ADVERTISEMENT

ADVERTISEMENT

സുവർണ ജൂബിലിയിലേയ്ക്ക് പിഎസ്എൻഎം; സിഡി പ്രകാശനം

നെടുമങ്ങാട്: സുവർണ ജൂബിലി ആലോഷങ്ങളുടെ ഭാഗമായി വെളിയന്നൂർ പിഎസ്എൻഎം യുപി സ്കൂൾ തയാറാക്കിയ 'പിഎസ്എൻഎം @ 50' എന്ന ആൽബത്തിന്‍റെ സിഡി നെടുമങ്ങാട് എഇഒ ബിനു മാധവൻ പ്രകാശനം ചെയ്തു. പിടിഎ മുൻ പ്രസിഡന്‍റ് എം. ഹരിഹരൻ അധ്യക്ഷനായി. പ്രഥമാധ്യാപിക ജി.ആർ. ശ്രീലേഖ, പിടിഎ വൈസ് പ്രസിഡന്‍റ് പ്രവീൺകുമാർ, സീനിയർ അസിസ്റ്റന്‍റ് എം.കെ. പ്രിയ, അധ്യാപകൻ എം.എം. ആദർശ് തുടങ്ങിയവർ സംസാരിച്ചു.

ആൽബത്തിലെ ഗാനങ്ങൾ രചിച്ചത് അധ്യാപകൻ ആദർശും ഗാനങ്ങൾ ആലപിച്ചത് അഞ്ചാം ക്ലാസിലെ ദേവികയുമാണ്. സുവർണ ജൂബിലി ആഘോഷങ്ങളുടെ ഭാഗമായി 50 പ്രവർത്തനങ്ങളാണ് സ്കൂൾ ആവിഷ്കരിച്ചിരിക്കുന്നത്.

ADVERTISEMENT

അസ്തമിച്ചു, ചെന്താരകം

സ്വന്തം ലേഖകൻ തിരുവനന്തപുരം: ഒരു വ്യാഴവട്ടക്കാലം സെക്രട്ടറിയായിയായി പാർട്ടിയെ നയിച്ച അതേ എകെജി സെന്‍ററിൽ വിഎസ് ഒരിക്കൽകൂടി എത്തി. ഇനി ഒരു തിരിച്ചുവരവ് വേണ്ടാത്ത വരവ്. അവിടെകൂടിയിരുന്ന ആയിരങ്ങളുടെ ഭാവത്തിനു സമാനമായി മൂടിക്കെട്ടിയിരുന്ന അന്തരീക്ഷം പെയ് തൊഴിയാതെ കനത്തുനിന്നു. ചേതനയറ്റ വിഎസിന്‍റെ ഭൗതികശരീരം വൈകുന്നേരം 5.30 ന് എത്തിക്കുമെന്ന വാർത്ത പുറത്തുവന്നതോടെ എകെജി പഠനഗവേഷണ കേന്ദ്രത്തിനു മുൻപിലേക്ക് ഒഴുകിയെത്തിയ ആയിരങ്ങളുടെ വൈവിധ്യം ഒന്നുമതി എന്തായിരുന്നു വിഎസ് എന്ന് തിരിച്ചറിയാൻ. സെക്രട്ടേറിയറ്റിലെ ഓഫീസിൽനിന്നു ജോലി കഴിഞ്ഞിറങ്ങിയ ഉന്നത ഉദ്യോഗസ്ഥർ മുതൽ പാളയം മാർക്കറ്റിലെ കയറ്റിറക്കു തൊഴിലാളികളും മാധ്യമ പ്രവർത്തകരുടെ വൻപടയും പരിസരത്തെ ജനസാഗരമാക്കി.

നിയന്ത്രണവിധേയമാക്കാനാകില്ലെന്നു തിരിച്ചറിഞ്ഞ പോലീസ് കേരളയൂണിവേഴ്സിറ്റിക്കു മുൻപിലും ജനറൽ ആശുപത്രിക്കുമുൻപിലും ബാരിക്കേഡുയർത്തി ജനങ്ങളുടെ ഒഴുക്കു തടയാൻ ശ്രമം തുടങ്ങി. പിന്നീട് എല്ലാ തടസങ്ങളെയും ഭേദിച്ച് വിഎസിനെ അവസാനനോക്കുകാണാൻ ഒഴുകിയെത്തിയവർക്കുമുൻപിൽ എല്ലാ തടസങ്ങളും വഴിമാറി. വിഐപികളും സാധാരണക്കാരും തോളോടുതോൾ ചേർന്നു വിഎസിനെ കണ്ടു. കൂട്ടംകൂട്ടമായി എകെജി സെന്‍ററിലെത്തിയ പാർട്ടി പ്രവർത്തകർ മുദ്രാവാക്യം വിളിച്ച് വിഎസിനെ അഭിവാദ്യമർപ്പിച്ചു. അഭിവാദ്യമർപ്പിക്കാനെത്തിയ ഒരോരുത്തരും തങ്ങൾക്കു വിഎസിനെകുറിച്ച് പറയാനുള്ളത് പറയാൻ ഓൺലൈൻ ചാനൽ മാധ്യമങ്ങളുടെ മൈക്കിനു മുൻപിൽ തിരക്കുകൂട്ടി. മറ്റു ചിലർ ആൾക്കൂട്ടത്തിനിടയിൽനിന്നു കണ്ണുനീർ വാർത്തു. മറ്റൊരുകൂട്ടർ ഇടിച്ചു കയറാനോ ബഹളം വയ്ക്കാനോ കൂട്ടാക്കാതെ നിന്നിടത്തുതന്നെ ആൾക്കൂട്ടത്തിൽ തനിയെ എന്ന ഭാവത്തിൽ നിലയുറപ്പിച്ചു. പുഷ്പചക്രവുമായി അന്ത്യോപചാരമർപ്പിക്കാനെത്തിയ സംഘടനകളുടെയും സ്ഥാപനങ്ങളുടെയും പ്രതിനിധികൾ അതുമായി മണിക്കൂറുകളോളം വരിയിൽ തുടർന്നു. തിക്കും തിരക്കും മൊബൈൽ ഫോണുകളിൽ പകർത്തിയവർ അവ സമൂഹമാധ്യമങ്ങളിൽ ഇടതടവില്ലാതെ അപ്ഡേറ്റുകളാക്കി. കെട്ടിടങ്ങളുടെ ബാൽക്കണികളിലും മുകളിലും നിലയുറപ്പിച്ചവർ മണിക്കൂറുകളോളം അവിടെതന്നെ തുടർന്നു. ഇതാകട്ടെ പിന്നീടെത്തിയവർക്ക് തടസവുമായി. അങ്ങോട്ടും ഇങ്ങോട്ടുമില്ലാതെ വിഎസിനെ മനസിലേറ്റിയവർ എകെജി സെന്‍ററിന്‍റെ പരിസരത്തെ അക്ഷരാർഥത്തിൽ ഒരു കോട്ടയാക്കി. മണിക്കൂറുകളോളം ആ കോട്ട ഇളകാതെ തുടർന്നു. രാത്രി വൈകിയും ഒരു പോറലുമേറ്റില്ല. പൊതുദര്‍ശനം ദര്‍ബാര്‍ ഹാളില്‍ രാവിലെ ഒന്‍പതു മുതല്‍ തിരുവനന്തപുരം: മുന്‍ മുഖ്യമന്ത്രി വി.എസ്. അച്യുതാനന്ദന്‍റെ മൃതദേഹം ഇന്നു രാവിലെ ഒന്‍പതു മുതല്‍ സെക്രട്ടേറിയറ്റിലെ ദര്‍ബാര്‍ ഹാളില്‍ പൊതുദര്‍ശനത്തിനു വയ്ക്കും. സെക്രട്ടേറിയറ്റു കാമ്പസില്‍ മന്ത്രിമാര്‍, എംഎല്‍എ, എംപിമാര്‍, ഉന്നത ഉദ്യോഗസ്ഥര്‍ എന്നിവരുടെ വാഹനങ്ങള്‍ക്കു മാത്രമായിരിക്കും പ്രവേശനം. മറ്റു വാഹനങ്ങളും സെക്രട്ടേറിയറ്റു ജീവനക്കാരുടെ ഉള്‍പ്പെടെയുള്ള സ്വകാര്യ വാഹനങ്ങളും സെന്‍ട്രല്‍ സ്റ്റേഡിയത്തില്‍ പാര്‍ക്കു ചെയ്യണം. പൊതുജനങ്ങള്‍ക്ക് സെക്രട്ടേറിയറ്റ് ക്യാമ്പസിലേക്ക് നോര്‍ത്ത് ഗേറ്റ്, ട്രഷറി ഗേറ്റുകള്‍ വഴിയാണ് പ്രവേശനം. അന്തിമോപചാരം അര്‍പ്പിച്ച ശേഷം പൊതുജനങ്ങള്‍ വൈഎംസിഎ ഗേറ്റ് വഴിയാണ് പുറത്തു പോകേണ്ടത്. സെക്രട്ടേറിയറ്റ് വളപ്പിലും സെക്രട്ടേറിയറ്റിനു ചുറ്റുമുള്ള നിരത്തുകളിലും പാര്‍ക്കിംഗ് അനുവദിക്കില്ല.

മടങ്ങിയെത്തുമെന്നു പ്രതീക്ഷിച്ചു; പക്ഷേ...

തിരുവനന്തപുരം: എന്നും വിധിയോടു പോരാട്ടം പ്രഖ്യാപിച്ചിരുന്ന വി.എസ്. അച്യുതാനന്ദന്‍ ആശുപത്രിക്കിടക്കയില്‍ നിന്നും ആരോഗ്യത്തോടെ തിരിച്ചുവരുമെന്നായിരുന്നു അദ്ദേഹത്തെ സ്‌നേഹിക്കുന്ന ചിലരെങ്കിലും പ്രതീക്ഷിച്ചിരുന്നത്. എന്നാല്‍ ഇന്നലെ ഉച്ചകഴിഞ്ഞു വിഎസിന്‍റെ രക്തസമ്മര്‍ദം അസാധാരണമായി കുറഞ്ഞതോടെയാണ് ആ പ്രതീക്ഷകള്‍ക്കു മങ്ങലേറ്റത്. മകന്‍ വി.എ. അരുണ്‍കുമാര്‍, മകള്‍ ആശ, മരുമകന്‍ ഡോ.തങ്കരാജ് എന്നിവരും അടുത്ത ചില ബന്ധുക്കളുമാണ് ആശുപത്രിയില്‍ ഉണ്ടായിരുന്നത്. ആരോഗ്യനില അതീവ ഗുരുതരമായതോടെ മുഖ്യമന്ത്രി പിണറായി വിജയനെയും സിപിഎം സംസ്ഥാന സെക്രട്ടറി എം.വി. ഗോവിന്ദനെയും അരുണ്‍കുമാര്‍ വിവരമറിയിച്ചു. തൊട്ടു പിന്നാലെ അവര്‍ ആശുപത്രിയില്‍ എത്തി. ഉച്ചതിരിഞ്ഞു 4.10നാണു വിഎസിന്‍റെ മരണ വാര്‍ത്ത അറിയിച്ചുകൊണ്ടുള്ള മെഡിക്കല്‍ ബുള്ളറ്റിനെത്തിയത്. തുടര്‍ന്ന് സിപിഎം ജനറല്‍ സെക്രട്ടറി എം.എ. ബേബി, മുഖ്യമന്ത്രി പിണറായി വിജയന്‍, പാര്‍ട്ടി സെക്രട്ടറി എം.വി. ഗോവിന്ദന്‍ എന്നിവരുടെ നേതൃത്വത്തില്‍ ആശുപത്രിയില്‍ നിന്നും സര്‍ക്കാരിന്‍റെ യും പാര്‍ട്ടിയുടെയും നടപടികള്‍ക്കുള്ള തീരുമാനങ്ങള്‍ എടുക്കുകുയും അണികള്‍ക്കു നിര്‍ദേശങ്ങള്‍ നല്‍കുകയും ചെയ്തു. പാര്‍ട്ടി പ്രവര്‍ത്തകര്‍ക്കും അണികള്‍ക്കും ഒപ്പം വിഎസിന്‍റെ മുന്‍ സ്റ്റാഫ് അംഗങ്ങളായ എ. സുരേഷ്, കെ.എം. ഷാജഹാന്‍, ജോസഫ് സി. മാത്യു, കെ.വി.സുധാകരന്‍ തുടങ്ങിയവരും അദ്ദേഹത്തിനന്‍റെ മൃതദേഹം പുറത്തെത്തിക്കുന്നതും കാത്തു നാലുമണിക്കൂളോളം ആശുപത്രിയുടെ പുറത്തു കാത്തുനിന്നു.

വിഎസിന്‍റെ ഓര്‍മകളിൽ വെള്ളായണിയിലെ കര്‍ഷകര്‍

പാപ്പനംകോട് രാജന്‍ നേമം: വി.എസ്. അച്യുതാനന്ദന്‍ മുഖ്യമന്ത്രിയായിരുന്നപ്പോള്‍ വെള്ളായണിയിലെ മണക്കുന്നില്‍ നടപ്പിലാക്കിയ എല്ലാവരും പാടത്തേയ്ക്ക് പദ്ധതി കര്‍ഷക മനസുകളില്‍ ഇന്നും ആവേശമായ ഓർയാണ്. 2008 കാലഘട്ടത്തിലാണു നെല്‍കൃഷിയെ പ്രോത്സാഹിപ്പിക്കുന്നതിനായി സംസ്ഥാന തലത്തില്‍ നിയമസഭയിലെ നൂറ്റിനാല്‍പ്പത് സമാജികരേയും ഉള്‍പ്പെടുത്തി "എല്ലാവരും പാടത്തേയ്ക്ക് പദ്ധതി' വിഎസ്. അച്യുതാനന്ദന്‍ നടപ്പിലാക്കിയത്. അന്നു മുണ്ടുടുത്തു തോര്‍ത്തും തലയില്‍ക്കെട്ടി ഉദ്ഘാടനത്തെത്തിയ വിഎസിനെ ഇന്നും ഓര്‍ക്കുകയാണ് നാട്ടുകാരും കര്‍ഷകരും. വെള്ളായണിയിലെ പുഞ്ചപ്പാടങ്ങളില്‍ ഏക്കറുകണക്കിനു നെല്‍പ്പാടങ്ങളാണ് തരിശ് കിടന്നത്. ഈ സമയത്താണ് സര്‍ക്കാരിന്‍റെ എല്ലാവരും പാടത്തേയ്ക്ക് പദ്ധതി നടപ്പിലാക്കുന്നത്. വി.എസ്. അച്യുതാനന്ദന്‍റെ വരവ് അന്ന് കര്‍ഷകര്‍ക്കു കൃഷി തുടരുന്നതിന് പ്രോത്സാഹനമായതായി കര്‍ഷകരായിരുന്ന എ.അസീസും ജി.ജയചന്ദ്രന്‍ നായരും പറഞ്ഞു. ഉദ്ഘാടനം കഴിഞ്ഞു സംഘാടകര്‍ ഒരുക്കിയ കപ്പ പുഴുങ്ങിയതും കട്ടന്‍ ചായയും കഴിച്ചാണ് വി.എസ്. അച്യുതാനന്ദനും സ് പീക്കറായിരുന്ന കെ. രാധാകൃഷ്ണനും എംഎല്‍എമാരും വെള്ളായണിയില്‍ നിന്നും പോയത്. എല്ലാവരും പാടത്തേയ്ക്ക് പദ്ധതി നടപ്പിലായ ശേഷം വെള്ളായണിയില്‍ കുറെ കാലം കൃഷി മുടങ്ങിയിരുന്നില്ലെന്ന് അന്നത്തെ പഞ്ചായത്ത് പ്രസിഡന്‍റ് അശോക് കുമാര്‍ പറഞ്ഞു.

പോരാട്ട വീര്യത്തെ മറക്കാതെ വിഴിഞ്ഞം

എസ്. രാജേന്ദ്രകുമാർ വിഴിഞ്ഞം: വി.എസ്. അച്യുതാനന്ദൻ എന്ന സമര പോരാളിയെ വിഴിഞ്ഞത്തുകാർ ഒരിക്കലും മറക്കില്ല. അന്താരാഷ്ട്ര തുറമുഖം എന്ന വികസന സ്വപ്നം സാക്ഷാത്കരിക്കാൻ എന്തു വിട്ടുവീഴ്ചക്കും തയാറെന്നു കേരള ജനതയ്ക്കു മുന്നിൽ തുറന്നു പറയാൻ കാണി ച്ച ചങ്കൂറ്റമാണ് വിഎസിനെ അന്ന് ജനകീയനാക്കിയത്. കുടിയൊഴിപ്പിക്കപ്പെടുന്നവർക്ക് ഒരു കൈതാങ്ങായി വമ്പൻ പാക്കേജ് പ്രഖ്യാപിച്ച് നാട്ടുകാരുടെ ആശങ്കയ്ക്ക് അറുതി വരുത്താൻ കഴിഞ്ഞതും അദ്ദേഹത്തിന്‍റെ വിശാലമനസ്കത വെളിവാക്കുന്നതായിരുന്നു. പതിറ്റാണ്ടുകളായി നിശബ്ദതയിലാണ്ടുകിടന്ന ഒരു വമ്പൻ പദ്ധതിക്ക് ഊർജവും ശക്തിയും പകർന്നു വെളിച്ചത്ത് കൊണ്ടുവരാൻ വി. എസ്. കാണിച്ച ചങ്കൂറ്റമാണ് പിന്നീട് വന്ന ഉമ്മൻ ചാണ്ടിക്കും പിണറായി വിജയനും അനുഗ്രഹമായത്. ടെൻഡർ ക്ഷണിച്ചു നിർമാതാക്കളെ കണ്ടെത്തുകയോ അന്തിമ പാരിസ്ഥിതിക അനുമതി കിട്ടുന്നതിനോ മുൻപ് തന്നെ അത്യാവശ്യം ഭൂമി ഏറ്റെടുത്തശേഷം വിഴിഞ്ഞം അന്താരാഷ്ട്ര തുറമുഖമെന്ന കേരളത്തിന്‍റെ സ്വപ്ന പദ്ധതിക്ക് കാഹളം മുഴക്കിയുള്ള ശിലാസ്ഥാപന കർമം നടത്താനുള്ള തൻ്റേടം കാട്ടാനും വി.എസ്. എന്ന ജനകീയ മുഖ്യമന്ത്രിക്കായി. പദ്ധതി പ്രദേശത്തിന് തൊട്ടു ചേർന്നുള്ള തോട്ടം നാഗർ ക്ഷേത്രത്തിനു മുന്നിൽ നിർമിച്ച കൂറ്റൻ പന്തലിൽ നിന്നു വൻ ജനാവലിയെ സാക്ഷിയാക്കി അദ്ദേഹം പ്രഖ്യാപിച്ച വമ്പൻ പദ്ധതി ഇന്നു ലോകമറിയുന്ന ഒന്നായി വികസിച്ചു. ജനങ്ങൾക്ക് അന്നു നൽകിയ വാഗ്ദാനം സഫലമായതും ചരക്കുമായി കൂറ്റൻ കണ്ടെയ്നർ കപ്പലുകൾ തുടർച്ചയായി വന്നു പോകുന്നതിന്‍റെ യെല്ലാം വാർത്തയറിഞ്ഞ സംതൃപ്തിയോടെയാണ് മടക്കം. നാടിന്‍റെ വികസനത്തിനായി ഒരു പദ്ധതി വരുമ്പോൾ എല്ലാം നഷ്ടപ്പെടുന്ന ഒരു ജനതക്ക് ആശങ്കകൾ ഉണ്ടാകുമെന്ന് ഉത്തമബോധ്യമുള്ള ആളായിരുന്നു അദ്ദേഹം. സ്വന്തം പാർട്ടിയിലെ ഒരു വിഭാഗത്തിന്‍റെയും കോൺഗ്രസ് പാർട്ടിയിലെയും പ്രതിഷേധങ്ങൾക്കുചെവി കൊടുക്കാതെ ജനങ്ങളെ വിശ്വാസത്തിലെടുത്ത് മുന്നോട്ട് പോകാൻ കഴിഞ്ഞതാണ് അദ്ദേഹത്തിന്‍റെ വിജയം. കുടിയിറക്കപ്പെടുന്നവർ കണ്ണീരോടെ പടിയിറങ്ങരുതെന്ന നിശ്ചയദാർഡ്യം ജനകീയമുഖ്യമന്ത്രിയായ വി എസിനുണ്ടായിരുന്നു. അതുകൊണ്ടുതന്നെ ജനവികാരം മാനിച്ച് ആകർഷണീയമായ ഒരു പാക്കേജ് പ്രഖ്യാപിക്കാനും അദ്ദേഹം മറന്നില്ല. ഭൂമിയും വീടും നഷ്ടപ്പെടുന്നവർക്കു മതിയായ നഷ്ടപരിഹാരം, പുതിയ വീടു വയ്ക്കാൻ സർക്കാർ ഏറ്റെടുക്കുന്ന ഭൂമിയിൽ അഞ്ച് സെന്‍റ് വീതം സൗജന്യമായി നൽകും, വീട് വയക്കാൻ ധനസഹായം എന്നിങ്ങനെയുള്ളവൻ പാക്കേജ് നൽകി ജനത്തെ തൃപ്തിപ്പെടുത്തി. താൻ പറയുന്ന വാക്കുകൾക്കു വിലയുണ്ടെന്ന് അദ്ദേഹം വിഴിഞ്ഞത്തു കാർക്കുമുന്നിൽ തെളിയിച്ചു. ജനകിയ പ്രതിഷേധങ്ങൾക്കോ പരാതികൾക്കോ വക നൽകാതെ കേരളത്തിന്‍റെ വികസന സ്വപ്നത്തിനു ചിറകുമുളക്കാനുള്ള അവസരം നൽകാൻ വി.എസ്. അച്യുതാനന്ദൻ എന്ന മുഖ്യമന്ത്രിക്കു കഴിയുമെന്നും തെളിയിച്ചു. സർ സി.പി. രാമസ്വാമി അയ്യർ എന്ന ദിവാന്‍റെ മനസിലുദിച്ച ആശയം, എം.വി. രാഘവൻ എന്ന മന്ത്രിയുടെ കാലത്തെ സർവെയും കഴിഞ്ഞു നിശബ്ദമായി കിടന്ന തുറമുഖ പദ്ധതി ഇന്നത്തെ തലമുറക്ക് കാണാൻ കഴിയുന്ന തരത്തിൽ ഉണർത്താനായതും വി.എസിന്‍റെ വിജയ നേട്ടം തന്നെയാണ്. അന്താരാഷ്ട്ര തുറമുഖത്തിന്‍റെ കവാടം മുല്ലൂർ എന്നുറപ്പിച്ച അദ്ദേഹം മുല്ലൂർ മേഖലയിൽ ഏറ്റെടുത്ത സ്ഥലത്തുകൂടി കടൽക്കരവരെ നീളുന്ന ഒരു റോഡും നിർമിച്ചു. തന്‍റെ ഭരണം അവസാനിക്കും മുൻപ് മറ്റു നടപടികൾ പൂർത്തിയാക്കി തുറമുഖ നിർമാണ പ്രവർത്തനങ്ങൾ തുടങ്ങാമെന്ന ആഗ്രഹം മാത്രം അന്ന് നടപ്പായില്ല. വിട പറയുമ്പോഴും അദ്ദേഹത്തിനു ആശ്വസിക്കാം, താൻ ശിലാസ്ഥാപനം നടത്തിയ ഒരു വികസന പദ്ധതി പാഴാകാതെ മുന്നോട്ടു പോയതിൽ.

കമ്യൂണിസ്റ്റ് രാഷ്ട്രീയത്തിന്‍റെ അവസാനത്തെ ആദര്‍ശവാൻ: ചെന്നിത്തല

തിരുവനന്തപുരം: കേരളത്തിന്‍റെ കമ്യൂണിസ്റ്റ് രാഷ്ട്രീയത്തിന്‍റെ അവസാനത്തെ ആദര്‍ശവാനും വിട പറഞ്ഞു. വേലിക്കകത്ത് ശങ്കരന്‍ അച്യുതാനന്ദന്‍ എന്ന വി.എസ്. അച്യുതാനന്ദന്‍ സമാനതകളില്ലാത്ത ഇതിഹാസമായിരുന്നു. കമ്യൂണിസ്റ്റ് പ്രസ്ഥാനത്തിന്‍റെ കറകളഞ്ഞ നേതാക്കളില്‍ അവസാനത്തെയാള്‍. എന്‍റെ ബാല്യം മുതല്‍ കേട്ടുതുടങ്ങിയ പേരാണത്. ഞാന്‍ കെഎസ്‌യു പ്രവര്‍ത്തകനായി ചെന്നിത്തലയില്‍ രാഷ്ട്രീയം തുടങ്ങിയ കാലത്തിനും എത്രയോ മുന്‍പേ അദ്ദേഹം പുന്നപ്ര- വയലാര്‍ സമരനായകനെന്ന നിലയില്‍ കേരളത്തിലെമ്പാടും അറിയപ്പെടുന്ന നേതാവായി മാറിയിരുന്നു. ഞാന്‍ പാര്‍ലമെന്‍റംഗമായി പോയപ്പോഴാണ് അച്യുതാനന്ദനുമായി അടുത്തിടപഴകാന്‍ കൂടുതല്‍ അവസരങ്ങളുണ്ടായത്. യാദൃശ്ചികമായി പലവട്ടം ഒന്നിച്ച് വിമാനത്തിലും ട്രെയിനിലും ഒക്കെ യാത്ര ചെയ്യാനുള്ള അവസരങ്ങളുണ്ടായി. പക്ഷേ, അതെല്ലാം അദ്ദേഹത്തെ അടുത്തു കാണാനും അറിയാനുമുള്ള അവസരങ്ങളായി മാറ്റി. രാഷ്ട്രീയമായി വളരെ അകലമുള്ളവരാണ് ഞങ്ങള്‍ രണ്ടു പേരും. വളരെ വിഭിന്നമായ ചേരിയില്‍ നിന്നുകൊണ്ട് പരസ്പരം അടരാടുമ്പോഴും സാധാരണ വ്യക്തികളെന്ന നിലയില്‍ ഞങ്ങള്‍ പരസ്പരം മനസിലാക്കുകയും ബഹുമാനിക്കുകയും ചെയ്തിട്ടുണ്ടെന്നും ചെന്നിത്ത ല കൂട്ടിച്ചേർത്തു.

വെള്ളറട ഡിപ്പോയിൽ ബ്രത്തലൈസർ ചതിച്ചു ; കെഎസ്ആർടിസി ഡ്രൈവർ കുത്തിയിരുന്നു പ്രതിഷേധിച്ചു

വെള്ളറട: ജീവിതത്തില്‍ മദ്യപിക്കാത്ത കെഎസ്ആര്‍ടിസി ജീവനക്കാരനെ പരിശോധിച്ചപ്പോള്‍ മദ്യപാനിയായി കണ്ടെത്തി. വെള്ളറട കെഎസ് ആര്‍ടിസി ഡിപ്പോയില്‍ ഡ്യൂട്ടിക്കെത്തിയ വി. സുനില്‍ എന്ന ഡ്രൈവർക്കാണ് ബ്രത്ത് അലൈസര്‍ പണി കൊടുത്തത്. ജീവിതത്തില്‍ നാളിതുവരെ മദ്യപാനശീലം ഇല്ല എന്നു വാദിക്കുന്ന വ്യക്തിയാണ് മലയങ്കാവ് സ്വദേശിയായ സുനില്‍. 2013 മുതല്‍ കെഎസ്ആര്‍ടിസി ജീവനക്കാരനായി ജില്ലയിലെ വിവിധ ഡിപ്പോകളില്‍ സേവനം അനുഷ്ഠിച്ചു വരുന്നു. കഴിഞ്ഞ ഏഴുമാസമായി വെള്ളറട ഡിപ്പായിലാണ് ജോലി നോക്കുന്നത്. പതിവുപോലെ രാവിലെ അഞ്ചുമണിക്കു പുറപ്പെടേണ്ട വെള്ളറട കോവിലവിള ബസിന്‍റെ ഡ്യൂട്ടിക്ക് എത്തിയപ്പോള്‍ നടത്തിയ പരിശോധനയിലാണു യന്ത്രം വില്ലനായത്. പരിശോധിച്ചപ്പോള്‍ 10 പോയിന്‍റു കാണിച്ചതോടെ സുനില്‍ ഡ്യൂട്ടിക്ക് അയോഗ്യനായി. താന്‍ ജീവിതത്തില്‍ മദ്യപിച്ചിട്ടില്ലെന്നും, ആരോഗ്യകാരണങ്ങളാല്‍ ഗ്രാമ്പു ഇട്ടു തിളപ്പിച്ച വെള്ളം രാവിലെ കുടിച്ചു എന്നും സുനില്‍ പറയുന്നു. തുടര്‍ന്നു സുനില്‍ വെള്ളറട സ്റ്റേഷനില്‍ പരാതി നല്‍കി. പോലീസുകാര്‍ പരിശോധിച്ചപ്പോള്‍ അവിടുത്തെ ബ്രത്തലൈസറില്‍ സീറോ കാണിച്ചു. യന്ത്രം ചതിച്ചതു കാരണം വെള്ളറട കോവിലവിള സര്‍വീസും മുടങ്ങി. കഴിഞ്ഞ ആഴ്ചയില്‍ പൂവ്വാര്‍ ഡിപ്പോയിലും സമാനമായ സംഭവം അരങ്ങേറിയിരുന്നു, മാത്രമല്ല ചക്ക കഴിച്ചതിനെ തുടര്‍ന്നു പന്തളം കെഎസ് ആര്‍ടിസി ഡിപ്പോയില്‍ നാലു ജീവനക്കാര്‍ക്കും ഇത്തരം പണി കിട്ടിയിരുന്നു. തനിക്കുണ്ടായ ദുരനുഭവത്തില്‍ പരിഹാരം കാണാന്‍ മേലധികാരികള്‍ക്ക് പരാതി നല്‍കാന്‍ ഒരുങ്ങുകയാണ് സുനില്‍ എന്ന 52 കാരന്‍. ഡ്യൂട്ടി ഓഫീസിനു മുന്നില്‍ ഇരുന്ന് സുനില്‍ പ്രതിഷേധിച്ചു.

മരം അപകട ഭീഷണിയാകുന്നു

നെടുമങ്ങാട്: ആര്യനാട് പഞ്ചായത്തിലെ കാനക്കുഴി കുരുവിയോട് ജംഗ്ഷനിലെ ഉണങ്ങിയ കൂറ്റൻ ബദാം മരം യാത്രക്കാർക്ക് അപകടഭീഷണിയുയർത്തുന്നു. ഏതു നിമിഷവും കെഎസ്ഇബി പോസ്റ്റിലേക്കോ റോഡിലേക്കോ മറിഞ്ഞു വീഴാവുന്ന അവസ്ഥയിലാണു മരം നിൽക്കുന്നത്. നിരവധി തവണ പരാതികൾ നൽകിയെങ്കിലും പഞ്ചായത്തും കെഎസ്ഇബിയും നടപടി സ്വീകരിച്ചില്ലെന്നു നാട്ടുകാർ പറഞ്ഞു. കഴിഞ്ഞ ദിവസം നെടുമങ്ങാട് പനയമുട്ടത്ത് ഉണങ്ങിയ മരം പോസ്റ്റിലേക്കു വീണ് വൈദ്യുത കമ്പിയിൽ തട്ടി വിദ്യാർഥി മരിച്ചത് നാട്ടുകാർക്ക് ആവലാതി കൂടിയിരിക്കുകയാണ്. നിരവധി വാഹനങ്ങളാണ് ഇതുവഴി കടന്നു പോകുന്നത്. കൂടാതെ നിരവധി സ്കൂൾ വിദ്യാർഥികൾ കാൽ നടയായി പോകുന്ന പ്രധാന പാതയാണിത്. എത്രയും വേഗത്തിൽ മരം മുറിച്ച് മാറ്റണമെന്ന് നാട്ടുകാർ ആവശ്യപ്പെട്ടു.

അഭയകേന്ദ്രത്തില്‍നിന്നു രക്ഷപ്പെട്ട നാലാമനെ എറണാകുളത്തു കണ്ടെത്തി

പേരൂര്‍ക്കട: തമ്പാനൂരിലെ അഭയകേന്ദ്രത്തില്‍നിന്നു ഞായറാഴ്ച രാവിലെ കാണാതായ സംഘത്തിലെ നാലാമനെയും കണ്ടെത്തി. എറണാകുളം റെയില്‍വേ സ്റ്റേഷനു സമീപത്തുനിന്നാണ് തമിഴ്‌നാട് സ്വദേശിയായ 15-കാരനെ കണ്ടെത്തിയത്. 13 മുതല്‍ 15 വരെ വയസു പ്രായമുള്ള നാലുപേരാണ് അഭയകേന്ദ്രത്തിന്‍റെ മുന്‍വശത്തെ ഗേറ്റ് തുറന്നു രക്ഷപ്പെട്ടത്. തമ്പാനൂര്‍ പോലീസ് നടത്തിയ പരിശോധനയില്‍ മണിക്കൂറുകള്‍ക്കുള്ളില്‍ രണ്ടുപേരെ ശാസ്തമംഗലത്തുനിന്നും ഒരാളെ തമ്പാനൂര്‍ റെയില്‍വേ സ്റ്റേഷനില്‍ നിന്നും കണ്ടെത്തുകയായിരുന്നു. നാലാമനായുള്ള അന്വേഷണത്തിനിടെയാണ് ഇയാള്‍ എറണാകുളത്തെ റെയില്‍വേ സ്റ്റേഷന്‍ പരിസരത്തുണ്ടെന്ന് അഭയകേന്ദ്രത്തിന്‍റെ എറണാകുളത്തെ ശാഖയില്‍ നിന്നു സന്ദേശം എത്തിയത്.

ഉന്നത വിജയികളെ കെസിസി അനുമോദിച്ചു

തിരുവനന്തപുരം: കേരള കൗണ്‍സില്‍ ഓഫ് ചര്‍ച്ചസ് തിരുവനന്തപുരം ജില്ലാ എഡ്യൂക്കേഷന്‍ കമ്മീഷന്‍റെയും ചില്‍ഡ്രന്‍സ് കമ്മീഷന്‍റെയും നേതൃത്വത്തില്‍ ഈ വര്‍ഷം എസ്എസ്എല്‍സി, ഹയര്‍ സെക്കൻഡറി പരീക്ഷയില്‍ ഉന്നത വിജയം നേടിയ വിദ്യാർഥികള്‍ക്ക് അനുമോദനം നല്‍കി. കരമന സിഎസ്ഐ സഭയില്‍ നടന്ന സമ്മേളനത്തില്‍ ബിലീവേഴ്‌സ് ഈസ്റ്റേണ്‍ സഭാ ബിഷപ്പ് മാത്യൂസ് മോര്‍ സില്‍വാനിയോസ് എപ്പിസ്‌കോപ്പ അധ്യക്ഷതവഹിച്ചു. സെന്‍റ് തോമസ് ഇവാഞ്ചലിക്കല്‍ ചര്‍ച്ച് ഓഫ് ഇന്ത്യ ഫെല്ലോഷിപ്പ് ബിഷപ്പ് ഡോ. ജോര്‍ജ് ഈപ്പന്‍ ഉദ്ഘാടനം ചെയ്തു. കെസിസി ജനറല്‍ സെക്രട്ടറി ഡോ. പ്രകാശ് പി. തോമസ് ജില്ലാതല മെമ്പര്‍ഷിപ്പ് വിതരണത്തിനു തുടക്കം കുറിച്ചു. സിഎസ്ഐ ബിഷപ്പ് കമ്മിസറി റവ. ഡോ. ജെ. ജയരാജ് ഹയര്‍ സെക്കൻഡറി പരീക്ഷയില്‍ മുഴുവന്‍ മാര്‍ക്കും നേടിയ എസ്.ജെ. അമ്രിന്‍ ക്രിസ്സിനെ അഭിനന്ദിച്ചു. ബിഎഫ്എം ബിഷപ്പ് ഡോ. സെല്‍വദാസ് പ്രമോദ്, ജില്ലാ പ്രസിഡന്‍റ് ഫാ. എ. ആര്‍. നോബിള്‍, സെക്രട്ടറി റവ. ഡോ. എല്‍.ടി. പവിത്രസിംഗ്, സഭാ ശുശ്രൂഷകന്‍ ഡി. എസ്. അരുണ്‍, എഡ്യൂക്കേഷന്‍ കമ്മീഷന്‍ ചെയര്‍മാന്‍ ജെ.വി. സന്തോഷ്, ചില്‍ഡ്രന്‍സ് കമ്മീഷന്‍ ചെയര്‍മാന്‍ റവ. വിമല്‍രാജ് എന്നിവര്‍ പ്രസംഗിച്ചു. തുടര്‍ന്ന് നടന്ന വി.ബി.എസ്. ഫോളോഅപ്പ് മീറ്റിംഗ് റവ. ഷെറി എസ്. റോബര്‍ട്ട് നേതൃത്വം നല്‍കി.

ചിറ്റയത്ത്കോണം മേഖലയിൽ വെള്ളക്കെട്ട്: ബിജെപി പ്രതിഷേധം

നെടുമങ്ങാട്: നഗരസഭയിലെ പേരയത്തു കോണം വാർഡിലെ ചിറ്റയത്ത്കോണം പ്രദേശത്തു മഴ സമയങ്ങളിൽ വെള്ളക്കെട്ട് രൂക്ഷം. വാർഡ് കൗൺസിലർക്കും മുൻസിപ്പാലിറ്റി അധികൃതർക്കും നിരവധിതവണ പരാതി നൽകിയിട്ടും റോഡിൽ ഓട നിർമിക്കുകയോ റോഡിലെ വെള്ളക്കെട്ട് പരിഹരിക്കുന്നതിന് ആവശ്യമായ നടപടി സ്വീകരിക്കുകയോ ചെയ്യാത്തതിനെ തുടർന്നു ബിജെപി പേരയത്തുകോണം വാർഡ് കമ്മിറ്റിയുടെ ആഭിമുഖ്യത്തിൽ പ്രതിഷേധ സമരം സംഘടിപ്പിച്ചു. പ്രതിഷേധ പ്രകടനം ബിജെപി പൂത്തൂർ ഏരിയ പ്രസിഡന്‍റ് ഡി.എം. സുരേഷ് ഉദ്ഘാടനം ചെയ്തു. ബിജെപി മണ്ഡലം സോഷ്യൽ മീഡിയ കൺവീനർ മിഥുൻ സുരേഷ്, മണ്ഡലം വൈസ് പ്രസിഡന്‍റ് രാജിദാസ് പരിയാരം, ബിജു പരിയാരം, എസ്.എൽ. പരാശരൻ തുടങ്ങിയവർ പങ്കെടുത്തു.

ഹൈടെക് ക്ലാസ് മുറികളുടെയും പാർക്കിന്‍റെയും ഉദ്ഘാടനം

നെടുമങ്ങാട്: ചാങ്ങ ഗവ. എൽപിഎസ് ഹൈടെക് ക്ലാസ് മുറികളുടെയും പാർക്കിന്‍റെയും ഉദ്ഘാടനം അഡ്വ. ജി. സ്റ്റീഫൻ എംഎൽഎ നിർവഹിച്ചു. പിടിഎ പ്രസിഡന്‍റ് എസ്.ടി. പ്രീത അധ്യക്ഷത വഹിച്ചു. ഫണ്ട് വിനിയോഗിച്ച് കിംസ് ഹെൽത്ത് മാനേജ്മെന്‍റ് ലിമിറ്റഡ് ആൻഡ് സ്പൈസ് റിട്രീറ്റ് ഹോസ്പിറ്റാലി പ്രൈവറ്റ് ലിമിറ്റഡ് എന്ന കമ്പനിയാണ് സ്കൂളിലെ കുട്ടികൾക്കായി പാർക്കും ഹൈടെക് ക്ലാസ് മുറികളും സജ്ജീകരിച്ചത്. എംപിടിഎ പ്രസിഡന്‍റ് സൂര്യ, എസ്എംസി ചെയർമാൻ വിശാന്ത് കുമാർ, എന്നിവർ പ്രസംഗിച്ചു. പ്രധാനാധ്യാപിക എം.കെ. ഗീത സ്വാഗതവും സിഎസ്ആർ സ്റ്റാഫ് സെക്രട്ടറി എസ്. ബിന്ദു നന്ദിയും പറഞ്ഞു.

ജനകീയ ശുചീകരണ കാമ്പയിന്‍ തുടങ്ങി

വെള്ളറട: വെള്ളറട പഞ്ചായത്ത് മാലിന്യമുക്ത നവകേരളം ജനകീയ ശുചീകരണ കാമ്പയിന്‍ പഞ്ചായത്തുതല ശുചീകരണ പരിപാടിക്കു തുടക്കമായി. പഞ്ചായത്ത് സ്റ്റാന്‍ഡിംഗ് കമ്മറ്റി ചെയര്‍പേഴ്‌സണ്‍ ജയന്തിയുടെ അധ്യക്ഷതയില്‍ പഞ്ചായത്ത് പ്രസിഡന്‍റ് എം. രാജ്‌മോഹന്‍ ഉദ്ഘാടനം ചെയ്തു. പഞ്ചായത്ത് അംഗങ്ങളായ ശ്യാം, ലീല, പഞ്ചായത്ത് സെക്രട്ടറി സുജിത്, പഞ്ചായത്ത് ഉദ്യോഗസ്ഥര്‍, ഹരിത കര്‍മസേനാ അംഗങ്ങള്‍ തുടങ്ങിയവര്‍ പങ്കെടുത്തു. മാര്‍ക്കറ്റിനു സമീപം കൂട്ടിയിട്ടിരുന്ന മാലിന്യങ്ങള്‍ മുഴുവന്‍ നീക്കം ചെയ്തു.

നിർത്തിയിട്ടിരുന്ന ടിപ്പർ ലോറിയിൽ ഇന്നോവ കാർ ഇടിച്ചുകയറി അപകടം

കണ്ടല: ഇന്നോവ കാർ നിർത്തിയിട്ടിരുന്ന ടിപ്പർ ലോറിയിൽ ഇടിച്ചു അപകടം. ഈ സമയം ഇതുവഴി നടന്നുപോയ മൂന്നു വിദ്യാർഥികൾ രക്ഷപെട്ടതു തലനാരിഴയ്ക്ക്. ഇടിയുടെ ആഘാതത്തിൽ ഇന്നോവയുടെ ടയർ ഇളകി നൂറുമീറ്ററിലധികം ദൂരം തെറിച്ചുപോയി. വാഹനം ഓടിച്ച ആൾ ഉൾപ്പെടെ നാലുപേരെ മാറനല്ലൂർ പോലീസ് കസ്റ്റഡിയിൽ എടുത്തു. കണ്ടലയിലായിരുന്നു സംഭവം. കാട്ടാക്കട ഭാഗത്തുനിന്നും എത്തിയ ഇന്നോവ കാറാണ് അപകടമുണ്ടായത്. നിയന്ത്രണം തെറ്റിയ ഇന്നോവ കാർ റോഡ് വശത്തെ വീടിന്‍റെ മതിലിൽ ഇടിച്ചശേഷമാണ് ടിപ്പറിന്‍റെ മുന്നിൽ ഇടിച്ചത്. ഈ സമയമാണ് ടയർ ഇളകി തെറിച്ചതും സമീപത്തു കൂടെ വിദ്യാർഥികൾ കടന്നു പോയതും. സംഭവത്തിൽ ആളപായം ഇല്ല.

കർക്കടക വാവുബലി: കാർഷിക വ്യാവസായിക പ്രദർശനം

നെടുമങ്ങാട്: കർക്കടക വാവുബലിയോടുനബന്ധിച്ചു അരുവിക്കര പഞ്ചായത്ത് സംഘടിപ്പിക്കുന്ന കാർഷിക വ്യാവസായിക പ്രദർശനം ജി. സ്റ്റീഫൻ എംഎൽഎ ഉദ്ഘാടനം ചെയ്തു. ജില്ലാപഞ്ചായത്ത് പ്രസിഡന്‍റ് ഡി. സുരേഷ് കുമാർ പൊതുസമ്മേളനം ഉദ്ഘാടനം ചെയ്തു. അരുവിക്കര പഞ്ചായത്ത് പ്രസിഡന്‍റ് ആർ. കല അധ്യക്ഷത വഹിച്ചു. കുടുംബശ്രീ സ്റ്റാളിന്‍റെ ഉദ്‌ഘാടനം ബ്ലോക്ക് പഞ്ചായത്ത് പ്രസിഡന്‍റ് വി. അമ്പിളി നിർവഹിച്ചു. ജനപ്രതിനിധികളായ വി.ആർ. ഹരിലാൽ, വി. വിജയൻ നായർ, ഗീതാഹരികുമാർ, ഷജിത, എ.എം. ഇല്യാസ്, ജഗൽ വിനായക്, മറിയക്കുട്ടി, അലിഫിയ, കെ. സുകുമാരൻ, ആർഡിഒ കെ.പി. ജയകുമാർ, കേരള വാട്ടർ അഥോറിറ്റി എക്സിക്യൂട്ടിവ് എൻജിനീയർ എം. മനോജ്, വിവിധ ഡിപ്പാർട്ട്മെന്‍റ് പ്രതിനിധികൾ, ദേവസ്വം ബോർഡ് പ്രതിനിധികൾ, രാഷ്ട്രീയ പാർട്ടി പ്രതിനിധികൾ തുടങ്ങിയവർ സംസാരിച്ചു. വൈസ് പ്രസിഡന്‍റ് വി.ആർ. രേണുക സ്വാഗതവും പഞ്ചായത്ത് സെക്രട്ടറി എസ്.പി. മാലിനി നന്ദിയും പറഞ്ഞു. ഡാം സൈറ്റിൽ 'അമ്യൂസ്മെന്‍റ് പാർക്കും പ്രവർത്തനം തുടങ്ങി. ബലിതർപ്പണ പാസുകൾ 50 രൂപ നിരക്കിൽ ലഭിക്കും. 24നു രാവിലെ നാലുമുതൽ ബലി കടവിലും ബലി മണ്ഡപത്തിലും ചടങ്ങുകൾ ആരംഭിക്കുമെന്നു സംഘാടകർ അറിയിച്ചു.

പ്രേം സിംഗേഴ്‌സ് ഏഴാമത് ഗാനസന്ധ്യ സംഘടിപ്പിച്ചു

തിരുവനന്തപുരം: പ്രേംനസീറെന്ന മഹാനടനെ വിമര്‍ശിക്കപ്പെടുന്നവര്‍ക്ക് ആ നടന്‍റെ മഹത്വമെന്തെന്നു മനസിലാക്കുവാന്‍ ചരിത്രം പഠിക്കണമെന്നും ഇന്നും എക്കാലവും ആരാധകരുടെ മനസുകളില്‍ ആ നടന്‍ ജീവിക്കുന്നു വെന്നും ഗായകന്‍ ജി. വേണുഗോപാല്‍ അഭിപ്രായപ്പെട്ടു. ഒരൊറ്റ പ്രാവശ്യം അടുത്തറിയാന്‍ സാധിച്ച തനിക്ക് പ്രേംനസീര്‍ സമ്മാനിച്ച പേന ഇന്നും അമൂല്യനിധിയായി കാത്തുസൂക്ഷിക്കുന്നുവെന്നും പ്രേംനസീര്‍ സുഹൃത് സമിതി ഒരുക്കിയ പ്രേം സിംഗേഴ്‌സ് ഏഴാമത് പ്രതിമാസ ഗാനസന്ധ്യ ഉദ്ഘാടനം ചെയ്ത് വേണുഗോപാല്‍ വെളിപ്പെടുത്തി. സാഹസിക സ്നേക്ക് കാച്ചർ റോഷ്‌നി, മ്യുസിഷ്യന്‍ ഡോ. വേണുഗോപാലന്‍ നായര്‍, എന്‍ആര്‍ഐ. പ്രതിഭകളായ എം.കെ. സൈനുലാബ്ദീന്‍, എം.എച്ച്. സുലൈമാന്‍, നാസര്‍ കിഴക്കതില്‍, ഗായകരായ രാധികാ നായര്‍, സുന്ദരേശന്‍, ഐശ്വര്യ നായര്‍ , കെ. സോമനാഥന്‍ , ജയകുമാരി എന്നിവര്‍ക്ക് പ്രേംനസീര്‍ പുരസ്‌കാരങ്ങള്‍ ഗായകന്‍ വേണുഗോപാല്‍ സമര്‍പ്പിച്ചു. ചലച്ചിത്ര താരം മായാ വിശ്വനാഥ് ഓണനിലാവ് ബ്രോഷര്‍ പ്രകാശനം ചെയ്തു. സസ്‌നേഹം ജി. വേണുഗോപാല്‍ ചാരിറ്റി അഡ്മിന്‍ ഗിരീഷ്, സമിതി കൊല്ലം ചാപ്റ്ററിലെ സുള്‍ഫിക്കര്‍, ദിലീപ് റെയ്മണ്ട്, സംസ്ഥാന സമിതിയിലെ തെക്കന്‍ സ്റ്റാര്‍ ബാദുഷ, പനച്ചമൂട് ഷാജഹാന്‍, ഡോ. വാഴമുട്ടം ചന്ദ്രബാബു, ജി. അജിത് കുമാര്‍, റഹിം പനവൂര്‍, ഗോപന്‍ ശാസ്തമംഗലം എന്നിവര്‍ സംസാരിച്ചു. പ്രേംസിംഗേഴ്‌സ് ഗായകരുടെ സംഗീത സന്ധ്യയും ഉണ്ടായിരുന്നു.

അഭിഭാഷകനെ മർദിച്ച് പണം തട്ടിയ കേസിൽ അറസ്റ്റിൽ

കാട്ടാക്കട: അഭിഭാഷകനെ കടത്തിക്കൊണ്ടുപോയി മർദിച്ചു പണംതട്ടിയെടുത്തു എന്ന പരാതിയിൽ ഒരാളെ കാട്ടാക്കട പോലീസ് അറസ്റ്റു ചെയ്തു. മലയം കരിക്കറത്തലയ്ക്കൽ ജിനേഷ് ഭവനിൽ ജിനേഷ് ജയനെ (28)യാണ് കാട്ടാക്കട പോലീസ് അറസ്റ്റു ചെയ്തത്. കാട്ടാക്കട അഞ്ചുതെങ്ങിൻമൂട് മണ്ണാംകോണം പുത്തൻവീട്ടിൽ അഡ്വ. ജെ. മുകേഷിന്‍റെ പരാതിയിലാണ് അറസ്റ്റ്. കഴിഞ്ഞ മാസമായിരുന്നു സംഭവം. ഒരു കേസുമായി ബന്ധപ്പെട്ട് ഇടപെട്ട സംഘമാണ് കാട്ടാക്കടയിലെ ബാറിലേക്ക് മുകേഷിനെ വിളിച്ചുവരുത്തിയശേഷം കാറിൽ കയറ്റിക്കൊണ്ടുപോയി മർദിച്ചത്.

യുവജന ദിനാഘോഷം നടത്തി

ഫാത്തിമപുരം: ഫാത്തിമ മാതാ പള്ളിയിൽ കെസിവൈഎം യൂണിറ്റിന്‍റെ യുവജന ദിനാഘോഷത്തിനു തുടക്കം കുറിച്ചു ഇടവക വികാരി ഫാ. കോസ്മോസ് തോപ്പിൽ കെസിവൈഎം പതാക ഉയർത്തി. തുടർന്നു വിശുദ്ധകുർബാന നടന്നു. ഫാ. വിനീത് പോൾ വചന സന്ദേശം നൽകി. കെസിവൈഎം മുൻ രൂപത പ്രസിഡന്‍റ് ജോണി എം.എ. ഇന്‍ററാക്ടീവ് സെഷൻ ക്ലാസ്‌ നയിച്ചു. ഉച്ചയ്ക്കു നടന്ന പൊതുസമ്മേളനം കെസിവൈഎം രൂപത ഡയറക്ടർ ഫാ. ഡാർവിൻ ഫെർണാണ്ടസ് ഉദ്ഘാടനം ചെയ്തു. കെസിവൈഎം പുതുക്കുറിച്ചി ഫൊറോന ഡയറക്ടർ ഫാ. പ്രദീപ് ഒസിഡി, ഫൊറോനാ പ്രസിഡന്‍റ് സോജൻ ജോണി, ഫാത്തിമപുരം കെസിവൈഎം ആനിമേറ്റർ സിസ്റ്റർ സ്മിനി ന്യൂട്ടൻ, മുൻ ആനിമേറ്റർ സിസ്റ്റർ വിനീത പത്രോസ്, ഫാത്തിമ അജപാല കൺവീനർ ബിനു ജോൺ എന്നിവർ പങ്കെടുത്തു.

ജമന്തി-പച്ചക്കറി കൃഷി ആരംഭിച്ചു

വെള്ളറട: വെള്ളറട ജംഗ്ഷന് സമീപത്ത് വെള്ളറട അക്ഷയ സെന്‍ററിന്‍റെ നേതൃത്വത്തില്‍ 47 സെന്‍റ് സ്ഥലം പാട്ടത്തിനെടുത്ത് ജമന്തിയും, പച്ചക്കറി കൃഷിയും ആരംഭിച്ചു. ഞങ്ങളും പച്ചക്കറി കൃഷിയിലേക്ക് എന്ന പേരിലാണ് കൃഷി സംരംഭം ആരംഭിച്ചത്. ഇന്നലെ ആരംഭിച്ച കൃഷിയുടെ ഉദ്ഘാടനം വെള്ളറട പഞ്ചായത്ത് വികസന സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.ജി. മംഗള്‍ ദാസ് നിര്‍വഹിച്ചു. വെള്ളറട അക്ഷയ സെന്‍റര്‍ മാനേജര്‍ ബിനുകുമാര്‍ അധ്യക്ഷത വഹിച്ചു. കൃഷി ഓഫീസര്‍ ജെഫിന്‍, കൃഷി അസിസ്റ്റന്‍റ് സിന്ധു,അക്ഷയാ സെന്‍റര്‍ ജീവനക്കാരായ അജോബിനു, ശരണ്യ, സന്ധ്യ, ബിനിത, സിന്ധു, ജയലക്ഷ്മി, അനശ്വര, എഡിഎസ് അംഗം എസ്.ആര്‍. സുനിത, സിഡിഎസ് അംഗം ആര്‍.എസ്. സുനിത എന്നിവര്‍ നേതൃത്വം നല്‍കി. ഓണത്തിന് പച്ചക്കറി വിളവ് ലഭിക്കത്തക്ക വിധത്തിലും അത്തപ്പൂക്കളം ഒരുക്കാന്‍ ജമന്തി പൂ ലഭിക്കാന്‍ പാകത്തിനാണ് പാടശേഖരം ഒരുക്കി കൃഷി ആരംഭിച്ചത്.

മത്സ്യബന്ധനത്തിന് ഭീഷണിയായി 'തക്കാളി ഞണ്ടുകൾ'

വിഴിഞ്ഞം: മത്സ്യത്തൊഴിലാളികൾക്കു ഭീഷണിയായി ചുവപ്പൻ ഞണ്ടുകൾ (തക്കാളി ഞണ്ടുകൾ). കഴിഞ്ഞ ദിവസം മത്സ്യബന്ധനത്തിനുപോയ നിരവധി വള്ളങ്ങളിലെ മത്സ്യങ്ങളെയാണ് തക്കാളി ഞണ്ടുകൾ കടിച്ചു കേടാക്കിയത്. കൂടാതെ വലകളും കടിച്ചു മുറിച്ചതായി മത്സ്യത്തൊഴിലാളികൾ പറഞ്ഞു. ഇന്നലെ ചെറു ചൂര മത്സ്യത്തിനായി വല വിരിച്ചവർക്കാണ് ഞണ്ടുകൾ ഭീഷണിയായത്. ഞണ്ടു കടിച്ചു കേടുവന്ന മത്സ്യങ്ങൾ കച്ചവടക്കാർ എടുക്കാതെ വന്നതോടെ വിലയിടിഞ്ഞു. ഈ മീനുകൾ കുറഞ്ഞ വിലയ്ക്ക് തീരത്ത് എത്തിയവർ വാങ്ങുകയായിരുന്നു. മത്സ്യബന്ധന സീസണായതിനാൽ തന്നെ തമിഴ്‌നാ‌ട് ഉൾപ്പെടെയുള്ള സ്ഥലത്തെ തൊഴിലാളികൾ ഇവിടെ നിന്നാണ് മത്സ്യബന്ധനത്തിനു പോകുന്നത്. സാധാരണ കടലിൽ പാറകളിൽ പറ്റിപ്പിടിച്ചു കാണുന്ന ചുവപ്പൻ ഞണ്ടുകൾ കടലിന്‍റെ ഒഴുക്കനുസരിച്ചു കൂട്ടത്തോടെ സഞ്ചരിക്കുമ്പോഴാണു വലയിൽ കുടുങ്ങുന്നതെന്നു തൊഴിലാളികൾ പറയുന്നു.ഇതിനോടൊപ്പം കയറുന്ന മ ത്സ്യങ്ങളെ ഞണ്ടുകൾ ഭക്ഷിക്കാറുണ്ട്.ചെറിയ കണ്ണികളുള്ള വലയിൽ പറ്റിപ്പിടിച്ചാൽ ഇവ നീക്കം ചെയ്യാൻ മണികൂറുകൾ വേണ്ടിവരും. വലയ്ക്കു കേടുപാടുകളും ഉണ്ടാകും. ഈ ഞണ്ടുകൾക്കു രുചിയില്ലാത്തതും മാംസം വളരെ കുറവായതിനാലും ആരും ഭക്ഷണത്തിനായി ഉപയോഗിക്കാറില്ല.

ജവഹർ നഗർ വസ്തുതട്ടിപ്പ്; മണികണ്ഠന്‍റെ സഹോദരന്‍റെ വീട്ടിൽ പരിശോധന

പേരൂർക്കട: ജവഹർ നഗറിലെ വസ്തു തട്ടിപ്പുമായി ബന്ധപ്പെട്ട നിലവിലെ പ്രധാന പ്രതിയായ അനന്തപുരി മണികണ്ഠന്‍റെ സഹോദരന്‍റെ വീട്ടിൽ പോലീസ് പരിശോധന നടത്തി. ഇദ്ദേഹത്തിന്‍റെ തിരുവനന്തപുരത്തെ വസതിയിലാണ് മ്യൂസിയം പോലീസ് ഇന്നലെ എത്തിയത്. ജവഹർ നഗറിലെ വസ്തു ഉടമ ഡോറ അസറിയ ക്രിപ്സിന്‍റെ വസ്തു തട്ടിയെടുത്തതുമായി ബന്ധപ്പെട്ട ഏതെങ്കിലും വിധത്തിലുള്ള രേഖകൾ ഇവിടെയുണ്ടോ എന്നറിയാനാണ് പോലീസ് എത്തിയത്. വസ്തു തട്ടിപ്പുമായി ബന്ധപ്പെട്ട രേഖകൾ തയാറാക്കി നൽകിയത് ആധാരം എഴുത്തുകാരൻ കൂടിയായ അനന്തപുരി മണികണ്ഠനാണ്. വഞ്ചിയൂർ സെഷൻസ് കോടതി ജാമ്യം നിഷേധിച്ചതോടെ ഇയാൾ ഒളിവിൽ കഴിഞ്ഞു വരികയാണ്. സഹോദരന്‍റെ വീട്ടിൽ പരിശോധന നടത്തിയെങ്കിലും തട്ടിപ്പുമായി ബന്ധപ്പെട്ട രേഖകൾ ഒന്നും ഇവിടെ കണ്ടെത്താൻ സാധിച്ചില്ല എന്നാണ് സൂചന. അനന്തപുരി മണികണ്ഠന്‍റെ പിന്നിൽ ഉന്നതരുടെ ഇടപെടലുകൾ ഉണ്ടെന്നും ഇയാളെ പിടികൂടിയാൽ മാത്രമേ സംഭവത്തിന്‍റെ പൂർണ ചിത്രം വെളിവാകുകയുള്ളൂ എന്നും പോലീസ് അറിയിച്ചു.

ബിഷപ് റവ. റൂബൻ മാർക്കിനെ അഭിനന്ദിച്ചു

തിരുവനന്തപുരം: ക്രൈസ്തവ സഭകളുടെ കൂട്ടായ്മയായ ആക്ട്സിന്‍റെ മുഖ്യരക്ഷാധികാരിയായ ബിഷപ് റവ. റൂബൻ മാർക്ക് സിഎസ്ഐ മോഡറേറ്ററായി തെരഞ്ഞെടുക്കപ്പെട്ടതിൽ ആക്ടസ് നേതൃയോഗം അഭിനന്ദനം രേഖപ്പെടുത്തി. ബിഷപ് ഡോ. ഉമ്മൻ ജോർജിന്‍റെ അധ്യക്ഷതയിൽ ചേർന്ന യോഗത്തിൽ ബിഷപ്പുമാരായ മാത്യൂസ് മോർ സിൽവാനിയോസ്, റവ. മോഹൻ മാനുവൽ, ആക്ട്സ് ജനറൽ സെക്രട്ടറി ജോർജ് സെബാസ്റ്റ്യൻ, റവ. ജയരാജ്, സാജൻ വേളൂർ, നിബു ജേക്കബ് വർക്കി, പ്രഫ. ഷേർളി സ്റ്റുവാർട്ട്, പ്രമീള, ഡെന്നിസ് ജേക്കബ് തുടങ്ങിയവർ പങ്കെടുത്തു. ഓഗസ്റ്റിൽ ബിഷപ്പ് റൂബൻ മാർക്കിനു തിരുവനന്തപുരത്തും കൊല്ലത്തും സ്വീകരണം നൽകും.

മൃതദേഹം മോര്‍ച്ചറിയില്‍

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലിരിക്കെ മരിച്ചയാളുടെ മൃതദേഹം മോര്‍ച്ചറിയില്‍. 19ന് തമ്പാനൂര്‍ കെഎസ്ആര്‍ടിസി ഭാഗത്തു അസുഖബാധിതനായി കണ്ടെത്തുകയും മെഡിക്കല്‍കോളജ് ആശുപത്രിയില്‍ ചികിത്സയിലിരിക്കെ ഇന്നലെ മരിക്കുകയും ചെയ്തയാളുടെ മൃതദേഹമാണ് മോര്‍ച്ചറിയിൽ സൂക്ഷിച്ചിട്ടുള്ളത്. ഇയാളുടെ പേരോ ബന്ധുക്കളെക്കുറിച്ചുള്ള വിവരങ്ങളോ ആശുപത്രിരേഖകളിലില്ല. 60 വയസ്സു പ്രായം തോന്നിക്കുന്ന ഇയാളെക്കുറിച്ച് എന്തെങ്കിലും വിവരം ലഭിക്കുന്നവര്‍ തമ്പാനൂര്‍ പോലീസുമായി ബന്ധപ്പെടണം. ഫോണ്‍: 0471 2326549, 94979 80046.

"എന്‍റെ കൃഷി എന്‍റെ ഭക്ഷണം' കാന്പയിൻ

കാട്ടാക്കട: മൈലോട്ടുമൂഴി ജനതാ ഗ്രന്ഥശാലയിൽ എന്‍റെ കൃഷി എന്‍റെ ഭക്ഷണം കാന്പയിനു തുടക്കമായി. ജില്ലാ ലൈബ്രറി കൗൺസിൽ അംഗം കെ. ഗിരി ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് എ.ജെ. അലക്സ് റോയ് അധ്യക്ഷനായി. വൈസ് പ്രസിഡന്‍റ് എസ്. അനിക്കുട്ടൻ, ജ്യോതിഷ് വിശ്വംഭരൻ, എ. വിജയകുമാരൻ നായർ, എസ്. സുരേഷ് കുമാർ, കെ.വി. അശോകൻ, ടി. ഓമന, അനിൽ ചാന്ദ്രമൂഴി തുടങ്ങിയവർ പ്രസംഗിച്ചു. വിവിധ ദിവസങ്ങളിലായി പച്ചക്കറി വിത്തുകൾ, നടീൽ വസ്തുക്കൾ, കൃഷിരീതി വിവരിക്കുന്ന ലഘുലേഖകൾ എന്നിവയുടെ വിതരണം, പഠന പരിപാടികൾ, അടുക്കളത്തോട്ട മത്സരം, രചനാ മത്സരങ്ങൾ എന്നിവ നടക്കും.

കെഎസ്ഇബി ഓഫീസ് മാർച്ച്

നെടുമങ്ങാട്: വൈദ്യുത ലൈൻ പൊട്ടിവീണ് പനയമുട്ടത്ത് 19കാരനായ അക്ഷയ് എന്ന ചെറുപ്പക്കാരൻ മരണപ്പെട്ടതിൽ പ്രതിഷേധിച്ചുകൊണ്ട് യൂത്ത് കോൺഗ്രസ് വാമനാപുരം നിയോജകമണ്ഡലം കമ്മിറ്റിയുടെ നേതൃത്വത്തിൽ പനവൂർ കെഎസ്ഇബി ഓഫീസിലേക്ക് മാർച്ച് നടത്തി. ജില്ലാ കോൺഗ്രസ് കമ്മിറ്റി വൈസ് പ്രസിഡന്‍റ് സുധീർ ഷാ പാലോട് ഉദ്ഘാടനം ചെയ്തു. യൂത്ത് കോൺഗ്രസ് നിയോജക മണ്ഡലം പ്രസിഡന്‍റ് യൂസഫ് കല്ലറ, യൂത്ത് കോൺഗ്രസ് സംസ്ഥാന സെക്രട്ടറി അമി തിലക്, യൂത്ത് കോൺഗ്രസ് ഭാരവാഹികളായ ഷിനാസ്, നജീബ്, ശ്രീകല വെള്ളാഞ്ചിറ എന്നിവരെ പോലീസ് അറസ്റ്റ് ചെയ്തു നീക്കി. കോൺഗ്രസ് പനവൂർ മണ്ഡലം പ്രസിഡന്‍റ് കുന്നിൽ ശശി, കോൺഗ്രസ് മൂഴി മണ്ഡലം പ്രസിഡന്‍റ് വേട്ടംപള്ളി സനൽ, മഹിളാ കോൺഗ്രസ് നിയോജക മണ്ഡലം പ്രസിഡന്‍റ് ഷൈല, രാജ്കുമാർ, യൂത്ത് കോൺഗ്രസ് മണ്ഡലം പ്രസിഡന്‍റ് ഡാഡുഷ, റിഷാദ് പാങ്ങോട്, ആനന്ദ് ആർ. നായർ, നൗഫൽ പെരിങ്ങമല, സിനോജ്, ലീല, മുഹമ്മദ് ഷാൻ, അൻസൽ, രാഹുൽ, കല്ലിയോട് രാഹുൽ, അൻസാരി എന്നിവർ സംസാരിച്ചു.

ഗ്യാസ് കുറ്റികളും വാഴക്കുലയും മോഷ്ടിച്ച യുവാവ് പിടിയിൽ

നെയ്യാർഡാം: ഗ്യാസ് കുറ്റികളും വാഴക്കുലകളും മോഷ്ടിച്ച യുവാവിനെ തൊണ്ടിയോടെ പിടികൂടി. ഊരൂട്ടമ്പലം സ്വദേശിയായ മണികണ്ഠനെ(44) യാണ് അറസ്റ്റ് ചെയ്തത്. നെയ്യാർഡാം പോലീസ് സംഘം പട്രോളിംഗിനിടെ അന്പൂരിയിൽനിന്നും കുട്ടമലവഴി വരവേ വാഴിച്ചൽ ജംഗ്ഷനിൽ സംശയാസ്പദമായ രീതിയിൽ യുവാവിനെ കണ്ടെത്തിയതിനെ തുടർന്നു നടത്തിയ ചോദ്യം ചെയ്യലിലാണ് പ്രതി പിടിയിലായത്. മണികണ്ഠൻ രണ്ടു കുറ്റി ഗ്യാസുകളും ഒരു വാഴക്കുലയുമായി പോലീസ് ജീപ്പിനുമുന്നിലേക്കു വന്നിറങ്ങുകയായിരുന്നു. സംശയം തോന്നിയ പോലീസ് സംഘം സ്കൂട്ടർ തടഞ്ഞു നിർത്തി വണ്ടിയുടെ താക്കോൽ ഊരിയെടുത്തു പരിശോധിച്ചപ്പോഴാണ് നമ്പർ പ്ലേറ്റ് പ്ലാസ്റ്റിക് സ്റ്റിക്കർ വെട്ടി ഒട്ടിച്ചുവെച്ച് മാറ്റിയിരിക്കുകയാണെന്ന് മനസിലായത്. തുടർന്നാണ് ഗ്യാസ് കുറ്റികൾ പ്രദേശത്തെ രണ്ടു വീടുകളിൽനിന്നും മോഷ്ടിച്ചതാണെന്നും വാഴക്കുല മറ്റൊരു വീട്ടിൽനിന്നു മോഷ്ടിച്ചതാണെന്നും വ്യക്തമായത്. തുടർന്നു അറസ്റ്റ് രേഖപ്പെടുത്തി.

വീണ്ടും അപകട ഭീഷണി നേരിടുന്നതായി പരാതി : തിരുവല്ലം പാച്ചല്ലൂരില്‍ അപകടത്തില്‍പ്പെട്ട വാഹനങ്ങള്‍ മാറ്റാതെ അധികൃതര്‍

തിരുവല്ലം: പാച്ചല്ലൂരിനു സമീപം പാറവിളയില്‍ ആഴ്ചകള്‍ക്ക് മുമ്പ് അപകടത്തില്‍പ്പെട്ട കാറും ഒമിനി വാനും അപകട മേഖലയായ കൊടുംവളവില്‍ നിന്നും മാറ്റുന്നില്ലെന്ന് പരാതി. ഇക്കഴിഞ്ഞ ഒമ്പതിന് പൊതുപണിമുടക്ക് ദിവസം പുലര്‍ച്ചെ 2.30 ഓടുകൂടിയാണ് മാരുതി ബൊലേനോ കാറും മാരുതി ഒമിനി വാനും കൂട്ടിയിടിച്ച് തലകീഴായി മറിഞ്ഞത്. സംഭവം നടന്ന് ഒരാഴ്ച കഴിഞ്ഞിട്ടും ബന്ധപ്പെട്ട അധികൃതര്‍ ഇടപെട്ടു വാഹനങ്ങള്‍ സംഭവസ്ഥലത്തുനിന്നും മാറ്റാത്തതില്‍ നാട്ടുകാര്‍ക്കിടയിലും വാഹന യാത്രികര്‍ക്കിടയിലും പ്രതിഷേധം ശക്തമായിരി ക്കുകയാണ്. അപകട മേഖലയിലെ കൊടും വളവില്‍ റോഡിനു വശത്തായി വാഹനങ്ങള്‍ കിടക്കുന്നത് ഏതു സമയത്തും വന്‍ അപകടം വരുത്തിവയ്ക്കും എന്നാണ് പരാതി ഉയരുന്നത്. തിരുവല്ലം പോലീസ് സംഭവ സമയം സ്ഥലത്തെത്തി പോയതല്ലാതെ വാഹനം മാറ്റുന്ന കാര്യത്തില്‍ യാതൊരുവിധ നടപടിയും സ്വീകരിച്ചിട്ടില്ലെന്നും പറയുന്നു. ബന്ധപ്പെട്ട അധികൃതര്‍ ഇടപെട്ട് ഇനിയൊരപകടം സംഭവിക്കുന്നതിനു മുമ്പ് തന്നെ വാഹനങ്ങള്‍ തിരക്കേറിയ റോഡിനു വശത്തുനിന്നും എത്രയും വേഗം മാറ്റണമെന്നാണ് പൊതുജനങ്ങളുടെയും ആവശ്യം.

വ്യാപാരിയുടെ കുടുംബത്തിന് ധനസഹായം കൈമാറി

നെയ്യാറ്റിന്‍കര: മരണമടഞ്ഞ വ്യാപാരിയുടെ കുടുംബത്തിനു സഹായഹസ്തവുമായി കേരള വ്യാപാരി വ്യവസായി ഏകോപന സമിതി നെയ്യാറ്റിൻകര യൂണിറ്റ്. നെയ്യാറ്റിന്‍കര ആലുംമൂട്ടില്‍ റെഡിമെയ്ഡ് സെന്‍റര്‍ ഉടമ മനോഹര്‍ ജഫേഴ്സണിന്‍റെ കുടുംബത്തിനാണ് കേരള വ്യാപാരി വ്യവസായി ഏകോപന സമിതി നെയ്യാറ്റിൻകര യൂണിറ്റ് പത്തു ലക്ഷം രൂപയുടെ ധനസഹായം നല്‍കിയത്. യൂണിറ്റ് പ്രസിഡന്‍റ് മഞ്ചത്തല സുരേഷിൻ്റെ അധ്യക്ഷതയിൽ ചേര്‍ന്ന യോഗത്തിൽ സമിതി ജില്ലാ പ്രസിഡന്‍റ് ധനീഷ് ചന്ദ്രൻ ധനസഹായ വിതരണം നിര്‍വഹിച്ചു. ബസ് സ്റ്റാൻഡ് ജംഗ്ഷനിലെ നവീകരിച്ച വ്യാപാരഭവന്‍റെ ഉദ്ഘാടനവും ഉന്നത വിജയം കൈവരിച്ച അംഗങ്ങളുടെ മക്കള്‍ക്ക് അനുമോദനവും മറ്റു വ്യാപാര സംഘടനകളിൽ നിന്ന് ഏകോപന സമിതിയിൽ ചേർന്നവർക്ക് അംഗത്വ വിതരണവും ഇതോടൊപ്പം നടന്നു. ജോഷി ബാനു, ഷിറോസ്ഖാൻ, വെള്ളറട രാജേന്ദ്രൻ, ഉദിയൻകുളങ്ങര ശ്രീകുമാർ, ആന്‍റണി അലൻ, അരുൺ സരയു, ശ്രീധരൻനായർ, കൃഷ്ണൻനായർ, വേണുഗോപാൽ, സുലൈമാൻ, ചൈതന്യലാൽ എന്നിവർ പ്രസംഗിച്ചു.

കാണിക്കവഞ്ചി കുത്തിത്തുറന്നു പണം മോഷ്ടിച്ചു

പൂവച്ചൽ: പൂവച്ചൽ കോട്ടാകുഴി തമ്പുരാൻകാവ് ദുർഗാദേവി ക്ഷേത്ര കവാടത്തിലെ കാണിക്കവഞ്ചി കുത്തിത്തുറന്നു പണം മോഷ്ടിച്ചു. ക്ഷേത്രത്തിലെ പടിക്കെട്ടുകൾ പൊളിഞ്ഞതു അറ്റകുറ്റപ്പണി നടത്തിയിരുന്നു. ഇതിൽ വെള്ളം ഒഴിക്കാൻ ക്ഷേത്ര ഭാരവാഹി എത്തിയപ്പോഴാണ് കാണിക്കവഞ്ചി തകർത്ത നിലയിൽ കാണുന്നത്. തുടർന്നു കാട്ടാക്കട പോലീസിൽ പരാതി നൽകി. ആറുമാസത്തിലൊരിക്കലാണ് കാണിക്കവഞ്ചി തുറന്നു പണം എടുക്കുന്നത്. 30,000 ത്തോളം രൂപ ഉണ്ടാകുമെന്നും അവസാനമായി പണം എടുത്തിട്ട് മൂന്നുമാസം പിന്നിടുന്നതായും പരാതിയിൽ പറയുന്നു.

കടമ്പനാട് വാർഡിൽ സമഗ്ര കുടിവെള്ള പദ്ധതി

നെടുമങ്ങാട്: അരുവിക്കര പഞ്ചായത്തിലെ കടമ്പനാട് വാർഡിൽ സമഗ്ര കുടിവെള്ള പദ്ധതി നടപ്പിലാക്കുന്നതിന്‍റെ ഭാഗമായി സ്ഥാപിച്ച ബൂസ്റ്റർ പമ്പും മോട്ടോറും ബ്ലോക്ക്‌ പഞ്ചായത്ത്‌ പ്രസിഡന്‍റ് വി. അമ്പിളി ഉദ്‌ഘാടനം ചെയ്തു. കടമ്പനാട് വാർഡിലെ കുറുംതോട്ടം, നിലക്കൽ, കരിംകുട്ടി, മഴുവൻകോട് ഉൾപ്പെടെയുള്ള ഉയർന്ന പ്രദേശങ്ങൾ കുടിവെള്ള ക്ഷാമം പരിഹരിക്കുന്നതിനു വേണ്ടി വാർഡ് മെമ്പർ എൽ.ജി. അജേഷിന്‍റെ നിരന്തര ഇടപെടലിന്‍റെ ഭാഗമായി ബ്ലോക്ക്‌ ഡിവിഷൻ മെമ്പർ അരുവിക്കര വിജയൻ നായർ നെടുമങ്ങാട് ബ്ലോക്ക്‌ പഞ്ചായത്തിന്‍റെ സമഗ്ര കുടിവെള്ള പദ്ധതിയിൽ ഉൾപ്പെടുത്തി നാലുലക്ഷം രൂപ അനുവദിച്ചതിലൂടെയാണ് പദ്ധതി നടപ്പിലാക്കിയത്. അരുവിക്കര പഞ്ചായത്ത്‌ വൈസ് പ്രസിഡന്‍റ് രേണുക രവിയുടെ അധ്യക്ഷതയിൽ നടന്ന യോഗത്തിൽ ജില്ലാ പഞ്ചായത്ത്‌ അംഗം വെള്ളനാട് ശശി, ബ്ലോക്ക്‌ ഡിവിഷൻ മെമ്പർ അരുവിക്കര വിജയൻ നായർ, പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർപേഴ്സന്മാരായ മറിയകുട്ടി, അലീഫിയ, വെള്ളനാട് പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർപേഴ്സൺ എസ്. ബിന്ദു, വെമ്പനൂർ വാർഡ് മെമ്പർ ഷജിത, വാട്ടർ അഥോറിറ്റി അസിസ്റ്റന്‍റ് എക്സിക്യൂട്ടീവ് എൻജിനീയർ എൻ.വി. അജേഷ്, വിവിധ രാഷ്ട്രീയ പാർട്ടികളിലെ നേതാക്കളായ വിശ്വനാഥൻ, ജയൻ, ഗോപാലകൃഷ്ണൻ, കാലമാനൂർ രാജേന്ദ്രൻ, അജിത്, മഴുവൻക്കോട് മോഹനൻ തുടങ്ങിയവർ പ്രസംഗിച്ചു.

വാടക കെട്ടിടങ്ങളിലേക്കു മാറി മാറി കെഎസ്ഇബി : സ്വന്തം കെട്ടിടം നിർമിക്കാൻ ഇനിയും നടപടികളായില്ല

മാറനല്ലൂർ: വാടക കെട്ടിടങ്ങളിലേക്കു മാറി മാറി കെഎസ്ഇബി. പുതിയ കെട്ടിടത്തിലേയ്ക്ക് ഉടൻ മാറും. മാറനല്ലൂരിൽ പ്രവർത്തിക്കുന്ന കെഎസ്ഇബി സെക്ഷൻ ഓഫീസിന് സ്വന്തമായി കെട്ടിടം നിർമിക്കാൻ പഞ്ചായത്ത് സ്ഥലം നൽകിയെങ്കിലും നടപടികളാകുന്നില്ല. കഴിഞ്ഞ പഞ്ചായത്ത് ഭരണസമിതിയുടെ അവസാന നാളുകളിലാണ് ഓഫീസിനു കെട്ടിടം നിർമിക്കുന്നതിനുവേണ്ടി മാറനല്ലൂർ പോലീസ് സ്റ്റേഷനു സമീപമുള്ള 10 സെന്‍റ് സ്ഥലം വിട്ടുനൽകുന്നതിനു തീരുമാനമെടുത്തത്. പുതിയ ഭരണസമിതി അധികാരമേറ്റതോടെ ഇതിനുവേണ്ടിയുള്ള നടപടികളും ആരംഭിച്ചു. താലൂക്ക്, വില്ലേജ് അധികൃതർ വന്നു സ്ഥലം പരിശോധിക്കുകയും അളന്നു തിട്ടപ്പെടുത്തുകയും ചെയ്‌തെങ്കിലും മറ്റു നടപടികളൊന്നുംതന്നെയായിട്ടില്ല. ബോർഡ് അധികൃതർ ഇതുമായി ബന്ധപ്പെട്ട് മുന്നോട്ടുപോകുന്നില്ലെന്ന് പഞ്ചായത്ത് അധികൃതർ പറയുമ്പോൾ താലൂക്കിൽനിന്നുള്ള നടപടികൾക്ക് വേഗംകൂട്ടാൻ പഞ്ചായത്ത് അധികൃതർ തയാറാകുന്നില്ലെന്നാണു ബോർഡ് അധികൃതരുടെ വിശദീകരണം. നിലവിൽ മൂലക്കോണത്തിനു സമീപം വാടകക്കെട്ടിടത്തിൽ പ്രവർത്തിക്കുന്ന ഓഫീസ് സ്ഥലസൗകര്യമില്ലാത്തതു കാരണം ഇപ്പോൾ മറ്റൊരു വാടകക്കെട്ടിടം അന്വേഷിക്കുകയാണ്. സൗകര്യപ്രദമായ കെട്ടിടം കിട്ടുന്നതോടെ ഓഫീസ് ഇനി മറ്റൊരിടത്തായിരിക്കും പ്രവർത്തിക്കുന്നത്. കഴിഞ്ഞ മൂന്നുവർഷത്തിനിടെ മാറനല്ലൂരിലെ കെഎസ്ഇബി ഓഫീസ് മൂന്നിടത്താണ് പലപ്പോഴായി മാറിയത്. ഓഫീസ് പലയിടങ്ങളിലായി മാറി പ്രവർത്തിക്കുന്നത് ജീവനക്കാർക്കും, ഉപഭോക്താക്കൾക്കും ഒരുപോലെ ബുദ്ധിമുട്ടാവുകയാണ്. നിലവിൽ പ്രവർത്തിക്കുന്ന കെട്ടിടത്തിൽ സൗകര്യക്കുറവായതു കാരണം അറ്റകുറ്റപ്പണികൾ നടത്തുന്നതിനുവേണ്ടിയുൾപ്പെടെയുള്ള സാധനസാമഗ്രികൾ പലതും പാതയോരത്താണ് നിക്ഷേപിച്ചിരിക്കുന്നത്. അലുമിനിയം കമ്പികളുൾപ്പെടെ മോഷണം പോകുന്നതും ഇപ്പോൾ പതിവായിട്ടുണ്ട്.

എല്ലാ വിദ്യാഭ്യാസ ജില്ലകളിലും സ്ട്രീം ശില്പശാലകൾ: മന്ത്രി

നേമം: സംസ്ഥാനത്തെ 41 വിദ്യാഭ്യാസ ജില്ലകളിലും വിദ്യാർഥികൾക്കായി സ്ട്രീം അധിഷ്ഠിത ശില്പശാലകൾ സംഘടിപ്പിക്കുമെന്ന് മന്ത്രി വി ശിവൻകുട്ടി. പൊതു വിദ്യാഭ്യാസ വകുപ്പിന്‍റെ ഭാഗമായ സ്റ്റേറ്റ് ഇൻസ്റ്റിറ്റ്യൂട്ട് ഓഫ് എഡ്യൂക്കേഷണൽ ടെക്നോളജി (എസ്ഐഇടി) സംഘടിപ്പിച്ച നവസാങ്കേതികവിദ്യാ ശില്പശാലയുടെ സമാപന സമ്മേളനം തിരുവനന്തപുരം മൺവിളയിൽ ഉദ്ഘാടനം ചെയ്യുകയായിരുന്നു മന്ത്രി. സയൻസ് , ടെക്നോളജി, എൻജിനീയറിംഗ്, മാത്തമാറ്റിക്സ് എന്നിവ ഉൾപ്പെടുന്നതാണ് സ്റ്റം. ഇതോടൊപ്പം റോബോട്ടിക്സും ആർട്സും ചേർത്ത് സ്ട്രീം ആക്കി സംസ്ഥാന വ്യാപകമായി എസ്ഐഇടി നടപ്പാക്കും- മന്ത്രി പറഞ്ഞു. തിരുവനന്തപുരം പൂവത്തൂർ ഗവ. ഹയർ സെക്കൻഡറി സ്കൂൾ വിദ്യാർഥിനി ആർ.എസ്. നന്ദന സ്വാഗതം പറഞ്ഞു. എറണാകുളം കടയിരിപ്പ് ഗവ. ഹയർ സെക്കൻഡറി സ്കൂൾ വിദ്യാർഥിനി അനസൂയ അനിൽ അധ്യക്ഷത വഹിച്ചു. വയനാട് പടിഞ്ഞാറത്തറ ജിഎച്ച്എസ്എസ് വിദ്യാർഥി ഉജ്വൽ കൃഷ്ണ നന്ദി പറഞ്ഞു. കോട്ടയം സെന്‍റ് ആൻസ് ഗേൾസ് ഹയർ സെക്കൻഡറി സ്കൂൾ വിദ്യാർഥിനി ഗായത്രി നായർ പരിപാടികൾ ഏകോപിപ്പിച്ചു. ‌എസ്ഐഇടി ഡയറക്ടർ ബി. അബുരാജ്, എസിഎസ്ടിഐ ഡയറക്ടർ കെ.സി. സഹദേവൻ, എസ്ഐഇടി അക്കാദമിക് കോ-ഓർഡിനേറ്റർ സുരേഷ് ബാബു, പ്രോഗ്രാം കോ-ഓർഡിനേറ്റർ എസ്.എൻ. സമിത തുടങ്ങിയവർ പ്രസംഗിച്ചു.

മഴവെള്ളം നിറഞ്ഞ ഓടയിൽവീണു ബൈക്ക് യാത്രികർക്കു പരിക്ക്

വെള്ളറട : വെള്ളറട ജംഗ്ഷനില്‍ വെള്ളം വാര്‍ന്നു പോകാന്‍ കഴിയാതെ ഓടകള്‍ നിറഞ്ഞതോടെ ആഴമറിയാതെ ബൈക്ക് യാത്രികര്‍ ഓടയില്‍ വീണ് രണ്ടുപേര്‍ക്കു പരിക്കേറ്റു. കാറ്റാടി ആറടിക്കര വീട്ടില്‍ ജയരാജ് (28), സുനില്‍ (41)നു മാണ് പരിക്കേറ്റത്. ഇന്നലെ രാവിലെ മുതല്‍ തിമിര്‍ത്തു പെയ്യുന്ന മഴയില്‍ വെള്ളം വാര്‍ന്നു പോകാന്‍ കഴിയാതെ വെള്ളറട ജംഗ്ഷനില്‍ ഓട നിറയെ മലിനജലം കെട്ടിനില്‍ക്കുകയായിരുന്നു. ഊരാളുങ്കൽ സൊസൈറ്റിയാണ് വെള്ളറട കാരക്കോണം റോഡിന്‍റെ പണി പൂര്‍ത്തിയാക്കിയത്. എന്നാല്‍ പല നിയമപ്രശ്‌നങ്ങളിലും കുടുങ്ങി വെള്ളറട ടൗണില്‍ വികസനം നടക്കുന്നില്ല. തുടര്‍ന്ന് സമീപത്തെ ഹോട്ടലില്‍ നിന്നുള്ള മാലിന്യവും ഇന്നലെ പെയ്ത മഴവെള്ളവും കൂടെ ചേര്‍ന്നു ടൗണില്‍ വെള്ളം പരിധിയിലധികം ഉയര്‍ന്നതാണു ബൈക്ക് യാത്രികരെ വീഴ്ത്തിയത്. മലിന ജലം കെട്ടിനില്‍ക്കുന്ന സ്ഥലം റോഡ് ആണെന്നു കരുതി ബൈക്ക് ഓടിച്ചിറക്കിയത് ഓടയിലേക്ക് ആയിരുന്നു. പരിക്കേറ്റ രണ്ടുപേരെയും ആശുപത്രിയിലേക്ക് മാറ്റി. ആഴമറിയാതെ റോഡു വക്കിലെ വെള്ളത്തില്‍ കാലു വയ്ക്കുന്നവരെല്ലാം ഓടയില്‍വീണ് പരിക്കേല്‍ക്കുന്ന സാഹചര്യമാണ് നിലവില്‍ ഉള്ളത്. എത്രയും പെട്ടെന്ന് ഓട നിര്‍മാണം പൂര്‍ത്തിയാക്കുകയും സ്ലാബുകള്‍ തകര്‍ന്നു കിടക്കുന്ന ഭാഗത്ത് പുതിയ സ്ലാബുകള്‍ ഇട്ട് അപകടരഹിതമാക്കി മാറ്റണമെന്നുമാണ് ആവ ശ്യം. യാത്രക്കാര്‍ക്കും സമീപത്തെ കടകളിലെ ആളുകള്‍ക്കും കടകളില്‍ കയറാന്‍ കഴിയാത്ത സാഹചര്യമാണ്.

"തൊഴിലാണ് എന്‍റെ ലഹരി' പദ്ധതി കാപ്പുകാട്ട് ആരംഭിച്ചു

കോട്ടൂർ: തൊഴിലാണ് എന്‍റെ ലഹരി പദ്ധതിക്ക് കാപ്പുകാട്ട് തുടക്കമായി. എക്സെസ്, വനം വകുപ്പുകളുടെയും എക്കോ ഡെവലപ്മെന്‍റ് കമ്മിറ്റിയുടെയും, സംയുക്താഭിമുഖ്യത്തിൽ വിമുക്തി മിഷന്‍റെ സഹകരണത്തോടെ കോട്ടൂരിലെ 27 ഓളം സെറ്റിൽമെന്‍റുകളിലുള്ള യുവതയ്ക്കായാണു സൗജന്യ പിഎസ്‌സി കോച്ചിംഗ് സെന്‍റർ ആരംഭിച്ചത്. കോട്ടൂർ ഫോറസ്റ്റ് ഓഫീസിൽ നടന്ന യോഗത്തിൽ കുറ്റിച്ചൽ പഞ്ചായത്ത് പ്രസിഡന്‍റ് ജി. മണികണ്ഠൻ അധ്യക്ഷനായി. ജി.സ്റ്റീഫൻ എംഎൽഎ യോഗം ഉദ്ഘാടനം ചെയ്തു. അഗസ്ത്യവനം ബയോളജിക്കൽ പാർക്ക് സർക്കിൾ, കൺസർവേറ്റർ ഓഫ് ഫോറസ്റ്റ് ശ്യാം മോഹൻലാൽ മുഖ്യ പ്രഭാഷണം നടത്തി. പിഎസ്‌സി ക്ലാസിന് ആവശ്യമായ വൈറ്റ്ബോർഡ് ലയൺസ് ക്ലബ് പ്രസിഡന്‍റ് പി. ജയരാമൻ നായർ, എംഎൽഎയ്ക്ക് കൈമാറി. വിമുക്തി മാനേജർ എസ്.കെ. സന്തോഷ്കുമാർ, ജില്ലാ വിമുക്തി മിഷൻ കോ-ഓർഡിനേറ്റർ വിഘ്നേഷ് വിശ്വനാഥ്, ഡെപ്യൂട്ടി എക്സൈസ് കമ്മീഷണർ പി.എൽ. ഷിബു, ശ്രീദേവി സുരേഷ്, ജി.ആർ. അനീഷ്, പ്രദീപ് കുമാർ, യു.എസ്. അനീസ്, ആർ.ജി. രാജേഷ്, സ്റ്റാഫ് അസോസിയേഷൻ ജില്ലാ സെക്രട്ടറി എം. വിശാഖ് തുടങ്ങിയവർ സംസാരിച്ചു. ക്ലാസിൽ പങ്കെടുത്ത വിദ്യാർത്ഥികൾക്ക് പഠനോപകരണങ്ങൾ വിതരണം ചെയ്തു. നെടുമങ്ങാട് എക്സൈസ് സർക്കിൾ ഇൻസ്പെക്ടർ ജെ.എസ്. ബിനു നന്ദി പറഞ്ഞു.

ശ്രീചിത്തിര തിരുനാളിന്‍റെ നാടുനീങ്ങലിന്‍റെ വാർഷികം

തിരുവനന്തപുരം: തിരുവിതാംകൂറിലെ അവസാന രാജാവ് ശ്രീചിത്തിര തിരുനാൾ ബാലരാമവർമയുടെ 34-ാമത് നാടുനീങ്ങൽ വാർഷികം ശ്രീചിത്തിര തിരുനാൾ സ്മാരക സമിതിയുടെ ആഭിമുഖ്യത്തിൽ കവടിയാർ കൊട്ടാരവളപ്പിൽ അദ്ദേഹം അന്ത്യവിശ്രമം കൊള്ളുന്ന "പഞ്ചവടി’യിൽ ആച രിച്ചു. പ്രത്യേകം സജ്ജമാക്കിയ പന്തലിൽ നടന്ന ചടങ്ങ് ഗവർണർ രാജേന്ദ്ര വിശ്വനാഥ അർലേക്കർ ഭദ്രദീപം തെളിച്ച് ഉദ്ഘാടനം ചെയ്തു. തുടർന്നു ഗവർണർ, രാജകുടുംബാംഗങ്ങൾ, വിശിഷ്ടാതിഥികൾ, സമിതി ഭാരവാഹികൾ തുടങ്ങിയവർ പുഷ്പാർച്ചന നടത്തി. ഗവർണറോടൊപ്പം പൂയം തിരുനാൾ ഗൗരി പാർവതീഭായി, അശ്വതി തിരുനാൾ ഗൗരിലക്ഷ്മീഭായി, അവിട്ടം തിരുനാൾ ആദിത്യ വർമ, കെ. മുരളീധരൻ, മുൻ അംബാസിഡർ ടി.പി.ശ്രീനിവാസൻ, പാലോട് രവി, മുൻ മന്തി എം. വിജയകുമാർ, ധനലക്ഷ്മി ബാങ്ക് ചെയർമാൻ മധു കലഞ്ഞൂർ, ശാസ്തമംഗലം മോഹൻ, മുൻ അംബാസിഡർ ടി.പി. സീതാരാമൻ, ബിജെപി ജില്ല പ്രസിഡന്‍റ് കരമന ജയൻ, ഭീമ ജൂവലേഴ്സ് ചെയർമാൻ ഡോ. ബി. ഗോവിന്ദൻ, എം. അയ്യപ്പൻ, വിക്ടർ ടി. തോമസ്, സതീശൻ, പുഷ് പവല്ലി, എസ്.എൻ. രഘുചന്ദ്രൻ നായർ, ജേക്കബ് കെ. എബ്രഹാം, വി. സണ്‍ലാൽ, പി. രവിന്ദ്രൻ നായർ, ബി. രാജൻ, ബാബു നാരായണൻ തുടങ്ങിയവർ പങ്കെടുത്തു. വള്ളക്കടവ് യത്തീംഖാന, സ്കൗട്ട് ആൻഡ് ഗൈഡ്സ്, അശ്വാരൂഢ പോലീസ്, വിവിധ സാമൂഹിക- സാംസ്കാരിക സംഘടനകളുടെ പ്രതിനിധികൾ തുടങ്ങിയവർ പുഷ്പാർച്ചനയിൽ പങ്കെടുത്തു.

തീരദേശം കേന്ദ്രീകരിച്ച് വിലസുന്ന വീസാ തട്ടിപ്പുകാരുടെ ഇരയായി ബൻസിഗർ.!

എസ്. രാജേന്ദ്രകുമാർ വിഴിഞ്ഞം: തീരദേശം കേന്ദ്രീകരിച്ച് വിലസുന്ന വീസാ തട്ടിപ്പുകാരുടെ ഇരയായി ബൻസിഗർ. ഇടനിലക്കാരനായിനിന്നു വാങ്ങി നൽകിയ പണം കൈപ്പറ്റിയവർ തിരികെ നൽകാതായ പ്പോൾ പിടിച്ചു നിൽക്കാനാകാതെ സ്വന്തം വള്ളത്തിൽ ഉൾക്കടലിൽ പോയി ജീവനൊടുക്കി. കടക്കാരുടെ മുന്നിൽ പിടിച്ച് നിൽക്കാനാകില്ലെന്ന നിസഹായാ വസ്ഥ വിവരിച്ചു ഭാര്യക്കും ബന്ധുക്കൾക്കും വീഡിയോ കോൾ ചെയ്തശേഷമാണ് ബ ൻ സിഗർ ജീവനൊടുക്കിയത്. പൂവാർ പള്ളം പുരയിടത്തിൽനിന്ന് വിഴിഞ്ഞം കോട്ടപ്പുറം തെന്നൂർക്കോണം കുഴിവിളയിൽ താമസമാക്കിയ മത്സ്യത്തൊഴിലാളിയായ ബൻസിഗറി (39) ന്‍റെ മരണമാണു വീട്ടുകാർക്കും ബന്ധുക്കൾക്കും തീരാനഷ്ടമായത്. ""എല്ലാം കൈവിട്ടു പോയി, പണം വാങ്ങിയ എല്ലാവരോടും കള്ളം പറഞ്ഞു മടുത്തു. എനിക്ക് എല്ലാം മതിയായി, മരിക്കാനും മടിയാണ്. മരിക്കാതിരിക്കാനും വയ്യ. വീസക്കു പണം തന്നവരെ പറഞ്ഞു സമാധാനിപ്പിക്കുന്നതിനും പരിധിയില്ലേ. ഞാൻ ജീവിച്ചിരുന്നിട്ട് കാര്യമില്ല..'' എന്നിങ്ങനെ വീസ തട്ടിപ്പുകാരുടെ പിടിയിൽപെട്ടതിന്‍റെ നിരാശയും നിസാഹായവസ്ഥയും കടലിൽനിന്നു വള്ളത്തിലിരുന്നു ഭാര്യയെ ലൈവ് വീഡിയോ കോളിലൂടെ അറിയിച്ച ശേഷം എല്ലാം അവസാനിപ്പിച്ചു. അഞ്ചാം നാൾ തമിഴ്നാട് അതിർത്തിയിൽ പൊങ്ങിയ മൃതദേഹത്തിൽ കണ്ട ദൂരൂഹത തേടിയുള്ള തീരദേശ പോലീസിന്‍റെ അന്വേഷണത്തിലാണു വ്യത്യസ്തമായ ജീവത്യാഗത്തിന്‍റെ ചുരുളഴിയുന്നത്. നീന്താനറിയാവുന്ന ബൻസിഗർ ജീവിതത്തിലേക്കു ഇനി തിരിച്ചു വരവുണ്ടാകരുതെന്ന കണക്കു കൂട്ടലിലായിരുന്നു എല്ലാം പ്ലാൻ ചെയ്തത്. അഞ്ചു ലിറ്റർ വീതം കൊള്ളുന്ന മൂന്നു കറുത്ത കന്നാസുകളിൽ മണൽ നിറച്ചു. കൈയിൽ നായ്കളെ കെട്ടുന്ന തരത്തിലുള്ള ചങ്ങലയും കരുതി. ഇക്കഴിഞ്ഞ 11നു വൈകുന്നേരം മൂന്നരക്ക് വിഴിഞ്ഞം തുറമുഖത്തുനിന്നു വളളം തുഴഞ്ഞ് ഉൾക്കടലിലേക്ക് തിരിച്ചു. മണൽനിറച്ച കന്നാസുകൾ ചങ്ങല കൊണ്ട് കോർത്ത് കാലിൽ ബന്ധിച്ചു പൂട്ട് കൊണ്ട് പൂട്ടി താക്കോൽ വള്ളത്തിൽ ഉപേക്ഷിച്ചു. കണ്ണുകൾ രണ്ടും തോർത്ത് കൊണ്ടു മറച്ചശേഷം കടലിലേക്ക് എടുത്തുചാടി. കാലിൽ കെട്ടിയ ഭാരം കാരണം ഉയർന്നു വരാനുമായില്ല. ശക്തമായ കടൽക്ഷോഭമുള്ള സമയത്ത് ആളില്ലാതെ ഒരു വള്ളം അനാഥമായി കിടക്കുന്നതു കണ്ട മറ്റു മത്സ്യത്തൊഴിലാളികളാണു വിവരം തീരദേശ പോലീസിനു കൈമാറിയത്. അധികൃതർ നടത്തിയ പരിശോധനയിൽക്കണ്ട ആധാർ കാർഡും ഫോണും കേന്ദ്രീകരിച്ചു നടത്തിയ പരിശോധനയിലാണു വള്ളം ബൻസിഗറിന്‍റേതെന്നു തെളിഞ്ഞത്. കാര്യങ്ങൾ അറിഞ്ഞതോടെ വീട്ടുകാർ ആത്മഹത്യ ഉറപ്പിച്ചു. തീരദേശ പോലീസിന്‍റെയും മറൈൻ എൻ ഫോഴ്സ്മെന്‍റിന്‍റെയും സ്കൂബാ സംഘങ്ങളുടെയും നിരന്തരമായ തെരച്ചിൽ നടക്കുന്നതിനിടയിലാണ് മൃതദേശം കണ്ടെത്തിയത്. തുടർന്നു കേസെടുത്ത തീരദേശ പോലീസ് നടത്തിയ മൊഴിയെടുക്കലിലാണ് വിസാ തട്ടിപ്പാണു പിന്നിലെന്ന വിവരം ബന്ധുക്കൾ അറിയിക്കുന്നത്. തൊഴിലെടുക്കാൻ വിദേശത്തുകൊണ്ടുപോകാമെന്ന മോഹന വാഗ്ദാനം നൽകി മത്സ്യത്തൊഴിലാളികളെ വലയിലാക്കി പണം തട്ടുന്ന വൻ സംഘം തിരദേശം കേന്ദ്രീകരിച്ച് പ്രവർത്തിക്കുന്നതായി അധികൃതർക്ക് വിവരം ലഭിച്ചിട്ടുണ്ട്. ഇറ്റലി, കാനഡ, ജപ്പാൻ, ഇസ്രായേൽ, ബ്രിട്ടൺ എന്നിങ്ങനെയുള്ള രാജ്യങ്ങളിൽ പോകാൻ സ്വപ്നം കാണുന്ന യുവാക്കളെ വലയിലാക്കുന്ന സംഘം വീസക്കും മറ്റുമായി അഡ്വാൻസ് എന്ന പേരിൽ പലപ്പോഴായി വൻ തുകകൾ കൈക്കലാക്കും. തുടർന്ന് എവിടെയെങ്കിലുംപ്രവർത്തിക്കുന്ന ഒരു തട്ടിക്കൂട്ട് ഓഫീസിന്‍റെ മേൽവിലാസവും നൽകി ആൾക്കാരെ വിശ്വാസത്തിലെടുക്കും. പണം കൈപ്പറ്റലും മറ്റുമെല്ലാം രഹസ്യമാക്കുന്നതിനാൽ പലരും തട്ടിപ്പ് മനസിലാക്കുന്നത് വൈകിയായിരിക്കും. പലരിൽ നിന്നായി വൻ തുകകൾ കൈക്കലാക്കുന്ന സംഘം ദിവസങ്ങൾക്കുള്ളിൽ ഓഫീസുകൾ പൂട്ടി മുങ്ങുന്നതോടെ പെട്ടു പോകുന്നത് ഇടനിലക്കാരാണ്. പണം നൽകിവരോട് അവധി പറഞ്ഞ് മടുത്ത ചിലർ നാടുവിട്ടതായും അറിയുന്നു.

ജവഹര്‍നഗര്‍ വസ്തുതട്ടിപ്പ് : അനന്തപുരി മണികണ്ഠന്‍റെ വീട്ടില്‍ പരിശോധന നടത്തി

പേരൂര്‍ക്കട: ജവഹര്‍നഗറിലെ വീടും വസ്തുവും തട്ടിയ സംഭവത്തില്‍ നിലവിലെ പ്രധാന കണ്ണിയായ അനന്തപുരി മണികണ്ഠന്‍റെ വീട്ടില്‍ പോലീസ് പരിശോധന നടത്തി. കിള്ളിപ്പാലം പുത്തന്‍കോട്ടയിലെ വാടകവീട്ടിലാണു മ്യൂസിയം പോലീസ് പരിശോധന നടത്തിയത്. വിവിധ സ്ഥലങ്ങളില്‍ മണികണ്ഠന്‍ വസ്തു വാങ്ങിയിട്ടുണ്ടെന്നും പണി നടന്നുവരുന്നുണ്ടെന്നുമാണ് സൂചന. പോലീസ് പരിശോധനയ്‌ക്കെത്തുമ്പോള്‍ ഭാര്യയും മണികണ്ഠൻഖെ മാതാപിതാക്കളുമാണ് ഇവിടെയുണ്ടായിരുന്നത്. മണികണ്ഠന്‍ ഇത്തരമൊരു ഗൂഢാലോചന നടത്തിയിട്ടില്ലെന്നും തെറ്റുകാരനല്ലെന്നുമായിരുന്നു മാതാപിതാക്കള്‍ക്കു പറയാനുണ്ടായിരുന്നത്. അതിനിടെ വസ്തുവിന്‍റെ ഒറിജിനല്‍ പ്രമാണം ഹാജരാക്കാന്‍ ആവശ്യപ്പെട്ടിരുന്ന ചന്ദ്രസേനന്‍റെ മരുമകന്‍ അനില്‍ തമ്പി സമയപരിധി കഴിഞ്ഞിട്ടും മ്യൂസിയം പോലീസുമായി സഹകരിച്ചിട്ടില്ല. വസ്തുവിന്‍റെ ഒറിജിനല്‍ പ്രമാണം തന്‍റെ പക്കല്‍ ഇല്ലെന്നാണ് ഇയാളുടെ പുതിയ വാദഗതി. അനന്തപുരി മണികണ്ഠന്‍റെ ജാമ്യാപേക്ഷ വഞ്ചിയൂര്‍ സെഷന്‍സ് കോടതി തള്ളിയതോടെയാണ് ഇയാളുടെ വീട്ടില്‍ പോലീസ് പരിശോധനയ്ക്ക് എത്തിയത്. അതിനിടെ മണികണ്ഠന്‍ ഒരു ലക്ഷ്വറി കാര്‍ വാങ്ങിയതായി സൂചനയുണ്ട്. വസ്തു ഇടപാടിലൂടെ ലഭിച്ചപണമാണോ ഇതിന് ഉപയോഗിച്ചിരിക്കുന്നതെന്ന പോലീസിന്‍റെ സംശയം ബലപ്പെടുത്തുന്ന ഒന്നാണ് ഇത്. അമേരിക്കയില്‍ സ്ഥിരതാമസമാക്കിയിരിക്കുന്ന ഡോറ അസറിയ ക്രിപ്‌സിന്‍റെ ജവഹര്‍ നഗറിലെ വസ്തു അവരറിയാതെ തട്ടിയെടുത്തതിലെ പ്രധാന കണ്ണിയാണ് മണികണ്ഠന്‍. കെയര്‍ ടേക്കര്‍ വസ്തുവിന്‍റെ കരമടയ്ക്കാന്‍ എത്തിയപ്പോഴാണ് കരമൊടുക്കിയതായി ഉദ്യോഗസ്ഥര്‍ അറിയിച്ചത്. ഇതോടെയാണ് വസ്തു തട്ടിപ്പുമായി ബന്ധപ്പെട്ട വിവാദങ്ങള്‍ ആരംഭിക്കുന്നത്.

അഭയകേന്ദ്രത്തില്‍നിന്നു നാലുപേര്‍ രക്ഷപ്പെട്ടു; മൂന്നുപേരെ പോലീസ് കണ്ടെത്തി

പേരൂര്‍ക്കട: അഭയകേന്ദ്രത്തില്‍ നിന്നു നാലുപേര്‍ രഹസ്യമായി രക്ഷപ്പെട്ടു. മൂന്നുപേരെ പോലീസ് കണ്ടെത്തി തിരികെക്കൊണ്ടുവന്നു. ‌ഞായറാഴ്ച രാവിലെ ആറോടെയാണ് തമ്പാനൂരിലെ ഡോണ്‍ ബോസ്‌കോ നിവാസ് എന്ന കുട്ടികളുടെ അഭയകേന്ദ്രത്തില്‍ നിന്നു നാല് ആൺകുട്ടികളെ കാണാതായത്. 13 മുതല്‍ 15 വയസുവരെ വിവിധ പ്രായത്തിലുള്ള നാലുപേരാണ് അഭയകേന്ദ്രത്തില്‍നിന്ന് ഒന്നിച്ചു പുറത്തുപോയത്. കേന്ദ്രത്തിന്‍റെ ഗേറ്റ് പൂട്ടിട്ടു പൂട്ടിയ നിലയിലായിരുന്നു. ഇത് താക്കോല്‍ ഉപയോഗിച്ച് തുറന്നശേഷമായിരുന്നു നാല്‍വര്‍ സംഘം രക്ഷപ്പെട്ടത്. തമ്പാനൂര്‍ പോലീസ് നടത്തിയ അന്വേഷണത്തില്‍ രണ്ടുപേരെ ശാസ്തമംഗലം ഭാഗത്തുനിന്നും ഒരാളെ തമ്പാനൂര്‍ റെയില്‍വേ സ്റ്റേഷന്‍ പരിസരത്തുനിന്നുമാണ് കണ്ടെത്താനായത്. നാലാമനെ കണ്ടെത്തുന്നതിനായി അന്വേഷണം ഊര്‍ജ്ജിതമാക്കിയിട്ടുണ്ടെന്നു തമ്പാനൂര്‍ എസ്.ഐ ബിനു മോഹന്‍ അറിയിച്ചു.

ഇവനോ ക്വിസ്: സെന്‍റ് ഗൊരേത്തീസ് സ്കൂളിനു ചാമ്പ്യൻഷിപ്പ്

തിരുവനന്തപുരം: നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിന്‍റെ രജത ജൂബിലി ആഘോഷത്തിന്‍റെ ഭാഗമായി സംഘടിപ്പിച്ച ഇന്‍റർ സ്കൂൾ ഇവാനോ ക്വിസിൽ നാലാഞ്ചിറ സെന്‍റ് ഗൊരേത്തീസ് സ്കൂൾ ചാമ്പ്യൻഷിപ്പുനേടി. സഭാ സ്ഥാപകൻ ധന്യൻ മാർ ഈവാനിയോസിന്‍റെ സ്മരണക്കായിട്ടാണ് എല്ലാ വർഷവും ഇവാനോ ക്വിസ് സംഘടിപ്പിക്കുന്നതെന്നു പ്രിൻസിപ്പൽ ഫാ. ജോസ് ചരുവിൽ പറഞ്ഞു. നാലാഞ്ചിറ സെന്‍റ് ഗൊരേത്തീസ് സ്കൂൾ, കിഴക്കേക്കര സെന്‍റ് മേരീസ് ഹയർ സെക്കൻഡറി സ്കൂൾ, സെന്‍റ് ജോൺസ് സ്കൂൾ, അബൽ, നവജീവൻ ബഥനി വിദ്യാലയ, നാലാഞ്ചിറ, നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂൾ എന്നിവർ ഒന്നുമുതൽ അഞ്ചു വരെ സ്ഥാനങ്ങൾക്ക് അർഹത നേടി. സമാപന സമ്മേളനത്തിൽ പ്രിൻസിപ്പൽ ഫാ. ജോസ് ചരുവിൽ അധ്യക്ഷത വഹിച്ചു. ബഥനി തിരുവനന്തപുരം പ്രൊവിൻഷ്യൽ സുപ്പീരിയർ സിസ്റ്റർ സാന്ദ്ര സമ്മാനദാനം നിർവഹിച്ചു. പ്രമുഖ സ്പിരിച്വൽ ക്വിസ് മാസ്റ്റർ ഫാ. ജോബിൻ, കൺവീനർ അജുമോൻ, വൈസ് പ്രിൻസിപ്പൽ ആർ.സി. അജീഷ് കുമാർ, പിടിഎ പ്രസിഡന്‍റ് ഡോ. ജോജു ജോൺ എന്നിവർ പ്രസംഗിച്ചു.

ആദിവാസി യുവാവിന്‍റെ മരണം : കോൺഗ്രസ് പ്രവർത്തകർ ആംബുലൻസ് തടഞ്ഞതിനാലെന്ന് ആരോപണം

വിതുര: ആംബുലൻസ് തടഞ്ഞു വച്ചതിനെ തുടർന്ന് ആദിവാസി യുവാവ് മരിച്ചതായി ആരോപണം. വിതുര മണലി കല്ലൻകുടി തടത്തരികത്ത് വീട്ടിൽ ബിനു (43)ആണ് മരിച്ചത്. കഴിഞ്ഞദിവസം വിഷം ഉള്ളിൽ ചെന്നതിനെതുടർന്ന് വിതുര താലൂക്ക് ആശുപത്രിയിൽ എത്തിച്ച ബിനുവിനെ മെഡിക്കൽ കോളജിലേക്ക് കൊണ്ടുപോകുന്നതിനിടയിൽ ആശുപത്രിയിൽ വച്ച് കോൺഗ്രസ് പ്രവർത്തകർ ആംബുലൻസ് തടയുകയായിരുന്നു. ആംബുലൻസിന്‍റെ കാലപ്പഴക്കവും ഇൻഷ്വറൻസ് തീർന്നതും ആരോപിച്ചായിരുന്നു കോൺഗ്രസ് വിതുര മണ്ഡലം കമ്മിറ്റിയുടെ ആംബുലൻസ് തടഞ്ഞുള്ള പ്രതിഷേധം. ഏകദേശം 20 മിനിറ്റോളം ആംബുലൻസ് ആശുപത്രി വളപ്പിൽ തടഞ്ഞിട്ടിരുന്നു. തുടർന്ന് ബിനുവിനെ മെഡിക്കൽ കോളജിൽ എത്തിച്ചെങ്കിലും മരണം സംഭവിക്കുകയായിരുന്നു. വിതുര താലൂക്ക് ആശുപത്രിയിൽനിന്നും എത്രയുംവേഗം മെഡിക്കൽ കോളേജിൽ കൊണ്ടുപോകാൻ ഡോക്ടർ പറഞ്ഞെന്നും കോൺഗ്രസ് പ്രവർത്തകർ അതു തടയുകയായിരുന്നുവെന്നും നേരത്തെ മെഡിക്കൽ കോളജിൽ എത്തിയെങ്കിൽ മരണം സംഭവിക്കില്ലെന്നും ബിനുവിന്‍റെ ബന്ധുക്കൾ പറഞ്ഞു. രോഗിയുടെ അവസ്ഥ ബോധ്യപ്പെടുത്താൻ ശ്രമിച്ച ആശുപത്രി ജീവനക്കാരോടും പ്രതിഷേധക്കാർ അസഭ്യം പറഞ്ഞതായി ജീവനക്കാർ പറഞ്ഞു. ഭാര്യ: സുമ. മക്കൾ ആര്യ, അഭിഷേക്. മന്ത്രി വീട് സന്ദർശിച്ചു മരണപ്പെട്ട ബിനുവിന്‍റെ വീട് മന്ത്രി ആർ. കേളു സന്ദർശിച്ചു. ആംബുലൻസ് തടഞ്ഞതിലൂടെ ഒരു യുവാവിന്‍റെ ജീവൻ നഷ്ടപ്പെട്ട സംഭവം ദൗർഭാഗ്യകരമെന്നും അദ്ദേഹം പറഞ്ഞു. ആംബുലൻസ് തടഞ്ഞു ആദിവാസി യുവാവ് മരിച്ച സംഭവത്തിൽ കുറ്റക്കാർക്കെതിരേ നടപടി സ്വീകരിക്കണമെന്നു സിപിഐ മണ്ഡലം സെക്രട്ടറി എം.എസ്. റഷീദ് ആവശ്യപ്പെട്ടു. ഇയാളെ യഥാസമയം മെഡിക്കൽ കോളജിൽ എത്തിച്ചിരുന്നെങ്കിൽ ജീവിതത്തിലേക്കു തിരിച്ചുകൊണ്ടുവരാൻ കഴിയുമായിരുന്നുവെന്നും ഇത്തരം സംഭവങ്ങൾ ആവർത്തിക്കാതിരിക്കാൻ നടപടി സ്വീകരിക്കണമെന്നും റഷീദ് ആവശ്യപ്പെട്ടു.

തരിശുഭൂമിയില്‍ പച്ചക്കറിത്തോട്ടം‍

മെഡിക്കല്‍കോളജ്: ചെറുവയ്ക്കല്‍ പേപ്പര്‍മില്‍ റോഡിനു സമീപം വര്‍ഷങ്ങളായി തരാശായികിടന്ന രണ്ടേക്കർ ഭൂമിയിൽ ഉള്ളൂര്‍ കൃഷിഭവന്‍ പച്ചക്കറിത്തോട്ടം ഒരുക്കുന്നു. ഇതിന്‍റെ ഉദ്ഘാടനം ജില്ലാ പ്രിന്‍സിപ്പല്‍ കൃഷി ഓഫീസര്‍ മേരി കെ. അലക്‌സ് നിര്‍വഹിച്ചു. ആക്കുളം വാര്‍ഡ് കൗണ്‍സിലര്‍ സുരേഷ്‌കുമാര്‍ അധ്യക്ഷത വഹിച്ചു. ഡെപ്യൂട്ടി കൃഷി ഡയറക്ടര്‍ ഷീന പദ്ധതിവിശദീകരണം നടത്തി. കേരള അഗ്രിക്കൾച്ചർ യൂണിവേഴ്‌സിറ്റിയില്‍നിന്നും കൃഷിവിജ്ഞാന വ്യാപന വിഭാഗം മേധാവിയായി വിരമിച്ച ഡോ. വി.ബി പത്മനാഭന്‍, ഫാം ജേണലിസ്റ്റ് സുരേഷ് മുതുകുളം എന്നിവര്‍ വിശിഷ്ടാതിഥികളായിരുന്നു. മുളക്, തക്കാളി, വെണ്ട, വഴുതന, കത്തിരി, പയര്‍, പടവലം, വെള്ളരി, ചീര, അഗത്തി ചീര, കറിവേപ്പില എന്നിവയാണ് ഇവിടെ ഒരുങ്ങുന്നത്. കൃഷി അസി. ഡയറക്ടര്‍ ആര്‍. റിയാസ് ആശംസകള്‍ അര്‍പ്പിച്ചു.

പഴകിയ ഭക്ഷണ സാധനങ്ങൾ പിടിച്ചെടുത്തു

നെടുമങ്ങാട്: പഴകുറ്റിക്ക് സമീപത്തെ കമ്മാളം റെസ്റ്റോറന്‍റിൽ നെടുമങ്ങാട് നഗരസഭ ആരോഗ്യ വിഭാഗം മിന്നൽ പരിശോധന നടത്തി. പരിശോധനയിൽ പഴകിയ ചിക്കൻ, ബീഫ്, തലേ ദിവസത്തെ അവിയൽ, തോരൻ, തുടങ്ങിയവ പിടിച്ചെടുത്തു. റെസ്റ്റോറന്‍റിലെ മാലിന്യം കിള്ളിയാറിലേക്ക് ഒഴുക്കി വിടുന്നതായും കണ്ടെത്തി. 24 മണിക്കൂറിനകം കട പൂട്ടുവാൻ ഉടമയ്ക്ക് നോട്ടീസ് നൽകി. 25,000 രൂപ പിഴയും ചുമത്തിയതായി ഉദ്യോഗസ്ഥർ പറഞ്ഞു. എച്ച്ഐ ബിന്ദു, പബ്ല്ളിക് ഹെൽത്ത് ഇൻസ്പെക്ടർമാരായ സബിത, മീര, ഷീന എന്നിവർ റെയ്ഡിൽ പങ്കെടുത്തു.

കർഷക കോൺഗ്രസ് പ്രതിഷേധിച്ചു

നെടുമങ്ങാട്: ആനാട് പഞ്ചായത്തിലെ ഹരിത കർമസേനയ്ക്ക് വീടുകളിൽനിന്നും ശേഖരിക്കുന്ന പ്ലാസ്റ്റിക് മാലിന്യങ്ങളും മറ്റു വസ്തുക്കളും കൊണ്ടുപോകാനായി നൽകിയ രണ്ടുവർഷം മാത്രം പഴക്കമുള്ള ലക്ഷങ്ങൾ വിലയുള്ള വാഹനം നശിക്കുന്നു. ബ്ലോക്ക് പഞ്ചായത്ത് 2022 - 23 ലെ വാർഷിക പദ്ധതിയിൽ ഉൾപ്പെടുത്തിയാണ് വാഹനം വാങ്ങിയത്. പഞ്ചായത്ത് ഭരണസമിതിക്കെതിരെ കർഷക കോൺഗ്രസ് ആനാട് മണ്ഡലം കമ്മിറ്റിയുടെ നേതൃത്വത്തിൽ വാഹനത്തിൽ റീത്ത് വച്ചും കരിങ്കൊടി കെട്ടിയും പ്രതിക്ഷേധിച്ചു. കർഷക കോൺഗ്രസ് മണ്ഡലം പ്രസിഡന്‍റ് ആനാട് ജോയിയുടെ അധ്യക്ഷതയിൽ പഞ്ചായത്ത് മുൻ പ്രസിഡന്‍റ് ആനാട് സുരേഷ് പ്രതിഷേധ സമരം ഉദ്ഘാടനം ചെയ്തു. മണ്ഡലം പ്രസിഡന്‍റുമാരായ ഹുമയൂൺകബീർ, വേട്ടം പ്പള്ളി സനൽ, യുഡിഎഫ് ചെയർമാൻ അജയകുമാർ, ആനാട് ഗോപകുമാർ, വേങ്കവിള സുരേഷ്, എം. എൻ. ഗിരി, വാമനാപുരം നിയോജക മണ്ഡലം പ്രസിഡന്‍റ് ജോയി, മുരളീധരൻ നായർ, മഹിളാ കോൺഗ്രസ് മണ്ഡലം പ്രസിഡന്‍റ് അഖില, യൂത്ത് കോൺഗ്രസ് മണ്ഡലം പ്രസിഡന്‍റ് ആനന്ദ് ആർ. നായർ എന്നിവർ പ്രസംഗിച്ചു.

വെള്ളനാട് പഞ്ചായത്തിൽ കാട്ടുപന്നികളുടെ ശല്യം രൂക്ഷം

നെടുമങ്ങാട്: വെള്ളനാട് പഞ്ചായത്തിലെ കുളക്കോട്, ആറ്റുകാൽ, വെളിയന്നൂർ, ചാങ്ങ, കിടങ്ങുമ്മൽ, കണ്ണമ്പള്ളി, ആശാരിമൂല, വെള്ളൂർക്കോണം തുടങ്ങിയ ഗ്രാമീണമേഖലകളിൽ കാട്ടുപന്നികളുടെ ശല്യം രൂക്ഷമായി. പന്നികളുടെ ആക്രമണം ഭയന്നു നാട്ടുകാർക്കു വീടിനു പുറത്തിറങ്ങാൻ പോലും പറ്റാത്ത സ്ഥിതിയാണ് പലയിടത്തും. പകൽ സമയത്തു പോലും പന്നികൾ കൂട്ടമായി റോഡിലിറങ്ങുകയാണ്. വെളിയന്നൂർ സ്വദേശികളായ പ്ലാവിള തടത്തരികത്ത് വീട്ടിൽ സോമൻ (58), ഇദ്ദേഹത്തിന്‍റെ സമീപവാസിയായ പ്ലാവിള സായൂജ്യത്തിൽ പ്രസന്നൻ (47) എന്നിവരെ ഈയിടെ കാട്ടുപന്നികൾ ഗുരുതരമായി ആക്രമിച്ചിരുന്നു. പന്നികളുടെ ശല്യം രൂക്ഷമായ പ്രദേശങ്ങളിലെ കുട്ടികൾക്ക് ഒറ്റയ്ക്ക് സ്‌കൂളിൽ പോകാൻപോലും ഭയമായി തീർന്നിരിക്കുകയാണ്. കൂട്ടത്തോടെ കൃഷിയിടങ്ങളിലിറങ്ങുന്ന പന്നികൾ വ്യാപകമായി കാർഷിക വിളകൾ നശിപ്പിക്കുന്നതും പതിവ്. ആഴ്ചകൾക്കുമുമ്പ് ആശാരിമൂല, വെള്ളൂർക്കോണം പ്രദേശങ്ങളിലെ കർഷകരുടെ രണ്ടരയേക്കറോളം വരുന്ന വാഴ, മരച്ചീനി, ചേമ്പ്, ചേന, തെങ്ങിൻ തൈകൾ തുടങ്ങിയ കൃഷികൾ വ്യാപകമായി നശിപ്പിച്ചിരുന്നു. പന്നികളുടെ ശല്യം കാരണം കൃഷി ഉപേക്ഷിക്കേണ്ട അവസ്ഥയിലാണ് കർഷകർ. കാടുപിടിച്ചു കിടക്കുന്ന പറമ്പുകളിലും ചതുപ്പുകളിലും കുന്നിൻചരിവുകളിലും താവളമുറപ്പിച്ചിരിക്കുന്ന കാട്ടുപന്നികൾ നാട്ടുകാർക്കും ഭീഷണിയായി തീർന്നിട്ട് കാലമേറെയായി. നാട്ടുകാർ വനംവകുപ്പ് അധികൃതരോടു പരാതി പറയുമ്പോൾ പഞ്ചായത്ത് അധികൃതർക്കു പരാതി നൽകാനാണു നിർദേശിക്കുന്നത്.

ഇവിഎം മെഷീനിൽ കുരുന്നുകളുടെ വോട്ടിടൽ

വിഴിഞ്ഞം: ഗവ. ഹാർബർ ഏരിയ അപ്പർ പ്രൈമറി സ്കൂൾ മൊബൈൽ ഇലക്ട്രോണിക് വോട്ടിംഗ് മെഷീനുകൾ (ഇവിഎം) ഉപയോഗിച്ച് സ്കൂൾ പാർലമെന്‍റ് തെരഞ്ഞെടുപ്പു നടത്തി. രാജ്യത്തെ യഥാർഥ പോളിംഗ് നടപടിക്രമങ്ങൾ കുട്ടികൾക്ക് പകർന്നു നൽകുന്നതിനായി, എല്ലാ തെരഞ്ഞെടുപ്പു നടപടി ക്രമങ്ങളും അനുകരിച്ചാണ് ഇലക്‌ഷൻ നടത്തിയത്. തെരഞ്ഞെടുപ്പ് പ്രഖ്യാപനം, നോമിനേഷൻ സമർപ്പണം, ഇലക്‌ഷൻ പ്രചാരണം, കൊട്ടിക്കലാശം, തെരഞ്ഞെടുപ്പ് ഓഫീസർമാർ, ഫലപ്രഖ്യാപനം, സുരക്ഷാ ഉദ്യോഗസ്ഥർ, പോളിംങ് സ്റ്റേഷനുകൾ, പോസ്റ്റൽ ബാലറ്റുകൾ തുടങ്ങി എല്ലാ പ്രവർത്തനങ്ങളും കുട്ടികളുടെ നേതൃത്വത്തിലാണ് നടന്നത്. വിദ്യാർഥികൾ അവരുടെ തിരിച്ചറിയൽ കാർഡ് കാണിക്കുകയും, വോട്ട് രേഖപ്പെടുത്താൻ അവരുടെ വിരലുകളിൽ മഷി പുരട്ടുകയും ചെയ്തു. സ്കൂൾ ലീഡർ, അസിസ്റ്റന്‍റ് ലീഡർ, വിവിധ ക്ലബുകളുടെ കൺവീനർ, സ്പോർട്സ് ക്യാപ്റ്റൻ, ഫൈനാൻസ് കൺവീനർ തുടങ്ങിയ സ്ഥാനങ്ങളിലേക്ക് മത്സരിച്ചവരാണ് ഇലക്ഷനിലൂടെ തെരഞ്ഞെടുക്കപ്പെട്ടത്.

ചെറുപുഷ്പ മിഷന്‍ ലീഗ് പ്രവര്‍ത്തന വര്‍ഷ ഉദ്ഘാടനം

തിരുവനന്തപുരം: തിരുവനന്തപുരം ഫൊറോന ചെറുപുഷ്പ മിഷന്‍ ലീഗിന്‍റെ 2025-26 പ്രവര്‍ത്തന വര്‍ഷ ഉദ്ഘാടനവും ദിവ്യകാരുണ്യം സ്വീകരിച്ച കുട്ടികളുടെ ഫൊറോനതല സംഗമമായ "ഏയ്ഞ്ചല്‍സ് മീറ്റ്' ഉദ്ഘാടനവും ലൂര്‍ദ് ഫൊറോന വികാരി റവ. ഡോ. ജോണ്‍ തെക്കേക്കര നിര്‍വഹിച്ചു. മിഷന്‍ ലീഗ് ഫൊറോന ഡയറക്ടര്‍ ഫാ.ബിജോ അരഞ്ഞാണിയില്‍, ഫൊറോന ജോയിന്‍റ് ഡയറക്ടര്‍ സി. ഡോണാ ജോസഫ്, ഓര്‍ഗനൈസിംഗ് ജോയിന്‍റ് സെക്രട്ടറി ജോണ്‍സണ്‍, ഫൊറോന ആനിമേറ്റര്‍ അഡ്വ. ജോണ്‍സണ്‍ കെ. ജയിംസ്, ഫൊറോന പ്രസിഡന്‍റ് അന്നാ മരിയ തുടങ്ങിയവര്‍ പങ്കെടുത്തു. ഫൊറോന ഓര്‍ഗനൈസിംഗ് പ്രസിഡന്‍റ് ജോ മാത്യു പാണനാല്‍ നന്ദി പറഞ്ഞു.

കര്‍മല മാതാമല തിരുനാള്‍ സമാപിച്ചു

വെള്ളറട: കര്‍മ്മല മാതാമല തിരുനാള്‍ സമാപിച്ചു. പരിശുദ്ധ മറിയം സമാധാനത്തിന്‍റെ രാഞ്ജി എന്നതായിരുന്നു തിരുനാള്‍ സന്ദേശം. തെക്കന്‍ കുരിശുമല സംഗമ വേദിയില്‍ നിന്നും മാതാ മലയിലേയ്ക്കു നടന്ന ജപമാല പദയാത്രയില്‍ നൂറു കണക്കിനു പേര്‍ പങ്കെടുത്തു. മാതാ സന്നിധിയില്‍ ജപമാല, ലിറ്റിനി, നൊവേന, മരിയന്‍ പ്രഭാഷണം എന്നിവയും നടന്നു. ആഘോഷമായ തിരുനാള്‍ ദിവ്യബലിക്ക് ആനപ്പാറ ഇടവക സഹവികാരി ഫാ. അരുണ്‍ പി. ജിത്ത് മുഖ്യകാര്‍മികത്വം വഹിച്ചു. തുടര്‍ന്നു പരിശുദ്ധ കര്‍മലമാതാവിനോടുള്ള വണക്ക പ്രാര്‍ഥനയും സമാപനാ ആശീര്‍വാദവും നടന്നു. തെക്കന്‍ കുരിശുമല സംഗമവേദിയില്‍ നടന്ന സ്‌നേഹവിരുന്നില്‍ നിരവധി പേര്‍ പങ്കെടുത്തു. തീര്‍ഥാടന കമ്മിറ്റി ശുശ്രൂഷകള്‍ക്ക് നേതൃത്വം നല്‍കി.

വിദ്യാർഥി ഷോക്കേറ്റു മരിച്ചതിന്‍റെ ദുഃഖം മാറുംമുന്പെ പാറശാല ഗവ. ജിഎച്ച്എസ്എസിൽ ജയോത്സവം നടത്താനുള്ള നീക്കം തടഞ്ഞു

പാറശാല: പാറശാല ഗവണ്‍മെന്‍റ് ഗേള്‍സ് ഹയര്‍ സെക്കൻഡറി സ്‌കൂളിലെ പിടിഎയുടെ നേതൃത്വത്തില്‍ ഇന്നലെ "ജയോത്സവം 2025' എന്ന പേരില്‍ ഒരു പരിപാടി നടത്താന്‍ തീരുമാനിച്ചിരുന്നത് കോൺഗ്രസ് പ്രതിഷേധത്തെ തുടർന്നു മുടങ്ങി. ജില്ലാ പഞ്ചായത്ത് അംഗം വി.ആര്‍. സലൂജ, ഹരിത വി. കുമാര്‍, മുരുകന്‍ കട്ടാക്കട തുടങ്ങിയ പ്രമുഖരെ പങ്കെടുപ്പിച്ച് നടത്താനിരുന്ന പരിപാടി, മിഥുന്‍റെ സംസ്‌കാര ചടങ്ങുകള്‍ കഴിയുന്നതുവരെയെങ്കിലും മാറ്റിവെക്കണമെന്നാവശ്യപ്പെട്ടു പാറശാല പഞ്ചായത്ത് കോണ്‍ഗ്രസ് മെമ്പര്‍മാര്‍ സ്‌കൂളിനു മുന്നില്‍ കരിങ്കൊടിയുമായി കുത്തിയിരുന്നു പ്രതിഷേധിക്കുകയായിരുന്നു. ദുഃഖാചരണത്തിന്‍റെ വേളയില്‍ പരിപാടി മാറ്റിവെക്കാന്‍ തയാറാവാതെ, "എന്തുവന്നാലും പരിപാടി നടത്തും' എന്ന പിടിവാശി കാണിച്ച പിടിഎയുടെ ധാര്‍ഷ്ട്യത്തിനുള്ള മറുപടിയാണ് കോണ്‍ഗ്രസ് മെമ്പര്‍മാരുടെ പ്രതിഷേധമെന്ന് അറിയിച്ചു. രാവിലെ മുതല്‍ ഓഫീസ് റൂമില്‍ കുത്തിയിരുന്ന്, ഉച്ചയ്ക്ക് രണ്ടുവരെയാണു അംഗങ്ങൾ പ്രതിഷേധിച്ചത്. ഇതേ തുടര്‍ന്ന് ജയോത്സവം സംഘടിപ്പിന്‍ കഴിഞ്ഞില്ല. പരിപാടികൾ സംഘടിപ്പിക്കാൻ സാധിക്കാതെ പിടിഎ പിൻവാങ്ങിയപ്പോൾ 3:30 ഓടെ സമരം അവസാനിപ്പിച്ച് മെമ്പര്‍മാര്‍ മടങ്ങിപ്പോയി. പാറശാല പഞ്ചായത്ത് പ്രതിപക്ഷ നേതാവ് ലെല്‍വിന്‍ ജോയ്, കോണ്‍ഗ്രസ് മെമ്പര്‍മാരായ വിനയനാഥ് മെമ്പര്‍, താര, നിര്‍മല കുമാരി എന്നിവര്‍ നേതൃത്വം നൽ കി. നാട്ടുകാരും, രക്ഷിതാക്കളും സമരക്കാർക്കു നന്ദി അറിയിച്ചു. മനുഷ്യത്വത്തിന്‍റെയും പൊ തുവികാരത്തിന്‍റെയും വിജയമാണ് സമരത്തിന്‍റെ വിജയത്തി നു പിന്നിലെന്നു പ്രതിഷേധിച്ച നേതാക്കളും വ്യക്തമാക്കി.

വാർഷിക സ്പോർട്സ് മീറ്റ് സംഘടിപ്പിച്ചു

മാറനല്ലൂർ: ക്രൈസ്റ്റ് നഗർ പബ്ലിക് സീനിയർ സെക്കണ്ടറി സ്കൂളിലെ വാർഷിക സ്പോർട്സ് മീറ്റ് 2025-26 അന്താരാഷ്ട്ര ഖോ ഖോ പ്ലേയർ എസ്. ശ്രീജേഷ് ഉദ്ഘാടനം ചെയ്തു. സ്കൂൾ മാനേജർ ഫാ. സിറിയക്ക് മഠത്തിൽ സിഎം ഐ സ്കൂൾ പതാക ഉയർത്തുകയും അധ്യക്ഷത വഹിക്കുകയും ചെയ്തു. സ്പോർട്സ് കൗൺസിലർ മാസ്റ്റർ എം.ആർ. ആരോമൽ, സത്യപ്രതിജ്ഞ ചൊല്ലി ക്കൊടുത്തു. സ്കൂൾ പ്രിൻസിപ്പൽ ഫാ. ചാക്കോ പുതുകുളം സിഎംഐ അതിഥിക്കു സ്നേഹോപഹാരം സമ്മാനിച്ചു. പിടിഎ പ്രസിഡന്‍റ് പ്രേംജിത്ത് പ്രസംഗിച്ചു. വിവിധ മത്സരങ്ങളിലെ വിജയികൾക്ക് സമ്മാനദാനവും നിർവഹിച്ചു.

സമ്മോഹനം മാനവിക- സൗഹൃദ കൂട്ടായ്മ സംഘടിപ്പിച്ചു

തിരുവനന്തപുരം: മുഖ്യമന്ത്രി എന്ന നിലയിൽ ജനക്ഷേമ പ്രവർത്തനങ്ങളിലൂടെ ജനപ്രിയനായി മാറിയ ഉമ്മൻ ചാണ്ടിയെ സ്വഭാവഹത്യ ചെയ്തു രാഷ്ട്രീയമായി വേട്ടയാടിയതിനു കാലം നൽകിയ കനത്ത ശിക്ഷയാണ് പിണറായി സർക്കാർ ഇപ്പോൾ അനുഭവിച്ചു കൊണ്ടിരിക്കുന്നതെന്ന് കോണ്‍ഗ്രസ് നേതാവ് എം.എം. ഹസൻ. നീതിമാനായ ഉമ്മൻചാണ്ടിയെ അനീതിയും അധർമവും നടത്തി അപമാനിച്ചവർക്കുള്ള കടുത്ത മറുപടിയായിരുന്നു തിരുവനന്തപുരം മുതൽ പുതുപ്പള്ളി വരെ ജനലക്ഷങ്ങൾ അദ്ദേഹത്തിനു നൽകിയ അന്ത്യയാത്രയെന്നും ഹസൻ അനുസ്മരിച്ചു. ഉമ്മൻചാണ്ടിയുടെ രണ്ടാം ചരമവാർഷികത്തോടനുബന്ധിച്ചു സമ്മോഹനം മാനവിക- സൗഹൃദ കൂട്ടായ്മ തിരുവനന്തപുരം പ്രസ് ക്ലബ് ഹാളിൽ സംഘടിപ്പിച്ച അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സമ്മോഹനം ചെയർമാൻ വിതുര ശശിയുടെ അധ്യക്ഷതയിൽ നടന്ന സമ്മേളനത്തിൽ ജനറൽ കണ്‍വീനർ പിരപ്പൻകോട് സുഭാഷ്, മുൻ സ്പീക്കർ എൻ. ശക്തൻ, മുൻമന്ത്രി വി.എസ്. ശിവകുമാർ, കെപിസിസി ജനറൽ സെക്രട്ടറി ജി.എസ്. ബാബു, കന്പറ നാരായണൻ, എസ്. മനോഹരൻനായർ, ജെ.എസ്. അഖിൽ, സി.കെ. വത്സലകുമാർ, അണിയൂർ എം. പ്രസന്നകുമാർ തുടങ്ങിയവർ പ്രസംഗിച്ചു.

ആനി മസ്ക്രീൻ ചരമവാർഷികം ആചരിച്ച് കെഎൽസിഎ

തിരുവനന്തപുരം: ആനി മസ്ക്രീനെ പോലുള്ള നിരവധി വനിതകൾ വളർന്നു വരേണ്ടത് ഇന്നത്തെ കാലഘട്ടത്തിന്‍റെ ആവശ്യമാണെന്നു തിരുവനന്തപുരം ലത്തീൻ അതിരൂപത സഹായമെത്രാൻ ഡോ. ആർ. ക്രിസ്തുദാസ്. കെഎൽസിഎ സംഘടിപ്പിച്ച ആനി മസ്ക്രീന്‍റെ 62-ാമത് ചരമവാർഷിക പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരളത്തിലെ ആദ്യ വനിതാമന്ത്രിയും സ്വാതന്ത്ര്യസമര സേനാനിയും തിരുവനന്തപുരത്തുനിന്നുള്ള ലോകസഭാംഗവും, ഭരണഘടനയുടെ കരട് രേഖയിൽ ഒപ്പുവച്ച വനിത കൂടിയായ ആനി മസ്ക്രീന്‍റെ ചരിത്രം ഇന്നത്തെ തലമുറ മറക്കുകയാണെന്ന് അദ്ദേഹം പറഞ്ഞു. പാട്രിക് മൈക്കൾ അധ്യക്ഷത വഹിച്ചു. കേരള തയ്യൽ തൊഴിലാളി ക്ഷേമനിധി ബോർഡ് ചെയർപേഴ്സണ്‍ എലിസബത്ത് അസീസി, ഫാ. ബീഡ് മനോജ് അമാദോ, സുരേഷ് സേവ്യർ, ഫാ. സെബാസ്റ്റ്യൻ, ആന്‍റണി ഗ്രേഷ്യസ്, ജോർജ് എസ്. പള്ളിത്തറ, ടി.എസ്. ജോയി, മേരിപുഷ്പം, ഡോളി ഫ്രാൻസിസ്, യേശുരാജ് തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]