പൊതുസ്ഥലങ്ങളിലെ മൊബൈല്‍ ചാര്‍ജിംഗ് ; സൂക്ഷിക്കണമെന്നു പോലീസ് മുന്നറിയിപ്പ്
Thursday, October 23, 2025 1:10 AM IST
കൊച്ചി: പൊതുസ്ഥലങ്ങളില്‍ മൊബൈല്‍ ഫോണ്‍ ചാര്‍ജ് ചെയ്യുമ്പോള്‍ സൂക്ഷിക്കണമെന്നു പോലീസിന്‍റെ മുന്നറിയിപ്പ്.
പൊതു മൊബൈല്‍ ചാര്‍ജിംഗ് പോയിന്‍റുകള്‍ (മാളുകള്‍, റസ്റ്ററന്‍റുകള്‍, റെയില്‍വേ സ്റ്റേഷനുകള്‍/ട്രെയിനുകള്‍) വഴി ഡാറ്റയും വ്യക്തിഗത വിവരങ്ങളും മോഷ്‌ടിക്കുന്ന സൈബര്‍ തട്ടിപ്പായ ജ്യൂസ് ജാക്കിംഗിനെ കരുതിയിരിക്കണമെന്നാണു സൈബര്‍ പോലീസിന്‍റെ മുന്നറിയിപ്പിലുള്ളത്.
സാധാരണ ചാര്‍ജിംഗ് കേബിള്‍പോലെ തോന്നിക്കുന്ന മാല്‍വെയര്‍ കേബിളുകള്‍ ഉപയോഗിച്ചാണു പൊതു ചാര്‍ജിംഗ് പോയിന്‍റുകളില്‍ സൈബര്‍ കുറ്റവാളികള്‍ തട്ടിപ്പ് നടത്തുന്നത്. ഇത്തരത്തിലുള്ള വ്യാജ കേബിളില്‍ കണക്ട് ചെയ്യുന്ന ഫോണുകളിലെ ബാങ്കിംഗ് വിവരങ്ങള്‍, ഫോട്ടോകള്‍, കോണ്‍ടാക്ട് ലിസ്റ്റ് തുടങ്ങിയ ഡാറ്റകള്‍ തട്ടിപ്പുകാര്‍ കൈക്കലാക്കുന്നു.
പൊതുജനങ്ങളില്‍ ഭൂരിഭാഗവും ഈ അപകടസാധ്യതയെക്കുറിച്ച് ബോധവാന്മാരല്ല. പൊതു ചാര്‍ജിംഗ് പോയിന്‍റുകള്‍ ഉപയോഗിക്കുമ്പോള്‍ അതീവജാഗ്രതയും ശ്രദ്ധയും പുലര്‍ത്തണമെന്നാണ് പോലീസ് പറയുന്നത്.
കരുതല്‍ നല്ലതാണ്
* പൊതുസ്ഥലങ്ങളില്‍ ചാര്‍ജ് ചെയ്യുമ്പോള്‍ മൊബൈല്‍ ഫോണ്‍ സ്വിച്ച് ഓഫ് ചെയ്യുക.
* പവര്‍ ബാങ്ക് ഉപയോഗിക്കണം.
* യുഎസ്ബി ഡാറ്റ ബ്ലോക്കര്‍ ഉപയോഗിക്കുക.
* ഫോണ്‍ ചാര്‍ജ് ചെയ്യുന്നതിനിടെ പാറ്റേണ്‍ ലോക്ക്, പാസ്‌വേഡ് എന്നിവ ഉപയോഗിക്കരുത്.