ഓണം കർഷകച്ചന്തക്ക് തുടക്കം

ശ്രീകണ്ഠപുരം: നഗരസഭ കൃഷിഭവന്‍റെ നേതൃത്വത്തിൽ നടത്തുന്ന "ഓണസമൃദ്ധി 2025' കർഷകച്ചന്ത നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ജോസഫീന വർഗീസ് അധ്യക്ഷത വഹിച്ചു. കൃഷി ഓഫീസർ കെ. ശ്രീധരൻ, വൈസ് ചെയർമാൻ കെ. ശിവദാസൻ, നഗരസഭ സ്ഥിരം സമിതി അധ്യക്ഷന്മാരായ പി.പി. ചന്ദ്രാംഗതൻ, കെ.സി. ജോസഫ്, കൗൺസിലർമാരായ കെ.വി. കുഞ്ഞിരാമൻ, കെ.വി. ഗീത, കെ.ജെ. ജോണി, ക്ലീൻസിറ്റി മാനേജർ പി. മോഹനൻ, ഹെൽത്ത് ഇൻസ്പെക്‌ടർ വി. പ്രേമരാജൻ, പബ്ലിക് ഹെൽത്ത് ഇൻസ്പെക്‌ടർ പി.വി. സതീശൻ, കൃഷി അസിസ്റ്റന്‍റ് ഇ. സിജിന, കൃഷി അസിസ്റ്റന്‍റ് എം.വി. വീണ തുടങ്ങിയവർ പങ്കെടുത്തു.

ഗുണമേന്മയുള്ളതും കർഷകരിൽ നിന്നും നേരിട്ടു വാങ്ങിയ കാർഷിക ഉത്പന്നങ്ങളും വിളകളും കേരള ആഗ്രോ ഉത്പന്നങ്ങളും 30 ശതമാനം വിലക്കുറവിലാണ് കർഷകച്ചന്തയിൽ വിപണനം ചെയ്യുന്നത്. നാലുവരെയാണ് ഓണം സമൃദ്ധി കർഷകച്ചന്ത പ്രവർത്തിക്കുന്നത്.

രയറോം: കാർഷിക വികസന കർഷക ക്ഷേമ വകുപ്പ് ആലക്കോട് കൃഷിഭവന്‍റെ ആഭിമുഖ്യത്തിലുള്ള കർഷകച്ചന്തയുടെ ഉദ്ഘാടനം പഞ്ചായത്ത്‌ പ്രസിഡന്‍റ് ജോജി കന്നിക്കാട്ട് നിർവഹിച്ചു.
രയറോം പാലത്തിനടുത്തുള്ള കൃഷിഭവന്‍റെ ആഴ്ചച്ചന്തയിൽ നാലുവരെയാണ് ഓണചന്ത നടത്തുന്നത്. വൈസ് പ്രസിഡന്‍റ് പി.സി. ആയിഷ, വിദ്യാഭ്യാസ കാര്യ സ്റ്റാൻഡിംഗ് കമ്മിറ്റി ചെയർമാൻ ഖലീൽ റഹ്മാൻ, ജോൺസൺ ചിറവയൽ, ജോസ് പുള്ളീറ്റ് എന്നിവർ പ്രസംഗിച്ചു.

കാർത്തികപുരം: ഉദയഗിരി കൃഷിഭവൻ ഓണം കർഷകച്ചന്ത കാർത്തികപുരത്ത് പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ബിന്ദു ഷാജു അധ്യക്ഷത വഹിച്ചു.
കെ.ടി. സുരേഷ്കുമാർ, ഷീജ വിനോദ്, എം.എൻ. ബിന്ദു, വി.ടി. ചെറിയാൻ, കൃഷി ഓഫീസർ ഡീന സെബാസ്റ്റ്യൻ, എ.പി. ശ്രീജ, ഒ.ആർ. കോരൻ, ജെയ്സൺ പല്ലാട്ട് എന്നിവർ പ്രസംഗിച്ചു.
കാർത്തികപുരം പഞ്ചായത്ത് ഓഫീസിനു മുന്നിലുള്ള പാറയിൽ ബിൽഡിംഗിലെ കർഷക ചന്തയിൽ നിന്നും നാലുവരെയാണു തുറന്നു പ്രവർത്തിക്കുന്നത്.

ADVERTISEMENT

ഓണത്തിന് വെളിച്ചെണ്ണ വില കൂടില്ല

വൈ.എസ്. ജയകുമാർ കണ്ണൂർ: തമിഴ്നാട്ടിൽ കൊപ്രയും വെളിച്ചെണ്ണയും പൂഴ്ത്തിവച്ചില്ലെങ്കിൽ വെളിച്ചെണ്ണ വില ഓണം കഴിഞ്ഞാലും കൂടില്ല. 460 രൂപയിലേക്ക് ഉയർന്ന വെളിച്ചെണ്ണയ്ക്ക് കഴിഞ്ഞ ദിവസത്തെ ചില്ലറ വില 390 രൂപയാണ്. സബ്സിഡിയിൽ സപ്ലൈകോ വഴി വെളിച്ചെണ്ണ വിതരണം തുടങ്ങുകയും പൊതു വിപണിയിലെ ആവശ്യം കുറയുകയും ചെയ്തതോടെ വിലയിടിവ് മുന്നിൽക്കണ്ട തമിഴ്നാട്ടിലെ കാങ്കയത്തെ മില്ലുടമകൾ പൂഴ്ത്തിവച്ച കൊപ്ര പുറത്തിറക്കുകയായിരുന്നു. അതിനാൽ ഓണത്തിനു വെളിച്ചെണ്ണ വില കിലോയ്ക്ക് 500 രൂപയ്ക്കു മുകളിലേക്കെത്തിയില്ല. സപ്ലൈകോയിൽ വിലകുറച്ച് വെളിച്ചെണ്ണ വില്പന തുടങ്ങിയതോടെ പൊതുവിപണിയിലെ കച്ചവടം കുത്തനേയിടിഞ്ഞു. മാത്രമല്ല, ഉപഭോക്താക്കൾ മറ്റ് പാചക എണ്ണകളിലേക്കു തിരിയുകയും ചെയ്തു. ഇതോടെ വെളിച്ചെണ്ണ വാങ്ങുന്നവരുടെ എണ്ണത്തിൽ വലിയ ഇടിവുണ്ടായി. വെളിച്ചെണ്ണയ്ക്കും നാളികേരത്തിനും വിലകൂട്ടുന്ന മൂന്ന് ഉത്സവങ്ങളാണ് ഇനി വരാനുള്ളത്. ഇതിൽ ആദ്യത്തേത് ബിഹാറിലെ ചട് പൂജയാണ്. വടക്കേ ഇന്ത്യക്കാർ ദീപാവലിക്കായും തേങ്ങയും കൊപ്രയും കൂടുതൽ വാങ്ങും. പലഹാര നിർമാണത്തിനായാണ് രണ്ട് ഉത്സവത്തിനും ഉണ്ടകൊപ്ര കൂടുതൽ കൊണ്ടുപോകുന്നത്. ദക്ഷിണേന്ത്യയിലാകെ തേങ്ങയുടെ ആവശ്യം കൂടുന്ന ശബരിമല തീർഥാടനകാലത്ത് തേങ്ങ വില കൂടുകയാണ് പതിവ്. മൂന്ന് ഉത്സവ കാലങ്ങളിലും കാങ്കയത്തെ മില്ലുകാർ പൂഴ്ത്തിവയ്പ് നടത്തിയില്ലെങ്കിൽ വെളിച്ചെണ്ണ വില കിലോയ്ക്ക് 380- 390 രൂപയിൽ തുടരുമെന്നും വ്യാപാരികൾ പറയുന്നു.കേരളം, തമിഴ്നാട്, കർണാടക സംസ്ഥാനങ്ങളിലെ കൊപ്ര വാങ്ങിക്കൂട്ടിയ കാങ്കയത്തെ മില്ലുകാർ പൂഴ്ത്തിവച്ചതാണ് രണ്ടുമാസമായി വെളിച്ചെണ്ണ വില കുത്തനേ ഉയരാൻ ഇടയാക്കിയതെന്നാണു വിലയിരുത്തുന്നത്. തമിഴ്നാട്ടിൽ ചെറുതും വലുതുമായ ഏഴായിരത്തിലേറെ മില്ലുകളുമുണ്ട്. ഇതിൽ 500 ലേറെ വൻകിട മില്ലുകൾ ഓരോന്നും ഒന്നര കോടിയിലേറെ തേങ്ങ വാങ്ങി പൂഴ്ത്തിവച്ചതായി കണക്കാക്കുന്നു. ഇതോടെ വിപണിയിൽ തേങ്ങയ്ക്കും കൊപ്രയ്ക്കും കൃത്രിമക്ഷാമം ഉണ്ടാകുകയും വില കുതിച്ചുയരുകയുമായിരുന്നു. തമിഴ്നാട്ടിൽ വെളിച്ചെണ്ണ ഭക്ഷ്യ‍യെണ്ണയായി ഉപയോഗിക്കാത്തതിനാൽ പൂഴ്ത്തിവയ്ക്കലിനെതിരേ സർക്കാർ നടപടി സ്വീകരിച്ചതുമില്ല. വില കൂടില്ലെന്ന് ഉറപ്പായതോടെ പൂഴ്ത്തിവച്ച കൊപ്ര വിപണിയിലിറക്കുകയും വിളവെടുപ്പു കാലമായതോടെ തേങ്ങവരവ് കൂടുകയും ചെയ്തു. ഇതോടെയാണ് വില കുറഞ്ഞത്. നിലവിൽ കർണാടകയിലും ആവശ്യത്തിന് തേങ്ങയും കൊപ്രയും എത്തുന്നുണ്ട്. അതിനാൽ കൊപ്ര വില ഇനി ഉയരാനിടയില്ലെന്ന് കൊച്ചിൻ ഓയിൽ മർച്ചന്‍റ്സ് അസോസിയേഷൻ പ്രസിഡന്‍റ് താലത്ത് മുഹമ്മദ് പ‌റഞ്ഞു. വില ഉയർന്നതോടെ കേരളീയർ വെളിച്ചെണ്ണ ഉപേക്ഷിച്ച് മറ്റ് സസ്യ എണ്ണകളിലേക്ക് തിരിഞ്ഞിട്ടുണ്ട്. മറ്റ് എണ്ണകൾ ശീലമാക്കിയവർ വെളിച്ചെണ്ണ പാചകത്തിലേക്ക് തിരിച്ചുവരാതിരുന്നാൽ സംസ്ഥാനത്തെ വെളിച്ചെണ്ണ വ്യാപാരത്തിന് തിരിച്ചടിയാകുമെന്ന് വെളിച്ചെണ്ണ വ്യാപാരികൾ ഭയക്കുന്നു. ഇത് നാളികേര കർഷകർക്കു തിരിച്ചടിയും മറ്റ് എണ്ണകളുടെ വില്പനയ്ക്ക് ഗുണകരവും ആകുമെന്ന് അദ്ദേഹം പ‌റഞ്ഞു.

ദീപികയിൽ ഓണാഘോഷം

കണ്ണൂർ: ദീപിക കണ്ണൂർ യൂണിറ്റിൽ നടന്ന ഓണാഘോഷം തലശേരി അതിരൂപത മുഖ്യവികാരി ജനറാൾ മോൺ. ആന്‍റണി മുതുകുന്നേൽ ഉദ്ഘാടനം ചെയ്തു. നന്മയുടെ രൂപത്തിൽ വരുന്ന തിന്മയുടെ ശക്തികളെ തിരിച്ചറിയണമെന്ന് ഉദ്ഘാടന പ്രസംഗത്തിൽ അദ്ദേഹം പറഞ്ഞു. നന്മ തിന്മകളേയും കപടവേഷധാരികളേയും തിരിച്ചറിയണം. ഓണത്തിന്‍റെ സമത്വ സുന്ദരമായ സ്വപ്നം നിലനിർത്തണം. നാനാജാതി മതസ്ഥർ ഒന്നിച്ചു കഴിയാനുള്ള ആഹ്വാനമാണ് ഓണം നൽകുന്നത്. പ്രതിലോമ ശക്തികളെ മറികടക്കാൻ വലിയ കൃപാകടാക്ഷം ആവശ്യമാണെന്നും മോൺ.ആന്‍റണി മുതുകുന്നേൽ പറഞ്ഞു. കണ്ണൂർ ഹോളി ഫാമിലി ഇടവക വികാരി ഫാ. മാത്യു നരിക്കുഴി അധ്യക്ഷത വഹിച്ചു. എജിഎം സർക്കുലേഷൻ ജോർജ് തയ്യിൽ, എജിഎം മാർക്കറ്റിംഗ് ജോസ് ലൂക്കോസ് എന്നിവർ പ്രസംഗിച്ചു. റെക്സി എം. ഐപ്പ് പ്രാർഥനാഗീതം ആലപിച്ചു. കണ്ണൂർ യൂണിറ്റ് റഡിഡന്‍റ് മാനേജർ ഫാ. ജോബിൻ വലിയപറന്പിൽ സ്വാഗതവും അസിസ്റ്റന്‍റ് റസിഡന്‍റ് മാനേജർ ഫാ. വിപിൻ വെമ്മേനിക്കട്ടയിൽ നന്ദിയും പറഞ്ഞു. ജീവനക്കാരുടെ കലാപരിപാടികളും മത്സരങ്ങളും ഓണസദ്യയും നടത്തി. ഉന്നതവിജയം നേടിയ ദീപിക ജീവനക്കാരുടെ മക്കളെ ആദരിച്ചു.

പെരിയ ഇരട്ടക്കൊലക്കേസ്: മണികണ്ഠന് ഇനി വോട്ടും ചെയ്യാനാകില്ല

കാസര്‍ഗോഡ്: പെരിയ ഇരട്ടക്കൊലക്കേസില്‍ തെരഞ്ഞെടുപ്പ് കമ്മീഷന്‍ അയോഗ്യനാക്കിയ കാഞ്ഞങ്ങാട് മുന്‍ ബ്ലോക്ക് പഞ്ചായത്ത് പ്രസിഡന്‍റ് കെ. മണികണ്ഠന് ഇനി വോട്ടും ചെയ്യാന്‍ കഴിയില്ല. എറണാകുളം സിബിഐ കോടതി അഞ്ചു വര്‍ഷത്തെ തടവിനു ശിക്ഷിച്ചതോടെയാണ് തെരഞ്ഞെടുപ്പ് കമ്മീഷന്‍ അയോഗ്യനാക്കിയത്. വിധി വന്ന ദിവസം മുതല്‍ തന്നെ മണികണ്ഠന്‍ പദവിക്ക് അര്‍ഹനല്ലെന്നും കമ്മീഷന്‍ വ്യക്തമാക്കി. കേരള പഞ്ചായത്ത് രാജ് ആക്ട്, 1994ലെ സെക്‌ഷന്‍ 35(1) പ്രകാരമാണു നടപടി. ജനുവരി മൂന്നിനാണ് കേസിലെ 14-ാം പ്രതിയായ മണികണ്ഠനെ ഇന്ത്യന്‍ പീനല്‍ കോഡ് സെക്‌ഷന്‍ 225 പ്രകാരം കോടതി ശിക്ഷിച്ചത്. ഹര്‍ജി ഒഴിവാക്കാന്‍ മണികണ്ഠന്‍ രണ്ടുമാസം മുമ്പ് ബ്ലോക്ക് പഞ്ചായത്ത് അംഗത്വം രാജിവച്ചിരുന്നു. എന്നാല്‍ താന്‍ നിരപരാധിയാണെന്നും അപ്പീല്‍ നല്‍കിയിട്ടുണ്ടെന്നും അദ്ദേഹം കമ്മീഷനെ അറിയിച്ചു. എന്നാല്‍ ശിക്ഷ റദ്ദാക്കാന്‍ അപ്പീല്‍കോടതി തയാറായിട്ടില്ലെന്ന് പിന്നീട് അദ്ദേഹംതന്നെ സമ്മതിച്ചു. രാജിവച്ചാലും കോടതിവിധി വന്ന ദിവസം മുതല്‍ മണികണ്ഠന്‍ അയോഗ്യനാണെന്നും അതിനാല്‍ രാജിക്കു പ്രസക്തിയില്ലെന്നും കമ്മീഷന്‍ വ്യക്തമാക്കി. മണികണ്ഠന് ഇനി വോട്ട് ചെയ്യാനോ അടുത്ത ആറു വര്‍ഷത്തേക്ക് ഏതെങ്കിലും തെരഞ്ഞെടുപ്പില്‍ മത്സരിക്കാനോ സാധിക്കില്ല.

ആദ്യം ശബരിമല യുവതീപ്രവേശന സമരക്കേസുകൾ പിൻവലിക്കണം: സി. സദാനന്ദൻ എംപി

കണ്ണൂർ: സർക്കാർ ആത്മാർഥതയോടെയാണ് അയ്യപ്പസംഗമം സംഘടിപ്പിക്കുന്നതെങ്കിൽ യുവതീപ്രവേശന പ്രക്ഷോഭവുമായി ബന്ധപ്പെട്ടു സമരം നടത്തിയവർക്കെതിരേയുള്ള കേസുകൾ പിൻവലിക്കുകയാണ് ആദ്യം വേണ്ടതെന്ന് രാജ്യസഭാംഗവും ബിജെപി സംസ്ഥാന വൈസ് പ്രസിഡന്‍റുമായ സി. സദാനന്ദൻ. കണ്ണൂർ പ്രസ് ക്ലബ്ബില്‍ മീറ്റ് ദ പ്രസ് പരിപാടിയിൽ സംസാരിക്കുകയായിരുന്നു അദ്ദേഹം. പൗരത്വ ഭേദഗതി നിയമത്തിനെതിരേയുള്ള സമരവുമായി ബന്ധപ്പെട്ട കേസുകൾ സംസ്ഥാന സർക്കാർ പെട്ടെന്ന് പിൻവലിച്ചിരുന്നു. എന്നാൽ, ശബരിമല വിഷയത്തിൽ അതുണ്ടായില്ല. യുവതീപ്രവേശനവുമായി ബന്ധപ്പെട്ട് നടത്തിയ പ്രക്ഷോഭത്തിൽ ബിജെപിയുടെ പ്രമുഖരായ നേതാക്കൾ ഉൾപ്പെടെയുള്ളവർക്കെതിരേ എടുത്ത കേസുകളൊന്നും പിൻവലിച്ചിട്ടില്ല. ഇതൊക്കെ നിലനില്‍ക്കേ അയ്യപ്പസംഗമം നടത്തുന്ന സർക്കാരിന്‍റെ ഉദ്ദേശ്യശുദ്ധി സംശയാസ്പദമാണ്. സർക്കാരിന്‍റെ ഉദ്ദേശ്യശുദ്ധിയിൽ തനിക്ക് മാത്രമല്ല പാർട്ടിക്കും സംശയമുണ്ട്. യുവതീപ്രവേശനത്തിനെതിരേ ദേവസ്വം ബോർഡ് കോടതിയിൽ അപ്പീൽ നൽകാൻ പോകുന്നുവെന്നതിനെ സ്വാഗതം ചെയ്യുന്നു. ശബരിമലയിൽ ദർശനം നടത്തുന്നവരിൽ ഭൂരിഭാഗവും ഭരിക്കുന്ന പാർട്ടിയുമായി അടുപ്പമുള്ളവരാണെന്നും എന്നാൽ അടുപ്പമുള്ളവരെ ദ്രോഹിക്കുന്ന സമീപനമാണ് സർക്കാരും ഭരിക്കുന്നപാർട്ടിയും സ്വീകരിച്ചതെന്ന്. സി. സദാനന്ദൻ എംപി പറഞ്ഞു. സി. സദാനന്ദൻ എംപി പറഞ്ഞു.ശബരിമലക്ക് പോകാൻ മാലയിട്ട വരെ സിപിഎം പാർട്ടിയിൽ നിന്നും പുറത്താക്കിയ സംഭവങ്ങൾ നേരത്തെ ഈ കേരളത്തിലുണ്ടായിട്ടുണ്ട്.

കല്യാട്ടെ മോഷണവും യുവതിയുടെ കൊലപാതകവും: പൂജാരിയെയും പോലീസ് ചോദ്യം ചെയ്യും

വീരാജ്പേട്ട: ഇരിക്കൂർ കല്യാട്ടെ വീട്ടിൽ നടന്ന മോഷണവും യുവതിയുടെ കൊലപാതകവുമായി ബന്ധപ്പെട്ടു കൊല്ലപ്പെട്ട ദർശിതയുടെ സുഹൃത്ത് സിദ്ധരാജുവിനെയും പ്രേതബാധ ഒഴിപ്പിക്കാൻ പണം വാങ്ങിയ ഹാസനിലെ പൂജാരി മഞ്ജുനാഥിനെയും കേരള പോലീസ് കസ്റ്റഡിയിൽ വാങ്ങി ചോദ്യം ചെയ്യും. സിദ്ധരാജുവിനെ സാലിഗ്രാം പോലീസ് കസ്റ്റഡിയിൽ വാങ്ങി ചോദ്യം ചെയ്തുവരികയാണ്. സ്വർണത്തെക്കുറിച്ച് അറിയില്ലെന്നാണ് ഇയാൾ മൊഴി നൽകിയത്. കൊല നടന്നതിന്‍റെ തലേദിവസമാണു ദർശിത ബാഗ് സിദ്ധരാജുവിനെ ഏൽപ്പിച്ചത്. ഇതു കൈമാറേണ്ട ആളുകളെയും പോലീസ് ചോദ്യം ചെയ്തിരുന്നു. ഇവരുടെ മൊഴി സാലിഗ്രാം പോലീസ് വിശ്വസിച്ചിട്ടുണ്ടെങ്കിലും കേരള പോലീസ് വിശ്വസിച്ചിട്ടില്ല. തുടക്കംമുതൽ സിദ്ധരാജുവിന്‍റെ മൊഴികളിലെ വൈരുദ്ധ്യം പോലീസിനെ കുഴപ്പിക്കുകയാണ്. അതിനാലാണു കേരള പോലീസ് കസ്റ്റഡി അപേക്ഷ നൽകിയത്. പൂജാരി മഞ്ജുനാഥിനെയും കസ്റ്റഡിയിൽ വാങ്ങിയാലേ കേസിന്‍റെ കാര്യത്തിൽ വ്യക്തത വരികയുള്ളൂവെന്നാണ് പോലീസ് കണക്കുകൂട്ടുന്നത്. ബാഗിൽ നിറയെ വിലകുറഞ്ഞ തരത്തിലുള്ള മുക്കുപണ്ടമാണു കണ്ടത്. ലോഡ്ജിലുണ്ടായിരുന്ന ബാഗിലും മുക്കുപണ്ടം കണ്ടതിനാൽ മൂന്നു ജീവനക്കാരെയും ചോദ്യം ചെയ്തിരുന്നു. പണമായി രണ്ടു ലക്ഷം മാത്രമേ തന്നിട്ടുള്ളൂവെന്നാണ് കസ്റ്റഡിയിലുള്ള സിദ്ധരാജു പറയുന്നത്. ദർശിത തലേദിവസം സ്വർണം കൊടുത്തിട്ടുണ്ടെങ്കിൽ എവിടെയോ ഒളിപ്പിക്കാനാണു സാധ്യത കാണുന്നത്. കല്യാടുനിന്ന് കാണാതായ പണത്തിന്‍റെ കാര്യത്തിൽ വ്യക്തത വന്നിട്ടുണ്ടെങ്കിലും സ്വർണത്തിന്‍റെ കാര്യത്തിലാണു തീരുമാനമാകേണ്ടത്. പൂജയ്ക്കു തീയതി നിശ്ചയിച്ചിരുന്നില്ലെന്നും പണം കൈപ്പറ്റിയെന്നും അന്വേഷണസംഘത്തോട് മന്ത്രവാദി മഞ്ജുനാഥ് സമ്മതിച്ചതാണ്. ഈ പണം വീട്ടിൽത്തന്നെയുണ്ടായിരുന്നു. എന്നാൽ കവർച്ചയും കൊലപാതകവുമായി ഇയാൾക്കു ബന്ധമില്ലെന്നാണ് സൂചനയെങ്കിലും കേരള പോലീസ് ഇക്കാര്യം പൂർണമായി വിശ്വാസത്തിലെടുത്തിട്ടില്ല. പൂജാരിയെ കണ്ടശേഷമാണു ദർശിത സിദ്ധരാജുവിനൊപ്പം സാലിഗ്രാമിലേക്കു പോയത്. അന്നു വൈകുന്നേരമാണ് സാലിഗ്രാം ടൗണിലെ എസ്ആർ ലോഡ്ജ് മുറിയിൽ സിദ്ധരാജു ദർശിതയെ ക്രൂരമായി കൊലപ്പെടുത്തിയത്. അതേസമയം കല്യാട്ടെ വീട്ടിൽ മുമ്പും രണ്ടുതവണ കുടുംബശ്രീസംഘത്തിനു നൽകാൻ സൂക്ഷിച്ച പണം കാണാതായിരുന്നു. ഇരിക്കൂർ സിഐയോടൊപ്പം കരിക്കോട്ടക്കരി സിഐ കെ.ജെ. വിനോയി, ഡിവൈഎസ്‌പിയുടെ സ്ക‌്വാഡംഗങ്ങളായ എ.എം. സിജോയ്, കെ.കെ. ജയദേവൻ, പി.രതീഷ്, കെ.പി. നിതീഷ്, വി. ഷാജി എന്നിവർ ഹുൻസൂറിൽ തങ്ങിയാണ് അന്വേഷണം തുടരുന്നത്.

കേര ഗ്രാമം പദ്ധതി ഉദ്ഘാടനം

ഇരിട്ടി: ആറളം പഞ്ചായത്ത് കൃഷിഭവൻ കേരള കാർഷിക വികസന കർഷക ക്ഷേമ വകുപ്പിന്‍റെ സമഗ്ര നാളികേര വികസന പദ്ധതി പ്രകാരം കേര കർഷകരുടെ സമഗ്ര വികസനത്തിനായി നടപ്പിലാക്കുന്ന കേര ഗ്രാമം പദ്ധതിയുടെ പഞ്ചായത്ത്തല ഉദ്ഘാടനം സണ്ണി ജോസഫ് എംഎൽഎ നിർവഹിച്ചു. ആറളം പഞ്ചായത്ത് പ്രസിഡന്‍റ് കെ.പി. രാജേഷ് അധ്യക്ഷത വഹിച്ചു. ഇരിട്ടി ബ്ലോക്ക് പ്രസിഡന്‍റ് കെ. വേലായുധൻ മുഖ്യാതിഥിയായിരുന്നു. കൃഷി വകുപ്പ് ഡെപ്യൂട്ടി ഡയറക്ടർ ബിന്ദു കെ. മാത്യു പദ്ധതി വിശദീകരിച്ചു. സെമിനാറിൽ അസിസ്റ്റന്‍റ് കൃഷി ഓഫീസർ സി. മദുസൂധനൻ വിഷയാവതരണം നടത്തി. ഇരിട്ടി ബ്ലോക്ക് കൃഷി അസിസ്റ്റന്‍റ് ഡയറക്ടർ ആർ. ബീന, ആറളം പഞ്ചായത്ത് വൈസ് പ്രസിഡന്‍റ് കെ.ജെ. ജസിമോൾ, സ്ഥിരംസമിതി അധ്യക്ഷൻമാരായ ജോസഫ് അന്ത്യാംകുളം, വൽസ ജോസ്, ഇ.സി. രാജു, കൃഷി ഓഫീസർ ആർ. ശരത്കൃഷ്ണ, കൃഷി അസിസ്റ്റന്‍റ് സി.കെ. സുമേഷ് എന്നിവർ പ്രസംഗിച്ചു. അടിയന്തരമായി വാർഡ് തല സർവേ പൂർത്തിയാക്കി ഉടൻതന്നെ കർഷകർക്ക് ആനുകൂല്യങ്ങൾ ലഭ്യമാക്കാനുള്ള ഊർജിത പ്രവർത്തനമാണ് കൃഷിഭവൻ നടത്തിവരുന്നത്.

ഓണക്കുരുക്ക്‌ ഒഴിവാക്കാൻ സുസജ്ജമായി പോലീസ്

ഇരിട്ടി: ഓണാഘോഷത്തിരക്കിൽ നഗരം ഗതാഗത കുരുക്കിൽ പെടാതിരിക്കാൻ പോലീസിന്‍റെ ശക്തമായ ഇടപെടൽ. ഇരിട്ടിയിൽ ഗതാഗതം സുഗമമാക്കാനായി 25 പോലീസുകാരും നാല് മൊബൈൽ പട്രോളിംഗ് ടീമുകളും ഇനിയുള്ള ദിവസങ്ങളിൽ നഗരത്തിലുണ്ടാകും. കഴിഞ്ഞ നാല് ദിവസങ്ങളിൽ 15 പോലീസുകാരെയും മൂന്ന് മൊബൈൽ പട്രോളിംഗ് ടീമുകളെയും നിയോഗിച്ചിരുന്നുവെന്ന് ഇരിട്ടി എസ്‌എച്ച്‌ഒ എ.കുട്ടികൃഷ്‌ണൻ അറിയിച്ചു. അനധികൃതമായും മറ്റു വാഹനങ്ങൾക്കും യാത്രക്കാർക്കും അപകടം ഉണ്ടാക്കുന്ന വിധവും പാർക്ക് ചെയ്‌ത 30 വാഹനങ്ങൾക്കെതിരെ പോലീസ് പിഴ ചുമത്തി. 600 ഓളം വാഹനങ്ങൾ ട്രാഫിക് നിയമം ലംഘിച്ചതായി കണ്ടെത്തിയെങ്കിലം ഓണസീസണയതിനാൽ താക്കീത് നൽകി വിട്ടയക്കുകയായിരുന്നു. സ്വകാര്യ വാഹനങ്ങൾ പാർക്കിംഗിനാവശ്യമായ സൗകര്യമില്ലാത്തത് വലിയ പ്രതിസന്ധി സൃഷ്ടിക്കുന്നുണ്ട്. ഇരിട്ടി പാലം മുതൽ കീഴൂർ വരെ കൂടുതൽ ഗതാഗത തിരക്കനുഭവപ്പെടുന്ന മേഖല എന്നു കണക്കിലെടുത്താണ് കൂടുതൽ പോലീസുകാരെ ട്രാഫിക് ഡ്യൂട്ടിയ്ക്കായി നിയോഗിച്ചിട്ടുള്ളത്. ഇന്നലെ മേലേ സ്‌റ്റാൻഡ്, പഴയ സ്‌റ്റാൻഡ്, ബസ് സ്‌റ്റാൻഡ് വൺവേ റോഡ്, സിറ്റി സെൻ്റർ, പഴയ പോസ്‌റ്റ് ഓഫിസ് പരിസരം, പയഞ്ചേരിമുക്ക് എന്നിവിടങ്ങളിൽ നിന്നാണു ഗതാഗത തടസ്സം സൃഷ്‌ടിച്ചു പാർക്ക് ചെയ്‌ത വാഹനങ്ങൾക്കെതിരെ നടപടി സ്വീകിച്ചത്. പരിശോധനകൾക്ക് എസ്ഐമാരായ ടി.ജി. അശോകൻ, റെജി സ്‌കറിയ, സിവിൽ പോലീസ് ഓഫിസർമാരായ അബ്ദുൽ നവാസ്, കെ.പി.സി. പ്രിയേഷ് എന്നിവർ നേതൃത്വം നൽകി. ഇരിട്ടി പഴയ പാലം റോഡിലും പഴയ ബസ് സ്‌റ്റാൻഡിലെ നഗരസഭ ഓപ്പൺ ഓഡിറ്റോറിയത്തിലും നേരംപോക്ക് റോഡിലും ഉൾപ്പെടെ പേ പാർക്കിംഗ് സംവിധാനങ്ങൾ ഒരുക്കിയിട്ടുണ്ടെങ്കിലും ഫീസ് നൽകി പാർക്കിംഗ് നടത്താൻ പലരും മടിക്കുന്നതും ഗതാഗത കുരുക്കിന് ഇടയാക്കുന്നുണ്ട്.

ഓണപ്പൊലിമയിൽ മലയോരം

ഇരിട്ടി: മലയോരത്ത് ഓണാഘോഷത്തോടനുബന്ധിച്ച് വിവിധ ക്ലബുകളുടേയും സാംസാകാരിക സംഘടനകളുടേയും നേതൃത്വത്തിൽ കലാ- കായിക മത്സരങ്ങളും പൂക്കള മത്സരവും നടത്തി. ഇരിട്ടി അഗ്‌നിരക്ഷാനിലയത്തിൽ ആഘോഷപരിപാടികൾ ജില്ലാ ഫയർ ഓഫീസർ അരുൺ ഭാസ്‌കർ ഉദ്ഘാടനം ചെയ്തു. രക്ഷാനിലയത്തിലെ ജീവനക്കാരും സിവിൽ ഡിഫൻസ്, ആപതാമിത്ര വാർഡൻമാരും സംയുക്തമായാണ് ഓണാഘോഷം സംഘടിപ്പിച്ചത്. ഇരിട്ടി നിലയം ഓഫീസർ ടി.വി. ഉണ്ണികൃഷ്ണൻ അധ്യക്ഷത വഹിച്ചു. ബെന്നി ദേവസ്യ, എൻ.ജി. അശോകൻ, അനീഷ് കുമാർ, കെ.ബി. ഉൻമേഷ് എന്നിവർ പ്രസംഗിച്ചു . ബധിര മൂക അസോസിയേഷൻ ഇരിട്ടി താലൂക്ക് കമ്മിറ്റിയുടെ നേതൃത്വത്തിൽ കുടുംബ സംഗമവും ഓണാഘോഷവും നടത്തി. ക്ലബ്ബ് പ്രസിഡന്‍റ് ജോയിസ് ഏബ്രഹാമിന്‍റെ അധ്യക്ഷതയിൽ വി.ജി. സുനിൽ ഉദ്ഘാടനം ചെയ്യും. ഇരിട്ടി, ഉളിക്കൽ, മട്ടന്നൂർ, കിഴ്പ്പള്ളി, കൊട്ടിയൂർ എന്നിവിടങ്ങളിൽ നിന്നായി നൂറിലധികം കുടുംബങ്ങൾ പങ്കെടുത്തു. ഇരിട്ടി പോലീസ് സ്‌റ്റേഷനിലും കലാപരിപാടികളും പൂക്കളവും ഓണ സദ്യയും ഉണ്ടായിരുന്നു. ഇരിട്ടി ഡിവൈഎസ്പി ധനഞ്ജയബാബു, ഇൻസ്പെക്ടർ എ. കുട്ടികൃഷ്ണൻ എന്നിവർ നേതൃത്വം നല്കി. ഇരിട്ടി നഗരസഭയിൽ പൂക്കളവും ഓണ സദ്യയും സംഘടിപ്പിച്ചു. സണ്ണിജോസഫ് എംഎൽഎ, നഗരസഭാ ചെയർ പേഴ്‌സൺ കെ. ശ്രീലത, വൈസ് ചെയർമാൻ പി.പി. ഉസ്മാൻ നഗരസഭാ അംഗങ്ങൾ ജീവനക്കാർ എന്നിവർ സംബന്ധിച്ചു. ഇരിട്ടി സൗഹൃദ വേദിയുടെ ഓണക്കൂട്ടായ്മയും ആദരവും ഇരിട്ടി ബ്ലോക്ക് പഞ്ചായത്ത് പ്രസിഡന്റ് കെ . വേലായുധൻ ഉദ്ഘാടനം ചെയ്തു. ഇരിട്ടി നഗരസഭ ചെയർ പേഴ്‌സൺ കെ .ശ്രീലത, റിട്ട. ഡിഎംഒ. ഡോ. ജി . ശിവരാമകൃഷ്ണൻ, മാർക്ക് പ്രവർത്തകൻ ഫൈസൽ വിളക്കോട് എന്നിവരെ ആദരിച്ചു. സംസ്ഥാന ന്യൂന പക്ഷ കമ്മീഷൻ അംഗം പി. റോസ ചടങ്ങിൽ മുഖ്യാതിഥിയായിരുന്നു.

വീട്ടിൽ നിന്നു സ്വർണാഭരണങ്ങൾ കവർന്നു; വീട്ടുജോലിക്കാരിക്കെതിരേ കേസ്

എടക്കാട്: വീട്ടുജോലിക്കാരി സ്വർണാഭരണങ്ങളും മൂന്ന് മൊബൈൽ ഫോണുകളും ഉൾപ്പെടെ രണ്ടു ലക്ഷത്തിലേറെ രൂപയുടെ സാധനങ്ങൾ മോഷ്ടിച്ചുവെന്ന പരാതിയിൽ എടക്കാട് പോലിസ് കേസെടുത്തു അന്വേഷണമാരംഭിച്ചു. തോട്ടട കൈരളി നഗറിലെ ത്രിവേണി എന്ന വാടക വീട്ടിൽ താമസിച്ചു വരുന്ന രോഹിത് സുരേഷിന്‍റെ പരാതിയിൽ ചുഴലി അടിക്കച്ചാമല സ്വദേശിനി സിന്ധുവിനെതിരേ (35) യാണ് പോലിസ് കേസെടുത്തത്. ജൂലൈ 30 നും ഓഗസ്റ്റ് 18 നും ഇടയിലുള്ള വിവിധ സമയങ്ങളിലാണ് കവർച്ച നടന്നത്. പരാതിക്കാരൻ കുടുംബ സമേതം താമസിച്ചു വരുന്ന വാടക വീട്ടിൽ നിന്ന് 1,30,000 രൂപ വിലവരുന്ന സ്വർണ അരഞ്ഞാണം, കൈവള, ഒരു ജോഡി കമ്മൽ എന്നിവയും രണ്ട് ആൻഡ്രോയിഡ് മൊബൈൽ ഫോൺ, ഒരു ഫീച്ചർ ഫോൺ എന്നിവ ഉൾപ്പെടെ രണ്ടു ലക്ഷത്തിന്‍റെ സാധനങ്ങൾ കവർച്ച ചെയ്തു വേലക്കാരി മുങ്ങിയെന്നാണ് പരാതി. സംഭവത്തിൽ കേസെടുത്ത എടക്കാട് പോലീസ് പ്രതിക്കായി അന്വേഷണം ഊർജിതമാക്കിയിട്ടുണ്ട്.

ചന്ദനക്കാംപാറയിൽ കാട്ടുപന്നി ചത്തനിലയിൽ

പയ്യാവൂർ: ചന്ദനക്കാംപാറ മേഖലയിൽ വീണ്ടും കാട്ടുപന്നിയെ ചത്തനിലയിൽ കണ്ടെത്തി. ചന്ദനക്കാംപാറ ടൗണിനു സമീപം ആനയടി ഭാഗത്തെ സ്വകാര്യ വ്യക്തിയുടെ കൃഷിയിടത്തിലാണ് കാട്ടുപന്നി ചത്തുകിടന്നിരുന്നത്. കഴിഞ്ഞ ദിവസം ഈ പന്നിയെ അവശനിലയിൽ കണ്ടിരുന്നതായി പരിസരവാസികൾ പറഞ്ഞു. ഇതിനുമുമ്പ് കഴിഞ്ഞയാഴ്ച പ്രദേശത്ത് വിവിധയിടങ്ങളിലായി ചത്തുകിടന്ന മൂന്ന് പന്നികളുടെ ജഡങ്ങൾ കണ്ടെത്തിയിരുന്നു. ആടാം പാറയിലെ കൃഷിയിടത്തിലും നാല് പന്നികൾ ചത്തുകിടക്കുന്നതായി പ്രദേശവാസികൾ കണ്ടിരുന്നു. ഈ വിവരങ്ങളെല്ലാം വനംവകുപ്പ് അധികൃതരെ യഥാസമയം അറിയിച്ചിട്ടും തിരിഞ്ഞു നോക്കിയിട്ടില്ലെന്നാണ് നാട്ടുകാരുടെ പരാതി. സ്ഥലത്തെത്തി അന്വേഷണം നടത്താനോ തുടർച്ച യായി ചാകുന്നതിന്‍റെ കാരണം കണ്ടെത്തുന്നതിനാവശ്യമായ നടപടി സ്വീകരിക്കാനോ അധികൃതർ തയാറാകാത്തതിൽ ജനങ്ങൾ പരിഭ്രാന്തിയിലാണ്.

ടൂറിസം ഓണാഘോഷ പരിപാടികൾക്ക് തുടക്കമായി; കലകളുടെ അരങ്ങിന് ഇന്ന് മിഴി തെളിയും

കണ്ണൂർ: സംസ്ഥാന ടൂറിസം വകുപ്പും ജില്ലാ ടൂറിസം പ്രമോഷൻ കൗൺസിലും ചേർന്ന സംഘടിപ്പി ക്കുന്ന ഓണാഘോഷ പരിപാടികൾക്ക് കണ്ണൂർ ടൗൺ സ്‌ക്വയറിൽ തുടക്കമായി. ഒന്പത് വരെ നീളുന്ന കലാപരിപാടികൾക്ക് ഇന്ന് വൈകുന്നേരം തുടക്കമാവും. ഓണാഘോഷത്തിന്‍റെ ഉദ്ഘാടനം നാലിന് വൈകുന്നേരം മന്ത്രി കടന്നപ്പള്ളി രാമചന്ദ്രൻ നിർവഹിക്കും. ഇന്നലെ തിരുവാതിര കളി മത്സരം, പ്രദർശന വടംവലി മത്സരം നടന്നു. ഓണാഘോഷ പരിപാടിക ളുടെ ഭാഗമായി കണ്ണൂർ നഗരത്തിലെ സർക്കാർ, അർധ സർക്കാർ, പൊതുമേഖലാ സ്ഥാപനങ്ങൾ ക്കായി പൂക്കള മത്സരവും നടന്നു. വിവിധ ദിവസത്തിലെ പരിപാടികൾ ഇന്ന് വൈകുന്നേരം അഞ്ചിന്: കലാഭവൻ ദിൽന അവതരിപ്പിക്കുന്ന സ്മൃതിതൻ ചിറകിലേറി, 5.40ന് കാഞ്ഞങ്ങാട് പുഷ്പ പ്രഭാകർ അവതരിപ്പിക്കുന്ന സംഗീത കച്ചേരി, 6.40ന് ചരടുകുത്തി കോൽക്കളി. രാത്രി ഏഴിന് പാലാപ്പള്ളി തിരുപ്പള്ളി ഫെയിം അതുൽ നറുകര നയിക്കുന്ന ഫോക്ക് സന്ധ്യ. നാളെ വൈകുന്നേരം അഞ്ചു മുതൽ വിവിധ കലാപരിപാടികൾ. ആറിന് സിനിമാ താരം ശ്രുതി ലക്ഷ്മി അവതരിപ്പിക്കുന്ന ഡാൻസ് നൈറ്റ്, രാത്രി ഏഴിന് ഉദ്ഘാടന സമ്മേളനം, മന്ത്രി കടന്നപ്പള്ളി രാമചന്ദ്രൻ. പ്രശസ്ത സിനിമാ താരം പി.പി. കുഞ്ഞികൃഷ്ണൻ, റാനിയ റഫീഖ് ( ബാലതാരം ) എന്നിവർ വിശിഷ്ടാതിഥികൾ. രാത്രി 7.30ന് അരങ്ങ് കൊയിലാണ്ടിയുടെ ആഭിമുഖ്യ ത്തിൽ നാടൻ പാട്ടുകളുടെ ദൃശ്യാവിഷ്‌കാരം, മുടിയാട്ടം, കാളകളി, പരുന്താട്ടം. രാത്രി ഒന്പതിന് ഡാൻസ് ഫ്യൂഷൻ. സെപ്റ്റംബർ അഞ്ചിന് ദിശ സ്കൂൾ ഓഫ് മ്യൂസിക്കിന്‍റെ ആഭിമുഖ്യത്തിലുള്ളൽ മ്യൂസിക് ഫ്യൂഷൻ, ആറിന് ജുമർ ഡാൻസ് (ജാർഖണ്ഡ്), സൈല, റീന ഡാൻസ് (മധ്യപ്രദേശ്), അവദി ഹോളി( ഉത്തർപ്രദേശ് ), ലാവണി ഡാൻസ്( മഹാരാഷ്ട്ര), ഗരഗലു (ആന്ധ്രാപ്രദേശ്‌), പൂജാ കുനിത( കർണാടക), ദിമ്സ( തെലുങ്കാന), കരകാട്ടം - (തമിഴ് നാട്). രാത്രി ഏഴിന് ഷംസുദ്ദീൻ ചെർപ്പുളശേരി അവതരിപ്പിക്കുന്ന ഇന്ത്യൻ മാംഗോ ട്രീ മാജിക്‌, ഇന്ത്യൻ സ്ട്രീറ്റ് മെന്‍റലിസം എന്നിവയും, രാത്രി എട്ടിന് സിനിമാതാരം മൃദുല വിജയ് നയിക്കുന്ന ക്ലാസിക്കൽ ഡാൻസ്, രാത്രി 8.30ന് ഫോക്ക് രാവ് മെഗാ മ്യൂസിക്കൽ ഫ്യൂഷൻ. സെപ്റ്റംബർ ആറിന് വൈകുന്നേരം അഞ്ചിന് നരിക്കോട് യുവ ചേതന മഹിള സമാജം, മ്യൂസിക്കൽ ഫ്യൂഷൻ ഡ്രാമ വീരവേൽ-വെട്രിവേൽ, 6.20ന് നാടൻ കോൽക്കളി, 6.30ന് സെമി ക്ലാസിക്കൽ ഡാൻസ്, 6.40ന് ഭരതനാട്യം, 7.35: ഗസൽ -അലോഷി പാടുന്നു. സെപ്റ്റംബർ ഏഴിന് വൈകുന്നേരം അഞ്ചിന് മ്യൂസിക്ക് ഫ്യൂഷൻ, രാത്രി ഏഴിന് ഡാൻസ് നൈറ്റ്,രാത്രി 7.30 ന് ലാസ്യ കലാകേന്ദ്ര അവതരിപ്പിക്കുന്ന ഡാൻസ് നൈറ്റ്‌, രാത്രി എട്ടിന് ഗിന്നസ് മനോജ് നയിക്കുന്ന സൂപ്പർ സ്റ്റേജ് മെഗാ ഷോ. സെപ്റ്റംബർ എട്ടിന് വൈകുന്നേരം അഞ്ചിന് ഗ്രൂപ്പ് ഡാൻസ്, 5.30 ന് പ്രതീക്ഷ ഭവനിലെ ഭിന്ന ശേഷി ക്കാരായ കുട്ടികൾ അവതരിപ്പിക്കുന്ന കലാപരിപാടികൾ, രാത്രി ഏഴിന് ഫാഷൻ ഷോ, രാത്രി എട്ടിന് സിനിമ പിന്നണി ഗായകർ ശ്രേയ ജയദീപ്, സിനോപ് രാജ് എന്നിവർ ചേർന്ന് നയിക്കുന്ന മ്യൂസിക്കൽ ബാൻഡ് സെപ്റ്റംബർ ഒന്പതിന് വൈകുന്നേരം അഞ്ചിന് മഹിളാ സമഖ്യയുടെ ആഭിമുഖ്യത്തിൽ വിവിധ കലാരൂപങ്ങൾ, രാത്രി ഏഴിന് സിനിമാ താരം സരയുവും സംഘവും അവതരിപ്പിക്കുന്ന ഡാൻസ് നൈറ്റ്, എട്ടിന് സജില സലിമും സംഘവും ചേർന്ന് നയിക്കുന്ന മ്യൂസിക്കൽ ഷോ- ഓണനിലാവ്.

ഓണം ഫെയറിൽ കിളികളുടെ കളകളാരവം

കണ്ണൂർ: കിളികളുടെ കളകളാരവം... തലയ്ക്ക് മുകളിലൂടെ പറക്കുന്ന പക്ഷികൾ... കണ്ടാൽ ഏതോ പക്ഷി സങ്കേതത്തിൽ എത്തുന്ന ഒരു പ്രതീതിയാണ് കണ്ണൂർ പോലീസ് മൈതാനിയിലെ ഓണം ഫെയറിൽ എത്തിയാൽ. പച്ച, മഞ്ഞ, വെള്ള തുടങ്ങി നിരവധി നിറങ്ങളുള്ള പക്ഷികളാണ് ഇവിടെ കണ്ണിന് കുളിർമയേകി പാറി പറക്കുന്നത്. നയാഗ്ര വെള്ളച്ചാട്ടത്തിന്‍റെയും സർറിയൽ വെള്ളച്ചാട്ടത്തിന്‍റെയും മനോഹാരിത ആസ്വദിച്ച് അകത്തേക്ക് പ്രവേശിക്കുന്നവർക്ക് പക്ഷികളുടെ ഒരു ലോകം തന്നെയാണ് തുറന്നിട്ടിരിക്കുന്നത്. പലർക്കും പക്ഷികളുടെ പേരുകൾ ഒന്നും അറിയില്ലെങ്കിലും ഇതിനെ കൊഞ്ചിച്ചും ലാളിച്ചുമാണ് ഇവിടെ നിന്നും മടങ്ങുന്നത്. പലരും ഒരുപാട് നേരം ഇവിടെ സമയം ചിലവിടുന്നുണ്ട്. ലൗബേർഡ്സ്, ആഫ്രിക്കൻ ഫിഞ്ചസ്, പീജിയൺ, ഫെസസന്‍റ് തുടങ്ങി നിരവധി പക്ഷികളാണ് ഇവിടെയുള്ളത്. ഇവിടെ നിന്നും മക്കാവോ, മെക്സികൻ ഇഗ്‌വാന, ബൂൾ പൈത്തൺ, ഷുഗർ ഗൈഡർ , ഗ്രേ പാരറ്റ് തുടങ്ങിയവയുടെ കൂടെ നിന്ന് ഫോട്ടോയെടുക്കുകയും ചെയ്യാം. ബുൾ പൈത്തൺ പാന്പിനെ തൊട്ട് അടുത്ത് കാണാനാണ് പലർക്കും ഇഷ്ടം. പേടികൊണ്ട് പലരും അതിനെ കഴുത്തിലിട്ട് ഫോട്ടോയെടുക്കുന്നില്ല. മക്കാവോ പക്ഷിക്കാണ് ആവശ്യക്കാർ ഏറെയും. പക്ഷിയെ കൈയിൽ വച്ച് ഫോട്ടോയെടുക്കുകയും കൊഞ്ചിക്കുകയും ചെയ്യുന്നവർ കുറവല്ല. പക്ഷികളെ കണ്ട് അകത്ത് പ്രവേശിക്കുന്നവരെ കാത്തിരിക്കുന്നത് വിസ്മയകാഴ്ചകളാണ്. ആദ്യ നോട്ടത്തിൽ ഉദ്യാനം പോലെ തോന്നും. നിറയെ സൂര്യകാന്തിപൂക്കൾ. ഒറിജിനലിനെ വെല്ലുന്ന രീതിയിലാണ് ഇവിടെ പൂക്കൾ നിർമിച്ചിരിക്കുന്നത്. ഇരിക്കാൻ ഇരിപ്പിടങ്ങൾ, സെൽഫി പോയന്‍റ്, പിന്നെ വിശ്രമിക്കാൻ മരചുവടുകൾ. അങ്ങനെ നിരവധി സംഭവങ്ങളാൽ അണിയിച്ചൊരിക്കിയിരിക്കുന്നതാണ് ഫോട്ടോ പോയിന്‍റ്. ഇവ കൂടാതെ പറക്കുന്ന പൂന്പാറ്റയ്ക്ക് കീഴിൽ ഇരുന്ന് ഊഞ്ഞാലാടുകയും ചെയ്യാം എന്നതാണ് ഇതിന്‍റെ മറ്റൊരു പ്രത്യേകത.

റോഡ് നവീകരിച്ചു; പയ്യാവൂർ-വാതിൽമട റൂട്ടിൽ ഇനി ബസിനായി കാത്തിരിപ്പ്

പയ്യാവൂർ: പയ്യാവൂർ പഞ്ചായത്തിലെ പാറക്കടവ് -വാതിൽമട റോഡിന്‍റെ നവീകരണ പ്രവൃത്തി പൂർത്തിയാവുന്പോൾ നാട്ടുകാർ ഇപ്പോൾ യാത്രാ സൗകര്യത്തിനായുള്ള ബസിനായി കാത്തിരിപ്പിലാണ്. പ്രധാനമന്ത്രി ഗ്രാമീൺ സഡക് യോജന പദ്ധതി മുഖേന അഞ്ച് കോടി രൂപ ചെലവഴിച്ചാണ് റോഡ് പുനർനിർമിച്ചത്. റോഡിലെ കയറ്റങ്ങൾ കുറച്ച് വീതി കൂട്ടി ടാറിംഗ് നടത്തുന്ന പ്രവൃത്തി പൂർത്തിയാക്കി സിഗ്നലുകൾ സ്ഥാപിച്ചുവരികയാണ്. മഴ കാരണം നിർമാണ പ്രവൃത്തി മന്ദഗതിയിലായത് നാട്ടുകാരുടെ പ്രക്ഷോഭത്തിനിടയാക്കിയിരുന്നു. റോഡ് നവീകരണം പൂർത്താകുന്നതിനൊപ്പം ഇതിലൂടെ കൂടുതൽ ബസ് സർവീസുകൾ വേണമെന്നാണ് നാട്ടുകാരുടെ ആവശ്യം. നിലവിൽ രാവിലെ പയ്യാവൂരിൽ നിന്ന് വാതിൽ മടവരെ പോയി മടങ്ങുന്ന കെഎസ്ആർടിസി ബസ് മാത്രമാണ് സർവീസ് നടത്തുന്നത്. ജനങ്ങൾ യാത്രക്കായി ജീപ്പ്, ഓട്ടോ ടാക്സി എന്നിവയെയാണ് ആശ്രയിക്കുന്നത്. പയ്യാവൂർ - പൊന്നുംപറമ്പ് - ഉപ്പുപടന്ന -വാതിൽമട വഴി കുന്നത്തൂരിലേക്കും മണിക്കടവിലേക്കും ബസുകൾ ഓടിക്കണമെന്നാണ് പ്രധാന ആവശ്യം.

ഉത്സവാഘോഷം: ഭക്ഷണ വിതരണത്തിന് ആരോഗ്യവകുപ്പിന്‍റെ മാർഗനിർദേശം

കണ്ണൂർ: ഓണം, നബിദിനം തുടങ്ങിയവയും വിവിധ ഉത്സവ ആഘോഷങ്ങളുടെയും ഭാഗമായി വിവിധ ഇടങ്ങളില്‍ ഭക്ഷണവും പാനീയവും തയാറാക്കി പൊതുജനങ്ങള്‍ക്ക് വിതരണം ചെയ്യുന്നതിന് ആരോഗ്യ വകുപ്പ് മാർഗനിർദേശം പുറത്തിറക്കി. * ഉത്സവഘോഷത്തിന് പാനീയങ്ങള്‍ ശുദ്ധമായ ജലത്തിലും ഐസിലും മാത്രമേ തയാറാക്കാനും വിതരണം ചെയ്യാനും പാടുള്ളൂ. ഇക്കാര്യം ആരോഗ്യ വകുപ്പ് ഉദ്യോഗസ്ഥർ നിരീക്ഷിക്കും. * ഭക്ഷണ പാനീയങ്ങൾ തയാർ ചെയ്തു വിതരണം ചെയ്യുന്നവർക്ക് ഹെൽത്ത് കാർഡ് ഉണ്ടായിരിക്കണം. വിതരണം ചെയ്യുന്നവർ കയ്യുറ ധരിച്ചിരിക്കണം. * തണുത്ത പാനീയങ്ങൾ ഒഴിവാക്കി പായസം, കാപ്പി, ചായ തുടങ്ങിയ തിളപ്പിച്ച വെള്ളത്തില്‍ തയ്യാറാക്കുന്നവ തെരെഞ്ഞെടുക്കാന്‍ പൊതുജനങ്ങൾ ശ്രദ്ധിക്കണം. * ഉത്സവാഘോഷവുമായി ബന്ധപ്പെട്ട് ഭക്ഷണ-കുടിവെള്ള വിതരണം നടത്തുന്ന കമ്മിറ്റി ഭാരവാഹികൾ അതാതു സ്ഥലത്തെ ആരോഗ്യ പ്രവർത്തകരെ വിവരം അറിയിക്കണം. * ആരോഗ്യ പ്രവർത്തകർ നൽകുന്ന നിർദേശങ്ങളും ആരോഗ്യ മാനദണ്ഡങ്ങളും പൂർണമായും പാലിച്ച് ഉത്സവഘോഷങ്ങൾ നടത്തുന്നതിന് എല്ലാവരും സഹകരിക്കണം. * ആരോഗ്യ മാനദണ്ഡങ്ങൾ പാലിക്കാതെ ഭക്ഷണ-കുടിവെള്ള വിതരണം നടത്തുന്നവർക്കെതിരേ പൊതുജനാരോഗ്യ നിയമം 2023 പ്രകാരം നടപടി സ്വീകരിക്കുന്നതാണ്. ആരോഗ്യ മാനദണ്ഡങ്ങൾ പാലിക്കാതെയുള്ള കുടിവെള്ള- ഭക്ഷണ വിതരണം മഞ്ഞപ്പിത്ത വ്യാപനത്തിന് കാരണമാകാൻ സാധ്യതയുണ്ടെന്ന് ആരോഗ്യവകുപ്പ് വിലയിരുത്തുന്നു. തുടർന്നാണ് മാർഗനിർദേശം പുറപ്പെടുവിപ്പിച്ചത്.

പുഴയോരത്ത് വച്ചു പിടിപ്പിച്ച മുളകളും മരങ്ങളും മുറിച്ചു കടത്തുന്നു

ചപ്പാരപ്പടവ്: പുഴ സംരക്ഷണ സമിതി പ്രവർത്തകരുടെ നേതൃത്വത്തിൽ പത്തു വർഷത്തിലധികമായി പുഴയോരത്തും തുരുത്തുകളിലും വച്ചു പിടിപ്പിച്ച മരങ്ങളും മുറിച്ചു കടത്തി കൊണ്ടു പോകുന്നു. മീന്പറ്റി തുരുത്തിൽ വർഷങ്ങൾക്കു മുന്പ് നട്ടുപരിപാലിച്ച് വളർത്തിയെടുത്ത മുളകളും വൻമരങ്ങളും സ്വകാര്യ വ്യക്തി മുറിച്ചു കടത്തിയെന്ന് പുഴ സംരക്ഷണ സമിതി പ്രവർത്തകർ ആരോപിക്കുന്നു. പുഴസംരംക്ഷണസമതി പ്രവർത്തകർ പുഴയുടെ തുരുത്തുകളിലും , പുഴതീരങ്ങളിലും നട്ടു പിടിപ്പിച്ച മുളകൾ നശിപ്പിക്കുന്നത് ശിക്ഷാർഹമാണെന്ന് കാണിച്ച് പഞ്ചായത്ത് സ്ഥാപപിച്ച ബോർഡും എടുത്തു കൊണ്ടു പോയിട്ടുണ്ട്. ഇക്കാര്യങ്ങൾ ചൂണ്ടിക്കാട്ടി ചപ്പാരപ്പടവ് പഞ്ചായത്തിന് പരാതി നൽകിയിട്ട് ഒരു മാസമായിട്ടും നടപടി ഉണ്ടായില്ലെന്ന് ആക്ഷേപമുണ്ട്. ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാൻ കുറ്റക്കാരെ കണ്ടെത്തി കടുത്ത ശിക്ഷ ഉറപ്പാക്കണമെന്നും പുഴ സംരക്ഷണ പ്രവർത്തകർ ആവശ്യപ്പെട്ടു.

ദേശീയപാതയോരത്ത് നിർത്തിയിട്ട ഓക്സിജൻ ടാങ്കറിൽ ചോർ‌ച്ച

തളിപ്പറമ്പ്: ദേശീയപാതയോരത്ത് വർക്‌ഷോപ്പിൽ നിർത്തിയിട്ട മെഡിക്കൽ ഓക്സിജൻ നിറച്ച ടാങ്കർ ലോറിയിൽ നിന്ന് ഓക്‌സിജൻ ചോർന്നു. തളിപ്പറമ്പ് ഫയർഫോഴ്‌സ് ഉദ്യോഗസ്ഥരെത്തി ചോർച്ച നിയന്ത്രിക്കുകയും അപകടം ഒഴിവാക്കുകയും ചെയ്തു. ഇന്നലെ രാവിലെ കുറ്റിക്കോൽ ബാബുരാജ് ഓട്ടോ ഇലക്‌ട്രിക്കൽസ് എന്ന സ്ഥാപനത്തിന് മുന്നിലായിരുന്നു സംഭവം. ചെന്നൈയിലെ സതേൺ എയർ പ്രൊഡക്‌ട്‌സ് ലിമിറ്റഡ് കമ്പനിയുടെ ടാങ്കർ ലോറിയിലാണ് ചോർച്ചയുണ്ടായത്. കാസർഗോഡ് സീതാംഗോളിയിൽ നിന്ന് തളിപ്പറമ്പ് സഹകരണ ആശുപത്രിയിലേക്ക് മെഡിക്കൽ ഓക്സിജനുമായി എത്തിയതാണ് ലോറി. ആശുപത്രിയിലെ സിലിണ്ടറുകളിൽ ഓക്സ‌ിജൻ നിറച്ചെങ്കിലും ലോറിയിലെ ടാങ്കറിൽ കുറച്ച് ഓക്‌സിജൻ ബാക്കിയുണ്ടായിരുന്നു. അതിനുശേഷം ലോറിയിലെ ഇലക്‌ട്രിക്കൽ ഷോർട്ട് സർക്യൂട്ട് പരിഹരിക്കാനാണ് കുറ്റിക്കോലിലെ ബാബുരാജ് ഓട്ടോ ഇലക്‌ട്രിക്കൽസിലേക്ക് എത്തിച്ചത്. അവിടുന്നാണ് ഓക്സിജൻ ചോർന്നത്. ഫയർഫോഴ്സ് ചോർച്ച ഒഴിവാക്കി. വാഹനം നിർത്തിയിട്ടപ്പോൾ മർദം വർധിച്ചതാണ് ഓക്സിജൻ പുറത്തേക്കുവരാൻ കാരണമെന്നാണ് ഫയർഫോഴ്‌സിന്‍റെ നിഗമനം.

പയ്യന്നൂരില്‍ സിമന്‍റ് ലോറിക്ക് തീപിടിച്ചു

പയ്യന്നൂര്‍: പയ്യന്നൂരില്‍ ഗോഡൗണില്‍ സിമന്‍റുമായി എത്തിയ ലോറിക്ക് തീപിടിച്ചു. കേളോത്ത് ഉളിയത്തു കടവിനു സമീപത്തെ രാംകോ സിമന്‍റ്സിന്‍റെ ഗോഡൗണില്‍ സിമന്‍റുമായി എത്തിയ ലോറിക്കാണു തീപിടിച്ചത്. അഗ്നിരക്ഷാസേനയെത്തി തീയണച്ചു. ഇന്നലെ ഉച്ചകഴിഞ്ഞ് 2.45 ഓടെയായിരുന്നു സംഭവം. തമിഴ്‌നാട്ടില്‍ നിന്നും ഉളിയത്ത് കടവിലെ ഗോഡൗണിലേക്ക് സിമന്‍റുമായി എത്തിയതായിരുന്നു ലോറി. ലോറിയില്‍ നിന്നും പകുതിയോളം സിമന്‍റ് ചാക്കുകള്‍ ചുമട്ടുതൊഴിലാളികള്‍ ഇറക്കിയപ്പോഴായിരുന്നു ഡ്രൈവറുടെ കാബിനില്‍ നിന്നും തീ പടര്‍ന്നത്. ഡ്രൈവര്‍ കാബിനകത്ത് ഗ്യാസ് ഉപയോഗിച്ച് ഭക്ഷണം പാചകം ചെയ്യുമ്പോഴായിരുന്നു തീപിടുത്തമുണ്ടായത്. ഗ്യാസ് സിലിണ്ടര്‍ പൊട്ടിത്തെറിച്ചതായിരിക്കാമെന്നാണു നിഗമനം. അപകടത്തില്‍ പരിക്കേറ്റ ഡ്രൈവര്‍ തഞ്ചാവൂര്‍ കുംഭകോണത്തെ ഗോപിനാഥിനെ പയ്യന്നൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. വിവരമറിഞ്ഞ് സ്ഥലത്തെത്തിയ പയ്യന്നൂര്‍ അഗ്നിരക്ഷാനിലയത്തിലെ സ്റ്റേഷന്‍ ഓഫീസര്‍ സി.പി. രാജേഷിന്‍റെ നേതൃത്വത്തിലുള്ള അഗ്നിരക്ഷാസേനയാണു തീയണച്ചത്. ഇദ്ദേഹത്തോടൊപ്പം അസിസ്റ്റന്‍റ് സ്‌റ്റേഷന്‍ ഓഫീസര്‍ തോമസ് ഡാനിയേല്‍, സീനിയര്‍ ഫയര്‍ ഓഫീസര്‍ എന്‍. മുരളി, ഫയര്‍ ആൻഡ് റെസ്‌ക്യൂ ഓഫീസര്‍മാരായ പി.പി. ലിജു, ആര്‍. ഗിരീഷ് തുടങ്ങിയവരും രക്ഷാപ്രവര്‍ത്തനത്തിനുണ്ടായിരുന്നു. തീപിടിത്തത്തില്‍ ലോറി ഭാഗികമായി കത്തിനശിച്ചു. സുരക്ഷാ ക്രമീകരണത്തിന്‍റെ ഭാഗമായി ലോറിയിലും ലോറിക്കടിയിലും പാചകം ചെയ്യരുതെന്ന മുന്നറിയിപ്പുകള്‍ അവഗണിച്ചതാണു തീപിടുത്തത്തിനു കാരണമായത്.

വൈകല്യങ്ങളോടും രോഗങ്ങളോടും പോരാടിയ സജിത്കുമാര്‍ വിടവാങ്ങി

കാസര്‍ഗോഡ്: വൈകല്യങ്ങളോടും രോഗങ്ങളോടും നാലുപതിറ്റാണ്ട് നീണ്ട പോരാട്ടത്തിനൊടുവില്‍ പഞ്ചായത്ത് വകുപ്പ് കാസര്‍ഗോഡ് ജോയിന്‍റ് ഡയറക്ടര്‍ ഓഫീസിലെ ജീവനക്കാരന്‍ കാസര്‍ഗോഡ് തെരുവത്തെ വി.വി. സജിത്കുമാര്‍ (44) അന്തരിച്ചു. ജന്മനാ കാഴ്ചശക്തിക്ക് തകരാര്‍ ഉണ്ടായിരുന്നു. പല ചികിത്സകള്‍ നടത്തി. ബിഎ വരെ പഠിച്ചു. ഐഎഡിയില്‍ എട്ടുവര്‍ഷം പിആര്‍ഒ ആയിരുന്നു. തുടര്‍ന്നു പിഎസ്‌സി വഴി പഞ്ചായത്ത് ഡിഡിപി ഓഫീസിലേക്ക് മാറി. അവിടെ ജോലിയിരിക്കെ കാഴ്ച ശക്തി പൂര്‍ണമായും നഷ്ടപ്പെട്ടു. ജോലിയിരിക്കെ കാഴ്ച നഷ്ടപ്പെട്ടതുകൊണ്ട് വൈകല്യാവസ്ഥ പരിഗണിച്ച് ഒരു പ്രത്യേക കേസായി പരിഗണിച്ച് ജോലിയില്‍ തുടരാന്‍ സര്‍ക്കാര്‍ തീരുമാനിക്കുകയും പഞ്ചായത്ത് ജോയിന്‍റ് ഡയറക്ടര്‍ ഓഫീസില്‍ ടെലിഫോണ്‍ ഓപ്പറേറ്റര്‍ തസ്തിക സൃഷ്ടിച്ച് അവിടെ നിയമിക്കുകയായിരുന്നു. ന്യുമോണിയ ബാധിച്ച് കാസര്‍ഗോട്ടെ സ്വകാര്യാശുപത്രിയില്‍ ഒരാഴ്ചയായി ചികിത്സയിലായിരുന്നു. ഇന്നലെ പുലര്‍ച്ചെ ഹൃദയാഘാതത്തെ തുടർന്നായിരുന്നു മരണം.സജിത്തിന്‍റെ അച്ഛന്‍ പുരുഷോത്തോമനും ജന്മനാ കാഴ്ചശക്തിക്ക് പ്രശ്‌നമുണ്ടായിരുന്നു. ബിഎ കഴിഞ്ഞ ഉടനെ സെയില്‍സ് ടാക്‌സ് ഡിപ്പാര്‍ട്ട്‌മെന്‍റില്‍ എല്‍ഡിസി ആയി ജോലി കിട്ടി. പിന്നീട് ഡോക്ടറുടെ നിര്‍ദേശപ്രകാരം ബിഎഡ് ചെയ്ത് ചന്ദ്രഗിരി ഗവ. ഹൈസ്‌കൂളില്‍ അധ്യാപകനായി ജോലിക്കു കയറി. 45 വയസാകുമ്പോള്‍ കാഴ്ചശക്തി പൂര്‍ണമായും നഷ്ടപ്പെട്ടതിനെതുടര്‍ന്ന് വോളണ്ടറി റിട്ടയര്‍മെന്‍റ് വാങ്ങി പിരിഞ്ഞു. 70-ാ മത്തെ വയസില്‍ ഒരു വീഴ്ച മൂലം രോഗ ബാധിതനായി 2019ല്‍ മരിച്ചു. അമ്മ: ബേബി. സഹോദരന്‍: അജിത്കുമാര്‍ (സോഫ്റ്റ്‌വേർ എന്‍ജിനിയര്‍, യുഎസ്എ).

ആനക്കൈ ബാലകൃഷ്ണന് മാനേജ്മെന്‍റിൽ ഡോക്ടറേറ്റ്

പാപ്പിനിശേരി: പൊതുമേഖലാ സ്ഥാപനമായ കെസിസിപിഎൽ മാനേജിംഗ് ഡയറക്ടറും സാംസ്കാ രിക പ്രവർത്തകനുമായ ആനക്കൈ ബാലകൃഷ്ണന് മാനേജ്മെന്‍റിൽ ഡോക്ടറേറ്റ്. കേരളത്തിലെ പൊതുമേഖലാ സ്ഥാപനങ്ങളെക്കുറിച്ചുള്ള പഠനത്തിനാണ് ഡോക്ടറേറ്റ് ലഭിച്ചിരിക്കുന്നത്. "Role of Employee Benefit systems in enhancing organisational efficiency: Evidence from PSUs of Kerala "എന്ന വിഷയത്തിലായിരുന്നു പഠനം. കേരളത്തിലെ പൊതുമേഖലാ സ്ഥാപനങ്ങളിലെ ജീവനക്കാരുടെ ക്ഷേമവും അതിലൂടെ പൊതുമേഖലയുടെ ശക്തിയും വർധിപ്പിക്കുക എന്ന ഉദ്യമത്തിന്‍റെ ഭാഗമായായിരുന്നു പഠനം. ആറുവർഷമായി മംഗളൂരു ശ്രീനിവാസ് യൂണിവേഴ്സിറ്റിയിലെ റിസേർച്ച് സ്കോളറായിരുന്നു അദ്ദേഹം. പ്രതിസന്ധിയിലായിരുന്ന ഒരു പൊതുമേഖലാ സ്ഥാപനത്തെ സംസ്ഥാന സർക്കാരിന്‍റെയും ഭരണസമിതിയുടെയും പിന്തുണയോടെ വൈവിധ്യവത്കരണ പദ്ധതികളിലൂടെ സംസ്ഥാനത്തെ തന്നെ മികച്ച പൊതുമേഖലാ സ്ഥാപനങ്ങളിലൊന്നായി വളർത്തിയെടുക്കാൻ കഴിഞ്ഞത് ഇദ്ദേഹത്തിന്‍റെ കൂടി നേതൃപാടവത്തിന്‍റെ വിജയമാണ്. ഭാര്യ: ഡോ. അനുപമ (കണ്ണൂർ ഡയറ്റ് ലക്ചറർ), മക്കൾ: തേജസ്വിനി (എൽഎൽബി വിദ്യാർഥിനി), സൂര്യതേജസ് (സിഎ വിദ്യാർഥി, പാലക്കാട്) .

10 കോടിയുടെ പദ്ധതികളുമായി ടിഎസ്എസ്എസ്

ചെമ്പേരി: പത്തുകോടി രൂപയുടെ വാർഷിക പദ്ധതി പ്രഖ്യാപനവുമായി തലശേരി സോഷ്യൽ സർവീസ് സൊസൈറ്റി (ടിഎസ്എസ്എസ്). സൊസൈറ്റിയുടെ 59 ാമത് വാർഷികാഘോഷങ്ങളുടെ ഭാഗമായി ചെമ്പേരി മദർ തെരേസ ഓഡിറ്റോറിയത്തിൽ നടന്ന സമ്മേളനം ഉദ്ഘാടനം ചെയ്ത തലശേരി ആർച്ച്ബിഷപ് മാർ ജോസഫ് പാംപ്ലാനിയാണ് പദ്ധതിയുടെ പ്രഖ്യാപനം നടത്തിയത്. 150 പേർക്ക് തൊഴിൽ പരിശീലനം, പന്ത്രണ്ടായിരം വൃക്ഷത്തൈകൾ നടലും പരിപാലിക്കലും, 25 സ്കൂളുകളിൽ ഔഷധ സസ്യങ്ങൾ നട്ടുവളർത്തൽ, 300 കിണർ റീചാർജിംഗ് യൂണിറ്റുകൾ, 60 മഴവെള്ള സംഭരണികൾ, ചെക്ക് ഡാമുകൾ ഉൾപ്പെടെയുള്ള നീർത്തട വികസന പദ്ധതി എന്നിവയടങ്ങുന്ന വാർഷിക പദ്ധതിയാണു സൊസൈറ്റിയുടെ വജ്രജൂബിലി ആഘോഷങ്ങളുടെ ഭാഗമായി പ്രഖ്യാപിച്ചത്. ജപ്തി ഭീഷണി മൂലം ദുരിതത്തിലായവർക്ക് പ്രത്യേക പാക്കേജ് ഏർപ്പെടുത്തുമെന്നും ആർച്ച്ബിഷപ് അറിയിച്ചു. ടിഎസ്എസ്എസ് പ്രസിഡന്‍റും അതിരൂപത വികാരി ജനറാളുമായ മോൺ. ആന്‍റണി മുതുകുന്നേൽ അധ്യക്ഷത വഹിച്ചു. ടിഎസ്എസ്എസ് അതിരൂപത ഡയറക്‌ടർ ഫാ. ബിബിൻ വരമ്പകത്ത് ആമുഖ പ്രഭാഷണം നടത്തി. അതിരൂപത ചാൻസലർ റവ. ഡോ. ജോസഫ് മുട്ടത്തുകുന്നേൽ മുഖ്യാതിഥിയും എകെസിസി ഗ്ലോബൽ ഡയറക്‌ടർ റവ. ഡോ. ഫിലിപ്പ് കവിയിൽ വിശിഷ്‌ടാതിഥിയുമായിരുന്നു. ചെമ്പേരി ലൂർദ് മാതാ ബസിലിക്ക റെക്‌ടർ റവ. ഡോ. ജോർജ് കാഞ്ഞിരക്കാട്ട്, വെള്ളരിക്കുണ്ട് ഫൊറോന വികാരി റവ. ഡോ. ജോൺസൺ അന്ത്യാംകുളം, ജനകീയ സംഘങ്ങളുടെ പ്രസിഡന്‍റ് ജോഷി കുന്നത്ത്, ടിഎസ്എസ്എസ് അതിരൂപത അസിസ്റ്റന്‍റ് ഡയറക്‌‌ടർ ഫാ. ആൽബിൻ തെങ്ങുംപള്ളിൽ എന്നിവർ പ്രസംഗിച്ചു. കേരളാ ലേബർ മൂവ്മെന്‍റിനെ സംബന്ധിച്ച ക്ലാസിന് ലേബർ മൂവ്മെന്‍റ് സംസ്ഥാന ട്രഷറർ തോമസ് മാത്യു നേതൃത്വം നൽകി. 2024-25 പ്രവർത്തന വർഷത്തെ മികച്ച ഗ്രാമിക യൂണിറ്റുകൾക്കും ക്രെഡിറ്റ് യൂണിയൻ, മഹിളാ സേവാ സംഘം യൂണിറ്റുകൾക്കും സമ്മാനങ്ങൾ വിതരണം ചെയ്തു. ടിഎസ്എസ്എസിൽ വിവിധ രീതിയിൽ സേവനങ്ങൾ ചെയ്തവരെ ആദരിക്കുകയും സമ്മാനങ്ങൾ നൽകുകയും ചെയ്തു.

സഹോദരിയുടെ സ്വര്‍ണാഭരണം മോഷ്‌ടിച്ച യുവാവും സുഹൃത്തും അറസ്റ്റില്‍

പയ്യന്നൂര്‍: വീട്ടിലെ അലമാരയില്‍ സൂക്ഷിച്ച നാലേമുക്കാല്‍ പവനോളം സ്വര്‍ണാഭരണങ്ങള്‍ മോഷണം പോയെന്ന യുവതിയുടെ പരാതിയില്‍ പയ്യന്നൂര്‍ പോലീസ് നടത്തിയ അന്വേഷണത്തില്‍ യുവതിയുടെ സഹോദരനും സുഹൃത്തും അറസ്റ്റില്‍. രാമന്തളി മൊട്ടക്കുന്നിലെ എം. സജനയുടെ പരാതിയെ തുടര്‍ന്നുള്ള അന്വേഷണത്തിലാണു സജനയുടെ സഹോദരന്‍ സജീവന്‍ (41), ഇയാളുടെ സുഹൃത്ത് എട്ടിക്കുളം അംമ്പലപ്പാറയിലെ കെ. രാഗേന്ത് (39) എന്നിവർ പോലീസിന്‍റെ പിടിയിലായത്. ഇക്കഴിഞ്ഞ ഞായറാഴ്ച രാവിലെ എട്ടോടെയാണ് അലമാരയുടെ ലോക്കറില്‍ സൂക്ഷിച്ചിരുന്ന ആഭരണങ്ങള്‍ മോഷണം പോയതായി കണ്ടെത്തിയത്. നാലുദിവസം മുമ്പ് നോക്കിയപ്പോള്‍ അലമാരയിലുണ്ടായിരുന്ന ആഭരണങ്ങളാണ് ഞായറാഴ്ച നോക്കിയപ്പോള്‍ കാണാതായത്. മോഷണത്തിലൂടെ മൂന്നര ലക്ഷത്തോളം രൂപയുടെ നഷ്‌ടമുണ്ടായതായും സഹോദരനെ സംശയിക്കുന്നതായുമുള്ള പരാതിയിലാണു പോലീസ് അന്വേഷണമാരംഭിച്ചത്. ഈ ദിവസങ്ങളില്‍ വീട്ടില്‍ത്തന്നെയുണ്ടായിരുന്നതിനാല്‍ പുറത്ത് നിന്നാരും എത്തിയിരുന്നില്ലെന്ന് പരാതിക്കാരിക്ക് ഉറപ്പുണ്ടായിരുന്നു. പ്രാഥമിക പരിശോധനയില്‍ തന്നെ മോഷ്‌ടാവ് പുറത്തുനിന്നുള്ളയാളല്ലെന്ന് പോലീസിനും ബോധ്യമായിരുന്നു. തുടര്‍ന്ന് നടത്തിയ അന്വേഷണത്തിലാണു സഹോദരനെയും സുഹൃത്തിനെയും പയ്യന്നൂര്‍ പോലീസ് കസ്റ്റഡിയിലെടുത്തത്. മോഷ്‌ടിച്ച സ്വര്‍ണം വില്പന നടത്താന്‍ സഹായിച്ചതിനാണ് സുഹൃത്തിനെ അറസ്റ്റ് ചെയ്തത്.

കീഴറയിലെ സ്ഫോടനം: രഹസ്യാന്വേഷണ വിഭാഗത്തിന് വീഴ്ച; പ്രതിക്കെതിരേ കാപ്പ ചുമത്തിയേക്കും

കണ്ണൂർ: കണ്ണപുരം കീഴറയിൽ സ്ഫോടനത്തിൽ വീട് തകരുകയും ഒരാൾ മരിക്കുകയും ചെയ്ത സംഭവത്തിൽ രഹസ്യാന്വേഷണ വിഭാഗത്തിന് ഗുരുതരമായ വീഴ്ച സംഭവിച്ചതായി വകുപ്പുതല വിലയിരുത്തൽ. അറസ്റ്റിലായ അനൂപ് മാലിക്ക് പടക്കങ്ങൾ സംഭരിച്ച പൊടിക്കുണ്ട് രാജേന്ദ്ര നഗറിലെ വാടക വീട്ടിൽ 2016ലുണ്ടായ ഉഗ്രസ്ഫോടനത്തിൽ വീട് തകരുകയും സമീപത്തെ നിരവധി വീടുകൾക്ക് കേടുപാടുകൾ സംഭവിക്കുകയും ചെയ്തിരുന്നു. അന്ന് ഇയാളുടെ ഭാര്യയ്ക്കും മകൾക്കും പരിക്കേൽക്കുകയും ചെയ്തിരുന്നു. അനൂപ് മാലിക്കിനെതിരെ വിവിധ സ്റ്റേഷനുകളിലായി സ്ഫോടക വസ്തു നിയമപ്രകാരം നിലവിൽ അഞ്ച് കേസുകളുണ്ട്. ഇത്തരം പശ്ചാത്തലമുള്ള ഒരാൾ നിരീക്ഷണത്തിലായിരിക്കണമെന്നിരിക്കെ കീഴറയിൽ ഇതുണ്ടായില്ല. കീഴറയിലെ വാടക വീട്ടിൽ പ്രതി സ്ഫോടക വസ്തുക്കൾ ശേഖരിച്ചതിനെ കുറിച്ച് രഹസ്യാന്വേഷണ വിഭാഗത്തിന് ഒരു വിവരവും ലഭിച്ചിരുന്നില്ല. ഇതാണ് സ്ഫോടനത്തിനും ഒരാളുടെ മരണത്തിനും ഇടയാക്കിയത്. അതിനിടെ കീഴറ സ്ഫോടനത്തിന്‍റെ കൂടി പശ്ചാത്തലത്തിൽ അനൂപ് മാലിക്കിനെതിരെ കാപ്പ ചുമത്തുന്നതിനെ കുറിച്ചും പോലീസ് ആലോചിക്കുന്നുണ്ട്. ഭാവിയിൽ പൊതുജനങ്ങൾക്ക് ഭീഷണിയാകുന്ന രീതിയിൽ സമാന പ്രവൃത്തികളിൽ ഏർപ്പെടുന്നത് തടയുക എന്ന ലക്ഷ്യത്തോടെയാണ് കാപ്പ ചുമത്തുന്നതിനെ കുറിച്ച് ആലോചിക്കുന്നതെന്ന് പോലീസ് വൃത്തങ്ങൾ അറിയിച്ചു. സ്ഫോടന കേസുമായി ബന്ധപ്പെട്ട തെളിവെടുപ്പിനും ചോദ്യം ചെയ്യുന്നതിനുമായി പ്രതിയെ പോലീസ് കസ്റ്റഡിയിൽ വാങ്ങും. പവർലിഫ്റ്ററും പവർലിഫ്റ്റർമാരുടെ സംഘടനാ നേതാവുമായ പ്രതിയുടെ ബന്ധങ്ങളും പോലീസ് അന്വേഷിച്ചു വരികയാണ്. ജിം ട്രെയിനറായി പ്രവർത്തിക്കുന്ന ഇയാൾ ഇത് മറയാക്കി മറ്റെന്തെങ്കിലും പ്രവർത്തനങ്ങൾ നടത്തിയിട്ടുണ്ടോ എന്നതുൾപ്പടെ അന്വേഷണ പരിധിയിലാണ്. ഉത്സവകാലത്ത് ക്ഷേത്രങ്ങളിലേക്കും മറ്റുമുള്ള വെടിക്കെട്ടുകൾക്ക് കരാറെടുക്കുന്നവർക്ക് അനൂപ് മാലിക്ക് ഗുണ്ടുകളും പടക്കങ്ങളും മറ്റ് കരിമരുന്ന് ഉത്പന്നങ്ങളും എത്തിച്ചു നൽകുന്നതായി കണ്ടെത്തിയിട്ടുണ്ട്. ഇയാളുടെ ബിനാമികളാണ് കരാറെടുക്കുന്നതെന്ന സംശയവും പോലീസിനുണ്ട്. ഉഗ്രസ്ഫോടന ശേഷിയുള്ള ഗുണ്ടുകൾ ഉൾപ്പെടെ പ്രതി എവിടെ നിന്നാണ് സംഭരിക്കുന്നതെന്നും അന്വേഷിക്കുന്നുണ്ട്.

ചെമ്പന്തൊട്ടി ഫാർമേഴ്സ് വെൽഫെയർ സൊസൈറ്റി ഓണാഘോഷം

ചെമ്പന്തൊട്ടി: ചെമ്പന്തൊട്ടി ഫാർമേഴ്സ് വെൽഫെയർ ആൻഡ് ചാരിറ്റബിൾ സൊസൈറ്റിയുടെ ആഭിമുഖ്യത്തിൽ ഓണാഘോഷവും വിഭവസമൃദ്ധമായ ഓണസദ്യയും വിവിധ കലാകായിക മത്സരങ്ങളും ബേബിച്ചൻ തോണിക്കലിന്‍റെ ഭവനത്തിൽ സംഘടിപ്പിച്ചു. ഇതോടനുബന്ധിച്ച് കുടിയേറ്റ കാലത്തിന്‍റെ കഷ്‌ടതകൾ അനുഭവിച്ച സൊസൈറ്റിയിലെ മുതിർന്ന അച്ഛനമ്മമാരെയും ഈ വർഷം വിവിധ അവാർഡുകൾ നേടിയ മികച്ച കർഷകരെയും സംരംഭകരെയും ആദരിച്ചു. ആഘോഷ പരിപാടികൾ സി.എൽ. ആന്‍റോ ഉദ്ഘാടനം ചെയ്തു. ചാക്കോ കൊല്ലമന അധ്യക്ഷത വഹിച്ചു. ജോസ് തോണിക്കൽ, ജോസഫ് വർഗീസ് ആറ്റുചിറ, ആന്‍റണി ജീരകത്തിൽ, ഫിലോമിന തോമ്പിൽ, ജോസഫ് ഇലവുങ്കൽ, ജോളി സേവി ഈഴക്കുന്നേൽ എന്നിവർ പ്രസംഗിച്ചു.

ജിപ്സ പി. ദേവസ്യയ്‌ക്ക് മികച്ച സംഗീത സംവിധായികയ്ക്കുള്ള പുരസ്കാരം

ചെറുപുഴ: ദുബായ് ആസ്ഥാനമായി പ്രവർത്തിക്കുന്ന മലയാളി സംഘടനയായ മെഹ്ഫിൽ ഇന്‍റർനാഷണൽ കേരളയുടെ ഈ വർഷത്തെ ഷോർട്ട് ഫിലിം ഫെസ്റ്റിവലിൽ മികച്ച സംഗീത സംവിധായികക്കുള്ള പുരസ്കാരത്തിന് കണ്ണൂർ ചെറുപുഴ സ്വദേശി ജിപ്സ പി. ദേവസ്യ അർഹയായി. കലാഗ്രാമം മീഡിയ നിർമിച്ച് മാധ്യമപ്രവർത്തകനായ ജയിംസ് ഇടപ്പള്ളി സംവിധാനം ചെയ്ത "സമസ്യ' എന്ന ഷോർട്ട് ഫിലിമിലെ പശ്ചാത്തല സംഗീതത്തിനാണ് പുരസ്കാരം. ജിപ്സ പി. ദേവസ്യ സ്കൂൾ കാലം മുതൽ കർണാടക സംഗീതം, കീബോർഡ്, നൃത്തം തുടങ്ങിയവ പഠിച്ചു. സംഗീത ആൽബങ്ങളിൽ ഗാനങ്ങൾ ആലപിച്ചു. സംഗീത മേഖലയിൽ വർഷങ്ങളായി സജീവ സാന്നിധ്യമാണ്. സ്കൂൾ, കോളജ്, കേരളോത്സവം തുടങ്ങിയ മത്സരങ്ങളിൽ കർണാടക സംഗീതത്തിന് സംസ്ഥാന, ജില്ലാ തലത്തിൽ നിരവധി സമ്മാനങ്ങൾ നേടി. 2024ൽ വിദ്യാഭ്യാസ വകുപ്പ് നടത്തിയ സംസ്ഥാനതല സംഗീത മത്സരത്തിൽ മാപ്പിളപ്പാട്ടിലും കർണാടക സംഗീതത്തിലും സമ്മാനം നേടി. കേരള സ്കൂൾ കലോത്സവത്തിൽ മാപ്പിളപ്പാട്ടിലും സംസ്ഥാനതലത്തിൽ സമ്മാനം നേടി. കണ്ണൂർ സർവകലാശാലയിൽ നിന്ന് ബിടെക് ബിരുദവും, ഇഗ്നോയിൽ നിന്ന് ബിരുദാനന്തര ബിരുദവും കരസ്ഥമാക്കിയിട്ടുണ്ട്. ചെറുപുഴ സ്വദേശി റിട്ട. ഹോണനറി ക്യാപ്റ്റൻ പി.പി. ദേവസ്യയുടെയും ചെമ്പേരിയിലുള്ള സംഗീത കുടുംബാംഗം മേഴ്‌സി പൊൻപാറയുടെയും മകളാണ്. സഹോദരൻ റോമി പി. ദേവസ്യ (പയ്യന്നൂർ കോ-ഓപ്പറേറ്റീവ് ടൗൺ ബാങ്ക്).

എട്ടു നോമ്പാചരണവും ഊട്ടുനേർച്ചയും

പെരുമ്പടവ്: പച്ചാണി സെന്‍റ് മേരീസ് പള്ളിയിൽ പരിശുദ്ധ ദൈവമാതാവിന്‍റെ എട്ടുനോമ്പ് ആചരണവും ഊട്ടുനേർച്ചയ്ക്കും തുടക്കം കുറിച്ച് ഇടവക വികാരി ഫാ. തോമസ് കണ്ടത്തിൽ കൊടിയേറ്റി. തുടർന്നു നടന്ന വിശുദ്ധ കുർബാനയ്ക്ക് ഫാ. ഏബ്രഹാം മഠത്തിമ്യാലിൽ മുഖ്യകാർമികത്വം വഹിച്ചു. രണ്ട്, മൂന്ന്, അഞ്ച്, ആറ് തീയതികളിൽ വൈകുന്നേരം നാലിന് ജപമാല. 4.30ന് ദിവ്യബലി, വചനസന്ദേശം, നൊവേന എന്നിവയ്ക്ക് ഫാ. ജോർജ് തൈക്കുന്നുംപുറം, ഫാ. അഗസ്റ്റിൻ കാരക്കാട്, ഫാ. സാനു ഇളംപുരയിടത്തിൽ, ഫാ. ജെൻസൺ എമ്മാനുവേൽ കണ്ടെത്തിൽ എന്നിവർ കാർമികത്വം വഹിക്കും. നാലിന് രാവിലെ 6.30ന് ജപമാല. ഏഴിന് ബിനു പൈമ്പിള്ളിലിന്‍റെ കാർമികത്തിൽ ദിവ്യബലി, വചന സന്ദേശം, നൊവേന ഏഴിന് രാവിലെ 7.30ന് ജപമാല, എട്ടിന് ഫാ. സജി കിഴക്കേക്കരയുടെ കാർമികത്വ ത്തിൽ ദിവ്യബലി, വചന സന്ദേശം, നൊവേന വൈകുന്നേരം നാലിന് ദിവ്യബലി. സമാപന ദിനമായ എട്ടിന് രാവിലെ 9.30ന് ജപമാല. 10ന് ഫാ. തോമസ് മേനപ്പാട്ടുപടിക്കലിന്‍റെ കാർമികത്വത്തിൽ റാസ കുർബാന, വചന സന്ദേശം, നൊവേന. തുടർന്ന് 12.30ന് ഊട്ടുനേർച്ച.

മൂന്നാംകുന്ന് കളിസ്ഥലം നാടിനു സമർപ്പിച്ചു

ആലക്കോട്: ആലക്കോട് പഞ്ചായത്തിന്‍റെ നേതൃത്വത്തിൽ ജനകീയ സഹകരണത്തോടെ മൂന്നാംകുന്നിൽ നിർമിച്ച കളിസ്ഥലം നാടിനു സമർപ്പിച്ചു. സജീവ് ജോസഫ് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ജോജി കന്നിക്കാട്ട് അധ്യക്ഷത വഹിച്ചു. മലയോരത്തിന്‍റെ ദീർഘകാല കാത്തിരിപ്പിന് ശേഷമാണ് കായിക മേഖലയുടെ സമഗ്ര വികസനത്തിനായി മൂന്നാംകുന്നിൽ കളിസ്ഥലം യാഥാർഥ്യമാക്കിയത്. 12.20 ലക്ഷം രൂപയാണ് ഇതിനായി ചെലവഴിച്ചത്. എട്ടുലക്ഷം പഞ്ചായത്ത് അനുവദിച്ചപ്പോൾ ബാക്കി 4.20 ലക്ഷം ജനകീയ കൂട്ടായ്‌മയുടെ നേതൃത്വത്തിലാണ് സമാഹരിച്ചത്. വിലയ്ക്ക് വാങ്ങിയ 28 സെന്‍റ് സ്ഥലത്താണ് കളിസ്ഥലം നിർമിച്ചത്. പഞ്ചായത്ത് വൈസ് പ്രസിഡന്‍റ് പി.സി. ആയിഷ, ആരോഗ്യ, വിദ്യഭ്യാസ സ്റ്റാൻഡിംഗ് കമ്മിറ്റി ചെയർമാൻ എം.എ. ഖലീൽ റഹ്മാൻ, ജനപ്രതിനിധികളായ ജെയ്മി ജോർജ്, മാത്യു പുതിയേടം, നിഷാ വിനു, വിവിധ രാഷ്‌ട്രീയ കക്ഷി നേതാക്കളായ റോയി ചെക്കാനിക്കുന്നേൽ, വി.വി. അബ്ദുള്ള, ജോസ് പുള്ളിറ്റ്, ദേവസ്യ കളരിക്കൽ, സിബി പന്തപ്പാട്ട്, അനീഷ് പുള്ളീറ്റ്, പി.കെ. ഹനീഫ, എം.എ. ജാബിർ ഹാജി എന്നിവർ പ്രസംഗിച്ചു.

സിപിഐ സംസ്ഥാന സമ്മേളന നഗരിയിലേക്കുള്ള പതാക ജാഥയ്ക്ക് സ്വീകരണം നല്കി

കണ്ണൂർ: സിപിഐ സംസ്ഥാന സമ്മേളന നഗരിയിലേക്കുള്ള പതാക ജാഥയ്ക്ക് കണ്ണൂർ പഴയ ബസ് സ്റ്റാൻഡിൽ സ്വീകരണം നല്കി. സ്വീകരണ പരിപാടിയിൽ സംഘാടക സമിതി ചെയർമാൻ എം. അനിൽകുമാർ അധ്യക്ഷത വഹിച്ചു. ജാഥാ ലീഡർ കെ.പി. രാജേന്ദ്രൻ, ഡപ്യൂട്ടി ലീഡർ ദീപ്തി അജയ കുമാർ, ജാഥാ അംഗങ്ങളായ ഇ.എം. സതീശൻ, എം. കുമാരൻ, പി. അജയകുമാർ എന്നിവർ പ്രസംഗിച്ചു. രാജ്യത്തെ എല്ലാ വിഭാഗം ജനങ്ങൾക്കെതിരേയുമുള്ള നിയമനിർമാണം നടത്തി ശത്രുതാപരമായ നിലപാടാണ് കേന്ദ്രസർക്കാർ സ്വീകരിച്ച് കൊണ്ടിരിക്കുന്നതെന്ന് ജാഥാ ലീഡറും സിപിഐ ദേശീയ എക്സിക്യൂട്ടീവംഗവുമായ കെ.പി. രാജേന്ദ്രൻ പറഞ്ഞു. ജനാധിപത്യ വിരുദ്ധ നിലപാട് സ്വീകരിക്കുന്ന ഇത്തരം വർഗീയ ഫാസിസ്റ്റ് ശക്തികൾക്കെതിരേയുള്ള പോരാട്ടത്തിന് ശക്തി പകരുന്നവരാണ് കമ്യൂണിസ്റ്റ് പാർട്ടിയും എൽഡിഎഫ് സർക്കാരും. ഫാസിസ്റ്റ് ശക്തികളെ അധികാരത്തിൽ നിന്ന് താഴെയിറക്കാൻ മുഴുവൻ മതേതര ജനാധിപത്യ ശക്തികളും ഒന്നിച്ച് നില്ക്കണമെന്നും കെ.പി. രാജേന്ദ്രൻ പറഞ്ഞു. സ്വീകരണ പരിപാടിയിൽ ജാഥാ ലീഡർ, ഡപ്യുട്ടി ലീഡർ, ഡയറക്ടർ, അംഗങ്ങൾ എന്നിവരെ നേതാക്കൾ ഷാൾ അണിയിച്ചു. വിവിധ വർഗ ബഹുജന സംഘടനകൾക്ക് വേണ്ടി ഹാരാർപ്പണം നടത്തി. ജാഥ തലശേരിയിലെ സ്വീകരണത്തിനു ശേഷം കോഴിക്കോട് ജില്ലയിലേക്ക് പ്രവേശിച്ചു.

കൂത്തുപറമ്പ് നിയോജക മണ്ഡലം പട്ടയമേള

കൂത്തുപറമ്പ്: സംസ്ഥാന സർക്കാരിന്‍റെ എല്ലാവർക്കും ഭൂമി, എല്ലാവർക്കും രേഖ, എല്ലാ സേവനങ്ങളും സ്മാർട്ട്‌ പദ്ധതിയിലൂടെ എന്ന ലക്ഷ്യവുമായി നടപ്പിലാക്കുന്ന കൂത്തുപറമ്പ് നിയോജക മണ്ഡലം പട്ടയമേള കൂത്തുപറമ്പ് ബ്ലോക്ക് പഞ്ചായത്ത് ഹാളിൽ നടന്നു. മന്ത്രി കെ. രാജൻ ഉദ്ഘാടനം ചെയ്തു. കെ.പി. മോഹനൻ എംഎൽഎ അധ്യക്ഷത വഹിച്ചു. ജില്ലാ കളക്‌ടർ അരുൺ കെ. വിജയൻ, നഗരസഭ വൈസ് ചെയർമാൻ വി. രാമകൃഷ്ണൻ, പാനൂർ നഗരസഭാ ചെയർമാൻ കെ.പി. ഹാഷിം, ബ്ലോക്ക്‌ പഞ്ചായത്ത്‌ പ്രസിഡന്‍റ് ആർ. ഷീല, മൊകേരി പഞ്ചായത്ത് പ്രസിഡന്‍റ് പി. വത്സൻ, പാട്യം പഞ്ചായത്ത് പ്രസിഡന്‍റ് എൻ.വി. ഷിനിജ, കുന്നോത്ത്പറമ്പ് പഞ്ചായത്ത് പ്രസിഡന്‍റ് കെ. ലത, തൃപ്പങ്ങോട്ടൂർ പഞ്ചായത്ത് പ്രസിഡന്‍റ് സക്കീന തെക്കയിൽ, നഗരസഭാംഗം ആർ. ഹേമലത, തലശേരി സബ് കളക്‌ടർ കാർത്തിക് പാണിഗ്രഹി, വിവിധ രാഷ്‌ട്രീയ കക്ഷി പ്രതിനിധികളായ കെ. ധനഞ്ജയൻ, എ. പ്രദീപൻ, ഹരിദാസ് മൊകേരി, അലി മൊട്ടമ്മൽ, ഷംജിത്ത് പാട്യം, എൻ. ധനഞ്ജയൻ, ശ്രീനിവാസൻ മാറോളി, കെ.ടി. രാകേഷ്, പി.കെ. രാജൻ, മുഹമ്മദ് റാഫി എന്നിവർ പ്രസംഗിച്ചു. കൂത്തുപറമ്പ് മണ്ഡലത്തിലെ വിവിധ വില്ലേജുകളിൽ നിന്നും തെരഞ്ഞെടുക്കപ്പെട്ട 153 പേർക്കാണു പട്ടയം നൽകിയത്.

പാവൽ കൃഷിയിൽ നൂറുമേനിയുമായി നാരായണനും കുടുംബവും

ഇരിട്ടി: കാലവർഷം അനുകൂലമല്ലാതിരുന്നിട്ടും പാവൽ കൃഷിയിൽ നൂറുമേനി വിളയിക്കാൻ കഴിഞ്ഞതിന്‍റെ സന്തോഷത്തിലാണ് ആറളം പന്നിമൂലയിലെ കുഞ്ഞേരിവീട്ടിൽ നാരായണനും കുടുംബവും. വീട്ടിൽ നിന്ന് മൂന്നു കിലോമീറ്റർ അകലെ അമ്പലക്കണ്ടിയിൽ പാട്ടത്തിനെടുത്ത 65 സെന്‍റ് സ്ഥലത്താണ് നാരായണൻ ഇത്തവണ കൃഷിയിറക്കിയത്. കാലാവസ്ഥയിലുണ്ടായ മാറ്റം ആശങ്കപ്പെടുത്തിയെങ്കിലും കീടങ്ങളെ പ്രതിരോധിച്ച് പരമാവധി ഉത്പാദനം ഉണ്ടാക്കാൻ കഴിഞ്ഞതിന്‍റെ ആഹ്ലാദത്തിലാണ് നാരായണനും കുടുംബവും. മഴകാരണം നാട്ടിലെങ്ങും പച്ചക്കറിക്കൃഷി മൂന്നിലൊന്നായി കുറഞ്ഞപ്പോൾ ഉണ്ടായ വിളവ് നല്ലവില ലഭിക്കുന്നമെന്ന പ്രതീക്ഷയും ഉണ്ട്. ഭാര്യ ദേവിയുടെ സഹായത്തോടെയാണു കൃഷിയിറക്കിയത്. കൃഷിയുടെ വിളവെടുപ്പ് ആറളം പഞ്ചായത്ത് പ്രസിഡന്‍റ് കെ.പി. രാജേഷ് ഉദ്ഘാടനം ചെയ്തു. വാർഡംഗം യു.സി. ബിന്ദു അധ്യക്ഷത വഹിച്ചു. കൃഷി അസിസ്റ്റന്‍റുമാരായ സി.കെ. സുമേഷ്, സി. മധുസൂദനൻ തുടങ്ങിയവർ പ്രസംഗിച്ചു. എടൂരിലുള്ള ആറളം പഞ്ചായത്തിന്‍റെ പച്ചക്കറിച്ചന്തയായ ഓണം സമൃദ്ധിയിലാണ് പാവയ്ക്ക വില്പനയ്‌ക്കെത്തുന്നത്.

ഇരിട്ടിയിൽ ഇരുട്ടായാൽ നായപ്പേടി

ഇരിട്ടി: ഇരിട്ടി ടൗണും പരിസരപ്രദേശങ്ങളും വീണ്ടും തെരുവുനായ്ക്കളുടെ പിടിയിൽ. രാത്രികാലങ്ങളിൽ കൂട്ടത്തോടെ ഇറങ്ങുന്ന തെരുവുനായ്ക്കൾ അന്തർസംസ്ഥാന യാത്രക്കാർക്ക് ഭീഷണിയാകുന്നു. പകൽ സമയത്ത് കെട്ടിടങ്ങളുടെ കോണുകളിലും ആളൊഴിഞ്ഞ കോണുകളിലും തമ്പടിക്കുന്ന നായ്ക്കൾ രാത്രിയായാൽ കൂട്ടത്തോടെയെത്തി അക്രമസ്വഭാവം കാണിക്കുകയാണ്. ഇതോടെ രാത്രികാലങ്ങളിൽ ബംഗളൂരു, മൈസൂരു ഭാഗങ്ങളിലേക്ക് യാത്രചെയ്യാൻ എത്തുന്നവർ തെരുവുനായ്ക്കളുടെ അക്രമണ ഭീഷണിയിലാണ്. കഴിഞ്ഞദിവസം ബംഗളൂരുവിലേക്ക് പോകാൻ എത്തിയ യാത്രക്കാരൻ പകർത്തിയ ചിത്രങ്ങളും അവരുടെ അനുഭവവും ഭയാനകമാണ്. കൂട്ടത്തോടെ എത്തിയ തെരുവുനായ്ക്കൂട്ടം ഒരു പൂച്ചക്കുട്ടിയെ ആക്രമിച്ച് ക്രൂരമായി കടിച്ച് കൊലപ്പെടുത്തിയ ശേഷം യാത്രക്കാർക്ക് നേരേയും ആക്രമണ സ്വഭാവത്തോടെ പെരുമാറി എന്നാണ് യാത്രക്കാരൻ പറയുന്നത്. ബസ് കാത്തുനിന്ന യാത്രക്കാർക്കിടയിലൂടെയും വാഹനത്തിനടിയിലൂടെയും ഓടിച്ച് അതിക്രൂരമായാണ് നായ്ക്കൾ പൂച്ചക്കുട്ടിയെ കടിച്ചുകൊന്നത്. നഗരസഭ അടിയന്തര നടപടി സ്വീകരിക്കണം തലശേരി-മൈസൂരു അന്തർസംസ്ഥാന പാതയിൽ തിരക്കേറിയ ടൗൺ കൂടിയാണ് ഇരിട്ടി. ദിവസവും രാത്രി നൂറുകണക്കിന് യാത്രക്കാരാണ് ഇവിടെ നിന്നും കർണാടകയിലേക്ക് യാത്ര ചെയ്യുന്നത്. ഭൂരിഭാഗം യാത്രക്കാരും രാത്രിസമയങ്ങളിവാണ് യാത്ര ചെയ്യുന്നത്. നിരവധി കെഎസ്ആർടിസി, ടൂറിസ്റ്റ് ബസുകളാണ് രാത്രികാല സർവീസ് നടത്തുന്നത്. വിദൂര സ്ഥലങ്ങളിൽ നിന്നും യാത്രക്കാർ ഇരിട്ടിയിൽ എത്തിയാണ് യാത്ര ചെയ്യുന്നത്. കുട്ടികളും മുതിർന്നവരും സ്ത്രീകളും അടങ്ങുന്ന യാത്രക്കാരാണ് രാത്രികാലങ്ങളിൽ തെരുവുനായ്ക്കളുടെ ഭീഷണി ഭയന്ന് ബസ് കാത്തു നിൽക്കുന്നത്. നഗരസഭ അടിയന്തരമായി ഇടപെട്ട് രാത്രികാലത്തെ തെരുവുനായ ശല്യത്തിന് പരിഹാരം കാണണമെന്നാണ് നാട്ടുകാരുടെയും യാത്രക്കാരുടെയും ആവശ്യം.

വിസ്മയ കാഴ്ചയൊരുക്കി നയാഗ്ര വെള്ളച്ചാട്ടവും സർറിയൽ വെള്ളച്ചാട്ടവും

കണ്ണൂർ: ലോകപ്രശസ്തമായ നയാഗ്ര വെള്ളച്ചാട്ടം, ദുബായ്, ചൈന എന്നിവിടങ്ങളിൽ ചരിത്രം സൃഷ്ടിച്ച് അപ്രത്യക്ഷമാകുന്ന സർറിയൽ വെള്ളച്ചാട്ടം... ഇവയൊക്കെ കാണണമെന്ന് ആഗ്രമില്ലാത്ത ആരും ഉണ്ടാകില്ല. മനസിനും കാഴ്ചയ്ക്കും കുളിരണിയിക്കുന്ന ഈ വെള്ളച്ചാട്ടങ്ങൾ കണ്ണൂർ പോലീസ് മൈതാനിയിൽ എത്തിയാൽ കാണാൻ കഴിയും. ഡിജെ അമ്യൂസ്മെന്‍റിന്‍റെ നേതൃത്വത്തിൽ ഒരുക്കിയ ഓണം ഫെയറിലാണ് വിസ്മയകാഴ്ചയൊരുക്കി നയാഗ്ര വെള്ളച്ചാട്ടം, സർറിയൽ വെള്ളച്ചാട്ടത്തിന്‍റെയും മാതൃകയുള്ളത്. ഫെയർ തുടങ്ങി ദിവസങ്ങൾ പിന്നിട്ടപ്പോഴേക്കും കേട്ടറിഞ്ഞ് നിരവധിയാളുകളാണ് ഈ വിസ്മയം കാണാനായി ഇവിടെ എത്തുന്നത്. കുട്ടികളൊക്കെ ഏറെ കൗതുകത്തോടെയാണ് ഇവ നോക്കിക്കാണുന്നത്. കുടുംബമായി എത്തുന്നവരും കപ്പിൾസും എല്ലാം നയാഗ്ര വെള്ളച്ചാട്ടത്തിന് സമീപം നിന്ന് വിവിധ പോസുകളിൽ ഫോട്ടോകൾ എടുക്കുന്നുണ്ട്. സർറിയൽ വെള്ളച്ചാട്ടത്തിൽ കളിക്കാനും സാധിക്കും. അതുകൊണ്ടു തന്നെ കുട്ടികൾ ഏറെ നേരം ഇവിടെ കളിച്ചും ഉല്ലസിച്ചും നിൽക്കും. സർറിയൽ വെള്ളച്ചാട്ടത്തിന് മാറ്റ് കൂട്ടാനായി ഗൾഫ് രാജ്യത്തിന്‍റെ മാതൃകയിലാണ് ഇവിടെ അണിയിച്ചൊരുക്കിയിരിക്കുന്നത്. ഈ വെള്ളച്ചാട്ടം ആസ്വദിച്ച് ഈന്തപ്പനയുടെ ചുവട്ടിൽ ഇരുന്ന് വിശ്രമിക്കാനായി ഇരിപ്പിടങ്ങളും ഒരുക്കിയിട്ടുണ്ട്. കൂ‌ടാതെ ദുബായിലുള്ള എല്ലാ വിനോദസഞ്ചാര കേന്ദ്രങ്ങളുടെയും ചിത്രങ്ങളും ചുമരുകളിൽ ഒരുക്കിയിട്ടുണ്ട്. ഇതിന്‍റെ മുന്നിൽ നിന്നും ഫോട്ടോ എടുക്കുന്നവരുമുണ്ട്. ദീർഘ ദൂരത്തിൽ നിന്ന് എത്തുന്നവരുടെ സൗകര്യാർഥം ഫെയറിന്‍റെ ഓപ്പണിംഗ് സമയം സംഘാടകർ മാറ്റിയിട്ടുണ്ട്. തിങ്കൾ മുതൽ വെള്ളിവരെ ഉച്ചകഴിഞ്ഞ് മൂന്നു മുതൽ രാത്രി 10 വരെയാണ് ഫെയർ. ശനി, ഞായർ തുടങ്ങി മറ്റ് അവധി ദിവസങ്ങളിൽ രാവിലെ 11 മുതൽ ഉണ്ടായിരിക്കും.

വർഷം ഒന്നു കഴിഞ്ഞു; കുവൈറ്റിലെ കടലാഴങ്ങളിൽ കാണാതായ അമലിനെ കാത്ത് കുടുംബം

ആലക്കോട്: കുവൈറ്റ് സമുദ്രാതിർത്തിയിലെ കടലാഴങ്ങളിൽ കാണാതായ മകനായുള്ള കാത്തിരിപ്പുമായി ഒരു വർഷമായി അമലിന്‍റെ കുടുംബം. വീട്ടിൽ കാണാൻ എത്തുന്നവരോട് ഇനിയെന്ത് ചെയ്യണമെന്ന് നിറകണ്ണുകളോടെ ഹൃദയം തകർന്ന് ചോദിക്കുകയാണ് ആലക്കോട് കാവുംകൂടിയിലെ കോട്ടയിൽ അമലിന്‍റെ മാതാപിതാക്കളായ സുരേഷും ഉഷയും. സഹോദരൻ ജീവനോടെയുണ്ടാകണേയെന്ന പ്രാർഥനയിലാണ് സഹോദരി അൽഷ. 2024 സെപ്റ്റംബർ ഒന്നിനാണ് കുവൈറ്റ് സമുദ്രാതിർത്തിയിൽ "അറബക്തർ ഒന്ന്' എന്ന കപ്പൽ അപകടത്തിൽപ്പെട്ടതും കണ്ണൂർ ആലക്കോട് കാവുംകുടിയിലെ അമൽ സുരേഷിനെ (26) കാണാതാകുന്നതും. അപകടത്തിൽപ്പെട്ട ആറുപേരിൽ തൃശൂർ സ്വദേശിയുടെ ഉൾപ്പെടെ നാലുപേരുടെ മൃതദേഹങ്ങൾ ലഭിച്ചിരുന്നു. കപ്പലിന്‍റെ ക്യാപ്റ്റൻ ഇറാൻ സ്വദേശിയെക്കുറിച്ചും അമലിനെക്കുറിച്ചുമാണ് വിവരങ്ങൾ ഒന്നും ലഭിക്കാത്തത്. സെപ്റ്റംബർ ഒന്നിന് അപകടം ഉണ്ടായെങ്കിലും അമലിനെ കാണാതായ വിവരം അഞ്ചിനാണു കുവൈറ്റിലെ ഇന്ത്യൻ എംബസി അമലിന്‍റെ കുടുംബത്തെ അറിയിച്ചത്. മരിച്ചതായാണ് ആദ്യം അറിയിച്ചത്. കപ്പലിൽ ഉണ്ടായിരുന്ന ആറുപേരിൽ നാലു പേരുടെ മൃതദേഹങ്ങൾ കിട്ടിയതായും പറഞ്ഞു. തുടർന്ന് കുവൈറ്റ് എംബസിയുടെ നിർദേശപ്രകാരം അമലിന്‍റെ മാതാപിതാക്കളിൽ നിന്നു ഡിഎൻഎ സാമ്പിളുകൾ ശേഖരിച്ച് എംബസിക്കു കൈമാറിയിരുന്നു. നാലുപേരുടെ മൃതദേഹമാണ് ഇതുവരെ കണ്ടെത്താൻ കഴിഞ്ഞതെന്നും അതിൽ അമൽ ഉൾപ്പെട്ടില്ലെന്നുമാണ് കുവൈറ്റ് എംബസിയിൽ നിന്ന് സെപ്റ്റംബർ 26-ന് കുടുംബത്തിനു വന്ന അവസാനത്തെ സന്ദേശം. പിന്നീട് ഒരു വിവരവും ഇവരുടെ ഭാഗത്തു നിന്നുണ്ടായില്ല. അപകടത്തിൽപ്പെട്ട ആറുപേരിൽ മലയാളിയായ തൃശൂർ കളരിക്കരയിലെ ഹരീഷ് ഹരിദാസിന്‍റെ മൃതദേഹം കിട്ടിയിരുന്നു. ഇനി കാണാനുള്ളത് അമലിനൊപ്പം കപ്പലിന്‍റെ ക്യാപ്റ്റനായ ഇറാൻ സ്വദേശിയുടെ മൃതദേഹമാണ്. അമലിനെ കാണാതായി വർഷം ഒന്നു കഴിഞ്ഞെങ്കിലും സർക്കാരിന്‍റേതടക്കം ഒരു തലത്തിലുള്ള അന്വേഷണവും കാര്യക്ഷമമല്ലെന്ന അഭിപ്രായം കുടുംബത്തിനുണ്ട്. സംഭവം നടന്നതു മുതൽ പിതാവ് സുരേഷ് മുട്ടാത്ത വാതിലുകളില്ല. മുഖ്യമന്ത്രിക്ക് നൽകിയ പരാതിയുടെ അടിസ്ഥാനത്തിൽ അന്വേഷണം നടത്താൻ നോർക്കയെ ചുമതലപ്പെടുത്തിയിരുന്നു. കേന്ദ്രമന്ത്രിമാരായ സുരേഷ് ഗോപിക്കും ജോർജ് കുര്യനും പലതവണ നേരിൽക്കണ്ട് പരാതി നൽകിയിരുന്നു. പക്ഷെ അമലിന് എന്ത് സംഭവിച്ചു എന്നതിനുത്തരം ഇന്നും അകലെയാണ്. കെ. സുധാകരൻ എംപിയും സജീവ് ജോസഫ് എംഎൽഎയും അമലിന്‍റെ വീട് സന്ദർശിച്ച് എല്ലാ സഹായവും വാഗ്ദാനം നൽകിരുന്നു. എന്നാൽ കുവൈറ്റിലെ ഇന്ത്യൻ എംബസിയിൽനിന്നോ കേന്ദ്ര സർക്കാരിൽനിന്നോ യാതൊരു വിവരങ്ങളും കുടുംബത്തിനു ലഭിച്ചിട്ടില്ല. അന്വേഷണത്തിൽ പുരോഗതി ഉണ്ടാകാത്തതിനെത്തുടർന്ന് പിതാവ് സുരേഷ് സെയ്‌ലേഴ്‌സ് യൂണിയൻ ഓഫ് ഇന്ത്യ ദേശീയ പ്രസിഡന്‍റ് രവി വിട്ടിലിനൊപ്പം മുംബൈയിലെ ഷിപ്പിംഗ് ഓഫീസിലെത്തി ഡയറക്ടറേറ്റ് ജനറൽ ഓഫ് ഷിപ്പിംഗ് ഓഫീസ് ചെയർമാൻ ശ്യാം ജഗന്നാഥന് നിവേദനം നൽകി. അമലും ക്യാപ്റ്റനും സുരക്ഷാബോട്ടിൽ രക്ഷപ്പെട്ടെങ്കിൽ എത്താൻ സാധ്യതയുള്ള സൗദി, ഖത്തർ ജയിലുകളിൽ പരിശോധന നടത്തണമെന്നായിരുന്നു കുടുംബത്തിന്‍റെ ആവശ്യം. മുംബൈ ഗ്ലോബൽ മറൈൻ ഏജൻസി വഴിയാണ് അമൽ പോയതെന്നാണ് കുടുംബത്തിന് ലഭിച്ച വിവരം. എന്നാൽ മുംബൈയിൽ തന്നെയുള്ള എർത്ത് ഓഷ്യൻ ഷിപ്പിംഗ് പ്രൈവറ്റ് ലിമിറ്റഡ് എന്ന ഏജൻസി വഴിയാണിതെന്ന് ഡിജിഎസ് ഉദ്യോഗസ്ഥർ നേരത്തെ കണ്ടെത്തിയിരുന്നു. വെസൽ ഈസ് മറിയം എന്ന കപ്പലിൽ ജോലി ലഭിച്ചെന്നാണ് രേഖയിലുള്ളത്. ഈ സാഹചര്യത്തിൽ അമൽ അറബക്തർ ഒന്നിൽ എത്തിയതിൽ ദുരൂഹതയുണ്ടെന്ന് കുടുംബം പറയുന്നു. ജനുവരിയിൽ ജോലി ലഭിച്ച് മുംബൈയിലേക്ക് പുറപ്പെട്ട അമൽ കൈയിൽ കരുതിയ 4,32,000 രൂപയിൽ നാല് ലക്ഷം ഏജൻസിക്ക് കൊടുത്തെന്നാണ് അറിയിച്ചത്. ജോലിയിൽ കയറിയശേഷം കപ്പൽക്കമ്പനി ഒരുരൂപ പോലും ശമ്പളം നൽകിയില്ല. ഇക്കാര്യങ്ങളൊക്കെ വിശദമായി അന്വേഷിക്കണമെന്ന് സുരേഷ് ഡിജിഎസ് ചെയർമാനോട് ആവശ്യപ്പെട്ടിട്ടും നടപടി ഉണ്ടായിട്ടില്ല. ഓണാവധിക്ക് ശേഷം ഹൈക്കോടതിയിൽ ഹർജി ഫയൽ ചെയ്യാനുള്ള തയാറെടുപ്പിലാണ് പിതാവ് സുരേഷ്. അമലിനെക്കുറിച്ചുള്ള വിവരങ്ങൾ ലഭിക്കുന്നത് വൈകിയാൽ കുടുംബത്തിന് നഷ്ടപരിഹാരം ഉൾപ്പെടെയുള്ളവ ലഭിക്കുന്നതിന് തടസം നേരിടും.

കറികൾ 200 തരം; സദ്യ കെങ്കേമമായി

ഉളിക്കൽ: "കാണം വിറ്റും ഓണം ഉണ്ണണം' എന്ന കേരളീയ പാരമ്പര്യത്തിന്‍റെ ആധുനിക വ്യാഖ്യാനവുമായി ജില്ലയിലെ മണിക്കടവ് സെന്‍റ് തോമസ് ഹയർ സെക്കൻഡറി സ്കൂൾ. ഓണാഘോഷത്തിന്‍റെ ഭാഗമായി ഗിന്നസ് റിക്കാർഡ് ലക്ഷ്യമിട്ട് 200 തരം കറികൾ ഒരുക്കിയാണ് വിദ്യാർഥി കൂട്ടായ്മ ഓണാഘോഷം സംഘടിപ്പിച്ചത്. ആഘോഷത്തോടനുബന്ധിച്ച് കേരളത്തിന്‍റെ പാരമ്പര്യ രുചികളുടെ ചേരുവകൾ അധ്യാപകരുടെ മേൽനോട്ടത്തിൽ വിദ്യാർഥി കൂട്ടായ്മയിൽ തയാറാക്കിയത് അപൂർവ നേട്ടങ്ങളിൽ ഒന്നായി മാറി. പരമ്പരാഗത ഓണം സദ്യയിൽ 20-30 തരം കറികളാണ് വിളമ്പുന്നത്. എന്നാൽ ഗിന്നസ് വേൾഡ് റിക്കാർഡിനുള്ള ശ്രമം എന്ന രീതിയിലാണ് 200 ൽ അധികം വിഭിന്ന കറികൾ ഇലയിൽ വിളമ്പിയത്. ഓണം എന്നത് വെറും ആഘോഷങ്ങൾ മാത്രമല്ല മലയാളികളുടെ ഐക്യം, സഹകരണം, സാംസ്കാരിക സമന്വയം എന്നിവയുടെ സങ്കലനമാണെന്ന സന്ദേശം കൂടിയായിരുന്നു വിദ്യാർഥികളുടെ പ്രകടനം. സെന്‍റ് തോമസ് ഹയർ സെക്കൻഡറി സ്കൂൾ ഓണാഘോഷ ഉദ്ഘാടനം ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി നിർവഹിച്ചു. സ്കൂൾ മാനേജർ ഫാ. പയസ് പടിഞ്ഞാറെ മുറിയിൽ അധ്യക്ഷത വഹിച്ചു. ഉളിക്കൽ പഞ്ചായത്ത് മെംബർ ഒ.വി ഷാജു, പ്രിൻസിപ്പൽ ഷാജി വർഗീസ് എന്നിവർ പ്രസംഗിച്ചു. മെഗാ തിരുവാതിര, പൂക്കള മത്സരം, ഓണപ്പാട്ട് മത്സരം, മലയാളിമങ്ക, കേരളശ്രീമാൻ തുടങ്ങിയ നിരവധി ഓണ മത്സരങ്ങൾ സംഘടിപ്പിച്ചു. കൊമേഴ്സിൽ ഡോക്ടറേറ്റ് നേടിയ അധ്യാപിക സൂര്യ തങ്കച്ചനെ പൊന്നാടയണിയിച്ച് ആദരിച്ചു.

എൻസിസി വാർഷിക പരിശീലന ക്യാമ്പിന് നെഹ്റു കോളജിൽ തുടക്കം

നീലേശ്വരം: എൻസിസി 32 കേരള ബറ്റാലിയന്‍റെ ദശദിന വാർഷിക പരിശീലന ക്യാമ്പ് പടന്നക്കാട് നെഹ്റു ആർട്സ് ആൻഡ് സയൻസ് കോളജിൽ ആരംഭിച്ചു. ക്യാമ്പ് കമാൻഡന്‍റ് കേണൽ വികാസ് ജെയിൻ ഉദ്ഘാടനം ചെയ്തു. ഡെപ്യൂട്ടി കമാൻഡന്‍റ് ലഫ്റ്റനന്‍റ് കേണൽ ടി.വി. അനുരാജ് അധ്യക്ഷത വഹിച്ചു. ക്യാമ്പ് അഡ്ജുഡന്‍റ് ക്യാപ്റ്റൻ ഡോ. നന്ദകുമാർ കോറോത്ത്, സുബേദാർ മേജർ ഡി.വി.എസ്. റാവു എന്നിവർ പ്രസംഗിച്ചു. കണ്ണൂർ, കാസർഗോഡ് ജില്ലകളിലെ വിവിധ വിദ്യാലയങ്ങളിൽ നിന്നായി അഞ്ഞൂറ് കേഡറ്റുകളാണ് ദശദിന ക്യാമ്പിൽ പങ്കെടുക്കുന്നത്. ഇവർക്ക് ഡ്രിൽ, ആയുധ ഉപയോഗം, ഫയറിംഗ്, മാപ്പ് റീഡിംഗ് എന്നിവയിൽ പരിശീലനം നൽകും സൈബർ ബോധവത്കരണം, പ്രഥമശുശ്രൂഷ, ട്രാഫിക് നിയമ ബോധവത്കരണം, വ്യക്തിത്വ വികസനം എന്നീ ക്ലാസുകളും സംഘടിപ്പിക്കും. പെരിങ്ങോം സിആർപിഎഫിന്‍റെ ആയുധ പ്രദർശനവും എൻഡിആർഎഫിന്‍റെ നേതൃത്വത്തിൽ ദുരന്തനിവാരണ പരിശീലനവും നടക്കും. സെപ്റ്റംബർ ഏഴിന് ക്യാമ്പ് സമാപിക്കും.

ഒരു രാഷ്‌ട്രീയ പാർട്ടിയോടും പ്രത്യേക അടുപ്പമോ എതിർപ്പോ ഇല്ല: മാർ ജോസഫ് പാംപ്ലാനി

ചെമ്പേരി: തനിക്ക് ഒരു രാഷ്‌ട്രീയ പാർട്ടിയോടും പ്രത്യേക അടുപ്പമോ എതിർപ്പോ ഇല്ലെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. നല്ല കാര്യങ്ങൾ ചെയ്യുമ്പോൾ അവരെ അഭിനന്ദിക്കാനും നന്ദി പറയാനും തയാറാകുമെന്നും, അതുപോലെ ജനസേവകരാകേണ്ടവർ തെറ്റുകൾ ചെയ്താൽ അത് ചൂണ്ടിക്കാണിക്കാൻ മടിക്കില്ലെന്നും അദ്ദേഹം വ്യക്തമാക്കി. സാമുദായിക ശാക്തീകരണം രാഷ്‌ട്ര പുരോഗതിക്ക് ' എന്ന മുദ്രാവാക്യമുയർത്തി കത്തോലിക്ക കോൺഗ്രസ് കേന്ദ്ര കമ്മിറ്റിയുടെ ആഭിമു ഖ്യ ത്തിൽ തലശേരി അതിരൂപത സമിതി ചെമ്പേരി നിർമല സ്കൂൾ ജൂബിലി ഹാളിൽ സംഘടിപ്പിച്ച നേതൃത്വ പരിശീലന ശില്പശാല ഉദ്ഘാടനം ചെയ്തു പ്രസംഗിക്കുകയായിരുന്നു ആർച്ച്ബിഷപ്. അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ മുഖ്യപ്രഭാഷണം നടത്തി. വരുന്ന തദ്ദേശ സ്വയംഭരണ തെരഞ്ഞെടുപ്പിൽ ജനകീയരും പൊതുസമ്മതരുമായ സമുദായ അംഗങ്ങൾക്ക് വിജയം നേടാൻ ഇത്തരം ശില്പശാലകൾ സഹായകരമാകുമെന്ന് അദ്ദേഹം അഭിപ്രായപ്പെട്ടു. സമുദായ അംഗങ്ങൾ പരസ്പരം തണലായും പൊതുസമൂഹത്തിന് ഉപകാരപ്പെടുന്നവരുമായി മാറണ മെന്ന് ഗ്ലോബൽ ഡയറക്ടർ റവ. ഡോ.ഫിലിപ്പ് കവിയിൽ ഓർമപ്പെടുത്തി. അതിരൂപത ചാൻസലർ റവ. ഡോ.ജോസഫ് മുട്ടത്തുകുന്നേൽ, ഗ്ലോബൽ ജനറൽ സെക്രട്ടറി പ്രഫ. ജോസുകുട്ടി ഒഴുകയിൽ, ചെമ്പേരി ലൂർദ് മാതാ ബസിലിക്ക റെക്ടർ റവ. ഡോ.ജോർജ് കാഞ്ഞിരക്കാട്ട്, കത്തോലിക്ക കോൺഗ്രസ് തലശേരി അതിരൂപത ജനറൽ സെക്രട്ടറി ജിമ്മി ആയിത്തമറ്റം, കത്തോലിക്കാ കോൺഗ്രസ് ചെമ്പേരി ഫൊറോന ഡയറക്ടർ ഫാ. പോൾ വള്ളോപ്പിള്ളി, കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റുരായ ട്രീസ ലിസ് സെബാസ്റ്റ്യൻ, ബെന്നി ആന്‍റണി, ഫാ. ജോബി ചെരുവിൽ, ഗ്ലോബൽ സെക്രട്ടറിമാരായ പീയൂസ് പറയിടം, ഷീജ കാറുകുളം, അതിരൂപത വൈസ് പ്രസിഡന്‍റുരായ ബെന്നിച്ചൻ മഠത്തിനകം, ഐ.സി. മേരി, ഷിനോ പാറയ്ക്കൽ, ടോമി കണയങ്കൽ, സിജോ കണ്ണേഴത്ത്, ബിജു മണ്ഡപത്തിൽ, ജോണി തോലമ്പുഴ, തോമസ് ഒഴുകയിൽ, ജോണി തോമസ് വടക്കേക്കര എന്നിവർ പ്രസംഗിച്ചു.

തുറമുഖ സുരക്ഷയ്ക്ക് കവചമൊരുക്കാൻ സിഐഎസ്എഫ്

മട്ടന്നൂർ: കേരളത്തിലേത് ഉൾപ്പെടെ തുറമുഖങ്ങളുടെ ഹൈബ്രിഡ് സുരക്ഷയ്ക്കായി പുതിയ പദ്ധതിയുമായി സിഐഎസ്എഫ്. ഇതിന്‍റെ ഭാഗമായി തുറമുഖങ്ങളിലെ സ്വകാര്യ സുരക്ഷാ ഉദ്യോഗസ്ഥർക്ക് പരിശീലനം നൽകി. വർധിച്ചുവരുന്ന സമുദ്ര ഭീഷണിക്കെതിരേ പ്രതിരോധം ശക്തിപ്പെടുത്തുകയാണ് പദ്ധതി ലക്ഷ്യമിടുന്നത്. പദ്ധതിയുടെ ഭാഗമായുള്ള പ്രത്യേക പരിശീലനം ജവഹർലാൽ നെഹ്‌റു പോർട്ട് അഥോറിറ്റി (ജെഎൻപിഎ) മുംബൈയിലും ചെന്നൈ പോർട്ട് അഥോറിറ്റി (സിഎച്ച്പിഎ)യിലും തുടങ്ങി. വരും ദിവസങ്ങളിൽ കേരളം ഉൾപ്പെടെയുള്ള തുറമുഖങ്ങളിലെ സ്വകാര്യ സുക്ഷാ ജീവനക്കാർക്കും പരിശീലനം നല്കും. ഇതിലൂടെ തുറമുഖങ്ങളിലെ ഹൈബ്രിഡ് പോർട്ട് സെക്യൂരിറ്റി ശക്തിപ്പെടുത്തുകയാണ് ലക്ഷ്യം. കേരളം ഉൾപ്പെടെ ഇന്ത്യയിൽ ഏകദേശം 200 ചെറുകിട, ഇടത്തരം തുറമുഖങ്ങളാണുള്ളത്. ഇതിൽ ഏകദേശം 68 എണ്ണം മാത്രമേ കാർഗോ പ്രവർത്തനങ്ങളിൽ സജീവമായിട്ടുള്ളൂ. 13 പ്രധാന തുറമുഖ ങ്ങളേയും സിഐഎസ്എഫ് സംരക്ഷിക്കുമ്പോൾ, കാർഗോ സോണുകൾ, വെയർഹൗസുകൾ, ആക്സസ് ഗേറ്റുകൾ, ചെറിയ തുറമുഖങ്ങളിലെ ഇൻസ്റ്റലേഷനുകൾ എന്നിവ സംരക്ഷിക്കുന്നതിൽ സ്വകാര്യ സുരക്ഷാ ഏജൻസികളാണ് പ്രധാന പങ്കുവഹിക്കുന്നത്. ഈ സാഹചര്യത്തിൽ എല്ലാ തുറമുഖങ്ങളിലും ഏകീകൃതവും കുറ്റമറ്റതുമായ സുരക്ഷാ പ്രോട്ടോക്കോൾ വികസിപ്പിക്കേണ്ടതിന്‍റെ പ്രാധാന്യം തിരിച്ചറിഞ്ഞാണ് സിഐഎസ്എഫ് ആദ്യമായി ഇത്തരമൊരു സുരക്ഷാ പദ്ധതിക്ക് രൂപം നല്കിയത്. രണ്ടാഴ്ച നീണ്ടുനില്ക്കുന്ന ‘പോർട്ട് ഫെസിലിറ്റി സെക്യൂരിറ്റി കോഴ്‌സ്’ എന്ന പേരിലാണ് പരിശീലനം നല്കുന്നത്. തുറമുഖ പ്രവർത്തനങ്ങൾ, ഭീഷണി തിരിച്ചറിയൽ, അടിയന്തര പ്രതികരണം എന്നിവയിൽ സ്വകാര്യ സുരക്ഷാ ജീവനക്കാരെ പ്രാപ്തരാക്കാൻ പരിശീലനത്തിലൂടെ കഴിയും. നിയമപരമായ ചട്ടക്കൂടുകൾ, സാങ്കേതിക സുരക്ഷാ ഗാഡ്‌ജെറ്റുകളുടെ ഉപയോഗം, ഇന്‍റർനാഷണൽ ഷിപ്പ് ആൻഡ് പോർട്ട് ഫെസിലിറ്റി സെക്യൂരിറ്റി (ഐഎസ്പിഎസ്) കോഡിന് കീഴിലുള്ള അന്താരാഷ്‌ട്ര മാനദണ്ഡങ്ങൾ എന്നിവയും പരിശീലനത്തിൽ ഉൾപ്പെടും. സിഐഎസ്എഫ്, കസ്റ്റംസ്, മറൈൻ ഡിപ്പാർട്ട്‌മെന്‍റ്, പോർട്ട് ഹെൽത്ത് ഓർഗനൈസേഷൻ എന്നിവിടങ്ങളിൽ നിന്നുള്ള ഇൻസ്ട്രക്ടർമാരാണ് പരിശീലനം നല്കുന്നത്.

കല്യാട്ടെ മോഷണവും കൊലപാതകവും; അന്വേഷണം ബിലിക്കരെ കേന്ദ്രീകരിച്ചും

ഇരിക്കൂർ: കല്യാട്ടെ മോഷണവും ദർശിതയുടെ കൊലപാതകവും സംബന്ധിച്ച് അന്വേഷണം പുരോഗമിക്കുന്നു. രണ്ടുദിവസമായി കേരളത്തിൽ നിന്നുള്ള അന്വേഷണസംഘം ദർശിതയുടെ നാടായ ബാലിക്കരെയിലാണ് ഉള്ളത്. കല്യാട് നിന്നും കാണാതായ പണത്തിന്‍റെ കാര്യത്തിൽ വ്യക്തത വന്നെങ്കിലും സ്വർണത്തിന്‍റെ കാര്യത്തിൽ അവ്യക്തത തുടരുകയാണ്. ഇരിക്കൂർ കല്യാട്ടെ ഭർതൃവീട്ടിൽനിന്ന് കർണാടക ഹുൻസൂർ ബിലിക്കരെ സ്വദേശി ദർശിത കവർച്ച ചെയ്ത പണത്തിൽ രണ്ടുലക്ഷം രൂപ നല്കിയത് പൂജാരിക്കാണെന്ന് ഇരിട്ടി ഡിവൈഎസ്‌പി പി.കെ. ധനഞ്‌ജയ ബാബുവിന്‍റെ മേൽനോട്ടത്തിൽ നടക്കുന്ന അന്വേഷണത്തിൽ വ്യക്തമായിരുന്നു. ഇരി ക്കൂർ എസ്എച്ചഒ രാജേഷ് ആയോടൻ നടത്തിയ അന്വേഷണത്തിലാണ് നല്കിയ പണത്തെക്കുറിച്ചും പണം നല്കിയ പൂജാരിയെക്കുറിച്ചും വ്യക്തമായത്. നാട്ടിലെ സുഹൃത്ത് സിദ്ധരാജുവിന്‍റെ പ്രേരണയെ തുടർന്നാണ് കവർച്ച നടത്തിയതെന്നാണ് സൂചന. വെള്ളിയാഴ്‌ച സ്വന്തം വീട്ടിലെത്തിയ ദർശിത പിറ്റേ ദിവസമാണ് വീടിനു സമീപത്തുള്ള ക്ഷേത്രത്തിലെ പൂജാരിയായ ജനാർദന മുഖേന കർണാടക ഹുൻപൂരിലെ മന്ത്രവാദിയായ മഞ്ജുനാഥ സ്വാമിയെ രണ്ട് ലക്ഷം രൂപ ഏൽപ്പിച്ചത്. ദർശിതയുടെ ഹുൻസൂറിലെ വീട്ടിൽ പ്രേതബാധ ഉണ്ടെന്നും അത് ഒഴിപ്പിക്കാൻ രണ്ടു ലക്ഷം നല്കാൻ പൂജാരി പറഞ്ഞിരുന്നുവത്രെ. ഇതു പ്രകാരമാണ് ബാധ ഒഴിപ്പിക്കാൻ പണം വാങ്ങിയത്. എന്നാൽ പൂജയ്ക്ക് തീയതി നിശ്ചയിച്ചിരുന്നില്ലെന്നും പണം കൈപ്പറ്റിയെന്നും അന്വേഷണ സംഘത്തോട് മന്ത്രവാദി മഞ്ജുനാഥ് സമ്മതിച്ചിട്ടുണ്ട്. ഈ പണം വീട്ടിൽ തന്നെയുണ്ടായിരുന്നു. എന്നാൽ കവർച്ചയും കൊലപാതകവുമായി ഇയാൾക്ക് ബന്ധമില്ലെന്നാണ് ഇതുവരേയുള്ള സൂചന. ഇതിന് ശേഷമാണ് സിദ്ദരാജുവിനൊപ്പം സാലിഗ്രാമിലേക്ക് പോയത്. അന്നു വൈകുന്നേരം സാലിഗ്രാം ടൗണിലെ എസ്.ആർ. ലോഡ്ജിലെ മുറിയിലാണ് ക്രൂരമായ രീതിയിൽ ദർശിതയെ സിദ്ദരാജു കൊലപ്പെടുത്തിയത്. ഇനി കവർച്ച ചെയ്ത സ്വർണമാണ് കണ്ടെത്താനുള്ളത്. ഇത് സംബന്ധിച്ച അന്വേഷണം പുരോഗമി ക്കുകയാണ്. അതേസമയം കല്യാട്ടെ വീട്ടിൽ മുമ്പും രണ്ടുതവണ പണം കാണാതായിരുന്നു. അന്ന് അത് വീട്ടുകാർ ഗൗരവമായി എടുത്തിരുന്നില്ല. അന്വേഷണ സംഘത്തിൽ ഇരിക്കൂർ ഇൻസ്പെക്ടറെ കൂടാതെ കരിക്കോട്ടക്കരി എസ്എച്ചഒ കെ.ജെ. വിനോയ്, ഡിവൈഎസ്‌പിയുടെ സ്ക്വാഡ് അംഗങ്ങളായ എ.എം.സിജോയ്, കെ.കെ. ജയദേവൻ, പി. രതീഷ്, കെ.പി. നിതീഷ്, വി.ഷാജി എന്നിവർ ഹുൻസൂറിൽ തന്നെ തങ്ങിയാണ് അന്വേഷണം നടത്തുന്നത്.

തൊഴിലാളി അംഗത്വം എടുക്കാതിരുന്നിട്ടും ഉടമാ വിഹിതം പിരിച്ചെടുക്കുന്നത് അവസാനിപ്പിക്കണം: എകെഎസ്എടിയു

കണ്ണൂർ: മോട്ടോർതൊഴിലാളി ക്ഷേമനിധിയിൽ ഉടമാ വിഹിതം അടയ്ക്കുന്നത് തൊഴിലാളിയുടെ ക്ഷേമത്തിന് വേണ്ടിയാണെന്നിരിക്കെ, തൊഴിലാളി അംഗത്വം എടുക്കാതിരുന്നിട്ടും ഉടമാ വിഹിതം നിർബന്ധമായി പിരിച്ചെടുക്കുന്ന ക്ഷേമനിധി ബോർഡിന്‍റേയും സർക്കാരിന്‍റേയും നടപടി അവസാനി പ്പിക്കണമെന്ന് കണ്ണൂരിൽ നടന്ന ഓൾ കേരള സ്വതന്ത്ര ഓട്ടോറിക്ഷതൊഴിലാളി യൂണിയൻ സംസ്ഥാന രൂപീകരണ സമ്മേളനം പ്രമേയത്തിലൂടെ അധികൃതരോട് ആവശ്യപ്പെട്ടു. ഓട്ടോറിക്ഷകളുടെ പ്രവർത്തന ചെലവിനും തൊഴിലാളികളുടെ ജീവിത ചെലവിനും ആനുപാതിക മായി ഓട്ടോ ചാർജ് യഥാസമയം വർധിപ്പിക്കുക, സർക്കാർ അനുവദിച്ച യാത്രക്കൂലി തൊഴിലാളികൾക്ക് ലഭിക്കുന്നു എന്ന് ഉറപ്പുവരുത്തി ക്കൊണ്ട് സർക്കാർ വിജ്ഞാപനം ശാസ്ത്രീയമായ രീതിയിൽ പരിഷ്കരിക്കുക, ഓട്ടോറിക്ഷകളുടെ അനധികൃത പാർക്കിംഗും സർവീസും തടയുക തുടങ്ങി വിവിധ ആവശ്യങ്ങളും സമ്മേളനം ഉന്നയിച്ചു.

നിരോധിത വസ്തുക്കൾ കണ്ണൂർ സെൻട്രൽ ജയിലിൽ സുലഭം; ഒരു മൊബൈൽ കൂടി പിടികൂടി

കണ്ണൂർ: കണ്ണൂർ സെൻട്രൽ ജയിലിൽനിന്നും വീണ്ടും മൊബൈൽ ഫോൺ കണ്ടെടുത്തു. സെൻട്രൽ ജയിൽ ന്യൂ ബ്ലോക്കിന്‍റെ പിറകുവശത്ത് ഒളിപ്പിച്ച നിലയിലായിരുന്നു മൊബൈൽ ഫോൺ. സംഭവത്തില്‍ ജോയിന്‍റ് സൂപ്രണ്ടിന്‍റെ പരാതിയിൽ ടൗൺ പോലീസ് കേസെടുത്ത് അന്വേഷണം ആരംഭിച്ചു. നിരോധനത്തിനിടയിലും രണ്ടാഴ്ചയ്ക്കുള്ളിൽ ഏഴു മൊബൈൽ ഫോണുകളാണ് ജയിലിൽനിന്ന് പരിശോധനക്കിടെ കണ്ടെത്തി പിടിച്ചെടുത്തത്. കഴിഞ്ഞ ദിവസം തടവുകാരൻ ഫോൺ വിളിക്കുന്നതും പരിശോധനയ്ക്കിടെ കണ്ടെത്തിയിരുന്നു. ശനിയാഴ്ച വൈകുന്നേരം നടത്തിയ പരിശോധനയിലാണ് ഫോൺ കണ്ടെത്തിയത്. ജയിലിലെ മതിൽക്കെട്ടിനു പുറത്തുനിന്ന് മൊബൈൽ ഫോണും പുകയില ഉത്പന്നങ്ങളും ജയിലിനുള്ളിലേക്ക് എറിഞ്ഞു നല്കുന്നതിനിടെ മൂന്നംഗ സംഘത്തിലെ ഒരാള്‍ ദിവസങ്ങൾക്ക് മുന്പ് പോലീസിന്‍റെ പിടിയിലായിരുന്നു. മറ്റു രണ്ടുപേരെ ഇനിയും പിടികൂടാനായില്ല. പുതിയതെരു പനങ്കാവ് സ്വദേശി അക്ഷയ് ആണ് പിടിയിലായത്. പണം വാങ്ങിയാണ് കഞ്ചാവ് ഉൾപ്പെടെ മതിലിന് പുറത്തുനിന്നും ജയിൽ തടവുകാർക്ക് എറിഞ്ഞു കൊടുക്കുന്നതെന്ന് ഇയാൾ പോലീസിന് മൊഴി നല്കിയിരുന്നു. ഒരാഴ്ച മുന്പാണ് ജയിലിലെ സുരക്ഷ പരിശോധിക്കുന്നതിനായി മുൻ ഡിജിപി ജേക്കബ് പുന്നൂസിന്‍റെ നേതൃത്വത്തിലുള്ള സംഘം കണ്ണൂരിൽ സന്ദർശനം നടത്തിയത്. ഓഗസ്റ്റ് 10ന് ജയില്‍ ഡിഐജിയുടെ നേതൃത്വത്തില്‍ നടത്തിയ പരിശോധനയില്‍ മൂന്ന് സ്മാര്‍ട്ട് ഫോ ണുകൾ കണ്ടെത്തിയിരുന്നു. ഫോണിനൊപ്പം ചില ചാര്‍ജറുകളും കണ്ടെത്തി. അഞ്ച്, ആറ്, ന്യൂ എന്നീ ബ്ലോക്കുകളില്‍ നിന്നാണ് ഫോണുകൾ കണ്ടെടുത്തത്. നേരത്തെ ജയിലിലെ കല്ലിനടിയിൽ നിന്നടക്കം മൊബൈൽ കണ്ടെത്തിയിരുന്നു.

റിലയൻസ് ഓൾ ഇന്ത്യ ഇൻവിറ്റേഷൻ കപ്പ്: കേരള ടീമിലേക്ക് രണ്ട് കണ്ണൂരുകാർ

കണ്ണൂർ: അഹമ്മദബാദിൽ സെപ്റ്റംബർ 16 വരെ നടക്കുന്ന 19 വയസിന് താഴെയുള്ള ആൺകുട്ടികളുടെ റിലയൻസ് ഓൾ ഇന്ത്യ ഇൻവിറ്റേഷൻ ത്രിദിന ലീഗ് കം നോക്കൗട്ട് ടൂർണമെന്‍റിന്‍റെ കേരള ടീമിൽ കണ്ണൂരിൽ നിന്ന് രണ്ടുപേർ. തലശേരി കോട്ടയംപൊയിൽ സ്വദേശി സംഗീത് സാഗർ, എട്ടിക്കുളം മൊട്ടക്കുന്നിലെ ഇമ്രാൻ അഷ്റഫ് എന്നിവരാണ് കേരള ടീമിൽ ഇടം നേടിയത്. 12 ടീമുകൾ പങ്കെടുക്കുന്ന ടൂർണമെന്‍റിൽ മുംബൈ, ബംഗാൾ, ബറോഡ എന്നിവരടങ്ങുന്ന ഗ്രൂപ്പ് ബി യിലാണ് കേരളം. മാനവ് കൃഷ്ണയാണ് കേരള ക്യാപ്റ്റൻ. ഓപ്പണറായ സംഗീത് സാഗർ കഴിഞ്ഞ വർഷം 19 വയസിന് താഴെയുള്ള ആൺകുട്ടികളുടെ ബിസിസിഐ കുച്ച് ബെഹാർ ‌ട്രോഫി, 2022-23 സീസണിൽ ബിസിസിഐ യുടെ 16 വയസിന് താഴെയുള്ള ആൺകുട്ടികളുടെ വിജയ് മർച്ചന്‍റ് ട്രോഫി എന്നിവയിൽ കേരള ടീമംഗമായിരുന്നു. തലശേരി ബികെ 55 ക്ലബ് അംഗമായ സംഗീത് 2023 ൽ രാജസ്ഥാൻ റോയൽസ് ജൂണിയർ ടീം പരിശീലന ക്യാമ്പിലേക്കും നാഷണൽ ക്രിക്കറ്റ് അക്കാഡമി ക്യാമ്പിലേക്കും തെരഞ്ഞെടുക്കപ്പെട്ടിരുന്നു.കോട്ടയംപൊയിൽ എടത്തിൽ ഹൗസിൽ വി.ഗിരീഷ്കുമാർ- കെ.കെ.ഷിജിന ദന്പതികളുടെ മകനാണ്. ടോപ് ഓർഡർ ബാറ്റ്സ്മാനും വിക്കറ്റ് കീപ്പറുമായ ഇമ്രാൻ അഷ്റഫ് അണ്ടർ 16 കേരള ടീമംഗമായിരുന്നു. ബികെ 55 ക്ലബം അംഗമാണ്. വിവിധ വിഭാഗങ്ങളിൽ ജില്ലയെ പ്രതിനിധീകരിച്ചിട്ടുണ്ട്. 19 വയസിന് താഴെയുള്ള അന്തർ ജില്ല ടൂർണ്ണമെന്‍റിൽ മലപ്പുറത്തിനെതിരെ 101 റൺസെടുത്തിരുന്നു.കണ്ണൂർ എട്ടിക്കുളം മൊട്ടക്കുന്ന് എൻഎംസി ഹൗസിൽ മുഹമ്മദ് അഷ്റഫ്- സെലീന ദന്പതികളുടെ മകനായ ഇമ്രാൻ അഷറഫ് പതിനൊന്നാം ക്ലാസ് ഓപ്പൺ സ്കൂൾ വിദ്യാർഥിയാണ്.

വയത്തൂർ പുഴയിലകപ്പെട്ട ഓട്ടോടാക്സി നാട്ടുകാരും ഫയർ ഫോഴ്സും കരയ്ക്കെത്തിച്ചു

ഉളിക്കൽ: വയത്തൂർ പുഴയിലെ ചപ്പാത്ത് പാലത്തിൽ നിന്ന് വെള്ളിയാഴ്ച പുലർച്ചെ ഒഴുക്കിൽപ്പെട്ട് കാണാതായ ഓട്ടോ ടാക്സി നാട്ടുകാരും ഫയർഫോഴ്സും ചേർന്ന് കരയ്ക്കെത്തിച്ചു. പെരുമ്പള്ളി സ്വദേശി ജോസ് കുഞ്ഞിന്‍റെ ഓട്ടോടാക്സിയാണ് ചപ്പാത്ത് പാലത്തിലൂടെ പുഴ കടക്കുമ്പോൾ ഒഴുക്കിൽപെട്ടത്. വാഹനത്തിലുണ്ടായിരുന്ന മൂന്നു പേരെ പ്രദേശവാസികളായ അഭിലാഷും സാബുവും ചേർന്ന് രക്ഷപെടുത്തിയിരുന്നു. മണിപ്പാറ പെരുമ്പള്ളിയിലെ ബസ് ജീവനക്കാരനായിരുന്ന അഭിലാഷിനെയും കൊണ്ട് പരിയാരം ഗവ. മെഡിക്കൽ കോളജാശുപത്രിയിൽ പോയി തിരിച്ചുവരികയായിരുന്ന ഓട്ടോ ടാക്സി കഴിഞ്ഞ വെള്ളിയാഴ്ച പുലർച്ചെ 2.45 ഓടെയാണ് അപകടത്തിൽപ്പെടുന്നത്. ഇതോടെ വാഹനത്തി ലുണ്ടായിരുന്ന മൂവരും ഒഴുകിപ്പോവുകയായിരുന്നു. രണ്ടു ദിവസത്തെ തെരച്ചിലിൽ വാഹനം കണ്ടെത്താൻ കഴിഞ്ഞിരുന്നില്ല. പുഴയിൽ വെള്ളം കുറഞ്ഞ തോടെ ഇരിട്ടി ഫയർഫോഴ്സും നാട്ടുകാരും ചേർന്ന് നടത്തിയ തെരച്ചിലിലാണ് വാഹനം കണ്ടെത്തി യത്. മൂന്നുമണിക്കൂറോളം നടത്തിയ കഠിന പ്രയത്നത്തിനൊടുവിൽ ഇന്നലെയാണ് ഓട്ടോ ടാക്സി കരയ്ക്കെത്തിച്ചത്. ചപ്പാത്ത് പാലത്തിനരികിൽ നിന്നും 200 മീറ്ററോളം മാറി ചെളിയിൽ പുതഞ്ഞ നിലയിലായിരുന്നു ഓട്ടോടാക്സി. ഇരിട്ടി ഫയർ ഫോഴ്സ് സംഘവും നാട്ടുകാരും ചേർന്ന് ചെളിയിൽ പുതഞ്ഞ കിടന്ന വാഹനത്തെ കരയിലേക്ക് വലിച്ച് കയറ്റുകയായിരുന്നു. വാഹനം കരയ്ക്ക് കയറ്റുന്ന വിവരം അറിഞ്ഞ് നിരവധി പേർ ഇവിടേയ്ക്ക് എത്തിയിരുന്നു.

കൊട്ടിയൂർ-ബോയ്സ് ടൗൺ ചുരംപാത; ഇടുങ്ങിയ ഭാഗങ്ങൾ വീതി കൂട്ടണമെന്ന ആവശ്യം ശക്തം

കൊട്ടിയൂർ: കൊട്ടിയൂർ-ബോയ്സ് ടൗൺ പാൽചുരം ചുരം പാതയിൽ ഏറ്റവും വീതി കുറഞ്ഞ ഭാഗങ്ങൾ അടിയന്തരമായി രീതി കൂട്ടണമെന്ന ആവശ്യം ശക്തമാകുന്നു. പലപ്പോഴും ചുരത്തിൽ വാഹനങ്ങൾ കേടാകുന്നത് പതിവാകുകയും ചുരത്തിൽ ഗതാഗതക്കുരുക്ക് ഉണ്ടാകുകയും ചെയ്യുന്നു. അതിനാൽ അടിയന്തരമായി വീതി കുറഞ്ഞ ഭാഗങ്ങൾ വീതി കൂട്ടണമെന്ന ആവശ്യം ശക്തമാകുകയാണ്. ചെകുത്താൻ തോടിനു സമീപത്തെ അരകിലോമീറ്ററോളം ദൂരത്താണ് വീതി കുറഞ്ഞ ഭാഗമുള്ളത്. ഇവിടെ ഒരേസമയം ഒരു വാഹനത്തിന് മാത്രമാണ് സുഗമമായി കടന്നുപോകാൻ സാധിക്കുക. നിലവിൽ ഒരുവാഹനം കടന്നുവരുമ്പോൾ മറ്റൊരു വാഹനം വശങ്ങളിൽ ഒതുക്കി നിർത്തിയാണ് യാത്രാ സൗകര്യമൊരുക്കുന്നത്. അതിനാൽ പ്രദേശത്ത് ഏതെങ്കിലും വാഹനങ്ങൾ അപകടത്തിൽപ്പെടുകയോ കേടാകുകയോ ചെയ്താൽ ചുരം മൊത്തം കുരുക്കിലാകുന്ന സ്ഥിതിയാണ്. ഈ പ്രദേശത്ത് മണ്ണും പാറക്കൂട്ടങ്ങളും ഇടിയാൻ സാധ്യതയുള്ള മേഖലയാണ്. ഈവർഷം രണ്ടു തവണ ഇവിടെ മണ്ണും പാറക്കൂട്ടങ്ങളും ഇടിഞ്ഞുചുരം പൂർണമായും കരുക്കിലായി. ഞായറാഴ്ച രാവിലെ വിവാഹ സംഘം സഞ്ചരിച്ചിരുന്ന വാഹനം കേടാകുകയും ഏറെനേരം ഗതാഗതം തടസപ്പെടുകയും ചെയ്തു. പിന്നീട് അറ്റകുറ്റപ്പണി നടത്തി വാഹനം മാറ്റിയശേഷം ആണ് ഗതാഗതം പഴയപടിയായത്. റോഡ് വീതികൂട്ടി നിർമിക്കാനുള്ള നടപടി സ്വീകരിക്കണമെന്ന് പാൽചുരം ചുരം സംരക്ഷണ സമിതി ചെയർമാൻ റെജി കന്നുകുഴി ആവശ്യപ്പെട്ടു.

ദേശീയ ശാസ്ത്ര സെമിനാർ നടത്തി

ഇരിട്ടി: കുന്നോത്ത് സെന്‍റ് ജോസഫ്സ് ഹയർ സെക്കൻഡറി സ്കൂൾ പത്താം വാർഷികത്തിന്‍റെ ഭാഗമായി ദേശീയ ശാസ്ത്ര സെമിനാർ "യുറേക്ക നെക്സസ് 25' സംഘടിപ്പിച്ചു. സജീവ് ജോസഫ് എംഎൽഎ ഉദ്ഘാടനം ചെയ്തു. യുവ ശാസ്ത്രജ്ഞന്മാരായ ഡോ. കാന സുരേശൻ (ഐസർ തിരുവനന്തപുരം) , ഡോ. മുഹമ്മദ് മുസ്തഫ (ഐസർ പൂനെ), ഡോ. സുധീഷ് കുമാർ രാധാകൃഷ്ണൻ (ഐസർ പൂനെ), ഡോ. പി.വി. ഷിബു (ഗവ. ബ്രണ്ണൻ കോളജ് തലശേരി) എന്നിവർ വിവിധ സെഷനുകൾ നയിച്ചു. സ്കൂൾ മാനേജർ ഫാ. സെബാസ്റ്റ്യൻ മൂക്കിലിക്കാട് അധ്യക്ഷത വഹിച്ചു. ചടങ്ങിൽ ജില്ലാ പഞ്ചായത്ത് വൈസ് പ്രസിഡന്‍റ് ബിനോയി കുര്യൻ, തലശേരി അതിരൂപത കോർപറേറ്റ് മാനേജർ ഫാ. സോണി വടശേരിൽ എന്നിവർ മുഖ്യാതിഥികളായിരുന്നു. സ്കൂളിന്‍റെ പത്താം വാർഷികത്തോടനുബന്ധിച്ചുള്ള പത്തിന പരിപാടികളുടെ ഉദ്ഘാടനം സണ്ണി ജോസഫ് എംഎൽഎ നിർവഹിച്ചു. പഞ്ചായത്ത് അംഗങ്ങളായ മുജീബ് കുഞ്ഞിക്കണ്ടി, ഷൈജൻ ജേക്കബ്, പിടിഎ പ്രസിഡന്‍റ് ബെന്നി പുതിയാമ്പുറം, സ്കൂൾ പ്രിൻസിപ്പൽ പി.കെ. ബാബു, കെ.എം. ബെന്നി എന്നിവർ പ്രസംഗിച്ചു. ഇരിട്ടി സബ് ജില്ലയിലെ വിവിധ സ്കൂളുകളിൽ നിന്നായി 140 കുട്ടികൾ ശാസ്ത്ര സെമിനാറിൽ പങ്കെടുത്തു.

കോശി കമ്മീഷൻ റിപ്പോർട്ട് നടപ്പിലാക്കണം: എകെസിസി

ചുങ്കക്കുന്ന്: ക്രൈസ്തവ സമുദായത്തിന്‍റെ പിന്നാക്കാവസ്ഥയെ കുറിച്ച് പഠിച്ചു സമർപ്പിച്ച കോശി കമ്മീഷൻ റിപ്പോർട്ട് നടപ്പിലാക്കണമെന്ന് കത്തോലിക്കാ കോൺഗ്രസ് ചുങ്കക്കുന്ന് മേഖല സമ്മേളനം ആവശ്യപ്പെട്ടു. മേഖലയിലെ ഒന്പത് ഇടവകകളിൽ നിന്നുള്ള പ്രതിനിധികൾ യോഗത്തിൽ സംബന്ധിച്ചു. എകെസിസി മാനന്തവാടി രൂപത പ്രസിഡന്‍റ് ജോൺസൻ തൊഴുത്തുങ്കൽ അധ്യക്ഷത വഹിച്ചു. ചുങ്കക്കുന്ന് ഫോറോന വികാരി ഫാ. പോൾ കൂട്ടാല യോഗം ഉദ്ഘാടനം ചെയ്തു. രൂപത ഡയറക്ടർ ഫാ. ജോബി മുക്കാട്ടുകാവുങ്കൽ അമുഖ പ്രഭാഷണം നടത്തി. മേഖലാ ഡയറക്ടർ ഫാ. ടോമി പുത്തൻപുരക്കൽ, രൂപത കമ്മിറ്റി അംഗം ജിൽസ് മേയ്ക്കൽ തുടങ്ങിയവർ പ്രസംഗിച്ചു. കത്തോലിക്കാ കോൺഗ്രസ് ചുങ്കക്കുന്ന് മേഖല ഭാരവാഹികളായി മാത്യു കൊച്ചുതറ-പ്രസിഡന്‍റ് ജോസ് നമ്പേലിൽ, സാലി കണ്ണന്താനം-വൈസ് പ്രസിഡന്‍റുമാർ, ജോൺസ് തൊട്ടിയിൽ-ജനറൽ സെക്രട്ടറി, ത്രേസ്യകുട്ടി കൊടിയാടൻ, മിനി കൊട്ടാരം-ജോയിന്‍റ് സെക്രട്ടറിമാർ, പോൾ ചീരംവേലി-ട്രഷറർ, ജോർജ് കോട്ടൂർ, സോണി പൂത്തറ, ജോസഫ് ആഞ്ഞിലിവേലി, ജോസഫ്, ജിം മാത്യു നമ്പുടാകം, ജയ്സൻ നിരപ്പത്ത്, ഷാജി തെങ്ങുംപള്ളി-ഭരണസമിതിയംഗങ്ങൾ എന്നിവരെ തെരഞ്ഞെടുത്തു.

പരമ്പരാഗത ക്രിസ്തീയ പലഹാരമേള സംഘടിപ്പിച്ചു

ഇരിട്ടി: കുന്നോത്ത് മേഖല മാതൃവേദിയുടെ ആഭിമുഖ്യത്തിൽ പരമ്പരാഗത ക്രിസ്തീയ പലഹാരങ്ങളുടെ മത്സരവും, പ്രദർശനവും മാടത്തിൽ സെന്‍റ് സെബാസ്റ്റ്യൻ പാരിഷ് ഹാളിൽ സംഘടിപ്പിച്ചു. പുതുതലമുറയ്ക്ക് അന്യമാകുന്ന പരമ്പരാഗതമായ ക്രിസ്തീയ വിഭവങ്ങളെ പരിചയപ്പെടുത്തുകയെന്ന ലക്ഷ്യത്തോടെ നടത്തിയ പലഹാരമേള പുത്തൻ അനുഭവമായി. തനത് സുറിയാനി ക്രിസ്ത്യാനി സ്ത്രീകളുടെ വേഷമായ ചട്ടയും മുണ്ടും ധരിച്ച് എത്തിയ മത്സരാർഥികൾ പലഹാരമേളയുടെ മറ്റൊരു ആകർഷണമായി. കൂടാതെ പഴയ കാലഘട്ടത്തിൽ ഉപയോഗിച്ചിരുന്ന പാത്രങ്ങൾ, ചിരട്ടത്തവി, ഉരുളി, ഉറി, പെട്രോമാക്സ് വിളക്ക് തുടങ്ങി പഴമയിലേക്കൊരു തിരിച്ചുപോക്ക് തന്നെയായിരുന്നു മത്സരം. പഴയ തലമുറയിലെ അമ്മച്ചിമാരോടു ചോദിച്ചറിഞ്ഞും, അന്വേഷിച്ചും കണ്ടെത്തിയ വ്യത്യസ്തയിനം പലഹാരങ്ങൾ പഴമയും തനിമയും പെരുമയും ചോരാതെ ഒരുക്കിക്കൊണ്ട് ഏഴു യൂണിറ്റിലെ മാതൃവേദി അംഗങ്ങൾ മത്സരത്തിൽ പങ്കാളികളായി. പഴമയുടെ രുചിക്കൂട്ടും അമ്മമാരുടെ കൈപുണ്യവും ഒന്നിച്ചപ്പോൾ 140 ഓളം വ്യത്യസ്ത വിഭവങ്ങളാണ് ഒരുക്കിയത്. ആവേശം അലതല്ലിയ മത്സരത്തിൽ കച്ചേരിക്കടവ്, മാടത്തിൽ, പെരിങ്കരി യൂണിറ്റുകൾ യഥാക്രമം ഒന്നും രണ്ടും മൂന്നും സ്ഥാനങ്ങൾ നേടി. ആനപ്പന്തി, കുന്നോത്ത്, ചരൾ, മുടയെരിഞ്ഞി യൂണിറ്റുകൾ പ്രോത്സാഹന സമ്മാനത്തിനും അർഹരായി. മേഖല ഡയറക്ടർ ഫാ. സോജൻ കരോട്ട്, ആനിമേറ്റർ സിസ്റ്റർ സോണിയ, മേഖല പ്രസിഡന്‍റ് സോളി ആഞ്ഞിലിത്തോപ്പിൽ, സെക്രട്ടറി ജീന കുളത്തിങ്കൽ, ജിജി ചാലിൽ, ഷീന പാലയ്ക്കൽ, രാജി കാരക്കാട്ട്, നിഷ കളമ്പുകാട്ട്, ലീലാമ്മ മണ്ണാപറമ്പിൽ എന്നിവർ നേതൃത്വം നൽകി.

"പ്രജ്യോതി' പദ്ധതി രണ്ടാംഘട്ടം തുടങ്ങി

ശ്രീകണ്ഠപുരം: നഗരസഭയുടെ ആഭിമുഖ്യത്തിൽ സമ്പൂർണ സാമ്പത്തിക സാക്ഷരത എന്ന ലക്ഷ്യവുമായി നടപ്പാക്കുന്ന "പ്രജ്യോതി' പദ്ധതിയുടെ രണ്ടാംഘട്ട പ്രവർത്തനത്തിന് തുടക്കമായി. പന്ന്യാൽ ലിസിഗിരി അങ്കണവാടിയിൽ നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. സിഡിഎസ് ചെയർപേഴ്സൺ എ. ഓമന അധ്യക്ഷത വഹിച്ചു. പന്ന്യാൽ എഡിഎസ് പ്രസിഡന്‍റ് എൽസമ്മ, നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ജോസഫിന വർഗീസ്, റോസമ്മ ജോസഫ് മലയിക്കൽ എന്നിവർ പ്രസംഗിച്ചു. അഖിൽ ഉളിയിൽ, പി.പി. പ്രണവ്, സി.ജി. അതുൽകൃഷ്ണ തുടങ്ങിയവർ ക്ലാസുകൾ നയിച്ചു. സാമൂഹിക വികസന രംഗത്ത് നിരവധി വർഷങ്ങളായി പ്രവർത്തിച്ചുവരുന്ന കേരളത്തിലെ പ്രമുഖ സോഷ്യൽ എൻജിനിയറിംഗ് കൂട്ടായ്മയായ വീ കാൻ സോഷ്യൽ ഇന്നൊവേറ്റേഴ്സാണ് പദ്ധതി രൂപകല്പന ചെയ്ത് നടപ്പിലാക്കുന്നത്.

ലൂം ലാൻഡിൽ കെടിഡിസി പായസമേള തുടങ്ങി

കണ്ണൂർ: പാലട, പരിപ്പ് പ്രഥമൻ, അട പ്രഥമൻ, പഴം പ്രഥമൻ, പാൽപായസം തുടങ്ങി സ്പെഷൽ പായസം വരെ നീളുന്ന രുചി ലോകമൊരുക്കി കെടിഡിസിയുടെ ലൂം ലാൻഡ് പായസമേള കണ്ണൂർ താവക്കരയിൽ ആരംഭിച്ചു. മന്ത്രി കടന്നപ്പള്ളി രാമചന്ദ്രൻ മേള ഉദ്ഘാടനം ചെയ്തു. ലോകത്ത് എവിടെയെല്ലാം മലയാളിയുണ്ടോ അവിടെയെല്ലാം അവരവരുടെ രീതിയിൽ ഓണം ആഘോഷിക്കുന്നുണ്ടെന്ന് മന്ത്രി പറഞ്ഞു. ഓണം നാടിന്‍റെ അടയാളപ്പെടുത്തലാണ്. മാറ്റങ്ങൾ ഉണ്ടായിട്ടുണ്ടെങ്കിലും മലയാളികൾ ജാതിമത ഭേദമന്യേ ഓണം ആഘോഷിക്കുന്നത് സന്തോഷകരമായ അനുഭവമാണെന്നും അദ്ദേഹം പറഞ്ഞു. ജില്ലാ പഞ്ചായത്ത് പ്രസിഡന്‍റ് കെ. രത്നകുമാരി അധ്യക്ഷത വഹിച്ചു. ആദ്യ വില്പന കണ്ണൂർ കോർപറേഷൻ മേയർ മുസ്‌ലിഹ് മഠത്തിൽ നിന്നും സുനിത ഫർണിച്ചർ ഡയറക്ടർ തമ്പാൻ ഏറ്റുവാങ്ങി. പായസമേള അഞ്ചിന് തിരുവോണ ദിവസം വരെ തുടരും. പ്രത്യേകം സജ്ജമാക്കിയ കൗണ്ടറുകൾ വഴിയാണ് പായസം വിതരണം ചെയ്യുന്നത്. ഒരു പായസ കൗണ്ടർ ലൂം ലാൻഡിലും മറ്റൊരു പായസ കൗണ്ടർ ജില്ലാ പഞ്ചായത്ത് കാര്യാലയത്തോട് ചേർന്നുമാണ് ഈ ദിവസങ്ങളിൽ പ്രവർത്തിക്കുക. പായസ മേളയ്ക്കൊപ്പം തന്നെ തിരുവോണത്തോടനുബന്ധിച്ച് മൂന്നുമുതൽ അഞ്ചുവരെ തീയതികളിൽ കെടിഡിസി വിഭവസമൃദ്ധമായ ഓണസദ്യയും ഒരുക്കും. പായസം ലിറ്ററിന് 400 രൂപയും അരലിറ്ററിന് 220 രൂപയും കപ്പിന് 50 രൂപയും വീതമാണ് ഈടാക്കുന്നത്. ഓണസദ്യയ്ക്ക് 450 രൂപയും പാർസലിന് 500 രൂപയുമാണ് നിരക്ക്. ഓണസദ്യയും പായസവും മുൻകൂർ ബുക്കിംഗിന് 94000 08681, 04972 700717, 04972 960100 എന്നീ നമ്പറുകളിൽ ബന്ധപ്പെടാവുന്നതാണ്.

ലോക പാമ്പ് ദിനം: ബോധവത്കരണം സംഘടിപ്പിച്ചു

കണ്ണൂർ: ലോക പാമ്പ് ദിനത്തോടനുബന്ധിച്ച് പയ്യന്നൂർ നഗരസഭയുടെയും താലൂക്ക് ആശുപത്രിയുടെയും നേതൃത്വത്തിൽ തളിപ്പറമ്പ് റേഞ്ച് ഫോറസ്റ്റ് ഓഫീസിന്‍റെ സഹകരണത്തോടെ ബോധവത്കരണ പരിപാടി സംഘടിപ്പിച്ചു. നഗരസഭാ ചെയർപേഴ്സൺ കെ.വി. ലളിത ഉദ്ഘാടനം ചെയ്തു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സി. ജയ അധ്യക്ഷയായി. പാമ്പുകടിയേറ്റാൽ ചെയ്യേണ്ട പ്രഥമശുശ്രൂഷ, അശാസ്ത്രീയമായ ചികിത്സ, ജനകീയാരോഗ്യ കേന്ദ്രങ്ങൾ വഴിയുള്ള ബോധവത്കരണം ശക്തിപ്പെടുത്തുക എന്നീ കാര്യങ്ങൾ ജനങ്ങളിലേക്കെത്തിക്കാനാണ് ബോധവത്കരണം. റേഞ്ച് ഫോറസ്റ്റ് ഓഫീസർ ടി.വി. സനൂപ്കൃഷ്ണൻ, റിയാസ് മാങ്ങാട് എന്നിവർ കേരളത്തിലെ പാമ്പുകളെക്കുറിച്ചും മറ്റ് മുൻകരുതലുകളെക്കുറിച്ചും ക്ലാസെടുത്തു. കൗൺസിൽ ഹാളിൽ നടന്ന പരിപാടിയിൽ ഹെൽത്ത്‌ ഇൻസ്‌പെക്ടർ ഇ. നന്ദകുമാർ, പബ്ലിക് ഹെൽത്ത് നഴ്സ് കെ. വിലാസിനി, ജൂണിയർ ഹെൽത്ത് ഇൻസ്‌പെക്ടർമാരായ സി.പി. മുരളീധരൻ, ആർ. സന്തോഷ്‌കുമാർ എന്നിവർ പ്രസംഗിച്ചു.

പൈസക്കരിയിൽ ഹൈമാസ്റ്റ് ലൈറ്റിന്‍റെ പ്രവർത്തനം നിലച്ചു

പൈസക്കരി: മേലേ അങ്ങാടിയിൽ ഹൈസ്കൂൾ ജംഗ്ഷനിലുള്ള ഹൈമാസ്റ്റ് ലൈറ്റ് പ്രവർത്തനം നിലച്ചതോടെ പ്രദേശത്തെ ഇരുട്ടിലാക്കി. കെ.സി. ജോസഫ് എംഎൽഎയുടെ പ്രാദേശിക വികസന ഫണ്ടിൽ നിന്ന് അനുവദിച്ചതായിരുന്നു ഹൈമാസ്റ്റ് ലൈറ്റ്. മാസങ്ങളായി ഇത് പ്രവർത്തനരഹിതമാണ്. ബന്ധപ്പെട്ട അധികൃതർക്ക് പരാതി നൽകിയിട്ടും യാതൊരുവിധ അനുകൂല നടപടികളും സ്വീകരിക്കാത്തതിൽ നാട്ടുകാർ കടുത്ത പ്രതിഷേധത്തിലാണ്. സ്കൂൾ, കോളജ് ജംഗ്ഷൻ ആയതിനാൽ സന്ധ്യ മയങ്ങുമ്പോൾ വെളിച്ചമില്ലാത്തതുകൊണ്ട് സാമൂഹ്യ വിരുദ്ധർ പ്രദേശം കൈയടക്കുന്നതായി ആക്ഷേപമുണ്ട്. അറ്റകുറ്റപ്പണി നടത്തി എത്രയും വേഗത്തിൽ ഈ ലൈറ്റ് പ്രകാശിപ്പിക്കണമെന്ന് വ്യാപാരികളും ഓട്ടോ തൊഴിലാളികളും ആവശ്യപ്പെട്ടു. പുലർച്ചെ ബസ് കാത്തുനിൽക്കുന്നവർക്കും പൈസക്കരി പള്ളിയിലേക്ക് വരുന്നവർക്കും ഏറെ ഉപകാരപ്രദമായിരുന്നു ലൈറ്റ്.

സംയുക്ത പരിശോധനയ്ക്ക് പോലീസും എക്സൈസും

കണ്ണൂർ: ഓണത്തിരക്കും ലഹരിക്കടത്തും നിയന്ത്രിക്കാൻ ജില്ലയിൽ പോലീസും എക്സൈസും കൈകോർക്കും. ഓണത്തിരക്ക് നിയന്ത്രിക്കാനായ് ജില്ലയിൽ പ്രത്യേക പോലീസ് സംഘത്തെ നിയോഗിച്ചിട്ടുണ്ട്. കണ്ണൂർ നഗരത്തിൽ മാത്രം 150 പോലീസുകാരെയാണ് വിന്യസിക്കുന്നത്. ഇരിട്ടി, തലശേരി, കൂത്തുപറമ്പ്, തളിപ്പറമ്പ്, പയ്യന്നൂർ തുടങ്ങിയ പ്രധാന നഗരപ്രദേശങ്ങളിൽ തിരുവോണം വരെയുള്ള ദിവസങ്ങളിൽ തിരക്ക് നിയന്ത്രിക്കാൻ കൂടുതൽ പോലീസുകാരെ നിയോഗിച്ചു. കൂടാതെ, പട്രോളിംഗും വാഹനപരിശോധനയും കർശനമാക്കും. മുൻകാലങ്ങളിൽ കേസിൽ പ്രതിയായവരെ നിരീക്ഷിക്കും. പോലീസ്, എക്സൈസ്, റവന്യു, ആർടിഒ, ഫോറസ്റ്റ് എന്നിവരുടെ നേതൃത്വത്തിൽ അതിർത്തിയിൽ സംയുക്ത പരിശോധനയും ഡോഗ് സ്‌ക്വാഡ്, വിവിധ വകുപ്പുകൾ തമ്മിൽ പരസ്‌പരം വിവരങ്ങൾ കൈമാറിയുള്ള പരിശോധനയും ആരംഭിച്ചു. ട്രെയിനുകളിലും നീരീക്ഷണം ശക്തമാക്കി. എല്ലാ നഗരങ്ങളിലും ഗതാഗതം നിയന്ത്രിക്കാൻ കൂടുതൽ പോലീസിനെ വിന്യസിക്കും. ജില്ലയിലെ പ്രധാന പച്ചക്കറി, മത്സ്യമാർക്കറ്റുകൾ, മാളുകൾ, വസ്ത്രവ്യാപാര കേന്ദ്രങ്ങൾ, ഓണവിപണികൾ, ബീച്ചുകൾ എന്നിവിടങ്ങളിൽ ഗതാഗതം സുഗമമാക്കാൻ പോലീസ് സാന്നിധ്യം ഉണ്ടാകും. വഴിയോര കച്ചവടത്തിനും നിയന്ത്രണമുണ്ടാകും. ഇടുങ്ങിയ സ്ഥലങ്ങൾ കേന്ദ്രീകരിച്ച് നടത്തുന്ന വഴിയോര കച്ചവടം അനുവദിക്കില്ല. ഓണക്കാലത്ത് ഇതര സംസ്ഥാനങ്ങളിൽ നിന്നും പൂക്കളും വസ്ത്രങ്ങളുമായി എത്തുന്ന വഴിയോര കച്ചവടസംഘങ്ങളെ നിയന്ത്രിക്കും. പ്രധാന റോഡിലും വഴിയരികിലുമിട്ട് കച്ചവടം ചെയ്യാൻ അനുവദിക്കില്ല. ഗതാഗതതടസമുണ്ടാക്കുന്ന വിധത്തിലുള്ള കച്ചവടവും അനുവദിക്കില്ല. കണ്ണൂർ സ്റ്റേഡിയം കോർണറിനോട് ചേർന്നുള്ള റോഡിൽ ഗതാഗതം നിരോധിക്കും. മദ്യവില്പന കേന്ദ്രങ്ങൾക്ക് മുന്നിൽ കൂട്ടംകൂടി സംഘർഷമുണ്ടാക്കുന്നവരെ കസ്റ്റഡിയിലെടുക്കും.

മാതാവിന്‍റെ പിറവിത്തിരുനാളും എട്ടു നോമ്പാചരണവും

ചെറുപുഴ സെന്‍റ് മേരീസ് ഫൊറോന പള്ളിയിൽ ചെറുപുഴ: സെന്‍റ് മേരീസ് ഫൊറോന പള്ളിയിൽ മാതാവിന്‍റെ പിറവിത്തിരുനാളും എട്ടു നോമ്പാചരണവും, 178 മണിക്കൂർ അഖണ്ഡ ജപമാലയും ആരാധനയും ഇന്നുമുതൽ എട്ടുവരെ നടക്കും. ഇന്ന് രാവിലെ 6.30ന് വിശുദ്ധ കുർബാന, ഏഴിന് 178 മണിക്കൂർ അഖണ്ഡ ജപമാല ആരംഭം. വൈകുന്നേരം 4.30ന് പൊതുജപമാല, ആഘോഷമായ വിശുദ്ധ കുർബാന, പ്രസംഗം, നൊവേന എന്നിവയ്ക്ക് ഫാ. ജോർജ് മുണ്ടൻകുന്നേൽ നേതൃത്വം നൽകും. നാളെമുതൽ എട്ടുവരെയുള്ള ദിവസങ്ങളിൽ രാവിലെ 5.30 മുതൽ വൈകുന്നേരം വരെ നടക്കുന്ന തിരുക്കർമങ്ങൾക്ക് ഫാ. തോമസ് പൂകമല, ഫാ. ജോസഫ് ആനക്കല്ലിൽ, ഫാ. ജയിംസ് അട്ടാറയ്ക്കൽ, ഫാ. ജോസഫ് ചാത്തനാട്ട്, ഫാ. ജോസ് മാണിക്കത്താഴെ, വികാരി ജനറാൾ മോൺ. സെബാസ്റ്റ്യൻ പാലാക്കുഴി, ഫാ. ജോർജ് കോവാട്ട് എന്നിവർ നേതൃത്വം നൽകും. കോഴിച്ചാൽ യാക്കോബായ പള്ളിയിൽ ചെറുപുഴ: കോഴിച്ചാൽ സെന്‍റ് ജോർജ് യാക്കോബായ സുറിയാനി പള്ളിയിൽ പരിശുദ്ധ ദൈവമാതാവിന്‍റെ ജനനതിരുനാളിനും എട്ടുനോമ്പാചരണത്തിനും തുടക്കമായി. ഇന്നലെ നടന്ന വിശുദ്ധ കുർബാനയ്ക്കും കൊടിയേറ്റിനും ഫാ. സാജു പൗലോസ് മാലേരി നേതൃത്വം നൽകി. ഇന്നു രാവിലെ ഏഴിന് പ്രഭാത പ്രാർഥന, വിശുദ്ധ കുർബാന, മധ്യസ്ഥ പ്രാർഥന, ശ്രേഷ്ഠ കാതോലിക്ക ആബൂൻ മോർ ബസേലിയോസ് പൗലോസ് ദ്വിതീയൻ കാതോലിക്ക ബാവയുടെ ഓർമ, 9.30ന് നേർച്ച, വൈകുന്നേരം 6.30 ന് സന്ധ്യാ പ്രാർഥന തുടങ്ങിയ തിരുക്കർമങ്ങൾക്ക് ഫാ. ബിനു ജോസഫ്, ഫാ. സ്കറിയ പുത്തൻപുരക്കൽ എന്നിവർ നേതൃത്വം നൽകും. നാളെ മുതൽ ഏഴു വരെയുള്ള ദിവസങ്ങളിൽ രാവിലെ ഏഴിന് പ്രഭാത പ്രാർഥന, 7.30 ന് വിശുദ്ധ കുർബാന, വൈകുന്നേരം 6.30 ന് സന്ധ്യാ പ്രാർഥന എന്നിവയുണ്ടാകും. സമാപന ദിനമായ എട്ടിന് രാവിലെ 7.15ന് നടക്കുന്ന പ്രഭാതപ്രാർഥനയ്ക്കും, എട്ടിന് നടക്കുന്ന വിശുദ്ധ കുർബാനയ്ക്കും ഫാ. അനീഷ് പാറശേരി നേതൃത്വം നൽകും. തുടർന്നു മധ്യസ്ഥ പ്രാർഥന, പ്രസംഗം,10 ന് റാസ, ആശീർവാദം, 11 ന് നേർച്ച, കൊടിയിറക്കൽ എന്നിവയോടെ എട്ടുനോമ്പ് ആചരണം സമാപിക്കും.

ജീവൻ രക്ഷാ പരിശീലന ക്ലാസ് സംഘടിപ്പിച്ചു

വെണ്ണക്കല്ല്: അപകട സാഹചര്യങ്ങളിൽ സഹായം നൽകുന്നതിനുള്ള ജീവൻ രക്ഷാ പരിശീലന ക്ലാസും വർധിച്ചുവരുന്ന ലഹരി ഉപയോഗത്തിനെതിരെ ലഹരി വിരുദ്ധ ബോധവത്കരണവും വെണ്ണക്കല്ല് സൺ‌ഡേ സ്കൂൾ, കെസിവൈഎം, ക്രെഡിറ്റ്‌ യൂണിയൻ, മാതൃവേദി, സമരിറ്റൻ ഒപ്പം കൂട്ടായ്മ എന്നിവയുടെ സംയുക്താഭിമുഖ്യത്തിൽ വെണ്ണക്കല്ല് സെന്‍റ് ആന്‍റണീസ് പാരിഷ് ഹാളിൽ നടന്നു. ഇടവക വികാരി ഫാ. മാത്യു കുറുമ്പുറത്ത് ഉദ്ഘാടനം ചെയ്തു. ഇടവക കോ-ഓർഡിനേറ്റർ തോമസ് വടകര ആമുഖ പ്രഭാഷണം നടത്തി. ദേശീയ അവാർഡ് ജേതാവ് കെ.വി. ശശിധരൻ പരിശീലന, ബോധവത്കരണ ക്ലാസുകൾ നയിച്ചു. ആവശ്യം കഴിഞ്ഞ് ബാക്കിയായ കാലാവധി കഴിയാത്ത മരുന്നുകൾ ശേഖരിച്ച് നിർധന രോഗികൾക്ക് നൽകാൻ ജനകീയ ഡോക്ടർ ലില്ലിയുടെ നേതൃത്വത്തിൽ നടത്തിവരുന്ന സമരറ്റിൻ ഒപ്പം പാലിയേറ്റീവിന്‍റെ മെഡിസിൻ ബോക്സ്‌ ഒപ്പം സമരറ്റിൻ ഡയറക്ടർ ഫാ. അനൂപ് നരിമറ്റത്തിൽ നിന്ന് ഏറ്റുവാങ്ങി. ഫാ. അനൂപ് നരിമറ്റം, ഒപ്പം യൂണിറ്റ് പ്രസിഡന്‍റ് സേവ്യർ ചെന്നക്കാടൻ, സൺ‌ഡേ സ്കൂൾ മുഖ്യാധ്യാപിക ബിന്ദു അനിൽ മണ്ണാപറമ്പിൽ, കെസിവൈഎം പ്രസിഡന്‍റ് ജിതിൻ പയ്യപ്പള്ളിൽ, ക്രെഡിറ്റ്‌ യൂണിയൻ പ്രസിഡന്‍റ് ജോണി തോട്ടപ്പള്ളിൽ, മാതൃവേദി പ്രസിഡന്‍റ് ഹണി അജീഷ് കുഴിയൻപ്ലാക്കൽ, പ്രകാശ് വാഴവേലിൽ എന്നിവർ പ്രസംഗിച്ചു. പാലിയേറ്റീവ് ഇൻ കണ്ണൂർ (പിഐകെ) ജില്ലാ പ്രസിഡന്‍റായി തെരഞ്ഞെടുത്ത കെ.വി. ശശീധരനെ ചടങ്ങിൽ ആദരിച്ചു.

ലോഡിംഗ് തൊഴിലാളി ഓടയിൽ മരിച്ച നിലയിൽ

പയ്യന്നൂർ: ലോഡിംഗ് തൊഴിലാളിയെ ഓടയിൽ മരിച്ചനിലയിൽ കണ്ടെത്തി. പയ്യന്നൂർ എഫ്സിഐയിലെ ലോഡിംഗ് തൊഴിലാളി അന്നൂർ പടിഞ്ഞാറെക്കരയിലെ തായമ്പത്ത് രാജേഷിനെ (45) യാണ് ഓടയിൽ മരിച്ച നിലയിൽ കണ്ടെത്തിയത്. പയ്യന്നൂർ മൂരിക്കൊവ്വൽ ഉഷാ റോഡിലെ ഓവുചാലിൽ ഇന്നലെ ഉച്ചയോടെയാണ് മൃതദേഹം കണ്ടത്. മൃതദേഹത്തിന്‍റെ പകുതിയോളം ഭാഗം ഓവുചാൽ മൂടാനുപയോഗിച്ച സ്ലാബിനടിയിലേക്ക് കയറിയ നിലയിലായിരുന്നു. രാജേഷിന്‍റെ മരണത്തിൽ ദുരൂഹതയുണ്ടെന്ന് ബന്ധുക്കൾ പറയുന്നു. ഇതുമായി ബന്ധപ്പെട്ട് ബന്ധുക്കൾ പോലീസിൽ പരാതി നല്കുമെന്ന് അറിയിച്ചു. അന്നൂർ പടിഞ്ഞാറെക്കരയിലെ പരേതരായ അമ്പു- തായമ്പത്ത് കുഞ്ചിരി ദന്പതികളുടെ മകനാണ് മരിച്ച രാജേഷ്. സഹോദരങ്ങൾ: കുമാരി, രാജീവൻ ( ലോഡിംഗ് തൊഴിലാളി, എഫ്സിഐ, പയ്യന്നൂർ), രതീഷ് (നിർമാണത്തൊഴിലാളി), പുഷ്പ.

വാഹനാപകടത്തിൽ പരിക്കേറ്റയാൾ മരിച്ചു

പയ്യന്നൂർ: സ്കൂട്ടറിടിച്ച് പരിക്കേറ്റതിനെ തുടർന്ന് ആശുപത്രിയിൽ ചികിത്സയിലായിരുന്നയാൾ മരിച്ചു. പരവന്തട്ടയിലെ പൊക്കിരെ കമലാക്ഷനാണ് (56) മരിച്ചത്. ശനിയാഴ്ച രാത്രി എട്ടോടെ വീടിനു സമീപം റോഡ് മുറിച്ചു കടക്കവേയാണ് സ്കൂട്ടറിടിച്ചായിരുന്നു അപകടം. ഗുരുതരമായി പരിക്കേറ്റതിനെ തുടർന്ന് നാട്ടുകാർ കമലാക്ഷനെ കണ്ണൂരിലെ സ്വകാര്യ ആശുപത്രിയിൽ എത്തിക്കുകയായിരുന്നു. പരേതനായ തുരുത്തിപ്പള്ളി രാഘവൻ-യശോദ ദന്പതികളുടെ മകനാണ്. ഭാര്യ: ദിവ്യ. മക്കൾ: ഹരിപ്രസാദ്, ഹർഷ. സഹോദരി: പദ്മാക്ഷി.

ബിഷപ് വള്ളോപ്പിള്ളി സ്മാരക കുടിയേറ്റ മ്യൂസിയം നാടിന് സമർപ്പിച്ചു

ചെന്പന്തൊട്ടി: ചരിത്രത്തെ തമസ്കരിക്കാനുള്ള ശ്രമങ്ങൾ നടക്കുമ്പോൾ മ്യൂസിയങ്ങൾ ചരിത്രത്തിന്‍റെ കാവൽപ്പുരകളായി മാറുമെന്ന് മന്ത്രി കടന്നപ്പള്ളി രാമചന്ദ്രൻ . ചെമ്പന്തൊട്ടിയിൽ ബിഷപ് വള്ളോപ്പിള്ളി സ്മാരക കുടിയേറ്റ മ്യൂസിയത്തിന്‍റെ ആദ്യഘട്ടം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. മ്യൂസിയങ്ങളുടെ പ്രാധാന്യം മനസിലാക്കി സംസ്ഥാന സർക്കാർ കണ്ണൂരിൽ ഒന്പതു വർഷം കൊണ്ട് എട്ട് മ്യൂസിയങ്ങളാണ് പൂർത്തിയാക്കിയതെന്ന് മന്ത്രി പറഞ്ഞു. മലബാർ കുടിയേറ്റത്തിന്‍റെ കഥ പറയുന്ന കുടിയേറ്റ മ്യൂസിയത്തിന്‍റെ ഒന്നാം ഘട്ടമാണ് ഇപ്പോൾ തയാറായത്.

ഇന്നത്തെ മലബാറിനെ രൂപപ്പെടുത്തുന്നതിലും കേരള വികസനത്തിന് സഹായമാകുന്നതിലും കുടിയേറ്റം വഹിച്ച പങ്കിനെക്കുറിച്ച് പ്രതിപാദിക്കുന്ന ഗാലറികളാണ് മ്യൂസിയത്തിൽ ഒരുക്കിയിരിക്കുന്നത്. ഇത് സമ്പൂർണ മ്യൂസിയം പദ്ധതിയുടെ ആമുഖ ഗാലറിയായി മാറുമെന്നും രണ്ടാംഘട്ടത്തിൽ വിപുലമായ പദ്ധതികൾ നടപ്പാക്കുമെന്നും മന്ത്രി പറഞ്ഞു. തലശേരി അതിരൂപതയുടെ കീഴിലുള്ള ചെമ്പന്തൊട്ടി ഫൊറോന പള്ളി 99 വർഷത്തേക്ക് പാട്ടത്തിനു നൽകിയ ഒരേക്കർ ഭൂമിയിലാണ് സംസ്ഥാന പുരാവസ്തു വകുപ്പിന്‍റെ പദ്ധതി വിഹിതം ഉപയോഗിച്ച് കെട്ടിട നിർമാണം പൂർത്തിയാക്കിയത്. ലളിതകലാ അക്കാദമിയുടെ കാക്കണ്ണൻപാറ കലാഗ്രാമത്തിന്‍റെ മാതൃകയിലാണ് കെട്ടിടം. കൂടാതെ കഫറ്റീരിയ, ശുചിമുറി തുടങ്ങിയവ ഉൾക്കൊള്ളുന്ന അനുബന്ധ കെട്ടിടത്തിന്‍റെയും നിർമാണം പൂർത്തിയായിട്ടുണ്ട്. പൂർത്തിയായ കെട്ടിടത്തിൽ മലബാർ: കുടിയേറ്റത്തിനു മുമ്പ്, കുടിയേറ്റം-മലബാറിലേക്ക്, നേരിട്ട വെല്ലുവിളികൾ, കാർഷികാഭിവൃത്തി, നിലനില്പിനായുള്ള സമരങ്ങൾ, ദുരിതത്തിൽ താങ്ങായി, നേടാനുണ്ട് പുതിയൊരു ലോകം, ബിഷപ് വള്ളോപ്പിള്ളി: കുടിയേറ്റ ജനതയുടെ പിതാവ് എന്നീ തലക്കെട്ടുകളിൽ എട്ട് ഗാലറികളാണ് പ്രവർത്തിക്കുന്നത്. 36 ലക്ഷം രൂപയാണ് കെട്ടിട നിർമാണത്തിനായി സർക്കാർ ചെലവഴിച്ചത്. തുടർന്ന്, പൂർത്തിയായ കെട്ടിടത്തിൽ ഗാലറികൾ സജ്ജീകരിക്കുന്നതിനായി 2020-21 സാമ്പത്തിക വർഷം പ്രത്യേക ബജറ്റ് ശീർഷകത്തിൽ ഉൾപ്പെടുത്തി പുരാവസ്തു വകുപ്പിന് 1.64 കോടിയുടെ ഭരണാനുമതി സർക്കാർ നൽകുകയുണ്ടായി. അതേതുടർന്നാണ് മ്യൂസിയം സജ്ജീകരണം ആരംഭിച്ചത്. മുൻ എംഎൽഎ കെ.സി. ജോസഫിന്‍റെ 50 ലക്ഷം രൂപ ആസ്തി വികസന ഫണ്ടും ഇതിനായി ചെലവഴിച്ചു. ഇതോടൊപ്പം സജീവ് ജോസഫ് എംഎൽഎ അനുവദിച്ച ഏഴ് ലക്ഷം ഉപയോഗിച്ച് ചെമ്പന്തൊട്ടി-നടുവിൽ റോഡിൽ നിന്ന് മ്യൂസിയത്തിലേക്കുള്ള റോഡ് ടാറിഗ് പ്രവൃത്തിയും പൂർത്തീകരിച്ചിട്ടുണ്ട്. രണ്ടാംഘട്ട പ്രവൃത്തികൾ പൂർത്തിയാകുന്നതോടെ മ്യൂസിയം പൂർണ സജ്ജമാവും. മ്യൂസിയത്തിലേക്ക് ആവശ്യമായ പ്രദർശന വസ്തുക്കളിൽ പലതും ജനപങ്കാളിത്തത്തോടെ നടന്ന സർവേയിൽ ശേഖരിച്ചവയാണ്. കൂടാതെ തലശേരി അതിരൂപതയുടെ കൈവശമുള്ള ചില പൈതൃക വസ്തുക്കളും പ്രദർശനത്തിന് അനുവദിച്ചു. കുടിയേറ്റവുമായി ബന്ധപ്പെട്ട ചിത്രങ്ങൾ, തിരുവിതാംകൂറിന്‍റെ ചരിത്രം, മറ്റ് ചരിത്ര സംഭവങ്ങൾ എന്നിവയെല്ലാം മ്യൂസിയത്തിൽ ഉൾക്കൊള്ളിക്കും. പിണറായി ഇൻഡസ്ട്രിയൽ കോ ഓപ്പറേറ്റീവ് സൊസൈറ്റിക്കാണ് നിലവിലെ നിർമാണച്ചുമതല. ചടങ്ങിൽ സജീവ് ജോസഫ് എംഎൽഎ അധ്യക്ഷത വഹിച്ചു. മ്യൂസിയത്തിന്‍റെ ഭാഗമായി നിർമിക്കുന്ന ബിഷപ് വള്ളോപ്പിള്ളിയുടെ പ്രതിമയ്ക്കായി തലശേരി അതിരൂപതയുടെ നേതൃത്വത്തിൽ ശേഖരിച്ച ഓട്, പിച്ചള വസ്തുക്കൾ കൈമാറുന്ന ചടങ്ങും വേദിയിൽ നടത്തി. ജില്ലാപഞ്ചായത്ത് പ്രസിഡന്‍റ് കെ.കെ. രത്നകുമാരി മുഖ്യാതിഥിയായി. മുൻ മന്ത്രി കെ.സി.ജോസഫ്, തലശേരി ആർച്ച്ബിഷപ് മാർ ജോസഫ് പാംപ്ലാനി എന്നിവർ വിശിഷ്ടാതിഥികളായി. ശ്രീകണ്ഠപുരം നഗരസഭ ചെയർപേഴ്സൺ കെ.വി ഫിലോമിന, പഞ്ചായത്ത് പ്രസിഡന്‍റുമാരായ ബേബി ഓടമ്പള്ളിൽ, മിനി ഷൈബി, വി.പി. മോഹനൻ, സാജു സേവ്യർ, ഹാൻവീവ് ചെയർമാൻ ടി.കെ. ഗോവിന്ദൻ, കേരള ലളിതകലാ അക്കാദമി സെക്രട്ടറി എബി എൻ. ജോസഫ്, പുരാവസ്തു വകുപ്പ് ഡയറക്ടർ ഇ. ദിനേശൻ, കേരള ചരിത്ര പൈതൃക മ്യൂസിയം എക്സിക്യുട്ടീവ് ഡയറക്ടർ ആർ. ചന്ദ്രൻപിള്ള, പുരാവസ്തു വകുപ്പ് ടെക്നിക്കൽ അസിസ്റ്റന്‍റ് കെ.പി. സദു, ചെമ്പന്തൊട്ടി ഫൊറോന വികാരി ഫാ. ആന്‍റണി മഞ്ഞളാംകുന്നേൽ, ശില്പി ഉണ്ണി കാനായി, വിവിധ മത- സാംസ്കാരിക -രാഷ്‌ട്രീയ സംഘടനാ പ്രതിനിധികൾ എന്നിവർ പ്രസംഗിച്ചു. ഇനി വേണ്ടത് രണ്ടാംഘട്ടം: സജീവ് ജോസഫ് എംഎൽഎ കുടിയേറ്റ മ്യൂസിയത്തിന്‍റെ വിപുലമായ രീതിയിൽ രണ്ടാംഘട്ടം നടപ്പാക്കുമെന്ന് സജീവ് ജോസഫ് എംഎൽഎ. രണ്ടാംഘട്ടം പൂർത്തിയാക്കാനുള്ള ഇടപെടലും നടപടികളുമാണ് ഇനി പ്രധാനം.അതിനായി എല്ലാവരും മുന്നോട്ട് വരണം. എന്നാൽ മാത്രമേ മ്യൂസിയം അതിന്‍റെ പാരമ്യത്തിൽ എത്തുകയുള്ളൂ. കുടിയേറ്റ ജനതയ്ക്കു നൽകിയ ആദരമാണ് മ്യൂസിയം. മ്യൂസിയത്തെ നാട് ഏറ്റെടുത്തുകഴിഞ്ഞു. അതിന്‍റെ ഏറ്റവും വലിയ ഉദാഹരണമാണ് വെങ്കല പ്രതിമയ്ക്കായി തലശേരി അതിരൂപതയിൽ നിന്നു ലഭിച്ച അസംസ്കൃത വസ്തുക്കൾ.നാടിന്‍റെ അടയാളമായി മ്യൂസിയം മാറുമെന്ന് അദ്ദേഹം പറഞ്ഞു. ചരിത്രത്തെ വിസ്മരിക്കുന്നത് അപകടകരം: മാർ ജോസഫ് പാംപ്ലാനി ചെന്പന്തൊട്ടി: ഈ തലമുറയ്ക്ക് കുടിയേറ്റത്തിന്‍റെ പ്രാധാന്യം പഠിക്കാൻ ഉതകുന്നതാണ് ചെമ്പന്തൊട്ടിയിലെ ബിഷപ് വള്ളോപ്പിള്ളി സ്മാരക മ്യൂസിയമെന്ന് തലശേരി അതിരൂപത ആർച്ച് ബിഷപ് മാർ ജോസഫ് പാംപ്ലാനി. ചരിത്രം നമുക്ക് നൽകുന്ന പാഠം വളരെ വലുതാണ്. പക്ഷെ ചരിത്രത്തിൽ നിന്ന് നാം ഒന്നും പഠിക്കുന്നില്ല. ചരിത്രത്തെ വിസ്മരിക്കുന്നത് അങ്ങേയറ്റം അപകടകരമാണ്. ചരിത്രത്തെക്കുറിച്ച് അറിയാത്തവന് ഭാവിയില്ല. താൻ എവിടെ നിന്ന് വന്നു എവിടേക്ക് പോകുന്നു എന്നതിന് ചരിത്രത്തിന് ഏറെ പ്രാധാന്യമുണ്ടെന്ന് തിരിച്ചറിയണം. ഒരു സമൂഹത്തെ തകർക്കാൻ ചരിത്രത്തിന് കഴിയും. ചരിത്രം ഇല്ലാതായാൽ സമൂഹം ഇല്ലാതാകും. കുടിയേറ്റ ജനതക്ക് ഒരു ചരിത്രമുണ്ട്. അതാണ് കെ.സി ജോസഫ് വഴി ലഭിച്ച മ്യൂസിയം. സ്ഥലം നൽകിയപ്പോൾ മനസുകൊണ്ട് എതിർത്തവരുണ്ട്. വൈകിയെങ്കിലും ആദ്യഘട്ടം വെളിച്ചം കണ്ടു. അതിന് പ്രയത്നിച്ചവരോടും എൽഡിഎഫ് സർക്കാരിനോടും നന്ദിയുണ്ട്. എന്‍റെ നന്ദിയിൽ തെറ്റിദ്ധരിക്കുന്നവരും ഉണ്ടെന്നും ആർച്ച്ബിഷപ് പറഞ്ഞു. കുടിയേറ്റ മ്യൂസിയങ്ങൾ ഇനിയും വേണം: കെ.സി. ജോസഫ് കുടിയേറ്റ മ്യൂസിയങ്ങൾ ഇനിയും ഉണ്ടാകണമെന്ന് മുൻമന്ത്രി കെ.സി. ജോസഫ്. പുതിയ തലമുറയ്ക്കായി കുടിയേറ്റചരിത്രം അനാവരണം ചെയ്യാനാണ് ചെമ്പന്തൊട്ടിയിൽ ബിഷപ് വള്ളോപ്പിളളി സ്മാരക മ്യൂസിയം സ്ഥാപിച്ചത്. 2016 ൽ ഉമ്മൻചാണ്ടി തറക്കല്ലിട്ടത് ഒന്പതു വർഷത്തിന് ശേഷമെങ്കിലും കടന്നപ്പള്ളി തന്നെ ഉദ്ഘാടനം ചെയ്തതിൽ അതിയായ സന്തോഷവും ചാരിതാർഥ്യവുമുണ്ട്. ആലക്കോട് രാജയുടെ പേരിൽ ആലക്കോട്ടും റാണിപുരം, രാജപുരം മേഖലയിലെ കുടിയേറ്റത്തിന് നേതൃത്വം നൽകിയ ബിഷപ് അലക്സാണ്ടർ ചൂളപ്പറമ്പിലിന്‍റെ സ്‌മരണയ്ക്കായി രാജപുരത്തും മ്യൂസിയം സ്‌ഥാപിക്കാൻ സർക്കാർ മുൻകൈയെടുക്കണമെന്ന് അദ്ദേഹം ആവശ്യപ്പെട്ടു.

നിയുക്ത ബിഷപ് മോൺ. ജയിംസ് പട്ടേരിലിന് ബൽത്തങ്ങാടിയിൽ സ്വീകരണം നൽകി

ബൽത്തങ്ങാടി: നിയുക്ത ബിഷപ് മോൺ. ജയിംസ് പട്ടേരിലിനെ രൂപതാ കുടുംബം ബൽത്തങ്ങാടി കത്തീഡ്രൽ ദേവാലയത്തിൽ സ്വീകരിച്ചു. മാർ ലോറൻസ് മുക്കുഴിക്കൊപ്പമാണ് സിനഡ് കഴിഞ്ഞ് അദ്ദേഹം രൂപതയിലേക്ക് എത്തിയത്. ക്ലരീശൻ കറുകുറ്റി പ്രൊവിൻഷ്യൽ ഫാ. സിബി ഞാവള്ളിയും കൂടെയുണ്ടായിരുന്നു. വികാരി ജനറാൾ ഫാ.ജോസ് വലിയപറമ്പിൽ, പ്രൊക്കുറേറ്റർ ഫാ. ഏബ്രഹാം പട്ടേരിൽ, ചാൻസലർ ഫാ.ലോറൻസ് പൂണോളിൽ, രൂപതയിലെ മറ്റ് വൈദികർ, സന്യസ്തർ, വിശ്വാസികൾ എന്നിവർ ചടങ്ങിൽ പങ്കെടുത്തു. ലോറൻസ് പിതാവ് പണിതുവച്ച അടിത്തറയിൽ സുഗമമായി രൂപതയിൽ നയിക്കാൻ സാധിക്കുമെന്നും അതിന് ഇവിടുത്തെ വൈദികരും സന്യസ്തരും അല്മായരും ജനങ്ങളുമെല്ലാം സഹകരണമുണ്ടാകുമെന്നും സ്വീകരണശേഷം മാധ്യമങ്ങളോട് സംസാരിക്കവെ നിയുക്തബിഷപ് പറഞ്ഞു.

ആറളം ഫാമിൽ അവശനിലയിൽ കണ്ടെത്തിയ കുട്ടിയാന ചരിഞ്ഞു

ഇരിട്ടി: ആറളംഫാം കോട്ടപ്പാറയിൽ അവശനിലയിൽ കണ്ടെത്തിയ മൂന്ന് വയസുള്ള കുട്ടിയാന ചരിഞ്ഞു. വനം വകുപ്പ് ഉദ്യോഗസ്ഥരുടെ നിരീക്ഷണത്തിൽ കഴിഞ്ഞിരുന്ന കുട്ടിയാനയ്ക്ക് ഇന്നലെ വിദഗ്ധ ചികിത്സ ആരംഭിക്കാനിരിക്കെയാണ് മരിച്ചത്. വെള്ളിയാഴ്ച രാത്രി 11.15 ഓടെയാണ് ആന ചരിഞ്ഞത്. വ്യാഴാഴ്ച വൈകുന്നേരം പട്രോളിംഗ് നടത്തുന്നതിനിടെയാണ് കോട്ടപ്പാറ ജലനിധി ടാങ്കിന് സമീപം അവശനിലയിൽ കുട്ടിയാനയെ കണ്ടെത്തിയത്. സമീപത്തായി കാട്ടാനയുടെ അസ്ഥികളും ചിതറിയ നിലയിലുണ്ടായിരുന്നു. നിലമ്പൂർ സൗത്ത് ഡിവിഷൻ അസിസ്‌റ്റന്‍റ് ഫോറസ്‌റ്റ് വെറ്ററിനറി ഓഫീസർ ഡോ. ശ്യാമിന്‍റെ നേതൃത്വത്തിലുള്ള വിദഗ്‌ധ സംഘം കുട്ടിയാനയുടെ പോസ്റ്റുമോർട്ടം നടത്തി.

ലഹരി കടത്ത് : കൂട്ടുപുഴയിൽ എക്സൈസ് പരിശോധന

ഇരിട്ടി: ഓണം ഉത്സവ സീസൺ പ്രമാണിച്ച് സ്‌പെഷൽ ഡ്രൈവിന്‍റെ ഭാഗമായി കൂട്ടുപുഴ അതിർത്തിയിൽ കേരള, കർണാടക എക്‌സൈസ് സംഘത്തിന്‍റെ സംയുക്ത പരിശോധന നടത്തി. കേരളത്തിൽ നിന്നും കർണാടകയിലേക്ക് പോകുന്ന എല്ലാ വാഹനങ്ങളും കർണാടകയിൽ നിന്ന് മാക്കൂട്ടം ചുരം പാത വഴി കൂട്ടുപുഴയിലേക്ക് എത്തുന്ന ചരക്ക് വാഹനങ്ങളും ബസുകൾ ഉൾപ്പെടെയുള്ള യാത്രവാഹനങ്ങളും സംയുക്തമായി പരിശോധിച്ചു. കൂട്ടുപുഴ പാലത്തിന്‍റെ ഇരുഭാഗങ്ങളിൽ നിന്നുമാണ് പരിശോധന നടത്തിയത്. ഇതോടൊപ്പം അതിർത്തിയിലെ പോലീസ് എയിഡ് പോസ്റ്റിലും എക്‌സൈസ് ചെക്ക് പോസ്റ്റിലും പരിശോധന ഉണ്ടായിരുന്നു. എക്‌സൈസ് സർക്കിൾ ഇൻസ്‌പെക്ടർ സി. രജിത്ത്, എക്‌സൈസ് ഇൻസ്‌പെക്ടർ ഇ.പി. വിപിൻ, ഡപ്യൂട്ടി സൂപ്രണ്ട് ഓഫ് എക്‌സൈസ് (കർണാടക) വി. ചന്ദ്രപ്പ, എക്‌സൈസ് ഇൻസ്‌പെക്ടർമാരായ എ. മഞ്ജു, ചേതൻ, (കർണാടക) സബ് ഇൻപെക്ടർമാരായ ആർ. മോഹൻ, ചന്ദ്ര, കേശവ ഗണേശ (കർണാടക) എന്നിവരുടെ നേതൃത്വത്തിൽ 20 ഓളം സേനാംഗങ്ങൾ പങ്കെടുത്തു.

ആയുഷ് കായകല്പ് അവാര്‍ഡ് ഏറ്റുവാങ്ങി

ഇരിട്ടി: പായം സർക്കാർ ഹോമിയോ ആശുപത്രിക്ക് ലഭിച്ച ആയുഷ് കായകല്പ് അവാര്‍ഡ് ഡോ. പി. നിഷ, പായം പഞ്ചായത്ത് അംഗങ്ങളായ വി. പ്രമീള, ബിജു കോങ്ങാടന്‍, പി. പങ്കജാക്ഷി, സൂര്യ എന്നിവര്‍ ചേര്‍ന്ന് ആരോഗ്യമന്ത്രി വീണാ ജോര്‍ജില്‍ നിന്നും ഏറ്റുവാങ്ങി. സർക്കാർ ആയുഷ് ആരോഗ്യ സ്ഥാപനങ്ങളിലെ ശുചിത്വം, മാലിന്യ പരിപാലനം, അണുബാധ നിയന്ത്രണം എന്നിവയിലെ മികവിനാണ് പായം സർക്കാർ ഹോമിയോ ആശുപത്രിയ്ക്ക് പ്രഥമ സംസ്ഥാന ആയുഷ് കായകല്പ് പുരസ്കാരം ലഭിച്ചത്. യോഗ ഹാൾ, മാതൃക ഔഷധ സസ്യ ഉദ്യാനം, പൂന്തോട്ടം, ശുചിത്വം തുടങ്ങി വിവിധ മേഖലകളിൽ മികവാർന്ന പ്രവർത്തനങ്ങളും മെഡിക്കൽ ക്യാമ്പ്, രോഗപ്രതിരോധ പ്രവർത്തനങ്ങൾ, ബോധവത്കരണ ക്ലാസുകൾ, കിടപ്പ് രോഗികളെ സന്ദർശിക്കൽ ഉൾപ്പെടെയുള്ള ജീവകാരുണ്യ പ്രവർത്തനങ്ങൾ തുടങ്ങിയവ അവാർഡിന് പരിഗണിച്ചിരുന്നു.

കോ-ഓപ്പറേറ്റീവ് എംപ്ലോയീസ് ഫ്രണ്ട് ധർണ നടത്തി

ഇരിട്ടി: വിവിധ ആവശ്യങ്ങൾ ഉന്നയിച്ച് കേരള കോ-ഓപ്പറേറ്റീവ് എംപ്ലോയീസ് ഫ്രണ്ട് ഇരിട്ടി താലൂക്ക് കമ്മിറ്റിയുടെ നേതൃത്വത്തിൽ പുന്നാട് പ്രവർത്തിക്കുന്ന ഇരിട്ടി സഹകരണ അസിസ്റ്റന്‍റ് രജിസ്ട്രാർ ഓഫീസിന് മുന്നിൽ ധർണ നടത്തി. ശമ്പളപരിഷ്‌കരണം നടപ്പിലാക്കുക, ക്ഷാമബത്ത കുടിശിക അനുവദിക്കുക, ദിന നിക്ഷേപ പിരിവുകാരുടെ പെൻഷൻ മാനദണ്ഡം പുനഃപരിശോധിക്കുക, ക്ഷീര സംഘങ്ങളെ സഹായിക്കുക, ബോണസ് കാലോചിതമായി പരിഷ്‌കരിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു ധർണ. ഡിസിസി വൈസ് പ്രസിഡന്‍റ് മുഹമ്മദ് ബ്ലാത്തൂർ ഉദ്ഘാടനം ചെയ്തു. താലൂക്ക് പ്രസിഡന്‍റ് ആർ.കെ. നവീൻ കുമാർ അധ്യക്ഷത വഹിച്ചു. കെസിഇഎഫ് വനിത ഫോറം സംസ്ഥാന കൺവീനർ കെ. രാധ മുഖ്യപ്രഭാഷണം നടത്തി. കെ.കെ. കൃഷ്ണകുമാർ, പി.എം. മുരളീധരൻ, വി. സുരേഷ് ബാബു, കെ.കെ. ബാബു, പി. പുഷ്പജ, പി.വി. ശോഭ, പി. ഷേർലി, സുനിൽ സെബാസ്റ്റ്യൻ, കെ. സജീവൻ എന്നിവർ പ്രസംഗിച്ചു.

കണ്ണൂർ-തലശേരി റൂട്ടിലെ ബസ് പണിമുടക്ക്: നടാലിൽ സത്യഗ്രഹ സമരം തുടങ്ങി

കണ്ണൂർ: കണ്ണൂർ-തലശേരി റൂട്ടിലെ ബസ് ഉടമകൾ സർവീസ് നിർത്തി സമരം നടത്തുന്നതിന് പിന്തുണ പ്രഖ്യാപിച്ച് കോ-ഓർഡിനേഷൻ കമ്മിറ്റിയുടെയും നടാൽ ഒകെ യുപി സ്കൂൾ കർമസമിതിയുടെയും നാട്ടുകാരുടെയും നേതൃത്വത്തിൽ നടാലിൽ സത്യഗ്രഹ സമരം തുടങ്ങി. കണ്ണൂർ-തോട്ടട-നടാൽ വഴി തലശേരിയിലേക്ക് സർവീസ് നടത്തുന്ന ബസുകൾക്ക് നടാൽ സർവീസ് റോഡിൽ പ്രവേശിക്കാൻ വഴി ഒരുക്കാത്ത എൻഎച്ച്-66 അധികൃതരുടെ നടപടിയിൽ പ്രതിഷേധിച്ചാണ് സമരം ആരംഭിച്ചത്. കോർപറേഷൻ കൗൺസിലർ കെ.വി. സവിത സത്യഗ്രഹ സമരം ഉദ്ഘാടനം ചെയ്തു. രാജ്കുമാർ കരുവാരത്ത് അധ്യക്ഷത വഹിച്ചു. പി.സി. നാരായണൻ, എം. രഘുനാഥൻ, കെ. പുരുഷോത്തമൻ, ബി. ഹാരിസ് തുടങ്ങിയവർ പ്രസംഗിച്ചു. പ്രശ്നത്തിന് പരിഹാരമായില്ലെങ്കിൽ സെപ്റ്റംബർ രണ്ടു മുതൽ കണ്ണൂർ-തലശേരി വഴി ബൈപാസ് റൂട്ടിലും നടാൽ വഴി തലശേരിയിലേക്കും മുഴുവൻ ബസുകളും കിഴുന്നപ്പാറയിലേക്ക് ഓടുന്ന ബസുകളും സർവീസ് നിർത്തിവയ്ക്കാൻ യോഗം തീരുമാനിച്ചു.

സ്ഥിരതയില്ലാതെ അരങ്ങം വയോജന കേന്ദ്രം

ആലക്കോട്: വയോജന ക്ഷേമത്തിനായി സർക്കാർ നേരിട്ടും തദ്ദേശ സ്ഥാപനങ്ങൾ വഴിയും ധാരാളം പദ്ധതികൾ പ്രഖ്യാപിച്ചിട്ടും സ്ഥിരമായി തുറന്നുപ്രവർത്തിക്കാതെ അരങ്ങത്തെ വയോജന വിശ്രമകേന്ദ്രമായ പകൽവീട്. ബജറ്റുകളിൽ നിർദിഷ്ട ശതമാനം വയോജന ക്ഷേമപദ്ധതിക്ക് നീക്കിവയ്ക്കണമെന്ന വ്യവസ്ഥയുണ്ടായിട്ടും തുക വകയിരുത്തുന്നില്ല. ആലക്കോട് പഞ്ചായത്ത് ആസ്ഥാനത്തിനടുത്ത് ടിസിബി റോഡരികിൽ വയോജന വിശ്രമ കേന്ദ്രത്തിനായി പഞ്ചായത്ത് പണിത പകൽവീട് കെട്ടിടത്തിൽ ഫർണിച്ചർ ഉൾപ്പെടെ സൗകര്യങ്ങൾ ഉണ്ട്. പക്ഷേ പ്രായമായവർക്ക് ചെല്ലണമെങ്കിൽ മറ്റുള്ളവരുടെ സഹായം ആവശ്യമാണ്. അവിടേക്കുള്ള വഴിയാണ് പ്രശ്നം. നേരത്തെ വയോജനവേദി പ്രവർത്തകരുടെ വലിയ സഹകരണവും പങ്കാളിത്തവും സാന്നിധ്യവും ലഭിച്ചതോടെ പ്രവർത്തനങ്ങൾ കാര്യക്ഷമമായിരുന്നു. വയോജനവേദി ഓരോ ദിവസം ഓരോരുത്തരെ ചുമതലകൾക്ക് നിശ്ചയിച്ചിരുന്നു. വിവിധ ആവ ശ്യങ്ങൾക്ക് ഓഫീസുകളിലും മറ്റുമായി ആലക്കോട്ടും അരങ്ങത്തുമെത്തുന്ന വയോജനങ്ങൾക്ക് പകൽവീട് വിശ്രമത്തിന് പറ്റിയ ഇടമായിരുന്നു. എന്നാൽ പ്രായാധിക്യത്തിന്‍റെ അവശത കാരണം ചുമതലയേറ്റവർക്ക് വരാനാകാതായി. ഇതോടെയാണ് കേന്ദ്രത്തിന്‍റെ പ്രവർത്തനം താളം തെറ്റിയത്. പകരം ചുമതല ഏറ്റെടുക്കാൻ ആരും മുന്നോട്ടുവന്നില്ല. ഉദയഗിരി, തേർത്തല്ലി എന്നിവിടങ്ങളിലെ വയോജനകേന്ദ്രങ്ങളുടെ പ്രവർത്തനവും പഴയതുപോലെ കാര്യക്ഷമമല്ല. വയോജനങ്ങളുടെ ആവശ്യം വയോജനങ്ങൾ കടന്നു വരണമെങ്കിൽ അരങ്ങത്തെ വയോജന വിശ്രമകേന്ദ്രം സ്ഥിരമായി തുറന്നുപ്രവർത്തിക്കാൻ നടപടി ഉണ്ടാവണം. പ്രദേശത്ത് പ്രഭാതസവാരിക്ക് താത്പര്യമുള്ളവർക്ക് ഇപ്പോൾ അതിനും കഴിയുന്നില്ല. വാഹനങ്ങളുടെ അമിത വേഗവും തെരുവുനായ ശലവും ഉയർത്തുന്ന ഭീതിയുമാണ് കാരണം. പകൽവീടുകളിൽ ടിവി, ദിനപത്രങ്ങൾ, മാസികകൾ തുടങ്ങിയവ ലഭ്യമാക്കുന്നതിനും സാഹിത്യ വാസനയുള്ളവർക്ക് എഴുതാനും വായിക്കാനും പൊതുചർച്ചക്കും സൗകര്യം ഒരുക്കണമെന്നുമാണ് വയോജനങ്ങൾ ആവശ്യപ്പെടുന്നത്.

സ്‌കൂൾ കെട്ടിടങ്ങളുടെ സുരക്ഷ : വകുപ്പുതല സന്ദർശനം പൂർത്തിയാക്കാൻ ജില്ലാ വികസന സമിതി നിർദേശം

കണ്ണൂർ: കെട്ടിടങ്ങളുടെ സുരക്ഷ ഉറപ്പാക്കുന്നതിന്‍റെ ഭാഗമായി ജില്ലയിലെ മുഴുവൻ സ്‌കൂളുകളിലും കെഎസ്ഇബി, എൽഎസ്ജിഡി, റവന്യൂ, പൊതുമരാമത്ത് വകുപ്പുകൾ പരിശോധന നടത്തി സെപ്റ്റംബർ 25 നകം റിപ്പോർട്ട് സമർപ്പിക്കണമെന്ന് ജില്ലാ വികസന സമിതി യോഗം ആവശ്യപ്പെട്ടു. സ്‌കൂളുകളിൽ വിദ്യാഭ്യാസ വകുപ്പിന്‍റെ സുരക്ഷ ഓഡിറ്റ് പൂർത്തിയായതായി വിദ്യാഭ്യാസ ഉപഡയറക്ടർ ഡി. ഷൈനി അറിയിച്ചു. എംഎൽഎമാരുടെ ഫണ്ടുകൾ ഉപയോഗിച്ച് മിനിമാസ്റ്റ് ലൈറ്റുകൾ സ്ഥാപിക്കാൻ ടെൻഡർ ചെയ്ത് കരാർ ഉടമ്പടിയായെങ്കിലും അവ സ്ഥാപിക്കാനുള്ള കാലതാമസം ഒഴിവാക്കാൻ നടപടി സ്വീകരിക്കണമെന്ന് എംഎൽഎ മാരായ കെ.പി. മോഹനൻ, കെ.കെ. ശൈലജ, ടി.ഐ. മധുസൂദനൻ, കെ.വി. സുമേഷ് എന്നിവർ ആവശ്യപ്പെട്ടു. പയ്യന്നൂർ മണ്ഡലത്തിലെ കാങ്കോൽ-ആലപ്പടമ്പ്, പെരിങ്ങോം-വയക്കര, ചെറുപുഴ എന്നീ ഗ്രാമപഞ്ചായത്തുകളിൽ ബസ് റൂട്ട് നിലവിലില്ലാത്ത പ്രദേശങ്ങളെ ബന്ധിപ്പിച്ച് പുതിയ ബസ് റൂട്ടിന് പെർമിറ്റ് അനുവദിക്കുന്നതിന് വേണ്ട നടപടികൾ അടിയന്തിരമായി സ്വീകരിക്കാൻ ആർടിഒയ്ക്ക് ജില്ലാ കളക്ടർ അരുൺ കെ. വിജയൻ നിർദേശം നൽകി. ടി.ഐ. മധുസൂദനൻ എംഎൽഎയാണ് വിഷയം ഉന്നയിച്ചത്. ഗ്രാമീണ റൂട്ടുകളിൽ ഉൾപ്പെടെ സ്വകാര്യ ബസുകൾ സർവീസ് നടത്താൻ മുന്നോട്ട് വരുന്ന സാഹചര്യത്തിൽ നടപടിക്രമങ്ങൾ വേഗത്തിലാക്കി പെർമിറ്റ ലഭ്യമാക്കണമെന്ന് എംഎൽഎമാർ ആവശ്യപ്പെട്ടു. ആറളം പുനരധിവാസ മേഖലയിലെ ഭൂമി വിതരണവുമായി ബന്ധപ്പെട്ട് 137 പേർക്ക് കൈവശ രേഖ അനുവദിക്കുന്നത് സംബന്ധിച്ചും കൈയേറ്റം, പ്ലോട്ട് മാറ്റം എന്നി വിഷയങ്ങളിൽ തീരുമാനം എടുക്കുന്നതിനുമായിന് ഗുണഭോക്തൃ തിരിച്ചറിയൽ കമ്മറ്റിയോഗം ചേർന്നതായി പ്രോജക്ട് ഐടിഡിപി അറിയിച്ചു. വി. ശിവദാസൻ എംപി, എംപിമാരുടെ പ്രതിനിധികൾ, സബ് കളക്ടർ കാർത്തിക് പാണിഗ്രഹി, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, വകുപ്പ് മേധാവികൾ എന്നിവർ പങ്കെടുത്തു.

"ജലമാണ് ജീവൻ' കിണറുകളിലെ ക്ലോറിനേഷന് തുടക്കം

കണ്ണൂർ: അമീബിക് മസ്തിഷ്‌കജ്വരം റിപ്പോർട്ട് ചെയ്യപ്പെടുന്ന സാഹചര്യത്തിൽ സുരക്ഷിത ജല ലഭ്യതയും ജലജന്യ രോഗപ്രതിരോധവും ലക്ഷ്യമിട്ട് സംസ്ഥാന വ്യാപകമായി നടത്തുന്ന "ജലമാണ് ജീവൻ' ജനകീയ തീവ്ര കർമപരിപാടിക്ക് ജില്ലയിൽ തുടക്കമായി. ഇതിന്‍റെ ഭാഗമായി കിണറുകൾ ക്ലോറിനേറ്റ് ചെയ്യുന്ന ആദ്യഘട്ട പ്രവർത്തനം ആരംഭിച്ചു. മലിനമായ കുളങ്ങൾ, പുഴകൾ എന്നിവയ്ക്കു പുറമെ കിണറുകളിലും വൃത്തിയാക്കാത്ത വാട്ടർ ടാങ്കുകളിലും അമീബയുടെ സാന്നിധ്യമുണ്ടെന്ന് പഠനങ്ങളിലൂടെ കണ്ടെത്തിയ സാഹചര്യത്തിലാണ് നടപടി. ഹരിതകേരളം മിഷൻ തദ്ദേശ സ്വയംഭരണ സ്ഥാപനങ്ങളുമായി ചേർന്ന് വിവിധ വകുപ്പുകളുടെ സഹകരണത്തോടെ "ജലമാണ് ജീവൻ' കാമ്പയിൻ ആരംഭിച്ചിട്ടുള്ളത്. ക്ലോറിനേഷന്‍റെ ആദ്യ ദിവസം ജില്ലയിലെ 49 പഞ്ചായത്തുകളിലും കണ്ണൂർ കോർപറേഷൻ ഉൾപ്പെടെ ആറ് നഗരസഭകളിലുമാണ് പ്രവർത്തനങ്ങൾ തുടങ്ങിയത്. ജില്ലയിലെ മുഴുവൻ കിണറുകളും ക്ലോറിനേറ്റ് ചെയ്യാനും മുഴുവൻ വീടുകളിലേയും സ്ഥാപനങ്ങളിലേയും വാട്ടർടാങ്കുകൾ വൃത്തിയാക്കാനുമുള്ള പ്രവർത്തനങ്ങൾ ഇന്നും തുടരും. ഈ ദിവസങ്ങളിൽ പൂർത്തിയാകാത്ത ഇടങ്ങളിൽ മറ്റ് ദിവസങ്ങളിൽ ക്ലോറിനേഷൻ നടത്തും. തോടുകൾ, കിണറുകൾ, മറ്റ് ജലാശയങ്ങൾ എന്നിവ ശുചീകരിക്കാനുള്ള വിപുലമായ ശ്രമങ്ങളും ജില്ലയിൽ ഏറ്റെടുക്കുന്നുണ്ട്. ക്ലോറിനേഷന് ആവശ്യമായ ബ്ലീച്ചിംഗ് പൗഡർ/ക്ലോറിൻ ഗുളികകൾ എന്നിവ തദ്ദേശ സ്വയംഭരണ സ്ഥാപനങ്ങൾ വഴിയാണ് ലഭ്യമാക്കുന്നത്. ആശാ പ്രവർത്തകർ, അങ്കണവാടി ജീവനക്കാർ, കുടുംബശ്രീ പ്രവർത്തകർ, ഹരിതകർമസേന, തൊഴിലുറപ്പ് തൊഴിലാളികൾ, സന്നദ്ധ പ്രവർത്തകർ, സന്നദ്ധ സംഘടനകൾ തുടങ്ങിയവരെ ഉൾപ്പെടുത്തിയാണ് പദ്ധതി നടപ്പാക്കുന്നത്. കണ്ണൂർ കോർപറേഷനിൽ തെക്കീബസാറിലെ പൊതുകിണർ ആരോഗ്യ സ്ഥിരം സമിതി ചെയർമാൻ എം.പി. രാജേഷിന്‍റെ നേതൃത്വത്തിൽ ക്ലോറിനേറ്റ് ചെയ്തു. ക്ലീൻ സിറ്റി മാനേജർ ഷൈൻ പി. ജോസ്, പബ്ലിക് ഹെൽത്ത് ഇൻസ്പെക്ടർ രേഷ്മ രമേശൻ, ഹെൽത്ത് ഇൻസ്‌പെക്ടർ സജില വളർപ്പാൻ എന്നിവർ നേതൃത്വം നൽകി. പയ്യന്നൂർ ബ്ലോക്ക്തല പ്രവർത്തനങ്ങൾ ബ്ലോക്ക് പഞ്ചായത്ത് ഓഫീസിലെ കിണർ ക്ലോറിനേറ്റ് ചെയ്തുകൊണ്ട് ആരംഭിച്ചു. ബ്ലോക്ക് പഞ്ചായത്ത് പ്രസിഡന്‍റ് പി.വി. വൽസല, വൈസ് പ്രസിഡന്‍റ് എം.വി. അപ്പുക്കുട്ടൻ, ബ്ലോക്ക് പഞ്ചായത്ത് സെക്രട്ടറി കെ. മോഹനൻ, ആരോഗ്യ വകുപ്പ് ജെഎച്ച്ഐ വിനോദ്, ഹരിത കേരളം മിഷൻ റിസോഴ്സ് പേഴ്സൺ പി. അരുൾ, ആശാവർക്കർ കെ. സുനിത എന്നിവർ നേതൃത്വം നൽകി.

നെടുങ്ങോം സ്കൂളിൽ എസ്പിസി ഓണം ക്യാമ്പ് നടത്തി

പയ്യാവൂർ: നെടുങ്ങോം ഗവ. ഹയർ സെക്കൻഡറി സ്കൂളിൽ എസ്പിസി യൂണിറ്റിന്‍റെ ആഭിമുഖ്യത്തിൽ ത്രിദിന ഓണം ക്യാമ്പ് "പൂത്തുമ്പികൾ' സംഘടിപ്പിച്ചു. ശ്രീകണ്ഠപുരം എസ്എച്ച്ഒ ടി.എൻ. സന്തോഷ് കുമാർ ക്യാമ്പിന് തുടക്കം കുറിച്ച് പതാക ഉയർത്തി. ശ്രീകണ്ഠപുരം നഗരസഭ വാർഡ് കൗൺസിലർ വി.സി. രവീന്ദ്രൻ ക്യാമ്പ് ഉദ്ഘാടനം ചെയ്തു. സ്കൂൾ പിടിഎ പ്രസിഡന്‍റ് കെ. ഭാസ്കരൻ അധ്യക്ഷത വഹിച്ചു. എസ്പിസി കമ്യൂണിറ്റി പോലീസ് ഓഫീസർ എ.വി. രതീഷ് ആമുഖ പ്രഭാഷണം നടത്തി. സ്കൂൾ പ്രിൻസിപ്പൽ ബോബി മാത്യു, മുഖ്യാധ്യാപിക പി.എൻ. ഗീത, ജൂണിയർ കേഡറ്റ് ദേവ്താര എന്നിവർ പ്രസംഗിച്ചു. ക്യാമ്പിന്‍റെ ഭാഗമായി സൈബർ സുരക്ഷ, ഫസ്റ്റ് എയ്ഡ്, മോട്ടിവേഷൻ ക്ലാസുകൾ, തളിപ്പറമ്പ് ഫയർ ആൻഡ് റെസ്ക്യൂ ടീമിന്‍റെ ദുരന്തനിവാരണ ബോധവത്കരണം, യോഗ പരിശീലനം, ഫീൽഡ് വിസിറ്റ് എന്നിവയും നടന്നു. ഓണാഘോഷത്തിന്‍റെ ഭാഗമായി കേഡറ്റുകൾ അത്തപ്പൂക്കളം ഒരുക്കി വിവിധ കലാപരിപാടികളും അവതരിപ്പിച്ചു.

വൈഎംസിഎ കായിക ദിനാചരണം നടത്തി

ചെമ്പേരി: വൈഎംസിഎ ചെമ്പേരി യൂണിറ്റിന്‍റെ ആഭിമുഖ്യത്തിൽ ധ്യാൻചന്ദിന്‍റെ ജന്മദിനത്തിൽ ദേശീയ കായിക ദിനം ആചരിച്ചു. ചെമ്പേരിയിലെ കായിക പരിശീലകരായ ബേബി അഗസ്റ്റിൻ കാവളക്കാട്ട്, ഡോ. ഡൊമിനിക് തോമസ് പുളിയ്ക്കൽ, വിനോദ് അഗസ്റ്റിൻ കിഴക്കേക്കര, ജോസ് ജോസഫ് പൈങ്ങോട്ട്, ദീപ ജോഷി തോട്ടുവയിൽ, എം.എം. വിനു മണിമല, പ്രജു കാക്കനാട്ട്, സാവിയോ ഇടയാടിയിൽ, ബെന്നി പരിന്തിരിക്കൽ എന്നിവരെ ആദരിച്ചു. വൈഎംസിഎ ഓഫീസിൽ ചേർന്ന യോഗത്തിൽ ചെമ്പേരി ലൂർദ് മാതാ ബസിലിക്ക റെക്ടർ റവ. ഡോ. ജോർജ് കാഞ്ഞിരക്കാട്ട് കായിക പരിശീലകരെ പൊന്നാടയണിയിച്ച് അനുഗ്രഹ പ്രഭാഷണം നടത്തി. വൈഎംസിഎ പ്രസിഡന്‍റ് ഷീൻ ഏബ്രഹാം അധ്യക്ഷത വഹിച്ചു. ഷാജി വർഗീസ്, റോബി സക്കറിയാസ്, സജിത്ത് കെ. സെബിൻ, വി.ജെ. ഷാജിമോൻ, ഷൈബി കുഴിവേലിപുറത്ത്, ജോമി ചാലിൽ, ലിസിയമ്മ ജോസഫ്, സാജു കൊട്ടാരം എന്നിവർ പ്രസംഗിച്ചു.

വൈഎംസിഎ ഓഫീസ് ഉദ്ഘാടനവും ഭാരവാഹികളുടെ സ്ഥാനാരോഹണവും

ചെറുപുഴ: പുളിങ്ങോം വൈഎംസിഎയുടെ ഓഫീസ് ഉദ്ഘാടനവും പുതിയ ഭാരവാഹികളുടെ സ്ഥാനാരോഹണവും നടന്നു. വൈഎംസിഎ നാഷ്ണൽ എക്സിക്യുട്ടീവ് മെംബർ വി.എം. മത്തായി ഉദ്ഘാടനം പരിപാടി ചെയ്തു. ജോജോ അഗസ്റ്റ്യൻ അധ്യക്ഷത വഹിച്ചു. പുളിങ്ങോം സെന്‍റ് ജോസഫ് പള്ളി വികാരി ഫാ. അഗസ്റ്റ്യൻ പാണ്ട്യാമ്മാക്കൽ അനുഗ്രഹ പ്രഭാഷണം നടത്തി. ജോൺസ് സി. പടിഞ്ഞാത്ത്, മോബി സ്കറിയ, പി.എ. ബേബി, ബെന്നി ജോൺ, ജോസഫ് പുത്തൻപുര, മിനി ജോസഫ്, ടിന്‍റു ബിജി, ബിന്ദു ബിജോയി, ഡോ. കെ.എം. തോമസ്, ഗാഥ തോമസ്, ജോയി അർത്തിയിൽ, ബിജു ഞെട്ടനൊഴികയിൽ, ആൽവിൻ ജോസ് എന്നിവർ പ്രസംഗിച്ചു.

വിധവകളെ ബിപിഎൽ ലിസ്റ്റിൽ ഉൾപ്പെടുത്തണം: വിധവ സംരക്ഷണ സമിതി

ചെമ്പേരി: വിധവകൾ ഗൃഹനാഥരായ റേഷൻ കാർഡുകൾ ബിപിഎൽ ആക്കി മാറ്റണമെന്നും വിധവ പെൻഷൻ അയ്യായിരം രൂപയാക്കി വർധിപ്പിക്കുക, മുഴുവൻ വിധവകൾക്കും പെൻഷൻ അനുവദിക്കുക തുടങ്ങിയ ആവശ്യങ്ങൾ ഉടൻ നടപ്പാക്കണമെന്നും കേരള വിധവ സംരക്ഷണ സമിതി. ഈ ആവശ്യങ്ങൾ ഉന്നയിച്ച് സംസ്ഥാനത്തിന്‍റെ എല്ലാ ഭാഗങ്ങളിൽ നിന്നുമായി ഒരുലക്ഷം ഒപ്പ് ശേഖരിച്ച് പ്രധാനമന്ത്രിക്കും മുഖ്യമന്ത്രിക്കും സമർപ്പിക്കുന്ന ഭീമഹർജിയിലേക്കുള്ള ഒപ്പ് ശേഖരണത്തിന്‍റെ കണ്ണൂർ ജില്ലാതല ഉദ്ഘാടനം ചെമ്പേരിയിൽ നടന്ന ചടങ്ങിൽ കേരളാ മീഡിയ പേഴ്സൺ യൂണിയൻ (കെഎംപിയു) ഇരിട്ടി മേഖലാ പ്രസിഡന്‍റ് തോമസ് അയ്യങ്കാനാൽ നിർവഹിച്ചു. സംസ്ഥാന സെക്രട്ടറി സാവിത്രി ശ്രീധരൻ അധ്യക്ഷത വഹിച്ചു. സംസ്ഥാന ചെയർമാൻ വി.ഡി. ബിന്‍റോ മുഖ്യപ്രഭാഷണം നടത്തി. സംസ്ഥാന പ്രസിഡന്‍റ് ടി.ജെ. ലില്ലിക്കുട്ടി, ജിനേഷ് കാളിയാനിയിൽ, ശാരദ വാതിൽമട, ലളിത പയ്യാവൂർ, തങ്കമ്മ കുര്യൻ, മിനി കിളിയന്തറ, വസന്ത ഇരിട്ടി, രാധ പയ്യാവൂർ, മേരി മാത്യു കിടാരത്തിൽ എന്നിവർ പ്രസംഗിച്ചു.

വെമ്പുവ തെരേസ ഭവനിൽ തിരുനാൾ ആറിന്

പയ്യാവൂർ: വെമ്പുവ തെരേസ ഭവനിൽ വിശുദ്ധ മദർ തെരേസയുടെ തിരുനാൾ ആഘോഷങ്ങൾ സെപ്റ്റംബർ ആറിന് നടക്കും. ഉച്ചകഴിഞ്ഞ് 2.15ന് ജപമാല പ്രാർഥന, വചന പ്രഘോഷണം, ദിവ്യകാരുണ്യ ആരാധന എന്നിവക്ക് മണ്ടളം സാൻജോ ഭവൻ ഡയറക്ടർ സിസ്റ്റർ സ്നേഹ എംഎസ്ജെ നേതൃത്വം നൽകും. വൈകുന്നേരം അഞ്ചിന് തലശേരി അതിരൂപത ചാൻസലർ റവ. ഡോ. ജോസഫ് മുട്ടത്തുകുന്നേലിന്‍റെ മുഖ്യകാർമികത്വത്തിൽ ആഘോഷമായ ദിവ്യബലി, വചനസന്ദേശം എന്നിവയുണ്ടായിരിക്കും. ഫാ.ജോസ് മണപ്പാട്ട്, ഫാ. ബിബിൻ അഞ്ചെമ്പിൽ എന്നിവർ സഹകാർമികരായിരിക്കും. സ്നേഹവിരുന്നോടെ ആഘോഷ പരിപാടികൾ സമാപിക്കും. സെപ്റ്റംബർ 14 മുതൽ തുടർന്നുള്ള എല്ലാ ഞായറാഴ്ചകളിലും ഉച്ചകഴിഞ്ഞ് 2.15 മുതൽ വൈകുന്നേരം 5.30 വരെ വചനപ്രഘോഷണവും ദിവ്യകാരുണ്യ ആരാധനയും ഉണ്ടായിരിക്കുമെന്ന് വെമ്പുവ മാർ സ്ലീവ പള്ളി വികാരി റവ. ഡോ. ജിനു വടക്കേമുളഞ്ഞനാൽ, തെരേസ ഭവൻ ഡയറക്ടർ ബ്രദർ ടി.കെ. സജി എന്നിവർ അറിയിച്ചു.

സംസ്ഥാന വയോസേവന അവാർഡ്

കണ്ണൂർ: വയോജന മേഖലയിൽ മികച്ച പ്രവർത്തനങ്ങൾ കാഴ്ചവച്ച വ്യക്തികൾക്കും സ്ഥാപനങ്ങൾക്കും മികച്ച തദ്ദേശ സ്വയംഭരണ സ്ഥാപനങ്ങൾക്കും സാമൂഹ്യനീതി വകുപ്പ് ഏർപ്പെടുത്തിയ "സംസ്ഥാന വയോസേവന അവാർഡ് 2025'ന് നാമനിർദേശം ക്ഷണിച്ചു. വയോജന മേഖലയിൽ മികച്ച പ്രകടനം കാഴ്ചവച്ച കോർപറേഷൻ, മുനിസിപ്പാലിറ്റി, ജില്ലാ പഞ്ചായത്ത്, ബ്ലോക്ക് പഞ്ചായത്ത്, ഗ്രാമപഞ്ചായത്ത്, എൻജിഒ, മെയിന്‍റനൻസ് ട്രിബ്യൂണൽ, ഗവ. വൃദ്ധസദനം, കായികതാരം, കല, സാഹിത്യ, സാംസ്‌കാരിക മേഖലയിലെ പ്രവർത്തനം, ആജീവനാന്ത ബഹുമതി മേഖലകളിലാണ് പുരസ്‌കാരം. ഓരോ വിഭാഗത്തിലുമുള്ള നിർദിഷ്ട മാനദണ്ഡ പ്രകാരമാണ് അപേക്ഷിക്കേണ്ടത്. ജില്ലാ പഞ്ചായത്ത്, കോർപറേഷൻ, മെയിന്‍റനൻസ് ട്രിബ്യൂണൽ എന്നീ വിഭാഗങ്ങളിലുള്ള അപേക്ഷകൾ സാമൂഹ്യനീതി ഡയറക്ടർക്ക് നേരിട്ടാണ് നൽകേണ്ടത്. അവസാന തീയതി സെപ്റ്റംബർ 12. കൂടുതൽ വിവരങ്ങൾക്ക്: www. swd kerala. gov.in, ഫോൺ: 0497 2997811.

വയോജന കമ്മീഷനിൽ കെഎസ്‌സിഎഫിനെ അവഗണിച്ചതിൽ പ്രതിഷേധം

കണ്ണൂർ: കേരളത്തിൽ ആദ്യം രൂപം കൊണ്ടതും പ്രഥമ സർക്കാർ അംഗീകൃത വയോജന സംഘടനയുമായ കേരള സീനിയർ സിറ്റിസൺ ഫോറത്തിനെ (കെഎസ്‌സിഎഫ്) വയോജന കമ്മീഷൻ രൂപീകരണത്തിൽ സംസ്ഥാന സർക്കാർ തീർത്തും അവഗണിച്ചതിൽ കെഎസ്‌സിഎഫ് ജില്ലാ കമ്മിറ്റി പ്രതിഷേധിച്ചു. പള്ളിക്കുളത്തെ ഓഫീസിൽ ചേർന്ന യോഗം സർക്കാർ നിലപാടിനെതിരെ പ്രതിഷേധ പ്രമേയം പ്രമേയം പാസാക്കി. എല്ലാ കക്ഷി നേതാക്കളും പ്രവർത്തകരും ഉൾക്കൊള്ളുന്ന ഒരു സംഘടനയായിട്ടും രാജ്യത്ത് ആദ്യമായി രൂപം കൊണ്ട സംസ്ഥാന വയോജന കമ്മീഷനിൽ ഈ സംഘടനയുടെ ഒരു പ്രതിനിധിയെ പോലും ഉൾപ്പെടുത്താത്തിയിട്ടില്ല. അതിനാൽ ആവശ്യമായ തിരുത്തൽ നടപടികൾ ഉണ്ടാകണമെന്ന് യോഗം ആവശ്യപ്പെട്ടു. ജില്ലാ പ്രസിഡന്‍റ് ഏബ്രഹാം തോണക്കര അധ്യക്ഷത വഹിച്ചു. സെക്രട്ടറി സി.കെ. രഘുനാഥൻ നമ്പ്യാർ ആമുഖ പ്രഭാഷണം നടത്തി റിപ്പോർട്ട് അവതരിപ്പിച്ചു. പി.പി. ബാലൻ, റിട്ട.മേജർ ജനറൽ ടി. പദ്മിനി, അഗസ്റ്റിൻ കുളത്തൂർ, കെ.കെ. മുകുന്ദൻ, എം.പി. ഭട്ടതിരിപ്പാട്, കെ.വി. ശിവരാമൻ, പി.വി. പദ്മനാഭൻ, എ.വി. മോഹനൻ, കെ.സി. ഈപ്പൻ, പി.സി. പദ്മനാഭ, ബി. ജയരാജൻ, ജോണി മുണ്ടയ്ക്കൽ, എം.കെ. ശ്രീധരൻ നമ്പ്യാർ, സി. അച്ചുതൻ, കെ.വി. ഗോപാലൻ, സി.വി. രവീന്ദ്രൻ, ടി. ജയചന്ദ്രൻ എന്നിവർ പ്രസംഗിച്ചു.

സ്കൂളുകളിൽ ഓണാഘോഷം അതിരുകടന്നു; വിദ്യാർഥികൾ ഓടിച്ച വാഹനങ്ങൾ പിടിച്ചെടുത്തു

ഇരിട്ടി: ഓണാഘോഷം പരിധി വിട്ടതോടെ വിദ്യാർഥികൾ ഓടിച്ച വാഹനം പോലീസ് പിടിച്ചെടുത്തു. ലൈസൻസ് ഇല്ലാതെയും വിദ്യാർഥികളെ കുത്തിനിറച്ചും ഓടിച്ച വാഹനങ്ങളാണ് പിടിച്ചെടുത്തത്. പാല, കാവുംപടി സ്കൂളുകളിലെ വിദ്യാർഥികളാണ് പുത്തൻ കാറുകളുമായി സ്കൂളിലെത്തി സ്വന്തം ജീവനും മറ്റുള്ളവരുടെ ജീവനും ഭീഷണിയാകുന്ന വിധം വാഹനം ഓടിച്ചത്. മുഴക്കുന്ന് എസ്എച്ച്ഒ എ.വി. ദിനേശ്, എസ്ഐ ജാൻസി മാത്യു എന്നിവരുടെ നേതൃത്വത്തിലുള്ള പോലീസാണ് വാഹനങ്ങൾ കസ്റ്റഡിയിലെടുത്തത്. വാഹന ഉടമകളെയും രക്ഷിതാക്കളെയും സ്റ്റേഷനിൽ എത്തിച്ചാൽ മാത്രമേ വാഹനങ്ങൾ തിരിച്ചുനൽകുകയുള്ളുവെന്ന് പോലീസ് പറഞ്ഞു.

ഹരിത ഓണം പ്രചരണയാത്ര തുടങ്ങി

കണ്ണൂർ: 'ഈ ഓണം ഹരിത ഓണം' സന്ദേശമുയര്‍ത്തി ശുചിത്വ മിഷന്‍ സംസ്ഥാന വ്യാപകമായി സംഘടിപ്പിക്കുന്ന 'ഹരിത ഓണം' പ്രചാരണ യാത്ര ജില്ലയിൽ പര്യടനം തുടങ്ങി. ജില്ലാ കളക്ടർ അരുൺ കെ. വിജയൻ ഫ്ലാഗ് ഓഫ് ചെയ്തു. അസിസ്റ്റന്‍റ് കളക്ടര്‍ എഹ്‌തെദ മുഫസിര്‍ മുഖ്യാതിഥിയായിരുന്നു. വൃത്തിയുടെ ചക്രവര്‍ത്തിയായി മാവേലി സെപ്തംബര്‍ രണ്ടുവരെ ജില്ലയുടെ പ്രധാന കേന്ദ്രങ്ങളില്‍ സന്ദര്‍ശനം നടത്തി പരിപാടികള്‍ അവതരിപ്പിക്കും. 'വൃത്തിയുടെ ചക്രവര്‍ത്തി' ചോദിക്കുന്ന ശുചിത്വ സംബന്ധമായ ചോദ്യങ്ങള്‍ക്ക് ശരിയുത്തരം നല്‍കുന്നവര്‍ക്ക് സമ്മാനങ്ങളും നൽകും. ഇന്ന് തളിപ്പറമ്പ്, ഇരിട്ടി ഭാഗങ്ങളിലും നാളെ തലശേരി, മുഴപ്പിലങ്ങാട്, പയ്യാമ്പലം ഭാഗങ്ങളിലും പര്യടനം നടത്തും. സെപ്തംബര്‍ ഒന്നിന് പയ്യന്നൂര്‍, പഴയങ്ങാടി, ആന്തൂര്‍ മേഖലയിലും രണ്ടിന് കൂത്തുപറമ്പ്, പാനൂര്‍, പേരാവൂര്‍ ഭാഗങ്ങളിലുമാണ് പര്യടനം. കണ്ണൂര്‍ സിറ്റി, താഴെ ചൊവ്വ, ചക്കരക്കല്‍ ഏച്ചൂര്‍ എന്നിവിടങ്ങളില്‍ ശുചിത്വ മാവേലി സന്ദര്‍ശനം നടത്തി. കണ്ണാടിപ്പറമ്പ് ഗ്രാമകേളി തിയേറ്റേഴ്സുമായി സഹകരിച്ചാണ് ജില്ലാ ശുചിത്വമിഷന്‍ പരിപാടി സംഘടിപ്പിക്കുന്നത്. ജില്ലാ ശുചിത്വമിഷന്‍ അസിസ്റ്റന്‍റ് കോ -ഓഡിനേറ്റര്‍ കെ.എം. സുനില്‍കുമാര്‍, ഹരിത കേരളം പ്രതിനിധികള്‍, എസ്എന്‍ കോളജിലേയും കൃഷ്ണ മേനോന്‍ സ്മാരക ഗവ. വനിതാ കോളജിലേയും എന്‍എസ്എസ് വിദ്യാര്‍ഥികള്‍ എന്നിവര്‍ പങ്കെടുത്തു.

മണ്ണിടിച്ചിൽ; ഗതാഗതം സ്തംഭിച്ചു

ഇരിട്ടി: കൂട്ടുപുഴയിൽ നിന്ന് പേരട്ടയിലേക്ക് പോകുന്ന റോഡരികിലെ വലിയ മൺതിട്ട ഇടിഞ്ഞുവീണ് ഗതാഗതം സ്തംഭിച്ചു. ഇന്നലെ ഉച്ചയോടെ ആയിരുന്നു സംഭവം. രണ്ടുദിവസമായി പെയ്യുന്ന കനത്ത മഴയെ തുടർന്ന് റോഡരികിലെ വലിയ മൺതിട്ട ഇടിഞ്ഞു റോഡിലേക്ക് വീഴുകയായിരുന്നു. ഈ ഭാഗത്തെ മരങ്ങളും കാട്ടുചെടികളും ഉൾപ്പെടെ റോഡിലേക്ക് പതിച്ചു. ഇതോടെ ഇതുവഴിയുള്ള ഗതാഗതം തടസപ്പെട്ടു. പ്രദേശവാസികൾ ചേർന്ന് മരങ്ങളും മറ്റും മുറിച്ചുമാറ്റി ഒരുഭാഗത്ത് കൂടി വാഹനങ്ങൾ കടന്നു പോകാൻ വഴിയൊരുക്കി. മഴ കനത്തതോടെ മൺതിട്ടയുടെ കൂടുതൽ ഭാഗങ്ങൾ ഇടിഞ്ഞുവീഴാൻ സാധ്യതയുണ്ടെന്നാണ് പ്രദേശവാസികൾ പറയുന്നത്. മഴയ്ക്ക് അല്പം ശമനം ലഭിച്ചത് കൂടുതൽ മണ്ണിടിച്ചിൽ ഉണ്ടാകാനുള്ള ആശങ്കയ്ക്ക് അയവ് വന്നിട്ടുണ്ട്. മണ്ണ് താഴേക്ക് പതിക്കുന്ന സമയത്ത് വാഹനങ്ങളും കാൽനട യാത്രക്കാരും ഇതുവഴി വരാതിരുന്നത് വലിയ അപകടം ഒഴിവാക്കി. മാക്കൂട്ടം ചുരം പാതയിലും ഇന്നലെ പുലർച്ചെ മണ്ണിടിച്ചിൽ ഉണ്ടായി. ഏറെനേരം വാഹന ഗതാഗതത്തെ ബാധിച്ചു. പുലർച്ചെയായിരുന്നു മണ്ണിടിച്ചില്‌.

ആനയുടെ അസ്ഥികൂടം; സമീപം കുട്ടിയാന അവശനിലയിൽ

ഇരിട്ടി: ആറളം പുനരധിവാസ മേഖലയിൽ പത്താം ബ്ലോക്ക്‌ കോട്ടപ്പാറ ജലനിധി ടാങ്കിനു സമീപം ആനയുടെ അസ്ഥികൂടം ചിതറിയ നിലയിൽ കണ്ടെത്തി. ഇതിന് സമീപത്തായി കുട്ടിയാനയെ വനം വകുപ്പ് അധികൃതർ അവശനിലയിൽ കണ്ടെത്തി. പതിവ് പട്രോളിംഗിനിടെയാണ് ഫോറസ്റ്റ് ഉദ്യോഗസ്ഥർ നിലത്തുവീണുകിടക്കുന്ന നിലയിൽ കുട്ടിയാനയെ കണ്ടെത്തിയത്. അവശനിലയിൽ കണ്ടെത്തിയ മൂന്ന് വയസുള്ള കുട്ടിയാനയ്ക്ക് വനം വകുപ്പ് വിദഗ്ധ ചികിത്സ നൽകാനുള്ള നടപടികൾ ആരംഭിച്ചു. കുട്ടിയാന വീണുകിടന്നതിനു 100 മീറ്റർ മാറിയാണു ആനയുടെ അസ്‌ഥികൂടം കണ്ടെത്തിയത്. ചിതറിക്കിടക്കുന്ന നിലയിലാണ് അസ്ഥികൂടം. കടുവ പോലുള്ള വന്യജീവി ഇരയാക്കിയതാണോയെന്നു വനം വകുപ്പ് പരിശോധിക്കുന്നുണ്ട്. പ്രാഥമിക പരിശോധനയിൽ ആനയുടെ ശരീരത്തിൽ പരിക്കുകളോ മറ്റ് അസ്വാഭാവികതകളോ കണ്ടെത്തിയിട്ടില്ല. കുട്ടിയാനയ്ക്ക് ആവശ്യമായ പരിചരണം നൽകിയതായും ഫോറസ്റ്റ് വെറ്ററിനറി സർജന്‍റെ നിർദേശപ്രകാരം തുടർചികിത്സകൾക്കുള്ള നടപടികൾ സ്വീകരിച്ചതായും വനം വകുപ്പ് അധികൃതർ അറിയിച്ചു. വിദഗ്‌ധ ചികിത്സ നൽകുന്നതിനു വയനാട് നിന്നു ഡോ. അരുൺ സഖറിയയുടെ നേതൃത്വത്തിലുള്ള വിദഗ്ധ സംഘം ഇന്ന് ആറളത്തെത്തുമെന്നും വനം വകുപ്പ് വ്യക്തമാക്കി. ആറളം ഫാമിൽ രണ്ടു മാസം മുന്പും കാട്ടാനയെ ചരിഞ്ഞ നിലയിൽ കണ്ടെത്തിയിരുന്നു. മൂന്നര വർഷത്തിനിടെ ഒന്പത് ആനകളാണ് ചരിഞ്ഞത്. വന്യജീവി ഇരയാക്കിയ നിലയിൽ കണ്ടെത്തുന്നത് ആദ്യമാണ്.

ആർഎസ്എസ് പ്രവർത്തകൻ അറസ്റ്റിൽ

മാഹി: പൊതു ്രവർത്തകനായ വളവിൽ സുധാകരനെ പകൽ സമയെ ആക്രമിച്ച് പരിക്കേല്‌പ്പിച്ച സംഭവത്തിൽ ഒരു ആർഎസ്എസ് പ്രവർത്തകൻ കൂടി അറസ്റ്റിലായി. പള്ളൂർ കരീക്കുന്നിൽ സുനിലി (43) നെയാണ് മാഹി പോലീസ് അറസ്റ്റ് ചെയ്തത്. വളവിൽ സുധാകരൻ എൻ.ആർ. കോൺഗ്രസ് മാഹി മേഖലാ ഭാരവാഹിയാണ്. ജൂലൈ ഏഴിന് രാവിലെയായിരുന്നു സംഭവം. ബൈക്കിൽ എത്തിയ രണ്ടംഗ മുഖം മൂടി അക്രമിസംഘം ഇരുമ്പു വടി കൊണ്ട് കാൽമുട്ടിന് കീഴെയും കഴുത്തിന് പിൻഭാഗത്തും അടിച്ച് പരിക്കേല്പിക്കുകയായിരുന്നു.നേരത്തെ മൂന്ന് ആർഎസ്എസുകാർ അറസ്റ്റിലായിരുന്നു. ഹരീഷ്, നിവേദ്, നിജേഷ് എന്നിവരാണ് അറസ്റ്റിലായത്. മാഹി പോലീസ് സർക്കിൾ ഇൻസ്പെക്ടർ പി.എ. അനിൽകുമാറിന്‍റെ നേതൃത്വത്തിലാണ് കേസ് അന്വേഷണം നടക്കുന്നത്. അറസ്റ്റിലായ പ്രതിയെ മാഹി കോടതി റിമാൻഡ് ചെയ്തു.

കണ്ണൂർ പൈതൃകോത്സവം സംഘാടകസമിതിയായി

കണ്ണൂർ: വൈവിധ്യമാർന്ന പരിപാടികളോടെ ഒക്ടോബർ അഞ്ച് മുതൽ 12 വരെ സംഘടിപ്പിക്കുന്ന കണ്ണൂർ പൈതൃകോത്സവത്തിന്‍റെ സംഘാടക സമിതി രൂപീകരിച്ചു. കണ്ണൂർ ശിക്ഷക് സദനിൽ നടന്ന സംഘാടക സമിതി രൂപീകരണ യോഗം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്തു. കെ.വി. സുമേഷ് എംഎൽഎ അധ്യക്ഷത വഹിച്ചു. കണ്ണൂരിന്‍റെ കലയും സംസ്കാരവും വൈജ്ഞാനിക പാരമ്പര്യങ്ങളും അനാവരണം ചെയ്യുന്ന വിധത്തിലാണ് കണ്ണൂർ പൈതൃകോത്സവം സംഘടിപ്പിക്കാൻ ഉദ്ദേശിക്കുന്നതെന്ന് മന്ത്രി പറഞ്ഞു. ഒക്ടോബർ അഞ്ചിന് 'മഹാത്മജിയെ അറിയുക' എന്ന പ്രദർശനത്തോടെയും പ്രഭാഷണത്തോടെയും ആരംഭിക്കും. സംഘാടക സമിതി രക്ഷാധികാരികളായി മുഖ്യമന്ത്രി പിണറായി വിജയൻ, സ്പീക്കർ എ.എൻ. ഷംസീർ എന്നിവരെയും ചെയർമാനായി മന്ത്രി കടന്നപ്പള്ളി രാമചന്ദ്രനേയും തെരഞ്ഞെടുത്തു. കണ്ണൂർ മേയർ മുസ്‌ലിഹ് മഠത്തിൽ, എംപി മാരായ കെ. സുധാകരൻ, ഡോ. വി. ശിവദാസൻ, പി. സന്തോഷ്കുമാർ, കെ.വി സുമേഷ് എംഎൽഎ, ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാകളക്ടർ അരുൺ കെ. വിജയൻ, കണ്ണൂർ ബ്ലോക്ക് പഞ്ചായത്ത് പ്രസിഡന്‍റ് കെ.സി. ജിഷ, മുണ്ടേരി പഞ്ചായത്ത് പ്രസിഡന്‍റ് എ. അനിഷ, യുവജന കമ്മീഷൻ ചെയർമാൻ എം. ഷാജർ എന്നിവർ വൈസ് ചെയർമാൻമാരും പുരാവസ്തു വകുപ്പ് ഡയറക്ടർ ഇ. ദിനേശൻ ജനറൽ കൺവീനറുമാണ്. ഫോക്‌ലോർ അക്കാദമി സെക്രട്ടറി എ.വി. അജയകുമാർ, മ്യൂസിയം വകുപ്പ് ഡയറക്ടർ പി.എസ്. മഞ്ജുളാദേവി, പുരാരേഖ വകുപ്പ് ഡയറക്ടർ എസ്. പാർവതി, ലളിതാകലാ അക്കാദമി സെക്രട്ടറി എബി എൻ. ജോസഫ്, എം.കെ. മനോഹരൻ, പി.കെ. വിജയൻ, കണ്ണൂർ തഹസിൽദാർ ആഷിക് തോട്ടോൻ എന്നിവർ കൺവീനർമാരുമാണ്. മ്യൂസിയം വകുപ്പ് ഡയറക്ടർ പി.എസ് മഞ്ജുളാദേവി, പുരാവസ്തു വകുപ്പ് ഡയറക്ടർ ഇ ദിനേശൻ, പുരാരേഖ വകുപ്പ് ഡയറക്ടർ എസ്. പാർവതി, കണ്ണൂർ ബ്ലോക്ക്‌ പഞ്ചായത്ത്‌ പ്രസിഡന്‍റ് കെ. സി. ജിഷ, എടക്കാട് ബ്ലോക്ക്‌ പഞ്ചായത്ത്‌ പ്രസിഡന്‍റ് പി.കെ. പ്രമീള, മുണ്ടേരി പഞ്ചായത്ത്‌ പ്രസിഡന്‍റ് എ. അനിഷ, ഡെപ്യൂട്ടി കളക്ടർ കെ.വി. ശ്രുതി, മോൺ. ക്ലാരൻസ് പാലിയത്ത്, ശൗര്യചക്ര പി.വി. മനീഷ്, മ്യൂസിയം വകുപ്പ് സൂപ്രണ്ട് പി.എസ്. പ്രിയരാജൻ എന്നിവർ പ്രസംഗിച്ചു.

ഇരിട്ടിയിൽ വർധിപ്പിച്ച ചായ, പലഹാര വിലകുറച്ചു

ഇരിട്ടി: ഇരിട്ടിയിൽ ചായയ്ക്കും പലഹാരങ്ങൾക്കും കൂട്ടിയ വില കുറച്ചു. പുതുക്കിയ വില ഇന്നു മുതൽ പ്രാബല്യത്തിൽ വരും. ചായയുടെ വില 12 രൂപയായും പലഹാരങ്ങൾക്ക് 13 രൂപയുമായാണ് പുതുക്കി നിർണയിച്ചത്. ചായക്ക് 13 രൂപയും എല്ലാ പലഹാരങ്ങൾക്കും 15 രൂപയുമാക്കിയുമാണ് കഴിഞ്ഞ ദിവസം വർധിപ്പിച്ചത്. മൂന്ന് രൂപയുടെ വർധനവിനെതിരെ പൊതുജങ്ങളിൽ നിന്ന് പ്രതിഷേധം ഉയർന്നു. നടപടിക്കെതിരെ കഴിഞ്ഞദിവസം പത്ര വാർത്തയെ തുടർന്ന് യുവജന സംഘടനകളും നിരക്ക് വർധനവിനെതിരെ രംഗത്തെത്തി. ഹോട്ടൽ ആൻഡ് റസ്റ്റോറന്‍റ്സ് അസോസിയേഷൻ ഭാരവാഹികളുമായി യുവജന സംഘടനകൾ നടത്തിയ ചർച്ചയെ തുടർന്നാണ് ഭീമമായി വർധിപ്പിച്ച വില കുറയ്ക്കാനുള്ള തീരുമാനം ഉണ്ടായത്. ചർച്ചയിൽ യുവജന സംഘടനകൾക്ക് വേണ്ടി ഡിവൈഎഫ്ഐ ബ്ലോക്ക് പ്രസിഡന്‍റ് പി.വി. ബിനോയി, വൈസ് .പ്രസിഡന്‍റ് എം. നിഖിലേഷ്, യൂത്ത് കോൺഗ്രസ് ഇരിട്ടി മണ്ഡലം പ്രസിഡന്‍റ് സി.കെ. അർജുൻ, ബിജെപി ഇരിട്ടി മണ്ഡലം ജനറൽ സെക്രട്ടറി പ്രശോഭ് എന്നിവർ ഹോട്ടൽ റസ്റ്റോറന്‍റ്സ് അസോസിയേഷൻ ജില്ലാ രക്ഷാധികാരി ഇബ്രാഹിം ഹാജി, ജില്ലാ വൈസ് പ്രസിഡന്‍റ് എഴുത്തൻ രാമകൃഷ്ണൻ, യൂണിറ്റ് പ്രസിഡന്‍റ് വി.വി. ജാഫർ, പ്രവീൺ, സജിത്ത് എന്നിവരുമായി നടത്തിയ ചർച്ചയിലാണ് തീരുമാനം.

കണ്ണൂർ സിറ്റി പോലീസ് അത്‌ലറ്റിക് മീറ്റ് ലോഗോ പ്രകാശനം ചെയ്തു

കണ്ണൂർ: സിറ്റി പോലീസിന്‍റെ ആഭിമുഖ്യത്തിൽ സംഘടിപ്പിക്കുന്ന മൂന്നാമത് അത്‌ലറ്റിക് മീറ്റ് - 2025 സെപ്റ്റംബർ 19, 20 തീയതികളിൽ നടത്തും. ലോഗോ പ്രകാശനം പോലീസ് കമ്മീഷണർ നിധിൻരാജ് നിർവഹിച്ചു. ‌ ജില്ലയിലെ പോലീസ് ഉദ്യോഗസ്ഥർ തയാറാക്കിയവയിൽ നിന്ന് സിപിഒ ടി. നിതിൻ രൂപകല്പന ചെയ്ത ലോഗോ തെരഞ്ഞെടുത്തു. ചടങ്ങിൽ അഡീഷണൽ എസ്.പി. സജേഷ് വാഴളാപ്പിൽ, ഡിസ്ട്രിക്ട് ക്രൈം ബ്രാഞ്ച് എസിപി എം.ടി. ജേക്കബ് , നാർക്കോട്ടിക് സെൽ എസിപി പി. രാജേഷ്, സ്പെഷൽ ബ്രാഞ്ച് എസിപി എ.വി. ജോൺ, സീനിയർ അഡ്മിനിസ്ട്രേറ്റീവ് അസിസ്റ്റന്‍റ് അനീഷ് കുമാർ, കണ്ണൂർ ടൗൺ പോലീസ് ഇൻസ്പെക്ടർ ശ്രീജിത്ത് കൊടേരി, ടെലികമ്യൂണിക്കേഷൻ ഇൻസ്പെക്ടർ സന്തോഷ്, മാനേജർ എം.സി. ലിഷ, അക്കൗണ്ട്സ് ഓഫീസർ എ. സോനാ തുടങ്ങിയവർ ചടങ്ങിൽ പങ്കെടുത്തു.

മടപ്പുരച്ചാൽ പരിശുദ്ധ വേളാങ്കണ്ണി മാതാ പള്ളി തിരുനാൾ നാളെ മുതൽ

പേരാവൂർ: മടപ്പുരച്ചാൽ പരിശുദ്ധ വേളാങ്കണ്ണി പള്ളിയിൽ തിരുനാളും എട്ടുനോന്പാചരണവും നാളെ മുതൽ സെപ്റ്റംബർ എട്ടുവരെ നടക്കും. നാളെ മുതൽ സെപ്റ്റംബർ എട്ടുവരെ നടക്കുന്ന തിരുക്കർമങ്ങൾക്ക് ഫാ. മാത്യു പാലമറ്റം, ഫാ. തോമസ് പട്ടാകുളം, ഫാ. അരുൺ നട്ടാലിൽ ഒഎഫ്എം, ഫാ. സെബാസ്റ്റ്യൻ പൊടിമറ്റം, ഫാ. ജോൺ പൊന്നന്പേൽ, ഫാ. മാത്യു പുതുക്കാട്ടുചിറ, ഫാ. ക്രിസ്റ്റോ കാരക്കാട്ട് ഐഎസ്‌സിഎച്ച്, റവ.ഡോ. തോമസ് കൊച്ചുകരോട്ട്, റവ.ഡോ.ജോസഫ് മുട്ടത്തുകുന്നേൽ എന്നിവർ കാർമികത്വം വഹിക്കും. ദിവസവും ഉച്ചകഴിഞ്ഞ് 3.45ന് ആരാധന, ജപമാല, വൈകുന്നേരം 4.30ന് ആഘോഷമായ വിശുദ്ധ കുർബാന, ആറിന് ലദീഞ്ഞ്, നൊവേന, മെഴുകുതിരി പ്രദക്ഷിണം. എട്ടിന് തിരുനാൾ ദിനത്തിൽ രാവിലെ 8.30ന് ആരാധന, ജപമാല, ഒന്പതിന് ആഘോഷമായ തിരുനാൾ കുർബാന, പ്രദക്ഷിണം. 12ന് സമാപന ആശീർവാദം, പാച്ചോർ നേർച്ച. തിരുക്കർമങ്ങൾക്കുശേഷം ദിവസവും വാഹന സൗകര്യം ഉണ്ടായിരിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]