ADVERTISEMENT

ADVERTISEMENT

‘സെക്കൻഡ് സൺ‌ഡേ -യൂത്ത് സൺ‌ഡേ'

പയ്യാവൂർ: കെസിവൈഎം ഉളിക്കൽ യൂണിറ്റിന്‍റെ നേതൃത്വത്തിൽ 'സെക്കൻഡ് സൺഡേ - യൂത്ത് സൺഡേ'യിൽ ഉളിക്കൽ ഉണ്ണിമിശിഹ ഇടവക വികാരി ഫാ.തോമസ് കിടാരത്തിൽ, കെസിവൈഎം തലശേരി അതിരൂപത പ്രസിഡന്‍റ് അബിൻ വടക്കേക്കര എന്നിവർ ചേർന്ന് കെസിവൈഎം അതിരൂപത മുൻ പ്രസിഡന്‍റ് എബിൻ കുമ്പുക്കലിനെ ആദരിച്ചു.

കെസിവൈഎം, എസ്എംവൈഎം തലശേരി അതിരൂപത സമിതിയുടെ ആഭിമുഖ്യത്തിൽ എല്ലാ മാസങ്ങളിലും രണ്ടാമത്തെ ഞായറാഴ്ച അതിരൂപതയിലെ 204 യൂണിറ്റുകളിലും സംഘടിപ്പിക്കുന്ന 'സെക്കൻഡ് സൺഡേ യൂത്ത് സൺ‌ഡേ' യുടെ പ്രവർത്തന ഭാഗമായാണ് കെസിവൈഎം രൂപത, സംസ്ഥാന മുൻകാല ഭാരവാഹികളെ ആദരിച്ചത്.

ADVERTISEMENT

കെഎസ്‌യു ഡിഐജി ഓഫീസ് മാർച്ചിൽ സംഘർഷം; അറസ്റ്റിനെതിരേ പോലീസ് വാഹനം തടഞ്ഞ് പ്രതിഷേധം

കണ്ണൂർ: കേരളത്തിലെ പോലീസ് രാജ് അവസാനിപ്പിക്കുന്നതിനും വടക്കാഞ്ചേരിയിൽ പ്രവർത്തകരെ മുഖം മൂടിയണിയിച്ചു കോടതിയിൽ ഹാജരാക്കിയതിനുമെതിരേ കണ്ണൂർ റേഞ്ച് ഡിഐജി ഓഫീസി ലേക്ക് കെഎസ്‌യു ജില്ലാ കമ്മിറ്റി നടത്തിയ പ്രതിഷേധ മാർച്ചിൽ സംഘർഷം. പോലീസും കെഎസ്‌യു പ്രവർത്തകരും തമ്മിൽ നഗരത്തിൽ ഒരു മണിക്കൂറോളം നീണ്ട തെരുവുയുദ്ധമാണ് അരങ്ങേറിയത്. പ്രവർത്തകരെ പിരിച്ചുവിടുന്നതിനായി പോലീസ് മൂന്നു തവണ ജലപീരങ്കി പ്രയോഗിച്ചു. സംസ്ഥാന ഉപാധ്യക്ഷൻ പി. മുഹമ്മദ് ഷമ്മാസ് മാർച്ച് ഉദ്ഘാടനം ചെയ്ത ശേഷമാണ് സംഘർഷം തുടങ്ങിയത്. കെഎസ്‌യു പ്രവർത്തകർ പോലീസ് ബാരിക്കേഡ് മറിച്ചിടാൻ ശ്രമിക്കുകയും ജലപീരങ്കിക്കു നേരെ കൊടിക്കെട്ടിയ വടി എറിയുകയും ചെയ്തു. ഇതോടെയാണ് ജലപീരങ്കി പ്രയോഗിച്ചത്. മൂന്നു തവണ ജലപീരങ്കി പ്രയോഗിച്ചിട്ടും പ്രവർത്തകർ മുദ്രാവാക്യം വിളികളുമായി ബാരിക്കേഡ് മറിച്ചിടാൻ ശ്രമിച്ചതോടെ ഇവരെ അറസ്റ്റു ചെയ്യാനുള്ള നീക്കം പോലീസ് നടത്തി. നിലത്തിരുന്ന പ്രവർത്തകരെ പോലീസുകാർ വലിച്ചിഴച്ച് പോലീസ് വാഹനത്തിൽ കയറ്റാൻ ശ്രമിച്ച തോടെ ഇരുവിഭാഗവും തമ്മിൽ വാക്കേറ്റവും കൈയാങ്കളിയുമായി. പല പ്രവർത്തകരേയും പോലീസ് മതിലിനോട് ചേർത്തു അമർത്തിപിടിച്ചു കീഴടക്കാൻ ശ്രമിച്ചതാണ് പ്രവർത്തകരെ പ്രകോപിതരാക്കി. അറസ്റ്റു ചെയ്യാനുള്ള നീക്കം നേതാക്കളടക്കം ചെറുത്തു. ഇതിൽ പ്രതിഷേധിച്ച നേതാക്കളായ മുഹമ്മദ് ഷമ്മാസിനെയും അതുലിനെയും ബലം പ്രയോഗിച്ച് പിടിച്ചുവലിച്ച് പോലീസ് വാനിൽ കയറ്റി. പലരുടെയും ചെരുപ്പുകൾ തെറിച്ചുപോയി. ഉടുമുണ്ടുകൾ അഴിഞ്ഞുവീണു. റോഡ് ഉപരോധിക്കാനായി ഓടിയ പ്രവർത്തകരെ പോലീസ് പിന്തുടർന്നു പിടികൂടി. ഉന്തുിലും തള്ളിലും ചില പോലീസുകാരും റോഡിൽ വീണു. ലാത്തിയും തൊപ്പിയും തെറിച്ചുപോയി. പോലീസ് വാനിനകത്തും പ്രവർത്തകരും പോലീസും തമ്മിൽ വാക്കേറ്റവും കൈയാങ്കളിയും ഉണ്ടായി. ഒരു കൂട്ടം പ്രവർത്തകർ പോലീ സ് വാൻ തടഞ്ഞു. റോഡിൽ കിടന്നും കുത്തിയിരുന്നും വാഹനം തടഞ്ഞതോടെ അറസ്റ്റു ചെയ്തവരെ സ്റ്റേഷനിൽ എത്തിക്കാനാകാതെ പോലീസ് കുഴങ്ങി. ഒടുവിൽ കൂടുതൽ പോലീസ് എത്തി ഇവരെ അറസ്റ്റു ചെയ്തു നീക്കിയതോടെയാണ് വാഹനം മുന്നോട്ട് എടുക്കാനായത്. വാനിലുള്ള പ്രവർത്തകർ ഡോറിനു മുന്നിൽ പ്രതിരോധം തീർത്തതോടെ പിന്നീട് അറസ്റ്റു ചെയ്ത വരെ വാനിൽ കയറ്റാനാകാതെ പോലീസ് ജീപ്പിൽ കയറ്റിയാണ് സ്റ്റേഷനിൽ എത്തിച്ചത്. മുക്കാൽ മണിക്കൂറിനു ശേഷമാണ് സംഘർഷം അവസാനിച്ചത്. ഇന്നലെ ഉച്ചയ്ക്കാണ് കണ്ണൂർ ഡിസിസി ഓഫീസിൽനിന്നു കെഎസ്‌യു പ്രവർത്തകർ റേഞ്ച് ഡിഐജി ഓഫിസിലേക്ക് പ്രതിഷേധ മാർച്ച് നടത്തിയത്. മാർച്ച് ഡിഐജി ഓഫീസിനു സമീപം താവക്കര സ്കൂളിനു മുന്നിലെ റോഡിൽ പോലീസ് ബാരിക്കേഡ് ഉയർത്തി തടഞ്ഞിരുന്നു. ജില്ലാ പ്രസിഡന്‍റ് എം.സി. അതുൽ അധ്യക്ഷത വഹിച്ചു. സംസ്ഥാന ഉപാധ്യക്ഷൻ പി. മുഹമ്മദ് ഷമ്മാസ് ഉദ്ഘാടനം ചെയ്തു. നേതാക്കളായ ആഷിത്ത് അശോകൻ, കെ. കാവ്യ, അർജുൻ കോറോം, അലക്സ് ബെന്നി, അക്ഷയ് മാട്ടൂൽ, എബിൻ കേളകം, വൈഷ്ണവ് അരവഞ്ചാൽ, സി.എച്ച്. മുബാസ്, നവനീത് ഷാജി, അർജുൻ ചാലാട് തുടങ്ങിയവർ നേതൃത്വം നല്കി. പോലീസ് പിണറായിയുടെ അടുക്കള സേവകരായി: പി. മുഹമ്മദ് ഷമ്മാസ് കണ്ണൂർ: പാർട്ടി തിട്ടൂരമനുസരിച്ച് പ്രതിപക്ഷ വിദ്യാർഥി യുവജന നേതാക്കളെ കൈകാര്യം ചെയ്ത പോലീസ് ഉദ്യോഗസ്ഥരുടെ റാങ്ക് പട്ടിക തയാറാക്കി മുൻകാല പ്രാബല്യത്തോടെ വിശ്രമ ജീവിതം അനുവദിക്കുമെന്ന് കെഎസ്‌യു സംസ്ഥാന ഉപാധ്യക്ഷൻ പി. മുഹമ്മദ് ഷമ്മാസ്. സർക്കാർ ശമ്പളം വാങ്ങുന്ന ഗുണ്ടകളായി കേരള പോലീസ് സേനയെ പിണറായി സർക്കാർ അധഃപതിപ്പിച്ചത് കൈയും കെട്ടി നോക്കി നില്ക്കാൻ കഴിയില്ലെന്നും അദ്ദേഹം പറഞ്ഞു. കെഎസ്‌യു കണ്ണൂർ റേഞ്ച് ഡിഐജി ഓഫീസിലേക്ക് നടത്തിയ മാർച്ച്‌ ഉദ്ഘടനം ചെയ്തു പ്രസംഗിക്കുകയായിരുന്നു ഷമ്മാസ്. സ്കോട്ട്‌ലൻഡ് യാർഡിനെപ്പോലും വെല്ലുന്ന മികവ് പുലർത്തിയ കേരളാ പോലീസ് ഇടതു ഭരണത്തിൽ പിണറായിയുടെ അടുക്കള സേവകരായി തരംതാണു. റെഡ് വോളന്‍റി യർമാരിൽ നിന്നും ഡെപ്യൂട്ടേഷനിൽ വന്നവരെ പോലെയാണ് ചില ഉദ്യോഗസ്ഥർ ഇപ്പോൾ പെരുമാറുന്നത്. കേരളമോന്നും സിപിഎം ഭരിക്കുമെന്ന് പ്രതീക്ഷിക്കേണ്ട- ഷമ്മാസ് ഓർമിപ്പിച്ചു.

പ്രായം മറന്ന് അവർ ആഹ്ളാദത്തീവണ്ടിയേറി

കണ്ണൂർ: പതിവു തിരക്കുള്ള കണ്ണൂർ റെയിൽവേ സ്റ്റേഷൻ ഒന്നാം നമ്പർ പ്ലാറ്റ്‌ഫോമിൽ ആകാംക്ഷ യോടെ ഒരുകൂട്ടം ആളുകൾ വണ്ടി കാത്തുനിൽക്കുന്നു. അതൊരു സാധാരണ യാത്രയുടെ തുടക്ക മായിരുന്നില്ല. ജീവിതത്തിലെ ആഗ്രഹങ്ങളെല്ലാം ഒറ്റ മുറിയിലേക്കും മനസിലേക്കും മാത്രമായി ഒതുങ്ങുന്ന പതിവ് തെറ്റിച്ച യാത്ര. കണ്ണൂർ അഴീക്കോട് സർക്കാർ വയോജന കേന്ദ്രത്തിലെ മുപ്പതോളം വരുന്ന അമ്മമാരും അച്ഛന്മാരും നഷ്ടപ്പെട്ടുപോയെന്നു കരുതിയ അവരുടെ നല്ല നിമിഷങ്ങളിലേക്ക് സന്തോഷത്തീവണ്ടി കയറുകയായിരുന്നു. അച്ഛനമ്മമാർക്ക് വന്ദേ ഭാരത് ട്രെയിനിൽ കയറണമെന്ന് ആഗ്രഹം. പിന്നെ താമസിച്ചില്ല. ബേക്കൽ കോട്ടയിലേക്കായിരുന്നു ആ സ്‌പെഷൽ യാത്ര. ചിലർക്ക് അത് ആദ്യത്തെ ട്രെയിൻ യാത്രയായിരുന്നുവെങ്കിൽ ചിലർക്ക് ഒറ്റപ്പെടലും അവഗണനയും വേദനകളും താണ്ടി മുന്നേറുന്ന അനുഭവമായിരുന്നു. സംസ്ഥാന സാമൂഹികനീതി വകുപ്പിന് കീഴിൽ കണ്ണൂർ ബ്ലോക്ക് പഞ്ചായത്തിന്‍റെ സഹകരണത്തോടെ പ്രവർത്തിക്കുന്ന വയോജന കേന്ദ്രം നിരാലംബരും വാർധക്യത്തിന്‍റെ അവശതകൾ പേറുന്നവരുമായ വയോജനങ്ങളെ പരിപാലിക്കുന്നതിന്‍റെ പുതിയൊരു മാതൃക തീർക്കുകയാണ്. വർഷത്തിൽ ഒരു യാത്ര എന്ന രീതിയിൽ 2022 മുതൽ തന്നെ ഇത്തരത്തിൽ യാത്രകൾ സംഘടിപ്പിച്ചുവരുന്നുണ്ട്. ഇപ്പോൾ രണ്ടുമാസത്തിൽ ഒരു യാത്ര എന്ന നിലയിൽ ഈ അച്ഛനമ്മമാർ പുറംലോകത്തിന്‍റെ കാഴ്ചകളിലേക്ക് ചേക്കേറുന്നു. ബ്ലോക്ക് പഞ്ചായത്ത് പ്രസിഡന്‍റും ജനപ്രതിനിധികളും സാമൂഹ്യപ്രവർത്തകരും ചേർന്ന മാനേജ്‌മെന്‍റിന്‍റെ മാർഗനിർദേശത്തിലാണ് സ്ഥാപനം പ്രവർത്തിക്കുന്നത്. പറശിനി മുത്തപ്പൻ ക്ഷേത്രം, പെരളശേരി സുബ്രമണ്യ ക്ഷേത്രം തുടങ്ങിയ ആരാധനാലയങ്ങൾ, പെറ്റ്‌സ് പാർക്ക് എന്നിവ സന്ദർശിക്കാനും സർക്കസ് ഷോകൾ, ഗാനമേളകൾ, നിരവധി കലാകായിക പരിപാടികൾ എന്നിവ ആസ്വദിക്കാനും അവസരം ഒരുക്കിയിട്ടുണ്ട്. സബ് കളക്ടറുടെ ആർദ്രദീപം പദ്ധതി പ്രകാരം തലശേരിയിൽ സിനിമ കാണാനും അവസരമുണ്ടായി. യാത്ര ചെയ്തു മടങ്ങുക എന്നതിനപ്പുറം അവർ അനുഭവങ്ങൾ ഹൃദയത്തിൽ കുറിച്ചുവച്ചു. ഒടുവിലത് "ഓർമകൾ തുടരുന്നു' എന്ന പേരിൽ പുസ്തകവുമായി. വയോജനങ്ങളുടെ ചെറിയ ആഗ്രഹങ്ങൾ നിറവേറ്റുന്നതിനോടൊപ്പം അവരുടെ കായികവും മാനസികവുമായ ആരോഗ്യ സംരക്ഷണത്തിന് നിരവധിയായ പ്രവർത്തനങ്ങൾ വയോജന കേന്ദ്രത്തിൽ നടപ്പിലാക്കുന്നു. ആരോഗ്യവും ഉന്മേഷവും ഉറപ്പാക്കുവാൻ എല്ലാ ദിവസവും യോഗ പരിശീലനം സംഘടിപ്പിക്കുന്നു. മെഡിക്കൽ ട്രീറ്റ്‌മെന്‍റ്, ഫോളോ അപ്പ് എന്നിവ കൃത്യമായി നടപ്പാക്കുന്നു. 24 മണിക്കൂറും പ്രവർത്തി ക്കുന്ന നഴ്‌സിംഗ് മുറിയും ജെപിഎച്ച്എൻ തസ്തികയിൽ ഒരു നഴ്‌സും പ്രവർത്തിക്കുന്നുണ്ട്. സ്വയംതൊഴിൽ ചെയ്യാൻ താത്പര്യമുള്ളവർക്ക് അതിനുള്ള പരിശീലനവും നല്കുന്നുണ്ട്. ഇവർക്ക് ആവശ്യമായ സോപ്പുപൊടികൾ അവർ തന്നെ നിർമിക്കുന്നു. പഴയകാല ഓർമകൾ ഒന്നിച്ച് പങ്കുവയ്ക്കുന്നു. ചെസ്, കാരംസ് തുടങ്ങിയ കളികളിൽ ഏർപ്പെടുന്നു. ലൈബ്രറിയും വായനാമുറിയും സജീവമാണ്. അവശരായവർക്ക് മുകളിലത്തെ നിലയിൽ കയറാൻ കൈവരികളും സജ്ജമാക്കിയിട്ടുണ്ട്. നിരവധിയായ കാരണങ്ങളാൽ നിറം മങ്ങിപ്പോയ ജീവിതത്തിലേക്ക് സന്തോഷം തിരിച്ചെത്തിക്കുവാനുള്ള സഞ്ചാരത്തിലാണ് ഇവർ. ആഗ്രഹങ്ങൾക്ക് പ്രായവും പ്രയാസവും പ്രതിബന്ധങ്ങൾ സൃഷ്ടിക്കുന്നില്ല എന്ന പ്രഖ്യാപനമാണ് ഇവർ നടത്തുന്നത്.

പേരട്ടയുടെ സീഡ് ബോളുകൾ ബ്രഹ്മഗിരിയിൽ തളിരിടും

ഇരിട്ടി : വേൾഡ് റിക്കാർഡ് സ്വന്തമാക്കിയ പേരട്ട സെന്‍റ് ജോസഫ് സ്കൂളിലെ വിദ്യാർഥികൾ നിർമിച്ച 20010 സീഡ് ബോളുകൾ കാട്ടിലെറിഞ്ഞു. അധ്യാപകരുടെയും പിടിഎയുടെയും നേതൃത്വത്തിൽ കർണാടക വനംവകുപ്പിന്‍റെ സഹായത്തോടെ ബ്രഹ്മഗിരി വന്യജീവി സങ്കേതത്തിനുള്ളിലാണ് സീഡ് ബോളുകൾ എറിഞ്ഞത്. രാവിലെ മുതൽ പെയ്ത മഴ വകവയ്ക്കാതെ, ആയുധധാരികളായ വനപാലകരുടെ സംരക്ഷണയിൽ രണ്ടു കിലോമീറ്റർ വനത്തിനുള്ളിലൂടെ നടന്നാണ് വിദ്യാർഥികൾ സീഡ് ബോൾ എറിഞ്ഞത്. പ്രകൃതിയെ അറിഞ്ഞ്, മഴയിൽ നനഞ്ഞ് വിദ്യാർഥികളുടെ യാത്ര വേറിട്ട അനുഭവമായി. സിസ്റ്റേഴ്സ് ഓഫ് സെന്‍റ് ജോസഫ് അനെസി വിശാഖപട്ടണം പ്രോവിൻസിന്‍റെ 375 -ാമത് വാർഷികത്തോടനുബന്ധിച്ചായിരുന്നു വേൾഡ് റിക്കാർഡിന് അർഹമായ സീഡ് ബോൾ നിർമാണം. പ്രോവിൻസിലെ 15 സ്കൂളുകളിലെ വിദ്യാർഥികളാണ് ഒരേസമയം ഒരു മണിക്കൂർകൊണ്ട് 11,90,796 ബോളുകൾ നിർമിച്ചത്. റേഞ്ച് ഫോറസ്റ്റ് ഓഫീസർമാരായ മാധവ ദോഡബുടഗി, ചന്ദ്രശേഖര എം. മുരളി, അസി. ആർഎഫ്ഒ ദയാനന്ദ, രാമചന്ദ്ര, ലോകേഷ്, പനജേഷ്, ഹമീദ്, മീട്ടു എന്നിവരും മുഖ്യാധ്യാപിക സിസ്റ്റർ ടെക്സി മാത്യു,അധ്യാപകരായ സിസ്റ്റർ ഡെർലി ജോസഫ്, സിസ്റ്റർ സുനീത, സിസ്റ്റർ ഷ്മിന പോൾ, സിജി, കരിഷ്മ, ലിറ്റി,പഞ്ചായത്തംഗം ബിജു വെങ്ങലപള്ളി, പിടിഎ പ്രസിഡന്‍റ് ബിജു പൊട്ടക്കുളം, എം പിടിഎ അംഗങ്ങളായ സിന്ധു, സാബിറ എന്നിവർ നേതൃത്വം നൽകി.

വാരിയേഴ്സ് പ്രതിരോധത്തിന് കരുത്തേകാന്‍ അര്‍ജന്‍റീനന്‍ താരം

കണ്ണൂര്‍: പ്രതിരോധനിരയ്ക്ക് ശക്തിപകരാന്‍ മെസിയുടെ നാട്ടില്‍നിന്ന് നിക്കോളാസ് ഡെല്‍മോണ്ടെയെ ടീമിലെത്തിച്ച് കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബ്. ക്ലബ് ഫുട്‌ബോളില്‍ പരിചയസമ്പന്നനായ അര്‍ജന്‍റീനന്‍ സെന്‍റര്‍ ബാക്കാണ് നിക്കോളാസ്. അര്‍ജന്‍റീനയിലെ ഒലിവയില്‍ ജനിച്ച താരം ദക്ഷിണ അമേരിക്ക, യൂറോപ്പ്, ഏഷ്യ എന്നീ ഭൂഖണ്ഡങ്ങളില്‍ കളിച്ച അനുഭവസമ്പന്നനാണ്.1.80 സെന്‍റിമീറ്റര്‍ ഉയരമുള്ള താരത്തിന് ലെഫ്റ്റ് ബാക്കായും ഡിഫന്‍സീവ് മിഡ്ഫീല്‍ഡറായും കളിക്കാന്‍ സാധിക്കും. അര്‍ജന്‍റീനന്‍ ക്ലബ് ഇന്‍ഡിപെന്‍ഡിയെന്‍റില്‍ നിന്നാണ് കരിയര്‍ ആരംഭിച്ചത്. 2010 ല്‍ ടീമിനൊപ്പം കോപ്പ സുദാമെറിക്കാന കിരീടവും നേടി. തുടര്‍ന്ന് ഡിനാമോ ടിരാന (അല്‍ബേനിയ), ജോഹോര്‍ ദാരുള്‍ താഝിം (മലേഷ്യ), ബഷുന്ധര കിംഗ്‌സ് (ബംഗ്ലാദേശ്), ചിറ്റാ ഡി ഫാസാനോ (ഇറ്റലി), മാര്‍ബെല്ല, എക്‌സ്‌ട്രെമദൂറ, സബഡെല്‍, സാമോറ, മെലില്ല, ലിനന്‍സെ (സ്പെയിന്‍) തുടങ്ങിയ ടീമുകള്‍ക്ക് വേണ്ടി കളിച്ചിട്ടുണ്ട്. കഴിഞ്ഞ സീസണില്‍ സ്പാനിഷ് ക്ലബ് ഹുവെന്തൂദ് ടോറെമൊലിനോസിനായി കളിച്ചു. ഇന്‍ഡിപെന്‍ഡിയെന്‍റിനൊപ്പം കളിക്കുമ്പോള്‍ അര്‍ജന്‍റീനിയന്‍ ഇതിഹാസ താരം ഗാബി മിലിറ്റോക്കൊപ്പം കളിച്ചിരുന്നു. കൂടാതെ സ്‌പെയിന്‍ താരം ജീസുസ് നവാസ്, അര്‍ജന്‍റീനയുടെ ബനേഗ, ഇക്കാര്‍ഡി എന്നിവര്‍ക്കെതിരെ സെവിയ, ഇന്‍റര്‍ മിലാന്‍ തുടങ്ങിയ ടീമുകള്‍ക്കെതിരെ സൗഹൃദ മത്സരം കളിച്ചിട്ടുണ്ട്. കരിയറിലുടനീളം നിരവധി മത്സരങ്ങള്‍ കളിച്ച താരം വിവിധ ടീമുകളുടെ ലീഗ് പ്രമോഷനുകള്‍ക്കും കപ്പ് വിജയങ്ങള്‍ക്കും നിര്‍ണായകമായി. അല്‍ബേനിയ, ബംഗ്ലാദേശ് എന്നിവിടങ്ങളില്‍ ആഭ്യന്തര കിരീടങ്ങളും നേടിയിട്ടുണ്ട്. മുഖ്യപരിശീലകന്‍ ഇന്നെത്തും കണ്ണൂര്‍: വാരിയേഴ്‌സിന്‍റെ മുഖ്യപരിശീലകന്‍ മാനുവല്‍ സാഞ്ചസ് ഇന്നെത്തും. കണ്ണൂര്‍ വിമാനത്താവളത്തില്‍ ഉച്ചയ്ക്ക് 12.20 ന് എത്തുന്ന പരിശീലകനെ ക്ലബ് അധികൃതരും റെഡ് മറിനൈസും ചേര്‍ന്ന് സ്വീകരിക്കും. ആദ്യ സീസണില്‍ കണ്ണൂര്‍ വാരിയേഴ്‌സിനെ സെമി ഫൈനലിലെത്തിച്ച പരിശീലകനാണ് മാനുവല്‍ സാഞ്ചസ്. മുഖ്യപരിശീലകനൊപ്പം അര്‍ജന്‍റീനന്‍ സെന്‍റര്‍ ബാക്ക് നിക്കോളാസ് ഡെല്‍മോണ്ടയും ഉണ്ടാകും.

കായികാധ്യാപകരുടെ നിസഹകരണ സമരം: താളംതെറ്റി സ്കൂൾ ഗെയിംസ്

കണ്ണൂര്‍: കായികാധ്യാപകർ നിസഹകരണ സമരം തുടരുന്നത് സ്കൂൾ ഗെയിംസ് മത്സരങ്ങളെ പ്രതിസന്ധിയിലാക്കും. 22ന് സംസ്ഥാന ഗെയിംസ് മത്സരങ്ങൾ കണ്ണൂരിൽ തുടങ്ങാനിരിക്കെ സമരം അവസാനിപ്പിക്കാനുള്ള നടപടികൾ സർക്കാർതലത്തിൽ ഇതുവരെയുണ്ടായിട്ടില്ല. 22 മുതൽ 27 വരെ ഫുട്ബോൾ, തയ്ക്വാൻഡോ, വോളിബോൾ, റസ്‌ലിംഗ്, ബോക്സിംഗ്, ടെന്നിക്വയ്റ്റ്, ജിംനാസ്റ്റിക്സ് എന്നീ വിഭാഗങ്ങളിലാണ് മത്സരങ്ങൾ. സമരം ഒത്തുതീർപ്പാക്കാൻ മന്ത്രിതലത്തിൽ നിരവധി ചർച്ചകൾ നടത്തിയെങ്കിലും പരിഹാരമായിട്ടില്ല. കായികാധ്യാപകരുടെ സഹകരണമില്ലാത്തതിനാൽ ഉപജില്ലാ മത്സരങ്ങൾ പോലും പൂർത്തിയാകാത്ത സാഹചര്യവുമുണ്ട്. കായികാധ്യാപകരുടെ അഭാവത്തിൽ ഡിഡിഇമാർ പ്രത്യേക ഉത്തരവിലൂടെ നിർബന്ധിതമായി ഒരു കായികാധ്യാപകനെ മേളയുടെ സെക്രട്ടറിയാക്കി നിയമിച്ചും മറ്റ് അധ്യാപകരെ നിയോഗിച്ചുമാണ് മേളകൾ നടത്തുന്നത്. അധ്യാപകരുടെ നിസഹകരണം കാരണം ഇത്തവണ സുബ്രതോ കപ്പ് ഫുട്ബോള്‍ തട്ടിക്കൂട്ടി നടത്തുകയായിരുന്നു. കായികമേളകൾ നടത്തിയതുമായി ബന്ധപ്പെട്ട് രണ്ടുവർഷത്തെ കുടിശികയായി മുക്കാല്‍ കോടിയോളം രൂപയാണ് ലഭിക്കാനുള്ളത്. മേളയിൽ മത്സരിക്കുന്ന കുട്ടികളുടെ എണ്ണം ഗണ്യമായി കൂടിയിട്ടുണ്ട്. ഇത് അധിക ബാധ്യതയാകുമെന്ന് കായികാധ്യാപകർ പറയുന്നു. കഴിഞ്ഞവര്‍ഷത്തെ തുക കിട്ടിയെങ്കിലും അതിന് മുമ്പുള്ള രണ്ട് വര്‍ഷത്തെ കുടിശികയാണ് കിട്ടാനുള്ളത്. തിരുവനന്തപുരം 20,85,000, കണ്ണൂര്‍ 11,56,000, മലപ്പുറം 10,74,000, കൊല്ലത്ത് 1,30,000, പത്തനംതിട്ട 1,25,000,എറണാകുളം 3,00,000, തൃശൂർ 5,15,000, പാലക്കാട് 8,90,000, കാസര്‍ഗോഡ് 3,30,000 എന്നിങ്ങനെയാണ് റവന്യു ജില്ലാ സെക്രട്ടറിമാര്‍ക്ക് ലഭിക്കാനുള്ള തുക. പിന്നോട്ടില്ലെന്ന് കായികാധ്യാപക സംഘടന 2017 വരെ നിലവിലുണ്ടായിരുന്ന കായികാധ്യാപകരുടെ സംരക്ഷണ ഉത്തരവ് പുനഃസ്ഥാപിക്കുക, മുൻ വർഷങ്ങളിൽ കായികമേളകൾ നടത്തിയതുമായി ബന്ധപ്പെട്ട് കായികാധ്യാപകർക്ക് ലഭിക്കാനുള്ള കോടികളുടെ കുടിശിക നൽകുക എന്നിവയാണ് പ്രധാന ആവശ്യങ്ങൾ. യുപി വിഭാഗത്തില്‍ 500 കുട്ടികള്‍ക്ക് ഒരു കായികാധ്യാപകന്‍ എന്നത് മാറ്റി 300 കുട്ടികള്‍ക്ക് ഒരു അധ്യാപകന്‍ എന്ന മാനദണ്ഡം നടപ്പാക്കണമെന്ന ആവശ്യവും ശക്തമാണ്. നിലവിൽ 499 കുട്ടികളാണ് യുപി സ്‌കൂളിലുള്ളതെങ്കില്‍ കായികാധ്യാപകന്‍ പുറത്തുപോകേണ്ട അവസ്ഥയാണ്. ഇതു സംബന്ധിച്ച പ്രശ്നങ്ങൾ പരിഹരിക്കാമെന്ന് സര്‍ക്കാര്‍ നല്‍കിയെങ്കിലും ഇതുവരെ നടപടിയൊന്നുമുണ്ടാകാത്തതിനെ തുടർന്നാണ് നിസഹകരണ സമരം ആരംഭിച്ചത്. പ്രശ്നങ്ങൾ പരിഹരിക്കാതെ മേളകളുടെ സംഘാടനത്തില്‍ സഹകരിക്കില്ലെന്ന് കായികാധ്യാപക സംഘടന കണ്ണൂര്‍ ജില്ലാ പ്രസിഡന്‍റ് പി.പി. ഉദയകുമാര്‍ പറഞ്ഞു.

പോലീസിനെ ഇരുത്തി പ്രതി

ബേക്കൽ: ബേക്കൽ പോലീസ് സ്റ്റേഷനിലേക്ക് കസേരകൾ സംഭാവന ചെയ്തത് നിരോധിത നോട്ടുകൾ കൈവശംവച്ച കേസിലെ പ്രതി. പോലീസുദ്യോഗസ്ഥർക്ക് കസേരകൾ കൈമാറുന്നതിന്‍റെ ഫോട്ടോയെടുത്ത് പ്രചരിപ്പിക്കുകയും ചെയ്തു. സംഗതി നാണക്കേടായതോടെ പോലീസ് കസേരകൾ തിരിച്ചുനൽകി തടിയൂരി. പൂച്ചക്കാട്ടെയും മൗവലിലെയും രണ്ടു ക്ലബുകളുടെ പേരിലാണ് പോലീസ് സ്റ്റേഷനിലേക്ക് 10 വീതം ഫൈബർ കസേരകൾ സംഭാവന ചെയ്തത്. ഇതിൽ മൗവലിലെ ക്ലബിന്‍റെ പേരിൽ നൽകിയ കസേരകളാണ് ആറുമാസം മുമ്പ് അമ്പലത്തറ പോലീസ് സ്റ്റേഷൻ പരിധിയിൽനിന്ന് കോടിക്കണക്കിന് രൂപയുടെ നിരോധിത 2000 രൂപ നോട്ടുകൾ പിടികൂടിയ കേസിലെ പ്രതി സ്പോൺസർ ചെയ്തതായി പറയുന്നത്. തിങ്കളാഴ്ച ഉച്ചയോടെ കസേരകൾ കൈമാറിയ ചടങ്ങിൽ പ്രതി പങ്കെടുത്ത് ഫോട്ടോയെടുക്കുകയും ചെയ്തു. ബേക്കലിലെ എസ്എച്ച്ഒ അടുത്തിടെ പുതുതായി ചുമതലയേറ്റ ആളായതിനാൽ ഇയാളെ തിരിച്ചറിയാൻ കഴിഞ്ഞില്ല. സംഭവം ജില്ലാതലത്തിൽ വാർത്തയായതോടെയാണ് ജില്ലാ പോലീസ് മേധാവി ഇടപെട്ട് കസേരകൾ തിരിച്ചുനൽകാൻ നിർദേശിച്ചത്.

അനധികൃത മത്സ്യബന്ധനം: നാല് ബോട്ടുകൾ പിടികൂടി; ഒൻപതുലക്ഷം പിഴ

നീലേശ്വരം: ജില്ലയുടെ തീരക്കടലിൽ അനധികൃത മത്സ്യബന്ധനം നടത്തിയ നാല് ബോട്ടുകൾ മറൈൻ എൻഫോഴ്സ്മെന്‍റും തീരദേശ പോലീസും സംയുക്തമായി നടത്തിയ രാത്രികാല പരിശോധനയിൽ പിടികൂടി. ആകെ ഒന്പത് ലക്ഷം രൂപ പിഴയീടാക്കി. വെള്ളിയാഴ്ച രാത്രി അഴിത്തലയിൽ നിന്ന് 12 നോട്ടിക്കൽ മൈൽ ദൂരത്തിനുള്ളിൽ വച്ചാണ് ബോട്ടുകൾ പിടികൂടിയത്. കോഴിക്കോട്ടു നിന്നുള്ള ഗ്രാൻഡ്, ഉമറുൾ ഫാറൂഖ്, കണ്ണൂരിൽ നിന്നുള്ള സീ ഫ്ളവർ, കർണാടകയിൽ നിന്നുള്ള സുരക്ഷ എന്നീ ബോട്ടുകളാണ് ഫിഷറീസ് എക്സ്റ്റൻഷൻ ഓഫീസർ അരുണേന്ദു രാമകൃഷ്ണന്‍റെ നേതൃത്വത്തിലുള്ള സംഘം പിടികൂടിയത്. രണ്ട് ബോട്ടുകൾ ചേർന്ന് ട്രോൾ വല ഉപയോഗിച്ച് മത്സ്യബന്ധനം നടത്തുന്ന പെയർ ട്രോളിംഗ്, കരവലി എന്നീ നിയമവിരുദ്ധ രീതികളിലാണ് ഇവർ മത്സ്യബന്ധനം നടത്തിയിരുന്നത്.

അങ്കണവാടിയിൽ ഭക്ഷ്യവിഷബാധ; ആറു കുട്ടികൾ ചികിത്സയിൽ

കാലിച്ചാനടുക്കം: ചാമക്കുഴി കൂവാറ്റി അങ്കണവാടിയിൽ ഭക്ഷ്യവിഷബാധയെ തുടർന്ന് ആറു കുട്ടികൾ ചികിത്സയിൽ. നൈല മാർട്ടിൻ എന്ന കുട്ടിയെ നീലേശ്വരം തേജസ്വിനി ആശുപത്രിയിൽ പ്രവേശിപ്പിച്ചു. മറ്റു കുട്ടികളായ ജിയ, ഷാർലറ്റ്, ശിവാൻഷി, റിതിക, ലൈല എന്നിവരെ പ്രാഥമിക ചികിത്സയ്ക്കുശേഷം വീട്ടിലേക്കയച്ചു. ആറു മാസം മുമ്പും ഇതേ അങ്കണവാടിയിൽ ഭക്ഷ്യവിഷബാധ ഉണ്ടായിരുന്നതായി രക്ഷിതാക്കൾ ആരോപിച്ചു. അന്നു പരാതി നല്കിയിട്ടും അധികൃതരുടെ ഭാഗത്തുനിന്ന് യാതൊരു നടപടിയും ഉണ്ടാകാതിരുന്നതാണ് വീണ്ടും പ്രശ്നമുണ്ടാകാൻ കാരണമായതെന്നും അവർ കുറ്റപ്പെടുത്തി.

ആറളം തോട്ടുകടവ് പാലം: അപ്രോച്ച് റോഡിനായി കാത്തിരിപ്പ് നീളുന്നു

ഇരിട്ടി: ആറളം തോട്ടുകടവ് പാലത്തിന്‍റെ ഇരുകരകളിലേയും സംരക്ഷണ ഭിത്തിയുടെ നിർമാണവും അപ്രോച്ച് റോഡ് നിർമാണവും നീളുന്നു. പാലത്തിന്‍റെ ഉപരിതല വാർപ്പ് പൂർത്തിയാക്കിട്ട് നാലുമാസം കഴിഞ്ഞെങ്കിലും നിലവിൽ ചുരുങ്ങിയ തൊഴിലാളികൾ മാത്രമാണ് അനുബന്ധ പ്രവൃത്തികൾ ചെയ്യുന്നത്. ഇതേ രീതി തുടർന്നാൽ പാലവും റോഡും എന്ന് തുറന്ന് കിട്ടുമെന്ന ആശങ്കയിലാണ് നാട്ടുകാർ. ജില്ലാ പഞ്ചായത്ത് അനുവദിച്ച 1.25 കോടി ചെലവിട്ട് നിർമിക്കുന്ന തോട്ടുകടവ് പാലത്തിന്‍റെ നിർമാണം 10 മാസംകൊണ്ട് പൂർത്തിയാക്കുമെന്നായിരുന്നു ആദ്യം നൽകിയ ഉറപ്പ്. നിലവിലുള്ള പാലം പൊളിച്ചു നീക്കി പുതിയ പാലത്തിന്‍റെ നിർമാണം തുടങ്ങിയതോടെ ബദൽ സംവിധാനം ഇല്ലാതെ തോട്ടുകടവ്, പൂതക്കുണ്ട്, ഏച്ചില്ലം, പായം, കോണ്ടമ്പ്ര ഗ്രാമങ്ങളിലെ നൂറുകണക്കിന് കുടുംബങ്ങൾ ഒന്നര വർഷമായി യാത്രാദുരിതത്തിലാണ്. ലോക്‌സഭാ തിെരഞ്ഞെടുപ്പിന് മൂന്ന് മാസം മുന്പ് നിർമാണ ഉദ്ഘാടനം ചെയ്യുകയും മഴയെത്താൻ മാസങ്ങൾ മാത്രം ബാക്കിയുള്ളപ്പോൾ നിലവിലെ പഴയ പാലം പൊളിച്ചു നീക്കുകയും ചെയ്തു. ബദൽ സംവിധാനങ്ങൾ ഉണ്ടാക്കാതെയാണ് പഴയ പാലം പൊളിച്ചു നീക്കിയത്. ഇതോടെ വാഹന ഗതാഗതം തോട്ടുകടവ് കൂട്ടക്കളം വഴി തിരിച്ചു വിട്ടു. പൂതക്കുണ്ട്, ആറളം ഭാഗങ്ങളിലുള്ളവർക്ക് മൂന്ന് കിലോമീറ്ററോളം അധികം സഞ്ചരിക്കേണ്ടി വന്നെങ്കിലും പുതിയ പാലമെന്ന പ്രതീക്ഷയിൽ അല്പകാലത്തേക്ക് ദുരിതം സഹിക്കാൻ നാട്ടുകാരും തയാറായി. തെരഞ്ഞെടുപ്പു കാലത്തെ നിർമാണം പിന്നീട് മന്ദഗതിയിലായി. മൂന്ന് മാസം കൊണ്ട് പാലത്തിന്‍റെ തൂണുകളുടെ രണ്ട് പൈലിംഗ് മാത്രമാണ് പൂർത്തിയായത്. പിന്നീട് കുറെക്കാലം നിർമാണം പൂർണമായും സ്തംഭിച്ചു. നിത്യവും നൂറുകണക്കിന് വാഹനങ്ങൾ കടന്നുപോകുന്ന പ്രധാന റോഡിലെ പാലം പൊളിച്ചു മാറ്റുമ്പോൾ ഉണ്ടാകാനിടയുളള പ്രയാസം പോലും അധികൃതർ കണക്കിലെടുക്കുന്നില്ല. താത്ക്കാലിക നടപ്പാലം അപകടഭീഷണിയിലാണ്. ആറളം ഹയർസെക്കൻഡറി സ്‌കൂളിലേക്കും ആറളം, പൂതക്കുണ്ട് മേഖലയിലുള്ളവർക്ക് എളുപ്പത്തിൽ ഇരിട്ടിയിലേക്കും പായം, കോണ്ടമ്പ്ര തുടങ്ങി വിവിധ മേഖലകളിലുള്ളവർക്ക് മലയോര ഹൈവേ വഴി എളുപ്പത്തിൽ മറ്റ് പ്രദേശങ്ങളിലേക്കും സഞ്ചരിക്കാൻ കഴിയുന്ന റൂട്ടാണ് ദുരിതത്തിലായത്. നാട്ടുകാർ കുറച്ച് കാലത്തേക്കായി നിർമിച്ച താല്ക്കാലിക പാലം ഏത് നിമിഷവും നിലം പൊത്താവുന്ന നിലയിലാണ്. പാലത്തിന്‍റെ സൈഡ് ഭിത്തിയുടെ നിർമാണം പൂർത്തിയാക്കി മണ്ണ് നിറച്ച് കാൽ നടയാത്രയ്ക്കുള്ള സൗകര്യമെങ്കിലും ഒരുക്കണം എന്നാണ് നാട്ടുകാരുടെ ആവശ്യം.

മികച്ച പച്ചത്തുരുത്ത്: അംഗീകാരം ഏറ്റുവാങ്ങി പായം പഞ്ചായത്ത്

കണ്ണൂർ: ഹരിതകേരളം മിഷന്‍റെ ആഭിമുഖ്യത്തിലുള്ള മികച്ച പച്ചത്തുരുത്തുകള്‍ക്ക് മുഖ്യമന്ത്രിയുടെ പുരസ്‌കാരം പ്രഖ്യാപിച്ചതില്‍ ജില്ലയിലെ മികച്ച മുളന്തുരുത്ത്, മികച്ച മൂന്നാമത്തെ പച്ചത്തുരുത്ത് എന്നിവക്കുള്ള ഉപഹാരവും പ്രശസ്തി പത്രവും തിരുവനന്തപുരത്ത് നടന്ന ചടങ്ങില്‍ പായം ഗ്രാമ പഞ്ചായത്ത് പ്രസിഡന്‍റ് പി. രജനി, വൈസ് പ്രസിഡന്‍റ് വിനോദ്കുമാര്‍, ഭരണസമിതി അംഗങ്ങള്‍ എന്നിവര്‍ ചേര്‍ന്ന് ഏറ്റുവാങ്ങി. പായം ഗ്രാമപഞ്ചായത്തിലെ കിളിയന്തറ തോണിക്കടവ് പച്ചത്തുരുത്താണ് മികച്ച മുളന്തുരത്തായി തെരഞ്ഞെടുക്കപ്പെട്ടത്.

കെപിഎസ്ടിഎ പൊതുവിദ്യാഭ്യാസ പരിവര്‍ത്തന സന്ദേശയാത്രയ്ക്ക് സ്വീകരണം നല്‍കി

പയ്യന്നൂര്‍: ഇടതുസര്‍ക്കാരിന്‍റെ പൊതുവിദ്യാഭ്യാസ നയങ്ങള്‍ തിരുത്തണമെന്നാവശ്യവുമായി കെപിഎസ്ടിഎ നടത്തുന്ന പൊതുവിദ്യാഭ്യാസ പരിവര്‍ത്തന സന്ദേശയാത്രയ്ക്ക് പയ്യന്നൂരില്‍ സ്വീകരണം നല്‍കി. സ്വീകരണത്തിന് മുന്നോടിയായി കലാജാഥയും അരങ്ങേറി. പയ്യന്നൂര്‍ ടൗണ്‍ സ്‌ക്വയറില്‍ യുഡിഎഫ് ജില്ലാ ചെയര്‍മാന്‍ പി.ടി. മാത്യു ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് പ്രസിഡന്‍റ് കെ. ജയരാജ് അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി പി.കെ. അരവിന്ദന്‍, ഡിസിസി സെക്രട്ടറിമാരായ എം.കെ. രാജന്‍, എ.പി. നാരായണന്‍, മണ്ഡലം പ്രസിഡന്‍റ് അശോകന്‍ പിലാക്കല്‍, കെഎസ്എസ്പിഎ സംസ്ഥാന സെക്രട്ടറി ടി.വി. ഗംഗാധരന്‍, ജില്ല പ്രസിഡന്‍റ് യു.കെ. ബാലചന്ദ്രന്‍, സെക്രട്ടറി ടി.വി. ഷാജി, ട്രഷറര്‍ രജീഷ് കാളിയത്താന്‍, സംസ്ഥാന വൈസ് പ്രസിഡന്‍റ് എം.കെ. അരുണ, സംസ്ഥാന സെക്രട്ടറി പി.പി. ഹരിലാല്‍, സംസ്ഥാന കമ്മിറ്റി അംഗങ്ങളായ കെ.എം. ബിന്ദു, രമേശന്‍ കാന, എസ്.പി. സജിന്‍, എം. സുമ, കെ.വി. യുഗേഷ് കുമാര്‍ എന്നിവര്‍ പ്രസംഗിച്ചു. ജാഥാ ക്യാപ്ടൻ കെ. അബ്ദുള്‍ മജീദ് സ്വീകരണത്തിന് നന്ദി പറഞ്ഞു.

പയ്യന്നൂര്‍ താലൂക്ക് ആശുപത്രിയില്‍ ‘തീപിടിത്തം'

പയ്യന്നൂര്‍: പയ്യന്നൂര്‍ താലൂക്ക് ആശുപത്രിയില്‍ 'തീപിടിത്തം'. നാലാം നിലയിലായിരുന്നു തീപിടിത്തം നടന്നത്. അഗ്നിരക്ഷാസേനയും ആശുപത്രി ജീവനക്കാരും ചേര്‍ന്ന് 'രക്ഷാപ്രവര്‍ത്തകരായി'. ഇന്നലെ ഉച്ചക്ക് ഒന്നോടെയാണ് സംഭവം. തീപിടിത്ത വിവരമറിഞ്ഞതോടെ സൈറണ്‍മുഴക്കി ചീറിപാഞ്ഞെത്തി. അഗ്നിരക്ഷസേനയെക്കണ്ട് ആളുകള്‍ പരിഭ്രാന്തരായി. നാലാം നിലയിലേക്ക് ഓടിക്കയറിയ ഇവര്‍ ഞൊടിയിടയില്‍ രോഗികളേയും കൂട്ടിരിപ്പുകാരേയും ഒഴിപ്പിച്ചു. മുകള്‍ നിലയില്‍ കുടുങ്ങിപ്പോയ ആളെ വടംകെട്ടി താഴെയെത്തിച്ചു. താഴെ കാത്തുനിന്നിരുന്ന ആബുലന്‍സുകള്‍ പരിക്കേറ്റവരുമായി ചീറിപ്പാഞ്ഞു. പയ്യന്നൂര്‍ ഗവ.താലൂക്ക് ആശുപത്രിയില്‍ അഗ്‌നിരക്ഷാസേന നടത്തിയ മോക്ഡ്രില്ലിന്‍റെ ഭാഗമായാണ് വിവിധ രംഗങ്ങള്‍ അരങ്ങേറിയത്. പയ്യന്നൂര്‍ സ്റ്റേഷന്‍ ഓഫീസര്‍ സി.പി. രാജേഷ്, സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍മാരായ പി.ശ്രീനിവാസന്‍, എന്‍.മുരളി, ഫയര്‍ ആന്‍ഡ് റെസ്‌ക്യൂ ഓഫീസര്‍മാരായ കെ.ഉന്മേഷ്, പി.പി. രാഹുല്‍, സി.കെ. ഇര്‍ഷാദ്, പി.പി.ജിഷ്ണുദേവ്, എസ്. ജോബി, ജിനോ ജോണ്‍, എസ്.ജിഷ്ണു, എം.എസ്. അഖില്‍, ഹോം ഗാര്‍ഡ്മാരായ എം. രാജീവന്‍, ശ്രീനിവാസന്‍ പിള്ള, കെ.എം.ഗോവിന്ദന്‍ തുടങ്ങിയവരും പയ്യന്നൂര്‍ ഗവ.താലൂക്ക് ആശുപത്രി മെഡിക്കല്‍ സൂപ്രണ്ട് ഡോ.പി.എം. ജ്യോതി, ഡോ.എസ്. അനില്‍കുമാര്‍, പിആര്‍ഒ ജാക്‌സണ്‍ ഏഴിമല, ഷീബ മാറോളി, പ്രദീപ് തുടങ്ങിയവരും പങ്കെടുത്തു

നിയന്ത്രണംവിട്ട ആംബുലൻസ് മറിഞ്ഞ് നാലുപേർക്കു പരിക്ക്

കൂത്തുപറമ്പ്: രോഗിയുമായി പോകുകയായിരുന്ന ആംബുലൻസ് പെരളശേരിയിൽ നിയന്ത്രണം വിട്ട് മറിഞ്ഞു. റോഡ് സൈഡിൽ പാർക്ക് ചെയ്തിരുന്ന കാറുകളിലിടിച്ചാണു മറിഞ്ഞത്. പെട്ടെന്ന് റോഡിലേക്ക് കയറിയ ബൈക്കിൽ ഇടിക്കാതിരിക്കാൻ ആംബുലൻസ് വെട്ടിച്ചപ്പോഴാണ് അപകടം ഉണ്ടായത്. അപകടത്തിൽ ആംബുലൻസിലുണ്ടായിരുന്ന രോഗി ഉൾപ്പടെ നാലുപേർക്ക് പരിക്കേറ്റു.മട്ടന്നൂർ പാലോട്ട് സ്വദേശികളായ ബുഷറ (39) ഷെരീഫ് (65) എന്നിവരെ മിംസ് ആശുപത്രിയിലും അംജത് (24), അഫ്ത്താഫ് (25 ) എന്നിവരെ ബേബി മെമ്മോറിയൽ ആശുപത്രിയിലും പ്രവേശിപ്പിച്ചു. ഇന്നലെ ഉച്ചയോടെയായിരുന്നു അപകടം. ശബ്‌ദം കേട്ട് ഓടിക്കൂടിയ നാട്ടുകാർ ചേർന്ന് ആബുലൻസിൽ അകപ്പെട്ടവരെ പുറത്തെടുത്ത് മറ്റൊരു ആംബുലൻസിലാണു കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചത്. നിയന്ത്രണം വിട്ട ആംബുലൻസ് ഇടിച്ച് പാർക്ക് ചെയ്ത ഇരുകാറുകൾക്കും കേടുപാടുകൾ സംഭവിച്ചിട്ടുണ്ട്. കൂടാതെ റോഡ് സൈഡിൽ നിർമാണം നടന്നു കൊണ്ടിരിക്കുന്ന ബസ് സ്റ്റോപ്പിന്‍റെ ഒരു ഭാഗവും തകർന്നു. വിവരമറിഞ്ഞ് ചക്കരക്കൽ പോലീസും സ്ഥലത്തെത്തിയിരുന്നു.

പൈപ്പ് പൊട്ടി കുടിവെള്ളം പാഴാകുന്നു

ശ്രീകണ്ഠപുരം: മലപ്പട്ടത്ത് അഞ്ചിടത്ത് പൈപ്പ് പൊട്ടി കുടിവെള്ളം പാഴാകുന്നു. ശുദ്ധജലപദ്ധതിയുടെ പൈപ്പ് പൊട്ടി വെള്ളം പാഴാകാൻ തുടങ്ങി മാസങ്ങൾ കഴിഞ്ഞിട്ടും നന്നാക്കാൻ നടപടിയില്ലെന്ന് നാട്ടുകാർ. കണിയാർവയൽ-മലപ്പട്ടം റോഡിൽ തലക്കോട്, കുണ്ടട, കണിയാർവയൽ വളവ്, തലക്കോട്-അടുവാപ്പുറം മിൽറോഡ് എന്നിവിടങ്ങളിലാണു പൈപ്പ് പൊട്ടിയത്. തലക്കോട്ട് മൂന്നിടത്തും അടുവാപ്പുറം മിൽ റോഡിലും കണിയാർവയൽ വളവിൽ സ്‌ഥലത്തു പൈപ്പ് പൊട്ടിയിട്ടുണ്ട്. തലക്കോട്ട് പൈപ്പ് പൊട്ടിയിട്ട് എഴ് മാസത്തിലേറെയായി. നന്നാക്കാൻ ജലഅഥോറിറ്റി കുഴിയെടുത്തെങ്കിലും മാസങ്ങൾ കഴിഞ്ഞിട്ടും നന്നാക്കിയിട്ടില്ല. വാഹനം താഴ്ന്നും മറ്റും അപകടം പതിവായതോടെ കുഴി നാട്ടുകാർ മൂടി. അപകടാവസ്ഥക്ക് മുന്നറിയിപ്പ് നൽകാൻ ഇവിടെ കമ്പുകൾ കുത്തിവച്ചിട്ടുണ്ട്. വെള്ളത്തിന്‍റെ കുത്തൊഴുക്കിൽ റോഡിൽ വിള്ളൽ വീണിട്ടുണ്ട്.

വനം വകുപ്പിന്‍റെ നേതൃത്വത്തിൽ ഹെൽപ്പ് ഡെസ്ക്കുകൾ പ്രവർത്തനം തുടങ്ങി

ചെറുപുഴ: ചെറുപുഴ പഞ്ചായത്ത് ഓഫീസിൽ വനം വകുപ്പിന്‍റെ ഹെൽപ്പ് ഡെസ്ക്ക് പ്രവർത്തനം തുടങ്ങി. മനുഷ്യ-വന്യജീവി സംഘർഷ ലഘൂകരണ തീവ്രയജ്ഞ പരിപാടിയുടെ ഒന്നാം ഘട്ടത്തിന്‍റെ ഭാഗമായാണിത്. പരിപാടിയുടെ ഭാഗമായി വന്യമൃഗശല്യം നേരിടുന്ന കർഷകർക്ക് ഇവിടെ പരാതി നൽകാം. പ്രാദേശിക തലത്തിൽ പരിഹരിക്കുവാൻ കഴിയുന്ന പ്രശ്നങ്ങൾക്ക് ഒന്നാം ഘട്ടത്തിൽ തന്നെ പരിഹാരമുണ്ടാക്കും. ഈമാസം 30 വരെ കർഷകർക്ക് ഹെൽപ്പ് ഡെസ്ക്കിൽ പരാതി നൽകാം. ബീറ്റ് ഫോറസ്റ്റ് ഓഫീസർമാരായ എം.കെ. ജിജേഷ്, മുഹമ്മദ് ഷാഫി എന്നിവരുടെ നേതൃത്വത്തിലാണു കർഷകരിൽ നിന്നു പരാതി സ്വീകരിക്കുന്നത്. തളിപ്പറമ്പ് ഫോറസ്റ്റ് റേഞ്ചിനു കീഴിൽ ചെറുപുഴ, ഉളിക്കൽ, ഉദയഗിരി, നടുവിൽ പഞ്ചായത്തുകളിലാണു ഹെൽപ്പ് ഡെസ്ക്കുകൾ പ്രവർത്തിക്കുന്നത്.

സാക്ഷരതാ കാമ്പയിൻ സംഘടിപ്പിച്ചു

ശ്രീകണ്ഠപുരം: സമ്പൂർണ സാമ്പത്തിക സാക്ഷരത ഉറപ്പുവരുത്തുന്നതിനായി ശ്രീകണ്ഠപുരം നഗരസഭയുടെ ആഭിമുഖ്യത്തിൽ നടപ്പിലാക്കി വരുന്ന "പ്രജ്യോതി' പദ്ധതിയുടെ ഭാഗമായി എസ്ഇഎസ് കോളജിൽ സാമ്പത്തിക സാക്ഷരതാ കാമ്പയിൻ സംഘടിപ്പിച്ചു. ഉദ്ഘാടനം ശ്രീകണ്ഠപുരം നഗരസഭാധ്യക്ഷ ഡോ. കെ.വി. ഫിലോമിന നിർവഹിച്ചു. വിദ്യാർഥികളിൽ സാമ്പത്തിക കാര്യങ്ങളിൽ അവബോധം വളർത്തി, തെറ്റായ സാമ്പത്തിക ശീലങ്ങളിൽ നിന്ന് വിട്ടുനിർത്തുകയും, ബാങ്കിംഗ് സംവിധാനങ്ങളും ഡിജിറ്റൽ ഇടപാടുകളും സുരക്ഷിതമായി ഉപയോഗിക്കുന്നതിനുള്ള മാർഗങ്ങളും വിദ്യാർഥികൾക്ക് പരിചയപ്പെടുത്തുകയും ചെയ്യുക എന്നതാണ് കാമ്പയിന്‍റെ ലക്ഷ്യം പ്രിൻസിപ്പൽ റീനാ സെബാസ്റ്റ്യൻ അധ്യക്ഷത വഹിച്ചു. നഗരസഭ പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ കെ.സി. ജോസഫ് മുഖ്യപ്രഭാഷണം നടത്തി. പ്രജ്യോതി കോ-ഓർഡിനേറ്റർ എം. വീണ, മെയ്‌ദിനി മോഹൻ തുടങ്ങിയവർ ക്ലാസുകൾ നയിച്ചു. എൻഎസ്എസ് കോ-ഓർഡിനേറ്റർ ദീപു ജോസ്, എൻഎസ്എസ് വോളണ്ടിയർ സഫീദ കോളജ് യൂണിയൻ ചെയർമാൻ യദുകൃഷ്ണ എന്നിവർ പ്രസംഗിച്ചു.

ജില്ലയിലെ ആരോഗ്യ കേന്ദ്രങ്ങളില്‍ സ്ത്രീകൾക്കായി പ്രത്യേക ക്ലിനിക്ക്

കണ്ണൂർ: ജില്ലയിലെ ജനകീയ ആരോഗ്യ കേന്ദ്രങ്ങളിൽ സ്ത്രീ ക്ലിനിക്കുകള്‍ ആരംഭിച്ചു. സംസ്ഥാന ആരോഗ്യ വകുപ്പിന്‍റെ നേതൃത്വത്തിൽ ആരംഭിച്ച സ്ട്രെംഗ്തനിംഗ് ഹെർ ടു എംപവർ എവരിവൺ എന്ന കായിനിന്‍റെ ഭാഗമായാണ് പ്രത്യേക ക്ലിനിക്കുകൾ ഒരുങ്ങിയത്. ചൊവ്വ, വ്യാഴം, ശനി ദിവസങ്ങളിൽ സ്ത്രീ ക്ലിനിക്കുകൾ പ്രവർത്തിക്കും. ആഴ്ചയിൽ ഒരു ദിവസം പി എച്ച് സി, എഫ് എച്ച് സി തലത്തിൽ പ്രത്യേക സെഷ്യാലിറ്റി ക്യാമ്പും സംഘടിപ്പിക്കും. സ്ത്രീകള്‍ക്കും കുട്ടികള്‍ക്കുമായി ക്ലിനിക്കുകള്‍, അയല്‍ക്കൂട്ട സ്‌ക്രീനിംഗ് ക്യാമ്പുകള്‍, വിദഗ്ധ സ്‌പെഷലിസ്റ്റ് സേവനങ്ങള്‍ എന്നിവ ഉൾപ്പെടുത്തിയാണ് സ്ത്രീ ക്ലിനിക്കുകളിൽ ഒരുക്കിയിരിക്കുന്നത്. വിളര്‍ച്ച, പ്രമേഹം, രക്താതിമര്‍ദം, സ്തനാർബുദം, വായിലെ കാന്‍സര്‍ സ്‌ക്രീനിംഗ്, ക്ഷയം, തുടങ്ങിയവയും ശാരീരിക ആരോഗ്യ പരിശോധന, കുട്ടികൾക്കും ഗർഭിണികൾക്കുമുള്ള പ്രതിരോധ കുത്തിവയ്പ്, ഹീമോഗ്ലോബിൻ പരിശോധന, ആർത്തവ ആരോഗ്യ പ്രശ്‌നങ്ങള്‍ എന്നിവ കണ്ടെത്തി ചികിത്സ ഉറപ്പാക്കാനും ഈ ക്ലിനിക്കുകളിലൂടെ സാധിക്കും. അയല്‍ക്കൂട്ടങ്ങള്‍ കേന്ദ്രീകരിച്ച് സ്ത്രീകള്‍ക്കായി പ്രത്യേക പരിശോധനകളും കുടുംബാരോഗ്യ കേന്ദ്രങ്ങളില്‍ വിദഗ്ധ പരിശോധനകളും ബോധവത്കരണവും ക്യാമ്പയിന്‍റെ ഭാഗമായി നടക്കും. സെപ്റ്റംബർ 17 മുതൽ മാർച്ച്‌ എട്ടു വരെയാണ് കായിൻ നടക്കുന്നത്. സ്ത്രീകള്‍ വെല്‍നസ് ക്ലിനിക്കുകളില്‍ എത്തി ആരോഗ്യ പരിശോധന നടത്തണമെന്ന് ജില്ലാ മെഡിക്കൽ ഓഫീസർ ഡോ. പിയൂഷ്‌ എം നമ്പൂതിരിപ്പാട് അറിയിച്ചു.

ഇടമന ലാസലെറ്റ് മരിയഭവൻ പള്ളിയിൽ തിരുനാൾ തുടങ്ങി

ചെമ്പേരി: ഇടമനയിലെ ലാസലെറ്റ് മരിയഭവൻ പള്ളിയിൽ പരിശുദ്ധ ലാസലെറ്റ് മാതാവിന്‍റെ അഞ്ചുദിവസത്തെ തിരുനാൾ ആഘോഷങ്ങൾക്ക് തുടക്കമായി. ഇന്നലെ വൈകുന്നേരം 4.30 ന് ദിവ്യകാരുണ്യ ആരാധന, ജപമാല പ്രാർഥന എന്നിവക്ക് ശേഷം മരിയ ഭവൻ സുപ്പീരിയർ ഫാ. ജെൻസൺ ചെന്ത്രാപ്പിന്നി എംഎസ് കൊടിയേറ്റി. തുടർന്ന് ലദീഞ്ഞ്, വിശുദ്ധ കുർബാന, വചന പ്രഘോഷണം, നൊവേന എന്നിവക്ക് കാർമികത്വം വഹിച്ചു. 19 വരെ എല്ലാ ദിവസവും വൈകുന്നേരം 4.30 മുതൽ ദിവ്യകാരുണ്യ ആരാധന, ജപമാല പ്രാർഥന, വിശുദ്ധ കുർബാന, വചന പ്രഘോഷണം, നൊവേന എന്നിവയുണ്ടായിരിക്കും. ഫാ. സനീഷ് ആലപ്പാട്ട് എംഎസ്, ഫാ. നോബിൾ ഓണംകുളം, ഫാ. അജേഷ് തുരുത്തേൽ എന്നിവർ വിവിധ ദിവസങ്ങളിൽ തിരുക്കർമങ്ങൾക്ക് നേതൃത്വം നൽകും. സമാപന ദിനമായ 20 ന് വൈകുന്നേരം 4.30 ന് ദിവ്യകാരുണ്യ ആരാധന, ജപമാല പ്രാർഥന എന്നിവയെ തുടർന്ന് ആഘോഷമായ തിരുനാൾ കുർബാനക്ക് ബംഗളൂരു ലാസലെറ്റ് മാതാ പ്രൊവിൻഷ്യൽ സുപ്പീരിയർ ഫാ. ബൈജു അവിട്ടപ്പള്ളി എംഎസ് മുഖ്യകാർമികത്വം വഹിക്കും. ഫാ. ബെന്നി തടത്തിക്കുന്നേൽ എംഎസ്, ഫാ. സനീഷ് പൂവത്തിങ്കൽ എംഎസ്, ചെമ്പേരി ഫൊറോന വൈദികർ എന്നിവർ സഹകാർമികരായിരിക്കും. 6.45 ന് ലദീഞ്ഞ്, പരിശുദ്ധ കുർബാനയുടെ ആശീർവാദം എന്നിവക്ക് ചെമ്പേരി ലൂർദ് മാതാ ബസിലിക്ക റെക്ടർ റവ.ഡോ. ജോർജ് കാഞ്ഞിരക്കാട്ട് നേതൃത്വം നൽകും. സ്നേഹവിരുന്നോടെ ആഘോഷ പരിപാടികൾ സമാപിക്കും.

അലക്സ്നഗറിൽ ജിയോ മാപ്പിംഗ് സർവേ നാളെ

പയ്യാവൂർ: ഇയുഡിആർ ജിയോ മാപ്പിംഗ് ഇതുവരെ പൂർത്തിയാക്കാത്ത റബർ തോട്ടം ഉടമസ്ഥർക്കായുള്ള ജിയോ മാപ്പിംഗ് (റബർ തോട്ടം സർവേ) നാളെ രാവിലെ 11 മുതൽ വൈകുന്നേരം നാലുവരെ അലക്സ്നഗർ സത്യൻ സ്മാരക വായനശാലയിൽ നടക്കും. വീട്ടിലെ എല്ലാവരുടെയും പേരിലുള്ള നികുതി അടച്ച രസീതും രേഖയുമായി വരുന്നയാളുടെ ആധാർ കാർഡും കൊണ്ടുവരണം (പകർപ്പ് ആവശ്യമില്ല). വരുന്ന ആളുടെ ഫോട്ടോ അവിടെനിന്ന് എടുക്കും. ആധാർ കാർഡ് തരുന്നയാളുടെ പേരിൽ സ്ഥലം വേണമെന്നില്ല. വീട്ടിലെ ആരെങ്കിലും ഒരാൾക്ക് അയാളുടെ ആധാർ കാർഡും എല്ലാവരുടെയും നികുതിരേഖകളുമായി വന്ന് ഫോട്ടോ എടുപ്പിക്കാവുന്നതാണ്. റബർ കർഷകർ/തോട്ടം ഉടമകൾ ഈ അവസരം ഉപയോഗപ്പെടുത്തണമെന്ന് അലക്സ്നഗർ റബർ ഉത്പാദക സംഘം (ആർപിഎസ്) പ്രസിഡന്‍റ് സ്കറിയ നെല്ലൻകുഴിയിൽ അറിയിച്ചു.

സ്ഥിരതാമസക്കാരായ വോട്ടർമാരെ ഒഴിവാക്കിയതായി പരാതി

തേർത്തല്ലി: ആലക്കോട് പഞ്ചായത്ത് കൂടപ്രം വാർഡിലെ വോട്ടർ പട്ടികയിൽനിന്ന് സ്ഥിരതാമസക്കാരായ നിരവധി വോട്ടർമാരെ ഒഴിവാക്കിയതായി എൽഡിഎഫിന്‍റെ പരാതി. യുഡിഎഫ് നേതൃത്വത്തിന്‍റെ സമ്മർദത്തിന് വിധേയമായി പഞ്ചായത്തിലെ കോൺഗ്രസ് യൂണിയൻ നേതാവ് വാർഡ് ചുമതലയുള്ള ഉദ്യോഗസ്ഥരെ ക്കൊണ്ട് റിപ്പോർട്ട് എഴുതിച്ചാണ് ഇത്തരത്തിൽ നടപടി ഉണ്ടായതെന്നും വിഷയം അധികൃതരുടെ ശ്രദ്ധയിൽപ്പെടുത്തിയിട്ടും നടപടിയുണ്ടായില്ലെന്നും എൽഡിഎഫ് കുറ്റപ്പെടുത്തി. വാർഡ് വിഭജനത്തിലെ ക്രമക്കേടുകൾക്കെതിരേ എൽഡിഎഫ് നേരത്തെ പ്രത്യക്ഷ സമരം നടത്തിയിരുന്നു. അതിലും പരിഹാരം ഉണ്ടായിട്ടില്ല. വാർഡ് വിഭജനത്തിലെ ക്രമക്കേടിനും വോട്ടർപട്ടികയിലെ വോട്ട് ഒഴിവാക്കലിനും പരിഹാരം കാണണമെന്ന് ആവശ്യപ്പെട്ട് എൽഡിഎഫ് തെരഞ്ഞെടുപ്പ് കമ്മിഷനും കളക്ടർക്കും പരാതി നൽകിയിട്ടുണ്ട്.

ഉദയഗിരി പഞ്ചായത്തിലെ വോട്ടർ പട്ടികയിൽ വ്യാപകമായ ക്രമക്കേട്; കോൺഗ്രസ് പരാതി നൽകി

കാർത്തികപുരം: ഉദയഗിരി പഞ്ചായത്തിലെ വോട്ടർ പട്ടികയിൽ വ്യാപകമായ ക്രമക്കേട് നടന്നതായി ഉദയഗിരി മണ്ഡലം കോൺഗ്രസ് കമ്മിറ്റി ആരോപിച്ചു. ഒന്നു മുതൽ 15 വരെയുള്ള വാർഡുകളിൽ ശരാശരി മുന്നൂറ്റമ്പതിൽപരം യുഡിഎഫ് വോട്ടുകൾ അപേക്ഷകൾ ഇല്ലാതെയും പഞ്ചായത്ത് പ്രസിഡന്‍റും ഉദ്യോഗസ്ഥരും സിപിഎം നേതാക്കളും കൂടി ഒത്തുകളിച്ചും ഒഴിവാക്കിയെന്ന് കോൺഗ്രസ് ആരോപിക്കുന്നു. യുഡിഎഫ് പ്രവർത്തകർ വ്യക്തമായ കാരണങ്ങൾ കാണിച്ച് ഓൺലൈൻ ആയും ഫോം അഞ്ചിലും കൊടുത്ത അപേക്ഷയിൽ ഹിയറിംഗിന് ഹാജരാകാത്തവപോലും വോട്ടർ പട്ടികയിൽ നിലനിർത്തുകയാണ്. സമീപ പഞ്ചായത്തുകളായ ആലക്കോട് ,നടുവിൽ, ചപ്പാരപ്പടവ്, പരിയാരം, എന്നിവിടങ്ങളിൽ വർഷങ്ങളായി സ്ഥിരതാമസക്കാരായവരെ ഉദയഗിരി പഞ്ചായത്ത് വോട്ടർ പട്ടികയിൽ നിന്ന് ഒഴിവാക്കാതെ ഉദയഗിരി പഞ്ചായത്തിലുള്ള കുടുംബാംഗങ്ങളുടെ വീട്ടു നമ്പറിൽ ചേർക്കുകയാണ്. ആൾതാമസം ഇല്ലാത്ത ഒരു വീടിന്‍റെ വീട്ടുനമ്പർ ഉപയോഗിച്ച് പല വീട്ടുപേരിൽ ഉള്ളവരെ പല വാർഡുകളിൽ താമസിക്കുന്നവരെ ഉൾപ്പെടുത്തിയത് ഉദ്യോഗസ്ഥരുടെ ശ്രദ്ധയിൽപ്പെടുത്തിയെങ്കിലും വോട്ടർ പട്ടികയിൽ നിന്ന് നീക്കം ചെയ്യാൻ തയാറായിട്ടില്ല. അശാസ്ത്രീയമായ വാർഡ് വിഭജനം മൂലം ഒരു വാർഡിൽ താമസിക്കുന്നവരുടെ വോട്ടുകൾ അതിനോട് ചേർന്നുള്ള വാർഡിൽ നിലനിർത്തിയിരിക്കുന്നു. രാഷ്ട്രീയ ലാഭം നോക്കിയുള്ള ക്രമക്കേടുകൾ ഒഴിവാക്കി വോട്ടർ പട്ടിക കുറ്റമറ്റതാക്കാൻ ആവശ്യമായ നടപടികൾ കൈക്കൊള്ളണമെന്ന് ആവശ്യപ്പെട്ട് ഉദയഗിരി മണ്ഡലം കോൺഗ്രസ് കമ്മിറ്റി പ്രസിഡന്‍റ് ജോയിച്ചൻ പള്ളിയാലിൽ സംസ്ഥാന തെരഞ്ഞെടുപ്പ് കമ്മീഷനും, ജില്ലാ കളക്ടർക്കും പരാതി നൽകി.

വന്യജീവി നിയമഭേദഗതി ബിൽ പ്രശംസനീയം: കോൺഗ്രസ് -എസ്

ചപ്പാരപ്പടവ്: വന്യജീവി നിയമ ഭേദഗതി ബില്ലിന് മന്ത്രിസഭ അനുമതി നൽകിയത് പ്രശംസനീയമാണെന്ന് കോൺഗ്രസ് -എസ് ജില്ലാ ജനറൽ സെക്രട്ടറി രാജേഷ് മാത്യു പുതുപ്പറമ്പിൽ. മലയോര കർഷകർ വർഷങ്ങളായി അനുഭവിക്കുന്ന ദുരിതത്തിനുള്ള പരിഹാരമാണെന്നും അദ്ദേഹം പറഞ്ഞു. കോൺഗ്രസ്-എസ് ചപ്പാരപ്പടവ് മണ്ഡലം കൺവൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് പയ്യൻ ലക്ഷ്മണൻ അധ്യക്ഷത വഹിച്ചു. കെ.ജെ. വർഗീസ്, റെനീഷ് മാത്യു, നെല്ലിയോട് ബാലകൃഷ്ണൻ, വി.ടി. തോമസ്, പി. കണ്ണൻ, ജിമ്മി അഗസ്റ്റിൻ, അഭിലാഷ് വർഗീസ് എന്നിവർ പ്രസംഗിച്ചു.

സൈനികനെ മർദിച്ചു

തലശേരി: ധർമടത്ത് അവധിക്ക് വന്ന സൈനികനെ യുവാവ് വഴിയിൽ തടഞ്ഞ് മർദിച്ച് പരിക്കേൽപ്പിച്ചു. ധർമടം പോലീസ് സ്റ്റേഷന് സമീപത്തെ ഇത്താമണി റോഡിൽ കൃഷ്ണാലയത്തിൽ ആനന്ദകുമാറിനാണ് (28) മർദനമേറ്റത്. മൂർച്ചയുള്ള ആയുധമുപയോഗിച്ചുള്ള ആക്രമണത്തിൽ ഇടതുചുമലിനും ഇടതു കൈയുടെ ചെറുവിരലിനും ഗുരുതരമായി പരിക്കേറ്റ ആനന്ദകുമാറിനെ ആശുപത്രിയിൽ പ്രവേശിപ്പിച്ചു. തിങ്കളാഴ്ച വൈകുന്നേരം നാലോടെയായിരുന്നു സംഭവം. കുടുംബ പ്രശ്നത്തെത്തുടർന്ന് സഹോദരീ ഭർത്താവായ നീലേശ്വരം സ്വദേശി ലുലുകൃഷ്ണയാണ് തന്നെ ആക്രമിച്ചതെന്ന് ആനന്ദകുമാർ നൽകിയ പരാതിയിൽ പറയുന്നു. ആനന്ദകുമാറിന്‍റെ സഹോദരിയും ലുലു കൃഷ്ണയും തമ്മിലുള്ള വിവാഹമോചനക്കേസ് കോടതിയൽ നടന്നു വരുന്നതിന്‍റെ വിരോധമാണ് അക്രമത്തിന് കാരണം. മിലിട്ടറിയിലെ ജോലി ഇല്ലാതാക്കുമെന്ന് ഭീഷണിപ്പെടുത്തിയെന്നും പരാതിയിൽ പറയുന്നു. ധർമടം പോലീസ് കേസെടുത്ത് അന്വേഷണം ആരംഭിച്ചു.

കണ്ണൂർ വിമാനത്താവളം: കാനാട്ടെ ഭൂവുടമകൾക്ക് വീണ്ടും ജപ്തിഭീഷണി

മട്ടന്നൂർ: കണ്ണൂർ രാജ്യാന്തര വിമാനത്താവളത്തിന്‍റെ റൺവേ വികസനത്തിന് സ്ഥലമേറ്റെടുക്കാൻ നടപടി വൈകുന്നതിനെ തുടർന്ന് ദുരിതത്തിലായ കാനാട്ടെ ഭൂവുടമകൾക്ക് വീണ്ടും ജപ്തിഭീഷണി. രോഗിയായ കാനാട്ടെ ചെമ്പിലാലിൽ നസീറയ്ക്കാണ് കഴിഞ്ഞ ദിവസം തലശേരി സഹകരണ കാർഷിക ഗ്രാമ വികസന ബാങ്കിന്‍റെ നോട്ടീസ് ലഭിച്ചത്. ബാങ്കിൽ പണയപ്പെടുത്തിയ സ്ഥലം ഒക്ടോബർ 21 ന് കീഴല്ലൂർ വില്ലേജ് ഓഫീസിൽ ലേലം ചെയ്യുമെന്നാണ് നോട്ടീസിൽ പറയുന്നത്. ചികിത്സയ്ക്കും മറ്റുമായാണ് അഞ്ചു സെന്‍റ് സ്ഥലവും വീടും പണയപ്പെടുത്തിയത്. വിമാനത്താവളത്തിനായി വിജ്ഞാപനം ചെയ്ത സ്ഥലമായതിനാൽ വില്പന നടത്താനും കഴിയാത്ത അവസ്ഥയിലാണ് ഭൂവുടമകളിൽ പലരും. കാനാട്ടെ പലർക്കും മുമ്പും പല ബാങ്കുകളുടെയും ജപ്തി നോട്ടീസ് ലഭിച്ചിരുന്നു. 2017 ലാണ് വിമാനത്താവളത്തിന്‍റെ റൺവേ 4000 മീറ്ററാക്കുന്നതിന് കീഴല്ലൂർ പഞ്ചായത്തിലെ കാനാട്, കോളിപ്പാലം, നല്ലാണി മേഖലകളിൽ നിന്ന് 245 ഏക്കർ സ്ഥലമേറ്റെടുക്കാൻ തീരുമാനിച്ചത്. എന്നാൽ ഇത്രവർഷമായിട്ടും സ്ഥലമേറ്റെടുക്കുന്നതിന് തുടർനടപടികളുണ്ടായില്ല. നഷ്ടപരിഹാരമായി നൽകേണ്ട 1000 കോടിയോളം രൂപ കണ്ടെത്തുന്നതിനുള്ള പ്രയാസമാണ് കാരണം. വിഷയം പ്രതിപക്ഷ നേതാവ് വി.ഡി. സതീശനും ജില്ലയിലെ എംഎൽഎമാരും നിയമസഭയിൽ ഉന്നയിച്ചതിനെ തുടർന്ന് മുഖ്യമന്ത്രി പ്രശ്‌നം ചർച്ചചെയ്യാൻ യോഗം വിളിച്ചിരുന്നു. സ്ഥലമേറ്റെടുപ്പിനുള്ള ഭൂമി അളക്കലും മറ്റും വേഗത്തിലാക്കാൻ നിർദേശിച്ചെങ്കിലും സ്ഥലമേറ്റെടുപ്പ് സംബന്ധിച്ച് ഇപ്പോഴും തീരുമാനമായിട്ടില്ല. ഒൻപതു വർഷത്തോളമായി ദുരിതത്തിലുള്ള ഭൂവുടകൾക്ക് ജപ്തി ഭീഷണിയിലൂടെ ഇരുട്ടടി നൽകാനുള്ള ശ്രമത്തെ ജനകീയ പ്രതിരോധത്തിലൂടെ ചെറുക്കുമെന്ന് കോൺഗ്രസ് കീഴല്ലൂർ മണ്ഡലം കമ്മിറ്റി പ്രസ്താവിച്ചു. മുഖ്യമന്ത്രിയുടെ പാർട്ടി ഭരിക്കുന്ന തലശേരി സഹകരണ കാർഷിക ഗ്രാമവികസന ബാങ്കിന്‍റെ കാനാട് പ്രദേശത്തെ ജപ്തി നടപടികൾ നിർത്തിവയ്ക്കണമെന്നാവശ്യപ്പെട്ട് പ്രതിപക്ഷ നേതാവ് മുഖേന സർക്കാരിന് നിവേദനം നൽകി.

വിദ്യാർഥിക്ക് തെരുവുനായയുടെ കടിയേറ്റു

ഇരിട്ടി: ഉളിയിൽ മേഖലയിൽ തെരുവുനായ ശല്യം രൂക്ഷം. കഴിഞ്ഞദിവസം മദ്രസയിൽ നിന്നു വീട്ടിലേക്കു മടങ്ങവേ വിദ്യാർഥിക്ക് തെരുവുനായയുടെ കടിയേറ്റു. ഉളിയിൽ പി.വി. റോഡിലെ ചുര്യേട്ട് റിയാസ്-ഫർസാന ദമ്പതികളുടെ മകൻ റിഹാലിനാണ് (14) കടിയേറ്റത്. കുട്ടിക്ക് കണ്ണൂർ ജില്ലാ ആശുപത്രിയിൽ ചികിൽസ നൽകി. കാലിനാണ് കടിയേറ്റത്. ഉളിയിൽ നൂറുൽ ഹുദാ മദ്രസയിലെ വിദ്യാർഥിയാണ് റിഹാൽ. മേഖലയിൽ പകൽ സമയത്തും തെരുവുനായ ശല്യം രൂക്ഷമാണ്.

പ്രധാനമന്ത്രി നാഷണൽ അപ്രന്‍റീസ്ഷിപ്പ് മേള സംഘടിപ്പിച്ചു

കണ്ണൂർ: കേന്ദ്ര നൈപുണ്യ വികസന മന്ത്രാലയത്തിന്‍റേയും സംസ്ഥാന വ്യാവസായിക പരിശീലന വകുപ്പിന്‍റേയും സഹകരണത്തോടെ കണ്ണൂർ ആർഐ സെന്‍റർ പ്രധാനമന്ത്രി നാഷണൽ അപ്രന്‍റീസ്ഷിപ്പ് മേള സംഘടിപ്പിച്ചു. വ്യാവസായിക പരിശീലന വകുപ്പ് ഉത്തര മേഖലാ ജോയിന്‍റ് ഡയറക്ടർ ആർ. സുധാശങ്കർ ഉദ്ഘാടനം ചെയ്തു. വിവിധ സർക്കാർ വകുപ്പുകൾ, പൊതുമേഖല, സഹകരണ, സ്വകാര്യ മേഖല സ്ഥാപനങ്ങളിൽ നിന്നും റിപ്പോർട്ട് ചെയ്ത മുന്നൂറിലധികം അപ്രന്‍റിസ്ഷിപ്പ് ഒഴിവുകളിലേക്ക് ട്രെയിനികളെ തെരഞ്ഞെടുത്തു. മേളയിൽ പങ്കെടുക്കാൻ കഴിയാത്ത ഐടിഐ ട്രേഡ് പാസായ ട്രെയിനികൾ കണ്ണൂർ ആർഐ സെന്‍ററിൽ നേരിട്ട് രജിസ്റ്റർ ചെയ്താൽ റിപ്പോർട്ട് ചെയ്ത ഒഴിവുകളിലേക്ക് പരിഗണിക്കും. അപ്രന്‍റിസ്ഷിപ്പ് ട്രെയിനിംഗ് മികച്ച രീതിയിൽ നടപ്പിലാക്കുന്ന ജില്ലയിലെ സ്ഥാപനങ്ങളായി തെരഞ്ഞെടുത്ത തലശേരി എൻജിനിയറിംഗ് കോളജ്, തലശേരി കോ-ഓപ്പറേറ്റീവ് റൂറൽ ബാങ്ക്, കണ്ണൂർ ആപ്‌കോ വെഹിക്കിൾസ് ഇന്ത്യ പ്രൈവറ്റ് ലിമിറ്റഡ് എന്നീ സ്ഥാപനങ്ങൾക്കുള്ള ഉപഹാര വിതരണവും നടത്തി. ട്രെയിനികൾക്കുള്ള കോൺട്രാക്ട് വിതരണം കണ്ണൂർ ഐടിഐ പ്രിൻസിപ്പൽ എം.എ .ബാലകൃഷ്ണൻ നിർവഹിച്ചു. തോട്ടട ഗവ. വനിതാ ഐടിഐയിൽ നടന്ന പരിപാടിയിൽ വ്യാവസായിക പരിശീലന വകുപ്പ് കോഴിക്കോട് മേഖലാ ഇൻസ്‌പെക്ടർ ഓഫ് ട്രെയിനിംഗ് വി.കെ. അനൂപ് അധ്യക്ഷത വഹിച്ചു.

ജില്ലാ വാട്ടര്‍ ആന്‍ഡ് സാനിറ്റേഷന്‍ മിഷന്‍ അവലോകന യോഗം

കണ്ണൂർ: ജില്ലാ വാട്ടര്‍ ആന്‍ഡ് സാനിറ്റേഷന്‍ മിഷന്‍റെ 23 ാമത് അവലോകന യോഗം സബ് കളക്ടര്‍ കാര്‍ത്തിക് പാണിഗ്രഹിയുടെ അധ്യക്ഷതയില്‍ കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്നു. ജല്‍ ജീവന്‍ മിഷന്‍ ജില്ലയില്‍ നടപ്പിലാക്കി വരുന്ന വിവിധ പദ്ധതികളുടെ പുരോഗതി യോഗത്തില്‍ വിലയിരുത്തി. ജില്ലയിലെ 4,33,842 ഗ്രാമീണ വീടുകളില്‍ 2,54,962 വീടുകളിലായി മൊത്തം 58.76 ശതമാനം കുടിവെള്ള കണക്ഷനുകള്‍ ലഭ്യമാക്കിയിട്ടുണ്ടെന്നും ജല്‍ജീവന്‍ മിഷന്‍ വഴി വിഭാവനം ചെയ്തതില്‍ 1,74,539 വീടുകളിലായി മൊത്തം 46.29 ശതമാനം കുടിവെള്ള കണക്ഷന്‍ നല്‍കിയിട്ടുണ്ടെന്നും യോഗം വിലയിരുത്തി. മിഷന്‍റെ പ്രവൃത്തികള്‍ക്കാവശ്യമായ അനുമതികള്‍ എത്രയും പെട്ടെന്ന് ലഭ്യമാക്കണ മെന്ന് വിവിധ വകുപ്പുകള്‍ക്ക് സബ് കളക്ടര്‍ നിര്‍ദേശം നല്‍കി. റോഡുകളുടെ പുനര്‍നിര്‍മാനം വേഗത്തില്‍ ആക്കണമെന്നും സബ്കളക്ടര്‍ ആവശ്യപ്പെട്ടു.

ഓട്ടോറിക്ഷ മറിഞ്ഞ് അപകടം

കേളകം: കേളകം വെള്ളൂന്നി സിടി കവലയിൽ ബ്രേക്ക് നഷ്ടപ്പെട്ട് ഓട്ടോ മറിഞ്ഞ് അപകടം. ഡ്രൈവർക്ക് ഗുരുതര പരിക്ക്.കേളകം സ്വദേശി പാലപ്പള്ളിൽ ശിവനാണ് പരിക്കേറ്റത്. ഇയാളെ കണ്ണൂരിലെ സ്വകാര്യ ആശുപത്രിയിലേക്ക് മാറ്റി. ഇന്നലെ വൈകുന്നേരം അഞ്ചോടെയാണ് അപകടം നടന്നത്. യാത്രക്കാരെ ഇറക്കിയശേഷം മടങ്ങി വരുന്ന വഴി വണ്ടിയുടെ ബ്രേക്ക് നഷ്ടപ്പെടുകയായിരുന്നു.

കാലം സാക്ഷി -ചരിത്രം സാക്ഷി പായം ഇന്നലെ ഇന്ന് ചരിത്രം പ്രകാശനം ചെയ്തു

ഇരിട്ടി: പായം പഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തി പായം ഇന്നലെ ഇന്ന് സമഗ്ര ചരിത്രം ചരിത്ര രചന സമിതി തയാറാക്കിയ ഒന്നാം പതിപ്പ് കാലം സാക്ഷി ചരിത്രം സാക്ഷി എന്ന ഗ്രന്ഥം പ്രകാശനം ചെയ്തു. മാടത്തിയിൽ നടന്ന ചടങ്ങിൽ മുൻ എംഎൽഎ എം.വി. ജയരാജൻ ജില്ലാ പഞ്ചായത്ത് വൈസ് പ്രസിഡന്‍റ് അഡ്വ. ബിനോയ് കുര്യന് കൈമാറി പ്രകാശനം ചെയ്തു. പായം പഞ്ചായത്ത് പ്രസിഡന്‍റ് പി. രജനി അധ്യക്ഷത വഹിച്ചു. ചരിത്രം തിരുത്തപ്പെടുന്ന കാലത്ത് ചരിത്രം രേഖപ്പെടുത്തുക പ്രധാനമാണ്. ചരിത്രത്തെ വസ്തു നിഷ്ഠമായയി കണ്ടെത്തി പുതുതലമുറക്കായി കൈമാറേണ്ടതുണ്ടെന്ന് പ്രകാശനം നിർവഹിച്ചു എം.വി. ജയരാജൻ പറഞ്ഞു. സക്കീർ ഹുസൈൻ, പഞ്ചായത്ത് വൈസ് പ്രസിഡന്‍റ് അഡ്വ. വിനോദ് കുമാർ, എൻ. അശോകൻ, ആറളം പഞ്ചായത്ത് പ്രസിഡന്‍റ് കെ.പി. രാജേഷ്, ബ്ലോക്ക് പഞ്ചായത്ത് അംഗം കെ.എൻ. പദ്മാവതി , ലൈബ്രറി കൗൺസിൽ താലൂക്ക് സെക്രട്ടറി രഞ്ജിത് കമൽ, കെ.ജെ. സെബാസ്റ്റ്യൻ , കെ.കെ. കുഞ്ഞികൃഷ്ണൻ , ഹമീദ് കണിയാറ്റയിൽ, പി. സാജിദ് സെക്രട്ടറി നിധിൻ സുധാകരൻ എന്നിവർ പ്രസംഗിച്ചു.

ഭരണനേട്ടങ്ങളുമായി തദ്ദേശ സ്ഥാപനങ്ങളിൽ വികസന സദസുകൾ നടത്തും

കണ്ണൂർ: സംസ്ഥാന സർക്കാരും തദ്ദേശ സ്ഥാപനങ്ങളും കൈവരിച്ച നേട്ടങ്ങൾ അവതരിപ്പിക്കുന്ന വികസന സദസുകൾ ജില്ലയിലെ എല്ലാ തദ്ദേശ സ്ഥാപനങ്ങളിലും 20 മുതൽ ഒക്ടോബർ 20 വരെ ഒരുമാസത്തിനിടയിൽ സംഘടിപ്പിക്കാൻ ജില്ലാ ആസൂത്രണ സമിതി യോഗം തീരുമാനിച്ചു. പഞ്ചായത്തുകൾ, നഗരസഭ, കോർപറേഷൻ എന്നിവയിൽ എല്ലാ വാർഡുകളിൽ നിന്നുള്ള ജനങ്ങളുടെ പങ്കാളിത്തത്തിൽ സ്ത്രീകൾ, യുവാക്കൾ ഉൾപ്പെടെ സമൂഹത്തിന്‍റെ വിവിധ തുറകളിലു ള്ളവരെ ഉൾപ്പെടുത്തും. അതിദാരിദ്യ നിർമാർജനം, ലൈഫ് മിഷൻ പദ്ധതികൾക്കായി ഭൂമി വിട്ടുനല്കിയവരേയും ഹരിതകർമ സേന പ്രവർത്തകരേയും ചടങ്ങിൽ ആദരിക്കും. വികസന സദസിന്‍റെ ഭാഗമായി പൊതുജനങ്ങൾക്ക് കെ സ്മാർട്ട് സേവനങ്ങൾ ലഭ്യമാക്കുന്ന കെ സ്മാർട്ട് ക്ലിനിക് സജ്ജമാക്കും. കൂടാതെ സർക്കാരിന്‍റേയും തദ്ദേശ സ്ഥാപനങ്ങളുടെയും വികസന പ്രവർത്തനങ്ങളുടെ ചിത്രപ്രദർശനവും ഉണ്ടായിരിക്കും. സംസ്ഥാന സർക്കാരിന്‍റേയും തദ്ദേശ സ്ഥാപനങ്ങളുടെയും വികസന നേട്ടങ്ങളും ഇനി നടപ്പാക്കേണ്ട പദ്ധതികളും സംബന്ധിച്ച് പൊതു ജനങ്ങളിൽ നിന്നുള്ള അഭിപ്രായങ്ങളും നിർദേശങ്ങളും മുന്നോട്ട് വയ്ക്കുന്നതിന് ഓപ്പൺ ഫോറം, സംഗ്രഹ ചർച്ച എന്നിവയും ഉണ്ടാവും. ചർച്ചയിൽ ഉരുത്തിരിയുന്ന അഭിപ്രായങ്ങൾ ക്രോഡീകരിച്ച് സംസ്ഥാനത്തിന്‍റെ പൊതുവായ വികസനപ്രവർത്തനങ്ങളിൽ പരിഗണിക്കും. വികസന സദസിന്‍റെ പ്രവർത്തനങ്ങൾ ഏകോപിപ്പിക്കുന്നതിനായി ജില്ലാപഞ്ചായത്ത് പ്രസിഡന്‍റ് ചെർപേഴ്‌സണും ജില്ലാ കളക്ടർ കോ ചെയർപേഴ്‌സണും തദ്ദേശ വകുപ്പ് ജോയിന്‍റ് ഡയറക്ടർ കൺവീനറുമായി ജില്ലാ പ്ലാനിംഗ് ഓഫീസർ, ജില്ലാ ഇൻഫർമേഷൻ ഓഫീസർ എന്നിവർ ഉൾപ്പെട്ട സമിതി പ്രവർത്തിക്കും. മുഖ്യമന്ത്രി പിണറായി വിജയൻ വികസന സദസിന്‍റെ സംസ്ഥാന തല ഉദ്ഘാടനം നിർവഹിക്കും.

വികസന സദസിനെതിരേ യുഡിഎഫ് പ്രചാരണ കൺവൻഷൻ 25ന്

കണ്ണൂർ: കേരളത്തിലെ പോലീസ് സംവിധാനം ഇത്രയധികം കുത്തഴിഞ്ഞതിന്‍റെ ഉത്തരവാദി ആഭ്യന്തരം കൈകാര്യം ചെയ്യുന്ന കേരള മുഖ്യമന്ത്രിയാണെന്നും, പോലീസ് സംവിധാനം ഇത്രയേറെ ജനങ്ങൾക്കിടയിൽ ചർച്ച ചെയ്യപ്പെട്ട ഒരു കാലഘട്ടം കേരളത്തിൽ ഇതുവരെ ഉണ്ടായിട്ടില്ലെന്നും യുഡിഎഫ് ജില്ലാ കമ്മിറ്റിയോഗം അഭിപ്രായപ്പെട്ടു. തദ്ദേശഭരണ സ്ഥാപനങ്ങളിലേക്ക് തെരഞ്ഞെടുപ്പ് പടിവാതിൽക്കൽ എത്തിനില്ക്കെ സ്ഥാപനങ്ങ ളുടെ ഫണ്ട് ഉപയോഗിച്ച് വികസന സദസ് നടത്തണമെ മെന്ന നിർദേശത്തിന് യുഡിഎഫ് എതിരാണ്. ഫണ്ട് വെട്ടിക്കുറച്ചും വൈകിപ്പിച്ചും തദ്ദേശസ്ഥാപനങ്ങളുടെ പ്രവർത്തനം സർക്കാർ തകർക്കുന്ന ഈ അവസ്ഥയിൽ അധികാര വികേന്ദ്രീകരണത്തിന്‍റെ അന്തസത്ത ഇല്ലാതാക്കിയ പിണറായി സർക്കാ രിന്‍റെ നിർദേശം തീർത്തും ധൂർത്താണെന്നും നവ കേരള സദസിന്‍റെ മോഡലിൽ ഇടതുപക്ഷത്തിന്‍റെ രാഷ്ട്രീയ പ്രചാരണത്തിന് വേണ്ടി ജനങ്ങളുടെ പണം ദുർവ്യയം ചെയ്യാനുള്ള നീക്കത്തോട് യുഡിഎഫ് യോജിക്കുന്നല്ലെന്നും യോഗം അഭിപ്രായപ്പെട്ടു. നിലപാട് വിശദീകരിക്കുന്നതിനും തദ്ദേശഭരണ തെരഞ്ഞെടുപ്പ് പ്രചാരണാ ർഥവും 25ന് ഉച്ചകഴിഞ്ഞു മൂന്നിന് കണ്ണൂർ ഡിസിസി ഓഡിറ്റോറിയത്തിൽ വിപുലമായ പ്രചാരണ കൺവൻഷൻ വിളിച്ചുചേർക്കാൻ യോഗം തീരുമാനിച്ചു. ചെയർമാൻ പി.ടി. മാത്യു അധ്യക്ഷതയിൽ സജീവ് ജോസഫ് എംഎൽഎ ഉദ്ഘാടനം യോഗം ചെയ്തു. പ്രചാരണ കൺവൻഷന്‍റെ ഭാഗമായി 17 മുതൽ 20 പേരെ വിവിധ നിയോജക മണ്ഡലങ്ങളിൽ യുഡിഎഫ് നേതൃയോഗങ്ങൾ ചേരാൻ തീരുമാനിച്ചു. 19ന് മുൻ പ്രതിപക്ഷ നേതാവ് രമേശ് ചെന്നിത്തല നയിക്കുന്ന വാക്ക് എഗൈൻസ്റ്റ് ഡ്രഗ്സ് രിപാടി വിജയിപ്പിക്കാൻ യോഗം യുഡിഎഫ് പ്രവർത്തകരോട് ആഹ്വാനം ചെയ്തു. നേതാക്കളായ അബ്ദുൾ കരീം ചേലേരി, മാർട്ടിൻ ജോർജ് , കെ.ടി. സഹദുള്ള, സി.എ. അജീർ, ഇല്ലിക്കൽ ആഗസ്തി, ജോൺസൺ പി തോമസ്, കെ. പ്രമോദ്, തോമസ് വെക്കത്താനം , സന്തോഷ് കണ്ണരം പള്ളി , എൻ.ജി. സുനിൽ പ്രകാശ്, എം. സതീഷ് കുമാർ, വി.രാഹുലൻ, സി.കെ. സഹജൻ , ജോസ് വേലിക്കകത്ത്, കെ.പി. താഹിർ തുടങ്ങിയവർ പങ്കെടുത്തു.

ഇരിട്ടി താലൂക്ക്‌തല ബാങ്ക് അദാലത്ത് 23 മുതൽ

ഇരിട്ടി: ഇരിട്ടി താലൂക്ക് പരിധിയിലെ വിവിധ ബാങ്കുകളിലെ റവന്യൂ റിക്കവറി നേരിടുന്ന കുടിശികക്കാർക്കായി ഇളവുകൾ അനുവദിക്കുന്നതിനായി താലൂക്ക്‌ തല-ബാങ്ക് അദാലത്തുകൾ 23 മുതൽ 30വരെ നടക്കും. താലൂക്കിലെ വിവിധ കേന്ദ്രങ്ങളിൽ സംഘടിപ്പിക്കുന്ന അദാലത്തിൽ കുടിശകക്കാരായ വ്യക്തികൾ ഈ അവസരം ഉപയോഗപ്പെടുത്തി ജപ്തി നടപടികളിൽ നിന്നും ഒഴിവാവാകണമെന്ന് തഹസിൽദാർ അറിയിച്ചു. ഒരാഴ്ച നീണ്ടുനില്ക്കുന്ന അദാലത്തുകൾ താഴെ പറയും പ്രകാരം വിവിധ കേന്ദ്രങ്ങളിൽ സംഘടിപ്പിക്കുന്നു. കോളാരി, പഴശി വില്ലേജുകളുള്ളവർക്ക് 23ന് രാവിലെ 10.30 മുതൽ മട്ടന്നൂർ നഗരസഭയിലെ സിഡിഎസ് ഹാളിൽ നടക്കും. ചാവശേരി, കീഴൂർ, പായം, വിളമന വില്ലേജുകളിലുള്ളവർക്ക് 24ന് രാവിലെ ഇരിട്ടി ബ്ലോക്ക് പഞ്ചായത്ത് ഹാളിൽ നടക്കും. മണത്തണ, വെള്ളാർവള്ളി, കണിച്ചാർ വില്ലേജുകളിലുളളവർക്ക് 25 ന് പേരാവൂർ ബ്ലോക്ക് പഞ്ചായത്ത് ഹാളിലും മുഴക്കുന്ന് തില്ലങ്കേരി വില്ലേജുകളിലുള്ളവർക്ക് കാക്കയങ്ങാട് പാർവ്വതി ഓഡിറ്റോറിയത്തിലും നടക്കും. 26ന് കൊട്ടിയൂർ, കേളകം വില്ലേജുകളിലുള്ളവർക്ക് കേളകം പഞ്ചായത്ത് ഹാളിലും അദാലത്ത് നടക്കും. വയത്തൂർ, നുച്യാട്, പടിയൂർ, കല്യാട് വില്ലേജുകളിലുള്ളവർക്ക് 29ന് ഉളിക്കൽ പഞ്ചായത്ത് ഹാളിൽ നടക്കും . ആറളം അയ്യൻകുന്ന്, കരിക്കോട്ടരി വില്ലേജുകളിലുള്ളവർക്ക് 30ന് ആറളം പഞ്ചായത്ത് ഹാളിലുമാണ് അദാലത്തുകൾ നടക്കുക.

അമീബിക് മസ്തിഷ്‌കജ്വരം: കിണറുകളുടെ ക്ലോറിനേഷൻ പത്തിനകം പൂർത്തിയാക്കണം

കണ്ണൂർ: അമീബിക് മസ്തിഷ്‌കജ്വരം ഉൾപ്പെടെ ജലജന്യരോഗങ്ങളെ പ്രതിരോധിക്കുന്നതിന്, ക്ലോറിനേഷൻ നടത്താത്ത ജില്ലയിലെ എല്ലാ സ്വകാര്യ, പൊതുകിണറുകളും ഒക്ടോബർ പത്തിനകം ക്ലോറിനേറ്റ് ചെയ്യാൻ ജില്ലാപഞ്ചായത്ത് പ്രസിഡന്‍റ് കെ.കെ. രത്‌നകുമാരിയുടെ അധ്യക്ഷതയിൽ ചേർന്ന അവലോകന യോഗത്തിൽ തീരുമാനം. പൊതുജനങ്ങൾ ഉപയോഗിക്കുന്ന നീന്തൽക്കുളങ്ങളും വാട്ടർതീം പാർക്കുകളും ക്ലോറിൻ അണുനാശിനികൾ ഉപയോഗിച്ച് ശുദ്ധീകരിക്കുന്നുണ്ടെന്ന് ഉറപ്പ് വരുത്താൻ പരിശോധന നടത്തും. ഇവയിലെ ജലത്തിന്‍റെ ഗുണനിലവാര പരിശോധന തദ്ദേശ സ്വയംഭരണ സ്ഥാപനങ്ങൾ ഉറപ്പ് വരുത്തണം. ഒക്ടോബർ രണ്ട് മുതൽ ജില്ലയിൽ ജല ശുചിത്വ വാരമായി ആചരിക്കും. വിവിധ വകുപ്പുകളുടെയും സ്ഥാപനങ്ങളുടെയും ഓഫീസുകളിലെ വാട്ടർ ടാങ്കുകൾ ശുചീകരിക്കാൻ അടിയന്തിര നടപടി സ്വീകരിക്കാൻ വകുപ്പ് മേധാവികൾക്ക് കളക്ടർ നിർദേശം നല്കി.കിണറുകൾ ഉൾപ്പെടെ ക്ലോറിനേറ്റ് ചെയ്യുന്നതിന് കുടുംബശ്രീ അയൽക്കൂട്ടം ആരോഗ്യ വോളന്‍റിയർ മാർ, എഡിഎസ്-സിഡിഎസ് ആരോഗ്യ വോളന്‍റിയർമാരുടെ ചുമതല ഉള്ളവർ എന്നിവരെ നിയോഗി ക്കും. ഇവർക്ക് ആരോഗ്യവകുപ്പ് പരിശീലനം നല്കും. തുടർപ്രവർത്തനമായി മൂന്നുമാസം കൂടുമ്പോൾ കിണറുകളും ജലാശയങ്ങളും ഉൾപ്പെടെ ക്ലോറിനേറ്റ് ചെയ്യണം. കണ്ണൂർ കോർപറേഷൻ, തളിപ്പറമ്പ് നഗരസഭ, ക്ലോറിനേഷൻ പ്രവർത്തനത്തിൽ പിന്നിൽ നില്ക്കുന്ന തദ്ദേശ ഭരണ സ്ഥാപനങ്ങൾ എന്നിവിടങ്ങളിലെ ആരോഗ്യ വകുപ്പ് ജീവനക്കാർ, ക്ലീൻ സിറ്റി മാനേജർ, ഹെൽത്ത് സൂപ്പർ വൈസർ എന്നിവരുടെയും കുടുംബശ്രീ സിഡിഎസ് ചെയർപേഴ്‌സ ൺമാരുടെയും പ്രത്യേക യോഗം 19ന് രാവിലെ 10.30 ന് ഡിപിസി ഹാളിൽ ചേരും. വിദ്യാലയങ്ങളിലും കോളജുകളിലും മസ്തിഷ്‌ക ജ്വരത്തെ കുറിച്ച് ബോധവത്കരണ പരിപാടി ഒക്ടോബർ രണ്ടിന് സംഘടിപ്പിക്കണം. 'സ്വച്ഛ് ഉത്സവിന്‍റെ' ഭാഗമായി ഒക്ടോബർ രണ്ടിന് ജില്ലയിലെ എല്ലാ ജലാശയങ്ങളും ശുചീകരിക്കുന്നതിനും യോഗം തീരുമാനിച്ചു. ഡിപിസി ഹാളിൽ ചേർന്ന യോഗത്തിൽ ജില്ലാ കളക്ടർ അരുൺ കെ. വിജയൻ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, തദ്ദേശവകുപ്പ് ജോയിന്‍റ് ഡയറക്ടർ ടി.ജെ. അരുൺ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, ഡെപ്യൂട്ടി ഡിഎംഒ ഡോ. കെ.സി.സച്ചിൻ, ഹരിതകേരളം ജില്ലാ കോ ഓർഡിനേറ്റർ ഇ.കെ. സോമശേഖരൻ, വിവിധ വകുപ്പ് ഉദ്യോഗസ്ഥർ എന്നിവരും പങ്കെടുത്തു.

വന്യജീവി ആക്രമണം ലഘൂകരിക്കാൻ നിർദേശങ്ങൾ സമർപ്പിക്കാൻ ഹെൽപ്പ് ഡെസ്‌ക്കുമായി വനം വകുപ്പ്

ഇരിട്ടി: വന്യജീവി ആക്രമണം ലഘൂകരിക്കുന്നതിനുള്ള തീവ്രയജ്ഞ പരിപാടിയുടെ ഭാഗമായി തദ്ദേശ സ്വയംഭരണ സ്ഥാപനങ്ങളിലും വനംവകുപ്പ് റേഞ്ച് ഓഫീസുകളിലും ഹെൽപ്പ് ഡെസ്‌ക്കുകൾ ൾ ആരംഭിക്കുന്നു. വന്യജീവി ആക്രമണം അതിരൂക്ഷമായ പഞ്ചായത്ത് ഓഫീസുകളിൽ 16 മുതൽ 30 വരെ ഹെൽപ്പ് ഡെസ്‌കുകൾ പ്രവർത്തിക്കും. വനംവകുപ്പിന്‍റെ സേവനങ്ങളെക്കുറിച്ചുള്ള പരാതികളും, ആക്രമണം ലഘൂകരിക്കുന്നതിനുള്ള നിർദേശങ്ങളും ഹെൽപ്പ് ഡെസ്‌കുകൾ വഴി പൊതുജനങ്ങൾക്ക് സമർപ്പിക്കാം. വിളനാശം, നഷ്ടപരിഹാരം വൈകുന്നത്, സുരക്ഷാ ഭീഷണി എന്നിവയുമായി ബന്ധപ്പെട്ട പരാതികൾ രേഖാമൂലം നൽകാൻ ഹെൽപ്പ് ഡെസ്‌കുകളിൽ സൗകര്യമുണ്ടാകും. പ്രാദേശിക തലത്തിൽ പരിഹരിക്കാൻ കഴിയാത്ത വിഷയങ്ങൾ ജില്ലാ, സംസ്ഥാന തലങ്ങളിലേക്ക് കൈമാറാനും തുടർനടപടികൾ സ്വീകരിക്കാനും ഇതിലൂടെ സാധിക്കുമെന്നാണ് വനം വകുപ്പ് കരുതുന്നത്. വന്യജീവി സംഘർഷത്തെ "സംസ്ഥാന സവിശേഷ ദുരന്തം’ ആയി പ്രഖ്യാപിച്ച സർക്കാർ തീരുമാനത്തിന് പിന്നാലെയാണു തീവ്രയജ്ഞ പരിപാടി ആരംഭിക്കുന്നത്. വിവിധ സർക്കാർ വകുപ്പുകളും തദ്ദേശ സ്വയംഭരണ സ്ഥാപനങ്ങളും തമ്മിലുള്ള ഏകോപനം മെച്ചപ്പെടുത്താനും പൊതുജനങ്ങളുടെ പങ്കാളിത്തം ഉറപ്പാക്കാനും ഇത് ലക്ഷ്യമിടുന്നു. പൊതുജനങ്ങൾ ഈ സേവനം പരമാവധി പ്രയോജനപ്പെടുത്തണമെന്ന് കണ്ണൂർ ഡിഎഫ്ഒ ജോസ് മാത്യു പറഞ്ഞു. മനുഷ്യ ആക്രമണം ലഘൂകരിക്കുന്നതിന്‍റെ ഭാഗമായി വനം വകുപ്പ് പ്രഖ്യാപിച്ച പത്തിന കർമ പദ്ധതികളിൽപ്പെട്ട ജനജാഗ്രതാ സമിതിക്കുള്ള പരിശീലനം നേരത്തെ നൽകിയിരുന്നു. ആറളം, കൊട്ടിയൂർ, മുഴക്കുന്ന്, അയ്യൻകുന്ന്, കണിച്ചാർ, പയ്യാവൂർ , കേളകം എന്നീ പഞ്ചായത്തുകളിലുള്ളവർക്കാണ് പരിശീലനം നൽകിയത്. ജനവാസ മേഖലയിൽ ഇറങ്ങി ജനങ്ങളുടെ ജീവന് ഭീഷണിയാകുന്ന വന്യമൃഗങ്ങളെ കൊല്ലാനുള്ള കരട് നിയമ ഭേദഗതി കഴിഞ്ഞ ദിവസം മന്ത്രിസഭ അംഗീകരിച്ചിരുന്നു. മലയോര മേഖലയിൽ നൂറുകണത്തിന് കർഷകർക്ക് ഉണ്ടായ കൃഷി നാശത്തിന് നഷ്ടപരിഹാരം ഇനിയും ലഭിക്കാനുണ്ട്. ഹെൽപ്പ് ഡെസ്‌ക്കിലൂടെ ഇതിന് പരിഹാരം ഉണ്ടാകുന്ന പ്രതീക്ഷയിലാണ് കർഷകർ.

ആദിവാസി ക്ഷേമ സമിതി മാർച്ച് നടത്തി

ഇരിട്ടി: ആനമതിൽ നിർമാണം വൈകുന്നതിൽ പ്രതിഷേധിച്ച് ആദിവാസി ക്ഷേമ സമിതിയുടെ നേതൃ ത്വത്തിൽ ഇരിട്ടി പൊതുമരാമത്ത് ഓഫീസിലേക്ക് മാർച്ചും ധർണയും നടത്തി. ഉദ്യോഗസ്ഥരുടെ അനാസ്ഥകാരണമാണ് നിർമാണം ഇഴഞ്ഞു നീങ്ങുന്നതെന്ന് ആരോപിച്ചായിരുന്നു ആദിവാസി ക്ഷേമ സമിതി ആറളം ഫാം ഏരിയാ കമ്മിറ്റിയുടെ നേതൃത്വത്തിൽ പ്രതിഷേധ പരിപാടികൾ സംഘടിപ്പിച്ചത്. സിപിഎം ഇരിട്ടി ഏരിയാ സെക്രട്ടറി കെ.വി. സക്കീർ ഹുസൈൻ ധർണ ഉദ്ഘാടനം ചെയ്തു. ആറളം ഫാം എകെഎസ് ഏരിയ സെക്രട്ടറി കെ.എ. ജോസ് അധ്യക്ഷത വഹിച്ചു. കെ. മോഹനൻ, കെ.കെ. ജനാർദനൻ, പി.സി. ലക്ഷ്മി, പി.കെ. അനന്തൻ, പി.കെ. രാമചന്ദ്രൻ, മിനി ദിനേശൻ , എ.ആർ. രാമചന്ദ്രൻ, എ.ആർ. ജോയൽ, ടി. പ്രവീൺ എന്നിവർ പ്രസംഗിച്ചു.

ദേവസ്വം ഭൂമിയിൽനിന്ന് ലക്ഷങ്ങളുടെ വൻ മരങ്ങൾ മുറിച്ചു കടത്തി

ശ്രീകണ്ഠപുരം: ചെങ്ങളായി പഞ്ചായത്തിലെ ചുഴലി ദേവസ്വത്തിന്‍റെ കീഴിലുള്ള സ്ഥലത്തുനിന്നും 15 ലക്ഷത്തോളും വില വരുന്ന മരങ്ങൾ മുറിച്ചുകടത്തി. ചെങ്ങളായി-ചുഴലി റോഡരികിൽ കാക്കണ്ണൻ പാറയ്ക്കടുത്ത 45 ഏക്കറോളം സ്ഥലത്തുനിന്ന് തേക്ക്, ചന്ദനം, ഇരൂൾ തുടങ്ങിയ മരങ്ങളാണ് മുറിച്ചു കടത്തിയത്. ദേവസ്വം ഭൂമി സംരക്ഷിക്കാൻ നടപടികൾ വേണമെന്ന ആവശ്യം ഉയരുന്നതിനിടെയാണ് മരംകൊള്ള. ചില മരങ്ങൾക്ക് താഴെ തീയിട്ട ശേഷമാണ് മുറിച്ചത്. ആൾ സഞ്ചാരമില്ലാത്ത പ്രദേശമായതിനാൽ മരം മുറിച്ച് കടത്തിയത് എപ്പോഴാണെന്ന് വ്യക്തമല്ല. ചുഴലി ചാലിൽവയൽ സ്വദേശിയാണ് മരം കൊള്ളയ്ക്ക് പിന്നിലെന്ന് കാണിച്ച് ദേവസ്വം എക്സിക്യൂട്ടീവ് ഓഫീസർ സി.വി.അനീഷ് ശ്രീകണ്ഠപുരം പോലീസിൽ പരാതി നൽകി. ദേവസ്വം ഭൂമിയിൽ വ്യാപക കൈയേറ്റം നടന്നതായും ആക്ഷേപമുണ്ട്. പോലീസ് കേസെടുത്ത് അന്വേഷണം ആരംഭിച്ചു.

പ്രേരണയായത് കണ്ണൂരിൽനിന്നുള്ള നിവേദനം

സ്വന്തം ലേഖകൻ കണ്ണൂർ: വായ്പാ തിരിച്ചടവു മുടങ്ങിയതിനാലും മറ്റു കാരണങ്ങളാലും ധനകാര്യസ്ഥാപനങ്ങളും സർക്കാർ സംവിധാനങ്ങളും താമസിക്കാൻ മറ്റു വീടില്ലാത്തവരെ ജപ്തി ചെയ്തു കുടിയിറക്കുന്നത് ഒഴിവാക്കാൻ സർക്കാർ നിയമം കൊണ്ടുവരുന്നു. ഏക കിടപ്പാടം സംരക്ഷണം എന്ന പേരിലുള്ള നിയമനിർമാണത്തിന് മന്ത്രിസഭായോഗം അംഗീകാരം നൽകി. ബിൽ ഇപ്പോൾ നടക്കുന്ന നിയമസഭാ സമ്മേളനത്തിൽ അവതരിപ്പിച്ച് പാസാക്കി നിയമമാക്കാനാണു തീരുമാനം. വായ്പാ തിരിച്ചടവു മുടങ്ങിയതിനെത്തുടർന്നു കിടപ്പാടം ജപ്തി ചെയ്യപ്പെട്ടു തെരുവിലിറങ്ങേണ്ടി വരുന്നവരുടെ അവസ്ഥയെക്കുറിച്ച് കണ്ണൂരിൽനിന്നു ലഭിച്ച നിവേദനമാണ് സർക്കാരിനെ പുതിയ നിയമനിർമാണത്തിലേക്കു നയിച്ചത്. കണ്ണൂർ മുനിസിപ്പൽ കൗൺസിലറായിരുന്ന പൊതുപ്രവർത്തകൻ, സഹകരണ സംഘം റിട്ട. ട്രൈബ്യൂണൽ ഡയറക്ടർ ഉൾപ്പെടെയുള്ള അഞ്ചു പേരാണ് ഇതു സംബന്ധിച്ച് നിവേദനവും നടപ്പാക്കേണ്ട രീതികളെക്കുറിച്ചുള്ള നിർദേശങ്ങളും സമർപ്പിച്ചത്. ഒരു വർഷം മുന്പായിരുന്നു ഇത്. ഇക്കാര്യങ്ങൾ മുഖ്യമന്ത്രിയുടെ നേതൃത്വത്തിൽ വിവിധ മന്ത്രിമാർ, ചീഫ് സെക്രട്ടറി, വകുപ്പ് സെക്രട്ടറിമാർ, ഉന്നതോദ്യോഗസ്ഥർ എന്നിവർ പലപ്പോഴായി ചർച്ച ചെയ്താണ് നിയമനിർമാണം തീരുമാനിച്ചത്. വാർഷിക വരുമാനം മൂന്നു ലക്ഷം രൂപയിൽ താഴെയുള്ള ആകെ വായ്പാതുക അഞ്ചു ലക്ഷവും പിഴയും പിഴപ്പലിശയും സഹിതം 10 ലക്ഷത്തിൽ കവിയാത്തവർക്കുമാണു നിയമ പരിരക്ഷ ലഭിക്കുക. പൊതുമേഖലാ ബാങ്കുകൾ, സഹകരണ സ്ഥാപനങ്ങൾ, സർക്കാർ നിയന്ത്രണത്തിലുള്ള കെഎസ്എഫ്ഇ, കെഎഫ്സി പോലുള്ള സ്ഥാപനങ്ങളിൽനിന്നും വായ്പ എടുത്തവരാണ് ഏക കിടപ്പാടം സംരക്ഷണ നിയമത്തിന്‍റെ പരിധിയിൽ വരിക. ഇതിനായി സർക്കാർ പ്രത്യേക ഫണ്ട് സംവിധാനവും ഒരുക്കും. സ്വകാര്യ ധനകാര്യ സ്ഥാപനങ്ങൾ, മൈക്രോ ഫിനാൻസ് എന്നിവയിൽനിന്ന് വായ്പ എടുത്തവർ നിയമത്തിന്‍റെ കീഴിൽ വരില്ല. ജപ്തിയുമായി ബന്ധപ്പെട്ട കാര്യങ്ങൾ പരിശോധിച്ച് ഉറപ്പുവരുത്താനായി ജില്ലാതലത്തിലും സംസ്ഥാനതലത്തിലും സമിതികൾ രൂപീകരിക്കും. സമിതിയുടെ റിപ്പോർട്ടിന്‍റെ അടിസ്ഥാനത്തിലായിരിക്കും അന്തിമ തീരുമാനമെടുക്കുക.

അര്‍ജുനെ സ്വന്തമാക്കി കണ്ണൂര്‍ വാരിയേഴ്‌സ്

കണ്ണൂര്‍: സൂപ്പര്‍ ലീഗ് കേരളയുടെ ആദ്യ സീസണില്‍ തൃശൂര്‍ മാജിക്കിന് വേണ്ടി ബൂട്ടുകെട്ടിയ എം.എം. അര്‍ജുന്‍ കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബില്‍. തൃശൂര്‍ മാജിക്കിന് വേണ്ടി എട്ടു മത്സരം കളിച്ച താരം ഒരു ഗോളും നേടിയിട്ടുണ്ട്. മിഡ്ഫില്‍ഡറായും വലതു വിംഗറായും കളിക്കാന്‍ സാധിക്കുന്ന താരമാണ്. 2024-25 സീസണില്‍ കേരള പ്രീമിയര്‍ ലീഗ് കിരീടത്തില്‍ മുത്തമിട്ട മുത്തൂറ്റ് എഫ്എക്കു വേണ്ടിയും മധ്യനിരയില്‍ തിളങ്ങിയ താരമാണ്. ടീമിനായി കേരള പ്രീമിയര്‍ ലീഗില്‍ ഗോളും അസിസ്റ്റുകളും നേടിയിട്ടുണ്ട്. മുത്തൂറ്റിന് വേണ്ടി പ്രീമിയര്‍ ലീഗ് നെക്സ്റ്റ് ജനറേഷന്‍ കപ്പില്‍ മത്സരിച്ചു. ടൂര്‍ണമെന്‍റില്‍ ഇംഗ്ലീഷ് പ്രീമിയര്‍ ലീഗ് ക്ലബുകളുടെ അക്കാദമി ടീമുകളായ എവര്‍ട്ടണ്‍, ടോട്ടന്‍ഹാം, ക്രിസ്റ്റല്‍ പാലസ് തുടങ്ങിയ ടീമുകള്‍ പങ്കെടുത്തിരുന്നു. കൂടാതെ മുത്തൂറ്റിന് വേണ്ടി യൂത്ത് ഡവലപ്പ്‌മെന്‍റ് ലീഗും കളിച്ചു, ദേശീയ ലെവലില്‍ മൂന്നാം സ്ഥാനവും നേടി. കാലിക്കറ്റ് യൂണിവേഴ്‌സിറ്റിക്ക് വേണ്ടി ഖേലോ ഇന്ത്യ യൂണിവേഴ്‌സിറ്റി ഗെയിംസില്‍ കിരീടവും ഓള്‍ ഇന്ത്യ ഇന്‍റർ യൂണിവേഴ്‌സിറ്റി ചാമ്പ്യന്‍ഷിപ്പില്‍ രണ്ടാം സ്ഥാനവും സ്വന്തമാക്കിയിട്ടുണ്ട്. 2018 ല്‍ എഫ്‌സി കേരളയുടെ അണ്ടര്‍ 15 വിഭാഗത്തില്‍ ഫുട്‌ബോള്‍ കരിയര്‍ ആരംഭിച്ച താരം ആ വര്‍ഷം യൂത്ത് ഐ ലീഗും കളിച്ചു. തൃശൂര്‍ ജില്ലയിലെ കിഴുപ്പിള്ളിക്കര സ്വദേശിയാണ്.

മടമ്പം പികെഎം കോളജിന് എക്സലൻസ് അവാർഡ്

പയ്യാവൂർ: ദേശീയതലത്തിൽ മികവു തെളിയിച്ച കേരളത്തിലെ ഉന്നതവിദ്യാഭ്യാസ സ്ഥാപനങ്ങളെ അനുമോദിക്കുന്ന "എക്സലൻസിയ 2025' പരിപാടിയിൽ മടമ്പം പികെഎം കോളജ് ഓഫ് എഡ്യുക്കേഷന് മിനിസ്റ്റേഴ്സ് അവാർഡ് ഫോർ എക്സലൻസ് ലഭിച്ചു. തിരുവനന്തപുരം ടാഗോർ തിയേറ്ററിൽ നടന്ന ചടങ്ങിൽ ഉന്നത വിദ്യാഭ്യാസ മന്ത്രി ഡോ. ആർ. ബിന്ദുവിൽ നിന്ന് കോളജ് വൈസ് പ്രിൻസിപ്പൽ ഡോ. പ്രശാന്ത് മാത്യു അവാർഡ് ഏറ്റുവാങ്ങി. നാക് ആക്രെഡിറ്റേഷനിൽ (തേഡ് സൈക്കിൾ) എ ഗ്രേഡ്, അധ്യാപക പരിശീലനത്തിൽ കേരള ഇൻസ്റ്റിറ്റ്യൂഷണൽ റാങ്കിംഗ് ഫ്രെയിംവർക്ക്‌ 2024 ൽ (കെഐആർഎഫ്) മൂന്നാം റാങ്ക് എന്നീ നേട്ടങ്ങൾ കരസ്ഥമാക്കിയതിനാണ് അവാർഡ്. കേരള സർക്കാരിന്‍റെ ഉന്നത വിദ്യാഭ്യാസ വകുപ്പും സ്റ്റേറ്റ് ലെവൽ ക്വാളിറ്റി അഷ്വറൻസ് സെല്ലും സംയുക്തമായാണ് എക്സലൻസിയ 2025 സംഘടിപ്പിച്ചത്.

കളക്ടർക്കും ഡിഐജിക്കുമെതിരേ സൈറണടിച്ച് കൗൺസിൽ യോഗം

കണ്ണൂർ: നഗരത്തിൽ കോർപറേഷൻ സൈറൺ പതിവ് തെറ്റാതെ മുഴങ്ങുമെന്ന് തീരുമാനമെടുത്ത കൗൺസിൽ യോഗത്തിൽ കണ്ണൂർ കളക്ടർക്കും ഡിഐജിക്കുമെതിരേ രൂക്ഷവിമർശനം. കണ്ണൂർ കളക്ടർ നടത്തിയത് അധികാര ദുർവിനിയോഗമെന്ന് മേയർ മുസ്‌ലിഹ് മഠത്തിൽ കൗൺസിൽ യോഗത്തിൽ പറഞ്ഞു. പരാതി ഉണ്ടെങ്കിൽ അത് കളക്ടർ ഹാജരാക്കണമായിരുന്നു. പരാതിക്കാരനെ കളക്ടറുടെ സാന്നിധ്യത്തിൽ കോർപറേഷനിൽ വിളിച്ചുവരുത്താനുള്ള അപൂർവ തീരുമാനവും ഇന്നലെ ചേർന്ന കൗൺസിൽ യോഗം എടുത്തു. കോർപറേഷന്‍റെ സൈറൺ മുഴക്കം കുറയ്ക്കുകയോ നിർത്തുകയോ ചെയ്യണമെന്നാവശ്യപ്പെട്ട് കളക്ടർ കോർപറേഷനു കത്തു നൽകിയതിനു പിന്നാലെയാണ് ഇതു സംബന്ധിച്ചു ചർച്ച ചെയ്യാൻ അടിയന്തര കൗൺസിൽ യോഗം ചേർന്നത്. സൈറൺ നിർത്തണമെന്നാവശ്യപ്പെട്ട് മുന്പ് പോലീസ് കോർപറേഷനു നൽകിയ നോട്ടീസും കൗൺസിൽ യോഗം തള്ളിയിരുന്നു. കുട്ടികൾക്കും മുതിർന്നവർക്കും ശബ്ദം ശല്യമാകുന്നതായി പരസരവാസികൾ പരാതി നൽകിയിരുന്നു. ഭരണ പ്രതിപക്ഷ ഭേദമന്യേ ചർച്ചയിൽ പങ്കെടുത്തവർ കളക്ടറുടെ കുറിപ്പിനെതിരേ സൈറൺ മുഴക്കി പ്രതിഷേധിക്കണമെന്നു ആവശ്യമുയർത്തി. കണ്ണൂർ കോർപറേഷൻ മുഴക്കുന്ന സൈറൺ ആണ് ദുരന്തമെന്നു പറഞ്ഞ കളക്ടറാണ് ഏറ്റവും വലിയ ദുരന്തമെന്ന് മുൻ മേയർ ടി.ഒ. മോഹനൻ പരിഹസിച്ചു. എന്താണ് ദുരന്തം എന്നത് കളക്ടർക്ക് അറിയില്ലേ? കളക്ടർ ആ പദവിയിലിരിക്കാൻ അർഹനല്ല. കോർപറേഷൻ ഭരണഘടനാ സ്ഥാപനമാണെന്നത് കളക്ടർ മറക്കുന്നുവെന്നും ടി. ഒ. മോഹനൻ പറഞ്ഞു. മേയർക്ക് അറിയിപ്പ് നലാകാതെയാണ് മലിനീകരണ നിയന്ത്രണ ബോർഡ് ഉദ്യോഗസ്ഥർ സൈറൺ പരിശോധിക്കാനെത്തിയത്. ഇത് ഗൂഢാലോചനയാണെന്നും സൈറൺ സംവിധാനം തുടരണമെന്നും മോഹനൻ പറഞ്ഞു. ചരിത്രപരമായ വിശേഷണം ഉള്ള സൈറൺ മുഴക്കം ഇല്ലാതാക്കാൻ കളക്ടർ ഇല്ലാത്ത അധികാരം ഉപ യോഗിക്കുകയാണെന്ന് ഡെപ്യൂട്ടി മേയർ പി. ഇന്ദിര പറഞ്ഞു. തെരുവ് നായ്ക്കളെ വെടി വച്ചുകൊല്ലാൻ ഉത്തരവിടാത്ത കളക്ടറാണോ സൈറൺ നിർത്തലാക്കാൻ ആവശ്യപ്പെടുന്നതെന്ന് സ്ഥിരം സമിതി അധ്യക്ഷൻ സുരേഷ് ബാബു എളയാവൂർ ചോദിച്ചു. കെ.പി. അബ്ദുൾ റസാഖ്,എം.പി. രാജേഷ്, ടി. രവീന്ദ്രൻ, സിയാദ് തങ്ങൾ, എൻ. ഉഷ, എസ്. ഷഹീദ, ഷമീമ, ഷാഹിന മൊയ്തീൻ, കെ. പ്രദീപൻ,വി.കെ. ഷൈജു എന്നിവരും കളക്‌ടറുടെ നടപടിയെ വിമർശിച്ചു.

സാങ്കേതികത്വത്തിന്‍റെ മതിൽ പൊളിഞ്ഞു; പി.എ.നായരുടെ ഭൂമിയിലേക്ക് വഴിയൊരുങ്ങി

എളേരിത്തട്ട്: നാട്ടിൽ ഒരു ഉന്നതവിദ്യാഭ്യാസ സ്ഥാപനം കൊണ്ടുവരുന്നതിനായി സ്വന്തം കുടുംബം സർക്കാരിന് സൗജന്യമായി സംഭാവന നൽകിയ ഭൂമിക്കും അതിനു പിന്നിൽ അവശേഷിച്ച സ്വന്തം സ്ഥലത്തിനുമിടയിൽ ഉയർന്ന സാങ്കേതികത്വത്തിന്‍റെ വൻമതിൽ ഇടിഞ്ഞുവീഴുന്നത് വർഷങ്ങൾ നീണ്ട പോരാട്ടത്തിനൊടുവിൽ തന്‍റെ 86-ാം വയസിൽ പി.എ. നായർ നോക്കിക്കണ്ടു. ഏറെ താമസിച്ചിട്ടാണെങ്കിലും ഒടുവിൽ എളേരിത്തട്ട് ഗവ. കോളജിന്‍റെ മതിലിന്‍റെ ഒരു ഭാഗം പൊളിച്ച് പി.എ. നായരുടെ ഭൂമിയിലേക്ക് വഴി തുറന്നുനൽകി. തന്‍റെ സ്ഥലത്തേക്കുള്ള വഴി നിഷേധിച്ച് കോളജ് അധികൃതർ മതിൽ കെട്ടിയതിനെതിരെ വർഷങ്ങളായി വിവിധ ഓഫീസുകൾ കയറിയിറങ്ങുകയായിരുന്നു മുതിർന്ന സിപിഐ നേതാവ് കൂടിയായ പൊടോര അപ്പുനായരെന്ന പി.എ. നായർ. ആദർശം വിട്ട് രാഷ്ട്രീയസ്വാധീനം ചെലുത്താൻ നിൽക്കാതെ തികച്ചും സാധാരണക്കാരനായി പരാതിയും അപേക്ഷയും നൽകി വർഷങ്ങളോളം കാത്തിരുന്നു. കോളജ് വിദ്യാഭ്യാസ വകുപ്പിന്‍റെ ഭാഗത്തുനിന്ന് യാതൊരുവിധ അനുകൂല നടപടികളും ഇല്ലാതിരുന്നപ്പോൾ 2008 ൽ മനുഷ്യാവകാശ കമ്മീഷനെ സമീപിച്ചു. വയോധികനായ വ്യക്തിക്ക് സ്വന്തം സ്ഥലത്തേക്കുള്ള പ്രവേശനം നിഷേധിക്കരുതെന്നും അടിയന്തിരമായി വഴി അനുവദിക്കണമെന്നും കമ്മീഷന്‍റെ വിധി ഉണ്ടായെങ്കിലും കോളജ് വിദ്യാഭ്യാസവകുപ്പ് പിന്നെയും സാങ്കേതികത്വങ്ങൾ പറഞ്ഞ് എതിർപ്പുമായി നിന്നു. വാഹനം പോകാനാവശ്യമായ വീതിയിൽ വഴി അനുവദിക്കാനാവില്ലെന്ന നിലപാടിൽ അവർ ഉറച്ചുനിന്നതോടെ ജീവിതസായാഹ്നത്തിൽ സ്വന്തം ഭൂമിയിൽ ഒരു വീടുവച്ച് താമസിക്കണമെന്ന പി.എ. നായരുടെ സ്വപ്നത്തിൽ കരിനിഴൽ വീണു. വീടുനിർമാണത്തിനായി ഇറക്കിവച്ച കല്ലുകൾക്കുമേൽ കാടും പടർപ്പുകളും വന്നുമൂടി. എൺപതുകൾ പിന്നിട്ട പ്രായത്തിൽ അപ്പുനായർക്ക് കോടതിയിലും പോകേണ്ടിവന്നു. കോളജിന് വേണ്ടി സൗജന്യമായി സ്ഥലം നൽകിയ വ്യക്തിയുടെ സ്വന്തം സ്ഥലത്തേക്കുള്ള വഴിമുടക്കുന്നതിലെ അധാർമികത മാധ്യമങ്ങളിലും സമൂഹത്തിലും ചർച്ചയായി. ഇതോടെ എംഎൽഎമാരായ ഇ. ചന്ദ്രശേഖരനും എം. രാജഗോപാലനുമടക്കമുള്ള ജനപ്രതിനിധികളും നേതാക്കളും ഇടപെട്ട് ഉന്നതവിദ്യാഭ്യാസ മന്ത്രി ആർ. ബിന്ദുവിന്‍റെ സാന്നിധ്യത്തിൽ ചർച്ച നടത്തി. മതിൽ പൊളിച്ചിട്ടായാലും പി.എ. നായരുടെ സ്ഥലത്തേക്ക് മനുഷ്യാവകാശ കമ്മീഷന്‍റെ ഉത്തരവ് പ്രകാരമുള്ള വഴി അനുവദിക്കാൻ കോളജ് വിദ്യാഭ്യാസ വകുപ്പിന് നിർദേശംനൽകി. മാസങ്ങളുടെ കാത്തിരിപ്പിനൊടുവിലാണ് ആ തീരുമാനം ഇന്നലെ നടപ്പായത്. കമ്യൂണിസ്റ്റ് പ്രസ്ഥാനത്തിനു വേണ്ടി തൂക്കുമരത്തിലേറിയ പൊടോര കുഞ്ഞമ്പുനായരുടെ സഹോദരിയുടെ മകനാണ് പി.എ. നായർ. 1981 ൽ എളേരിത്തട്ടിൽ സർക്കാർ കോളജ് സ്ഥാപിക്കാൻ ഏറ്റവുമധികം ഭൂമി സൗജന്യമായി നൽകിയത് പൊടോര കുഞ്ഞമ്പു നായരുടെ കുടുംബമാണ്. കുഞ്ഞമ്പു നായരുടെ സഹോദരൻ കുഞ്ഞിരാമൻ നായരും സഹോദരി മാണി അമ്മയുടെ മക്കളായ കൃഷ്ണൻ നായരും പി.എ. നായരും ചേർന്നാണ് കോളജിന് വേണ്ടി ഏക്കർ കണക്കിന് ഭൂമി സൗജന്യമായി നൽകിയത്. ഇതിനു പിന്നിൽ അവശേഷിച്ചിരുന്ന പി.എ. നായരുടെ സ്ഥലത്തേക്ക് പോകാനുള്ള വഴി ഈ സ്ഥലത്തിന്‍റെ ഒരു ഭാഗത്തുകൂടിയായിരുന്നു. വർഷങ്ങൾക്കിപ്പുറം കോളജ് അധികൃതർ മതിൽ കെട്ടിയതോടെയാണ് ഈ വഴിയടഞ്ഞത്. ധാർമികതയ്ക്കും നീതിക്കും വേണ്ടി വർഷങ്ങളായി നടത്തിയ പോരാട്ടം 86-ാം വയസിലെങ്കിലും വിജയത്തിലെത്തിയതിന്‍റെ ആശ്വാസത്തിലാണ് പി.എ.നായർ. ഇപ്പോൾ കയ്യൂരിൽ താമസിക്കുന്ന ഇദ്ദേഹം മതിൽ പൊളിച്ച് സ്വന്തം സ്ഥലത്തേക്കുള്ള വഴി തുറന്നുകിട്ടുന്നത് കാണാൻ ഇന്നലെ എളേരിത്തട്ടിലെത്തിയിരുന്നു. ഇനിയെങ്കിലും ഇവിടെ ഒരു വീട് നിർമിക്കാനുള്ള സ്വപ്നം വീണ്ടും പൊടിതട്ടിയെടുക്കാനുള്ള ആലോചനയിലണ് പി.എ.നായരും കുടുംബവും.

എൽഡിഎഫ് മലയോര കർഷകർക്കൊപ്പം: ജനാധിപത്യ കേരള കോൺഗ്രസ്

കണ്ണൂർ: ജനവാസ മേഖലകളിൽ ഇറങ്ങുന്ന ആക്രമകാരികളായ വന്യമൃഗങ്ങളെ കൊല്ലാൻ അനുമതി നൽകുന്ന നിയമനിർമാണ ബില്ലിന് മന്ത്രിസഭ അനുമതി നൽകിയത് എൽഡിഎഫ് സർക്കാർ മലയോര കർഷകർക്ക് ഒപ്പമാണ് എന്നതിന്‍റെ ഏറ്റവും വലിയ തെളിവാണെന്ന് ജനാധിപത്യ കേരള കോൺഗ്രസ് സംസ്ഥാന ഡെപ്യൂട്ടി ചെയർമാൻ എ. ജെ.ജോസഫ് പറഞ്ഞു. ജനാധിപത്യ കേരള കോൺഗ്രസ് ജില്ലാ നേതൃത്വ യോഗം കണ്ണൂരിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദേഹം. യോഗത്തിൽ ജില്ലാ പ്രസിഡന്‍റ് ജോജി ആനിത്തോട്ടം അധ്യക്ഷത വഹിച്ചു. ജനറൽ സെക്രട്ടറി കെ.പി. അനിൽകുമാർ, ജില്ലാ ഭാരവാഹികളായ ജോസഫ് പരത്തനാൽ, ടോമിച്ചൻ നടുതൊട്ടിയിൽ, ബാബു അണിയറ, ബാബു സെബാസ്റ്റ്യൻ, ജോസ് മാത്യു, ബിജു പുളിക്കൻ, സണ്ണി പായിക്കാടൻ, ജോസ് തെക്കേടത്ത്, സണ്ണി എന്നിവർ പ്രസംഗിച്ചു.

"സീറ്റ് ' വാർഷികവും അവാർഡ് ദാനവും

ചെമ്പേരി: ചെമ്പേരി കേന്ദ്രമായി പ്രവർത്തിക്കുന്ന അധ്യാപക സംഘടനയായ കാത്തലിക് എഡ്യുക്കേഷണൽ എംപ്ലോയീസ് ട്രസ്റ്റ് (സീറ്റ്) വാർഷികാഘോഷവും സംഘടനയുടെ സ്ഥാപക പ്രസിഡന്‍റ് കെ.എ. യോഹന്നാൻ സ്മാരക എക്സലൻസ് അവാർഡ് ദാനവും ചെമ്പേരി മദർ തെരേസ ഓഡിറ്റോറിയത്തിൽ നടന്നു. തലശേരി അതിരൂപത വികാരി ജനറാൾ മോൺ. ആന്‍റണി മുതുകുന്നേൽ ഉദ്ഘാടനം ചെയ്തു. സീറ്റ് പ്രസിഡന്‍റ് മാത്യു ജോസഫ് അധ്യക്ഷത വഹിച്ചു. ഈ വർഷത്തെ കെ.എ. യോഹന്നാൻ എക്സലൻസ് അവാർഡ് ജീവകാരുണ്യ സംരംഭങ്ങൾക്ക് നേതൃത്വം നൽകുന്ന പ്രശസ്ത പാലിയേറ്റീവ് പ്രവർത്തകയും വിദഗ്ധ ചികിത്സകയുമായ ഡോ. ലില്ലി ലത്തീഫിന് ചെമ്പേരി ലൂർദ് മാതാ ബസിലിക്ക റെക്‌ടർ റവ. ഡോ. ജോർജ് കാഞ്ഞിരക്കാട്ട് സമ്മാനിച്ചു. പതിനായിരം രൂപയും പ്രശംസാ ഫലകവും അടങ്ങുന്നതാണ് അവാർഡ്. ചെമ്പേരി നിർമല ഹയർ സെക്കൻഡറി സ്കൂളിൽ ഏറ്റവും കൂടുതൽ മാർക്ക് നേടുന്ന വിദ്യാർഥിക്കുള്ള പന്നിക്കോട്ട് ഫാമിലി എൻഡോവ്മെന്‍റ് പ്ലസ് വണ്ണിൽ മുഴുവൻ മാർക്ക് കരസ്ഥമാക്കിയ ഏയ്ഞ്ചൽ മരിയ രാജേഷിന് ഏരുവേശി ഗ്രാമപഞ്ചായത്ത്‌ പ്രസിഡന്‍റ് മിനി ഷൈബി കൈമാറി. ജിജി കൊന്നയ്ക്കൽ, ഷൈബി കുഴിവേലിപ്പുറത്ത്, ജോമി ജോസ് ചാലിൽ, ദീപു ജോസ് കണ്ടത്തിൽ, ജിൻസ് തോമസ്, സോന ഷാജി എന്നിവർ പ്രസംഗിച്ചു.

പച്ചത്തുരുത്തുകൾക്ക് മുഖ്യമന്ത്രിയുടെ പുരസ്‌കാരം: കണ്ണൂരിന് മികച്ച നേട്ടം

കണ്ണൂർ: ഹരിതകേരളം മിഷന്‍റെ ആഭിമുഖ്യത്തിലുള്ള മികച്ച പച്ചത്തുരുത്തുകൾക്ക് മുഖ്യമന്ത്രിയുടെ പുരസ്‌കാരം പ്രഖ്യാപിച്ചതിൽ കണ്ണൂർ ജില്ലയ്ക്ക് മികച്ച നേട്ടം. പങ്കെടുത്ത എല്ലാ മത്സര വിഭാഗങ്ങളിലും കണ്ണൂർ ജില്ല മികച്ച പ്രകടനം കാഴ്ചവച്ചു. തദ്ദേശ സ്വയംഭരണ സ്ഥാപനങ്ങളുടെ വിഭാഗത്തിൽ ഒന്നാം സ്ഥാനം മുഴക്കുന്ന് ഗ്രാമപഞ്ചായത്തിന്‍റെ അയ്യപ്പൻകാവ് പച്ചത്തുരുത്ത് സ്വന്തമാക്കി. പ്രത്യേക ജൂറി പുരസ്‌കാരം കുറുമാത്തൂർ ഗ്രാമപഞ്ചായ ത്ത്-ശ്രീസ്ഥ പച്ചത്തുരുത്ത്. കലാലയ വിഭാഗത്തിൽ ഒന്നാം സ്ഥാനം പയ്യന്നൂർ കോളജ് പച്ചത്തുരുത്ത്. വിദ്യാലയ വിഭാഗത്തിൽ ഒന്നാം സ്ഥാനം തവിടിശേരി ജിഎച്ച്എസ്എസ് പച്ചത്തുരുത്ത് -പെരിങ്ങോം-വയക്കര പഞ്ചായത്ത്. മറ്റ് സ്ഥാപനങ്ങളുടെ വിഭാഗത്തിൽ ഒന്നാം സ്ഥാനം കണ്ണൂർ സെൻട്രൽ ജയിൽ ട്രീമ്യൂസിയം. ദേവഹരിതം വിഭാഗത്തിൽ രണ്ടാം സ്ഥാനം: കണ്ണപുരം ഗ്രാമപഞ്ചായത്ത്-പ്രയാങ്കോട്ടം പച്ചത്തുരുത്ത് മൂന്നാം സ്ഥാനം (രണ്ടുപേർക്ക്): കരിവള്ളൂർ പെരളം ഭഗവതി ക്ഷേത്രം പച്ചത്തുരുത്ത്- കരിവെള്ളൂർ-പെരളം ഗ്രാമപഞ്ചായത്ത്, മുഴക്കുന്ന് മൃദംഗശൈലേശ്വരി പച്ചത്തുരുത്ത്-മുഴക്കുന്ന് ഗ്രാമപഞ്ചായത്ത്. മുളന്തുരുത്ത് രണ്ടാം സ്ഥാനം (രണ്ടുപേർക്ക്): ചെറുതാഴം ഗ്രാമപഞ്ചായത്ത്-ചെറുതാഴം മുള പച്ചത്തുരുത്ത്, പായം ഗ്രാമപഞ്ചായത്ത്-കിളിയന്തറ തോണിക്കടവ് പച്ചത്തുരുത്ത്. മൂന്നാം സ്ഥാനം: കുറുമാത്തൂർ ഗ്രാമപഞ്ചായത്ത്-ആരണ്യകം. കണ്ടൽ തുരുത്തുകൾ ഒന്നാം സ്ഥാനം: ചെറുതാഴം ഗ്രാമപഞ്ചായത്ത്-വയലപ്ര പാർക്ക്.

അമീബിക് മസ്തിഷ്‌കജ്വരം: കിണറുകളുടെ ക്ലോറിനേഷൻ പത്തിനകം പൂർത്തിയാക്കണം

കണ്ണൂർ: അമീബിക് മസ്തിഷ്‌കജ്വരം ഉൾപ്പെടെ ജലജന്യരോഗങ്ങളെ പ്രതിരോധിക്കുന്നതിന്, ക്ലോറിനേഷൻ നടത്താത്ത ജില്ലയിലെ എല്ലാ സ്വകാര്യ, പൊതുകിണറുകളും ഒക്ടോബർ പത്തിനകം ക്ലോറിനേറ്റ് ചെയ്യാൻ ജില്ലാപഞ്ചായത്ത് പ്രസിഡന്‍റ് കെ.കെ. രത്‌നകുമാരിയുടെ അധ്യക്ഷതയിൽ ചേർന്ന അവലോകന യോഗത്തിൽ തീരുമാനം. പൊതുജനങ്ങൾ ഉപയോഗിക്കുന്ന നീന്തൽക്കുളങ്ങളും വാട്ടർതീം പാർക്കുകളും ക്ലോറിൻ അണുനാശിനികൾ ഉപയോഗിച്ച് ശുദ്ധീകരിക്കുന്നുണ്ടെന്ന് ഉറപ്പ് വരുത്താൻ പരിശോധന നടത്തും. ഇവയിലെ ജലത്തിന്‍റെ ഗുണനിലവാര പരിശോധന തദ്ദേശ സ്വയംഭരണ സ്ഥാപനങ്ങൾ ഉറപ്പ് വരുത്തണം. ഒക്ടോബർ രണ്ട് മുതൽ ജില്ലയിൽ ജല ശുചിത്വ വാരമായി ആചരിക്കും. വിവിധ വകുപ്പുകളുടെയും സ്ഥാപനങ്ങളുടെയും ഓഫീസുകളിലെ വാട്ടർ ടാങ്കുകൾ ശുചീകരിക്കാൻ അടിയന്തിര നടപടി സ്വീകരിക്കാൻ വകുപ്പ് മേധാവികൾക്ക് കളക്ടർ നിർദേശം നല്കി.കിണറുകൾ ഉൾപ്പെടെ ക്ലോറിനേറ്റ് ചെയ്യുന്നതിന് കുടുംബശ്രീ അയൽക്കൂട്ടം ആരോഗ്യ വോളന്‍റിയർ മാർ, എഡിഎസ്-സിഡിഎസ് ആരോഗ്യ വോളന്‍റിയർമാരുടെ ചുമതല ഉള്ളവർ എന്നിവരെ നിയോഗി ക്കും. ഇവർക്ക് ആരോഗ്യവകുപ്പ് പരിശീലനം നല്കും. തുടർപ്രവർത്തനമായി മൂന്നുമാസം കൂടുമ്പോൾ കിണറുകളും ജലാശയങ്ങളും ഉൾപ്പെടെ ക്ലോറിനേറ്റ് ചെയ്യണം. കണ്ണൂർ കോർപറേഷൻ, തളിപ്പറമ്പ് നഗരസഭ, ക്ലോറിനേഷൻ പ്രവർത്തനത്തിൽ പിന്നിൽ നില്ക്കുന്ന തദ്ദേശ ഭരണ സ്ഥാപനങ്ങൾ എന്നിവിടങ്ങളിലെ ആരോഗ്യ വകുപ്പ് ജീവനക്കാർ, ക്ലീൻ സിറ്റി മാനേജർ, ഹെൽത്ത് സൂപ്പർ വൈസർ എന്നിവരുടെയും കുടുംബശ്രീ സിഡിഎസ് ചെയർപേഴ്‌സ ൺമാരുടെയും പ്രത്യേക യോഗം 19ന് രാവിലെ 10.30 ന് ഡിപിസി ഹാളിൽ ചേരും. വിദ്യാലയങ്ങളിലും കോളജുകളിലും മസ്തിഷ്‌ക ജ്വരത്തെ കുറിച്ച് ബോധവത്കരണ പരിപാടി ഒക്ടോബർ രണ്ടിന് സംഘടിപ്പിക്കണം. 'സ്വച്ഛ് ഉത്സവിന്‍റെ' ഭാഗമായി ഒക്ടോബർ രണ്ടിന് ജില്ലയിലെ എല്ലാ ജലാശയങ്ങളും ശുചീകരിക്കുന്നതിനും യോഗം തീരുമാനിച്ചു. ഡിപിസി ഹാളിൽ ചേർന്ന യോഗത്തിൽ ജില്ലാ കളക്ടർ അരുൺ കെ. വിജയൻ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, തദ്ദേശവകുപ്പ് ജോയിന്‍റ് ഡയറക്ടർ ടി.ജെ. അരുൺ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, ഡെപ്യൂട്ടി ഡിഎംഒ ഡോ. കെ.സി.സച്ചിൻ, ഹരിതകേരളം ജില്ലാ കോ ഓർഡിനേറ്റർ ഇ.കെ. സോമശേഖരൻ, വിവിധ വകുപ്പ് ഉദ്യോഗസ്ഥർ എന്നിവരും പങ്കെടുത്തു.

നിർദേശങ്ങൾ സമർപ്പിക്കാൻ ഹെൽപ്പ് ഡെസ്‌ക്കുമായി വനം വകുപ്പ്

ഇരിട്ടി: വന്യജീവി ആക്രമണം ലഘൂകരിക്കുന്നതിനുള്ള തീവ്രയജ്ഞ പരിപാടിയുടെ ഭാഗമായി തദ്ദേശ സ്വയംഭരണ സ്ഥാപനങ്ങളിലും വനംവകുപ്പ് റേഞ്ച് ഓഫീസുകളിലും ഹെൽപ്പ് ഡെസ്‌ക്കുകൾ ൾ ആരംഭിക്കുന്നു. വന്യജീവി ആക്രമണം അതിരൂക്ഷമായ പഞ്ചായത്ത് ഓഫീസുകളിൽ 16 മുതൽ 30 വരെ ഹെൽപ്പ് ഡെസ്‌കുകൾ പ്രവർത്തിക്കും. വനംവകുപ്പിന്‍റെ സേവനങ്ങളെക്കുറിച്ചുള്ള പരാതികളും, ആക്രമണം ലഘൂകരിക്കുന്നതിനുള്ള നിർദേശങ്ങളും ഹെൽപ്പ് ഡെസ്‌കുകൾ വഴി പൊതുജനങ്ങൾക്ക് സമർപ്പിക്കാം. വിളനാശം, നഷ്ടപരിഹാരം വൈകുന്നത്, സുരക്ഷാ ഭീഷണി എന്നിവയുമായി ബന്ധപ്പെട്ട പരാതികൾ രേഖാമൂലം നൽകാൻ ഹെൽപ്പ് ഡെസ്‌കുകളിൽ സൗകര്യമുണ്ടാകും. പ്രാദേശിക തലത്തിൽ പരിഹരിക്കാൻ കഴിയാത്ത വിഷയങ്ങൾ ജില്ലാ, സംസ്ഥാന തലങ്ങളിലേക്ക് കൈമാറാനും തുടർനടപടികൾ സ്വീകരിക്കാനും ഇതിലൂടെ സാധിക്കുമെന്നാണ് വനം വകുപ്പ് കരുതുന്നത്. വന്യജീവി സംഘർഷത്തെ "സംസ്ഥാന സവിശേഷ ദുരന്തം" ആയി പ്രഖ്യാപിച്ച സർക്കാർ തീരുമാനത്തിന് പിന്നാലെയാണു തീവ്രയജ്ഞ പരിപാടി ആരംഭിക്കുന്നത്. വിവിധ സർക്കാർ വകുപ്പുകളും തദ്ദേശ സ്വയംഭരണ സ്ഥാപനങ്ങളും തമ്മിലുള്ള ഏകോപനം മെച്ചപ്പെടുത്താനും പൊതുജനങ്ങളുടെ പങ്കാളിത്തം ഉറപ്പാക്കാനും ഇത് ലക്ഷ്യമിടുന്നു. പൊതുജനങ്ങൾ ഈ സേവനം പരമാവധി പ്രയോജനപ്പെടുത്തണമെന്ന് കണ്ണൂർ ഡിഎഫ്ഒ ജോസ് മാത്യു പറഞ്ഞു. മനുഷ്യ ആക്രമണം ലഘൂകരിക്കുന്നതിന്‍റെ ഭാഗമായി വനം വകുപ്പ് പ്രഖ്യാപിച്ച പത്തിന കർമ പദ്ധതികളിൽപ്പെട്ട ജനജാഗ്രതാ സമിതിക്കുള്ള പരിശീലനം നേരത്തെ നൽകിയിരുന്നു. ആറളം, കൊട്ടിയൂർ, മുഴക്കുന്ന്, അയ്യൻകുന്ന്, കണിച്ചാർ, പയ്യാവൂർ , കേളകം എന്നീ പഞ്ചായത്തുകളിലുള്ളവർക്കാണ് പരിശീലനം നൽകിയത്. ജനവാസ മേഖലയിൽ ഇറങ്ങി ജനങ്ങളുടെ ജീവന് ഭീഷണിയാകുന്ന വന്യമൃഗങ്ങളെ കൊല്ലാനുള്ള കരട് നിയമ ഭേദഗതി കഴിഞ്ഞ ദിവസം മന്ത്രിസഭ അംഗീകരിച്ചിരുന്നു. മലയോര മേഖലയിൽ നൂറുകണത്തിന് കർഷകർക്ക് ഉണ്ടായ കൃഷി നാശത്തിന് നഷ്ടപരിഹാരം ഇനിയും ലഭിക്കാനുണ്ട്. ഹെൽപ്പ് ഡെസ്‌ക്കിലൂടെ ഇതിന് പരിഹാരം ഉണ്ടാകുന്ന പ്രതീക്ഷയിലാണ് കർഷകർ.

എയ്ഞ്ചൽസ് സ്പെഷൽ സ്കൂളിന് കളി ഉപകരണങ്ങൾ നൽകി

ചെറുപുഴ: ചെറുപുഴ ടൗൺ ലയൺസ് ക്ലബ് ഓണാഘോഷത്തിന്‍റെയും കുടുംബ സംഗമത്തിന്‍റെയും ഭാഗമായി കുണ്ടംതടം എയ്ഞ്ചൽസ് സ്പെഷൽ സ്കൂളിന് കളി ഉപകരണങ്ങൾ നൽകി. ലയൺസ് ഡിസ്ട്രിക്‌ട് പബ്ലിക് റിലേഷൻ ഓഫീസർ ഷാജി ജോസഫ് ഉദ്ഘാടനം ചെയ്തു. ക്ലബ് പ്രസിഡന്‍റ് മാത്യു ജോസഫ് തോണിക്കൽ അധ്യക്ഷത വഹിച്ചു. സ്പെഷൽ സ്കൂൾ വിദ്യാർഥികൾ കലാപരിപാടികൾ അവതരിപ്പിച്ചു. അവാർഡ് ജേതാവായ സ്പെഷൽ സ്കൂൾ അധ്യാപിക കെ. സ്മിതയെ സോൺ ചെയർമാൻ മഞ്ജു അഭിലാഷ് പൊന്നാട അണിയിച്ച് ആദരിച്ചു. മുൻ ഡിസ്ട്രിക്‌ട് ഗവർണർ ഡോ. ഒ.വി. സനൽ, സിതാര സനൽ എന്നിവർ മുഖ്യാതിഥികളായിരുന്നു. സെക്രട്ടറി ജി. അഭിലാഷ്, കെ. സുരേഷ്, ജോസഫ് മാത്യു, ജിജോ സെബാസ്റ്റ്യൻ, എ. സുകേഷ്, ഇ. രവീന്ദ്രൻ എന്നിവർ പ്രസംഗിച്ചു. ചടങ്ങിൽ അധ്യാപകരെ ആദരിച്ചു. മികച്ച പ്രവർത്തനങ്ങൾക്ക് ക്ലബിനു ലഭിച്ച അവാർഡുകൾ വിതരണം ചെയ്തു. ഓണക്കളികളും ഓണസദ്യയും നടന്നു.

കെസിവൈഎം, എസ്എംവൈഎം ആലക്കോട് ഫൊറോനയുടെ പ്രവർത്തനവർഷം ഉദ്ഘാടനം ചെയ്തു

ആലക്കോട്: കെസിവൈഎം, എസ്എംവൈഎം ആലക്കോട് ഫൊറോനയുടെ 2025-26 പ്രവർത്തന വർഷം ഉദ്ഘാടനം നടത്തി. ആലക്കോട് സെന്‍റ് മേരീസ് ഓഡിറ്റോറിയത്തിൽ കെസിവൈഎം തലശേരി അതിരൂപത ഡയറക്ടർ ഫാ. അഖിൽ മുക്കുഴി ഉദ്ഘാടനം നിർവഹിച്ചു. കെസിവൈഎം ആലക്കോട് മേഖല പ്രസിഡന്‍റ് അജൽ ജോബി പന്തലായ്ക്കൽ അധ്യക്ഷത വഹിച്ചു. വർണം എന്ന പേരിൽ പുതിയ സമിതിയുടെ ലോഗോ പ്രകാശനവും മുൻ സമിതി അംഗങ്ങളുടെ ആദരവും നടത്തി. കെസിവൈഎം ആലക്കോട് മേഖല ഡയറക്ടർ ഫാ. റോബിൻ പരിയാനിക്കൽ ആമുഖ പ്രഭാഷണവും തലശേരി അതിരൂപത പ്രസിഡന്‍റ് അബിൻ വടക്കേക്കര മുഖ്യപ്രഭാഷണവും നടത്തി. ജോണിച്ചൻ കൊടകനാടി , അപർണ സോണി എന്നിവർ പ്രസംഗിച്ചു. കെസിവൈഎം ആലക്കോട് മേഖലാ ഭാരവാഹികളായ ഏബൽ കുര്യൻ, റിമൽ അഗസ്റ്റിൻ, മരീറ്റ, അമല, അശ്വിൻ എന്നിവർ നേതൃത്വം നൽകി.

പള്ളിമുറ്റത്ത് പൂന്തോട്ടമൊരുക്കി റിട്ട. അധ്യാപിക

ചെമ്പന്തൊട്ടി: റിട്ട.അധ്യാപിക ഷേർലിയുടെ ശ്രമഫലമായി ചെമ്പന്തൊട്ടി സെന്‍റ് ജോർജ് ഫൊറോന പള്ളിയുടെ മുന്നിൽ മനോഹരമായ പൂന്തോട്ടം തയാറായി. കാടുകൾ വളർന്ന സ്ഥലമാണ് ടീച്ചർ പൂന്തോട്ടമൊരുക്കി ദൃശ്യമനോഹരമാക്കിയത്. കഴിഞ്ഞവർഷം ഫൊറോനയിൽ സഹവികാരിയായിരുന്ന ഫാ. തോമസ് പള്ളിയ്ക്കൽ ഇവിടെയൊരു പൂന്തോട്ടത്തിന് തുടക്കമിട്ടിരുന്നെങ്കിലും അദ്ദേഹം സ്ഥലംമാറി പോയതോടെ ഇവിടം വീണ്ടും കാടുകയറി മൂടിയപ്പോഴാണ് ടീച്ചർ പുതിയ പൂന്തോട്ടം തയാറാക്കാനുള്ള ശ്രമം തുടങ്ങിയത്. ഇപ്പോൾ ജമന്തി, സീനിയ, ഞെറപറ, കൊങ്ങിണി, റോസ് എന്നിവയടക്കം വിവധയിനം പൂക്കളുടെ തോട്ടമായി മാറി. ചെമ്പന്തൊട്ടി ഫൊറോന വികാരി ഫാ. ആന്‍റണി മഞ്ഞളാംകുന്നേൽ, പാരീഷ് ട്രസ്റ്റിമാരായ സണ്ണി മാനാംപുറത്ത്, നിമ്മി വാഴയിൽ, അൾത്താര ശുശ്രൂഷി ആന്‍റോ, മോളി ചേരിയിൽ എന്നിവരുടെ സഹായവും ടീച്ചർക്ക് ലഭിച്ചത് പൂന്തോട്ടമൊരുക്കൽ എളുപ്പമാക്കിയിരുന്നു. 2014 ൽ കിളിയന്തറ സെന്‍റ് തോമസ് ഹൈസ്കൂളിൽനിന്ന് വിരമിച്ച ഷേർലി ടീച്ചർ ഓയിസ്ക ഇക്കോ ക്ലബിന്‍റെ സജീവ പ്രവർത്തകയായിരുന്നു.

ക്ഷേത്രദർശനം കഴിഞ്ഞു മടങ്ങിയ കുടുംബം സഞ്ചരിച്ച കാർ അപകടത്തിൽപ്പെട്ട് അധ്യാപിക മരിച്ചു

കണ്ണൂർ: കുടുംബസമേതം പറശിനിക്കടവ് ക്ഷേത്രത്തിൽ ദർശനം നടത്തിയ ശേഷം നാട്ടിലേക്ക് മടങ്ങുകയായിരുന്ന വയനാട് സ്വദേശികൾ സഞ്ചരിച്ച കാർ അപകടത്തിൽപ്പെട്ട് അധ്യാപികയായ യുവതി മരിച്ചു. കൽപ്പറ്റ വേങ്ങപ്പള്ളി പഞ്ചായത്തിലെ ചോലപ്പുറത്തെ അന്പലക്കുന്നിൽ വീട്ടിൽ ചന്ദ്രൻ-വിലാസിനി ദന്പതികളുടെ മകൾ കെ.സി. ശ്രീനിതയാണ് (32) മരിച്ചത്. കൽപ്പറ്റ എൻഎസ്എസ് ഹയർസെക്കൻഡറി സ്കൂൾ ഐടി വിഭാഗം അധ്യാപികയാണ്. ഞായറാഴ്ച ഉച്ചകഴിഞ്ഞ് മൂന്നോടെ കുറുവ പള്ളിക്കടുത്ത് വച്ച് ഇവർ സഞ്ചരിച്ച കാർ എതിരേ വന്ന പിക്കപ്പ് വാനുമായി കൂട്ടിയിടിക്കുകയായിരന്നു. അപകടത്തിൽ ഭർത്താവ് ജിജിലേഷ്, മക്കളായ ആരാധ്യ, ആത്മിക എന്നിവർക്കും പരിക്കേറ്റിരുന്നു. പരിക്കേറ്റ നാലു പേരെയും ചാലയിലെ സ്വകാര്യ ആശുപത്രിയിൽ പ്രവേശിപ്പിച്ചുവെങ്കിലും ശ്രീനിത അർദ്ധരാത്രിയോടെ മരിച്ചു. ജില്ലാ ആശുപത്രിയിലെ പോസ്റ്റുമോർട്ടത്തിന് ശേഷം മൃതദേഹം നാട്ടിലേക്ക് കൊണ്ടു പോയി.

പിക്കപ്പ് ഇടിച്ച് സ്‌കൂട്ടര്‍ യാത്രികന്‍ മരിച്ചു

പയ്യന്നൂര്‍: പിക്കപ്പ് വാനും സ്കൂട്ടറും കൂട്ടിയിടിച്ചുണ്ടായ അപകടത്തില്‍ സ്‌കൂട്ടര്‍ യാത്രികനായ പെയിന്‍റിംഗ് തൊഴിലാളി മരിച്ചു. തൃക്കരിപ്പൂര്‍ കക്കുന്നം ചെമ്മട്ടില മസ്ജിദ് റോഡിലെ പരേതനായ കെ. കുഞ്ഞിക്കണ്ണൻ-ടി.വി. ദേവകി ദന്പതികളുടെ മകന്‍ ടി.വി. സുകേഷാണ് (38) മരിച്ചത്. ഞായറാഴ്ച രാത്രി 11.45 ഓടെ പയ്യന്നൂര്‍ മെയിന്‍ റോഡിലെ മിന ബസാറിന് സമീപമായിരുന്നു അപകടം. പയ്യന്നൂരില്‍നിന്നും തൃക്കരിപ്പൂര്‍ ഭാഗത്തേക്ക് സുകേഷ് സഞ്ചരിച്ചിരുന്ന സ്‌കൂട്ടറിൽ എതിരേവന്ന പിക്കപ്പും തമ്മില്‍ കൂട്ടിയിടിക്കുകയായിരുന്നു. സുകേഷിനെ ഉടന്‍ ആശുപത്രിയിലെത്തിച്ചെങ്കിലും മരിച്ചു. സഹോദരി: റീന.

മുറിക്കുന്നതിനിടയിൽ തെങ്ങ് വീണു തൊഴിലാളി മരിച്ചു

ചെറുപുഴ: തെങ്ങ് മുറിക്കുന്നതിനിടയിൽ തെങ്ങ് വീണു തൊഴിലാളി മരിച്ചു. തിരുമേനി കോക്കടവിലെ മൈലാടൂർ സണ്ണി (52) ആണ് മരിച്ചത്. ഇന്നലെ രാവിലെ 11 ഓടെയായിരുന്നു അപകടം. കോക്കടവ് ടൗണിനടുത്ത് ഉണങ്ങിയ തെങ്ങുമുറിച്ച് വലിച്ചിടുന്നതിനിടയിലായിരുന്നു അപകടം. ഉടൻ തന്നെ ആശുപത്രിയിലെത്തിച്ചുവെങ്കിലും ജീവൻ രക്ഷിക്കാൻ കഴിഞ്ഞില്ല. സംസ്കാരം ഇന്ന് 3.30 ന് തിരുമേനി സെന്‍റ് ആന്‍റണീസ് പള്ളിയിൽ. ഭാര്യ: ലിജി. മക്കൾ: ജസ്ന, ക്രിസ്റ്റീന. സഹോദരങ്ങൾ: ടോമിച്ചൻ, തങ്കച്ചൻ, ബാബു, കൊച്ചുമോൻ, മോളിമ്മ, സോഫിയാമ്മ.

മൂക്കിലൂടെ വിസിലടിച്ച് ആറു വയസുകാരൻ

കേളകം: ഹൃദയ് എന്ന ആറു വയസുകാരൻ പുറപ്പെടുവിക്കുന്ന വിസിലടി ശബ്ദം കേൾക്കുന്നവർക്കും കാഴ്ചക്കാർക്കും അദ്ഭുതമാകുന്നു. മിക്കവരും ചുണ്ടുകളുടെ പ്രത്യേകരീതിയിലുള്ള ഉപയോഗത്തിലൂടെയാണ് വിസിൽ അടിക്കുന്ന ശബ്ദം ഉണ്ടാക്കുന്നതെന്നിരിക്കെ ഹൃദയ് ചുണ്ടുകൾ ചലിപ്പിക്കാതെയാണ് വിസിൽ ശബ്ദം കേൾപ്പിക്കുന്നത്. മൂക്കിലൂടെ ശ്വാസക്രമീകരണത്തിലൂടെയാണ് ഹൃദയിന്‍റെ വിസിലടി. കേൾക്കുന്നവർക്ക് ഇത് ഒറിജിനൽ വിസിൽ ശബ്ദമാണെന്നോ തോന്നൂ. കൊട്ടിയൂരിലെ ചുങ്കക്കുന്ന് കോടൂർ ആതിര-രഞ്ജിത്ത് ദമ്പതികളുടെ മകനാണ് ഹൃദയ്. ചുണ്ടുകൾ ചലിപ്പിക്കാതെ ചൂളം അടിക്കുന്ന ശബ്ദംകേട്ട് മാതാപിതാക്കൾ ആദ്യം പരിഭ്രമിച്ചെങ്കിലും ശ്വാസം അടക്കിപ്പിടിച്ച് മൂക്കുപയോഗിച്ചാണ് ശബ്ദമുണ്ടാക്കുന്നതെന്ന് മനസിലായതോടെ പരിഭ്രമം അദ്ഭുതത്തിന് വഴിമാറി. കഴിഞ്ഞ തിരുവോണ ദിവസമാണ് ബന്ധുക്കൾ ഹൃദയിന്‍റെ ഈ കഴിവ് ശ്രദ്ധിക്കുന്നത്. ഉടൻതന്നെ സോഷ്യൽ മീഡിയയിൽ പോസ്റ്റ് ചെയ്തു. പിന്നാലെ നെഗറ്റീവ് കമന്‍റസും വരാൻ തുടങ്ങി. കുഞ്ഞു ഹൃദയ്ക്ക് അസുഖമാണെന്നും ഉടൻതന്നെ ഡോക്ടറെ സമീപിക്കണമെന്നുള്ള കമന്‍റുകൾ അമ്മ ആതിരയെ അസ്വസ്ഥയാക്കിയിരുന്നു. എന്നാൽ ഡോക്ടർമാരുമായി സംസാരിച്ചപ്പോൾ പേടിക്കാനൊന്നുമില്ലെന്ന മറുപടി ലഭിച്ചതോടെയാണ് സമാധാനമായത്. കൊട്ടിയൂർ ചുങ്കക്കുന്ന് ഗവ. യുപി സ്കൂളിലെ ഒന്നാം ക്ലാസ് വിദ്യാർഥിയാണ് ഹൃദയ്. അച്ഛൻ രഞ്ജിത്ത് ഇലക്ട്രീഷ്യനാണ്.

വിധിയില്‍ തളരാത്ത രാധിക പുതുജീവിതത്തിലേക്ക്

പിലാത്തറ: കളിക്കൂട്ടുകാരനായിരുന്ന പ്രജിലിന്‍റെ കൈപിടിച്ച് രാധിക പുതുജീവിതത്തിലേക്ക് വലതുകാല്‍വെച്ച് കയറിയപ്പോള്‍ അത് വിധിക്കെതിരെ പോരാടി നേടിയ വിജയം കൂടിയായി. പഴയങ്ങാടി നെരുവമ്പ്രത്തെ ലോട്ടറി കച്ചവടക്കാരനായിരുന്ന ശേഖരന്‍റെയും പാചകതൊഴിലാളിയായ റാണി മേരിയുടെയും മൂന്നു മക്കളില്‍ മൂത്തവളായ രാധികയാണ് നിശ്ചയദാര്‍ഢ്യം കൊണ്ട് വിധിക്കെതിരെ പോരാടി നേടിയ വിജയവുമായി വിവാഹ ജീവിതത്തിലേക്ക് പ്രവേശിച്ചത്. വലതു കാല്‍മുട്ടിനു താഴെ വളര്‍ച്ചയില്ലാത്ത നിലയിലായിരുന്നു രാധികയുടെ ജനനം. സ്വന്തമായി വീടുപോലും ഇല്ലാതിരുന്ന നിര്‍ധന കുടുംബത്തിന് രാധികയുടെ ചികിത്സയും വിദ്യാഭ്യാസവും വെല്ലുവിളിയായിരുന്നു. എല്‍പി സ്‌കൂളില്‍ ചേര്‍ത്തപ്പോള്‍ അമ്മയുടെ ഒക്കത്തുകയറിയായിരുന്നു സ്‌കൂളിലേക്കുള്ള പോക്കും വരവും. രാധികയുടേയും കുടുംബത്തിന്‍റെ അവസ്ഥ മനസിലാക്കിയ പിലാത്തറ ഹോപ്പ് ചാരിറ്റബിള്‍ ട്രസ്റ്റിന്‍റെ സഹായത്തോടെ വലതു കാല്‍മുട്ടിന് താഴെ ശസ്ത്രക്രിയ നടത്തി കൃത്രിമകാല്‍ വച്ചുപിടിപ്പിച്ചത് ജീവിതത്തിലെ വഴിത്തിരിവായി. ‌ കൃത്രിമക്കാലിൽ പിച്ചവയ്ക്കാന്‍ ആരംഭിച്ച രാധിക പരസഹായമില്ലാതെ വിദ്യാഭ്യാസവും ഇഷ്ടമേഖലയായ നൃത്തപഠനവും തുടര്‍ന്നു. വിദ്യാഭ്യാസ ചെലവുകള്‍ ഹോപ്പ് ചാരിറ്റബിള്‍ ട്രസ്റ്റ് വഹിച്ചതോടെയാണ് പഠനം മുന്നേറിയത്. സ്‌കൂള്‍- ഹയര്‍ സെക്കന്‍ഡറി വിദ്യാഭ്യാസം മാടായി സ്‌കൂളിലും തുടര്‍ന്ന് ഡിഗ്രി പഠനം മാടായി കോളേജിലുമായി പൂർത്തിയാക്കി. ഒപ്പം കംപ്യൂട്ടർ ഡാറ്റാ എന്‍ട്രിയില്‍ പരിശീലനവും നേടി. ഇനി ജീവിതം പച്ചപിടിപ്പിക്കാനായി സ്വന്തമായി ഒരു ജോലി വേണമെന്ന ആഗ്രഹവുമായി കഴിയുമ്പോഴാണ് ബാല്യകാല സുഹൃത്തും സമീപവാസിയുമായ പ്രജില്‍ രാധികയെ ജീവിതത്തിലേക്ക് ക്ഷണിച്ചത്. തന്‍റെ പോരായ്മകള്‍ ബോധ്യമുണ്ടായിരുന്നതിനാല്‍ രാധിക വിസമ്മതിക്കുകയായിരുന്നു. ‌എന്നാല്‍ രാധികയുടെ ശാരീരിക സാമ്പത്തിക പോരായ്മകള്‍ പ്രശ്‌നമല്ലെന്ന നിലപാടില്‍ പ്രജിലും വീട്ടുകാരും ഉറച്ചുനിന്നതോടെ രാധിക നിലപാട് മാറ്റി. ഇതോടെ സന്തോഷകരമായി മനസമ്മതവും നടന്നു. ഇതിനിടയിലാണ് ജന്മനാ കൂടപ്പിറപ്പായിരുന്ന വിധി വീണ്ടും രാധികയെ വെല്ലുവിളിച്ചത്. എപ്പോഴും താങ്ങും തണലുമായി രാധികയുടെ കൂടെ നിന്നിരുന്ന അച്ഛന്‍ ശേഖരനെ ഹൃദയാഘാതത്തിന്‍റെ രൂപത്തിലെത്തിയ മരണം തട്ടിയെടുത്തത് രാധികയ്ക്ക് കനത്ത ആഘാതമായി. അപ്പോഴും സഹായങ്ങളുമായി കൂടെ നിന്നിരുന്ന പ്രജിലും കുടുംബവുമാണ് ആശ്വാസമായത്. ജീവിതത്തിന് കരുത്തായി മാറിയ ഹോപ്പില്‍ തന്നെ വിവാഹം നടത്താമെന്ന ആഗ്രഹം പ്രകടിപ്പിച്ചപ്പോൾ ഹോപ്പ് അധികൃതര്‍ സന്തോഷത്തോടെ ആ ദൗത്യം ഏറ്റെടുക്കുകയായിരുന്നു. ക്ഷണിക്കപ്പെട്ട സാമൂഹിക-സാംസ്‌കാരിക പ്രമുഖരുടെ സാന്നിധ്യത്തിലായിരുന്നു വിവാഹം. ഇനിയൊരു തൊഴിൽ എന്നതാണ് രാധികയുടെ ആഗ്രഹം. തൊഴില്‍ നല്‍കാന്‍ ഏതെങ്കിലുമൊരു തൊഴില്‍ദാതാവ് മുന്നോട്ടുവരുമെന്നാണ് പ്രതീക്ഷ.

കണ്ണൂർ വാരിയേഴ്സിന്‍റെ വിദേശ താരങ്ങൾക്ക് സ്വീകരണം നൽകി

കണ്ണൂര്‍: കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബിന്‍റെ രണ്ടാം സീസണിലെ വിദേശതാരങ്ങള്‍ക്ക് വിമാനത്താവളത്തില്‍ വാരിയേഴ്സ് ക്ലബ് ആരാധകുടെ കൂട്ടായ്മയായ റെഡ് മറൈനേഴ്സ് സ്വീകരണം നൽകി. സെനഗലില്‍ നിന്നുള്ള സ്‌ട്രൈക്കര്‍ അബ്ദുകരിം സാംബ് ആണ് ആദ്യം എത്തിയത്. ശനിയാഴ്ച രാത്രി 8.20 ന് എത്തിയ താരത്തെ ടീം മാനേജര്‍ അല്‍ഫിന്‍ ടീമിന്‍റെ പെനന്‍റ് (ഹാന്‍ഡ് ഫ്‌ളാഗ്) നൽകി സ്വീകരിച്ചു. തുടര്‍ന്ന് ആരാധകരില്‍ നിന്ന് രണ്ടുപേര്‍ താരത്തെ സ്‌കാഫ് അണിയിച്ചു. താരത്തെ കാത്ത് ഇരുപതോളം ആരാധകര്‍ വിമാനത്താവളത്തില്‍ എത്തിയിരുന്നു. സ്വാഗതം ചെയ്ത് കൊണ്ടുള്ള ബാനറിനു പിന്നില്‍ എല്ലാവരും അണിനിരന്ന് കൈയടികളോടെ ഉച്ചത്തിലുള്ള ചാന്‍റുകള്‍ ചൊല്ലിയാണ് താരത്തെ വരവേറ്റത്. ഇന്നലെ പുലർച്ചെ 2.30 ന് മധ്യനിര താരം ടുണീഷ്യയില്‍ നിന്നുള്ള നിദാല്‍ കോഴിക്കോട് വിമാനത്താവളത്തിലിറങ്ങി. തുടര്‍ന്ന് കാർമാര്‍ഗം കണ്ണൂരിലെത്തി. വൈകുന്നേരം 5.45 ന് സ്പാനിഷ് താരങ്ങളായ അസിയര്‍, അഡ്രിയാന്‍ എന്നിവരും കണ്ണൂര്‍ വിമാനത്താവളത്തിലെത്തി. ആദ്യ സീസണില്‍ ടീമിന് വേണ്ടി മികച്ച പ്രകടനം കാഴ്ചവച്ച താരങ്ങളായത് കൊണ്ട് തന്നെ നിരവധി ആരാധകരാണ് വിമാനത്താവളത്തിലെത്തിയത്. ഇന്നു മുതല്‍ നാല് താരങ്ങളും ടീമിനൊപ്പം പരിശീലനം ആരംഭിക്കും. മുഖ്യപരിശീലകനും രണ്ട് വിദേശതാരങ്ങളുമാണ് ഇനി ടീമിനൊപ്പം ചേരാനുള്ളത്. കണ്ണൂര്‍ പോലീസ് പരേഡ് ഗ്രൗണ്ടിലാണ് പരിശീലനം. ഇന്ത്യയില്‍ നിന്നുള്ള എല്ലാ താരങ്ങളും നിലവില്‍ ടീമിനൊപ്പമുണ്ട്. 2024 ല്‍ കണ്ണൂർ വാരിയേഴ്സ് ക്ലബ് രൂപീകരിച്ച സമയത്താണ് റെഡ് മറൈനേഴ്‌സ് എന്ന ആരാധക കൂട്ടായ്മയും സ്ഥാപിതമായത്. കളിയാവേശം വിതറുന്നതിനൊപ്പം വിവിധ സമൂഹ്യസേവന പ്രവര്‍ത്തനങ്ങളിലും റെഡ് മറൈനേഴ്സ് സജീവമാണ്. ആദ്യ സീസണില്‍ കോഴിക്കോട് ഹോം സ്‌റ്റേഡിയം ആയിരുന്നപ്പോള്‍ കണ്ണൂരില്‍ നിന്ന് കോഴിക്കോട് എത്തിയാണ് റെഡ് മറൈനേഴ്‌സ് ടീമിന് ആവേശം പകർന്നത്.

ടിസിഎസ് റൂറല്‍ ഐടി ക്വിസ് രജിസ്‌ട്രേഷന്‍ ആരംഭിച്ചു

കണ്ണൂർ: ബംഗളൂരു ടെക് സമ്മിറ്റ് 2025-ന്‍റെ ഭാഗമായി കര്‍ണാടക സര്‍ക്കാരിന്‍റെ ഇലക്ട്രോണിക്-ഐടി വകുപ്പും ടാറ്റാ കണ്‍സല്‍ട്ടന്‍സി സര്‍വിസും സംയുക്തമായി ചെറുനഗരങ്ങളില്‍ നടത്തുന്ന റൂറല്‍ ഐടി ക്വിസിന്‍റെ രജിസ്‌ട്രേഷന്‍ ആരംഭിച്ചു. കേരളത്തില്‍ കണ്ണൂർ, മലപ്പുറം എന്നീ രണ്ടു കേന്ദ്രങ്ങൾ മാത്രമാണുള്ളത്. ഓണ്‍ലൈന്‍ ടെസ്റ്റുകള്‍, വിർച്വല്‍, ഫിസിക്കല്‍ ക്വിസ് എന്നിവ അടങ്ങിയതായിരിക്കും മത്സരം. എട്ടു മുതല്‍ 12 വരെ ക്ലാസുകളിലെ വിദ്യാർഥികൾക്കായാണ് മത്സരം. സിറ്റി, കോര്‍പറേഷന്‍ പരിധികളിലെ സ്‌കൂളുകളിലെ വിദ്യാർഥികൾക്ക് പങ്കെടുക്കാനാകില്ല. ടെക്നോളജി എന്‍വയോണ്‍മെന്‍റ്, ബിസിനസ്, അതിലെ വ്യക്തികൾ, ആര്‍ട്ടിഫിഷ്യല്‍ ഇന്‍റലിജന്‍സും ക്ലൗഡ് കംപ്യൂട്ടിംഗ് ഉള്‍പ്പെടെയുള്ള പുതിയ പ്രവണതകള്‍ തുടങ്ങി സാങ്കേതികവിദ്യാ ഉപയോഗത്തിന്‍റെ വിവിധ മേഖലകളിലേക്ക് ഫോക്കസ് ചെയ്തുള്ള ചോദ്യങ്ങളുണ്ടാകും. ബാങ്കിംഗ്, വിദ്യാഭ്യാസം, വിനോദം, റോബോട്ടിക്സ്, പുസ്തകങ്ങള്‍, മള്‍ട്ടീമീഡിയ, സംഗീതം, സിനിമ, ഇന്‍റര്‍നെറ്റ്, പരസ്യം, കായിക മേഖല, ഗെയിമിംഗ്, സാമൂഹ്യമാധ്യമങ്ങള്‍ തുടങ്ങിയ ഐടി സ്വാധീനം ചെലുത്തുന്ന മേഖലകളും ക്വിസിന്‍റെ പരിധിയിൽ വരും. രാജ്യത്താകമാനം എട്ട് മേഖലാ ഫൈനലുകൾ നടക്കും. മേഖലാ ഫൈനലുകളിലെ വിജയികളാണ് നവംബറിൽ ബംഗളൂരുവിൽ നടക്കുന്ന ദേശീയ ഫൈനലിൽ പങ്കെടുക്കുക. മേഖലാ ജേതാക്കൾക്ക് 10,000 രൂപയുടെ ഗിഫ്റ്റ് വൗച്ചറുകളും രണ്ടാം സ്ഥാനക്കാര്‍ക്ക് 7,000 രൂപയുടെ വൗച്ചറുകളും ലഭിക്കും. മത്സരത്തിലെ ദേശീയ ജേതാവിന് ഒരു ലക്ഷം രൂപയുടെ ടിസിഎസ് എഡ്യുക്കേഷന്‍ സ്‌കോളര്‍ഷിപ് സമ്മാനമായി ലഭിക്കും. ദേശീയ തലത്തിലെ രണ്ടാം സ്ഥാനക്കാര്‍ക്ക് 50,000 രൂപയുടെ സ്‌കോളര്‍ഷിപ്പും ലഭിക്കും. പങ്കെടുക്കുന്നതിനായി htt ps://iur.ls/tcsruralitquiz2025reg എന്ന വെബ്‌സൈറ്റിലൂടെ സെപ്റ്റംബര്‍ 30 ന് മുന്പായി രജിസ്റ്റര്‍ ചെയ്യണം. കഴിഞ്ഞ വര്‍ഷത്തെ ടിസിഎസ് റൂറല്‍ ഐടി ക്വിസില്‍ 28 സംസ്ഥാനങ്ങളില്‍ നിന്നും നാലു കേന്ദ്ര ഭരണ പ്രദേശങ്ങളില്‍ നിന്നുമായി 5.6 ലക്ഷത്തിലധികം കുട്ടികള്‍ പങ്കെടുത്തിരുന്നു.

പൂജാ അവധിക്ക് ബംഗളൂരു, മൈസൂരു റൂട്ടിൽ കെഎസ്ആർടിസി സ്പെഷൽ സർവീസ്

കണ്ണൂർ: പൂജാ അവധി പ്രമാണിച്ച് ബംഗളൂരു, മൈസൂരു എന്നിവിടങ്ങളിൽ നിന്ന് കേരളത്തിലേക്കും തിരിച്ചും കെഎസ്ആർടിസി 20 അധിക സർവീസ് നടത്തും. ചെന്നൈയിലേക്ക് രണ്ട് അധിക സർവീസും നടത്തും. 25 മുതൽ ഒക്ടോബർ വരെയാണ് സർവീസ് നടത്തുന്നത്. ഏഴ് സൂപ്പർ ഫാസ്റ്റുകളും 15 സൂപ്പർ ഡീലക്സ് ബസുകളും അധിക സർവീസിനായി വിനിയോഗിക്കും. കോഴിക്കോട്- ബംഗളൂരു റൂട്ടിലും തിരിച്ചും കുട്ട- മാനന്തവാടി- മൈസൂരു വഴി നാലു വീതം സൂപ്പർ ഫാസ്റ്റ് സർവീസുകൾ ദിവസവും ഉണ്ടാകും. ബംഗളൂരു- മലപ്പുറം റൂട്ടിലും കുട്ട വഴി സൂപ്പർ ഫാസ്റ്റ് സർവീസ് നടത്തും.‌ എറണാകുളം (രണ്ട്), തൃശൂർ, തിരുവനന്തപുരം, കോട്ടയം, കൊല്ലം, അടൂർ, കൊട്ടാരക്കര, പുനലൂർ, ചേർത്തല, ഹരിപ്പാട്, എന്നിവിടങ്ങളിലേക്കും തിരിച്ചും സൂപ്പർ ഡീലക്സ് ബസുകൾ കോയന്പത്തൂർ, പാലക്കാട് വഴി സർവീസ് നടത്തും. ഇരിട്ടി - മട്ടന്നൂർ വഴി കണ്ണൂരിലേക്കും തിരിച്ചും രണ്ട് സൂപ്പർ ഫാസ്റ്റുകളും ചെറുപുഴ വഴി പയ്യന്നൂരിലേക്കും കാഞ്ഞങ്ങാട്ടേക്കും തിരിച്ചും ഓരോ സൂപ്പർ ഡീലക്സ് ബസ് സർവീസും നടത്തും. ബംഗളൂരുവിൽ നിന്നും ചെന്നൈയിൽ നിന്നും തിരുവനന്തപുരത്തേക്കും തിരിച്ചും നാഗർകോവിൽ വഴി ഓരോ സൂപ്പർ ഡീലക്സ് ബസുകളും അധിക സർവീസ് നടത്തും. ചെന്നൈയിൽ നിന്ന് എറണാകുളത്തേക്കും തിരിച്ചും സേലം നാഗർകോവിൽ വഴി ഒരു സൂപ്പർ ഡീലക്സ് ബസ് സർവീസ് നടത്തും. ബംഗളൂരുവിൽ നിന്ന് വൈകുന്നേരം അഞ്ചിനുശേഷമാണ് മുഴുവൻ ബസുകളും പുറപ്പെടുക. അധിക സർവീസിലെ അവസാന ബസ് രാത്രി 11.15 നാകും ബംഗളൂരുവിൽ നിന്ന് കോഴിക്കോട്ടേക്ക് പുറപ്പെടുക. ഇതോടൊപ്പം നിലവിലുള്ള സ്കാനിയ, വോൾവോ, സ്വിഫ്റ്റ് ബസുകൾ അറ്റകുറ്റപ്പണി നടത്തി ഉടൻ സർവീസിന് സജ്ജമാക്കി മുഴുവൻ അന്തർ സംസ്ഥാന സർവീസുകളും ഓപ്പറേറ്റ് ചെയ്യാൻ നിർദേശിച്ചിട്ടുണ്ട്. യാത്രാതിരക്ക് അനുസരിച്ച് സമയക്രമത്തിൽ മാറ്റം വരുത്താനും റൂട്ട് ക്രമീകരിക്കാനും നിർദേശം നൽകിയിട്ടുണ്ട്. തിരക്കിന് അനുസരിച്ച് ഫ്ളക്സി നിരക്ക് ഈടാക്കും. ഓൺലൈനായി സീറ്റുകൾ റിസർവ് ചെയ്യാനാകും.

രാജ്യത്ത് മതേതരത്വ-പൗരാവകാശങ്ങൾ നിഷേധിക്കപ്പെടുന്നു: കത്തോലിക്ക കോൺഗ്രസ്

തലശേരി: ഇന്ത്യൻ ഭരണഘടനയുടെ കടയ്ക്കൽ കത്തിവയ്ക്കുന്ന രീതിയിൽ മതേതരത്വ അവകാശങ്ങൾ നിഷേധിക്കപ്പെടുകയും ഓരോ പൗരന്‍റെയും അവകാശങ്ങൾ ഇല്ലാതാക്കുകയും ചെയ്യപ്പെടുന്ന അതീവ പ്രതിസന്ധിഘട്ടമാണ് രാജ്യം അഭിമുഖീകരിക്കുന്നതെന്ന് കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ. കത്തോലിക്ക കോൺഗ്രസ് തലശേരി അതിരൂപത എക്സിക്യൂട്ടീവ് കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ലോക്കപ്പ് മർദനത്താലും വന്യജീവികളാലും തെരുവ് നായ്ക്കളാലും പൗരന്‍റെ അവകാശങ്ങൾ നിഷേധിക്കപ്പെടുന്നതിനൊപ്പം മൃഗങ്ങളോടുള്ള പരിഗണന പോലും മനുഷ്യന് നിഷേധിക്കപ്പെടുകയും ചെയ്യുന്നു. നീതി നിഷേധത്തിനെതിരെ കത്തോലിക്ക കോൺഗ്രസിന്‍റെ ആഭിമുഖ്യത്തിൽ ഒക്ടോബർ 13 മുതൽ 24 വരെ കാസർഗോഡ് നിന്നും തിരുവനന്തപുരത്തേക്ക് പൗരാവകാശ സംരക്ഷണ ജാഥ നടത്തുമെന്നു പ്രഫ. രാജീവ് കൊച്ചുപറന്പിൽ അറിയിച്ചു. ഒട്ടനവധി നീതി നിഷേധങ്ങളും പൗരാവകാശം ലംഘനങ്ങളും മത ന്യൂനപക്ഷങ്ങളുടെ അവകാശങ്ങളും ചൂണ്ടിക്കാട്ടിയാണ് പൗരാവകാശ സംരക്ഷണ ജാഥ നടത്തുന്നതെന്നു ഗ്ലോബൽ ഡയറക്ടർ റവ.ഡോ.ഫിലിപ്പ് കവിയിൽ വ്യക്തമാക്കി. കാസർഗോഡ് പനത്തടിയിൽ ഒക്ടോബർ 13 ന് തലശേരി അതിരൂപത ആർച്ച്ബിഷപ്പ് മാർ ജോസഫ് പാംപ്ലാനി ജാഥ ഉദ്ഘാടനം ചെയ്യും. 24 ന് തിരുവനന്തപുരം സെക്രട്ടേറിയറ്റിനു മുന്നിൽ വൻ റാലിയോടെ സമാപിക്കും. കണ്ണൂർ, കാസർഗോഡ് ജില്ലകളിലായി തലശേരി അതിരൂപതയിലെ ആറ് കേന്ദ്രങ്ങളിലൂടെ കടന്നുപോകുമ്പോൾ ആയിരക്കണക്കിന് ആളുകൾ പങ്കെടുത്ത് പൗരാവകാശ സംരക്ഷണ യാത്രയ്ക്ക് സ്വീകരണം നൽകുമെന്ന് യോഗത്തിൽ അധ്യക്ഷത വഹിച്ച അതിരൂപത പ്രസിഡന്‍റ് ഫിലിപ്പ് വെളിയത്ത് പറഞ്ഞു. ജനറൽ സെക്രട്ടറി ജിമ്മി ആയിത്തമറ്റം, ഗ്ലോബൽ ട്രഷറർ ടോണി ജോസഫ് പുഞ്ചക്കുന്നേൽ, അതിരൂപത ട്രഷറർ സുരേഷ് കാഞ്ഞിരത്തിങ്കൽ, ആലക്കോട് മേഖല ഡയറക്ടർ ഫാ. ജിബിൻ വട്ടംകാട്ടേൽ, ഗ്ലോബൽ ഭാരവാഹികളായഷീജ കാറുകുളം, പീയൂസ് പറയിടം, ബെന്നി പുതിയാമ്പുറം, ഐ.സി.മേരി, ടോമി കണയങ്കൽ, സെബാസ്റ്റ്യൻ ജാതികുളം, ബേബി കോയിക്കൽ, ജയ്സൺ അട്ടാറിമാക്കൽ, ജോളി ജോസഫ് എരിഞ്ഞേരിയിൽ, തോമസ് വർഗീസ് വരമ്പുങ്കൽ, ബിജു ഒറ്റപ്ലാക്കൽ, സാജു പുത്തൻപുര, തോമസ് ഒഴുകയിൽ, ഷാജൻ, ജോസഫ് മാത്യു കൈതമറ്റം, ബിജു മണ്ഡപത്തിൽ, മാത്യു വള്ളോംകോട്ട് എന്നിവർ പ്രസംഗിച്ചു.

ഫണ്ട് അനുവദിച്ചിട്ടും പേരട്ട-കുറ്റിയാട്കുന്ന് റോഡ് നവീകരണം വൈകുന്നു

ഇരിട്ടി: ഉളിക്കൽ -പായം പഞ്ചാത്തുകളിലൂടെ കടന്നുപോകുന്ന പേരട്ട -മട്ടിണി - കുറ്റിയാട്ട്കുന്ന് റോഡ് നവീകരണത്തിന് ജില്ലാ പഞ്ചായത്ത് ഫണ്ട് അനുവദിച്ചിട്ടും നവീകരണ പ്രവൃത്തികൾ ആരംഭിച്ചില്ല. ഫണ്ട് അനുവദിച്ചതോടെ തങ്ങൾ അനുഭവിക്കുന് യാത്രാ ക്ലേശം ഉടൻ പരിഹരിക്കപ്പെടുമെന്ന് കരുതിയ ജനങ്ങൾ ഇതോടെ കടുത്ത നിരാശയിലാണ്. അഞ്ചു കിലോമീറ്ററിൽ അധികം ദൂരം വരുന്ന റോഡിന്‍റെ അറ്റകുറ്റ പണികൾക്കായി 30 ലക്ഷം രൂപയാണ് അനുവദിച്ചത്. സ്കൂൾ, ആരാധനാലയങ്ങൾ എന്നിവയടക്കമുള്ള പ്രദേശത്തെ റോഡിന്‍റെ നവീകരണമാണ് അധികൃതരുടെ അനാസ്ഥയിൽ വൈകുന്നത്. ബസ് സർവീസ് ഇല്ലാത്ത റോഡിൽ ഓട്ടോറിക്ഷ ഉൾപ്പെടെയുള്ള ടാക്സി സംവിധാനങ്ങൾ ആണ് ജനങ്ങൾ ഉപയോഗിക്കുന്നത് . റോഡ് പൂർണമായും തകർന്നതോടെ ഓട്ടോറിക്ഷകൾ ഇതുവഴി ട്രിപ്പ് വരാൻ മടിക്കുന്നതായും നാട്ടുകാർ പറഞ്ഞു. പേരട്ട - മട്ടിണി ഭാഗത്തെ ഒരു കിലോമീറ്റർ ദൂരത്തിലാണ് റോഡ് പൂർണമായും തകർന്നു കിടക്കുന്നത്. നവീകരണ പ്രവൃത്തി ഏതു പഞ്ചായത്തിൽ നിന്നാരംഭിക്കണം എന്ന കാര്യത്തിൽ തീരുമാനമെടുക്കാനാവാത്തതാണ് പ്രവൃത്തി വൈകാൻ കാരണമെന്നും പറയപ്പെടുന്നു.

സോഷ്യല്‍വര്‍ക്ക് വിദ്യാര്‍ഥികളുടെ സഹവാസ ക്യാമ്പിന് തുടക്കം

ചെറുകുന്ന്: ഗ്രാമീണ ജീവിതത്തെ നേരിട്ട് പരിചയപ്പടുക, സാമൂഹ്യ ഉത്തരവാദിത്യം വളര്‍ത്തുക തുടങ്ങിയ ലക്ഷ്യത്തോടെ സെന്‍റ് ജോസഫ്‌സ് കോളജ് പിലാത്തറ രണ്ടാം വര്‍ഷ സാമൂഹിക പ്രവര്‍ത്തനവിഭാഗം വിദ്യാര്‍ഥികളുടെ സഹവാസ ക്യാമ്പിന് കട്ടക്കുളം സെന്‍റ് ജോസഫ്‌സ് പള്ളിയിൽതുടക്കമായി. ചെറുകുന്ന് പഞ്ചായത്ത് വൈസ് പ്രസിഡന്‍റ് പി.വി. സജീവൻ ഉദ്ഘാടനം ചെയ്തു. സെന്‍റ് ജോസഫ്സ് കോളജ് മാനേജർ ഫാ. രാജൻ ഫൗസ്തോ അധ്യക്ഷത വഹിച്ചു. കട്ടക്കുളം ഇടവക വികാരി ഫാ. ജോളി അൽഫോൻസ്, വകുപ്പ് മേധാവി ജയ്സ് ആന്‍റണി ക്യാന്പ് അവതരണം നടത്തി. അസി. പ്രഫ. ആർ. ജോസ്, പഞ്ചായത്ത് സ്റ്റാൻഡിംഗ് കമ്മിറ്റഇ ചെയർപേഴ്സൺ സി എച്ച് പ്രദീപ് കുമാര്‍, വാർഡ് മെംബർ കൃഷ്ണന്‍, ഇടവക പാരിഷ് സെക്രട്ടറി കെ.ആന്‍റോ, സ്റ്റുഡന്‍റ് കോ-ഓർഡിനേറ്റർ അക്ഷയ് എന്നിവർ പ്രസംഗിച്ചു.

പഴശി ആയുർവേദ ആശുപത്രി ഡിസംബറിൽ തുറക്കും

മട്ടന്നൂർ: പഴശി കന്നാട്ടുംകാവിൽ നിർമിക്കുന്ന സർക്കാർ ആയുർവേദ ആശുപത്രി ഡിസംബറോടെ പൂർത്തിയാകും.17 കോടി ചെലവഴിച്ചാണ് 50 കിടക്കകളുള്ള ആയുർവേദ ആശുപത്രി നിർമിക്കുന്നത്. ഇന്‍റ ഗ്രേറ്റഡ് ഹെൽത്ത് സെന്‍റർ എന്ന നിലയിൽ നിർമിക്കുന്ന ആശുപത്രി കെട്ടിടത്തിന് അഞ്ചു നിലകളാണുള്ളത്. കെ.കെ. ശൈലജ എംഎൽഎയുടെ നേതൃത്വത്തിൽ ആശുപത്രിയുടെ നിർമാണ പുരോഗതി വിലയിരുത്തി. ആയുർവേദത്തിനാണ് പ്രാധാന്യമെങ്കിലും മറ്റു വിഭാഗങ്ങളിലെ ഡോക്ടർമാരുടെ സേവനവും ഇവിടെയുണ്ടാകും. പാവപ്പെട്ടവർക്ക് സൗജന്യമായും മറ്റുള്ളവർക്ക് പണം നൽകിയും ആധുനിക ആയുർവേദ ചികിത്സ ലഭ്യമാക്കും. വിമാനത്താവളത്തിനു തൊട്ടടുത്ത പ്രദേശമായതിനാൽ കേരളത്തിന്‍റെ പാരമ്പര്യ ചികിത്സയായ ആയുർവേദത്തെ തേടി വരുന്ന ആഭ്യന്തര-വിദേശ യാത്രികർ കൂടി ഇവിടെ എത്തുമെന്നാണ് പ്രതീക്ഷിക്കുന്നത്. താഴത്തെ നിലയിൽ ഒപി അടക്കമുള്ള സംവിധാനങ്ങളും ഒന്നും രണ്ടും നിലകളിൽ വാർഡുകളുമാണ് ഉണ്ടാകുക. കേന്ദ്രപദ്ധതി പ്രകാരം ആദ്യം ഒൻപതു കോടി രൂപയാണ് പദ്ധതിക്കായി അനുവദിച്ചത്. ഇത് തികയാതെ വന്നതോടെ രണ്ടു കോടി കൂടി സംസ്ഥാന സർക്കാർ അനുവദിച്ചു. പിന്നീട് കേന്ദ്ര-സംസ്ഥാന വിഹിതമായി ആറു കോടിയും ചേർന്ന് 17 കോടി ചെലവിലാണ് ആശുപത്രി നിർമിക്കുന്നത്. കെ.കെ. ശൈലജ ആരോഗ്യ മന്ത്രിയായിരുന്ന കാലത്താണ് മട്ടന്നൂരിന്‍റെ ആരോഗ്യ രംഗത്തിന് കരുത്തേകാൻ ആയുർവേദ ആശുപത്രി അനുവദിച്ചത്. ആയുർവേദത്തിന്‍റെ പരമ്പരാഗത ചികിത്സാ രീതികൾക്കൊപ്പം അധുനിക സംവിധാനങ്ങളും ഉപയോഗപ്പെടുത്തിയുള്ള ചികിത്സാ സംവിധാനമാണ് ലഭ്യമാക്കുക. നിർമാണം പൂർത്തിയാകുന്നതോടെ പഴശി ബഡ്‌സ് സ്‌കൂൾ കെട്ടിടത്തിൽ പ്രവർത്തിക്കുന്ന ആയുർവേദ ആശുപത്രി ഇവിടേക്ക് പ്രവർത്തനം മാറും. ദേശീയ ആയുഷ് മിഷന്‍റെയും സംസ്ഥാന സർക്കാരിന്‍റെയും നേതൃത്വത്തിലാണ് ആശുപത്രിക്കുള്ള പദ്ധതി തയാറാക്കിയത്. പിന്നീട് ഇന്‍റഗ്രേറ്റഡ് ഹെൽത്ത് സെന്‍റർ എന്ന നിലയിൽ വിപുലപ്പെടുത്തുകയായിരുന്നു.

കഥകളി മഹോത്സവത്തിന് തിരി തെളിഞ്ഞു

ഇരിട്ടി: കഥകളിയുടെ ജന്മനാട്ടിൽ നടക്കുന്ന സൗത്ത് സോൺ കഥകളി ഉത്സവത്തിന് മൃദംഗ ശൈലേശ്വരി ക്ഷേത്രമുറ്റത്ത് തിരിതെളിഞ്ഞു. കേന്ദ്ര സാംസ്ക്കാരിക വകുപ്പ് തഞ്ചാവൂർ സൗത്ത് സോൺ കൾച്ചറൽ സെന്‍റർ മൃദംഗ ശൈലേശ്വരി ക്ഷേത്രവുമായി സഹകരിച്ചാണ് ഏട്ടു ദിവസം നീണ്ടുനിൽക്കുന്ന കഥകളി ഉത്സവം നടത്തുന്നത്. പ്രശസ്ത കഥകളി നടൻ സദനം ബാലകൃഷ്ണൻ തിരികൊളുത്തി ഉദ്ഘാടനം ചെയ്തു. സൗത്ത് സോൺ കൾച്ചർ സെന്‍റർ ഡയറക്ടർ കെ.കെ. ഗോപാലകൃഷ്ണൻ അധ്യക്ഷത വഹിച്ചു. കഥകളി സ്കൂൾ ഡയറക്ടർ കലാമണ്ഡലം ഗോപാലകൃഷ്ണൻ, ക്ഷേത്രം ചെയർമാൻ എ. കെ. മനോഹരൻ, മെമ്പർമാരായ പ്രേമരാജൻ, പി. നാരായണൻ, രഘു എന്നിവർ പങ്കെടുത്തു. കോട്ടയത്ത് തമ്പുരാന്‍റെ നാട്ടിൽ നടക്കുന്ന കഥകളി ഉത്സവത്തിൽ തമ്പുരാന്‍റെ വിഖ്യാത ആട്ടക്കഥകളാണ് പൂർണ രൂപത്തിൽ അരങ്ങേറുന്നത്. കഥകളി രംഗത്തെ സംസ്ഥാനത്തിനകത്തും പുറത്തുമുള്ള കലാകാരന്മാർ ഉത്സവത്തിന്‍റെ ഭാഗമാകും.

സൗജന്യമായി ട്രാവൽ കാർഡുകൾ നൽകി

ആലക്കോട്: മാനന്തവാടി-ആലക്കോട് - ബന്തടുക്ക റൂട്ടിൽ പുതുതായി സർവീസ് ആരംഭിച്ച കെഎസ്ആർടിസി ബസിലെ സ്ഥിരം യാത്രക്കാർക്ക് സൗജന്യമായി ട്രാവൽ കാർഡുകൾ നൽകി. മലയോര മേഖലാ പാസഞ്ചേർസ് അസോസിയേഷൻ കൃപാ ഏജൻസിയുടെ സഹകരണത്തോടെയാണ് ട്രാവൽ കാർഡുകൾ നൽകിയത്. സ്ഥിരം യാത്രക്കാരെ കെഎസ്ആർടിസിയിലേക്ക് ആകർഷിക്കുകയും, പുതിയതായി തുടങ്ങുന്ന സർവീസുകൾ മികച്ച വരുമാനമുള്ളതാക്കുകയുമാണ് ലക്ഷ്യം. ആലക്കോട് നടത്തിയ ട്രാവൽ കാർഡ് വിതരണോദ്ഘാടനം ബസ് പാസഞ്ചേർസ് അസോസിയേഷൻ കൺവീനർ എം.വി.രാജു കെവിവിഇഎസ് പ്രസിഡന്‍റ് കെ. എം. ഹരിദാസിന് കൈമാറി നിർവഹിച്ചു. ആലക്കോട് പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർമാൻ ഖലീൽ റഹ്മാൻ, കെ വിവിഇഎസ് ഭാരവാഹികളായ ജോൺ പടിഞ്ഞാത്ത്, എൻ.എം. മൊയ്‌തീൻ, ടി.സി. പ്രകാശ്,പ്രജി, ഷഫീക് എന്നിവർ പ്രസംഗിച്ചു.

136 പേരെ രക്ഷകരാക്കി ജലസുരക്ഷാ കാമ്പയിന്‍ സമാപിച്ചു

പയ്യന്നൂര്‍: ഏഴ് ഘട്ടങ്ങളിലായി കവ്വായി കായലിന്‍റെ ഭാഗമായ രാമന്തളി ഏറന്‍ പുഴയില്‍ ചാള്‍സണ്‍ സ്വിമ്മിംഗ് അക്കാദമി ഏഴിമല എകെജി സ്മാരക കലാകായിക വേദിയുടെ സഹകരണത്തോടെ നടത്തിവന്ന ജല സുരക്ഷാ കാമ്പയിന്‍ സമാപിച്ചു. 136 പേര്‍ക്ക് സിപിആര്‍ ഉള്‍പ്പെടെയുള്ള ജീവന്‍ രക്ഷാ പ്രവര്‍ത്തന പരിശീലനം നല്‍കിയാണ് കാമ്പയിൻ സമാപിച്ചത്. ലോക മുങ്ങിമരണ നിവാരണ ദിനാചരണത്തോടനുബന്ധിച്ച് കഴിഞ്ഞ ജൂലൈ 25-നാണ് കവ്വായി കായലിന്‍റെ ഭാഗമായ രാമന്തളി ഏറന്‍ പുഴയില്‍ ജില്ലാ പഞ്ചായത്ത് മുന്‍ പ്രസിഡന്‍റ് പി.പി. ദിവ്യ ജല സുരക്ഷാ കാമ്പയിൻ ഉദ്ഘാടനം ചെയ്തു. തുടര്‍ന്ന് ഏഴ് ഘട്ടങ്ങളിലായാണ് കാമ്പയിന്‍റെ ഭാഗമായുള്ള വിവിധ പരിശീലനങ്ങള്‍ ഡോ. ചാള്‍സണ്‍ ഏഴിമലയ്‌ക്കൊപ്പം നടന്നത്. തിരുവനന്തപുരം വിന്നര്‍ലാൻഡ് സ്‌പോട്‌സ് അക്കാദമിയുടെയും ഭാരതീയ ലൈഫ് സേവിംഗ് സൊസൈറ്റിയുടെയും ചീഫ് ട്രെയിനര്‍ ഡോ. ബി. സാനുവും പരിശീലനങ്ങള്‍ക്ക് നേതൃത്വം നൽകി. രണ്ട് കിലോമീറ്റര്‍ കായല്‍ ക്രോസിംഗ് നീന്തല്‍, കയാക്കിംഗ് പരിശീലനം, നാടന്‍ വള്ളം തുഴയല്‍, യന്ത്രവല്‍കൃത യാനങ്ങളില്‍ പരിശീലനം, ജീവന്‍ രക്ഷാപ്രവര്‍ത്തന പരിശീലനം, സിപിആര്‍ ഉള്‍പ്പെടെയെയുള്ള പ്രാക്ടിക്കല്‍ ക്ലാസുകള്‍ എന്നിവയിലാണ് ഈ ദിവസങ്ങളില്‍ പരിശീലനം നല്‍കിയത്. ശാരീരിക, മാനസിക പരിമിതികളുള്ള ആറുവയസുകാരന്‍ മുതല്‍ അന്‍പതുകാരി വരെയുള്ളവരാണ് പരിശീലനം പൂര്‍ത്തിയാക്കിയത്. സമാപന പരിപാടിയുടെ ഉദ്ഘാടനം ടി.ഐ. മധുസൂദനന്‍ എംഎല്‍എ നിര്‍വഹിച്ചു. ഡോ. ചാള്‍സണ്‍ ഏഴിമല, വാര്‍ഡ് മെമ്പര്‍ കെ.പി. ദിനേശന്‍, ഒ.കെ. ശശി, സി.ഡി. ഷിജൊ, പി. സന്തോഷ് എന്നിവര്‍ പ്രസംഗിച്ചു.

വരുമാനരഹിത ഭൂവുടമകളുടെ ക്ഷേമ പെൻഷൻ തടയരുത്: കെഎസ്‌സിഎഫ്

നടുവിൽ: വസ്തു നികുതി അടയ്ക്കാൻ പോലും വരുമാനമില്ലാതെ വിഷമിക്കുന്ന തീർത്തും ആദായമില്ലാത്ത ഭൂമി പരിധിയിൽ കവിഞ്ഞ അളവിൽ കൈവശമുണ്ട് എന്ന കാരണത്താൽ മുതിർന്ന പൗരന്മാരുടെ വാർധക്യകാല ക്ഷേമപെൻഷൻ തടയാനുള്ള നീക്കം ഉപേക്ഷിക്കണമെന്ന് കേരള സീനിയർ സിറ്റിസൺ ഫോറം (കെഎസ് സിഎഫ്) തളിപ്പറമ്പ് ഈസ്റ്റ് ബ്ലോക്ക് പ്രവർത്തകസമിതി യോഗം സർക്കാരിനോടാവശ്യപ്പെട്ടു. ബ്ലോക്ക് കമ്മിറ്റി ചെയർമാൻ ശശികുമാർ ഗിരിമന്ദിരം അധ്യക്ഷത വഹിച്ചു. കൺവീനർ കെ.സി.ഈപ്പൻ റിപ്പോർട്ട് അവതരിപ്പിച്ചു. മാത്യു ചാണക്കാടൻ, കെ.ജി.ഓമന, അഗസ്റ്റിൻ കുളത്തൂർ, അന്നമ്മ അഗസ്റ്റിൻ, നാരായണൻ തലവിൽ, സത്യാനന്ദൻ, ഏബ്രഹാം ഈറ്റയ്ക്കൽ, ജോസഫ് വട്ടക്കോട്ടയിൽ, കെ.എൻ.ചന്ദ്രൻ എന്നിവർ പ്രസംഗിച്ചു.

‘സ്റ്റെം അറ്റ് സ്കൂൾ' മൂന്നാംഘട്ട പരിശീലനം നടത്തി

പയ്യാവൂർ: മടമ്പം പികെഎം കോളജ് ഓഫ് എഡ്യൂക്കേഷൻ സൃഷ്ടി റോബോട്ടിക്സ് ആൻഡ് ടെക്നോളജീസുമായി സഹകരിച്ച് നടപ്പാക്കിയ അക്കാഡമിക് പ്രോജക്ടായ 'സ്റ്റെം അറ്റ് സ്‌കൂൾ' പദ്ധതിയുടെ ഭാഗമായി സ്കൂൾ വിദ്യാർഥികൾക്കായുള്ള മൂന്നാം ഘട്ട പരിശീലന നടത്തി. കോളജ് സ്റ്റെം ലബോറട്ടറിയിൽ കോഴ്സ് ഡയറക്ടർ പ്രശാന്ത് മാത്യു ഉദ്ഘാടനം ചെയ്തു. പൊതുവിദ്യാഭ്യാസ രംഗത്ത് റോബോട്ടിക്സിന് കൈവന്ന പ്രാധാന്യം കണക്കിലെടുത്ത് ആറു മുതൽ ഒന്പത് വരെ ക്ലാസുകളിൽ പഠിക്കുന്ന ഇരുപത്തൊന്ന് വിദ്യാർഥികൾക്കാണ് റോബോട്ടിക്സ്, കോഡിംഗ് എന്നിവയിൽ പരിശീലനം നൽകിയത്. പരിശീലകരായ പതിമൂന്ന് സ്റ്റെം മെന്‍റേഴ്സും മേരിഗിരി ഇംഗ്ലീഷ് മീഡിയം സ്കൂൾ അറ്റൽ ടിങ്കറിംഗ് ലാബ് ഇൻസ്ട്രക്ടർ രേഷ്‌മി ബെഞ്ചമിനും ചേർന്ന് ടെക്നിക്കൽ സെഷൻസുകൾ നയിച്ചു. സ്റ്റെം അറ്റ് സ്കൂൾ കോ-ഓർഡിനേറ്റർ എം.ഫാത്തിമത്തുൽ സുഹ്‌റ നേതൃത്വം നൽകി.

ജീവൻരക്ഷാ പരിശീലന ക്ലാസ് സംഘടിപ്പിച്ചു

പുലിക്കുരുമ്പ: സ്പർശം പാലിയേറ്റീവ് കെയറിന്‍റെ ആഭിമുഖ്യത്തിൽ ജീവൻരക്ഷ പരിശീലന ക്ലാസ് സംഘടിപ്പിച്ചു. പുലിക്കുരുമ്പ സെന്‍റ് അഗസ്റ്റിൻസ് പള്ളി വികാരി ഫാ. തോമസ് പൈമ്പള്ളിൽ ഉദ്ഘാടനം ചെയ്തു. പാലിയേറ്റീവ് കെയർ യൂണിറ്റ് പ്രസിഡന്‍റ് വി.ഡി. സ്റ്റീഫൻ അധ്യക്ഷത വഹിച്ചു. ഫോർമീസ് തെള്ളിക്കുന്നേൽ ആമുഖ പ്രഭാഷണവും ശ്രീകണ്ഠപുരം സമരിറ്റൻ ഹോം ഡയറക്ടർ ഫാ. അനൂപ് നരിമറ്റത്തിൽ അനുഗ്രഹ പ്രഭാഷണവും നടത്തി. കെ.വി. ശശിധരൻ ക്ലാസെടുത്തു. ഡോ. ലില്ലി, കെ.വി. ശശിധരൻ, അൽഫോൻസ മരുതുംകുഴിയിൽ എന്നിവർ പ്രസംഗിച്ചു. വീടുകളിൽ നിന്ന് ശേഖരിച്ച മരുന്നുകൾ ശ്രീകണ്ഠപുരം സമരിറ്റൻ ഹോമിന് കൈമാറി .

കോഴിച്ചാൽ തുരുത്ത് പാലം ഉദ്ഘാടനം ചെയ്തു

ചെറുപുഴ: കാര്യങ്കോട് പുഴയ്ക്ക് കുറുകെ നിർമിച്ച കോഴിച്ചാൽ തുരുത്ത് പാലം ഉദ്ഘാടനം ചെയ്തു. 14 ലക്ഷം രൂപ ചെലവഴിച്ച് ചെറുപുഴ പഞ്ചായത്ത് നിർമിച്ച സ്റ്റീൽ പാലത്തിന്‍റെ ഉദ്ഘാടനം ടി.ഐ. മധുസൂദനൻ എംഎൽഎ നിർവഹിച്ചു. ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ അധ്യക്ഷത വഹിച്ചു. വൈസ് പ്രസിഡന്‍റ് റെജി പുളിക്കൽ, ബ്ലോക്ക് പഞ്ചായത്തംഗം എ.സി. പൗലോസ്, പഞ്ചായത്തംഗങ്ങളായ സിബി എം. തോമസ്, മാത്യു കാരിത്താങ്കൽ, രജിത സജി, സജിനി മോഹൻ, വി. ഭാർഗവി, മുൻ പഞ്ചായത്തംഗം ജോയിസ് പുത്തൻപുര എന്നിവർ പ്രസംഗിച്ചു.

തളിപ്പറന്പ്-ഇരിട്ടി സംസ്ഥാന പാതയിലെ കുഴികൾ അപകടഭീഷണി ഉയർത്തുന്നു

മടമ്പം: സംസ്ഥാന പാതയോരം തകർന്നത് ഗതാഗത തടസത്തിനും അപകടങ്ങൾക്കും ഇടയാക്കുന്നു. തളിപ്പറമ്പ്–ഇരിട്ടി സംസ്ഥാന പാതയിലെ മടമ്പം,തുമ്പേനി, കണിയാർവയൽ, പെരുവളത്തുപറമ്പ്,നിലാമുറ്റം, ഇരിക്കൂർ, പെരുമണ്ണ് എന്നിവിടങ്ങളിലാണ് മെക്കാഡം ചെയ്ത റോഡിന്‍റെ വശങ്ങൾ തകർന്നത്. പലയിടത്തും വലിയ കുഴികൾ രൂപപ്പെട്ടിട്ടുണ്ട്. ഇത്തരം ഇടങ്ങളിൽ എതിരേ വരുന്ന വാഹനങ്ങൾക്ക് സൈഡ് കൊടുക്കാൻ കഴിയാതെ വാഹനങ്ങൾ നിർത്തിയിടേണ്ടി വരുന്നത് കാരണം ഗതാഗത തടസം ഉണ്ടാകുന്നുണ്ട്. വലിയ വളവുകളും വീതി കുറവുളള ഭാഗങ്ങളിലെ കുഴികൾ വലിയ അപകട ഭീഷണിയുമാണ് ഉയർത്തുന്നത്.

കാട്ടാമ്പള്ളിയിൽ സ്കൂ‌ട്ടറുകൾ കൂട്ടിയിടിച്ച് വ്യാപാരി മരിച്ചു

വളപട്ടണം: കാട്ടാമ്പള്ളിയിൽ സ്കൂ‌ട്ടറുകൾ തമ്മിൽ കൂട്ടിയിടിച്ചുണ്ടായ അപകടത്തിൽ വയോധികനായ വ്യാപാരി മരിച്ചു. കാട്ടാമ്പള്ളി അബൂബക്കർ സ്റ്റോർ ഉടമ കണ്ണാടിപ്പറമ്പ് ആറാംപീടികയിൽ പള്ളേരി മുംതാസ് മൻസിലിൽ കടവൻപറമ്പിൽ കെ.പി. അബൂബക്കറാണ് (75) മരിച്ചത്. ഇന്നലെ പുലർച്ചെ 5.10 ഓടെ കാട്ടാമ്പള്ളി പള്ളിക്ക് മുന്നിലായിരുന്നു സംഭവം. സുബഹ് നിസ്കാരത്തിന് പള്ളിയിലേക്ക് പോയ അബൂബക്കർ സഞ്ചരിച്ച സ്കൂട്ടറിൽ മറ്റൊരു സ്കൂട്ടർ ഇടിച്ചാണ് അപകടമുണ്ടായത്. റോഡിൽ തെറിച്ചുവീണ അബൂബക്കറിനെ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വളപട്ടണം പോലീസ് ഇൻക്വസ്റ്റ് നടത്തി. ഭാര്യമാർ: പുതിയപുരയിൽ മുംതാസ്, പരേതയായ മുക്രി മറിയം. മക്കൾ: റമീസ്, റൈഹാനത്ത്, നജ്മ, നയിമ. സഹോദരങ്ങൾ: ആയിഷ, പരേതരായ മുഹമ്മദ് കുഞ്ഞി, കുഞ്ഞിമറയം, ഫാത്തിമ.

പരിയാരം മദർഹോം; ആത്മീയനിറവിൽ വാർഷികാഘോഷം

പരിയാരം: തലശേരി അതിരൂപത യ ുടെ ധ്യാനകേന്ദ്രമായ മദര്‍ ഹോ മിന്‍റെ 21-ാംവാര്‍ഷികവും രാപ്പകല്‍ ആരാധനയുടെ ആയിരം ദിവസത്തിന്‍റെ ആഘോഷവും നടന്നു. വാര്‍ഷിക ദിനത്തില്‍ നടന്ന ശുശ്രൂഷകള്‍ക്ക് തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി നേതൃത്വം നല്കി. കഴിഞ്ഞ 21 വര്‍ഷങ്ങളിലെ വ്യത്യസ്തങ്ങളായ ധ്യാന, ആത്മീയ ശുശ്രൂഷകള്‍വഴി വിവിധ തിന്മകളില്‍ അകപ്പെട്ടുപോയ അനേകരെ തിരിച്ചുകൊണ്ടുവരാനും മാനസാന്തരപ്പെടുത്താനും നന്മയുടെ വഴിയിലേക്ക് നയിക്കാനും സാധിച്ചിരുന്നു. 2004 സെപ്റ്റംബര്‍ എട്ടിന് തലശേരി അതിരൂപതയിലെ പ്രമുഖ ധ്യാന ഗുരുവായ ഫാ. മാത്യു ആശാരിപറമ്പിലാണ് മദര്‍ ഹോം ധ്യാനകേന്ദ്രത്തിന് തുടക്കം കുറിച്ചത്. നിരവധി വിശ്വാസികൾ ആഘോഷത്തിലും ശുശ്രൂഷാ ചടങ്ങിലും പങ്കെടുത്തു. മദർ ഹോം ഡയറക്‌ടർ ഫാ. ബെന്നി പുത്തൻനട, അഡ്മിനിസ്‌ട്രേറ്റര്‍ ഫാ. മൈക്കിള്‍ മഞ്ഞക്കുന്നേല്‍, സ്പിരിച്വല്‍ ഡയറക്ടര്‍ ഫാ. പോള്‍ പുലിമല, എന്നിവർ ചടങ്ങുകൾക്ക് നേതൃത്വം നല്കി.

ആക്രമണത്തിന് മൂര്‍ച്ച കൂട്ടാന്‍ അര്‍ഷാദും വാരിയേഴ്‌സില്‍

കണ്ണൂര്‍: സൂപ്പര്‍ ലീഗ് കേരളയില്‍ കിരീടം ലക്ഷ്യമിടുന്ന കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബ് ആക്രമണത്തിന് മൂര്‍ച്ചകൂട്ടാന്‍ വിംഗര്‍ എ. അര്‍ഷാദിനെയും ടീമിലെത്തിച്ചു. ഇടതും വലതും വിംഗില്‍ ഒരേപോലെ കളിക്കാന്‍ സാധിക്കുന്ന താരമാണ് അര്‍ഷാദ്. 2024-25 സീസണില്‍ ദേവഗിരി സെന്‍റ് ജോസഫ്‌സ് കോളജിന് വേണ്ടി കേരള പ്രീമിയര്‍ ലീഗ് കളിച്ച താരം നാല് ഗോളും മൂന്ന് അസിസ്റ്റും നേടിയിട്ടുണ്ട്. രണ്ടു മത്സരത്തിലെ മികച്ച താരത്തിനുള്ള അവാര്‍ഡും സ്വന്തമാക്കി. 2023 ല്‍ നടന്ന റിലയന്‍സ് സൗത്ത് സോണ്‍ യൂത്ത് ചാമ്പ്യന്‍ഷിപ്പില്‍ ദേവഗിരി കോളജ് കിരീടം നേടിയപ്പോള്‍ ചാമ്പ്യന്‍ഷിപ്പിലെ ടോപ് സ്‌കോററും അര്‍ഷാദായി രുന്നു. അഞ്ച് ഗോളാണ് താരം ടൂര്‍ണമെന്‍റിൽ നേടിയത്. 2021 മുതല്‍ 2023 വരെ ലൂക്ക സോക്കര്‍ ക്ലബിന് വേണ്ടി കളിച്ച താരം കേരള പ്രീമിയര്‍ ലീഗ്, യൂത്ത് സോക്കര്‍ ലീഗ്, കെഎഫ്എ അണ്ടര്‍ 14 ജില്ലാ ലീഗ് തുടങ്ങിയ ടൂര്‍ണമെന്‍റുകളിലും കളിച്ചു. 2022 ല്‍ നടന്ന യൂത്ത് സോക്കര്‍ ലീഗില്‍ ലൂക്ക സോക്കര്‍ ക്ലബ് ചാമ്പ്യന്‍മാരും ആയി. ചാമ്പ്യന്‍ഷിപ്പിലെ ടോപ് സ്‌കോററും അര്‍ഷാദ് ആയിരുന്നു. ലൂക്ക സോക്കര്‍ അക്കാദമിയിലൂടെയാണ് താരം ഫുട്‌ബോള്‍ കരിയര്‍ ആരംഭിച്ചത്. മലപ്പുറം മേലങ്ങാടി സ്വദേശിയാണ്.

തലശേരി ഇന്‍റര്‍നാഷണല്‍ ഫിലിം ഫെസ്റ്റിവല്‍ ഒക്ടോബര്‍ 16 മുതല്‍

കണ്ണൂർ: കേരള സംസ്ഥാന ചലച്ചിത്ര അക്കാദമി ഒക്ടോബര്‍ 16, 17, 18, 19 തീയതികളില്‍ തലശേരി ലിബര്‍ട്ടി തിയേറ്റര്‍ സമുച്ചയത്തില്‍ സംഘടിപ്പിക്കുന്ന തലശേരി ഇന്‍റര്‍നാഷണല്‍ ചലച്ചിത്രമേളയുടെ (ടിഐഎഫ്എഫ്) സംഘാടക സമിതി രൂപീകരിച്ചു. യോഗം നിയമസഭ സ്പീക്കർ എ.എൻ. ഷംസീർ ഉദ്ഘാടനം ചെയ്തു. ചലച്ചിത്ര അക്കാദമി ചെയർമാൻ പ്രേംകുമാർ അധ്യക്ഷത വഹിച്ചു. മേളയിൽ അന്താരാഷ്‌‌ട്ര നിലവാരമുള്ള 55 സിനിമകൾ പ്രദർശിപ്പിക്കും. ഒരേ സമയം മൂന്നു തിയേറ്ററുക ളി ലായി 1200 പേർക്ക് സിനിമകൾ കാണാനുള്ള അവസരം ഒരുക്കും. ഡെലിഗേറ്റ് ഫീസ് 354 രൂപയും വിദ്യാർഥികൾക്ക് 177 രൂപയും ആണ്. മുഖ്യരക്ഷാധികാരികളായി മുഖ്യമന്ത്രി പിണറായി വിജയൻ, മന്ത്രിമാരായ സജി ചെറിയാൻ, കടന്നപ്പള്ളി രാമചന്ദ്രൻ എന്നിവരെ തെരഞ്ഞെടുത്തു. രക്ഷാധികാരികൾ: ഷാഫി പറമ്പിൽ എംപി, കെ.പി. മോഹനൻ എംഎൽഎ. സംഘാടകസമിതി ചെയർപേഴ്സണായി സ്പീക്കർ എ.എൻ. ഷംസീർ, ഫെസ്റ്റിവൽ ഡയറക്ടറായി കേരള ചലച്ചിത്ര അക്കാദമി ചെയർമാൻ പ്രേംകുമാർ, ജനറൽ കൺവീനറും ഫെസ്റ്റിവൽ എക്സിക്യൂട്ടീവ് ഡയറക്ടറുമായി ചലച്ചിത്ര അക്കാദമി സെക്രട്ടറി സി. അജോയ് എന്നിവരെയും തെരഞ്ഞെടുത്തു. കേരള സംസ്ഥാന ചലച്ചിത്ര അക്കാദമി ജനറൽ കൗൺസിൽ അംഗം പ്രദീപ് ചൊക്ലി, കെഎസ്എഫ്ഡിസി ബോർഡ് അംഗം ജിത്തു കോളയാട്, എസ്.കെ. അർജുൻ എന്നിവർ കൺവീനർമാരാണ്. പ്രോഗ്രാം കമ്മിറ്റി ചെയർപേഴ്സണായി ബീനിഷ് കോടിയേരി, റിസ്പഷൻ കമ്മിറ്റി ചെയർപേഴ്സണായി തലശേരി നഗരസഭ ചെയർപേഴ്സൺ ജമുനറാണി, മീഡിയ കമ്മിറ്റി ചെയർപേഴ്സണായി ജില്ലാ ഇൻഫർമേഷൻ ഓഫീസർ പി.പി. വിനീഷ് തുടങ്ങിയവരേയും തെരഞ്ഞെടുത്തു. തലശേരി കോസ്‌മോപൊളിറ്റന്‍ ക്ലബില്‍ നടന്ന യോഗത്തിൽ കേരള സംസ്ഥാന ചലച്ചിത്ര അക്കാദമി ചെയർമാൻ പ്രേംകുമാർ, തലശേരി സബ് കളക്ടർ കാർത്തിക് പാണിഗ്രഹി, എഎസ്പി പി.ബി. കിരൺ, നഗരസഭ വൈസ് ചെയർമാൻ എം.വി. ജയരാജൻ, സി.അജോയ്, ലിബർട്ടി ബഷീർ, നടൻ സുശീൽ കുമാർ തിരുവങ്ങാട്, പ്രദീപ്‌ ചൊക്ലി എന്നിവർ പ്രസംഗിച്ചു.

മലയോരത്തിന് ആവേശം പകർന്ന് റൺ പാലക്കയംതട്ട് മിനി മാരത്തൺ

പയ്യാവൂർ: ഇരിക്കൂര്‍ നിയോജക മണ്ഡലത്തിലെ ടൂറിസം കേന്ദ്രങ്ങളെ ലോകശ്രദ്ധയിലേക്കെത്തിക്കാനായി സജീവ് ജോസഫ് എംഎൽഎയുടെ നേതൃത്വത്തിൽ ഡിടിപിസിയും ഇരിക്കൂര്‍ ടൂറിസം ആന്‍ഡ് ഇന്നൊവേഷന്‍ കൗണ്‍സിലും സംയുക്തമായി സംഘടിപ്പിച്ച ‘റൺ പാലക്കയംതട്ട് ഇരിക്കൂർ ടൂറിസം രാജ്യാന്തര മിനി മാരത്തൺ’ വൻ വിജയം. മലയോര മേഖലയിലെ പ്രധാന ടൂറിസം കേന്ദ്രങ്ങളായ പാലക്കയംതട്ടിന്‍റെയും പൈതൽമലയുടെയും താഴ്‌വാരത്തിലൂടെ മാരത്തൺ താരങ്ങൾ മാറ്റുരച്ചപ്പോൾ മലയോരജനതയ്ക്ക് അത് ആവേശത്തിന്‍റെ പുത്തനനുഭവമായി. പയ്യാവൂരിൽനിന്ന് ആരംഭിച്ച്, പുലിക്കുരുന്പയിൽ സമാപിച്ച മിനി മാരത്തണിൽ പുരുഷ,വനിത, ട്രാൻസ്ജെൻഡർ വിഭാഗങ്ങളിലായി നടത്തിയ മിനി മാരത്തണിൽ വിദേശികളും സ്വദേശികളുമുൾപ്പെടെ ആയിരത്തോളം അത്‌ലറ്റുകൾ പങ്കെടുത്തു. പയ്യാവൂരിൽനിന്ന് പുലിക്കുരുമ്പയിലേക്ക് നടത്തിയ മിനി മാരത്തണിന്‍റെ ഫ്ലാഗ് ഓഫ് കെ.പി. മോഹനൻ എംഎൽഎ, കണ്ണൂർ കോർപറേഷൻ മേയർ മുസ്‌ലിഹ് മഠത്തിൽ, ജില്ലാ കളക്ടര്‍ അരുണ്‍ കെ.വിജയന്‍, സിറ്റി പോലീസ് കമ്മീഷണര്‍ പി. നിധിൻ രാജ്, മുൻ ഇന്ത്യൻ ഫുട്ബോൾ താരം സി.കെ. വീനിത്, ധ്യാൻചന്ദ് പുരസ്കാര ജേതാവും അന്തർദേശീയ ബോക്സിംഗ് താരവുമായ കെ.സി. ലേഖ, കോമൺവെൽത്ത് ഗെയിംസ് മെഡൽ ജേതാക്കളായ ടി.കെ. പ്രിയ, സിനി ജോസ്, ടിയാന മേരി തോമസ്, മുന്‍ ഇന്ത്യന്‍ വോളിബോള്‍ താരം മനു ജോസഫ് എന്നിവർ ചേർന്ന് നിർവഹിച്ചു. സജീവ് ജോസഫ് എംഎൽഎ അധ്യക്ഷത വഹിച്ചു. ജില്ലാ കളക്ടർ അരുൺ കെ. വിജയൻ, സിറ്റി പോലീസ് കമ്മീഷണർ പി. നിധിൻ രാജ് എന്നിവർ മിനി മാരത്തണിൽ പങ്കാളികളായി 12.5 കിലോമീറ്റർ ദൂരം ഓടുകയും ചെയ്തു. മിനി മാരത്തൺ ആരംഭിച്ച പയ്യാവൂർ, സമാപന വേദിയായ പുലിക്കുരുന്പ എന്നിവിടങ്ങളിൽ ജില്ലാ മെഡിക്കൽ ഓഫീസർ പീയൂഷ് നമ്പൂതിരിപ്പാട്, ഡിടിപിസി സെക്രട്ടറി സൂരജ്, ഇരിക്കൂർ ടൂറിസം കൗൺസിൽ ചെയർമാൻ പി.ടി. മാത്യു, ശ്രീകണ്ഠപുരം മുനിസിപ്പൽ ചെയർപേഴ്സൺ കെ.വി. ഫിലോമിന, ബ്ലോക്ക് പഞ്ചായത്ത് പ്രസിഡന്‍റ് റോബർട്ട് ജോർജ്, ഫാ. തോമസ് പയ്യമ്പള്ളി, ഫാ. ജോസഫ് കാവനാടി, ഫാ. ആന്‍റണി മഞ്ഞളാംകുന്നേൽ, ഫാ. ബിബിൻ അഞ്ചെന്പിൽ, പഞ്ചായത്ത് പ്രസിഡന്‍റുമാരായ ബേബി ഓടംപള്ളിൽ, മിനി ഷൈബി, സാജു സേവ്യർ, കണ്ണൂർ കോർപറേഷൻ സ്റ്റാൻഡിംഗ് കമ്മിറ്റി ചെയർപേഴ്സൺ സുരേഷ് ബാബു എളയാവൂർ, ഉണ്ണികൃഷ്ണൻനമ്പൂതിരി, സി.വി.എൻ. യാസ്റ, ചാക്കോ പാലക്കലോടി , ബേബി തോലാനി, സോജൻ കാരാമയിൽ, ജയിംസ് തുരുത്തേൽ, പി.ആർ. രാഘവൻ, ജോഷി കണ്ടത്തിൽ, മധു തൊട്ടിയിൽ, പ്രീത സുരേഷ് , ഇ.കെ. കുര്യൻ , ടി.പി. അഷ്റഫ്, ടെൻസൻ കണ്ടത്തിങ്കര, ബാബു മണ്ടളം, ജോസ് പരത്തനാൽ, സന്ദീപ് പാണപ്പുഴ, നൗഷാദ് ബ്ലാത്തൂർ, പി.ആർ. സനീഷ്, റെജി, റോബിൻ പുലിക്കുരുമ്പ, ഷാജി, വിവിധ രാഷ്‌ട്രീയപാർട്ടി നേതാക്കൾ, സംഘടന പ്രതിനിധികൾ എന്നിവർ പങ്കെടുത്തു. ആരോഗ്യ വകുപ്പ്, പോലീസ്, വിവിധ സർക്കാർ സംവിധാനങ്ങളുടെ എന്നിവരുടെ വിപുലമായ സഹകരണവും ലഭിച്ചിരുന്നു. മത്സര ഫലങ്ങൾ 18-35 വയസ് പുരുഷ വിഭാഗത്തിൽ എം.പി.നെബീൽ ഷാഹി (കോഴിക്കോട്), സതീഷ്കുമാർ( കോയമ്പത്തൂർ), ബെഞ്ചമിൻ ബാബു (ഇടുക്കി) എന്നിവർ യഥാക്രമം ഒന്ന്, രണ്ട്, മൂന്ന് സ്ഥാനങ്ങൾ നേടി. വനിതാ വിഭാഗത്തിൽ റീബ അന്നാ ജോർജ്(പത്തനംതിട്ട) ശിവാനി( ഉത്തർ പ്രദേശ്), അഞ്ജു മുകുന്ദൻ( ഇടുക്കി) എന്നിവർ വിജയികളായി. 36-45 വയസുകാരുടെ വിഭാഗത്തിൽ പുരുഷന്മാരിൽ നഞ്ചപ്പ (തമിഴ്നാട്), വിനോദ് കുമാർ(ഊട്ടി), ജഗദീശൻ (തമിഴ്നാട്) എന്നിവർ യഥാക്രമം ഒന്നും രണ്ടും മൂന്നും സ്ഥാനങ്ങൾക്ക് അർഹരായി. വനിതാ വിഭാഗത്തിൽ ആശ പത്രേയ(ബംഗളൂരു) ജിനി ചെറിയാൻ (കണ്ണൂർ) എന്നിവർ വിജയികളായി. 46 വയസിനു മുകളിൽ പുരുഷന്മാരിൽ ജോസ് ഇല്ലിക്കൽ(വയനാട്), ഷറഫുദ്ദീൻ(വയനാട്), എൻ.പി.ഷാജി (കോഴിക്കോട് )എന്നിവർ ജേതാക്കളായി. വനിതാ വിഭാഗത്തിൽ പി.എ. ജസീല (തൃശൂർ), കെ.കെ.രമ (എറണാകുളം), ജ്യോതി പ്രവ (ആസാം) എന്നിവർ ആദ്യ മൂന്ന് സ്ഥാനങ്ങൾ നേടി. ഫൺ റൺ മത്സരത്തിൽ പുരുഷവിഭാഗത്തിൽ ഷിബിൻ ആന്‍റോ (കോട്ടയം), ആദർശ് ഗോപി (കണ്ണൂർ), അതുൽ (വടകര), റജിൽ ബാബു(ചങ്ങനാശേരി) എന്നിവരും സ്ത്രീകളിൽ ജി. ജിൻസി( പാലക്കാട്), വി. അഞ്ജന (പാലക്കാട്), എസ്.കെ. വിജയലക്ഷ്മി (കർണാടക), നിയാമോൾ തോമസ് (ചെറുപുഴ )എന്നിവർ വിജയികളായി. വിജയികൾക്ക് കാഷ് അവർഡുൾപ്പെടെയുള്ള സമ്മാനങ്ങൾ നൽകി. 60 വയസിനു മുകളിലുള്ള മത്സരാർഥികൾക്കും പ്രത്യേകം കാഷ് പ്രൈസ് നൽകി ആദരിച്ചു.

വൈദിക സൗഹൃദ ടൂർണമെന്‍റ്: കാസർഗോഡും ചെന്പേരിയും ജേതാക്കൾ

ചെമ്പേരി: തലശേരി അതിരൂപതയുടെ ആഭിമുഖ്യത്തിൽ സൗഹൃദോത്സവം എന്ന പേരിൽ സംഘടിപ്പിച്ച വൈദിക സൗഹൃദ ടൂർണമെന്‍റിലെ ക്രിക്കറ്റ്, ബാസ്ക്കറ്റ് ബോൾ മത്സരങ്ങൾ ചെമ്പേരി വിമൽ ജ്യോതി എൻജിനിയറിംഗ് കോളജ് സ്റ്റേഡിയത്തിൽ നടന്നു. അതിരൂപതയിലെ ഫൊറോനകളെ ഇരിട്ടി, ചെമ്പേരി, ചെറുപുഴ, കാസർഗോഡ് എന്നീ നാല് റീജണുകളായി തിരിച്ചാണ് ടൂർണമെന്‍റ് സംഘടിപ്പിച്ചത്. ക്രിക്കറ്റിൽ ഇരിട്ടിയെ പതിനൊന്ന് റൺസിന് പരാജയപ്പെടുത്തി കാസർഗോഡ് ജേതാക്കളായി. ബാസ്ക്കറ്റ് ബോളിൽ ചെന്പേരിയാണ് ജേതാക്കൾ. ഇരിട്ടിയാണ് റണ്ണേഴ്സ് അപ്പ്. 21 പോയിന്‍റു കൾക്കെതിരെ 35 പോയിന്‍റ ുകൾ നേടിയാണ് ചെന്പേരി വിജയി കളായത്. ബാസ്കറ്റ് ബോൾ മത്സരത്തിൽ ബെസ്റ്റ് പ്ലെ്ലയറായി ഫാ. ജെറിൻ പന്തല്ലൂപറമ്പിലും സീനിയർ വിഭാഗത്തിൽ ഫാ. മാത്യു ശാസ്താംപടവിലും തെരഞ്ഞെടുക്കപ്പെട്ടു. ക്രിക്കറ്റിൽ ഫാ. പ്രവീൺ കായംകാട്ടിൽ മാൻ ഓഫ് ദി മാച്ച് പുരസ്കാരം നേടി. വികാരി ജനറാൾമാരായ മോൺ. ആന്‍റണി മുതുകുന്നേൽ, മോൺ. സെബാസ്റ്റ്യൻ പാലക്കുഴി, മോൺ. മാത്യു ഇളംതുരുത്തിപടവിൽ എന്നിവർ മത്സരങ്ങൾക്ക് നേതൃത്വം നൽകി. സമാപന സമ്മേളനം ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്തു. ആർച്ച്ബിഷപ് എമരിറ്റസ് മാർ ജോർജ് വലിയമറ്റം സമ്മാനദാനം നിർവഹിച്ചു. ടൂർണമെന്‍റിലെ വോളിബോൾ, ഷട്ടിൽ ബാഡ്മിന്‍റൺ‍ (ഡബിൾസ്) മത്സരങ്ങൾ ഒക്ടോബർ 20ന് നടക്കും. വൈദികരുടെ ഇടയിൽ പരസ്പര സൗഹൃദവും കായിക ക്ഷമതയും വർധിപ്പിക്കുന്നതിനായാണ് സൗഹൃദോത്സവം സംഘടിപ്പിച്ചത്. വിവിധ ഇടവക പള്ളികളുടെ ഭാരിച്ച ഉത്തരവാദിത്വങ്ങൾ അല്പ സമയത്തേക്ക് മാറ്റിവച്ച് പഴയ സെമിനാരി കാലത്തെ സൗഹൃദ ങ്ങളിലേക്കുള്ള തിരിച്ചുപോകൽ കൂടി യായിരുന്നു സൗഹൃദോത്സവം മത്സരങ്ങൾ.

ഓടയിലൂടെ മാലിന്യം പുഴയിലേക്ക് ഒഴുക്കുന്നു

ആലക്കോട്: ടൗണിലെ മാലിന ജലത്തിനൊപ്പം മാലിന്യങ്ങളും ഓ‌ടയിലൂടെ പുഴയിലേക്ക് ഒഴുക്കി വിടുന്നു. ഒറ്റത്തെ റോഡിലാണ് മാലിന്യവും മലിനജലവും പുഴയിലേക്ക് ഒഴുക്കുന്നത്. ആലക്കോട് ടൗണിലെ ശുദ്ധജല വിതരണത്തിന് ഉപയോഗിക്കുന്നതും നിരവധി ആളുകൾ കുടിവെള്ളത്തിനും കുളിക്കാനും ആശ്രയിക്കുന്ന പുഴയിലേക്കാണ് മാലിന്യം തുറന്നു വിടുന്നത്. ഇത് ഗുരുതരമായ ആരോഗ്യ പ്രശ്നങ്ങൾക്ക് ഇടയാക്കും. ഓടയുടെ തുറന്നു വച്ച ഭാഗത്ത് മാലിന്യങ്ങൾ കെട്ടിക്കിടക്കുന്നുണ്ട്. ഇതു കാരണം ഓട നിറഞ്ഞ് കൊതുകുകളും പെരുകുയിട്ടുണ്ട്. ജലജന്യ രോഗങ്ങൾ പെരുകുന്പോൾ ആരോഗ്യവകുപ്പ് നിരന്തരം ജാഗ്രതാ നിർദേശം നൽകി വരുന്പോൾ തന്നെയാണ് അധികൃതർ പരസ്യമായി മലിനജലം പുഴയിലേക്ക് ഒഴുക്കി വിട്ടു കൊണ്ടിരിക്കുന്നത്.

മലയോരത്ത് വിയറ്റ്നാം മോഡൽ കുരുമുളക് കൃഷി പരീക്ഷണം

ചെറുപുഴ: വിയറ്റ്നാം മോഡൽ കുരുമുളക് കൃഷിയിലേക്ക് തിരിഞ്ഞ് മലയോര കർഷകർ. കുറഞ്ഞ സ്ഥലത്ത് കൂടുതൽ കൃഷിയെന്ന ഹൈഡെൻസിറ്റി എന്ന ശാസ്ത്രീയ കൃഷി രീതിയാണ് വിയറ്റ്നാം മോഡലിന്‍റെ പ്രത്യേകത. ചെറുപുഴ-കടുമേനി റോഡരികിൽ വെണ്യക്കരയിൽ തോമസ് പാറശേരിൽ തന്‍റെ 17 സെന്‍റിൽ 145 കുരുമുളക് വള്ളികളാണ് വിയറ്റ്നാം മോഡലിൽ കൃഷി ചെയ്യുന്നുണ്ട്. നാലിഞ്ച് വണ്ണവും രണ്ടര മീറ്റർ ഉയരവുമുള്ള പിവിസി പൈപ്പിലാണ് തൈകൾ പിടിപ്പിച്ചിരിക്കുന്നത്. ഇനിയും രണ്ടര മീറ്റർ കൂടി പിവിസി പൈപ്പിന് ഉയരം കൂട്ടും. ഏഴരയടി സമചതുരത്തിലാണ് പിവിസി പൈപ്പുകൾ നാട്ടുന്നത്. ഇതിൽ കൂമ്പുങ്കൻ, വിജയ്, പന്നിയൂർ വൺ എന്നീ മൂന്നിനങ്ങളാണ് നട്ടിരിക്കുന്നത്. തോട്ടത്തിൽ കാടുപിടിക്കാതിരിക്കാൻ വീഡ് മാറ്റ് വിരിച്ചിട്ടുണ്ട്. ഇതുകാരണം വെള്ളം നന്നായി മണ്ണിലിറങ്ങും. അടിസ്ഥാന വളമായി ബംഗളൂരു ഐസിഎആറിന്‍റെ ശിപാർശയോടെ തയാറാക്കിയ ചകിരി കമ്പോസ്റ്റും ചാണകവും ഇട്ടാണ് തൈകൾ നട്ടത്. ഇതുകാരണം ചുവട് ഇളകുകയേ ഇല്ല. ഫോളിയാർ രൂപത്തിൽ സസ്യങ്ങൾക്കാവശ്യമായ മൂലകങ്ങൾ സ്പ്രേ ചെയ്തു കൊടുക്കുന്നതാണ് ഈ കൃഷി രീതിയുടെ മറ്റൊരു പ്രത്യേകത. കീടങ്ങളിൽ നിന്നും സംരക്ഷണം കിട്ടുന്നതിനായി തോട്ടത്തിന് ചുറ്റും ചെണ്ടുമല്ലിയും നട്ടിട്ടുണ്ട്. കടുമേനി ഫാർമേഴ്സ് ഗ്രൂപ്പംഗമാണ് തോമസ്. തോമസ് ഉൾപ്പെടെ 10 ഗ്രൂപ്പംഗങ്ങളും വിയറ്റ്നാം മോഡൽ കൃഷിയിൽ സജീവമാണ്. കുരുമുളക് ചെടികൾക്കിടയിൽ പച്ചക്കറികളും നടും. തൈകൾ നട്ട് ആറുമാസമാകുന്പോഴേക്കും തിരിയിടും. നാലുവർഷം കൊണ്ട് മുടക്കുമുതൽ തിരിച്ച് കിട്ടുമെന്ന് കർഷകനായ തോമസ് പറഞ്ഞു.

ചെങ്ങളായി-അഡൂർ പാലം നിർമാണം പുനരാരംഭിച്ചു

ശ്രീകണ്ഠപുരം: പണി നിർത്തിവച്ചിരുന്ന ചെങ്ങളായി-അഡൂർ പാലത്തിന്‍റ നിർമാണം പുനരാരംഭിച്ചു. നിർമാണ സാമഗ്രികൾ എത്തിക്കാനാവാത്തതിനെ തുടർന്ന് പാലം പണി നിലച്ചത്. ഇത് ദീപിക റിപ്പോർട്ട് ചെയ്തിരുന്നു. ഇതിനു പിന്നാലെയാണ് കരാറുകാരൻ സാമഗ്രികളെത്തിച്ച് പണിയാരംഭിച്ചിരിക്കുന്നത്. ശക്തമായ മഴയും പ്രവൃത്തി സ്തംഭിക്കാൻ കാരണമായിരുന്നു.12 കോടി രൂപ ചെലവിലാണ് അഡൂർക്കടവിൽ പാലം നിർമിക്കുന്നത്. 2018-19 വർഷത്തെ ബജറ്റിൽ 9.50 കോടിരൂപ പാലം നിർമാണത്തിന് അനുവദിച്ചിരുന്നു. സമീപന റോഡ് നിർമാണത്തിനായി നാട്ടുകാർ സൗജന്യമായി സ്ഥലം നൽകുകയും ചെയ്തിരുന്നു. എന്നാൽ, 2018-19 വർഷങ്ങളിലുണ്ടായ വെള്ളപ്പൊക്കത്തെ തുടർന്ന് പൊതുമരാമത്തുവകുപ്പ് പാലത്തിന്‍റെ പ്ലാനിലും എസ്റ്റിമേറ്റിലും റീകാസ്റ്റിംഗ് വരുത്തി. ഇതോടെയാണ് തുടർനടപടികൾ നിലച്ചത്. പിന്നീട് എസ്റ്റിമേറ്റ് പുതുക്കി ഭരണാനുമതി നൽകുകയായിരുന്നു. നിലവിൽ ചെങ്ങളായി ഭാഗത്താണ് പ്രവൃത്തി പുരോഗമിക്കുന്നത്. തളിപ്പറമ്പ്-ഇരിട്ടി സംസ്ഥാന പാതയിൽ ചെങ്ങളായി ഭാഗത്തുനിന്ന് കടവിലേക്കുള്ള അനുബന്ധ റോഡാണ് ആദ്യം ഒരുക്കിയത്. പിന്നാലെ തൂൺ നിർമാണവും തുടങ്ങി. പൊതുമരാമത്ത് വകുപ്പധികൃതർ കഴിഞ്ഞദിവസം സ്ഥലത്തെത്തി നിർമാണ പ്രവൃത്തികൾവിലയിരുത്തി. ഊരാളുങ്കൽ സൊസൈറ്റിക്കാണ് നിർമാണച്ചുമതല. നിയമപരമായല്ല ടെൻഡർ നൽകിയതെന്നാരോപിച്ച് ഇരിക്കൂറിലെ നിർമാണ കമ്പനി കേസിനെ തുടർന്ന് നിർമാണം നേരത്തെ ഒരു വർഷത്തോളം സ്തംഭിച്ചിരുന്നു. കേസ് ഹൈക്കോതി തള്ളിയതിനെ തുടർന്നായിരുന്നു പ്രവൃത്തിയാരംഭിച്ചത്.

പ്രകൃതി സംരക്ഷണ ക്ലാസ് നടത്തി

കണ്ണൂർ: കയ്‌റോസ് കണ്ണൂര്‍, കോള്‍പിംഗ് ഇന്ത്യ എന്നിവയുടെ നേതൃത്വത്തില്‍ താവം ഫാത്തിമ മാതാ പള്ളി ഹാളില്‍ പ്രകൃതി സംരക്ഷണ ക്ലാസ് നടത്തി. താവം ഇടവക വികാരി ഫാ. ജീസണ്‍ തണ്ണിക്കോട്ട് ഉദ്ഘാടനം ചെയ്തു. കോള്‍പിംഗ് കോ-ഓര്‍ഡിനേറ്റര്‍ കെ. അരുണ്‍ അധ്യക്ഷത വഹിച്ചു. ജൈവ കൃഷിയില്‍ ദേശിയ അവാര്‍ഡ് നേടിയ കെ.ബി.ആര്‍. കണ്ണന്‍ പ്രകൃതി സംരക്ഷണവും, കൃഷിയുടെ പ്രാധാന്യവും, പോഷക ആഹാരങ്ങളെക്കുറിച്ചും ക്ലാസെടുത്തു. അംഗങ്ങള്‍ക്ക് നാടന്‍ പച്ചക്കറി വിത്തുകള്‍ വിതരണം ചെയ്തു. റീജിയണല്‍ കോ-ഓര്‍ഡിനേറ്റര്‍ എം.വി. ചന്ദ്രന്‍, ഫെഡറേഷന്‍ പ്രസിഡന്‍റ് ഷൈമ അഗസ്റ്റിന്‍ എന്നിവർ പ്രസംഗിച്ചു. 30 കോള്‍പിംഗ് മെംബര്‍മാര്‍ പങ്കെടുത്തു.

മണൽ കടത്തിയ വാഹനം പോലീസ് പിന്തുടർന്ന് പിടികൂടി

പഴയങ്ങാടി: മാട്ടൂലിൽ നിന്ന് അനധികൃതമായി കടത്തിക്കൊണ്ടുപോയ പുഴ മണൽ പഴയങ്ങാടി എസ്ഐ കെ. സുഹൈലും സംഘവും പിന്തുടർന്ന് പിടികൂടി. മാട്ടൂൽ സൗത്തിലെ സ്ട്രീറ്റ് നമ്പർ 45 ഭാഗത്ത് നിന്ന് മണലുമായി എത്തിയ ടിപ്പർ ലോറിയെ പോലീസ് സംഘം കൈ കാണിച്ചു. എന്നാൽ, പോലീസ് സംഘത്തെ കണ്ട് ലോറി അമിത വേഗതയിൽ ഓടിച്ചു പോകുകയായിരുന്നു. വാഹനത്തെ പിന്തുടർന്ന് മാട്ടൂൽ മടക്കര പാലത്തിന് സമീപത്തു നിന്ന് പിടികൂടുകയായിരുന്നു. ലോറിയിൽ ഉണ്ടായിരുന്നവർ വാഹനം ഉപേക്ഷിച്ച് രക്ഷപ്പെട്ടു. ഇന്നലെ പുലർച്ചെ മൂന്നോടെ പട്രോളിംഗിനിടെയാണ് സംഭവം. മണലും ടിപ്പർ ലോറിയും സ്റ്റേഷനിലേക്ക് മാറ്റി. ഒരു ഇടവേളക്ക് ശേഷം ഈ ഭാഗങ്ങളിൽ മണൽ കടത്ത് സംഘം പിടി മുറുക്കുകയാണെന്ന ആരോപണം ശക്തമാകുന്നുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]