ADVERTISEMENT

ADVERTISEMENT

കെഎൽസിഎ സമുദായ സമ്പർക്ക പരിപാടി; ആലോചന യോഗം ചേർന്നു

കോഴിക്കോട്: കെഎൽസിഎ സമുദായ സമ്പർക്ക പരിപാടി 2025ന്‍റെ മുന്നൊരുക്കങ്ങളുടെ ഭാഗമായി ആലോചന യോഗം ചേർന്നു. കോഴിക്കോട് അതിരൂപതയിൽ ചേർന്ന യോഗത്തിൽ കെഎൽസിഎ സംസ്ഥാന പ്രസിഡന്‍റ് അഡ്വ. ഷെറി ജെ. തോമസ് അധ്യക്ഷത വഹിച്ചു.

കെഎൽസിഎ അതിരൂപത പ്രസിഡന്‍റ് ബിനു എഡ്വേർഡ് മുഖ്യപ്രഭാഷണം നടത്തി. ഓഗസ്റ്റ് 16ന് രാവിലെ 9.30ന് കോഴിക്കോട് വച്ച് "കെഎൽസിഎ സമുദായ സമ്പർക്ക പരിപാടി 2025'ന്‍റെ സംസ്ഥാനതല ഉദ്ഘാടനം നടത്തുവാൻ തീരുമാനിച്ചു.

സംസ്ഥാന ജനറൽ സെക്രട്ടറി ബിജു ജോസി, ട്രഷറർ രതീഷ് ആന്‍റണി, സംസ്ഥാന വൈസ് പ്രസിഡന്‍റ് നൈജു അറക്കൽ, കോഴിക്കോട് അതിരൂപത ജനറൽ സെക്രട്ടറി കെ.വൈ. ജോർജ്, ട്രഷറർ ഫ്ലോറ മെൻഡോൻസാ, സമുദായ സമ്പർക്ക പരിപാടിയുടെ കോഴിക്കോട് അതിരൂപതതല കോഓർഡിനേറ്റർമാരായ പ്രകാശ്‌ പീറ്റർ, മാക്സ്‌വെൽ ടൈറ്റസ്,

കെ.എഫ്. ജോയി, ജെസി ഹെലൻ, ജോണി വർഗീസ്, വിക്ടർ ജോയി, ടി.എഫ്. ഷാജി, ജോസഫ് റെബേല്ലോ, സാംസൺ, അഡ്വ. എ.സി. ഫ്രാൻസിസ്, അഡ്വ. ബോണി വർഗീസ്, കണ്ണൂർ രൂപത പ്രസിഡന്‍റ് ഗോഡ്സൺ ഡിക്രൂസ്, സുൽത്താൻ പേട്ട് രൂപത പ്രസിഡന്‍റ് ജോൺ ജോസഫ് എന്നിവർ പ്രസംഗിച്ചു.

ADVERTISEMENT

മലയോര ഹൈവേ : ചക്കിട്ടപാറ ടൗണിൽ പണി വീണ്ടും നാട്ടുകാർ തടഞ്ഞു

വ്യാപാരി പ്രസിഡന്‍റിനു ഭീഷണിയും കടകളിൽ മിന്നൽ പരിശോധനയും പേരാമ്പ്ര: മൂന്ന് മാസം മുമ്പ് നാട്ടുകാർ തടഞ്ഞ ചക്കിട്ടപാറ ടൗണിലെ മലയോര ഹൈവേ പ്രവർത്തി ഇന്നലെ രാവിലെ വീണ്ടും തടഞ്ഞു. റോഡിന്‍റെ വീതി അളവ് നിർണയം സംബന്ധിച്ച തർക്കമാണ് പ്രശ്‌ന കാരണം. ഇത് പരിഹരിക്കാൻ താലൂക്ക് സർവെയർമാർ നാലു തവണ റോഡിൽ അളന്നു. ഓരോ പ്രാവശ്യവും വ്യത്യസ്ത അളവാണ് രേഖപ്പെടുത്തിയത്. 12 മീറ്റർ വീതിയാണ് മലയോര ഹൈവേ നിർമിക്കാൻ വേണ്ടത്. നാല് തവണ അളന്നിട്ടും 12 മീറ്റർ വീതി കണ്ടെത്താനായില്ല. ചൊവ്വാഴ്ച പഞ്ചായത്ത് പ്രസിഡന്‍റ് കെ.സുനിലും കരാറുകാരും വന്ന് റോഡിന്‍റെ വീതി അളന്നു. ഇത് പ്രകാരം മുമ്പ് പണി ആരംഭിച്ചതും പിന്നീട് തടഞ്ഞതുമായ ഭാഗത്ത് ഇന്നലെ മുതൽ പണി വീണ്ടും ആരംഭിക്കുമെന്ന് പ്രസിഡന്‍റ് വ്യാപാരികളെ അറിയിച്ചിരുന്നു. അതേ സമയം ടൗണിൽ റോഡിന്‍റെ യഥാർത്ഥ വീതി സംബന്ധിച്ച് കൃത്യമായ രേഖകളുണ്ടെന്നും ഇത് മറച്ച് വച്ച് റോഡ് കൈയ്യേറിയവരെ സംരംക്ഷിക്കാനുള്ള അളവും വീതി നിർണയ നീക്കവും അനുവദിക്കില്ലെന്നാണ് വ്യാപാരികളുടെയും നാട്ടുകാരുടേയും നിലപാട്. ഇന്നലെ പണി തടഞ്ഞതറിഞ്ഞ് ചിലർ വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്‍റ് ബെന്നി സെബാസ്റ്റ്യനെ ഫോണിലൂടെ ഭീഷണിപ്പെടുത്തി. പണി തടഞ്ഞാൽ ഇന്ന് മുതൽ ചക്കിട്ടപാറയിലെ ഒറ്റ കടകളും തുറക്കാൻ സമ്മതിക്കില്ലെന്നാണ് ഭീഷണി. മലയോര ഹൈവേ പ്രവർത്തി നാട്ടുകാരോടൊപ്പം വ്യാപാരികളും ചേർന്ന് തടഞ്ഞതിനു പിന്നാലെ ടൗണിലെ കടകളിൽ സെക്രട്ടറിയുടെ നേതൃത്വത്തിൽ പഞ്ചായത്ത് ഉദ്യോഗസ്ഥർ പരിശോധന നടത്തി. നിരോധിത പ്ലാസ്റ്റിക് വിൽപന തടയുന്നതിനുള്ള പരിശോധനയാണ് നടത്തിയതെന്നാണ് ഉദ്യോഗസ്ഥർ പറയുന്നത്. ഇതിനെതിരേ വ്യാപാര സമൂഹം കടുത്ത പ്രതിഷേധത്തിലാണ്. പ്രവർത്തികളെക്കുറിച്ച്‌ ആലോചിക്കുന്നതിനായി ഇന്ന് രാവിലെ 9.30 ന് പഞ്ചായത്ത് ഹാളിൽ ചക്കിട്ടപാറ ടൗണിലെ കച്ചവടക്കാരുടെ യോഗം ചേരുമെന്ന് പ്രസിഡന്‍റ് കെ. സുനിൽ അറിയിച്ചു.

ലഹരിയിൽ നിന്ന് പുതുതലമുറയെ രക്ഷിക്കേണ്ടത് അനിവാര്യം: മാർ ഇഞ്ചനാനിയിൽ

താമരശേരി: ലഹരിയുടെ മാരക ദുരന്തങ്ങളിൽ നിന്ന് പുതുതലമുറയെ രക്ഷിക്കേണ്ടത് അനിവാര്യമാണെന്ന് താമരശേരി ബിഷപ് മാർ റെമീജിയോസ് ഇഞ്ചനാനിയിൽ. താമരശേരി രൂപതാ വ്യക്തിത്വ വികസന ക്ലബിന്‍റെ ആഭിമുഖ്യത്തിൽ നടന്ന ശിൽപശാല ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. പുതിയ രൂപ ഭാവങ്ങളിൽ പ്രത്യക്ഷപ്പെടുന്ന ലഹരി വസ്തുക്കളുടെ ചതിക്കുഴികളിൽ പെടാതിരിക്കാനുള്ള വിവേകം കുട്ടികൾക്ക് ഉണ്ടാകണം. അധ്യാപകരും രക്ഷിതാക്കളും സമൂഹവും ഇക്കാര്യത്തിൽ നിതാന്ത ജാഗ്രത പുലർത്തണമെന്ന് അദ്ദേഹം പറഞ്ഞു. താമരശേരി രൂപതാ ലഹരി വിരുദ്ധ സമിതിയുടെയും കോർപറേറ്റ് വിദ്യാഭ്യാസ ഏജൻസിയുടെയും ആഭിമുഖ്യത്തിൽ സ്കൂളുകളിൽ പ്രവർത്തിക്കുന്ന വ്യക്തിത്വ വികസന ക്ലബ് ഡയറക്ടർമാരുടെ കൗൺസിലിംഗ് പരിശീലനവും ക്ലബ്‌ ഭാരവാഹികളുടെ നേതൃത്വപരിശീലന ക്യാമ്പും നടന്നു. രൂപതാ പ്രസിഡന്‍റ് കുര്യൻ ചെമ്പനാനി അധ്യക്ഷത വഹിച്ചു. ലഹരി വിരുദ്ധ സമിതി രൂപതാ ഡയറക്ടർ ഫാ. ജിന്‍റോ മച്ചുകുഴി മുഖ്യ പ്രഭാഷണം നടത്തി. സെക്രട്ടറി ജോളി ഉണ്ണിയേപ്പിള്ളിൽ, എക്സിക്യൂട്ടീവ് കമ്മിറ്റി അംഗങ്ങളായ റോയ് ജോസ് മുരിക്കോലിൽ, ടി.ടി. തോമസ്, ഏബ്രഹാം മണലോടി, വി.കെ. മത്തായി, സിസ്റ്റർ ഗീത, കെ.സി. ജോസഫ്, ടി.ജെ. സണ്ണി, കെ.സി.ടോമി തുടങ്ങിയവർ പ്രസംഗിച്ചു. വിവിധ സ്കൂളുകളിൽ നിന്ന് ഇരുന്നൂറ്റി അമ്പതോളം പ്രതിനിധികൾ പങ്കെടുത്തു. ഫാ. സായി പാറൻ കുളങ്ങര, മാത്യു മേൽവെട്ടം, സന്ദീപ്‌ കളപ്പുരക്കൽ, ടി.ടി. തോമസ്, റോയ് ജോസ്, ജോളി ഉണ്ണിയേപ്പിള്ളിൽ എന്നിവർ വിവിധ സെഷനുകളിൽ ക്ലാസുകൾ നയിച്ചു.

കെട്ടിടങ്ങള്‍ക്ക് അനധികൃത നമ്പര്‍ നല്‍കിയ കേസ്:സര്‍വകക്ഷി സംഘം മുഖ്യമന്ത്രിയെ കാണും

കോഴിക്കോട്: കോര്‍പ്പറേഷന്‍ റവന്യൂ ഉദ്യോഗസ്ഥരുടെ യൂസര്‍ ഐഡിയും പാസ്‌വേഡും ചോര്‍ത്തി വ്യാജരേഖയുണ്ടാക്കി നഗരത്തിലെ കെട്ടിടങ്ങള്‍ക്ക് അനധികൃത നമ്പര്‍ നല്‍കിയ കേസില്‍ നടപടി വൈകുന്നതുമായി ബന്ധപ്പെട്ട് സര്‍വകക്ഷി സംഘം മുഖ്യമന്ത്രിയെ കാണും. ഇന്നലെ നടന്ന കൗണ്‍സില്‍ യോഗത്തില്‍ മുസ്ലിംലീഗിലെ കെ.മൊയ്തീന്‍കോയയുടെ ശ്രദ്ധക്ഷണിക്കലിനുള്ള മറുപടിയിലാണ് മേയര്‍ ഡോ. ബീനാഫിലിപ്പ് ഇക്കാര്യം വ്യക്തമാക്കിയത്. 2022 ജൂണ്‍ 18 നാണ് കെട്ടിട നമ്പര്‍ തട്ടിപ്പിനെ കുറിച്ച് പുറത്തറിയുന്നത്. ലോക്കല്‍ പോലിസും പിന്നീട് ജില്ലാ ക്രൈംബ്രാഞ്ചും തുടര്‍ന്ന് വിജിലന്‍സും കേസ് അന്വേഷിച്ചെങ്കിലും ഇതുവരേയും കുറ്റപത്രം സമര്‍പ്പിച്ചിട്ടിന്നെും മൊയ്തീന്‍കോയ പറഞ്ഞു. ഓഗസ്റ്റില്‍ തന്നെ മുഖ്യമന്ത്രിയെ കാണാന്‍ അനുമതി തേടിയിട്ടുണ്ടെന്ന് മേയര്‍ പറഞ്ഞു. വലിയങ്ങാടി സെന്‍ട്രല്‍ മാര്‍ക്കറ്റിന്‍റെ നിര്‍മ്മാണവുമായി ബന്ധപ്പെട്ട് ആശങ്കകള്‍ വേണ്ടെന്നും തൊഴിലാളികളുടെ പ്രശങ്ങള്‍ പരിഹരിച്ചു നിര്‍മാണവുമായി മുന്നോട്ട് പോകുമെന്നും കോര്‍പ്പറേഷന്‍ കൗണ്‍സില്‍ യോഗം വ്യക്തമാക്കി. മീഞ്ചന്ത ഗവ. ആര്‍ട്സ് ആന്‍ഡ് സയന്‍സ് കോളജിന് സമീപത്തെ ബസ് കാത്തിരിപ്പ് കേന്ദ്രം തകര്‍ന്ന് പരുക്കേറ്റ വിദ്യാര്‍ഥിനിയ്ക്ക് ചികിത്സ ഉറപ്പാക്കുമെന്ന് ഡെപ്യൂട്ടി മേയര്‍ സി.പി മുസാഫിര്‍ പറഞ്ഞു.കുടുംബത്തിന് ചെലവില്ലാത്ത വിധത്തില്‍ ചികിത്സ ഉറപ്പാക്കും. ബസ് കാത്തിരിപ്പ് കേന്ദ്രം പരിപാലിക്കുന്ന കരാര്‍ കമ്പനി പ്രാഥമികമായുള്ള ചെലവുകള്‍ വഹിച്ചിട്ടുണ്ട്. ശസ്ത്രക്രിയാ ചെലവും മറ്റു ചികിത്സയും നടത്താനുള്ള സംവിധാനവും ഉറപ്പാക്കും. രണ്ടാഴ്ചയോളം ആശുപത്രിയില്‍ ചികിത്സ ആവശ്യമായി വരുമെന്നാണ് വിവരം. തുടര്‍ന്നുള്ള ചികിത്സയും കോര്‍പ്പറേഷന്‍ ഉറപ്പാക്കുമെന്ന് അദ്ദേഹം അറിയിച്ചു.

ഇൻഫോസിസ് പരിശീലന പരിപാടി നടത്തി

‌മുക്കം: മാമ്പറ്റ ഡോൺ ബോസ്കോ കോളജ് പ്ലേസ്മെന്‍റ് സെല്ലിന്‍റെ നേതൃത്വത്തിൽ ഇൻഫോസിസിനുമായി ചേർന്ന് പ്രോജക്ട് ജെനസിസിന് കീഴിൽ വിദ്യാർഥികൾക്കായി 15 ദിവസത്തെ സോഫ്റ്റ് സ്കിൽ ഡെവലപ്മെന്‍റും, ആപ് റ്റിറ്റ്യൂഡ് പരിശീലനവും വിജയകരമായി സംഘടിപ്പിച്ചു. ജൂലൈ ഏഴ് മുതൽ 23 വരെ ആയിരുന്നു പരിശീലനം. വിദ്യാർഥികളെ ക്യാമ്പസ് റിക്രൂട്ട്മെന്‍റിനും ഇന്നത്തെ മത്സരാധിഷ്ഠിത തൊഴിൽ വിപണിയിൽ ആവശ്യമായ സോഫ്റ്റ് സ്കില്ലുകളും പ്രഫഷണൽ കഴിവുകളും വളർത്തിയെടുക്കുന്നതിനായിരുന്നു വർക്ക്ഷോപ്പ് സംഘടിപ്പിച്ചത്. ട്രെയിനിംഗ് പ്രോഗ്രാമിന്‍റെ ഔദ്യോഗിക ഉദ്ഘാടനം കോളജ് പ്രിൻസിപ്പൽ ഫാ. ഡോ. ജോബി എം. ഏബ്രഹാം നിർവഹിച്ചു. പ്രമുഖ പരിശീലകരായ സെൽവി കണ്ഠ സ്വാമിയും, വിഷ്ണുപ്രസാദുമാണ് പരിശീലനം നയിച്ചത്. വിദ്യാർഥികൾക്കിടയിൽ മികച്ച പ്രതികരണം ലഭിച്ച പരിശീലനം അവരുടെ ഭാവി തൊഴിൽ സാധ്യതകളെ ശക്തിപ്പെടുത്തുമെന്ന് കോളജ് അധികൃതർ അറിയിച്ചു. കോളജ് വൈസ് പ്രിൻസിപ്പൽ ജിജി ജോർജ് പ്രസംഗിച്ചു.

വിദ്യാർഥികൾ അമർജ്യോതി സ്പെഷ്യൽ സ്കൂൾ സന്ദർശിച്ചു

താമരശേരി: ചമൽ നിർമ്മല എൽപി, യുപി സ്കൂളിലെ വിദ്യാർഥികൾ അമർജ്യോതി സ്പെഷ്യൽ സ്കൂൾ സന്ദർശിച്ചു. പതിവ് വിദ്യാലയ ജീവിതത്തിൽ നിന്ന് വ്യത്യസ്തമായി നന്മയും സൗഹൃദവും പങ്കുവയ്ക്കുന്ന സന്ദർശനം വിദ്യാർഥികൾക്ക് നവ്യാനുഭവമായി. ഇരു സ്കൂളുകളിലെ വിദ്യാർഥികളും ചേർന്ന് വിവിധ കലാപരിപാടികൾ അവതരിപ്പിച്ചു. അമർജ്യോതി സ്പെഷ്യൽ സ്കൂളിലെ പ്രധാനധ്യപിക സിസ്റ്റർ റിൻസി, യുപി പ്രധാനാധ്യാപിക ജിസ്ന ജോസ്, സീനിയർ അസിസ്റ്റന്‍റ് പി.എ. ഷൈനി എന്നിവർ നേതൃത്വം നൽകി.

കന്യാസ്ത്രീകളുടെ അറസ്റ്റ് : ക്രൈസ്തവ വേട്ട ; പ്രതിഷേധമിരമ്പുന്നു

തിരുവമ്പാടി: ഛത്തീസ്ഗഡിൽ മലയാളികളായ രണ്ട് കന്യാസ്ത്രീമാരെ മതപരിവർത്തനവും മനുഷ്യക്കടത്തും ആരോപിച്ച് കള്ളക്കേസ് എടുത്ത് ജയിലിൽ അടച്ചതിനെതിരേ തിരുവമ്പാടി മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ പ്രതിഷേധ പ്രകടനവും സമ്മേളനവും നടത്തി. ഡിസിസി ജനറൽ സെക്രട്ടറി ബാബു പൈക്കാട്ടിൽ ഉദ്ഘാടനം ചെയ്തു.തിരുവമ്പാടി മണ്ഡലം കോൺഗ്രസ് കമ്മിറ്റി പ്രസിഡന്‍റ് മനോജ് സെബാസ്റ്റ്യൻ വാഴപ്പറമ്പിൽ അധ്യക്ഷതവഹിച്ചു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ, യുഡിഎഫ് ചെയർമാൻ ടി.ജെ. കുര്യാച്ചൻ, പഞ്ചായത്ത് അംഗങ്ങളായ ലിസി മാളിയേക്കൽ, മേഴ്‌സി പുളിക്കാട്ട്, രാജു അമ്പലത്തിങ്കൽ, രാമചന്ദ്രൻ കരിമ്പിൽ, ലിസി സണ്ണി എന്നിവർ പ്രസംഗിച്ചു. കൂടരഞ്ഞി: കൂടരഞ്ഞി മണ്ഡലം കോൺഗ്രസ് കമ്മിറ്റി പ്രതിഷേധ പ്രകടനം നടത്തി. പ്രതിഷേധ യോഗം മണ്ഡലം കോൺഗ്രസ് പ്രസിഡന്‍റ് സണ്ണി പെരികിലം തറപ്പേൽ ഉദ്ഘാടനം ചെയ്തു. പ്രതിഷേധ പ്രകടനത്തിൽ ബോക്ക് വൈസ് പ്രസിഡന്‍റ് സിബു തോട്ടത്തിൽ, സെക്രട്ടറിമാരായ ഷാജി പൊന്നമ്പേൽ, പഞ്ചായത്ത് മെമ്പർമാരായ ജോണി വാളിപ്ലാക്കൽ, മോളി തോമസ്, ബോബി ഷിബു എന്നിവർ നേതൃത്വം നൽകി. ഏലിയാമ്മ ഇടമുളയിൽ, ഫ്രാൻസീസ് മൂക്കിലിക്കാട്ട്, ജോർജ്ജ്കുട്ടി കക്കാടം പൊയിൽ, നിസാറ ബീഗം, അനീഷ് പനച്ചിയിൽ, അബ്ദുള്ള പുതുക്കുടി, ജോർജ് തറപ്പേൽ, പൗലോസ് താന്നി മുളയിൽ, സോളി ജോസഫ്, ജോയ് പന്തപ്പിള്ളി, ജിബിൻ മാണിക്കത്ത്കുന്നേൽ, ജിന്‍റോ പുഞ്ചതറപ്പേൽ, ജോസ് മലപ്രവനാൽ എന്നിവർ പ്രസംഗിച്ചു. കോഴിക്കോട്: കന്യാസ്ത്രീകളെ ഛത്തീസ്ഗഡിൽ മതപരിവർത്തനവും മനുഷ്യക്കടത്തും ആരോപിച്ച് അറസ്റ്റ് ചെയ്ത് സംഭവം രാജ്യത്തിന്‍റെ മതനിരപേക്ഷ സംസ്കാരത്തിന് അപമാനമാണെന്ന് യൂത്ത് ഫ്രണ്ട് (ജേക്കബ്) ജില്ല കമ്മിറ്റി യോഗം അഭിപ്രായപ്പെട്ടു. കന്യാസ്ത്രീകൾക്കെതിരേ വ്യാജ ആരോപണം ഉന്നയിച്ചവർക്കെതിരേയും ഏകപക്ഷീയമായി അറസ്റ്റ് ചെയ്തവർക്കെതിരേയും നിയമനടപടി സ്വീകരിക്കണമെന്നും ആവശ്യപ്പെട്ടു. പ്രസിഡന്‍റ് ഷഫീഖ് തറോപ്പൊയിൽ അധ്യക്ഷത വഹിച്ചു. രാജൻ വർക്കി, പി.കെ. സനീഷ്, പ്രദീപ് ചോമ്പാല, യൂസഫ് പള്ളിയത്ത്, പി.എ. ബബീഷ്, പി.എം. ഷുക്കൂർ, പി.എം. നിസാർ എന്നിവർ പ്രസംഗിച്ചു. കോടഞ്ചേരി: കന്യാസ്ത്രീകളെ അറസ്റ്റ് ചെയ്ത സംഭവം ജനാധിപത്യവിരുദ്ധവും പൗരാവകാശ ലംഘനവുമാണെന്ന് യുണൈറ്റഡ് ക്രിസ്ത്യന്‍ ഫോറം കോടഞ്ചേരി മേഖല എക്‌സിക്യൂട്ടീവ് യോഗം അഭിപ്രായപ്പെട്ടു. യുസിഎഫ് കോടഞ്ചേരി മേഖല ഡയറക്ടര്‍ ഫാ. ജോസ് പെണ്ണാപറമ്പില്‍ അധ്യക്ഷനായിരുന്നു. ഫാ. കുര്യാക്കോസ് ഐകുളമ്പില്‍, ഫാ.ബേസില്‍ തമ്പി പടിഞ്ഞാറേക്കര, ഫാ. എബി ചാലില്‍, ഫാ.സ്‌കറിയ ഇളന്തനാംകുഴി, ഫാ. റിനോ ജോണ്‍, ഷിബു ജോസഫ്, രാജു, ഏലിയാസ്, ഷിജി അവനൂര്‍, ടെസി കാരിക്കൊമ്പില്‍, ഓമന ജോയ്, ആനി പുത്തന്‍പുര, ലീന മാത്യു, ജയ്‌സണ്‍ മാത്യു എന്നിവര്‍ സംബന്ധിച്ചു. കോടഞ്ചേരി: വലിയകൊല്ലി വിശുദ്ധ അൽഫോൻസ ദേവാലയത്തിലെ എകെസിസി യൂണിറ്റ് പ്രതിഷേധ ജ്വാല സംഘടിപ്പിച്ചു. എകെസി സി യൂണിറ്റ് ഡയറക്ടർ ഫാ. ജിയോ പുതുശേരി പുത്തൻപുരയിൽ ഉദ്ഘാടനം ചെയ്തു. യോഗത്തിൽ എകെസിസി പ്രസിഡന്‍റ് റെജി ചിറയിൽ, ഫ്രാൻസിസ് ചാലിൽ, ടോമി കോനി കുന്നേൽ, സെക്രട്ടറി ഷൈനി വടയാറ്റുകുന്നേൽ, സിസ്റ്റേഴ്സ്, കൈക്കാരന്മാർ എന്നിവർ പങ്കെടുത്തു. തോട്ടുമുക്കം: തോട്ടുമുക്കം ഫൊറോന എകെസിസി യൂണിറ്റും മറ്റു സംഘടനകളും സംയുക്തമായി പ്രതിഷേധിച്ചു. എകെസിസി മേഖല ഡയറക്ടർ ഫാ. ബെന്നി കാരക്കാട്ട് ഉദ്ഘാടനം ചെയ്ത പ്രതിഷേധ മീറ്റിംഗിൽ തോമസ് മുണ്ടപ്ലാക്കൽ, സാബു വടക്കേ പടവിൽ, സിസ്റ്റർ ആലീസ് സിഎംസി, ഫാ. ജിജോ മേലാട്ട്, ബെന്നി തട്ടുംപുറത്ത്, ഷാജു പനക്കൽ എന്നിവർ പ്രസംഗിച്ചു. സെബാസ്റ്റ്യൻ പൂവത്തം കൂടി, ബെൻസി പഞ്ഞിപ്പാറയിൽ, ജിയോ വെട്ടുകാട്ടിൽ, കുര്യാക്കോസ് ഔസേപ്പു പറമ്പിൽ എന്നിവർ റാലിക്ക് നേതൃത്വം നൽകി. താമരശേരി: താമരശേരി എകെസിസി യൂണിറ്റിന്‍റെ നേതൃത്വത്തിൽ പ്രതിഷേധ റാലിയും പൊതുയോഗവും നടത്തി. താമരശേരി മേരി മാതാ കത്തീഡ്രലിൽ നിന്ന് ആരംഭിച്ച റാലി താമരശേരി ടൗൺ ബസ് സ്റ്റാൻഡിൽ സമാപിച്ചു. പാരിഷ് കൗൺസിൽ സെക്രട്ടറി ടോമി കൊച്ചുവീട്ടിൽ ഉദ്ഘാടനം ചെയ്തു. എകെസിസി താമരശേരി യൂണിറ്റ് പ്രസിഡന്‍റ് സാജൻ ഇടവഴിക്കൽ അധ്യക്ഷത വഹിച്ചു. കത്തീഡ്രൽ വികാരി ഫാ. തോമസ് ചിലമ്പിക്കുന്നേൽ, ഫാ. ജോർജ്ജ് മുണ്ടക്കൽ, യൂണിറ്റ് ഭാരവാഹികളായ ഷാജൻ കൊച്ചുവീട്ടിൽ, ജോബിഷ് തുണ്ടത്തിൽ, ട്രസ്റ്റിമാരായ ജോൺസൺ ചക്കാട്ടിൽ, ദേവസ്യ വെള്ളാപ്പിള്ളിൽ, ജോഫിൻ ആനി തോട്ടത്തിൽ എന്നിവർ നേതൃത്വം നൽകി. കൂരാച്ചുണ്ട്: കൂരാച്ചുണ്ട് സെന്‍റ് തോമസ് ഫൊറോന ഇടവകയുടെ നേതൃത്വത്തിൽ പ്രതിഷേധ പ്രകടനവും പൊതുയോഗവും സംഘടിപ്പിച്ചു. ഫൊറോനാ വികാരി ഫാ. വിൻസെന്‍റ് കണ്ടത്തിൽ ഉദ്ഘാടനം ചെയ്തു. സണ്ണി പാരഡൈസ്, ജോസ് ചെറുവള്ളിൽ എന്നിവർ പ്രസംഗിച്ചു. ട്രസ്റ്റിമാരായ സജി കൊഴുവനാൽ, ജിജി കോനുകുന്നേൽ, ജോസ് അറയ്ക്കൽ, ജോയ് വേണ്ടത്താനം തുടങ്ങിയവർ നേതൃത്വം നൽകി. കന്യാസ്ത്രീകളെ കള്ളക്കേസിൽ കുടുക്കി ജയിലിൽ അടയ്ക്കുന്ന പ്രവണത അവസാനിപ്പിക്കണമെന്ന് കേരള കോൺഗ്രസ് - എം കൂരാച്ചുണ്ട് മണ്ഡലം കമ്മിറ്റി ആവശ്യപ്പെട്ടു. മണ്ഡലം പ്രസിഡന്‍റ് വിൽസൺ പാത്തിച്ചാലിൽ അധ്യക്ഷത വഹിച്ചു. ജോസഫ് വെട്ടുകല്ലേൽ, എം.സി ജോയി, സിനി ഷിജോ, ബേബി പൂവത്തിങ്കൽ, ജോസഫ് വടക്കേടത്ത്, വിനോദ് വെട്ടുകല്ലേൽ, ബിജോയ് പൂവത്തിങ്കൽ, ബേബി വട്ടപ്പറമ്പിൽ, ബിനോയി മാടവന, ജിതിൻ അരിമണ്ണിൽ, സ്റ്റീഫൻ ഇലവുങ്കൽ എന്നിവർ പ്രസംഗിച്ചു. സിപിഎം കൂരാച്ചുണ്ട് ലോക്കൽ കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും പൊതുയോഗവും സംഘടിപ്പിച്ചു. ലോക്കൽ കമ്മിറ്റി സെക്രട്ടറി കെ.ജി അരുൺ ഉദ്ഘാടനം ചെയ്തു. സുഗുണൻ കറ്റോടി അധ്യക്ഷത വഹിച്ചു. എൻ.കെ കുഞ്ഞമ്മദ്, കെ.ജെ തോമസ്, മാത്യു ആന്‍റോ എന്നിവർ പ്രസംഗിച്ചു. ചക്കിട്ടപാറ: സിപിഎം ചക്കിട്ടപാറയിൽ പ്രകടനവും യോഗവും നടത്തി.പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ഇ.എം. ശ്രീജിത്ത് അധ്യക്ഷത വഹിച്ചു. പി.പി.രഘുനാഥ് മുഖ്യ പ്രഭാഷണം നടത്തി. എം.പി. പ്രകാശൻ, ബിന്ദുസജി, നിഖിൽ നരിനട, ശ്രീധരൻ പെരുവണ്ണാമൂഴി തുടങ്ങിയവർ പ്രകടനത്തിനു നേതൃത്വം നൽകി. കൂടത്തായ്: കൂടത്തായി ലൂർദ് മാതാപള്ളിയുടെ ആഭിമുഖ്യത്തിൽ പ്രതിഷേധ ജ്വാല സംഘടിപ്പിച്ചു. ഇടവക വികാരി ഫാ. അഗസ്റ്റിൻ കണിവേലിൽ, ഫാ. സിബി പൊൻപാറ, സജികരോട്ട്, വിൻസെന്‍റ് കുന്നത്ത് എന്നിവർ നേതൃത്വം നൽകി. മുക്കം: തേക്കുംകുറ്റി ഫാത്തിമ മാതാ ഇടവകയിലെ എകെസിസി കെസിവൈഎം, മാതൃസംഘം, മിഷൻ ലീഗ് സംഘടനകളുടെ ആഭിമുഖ്യത്തിൽ പ്രതിഷേധ റാലി നടത്തി. തേക്കുംകുറ്റി പള്ളിയിൽ നിന്നും തേക്കുംകുറ്റി കുരിശുപള്ളിയിലേക്കാണ് റാലി നടത്തിയത്. ഇടവക വികാരി ഫാ. ജയ്സൺ കാരക്കുന്നേൽ ഐക്യദാർഢ്യ പ്രതിജ്ഞവാചകം ചൊല്ലിക്കൊടുത്തു. സൺഡേ സ്കൂൾ ഹെഡ്മാസ്റ്റർ സണ്ണി തൈക്കൂട്ടത്തിൽ പ്രതിഷേധ പ്രഭാഷണം നടത്തി. ജാൻസൺ മാതിരംപള്ളി, സണ്ണി ചെമ്പോട്ടിക്കൽ, ജോജി പുലിക്കോട്ടിൽ, അനിൽ പരത്തമല എന്നിവർ നേതൃത്വം വഹിച്ചു. പേരാമ്പ്ര: പേരാമ്പ്ര സെന്‍റ് ഫ്രാൻസീസ് ഇടവകയുടെ നേതൃത്വത്തിൽ പ്രതിക്ഷേധ കൂട്ടായ്മ സംഘടിപ്പിച്ചു. അസി. വികാരി ഫാ. റ്റിബിൻ നെടുമറ്റത്തിൽ അധ്യക്ഷത വഹിച്ചു. ഇടവകാ വികാരി ഫാ. ജോർജ്ജ് കുഴിവിളയിൽ പരിപാടി ഉദ്ഘാടനം ചെയ്തു. പാരീഷ് സെക്രട്ടറി അഡ്വ. രാജേഷ് മഞ്ചേരിൽ, സിസ്റ്റർ റിറ്റി ജോസ്, സിസ്റ്റർ റോസ്, ബെന്നി വെമ്പള്ളിൽ, ജയിൻ കല്ലുവേലിക്കുന്നേൽ, പ്രകാശ് കടുവാകുളങ്ങര, ഷാജു പുളിക്കത്താഴെ എന്നിവർ പ്രസംഗിച്ചു. സ്കറിയാച്ചൻ തടത്തിൽ, ജെസ്റ്റിൻ വലിയ വീടൻ തുടങ്ങിയവർ നേതൃത്വം നൽകി. കുടരഞ്ഞി: കൂടരഞ്ഞി ഇടവകയിലെ കത്തോലിക്ക കോൺഗ്രസിന്‍റെയും മറ്റു സംഘടനകളുടെയും നേതൃത്വത്തിൽ പ്രതിഷേധ റാലി നടത്തി. ഇടവക വികാരി ഫാ. സെബാസ്റ്റ്യൻ പുരയിടത്തിൽ, അസിസ്റ്റന്‍റ് വികാരി ഫാ. ജ്യോതിഷ് ചെറുശേരി, പ്രസിഡന്‍റ് ആന്‍റണി കളത്തുപറമ്പിൽ, ടോമി പ്ലാത്തോട്ടം, സെക്രട്ടറി ജോയ് മാഞ്ചിറ എന്നിവർ പ്രസംഗിച്ചു. യൂണിറ്റ് സെക്രട്ടറി അരുൺ ഡിക്രൂസ്, ജിജോ വാളിപ്ലാക്കൽ, സെബാസ്റ്റ്യൻ വള്ളിയാംപൊയ്കയിൽ, ജോസഫ് പ്ലാംപറമ്പിൽ, ജോസ് കുഴമ്പിൽ, ബെന്നി ആലപ്പാട്ട് എന്നിവർ നേതൃത്വം നൽകി.

പന്നിയങ്കര-പന്തീരാങ്കാവ് റോഡ് സർവേ പൂർത്തിയായി

കോഴിക്കോട്: കേരള റോഡ്സ് ഫണ്ട് ബോർഡിന്‍റെ നഗരവികസന പദ്ധതിയിലുൾപ്പെടുത്തി വീതികൂട്ടി പുനർനിർമിക്കുന്ന പന്നിയങ്കര–തിരുവണ്ണൂർ- മീഞ്ചന്ത–പന്തീരാങ്കാവ് റോഡിന്‍റെ സർവേ പൂർത്തിയായി. 25 മീറ്റർ ഇടവിട്ട്‌ സർവേ കല്ലുകൾ പാകി. 18 മീറ്റർ വീതിയിൽ 7.075 കിലോമീറ്റർ നീളത്തിലാണ്‌ റോഡ്‌ നവീകരണം. ഇതിനായി 83.94 കോടി രൂപ സർക്കാർ വകയിരുത്തി. ഉടമകൾക്ക്‌ മതിയായ നഷ്‌ടപരിഹാരം നൽകി ആറര ഹെക്ടർ ഭൂമി ഏറ്റെടുക്കും. ഊരാളുങ്കൽ ലേബർ കോൺട്രാക്ട്‌ കോ-ഓപറേറ്റീവ്‌ സൊസൈറ്റിയാണ്‌ സർവേ നടത്തിയത്. തുടർ നടപടി ഉടൻ ആരംഭിക്കുമെന്ന്‌ അധികൃതർ അറിയിച്ചു. കലക്ടറുടെ വിജ്ഞാപനത്തിനുശേഷം ഭൂമി ഏറ്റെടുക്കും. തുടർന്ന്‌ പദ്ധതിരേഖ തയ്യാറാക്കി നിർമാണം ആരംഭിക്കും. പന്നിയങ്കര, ചെറുവണ്ണൂർ, ഒളവണ്ണ, പന്തീരാങ്കാവ് വില്ലേജുകളിൽനിന്നാണ് ഭൂമി ഏറ്റെടുക്കുന്നത്. ഒന്നാം റീച്ചായ പന്നിയങ്കരമുതൽ- തിരുവണ്ണൂർ ബൈപാസുവരെയുള്ള 1.1 കിലോമീറ്റർ പാതയ്‌ക്കായി പന്നിയങ്കര വില്ലേജിൽനിന്ന്‌ ഭൂമി ഏറ്റെടുക്കും. തിരുവണ്ണൂർ ബൈപസിലൂടെയും പിന്നീട് കുറച്ച് ദൂരം വട്ടക്കിണർ- രാമനാട്ടുകര ഹൈവേയിലൂടെയും ചേർന്നുപോകുന്ന റോഡിന്‍റെ പിന്നീടുള്ള തുടർച്ച രണ്ടാം റീച്ചായ അരീക്കാട്ടുനിന്നാണ്. അരീക്കാട്, നല്ലളം, ഒളവണ്ണ, കൊടിനാട്ടുമുക്ക്, ചാത്തോത്തറ വഴി പന്തീരാങ്കാവിലേക്ക് എത്തുംവിധമാണ് റോഡ് വീതികൂട്ടുന്നത്. വീതികൂട്ടി പുനർനിർമിക്കുന്ന പന്നിയങ്കര-പന്തീരാങ്കാവ് റോഡ് വേഗത്തിൽ യാഥാർഥ്യമാക്കാൻ നിർദേശങ്ങൾ നൽകി. ഭൂമി ഏറ്റെടുക്കൽ വിപുലമായ നടപടിയാണ്. മതിയായ നഷ്ടപരിഹാരം നൽകിയായിരിക്കും ഏറ്റെടുക്കുക. 18 മീറ്റർ വീതിയിൽ നാലുവരി ബൈപാസായി രൂപപ്പെടുന്നതോടെ ദേശീയപാതയിലെ ഗതാഗതം സുഗമമാകും.

കനാലില്‍ സ്ത്രീയുടെ മൃതദേഹം കണ്ടെത്തി

വടകര: തോടന്നൂരില്‍ വടകര-മാഹി കനാലില്‍ സ്ത്രീയുടെ മൃതദേഹം കണ്ടെത്തി. തോടന്നൂര്‍ കവുന്തന്‍നട കാല്‍നട പാലത്തിന് സമീപത്തായാണ് അമ്പത് വയസ് തോന്നിക്കുന്ന സ്ത്രീയുടെ മൃതദേഹം കണ്ടെത്തിയത്. ആളെ തിരിച്ചറിഞ്ഞിട്ടില്ല. കനാലില്‍ ജോലി ചെയ്യുന്ന തൊഴിലാളികളാണ് മൃതദേഹം കണ്ടത്. ദിവസങ്ങള്‍ പഴക്കമുള്ളതിനാല്‍ ശരീരം അഴുകിയ നിലയിലാണ്. മാക്‌സിയാണ് വേഷം. പോലീസും ഫയര്‍ ഫോഴ്‌സുമെത്തി മൃതദേഹം വടകര ജില്ലാ ആശുപത്രി മോര്‍ച്ചറിയിലേക്ക് മാറ്റി.

ജോബ് ഡ്രൈവ് നാളെ

കോഴിക്കോട്: ജില്ലാ എംപ്ലോയ്‌മെന്‍റ് എക്‌സ്‌ചേഞ്ചിലെ എംപ്ലോയബിലിറ്റി സെന്‍ററില്‍ 31ന് രാവിലെ 10.30ന് ജോബ് ഡ്രൈവ് സംഘടിപ്പിക്കും. ബിസിനസ് ഡെവലപ്‌മെന്‍റ് എക്‌സിക്യൂട്ടീവ്, ഷോറൂം സെയില്‍സ്, സെയില്‍സ് എക്‌സിക്യൂട്ടീവ്, ഗസ്റ്റ് റിലേഷന്‍ എക്‌സിക്യൂട്ടീവ്, ടെലി സെയില്‍സ്, ബില്ലിംഗ് ആൻഡ് ക്യാഷ്, സ്റ്റോര്‍ കീപ്പര്‍, വെയര്‍ ഹൗസ് ഹെല്‍പ്പര്‍, അക്കൗണ്ടന്‍റ്, ബ്രാഞ്ച് മാനേജര്‍, ബിസിനസ് ഡെവലപ്‌മെന്‍റ് മാനേജര്‍, സെയില്‍സ് ഡെവലപ്‌മെന്‍റ് മാനേജര്‍, ഫിനാന്‍സ് കണ്‍സല്‍ട്ടന്‍റ് എന്നീ തസ്തികകളിലേക്കാണ് കൂടിക്കാഴ്ച. യോഗ്യത: പ്ലസ് ടു/ ഡിഗ്രി. എംപ്ലോയബിലിറ്റി സെന്‍ററില്‍ പേര് രജിസ്റ്റര്‍ ചെയ്തവര്‍ക്ക് സൗജന്യമായും അല്ലാത്തവര്‍ക്ക് 300 രൂപ ഫീസ് അടച്ച് സ്‌പോട്ട് രജിസ്‌ട്രേഷന്‍ നടത്തിയും പങ്കെടുക്കാം. ഫോണ്‍: 0495 2370176.

കർഷക കോൺഗ്രസ് പ്രതിഷേധ പ്രകടനം നടത്തി

കോടഞ്ചേരി: സംസ്ഥാന സർക്കാരിന്‍റെ നയങ്ങൾക്കെതിരേ സമാധാനപരമായി പ്രതിഷേധിച്ച കർഷക കോൺഗ്രസ് നേതാക്കളെ മർദിച്ചു ജയിലിൽ അടച്ച നടപടിയിൽ പ്രതിഷേധിച്ച് കർഷക കോൺഗ്രസ് നെല്ലിപ്പൊയിൽ മണ്ഡലം കമ്മിറ്റി അങ്ങാടിയിൽ പ്രതിഷേധ പ്രകടനവും പൊതുസമ്മേളനം നടത്തി. കോൺഗ്രസ് മണ്ഡലം പ്രസിഡന്‍റ് വിൻസെന്‍റ് വടക്കേമുറിയിൽ ഉദ്ഘാടനം ചെയ്തു. കർഷക കോൺഗ്രസ് മണ്ഡലം പ്രസിഡന്‍റ് സാബു അവണ്ണൂർ അധ്യക്ഷത വഹിച്ചു.ബ്ലോക്ക് കോൺഗ്രസ് കമ്മിറ്റി ഭാരവാഹികളായ ടോമി ഇല്ലിമൂട്ടിൽ, വിൽസൺ തറപ്പേൽ, സാബു മനയിൽ, ബേബി കളപ്പുര, ബിജു ഓത്തിക്കൽ, സേവിയർ കിഴക്കേ കുന്നേൽ, പി.കെ. സ്കറിയ, റോയി ഊന്നുകല്ലേൽ, ജോസഫ് കുറൂര്, ചാക്കോ ഓരത്ത്, ബെന്നി പല്ലാട്ട്, സജി വള്ളിയാപൊയ്ക, മാത്യു പൊട്ടുകുളത്ത് എന്നിവർ പ്രസംഗിച്ചു.

പ്രകൃതി സൗഹാർദ പുരസ്‌കാരം കർഷകന് കൈമാറി

കൂരാച്ചുണ്ട്: യൂത്ത് കോൺഗ്രസ്‌ കൂരാച്ചുണ്ട് മണ്ഡലം കമ്മിറ്റി ലോക പ്രകൃതി സംരക്ഷണ ദിനാചരണത്തിൽ ഏർപ്പെടുത്തിയ ഒന്നാമത് "പ്രകൃതി സൗഹാർദ പുരസ്‌കാരം' മുതിർന്ന കർഷകൻ തങ്കപ്പൻ പണിക്കാശേരിക്ക് കൈമാറി. കോൺഗ്രസ്‌ മണ്ഡലം വൈസ് പ്രസിഡന്‍റ് ഷാജു കാരക്കട പുരസ്‌കാരം നൽകി. യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. കോൺഗ്രസ്‌ മണ്ഡലം വൈസ് പ്രസിഡന്‍റ് ജെറിൻ കുര്യാക്കോസ്, ഐഎൻടിയുസി ജില്ലാ സെക്രട്ടറി കുര്യൻ ചെമ്പനാനി, സണ്ണി പാരഡൈസ്, വി.ജെ. സെബാസ്റ്റ്യൻ, യൂത്ത് കോൺഗ്രസ്‌ നിയോജക മണ്ഡലം ജനറൽ സെക്രട്ടറി വിഷ്ണു തണ്ടോറ, കെഎസ്‌യു മണ്ഡലം പ്രസിഡന്‍റ് രാഹുൽ രാഘവൻ, സന്ദീപ് കളപ്പുരയ്ക്കൽ, ജ്യോതിഷ് രാരപ്പൻകണ്ടി, അജ്മൽ ചാലിടം, ലിബിൻ പാവത്തികുന്നേൽ, ഷാരോൺ പൂവത്തുംചോല എന്നിവർ പ്രസംഗിച്ചു.

സെന്‍ട്രല്‍ മാര്‍ക്കറ്റ് വികസനം: ‘കച്ചവടക്കാരുടെ താത്പര്യങ്ങൾ പരിഗണിക്കണം’

കോഴിക്കോട്: സെന്‍ട്രല്‍ മാര്‍ക്കറ്റിലെ വികസന പ്രവര്‍ത്തനങ്ങള്‍ കച്ചവടക്കാരുടെ താത്പര്യങ്ങള്‍ കൂടി പരിഗണിച്ച് കൊണ്ടാവണമെന്ന് ഇന്ത്യന്‍ നാഷണല്‍ വ്യാപാരി വ്യവസായി കോണ്‍ഗ്രസ് സംസ്ഥാന നേതൃയോഗം കോര്‍പറേഷനോട് ആവശ്യപ്പെട്ടു. കച്ചവടക്കാരെ പരിഗണിക്കാതെ മാര്‍ക്കറ്റില്‍ നവീകരണം നടത്തരുതെന്നും യോഗം ആവശ്യപ്പെട്ടു. ഡിസിസിയില്‍ നടന്ന യോഗത്തില്‍ സംസ്ഥാന പ്രസിഡന്‍റ് ഡോ. പാളയം അശോക് അധ്യക്ഷത വഹിച്ചു. സംസ്ഥാന കോഓർഡിനേറ്റര്‍ പേരൂര്‍ക്കട മോഹനന്‍ പ്രവര്‍ത്തന റിപ്പോര്‍ട്ട് അവതരിപ്പിച്ചു. ഡിസിസി ജനറല്‍ സെക്രട്ടറി പി.എം. അബ്ദുറഹ്മാന്‍, കോഴിക്കോട് ജില്ലാ പ്രസിഡന്‍റ് കെ.വി. കൃഷ്ണന്‍, സംസ്ഥാന സെക്രട്ടറിമാരായ മുത്തുസാമി, ജേക്കബ് ഫെര്‍ണാണ്ടസ്, ഫാറൂഖ് കേച്ചേരി, ജില്ലാ ഭാരവാഹികളായ ടി.പി.ഷാജി, മുഹമ്മദ് അഷറഫ്, സാബിര്‍ഖാന്‍, ഹരിദാസന്‍ അത്തോളി, പി.ഗഫൂര്‍ എന്നിവര്‍ പ്രസംഗിച്ചു.

ഡിഡിഇ ഓഫീസിലേക്ക് എസ്എഫ്‌ഐ മാര്‍ച്ച് നടത്തി

കോഴിക്കോട്: അവകാശ പത്രിക അംഗീകരിക്കണമെന്ന മുദ്രാവാക്യമുയര്‍ത്തി കോഴിക്കോട് ഡിഡിഇ ഓഫിസിലേക്ക് എസ്എഫ്‌ഐ വിദ്യാര്‍ഥി മാര്‍ച്ച് സംഘടിപ്പിച്ചു. ഗവര്‍ണറെ ചാന്‍സലര്‍ സ്ഥാനത്ത് നിന്ന് നീക്കുക, സ്വകാര്യ സെല്‍ഫ് ഫിനാന്‍സിംഗ് കോളജുകളുടെ ഫീസ് നിയന്ത്രിക്കുവാനുള്ള സര്‍വകലാശാല സമിതി രൂപീകരിക്കുക തുടങ്ങിയ ആവശ്യങ്ങള്‍ ഉന്നയിച്ചായിരുന്നു മാര്‍ച്ച്. മലബാര്‍ ക്രിസ്ത്യന്‍ കോളജ് ഗ്രൗണ്ടില്‍നിന്ന് ആരംഭിച്ച മാര്‍ച്ച് ഡിഡിഇ ഓഫീസിന് മുന്പില്‍ സമാപിച്ചു. കേന്ദ്ര എക്സിക്യൂട്ടീവ് കമ്മിറ്റി അംഗം ബിപിന്‍രാജ് പായം ഉദ്ഘാടനം ചെയ്തു. ജില്ലാ പ്രസിഡന്‍റ് ടി.പി. അമല്‍രാജ് അധ്യക്ഷത വഹിച്ചു.സംസ്ഥാന കമ്മിറ്റി അംഗങ്ങളായ എസ്. നന്ദന, ഖദീജ ഹിബ, അനഘ, ജില്ലാ ജോയിന്‍റ് സെക്രട്ടറി സ്വരാഗ്, അശ്വന്ത് ചന്ദ്ര, സംസ്ഥാന കമ്മിറ്റി അംഗം സരോദ് ചങ്ങാടത്ത്, മുഹമ്മദ് ഫര്‍ഹാന്‍ എന്നിവര്‍ സംസാരിച്ചു.

വിദ്യാർഥികൾക്ക് ബോധവത്കരണം നൽകി

കുളത്തുവയൽ: കുളത്തുവയൽ സെന്‍റ് ജോർജസ് ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെയും സ്കൗട്ട് ആൻഡ് ഗൈഡൻസിന്‍റെയും നേതൃത്വത്തിൽ പെയിൻ ആൻഡ് പാലിയേറ്റീവ് പരിചരണത്തെക്കുറിച്ചുള്ള ബോധവത്കരണവും പരിശീലനവും സംഘടിപ്പിച്ചു. സ്കൂൾ പ്രിൻസിപ്പൽ കെ.പി. ജോസ് അധ്യക്ഷത വഹിച്ചു. സാന്ത്വന പരിചരണത്തിന്‍റെ ആവശ്യകതയെക്കുറിച്ച് വിദ്യാർഥികളിൽ അവബോധമുണ്ടാക്കുകയെന്ന ലക്ഷ്യത്തോടെ സുരക്ഷാ പാലിയേറ്റീവ് സെക്രട്ടറി സി. മുഹമ്മദ്, പാലിയേറ്റീവ് പ്രവർത്തനങ്ങൾ പ്രോത്സാഹിപ്പിക്കുകയെന്ന വിഷയത്തിൽ ജാൻ ട്രസ്റ്റ്‌ ഡയറക്ടർ ജസ്‌ലീന അമേത്ത് എന്നിവർ ക്ലാസുകൾ നയിച്ചു. പെയിൻ ആൻഡ് പാലിയേറ്റീവ് രൂപത പ്രസിഡന്‍റ് ബേബി സെബാസ്റ്റ്യൻ, എൻഎസ്എസ് കോഓർഡിനേറ്റർ അഞ്ജു എൽസ ജോയ്, സ്കൂൾ സ്കൗട്ട് ആൻഡ് ഗൈഡ്സ് ക്യാപ്റ്റൻമാരായ ജനേഷ് ദേവസ്യ, ടി. നമിത, ഷാന്‍റി ജേക്കബ്, ഗീതിക, എൻഎസ്എസ് വോളണ്ടിയർ അങ്കിത ബോസ് എന്നിവർ പ്രസംഗിച്ചു.

കക്കയം ഡാം സൈറ്റ് റോഡ് കാടുമൂടി; യാത്രക്കാർക്ക് അപകട ഭീഷണി

കൂരാച്ചുണ്ട്: പൊതുമരാമത്ത് വകുപ്പിന്‍റെ അധീനതയിലുള്ള കക്കയം ഡാം സൈറ്റ് റോഡിന്‍റെ ഇരുഭാഗങ്ങളിലും കാടുമൂടി യാത്രക്കാരുടെ കാഴ്ച മറയ്ക്കുന്നതായി ആക്ഷേപം. ഡാം സൈറ്റ് മേഖലയിൽ പ്രവർത്തിക്കുന്ന വിനോദ സഞ്ചാര കേന്ദ്രങ്ങളിലേക്ക് ജില്ലയുടെ വിവിധ ഭാഗങ്ങളിൽ നിന്നായി ഒട്ടനവധി വിനോദസഞ്ചാരികളാണ് യാത്ര ചെയ്യുന്നത്. എന്നാൽ സമയബന്ധിതമായി റോഡരികിലെ കാടുവെട്ടി നീക്കാൻ അധികൃതർ തയാറായിട്ടില്ല. പാടെ വീതി കുറഞ്ഞ ഡാം റോഡിൽ കാടുമൂലം ഒരേസമയം രണ്ടു വാഹനങ്ങൾ കടന്നുപോകാൻ പാടുപെടുന്നുണ്ട്. കൂടാതെ ഡാം മേഖലയിലുള്ള കെഎസ്ഇബി ജീവനക്കാർ, പോലീസ് ഉദ്യോഗസ്ഥർ, വനംവകുപ്പ് ഉദ്യോഗസ്ഥരും മേഖലയിൽ താമസിക്കുന്ന കുടുംബങ്ങളും ഇതുവഴിയാണ് യാത്ര ചെയ്യുന്നത്. അപകട ഭീക്ഷണിയായി തീർന്ന കാട് അടിയന്തരമായി വെട്ടിനീക്കണമെന്നാണ് വ്യാപകമായി ആവശ്യമുയരുന്നത്.

വേനപ്പാറ ഇടവകയോഗം പ്രതിഷേധിച്ചു

കോഴിക്കോട്: ഛത്തീസ്ഗഡിൽ രണ്ടു മലയാളി കന്യാസ്ത്രീകളെ അറസ്റ്റ് ചെയ്ത സംഭവത്തിൽ വേനപ്പാറ ഇടവകയോഗം ശക്തമായി പ്രതിഷേധിച്ചു. കേന്ദ്ര, സംസ്ഥാന സർക്കാരുകൾ അടിയന്തരമായി ഇടപെട്ട് കേസ് റദ്ദാക്കാൻ വേണ്ട നടപടികൾ സ്വീകരിക്കണമെന്ന് യോഗം അഭ്യർഥിച്ചു. വികാരി ഫാ. സ്കറിയ മങ്ങരയിൽ അധ്യക്ഷത വഹിച്ചു. പാരീഷ് സെക്രട്ടറി കുര്യാക്കോസ്ചേന്ദംകുളം, ട്രസ്റ്റി ജോർജ് കല്ലിടുക്കിൽ എന്നിവർ പ്രസംഗിച്ചു.

ഭരണകൂട ഭീകരതയിൽ പ്രതിഷേധിച്ചു

കുപ്പായക്കോട്: ഛത്തിസ്ഗഡില്‍ നിരപരാധികളായ രണ്ടു കന്യാസ്ത്രീകളെ ജയിലില്‍ അടച്ച ഭരണകൂട ഭീകരതയില്‍ കുപ്പായക്കോട് എകെസിസി യൂണിറ്റ് പ്രതിഷേധിച്ചു. ഇല്ലാത്തകുറ്റം ചുമത്തി നിരപരാധികളെ ജയിലില്‍ അടച്ചാല്‍ ക്രിസ്തുമത വിശ്വാസം ഇന്ത്യയില്‍നിന്നു തുടച്ചുനീക്കാമെന്നു വിചാരിക്കുന്നവര്‍ മൂഢ സ്വര്‍ഗത്തിലാണ് ജീവിക്കുന്നത്. മതസ്വാതന്ത്ര്യം ഇന്ത്യന്‍ ഭരണഘടന നല്‍കുന്ന അവകാശമാണ്. അത് സംരക്ഷിക്കാന്‍ എന്ത് ത്യാഗവും സഹിക്കാന്‍ ഇന്ത്യയിലെ ക്രിസ്ത്യാനികള്‍ തയാറാണെന്ന് എകെസിസി ചൂണ്ടിക്കാട്ടി. കുപ്പായക്കോട് ഇടവക വികാരി ഫാ. ജയിംസ് കുഴിമറ്റത്തിലിന്‍റെ അധ്യക്ഷതയില്‍ ചേര്‍ന്ന യോഗം രാജു ജോസ് ചുള്ളമടത്തില്‍ ഉദ്ഘാടനം ചെയ്തു. ബിജു വെട്ടിത്താനം, ബെന്നി വയലില്‍, ജോയി കാളംപറമ്പില്‍, ഫ്രാന്‍സിസ് ഒറങ്ങര എന്നിവര്‍ പ്രസംഗിച്ചു.

‘ഭരണഘടനാ സംവിധാനങ്ങളെ ‌‌ ആയുധമാക്കരുത് ’

കോഴിക്കോട്: ഭാരതത്തിന്‍റെ പൈതൃകവും വ്യക്തി സ്വാതന്ത്ര്യത്തിന്‍റെ മൗലിക ബോധ്യങ്ങളും സംരക്ഷിക്കേണ്ട ഭരണഘടനാ സംവിധാനങ്ങൾ അധികാരഭ്രമത്താൽ അസഹിഷ്ണുതയുടെ പ്രചാരകരായി മാറിയെന്ന് മലങ്കര ഓർത്തഡോക്സ് സുറിയാനി സഭയുടെ മലബാർ ഭദ്രാസനാധിപൻ ഗീവർഗീസ് മാർ പക്കോമിയോസ് മെത്രാപ്പോലീത്താ. ഇതിന്‍റെ പരിണിതഫലമാണ് ഛത്തീസ്ഗഡിലെ ദുർഗിൽ കന്യാസ്ത്രീകൾക്ക് നേരെ ഉണ്ടായ അതിക്രമമെന്നും മെത്രാപ്പോലീത്താ കൂട്ടിച്ചേർത്തു. ഭരണകൂടങ്ങളുടെ പക്ഷപാതപരമായ മനോഭാവത്തിൽ പ്രതിഷേധിച്ച് ഭദ്രാസന ആസ്ഥാനമായ ചാത്തമംഗലം മൗണ്ട് ഹെർമോൻ അരമനയിൽ ചേർന്ന പൊതുയോഗത്തിൽ മലബാർ ഭദ്രാസന സെക്രട്ടറി ഫാ. ബോബി പീറ്റർ പ്രതിഷേധ പ്രമേയം അവതരിപ്പിച്ചു.

കുറ്റക്കാർക്കെതിരേ നടപടി സ്വീകരിക്കണമെന്ന്

കൂടരഞ്ഞി: ഛത്തീസ്ഗഡിൽ രണ്ട് മലയാളി കന്യാസ്ത്രീകളെ വ്യാജ ആരോപണങ്ങൾ ഉന്നയിച്ച് അറസ്റ്റ് ചെയ്ത് ജയിലിൽ അടച്ച സംഭവത്തിൽ കേന്ദ്രസർക്കാർ അടിയന്തരമായി ഇടപെടണമെന്ന് കൂടരഞ്ഞി വൈഎംസിഎ ജനറൽ ബോഡി ആവശ്യപ്പെട്ടു. ജയിലിൽ അടച്ചവർക്കെതിരേ നടപടി സ്വീകരിക്കണം. ഭരണഘടന സംരക്ഷിക്കേണ്ട ഛത്തീസ്ഗഡ് മുഖ്യമന്ത്രി വ്യാജ ആരോപണങ്ങൾ ശരിവച്ചത് രാജ്യത്തെ ജനങ്ങൾക്ക് തെറ്റായ സന്ദേശമാണ് നൽകുന്നതെന്നും യോഗം വിലയിരുത്തി. പ്രസിഡന്‍റ് തങ്കച്ചൻ കൊച്ചുകൈപ്പേൽ അധ്യക്ഷത വഹിച്ചു. സെക്രട്ടറി ജ്യോതിഷ് ചാക്കോ, ജോർജ് മങ്കര, സാജു വർഗീസ്, മാത്യു വർഗീസ്, ജിജി കിഴക്കരക്കാട്ട്, ഷാജു കൊല്ലിച്ചിറയിൽ, ബെന്നി മങ്കര, ഷാജി വള്ളികുന്നേൽ തുടങ്ങിയവർ പ്രസംഗിച്ചു.

കന്യാസ്ത്രീകളുടെ അറസ്റ്റിൽ പ്രതിഷേധിച്ചു

കൂരാച്ചുണ്ട്: ഛത്തീസ്ഗഡിൽ കന്യാസ്ത്രീകളെ കള്ളക്കേസ് ചമച്ച് ജയിലിലടച്ചത് ഫാസിസ ഭരണകൂടത്തിന്‍റെ ഗൂഢലോചനയുടെ തെളിവാണെന്ന് കത്തോലിക്ക കോൺഗ്രസ് മേഖലാ കമ്മിറ്റി യോഗം ആരോപിച്ചു. കേരളത്തിൽ കപട ക്രൈസ്തവ സ്നേഹം നടിച്ച് അരമനകൾ കയറിയിറങ്ങി വോട്ടു ബാങ്ക് ലക്ഷ്യമിടുന്നവരുടെ യഥാർഥ മുഖം തിരിച്ചറിയാൻ ഛത്തീസ്ഗഡിലെ ക്രൈസ്തവ വേട്ട സഹായിച്ചുവെന്നും സംഭവത്തെ യോഗം ശക്തമായി അപലപിക്കുകയും ചെയ്തു. ഫൊറോന ഡയറക്ടർ ഫാ. വിൻസെന്‍റ് കണ്ടത്തിൽ ഉദ്ഘാടനം ചെയ്തു. ഭാരവാഹികളായ ജോസ് ചെറുവള്ളിൽ, ജോൺസൺ കക്കയം, ബോബൻ പുത്തൂരാൻ, നിമ്മി പുതിയട്ടേൽ, ദാസ് കാനാട്ട്, സണ്ണി എമ്പ്രയിൽ, ബിനോജ് വടക്കേടം, ജോബി കുന്നേൽ, ജയിംസ് കൂരാപ്പള്ളി എന്നിവർ പ്രസംഗിച്ചു.

സാമൂഹ്യ സേവനത്തിനായി വ്രതമെടുത്തവരെ അപമാനിക്കരുത്: കേരള കോണ്‍ഗ്രസ്-എം

കോഴിക്കോട്: ഛത്തീസ്ഗഡിലെ ദുര്‍ഗില്‍ രണ്ട് മലയാളി കന്യാസ്ത്രീകള്‍ക്കു നേരെ ബജ്രംഗ്ദള്‍ പ്രവര്‍ത്തകര്‍ നടത്തിയ ആക്രമണവും പോലീസ് ചുമത്തിയ കള്ളക്കേസും രാജ്യത്തെയാകമാനം അപകീര്‍ത്തിപ്പെടുത്തിയെന്ന് കേരള കോണ്‍ഗ്രസ്-എം കോഴിക്കോട് ജില്ലാ നേതൃത്വ യോഗം അഭിപ്രായപ്പെട്ടു. സാമൂഹ്യ - ജീവകാരുണ്യ പ്രവര്‍ത്തനങ്ങള്‍ക്കായി വ്രതമെടുത്ത സന്യസ്തരെ അപകീര്‍ത്തിപ്പെടുത്തിയ ബിജെപി സര്‍ക്കാരിന് അധികാരത്തില്‍ തുടരാന്‍ അര്‍ഹതയില്ലെന്ന് യോഗം വ്യക്തമാക്കി. ജില്ലാ പ്രസിഡന്‍റ് ടി.എം. ജോസഫ് അധ്യക്ഷത വഹിച്ചു. കെ.എം പോള്‍സണ്‍, ബേബി കാപ്പുകാട്ടില്‍, കെ. കെ നാരായണന്‍, ബോബി മൂക്കന്‍തോട്ടം, ജോസഫ് വെട്ടുകല്ലേല്‍, സുരേന്ദ്രന്‍ പാലേരി, ആന്‍റണി ഈരൂരി, വയലാങ്കര മുഹമ്മദ് ഹാജി, ബോബി ഓസ്റ്റ്യന്‍, ജോസഫ് മൂത്തേടത്ത്, റോയി മുരിക്കോലില്‍, റുഖിയ ബീവി, പ്രിന്‍സ് പുത്തന്‍കണ്ടം എന്നിവര്‍ പ്രസംഗിച്ചു.

സംരംഭക കർഷകർക്ക് കുടുംബശ്രീ കെ ടാപ്

കോഴിക്കോട്: കുടുംബശ്രീ ജില്ലാമിഷന്‍റെ നേതൃത്വത്തില്‍ കാര്‍ഷിക മേഖലയിലെ സംരംഭങ്ങളെ മികവുറ്റതാക്കാനുള്ള കുടുംബശ്രീ ടെക്‌നോളജി അഡ്വാന്‍സ്‌മെന്‍റ് പ്രോഗ്രാമി (കെ ടാപ്)ന്‍റെ പരിശീലനം സംഘടിപ്പിച്ചു. കുടുംബശ്രീയുടെ കാര്‍ഷിക സംരംഭ യൂണിറ്റുകള്‍ക്ക് നൂതന സാങ്കേതികവിദ്യകള്‍ സൗജന്യമായി നല്‍കി കുടുംബശ്രീ പ്രവര്‍ത്തകര്‍ക്ക് കാര്‍ഷിക മേഖലയില്‍ ഉപജീവന മാര്‍ഗവും തൊഴില്‍ അവസരങ്ങളും സൃഷ്ടിക്കുക എന്ന ലക്ഷ്യത്തോടെയാണ് പരിശീലനം സംഘടിപ്പിച്ചത്. ജില്ലയിലെ സിഡിഎസ് ചെയര്‍പേഴ്സണ്‍മാര്‍, കുടുംബശ്രീ സംരംഭകർ തുടങ്ങി 300പേര്‍ പങ്കെടുത്തു. ഇരിങ്ങല്‍ ക്രാഫ്റ്റ് വില്ലേജില്‍ നടന്ന പരിപാടി കുടുംബശ്രീ ജില്ലാ മിഷന്‍ കോഓര്‍ഡിനേറ്റര്‍ പി.സി. കവിത ഉദ്ഘാടനം ചെയ്തു. കുടുംബശ്രീ കാർഷിക മേഖലാ സംസ്ഥാന മിഷന്‍ പ്രോഗ്രാം ഓഫീസര്‍ ഡോ. ഷാനവാസ് ക്ലാസെടുത്തു. അസി. ജില്ലാ മിഷന്‍ കോഓര്‍ഡിനേറ്റര്‍മാരായ പി. സൂരജ്, എസ്.കെ. അതുല്‍ രാജ്, സംസ്ഥാന മിഷന്‍ അസി. പ്രോഗ്രാം മാനേജര്‍ ഡോ. ഷമീന, ജില്ലാ പ്രോഗ്രാം മാനേജര്‍ ആരതി വിജയന്‍ തുടങ്ങിയവർ പ്രസംഗിച്ചു.

യാത്രയയപ്പ് നൽകി

മുക്കം: കൊടിയത്തൂർ പഞ്ചായത്ത് സെക്രട്ടറിയായിരിക്കെ കുന്നമംഗലത്തേക്ക് ബ്ലോക്ക് ഡെവലപ്മെന്‍റ് ഓഫീസറായി സ്ഥലം മാറിപ്പോവുന്ന ടി. ആബിദ, കുന്നമംഗലം പഞ്ചായത്തോഫീസിലേക്ക് സ്ഥലം മാറിപ്പോവുന്ന ഐസിഡിഎസ് സൂപ്പർവൈസർ പി.കെ ലിസ, അസിസ്റ്റന്‍റ് സെക്രട്ടറിയായി സ്ഥാനക്കയറ്റം കിട്ടി പോവുന്ന ഹെഡ് ക്ലാർക്ക് അഷ്റഫ്, സ്ഥലം മാറിപ്പോവുന്ന ഡ്രൈവർ സുരേഷ് എന്നിവർക്ക് കൊടിയത്തൂർ പഞ്ചായത്ത് ഭരണസമിതി യാത്രയയപ്പ് നൽകി. പഞ്ചായത്ത് കോൺഫറൻസ് ഹാളിൽ നടന്ന ചടങ്ങിൽ പഞ്ചായത്ത് പ്രസിഡന്‍റ് ദിവ്യ ഷിബു ഉപഹാരം സമർപ്പിച്ചു. പഞ്ചായത്ത് ജീവനക്കാരുടെ ഉപഹാരവും ചടങ്ങിൽ വിതരണം ചെയ്തു. വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു.

പ്രതിഭാദരം സംഘടിപ്പിച്ചു

മുക്കം: പാഠ്യപാഠ്യേതര രംഗത്ത് മികച്ച നിലവാരം പുലർത്തുന്ന പന്നിക്കോട് എയുപി സ്കൂളിൽ ഈ വർഷത്തെ പ്രതിഭാദരം പരിപാടി ഏറെ വ്യത്യസ്തമായി. സ്കൂളിൽ നിന്നും ഈ വർഷം യുഎസ്എസ് നേടിയ 15 വിദ്യാർഥികൾക്കും മാനേജർ സി.കേശവൻ നമ്പൂതിരിയുടെ വകയായി സ്വർണ നാണയമാണ് സമ്മാനമായി നൽകിയത്. കഴിഞ്ഞ മൂന്ന് വർഷമായി ഇത്തരത്തിൽ മാനേജരുടെ നേതൃത്വത്തിൽ യുഎസ്എസ് ജേതാക്കൾക്ക് സ്വർണ മെഡൽ നൽകി വരുന്നുണ്ട്. പരിപാടി കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. എഴുത്തുകാരൻ യു.കെ കുമാരൻ മുഖ്യാതിഥിയായി. കലുഷിതമായ കാമ്പസുകളും വിദ്യാർഥി സംഘട്ടനങ്ങളുമൊക്കെ സർവസാധാരണമായ ഇക്കാലത്ത് വായനയുടെയും എഴുത്തിന്‍റെയും ലോകം വിദ്യാർഥികൾക്ക് പുതിയ വാതായനങ്ങൾ തുറക്കുമെന്ന് അദ്ദേഹം പറഞ്ഞു. ചടങ്ങിൽ പിടിഎ പ്രസിഡന്‍റ് ബഷീർ പാലാട്ട് അധ്യക്ഷത വഹിച്ചു. വിവിധ മേഖലകളിൽ ഉന്നത വിജയം നേടിയവർക്ക് വിശിഷ്ടാതിഥികൾ സമ്മാനങ്ങൾ വിതരണം ചെയ്തു. പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ, അംഗങ്ങളായ ബാബു പൊലുകുന്ന്, യു.പി. മമ്മദ്, മാനേജർ സി. കേശവൻ നമ്പൂതിരി, പ്രസ് ക്ലബ് പ്രസിഡന്‍റ് സി. ഫസൽബാബു, ഡോ. കമൽ മാധവ്, പ്രധാനാധ്യാപിക സജ്നി, എംപിടിഎ പ്രസിഡന്‍റ് റസീന മജീദ്, സ്റ്റാഫ് സെക്രട്ടറി പി.കെ. ഹഖീം കളൻതോട്, പി.പി. റസ്‌ല, പി.എം. ഗൗരി, സുഭഗ ഉണ്ണികൃഷ്ണൻ തുടങ്ങിയവർ പ്രസംഗിച്ചു.

ഒന്പതുവയസുകാരനെ ലൈംഗികമായി ഉപദ്രവിച്ച പ്രതിക്ക് അഞ്ചുവര്‍ഷം കഠിനതടവ്

കൊയിലാണ്ടി: ഒന്പതുവയസുകാരനെ ലൈംഗികമായി ഉപദ്രവിച്ച പ്രതിക്ക് അഞ്ചുവര്‍ഷം കഠിനതടവും പതിനേഴായിരം രൂപ പിഴയും. പുതുപ്പാടി എലോക്കര കുന്നുമ്മല്‍വീട്ടില്‍ മുസ്തഫ (52)യെയാണ് പോക്‌സോ നിയമപ്രകാരം ശിക്ഷിച്ചത്. 2018ലാണ് കേസിനാസ്പദമായ സംഭവം. കുട്ടിയെ പ്രതിയുടെ വീട്ടിലേക്ക് മറ്റാരുമില്ലാത്ത സമയത്ത് കൂട്ടിക്കൊണ്ടുപോയി ലൈംഗികമായി ഉപദ്രവിച്ചെന്നാണ് കേസ്. സ്‌കൂളില്‍ പോക്‌സോ നിയമത്തെ സംബന്ധിച്ച് ക്ലാസ് കേട്ടതിനുശേഷം കുട്ടി രക്ഷിതാക്കളോട് കാര്യം പറയുകയും പോലീസില്‍ വിവരം അറിയിക്കുകയുമായിരുന്നു. ഇയാള്‍ നേരത്തെയും പോക്സോ കേസില്‍ ശിക്ഷിക്കപ്പെട്ടയാളാണ്. താമരശേരി പോലീസ് രജിസ്റ്റര്‍ ചെയ്ത കേസ് സബ് ഇന്‍സ്‌പെക്ടര്‍ വി.കെ. റസാഖാണ് അന്വേഷിച്ചത്. പ്രോസീക്യൂഷനുവേണ്ടി അഡ്വ. പി. ജെതിന്‍ ഹാജരായി.

വാര്‍ഡ് വിഭജനം: ഡീലിമിറ്റേഷൻ കമ്മീഷൻ ഹിയറിംഗ് നാളെ, ജില്ലയിൽ നിന്ന് 17 പരാതികൾ

കോഴിക്കോട്: ജില്ലാ പഞ്ചായത്തുകളിലെ വാര്‍ഡ് വിഭജന കരട് നിർദേശങ്ങൾ സംബന്ധിച്ച് പരാതി സമർപ്പിച്ചവർക്കായി നാളെ തിരുവനന്തപുരം തൈക്കാട് പിഡബ്ല്യുഡി റെസ്റ്റ്ഹൗസിൽ ഡീലിമിറ്റേഷൻ കമ്മീഷൻ ഹിയറിംഗ് നടത്തും. രാവിലെ 9.30ന് കോഴിക്കോട്, തൃശൂർ, പാലക്കാട്, മലപ്പുറം, വയനാട്, കണ്ണൂർ, കാസർകോട് ജില്ലകളിലെ പരാതിക്കാരെയും രാവിലെ 11ന് തിരുവനന്തപുരം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലുള്ളവരെയുമാണ് കമ്മീഷൻ നേരിൽ കേൾക്കുക. ജില്ലാപഞ്ചായത്ത് കരട് വിഭജന നിർദേശങ്ങളിൽ നിശ്ചിത സമയപരിധിക്ക് മുമ്പ് ഡീലിമിറ്റേഷൻ കമ്മീഷനോ ജില്ലാ കളക്ടർക്കോ പരാതി സമർപ്പിച്ചിട്ടുള്ളവരാണ് ഹാജരാവേണ്ടത്. മാസ് പെറ്റീഷൻ നൽകിയിട്ടുള്ളവരിൽനിന്ന് ഒരു പ്രതിനിധി പങ്കെടുത്താൽ മതി. 14 ജില്ലകളിൽ നിന്നായി 147 പരാതികളാണ് ലഭിച്ചത്. കോഴിക്കോട് ജില്ലയിൽനിന്ന് 17 പരാതികളാണുള്ളത്. തിരുവനന്തപുരം -3, കൊല്ലം -2, പത്തനംതിട്ട -12, ആലപ്പുഴ -28, കോട്ടയം -14, ഇടുക്കി -11, എറണാകുളം -5, തൃശൂർ -12, പാലക്കാട് -5, മലപ്പുറം -18, വയനാട് -4, കണ്ണൂർ -5, കാസർകോട് -11 എന്നിങ്ങനെയാണ് മറ്റു ജില്ലകളിലെ പരാതികൾ.

കുഴിയിൽ വീണ പശുവിനെ രക്ഷപ്പെടുത്തി

മുക്കം: മഴക്കുഴിയിൽ വീണ പശുവിനെ മുക്കം അഗ്നിരക്ഷാസേനയുടെ സഹായത്തോടെ പുറത്തെടുത്തു. ചൊവ്വാഴ്ച വൈകുന്നേരം അഞ്ചോടുകൂടിയാണ് സംഭവം. മുക്കം നെല്ലിക്കാ പൊയിലിൽ പറമ്പിൽ മേഞ്ഞു നടക്കുന്നതിനിടയിൽ പടിഞ്ഞാറയിൽ പത്മാവതിയുടെ ഉടമസ്ഥതയിലുള്ള പശുവാണ് കുഴിയിൽ വീണത്. വിവരമറിയിച്ചതിന്‍റെ അടിസ്ഥാനത്തിൽ മുക്കം അഗ്നിരക്ഷാ നിലയത്തിൽ നിന്നും സ്റ്റേഷൻ ഓഫീസർ എം. അബ്ദുൾ ഗഫൂറിന്‍റെ നേതൃത്വത്തിലുള്ള സേനാംഗങ്ങൾ സംഭവസ്ഥലത്ത് എത്തി റെസ്ക്യൂ ബെൽറ്റ്, ജെസിബി എന്നിവയുടെ സഹായത്തോടുകൂടി പശുവിനെ കുഴിയിൽ നിന്നും പുറത്തെടുക്കുകയായിരുന്നു.

സ്പിൽ ഓവർ ഇല്ലാതെ വാർഷികപദ്ധതി പൂർത്തിയാക്കണം: ജില്ലാ ആസൂത്രണ സമിതി

കോഴിക്കോട്: ഒരു സാമ്പത്തിക വർഷം തദ്ദേശഭരണ സ്ഥാപനങ്ങൾക്ക് അനുവദിക്കുന്ന തുക ആ വർഷം തന്നെ ചെലവഴിക്കുന്ന രീതി നടപ്പാക്കി 2025-26 വാർഷിക പദ്ധതി മുതൽ സ്പിൽ ഓവർ ഇല്ലാതെ പദ്ധതികൾ പൂർത്തീകരിക്കുന്ന ജില്ലയായി കോഴിക്കോടിനെ മാറ്റണമെന്ന് ജില്ലാ ആസൂത്രണ സമിതി യോഗം. വാർഷിക പദ്ധതി അവലോകനവുമായി ബന്ധപ്പെട്ട് ജില്ലാ ആസൂത്രണ സമിതി സെക്രട്ടറിയേറ്റ് കോൺഫറൻസ് ഹാളിൽ ചേർന്ന യോഗത്തിലാണ് നിർദേശം. തദ്ദേശ ഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് പെരുമാറ്റച്ചട്ടം നിലവിൽ വരുന്നതിനു മുന്പ് അംഗീകാരം ലഭിച്ച എല്ലാ പദ്ധതികളും സംബന്ധിച്ച് പ്രവർത്തനം ആരംഭിക്കണമെന്നും യോഗം നിർദേശം നൽകി. വാർഷിക പദ്ധതി പുരോഗതി വിലയിരുത്തുന്നതിനായി നാല് തലത്തിലുള്ള അവലോകന സംവിധാനം നടപ്പിലാക്കും.യോഗത്തിൽ 88 തദ്ദേശ സ്വയംഭരണ സ്ഥാപനങ്ങളുടെ 2025-26 വാർഷിക പദ്ധതി ഭേദഗതിക്ക് അംഗീകാരം നൽകി. 29 തദ്ദേശ സ്വയംഭരണ സ്ഥാപനങ്ങളുടെ ഹെൽത്ത് ഗ്രാൻഡ് ഭേദഗതി പദ്ധതികൾക്കും അഞ്ച് നഗരഭരണസ്ഥാപനങ്ങളുടെ കെഎസ്ഡബ്ല്യുഎം പ്രോജക്ടുകൾക്കും അംഗീകാരം നൽകി. യോഗത്തിൽ ജില്ലാ ആസൂത്രണ സമിതി ചെയർപേഴ്സൺ ഷീജ ശശി അധ്യക്ഷത വഹിച്ചു. ജില്ലാ പ്ലാനിംഗ് ഓഫീസർ ഇൻ ചാർജ് സി.പി. സുധീഷ്, ആസൂത്രണ സമിതി സർക്കാർ നോമിനി എ. സുധാകരൻ, ജനപ്രതിനിധികൾ, ആസൂത്രണ സമിതി അംഗങ്ങൾ, ജില്ലാതല ഉദ്യോഗസ്ഥർ തുടങ്ങിയവർ പങ്കെടുത്തു.

കടലിൽ കാണാതായ യുവാവിന്‍റെ മൃതദേഹം കണ്ടെത്തി

കൊയിലാണ്ടി: കടലിൽ കാണാതായ യുവാവിന്‍റെ മൃതദേഹം കണ്ടെത്തി. കാപ്പാട് കണ്ണൻകടവ് സ്വദേശി കാട്ടിലപ്പീടിക മുല്ലാണ്ടിയിൽ മുഹമ്മദ് ജാസിർ (22) ആണ് മരിച്ചത്. ഇന്നലെ രാവിലെ മാറാട് ബീച്ചിൽ നിന്ന് മത്സ്യത്തൊഴിലാളികളാണ് മൃതദേഹം കണ്ടെത്തിയത്. തൊഴിലാളികൾ വിവരം അറിയിച്ചതിനെ തുടർന്ന് കോസ്റ്റൽ പോലീസെത്തിയാണ് മൃതദേഹം കരയ്ക്കെത്തിച്ചത്. കോഴിക്കോട് മെഡിക്കൽ കോളജ് മോർച്ചറിയിലേക്ക് മാറ്റിയ മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകി. പിതാവ്: അഹമ്മദ് കോയ. മാതാവ്: സൗജത്ത്.

ഞെളിയന്‍പറമ്പില്‍ സിബിജി പ്ലാന്‍റ്; ബിപിസിയുമായി ധാരണാപത്രം ഒപ്പുവച്ചു

കോഴിക്കോട്: മാലിന്യസംസ്‌കരണം ലക്ഷ്യമിട്ട് കോഴിക്കോട് കോര്‍പറേഷന്‍റെ കംപ്രസ്ഡ് ബയോഗ്യാസ് (സിബിജി) പ്ലാന്‍റ് യഥാര്‍ഥ്യമാകുന്നു. ഞെളിയന്‍പറമ്പിലെ എട്ടേക്കറോളം സ്ഥലത്താണ് ജൈവ മാലിന്യം സംസ്‌കരിച്ച് പാചകവാതകമാക്കി മാറ്റുന്നതിനുള്ള പ്ലാന്‍റ് ഉയരുക. നഗരം നേരിടുന്ന വലിയ മാലിന്യ പ്രശ്നത്തിനാണ് ഇതോടെ പരിഹാരമാവുക. 99 കോടി രൂപ ചെലവിലുള്ള പദ്ധതിയുടെ നിര്‍മാണ ചുമതല ഭാരത് പെട്രോളിയം കോര്‍പറേഷനാണ്. ഇതുസംബന്ധിച്ച ധാരണാപത്രം കൈമാറി. പ്ലാന്‍റ് സ്ഥാപിക്കാന്‍ ആവശ്യമായ സ്ഥലം കോര്‍പറേഷന്‍ 25 വര്‍ഷത്തേക്കാണ് ബിപിസിഎല്ലിന് അനുവദിച്ചത്. 24 മാസത്തിനകം പ്രവൃത്തി പൂര്‍ത്തീകരിച്ച് പ്ലാന്‍റ് പ്രവര്‍ത്തനം ആരംഭിക്കാനാണ് ധാരണ. ദിവസേന 150 മുതല്‍ 180 ടണ്‍ ജൈവ മാലിന്യം സംസ്‌കരിക്കാനുള്ള ശേഷിയാണ് പ്ലാന്‍റിനുണ്ടാവുക. ഇവിടെനിന്ന് 56 ടണ്‍ ബയോഗ്യാസും 20 മുതല്‍ 25 ടണ്‍വരെ ജൈവവളവും ഉല്‍പ്പാദിപ്പിക്കാം. ഉല്‍പ്പാദിപ്പിക്കുന്ന ഗ്യാസ് ഗെയിലിന് വില്‍ക്കും. പദ്ധതി പ്രദേശത്ത് ഫ്യുവല്‍ സ്റ്റേഷനും സജ്ജീകരിക്കും. പുതിയ ഊര്‍ജസ്രോതസ്സുകളിലേക്കും ജൈവകൃഷിയിലേക്കും ആളുകളെ ആകര്‍ഷിക്കും വിധമാണ് കംപ്രസ്ഡ് ബയോഗ്യാസ് പ്ലാന്‍റ് പദ്ധതി നടപ്പാക്കുക. ചടങ്ങില്‍ സംസാരിച്ച മന്ത്രി എം.ബി രാജേഷ്, മാലിന്യക്കൊട്ടകള്‍ സ്ഥാപിച്ചിട്ടും പൊതു ഇടങ്ങളില്‍ മാലിന്യം വലിച്ചെറിയുന്നവര്‍ക്കെതിരെ ശക്തമായ നിയമനടപടിയെടുക്കുമെന്ന് വ്യക്തമാക്കി. മാലിന്യത്തില്‍നിന്ന് ഒരു വ്യാവസായിക ഉല്‍പന്നം ഉണ്ടാക്കുകവഴി നഗരം വൃത്തിയാവുന്നുവെന്ന് മാത്രമല്ല, അദ്ഭുതകരമായ മാറ്റം കൂടിയാണ് ഉണ്ടാവുക. 150 ടണ്‍ ജൈവമാലിന്യം സംസ്‌കരിച്ച് കമ്പ്രസ്ഡ് ബയോഗ്യാസ് ഉല്‍പാദിപ്പിക്കുന്ന പ്ലാന്‍റ് കൊച്ചി ബ്രഹ്‌മപുരത്ത് സ്ഥാപിച്ചുകഴിഞ്ഞു. ജനോപകാരപ്രദമായ പദ്ധതികള്‍ ആവിഷ്‌കരിച്ച് നടപ്പാക്കാന്‍ ഒരുങ്ങുമ്പോള്‍ എതിര്‍ക്കുകയെന്ന പൊതുവായ മനോഭാവത്തില്‍ മാറ്റമുണ്ടാവണം. ശുചിത്വത്തിന്‍റെ കാര്യത്തില്‍ കോഴിക്കോട് കൈവരിച്ച നേട്ടങ്ങള്‍ പൂര്‍ണതയില്‍ എത്തിക്കാന്‍ കോര്‍പറേഷന് സാധിക്കണമെന്നും മന്ത്രി പറഞ്ഞു. മന്ത്രിമാരായ പി.എ. മുഹമ്മദ് റിയാസ്, എ.കെ. ശശീന്ദ്രന്‍, മേയര്‍ ഡോ. ബീന ഫിലിപ്പ്, എംഎല്‍എമാരായ തോട്ടത്തില്‍ രവീന്ദ്രന്‍, അഹമ്മദ് ദേവര്‍കോവില്‍, ഡെപ്യൂട്ടി മേയര്‍ മുസാഫര്‍ അഹമ്മദ്, കോര്‍പറേഷന്‍ സ്ഥിരം സമിതി അധ്യക്ഷരായ ഡോ. ജയശ്രീ, പി. ദിവാകരന്‍, പി.കെ. നാസര്‍ തുടങ്ങിയവര്‍ പങ്കെടുത്തു.

കന്യാസ്ത്രീകളുടെ അറസ്റ്റില്‍ വ്യാപക പ്രതിഷേധം

കൂടരഞ്ഞി: ഛത്തിസ്ഗഡിലെ ദുര്‍ഗ്ഗില്‍ മത പരിവര്‍ത്തനം ആരോപിച്ചു രണ്ടു കന്യാസ്ത്രീകളെ കള്ളക്കേസില്‍ കുടുക്കി ജയിലിലടച്ചതിനെതിരെ ആം ആദ്മി കൂടരഞ്ഞി പഞ്ചായത്ത് കമ്മിറ്റി പന്തം കൊളുത്തി പ്രകടനവും പൊതുയോഗവും നടത്തി. തിരുവമ്പാടി മണ്ഡലം പ്രസിഡന്‍റ് മനു പൈമ്പിള്ളില്‍ ഉദ്ഘാടനം ചെയ്തു.ജോബി പുളിമൂട്ടില്‍, ബാബു ഐക്കരശ്ശേരിയില്‍, ജോയി കളത്തിപറമ്പില്‍, ഫ്രാന്‍സിസ് പുന്നക്കുന്നേല്‍ എന്നിവര്‍ നേതൃത്വം നല്‍കി. കൂരാച്ചുണ്ട്: കന്യാസ്ത്രീകളെ അറസ്റ്റ് ചെയ്ത സംഭവത്തില്‍ കെസിവൈഎം കൂരാച്ചുണ്ട് യൂണിറ്റ് കമ്മിറ്റി തിരി തെളിയിച്ച് പ്രതിഷേധിച്ചു. യൂണിറ്റ് ഡയറക്ടര്‍ ഫാ. മൈക്കിള്‍ നീലംപറമ്പില്‍ അധ്യക്ഷത വഹിച്ചു. ഡെന്നി കണ്ടത്തിന്‍കര, ടിനു മുതുപ്ലാക്കല്‍, അന്‍വിന്‍ കണ്ടശാംകുന്നേല്‍, കിരണ്‍ തയ്യില്‍, ഡോണ കിരണ്‍, ജുവാന കാരക്കട, അലോണ പൂകമല, എമില്‍ ഒറ്റപ്ലാക്കല്‍, ആല്‍ബിന്‍ കുറ്റിയാനിക്കല്‍, ഹെലന്‍ മലേപ്പറമ്പില്‍, ജെന്ന തേനംമാക്കല്‍ തുടങ്ങിയവര്‍ നേതൃത്വം നല്‍കി. കൂരാച്ചുണ്ട്: കന്യാസ്ത്രീകളെ ജയിലിലടച്ച ഛത്തീസ്ഗഡ് സര്‍ക്കാരിന്‍റെ നടപടിയില്‍ കല്ലാനോട് ആറാം വാര്‍ഡ് കോണ്‍ഗ്രസ് കമ്മിറ്റി പ്രതിഷേധിച്ചു. ഷാജന്‍ കടുകന്‍മാക്കല്‍ അധ്യക്ഷത വഹിച്ചു. ജോണ്‍സണ്‍ എട്ടിയില്‍, കുര്യന്‍ ചെമ്പനാനി, ജോസ് വട്ടുകുളം, തോമസ് കിഴക്കേവീട്ടില്‍, സന്ദീപ് കളപ്പുരയ്ക്കല്‍, ജോമോന്‍ പുല്ലന്‍പ്ലാവില്‍ എന്നിവര്‍ പ്രസംഗിച്ചു. കൂടരഞ്ഞി: മലയാളികളായ രണ്ട് കന്യാസ്ത്രീകളെ ഛത്തീസ്ഗഡില്‍ മതപരിവര്‍ത്തനവും മനുഷ്യക്കടത്തും ആരോപിച്ച് അറസ്റ്റ് ചെയ്തു റിമാന്‍ഡില്‍ ആക്കിയ സംഭവം രാജ്യത്തിന്‍റെ മതനിരപേക്ഷ സംസ്‌കാരത്തിന് അപമാനമാണെന്ന് കേരള കോണ്‍ഗ്രസ് എം കൂടരഞ്ഞി മണ്ഡലം കമ്മിറ്റി അഭിപ്രായപ്പെട്ടു. മണ്ഡലം പ്രസിഡന്‍റ് ഷൈജു കോയിനിലം അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് മേരി തങ്കച്ചന്‍, ബേബി തടത്തില്‍, അഡ്വ. ജിമ്മി ജോര്‍ജ്, മാണി വള്ളോപള്ളിയില്‍, അഗസ്റ്റിന്‍ ചെമ്പോട്ടിക്കല്‍ തുടങ്ങിയവര്‍ സംസാരിച്ചു.

മദര്‍ തെരേസ സേവന അവാര്‍ഡ് അന്‍വിത അജിക്ക്

കൂരാച്ചുണ്ട്: ഫാ. ഡേവിസ് ചിറമേല്‍ ചാരിറ്റബിള്‍ ട്രസ്റ്റ് ഏര്‍പ്പെടുത്തിയ മദര്‍ തെരേസ സേവന അവാര്‍ഡിന് കല്ലാനോട് സെന്‍റ് മേരീസ് ഹൈസ്‌കൂള്‍ പത്താം ക്ലാസ് വിദ്യാര്‍ഥിനി അന്‍വിത അജി അര്‍ഹയായി. ഏകരായി കഴിയുന്ന വൃദ്ധജനങ്ങളെ സന്ദര്‍ശിക്കല്‍, അനാഥാലയ സന്ദര്‍ശനം, കോളനി സന്ദര്‍ശനം, ബഡ്‌സ് സ്‌കൂള്‍ സന്ദര്‍ശനം, പാലിയേറ്റീവ് കെയര്‍ യൂണിറ്റിനോട് ചേര്‍ന്നുള്ള പ്രവര്‍ത്തനം, സഹപാഠിക്ക് ഒരു കൈത്താങ്ങ്, പൊതിച്ചോറ് വിതരണം, തൊഴിലുറപ്പു പ്രവര്‍ത്തകരോടൊപ്പമുള്ള പ്രവര്‍ത്തനങ്ങള്‍, സീഡ് ബോള്‍ നിര്‍മാണം, സീഡ് പെന്‍ നിര്‍മാണം, വിരമിച്ച അധ്യാപകരെ ആദരിക്കല്‍, പ്ലാസ്റ്റിക് നിര്‍മാര്‍ജ്ജന പ്രവര്‍ത്തനങ്ങള്‍, പച്ചക്കറിത്തോട്ട പരിപാലനം, പരിസ്ഥിതി സംരക്ഷണ പ്രവര്‍ത്തനങ്ങള്‍, സ്‌കൂളും പരിസരവും വൃത്തിയായി സൂക്ഷിക്കുന്നതിലെ പങ്കാളിത്തം തുടങ്ങിയ പ്രവര്‍ത്തങ്ങള്‍ കാഴ്ചവച്ചതിനാണ് അവാര്‍ഡ്. സംസ്ഥാനത്തെ ഹൈസ്‌കൂള്‍ വിദ്യാര്‍ഥികളില്‍ ഏറ്റവും കൂടുതല്‍ പോയിന്‍റ് നേടിക്കൊണ്ട് അന്‍വിത ഒരു ലക്ഷം രൂപയുടെ അവര്‍ഡിനാണ് അര്‍ഹയായത്. എറണാകുളത്ത് നടന്ന അവാര്‍ഡ് ദാന ചടങ്ങ് കൂനംമാവ് സെന്‍റ് ജോസഫ്‌സ് യു.പി സ്‌കൂളില്‍ സംഘടിപ്പിച്ച ചടങ്ങ് മുന്‍ സുപ്രീം കോടതി ജഡ്ജി ജസ്റ്റിസ് കുര്യന്‍ ജോസഫ് ഉദ്ഘാടനം ചെയ്തു. എസ്പി കെ.എസ് സുദര്‍ശന്‍, ബി.ആര്‍.ഡി. ചെയര്‍മാന്‍ വില്യം വര്‍ഗീസ് എന്നിവര്‍ പങ്കെടുത്തു. ലൈഫ് ആന്‍റ് ലിംപ്‌സ് ചാരിറ്റബിള്‍ ട്രസ്റ്റ് ചെയര്‍മാന്‍ ജോണ്‍ സാമൂവേല്‍ അന്‍വിതയ്ക്കുള്ള കാഷ് വിതരണം ചെയ്തു. അന്‍വിതയ്ക്ക് മദര്‍ തെരേസയുടെ കല്‍ക്കത്തയിലുള്ള ആശ്രമത്തിലേക്ക് കുടുംബസമേതം യാത്ര പോകാനുള്ള അവസരവും ലഭിക്കും. സെന്‍റ് മേരീസ് ഹൈസ്‌കൂളിലെ അലക്‌സി റോസ് ജിനേഷ്, വൈഗ ജയന്‍, റെല്‍സ് റിപ്, എഡ്വിന്‍ ജോസഫ് തോമസ് എന്നീ വിദ്യാര്‍ഥികള്‍ ഹൈസ്‌കൂള്‍ തലത്തിലും ആന്‍ലിയ സിജു, അലന്‍ സിജു, എസ്‌തേര്‍ അന്ന തോമസ്, വേദ സോണി എന്നിവര്‍ യുപി തലത്തിലും 5000 രൂപയുടെ ക്യാഷ് അവാര്‍ഡിന് അര്‍ഹരായി. സെന്‍റ് മേരീസ് ഹൈസ്‌കൂളിലെ മദര്‍ തെരേസ കോ ഓര്‍ഡിനേറ്ററായ സിസ്റ്റര്‍ റെജിന്‍ മരിയയ്ക്ക് സംസ്ഥാന തലത്തിലെ ഏറ്റവും മികച്ച കോ ഓര്‍ഡിനേറ്റര്‍ക്കുള്ള 10,000 രൂപയുടെ അവാര്‍ഡും ലഭിച്ചു. ഈ സേവന പദ്ധതിയില്‍ ഹൈസ്‌കൂള്‍ വിഭാഗത്തില്‍ ഏറ്റവും അധികം കുട്ടികളെ പങ്കെടുപ്പിച്ച വിദ്യാലത്തിനുള്ള 10,000രൂപയുടെ അവാര്‍ഡും കല്ലാനോട് സെന്‍റ്് മേരീസ് ഹൈസ്‌കൂള്‍ കരസ്ഥമാക്കി.

തിണ്ട് ഇടിഞ്ഞു വീണ് വീടിന് നാശനഷ്ടം

കൂരാച്ചുണ്ട്: ശക്തമായ മഴയെ തുടര്‍ന്ന് തിണ്ട് ഇടിഞ്ഞുവീണ് വീടിന് നാശനഷ്ടം സംഭവിച്ചു. കൂരാച്ചുണ്ട് പഞ്ചായത്ത് ആറാം വാര്‍ഡ് കല്ലാനോട് വരിക്കശേരി ആഗസ്തിയുടെ വീടിനാണ് നാശം സംഭവിച്ചത്. ഉയര്‍ന്നു നിന്ന തിണ്ടിലുള്ള കല്ലും മണ്ണും പതിച്ച് വീടിന്‍റെ ഭിത്തിയും മേല്‍ക്കൂരയും തകര്‍ന്നു. -ഭിന്നശേഷിക്കാരനായ മകനോടൊപ്പം ആഗസ്തി താമസിക്കുന്ന വീടാണിത്. വാര്‍ഡ് അംഗം അരുണ്‍ ജോസ് വീട് സന്ദര്‍ശിച്ചു. നഷ്ടം സംബന്ധിച്ച് കൂരാച്ചുണ്ട് വില്ലേജ് ഓഫീസില്‍ പരാതി നല്‍കുമെന്ന് അരുണ്‍ ജോസ് അറിയിച്ചു.

ജിയോളജി ഉദ്യോഗസ്ഥര്‍ പരിശോധന നടത്തി

താമരശേരി: കട്ടിപ്പാറയില്‍ മലയിടിച്ചിലുണ്ടായ മണ്ണാത്തിയേറ്റ് മലയില്‍ ജിയോളജി വകുപ്പ് ഉദ്യോഗസ്ഥര്‍ പഞ്ചായത്ത് പ്രസിഡന്‍റ് പ്രേംജി ജെയിംസിന്‍റെ നേതൃത്വത്തില്‍ പരിശോധന നടത്തി. പഞ്ചായത്ത് കളക്ടര്‍ക്ക് നല്‍കിയ നിവേദനത്തെ തുടര്‍ന്നാണ് പരിശോധന നടത്തിയത്. പ്രദേശത്ത് 24 കുടുബങ്ങള്‍ അപകട ഭീഷണിയിലാണ്. ഇവര്‍ ബന്ധുവീടുകളിലാണ് താമസിക്കുന്നത്. പാറ പൊട്ടിച്ചുനീക്കിയാലേ ഇവര്‍ക്ക് സ്വന്തം വീടുകളിലേയ്ക്ക് തിരിച്ചെത്താനാകൂ. അടിയന്തര നടപടി ആവശ്യപ്പെട്ടാണ് പഞ്ചായത്ത് പ്രസിഡന്‍റിന്‍റെ നേതൃത്വത്തില്‍ കളക്ടര്‍ക്ക് നിവേദനം നല്‍കിയത്.

പുത്തന്‍ ഷോപിംഗ് അനുഭവവുമായി മലബാര്‍ ഗോള്‍ഡിന്‍റെ കാഞ്ഞങ്ങാട് ഷോറൂം

കാഞ്ഞങ്ങാട്: മലബാര്‍ ഗോള്‍ഡ് ആന്‍ഡ് ഡയമണ്ട്സിന്‍റെ അത്യാധുനിക സൗകര്യങ്ങളോടുകൂടി നവീകരിച്ച കാഞ്ഞങ്ങാട് ഷോറൂം നോര്‍ത്ത് കോട്ടച്ചേരിയില്‍ പ്രവര്‍ത്തനമാരംഭിച്ചു. കാഞ്ഞങ്ങാട് എംഎല്‍എ ഇ. ചന്ദ്രശേഖരന്‍ ഉദ്ഘാടനം ചെയ്തു. കാഞ്ഞങ്ങാട് മുന്‍സിപ്പല്‍ ചെയര്‍പേഴ്‌സണ്‍ സുജാത, മുന്‍സിപ്പല്‍ വൈസ് ചെയര്‍മാന്‍ അബ്ദുള്ള ബില്‍ടെക്, ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, കൗണ്‍സിലര്‍ ശോഭ, മുന്‍ ജില്ലാ കളക്ടര്‍ ഡോ. ജയശ്രീ, വ്യാപാരി വ്യവസായി ഏകോപന സമിതി കാസര്‍ഗോഡ് ജില്ലാ പ്രസിഡന്‍റ് അഹമ്മദ് ശരീഫ്, വിവിധ രാഷ്ട്രീയ പാര്‍ട്ടി പ്രതിനിധികള്‍, മലബാര്‍ ഗ്രൂപ്പ് മാനേജ്മെന്‍റ് ടീം അംഗങ്ങള്‍ തുടങ്ങിയവര്‍ ചടങ്ങില്‍ പങ്കെടുത്തു. ഭവനരഹിതരായ അഞ്ചു കുടുംബങ്ങള്‍ക്ക് പാര്‍പ്പിട നിര്‍മ്മാണത്തിനായുള്ള ധനസഹായവും ചടങ്ങില്‍ വിതരണം ചെയ്തു. 9000 സ്‌ക്വയര്‍ ഫീറ്റിലാണ് നവീകരിച്ച ഷോറൂം സ്ഥിതി ചെയ്യുന്നത്. ഉദ്ഘാടനത്തോടനുബന്ധിച്ച് ഉപഭോക്താക്കള്‍ക്കായി വിവിധ ഓഫറുകളും കമ്പനി പ്രഖ്യാപിച്ചിട്ടുണ്ട്. ഗോള്‍ഡ്, അണ്‍കട്ട്, ജെംസ്റ്റോണ്‍ എന്നീ ആഭരണങ്ങള്‍ക്ക് പണിക്കൂലിയില്‍ 30 ശതമാനം കിഴിവും ഡയമണ്ടിന്‍റെ മൂല്യത്തില്‍ 30 ശതമാനം വരെ കിഴിവും കമ്പനി വാഗ്ദാനം ചെയ്യുന്നുണ്ട്.

വിശുദ്ധ അല്‍ഫോന്‍സാമ്മ ദിനാചരണം സംഘടിപ്പിച്ചു

കൂരാച്ചുണ്ട്: കല്ലാനോട് സെന്‍റ്മേരീസ് എല്‍.പി സ്‌കൂളില്‍ വിശുദ്ധ അല്‍ഫോന്‍സാമ്മയുടെ ദിനാചരണത്തോടനുബന്ധിച്ച് വിവിധ പരിപാടികള്‍ സംഘടിപ്പിച്ചു. വിദ്യാര്‍ഥികള്‍ ദൃശ്യാവിഷ്‌കാരം അവതരിപ്പിച്ചു. എംപിടിഎ പ്രസിഡന്‍റ് ദിവ്യ നിമേഷ് അധ്യക്ഷതവഹിച്ചു. സോണിയ അബ്രഹാം സന്ദേശം നല്‍കി. പ്രധാനാധ്യാപിക സ്വപ്ന വര്‍ഗീസ്, അധ്യാപകരായ ദില്‍ന ആന്‍റണി, ടിജി, അലോണ ജോണ്‍സണ്‍, സ്‌കൂള്‍ ലീഡര്‍ ആന്‍റണി മാത്യു, അസിസ്റ്റന്‍റ് ലീഡര്‍ ഏബല്‍ അജിത്ത് തുടങ്ങിയവര്‍ നേതൃത്വം നല്‍കി.

കാട്ടുപന്നികളെ ഉന്‍മൂലനം ചെയ്യണമെന്ന്

കൂരാച്ചുണ്ട്: കാട്ടുപന്നികളെ ക്ഷുദ്രജീവിയായി പ്രഖ്യാപിച്ച് അവയെ ഉന്മൂലനം ചെയ്യണമെന്ന് കൂരാച്ചുണ്ടില്‍ ചേര്‍ന്ന ഇന്‍ഫാം ഫെയര്‍ പ്രൈസ് സൊസൈറ്റിയുടെ വാര്‍ഷിക പൊതുയോഗം ആവശ്യപ്പെട്ടു. സൊസൈറ്റി പ്രസിഡന്‍റ് ദേവസ്യ കെ. വര്‍ഗീസ് അധ്യക്ഷത വഹിച്ചു. ആദ്യകാല പ്രസിഡന്‍റ് എന്‍.സി ചെറിയാന്‍ നെല്ലിക്കലിനെ അനുസ്മരിച്ചു. സി.എ തോമസ്‌കുട്ടി, ട്രഷറര്‍ ജോസ് ജോസഫ് കിഴക്കുംപുറം, വില്‍സണ്‍ തോമസ് കൊങ്ങോല, ജോര്‍ജ് തോമസ് പുള്ളിക്കാട്ട്, ജോര്‍ജ് ചിരട്ടവയലില്‍, ബിനു വരകുപാറ, എന്‍.സി ജോസ് നെല്ലിക്കല്‍, കെ.കെ മത്തായി കുന്നേല്‍, ചെറിയാന്‍ അറയ്ക്കല്‍, ബേബി മുണ്ടയ്ക്കല്‍, പി.ജി തങ്കപ്പന്‍ പണിക്കശേരി, ജെയിംസ് കൂരാപ്പള്ളില്‍, കെ അമാനുള്ള, ജോസ് ഉറുമ്പുങ്കല്‍, ആന്‍റോ കായിത്തറ എന്നിവര്‍ പ്രസംഗിച്ചു. ഭാരവാഹികള്‍: ദേവസ്യ കെ. വര്‍ഗീസ് (പ്രസിഡന്‍റ്), വില്‍സണ്‍ തോമസ് കൊങ്ങോല (വൈസ് പ്രസിഡന്‍റ്) സി.എ തോമസുകുട്ടി ചെരിയംപുറത്ത് (സെക്രട്ടറി), ജോസ് ജോസഫ് കിഴക്കുംപുറം (ട്രഷറര്‍).

മലയോര ഹൈവേ: ചെമ്പ്ര ടൗണിലെ പ്രവൃത്തി വേഗത്തില്‍ പൂര്‍ത്തീകരിക്കണം

കൂരാച്ചുണ്ട്: മലയോര ഹൈവേയുടെ പ്രവര്‍ത്തി നടക്കുന്ന ചെമ്പ്ര ടൗണില്‍ റോഡിന്‍റെ നിര്‍മാണം എത്രയും വേഗത്തില്‍ പൂര്‍ത്തീകരിക്കണമെന്ന് വ്യാപാരി വ്യവസായി ഏകോപനസമിതി ചെമ്പ്ര യൂണിറ്റ് ജനറല്‍ ബോഡിയോഗം ആവശ്യപ്പെട്ടു. പണി ഇഴഞ്ഞുനീങ്ങുന്നത് വ്യാപാരികള്‍ക്കും പൊതുജനങ്ങള്‍ക്കും ബുദ്ധിമുട്ട് സൃഷ്ടിക്കുന്നു. ജില്ലാ സെക്രട്ടറി സുരേഷ് ബാബു കൈലാസ് ഉദ്ഘാടനം ചെയ്തു. കൊടേരി മൊയ്തീന്‍ അധ്യക്ഷത വഹിച്ചു. മണ്ഡലം പ്രസിഡന്‍റ് ഷെരീഫ് ചീക്കിലോട്, പി.എസ് ബാബു, രാജന്‍ ഒതയോത്ത്, സി.കെ റഫീഖ്, മനോജ് മുതുകാട്, കുഞ്ഞമ്മദ് താനിയോട്ടില്‍, പ്രകാശ് ചിറയ്ക്കല്‍ എന്നിവര്‍ പ്രസംഗിച്ചു.

കുളത്തുവയല്‍ സ്‌കൂളിലെ വിദ്യാര്‍ഥി സമരം: നാളെ സര്‍വകക്ഷി യോഗം

ചക്കിട്ടപാറ: പഠനത്തിലും പാഠ്യേതര തലത്തിലും മികവു പുലര്‍ത്തുന്ന കുളത്തുവയല്‍ സെന്‍റ് ജോര്‍ജ്‌സ് ഹയര്‍ സെക്കന്‍ഡറി സ്‌കൂളിനെ തുടര്‍ച്ചയായ വിദ്യാര്‍ഥി സമരങ്ങളില്‍ നിന്നു സംരക്ഷിക്കാന്‍ നടപടി ആവശ്യപ്പെട്ട് പി.ടി.എ. രംഗത്ത്. പ്രശ്‌നം പരിഹരിക്കാന്‍ സഹായം തേടിയതിന്‍റെ അടിസ്ഥാനത്തില്‍ ചക്കിട്ടപാറ ഗ്രാമപഞ്ചായത്തിന്‍റെ ആഭിമുഖ്യത്തില്‍ ഇന്നലെ ബന്ധപ്പെട്ടവരുടെ യോഗം പ്രസിഡന്‍റ് കെ.സുനിലിന്‍റെ അധ്യക്ഷതയില്‍ പഞ്ചായത്ത് ഹാളില്‍ ചേര്‍ന്നു. മുന്‍ കാലങ്ങളില്‍ സമരത്തിനായി ഒരു മണിക്കൂര്‍ നല്‍കിയിരുന്നതായി പ്രസിഡന്‍റ് പറഞ്ഞു. പിന്നീട് അതിനു മാറ്റം വന്നു. സമരമുള്ളപ്പോള്‍ ദിവസം മുഴുവന്‍ വിദ്യാലയം പ്രവര്‍ത്തിപ്പിക്കാന്‍ കഴിയാത്ത സ്ഥിതിയിലായി. ഈ വര്‍ഷം തന്നെ നാല് അധ്യയന ദിനങ്ങള്‍ സമരം കാരണം ഇതിനോടകം നഷ്ടമായതായി പ്രിന്‍സിപ്പാള്‍ കെ.പി.ജോസ്, പ്രധാനാധ്യാപകന്‍ ഫ്രാന്‍സീസ് സെബാസ്റ്റ്യന്‍, സ്റ്റാഫ് സെക്രട്ടറി ഫാ. രാജേഷ് മാത്യു, പി.ടി.എ. പ്രസിഡന്‍റ് വി.ഡി.പ്രേംരാജ് എന്നിവര്‍ പറഞ്ഞു. ഇത് സ്‌കൂളിന്‍റെ അക്കാഡമിക് മികവിനെ ബാധിക്കുമെന്നും രക്ഷിതാക്കള്‍ അതാഗ്രഹിക്കുന്നില്ലെന്നും അവര്‍ ചൂണ്ടിക്കാട്ടി. സമരം ചെയ്യാന്‍ വിദ്യാര്‍ത്ഥി യൂണിയനുകള്‍ക്കുള്ള അവകാശം പോലെ തന്നെ വിദ്യാര്‍ഥികള്‍ക്ക് പഠിക്കാനുള്ള അവസരം നഷ്ടപ്പെടാതെയുള്ള സമീപനവും തീരുമാനവുമാണ് ഇക്കാര്യത്തില്‍ വേണ്ടതെന്ന് യോഗത്തില്‍ സംബന്ധിച്ച രാഷ്ട്രീയ പാര്‍ട്ടി നേതാക്കളായ റെജി കോച്ചേരി, വി.വി.രാജന്‍, രാജന്‍ വര്‍ക്കി എന്നിവര്‍ അഭിപ്രായപ്പെട്ടു. വിദ്യാര്‍ഥികള്‍ സമരം ചെയ്താണ് സമൂഹത്തിന്‍റെ ഭാഗമാകേണ്ടതെന്നാണ് കെ.എസ്.യു, എസ്.എഫ്.ഐ നേതാക്കള്‍ യോഗത്തില്‍ പറഞ്ഞത്. മുമ്പ് അനുവദിച്ച ഒരു മണിക്കൂര്‍ സമയമോ അതില്‍ കൂടുതലോ ധാരണയാക്കി പ്രശ്‌നം പരിഹരിക്കണമെന്ന് പഞ്ചായത്ത് പ്രസിഡന്‍റ് പറഞ്ഞെങ്കിലും വിദ്യാര്‍ഥി യൂണിയന്‍ നേതാക്കള്‍ ഇത് അംഗീകരിക്കുന്നില്ലെന്നു വ്യക്തമാക്കി. പഠനം മുടക്കി ദിവസം മുഴുവന്‍ സമരത്തിന് നല്‍കാന്‍ പറ്റില്ലെന്നു പ്രസിഡന്‍റും മറ്റുള്ളവരും നിലപാടെടുത്തു. ഈ സാഹചര്യത്തില്‍ നാളെ കാലത്ത് 11 ന് കുളത്തുവയല്‍ സ്‌കൂളില്‍ സര്‍വകക്ഷി യോഗം ചേര്‍ന്ന് ഉചിതമായ തീരുമാനമെടുക്കുമെന്ന് കെ. സുനില്‍ അറിയിച്ചു.

ടൗണ്‍ഷിപ്പ് ഒഴികെ ചുരല്‍മലയിലെ എല്ലാ പദ്ധതികളും വിലങ്ങാട് നടപ്പാക്കും: പി.ഗവാസ്

കോഴിക്കോട്: വയനാട് ചൂരല്‍ മലയില്‍ അനുവദിച്ച ടൗണ്‍ഷിപ്പ് ഒഴികെയുള്ള എല്ലാ പദ്ധതികളും വിലങ്ങാട് ഉരുള്‍പൊട്ടല്‍ മേഖലയില്‍ നടപ്പിലാക്കുമെന്ന് സിപിഐ ജില്ലാ സെക്രട്ടറി അഡ്വ.പി. ഗവാസ്. ഇവിടെ ചിലര്‍ ഉയര്‍ത്തുന്നത് രാഷ്ട്രീയമായ പരാതികള്‍ മാത്രമാണെന്നും അവിടുത്തെ ജനകീയ പ്രശ്‌നങ്ങള്‍ക്കെല്ലാം പരിഹാരമുണ്ടാക്കുമെന്നും കാലിക്കറ്റ് പ്രസ്‌ക്ലബിന്‍റെ മീറ്റ് ദ പ്രസ് പരിപാടിയില്‍ അദ്ദേഹം പറഞ്ഞു. അവിടെ ഭൂമി നഷ്ടപ്പെട്ടവരുണ്ട്. വീടുകള്‍ നഷ്ടപ്പെട്ടവരുണ്ട്. എല്ലാവരുടെയും ആവലാതികള്‍ക്കും സര്‍ക്കാര്‍ സമയബന്ധിതമായി പരിഹാരമുണ്ടാക്കുമെന്ന് അദ്ദേഹം പറഞ്ഞു. ക്യാമ്പസുകളില്‍ രാഷ്ട്രീയ ആഭിമുഖ്യം കുറയുന്ന അവസ്ഥയുണ്ട്. ചരിത്രത്തെക്കുറിച്ച് മനസിലാക്കാതെ ഇന്നത്തെ സാഹചര്യം മാത്രം വിലയിരുത്തുന്ന ഒരു തലമുറ വളര്‍ന്നുവരുന്നു. രാഷ്ട്രീയാവബോധവും ചരിത്ര ബോധവുമുള്ള തലമുറയെ വാര്‍ത്തെടുക്കുന്നതിന് കലാലയങ്ങളില്‍ സംഘടനാ പ്രവര്‍ത്തനം ശക്തിപ്പെടേണ്ടതുണ്ടെന്ന് അദ്ദേഹം പറഞ്ഞു.

സെന്‍ട്രല്‍ മാര്‍ക്കറ്റ് പുനര്‍നിര്‍മാണം: ആശങ്കയ്ക്ക് അടിസ്ഥാനമില്ലെന്ന് മേയര്‍

കോഴിക്കോട്: സെന്‍ട്രല്‍ മാര്‍ക്കറ്റ് പുനര്‍നിര്‍മിതിയുമായി ബന്ധപ്പെട്ട ആശങ്കകള്‍ അടിസ്ഥാന രഹിതമാണെന്ന് മേയര്‍ ഡോ. ബീനാ ഫിലിപ്പ്. നിലവിലെ സെന്‍ട്രല്‍ മാര്‍ക്കറ്റിന്‍റെ ശോചനീയാവസ്ഥ പരിഹരിക്കുന്നതിനും മാര്‍ക്കറ്റിലെ കച്ചവടക്കാര്‍ക്കും തൊഴിലാളികള്‍ക്കും മികച്ച തൊഴിലിടം സൃഷ്ടിക്കുന്നതിനുമായാണ് സെന്‍ട്രല്‍ മാര്‍ക്കറ്റ് പൊളിച്ചു മാറ്റി അന്താരാഷ്ട്ര നിലവാരത്തില്‍ പുതുക്കി നിര്‍മ്മിക്കുന്നതിന് കോര്‍പറേഷന്‍ ലക്ഷ്യമിട്ടതെന്ന് അവര്‍ പ്രസ്താവനയില്‍ പറഞ്ഞു. ഇതിനായി പ്രാഥമിക ഡ്രോയിംഗുകള്‍ തയാറാക്കി പദ്ധതി സര്‍ക്കാര്‍ അംഗീകാരത്തിന് സമര്‍പ്പിച്ച് ആവശ്യമായ ഫണ്ട് ലഭ്യമാക്കി. തുടര്‍ന്ന് പ്രവൃത്തി ടെന്‍ഡര്‍ ചെയ്യുന്നതിന് മുമ്പായി സെന്‍ട്രല്‍ മാര്‍ക്കറ്റ് കെട്ടിടത്തിലെ കച്ചവടക്കാരുടെയും തൊഴിലാളികളുടെയും സംഘടനാ പ്രതിനിധികളുമായി വിവിധ ഘട്ടങ്ങളിലായി ചര്‍ച്ച നടത്തി. പുതുക്കി നിര്‍മിക്കുന്ന മാര്‍ക്കറ്റിന്‍റെ രൂപരേഖ സംബന്ധിച്ച് വിശദീകരിക്കുന്നതിനും മാര്‍ക്കറ്റില്‍ ഉള്‍പ്പെടുത്തേണ്ട സൗകര്യങ്ങള്‍ സംബന്ധിച്ച് അവരുടെ അഭിപ്രായം ആരായുന്നതിനും അതനുസരിച്ച് ആവശ്യമായ മാറ്റങ്ങള്‍ വരുത്തുന്നതിനുമായിരുന്നു ഇത്തരത്തില്‍ യോഗം വിളിച്ചു ചേര്‍ത്തത്. എങ്കിലും ചില തെറ്റിദ്ധാരണാജനകമായ വാര്‍ത്തകള്‍ സെന്‍ട്രല്‍ മാര്‍ക്കറ്റിലെ തൊഴിലാളികളിലും കച്ചവടക്കാരിലും ആശങ്ക സൃഷ്ടിക്കുന്ന വിധത്തില്‍ പടരുന്നതായി ശ്രമേയര്‍ പറഞ്ഞു. സെന്‍ട്രല്‍ മാര്‍ക്കറ്റ് പുനര്‍നിര്‍മ്മാണ പ്രവൃത്തിക്കായി 55 കോടി രൂപയാണ് സര്‍ക്കാര്‍ അനുവദിച്ചിട്ടുള്ളത്.സര്‍ക്കാര്‍ അനുമതി ലഭ്യമായ സാഹചര്യത്തില്‍ ഇത് സംബന്ധിച്ച് മേയറുടെയും ഡെപ്യൂട്ടി മേയറുടെയും സ്ഥിരം സമിതി ചെയര്‍മാന്‍മാരുടെയും കൗണ്‍സിലര്‍മാരുടെയും ഉദ്യോഗസ്ഥരുടെയും സാന്നിധ്യത്തില്‍ സെന്‍ട്രല്‍ മാര്‍ക്കറ്റിലെ മുഴുവന്‍ കച്ചവടക്കാരുടെയും പ്രതിനിധികളുമായി മൂന്ന് വട്ടം ചര്‍ച്ച നടത്തി. ഇതില്‍ മത്സ്യ മൊത്തകച്ചവടം, ചില്ലറ വ്യാപാരം, ഉണക്ക മത്സ്യകച്ചവടം, മാര്‍ക്കറ്റിലെ കടമുറികളില്‍ കച്ചവടം ചെയ്യുന്നവര്‍, ചിക്കന്‍ മീറ്റ് സ്റ്റാള്‍, ഫിഷ് കട്ട് ചെയ്യുന്നവര്‍, ഹെഡ് ലോഡേഴ്‌സ് എന്നിങ്ങനെ എല്ലാ വിഭാഗത്തിന്‍റെയും പ്രതിനിധികളുടെ സാന്നിധ്യത്തിലാണ് ചര്‍ച്ച നടത്തിയതെന്ന് അവര്‍ പറഞ്ഞു.

യുവാവ് അബുദാബിയില്‍ കാറപകടത്തില്‍ മരിച്ചു

പശുക്കടവ്: പശുക്കടവ് സ്വദേശി അബുദാബിയില്‍ കാര്‍ അപകടത്തില്‍ മരിച്ചു. സെന്‍റര്‍ മുക്കില്‍ വടക്കേടത്ത് ഡയസിന്‍റെയും ടോജിയുടെയും ഏക മകന്‍ നെവില്‍ കുര്യന്‍ ഡയസ് (33) ആണ് മരിച്ചത്. സംസ്‌കാരം നാളെ (ബുധനാഴ്ച്ച) നാലിന് പശുക്കടവ് സെന്‍റ് തെരേസാസ് പള്ളിയില്‍. ഭാര്യ: ആഷ്ന പൂഴിത്തോട് ഒട്ടക്കല്‍ കുടുംബാംഗം. മകള്‍: റൂത്ത്.

പ്രതിഭ സംഗമം സംഘടിപ്പിച്ചു

കോഴിക്കോട്: എരഞ്ഞിപ്പാലം ശ്രീ വാഗ്ഭടാനന്ദ ഗുരുദേവർ സ്മാരക വായനശാലയുടെ ആഭിമുഖ്യത്തിൽ പ്രതിഭ സംഗമം സംഘടിപ്പിച്ചു. എസ്എസ്എൽസി, പ്ലസ് ടു, എൽഎസ്എസ്, യുഎസ്എസ് വിജയികളെ ആദരിച്ചു. ഡോ. ആനീ വർഗീസ് ഉപഹാരങ്ങൾ നൽകി. വായനശാല പ്രസിഡന്‍റ് പി.എസ്. വിപിൻ അധ്യക്ഷത വഹിച്ചു. ചടങ്ങിൽ സെക്രട്ടറി കെ. ശൈലേഷ്, ബാലവേദി കൺവീനർ കെ. ലൈല, പി.എസ്. സ്മിത, എൻ. ദിനേശൻ, പ്രസീദ ശ്രീജിത്ത് എന്നിവർ പ്രസംഗിച്ചു.

ടൂറിസം കേന്ദ്രങ്ങളോടുള്ള അവഗണന: യുഡിഎഫ് പ്രക്ഷോഭത്തിലേക്ക്

കൂരാച്ചുണ്ട്: ടൂറിസം കേന്ദ്രങ്ങളോടുള്ള അധികൃതരുടെ അവഗണനയിൽ പ്രതിഷേധിച്ച് യുഡിഎഫ് കൂരാച്ചുണ്ട് പഞ്ചായത്ത് കമ്മിറ്റിയുടെ നേതൃത്വത്തിൽ സമരത്തിനൊരുങ്ങുന്നു. തോടിക്കടവ് ടൂറിസം കേന്ദ്രത്തിൽ കൂടുതൽ സൗകര്യങ്ങൾ ഏർപ്പെടുത്താത്തതിനെതിരേയും കരിയാത്തുംപാറ ടൂറിസം കേന്ദ്രത്തിലെ അസൗകര്യങ്ങൾക്കെതിരേയുമാണ് പ്രക്ഷോഭം സംഘടിപ്പിക്കുന്നത്. ടൂറിസം മാനേജ്മെന്‍റ് കമ്മിറ്റി വിളിച്ചു ചേർക്കണം, തോണിക്കടവിൽ ബോട്ട് സർവീസ് ആരംഭിക്കണം, ഇവിടെ പൂന്തോട്ടങ്ങൾ നിർമിക്കണം, കരിയാത്തുംപാറ ടൂറിസം കേന്ദ്രത്തിൽ ഇരിപ്പിടങ്ങൾ സജ്ജമാക്കണം തുടങ്ങിയ ആവശ്യങ്ങളാണ് ഉയർത്തുന്നത്. നടപടി സ്വീകരിക്കാത്ത പക്ഷം വരുന്ന മാസം രണ്ടാം വാരത്തിൽ പ്രത്യക്ഷ സമരങ്ങൾക്ക് തുടക്കം കുറിക്കുമെന്നും നേതാക്കൾ അറിയിച്ചു.

നവീകരിച്ച കോൺഫറൻസ് ഹാൾ ഉദ്ഘാടനം ചെയ്തു

മുക്കം: കൊടിയത്തൂർ പഞ്ചായത്ത് ഓഫീസിൽ ആധുനിക സൗകര്യങ്ങളോടെ നവീകരിച്ച കോൺഫറൻസ് ഹാൾ ഉദ്ഘാടനം ചെയ്തു. 2024-25 വാർഷിക പദ്ധതിയിൽ ഉൾപ്പെടുത്തി 15 ലക്ഷത്തോളം രൂപ ചെലവഴിച്ചാണ് പ്രവൃത്തി പൂർത്തീകരിച്ചത്. ഭരണസമിതി യോഗം ചേരാൻ പറ്റാത്ത സ്ഥിതിയായിരുന്നു കോൺഫറൻസ്. ഈ സാഹചര്യത്തിലാണ് കൂടുതൽ സൗകര്യങ്ങളോടെ നവീകരിച്ചത്. ഡയസ്, കസേരകൾ, നിലത്തെ ടൈലുകൾ തുടങ്ങിയവയെല്ലാം മാറ്റി സ്ഥാപിച്ചിട്ടുണ്ട്. നവീകരിച്ച ഹാളിന്‍റെ ഉദ്ഘാടനം പഞ്ചായത്ത് പ്രസിഡന്‍റ് ദിവ്യ ഷിബു നിർവഹിച്ചു. വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി അധ്യക്ഷരായ ബാബു പൊലുകുന്നത്ത്‌, ആയിഷ ചേലപ്പുറം, മറിയം കുട്ടി ഹസൻ, യു.പി. മമ്മദ്, ടി.കെ. അബൂബക്കർ, പഞ്ചായത്ത് സെക്രട്ടറി അനസ്, മുൻ സെക്രട്ടറി ടി. ആബിദ തുടങ്ങിയവർ പ്രസംഗിച്ചു.

കുളത്തൂർ ഉന്നതി സാംസ്കാരിക നിലയത്തിൽ വൈദ്യുതി ലഭിച്ചു

പെരുവണ്ണാമൂഴി: പട്ടികവർഗ വികസന വകുപ്പിന്‍റെ ആഭിമുഖ്യത്തിൽ ‌ചക്കിട്ടപ്പാറ പഞ്ചായത്തിലെ കുളത്തൂർ ഉന്നതി സാംസ്കാരിക നിലയത്തിൽ വർഷങ്ങളുടെ കാത്തിരിപ്പിനൊടുവിൽ വൈദ്യുതി കണക്‌ഷൻ ലഭിച്ചു. ലക്ഷങ്ങൾ വകയിരുത്തി നിർമിച്ച് ഉദ്ഘാടനം ചെയ്‌ത കെട്ടിടത്തിൽ വൈദ്യുതി ലഭിക്കാത്തത് അസൗകര്യം സൃഷ്ടിച്ചിരുന്നു. ജനമൈത്രി പോലീസിന്‍റെ നേതൃത്വത്തിലാണ് വയറിംഗ് പൂർത്തിയാക്കിയത്. വൈദ്യുതി ലഭിച്ചതിന്‍റെയും വകുപ്പിന്‍റെ സുവർണ ജൂബിലിയുടെ ഭാഗമായിട്ടുള്ള പ്രവർത്തനവും ഊരുത്സവ ആഘോഷവും പ്രസിഡന്‍റ് കെ. സുനിൽ ഉദ്ഘാടനം ചെയ്‌തു. ഭക്ഷ്യക്കിറ്റ് വിതരണവും നടത്തി. പേരാമ്പ്ര ട്രൈബൽ എക്സ്റ്റൻഷൻ ഓഫീസിന്‍റെ ആഭിമുഖ്യത്തിലാണ് പരിപാടികൾ സംഘടിപ്പിച്ചത്. ഊര് മൂപ്പൻ ബാലൻ തുവ്വക്കടവിൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ചിപ്പി മനോജ്, പേരാമ്പ്ര ട്രൈബൽ എക്സ്റ്റൻഷൻ ഓഫീസർ എ. ഷമീർ, എസ്ടി പ്രൊമോട്ടർ പ്രീതി എന്നിവർ പ്രസംഗിച്ചു. ചടങ്ങിൽ എക്സൈസ് വകുപ്പിന്‍റെ വിമുക്തി മിഷൻ ലഹരി വിരുദ്ധ ബോധവത്കരണ ക്ലാസ് നൽകി. അസിസ്റ്റന്‍റ് എക്സൈസ് ഇൻസ്‌പെക്ടർ ജയരാജ്‌, ജില്ലാ വിമുക്തി മിഷൻ കോഓർഡിനേറ്റർ പി.വി. ജിതേഷ് എന്നിവർ നയിച്ചു.

ഞെളിയന്‍പറമ്പില്‍ ഇനി കംപ്രസ്ഡ് ബയോഗ്യാസ് പ്ലാന്‍റ്

കോര്‍പറേഷനും ബിപിസിഎല്ലും കരാറില്‍ ഇന്ന് ഒപ്പുവയ്ക്കും കോഴിക്കോട്: നഗരത്തിന്‍റെ തലവേദനയായ മാലിന്യ പ്രശ്‌നത്തിന് പരിഹാരമായി ഞെളിയന്‍പറമ്പില്‍ ബിപിസിഎല്‍ സ്ഥാപിക്കുന്ന കംപ്രസ്ഡ് ബയോഗ്യാസ് പ്ലാന്‍റ് നിര്‍മാണം ഉടന്‍ ആരംഭിക്കും. പ്രതിദിനം 150 ടണ്‍ മാലിന്യം സംസ്‌കരിക്കുന്നതിന് ശേഷിയുള്ള പ്ലാന്‍റാണ് നിര്‍മിക്കുക. പ്ലാ‍ന്‍റിന്‍റെ നിര്‍മാണവും നടത്തിപ്പും 25 വര്‍ഷത്തേക്ക് ബിപിസിഎല്‍ (ഭാരത് പെട്രോളിയം കോര്‍പറേഷന്‍ ലിമിറ്റഡ്) ആയിരിക്കും നടത്തുക. പരിസ്ഥിതി സൗഹൃദമായിട്ടാണ് പ്ലാന്‍റ് നിര്‍മിക്കുക. പ്ലാന്‍റ്് നിര്‍മാണത്തിനായി ഞെളിയന്‍ പറമ്പിലെ ഏഴ് മുതല്‍ എട്ട് ഏക്കര്‍ സ്ഥലം ബിപിസിഎല്ലിന് പാട്ടത്തിന് നല്‍കും. ബയോഗ്യാസ് നിര്‍മാണത്തിന് ആവശ്യമായി വരുന്ന 150 ടണ്‍ മാലിന്യം പ്രതിദിനം കോര്‍പറേഷന്‍ പ്ലാന്‍റില്‍ എത്തിച്ചു നല്‍കും. ആവശ്യമെങ്കില്‍ അടുത്തുള്ള പഞ്ചായത്ത്, നഗരസഭയുമായി സഹകരിച്ച് മാലിന്യം എത്തിക്കാനും കോര്‍പറേഷന് കഴിയും. കരാര്‍ ഒപ്പുവച്ച് 24 മാസത്തിനുള്ളില്‍ നിര്‍മാണം പൂര്‍ത്തീകരിക്കും.അതേസമയം നിലവില്‍ ഞെളിയന്‍പറമ്പില്‍ ജൈവമാലിന്യ സംസ്‌കരണം നടത്തുന്ന ബിന്‍ഡ്രോ കമ്പോസ്റ്റ് പ്ലാന്‍റ് തുടര്‍ന്നും അവിടെ പ്രവര്‍ത്തിക്കും. പ്ലാന്‍റ് നിര്‍മാണം സംബന്ധിച്ച കരാറില്‍ കോര്‍പറേഷനും ബിപിസിഎല്ലിനും ഇന്ന് ഒപ്പുവയ്ക്കും. രാവിലെ 9.30ന് മലബാര്‍ പാലസില്‍ നടക്കുന്ന ചടങ്ങില്‍ മന്ത്രിമാരായ എം.ബി. രാജേഷ്, പി.എ. മുഹമ്മദ് റിയാസ്, എ.കെ.ശശീന്ദ്രന്‍ , എം.കെ രാഘവന്‍ എംപി , എംഎല്‍എമാര്‍ പങ്കെടുക്കും. പ്ലാന്‍റ് യാഥാര്‍ഥ്യമാകുന്നതോടെ നഗരത്തിന് വലിയ വെല്ലുവിളി ആയിരുന്ന ജൈവമാലിന്യ പ്രശ്‌നത്തിന് ഇതോടെ ശാശ്വത പരിഹാരമാകുമെന്നാണ് പ്രതീക്ഷ.

വയോജന ദിനം ആഘോഷിച്ചു

ചക്കിട്ടപാറ: ചക്കിട്ടപാറ സെന്‍റ് ആന്‍റണീസ് ഇടവകയുടെ ആഭിമുഖ്യത്തിൽ വയോജന ദിനം ആഘോഷിച്ചു. വാർധക്യ സഹജമായ രോഗങ്ങളാലും ശാരീരിക ക്ലേശങ്ങളാലും വീടുകളിൽ കഴിഞ്ഞിരുന്ന മാതാപിതാക്കൾക്കും മറ്റും ആശ്വാസവും സന്തോഷവും നൽകിയ പരിപാടിക്ക് വികാരി ഫാ. പ്രിയേഷ് തേവടിയിലിന്‍റെ കാർമികത്വത്തിൽ നടന്ന ആഘോഷമായ ദിവ്യബലിയോടെയാണ് തുടക്കം കുറിച്ചത്. പലർക്കും വളരെ നാളുകളുടെ ഇടവേളക്കു ശേഷമാണ് ദേവാലയത്തിലെത്തി കുമ്പസാരിക്കാനും വിശുദ്ധ കുർബാനയിൽ സംബന്ധിക്കാനും അവസരമൊരുങ്ങിയത്. എത്തിയ 27 വയോധികർക്ക് ഫാ. പ്രിയേഷ് തേവടിയിൽ ഉപഹാരവും നൽകി. പാരീഷ് കമ്മിറ്റി ഭാരവാഹികളായ സാബു പുളിക്കൽ, റിജോയ്‌ ചന്ദ്രൻകുന്നേൽ, ജോസ് കുട്ടി പുരയിടത്തിൽ, സൈമൺ ചേരോലിക്കൽ, ബിനു കാലായിൽ, ഷിജു തോണക്കര, ദേവാലയ ശുശ്രൂഷി ജോസ് ചക്കാലക്കൽ, സിസ്റ്റർ ദീപ എന്നിവരും വിൻസന്‍റ് ഡി പോൾ, മാതൃവേദി, ചെറുപുഷ്പം മിഷൻ ലീഗ് അംഗങ്ങളും നേതൃത്വം നൽകി.

കനത്ത മഴ: നിരവധി വീടുകൾക്ക് നാശനഷ്ടം

കൂടരഞ്ഞി: കൂടരഞ്ഞി, തിരുവമ്പാടി പഞ്ചായത്തുകളിലെ വിവിധ സ്ഥലങ്ങളിലുണ്ടായ മിന്നൽ ചുഴലിയിൽ വൻ നാശനഷ്ടം. വീട്ടിപ്പാറ രണ്ടിടങ്ങളിലായി മരം കടപുഴകിവീണ് ഗതാഗതം തടസപ്പെട്ടു.പൂവാറൻതോട് ലിസ വളവിനോട് ചേർന്ന് മരം വീണ് ഗതാഗതം പൂർണമായും തടസപ്പെട്ടു. തിരുവമ്പാടിയിൽ തുമ്പച്ചാൽ വയലാമണ്ണിൽ ചാക്കോയുടെ വീടിന് മുകളിൽ മരങ്ങൾ വീണ് മേൽക്കൂര തകർന്നു. വൈദ്യുതി കമ്പികൾക്ക് മുകളിലും മരങ്ങൾ വീണു. പ്രദേശത്ത് വൈദ്യുതി നിലച്ചു. എംഎൽഎ ലിന്‍റോ ജോസഫ്, പഞ്ചായത്ത് പ്രസിഡന്‍റ് ആദർശ് ജോസഫ് എന്നിവരടങ്ങിയ സംഘം സ്ഥലം സന്ദർശിച്ചു. മേപ്പയ്യൂർ: ശനിയാഴ്ച രാത്രിയുണ്ടായ കനത്ത കാറ്റിൽ മേപ്പയ്യൂർ മേഖലയിൽ നാശനഷ്ടം. കേളോത്ത് ബാലകൃഷ്ണന്‍റെ വീടിനു മുകളിൽ തെങ്ങ് വീണു. കീഴ്പ്പയ്യൂർ പാറച്ചാലിൽ ലീലയുടെ വീടിനും മരം വീണ് തകരാർ സംഭവിച്ചു. ഇല്ലത്ത് അബ്ദുറഹിമാന്‍റെ മൂന്ന് തെങ്ങുകളും ഫലവൃക്ഷങ്ങളും കടപുഴകി വീണു. പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ഭാസ്കരൻ കൊഴുക്കല്ലൂർ സ്ഥലം സന്ദർശിച്ചു. ദുരിതാശ്വാസ ക്യാമ്പ് തുറന്നു കൊയിലാണ്ടി: ശക്തമായ മഴയില്‍ കൊയിലാണ്ടി നഗരസഭയിലെ കുറ്റിനിലം പ്രദേശത്തെ വീടുകളില്‍ വെള്ളം കയറിയതിനെ തുടര്‍ന്ന് പന്തലായനി കോതമംഗലം ഗവ. എല്‍ പി സ്‌കൂളില്‍ ദുരിതാശ്വാസ ക്യാമ്പ് തുടങ്ങി. മൂന്നു കുടുംബങ്ങളിലെ നാലുപുരുഷന്‍മാരും അഞ്ച് സ്ത്രീകളുമാണ് ക്യാമ്പിലുള്ളത്. ശക്തമായ മഴയെ തുടര്‍ന്ന് ശനിയാഴ്ച രാത്രിയിലാണ് ക്യാമ്പ് തുറന്നത് .ജില്ലയിലെ എല്ലാ താലൂക്കുകളിലും ശനിയാഴ്ച ശക്തമായ മഴപെയ്തു. മഴയില്‍ രണ്ട് വീടുകള്‍ പൂര്‍ണമായും 41 വീടുകള്‍ ഭാഗികമായും തകര്‍ന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]