ADVERTISEMENT

ADVERTISEMENT

വൈഎംസിഎ പുനലൂർ സബ് റീജണൽ നേതൃത്വ ശില്പശാല നടത്തി

കൊട്ടാരക്കര : വൈഎംസിഎ പുനലൂർ സബ് റീജണലിന്‍റെ ഏകദിന നേതൃത്വ ശില്പശാല ചെങ്ങമനാട് വൈഎംസിഎയിൽ നടന്നു. അഖിലേന്ത്യ ട്രഷറർ റെജി ജോർജ് ഇടയാറൻമുള ഉദ്ഘാടനം ചെയ്തു.

സബ് റീജണൽ ചെയർമാൻ ഡോ.ഏബ്രഹാം മാത്യു അധ്യക്ഷത വഹിച്ചു. മുൻ നാഷണൽ എക്സിക്യൂട്ടീവ് മെമ്പർ കെ.ഒ.രാജുക്കുട്ടി, സഖറിയ റമ്പാൻ,എക്യുമെനിക്കൽ സെന്‍റർ ചെയർമാൻ എൽ.തങ്കച്ചൻ,ജനറൽ കൺവീനർ ഷിബു.കെ. ജോർജ്, ചെങ്ങമനാട് വൈഎംസിഎ പ്രസിഡന്‍റ് എൽ.ബാബു,

മുൻ സബ് റീജണൽ ചെയർമാൻമാരായ പി.എം.തോമസ്കുട്ടി,കെ. ജോർജ് പണിക്കർ, പി.എ.സജിമോൻ, കെ.ബാബുക്കുട്ടി, കെ.കെ.അലക്സാണ്ടർ,ലീഡർഷിപ്പ് കൺവീനർ പി.ജോൺ,പി.ഒ. ജോൺ, കെ.എം.റെജി,സാനു ജോർജ്, എം.ഗീവർഗീസ്, ലീലാമ്മ ജോർജ്, കെ.ജോർജുകുട്ടി,കെ.ജോണി, കെ.കെ.തോമസ് ,കെ.അലക്സാണ്ടർ എന്നിവർ പ്രസംഗിച്ചു.

ADVERTISEMENT

തൊഴിലുറപ്പ് പദ്ധതിയിലെ പ്രതിസന്ധിക്ക്‌ പരിഹാരം ഉണ്ടാകണം: ഐഎൻടിയുസി

ചവറ : മഹാത്മാ ഗാന്ധി ഗ്രാമീണ തൊഴിലുറപ്പ് പദ്ധതിയിലെ തൊഴിൽ പ്രതിസന്ധിക്കു പരിഹാരം കാണണമെന്ന് ഐ എൻ ടി യുസി ജില്ലാ ജനറൽ സെക്രട്ടറി ആർ. ജയകുമാർ ആവശ്യപ്പെട്ടു. തേവലക്കര പഞ്ചായത്ത്‌ ഓഫീസ് ജംഗ്ഷനിൽ നിന്നും ഹെഡ് പോസ്റ്റ്‌ ഓഫീസിലേക്ക് നടന്ന മാർച്ചും ധർണയും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചെയ്തുകൊണ്ടിരുന്ന ജോലികളിൽ ഭൂരിപക്ഷവും കേന്ദ്ര നിബന്ധനകളെ തുടർന്ന് പുറത്തായതോടെ തൊഴിലുറപ്പ് പദ്ധതി കടുത്ത പ്രതിസന്ധിയെ നേരിടുകയാണെന്നും ആവർത്തന സ്വഭാവമുള്ള പദ്ധതികൾ നടപ്പാക്കരുതെന്നും തരിശു ഭൂമിയെ കൃഷി യോഗ്യമാക്കുന്നതിനു മുൻപ് സാക്ഷ്യപത്രം നൽകണമെന്നത് ഉൾപ്പെടെയുള്ള നിബന്ധനകൾ ആണ് പദ്ധതിയെ പ്രതിസന്ധിയിൽ ആക്കിയിരിക്കുന്നത്. ഭൂപ്രകൃതിക്കും കാലാവസ്ഥക്കും അനുയോജ്യമായ പദ്ധതിയിലൂടെ തൊഴിലാളികൾക്ക് തൊഴിൽ നൽകുന്നതിനുള്ള നടപടികൾ സ്വീകരിക്കാൻ സർക്കാർ തയാറാകണമെന്നും നേതാക്കൾ ആവശ്യപ്പെട്ടു. തൊഴിലുറപ്പ് തൊഴിലാളി കോൺഗ്രസ്‌ ജില്ലാ ജനറൽ സെക്രട്ടറി ജോസ് വിമൽരാജ് അധ്യക്ഷനായി .അനിൽ കുമാർ, ശിവൻകുട്ടി പിള്ള, സെബാസ്റ്റ്യൻ ആംബ്രോസ്,റിയാസ് ഖാൻ, ടൈറ്റസ് തെക്കുംഭാഗം, മോഹൻ കോയിപ്പുറം, ജോളി, ഷീബ , ഷൈനി ഗ്രേസി തുടങ്ങിയവർ പ്രസംഗിച്ചു.

തെരുവുനായ പ്രശ്‌ന പരിഹാരം : ബ്ലോക്ക് അടിസ്ഥാനത്തില്‍ പോര്‍ട്ടബിള്‍ എബിസി സെന്‍ററുകള്‍ വരുന്നു

കൊല്ലം: ജില്ലയിലെ തെരുവ്‌നായപ്രശ്‌നത്തിന് പരിഹാരമായി ജില്ലാ ആസൂത്രണസമിതിയുടെ നേതൃത്വത്തില്‍ കര്‍മപദ്ധതി. ജില്ലാ പഞ്ചായത്തിന്‍റെയും മുനിസിപ്പാലിറ്റികളുടേയും ബ്ലോക്ക്, പഞ്ചായത്തുകളുടെയും സംയുക്തനേതൃത്വത്തില്‍ പോര്‍ട്ടബിള്‍ എബിസി സെന്‍ററുകള്‍ സ്ഥാപിക്കുന്നതിന് ജില്ലാ ആസൂത്രണസമിതിയോഗത്തില്‍ തീരുമാനിച്ചു. ജില്ലാ പഞ്ചായത്ത് കുര്യോട്ട് മലയില്‍ നിര്‍മിച്ച്‌ വരുന്ന എബിസി സെന്‍റര്‍ കൂടാതെയാണ് പുതിയവ. ഓപറേഷന്‍ ടേബിള്‍, ഉപകരണങ്ങള്‍, ശീതീകരണസൗകര്യം, ജനറേറ്റര്‍, റഫ്രിജറേറ്റര്‍, ഫ്രഷ്‌വാട്ടര്‍ ടാങ്ക്, 100 നായ്ക്കളെ പാര്‍പ്പിക്കാന്‍ ഉതകുന്ന കെന്നലും മേല്‍ക്കൂരയും ഉള്‍പ്പെടുന്നതാണ് ഒരു കേന്ദ്രം. ചെലവ് 25,00,000 രൂപ. വാഹനങ്ങളില്‍ സജ്ജമാക്കി ഒഴിഞ്ഞ പ്രദേശത്ത് സ്ഥാപിച്ച് 100 നായ്ക്കളെവരെ ശസ്ത്രക്രിയാനന്തരം പാര്‍പ്പിക്കാനാകും. മാലിന്യപ്രശ്‌നം ഒഴിവാകുമെന്ന പ്രത്യേകതയുമുണ്ട്. ഈ വര്‍ഷംതന്നെ എല്ലാ തദ്ദേശ സ്വയംഭരണസ്ഥാപനങ്ങളും നടപ്പിലാക്കണമെന്ന് ഡിപിസി ചെയര്‍മാന്‍ അറിയിച്ചു.ജില്ലാ പഞ്ചായത്ത് പ്രസിഡന്‍റ് ഡോ.പി.കെ. ഗോപന്‍റെ അധ്യക്ഷതയില്‍ കൂടിയ യോഗത്തില്‍ 84 തദ്ദേശ സ്വയംഭരണ സ്ഥാപനങ്ങളുടെ വാര്‍ഷിക പദ്ധതി ഭേദഗതിക്ക് അംഗീകാരം നല്‍കി. മാലിന്യസംസ്‌കരണ സംവിധാനങ്ങളുടെയും അതിദാരിദ്ര്യനിര്‍മാര്‍ജന പ്രവര്‍ത്തനങ്ങളുടെയും ലക്ഷ്യപൂര്‍ത്തീകരണത്തിന് ആവശ്യമായ പ്രോജക്‌ടുകളും വിജ്ഞാനകേരളം കാമ്പയിന്‍ പ്രവര്‍ത്തനങ്ങള്‍ക്ക് പിന്തുണ നല്‍കുന്നതിനുള്ള പ്രോജക്‌ടുകളും വാര്‍ഷികപദ്ധതിയില്‍ ഏറ്റെടുത്തിട്ടുണ്ടെന്ന് പ്രസിഡന്‍റ് അറിയിച്ചു.

എംഡിഎംഎ കടത്തിയ കേസ്; പ്രതികൾക്ക് അഞ്ചുവർഷം തടവ്

ചവറ: എംഡിഎംഎ കടത്തിയ കേസിലെ രണ്ട് പ്രതികൾക്ക് കൊല്ലം അഡീഷണൽ ഡിസ്ട്രിക്‌ട് സെഷൻസ് കോടതി അഞ്ചുവർഷം തടവും അമ്പതിനായിരം രൂപ പിഴയും ശിക്ഷ വിധിച്ചു. ചവറ പന്മന ചോല ശങ്കരവിലാസം വീട്ടിൽ അജേഷ് കുമാർ, മൈനാഗപ്പള്ളി കടപ്പ പൂവച്ചേരിൽ പടിഞ്ഞാറ്റതിൽ ഷാജഹാൻ എന്നിവരെയാണ് ജഡ്ജി എസ്. ശ്രീരാജ് ശിക്ഷിച്ചത്. 2022 മേയ് 18നാണ് കേസിന് ആസ്പദമായ സംഭവം. അജേഷ് കുമാറും ഷാജഹാനും കോളജുകൾ കേന്ദ്രീകരിച്ച് വിൽപ്പന നടത്തുന്നതിനായി കൊണ്ടുവന്ന 3.55 ഗ്രാം എംഡിഎം എ കരുനാഗപ്പള്ളി റേഞ്ച് എക്സൈസ് ഇൻസ്പെക്ടറായിരുന്ന ജി.പ്രസന്നനും സംഘവും പിടികൂടി അറസ്റ്റ് ചെയ്തിരുന്നു. വിചാരണ നേരിടുകയായിരുന്ന ഇരുവരെയും കഴിഞ്ഞ ദിവസമാണ് കോടതി ശിക്ഷിച്ചത്. കരുനാഗപ്പള്ളി എക്സൈസ് സർക്കിൾ ഇൻസ്പെക്ടർ ആയിരുന്ന പി.ശിവപ്രസാദ് ആണ് കേസിന്‍റെ അന്വേഷണം പൂർത്തിയാക്കി കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ വി. വിനോദ് ഹാജരായി. അസിസ്റ്റന്‍റ് എക്സൈസ് ഇൻസ്പെക്‌ടർ ഇ. മുഹമ്മദ് കുഞ്ഞായിരുന്നു പ്രോസിക്യൂഷൻ സഹായി.ശിക്ഷാവിധിയെ തുടർന്ന് ഇരുവരെയും ജില്ലാ കോടതിയിലേക്ക് മാറ്റി.

തെന്മല പരപ്പാര്‍ ഡാം ഇന്ന് തുറക്കും; ജാഗ്രതപാലിക്കണമെന്ന് മുന്നറിയിപ്പ്

കൊല്ലം: തെന്മല പരപ്പാര്‍ ഡാമിന്‍റെ വൃഷ്ടിപ്രദേശങ്ങളില്‍ മഴതുടരുന്നതിനാല്‍ ജലനിരപ്പ് ഉയരാന്‍ സാധ്യതയുള്ളത് പരിഗണിച്ച് ഇന്ന് രാവിലെ 11 മുതല്‍ ഡാമിന്‍റെ രണ്ട് ഷട്ടറുകള്‍ പരമാവധി 80 സെന്‍റീമീറ്റര്‍ വരെ പടിപടിയായി ഉയര്‍ത്തി അധികജലം കല്ലടയാറ്റിലേക്ക് ഒഴുക്കി വിടുമെന്ന് ജില്ലാകളക്ടറുടെ ചുമതലയുള്ള എഡിഎം ജി. നിര്‍മല്‍ കുമാര്‍ അറിയിച്ചു. ജലനിരപ്പ് ഇപ്പോഴത്തെക്കാള്‍ പരമാവധി 70 സെന്‍റിമീറ്റര്‍ വരെ ഉയരാനാണ് സാധ്യതയുള്ളത്. നിലവിലെ ജലനിരപ്പ് 108.3 മീറ്ററാണ്. തീരപ്രദേശങ്ങളിലുള്ളവര്‍ ജാഗ്രത പാലിക്കണം. ജലനിരപ്പ് ക്രമീകരിക്കേണ്ടതിന്‍റെ ഭാഗമായാണ് നടപടിയെന്നും വ്യക്തമാക്കി.

വനിതാ കമ്മീഷന്‍ സിറ്റിംഗ്; 13 കേസുകള്‍ തീര്‍പ്പാക്കി

കൊല്ലം: സംസ്ഥാന വനിതാ കമ്മീഷന്‍ അംഗം അഡ്വ. ഇന്ദിര രവീന്ദ്രന്‍റെ അധ്യക്ഷതയില്‍ ജവഹര്‍ ബാലഭവനില്‍ നടത്തിയ സിറ്റിങ്ങില്‍ 13 കേസുകള്‍ തീര്‍പ്പാക്കി. 57 കേസുകളാണ് പരിഗണിച്ചത്. എട്ട് കേസുകള്‍ റിപ്പോര്‍ട്ടിനയച്ചു. 36 കേസുകള്‍ അടുത്ത സിറ്റിംഗിലേക്ക് മാറ്റി. കുടുംബ ബന്ധങ്ങളിലെ പ്രശ്നങ്ങള്‍, തൊഴിലിടങ്ങളിലെ തര്‍ക്കങ്ങള്‍, സാമ്പത്തിക ഇടപാട് തുടങ്ങിയ വിഷയങ്ങളിലുള്ള കേസുകളായിരുന്നു കൂടുതലും.ലഹരി ഉപയോഗിക്കുന്നവരെ ജീവിതത്തിലേക്ക് തിരിച്ചുകൊണ്ടുവരാന്‍ ഡി-അഡിക്ഷന്‍ കേന്ദ്രങ്ങളിലേക്ക് മാറ്റണം. സൈബര്‍ സാമ്പത്തികകുറ്റകൃത്യങ്ങളില്‍ നിന്നകറ്റാന്‍ സ്ത്രീകള്‍ക്കായി ബോധവത്ക്കരണ ക്ലാസുകളും സെമിനാറുകളും സംഘടിപ്പിക്കുമെന്ന് അറിയിച്ചു. അഭിഭാഷകരായ ജെ. സീനത്ത് ബീഗം, എസ്.ഹേമാ ശങ്കര്‍, പാനല്‍ കൗണ്‍സിലര്‍ സിസ്റ്റര്‍ സംഗീത, സിറ്റി സര്‍ക്കിള്‍ ഇന്‍സ്‌പെക്ടര്‍ ജോസ് കുര്യന്‍ തുടങ്ങിയവര്‍ പങ്കെടുത്തു.

ലയൺസ് ക്ലബ് ഭാരവാഹികളുടെ സ്ഥാനാരോഹണം

കൊല്ലം: ലയൺസ് ഇന്‍റർനാഷണൽ ഡിസ്ട്രിക്ട് 318 - എയുടെ ഭാരവാഹികളുടെ സ്ഥാനാരോഗണം നാളെ നടക്കും. കൊല്ലം സി. കേശവൻ മെമ്മോറിയൽ ഹാളിൽ ഉച്ചകഴിഞ്ഞ് മൂന്നിന് നടക്കുന്ന ചടങ്ങിൽ കെനിയ സ്വദേശിയും ലയൺസ് ഇന്‍റർനാഷണലിന്‍റെ രണ്ടാം വൈസ് പ്രസിഡന്‍റുമായ മനോജ് ഷാ മുഖ്യാതിഥിയായിരിക്കും. 2000-ൽ അധികം പ്രതിനിധികൾ സമ്മേളനത്തിൽ പങ്കെടുക്കും. 2025-26 വർഷത്തെ സാമൂഹിക സേവന പദ്ധതികളുടെ ഉദ്ഘാടനവും ചടങ്ങിൽ നടക്കും. പുത്തൂരിലെ ശാരീരിക വെല്ലുവിളികൾ ഉള്ള കുട്ടികൾ പഠിക്കുന്ന സ്കൂളിന് ചടങ്ങിൽ ക്ലബിന്‍റെ വക സ്കൂൾ വാൻ കൈമാറും. ഉദ്ഘാടന സമ്മേളനത്തിന് മുന്നോടിയായി ഉച്ചകഴിഞ്ഞ് രണ്ടിന് കൊല്ലം റെയിൽവേ ഗുഡ്സ് ഷെഡ് പരിസരത്ത് നിന്ന് സി.കേശവൻ മെമ്മോറിയൽ ടൗൺ ഹാളിലേക്ക് വർണശബളമായ ഘോഷയാത്ര നടക്കും. പ്രത്യേക ഡ്രസ് കോഡിലുള്ള 400 തെരഞ്ഞെടുക്കപ്പെട്ട പ്രതിനിധികൾ ഘോഷയാത്രയിൽ അണിനിരക്കും. പത്രസമ്മേളനത്തിൽ ലയൺസ് ക്ലബ് ഭാരവാഹികളായ വി. അനിൽ കുമാർ, ആർ. വി. ബിജു, സിക്സ്റ്റസ് ലൂയിസ്, ഷാജു തോമസ്, ജോസഫ് യൂജിൻ, കോശി ജോർജ് എന്നിവർ സംബന്ധിച്ചു.

ഷോട്ടോക്കാന്‍ കരാട്ടെ അക്കാദമി വാര്‍ഷികം

കൊല്ലം : ജെകെഎംഒ കൊല്ലം തിരുവനന്തപുരം വിഭാഗമായ ഷോട്ടോക്കാന്‍ കരാട്ടെ ആന്‍ഡ് സ്‌പോര്‍ട്‌സ് അക്കാദമിയുടെ പതിനെട്ടാം വാര്‍ഷികവും ബ്ലാക്ക് ബെല്‍റ്റ് ജേതാക്കളുടെ അവാര്‍ഡ് വിതരണവും മേയര്‍ ഹണി ബെഞ്ചമിന്‍ ഉദ്ഘാടനം ചെയ്തു. അക്കാദമി പ്രസിഡന്‍റ് ചാള്‍സ് മോഹന്‍ മെന്‍ഡസ് അധ്യക്ഷത വഹിച്ചു. ഏഷ്യന്‍ തലവന്‍ ഷിഹാന്‍ ഡോ. ഷാജി എസ്. കൊട്ടാരം, ഡോ. സുജിത് വിജയന്‍പിള്ള എംഎല്‍എ, അക്കാദമി ജനറല്‍ സെക്രട്ടറി വിക്രമന്‍ നായര്‍, ജെ കെഎം ഒ ബഹറിന്‍ തലവന്‍ അബ്ദുള്ള അഹമദ്,ഡെപ്യൂട്ടി മേയര്‍ എസ്.ജയന്‍, കരുതല്‍ ഡോജോ അഡ്മിനിസ്‌ട്രേറ്റര്‍ ജോര്‍ജ് എഫ് സേവ്യര്‍ വലിയവീട്, എസ്.ഷാജി, കെ. മോഹന്‍കുമാര്‍, വിജയി വി. നായര്‍, ചോയ്‌സ് മുരളി, സഗീഷ് ഗോവിന്ദന്‍ തുടങ്ങിയവര്‍ പ്രസംഗിച്ചു.

കടൽ മണൽ ഖനനത്തിനെതിരേ പ്രക്ഷോഭം ശക്തമാക്കുന്നു

കൊല്ലം: കടൽ മണൽ ഖനനത്തിന് എതിരേയുള്ള സമരം വീണ്ടും ശക്തമാക്കാൻ മത്സ്യത്തൊഴിലാളി കോൺഗ്രസ് തീരുമാനം. ദേശീയ തലത്തിൽ അടക്കം പ്രക്ഷോഭ പരിപാടികൾ സംഘടിപ്പിക്കാനാണ് സംഘടന തീരുമാനിച്ചിട്ടുള്ളത്. ഇതിന്‍റെ ഭാഗമായി നൂറുകണക്കിന് മത്സ്യതൊഴിലാളികൾ 28 ന് കൊല്ലം പോർട്ട് ഓഫീസ് ഉപരോധിക്കും. എഐസിസി വർക്കിംഗ് കമ്മിറ്റി അംഗം രമേശ് ചെന്നിത്തല ഉദ്ഘാടനം ചെയ്യും. കേന്ദ്ര സർക്കാരിന്‍റെ തീരുമാനപ്രകാരം കൊല്ലം പരപ്പിലാണ് ആദ്യം കടൽ മണൽ ഖനനം നടക്കുക. ഇക്കാരണത്താലാണ് കൊല്ലം കേന്ദ്രീകരിച്ച് പ്രക്ഷോഭ പരിപാടികൾ ആരംഭിക്കുന്നതെന്ന് കെപിസിസി രാഷ്്‌ട്രീയ കാര്യ സമിതി അംഗവും മുൻ എംപിയുമായ ടി.എൻ. പ്രതാപൻ പത്ര സമ്മേളനത്തിൽ വ്യക്തമാക്കി. കേന്ദ്ര സർക്കാർ ടെണ്ടർ രേഖകൾ ഇതിനകം നൽകി കഴിഞ്ഞു. മത്സ്യത്തൊഴിലാളി സമൂഹത്തിന്‍റെ പ്രതിഷേധം തിരിച്ചറിഞ്ഞ് ഖനനത്തിന്‍റെ ടെണ്ടർ നടപടികളിൽ നിന്ന് ഇന്ത്യയിലെ പല കോർപറേറ്റ് കമ്പനികളും മാറി നിന്നപ്പോൾ വിദേശ കോർപറേറ്റ് കമ്പനികളെകേന്ദ്ര സർക്കാർ ക്ഷണിച്ച് കൊണ്ടുവരികയാണെന്ന് അദ്ദേഹം ആരോപിച്ചു.കേന്ദ്ര സർക്കാരിന്‍റെ അറിയിപ്പ് പ്രകാരം നിരക്കുകളും വ്യവസ്ഥകളും അറിയിച്ച് ടെണ്ടർ രേഖകൾ നൽകേണ്ട തീയതി നിശ്ചയിച്ചിരിക്കുന്നത് ഈ മാസം 28നാണ്. യോഗ്യതയുള്ളവരെ ഓഗസ്റ്റ് 21 നും സെപ്റ്റംബർ രണ്ടിനും മധ്യേ തെരത്തെടുക്കും. തെരഞ്ഞെടുക്കപ്പെടുന്ന കമ്പനിയെ സെപ്റ്റംബർ എട്ടിന് പ്രഖ്യാപിക്കുമെന്നാണ് കേന്ദ്ര സർക്കാർ വ്യക്തമാക്കിയിട്ടുള്ളത്.കടൽ മണൽ ഖനനവും ആഴക്കടൽ മത്സ്യബന്ധനവും കോർപറേറ്റ് കമ്പനികളെ ഏൽപ്പിക്കുന്നതോടെ മത്സ്യത്തൊഴിലാളികളുടെ മരണമണി മുഴങ്ങും. ബ്ലൂ ഇക്കണോമിയുടെ പേരിൽ കടലിനെ കൊള്ളയടിച്ച് പ്രധാനമന്ത്രി അദ്ദേഹത്തിന്‍റെ ചങ്ങാത്ത മുതലാളിമാരെ സംരക്ഷിക്കുകയാണെന്ന് പ്രതാപൻ ആരോപിച്ചു.കേരളത്തിലെ പരമ്പരാഗത മത്സ്യ തൊഴിലാളി സമൂഹം ഒറ്റക്കെട്ടായി നിന്ന് ഇതിനെ എന്തു വിലകൊടുത്തും ചെറുത്ത് തോൽപ്പിക്കും. കടൽ മണൽ വിഷയത്തിൽ സംസ്ഥാനത്ത് മുഖ്യമന്ത്രി അടക്കം ബോധപൂർവമായ മൗനം പാലിക്കുകയാണ്. ഈ വിഷയത്തിൽ സർവകക്ഷി സംഘം മുഖ്യമന്ത്രിയുടെ നേതൃത്വത്തിൽ ഡൽഹിയിൽ പോയി പ്രധാനമന്ത്രിയെ പ്രതിഷേധവും ആശങ്കകളും അറിയിക്കണമെന്നും പ്രതാപൻ ആവശ്യപ്പെട്ടു. മത്സ്യത്തൊഴിലാളി കോൺഗ്രസ് സംസ്ഥാന പ്രസിഡന്‍റ് ജി. ലീലാകൃഷ്ണൻ, ജില്ലാ പ്രസിഡന്‍റ് യേശുദാസൻ എന്നിവരും പത്രസമ്മേളനത്തിൽ സംബന്ധിച്ചു. മത്സ്യത്തൊഴിലാളികളെ അവഗണിച്ചാൽ നേരിടും: ബിഷപ് കൊല്ലം: കേരളത്തിലെ മത്സ്യത്തൊഴിലാളികളെ അവഗണിച്ചാൽ കടുത്ത പ്രതിഷേധം നേരിടേണ്ടിവരുമെന്ന് ബിഷപ് ഡോ. പോൾ ആന്‍റണി മുല്ലശേരി. കടൽ മണൽ ഖനനത്തിനെതിരേ മത്സ്യത്തൊഴിലാളി കോൺഗ്രസ് സംസ്ഥാന വ്യാപകമായി സംഘടിപ്പിക്കുന്ന പ്രതിഷേധത്തിന്‍റെ ഭാഗമായി മുൻ അഖിലേന്ത്യപ്രസിഡന്‍റും മുൻഎംപിയുമായ ടി.എൻ. പ്രതാപൻ കൊല്ലം ബിഷപ് ഹൗസിലെത്തി ഡോ. പോൾ ആന്‍റണി മുല്ലശേരിയുമായി നടത്തിയ ചർച്ചയിൽ സംസാരിക്കുകയായിരുന്നു ബിഷപ്. മത്സ്യത്തൊഴിലാളികളുടെ വിഷയം രാഷ്്‌ട്രീയ മത ഭേദമന്യേ ഭരണ കേന്ദ്രങ്ങളിൽ ഉയർത്തണമെന്നും ബിഷപ് ചർച്ചയിൽ പറഞ്ഞു. സംസ്ഥാന പ്രസിഡന്‍റ് ജി. ലീല കൃഷണൻ, ജില്ലാ പ്രസിഡന്‍റ് എ.എഫ്. യേശുദാസൻ തുടങ്ങിയ നേതാക്കളും സംബന്ധിച്ചു.

വന്ദനദാസ് കൊലക്കേസ്: വിചാരണ 28ലേക്ക് മാറ്റി

കൊല്ലം: ഡോ. വന്ദനദാസ് കൊലപാതക കേസിന്‍റെ വിചാരണ നടപടികള്‍ക്കായി കേസ് 28 ലേക്ക് മാറ്റി. പ്രതിഭാഗം അഭിഭാഷകനായി പ്രതാപ് ചന്ദ്രൻപിള്ള ഹാജരാകും.പ്രതിഭാഗത്തിനായി എത്തിയ അഭിഭാഷകന്‍ കേസില്‍ നിന്ന് പിന്മാറിയതിനെ തുടര്‍ന്ന് കൊല്ലം സെഷന്‍സ് കോടതി വിചാരണ നടപടികള്‍ നിര്‍ത്തിവച്ചിരുന്നു. നേരത്തെ കേസില്‍ പ്രതി ഭാഗത്തിനായി ഹാജരായിരുന്ന ബി.എ .ആളൂര്‍, പി.ജി. മനു എന്നിവര്‍ മരണപ്പെട്ടിരുന്നു. തുടര്‍ന്ന് വിചാരണയും തടസപ്പെട്ടു. ഇതിന്‍റെ മറവില്‍ വിചാരണ നീട്ടി വയ്ക്കാന്‍ പ്രതി ശ്രമം നടത്തുന്നതായി ആരോഗ്യ വകുപ്പിലെ ഡോ. കെ. പ്രതിഭ പ്രോസിക്യൂഷന്‍ ഡയറക്ടര്‍ ജനറലിനും സംസ്ഥാന പോലിസ് മേധാവിക്കും പരാതി നല്‍കി. തുടര്‍ന്ന് ജോണ്‍ എസ്. റാല്‍ഫ് പ്രതിഭാഗത്തിനായി ഹാജരാകുകയും വിചാരണ തുടരുകയും ചെയ്തിരുന്നു. എന്നാല്‍ തുടർന്നുള്ള വിചാരണയിൽ നിന്ന് ജോണ്‍ എസ്. റാല്‍ഫ് പിന്‍മാറിയതോടെ കോടതി സ്റ്റോപ്പ് മെമ്മോ പുറപ്പെടുവിച്ച് നിര്‍ത്തിവെക്കുകയും ചെയ്തിരുന്നു.

കഞ്ചാവുമായി ഒരാൾ പിടിയിൽ

കൊല്ലം: കൊല്ലം റെയിൽവേ സ്റ്റേഷൻ പരിസരത്തു നടത്തിയ പരിശോധനയിൽ ഒന്നേകാൽ കിലോ കഞ്ചാവുമായി ഒരാൾ അറസ്റ്റിൽ. തിരുവനന്തപുരം മണക്കാട് കൊച്ചു മുടമ്പിൽ വീട്ടിൽ രവികുമാറാണ് പിടിയിലായത്. എക്സൈസ് എൻഫോഴ്സ്മെന്‍റ് ആൻഡ് ആന്‍റി നർക്കോട്ടിക് സ്പെഷൽ സ്ക്വാഡിലെ സർക്കിൾ ഇൻസ്പെക്ടർ എസ്. ഷിജുവിന്‍റെ നേതൃത്വത്തിൽ നടത്തിയ പരിശോധനയിൽ ഇയാളിൽ നിന്ന് 1.274 കിലോഗ്രാം കഞ്ചാവ് പിടിച്ചെടുത്തത്. സൈബർ സെല്ലിന്‍റെ സഹായത്തോടെ ആണ് പ്രതിയെ പിടികൂടിയത്. ആന്ധ്രാ പ്രദേശിൽ നിന്നുമാണ് ഇയാൾ കഞ്ചാവ് കടത്തിക്കൊണ്ട് വന്നത്. പരിശോധനയിൽ എക്സൈസ് ഇൻസ്പെക്ടർ സി.പി.ദിലീപ് , അസി എക്സൈസ് ഇൻസ്‌പെക്ടർ നിർമലൻ തമ്പി, പ്രിവന്‍റീവ് ഓഫീസർ പ്രസാദ് കുമാർ, സിവിൽ എക്സൈസ് ഓഫീസർമാരായ എം.ആർ. അനീഷ്, ബി.എസ്.അജിത്ത്, ബാലു എസ്. സുന്ദർ, ജൂലിയൻ ക്രൂസ്, സൂരജ്,തൻസീർ, അഭിരാം, ജോജോ വനിത സിവിൽ എക്സൈസ് ഓഫീസർ നിജി, ഡ്രൈവർ സുഭാഷ് എന്നിവർ പങ്കെടുത്തു.

മലയോര ഹൈവേയിൽ മരം കടപുഴകി വീണ് ഗതാഗതം തടസപ്പെട്ടു

കുളത്തൂപ്പുഴ. മലയോര ഹൈവേയിൽ അഞ്ചൽ കുളത്തൂപ്പുഴ പാതയിൽ പതിനൊന്നാം മൈലിന് സമീപം ശക്തമായ കാറ്റിലും മഴയിലും മരം കടപുഴകി വീണു മലയോര ഹൈവേയിലെ ഗതാഗതം പൂർണമായി തടസപ്പെട്ടു. മരം വീഴുന്ന സമയത്ത് റോഡിൽ വാഹനമില്ലാതിരുന്നതിനാൽ വൻ അപകടം ഒഴിവായി. കടയ്ക്കൽ നിന്നും ഫയർഫോഴ്സ് സംഘം എത്തിയെങ്കിലും നാട്ടുകാരുടെയും പഞ്ചായത്ത് മെമ്പർമാരുടെയും എതിർപ്പിനെ തുടർന്ന് ഇലക്‌ട്രിക് പോസ്റ്റ് തകർത്ത് റോഡിലേക്ക് വീണ മരം മുറിച്ചു മാറ്റുവാൻ നാട്ടുകാർ അനുവദിച്ചില്ല. പിഡബ്ല്യഡി ഉദ്യോഗസ്ഥർ സംഭവ സലത്ത് എത്താതെ മരം മുറിച്ചു മാറ്റുവാൻ ഫയർഫോഴ്സിനെ നാട്ടുകാരും ജനപ്രതിനിധികളും അനുവദിച്ചില്ല. കിഴക്കൻ മേഖലയിൽ മലയോര ഹൈവേയുടെയും അന്തർസംസ്ഥാന പാതയുടെ വശങ്ങളിലും അപകടകരമായ അനേക വൃക്ഷങ്ങളാണ് നിൽക്കുന്നത്. മുറിച്ചുമാറ്റണമെന്നാവശ്യപ്പെട്ട് പലപ്രാവശ്യവും അധികാരികൾക്ക് പരാതി നൽകിയിട്ടും ഇതിനൊരു തീരുമാനം ആയില്ല. നാട്ടുകാരുടെയും ജനപ്രതിനിധികളുടെയും പ്രതിഷേധത്തെ തുടർന്ന് മണിക്കൂറോളം ഗതാഗതം തടസപ്പെട്ടു. കുളത്തൂപ്പുഴ പോലീസ് സംഭവസ്ഥലത്ത് എത്തുകയും സബ് ഇൻസ്പെക്ടർ ഷാജഹാന്‍റെ നേതൃത്വത്തിൽ നാട്ടുകാരും ജനപ്രതിനിധികളുമായും നടത്തിയ ചർച്ചയിൽ മരത്തിന്‍റെ പകുതിഭാഗം മുറിച്ചുമാറ്റി വാഹനങ്ങൾ കടത്തിവിടുവാൻ തീരുമാനമായി. കഴിഞ്ഞ ഒരാഴ്ചയ്ക്ക് മുൻപാണ് തിരുവനന്തപുരം തെങ്കാശി അന്തർ സംസ്ഥാനപാതയിൽ നെടുവന്നൂർ കടവ് ചെക്ക് പോസ്റ്റിന് സമീപം ആർപിഎല്ലിന്‍റെ സ്കൂൾ ബസിന് മുകളിലേക്ക് മരം വീണത്. ബസിൽ ഉണ്ടായിരുന്ന വിദ്യാർഥികൾ അത്ഭുതകരമായി രക്ഷപ്പെടുകയായിരുന്നു. ഇതുപോലെ വൻ അപകടങ്ങൾ ഇനി ഉണ്ടാകാൻ പാടില്ലെന്നാണ് ജനപ്രതിനിധികളായ ജോസഫ്, സുഭിലാഷ് കുമാർ, സന്തോഷ് കുമാർ തുടങ്ങിയവർ പറയുന്നത്.

ഏരൂരില്‍ വീട് ഇടിഞ്ഞു വീണ് ഗൃഹനാഥനും മകനും പരിക്ക്

അഞ്ചല്‍ : കനത്ത മഴയിൽ ഏരൂരില്‍ വീട് ഇടിഞ്ഞു വീണു. വിളക്കുപാറ ഇടക്കൊച്ചി സജീവ് വിലാസത്തില്‍ സജീവ് - ചന്ദ്രലേഖ ദമ്പതികളുടെ വീടാണ് കനത്ത മഴയില്‍ കഴിഞ്ഞ ദിവസം രാത്രി നിലംപൊത്തിയത്. ഈ സമയം വീടിനുള്ളില്‍ ഉണ്ടായിരുന്ന സജീവിനും മകന്‍ അമല്‍ സാജിനും ഓടും മേല്‍ക്കൂരയും വീണു പരിക്കേറ്റു. തലയ്ക്കും കൈയ്ക്കും പരിക്കേറ്റ സജീവിനെ പുനലൂര്‍ താലൂക്ക് ആശുപത്രിയില്‍ എത്തിച്ച് ചികിത്സ നല്‍കി. വീട് തകരുന്നത് ശ്രദ്ധയില്‍പ്പെട്ടയുടന്‍ വീട്ടിലുണ്ടായിരുന്ന സജീവിന്‍റെ അമ്മ 86 കാരി രാജമ്മയെ വേഗത്തില്‍ തൊട്ടടുത്ത ബന്ധുവീട്ടിലേക്ക് മാറ്റി. ഇതിനാല്‍ വലിയ ദുരന്തം ഒഴിവായി. വീട്ടിനുള്ളില്‍ ഉണ്ടായിരുന്ന കട്ടിലുകള്‍, അലമാര, കസേരകള്‍ ഉള്‍പ്പെടെയുള്ള വീട്ടുപകരണങ്ങള്‍ പൂര്‍ണമായും തകര്‍ന്നു. അപകടവസ്ഥയിലായ കെട്ടിടത്തില്‍ നിന്നും പ്രദേശത്തെ ഡിവൈഎഫ്ഐ പ്രവര്‍ത്തകര്‍ എത്തിയാണ് രേഖകളും അത്യാവശ്യ സാധനങ്ങളും വീണ്ടെടുത്ത് നല്‍കിയത്. ഹൃദ്രോഗിയായ സജീവ് ചികിത്സയിലാണ്. ഇതിനിടയില്‍ വല്ലപ്പോഴും ലഭിക്കുന്ന കൂലിവേലയും ഭാര്യ തൊഴിലുറപ്പ് ജോലി ചെയ്തു ലഭിക്കുന്ന വരുമാനത്തിലുമാണ് കുടുംബം കഴിഞ്ഞുവന്നിരുന്നത്. പഞ്ചായത്ത് സ്ഥിരം സമിതി അധ്യക്ഷന്‍ ഷൈന്‍ ബാബു, വാര്‍ഡ് അംഗം അഞ്ജു എന്നിവര്‍ സ്ഥലത്തെത്തി. വില്ലേജ് ഓഫീസര്‍ ഉള്‍പ്പടെയുള്ള റവന്യൂ സംഘത്തെ വിവരം അറിയിച്ചതായും അവർ എത്തി ആവശ്യമായ നടപടികള്‍ സ്വീകരിക്കുമെന്നും ഷൈന്‍ ബാബു പറഞ്ഞു. തല്‍ക്കാലം ബന്ധുവീട്ടില്‍ അഭയം തേടിയിരിക്കുകയാണ് സജീവും കുടുംബവും.

വിപഞ്ചികയുടെ വീട് വനിതാ കമ്മീഷൻ സന്ദർശിച്ചു

കൊല്ലം: ഭർത്താവിന്‍റെ പീഡനത്തെ തുടർന്ന് ഷാർജയിൽ ആത്മഹത്യ ചെയ്ത കൊല്ലം സ്വദേശിനി വിപഞ്ചികയുടെ വീട് കേരള വനിതാ കമ്മീഷൻ അംഗം അഡ്വ. ഇന്ദിര രവീന്ദ്രൻ സന്ദർശിച്ചു. കുടുംബാംഗങ്ങളെ നേരിൽ കണ്ടു ആശ്വസിപ്പിച്ച കമ്മീഷൻ അംഗം വിഷയത്തിൽ സ്വമേധയാ കേസെടുത്തിട്ടുണ്ടെന്നും അന്വേഷണം പുരോഗമിക്കുകയാണെന്നും അറിയിച്ചു. സംഭവത്തിൽ തുടർന്നുള്ള നിയമനടപടികൾക്കായി ആവശ്യമായ എല്ലാ സഹായങ്ങളും വനിതാ കമ്മീഷൻ നൽകുമെന്ന് ഉറപ്പ് നല്‍കി. കേരള മഹിളാ സംഘം ജില്ലാ പ്രസിഡന്‍റ് കെ. ജഗദമ്മ ടീച്ചർ, പെരിനാട് പഞ്ചായത്ത് പ്രസിഡന്‍റ് ദിവ്യ ജയകുമാർ, വൈസ് പ്രസിഡന്‍റ് അനിൽ കുമാർ, മുഖത്തല ബ്ലോക്ക് പഞ്ചായത്ത് അംഗം അഡ്വ. ഫാറൂഖ് നിസാർ, ഗ്രാമ പഞ്ചായത്ത് അംഗ സരിത, രാജൻ ലാൽ, പുഷ്പൻ എന്നിവർ ഒപ്പമുണ്ടായിരുന്നു.

കഞ്ചാവ് കടത്തിയ കേസ്: പ്രതികൾക്ക് തടവും പിഴയും

കൊല്ലം : 33 കിലോഗ്രാം കഞ്ചാവ് കടത്തിയ കേസിലെ രണ്ട് പ്രതികൾക്ക് കൊല്ലം അഡിഷണൽ ഡിസ്ട്രിക്‌ട് സെഷൻസ് നാല് കോടതി 10 വർഷം വീതം കഠിന തടവും ഒരു ലക്ഷം രൂപ വീതം പിഴയും ശിക്ഷ വിധിച്ചു. പിഴ ഒടുക്കിയില്ലെങ്കിൽ ഒരു വർഷം കൂടി അധികം തടവു ശിക്ഷ അനുഭവിക്കണം. കൊല്ലം ഉളിയക്കോവിൽ ദേശത്ത് ശ്രീ ഭദ്ര നഗർ 198-ൽ കണ്ണമത്ത് തെക്കതിൽ വീട്ടിൽ നവാസ്( 59), കൊല്ലം ഈസ്റ്റ് ആണ്ടാമുക്ക് ആറ്റുകാൽ പുരയിടത്തിൽ സുധീർ(55) എന്നിവരെയാണ് ജില്ല ഫോർത്ത് അഡീഷണൽ സെഷൻസ് ജഡ്ജി സി.എം.സീമ ശിക്ഷിച്ചത്. 2022 ഫെബ്രുവരി രണ്ടിനാണ് കേസിന് ആസ്പദമായ സംഭവം. പ്രതികളായ നവാസും സുധീറും ചേർന്ന് ആന്ധ്രപ്രദേശിൽ നിന്നും 15 കഞ്ചാവ് പാക്കറ്റുകൾ രണ്ട് ചാക്കുകളിലാക്കി ജില്ലയുടെ വിവിധ ഭാഗങ്ങളിൽ വിതരണം നടത്തുന്നതിനായി ഉളിയക്കോവിൽ ജംഗ്ഷനു സമീപമുള്ള നവാസിന്‍റെ വീട്ടിൽ എത്തിച്ചിട്ടുണ്ടെന്ന വിവരത്തിന്‍റെ അടിസ്ഥാനത്തിൽ കൊല്ലം എക്സൈസ് റേഞ്ച് ഇൻസ്പെക്ടറായിരുന്ന ടി. രാജുവും പാർട്ടിയും ചേർന്ന് പ്രതികളെ പിടികൂടുകയായിരുന്നു. കൊല്ലം അസി. എക്സൈസ് കമ്മീഷണർ ആയിരുന്ന റോബർട്ടാണ് കേസിന്‍റെ അന്വേഷണം പൂർത്തിയാക്കി കോടതി മുമ്പാകെ കുറ്റപത്രം സമർപ്പിച്ചത്. 19 സാക്ഷികളെ വിസ്തരിച്ച കേസിൽ പബ്ലിക് പ്രോസിക്യൂട്ടർ നിയാസാണ് പ്രോസിക്യൂഷനു വേണ്ടി ഹാജരായത്.

അരിപ്പ ഭൂസമര ഭൂമിയിലെ കുടില്‍ കത്തി നശിച്ചു

കുളത്തൂപ്പുഴ: ആദിവാസി ദലിത് മുന്നേറ്റ സമിതിയുടെ നേതൃത്വത്തിൽ നടന്നു വരുന്ന അരിപ്പ ഭൂസമര ഭൂമിയിലെ കുടില്‍ കത്തി നശിച്ചു. സമര ഭൂമിയിലെ നാലാം കൗണ്ടറിനു സമീപം ആറ്റിങ്ങല്‍ സ്വദേശി രാജു താമസിച്ചു വന്നിരുന്ന കുടിലാണ് കഴിഞ്ഞ ദിവസം കത്തിയമര്‍ന്നത്. പ്ലാസ്റ്റിക് ഷീറ്റു കൊണ്ടു മറച്ചു കെട്ടിയ കുടിലിലെ അടുപ്പില്‍ നിന്നും തീ പ്ലാസ്റ്റിക്കിലേക്ക് പടര്‍ന്നതാവാം അപകടകാരണമെന്ന് കരുതുന്നു. സംഭവ സമയം രാജു സാധനങ്ങള്‍ വാങ്ങുന്നതിനായി പുറത്തു പോയിരിക്കുകയായിരുന്നു. മടങ്ങിയെത്തുമ്പോഴേക്കും കുടിലും വസ്ത്രങ്ങളും വീട്ടുപകരണങ്ങളുമെല്ലാം ചാമ്പലായി മാറിയിരുന്നു.

കാര്‍ഷിക മേഖലയില്‍ വളര്‍ച്ച കൈവരിക്കാന്‍ കഴിഞ്ഞു: മന്ത്രി പി. പ്രസാദ്

കൊല്ലം: കാര്‍ഷികമേഖലയില്‍ സംസ്ഥാനത്തിന് 4.65ശതമാനം വളര്‍ച്ച കൈവരിക്കാന്‍ കഴിഞ്ഞതായി മന്ത്രി പി .പ്രസാദ്. മറ്റ് സംസ്ഥാനങ്ങളില്‍ ഒരു ശതമാനം മാത്രമാണ് വളര്‍ച്ച കൈവരിക്കാന്‍ കഴിഞ്ഞത്. സിപിഐ ജില്ലാ സമ്മേളനത്തോടനുബന്ധിച്ച് കിസാൻ സഭ ജില്ലാ കമ്മിറ്റിയുടെ ആഭിമുഖ്യത്തിൽ സംഘടിപ്പിച്ചിട്ടുള്ള കാർഷിക പ്രദർശന വിപണന മേള കടപ്പാക്കട സ്പോര്‍ട്സ് ക്ലബ് മൈതാനിയില്‍ ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. മൂല്യവര്‍ധിത ഉത്പന്നങ്ങളുടെ ഉത്പാദനവും വിപണനവും ലക്ഷ്യമിട്ട് ഇരുപതിനായിരം കൃഷിക്കൂട്ടങ്ങളെ സംഘടിപ്പിക്കാന്‍ കഴിഞ്ഞു. ആയിരം മൂല്യവര്‍ധിത ഉല്പന്നങ്ങളാണ് ലക്ഷ്യമിട്ടതെങ്കിലും നാലായിരം ഉത്പന്നങ്ങള്‍ വിപണിയില്‍ ഇറക്കാന്‍ കഴിഞ്ഞതായും മന്ത്രി പറഞ്ഞു. യോഗത്തിൽ കിസാൻ സഭ ജില്ലാ പ്രസിഡന്‍റ് കെ.ആർ. മോഹനൻ പിള്ള അധ്യക്ഷത വഹിച്ചു. സിപിഐ ജില്ലാ സെക്രട്ടറി പി.എസ്. സുപാൽ എംഎൽഎ, അസിസ്റ്റന്‍റ് സെക്രട്ടറി സാം കെ ഡാനിയേൽ, മേയർ ഹണി ബെഞ്ചമിൻ, സിപിഐ സംസ്ഥാന കൗൺസിൽ അംഗങ്ങളായ അഡ്വ. ജി. ലാലു, അഡ്വ. ആർ. വിജയകുമാർ, എഐഎസ്എഫ് സംസ്ഥാന സെക്രട്ടറി എ. അധിൻ, ജില്ലാ പ്രിൻസിപ്പൽ കൃഷി ഓഫീസർ എം.എസ്. അനീസ, ഡോ.ഷൈൻ കുമാർ, സജികുമാർ ,റോഷൻ ജോർജ്, തുടങ്ങിയവർ പങ്കെടുത്തു. ഫാം ഇന്‍ഫര്‍മേഷന്‍ ബ്യൂറോ, ഹോര്‍ട്ടികള്‍ച്ചര്‍ മിഷന്‍, ലൈവ്സ്റ്റോക് ഡെവലപ്മെന്‍റ് ബോര്‍ഡ്, സംസ്ഥാന പൗള്‍ട്രി വികസനകോര്‍പറേഷന്‍, പ്ലാന്‍റേഷന്‍ കോര്‍പറേഷന്‍, കേരള അഗ്രോ ഇന്‍ഡസ്ട്രീസ്, ഹോര്‍ട്ടികോര്‍പ്സ്, ഓയില്‍പാം, വിഎഫ്‌സികെ, കൃഷി വിജ്ഞാനകേന്ദ്രം, വനിതാ കര്‍ഷക സമിതി, കുരിയോട്ടുമല ഡയറി ഫാം തുടങ്ങി സര്‍ക്കാര്‍ ഏജന്‍സികളുടെയും സ്വകാര്യ ഏജന്‍സികളുടെയും സ്റ്റാളുകള്‍ പ്രദര്‍ശന വേദിയിലുണ്ട്. പ്രദര്‍ശന വിപണന മേള നാളെ സമാപിക്കും.

1 കോടിയുടെ നിരോധിത പുകയില ഉത്പന്നങ്ങൾ പിടികൂടി

കൊട്ടിയം: കുപ്പിവെള്ള വില്പനയുടെ മറവിൽ കോടികൾ വില വരുന്ന നിരോധിത പുകയില ഉത്പന്നങ്ങൾ ലോറിയിൽ കടത്തുകയായിരുന്ന രണ്ടംഗ സംഘം പോലീസിന്‍റെ പിടിയിലായി. മംഗലാപുരം സ്വദേശി സവാദ് (38), മലപ്പുറം സ്വദേശി അമീർ (38) എന്നിവരാണ് പിടിയിലായത്. സംസ്ഥാനം മുഴുവൻ നിരോധിത പുകയില ഉത്പന്നങ്ങൾ എത്തിക്കുന്ന വലിയ സംഘത്തിലെ കണ്ണികളാണ് പിടിയിലായത്.കൊല്ലത്തുനിന്ന് എത്തിയ ഡാൻസാഫ് ടീമുംകൊട്ടിയം പോലീസും ചേർന്ന് നടത്തിയ പരിശോധനയിലാണ് കോടികൾ വിലവരുന്ന നിരോധിത പുകയില ഉത്പന്നങ്ങൾ പിടികൂടാനായത്. കർണാടകത്തിൽ നിന്നും തിരുവനന്തപുരം ഭാഗത്തേക്ക് കൊണ്ടുപോകുകയായിരുന്നു നിരോധിത പുകയില ഉത്പന്നങ്ങൾ. വിവിധ ബ്രാൻഡുകളിലുള്ള 225 ചാക്ക് പുകയില ഉത്പന്നങ്ങളാണ് ലോറിയിൽ ഉണ്ടായിരുന്നത്. മുകളിൽ കുപ്പിവെള്ളം അടുക്കി വച്ച ശേഷം അതിനടിയിലായാണ് പാൻമസാല ചാക്കുകൾ അടുക്കി വെച്ചിരുന്നത്. സംസ്ഥാനത്തുടനീളം പാൻമസാല വിതരണം നടത്തുന്ന അന്തർ സംസ്ഥാന സംഘത്തിൽപ്പെട്ടവരാണ് പിടിയിലായിട്ടുള്ളത്. ഇവരെ പൊലീസ് വിശദമായി ചോദ്യം ചെയ്തു വരികയാണ്. പിടികൂടിയ പുകയില ഉത്പന്നങ്ങളിൽ രേഖപ്പെടുത്തിയിരിക്കുന്ന വിലയനുസരിച്ച് ഒരു കോടിയിലധികംരൂപ വരുമെങ്കിലും ഇത് വിൽപ്പന നടത്തുന്നത് അഞ്ചിരട്ടിയോളം അധിക വിലയ്ക്കാണ്. പാൻ മസാല നിരോധനം നിലവിലില്ലാത്ത സ്ഥലങ്ങളിൽ നിന്നും തുഛമായ വിലയ്ക്ക് വാങ്ങുന്ന സാധനമാണ് ഇവർ കേരളത്തിലെത്തിച്ച് വലിയ വിലയ്ക്ക് വിൽക്കുന്നത്. സവാള, പച്ചക്കറികൾ എന്നിവ കയറ്റിയ ലോറികളിലും പാൻമസാലകടത്തുന്നുണ്ട്. പല ദിവസങ്ങളിലും പല സ്ഥലത്താണ് പിടിയിലായ സംഘം പാൻമസാല ഇറക്കുന്നത്. സ്കൂൾ പരിസരങ്ങൾ കേന്ദ്രീകരിച്ച് പാൻ മസാല വില്പന നടത്തുന്ന സംഘങ്ങൾക്ക് നൽകുന്നതിനായി കൊണ്ടുവന്ന പാൻമസാലയാണ് പിടികൂടിയത്. മറ്റ് സാധനങ്ങൾ കൊണ്ടുവരുന്നെന്ന വ്യാജേനയാണ് ഇവർ ലോറിയിൽ പാൻ മസാല കടത്തിയിരുന്നത്. അന്യ സംസ്ഥാനങ്ങളിൽ നിന്നും ലോറിയിൽ പാൻ മസാല കടത്തുന്നതിനെക്കുറിച്ച് കൊല്ലം സിറ്റി പോലീസ് കമ്മീഷണർ കിരൺ നാരായണന് ലഭിച്ച വിവരത്തിന്‍റെ അടിസ്ഥാനത്തിൽ ചാത്തന്നൂർ എസിപി അലക്സാണ്ടർ തങ്കച്ചന്‍റെ നേതൃത്വത്തിൽ കൊട്ടിയം ഇൻസ്പെക്ടർ പി. പ്രദീപ്, ചാത്തന്നൂർ ഇൻസ്പെക്ടർ അനൂപ്, എസ് ഐ നിതിൻ നളൻ ,ഡാൻസാഫ് ടീമംഗങ്ങൾ എന്നിവർ ചേർന്നാണ് പിടി കൂടിയത് .

ദു:ഖാചരണ ദിനത്തിൽ യോഗം; ബഹിഷ്കരിച്ച് കെഎസ്ടിഎ

ചാത്തന്നൂർ: സർക്കാരിന്‍റെ ദുഃഖാചരണത്തെ മറികടന്നു ചാത്തന്നൂർ ഉപജില്ലയിൽ എഇഒയുടെ പ്രഥമാധ്യാപക യോഗം നടത്തി. മുൻ മുഖ്യമന്ത്രി വി. എസ്. അച്യുതാനന്ദന്‍റെ നിര്യാണത്തിൽ ആദരവ് പ്രകടിപ്പിച്ചു സംസ്ഥാനമൊട്ടാകെ മൂന്നുദിവസത്തെ ദുഖാചരണം സർക്കാർ പ്രഖ്യാപിച്ചിരുന്നു. സംസ്ഥാനത്ത് നടത്താൻ നിശ്ചയിച്ചിരുന്ന മുഴുവൻ പരിപാടികളും ഔദ്യോഗിക യോഗങ്ങളും മാറ്റിവച്ചു. ഈ സാഹചര്യത്തിലാണ് ചാത്തന്നൂർ ഉപജില്ല വിദ്യാഭ്യാസ ഓഫീസർ ബുധനാഴ്ച ഉപജില്ലയിലെ സ്കൂളുകളിലെ പ്രഥമാധ്യാപകരുടെ യോഗം വിളിച്ചു ചേർത്തത്. സർക്കാരിനെ വെല്ലുവിളിച്ചു കൊണ്ടുള്ള എഇഒയുടെ നിഷേധാത്മക നടപടിയിൽ കെഎസ്ടിഎ ഉപജില്ലാ കമ്മിറ്റി പ്രതിഷേധിക്കുകയും പ്രഥമാധ്യാപകർ മീറ്റിംഗ് ബഹിഷ്കരിച്ച് ഇറങ്ങിപ്പോവുകയും ചെയ്തു. സർക്കാരിനെയും വിദ്യാഭ്യാസ വകുപ്പിനെയും മറികടന്നു കൊണ്ടുള്ളതായിരുന്നു എഇഒ യുടെ പ്രഥമാധ്യാപക യോഗമെന്ന് കെഎസ്ടിഎ ആരോപിച്ചു. സമഗ്ര പ്ലസ്, സ്കൂൾ സുരക്ഷ, പാഠപുസ്തക വിതരണം തുടങ്ങിയ അജണ്ട വച്ചു കൊണ്ടായിരുന്നു മീറ്റിംഗ്. സ്കൂൾ തുറക്കുന്നതിന് മുൻപ് തന്നെ സർക്കാർ കുട്ടികൾക്ക് പുസ്തകം എത്തിച്ചിരുന്നു. ഓണപ്പരീക്ഷ ആയിട്ടും ഉപജില്ലയിലെ സ്കൂളുകളിലെ സ്റ്റോറുകളിൽ കെട്ടിക്കിടക്കുന്ന പുസ്തകങ്ങൾ ആവശ്യമുള്ള സ്കൂളുകളിൽ എത്തിച്ചു കൊടുക്കാത്ത എഇഒയുടെ നിരുത്തരവാദപരമായ നടപടി അപലപനീയമാണ്.

യുവാവിനെ ആക്രമിച്ചയാൾ പിടിയില്‍

കൊല്ലം: യുവാവിനെ ആക്രമിച്ചു പരിക്കേല്‍പ്പിച്ച പ്രതി പിടിയില്‍. കല്ലുവാതുക്കല്‍ ആഴാത്ത് അനീഷ്(33) ആണ് പാരിപ്പള്ളി പോലീസിന്‍റെ പിടിയിലായത്. അലക്ഷ്യമായി ഓട്ടോറിക്ഷ പാര്‍ക്ക് ചെയ്തത് ചേദ്യംചെയ്ത യുവാവിനെ അനീഷും കൂട്ടാളിയും ചേര്‍ന്ന് ആക്രമിച്ച് പരിക്കേല്‍പ്പിക്കുകയായിരുന്നു. യുവാവിന്‍റെ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത പാരിപ്പള്ളി പോലീസ് ഒളിവില്‍ പോയ പ്രതിയെ പിടികൂടുകയായിരുന്നു. ഇയാള്‍ക്കെതിരേ നരഹത്യശ്രമം അടക്കമുള്ള ഒന്‍പതോളം ക്രിമിനല്‍ കേസുകള്‍ നിലവിലുണ്ട്. കാപ്പ പ്രകാരം നടപടികളും നേരിട്ടിട്ടുണ്ട്.

കനത്ത മഴ; ഏരൂരില്‍ വീട് ഇടിഞ്ഞുവീണു

അഞ്ചല്‍ : കഴിഞ്ഞ ദിവസം പെയ്ത കനത്ത മഴയില്‍ ഏരൂരില്‍ വീട് ഇടിഞ്ഞുവീണു. മണലില്‍ പള്ളിമുക്ക് മധു മന്ദിരത്തില്‍ ആശയുടെ വീടാണ് ഇടിഞ്ഞുവീണത്. ഇന്നലെ ഉച്ചയോടെയായിരുന്നു സംഭവം. കനത്ത മഴയിലും കാറ്റിലും വീട് നിലംപൊത്തുകയായിരുന്നു. വീട് ഇടിഞ്ഞ സമയത്ത് ആശയും രണ്ടു മക്കളും വീട്ടില്‍ ഉണ്ടായിരുന്നുവെങ്കിലും ഓടിമാറിയതിനാല്‍ അപകടം ഒഴിവായി. വിവരമറിഞ്ഞെത്തിയ വാര്‍ഡ് അംഗവും സിപിഐ പ്രവര്‍ത്തകരും ചേര്‍ന്ന് ആശയേയും കുടുംബത്തെയും തല്‍ക്കാലികമായി മാറ്റിപ്പാര്‍പ്പിക്കാനുള്ള നടപടികള്‍ സ്വീകരിച്ചിട്ടുണ്ട്. വാടക വീട് ക്രമീകരിച്ചാല്‍ വാടക നല്‍കുമെന്നു പഞ്ചായത്ത് പ്രസിഡന്‍റ് ജി. അജിത്ത് അറിയിച്ചു. പി.എസ്. സുപാല്‍ എംഎല്‍എയുടെ നിര്‍ദേശത്തെ തുടര്‍ന്നു പുനലൂര്‍ തഹസീല്‍ദാര്‍, വില്ലേജ് ഓഫീസര്‍ അടക്കമുള്ളവര്‍ സ്ഥലം സന്ദര്‍ശിച്ച് നാശനഷ്ടങ്ങള്‍ വിലയിരുത്തി. ആശയ്ക്ക് സൗജന്യ റേഷന്‍ നല്‍കുന്നതിനുള്ള നടപടികള്‍ സ്വീകരിക്കുമെന്നും തഹസീല്‍ദാര്‍ അറിയിച്ചു.

പിതൃസ്മരണകൾ ഉണർത്തി വാവുബലി...

കൊല്ലം: പിതൃക്കളുടെ മോക്ഷ പ്രാപ്തിക്കായി ജില്ലയിലെ വിവിധ സ്നാനഘട്ടങ്ങളിൽ ആയിരങ്ങൾ ബലിതർപ്പണം നടത്തി. കനത്ത മഴയിലും എല്ലായിടത്തും കർക്കടക വാവുബലി അർപ്പിക്കാൻ അഭൂതപൂർവമായ തിരക്കായിരുന്നു. കൊല്ലം നഗരത്തിൽ മുണ്ടയ്ക്കൽ പാപനാശനം കടപ്പുറം, തിരുമുല്ലവാരം ക്ഷേത്രം, അഷ്ടമുടി വീരഭദ്ര സ്വാമി ക്ഷേത്രം എന്നിവിടങ്ങളിലാണ് പ്രധാനമായും ബലികർമങ്ങൾ നടന്നത്. ഇന്നലെ പുലർച്ചെ മുതലാണ് ബലിതർപ്പണം നിശ്ചയിച്ചിരുന്നതെങ്കിലും മിക്കയിടത്തും 23ന് രാത്രി മുതൽ തന്നെ ആൾക്കാർ എത്തി. പലരും രാത്രി തന്നെ വാവുബലി അർപ്പിച്ച് മടങ്ങുകയും ചെയ്തു.മുണ്ടയ്ക്കൽ പാപനാശനം കടപ്പുറത്ത് തഠത്തിൽ മഠം ടി.കെ. ചന്ദ്രശേഖര ശാസ്ത്രിയുടെ നേതൃത്വത്തിൽ 15-ൽപ്പരം തന്ത്രിമാരാണ് ബലിതർപ്പണത്തിന് കാർമികത്വം വഹിച്ചത്. ഇവിടെ തിലഹവനം നടത്തുന്നതിന് പ്രത്യേക സൗകര്യവും ഒരുക്കിയിരുന്നു. ബലിയിടാൻ എത്തിയവർക്ക് തുമ്പറ മഹാദേവീ ക്ഷേത്രം ട്രസ്റ്റിന്‍റെ ആഭിമുഖ്യത്തിൽ ചുക്കുകാപ്പി വിതരണം നടത്തി. തിരുമുല്ലവാരം ക്ഷേത്രത്തിന് സമീപത്തെ കടപ്പുറത്ത് ഒരേ സമയം 3000 പേരാണ് ബലിയർപ്പിച്ചത്. ഇവിടെ പുലർച്ചെ 2.30 മുതൽ ബലിതർപ്പണം ആരംഭിച്ചു. 70-ൽ അധികം കാർമികരുടെ നേതൃത്വത്തിലായിരുന്നു ചടങ്ങുകൾ. സ്ത്രീകൾക്ക് ബലിതർപ്പണം നടത്താൻ പ്രത്യേക സൗകര്യവും ഏർപ്പെടുത്തിയിരുന്നു. അഷ്‌ടമുടി വീരഭദ്രസ്വാമി ക്ഷേത്ര പരിസരത്തെ ത്രിവേണി സംഗമത്തിലും പുലർച്ചെ നാലുമുതൽ നൂറുകണക്കിന് ആൾക്കാർ ബലിതർപ്പണം നടത്തി. ഇവിടത്തെ വാവുബലി ചടങ്ങുകൾ വൈകുന്നേരം അഞ്ചിന് സമാപിച്ചു. എല്ലാ ബലിതർപ്പണ കേന്ദ്രങ്ങളിലേക്കും കെഎസ്ആർടിസിയും സ്വകാര്യ ബസുകളും പ്രത്യേക സർവീസുകൾ നടത്തി. ലൈഫ് ഗാർഡുകളുടെ സേവനവും ഏർപ്പാടാക്കിയിരുന്നു.പോലീസ്, ഫയർ ഫോഴ്സ്, മെഡിക്കൽ ടീം, എൻസിസി സ്കൗട്ട് വോളണ്ടിയർമാർ എന്നിവരുടെ സേവനവും ഉണ്ടായിരുന്നു. ചവറ : പിതൃമോക്ഷം തേടി നിരവധി പേർ വിവിധ ഇടങ്ങളിൽ ഒരുക്കിയ തർപ്പണ കേന്ദ്രങ്ങളിൽ ബലിയർപ്പിച്ചു. സ്ത്രീ പുരുഷ ഭേദമന്യേ കുട്ടികളും പിതൃക്കളുടെ മോക്ഷ പ്രാപ്തിക്കായി ബലിയർപ്പിക്കാൻ എത്തി . ചവറയിലെ പ്രധാനപ്പെട്ട കേന്ദ്രങ്ങളിൽ എല്ലാം തന്നെ പുലർച്ചേ മുതൽ ബലിതർപ്പണം തുടങ്ങിയിരുന്നു. നീണ്ടകര പുത്തൻതുറ ആൽത്തറമൂട് മഹാവിഷ്ണുക്ഷേത്രത്തിന് സമീപത്തെ കടൽ തീരത്ത് ഒരേസമയം മുന്നുറിലധികം പേരാണ് ബലിതർപ്പണം നടത്തിയത്. ഇവിടെ ആയിരങ്ങൾ ബലിതർപ്പണത്തിൽ പങ്കെടുത്തു.പന്മന അഞ്ചു മനയ്ക്കൽ ക്ഷേത്ര സമീപത്തും ബലിതർപ്പണത്തിന് നിരവധിപേർ എത്തി. കർക്കടകവാവുബലി തർപ്പണത്തിൽ പന്മന ആശ്രമത്തിൽ ആയിരങ്ങൾ പങ്കെടുത്തു. പന്മന ആശ്രമം ആചാര്യൻ സ്വാമി നിത്യസ്വരൂപാനന്ദയുടെ കാർമികത്വത്തിൽ ബലിതർപ്പണവും ക്ഷേത്രം മേൽശാന്തി വിഷ്ണുവിന്‍റെ കാർമികത്വത്തിൽ തിലഹവനവും നടന്നു. പന്മന ആശ്രമം മഠാധിപതി സ്വാമി കൃഷ്ണമയാനന്ദ തീർഥപാദർ ചടങ്ങിന് നേതൃത്വം നൽകി. പിതൃക്കളെ ധ്യാനിച്ച് ബലി തര്‍പ്പണം നടത്താനായി പുലര്‍ച്ചേ മുതല്‍ ബലിതർപ്പണ കേന്ദ്രങ്ങളിൽ വന്‍ തിരക്കനുഭവപ്പെട്ടു. സ്ത്രീകളും കുട്ടികളും ഉൾപ്പെടെ നൂറ് കണക്കിന് ആള്‍ക്കാരണ് പല സ്ഥലങ്ങളിലും ബലി അര്‍പ്പിക്കാനായി എത്തിയത്.പോലീസ്, ഫയർഫോഴ്സ് , മറ്റ് സന്നദ്ധ പ്രവര്‍ത്തകരും പലയിടങ്ങളിലും തിരക്ക് നിയന്ത്രിക്കാന്‍ ഉണ്ടായിരുന്നു.ചിലയിടങ്ങളില്‍ ബലി അര്‍പ്പിച്ച ശേഷം പ്രഭാത ഭക്ഷണവും ഒരുക്കിയിരുന്നു. കുളത്തൂപ്പുഴ : കുളത്തൂപ്പുഴ, കടമാൻ കോഡ്, ആര്യങ്കാവ്, തുടങ്ങിയ പ്രദേശങ്ങളിലെ ക്ഷേത്രക്കടവുകളിൽ ശക്തമായ മഴയെ അവഗണിച്ചു ആയിരങ്ങൾ ബലിതർപ്പണ ചടങ്ങിൽ പങ്കെടുത്തു. പുലർച്ചേ 3.30 മുതൽ കുളത്തൂപ്പുഴ ധർമശാസ്താ ക്ഷേത്ര ആറ്റിൻകടവുകളിൽ ബലിതർപ്പണ ചടങ്ങുകൾ തുടങ്ങി. അരി, പൂവ് ,ജലം, എള്ള് തുടങ്ങിയ പൂജാദ്രവ്യങ്ങൾ ഉപയോഗിച്ച് ബലിദർപ്പണം നടത്തി . കുളത്തൂപ്പുഴയിൽ തിരുവിതാംകൂർ ദേവസ്വം ബോർഡ്, പഞ്ചായത്ത്, ക്ഷേത്ര ഉപദേശക സമിതി എന്നിവയുടെ സംയുക്താഭിമുഖ്യത്തിൽ ഫയർഫോഴ്സിന്‍റെയും, ആരോഗ്യ പ്രവർത്തകരുടെയും നേതൃത്വത്തിൽ ശക്തമായ സുരക്ഷാ ക്രമീകരണങ്ങളാണ് പ്രദേശത്തെ ഒരുക്കിയിട്ടുള്ളത്. പരവൂർ : പൊഴിക്കര പനമൂട് മഹാദേവ ക്ഷേത്രത്തിൽ ആയിരങ്ങൾ പിതൃക്കൾക്ക് അശ്രുപൂജ അർപ്പിച്ചു മടങ്ങി.ചടങ്ങുകൾക്കായി വിപുലമായ ഒരുക്കങ്ങളാണ് ക്ഷേത്രത്തിൽ നടത്തിയിരുന്നത് .പോലീസ് ഉദ്യോഗസ്ഥരുടെയും ഫയർ ഫോഴ്സിന്‍റെയും ആരോഗ്യ വകുപ്പിന്‍റെയും ഇലക്‌ട്രിസിറ്റി,വാട്ടർ അഥോറിറ്റി, പരവൂർ നഗരസഭ ഉൾപ്പെടെ നിരവധി സന്നദ്ധ സംഘടനകളുടെയും സേവനം ഭക്തജനങ്ങൾക്ക് ബലി തർപ്പണത്തിന് ലഭിച്ചിരുന്നു. പുലർച്ചേ മൂന്നിന് ആരംഭിച്ച പിതൃതർപ്പണ ചടങ്ങുകൾക്ക് ചേർത്തല ബിജുശാന്തി ,ധനേഷ് ശാന്തി തുടങ്ങിയവർ കാർമികത്വം വഹിച്ചു.ജാതി മത ഭേദമന്യേ സമസ്ത ജനവിഭാഗ ങ്ങളും ആരാധനാ നടത്തുന്ന തെക്കൻ കേരളത്തിലെ ഒരു പ്രധാന ശിവക്ഷേത്രമാണ് പരവൂർ പൊഴിക്കര പനമൂട് കുടുംബ മഹാദേവ ക്ഷേത്രം.ക്ഷേത്രത്തിനു സമീപമുള്ള വിശാലമായ കടപ്പുറം ബലിതർപ്പണ ചടങ്ങുകൾക്ക് ഭക്തർക്ക് പൂർണത നൽകുന്നു. ക്ഷേത്ര മുറ്റത്തു തയാറാക്കിയവിശാലമായ പന്തലിൽ ഒരേ സമയം ആയിരത്തി ഇരുന്നൂറോളം പേർക്ക് തർപ്പണം ചെയ്യാൻ സൗകര്യ മുണ്ടായിരുന്നു. കടപ്പുറത്ത് എത്തി തർപ്പണ ചടങ്ങുപൂർത്തിയാക്കി വരുന്ന ഭക്തർക്ക് സൗജന്യ പ്രഭാത ഭക്ഷണവും ക്ഷേത്ര കമ്മിറ്റി ഒരുക്കിയിരുന്നു. അഞ്ചല്‍ : കര്‍ക്കടകത്തിലെ വാവുദിനത്തില്‍ കിഴക്കന്‍ മേഖലയില്‍ പിതൃസ്മരണയില്‍ പ്രാര്‍ഥനയോടെ ആയിരങ്ങള്‍ ബലിതര്‍പ്പണം നടത്തി. അഞ്ചല്‍ വടമണ്‍ ശ്രീകൃഷ്ണ സ്വാമി ക്ഷേത്രം, കടയാറ്റ് കളരി ക്ഷേത്രം,കോട്ടുക്കല്‍ ക്ഷേത്രം, ഏരൂര്‍ തൃക്കോയിക്കല്‍ ക്ഷേത്രം എന്നിവിടങ്ങളില്‍ ബലിതര്‍പ്പണത്തിനായി ബലിപ്പുരകള്‍ ഒരുക്കിയിരുന്നു. ആയിരങ്ങളാണ് കനത്ത മഴയിലും പുലര്‍ച്ചേ മുതല്‍ ബലിതര്‍പ്പണം നടത്താനായി എത്തിയത്. കാലാവസ്ഥ പ്രതികൂലമായതിനാല്‍ തന്നെ മിക്കയിടങ്ങളിലും വലിയ സുരക്ഷാ ക്രമീകരണങ്ങളും ഒരുക്കിയിരുന്നു. പോലീസ്, ഫയര്‍ ഫോഴ്‌സ് കൂടാതെ ആരോഗ്യവകുപ്പിന്‍റെ നേതൃത്വത്തില്‍ പ്രത്യേക സംഘവും ആംബുലന്‍സ് ഉള്‍പ്പെടെയുള്ളവയുടെ സൗകര്യവും ഒരുക്കിയിരുന്നു. അമൃതപുരി (കൊല്ലം): മാതാ അമൃതാനന്ദമയി മഠം അമൃതപുരി ആശ്രമത്തിൽ കർക്കിടക വാവ് ദിനത്തിൽ ബലിതർപ്പണവും പൂജയും നടന്നു. സ്വാമി തുരീയാമൃതാനന്ദ പുരി ഭദ്രദീപം കൊളുത്തി ചടങ്ങുകൾക്ക് ആരംഭം കുറിച്ചു. ആശ്രമത്തിൽ നടന്ന പൂജയിൽ ഇന്ത്യയിലും വിദേശത്തുമുള്ള നിരവധിപേരാണ് പങ്കെടുത്തത്. 13 ഭാഷകളിലായി ഓൺലൈൻ വഴി സംഘടിപ്പിച്ച പൂജയിൽ പതിനഞ്ചിലധികം രാജ്യങ്ങളിൽ നിന്നുള്ളവർ പങ്കെടുത്തു. കുണ്ടറ : പെരുമ്പുഴ താഴംമുണ്ടപ്പള്ളിൽ മഹാവിഷ്‌ണു ക്ഷേത്രത്തിൽ കർക്കടകവാവ് ബലിതർപ്പണം ഇന്നലെ കായംകുളം സന്തോഷ് ജ്യോത്സ്യന്‍റെ മുഖ്യകാർമികത്വത്തിൽ പ്രസിഡന്‍റ് ആർ .സുഗതൻ സെക്രട്ടറി എസ്. പ്രസന്നൻ എന്നിവരുടെ സാന്നിധ്യത്തിൽ രാവിലെ 4.30 ന് ആരംഭിച്ച കർമങ്ങൾ വൈകുന്നേരം നാലുവരെ തുടർന്നു. പിതൃക്കൾക്ക് ബലിയിട്ടും തിലഹോമം, പിതൃപൂജ, സായൂജ്യപൂജ, പാൽപ്പായസനേർച്ച എന്നിവ നടത്തി ഭക്തജനങ്ങൾ മടങ്ങി. പുനലൂർ: അഷ്ടമംഗലം ശ്രീ മഹാവിഷ്ണു, ഭഗവതി ക്ഷേത്രത്തിലെ പൊരീയ്ക്കൽ കടവിൽ കർക്കടകവാവു ബലിതർപ്പണ ചടങ്ങുകൾ നടത്തി.സുരേഷ് തിരുമേനി മുഖ്യകാർമികത്വം വഹിച്ചു. പുലർച്ചേ 4.30 മുതൽ 11.30 വരെ നടന്ന ബലിതർപ്പണത്തിന് ക്ഷേത്രോപദേശക സമിതിയുടെ നേതൃത്വത്തിൽ വിപുലമായ ക്രമീകരണങ്ങൾ ഒരുക്കിയിരുന്നു. ക്ഷേത്രത്തിൽ പിതൃപൂജയും തില ഹോമവും നടന്നു. കഞ്ഞിസദ്യയും നടത്തി. സബ് ഗ്രൂപ്പ് ഓഫീസർ ഡി. ഉണ്ണികൃഷ്ണൻ നമ്പ്യാതിരി ,ക്ഷേത്ര ഉപദേശക സമിതി പ്രസിഡന്‍റ് ബി .ജ്യോതിനാഥ്, സെക്രട്ടറി എസ്. അരുൺകുമാർ, വൈസ് പ്രസിഡന്‍റ് എം .ആർ. വിനോദ്,ക്ഷേത്ര ഉപദേശക സമിതി അംഗങ്ങളായ വിപിൻ വേണു,അനന്തകുമാർ, എം.ബിനു, കെ. പ്രഭ എന്നിവർ നേതൃത്വം നൽകി. തിരുമുല്ലവാരത്ത് ഭക്തജനങ്ങളെ വടംകെട്ടി തടഞ്ഞു കൊല്ലം: തിരുമുല്ലവാരത്ത് ബലിയര്‍പ്പിക്കാനെത്തിയ ഭക്തരെ വടം കെട്ടി തടഞ്ഞതായി പരാതി. നിരവധിപേര്‍ കണ്ണീരോടെയാണ് മടങ്ങിയത്. കൂപ്പണ്‍ വാങ്ങിയിട്ടും ബലിയര്‍പ്പിക്കാന്‍ സാമഗ്രികള്‍ നല്‍കിയില്ല. പുലര്‍ച്ചേയെത്തി മണിക്കൂറുകള്‍ കാത്തുനിന്നവര്‍ക്കാണ് ദുരനുഭവമുണ്ടായത്. ദര്‍പ്പണം നടത്താനാകാതെ ജനങ്ങള്‍ ദേവസ്വം സ്റ്റാഫിനോട് പണം തിരികെ ചോദിച്ചു. കഴിഞ്ഞവര്‍ഷവും ഇതേ അനുഭവമാണ് ഉണ്ടായെതെന്നു ഭക്തര്‍ പ്രതികരിച്ചു. തിരുവിതാംകൂര്‍ ദേവസ്വം ബോര്‍ഡ് ആവശ്യമായ ക്രമീകരണങ്ങള്‍ ഒരുക്കിയില്ലെന്നാണ് ആക്ഷേപം. പിതൃതര്‍പ്പണത്തിനുള്ള കൂപ്പണിലും തിരുമറിയെന്ന് പരാതിയുണ്ട്. 75 രൂപയുടെ കൂപ്പണിനു നൂറു രൂപ വാങ്ങുന്നതായുള്ള ആക്ഷേപങ്ങള്‍ ഉയര്‍ന്നു. കഴിഞ്ഞവര്‍ഷം മുതലാണ് തിരുമുല്ലവാരത്തെ ബലിദര്‍പ്പണം ദേവസ്വം ബോര്‍ഡ് ഏറ്റെടുത്തത്. തിരുമുല്ലവാരത്തുണ്ടായത് ദേവസ്വംബോർഡിന്‍റെ കെടുകാര്യസ്ഥത: ഡി.ഗീതാകൃഷ്ണൻ കൊല്ലം: തിരുമുല്ലവാരത്തെ ബലിദർപ്പണ ചടങ്ങ് അട്ടിമറിക്കാനാണ് ദേവസ്വം ബോർഡ്‌ ശ്രമിച്ചതെന്ന് ബ്ലോക്ക്‌ കോൺഗ്രസ്‌ കമ്മിറ്റി പ്രസിഡന്‍റ് ഡി.ഗീതാകൃഷ്ണൻ ആരോപിച്ചു. ദേവസ്വം ബോർഡിന്‍റെ കെടുകാര്യസ്ഥത കൊണ്ട് ആയിരക്കണക്കിന് ആളുകൾ ബലി ഇടാതെ മടങ്ങി പോയി. തികച്ചും മോശമായ പന്തലാണ് നിർമിച്ചത്. ഇത് നിയന്ത്രിക്കാൻ ആവശ്യമായ പോലീസ് സംവിധാനവും ഇല്ലായിരുന്നു. ബാരിക്കേട് പൊളിച്ചതിന് ശേഷം വലിച്ചു കെട്ടിയത് സാരി പോലെയുള്ള തുണി. 500 പേർ ഒരേ സമയം ഇരുന്നു ബലി ഇടാവുന്ന പന്തലിൽ ഉണ്ടായിരുന്നത് 10 ഓളം ജീവനക്കാരും. ആവശ്യമായ സന്നാഹങ്ങൾ ഒരുക്കാതെ ദേവസ്വം ബോർഡ്‌ മനഃപൂർവം ചെയ്തത് ആണോ എന്നതിന് വിജിലൻസ് അന്വേഷണം വേണമെന്ന് ഗീതാകൃഷ്ണൻ ആവശ്യപ്പെട്ടു. അല്ലാത്ത പക്ഷം ദേവസ്വം ബോർഡിന് എതിരെ ശക്തമായ സമര പരിപാടികൾ ആരംഭിക്കുമെന്ന് ഗീതാകൃഷ്ണൻ പറഞ്ഞു.

ദേശീയപാത നിർമാണം: കരാർ കമ്പനി അധികൃതർ കൊട്ടിയം ജംഗ്ഷൻ സന്ദർശിച്ചു

കൊട്ടിയം:ദേശീയപാത നിർമാണവുമായി ബന്ധപ്പെട്ട് കൊട്ടിയം ജംഗ്ഷനിലും പരിസരത്തും ഉണ്ടാകുന്ന പ്രശ്നങ്ങളെ കുറിച്ച് നേരിൽ കണ്ട് മനസിലാക്കുകയും ആവശ്യമായ പരിഹാരം ഉണ്ടാക്കുകയും ചെയ്യുന്നതിന് വേണ്ടി ദേശീയപാതയുടെ നിർമാണം കരാർ ഏറ്റെടുത്തിട്ടുള്ള കമ്പനിയുടെ അധികൃതർ കൊട്ടിയം ജംഗ്ഷനിലും പരിസരവും സന്ദർ ശിച്ചു. നിലവിലെ സ്ഥിതിഗതികൾ നേരിട്ട് വിലയിരുത്തി. റൈസിംഗ് കൊട്ടിയം ജില്ലാ കളക്്‌ടർക്ക് നൽകിയ പരാതിയെ തുടർന്ന് കളക്‌ടർ സന്ദർശിക്കുകയും കരാർ കമ്പനിയായ ശിവാലയക്ക് നിർശങ്ങൾ നൽകുകയും ചെയ്തിരുന്നു ഇതിന്‍റെ അടിസ്ഥാനത്തിൽ റൈസിംഗ് കൊട്ടിയം ഭാരവാഹികളുമായിശിവാലയ അധികൃതർ ചർച്ച നടത്തിയതിനെ തുടർന്നാണ് അവർ സ്ഥലം സന്ദർശിച്ച് സ്ഥിതിഗതികൾ നേരിട്ട് വിലയിരുത്താൻ എത്തിയത്. ശിവാലയ മാനേജർ ലിതേന്ദ്ര ജെയിന്‍റെ നേതൃത്വത്തിലാണ് കൊട്ടിയത്ത് സന്ദർശനം നടത്തിയത്. കൊട്ടിയത്തെ ട്രാഫിക് തടസങ്ങൾ, ഓടയിൽ കൂടി വെള്ളം പോകാത്തത്, ഫുട്പാത്തുകളിൽ കോൺക്രീറ്റ് കട്ടകൾ കിടക്കുന്നത്, സ്പാനുകളുടെ അടിയിലെ മൺകൂനകൾ, നടപ്പാതയിലെ കേബിളുകൾ, കമ്പികൾ കിടക്കുന്നത്, കൊട്ടിയത്തെ സർവീസ് റോഡുകളിൽ വണ്ടികൾക്ക് കയറാൻ കഴിയാത്ത വിധം കുഴികളായി കിടക്കുന്നത്, കോൺക്രീറ്റ് സ്ലാബുകൾ ഫുട്പാത്തിലേക്ക് തള്ളി നിൽക്കുന്നത് തുടങ്ങി 58 ഓളം പ്രശ്നബാധിത സ്ഥലങ്ങൾ ഏകദേശം ആറ് കിലോമീറ്റർ ദൂരത്തിലുള്ള പ്രശ്നങ്ങൾ റൈസിംഗ് കൊട്ടിയം ഭാരവാഹികൾ ഉദ്യോഗസ്ഥർക്ക് കാണിച്ചു കൊടുത്തു. ഉടൻതന്നെ ഈ വിഷയങ്ങൾക്ക് എല്ലാം പരിഹാരം ഉണ്ടാക്കാം എന്ന് ശിവാലയ അധികാരികൾ റൈസിംഗ് കൊട്ടിയം ഭാരവാഹികൾക്ക് ഉറപ്പു നൽകി. പ്രസിഡന്‍റ് അലോഷ്യസ് റൊസാരിയോ, രാജേഷ് ആധാരം, റോയൽ സമീർ, ആയൂബ് മേത്തർ, സന്തോഷ് തട്ടാമല,അശോക് പ്രസാദ്, രാജൻ തട്ടാമല, സക്കീർ ബിസ്മി, അസീർ വേവ്സ് എന്നിവർ ഉദ്യോഗസ്ഥർക്ക് പ്രശ്നബാധിത പ്രദേശങ്ങൾ കാണിച്ചുകൊടുത്തു.

ജാമ്യത്തിൽ ഇറങ്ങി ഒളിവിൽ കഴിഞ്ഞിരുന്ന പ്രതി പിടിയിൽ

ചാത്തന്നൂർ:നിരവധി ക്രിമിനല്‍ കേസിലെ പ്രതിയും പിടികിട്ടാപുളളിയുമായ നെടുമ്പന കുളപ്പാടം ജാബിര്‍ മന്‍സിലില്‍ മുഹമ്മദ് അന്‍വറി(37)നെ ചാത്തന്നൂർ പോലീസ് കാസർഗോഡ് നിന്നും പിടികൂടി. കൊട്ടിയം സിതാര ജംഗ്ഷന് സമീപമുള്ള വീട്ടില്‍ കയറി യുവാവിനെ വെട്ടിക്കൊലപ്പെടുത്താന്‍ ശ്രമിച്ച സംഘത്തിലേ യും 2012-ല്‍ കുളപ്പാടത്ത്‌ വച്ച് രാഷ്്‌ട്രീയ പ്രവര്‍ത്തകരായ മൂന്നുപേരെ വാളുകൊണ്ട് വെട്ടിക്കൊലപ്പെടുത്താന്‍ ശ്രമിച്ച കേസിലേയും പ്രധാന പ്രതിയാണ് പിടിയിലായ മുഹമ്മദ് അന്‍വര്‍. ഈ കേസില്‍ ജാമ്യത്തില്‍ ഇറങ്ങിയ ശേഷം ഇയാള്‍ കോടതിയില്‍ ഹാജരാകാതെ ഒളിവില്‍ പോവുകയായിരുന്നു. ഒളിവില്‍ കഴിഞ്ഞ് വന്നിരുന്ന കാസര്‍ഗോഡ് ബേക്കലുളള വീട്ടില്‍ നിന്നാണ് ഇയാളെ ചാത്തന്നൂര്‍ പോലീസ് പിടികൂടിയത്. വിചാരണ കോടതി കൂട്ടു പ്രതികളെ ശിക്ഷിച്ചുവെങ്കിലും അന്‍വര്‍ ദീര്‍ഘകാലം ഒളിവില്‍ കഴിഞ്ഞുവരികയായിരുന്നു. കൊല്ലം സിറ്റി പോലീസ് കമ്മീഷണര്‍ കിരണ്‍ നാരായണന് ലഭിച്ച രഹസ്യവിവരത്തിന്‍റെ അടിസ്ഥാനത്തില്‍ ചാത്തന്നൂര്‍ അസി.പോലീസ് കമ്മീഷണര്‍ അലക്‌സാണ്ടര്‍ തങ്കച്ചന്‍റെ നേതൃത്വത്തില്‍ചാത്തന്നൂര്‍ ഇന്‍സ്‌പെക്ടര്‍ അനൂപ്,സിപിഒ മാരായ രാജീവ്. ആന്‍റണി തോബിയാസ്, ഹസീം എന്നിവരടങ്ങിയ പോലീസ് സംഘമാണ് പ്രതിയെ പിടികൂടിയത്.

സംസ്ഥാന ഗേൾസ് ഫുട്ബോൾ ചാമ്പ്യൻഷിപ്പിന് ഇന്ന് തുടക്കം

ചവറ: കേരള ഫുട്ബോൾ അസോസിയേഷന്‍റെ നേതൃത്വത്തിൽ നടക്കുന്ന സംസ്ഥാന സബ്- ജൂണിയർ ഗേൾസ് ഫുട്ബോൾ ചാമ്പ്യൻഷിപ്പിന് ചവറ ശങ്കരമംഗലം സർക്കാർ ഹയർ സെക്കൻഡറി സ്കൂൾ ഗ്രൗണ്ടിൽ ഇന്ന് തുടക്കം. രാവിലെ ഏഴിന് നടക്കുന്ന ആദ്യ മത്സരത്തിൽ കണ്ണൂർ തിരുവനന്തപുരവുമായി ഏറ്റുമുട്ടും. രാവിലെ എട്ടിനുള്ള മത്സരത്തിൽ ആലപ്പുഴയും വയനാടും തമ്മിൽ മത്സരിക്കും. ഉച്ചകഴിഞ്ഞ് മൂന്നിന് ആലപ്പുഴ തിരുവനന്തപുരത്തേയും വൈകുന്നേരം നാലിന് കണ്ണൂർ വയനാടിനേയും നേരിടും. ടൂർണമെന്‍റ് ഉദ്ഘാടന സി.ആർ. മഹേഷ് എംഎൽഎ നിർവഹിക്കും. ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി അധ്യക്ഷനാകും. ചാമ്പ്യൻഷിപ്പ് 31ന് സമാപിക്കും. ചാമ്പ്യൻഷിപ്പിൽ പങ്കെടുക്കുവാനെത്തിയ ആദ്യ ടീമായ കണ്ണൂർ ടീമിനെ വർക്കിംഗ് ചെയർമാനും ചവറ ബ്ലോക്ക് പഞ്ചായത്ത് പ്രസിഡന്‍റുമായ സന്തോഷ് തുപ്പാശേരിയുടെ നേതൃത്വത്തിൽ ഹെഡ് കോച്ച് നിവേത് സതീശൻ, യശസ്വനി, ഹേമന്ദ് എന്നിവരേയും കുട്ടികളേയും സ്വീകരിച്ചു. ചടങ്ങിൽ ജില്ലാ ഫുട്‌ബോൾ അസോസിയേഷൻ പ്രസിഡന്‍റ് പന്മന മഞ്ജേഷ്, സംഘാടക സമിതി ഭാരവാഹികളായ രവി തയ്യിൽ,ഉണ്ണിക്യഷ്ണൻ മൊരുന്തിയിൽ, എം.അനന്ത കൃഷ്ണൻഎന്നിവർ പങ്കെടുത്തു.

സ്കൂളിന് സമീപത്തെ തെരുവുനായകൾ വിദ്യാർഥികൾക്ക് ഭീഷണിയാകുന്നു

കൊട്ടിയം:കണ്ണനല്ലൂർ ജംഗ്ഷനിലെ യുപി സ്കൂളിന് സമീപം തമ്പടിക്കുന്ന തെരുവ് നായകൾ വിദ്യാർഥികൾക്കും നാട്ടുകാർക്കും ഒരുപോലെ ഭീഷണിയാകുന്നു. എകെഎൽ എം യുപി സ്കൂളിന് സമീപമാണ് തെരുവുനായ്ക്കളുടെ കൂട്ടം. ചെറിയ കുട്ടികളാണ് ഈ സ്കൂളിൽ പഠിക്കുന്നത്. കുട്ടികൾക്ക് ഒറ്റയ്ക്കോ സ്വാതന്ത്ര്യത്തോടെയോ സ്കൂളിൽ എത്താനോ തിരിച്ചു പോകാനോ കഴിയാത്ത അവസ്ഥയാണ്. കൂട്ടമായി തമ്പടിച്ചിരിക്കുന്ന തെരുവുനായകൾ എപ്പോഴും കുട്ടികളെ ആക്രമിക്കാമെന്ന ഭീതിയിലാണ് കുട്ടികളും രക്ഷാകർത്താക്കളും. മുതിർന്നവരും ആശങ്കയോടെയാണ് ഈ ഭാഗത്തുകൂടി നടന്നു പോകുന്നത്. പലർക്കും ഒറ്റയ്ക്ക് പോകാൻ തന്നെ പേടിയാണ്. കൂട്ടത്തോടെ പാഞ്ഞടുക്കുന്ന തെരുവ്നായകളിൽ നിന്നും പലരും ഓടി രക്ഷപ്പെടുകയാണ് പതിവ്. ഇരു ചക്രവാഹനക്കാരുടെ അവസ്ഥയും ഇതു തന്നെയാണ്. നായകൾ എപ്പോൾ വേണമെങ്കിലും ഇരുചക്ര വാഹനത്തിന് കുറുകെ ചാടുമെന്ന സ്ഥിതിയിലാണ്. സ്കൂൾ പരിസരത്തെ റോഡിൽ കൂട്ടത്തോടെ തെരുവ് നായ്ക്കൾ തമ്പടിച്ചിട്ടുംഅധികൃതർ കണ്ടമട്ടില്ല.പഞ്ചായത്ത് അധികൃതരുടെ ഭാഗത്തുനിന്നും നടപടി ഉണ്ടാകണമെന്നാണ് നാട്ടുകാരുടെ ആവശ്യം.

ഉയർന്ന തിരമാല; ജില്ലയിൽ ജാഗ്രതാ മുന്നറിയിപ്പ്

കൊല്ലം: ജില്ലയിൽ തീരപ്രദേശത്ത് ഇന്ന് രാത്രി 8.30 വരെ 2.6 മുതൽ 3.4 മീറ്റർ വരെ ഉയർന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. കടലാക്രമണത്തിന് സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്ന് ജില്ലാദുരന്ത നിവാരണ അഥോറിറ്റി സിഇഒ ജി.നിർമൽ കുമാർ മുന്നറിയിപ്പ് നൽകി. കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽ നിന്ന് അധികൃതരുടെ നിർദേശാനുസരണം മാറി താമസിക്കണം. ചെറിയ വള്ളങ്ങളും ബോട്ടുകളും കടലിലേക്ക് ഇറക്കരുത്. കള്ളക്കടൽ പ്രതിഭാസത്തിനും ഉയർന്ന തിരമാലക്കും സാധ്യതയുള്ള ഘട്ടത്തിൽ കടലിലേക്ക് മത്സ്യബന്ധന യാനങ്ങൾ ഇറക്കുന്നത് പോലെ തന്നെ അപകടകരമാണ് കരക്കടുപ്പിക്കുന്നതും. തിരമാല ശക്തിപ്പെടുന്ന ഘട്ടത്തിൽ കടലിലേക്ക് ഇറക്കുന്നതും കരയ്ക്കടുപ്പിക്കുന്നതും ഒഴിവാക്കണം. മുന്നറിയിപ്പ് പിൻവലിക്കുന്നത് വരെ ബീച്ചുകൾ കേന്ദ്രീകരിച്ചുള്ള വിനോദസഞ്ചാരമുൾപ്പെടെയുള്ള എല്ലാ പ്രവർത്തനങ്ങളും പൂർണമായി ഒഴിവാക്കണം. മത്സ്യബന്ധന യാനങ്ങൾ (ബോട്ട്, വള്ളം, മുതലായവ) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കണം. വള്ളങ്ങൾ തമ്മിൽ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം. മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണമായും ഒഴിവാക്കണമെന്നും നിർദേശമുണ്ട്. തീരശോഷണത്തിനു സാധ്യതയുള്ളതിനാൽ പ്രത്യേകം ജാഗ്രത പുലർത്തണമെന്നും മുന്നറിയിപ്പ് നൽകിട്ടുണ്ട്. ഇന്ന് ജില്ലയിൽ മഴയ്ക്കുള്ള സാധ്യത പരിഗണിച്ച് ഓറഞ്ച് അലർട്ടും പ്രഖ്യാപിച്ചിട്ടുണ്ട്.

യുവതി തൂങ്ങി മരിച്ച നിലയിൽ

ഓയൂർ: വെളിനല്ലൂർ റോഡുവിളയിൽ യുവതിയെ തൂങ്ങിമരിച്ച നിലയില്‍ കണ്ടെത്തി. ലിബിയാ ഭവനിൽ സുരേഷിന്‍റെ മകൾ ലിബിന (26)യാണ് മരിച്ചത്.ആത്മഹത്യയെന്നാണ് നിഗമനം. അവിവാഹിതയാണ്. ഉച്ചയ്ക്ക് 1.30ഓടെയായിരുന്നു സംഭവം. കിടപ്പുമുറിയിലെ കതക് കുറ്റിയിട്ട ശേഷം ഏറെ നേരം കഴിഞ്ഞിട്ടും മുറി തുറക്കാത്തതിനെ തുടർന്ന് വീട്ടുകാർ നടത്തിയ പരിശോധനയിലാണ് മൃതദേഹം കണ്ടത്. കാരണം വ്യക്തമല്ല. പൂയപ്പള്ളി പോലീസ് അന്വേഷണം തുടങ്ങി.

പ്ലാസ്റ്റിക്കിന് സമ്പൂര്‍ണ നിരോധനം; സ്വാതന്ത്ര്യദിന ആഘോഷം ആശ്രാമം മൈതാനത്ത്

കൊല്ലം: ജില്ലയിലെ സ്വാതന്ത്ര്യദിനാഘോഷം ആശ്രാമം മൈതാനത്ത് നിറപകിട്ടാര്‍ന്നചടങ്ങുകളോടെ സമുചിതമായി ആഘോഷിക്കാന്‍ ജില്ലാ കളക്ടറുടെ ചുമതലയുള്ള എഡിഎം ജി. നിര്‍മല്‍ കുമാറിന്‍റെഅധ്യക്ഷതയില്‍ ചേര്‍ന്ന യോഗം തീരുമാനിച്ചു. പൂര്‍ണമായും ഹരിതചട്ടം ഉറപ്പാക്കിയാകും പരിപാടികള്‍. പ്ലാസ്റ്റിക്‌നിര്‍മിത ദേശീയപതാകകളുടെ ഉത്പാദനവും വിതരണവും വില്‍പനയും പ്രദര്‍ശനവും നിരോധിച്ചു. ആവശ്യമായ സുരക്ഷാക്രമീകരണങ്ങള്‍ക്ക് നിര്‍ദേശംനല്‍കി. പോലീസ്, എക്‌സൈസ്, ഫോറസ്റ്റ്, സ്റ്റുഡന്‍റ് പോലീസ്, എന്‍സി.സി, സ്‌കൗട്ട് ആന്‍റ്ഗൈഡ്‌സ്, ജൂനിയര്‍ റെഡ്‌ക്രോസ് തുടങ്ങിയ വിഭാഗങ്ങളുടെ പ്ലറ്റൂണുകള്‍ പരേഡില്‍ അണിനിരക്കും. സ്‌കൂളുകളില്‍ നിന്നുള്ള ബാന്‍ഡ് ട്രൂപ്പുകളും ഉണ്ടാകും. പരേഡ് പരിശീലനം ഓഗസ്റ്റ് 11, 12 തീയതികളിലും ഡ്രസ് റിഹേഴ്‌സല്‍ 13നും നടത്തും. പരേഡില്‍ പങ്കെടുക്കുന്നവര്‍ക്ക് യാത്രാസൗകര്യം ഒരുക്കും. വിദ്യാര്‍ഥികള്‍ക്ക് കണ്‍സഷന്‍ ലഭ്യമാക്കുന്നതിന് ആര്‍ടിഒയ്ക്കാണ് ചുമതല. പരിശീലനസമയത്തും പരേഡ്ദിനത്തിലും ആംബുലന്‍സ്‌സഹിതം ആരോഗ്യസംഘമുണ്ടാകും. വിദ്യാഭ്യാസ-വ്യാപാരസ്ഥാപനങ്ങളിലും ആഘോഷപരിപാടികള്‍ സംഘടിപ്പിക്കണമെന്നാണ് യോഗനിര്‍ദേശം. സബ് കളക്ടര്‍ നിഷാന്ത് സിഹാര, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

വിഎസിന് വിടനൽകി കരുനാഗപ്പള്ളിയും ചവറയും

കരുനാഗപ്പള്ളി : വി.എസ് .അച്യുതാനന്ദന് അന്ത്യോപചാരമർപ്പിക്കുവാൻ ആയിരങ്ങളാണ് കരുനാഗപ്പള്ളിയിൽ തടിച്ചുകൂടിയത്. ചൊവ്വാഴ്ച വൈകുന്നേരം ഏഴിന് കരുനാഗപ്പള്ളിയിൽ എത്തിച്ചേരുമെന്ന് നേരത്തെ നിശ്ചയി്ചിരുന്ന വി.എസിന്‍റെഭൗതിക ശരീരവും വഹിച്ചുകൊണ്ടുള്ള വിലാപയാത്ര എത്തിയത് രാവിലെ ആറിന്. കരുനാഗപ്പള്ളി ബോയ്സ് ഹയർസെക്കൻഡറി സ്കൂളിൽ പ്രത്യേകം തയാറാക്കിയ വേദിയിൽ ഒരു രാത്രി മുഴുവൻ ഉറക്കം ഒഴിച്ച് നൂറുകണക്കിന് പ്രവർത്തകർ വി .എസിന്‍റെ വരവും കാത്ത് ഇരുന്നു.സ്കൂളങ്കണത്തിൽ തയാറാക്കിയ വലിയ സ്ക്രീനിൽ വിഎസിന്‍റെ വിലാപയാത്ര ഓരോ പോയിന്‍റ് കടക്കുമ്പോഴും അവർ പ്രതീക്ഷയോടെ കാത്തിരിക്കുകയായിരുന്നു കണ്ണിമ ചിമ്മാതെ ഒരു രാത്രി മുഴുവൻ ഉറക്കം ഒഴിച്ചിരുന്ന പ്രവർത്തകർക്ക് മുന്നിലേക്ക് രാവിലെ വി.എസിന്‍റെ വിലാപയാത്ര എത്തിയപ്പോൾ നഗരത്തിനു ഉൾക്കൊള്ളാൻ കഴിയാത്തത്ര ജനക്കൂട്ടം ആയിരുന്നു ടൗണിൽ തടിച്ചുകൂടിയത്. പോലീസും, റെഡ് വാളണ്ടിയേഴ്സും പ്രവർത്തകരും ചേർന്ന് ഏറെ പണിപ്പെട്ടാണ് മൃതദേഹവും വഹിച്ചു കൊണ്ടുവന്ന വാഹനം കടത്തിവിട്ടത്. സ്ത്രീകളും കുട്ടികളും മുതിർന്നവരും ഉൾപ്പെടെ ആയിരക്കണക്കിന് ആളുകൾ തടിച്ചുകൂടി. ബോയിസ് ഹൈസ്കൂളിന് മുന്നിൽ പ്രത്യേകം തയാറാക്കിയ ഛായ ചിത്രത്തിന് മുന്നിൽ പുഷ്പാർച്ചനയും നടന്നു. നിരവധി സംഘടനകളും വ്യക്തികളും മൃതദേഹത്തിൽ പുഷ്പചക്രം അർപ്പിച്ചു. നേതാക്കളായ ടി. മനോഹരൻ, പി. ബി. സത്യദേവൻ, പി. ആർ. വസന്തൻ, സൂസൻ കോടി, തുടങ്ങിയവർ നേതൃത്വം നൽകി. ചവറ: മുൻ മുഖ്യമന്ത്രിയും സിപിഎം നേതാവുമായ വി.എസ് .അച്യുതാനന്ദന് കരിമണ്ണിന്‍റെ നാടായ ചവറയിലും വിട പറയൽ നൽകി. ഏറെ വൈകിയാണ് ഭൗതികശരീരം വഹിച്ചുകൊണ്ടുള്ള വാഹനം ഇന്നലെ പുലർച്ചെ അഞ്ചോടെ ചവറയിൽ എത്തിയത്. വിവിധ സ്ഥലങ്ങളിൽ നിന്നും പ്രായഭേദമന്യേ നൂറുകണക്കിനാളുകൾ വി എസിനെ അവസാനമായി ഒരു നോക്കു കാണുവാൻ എത്തിയിരുന്നു. രാത്രി മുതൽ എത്തിയ ജനക്കൂട്ടം മഴയെത്തും ഏറെ സഹിച്ചു നിന്നാണ് തങ്ങളുടെ പ്രിയ സഖാവിന് അന്ത്യോപചാരം അർപ്പിക്കാൻ എത്തിയത്. ജില്ലയുടെ കിഴക്കൻ മേഖലയിൽ നിന്നുമുള്ള നിരവധി പേരും ചവറയിൽ എത്തിയിരുന്നു. ചവറയിൽ നിന്നും ഭൗതികശരീരം വഹിച്ചുകൊണ്ടുള്ള വാഹനം ഒരു മണിക്കൂറോളം കഴിഞ്ഞാണ് കരുനാഗപ്പള്ളിയിൽ എത്തിച്ചേർന്നത്.വിഎസിന്‍റെ സ്മരണയിൽ നാനാ തുറകളിൽ പെട്ടവർ അന്ത്യോപചാരം അർപ്പിക്കാൻ എത്തിയിരുന്നു. ചവറ ബസ്റ്റാൻഡ് കേന്ദ്രീകരിച്ചായിരുന്നു വിഎസിന് അന്ത്യോപചാരം അർപ്പിക്കാൻ സൗകര്യം ഒരുക്കിയിരുന്നത്. നീണ്ടകര മുതൽ കന്നേറ്റി പാലം വരെയും ഇരുവശങ്ങളിലായി മുഷ്ടികൾ ചുരുട്ടി ജനഹൃദയങ്ങൾ വിഎസിന് അഭിവാദ്യം അർപ്പിക്കുന്നുണ്ടായിരുന്നു. ചവറ നിയോജകമണ്ഡലത്തിന്‍റെ വിവിധ ഭാഗങ്ങളിലെ പരിപാടികളിൽ വി.എസ് .പങ്കെടുത്തിട്ടുണ്ട്. കൂടുതലും സാംസ്കാരിക സംഘടനകളുടെ പരിപാടികളിലായിരുന്നു പങ്കെടുത്തിട്ടുള്ളത് .പുലർച്ചെ ഉണ്ടായിരുന്ന മഴയെ അവഗണിച്ചാണ് തങ്ങളുടെ പ്രിയ നേതാവിനെ ഒരു നോക്കു കാണുവാനും അന്ത്യോപചാരമർപ്പിക്കുവാനും ജനങ്ങൾ എത്തിയത്. കൊല്ലം : മുന്‍മുഖ്യമന്ത്രി വി.എസ്. അച്യുതാനന്ദന്‍റെനിര്യാണത്തില്‍ യുണൈറ്റഡ് മര്‍ച്ചന്‍റ്സ് ചേമ്പര്‍ കൊല്ലം ജില്ലാ കമ്മിറ്റി അനുശോചന രേഖപ്പെടുത്തി. സംസ്ഥാന ട്രഷററുംജില്ലാ പ്രസിഡന്‍റുമായ നിജാംബഷി, സംസ്ഥാന സെക്രട്ടറിമാരായ റ്റി.കെ.മൂസ, ജില്ലാ ജനറല്‍ സെക്രട്ടറികൂടിയായ ആസ്റ്റിന്‍ബെന്‍, ജില്ലാ വര്‍ക്കിംഗ് പ്രസിഡന്‍റ് എം.സിദിഖ് മണ്ണാന്‍റയ്യം, സംസ്ഥാന ജില്ലാ ഭാരവാഹികളായ എസ്.ഷംസുദ്ദീന്‍, റൂഷ പി. കുമാര്‍, എം.പി. ഫൗസിയാബീഗം, ജി.ബാബുക്കുട്ടന്‍പിളള,ഡോ.എസ്.ശശികുമാര്‍, എച്ച്.സലിം, നുജൂം കിച്ചന്‍ ഗാലക്‌സി, ചക്കാലയില്‍ നാസർ , ആര്‍.ആര്‍.പിളള, ജില്ലാ നിര്‍വാഹകസമിതി അംഗങ്ങളായ സജികുമാര്‍, ഷാജി ഇക്രു, അനില്‍വാഴപ്പള്ളി, നിഹാര്‍വേലിയില്‍, അശോകന്‍ അമ്മവീട്, അജയകുമാരന്‍പിളള, സുഭാഷ് പാറയ്ക്കല്‍, സുധീര്‍ കാട്ടില്‍തറയില്‍, ഷെറഫുന്‍, ഗിരിജ, ബിനി അനില്‍, എന്നിവര്‍ അനുശോചിച്ചു.

സ്കൂൾ കെട്ടിടം പൊളിച്ചുനീക്കാൻ നടപടി ആയില്ല; ആശങ്കയോടെ അധ്യാപകരും വിദ്യർഥികളും

കൊട്ടാരക്കര: വർഷങ്ങളായി ജീർണാവസ്ഥയിൽ തുടരുന്നതും ഏതു സമയവും ഇടിഞ്ഞു വീഴാനിടയുള്ളതുമായ സ്കൂൾ കെട്ടിടം അധ്യാപകർക്കും വിദ്യാർഥികൾക്കും ഭീഷണി ഉയർത്തുന്നു. ആനക്കോട്ടൂർ സർക്കാർ വക എൽ പി സ്കൂൾ കെട്ടിടം ആണ് വർഷങ്ങളായി ജീർണാവസ്ഥയിൽ തുടരുന്നത്. ഓരോ അധ്യയനവർഷവും ഭീതിയോടെ കടന്ന് പോകുമ്പോഴും അധ്യാപകരുടെ ഉള്ളിൽ ആശ്വാസത്തിന്‍റെ നെടുവീർപ്പാണ്. ഇടിഞ്ഞു പൊളിഞ്ഞു ഏത് നിമിഷവും നിലം പൊത്താറായ സ്കൂൾ കെട്ടിടമുറി കാലപ്പഴക്കം കൊണ്ട് അപകടാവസ്ഥയിലായിട്ട് നാളേറെയായി. കെട്ടിടം പൊളിച്ച് മാറ്റാൻ സർക്കാർ ഉത്തരവ് ഉണ്ടായിട്ടും നടപടിയില്ല. ഇവിടെ പൊതു വിദ്യാലയ സംരക്ഷണ പദ്ധതിയിൽ ഉൾപ്പെടുത്തി 1.76കോടി മുടക്കി സ്കൂളിന് ബഹുനില കെട്ടിടം നിർമിച്ചിരുന്നതാണ്. 2021ഫെബ്രുവരിയിൽ കെട്ടിടത്തിന്‍റെ ഉദ്ഘാടനവും നടന്നു. പുതിയ കെട്ടിടത്തിലേയ്ക്ക് സ്കൂളിന്‍റെ പ്രവർത്തനം മാറ്റിയിട്ടും പഴയ കെട്ടിടം പൊളിച്ചു നീക്കം ചെയ്യാൻ നടപടി ആയിട്ടില്ല. മേൽക്കൂരയിലെ ഓടുകൾ മിക്കവയും പൊട്ടി ഇളകി പല ഭാഗങ്ങളും ഇളകി വീഴാറുണ്ട്. ഭിത്തി ഇളകി കെട്ടിടം തകർന്ന് വീഴുമോ എന്ന ആശങ്കയിലാണ് നാട്ടുകാർ. ജീർണാവസ്ഥയിലുള്ള കെട്ടിടം നിലംപൊത്തിയാൽ കൊച്ചു കുഞ്ഞുങ്ങൾ ഓടിക്കളിക്കുന്ന സ്കൂൾ മുറ്റം വേദനാജനകമാകും. സ്കൂൾ അധികൃതരും പഞ്ചായത്ത്‌ അധികാരികളും പല തവണ വിഷയം വിദ്യാഭ്യാസ വകുപ്പിനെയും പൊതു മരാമത്ത് അധികാരികളെയും രേഖാ മൂലവും അറിയിച്ചിട്ടും ഒരു ഫലവും ഫലവും ഉണ്ടായിട്ടില്ല.

സ്‌കൂള്‍ പാചക തൊഴിലാളികള്‍ കരിദിനം ആചരിച്ചു

കുണ്ടറ : സ്‌കൂള്‍ പാചക തൊഴിലാളികള്‍ കരിദിനം ആചരിച്ചു. സ്‌കൂള്‍ പാചക തൊഴിലാളികള്‍ക്ക് ജോലി ചെയ്തിട്ടും വേതനം നല്‍കാത്ത സര്‍ക്കാര്‍ നിലപാടില്‍ പ്രതിഷേധിച്ച് കറുത്ത ബാഡ്ജ് ധരിച്ച് ജോലി ചെയ്തുകൊണ്ടായിരുന്നു പ്രതിഷേധം. എല്ലാമാസവും അഞ്ചിന് മുമ്പ് വേതനം നല്‍കുമെന്ന് പ്രഖ്യാപിച്ച വിദ്യാഭ്യാസ മന്ത്രി വാക്ക് പാലിക്കുക, മന്ത്രിതല ചര്‍ച്ചയിലെ തീരുമാനങ്ങള്‍ ഉടന്‍ നടപ്പിലാക്കുക, മിനിമം കൂലി നിഷേധിച്ച സര്‍ക്കാര്‍ ഉത്തരവ് പിന്‍വലിക്കുക, തൊഴില്‍ നഷ്ടപ്പെടുന്ന ദിവസങ്ങളില്‍ തൊഴിലാളിക്ക് വേതനം നല്‍കുക തുടങ്ങിയ ആവശ്യങ്ങള്‍ ഉന്നയിച്ചായിരുന്നു പ്രതിഷേധം. കരിദിനം ആചരിച്ചുള്ള പ്രതിഷേധം ഒരു സൂചന മാത്രമാണെന്നും ഉടൻശമ്പളം നല്‍കിയില്ലെങ്കില്‍ ശക്തമായ സമര പരിപാടിക്ക് സംഘടന രൂപം നല്‍കുമെന്നും ഐഎന്‍ടിയുസി,സംസ്ഥാന ജനറല്‍ സെക്രട്ടറി എ. ഹബീബ് സേട്ട് അറിയിച്ചു,

സാഹിത്യോത്സവ് 26,27 തീയതികളിൽ

കൊല്ലം: എസ്എസ്എഫ് ജില്ലാ സാഹിത്യോത്സവ് 26, 27 തീയതികളിൽ കുന്നിക്കോട് ശാസ്ത്രി ജംഗ്ഷനിൽ നടക്കും.26-ന് രാത്രി ഏഴിന് മന്ത്രി കെ.എൻ. ബാലഗോപാൽ ഉദ്ഘാടനം നിർവഹിക്കും. പരിസ്ഥിതി പ്രവർത്തകൻ കെ. സഹദേവൻ മുഖ്യാതിഥിയായി പങ്കെടുക്കും. എഴുത്തുകാരൻ ദേവദാസ് ക്ലാപ്പന മുഖ്യപ്രഭാഷണം നടത്തും.മത്സ്യത്തൊഴിലാളികളുടെ ജീവിതത്തെ പ്രതികൂലമായി ബാധിക്കുന്ന കടൽ മണൽ ഖനനമാണ് ഇത്തവണത്തെ സാഹിത്യോത്സവത്തിന്‍റെ പ്രമേയമെന്ന് ഭാരവാഹികൾ പറഞ്ഞു. പാരിസ്ഥിതിക പഠനം നടത്താതെയുള്ള ഖനന പ്രവർത്തനങ്ങളിൽ നിന്ന് കേന്ദ്ര സർക്കാർ പിന്മാറണമെന്നും അവർ ആവശ്യപ്പെട്ടു. പത്രസമ്മേളനത്തിൽ എസ്എസ്എഫ് ജില്ലാ ഭാരവാഹികളായ അനസ് മൈലാപ്പൂര്, തൗഫീഖ്, ഫൈസൽ മുഈനി, സുധീർ ഖാൻ കുളപ്പാടം എന്നിവർ സംബന്ധിച്ചു.

ഇത്തിക്കര ബ്ലോക്ക് പഞ്ചായത്ത് നവീകരിച്ച കെട്ടിട ഉദ്ഘാടനം 26ന് സ്പീക്കര്‍ നിര്‍വഹിക്കും

കൊല്ലം ഇത്തിക്കര ബ്ലോക്ക് പഞ്ചായത്തിന്‍റെനവീകരിച്ച കെട്ടിടം 26 ഉച്ചയ്ക്ക് രണ്ടിന് നിയമസഭാ സ്പീക്കര്‍ എ.എന്‍.ഷംസീര്‍ ഉദ്ഘാടനം ചെയ്യും. തൊഴിലുറപ്പ് പദ്ധതിയില്‍ മികച്ച പ്രകടനം കാഴ്ചവെച്ച പഞ്ചായത്തുകള്‍ക്ക് പുരസ്‌ക്കാരം സമര്‍പ്പിക്കും. ഹരിതകര്‍മസേനകളെ ആദരിക്കും. ബ്ലോക്ക് പഞ്ചായത്ത് കമ്യുണിറ്റി ഹാളില്‍ നടക്കുന്ന പരിപാടിയില്‍ ജി.എസ് .ജയലാല്‍ എംഎല്‍എ അധ്യക്ഷനാകും. ഇത്തിക്കര ബ്ലോക്ക് പഞ്ചായത്ത് പ്രസിഡന്‍റ് എം.കെ. ശ്രീകുമാര്‍, ജില്ലാ പഞ്ചായത്ത് വൈസ്പ്രസിഡന്‍റ് ശ്രീജ ഹരീഷ്, ഗ്രാമ പഞ്ചായത്ത് പ്രസിഡന്‍റുമാരായ, എസ്.അമ്മിണിയമ്മ, എസ്.കെ.ചന്ദ്രകുമാര്‍, ടി.ആര്‍.സജില, രേഖാ എസ്.ചന്ദ്രന്‍, എന്‍.ശാന്തിനി,ഇത്തിക്കര ബ്ലോക്ക് വൈസ് പ്രസിഡന്‍റ് നിര്‍മല വര്‍ഗീസ്, പി.സി .മന്മഥന്‍, ജില്ലാ പഞ്ചായത്ത് അംഗങ്ങള്‍, സ്ഥിരംസമിതി അധ്യക്ഷര്‍ തുടങ്ങിയവര്‍ പങ്കെടുക്കും.

തലച്ചിറ വൈഎംസിഎ പ്രവർത്തനോദ്ഘാടന സമ്മേളനവും വൈദിക വരവേൽപ്പും ഇന്ന്

കൊട്ടാരക്കര :തലച്ചിറ വൈഎംസിഎ പ്രവർത്തനോദ്ഘാടന സമ്മേളനവും ഭാരവാഹികളുടെ സ്ഥാനാരോഹണവും വൈദിക വരവേൽപ്പുംഇന്ന് വൈകുന്നേരം 4.30ന് ചിരട്ടക്കോണം സെന്‍റ് മേരിസ് മലങ്കര കത്തോലിക്കാ പള്ളിയിൽ നടക്കും. വൈഎംസിഎ അഖിലേന്ത്യ ട്രഷറർ റെജി ജോർജ് ഇടയാറൻമുള ഉദ്ഘാടനം ചെയ്യും.സംസ്ഥാന വൈസ് ചെയർമാൻ അഡ്വ.ജയൻ മാത്യുഭാരവാഹികളുടെ സ്ഥാനാരോണ ശുശ്രൂഷയ്ക്ക് നേതൃത്വം നൽകും. വൈഎംസിഎ രക്ഷാധികാരിമാരായ, പുതുതായി ചുമതലയേറ്റ ഇടവക വികാരിമാർക്കുള്ള വരവേൽപ്പ് സബ് റീജിയൻ ചെയർമാൻ ഡോ.ഏബ്രഹാം മാത്യുവും പ്രതിഭകളെ ആദരിക്കൽ മുൻ നാഷണൽ എക്സിക്യൂട്ടീവ് അംഗം കെ.ഒ.രാജുക്കുട്ടിയും നിർവഹിക്കും. പ്രസിഡന്‍റ് പി.ഒ.ജോൺ അധ്യക്ഷത വഹിക്കും. ചക്കുവരക്കൽ മോർ ഇഗ്നാത്യോസ് യാക്കോബായാ പള്ളി വികാരി ഫാ.ജോർജ് പെരുമ്പട്ടേത്ത് മുഖ്യ സന്ദേശവും തലച്ചിറ മാർത്തോമാപള്ളിവികാരി റവ.സി.പി.ബിജു പ്രവർത്തന രൂപരേഖ പ്രകാശനവും നിർവഹിക്കും. ചിരട്ടക്കോണം മലങ്കര കാത്തലിക് ചർച്ച് വികാരി ഫാ.മാത്യൂസ് അലുമൂട്ടിൽ, പൊടിയാട്ടുവിള സെന്‍റ് മേരിസ് മലങ്കര കാത്തലിക് ചർച്ച് വികാരി ഫാ.അനു ജോസ് കുന്നിൽ, തലച്ചിറ സെന്‍റ് തോമസ് ഇവാഞ്ചലിക്കൽ ചർച്ച് വികാരി റവ. അനീഷ് തോമസ് ജോൺ, ഭാരവാഹികളായ എൻ.എ. ജോർജുകുട്ടി,ജി.യോഹന്നാൻ കുട്ടി,ജെയിംസ് ജോർജ്,റോയി ജോൺ,ബിനു.ജി.കടയിൽ എന്നിവർ പ്രസംഗിക്കും.

മത്സ്യബന്ധന വള്ളം മറിഞ്ഞ് ആറ് തൊഴിലാളികൾക്ക് പരിക്ക്

ചവറ: മത്സ്യബന്ധനം കഴിഞ്ഞ് മടങ്ങിയ വള്ളം മറിഞ്ഞ് ആറു തൊഴിലാളികൾക്കു പരിക്ക്. ശക്തികുളങ്ങര ഫിഷിംഗ് ഹാർബറിനു സമീപം ഇന്നലെ രാവിലെ 9.30 നായിരുന്നു അപകടം. മത്സ്യബന്ധനം കഴിഞ്ഞു മടങ്ങിയ വള്ളം ശക്തമായ തിരമാലയിൽപ്പെട്ട് നിയന്ത്രണം വിട്ടു പുലിമുട്ടിൽ ഇടിക്കുകയായിരുന്നു. ഇടിയുടെ ആഘാതത്തിൽ വള്ളത്തിൽ ഉണ്ടായിരുന്നവർ കടലിൽ വീഴുകയായിരുന്നു. സമീപത്ത് ഉണ്ടായിരുന്ന മറ്റു വള്ളങ്ങളിലെ തൊഴിലാളികൾ സ്ഥലത്ത് എത്തി അപകടത്തിൽപ്പെട്ട എല്ലാവരെയും രക്ഷപ്പെടുത്തി കരയ്ക്ക് എത്തിച്ചു. അമ്പലപ്പുഴ കരൂർ സ്വദേശികളും സഹോദരങ്ങളുമായ അഖിൽ (24), അഭിനന്ദ് (22), ചെറിയഴീക്കൽ സ്വദേശികളായ സുജിത് (42), ഷൺമുഖൻ (46), രഞ്ജിത് (40) , രാജീവ് (44) എന്നിവരാണ് അപകടത്തിൽപ്പെട്ട വള്ളത്തിൽ ഉണ്ടായിരുന്നത്. ഇവരെ പിന്നീട് ജില്ലാ ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല. പണ്ടാരത്തുരുത്ത് സ്വദേശി രാജേഷിന്‍റെ ഉടമസ്ഥതയിലുള്ള വള്ളമാണ് അപകടത്തിൽപ്പെട്ടത്. വിവരം അറിഞ്ഞു ശക്തികുളങ്ങര പോലീസും സ്ഥലത്ത് എത്തിയിരുന്നു.

കാർഷിക പ്രദർശന വിപണന മേളയ്ക്ക് നാളെ തുടക്കം

കൊല്ലം: സിപിഐ ജില്ലാ സമ്മേളനത്തോടനുബന്ധിച്ച് നടക്കുന്ന കാർഷിക പ്രദർശന വിപണന മേളയ്ക്ക് നാളെ തുടക്കമാകും. കടപ്പാക്കട സ്പോർട്സ് ക്ലബ് മൈതാനിയിൽ മൂന്നു ദിവസങ്ങളിലായി നടക്കുന്ന മേള 27ന് സമാപിക്കും. നാളെ രാവിലെ 10ന് മന്ത്രി പി. പ്രസാദ് മേള ഉദ്ഘാടനം ചെയ്യും. കിസാൻ സഭ ജില്ലാ പ്രസിഡന്‍റ് കെ. ആർ. മോഹനൻ പിള്ള അധ്യക്ഷത വഹിക്കുന്ന യോഗത്തിൽ ജില്ലാ സെക്രട്ടറി അഡ്വ. ലെനു ജമാൽ, സംസ്ഥാന കൗൺസിൽ അംഗംഎൻ. നളിനാക്ഷൻ എന്നിവർ പ്രസംഗിക്കും. സംസ്ഥാന ഹോർട്ടികൾച്ചറൽ മിഷൻ, മിൽമ, ഓയിൽ പാം ഇന്ത്യ, സംസ്ഥാന ഫാർമിങ് കോർപറേഷൻ തുടങ്ങി 32ഓളം സ്ഥാപനങ്ങളുടെ സ്റ്റാളുകൾ പ്രദർശനത്തിനുണ്ടാകും.27ന് വൈകുന്നേരം നാലിന് നടക്കുന്ന സമാപന യോഗം മന്ത്രി ജെ. ചിഞ്ചുറാണി ഉദ്ഘാടനം ചെയ്യും. സിപിഐ സംസ്ഥാന കൗൺസിൽ അംഗം ആർ വിജയകുമാർ അധ്യക്ഷത വഹിക്കുന്ന യോഗത്തിൽ കിസാൻ സഭ സംസ്ഥാന എക്സിക്യൂട്ടീവ് അംഗം എസ്. അജയഘോഷ്, കോഓർഡിനേറ്റർ എസ്. മോഹനചന്ദ്രൻ, എന്നിവർ പ്രസംഗിക്കും. രാവിലെ ഒമ്പത് മുതൽ രാത്രി എട്ട് വരെ നടക്കുന്ന മേളയിൽ പ്രവേശനം സൗജന്യമാണ്.

ഫാത്തിമാ കോളജിൽ പ്രഫ.ത്രേസ്യാമ്മകുര്യൻ മെമ്മോറിയൽ ചെയർ ഉദ്ഘാടനം

കൊല്ലം: പ്രഫ. ത്രേസ്യാമ്മ കുര്യൻ മെമ്മോറിയൽ ചെയർ ഉദ്ഘാടനംഫാത്തിമാ മാതാ നാഷണൽ കോളജിൽ നടന്നു. കോളജ് സ്ഥാപിതമായ 1951 മുൽ1982 വരെ ജന്തുശാസ്ത്ര വിഭാഗം അധ്യാപികയായിരുന്ന പ്രഫ. ത്രേസ്യാമ്മ കുര്യന്‍റെ സ്മരണാർഥം കുടുംബാംഗങ്ങൾ ഏർപ്പെടുത്തിയ ചെയർ, മാനേജർ ഫാ. ഡോ. അഭിലാഷ് ഗ്രിഗറിയുടെ സാന്നിധ്യത്തിൽ പ്രിൻസിപ്പൽ ഡോ. സിന്ത്യ കാതറിൻ മൈക്കിൾ ഉദ്ഘാടനം ചെയ്തു. ഫാ. അഭിലാഷ് ഗ്രിഗറി, പ്രഫ. ഡോ. സർളിൻ പി.ജെ, ജോസഫ് കുഞ്ചെറിയാ, ഡോ. ജോർജ് ഡിക്രൂസ്, ഡോ. വിജയശ്രീ തുടങ്ങിയവർ പ്രസംഗിച്ചു. ചെയറിന്‍റെ ആദ്യസെഷൻ കേരളത്തിലെ വിവിധയിനം പാമ്പുകൾ, പാമ്പുകടി, സർപ്പ ആപ്പ് എന്നിവയെക്കുറിച്ച് അസി.ഫോറസ്റ്റ് കൺസർവേറ്റർ മുഹമ്മദ് അൻവർ നയിച്ചു. രണ്ടാമത്തെ ചെയർ ഡോ. സുജിത് വി. ഗോപാലൻ ആണ് നയിച്ചത്. പശ്ചിമഘട്ടത്തിലെ തവളകളെക്കുറിച്ചും അവയുടെ പ്രാധാന്യവും എന്ന വിഷയത്തിലാണ് ക്ലാസ് നടന്നത്.

ഉഴവൂർ വിജയൻ അനുസ്മരണം നടത്തി

കൊല്ലം : എൻസിപി മുൻ സംസ്ഥാന പ്രസിഡന്‍റ് ആയിരുന്ന ഉഴവൂർ വിജയന്‍റെഎട്ടാമത് ചരമവാർഷിക പരിപാടികൾ എൻസിപിഎസ് ജില്ലാ പ്രസിഡന്‍റ് ജി .പദ്മാകരൻ ഉദ്ഘാടനം ചെയ്തു .ജില്ലാ വൈസ് പ്രസിഡന്‍റ് രാഘവൻപിള്ളയുടെ അധ്യക്ഷതയിൽ കൂടിയ യോഗത്തിൽ എൻസിപിഎസ് സംസ്ഥാന നിർവാഹക സമിതി അംഗം എസ് .പ്രദീപ്കുമാർ മുഖ്യപ്രഭാഷണം നടത്തി. എസ് .രാജീവ്,കുണ്ടറ പ്രതാപൻ സക്കീർ ഹുസൈൻ, അഡ്വ. മിലിശ്രീ, എം. എ. റഹ്മാൻ, ചെന്നലിൽ ഗോപകുമാർ, ഡോ. പദ്മകുമാർ,മഠത്തിൽ രാജേഷ്, എന്നിവർ പ്രസംഗിച്ചു.

യുവാവിനെ ആക്രമിച്ച് ഒളിവിൽപോയ പ്രതി അറസ്റ്റിൽ

കൊല്ലം: യുവാവിനെ ആക്രമിച്ച് കൊലപ്പെടുത്താൻ ശ്രമിച്ച ശേഷം ഒളിവിൽ പോയ പ്രതിയെ പോലീസ് പിടികൂടി. തൃക്കോവിൽവട്ടം വില്ലേജിൽ മുഖത്തല സ്‌കൂൾ ജംഗ്ഷന് സമീപം വാടകയ്ക്ക് താമസിക്കുന്ന മനീഷ് കണ്ണൻ(27) ആണ് കൊട്ടിയം പോലീസിന്‍റെ പിടിയിലായത്. കണ്ണനല്ലൂർ സ്വദേശി വിപിനേയും സുഹൃത്തിനേയും തടഞ്ഞ് നിർത്തി മർദ്ദിച്ച് ഗുരുതരമായി പരിക്കേൽപ്പിച്ചതിനാണ് ഇയാൾ അറസ്റ്റിലായത്. സംഭവത്തെ തുടർന്ന് ഇയാൾ എറണാകുളത്ത് ഒളിവിൽ കഴിയുകയായിരുന്നു. ചാത്തന്നൂർ അസിസ്റ്റന്‍റ് പോലീസ് കമ്മീഷണർ അലക്‌സാണ്ടറിന്‍റെ നിർദേശ പ്രകാരം കൊട്ടിയം പോലീസ് ഇൻസ്‌പെക്ടർ പി.പ്രദീപ്, എസ് ഐ മാരായ നിതിൻനളൻ, മിനുരാജ്, സോമരാജൻ, സിവിൽ പോലീസ് ഓഫീസർമാരായ അരുൺ, വിനോദ് എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്. ഇയാളെ കൊല്ലം ജുഡിഷ്യൽ ഒന്നാം ക്ലാസ് മജിസ്‌ട്രേറ്റ് കോടതി രണ്ടിൽ ഹാജരാക്കി റിമാന്‍റ് ചെയ്തു.

അതിഥി അധ്യാപികയ്ക്ക് ഒരു മാസത്തിനകം വേതനം നൽകണമെന്ന് മനുഷ്യാവകാശ കമ്മീഷൻ

കൊല്ലം : കുമ്മന്നൂർ സെന്‍റ് ജോൺസ് വിഎച്ച്എസ്എസിൽ 2023 സെപ്റ്റംബർ മുതൽ 2024 ഫെബ്രുവരി വരെ അതിഥി അധ്യാപികയായി ജോലി ചെയ്തയാൾക്ക് ഒരു മാസത്തിനകം വേതനം നൽകണമെന്ന് മനുഷ്യാവകാശ കമ്മീഷൻ അംഗം വി. ഗീത വിദ്യാഭ്യാസ വകുപ്പ് അധികൃതർക്ക് നിർദ്ദേശം നൽകി. കൊട്ടാരക്കര മൈലം സ്വദേശിനി റീന രാജന് വേതനം നൽകാനാണ് ഉത്തരവ്. നിയമന ഉത്തരവ് നൽകാനുണ്ടായ കാലതാമസം കാരണമാണ് വേതനം ലഭിക്കാത്തതെന്ന് പരാതിയിൽ പറയുന്നു.വിദ്യാഭ്യാസ ഉപമേധാവിയിൽ (കൊല്ലം) നിന്നും കമ്മീഷൻ റിപ്പോർട്ട് വാങ്ങി. പരാതിക്കാരിയുടെ നിയമന പ്രൊപ്പോസൽ അധികാരസ്ഥാപനങ്ങൾ നിരസിച്ചിട്ടുള്ളതാണെന്ന് റിപ്പോർട്ടിൽ പറയുന്നു. എന്നാൽ നിയമനശുപാർശ സമർപ്പിക്കാനുണ്ടായ കാലതാമസം സർക്കാർ മാപ്പാക്കി ഉത്തരവിറക്കിയതായും റിപ്പോർട്ടിൽ പറയുന്നു. ഈ സാഹചര്യത്തിലാണ് വേതനം ഒരു മാസത്തിനകം നൽകാൻ കമ്മീഷൻ നിർദ്ദേശം നൽകിയത്.

ആരാധനാലയത്തിൽ അക്രമം: രണ്ടു പേർ പിടിയിൽ

കൊട്ടാരക്കര: മൈലം ആക്കവിള കുളപ്പാറ മലയിൽ കിരാതമൂർത്തി ക്ഷേത്രം ആരാധനത്തറയിൽ അക്രമം കാട്ടിയ രണ്ടു പേർ അറസ്റ്റിൽ. പാറമുകളിലെ ശിവാരാധനത്തറയ്ക്കു കേടുവരുത്തുകയും വിളക്കു സൂക്ഷിച്ചിരുന്ന ചില്ലുകൂട് അടിച്ചു തകർക്കുകയുമായിരുന്നു. സംഭവത്തിൽ കുര മുകളുവിള പടിഞ്ഞാറ്റതിൽ അഖിൽ(26), സുഹൃത്ത് പ്രജിൻ(20) എന്നിവരെ അറസ്റ്റ് ചെയ്തു. കഴിഞ്ഞ ദിവസം വൈകുന്നേരമായിരുന്നു സംഭവം. ക്ഷേത്രം ട്രസ്റ്റ് സെക്രട്ടറിയുടെ പരാതിയിൽ കൊട്ടാരക്കര പോലീസിൽ സ്ഥലത്തെത്തി പരിശോധന നടത്തിയിരുന്നു. തുടർന്ന് പോലീസ് നടത്തിയ അന്വേഷണത്തിലാണ് ഇരുവരെയും പോലീസ് അറസ്റ്റ് ചെയ്തത്. ഇവരെ കോടതിയിൽ ഹാജരാക്കി റിമാൻഡ് ചെയ്തു.

കെഎസ്ആർടിസി ഡിപ്പോയിൽ വെള്ളം കയറി

പുനലൂർ: കനത്ത മഴയിൽ കെഎസ്ആർടിസി ഡിപ്പോയിൽ വെള്ളം കയറി. ഡിപ്പോയ്ക്കുള്ളിലാണ് വെള്ളം കയറിയിട്ടുള്ളത്. കഴിഞ്ഞ ദിവസങ്ങളിൽ കിഴക്കൻ മേഖലയിൽ മഴ തോർന്നിട്ടില്ല. താഴ്ന്ന പ്രദേശമായ ഇവിടെ പലപ്പോഴും കനത്ത മഴയിൽ വെള്ളം കയറിയിട്ടുണ്ട്. മഴ ശക്തമായാൽ ഇവിടെ കൂടുതൽ വെള്ളം കയറാനുള്ള സാധ്യതയുണ്ട്.

സൗരോർജ വേലി തകർന്നു; ആദിവാസികളടക്കം നൂറുകണക്കിനു കുടുംബങ്ങൾ വന്യമൃഗ ഭീഷണിയിൽ

കുളത്തൂപ്പുഴ: ഒരു മാസം മുൻപ് കിഴക്കന്‍ മലയോര മേഖലയില്‍ ഉണ്ടായ ശക്തമായ കാറ്റിലും മഴയിലും തകർന്ന സൗരോർജ വേലി (ഹാങ്ങിങ് ഫെന്‍സിങ്) പ്രവർത്തന സജ്ജമാക്കാൻ അധികൃതർ അനാസ്ഥ കാട്ടുന്നത് മൂലം നൂറുകണക്കിനു കുടുംബങ്ങൾക്കുള്ള ഏക യാത്രമാര്‍ഗമായ അമ്പതേക്കര്‍ വന പാതയും അതുമായി ബന്ധപ്പെട്ട ആദിവാസി സങ്കേതങ്ങളടക്കമുള്ള നൂറുകണക്കിനു കുടുംബങ്ങൾ വന്യ മൃഗ ഭീഷണിയിലാണ്. പാതയോരത്ത് നിന്നിരുന്ന മരം കടപുഴകി വീണ് തകര്‍ന്ന സൗരോർജ വേലി പ്രവര്‍ത്തന സജ്ജമാക്കാന്‍ അധികൃതർ യാതൊരു നടപടിയും എടുക്കുന്നില്ലെന്നാണ് നാട്ടുകാരുടെ പരാതി. ഏതാനും മാസങ്ങള്‍ക്ക് മുൻപാണ് ത്രിതല പഞ്ചായത്തുകളുടെ സഹകണത്തോടെ വനാവരണം പദ്ധതിയിൽ ഉൾപ്പെടുത്തി അമ്പത്തിനാലു ലക്ഷം രൂപ മുടക്കി ഹാങ്ങിങ് ഫെന്‍സിങ് സ്ഥാപിക്കുന്നത്. കുളത്തൂപ്പുഴ ഗ്രാമപഞ്ചായത്തിലെ അമ്പലക്കടവ് മുതല്‍ അമ്പതേക്കര്‍ വരെ പാതയോരത്തോട് ചേർന്നായിരുന്നു പദ്ധതി നടപ്പിലാക്കിയിരുന്നത്.അമ്പതേക്കര്‍ ഗ്രാമത്തിലേക്കും വില്ലുമല, കുളമ്പി, രണ്ടാംമൈല്‍ തുടങ്ങിയ ആദിവാസി സങ്കേതങ്ങളിലക്കടക്കമുള്ള നൂറുകണക്കിനു കുടംബങ്ങള്‍ക്കുള്ള ഏക യാത്രമാർഗമാണ് അമ്പതേക്കര്‍ വന പാത എന്നതാണ് എടുത്ത് പറയേണ്ടത്. ഇക്കഴിഞ്ഞ ജൂണ്‍ മാസം ആദ്യവാരത്തില്‍ പ്രദേശത്ത് വീശിയടിച്ച കാറ്റില്‍ പാതയോരത്ത് നിന്നിരുന്ന കൂറ്റന്‍ അക്കേഷ്യ മരം കടപുഴകി പാതക്ക് കുറുകെ വീണു വൈദ്യുതി ലൈൻ തകരുകയായിരുന്നു. വൈദ്യുതി ലൈന്‍ തകര്‍ത്തുകൊണ്ട് അക്കേഷ്യ മരം വീണത് ഈ വേലിക്കു മുകളിലേക്കായിരുന്നു. ഇതോടെ വേലി സ്ഥാപിച്ചിരുന്ന ഇരുമ്പ് തൂണുകളും വൈദ്യുതി കടന്നുപോകുന്ന കമ്പികളും പൊട്ടി തകര്‍ന്നു. പ്രദേശത്തെ കുട്ടി വനത്തില്‍ അനകളുടെയും കാട്ടുപോത്തുകളുടെയും കാട്ടുപന്നിയടക്കമുളള മറ്റു മൃഗങ്ങളുടെയും നിരന്തര സാന്നിദ്ധ്യമുള്ളതിനാലും കഴിഞ്ഞ ദിവസങ്ങളില്‍ പൊട്ടി തകര്‍ന്ന സൗരോർജ വേലിക്ക് സമീപം കാട്ടാനക്കൂട്ടത്തെ നാട്ടുകാർ കാണുകയും ചെയ്തതോടെ പ്രദേശവാസികള്‍ ഒന്നടങ്കം ഭയപ്പാടിലാണ്. ഈ വഴി കടന്നു പോകുന്ന പാതയിൽ ഏത് സമയത്തും കാട്ടാന കൂട്ടത്തെയും കാട്ടുപോത്തിനെയും കാണാൻ കഴിയുന്നതാണ് ബൈക്ക് യാത്രക്കാരെയും സ്കൂളിലേക്ക് പോകുന്ന വിദ്യാർഥികളെയും ഭയപ്പെടുത്തുന്നത്. കാട്ടാനയുടെ ഉപദ്രവം ഭയന്ന് പകൽ സമയങ്ങളിലും പോലും ഒറ്റയ്ക്ക് സഞ്ചരിക്കുവാൻ നാട്ടുകാർക്ക് ഭയമാണ്.സൗരോർജ വേലി തകർന്നതോടെ ജനങ്ങൾക്ക് ബാക്കി ഉണ്ടായിരുന്ന സുരക്ഷിതത്വമാണ് നഷ്ടമായിരിക്കുന്നത്. വേലി സ്ഥാപിക്കാന്‍ മാത്രമാണ് തുക അനുവദിച്ചിട്ടുള്ളതെന്നും സൗരോർജ വേലിയുടെ തുടര്‍ സംരക്ഷണത്തിന് നിലവില്‍ പദ്ധതികളൊന്നുമില്ലെന്നും അധികൃതർ പറയുമ്പോൾ തീർത്തും ആശങ്കയിലായിരിക്കുന്നത് നാട്ടുകാരാണ്. വനാവരണം പദ്ധതി ഉദ്ഘാടനം ചെയ്ത വനം വകുപ്പിനോ, പദ്ധതിക്കായി തുക വകയിരുത്തിയ ത്രിതല പഞ്ചായത്തുകള്‍ക്കോ തുടര്‍ പ്രവര്‍ത്തനങ്ങള്‍ സംബന്ധിച്ച് യാതൊരു ഉത്തരവാദിത്വവും ഇല്ലെന്ന അവസ്ഥയാണ് ഉള്ളത്.ലക്ഷങ്ങള്‍ മുടക്കി കൊട്ടിഘോഷിച്ച് വന്യമൃഗങ്ങളിൽ നിന്ന് ഈ പ്രദേശത്തെ ജനത്തിനു സംരക്ഷണം ഒരുക്കിയെന്നു കൊട്ടിഘോഷിച്ചവരെ ഇപ്പോൾ കണികാണാനില്ലെന്നാണ് നാട്ടുകാർ പറയുന്നത്. തകർന്ന ഹാങ്ങിങ് ഫെന്‍സിങിന്‍റെ അറ്റകുറ്റപണിക്ക് ആരെ ബന്ധപ്പെടണമെന്നറിയാതെ കഷ്ടത്തിലായിരിക്കുകയാണ് നാട്ടുകാർ. പൊതുജനങ്ങളുടെ സുരക്ഷക്കെന്ന പേരു പറഞ്ഞ് നികുതി പണം ചിലവഴിക്കാനുള്ള മാർഗം മാത്രമായിരുന്നോ പദ്ധതിയെന്ന ചോദ്യമാണ് നാട്ടുകാർ ഒന്നടങ്കം ഇക്കാര്യത്തിൽ ഉന്നയിക്കുന്നത്.

60 ടണ്‍ നാടന്‍ മട്ടഅരി വിപണിയില്‍ ജില്ലാ പഞ്ചായത്തിന്‍റെ ‘കതിര്‍മണി’ കൃഷി 250 ഏക്കറിലേക്ക്

കൊല്ലം :തരിശിടങ്ങളില്‍ നെല്‍കൃഷിയുടെ സമൃദ്ധിവിളയിക്കുകയാണ് ജില്ലാ പഞ്ചായത്ത്. ‘കതിര്‍മണി’ പദ്ധതിക്ക് വയസ് രണ്ടാകുമ്പോള്‍ വിപണിയില്‍ നിറയുന്നത് 60 ടണ്‍ മട്ടഅരി. തരിശ്‌നെല്‍പ്പാടങ്ങളില്‍നിന്ന് മുണ്ടകന്‍ കൃഷിക്ക് അനുയോജ്യമായവ ഏറ്റെടുത്താണ് കൃഷി. കൃഷിയിടങ്ങള്‍ കണ്ടെത്തുന്നത് കൃഷിഭവനുകളാണ്. ഉദ്പാദിപ്പിക്കുന്ന നെല്ലിന് താങ്ങ് വില നല്‍കുന്നു. അരി സംഭരിച്ച് ജില്ലാ പഞ്ചായത്തിന്‍റെ ലേബലില്‍ ഗുണനിലവാരമുള്ള ഉല്‍പന്നമാക്കിമാറ്റിയാണ് വിപണയില്‍ എത്തിക്കുന്നത്. 325 രൂപയ്ക്ക് അഞ്ച് കിലോ വീതമുള്ള പാക്കറ്റുകളായാണ് വില്‍പന. ഉപോല്‍പ്പന്നങ്ങളായി പൊടിയരിയും തവിടും കൂടിയുണ്ട്. തനതു പ്ലാന്‍ ഫണ്ടുകളില്‍ നിന്ന് ഒരു കോടി രൂപ വിനിയോഗിച്ചാണ് പദ്ധതി നടപ്പാക്കുന്നത്. 2023-24ലായിരുന്നു ആദ്യഘട്ടം; ജനകീയാസൂത്രണ പദ്ധതിയിലൂടെ 25 കൃഷിഭവനുകള്‍ മുഖേന 350 ഏക്കര്‍ തരിശില്‍. സബ്സിഡിയായി ഹെക്ടറിന് 35,000 രൂപയും ഭൂവുടമകള്‍ക്ക് ഇന്‍സെന്‍റീവായി 5,000 രൂപയും നല്‍കി. കിലോയ്ക്ക് 28.20 രൂപ നല്‍കി നെല്ല് സംഭരിച്ചു. ഓയില്‍ പാം ഇന്ത്യ ലിമിറ്റഡിന്‍റെ വെച്ചൂരിലുള്ള മോഡേണ്‍ റൈസ് മില്ലില്‍ സംസ്‌കരിച്ച് 'കതിര്‍മണി' ബ്രാന്‍ഡില്‍ 60 ശതമാനം തവിട്കലര്‍ന്ന ഗുണമേന്മയുള്ള അരിയായി വിപണിയില്‍ എത്തിച്ചു. പാടശേഖരസമിതികള്‍, സ്വയംസഹായ സംഘങ്ങള്‍, കൃഷിക്കൂട്ടങ്ങള്‍, ഗ്രന്ഥശാല കൂട്ടായ്മകള്‍ എന്നിവ മുഖേനയാണ് കൃഷി നടത്തിയത്. 350 ടണ്‍ നെല്ല് ഉദ്പാദിപ്പിച്ചു. രണ്ടാം ഘട്ടത്തില്‍ (2024-25) 241.4 ഏക്കര്‍ തരിശ്‌നിലത്തില്‍ കൃഷി നടത്തി. തട്ടാര്‍ക്കോണം, ചെറിയേല, ചടയമംഗലം, തേവലക്കര പാടശേഖരങ്ങളില്‍ ജ്യോതി, ഉമ, ശ്രേയസ് നെല്ലിനങ്ങള്‍ കൃഷിചെയ്ത് 52 ടണ്‍ നെല്ല് സംഭരിച്ചു. ജില്ലാപഞ്ചായത്ത് ഓഫീസ് ഔട്ട്‌ലെറ്റ്,കുടുംബശ്രീഎക്കോ ഷോപ്പുകള്‍, കൃഷിഭവനുകള്‍, തെരഞ്ഞെടുക്കപ്പെട്ട സൂപ്പര്‍മാര്‍ക്കറ്റുകള്‍ വഴി കതിര്‍മണി നാടാകെയെത്തിച്ചു.മൂന്നാംഘട്ടത്തില്‍ (2025-26) പുതുതായി 250 ഏക്കറില്‍ വ്യാപിപ്പിക്കുന്ന കൃഷി സെപ്റ്റംബര്‍-ഒക്ടോബര്‍ മാസങ്ങളില്‍ ആരംഭിക്കും. തരിശായ 450 ഏക്കറില്‍ നെല്‍കൃഷി വ്യാപിപ്പിക്കാനാണ് പദ്ധതികാരണമായത്. തരിശു നിലങ്ങള്‍ കൃഷിയോഗ്യമാക്കുന്നതിനൊപ്പം കര്‍ഷകര്‍ക്ക് മികച്ച വരുമാനവും ഉറപ്പാക്കുകയാണ് പദ്ധതിയുടെ ലക്ഷ്യമെന്ന് ജില്ലാ പഞ്ചായത്ത് പ്രസിഡന്‍റ് ഡോ. പി.കെ.ഗോപന്‍ വ്യക്തമാക്കി.

തേവലക്കര സ്കൂൾ തുറന്നു : മിഥുന്‍റെ ഓർമകളിൽ വിതുമ്പി കൂട്ടുകാർ

കൊല്ലം: ഹ്രസ്വമായ ഇടവേളയ്ക്ക് ശേഷം തേവലക്കര ബോയ്സ് ഹൈസ്കൂൾ വീണ്ടും തുറന്നപ്പോൾ എട്ടാം ക്ലാസിലെ ബി-ഡിവിഷനായിരുന്നു ഇന്നലെ എല്ലാവരുടെയും ശ്രദ്ധാകേന്ദ്രം.പതിവുപോലെ അസംബ്ലി കഴിഞ്ഞ് ബെല്ലടിച്ചപ്പോൾ ഇവിടേയ്ക്ക് ക്ലാസ് ടീച്ചർ റൂബി എത്തി. ഹാജർ വിളി ആരംഭിച്ച് 12-ാമതായി മിഥുന്‍റെപേര് വിളിച്ചപ്പോൾ ശബ്ദം പുറത്ത് വരാത്ത വിധം ടീച്ചറുടെ കണ്ഠമിടറി.പ്രസന്‍റ് ടീച്ചർ എന്ന് പറയാൻ മിഥുൻ ഇല്ലായിരുന്നു. പിന്നീട് അൽപ്പനേരം നൊമ്പരപ്പെടുത്തുന്ന ശൂന്യതയായിരുന്നു ക്ലാസിലെങ്ങും.മിഥുൻ ഇനി ഒരിക്കലും തിരിച്ചുവരില്ല എന്ന തിരിച്ചറിവിൽ സഹപാഠികൾ പരസ്പരം നോക്കി മിഴി തുടച്ചു. ഇതുകണ്ട് ടീച്ചറും കണ്ണീരണിഞ്ഞു .മിഥുൻ സ്ഥിരമായി ഇരിക്കുന്ന ബഞ്ചിന് മുന്നിലെത്തി കൂട്ടുകാർ വിതുമ്പലടക്കാൻ കഴിയാതെ നിന്നത് നൊമ്പരക്കാഴ്ചയായി.മിഥുന്‍റെ ക്ലാസ് റൂമിന്‍റെ തൊട്ടടുത്ത മുറിയിലാണ് സ്കൂളിലെ എൻസിസി ഓഫീസ് പ്രവർത്തിക്കുന്നത്.അവിടെ നോട്ടീസ് ബോർഡിൽ പുതുതായി സെലക്ഷൻ കിട്ടിയ കേഡറ്റുകളിൽ 37-ാമതായാണ് മിഥുന്‍റെ പേര് രേഖപ്പെടുത്തിയിരിക്കുന്നത്. പക്ഷേ അത് കാണാൻ മിഥുനെ വിധി അനുവദിച്ചില്ല. എൻസിസിയിൽ ചേരുന്നതിന് വേണ്ടി മാത്രമാണ് വീടിന് സമീപത്തെ നൽപ്പരക്കുന്ന് ഹൈസ്കൂളിൽ ചേരാതെ ഈ കൊച്ചു മിടുക്കൻ തേവലക്കര സ്കൂളിൽ അഡ്മിഷനെടുത്തത്. സ്കൂൾ ഫുട്ബോൾ ടീമിൽ സെലക്ഷൻ കിട്ടിയതിന്‍റെ സന്തോഷത്തിലായിരുന്നു മിഥുൻ. രാജ്യസേവനത്തിനായി സൈനികൻ ആകണമെന്നായിരുന്നു മോഹം. ഇത് ബാക്കി വച്ചാണ് എല്ലാവരെയും തീരാവേദനയിലാക്കി മിഥുൻ നിത്യതയിലേക്ക് മടങ്ങിയത്. സ്കൂളിലെ സൈക്കിൾ ഷെഡിന് മുകളിൽ വീണ ചെരുപ്പ് എടുക്കാൻ ശ്രമിക്കവേ കഴിഞ്ഞ വ്യാഴാഴ്ചയാണ് ഷോക്കേറ്റ് മിഥുൻ മരിച്ചത്. മിഥുന്‍റെമരണം: കുറ്റകരമായ നരഹത്യ ചുമത്താന്‍ അന്വേഷണ സംഘം കൊല്ലം: തേവലക്കര ബോയ്സ് ഹൈസ്കൂളിൽ എട്ടാം ക്ലാസ് വിദ്യാർഥി മിഥുന്‍ ഷോക്കേറ്റ് മരിച്ച സംഭവത്തില്‍ കുറ്റകരമായ നരഹത്യ ചുമത്തുന്നതില്‍ നിയമോപദേശം തേടി അന്വേഷണ സംഘം. ഇത് സംബന്ധിച്ച് ജില്ലാ ഗവ.പ്ലീഡര്‍ക്ക് പോലീസ് ഉദ്യോഗസ്ഥർ കത്ത് നല്‍കി. അസ്വാഭാവിക മരണം സംബന്ധിച്ച വകുപ്പിലാണു പോലീസ് ആദ്യം കേസെടുത്തത്. എന്നാല്‍ സംഭവം വിവാദമാവുകയും പ്രതിഷേധം ശക്തമാവുകയും ചെയ്തതോടെ മനഃപൂര്‍വമല്ലാത്ത നരഹത്യ വകുപ്പ് ചുമത്തി കേസെടുക്കുകയായിരുന്നു. അതേസമയം, കേസില്‍ സ്‌കൂള്‍ മാനേജര്‍, ഹെഡ്മിസ്ട്രസ്, കെഎസ്ഇബി അസി. എന്‍ജിനീയര്‍ എന്നിവരേയും പ്രതി ചേര്‍ത്തിട്ടുണ്ട്. വൈദ്യുതി ബോര്‍ഡ് അസി. എന്‍ജിനിയറെ വിളിച്ചുവരുത്തി മൊഴിയെടുത്തു. മൈനാഗപ്പള്ളി പഞ്ചായത്ത് അസി. എന്‍ജിനിയര്‍ക്കും മൊഴി നൽകണമെന്ന് ആവശ്യപ്പെട്ട് അന്വേഷണ ഉദ്യോഗസ്ഥർ നോട്ടീസ് നല്‍കിയിട്ടുണ്ട്. നേരിട്ടും അല്ലാതെയും ബന്ധമുള്ളവരുടെയെല്ലാം മൊഴി രേഖപ്പെടുത്തിയ ശേഷമേ അന്തിമ പ്രതിപ്പട്ടിക തയാറാക്കുകയുള്ളൂ. മൂന്നു മാസത്തിനുള്ളില്‍ അന്വേഷണം പൂര്‍ത്തിയാക്കുമെന്ന് അന്വേഷണ ഉദ്യോഗസ്ഥർ പറഞ്ഞു.

വി.എസ്. അച്യുതാനന്ദനെ അധിക്ഷേപിച്ച് പോസ്റ്റിട്ട അധ്യാപകന്‍ അറസ്റ്റില്‍

കിളിമാനൂർ: അന്തരിച്ച മുന്‍ മുഖ്യമന്ത്രിയും മുതിര്‍ന്ന കമ്മ്യൂണിസ്റ്റ് നേതാവുമായ വി.എസ്. അച്യുതാനന്ദനെ അധിക്ഷേപിച്ചു പോസ്റ്റിട്ട നഗരൂർ പോലീസ് അറസ്റ്റ് ചെയ്തു. നഗരൂർ നെടുംപറമ്പ് സ്വദേശി വി. അനൂപാണ് പിടിയിലായത്. ആറ്റിങ്ങൽ ഗവ. ബോയ്സ് ഹയർ സെക്കൻഡറി സ്കൂളിലെ അധ്യാപകാണ് അനൂപ്. വിഎസിന്‍റെ മരണവാർത്ത അറിഞ്ഞശേഷം അനൂപ് വാട്സാപ്പിൽ അധിക്ഷേപ പോസ്റ്റിടുകയായിരുന്നു. ഇതിനെതിരേ വ്യാപക പ്രതിഷേധം ഉയർന്നിട്ടുണ്ട്. ഇയാളുടെ മൊഴി രേഖപ്പെടുത്തിയതിനുശേഷം തുടർ നടപടികളിലേക്ക് കടക്കും. അനൂപിനെതിരേ വിദ്യാഭ്യാസ വകുപ്പ് മാതൃകാപരമായ നടപടി സ്വീകരിക്കണമെന്നാവശ്യപ്പെട്ട് സുപ്രീം കോടതി അഭിഭാഷകനും സേവ് നിമിഷപ്രിയ ആക്ഷന്‍ കൗണ്‍സില്‍ നിയമോപദേഷ്ടാവുമായ അഡ്വ. കെ.ആര്‍. സുഭാഷ് ചന്ദ്രന്‍ ഫേസ്ബുക്കിൽ കുറിച്ചു.

യാത്രാസൗകര്യം ഉറപ്പാക്കുന്നതിൽ മുൻഗണന: മന്ത്രി കെ.എൻ. ബാലഗോപാൽ

കൊല്ലം: റോഡും പാലവും നിർമിക്കുന്നതിനൊപ്പം യാത്രാസൗകര്യവും ഉറപ്പാക്കുന്നതിൽ സർക്കാർ പ്രതിജ്ഞാബദ്ധമാണെന്ന് മന്ത്രി കെ. എൻ. ബാലഗോപാൽ. അറക്കടവ് പാലം വഴിയുള്ള കെഎസ്ആർടിസി ബസ് സർവീസ് ഫ്ലാഗ് ഓഫ് നിർവഹിക്കുകയായിരുന്നു മന്ത്രി. കൊട്ടാരക്കരയിൽ നിന്നും വെളിയം പടിഞ്ഞാട്ടിൻകര വഴി കൊല്ലത്തേക്കാണ് ബസ് സർവീസ് നടത്തുക. കൊല്ലം കളക്ടറേറ്റിലേക്ക്‌ ഉദ്യോഗസ്ഥർക്കും ആവശ്യക്കാർക്കും എത്താൻ ഇത് ഏറെ സഹായിക്കും. വൈകുന്നേരം തിരിച്ചും കളക്ടറേറ്റിൽ നിന്ന് ബസ് സർവീസ് ഉണ്ട്. കൊട്ടാരക്കര - എഴുകോൺ - കരീപ്ര ബസ് സർവീസ് ഉടൻ പുനരാരംഭിക്കും. ഐടിഐയിലെ പുതിയ കെട്ടിടത്തിന്റെ ഡിസൈൻ അന്തിമമാക്കുന്ന നടപടി അവസാനഘട്ടത്തിലാണെന്നും വിവിധ പദ്ധതികൾക്കായി വെളിയം ജംഗ്ഷനിൽ സ്ഥലം ലഭ്യമാക്കാൻ ശ്രമം നടക്കുന്നതായും മന്ത്രി വ്യക്തമാക്കി. വെളിയം പഞ്ചായത്ത് വൈസ് പ്രസിഡന്‍റ് ജയരഘുനാഥ് അധ്യക്ഷയായി. ജില്ലാ പഞ്ചായത്ത് അംഗം ഷൈൻ കുമാർ, സ്ഥിരംസമിതി അധ്യക്ഷർ, രാഷ്ട്രീയപാർട്ടി പ്രതിനിധികൾ തുടങ്ങിയവർ പങ്കെടുത്തു. photo: അറക്കടവ് പാലം വഴിയുള്ള കെഎസ്ആർടിസി ബസ് സർവീസ് മന്ത്രി കെ. എൻ. ബാലഗോപാൽ ഫ്ലാഗ് ഓഫ് ചെയ്യുന്നു .

‘ഒരു വയറൂട്ടാം’ പദ്ധതിക്ക് കിഴക്കേക്കര സെന്‍റ് മേരീസ് സ്കൂളിൽ തുടക്കം

കിഴക്കേക്കര: കിഴക്കേക്കര സെന്‍റ് മേരീസ് ഹയർ സെക്കൻഡറി സ്കൂളിലെ എസ്പിസി കേഡറ്റുകളുടെ നേതൃത്വത്തിൽ ഒരു വയറൂട്ടാം പദ്ധതിക്ക് തുടക്കം കുറിച്ചു. സ്കൂൾ ബർസാർ ഫാ. ഗീവർഗീസ് എഴിയത്തി െന്‍റ അധ്യക്ഷതയിൽ ചേർന്ന യോഗം പിങ്ക് പോലീസ് എ എസ് ഐ എൽ. ജ്യോതി ഉദ്ഘാടനം ചെയ്തു. കുട്ടികൾ ശേഖരിച്ച പൊതിച്ചോറുകൾ കോക്കാട് അമ്മ മഠത്തിന് കൈമാറി. കുട്ടി പോലീസുകാരുടെ നന്മയെ അഭിനന്ദിച്ചുകൊണ്ട് ടി. ടി.പ്രിൻസിപ്പൽ ജോമി,ടി.ഹെഡ്മാസ്റ്റർ രാജു, സ്റ്റാഫ് സെക്രട്ടറി ബിനിൽ ജോൺ, പ്രോഗ്രാം കോഡിനേറ്റർ ഫാ. ജോർജ് ഭട്ടശ്ശേരിൽ, ഡി.ഐ മാത്യു വർഗീസ് എന്നിവർ പ്രസംഗിച്ചു. സി.പി.ഒ മാരായ ഷെർലി കെ, രാജീവ് രാജൻ എന്നിവർ നേതൃത്വം നൽകി.

‘ചന്ദ്രയാൻ പേടകം’സ്‌കൂൾ മുറ്റത്ത്

കുണ്ടറ : ചാന്ദ്രദിനത്തോടനുബന്ധിച്ചു കുണ്ടറ എസ് കെ വി എൽ പി സ്‌കൂളിൽ ചന്ദ്രയാൻ പേടകം അപ്പോളോ 11 മോഡൽ ഇറങ്ങി. പേടകത്തിൽ നിന്നും നീൽ ആംസ്ട്രോംഗ് സ്‌കൂൾ മുറ്റത്തേക്കെത്തി. സ്കൂളിലെ വിദ്യാർഥികൾക്ക് ഇതൊരു പുതിയ അനുഭവമായി. ചാന്ദ്രദിനത്തി െന്‍റ പ്രാധാന്യം മനസിലാക്കുന്നതിനായി 'ചന്ദ്ര െന്‍റ കഥ പറച്ചിൽ' എന്ന വിഷയത്തിൽ അധ്യാപകനായ അജേഷ് മാധവൻ വിദ്യാർഥികൾക്കായി ഇത് സംബന്ധിച്ച ക്ലാസ് എടുത്തു. വീഡിയോ പ്രദർശനത്തിലൂടെ ചന്ദ്രനെക്കുറിച്ചും മറ്റ് ഗ്രഹങ്ങളെക്കുറിച്ചുമുള്ള അറിവുകൾ അദ്ദേഹം പകർന്നു നൽകി. ശേഷം വിദ്യാർഥികളുടെ സ്ക്രിപ്റ്റ്, പാട്ടുകൾ, പ്രസംഗം, നീൽ ആംസ്ടോങ്ങിന്‍റ ഇന്‍റർവ്യു എന്നിവ നടന്നു. പോസ്റ്റർ പ്രദർശനം, പേപ്പർ റോക്കറ്റ് പ്രദർശനം എന്നിവയും ഉണ്ടായിരുന്നു. സ്കൂൾ മാനേജർ ബി. രമാദേവി, സ്കൂൾ ഹെഡ്മിസ്ട്രസ് റ്റി. സി. ബീന, മറ്റ് അധ്യാപകർ രക്ഷിതാക്കൾ തുടങ്ങിയവർ പരിപാടിയിൽ പങ്കാളികളായി.

അതുല്യയുടെ മരണം: അന്വേഷണ ചുമതല എഎസ്പി അഞ്ജലി ഭാവനയ്ക്ക്

ചവറ : ഷാർജയിൽ ഫ്ലാറ്റിൽ തൂങ്ങിമരിച്ച നിലയിൽ കണ്ടെത്തിയ അതുല്യയുടെ മരണവുമായി ബന്ധപ്പെട്ട് തുടർ അന്വേഷണത്തി െന്‍റചുമതല കരുനാഗപ്പള്ളി എഎസ്പി അഞ്ജലി ഭാവനക്ക് കൈമാറി. സംഭവവുമായി ബന്ധപ്പെട്ട് ഭർത്താവ് സതീഷിനെ നാട്ടിലെത്തിക്കാൻ പ്രത്യേക അന്വേഷണസംഘം ശ്രമം നടത്തുന്നുണ്ട്. ഭർത്താവ് സതീഷ് ശങ്കർ ഉപദ്രവിക്കുന്ന ദൃശ്യങ്ങൾ പകർത്തിയ അതുല്യയുടെ മൊബൈൽ നാട്ടിൽ കൊണ്ടുവന്ന് പരിശോധനയ്ക്ക് വിധേയമാക്കും. നാട്ടിൽവച്ച് അതുല്യ നേരിട്ട പീഡനങ്ങളും പരാതികളും കോടതിയിലെ കേസുകളും പരിശോധിക്കും. ഷാർജ പോലീസിന്‍റെ നടപടിക്രമങ്ങൾ പൂർത്തിയാക്കിയശേഷം ഭർത്താവിനെ നാട്ടിൽ എത്തിച്ച് ചോദ്യം ചെയ്യുമെന്നാണ് പോലീസ് നൽകുന്ന സൂചന. ഷാർജയിൽ ഭർത്താവിനൊപ്പം താമസിച്ചു വന്ന ഫ്ലാറ്റിൽ മരിച്ച നിലയിൽ കണ്ടെത്തിയ തേവലക്കര കോയിവിള സൗത്ത് അതുല്യ ഭവനിൽ ടി.അതുല്യ ശേഖറിൻ്റെ മരണത്തിൽ വിശദമായി അന്വേഷണം പോസ്റ്റ്മോർട്ടം റിപ്പോർട്ട് കിട്ടിയശേഷം ഊർജിതമാക്കും. കരുനാഗപ്പള്ളി എ എസ് പി അഞ്ജലി ഭാവനയുടെ മേൽനോട്ടത്തിൽ ചവറ തെക്കുംഭാഗം പോലീസ് ഇൻസ്പെക്ടർ എസ്.ശ്രീകുമാർ അടങ്ങുന്ന എട്ടംഗ പ്രത്യേക അന്വേഷണ സംഘത്തെയാണ് ചുമതല പെടുത്തിയിട്ടുള്ളത്. ഷാർജയിലുള്ള മൃതദേഹത്തി െ ന്‍റ പോസ്റ്റ്മോർട്ട നടപടികൾ പൂർത്തിയാക്കി റിപ്പോർട്ട് പരിശോധിച്ചായിരിക്കും തുടർ അന്വേഷണം. അതുല്യയുടെ പിറന്നാൾ ദിനത്തിൽ കേട്ട മകളുടെ വിയോഗ വാർത്തയുടെ ഞെട്ടലി െന്‍റ ആഘാതത്തിൽ നിന്നും മാതാപിതാക്കളും ബന്ധുക്കളും നാട്ടുകാരും ഇതുവരെ മുക്തരായിട്ടില്ല.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]