അതിദരിദ്രരിൽ 12,763 പട്ടികജാതി വിഭാഗക്കാരും 3201 പട്ടികവർഗ വിഭാഗക്കാരും 2,737 തീരദേശവാസികളുമാണ്. ഒരു വരുമാനവും ഇല്ലാത്തവർ, ആരോഗ്യാവസ്ഥ മോശമായവർ, രണ്ടു നേരം ഭക്ഷണം കഴിക്കാൻ കഴിയാത്തവർ, റേഷൻ കിട്ടുന്നുവെങ്കിലും പാകം ചെയ്തു കഴിക്കാൻ കഴിയാത്തവർ തുടങ്ങിയവരാണ് അതിദരിദ്രരുടെ പട്ടികയിലുള്ളത്.
64,006 കുടുംബങ്ങളിൽ 75 ശതമാനം ആളുകൾ പൊതുവിഭാഗത്തിലും 20 ശതമാനം പട്ടികജാതി വിഭാഗത്തിലും, അഞ്ചു ശതമാനം പട്ടികവർഗ വിഭാഗത്തിലും ഉൾപ്പെടുന്നവരാണ്. ഏതു വിഭാഗത്തിൽ ഉൾപ്പെടുന്നു എന്നറിയാത്ത വളരെ ചെറിയ ശതമാനം കുടുംബങ്ങളും ലിസ്റ്റിലുണ്ട്.
8,553 ദരിദ്രകുടുംബങ്ങളുളള മലപ്പുറം ജില്ലയാണ് പട്ടികയിൽ ഒന്നാം സ്ഥാനത്ത് (13.4 ശതമാനം). തൊട്ടുപിന്നാലെ തിരുവനന്തപുരം ജില്ലയാണ് (11.4 ശതമാനം). ഏറ്റവും കുറവ് ദരിദ്രർ വസിക്കുന്നത് കോട്ടയം ജില്ലയിലാണ് (1071 കുടുംബങ്ങൾ). ഭക്ഷണം, ആരോഗ്യം, വരുമാനം, പാർപ്പിടം എന്നീ ഇല്ലായ്മ ഘടകങ്ങളെ ആസ്പദമാക്കിയാണ് അതിദരിദ്രരുടെ പട്ടിക തയാറാക്കിയത്.
സർവേയിലൂടെ കണ്ടെത്തിയ 35 ശതമാനം കുടുംബങ്ങൾക്കു വരുമാനത്തിന്‍റെ അഭാവവും 24 ശതമാനം കുടുംബങ്ങൾക്ക് ആരോഗ്യസംബന്ധമായ പ്രശ്നങ്ങളും 21 ശതമാനത്തിനു ഭക്ഷണത്തിന്‍റെ അഭാവവും 15 ശതമാനം കുടുംബങ്ങൾക്കു പാർപ്പിടത്തിന്‍റെ അഭാവവും ഉള്ളതായി കണ്ടെത്തിയിട്ടുണ്ട്.