ADVERTISEMENT

ADVERTISEMENT

ഇന്‍റർ ഹയർ സെക്കൻഡറി ക്വിസ്: ശ്രീകണ്ഠപുരം ഗവ. ഹയർ സെക്കൻഡറി ജേതാക്കൾ

പയ്യാവൂർ: പൈസക്കരി ദേവമാതാ ആർട്സ് ആൻഡ് സയൻസ് കോളജ് കൊമേഴ്സ് വിഭാഗം ഹയർസെക്കൻഡറി സ്കൂൾ വിദ്യാർഥികൾക്കായി സംഘടിപ്പിച്ച ബിസിനസ് ക്വിസ് മത്സരത്തിൽ ശ്രീകണ്ഠപുരം ഗവ. ഹയർ സെക്കൻഡറി സ്കൂൾ ജേതാക്കൾ. ചെന്പേരി നിർമല, പൈസക്കരി ദേവമാതാ സ്കൂളുകൾ യഥാക്രമം രണ്ടും മൂന്നും സ്ഥാനം നേടി. ജില്ലയിലെ വിവിധ സ്കൂളുകളിൽ നിന്നായി പതിനൊന്ന് ടീമുകൾ മത്സരിച്ചു.

കോളജ് സെമിനാർ ഹാളിൽ നടന്ന മത്സരം പ്രിൻസിപ്പൽ ഡോ. എം.ജെ. മാത്യു ഉദ്ഘാടനം ചെയ്തു. അധ്യാപകരായ സിബിച്ചൻ തോമസ്, സൗമ്യ മാനുവൽ, മോനിഷ മോഹൻദാസ്, വിദ്യാർഥിനി നിജ ഫാത്തിമ എന്നിവർ നേതൃത്വം നൽകി. സമാപന സമ്മേളനത്തിൽ കോളജ് മാനേജർ ഫാ. നോബിൾ ഓണംകുളം വിജയികൾക്ക് കാഷ് അവാർഡും സർട്ടിഫിക്കറ്റുകളും സമ്മാനിച്ചു. കൊമേഴ്സ് വിഭാഗം മേധാവി പി.എസ്. ഷൈജോ, കോ-ഓർഡിനേറ്റർ മനു ജോസഫ് എന്നിവർ പ്രസംഗിച്ചു.

ADVERTISEMENT

എസ്എഫ്ഐ ഹെഡ് പോസ്റ്റ് ഓഫീസ് മാർച്ചിൽ ഉന്തും തള്ളും

കണ്ണൂർ: കേരളത്തിലെ ഉന്നത വിദ്യാഭ്യാസ സ്ഥാപനങ്ങളെ കാവിവത്കരിക്കാനുള്ള ഗവർണറുടെ നടപടികൾ അവസാനിപ്പിക്കുക എന്നാവശ്യപ്പെട്ട് എസ്എഫ്ഐ കണ്ണൂർ ഹെഡ് പോസ്റ്റ് ഓഫീസിലേക്ക് നടത്തിയ മാർച്ചിൽ പോലീസും സമരക്കാരും തമ്മിൽ സംഘർഷം. മാർച്ച് പോലീസ് ഹെഡ് പോസ്റ്റ് ഓഫീസ് ഗേറ്റ് അടച്ച് തടഞ്ഞെങ്കിലും സമരക്കാർ പോലീസിനെ മറികടന്ന് ഓഫീസിലേക്ക് കടക്കാൻ ശ്രമിച്ചതാണ് ഉന്തിലും തള്ളിലും കലാശിച്ചത്. പോലീസ് വലയം ഭേദിച്ച് സമരക്കാർ ഹെഡ് പോസ്റ്റ് ഓഫീസ് വളപ്പിലേക്ക് കടന്നെങ്കിലും നേതാക്കളുൾപ്പടെയുള്ളവർ സമരക്കാരെ പിന്തിരിപ്പിച്ചു. തുടർന്ന് എസ്എഫ്ഐ സംസ്ഥാന സെക്രട്ടേറിയറ്റംഗം ടി.പി. അഖില ഉദ്ഘാടനം ചെയ്തു. കേരളത്തിലെ സർവകലാശാലകളെ കാവിവത്കരിക്കാനായി ആർഎസ്എസും ബിജെപിയും ഗവർണറെയും വൈസ് ചാൻസലർമാരെയും ഉപയോഗപ്പെടുത്തുകയാണ്. ഇതിനെ എസ്എഫ്ഐ പ്രതിരോധിക്കുമെന്ന് ടി.പി. അഖില പറഞ്ഞു.

അന്നം അഭിമാനം പദ്ധതിയിലേക്ക് ഒരു ദിവസത്തെ ഭക്ഷണം കൈമാറി

ഇരിട്ടി: ഇരിട്ടി പോലീസും ജെസിഐ ഇരിട്ടിയും സംയുക്തമായി നടത്തിവരുന്ന "വിശപ്പുരഹിത ഇരിട്ടി- അന്നം അഭിമാനം' പദ്ധതിക്ക് ഒരു ദിവസത്തെ ഭക്ഷണം കൈമാറി. ഷീല ഏബ്രഹാമിന്‍റെ രണ്ടാം ചരമ വാർഷികംദിനത്തിൽ മകൻ ജെയിൻ ഏബ്രഹാം ഇരിട്ടി എസ്ഐ കെ. ഷറഫുദ്ദീൻ, അനോജ് ജോയ് എന്നിവർക്ക് ഭക്ഷണം കൈമാറി. രണ്ടുവർഷമായി ഇരിട്ടിയിൽ പ്രവർത്തിച്ചുവരുന്ന അന്നം അഭിമാനം പദ്ധതി ഇരിട്ടിക്ക് അഭിമാനമായി മാറുകയാണ്. ദിനം പ്രതി 15 ഓളം പേർക്കാണു മുടങ്ങാതെ ഭക്ഷണം നൽകി വരുന്നത്. പദ്ധതി കമ്മിറ്റി അംഗങ്ങളായ കെ. സുരേഷ് ബാബു, ഡോ. ജി. ശിവരാമകൃഷ്ണൻ, കെയർ ടേക്കർ സജീഷ് പുത്തൻപുരയിൽ എന്നിവർ പങ്കെടുത്തു.

കുരുക്കഴിഞ്ഞില്ല, കൂടുതൽ കുടുക്കിലായി

കണ്ണൂർ: ഗതാഗതക്കുരുക്കഴിക്കാൻ തെക്കിബസാർ-കക്കാട് ജംഗ്ഷൻ വൺവേയാക്കിയെങ്കിലും കുരുക്കഴിക്കാൻ സാധിച്ചില്ല. പതിവിലും കൂടുതൽ ബ്ലോക്കാണ് ഇന്നലെ അനുഭവപ്പെട്ടത്. പരീക്ഷണാടിസ്ഥാനത്തിലുള്ള ഗതാഗതക്രമീകരണം ചൊവ്വാഴ്ച മുതലാണ് നടപ്പിലാക്കിയത്. എന്നാൽ, സ്വകാര്യബസുകളുടെ പണിമുടക്ക് കാരണം അന്ന് വലിയ തിരക്കുണ്ടായിരുന്നില്ല. ഇന്നലെ ബസുകളും കൂടി നിരത്തിലിറങ്ങിയതോടെ വലിയ ഗതാഗതക്കുരുക്കാണ് അനുഭവപ്പെട്ടത്. കണ്ണൂർ ഭാഗത്ത് നിന്ന് കക്കാട് ഭാഗത്തേക്ക് പോകുന്ന വാഹനങ്ങൾക്ക് നിലവിലെ ജംഗ്ഷനിൽ നിന്ന് നേരിട്ട് കക്കാട് റോഡിലേക്കുള്ള പ്രവേശനം തടഞ്ഞിരുന്നു. ഇതിനു പകരം നിലവിലെ ജംഗ്ഷനിൽ നിന്ന് നൂറുമീറ്റർ മുന്നോട്ടു പോയി വലതുഭാഗത്ത് തിരിഞ്ഞ് കക്കാടേക്ക് പോകുന്ന റോഡിലൂടെ കടന്നു പോകണം. ഇവിടെ, ബസുകൾ ഉൾപ്പെടെയുള്ള വാഹനങ്ങൾ തിരിയുന്പോൾ വലിയ കുരുക്കാണ് അനുഭവപ്പെടുന്നത്. പുതിയതെരു ഭാഗത്ത് നിന്ന് കക്കാടേക്ക് പോകേണ്ട വാഹനങ്ങളും ഇതു വഴിയാണ് കടന്നു പോകേണ്ടത്. കക്കാട് ഭാഗത്ത് നിന്ന് കണ്ണൂരിലേക്ക് വരുന്ന വാഹനങ്ങളെ നിലവിലെ റോഡിലൂടെ തന്നെയാണ് കടത്തിവിടുന്നത്. കക്കാട് നിന്ന് തളിപ്പറന്പ് ഭാഗത്തേക്ക് പോകേണ്ട വാഹനങ്ങളെ ജംഗ്ഷനിൽ നിന്ന് യുടേൺ എടുത്ത് തളിപ്പറന്പ് ഭാഗത്തേക്ക് കടത്തി വിടില്ല. വാഹനങ്ങൾ നേരെ ഗാന്ധി സർക്കിൾ ചുറ്റി ദേശീയപാതയിലൂടെ തന്നെയോ കടന്നുപോകണം. പരീക്ഷണാടിസ്ഥാനത്തിൽ നടപ്പാക്കുന്ന ക്രമീകരണം വിലയിരുത്തിയ ശേഷമായിരിക്കും സ്ഥിരം നടപടികളിലേക്ക് കടക്കുകയെന്ന് ട്രാഫിക് പോലീസ് അറിയിച്ചു.

കാടുകയറുന്ന കായിക സ്വപ്നം

മഞ്ഞളാംപുറം: കേളകം പഞ്ചായത്തിലെ മഞ്ഞളാംപുറത്ത് നിര്‍മിച്ച മള്‍ട്ടി പര്‍പ്പസ് സിന്തറ്റിക്ക് സ്റ്റേഡിയത്തോട് അവഗണ. 30 ലക്ഷം രൂപ ചെലവില്‍ നിര്‍മിച്ച സിന്തറ്റിക്ക് സ്‌റ്റേഡിയം ആരും തിരിഞ്ഞ് നോക്കാന്‍ ഇല്ലാതെ വന്നതോടെ എതാണ്ട് പൂര്‍ണമായി നശിച്ചു. മലയോരത്തെ കായിക പ്രതിഭകള്‍ക്ക് ഉപകാരപ്രദമാകേണ്ട സ്‌റ്റേഡിയമാണ് നശിച്ചത്. സ്‌റ്റേഡിയം നവീകരിക്കുന്നതിന് യാതൊരു നടപടിയും ഉണ്ടാകുന്നില്ല. ഇപ്പോള്‍ സ്റ്റേഡിയത്തിന്‍റെ സ്ഥിതി പരിതാപകരമാണ്. സ്‌റ്റേഡിയം പൂര്‍ണമായും കാട് കയറിയ നിലയിലാണ്. സ്റ്റേഡിയത്തിന് ചുറ്റം ഉണ്ടായിരുന്ന വേലികള്‍ പൂര്‍ണമായി തകര്‍ന്നു. വേലിയുടെ തൂണുകള്‍ മാത്രമാണ് ബാക്കിയുളളത്. തൂണുകളും തുരുമ്പെടുത്തു. കൃത്യമായ പരിപാലം നടത്താതെ വന്നതോടെ സ്റ്റേഡിയത്തിലെ സിന്തറ്റിക്ക് പ്രതലം പൂര്‍ണമായി നശിച്ചു. ബാസ്‌ക്കറ്റ് ബോള്‍ പോളും തുരുമ്പെടുത്തു. രാത്രിയില്‍ മത്സരങ്ങളും പരിശീലനവും നടത്തുന്നതിനായി ചുറ്റം ലൈറ്റുകള്‍ സ്ഥാപിച്ചിരുന്നു. ഇതും നശിക്കുകയാണ്. കേന്ദ്രസര്‍ക്കാര്‍ അനുവദിച്ച ഫണ്ട് ഉപയോഗിച്ച് സംസ്ഥാന കായിക വകുപ്പാണ് സ്റ്റേഡിയം നിര്‍മിച്ചത്. 2015ല്‍ ഉമ്മന്‍ ചാണ്ടി സര്‍ക്കാരിന്‍റെ കാലത്ത് അന്നത്തെ കായിക മന്ത്രി തിരുവഞ്ചൂര്‍ രാധാകൃഷ്ണനാണ് സ്റ്റേഡിയം ഉദ്ഘാടനം ചെയ്തത്. എന്നാല്‍, പിന്നീട് വേണ്ട രീതിയില്‍ ഉപയോഗിക്കുകയോ പരിപാലിക്കുകയോ ചെയ്തില്ല. അതോടെ സ്‌റ്റേഡിയം നശിക്കുകയായിരുന്നു. ഫണ്ട് ഇല്ലാത്തതുകൊണ്ടാണ് സ്റ്റേഡിയം നവീകരിക്കാന്‍ സാധിക്കാത്തത് എന്ന് പഞ്ചായത്തംഗം ജോണി പാമ്പാടി പറഞ്ഞു. മള്‍ട്ടി പര്‍പ്പസ് സിന്തറ്റിക്ക് സ്റ്റേഡിയം വേണ്ട രീതിയില്‍ നവീകരിച്ചാല്‍ കുട്ടികള്‍ക്കും കായികതാരങ്ങള്‍ക്ക് പരിശീലനം നടത്താനും മത്സരങ്ങള്‍ സംഘടിപ്പിക്കാനും സാധിക്കും. എന്നാല്‍, കായിക വകുപ്പ് പോലും സ്റ്റേഡിയത്തെ മറന്ന നിലയിലാണ്.

ന്യായമായ നഷ്ടപരിഹാരം ഇല്ലെങ്കിൽ പ്രക്ഷോഭം ശക്തമാക്കാൻ കർഷകരും ഭൂവുടമകളും

ഇരിട്ടി: നിർദിഷ്ട 400 കെവി ലൈൻ നഷ്ടപരിഹാര പാക്കേജുമായി ബന്ധപ്പെട്ട് സമരസമിതിയുടെ ആവശ്യങ്ങൾ പരിഗണിക്കാതെ ഏകപഷീയമായ പാക്കേജ് പ്രഖ്യാപനത്തിന് എതിരെ ഭൂമി നഷ്ടപ്പടുന്ന കർഷകർ ശക്തമായ പ്രക്ഷോഭത്തിലേക്ക്. അയ്യൻകുന്ന് പഞ്ചായത്തിൽ ചേർന്ന കർഷകരും ഭൂവുടമകളും സമരപരിപാടികൾ ആസൂത്രണം ചെയ്യുന്നതിനായി യോഗം ചേർന്നു. വൈദ്യുത മന്ത്രി പ്രഖ്യാപിച്ചിരിക്കുന്ന നഷ്ടപരിഹാര പാക്കേജ് അംഗീകരിക്കില്ലെന്നും ന്യായമായ വില ലഭിക്കുന്നതുവരെ സമരവുമായി മുന്നോട്ടുപോകുമെന്നും യോഗം ഏകകണ്ഠമായി പ്രഖ്യാപിച്ചു. പഞ്ചായത്ത് പ്രസിഡന്‍റ് കുര്യാച്ചൻ പൈന്പള്ളിക്കുന്നേൽ അധ്യക്ഷത വഹിച്ചു. പഞ്ചായത്ത്തലത്തിൽ യോഗം വിളിച്ചു ചേർക്കാനും ഭൂമി നഷ്ടപ്പെടുന്ന മുഴുവൻ പേരെയും അണിനിരത്തി ജില്ലാ ആസ്ഥാനത്തേക്ക് ബഹുജന സമരപരിപാടികൾ സംഘടിപ്പിക്കാൻ തീരുമാനിച്ചു. ന്യയമായ വില ലഭിക്കാതെ ഭൂമിയിൽ പ്രവേശിക്കാൻ അധികൃതരെ അനുവദിക്കില്ലെന്ന് യോഗം മുന്നറിയിപ്പ് നൽകി. ‌വില നിർണയത്തിലെ അപാകതകൾ ചൂണ്ടിക്കാണിച്ച യോഗം നാലും അഞ്ചും കോടി രൂപ ലഭിക്കേണ്ട ഭൂമിക്ക് നിസാര നഷ്ടപരിഹാരമാണ് നിലവിൽ സർക്കാർ പ്രഖ്യാപിച്ചിരിക്കുന്നതെന്ന് ചൂണ്ടിക്കാട്ടി. പ്രധാന റോഡുകൾ, പഞ്ചായത്ത് റോഡുകൾ എന്നിവ കണക്കാക്കി സ്ഥലത്തിന് പ്രത്യേക നഷ്ടപരിഹാരം നൽകണമെന്നും യോഗം ആവശ്യപ്പെട്ടു. ലൈൻ കടന്നുപോകുന്നതിന് താഴെ വരുന്ന വീടുകൾക്ക് ചതുരശ്ര അടിക്ക് 2500 രൂപ നഷടപരിഹാരം എന്ന ആവശ്യം വീണ്ടും സർക്കാരിൽ ഉന്നയിക്കും. ഇന്നലത്തെ യോഗതീരുമാനങ്ങൾ ഉൾക്കൊള്ളിച്ചുകൊണ്ടുള്ള ജനകീയ പരാതി മന്ത്രിക്കും കളക്ടർക്കും വൈദ്യുതി ബോർഡിനും കൈമാറും. യോഗത്തിൽ ആക്‌ഷൻ കമ്മിറ്റി ചെയർമാൻ തോമസ് വർഗീസ്, പഞ്ചായത്തംഗങ്ങളായ ലിസി തോമസ്, മിനി വിശ്വനാഥൻ, സിബി വാഴക്കാലയിൽ, ആക്‌ഷൻ കമ്മിറ്റി കൺവീനർ ബെന്നി പുതിയാമ്പുറം എന്നിവർ പ്രസംഗിച്ചു.

ഉളിക്കൽ കോളിത്തട്ടിൽ കാട്ടാന കൃഷി നശിപ്പിച്ചു

ഉളിക്കൽ: ഉളിക്കൽ പഞ്ചായത്ത്‌ കോളിത്തട്ട് രണ്ടാംകൈയിൽ കാട്ടാനയിറങ്ങി കാഞ്ഞിരത്തിങ്കൽ ദാസന്‍റെ കൃഷി നശിപ്പിച്ചു. വാഴ, തെങ്ങ്, കവുങ്ങ് തുടങ്ങിയ കൃഷികൾ ആന ചവിട്ടിനശിപ്പിച്ചു. പ്രദേശത്ത് ആദ്യമായാണ് കാട്ടാന എത്തുന്നതെന്നു പ്രദേശവാസികൾ പറയുന്നു. കഴിഞ്ഞദിവസം രാത്രിയായിരുന്നു സംഭവം. രാത്രിയിൽ ശക്തമായ മഴ പെയ്തതുകൊണ്ട് ശബ്ദം ഒന്നും കേട്ടില്ലെന്നാണ് ദാസൻ പറയുന്നത്. കർണാടക വനത്തിൽ നിന്നെത്തിയ ആനയാണെന്നാണ് കരുതുന്നത്. ഉളിക്കൽ പഞ്ചായത്ത്‌ പ്രസിഡന്‍റും ഭരണസമിതി അംഗങ്ങളും വനം വകുപ്പ് അധികൃതരും സ്ഥലത്തെത്തി പരിശോധന നടത്തി. ജനവാസമേഖലയിൽ കാട്ടാന ഇറങ്ങി കർഷകർക്ക് ഭീഷണിയാകുന്നത് തടയാനുള്ള നടപടി വനം വകുപ്പിന്‍റെ ഭാഗത്തുനിന്നുണ്ടാകണമെന്ന് പഞ്ചായത്ത് പ്രസിഡന്‍റ് പി.സി. ഷാജി ആവശ്യപ്പെട്ടു. ഉളിക്കൽ പഞ്ചായത്തിലും പായം പഞ്ചായത്തിലും കാട്ടാന ഇറങ്ങി വിലപ്പെട്ട രണ്ടു ജീവനുകളുമാണ് ചവിട്ടി മെതിച്ചത്. ഇനിയൊരു അപകടം സംഭവിക്കാതിരിക്കാൻ അധികൃതർ ജാഗ്രത പാലിക്കണമെന്നും രണ്ടു വർഷമായി മുടങ്ങിക്കിടക്കുന്ന കർഷകരുടെ നഷ്ടപരിഹാരം അടിയന്തരമായി കൈമാറണമെന്നും പ്രസിഡന്‍റ് ആവശ്യപ്പെട്ടു.

പ്രവാസികൾക്കായി സംരംഭകത്വ ശില്പശാല സംഘടിപ്പിച്ചു

കണ്ണൂർ: നോർക്കാ റൂട്ട്സിന്‍റെയും സെന്‍റർ ഫോർ മാനേജ്‌മെന്‍റ് ഡവലപ്‌മെന്‍റിന്‍റെയും സംയുക്താഭിമുഖ്യത്തിൽ ജില്ലയിലെ പ്രവാസികൾക്കും തിരിച്ചെത്തിയ പ്രവാസികൾക്കുമായി സംഘടിപ്പിച്ച ഏകദിന സംരംഭകത്വ ശില്പശാല ഡിപിസി ഹാളിൽ നോർക്ക റൂട്ട്‌സ് ജനറൽ മാനേജർ ടി. രശ്മി ഉദ്ഘാടനം ചെയ്തു. തിരിച്ചെത്തിയ പ്രവാസികളുടെ പുനരധിവാസത്തിനായി സംസ്ഥാന സർക്കാർ നോർക്ക റൂട്ട്‌സ് വഴി നടപ്പിലാക്കുന്ന നോർക്ക ഡിപ്പാർട്ട്‌മെന്‍റ് പ്രോജക്ട് ഫോർ റിട്ടേൺഡ് എമിഗ്രന്‍റ്സ് പദ്ധതി (എൻഡിപിആർഇഎം), മറ്റ് പദ്ധതികൾ എന്നിവയെക്കുറിച്ച് സെന്‍റർ ഫോർ മാനേജ്‌മെന്‍റ് ഡവലപ്‌മെന്‍റ് അസോസിയേറ്റ് പ്രഫസർ പി.ജി അനിൽ ക്ലാസെടുത്തു. രണ്ടു വർഷത്തിൽ കൂടുതൽ വിദേശത്ത് ജോലിചെയ്ത് നാട്ടിൽ സ്ഥിരതാമസമാക്കിയ പ്രവാസി മലയാളികൾക്ക് സ്വയംതൊഴിൽ, സംരംഭങ്ങൾ എന്നിവ ആരംഭിക്കുന്നതിനും നിലവിലുള്ളവയുടെ വിപുലീകരണത്തിനും പ്രയോജനപ്പെടുന്നതാണ് എൻഡിപിആർഇഎം പദ്ധതി. 2025-26 വർഷത്തിൽ കേരളത്തിൽ 1500 പുതിയ സംരംഭകരെ സൃഷ്ടിക്കുകയാണ് ഇതിലൂടെ ലക്ഷ്യമിടുന്നത്. സംരംഭങ്ങൾ തെരഞ്ഞെടുക്കുന്നതിനും പദ്ധതി നടപ്പിലാക്കുന്നതിനും ആവശ്യമായ സാമ്പത്തിക, നിയമ, മാനേജ്‌മെന്‍റ് മേഖലകളെ സംബന്ധിച്ചുള്ള മാർഗനിർദേശങ്ങളും കുറഞ്ഞ മൂലധനത്തിൽ നാട്ടിൽ ആരംഭിക്കാൻ കഴിയുന്ന നൂതന ബിസിനസ് ആശയങ്ങളെക്കുറിച്ചും ശില്പശാലയിൽ സംവദിച്ചു. ജില്ലയുടെ വിവിധ ഭാഗങ്ങളിൽ നിന്നായി 125 ലധികം പ്രവാസികൾ പങ്കെടുത്തു. ശില്പശാലയിൽ സെന്‍റർ ഫോർ മാനേജ്‌മെന്‍റ് ഡവലപ്‌മെന്‍റ് പ്രോജക്ട് ഓഫീസർ സ്മിത ചന്ദ്രൻ അധ്യക്ഷത വഹിച്ചു. സിഎംഡി പ്രോജക്ട് ഓഫീസർ ജി. ഷിബു, വി. ഷിജി എന്നിവർ പങ്കെടുത്തു.

ചെങ്കൽ ഖനനം: ബാലേശുഗിരി ആക്‌ഷൻ കമ്മിറ്റി താലൂക്ക് ഓഫീസ് ധർണ നടത്തും

ചപ്പാരപ്പടവ്: കളക്ടറുടെ ഉത്തരവ് മറികടന്ന് മാവിലംപാറയിൽ ചെങ്കൽ ഖനനം നടത്തുന്നതിനെതിരെ ശക്തമായ സമരം ആരംഭിക്കാൻ ബാലേശുഗിരിയിലെ ജനങ്ങൾ തീരുമാനിച്ചു. ചെങ്ങളായി പഞ്ചായത്തിലെ മാവിലം പാറയിൽ നടക്കന്ന ഖനനത്തിന്‍റെ ദുരിതം ചപ്പാരപ്പടവ് പഞ്ചായത്തിലെ ബാലേശുഗിരിയിലെ ജനങ്ങളാണ് അനുഭവിക്കുന്നതെന്ന് സമരപരിപാടികൾ ആലോചിക്കാനായി ചേർന്ന യോഗം ചൂണ്ടിക്കാട്ടി. ഖനനത്തിനെതിരെ പ്രദേശവാസികൾ ബാലേശുഗിരി ആക്‌ഷൻ കമ്മിറ്റി രൂപീകരിച്ചാണ് സമരത്തിനൊരുങ്ങുന്നത്. ആക്‌ഷൻ കമ്മിറ്റി പ്രദേശവാസികൾ നേരിടുന്ന ദുരിതം സംബന്ധിച്ച് കളക്ടർക്ക് നൽകിയ പരാതിയെ തുടർന്ന് കളക്ടർ സ്ഥലം സന്ദർശിച്ചിരുന്നു. തുടർന്നാണ് ഖനനം നിർത്തി വെക്കാൻ ഉത്തരവിട്ടത്. എന്നാൽ, കളക്ടറുടെ ഉത്തരവ് ലംഘിച്ചും ഖനനം നടത്തുകയാണ്. അധികാരികളുടെ ഒത്താശയോടെയാണ് അനധികൃത ഖനനം നടക്കുന്നതെന്ന് യോഗം അഭിപ്രായപ്പെട്ടു. സമരം ശക്തമാക്കുന്നതിന്‍റെ ഭാഗമായി താലൂക്ക് ഓഫീസ് ധർണ ഉൾപ്പെടുയുള്ള സമരപരിപാടികൾക്ക് യോഗം രൂപം നൽകി. യോഗത്തിന് പ്രസിഡന്‍റ് സുനിജ ബാലകൃഷ്ണൻ അധ്യക്ഷത വഹിച്ചു. എ.എൻ. വിനോദ്, വി.വി. നാരായണൻ, മനോജ് ശാസ്താംപടവിൽ, ജോസ് മുടവനാട്ട്, വിൽസൺ കിഴക്കേക്കര, കെ.വി. അരുൺ ബാബു, ജോബി കിഴക്കേക്കര, ടോം എടാട്ടേൽ എന്നിവർ പ്രസംഗിച്ചു.

വൈഎംസിഎ ഭാരവാഹികൾ സ്ഥാനമേറ്റു

പെരുമ്പടവ്: പെരുമ്പടവ് വൈഎംസിഎ ഭാരവാഹികളുടെ സ്ഥാനാരോഹണവും കുടുംബ സംഗമവും പുതിയ അംഗങ്ങൾക്കുള്ള സ്വീകരണവും നടന്നു. പെരുമ്പടവ് മറിയം ഓഡിറ്റോറിയത്തിൽ ജില്ലാ പഞ്ചായത്ത് പ്രതിപക്ഷ നേതാവ് തോമസ് വെക്കത്താനം ഉദ്ഘാടനം ചെയ്തു. വൈഎംസിഎ പ്രസിഡന്‍റ് ബെന്നി ചിറ്റിലപ്പള്ളി അധ്യക്ഷത വഹിച്ചു. പെരുമ്പടവ് സെന്‍റ് ജോസഫ് ഇടവക വികാരി ഫാ. ജോർജ് തൈക്കുന്നുംപുറം അനുഗ്രഹ പ്രഭാഷണം നടത്തി. കണ്ണൂർ വൈഎംസിഎ സബ് റീജണൽ ചെയർമാൻ ബെന്നി ജോൺ പുതിയ ഭാരവാഹികളുടെ സ്ഥാനാരോഹണം നടത്തി. പ്രസിഡന്‍റായി ബെന്നി ചിറ്റിലപ്പള്ളിയും സെക്രട്ടറിയായി ജയ്സൺ മുടിയാനിക്കൽ, ട്രഷററായി ഏബ്രഹാം കണ്ടത്തിൽ എന്നിവരും ഭരണസമിതിയംഗങ്ങളും ചുമതലയേറ്റു. വനിത ഫോറം പ്രസിഡന്‍റായി ഹെലൻ മുടയാനിക്കലും സെക്രട്ടറിയായി ഷാനി മൂത്തേടത്തും യൂണി-വൈ പ്രസിഡന്‍റായി ജസ്റ്റിൻ പെരിഞ്ചേരിയും സെക്രട്ടറിയായി ഗോഡ്‌വിൻ ചിറ്റിലപ്പള്ളിയും ചുമതലയേറ്റു. പുതിയ അംഗങ്ങളുടെ സത്യപ്രതിജ്ഞാ ചടങ്ങിന് വൈഎംസിഎ ഏഷ്യ പസഫിക്ക് കമ്മിറ്റി മെംബർ ഡോ. കെ.എം. തോമസ് നേതൃത്വം നൽകി. വനിതാ ഭാരവാഹികളുടെ സ്ഥാനാരോഹണ ചടങ്ങ് കണ്ണൂർ വനിത സബ് റീജണൽ ചെയർപേഴ്സൺ ടിന്‍റു ബിജി ഉദ്ഘാടനം ചെയ്തു. യുവജന വിഭാഗമായ യൂണി-വൈയുടെ പെരുമ്പടവ് യൂണിറ്റ് സ്ഥാപനം ജനറൽ കൺവീനർ ഷാജി ജോസഫ് നിർവഹിച്ചു. നാഷണൽ എക്സിക്യൂട്ടീവ് അംഗം മത്തായി വീട്ടിയാങ്കൽ മുഖ്യപ്രഭാഷണം നടത്തി. സമൂഹത്തിലെ യുവജനങ്ങളെ കാർന്നുതിന്നുന്ന രാസലഹരിക്കെതിരായി ആദ്യ പ്രസിഡന്‍റ് മാത്യു വട്ടോത്ത് പ്രമേയം അവതരിപ്പിച്ചു.

തടിക്കടവ് പന്ത്രണ്ടാം ചാലിൽ റോഡ് ആര് സംരക്ഷിക്കും

തടിക്കടവ്: തടിക്കടവ് റോഡിൽ പന്ത്രണ്ടാംചാൽ പക്ഷിസങ്കേതത്തിനു സമീപം റോഡ് പുഴയിലേക്ക് ഇടിഞ്ഞിട്ട് രണ്ടുവർഷം കഴിഞ്ഞു. കഴിഞ്ഞവർഷവും റോഡ് പുഴയിലേക്ക് ഇടിയുകയുണ്ടായി. സംരക്ഷണഭിത്തി നിർമിക്കാത്തതാണ് മണ്ണിടിയാൻ കാരണം. നൂറ്റാണ്ട് പഴക്കമുള്ള നിരവധി മരങ്ങൾ ഉൾപ്പെടെ റോഡിലേക്കു വീഴുന്ന നിലയിലാണ്. സമീപത്ത് വീടുമുണ്ട്. ഇരുപതോളം അടി ഉയരത്തിലുള്ള മണ്ണാണ് പുഴയിലേക്ക് ഇടിഞ്ഞുവീണത്. റോഡ് ഇനിയും ഇടിയാൻ സാധ്യതയുണ്ടെന്നു ചൂണ്ടിക്കാട്ടി ചപ്പാരപ്പടവ് പഞ്ചായത്ത് കഴിഞ്ഞ രണ്ടു വർഷവും ദുരന്ത നിവാരണ അഥോറിറ്റിക്ക് റിപ്പോർട്ട് നൽകിയിരുന്നു. ‌‌ മണിക്കൽ പുഴയോടു ചേർന്നുള്ള ഈ ഭാഗത്തെ റോഡ് കൊടുംവളവുകളും ചെരിവുമുള്ളതാണ്. 12 മീറ്റർ വീതിയിൽ നിർമിച്ച റോഡിന്‍റെ ഈ ഭാഗത്തെ വീതി 10 മീറ്ററിൽ താഴെയാണ്. ഇവിടെ പാതയോരമില്ല. ടാറിംഗ് കഴിഞ്ഞ ഭാഗം വൻ താഴ്ചയാണ്. മണ്ണിടിച്ചിലും അപകട ഭീഷണിയും ഉണ്ടാകുമെന്ന് ചൂണ്ടിക്കാട്ടി നാട്ടുകാർ കളക്ടർക്ക് അടക്കം പരാതി നൽകിയതാണ്. 70 കോടി ചെലവഴിച്ച് ലോകോത്തര നിലവാരത്തിൽ നവീകരിക്കുന്നതായി പറഞ്ഞ റോഡിനാണ് ഈ ദുർഗതി. അതേസമയം, ഏഴുവർഷമായിട്ടും റോഡ് നവീകരണം പൂർത്തിയായിട്ടുമില്ല. 12 മീറ്ററിൽ നവീകരിച്ച റോഡിന്‍റെ പലഭാഗത്തും 10 മീറ്ററോ അതിൽ താഴെയോ മാത്രമേ വീതിയുളളൂ. ചിലയിടങ്ങളിൽ കേസുള്ളതിനാൽ നിശ്ചിത വീതി ലഭിക്കാത്ത അവസ്ഥ നിലനിൽക്കുന്നുണ്ട്. ആദ്യം 10 മീറ്ററിൽ നവീകരിക്കുമെന്നു പറഞ്ഞ റോഡാണ് പിന്നീട് 12 മീറ്ററായി ഉയർത്തിയത്. എന്നാൽ, ഏഴര മീറ്ററേ ടാറിംഗ് ഉള്ളൂ. അതിലേക്കും ഇപ്പോൾ കാടുവളർന്നു നിൽക്കുകയാണ്. ടാറിംഗിനു ശേഷമുള്ള ഭാഗം കോൺക്രീറ്റ് ചെയ്യാത്തതാണ് ഇതിനു കാരണം. പലയിടങ്ങളിലും ഓവുചാൽ നിർമിക്കാത്തതിനാൽ മഴവെള്ളം റോഡിലൂടെയാണ് ഒഴുകുന്നത്. റോഡിന് ഇരുവശത്തു നിന്നും രണ്ടുമീറ്റർ വീതമെടുത്തായിരുന്നു നവീകരണം. കെട്ടിടങ്ങളും മതിലുകളും മുറ്റവുമെല്ലാം ഇടിച്ചുതകർത്താണ് റോഡിന് വീതി കൂട്ടിയതെങ്കിലും ഇതിന്‍റെ പ്രയോജനം ജനങ്ങൾക്കു ലഭിക്കുന്നില്ല. കഴിഞ്ഞവർഷം പുഴയിടിഞ്ഞപ്പോൾ നാട്ടുകാരുടെയും ചപ്പാരപ്പടവ് പഞ്ചായത്തിന്‍റെയും പരാതികളെ തുടർന്ന് സബ് കളക്ടർ സ്ഥലം സന്ദർശിച്ചിക്കുകയും ആവശ്യമായ നടപടികൾ സ്വീകരിക്കാമെന്ന് ഉറപ്പു നൽകുകയും ചെയ്തതാണ്. എന്നാൽ, ആ സമയത്ത് പുഴയിൽ വലിയ വെള്ളമായതിനാൽ ഒന്നും ചെയ്യാൻ സാധിക്കില്ലെന്നും പുഴയിൽ വെള്ളം കുറയുമ്പോൾ നടപടി സ്വീകരിക്കാമെന്നുമാണ് പറഞ്ഞത്. എന്നാൽ കഴിഞ്ഞ വേനലിലും ഒന്നും ചെയ്തിട്ടില്ല. ഇപ്പോഴും അതേ അവസ്ഥ തുടരുന്നു. വലിയ അപകടങ്ങൾ ക്ഷണിച്ചു വരുത്താതെ സത്വര നടപടി സ്വീകരിക്കാൻ തയാറാകണമെന്നാണ് നാട്ടുകാരും പഞ്ചായത്ത് ഭരണസമിതിയും ആവശ്യപ്പെടുന്നത്.

വിന്‍വിന്‍ കോര്‍പറേഷന്‍ പത്താം വാർഷികം ആഘോഷിച്ചു

കണ്ണൂര്‍: പത്രപരസ്യ രംഗത്തും ഇവന്‍റ് മാനേജ്മെന്‍റ് മേഖലയിലും സജീവ സാന്നിധ്യമായ വിൻവിൻ കോർപറേഷൻ പത്താം വാർഷികം ആഘോഷിച്ചു. ഭക്തി സംവർദ്ധിനി യോഗം വൈസ് പ്രസിഡന്‍റ് ടി.കെ. രാജേന്ദ്രൻ ഭദ്രദീപം കൊളുത്തി. നോർത്ത് മലബാർ ചേംബർ ഓഫ് കൊമേഴ്സ് പ്രസിഡന്‍റ് ടി.കെ.രമേഷ്കുമാർ ഉദ്ഘാടനം ചെയ്തു. കണ്ണൂർ ആകാശവാണി മുൻ സ്റ്റേഷൻ ഡയറക്ടർ കെ. ബാലചന്ദ്രൻ അധ്യക്ഷത വഹിച്ചു. ഓള്‍ ഇന്ത്യ മോട്ടോര്‍ ട്രാന്‍സ്പോര്‍ട്ട് കോണ്‍ഗ്രസ് മാനേജിംഗ് കമ്മിറ്റി മെംബര്‍ എം.ടി പ്രകാശന്‍, സദാനന്ദ റിയാല്‍റ്റസ് എംഡി സി.കെ സദാന്ദന്‍, റസിഡൻസ് അസോസിയേഷന്‍ സംസ്ഥാന വൈസ്. പ്രസിഡന്‍റ് ആര്‍. അനില്‍കുമാര്‍, ജില്ലാ സെക്രട്ടറി കെ.പി.മുരളി കൃഷ്ണന്‍, മുന്‍ ഡെപ്യൂട്ടി ലേബര്‍ കമ്മീഷര്‍ പി.സി. വിജയരാജന്‍, ദീപിക മാർക്കറ്റിംഗ് സീനിയർ ബിസിനസ് മാനേജർ പി.ജെ. മാത്യു, കേരളകൗമുദി യൂണിറ്റ് ചീഫ് കെ.വി. ബാബുരാജൻ, പരസ്യവിഭാഗം മാനേജര്‍ കെ.ടി. രാജു, കണ്ണൂര്‍ മീഡിയ എഡിറ്റര്‍ ശിവദാസന്‍ കരിപ്പാല്‍, ആര്‍ട്ടിസ്റ്റ് ശശികല, ബ്ലൂഇങ്ക് ബുക്സ് എംഡി സി.പി. ചന്ദ്രന്‍, മാതൃഭൂമി മാർക്കറ്റിംഗ് ഡെപ്യൂട്ടി മാനേജർ കെ. ധനീഷ്, ശ്രീജിത്ത് കൈതേരി, ഡോ.ടി. ശശിധരന്‍, ചാര്‍ട്ടേഡ് അക്കൗണ്ടന്‍റ് ശിശില്‍ രാമകൃഷ്ണന്‍, കണ്ണൂര്‍ മിറര്‍ സര്‍ഗവേദി പ്രസിഡന്‍റ് കെ.സി.ശശീന്ദ്രന്‍, ഗ്ലൈസീമിയ ആന്‍റി ഡയബറ്റിക് ക്ലിനിക് മാനേജിംഗ് ഡയറക്ടര്‍ അനീഷ് കല്ലി, കണ്ണൂര്‍ മെട്രോ വാര്‍ത്ത റിപ്പോര്‍ട്ടര്‍ ഷമൽ, ക്ലബ്ബ് എഫ്എം റേഡിയോ സൊലൂഷന്‍സ് മാനേജര്‍ പി.പ്രസാദ്, കണ്ണൂര്‍ വിഷന്‍ മാര്‍ക്കറ്റിംഗ് മാനേജർ ജയന്‍ ചോല, പി.സി. അശോകന്‍, കെ.ജ്യോതിപ്രകാശ്, രഘുത്തമന്‍ എന്നിവർ പ്രസംഗിച്ചു.

മാടായി പഞ്ചായത്ത് പ്രസിഡന്‍റിന്‍റെ വീട്ടിൽ വിജിലൻസ് റെയ്ഡ്; രേഖകൾ പിടിച്ചെടുത്തു

പഴയങ്ങാടി: മാടായി പഞ്ചായത്ത് പ്രസിഡന്‍റ് കായിക്കാരൻ സഹീദിന്‍റെ വീട്ടിലും പഞ്ചായത്ത് ഓഫീസിലും വിജിലൻസ് റെയ്ഡ്. അനധികൃത സ്വത്തു സന്പാദനമെന്ന പരാതിയെ തുടർന്നായിരുന്നു റെയ്ഡ്. പരിശോധനയിൽ ചില നിർണായക രേഖകൾ കണ്ടെത്തി കസ്റ്റഡിയിലെടുത്തതായാണ് വിവരം. ഇന്നലെ പുലർച്ചെ ആറോടെയാണ് വിജിലൻസ് സംഘം മാട്ടൂൽ നോർത്തിലെ വീട്ടിൽ റെയ്ഡിനെത്തിയത്. കോഴിക്കോട് വിജിലൻസ് വിഭാഗം സ്പെഷൽ സെല്ലിലെ ഡിവൈഎസ്പിമാരായ സുരേഷ്, രമേശ് എന്നിവരുടെ നേതൃത്വത്തിലുള്ള 33 അംഗ സംഘമാണ് പരിശോധന നടത്തിയത്. പരിശോധന വൈകുന്നേരം ഏഴു വരെ നീണ്ടു. പ്രസിഡന്‍റിന്‍റെ വീട്ടിൽ റെയ്ഡ് നടക്കുന്ന അതേ സമയം തന്നെയാണ് പഞ്ചായത്ത് ഓഫീസിലും പരിശോധന നടത്തിയത്. കൂടാതെ കായിക്കാരൻ സഹീദിന്‍റെ അടുത്ത സുഹൃത്തായ ഒരാളുടെ മാട്ടൂലിലെ വീട്ടിലും പരിശോധന നടത്തി. മുസ്‌ലിം ലീഗ് അഖിലേന്ത്യാ കമ്മിറ്റിയംഗവും പുതിയങ്ങാടി ജമാഅത്ത് ഹൈസ്കൂൾ ചെയർമാനും കൂടിയാണ് കായിക്കാരൻ സഹീദ്. അനധികൃത സ്വത്ത് സന്പാദനമെന്ന പരാതിയിൽ കണ്ണൂർ വിജിലൻസ് വിഭാഗം പ്രാഥമികാന്വേഷണം നടത്തിയതിനെ തുടർന്ന് പരാതിയിൽ കഴന്പുണ്ടെന്ന് കാണിച്ച് വിജിലൻസ് ഡയറക്ടർക്ക് റിപ്പോർട്ട് സമർപ്പിച്ചിരുന്നു. ഇതേത്തുടർന്ന് വിജിലൻസ് ഡയറക്ടറേറ്റ് നിർദേശപ്രകാരം നേരത്തെ കോഴിക്കോട് സ്പെഷ്യൽ സെൽ അന്വേഷിക്കുകയും ഇതിന്‍റെ റിപ്പോർട്ട് സമർപ്പിക്കുകയും ചെയ്തിരുന്നു. ഈ റിപ്പോർട്ടിന്‍റെയും കൂടി അടിസ്ഥാനത്തിലാണ് റെയ്ഡ് നടത്തിയത്.

കണ്ണൂർ റെയിൽവേ സ്റ്റേഷനിലേക്ക് പ്രവേശിക്കാൻ പുതിയ പാത വരുന്നു

കണ്ണൂർ: കണ്ണൂർ റെയിൽവേ സ്റ്റേഷന്‍റെ മുഖ്യകവാടത്തിലേക്ക് പ്രവേശിക്കാൻ ഇനി കുരുക്കിൽ കിടക്കേണ്ട. ഇവിടെ പുതിയ പാതയ്ക്കൊരുങ്ങുകയാണ് റെയിൽവേ. നിലവിലുള്ള കവാടത്തിന് പുറമെ മുനീശ്വരൻ കോവിലിലെ ആർഎസ് പോസ്റ്റ് ഓഫീസിന് അരികിലൂടെയാണ് പുതിയ പാത നിർമിക്കാനുദ്ദേശിക്കുന്നത്. പാഴ്സൽ ഓഫീസിനോട് ചേർന്ന് നിലവിലുള്ള വീതികുറഞ്ഞ റോഡ് ഇതുമായി ബന്ധിപ്പിച്ച് വിപുലീകരിച്ച് നിലവിൽ പുറത്തേക്കുള്ള വഴിയുമായി ചേരും. ഏഴുമീറ്റർ വീതിയിൽ വൺവേയായിരിക്കും നിർമിക്കുക. റോഡിൽനിന്ന് സ്റ്റേഷനിലേക്ക് പ്രവേശിക്കുന്ന കവാടം അതുപോലെ തുടരും. പാത യാഥാർത്ഥ്യമായാൽ മുനീശ്വരൻ കോവിൽ മുതൽ താവക്കര വരെയുണ്ടാകുന്ന രൂക്ഷമായ ഗതാഗതക്കുരുക്ക് കുറയുമെന്ന് അധികൃതർ പറഞ്ഞു. അതേസമയം റെയിൽവേ വികസനം ഇല്ലാതാക്കി ഭൂമി സ്വകാര്യ കന്പനിക്ക് പാട്ടത്തിന് നല്കിയത് സ്റ്റേഷൻ റോഡ് വിപുലീകരണത്തെയും ബാധിക്കും. സ്റ്റേഷന് പടിഞ്ഞാറുഭാഗത്തെ റോഡിലൂടെ നിലവിൽ രൂക്ഷമായ തിരക്കാണ് അനുഭവപ്പെടുന്നത്. ഇവിടെ സ്വകാര്യ കമ്പനിയുടെ ഷോപ്പിംഗ് കോംപ്ലക്സ് വന്നാൽ വീതികൂട്ടാനാകില്ലെന്നാണ് വ്യാപാരികളടക്കം പറയുന്നത്. റെയിൽവേ ഭൂമി പാട്ടത്തിനെടുത്ത ടെക്സ് വർത്ത് കന്പനി വാണിജ്യകെട്ടിടം നിർമിക്കാനുള്ള പ്രവൃത്തിയിലാണ്. റെയിൽവേ പദ്ധതിയുടെ സ്കെച്ചിലും റോഡ് തുറക്കുന്നത് ഏറ്റവും തിരക്കുള്ള പ്ലാസ ജംഗ്ഷനിലേക്കാണ്. ഇത് തിരിച്ചടിയാകാം.

കെഎഎസ്എൽജിഇയു സംസ്ഥാന സമ്മേളനം ഇന്നു മുതൽ കണ്ണൂരിൽ

കണ്ണൂർ: കേരള എയ്ഡഡ് സ്കൂൾ ലാസ്റ്റ് ഗ്രേഡ് എംപ്ലോയീസ് യൂണിയൻ (കെഎഎസ്എൽജിഇയു) 55ാം വാർഷികാഘോഷവും 31ാം സംസ്ഥാന സമ്മേളനവും ഇന്നു മുതൽ 13 വരെ കണ്ണൂരിൽ നടക്കും. ഇന്നു വൈകുന്നേരം അഞ്ചിന് ശിക്ഷക് സദനിൽ പതാക ഉയർത്തുന്നതോടെ സമ്മേളനത്തിനു തുടക്കമാകും. തുടർന്ന് നടക്കുന്ന സംസ്ഥാന എക്സിക്യുട്ടീവ് കൗൺസിൽ മുൻ സംസ്ഥാന ജനറൽ സെക്രട്ടറി ടി.കെ. അബ്ദുൾ റഷീദ് ഉദ്ഘാടനം ചെയ്യുമെന്ന് ഭാരവാഹികളായ കെ.എം. ബാലകൃഷ്ണൻ നന്പൂതിരിയും കെ.ടി. സജീവനും പത്രസമ്മേളനത്തിൽ അറിയിച്ചു. നാളെ രാവിലെ 11ന് സമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. കോർപറേഷൻ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സുരേഷ് ബാബു എളയാവൂർ മുഖ്യാതിഥിയായിരിക്കും. സർവീസിൽ നിന്നു വിരമിക്കുന്ന ജീവനക്കാരെ ഡപ്യൂട്ടി മേയർ ടി. ഇന്ദിര ആദരിക്കും. ഉന്നതവിജയികളെ ഡിഡിഇ ഡി. ഷൈനി അനുമോദിക്കും. 13ന് രാവിലെ 10ന് തളാപ്പ് ചെങ്ങിനിപ്പടി യുപി സ്കൂളിൽ നടക്കുന്ന പ്രതിനിധി സമ്മേളനം ടി.കെ. അബ്ദുൾ റഷീദ് ഉദ്ഘാടനം ചെയ്യും. ഉച്ചകഴിഞ്ഞ് രണ്ടിന് പുതിയ ഭാരവാഹികളെ തെരഞ്ഞെടുക്കും. ഹയർ സെക്കൻഡറി പരീക്ഷ പേപ്പർ സൂക്ഷിക്കുന്ന സ്കൂളുകളിൽ സുരക്ഷാ ചുമതലയ്ക്ക് ക്ലാസ് ഡി ജീവനക്കാരെ നിയോഗിച്ച് പീഡിപ്പിക്കുന്ന സർക്കാർ നടപടി പിൻവലിക്കണം. നേരത്തെ പോലീസ് വഹിച്ചിരുന്ന ചുമതലയാണ് ജീവനക്കാരുടെ തലയിലേക്ക് അടിച്ചേൽപ്പിക്കുന്നത്. യാതൊരു സുരക്ഷയുമില്ലാത്ത സ്ഥലത്ത് ഇത്തരത്തിൽ ജീവനക്കാരെ നിയോഗിക്കാനുള്ള തീരുമാനം പുനഃപരിശോധിക്കണമെന്ന് നേതാക്കൾ ആവശ്യപ്പെട്ടു. എല്ലാ ജീവനക്കാരെയും സ്റ്റാറ്റ്യൂട്ടറി പെൻഷനു കീഴിൽ കൊണ്ടുവരണമെന്നും നേതാക്കൾ ആവശ്യപ്പെട്ടു. പത്രസമ്മേളനത്തിൽ ടി.വി. അനിൽകുമാർ, ഇ.സി. മനോജ്, കെ.എൻ. രാജു തുടങ്ങിയവരും പങ്കെടുത്തു.

കാരുണ്യ സ്പർശം അവാർഡ് കരുവഞ്ചാൽ ആശാഭവന്

വായാട്ടുപറമ്പ്: ഈ വർഷത്തെ ജോർജ് അർത്തനാകുന്നേൽ സ്മാരക കാരുണ്യ സ്പർശം അവാർഡിന് കരുവഞ്ചാൽ ആശാഭവൻ സ്പെഷൽ സ്കൂൾ അർഹമായി. കാൽലക്ഷം രൂപയും പ്രശസ്തി ഫലകവും അടങ്ങുന്ന അവാർഡ് 14 ന് രാവിലെ11 ന് കരുവഞ്ചാൽ ആശാഭവൻ ഓഡിറ്റോറിയത്തിൽ ചേരുന്ന സമ്മേളനത്തിൽ ആശാഭവൻ പ്രിൻസിപ്പൽ സിസ്റ്റർ മെർലിനു കരുവഞ്ചാൽ ലിറ്റിൽ ഫ്ലവർ ഇടവക വികാരി ഫാ. ജോസഫ് ഈനാച്ചേരി സമ്മാനിക്കുമെന്ന് ബി പോസിറ്റീവ് ഭാരവാഹികൾ അറിയിച്ചു. എസ്എച്ച് കോൺവന്‍റ് തലശേരി പ്രോവിൻസിനു കീഴിൽ ബുദ്ധിപരമായ വെല്ലുവിളി നേരിടുന്ന കുട്ടികളെ പരിശീലിപ്പിക്കുന്ന ആശാഭവൻ സ്പെഷൽ സ്കൂളിന്‍റെ പ്രവർത്തനം മാതൃകാപരവും അനേകം കുടുംബങ്ങൾക്കു വലിയ ആശ്വാസം നൽകുന്നതുമാണെന്ന് അവാർഡ് കമ്മറ്റി വിലയിരുത്തി. വലിയ ക്ഷമയും ശ്രദ്ധയും സഹാനുഭൂതിയും സാമ്പത്തിക ബാധ്യതയും ആവശ്യമായ സ്കൂളിന്‍റെ പ്രവർത്തനങ്ങൾക്ക് സമൂഹത്തിൽ അർഹമായ പരിഗണന ലഭിക്കുന്നില്ലെന്നും കമ്മിറ്റി നിരീക്ഷിച്ചു. ഇത്തരം സ്ഥാപനങ്ങൾ ദേശത്തിന് അനുഗ്രഹവും പ്രോത്സാഹിക്കപ്പെടേണ്ടതുമാണ്. 41 വർഷം മുന്പ് ഫാ. തോമസ് കുറിച്യാപറമ്പിൽ മുൻകൈ എടുത്ത് സ്ഥാപിച്ച ആശാഭവൻ സ്പെഷൽ സ്കൂളിൽ ആറ് സിസ്റ്റേഴ്സ് അടക്കം 13 പേർ സേവനം അനുഷ്ഠിക്കുന്നു. ബുദ്ധിപരമായി വെല്ലുവിളി നേരിടുന്ന ആൺകുട്ടികളും പെൺകുട്ടികളുമടക്കം 50 പേരാണ് ഇപ്പോൾ സ്പെഷൽ സ്കൂളിൽ പരിശീലനത്തിനുള്ളത്. വായാട്ടുപറമ്പ് കേന്ദ്രമായി പ്രവർത്തിക്കുന്ന ബി പോസിറ്റീവ് ട്രസ്റ്റിന്‍റെ കാരുണ്യ സ്പർശം അവാർഡ് കഴിഞ്ഞ വർഷങ്ങളിൽ ആശാൻകവല തിരുരക്ത ആശ്രമം, ചെമ്പേരി കരുണാലയം, കരുണാപുരം കാരുണ്യഭവൻ എന്നീ സ്ഥാപനങ്ങൾക്കാണ് ലഭിച്ചത്.

സ്കൂളിലെ പാചകക്കാരിയെ ഡിവൈഎഫ്ഐ വനിതാ നേതാവ് മർദിച്ചു

മണത്തണ: എസ്എഫ്ഐയുടെ പഠിപ്പ് മുടക്കിന്‍റെ ഭാഗമായി മണത്തണ ഗവ. ഹയർ സെക്കൻഡറി സ്കൂളിൽ എത്തിയ ഡിവൈഎഫ്ഐ വനിതാ നേതാവ് സ്കൂളിൽ ഉച്ചഭക്ഷണം പാചകം ചെയ്യുന്ന പ്രായമായ സ്ത്രീയെ കൈയേറ്റം ചെയ്തു. സ്കൂളിൽ മൂന്നുവർഷമായി ഹെൽപ്പറായി ജോലി ചെയ്യുന്ന വസന്തയെയാണ് കൈയേറ്റം ചെയ്തത്. കൈപിടിച്ച് തിരിച്ചുവെന്നും കൈയിലുണ്ടായിരുന്ന ഭക്ഷണം തട്ടി താഴെയിട്ടുവെന്നും വസന്ത പറഞ്ഞു. ഇന്നലെ രാവിലെ പത്തോടെയായിരുന്നു സംഭവം. കൈയ്ക്ക് പരിക്കേറ്റ വസന്ത പേരാവൂർ താലൂക്ക് ആശുപത്രിയിൽ ചികിത്സ തേടി. സംഭവത്തിൽ ഡിവൈഎഫ്ഐ നേതാവും വളയങ്ങാട് സ്വദേശിനിയുമായ അക്ഷയ മനോജിനെതിരേ വസന്ത പേരാവൂർ പോലീസിൽ പരാതി നൽകിയിട്ടുണ്ട്. യാതൊരു പ്രകോപനവുമില്ലാതെയാണ് സ്കൂളിന് പുറത്തുള്ളവർ കഞ്ഞിപ്പുരയിൽ കയറി അക്രമം കാണിച്ചതെന്ന് വസന്തയുടെ ബന്ധുക്കൾ പറഞ്ഞു. സംസ്ഥാന വ്യാപകമായി ഇന്നലെ എസ്എഫ്ഐ വിദ്യാഭ്യാസ ബന്ദ് പ്രഖ്യാപിച്ചിരുന്നു. ഇതിന്‍റെ ഭാഗമായാണ് മണത്തണ ഗവ. ഹയർ സെക്കൻഡറി സ്കൂളിൽ പുറത്തുള്ള ആളുകൾ സ്കൂൾ അടപ്പിക്കുന്നതിന് എത്തിയത്. ഇവർ ഭക്ഷണം പാകം ചെയ്യുന്നിടത്ത് എത്തി ബഹളമുണ്ടാക്കുകയായിരുന്നു. കൂട്ടത്തിൽ മറ്റാളുകൾ ഉണ്ടായിരുന്നെങ്കിലും ഡിവൈഎഫ്ഐ വനിതാ നേതാവാണ് വസന്തയെ കൈയേറ്റം ചെയ്തതെന്ന് ബന്ധുക്കൾ പറഞ്ഞു. പ്രായമായ സ്ത്രീയെ കൈയേറ്റം ചെയ്തതിൽ വ്യാപക പ്രതിഷേധമാണ് ഉയരുന്നത്.

ഖദീജ വധം: സഹോദരങ്ങൾക്ക് ജീവപര്യന്തവും പിഴയും

തലശേരി: രണ്ടാം വിവാഹം കഴിക്കുന്നതിന്‍റെ വിരോധത്താല്‍ സഹോദരിയെ വെട്ടിക്കൊന്ന കേസില്‍ പ്രതികള്‍ക്ക് ജീവപര്യന്തം തടവും 60,000 രൂപ പിഴയും. തില്ലങ്കേരി പടിക്കച്ചാലിലെ പുതിയപുരയിൽ കെ.എന്‍. ഇസ്മയിൽ (40), കെ.എന്‍. ഫിറോസ് (36) എന്നിവരെയാണ് തലശേരി അഡീഷണല്‍ ജില്ലാസെഷന്‍സ് കോടതി ജഡ്ജി (ഒന്ന്) ഫിലി തോമസ് ശിക്ഷിച്ചത്. സഹോദരിയായ പടിക്കച്ചാലിലെ പുതിയപുരയില്‍ ഖദീജയെ (28) വെട്ടിക്കൊല്ലുകയും രണ്ടാം ഭര്‍ത്താവ് ഹമീദിനെ (47) വധിക്കാന്‍ ശ്രമിച്ചെന്നുമാണ് കേസ്. പ്രതികള്‍ പിഴ അടച്ചില്ലെങ്കില്‍ ഒരുവര്‍ഷം അധികതടവ് അനുഭവിക്കണം. 2012 ഡിസംബര്‍ 12ന് ഉച്ചയ്ക്ക് 12 ഓടെയാണ് കേസിനാസ്പദമായ സംഭവം. പഴശി കുഴിക്കലിലെ ജസീല മന്‍സിലില്‍ കെ. നൗഷാദാണ് ഖദീജയുടെ ആദ്യ ഭര്‍ത്താവ്. ഈ ബന്ധത്തില്‍ രണ്ട് പെണ്‍മക്കളുണ്ട്. ഇതിനിടയിലാണ് ഷാഹുല്‍ ഹമീദുമായി യുവതി സ്നേഹത്തിലായത്. ഈ ബന്ധം ഒഴിവാക്കാനായി പറഞ്ഞെങ്കിലും പിന്മാറാത്ത വിരോധമാണ് കൊലയ്ക്ക് കാരണമെന്നാണ് അന്വേഷണത്തിലെ കണ്ടെത്തല്‍.രണ്ടാം വിവാഹം നടത്താമെന്ന വ്യാജേന ആദ്യ വിവാഹം തലാഖ് നടത്തി. ഖദീജയെയും ഷാഹുല്‍ ഹമീദിനെയും നാട്ടില്‍ എത്തിച്ചശേഷമാണ് കൊലയും കൊലപാതക ശ്രമവും നടന്നത്. മതാചാരപ്രകാരം വിവാഹം നടത്തിക്കൊടുക്കാമെന്ന് വാഗ്ദാനം ചെയ്താണ് ഖദീജയെ വിവാഹം കഴിക്കാനിരുന്ന ഷാഹുല്‍ ഹമീദിനെയും ബന്ധുക്കളെയും പ്രതികള്‍ വീട്ടിലേക്ക് വിളിപ്പിച്ചത്. നിക്കാഹിന്‍റെ കാര്യം സംസാരിക്കാനെന്ന് പറഞ്ഞ് ബന്ധുക്കളെ പള്ളിയിലേക്ക് കൂട്ടിക്കൊണ്ടുപോയി. ഈസമയം പ്രതികള്‍ ഖദീജയെ കുത്തിക്കൊലപ്പെടുത്തുകയും ഷാഹുല്‍ ഹമീദിനെയും കുത്തി പരിക്കേല്‍പ്പിക്കുകയും ചെയ്തു. മട്ടന്നൂര്‍ പോലീസ് ഇന്‍സ്‌പെക്ടറായിരുന്ന കെ.വി വേണുഗോപാലായിരുന്നു കേസ് അന്വേഷിച്ചത്. ആറ് പ്രതികളുണ്ടായിരുന്നതില്‍ നാലുപേരെ കോടതി വെറുതെ വിട്ടിരുന്നു. പ്രോസിക്യൂഷന് വേണ്ടി അഡീഷനല്‍ ജില്ലാ ഗവ.പ്ലീഡര്‍ കെ.രൂപേഷ് ഹാജരായി.

വാഹനാപകടത്തിൽ പരിക്കേറ്റ ഓട്ടോ ഡ്രൈവർ മരിച്ചു

പള്ളിക്കുന്ന്: വാഹനാപകടത്തെ തുടർന്ന് ചികിത്സയിലായിരുന്ന ഓട്ടോ ഡ്രൈവർ മരിച്ചു. പെരുമണ്ണ് മല്ലിശേരി ഇല്ലത്ത് പരേതരായ നാരായണൻ നമ്പൂതിരി-പള്ളിക്കുന്ന് മൂകാംബിക ക്ഷേത്രത്തിനു സമീപത്തെ വടക്കെ വാര്യത്ത് ലക്ഷ്മിക്കുട്ടി വാരസ്യാർ ദന്പതികളുടെ മകൻ ദുർഗ റോഡിൽ അച്യുതത്തിൽ ഗോപിനാഥൻ (അച്ചൂട്ടി-70) ആണ് മരിച്ചത്. ഫെബ്രുവരി 15ന് ചാല പനോന്നേരിയിലുണ്ടായ വാഹനാപകടത്തെ തുടർന്ന് ചികിത്സയിലായിരുന്നു. സംസ്കാരം ഇന്ന് മൂന്നിന് പയ്യാമ്പലത്ത്. ഭാര്യ: വസന്ത. മക്കൾ: മഞ്ജുള, മിഥുൻ (കെവിആർ മാരുതി, പുതിയതെരു). മരുമക്കൾ: മുരളീധര വാര്യർ (ജ്യോൽസ്യർ, കല്യാശേരി), ദിവ്യ. സഹോദരങ്ങൾ: പത്മാവതി, ചന്ദ്രവല്ലി, ജയനാരായണൻ, പരേതരായ കമലം, യശോദ, ബാലകൃഷ്ണ വാര്യർ, രാമചന്ദ്ര വാര്യർ.

നഷ്ടപരിഹാരം ഏകപക്ഷീയമെന്ന് ഭൂവുടമകൾ; പായത്ത് പ്രതിഷേധ യോഗം നടത്തി

ഇരിട്ടി: വയനാട്-കരിന്തളം 400 കെവി ലൈൻ പുതിയ നഷ്ടപരിഹാര പാക്കേജ് സർക്കാർ ഏകപക്ഷീയമായി തീരുമാനിച്ചതാണെന്ന് ഭൂവുടമകൾ. സർക്കാരിന്‍റെ ഏകപക്ഷീയ പാക്കേജിനെതിരെ പായം പഞ്ചായത്തിലെ ഭൂവുടമകളും കർഷകരും പ്രതിഷേധ യോഗം നടത്തി. കിളിയന്തറ പാരിഷ് ഹാളിൽ ഇടവക വികാരി ഫാ. ആന്‍റണി ആനക്കല്ലിൽ ഉദ്ഘാടനം ചെയ്‌തു. സമര സമിതി ചെയർമാൻ തോമസ് വർഗീസ് അധ്യക്ഷത വഹിച്ചു. വീടും സ്ഥലവും നഷ്ട്ടപ്പെടുന്നവർക്ക് അർഹമായ നഷ്ട്ടപരിഹാരം നൽകാതെ ജനങ്ങളെ വഞ്ചിക്കുന്ന സർക്കാർ നിലപാടിനെതിരെ ശക്തമായ സമരപരിപാടികൾക്ക് നേതൃത്വം നൽകാൻ യോഗം തീരുമാനിച്ചു. ബെന്നി പുതിയാന്പുറം, ഡെന്നീസ് മാണി, ജിജോ അടവനാൽ, തങ്കച്ചൻ നെടുമല, റോബിൻസ് മണ്ണനാൽ, രാജി അടവനാൽ എന്നിവർ പ്രസംഗിച്ചു.

നിയന്ത്രണം വിട്ട കാർ വൈദ്യുത തൂണിലിടിച്ച് മറിഞ്ഞു

മട്ടന്നൂർ: ചാവശേരി കൂരൻ മുക്കിൽ കാർ നിയന്ത്രണം വിട്ടു വൈദ്യുതി തൂണിലിടിച്ച് മറിഞ്ഞു. ഇന്നലെ പുലർച്ചെ അഞ്ചരയോടെയായിരുന്നു അപകടം. ഇരിക്കൂറിൽ നിന്നു ഉളിയിൽ ഭാഗത്തേക്ക് പോയ കാർ കൂരൻമുക്കിൽ നിയന്ത്രണം വിട്ടു റോഡരികിലെ വൈദ്യുത തൂണിലിടിച്ച് മറിയുകയായിരുന്നു. കാർ ഡ്രൈവർ പരിക്കേൽക്കാതെ രക്ഷപ്പെട്ടു. അപകടത്തെ തുടർന്നു വൈദ്യുത തൂണും കമ്പിയും റോഡിലേക്ക് വീണു. പ്രദേശത്ത് വൈദ്യുത ബന്ധം തടസപ്പെട്ടു. വൈദ്യുത തൂൺ റോഡിൽ നിന്ന് മാറ്റുന്നതിനിടെ ഇരിട്ടി ഭാഗത്തേക്ക് പോയ പാർസൽ ലോറി തട്ടി മൂന്നുപേർക്ക് പരിക്കേറ്റു. ഇവരെ മട്ടന്നൂരിലെ ആശുപത്രിയിൽ പ്രവേശിപ്പിച്ചു. മറിഞ്ഞ കാർ പിന്നീട് ക്രെയിൻ ഉപയോഗിച്ച് നീക്കി.

കരാറുകാർ കനിഞ്ഞാൽ വീട് ലഭിക്കും; അയൽവീടുകളിൽ അന്തിയുറങ്ങി ദമ്പതികൾ

ഉളിക്കൽ: ലൈഫ് ഭവന പദ്ധതിയിൽ വീട് അനുവദിച്ചിട്ടും അന്തിയുറങ്ങാൻ ഇടമില്ലാതെ വൃദ്ധദമ്പതിമാർ അയൽവീട്ടിൽ അഭയം പ്രാപിക്കുന്നു. ഉളിക്കൽ വയത്തൂരിലെ പി.എ. കൃഷ്‌ണൻ നമ്പ്യാരും ഭാര്യ കമലാക്ഷിയുമാണ് കിടക്കാൻ ഇടമില്ലാതെ ബന്ധുക്കളുടെ സഹായത്താൽ കഴിയുന്നത്. ലൈഫ് ഭവന പദ്ധതിയിൽ വീട് അനുവദിച്ചിട്ടുണ്ടെങ്കിലും കരാറുകാർ ഏറ്റെടുക്കാൻ തയാറാവാതെ വന്നതോടെ ഇവരുടെ വീട് പണി അനിശ്ചിതത്വത്തിലാണ്. ആരെങ്കിലും കരാർ ഏറ്റെടുത്താൽ മാത്രമേ പ്രായം എൺപതിനോട് അടുക്കുന്ന ഇരുവരുടെയും വീടെന്ന സ്വപനം യാഥാർഥ്യമാകുകയുള്ളൂ. ലൈഫ് പദ്ധതി പ്രകാരം അനുവദിച്ച് വീടിന്‍റെ ഒന്നാം ഗഡു തുക ലഭിച്ചെങ്കിലും ഇത് ബാങ്കിൽ നിന്ന് എടുക്കാൻ കഴിഞ്ഞിട്ടില്ല. മക്കളില്ലാത്ത ഇവർ പ്രായത്തിന്‍റെ ബുദ്ധിമുട്ടുകളും രോഗങ്ങളും കാരണം മരുന്നിനുപോലും കഷ്‌ടപ്പെടുകയാണ്. ബന്ധുവിന്‍റെ സഹായത്തിലാണ് ഇപ്പോൾ ഇടിഞ്ഞുവീഴാറായ പഴയവീട്ടിൽ നിന്ന് മാറി താമസിക്കുന്നത്.

ഇൻഡക്ഷൻ പ്രോഗ്രാം സംഘടിപ്പിച്ചു

നിർമലഗിരി: നിർമലഗിരി കോളജ് (ഓട്ടോണമസ്) ചരിത്ര വിദ്യാർഥികൾക്കായി ഇൻഡക്ഷൻ പ്രോഗ്രാം സംഘടിപ്പിച്ചു. നിർമലഗിരി കോളജ് ചരിത്ര വിഭാഗം മുൻ മേധാവിയും ആലക്കോട് മേരി മാതാ ആർട്സ് ആൻഡ് സയൻസ് കോളജ് പ്രിൻസിപ്പലുമായ ഡോ. ടി.ജെ. ഷാജിമോൻ മുഖ്യപ്രഭാഷണം നടത്തി. ചരിത്ര വിഭാഗം മേധാവി രേഷ്മ ടോം, സിസ്റ്റർ ഡോ. സുജമോൾ ജോസഫ്, ഫാത്തിമത്ത് റാഹില എന്നിവർ പ്രസംഗിച്ചു. മലയാള വിഭാഗം ഒന്നാം വർഷ വിദ്യാർഥികൾക്കായി ഇൻഡക്ഷൻ പ്രോഗ്രാം "പ്രവേശകം 25' സംഘടിപ്പിച്ചു. മലയാള വിഭാഗം പൂർവ വിദ്യാർഥി സഞ്ജയ് ഷാജി മുഖ്യാതിഥിയായിരുന്നു. മലയാള ഭാഷാ പഠനത്തിന്‍റെ പ്രാധാന്യത്തെകുറിച്ചും വിവിധ ജോലി സാധ്യതകളെകുറിച്ചും അദ്ദേഹം സംസാരിച്ചു. മലയാള വിഭാഗം അധ്യക്ഷ ഡോ. ദീപാ മോൾ മാത്യു, പി. അമയ എന്നിവർ പ്രസംഗിച്ചു.

പഴകിയ ഭക്ഷ്യവസ്തുക്കൾ പിടിച്ചെടുത്തു നശിപ്പിച്ചു

ഇരിട്ടി: ഇരിട്ടി നഗരസഭ ആരോഗ്യ വിഭാഗം ന‌ടത്തിയ പരിശോധനയിൽ പഴകിയ പഴവർഗങ്ങളും ഇളനീരും പിടിച്ചെടുത്തു. സ്വകാര്യ ആശുപത്രിക്ക് സമീപമുള്ള ഇരിട്ടി കീഴൂരിലെ ത്രീസ്റ്റാർ ഫ്രൂട്ട്സ് സ്റ്റേഷനറി ആൻഡ് കൂൾബാറിൽ കഴിഞ്ഞദിവസം ഇരിട്ടി നഗരസഭ ആരോഗ്യ വിഭാഗം നടത്തിയ പരിശോധനയിലാണ് പഴകിയ പഴവർഗങ്ങളും ഫ്രീസറിൽ സൂക്ഷിച്ച വലിയ ബക്കറ്റ് നിറയെ ജ്യൂസ് അടിക്കാൻ സൂക്ഷിച്ച ഇളനീരും പിടിച്ചെടുത്ത് നശിപ്പിച്ചത്. കരിക്ക് വെട്ടിയ ശേഷം ഉള്ളിലെ കാമ്പ് മാത്രം ബക്കറ്റിൽ സൂക്ഷിച്ച നിലയിലായിരുന്നു ഇവ കണ്ടെത്തിയത്. ഇതോടൊപ്പം പഴകിയ അനാറും മുന്തിരിയും നഗരസഭ ആരോഗ്യ വിഭാഗം പിടിച്ചെടുത്തു നശിപ്പിച്ചു. ഇവിടെ നിന്ന് നിരോധിച്ച പ്ലാസ്റ്റിക് ഗ്ലാസുകളും പിടിച്ചെടുത്തു. മഞ്ഞപ്പിത്തം ഉൾപ്പെടെ പകർച്ച വ്യാധികൾ പടർന്നു പിടിക്കുന്ന സാഹടര്യത്തിലാണ് പരിശോധന നടത്തിയത്. ഉപഭോക്താവിന് ചോദിച്ച് ഉറപ്പുവരുത്താം: ക്ലീൻ സിറ്റി മാനേജർ ഭക്ഷണം കഴിക്കാൻ കയറുന്ന സ്ഥാപനങ്ങളിൽ മാനദണ്ഡങ്ങൾ പാലിക്കുന്നുണ്ടോ എന്ന് ഉപഭോക്താവിന് അന്വേഷിച്ച് ഉറപ്പുവരുത്താനുള്ള അവകാശം ഉണ്ടെന്ന് ഇരിട്ടി ക്ലീൻ സിറ്റി മാനേജർ കെ.വി. രാജീവൻ പറഞ്ഞു. ഹോട്ടലുകളിലും കൂൾബാറുകളിലും വെള്ളം പരിശോധിച്ച റിപ്പോർട്ടും ഹെൽത്ത് കാർഡ് ഉൾപ്പെടെ നിർബന്ധമാണ്. എന്നാൽ, ഇത് എത്രയധികം പ്രയോഗികമാണെന്ന് ജനങ്ങൾ അന്വേഷിക്കാൻ തയാറാകുമോ എന്നതും പ്രശ്‌നമാണ്. കട ഉടമകൾ വിവരങ്ങൾ കൈമാറാൻ തയാറായില്ലെങ്കിൽ വാക്കുതർക്കത്തിന് ഉൾപ്പെടെ കാരണമായേക്കാം. ഇത്തരം സിർട്ടിഫിക്കറ്റുകൾ കടയുടമകൾ ഉപഭോക്താക്കൾക്ക് കാണാവുന്ന രീതിയിൽ പ്രദർശിപ്പിക്കുക മാത്രമാണ് ഇതിനൊരു പോംവഴി. മഴക്കാലമായതോടെ പകർച്ചവ്യാധി രോഗങ്ങളിൽ നിന്ന് രക്ഷനേടാൻ ജനങ്ങൾ പരമാവധി ശ്രദ്ധിക്കണം. പഴകിയ വസ്തുക്കൾ സൂക്ഷിച്ച കടയുടമയിൽ നിന്ന് 3000 രൂപ പിഴ ഈടാക്കി. വരുംദിവസങ്ങളിൽ ഹോട്ടലുകളിലും കുൾബാറുകളിലും ഉൾപ്പെടെ പരിശോധന ശക്തമാക്കുമെന്ന് ഇരിട്ടി നഗരസഭ ആരോഗ്യ വിഭാഗം അറിയിച്ചു.

പണിമുടക്ക് ദിനം ജോലിക്കെത്തിയവർക്കു നേരെ കൈയേറ്റവും ഭീഷണിയുമെന്ന് എൻജിഒ അസോ.

കണ്ണൂർ: ഇടത് സംഘടനകൾ ആഹ്വാനം ചെയ്ത ദേശീയ പണിമുടക്ക് ദിനത്തിൽ പണിമുടക്കിൽ പങ്കെടുക്കാതെ സർക്കാർ ഓഫീസുകളിലും സ്കൂളുകളിലും ജോലിക്കെത്തിയവർക്ക് നേരെ കൈയേറ്റവും ഭീഷണിയും നടന്നതായും ജീവനക്കാരുടെ വാഹനം കേടുവരുത്തുകയും ചെയ്തതായി കേരള എൻജിഒ അസോസിയേഷൻ കണ്ണൂർ ജില്ലാ കമ്മിറ്റി ആരോപിച്ചു. സംഭവത്തിൽ പ്രതിഷേധിച്ച് ഇന്ന് ഉച്ചയ്ക്ക് കേരള എൻജിഒ അസോസിയേഷൻ കളക്ടറേറ്റ് പരിസരത്ത് പ്രകടനം നടത്തുമെന്നും ജില്ലാ കമ്മിറ്റി അറിയിച്ചു. കളക്ടറേറ്റ്, പിണറായി സിഎച്ച്സി, തലശേരി ബ്രണ്ണൻ കോളജ് ബിഎഡ് സെന്‍റർ, പേരാവൂർ ബ്ലോക്ക് പഞ്ചായത്ത് ഓഫീസ്, പെരിങ്ങോം വില്ലേജ് ഓഫീസ് തുടങ്ങിയ സ്ഥലങ്ങളിൽ ജോലിക്ക് ഹാജരായവരെയാണ് പണിമുടക്ക് അനുകൂലികൾ ഭീഷണിപ്പെടുത്തി കൈയേറ്റം നടത്തിയത്. പെരിങ്ങോം വില്ലേജ് ഓഫീസ് ജീവനക്കാരന്‍റെ ഇരുചക്രവാഹനം കേടുവരുത്തുകയും ചെയ്തു. കേരളത്തിലെ സർക്കാർ ജീവനക്കാരുടെ ആനുകൂല്യങ്ങളും ശന്പള പരിഷ്കരണങ്ങളും നിഷേധിക്കുന്ന ഇടത് അനുകൂല സംഘടനകൾ ഇതെല്ലാം മറന്ന് കേന്ദ്ര സർക്കാരിനെതിരെ മാത്രം പണിമുടക്ക് സമരം നടത്തുന്നത് ഇരട്ടത്താപ്പാണെന്ന് കേരള എൻജിഒ അസോസിയേഷൻ ജില്ലാ കമ്മിറ്റി കുറ്റപ്പെടുത്തി. പണിമുടക്ക് ദിനത്തിൽ ഇടത് യൂണിയനിലുള്ളവർ പോലും ഓഫീസിൽ ഹാജരാവുകയും എത്തിപ്പെടാൻ കഴിയാത്തവർ അവധിയെടുക്കുകയും ചെയ്ത് ഇടത് സംഘടനാ നേതാക്കളെ പ്രകോപിതരാക്കി. സർക്കാർ സ്പോൺസേർഡ് സമരമായിട്ടും സമരം വിജയിപ്പിക്കാൻ കൈയൂക്കിന്‍റെ സ്ഥിതിയിലേക്ക് പോകേണ്ടി വന്ന സാഹചര്യം കേരളത്തിൽ ആദ്യമാണെന്നും എൻജിഒ അസോസിയേഷൻ പ്രസ്താവനയിൽ പറഞ്ഞു.

പണിമുടക്കിൽ സ്തംഭിച്ച് ജില്ല

കണ്ണൂർ: കേന്ദ്രസർക്കാരിന്‍റെ തൊഴിലാളി വിരുദ്ധ നയങ്ങൾക്കെതിരേ കേന്ദ്ര ട്രേഡ് യൂണിയനുകൾ ആഹ്വാനം ചെയ്ത അഖിലേന്ത്യാ പണിമുടക്ക് കണ്ണൂർ ജില്ലയിൽ പൂർണം. വിദ്യാഭ്യാസസ്ഥാപനങ്ങളൊന്നും പ്രവർത്തിച്ചില്ല. സർക്കാർ ഓഫീസിൽ‌ ഹാജർ നില കുറവായിരുന്നു. സർക്കാർ ഓഫീസിൽ സമരക്കാർ എത്തി ജീവനക്കാരെ ഇറക്കിവിട്ട സംഭവങ്ങളും ഉണ്ടായിരുന്നു. കെഎസ്ആർടിസി ബസുകളൊന്നും സർവീസ് നടത്തിയില്ല. ഇന്നലെ രാവിലെ കണ്ണൂർ ഡിപ്പോയിൽ സർവീസ് നടത്താൻ ചിലർ തയാറായെങ്കിലും സിഐടിയു പ്രവർത്തകർ ഇവരെ തടയുകയായിരുന്നു. പണിമുടക്കിയ തൊഴിലാളികൾ കണ്ണൂർ, പയ്യന്നൂർ, തലശേരി, ഇരിട്ടി, തളിപ്പറന്പ്, മട്ടന്നൂർ നഗരങ്ങളിൽ പ്രകടനം നടത്തി. തോട്ടട ഗവ. ഐടിഐയിൽ എത്തിയ സമരാനുകൂലികൾ ജോലിക്കെത്തിയ അധ്യാപകരെയും ജീവനക്കാരെയും ഭീഷണിപ്പെടുത്തി. പോലീസെത്തിയാണ് സമരാനുകൂലികളെ പിന്തിരിപ്പിച്ചത്. ഇരിട്ടിയിൽ സ്ഥാപനങ്ങൾ അടപ്പിച്ചു; വീരാജ്പേട്ടയിൽ ജനജീവിതം സാധാരണ ഗതിയിൽ ഇരിട്ടി: ഇരിട്ടി ടൗണിൽ ദേശീയ പണിമുടക്ക് ദിനത്തിൽ തുറന്ന സ്ഥാപനങ്ങൾ സമരാനുകൂലികൾ അടപ്പിച്ചു. സമരാനുകൂലികൾ പ്രകടനമായെത്തി പോസ്റ്റ് ഓഫീസ് അടക്കമുള്ള കേന്ദ്ര-സംസ്ഥാന സർക്കാർ ഓഫീസുകൾ അടപ്പിക്കുകയായിരുന്നു. അതേസമയം, തൊട്ടടുത്ത പ്രദേശവും അയൽ സംസ്ഥാനവുമായ കർണാടകയിലെ വീരാജ്പേട്ടയിൽ പണിമുടക്ക് ബാധിച്ചില്ല. ഇവിടെ ജനജീവിതം സാധാരണ പോലെയായിരുന്നു. ഫെഡറൽ ബാങ്കിലേക്ക് പ്രകടനമായെത്തിയ സമരക്കാരെ കണ്ട് ബാങ്ക് ജീവനക്കാർ ഷട്ടർ അകത്ത് നിന്ന് പൂട്ടാൻ ശ്രമിച്ചെങ്കിലും സമരാനുകൂലികൾ ബാങ്കിനകത്തേക്ക് ഇരച്ചു കയറി ബാങ്കിന്‍റെ പ്രവർത്തനം നിർത്തിവയ്പ്പിക്കുകയായിരുന്നു. സബ് രജിസ്ട്രാർ ഓഫീസിലെ ചില ജീവനക്കാർ പണിമുടക്കനുകൂലികളുടെ ആവശ്യം നിരാകരിച്ചത് വാക്കേറ്റത്തിനിടയാക്കിയെങ്കിലും പിന്നീട് ഓഫീസ് അടക്കുകയായിരുന്നു. കീഴൂരിലെ മുത്തൂറ്റ് മൈക്രോ ഫിൻകോർപ്പുംഅടപ്പിച്ചു. ഇരിട്ടി ടൗണിൽ ആശുപത്രികളും മെഡിക്കൽ ഷോപ്പുകളും മാത്രമാണ് തുറന്നു പ്രവർത്തിച്ചത്. ഇരിട്ടി ഹൈസ്‌കൂൾ വിഭാഗം അധ്യാപകരും അനധ്യാപകരും എത്തിയതിനെ തുടർന്ന് തുറന്ന് പ്രവർത്തിച്ചു. ഹയർ സെക്കൻഡറി വിഭാഗത്തിൽ ജീവനക്കാർ ആരും എത്തിയിരുന്നില്ല. ഹൈസ്‌കൂൾ വിഭാഗത്തിൽ 42 പേരിൽ 29 ജീവനക്കാർ ജോലിക്ക് ഹാജരായി. ഹയർ സെക്കൻഡറി വിഭാഗത്തിൽ ആറുപേരാണ് പണിമുടക്കിയത്. വൈകുന്നേരം നാലിന് ശേഷമാണ് ഹൈസ്‌കൂൾ ഓഫീസ് അടച്ച് എല്ലാവരും പോയത്. ഇരിട്ടി താലൂക്ക് ഓഫീസിൽ മൂന്ന് ജീവനക്കാർ മാത്രമാണ് എത്തിയത്. സമരക്കലി ഭക്ഷണത്തോടും ഗവ. ബ്രണ്ണൻ സ്കൂളിൽ സമരാനുകൂലികൾ ഭക്ഷണം വലിച്ചെറിഞ്ഞു. ഇന്നലെ രാവിലെ 11 ഓടെയാണ് സംഭവം. ബ്രണ്ണൻ സ്കൂളിൽ കോൺഗ്രസ് അധ്യാപക സംഘടനയിൽപ്പെട്ടവരും ഇടത് അനുകൂലസംഘടനയിൽപ്പെട്ടവരുമായ എട്ട് അധ്യാപകർ ജോലിക്ക് ഹാജരായിരുന്നു. ഇതിനിടയിൽ, സമരാനുകൂലികൾ സ്കൂളിൽ എത്തുകയും പുറത്തുപോകുവാൻ ആവശ്യപ്പെടുകയുമായിരുന്നു. ഇതോടെ, അധ്യാപകർ ജോലി മതിയാക്കി പിരിഞ്ഞു പോകുവാൻ തയാറെടുക്കുകയായിരുന്നു. ഇതിനിടയിൽ, സ്കൂളിലെ പ്യൂണിന് ഒരു അധ്യാപിക താൻ കൊണ്ടുവന്ന ഉച്ചഭക്ഷണം നല്കുകയായിരുന്നു. എന്നാൽ, ഉച്ചഭക്ഷണം തട്ടിപ്പറിച്ച് സമരാനുകൂലി വലിച്ചെറിയുകയായിരുന്നു. പഴയങ്ങാടിയിൽ സമരക്കാർ വാഹനം തടഞ്ഞു; സമരാനുകൂലികളും പോലീസും വാക്കേറ്റവും പഴയങ്ങാടി: പഴയങ്ങാടിയിൽ സംയുക്ത തൊഴിലാളി യൂണിയന്‍റെ ന നേതൃത്വത്തിൽ വാഹനങ്ങൾ തടഞ്ഞതിനെ തുടർന്ന് സമരാനുകൂലികളും പോലീസും തമ്മിൽ വാക്കേറ്റവും ഉന്തും തള്ളും. പഴയങ്ങാടി ബസ് സ്റ്റാൻഡ് പരിസരത്ത് സിഐടിയുവിന്‍റെ നേതൃത്വത്തിലായിരുന്നു പണിമുടക്ക് വിവരം അറിയാതെ ഇതരസംസ്ഥാന ഡ്രൈവർമാർ ഓടിച്ച നാഷണൽ പെർമിറ്റ് ലോറികൾ ഉൾപ്പടെയുള്ള വാഹനങ്ങളും സ്വകാര്യ വാഹനങ്ങളുമായിരുന്നു തടഞ്ഞത്. ഇതേതുടർന്ന് യാത്രക്കാരും സമരക്കാരും തമ്മിൽ വാക്കേറ്റമുണ്ടായി. വിവരമറിഞ്ഞ് പഴയങ്ങാടി എസ്ഐ കെ. സുഹൈലിന്‍റെ നേതൃത്വത്തിലുള്ള പോലീസ് സ്ഥലത്തെത്തി വാഹനങ്ങളെ തടയരുതെന്ന് നിർദേശിച്ചെങ്കിലും സമരക്കാർ അംഗീകരിച്ചില്ല. ഇതോടെ സമരക്കാരും പോലീസും തമ്മിൽ വാക്കേറ്റമുണ്ടാകുകയും ഉന്തും തള്ളിലും കലാശിക്കുകയുമായിരുന്നു. തുടർന്ന് പോലീസ് സമരക്കാരുമായി ചർച്ച നടത്തുക‍യും ഒരു മണിക്കൂറിന് ശേഷം തടഞ്ഞു വച്ച സ്വകാര്യ വാഹനങ്ങളെ പോകാൻ സമരക്കാർ അനുവദിക്കുകയുമായിരുന്നു. ബൈപാസിൽ വാഹനങ്ങൾ തടഞ്ഞു മാഹി: മുഴപ്പിലങ്ങാട്-മാഹി ബൈപാസിൽ ചരക്ക് ലോറികൾ സമരക്കാർ തടഞ്ഞു. പെരിങ്ങാടി സിഗ്നൽ പരിസരത്താണ് വാഹനങ്ങളെ പണിമുടക്കനുകൂലികൾ തടഞ്ഞത്. ഒരു മണിക്കൂറിനകം ബൈപാസിന്‍റെ ഇരുവശങ്ങളിലും ചരക്ക് ലോറികളുടെ നീണ്ട നിര രൂപപ്പെട്ടു. പണിമുടക്കിനെ കുറിച്ചറിയാതെ വാഹനം ഓടിച്ചു വന്ന അന്യസംസ്ഥാനങ്ങളിൽ നിന്നുള്ള ലോറികളായിരുന്നു തടഞ്ഞിട്ടത്. വാഹനം തടഞ്ഞത് ലോറി ജീവനക്കാർ ചോദ്യം ചെയ്തതിനെ തുടർന്ന് വാക്കേറ്റമുണ്ടായി. വിവരമറിഞ്ഞ് പള്ളൂർ എസ്ഐ വി.പി. സുരേഷിന്‍റെ നേതൃത്വത്തിലുള്ള പോലീസ് സ്ഥലത്തെത്തി വാഹനം തടഞ്ഞവരുമായി ചർച്ച നടത്തി പ്രശ്നം രമ്യമായി പരിഹരിക്കുകയായിരുന്നു. തുടർന്ന ചരക്ക് ലോറികളെ പോകാൻ അനുവദിച്ചു. മാഹിയിൽ സ്കൂൾ വിട്ടില്ല; അധ്യാപകരെ സമരക്കാർ തടഞ്ഞുവച്ചു സ്കൂൾ വിടണമെന്ന സമരാനുകൂലികളുടെ ആവശ്യം അംഗീകരിക്കാത്തതിനെ തുട‌ർന്ന് സ്കൂളിൽ സംഘർഷം. പന്തക്കൽ ഐ.കെ. കുമാരൻ ഹയർസെക്കൻഡറി സ്കൂളിലായിരുന്നു സിപിഎം പ്രവർത്തകരും വൈസ് പ്രിൻസിപ്പലും തമ്മിൽ വാക്കേറ്റവും സംഘർഷവുമുണ്ടായത്. രാവിലെ ക്ലാസ് ആരംഭിച്ചതിന് ശേഷം സിപിഎം പ്രവർത്തകർ സ്കൂളിലെത്തി വൈസ് പ്രിൻസിപ്പൽ ഷീബയുമായി സംസാരിച്ച് ക്ലാസ് വിടണമെന്ന് ആവശ്യപ്പെട്ടു. എന്നാൽ, മാഹി റീജണൽ അഡ്മിനിസ്ട്രേറ്ററുടെ അനുമതി ഉണ്ടെങ്കിൽ മാത്രമേ സ്കൂൾ വിടാൻ പറ്റൂ എന്ന് വൈസ് പ്രിൻസിപ്പൽ അറിയിച്ചു. ഇതംഗീകരിക്കാൻ സമരക്കാർ തയാറായില്ല. ഇതോടെ സ്കൂൾ പരിസരത്ത് കൂടുതൽ സമരാനുകൂലികൾ സംഘടിപ്പച്ചെത്തി. മാഹി പോലീസ് സൂപ്രണ്ട് ജി. ശരവണന്‍റെ പന്തക്കൽ എസ്ഐ പി. ഹരിദാസൻ, പള്ളൂർ എസ്ഐ വി.പി. സുരേഷ് ബാബു എന്നിവരടക്കമുള്ള പോലീസും സ്ഥലത്തെത്തി. സ്കൂൾ സാധാരണ പോലെ വൈകുന്നേരം നാലുവരെ പ്രവർത്തിച്ച ശേഷമാണ് വിട്ടത്. സ്കൂൾ വിട്ടതിനു ശേഷം സ്വന്തം വാഹനങ്ങളിലെത്തിയ അധ്യാപകരും ജീവനക്കാരും തിരിച്ചുപോകുന്നത് സമരക്കാർ തടഞ്ഞു. ഇവരെ പോലീസ് വാഹനത്തിൽ സ്കൂളിൽ നിന്നും മാറ്റാൻ ശ്രമിച്ചെങ്കിലും സമരക്കാർ പോലീസ് വാഹനം തടഞ്ഞ് മുദ്രാവാക്യം മുഴക്കി. ഇതോടെ സമരക്കാരെ പോലീസ് ബലം പ്രയോഗിച്ച് മാറ്റാൻ ശ്രമിച്ചത് ഉന്തിലും തള്ളിലും കലാശിച്ചു. സമരക്കാരെ ബലമായി മാറ്റിയാണ് അധ്യാപകരെയും ജീവനക്കാരെയും പോലീസ് സ്കൂളിൽ നിന്നും പുറത്തെത്തിച്ചത്. ഇതോടെ സമരക്കാരും പിരിഞ്ഞു പോകുകയായിരുന്നു.

സയൻസ് ഓൺ വീൽസ് പ്രോഗ്രാം സമാപിച്ചു

ചെമ്പേരി: സ്കൂൾ വിദ്യാർഥികളിൽ ശാസ്ത്ര അഭിരുചി വളർത്തി സയൻസ് പഠനം എളുപ്പമാക്കുന്നതിനായി ചെമ്പേരി റോട്ടറി ക്ലബിന്‍റെ ആഭിമുഖ്യത്തിൽ മലയോര മേഖലയിലെ വിവിധ സ്കൂളുകളിലായി നടത്തിവന്ന സയൻസ് ഓൺ വീൽസ് പ്രോഗ്രാം 'വിജ്ഞാൻ രഥ് ' സമാപിച്ചു. കഴിഞ്ഞ രണ്ടാഴ്ചകളിലായി മലയോരത്തെ 21 സ്കൂളുകളിലാണ് ശാസ്ത്ര പരീക്ഷണ ബോധവത്കരണ പരിപാടി നടത്തിയത്. തമിഴ്നാട്ടിലെ വിരുതുനഗർ റോട്ടറി ക്ലബ് മെംബറായ ഇദയം ഓയിൽ കമ്പനി ഉടമ പി.ഡി.ജി. മുത്തു സ്പോൺസർ ചെയ്ത് വടിവേലു രാമയ്യ ചെയർമാനായി ഫുഡ് സയന്‍റിസ്റ്റ് ഡോ. പശുപതി ആരംഭിച്ചതാണ് സയൻസ് ഓൺ വീൽസ് പ്രോഗ്രാം. കഴിഞ്ഞ പതിനഞ്ച് വർഷങ്ങൾക്കിടയിൽ തമിഴ്നാട്ടിലും കർണാടകയിലുമായി ഇരുപത്തഞ്ച് ലക്ഷത്തോളം വിദ്യാർഥികൾക്ക് മുന്നിൽ അവതരിപ്പിച്ച പരിപാടി ചെമ്പേരി റോട്ടറി ക്ലബാണ് കേരളത്തിൽ ആദ്യമായി മലയോര ഗ്രാമമായ ചെമ്പേരിയിൽ എത്തിക്കുന്നത്. ചെമ്പേരി നിർമല ഹൈസ്കൂളിൽ നടന്ന സമാപന ചടങ്ങിൽ ചെമ്പേരി റോട്ടറി ക്ലബ് പ്രസിഡന്‍റ് മാർട്ടിൻ മാത്യു അധ്യക്ഷത വഹിച്ചു. റോട്ടറി ക്ലബ് പ്രോഗ്രാം ഡയറക്ടർ സുനിൽ, സയൻസ് ഓൺ വീൽസ് കോ ഓർഡിനേറ്റർമാരായ അറിവരശൻ, നവീൻകുമാർ, സതീഷ് കുമാർ എന്നിവർ നേതൃത്വം നൽകി.

പുതിയ പാക്കേജ് ഉടൻ പ്രഖ്യാപിക്കണം: സോണി സെബാസ്റ്റ്യൻ

ആലക്കോട്: വയനാട്-കരിന്തളം 400 കെവി വൈദ്യുത ലൈൻ കടന്നുപോകുമ്പോൾ വീടും സ്ഥലവും വിളകളും നഷ്ടപ്പെടുന്ന കൃഷിക്കാർക്ക് വേണ്ടി വൈദ്യുതി മന്ത്രി കെ. കൃഷ്ണൻകുട്ടി പ്രഖ്യാപിച്ച നഷ്ടപരിഹാര പാക്കേജിലെ അപാകതകൾ പരിഹരിച്ച് പുതിയ പാക്കേജ് ഉടൻ പ്രഖ്യാപിക്കണമെന്ന് കെപിസിസി ജനറൽ സെക്രട്ടറി സോണി സെബാസ്റ്റ്യൻ ആവശ്യപ്പെട്ടു. ഭൂമിയും വിളകളും വീടും നഷ്ടപ്പെടുന്ന കർഷകരെ പൂർണമായി വിശ്വാസത്തിൽ എടുക്കാതെ ഏകപക്ഷീയമായി പ്രഖ്യാപിച്ച നഷ്ടപരിഹാര പാക്കേജിനെക്കുറിച്ച് വ്യാപകമായ പരാതികളാണ് ഉയർന്നുവന്നിരിക്കുന്നത്. ഈ സാഹചര്യത്തിൽ ഭൂമിയും വിളകളും വീടും നഷ്ടപ്പെടുന്ന കർഷകരുടെ ഭൂമിക്കും വിളകൾക്കും അതാത് പ്രദേശത്തെ ന്യായവില ഉറപ്പാക്കാനുളള നടപടിയാണ് സർക്കാർ സ്വീകരിക്കേണ്ടതെന്ന് സോണി സെബാസ്റ്റ്യൻ പറഞ്ഞു. മുന്നോട്ടുവച്ച ആവശ്യങ്ങൾ പരിഗണിക്കാതെ ഏകപക്ഷീയമായ പാക്കേജ് പ്രഖ്യാപനം അടിച്ചേൽപ്പിക്കുന്നത് ഒരു കാരണവശാലും അംഗീകരിക്കാൻ കഴിയില്ലന്നും അദ്ദേഹം പറഞ്ഞു. ഭൂമി നഷ്ടപ്പെടുന്ന കർഷകർക്ക് വിളകൾക്കും ഭൂമിക്കും വീടിനും മതിയായ നഷ്ടപരിഹാരം ഉറപ്പുവരുത്താതെ ഭൂമിയിൽ കടന്നു കയറി നിർമാണ പ്രവർത്തികൾ ചെയ്യാനുള്ള കെഎസ്ഇബി ഉദ്യോഗസ്ഥരുടെ ശ്രമം കർഷകരെ അണിനിരത്തി നേരിടും. കൃഷിക്കാരെ വഴിയാധാരമാക്കുന്ന കെഎസ്ഇബിയുടെ നടപടിയെ ഒരു കാരണവശാലും അംഗീകരിക്കാൻ കഴിയില്ല. വയനാട് മുതൽ കാസർഗോഡ് വരെ 100 കണക്കിന് കൃഷിക്കാരെ ബാധിക്കുന്ന പ്രശ്നത്തിൽ സർക്കാർ അടിയന്തരമായി ഇടപെട്ട് കൂട്ടായ ചർച്ചയ്ക്ക് ശേഷം മതിയായ നഷ്ടപരിഹാര പാക്കേജ് പ്രഖ്യാപിക്കണമെന്നും സോണി സെബാസ്റ്റ്യൻ ആവശ്യപ്പെട്ടു.

പണിമുടക്കിൽ സ്തംഭിച്ച് ജില്ല

കണ്ണൂർ: കേന്ദ്രസർക്കാരിന്‍റെ തൊഴിലാളി വിരുദ്ധ നയങ്ങൾക്കെതിരേ കേന്ദ്ര ട്രേഡ് യൂണിയനുകൾ ആഹ്വാനം ചെയ്ത അഖിലേന്ത്യാ പണിമുടക്ക് കണ്ണൂർ ജില്ലയിൽ പൂർണം. വിദ്യാഭ്യാസസ്ഥാപനങ്ങളൊന്നും പ്രവർത്തിച്ചില്ല. സർക്കാർ ഓഫീസിൽ‌ ഹാജർ നില കുറവായിരുന്നു. സർക്കാർ ഓഫീസിൽ സമരക്കാർ എത്തി ജീവനക്കാരെ ഇറക്കിവിട്ട സംഭവങ്ങളും ഉണ്ടായിരുന്നു. കെഎസ്ആർടിസി ബസുകളൊന്നും സർവീസ് നടത്തിയില്ല. ഇന്നലെ രാവിലെ കണ്ണൂർ ഡിപ്പോയിൽ സർവീസ് നടത്താൻ ചിലർ തയാറായെങ്കിലും സിഐടിയു പ്രവർത്തകർ ഇവരെ തടയുകയായിരുന്നു. തട്ടുകടകൾ പോലും പ്രവർത്തിച്ചിരുന്നില്ല. പഴയങ്ങാടിയിൽ ദേശീയപാതയിൽ ചരക്കുവാഹനങ്ങൾ സമരാനുകൂലികൾ തടഞ്ഞത് പോലീസും പ്രതിഷേധക്കാരും തമ്മിൽ വാക്കേറ്റത്തിനിടയാക്കി. പണിമുടക്കിയ തൊഴിലാളികൾ കണ്ണൂർ, പയ്യന്നൂർ, തലശേരി, ഇരിട്ടി, തളിപ്പറന്പ്, മട്ടന്നൂർ നഗരങ്ങളിൽ പ്രകടനം നടത്തി. തോട്ടട ഗവ. ഐടിഐയിൽ എത്തിയ സമരാനുകൂലികൾ ജോലിക്കെത്തിയ അധ്യാപകരെയും ജീവനക്കാരെയും ഭീഷണിപ്പെടുത്തി. പോലീസെത്തിയാണ് സമരാനുകൂലികളെ പിന്തിരിപ്പിച്ചത്. പഴയങ്ങാടിയിൽ സമരക്കാർ വാഹനം തടഞ്ഞു; സമരാനുകൂലികളും പോലീസും വാക്കേറ്റവും പഴയങ്ങാടി: പഴയങ്ങാടിയിൽ സംയുക്ത തൊഴിലാളി യൂണിയന്‍റെ ന നേതൃത്വത്തിൽ വാഹനങ്ങൾ തടഞ്ഞതിനെ തുടർന്ന് സമരാനുകൂലികളും പോലീസും തമ്മിൽ വാക്കേറ്റവും ഉന്തും തള്ളും. പഴയങ്ങാടി ബസ് സ്റ്റാൻഡ് പരിസരത്ത് സിഐടിയുവിന്‍റെ നേതൃത്വത്തിലായിരുന്നു പണിമുടക്ക് വിവരം അറിയാതെ ഇതരസംസ്ഥാന ഡ്രൈവർമാർ ഓടിച്ച നാഷണൽ പെർമിറ്റ് ലോറികൾ ഉൾപ്പടെയുള്ള വാഹനങ്ങളും സ്വകാര്യ വാഹനങ്ങളുമായിരുന്നു തടഞ്ഞത്. ഇതേതുടർന്ന് യാത്രക്കാരും സമരക്കാരും തമ്മിൽ വാക്കേറ്റമുണ്ടായി. വിവരമറിഞ്ഞ് പഴയങ്ങാടി എസ്ഐ കെ. സുഹൈലിന്‍റെ നേതൃത്വത്തിലുള്ള പോലീസ് സ്ഥലത്തെത്തി വാഹനങ്ങളെ തടയരുതെന്ന് നിർദേശിച്ചെങ്കിലും സമരക്കാർ അംഗീകരിച്ചില്ല. ഇതോടെ സമരക്കാരും പോലീസും തമ്മിൽ വാക്കേറ്റമുണ്ടാകുകയും ഉന്തും തള്ളിലും കലാശിക്കുകയുമായിരുന്നു. തുടർന്ന് പോലീസ് സമരക്കാരുമായി ചർച്ച നടത്തുക‍യും ഒരു മണിക്കൂറിന് ശേഷം തടഞ്ഞു വച്ച സ്വകാര്യ വാഹനങ്ങളെ പോകാൻ സമരക്കാർ അനുവദിക്കുകയുമായിരുന്നു. ശ്രീകണ്ഠപുരം: പണിമുടക്കിയ തൊഴിലാളി സംഘടനകൾ സംയുക്തസമരസമിതിയുടെ ആഭിമുഖ്യത്തിൽ മണ്ഡലം കേന്ദ്രങ്ങളിലും പഞ്ചായത്ത് കേന്ദ്രങ്ങളിലും പ്രകടനം നടത്തി ശ്രീകണ്ഠപുരത്ത് നടന്ന പ്രകടനത്തിന് നേതാക്കളായ എം.സി. ഹരിദാസൻ, സി. രവീന്ദ്രൻ, പി. മാധവൻ, സി. സന്തോഷ്, രാമചന്ദ്രൻ, പി. ഗോവിന്ദൻ, ടി. ഗീത എന്നിവരും മലപ്പട്ടത്ത് ഇ.വി. ഉണ്ണികൃഷ്ണൻ, എ. പുരുഷോത്തമൻ എന്നിവരും യുഡിടിഎഫിന്‍റെ ആഭിമുഖ്യത്തിൽ ശ്രീകണ്ഠപുരത്ത് നടത്തിയ പ്രകടനത്തിന് പി.ടി. കുര്യാക്കോസ്, എൻ.പി. ബക്കർ ഹാജി, കെ. ഇബ്രാഹിം എന്നിവരും നേതൃത്വം നൽകി. ശ്രീകണ്ഠപുരത്തെ ഒഴിഞ്ഞ റോഡുകളിൽ കുട്ടികൾ സ്കേറ്റിംഗും സൈക്കിളിംഗും നടത്തി.

ശുചിമുറി മാലിന്യം തോട്ടിലേക്ക് ഒഴുക്കി; ഹോട്ടല്‍ നഗരസഭ അടപ്പിച്ചു

തളിപ്പറമ്പ്: പൊതുപണിമുടക്കിന്‍റെ മറവില്‍ പട്ടാപ്പകല്‍ ഹോട്ടലിലെ കക്കൂസ് മാലിന്യം തോട്ടിലേക്ക് പന്പ് ചെയ്ത് ഒഴുക്കി. സംഭവത്തെ തുടർന്ന നഗരസഭാധികൃതർ ഹോട്ടൽ അടപ്പിച്ചു. ഇന്നലെ ഉച്ചയോടെ തളിപ്പറന്പ് ചിറവക്കിലെ ബാംബു ഫ്രഷ് റസ്റ്റോറന്‍റിലെ ശുചിമുറി മാലിന്യമാണ് കീഴാറ്റൂർ തോട്ടിലേക്ക് ഒഴുക്കിവിട്ടത്. കടുത്ത ദുർഗന്ധത്തെ തുടർന്ന് പ്രദേശവാസികൾ അന്വേഷിച്ചപ്പോഴാണ് ഹോട്ടലിലെ ശുചിമുറി മാലിന്യം ഒഴുക്കി വിട്ടതാണെന്ന് മനസിലായത്. ഇതോടെ കീഴാറ്റൂരില്‍ നിന്നും എത്തിയ നാട്ടുകാര്‍ പ്രതിഷേധവുമായി ഹോട്ടൽ വളയുകയായിരുന്നു. നഗരസഭാ വൈസ് ചെയര്‍മാന്‍ കല്ലിങ്കീല്‍ പദ്മനാഭന്‍, സ്ഥിരം സമിതി അധ്യക്ഷന്‍മാരായ കെ. നബീസബീവി, പി.പി. മുഹമ്മദ്‌ നിസാര്‍, കൗണ്‍സിലര്‍മാരായ കെ.എം. ലത്തീഫ്, കെ. രമേശന്‍, സിപിഎം നോര്‍ത്ത് ലോക്കല്‍ സെക്രട്ടറി കെ.ബിജുമോന്‍ എന്നിവരും സ്ഥലത്തെത്തിയിരുന്നു. തളിപ്പറന്പ് പോലീസും സ്ഥലത്തെത്തി. സെപ്റ്റിക് ടാങ്ക് പ്രശ്‌നത്തില്‍ ശാശ്വതപരിഹാരം കണ്ടാൽ മാത്രമേ ഹോട്ടൽ തുറന്നു പ്രവർത്തിപ്പിക്കാൻ അനുവദിക്കുകയുള്ളൂവെന്ന് നഗരസഭ വൈസ്ചെയർമാൻ കല്ലിങ്കീൽ പദ്മനാഭൻ അറിയിച്ചു. റസ്റ്റോറന്‍റ് ഉടമയ്ക്കെതിരേ കേസ് ഹോട്ടലിലെ ശുചിമുറി മാലിന്യം തോട്ടിലേക്ക് ഒഴുക്കി വിട്ട സംഭവത്തിൽ ബാംബു ഫ്രഷ് റസ്റ്റോറന്‍റ് ഉടമക്കെതിരേ പോലീസ് കേസെടുത്തു. സിപിഎം തളിപ്പറന്പ് നോർത്ത് ലോക്കൽ സെക്രട്ടറി കെ. ബിജുമോൻ നൽകിയ പരാതിയിലാണ് നടപടി. ആറുമാസം തടവോ പിഴയോ രണ്ടും കൂടിയോ ശിക്ഷ ലഭിക്കാവുന്ന കുറ്റമാണ് ഹോട്ടലുടമ ചെയ്തിരിക്കുന്നത്.

കള്ളത്തോക്ക് നിര്‍മാണം: ആലക്കോട് സ്വദേശി അറസ്റ്റില്‍

രാജപുരം: കള്ളത്തോക്ക് നിര്‍മാണകേന്ദ്രത്തില്‍ പോലീസ് നടത്തിയ റെയ്ഡില്‍ ഒരാള്‍ അറസ്റ്റില്‍. കള്ളാര്‍ കോട്ടക്കുന്ന് കൈക്കളംകല്ലില്‍ താമസിക്കുന്ന കണ്ണൂര്‍ ആലക്കോട് കാര്‍ത്തികപുരം എരുത്തമാട സ്വദേശി എം.കെ.അജിത്കുമാര്‍ (55) ആണ് അറസ്റ്റിലായത്. താമസസ്ഥലത്തുനിന്ന് രണ്ടു തോക്കുകളും നിര്‍മാണത്തിലിരിക്കുന്ന ഒരു തോക്കും നിര്‍മാണസാമഗ്രികളും പിടികൂടി. പ്രതിയുടെ സഹായികളായിരുന്ന രാജപുരം പുഞ്ചക്കരയിലെ സന്തോഷ്, പരപ്പയിലെ ഷാജി എന്നിവര്‍ക്കെതിരെ രാജപുരം പോലീസ് കേസെടുത്തു. ഇവര്‍ ഒളിവിലാണ്. ഒരുമാസം മുമ്പാണ് പ്രതി ഇവിടെ താമസം ആരംഭിച്ച് ആവശ്യക്കാര്‍ക്ക് തോക്ക് നിര്‍മിച്ചുകൊടുക്കാന്‍ തുടങ്ങിയതെന്ന് പോലീസ് പറഞ്ഞു. നാടന്‍ ഒറ്റക്കുഴല്‍ തോക്കാണ് നിര്‍മിച്ചുനല്‍കിയിരുന്നത്. കഴിഞ്ഞദിവസം വൈകുന്നേരമാണ് ജില്ലാ പോലീസ് മേധാവിയുടെ നിര്‍ദേശപ്രകാരം കാഞ്ഞങ്ങാട്, ബേക്കല്‍ ഡിവൈഎസ്പിമാരുടെ സ്‌ക്വാഡുകളും രാജപുരം പോലീസ് ചേര്‍ന്ന് ഈ വീട്ടില്‍ റെയ്ഡ് നടത്തിയത്.

മഴവെള്ളത്തിനൊപ്പം തോട്ടിൽ പത ഉയർന്നു

ഇരിട്ടി: മഴ പെയ്തതിനു പിന്നാലെ തോട് വെള്ളപ്പതയോടെ നിറഞ്ഞൊഴുകിയത് പ്രദേശവാസികളെ ആശങ്കയിലാക്കുന്നു. ഉളിക്കൽ പഞ്ചായത്തിലെ നെല്ലിക്കാംപൊയിലിന് സമീപത്തെ ചുള്ളിയോട് തോടാണ് വെള്ള നിറത്തിലുള്ള പതയാൽ നിറഞ്ഞൊഴുകിയത്. ഇന്നലെ വൈകുന്നേരമാണ് തോട്ടിൽ അസാധാരണമായ നിലയിലുള്ള പത പ്രദേശത്തുകാരുടെ ശ്രദ്ധയിൽപ്പെട്ടത്. പാറക്കൽ നിന്ന് ആരംഭിക്കുന്ന തോട്ടിൽ ചുള്ളിയോട് മുതൽ ചെട്ട്യാർപീടിക പഴശി പദ്ധതി ജലസംഭരണി പ്രദേശം വരെ രണ്ടുകിലോമീറ്ററോളം ദൂരത്തിലാണ് പത പ്രത്യക്ഷപ്പെട്ടത്. വ്യവസായ സ്ഥാപനങ്ങളില്ലാത്ത മേഖലയിൽ തോട് പതഞ്ഞതിന്‍റെ കാരണം വ്യക്തമല്ല. സംഭവമറിഞ്ഞ് ആരോഗ്യവകുപ്പ് അധികൃതരും പഞ്ചായത്തധികൃതരും പോലീസും സ്‌ഥലത്തെത്തി. ജനങ്ങളോട് ജാഗ്രത പുലർത്താൻ നിർദേശിച്ചിട്ടുണ്ട്. ഏറെ നേരത്തെ പതഞ്ഞ് ഒഴുകലിനുശേഷം തോട് സാധാരണ നിലയിലായിട്ടുണ്ട്. പത ഉയരാനുണ്ടായ കാരണം എന്താണെന്ന് വ്യക്തമായിട്ടില്ല.

ഇരിട്ടി നഗരസഭാധ്യക്ഷ പരീക്ഷാച്ചൂടിലാണ്...

ബിജു പാരിക്കാപള്ളി ഇരിട്ടി: ഇരിട്ടി നഗരസഭാ ചെയർപേഴ്സൺ കെ. ശ്രീലത ഇന്നുമുതൽ പരീക്ഷ തിരക്കിലാണ്. പഠനകാലത്ത് പൂർത്തീകരിക്കാൻ കഴിയാതെപോയ സ്വപ്നങ്ങൾ സാക്ഷാത്കരിക്കുന്ന തിരക്കിൽ. സാക്ഷരതാ മിഷൻ പൊതുവിദ്യാഭ്യാസ വകുപ്പുമായി ചേർന്ന് നടത്തുന്ന ഹയർ സെക്കൻഡറി രണ്ടാം വർഷ തുല്യതാ പരീക്ഷയുടെ എട്ടാമത്തെ ബാച്ചിൽ നഗരസഭാ അധ്യക്ഷയും ഇന്നുമുതൽ പരീക്ഷ എഴുതി തുടങ്ങും. ഇരിട്ടി കീഴൂർ മഹാത്മ കോളജിൽ 1991-92 ബാച്ചിൽ പ്രീഡിഗ്രി ഒന്നാം വർഷം പഠിക്കുമ്പോൾ വിവാഹം കഴിഞ്ഞതോടെ പഠനം മുടങ്ങുകയായിരുന്നു. 35 വർഷത്തെ ഇടവേളക്ക് ശേഷമാണ് പഴയ ആഗ്രഹങ്ങൾ പൊടിതട്ടിയെടുത്ത് അധ്യക്ഷ എത്തുന്നത്. ആദ്യവർഷ പരീക്ഷയിൽ 70 ശതമാനത്തിന് മുകളിൽ മാർക്ക് നേടാൻ കഴിഞ്ഞതിന്‍റെ ആത്മവിശ്വാസം ഉണ്ടെങ്കിലും ടെൻഷനും ഇല്ലാതില്ല. ഒന്നാംവർഷ പരീക്ഷയിൽ ഡബിൾ പാസ് നേടിയതിനാൽ വിജയം ഉറപ്പാണ്. വിവാഹം കഴിഞ്ഞും പഠിക്കണമെന്ന ആഗ്രഹം ഉണ്ടായിരുന്നെങ്കിലും കുട്ടി ജനിച്ചതോടെ പഠനമെന്ന സ്വപ്‍നം മാറ്റിവെച്ച് കുടുംബമെന്ന സ്വപ്നത്തിനൊപ്പം സഞ്ചരിക്കുകയായിരുന്നു. ഇരിട്ടി നഗരസഭാ ചെയർപേഴ്സണായി ചുമതല ഏറ്റെടുത്ത ആദ്യദിവസം കാണാൻ വന്നവരുടെ കൂട്ടത്തിലുണ്ടായിരുന്ന സാക്ഷരത പ്രേരക് ഷൈമയാണ് തുടർപഠനത്തിന്‍റെ ആദ്യപ്രേരണ. ഭർത്താവും കുട്ടികളും കൂടെനിന്നതോടെ രണ്ടാം ഘട്ടം പിന്നിട്ടു. നഗരസഭയിലെ തിരക്കുകൾ കാരണം അല്പം കാലതാമസം നേരിട്ടു. നഗരസഭയുടെ സാക്ഷരതാ സമിതി ചെയർപേഴ്സൺ എന്ന നിലയിൽ പ്രവർത്തനങ്ങൾ അടുത്തറിഞ്ഞതോടെ പഠിക്കണമെന്ന താത്പര്യം ഉറപ്പിച്ചു. മറ്റു കൗൺസിലർമാരും ജീവനക്കാരും നല്ല പിന്തുണയാണ് നൽകുന്നത്. തിരക്കുകൾക്കിടയിലും ഒഴിവാക്കാൻ കഴിയാത്ത ക്ലാസുകളിൽ പഠിതാവായി എത്തും. ഇരിട്ടി നഗരസഭാ സ്റ്റാൻഡിംഗ് കമ്മറ്റി ചെയർമാൻ കെ. സോയയും നഗരസഭയിലെ എട്ട് ആശാവർക്കർമാരും ചെയർപേഴ്സണൊപ്പം പരീക്ഷ എഴുതുന്നുണ്ട്. ഇന്ന് നടക്കുന്ന പരീക്ഷയിൽ ഇരിട്ടി നഗരസഭയുടെ പരിധിയിൽ 56 പേരാണ് രണ്ടാം വർഷ തുല്യതാ പരീക്ഷ എഴുതുന്നത്. പരീക്ഷ എഴുതുന്നതിൽ ഏറ്റവും മുതിർന്ന വ്യക്തി ആറളം പഞ്ചായത്തിലെ 54 നാലുകാരനായ കെ. വിശ്വംഭരനാണ്. 23 വയസുള്ളതാണ് പ്രായം കുറഞ്ഞ പഠിതാവ്. ചാവശേരി ഹയർ സെക്കൻഡറി സ്കൂളിൽ ജൂലൈ 28 വരെയാണ് പരീക്ഷ.

കോരിക്കൊമ്പനെ കാട്ടിലേക്ക് തുരത്തി

ഇരിട്ടി: ആറളം പുനരധിവാസ മേഖലയിലിറങ്ങിയ കോരിക്കൊമ്പൻ എന്ന കാട്ടാനയെ വനത്തിലേക്ക് തുരത്തി. കാട്ടാനകളെ തുരത്തുന്നതിന്‍റെ ഭാഗമായി കഴിഞ്ഞ ദിവസം നടത്തിയ ദൗത്യത്തിലാണ് ആനയെ കാട്ടിലേക്ക് തുരത്തിയത്. കൊട്ടിയൂർ റേഞ്ചർ നിതിൻ രാജ്, ആർആർടി ഡെപ്യൂട്ടി റേഞ്ചർ ഷൈനികുമാർ എന്നിവരുടെ നേതൃത്വത്തിൽ 25 അംഗ ദൗത്യസംഘം പങ്കെടുത്തു. ഫാം ബ്ലോക്ക് ആറിൽ കൈതക്കൊല്ലി ഭാഗത്തെ ജനവാസ കേന്ദ്രത്തോട് ചേർന്നുള്ള വട്ടക്കാടിനുള്ളിൽ തമ്പടിച്ച കോരിക്കൊമ്പനെ തുരത്തിയത്. പ്രതികൂല കാലാവസ്ഥയെ അവഗണിച്ച് മണിക്കൂറുകൾ നീണ്ട പരിശ്രമത്തിനൊടുവിലാണ് ആനയെ വട്ടക്കാട് വഴി താളിപ്പാറയിലേക്കും തുടർന്ന് കോട്ടപ്പാറ ഭാഗത്ത് സ്ഥാപിച്ചിട്ടുള്ള സോളാർ തൂക്കുവേലി കടത്തി ഉരുപ്പുകുന്ന് വനഭാഗത്തേക്ക് കടത്തിവിട്ടത്. ദൗത്യത്തിൽ ആർആർടി ഇരിട്ടി, കീഴ്പള്ളി, മണത്തണ, തോലമ്പ്ര, ആറളം വൈൽഡ് ലൈഫ്, നരിക്കടവ്, ആറളം സെക്ഷൻ എന്നിവിടങ്ങളിലെ ജീവനക്കാരും പങ്കെടുത്തു.

മസ്ജിദുകൾ കേന്ദ്രീകരിച്ച് കവര്‍ച്ച: പ്രതി ആന്ധ്രയില്‍ അറസ്റ്റില്‍

കാസര്‍ഗോഡ്: മസ്ജിദുകൾ മാത്രം കേന്ദ്രീകരിച്ച് കവര്‍ച്ച നടത്തുന്ന കുപ്രസിദ്ധ മോഷ്ടാവ് ആന്ധ്രയില്‍ അറസ്റ്റില്‍. ആന്ധ്രാപ്രദേശ് വെസ്റ്റ് ഗോദാവരി അക്കിവിട് സ്വദേശി മുഹമ്മദ് സല്‍മാന്‍ അഹമ്മദ് (34) ആണ് അറസ്റ്റിലായത്. ജൂണ്‍ 24ന് കാസര്‍ഗോഡ് ചൂരിയിലെ സലഫി മസ്ജിദില്‍ നിന്ന് 3.10 ലക്ഷം രൂപയും രണ്ടു പവന്‍ സ്വര്‍ണവും ഇയാള്‍ കവര്‍ന്നിരുന്നു. കണ്ണൂര്‍ പാനൂര്‍, മലപ്പുറം, പാലക്കാട്, കസബ, ഏലത്തൂര്‍ പോലീസ് സ്റ്റേഷൻ പരിധിയിലെ മസ്ജിദിൽ മോഷണം നടത്തിയ കേസുകളില്‍ പ്രതിയാണ് ഇയാള്‍. പല സംഭവത്തിലും പരാതിയില്ല. കളവു ചെയ്ത പണം കോഴിക്കോട് ബാറില്‍ കൂട്ടുകാരുടെ കൂടെ അടിച്ചു പൊളിച്ചു തീര്‍ക്കുകയാണ് ശീലം. സിസിടിവി കേന്ദ്രികരിച്ച് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. കോഴിക്കോട് ആണ് ഇയാള്‍ സാധാരണ ഉണ്ടാകാറുള്ള സ്ഥലം എന്ന് മനസിലാക്കി കണ്ടെത്താന്‍ ശ്രമം നടത്തിയെങ്കിലും പിടികൂടാനായില്ല. തുടര്‍ന്ന് നടത്തിയ അന്വേഷണത്തില്‍ ഇയാള്‍ സ്വദേശമായ ആന്ധ്രായിലേക്ക് പോയിട്ടുണ്ടാകും എന്ന നിഗമനത്തില്‍ അന്വേഷണ സംഘം പ്രതിയുടെ താമസസ്ഥലത്തെത്തി ആന്ധ്രാ പോലീസിന്‍റെ സഹായത്തോടെ പിടികൂടുകയായിരുന്നു. കാസര്‍ഗോഡ് ടൗണ്‍ എസ്‌ഐ ജോജോ ജോര്‍ജ് എസ്‌സിപിമാരായ പി.സതീശന്‍, കെ.വി.രതീഷ്‌കുമാര്‍, ജയിംസ് എന്നിവര്‍ ചേര്‍ന്നാണ് പ്രതിയെ സാഹസികമായി പിടികൂടിയത്.

ഡ്രാഗണ്‍ ഫ്രൂട്ട് കൃഷിയിൽ നൂറുമേനി; വിപണിക്ക് കർഷകന്‍റെ നെട്ടോട്ടം

പെരുമ്പടവ്: പാറപ്പുറത്ത് ഡ്രാഗണ്‍ ഫ്രൂട്ട് കൃഷി നടത്തി ചപ്പാരപ്പടവ് തേറണ്ടിയിലെ കര്‍ഷകനായ പാലക്കീൽ രാജൻ നൂറുമേനി വിജയം കണ്ടെങ്കിലും വിപണി കണ്ടെത്താൻ സാധിക്കാതെ നെട്ടോട്ടത്തിലാണ്. ഒരേക്കറോളം സ്ഥലത്തെ റബർ മരങ്ങൾ മുറിച്ചുമാറ്റിയാണ് രാജന്‍റെ ഡ്രാഗൺ ഫ്രൂട്ട് കൃഷി. കോവിഡ് കാലത്താണ് രാജന് ഡ്രാഗൺ ഫ്രൂട്ട് കൃഷിയിറക്കണമെന്ന മോഹമുദിച്ചത്. റബര്‍ വിലയിടിവും തൊഴിലാളികളെ കിട്ടാത്തതുമാണ് രാജനെ മാറി ചിന്തിപ്പിച്ചത്. പത്തനംതിട്ട, കാസർഗോഡ് എന്നിവിടങ്ങളിൽ നിന്ന് തൈകൾ എത്തിച്ചു. പരീക്ഷണാടിസ്ഥാനത്തിൽ ഒരേക്കറോളം സ്ഥലത്ത് കൃഷിയിറക്കി. കോൺക്രീറ്റ് വേലിക്കല്ലുകൾ നാട്ടി തൈകൾ നട്ടു. ചെടിക്ക് പടരാന്‍ പഴയ ടയറുകളും സ്ഥാപിച്ചു. യൂട്യൂബിൽ നോക്കിയാണ് പ്രധാനമായും കൃഷി രീതികൾ പഠിച്ചത്. മൂന്നുവർഷംകൊണ്ട് രാജന്‍റെ ഡ്രാഗൺ ഫ്രൂട്ടുകൾ വിളവെടുപ്പിന് തയാറാവുകയും കഴിഞ്ഞവർഷം 200 രൂപയോളം വില ലഭിച്ചു. വില്പനയ്ക്ക് തടസങ്ങളുമുണ്ടായില്ല. മലേഷ്യൻ റെഡ്, വൈറ്റ് ഡ്രാഗൺ, ഇസ്രായേൽ യെല്ലോ, റോയൽ റെഡ്, മെക്സിക്കൻ റെഡ് തുടങ്ങിയ ഇനങ്ങളാണ് കൃഷി ചെയ്തത്. എന്നാൽ, ഈ വർഷം സ്ഥിതി ഏറെ വ്യത്യസ്തമാണ്. പ്രതീക്ഷിച്ച പോലെ തന്നെ നല്ല വിളവ് ലഭിക്കുന്നുണ്ട്. പക്ഷേ വിപണനം പ്രയാസമാണ്. വീട്ടിൽ വരുന്നവർക്ക് 180 രൂപ തോതിൽ വിൽക്കുന്നുണ്ട്. വ്യാപാര സ്ഥാപനങ്ങളിൽ എത്തിച്ചു നൽകുമ്പോൾ 120 മുതൽ 150 രൂപ വരെയാണ് ലഭിക്കുന്നത്. വലിയ ഷോപ്പുകളിൽ എത്തിച്ചാല് ഇതിലും വളരെ കുറഞ്ഞ തുകയാണ് ലഭിക്കുന്നത്. ആശങ്ക നിലനിൽക്കുന്നതിനാൽ ചെറിയ തുകയ്ക്കും വില്പന നടത്തുകയാണ്. കൂടാതെ നാടുകാണി, പയ്യന്നൂർ, പഴയങ്ങാടി, മാട്ടൂൽ എന്നിവിടങ്ങളിൽ വാഹനങ്ങളിൽ കൊണ്ടുപോയി വഴിയോര കച്ചവടവും നടത്തുന്നു. ഇത്തരത്തിൽ ദിവസം ഒരു ക്വിന്‍റലോളം പഴങ്ങൾ വിറ്റു പോകുന്നുണ്ട്. ഏപ്രിൽ മാസത്തിൽ പുഷ്പിക്കുന്ന ഡ്രാഗൺ ഫ്രൂട്ടിൽ മേയ് മുതൽ നവംബർ വരെയാണ് വിളവ് ലഭിക്കുന്നത്. ഈ വർഷം ഇനിയും 30 ക്വിന്‍റലോളം വിളവ് പ്രതീക്ഷിക്കുന്നുണ്ട്. എന്നാൽ, വിപണി ലഭിക്കാത്തതിനാൽ രാജനും കുടുംബവും നിരാശയിലാണ്.

ബിഎസ്എൻഎൽ കേബിൾ മോഷ്ടാക്കൾ അറസ്റ്റിൽ

ഉളിക്കല്‍: നുച്യാട് പാലത്തിനു സമീപത്തുനിന്ന് ബിഎസ്എന്‍എല്‍ കേബിള്‍ മോഷ്ടിച്ച രണ്ടുപേരെ ഉളിക്കൽ പോലീസ് അറസ്റ്റ് ചെയ്തു. അസം സ്വദേശികളായ മുനവര്‍ അലി ( 31), ചനോവര്‍ ഹുസൈന്‍ ( 25) എന്നിവരെയാണ് പോലീസ് സംഘം പയ്യന്നൂരില്‍ നിന്ന് അറസ്റ്റ് ചെയ്തത്. ജൂണ്‍ 28നാണ് നുച്യാട് പാലത്തില്‍ നിന്ന് ബിഎസ്എൻഎൽ കേബിള്‍ മോഷണം പോയത്. അധികൃതർ ഉളിക്കൽ പോലീസിൽ നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് സംഘം പിടിയിലായത്. പകല്‍ സമയങ്ങളില്‍ കുപ്പി പെറുക്കാനെന്ന നിലയിൽ മോഷണം നടത്തേണ്ട സ്ഥലം നിരീക്ഷിക്കും. രാത്രിയിൽ വാഹനത്തിൽ എത്തി കേബിളുകള്‍ മുറിച്ചെടുത്ത് കടക്കുന്ന രീതിയാണ് നടത്തിയിരുന്നത്. ഇരിട്ടി ഡിവൈഎസ്പി ധനഞ്ജയബാബുവിന്‍റെ നേതൃത്വത്തിലുള്ള സ്‌ക്വാഡ് അംഗങ്ങളും ഉളിക്കല്‍ പോലീസും ചേര്‍ന്ന് നടത്തിയ അന്വേഷണത്തിലാണ് പ്രതികള്‍ പിടിയിലായത്. ഒരാഴ്ചക്കുള്ളിൽ 200 ഓളം സിസിടിവി ദൃശ്യങ്ങൾ പോലീസ് പരിശോധിച്ചതില്‍ നിന്നാണ് പ്രതികളെകുറിച്ചുള്ള സൂചന ലഭിച്ചത്. സമാനമായി തളിപ്പറമ്പ് ദേശീയ പാതയിലും കേബിളുകള്‍ മോഷണം പോയതായി വിവരം ലഭിച്ചു. തുടര്‍ന്ന് അന്വേഷണ സംഘം നടത്തിയ പരിശോധനയിൽ രണ്ടുമോഷണവും ഒരേ രീതിയിൽ നടന്നതായും പ്രതികളെക്കുറിച്ചും വ്യക്തമായ തെളിവുകൾ ലഭിച്ചു. തളിപ്പറമ്പിലെ മോഷണത്തിന് ഉപയോഗിച്ച വാഹനം തന്നെ നുച്യാട് പാലത്തിലെ കേബിളുകള്‍ മോഷ്ടിക്കാൻ ഉപയോഗിച്ചതായി അന്വേഷണത്തിൽ പോലീസ് കണ്ടെത്തി. പോലീസ് പിന്തുടരുന്നതായി മനസിലാക്കിയ പ്രതികൾ അന്വേഷണം വഴി തെറ്റിക്കാനായി പല സ്ഥലങ്ങളിലൂടെയും ചുറ്റി സഞ്ചരിച്ചു. മോഷ്ടിക്കാൻ ഉപയോഗിച്ച വാഹനം പയ്യന്നൂരിലെ വര്‍ക്ക്ഷോപ്പില്‍ ഒളിപ്പിച്ചിടത്തു നിന്ന് പോലീസ് കണ്ടെടുത്തു. തുടർന്നാണ് പ്രതികളും പിടിയിലാകുന്നത്. അന്വേഷണ സംഘത്തില്‍ ഉളിക്കല്‍ സിഐ വി.എം. ഡോളി, എസ്ഐ ഷാജന്‍, സീനിയർ സിവിൽ പോലീസ് ഓഫീസർമാരായ പ്രവീണ്‍ ഊരത്തൂര്‍, തോമസ് ജോസഫ്, ഷാജി, ഇരിട്ടി സ്റ്റേഷനിലെ സ്‌ക്വാഡ് അംഗം ഷിജോയി, പെരിങ്ങോം സ്‌റ്റേഷനിലെ എസ്‌ഐ റൗഫ് എന്നിവരും ഉണ്ടായിരുന്നു. പ്രതികളെ കോടതിയിൽ ഹാജരാക്കി.

മട്ടന്നൂർ അഗ്‌നിരക്ഷാ സേനയ്ക്ക് ഇനി വെള്ളത്തിനടിയിലും ആശയവിനിമയം

മട്ടന്നൂർ: മട്ടന്നൂർ അഗ്നിരക്ഷാ സേനയ്ക്ക് വെള്ളത്തിനടിയിൽ നിന്ന് ആശയവിനിമയം നടത്താനുള്ള അത്യാധുനിക സംവിധാനമെത്തി. മട്ടന്നൂർ മഹാദേവ ക്ഷേത്രക്കുളത്തിൽ പരീക്ഷണം നടത്തി. ജലാശയങ്ങളിൽ രക്ഷാപ്രവർത്തനം നടത്തുന്ന ഡൈവർമാരുമായി സംസാരിക്കാൻ സാധിക്കുന്ന മെഷിനറിയാണ് ലഭിച്ചത്. വെള്ളത്തിൽപ്പെടുന്നവരെ രക്ഷിക്കാൻ ഇറങ്ങുമ്പോഴുള്ള സംവിധാനത്തിന്‍റെ പ്രവർത്തനമാണ് വിലയിരുത്തിയത്. അഗ്നിശമന വിഭാഗം എന്തൊക്കെ മുൻ കരുതലുകൾ സ്വീകരിക്കണമെന്നുള്ളത് മനസിലാക്കുന്നതിനാണ് മട്ടന്നൂർ അഗ്നി രക്ഷാ സേന പരിശീലനം നൽകിയത്. കുളത്തിലും മറ്റും ഇറങ്ങുന്ന സേനാംഗങ്ങളുമായി കരയിലുള്ളവർക്ക് കേബിളിന്‍റെ സഹായത്തോടെ ആശയ വിനിമയം നടത്താൻ സഹായിക്കുന്ന സംവിധാനമാണിത്. ഏതാനും മാസം മുമ്പാണ് മട്ടന്നൂർ അഗ്നിരക്ഷാ സേനക്ക് ഇത് ലഭിച്ചത്.

കുളത്തിൽ കുളിക്കുന്നതിനിടെ വിദ്യാർഥി മുങ്ങിമരിച്ചു

വളപട്ടണം: സുഹൃത്തുകൾക്കൊപ്പം കുളത്തിൽ കുളിക്കുന്നതിനിടെ വിദ്യാർഥി മുങ്ങിമരിച്ചു. വളപട്ടണം സിഎച്ച് മുഹമ്മദ് കോയ സ്മാരക ഗവ. എച്ച്എസ്എസ് പത്താം ക്ലാസ് വിദ്യാർഥിയും അഴീക്കലിലെ മനാഫ്-സുഹറാബി ദന്പതികളുടെ മകനുമായ സമദ് (15) ആണ് മരിച്ചത്. ചൊവ്വാഴ്ച വൈകുന്നേരം കക്കുളങ്ങര മസ്ജിദിലെ കുളത്തിൽ കുളിക്കുന്നതിനിടെയായിരുന്നു അപകടം. മുങ്ങിപ്പോയ സമദിനെ ഉടൻ നാട്ടുകാരും പോലീസും ചേർന്ന് പുറത്തെടുത്ത് ആശുപത്രിയിലെത്തിച്ചെങ്കിലും രാത്രി 11ഓടെ മരിച്ചു.

ഓട്ടോമറിഞ്ഞ് ഡ്രൈവർ മരിച്ചു

ഇരിട്ടി: ഓട്ടോറിക്ഷ മറിഞ്ഞ് ഡ്രൈവർ മരിച്ചു. മലയോര ഹൈവേയിൽ കരിക്കോട്ടക്കരി-എടൂർ റോഡിൽ കൊട്ടുകപ്പാറ കാലിവളവിൽ ഇന്നലെ രാവിലെ പത്തോടെയാണ് അപകടം അപകടം. കരിക്കോട്ടക്കരി വളയങ്കോട് സ്വദേശി കെട്ടിലിങ്കൽ സുബൈറാണ് (46) മരിച്ചത്. കരിക്കോട്ടക്കരിയിൽ എടൂർ ഭാഗത്തേക്ക് വരികയായിരുന്ന ഓട്ടോ വളവിലെ ഇറക്കത്തിൽ നിയന്ത്രണം വിട്ട് മറിയുകയായിരുന്നു. ഓട്ടോയുടെ അടിയിലായ സുബൈറിനെ ഓടിയെത്തിയ സമീപവാസികൾ ചേർന്ന് ഇരിട്ടിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കരിക്കോട്ടക്കരിയിലെ ജാസ്മിൻ പിക്കിൾസ് സംരംഭത്തിന്‍റെ ഉടമ കൂടിയായ സുബൈർ യൂത്ത് ലീഗ് അയ്യൻകുന്ന് പഞ്ചായത്ത് പ്രസിഡന്‍റും കൂടിയാണ്. ഭാര്യ: ഹസീന. മക്കൾ: റുസൈന, അജ്മൽ. കുഞ്ഞിമോൻ-സക്കീന ദന്പതികളുടെ മകനാണ്. സഹോദരങ്ങൾ: ഷമീർ, നാസർ, മുനീർ, സുഹറ.

ന്യൂമോണിയ ബാധിച്ച് വിദ്യാർഥി മരിച്ചു

മണക്കടവ്: ന്യൂമോണിയ ബാധിച്ച് വിദ്യാർഥി മരിച്ചു. ശ്രീപുരം ഗവ. ഹയർ സെക്കണ്ടറി സ്കൂൾ പ്ലസ് വൺ വിദ്യാർഥി ഹരികൃഷ്ണനാണ് (15) മരിച്ചത്. പരിയാരം മെഡിക്കൽ കോളജിൽ ചികിത്സയിലായിരുന്നു. വായക്കമ്പ പൊറ്റമല ഹരിപ്രകാശിന്‍റെയും ജയകുമാരിയുടേയും മകനാണ്. സഹോദരൻ:ഹരിനന്ദൻ (വിദ്യാർഥി). മൃതദേഹം സ്കൂൾ ഓഡിറ്റോറിയത്തിൽ പൊതു ദർശനത്തിനു ശേഷം ഒരു മണിയോടെ വീട്ടുവളപ്പിൽ സംസ്കരിച്ചു.

ഓട്ടോയിൽ മദ്യവില്പന; യുവാവ് പിടിയിൽ

പഴയങ്ങാടി: ഓട്ടോയിൽ സഞ്ചരിച്ച് മദ്യവില്പന നടത്തുകയായിരുന്ന യുവാവിനെ പോലീസ് അറസ്റ്റ് ചെയ്തു. മാട്ടൂലിലെ സ്റ്റേവി ജോസിനെയാണ് (40) പഴയങ്ങാടി എസ്ഐ കെ. സുഹൈലിന്‍റെ നേതൃത്വത്തിലുള്ള പോലീസ് അറസ്റ്റ് ചെയ്തത്. ഇന്നലെ രാത്രി പത്തോടെ മാട്ടൂൽ സൗത്ത് മടക്കര റോഡിൽ അസ്വാഭാവിക നിലയിൽ ഓട്ടോറിക്ഷ കണ്ടെത്തിയതിനെ തുടർന്ന് നടത്തിയ പരിശോധനയിലാണ് മദ്യം പിടികൂടിയത്. ‍ഓട്ടോയിൽ നിന്ന് 15 കുപ്പി വിദേശ മദ്യവും 12 ഒഴിഞ്ഞ മദ്യകുപ്പികളും 5,220 രൂപയും പിടികൂടി. ഓട്ടോ റിക്ഷയും കസ്റ്റഡിയിലെടുത്തു. ജൂണിയർ എസ്ഐ പി. മൻസൂർ, സീനിയർ സിവിൽ പോലീസ് ഓഫീസർ സുരേഷ്, സിവിൽ പോലീസ് ഓഫീസർമാരായ പ്രിയങ്ക, മിഥുൻ എന്നിവരും അന്വേഷണ സംഘത്തിലുണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ഇൻഡക്ഷൻ പ്രോഗ്രാം സംഘടിപ്പിച്ചു

നിർമലഗിരി: നിർമലഗിരി കോളജ് (ഓട്ടോണമസ്) ഹോം സയൻസ് വിഭാഗം ഒന്നാം വർഷ ബിരുദ വിദ്യാർഥികൾക്കായി ഇൻഡക്ഷൻ പ്രോഗ്രാം സംഘടിപ്പിച്ചു. പ്രിൻസിപ്പൽ സിസ്റ്റർ ഡോ. സെലിൻ മാത്യു ഉദ്ഘാടനം ചെയ്തു. മാനാ സ്പൈൻ ആൻഡ് വെൽനസ് ക്ലിനിക്കിലെ കൺസൾട്ടന്‍റ് ന്യൂട്രീഷ്യനിസ്റ്റ് എം.ജെ. ആഗ്‌നറ്റ് മുഖ്യാതിഥിയായിരുന്നു. വിദ്യാർഥികൾക്ക് ഹോം സയൻസ്, പ്രത്യേകിച്ച് ന്യൂട്രീഷ്യൻ മേഖലയിലെ തൊഴിലവസരങ്ങളെയും സാധ്യതകളെയും കുറിച്ച് പ്രസംഗിച്ചു. ഹോം സയൻസ് പഠനത്തിന്‍റെ പ്രാധാന്യം, വിവിധ കരിയർ സാധ്യതകൾ എന്നിവയെക്കുറിച്ച് വിദ്യാർഥികൾക്ക് വ്യക്തമായ ധാരണ നൽകുകയും അവരുടെ സംശയങ്ങൾക്ക് മറുപടി നൽകുകയും ചെയ്തു. ഹോം സയൻസ് വിഭാഗം അധ്യക്ഷ കെ. ദീപ്തി ലിസ്ബത്ത് അധ്യക്ഷത വഹിച്ചു. അസിസ്റ്റന്‍റ് പ്രഫ. എ. ഐശ്വര്യ, വിദ്യാർഥിനി ശിവാനി രഞ്ജിത്ത് എന്നിവർ പ്രസംഗിച്ചു.

മരം കടപുഴകി കെട്ടിടത്തിൽ വീണു

മട്ടന്നൂർ: ശക്തമായ കാറ്റിലും മഴയിലും മട്ടന്നൂരിൽ മരം കടപുഴകി വീണ് കെട്ടിടത്തിന് നാശനഷ്ടം. മട്ടന്നൂർ - കണ്ണൂർ റോഡിലെ കോളാരി വില്ലേജ് ഓഫീസ് പരിസരത്തെ കൂറ്റൻ തേക്ക് മരമാണ് കടപുഴകി സമീപത്തെ കെട്ടിടത്തിലേക്ക് വീണത്. മരം വീണതിനെ തുടർന്ന് റാറാവീസ് മന്തി ഹൗസിന്‍റെ ഷീറ്റുകളാണ് തകർന്നത്. ഇന്നലെ രാവിലെയായിരുന്നു അപകടം.

മലയോരത്ത് ഇന്നലെ നാല് വാഹനാപകടങ്ങൾ; ഒരു മരണം

ഇരിട്ടി: ഇന്നലെ മലയോര മേഖലയിൽ നാലിടങ്ങളിലുണ്ടായ വാഹനപാകടങ്ങളിൽ ഒരാൾ മരിക്കുകയും ആറു പേർക്ക് പരിക്കേൽക്കുകയും ചെയ്തു. സ്വകാര്യ ബസ് പണിമുടക്കിനെ തുടർന്ന് റോഡുകളിൽ സാധാരണ നിലയെക്കാളും തിരക്കായിരുന്നു അനുഭവപ്പട്ടത്. പലരും യാത്രക്കായി സ്വകാര്യ വാഹനങ്ങൾ നിരത്തിലിറക്കിയതാണ് തിരിക്കിനിടയാക്കിയത്. അയ്യൻകുന്ന് പഞ്ചായത്തിലെ കരിക്കോട്ടക്കരി കൊട്ടുകപ്പാറ കാലിവളവിലുണ്ടായ വാഹനാപാകടത്തിലാണ് ഒരാൾ മരിച്ചത്. ഇന്നലെ രാവിലെ പത്തോടെ ഓട്ടോറിക്ഷ നിയന്ത്രണം വിട്ട് മറിയുകയായിരുന്നു. ഉളിക്കൽ റോഡിൽ പുതുശേരി കണ്ണിക്കരിയിൽ പിക്കപ്പ് ജിപ്പും ബൈക്കും കൂട്ടിയിടിച്ചുണ്ടായ അപകടത്തിൽ മൂന്ന് പേർക്ക് പരിക്കേറ്റു. ഇന്നലെ ഉച്ചയോടെയായിരുന്നു അപകടം. ഇരിട്ടി ഭാഗത്ത് നിന്നും ഉളിക്കൽ ഭാഗത്തേക്ക് പോകുകയായിരുന്ന പിക്കപ്പ് ജിപ്പും ഇരിട്ടി ഭാഗത്തേക്ക് വരികയായിരുന്ന ബൈക്കുമാണ് അപകടത്തിൽപ്പെട്ടത്. അപകടത്തിൽ പിക്കപ്പ് ജീപ്പ് മറിയുകയും ബൈക്ക് പൂർണമായും തകർന്നു. ചെമ്പേരി കരയത്തുംചാൽ സ്വദേശി നവീൻ (25) സഹോദരി ആറളം ഫാം ഒമ്പതാം ബ്ലോക്കിലെ ഗ്രീഷ്മ (28) എന്നിവർക്ക് സാരമായി പരിക്കേറ്റു. ഇവരെ കണ്ണൂരിലെ സ്വകാര്യാശുപത്രിയിൽ പ്രവേശിപ്പിച്ചു . പിക്കപ്പ് ജീപ്പ് ഡ്രൈവർ ബിനുവിന്‍റെ പരിക്ക് സാരമുള്ളതല്ല. മട്ടന്നൂർ: ചാവശേരി ഗവ. ഹയർ സെക്കൻഡറി സ്കൂളിന് സമീപം പാർസൽ വാനും സ്കോർപിയോ കാറും കൂട്ടിയിടിച്ച് കാർ യാത്രികനായ സാജൻ, പാർസൽ വാനിലെ രണ്ടു പേർ എന്നിവർക്ക് പരിക്കേറ്റു. വാഹനങ്ങളിൽ കുടുങ്ങിപ്പോയവരെ ഏറെ പരിശ്രമിച്ചാണ് പുറത്തെടുത്തത്. പരിക്കേറ്റവരെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇതിനു പിന്നാലെ അപകടത്തിൽ പെട്ട വാഹനത്തിന് പിന്നിൽ മറ്റൊരു കാറും കൂട്ടിയിടിച്ചു. കോളിക്കടവിൽ ഡ്രൈവിംഗ് പരിശീലനത്തിനിടെ കാർ നിയന്ത്രണം വിട്ട് മറിഞ്ഞെങ്കിലും പരിശീലകനും സഹായിയും പരിക്കേൽക്കാതെ രക്ഷപ്പെട്ടു. മഴയിൽ ഓടകൾ നിറഞ്ഞ് കവിഞ്ഞ് വെള്ളം റോഡിലൂടെ ഒഴുകുന്നതും തുടർച്ചയായുള്ള മഴകാരണം റോഡുകളുടെ ഉപരിതലം തെന്നുന്നതുമാണ് അപകടങ്ങൾക്കിടിയാക്കുന്നതെന്ന് ഡ്രൈവർമാർ പറയുന്നു.

തെക്കിബസാർ-കക്കാട് റോഡ് ജംഗ്ഷൻ വൺവേ ആക്കുന്നു; ട്രയൽ ആരംഭിച്ചു

കണ്ണൂർ: തളിപ്പറന്പ്-കണ്ണൂർ ദേശീയ പാതയിൽ നഗരത്തിൽ ഏറ്റവും വലിയ ഗതാഗതകുരുക്കിനിടയാക്കുന്ന തെക്കിബസാർ-കക്കാട് ജംഗ്ഷൻ വൺവേ ആക്കാൻ ട്രാഫിക് പോലീസ് തീരുമാനം. പരീക്ഷണാടിസ്ഥാനത്തിലുള്ള ഗതാഗതക്രമീകരണം ഇന്നലെ വൈകുന്നേരം നടപ്പാക്കി. തീരുമാന പ്രകാരം കണ്ണൂർ ഭാഗത്ത് നിന്ന് കക്കാട് ഭാഗത്തേക്ക് പോകുന്ന വാഹനങ്ങൾക്ക് നിലവിലെ ജംഗ്ഷനിൽ നിന്ന് നേരിട്ട് കക്കാട് റോഡിലേക്കുള്ള പ്രവേശനം തടഞ്ഞു. ഇതിനു പകരം നിലവിലെ ജംഗ്ഷനിൽ നിന്ന് നൂറു മീറ്റർ മുന്നോട്ടു പോയി വലതുഭാഗത്ത് തിരിഞ്ഞ് കക്കാടേക്ക് പോകുന്ന റോഡിലൂടെ കടന്നു പോകണം. ഇതിനായി ഇവിടെയുണ്ടായിരുന്ന ദേശീയ പാതയിലെ ഡിവൈഡറുകൾ ദേശീയ പാത അഥോറിറ്റിയുടെ അനുമതിയോടെ നീക്കം ചെയ്താണ് ഗതാഗത സൗകര്യമൊരുക്കിയത്. പുതിയതെരു ഭാഗത്ത് നിന്ന് കക്കാടേക്ക് പോകേണ്ട വാഹനങ്ങളും ഇതു വഴിയാണ് കടന്നു പോകേണ്ടത്. കക്കാട് ഭാഗത്ത് നിന്ന് തളിപ്പറന്പ് ഭാഗത്തേക്ക് പോകേണ്ട വാഹനങ്ങളെ ജംഗ്ഷനിൽ നിന്ന് യു ടേൺ എടുത്ത് തളിപ്പറന്പ് ഭാഗത്തേക്ക് കടത്തി വിടില്ല. വാഹനങ്ങൾ നേരെ ഗാന്ധി സർക്കിളിലെത്തി ഇവിടെ നിന്ന് താലൂക്ക് ഓഫീസിന് മുൻ വശത്തൂടെ എസ്പിസിഎ റോഡിലേക്ക് പ്രവേശിച്ച് എകെജി ആശുപത്രിക്ക് മുന്നിലെത്തുന്ന വഴിയോ അല്ലെങ്കിൽ സർക്കിൾ ചുറ്റി ദേശീയപാതയിലൂടെ തന്നെയോ കടന്നു പോകണം. വ്യാപാരികൾ, ബസ് ഉടമകൾ,ഓട്ടോറിക്ഷ തൊഴിലാളികൾ, പ്രാദേശിക ജനപ്രതിനിധികൾ എന്നിവരുമായി കൂടിയാലോചിച്ചാണ് നടപടി. പരീക്ഷണാടിസ്ഥാനത്തിൽ നടപ്പാക്കുന്ന ക്രമീകരണം വിലയിരുത്തിയ ശേഷമായിരിക്കും സ്ഥിരം നടപടികളിലേക്ക് കടക്കുക.

സ്വകാര്യ ബസ് പണിമുടക്ക് ജില്ലയിൽ പൂർണം

കണ്ണൂർ: ജില്ലയിൽ സ്വകാര്യ ബസുടമകൾ നടത്തിവന്ന പണിമുടക്ക് പൂർണം. സ്വകാര്യ ബസുകളൊന്നും നിരത്തിലിറങ്ങിയില്ല. നിലവിൽ ജില്ലയിൽ സർവീസ് നടത്തുന്ന 800 ഓളം ബസുകളാണ് പണിമുടക്കിയത്. സ്വകാര്യ ബസ് പണിമുടക്കിന്‍റെ പശ്ചാത്തലത്തിൽ കെഎസ്ആർടിസി അധിക സർവീസ് നടത്തുമെന്ന് ആളുകൾ പ്രതീക്ഷിച്ചിരുന്നെങ്കിലും കണ്ണൂർ ഡിപ്പോയിൽ നിന്നാകെ ആറ് അധിക സർവീസുകൾ മാത്രമാണ് ഉണ്ടായിരുന്നത്. മയ്യിൽ, ഇരിട്ടി, കൂത്തുപറന്പ്, കോഴിക്കോട് എന്നിവിടങ്ങളിലേക്കായിരുന്നു അധിക സർവീസ്. പയ്യന്നൂർ ഡിപ്പോയിൽ നിന്ന് അധിക സർവീസ് ഒന്നും നടത്തിയില്ല. തലശേരി ഡിപ്പോയിൽ നിന്ന് ഇരിട്ടിയിലേക്ക് മാത്രമാണ് നാല് അധിക സർവീസുകൾ നടത്തിയത്. ആലക്കോട്, ശ്രീകണ്ഠാപുരം, പയ്യാവൂർ, ചെറുപുഴ തുടങ്ങിയ സ്ഥലങ്ങളിലേക്കൊന്നും കെഎസ്ആർടിസി അധിക സർവീസ് നടത്താത്തത് ജനങ്ങളെ ആകെ വലച്ചു. ടൂറിസ്റ്റ് ബസുകളും, ഓട്ടോകളും ട്രാവലറിനെയുമെല്ലാം ആശ്രയിച്ച് വലിയ പണം മുടക്കിയാണ് ജോലി സ്ഥലത്തെത്തിയത്. സ്വകാര്യ വാഹനങ്ങൾ കൂടുതലായും നിരത്തിൽ ഇറങ്ങിയപ്പോൾ ഗതാഗതകുരുക്കും രൂക്ഷമായിരുന്നു. ഇതോടെ ഏറെ വൈകിയാണ് ആളുകൾ ലക്ഷ്യസ്ഥാനത്ത് എത്തിയത്.

ലയൺസ് ക്ലബ് ഭാരവാഹികൾ സ്ഥാനമേറ്റു

ചെറുപുഴ: ചെറുപുഴ ലയൺസ് ക്ലബ് ഭാരവാഹികൾ സ്ഥാനമേറ്റു. പുതിയ അംഗങ്ങളുടെ സത്യപ്രതിജ്ഞയും നടന്നു. ഡിസ്ട്രിക്ട് മുൻ ഗവർണർ ഡെന്നീസ് തോമസ് ഉദ്ഘാടനം ചെയ്തു. ചെറുപുഴ ലയൺസ് ക്ലബ് പ്രസിഡന്‍റ് എം.ടി.പി. അബ്ദുള്ള അധ്യക്ഷത വഹിച്ചു. സെക്രട്ടറി സെൻ സെബാസ്റ്റ്യൻ, കെ.കെ. വേണുഗോപാൽ, ഡോ. മെൻഡലിൻ മാത്യു, ബോബൻ ജോസഫ്, ഷാജി ജോസഫ്, ബെന്നി ജോൺ, ഡോ. സുജ വിനോദ്, ഡോ. പ്രവൺ ഗോപിനാഥ്, ബെന്നി സെബാസ്റ്റ്യൻ, കെ.എ. സെബാസ്റ്റ്യൻ, എൻ.ജെ. ജോസഫ്, മഞ്ജു അഭിലാഷ്, റോയി ജോസഫ് എന്നിവർ പ്രസംഗിച്ചു. വിവിധ മേഖലകളിൽ കഴിവ് തെളിയിച്ച വിദ്യാർഥികളെയും 70 വയസിന് മുകളിൽ പ്രായമുള്ള ക്ലബംഗങ്ങളേയും ആദരിച്ചു. ഭാരവാഹികൾ ബോബൻ ജോസഫ് -പ്രസിഡന്‍റ്, റോയി ജോസഫ് -സെക്രട്ടറി, തോമസ് ജോസഫ് -ട്രഷറർ. ചെറുപുഴ: പാടിയോട്ടുചാൽ ലയൺസ് ക്ലബ്‌ ഭാരവാഹികൾ ചുമതലയേറ്റു. മുൻ ഡിസ്ട്രിക്ട് ഗവർണർ ടി.കെ. രജീഷ് ഉദ്ഘാടനം ചെയ്തു. കെ. സിനു അധ്യക്ഷത വഹിച്ചു. ചീഫ് ഐടി കോ-ഓർഡിനേറ്റർ ശ്രീനിവാസ പൈ, വി.പി.നിതീഷ്, രാഘവൻ തെക്കെടവൻ, ജീവ് ജയിംസ്, ഹൈമ ശശിധരൻ, കെ.പി. ജ്യോതിഷ്, ഷാജീവൻ എന്നിവർ പ്രസംഗിച്ചു. ഭാരവാഹികൾ: കെ. സീനു (പ്രസിഡന്‍റ്), വി.പി. നിതീഷ് (സെക്രട്ടറി).

കാരുണ്യ പദ്ധതി പിണറായി സർക്കാർ തകർത്തു: മാർട്ടിൻ ജോർജ്

കണ്ണൂർ: സാധാരണക്കാർക്ക് ഏറെ ആശ്വാസമായി ഉമ്മൻ ചാണ്ടി സർക്കാർ ആവിഷ്കരിച്ച കാരുണ്യ പദ്ധതിയെ പോലും പിണറായി സർക്കാർ തകർത്തിരിക്കുകയാണെന്ന് ഡിസിസി പ്രസിഡന്‍റ് മാർട്ടിൻ ജോർജ്. ആരോഗ്യ മേഖലയിലെ സർക്കാരിന്‍റെ പരാജയത്തിൽ പ്രതിഷേധിച്ചും ആരോഗ്യമന്ത്രിയുടെ രാജി ആവശ്യപ്പെട്ടും ജില്ലയിലെ താലൂക്ക് ആശുപത്രികൾക്കു മുന്നിൽ കോൺഗ്രസ് നടത്തിയ ധർണയുടെ ജില്ലാതല ഉദ്ഘാടനം ജില്ലാ ആശുപത്രി പരിസരത്ത് നിർവഹിച്ച് പ്രസംഗിക്കുകയായിരുന്നു അദ്ദേഹം. കണ്ണൂർ-അഴീക്കോട് നിയോജക മണ്ഡലം കമ്മറ്റികളുടെ നേതൃത്വത്തിൽ കണ്ണൂർ ജില്ലാ ആശുപത്രിയുടെ മുമ്പിൽ നടത്തിയ പ്രതിഷേധ ധർണയിൽ കണ്ണൂർ ബ്ലോക്ക് കോൺഗ്രസ് പ്രസിഡന്‍റ് രാഹുൽ കായക്കൽ അധ്യക്ഷത വഹിച്ചു. പ്രഫ.എ.ഡി മുസ്തഫ മുഖ്യപ്രഭാഷണം നടത്തി.കെ.‌ പ്രമോദ്, രാജീവൻ എളയാവൂർ, അമൃത രാമകൃഷ്ണൻ, സുരേഷ് ബാബു എളയാവൂർ, ടി.ജയകൃഷ്ണൻ, പി.മുഹമ്മദ് ഷമ്മാസ്, പി.മാധവൻ, അഡ്വ. പി.ഇന്ദിര, ഷമാ മുഹമ്മദ്, മുണ്ടേരി ഗംഗാധരൻ, ശ്രീജ മഠത്തിൽ, എം.പി. വേലായുധൻ, സി.ടി. ഗിരിജ, ലിഷ ദീപക്ക്, ലക്ഷ്മണൻ തുണ്ടിക്കോത്ത്, കൂക്കിരി രാജേഷ്, ബിജു ഉമ്മർ, എം.കെ. വരുൺ എന്നിവർ പ്രസംഗിച്ചു. പയ്യന്നൂര്‍: കേരളത്തിന്‍റെ ആരോഗ്യരംഗത്ത് ഉണ്ടായിരുന്ന പുരോഗതി കഴിഞ്ഞ അഞ്ചു വര്‍ഷം കൊണ്ട് മന്ത്രിയുടെ കാര്യക്ഷമത ഇല്ലായ്മയും ധനവകുപ്പിന്‍റെ പിടിപ്പുകേടുംമൂലം തകിടം മറിച്ചതായി കോൺഗ്രസ് നേതാവ് റിജില്‍ മാക്കുറ്റി. പയ്യന്നൂര്‍, ചെറുപുഴ ബ്ലോക്ക് കോണ്‍ഗ്രസ് കമ്മിറ്റികളുടെ സംയുക്താഭിമുഖ്യത്തില്‍ പയ്യന്നൂര്‍ താലൂക്ക് ആശുപത്രിക്ക് മുന്നില്‍ നടത്തിയ ധര്‍ണ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. പയ്യന്നൂര്‍ ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് കെ. ജയരാജ് അധ്യക്ഷത വഹിച്ചു. ചെറുപുഴ ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് മഹേഷ് കുന്നുമ്മല്‍, ഡിസിസി ജനറല്‍ സെക്രട്ടറി രജിത്ത് നാറാത്ത്, ഡിസിസി ജനറല്‍ സെക്രട്ടറിമാരായ എ.പി. നാരായണന്‍, പി. ലളിത, ഡി.കെ. ഗോപിനാഥ്, ആലയില്‍ ബാലകൃഷ്ണന്‍, കെ.കെ. സുരേഷ് കുമാര്‍, എം. ഉമ്മര്‍, ടി.വി. ഗംഗാധരന്‍, മണ്ഡലം കോണ്‍ഗ്രസ് കമ്മിറ്റി പ്രസിഡന്‍റുമാർ, നഗരസഭ പ്രതിപക്ഷ നേതാവ് കെ.കെ. ഫല്‍ഗുനന്‍, എ. രൂപേഷ്, അത്തായി പത്മിനി, യൂത്ത് കോണ്‍ഗ്രസ് കണ്ണൂര്‍ ജില്ലാ വൈസ് പ്രസിഡന്‍റ് മഹിത മോഹന്‍, ആകാശ് ഭാസ്‌കരന്‍, അര്‍ജുന്‍ കൊറോം, നവനീത് നാരായണന്‍ തുടങ്ങിയവര്‍ പ്രസംഗിച്ചു. ഇരിക്കൂർ: ആരോഗ്യ മേഖലയോടുള്ള സർക്കാരിന്‍റെ അവഗണക്കെതിരെയും, ആരോഗ്യ മന്ത്രിയുടെ കെടുകാര്യസ്ഥതയ്ക്കെതിരേയും ബ്ലോക്ക്‌ കോൺഗ്രസ്‌ കമ്മിറ്റികളുടെ നേതൃത്വത്തിൽ ഇരിക്കൂർ താലൂക്ക് ആശുപത്രിക്ക് മുന്നിൽ ധർണ നടത്തി. സജീവ് ജോസഫ് എംഎൽഎ ഉദ്ഘാടനം ചെയ്തു. ഇരിക്കൂർ ബ്ലോക്ക് കോൺഗ്രസ്‌ പ്രസിഡന്‍റ് എ.ജെ. ജോസഫ് അധ്യക്ഷത വഹിച്ചു. കെപിസിസി അംഗം ഡോ. കെ.വി. ഫിലോമിന,കൊയ്യo ജനാർദനൻ, കെ. പി. ഗംഗാധരൻ, ബേബി തോലാനി, ജോജി വർഗീസ്, ഇ.വി. രാമകൃഷ്ണൻ, കെ.കെ ഷഫീഖ്, കെ.ആർ. അബ്ദുൽ കാദർ, നസീമഖാദർ, ടി.സി. പ്രിയ, വിജിൽമോഹൻ, പ്രിൻസ് പി. ജോർജ്, എന്നിവർ പ്രസംഗിച്ചു.

കരുവഞ്ചാലിലെ പൊതു ശൗചാലയം പ്രവർത്തനക്ഷമമാക്കണം

കരുവഞ്ചാൽ: നടുവിൽ പഞ്ചായത്ത് ടൗണിൽ പാലത്തിന് സമീപം ടേക്ക് എ ബ്രേക്ക് പദ്ധതിയിൽ ഉൾപ്പെടുത്തി നിർമിച്ച പൊതുശൗചാലയം ഉടൻ പ്രവർത്തനക്ഷമമാക്കണമെന്ന് ആവശ്യപ്പെട്ട് നാഷണൽ ഹ്യൂമൻ റൈറ്റ്സ് എൻവയോൺമെന്‍റ് മിഷൻ തളിപ്പറമ്പ് മേഖലാ കമ്മറ്റി പൊതുജനങ്ങളിൽ ഒപ്പുകൾ ശേഖരിച്ച് ഹർജി സജീവ് ജോസഫ് എംഎൽഎക്ക് കൈമാറി. നടുവിൽ പഞ്ചായത്ത് അധികാരികളുടെ കെടുകാര്യസ്ഥതയുടെ ഫലമായി മൂന്നുവർഷത്തോളമായി ഇതിനുവേണ്ടി നിർമിച്ച കെട്ടിടം കാടുപിടിച്ച് അനാഥാവസ്ഥയിലാണ്. കരുവഞ്ചാൽ ടൗണിലെ വ്യാപാര സ്ഥാപനങ്ങളിലെ സ്ത്രീകൾ ഉൾപ്പെടെയുള്ള ജോലിക്കാർ, ഓട്ടോ ടാക്സി തൊഴിലാളികൾ, ചുമട്ടുതൊഴിലാളികൾ, യാത്രക്കാർ ഉൾപ്പടെ ആയിരക്കണക്കിന് ആളുകൾക്ക് പ്രയോജനകരമാകുന്ന ഈ പദ്ധതി പൂർത്തീകരിക്കാത്ത പക്ഷം ജനകീയവും നിയമപരവുമായ പ്രക്ഷോഭങ്ങൾക്ക് നേതൃത്വം നല്കുമെന്ന് എൻഎച്ച്ആർഇഎം ഭാരവാഹികൾ പറഞ്ഞു. ഒപ്പുശേഖരണ കാമ്പയിന് ജെയ്സൺ ഡൊമിനിക്, ബേബി അഗസ്റ്റിൻ, അൻവർ കരുവഞ്ചാൽ എന്നിവർ നേതൃത്വം നൽകി.

ആലക്കോട് ടൗണിൽ തെരുവുനായ വിളയാട്ടം

ആലക്കോട്: ആലക്കോട് ടൗണിലും പരിസരത്തും തെരുവുനായ ശല്യം രൂക്ഷമാകുന്നു. തെരുവുനായകൾ വർധിക്കുന്നത് സ്കൂ‌ൾ വിദ്യാർഥികൾക്കും കാൽനട യാത്രക്കാർക്കും ഇരുചക്ര വാഹന യാത്രക്കാർക്കും ഭീഷണിയാകുന്നു. വ്യാപാരികളും തൊഴിലാളികളും ടൗണിൽ എത്തുന്നവരും പ്രദേശ വാസികളും തെരുവുനായ ശല്യം കൊണ്ട് പൊറുതി മുട്ടിയിരിക്കുകയാണ്. രാത്രികാലങ്ങളിൽ കടത്തിണ്ണകളിലാണ് തെരുവുനായകൾ തന്പടിക്കുന്നത്. രാത്രി വൈകി ടൗണിൽ നിന്ന് എത്തുന്ന യാത്രക്കാർക്കു നേരേ കുരച്ചു ചാടുകയാണ്. യാത്രക്കാർ ഭാഗ്യത്താൽ മാത്രം കടിയേൽക്കാതെ രക്ഷപ്പെടുന്നു. അക്രമകാരികളായ നായകളുടെ ശല്യം കാരണം ടൗണിലൂടെ നടക്കാൻ വിദ്യാർഥികൾ ഭയക്കുകയാണ്. തെരുവുനായകൾക്ക് ചിലർ ടൗണിൽ ഭക്ഷണം നൽകുന്നു. ഭക്ഷണം നൽകുന്ന സ്ഥലങ്ങളിൽ ഒത്തു കൂടുന്ന തെരുവ് നായകൾ ശല്യമായി മാറുകയും പെറ്റു പെരുകി പ്രദേശത്ത് ശല്യമായി മാറുകയും ചെയ്യുന്നു. വീടുകളിൽ നിന്ന് പുറന്തള്ളുന്ന നായ്ക്കളെ ടൗണിൽ ഉപേക്ഷിക്കുന്നതും തെരുവുനായ ശല്യം വർധിക്കാൻ കാരണമായിട്ടുണ്ട്. വർധിച്ചുവരുന്ന തെരുവുനായ ശല്യം അവസാനിപ്പിക്കാൻ തദ്ദേശ സ്ഥാപനങ്ങൾ നടപടികൾ സ്വീകരിക്കണമെന്നാണ് നാ‌ട്ടുകാരുടേയും വ്യാപാരികളുടേയും ആവശ്യം.

എൽഐസി ഓഫീസുകൾക്ക് മുന്നിൽ പ്രകടനവും കവാട യോഗങ്ങളും നടത്തി

മട്ടന്നൂർ: അഖിലേന്ത്യാ പണിമുടക്കിന് മുന്നോടിയായി ഇൻഷ്വറൻസ് ജീവനക്കാരും ഏജന്‍റുമാരും ജില്ലയിലെ എൽഐസി ഓഫീസുകൾക്ക് മുന്നിൽ പ്രകടനവും യോഗവും നടത്തി. എൽഐസി എംപ്ലോയീസ് യൂണിയൻ, എൽഐസി ഏജന്‍റസ് ഓർഗനൈസേഷൻ ഓഫ് ഇന്ത്യ, എൽഐസി പെൻഷനേഴ്സ് അസോസിയേഷൻ സെക്യൂരിറ്റി ആൻഡ് ലേബർ കോൺട്രാക്ട് വർക്കേഴ്സ് യൂണിയൻ എന്നിവയുടെ സംയുക്താഭിമുഖ്യത്തിലായിരുന്നു പ്രകടനവും യോഗവും നടത്തിയത്. കണ്ണൂരിൽ എൽഐസി എംപ്ലോയീസ് യൂണിയൻ കോഴിക്കോട് ഡിവിഷൻ പ്രസിഡന്‍റ് കെ. ബാഹുലേയൻ ഉദ്ഘാടനം ചെയ്തു. കണ്ണൂർ-കാസർഗോഡ് ജില്ലാ കോ-ഓർഡിനേഷൻ കമ്മിറ്റി കൺവീനർ എം.കെ. പ്രേംജിത്ത് അധ്യക്ഷത വഹിച്ചു. തളിപ്പറമ്പിൽ പി. വി. ഷിജു, കെ. ഗണേശൻ,സി. ദാമോദരൻ, സി. വി. മനീഷ, കെ. ചന്ദ്രൻ എന്നിവരും പയ്യന്നൂരിൽ ടി.വി.ഗണേശൻ, കെ.വി. വേണു, രമേഷ് പുതിയറക്കൽ, എം. ഷിബിൻ, എം. ചന്ദ്രൻ, കെ. ജയരാജൻ എന്നിവരും പ്രസംഗിച്ചു.

തെക്കിബസാർ-കക്കാട് റോഡ് ജംഗ്ഷൻ വൺവേ ആക്കുന്നു; ട്രയൽ ആരംഭിച്ചു

കണ്ണൂർ: തളിപ്പറന്പ്-കണ്ണൂർ ദേശീയ പാതയിൽ നഗരത്തിൽ ഏറ്റവും വലിയ ഗതാഗതകുരുക്കിനിടയാക്കുന്ന തെക്കിബസാർ-കക്കാട് ജംഗ്ഷൻ വൺവേ ആക്കാൻ ട്രാഫിക് പോലീസ് തീരുമാനം. പരീക്ഷണാടിസ്ഥാനത്തിലുള്ള ഗതാഗതക്രമീകരണം ഇന്നലെ വൈകുന്നേരം നടപ്പാക്കി. തീരുമാന പ്രകാരം കണ്ണൂർ ഭാഗത്ത് നിന്ന് കക്കാട് ഭാഗത്തേക്ക് പോകുന്ന വാഹനങ്ങൾക്ക് നിലവിലെ ജംഗ്ഷനിൽ നിന്ന് നേരിട്ട് കക്കാട് റോഡിലേക്കുള്ള പ്രവേശനം തടഞ്ഞു. ഇതിനു പകരം നിലവിലെ ജംഗ്ഷനിൽ നിന്ന് നൂറു മീറ്റർ മുന്നോട്ടു പോയി വലതുഭാഗത്ത് തിരിഞ്ഞ് കക്കാടേക്ക് പോകുന്ന റോഡിലൂടെ കടന്നു പോകണം. ഇതിനായി ഇവിടെയുണ്ടായിരുന്ന ദേശീയ പാതയിലെ ഡിവൈഡറുകൾ ദേശീയ പാത അഥോറിറ്റിയുടെ അനുമതിയോടെ നീക്കം ചെയ്താണ് ഗതാഗത സൗകര്യമൊരുക്കിയത്. പുതിയതെരു ഭാഗത്ത് നിന്ന് കക്കാടേക്ക് പോകേണ്ട വാഹനങ്ങളും ഇതു വഴിയാണ് കടന്നു പോകേണ്ടത്. കക്കാട് ഭാഗത്ത് നിന്ന് തളിപ്പറന്പ് ഭാഗത്തേക്ക് പോകേണ്ട വാഹനങ്ങളെ ജംഗ്ഷനിൽ നിന്ന് യു ടേൺ എടുത്ത് തളിപ്പറന്പ് ഭാഗത്തേക്ക് കടത്തി വിടില്ല. വാഹനങ്ങൾ നേരെ ഗാന്ധി സർക്കിളിലെത്തി ഇവിടെ നിന്ന് താലൂക്ക് ഓഫീസിന് മുൻ വശത്തൂടെ എസ്പിസിഎ റോഡിലേക്ക് പ്രവേശിച്ച് എകെജി ആശുപത്രിക്ക് മുന്നിലെത്തുന്ന വഴിയോ അല്ലെങ്കിൽ സർക്കിൾ ചുറ്റി ദേശീയപാതയിലൂടെ തന്നെയോ കടന്നു പോകണം. വ്യാപാരികൾ, ബസ് ഉടമകൾ,ഓട്ടോറിക്ഷ തൊഴിലാളികൾ, പ്രാദേശിക ജനപ്രതിനിധികൾ എന്നിവരുമായി കൂടിയാലോചിച്ചാണ് നടപടി. പരീക്ഷണാടിസ്ഥാനത്തിൽ നടപ്പാക്കുന്ന ക്രമീകരണം വിലയിരുത്തിയ ശേഷമായിരിക്കും സ്ഥിരം നടപടികളിലേക്ക് കടക്കുക.

നഴ്സുമാരുടെ മൊബൈല്‍ മോഷ്ടിച്ച പ്രതി പിടിയില്‍

പയ്യന്നൂര്‍: പയ്യന്നൂരില്‍ സ്വകാര്യ ആശുപത്രിയിലെ നഴ്‌സുമാരുടെ മൊബൈല്‍ ഫോണുകള്‍ കവര്‍ന്ന കേസില്‍ പ്രതി അറസ്റ്റില്‍. കുഞ്ഞിമംഗലം കൊവ്വപ്പുറം സ്വദേശി കെ.പി. സലീമിനെയാണ് (38) പയ്യന്നൂര്‍ എസ്‌ഐ പി.യദുകൃഷ്ണനും സംഘവും അറസ്റ്റ് ചെയ്തത്. ബംഗളൂരുവിൽ ഒളിവില്‍ കഴിയുന്നതിനിടെയാണ് പോലീസ് പിടികൂടിയത്. കണ്ണൂര്‍ ടൗണിലെ ആശുപത്രിയിലും കാഞ്ഞങ്ങാട്ടെ സ്വകാര്യ ആശുപത്രിയിലും സമാനമായ രീതിയില്‍ മൊബൈല്‍ മോഷണം നടത്തിയതായി പോലീസ് കണ്ടെത്തിയിട്ടുണ്ട്. മംഗളൂരുവിൽ താമസിക്കുന്നതിനിടയില്‍ ഓരോ സ്ഥലത്തുമെത്തിയായിരുന്നു മോഷണം. ഫോണ്‍ ചെയ്യുന്നതുപോലെ നടിച്ച് മൊബൈലുകള്‍ നോട്ടംവച്ച് അവസരം അനുകൂലമാകുമ്പോള്‍ ഫോണുമായി സ്ഥലം വിടുകയാണെന്ന്് പോലീസ് പറയുന്നു. മേയ് നാലിന് ഉച്ചക്ക് 1.30 തിനും രണ്ടിനുമിടയിലായിരുന്നു പരാതിക്കാസ്പദമായ മോഷണം. മൂരിക്കൊവ്വല്‍ അനാമയ ആശുപത്രിയിലെ നഴ്‌സുമാരായ പരിയാരം കുറ്റ്യേരിയിലെ സന്ധ്യാവിനോദ്, ചെറുപുഴയിലെ സാന്ദ്ര, നിധി ജോസഫ് എന്നിവരുടെ ഫോണുകളാണ് മോഷ്ടിച്ചത്. സിസിടിവി ദൃശ്യത്തില്‍നിന്നാണ് പോലീസ് പ്രതിയെ തിരിച്ചറിഞ്ഞത്.

കണ്ണില്‍ ചോരയില്ലാതെ റവന്യുവകുപ്പ് : എങ്ങോട്ടുപോകുമെന്നറിയാതെ ലക്ഷ്മിയമ്മയും കുടുംബവും

കാസര്‍ഗോഡ്: റവന്യു വകുപ്പിന്‍റെ പരസ്പരവിരുദ്ധമായ കത്തില്‍ പകച്ചുനില്‍ക്കുകയാണ് കാസര്‍ഗോഡ് നായ്കസ് റോഡില്‍ ഒരു കുടുംബം. 90 വര്‍ഷമായി കുടിയിരിക്കുന്ന ഭൂമിയില്‍നിന്ന് മൂന്നു ദിവസത്തിനകം കുടിയൊഴിയണമെന്നും അല്ലെങ്കില്‍ ഒഴിപ്പിക്കല്‍ നടപടി സ്വീകരിക്കുമെന്നുമാണ് നോട്ടീസ്. മാറിപ്പോകേണ്ട സ്ഥലത്തിന്‍റെ സര്‍വേ നമ്പര്‍ ഉള്‍പ്പെടെ നല്‍കിയിട്ടുണ്ടെങ്കിലും അങ്ങനെയൊരു സ്ഥലം ഇവര്‍ക്ക് അനുവദിച്ചതിന്‍റെ രേഖകള്‍ ഫയലില്ലെന്ന് ആര്‍ഡിഒയും പറയുന്നു. ഇല്ലാത്ത സ്ഥലത്തേക്ക് കുടിയൊഴിയാന്‍ ആവശ്യപ്പെടുമ്പോള്‍ പട്ടികജാതി വിഭാഗത്തില്‍പ്പെടുന്ന കുടുംബം അനുഭവിക്കുന്നത് കടുത്ത നീതി നിഷേധമാണ്. "വില്ലേജ് ഓഫീസീന്ന് കൊണ്ടുവന്ന കടലാസില്‍ പറയുന്നു മൂന്നു ദിവസത്തില്‍ കുടിയൊഴിയണമെന്ന്. ഞങ്ങള്‍ എങ്ങോട്ടാണ് പോകേണ്ടത് ?' സംസാരിക്കുമ്പോള്‍ കണ്ണീര്‍ വാര്‍ക്കുന്നുണ്ട് ഈ വീട്ടിലെ അംഗങ്ങള്‍ ഓരോരുത്തരും. ഭൂമിക്കായി വര്‍ഷങ്ങള്‍ നീണ്ട നിയമപോരാട്ടം നടക്കുമ്പോഴാണ് റവന്യൂ അധികൃതരില്‍നിന്നും മനുഷ്യത്വ വിരുദ്ധമായ സമീപനം. കാസര്‍ഗോഡ് വില്ലേജിലെ സര്‍വേ നമ്പര്‍ 89/11ല്‍പ്പെട്ട സ്ഥലത്താണ് 92 കാരിയായ ലക്ഷ്മിയമ്മയും മകള്‍ കമലാക്ഷിയും, മകന്‍റെ ഭാര്യ ചിത്രയും അവരുടെ മൂന്നുമക്കളും കഴിയുന്നത്. പൊളിഞ്ഞു വീഴാറായ വീട് ഒന്ന് പുതുക്കി പണിയാന്‍ പോലും ഇതുവരെ സാധിച്ചിട്ടില്ല. ലക്ഷ്മിയമ്മ കിടപ്പിലാണ്. ഇനിയിപ്പോള്‍ അധികൃതര്‍ കുടിയിറക്കിയാല്‍ കിടപ്പിലായ അമ്മയെയും കൊണ്ട് എങ്ങോട്ട് പോകുമെന്നതില്‍ കുടുംബാംഗങ്ങള്‍ക്ക് നിശ്ചയമില്ല. കഴിഞ്ഞ അഞ്ചിനാണ് താലൂക്ക് തഹസില്‍ദാര്‍ ഒപ്പുവച്ച നോട്ടീസ് കുടുംബത്തിന് ലഭിച്ചത്. വര്‍ഷങ്ങളായി കുടിയിരിപ്പുള്ള സ്ഥലത്തുനിന്ന് 122/1 പിടി യില്‍പ്പെട്ട സ്ഥലത്തേക്ക് മാറാനാണ് ഉത്തരവ്. എന്നാല്‍, ഇതേ സര്‍വേ നമ്പര്‍ പ്രകാരമുള്ള സ്ഥലം സംബന്ധിച്ച വിവരങ്ങള്‍ ആരാഞ്ഞ് വിവരാവകാശ നിയമപ്രകാരം നല്‍കിയ അപേക്ഷക്ക് ജൂണ്‍ 28ന് ആര്‍ഡിഒ നല്‍കിയ മറുപടിയില്‍ ഈ സര്‍വേ നമ്പറില്‍ ലക്ഷ്മിഅമ്മക്ക് ഭൂമി അനുവദിച്ചതിന്‍റെ രേഖകള്‍ ഫയലില്‍ കാണുന്നില്ലെന്നും പറയുന്നു. ഭൂരഹിതരായവര്‍ക്ക് അവരുടെ അപേക്ഷ പരിഗണിച്ചാണ് ഭൂമി അനുവദിക്കുന്നത്. എന്നാല്‍, വര്‍ഷങ്ങളായി ഒരിടത്ത് കുടിയറക്കുമ്പോള്‍ അപേക്ഷ പോലും നല്‍കാതിരിക്കെ എങ്ങനെയാണ് തഹസില്‍ദാരുടെ കത്തില്‍ പരാമര്‍ശിക്കുന്ന സര്‍വേ നമ്പറില്‍ ഭൂമി ലഭിച്ചതെന്നതിലും വ്യക്തതയില്ല. കുടിയിരിപ്പ് ഭൂമി അനുവദിക്കണമെന്നാവശ്യപ്പെട്ട് വര്‍ഷങ്ങളായി ഈ കുടുംബം ഹൈക്കോടതിയില്‍ കേസ് നടത്തുന്നുണ്ട്. റവന്യുമന്ത്രിക്കും കുടുംബം അപേക്ഷ നല്‍കിയിട്ടുണ്ട്.

തൃക്കണ്ണാട്ട് കടലാക്രമണം രൂക്ഷം; കെട്ടിടങ്ങള്‍ തകര്‍ന്നുവീണു

ബേക്കല്‍: തൃക്കണ്ണാട്ട് കടലാക്രമണം രൂക്ഷമായി. തിങ്കളാഴ്ച രാത്രിയോടെ ആരംഭിച്ച കടലാക്രമണത്തെതുടര്‍ന്ന് ഉച്ചയോടെ ആളുകള്‍ നോക്കിനില്‍ക്കെ രണ്ടു കെട്ടിടങ്ങള്‍ തകര്‍ന്നുവീണു. കാസര്‍ഗോഡ്-കാഞ്ഞങ്ങാട് സംസ്ഥാനപാതയിലെ തൃക്കണ്ണാട് ക്ഷേത്രത്തിനു മുന്‍വശം കടലും റോഡും തമ്മിലുള്ള അകലം വെറും 10 മീറ്റര്‍ മാത്രമായി ചുരുങ്ങി. സംസ്ഥാനപാതയില്‍ ഏതു സമയത്തും കടല്‍ കയറുമെന്ന അവസ്ഥയിലാണ് ഉള്ളത്. തൃക്കണ്ണാട് ത്രയംബകേശ്വര ക്ഷേത്രത്തിന്‍റെ നമസ്‌കാര മണ്ഡപവും കടലാക്രമണ ഭീഷണിയിലാണ്. മണ്ഡപത്തിനു ചുറ്റും കല്ലുകള്‍ കൂട്ടിയിട്ടാണ് താത്കാലിക കവചം തീര്‍ത്തിട്ടുള്ളത്. മണ്ഡപത്തിന്‍റെ തെക്കു ഭാഗത്ത് കടല്‍കരയിലേക്ക് കൂടുതല്‍ കയറിയതാണ് കെട്ടിടങ്ങള്‍ തകരാന്‍ ഇടയാക്കിയത്. റവന്യു ഉദ്യോഗസ്ഥരും പോലീസും സ്ഥലത്തു ക്യാമ്പ് ചെയ്തിട്ടുണ്ട്.

കാട്ടാനക്കലി തുടരുന്നു; വീട്ടമ്മ രക്ഷപ്പെട്ടത് തലനാരിഴയ്ക്ക്

ഇരിട്ടി: ആറളം ഫാം ബ്ലോക്ക് പത്തിലെ ആനമുക്കിൽ പ്ലോട്ട് നമ്പർ 746 ലെ രാജമ്മയുടെ പുരയിടത്തിൽ ഇന്നലെ പുലർച്ചെ 2.30 ഓടെ കാട്ടാനയിറങ്ങി വ്യാപക നാശനഷ്ടമുണ്ടാക്കി. കൊലയാളി മോഴയാനയാണ് ഇന്നലെ മേഖലയിൽ ഭീതിവിതച്ചത്. രാജമ്മയുടെ കൃഷിയിടത്തിലെ തെങ്ങ്, കവുങ്ങ്, വാഴ, കശുമാവ് എന്നിവ നശിപ്പിച്ച ആന കുടിവെള്ള പൈപ്പും നശിപ്പിച്ചു. കിണറിൽ നിന്ന് വീട്ടിലെ ടാങ്കിലേക്ക് വെള്ളം എത്തിക്കുന്ന പൈപ്പാണ് ആന തകർത്തത്. ഇതോടെ ഇവരുടെ വീട്ടിലേക്കുള്ള കുടിവെള്ളം നിലച്ചിരിക്കുകയാണ്. ഈ വർഷം മൂന്നാം തവണയാണ് കാട്ടാന രാജമ്മയുടെ കൃഷിയിടത്തിലെത്തി കൃഷി നശിപ്പിക്കുന്നത്. ബ്ലോക്ക് പത്തിലെ പ്ലോട്ട് നമ്പർ 745 ലെ കൃഷ്‌ണൻ പുലിക്കരി, പ്ലോട്ട് നമ്പർ 714 ലെ നാരായണി ചപ്പിലി എന്നിവരുടെ കൃഷിയിടത്തിലും മോഴയാന നാശം വിതച്ചു. ഇവരുടെയും പ്ലാവ് ഉൾപ്പെടെയുള്ള കൃഷികൾ മോഴയാന നശിപ്പിച്ചു. പുലർച്ചെ നാലോടെയാണ് ആന എത്തിയത്. ചെവിക്ക് കേൾവിക്കുറവുള്ള ചിപ്പിലി നാരായണി ഭാഗ്യം കൊണ്ടാണ് ആനയുടെ പിടിയിൽ നിന്നു രക്ഷപ്പെട്ടത്. ‌ഒറ്റയ്ക്ക് താമസിക്കുന്ന നാരായണിയുടെ വീട്ടിലെ നായ കുരച്ച് ബഹളം വച്ചപ്പോൾ ലൈറ്റ് പോലുമില്ലാതെ നാരായണി വീടിന്‍റെ തിണ്ണവരെ എത്തിനോക്കിയിട്ട് തിരിച്ചുപോകുകയായിരുന്നു. ആ സമയം വീടിന്‍റെ മുറ്റത്ത് ആനയുണ്ടായിരുന്നു. പിന്നീട് വീട്ടുമുറ്റത്തെ തെങ്ങ് നശിപ്പിച്ചശേഷമാണ് ആന അവിടെനിന്ന് മാറിയത്. 2007 ൽ ആലക്കോട് വെള്ളാട്, ഉദയഗിരി ഭാഗത്തു നിന്നെത്തിയ കുടുംബങ്ങളാണ് ഇവിടെ ഭൂരിഭാഗവും. കശുമാവ് മാത്രം ഉണ്ടായിരുന്ന പ്രദേശം ഓരോ വിളകളായി പിടിപ്പിച്ചു വന്നതാണ് ഇന്ന് കാട്ടാനകൾ നശിപ്പിക്കുന്നത്. അഞ്ചു വർഷമായി ആനയുടെ ആക്രമണം വളരെ കൂടുതലാണെന്ന് പ്രദേശവാസികൾ പറയുന്നത്. നാലു മാസത്തിനുള്ളിൽ പതിനെട്ടിലധികം കുടിലുകൾ കാട്ടാന തകർത്തിരുന്നു. പലരും ഭാഗ്യംകൊണ്ടാണ് ആനയ്ക്ക് മുന്നിൽനിന്ന് രക്ഷപ്പെട്ടത്. ഭയന്നോടിയവരിൽ പലരും വീണ് പരിക്കേറ്റ സംഭവങ്ങളും ഉണ്ടായിട്ടുണ്ട്. താത്കാലിക സോളാർ വേലി സ്ഥാപിച്ചിട്ടുണ്ടെങ്കിലും ഇവ തകർത്താണ് ആനകൾ ജനവാസ മേഖലയിൽ പ്രവേശിക്കുന്നതെന്നാണ് പ്രദേശവാസികൾ പറയുന്നത്. മനുഷ്യനെ കൊല്ലുന്ന കാട്ടാനകളിൽ നിന്ന് ആദിവാസികളെ രക്ഷിക്കണമെന്നാണ് ഇവരുടെ ആവശ്യം. ഞങ്ങൾക്ക് വേണ്ടത് ജീവന് സുരക്ഷയാണ്: രാജമ്മ പത്രമാധ്യമങ്ങളിൽ വാർത്ത വന്നാൽ ആദിവാസികളുടെ ജീവന് സുരക്ഷയാവില്ല. ഞങ്ങൾക്ക് വേണ്ടത് ശാശ്വത പരിഹാരമാണ്. മനുഷ്യനെ കൊല്ലുന്ന കാട്ടാനകൾ പുനരധിവാസ മേഖലയിൽ ചുറ്റിത്തിരിയുമ്പോൾ വലിയ വലിയ ഓഫീസുകളിൽ ഇരിക്കുന്ന ഉദ്യോഗസ്ഥർ ജനങ്ങളുടെ നിസഹായ അവസ്ഥ മനസിലാക്കുന്നില്ല. ചർച്ചകൾകൊണ്ട് കാര്യമില്ല. ആനമതിൽ ഉൾപ്പെടെ നിർമാണം നിലച്ചിട്ടും യാതൊരു നടപടിയും ഉണ്ടാകാത്തത് ആദിവാസികളോട് കാണിക്കുന്ന അനീതിയാണ്. മാനസികവും ശാരീരികവുമായി വളരെയേറെ ബുദ്ധിമുട്ടുകളാണ് മേഖലയിലെ ജനങ്ങൾ നേരിടുന്നത്. തൊഴിലെടുത്ത് ജീവിക്കാൻ കഴിയാതായവരെ എന്തിനാണ് ആനക്കാട്ടിൽ മരിച്ചുതീരാൻ വിടുന്നത്.

"എന്‍റെ പ്രിയ മുഖ്യമന്ത്രീ...ഭയമാകുന്നു,' പോലീസിനെതിരേ നടപടി ആവശ്യപ്പട്ട് മുഖ്യമന്ത്രിക്ക് എഴുത്തുകാരന്‍റെ പരാതി

കണ്ണൂർ: റോഡ് മുറിച്ചുകടക്കാൻ കഴിയാതിരുന്ന വയോധികനെ റോഡ് മുറിച്ചുകടത്തി കൊടുക്കുന്നതിനിടെ ഡ്യൂട്ടിയിലുണ്ടായിരുന്ന പോലീസുകാരനോട് ഒന്നു സഹായിച്ചു കൂടെ എന്നു ചോദിച്ച വിരോധത്തിൽ എസ്ഐ ജീപ്പിൽ കയറ്റി സ്റ്റേഷനിൽ കൊണ്ടുപോയി മാനസികമായി പീഡിപ്പിക്കുകയും മദ്യപാനിയെന്ന് വരുത്തിത്തീർക്കാൻ ശ്രമിക്കുകയും ചെയ്തെന്ന് കാണിച്ച് മുഖ്യമന്ത്രിക്ക് പരാതി. എഴുത്തുകാരനും വ്യാപാരിയുമായ ഇയ്യ വളപട്ടണമാണ് വളപട്ടണം എസ്ഐക്കെതിരെ മുഖ്യമന്ത്രിക്ക് പരാതി നൽകിയത്. കഴിഞ്ഞ ശനിയാഴ്ചയായിരുന്നു പരാതിക്കാസ്പദമായ സംഭവം. റോഡ് മുറിച്ചു കടക്കാൻ വിഷമിച്ച വയോധികനെ റോഡ് കടത്തി കൊടുക്കുന്പോൾ ഡ്യൂട്ടിയിലുണ്ടായിരുന്ന പോലീസുകാരനോട് ഒന്നു സഹായിച്ചു കൂടെ എന്നു ചോദിച്ചപ്പോൾ എന്‍റെ ഡ്യൂട്ടി അതല്ല, ഞാൻ തളിപ്പറന്പ് രാജരാജേശ്വര ക്ഷേത്രത്തിലേക്ക് പോകുന്ന ഗവർണറുടെ സുരക്ഷാ ഡ്യൂട്ടിയിലാണെന്ന് പറഞ്ഞ് തട്ടിക്കയറുകയും എസ്ഐ വിളിപ്പിച്ച് ജീപ്പിൽ കയറ്റി സ്റ്റേഷനിലേക്ക് കൊണ്ടു പോകുകയുമായിരുന്നു. മദ്യലഹരിയിൽ പോലീസിനോട് തട്ടിക്കയറി ഡ്യൂട്ടി തടസപ്പെടുത്താൻ ശ്രമിച്ചെന്ന കേസ് ചുമത്തി ആറുമാസം ജയിലിലാക്കുമെന്ന് ഭീഷണിപ്പെടുത്തിയെന്നും പരാതിയിൽ പറയുന്നു. ജീവിതത്തിൽ ഇന്നു വരെ മദ്യപിക്കാത്ത തന്നെ മദ്യപനായി ചിത്രീകരിക്കാനാണ് എസ്ഐയും അവിടെയുള്ള ചില പോലീസുകാരും ശ്രമിച്ചത്. തന്നെ അറിയാവുന്ന പോലീസ് സുഹൃത്തുക്കൾ താൻ മദ്യപിക്കാത്ത വ്യക്തിയാണെന്ന് എസ്ഐയെ അറിയിച്ചപ്പോഴും അംഗീകരിക്കാൻ തയാറായില്ല. ആധാർ കാർഡ് ആവശ്യപ്പെട്ടപ്പോൾ കൈയിലില്ലെന്ന് പറഞ്ഞപ്പോൾ ആധാർ കൈവശം വയ്ക്കാത്തതിന് കേസെടുക്കുമെന്നും ഭീഷണിപ്പെടുത്തി. ഫോൺ പിടിച്ചുവാങ്ങുന്നതിനിടെ ഒരു സുഹൃത്തിനോട് വിവരം പറയാനായതിനാലാണ് കള്ളക്കേസിൽ കുടുങ്ങാതെ രക്ഷപ്പെട്ടത്. ഇക്കാര്യം സമൂഹമാധ്യമത്തിൽ പോസ്റ്റ് ചെയ്യാമായിരുന്നെങ്കിലും മുഴുവൻ പോലീസ് സേനയുടെയും സർക്കാരിന്‍റെയും പ്രതിച്ഛായ മങ്ങുമെന്നതിനാലാണ് അക്കാര്യം ചെയ്യാതിരുന്നത്. ഇവിടത്തെ സിസ്റ്റം എത്ര നന്നാക്കാൻ ശ്രമിച്ചാലും നന്നാകാൻ വിടില്ല എന്നു തീരുമാനിക്കുന്ന ഒരു വിഭാഗം പോലീസുകാരുണ്ട്. ഞാൻ പറയുന്നത് കേൾക്കാനുള്ള സാവകാശം പോലും പോലീസുകാർ കാണിച്ചില്ല. ഒരു മനുഷ്യനോട് പോലും കടുപ്പിച്ചു സംസാരിക്കാൻ പോലും കഴിയില്ല എന്നു തിരിച്ചറിഞ്ഞതു കൊണ്ട്. എസ്ഐ ടെസ്റ്റ്‌ എഴുതാതെ മടങ്ങി വന്ന ഒരാളാണ് ഞാൻ. ഒരു മണിക്കൂറോളം സ്റ്റേഷനിൽ വച്ച് ഹൃദ്രോഗികൂടിയായ എന്നെ എസ്ഐയുടെ നേതൃത്വത്തിൽ ചില പോലീസുകാർ മാനസികമായി പീഡിപ്പിക്കുകയായിരുന്നു. അറിയാവുന്ന ചില പോലീസുകാരും സിപിഎം ലോക്കൽ സെക്രട്ടറി ഷക്കീൽ ഉൾപ്പെടെയുള്ളവരും ഇടപെട്ടതിനാലാണ് മദ്യപാനകുറ്റത്തിൽനിന്നും രക്ഷപ്പെട്ടത്. അവരോട് എന്‍റെ സ്നേഹം അറിയിക്കുന്നു. മരിക്കുന്നതുവരെ ഇവരെ മറക്കില്ല. തിരക്കിന്‍റെ ഇടയിലും എനിക്ക് വേണ്ടി അവർ സംസാരിച്ചല്ലോ. സ്റ്റേഷനിലുള്ള പോലീസുകാരൊക്കെ ഒരു കൊലപാതകിയോട് പെരുമാറുന്നത് പോലെ അത്രയ്ക്ക് രൂക്ഷമായിട്ടാണ് പെരുമാറിയത്. എനിക്ക് ആ പോലീസുകാരോട് ദേഷ്യമല്ല തോന്നിയത്.., സങ്കടമാണ്. ഇങ്ങനെയുള്ളവരിൽനിന്ന് എന്ത് നീതി നിർവഹണമാണ് സമൂഹത്തിനു ലഭിക്കുക. ഇവരിൽ നിന്നും എന്തു നീതിയാണ് സമൂഹം പ്രതീക്ഷിക്കേണ്ടത്. പരാതി കൊടുത്താൽ പോലീസുകാർ പലരീതിയിലും എന്നെ കേസിൽ കുടുക്കും എന്നു എന്‍റെ പോലീസ് സുഹൃത്ത്‌ പറയുകയുണ്ടായി. അവരിൽനിന്നു തുടർന്നുണ്ടായേക്കാവുന്ന കേസുകൾ എന്നെ ഭയപ്പെടുത്തുന്നുണ്ട്. എന്‍റെ പ്രിയ മുഖ്യമന്ത്രീ.. ഭയമാകുന്നു...സർക്കാരിന്‍റെ മുഖമായാണ് എന്നെപ്പോലെയുള്ളവർ പോലീസിനെ കാണുന്നത് .അതുകൊണ്ട് തന്നെ, എന്‍റെ അനുഭവം മേലിൽ ആർക്കുമുണ്ടാകാതിരിക്കാൻ നടപടി ഉണ്ടാകണം. ആർക്കെതിരെയെങ്കിലുമുള്ള ശിക്ഷാ നടപടികൾ അല്ല, പകരം ഭരണകൂടത്തിന്‍റെ മർദനോപാധിയാണ് പോലീസ് എന്ന തോന്നൽ മാറ്റാൻ ആവശ്യമായ നടപടികൾ എടുക്കാൻ വികസന കേരളത്തിന്‍റെ നായകൻ എന്ന നിലയിൽ അങ്ങയുടെ സർക്കാർ ഇടപെടണം എന്നാണ് അപേക്ഷയെന്നും പരാതിയിലുണ്ട്.

വന്യമൃഗങ്ങളെ വനത്തിനുള്ളിൽ സംരക്ഷിക്കണം: ഇൻഫാം

കണ്ണൂർ: വന്യമൃഗങ്ങളെ വനത്തിനുള്ളിൽ സംരക്ഷിക്കാനും കൃഷിയിടങ്ങളിൽ ഇറങ്ങുന്നത് നിയന്ത്രിക്കാനും ആയിരം കോടി മാറ്റിവയ്ക്കാൻ സർക്കാർ തയാറാകണമെന്ന് ഇൻഫാം ദേശീയ സെക്രട്ടറി ഫാ.ജോസഫ് കാവനാടി. ഇൻഫാം ജില്ലാ ജനറൽബോഡി യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. നിലവിൽ ബജറ്റിൽ നീക്കിവയ്ക്കുന്ന നാമമാത്ര തുക നഷ്ടപരിഹാരത്തിനു പോലും തികയാറില്ല. കേന്ദ്ര-സംസ്ഥാന സർക്കാരുകളുടെ കിടമത്സരം മൂലം പാവപ്പെട്ട കർഷകരുടെ ജീവനാണ് ബലി കൊടുക്കേണ്ടിവരുന്നത്. കർഷകരുടെ സ്വത്തിനും ജീവനും യാതൊരു വിലയും കല്പിക്കാതെ വന്യമൃഗശല്യം കേരളമാകെ സംഹാര താണ്ഡവമാടുന്പോൾ ശാശ്വത പരിഹാരം കാണാനാകാതെ സർക്കാരും വനം വകുപ്പും ഇരുട്ടിൽ തപ്പുകയാണെന്ന് അദ്ദേഹം പറഞ്ഞു. വന നിയമങ്ങൾ ഭേദഗതി ചെയ്യുക, പ്രതിരോധ സംവിധാനത്തിന് ആയിരം കോടി അനുവദിക്കുക,പ്രതിരോധ പ്രവർത്തനങ്ങൾക്ക് ജനകീയ സമിതികൾ രൂപീകരിക്കുക, നഷ്ടപരിഹാര തുക വർധിപ്പിക്കുക തുടങ്ങിയ ആവശ്യങ്ങൾ സർക്കാരിന്‍റെ ശ്രദ്ധയിൽപ്പെടുത്താൻ യോഗം തീരുമാനിച്ചു. ഇൻഫാം ജില്ലാ പ്രസിഡന്‍റ് സ്കറിയ നെല്ലംകുഴി അധ്യക്ഷത വഹിച്ചു. ഇൻഫാം ഡയറക്ടർ ഫാ. ബിബിൻ വരമ്പകത്ത് വിഷയാവതരണം നടത്തി. സണ്ണി തുണ്ടത്തിൽ, ഉണ്ണിക്കൃഷ്ണൻ ചുഴലി, ജോസ് തോണിക്കൽ, ടോമി വടക്കേക്കുരിക്കാട്ട്, ഷാജി തെക്കേക്കര, ടോമി ചക്കാലക്കുന്നേൽ, ആന്‍റണി ജീരകത്തിൽ, ലാലിച്ചൻ കുഴിയാത്ത്, കുര്യാക്കോസ് പുതിയിടത്ത്പറമ്പിൽ എന്നിവർ പ്രസംഗിച്ചു.

സർവകലാശാല‍യിലേക്ക് എസ്എഫ്ഐ മാർച്ച് ; സംഘർഷം; ജലപീരങ്കി

കണ്ണൂർ: സർവകലാശാലയെ കാവിവത്കരിക്കാനുള്ള ഗവർണറുടെ നീക്കത്തിൽ പ്രതിഷേധിച്ച് താവക്കരയിലെ സർവകലാശാല ആസ്ഥാനത്തേക്ക്‌ എസ്എഫ്ഐ പ്രവർത്തകർ ന‌ടത്തിയ മാർച്ച്‌ സംഘർഷത്തിൽ കലാശിച്ചു. ബാരിക്കേഡുകൾ മറികടന്ന് മുന്നേറിയ വിദ്യാർഥികളിൽ ചിലർ സർവകലാശാലയുടെ ഗേറ്റ് ചാടിക്കടന്ന് സർവകലാശാല അഡ്മിനിസ്ട്രേറ്റീവ് ബ്ലോക്കിലേക്ക് കടന്നെത്തി കുത്തിയിരുന്ന് മുദ്രാവാക്യം വിളിച്ചു. ബാരിക്കേഡുകൾ തള്ളിമാറ്റിയതോടെ പോലീസും പ്രവർത്തകരും തമ്മിൽ ഉന്തും തള്ളുമുണ്ടായി സംഘർഷം കൂടിയതോടെ പോലീസ് ജലപീരങ്കി പ്രയോഗിച്ചു. സർവകലാശാല കാവിവത്കരിക്കാൻ ശ്രമിക്കുന്ന ഗവർണറുടെ ഇടപെടലുകളിൽനിന്ന് പിന്മാറുക, വൈസ് ചാൻസലറുടെ ഏകാധിപത്യ നിലപാട് അവസാനിപ്പിക്കുക എന്നീ ആവശ്യങ്ങൾ വിദ്യാർഥികൾ ഉന്നയിച്ചു. കേന്ദ്രകമ്മിറ്റി അംഗം ബിപിൻരാജ് പായം ഉദ്ഘാടനം ചെയ്തു. ജില്ലാ സെക്രട്ടറി ശരത്‌ രവീന്ദ്രൻ അധ്യക്ഷനായി. സംസ്ഥാന സെക്രട്ടേറിയറ്റ്‌ അംഗം ടി.പി. അഖില, കാസർഗോഡ് ജില്ലാ പ്രസിഡന്‍റ് ഋഷിത സി. പവിത്രൻ, സെക്രട്ടറി കെ. പ്രണവ്‌, സംസ്ഥാന കമ്മിറ്റി അംഗങ്ങളായ അഞ്ജലി സന്തോഷ്‌, കെ. നിവേദ്‌, ജോയൽ തോമസ്‌, സ്വാതി പ്രദീപൻ എന്നിവർ പ്രസംഗിച്ചു. ‌

ക്രെഡിറ്റ് യൂണിയൻ വാർഷിക പൊതുയോഗം നടത്തി

പയ്യാവൂർ: തലശേരി സോഷ്യൽ സർവീസ് സൊസൈറ്റിയുടെ (ടിഎസ്എസ്എസ്) ഭാഗമായ നടുവിൽ സെന്‍റ് മേരീസ് ക്രെഡിറ്റ് യൂണിയന്‍റെ വാർഷിക പൊതുയോഗം നടുവിൽ പാരിഷ് ഹാളിൽ നടന്നു. ടിഎസ്എസ്എസ് അതിരൂപത പ്രസിഡന്‍റ് ജോഷി കുന്നത്ത് ഉദ്ഘാടനം ചെയ്തു. യൂണിറ്റ് ഡയറക്ടർ ഫാ. ജോബി ചെരുവിൽ അധ്യക്ഷത വഹിച്ചു‌. യൂണിറ്റ് പ്രസിഡന്‍റ് സിബി ചെരുവുപുരയിടത്തിൽ ആമുഖ പ്രഭാഷണവും ടിഎസ്എസ്എസ് ചെമ്പേരി മേഖലാ പ്രോഗ്രാം മാനേജർ ലിസി ജിജി മുഖ്യപ്രഭാഷണവും നടത്തി. യൂണിറ്റ് സെക്രട്ടറി ജോജി പുളിമൂട്ടിൽ വാർഷിക റിപ്പോർട്ടും ഓഡിറ്റ് റിപ്പോർട്ടും അവതരിപ്പിച്ചു. മേഖലാ വൈസ് പ്രസിഡന്‍റ് ബേബി മുല്ലൂർ, സിസ്റ്റർ ഫിൽസി എഫ്സിസി, ഷാജി മേലെമുറി, സിസ്റ്റർ ഡോ. ലൂസിയ ജോർജ് എന്നിവർ പ്രസംഗിച്ചു. ചടങ്ങിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അതിരൂപത പ്രസിഡന്‍റ് ജോഷി കുന്നത്ത് അനുമോദിച്ചു. മുടങ്ങാതെ നിക്ഷേപം നടത്തിയവർക്കും വിവിധ മേഖലകളിൽ കഴിവ് തെളിയിച്ചവർക്കും ടിഎസ്എസ്എസ് റീജണൽ ഡയറക്ടർ ഫാ. ജോബി ചെരുവിൽ ഉപഹാരങ്ങൾ സമ്മാനിച്ചു.

സര്‍ക്കാര്‍ പൊതുജനാരോഗ്യ മേഖലയെ ബോധപൂര്‍വം തകര്‍ക്കുന്നു: കെ. സുരേന്ദ്രന്‍

കണ്ണൂര്‍: എല്‍ഡിഎഫ് സര്‍ക്കാര്‍ ബോധപൂര്‍വം പൊതുജനാരോഗ്യ മേഖലയെ തകര്‍ക്കുകയാണെന്ന് ബിജെപി മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍. സ്വകാര്യ ആശുപത്രി ലോബിയെ സഹായിക്കാനാണ് സർക്കാർ ഇങ്ങനെ പ്രവർത്തിക്കുന്നതെന്ന് അദ്ദേഹം പറഞ്ഞു. ആരോഗ്യ മന്ത്രി വീണാ ജോര്‍ജിന്‍റെ രാജി ആവശ്യപ്പെട്ട് ബിജെപി നോര്‍ത്ത് ജില്ലാ കമ്മിറ്റിയുടെ ആഭിമുഖ്യത്തില്‍ കണ്ണൂര്‍ ജില്ലാ ആശുപത്രിയിലേക്കു നടത്തിയ മാര്‍ച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നൂറുകണക്കിന് വന്‍കിട സ്വകാര്യ ആശുപത്രികളാണ് സംസ്ഥാനത്ത് ഏതാനും വര്‍ഷങ്ങള്‍ക്കുളളില്‍ പ്രവര്‍ത്തനം ആരംഭിച്ചത്. മുഖ്യമന്ത്രിയും ആരോഗ്യ മന്ത്രിയും സ്വകാര്യ മേഖലയെ സഹായിക്കുന്ന നിലപാടാണ് എടുക്കുന്നത്. മന്ത്രിമാര്‍ സര്‍ക്കാര്‍ ആശുപത്രികളില്‍ ചികിത്സയ്ക്ക് പോകുന്നില്ല. ഗുരുതരമായ പ്രശ്‌നമാണ് സംസ്ഥാനത്തെ ആരോഗ്യ മേഖല നേരിടുന്നത്. ഈ സാഹചര്യത്തിൽ മന്ത്രി വീണാ ജോര്‍ജ് രാജിവയ്ക്കും വരെ പ്രക്ഷോഭം തുടരുമെന്നും കെ. സുരേന്ദ്രൻ പറഞ്ഞു. ബിജെപി ജില്ലാ പ്രസിഡന്‍റ് കെ.കെ. വിനോദ് കുമാര്‍ അധ്യക്ഷത വഹിച്ചു. നേതാക്കളായ സി. രഘുനാഥ്, പി.കെ. വേലായുധന്‍, സി. നാരായണന്‍, യു.ടി. ജയന്തന്‍, എം. അനീഷ്‌കുമാര്‍, അര്‍ച്ചന വണ്ടിച്ചാല്‍, അര്‍ജുന്‍ മാവിലാക്കണ്ടി, അജികുമാര്‍ കരിയില്‍ എന്നിവർ പ്രസംഗിച്ചു.

ഫെൻസിംഗ് പൂർത്തിയാക്കി കാട്ടാനശല്യം അവസാനിപ്പിക്കണം: സജീവ് ജോസഫ് എംഎൽഎ

ആലക്കോട്: ഉദയഗിരി പഞ്ചായത്തിലെ അപ്പർ ചീക്കാട് പ്രദേശത്ത് കഴിഞ്ഞ ദിവസങ്ങളിൽ വ്യാപകമായ കാട്ടാനശല്യം ഉണ്ടായ പ്രദേശങ്ങൾ സജീവ് ജോസഫ് എംഎൽഎ സന്ദർശിച്ചു. ഫെൻസിംഗ് പൂർത്തിയാക്കി കാട്ടാന ശല്യം അവസാനിപ്പിക്കാൻ അധികൃതർ തയാറാവണമെന്ന് എംഎൽഎ ആവശ്യപ്പെട്ടു. ജനങ്ങൾക്ക് പുറത്തിറങ്ങാനും കുട്ടികൾക്ക് സ്കൂളിൽ പോകാനും, കർഷകർക്ക് സ്വന്തം കൃഷിയിടത്തിൽ ജോലി ചെയ്യാനും സാധിക്കാത്ത ആശങ്കാജനകമായ സാഹചര്യമാണ്. പഞ്ചായത്തിലെ വനാതിർത്തി പങ്കിടുന്ന പ്രദേശങ്ങൾ പൂർണമായും ഫെൻസിംഗ് നടത്തിയാൽ മാത്രമേ കാട്ടാന ശല്യം തടയാൻ സാധിക്കുകയുള്ളൂ, എംഎൽഎ ഫണ്ട് നൽകി രണ്ടു വർഷമായിട്ടും നിർമാണം നടത്താൻ അധികൃതർ വൈകുന്നത് പ്രതിഷേധാർഹമാണെന്നും സജീവ് ജോസഫ് പറഞ്ഞു. പഞ്ചായത്തംഗം സിന്ധു തോമസ്, ജോയിച്ചൻ പള്ളിയാലിൽ, ബേബി കോയിക്കൽ, സാബു വെള്ളമറ്റം, ബേബി ഏറത്ത്, ജോസ് പന്തപ്ലാക്കൽ, തോമസ് ഒറ്റപ്ലാക്കൽ എന്നിവരും ഉണ്ടായിരുന്നു.

സംസ്ഥാന സര്‍ക്കാര്‍ പൊതുജനാരോഗ്യ മേഖലയെ ബോധപൂര്‍വം തകര്‍ക്കുന്നു: കെ. സുരേന്ദ്രന്‍

കണ്ണൂര്‍: എല്‍ഡിഎഫ് സര്‍ക്കാര്‍ ബോധപൂര്‍വം പൊതുജനാരോഗ്യ മേഖലയെ തകര്‍ക്കുകയാണെന്ന് ബിജെപി മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍. സ്വകാര്യ ആശുപത്രി ലോബിയെ സഹായിക്കാനാണ് സർക്കാർ ഇങ്ങനെ പ്രവർത്തിക്കുന്നതെന്ന് അദ്ദേഹം പറഞ്ഞു. ആരോഗ്യ മന്ത്രി വീണാ ജോര്‍ജിന്‍റെ രാജി ആവശ്യപ്പെട്ട് ബിജെപി നോര്‍ത്ത് ജില്ലാ കമ്മിറ്റിയുടെ ആഭിമുഖ്യത്തില്‍ കണ്ണൂര്‍ ജില്ലാ ആശുപത്രിയിലേക്കു നടത്തിയ മാര്‍ച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നൂറുകണക്കിന് വന്‍കിട സ്വകാര്യ ആശുപത്രികളാണ് സംസ്ഥാനത്ത് ഏതാനും വര്‍ഷങ്ങള്‍ക്കുളളില്‍ പ്രവര്‍ത്തനം ആരംഭിച്ചത്. മുഖ്യമന്ത്രിയും ആരോഗ്യ മന്ത്രിയും സ്വകാര്യ മേഖലയെ സഹായിക്കുന്ന നിലപാടാണ് എടുക്കുന്നത്. മന്ത്രിമാര്‍ സര്‍ക്കാര്‍ ആശുപത്രികളില്‍ ചികിത്സയ്ക്ക് പോകുന്നില്ല. ഗുരുതരമായ പ്രശ്‌നമാണ് സംസ്ഥാനത്തെ ആരോഗ്യ മേഖല നേരിടുന്നത്. ഈ സാഹചര്യത്തിൽ മന്ത്രി വീണാ ജോര്‍ജ് രാജിവയ്ക്കും വരെ പ്രക്ഷോഭം തുടരുമെന്നും കെ. സുരേന്ദ്രൻ പറഞ്ഞു. ബിജെപി ജില്ലാ പ്രസിഡന്‍റ് കെ.കെ. വിനോദ് കുമാര്‍ അധ്യക്ഷത വഹിച്ചു. നേതാക്കളായ സി. രഘുനാഥ്, പി.കെ. വേലായുധന്‍, സി. നാരായണന്‍, യു.ടി. ജയന്തന്‍, എം. അനീഷ്‌കുമാര്‍, അര്‍ച്ചന വണ്ടിച്ചാല്‍, അര്‍ജുന്‍ മാവിലാക്കണ്ടി, അജികുമാര്‍ കരിയില്‍ എന്നിവർ പ്രസംഗിച്ചു.

ലയൺസ് ക്ലബ് ഇരിട്ടി ഭാരവാഹികള്‍ സ്ഥാനമേറ്റു

ഇരിട്ടി: ലയൺസ് ക്ലബ് ഭാരവാഹികളുടെ സ്ഥാനാരോഹണം മുന്‍ ഡിസ്ട്രിക് ഗവര്‍ണര്‍ ശ്രീനിവാസ ഷേണായി ഉദ്ഘാടനം ചെയ്തു. പ്രസിഡന്‍റ് റെജി തോമസ് അധ്യക്ഷത വഹിച്ചു. പ്ലസ്ടു പരീക്ഷയില്‍ ഉന്നതവിജയം നേടിയവരെ അനുമോദിച്ചു. ഇരിട്ടി ബിആര്‍സിയിലെ കുട്ടികള്‍ക്ക് കിടക്കവിതരണം, വിദ്യാർഥികള്‍ക്ക് പഠനസഹായ വിതരണം എന്നിവയും നടത്തി. ഡെന്നിസ് തോമസ് പുതിയ അംഗങ്ങള്‍ക്ക് സത്യവാജകം ചൊല്ലി കൊടുത്തു. സെക്രട്ടറി ജോളി അഗസ്റ്റിന്‍, കെ.ജെ. ജാസ്, റീജിയണല്‍ ചെയര്‍മാന്‍ എന്‍. കൃഷ്ണന്‍, സുരേഷ് മിലന്‍, സുരേഷ് ബാബു, കെ.ടി. അനൂപ്, ശ്രീജ അനൂപ്, സിബി അറയ്ക്കല്‍ എന്നിവര്‍ പ്രസംഗിച്ചു. ഭാരവാഹികള്‍: അര്‍ച്ചന റെജി (പ്രസിഡന്‍റ്), വി.ജി. സുനില്‍, ഡയാന സുരേഷ്ബാബു, ജോണ്‍ തോമസ് (വൈസ് പ്രസിഡന്‍റുമാര്‍), ജോളി അഗസ്റ്റിന്‍ (സെക്രട്ടറി), ബെബന്‍ മാത്യു (ജോയിന്‍റ് സെക്രട്ടറി), എ.കെ. കുഞ്ഞിരാമന്‍ നമ്പ്യാര്‍ (ട്രഷറര്‍).

കണ്ണവം ഇളമാങ്കലിൽ വീണ്ടും കാട്ടാനയിറങ്ങി

കൂത്തുപറമ്പ്: കണ്ണവം ഇളമാങ്കൽ ഉന്നതിയിൽ ഇന്നലെ കാട്ടാനകൾ ഇറങ്ങി കാർഷിക വിളകൾ നശിപ്പിച്ചു. പുലർച്ചെ നാലോടെ വീട്ടുപറന്പിലെത്തിയ കാട്ടാനകൾ തെങ്ങുകളും കമുകകളുമാണ് നശിപ്പിച്ചത്. ഈ പ്രദേശത്ത് മൂന്നാം തവണയാണ് കാട്ടാനകളിറങ്ങുന്നത്. കണ്ണവം വനം വന്യജീവി വകുപ്പ് അധികൃതർ സ്ഥലത്തെത്തി നാട്ടുകാരുടെ സഹായത്തോടെ ആനകളെ പടക്കം പൊട്ടിച്ചും ബഹളം വച്ചും പന്തം കത്തിച്ചും വനാന്തരങ്ങളിലേക്ക് തുരത്തി. പാട്യം പഞ്ചായത്ത് അധികൃതർ സംഭവ സ്ഥലം സന്ദർശിച്ചു.ആറ് വീടുകളിലായി 10 കുടുംബങ്ങൾ താമസിക്കുന്ന ഒറ്റപ്പെട്ട പ്രദേശമാണിത്. പൊതുവേ ഗതാഗത സൗകര്യം കുറഞ്ഞ സ്ഥലമായതി നാൽ ഉന്നതി നിവാസികൾ ഭീതിയിലാണ്. കഴിഞ്ഞാഴ്ച ഇളമാങ്കലിലെ കൊടന്നോടൻ വിനീഷ്, രതീഷ് എന്നിവരുടെ വീട്ടുപറമ്പിലെ കൃഷികളാണ് നശിപ്പിച്ചത്. പഞ്ചായത്തിലെ വനമേഖലയോട് ചേർന്നു കിടക്കുന്ന ഇളമാങ്കൽ ഉന്നതിയിൽ ഇതുവരെ കാട്ടുപന്നിയുടെയും കുരങ്ങിന്‍റേയും ശല്യം മാത്രമേ പ്രദേശത്തുകാർ അനുഭവിച്ചിരുന്നുള്ളൂ. ഇപ്പോൾ കൂട്ടമായി എത്തുന്ന കാട്ടാനകൾ വീടുകൾ ആക്രമിക്കുമെന്ന ഭിതിയിലാണ് പ്രദേശവാസികൾ.

വിദ്യാവനം പദ്ധതി ഉദ്‌ഘാടനം ചെയ്തു

ഇരിട്ടി: വന മഹോത്സവത്തിന്‍റെ ഭാഗമായി വനം വന്യജീവി വകുപ്പ് സാമൂഹ്യവനവത്കരണ വിഭാഗത്തിന്‍റെ സഹകരണത്തോടെ ഇരിട്ടി എംജി കോളജിൽ വിദ്യാവനം പദ്ധതിക്ക് തുടക്കമായി. പദ്ധതിയുടെ പ്രവർത്തി ഉദ്‌ഘാടനം എംജി കോളജ് ഓഡിറ്റോറിയത്തിൽ സാമൂഹിക വനവത്കരണ വിഭാഗം കണ്ണൂർ ഡെപ്യൂട്ടി ഫോറസ്റ്റ് കൺസർവേറ്റർ ജോസ് മാത്യു നിർവഹിച്ചു. ഇരിട്ടി എഡ്യൂക്കേഷണൽ സൊസൈറ്റി ചെയർമാൻ ചന്ദ്രൻ തില്ലങ്കേരി അധ്യക്ഷത വഹിച്ചു. സൊസൈറ്റി ജനറൽ സെക്രട്ടറി വൈ.വൈ. മത്തായി, സെക്രട്ടറി കെ. വത്സരാജ്, കോളജ് പ്രിൻസിപ്പൽ ഡോ. ആർ. സ്വരൂപ, ഐക്യൂഎസി കോ ഓർഡിനേറ്റർ ഡോ. കെ. അനീഷ് കുമാർ, ഭൂമിത്രസേന ക്ലബ് കൺവീനർ പി. പ്രിയങ്ക, എൻഎസ്എസ് പ്രോഗ്രാം ഓഫീസർ ഇ. രജീഷ്, ബയോ ഡൈവേഴ്‌സിറ്റി ക്ലബ് കൺവീനർ സി. ഗീത, സൂപ്രണ്ട് എം.ജെ. മിനി ജോൺ, സാമൂഹിക വനവത്കരണ വിഭാഗം തലശേരി റെയ്ഞ്ച് ഫോറസ്റ്റ് ഓഫീസർ ഇ.കെ. ജിഷ എന്നിവർ പ്രസംഗിച്ചു.

കോളാരി ബാങ്ക് നാളികേര സംസ്കരണ ഫാക്ടറിയിൽ പുതിയ മെഷീനുകൾ പ്രവർത്തനം തുടങ്ങി

മട്ടന്നൂർ: കോളാരി സർവീസ് സഹകരണ ബാങ്കിന്‍റെ നാളികേര സംസ്കരണ ഫാക്ടറിയിൽ വെർജിൻ കോക്കനട്ട് ഓയിൽ തയാറാക്കുന്നതിനുള്ള പുതിയ മെഷനറികളുടെ ഉദ്ഘാടനം നഗരസഭ ചെയർമാൻ എൻ. ഷാജിത്ത് നിർവഹിച്ചു. കോളാരി ബാങ്ക് പ്രസിഡന്‍റ് കെ. ഭാസ്കരൻ അധ്യക്ഷത വഹിച്ചു. വൈസ് പ്രസിഡന്‍റ് ജി. ശ്രീജിത്ത്, സെക്രട്ടറി സി. അജയകുമാർ, ഡയരക്ടർമാരായ വി.വി. മനോഹരൻ, എം.വി. പ്രകാശൻ, വി.കെ. ഷാജി, പി. പവിത്രൻ, മാനേജർ കെ. നാരായണൻ എന്നിവർ എന്നിവർ പ്രസംഗിച്ചു.

ഞാറ്റുവേല മഹോത്സവം സംഘടിപ്പിച്ചു

കേളകം: സെന്‍റ് തോമസ് ഹയർ സെക്കൻഡറി സ്കൂളിലെ നാഷണൽ സർവീസ് സ്കീം വിദ്യാർഥികൾ നെൽവിത്ത് വിതച്ച് ഞാറ്റുവേല മഹോത്സവം സംഘടിപ്പിച്ചു. കണിച്ചാർ പഞ്ചായത്ത് വികസന കാര്യ സ്റ്റാൻഡിംഗ് കമ്മിറ്റി ചെയർമാൻ തോമസ് വടശേരി ഉദ്ഘാടനം ചെയ്തു. സ്കൂൾ പിടിഎ പ്രസിഡന്‍റ് എം.പി. സജീവൻ അധ്യക്ഷനായിരുന്നു. വാർഡ് മെംബർ ലിസമ്മ ജോയ്, സ്കൂൾ പ്രിൻസി പ്പൽ എൻ.ഐ. ഗീവർഗീസ്, അധ്യാപകരായ പി.ജെ. വിജി, ബോബി പീറ്റർ, പാടശേഖരത്തിന്‍റെ ഉടമസ്ഥരായ ശ്രീനി അരീക്കാട്ട്, ഹരീന്ദ്രൻ അരീക്കാട്ട്, എൻഎസ്എസ് ലീഡർമാരായ അർനോൾഡ്, ഡെൽഫിയ തുടങ്ങിയവർ പ്രസംഗിച്ചു.

കേരളത്തില്‍ മനുഷ്യനും മൃഗത്തിനും ജീവിക്കാന്‍ പറ്റാത്ത സാഹചര്യം: കേരള കോണ്‍ഗ്രസ്

ഇരിട്ടി: കേരളത്തില്‍ മനുഷ്യനും മൃഗത്തിനും ജീവിക്കാന്‍ പറ്റാത്ത സാഹചര്യമാണെന്ന് കേരള കോണ്‍ഗ്രസ് വൈസ് ചെയര്‍മാന്‍ കെ.എ.ഫിലിപ്പ്. കേരള കോണ്‍ഗ്രസിന്‍റെ നേതൃത്വത്തില്‍ മന്ത്രി വീണാ ജോര്‍ജ് രാജി വയ്ക്കണമെന്നാവശ്യപ്പെട്ട് ഇരിട്ടിയില്‍ നടത്തിയ പ്രതിഷേധ മാര്‍ച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ആശുപത്രികളില്‍ കിടക്കാന്‍ കിടക്കയോ, രോഗികൾക്കു നൽകാൻ മരുന്നോ ഇല്ല. തസ്തിക ഒഴിഞ്ഞ് കിടക്കുകയാണ്. റബറിന് 250 രൂപ കൊടുക്കാമെന്നും കുടുംബിനികള്‍ക്ക് 2000 രൂപ കൊടുക്കാമെന്നും നുണ പറഞ്ഞവരാണ് ഭരിക്കുന്നതെന്ന് അദ്ദേഹം പറഞ്ഞു. ജില്ലാ പ്രസിഡന്‍റ് റോജസ് സെബാസ്റ്റ്യന്‍ അധ്യക്ഷത വഹിച്ചു. സംസ്ഥാന കോ-ഓര്‍ഡിനേറ്റര്‍ അപു ജോണ്‍, ജോസഫ് മുള്ളന്‍മട, മാത്യു ചാണകാട്ടില്‍, ജോസ് നരിമറ്റം, മാര്‍ട്ടിന്‍ ജോസഫ്, അബ്രാഹം ഈറ്റക്കല്‍, കെ.കെ. മത്തായി, രഞ്ചു ചാണാകാട്ടില്‍, മേരി ജയിംസ്, ഡെന്നീസ് വാഴപ്പള്ളി, യൂത്ത്ഫ്രണ്ട് ജില്ലാ പ്രസിഡന്‍റ് അരുണ്‍ കുഴുപ്പള്ളി, കെഎസ്‌സി ജില്ലാ പ്രസിഡന്‍റ് ആകാശ് മാത്യു, ജോസ് ഇളപ്പുങ്കല്‍, ലീലാമ്മ ചോളിയില്‍, ജിജോ അടവനാല്‍, ജോര്‍ജ് ആന്‍റണി തൊടുകയില്‍, കെ.സി. ഷിജു, സിബി കണ്ണീറ്റുകണ്ടത്തില്‍ എന്നിവര്‍ പ്രസംഗിച്ചു.

ആറളത്ത് ആർആർടി എന്തെല്ലാം ചെയ്യണം....

ഇരിട്ടി: ആറളം പുനരധിവാസ മേഖലയിൽ വർധിച്ചു വരുന്ന വന്യമൃഗശല്യത്തെ പ്രതിരോധിക്കാൻ താത്കാലികമായി എത്തിയ ആർആർടി സംഘം ഇപ്പോൾ സ്ഥിരം ആസ്ഥാനം ഒരുക്കി ഫാം മേഖലയിൽ പ്രവർത്തിച്ചു വരികയാണ്. ഊണും ഉറക്കവുമില്ലാതെ 24 മണിക്കൂറും പ്രവർത്തിക്കുന്ന ആർആർടിയെക്കുറിച്ച് പ്രദേശവാസികൾക്ക് നല്ല മതിപ്പാണ്. പുനരധിവാസ മേഖലയിൽ മരം മുറിച്ചുമാറ്റുന്നതു മുതൽ പൊട്ടിയ സോളാർ വേലി നേരെയാക്കുക, ആനയെ തുരത്തുക, രോഗികളെ ആശുപത്രിയിൽ എത്തിക്കുക, സമയം വൈകി എത്തുന്നവരെ വീടുകളിൽ എത്താൻ സഹായിക്കുക, പോലീസിന് ഉൾപ്പെടെ കാവൽ പോകുക ഇവയെല്ലാം യാതൊരു മടിയും കൂടാതെയാണ് ആർആർടി നിർവഹിക്കുന്നത്. രാത്രിയായാൽ ആംബുലൻസ് ഉൾപ്പെടെ വാഹനങ്ങൾ ലഭിക്കില്ല രാത്രികാലങ്ങളിൽ ആർആർടി വാഹനം ഒഴികെ മറ്റ് വാഹങ്ങൾ ഒന്നും പുനരധിവാസ മേഖലയിലേക്ക് കടക്കാൻ ആരും ധൈര്യം കാണിക്കാറില്ല . ആശുപത്രി ഉൾപ്പെടെ അടിയന്തര ആവശ്യങ്ങൾക്ക് ജനങ്ങൾ ആശ്രയിക്കുന്നത് ആർആർടി വാഹനത്തെയാണ്. കഴിഞ്ഞ ദിവസം വയറുവേദന അനുഭവപ്പെട്ട രോഗിയുമായി പേരാവൂർ താലൂക്ക് ആശുപത്രിയിൽ എത്തിയ ആർആർടി ജീവനക്കാർക്ക് മണിക്കൂറുകളോളം ആശുപത്രിയിൽ കാത്തുനിന്ന ശേഷം രോഗിയെയും കൂടി തിരിച്ചു വീട്ടിൽ എത്തിക്കേണ്ട സാഹചര്യം ഉണ്ടായി. ഫാമിൽ രാത്രിയായാൽ സർവീസ് നടത്താൻ ആംബുലൻസ് ഇല്ല എന്നതും അടിയന്തര പ്രധാന്യം അർഹിക്കുന്ന കാര്യമാണ്. ആറളം ഫാമിലേക്ക് പോകാൻ വാഹനങ്ങൾ ലഭിക്കില്ലെന്നും രോഗിയെ തിരികെ കൊണ്ടുപോകണമെന്നും ആശുപത്രി അധികൃതർ അറിയച്ചതോടെയാണ് ആർആർടിക്ക് ആശുപത്രിക്ക് മുന്നിൽ കാത്തുനിൽക്കേണ്ട സാഹചര്യം ഉണ്ടായത്. ആനയിറങ്ങിയ സ്ഥലത്ത് അടിയന്തരമായി എത്തേണ്ടവർ ഇത്തരം ആശുപത്രി സാഹചര്യത്തിൽ എന്ത് ചെയ്യണമെന്ന ആശങ്കയാണ് പങ്കുവയ്ക്കുന്നത്. ആർആർടി വാഹനം ചെളിയിൽ താണു ബ്ലോക്ക് ഒന്പതിൽ പ്ലോട്ട് നമ്പർ 430ന് സമീപം ആർആർടിയുടെ വാഹനം ചെളിയിൽ താഴ്ന്നു. വനം വകുപ്പിന്‍റെ മറ്റൊരു വാഹനം എത്തി കയർ കെട്ടി വലിച്ചാണ് ചെളിയിൽ താണ വാഹനത്തെ വെളിയിൽ എത്തിച്ചത്. പല സ്ഥലങ്ങളിലും മൺ റോഡുകളിലൂടെ വേണം സഞ്ചരിക്കാൻ. വാഹനം ചെളിയിൽ താഴ്ന്ന് മണിക്കൂറുകൾ എടുത്താണ് വാഹനം കയറ്റി തിരികെ എത്തുന്നത്. രാത്രിയിൽ ജീവൻ പണയം വച്ചാണ് ആർആർടി സംഘം ജോലിചെയ്യുന്നത്. കാട്ടാന വീടിന് മുകളിലേക്ക് മരം തള്ളിയിട്ടു ഇരിട്ടി: ആറളം പുനരധിവാസ മേഖലയിലെ കാട്ടാന ആക്രമണം നിയന്ത്രണം ഇല്ലാതെ തുടരുന്നു. കഴിഞ്ഞ ദിവസം രാത്രി ബ്ലോക്ക് ഒന്പതിൽ കാളികയത്ത് പുഷ്പ രമേശിന്‍റെ വീടിന് മുകളിലേക്ക് കാട്ടാന പ്ലാവ് തള്ളിയിട്ടു. വീട്ടുമുറ്റത്ത് എത്തിയ ആന പ്ലാവിലെ ചക്ക പറിച്ചു തിന്ന ശേഷമാണ് പ്ലാവിനെ വീടിന് മുകളിലേക്ക് തള്ളിയിട്ടത്. പിറ്റേന്ന് ആആർടി എത്തിയാണ് പ്ലാവ് മുറിച്ചു മാറ്റിയത്. ബ്ലോക്ക് ഒന്പതിൽ തന്നെ പ്ലോട്ട് നമ്പർ 448 ലെ കായ്ഫലമുള്ള തെങ്ങും ആന ചവിട്ടി മറിച്ചിട്ടു. ആർആർടി എത്തി മടങ്ങിയ ശേഷം രാത്രി 2.30 ഓടെയാണ് ആന വീണ്ടും എത്തി തെങ്ങ് നശിപ്പിച്ചത്. ബ്ലോക്ക് 13 ൽ സിനോജിന്‍റെ വീട്ടുമുറ്റത്തെ വാഴ നശിപ്പിച്ച ശേഷം സർവീസ് വയർ ഉൾപ്പെടെ ആന വലിച്ച് പൊട്ടിച്ചു.

നഷ്ടപ്പെട്ട 33 മൊബൈൽ ഫോണുകൾ കണ്ടെത്തി

കണ്ണൂർ: നഷ്ടപ്പെട്ടതും മോഷണം പോയതുമായ 33 മൊബൈൽ ഫോണുകൾ വീണ്ടെടുത്ത് ഉടമസ്ഥർക്ക് കൈമാറി കണ്ണൂർ സിറ്റി സൈബർ സെൽ. മൊബൈൽ ഫോൺ സംസ്ഥാനത്തെ വിവിധ ജില്ലകൾക്ക് പുറമെ തമിഴ്നാട്, ഉത്തർപ്രദേശ്, ഡൽഹി, കർണാടക തുടങ്ങിയ അന്യസംസ്ഥാനങ്ങ ളിലാണ് ട്രേസ് ആയത്. ലഭിച്ചവരിൽ നിന്നും നേരിട്ടോ, പോലീസ് സ്റ്റേഷൻ വഴിയോ, കൊറിയർ വഴിയോ ആണ് എത്തിച്ചത്. കണ്ണൂർ സിറ്റി പോലീസ് കമ്മീഷണർ പി. നിധിൻരാജ് വീണ്ടെടുത്ത ഫോണുകൾ നേരിട്ട് ഉടമസ്ഥർക്ക് നല്കി. സൈബർ സെൽ എഎസ്ഐ എം.ശ്രീജിത്ത്, സിപിഒ പി.കെ. ദിജിൻ രാജ് എന്നിവർ ചേർന്നാണ് മൊബൈൽ ഫോൺ കണ്ടെത്തിയത്. ലഭിച്ച ഫോണുകൾ സൈബർ സെൽ ഉടമസ്ഥർക്ക് അൺബ്ലോക്ക്‌ ചെയ്തു നൽകി. കഴിഞ്ഞ ആറുമാസത്തിനുള്ളിൽ സൈബർ സെൽ 300 ഓളം മൊബൈൽ ഫോണുകൾ കണ്ടെത്തി ഉടമസ്ഥർക്ക് തിരിച്ച് നൽകിയിട്ടുണ്ട്. ഫോണുകൾ നഷ്ടപ്പെട്ടാൽ മൊബൈൽ ഫോണുകൾ നഷ്ടപ്പെട്ടാൽ സിം കാർഡ് ഡ്യൂപ്ലിക്കേറ്റ് എടുത്ത് ബന്ധപ്പെട്ട പോലീസ് സ്റ്റേഷനിൽ പരാതി നല്കുകയും ശേഷം പരാതി രസീത് ഉപയോഗിച്ച് സിഇഐആർ പോർട്ടൽ (https:// www. ceir.gov.in) വഴി ഫോണിലുള്ള മുഴുവൻ ഐഎംഇഐ നമ്പറുകളുടെ വിവരങ്ങളും നല്കിയാൽ ഫോൺ ബ്ലോക്ക് ആവുകയും ബ്ലോക്ക് ആയ ഫോണിൽ ആരെങ്കിലും സിം കാർഡ് ഇടുകയാണെങ്കിൽ ഫോൺ ട്രേസ് ആവുകയും ചെയ്യും. ശേഷം ഫോൺ വീണ്ടെടുക്കുന്നതിനുള്ള നടപടികൾ സ്വീകരിക്കും. സെക്കൻഡ് ഹാൻഡ് മൊബൈൽ ഫോണുകൾ വാങ്ങിക്കുമ്പോൾ ഉടമസ്ഥരിൽ നിന്നും നഷ്ടപ്പെട്ടതിന് ശേഷം ഉടമസ്ഥർ അറിയാതെയാണ് വിളിക്കുവാൻ ശ്രമിക്കുന്നത് എന്ന് മനസിലാക്കുവാൻ സഞ്ചാർസാത്തി(https:// sancharsa athi. gov.in) എന്ന വെബ്സൈറ്റിലെ Know Genuineness of Your Mobile Handset എന്ന ഓപ്ഷൻ വഴി ഐഎംഇഐ നമ്പർ നല്കിയാൽ മതി.

പെരുമ്പടവ് സൗത്ത് ഇന്ത്യൻ ബാങ്കിൽ ഷോർട്ട് സർക്യൂട്ട്

പെരുമ്പടവ്: പെരുമ്പടവ് സൗത്ത് ഇന്ത്യൻ ബാങ്കിൽ ഷോർട്ട് സർക്യൂട്ട് മൂലം തീയും പുകയും ഉയർന്നത് ജനങ്ങളിൽ ഭീതി ഉണർത്തി. ഇന്നലെ രാത്രി ഒന്പതോടെയായിരുന്നു സംഭവം. ബാങ്കിന്‍റെ എതിർവശത്ത് പ്രവർത്തിക്കുന്ന പെട്രോൾ പമ്പിൽ ഇന്ധനമടിക്കാൻ വന്ന ബസ് ജീവനക്കാരാണ് ബാങ്കിൽനിന്ന് പുക ഉയരുന്നത് കണ്ടത്. ഇവരുടെ അവസരോചിതമായി ഇടപെടലിൽ വൻദുരന്തം ഒഴിവായി. ഇവർ പുക ഉയരുന്ന സ്ഥലം കണ്ടെത്തുകയും ബാങ്ക് കെട്ടിടത്തിന്‍റെ ജനൽ ഗ്ലാസുകൾ പൊളിച്ച് ബാറ്ററിയുടെ സർക്യൂട്ടുകൾ വേർപെടുത്തുകയും ചെയ്തു. അപ്പോഴേക്കും ബാറ്ററികൾ നശിച്ചു പോയിരുന്നു. എന്നിരുന്നാലും മറ്റ് ഇലക്ട്രോണിക് സാധനങ്ങൾക്ക് കേടുപാടുകൾ സംഭവിച്ചില്ല. ബാങ്കിനുള്ളിലും പ്രദേശമാകെയും പുക പടരുകയും രൂക്ഷമായ ദുർഗന്ധം വ്യാപിക്കുകയും ചെയ്തു. സംഭവം അറിഞ്ഞ് നൂറുകണക്കിന് നാട്ടുകാരാണ് തടിച്ചു കൂടിയത്. 9.30 ഓടുകൂടി തളിപ്പറമ്പിൽനിന്ന് ഫയർഫോഴ്സും പെരിങ്ങോത്തു നിന്ന് പോലീസും എത്തിയെങ്കിലും സ്ഥിതി ശാന്തമായിരുന്നു. ബാങ്ക് ജീവനക്കാർ ഉൾപ്പെടെ ബാങ്കിനുള്ളിൽ കയറി പരിശോധന നടത്തിയതിനുശേഷമാണ് ബാറ്ററികൾക്ക് മാത്രമേ നാശം സംഭവിച്ചിട്ടുള്ളൂവെന്ന് വ്യക്തമാക്കിയത്.

തലശേരി എൻജിനിയറിംഗ് കോളജിനെ മികവിന്‍റെ കേന്ദ്രമാക്കി ഉയർത്തും

കണ്ണൂർ: തലശേരി എൻജിനിയറിംഗ് കോളജിനെ കിഫ്ബി സഹായത്തോടെ ഗവേഷണം, ഇന്നവേഷൻ, എൻജിനിയറിംഗ്, മാനേജ്‌മെന്‍റ് എന്നീ മേഖലകളിൽ മികവിന്‍റെ കേന്ദ്രമാക്കി ഉയർത്തുന്നതിനുള്ള നടപടികൾക്കു തുടക്കമായി. ഇതുസംബന്ധിച്ച് തയാറാക്കിയ കൺസെപ്റ്റ് നോട്ട് നിയമസഭാ സ്പീക്കർ എ.എൻ. ഷംസീറിന്‍റെ അധ്യക്ഷതയിൽ സ്പീക്കറുടെ ചേംബറിൽ ചേർന്ന യോഗത്തിൽ അംഗീകരിച്ചു. രണ്ടാഴ്ചയ്ക്കുള്ളിൽ പ്രോജക്‌ട് റിപ്പോർട്ട് തയാറാക്കി സമർപ്പിക്കുന്നതിന് കേപ്പ് അധികൃതരെ ചുമതലപ്പെടുത്തി. ആർട്ടിഫിഷ്യൽ ഇന്‍റലിജൻസ്, റോബോട്ടിക്സ്, ആധുനിക ലോജിസ്റ്റിക്സ് സാങ്കേതിക വിദ്യകൾ എന്നീ മേഖലകളിൽ വിദ്യാർഥികൾക്ക് മികച്ച പ്ലേസ്‌മെന്‍റ് ഉറപ്പാക്കും. പശ്ചാത്തല വികസനമുൾപ്പെടെ 50 കോടി രൂപയുടെ പ്രൊപ്പോസൽ കിഫ്ബി സഹായത്തോടെ നടപ്പാക്കും. കൂടാതെ തൊഴിൽ വകുപ്പിനു കീഴിലുള്ള കേരള അക്കാദമി ഫോർ സ്‌കിൽസ് എക്സലൻസ് (കെഎഎസ്ഇ) മുഖേന സ്‌കിൽ ഡെവലപ്മെന്‍റിന് പ്രോജക്‌ട് ആവിഷ്‌കരിക്കുന്നതും ആലോചിക്കും. ഈമാസം 25 ന് വീണ്ടും യോഗം ചേർന്ന് കിഫ്ബിക്ക് പ്രോപ്പോസൽ സമർപ്പിക്കുന്നതിനുള്ള നടപടി സ്വീകരിക്കും. കേപ്പ് ഡയറക്ടർ ഡോ. താജുദീൻ അഹമ്മദ്, ജോയിന്‍റ് ഡയറക്‌ടർ ഡോ. എസ്. ജയകുമാർ, സ്പീക്കറുടെ പ്രൈവറ്റ് സെക്രട്ടറി ടി. മനോഹരൻ നായർ, സഹകരണ മന്ത്രിയുടെ അഡീഷണൽ പ്രൈവറ്റ് സെക്രട്ടറി ദീപു പി. നായർ, അഡീഷണൽ പ്രൈവറ്റ് സെക്രട്ടറിമാരായ എം. കുഞ്ഞുമോൻ, എസ്.കെ. അർജുൻ എന്നിവർ യോഗത്തിൽ പങ്കെടുത്തു.

നിക്‌ഷാന്‍ ലക്കിഡ്രോ: ബംബര്‍ പ്രൈസ് സ്‌കോഡ കുഷാക്ക് കെ.സി. ഇഫ്രത്തിന്

കണ്ണൂർ: നിക്‌ഷാന്‍ ഗ്രാന്‍ഡ് ബംബര്‍ പ്രൈസായ സ്‌കോഡ കുഷാക്ക് നറുക്കെടുപ്പിലൂടെ കരിയാട് സ്വദേശി കെ.സി ഇഫ്രത്ത് (കൂപ്പണ്‍ നമ്പര്‍: 099832) സ്വന്തമാക്കി. തളിപ്പറമ്പ ഹജ്മസ് കണ്‍വന്‍ഷന്‍ സെന്‍ററില്‍ നടത്തിയ ചടങ്ങിൽ പ്രശസ്ത പിന്നണി ഗായകന്‍ സിദ്ധാര്‍ഥ് മേനോൻ ബംബര്‍ പ്രൈസ് നറുക്കെടുപ്പ് നിര്‍വഹിച്ചു. നറുക്കെടുപ്പിലൂടെ ബിഎംഡബ്ല്യു ജി 310 ആര്‍ആര്‍ ബൈക്ക് നേടിയവര്‍: വി.പി. താഹിറ (കൂപ്പണ്‍ നമ്പര്‍: 154674), ഷഹാന്‍ (കൂപ്പണ്‍ നമ്പര്‍: 279681). ഏഥര്‍ ഇലക്ട്രിക് സ്‌കൂട്ടര്‍ നേടിയവര്‍: എം. സുജ (കൂപ്പണ്‍ നമ്പര്‍: 265332), വിഷ്ണു (കൂപ്പണ്‍ നമ്പര്‍: 17089). നിക്‌ഷാന്‍ ഇലക്ട്രോണിക്‌സ് ചെയര്‍മാന്‍ കെ. മുസ്തഫ, നിക്‌ഷാന്‍ ഇലക്ട്രോണിക്‌സ് എംഡി എം.എം.വി. മൊയ്തു, എക്‌സിക്യുട്ടീവ് ഡയറക്ടര്‍ നിക്‌ഷാന്‍ അഹമ്മദ്, കെ.പി. ഫൈസല്‍, എല്‍ജി അപ്ലയന്‍സസ് ഇന്ത്യ പ്രൈവറ്റ് ലിമിറ്റഡ് ബ്രാഞ്ച് മാനേജര്‍ മുഹമ്മദ് റാഫി, വ്യാപാരി വ്യവസായി ഏകോപന സമിതി യൂത്ത് വിംഗ് ജില്ലാ പ്രസിഡന്‍റ് കെ.എസ്. റിയാസ്, സെതാക് ഹോള്‍ഡിംഗ്സ് ചെയര്‍മാന്‍ ഷുജെയ്ന്‍ മജീദ്, ഗ്രാന്‍ഡ് തേജസ് എംഡി കെ. മുഹമ്മദ് അഷ്‌റഫ്, നോര്‍ത്ത് മലബാര്‍ ചേംബര്‍ ഓഫ് കൊമേഴ്‌സ് പ്രസിഡന്‍റ് ടി.കെ. രമേഷ്കുമാര്‍, ട്രഷറര്‍ കെ. നാരായണന്‍കുട്ടി, ഭാരവാഹി കെ.വി. അനീഷ് തുടങ്ങിയവര്‍ പങ്കെടുത്തു. ചടങ്ങിനോടനുബന്ധിച്ച് നടത്തിയ സംഗീത നിശ "നിക്‌ഷാന്‍ അര്‍മാദം' നിറഞ്ഞ സദസിന് അവിസ്മരണീയമായ കലാവിരുന്നൊരുക്കി.

കരിന്തളം-വയനാട് 400 കെവി ലൈനിന് പകരം സോളാർ പദ്ധതി നടപ്പിലാക്കണം: കേരള കോൺഗ്രസ്‌ -എം

കണ്ണൂർ: കേരളത്തിലെ വൈദ്യുതി ക്ഷാമത്തിന് പരിഹാരം കാണുന്നതിന് കേന്ദ്ര സർക്കാരിന്‍റെ ഗ്യാരണ്ടിയിൽ ജർമൻ ബാങ്കിൽ നിന്ന് 1000 കോടിയിലധികം രൂപ വായ്പയെടുത്ത് കർഷകർക്ക് കൃഷിയും കൃഷി സ്ഥലവും നഷ്ടപ്പെടുത്തി സാമ്പത്തിക ബാധ്യത വരുത്തി വയ്ക്കുന്ന കരിന്തളം-വയനാട് 400 കെവി പദ്ധതിയിൽ നിന്ന് സർക്കാർ പിൻമാറി കേന്ദ്ര സർക്കാർ സബ്‌സിഡിയും മറ്റു ആനുകൂല്യങ്ങളും നൽകുന്ന സോളാർ പദ്ധതിയെ പ്രോത്സാഹിപ്പിക്കുകയാണ് വേണ്ടതെന്ന് കേരള കോൺഗ്രസ് -എം കണ്ണൂർ ജില്ലാ കമ്മിറ്റി യോഗം ആവശ്യപ്പെട്ടു.കേന്ദ്രസർക്കാർ 78,000 രൂപ സബ്സിഡിയും ദേശസാൽകൃത ബാങ്കുകൾ ആറുശതമാനം പലിശ നിരക്കിൽ വായ്പ നൽകിയും രാജ്യത്തെ വൈദ്യുതി ക്ഷാമത്തിന് പരിഹാരം കാണാൻ പി.എം. സൂര്യ ഘർ പദ്ധതി പ്രോത്സാഹിപ്പിക്കേണ്ടതാണ്. എന്നാൽ അതിനു ശ്രമിക്കാതെ സോളാർ വൈദ്യുതി ഇടപാടുകാർക്ക് അപ്രായോഗികവും കേരളത്തിന്‍റെ വൈദ്യുതി മേഖലയെ പ്രതികൂലമായി ബാധിക്കുന്നതുമായ സംസ്ഥാന വൈദ്യുതി റെഗുലേറ്ററി കമ്മീഷന്‍റെ കരട് ചട്ടം സോളാർ വ്യവസായത്തെ തകർക്കുകയാണ്. കടുത്ത വേനൽക്കാലത്ത് വൻ തുക മുടക്കി പുറത്തുനിന്ന് വൈദ്യുതി വാങ്ങുമ്പോൾ കഴിഞ്ഞ സാമ്പത്തിക വർഷം മാത്രം 125 ദശ ലക്ഷം യൂണിറ്റ് വൈദ്യുതിയാണ് സോളാർ സ്രോതസുകളിൽ നിന്ന് ലഭിച്ചത്. മാത്രമല്ല സോളാർ പദ്ധതിയിലൂടെ കേരളത്തിലേക്ക് എത്തേണ്ട ആയിരം കോടി രൂപയുടെ സബ്സിഡിയും, 500 കോടിയുടെ ജിഎസ്ടിയും 5000 കോടിയുടെ സോളാർ വ്യവസായവും, പതിനായിരക്കണക്കിന് തൊഴിലവസരവും നഷ്ടമാകും. കർഷകന് വലിയ കൃഷിനാശവും സാമ്പത്തിക നഷ്ടവും വരുത്തി 400 കെവി ലൈൻ വലിക്കാൻ ശ്രമിക്കുന്നത് പ്രതിഷേധാർഹമാണ്. കോടികളുടെ നഷ്ടം വരുത്തി 400 കെവി ലൈൻ വലിക്കാൻ ശ്രമിക്കുന്നതിനെതിരേ കേരള കോൺഗ്രസ് -എം ശക്തമായ സമരം ആരംഭിക്കുമെന്ന് യോഗം മുന്നറിയിപ്പ് നൽകി.ജില്ലാ പ്രസിഡന്‍റ് ജോയി കൊന്നക്കൽ അധ്യക്ഷത വഹിച്ചു. ജോയിസ് പുത്തൻപുര, മാത്യു കുന്നപ്പള്ളി, സജി കുറ്റിയാനിമറ്റം, ജോസ് ചെമ്പേരി, ജോബിച്ചൻ മൈലാടൂർ, കെ.ടി. സുരേഷ് കുമാർ, തോമസ് മാലത്ത് തുടങ്ങിവർ പ്രസംഗിച്ചു.

വായ്പ തിരിച്ചുപിടിക്കൽ നടപടി ആരംഭിച്ചെന്ന് അഡ്മിനിസ്‌ട്രേറ്റീവ് സമിതി

ഇരിട്ടി: കോളിത്തട്ട് സഹകരണബാങ്കിൽ വായ്പയിനത്തിൽ പിരിഞ്ഞുകിട്ടാനുള്ളത് ആറ് കോടിയോളം രൂപ. ബാങ്ക് നിക്ഷേപകർക്ക് നൽകാനുള്ളത് 15 കോടി. സിപിഎമ്മിന്‍റെ നിയന്ത്രണത്തിലായിരുന്ന കോളിത്തട്ട് സഹകരണ ബാങ്കിൽ സാമ്പത്തിക ക്രമക്കേടുകളെ തുടർന്ന് ഭരണസമിതി പിരിച്ചുവിട്ട് അഡ്മിനിട്രേറ്റർ ഭരണവും പിന്നീട് അഡ്മിനിസ്ട്രേറ്റീവ് സമിതിയും ഭരണം ഏറ്റെടുത്തിരുന്നു. ആറുമാസം കാലാവധിയുള്ള അഡ്മിസ്‌ട്രേറ്റീവ് സമിതിയാണ് വായ്‌പകൾ തിരിച്ചുപിടിക്കാനുള്ള നടപടികൾ ആരംഭിച്ചത്. എന്നാൽ അഡ്മിനിസ്ട്രേറ്റർ ഭരണകാലത്തുതന്നെ വായ്പാ തുക തിരിച്ചുപിടിക്കാനുള്ള നിയമ നടപടികൾ ആരംഭിക്കുകയും 70 ലക്ഷത്തോളം രൂപ തിരിച്ചുപിടിക്കുകയും ചെയ്തു. വായ്പയിനത്തിൽ ആറു കോടിയോളം രൂപ പിരിഞ്ഞുകിട്ടാനുണ്ട്. വായ്പ കൊടുത്ത തുകയിൽ പലതും ബിനാമി വായ്പകളായ നിലയിൽ തിരിച്ചടവിന് സാധ്യതയില്ല. ബാങ്കിന്‍റെ ബാധ്യത നിക്ഷേപകരുടെ 15 കോടിയും ജില്ലാ ബാങ്കിന് നൽകാനുള്ള 12 കോടിയുമാണ്. വായ്പാത്തുക മുഴുവൻ തിരിച്ചുപിടിച്ചാലും 21 കോടിയോളം രൂപ വീണ്ടും കണ്ടെത്തണം. ആറു മാസത്തിനുള്ളിൽ തെരഞ്ഞെടുപ്പ് നടത്തി പുതിയ ഭരണ സമിതിക്ക് ഭരണം കൈമാറുന്നതുവരെയാണ് അഡ്മിനിസ്ട്രേറ്റീവ് സമിതിയുടെ കാലാവധി. നേരത്തെ അഡ്മിനിസ്ട്രേറ്റർ ഭരണസമയത്തും തെരഞ്ഞെടുപ്പ് പ്രഖ്യാപിച്ചെങ്കിലും ആരും പത്രിക സമർപ്പിക്കാതെ വന്നതോടെ തെരഞ്ഞെടുപ്പ് നടന്നില്ല. തുടർന്നാണ് അഡ്മിനിസ്ട്രേറ്റീവ് സമിതി അധികാരം ഏൽക്കുന്നത്. കോടികളുടെ സാമ്പത്തികത്തട്ടിപ്പിൽ ഉളിക്കൽ പോലീസ് സ്റ്റേഷനിൽ കേസ് നിലനിൽക്കുന്നുണ്ട്. ഇത്തരം ബാങ്ക് തട്ടിപ്പ് കേസുകൾ ക്രൈംബ്രാഞ്ചാണ് അന്വേഷണം നടത്തേണ്ടത്. ഇതോടെ കോളിത്തട്ട് സഹകരണ ബാങ്കിലെ സാധാരണക്കാരായ നിക്ഷേപകർ എന്തുചെയ്യണമെന്നറിയാതെ ആശങ്കയിലാണ്.

വിവരാവകാശത്തിന് കൃത്യമായ മറുപടിയില്ല; ജൂണിയർ സൂപ്രണ്ടിന് പിഴയിട്ടു

തളിപ്പറമ്പ്: വിവരാവകാശ നിയമപ്രകാരമുള്ള സമയപരിധിക്കുള്ളിൽ കൃത്യമായ വിവരം നൽകാത്തതിന് തളിപ്പറമ്പ് താലൂക്ക് ഓഫീസിലെ ജൂണിയർ സൂപ്രണ്ടായിരുന്ന എ. ജയന് മൂവായിരം രൂപ പിഴയിട്ട് സംസ്ഥാന വിവരാവകാശ കമ്മീഷണർ. ഇപ്പോൾ കണ്ണൂർ കളക്ടറേറ്റിൽ ജൂണിയർ സൂപ്രണ്ടാണ് ജയൻ. സംസ്ഥാന വിവരാവകാശ കമ്മീഷണർ അഡ്വ ടി. കെ. രാമകൃഷ്ണനാണ് പിഴയിട്ടത്. നോട്ടീസ് കിട്ടി 30 ദിവസത്തിനകം പിഴയടച്ച് ചെലാൻ രസീത് സഹിതം കമ്മീഷൻ സെക്രട്ടറിയെ അറിയിക്കണമെന്നും ഉത്തരവിലുണ്ട്. പിഴയടച്ചില്ലെങ്കിൽ ഉദ്യോഗസ്ഥന്‍റെ സ്ഥാപനജംഗമ വസ്‌തുക്കൾ ജപ്‌തിചെയ്‌ത്‌ തുക ഈടാക്കാനും ഉത്തരവിൽ നിർദേശിച്ചിട്ടുണ്ട്. ഇക്കഴിഞ്ഞ19നാണ് ഉത്തരവ് പുറപ്പെടുവിച്ചത്. തളിപ്പറമ്പ് കൊളത്തൂരിലെ വി. ഒതേനന്‍റെ പരാതിയിലാണ് കമ്മീഷൻ ഉത്തരവ്. 1943 മുതൽ ഒതേനന്‍റെ അച്ഛന് കൈവശാവകാശ രേഖയുള്ളതും 1970 മുതൽ നികുതി അടയ്ക്കുന്നതുമായ, ചുഴലി വില്ലേജിൽ കൊളത്തൂർ ദേശത്തിൽ റീസർവേ നമ്പർ 66/1എ1-ൽപെട്ട 4.11 ഏക്കർ ഭൂമി 1991ൽ മിച്ചഭൂമിയായി സർക്കാർ ഏറ്റെടുത്തിരുന്നു. അന്ന് കരസേനയിലായിരുന്ന ഒതേനൻ ഇക്കാര്യം അറിഞ്ഞില്ല. പിന്നീട് ഉദ്യോഗസ്ഥരെ സമീപിച്ചെങ്കിലും ഫലമുണ്ടായില്ല. സ്ഥലം വിട്ടുകിട്ടാനാവശ്യപ്പെട്ട് 2002ൽ ഹൈക്കോടതിയെ സമീപിച്ചു. ഈ കേസിന്‍റെ ആവശ്യത്തിനാണ് 10 വിവരങ്ങൾ തേടി 2021 ഫെബ്രുവരി 20ന് ഒതേനൻ താലൂക്ക് ഓഫീസിൽ വിവരാവകാശ നിയമപ്രകാരം അപേക്ഷ നൽകിയത്. ചില വിവരങ്ങൾ ക്രോഡീകരിച്ച് സൂക്ഷിച്ചിട്ടില്ലെന്നായിരുന്നു മറുപടി. തുടർന്ന്, കമ്മീഷനിൽ അപ്പീൽ നൽകിയപ്പോഴും ഹിയറിംഗ് വേളയിലും ജയൻ വ്യക്തമായ മറുപടിയോ വിശദീകരണമോ നൽകിയില്ല. ഉദ്യോഗസ്ഥൻ വിവരാവകാശ നിയമത്തിന് വില കല്പിക്കുന്നില്ലെന്നതിന്‍റെ തെളിവാണിതെന്ന് കമ്മീഷണർ കുറ്റപ്പെടുത്തി. തുടർന്നാണ് പിഴയടയ്ക്കാൻ ഉത്തരവിട്ടത്. 2022 വരെ നികുതി സ്വീകരിച്ചതുൾപ്പെടെയുള്ള ഒതേനന്‍റെ വാദം അംഗീകരിച്ച് ഈ വർഷം ജനുവരി 15ന് മിച്ചഭൂമിയിൽനിന്ന് സ്ഥലം ഒഴിവാക്കി ഹൈക്കോടതിയും ലാൻഡ്‌സ്ട്രൈബ്യൂണലും ഉത്തരവായിട്ടുണ്ട്.

നിക്ഷേപകരെ കബളിപ്പിച്ച സഹകരണ സംഘം സെക്രട്ടറി അറസ്റ്റിൽ

ഇരിട്ടി: അങ്ങാടിക്കടവിൽ പ്രവർത്തിച്ചുവന്ന ഇരിട്ടി അഗ്രികൾച്ചറൽ ആൻഡ് അലൈഡ് എംപ്ലോയീസ് വെൽഫെയർ സൊസൈറ്റിയുടെ സെക്രട്ടറിയെ കരിക്കോട്ടക്കരി പോലീസും ക്രൈംബ്രാഞ്ചും ചേർന്ന് കോട്ടയത്തുനിന്നും അറസ്റ്റ് ചെയ്തു. ഒളിവിൽ കഴിഞ്ഞിരുന്ന കരിക്കോട്ടക്കരി സ്വദേശി വി.ഡി. ജോളിയെയാണ് (52) അറസ്റ്റ് ചെയ്തത്. സൊസൈറ്റിയുടെ ഫണ്ടിൽ മൂന്നുകോടിയിലധികം രൂപ തിരിമറി നടത്തി നിക്ഷേപകരെ കബളിപ്പിച്ചതിന് പ്രതിയുടെ പേരിൽ 2023 ൽ കേസ് രജിസ്റ്റർ ചെയ്തിരുന്നു. തുടർന്ന് ഇയാൾ ഒളിവിൽ പോകുകയായിരുന്നു. ഇതേ കേസിൽ സംഘം പ്രസിഡന്‍റ് സെബാസ്റ്റ്യൻ പറക്കണശേരിയെ ക്രൈംബ്രാഞ്ച് നേരത്തെ അറസ്റ്റ് ചെയ്തിരുന്നു. കോടതിയിൽ ഹാജാക്കിയ പ്രതിയെ റിമാൻഡ് ചെയ്തു.

പച്ചത്തേങ്ങ സംഭരണം തുടങ്ങി

ചെറുപുഴ: കേരഫെഡിന്‍റെ പച്ചത്തേങ്ങ സംഭരണ കേന്ദ്രം ചെറുപുഴയിൽ പ്രവർത്തനം ആരംഭിച്ചു. കേരഫെഡ് നേരിട്ട് പച്ചത്തേങ്ങ സംഭരിക്കുന്ന സംസ്ഥാനത്തെ ആദ്യത്തെ പച്ചത്തേങ്ങ സംഭരണകേന്ദ്രമാണ് ചെറുപുഴയിലേത്. ചെറുപുഴ പ്രശാന്ത് ഓഡിറ്റോറിയത്തിൽ നടന്ന ചടങ്ങിൽ കേരഫെഡ് ചെയർമാൻ വി. ചാമുണ്ണി ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് റെജി പുളിക്കൽ അധ്യക്ഷത വഹിച്ചു. മാനേജിംഗ് ഡയറക്ടർ സാജു കെ. സുരേന്ദ്രൻ പദ്ധതി വിശദീകരിച്ചു. കേരഫെഡ് വൈസ് ചെയർമാൻ കെ. ശ്രീധരൻ, കെ.സി. രാമചന്ദ്രൻ, കെ. ലക്ഷ്മണൻ, ചെറുപുഴ കൃഷി ഓഫീസർ പി. അഞ്ജു, കൃഷി അസിസ്റ്റന്‍റ് സുരേഷ് കുറ്റൂർ, അഭിലാഷ് കൃഷ്ണൻ എന്നിവർ പ്രസംഗിച്ചു. ചെറുപുഴ പുതിയ പാലത്തിന് സമീപത്തുള്ള പവൻ ബിൽഡിംഗിലാണ് പച്ചത്തേങ്ങ സംഭരണ കേന്ദ്രം പ്രവർത്തിക്കുന്നത്. കർഷകരെ കബളിപ്പിച്ച് ലാഭം കൊയ്യുന്ന ഇടനിലക്കാരെ വിപണിയിൽനിന്ന് പൂർണമായും ഒഴിവാക്കാൻ സാധിക്കുമെന്ന് കേരഫെഡ് അധികൃതർ പറഞ്ഞു. സംഭരണകേന്ദ്രം എല്ലാ ദിവസവും പ്രവർത്തിക്കും. ഇതിനുപുറമെ പച്ചത്തേങ്ങ സംഭരിക്കുന്ന ദിവസം തന്നെ പണം കർഷകന്‍റെ ബാങ്ക് അക്കൗണ്ടിൽ നിക്ഷേപിക്കുമെന്ന് ചെയർമാൻ പറഞ്ഞു. വിപണി വിലയെക്കാൾ കൂട്ടിയായിരിക്കും പച്ചത്തേങ്ങ സംഭരിക്കുന്നത്. കർഷകർ കേരഫെഡ് നൽകിയിട്ടുള്ള ഫോറത്തിൽ നൽകുന്ന തേങ്ങയുടെ അളവും ബാങ്ക് അക്കൗണ്ട് വിവരങ്ങളും വാട്സ് ആപ്പ് നമ്പരിൽ അയച്ചാൽ തേങ്ങ കൊണ്ടുവരേണ്ട തീയതി കർഷകരെ അറിയിക്കും.

ഹോപ്പിലെ അന്തേവാസി അന്തരിച്ചു

പിലാത്തറ: ഹോപ്പിലെ അന്തേവാസിയായ കെ.കെ. നാരായണൻ (75) അന്തരിച്ചു. മൃതദേഹം കണ്ണൂർ ജില്ലാ ആശുപത്രി മോർച്ചറിയിൽ സൂക്ഷിച്ചിട്ടുണ്ട്. 2014 ഏപ്രിൽ ഏഴിന് കണ്ണൂർ ജില്ലാ ആശുപത്രിയിലെ ഒന്പതാം വാർഡിൽ ചികിത്സ കഴിഞ്ഞ് ഏറ്റെടുക്കാൻ ആരുമില്ലാത്തതിനാൽ ആശുപത്രി അധികൃതരുടെയും പോലീസിന്‍റെയും അഭ്യർഥന പ്രകാരം ഹോപ്പ് അധികൃതർ ഇദ്ദേഹത്തെ ഏറ്റെടുക്കുകയായിരുന്നു. ഇദ്ദേഹത്തിന്‍റെ ബന്ധുക്കളോ സുഹൃത്തുക്കളോ മൃതദേഹം ഏറ്റെടുത്ത് സംസ്കരിക്കാൻ താത്പര്യപെടുന്നുവെങ്കിൽ 10ന് ഉച്ചയ്ക്ക് 12 ന് മുന്പ് പരിയാരം പോലീസ് സ്റ്റേഷനിലോ ഹോപ്പിലോ നേരിട്ട് എത്തിയോ 9605398889 എന്ന ഫോൺ നന്പറിലോ ബന്ധപ്പെടുക. അല്ലാത്തപക്ഷം അതിനുശേഷം ജനപ്രതിനിധിയുടെ നിർദേശാനുസരണം സംസ്കാരം നടത്തുന്നതായിരിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]