ നിരവധി ആളുകള്‍ എത്തുമായിരുന്നു. യുവതികളെ വീഴ്ത്തിയത് പ്രണയം നടിച്ച് അക്ബര്‍ അലി പെണ്‍കുട്ടികളെ വീഴ്ത്തിയിരുന്നത് പ്രണയം നടിച്ചായിരുന്നുവെന്ന് പോലീസ് പറയുന്നു. ആഡംബര കാറിലായിരുന്നു ഇയാളുടെ സഞ്ചാരം. ഇത്തരത്തില്‍ സൗഹൃദത്തിലാകുന്ന യുവതികള്‍ക്ക് ലഹരി നല്‍കി അനാശാസ്യ കേന്ദ്രത്തില്‍ എത്തിച്ചിരുന്നതായും സൂചനയുണ്ട്. ഇയാളുടെ ഫോണില്‍ നിന്ന് നിരവധി പെണ്‍കുട്ടികളുടെ ഫോട്ടോകൾ പോലീസിനു ലഭിച്ചു. ഇതില്‍ ഐടി പ്രഫഷണലുകളും ചില കോളജ് വിദ്യാര്‍ഥിനികളും ഉള്‍പ്പെട്ടിട്ടുണ്ടെന്നാണ് വിവരം. അക്ബര്‍ അലി മുമ്പ് കാക്കനാടാണ് താമസിച്ചിരുന്നത്.

വൈദ്യുത പോസ്റ്റിൽ മലമ്പാമ്പ് ഷോക്കേറ്റ് ചത്തനിലയിൽ

തൃപ്പൂണിത്തുറ: വൈദ്യുത പോസ്റ്റിൽ മലമ്പാന്പിനെ ഷോക്കേറ്റ് ചത്ത നിലയിൽ കണ്ടെത്തി. നഗരസഭ 27-ാം ഡിവിഷൻ മാവിൻചുവട് ലെയിനിലെ വൈദ്യുതി പോസ്റ്റിലാണ് മലമ്പാമ്പിനെ ഷോക്കേറ്റ് ചത്ത നിലയിൽ കണ്ടത്. ഇന്നലെ രാവിലെ 9.30ഓടെ ഈരവേലിൽ സേവ്യറിന്‍റെ ഭാര്യ ലിസമ്മയാണ് വീടിന് മുന്നിലെ വൈദ്യുതി പോസ്റ്റിൽ മലമ്പാമ്പ് കുടുങ്ങിക്കിടക്കുന്നത് കണ്ടത്. തുടർന്ന് വാർഡ് കൗൺസിലർ കെഎസ്ഇബിയിൽ അറിയിക്കുകയും കെഎസ്ഇബി ഉദ്യോഗസ്ഥർ വനംവകുപ്പിന് വിവരം കൈമാറുകയുമായിരുന്നു. എരുമേലി വണ്ടൻപതാലിൽ നിന്നുള്ള ഫോറസ്റ്റ് റാപ്പിഡ് റെസ്പോൺസ് ടീം (ആർആർടി) ഉച്ചകഴിഞ്ഞ് 3.30ഓടെ എത്തി ചത്ത പാമ്പിനെ നീക്കം ചെയ്തു.

യാത്രാ സര്‍വീസിനേക്കാള്‍ ലാഭം ടൂറിസം

കൊച്ചി: കെഎസ്ആര്‍ടിസിക്ക് യാത്രാ സര്‍വീസുകളേക്കാള്‍ ലാഭം ടൂറിസം സര്‍വീസുകള്‍. തിരുവനന്തപുരത്താണ് ആദ്യ ടൂറിസം ഡബിള്‍ ഡക്കര്‍ ബസ് സര്‍വീസ് ആരംഭിച്ചത്. കിലോമീറ്ററിന് 130 രൂപ ഇതില്‍ നിന്ന് ലഭിക്കുന്നുണ്ടെന്നാണ് കെഎസ്ആര്‍ടിസി തന്നെ പുറത്തുവിട്ട കണക്കിലുള്ളത്. യാത്ര സര്‍വീസിന് കിലോമീറ്ററില്‍ 50 രൂപ മാത്രം വരുമാനം ലഭിക്കുന്നിടത്താണിത്. ഒരു കിലോമീറ്റര്‍ യാത്ര സര്‍വീസ് ഓപ്പറേറ്റ് ചെയ്യാന്‍ 60 രൂപ ചിലവ് വരും. 10 രൂപ നഷ്ടത്തിലാണ് കെഎസ്ആര്‍ടിസി യാത്രാ സര്‍വീസ് നടത്തിവരുന്നത്. തിരുവനന്തപുരത്തിന് പിന്നാലെ മൂന്നാറില്‍ ആരംഭിച്ച ഓപ്പണ്‍ ഡബിള്‍ ഡക്കര്‍ ബസും വന്‍ ഹിറ്റാണ്. 300 രൂപയാണ് മൂന്നാര്‍ ടൂറിസം ബസില്‍ നിന്ന് കിലോമീറ്ററില്‍ ലഭിക്കുന്ന വരുമാനം. കെഎസ്ആര്‍ടിസിയുടെ ടൂറിസം സര്‍വീസുകളില്‍ നിന്നായി നിലവില്‍ നാല് കോടിയോളം രൂപ വരുമാനമുണ്ടെന്ന് കെഎസ്ആര്‍ടിസി ബജറ്റ് ടൂറിസം ചീഫ് ട്രാഫിക് മാനേജര്‍ ആര്‍. ഉദയകുമാര്‍ പറഞ്ഞു.

ദുരന്തനിവാരണം: സംസ്ഥാനതല സന്നദ്ധ സേനയ്ക്ക് പരിശീലനം

കൊച്ചി: കേരളത്തിൽ ദുരന്തനിവാരണ പ്രവർത്തനങ്ങൾക്കുള്ള സന്നദ്ധത ശക്തിപ്പെടുത്തുന്നതിനു "സെർച്ച് ആൻഡ് റെസ്‌ക്യൂ (എസ്എആർ) മെഡിസിൻ' എന്ന പ്രത്യേക മേഖലയിൽ സംസ്ഥാനതല സന്നദ്ധ സേനയ്ക്ക് പരിശീലനം നൽകും. ഇതിനു മുന്നോടിയായി ദുരന്തനിവാരണ സന്നദ്ധപ്രവർത്തകർക്കായി ആഗോള വിദഗ്ധരുടെ നേതൃത്വത്തിലുള്ള ആദ്യ ശില്പശാല കൊച്ചിയിൽ നടന്നു. 14 ജില്ലകളിൽനിന്ന് തെരഞ്ഞെടുക്കപ്പെട്ട 50ഓളം പേർ പങ്കെടുത്തു. സംസ്ഥാന ദുരന്ത നിവാരണ അഥോറിറ്റിയുമായി (കെഎസ്ഡിഎംഎ) സഹകരിച്ചു എഡ്യൂകെയർ ഇൻസ്റ്റിറ്റ്യൂട്ട് ഓഫ് ഡെന്‍റൽ സയൻസസ്, യുകെ ആസ്ഥാനമായുള്ള പ്രോമിത്യൂസ് മെഡിക്കൽ ഇന്‍റർനാഷണൽ, യുഎഇയിൽ നിന്നുള്ള റെസ്‌പോൺസ് പ്ലസ് മെഡിക്കൽ സർവീസസ് എന്നിവ സംയുക്തമായാണു ശില്പശാല സംഘടിപ്പിച്ചത്. കളക്ടർ എൻ.എസ്.കെ. ഉമേഷ് ഉദ്ഘാടനം ചെയ്തു. കെഎസ്ഡിഎംഎയുമായി സഹകരിച്ച് 14 ജില്ലകളിലും സമാനമായ ശില്പശാലകൾ സംഘടിപ്പിക്കുമെന്ന് എഡ്യൂകെയർ ഇൻസ്റ്റിറ്റ്യൂട്ട് ഓഫ് ഡെന്‍റൽ സയൻസസ് എംഡി നാസർ കിളിയമണ്ണിൽ പറഞ്ഞു. എസ്എആർ മെഡിസിൻ രംഗത്തെ പ്രമുഖനായ പ്രഫ. റിച്ചാർഡ് ലിയോൺ, ഡോ. റോഹിൽ രാഘവൻ എന്നിവർ സെഷനുകൾ നയിച്ചു.

കൈയിൽ വിലങ്ങുമായി രക്ഷപ്പെട്ട പ്രതിക്കായി അന്വേഷണം ഊര്‍ജിതം

കളമശേരി: കഞ്ചാവ് കേസിൽ കസ്റ്റഡിയിലെടുത്ത പ്രതിയെ കളമശേരി സ്റ്റേഷനിൽനിന്ന് ആലുവ ജില്ലാ ആശുപത്രിയിലേക്ക് വൈദ്യപരിശോധനയ്ക്കായി എത്തിക്കുന്നതിനിടയിൽ പോലീസിന്‍റെ കണ്ണു വെട്ടിച്ച് ഓടി രക്ഷപ്പെട്ടു. ഒഡീഷ സ്വദേശിയായ ബാബു റാം എന്ന് വിളിക്കുന്ന പത്മൻ സമൽ (42) ആണ് കൈയിലെ വിലങ്ങുമായി രക്ഷപ്പെട്ടത്. കഞ്ചാവുമായി പിടിയിലായ രണ്ട് പേരെ ചോദ്യം ചെയ്തതിൽ നിന്ന് കിട്ടിയ വിവര പ്രകാരമാണ് പത്മൻ സമലിനെ തിങ്കളാഴ്ച രാവിലെ കസ്റ്റഡിയിലെടുത്തത്. പോലീസ് ജീപ്പിൽ ആശുപത്രിയിലേക്ക് കൊണ്ടു പോകവെ, സ്റ്റേഷനിൽനിന്ന് ആവശ്യപ്പെട്ട പ്രകാരം ജീപ്പ് തിരികെ വിട്ട പോലീസ്, പ്രതിയുമായി ഓട്ടോറിക്ഷയിലാണ് യാത്ര തുടർന്നത്. സ്ഥലത്തെത്തിയപ്പോൾ ഓട്ടോയിൽനിന്ന് ഇറങ്ങാൻ വിസമ്മതിച്ച പ്രതിയുടെ ഒരു കൈയിലെ വിലങ്ങ് അഴിക്കുകയും പുറത്തിറങ്ങിയ പ്രതി ഓടി രക്ഷപ്പെടുകയുമായിരുന്നു. പ്രതിക്കായി പോലീസ് അന്വേഷണം ഊർജിതമാക്കി. സംഭവത്തിൽ തൃക്കാക്കര എസിപിയോട് കമ്മീഷണർ വിശദീകരണം തേടി.

ചെല്ലാനത്ത് നത്തോലി മയം, കിലോയ്ക്ക് വെറും 15 രൂപ

ചെല്ലാനം: ചെല്ലാനം ഹാർബറിൽ നിന്ന് കടലിൽ പോയ വളളങ്ങൾ ടൺ കണക്കിന് നത്തോലിയുമായാണ് ചൊവ്വാഴ്ച ചെല്ലാനം ഫിഷിംഗ് ഹാർബറിലെത്തിയത്. കടലിൽ പോയ എല്ലാ വള്ളങ്ങൾക്കും നിറയെ നത്തോലി കിട്ടി. ആദ്യമെത്തിയ വള്ളങ്ങൾക്ക് കിലോയ്ക്ക് 20 രൂപ കിട്ടിയെങ്കിലും വളളങ്ങൾ കൂട്ടമായെത്തിയതോടെ വില 15 രൂപയായി താഴ്ന്നു. ഇക്കുറി മൺസൂൺ കാലത്ത് കൂടുതലായി കിട്ടിയത് നത്തോലിയാണ്. അടുത്തടുത്ത ദിവസങ്ങളിൽ നത്തോലി ധാരാളമായി കിട്ടിയതും വില കുറയാനിടയാക്കി. എന്നാൽ ചെറുകിട വില്പനക്കാർക്കിടയിൽ കാര്യമായി വില കുറഞ്ഞില്ല. മീൻ വൻതോതിൽ ലഭിച്ചിട്ടും ജനങ്ങൾക്ക ന്യായമായ വിലയ്ക്ക് അത് കിട്ടന്നില്ല. മത്സ്യം സൂക്ഷിച്ച് വയ്ക്കാൻ സൗകര്യമില്ലാത്തതിനാൽ കിട്ടുന്ന വിലയ്ക്ക് വില്ക്കുകയാണ് തൊഴിലാളികൾ. അതേ സമയം വള്ളക്കാർക്ക് ലഭിച്ച പൂവാലൻ ചെമ്മീനു ഹാർബറിൽ കിലോഗ്രാമിനു 150 മുതൽ 180 രൂപവരെ കിട്ടി.

രാജഗിരിയിൽ എഐ ഇന്നൊവേഷൻ ലാബ് ആരംഭിച്ചു

കൊച്ചി: കേരളത്തിലെ ഉന്നത സാങ്കേതിക വിദ്യാഭ്യാസ സ്ഥാപനങ്ങളില്‍ ആരംഭിക്കുന്ന ആദ്യത്തെ ആര്‍ട്ടിഫിഷല്‍ ഇന്‍റലിജൻസ് (എഐ) ഇന്നൊവേഷൻ ലാബ് കാക്കനാട് രാജഗിരി സ്‌കൂള്‍ ഓഫ് എൻജിനിയറിംഗ് ആൻഡ് ടെക്‌നോളജിയില്‍ സ്ഥാപിച്ചു. രാജഗിരി വിദ്യാഭ്യാസ സ്ഥാപനങ്ങളുടെ ഡയറക്ടര്‍ റവ. ഡോ. ജോസ് കുറിയേടത്ത്, മൈഫൈ സെമി കണ്ടക്ടേഴ്സ് സിഇഒ പ്രസാദ് ബാലകൃഷ്ണന്‍ എന്നിവര്‍ ചേര്‍ന്ന് ഉദ്ഘാടനം നിര്‍വഹിച്ചു. പ്രിന്‍സിപ്പല്‍ ഫാ. ജെയ്സണ്‍ മുളേരിക്കൽ, വിവിധ ഡിപ്പാർട്ട്മെന്‍റ് മേധാവികൾ, അധ്യാപകർ എന്നിവർ പ്രസംഗിച്ചു. മൈക്രോമാക്‌സ് ഇന്‍ഫോര്‍മാറ്റിക്‌സിന്‍റെയും ഫൈസൻ ഇലക്ട്രോണിക്‌സിന്‍റഎയും സംയുക്ത സംരംഭമായ മൈഫൈ സെമി കണ്ടക്ടേഴ്‌സാണു ലാബ് സജ്ജീകരിച്ചിരിക്കുന്നത്. ഇതു സംബന്ധിച്ച ധാരണാ പത്രം ഇരുസ്ഥാപനങ്ങളുടെയും മേധാവികൾ ഒപ്പു വച്ചു. മൈഫൈയുടെ കേരളത്തിലെ ടെക്നോളജി പാർട്ണറായ മിന്‍റാഷ് ടെക്‌നോളജീസാണ് രാജഗിരിയിൽ എഐ ലാബ് ഒരുക്കിയത്.

നാട്ടുകാർ പ്രതിഷേധിച്ചു ; മലയാറ്റൂരിലെ അനധികൃത പന്നി ഫാം പൂട്ടിച്ചു

കാലടി : മലയാറ്റൂർ ഇല്ലിത്തോട് ഒന്നാം ബ്ലോക്കിൽ നാലു വർഷമായി അനധികൃതമായി പ്രവർത്തിച്ചു വന്ന പന്നി ഫാം നാട്ടുകാർ ഇടപെട്ട് പൂട്ടിച്ചു. നാട്ടുകാരുടെ പരാതിയെത്തുടർന്ന് തിങ്കളാഴ്ച എഐവൈഎഫ് പ്രവർത്തകർ സംഭവ സ്ഥലത്തെത്തിയിരുന്നു. സംഘടനയുടെ മേഖലാ സെക്രട്ടറി അനിൽ ബാബു കാലടി സിഐയെ പന്നിഫാമിനെക്കുറിച്ചുള്ള വിവരങ്ങൾ അറിയിച്ചതിനെത്തുടർന്ന് സിഐ സ്ഥലം സന്ദർശിക്കുകയും ഒരു ദിവസത്തിനുള്ളിൽ മുഴുവൻ മാലിന്യങ്ങൾ നീക്കം ചെയ്യാൻ ആവശ്യപ്പെടുകയും ചെയ്തിരുന്നു. ലൈസൻസ്, സാനിറ്ററി സെർട്ടിഫിക്കറ്റ്, ഹെൽത്ത്‌ കാർഡ് എന്നിവ ഇല്ലാതെയാണ് ഫാം നടത്തിയിരുന്നത്. ചൊവ്വാഴ്ച പഞ്ചായത്ത്‌ പ്രസിഡന്‍റും ഹെൽത്ത്‌ ഇൻസ്‌പെക്ടറും വാർഡ് മെമ്പറും അടക്കം സ്ഥലം സന്ദർശിച്ചു. തുടർന്നാണ് അടച്ചുപൂട്ടാനും ഇവിടെ കുന്നുകൂടിക്കിടക്കുന്ന മാലിന്യങ്ങൾ നീക്കം ചെയ്യാനും നോട്ടീസ് നൽകിയത്. ഇന്നലെ ഇവിടെ നിന്നും പന്നികളെ മാറ്റിത്തുടങ്ങി. മുഴുവൻ മാലിന്യങ്ങളും നീക്കം ചെയ്യാൻ ഫാം ഉടമ സാവകാശം ചോദിച്ചതിനെ തുടർന്ന് ജൂലൈ 20 ന് മുൻപ് മുഴുവൻ മാലിന്യങ്ങളും നീക്കം ചെയ്യണമെന്ന് പഞ്ചായത്ത്‌ പ്രസിഡന്‍റ് അറിയിച്ചിട്ടുണ്ട്. തോട്ടിലൂടെ ഒഴുകി എത്തുന്ന ഫാം മാലിന്യങ്ങൾ നാട്ടുകാർക്ക്‌ പല ശരീരിക പ്രശ്നങ്ങൾ സൃഷ്ടിച്ചുകൊണ്ടിരിക്കുന്നതായി നാട്ടുകാർ ആരോപിച്ചു. പ്ലാസ്റ്റിക് മാലിന്യങ്ങളുടെ കൂമ്പരമാണിവിടം, നൂറിലധികം പന്നികളെയും പൊത്തുകളെയും വൃത്തി ഹീനമായ അന്തരീക്ഷത്തിൽ വളർത്തുകയായിരുന്നുവെന്ന് നാട്ടുകാർ പരാതിപ്പെട്ടു. ഈ മാലിന്യങ്ങൾ നിക്ഷേപിച്ചിരുന്നത് തൊട്ട് ചേർന്ന് പ്രവർത്തനം നിലച്ച വെള്ളം കെട്ടി നിൽക്കുന്ന പാറമടയിലേക്കായിരുന്നു. ഇത്രയും വർഷക്കാലം അനധികൃതമായി പ്രവർത്തനം നടന്നു പോന്ന ഈ ഫാമിനെക്കുറിച്ച് വാർഡ് മെമ്പറോ മലയാറ്റൂർ-നീലീശ്വരം പഞ്ചായത്ത്‌ ഭരണ സമ്മിതിക്കോ അറിവില്ല എന്നത് പച്ചക്കള്ളമാണെന്നും പൊതുജനം എല്ലാം കാണുന്നുണ്ടെന്നും സിപിഐ ലോക്കൽ കമ്മിറ്റി അഭിപ്രായപ്പെട്ടു.

സാധാരണക്കാരന്‍റെ വളർച്ച സാമൂഹ്യ വികസനത്തിന്‍റെ അളവുകോൽ: മാർ പാംബ്ലാനി

കൊച്ചി: ധനാഢ്യരുടെ കിട്ടാക്കടങ്ങൾ ബാങ്കുകൾ എഴുതിത്തള്ളുമ്പോഴും സാധാരണക്കാരൻ തന്‍റെ വായ്പകൾ വിശ്വസ്തതയോടെ തിരിച്ചടയ്ക്കുന്നത് സമ്പത്തിനേക്കാളുപരി ആത്മാഭിമാനത്തിന് അവൻ വില കല്പിക്കുന്നതു കൊണ്ടാണെന്ന് എറണാകുളം - അങ്കമാലി അതിരൂപത മെത്രാപ്പോലീത്തൻ വികാരി ആർച്ച്ബിഷപ് മാർ ജോസഫ് പാംബ്ലാനി. അതിരൂപത സാമൂഹ്യപ്രവർത്തന വിഭാഗമായ സഹൃദയ, ഫെഡറൽ ബാങ്കുമായി സഹകരിച്ച് സ്ഥാപിച്ച ജോയിന്‍റ് ലയബിലിറ്റി ഗ്രൂപ്പുകൾ (ജെഎൽജി) 2000 എണ്ണം കടന്നതിന്‍റെ പ്രഖ്യാപന ചടങ്ങിൽ അധ്യക്ഷത വഹിക്കുകയായിരുന്നു അദ്ദേഹം. സമൂഹത്തിന്‍റെ വളർച്ചയുടെ അളവുകോൽ അതിലെ ഏറ്റവും സാധാരണക്കാരന്‍റെ വളർച്ചയാകണമെന്ന് അദ്ദേഹം കൂട്ടിച്ചേർത്തു. ‌ഉമാ തോമസ് എംഎൽഎ യോഗം ഉദ്‌ഘാടനം ചെയ്തു. ഫെഡറൽ ബാങ്ക് 2000 ജെഎൽജികളെ അംഗീകരിച്ചതിന്‍റെ പ്രഖ്യാപനം സോണൽ ഹെഡ് സി.എം. ശശിധരൻ നടത്തി. വായ്പ പദ്ധതിയുടെ ഉദ്‌ഘാടനം ഫെഡറൽ ബാങ്ക് റീജണൽ ഹെഡ് ജോസ്മോൻ പി. ഡേവിഡ് നിർവഹിച്ചു. സഹൃദയ ആരംഭിക്കുന്ന മനോമിത്രം കൗൺസിലിംഗ് സെന്‍ററിന്‍റെ ഉദ്‌ഘാടനം മാർ ജോസഫ് പാംബ്ലാനിയും ഓണത്തിന് ഓരോ വീട്ടിലും ഒരു മുറം പച്ചക്കറി പദ്ധതിയുടെ ഉദ്‌ഘാടനം എംഎൽഎയും നടത്തി. മികച്ച പ്രവർത്തനം നടത്തിയ ജെഎൽജി പ്രവർത്തകർക്കുള്ള അവാർഡുകൾ യോഗത്തിൽ വിതരണം ചെയ്തു. സഹൃദയ ഡയറക്ടർ ഫാ. ജോസ് കൊളുത്തുവെള്ളിൽ, അസിസ്റ്റന്‍റ് ഡയറക്ടർ ഫാ. സിബിൻ മനയംപിള്ളി, ജനറൽ മാനേജർ പാപ്പച്ചൻ തെക്കേക്കര, അസി. ജനറൽ മാനേജർ സുനിൽ സെബാസ്റ്റ്യൻ, ചീഫ് കൺസൽട്ടന്‍റ് തോമസ് കടവൻ , അനിമേറ്റർമാരുടെ പ്രതിനിധി ജെയ്‌നി സാം രാജ് , ജെഎൽജി ഡവലപ്മെന്‍റ് ഓഫീസർ സി.ജെ. പ്രവീൺ,സഹൃദയ ടെക്ക് മാനേജർ ജീസ് പി. പോൾ എന്നിവർ പ്രസംഗിച്ചു.

മാധ്യമ തൊഴില്‍ മേഖല കടന്നുപോകുന്നത് ഏറെ ബുദ്ധിമുട്ടിലൂടെ: മന്ത്രി റിയാസ്

കൊച്ചി: കേരളത്തിലേത് മികച്ച ആരോഗ്യ ചികിത്സാ സംവിധാനമാണെന്ന് മന്ത്രി പി.എ. മുഹമ്മദ് റിയാസ്. മാധ്യമ തൊഴില്‍ മേഖല ഏറെ ബുദ്ധിമുട്ടിലൂടെയാണ് കടന്നുപോകുന്നതെന്നും അദ്ദേഹം പറഞ്ഞു. എറണാകുളം പ്രസ്‌ക്ലബ് അംഗങ്ങള്‍ക്കായി നടപ്പാക്കുന്ന മെഡിക്കല്‍ പ്രിവിലേജ് പദ്ധതിയുടെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. മാധ്യമരംഗത്ത് മത്സരം ഏറുകയാണ്. അതിന്‍റെ ഭാഗമായി മാധ്യമപ്രവര്‍ത്തകര്‍ക്ക് ഏറെ റിസ്‌ക് എടുക്കേണ്ടി വരുന്നുണ്ട്. ഇത് മാധ്യമപ്രവര്‍ത്തകരുടെ ആരോഗ്യത്തെ ബാധിക്കുന്നുണ്ടെന്നും മന്ത്രി പറഞ്ഞു. എറണാകുളം പ്രസ്‌ക്ലബ് പ്രസിഡന്‍റ് ആര്‍.ഗോപകുമാര്‍ അധ്യക്ഷത വഹിച്ചു. ആസ്റ്റര്‍ മെഡ്‌സിറ്റി സിഇഒ ഡോ. ജയദേവ് നളന്ദ, അമൃത അഡീഷണല്‍ മെഡിക്കല്‍ സൂപ്രണ്ട് ഡോ. കെ.വി. ബീന, കിൻഡര്‍ ഹോസ്പിറ്റല്‍ സിഇഒ സതീഷ് കുമാര്‍, മെഡിക്കല്‍ ട്രസ്റ്റ് ഹോസ്പിറ്റല്‍ മീഡിയ ആന്‍ഡ് ബ്രാന്‍ഡിംഗ് മാനേജര്‍ ആര്‍. വിനോദ്, രാജഗിരി ഹോസ്പിറ്റല്‍ വൈസ് പ്രസിഡന്‍റ് ജോസ് പോള്‍, പ്രസ്‌ക്ലബ് സെക്രട്ടറി എം. ഷജില്‍ കുമാര്‍, നിര്‍വാഹക സമിതിയംഗം പി.ഒ. ജിഷ എന്നിവര്‍ പ്രസംഗിച്ചു.

എൽഎഫിൽ ലോക പ്ലാസ്റ്റിക് സർജറി ദിനാചരണം

അങ്കമാലി : ലോക പ്ലാസ്റ്റിക് സർജറി ദിനത്തോടനുബന്ധിച്ച് ലിറ്റിൽ ഫ്ലവർ ആശുപത്രിയിൽ നടക്കുന്ന ക്യാന്പിന്‍റെ ഉദ്ഘാടനം പിന്നണി ഗായിക അരുണ മേരി ജോർജ് നിർവഹിച്ചു. ദിവസേന ഉച്ചയ്ക്ക് രണ്ടു മുതൽ അഞ്ചു മണി വരെ നടക്കുന്ന ക്യാമ്പ് 19 വരെ തുടരും. ക്യാമ്പിനോടനുബന്ധിച്ച് സൗജന്യമായി ഡോക്ടറെ കാണാം, എക്സറേ, സ്കാനിംഗ്, സർജറി തുടങ്ങിയവയ്ക്ക് ഡിസ്കൗണ്ടും ഉണ്ടായിരിക്കുന്നതാണെന്ന് ആശുപത്രി ഡയറക്ടർ ഫാ. ജേക്കബ് പാലാക്കാപ്പിള്ളി അറിയിച്ചു. പ്ലാസ്റ്റിക് സർജറിയുടെ പ്രാധാന്യത്തെക്കുറിച്ചും ആവശകതയെക്കുറിച്ചും ഡോ. പി.പി. സന്തോഷ് കുമാർ ക്ലാസുകൾ നയിച്ചു. നഴ്സിംഗ് വിദ്യാർഥികളുടെ ഫ്ലാഷ് മോബും ഉണ്ടായിരുന്നു. ഡോ. അജോ സെബാസ്റ്റ്യൻ, ഫാ. വർഗീസ് പാലാട്ടി എന്നിവർ ആശംസകൾ നേർന്നു സംസാരിച്ചു.

സെക്യൂരിറ്റിയെ മർദിച്ച യൂത്ത് കോൺ. നേതാവ് പിടിയിൽ

ആലുവ: പാർക്ക് ചെയ്ത സ്കൂട്ടർ മാറ്റാൻ ആവശ്യപ്പെട്ട സൂപ്പർ മാർക്കറ്റിലെ സെക്യൂരിറ്റിയെ മർദിച്ച സംഭവത്തിൽ യൂത്ത് കോൺ. നേതാവ് പിടിയിൽ. യൂത്ത് കോൺഗ്രസ് യൂത്ത് കെയർ ജില്ലാ ഭാരവാഹി കുട്ടമശേരി സൂര്യാനഗറിൽ കുന്നത്ത് വീട്ടിൽ (കോളായിൽ) കെ.ബി. നിജാസ് (37) ആണ് പിടിയിലായത്. ആലുവ ആശാൻ ലൈനിൽ അന്നപ്പിള്ളി വീട്ടിൽ ബാലകൃഷ്ണ (73) നെയാണ് നിജാസ് മർദിച്ചത്. ചെമ്പകശേരി കവലയിലെ സൂപ്പർ മാർക്കറ്റിന് മുമ്പിൽ വാഹനം പാർക്ക് ചെയ്യുന്നത് സംബന്ധിച്ചാണ് തർക്കം ഉണ്ടായത്. മർദനത്തിന്‍റെ സിസി ടിവി ദൃശ്യവും പോലീസ് ശേഖരിച്ചിട്ടുണ്ട്.

മരടിൽ ചാറ്റ് ബോട്ട് സേവനം തുടങ്ങി

മരട്: നഗരസഭാ സേവനങ്ങൾ ഇനി വിരൽത്തുമ്പിൽ എന്ന ആശയം മുൻനിർത്തി മരട് നഗരസഭ നടപ്പിലാക്കിയ ചാറ്റ് ബോട്ട് സംവിധാനത്തിന് തുടക്കം കുറിച്ചു. നഗരസഭാങ്കണത്തിൽ നടന്ന ചടങ്ങ് കെ.ബാബു എംഎൽഎ ഉദ്ഘാടനം ചെയ്തു. നഗരസഭാ ചെയർപേഴ്സൺ ആന്‍റണി ആശാംപറമ്പിൽ അധ്യക്ഷത വഹിച്ചു. ഡെപ്യൂട്ടി ചെയർപേഴ്സൺ അഡ്വ. രശ്മി സനിൽ, സ്ഥിരം സമിതിയധ്യക്ഷന്മാരായ റിയാസ് കെ. ഹമ്മദ്, റിനി തോമസ്, ബേബി പോൾ, കൗൺസിലർമാരായ ദിഷ പ്രതാപൻ, പി.ഡി. രാജേഷ്, സിബി സേവ്യർ, മോളി ഡെന്നി തുടങ്ങിയവർ പ്രസംഗിച്ചു. ഉപഭോക്താക്കൾക്ക് മികച്ച രീതിയിലുള്ള സേവനം ഉറപ്പു വരുത്തുന്നതോടൊപ്പം മലയാളം, ഇംഗ്ലീഷ് എന്നീ ഭാഷകളുപയോഗിച്ച് രാജ്യത്തെവിടെയിരുന്നും മരട് നഗരസഭയുടെ സേവനത്തോടൊപ്പം മറ്റു നഗരസഭകളുടേയും സേവനം ജനങ്ങൾക്ക് ലഭിക്കും. 8138969747 എന്ന ചാറ്റ്‌ബോട്ടിന്‍റെ വാട്സാപ്പ് നമ്പറിലേയ്ക്ക് 'ഹായ്' അയച്ച് ഇഷ്ടമുള്ള ഭാഷ തെരഞ്ഞെടുത്ത് അനുബന്ധരേഖകൾ അപ്‌ലോഡ് ചെയ്ത് ആവശ്യമായ സേവനങ്ങൾ 24 മണിക്കൂറും വാട്സ്ആപ്പിലൂടെ തന്നെ ഗുണഭോക്താവിന് ലഭ്യമാകും.കെ-സ്മാർട്ട് പോലുള്ള സർക്കാർ സംവിധാനങ്ങളിലേയ്ക്കും പൊതുജനങ്ങൾക്ക് ലഭിക്കേണ്ട സേവനങ്ങൾ ഒരൊറ്റ ക്ലിക്കിൽ സാധ്യമാകും.

ഗോശ്രീ രണ്ടാം പാലത്തിൽ അപകടക്കുഴി: ജിഡയ്ക്ക് മൗനമെന്ന് ആക്ഷേപം

വൈപ്പിൻ :ഗോശ്രീ രണ്ടാം പാലത്തിൽ അപകടക്കുഴി. അറ്റകുറ്റപ്പണികൾ നടത്താതെ ജിഡ ഒഴിഞ്ഞുമാറുന്നതായി ഫോർട്ട് കൊച്ചി ജനകീയ കൂട്ടായ്മ ആരോപിച്ചു. സമാന്തര പാലം അറ്റകുറ്റപ്പണികൾക്ക് അടച്ചിട്ടിരിക്കുന്നതിനാൽ ഈ പാലത്തിലൂടെയാണ് ഇപ്പോൾ വാഹനങ്ങൾ ഇരു ഭാഗത്തേക്കും സഞ്ചരിക്കുന്നത്.ഇതുമൂലം രാവിലെയും വൈകുന്നേരവും വൻ ഗതാഗതക്കുരുക്കാണിവിടെ. രാത്രികാലത്ത് ഇവിടെ തെരുവുവിളക്കുമില്ല. കഴിഞ്ഞ ദിവസം ഇവിടെ കുഴിയിൽ ചാടിയ ബൈക്കിൽ നിന്ന് തെറിച്ചു വീണ യാത്രക്കാരൻ ഗുരുതരമായി പരിക്കേറ്റ് ചികിത്സയിലാണ്. ഈ സാചര്യത്തിൽ അടിയന്തിരമായി കുഴികൾ അടക്കാൻ ജിഡ തയാറാകണമെന്ന് ജനകീയ കൂട്ടായ്മ കൺവീനർ ജോണി വൈപ്പിൻ ആവശ്യപ്പെട്ടു.

നട്ടെല്ല് വളയുന്ന രോഗം; ശസ്ത്രക്രിയക്ക് സഹായം തേടി വിദ്യാർഥിനി

കാലടി: നട്ടെല്ല് വളയുന്ന രോഗബാധിതയായ ഒൻപതാം ക്ലാസുകാരി സുമനസുകളിൽനിന്ന് ചികിത്സാ സഹായം തേടുന്നു. കാലടി പഞ്ചായത്ത് യോർദ്ധനാപുരം നാലാം വാർഡിൽ ചേരാമ്പിള്ളി രാജൻ-സുജിത ദന്പദികളുടെ മകൾ നവനീത രാജാണ് സഹായം തേടുന്നത്. ശസത്രക്രിയയ്‌ക്ക് മാത്രമായി 3,60,000 രൂപ ചെലവാകും. നിർധന കുടുബത്തിന് ഇത്രയും വലിയ തുക കണ്ടെത്താൻ കഴിയാത്ത അവസ്ഥയാണ്. ശസ്ത്രക്രിയയ്‌ക്ക് ആവശ്യമായ തുക സ്വരൂപിക്കുന്നതിനായി റോജി എം. ജോൺ എംഎൽഎ രക്ഷാധികാരിയായും വാർഡംഗം ബിനോയ്‌ കൂരൻ ചെയർമാനായും പ്രദേശത്തെ പ്രധാന വ്യക്തികൾ അംഗങ്ങളായും ചികിത്സ സഹായനിധിക്ക് രൂപീകരിച്ച് കാനറാ ബാങ്ക് കാലടി ശാഖയിൽ അക്കൗണ്ട് തുടങ്ങിയിട്ടുണ്ട്. അക്കൗണ്ട് നന്പർ: 110189840414, എഎഫ്എസ്‌‌‌സി: CNRB0002921.

വിദ്യാജ്യോതി പുരസ്‌കാരദാനം

കൊച്ചി: കേരള ക്ഷേത്രസംരക്ഷണസമിതി ചേന്ദൻകുളങ്ങര ശാഖ ഏർപ്പെടുത്തിയ ഇടപ്പള്ളി ചേന്ദൻകുളങ്ങരയപ്പൻ വിദ്യാജ്യോതി പുരസ്‌കാരം 10,12 ക്ളാസുകളിൽ ഉന്നതവിജയം നേടിയ കൊച്ചിൻ കോർപറേഷൻ 35, 37 ഡിവിഷനുകളിൽ താമസിക്കുന്ന 25 കുട്ടികൾക്ക് വിതരണം ചെയ്തു. എപിജെ അബ്ദുൾ കലാം കേരള സാങ്കേതിക സർവകലാശാല വൈസ് ചാൻസലർ പ്രഫ.ഡോ.കെ.ശിവപ്രസാദ് മുഖ്യാതിഥിയായിരുന്നു. അമൃത മെഡിക്കൽ കോളജ് ഇന്‍റേണൽ മെഡിസിൻ വിഭാഗം മേധാവി ഡോ.എം.ജി.കെ.പിള്ള മുഖ്യപ്രഭാഷണം നടത്തി. ശാഖാ സമിതി പ്രസിഡന്‍റ് അധ്യക്ഷത വഹിച്ചു.

നെല്ലിയാന്പതി മലനിരകൾ ചവിട്ടിക്കയറി സൈക്കിൾ ടീം കൊച്ചി

ഫോർട്ടുകൊച്ചി: പാലക്കാട് നെല്ലിയാന്പതി മലനിരകളിലേക്കുള്ള സൈക്കിൾ ടീം കൊച്ചിയുടെ മൺസൂൺ റൈഡിന് എംഎൽഎയും വൈദികനും കണ്ണികളായത് ടീമിന് ആവേശമായി. കെ.ജെ. മാക്സി എംഎൽഎയും ഫാറ്റിമ ആശുപത്രി ഡയറക്ടർ ഫാ.സിജു ജോസഫ് പാലിയത്തറയും അടങ്ങുന്ന സൈക്കിൾ ടീം കഴിഞ്ഞ ശനിയാഴ്ചയാണ് കൊച്ചിയിൽനിന്നു പുറപ്പെട്ടത്. ആറ്പേരടങ്ങുന്ന ടീം രാവിലെ എട്ടോടെ മലനിരകൾ ചവിട്ടിക്കേറി ഉച്ചയ്ക്ക് മൂന്നോടെ നെല്ലിയാംപതിയിൽ എത്തിച്ചേർന്നു. കഴിഞ്ഞ വർഷങ്ങളിൽ ഊട്ടി, മൂന്നാർ, വാഗമൺ, കുട്ടിക്കാനം, അതിരപ്പിള്ളി എന്നീ മലനിരകൾ ചവിട്ടി കേറിയ സൈക്കിൾ ടീം അംഗങ്ങൾക്ക് സമുദ്രനിരപ്പിൽനിന്നും 1500 ഉം 5000 ഉം ഇടയിൽ അടി ഉയരമുള്ള നെല്ലിയാന്പതി മലനിര അനായാസം ചവിട്ടിക്കേറാനായി. ആരോഗ്യത്തിന് അനുദിന സൈക്കിൾ സവാരി എന്ന സന്ദേശത്തോടെയാണ് മൺസൂൺ റൈഡ് വർഷാവർഷം ഒരുക്കിയിരിക്കുന്നത്.

ഷിജു പൂപ്പന അനുസ്മരണവും പുരസ്‌കാര സമർപ്പണവും

ഫോർട്ടുകൊച്ചി: കെസിവൈഎം കൊച്ചി രൂപത നേതാവും സംസ്ഥാന കമ്മിറ്റി അംഗവുമായിരുന്ന ഷിജു പൂപ്പനയുടെ പത്താം ചരമ വാർഷികവും അനുസ്മരണസമ്മേളനവും ശനിയാഴ്ച വൈകുന്നേരം ആറിന് തോപ്പുംപടി കാത്തലിക് സെന്‍ററിൽ നടക്കും. മുൻകാല കെസിവൈഎം കൂട്ടായ്മയായ ഫോർമർ ലീഡേഴ്‌സ് അലൈൻസാണ് ചടങ്ങ് സംഘടിപ്പിക്കുന്നത്. ഷിജു പൂപ്പനയുടെ പേരിൽ ഫോർമർ ലീഡേഴ്‌സ് അലൈൻസ് നൽകുന്ന സാമൂഹ്യ സേവന പുരസ്‌കാരം സാധാരണ ജനങ്ങൾക്ക് നൽകി വരുന്ന സേവനങ്ങളെ അധികരിച്ചു കൊച്ചി തഹസീൽദാറും (റവന്യൂ റിക്കവറി, കണയന്നൂർ) ജോസഫ് ആന്‍റണി ഹെർട്ടിസിന് നൽകുവാൻ തീരുമാനിച്ചു. 19 ന് തോപ്പുംപടി കാത്തലിക് സെന്‍ററിൽ നടക്കുന്ന ചടങ്ങിൽ പുരസ്കാരം സമർപ്പിക്കുമെന്ന് രക്ഷാധികാരി നെൽസൺ കൊച്ചേരി, ജോളി പവേലിൽ, ജോർജ് വലിയതറ, ബിനിഷ് ചക്കാലക്കൽ എന്നിവർ അറിയിച്ചു

ഇഇസി മാർക്കറ്റ്-കീച്ചേരിപ്പടി റോഡിന്‍റെ ശോച്യാവസ്ഥ പരിഹരിക്കണം; പിഡബ്ല്യുഡി എൻജിനീയറെ ഉപരോധിച്ചു

മൂവാറ്റുപുഴ: ഇഇസി മാർക്കറ്റ് - കീച്ചേരിപ്പടി റോഡിന്‍റെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ട് കാവുങ്കര വികസന സമിതിയും നഗരസഭ കൗണ്‍സിലർമാരും പിഡബ്ല്യുഡി റോഡ്സ് വിഭാഗം എൻജിനീയറെ ഉപരോധിച്ചു. കോണ്‍ഗ്രസ് മൂവാറ്റുപുഴ ടൗണ്‍ മണ്ഡലം പ്രസിഡന്‍റ് അബ്ദുൽ സലാം, നഗരസഭ സ്ഥിരംസമിതി അധ്യക്ഷൻ പി.എം. അബ്ദുൽ സലാം, മാഹിൻ വെളിയത്തുകുടി, നഗരസഭാംഗങ്ങളായ കെ.കെ. സുബൈർ, അസം ബീഗം, നസീർ അലിയാർ, സാഹിൽ മക്കാർ എന്നിവർ പങ്കെടുത്തു. പ്രതിഷേധക്കാർ പിഡബ്ല്യുഡി റോഡ്സ് വിഭാഗം എൻജിനീയർക്ക് നിവേദനം നൽകി. രണ്ടു ദിവസത്തിനുള്ളിൽ റോഡിന്‍റെ ശോചനീയാവസ്ഥയ്ക്ക് അടിയന്തരമായ പരിഹരിക്കാമെന്ന് എക്സിക്യൂട്ടീവ് എൻജിനീയർ ഉറപ്പുനൽകിയതോടെ ഉപരോധം അവസാനിപ്പിക്കുകയായിരുന്നു. നടപടി ഉണ്ടായില്ലങ്കിൽ ശക്തമായ സമര നടപടികളുമായി മുന്നോട്ട് പോകുമെന്ന് സമര സമിതി അറിയിച്ചു.

ബസുമായി കൂട്ടിയിടിച്ച് ബൈക്ക് യാത്രികന് പരിക്ക്

വാഴക്കുളം: ബസും ബൈക്കും കൂട്ടിയിടിച്ചുണ്ടായ അപകടത്തിൽ ബൈക്കു യാത്രക്കാരന് പരിക്കേറ്റു. രണ്ടാർ വടക്കേക്കുടിയിൽ റോയി ജോർജിനാണ് തലയ്ക്കും കാലിനും പരിക്കേറ്റത്. ഇന്നലെ രാത്രി എട്ടോടെ വാഴക്കുളം ടൗണിന്‍റെ പടിഞ്ഞാറേ ഭാഗത്ത് നയന ബാറിനു സമീപത്താണ് അപകടമുണ്ടായത്. തൊടുപുഴയ്ക്കു പോകുകയായിരുന്ന സ്വകാര്യ ബസ് ആവോലി ദിശയിൽ സഞ്ചരിച്ച ബൈക്കിൽ ഇടിച്ചാണ് അപകടം. ബസിന്‍റെ അടിയിലേക്ക് ബൈക്ക് കയറിയ നിലയിലാണ്. പരിക്കേറ്റ റോയിയെ തൊടുപുഴയിലെ സ്വകാര്യ ആശുപത്രിയിൽ പ്രഥമ ശുശ്രൂഷയ്ക്കു ശേഷം ആലുവയിലെ സ്വകാര്യ ആശുപത്രിയിൽ പ്രവേശിപ്പിച്ചു. ആവോലിയിൽ കേബിൾ ടിവി സ്ഥാപനം നടത്തുകയാണ് റോയി.

ലയണ്‍സ് ക്ലബ് ഭാരവാഹികളെ തെരഞ്ഞെടുത്തു

ആയവന: ഏനാനല്ലൂർ ലയണ്‍സ് ക്ലബിൽ 2025- 26 വർഷത്തെ പുതിയ ഭാരവാഹികളെ തെരഞ്ഞെടുത്തു. സമ്മേളനത്തിൽ സോണ്‍ ചെയർമാൻ സന്തോഷ് മാലിക്കുന്നേൽ അധ്യക്ഷത വഹിച്ചു. ബിനോ ഐ. കോശി പുതിയ ഭാരവാഹികളെ തെരഞ്ഞെടുത്തു. റീജണൽ ചെയർപേഴ്സണ്‍ ബിനോയ് ഭാസ്കരൻ ഇൻസ്റ്റലേഷൻ പ്രോജക്ട് ഉദ്ഘാടനം നിർവഹിച്ചു. വിവിധ സേവനപ്രവർങ്ങളുടെ ഉദ്ഘാടനം പ്രസിഡന്‍റ് ലിബിൻ ബേബി നിർവഹിച്ചു. ഭാരവാഹികളായി ലിബിൻ ബേബി പോത്തനാമൂഴി (പ്രസിഡന്‍റ്), അനീഷ് കരുണാകരൻ പോക്കളത്ത് (സെക്രട്ടറി), പോൾ ജോസഫ് വാലന്പാറക്കൽ (ട്രഷറർ) എന്നിവർ ചുമതലയേറ്റു.

വി.ടി. ജോബിനെ ശ്രേഷ്ഠ ബാവ സന്ദർശിച്ചു

കൂത്താട്ടുകുളം: സാമൂഹ്യ - ജീവകാരുണ്യ പ്രവർത്തകനായ വി.ടി. ജോബിനെ യാക്കോബായ സഭായുടെ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവ ഭവനത്തിൽ എത്തി സന്ദർശിച്ചു. അതീവ ഗുരുതര വിഭാഗത്തിൽപ്പെട്ട മൾട്ടിപ്പിൾ മൈലോമ എന്ന അത്യപൂർവ കാൻസർ ബാധിച്ച് നട്ടെല്ലിന് ശാസ്ത്രക്രിയക്കും തുടർന്നു മജ്ജ മാറ്റിവയ്ക്കൽ ശാസ്ത്രക്രിയക്കും വിധേയനായ വി.ടി. ജോബ് കഴിഞ്ഞ രണ്ടര വർഷമായി ആഴ്ച തോറും കീമോതെറാപ്പി ചെയ്ത് വരികയാണ്. ഫാ. ടോം ഉഴുന്നാലിന്‍റെ മോചന ശ്രമങ്ങൾ രാജ്യാന്തര തലത്തിൽ ഏകോപിച്ചതും ഏതനിലെ തീവ്രവാദി ആക്രമണത്തിൽനിന്നും രക്ഷപ്പെട്ട മദർ തെരേസ മിഷണറീസ് ഓഫ് ചാരിറ്റിയുടെ ഏക കന്യാസ്ത്രീ സിസ്റ്റർ സാലിയെ രക്ഷപ്പെടുത്തി നാട്ടിൽ എത്തിച്ചതും വി.ടി. ജോബായിരുന്നു. യുദ്ധ മേഖലകളിലും വിസ തട്ടിപ്പിലും കുടുങ്ങിയ മലയാളി നഴ്സുമാരുടെ മോചന ശ്രമത്തിന്‍റെ ഭാഗമായ സർക്കാർ ഉദ്യമത്തിൽ നിരവധി തവണ പങ്കാളിയാകുകയും ചെയ്തിട്ടുണ്ട്. പ്രളയ-കോവിഡ് കാലത്തെ പ്ലാസ്മ ഡോണേഴ്സിനെ ഏകോപിപ്പിച്ചതടക്കം നടത്തിയ പ്രവർത്തനങ്ങൾക്ക് നിരവധി പുരസ്കാരങ്ങളും ലഭിച്ചിട്ടുണ്ട്. ജോബിന്‍റെ ഭവനത്തിലെത്തിയ ശ്രേഷ്ഠ കാതോലിക്കാ ബാവ രോഗമുക്തിക്ക് വേണ്ടി പ്രത്യേക പ്രാർത്ഥനയും നടത്തിയാണ് മടങ്ങിയത്. ബാവയോടൊപ്പം യാക്കോബായ സഭാ മാനേജിംഗ് കമ്മിറ്റിയംഗം ബോബൻ വർഗീസും ഉണ്ടായിരുന്നു.

പോലീസിൽ പരാതി നൽകിയതിൽ വിരോധം; വീട് ആക്രമിച്ച പ്രതി പിടിയിൽ

മൂവാറ്റുപുഴ: പോലീസിൽ പരാതി നൽകിയ വിരോധത്തിൽ വീട്ടിൽ അതിക്രമിച്ച് കയറി ജനൽ ചില്ലുകൾ തകർക്കുകയും മോട്ടോർ സൈക്കിൾ കത്തിക്കുകയും വീട്ടുകാരെ വധിക്കുമെന്ന് ഭീഷണിപ്പെടുത്തുകയും ചെയ്ത കേസിലെ പ്രതി പിടിയിൽ. വെള്ളൂർക്കുന്നം കടാതി ഒറമടത്തിൽ മോൻസി വർഗീസ് (44)നെയാണ് മുവാറ്റുപുഴ പോലീസ് ഇൻസ്പെക്ടർ ബേസിൽ തോമസിന്‍റെ നേതൃത്വത്തിൽ അറസ്റ്റ് ചെയ്തത്. കടാതി സ്വദേശിയുടെ വീടിനു നേരെയാണ് ആക്രമണം നടത്തിയത്. ഷെഡിൽ ഇരുന്ന ഇരുചക്ര വാഹനം കനാലിൽ തള്ളിയിട്ട് നാശനഷ്ടം വരുത്തിയതിന് പോലീസിൽ പരാതി കൊടുത്തതിലുള്ള വിരോധമാണ് കാരണം. വീട്ടുകാരെ കൊല്ലുമെന്ന് പറഞ്ഞ് പരാതിക്കാരന്‍റെ അമ്മയെ ഭീഷണിപ്പെടുത്തുകയും വീടിന്‍റെ മുൻവശത്തെ ജനൽ ചില്ലുകൾ അടിച്ച് തകർത്തതായും പറയുന്നു. പ്രതിയെ മൂവാറ്റുപുഴ കോടതിയിൽ ഹാജരാക്കി.

കാർ മോഷ്ടിച്ച് പെണ്‍‌‌സുഹൃത്തുമായി കറങ്ങിയ യുവാവിനെ പിടികൂടി

മൂവാറ്റുപുഴ: കാർ മോഷ്ടിച്ച് നന്പർ മാറ്റി പെണ്‍‌‌സുഹൃത്തുമായി കറങ്ങിയ മുളവൂർ സ്വദേശിയായ യുവാവിനെ തിരുവനന്തപുരത്തുനിന്ന് പോലീസ് പിടികൂടി. മുളവൂർ പേണ്ടാണത്ത് അൽ സാബിത്തി (20) നെയാണ് മൂവാറ്റുപുഴ പോലീസ് ഇൻസ്പെക്ടർ ബേസിൽ തോമസിന്‍റെ നേതൃത്വത്തിൽ അറസ്റ്റ് ചെയ്തത്. കരുട്ടുകാവ് ഭാഗത്തെ വീട്ടിൽനിന്ന് കഴിഞ്ഞ നാലിന് പുലർച്ചെ വീടിന്‍റെ പോർച്ചിൽനിന്ന് സ്വിഫ്റ്റ് കാർ മോഷ്ടിക്കുകയായിരുന്നു. മോഷണം നടത്തിയ വാഹനം അന്നുതന്നെ തിരുവനന്തപുരത്ത് എത്തിച്ച് രൂപമാറ്റം വരുത്തി. തുടർന്ന് ഇൻസ്റ്റഗ്രാം വഴി പരിചയപ്പെട്ട പെണ്‍സുഹൃത്തും ഒന്നിച്ചായിരുന്നു യാത്ര. പ്രതി വാഹനത്തിന് വ്യാജ നന്പർ പ്ലേറ്റ് ഘടിപ്പിച്ച ശേഷമായിരുന്നു ഉപയോഗിച്ച് വന്നിരുന്നത്. ആർഭാട ജീവിതത്തിനായിട്ടാണ് മോഷണം നടത്തിയതെന്ന് പോലീസിനോട് പറഞ്ഞു. സമാന കുറ്റകൃത്യങ്ങളിൽ ഇയാൾ ഉൾപ്പെട്ടിട്ടുണ്ടോയെന്ന് പോലീസ് പരിശോധിച്ചു വരികയാണ്. ശാസ്ത്രീയ അന്വേഷണത്തിനൊടുവിലാണ് പ്രതിയിലേക്കെത്തിയത്. ഡിവൈഎസ്പി പി.എം ബൈജുവിന്‍റെ മേൽനോട്ടത്തിലുള്ള അന്വേഷണ സംഘത്തിൽ എസ്ഐമാരായ വിഷ്ണു രാജു, കെ.കെ. രാജേഷ്, പി.ബി. സത്യൻ, പി.സി. ജയകുമാർ, അസിസ്റ്റന്‍റ് സബ് ഇൻസ്പെക്ടർ ബിജു, സീനിയർ സിപിഓമാരായ ബിബിൽ മോഹൻ, എച്ച്. ഹാരിസ്, സിപിഒ ശ്രീജു ചന്ദ്രൻ എന്നിവരുമുണ്ടായിരുന്നു.

സോളാർ പവറിൽ സെന്‍റ് ഫിലോമിനാസ് സ്കൂൾ

ഇലഞ്ഞി: സെന്‍റ് ഫിലോമിനാസ് പബ്ലിക് സ്കൂൾ ആന്‍ഡ് ജൂണിയർ കോളജ് മുഴുവൻ സോളാർ പവറിലേക്ക് മാറി. പുതിയതായി 50 കിലോവാട്ട് സോളാർ സിസ്റ്റംകൂടി സ്ഥാപിച്ചതോടെ സ്കൂളിന്‍റെ പ്രവർത്തനങ്ങൾ മുഴുവൻ സോളാർ വൈദ്യുതിയിൽ നടക്കും. പ്ലാന്‍റിന്‍റെ ഔദ്യോഗിക ഉദ്ഘാടനം കൂത്താട്ടുകുളം അസിസ്റ്റന്‍റ് എൻജിനീയർ പി.എസ്. ബാബുരാജ് നിർവഹിച്ചു. എല്ലാ ക്ലാസുകളിലും പാനൽ ബോർഡുകൾ സ്ഥാപിച്ചതോടെ സന്പൂർണ ഡിജിറ്റലൈസേഷനും പൂർത്തിയായതായി മാനേജിംഗ് ട്രസ്റ്റി ബേബി വർക്കി അറിയിച്ചു. ഐ ഗേറ്റ് റിന്യുവബിൾ എനർജി സൊല്യൂഷൻസാണ് പ്ലാന്‍റിന്‍റെ പ്രവർത്തനങ്ങൾ പൂർത്തീകരിച്ചത്.

സിപിഎം കൗൺസിലർ പോക്സോ കേസിൽ അറസ്റ്റിലായ സംഭവം : അടിയന്തര കൗണ്‍സിൽ വിളിക്കണം- യുഡിഎഫ്

കോതമംഗലം: നഗരസഭയിൽ അടിയന്തര കൗണ്‍സിൽ വിളിക്കണമെന്ന് യുഡിഎഫ് കൗണ്‍സിലർമാർ ആവശ്യപ്പെട്ടു. കോതമംഗലം നഗരസഭ സ്ഥിരംസമിതി അധ്യക്ഷനായിരുന്ന കെ.വി. തോമസ് പോക്സോ കേസിൽ അറസ്റ്റിലായതിൽ നഗരസഭ ഓഫീസും ഉൾപ്പെട്ടതിൽ യുഡിഎഫ് കൗണ്‍സിലർമാർ ശക്തമായ പ്രതിഷേധം രേഖപ്പെടുത്തി. നഗരസഭ ഓഫീസ് ഇത്തരം ആഭാസത്തിന് വേദിയാക്കിയത് ചർച്ച ചെയ്യണമെന്ന് ആവശ്യപ്പെട്ട് അടിയന്തര കൗണ്‍സിൽ വിളിക്കുന്നതിന് യുഡിഎഫ് കൗണ്‍സിലർമാർ നോട്ടീസ് നൽകിയതായി അറിയിച്ചു. പാർലമെന്‍ററി പാർട്ടി ലീഡർ എ.ജി. ജോർജ്, ഷമീർ പനക്കൽ, സിജു ഏബ്രഹാം, ഭാനുമതി രാജു, ഷിബു കുര്യാക്കോസ്, ലിസി ജോസ്, സിന്ധു ജിജോ, ബബിത മത്തായി, ഏലിയാമ്മ ജോർജ് എന്നിവർ പത്രസമ്മേളനത്തിൽ പങ്കെടുത്തു. വായമൂടിക്കെട്ടി പ്രതിഷേധ മാർച്ച് നടത്തി കോതമംഗലം: പോക്സോ കേസിൽ പിടിയിലായ സിപിഎം കൗണ്‍സിലർ കെ.വി. തോമസിനെ രക്ഷിക്കാൻ കേസ് ഒത്തു തീർപ്പാക്കാൻ ശ്രമിച്ച ആന്‍റണി ജോണ്‍ എംഎൽഎയെ കേസിൽ പ്രതി ചേർക്കണമെന്ന് ആവശ്യപ്പെട്ട് യുഡിവൈഎഫ് നിയോജക മണ്ഡലം കമ്മിറ്റിയുടെ നേതൃത്വത്തിൽ വായമൂടിക്കെട്ടി പ്രതിഷേധ മാർച്ച് നടത്തി. തുടർന്ന് നടത്തിയ ധർണ യൂത്ത് കോണ്‍ഗ്രസ് സംസ്ഥാന സെക്രട്ടറി അനൂപ് ഇട്ടൻ ഉദ്ഘാടനം ചെയ്തു. നിയോജകമണ്ഡലം ചെയർമാൻ എൽദോസ് എൻ. ഡാനിയേൽ അധ്യക്ഷത വഹിച്ചു.

ബിഎഡ് വിദ്യാർഥികൾക്ക് സൂംബ ഡാൻസ് പരിശീലനം

മൈലക്കൊന്പ്: സെന്‍റ് തോമസ് കോളജ് ഓഫ് ടീച്ചർ എഡ്യൂക്കേഷനിലെ ഒന്നാം സെമസ്റ്റർ ബിഎഡ് വിദ്യാർഥികൾക്ക് കോഴ്സിന്‍റെ തുടക്കത്തിലുള്ള ഒരാഴ്ചത്തെ ഇൻഡക്ഷൻ പ്രോഗ്രാമിൽ സൂംബ ഡാൻസും ഉൾപ്പെടുത്തി പരിശീലനം തുടങ്ങി. കോളജ് ഫിസിക്കൽ എഡ്യൂക്കേഷൻ ഡയറക്ടർ കെ.ജെ. ഫ്രാൻസിസ്, അധ്യാപിക മേഘാ വർഗീസ് എന്നിവരാണ് പരിശീലനത്തിന് നേതൃത്വം നൽകുന്നത്. ബിഎഡ് വിദ്യാർഥി-വിദ്യാർഥിനികളുടെ വ്യായാമക്കുറവ് പരിഹരിക്കുക, മാനസിക-ഹൃദയാരോഗ്യം വർധിപ്പിക്കുക എന്നീ ലക്ഷ്യങ്ങളോടെയാണ് സൂംബ നൃത്തം കോളജിൽ പരിശീലിപ്പിക്കുന്നതെന്ന് പ്രിൻസിപ്പൽ റവ.ഡോ. ജോണ്‍സണ്‍ ഒറോപ്ലാക്കൽ പറഞ്ഞു. കൂടാതെ ബിഎഡ് വിദ്യാർഥികൾ ഭാവിയിൽ അധ്യാപകരാകുന്പോൾ സ്കൂൾ കുട്ടികളെ പരിശീലിപ്പിക്കുവാനും ഇവിടെ ലഭിക്കുന്ന പരിശീലനം ഉപകരിക്കുമെന്നും എല്ലാ അധ്യാപക വിദ്യാഭ്യാസ സ്ഥാപനങ്ങളിലും സൂംബ നൃത്തം പരിശീലിപ്പിക്കുന്നത് നന്നായിരിക്കുമെന്നും പ്രിൻസിപ്പൽ പറഞ്ഞു.

ജനസന്പർക്ക യാത്ര

കോതമംഗലം: എന്‍റെ നാട് ജനകീയ കൂട്ടായ്മ കീരന്പാറ പഞ്ചായത്ത് 53-ാം ബൂത്തിൽ നടത്തിയ ഗാന്ധി ദർശൻ ജനസന്പർക്ക യാത്രയുടെ ഉദ്ഘാടനം പഞ്ചായത്ത് വൈസ് പ്രസിഡന്‍റ് ബീന റോജോ നിർവഹിച്ചു. ബൂത്ത് പ്രസിഡന്‍റ് ബിനി പി. മാത്യു അധ്യക്ഷത വഹിച്ചു. എന്‍റെ നാട് ചെയർമാൻ ഷിബു തെക്കുംപുറം മുഖ്യപ്രഭാഷണം നടത്തി. മാമച്ചൻ ജോസഫ്, രാജു ഏബ്രഹാം, ബിനോയ് സി. പുല്ലൻ, സാന്‍റി ജോസ്, ബേസിൽ ബേബി, വി.ജെ. മത്തായി, ജോസ് ജോണ്‍, കെ.ഡി. വർഗീസ്, എം.സി. അയ്യപ്പൻ, റോയ് ഓടയ്ക്കൽ, മത്തച്ചൻ നെടുമറ്റം, കെ.കെ. സുധാകരൻ, ലിസി ജോണ്‍ എന്നിവർ പ്രസംഗിച്ചു. കീരന്പാറ പഞ്ചായത്ത് പ്രസിഡന്‍റായിരിക്കെ മികച്ച പ്രവർത്തനം കാഴ്ചവച്ചതിന് മാമച്ചൻ ജോസഫിനെയും ബൂത്തിലെ അങ്കണവാടി വർക്കർ മിനി ബാബുവിനെയും പുന്നേക്കാട് കുടുംബാരോഗ്യ കേന്ദ്രത്തിലെ പാലിയേറ്റീവ് നഴ്സിനെയും യോഗത്തിൽ ആദരിച്ചു.

രാമായണ പാരായണം നാളെ മുതൽ

മൂവാറ്റുപുഴ: വെള്ളൂർക്കുന്നം മഹാദേവ ക്ഷേത്രത്തിൽ രാമായണ മാസാചരണത്തിന്‍റെ ഭാഗമായി നാളെ മുതൽ രാമായണ പാരായണം ആരംഭിക്കും. രാവിലെ ആറ് മുതൽ എട്ട് വരെയാണ് പാരായണം നടക്കുക. ഇതോടനുബന്ധിച്ച് 31 വരെ വൈകുന്നേരത്തെ ദീപാരാധനയ്ക്കുശേഷം ഊട്ടുപുരയിൽ ഔഷധക്കഞ്ഞി വിതരണവുമുണ്ടായിരിക്കും. ഒന്നിന് രാവിലെ ആറ് മുതൽ ഔഷധ സേവയുമുണ്ടായിരിക്കും. കർക്കിടക വാവുബലി നാളിൽ 24ന് രാവിലെ 4.30 മുതൽ ക്ഷേത്രക്കടവിൽ ബലിതർപ്പണത്തിനുള്ള സൗകര്യങ്ങളും ഒരുക്കിയിട്ടുണ്ട്. രാമായണമാസത്തോടനുബന്ധിച്ച് തൃപ്രയാർ, കൂടൽമാണിക്യം, മൂഴിക്കുളം, പായമ്മൽ ക്ഷേത്രങ്ങൾ സന്ദർശിക്കുന്ന നാലന്പല ദർശനം 22ന് നടക്കും. രാവിലെ 4.30ന് യാത്ര പുറപ്പെട്ട് ഗുരുവായൂരും സന്ദർശിച്ച് വൈകുന്നേരം തിരിച്ചെത്തുന്നതാണ് യാത്ര. നാലന്പല ദർശനത്തിനുള്ള സീറ്റുകൾ ദേവസ്വം ഓഫീസിൽ ബുക്ക് ചെയ്യാം.

വെഞ്ചരിപ്പും ഗൃഹപ്രവേശനവും

കോതമംഗലം: സെന്‍റ് ജോർജ് കത്തീഡ്രൽ ഇടവകയുടെ ഭവന നിർമാണ പദ്ധതിയായ കത്തീഡ്രൽ ഹോംസിന്‍റെ ആഭിമുഖ്യത്തിൽ പണികഴിപ്പിച്ച പന്ത്രാണ്ടാമെത്തെ ഭവനത്തിന്‍റെ വെഞ്ചരിപ്പും ഗൃഹപ്രവേശനവും വികാരി റവ.ഡോ. മാത്യു കൊച്ചുപുരക്കൽ നിർവഹിച്ചു. താക്കോൽ ദാനം കോതമംഗലം രൂപത സോഷ്യൽ സർവീസ് ഡയറക്ടർ ഫാ. ജോസഫ് കൊച്ചുപറന്പിൽ നിർവഹിച്ചു. സെന്‍റ് സെബാസ്റ്റ്യൻസ് വാർഡ് പരിധിയിൽ അന്പലപ്പറന്പ് പ്രദേശത്താണ് പുതിയ വീട് നിർമിച്ച് നൽകിയത്. കത്തീഡ്രൽ ഇടവകയിൽ 25 കുടുംബങ്ങൾക്കാണ് കത്തീഡ്രൽ ഹോംസ് പദ്ധതിയുടെ ആദ്യഘട്ടം വീട് നിർമിക്കുന്നത്. അതോടെപ്പം 54 വീടുകളുടെ അറ്റകുറ്റപ്പണികളുമാണ് ആദ്യഘട്ടത്തിൽ പൂർത്തിയാക്കിയത്. കത്തീഡ്രൽ റസിഡന്‍റ് പ്രീസ്റ്റ് ഫാ. ജോണ്‍ മറ്റപ്പിള്ളി, സഹവികാരി ഫാ. ജസ്റ്റ്യൻ ചേറ്റൂർ, ജോയ്സ് റാഫേൽ മുണ്ടക്കൽ, സിസ്റ്റർ ജീൻ, സിസ്റ്റർ വിമൽ റോസ്, പയസ് തെക്കേക്കര, ജസ്റ്റിൻ പാറയിൽ, ജെയ്സി കെന്നഡി, ഡേവിസ് നെല്ലിക്കാട്ടിൽ, ബിജു കുന്നുംപുറം, ജോണ്‍സണ്‍ പോത്താനിക്കാട്ട്, ജോർജ് കുര്യാക്കോസ് ഓലിയപ്പുറം എന്നിവർ പങ്കെടുത്തു.

‘എംഎൽഎയ്ക്കും സിപിഎമ്മിനുമെതിരെയുള്ള ദുഷ്പ്രചാരണം അവസാനിപ്പിക്കണം’

കോതമംഗലം: ആന്‍റണി ജോണ്‍ എംഎൽഎയ്ക്കും സിപിഎമ്മിനുമെതിരെയുള്ള ദുഷ്പ്രചാരണം കോണ്‍ഗ്രസും യുഡിഎഫും അവസാനിപ്പിക്കണമെന്ന് സിപിഎം ഏരിയ സെക്രട്ടറി കെ.എ. ജോയി ആവശ്യപ്പെട്ടു. നഗരസഭ സ്ഥിരം സമിതി അധ്യക്ഷൻ കെ.വി. തോമസുമായി ബന്ധപ്പെട്ട കേസിൽ പാർട്ടി ഏരിയ കമ്മിറ്റി അടിയന്തര നടപടി സ്വീകരിച്ചിരുന്നു. കൗണ്‍സിലർ സ്ഥാനവും രാജിവയ്പ്പിച്ചു. എംഎൽഎ പ്രതിയെ സഹായിക്കുന്ന നിലപാട് സ്വീകരിച്ചുവെന്നത് വ്യാജപ്രചാരണമാണ്. ഇത്തരം നടപടിയുമായി മുന്നോട്ടുപോയാൽ രാഷ്ട്രീയമായും നിയമപരമായും നേരിടുമെന്നും ഏരിയ സെക്രട്ടറി മുന്നറിയപ്പ് നൽകി.

തൂന്പുംകുഴിയിൽ കുളിക്കാനിറങ്ങിയ യുവാവ് മുങ്ങിമരിച്ചു

പറവൂർ: ഏഴിക്കര പഞ്ചായത്തുപടി നെല്ലിപ്പിള്ളി മീൻകെട്ടിന്‍റെ തൂന്പുംകുഴിയിൽ കുളിക്കാനിറങ്ങിയ യുവാവ് മുങ്ങി മരിച്ചു. ചെറായി ബേക്കറി സ്റ്റോപ്പിന് കിഴക്ക് കൈമാത്തുരുത്തി സ്റ്റീഫൻ- സജിനി ദന്പതികളുടെ മകൻ ആഷിലാ(27)ണ് മരിച്ചത്. തിങ്കളാഴ്ച രാത്രി ഒന്പതിനാണ് സംഭവം. നാലു കൂട്ടുകാരുമൊത്താണ് ആഷിൽ തൂന്പുംകുഴിക്ക് സമീപമെത്തിയത്. സുഹൃത്തിനൊപ്പം നീന്താനിറങ്ങിയ ആഷിൽ മുങ്ങിപ്പോകുകയായിരുന്നു. സുഹൃത്തുക്കൾ ഒച്ചവച്ചതിനെ തുടർന്ന് നാട്ടുകാരെത്തി വിവരം ഫയർഫോഴ്സിനെ അറിയിച്ചതിനെ തുടർന്ന് അവർ നടത്തിയ പരിശോധനയിലാണ് മൃതദേഹം കണ്ടെത്തിയത്. പഠനം പൂർത്തിയാക്കിയ ആഷിൽ ജോലിക്ക് ശ്രമിക്കുകയായിരുന്നു. സംസ്കാരം ഇന്നു 4.30ന് പള്ളിപ്പുറം മഞ്ഞുമാതാ ബസിലിക്ക പള്ളിയിൽ. സഹോദരി: അന്നജൂലി (ജർമനി).

എറണാകുളം നോര്‍ത്തിലെ ഫര്‍ണിച്ചര്‍ കടയില്‍ വന്‍ തീപിടുത്തം

കൊച്ചി: എറണാകുളം നോര്‍ത്ത് ടൗണ്‍ഹാളിനു സമീപം ഫര്‍ണിച്ചര്‍ കടയില്‍ ഇന്നലെ പുലര്‍ച്ചെയോടെ വന്‍ തീപിടുത്തം. ഷെയര്‍ ലാന്‍ഡ് സെക്കന്‍ഡ് ഫര്‍ണിച്ചര്‍ എന്ന യൂസ്ഡ് ഫര്‍ണിച്ചറുകള്‍ വില്പന നടത്തുന്ന കടയിലാണ് പുലര്‍ച്ചെ മൂന്നോടെ തീപിടിത്തമുണ്ടായത്. അഗ്നിക്ഷാസേനയുടെ മണിക്കൂറുകള്‍ നീണ്ട ശ്രമത്തിലൊടുവിലാണ് തീ പൂര്‍ണമായും അണയ്ക്കാനായത്. സമീപത്ത് മൂന്ന് പെട്രോള്‍ പമ്പുകളും, കടയ്ക്കു പിറകിലായി രണ്ടു ഫ്‌ളാറ്റുകളും ഒരു വീടുമുണ്ട്. സമീപത്തു കൂടി മെട്രോ റെയിലും കടന്നു പോകുന്നുണ്ട്. തീ നിയന്ത്രണവിധേയമായെങ്കിലും കടയില്‍ നിന്നും പുകയുയര്‍ന്നത് ചെറിയ തോതില്‍ ആശങ്ക സൃഷ്ടിച്ചു. കടയ്ക്കുള്ളിലുണ്ടായിരുന്ന ഫര്‍ണിച്ചറുകളെല്ലാം കത്തി നശിച്ചു. മേശ, കസേര, സെറ്റി, അലമാര ഉള്‍പ്പെടെയുള്ള ഗൃഹോപകരണങ്ങളാണ് കത്തിനശിച്ചത്. സമീപത്തെ ഹോട്ടല്‍ കെട്ടിടത്തിനും നേരിയ നാശമുണ്ട്. ഏകദേശം 50 ലക്ഷം രൂപയുടെ നഷ്ടമുണ്ടായതായാണ് പ്രാഥമിക നിഗമനം. സ്ഥാപനത്തിനുള്ളില്‍ സൂക്ഷിച്ചിരുന്ന രണ്ട് ഗ്യാസ് സിലിണ്ടറുകളില്‍ നിന്ന് ചോര്‍ച്ചയുണ്ടായി തീ പടര്‍ന്നതായി അഗ്‌നി രക്ഷാസേന അറിയിച്ചു. സമയോചിതമായ ഇടപെടലിനെ തുടര്‍ന്നാണ് പൊട്ടിത്തറി ഒഴിവായത്. ഫോറന്‍സിക് വിദഗ്ധര്‍ സ്ഥലത്ത് പരിശോധന നടത്തി. കഴിഞ്ഞ എട്ടു വര്‍ഷമായി യൂസ്ഡ് ഓഫീസ് ഫര്‍ണിച്ചറുകളുടെ വില്പന നടത്തിവന്ന സ്ഥാപനത്തിന്‍റെ ഉടമ എളമക്കര കറുകപ്പിള്ളി വീട്ടില്‍ ഹാരിസാണ്. ഞായറാഴ്ച രാത്രി 10.30 ഓടെയാണ് ഹാരിസ് കടയടച്ച് വീട്ടിലേക്ക് പോയത്. കടയിലെ മെയിന്‍ സ്വിച്ചും ഓഫാക്കിയിരുന്നു. പുലര്‍ച്ചെ സമീപവാസികളാണ് തീപിടിച്ച വിവരം ഹാരിസിനെ അറിയിച്ചത്. ഫയര്‍ ഫോഴ്‌സും പോലീസും സ്ഥലത്തെത്തി. രണ്ടു മണിക്കൂറിനുള്ളില്‍ തീയണച്ച് സേന ഷീറ്റുകൊണ്ട് പണിത ഏകദേശം 1,800 സ്‌ക്വയര്‍ ഫീറ്റിലുള്ള കട പുറത്തുനിന്നു പൂട്ടിയിരുന്നതിനാല്‍ അഗ്നിരക്ഷാസേന എത്തുമ്പോള്‍ അകത്ത് തീ ആളിക്കത്തുന്ന നിലയിലായിരുന്നു. മേല്‍ക്കൂരയും തീയില്‍ തകര്‍ന്നു വീണു. കടയുടെ പൂട്ടുപൊളിച്ച് വശങ്ങളിലെ ഷീറ്റുകള്‍ തകര്‍ത്താണ് അഗ്നിരക്ഷാസേന രക്ഷാപ്രവര്‍ത്തനം തുടങ്ങിയത്. ഫയര്‍ സ്‌റ്റേഷന്‍ ഓഫീസര്‍ രാജേഷ് കുമാറിന്‍റെ നേതൃത്വത്തില്‍ ഗാന്ധിനഗര്‍, ക്ലബ് റോഡ്, തൃപ്പൂണിത്തുറ, തൃക്കാക്കര, ഏലൂര്‍, മട്ടാഞ്ചേരി എന്നിവിടങ്ങളില്‍ നിന്നുള്ള ഒമ്പതു ഫയര്‍ യൂണിറ്റുകള്‍ രണ്ടു മണിക്കൂര്‍ നേരം കിണഞ്ഞു പരിശ്രമിച്ചാണ് തീയണച്ചത്. കടയ്ക്കുള്ളില്‍ ഇരുമ്പും പ്ലാസ്റ്റിക്കും കൊണ്ട് നിര്‍മിച്ച വസ്തുക്കളായതിനാല്‍ തീ അണയ്ക്കുന്ന ദൗത്യം കഠിനമായിരുന്നു. കെഎംആര്‍എല്ലില്‍ നിന്നും പമ്പിംഗിനായി വെള്ളം ഉപയോഗിച്ചു. അഗ്നിരക്ഷാസേനയും എറണാകുളം സെന്‍ട്രല്‍ പോലീസും ഉടന്‍ തന്നെ സമീപത്തെ ഫ്‌ളാറ്റുകളിലെയും വീട്ടിലെയും ആളുകളെ സുരക്ഷിത സ്ഥാനങ്ങളിലേക്ക് മാറ്റി. പെട്രോള്‍ പമ്പുകളുടെ പ്രവര്‍ത്തനവും നിര്‍ത്തിവയ്പിച്ചതിനാല്‍ കൂടുതല്‍ ദുരന്തം ഒഴിവായി. ഈ വഴിയുള്ള ഗതാഗതം പോലീസ് തിരിച്ചുവിട്ടു. സംഭവത്തില്‍ എറണാകുളം സെന്‍ട്രല്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. സ്ഥാപനത്തില്‍ അഗ്‌നിശമന സംവിധാനങ്ങളില്ലെന്ന് കണ്ടത്തിയതിനെ തുടര്‍ന്ന് സ്ഥാപനത്തിന് നോട്ടീസ് നല്‍കുമെന്ന് ജില്ലാ ഫയര്‍ ഓഫീസര്‍ കെ. ഹരികുമാര്‍ പറഞ്ഞു. മോഷണശ്രമം സംശയിക്കുന്നതായി കടയുടമ തീപിടുത്തത്തില്‍ മോഷണശ്രം സംശയിക്കുന്നതായി കടയുടമ ഹാരിസ് പറഞ്ഞു. പതിവു പോലെ മെയിന്‍ സ്വിച്ച് ഇന്നലെ രാത്രിയും ഓഫാക്കിയിരുന്നു. മോഷ്ടിക്കാനായി കയറിയ ആരെങ്കിലും ലൈറ്ററോ മറ്റ് തെളിച്ചതാകാമെന്നും അദ്ദേഹം പറഞ്ഞു. മുമ്പും ഈ കടയില്‍ മോഷണശ്രമം ഉണ്ടായിട്ടുണ്ടെന്ന് ഉടമ വ്യക്തമാക്കി.

മുതിർന്ന പൗരനിൽ നിന്ന് 25 ലക്ഷം തട്ടിയെടുത്ത കേസിൽ ഒരാൾ അറസ്റ്റിൽ

കിഴക്കമ്പലം: ബാങ്ക് ലോൺ തരപ്പെടുത്തി നൽകാമെന്ന് പറഞ്ഞ് മുതിർന്ന പൗരനിൽ നിന്ന് 25 ലക്ഷം രൂപ തട്ടിയ കേസിൽ ഒരാൾ അറസ്റ്റിൽ. ബീഹാർ നളന്ദ സ്വദേശി വിശാൽ കുമാറി(21)നെയാണ് തടിയിട്ടപറമ്പ് പോലീസ് അറസ്റ്റ് ചെയ്തത്. കിഴക്കമ്പലം സ്വദേശിക്കാണ് പണം നഷ്ടമായത്. സോഷ്യൽ മീഡിയയിലൂടെയാണ് തട്ടിപ്പ് സംഘത്തെ പരിചയപ്പെടുന്നത്. ഒരു ദേശസാൽകൃത ബാങ്കിൽ നിന്ന് 50 ലക്ഷം രൂപയുടെ ലോൺ തരപ്പെടുത്തി കൊടുക്കാമെന്നായിരുന്നു വാഗ്ദാനം. പ്രോസസിംഗ് ഫീ, ഇൻഷ്വറൻസ്, ബാങ്കിലെ നിയമങ്ങൾ മാറിയെന്നു പറഞ്ഞ് അതിന് ഫീ തുടങ്ങി ഓരോരോ കാരണങ്ങൾ പറഞ്ഞ്പണം വാങ്ങുകയായിരുന്നു. പിന്നീട് പണം വാങ്ങിയവരെക്കുറിച്ച് ഒരു വിവരവുമുണ്ടായില്ല. തുടർന്നാണ് പോലീസിൽ പരാതി നൽകിയത്. ജില്ലാ പോലീസ് മേധാവി എം. ഹേമലതയുടെ മേൽനോട്ടത്തിൽ പ്രത്യേക ടീം രൂപീകരിച്ചു. ശാസ്ത്രീയ അന്വേഷണത്തിനൊടുവിൽ നളന്ദയിലെ ഒറ്റപ്പെട്ട ഗ്രാമത്തിൽ പ്രതികളിലൊരാളുണ്ടെന്ന് മനസിലാക്കി. തുടർന്ന് വേഷം മാറി ദിവസങ്ങളോളം അവിടെ താമസിച്ച് സാഹസികമായി പിടികൂടി ഇയാളെ നാട്ടിലെത്തിക്കുകയായിരുന്നു. നിരവധി പേർക്ക് ഇത്തരത്തിൽ പണം നഷ്ടപ്പെട്ടിട്ടുണ്ടെന്നാണ് പ്രാഥമിക വിവരം. എഎസ്പി ശക്തി സിംഗ്‌ ആര്യ, ഇൻസ്പെക്ടർ പി.ജെ. കുര്യാക്കോസ്, എസ്ഐ എൻ.കെ. ജേക്കബ് സീനിയർ സിപിഒമാരായ കെ.കെ. ഷിബു, മിഥുൻ മോഹൻ എന്നിവരാണ് അന്വേഷണ സംഘത്തിലുള്ളത്.

വധശ്രമം: യുവാവ് അറസ്റ്റിൽ

നെടുമ്പാശേരി: 47കാരനെ കൊലപ്പെടുത്താൻ ശ്രമിച്ച കേസിൽ യുവാവ് അറസ്റ്റിൽ. പാലക്കാട് നെന്മാറ തിരുത്തുംപാടം പ്രണവിനെ(33)യാണ് ചെങ്ങമനാട് പോലീസ് അറസ്റ്റ് ചെയ്തത്. മൂന്നുപേർ നേരത്തെ പിടിയിലായിരുന്നു. കഴിഞ്ഞ മാർച്ചിൽ അത്താണിയിലുള്ള ബാറിലായിരുന്നു സംഭവം. പ്രതികളിലൊരാളായ വിക്രമൻ ബാർ കൗണ്ടറിലിരുന്ന് ബഹളം വച്ചപ്പോൾ മിണ്ടാതിരിക്കാൻ പറഞ്ഞതിലുള്ള വിരോധമാണ് വധശ്രമത്തിൽ കലാശിച്ചത്. പാർക്കിംഗ് ഏരിയയിൽ തടഞ്ഞു നിർത്തിയ ശേഷം മറ്റു പ്രതികളെ വിളിച്ചുവരുത്തി ആക്രമിക്കുകയായിരുന്നു. വിവിധ സ്റ്റേഷനുകളിലായി 15ഓളം കേസുകളിലെ പ്രതിയാണ് പ്രണവ്.

മദ്യപിച്ച് വാഹനം ഓടിച്ച മൂന്നു സ്വകാര്യ ബസ് ഡ്രൈവര്‍മാര്‍ കുടുങ്ങി

കൊച്ചി: മദ്യപിച്ച് വാഹനമോടിച്ച മൂന്ന് സ്വകാര്യ ബസ് ഡ്രൈവര്‍മാര്‍ക്കെതിരെ നടപടി. ഗതാഗത വകുപ്പ് കമ്മീഷണറുടെ നിര്‍ദേശപ്രകാരം എറണാകുളം ഡെപ്യൂട്ടി ട്രാന്‍സ്‌പോര്‍ട്ട് കമ്മീഷണര്‍, ആര്‍ടിഒ(എന്‍ഫോഴ്‌സ്‌മെന്‍റ്) സ്‌ക്വാഡ്, എറണാകുളം സിറ്റി പോലീസ് എന്നിവര്‍ സംയുക്തമായി നടത്തിയ പരിശോധനയിലാണ് മൂന്നുപേര്‍ പിടിയിലായത്. നിയമംലംഘിച്ച് സർവീസ് നടത്തിയ 18 ബസുകള്‍ക്കെതിരെയും നടപടികള്‍ സ്വീകരിച്ചു. നഗരത്തില്‍ സര്‍വീസ് നടത്തുന്ന ബസ് ഡ്രൈവര്‍മാര്‍ക്കെതിരെ പരാതികള്‍ ലഭിച്ചതിന്‍റെ അടിസ്ഥാനത്തില്‍ ഹൈക്കോര്‍ട്ട് ജംഗ്ഷന്‍, കലൂര്‍ ബസ്‌സ്റ്റാൻഡ് എന്നിവിടങ്ങള്‍ കേന്ദ്രീകരിച്ചായിരുന്നു പരിശോധന. വരുന്ന ദിവസങ്ങളിലും പരിശോധന തുടരുമെന്നു എറണാകുളം ആര്‍ടിഒ(എന്‍ഫോഴ്‌സ്‌മെന്‍റ്) അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]