ADVERTISEMENT

ADVERTISEMENT

ചിരി തെറാപ്പി ക്ലാസ് നടത്തി

പുൽപ്പള്ളി: സ്നേഹജ്വാലയുടെ നേതൃത്വത്തിലുള്ള സ്നേഹദീപം കൂട്ടായ്മ വയോധികർക്ക് കൃപാലയ സ്പെഷൽ സ്കൂൾ ഓഡിറ്റോറിയത്തിൽ ചിരി തെറാപ്പി ക്ലാസ് നടത്തി. 85ഓളം പേർ പങ്കെടുത്തു. ആലത്തൂർ കപ്പൂച്ചിൻ ആശ്രമത്തിലെ ഫാ.സണ്ണി ഉദ്ഘാടനം ചെയ്തു. സ്നേഹദീപം പ്രസിഡന്‍റ് ജോണ്‍ പാളിത്തോട്ടം അധ്യക്ഷത വഹിച്ചു.

ക്ലിനിക്കൽ സൈക്കോളജിസ്റ്റ് സിസ്റ്റർ ഡോ.ലില്ലി ജോസ് എസ്എബിഎസ്, സിസ്റ്റർ ടെസീന എസ്എബിഎസ്, സിസ്റ്റർ ആൻസീന എസ്എബിഎസ്, സിസ്റ്റർ ആൻസ് മരിയ എസ്എബിഎസ്, സിസ്റ്റർ അർപ്പിത, സ്നേഹദീപം സെക്രട്ടറി ജോയി ആക്കപ്പള്ളി, മേരിക്കുട്ടി പള്ളിക്കാമാലിൽ എന്നിവർ പ്രസംഗിച്ചു.

പ്രദേശത്തെ എസ്എസ്എൽസി, പ്ലസ് ടു ഉന്നത വിജയികളെ ആദരിച്ചു.

ADVERTISEMENT

കസ്തൂർബ വനിതാ ഗാന്ധിദർശൻ വേദി ഭാരവാഹികൾ ചുമതലയേറ്റു

കൽപ്പറ്റ: ഗാന്ധി ദർശൻ വേദിയുടെ വനിതാ വിഭാഗമായ കസ്തൂർബ വനിതാ ഗാന്ധിദർശൻ വേദി ജില്ലാ ഭാരവാഹികൾ ചുമതലയേറ്റു. ഇതിനു ഡിസിസി ഓഫീസിൽ സംഘടിപ്പിച്ച ചടങ്ങ് യുഡിഎഫ് ജില്ലാ കണ്‍വീനർ പി.ടി. ഗോപാലക്കുറുപ്പ് ഉദ്ഘാടനം ചെയ്തു. കസ്തൂർബ വനിതാ ഗാന്ധിദർശൻ വേദി ജില്ലാ ചെയർപേഴ്സണ്‍ ചിന്നമ്മ ജോസ് അധ്യക്ഷത വഹിച്ചു. ഗാന്ധിദർശൻ വേദി ജില്ലാ ചെയർമാൻ ഇ.വി. ഏബ്രഹാം ഭാരവാഹികൾക്ക് സത്യപ്രതിജ്ഞ ചൊല്ലിക്കൊടുത്തു. ടി. സിദ്ദിഖ് എംഎൽഎ ഉമ്മൻ ചാണ്ടി അനുസ്മരണം നടത്തി. കെപിസിസി അംഗം പി.പി. ആലി, കെ.വി. പോക്കർ ഹാജി, കെ.ജി. വിലാസിനി, എള്ളിൽ മുസ്തഫ, പി.വി. ആന്‍റണി, ലേഖ രാജീവ്, അഡ്വ. ഗ്ലാഡിസ് ചെറിയാൻ, ഗിരിജ മോഹൻദാസ്, ലില്ലി മാത്യു, ശ്യാമള സുനി, സുധാദേവി, ശ്യാമള സുനി, ഒ.ജെ. ബിന്ദു, ഐ.ബി. മൃണാളിനി, ബീന സജി, ഷൈജി, ത്രേസ്യാമ്മ വർഗീസ്, ബിജി വിൻസന്‍റ്, ജയപ്രഭ, ഷൈല ജീസസ് എന്നിവർ പ്രസംഗിച്ചു.

എകെഎസ്ടിയു ധർണ നടത്തി

കൽപ്പറ്റ: ഓൾ കേരള സ്കൂൾ ടീച്ചേഴ്സ് യൂണിയൻ ജില്ലാ കമ്മിറ്റിയുടെ നേതൃത്വത്തിൽ കളക്ടറേറ്റ് പരിസരത്ത് ധർണ നടത്തി. സംസ്ഥാനത്തോടുള്ള കേന്ദ്ര അവഗണന അവസാനിപ്പിക്കുക, വിദ്യാഭ്യാസ മേഖലയിലെ വർഗീയ അജൻഡകളെ ചെറുത്തുതോൽപ്പിക്കുക, ശന്പള പരിഷ്കരണം നടപ്പാക്കുക, ഡിഎ, ലീവ് സറണ്ടർ ആനുകൂല്യങ്ങൾ പുനഃസ്ഥാപിക്കുക, ഉച്ചഭക്ഷണം, സൗജന്യ യൂണിഫോം, വിദ്യാവാഹിനി പദ്ധതികൾക്ക് ആവശ്യമായ തുക വകയിരുത്തുക, പ്രീ പ്രൈമറി സംവിധാനം പരിഷ്കരിക്കുക, കായികാധ്യാപകരുടെ പ്രശ്നങ്ങൾ പരിഹരിക്കുക, പൊതുവിഭ്യാഭ്യാസ മേഖലയുടെ സമഗ്ര പരിഷ്കരണം യാഥാർഥ്യമാക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു ധർണ. സംസ്ഥാന എക്സിക്യുട്ടീവ് കമ്മിറ്റി അംഗം സി. ബിജു ഉദ്ഘാടനം ചെയ്തു. ജില്ല പ്രസിഡന്‍റ് വി.ആർ. പ്രകാശ് അധ്യക്ഷത വഹിച്ചു. ജോയിന്‍റ് കൗണ്‍സിൽ ജില്ലാ സെക്രട്ടറി ടി.ഡി. സുനിൽമോൻ, കെജിഒഎഫ് ജില്ലാ സെക്രട്ടറി അമൽ വിജയ്, എകെഎസ്ടിയു സംസ്ഥാന കമ്മിറ്റി മുൻ അംഗം സ്റ്റാൻലി ജേക്കബ്, ജില്ലാ വൈസ് പ്രസിഡന്‍റ് സുനിൽ അഗസ്റ്റിൻ, ജില്ലാ സെക്രട്ടറി ശ്രീജിത്ത് വാകേരി, ട്രഷറർ എൻ.വി. കരുണാകരൻ എന്നിവർ പ്രസംഗിച്ചു.

വി.എസ്. അച്യുതാനന്ദന്‍റെ നിര്യാണത്തിൽ അനുശോചിച്ചു

കൽപ്പറ്റ: സ്വാതന്ത്ര്യാനന്തരം അടിച്ചമർത്തപ്പെട്ടവർക്കും തൊഴിലാളികൾക്കും കർഷകർക്കും വേണ്ടി കേരളത്തിൽ നടന്ന സമര പോരാട്ടങ്ങൾക്ക് പുതിയ അധ്യായം കുറിച്ച ധീരനായ കമ്മ്യൂണിസ്റ്റായിരുന്നു വി.എസ്. അച്യുതാനന്ദൻ എന്ന് എൻസിപി-എസ് ജില്ലാ കമ്മിറ്റി അനുസ്മരിച്ചു. എൻസിപി-എസ് ജില്ലാ പ്രസിഡന്‍റ് ഷാജി ചെറിയാൻ, സംസ്ഥാന സെക്രട്ടറി സി.എം. ശിവരാമൻ, ജില്ലാ ബ്ലോക്ക് നേതാക്കളായ പി.പി. സദാനന്ദൻ, സി.ടി. നളിനാഷൻ, കെ.വി. റെനിൽ, അനൂപ് ജോജോ, സലിം കടവൻ, മമ്മൂട്ടി എളങ്ങോളി, ഷൈജു വി. കൃഷ്ണ, എം. ശ്രീകുമാർ, എ.പി. ഷാബു, ടി.പി. നൂറുദ്ദീൻ, എം.കെ. ബാലൻ, ജയിംസ് മാങ്കുത്തയിൽ, കെ.സി. സ്റ്റീഫൻ, എച്ച്. സൈമണ്‍, സി.എം. വത്സല, രാജൻ മൈക്കിൾ, സുരേന്ദ്ര ബാബു, ജോർജ് മുള്ളൻകൊല്ലി തുടങ്ങിയവർ അനുശോചനം രേഖപ്പെടുത്തി. കൽപ്പറ്റ: വി.എസ്. അച്യുതാനന്ദന്‍റെ നിര്യാണത്തിൽ സിപിഐ-എംഎൽ സംസ്ഥാന കമ്മിറ്റി അനുശോചിച്ചു. ദുഖങ്ങളും കഷ്ടപാടുകളും നിറഞ്ഞു നിന്ന ജീവിതാരംഭം നൽകിയ സഹനശേഷിയും വ്യവസ്ഥയുടെ ക്രൂരതകളോടുള്ള തിരിച്ചറിവും മനുഷ്യനെ മനുഷ്യനായി കാണുന്ന ഒരു സാമൂഹ്യവ്യവസ്ഥ എന്ന സ്വപ്നം വിഎസിന്‍റെ മനസിൽ ഇടം നേടി. വർഗരഹിത സമൂഹമെന്ന ആ സ്വപ്നം യാഥാർത്ഥ്യമാക്കാൻ കമ്മ്യൂണിസ്റ്റ് പാർട്ടി അംഗവും പോരാളിയും നേതൃത്വവുമായി മാറി. അദ്ദേഹവും അദ്ദേഹത്തിന്‍റെ പാർട്ടിയും പ്രത്യയശാസ്ത്ര വ്യതിയാനത്തിൽപ്പെട്ട് മുന്നോട്ട് പോകുന്പോഴും തന്‍റെ തീക്ഷണമായ ജീവിതാനുഭങ്ങളിൽ നിന്ന് ആർജിച്ചെടുത്ത വർഗപക്ഷപാതിത്വം കൈയൊഴിയാതെയും അരികുവത്കരിക്കപ്പെടുന്നവരോടൊപ്പവും എന്നും നിലകൊണ്ട ധീരനായ പോരാളിയായിരുന്നു വി.എസ്. അച്യുതാനന്ദനെന്ന് കമ്മിറ്റി അനുസ്മരിച്ചു. പി.പി. കുഞ്ഞിരാമൻ (സെക്രട്ടറി), സാം പി. മാത്യു (അസിസ്റ്റന്‍റ് സെക്രട്ടറി) എന്നിവർ പ്രസംഗിച്ചു. കൽപ്പറ്റ: മുതിർന്ന കമ്മ്യൂണിസ്റ്റ് നേതാവും മുൻ മുഖ്യമന്ത്രിയുമായിരുന്ന വി.എസ്. അച്യുതാനന്ദന്‍റെ നിര്യാണത്തിൽ ആർജെഡി കൽപ്പറ്റ മണ്ഡലം കമ്മിറ്റി അനുശോചിച്ചു. ജനകീയ നേതാവ്, നിയമസഭാ സാമാജികൻ, പ്രതിപക്ഷനേതാവ്, മുഖ്യമന്ത്രി തുടങ്ങിയ സ്ഥാനങ്ങളിൽ എതിരാളികളെ പിന്നിലാക്കി ജനഹൃദയങ്ങളിൽ സ്ഥാനം നേടിയ വിഎസിന്‍റെ വിയോഗം കേരള ജനതയ്ക്കും ഇടതുപക്ഷ പ്രസ്ഥാനത്തിനും കനത്ത നഷ്ടമാണുണ്ടാക്കിയതെന്ന് യോഗം അഭിപ്രായപ്പെട്ടു. മണ്ഡലം പ്രസിഡന്‍റ് പി.കെ. രാജൻ അധ്യക്ഷത വഹിച്ചു. നാസർ കുരുണിയൻ, എം.വി. മണിയൻ, യു.എ. അജ്മൽ സാജിദ്, അഷ്റഫ് പുതുശേരി, എം.പി. ഷൈജു, കെ.കെ. വത്സല, ഷൈജൽ കൈപ്പ, കെ.എ. സനൂഷ് കുമാർ എന്നിവർ പ്രസംഗിച്ചു.

ശക്തമായ മഴയിൽ വീട് ഭാഗികമായി തകർന്നു

സുൽത്താൻ ബത്തേരി: ശക്തമായ മഴയിൽ വീട് ഭാഗികമായി തകർന്നു. നൂൽപ്പുഴ മാറോട് ശശിധരന്‍റെ വീടാണ് തകർന്നത്. കഴിഞ്ഞ ദിവസം പുലർച്ചെ ഒന്നരയോടെയാണ് സംഭവം. ശശിധരന്‍റെ വീടിന്‍റെ അടുക്കളഭാഗം ശക്തമായ മഴയിൽ തകർന്നുവീഴുകയായിരുന്നു. ചിമ്മിനിയടക്കമുള്ള ഭാഗമാണ് വലിയ ശബ്ദത്തോടെ തകർന്ന് വീണത്. ഈസമയം വീട്ടിലുണ്ടായിരുന്ന ശശിധരനും ഭാര്യയും മക്കളും പുറത്തേക്ക് ഓടി രക്ഷപ്പെട്ടു. നിരവധി സാധനങ്ങൾ തകർന്നുവീണ അവശിഷ്ടങ്ങൾക്കടിയിലായി. അടുക്കള തകർന്നതോടെ വീടിനുപുറത്താണ് ഭക്ഷണം പാകംചെയ്യുന്നത്. ചിമ്മിനി തകർന്നതോടെ വീടിന്‍റെ മറ്റ് ഭാഗങ്ങൾക്കും കേടുപാടുകൾ സംഭവിച്ചിട്ടുണ്ട്. ഇരുപത്തിമൂന്ന് വർഷം പഴക്കമുളള വീടാണ് മഴയിൽ തകർന്നത്. വീട്ടിൽ താമസിക്കാൻ പറ്റാത്ത സാഹചര്യമാണെന്നും പുതിയ വീട് അനുവദിക്കണമെന്നുമാണ് കുടുംബം ആവശ്യപ്പെടുന്നത്.

കോഴികൊല്ലി നാരങ്ങാക്കടവിൽ കോണ്‍ക്രീറ്റ് പാലം നിർമിക്കുന്നു

ഗൂഡല്ലൂർ: നെല്ലിയാളം നഗരസഭയിലെ കോഴികൊല്ലി നാരങ്ങാക്കടവിൽ കോണ്‍ക്രീറ്റ് പാലം നിർമിക്കും. കഴിഞ്ഞ ദിവസം ആർഡിഒ ഓഫീസിൽ ചേർന്ന ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് ഇക്കാര്യത്തിൽ തീരുമാനം. 30 ലക്ഷം രൂപ ചെലവിലാണ് പാലം പണിയുക. നാരങ്ങാക്കടവ് പാലം കഴിഞ്ഞവർഷം കനത്ത മഴയിൽ ഒലിച്ചു പോയിരുന്നു. പകരം പാലം നിർമിക്കുന്നതിന് നാട്ടുകാർ സമ്മർദം ചെലുത്തിയപ്പോൾ ഇരുന്പുപാലം നിർമിക്കാൻ വനം വകുപ്പ് തീരുമാനിക്കുകയും പ്രവൃത്തി ആരംഭിക്കുകയും ചെയ്തു. ഇരുന്പുപാലം നിർമിക്കുന്നതിനെതിരേ നാട്ടുകാർ സിപിഎമ്മിന്‍റെ നേതൃത്വത്തിൽ നഗരസഭാകാര്യാലയത്തിനു മുന്പിൽ സമരം നടത്തി. ഈ പശ്ചാത്തലത്തിൽ ചേർന്ന യോഗത്തിലാണ് കോണ്‍ക്രീറ്റ് പാലം നിർമിക്കാൻ തീരുമാനമായത്. ആർഡിഒ ഗുണശേഖരന്‍റെ അധ്യക്ഷതയിൽ ചേർന്ന യോഗത്തിൽ ഡിഎഫ്ഒ വെങ്കിടേഷ് പ്രഭു, മുൻ എംഎൽഎ എം. ദ്രാവിഡമണി, വാർഡ് കൗണ്‍സിലർ ഭുവനേശ്വരൻ, എൻ. വാസു, രമേശ്, അസൈൻ, ഷാജി, രവികുമാർ, സുബൈർ, ഷംസുദ്ദീൻ, സുലൈമാൻ, കുഞ്ഞലവി, ഗോപാലൻ തുടങ്ങിയവർ പങ്കെടുത്തു.

കാട്ടാനാക്രമണത്തിൽ സ്ത്രീ കൊല്ലപ്പെട്ടതിൽ പ്രതിഷേധിച്ച് കൊളപ്പള്ളിയിൽ നാട്ടുകാർ റോഡ് ഉപരോധിച്ചു

പന്തല്ലൂർ: ചേരങ്കോട് ഗ്രാമ പഞ്ചായത്തിലെ അമ്മങ്കാവിൽ കാട്ടാനആക്രമണത്തിൽ സ്ത്രീ കൊല്ലപ്പെട്ടതിൽ പ്രതിഷേധിച്ച് കൊളപ്പള്ളി ടൗണിൽ നാട്ടുകാർ റോഡ് ഉപരോധിച്ചു. കാട്ടാന ശല്യത്തിന് ശാശ്വത പരിഹാരം കാണണമെന്നാവശ്യപ്പെട്ടാണ് സമരം നടത്തിയത്. രാവിലെ പത്ത് മുതൽ ഉച്ചയ്ക്ക് 1.30 വരെയാണ് സമരം നടത്തിയത്. സ്ത്രീകൾ ഉൾപ്പെടെ നൂറുക്കണക്കിന് പേർ സമരത്തിൽ പങ്കെടുത്തു. വിവരമറിഞ്ഞ് ദേവാല ഡിവൈഎസ്പി ജയപാൽ, എസിഎഫ്, പന്തല്ലൂർ തഹസിൽദാർ സിറാജുന്നീസ, ഗൂഡല്ലൂർ എംഎൽഎ പൊൻ ജയശീലൻ, മുൻ എംഎൽഎ എം. ദ്രാവിഡമണി, ബിദർക്കാട് റേഞ്ചർ രവി തുടങ്ങിയവർ സ്ഥലത്തെത്തി സമരക്കാരുമായി ചർച്ച നടത്തി. പ്രശ്നത്തിന് പരിഹാരം കാണുമെന്ന് ഉറപ്പ് നൽകിയതിനെത്തുടർന്നാണ് ഉച്ചയോടെ സമരം അവസാനിപ്പിച്ചത്. കൊളപ്പള്ളിയിൽ മൂന്നര മണിക്കൂർ വാഹന ഗതാഗതം തടസപ്പെട്ടു. റോഡിന്‍റെ ഇരുഭാഗങ്ങളിലും ധാരാളം വാഹനങ്ങൾ കുടുങ്ങി കിടന്നിരുന്നു. വനാതിർത്തിയിൽ കിടങ്ങ് നിർമിക്കുകയും സോളാർ വേലി സ്ഥാപിക്കുകയും ചെയ്യും, പത്ത് ലക്ഷം രൂപ നഷ്ട പരിഹാരം നൽകും, കാട്ടാനയെ വനത്തിലേക്ക് തുരത്തും തുടങ്ങിയ കാര്യങ്ങളാണ് സമരക്കാർക്ക് അധികാരികൾ ഉറപ്പ് നൽകിയത്. അതേസമയം പ്രതിഷേധം തണുപ്പിക്കാനും പൊതുജനങ്ങളുടെ കണ്ണിൽ പൊടിയിടാനുമുള്ള അധികാരികളുടെ തന്ത്രമാണിതെന്നാണ് ജനങ്ങൾ ആരോപിക്കുന്നത്.

നൻമ കേണിച്ചിറ മേഖലാ സമ്മേളനം നടത്തി

കേണിച്ചിറ: മലയാള കലാകാരൻമാരുടെ ദേശീയ സംഘടനയായ നൻമയുടെ മേഖലാ സമ്മേളനം നടത്തി. ജില്ലാ പ്രസിഡന്‍റ് കെ.വി. സ്റ്റാനി ഉദ്ഘാടനം ചെയ്തു. മേഖലാ പ്രസിഡന്‍റ് കെ.എസ്. ജോസഫ് അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് വിൻസണ്‍ സാമുവൽ മുഖ്യപ്രഭാഷണം നടത്തി. മേഴ്സി സാബു, എവണ്‍ പ്രമോദ്, എസ്. ചിത്രകുമാർ, എം.എൻ. ദിവാകരൻ, മനു മത്തായി, വിശാലാക്ഷി ചന്ദൻ, കലാമണ്ഡലം റെസി ഷാജിദാസ്, ടി.ഐ. ജയിംസ്, എം.എസ്. ഷിജിത്ത് എന്നിവർ പ്രസംഗിച്ചു. കേരള സംഗീത നാടക അക്കാദമി അവാർഡ് ജേതാവ് ജോണ്‍സണ്‍ ഐക്കര, തെയ്യം കലാകാരൻ പൊങ്ങിണി ശ്രീധരൻ എന്നിവരെ ആദരിച്ചു. കലാസംഘങ്ങൾക്കു സ്വീകരണം നൽകി. കലാപ്രതിഭകളെ അനുമോദിച്ചു.

നെൻമേനി ശുദ്ധജല വിതരണ സൊസൈറ്റിയെപ്പറ്റി പഠിക്കാൻ വിദേശികൾ

സുൽത്താൻ ബത്തേരി: മാതൃകാ ജനകീയ പദ്ധതിയായ നെൻമേനി ശുദ്ധജല വിതരണ പദ്ധതിയെപ്പറ്റി പഠിക്കുന്നതിനായി 29 വിദേശ രാജ്യങ്ങളിൽ നിന്നുള്ള പ്രതിനിധികൾ നെൻമേനിയിലെത്തി. ഇവർ പദ്ധതിയെപ്പറ്റി പഠനം നടത്തുകയും ഗ്രാമീണ ജനങ്ങളുമായി ആശയവിനിമയം നടത്തുകയും പദ്ധതി മാതൃക പദ്ധതിയാണെന്ന് വിലയിരുത്തുകയും ചെയ്തതായി സൊസൈറ്റി ഭാരവാഹികൾ വാർത്താ സമ്മേളനത്തിൽ അറിയിച്ചു. കേരള വാട്ടർ അതോറിറ്റിയുടെ കീഴിലുണ്ടായിരുന്ന പദ്ധതി 2005ൽ ജലനിധി പദ്ധതിയുടെ ഭാഗമായി. 2007ൽ ജനകീയ സമിതിയായ നെൻമേനി ശുദ്ധജല വിതരണ സൊസൈറ്റിയെ ഏൽപ്പിച്ചു. 389 ഹൗസ് കണക്ഷനും 253 പൊതുടാപ്പും ഉണ്ടായിരുന്ന പദ്ധതി സൊസൈറ്റിയുടെ കീഴിലേക്ക് മാറിയപ്പോഴേക്കും 5065 കണക്ഷനും 53 പൊതുടാപ്പും എന്ന നിലയിലേയ്ക്ക് മാറി. കഴിഞ്ഞ 10 വർഷത്തിനുള്ളിൽ പലവിധകാരണങ്ങളാൽ ജല വിതരണം മുടങ്ങിയത് 82 ദിവസം മാത്രമാണ്.ജനകീയ സമിതിയുടെ നേതൃത്വത്തിൽ നല്ല നിലയിൽ പ്രവർത്തിക്കുന്ന ശുദ്ധജല വിതരണ പദ്ധതിയിൽ ഒരു ദിവസം വേണ്ടി വരുന്നത് 16 ലക്ഷം ലിറ്റർ വെള്ളമാണ്. ചീരാൽ വില്ലേജിലെ മുഴുവൻ പ്രദേശങ്ങളിലെയും മലവയൽ മുതൽ മലങ്കര, പാലക്കുനിവരെയുള്ള പ്രദേശങ്ങളിലുമാണ് ജലവിതരണം നടത്തുന്നത്. നിലവിലുള്ള കണക്ഷന് പുറമേ ഇനിയും ആയിരം പേർക്കുകൂടി കണക്ഷൻ നൽകാനുള്ള കപ്പാസിറ്റിയാണുള്ളത്. ജനകീയ സൊസൈറ്റിയുടെ കീഴിലുള്ള ഈ സ്ഥാപനം പാലിയേറ്റീവ് പ്രവർത്തന രംഗത്തും സജീവമായി പ്രവർത്തിക്കുന്നു. മേഖലയിലെ കിടപ്പ് രോഗികളായ 20 പേർക്ക് മാസം തോറും ആയിരം രൂപ വീതം നൽകുകയും ചെയ്യുന്നുണ്ട്. വാർത്താസമ്മേളനത്തിൽ ട്രൈബൽ ഡെവലപ്പ്മെന്‍റ് സ്പെഷലിസ്റ്റ് എ. യോഹന്നാൻ, നെൻമേനി ശുദ്ധജല വിതരണ സൊസൈറ്റി പ്രസിഡന്‍റ് പി.എം. കുര്യാക്കോസ്, ഉപദേശക സമിതി അംഗം പി.കെ. കുര്യൻ, എക്സിക്യുട്ടീവ് അംഗങ്ങളായ ബിജു, പി.സി. വിജയകുമാർ എന്നിവർ പങ്കെടുത്തു.

കൃഷി ഓഫീസറെ ആദരിച്ചു

പുൽപ്പള്ളി: കേരള കാർഷിക സർവകലാശാലയിൽനിന്നു ഡോക്ടറേറ്റ് നേടിയ സാന്ദ്ര മരിയ സാജുവിനെ പഞ്ചായത്ത് കാർഷിക വികസന സമിതിയുടെ നേത്യത്വത്തിൽ ആദരിച്ചു. ബെന്നി കുറുന്പാലക്കാട്ട് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ടി.എസ്. ദിലീപ്കുമാർ മെമന്‍റോ നൽകി. ഡോ. ജോമറ്റ് കോതവഴിക്കൽ, കൃഷി അസിസ്റ്റന്‍റ് രഞ്ജിനി, ശശിധരൻ മാസ്റ്റർ,ബേബി കൈനികുടി, ജോയി, സണ്ണി കൊറ്റനാട്ട് എന്നിവർ പ്രസംഗിച്ചു.

ഒയിസ്ക വരാഘോഷം: സെമിനാർ നടത്തി

കൽപ്പറ്റ: ഒയിസ്ക ഇന്‍റർനാഷണൽ ചാപ്റ്ററിൽ ഒയിസ്ക വാരാഘോഷം ആരംഭിച്ചു. ഇതിന്‍റെ ഭാഗമായി പരിസ്ഥിതി-ജൈവ വൈവിധ്യ സംരംക്ഷണ സെമിനാർ സംഘടിപ്പിച്ചു. ശ്രദ്ധേയമായ പ്രവർത്തനം കാഴ്ച വച്ച പരിസ്ഥിതി പ്രവർത്തകരെ ആദരിച്ചു. ഓയിസ്ക ജില്ലാ സെക്രട്ടറി അഡ്വ.അബ്ദുൾ റഹ്മാൻ കാതിരി ഉദ്ഘാടനം ചെയ്തു. ചാപ്റ്റർ പ്രസിഡന്‍റ് ഡോ.എ.ടി. സുരേഷ് അധ്യഷത വഹിച്ചു. സി.ഡി. സുനീഷ്, കെ.ഐ. വർഗീസ്, എം. ഉമ്മർ, ഡോ.ടി.സി. അനിത, ഷംന നസീർ, ഡോ.മണിലാൽ, പി. ഓമന എന്നിവർ പ്രസംഗിച്ചു. ഡി. ശരവണൻ(ആരണ്യ ഓറോവിൽ പുതുച്ചേരി), എസ്. ഭാരതിദാസൻ(അരുളകം നേച്ചർ കണ്‍സർവേഷൻ സൊസൈറ്റി, കോയന്പത്തൂർ), വൈൽഡ് ലൈഫ് ബയോളജിസ്റ്റ് ഡോ. ജിക്രിസ്റ്റാഫർ മാർത്താണ്ടം, ഫോറസ്റ്റ് ഇക്കോളജിസ്റ്റ് ഡോ.കന്തവേലു(തിരുച്ചിറപ്പിള്ളി) എന്നിവർ വിഷയങ്ങൾ അവതരിപ്പിച്ചു. എൽദോ ഫിലിപ്പ്, നിഷ ദേവസ്യ എന്നിവർ സംസാരിച്ചു.

റോഡ് സംരക്ഷണ ഭിത്തികളുടെ നിർമാണ പ്രവൃത്തികൾ പുരോഗമിക്കുന്നു

ഗൂഡല്ലൂർ: ഊട്ടി-മസിനഗുഡി പാതയിലെ കല്ലട്ടി ചുരത്തിൽ റോഡ് സംരക്ഷണഭിത്തികളുടെ നിർമാണ പ്രവൃത്തികൾ പുരോഗമിക്കുന്നു. റോഡ് അപകടങ്ങൾ കുറയ്ക്കുന്നതിന് പൊതുമരാമത്ത് പുതിയ സംവിധാനങ്ങൾ ഇവിടെ പരീക്ഷിച്ചു വരികയാണ്. റോഡോരങ്ങളിൽ റോളറുകൾ സ്ഥാപിച്ചിട്ടുണ്ട്. ഏറ്റവും കൂടുതൽ വാഹനാപകടങ്ങൾ സംഭവിക്കുന്ന മേഖലയാണിത്. അതുകൊണ്ടാണ് ഈ റൂട്ടിൽ അപകടങ്ങൾ കുറയ്ക്കുന്നതിനുള്ള മാർഗങ്ങൾ സ്വീകരിച്ചിരിക്കുന്നത്.

വിദ്യാർഥികളെ അനുമോദിച്ചു

മുട്ടിൽ: കുട്ടമംഗലം പഴശി ട്രൈബൽ ലൈബ്രറിയിൽ സംഘടിപ്പിച്ച സ്നേഹാദരം പരിപാടിയിൽ പ്രദേശത്ത് കഴിഞ്ഞ അധ്യയനവർഷം എസ്എസ്എൽസി, പ്ലസ് ടു പരീക്ഷകൾ വിജയിച്ചവരെയും ജില്ലാ സബ്ജൂണിയർ ഫുട്ബോൾ ടീം ക്യാപ്റ്റനായി തെരഞ്ഞെടുത്ത മുഹമ്മദ് മിദ്ലാജ്നെയും അനുമോദിച്ചു. പഞ്ചായത്ത് അംഗം ആയിഷ കാര്യങ്ങൽ ഉദ്ഘാടനം ചെയ്തു. മെമന്‍റോ വിതരണം അവർ നിർവഹിച്ചു. സതീഷ്കുമാർ അധ്യക്ഷത വഹിച്ചു. യുവ എഴുത്തുകാരി ഫർഹാന പാറു ബഷീർ അനുസ്മരണ പ്രഭാഷണം നടത്തി. വൈത്തിരി താലൂക്ക് ലൈബ്രറി കൗണ്‍സിൽ സെക്രട്ടറി സി. എം. സുമേഷ്, ജില്ലാ ലൈബ്രറി കൗണ്‍സിൽ അംഗം എ.കെ. മത്തായി, തുടങ്ങിയവർ പ്രസംഗിച്ചു.

നിഖ്യ സൂന്നഹദോസ് വാര്‍ഷികാഘോഷം നടത്തി

വയനാട്: യുണൈറ്റഡ് ക്രിസ്ത്യന്‍ ഫോറം കോടഞ്ചേരി മേഖലയുടെ ആഭിമുഖ്യത്തില്‍ നിഖ്യ സുന്നഹദോസിന്‍റെ 1700-ാം വാര്‍ഷികാഘോഷവും അനുസ്മരണവും സംഘടിപ്പിച്ചു. കോടഞ്ചേരി സെന്‍റ് മേരീസ് ഫൊറോന പാരിഷ് ഹാളില്‍ നടന്ന ചടങ്ങ് യാക്കോബായ സുറിയാനി സഭ കോഴിക്കോട് ഭദ്രാസനം മെത്രാപ്പോലീത്ത പൗലോസ് മോര്‍ ഐറേനിയോസ് ഉദ്ഘാടനം ചെയ്തു. താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍ അധ്യക്ഷത വഹിച്ചു. മലങ്കര ഓര്‍ത്തഡോക്‌സ് സുറിയാനി സഭ മലബാര്‍ ഭദ്രാസനം മെത്രാപ്പോലീത്ത ഗീവര്‍ഗീസ് മോര്‍ പക്കോമിയോസ് ചടങ്ങിൽ പങ്കെടുത്തു. യാക്കോബായ സുറിയാനി സഭ പെരുമ്പാവൂര്‍ മേഖല മെത്രാപ്പോലീത്ത മാത്യൂസ് മോര്‍ അഫ്രേം, കുന്നോത്ത് ഗുഡ് ഷെപ്പേഡ് മേജര്‍ സെമിനാരി പ്രഫ. ഫാ. ആന്‍റണി തറേക്കടവില്‍ എന്നിവര്‍ ക്ലാസുകള്‍ക്ക് നേതൃത്വം നല്‍കി.

മദ്യനയം: മത നേതാക്കൾ സർക്കാരിൽ സമ്മർദം ചെലുത്തണം

പനമരം: ജനദ്രോഹകരമായ നിലവിലെ മദ്യനയത്തിൽ മാറ്റം വരുത്താൻ മത നേതാക്കൾ സംയുക്തമായി സർക്കാരിൽ സമ്മർദം ചെലുത്തണമെന്ന് കേരള മദ്യനിരോധന സമിതി സംസ്ഥാന പ്രസിഡന്‍റ് ഇയ്യാച്ചേരി കുഞ്ഞികൃഷ്ണൻ അഭ്യർഥിച്ചു. സമിതിയുടെ ജില്ലാ കണ്‍വൻഷൻ പനമരത്ത് ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് സി.കെ. ദിവാകരൻ അധ്യത വഹിച്ചു. തങ്ങൾ അധികാരത്തിലെത്തിയാൽ മദ്യത്തിന്‍റെ ലഭ്യതയും ഉപയോഗവും നിയന്ത്രിക്കുമെന്ന് തെരഞ്ഞെടുപ്പ് പ്രകടന പത്രികയിൽ വാഗ്ദാനം നൽകിയവർ കഴിഞ്ഞ ഒൻപത് വർഷം കൊണ്ട് 32 ഇരട്ടി ബാറുകളാണ് തുറന്നത്. ഇത് കടുത്ത ജനവഞ്ചനയാണെന്ന് യോഗം വിലയിരുത്തി. സമിതി മഹിളാവേദി സംസ്ഥാന സെക്രട്ടറി ഇയ്യാച്ചേരി പത്മിനി, ഡോ.പി. ലക്ഷ്മണൻ, അബു ഗൂഡലായി, പ്രജീഷ്, പി.ആർ. സ്വതന്ത്ര മീനങ്ങാടി, വെള്ളസോമൻ, എൻ.യു. ബേബി, മുജീബ് റഹ്മാൻ, മണിനാരായണൻ, കെ.ആർ. ഗോപി, വി.ജി. ശശി, ഖാലിദ് പനമരം എന്നിവർ പ്രസംഗിച്ചു.

ഇഞ്ചികൃഷി രോഗവ്യാപനം; കൃഷിയിടങ്ങൾ വിദഗ്ധ സംഘം സന്ദർശിച്ചു

കൽപ്പറ്റ: കാർഷിക വികസന കർഷകക്ഷേമ വകുപ്പിന്‍റെ നേതൃത്വത്തിൽ രോഗവ്യാപനമുള്ള ജില്ലയിലെ ഇഞ്ചി കൃഷിയിടങ്ങളിൽ വിദഗ്ധ സംഘം സന്ദർശനം നടത്തി. മൾട്ടി ഡിസിപ്ലിനറി ഡയഗ്നോസ്റ്റിക് സംഘമാണ് കൃഷിയിടങ്ങൾ സന്ദർശിച്ചത്. ഇഞ്ചി കൃഷിയിൽ വ്യാപകമായി വരുന്ന കുമിൾമൂലം ഉണ്ടാവുന്ന ഇലകരിച്ചിൽ (പെർകുലേറിയ) ബാധിച്ച കൃഷിയിടങ്ങളിലാണ് എം.ഡി.ഡി.റ്റി ടീം പരിശോധന നടത്തിയത്. കാറ്റിലൂടെയും രാത്രിയിലെ കുറഞ്ഞ താപനില, കൂടിയ അന്തരീക്ഷ ആർദ്രത, മഞ്ഞ് എന്നിവയിലൂടെയാണ് പെട്ടന്നുള്ള രോഗവ്യാപനത്തിന് കാരണമാകുന്നത്. ഇഞ്ചിയുടെ നടീൽ സമയത്ത് മുൻകരുതലായി സ്യൂഡോമോണാസ് ഫ്ളൂറസെൻസെന്ന ജൈവ കുമിൾ നാശിനി (1 ലിറ്റർ വെള്ളത്തിൽ 20 ഗ്രാം എന്ന അളവിൽ) മണ്ണിൽ ചേർത്ത് കൊടുക്കൽ, തോട്ടത്തിൽ നീർവാർച്ചയുണ്ടെന്ന് ഉറപ്പാക്കൽ, കുമ്മായം, വളം എന്നിവ ചേർക്കൽ, രോഗ ബാധയുള്ള ചെടിയുടെ ഭാഗങ്ങൾ യഥാസമയം നീക്കെം ചെയ്യൽ എന്നിവ ഉറപ്പാക്കണം. ഇഞ്ചി തോട്ടങ്ങളിൽ രോഗലക്ഷണങ്ങൾ കണ്ട് തുടങ്ങിയാൽ കുമിൾ നാശിനി ചെടികളിൽ തളിക്കണം. പരിശോധനയിൽ പ്രിൻസിപ്പൽ കൃഷി ഓഫീസർ ഇൻചാർജ് കെ.ബിന്ദു, കൃഷി ഡെപ്യൂട്ടി ഡയറക്ടർ കെ.കെ രാമുണ്ണി, കൃഷി വിജ്ഞാൻ കേന്ദ്രം മേധാവി ഡോ. വി.പി രാജൻ,അന്പലവയൽആർ.എ.ആർ.എസ് അസിസ്റ്റന്‍റ് പ്രൊഫസർ ഡോ എൻ.പി ലിഷ്മ, ജില്ലാ പ്ലാന്‍റ് ഹെൽത്ത് മാനേജർ അനുശ്രീ മോഹൻ,കൃഷിഭവൻ ഉദ്യോഗസ്ഥർ നേതൃത്വം നൽകി.

നാടിന്‍റെ വികസനത്തിന് സംരംഭ നിക്ഷേപം അനിവാര്യം: ടി. സിദ്ദിഖ് എംഎൽഎ

കൽപ്പറ്റ: നാടിന്‍റെ വികസനത്തിന് സംരംഭ നിക്ഷേപങ്ങൾ അനിവാര്യമെന്ന് താലൂക്ക്തല നിക്ഷേപ സംഗമത്തിൽ ടി. സിദ്ദിഖ് എംഎൽഎ. ജില്ലാ വ്യവസായ കേന്ദ്രത്തിന്‍റെ ആഭിമുഖ്യത്തിൽ കൈനാട്ടി റോയൽ ക്രൗണിൽ നടത്തിയ വൈത്തിരി താലൂക്ക്തല നിക്ഷേപ സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സംരംഭകർ വ്യവസായ നിക്ഷേപ സാഹചര്യങ്ങൾ പ്രയോജനപ്പെടത്തി കൂടുതൽ തൊഴിലവസരങ്ങൾ സൃഷ്ടിച്ച് മാതൃകയാവണം. സംസ്ഥനത്ത് സർക്കാർ നടപ്പാക്കിയ ഈസ് ഓഫ് ഡൂയിങ് ബിസിനസ് റേറ്റിംഗിന്‍റെ ഭാഗമായി ലൈസൻസിംഗ് നടപടികളിലെ ഇളവുകൾ, നിയമ ഭേദഗതി സംബന്ധിച്ച് സംരംഭകർക്ക് അറിവുണ്ടാവണം. തൊഴിൽ സാധ്യതകൾ വർധിപ്പിച്ച് ഉത്പാദന ക്ഷമതയിലും പ്രതിശീർഷ വരുമാനത്തിലും വളർച്ചയുണ്ടാക്കാൻ സംരംഭകർക്ക് കഴിയണം. വ്യവസായ വകുപ്പിന്‍റെ നേതൃത്വത്തിൽ ഉത്പാദന സേവന മേഖലകളിലെ സമഗ്ര പുരോഗതി, വ്യവസായ സംരംഭകരെ കണ്ടെത്തൽ, സംരംഭകർക്ക് പ്രചോദനവും മാർഗ്ഗനിർദ്ദേശങ്ങളും നൽകാൻ സാധിക്കണമെന്നും എംഎൽഎ പറഞ്ഞു. വൈത്തിരി താലൂക്കിൽ ഉത്പാദന മേഖലയിൽ 50 കോടി നിക്ഷേപം നടത്തിയ സംരംഭകനായ എം.ടി. സുധീഷിനെ എംഎൽഎ ആദരിച്ചു. വ്യവസായ വകുപ്പ്, ബാങ്കുകൾ നടപ്പാക്കുന്ന വിവിധ പദ്ധതികൾ, വിവിധ വകുപ്പുകളിൽ നിന്നും ലഭിക്കേണ്ട അനുമതികൾ, മലിനീകരണ നിയന്ത്രണ ബോർഡ് ക്ലിയറൻസ് തുടങ്ങിയ വിഷയങ്ങൾ താലൂക്ക്തല നിക്ഷേപ സംഗമത്തിൽ സംവദിച്ചു. ജില്ലാ വ്യവസായ കേന്ദ്രം ജനറൽ മാനേജർ ബി. ഗോപകുമാർ അധ്യക്ഷനായ പരിപാടിയിൽ ജില്ലാ ലീഡ് ബാങ്ക് മാനേജർ ടി.എം. മുരളീധരൻ, തദ്ദേശ സ്വയംഭരണ വകുപ്പ് അസിസ്റ്റന്‍റ് ഡയറക്ടർ ജോമോൻ ജോർജ്, വൈത്തിരി താലൂക്ക് വ്യാവസായ ഓഫീസർ എൻ. അയ്യപ്പൻ, വ്യവസായ വികസന ഓഫീസർ ജി.എസ്. സ്മിത എന്നിവർ പ്രസംഗിച്ചു.

പുലിയുടെ ആക്രമണത്തിൽ വളർത്തു മൃഗത്തിന് പരിക്കേറ്റു

സുൽത്താൻ ബത്തേരി: നെൻമേനി പഞ്ചായത്തിലെ ചീരാലിൽ വീണ്ടും പുലിയുടെ ആക്രമണം. കരിങ്കാളികുന്നിൽ കുറ്റിപ്പുറത്ത് രാധാകൃഷ്ണന്‍റെ നായയെയാണ് ഞായറാഴ്ച രാത്രി പുലി ആക്രമിച്ച് പരിക്കേൽപ്പിച്ചത്. കഴിഞ്ഞ രണ്ട് മാസത്തിനിടെ കരിങ്കാളിക്കുന്നിൽ മാത്രം മൂന്നാമത്തെ വളർത്തുമൃഗത്തെയാണ് പുലി ആക്രമിച്ചത്. രാത്രി പതിനൊന്നോടെ വീടിനുസമീപത്തെ നായക്കൂട്ടിൽ നിന്ന് കരച്ചിൽ കേട്ടു. ഈസമയം വീട്ടുകാർ ഉണർന്ന് ലൈറ്റിട്ട് നോക്കിയപ്പോൾ പുലി ഇരുളിലേക്ക് മറയുന്നതാണ് കണ്ടത്. പിന്നീട് നായയെ പരിശോധിച്ചപ്പോൾ കഴുത്തിൽ വലിയ മുറിവ് കണ്ടെത്തി. പിന്നീട് ഡോക്ടറെ കാണിച്ച് പത്ത് തുന്നലിടേണ്ടിയും വന്നു. ചീരാൽ നന്പ്യാർകുന്ന് മേഖലകളിൽ കഴിഞ്ഞ നാല് മാസത്തിനിടെ പതിനഞ്ച് വളർത്തുമൃഗങ്ങളാണ് പുലിയുടെ ആക്രമണത്തിനിരയായത്. ഇതിൽ നാല് പശുക്കിടാവും ആറ് ആടും അഞ്ച് വളർത്തുനായ്ക്കളും ഉൾപ്പെടും. ഇവയ്ക്ക് പുറമെയാണ് തെരുവ് നായ്ക്കളെ പുലി പിടികൂടിയത്. മേഖലയിൽ രണ്ട് പുലികളെ പിടികൂടിയെങ്കിലും മാസങ്ങളായി ചീരാൽ മേഖലയിൽ തുടർന്നുവരുന്ന പുലി ശല്യത്തിന് ഇപ്പോഴും മാറ്റമുണ്ടായിട്ടില്ല. പുലിയുടെ സാന്നിധ്യം മേഖലയിൽ സ്ഥിരമായതോടെ കരിങ്കാളികുന്നിൽ പുലിക്കായി കൂട് സ്ഥാപിച്ചു. എന്നാൽ പുലി കൂട്ടിൽ അകപ്പെട്ടില്ല. പുലിയെ ഭയന്ന് ജനങ്ങൾ തോട്ടങ്ങളിലെ ജോലി പോലും ഉപേക്ഷിച്ചു. ക്ഷീരമേഖലയിലെ കർഷകർ സൊസൈറ്റികളിൽ രാവിലെ പാൽ അളക്കാൻ പോകുതും ഭീതിയോടെയാണ്. ജനവാസമേഖലയിലിറങ്ങി ജനങ്ങളുടെ ജീവനും സ്വത്തിനും ഭീക്ഷണിയായി തീർന്ന പുലികളെ കൂട് വച്ച് പിടികൂടാൻ കാത്ത് നിൽക്കാതെ മയക്കുവെടി വച്ച് പിടികൂടണമെന്നാണ് ജനങ്ങളുടെ ആവശ്യം. മേപ്പാടി റേഞ്ചിലേയും തോട്ടാമൂല ഫോറസ്റ്റ് സെക്ഷന് കീഴിലുമുള്ള വനപാലകരും സ്ഥലത്ത്് ക്യാന്പ് ചെയ്ത് പട്രോളിംഗ് നടത്തുന്നുണ്ട്. ഐശ്വര്യക്കവലയിൽ കടുവ പശുക്കിടാവിനെ കൊന്നു പുൽപ്പള്ളി: സീതാമൗണ്ട് ഐശ്വര്യക്കവലയിൽ പശുക്കിടാവിനെ കടുവ കൊന്നു. മാടത്താനി അമ്മിണിയുടെ രണ്ട് വയസ് പ്രായമുള്ള പശുക്കിടാവാണ് കടുവയ്ക്കിരയായത്. ഇന്നലെ വൈകുന്നേരം 4.30 ഓടെയാണ് സംഭവം. വീടിന് സമീപത്തെ റോഡരികിൽ പുല്ലുതീറ്റുന്നതിനായി കെട്ടിയിട്ട പശുക്കിടാവിനെയാണ് കടുവ ആക്രമിച്ചത്.

പശുക്കിടാവിന്‍റെ കരച്ചിൽകേട്ട് നാട്ടുകാരെത്തിയപ്പോൾ കടുവ പശുക്കിടാവിനെ കടിച്ചുവലിച്ച് തൊട്ടടുത്ത കന്നാരംപുഴയോരത്തെ കൃഷിയിടത്തിലേക്ക് കൊണ്ടുപോവുകയായിരുന്നു. തുടർന്ന് നാട്ടുകാർ ബഹളമുണ്ടാക്കിയതോടെ പശുക്കിടാവിന്‍റെ ജഡം ഉപേക്ഷിച്ച് കടുവ സമീപത്തെ കൃഷിയിടത്തിലേക്ക് ഓടിമറഞ്ഞു. വിവരമറിഞ്ഞ് വനംവകുപ്പ് ഉദ്യോഗസ്ഥർ സ്ഥലത്തെത്തി പ്രദേശത്ത് തെരച്ചിൽ നടത്തി. കടുവ വീണ്ടും വരാനിടയുള്ളതിനാൽ എത്രയും വേഗം കൂട് സ്ഥാപിച്ച് കടുവയെ പിടികൂടണമെന്നാണ് നാട്ടുകാരുടെ ആവശ്യം. വനംവകുപ്പ് ഉദ്യോഗസ്ഥർക്കെതിരെ നാട്ടുകാർ പ്രതിഷേധിച്ചതിനെ തുടർന്ന് പുൽപ്പള്ളിയിൽനിന്നും പോലീസും സ്ഥലത്തെത്തിയിരുന്നു. പശുക്കിടാവിന്‍റെ ഉടമയ്ക്ക് വെറ്ററിനറി ഡോക്ടറുടെ റിപ്പോർട്ടിന്‍റെ അടിസ്ഥാനത്തിൽ അർഹമായ നഷ്ടപരിഹാരം നൽകുമെന്ന് വനംവകുപ്പ് ഉദ്യോഗസ്ഥർ പറഞ്ഞു. കർണാടക വനത്തോട് ചേർന്ന പ്രദേശത്താണ് പശുക്കിടാവിനുനേരെ കടുവയുടെ ആക്രമണമുണ്ടായത്. കർണാടക വനത്തിൽ നിന്നും ജനവാസ മേഖലയിലേക്ക് കടുവയിറങ്ങുന്നത് നിത്യസംഭവമായി മാറിയിരിക്കുകയാണെന്ന് നാട്ടുകാർ പറഞ്ഞു.

മാർ ഇവാനിയോസ് അനുസ്മരണ പദയാത്ര

മാനന്തവാടി: ധന്യൻ മാർ ഇവാനിയോസ് വലിയ മെത്രാപ്പോലീത്തായുടെ 72-ാമത് ഓർമപ്പെരുന്നാളും തീർഥാടന പദയാത്രയും മേഖലയിലെ മലങ്കര സുറിയാനി കത്തോലിക്കാ ദേവാലയങ്ങളുടെ നേതൃത്വത്തിൽ നടത്തി. ലിറ്റിൽ ഫ്ളവർ സ്കൂൾ അങ്കണത്തിൽ ആരംഭിച്ച പദയാത്ര മാനന്തവാടി പ്രോട്ടോ വികാരി ഫാ.തോമസ് തുണ്ടിയിൽ വളളിക്കുരിശ് കൈമാറി ഉദ്ഘാടനം ചെയ്തു. ഓർമപ്പെരുന്നാളിൽ ബഥനി സന്ന്യസസഭ സൂപ്പിരിയർ ജനറൽ റവ.ഡോ.ഗീർവർഗീസ് കുറ്റിയിൽ മുഖ്യകാർമികനായി. ഫാ.വർഗീസ് മറ്റമന, ഫാ.തോമസ് തുണ്ടിയിൽ, ഫാ.ജോണ്‍ പനച്ചിപറന്പിൽ, ഫാ.വർഗീസ് ചൂരക്കുഴി, ഫാ.തോമസ് ചമതയിൽ, ഫാ.സണ്ണി വെട്ടിക്കാട്ടിൽ, ഫാ.ഡേവിഡ് ആലിങ്കൽ എന്നിവർ സഹകാർമികരായി. ഓർമപ്പെരുന്നാളിന്‍റെ ഭാഗമായി ചേർന്ന യോഗത്തിൽ പാസ്റ്ററൽ കൗണ്‍സിൽ സെക്രട്ടറി ബേബി നീർക്കുഴി, എംസിഎ സഭാതല വൈസ് പ്രസിഡന്‍റ് ഷാജി തോമസ്, ബത്തേരി രൂപത എംസിഎ പ്രസിഡന്‍റ് പ്രിൻസ് ഏബ്രഹാം, രൂപത പാസ്റ്ററൽ കൗണ്‍സിൽ അംഗം ബിജു നാരോക്കാട്ട്, ഫിലിപ്പ് കൊട്ടേക്കാട്ട്, സിസ്റ്റർ ജെസ്വിൻ, സിസ്റ്റർ മനോജ്ഞ, സീന ബൈജു, അലിൻഡ എന്നിവർ പ്രസംഗിച്ചു. മാർ ഇവാനിയോസ് അനുസ്മരണ ക്വിസ് മത്സര വിജയികൾക്കും പരീക്ഷകളിൽ ഉന്നത വിജയം നേടിയ വിദ്യാർഥികൾക്കും സമ്മാനം നൽകി. മേഖലയിലെ പാസ്റ്ററൽ കൗണ്‍സിൽ, എംസിഎ, എംസിഎംഎഫ്, എംസിവൈഎം അംഗങ്ങൾ ആഘോഷത്തിനു നേതൃത്വം നൽകി.

വി.എസ്. അച്യുതാനന്ദന്‍റെ നിര്യാണത്തിൽ അനുശോചിച്ചു

കൽപ്പറ്റ: വി.എസ്. അച്യുതാനന്ദന്‍റെ നിര്യാണത്തിൽ സിപിഎം ജില്ലാ കമ്മിറ്റി അനുശോചിച്ചു. വയനാടിന്‍റെയും പോരാട്ട നായകനായിരുന്നു. കർഷക കർഷകതൊളിലാളി പ്രക്ഷോഭങ്ങളുടെ നേതൃത്വമായി ജില്ലയിൽ പലതവണയെത്തി. പാർട്ടി സംസ്ഥാന സെക്രട്ടറിയും പ്രതിപക്ഷ നേതാവുമായിരിക്കെ വയനാടിന്‍റെ പ്രശ്നങ്ങളിൽ നിരന്തരം ഇടപെട്ടു. കൃഷിനാശത്തിലും വിലയിടിവിലും കാർഷിക മേഖല തകർന്ന നാളുകളിൽ പ്രക്ഷോഭങ്ങൾക്ക് നേതൃത്വമായി. വരൾച്ചയും കർഷക ആത്മഹത്യയും അതിരൂക്ഷമായ 2005 ൽ പുൽപ്പള്ളി മേഖല സന്ദർശിച്ച് വിഷയം നിയമസഭയിൽ ഉയർത്തി. മുഖ്യമന്ത്രിയായപ്പോൾ കാർഷിക കടാശ്വാസ കമീഷൻ രൂപീകരിച്ച് കർഷകരെ ആത്മഹത്യയിൽനിന്ന് കരകയറ്റി. ആദിവാസി ഭൂസമരങ്ങൾക്ക് പിന്തുണ നൽകി. ഭൂസമരകേന്ദ്രങ്ങൾ സന്ദർശിച്ചു. വിഎസ് മുഖ്യമന്ത്രിയായിരിക്കെ വനവാകാശ നിയമപ്രകാരം അയ്യായിരം ആദിവാസികൾക്ക് ഭൂമി നൽകി. പൂക്കോട് വെറ്ററിനറി സർവകലാശാല സ്ഥാപിക്കുന്നതിനുള്ള ആക്ട് പാസാക്കി. വിദ്യാഭ്യാസ സ്ഥാപനങ്ങളും നിരവധി വികസന പദ്ധതികളും ജില്ലയ്ക്കായി നടപ്പാക്കിയെന്നും ജില്ലാ കമ്മിറ്റി അനുശോചനക്കുറിപ്പിൽ പറഞ്ഞു. ഇന്ത്യയിലെ കമ്മ്യൂണിസ്റ്റ് പ്രസ്ഥാനത്തിന്‍റെ കരുത്തുറ്റ നായകൻ: കെ.ജെ. ദേവസ്യ സുൽത്താൻ ബത്തേരി: ഇന്ത്യയിലെ കമ്മ്യൂണിസ്റ്റ് പ്രസ്ഥാനത്തിന്‍റെ കരുത്തുറ്റ നായകനായിരുന്നു വി.എസ്. അച്യുതാനന്ദനെന്ന് കേരള കോണ്‍ഗ്രസ്-എം സംസ്ഥാന ജനറൽ സെക്രട്ടറി കെ.ജെ. ദേവസ്യ. കമ്മ്യൂണിസ്റ്റുകാരുടെ മാത്രമല്ല ഇല്ലായ്മയെ അടുത്തറിഞ്ഞും മുതലാളിത്തത്തിന്‍റെ കടന്നുകയറ്റത്തിനെതിരേ പ്രതികരിക്കുകയും ചെയ്ത ധീര സഖാവായിരുന്നു. വിഎസിന്‍റെ നിര്യാണത്തിൽ അഗാധമായ ദുഃഖം രേഖപ്പെടുത്തുന്നതായും കെ.ജെ. ദേവസ്യ പറഞ്ഞു.

തെനേരി ക്ഷീരസംഘം വാർഷിക പൊതുയോഗം നടത്തി

കാക്കവയൽ: തെനേരി ക്ഷീരസംഘം വാർഷിക പൊതുയോഗം നടത്തി. പ്രസിഡന്‍റ് പി.ടി. ഗോപാലക്കുറുപ്പ് അധ്യക്ഷത വഹിച്ചു. 2024-25ൽ കൂടുതൽ പാൽ അളന്ന കർഷകരെ അദ്ദേഹം ആദരിച്ചു. സംഘം അംഗങ്ങളുടെ മക്കളിൽ പരീക്ഷകളിൽ ഉന്നത വിജയം നേടിയവർക്കുള്ള സ്കോളർഷിപ്പ് കൽപ്പറ്റ ക്ഷീര വികസന ഓഫീസർ സി.എച്ച്. ഹുസ്ന വിതരണം ചെയ്തു. എംആർഡിഎഫിൽനിന്നുള്ള ചികിത്സാസഹായധനം മിൽമ പി ആൻഡ് ഐ ജില്ലാ മേധാവി പി.പി. പ്രദീപൻ കൈമാറി. സംഘം ഡയറക്ടർ വി.ജെ. ബാബു സ്വാഗതവും സെക്രട്ടറി കെ.യു. എൽദോ നന്ദിയും പറഞ്ഞു.

കല്ലോടിയിൽ ‘ലഹരിവിരുദ്ധ ആകാശം’ നിർമിച്ചു

കല്ലോടി: സെന്‍റ് ജോസഫ്സ് യുപി സ്കൂളിൽ വിദ്യാർഥികൾ ലഹരിവിരുദ്ധ പ്രവർത്തനങ്ങളുടെ ഭാഗമായി ലഹരിവിരുദ്ധ സന്ദേശങ്ങൾ എഴുതിയ ഹൈഡ്രജൻ ബലൂണുകൾ പറത്തി ’ലഹരിവിരുദ്ധ ആകാശം’ നിർമിച്ചു. എടവക പഞ്ചായത്ത് പ്രസിഡണ്ട് അഹമ്മദുകുട്ടി ബ്രാൻ ഉദ്ഘാടനം ചെയ്തു. ഹെഡ്മാസ്റ്റർ ജോസ് പള്ളത്ത് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. പൊതുസമ്മേളനവും വിദ്യാലയത്തിലെ നവീകരിച്ച കെട്ടിടവും മാനന്തവാടി രൂപത കോർപറേറ്റ് മാനേജർ ഫാ.സിജോ ഇളംകുന്നപ്പുഴ ഉദ്ഘാടനം ചെയ്തു. സ്കൂൾ മാനേജർ ഫാ.സജി കോട്ടായിൽ അധ്യക്ഷത വഹിച്ചു. സിസിടിവി സ്വിച്ച്ഓണ്‍ കർമം അദ്ദേഹം നിർവഹിച്ചു. അഹമ്മദുകുട്ടി ബ്രാൻ മുഖ്യപ്രഭാഷണം നടത്തി. വാർഡ് അംഗം ജംഷീറ ശിഹാബ്, പിടിഎ പ്രസിഡന്‍റ് സിബി ആശാരിയോട്ട്, സ്റ്റാഫ് സെക്രട്ടറി നസ്രിൻ തയ്യുള്ളതിൽ എന്നിവർ പ്രസംഗിച്ചു.

വൈഎംസിഎ ഡയാലിസിസ് സഹായധന പ്രോജക്ട് ഉദ്ഘാടനം ചെയ്തു

പുൽപ്പള്ളി: നാഷണൽ വൈഎംസിഎയും പുൽപ്പള്ളി വൈഎംസിഎ യൂണിറ്റിന്‍റെയും നേതൃത്വത്തിൽ ഡയാലിസിസ് രോഗികൾക്കുള്ള ചികിത്സ സഹായം നൽകുന്ന പദ്ധതിയായ ഡയാലിസിസ് സഹായ ധനപ്രോജക്ട് ഉദ്ഘാടനം ചെയ്തു. വൈഎംസിഎ ഓഡിറ്റോറിയത്തിൽ നടന്ന കുടുംബ പ്രാർത്ഥന കൂട്ടായ്മയിൽ കേരള റീജിയൻ വൈസ് ചെയർമാൻ കുര്യൻ തൂന്പുങ്കൽ പ്രോജക്ട് കോഓർഡിനേറ്റർ ഷിനോജ് കണ്ണന്പള്ളിക്ക് രോഗികൾക്കുള്ള കൂപ്പണ്‍ നൽകി ഉദ്ഘാടനം നിർവഹിച്ചു. ഒരു ഡയാലിസിസിന് ആയിരം രൂപ നൽകുന്നതിൽ 500 രൂപ നാഷണലും ബാക്കി 500 രൂപ പുൽപ്പള്ളി യൂണിറ്റുമാണ് വഹിക്കുന്നത്. അഞ്ച് രോഗികൾക്ക് ആഴ്ചയിൽ മൂന്നു വീതം മാസത്തിൽ 60 ഓളം ഡയാലിസിസിനാണ് സഹായം നൽകുന്നത്. ജൂലൈ ഒന്നു മുതലാണ് പദ്ധതിക്ക് തുടക്കം കുറിച്ചത്. വൈഎംസിഎ പുൽപ്പള്ളി യൂണിറ്റ് പ്രസിഡന്‍റ് തോമസ് ഒറ്റക്കുന്നേൽ അധ്യക്ഷത വഹിച്ചു. കൃപാലയ സ്പെഷൽ സ്കൂൾ പ്രിൻസിപ്പൽ സിസ്റ്റർ ആൻസിന, വൈഎംസിഎ വൈത്തിരി പ്രോജക്ട് ചെയർമാൻ ബിജു തിണ്ടിയത്ത്, സെക്രട്ടറി നോബി പള്ളിത്തറ, പ്രോജക്ട് കമ്മിറ്റി അംഗം ബെന്നി അമരികാട്ട്, ട്രഷറർ ലിയോ പിഡിസി എന്നിവർ പ്രസംഗിച്ചു.

മാനന്തവാടിയിൽ പൊതുമരാമത്ത് പ്രവൃത്തികൾക്ക് 13.5 കോടിയുടെ ഭരണാനുമതി

കൽപ്പറ്റ: മാനന്തവാടിയിൽ വിവിധ പൊതുമരാമത്ത് പ്രവൃത്തികൾക്ക് 13.5 കോടി രൂപയുടെ ഭരണാനുമതി. വിവിധ റോഡുകളുടെ നവീകരണത്തിനും കെഐസ്ആർടിസി ഡിപ്പോ യാർഡ് നിർമാണത്തിനുമാണ് തുക അനുവദിച്ച് ഭരണാനുമതിയായത്. വള്ളിയൂർക്കാവ് പാലം-കമ്മന കുരിശിങ്കൽ റോഡ് ടാറിംഗ്-രണ്ടു കോടി രൂപ, കഐസ്ആർടിസി ഡിപ്പോ യാർഡ് കോണ്‍ക്രീറ്റ് പ്രവൃത്തി-രണ്ട് കോടി, തരുവണ-പാലിയാണ-കക്കടവ് റോഡ് ടാറിംഗ്-മൂന്ന് കോടി, കണ്ണോത്തുമല-ഇടമന-വരയാൽ റോഡ് ടാറിംഗ്-മൂന്ന് കോടി, വെണ്‍മണി-തിടങ്ങഴി റോഡ് ടാറിംഗ്-1.5 കോടി, അഞ്ചാംപീടിക-പുതുശേരി-കാഞ്ഞിരങ്ങാട് റോഡ് ടാറിംഗ്-രണ്ടു കോടി രൂപ എന്നിങ്ങനെയാണ് തുക അനുവദിച്ചത്. പ്രവൃത്തികൾ വേഗത്തിൽ നടത്താൻ പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു പൊതുമരാമത്ത് ഉദ്യോഗസ്ഥർക്ക് നിർദേശം നൽകി.

വന്യമൃഗശല്യം: കാപ്പംകൊല്ലിയിൽ പ്രതിഷേധ കൂട്ടായ്മയും ഒപ്പുശേഖരണവും നടത്തി

മേപ്പാടി: പഞ്ചായത്തിലെ കോട്ടനാട്, നാൽപ്പത്താറ്, പുഴമൂല 22, കാപ്പിക്കാട്, ആനക്കാട്, കാപ്പംകൊല്ലി പ്രദേശങ്ങളിലെ വന്യമൃഗശല്യത്തിന് പരിഹാരം ആവശ്യപ്പെട്ട് കാപ്പംകൊല്ലി നാൽപ്പത്താറിൽ സെന്‍റ് സെബാസ്റ്റ്യൻസ് ചർച്ച് സാമൂഹിക ശുശ്രൂഷാസമിതിയുടെ നേതൃത്വത്തിൽ പ്രതിഷേധക്കൂട്ടായ്മയും ഗവർണർക്കും വനം നൽകുന്ന നിവേദനത്തിലേക്ക് ഒപ്പുശേഖരണവും നടത്തി. സെന്‍റ് സെബാസ്റ്റ്യൻസ് ചർച്ച് വികാരി ഫാ.ഡാനി ജോസഫ് ഉദ്ഘാടനം ചെയ്തു. പാരീഷ് കൗണ്‍സിൽ സെക്രട്ടറി ബാബു ഇഞ്ചയ്ക്കൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് രാധ രാമസ്വാമി, മദർ സുപ്പീരിയർ ഷേർളി, ജോണ്‍ മാതാ, ബാബു തോമസ്, സണ്ണി കടവൻ എന്നിവർ പ്രസംഗിച്ചു. ശുശ്രൂഷാസമിതി കോ ഓർഡിനേറ്റർ സൗമ്യ സാബു സ്വാഗതവും സാബു മറ്റക്കാട്ട് നന്ദിയും പറഞ്ഞു.

ഗാന്ധിപാർക്ക് മെഡിക്കൽ കോളജ് പരിസരങ്ങളിൽ തെരുവ് വിളക്ക് സ്ഥാപിച്ചു

മാനന്തവാടി: മാനന്തവാടി ഗാന്ധിപാർക്ക് മെഡിക്കൽ കോളജ് ജംഗ്ഷൻ മുതൽ ഫോറസ്റ്റ് ഓഫീസ് പരിസരം വരെ മാനന്തവാടി നഗരസഭയുടെ നേതൃത്വത്തിൽ തെരുവ് വിളക്കുകൾ സ്ഥാപിച്ചു. തെരുവ് വിളക്കുകളുടെ സ്വിച്ച് ഓണ്‍ കർമം നഗരസഭാ ചെയർപേഴ്സണ്‍ സി.കെ. രത്നവല്ലി നിർവഹിച്ചു. 75 ലക്ഷം രൂപ ചെലവിലാണ് തെരുവ് വിളക്കുകൾ സ്ഥാപിച്ചത്. എരുമത്തെരുവ് മുതൽ ബിഷപ്സ് ഹൗസ് വരെയും ജോസ് ടാക്കീസ് ജംഗ്ഷൻ മുതൽ സെന്‍റ് ജോസഫ്സ് ആശുപത്രി വരെയും തെരുവ് വിളക്കുകൾ സ്ഥാപിക്കാൻ നടപടി സ്വീകരിച്ചതായി അധികൃതർ അറിയിച്ചു. പരിപാടിയിൽ നഗരസഭാ വൈസ് ചെയർമാൻ ജേക്കബ് സെബാസ്റ്റ്യൻ അധ്യക്ഷനായി. സ്റ്റാൻഡിംഗ് കമ്മിറ്റി ചെയർമാൻമാരായ പി.വി.എസ്. മൂസ, ലേഖ രാജീവൻ, അഡ്വ.സിന്ധു സെബാസ്റ്റ്യൻ, കൗണ്‍സിലർമാരായ പി.വി. ജോർജ്, വി.യു. ജോയി, പി.എം. ബെന്നി, ഷിബു കെ. ജോർജ്, ബാബു പുളിക്കൽ, മാർഗരറ്റ് തോമസ്, വ്യാപാരി വ്യവസായി ജില്ലാ സെക്രട്ടറി കെ. ഉസ്മാൻ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

വനത്തിൽ വിത്തൂട്ട് നടത്തി

പുൽപ്പള്ളി: മരിയനാട് എൽപി സ്കൂൾ പരിസ്ഥിതി ക്ലബ് അംഗങ്ങളായ വിദ്യാർഥികൾ, അധ്യാപകർ, ഇരുളം ഫോറസ്റ്റ് സ്റ്റേഷൻ ജീവനക്കാർ,എൻഇആർഎഫ് അംഗങ്ങൾ എന്നിവർ ഇരുളം ഫോറസ്റ്റ് സ്റ്റേഷൻ പരിധിയിൽ വിത്തൂട്ട് നടത്തി. ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു.സൗത്ത് വയനാട് ഡിഎഫ്ഒ അജിത് കെ. രാമൻ അധ്യക്ഷത വഹിച്ചു. ചെതലത്ത് റേഞ്ച് ഫോറസ്റ്റ് ഓഫീസർ എം.കെ. രാജീവ്കുമാർ, ഇരുളം ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫീസർ കെ.പി. അബ്ദുൾഗഫൂർ, മരിയനാട് എൽപി സ്കൂൾ ഹെഡ്മിസ്ട്രസ് സിസ്റ്റർ സുപ്രിയ, ആദർശ് എന്നിവർ നേതൃത്വം നൽകി.

വ്യാപാരി വ്യവസായി ഏകോപനസമിതി യൂണിറ്റിലെ ക്രമകേടുകൾ: അന്വേഷണം വേണമെന്ന് മുൻ ട്രഷറർ

പുൽപ്പള്ളി: വ്യാപാരി വ്യവസായി ഏകോപന സമിതി പുൽപ്പള്ളി യൂണിറ്റിലെ സാന്പത്തിക ക്രമക്കേടുകളുടെ ഉത്തരവാദിത്വം തന്‍റെ തലയിൽകെട്ടിവയ്ക്കാനുള്ള വ്യാപാരി നേതാക്കളുടെ ശ്രമം അംഗീകരിക്കില്ലെന്ന് മുൻ ട്രഷറർ എം.കെ. ബേബി, ഭാര്യ ജോളി ബേബി എന്നിവർ വാർത്താസമ്മേളനത്തിൽ പറഞ്ഞു. ജൂണ്‍ മാസംവരെയുള്ള മുഴുവൻ കണക്കുകളും കാഷ് ബാലൻസും പ്രസിഡന്‍റിനെ ഏൽപ്പിച്ചതാണ്. അധികമായി നൽകിയ 10,857 രൂപ തനിക്ക് തിരിച്ച് തരാനാണുള്ളത്. ഓഫീസിലെ കണക്കുകളിൽ വെട്ടിത്തിരുത്തലുകളുണ്ടായിട്ടുണ്ടെന്ന് ഓഡിറ്റിംഗിൽ കണ്ടെത്തിയതാണ്. മുൻ കാലങ്ങളിലെ സാന്പത്തിക ഇടപാടുകളെക്കുറിച്ചും സമിതിയുടെ ചിട്ടി നടത്തിപ്പിലെ ക്രമക്കേടുകളെക്കുറിച്ചും വിജിലൻസ് അന്വേഷണം നടത്തണം. ദുരന്തബാധിതരെ സഹായിക്കുന്നതിനായി അംഗങ്ങളിൽ നിന്നും പിരിച്ചെടുത്ത പണം സംബധിച്ചും സമഗ്ര അന്വേഷണം നടത്തണമെന്നും എം.കെ. ബേബി, ഭാര്യ ജോളി എന്നിവർ പറഞ്ഞു.

വനിതാ ജനപ്രതിനിധികൾക്ക് ജില്ലാതല കണ്‍വെൻഷൻ സംഘടിപ്പിച്ചു

കൽപ്പറ്റ: കിലയുടെ നേതൃത്വത്തിൽ ജില്ലയിലെ തദ്ദേശ സ്വയംഭരണ സ്ഥാപനങ്ങളിലെ വനിതാ ജനപ്രതിനിധികൾക്ക് ജില്ലാതല കണ്‍വെൻഷൻ സംഘടിപ്പിച്ചു. വനിതാ പ്രതിനിധികളുടെ നേതൃത്വശേഷി, കാര്യശേഷി, വികസനം, അനുഭവം, മുന്നോട്ടുള്ള പ്രവർത്തനങ്ങൾക്ക് രൂപം നൽകൽ എന്നിവ ലക്ഷ്യമിട്ടാണ് കണ്‍വെൻഷൻ സംഘടിപ്പിച്ചത്. പൊതുപ്രവർത്തനങ്ങളിൽ വനിതാ ജനപ്രതിനിധികളുടെ കാര്യശേഷി പ്രധാന ചർച്ചയായി. പഠന റിപ്പോർട്ടുകളുടെ അടിസ്ഥാനത്തിൽ കണ്ടെത്തലുകൾ അവതരിപ്പിച്ചു. പൊതുപ്രവർത്തന രംഗത്തെ മാതൃകാ പ്രവർത്തനങ്ങൾ ചർച്ചയായി. ജില്ലാതല കണ്‍വെൻഷനിൽ 70 പേർ പങ്കെടുത്തു. കൽപ്പറ്റ ബ്ലോക്ക്പഞ്ചായത്ത് ഹാളിൽ നടന്ന പരിപാടിയിൽ കില റിസോഴ്സ് പേഴ്സണ്‍മാരായ ടി.എം. ഷിഹാബ്, കെ.വി. ജുബൈർ, സാരംഗി എന്നിവർ ക്ലാസുകൾ നയിച്ചു. കില ജില്ലാ കോഓർഡിനേറ്റർ എം. ശരത് ചന്ദ്രൻ, തീമാറ്റിക് വിദഗ്ധ ഗ്രീഷ്മ മൻമദൻ എന്നിവർ പ്രസംഗിച്ചു.

തൊണ്ടാർ ജലസേചന പദ്ധതി ഉപേക്ഷിക്കണം: മുസ്ലിം ലീഗ്

മക്കിയാട്: തൊണ്ടർനാട്, എടവക പഞ്ചായത്തുകളുടെ അതിർത്തി പ്രദേശമായ മൂളിത്തോടിൽ പ്രാവർത്തികമാക്കാൻ ആലോചിക്കുന്ന തൊണ്ടർ ജലസേചന പദ്ധതി ഉപേക്ഷിക്കണമെന്ന് മുസ്ലിംലീഗ് തൊണ്ടർനാട് പഞ്ചായത്ത് കൗണ്‍സിൽ യോഗം സർക്കാരിനോട് ആവശ്യപ്പെട്ടു. നൂറുകണക്കിനു കുടുംബങ്ങൾ വഴിയാധാരമാകാൻ കാരണമാകുന്ന പദ്ധതിക്ക് ഡിപിആർ തയാറാക്കാൻ സർക്കാർ ഭരണാനുമതി നൽകിയത് പ്രതിഷേധാർഹമാണ്. ഇനിയും വൻകിട ജലസേചന പദ്ധതികൾ നടപ്പാക്കാൻ ജില്ലയിലെ ഭൂപ്രകൃതി യോജിച്ചതല്ലെന്ന് യോഗം അഭിപ്രായപ്പെട്ടു. നിയോജക മണ്ഡലം കമ്മിറ്റി പ്രസിഡന്‍റ് സി.പി. മൊയ്തു ഹാജി ഉദ്ഘാടനം ചെയ്തു. പഞ്ചായത്ത് കമ്മിറ്റി പ്രസിഡന്‍റ് ടി. മൊയ്തു ആധ്യക്ഷത വഹിച്ചു. തദ്ദേശ തെരഞ്ഞടുപ്പും പാർട്ടിയും എന്ന വിഷയത്തിൽ ജില്ലാ വൈസ് പ്രസിഡന്‍റ് യഹ്യാഖാൻ തലക്കൽ ക്ലാസെടുത്തു. പഞ്ചായത്ത് കമ്മിറ്റി ജനറൽ സെക്രട്ടറി ആലിക്കുട്ടി ആറങ്ങാടൻ സ്വാഗതവും പി.എ. മൊയ്തുട്ടി നന്ദിയും പറഞ്ഞു.

അന്പലവയലിൽ അവൊക്കാഡോ ഫെസ്റ്റ് 30ന് തുടങ്ങും

കൽപ്പറ്റ: അന്പലവയൽ മേഖല കാർഷിക ഗവേഷണ കേന്ദ്രവും വയനാട് ഹിൽ ഫാർമർ പ്രൊഡ്യൂസർ കന്പനിയും സംയുക്തമായി അവൊക്കോഡോ ഫെസ്റ്റ് നടത്തുന്നു. 30,31 തീയതികളിൽ രാവിലെ ഒന്പത് മുതൽ വൈകുന്നേരം ആറു വരെ അന്പലവയൽ വ്യാപാര ഭവനിലാണ് പരിപാടിയെന്ന് കാർഷിക ഗവേഷണ കേന്ദ്രം മേധാവി ഡോ.സി.കെ. യാമിനി വർമ, പ്രൊഡ്യൂസർ കന്പനി പ്രതിനിധികളായ എം.ആർ. സുനിൽകുമാർ, പി. പദ്മരാജ്, ഡോ.പി. മണിലാൽ, ഡോ.എ.ടി. സുരേഷ് എന്നിവർ വാർത്താസമ്മേളനത്തിൽ അറിയിച്ചു. കേരളത്തിൽ ആദ്യമായി അവൊക്കാഡോ നട്ടുവളർത്തിയത് 1948ൽ അന്പലവയലിൽ പ്രവർത്തിച്ചിരുന്ന ഹോർട്ടി കൾച്ചർ റിസർച്ച് സ്റ്റേഷനിലാണ്. നിലവിൽ ജില്ലയിലെ മിക്ക വീട്ടുവളപ്പുകളിലും ഒന്നും രണ്ടും അവൊക്കാഡോ മരങ്ങളുണ്ട്. ചെടി നട്ട് നാലു വർഷം കഴിയുന്പോൾ മുതൽ വിളവ് ലഭിക്കുന്ന അവൊക്കാഡോ കൃഷി എന്ന നിലയിൽ ഇനിയും പ്രചാരം നേടിയിട്ടില്ല. ഈ സാഹചര്യത്തിൽ കൃഷി പ്രോത്സാഹിപ്പിക്കുക, സംസ്കരണം, മൂല്യവർധനം, വിപണനം എന്നിവയിൽ ബോധവത്കരണം നൽകുക തുടങ്ങിയ ലക്ഷ്യങ്ങളോടെയാണ് ഫെസ്റ്റ് നടത്തുന്നത്. ശിൽപ്പശാലകൾ, ക്ലാസ്, ബിസിനസ് മീറ്റ്, മത്സരങ്ങൾ തുടങ്ങിയവ ഫെസ്റ്റിന്‍റെ ഭാഗമാണ്. അന്പലവയൽ കൃഷി വിജ്ഞാന കേന്ദ്രം, കിസാൻ സർവീസ് സൊസൈറ്റി, ഇന്ത്യൻ ഇൻസ്റ്റിറ്റ്യൂട്ട് ഓഫ് ഹോർട്ടികൾച്ചറൽ റിസർച്ച്, എൻഎൻഐഎസ്ടി തിരുവനന്തപുരം എന്നിവ പരിപാടിയുമായി സഹകരിക്കും.

കഥാസമാഹാരം പ്രകാശനം

കണിയാന്പറ്റ: വാകേരി ശിഹാബ് തങ്ങൾ ഇസ്ലാമിക് അക്കാദമിയിലെ ഡിഗ്രി ഒന്നാം വർഷ വിദ്യാർഥി മുഹമ്മദ് സിനാൻ പിണങ്ങോട് എഴുതിയ ’സ്നാപ് ഷോർട്ട് ’ കഥാസമാഹാരം സയ്യിദ് ആർ.പി. മുജീബ് തങ്ങൾ കൽപ്പറ്റ നിർവഹിച്ചു. യാക്കോബായ സഭ മലബാർ ഭദ്രാസനാധിപൻ ഡോ. ഗീവർഗീസ് മോർ സ്തേഫാനോസ് ആദ്യപ്രതി സ്വീകരിച്ചു. നാസർ മൗലവി, ഹാരിസ് ബാഖവി കന്പളക്കാട്, ഈശ്വരൻ നന്പൂതിരി കൽപ്പറ്റ, വി.കെ. അബ്ദുറഹ്മാൻ ദാരിമി, ഇബ്രാഹിം ഫൈസി പേരാൽ, കെ.കെ.എസ്. തങ്ങൾ, ഹംസ റഹ്മാനി കൊണ്ടിപ്പറന്പ്, ശുഐബുൽ ഹൈതമി വാരാന്പറ്റ, കെ. മുഹമ്മദുകുട്ടി ഹസനി, റിയാസ് ഫൈസി പാപ്ലശേരി തുടങ്ങിയവർ പങ്കെടുത്തു.

പെരിക്കല്ലൂർ ഭൂമി പ്രശ്നം: റവന്യു സെക്രട്ടറി റിപ്പോർട്ട് തേടി

പുൽപ്പള്ളി: കർണാടക സ്വദേശനി അവകാശവാദം ഉന്നയിച്ചതിനെത്തുടർന്നു പെരിക്കല്ലൂർ 33 കവല, 80 കവല പ്രദേശവാസികൾ കുടിയിറക്ക് ഭീഷണി നേരിടുന്ന വിഷയത്തിൽ റവന്യു സെക്രട്ടറി ലാൻഡ് ബോർഡ് സെക്രട്ടറിയുടെ റിപ്പോർട്ട് തേടി. ജനങ്ങളുടെ ആശങ്ക പരിഹരിക്കണമെന്നാവശ്യപ്പെട്ട് ഐ.സി. ബാലകൃഷ്ണൻ എംഎൽഎ റവന്യു മന്ത്രിക്ക് നൽകിയ കത്തിനെ തുടർന്നാണിത്. ലാൻഡ് ബോർഡ് സെക്രട്ടറിയിൽനിന്നു അടിയന്തരമായി റിപ്പോർട്ട് വാങ്ങി പരിശോധിച്ച് തുടർനടപടി സ്വീകരിക്കുമെന്ന് എംഎൽഎയ്ക്ക് റവന്യു സെക്രട്ടറി മറുപടി നൽകി.

വിദ്യാർഥികൾ ലക്ഷ്യം സ്വപ്നം കണ്ട് വളരണം: രമേശ് ചെന്നിത്തല

സുൽത്താൻ ബത്തേരി: വിദ്യാർഥികൾ ലക്ഷ്യം സ്വപ്നം കണ്ട് വളരണമെന്ന് രമേശ് ചെന്നിത്തല എംഎൽഎ. നിയോജകമണ്ഡലത്തിൽ സ്റ്റേറ്റ്, സിബിഎസ്ഇ, ഐഎസ്‌സി സിലബസുകളിൽ എസ്എസ്എൽസി, പ്ലസ് ടു പരീക്ഷകളിൽ ഫുൾ എ പ്ലസ്/ എ 1 നേടിയ വിദ്യാർഥികളെയും എൽഎസ്എസ്, യുഎസ്എസ്, എൻഎംഎംഎസ് ജേതാക്കളെയും ഉന്നത വിജയം നേടിയ വിദ്യാലയങ്ങളെയും ഐ.സി. ബാലൃഷ്ണൻ എംഎൽഎയുടെ ഫ്ളെയർ എഡ്യു സ്കോളർ പദ്ധതിയിൽ ആദരിക്കുന്നതിന് എടത്തറ ഓഡിറ്റോറിയത്തിൽ സംഘടിപ്പിച്ച ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. കുട്ടികൾ ലക്ഷ്യം സ്വപ്നംകണ്ട് വളർന്നാൽ മാത്രമേ വലിയ സ്ഥാനങ്ങളിൽ എത്താൻ കഴിയൂ. നിർമിത ബുദ്ധിക്കു ഉൗന്നൽ നൽകിയുള്ളതാകണം വിദ്യാർഥികളുടെ പഠനം. മൊബൈൽ ഫോണ്‍ ഉപയോഗം വിവേകത്തോടെയാകണം. ഫോണിലെ രഹസ്യങ്ങളെല്ലാംതന്നെ പരസ്യമാണെന്ന് ഓർക്കണമെന്നും മുൻ പ്രതിപക്ഷ നേതാവുമായ ചെന്നിത്തല പറഞ്ഞു. ഐ.സി. ബാലകൃഷ്ണൻ എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ മുഖ്യപ്രഭാഷണം നടത്തി. ജില്ലാ വിദ്യാഭ്യാസ ഉപ ഡയറക്ടർ ശശീന്ദ്രവ്യാസ്, തഹസിൽദാർ എം.എസ്. ശിവദാസൻ, ഹയർ സെക്കൻഡറി ജില്ലാ കോ ഓർഡിനേറ്റർ ഷിവി കൃഷ്ണൻ, ഡിഇഒ സി.വി. മൻമോഹൻ, പൊതുപ്രവർത്തകരായ ടി. മുഹമ്മദ്, കെ.എൽ. പൗലോസ്, ഡി.പി. രാജശേഖരൻ, മാടക്കര അബ്ദുള്ള, സതീഷ് പൂതിക്കാട്, എം.എ. അസൈനാർ, ബാബു പഴുപ്പത്തൂർ, കെ.ഇ. വിനയൻ തുടങ്ങിയവർ പങ്കെടുത്തു. സാജു കൊടിയൻ, ബിജു ചാലക്കുടി, പ്രമോദ് മാള, ഉമ്മർ പൂപ്പറ്റ, സാബു സേവ്യർ എന്നിവർ കലാപരിപാടികൾ അവതരിപ്പിച്ചു.

ജില്ലയിൽ സ്വകാര്യ ബസുകൾ നാളെ മുതൽ അനിശ്ചിതകാലം ഓടില്ല

സുൽത്താൻ ബത്തേരി: ജില്ലയിൽ സ്വകാര്യ ബസുകൾ നാളെ മുതൽ അനിശ്ചിതകാലം ഓടില്ലെന്ന് പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ പ്രസിഡന്‍റ് പി.കെ. ഹരിദാസ്, പി.വി. ജോർജ് എന്നിവർ അറിയിച്ചു. വിദ്യാർഥികളുടെ യാത്രനിരക്ക് കാലോചിതമാക്കുക, ദീർഘദൂര ബസുകളുടെ പെർമിറ്റ് യഥാസമയം പുതുക്കുക, തൊഴിലാളികൾക്ക് പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കിയ നടപടി പിൻവലിക്കുക തുടങ്ങിയ ആവശ്യങ്ങൾ ഉന്നയിച്ച് സ്വകാര്യ ബസ് ഉടമകളുടെ സംയുക്ത സമര സമിതി സംസ്ഥാന വ്യാപകമായി ആഹ്വാനം ചെയ്ത അനിശ്ചിതകാല സമരത്തിന്‍റെ ഭാഗമായാണ് ജില്ലയിൽ സർവീസ് നിർത്തിവയ്ക്കുന്നത്.

തോൽപ്പെട്ടിയിൽ ജീപ്പ് മരത്തിലിടിച്ച് അഞ്ചു പേർക്ക് പരിക്ക്

കാട്ടിക്കുളം: തോൽപ്പെട്ടയിൽ കർണാടക സ്വദേശിയുടെ ജീപ്പ് നിയന്ത്രണംവിട്ട് മരത്തിലിടിച്ച് അഞ്ചു പേർക്ക് പരിക്കേറ്റു. ശനിയാഴ്ച രാത്രിയാണ് അപകടം. വാഹനത്തിന്‍റെ മുൻഭാഗം തകർന്നു. ഡ്രൈവർ സീറ്റിൽ കുടുങ്ങി. പരിക്കേറ്റതിൽ മൂന്നു പേരെ മാനന്തവാടി ഗവ.മെഡിക്കൽ കോളജ് ആശുപത്രിയിലും രണ്ടുപേരെ മേപ്പാടി മെഡിക്കൽ കോളജ് ആശുപത്രിയിലും പ്രവേശിപ്പിച്ചു. മാനന്തവാടി ഫയർ ആൻഡ് റസക്യു സ്റ്റേഷൻ ജീവനക്കാരാണ് രക്ഷാപ്രവർത്തനം നടത്തിയത്.

വൈദ്യുത ലൈൻ ഭീഷണിയാകുന്നു

സുൽത്താൻ ബത്തേരി: കാൽനടയാത്രക്കാർക്കും കർഷകർക്കും ഭീഷണിയായി മരത്തിനിടയിലൂടെയും താഴ്ന്നും കിടക്കുന്ന വൈദ്യുത ലൈൻ. സുൽത്താൻ ബത്തേരി തൊടുവട്ടിലിയാണ് വൈദ്യുത ലൈൻ അപകട ഭീഷണിയിലുള്ളത്. തൊടുവട്ടി ട്രാൻസ്ഫോർമറിൽ നിന്ന് ചെക്ക് ഡാമിനുമുകളിലുടെയാണ് താഴ്ന്നും മരത്തിനിടയിലൂടെയും വൈദ്യുത ലൈൻ കടന്നുപോകുന്നത്. ചെക്ക് ഡാമിനും കുട്ടികൾ കളിക്കുന്ന ചെറിയ മൈതാനത്തിനും സമീപത്തായുള്ള മരത്തിന്‍റെ വൻ ശിഖരത്തിന് ഇടയിലൂടെയാണ് വൈദ്യുത ലൈൻ കടന്നുപോകുന്നത്. രണ്ട് കന്പികളും മരത്തിന്‍റെ ശിഖരങ്ങളിൽ തട്ടിയാണ് കടന്നുപോകുന്നതും. ശക്തമായ കാറ്റിലും മഴയിലും ശിഖരം പൊട്ടിവീണാൽ വൈദ്യുതിലൈൻ പൊട്ടിവീഴാനും അത് കൂടുതൽ അപകടങ്ങൾക്കും കാരണമായേക്കാം. ചെക്ക് ഡാമിന്‍റെ മറുഭാഗത്ത് അപകടകരമാംവിധമാണ് ലൈനുകൾ താഴ്ന്ന് കിടക്കുന്നത്. കനാലിനുമുകളിൽ നിന്ന് കൈ എത്തുന്നതരത്തിലാണ് ഈ ഭാഗത്ത് ലൈനുകളുള്ളത്. ഇതുവഴി നടന്നുപോകുന്നവർ അശ്രദ്ധമായി കൈ മുകിളിലേക്ക് ഉയർത്തിയാൽ വൈദ്യുതി ലൈനിൽതട്ടി അപകടം സംഭവിച്ചേക്കാം. വൈദ്യുതി ലൈനുകൾ ഇത്തരത്തിൽ താഴ്ന്ന് കിടക്കുന്നത് സമീപത്തെ വയലുകളിൽ ജോലിചെയ്യുന്നവർക്കും ഭീഷണിയാണ്. അപകടാവസ്ഥയിലായ ലൈനുകൾ മാറ്റുകയോ ഉയർത്തുകയോ ചെയ്യണമെന്ന് പ്രദേശവാസികൾ പലതവണ ആവശ്യപ്പെട്ടിട്ടും നടപടിയുണ്ടായില്ലെന്നാണ് ആരോപണം. അതിനാൽ അപകടങ്ങൾ സംഭവിക്കുന്നതിനുമുന്പേ വൈദ്യുത ലൈൻ മാറ്റി സ്ഥാപിക്കണമെന്ന ആവശ്യമാണ് ഉയരുന്നത്.

മന്ത്രി ഒ.ആർ. കേളുവിന്‍റെ ഓഫീസിലേക്ക് മാർച്ച് നടത്തി

മാനന്തവാടി: കോണ്‍ഗ്രസ് തൃശിലേരി, തിരുനെല്ലി മണ്ഡലം കമ്മിറ്റികളുടെ സംയുക്താഭിമുഖ്യത്തിൽ മന്ത്രി ഒ.ആർ. കേളുവിന്‍റെ പ്രാദേശിക ഓഫീസിലേക്ക് മാർച്ച് നടത്തി. തിരുനെല്ലി ബഡ്സ്, ആശ്രമം സ്കൂളുകളുടെ ശോച്യാവസ്ഥയിൽ പ്രതിഷേധിച്ചു നടത്തിയ മാർച്ച് ഓഫീസ് പരിസരത്ത് പോലീസ് തടഞ്ഞു. തുടർന്നു ചേർന്ന യോഗം കോണ്‍ഗ്രസ് ബ്ലോക്ക് കമ്മിറ്റി പ്രസിഡന്‍റ് എ.എം. നിശാന്ത് ഉദ്ഘാടനം ചെയ്തു. തൃശിലേരി മണ്ഡലം പ്രസിഡന്‍റ് സതീശൻ പുളിമൂട് അധ്യക്ഷത വഹിച്ചു. തിരുനെല്ലി മണ്ഡലം പ്രസിഡന്‍റ് ഒ.പി. ഹസൻ, ഡിസിസി ജനറൽ സെക്രട്ടറിമാരായ കമ്മന മോഹനൻ, പി.വി. ജോർജ്, കോണ്‍ഗ്രസ് ബ്ലോക്ക് വൈസ് പ്രസിഡന്‍റുമാരായ റഷീദ് തൃശിലേരി, ബാലനാരായണൻ ചെറുകുന്പം, കർഷക കോണ്‍ഗ്രസ് ജില്ലാ ജനറൽ സെക്രട്ടറി റീന ജോർജ്, കെ.വി. ഷിനോജ് എന്നിവർ പ്രസംഗിച്ചു.

ധന്യൻ മാർ ഇവാനിയോസ് മെത്രാപ്പോലീത്തയുടെ ഓർമ്മദിനം ആചരിച്ചു

പുൽപ്പള്ളി: മലങ്കര സുറിയാനി കത്തോലിക്കാ സഭയുടെ ശില്പി ധന്യ മാർ ഈവാനിയോസ് മെത്രാപ്പോലീത്തയുടെ 72-ാമത് ഓർമ്മ ദിനാചരണം പുൽപ്പള്ളി വൈദിക ജില്ലയുടെ നേതൃത്വത്തിൽ വിവിധ പരിപാടികളോടെ പുൽപ്പള്ളി സെന്‍റ് ജോർജ് തീർഥാടന ദേവാലയത്തിൽ നടത്തി. ആഘോഷ പരിപാടി ബത്തേരി രൂപത വികാരി ജനറൽ റവ.ഡോ.ജേക്കബ് ഓലിക്കൽ മുഖ്യ കാർമികത്വം വഹിച്ചു. പുൽപ്പള്ളി വൈദിക ജില്ല പ്രോട്ടോ വികാരി ഫാ. ചാക്കോ ചേലംപറന്പത്ത്, മാത്യു മുണ്ടക്കോടിൽ കോർ എപ്പിസ്കോപ്പ, ഫാ. ജോർജ് കാലായിൽ, ഫാ. മാത്യു ചൂരകുഴിയിൽ, അജപാലന സമിതി സെക്രട്ടറി പി.ഒ. ജോയ്, പുൽപ്പള്ളി ഇടവക ട്രസ്റ്റി ജയിംസ് തേവലത്തിൽ, പാസ്റ്ററൽ കൗണ്‍സിൽ അംഗം മത്തായി തണ്ടായിമറ്റം എന്നിവർ നേതൃത്വം നൽകി. തുടർന്ന് പഴശിരാജ കോളജ് അങ്കണത്തിലേക്ക് നടത്തിയ തീർഥാടന പദയാത്രയിൽ മേഖലയിലെ ഇടവകകളിൽ നിന്നുള്ള വൈദികരും സന്യസ്ഥരും സഭാ വിശ്വാസികളും പങ്കെടുത്തു.

രമേശ് ചെന്നിത്തല സമരിറ്റൻ ഭവൻ സന്ദർശിച്ചു

മാനന്തവാടി: കോണ്‍ഗ്രസ് നേതാവും മുൻ പ്രതിപക്ഷ നേതാവുമായ രമേശ് ചെന്നിത്തല സമരിറ്റൻ ഭവൻ ഓൾഡ് ഏജ് ഹോം സന്ദർശിച്ചു. സമരിറ്റൻ ഭവൻ സിസ്റ്റർ സുപ്പീരിയർ കാർമൽ, സിസ്റ്റർ അനീന, സിസ്റ്റർ റെൻസി എന്നിവർ ചേർന്ന് അദ്ദേഹത്തെ സ്വീകരിച്ചു. മുൻ മന്ത്രി പി.കെ. ജയലക്ഷ്മി, കെപിസിസി സെക്രട്ടറി അഡ്വ.എൻ.കെ. വർഗീസ്, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് എ.എം. നിഷാന്ത്, പി.വി. ജോർജ്, സി. അഷറഫ്, സുനിൽ ആലിക്കൽ, സിൽവി തോമസ്, ലേഖ രാജീവൻ എന്നിവർ ചെന്നിത്തലയ്ക്കൊപ്പം ഉണ്ടായിരുന്നു. അന്താവാസികൾക്കൊപ്പം കുറച്ചുനേരം ചെലവഴിച്ചശേഷമാണ് ചെന്നിത്തലയും സംഘവും മടങ്ങിയത്.

ജില്ലയിലെ ആദ്യത്തെ സ്പോർട്സ് കോളജ് ബത്തേരിയിൽ പ്രവർത്തനം തുടങ്ങുന്നു

സുൽത്താൻ ബത്തേരി: ജില്ലയിൽ ആദ്യത്തെ ഫിസിക്കൽ എഡ്യുക്കേഷൻ ആൻഡ് സ്പോർട്സ് കേ ളജ് മലങ്കര കത്തോലിക്കാ സഭയുടെ കീഴിൽ ബത്തേരിയിൽ പ്രവർത്തനം തുടങ്ങുന്നു. മാർത്തോമ്മാ കോളജ് ഓഫ് ഫിസിക്കൽ എഡ്യുക്കേഷൻ എന്ന പേരിലാണ് കോളജ് ആരംഭിക്കുന്നത്. കാലിക്കട്ട് യൂണിവേഴ്സിറ്റിയുടെ അഫിലിയേഷനോടെ ബാച്‌ലർ ഇൻ ഫിസിക്കൽ എഡ്യുക്കേഷൻ എന്ന നാല് വർഷത്തെ സമഗ്ര ബിരുദ പഠന പരിപാടിയാണിത്. പ്ലസ് ടു വിജയിച്ചവർക്ക് അപേക്ഷിക്കാം. റസിഡൻഷ്യൽ രീതിയിൽ പ്രവർത്തിക്കുന്ന കോളജിലേക്ക് ആണ്‍കുട്ടികൾക്കും പെണ്‍കുട്ടികൾക്കും അപേക്ഷിക്കാം. അധ്യാപകരെയും പരിശീലകരെയും സ്പോർട്സ് പ്രഫഷനലുകളെയും വളർത്തിയെടുക്കുകയാണ് ലക്ഷ്യം. ബത്തേരി ബിഷപ് ഡോ. ജോസഫ് മാർ തോമസാണ് കോളജിന്‍റെ പ്രവർത്തനങ്ങൾക്ക് നേതൃത്വം നൽകുന്നത്. കായിക പരിജ്ഞാനം, അടിസ്ഥാന ഇംഗ്ലീഷ് വ്യാകരണം എന്നിവയിൽ എഴുത്തുപരീക്ഷയും കായിക പ്രകടനത്തിലെ മികവും വിലയിരുത്തിയാകും പ്രവേശനം. 26 വരെ അപേക്ഷിക്കാം. ഫോണ്‍: 9388900058.

വനം-വന്യജീവി സംരക്ഷണ നിയമം കാലോചിതമാക്കണം: സെമിനാർ

കൽപ്പറ്റ: മലയോര ജനതയുടെ ജീവനും സ്വത്തിനും സംരക്ഷണം നൽകുന്നവിധം 1972ലെ വനം-വന്യജീവി സംരക്ഷണ നിയമം ഭേദഗതി ചെയ്യാൻ കേന്ദ്ര സർക്കാർ തയാറാകണമെന്ന് സീനിയർ ജേണലിസ്റ്റ്സ് ഫോറം ജില്ലാ കമ്മിറ്റി വന്യമൃഗശല്യ ലഘൂകരണം എന്ന വിഷയത്തിൽ കൈനാട്ടി പദ്മപ്രഭാ ലൈബ്രറി ഹാളിൽ സംഘടിപ്പിച്ച സെമിനാർ ആവശ്യപ്പെട്ടു. വന്യജീവി ശല്യം കൂടുതലുള്ള പ്രദേശമാണ് വയനാട്. കാടിറങ്ങുന്ന വന്യജീവികൾ ജനജീവിതം ദുസഹമാക്കുകയാണ്. വന്യജീവികളെ ജനവാസ കേന്ദ്രങ്ങളിലേക്കു ആകർഷിക്കാതിരിക്കാൻ അവയ്ക്ക് ആവശ്യമായ ആഹാരം വനത്തിൽ ഉറപ്പുവരുത്തണമെന്നും സെമിനാർ ആവശ്യപ്പെട്ടു. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. ഫോറം ജില്ലാ പ്രസിഡന്‍റ് പി.കെ. അബ്ദുൾ അസീസ് അധ്യക്ഷത വഹിച്ചു. ഡിസിസി ജനറൽ സെക്രട്ടറി കെ.ഇ. വിനയൻ, സി.കെ. ശിവരാമൻ (സിപിഎം), കെ.കെ.ഹംസ (ആർജെഡി), പി.എം. ജോയ് (സിപിഐ), റസാഖ് കൽപ്പറ്റ (മുസ്ലിം ലീഗ്), കെ.ജെ. ദേവസ്യ (കേരള കോണ്‍ഗ്രസ്-എം), കെ. സദാനന്ദൻ(ബിജെപി), അഡ്വ.പി. ചാത്തുക്കുട്ടി, പ്രദീപ് മാനന്തവാടി, കെ.സജീവൻ എന്നിവർ പ്രസംഗിച്ചു. വയനാട് വൈൽഡ്ലൈഫ് ഡിവിഷൻ കണ്‍സർവേഷൻ ബയോളജിസ്റ്റ് വിഷ്ണു ഓമനക്കുട്ടൻ വിഷയാവതരണം നടത്തി. എൻ.ഒ. ദേവസ്യ, വർഗീസ് വട്ടക്കാട്ടിൽ, പി.വി. മത്തായി, ജേക്കബ് വൈദ്യർ, പി. പദ്മരാജ്, കെ. പ്രകാശൻ, വി.പി. വർക്കി, പി.ജി. മോഹൻദാസ് തുടങ്ങിയവർ ചർച്ചയിൽ പങ്കെടുത്തു. ഹ്യൂം സെന്‍ററിലെ ഡോ.ടി.ആർ. സുമ മോഡറേറ്റായി. ഫോറം സെകട്ടറി ടി.വി. രവീന്ദ്രൻ സ്വാഗതവും ട്രഷറർ പി. രാജഗോപാലൻ നന്ദിയും പറഞ്ഞു.

ഗവ.മെഡിക്കൽ കോളജ് ആശുപത്രി : കെട്ടിടങ്ങളുടെ ചോർച്ച പരിഹരിക്കുന്നതിന് കത്ത് നൽകി

മാനന്തവാടി: ഗവ.മെഡിക്കൽ കോളജ് ആശുപത്രിയിലെ ഐപി, ഒപി വിഭാഗം കെട്ടിടങ്ങളുടെ ചോർച്ച പരിഹരിക്കുന്നതിനും ശുചിമുറികളുടെ നവീകരണം, ഐസി യൂണിറ്റ്, ഓപ്പറേഷൻ തീയേറ്റർ അറ്റകുറ്റപ്പണി എന്നിവ അടിയന്തരമായി നടത്താൻ പൊതുമരാമത്ത് കെട്ടിട വിഭാഗത്തിന് കത്ത് നൽകിയതായി സൂപ്രണ്ട് അറിയിച്ചു. പൊതുമരാമത്ത് കെട്ടിട വിഭാഗം (സ്പെഷൽ ബിൽഡിംഗ്) നേരിട്ടാണ് കെട്ടിടങ്ങളുടെ പ്രവൃത്തികളും അറ്റകുറ്റപ്പണികളും ചെയ്യേണ്ടത്. ആശുപത്രിയിലെ സിടി സ്കാൻ യന്ത്രം പരിഹരിക്കാൻ കഴിയാത്തവിധം തകരാറിലായതിനാൽ പുതിയത് വാങ്ങാൻ നടപടി സ്വീകരിച്ചിട്ടുണ്ട്. പുതിയ യന്ത്രം വരുന്നതുവരെ നല്ലൂർനാട് ഗവ.കാൻസർ ആശുപത്രിയിലെ സിടി സ്കാൻ സൗകര്യം ഉപയോഗപ്പെടുത്തും. ആശുപത്രിയിൽ 41 ഡോക്ടർമാരുടെ സേവനം ലഭ്യമാണ്. മൂന്ന് ഡോക്ടർമാർ ജോലി ക്രമീകരണ വ്യവസ്ഥയിൽ തുടരുന്നുണ്ട്. 24 മണിക്കൂറും പ്രവർത്തിക്കുന്ന അത്യാഹിത വിഭാഗത്തിൽ രണ്ട് ഡോക്ടർമാരുടെ മുഴുവൻ സമയ സേവനവും അത്യാവശ്യ ഘട്ടങ്ങളിൽ സ്പെഷാലിറ്റി ഡോക്ടർമാരുടെ സേവനവും ലഭ്യമാണ്. 2021 ഫെബ്രുവരിയിൽ മാനന്തവാടി ജില്ലാ ആശുപത്രി മെഡിക്കൽ കോളജ് ആശുപത്രിയാക്കി ഉയർത്തിയശേഷം ഇവിടെ ചികിത്സക്കെത്തുന്ന രോഗികളുടെ എണം ഗണ്യമായി വർധിച്ചു.2020ൽ ജില്ലാ ആശുപത്രിയായിരുന്നപ്പോൾ ഒപി, ഐപി വിഭാഗങ്ങളിൽ 2,70,416 പേരാണ് ചികിത്സ നേടിയത്. കഴിഞ്ഞ വർഷം 6,83,914 പേർ ചികിത്സയ്ക്കെത്തി. ആശുപത്രിയിലെ 11 വാഹനങ്ങളും പ്രവർത്തന സജ്ജമാണെന്നും സൂപ്രണ്ട് പറഞ്ഞു.

റാഫ് മാനന്തവാടി മേഖലാ കണ്‍വൻഷൻ നടത്തി

മാനന്തവാടി: റോഡ് ആക്സിഡന്‍റ് ആക്ഷൻ ഫോറം(റാഫ്) മേഖലാ കണ്‍വൻഷൻ ഡബ്ല്യുഎംഒ ബാഫഖി ഹോം ഓഡിറ്റോറിയത്തിൽ നടത്തി. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു. റാഫ് ജില്ലാ പ്രസിഡന്‍റ് മുഹമ്മദ് ഫാരിസ് സൈൻ അധ്യക്ഷത വഹിച്ചു. സെക്രട്ടറി സജി മണ്ഡലത്തിൽ മുഖ്യപ്രഭാഷണം നടത്തി. കെ. അഹമ്മദ്, പി. ഉസ്മാൻ, എ. അബ്ദുൾ റസാഖ്, കെ.എം. ഷിനോജ്, ആമിന സത്താർ, സി. കുഞ്ഞബ്ദുള്ള ഹാജി, പ്രേംരാജ് ചെറുകര, എം. മണികണ്ഠൻ, സി. മമ്മു, സൗജത്ത് ഉസ്മാൻ, കെ.എം. അബ്ദുള്ള എന്നിവർ പ്രസംഗിച്ചു.

കാട്ടാനകൾ 650 വാഴ നശിപ്പിച്ചു

മാനന്തവാടി: തിരുനെല്ലി പഞ്ചായത്തിലെ അപ്പപ്പാറ എടയൂർക്കുന്നിൽ കാട്ടാനക്കൂട്ടം കൃഷി നശിപ്പിച്ചു. എടയൂർ ഉന്നതിയിലെ കാളനും നിധീഷും പാട്ടത്തിനെടുത്ത ഭൂമിയിൽ നടത്തിയ വാഴക്കൃഷി കാട്ടാനക്കൂട്ടം ചവിട്ടിമെതിച്ചു. കഴിഞ്ഞദിവസം രാത്രിയാണ് സംഭവം. വനാതിർത്തിയിലെ പ്രതിരോധവേലി തകർത്താണ് ആനകൾ കൃഷിടത്തിലെത്തിയത്. ഒരു മാസംകൂടി കഴിഞ്ഞാൽ വിളവെടുക്കാവുന്ന 650 വാഴയാണ് കാട്ടാനക്കൂട്ടം നശിപ്പിച്ചത്. വനത്താൻ ചുറ്റപ്പെട്ട പ്രദേശമാണ് എടയൂർക്കുന്ന്. കാളനും നിധീഷും 3,000 വാഴയാണ് നട്ടത്. ഇതിൽ 150 എണ്ണം മാസങ്ങൾ മുന്പ് നശിപ്പിച്ചിരുന്നു.

പശുവിനെയും രണ്ട് പശുക്കുട്ടികളെയും കാണാതായി, മൂരിക്കുട്ടൻ പരിക്കേറ്റ നിലയിൽ; പുലികളുടെ ആക്രമണമെന്നു സംശയം

സുൽത്താൻ ബത്തേരി: മേയാൻവിട്ട പശുവിനെയും രണ്ട് പശുക്കുട്ടികളെയും കാണാതായി. ഒപ്പമുണ്ടായിരുന്ന മുരിക്കുട്ടനെ പരിക്കേറ്റ നിലയിൽ കണ്ടെത്തി. കന്നുകാലികളെ പുലികൾ ആക്രമിച്ചെന്ന സംശയത്തിൽ ഉടമ. കുന്താണി റാട്ടക്കുണ്ട് കൗണ്ടത്ത് നൗഷാദിന്‍റെ രണ്ട് വയസിനടുത്ത് പ്രായമുള്ള പശുവിനെയും ആറും, ഏഴും മാസം പ്രായമുള്ള പശുക്കുട്ടികളെയുമാണ് കാണാതായത്. രണ്ട് വയസുള്ളതാണ് മുറിവേറ്റ നിലയിൽ കണ്ട മൂരിക്കുട്ടൻ. പുലി ആക്രമണത്തിലാണ് മൂരിക്കുട്ടനു പരിക്കേറ്റതെന്നു കരുതുന്നതായി നൗഷാദ് പറഞ്ഞു. വെള്ളിയാഴ്ച വൈകുന്നേരമാണ് പശുവിനെയും പശുക്കുട്ടികളെയും കാണാതായതും മൂരിക്കുട്ടനു പരിക്കേറ്റതും നൗഷാദിന്‍റെ ശ്രദ്ധയിൽപ്പെട്ടത്. കന്നുകാലികളെ മേയാൻ വിട്ടതിനടുത്ത് പതിഞ്ഞ കാൽപ്പാടുകൾ പുലിയുടേതാണെന്ന് വനപാലകർ സ്ഥിരീകരിച്ചതായി നൗഷാദ് പറഞ്ഞു.പശുഫാം നടത്തുന്ന നൗഷാദ് വെള്ളിയാഴ്ച പകൽ മഴ ശമിച്ചപ്പോഴാണ് മേയുന്നതിന് വീടിനു കുറച്ചകലെ പശുവിനെയും മൂരിക്കുട്ടനെയും കെട്ടുകയും പശുക്കുട്ടികളെ അഴിച്ചുവിടുകയും ചെയ്തത്. വൈകുന്നേരം തൊഴുത്തിൽ കയറ്റുന്നതിനു ചെന്നപ്പോൾ പശുവിനെയും പശുക്കുട്ടികളെയും കാണാനുണ്ടായിരുന്നില്ല. കഴുത്തിലും ചുമലിലും ആഴത്തിൽ മുറിവേറ്റ നിലയിലായിരുന്നു മൂരിക്കുട്ടൻ. ഒന്നിലധികം പുലികളാണ് കാലികളെ പിടിച്ചതെന്നു നൗഷാദ് കരുതുന്നു. കാണാതായ പശുവിനും പശുക്കുട്ടികൾക്കുംവേണ്ടി നടത്തിയ തെരച്ചിൽ ഫലം ചെയ്തില്ല. വനത്തിൽ ഡ്രോണ്‍ സഹായത്തോടെ തെരച്ചിൽ നടത്താനാണ് നൗഷാദിന്‍റെ തീരുമാനം.

മൂടക്കൊല്ലിയിലെ കാട്ടാന ശല്യം: ബിജെപി സമരത്തിലേക്ക്

സുൽത്താൻ ബത്തേരി: മൂടക്കൊല്ലിയിലെയും സമീപപ്രദേശങ്ങളിലെയും കാട്ടാനശല്യത്തിന് പരിഹാരം ആവശ്യപ്പെട്ട് ബിജെപി ശക്തമായ പ്രക്ഷോഭം സംഘടിപ്പിക്കുമെന്ന് പുൽപ്പള്ളി മണ്ഡലം ജനറൽ സെക്രട്ടറി ശ്രീനേഷ് മൂടക്കൊല്ലി, വാകേരി മേഖലാ പ്രസിഡന്‍റ് നൈജു ആലിക്കൽ, വസന്തകുമാർ എന്നിവർ വാർത്താസമ്മേളനത്തിൽ അറിയിച്ചു. ദിവസങ്ങളായി മൂടക്കൊല്ലിയിലും പരിസരങ്ങളിലും കാട്ടാനശല്യം രൂക്ഷമാണ്. കൂടല്ലൂർ വാകേരിയിൽ 12 ദിവസം മുന്പാണ് അഭിലാഷ് എന്ന യുവാവിനെ വീടിന് സമീപം കാട്ടാന ആക്രമിച്ചത്. ഈയിടെ കൂടല്ലൂരിലെ വിലാസിനിയുടെ വീടിന്‍റെ സിറ്റൗട്ടിൽ വരെ കാട്ടാനയെത്തി. കഴിഞ്ഞ ദിവസം പുലർച്ചെ കോട്ടൂർ ബാബു, ആനമുണ്ടയിൽ ഗോപി, നെടുമല ശശി എന്നിവരുടെ കൃഷി ആന നശിപ്പിച്ചു. ജനങ്ങളുടെ ശക്തമായ പ്രതിഷേധത്തെത്തുടർന്ന് കാട്ടാനകളെ കുംകി ആനകളുടെ സഹായത്തോടെ തുരത്തിയെങ്കിലും അവ ജനവാസ കേന്ദ്രങ്ങളിൽ തിരിച്ചെത്തുകയാണുണ്ടായത്. ആനകളെ ഉൾക്കാട്ടിലേക്കു തുരത്താൻ വനം വകുപ്പിന് ശുഷ്കാന്തിയില്ല. റെയിൽ ഫെൻസിംഗ് തകർന്ന ഭാഗത്തുകൂടിയാണ് ആനകൾ ജനവാസ മേഖലയിൽ എത്തുന്നത്. വനാതിർത്തിയിൽ പലേടത്തും പ്രതിരോധ മതിലോ വേലിയോ ഇല്ല. റെയിൽ ഫെൻസിംഗ് നന്നാക്കി പരിപാലനം ഉറപ്പുവരുത്തണം. കുംകി ആനകളെ ഉപയോഗപ്പെടുത്തിയുള്ള പട്രോളിംഗ് ശക്തമാക്കണം. പ്രദേശത്ത് വഴിവിളക്കുകൾ യുദ്ധകാലാടിസ്ഥാനത്തിൽ സ്ഥപിക്കണം. വിളനാശം സംഭവിച്ച കർഷകർക്ക് നഷ്ടപരിഹാരം വേഗത്തിൽ നൽകണം. താഴത്തങ്ങാടി-മുടക്കൊല്ലി റോഡ് ഗതാഗതയോഗ്യമാക്കണമെന്നും ബിജെപി നേതാക്കൾ ആവശ്യപ്പെട്ടു.

ഉന്നത വിജയം നേടിയ സ്കൂളുകളെയും വിദ്യാർഥികളെയും അനുമോദിച്ചു

കൽപ്പറ്റ: നിയോജമണ്ഡലത്തിൽ എസ്എസ്എൽസി, പ്ലസ്ടു, സിബിഎസ്‌സി, ഐസിഎസ്‌സി പരീക്ഷകളിൽ നൂറു ശതമാനം വിജയം നേടിയ സ്കൂളുകളെയും എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങളിലും എ പ്ലസ് നേടിയ വിദ്യാർഥികളെയും ടി. സിദ്ദിഖ് എംഎൽഎയുടെ നേതൃത്വത്തിൽ നടപ്പാക്കുന്ന സ്പാർക്ക് വിദ്യാഭ്യാസ പദ്ധതിയുടെ ഭാഗമായി അനുമോദിച്ചു. സെന്‍റ് ജോസഫ്സ് സ്കൂൾ ഓഡിറ്റോറിയത്തിൽ എക്സൈസ് മുൻ കമ്മീഷണർ ഋഷിരാജ്സിംഗ് ഉദ്ഘാടനം ചെയ്തു. യൗവനത്തെ നശിപ്പിക്കുന്ന ലഹരി ഉപയോഗത്തിനെതിരായ പ്രതിരോധം അനിവാര്യതയാണെന്നു അദ്ദേഹം പറഞ്ഞു. ടി. സിദ്ദിഖ് എംഎൽഎ അധ്യക്ഷത വഹിച്ചു. കേരളത്തിൽ പട്ടികവർഗ വിഭാഗത്തിൽനിന്നു ആദ്യമായി ഐഎഎസ് നേടിയ ശ്രീധന്യ സുരേഷ് ഓണ്‍ലൈൻ വഴി മുഖ്യപ്രഭാഷണം നടത്തി. നഗരസഭാ ചെയർമാൻ ടി.ജെ. ഐസക്, ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, പഞ്ചായത്ത് പ്രസിഡന്‍റുമാരായ പി.പി. റെനീഷ്, ബി. ഉണ്ണിക്കൃഷ്ണൻ, ഷമീം പാറക്കണ്ടി, ബ്ലോക്ക് പഞ്ചായത്ത് അംഗം പി.കെ. അബ്ദുറഹ്മാൻ, പി.പി. ആലി, ടി. ഹംസ, മജീദ് വട്ടക്കാരി, ഹാരിസ് കണ്ടിയൻ, ഗോകുൽദാസ് കോട്ടയിൽ, പോൾസണ്‍ കൂവയ്ക്കൽ, റസാഖ് കൽപ്പറ്റ, അഡ്വ. ഗൗതം ഗോകുൽദാസ്, നജീബ് കരണി, വി.ജി, ഷിബു, സലീം മേമന, ഷിംറോണ്‍ ആലക്കൽ, പി. കബീർ, കെ.ആർ. ബിനീഷ് തുടങ്ങിയവർ പങ്കെടുത്തു.

ദേശീയ സ്വച്ഛ് സർവേക്ഷൻ റാങ്കിംഗ്: മികച്ച പ്രകടനവുമായി കൽപ്പറ്റ, ബത്തേരി നഗരസഭകൾ

കൽപ്പറ്റ: ദേശീയ സ്വച്ഛ് സർവേക്ഷൻ റാങ്കിംഗിൽ മികച്ച പ്രകടനവുമായി കൽപ്പറ്റ, ബത്തേരി നഗരസഭകൾ. ജിഎഫ്സി(ഗാർബേജ് ഫ്രീ സിറ്റി) സ്റ്റാർ പദവിയും ഒഡിഎഫ് പ്ലസ് പ്ലസ് അവാർഡും കൽപ്പറ്റ നഗരസഭ നേടി. സ്മോൾ സിറ്റി കാറ്റഗറിയിൽ സംസ്ഥാനത്ത് 13-ാം റാങ്കും അഖിലേന്ത്യ തലത്തിൽ 289-ാം റാങ്കും കൽപ്പറ്റയ്ക്കാണ്. സ്മോൾ സിറ്റി കാറ്റഗറിയിൽ സംസ്ഥാനത്ത് 16-ാം സ്ഥാനവും അഖിലേന്ത്യ തലത്തിൽ 379-ാം സ്ഥാനവും ബത്തേരി നേടി. സ്വച്ഛ് സർവേക്ഷൻ റാങ്കിംഗിന്‍റെ ഭാഗമായി നിരവധി പ്രവർത്തനങ്ങളാണ് കൽപ്പറ്റ നഗരസഭയിൽ നടന്നതെന്ന് ചെയർമാൻ ടി.ജെ. ഐസക് പറഞ്ഞു. ജൈവ, അജൈവ മാലിന്യം കൃത്യമായി സംസ്കരിക്കാൻ നഗരസഭയ്ക്ക് സാധിക്കുന്നുണ്ട്. കക്കൂസ് മാലിന്യം സംസ്കരിക്കാൻ കഴിവുള്ള എഫ്എസ്ടിപി, ജൈവമാലിന്യ സംസ്കരണത്തിനു വിൻഡോ കന്പോസ്റ്റിംഗ് യൂണിറ്റ്, റിസോഴ്സ് റിക്കവറി ഫെസിലിറ്റി തുടങ്ങിയവ വെള്ളാരംകുന്ന് ബയോപാർക്കിൽ പ്രവർത്തിക്കുന്നുണ്ട്. സാനിറ്ററി മാലിന്യ സംസ്കരണത്തിന് പ്ലാന്‍റ് അടുത്ത വർഷത്തോടെ സജ്ജമാകും. ശുചിത്വം മുൻനിർത്തി ചിത്രനഗരി പദ്ധതി, തെളിമയുള്ള കൽപ്പറ്റ, ഹാൻഡ് റെയിൽ പെയിന്‍റിംഗ്, ഈ നഗരം നമ്മുടേത് മെഗാ കാന്പയിൻ, വഴിയോരങ്ങളിൽ വേസ്റ്റ് ബിന്നുകൾ, കൈമാറ്റക്കട, വേസ്റ്റ് ടു വണ്ടർ പാർക്ക് തുടങ്ങിയ പരിപാടികളും നഗരസഭ നടപ്പാക്കിയിട്ടുണ്ട്. നഗരപരിധിയിൽ മാലിന്യക്കൂനകൾ പൂർണമായും ഇല്ലാതാക്കാൻ കൃത്യമായ പദ്ധതികളാണ് ബത്തേരി നഗരസഭ നടപ്പാക്കിയതെന്നു ചെയർമാൻ ടി.കെ. രമേശ് പറഞ്ഞു. ക്ലീനിംഗ് കാന്പയിനുകൾ, മനുഷ്യച്ചങ്ങല, ജാഗ്രത റാലികൾ, ഫ്ളാഷ് മോബുകൾ, പ്രചാരണ വാഹനറാലി, ചിത്രരചനാ മത്സരം, ഹരിത കർമസേനാംഗങ്ങൾ, ശുചിത്വ തൊഴിലാളികൾ എന്നിവർക്ക് പ്രത്യേക പരിശീലനം, തൊഴിലാളികൾക്ക് മെഡിക്കൽ കാന്പ്, നഗരപരിധിയിൽ ഐഇസി ബോർഡുകൾ, മതിലുകളിൽ ശുചിത്വ സന്ദേശങ്ങൾ, ചുമർചിത്രങ്ങൾ, റെഡ്യൂസ് റീയൂസ് റീ സൈക്കിൾ സെന്‍റർ, പൊതുശൗചാലയങ്ങളിലേക്ക് ദിശാ ബോർഡ് സ്ഥാപിക്കൽ, ഫീഡ്ബാക്ക് സംവിധാനം, ജലാശയങ്ങൾ വൃത്തിയാക്കൽ, മാലിന്യം വലിച്ചെറിയുന്നതിന് പിഴ, ഓവുചാലുകളിലും വെള്ളച്ചാലുകളിലും ട്രാഷ് അറസ്റ്ററുകൾ സ്ഥാപിക്കൽ തുടങ്ങിയവ നഗരസഭ നടത്തി.

ക്ഷീര സംഘങ്ങൾക്ക് മിൽമ അവാർഡുകൾ നൽകുന്നു

കൽപ്പറ്റ: മിൽമ മലബാർ മേഖല യൂണിയൻ പ്രവർത്തന പരിധിയിൽ 2024-25ൽ മികച്ച പ്രവർത്തനം കാഴ്ചവച്ച ആനന്ദ് മാതൃക ക്ഷീര സംഘങ്ങൾക്ക് ജില്ല/യൂണിയൻ തലത്തിൽ അവാർഡുകൾ നൽകുന്നു. ഏറ്റവും മികച്ച ആനന്ദ് മാതൃക ക്ഷീരസംഘം, ബിഎംസി സംഘം, ഗുണനിലവാരമുള്ള പാൽ നൽകിയ സംഘം, മിൽമ ഉത്പനങ്ങൾ ഏറ്റവും കൂടുതൽ വിറ്റഴിച്ച സംഘം എന്നീ വിഭാഗങ്ങളിലാണ് അവാർഡ്. യൂണിയൻ തലത്തിൽ 25,000 രൂപയും ജില്ലാതലത്തിൽ 10,000 രൂപയുമാണ് അവാർഡ്. രണ്ടു തലങ്ങളിലും പ്രശസ്തി പത്രം, അനുമോദന ഫലകം എന്നിവയും നൽകും.

തവളകളെ കണ്ടും അറിഞ്ഞും സ്കൂൾ വിദ്യാർഥികൾ

കൽപ്പറ്റ: ഹ്യൂം സെന്‍റർ ഫോർ ഇക്കോളജി ആൻഡ് വൈൽഡ് ലൈഫ് ബയോളജി പൂക്കോട് വെറ്ററിനറി കോളജ് കാന്പസിൽ സംഘടിപ്പിച്ച ഫ്രോഗ് വാച്ച് സ്കൂൾ വിദ്യാർഥികൾക്ക് തവളകളെ കാണാനും അറിയാനും അവസരമായി. ജില്ലയുടെ വിവിധ ഭാഗങ്ങളിൽനിന്നുള്ള 30 കുട്ടികൾ പരിപാടിയിൽ പങ്കെടുത്തു. പച്ചിലപ്പാറൻ, പൊൻമുടിത്തവള, കാട്ടുമണവാട്ടി, പശ്ചിമഘട്ടത്തിൽ വയനാട്ടിൽ മാത്രമുള്ള മഴത്തുള്ളിത്തവള (ലൈക്കൻ ബുഷ് ഫ്രോഗ്), പാറമാക്രി തുടങ്ങിയ ഇനം തവളകളെയും വിവിധയിനം റ്റോഡുകളെയും പച്ചിലപ്പാന്പ് നീർക്കോലി, ഓന്തുകൾ തുടങ്ങിയ ഇനം ഉരഗങ്ങളെയും കുട്ടികൾ നിരീക്ഷിച്ചു. നാച്യുറലിസ്റ്റും ഗവേഷകനുമായ ഉമേഷ് പാവുകണ്ടി നേതൃത്വം നൽകി. തവള വൈവിധ്യം, അവയുടെ ആവാസവ്യവസ്ഥാ സേവനങ്ങൾ, വെല്ലുവിളികൾ എന്നിവ അദ്ദേഹം കുട്ടികളോട് വിശദീകരിച്ചു. നാച്യുറലിസ്റ്റ് ഡേവിഡ് രാജു തവളകളെയും പരിസ്ഥിതിയിലെ മാറ്റം അവയിൽ വരുത്തുന്ന പ്രത്യാഘാതത്തെയും കുറിച്ച് ക്ലാസ് നൽകി. പൂക്കോട് വെറ്ററിനറി കോളജ് അസിസ്റ്റന്‍റ് പ്രഫ. ഡോ. ആർ.എൽ. രതീഷ്, ഹ്യൂം സെന്‍റർ ഡയറക്ടർ സി.കെ. വിഷ്ണുദാസ്, ഡോ.ടി.ആർ. സുമ എന്നിവർ കുട്ടികൾക്ക് മാർഗനിർദേശം നൽകി. ഫ്രോഗ് വാച്ചിന്‍റെ ഭാഗമായി നടത്തിയ ആർട്ട് സെഷന് ആർട്ടിസ്റ്റ് ചിത്ര നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]