ADVERTISEMENT

ADVERTISEMENT

ഹരിത സന്ദേശ സൈക്കിൾ റാലി

ഹരിപ്പാട്: നഗരസഭ കേരള ഖരമാലിന്യ പരിപാലന പദ്ധതിയിൽ മാലിന്യമുക്ത നഗരം എന്ന സന്ദേശവുമായി സൈക്കിൾ റാലി സംഘടിപ്പിച്ചു. നഗരസഭാ ചെയർമാൻ കെ.കെ. രാമകൃഷ്ണൻ ഉദ്ഘാടനം ചെയ്തു.

നഗരസഭ ഓഫീസ് പരിസരത്ത് നിന്നാരംഭിച്ച റാലി പതിമുഖം ജംഗ്ഷൻ, വാത്തുകുളങ്ങര, വെള്ളാന ജംഗ്ഷൻ എന്നിവ വഴി സഞ്ചരിച്ചു നഗരസഭ ഓഫീസിൽ തിരിച്ചെത്തി സമാപിച്ചു. ഹരിപ്പാട് ഗവ. ഗേൾസ് ഹയർ സെക്കൻഡറി സ്‌കൂളിലെ എസ്പിസി, എൻഎസ്എസ്, എൻസി സി കേഡറ്റുകളായ 110 കുട്ടികൾ ഉൾപ്പെടെ 150ൽപരം ആളുകൾ പങ്കെടുത്തു.

സ്ഥിരം സമിതി അധ്യക്ഷന്മാരായ എസ്. നാഗദാസ്, മിനി സാറമ്മ, എസ്. കൃഷ്ണകുമാർ, നിർമലകുമാരി, ഹെൽത്ത് ഇൻസ്പെക്ടർ ഷാജഹാൻ, ഗവ. ഗേൾസ് ഹയർ സെക്കൻഡറി സ്കൂൾ പ്രിൻസിപ്പൽ റഫീഖ് എന്നിവർ പങ്കെടുത്തു.

ADVERTISEMENT

"അഹങ്കരിക്കരുത്, പാര്‍ട്ടിയില്‍ ഈഗോയിസം പാടില്ല' ഡോസ് കുറയ്ക്കാതെ ജി. സുധാകരൻ

ആലപ്പുഴ: സംസ്ഥാന സര്‍ക്കാരിനെ പരോക്ഷമായി വീണ്ടും വിമര്‍ശിച്ച് മുന്‍ മന്ത്രി ജി. സുധാകരന്‍. കുറവുകളില്ലെന്നു പറഞ്ഞ് അഹങ്കരിക്കരുത്. കമ്യൂണിസ്റ്റ് പാര്‍ട്ടിയില്‍ ഈഗോയിസം ഒട്ടും പാടില്ലെന്നാണെന്ന് ജി. സുധാകരന്‍ പറഞ്ഞു. ഓള്‍ കേരള ഫോട്ടോഗ്രാഫേഴ്സ് അസോസിയേഷന്‍ മേഖല സമ്മേളനം ഉദ്ഘാടനം ചെയ്യുകയായിരുന്നു സുധാകരന്‍. കേരളം വളരെയേറെ വികാസം പ്രാപിച്ച പുരോഗമിച്ച സംസ്ഥാനമാണ്. അതെല്ലാം ശരിയായ കാര്യങ്ങളാണ്. പക്ഷേ, നമുക്ക് കുറവൊന്നുമില്ല എന്നു നാം അഹങ്കരിക്കരുത്. അതാണ് പ്രശ്നം. നമ്മള്‍ പെര്‍ഫെക്ടാണ് എന്ന് പറയുന്നതാണ് പുതിയ രീതി. കുറവുണ്ടെന്നു പറഞ്ഞാല്‍ അതു കുഴപ്പമായി. അതിനെ അഹംഭാവം എന്നാണ് പറയുന്നത്. താനെന്ന ഭാവമാണത്. കമ്യൂണിസ്റ്റ് പാര്‍ട്ടിയില്‍ ഈഗോയിസം ഒട്ടും പാടില്ലെന്നാണ്. താനെന്ന ഭാവം ഒട്ടും പാടില്ലെന്നു പറയുന്ന പ്രസ്ഥാനമാണ് കമ്യൂണിസ്റ്റ് പാര്‍ട്ടി. നമ്മുടെ കുറവുകളെ കുറിച്ച്കൂടി മനസിലാക്കണമെന്നും ജി. സുധാകരന്‍ പറഞ്ഞു. അടുക്കാതെ പാര്‍ട്ടിയുമായി ഇടഞ്ഞുനില്‍ക്കുന്ന ജി. സുധാകരനെ അനുനയിപ്പിക്കാന്‍ നേതാക്കള്‍ ശ്രമിക്കുന്നുണ്ടെങ്കിലും അടുക്കാത്ത മട്ടിലാണ് നേതാവ്. പ്രായത്തിന്‍റെ പേരില്‍ പാര്‍ട്ടി ചുമതലകളില്‍നിന്ന് ഒഴിവാക്കപ്പെട്ടത് മുതല്‍ സിപിഎം നേതൃത്വത്തിനെതിരെ സുധാകരന്‍ പരസ്യ പ്രതികരണം നടത്തിയിരുന്നു. ഏറെ നാളായി സുധാകരനെ പാര്‍ട്ടി പരിപാടികളില്‍നിന്ന് ജില്ലാ നേതൃത്വം ഒഴിവാക്കുകകൂടി ചെയ്തപ്പോൾ പാര്‍ട്ടിയോട് അകലം പാലിക്കുകയാണ് അദ്ദേഹം. പലപ്പോഴായി സര്‍ക്കാരിനെയും പാര്‍ട്ടിയെയും പ്രതിസന്ധിയിലാക്കും വിധം പ്രതികരണങ്ങളും അദ്ദേഹം നടത്തി. ജി. സുധാകരന്‍ പാര്‍ട്ടിയോട് ചേര്‍ന്ന് പോകണമെന്ന സംസ്ഥാന സെക്രട്ടറിയേറ്റ് അംഗം കൂടിയായ മന്ത്രി സജി ചെറിയാന്‍റെ പ്രസ്താവനയോടു കടുത്ത ഭാഷയിലാണ് അദ്ദേഹം പ്രതികരിച്ചത്. ക്ഷണം ലഭിച്ചിട്ടും കുട്ടനാട്ടില്‍ കഴിഞ്ഞ ദിവസം നടന്ന വി.എസ്. അച്യുതാനന്ദന്‍ സ്മാരക പുരസ്‌കാരദാന ചടങ്ങില്‍നിന്നു പോലും അദ്ദേഹം വിട്ടുനിന്നിരുന്നു. അച്ചടക്ക നടപടി മുതിര്‍ന്ന നേതാവായ ജി. സുധാകരനു പാര്‍ട്ടി അച്ചടക്ക നടപടികള്‍ പുതുതല്ല. താക്കീത്, ശാസന, പരസ്യ ശാസന, തരംതാഴ്ത്തല്‍, സസ്‌പെന്‍ഷന്‍, അംഗത്വത്തില്‍നിന്ന് പുറത്താക്കല്‍ എന്നിങ്ങനെയാണ് സിപിഎമ്മിന്‍റെ അച്ചടക്ക നടപടിയുടെ ക്രമം. ഇതില്‍ പരസ്യ ശാസനയും തരംതാഴ്ത്തലും സുധാകരന്‍ നേരിട്ടുകഴിഞ്ഞു. രണ്ടു തവണയും പാര്‍ട്ടിക്കെതിരേ പ്രവര്‍ത്തിച്ചെന്ന ആരോപണം ഉന്നയിച്ചായിരുന്നു നടപടി. 2002ല്‍ പാര്‍ട്ടി പിടിക്കാന്‍ നടത്തിയ ശ്രമങ്ങളുടെ ഭാഗമായി വിഭാഗീയത ആരോപിച്ച് സംസ്ഥാന കമ്മിറ്റിയില്‍നിന്നു ജില്ലാ കമ്മിറ്റിയിലേക്കു തരംതാഴ്ത്തുകയായിരുന്നു. 2021ലാണ് സുധാകരനെ പാര്‍ട്ടി പരസ്യമായി ശാസിച്ചത്. തുടര്‍ഭരണം ലക്ഷ്യമാക്കി മുന്നോട്ടു പോകുമ്പോള്‍ സംഘടനാവിരുദ്ധ പ്രവര്‍ത്തനങ്ങള്‍ അംഗീകരിക്കാന്‍ കഴിയില്ലെന്ന മുന്നറിയിപ്പാണ് പരസ്യശാസനയിലൂടെ പാര്‍ട്ടി ജി. സുധാകരനു നല്‍കിയത്. ജി. സുധാകരനും പാര്‍ലമെന്‍ററി വ്യാമോഹം ഉണ്ടായെന്നും തെറ്റു തിരുത്തുന്നതിന്‍റെ ഭാഗമായി സുധാകരനെ പരസ്യമായി ശാസിക്കാന്‍ സംസ്ഥാന കമ്മിറ്റി തീരുമാനിക്കുയാണെന്നും പാര്‍ട്ടി പ്രഖ്യാപിച്ചിരുന്നു. തെരഞ്ഞെടുപ്പില്‍ സ്വന്തം തട്ടകത്തില്‍ പകരക്കാരനായി പാര്‍ട്ടി കണ്ടെത്തിയ എച്ച്. സലാമിനെ പിന്തുണച്ചില്ല, മതിയായ സാന്പത്തിക സഹായം ലഭ്യമാക്കാന്‍ സഹായിച്ചില്ല, സലാമിനെതിരേ നടന്ന പ്രചാരണങ്ങളില്‍ മൗനം തുടങ്ങിയ ആരോപണങ്ങളാണ് സുധാകരനെതിരേ ഉണ്ടായിരുന്നത്.

എൻ. ദേവകിയമ്മയ്ക്ക് ആയിരങ്ങൾ അന്തിമോപചാരം അർപ്പിച്ചു

മാന്നാർ: കോൺഗ്രസ് നേതാവും എഐസിസി വര്‍ക്കിംഗ്‌ കമ്മിറ്റിയംഗവുമായ രമേശ് ചെന്നിത്തല എംഎൽഎയുടെ മാതാവ് എൻ. ദേവകിയമ്മക്ക് ആയിരങ്ങൾ അന്ത്യാഞ്ജലി അർപ്പിച്ചു. ജാതി, മത, രാഷ്ട്രീയ ഭേദമന്യേ ജീവിതത്തിന്‍റെ നാനാതുറകളിൽപ്പെട്ട ആയിരങ്ങളാണ് ദേവകിയമ്മക്ക് അന്തിമോപചാരം അർപ്പിക്കാനായി ചെന്നിത്തലയിലേക്ക് ഒഴുകിയെത്തിയത്. കേന്ദ്രമന്ത്രി ജോർജ് കുര്യൻ, പ്രതിപക്ഷ നേതാവ് വി.ഡി. സതീശൻ, മന്ത്രിമാരായ കെ.എൻ. ബാലഗോപാൽ, സജി ചെറിയാൻ, റോഷി അഗസ്റ്റിൻ, ഫോക്‌ലോർ അക്കാദമി ചെയർമാൻ ഒ.എസ്. ഉണ്ണികൃഷ്ണൻ, പാർലമെന്‍റംഗങ്ങളായ കെ.സി. വേണുഗോപാൽ, കെ. സുധാകരൻ, കൊടിക്കുന്നിൽ സുരേഷ് എം പി, എൻ.കെ. പ്രേമചന്ദ്രൻ, ആന്‍റോ ആന്‍റണി, ഫ്രാൻസിസ് ജോർജ്, ഡീൻ കുര്യാക്കോസ്, എം.കെ. രാഘവൻ, ജേബി മേത്തർ, കേരള കോൺഗ്രസ് (എം) ചെയർമാൻ ജോസ് കെ. മാണി, എംഎൽഎമാരായ തിരുവഞ്ചൂർ രാധാകൃഷ്ണൻ, ഉമാ തോമസ്, ചാണ്ടി ഉമ്മൻ, എച്ച്. സലാം, അൻവർ എം. സാദത്ത്, അനൂപ് ജേക്കബ്, പി.സി. വിഷ്ണുനാഥ്, സി.എ. അരുൺകുമാർ, മുൻ കേന്ദ്രമന്ത്രിമാരായ പി.സി. തോമസ്, പി.ജെ. കുര്യൻ, മുൻ മന്ത്രി വി.എസ്. ശിവകുമാർ, ആർഎസ്പി സംസ്ഥാന സെക്രട്ടറി ഷിബു ബേബി ജോൺ, മുൻ മന്ത്രി ജി. സുധാകരൻ, എസ്എൻഡിപി യോഗം വൈസ് പ്രസിഡന്‍റ് തുഷാർ വെള്ളാപ്പള്ളി, വൈക്കം വിശ്വൻ, സി.പി. ജോൺ, ജോണി നെല്ലൂർ, ബിജെപി നേതാക്കളായ പി.സി. ജോർജ്, അഡ്വ. ഷോൺ ജോർജ്, സന്ദീപ് വചസ്പതി, എം.വി. ഗോപകുമാർ, ജി. ജയദേവ്, സിപിഐ നേതാക്കളായ ടി.ജെ. ആഞ്ചലോസ്, എസ്. സോളമൻ, ജി. ഹരികുമാർ, ഗാന്ധിഭവൻഡയറക്ടർ പുനലൂർ സോമരാജൻ, സുരേഷ് കുറുപ്പ്, യൂത്ത് കോൺഗ്രസ് സംസ്ഥാന പ്രസിഡന്‍റ് ഒ.ജെ. ജനീഷ്, അബിൻ വർക്കി, അരിത ബാബു, കെപിസിസി ഭാരവാഹികളായ എം.ലിജു, അഡ്വ.എൻ. ഷൈലാജ്, വി.ടി. ബലറാം, നിഷാ സോമൻ, കെ.പി.ശ്രീകുമാർ, അഡ്വ.എബി കുര്യാക്കോസ്, പഴകുളം മധു, അഡ്വ. ബിന്ദു കൃഷ്ണാ, ഡി.സി.സി പ്രസിഡന്‍റുമാരായ ബി. ബാബുപ്രസാദ്, പ്രഫ. സതീഷ് കൊച്ചുപറമ്പിൽ, കെപിസിസി അംഗങ്ങളായ മാന്നാർ അബ്ദുൽ ലത്തീഫ്, രാധേഷ് കണ്ണന്നൂർ, അഖിലേന്ത്യാ സംയുക്ത കിസാൻസഭാ ദേശീയ സമിതിയംഗം പി.എൻ. നെടുവേലി തുടങ്ങിയവർ അന്തിമോപചാരങ്ങൾ അർപ്പിച്ചു. ദേവകിയമ്മയുടെ മൃതദേഹം ചെന്നിത്തല - തൃപ്പെരുന്തുറയിലെ കോട്ടൂർ കിഴക്കേതിൽ കുടുംബ വളപ്പിൽ സംസ്കരിച്ചു.

തുറവൂർ മഹാക്ഷേത്രോത്സവത്തിനിടയിൽ പോലീസിനെ ആക്രമിച്ച പ്രതികൾ റിമാന്‍ഡില്‍

ആലപ്പുഴ: തുറവൂര്‍ മഹാക്ഷേത്രത്തിലെ ഉത്സവത്തിനിടെ പോലീസുകാര്‍ക്കു നേരെയുണ്ടായ ആക്രമണത്തില്‍ അഞ്ചു പേരെ പോ ലീസ് അറസ്റ്റ് ചെയ്തു. മദ്യപിച്ചെത്തി സംഘര്‍ഷമുണ്ടാക്കിയ പ്രതികളെ തടയാന്‍ ശ്രമിച്ച പോലീസുകാരെയാണ് പ്രതികള്‍ ആക്രമിച്ചത്. യുവാക്കള്‍ സംഘം ചേര്‍ന്ന് പോലീസിനെ വളയുകയും ആക്രമിക്കുകയുമായിരുന്നു. ഡ്യൂട്ടിയിലുണ്ടായിരുന്ന രണ്ട് ഉദ്യോഗസ്ഥര്‍ക്കാണ് പരിക്കേറ്റത്. പുളിങ്കുന്ന് സ്റ്റേഷനിലെ പോലീസുകാരന്‍ ഹസീര്‍ ഷാ (37), ചേര്‍ത്തല സ്റ്റേഷനിലെ പോലീസുകാരന്‍ സുനില്‍ (35) എന്നിവര്‍ക്കാണ് പരിക്കേറ്റത്. തിങ്കളാഴ്ച രാത്രി 10-നായിരുന്നു സംഭവം നടന്നത്. പിന്നീട്, കുടുതല്‍ പോലീസുകാരെത്തി പ്രതികളെ അറസ്റ്റ് ചെയ്തു. വളമംഗലം സ്വദേശികളായ രാമചന്ദ്രന്‍ (26), രഞ്ജിത്ത് (28), തൈക്കാട്ടുശേരി സ്വദേശികളായ അഖില്‍ (28), ശ്യാം (32), രാഹുല്‍ സാബു (26) എന്നിവരാണ് അറസ്റ്റിലായത്. സംഭവശേഷം കടന്നുകളഞ്ഞ മുഖ്യപ്രതിയായ രഞ്ജിത്തിനെ പിന്നീട് പോലീസ് പിടികൂടുകയായിരുന്നു. കോടതിയില്‍ ഹാജരാക്കിയ പ്രതികളെ റിമാന്‍ഡ്് ചെയ്തു.

കേന്ദ്ര കൃഷി യോജന പദ്ധതിയിൽ ആലപ്പുഴയെ ഉൾപ്പെടുത്തണം: തുഷാർ

മങ്കൊമ്പ്: കേന്ദ്ര സർക്കാരിന്‍റെ പ്രധാനമന്ത്രി ജൻ ധാന്യാ കൃഷി യോജന പദ്ധതിയിൽ ആലപ്പുഴ ജില്ലയെ ഉൾപ്പെടുത്തണമെന്ന് കേന്ദ്രസർക്കാരിനോട് ആവശ്യപ്പെടുമെന്ന് എൻഡിഎ അധ്യക്ഷൻ തുഷാർ വെള്ളാപ്പള്ളി. കുട്ടനാടിനായി പ്രത്യേക പാക്കേജ് സമർപ്പിക്കുമെന്നും ഡിസാസ്റ്റർ മാനേജ്‌മെന്‍റിന്‍റെ പരിധിയിൽ ഉൾപ്പെടുത്തി ഒറ്റ ഏജൻസിയിലൂടെ കൂട്ടനാടിന്‍റെ പുനരുജ്ജീവന പദ്ധതികൾക്ക് രൂപം നൽകി നടപ്പിലാക്കുന്നതിനുള്ള ശ്രമങ്ങൾ നടത്തും. എൻഡിഎ അധ്യക്ഷൻ രാജീവ് ചന്ദ്രശേഖറിനോപ്പം ഈ മാസം കൃഷിമന്ത്രിയെ നേരിൽക്കാണുമെന്നും അദ്ദേഹം പറഞ്ഞു. കുട്ടനാട്ടിൽ ത്രിതല പഞ്ചായത്ത് തെരഞ്ഞെടുപ്പിൽ ബിഡിജെഎസ് സ്ഥാനാര്‍ഥി നിർണയത്തിൽ കർഷകർക്ക് പ്രഥമ പരിഗണ നൽകും. കുട്ടനാട്ടിലെ നെൽകർഷകർ അനുഭവിക്കുന്ന ദുരിതങ്ങൾ കേന്ദ്ര കൃഷിവകുപ്പ് മന്ത്രിയുടെ ശ്രദ്ധയിൽപ്പെടുത്തുന്നതിനായി കുട്ടനാട്ടിലെ നെൽകർഷകരേയും പാടശേഖരസമിതി ഭാരവാഹികളെയും നേരിൽക്കണ്ട് ചർച്ച നടത്തി. രണ്ടാംകൃഷി നടക്കുന്നതടക്കമുള്ള വിവിധ പാടശേഖരങ്ങളിലും കായൽ നിലങ്ങളിലും തുഷാർ സന്ദർശനം നടത്തി.

ലോട്ടറിക്കടയിലെ മോഷണം: പോലീസ് അന്വേഷണം ഊര്‍ജിതമാക്കി

ചേർത്തല: നഗരത്തിലെ ലോട്ടറി ടിക്കറ്റ് വിൽപ്പനശാലയിൽനിന്ന് 2.16 ലക്ഷം രൂപയുടെ ലോട്ടറി ടിക്കറ്റും പണവും നഷ്ടപ്പെട്ട കേസിൽ പോലീസ് അന്വേഷണം ഊർജിതമാക്കി. നഗരത്തിലെ വിവിധ പ്രദേശങ്ങളിലെ സിസിടി വി കേന്ദ്രീകരിച്ചാണ് പോലീസ് അന്വേഷണം നടക്കുന്നത്. പോലീസ് നായ സഞ്ചരിച്ച വഴികളിലെയും സമീപത്തെ കടകളിലെയും കാമറകൾ പോലീസ് ഇന്നലെ പരിശോധിച്ചു. വിരലടയാള വിദഗ്ധർ നൽകിയ വിവരത്തിന്‍റെ അടിസ്ഥാനത്തിലും പോലീസ് പരിശോധന ആരംഭിച്ചിട്ടുണ്ട്. ചേർത്തല ദേവീക്ഷേത്രത്തിന് തെക്കുവശം കണിച്ചുകുളങ്ങര പള്ളിക്കാവുവെളി ലതാബാബുവിന്‍റെ ഉടമസ്ഥതയിൽ പ്രവർത്തിക്കുന്ന ബ്രദേഴ്സ് ലോട്ടറി ടിക്കറ്റ് വിൽപ്പനശാലയിൽ തിങ്കളാഴ്ച പുലർച്ചെയാണ് മോഷണം നടന്നത്. സമീപത്തെ വീടിന്‍റെ ഗേറ്റ് ചാടിക്കടന്ന് കടയുടെ മതിൽക്കെട്ടിനുള്ളിൽ പ്രവേശിച്ച മോഷ്ടാവ് ജനൽപ്പാളി തുറന്ന് കമ്പി അറ ത്തുമാറ്റിയശേഷം കമ്പിപ്പാര ഉപയോഗിച്ച് ഗ്രിൽ തകർത്ത് അകത്തുകടന്നാണ് മോഷണം നടത്തിയത്. മൂന്നു ദിവസത്തെ 5143 ടിക്കറ്റുകളും പൂജ ബംമ്പറിന്‍റെ 20 ടിക്കറ്റുകളുമാണ് മോഷ്ടിച്ചത്. മോഷ്ടിക്കപ്പെട്ട സ്ത്രീശക്തി ലോട്ടറിയിൽ 1000ത്തിന്‍റെ യും 200ന്‍റെയും 100ന്‍റെയും ടിക്കറ്റുകൾ സമ്മാനാർഹമായിട്ടുണ്ട്. ഇന്നു നറുക്കെടുക്കുന്ന ധനലക്ഷ്മി ലോട്ടറിയുടെ 525 ടിക്കറ്റുകളും നഷ്ടപ്പെട്ടിട്ടുണ്ട്. നഷ്ടപ്പെട്ട ടിക്കറ്റുകളിൽ സമ്മാനാർഹമായവയുടെ സീരിയൽ നമ്പരുകൾ അടക്കമുള്ള വിവരങ്ങൾ പോലീസ് മറ്റ് ഏജൻസികൾക്ക് കൈമാറിയിട്ടുണ്ട്. ടിക്കറ്റുമായി എത്തുന്നവരുടെ വിവരം ശേഖരിക്കാൻ പോലീസ് നിർദേശം നൽകിയിട്ടുണ്ട്.

ഫാ. മാത്യു സോബിന്‍ കണിയാംപറമ്പില്‍ റഫറന്‍റ് പ്രൊവിന്‍ഷല്‍

ആലപ്പുഴ: പൊന്തിഫിക്കല്‍ മിഷനറി സഭയുടെ പോര്‍ട്ട് മോസ്ബിയില്‍ (പാപ്പുവ ന്യുഗിനി) നടന്ന ഔദ്യോഗിക ചാപ്റ്ററില്‍ ഫാ. മാത്യു സോബിന്‍ കണിയാംപറമ്പില്‍ സഭയുടെ പുതിയ റഫറന്‍റ് പ്രൊവിന്‍ഷലായി തെരഞ്ഞെടുക്കപ്പെട്ടു. ഇത്തരത്തില്‍ നിയോഗിക്കപ്പെടുന്ന ആദ്യ മലയാളിയാണ് ഫാ. മാത്യു. ഓസ്‌ട്രേലിയ പാപ്പുവയിലെ സഭയുടെ പ്രവര്‍ത്തനങ്ങളുടെ മേല്‍നോട്ടമാണ് അദ്ദേഹത്തിന്‍റെ ശുശ്രൂഷാ ചുമതല. ഇന്ത്യ കൂടാതെ ഫിലിപ്പീന്‍സ്, ഇറ്റലി, ഫ്രാന്‍സ്, അമേരിക്ക, കാമറൂണ്‍ (ആഫ്രിക്ക) എന്നീ രാജ്യങ്ങളില്‍ പ്രവര്‍ത്തിച്ചിട്ടുണ്ട്. പാരീസ് സര്‍വകലാശാല, പാദുവാ സര്‍വകലാശാല എന്നിവിടങ്ങളില്‍ ഉപരിപഠനം നടത്തി. പോര്‍ട്ട് മോസ്ബി അതിരൂപതയില്‍ ഇടവക വികാരിയും സെമിനാരി റെക്ടറായും സേവനമനുഷ്ഠിച്ചു വരികയാണ്. ചങ്ങനാശേരി അതിരൂപതയിലെ ആലപ്പുഴ പഴവങ്ങാടി ഇടവകാംഗമാണ്.

മാർ ഒസ്താത്തിയോസ് ഗുരുകുലം ഡയാലിസിസ് സെന്‍റർ ഉദ്ഘാടനം

മാന്നാർ: ലൈഫ് കെയർ ഫൗണ്ടേഷന്‍റെ പ്രഥമ സംരംഭം മാർ ഒസ്താത്തിയോസ് ഗുരുകുലം ഡയാലിസിസ് സെന്‍റർ ചെന്നിത്തല കോട്ടമുറിയിൽ പ്രവർത്തനം തുടങ്ങി. മലങ്കര ഓർത്തഡോക്സ് സഭ പരമാധ്യക്ഷൻ പരിശുധ ബസേലിയോസ് മാത്യൂസ് തൃതീയൻ കാതോലിക്കാബാവ ഉദ്ഘാടനം ചെയ്തു. അശരണരും ആലംബഹീനരുമായ വൃക്ക രോഗികൾക്ക് സൗജന്യ ഡയാലിസിസ് സേവനം നൽകുന്ന സെന്‍ററിന്‍റെ പ്രവർത്തനം ചെന്നിത്തലയുടെ സമീപപ്രദേശങ്ങളിലുള്ള വൃക്ക രോഗികൾക്ക് ആശ്വസം പകരുമെന്നും അപരന്‍റെ ജീവിതത്തിന് തണലാകുമ്പോഴാണ് ക്രൈസ്തവ സാക്ഷ്യം പൂർണമാകുന്നതെന്നും ബാവാ ഉദ്ഘാടന പ്രസംഗത്തിൽ പറഞ്ഞു. മലങ്കര ഓർത്തഡോക്സ് സഭ നിരണം ഭദ്രാസനാധിപൻ ഡോ. യൂഹാനോൻ മാർ ക്രിസോസ്റ്റമോസ് ചെയർമാനായുള്ള ലൈഫ് കെയർ ഫൗണ്ടേഷന്‍റെ കീഴിൽ തുടക്കത്തിൽ മൂന്ന് ഡയാലിസിസ് മെഷീനുകൾ പ്രവർത്തിക്കും. മാർത്തോമാ സഭ ചെങ്ങന്നൂർ ഭദ്രാസനാധിപൻ ഡോ. യൂയാക്കിം മാർ കൂറിലോസ് സഫഗ്രൻ അനുഗ്രഹപ്രഭാഷണം നടത്തി. പ്രഫ. പി.ജെ. കുര്യൻ, കൊടിക്കുന്നിൽ സുരേഷ് എംപി, ഫാ. എം.സി. പൗലോസ്, ഫാ. ഷാജി കെ. പോൾ, ഓർത്തഡോക്സ് സഭാ സെക്രട്ടറി അഡ്വ. ബിജു ഉമ്മൻ, യുഡിഎഫ് ജില്ലാ ചെയർമാൻ അഡ്വ. വർഗീസ് മാമൻ, തോംസൺ പി. വർഗീസ്, അഭിലാഷ് തുമ്പിനത്ത്, മാത്യൂസ് കെ. ജേക്കബ്, ജോസഫ് ചാക്കോ, പി.ഡി. ജോർജ്, ജോൺസൺ മണലൂർ, പി.എച്ച്. ഷാജി, സുരേഷ് കുമാർ, വിനോദ് ഫിലിപ്പ്, പി.എ. ബോബൻ എന്നിവർ പ്രസംഗിച്ചു.

നാടക കലാകാരൻ വേദിയില്‍ കുഴഞ്ഞുവീണ് മരിച്ചു

അമ്പലപ്പുഴ: നാടക കലാകാരൻ വേദിയില്‍ കുഴഞ്ഞുവീണ് മരിച്ചു. ചമ്പക്കുളം, വൈശ്യംഭാഗം പുതുവന ലഗേഷ് രാഘവന്‍ (62) ആണ് മരിച്ചത്. തിങ്കളാഴ്ച രാത്രി കൊല്ലത്ത് അമ്പലപ്പുഴ അക്ഷരജ്വാലയുടെ വാർത്ത എന്ന നാടകം അരങ്ങിൽ അവതരിപ്പിച്ചുകൊണ്ടിരിക്കെയാണ് കുഴഞ്ഞുവീണത്. കഴിഞ്ഞ 20 വർഷമായി മലയാള പ്രഫഷണൽ നാടകത്തിൽ അഭിനയിച്ചുവരുന്നു. ലഗേഷ് പോലീസ് ഡിപ്പാർട്മെന്‍റിൽ ജോലി ചെയ്തുവരുന്നതിനിടെയാണ് ആരോഗ്യവകുപ്പില്‍ ജോലിയില്‍ പ്രവേശിച്ചത്. വിരമിച്ചശേഷം മുഴുവൻ സമയവും പ്രഫഷണൽ നാടകത്തിൽ ചുവടുറപ്പിച്ചു. കഴിഞ്ഞ രണ്ടു വർഷമായി തിലകന്‍റെ അക്ഷരജ്വാലയിൽ അഭിനയിച്ചു വരുകയായിരുന്നു. അക്ഷരജ്വാലയുടെ പുതിയ നാടകമായ വാർത്ത അഞ്ചാലുംമ്മൂട്ടിൽ അവതരിപ്പിച്ചു കൊണ്ടിരിക്കുന്നതിനിടെയായിരുന്നു അന്ത്യം. ഭാര്യ രാജലക്ഷ്മി. മക്കൾ ഐശ്വര്യ, അമൽ.മരുമകൻ: അനന്തു.

ഫോട്ടോഗ്രാഫേഴ്സ് അസോസിയേഷൻ സമ്മേളനവും തെരഞ്ഞെടുപ്പും

എടത്വ: ഓള്‍ കേരള ഫോട്ടോഗ്രാഫേഴ്സ് അസോസി യേഷന്‍ കുട്ടനാട് മേഖലാ സമ്മേളനവും ഭാരവാഹി തെരഞ്ഞെടുപ്പും നടന്നു. ചമ്പക്കുളം ബ്ലോക്ക് പഞ്ചായത്ത് പ്രസിഡന്‍റ് ജിന്‍സി ജോളി ഉദ്ഘാടനം നിര്‍വഹിച്ചു. മേഖലാ പ്രസിഡന്‍റ് ജിയോ ജയിംസ് അധ്യക്ഷത വഹിച്ചു. സംസ്ഥാന വെല്‍ഫെയര്‍ ചെയര്‍മാന്‍ ബി.ആര്‍. സുദര്‍ശനന്‍ മുഖ്യപ്രഭാഷണം നടത്തി. പ്രതിനിധി സമ്മേളന ഉദ്ഘാടനം ജില്ല പ്രസിഡന്‍റ് എസ്. മോഹനന്‍പിള്ള നിര്‍വഹിച്ചു. ജില്ലാ സെക്രട്ടറി അനില്‍ ഫോക്കസ്, മേഘലാ സെക്രട്ടറി ടോം ഫ്രാന്‍സിസ്, ഗോപിനാഥപണിക്കര്‍, വി.എസ്. അനീഷ്‌കുമാര്‍, തോമസ് ജോസഫ്, ആര്‍. രാജേഷ്, ഫ്രാന്‍സിസ് സെബാസ്റ്റ്യന്‍, യൂണിറ്റ് പ്രസിഡന്‍റ് സുനില്‍കുമാര്‍, സുദര്‍ശന്‍ എന്നിവര്‍ പ്രസംഗിച്ചു. സംസ്ഥാന ഫോട്ടോക്ലബ് സബ് കോ-ഓർഡിനേറ്റര്‍ ബൈജു ശലഭം തെരഞ്ഞെടുപ്പ് വരണാധികാരിയായിരുന്നു. ഭാരവാഹികള്‍- രാഗേഷ് ആര്‍ (പ്രസിഡന്‍റ്), ജിയോമോന്‍ ജയിംസ് (വൈസ് പ്രസിഡന്‍റ്), ടോം ഫ്രാന്‍സിസ് (സെക്രട്ടറി), എം.പി. ബിന്ദു (ജോയിന്‍റ് സെക്രട്ടറി), സുധികുമാര്‍ (ട്രഷറര്‍), പ്രമോദ് കുമാര്‍ (പിആര്‍ഒ), സന്തോഷ് വര്‍ഗീസ്, ഫ്രാന്‍സിസ് സെബാസ്റ്റ്യന്‍, മോന്‍സി തോട്ടപ്പള്ളി (ജില്ലാ കമ്മിറ്റി).

വേമ്പനാട്ടു കായലിൽ പായൽഭരണം; കക്ക- മത്സ്യത്തൊഴിലാളികൾക്കു ദുരിതം

പൂച്ചാക്കല്‍: വേമ്പനാട്ടു കായലില്‍ പതിവുപോലെ പായല്‍ നിറഞ്ഞു. മത്സ്യ- കക്കാ മേഖലയിലെ തൊഴിലാളികള്‍ പട്ടിണിയുടെ വക്കില്‍. തണ്ണീര്‍മുക്കം മുതല്‍ അരൂകുറ്റി വരെയുളള ഭാഗങ്ങളിലെ കായലില്‍ പലേടത്തും വെള്ളം കാണാനാകാത്ത വിധമാണ് പായല്‍ നിറഞ്ഞിരിക്കുന്നത്. വേമ്പനാട്ട് കായലിനെ ആശ്രയിച്ചു കഴിയുന്ന ഇരുപതിനായിരം കക്കാ തൊഴിലാളികളും അത്രയുംതന്നെ മത്സ്യത്തൊഴിലാളികളും ഒരുപോലെ ദുരിതം നേരിടുകയാണ്. വള്ളം ഇറക്കാനാവുന്നില്ല ഒക്ടോബര്‍ മുതലാണ് പായൽ വേമ്പനാട്ടു കായലില്‍ നിറയുന്നത്. കുട്ടനാടന്‍ പാടശേഖരങ്ങള്‍ പാടം തെളിച്ച് കൃഷി ചെയ്യാന്‍ തുടങ്ങുമ്പോള്‍ പുറത്തേക്കു തള്ളിവിടുന്ന പായലുകള്‍ വേലിയേറ്റ സമയങ്ങളില്‍ തണ്ണീര്‍മുക്കം ബണ്ടു വഴി വടക്കന്‍ മേഖലയിലെക്ക് ഒഴുകി എത്തുന്നു. വേമ്പനാട്ടു കായലില്‍നിന്നു വേലിയേറ്റ സമയങ്ങളില്‍ ഉള്‍തോടുകളിലേക്കും പായല്‍ കയറുന്നു. കക്കാവാരി ഉപജിവനം നടത്തുന്ന തൊഴിലാളികളുടെ വള്ളങ്ങള്‍ പോലും പുറത്തിറക്കാന്‍ പറ്റാത്ത അവസ്ഥയാണ്. പല തൊഴിലാളികളുടെയും കുടുംബങ്ങള്‍ പട്ടിണിയുടെ വക്കിലാണ്. പട്ടിണിയുടെ വക്കിൽ ജില്ലയുടെ വടക്കന്‍ മേഖലയില്‍ കാല്‍ലക്ഷത്തോളം തൊഴിലാളികള്‍ നേരിട്ടു പരമ്പരാഗത മത്സ്യബന്ധനം നടത്തുന്നുണ്ട്. ട്രോളിംഗ് നിരോധന കാലത്തു നാടന്‍ മത്സ്യങ്ങള്‍ക്കു പ്രിയമേറുമെങ്കിലും നിലവില്‍ കായലില്‍ വലയിടാന്‍ പറ്റാത്ത അവസ്ഥയാണ്. വേമ്പനാട്ടു കായലില്‍ നൂറിനടുത്ത് ഊന്നി ലൈനുകള്‍ (ഊന്നിപ്പാട്) ഉണ്ട്. ഇതിലോരോന്നിലും 18 മുതല്‍ 120 വരെ ഊന്നിക്കുറ്റികള്‍ ഉണ്ടാകും. വേലിയേറ്റ-ഇറക്കങ്ങള്‍ ശക്തമാകുമ്പോള്‍ ഒഴുകിയെത്തുന്ന പോളപ്പായല്‍ മൂലം ഊന്നിക്കുറ്റികള്‍ മറിഞ്ഞ് ഒഴുകിപ്പോകുകയാണ്. പലതും നാശത്തന്‍റെ വക്കിലാണ്. ഊന്നിക്കുറ്റി തറയ്ക്കുന്നതിനു പതിനായിരവും വലയ്ക്ക് 25,000 രൂപയും ഉള്‍പ്പെടെ 35,000 രൂപയുടെ നഷ്ടം ഓരോ മത്സ്യത്തൊഴിലാളിക്കും വന്നിട്ടുണ്ട്. പായലിനൊപ്പം കട്ടപ്പുല്ല്, വെണ്ണപ്പായല്‍ എന്നിവയും വ്യാപിക്കുന്നുണ്ട്. ഇതോടെ വലയിടാന്‍ കഴിയില്ല. ഊന്നി വലയില്‍ നിറഞ്ഞു കുമിയുന്ന പായല്‍ പലപ്പോഴും വലയും കുറ്റിയും തകര്‍ത്താണ് പോകാറ്. വലയില്‍ ഒട്ടിപ്പിടിക്കുന്ന വെണ്ണപ്പായല്‍ കുടഞ്ഞു കളഞ്ഞാലും പോകില്ല. എല്ലാ വര്‍ഷവും ഇതുതന്നെയാണ് തൊഴിലാളികളുടെ അവസ്ഥ. ഇതിനു പരിഹാരം കാണാന്‍ സര്‍ക്കാര്‍ തയാറാകണമെന്നാണ് തൊഴിലാളി സംഘടനകളുടെ ആവശ്യം.

ഒല ഷോറൂമിനെതിരേ പോലീസില്‍ പരാതി

അമ്പലപ്പുഴ: ഒല ഇലക്‌ട്രിക് സ്‌കൂട്ടര്‍ വാങ്ങി കബളിപ്പിക്കപ്പെട്ട ഉപഭോക്താക്കള്‍ ഷോറൂമിനെതിരേ പരാതിയുമായി രംഗത്ത്. കാക്കാഴം കാട്ടുങ്കല്‍ചിറ മുഹമ്മദ് കോയ, അമ്പലപ്പുഴ ബ്രദേഴ്‌സ് ഹൗസില്‍ ഷെരീഫ്, ചക്കാലക്കളം വീട്ടില്‍ മോഹനന്‍, അഭിജിത്ത് എന്നിവരാണ് പരാതി നല്‍കിയത്. അഞ്ചു വര്‍ഷത്തെ വാറന്‍റിയും നിരവധി വാഗ്ദാനങ്ങളും നല്‍കിയാണ് ജീവനക്കാര്‍ ആളുകളെ കൊണ്ട് സ്‌കൂട്ടര്‍ വാങ്ങിപ്പിച്ചത്. എന്നാല്‍, അറ്റകുറ്റപ്പണികള്‍ക്കായി ചെല്ലുമ്പോള്‍ ഇവിടെ സര്‍വീസിംഗ് ഇല്ലെന്നും ആലപ്പുഴ മാന്നാറില്‍ സ്വന്തം ചെലവില്‍ എത്തിക്കാനും അറിയിക്കും. തുടര്‍ന്ന് അവിടെ എത്തിക്കുന്ന വാഹനങ്ങളും മാസങ്ങള്‍ കഴിഞ്ഞാലും കേടുപാടുകള്‍ തീര്‍ത്തു കൊടുക്കാന്‍ കമ്പനി തയാറാകുന്നില്ലെന്ന് വാഹന ഉടമകള്‍ പറയുന്നു. മാസങ്ങളോളം സര്‍വീസ് സെന്‍ററില്‍ വാഹനം ഇരിക്കുന്നതോടെ ഇതിന്‍റെ ബാറ്ററിയുടെ പ്രവര്‍ത്തനം നിലയ്ക്കും. ഇതോടെ ബാറ്ററിക്ക് ഗാരണ്ടി ഇല്ലെന്നു പറഞ്ഞ് ഇതിന്‍റെ തുകകൂടി വാഹന ഉടമ അടയ്ക്കണം എന്ന ഭീഷണിയും കമ്പനിയുടെ ഭാഗത്തുനിന്ന് ഉണ്ടാവുന്നതായി ആരോപണമുണ്ട്. വാഹനം കേടായി സര്‍വീസ് സെന്‍ററില്‍ മാസങ്ങളോളം കിടക്കുമ്പോഴും ഇതിന്‍റെ ബാങ്ക് ലോണ്‍ അടക്കമുള്ളവ കൃത്യമായി വാഹന ഉടമകള്‍ അടച്ചേ മതിയാകൂ. വാഹനം എടുത്ത് വെട്ടിലായ ഉടമകള്‍ ഇന്നലെ സംഘടിച്ച് അമ്പലപ്പുഴ ഷോറൂമില്‍ എത്തുകയും അമ്പലപ്പുഴ പോലീസില്‍ വിവരം അറിയിക്കുകയുമായിരുന്നു. തുടര്‍ന്ന് അമ്പലപ്പുഴ പോലീസ് സ്ഥലത്തെത്തുകയും എല്ലാവരോടും പരാതി നല്‍കാന്‍ ആവശ്യപ്പെടുകയുമായിരുന്നു. തുടര്‍ന്നാണ് വാഹനം എടുത്ത് വെട്ടിലായവര്‍ അമ്പലപ്പുഴ പോലീസില്‍ പരാതി നല്‍കിയത്. ഇക്കാര്യം ചൂണ്ടിക്കാട്ടി കണ്‍സ്യൂമര്‍ കോര്‍ട്ടിലും പരാതി നല്‍കാന്‍ ഒരുങ്ങുകയാണിവര്‍.

കൃഷി ആരംഭിച്ചു

ചേര്‍ത്തല: സെന്‍റ് മൈക്കിള്‍സ് കോളജ് എന്‍എസ്എസ് യൂണിറ്റിന്‍റെ ആഭിമുഖ്യത്തില്‍ കിഴങ്ങുവര്‍ഗ കൃഷി ആരംഭിച്ചു. കോളജ് അങ്കണത്തില്‍ നടന്ന ചടങ്ങില്‍ വിത്ത് വിത മന്ത്രി പി. പ്രസാദ് ഉദ്ഘാടനം ചെയ്തു. മാനേജര്‍ റവ.ഡോ. സെലസ്റ്റിന്‍ പുത്തന്‍പുരയ്ക്കല്‍, വൈസ് പ്രിന്‍സിപ്പല്‍ ഡോ. ആന്‍റണി കുര്യാക്കോസ്, എന്‍എസ്എസ് പ്രോഗ്രാം ഓഫീസര്‍മാരായ ഡോ.ആര്‍. രാജേഷ്, ഡോ.ഡി.ബി. ധ്വജം, കര്‍ഷകന്‍ എസ്.പി. സുജിത് എന്നിവര്‍ പങ്കെടുത്തു.

ആലപ്പുഴ ഉപജില്ലാ സ്കൂൾ ശാസ്ത്രോത്സവത്തിനു തുടക്കം

അമ്പലപ്പുഴ: മൂന്നു ദിവസങ്ങളിലായി നടക്കുന്ന ആലപ്പുഴ ഉപജില്ലാ സ്കൂൾ ശാസ്ത്രോത്സവത്തിന് തുടക്കം. അറവുകാട് ഹയർ സെക്കൻഡറി, ഹൈസ്കൂൾ, എൽപി സ്കൂൾ, പുന്നപ്ര യുപിഎസ്, സെന്‍റ് ജോസഫ് എച്ച്എസ് എന്നീ സ്കൂളുകളിലായി നടക്കുന്ന ശാസ്ത്രോത്സവത്തിൽ 71 സ്കൂളുകളിൽനിന്നായി 2000 ത്തോളം വിദ്യാർഥികളാണ് മാറ്റുരയ്ക്കുന്നത്. പ്രവൃത്തിപരിചയ മേള, ഐടി മേള, സോഷ്യൽ സയൻസ് മേള, ഗണിതശാസ്ത്രമേള, സയൻസ് മേള എന്നിങ്ങനെ വിവിധ സെക‌്ഷനുകളിലാണ് ശാസ് ത്രോത്സവം നടക്കുക. അറവുകാട് ഹയർ സെക്കൻഡറി സ്കൂൾ ഓഡിറ്റോറിയത്തിൽ സംഘടിപ്പിച്ച സമ്മേളനം എച്ച്. സലാം എംഎൽഎ ഉദ്ഘാടനം ചെയ്തു. അറവുകാട് ഹൈസ്കൂളിൽ നടത്തിയ സമ്മേളനത്തിൽ പുന്നപ്ര തെക്ക് പഞ്ചായത്ത് പ്രസിഡന്‍റ് പി.ജി. സൈറസ് അധ്യക്ഷനായി. ആലപ്പുഴ ഉപജില്ലാ വിദ്യാഭ്യാസ ഓഫീസർ എം. കെ. ശോഭന, പഞ്ചായത്ത് സ്ഥിരം സമിതി അധ്യക്ഷൻ എൻ.കെ. ബിജുമോൻ, സി. സന്ദീപ് ഉണ്ണികൃഷ്ണൻ എന്നിവർ പ്രസംഗിച്ചു. നാളെ പകൽ രണ്ടിന് നടക്കുന്ന സമാപന സമ്മേളനവും സമ്മാനദാനവും ജില്ലാ പഞ്ചായത്ത് പ്രസിഡന്‍റ് കെ ജി. രാജേശ്വരി ഉദ്ഘാടനം ചെയ്യും.

ചേപ്പാട് പഞ്ചായത്ത് വികസന സദസ്

ചേപ്പാട്: പഞ്ചായത്ത് വികസന സദസ് ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് എം.കെ. വേണുകുമാർ അധ്യക്ഷനായി. പഞ്ചായത്ത് വൈസ് പ്രസിഡന്‍റ് ബിന്ദു രാജേന്ദ്രൻ, ജില്ലാ പഞ്ചായത്ത് സെക്രട്ടറി വി. പ്രദീപ് കുമാർ, ജില്ലാ പഞ്ചായത്തംഗങ്ങളായ എ. ശോഭ, കെ.ജി. സന്തോഷ്, മുതുകുളം ബ്ലോക്ക് പഞ്ചായത്ത് വൈസ് പ്രസിഡന്‍റ് ജി. ഉണ്ണികൃഷ്ണൻ, പഞ്ചായത്ത് സ്ഥിരം സമിതി അധ്യക്ഷരായ ഡി. കൃഷ്ണകുമാർ, എസ്. വിജയകുമാരി, കെ. വിശ്വപ്രസാദ്, പഞ്ചായത്ത് സെക്രട്ടറി ജി. മനോജ് എന്നിവർ പ്രസംഗിച്ചു.

കാറ്റിലും മഴയിലും വീടിന്‍റെ ഒരു ഭാഗം ഇടിഞ്ഞുവീണു

അമ്പലപ്പുഴ: കാറ്റിലും മഴയിലും വീടിന്‍റെ ഒരു ഭാഗം ഇടിഞ്ഞുവീണു. മൂന്നു പിഞ്ചുകുഞ്ഞുങ്ങളടക്കം വന്‍ ദുരന്തത്തില്‍നിന്ന് രക്ഷപ്പെട്ടു. അമ്പലപ്പുഴ തെക്ക് പഞ്ചായത്ത് 17-ാം വാര്‍ഡ് കോമന പുതുവല്‍ റൂബിയുടെ വീടിന്‍റെ അടുക്കള ഭാഗമാണ് കാലപ്പഴക്കം മൂലം ഇടിഞ്ഞുവീണത്. റൂബി അടുക്കളയില്‍ ഭക്ഷണം പാകം ചെയ്യുന്നതിനിടെ വലിയ ശബ്ദത്തോടെ വീടിന്‍റെ ഒരു ഭാഗം നിലംപതിക്കുകയായിരുന്നു. ഹോളോ ബ്രിക്‌സ് കൊണ്ടു നിര്‍മിച്ച ചുവരാണ് തകര്‍ന്നുവീണത്. ഈ സമയം മകന്‍ നജീബും നജീബിന്‍റെ മൂന്നു പിഞ്ചുമക്കളും തൊട്ടടുത്തുണ്ടായിരുന്നെങ്കിലും ആര്‍ക്കും പരിക്കില്ല. 18 വര്‍ഷം മുന്‍പ് ബ്ലോക്ക് പഞ്ചായത്തിന്‍റെ സഹായത്തോടെ നിര്‍മിച്ച വീടിന്‍റെ മറ്റ് ഭാഗങ്ങളും ഏതു നിമിഷവും നിലംപതിക്കുമെന്ന ആശങ്കയിലാണ് ഇവര്‍. അറ്റകുറ്റപ്പണി പോലും ചെയ്യാന്‍ കഴിയാത്ത തരത്തില്‍ തകര്‍ന്നിരിക്കുകയാണ് വീട്. പല ഭാഗത്തും ഭിത്തിക്ക് വലിയ വിള്ളലുകളാണുള്ളത്. ഒന്നര സെന്‍റ് സ്ഥലത്ത് നിര്‍മിച്ചിരിക്കുന്ന വീട് പൊളിച്ച് മറ്റൊരു വീട് നിര്‍മിക്കാനുള്ള സാമ്പത്തിക ശേഷി കുടുംബത്തിനില്ല. ലൈഫ് ഭവന പദ്ധതിയില്‍ ഒരു വര്‍ഷം മുന്‍പ് വീട് അനുവദിച്ചെങ്കിലും തീരപരിപാലന നിയമ പരിധിയില്‍പ്പെട്ട സ്ഥലമായതിനാല്‍ പുതിയ നിര്‍മാണത്തിന് അനുമതി ലഭിക്കാതെ വന്നതോടെ ലൈഫ് വീടും ഇവര്‍ക്ക് നഷ്ടപ്പെട്ടു. ഈ അവസ്ഥയില്‍ പിഞ്ചുകുഞ്ഞുങ്ങളുമായി എങ്ങോട്ടു പോകണമെന്നറിയാതെ വിഷമിക്കുകയാണ് റൂബിയും മകനും.

ശിശുക്ഷേമസമിതി വർണോത്സവം നാളെ

ആലപ്പുഴ: ജില്ലാ ശിശുക്ഷേമസമിതി ശിശുദിനത്തിന്‍റെ ഭാഗമായി സംഘടിപ്പിക്കുന്ന വർണോത്സവം-2025 ജില്ലാതല ഉദ്ഘാടനം നാളെ രാവിലെ 10ന് ജവഹർ ബാലഭവനിൽ ജില്ലാ കളക്ടർ അലക്സ് വർഗീസ് ഉദ്ഘാടനം ചെയ്യും. തുടർന്ന് പ്രസംഗമത്സരം നടക്കും. എൽപി വിഭാഗത്തിന് മധുരം മലയാളം, പരിസര ശുചീകരണത്തിൽ വിദ്യാഥികളുടെ പങ്ക്, യു.പി. വിഭാഗത്തിൽ ലഹരി വിമുക്ത കേരളം, സമ്മതിദാനവിനിയോഗം, നവകേരളം ഇതിൽനിന്ന് ഒരു വിഷയമായിരിക്കും പ്രസംഗമത്സരത്തിന് ലഭിക്കുക. എച്ച്എസ്, എച്ച്എസ്എസ് വിഭാഗങ്ങള്‍ക്ക് വേദിയില്‍ വച്ചാണ് വിഷയം നൽകുക. മലയാളം, ഇംഗ്ലീഷ് പ്രസംഗങ്ങൾക്ക് ഒരേ വിഷയമായിരിക്കും. എൽ പി വിഭാഗം പ്രസംഗം ഒന്നാമതെത്തുന്നയാള്‍ കുട്ടികളുടെ പ്രധാനമന്ത്രി ആകും. യുപി വിഭാഗം പ്രസംഗം ഒന്നാം സ്ഥാനം കരസ്ഥമാക്കുന്ന വിദ്യാഥി പ്രസിഡന്‍റാകും. രണ്ടാംഘട്ട മത്സരങ്ങൾ നവംബർ ആദ്യവാരം നടത്തുമെന്ന് സെക്രട്ടറി കെ.ഡി. ഉദയപ്പൻ അറിയിച്ചു. കൂടുതല്‍ വിവരങ്ങൾക്ക് ഫോണ്‍: 8891010637.

കത്തോലിക്കാ കോൺഗ്രസ് അവകാശ സംരക്ഷണ ജാഥയ്ക്ക് ഇന്ന് സ്വീകരണം

ആലപ്പുഴ: കത്തോലിക്കാ കോൺഗ്രസ് അവകാശ സംരക്ഷണ ജാഥഇന്ന് രണ്ടിന് ആലപ്പുഴയിൽ എത്തിച്ചേരുമ്പോൾ സ്വീകരണം നല്കും. പ്രസിഡന്‍റ് പ്രഫ. രാജീവ് കൊച്ചുപറമ്പിൽ നേതൃത്വം നൽകുന്ന ജാഥ ചങ്ങനാശേരി ജംഗ്ഷനിൽനിന്ന് ജാഥ അംഗങ്ങളെ സ്വീകരിച്ച് കൈതവന വിമല ഹൃദയനാഥാ ദേവാലയത്തിൽ എത്തിച്ചേരുമ്പോൾ സ്വീകരണ സമ്മേളനം ആരംഭിക്കും. സമ്മേളനത്തിൽ ഗ്ലോബൽ സമിതി ഭാരവാഹികൾ പ്രസംഗിക്കും. കൈതവന പള്ളിയിൽ കൂടിയ യോഗത്തിൽ ഫൊറോനാ പ്രസിഡന്‍റ് ദേവസ്യാ പുളിക്കാശേരി അധ്യക്ഷത വഹിച്ചു. ഫൊറോന ഡയറക്ടർ ഫാ. തോമസ് ഇരുമ്പുകുത്തി, ഫാ. ദമിനിയോസ് കോച്ചേരി, സെബാസ്റ്റ്യൻ വർഗീസ്, ഷാജി പോൾ ഉപ്പൂട്ടിൽ, പൗലോസ് നെല്ലിക്കാപള്ളി തുടങ്ങിയവർ പ്രസംഗിച്ചു.

2.16 ലക്ഷം രൂപയുടെ ടിക്കറ്റും പതിനായിരം രൂപയും മോഷണം പോയി

ചേർത്തല: നഗരത്തിലെ ഭാഗ്യക്കുറി വിൽപ്പനശാലയിൽ മോഷണം. 2.16 ലക്ഷം രൂപയുടെ ലോട്ടറി ടിക്കറ്റും പതിനായിരത്തോളം രൂപയും മോഷ്ടിച്ചു. ചേർത്തല ദേവീ ക്ഷേത്രത്തിന് തെക്കുവശം കണിച്ചുകുളങ്ങര പള്ളിക്കാവ് വെളി ലതാ ബാബുവിന്‍റെ ഉടമസ്ഥതയിൽ പ്രവർത്തിക്കുന്ന ബ്രദേഴ്സ് ഭാഗ്യക്കുറി വിൽപ്പനശാലയിൽ തിങ്കളാഴ്ച പുലർച്ചെയാണ് മോഷണം. സമീപത്തെ വീടിന്‍റെ ഗേറ്റ് ചാടിക്കടന്ന മോഷ്ടാവ് കടയുടെ മതിലിനുള്ളിൽ പ്രവേശിച്ചു. കടയ്ക്ക് വടക്കുഭാഗത്തുള്ള ജനൽപ്പാളി തുറന്ന് കമ്പി അറുത്തുമാറ്റി കമ്പിപ്പാര ഉപയോഗിച്ച് ഉള്ളിലുണ്ടായിരുന്ന ഗ്രിൽ തകർത്താണ് മോഷ്ടാവ് അകത്തുകടന്നത്. തിങ്കളാഴ്ച നറുക്കെടുന്ന ഭാഗ്യധാര, ചൊവ്വാഴ്ച നറുക്കെടുക്കുന്ന സ്ത്രീശക്തി, ബുധനാഴ്ചത്തെ ധനലക്ഷ്മി എന്നിവയുടെ 5143 ലോട്ടറി ടിക്കറ്റുകളാണ് മോഷ്ടിച്ചത്. കടയിലേയും സമീപത്തേയും സിസിടിവി ദൃശ്യങ്ങൾ പരിശോധിച്ചതിൽനിന്നും തിങ്കളാഴ്ച പുലർച്ചെ 2.45ന് മോഷ്ടാവ് വരുന്നതും മോഷണം നടത്തുന്നതുമായ ദൃശ്യങ്ങളും പോലീസ് ശേഖരിച്ചിട്ടുണ്ട്. മോഷ്ടാവ് നീലനിറത്തിലുള്ള മഴക്കോട്ട് ധരിച്ച് തുണികൊണ്ട് മുഖം മറച്ചാണ് എത്തിയത്. തിങ്കളാഴ്ച രാവിലെ കട തുറക്കാനായി ജീവനക്കാരൻ എത്തിയപ്പോഴാണ് മോഷണവിവരം അറിയുന്നത്. കടയിലെ ഷെൽഫിൽ കെട്ടുകളായി അടുക്കിവച്ചിരുന്ന ടിക്കറ്റുകളും കൗണ്ടറിൽ സൂക്ഷിച്ചിരുന്ന പതിനായിരത്തോളം രൂപയുമാണ് നഷ്ടപ്പെട്ടത്. ചേർത്തല പോലീസ് സ്റ്റേഷൻ ഹൗസ് ഓഫീസർ ലൈസാദ് മുഹമ്മദിന്‍റെ നേതൃത്വത്തിൽ പോലീസ് സംഘം സ്ഥലത്തെത്തി. തുടർന്ന് ആലപ്പുഴയിൽനിന്ന് ഡോഗ് സ്ക്വാഡും വിരലടയാള വിദഗ്ധരും സ്ഥലത്തെത്തി പരിശോധന നടത്തി. കടയ്ക്കുള്ളിൽനിന്ന് മണം പിടിച്ച ഡോഗ് കടയിൽനിന്ന് വടക്കോട്ട് ഓടി നടക്കാവ് റോഡുവഴി പടിഞ്ഞോട്ട് ചെന്ന് പാരഡൈസ് സിനിമ തിയറ്ററിനു മുന്നിൽ ചെന്നുനിന്നു. മോഷ്ടാവിനെ കണ്ടെത്താൻ സമീപ പ്രദേശങ്ങളിലെ സിസിടിവി ദൃശ്യങ്ങൾ പരിശോധിച്ചുള്ള അന്വേഷണം ആരംഭിച്ചതായി സ്റ്റേഷൻ ഓഫീസർ ലൈസാദ് മുഹമ്മദ് പറഞ്ഞു.

സ്വർണപ്പണയ സ്ഥാപന ഉടമ യുവതിയെ വീട്ടിൽ കയറി മര്‍ദിച്ചതായി പരാതി

ഹരിപ്പാട്: പണയംവച്ച ഉരുപ്പടിയുമായി ബന്ധപ്പെട്ട തര്‍ക്കത്തെ ത്തുടര്‍ന്ന് സ്വര്‍ണപ്പണയ സ്ഥാപന ഉടമ യുവതിയെ വീട്ടില്‍ കയറി മര്‍ദിച്ചതായി പരാതി. തൃക്കുന്നപ്പുഴ കിഴക്കേക്കര സിദ്ധു നിവാസില്‍ സരിതയ്ക്കാണ് പരിക്കേറ്റത്. ഇന്നലെ രാവിലെ 7. 30നായിരുന്നു സംഭവം. കല്ലുപുരയ്ക്കല്‍ സനല്‍കുമാറിന്‍റെ ഉടമസ്ഥതയിലുള്ള തേജസ് സ്വര്‍ണപ്പണയ ഇടപാട് സ്ഥാപനത്തില്‍ 2022 ഒക്ടോബര്‍ 23ന് പണയം വച്ചിരുന്ന രണ്ട് ഗ്രാം തൂക്കമുള്ള വള തിരികെ വേണമെന്ന് ആവശ്യപ്പെട്ട് സരിത വെള്ളിയാഴ്ച സ്ഥാപന ഉടമയെ ഫോണില്‍ വിളിക്കുകയും ചീട്ട് നോക്കിയ ശേഷം പിന്നീട് വിവരമറിയിക്കാമെന്ന് ഉടമ പറയുകയും ചെയ്തിരുന്നു. പിന്നീട് കാര്‍ത്തിക വീട്ടില്‍ സജിത എന്നൊരാള്‍ പണയം ഉരുപ്പടി എടുത്തുകൊണ്ടു പോയതായി പറയുകയും ചെയ്തു. എന്നാല്‍, അങ്ങനെയൊരു സംഭവം ഉണ്ടായിട്ടില്ലെന്നും പണയച്ചീട്ടു ഉള്‍പ്പെടെ തന്‍റെ കൈവശമാണെന്നും സരിത പറഞ്ഞു. തുടര്‍ന്ന് സ്ഥാപന ഉടമ ഇന്നലെ രാവിലെ വീട്ടിലെത്തി സ്വര്‍ണം തിരികെ എടുത്തതായി രജിസ്റ്റര്‍ ബുക്ക് കാണിക്കുകയയും അതില്‍ പേരോ മറ്റ് വിവരങ്ങളോ ഒന്നും തന്നെ ഇല്ല എന്നുള്ളത് ചൂണ്ടിക്കാണിക്കുകയും ഇതേതുടര്‍ന്ന് വാക്കുതര്‍ക്കം ഉണ്ടാവുകയും അസഭ്യം പറയുകയും മര്‍ദിക്കുകയും ചെയ്തതായി തൃക്കുന്നപ്പുഴ പോലീസില്‍ നല്‍കിയ പരാതിയില്‍ പറയുന്നു. മര്‍ദനമേറ്റ സരിത ഹരിപ്പാട് താലൂക്ക് ആശുപത്രിയില്‍ ചികിത്സതേടി.

ജൂബിലി ലോഗോസ് ക്വിസ് -2025: ചങ്ങനാശേരി അതിരൂപത വിജയികളെ പ്രഖ്യാപിച്ചു

ചങ്ങനാശേരി: ജൂബിലി ലോഗോസ് ക്വിസ് -2025ന്‍റെ അതിരൂപതാതല വിജയികളെ പ്രഖ്യാപിച്ചു. വിവിധ കാറ്റഗറികളിലെ വിജയികൾ. കാറ്റഗറി-എ: ഒന്നാംസ്ഥാനം: ജോസഫ് ജോൺ മേനാച്ചേരി, ലൂർദ് ഫൊറോന പള്ളി തിരുവനന്തപുരം, തിരുവനന്തപുരം ഫൊറോന, രണ്ടാംസ്ഥാനം: സേറ ആൻ ജൂവൽ സെന്‍റ് മേരിസ് പാറേൽ, ചങ്ങനാശേരി ഫൊറോന, മൂന്നാംസ്ഥാനം: തെരേസ ടോജോ ഉറുമ്പക്കൽ ക്രിസ്തുരാജ് പള്ളി, ഏറ്റുമാനൂർ, അതിരമ്പുഴ ഫൊറോന കാറ്റഗറി-ബി: ഒന്നാംസ്ഥാനം: ജാൻവി ആൻ ജോസി മറ്റപ്പറമ്പിൽ, എസ്എച്ച് പള്ളി, ചെത്തിപ്പുഴ, ചങ്ങനാശേരി ഫൊറോന രണ്ടാംസ്ഥാനം: ഏയ്ഞ്ചൽ മേരി തോമസ് ഷാരോൺ കുറ്റിക്കാട്ട് സെന്‍റ് മേരീസ് ആർക്കിഎപ്പിസ്കോപ്പൽ പള്ളി കുടമാളൂർ, കുടമാളൂർ ഫൊറോന. മൂന്നാംസ്ഥാനം: അലോണ നോജി കാട്ടാമ്പള്ളി സെന്‍റ് ജോൺ ദ ബാപ്റ്റിസ്റ്റ് പള്ളി നെടുംകുന്നം, നെടുംകുന്നം ഫൊറോന കാറ്റഗറി -സി: ഒന്നാംസ്ഥാനം: ജോയൽ ജോമോൻ പതിനഞ്ചിൽ സെന്‍റ് തോമസ് കപ്പൂച്ചിൻ ആശ്രമം സൺഡേ സ്കൂൾ, കാവാലം സെന്‍റ് തെരേസാസ് ഇടവക, പുളിങ്കുന്ന് ഫൊറോന. രണ്ടാംസ്ഥാനം: വിൻസി റോസ് ക്രിസ്തുരാജ് പള്ളി രാജഗിരി, അമ്പൂരി ഫൊറോന. മൂന്നാംസ്ഥാനം: ജിഷ ജോർജ് കുരീക്കാട്ട്, സെന്‍റ് ജോസഫ് പള്ളി, ചമ്പക്കര, നെടുംകുന്നം ഫൊറോന. ഡി-കാറ്റഗറി: ഒന്നാംസ്ഥാനം: മജേഷ് ജോസഫ് തൈക്കാട് സെന്‍റ് ജോസഫ് ചർച്ച് വായ്പൂര്, നെടുംകുന്നം ഫൊറോന. രണ്ടാംസ്ഥാനം: സിസ്റ്റർ സിസി മരിയ പറപ്പള്ളി എസ്എബിഎസ്, ലൂർദ് മാതാ ചർച്ച് മാമ്മൂട്, കുറുമ്പനാടം ഫൊറോന. മൂന്നാംസ്ഥാനം: നിധി ആന്‍റൺ കൈലാത്ത്, സെന്‍റ് മേരീസ് കത്തീഡ്രൽ, ചങ്ങനാശേരി ഫൊറോന. ഇ-കാറ്റഗറി: ഒന്നാംസ്ഥാനം: തോമസുകുട്ടി ജോസ് വള്ളവന്ത്ര സെന്‍റ് ഗ്രിഗോറിയസ് ചർച്ച്, പുന്നപ്ര, ആലപ്പുഴ ഫൊറോന രണ്ടാംസ്ഥാനം: ഫാ. മാർട്ടിൻ തൈപ്പറമ്പിൽ സെന്‍റ് തോമസ് ചെത്തിപ്പുഴ, ചങ്ങനാശേരി ഫൊറോന. മൂന്നാംസ്ഥാനം: അമ്മിണി ഇമ്മാനുവൽ കാരിക്കാട്ട്, ക്രിസ്തുരാജ് പള്ളി കുറ്റിക്കോണം, കൊല്ലം-ആയൂർ ഫൊറോന. എഫ്-കാറ്റഗറി: ഒന്നാംസ്ഥാനം: വത്സമ്മ സ്കറിയ അമ്പലത്തട്ടിൽ, സെന്‍റ് ജോർജ് പള്ളി തോട്ടയ്ക്കാട്, കുറുമ്പനാടം ഫൊറോന. രണ്ടാംസ്ഥാനം: സിസ്റ്റർ ആശാ എസ്ഡിഎസ് സെന്‍റ് ജോസഫ് പള്ളി പടഹാരം, ചമ്പക്കുളം ഫൊറോന. മൂന്നാംസ്ഥാനം: ലിസി തോമസ് കുരിശുംമൂട്ടിൽ സെന്‍റ് അൽഫോൻസ പള്ളി പൊങ്ങംമൂട്. മത്സരത്തിന്‍റെ മുഴുവൻ ഫലങ്ങളും ചങ്ങനാശേരി അതിരൂപത, ഇടവകതല മത്സര റിസൾട്ട് ഉൾപ്പെടെ www.logosquiz.org എന്ന സൈറ്റിൽ ലഭ്യമാണെന്ന് സംഘാടകർ അറിയിച്ചു. ചങ്ങനാശേരി അതിരൂപത കേന്ദ്രത്തിൽ നടന്ന വാർത്താ സമ്മേളനത്തിൽ വികാരി ജനറാൾ മോൺ. ആന്‍റണി എത്തയ്ക്കാട്ട്, ബൈബിൾ അപ്പൊസ്തലേറ്റ് അതിരൂപത ഡയറക്ടർ ഫാ. ജോർജ് മാന്തുരുത്തിൽ, പ്രഫ. ജോസഫ് ടിറ്റോ നേര്യംപറമ്പിൽ, സിസ്റ്റർ ചെറുപുഷ്പം എസ്എബിഎസ്, മറിയം ജോർജ് പൊട്ടംകളം, റ്റോമിച്ചൻ കൈതക്കളം, ജിക്കു ജോസഫ് ഉണ്ടിപ്പറമ്പിൽ, ജോഷി കൊല്ലാപുരം തുടങ്ങിയവർ പങ്കെടുത്തു. വിജയികൾക്കുള്ള സെമിഫൈനൽ മത്സരം നവംബർ 9ന് കൊല്ലം ജ്യോതി നികേതൻ വിമൻസ് കോളജിൽ ഉച്ചകഴിഞ്ഞ് 2 മുതൽ 3 വരെ നടക്കും. വിശദവിവരങ്ങൾക്ക് ഫോൺ: +91 96050 02846, +91 99613 69380.

സ്വകാര്യബസ് ബൈക്കിലിടിച്ചു; 12 വയസുകാരന് ദാരുണാന്ത്യം

തുറവൂർ: വാഹനാപകടത്തിൽ 12 വയസുകാരന് ദാരുണാന്ത്യം. വയലാർ കൊല്ലപ്പള്ളി പള്ളിപ്പാട്ട് നിഷാദിന്‍റെ മകൻ ശബരീശൻ അയ്യൻ (12) ആണ് മരിച്ചത്. ദേശീയപാതയിൽ പത്മാക്ഷികവലയ്ക്കു സമീപം ഇന്നലെ രാവിലെ എട്ടരയോടെയാണ് അപകടമുണ്ടായത്. അച്ഛനോടൊപ്പം ശബരീശൻ ബൈക്കിനു പിന്നിൽ യാത്ര ചെയ്യുകയായിരുന്നു. ഇതിനിടെ സ്വകാര്യബസ് ബൈക്കിലിടിച്ചാണ് അപകടമുണ്ടായത്. നിഷാദും ശബരീശൻ അയ്യനും ശബരീശന്‍റെ സഹോദരനും ഒന്നിച്ച് തുറവൂരിലേക്ക് ബൈക്കിൽ പോകുകയായിരുന്നു. ബസ് തട്ടിയതോടെ ബൈക്ക് നിയന്ത്രണം വിട്ട് പിന്നിലിരുന്ന ശബരീശൻ തെറിച്ചുവീണ് സ്വകാര്യ ബസിനടിയിൽപ്പെടുകയായിരുന്നു. ബസിന്‍റെ പിൻചക്രം കയറിയിറങ്ങി ശബരീശൻ തൽക്ഷണം മരിച്ചു. പരിക്കേറ്റ നിഷാദും ശബരീശന്‍റെ സഹോദരനും തുറവൂർ ഗവ. ആശുപത്രിയിൽ ചികിത്സയിലാണ്. അമ്മ ശാന്തിനി. സഹോദരൻ ഗൗരീശൻ അയ്യൻ. പട്ടണക്കാട് പോലീസ് കേസെടുത്തു.

ഇടത്താവളത്തിൽ ദുരിതപ്പെരുമഴ

ചെങ്ങന്നൂര്‍: മണ്ഡലകാലം ആരംഭിക്കാന്‍ ഒരുമാസം മാത്രം അവശേഷിക്കെ ശബരിമല തീര്‍ഥാടകരുടെ പ്രധാന ഇടത്താവളമായ ചെങ്ങന്നൂരില്‍ അടിസ്ഥാന സൗകര്യങ്ങള്‍ ഒരുക്കുന്നതിലെ ക്രമീകരണങ്ങള്‍ എങ്ങുമെത്തിയില്ല. ലക്ഷക്കണക്കിന് അയ്യപ്പന്മാര്‍ക്ക് താമസത്തിനും പ്രാഥമിക ആവശ്യങ്ങള്‍ക്കും മതിയായ സംവിധാനങ്ങളില്ലാത്തത് വലിയ പ്രതിസന്ധി സൃഷ്ടിക്കുന്നു. ശബരിമലയിലേക്കുള്ള യാത്രയ് ക്കു മുന്‍പും മലയിറങ്ങി വന്ന ശേഷവും തീര്‍ഥാടകര്‍ ചെങ്ങന്നൂര്‍ മഹാദേവക്ഷേത്രത്തില്‍ ദര്‍ശനം നടത്താറുണ്ട്. എന്നാല്‍, ഇവിടെ വിശ്രമിക്കാനുള്ള സത്രമോ, ആവശ്യത്തിന് ശൗചാലയങ്ങളോയില്ല. പാതിവഴിയില്‍ ഇടത്താവള നിര്‍മാണം മഹാദേവക്ഷേത്രത്തിന് മുന്‍പില്‍ ശബരിമല ഇടത്താവളം എന്ന് ബോര്‍ഡ് വച്ചിട്ടുണ്ടെങ്കിലും തീര്‍ഥാടകര്‍ക്ക് ആവശ്യമായ സൗകര്യങ്ങള്‍ ഏര്‍പ്പെടുത്താന്‍ അധികൃതര്‍ക്ക് കഴിഞ്ഞിട്ടില്ല. കിഫ്ബി ഫണ്ടുപയോഗിച്ച് നിര്‍മിക്കുന്ന ഇടത്താവളത്തിന്‍റെ പണി പാതിവഴിയിലാണ്. 10.48 കോടി ചെലവില്‍ ആധുനിക സൗകര്യങ്ങളോടെ മഹാദേവക്ഷേത്രത്തിന് സമീപം കുന്നത്തുമലയില്‍ നിര്‍മിക്കുന്ന മൂന്നുനില കെട്ടിടം ഈ മണ്ഡല-മകരവിളക്ക് ഉത്സവത്തിനും തുറന്നുകൊടുക്കാന്‍ സാധിക്കുമെന്ന് തോന്നുന്നില്ല. കാലതാമസം 2019ല്‍ ആരംഭിച്ച പദ്ധതി രണ്ടു വര്‍ഷം കൊണ്ട് പൂര്‍ത്തിയാക്കുമെന്നായിരുന്നു ദേവസ്വം ബോര്‍ഡ് വാഗ്ദാനം. എന്നാല്‍, ഒരു നില പോലും പൂര്‍ണമായിട്ടില്ല. നിര്‍മാണച്ചുമതലയുള്ള നാഷണല്‍ ബില്‍ഡിംഗ് കണ്‍സ്ട്രഷന്‍ കോര്‍പറേഷനെയാണ് ബോര്‍ഡ് അധികൃതര്‍ പഴിക്കുന്നത്. വാഗ്ദാനം ചെയ്ത സൗകര്യങ്ങള്‍ 40,000 ചതുരശ്ര അടി വിസ്തീര്‍ണത്തില്‍, 25 കാറുകള്‍ക്ക് ഒരേസമയം പാര്‍ക്കിംഗ്, 200 പുരുഷന്മാര്‍ക്കും 100 സ്ത്രീകള്‍ക്കും താമസിക്കാവുന്ന ഡോര്‍മിറ്ററി, 350 പേര്‍ക്ക് ഒരേസമയം ഭക്ഷണം കഴിക്കാവുന്ന അന്നദാന മണ്ഡപം, പാചകശാല, മൂന്ന് ലിഫ്റ്റുകള്‍, ഭിന്നശേഷി സൗഹൃദ ശുചിമുറികള്‍ എന്നിവയായിരുന്നു വാഗ്ദാനം. താത്കാലിക സൗകര്യങ്ങള്‍ ഇല്ലാതായി മുന്‍പ് ഉണ്ടായിരുന്ന ഭജനമഠം ജീര്‍ണിച്ച് നശിച്ചു. കെട്ടിടനിര്‍മാണത്തിനായി നഗരസഭയുടെ താത്കാലിക ശുചിമുറികളും പൊളിച്ചുനീക്കിയത് തീര്‍ഥാടകരെ കൂടുതല്‍ ദുരിതത്തിലാക്കി. ക്ഷേത്രത്തിന് കിഴക്കേ നടയിലുള്ള ചെറിയ ശൗചാലയങ്ങള്‍ തീര്‍ത്തും അപര്യാപ്തമാണ്. ആറാട്ടുകടവിലേക്കുള്ള വഴികളിലും ക്ഷേത്രമതില്‍ ചുറ്റിയുള്ള റോഡുകളിലും വിസര്‍ജ്യങ്ങള്‍ നിറയുന്ന അവസ്ഥ നാട്ടുകാര്‍ക്ക് ദുരിതമാവുന്നു. ശുചീകരണത്തിനായി സര്‍ക്കാര്‍ ഫണ്ട് അനുവദിക്കാറുണ്ടെങ്കിലും അത് ഫലപ്രദമായി വിനിയോഗിക്കാറില്ലെന്ന് ആക്ഷേപമുണ്ട്. ഓടകള്‍ വൃത്തിയാക്കുന്നതിനുള്ള ശ്രമങ്ങള്‍ പോലും ഇതുവരെ ആരംഭിച്ചിട്ടില്ല. മണ്ഡലകാലത്ത് മുടക്കം വരാതെ കുടിവെള്ളം ലഭ്യമാക്കുന്നതില്‍ ജല അഥോറിറ്റിക്കും റെയില്‍വേക്കും ആശങ്കയുണ്ട്. കുന്നത്തുമല ശുദ്ധജല പദ്ധതിയിലെ 4.5 ലക്ഷം ലിറ്റര്‍ ശേഷിയുള്ള ജലസംഭരണിക്ക് ചോര്‍ച്ചയുള്ളതിനാല്‍ പൂര്‍ണമായി വെള്ളം ശേഖരിക്കാനാവുന്നില്ല. നിലവില്‍ ഒന്നിടവിട്ട ദിവസങ്ങളിലാണ് നഗരത്തില്‍ പല ഭാഗത്തും വെള്ളം വിതരണം ചെയ്യുന്നത്. തീര്‍ഥാടനകാലത്ത് പ്രതിദിനം രണ്ടു ലക്ഷം ലിറ്റര്‍ വരെ വെള്ളം വേണ്ട റെയില്‍വേ സ്റ്റേഷനിലും ക്ഷാമം രൂക്ഷമാകും. മിത്രപ്പുഴക്കടവിലും സുരക്ഷയില്ല തീര്‍ഥാടകര്‍ സ്‌നാനഘട്ടമായി ഉപയോഗിക്കുന്ന മിത്രപ്പുഴക്കടവിന്‍റെ അവസ്ഥയും പരിതാപകരമാണ്. സുരക്ഷാവേലിയില്‍ മാലിന്യം തങ്ങിനില്‍ക്കുകയും വലിയതോതില്‍ ചെളിയടിയുകയും ചെയ്തിരിക്കുന്നു. പടിഞ്ഞാറെ കടവ് ഉപയോഗശൂന്യമായി. പമ്പാനദിയിലെ ശക്തമായ അടിയൊഴുക്കു കാരണം പരിയമില്ലാത്തവര്‍ അപകടത്തില്‍പ്പെടാന്‍ സാധ്യതയുണ്ട്. മണ്ഡലകാലത്തുമാത്രമാണ് ഇവിടെ സുരക്ഷ ഏര്‍പ്പെടുത്താറ്. എല്ലാ മാസപൂജാസമയത്തും സുരക്ഷ ഉറപ്പാക്കണമെന്ന ആവശ്യം അഗ്‌നിരക്ഷാസേന പരിഗണിച്ചിട്ടില്ല. ഇതുസംബന്ധിച്ച് നിര്‍ദേശങ്ങളൊന്നും ലഭിച്ചിട്ടില്ലന്നാണ് ഉദ്യോഗസ്ഥര്‍ പറയുന്നത്. മുന്നറിയിപ്പ് സംവിധാനമില്ല ഇതര സംസ്ഥാനങ്ങളില്‍നിന്നുള്ള തീര്‍ഥാടകര്‍ക്ക് അപകട മുന്നറിയിപ്പ് നല്‍കാന്‍ യാതൊരു മാര്‍ഗവും ഇവിടെ അവലംമ്പിച്ചിട്ടില്ല. വിവിധ ഭാഷകളില്‍ മുന്നറിയിപ്പ് ബോര്‍ഡുകളും സ്ഥാപിക്കുകയും മതിയായ സുരക്ഷ സംവിധാനങ്ങള്‍ ഏര്‍പ്പെടുത്തുമെന്ന് ശബരിമല അവലോകന യോഗത്തില്‍ തീരുമാനം എടുത്തിരുന്നു. തീരുമാനം നടപ്പിലാക്കിയാല്‍ ദുരിത വാര്‍ത്തകള്‍ കേള്‍ക്കേണ്ടി വരുന്ന സാഹചര്യങ്ങള്‍ ഒഴിവാക്കാമെന്ന് ഭക്തജനങ്ങള്‍ പറഞ്ഞു. ഭക്ഷ്യസുരക്ഷയും യാത്രാദുരിതവും മണ്ഡലകാലത്ത് കൂണുപോലെ മുളച്ചുപൊന്തുന്ന കടകളിലെ ഭക്ഷ്യവസ്തുക്കളുടെ ഗുണനിലവാരം ഉറപ്പാക്കാന്‍ ഭക്ഷ്യസുരക്ഷാ സംവിധാനം ശക്തമല്ല. നിയോജകമണ്ഡലത്തില്‍ ഒരു ഭക്ഷ്യസുരക്ഷാ ഓഫീസര്‍ മാത്രമാണുള്ളത്. എല്ലാ സ്ഥാപനങ്ങളിലും പരിശോധന നടത്താന്‍ മൊബൈല്‍ വിജിലന്‍സ് സ്‌ക്വാഡിനെ നിയമിക്കണമന്ന ആവശ്യം നടപ്പിലായിട്ടില്ല. തീര്‍ഥാടനകാലത്ത് കെഎസ്ആര്‍ടിസി പുതിയ ബസുകള്‍ ഉറപ്പുനല്‍കാറുണ്ടെങ്കിലും ഒരു വര്‍ഷവും ബസ് തികയാറില്ല. ചെങ്ങന്നൂര്‍ ഡിപ്പോയില്‍നിന്ന് ഏറ്റവും കൂടുതല്‍ സര്‍വീസുകള്‍ നടത്താറുണ്ടെങ്കിലും തിരക്ക് വര്‍ധിച്ചാല്‍ ബസ് ക്ഷമമുണ്ടാകുകയും സ്വകാര്യ വാഹനങ്ങള്‍ ഇത് മുതലെടുക്കുകയും ചെയ്യും. പാര്‍ക്കിംഗ് പ്രശ്‌നം ചെങ്ങന്നൂര്‍ ബസ് സ്റ്റാന്‍ഡില്‍ മതിയായ പാര്‍ക്കിംഗ് സൗകര്യമില്ല. ഏഴു മാസങ്ങള്‍ക്ക് മുന്‍പ് കെഎസ്ആര്‍ടിസി ഡിപ്പോയിലെ പഴയ കെട്ടിടം പൊളിച്ചുമാറ്റിയതും ഈ വര്‍ഷത്തെ തീര്‍ഥാടനത്തെ സാരമായി ബാധിക്കും. ഇപ്പോള്‍ രാത്രികാലങ്ങളില്‍ ബസുകള്‍ എംസി റോഡിന്‍റെ വശങ്ങളിലാണ് പാര്‍ക്ക് ചെയ്യുന്നത്. കാത്തിരിപ്പുകേന്ദ്രമില്ല കെഎസ്ആര്‍ട്ടിസി ഡിപ്പോയില്‍ താത്കാലിക കാത്തിരിപ്പ് കേന്ദ്രത്തിന്‍റെ നിര്‍മാണം വൈകുകയാണ്. എംഎല്‍എ ഫണ്ടില്‍നിന്ന് 4.40 ലക്ഷം അനുവദിച്ച് ടെന്‍ഡര്‍ നടപടികള്‍ ഒരു മാസം മുന്‍പ് തുടങ്ങിയെന്ന് പറയുന്നതല്ലാതെ അതിന്‍റെ നിജസ്ഥിതി എന്താണെന്ന് ശബരിമല അവലോകന യോഗത്തിലും ചെങ്ങന്നുരിന്‍റെ എംഎല്‍എയും മന്ത്രിയുമായ സജി ചെറിയാന്‍ വ്യക്തമാക്കിയില്ല. ഉടന്‍ കാത്തിരുപ്പു കേന്ദരം പണിയുമെന്ന് മാത്രമാണ് പറഞ്ഞത്. മറ്റ് പ്രശ്നങ്ങള്‍ റോഡ് തകര്‍ന്നു: മഹാദേവക്ഷേത്രത്തിന് ചുറ്റുമുള്ള റോഡില്‍ കിഴക്ക് ഭാഗത്ത് പത്തു മീറ്ററോളം റോഡ് ഇടിഞ്ഞുതാഴ്ന്നു. 30 അടിയിലേറെ കോണ്‍ക്രീറ്റ് അടര്‍ന്നിട്ടും ദേവസ്വം ബോര്‍ഡ് നടപടിയെടുത്തിട്ടില്ല. ക്ഷേത്രത്തിലേക്കുള്ള വാഹനങ്ങളും ഭക്തരും ഉള്‍പ്പ െടെ നിരവധി യാത്രക്കാര്‍ ആശ്രയിക്കുന്ന റോഡാണ്. ഫണ്ട് വകമാറ്റം: ശബരിമല തീര്‍ഥാടനത്തിനായി സര്‍ക്കാര്‍ അനുവദിക്കുന്ന ഫണ്ട് നഗരസഭ മറ്റ് ആവശ്യങ്ങള്‍ക്കായി വകമാറ്റി ചെലവഴിക്കുന്നതായി ആരോപണമുണ്ട്. 2012ല്‍ അനുവദിച്ച 15 ലക്ഷം രൂപയില്‍നിന്ന് പണമെടുത്ത് ഫ്രണ്ട് ലോഡ് ട്രാക്ടര്‍ വാങ്ങിയതായി പറയപ്പെടുന്നു.

45 വർഷത്തെ സിപിഎം ഭരണം കൈനകരിയെ പിന്നോട്ടു നയിച്ചെന്ന്

കൈനകരി: കഴിഞ്ഞ 45 വർഷത്തെ സിപിഎം നേതൃത്വത്തിലുള്ള പഞ്ചായത്ത് ഭരണത്തിൽ കൈനകരി വളരെയധികം പിന്നാക്കം പോയെന്നും എംഎൽഎയേയും സംസ്ഥാന തുടർ ഭരണവും ലഭിച്ചിട്ടും കൈനകരിയുടെ അടിസ്ഥാന സൗകര്യവികസനതിനുവേണ്ടി ഒന്നും ചെയ്യാൻ കഴിഞ്ഞില്ലെന്നും ഡിസി സി വൈസ് പ്രസിഡന്‍റ് സജി ജോസഫ്. കഴിവുകെട്ട പഞ്ചായത്ത് ഭരണസമിതിയുടെ അഴിമതിയും ദൂർഭരണവും പൊള്ളത്തരവും ജനമധ്യത്തിൽ തുറന്നുകാട്ടാൻ കൈനകരി ദുരിത മോചന വാഹന ജാഥ പള്ളാത്തുരുത്തി പാലത്തിനു സമീപം ഉദ്ഘാടനം ചെയ്തു പ്രസംഗിക്കു കയായിരുന്നു അ ദ്ദേഹം. ജാഥ ക്യാപറ്റ്ൻ ഡി. ജോസഫ് പതാക ഏറ്റുവാങ്ങി. സമാപനസമ്മേളനം നോർത്ത് ബ്ലോക്ക് പ്രസിഡന്‍റ് സി.വി. രാജീവ് ഉദ്ഘാടനം ചെയ്തു. യുഡിഎഫ് ചെയർമാൻ ജോസഫ് ചേക്കോടൻ, എസ്.ഡി. രവി, മധു സി. കുളങ്ങര, ജോണി പുതിയാറ, സിബിച്ചൻ കാളാശേരി തുടങ്ങിയവർ പ്രസംഗിച്ചു.

ഭക്ഷണം പങ്കുവയ്ക്കുകയും പാഴാക്കാതിരിക്കുകയും വേണം: ബിഷപ് ഡോ. ജയിംസ് ആനാപറമ്പില്‍

ആലപ്പുഴ: ഭക്ഷണം പങ്കുവയ്ക്കുകയും അത് പാഴാക്കാതിരിക്കുകയുമാണ് മനുഷ്യര്‍ നിര്‍ബന്ധമായും ചെയ്യേണ്ടതെന്നു ആലപ്പുഴ ബിഷപ് ഡോ. ജയിംസ് റാഫേല്‍ ആനാപറമ്പില്‍. തത്തംപള്ളി റസിഡന്‍റ് സ് അസോസിയേഷന്‍റെ ‘ഭക്ഷ്യനീതി: എവിടെയും മായമില്ലാത്ത ഭക്ഷണം മനുഷ്യരുടെ അവകാശം’ പ്രചാരണത്തിന് തുടക്കം കുറിച്ചു പ്രസംഗിക്കുകയായിരുന്നു ബിഷപ്. മായം ചേര്‍ക്കാത്ത ഭക്ഷണം എന്ന ആശയം, എല്ലാ മനുഷ്യര്‍ക്കും ആരോഗ്യകരവും മലിനമാകാത്തതുമായ ഭക്ഷണത്തിന്‍റെ പ്രാധാന്യം ഊന്നിപ്പറയുന്നുവെന്നും അതിനായി സര്‍ക്കാര്‍, സര്‍ക്കാരിതര സ്ഥാപനങ്ങളുടെ സേവനങ്ങള്‍ കൃത്യമാക്കാനുള്ള ജനകീയ ശ്രമമാണിതെന്നും ടിആര്‍എ പ്രസിഡന്‍റ് തോമസ് മത്തായി കരിക്കംപള്ളില്‍ വിശദീകരിച്ചു. ആരോഗ്യകരമായ ഭക്ഷണം എല്ലാവര്‍ക്കും അവകാശം എന്നതാണ് പ്രചാരണങ്ങള്‍ കൊണ്ട് ടിആര്‍എ ലക്ഷ്യമാക്കുന്നതെന്നും അദ്ദേഹം പറഞ്ഞു.

ജി. സുധാകരനെ നേരിൽ കാണുമെന്നും ചേർത്തുനിർത്തുമെന്നും സജി ചെറിയാൻ

അമ്പലപ്പുഴ: ജി. സുധാകരനെ നേരിൽ കാണുമെന്നും ചേർത്തുനിർത്തുമെന്നും മന്ത്രി സജി ചെറിയാൻ. ജി. സുധാകരന് തന്നെയടക്കം വിമർശിക്കാനുള്ള അധികാരമുണ്ടെന്നും സജി ചെറിയാൻ പറഞ്ഞു. ഞങ്ങൾ നന്ദികെട്ടവരല്ല. ജി. സുധാകരനെ തകർത്തിട്ട് ഒന്നും സാധിക്കാനില്ല. അദ്ദേഹത്തെ ചേർത്തുപിടിക്കും. സജി ചെറിയാനെയടക്കം ജി. സുധാകരൻ നേരത്തെ വിമർശിച്ച് രംഗത്തെത്തിയിരുന്നു. ജി. സുധാകരനെ പാർട്ടിയുടെ മുഖ്യധാരയിലേക്ക് കൊണ്ടുവരും. ജി. സുധാകരനുമായി പ്രശ്നങ്ങൾ ഉണ്ടെന്നത് മാധ്യമ സൃഷ്ടിയാണെന്നും സജി ചെറിയാൻ പറഞ്ഞു. സിപിഎമ്മുമായി ഇടഞ്ഞുനിൽക്കുന്ന സുധാകരൻ കഴിഞ്ഞ ദിവസം കുട്ടനാട്ടിൽ നടന്ന സിപിഎം പരിപാടിയിൽനിന്ന് വിട്ടുനിന്നിരുന്നു.

തദ്ദേശ ജനപ്രതിനിധികള്‍ തിരക്കിൽ; തെരഞ്ഞെടുപ്പിന് മുന്‍പ് ഉദ്ഘാടന മാമാങ്കം

എടത്വ: തദ്ദേശ തെരഞ്ഞെടുപ്പ് പടിവാതുക്കല്‍ എത്തിയതോടെ സീറ്റുറപ്പിക്കാനുള്ള തത്രപ്പാടില്‍ ത്രിതല പഞ്ചായത്ത് ജനപ്രതിനിധികള്‍. വാര്‍ഡുകള്‍ തോറും ഉദ്ഘാടന മാമാങ്കം അരങ്ങുതകര്‍ക്കുമ്പോള്‍ വോട്ടര്‍മാരുടെ പ്രീതി സമ്പാദിക്കാന്‍ ജനപ്രതിനിധികള്‍ നേട്ടോട്ടത്തിലാണ്. ജനപ്രതിനിധികള്‍ ഓടിനടന്ന് ഉദ്ഘാടനം നടത്തുകയാണ്. റോഡുകളുടെയും പാലങ്ങളുടെയും നിര്‍മാണോദ്ഘാടനം, പൈപ്പ് സ്ഥാപിക്കല്‍, കുടിവെള്ള പ്രശ്‌നം, വീല്‍ചെയര്‍, കട്ടില്‍വിതരണം, പാടശേഖര മോട്ടോര്‍തറ സ്ഥാപിക്കല്‍, ആംഗൻവാടി കെട്ടിടങ്ങളുടെ നിര്‍മാണം, ജലാശയ തീരത്തെ സംരക്ഷണഭിത്തി നിര്‍മിക്കല്‍, വീടുകളിലും കച്ചവട സ്ഥാപനങ്ങളിലും മാലിന്യ ബിന്‍ വിതരണം, തരിശുഭൂമി കൃഷി യോഗ്യമാക്കല്‍, ബന്തിപ്പൂ കൃഷിയുടെ വിളവെടുപ്പ്, പട്ടികജാതി-പട്ടിക വര്‍ഗ ക്ഷേമ പ്രവര്‍ത്തനം, ലൈഫ് മിഷന്‍ പദ്ധതിയില്‍ വീട് നിര്‍മാണം, റീബില്‍ഡ് കേരള പദ്ധതി പ്രവര്‍ത്തനം തുടങ്ങി ചെറുതും വലുതുമായ ഒട്ടേറെ വിഷയങ്ങളിലാണ് ഉദ്ഘാടനം പൊടിപൊടിക്കുന്നത്. ജനനം മുതല്‍ മരണം വരെയുള്ള ചടങ്ങുകള്‍ക്കും ജനപ്രതിനിധികളുടെ സാനിധ്യം ഏറിവരുകയാണ്. ജനപ്രതിനിധികളുടെയും തെരഞ്ഞെടുപ്പ് ഗോദയില്‍ മത്സരത്തിന് തയാറെടുക്കുന്നവരുടെയും വീടുകളിലെ ചടങ്ങുകള്‍ക്ക് കരയടച്ച് ക്ഷണിച്ചാണ് സാന്നിധ്യം അറിയിക്കുന്നത്. പോലീസ് എടുക്കുന്ന പെറ്റി കേസുകളില്‍ ജാമ്യക്കാരായും സാന്നിധ്യം ഉറപ്പിക്കുന്നുണ്ട്. ജനപ്രതിനിധികള്‍ക്കൊപ്പം അതത് രാഷ്ട്രീയപ്രതിനിധികളും എത്തിയതോടെ ഉദ്ഘാടനവും മറ്റ് പൊതുചടങ്ങുകളും ഗംഭീരമാക്കാന്‍ കിണഞ്ഞ് പരിശ്രമിക്കുന്നുണ്ട്. ചെറിയ പരിപാടികള്‍ക്കു പോലും സംസ്ഥാന- ജില്ലാ പ്രതിനിധികളുടെ സാന്നിധ്യം പ്രകടമാകുന്നു. പല പഞ്ചായത്തുകളും തനത് ഫണ്ടില്‍ കവിഞ്ഞുള്ള പ്രഖ്യാപനവും ഉദ്ഘാടനവുമാണ് നടത്തുന്നത്. കഴിഞ്ഞ അഞ്ചു വര്‍ഷമായി ത്രിതല പഞ്ചായത്ത് പ്രതിനിധികള്‍ കാണാത്ത വികസന പ്രവര്‍ത്തനം അവസാന നാളുകള്‍ വരെ നീട്ടിവച്ചതിനു പിന്നില്‍ തെരഞ്ഞെടുപ്പ് ലക്ഷ്യമിട്ടാണെന്ന് വോട്ടര്‍മാര്‍ ചൂണ്ടിക്കാട്ടുന്നു. പരാതികളും പ്രതിഷേധങ്ങളും സോഷ്യല്‍ മീഡിയ വഴി ചൂണ്ടിക്കാട്ടുമ്പോഴും തദ്ദേശ ജനപ്രതിനിധികള്‍ ഉദ്ഘാടന മാമങ്കത്തിനുള്ള തിരക്കിലാണ്.

വയലാര്‍ അനുസ്മരണവും നടൻ പ്രകാശ് വർമയ്ക്ക് സ്വീകരണവും

ചേർത്തല: ചേർത്തല ശാലയുടെ ആഭിമുഖ്യത്തിൽ നടത്തിയ വയലാർ രാമവർമയുടെ 50-ാം ചരമവാർഷിക അനുസ്മരണവും നടൻ പ്രകാശ് വർമയ്ക്ക് സ്വീകരണവും കെ.സി. വേണുഗോപാൽ എംപി ഉദ്ഘാടനം ചെയ്തു. വടക്കേ അങ്ങാടിക്ക് സമീപം ഭുവനേന്ദ്ര ഓഡിറ്റോറിയത്തിൽ നടന്ന സമ്മേളനത്തിൽ പ്രസിഡന്‍റ് സി.വി. തോമസ് അധ്യക്ഷത വഹിച്ചു. സെക്രട്ടറി ഷെഹിൻ കൊച്ചുബാവ, കെ. ബാബുമോൻ, ജി.എസ്. വിനിത റാണി, സദാനന്ദൻ പാണാവള്ളി, രാജീവ് ആലുങ്കൽ, ശരത് ചന്ദ്രവർമ, സൂര്യ, ശ്രീകല സുഖാദിയ, ചേർത്തല ജയൻ, കെ.പി. നടരാജൻ എന്നിവർ പ്രസംഗിച്ചു.

ചെങ്ങന്നൂർ നഗരസഭാ ഭരണത്തിനെതിരേ എൽഡിഎഫ് ജനകീയ കുറ്റപത്രം

ചെങ്ങന്നൂര്‍: യുഡിഎഫ് നേതൃത്വത്തിലുള്ള ചെങ്ങന്നൂര്‍ നഗരസഭാ ഭരണസമിതിയുടെ കെടുകാര്യസ്ഥതയും അഴിമതിയും ജനദ്രോഹ നടപടികളും തുറന്നുകാട്ടി എല്‍ഡിഎഫ് നഗരസഭാ കമ്മിറ്റി ജനകീയ കുറ്റപത്രം പുറത്തിറക്കി. നിലവിലെ ഭരണസമിതി അധികാരത്തിലെത്തിയ ശേഷം നടത്തിയ ഭരണപരമായ വീഴ്ചകളും വികസന മുരടിപ്പും അഴിമതിയും കെടുകാര്യസ്ഥതയും അക്കമിട്ടു നിരത്തുന്നതാണ് കുറ്റപത്രമെന്ന് എല്‍ഡിഎഫ് നേതാക്കള്‍ പറഞ്ഞു. സംസ്ഥാന സര്‍ക്കാര്‍ നടപ്പിലാക്കിവരുന്ന വികസന പ്രവര്‍ത്തനങ്ങള്‍ക്ക് മന്ത്രി സജി ചെറിയാന്‍ നേതൃത്വം നല്‍കുന്ന ചെങ്ങന്നൂര്‍ മണ്ഡലത്തില്‍, നഗരസഭ ഒഴികെയുള്ള എല്ലാ തദ്ദേശസ്ഥാപനങ്ങളും കലവറയില്ലാത്ത പിന്തുണയാണ് നല്‍കുന്നത്. എന്നാല്‍, ചെങ്ങന്നൂര്‍ നഗരസഭാ പ്രദേശം നടപ്പിലാക്കുന്ന പദ്ധതികള്‍ക്ക് ഒന്നാകെ തടസം നില്‍ക്കാനും കാലതാമസം വരുത്തി ഇല്ലാതാക്കാനുമാണ് നഗരസഭാ ഭരണം ശ്രമിച്ചതെന്ന് എല്‍ഡിഎഫ് ആരോപിച്ചു. പ്രധാന ആരോപണങ്ങള്‍ റോഡുകള്‍ തകര്‍ന്നു നഗരസഭയുടെ അധീനതയിലുള്ള മുഴുവന്‍ റോഡുകളും സഞ്ചാരയോഗ്യമല്ലാതായിട്ട് നാളുകളായി. കുടിവെള്ള പദ്ധതിക്ക് തടസം സംസ്ഥാന സര്‍ക്കാരിന്‍റെ സമ്പൂര്‍ണ കുടിവെള്ള പദ്ധതിയുടെ പ്രവര്‍ത്തനങ്ങളെ നഗരസഭയിലെ യുഡിഎഫിന്‍റെയും ബിജെപിയുടെയും കൗണ്‍സിലര്‍മാര്‍ തടസപ്പെടുത്തുന്നു. പാണ്ഡവന്‍പാറ, നൂറ്റവന്‍പാറ, ചെറ്റിയാന്‍ മോടി, പുലിക്കുന്ന്, അങ്ങാടിക്കല്‍ മല, ക്രിസ്ത്യന്‍ കോളജ് പ്രദേശത്തെ ജനങ്ങള്‍ കുടിവെള്ളത്തിന് എന്തു ചെയ്യണമെന്ന് നഗരസഭ വ്യക്തമാക്കണം. മാലിന്യസംസ്‌കരണം പാളി ജൈവമാലിന്യം സംസ്‌കരിക്കുന്നതിനുള്ള യാതൊരു സംവിധാനവും നഗരസഭയില്‍ ഇല്ല. പെരുങ്കുളം പാടത്ത് സ്റ്റേഡിയം നിര്‍മാണം ആരംഭിച്ചതു മുതല്‍ അവിടെ തള്ളാന്‍ കഴിയാത്ത ലോഡ് കണക്കിന് മാലിന്യങ്ങള്‍ ഇപ്പോള്‍ നഗരസഭാ ഓഫീസ് പരിസരത്തും പൊതു ഇടങ്ങളിലും റോഡരികുകളിലും ജലാശയങ്ങളുടെ പരിസരത്തും തള്ളുന്നു. ഇത് മഴക്കാലത്ത് സാംക്രമികരോഗങ്ങള്‍ പടരാനും പാരിസ്ഥിതിക പ്രശ്‌നങ്ങള്‍ക്കും തെരുവുനായ്ക്കളുടെ വര്‍ധനവിനും കാരണമാകുന്നു. ആരോഗ്യ, വിദ്യാഭ്യാസ മേഖലയോട് അവഗണന നഗരസഭയുടെ കീഴിലുള്ള വിദ്യാഭ്യാസസ്ഥാപനങ്ങളുടെ ഉന്നമനത്തിനായി യാതൊരു ഇടപെടലും ഉണ്ടാകുന്നില്ല. തകര്‍ന്ന ആരോഗ്യമേഖല ആധുനിക നിലവാരത്തിലേക്കുയര്‍ത്താന്‍ മന്ത്രി സജി ചെറിയാന്‍റെ നേതൃത്വത്തില്‍ നടത്തുന്ന പദ്ധതികള്‍ക്ക് പരമാവധി തടസങ്ങള്‍ കൊണ്ടുവരാന്‍ നഗരസഭ ശ്രമിച്ചു. 200 കോടിയുടെ മള്‍ട്ടി സ്‌പെഷാലിറ്റി ആശുപത്രി നിര്‍മാണം ആരംഭിച്ച ഘട്ടത്തില്‍ താല്‍ക്കാലികസംവിധാനത്തിനായി ഒഴിഞ്ഞുകിടന്ന സ്‌കൂള്‍ കെട്ടിടം ഉപയോഗിക്കാന്‍ പോലും നഗരസഭ തടസം നിന്നു. ഫണ്ട് ലാപ്സാക്കി പട്ടികവിഭാഗ ക്ഷേമപ്രവര്‍ത്തനങ്ങള്‍ക്ക് സംസ്ഥാന സര്‍ക്കാര്‍ അനുവദിച്ച ഫണ്ടില്‍നിന്നു കോടികള്‍ ലാപ്സാക്കി. കഴിഞ്ഞ അഞ്ചുവര്‍ഷവും സംസ്ഥാന സര്‍ക്കാര്‍ അനുവദിച്ച തുകയുടെ 80 ശതമാനവും ലാപ്‌സാക്കിയ നഗരസഭ ചെങ്ങന്നൂരില്‍ അല്ലാതെ വേറെയില്ല. വസ്തു വാങ്ങി വീട് വയ്ക്കാനുള്ള ഒരു കോടി രൂപയോളം ലാപ്‌സാക്കി. ശബരിമല തീര്‍ഥാടകര്‍ക്ക് സൗകര്യം ഒരുക്കാന്‍ സംസ്ഥാന സര്‍ക്കാര്‍ അനുവദിച്ച ഫണ്ടും ലാപ്സാക്കുന്ന സ്ഥിതിവിശേഷമാണ് വികസനമുരടിപ്പ് പൊതുശ്മശാനം, ടൗണ്‍ ഹാള്‍, വിനോദ-വിശ്രമകേന്ദ്രം, വഴിയോര വിശ്രമ കേന്ദ്രം, വാഹന പാര്‍ക്കിംഗ് എന്നിവ ഇല്ലാത്ത സംസ്ഥാനത്തെ ഏക നഗരസഭയാണ് ചെങ്ങന്നൂരിലേത്. 100 കോടി രൂപ ചെലവഴിച്ച് അന്താരാഷ്ട്ര നിലവാരമുള്ള സ്റ്റേഡിയം നിര്‍മാണത്തിന് നഗരസഭ തടസം സൃഷ്ടിച്ചു. ടൗണ്‍ മാസ്റ്റര്‍ പ്ലാന്‍ പ്രശ്‌നം ടൗണ്‍ മാസ്റ്റര്‍ പ്ലാന്‍ 2021-41 പദ്ധതിയില്‍ നഗരസഭയിലെ കുറെയധികം വാര്‍ഡുകള്‍ ദുരന്തബാധിത പ്രദേശങ്ങളാകുന്നതിന് നഗരസഭ മറുപടി പറയണം. ജനകീയ വിചാരണ ജാഥ നടത്തും നഗരസഭ ഭരണത്തിനെതിരായ ജനവികാരം നഗരസഭയുടെ ശ്രദ്ധയില്‍ എത്തിക്കുന്നതിനും കുറ്റപത്രത്തിലെ വിഷയങ്ങള്‍ ജനങ്ങള്‍ക്കു മുന്നില്‍ അവതരിപ്പിക്കുന്നതിനുമായി എല്‍ഡിഎഫ് നഗരസഭാ സമിതിയുടെ നേതൃത്വത്തില്‍ ജനകീയ വിചാരണ ജാഥ സംഘടിപ്പിക്കും. നഗരസഭയിലെ മുഴുവന്‍ വാര്‍ഡുകളിലെയും ജനങ്ങളെ അണിനിരത്തിക്കൊണ്ട് ഭരണസമിതിയുടെ അഴിമതിക്കും കെടുകാര്യസ്ഥതയ്ക്കും എതിരേ ശക്തമായ പ്രക്ഷോഭം തുടരുമെന്നും എല്‍ഡിഎഫ് നേതാക്കളായ എം.കെ. മനോജ്, വി.വി. അജയന്, പി.ആര്‍. പ്രദീപ് കുമാര്‍, അനസ് പുവാലംപറമ്പില്‍, ഷാജി പട്ടത്താനം, വത്സമ്മ ഏബ്രഹാം, മോഹന്‍ കൊട്ടാരത്തില്‍, ടി.സി. ഉണ്ണി കൃഷ്ണന്‍, പ്രണവം വിജയന്‍, കെ.കെ. ചന്ദ്രന്‍, വി.ജി. അജീഷ്, പി.കെ. അനില്‍കുമാര്‍, ജോര്‍ജുകുട്ടി എന്നിവര്‍ അറിയിച്ചു. മറ്റ് വിഷയങ്ങള്‍ വരട്ടാറിനെ പുനരുജ്ജീവിപ്പിക്കാനുള്ള സര്‍ക്കാര്‍ ശ്രമങ്ങളെ തടസപ്പെടുത്തുന്നു. തെരുവുവിളക്കുകള്‍ സ്ഥാപിക്കാതെ ചെങ്ങന്നൂരിനെ സമ്പൂര്‍ണ ഇരുട്ട്നഗരമാക്കി. പൈതൃക സ്മാരകങ്ങളെ പരിഗണിക്കുന്നില്ല. അപകടാവസ്ഥയിലായ നഗരസഭാ കെട്ടിടത്തില്‍നിന്ന് ഓഫീസ് പ്രവര്‍ത്തനം മാറ്റുന്നില്ല. ശാസ്താംപുറം ചന്തയില്‍ ആധുനിക മാര്‍ക്കറ്റ് കോംപ്ലക്‌സ് നിര്‍മാണത്തെത്തുടര്‍ന്ന് വ്യാപാരം നഷ്ടപ്പെട്ട വ്യാപാരികളെ പുനരധിവസിപ്പിച്ചില്ല. തദ്ദേശ സ്വയംഭരണ ഓംബുഡ് സ്മാന്‍ വിചാരണ നേരിടുന്ന യുഡിഎഫ് നഗരസഭാ അംഗങ്ങള്‍ അടിയന്തരമായി രാജിവയ്ക്കണം.

ദേശീയപാതയിൽ വെള്ളക്കെട്ട് രൂക്ഷം

തുറവൂർ: അരൂർ തുറവൂർ ഉയരപ്പാത നിർമാണം നടക്കുന്ന ചന്തിരൂർ മുതൽ അരൂർ ബൈപാസ് കവല വരെയുള്ള പാതയിൽ വെള്ളക്കെട്ട് രൂക്ഷം. വെള്ളക്കെട്ടിലൂടെ ചരക്ക് വാഹനങ്ങൾ സഞ്ചരിക്കുമ്പോൾ കാൽനടയാത്രികർക്കും ഇരുചക്രവാഹനങ്ങൾക്കും ചെളിയഭിഷേകമാണ്. കൊച്ചിയിലെ സർക്കാർ, സ്വകാര്യ സ്ഥാപനങ്ങളിൽ ജോലിക്കുപോകുന്ന ഇരുചക്ര വാഹന യാത്രക്കാർ പാതയിൽ കെട്ടിക്കിടക്കുന്ന ചെളിവെള്ളം ശരീരത്ത് വീഴുന്നതോടെ ജോലിക്കു പോകാൻ കഴിയാതെ തിരികെ വീട്ടിലേക്കു പോകുന്ന അവസ്ഥയാണുള്ളത്. ഉയരപ്പാത നിർമാണവുമായി ബന്ധപ്പെട്ടു കാനയുടെ നിർമാണം പൂർത്തിയാകാത്തതാണു പാതയോരത്ത് വെള്ളക്കെട്ടിന് കാരണം. ചെറുമഴമതി പാതയിൽ വെള്ളക്കെട്ട് രൂപപ്പെടാൻ. മാത്രമല്ല ചെളിവെള്ളത്തിലൂടെ സഞ്ചരിക്കുന്ന ഇരുചക്രവാഹനങ്ങളും ഓട്ടോറിക്ഷകളും നിയന്ത്രണം വിട്ട് അപകടങ്ങൾക്കും കാരണമാകുന്നു. അടിയന്തരമായി കാനയുടെ നിർമാണം പൂർത്തിയാക്കി റോഡുകളുടെ നവീകരണം നടത്തിയാൽ മാത്രമേ അപകടങ്ങൾ ഒഴിവാക്കാൻ കഴിയൂ.

ചേപ്പാട് ഓർത്തഡോക്സ് പള്ളിയിലെ പോലീസ് നടപടി അപലപനീയം: കെ.സി. വേണുഗോപാൽ

ഹരിപ്പാട്: ദേശീയപാതാ വികസനത്തിന്‍റെ ഭാഗമായി ഹരിപ്പാട് ചേപ്പാട് സെന്‍റ് ജോർജ് ഓർത്തഡോക്സ് വലിയപള്ളിയുടെ മതിലും കുരിശടിയും പൊളിച്ചുമാറ്റുകയും വൈദികരെ മർദിക്കുകയും ചെയ്ത പോലീസ് നടപടി അപലപനീയവും പ്രതിഷേധാർഹവുമാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ എംപി. പള്ളിയുടെ ഭാഗത്തെ ദേശീയപാതയുടെ നിർമാണം ആരംഭിച്ചപ്പോൾ മുതൽ 1500 വർഷത്തോളം പഴക്കമുള്ള ഒറ്റക്കല്ലിൽ തീർത്ത കൽക്കുരിശും ചരിത്രപ്രാധാന്യമുള്ള പള്ളിയും പൊളിക്കരുതെന്ന ആവശ്യം പലതവണ കത്തിലൂടെയും നേരിട്ടും കേന്ദ്ര ഉപരിതലഗതാഗതമന്ത്രി നിതിൻ ഗഡ്കരിയേയും ദേശീയപാത അഥോറിറ്റിയേയും അറിയിക്കുകയും അതിനുവേണ്ടി വിശ്വാസികൾക്കൊപ്പം നിലപാട് സ്വീകരിക്കുകയും ചെയ്തിട്ടുണ്ടെന്ന് സംഭവസ്ഥലം സന്ദർശിച്ച എംപി പറഞ്ഞു. കുരിശടിയേയും പള്ളിയെയും ഒരുതരത്തിലും ബാധിക്കാത്ത വിധത്തിൽ പള്ളിയുടെ ഭരണസമിതിയെ കൂടി വിശ്വാസത്തിലെടുത്തു മാത്രമേ ആ ഭാഗത്തു നിർമാണം നടത്താവൂ എന്ന കാര്യം പലതവണ, പ്രാദേശികമായി ദേശീയപാത നിർമാണ ചുമതലവഹിക്കുന്ന പ്രൊജക്റ്റ് ഡയറക്ടറോടും ആവശ്യപ്പെട്ടിരുന്നുവെന്നും അവർ അക്കാര്യം ഉറപ്പു നല്കിയിരുന്നുവെന്നും എംപി പറഞ്ഞു. എന്നാൽ, ഉറപ്പിനു വിപരീതമായി നടപടിയെടുത്ത ദേശീയപാത അഥോറിറ്റി ഉദ്യോഗസ്ഥരെ എംപി ശക്തമായ പ്രതിഷേധമറിയിച്ചു. വികാരി ഫാ. ബിജി ജോൺ, ഫാ. ബിനു തോമസ്, ഇടവക ഭരണസമിതി അംഗങ്ങൾ, വിശ്വാസികൾ എന്നിവരോടൊപ്പം എംപി സംഭവസ്ഥലം സന്ദർശിച്ചു.

വോട്ടേഴ്സ് ലിസ്റ്റിൽ വിദ്യാർഥിക്ക് പേരു ചേർക്കാൻ കഴിയുന്നില്ലെന്ന് പരാതി

എടത്വ: പ്രായപൂർത്തിയായിട്ടും വോട്ടേഴ്സ് ലിസ്റ്റിൽ വിദ്യാർഥിക്ക് പേര് ചേർക്കാൻ കഴിയുന്നില്ലെന്ന് പരാതി. എടത്വ പഞ്ചായത്ത് 11 -ാം വാർഡിൽ പച്ച മണ്ണാംതുരുത്തിൽ പ്രിയൻ വി. വർഗീസാണ് വോട്ടർ പട്ടികയിൽ പേര് ചേർക്കാൻ കഴിയാതെ നാലാം വട്ടവും മടങ്ങിയത്. ലിസ്റ്റിൽ പേര് ചേർക്കൽ ആരംഭിച്ചതോടെ പ്രിയൻ വി. വർഗീസ് എടത്വ പഞ്ചായത്തിൽ എത്തിയിരുന്നു. അടുത്ത ഞായറാഴ്ചയിലേക്ക് സമയം മാറ്റി നൽകി. അധികൃതർ നൽകിയ സമയത്ത് എത്തിയെങ്കിലും പഞ്ചായത്ത് അടഞ്ഞു കിടക്കുകയായിരുന്നു. വീണ്ടും അപേക്ഷ നൽകിയതോടെ ഹിയറിംഗിന് വിളിപ്പിച്ചു. ഹിയറിംഗിന് വിളിപ്പിച്ച ദിവസം പഞ്ചായത്തിൽ എത്തിയപ്പോൾ വീണ്ടും അധികൃതർ സമയം നൽകി. വോട്ടർ ലിസ്റ്റ് ക്രമപ്പെടുത്തുന്നതിന്‍റെ ഭാഗമായി ഞായറാഴ്ചയും ഓഫീസ് പ്രവർത്തിക്കുമെന്നാണ് ഉദ്യോസ്ഥർ പറഞ്ഞത്. ഇതു പ്രകാരം ഇന്നലെ പഞ്ചായത്തിൽ എത്തിയെങ്കിലും പതിവു പോലെ ഓഫീസ് അടഞ്ഞുകിടക്കുകയായിരുന്നു. ജീവനക്കാരുമായി ബന്ധപ്പെടാൻ ശ്രമിച്ചെങ്കിലും നടന്നില്ല. പഠനാവശ്യവുമായി നടക്കുന്നതിനിടെ പഞ്ചായത്ത് അധിക്യതർ നിർദേശിച്ച സമയങ്ങളിൽ എത്തിയെങ്കിലും ലിസ്റ്റിൽ പേര് ചേർക്കാൻ കഴിയാത്ത മനോവിഷമത്തിലാണ് വിദ്യാർഥി. തദ്ദേശ തെരഞ്ഞെടുപ്പിൽ കന്നി വോട്ടായി സമ്മതിദാനാവകാശം വിനിയോഗിക്കാനുള്ള പൗരന്‍റെ അവകാശമാണ് പഞ്ചായത്ത് അധികൃതർ ഇല്ലാതാക്കുന്നതെന്ന് ആരോപണമുണ്ട്.

മാന്നാർ ഉറപ്പായും തിളയ്ക്കും

മാന്നാര്‍ ഗ്രാമപഞ്ചായത്ത് അപ്പര്‍ കുട്ടനാട്ടിലെ വിശാലമായ നെല്‍വയലുകള്‍ ഉള്ള പടിഞ്ഞാറന്‍ മേഖലയും മാന്നാര്‍ ടൗണും വെങ്കലപാത്ര ആലകള്‍ ഉള്‍പ്പെടുന്ന കുരട്ടിക്കാടും ഇതിനോടു ചേര്‍ന്നു നില്‍ക്കുന്ന കുട്ടംപേരൂരും ഉള്‍പ്പെടുന്ന ഭൂപ്രദേശം. 17.96 ച.കിലോമീറ്റര്‍ വിസ്തൃതിയുള്ള ഈ പഞ്ചായത്തില്‍ 7,566 കുടുംബങ്ങളാണ് ഉള്ളത്. മാവേലിക്കര ബ്ലോക്ക് പഞ്ചായത്തില്‍ ഉള്‍പ്പെടുന്ന മാന്നാര്‍, ചെങ്ങന്നൂര്‍ താലൂക്കിന്‍റെ രണ്ടാമത്തെ സിരാകേന്ദ്രം. നേട്ടങ്ങള്‍ ടി.വി. രത്നകുമാരി (പഞ്ചായത്ത് പ്രസിഡന്‍റ്) 4ഭൂരഹിതരും ഭവനരഹിതരും അഗതികളും ഇല്ലാത്ത പഞ്ചായത്താക്കി മാറ്റി. 4ഉപജീവന സുരക്ഷയും സാമൂഹ്യ സുരക്ഷയും ഉറപ്പാക്കാൻ കുടുംബശ്രീകളുമായി ചേര്‍ന്നു പദ്ധതി. പച്ചക്കറി കൃഷിയില്‍ സ്വയം പര്യാപ്ത നേടാൻ പദ്ധതികൾ. അങ്കണവാടി, സ്‌കൂള്‍ എന്നിവിടങ്ങളില്‍ കൃഷി. തരിശുനിലങ്ങള്‍ ഇല്ലാതാക്കി. നെല്‍വിത്തുകളും വളവും സൗജന്യമായി നല്‍കി. 42 ലക്ഷം മുടക്കി തോടുകള്‍ ശുചീകരിച്ചു. സ്വന്തം സ്ഥലത്ത് അങ്കണവാടി, എംസിഎഫ്. ഹെല്‍ത്ത് സെന്‍റർ നിര്‍മാണം തുടങ്ങി ലൈഫ് പദ്ധതിയില്‍ 180 വീടുകള്‍. കോട്ടങ്ങള്‍ സുജിത് ശ്രീരംഗം (യുഡിഎഫ് പാർലമെന്‍ററി പാർട്ടി നേതാവ്) വികസനം എല്ലാ മേഖലയിലും പിന്നാക്കം. 2023-24 വര്‍ഷത്തെ പദ്ധതികള്‍ പൂര്‍ണമായും നഷ്ടപ്പെടുത്തി. റോഡ് നിര്‍മാണത്തിനുള്ള മൂന്നു കോടി ലാപ്സാക്കി. ജലജീവന്‍ പദ്ധതി പൂർണമായില്ല. തൊഴിലുറപ്പ് പദ്ധതിയില്‍ റോഡുകള്‍ കോണ്‍ക്രീറ്റ് ചെയ്യാൻ കഴിഞ്ഞില്ല. അങ്കണവാടിക്കു ഭൂമി വാങ്ങിയതില്‍ ക്രമക്കേട്. ക്ഷീരഗ്രാമം പദ്ധതി നടപ്പിലാക്കാതെ 30 ലക്ഷം നഷ്ടപ്പെടുത്തി. ഹരിതകര്‍മ സേനയ്ക്കു വാങ്ങിയത് നിലവാരമില്ലാത്ത വാഹനങ്ങള്‍. ഒറ്റനോട്ടത്തില്‍ മാന്നാര്‍ പഞ്ചായത്തിന്‍റെ സമഗ്ര വികസനത്തിനുള്ള സാധ്യതകള്‍ ഏറെയുണ്ട്. പന്നായി കടവിലെ മിനി പാര്‍ക്ക്, മാന്നാര്‍ ടൗണിന്‍റെ വികസനം, പഞ്ചായത്ത് ബസ് സ്റ്റാന്‍ഡിന്‍റെ ശോച്യാവസ്ഥ, വെങ്കല പാത്രനിര്‍മാണ മുള്‍പ്പടെയുള്ള പരന്പരാഗത തൊഴില്‍ മേഖലയുടെ തിരിച്ചുവരവ്, പമ്പാനദിയുടെ നവീകരണം, ടൂറിസം തുടങ്ങി അനന്തമായ സാധ്യതകൾക്കു കാത്തിരിക്കുകയാണ് മാന്നാര്‍. അട്ടിമറിയിലൂടെ ഭരണം എല്‍ഡിഎഫ് പിടിച്ച പഞ്ചായത്താണ് മാന്നാര്‍. യുഡിഎഫില്‍നിന്നു കൂറു മാറി ഒരംഗം എല്‍ഡിഎഫില്‍ എത്തിയതോടെ യുഡിഎഫ് ഭരിക്കേണ്ട പഞ്ചായത്ത് എല്‍ഡിഎഫ് പക്ഷത്തായി. കൂറുമാറിയെത്തിയ സുനില്‍ ശ്രദ്ധേയത്തെ എല്‍ഡിഎഫ് വൈസ് പ്രസിഡന്‍റാക്കി. എന്നാല്‍, മൂന്നു വര്‍ഷം പിന്നിട്ടപ്പോള്‍ കൂറുമാറ്റ നിരോധന നിയമപ്രകാരം ഇയാള്‍ പുറത്തായി. പിന്നീട് നടന്ന ഉപതെരഞ്ഞെടുപ്പില്‍ എല്‍ഡിഎഫ് വിജയിച്ചതോടെ ഭരണം നിലനിര്‍ത്തി. കക്ഷിനില: ആകെ അംഗങ്ങൾ-18. എല്‍ഡിഎഫ്-9, യുഡിഎഫ് - 8, ബിജെപി-1 .

‘ജീവിതോത്സവം’ സമാപിച്ചു

റാന്നി: നാഷണൽ സർവീസ് സ്കീം റാന്നി എംഎസ് ഹയർ സെക്കൻഡറി സ്കൂൾ വിദ്യാർഥികൾ നടത്തിവന്ന 21 ദിവസത്തെ ജീവിതോത്സവം പദ്ധതിയുടെ സമാപനത്തോടനുബന്ധിച്ച് റാന്നി പെരുമ്പുഴ ബസ് സ്റ്റാൻഡിൽ ലഹരിവിരുദ്ധ പൊതുസമ്മേളനവും കലാസദസും നടത്തി. റാന്നി ഗ്രാമപഞ്ചായത്ത് പ്രസിഡന്‍റ് കെ. ആർ. പ്രകാശ് സമാപന സമ്മേളനം ഉദ്ഘാടനം ചെയ്തു. സ്കൂൾ പ്രിൻസിപ്പൽ സ്മിജു ജേക്കബ് അധ്യക്ഷത വഹിച്ചു. സ്കൂൾ മാനേജർ കെ.സി. ജേക്കബ് മുഖ്യസന്ദേശം നൽകി. ഗ്രാമപഞ്ചായത്ത് മെംബർ സന്ധ്യാദേവി, പ്രോഗ്രാം ഓഫീസർ സ്മിതാ സ്കറിയ, സ്കൂൾ പ്രൊട്ടക്ഷൻ ഗ്രൂപ്പ് അംഗം രവി കുന്നക്കാട്ട്, ഡോ. ജെബു ജോസഫ് എന്നിവർ പ്രസംഗിച്ചു. സമാപന സമ്മേളനത്തിന്‍റെ ഭാഗമായി വിദ്യാർഥികളുടെ നേതൃത്വത്തിൽ ലഹരിവിരുദ്ധ സന്ദേശം നൃത്തശില്പം, തുടി, ഫ്ലാഷ് മോബ്, കവിതാലാപനം, കലാസദസ് തുടങ്ങിയവ നടത്തി.

ഫിറ്റ്നസ് സെന്‍ററിന്‍റെ മറവിൽ മയക്കുമരുന്ന് കച്ചവടം: ഉടമ അറസ്റ്റിൽ

ചാരുംമൂട്: ഫിറ്റ്നസ് സെന്‍ററിന്‍റെ മറവിൽ മയക്കുമരുന്ന് കച്ചവടം നടത്തിവന്ന ഉടമ അറസ്റ്റിൽ. നൂറനാട് പാലമേൽ കൈലാസം വീട്ടിൽ അഖിൽ ജി. നാഥ് (31) ആണ് പിടിയിലായത്. ഇയാളുടെ വീട്ടിലെ കിടപ്പുമുറിയിൽനിന്ന് 48 ഗ്രാം എംഡിഎംഎ ജില്ലാ ലഹരിവിരുദ്ധ സ്ക്വാഡും നുറനാട് പോലീസും ചേർന്ന് കണ്ടെടുത്തു. നൂറനാട് പടനിലത്ത് ഫിറ്റ്നസ് സെന്‍റർ നടത്തുകയാണ് അഖിൽ നാഥ്. രണ്ടുമാസം മുമ്പ് ഇയാളുടെ ഫിറ്റ്നസ് സെന്‍റർ ട്രെയിനറായിരുന്ന കിരണിനെ ജില്ലാ ലഹരി വിരുദ്ധ സ്ക്വാഡും നുറനാട് പോലീസും ചേർന്ന് പിടികുടിയിരുന്നു. ഇതേതുടർന്ന് ജില്ലാ ലഹരിവിരുദ്ധ സ്ക്വാഡിന്‍റെ നിരീക്ഷണത്തിലായിരുന്നു അഖിൽ ജി. നാഥ്. ബംഗളൂരുവിൽനിന്ന് എംഡിഎംഐ വാങ്ങി നൽകുന്ന നൂറനാട് പടനിലം പറ്റൂർ സ്വദേശി ബിനുരാജിനെയും നൂറനാട് പോലീസ് കസ്റ്റഡിയിലെടുത്തിട്ടുണ്ട്. ഫിറ്റ്നസ് സെന്‍ററിൽ എത്തുന്ന യുവാക്കളെയും യുവതികളെയും രാസലഹരി പോലുള്ള മയക്കുമരുന്ന് കൊടുത്ത് ഫിറ്റ്നസിന് ഇത് ആവശ്യമാണെന്ന് വരുത്തി വൻതോതിൽ രാസലഹരി കച്ചവടമാണ് ഇയാൾ സെന്‍ററിന്‍റെ മറവിൽ നടത്തി വന്നിരുന്നതെന്ന് പോലീസ് കണ്ടെത്തി. ഫിറ്റ്നസ് സെന്‍ററിൽ സ്ഥിരം പോയിരുന്ന ചില യുവാക്കൾ മയക്കുമരുന്ന് ഉപയോഗിച്ച് നുറനാട്ടുള്ള ലഹരിവിമുക്ത കേന്ദ്രത്തിൽ ചികിത്സതേടിയതായും പോലീസിന് വിവരം ലഭിച്ചു. ലഹരി ഉപയോഗിക്കുന്നതിന് പ്രത്യേകം പാർട്ടി ഇയാൾ നടത്തിയിരുന്നതായി പോലീസ് പറയുന്നു. ഓപ്പറേഷൻ ഡി ഹണ്ടിന്‍റെ ഭാഗമായി ജില്ലാ പോലീസ് മേധവി എം.പി. മോഹനചന്ദ്രന്‍റെ മേൽനോട്ടത്തിൽ നർക്കോട്ടിക് സെൽ ഡിവൈഎസ്പി ബി. പങ്കജാക്ഷന്‍റെ നേതൃത്യത്തിലുള്ള ജില്ലാ ലഹരിവിരുദ്ധ സ്ക്വാഡും ചെങ്ങന്നൂർ ഡിവൈഎസ് പി എം.കെ. ബിനുകുമാറിന്‍റെ നേതൃത്വത്തിൽ നൂറനാട് സിഐ ശശികുമാർ, എസ് ഐ ശ്രീജിത്ത്, ഗ്രേഡ് എഎസ്ഐ സിനു വർഗീസ്, സിപിഒ കലേഷ്, വിഷ്ണു, രജനി, ജഗദിഷ് എന്നിവരുടെ സംഘമാണ് പ്രതിയെ പിടികൂടിയത്.

രാജ്യസുരക്ഷാ സേവകർക്ക് ആദരവ്

കരുമാടി: രാജ്യം അകത്തുനിന്നും പുറത്തുനിന്നും ഭീഷണികളെ അതിജീവിക്കുന്ന കാലഘട്ടത്തിൽ ഇത്തരത്തിലുള്ള സംഗമങ്ങൾ രാജ്യസുരക്ഷാ സേവകർക്ക് വലിയ ആവേശവും സന്തോഷവും നൽകുന്നതാണെന്ന് അമ്പലപ്പുഴ എസ്എച്ച്ഒ പ്രദീഷ്കുമാർ പറഞ്ഞു. കരുമാടി സെന്‍റ് നിക്കോളാസ്, സെന്‍റ് ജോസഫ് ദേവാലയത്തിൽ രാജ്യസുരക്ഷയുമായി ബന്ധപ്പെട്ട് സേവനം ചെയ്‌തു വിരമിച്ചവരെയും സേവനം ചെയ്‌തുകൊണ്ടിരിക്കുന്നവരെയും ആദരിക്കുന്ന ‘ദേശ് സുരക്ഷാ സേവക് സമ്മാൻ ആദരവ്’ ഉദ്ഘാടനം ചെയ്തു പ്രസം ഗിക്കുകയായിരുന്നു അദ്ദേഹം. മിഷൻലീഗ്, യുവദീപ്‌തി, മാതൃ-പിതൃവേദി എന്നീ സംഘടനകളുടെ സംയുക്താഭിമുഖ്യത്തിലാ ണ് പരിപാടി സംഘടിപ്പിച്ചത്. ചടങ്ങിൽ ൽ 75 രാജ്യസുരക്ഷാ സേവകർ പങ്കെടുത്തു. കരുമാടി സെന്‍റ് നിക്കോളാസ് ഹാളിൽ നടന്ന പരിപാടി വികാരി ഫാ. മാത്യു നടയ്ക്കൽ അധ്യക്ഷനായി. പ്രോഗ്രാം കോ ഓർഡിനേറ്റർ ഫാ. മാത്യു തടത്തിൽ സ്വാഗത പറഞ്ഞു. കൈക്കാരന്മാരായ ജോണി കളത്തിൽ, സാബു അഞ്ചിൽ, റൂബി ദേവസ്യ എന്നിവർ പ്രസംഗിച്ചു.

അതിദരിദ്രരെ മുഖ്യധാരയിലേക്ക് കൊണ്ടുവരിക ലക്ഷ്യം: മന്ത്രി റോഷി അഗസ്റ്റിന്‍

ആലപ്പുഴ: അതിദരിദ്രരെ മുഖ്യധാരയിലേക്ക് കൊണ്ടുവരിക പ്രധാന ലക്ഷ്യമാണെന്ന് മന്ത്രി റോഷി അഗസ്റ്റിന്‍ പറഞ്ഞു. ആലപ്പുഴ നഗരസഭയിലെ സിവ്യൂ, പവര്‍ഹൗസ് എന്നീ വാര്‍ഡുകളെ ബന്ധിപ്പിച്ചു നിര്‍മിച്ച വെള്ളാപ്പള്ളി പാലത്തിന്‍റെ ഉദ്ഘാടനം സെന്‍റ് ഫ്രാന്‍സിസ് അസീസി പാരീഷ് ഹാളില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം. ഭൂമി, വീട്, ഭക്ഷണം, തുടര്‍ചികിത്സ തുടങ്ങിയവ ആവശ്യമുള്ളവരെ കണ്ടെത്തി അവര്‍ക്കുവേണ്ട സഹായങ്ങള്‍ നല്‍കുന്നതിന് സര്‍ക്കാര്‍ ചിട്ടയായി പ്രവര്‍ത്തിച്ചു. നവംബര്‍ ഒന്നിന് ഈ ലക്ഷ്യം പൂര്‍ത്തീകരിക്കാന്‍ കേരളത്തിന് സാധിക്കുമെന്നും മന്ത്രി പറഞ്ഞു. മൂന്നുകോടി രൂപ ചെലവില്‍ സിവ്യൂ, പവര്‍ഹൗസ് വാര്‍ഡുകളെ ബന്ധിപ്പിച്ചുകൊണ്ടാണ് വെള്ളാപ്പള്ളി പാലത്തിന്‍റെ നിര്‍മാണം. 7.5 മീറ്റര്‍ ക്യാരേജ് വീതിയില്‍ ഇരുവശവും നടപ്പാത ഉള്‍പ്പെടെ 15.65 മീറ്റര്‍ നീളത്തില്‍ ജലഗതാഗതത്തിനു തടസമാവാത്ത രീതിയിലാണ് പാലം രൂപകല്പന ചെയ്തിരിക്കുന്നത്. പി.പി. ചിത്തരഞ്ജന്‍ എംഎല്‍എ അധ്യക്ഷനായി. നഗരസഭാധ്യക്ഷ കെ.കെ. ജയമ്മ, ഉപാധ്യക്ഷന്‍ പി.എസ.്എം. ഹുസൈന്‍, സ്ഥിരംസമിതി അധ്യക്ഷരായ എം.ആര്‍. പ്രേം, എം.ജി. സതീദേവി, എ.എസ്. കവിത, നഗരസഭാഗംങ്ങളായ ഹെലന്‍ ഫെര്‍ണാണ്ടസ്, റഹിയാനത്ത്, ഫാ. ആന്‍റണി തട്ടകത്ത്, ഫാ. സെബാസ്റ്റ്യന്‍ പുളിക്കല്‍, കെഐഐഡിസി ഡെപ്യൂട്ടി ജനറല്‍ മാനേജര്‍ ഹരണ്‍ ബാബു തുടങ്ങിയവര്‍ പങ്കെടുത്തു.

റോഡിന്‍റെ തിട്ട ഇടിഞ്ഞുതാഴ്ന്നു; വൈദ്യുതി പോസ്റ്റ് അപകടനിലയിൽ

എടത്വ: പഞ്ചായത്ത് റോഡിന്‍റെ തിട്ട ഇടിഞ്ഞുതാഴ്ന്നു. വൈദ്യുതി പോസ്റ്റ് തോട്ടിലേക്ക് ചരിഞ്ഞ് അപകടനിലയിൽ. തലവടി പഞ്ചായത്ത് 11-ാം വാർഡിൽ മുരിക്കോലിമുട്ട്- ബഥേൽ റോഡിൽ കാഞ്ഞൂമഠം വീടിനു സമീപത്താണ് റോഡിന്‍റെ തിട്ട തോട്ടിലേക്ക് ഇടിഞ്ഞുതാഴ്ന്നത്. തിട്ട ഇടിഞ്ഞതോടെ വൈദ്യുതി പോസ്റ്റ് തോട്ടിലേയ്ക്ക് ചരിഞ്ഞ നിലയിലാണ്. പോസ്റ്റ് തോട്ടിൽ വീണാൽ അപകടങ്ങൾക്കു കാരണമാകുമെന്ന് പരിസരവാസികൾ പറഞ്ഞു. ഓട്ടോയും കാറും ഈ റോഡിലൂടെ കടന്നുപോകുന്നത് ഏറെ ക്ലേശം സഹിച്ചാണ്. നാട്ടുകാർ പലതവണ അധികൃതരുമായി ബന്ധപ്പെട്ടെങ്കിലും യാതൊരു നടപടിയും സ്വീകരിച്ചില്ല. അധികൃതരുടെ അവഗണനയ്ക്കെതിരേ പ്രതിഷേധസമരം നടത്താനാണ് നാട്ടുകാരുടെ തീരുമാനം.

ചെത്തിപ്പുഴ ആശുപത്രിയില്‍ രാജ്യാന്തര സമ്മേളനം തുടങ്ങി

ചങ്ങനാശേരി: എംജി സര്‍വകലാശാലയിലെ ഡോ.എന്‍. രാധാകൃഷ്ണന്‍ ഇന്‍റര്‍നാഷനല്‍ സെന്‍റര്‍ ഫോര്‍ മെഡിക്കല്‍ ഇന്നൊവേഷന്‍റെ നേതൃത്വത്തില്‍ ചെത്തിപ്പുഴ സെന്‍റ് തോമസ് ആശുപത്രിയില്‍ ആരംഭിച്ച "റിഥം -2025’ രാജ്യാന്തര സമ്മേളനം എംജി സര്‍വകലാശാല വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ ഉദ്ഘാടനം ചെയ്തു. ആശുപത്രി എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിച്ചു. കോട്ടയം മെഡിക്കല്‍ കോളജ് ആശുപത്രി പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ് മുഖ്യപ്രഭാഷണം നടത്തി. ജോബ് മൈക്കിള്‍ എംഎല്‍എ, സെന്‍റ് തോമസ് ആശുപത്രി മാനേജര്‍ മോണ്‍. ജോണ്‍ തെക്കേക്കര, അസോസിയേറ്റ് ഡയറക്ടര്‍ ഫാ. ജോഷി മുപ്പതില്‍ചിറ, എന്‍ആര്‍ഐസിഎംഐ ചെയര്‍മാനും സെന്‍റ് തോമസ് ഇന്‍സ്റ്റിറ്റ്യൂട്ട് ഓഫ് റിസര്‍ച്ച് ഓണ്‍ വീനസ് ഡിസീസ് മെഡിക്കല്‍ ഡയറക്ടറുമായ ഡോ. എന്‍. രാധാകൃഷ്ണന്‍, സെന്‍റ് തോമസ് ആശുപത്രി കാര്‍ഡിയോളജി വിഭാഗം ഡോ. അബ്ദുല്‍ ഖാദര്‍, മാര്‍ അത്തനാസിയോസ് കോളജ് ഫോര്‍ അഡ്വാന്‍സ് സ്റ്റഡീസ് പ്രിന്‍സിപ്പല്‍ ഫാ. ഏബ്രഹാം മുളമൂട്ടില്‍, പുഷ്പഗിരി മെഡിക്കല്‍ കോളജ് ജനറല്‍ സര്‍ജറി വിഭാഗം പ്രഫ. റോബിന്‍സണ്‍ പി. ജോര്‍ജ്, ഡോ. സി. ചന്ദന എന്നിവര്‍ പ്രസംഗിച്ചു.

എസ്റ്റിമേറ്റുകൾ പലത്; പരിഹാരം അകലെ

അമ്പലപ്പുഴ: കാലങ്ങളായി തുടരുന്ന വെള്ളക്കെട്ട് പരിഹാരിക്കാന്‍ എസ്റ്റിമേറ്റുകള്‍ പലതെടുത്തു. എന്നാല്‍, വെള്ളക്കെട്ടിനു പരിഹാരമായില്ല. ചെറിയ മഴ പെയ്താല്‍ പോലും അരയ്‌ക്കൊപ്പം വെള്ളം കയറുന്ന അവസ്ഥ. പുറത്തിറങ്ങാന്‍ ചങ്ങാടം ഉപയോഗിക്കേണ്ട സ്ഥിതി. ഒന്‍പതു വര്‍ഷമായി തുടരുന്ന ഈ ദുരിതത്തിന് പരിഹാരം കാണാന്‍ ഒരധികൃതരും ഇവിടേക്ക് എത്തിയിട്ടുമില്ല. അമ്പലപ്പുഴ വടക്ക് പഞ്ചായത്ത് ഒന്നാം വാര്‍ഡ് വണ്ടാനം ഇഎംഎസ് ഷിഹാബ് നഗര്‍ റോഡിന് സമീപമുള്ള 15 ഓളം കുടുംബങ്ങളാണ് എല്ലാ മഴക്കാലത്തും വെള്ളക്കെട്ടിന്‍റെ ദുരിതത്തില്‍ക്കഴിയുന്നത്. ഒന്‍പതു വര്‍ഷം മുന്‍പ് റോഡ് നിര്‍മിക്കാനായി ഇവിടെ നേരത്തെയുണ്ടായിരുന്ന പൈപ്പ് മാറ്റിയതോടെയാണ് പ്രദേശവാസികളുടെ ദുരിതമാരംഭിച്ചത്. പ്രദേശത്തെ വെള്ളക്കെട്ടിന് പരിഹാരമായി പതിറ്റാണ്ടുകള്‍ക്കു മുന്‍പ് സ്ഥാപിച്ച പൈപ്പ് പുതിയത് സ്ഥാപിക്കാമെന്ന ഉറപ്പിലാണ് മാറ്റിയത്. എന്നാല്‍, വര്‍ഷങ്ങള്‍ കഴിഞ്ഞിട്ടും മുന്‍പ് മാറ്റിയ പൈപ്പ് ഇതുവരെ പുനഃസ്ഥാപിച്ചിട്ടില്ല. എല്ലാവര്‍ഷവും ആദ്യ മഴയില്‍ത്തന്നെ ഇതാണ് അവസ്ഥ. ഇത്തവണയും ഇതിന് മാറ്റമുണ്ടായിട്ടില്ല. കഴിഞ്ഞ ഒരുദിവസത്തെ മഴയില്‍ പ്രദേശത്തെ വീടുകളിലെല്ലാം വെളളം കയറി. ഇപ്പോള്‍ വീടിന് പുറത്തിറങ്ങാന്‍ പല കുടുംബങ്ങളും ചങ്ങാടം നിര്‍മിച്ചിരിക്കുകയാണ്. മലിനജലത്തിലൂടെ നടന്ന് പലര്‍ക്കും അസുഖങ്ങളും പിടിപെട്ടു. ഓടനിര്‍മിക്കാനും പൈപ്പിടാനുമായി പലതവണ പഞ്ചായത്ത് എസ്റ്റിമേറ്റ് തയാറാക്കിയെങ്കിലും വര്‍ഷങ്ങള്‍ കഴിഞ്ഞിട്ടും ഇവ രണ്ടും യാഥാര്‍ഥ്യമായില്ല. 4,85,000 രൂപയുടെ എസ്റ്റിമേറ്റാണ് തയാറാക്കിയത്. കഴിഞ്ഞവര്‍ഷം രണ്ട് മാസത്തോളമാണ് ഇവര്‍ വെള്ളക്കെട്ടിന്‍റെ ദുരിതമനുഭവിച്ചത്. ഇനി തുലാവര്‍ഷം ശക്തമായാല്‍ വെള്ളക്കെട്ട് രൂക്ഷമാകുന്നതോടെ വീടിന് പുറത്തിറങ്ങാന്‍ കഴിയാത്ത സ്ഥിതിയാകും. വെള്ളം ഇങ്ങനെ കെട്ടിക്കിടക്കുന്നതിനാല്‍ പല കുടുംബത്തിനും പ്രാഥമികാവശ്യം നിര്‍വഹിക്കാന്‍ പോലും കഴിയാത്ത സ്ഥിതിയായി. വെള്ളം ഒഴുകിപ്പോകാന്‍ മാര്‍ഗമില്ലാതെ വന്നതോടെ പ്രദേശത്തുനിന്നുള്ള മലിനജലമെല്ലാം ഇവിടെ കെട്ടിക്കിടക്കുകയാണ്. ഇതോടെ കുട്ടികള്‍ക്ക് സ്‌കൂളുകളില്‍ പോകാന്‍ പോലും കഴിയാത്ത സ്ഥിതിയായി. ജില്ലാ ഭരണകൂടം അടിയന്തരമായി ഇടപെട്ട് ശാശ്വതപരിഹാരം കാണണമെന്നാണ് നാട്ടുകാരുടെ ആവശ്യം. പഞ്ചായത്ത് ഭരണസമിതിയുടെ കാലാവധി അവസാനിക്കാന്‍ ഇനി ആഴ്ചകള്‍ മാത്രമവശേിക്കേ തങ്ങളുടെ ദുരിതത്തിന് ആര്, എങ്ങനെ പരിഹാരം കാണുമെന്ന ആശങ്കയാണ് ഇവര്‍ക്ക്.

കെവിഎം ആശുപത്രി വാര്‍ഷികം

ചേര്‍ത്തല: കെവിഎം സൂപ്പര്‍ സ്‌പെഷാലിറ്റി ആശുപത്രിയുടെ 53-ാമത് വാര്‍ഷികം ആഘോഷിച്ചു. ആശുപത്രി ഓഡിറ്റോറിയത്തില്‍ ചേര്‍ന്ന സമ്മേളനത്തില്‍ ഇന്‍കംടാക്‌സ് അഡീഷണല്‍ കമ്മീഷണര്‍ ജ്യോതിസ് മോഹന്‍ ഉദ്ഘാടനം ചെയ്തു. ആശുപത്രി മാനേജിംഗ് പാര്‍ട്ണര്‍ ഡോ. അവിനാശ് ഹരിദാസ് അധ്യക്ഷത വഹിച്ചു. സീനിയര്‍ ഫിസിഷ്യന്‍ ഡോ.പി. വിനോദ് കുമാര്‍, ഡപ്യൂട്ടി ഓപ്പറേഷന്‍സ് മാനേജര്‍ മേഘ എം. പിള്ള എന്നിവര്‍ പ്രസംഗിച്ചു. 43 വര്‍ഷം സേവനം പൂര്‍ത്തിയാക്കിയ എച്ച്ആര്‍ എക്‌സിക്യൂട്ടീവ് എച്ച്. സരോജയ്ക്ക് ലൈഫ് ടൈം അച്ചീവ്‌മെന്‍റ് അവാര്‍ഡ് ഡോ. അവിനാശ് ഹരിദാസ്, ചീഫ് മെഡിക്കല്‍ ഓഫീസര്‍ ഡോ.വി.വി. ഹരിദാസ് എന്നിവര്‍ ചേര്‍ന്ന് സമ്മാനിച്ചു.

മെഗാ ടൂറിസം പദ്ധതിക്ക് മെഗാ താമസം!

കായംകുളം: ഏറെ കൊട്ടിഘോഷിച്ച കായംകുളം മെഗാടൂറിസം പദ്ധതി ഒരു പതിറ്റാണ്ടു കഴിഞ്ഞിട്ടും പാതിവഴിയിൽ. പദ്ധതി പൂര്‍ത്തിയാക്കാത്തത് കായലോര ടൂറിസം വികസനത്തെ പ്രതിസന്ധിയിലാക്കി. കായലോരത്തു മോഷണവും സാമൂഹ്യവിരുദ്ധ ശല്യവും വ്യാപകമായതിനെത്തുടര്‍ന്നു നിരീക്ഷണ കാമറകള്‍ സ്ഥാപിച്ചെങ്കിലും സാമൂഹ്യവിരുദ്ധ ശല്യത്തിനു പരിഹാരമായിട്ടില്ല. ആളുകള്‍ക്കു കായല്‍ സൗന്ദര്യംആസ്വദിക്കുന്നതിനായി നിര്‍മിച്ച നടപ്പാതകള്‍ കാടുകയറിയ നിലയിലാണ്. കേന്ദ്ര ടൂറിസം വകുപ്പ് മെഗാ ടൂറിസം വികസനം ലക്ഷ്യമിട്ട് 2013 ജൂലൈ 12നാണ് പദ്ധതി ആവിഷ്‌കരിച്ചത്. ദേശീയ പദ്ധതിയില്‍ ആലപ്പുഴ ജില്ലയ്ക്ക് 52.25 കോടി രൂപ പദ്ധതിയുടെ ഭാഗമായി അനുവദിച്ചു. കായംകുളത്ത് മാത്രമായി പദ്ധതിക്ക് 7.83 കോടി രൂപയാണ് അനുവദിച്ചത്. എല്ലാം നശിക്കുന്നു വിനോദസഞ്ചാരികള്‍ക്കു ബോധവത്കരണ കേന്ദ്രം, ഭക്ഷണശാല, ലൈഫ് ഗാര്‍ഡിനുവേണ്ടിയുള്ള മുറി, പോലീസ് ബൂത്ത്, കായല്‍ സൗന്ദര്യം ആസ്വദിക്കാൻ ബോട്ട് വാക് വ്യൂ, കുട്ടികള്‍ക്കായി പാര്‍ക്ക്, മത്സ്യകന്യകയുടെ ശില്പം തുടങ്ങിയവയാണ് പദ്ധതിയുടെ ഭാഗമായി നിര്‍മിച്ചത്. മത്സ്യകന്യക ശില്പം പെയിന്‍റ് മങ്ങി പായല്‍ പിടിച്ചു. കുട്ടികളുടെ പാര്‍ക്കിലെ ഉപകരണങ്ങള്‍ ആകട്ടെ അതും പ്രയോജനമില്ലാതെ കിടക്കുന്നു. സ്‌കൂള്‍ കോളജ് വിദ്യാര്‍ഥികളുടെയും കമിതാക്കളുടെയും ഇടമായി കായലോരം ഇപ്പോള്‍ മാറി. അമിനിറ്റി സെന്‍റർ ചത്തു കായലോര ടൂറിസം പദ്ധതി പ്രദേശത്തു ഡിടിപിസിയുടെ നിയന്ത്രണത്തിലുള്ള അമിനിറ്റി സെന്‍ററിന്‍റെ പ്രവര്‍ത്തനം നിലച്ചിട്ടു മാസങ്ങളായി. ഉടന്‍ തുറക്കുമെന്നു പറയുന്നുണ്ടെങ്കിലും പ്രദേശം ഇപ്പോൾ കാടുകയറി ക്കിടക്കുകയാണ്. അമിനിറ്റി സെന്‍റര്‍ സ്വകാര്യ സംരഭകര്‍ക്കു ലേലത്തില്‍ നല്‍കുകയാണ് ചെയ്തുകൊണ്ടിരുന്നത്. മുമ്പ് അമിനിറ്റി സെന്‍റര്‍ ലേലത്തില്‍ എടുക്കുന്നവര്‍ നഷ്ടം വരുന്നതിനാല്‍ സംരംഭകര്‍ പ്രവര്‍ത്തനം നിര്‍ത്തുകയാണ്. വിശ്രമമുറികളും റസ്റ്ററന്‍റും കോണ്‍ഫറന്‍സ് ഹാളും അടങ്ങുന്നതാണ് അമിനിറ്റി സെന്‍റര്‍. കാല്‍നൂറ്റാണ്ട് മുമ്പ് ടൂറിസം വകുപ്പ് നിര്‍മിച്ചതാണ് അമിനിറ്റി സെന്‍റര്‍. കായലോര ടൂറിസം പദ്ധതി പ്രദേശം കാലത്തിനൊത്തു വളരാത്തത് അനുബന്ധ സ്ഥാപനങ്ങളുടെ പ്രവര്‍ത്തനങ്ങളെയും ബാധിച്ചു. വര്‍ഷത്തില്‍ ഒരിക്കല്‍ മാത്രം നടക്കുന്ന വള്ളംകളിയാണ് ടൂറിസം കേന്ദ്രത്തിലെ പ്രധാന വിനോദ പരിപാടി. വിനോദസഞ്ചാര വകുപ്പ് ജില്ലാ ടൂറിസം പ്രമോഷന്‍ കൗണ്‍സിലിനു പദ്ധതി പ്രദേശം കൈമാറിയിട്ടുണ്ട്. സുരക്ഷാ ജീവനക്കാര്‍ അടക്കമുള്ള സംവിധാനങ്ങള്‍ ഉടന്‍ സജ്ജമാക്കുമെന്നാണ് അധികൃതര്‍ പറയുന്നത്.

കാലിത്തീറ്റകൾക്ക് ഗുണനിലവാരം ഉറപ്പുവരുത്തും: മന്ത്രി ചിഞ്ചുറാണി

ചേര്‍ത്തല: കാലിത്തീറ്റ കമ്പനികളിൽ ഉത്പാദിപ്പിക്കുന്ന കാലിത്തീറ്റകൾക്ക് ഗുണനിലവാരം ഉറപ്പുവരുത്തുമെന്നും ഏതെങ്കിലും കമ്പനിയുടെ തീറ്റ കഴിച്ച് പശുക്കൾ ചത്താൽ അവർ പകരം പശുവിനെ നൽകണമെന്നും അല്ലാത്തപക്ഷം ആ കമ്പനി അടച്ചുപൂട്ടുന്നുതിനുള്ള പുതിയ നിയമം കേരളത്തില്‍ നടപ്പാക്കുമെന്നും ക്ഷീര വികസന മൃഗസംരക്ഷണമന്ത്രി ചിഞ്ചുറാണി പറഞ്ഞു. ക്ഷീരവികസന വകുപ്പിന്‍റെ ആലപ്പുഴ ജില്ലാ സംഗമത്തോടനുബന്ധിച്ചുള്ള പൊതുസമ്മേളനം ഉദ്ഘാടനം ചെയ്യുകയായിരുന്നു മന്ത്രി. കേന്ദ്രവും-കേരള സംസ്ഥാനവും ചേർന്ന് പുതിയ സമഗ്ര ഇൻഷ്വറൻസ് പരിരക്ഷ കൊണ്ടുവരും. ഇതിന്‍റെ ഉദ്ഘാടനം ഈ മാസം തന്നെ ഉണ്ടാകും. കേന്ദ്രസർക്കാർ 29 വെറ്ററിനറി ആംബുലൻസ് നൽകിയപ്പോൾ കേരള സർക്കാർ 56 ആംബുലൻസുകൾ വിവിധ ബ്ലോക്കുകളിൽ കൂടി നൽകി. 1962 എന്ന കോൾ സെന്‍ററിലെ നമ്പറിൽ ക്ഷീരകർഷകർ വിളിച്ചാൽ ആംബുലൻസും ഡോക്ടറുടെയും സേവനം വീട്ടുമുറ്റത്ത് കിട്ടും. ബ്ലോക്ക് പഞ്ചായത്തിലൂടെ നൽകുന്ന ക്ഷീര മരുന്നുകൾ ആംബുലൻസ് വഴിയും നൽകാൻ കഴിയും. വൈകുന്നേരം നാലു മുതൽ രാത്രി 12 വരെ എല്ലാ ജില്ലാകേന്ദ്രങ്ങളിലും ഓപ്പറേഷൻവരെ നടത്താനുള്ള സൗകര്യം ആംബുലൻസിൽ സേവനം ലഭ്യമാണ്. കേരള ബാങ്ക് വഴി കർഷകർക്ക് അഞ്ചു മുതൽ 10 വരെയുള്ള പശുക്കളെ വായ്പ വഴി നൽകും. ഇതിനുവേണ്ടി വരുന്ന പലിശ ക്ഷീരവകുപ്പിൽനിന്നും നൽകും. കയർത്തൊഴിലാളികൾക്ക് രണ്ടു പശുവിനെ വാങ്ങാൻ 95,000 രൂപ വായ്പ ക്ഷീരവകുപ്പ് നൽകും. ആലപ്പുഴ ജില്ലയിൽ മാത്രം ഈ വായ്പ 18 പേർക്ക് നൽകി. ക്ഷീരകർഷകരുടെ മക്കൾക്ക് മിൽമയിൽ വരുന്ന ജോലി ഒഴുവുകളിൽ മുൻഗണന നൽകുമെന്നും ചിഞ്ചു റാണി പറഞ്ഞു. കാവില്‍ സെന്‍റ് മൈക്കിള്‍സ് പാരീഷ് ഹാളില്‍ നടന്ന സമ്മേളനത്തില്‍ മന്ത്രി പി. പ്രസാദ് അധ്യക്ഷത വഹിച്ചു. ജില്ലയിലെ മികച്ച കർഷകരായ വത്സല, വത്സ, പ്രസന്നകുമാരി എന്നിവരെ ചടങ്ങില്‍ ആദരിച്ചു. ക്ഷീര വികസനവകുപ്പ് ഡയറക്ടർ ശാലിനി ഗോപിനാഥ് റിപ്പോർട്ട് അവതരിപ്പിച്ചു. ക്ഷീര സംഘങ്ങൾക്കുള്ള ധനസഹായം ടിആര്‍സിഎംപിയു ചെയർമാൻ മണി വിശ്വനാഥ് വിതരണം ചെയ്തു. അവാർഡ് വിതരണം ജില്ലാ പഞ്ചായത്ത് വൈസ് പ്രസിഡന്‍റ് എൻ.എസ്. ശിവപ്രസാദ് നിർവഹിച്ചു. സി.ആർ. ബാഹുലേയൻ, ടി.കെ. പ്രതുലചന്ദ്രൻ, ആയാപറമ്പ് രാമചന്ദ്രൻ, ഓമന ബാനർജി, ബിനു ഐസക് രാജു, എം.ജി. നായർ എന്നിവർ പങ്കെടുത്തു.

ആർപ്പോ... ആലപ്പുഴ! റവന്യു ജില്ലാ സ്കൂൾ കായിക മേള ഓവറോൾ ചാന്പ്യൻഷിപ്പ്

മുഹമ്മ: ഇഞ്ചോടിഞ്ച് പോരാട്ടം നടന്ന റവന്യു ജില്ലാ സ്കൂൾ കായിക മേളയിൽ ആലപ്പുഴ സബ് ജില്ല ഓവറോൾ ചാന്പ്യൻഷിപ്പ് കരസ്ഥമാക്കി. ചേർത്തല സബ് ജില്ലയ്ക്കാണ് രണ്ടാം സ്ഥാനം. ആലപ്പുഴ സബ് ജില്ലയ്ക്ക് 346 പോയിന്‍റും ചേർത്തല സബ് ജില്ലയ്ക്ക് 329 പോയിന്‍റും ലഭിച്ചു. 56 പോയിന്‍റ് നേടിയ മാവേലിക്കര സബ് ജില്ലയാണ് മൂന്നാം സ്ഥാനത്ത്. സ്കൂൾ വിഭാഗത്തിൽ കലവൂർ ഗവ. ഹയർ സെക്കൻഡറി സ്കൂളിന് 107 പോയിന്‍റ് ലഭിച്ചപ്പോൾ രണ്ടാം സ്ഥാനത്ത് എത്തിയ ആലപ്പുഴ എസ്ഡിവി ബോയ്സ് ഹയർ സെക്കൻഡറി സ്കൂൾ 93 പോയിന്‍റ് കരസ്ഥമാക്കി. 76 പോയിന്‍റ് ലഭിച്ച ആലപ്പുഴ ലിയോ തേർട്ടിന്ത് ഹയർ സെക്കൻഡറി സ്കൂളാണ് മൂന്നാം സ്ഥാനത്ത്. ത്രില്ലിംഗ് ക്ലൈമാക്സ് നാലുനാൾ നീണ്ട മത്സരത്തിൽ വാശിയേറിയ പോരാട്ടമാണ് ആലപ്പുഴ സബ് ജില്ലയും ചേർത്തല സബ് ജില്ലയും നടത്തിയത്. ഓരോ ദിവസവും മേള തീരുമ്പോൾ ഏതാനും പോയിന്‍റുകളുടെ വ്യത്യാസം മാത്രമാണ് ഈ സബ് ജില്ലകൾ തമ്മിൽ ഉണ്ടായിരുന്നത്. ഇന്നലെ നടന്ന മത്സരത്തിൽ അവസാന നിമിഷം വരെ ഫലം പ്രവചനാതീതമായിരുന്നു. ജില്ലാ പഞ്ചായത്തംഗം ആർ. റിയാസ് സമ്മാനദാനം നടത്തി. വിദ്യാഭ്യാസ ഡപ്യൂട്ടി ഡയറക്ടർ ഇ.എസ് ശ്രീലത, ആർജിഎസ്ഡിഎ സെക്രട്ടറി ആർ. അനസ്, മുഹമ്മ മദർ തെരേസാ ഹൈസ്കൂൾ ഹെഡ്മിസ്ട്രസ് മെയ്മോൾ ജോസഫ്, എം.വി. സാബുമോൻ, എൽ. വിനോദ് കുമാർ, സഹിതാ സതീശൻ, എസ്. സുജീഷ് എന്നിവർ പ്രസംഗിച്ചു. കലവൂരുകാരെ കളറാക്കിയ കരസ്പർശം ഇവരുടേത് മുഹമ്മ: പരിമിതികളോട് പടവെട്ടിയാണ് സ്കൂൾ വിഭാഗം മൽസരത്തിൽ കലവൂർ ഗവ. ഹയർ സെക്കൻഡറി സ്കൂൾ വിഭാഗം മൽസരത്തിൽ ഒന്നാമതെത്തിയത്. ആലപ്പുഴ എസ് ഡിവി സ്കൂളുമായി ഇഞ്ചോടിച്ച് മൽസരിച്ചാണ് കലവൂർ സ്കൂൾ വെന്നിക്കൊടി പാറിച്ചത്.

കായികാധ്യാപിക അന്നമ്മ അഗസ്റ്റിന്‍റെയും സ്പോർട്സ് കൗൺസിൽ കോച്ച് കെ.ആർ. സാംജിയുടെയും ശിക്ഷണത്തിലാണ് കലവൂർ സ്കൂളിലെ കുട്ടികൾ മേളയിൽ മാറ്റുരയ്ക്കാൻ എത്തിയത്. കായിക പരിശീലനത്തിനുള്ള അടിസ്ഥാന സൗകര്യങ്ങൾ കുറവുള്ള സ്കൂളാണ് കലവൂർ സ്കൂളെങ്കിലും സംസ്ഥാന തലത്തിലും ദേശീയ തലത്തിലുമെല്ലാം ഒന്നാമതെത്തുന്ന താരങ്ങളെ സംഭാവന ചെയ്യാൻ സ്കൂളിനു കഴിയുന്നുണ്ട്. അന്നമ്മ അഗസ്റ്റിൻ തെരഞ്ഞെടുക്കുന്ന താരങ്ങളെ വിദഗ്ധ പരിശീലനം നൽകി മുൻ നിരയിലെത്തിക്കുന്നത് സ്പോർട്സ് കൗൺസിലിന്‍റെ റീജണൽ കോച്ചിംഗ് സെന്‍ററായ പ്രീതികുളങ്ങരയിലെ കലവൂർ ഗോപിനാഥ് സ്റ്റേഡിയവും ഇവിടെ കോച്ചായ കെ.ആർ. സാംജിയുമാണ്.

അന്പലപ്പുഴ തെക്ക് പോരാട്ടം ഇരന്പും

അമ്പലപ്പുഴ തെക്ക് പഞ്ചായത്ത് അമ്പലപ്പുഴ തെക്ക് പഞ്ചായത്ത് പടിഞ്ഞാറ് അറബിക്കടൽ അതിരിടുന്നു. കിഴക്കിന്‍റെ ഒരു ഭാഗം വേമ്പനാട് കായലിന്‍റെ സാന്നിധ്യവും നെൽവയലുകളും തെങ്ങിൻ തോപ്പുകളും നിറഞ്ഞ ഗ്രാമപ്രദേശം. നെൽകൃഷിയാണ് പ്രധാന വരുമാനം. 15 വാർഡുകളുള്ളതിൽ മൂന്നു വാർഡുകൾ പൂർണമായും രണ്ടു വാർഡുകൾ ഭാഗികമായും തീരദേശ വാർഡുകൾ. തീരദേശത്ത് മത്സ്യബന്ധനം പ്രധാന വരുമാനം. ബാക്കിയുള്ള 10 വാർഡുകളിൽ 9 എണ്ണവും കാർഷിക മേഖലയിൽ. നേട്ടങ്ങൾ... ശോഭാ ബാലൻ അമ്പലപ്പുഴ തെക്ക് പഞ്ചായത്ത് പ്രസിഡന്‍റ് •കോമന സബ് സെന്‍ററിന് പത്തു സെന്‍റ് സ്ഥലം കണ്ടെത്തി. നിർമാണത്തിനു ഹെൽത്ത് ഗ്രാന്‍റിൽനിന്ന് 55 ലക്ഷം അനുവദിച്ചു ടെൻഡർ നടപടി തുടങ്ങി. 417 അങ്കണവാടികൾക്കു സൗജന്യമായി സ്ഥലം ലഭ്യമാക്കി. നാല് അങ്കണവാടികൾ പുതിയ കെട്ടിടത്തിൽ. •സുനാമി കോളനിയിൽ പത്തു കൊല്ലമായി മുടങ്ങിക്കിടന്ന കുഴൽക്കിണർ പ്രവർത്തനക്ഷമമാക്കി. മൂന്നാം വാർഡിൽ കുഴൽക്കിണർ. കറുകത്തറ, കരുമാടി പമ്പ് ഹൗസിലും മോട്ടോറുകൾ സ്ഥാപിച്ച് കുടിവെള്ളപ്രശ്‌നം പരിഹരിച്ചു. •13.50 ലക്ഷം ലിറ്റർ ശേഷിയുള്ള ജലസംഭരണിക്കായി പോലീസ് ക്വാർട്ടേഴ്‌സിനു സമീപം റവന്യൂ പുറമ്പോക്കു കണ്ടെത്തി ജലഅഥോറിറ്റിക്കു കൈമാറി. നിർമാണത്തിന് 12.50 കോടിയുടെ ടെൻഡർ. •അതിദരിദ്ര പട്ടികയിൽപ്പെട്ട രണ്ടു കുടംബങ്ങൾക്കു ഭൂമി വാങ്ങി വീടു നിർമാണത്തിനു നടപടി. മറ്റു രണ്ടു കുടുംബങ്ങൾക്കുള്ള വീടു നിർമാണം പുരോഗമിക്കുന്നു. അതിദാരിദ്ര്യമുക്ത പഞ്ചായത്തായി പ്രഖ്യാപിച്ചു. കോട്ടങ്ങൾ... കെ. മനോജ്‌കുമാർ (ബിജെപി പാർലമെന്‍ററി പാർട്ടി നേതാവ് ) •ജലജീവൻ പദ്ധതി പൂർത്തീകരിക്കാൻ സാധിച്ചില്ല. •രണ്ടാം നമ്പർ ഷോപ്പിംഗ് കോംപ്ലക്‌സ് നിൽക്കുന്ന സ്ഥലം പഞ്ചായത്തിന്‍റെ പേരിലാക്കാൻ സാധിച്ചില്ല. ഇതിന്‍റെ ഭൂമി ദേശീയപാതയ്ക്കു വിട്ടുകൊടുത്തതിന്‍റെ നഷ്ടപരിഹാരത്തുക വാങ്ങിയെടുത്തില്ല. •ഷോപ്പിംഗ് കോംപ്ലക്‌സിലെ അനധികൃത കച്ചവടം നടത്തുന്നവരെ ഒഴിപ്പിക്കാനായില്ല. പഞ്ചായത്തിന് ലക്ഷക്കണക്കിനു രൂപയുടെ നഷ്ടം. •മാലിന്യസംസ്കരണ, മാലിന്യസംഭരണ സംവിധാനങ്ങൾ പൂർണമാക്കാനായില്ല. •പൊതുജലാശയങ്ങളിലെ പോള നീക്കാൻ നടപടിയില്ല. മിനി സിവിൽസ്റ്റേഷനടക്കമുള്ള നിർമാണം തടസപ്പെട്ടു. •സ്വകാര്യ വ്യക്തികൾ കൈവശം വച്ചിരിക്കുന്ന അമ്പലപ്പുഴ ടൗൺ ക്ലബ് പഞ്ചായത്ത് ഏറ്റെടുക്കാനുള്ള നടപടി തുടങ്ങിയെങ്കിലും രാഷ്‌ട്രീയ ഇടപെൽ മൂലം പൂർത്തീകരിക്കാനായില്ല. ഒറ്റനോട്ടത്തിൽ കർഷകത്തൊഴിലാളികളും മത്സ്യത്തൊഴിലാളികളും കാർഷിക അനുബന്ധ തൊഴിൽ ചെയ്യുന്നവരുമാണ് പഞ്ചായത്തിലേറെയും. എല്ലാ മതവിഭാഗത്തിലുമുള്ള ജനങ്ങൾ വളരെ സൗഹാർദത്തോടെ കഴിഞ്ഞുവരുന്ന പഞ്ചായത്തിലെ ആകെ ജനങ്ങളുടെ എണ്ണം 2021ലെ സെൻസസ് പ്രകാരം 23205. 2020ലെ പഞ്ചായത്ത് തെരഞ്ഞെടുപ്പിലെ ആകെ വോട്ടർമാർ 16,306. ഇതിൽ 7,565 പുരുഷ വോട്ടർമാരും 8,741 സ്ത്രീകളും. 95 ശതമാനത്തോളം സാക്ഷരതയുള്ള ഗ്രാമത്തിലെ വിദ്യാഭ്യാസ, സാംസ്‌കാരിക, സാമൂഹിക സ്ഥാപനങ്ങൾ സാമൂഹിക ഐക്യത്തിനു വലിയ പങ്കുവഹിക്കുന്നു. നിലവിലെ കക്ഷിനില: ആകെ വാർഡുകൾ- 15. സിപിഎം-7, സിപിഐ- 1, ബിജെപി- 6, എസ്ഡിപിഐ -1.

മിച്ചല്‍ ജംഗ്ഷന്‍ വികസനം: തർക്കം, ബഹിഷ്കരണം

മാവേലിക്കര: മാവേലിക്കര മിച്ചല്‍ ജംഗ്ഷന്‍ വികസനം സംബന്ധിച്ച് ജില്ലാതല സാമൂഹിക പ്രത്യാഘാത പഠന യൂണിറ്റായ കളമശേരി രാജഗിരി കോളജ് ഓഫ് സോഷ്യല്‍ സയന്‍സ് നടത്തിയ സമൂഹിക പ്രത്യാഘാത പഠന റിപ്പോര്‍ട്ടിന്‍റെ കരടിന്‍മേല്‍ പൊതുവാദം നടന്നു. മാവേലിക്കര മിനി സിവില്‍ സ്റ്റേഷന്‍ കോണ്‍ഫറന്‍സ് ഹാളില്‍ നടന്ന ഹിയറിംഗില്‍ ജനപ്രതിനിധികള്‍, ഭൂവുടമകള്‍, വ്യാപാരികള്‍, സ്ഥാപനങ്ങളിലെ തൊഴിലാളികള്‍ എന്നിവര്‍ പങ്കെടുത്തു. നിലവില്‍ 18 മീറ്റര്‍ വീതിയില്‍ നിര്‍മിക്കുന്ന റോഡ് വടക്ക് തെക്ക് ഭാഗങ്ങളില്‍ അന്‍പത് മീറ്റര്‍ നീളത്തിലും കിഴക്ക് പടിഞ്ഞാറ് ഭാഗങ്ങളില്‍ നൂറ് മീറ്റര്‍ നീളത്തിലുമാണ് വീതികൂട്ടൽ പറഞ്ഞിരിക്കുന്നത്. ഭിന്നസ്വരം 18 മീറ്റര്‍ വീതിയാക്കുന്നതു വലിയ ആഘാതമായിരിക്കുമെന്നും 14 മീറ്റർ മതിയെന്നുമായിരുന്നു വ്യാപാരികളുടെ വാദം. എന്നാൽ, ഭാവിയിൽ വികസനവും പുതിയ സ്ഥാപനങ്ങളും വരണമെങ്കിൽ 18 മീറ്റർ വീതി തന്നെ വേണമെന്ന നിലപാടാണ് ഭൂഉടമകൾ സ്വീകരിച്ചത്. ഭൂമിക്കു മതിയായ നഷ്ടപരിഹാരം നൽകണമെന്നും ഇവർ ആവശ്യപ്പെട്ടു. നിലവിലെ വികസനം കുപ്പിക്കഴുത്ത് പോലെയാണെന്നും ആക്ഷേപം ഉയർന്നു. ഇറങ്ങിപ്പോയി അതേസമയം, പദ്ധതിപ്രദേശത്തെ ജനപ്രതിനിധികള്‍ പദ്ധതിതന്നെ ആശാസ്ത്രീയമെന്ന് ആരോപിച്ച് ഇറങ്ങിപ്പോയി. മാവേലിക്കര നഗരസഭ ചെയര്‍മാന്‍ നൈനാന്‍ സി. കുറ്റിശേരില്‍, വാര്‍ഡ് മെംബര്‍മാരായ ലളിത രവീന്ദ്രനാഥ്, അനി വര്‍ഗീസ്, മനസ് രാജന്‍, ശാന്തി അജയന്‍ എന്നിവരാണ് ഇറങ്ങിപ്പോയത്. രാജഗിരി കോളജ് ഓഫ് സോഷ്യല്‍ സയന്‍സ് ഡവലപ്മെന്‍റ് ഓഫീസര്‍ സി.പി. ബിജു, കോളജ് റിസര്‍ച്ച് അസോസിയേറ്റുകളായ മരിയ കെന്‍സി, കെ.ഒ. വര്‍ഗീസ്, പിഡബ്ല്യൂഡി അസിസ്റ്റന്‍റ് എക്‌സിക്യൂട്ടീവ് എന്‍ജിനിയര്‍ ഷാനജ, എ.ഇ അനീഷ്, ഭൂമി ഏറ്റെടുക്കല്‍ ഡപ്യൂട്ടി തഹസില്‍ദാര്‍ ആര്‍. രാജീവ്, റവന്യു ഇന്‍സ്‌പെക്ടര്‍ ബിജു എന്നിവര്‍ പങ്കെടുത്തു. അന്തിമ റിപ്പോര്‍ട്ട് കളക്ടര്‍ അധ്യക്ഷനായ വിദഗ്ധസമിതി പരിശോധിച്ച ശേഷം അംഗീകാരം നല്‍കും. റിപ്പോര്‍ട്ട് അംഗീകരിച്ച ശേഷം ഭൂമിയേറ്റെടുക്കാനുള്ള പ്രാരംഭ വിജ്ഞാപനത്തിലേക്കു കടക്കും. മിച്ചല്‍ ജംഗ്ഷന്‍ വികസനത്തിനെതിരേ ഹൈക്കോടതിലുണ്ടായിരുന്ന കേസിന്‍റെ വിധിയില്‍ സാമൂഹിക പ്രത്യാഘാതപഠനം വീണ്ടും നടത്തണമെന്നു കോടതി നിര്‍ദേശിച്ചതിനെത്തുടര്‍ന്നാണ് പുതിയ പഠനം ഇപ്പോൾ നടന്നുവരുന്നത്. 45 ദിവസത്തിനകം പഠനം പൂര്‍ത്തിയാക്കണമെന്നും ഒരു കാരണവശാലും ആറു മാസത്തില്‍ കൂടരുതെന്നും നിർദേശമുണ്ട്. ഇഴഞ്ഞിഴഞ്ഞ് ഏഴാം വർഷത്തിൽ മാവേലിക്കര: മുന്‍ എംഎല്‍എ ആര്‍. രാജേഷിന്‍റെ കാലഘട്ടത്തിലാണ് ടൗണ്‍ വികസനത്തിനു പച്ചക്കൊടി കാട്ടുന്നത്. ആദ്യഘട്ട സര്‍വേകളും മറ്റും നടന്നു പോയെങ്കിലും പിന്നീട് ഇഴഞ്ഞു തുടങ്ങി. നിലവില്‍ മൂന്നാം സാമൂഹിക പ്രത്യാഘാത പഠനമാണ് രാജഗിരി കോളജ് നടത്തിക്കൊണ്ടിരിക്കുന്നത്. ഇപ്പോഴും അലൈന്‍മെന്‍റിൽ തട്ടിയാണ് തർക്കം.പുരാതന നഗരങ്ങളിലൊന്നായ മാവേലിക്കരയിൽ കാര്യമായ വികസനക്കാറ്റ് വീശിയിട്ടില്ല. നഗര ഹൃദയത്തിലെ വീതി ഇല്ലായ്മയാണ് പ്രധാന പ്രശ്നം. മിച്ചല്‍ ജംഗ്ഷനില്‍നിന്നു കിഴക്കുപടിഞ്ഞാറ് ഭാഗങ്ങളിലേക്കു നൂറു മീറ്റർ നീളത്തിലും തെക്കുപടിഞ്ഞാറ് ഭാഗത്തേക്ക് അന്‍പത് മീറ്റര്‍ നീളത്തിലുമാണ് വീതികൂട്ടല്‍ വിഭാവനം ചെയ്യുന്നത്. എന്നാൽ, പുളിമൂട് പാലം മുതല്‍ ജില്ലാ ആശുപത്രി ജംഗ്ഷന്‍ വരെയും ബുദ്ധ ജംഗ്ഷന്‍ മുതല്‍ മണ്ഡപത്തിന്‍ കടവ് വരെയും വീതികൂട്ടിയാൽ മാത്രമേ പ്രയോജനമുള്ളെന്നു ഒരു വിഭാഗം ചൂണ്ടിക്കാട്ടുന്നു. നിലവിൽ നഗരത്തിൽ വാഹനപാർക്കിംഗിന് യാതൊരു സൗകര്യവുമില്ല. ചെറിയൊരു ഭാഗത്തു മാത്രം വീതികൂട്ടൽ നടപ്പാക്കിയതുകൊണ്ട് പാർക്കിംഗിനു പ്രയോജനം കിട്ടില്ല. മാത്രമല്ല കൂടുതൽ ഗതാഗത കുരുക്കിലേക്ക് ഇതു നയിക്കുമെന്നും ഇവർ പറയുന്നു. ഏഴു വർഷമായി തുടരുന്ന ചർച്ചകൾ ഇനി എത്ര കാലം നീളുമെന്ന ആശങ്കയിലാണ് നഗരവാസികൾ. മിച്ചല്‍ ജംഗ്ഷന്‍ വികസനം അശാസ്ത്രീയം: കോണ്‍ഗ്രസ് മാവേലിക്കര: നിലവില്‍ മാവേലിക്കരയില്‍ നടപ്പാക്കാന്‍ എംഎല്‍എ ശ്രമിക്കുന്ന മിച്ചല്‍ ജംഗ്ഷന്‍ വികസനം അശാസ്ത്രീയമാണെന്നു മാവേലിക്കര ബ്ലോക്ക് കോണ്‍ഗ്രസ് പ്രസിഡന്‍റ് അനി വര്‍ഗീസ് പറഞ്ഞു. നഗരത്തില്‍ ളാഹയില്‍ മുക്ക് ജംഗ്ഷന്‍ മുതല്‍ പ്രായിക്കര വരെയും തട്ടാരമ്പലം മുതല്‍ തഴക്കര ഓവര്‍ബ്രിഡ്ജു വരെയും വീതികൂട്ടൽ സാധ്യമായാല്‍ മാത്രമേ മാവേലിക്കരയുടെ വികസനം പൂര്‍ണമാകൂ. മിച്ചല്‍ ജംഗ്ഷനിലെ വളരെ കുറച്ചു ദൂരം മാത്രം വീതി കൂട്ടുന്നത് യാതൊരുവിധ ഗുണവും മാവേലിക്കര നഗരത്തിനു ചെയ്യില്ല. ഹിയറിംഗില്‍ പോലും വ്യക്തമായ ധാരണ ഇല്ലെന്നും അതിനാലാണ് ബഹിഷ്‌കരിച്ചതെന്നും അദ്ദേഹം പറഞ്ഞു.

പാലം തകർന്നു; നാട്ടുകാർ ദുരിതത്തിൽ

ചമ്പക്കുളം: തകഴി, ചമ്പക്കുളം പഞ്ചായത്തുകളെ ബന്ധിപ്പിക്കുന്ന പാലം തകർന്ന് നാട്ടുകാർ ദുരിതത്തിൽ. 10 വർഷം മുമ്പ് ചമ്പക്കുളം പഞ്ചായത്തിലെ ഏഴാം വാർഡായ പുല്ലങ്ങടിയെയും തകഴി പഞ്ചായത്തിലെ മൂന്നാം വാർഡായ ചൂരവടി പ്രദേശത്തെയും തമ്മിൽ ബന്ധിപ്പിക്കുന്നതിന് തകഴി പഞ്ചായത്ത് പണികഴിപ്പിച്ച പാലമാണ് തകർന്നത്. പാലത്തിന്‍റെ ഉരുമ്പു കേഡറുകൾ കാലപ്പഴക്കം മൂലം തുരുമ്പുപിടിച്ച് കഴിഞ്ഞ ദിവസം ഒടിഞ്ഞുവീണതിനാൽ പ്രദേശവാസികളായ 25 വീട്ടുകാർ ഒറ്റപ്പെട്ട നിലയിലാണ്. പ്രദേശവാസികളും ചൂരവടി പാടശേഖരത്തിലെ 200 ഏക്കറോളം വരുന്ന കൃഷിഭൂമിയിലെ കൃഷിക്കാരും വിദ്യാർഥികളും വളരെയേറെ ബുദ്ധിമുട്ടിലാണ്. ഈ ദീപിൽനിന്നു കരകയറാനുള്ള ഏകമാർഗമായിരുന്ന പാലം. ബന്ധപ്പെട്ടവർ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.

കായംകുളം റെയിൽവേ പ്ലാറ്റ് ഫോമിൽ മേൽക്കൂരയ്ക്ക് ചോർച്ച

കായംകുളം: തീരദേശപാതയിലെ പ്രധാന റയിൽവേ സ്റ്റേഷനായ കായംകുളം ജംഗ്‌ഷൻ റെയിൽവേ സ്റ്റേഷനിൽ യാത്രക്കാർക്ക് മഴയും വെയിലും ഏൽക്കാതിരിക്കാൻ പുതുതായി നിർമിച്ച മേൽക്കൂര ചോരുന്നു. ഒന്നാം നമ്പർ പ്ലാറ്റ് ഫോമിൽ നിർമിച്ച മേൽക്കൂരയാണ് കനത്ത മഴയിൽ ചോർന്നൊലിക്കുന്നത്. പുതുതായി നിർമിച്ച മേൽക്കൂരയിൽ സീലിംഗും മറ്റും നിർമിച്ചിട്ടുണ്ട്. മേൽക്കൂരയിൽനിന്ന് വെള്ളം ഒഴുകി സീലിംഗിൽ തങ്ങിനിന്ന് വിടവുകളിലൂടെ താഴേക്ക് ഒഴുകുകയാണ്. വെള്ളം കെട്ടികിടക്കുകയും ഭാരം കൂടി സീലിംഗ് അടർന്ന് വീഴാനും സാധ്യതയേറെയാണ്. ലൈറ്റ്, ഫാൻ, അനൗൺസ്‌മെന്‍റ് സിസ്റ്റം തുടങ്ങിയവയ്ക്കുള്ള ഇലക്‌ട്രിക്കൽ ഉപകരണങ്ങൾ വെള്ളം കയറിയാൽ നശിക്കും. സീലിംഗ് മുകളിലൂടെയാണ് ഇലക്‌ട്രിക്‌ വയറുകളും മറ്റും പോകുന്നത്. ഇവിടെ സ്ഥാപിച്ചിട്ടുള്ള ഫാനിലൂടെയും മറ്റും വെള്ളം താഴേക്ക് വീഴുന്നുണ്ട്. താഴെ വെള്ളം കെട്ടിക്കിടക്കുന്നതിനാൽ യാത്രക്കാർ തെന്നിവീഴാനുള്ള സാധ്യതയുണ്ട്. പ്ലാറ്റ് ഫോമിന്‍റെ മേൽക്കൂരയുടെ തൂണുകൾ എല്ലാം ഇരുമ്പ് പൈപ്പാണ്. ഇരുമ്പ് പൈപ്പിനെ അലൂമിനിയം ഷീറ്റുകൊണ്ട് പൊതിഞ്ഞിരിക്കുകയാണ്. കൂടാതെ സീലിംഗും അലൂമിനിയം ഷീറ്റുകൊണ്ടാണ് നിർമിച്ചിരിക്കുന്നത്. സീലിംഗിലൂടെ ഇലക്‌ട്രിക് വയറുകളും പോകുന്നുണ്ട്. മഴ പെയ്തപ്പോൾ വെള്ളം തൂണുകളിലൂടെ താഴേക്ക് ഇറങ്ങി. ഇലക്‌ട്രിക് വയറുകളുടെ ഇൻസുലേഷനോ മറ്റോ പോയാൽ വൈദ്യുതി പ്രവഹിക്കും. ഇത് ഷോക്കേൽക്കാനും കാരണമാകും.

ചാരുംമൂട് ജംഗ്‌ഷനിൽ ആംബുലൻസും കാറും കൂട്ടിയിടിച്ച് ആറു പേർക്കു പരിക്ക്

ചാരുംമൂട്: ആംബുലന്‍സും കാറും കൂട്ടിയിടിച്ച് ആറു പേർക്കു പരിക്കേറ്റു. കാർ യാത്രികരായ കാർത്തികപ്പള്ളി ചിങ്ങോലി കുന്നേൽ വടക്കേതിൽ സഫീർ, ഭാര്യ മനീഷ സഫീർ, ഇവരുടെ ബന്ധുക്കളായ കായംകുളം എരുവ സ്വദേശിനികളായ സുലേഖ, ലൈല കുഞ്ഞുമോൾ, ആംബുലൻസ് ഡ്രൈവർ പള്ളിപ്പാട് സ്വദേശി ജോർജി എന്നിവർക്കാണ് പരിക്കേറ്റത്. കാർ യാത്രികരെ അടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇതിൽ രണ്ടുപേരുടെ നില ഗുരുതരമാണ്. ചാരുംമൂട് ജംഗ്‌ഷനിൽ കഴിഞ്ഞ ദിവസം അർധരാത്രിയോടെയായിരുന്നു അപകടം. കൊല്ലം-തേനി ദേശീയപാതയിലൂടെ അമിതവഗത്തിൽ വന്ന ആംബുലൻസ് ചാരുംമൂട് ജംഗ്‌ഷനിലെ ട്രാഫിക് സിഗ്നലിനു സമീപം കെപി റോഡിലൂടെ കായംകുളം ഭാഗത്തേക്ക് വരികയായിരുന്ന കാറിൽ ഇടിക്കുകയും ആംബുലൻസ് തലകീഴായി മറിയുകയുമായിരുന്നു. പരുമല സ്വകാര്യ ആശുപത്രിയിലെ ആംബുലൻസാണ് അപകടത്തിൽപ്പെട്ടത്. ആംബുലൻസിൽ രോഗികൾ ആരുമില്ലായിരുന്നു. നൂറനാട് പോലീസ് കേസെടുത്തു.

ദ്വിതീയ സോപാൻ ക്യാമ്പ്

കറ്റാനം: പോപ്പ് പയസ് ഹയർ സെക്കൻഡറി സ്കൂളിൽ ഭാരത് സ്കൗട്സ് ആൻഡ് ഗൈഡ്സിന്‍റെ ദ്വിതീയ സോപാൻ ക്യാമ്പ് ആരംഭിച്ചു. മാവേലിക്കര രൂപത വികാരി ജനറാൾ മോൺ. ജോബ് കല്ലുവിളയിൽ ഉദ്ഘാടനം ചെയ്തു. പിടിഎ പ്രസിഡന്‍റ് ഗോപൻ ഭരണിക്കാവ് അധ്യക്ഷത വഹിച്ചു. മാവേലിക്കര രൂപത കറസ്പോണ്ടന്‍റ് ഫാ. ഡാനിയേൽ തെക്കേടത്ത് മുഖ്യപ്രഭാഷണം നടത്തി. വാർഡ് മെംബർ മാത്യു ഫിലിപ്പ്, ഡിഒസി എൻ. ശ്രീകുമാർ, ഡിറ്റിസിബി, രേണുക, ഫാ. സിൽവെസ്റ്റർ തെക്കേടത്ത്, പ്രിൻസിപ്പൽ ടി. മോഹൻ, സ്കൗട്ട് മാസ്റ്റർ സി.റ്റി. വർഗീസ്, ഗൈഡ് ക്യാപ്റ്റൻ എസ്. മിനി, റെയ്ഞ്ചർലീഡർ രമ്യ സൂസൻ തോമസ്, അധ്യാപകരായ ഗ്രേസ് ഫിലിപ്പ്, സെലിൻസ്കറിയ, ലീഡേഴ്സ് മെൽബിൻ ബിനു, സ്മൃതി എസ്. കുമാർ എന്നിവർ പ്രസംഗിച്ചു.

അവകാശ പ്രഖ്യാപന ജാഥയ്ക്ക് സ്വീകരണം

ആലപ്പുഴ: കത്തോലിക്ക കോൺഗ്രസിന്‍റെ നേതൃത്വത്തിൽ കാസർഗോഡ് നിന്ന് ആരംഭിച്ച അവകാശ പ്രഖ്യാപന ജാഥ 22ന് ആലപ്പുഴയിൽ എത്തുമ്പോൾ വൻ സ്വീകരണം നൽകാൻ കത്തോലിക്ക കോൺഗ്രസ് ആലപ്പുഴ, മുഹമ്മ ഫൊറോന സമിതിയുടെയും വിവിധ സംഘടനകളുടെയും ഭാരവാഹികളുടെ യോഗത്തിൽ തീരുമാനിച്ചു. 22ന് രണ്ടിന് ചങ്ങനാശേരി ജംഗ്ഷനിൽ എത്തിച്ചേരുന്ന ജാഥയ്ക്ക് കൈതവന വിമലഹൃദയ നാഥാ ദേവാലയത്തിൽ സ്വീകരണം നൽകും. കത്തോലിക്ക കോൺഗ്രസ് ആലപ്പുഴ ഫൊറോന പ്രസിഡന്‍റ് ദേവസ്യാ പുളിക്കാശേരിയുടെ അധ്യക്ഷതയിൽ ചേർന്ന യോഗത്തിൽ ആലപ്പുഴ ഫൊറോനാ ഡയക്ടർ ഫാ. തോമസ് ഇരുമ്പുകുത്തി ഉദ്ഘാടനം ചെയ്തു. അതിരുപത സെക്രട്ടറി സെബാസ്റ്റ്യൻ വർഗീസ്, ഫെറോന ജനറൽ സെക്രട്ടറി ഷാജി പോൾ ഉപ്പൂട്ടിൽ, ബിനു സ്കറിയ, ജോസ് തോമസ്, തോമസ് കുറ്റേൽ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]