ADVERTISEMENT

ADVERTISEMENT

സ്കൂൾ അവധി

പത്തനംതിട്ട: ജില്ലയിൽ ദുരിതാശ്വാസ ക്യാമ്പായി പ്രവർത്തിക്കുന്ന ആലംതുരുത്തി ഗവ. എൽപിഎസ്, പെരിങ്ങര വില്ലേജ് മേപ്രാൽ സെൻറ് ജോൺസ് എൽപിഎസ്, കവിയൂർ വില്ലേജ് പടിഞ്ഞാറ്റുംചേരി ഗവ. എൽപിഎസ്, കുറ്റപ്പുഴ വില്ലേജ് തിരുമൂലപുരം എസ്എൻവി സ്കൂൾ,

പന്തളം വില്ലേജ് മുടിയൂർക്കോണം എംടി എൽപിഎസ് എന്നിവയ്ക്ക് ജില്ലാ കളക്ടർ ഇന്ന് അവധി പ്രഖ്യാപിച്ചു.

ADVERTISEMENT

ജില്ലാതല പ്രേരണാ ഉത്സവ് 2025 സമാപിച്ചു

റാന്നി: വെച്ചൂച്ചിറ ജവഹർ നവോദയ വിദ്യാലയത്തിൽ നടന്ന ജില്ലാതല പ്രേരണ ഉത്സവ് സമാപിച്ചു. ജില്ലയിലെ അന്പതോളം സ്കൂളുകളിൽ നിന്നും നൂറോളം വിദ്യാർഥികൾ പ്രേരണ ഉത്സവിൽ പങ്കെടുത്തു. വിദ്യാർഥികളുടെ സൃഷ്ടിപരവും സർഗാത്മകവുമായ കഴിവുകളുടെ മാറ്റുരയ്ക്കൽ, വിധികർത്താക്കളുമായുള്ള അഭിമുഖം എന്നിവയ്ക്ക് ജില്ലയിൽ നിന്നും തെരഞ്ഞെടുക്കപ്പെട്ട വിദ്യാർഥികളുടെ ചുരുക്കപ്പട്ടിക, വിദ്യാഭ്യാസ മന്ത്രാലയത്തിന്റെ പ്രേരണ പോർട്ടലിൽ സമർപ്പിച്ചു. പരിപാടിയിൽ ജില്ലാ വിദ്യാഭ്യാസ ഓഫീസർക്ക് വേണ്ടി എഇഒ കെ.എസ്. ജയന്തി, വിധികർത്താക്കൾ, നവോദയ പ്രിൻസിപ്പൽ, ജീവനക്കാർ തുടങ്ങിയവരും സന്നിഹിതരായിരുന്നു.. കുട്ടികളുടെ ബഹുമുഖമായ നൈപുണ്യ വികസനത്തിനുള്ള സാഹചര്യം ഒരുക്കുന്നതിനായി വിഭാവനം ചെയ്യപ്പെട്ട മിഷൻ പ്രേരണയുടെ ഭാഗമാണ് പ്രേരണ പോർട്ടൽ തയാറാക്കിയത്.

റാന്നിയിൽ കേരള കോൺ.- എം പ്രതിഷേധം

റാന്നി: ചത്തീസ്ഗഡിൽ മലയാളി കന്യാസ്ത്രീമാരെ അകാരണമായി അറസ്റ്റ് ചെയ്ത് ജയിലിൽ അടച്ച നടപടിക്കെതിരേ കേരള കോൺഗ്രസ് - എം റാന്നി നിയോജക മണ്ഡലം കമ്മിറ്റിയുടെ പ്രതിഷേധ പ്രകടനവും യോഗവും നടന്നു. ‌ റാന്നി എംഎസ് സ്കൂൾ മൈതാനിയിൽനിന്ന് ആരംഭിച്ച് പെരുമ്പുഴ സ്റ്റാൻഡിൽ ധർണയോടുകൂടി സമാപിച്ചു. നിയോജക മണ്ഡലം വൈസ് പ്രസിഡന്‍റ് രാജു ഇടയാടിയിൽ അധ്യക്ഷത വഹിച്ചു യോഗം ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം ഉദ്ഘാടനം ചെയ്തു. സാബു കുറ്റിയിൽ, ബോബി കാക്കനാപ്പള്ളിയിൽ, എം. സി ജയകുമാർ, ലിജോ വാളനാംകുഴി, ബിബിൻ കല്ലംപറമ്പിൽ, ടോമി വടക്കേമുറി, ടോം ആയല്ലൂർ, സിബി ജെയിംസ് മൈലേട്ട്, വി.ജി. റജി എന്നിവർ പ്രസംഗിച്ചു.

കോഴഞ്ചേരിയിൽ സംയുക്ത ക്രൈസ്തവ പ്രതിഷേധം

കോഴഞ്ചേരി: ഛത്തീസ്ഗഡിൽ കന്യാസ്ത്രീമാർക്കെതിരേയുള്ള കള്ളക്കേസില്‍ പ്രധാനമന്ത്രിയും രാഷ്‌ട്രപതിയും ഇടപെടണമെന്ന് സംസ്ഥാന ആസൂത്രണ ബോർഡംഗം ഡോ. വര്‍ഗീസ് ജോര്‍ജ്. കോഴഞ്ചേരിയിലെ വിവിധ ക്രൈസ്തവ സഭകള്‍ സംയുക്തമായി നടത്തിയ അവകാശ സംരക്ഷണ പ്രതിഷേധ റാലിയില്‍ പ്രസംഗിക്കുകയായിരുന്നു അദ്ദേഹം. ആയിരത്തില്‍പരം ആളുകള്‍ പങ്കെടുത്തു സമരത്തിന് ഐക്യദാര്‍ഢ്യം പ്രഖ്യാപിച്ചു. മാരാമൺ സെന്‍റ് ജോസഫ്സ് പള്ളിയിൽനിന്നാരംഭിച്ച റാലി കോഴഞ്ചേരി ടൗണിൽ സമാപിച്ചു. ഫാ. ജോണ്‍സണ്‍ ചിറയിൽ, ഫാ. ബിജു മാത്യു, റവ. രാജു പി. ജോർജ്, ഫാ. സ്റ്റീഫൻ പുത്തൻപറന്പിൽ, ഫാ. ജോണ്‍സണ്‍ ചിറയിൽ, മാത്യു നരിപ്പാറ, റവ. ജിജി തോമസ്, റവ. റോഷന്‍ വി. മാത്യൂസ്, റവ. ഡാനിയല്‍ വര്‍ഗീസ്, റവ. ഐപ്പ് ജോസഫ്, സാവിയോ സ്കൂൾ പ്രിൻസിപ്പൽ സിസ്റ്റര്‍ റോസിലി സിറിയക്, സിസ്റ്റര്‍ മേരി ഏബ്രഹാം , സിസ്റ്റര്‍ ജെസി പോള്‍ തുടങ്ങിയവർ പ്രസംഗിച്ചു.

കുന്നന്താനം കിൻഫ്ര വ്യവസായ പാർക്കിൽ 33 കെവി സബ് സ്റ്റേഷൻ നിർമിക്കും

തിരുവല്ല: കുന്നന്താനം കിൻഫ്ര വ്യവസായ പാർക്കിൽ 33 കെവി സബ്സ്റ്റേഷൻ നിർമിക്കുന്നതിന് 16.9 കോടി രൂപയുടെ ഭരണാനുമതി ലഭിച്ചതായി മാത്യു ടി. തോമസ് എംഎൽഎ അറിയിച്ചു. കുന്നന്താനം കിൻഫ്ര വ്യവസായ പാർക്കിലും പരിസര പ്രദേശങ്ങളിലും വൈദ്യുതിയുടെ ആവശ്യകത കൂടി വരുന്ന സാഹചര്യത്തിൽ മെച്ചപ്പെട്ടതും തടസങ്ങളില്ലാത്തതുമായ വൈദ്യുതി വിതരണം ഉറപ്പാക്കുന്നതിന് നിർദ്ദിഷ്ട പദ്ധതിയിലൂടെ സാധിക്കും. മുൻപ് അനുമതി ലഭിച്ചിരുന്നുവെങ്കിലും സബ് സ്റ്റേഷൻ സ്ഥാപിക്കുന്നതിനുള്ള സ്ഥലം ലഭിക്കുന്നത് സംബന്ധിച്ചുള്ള അവ്യക്തത കാരണമാണ് പദ്ധതിക്ക് താമസം നേരിട്ടത്. വ്യവസായ വകുപ്പിന് കീഴിലുള്ള കുന്നന്താനത്തുള്ള കിൻഫ്ര പാർക്കിലെ ഭൂമി സ്വന്തമായി വിട്ടുനൽകാമെന്ന വ്യവസ്ഥയിൽ പദ്ധതി ആസൂത്രണം ചെയ്തുവെങ്കിലും സ്ഥലം കൈമാറുന്നതിൽ നിയമതടസം നേരിടുകയും തുടർന്ന് 60 വർഷത്തേക്ക് സെന്റിന് ഒരു രൂപ എന്ന നാമമാത്രമായ നിരക്കിൽ പാട്ടവ്യവസ്ഥയിൽ 76.50 സെന്‍റ് സ്ഥലം വിട്ടുനൽകുന്നതിന് തീരുമാനിച്ചു. തുടർന്ന് പുതുക്കിയ നിരക്കിലുള്ള എസ്റ്റിമേറ്റ് പ്രകാരം ഭരണാനുമതി ലഭിച്ചിട്ടുള്ളത്. തൃക്കൊടിത്താനത്തുള്ള 110 കെവി സബ് സ്റ്റേഷനിൽ 33 കെവി ട്രാൻസ്ഫോർമറും ഫീഡറുകളും സ്ഥാപിച്ച് അതിൽ നിന്ന് എട്ട് കിലോമീറ്റർ 33 കെവി ലൈൻ വലിച്ച് ആവശ്യമായ സജ്ജീകരണങ്ങളോടെ സബ് സ്റ്റേഷൻ നിർമിക്കുന്നതിനാണ് വിഭാവനം ചെയ്തിരിക്കുന്നത്.

തെരുവുനായ ശല്യം; നടപടി ഇല്ലാത്തതിൽ വെച്ചൂച്ചിറയിൽ പ്രതിഷേധം

റാന്നി: വെച്ചൂച്ചിറയിൽ വർധിച്ചുവരുന്ന തെരുവുനായ ശല്യത്തിൽ നടപടി വൈകുന്നതിൽ പ്രതിഷേധം. ഡിവൈഎഫ്ഐ നേതൃത്വത്തിൽ ഇന്നലെ പഞ്ചായത്ത് ഓഫീസിലേക്ക് മാർച്ച് നടത്തി. കഴിഞ്ഞദിവസം വിദ്യാർഥികളും വ്യാപാരിയും വഴിയാത്രക്കാരുമടക്കം അഞ്ചു പേർക്കാണ്തെരുവുനായയുടെ കടിയേറ്റത്. മാർക്കറ്റ് കവല ഭാഗങ്ങളിലായി എട്ടോളം തെരുവു നായ്ക്കൾക്കും കടിയേറ്റിട്ടുണ്ട്. കടിച്ച നായയ്ക്ക് പേവിഷബാധയുള്ളതായും സംശയിക്കുന്നു. ബുധനാഴ്ച വൈകുന്നേരം ട്യൂഷനു ശേഷം വീട്ടിലേക്കു പോകാൻ സിഎംഎസ് എൽപി സ്കൂളിനു സമീപം നിന്നിരുന്ന വിദ്യാർഥിനിക്കാണ് നായയുടെ കടി ആദ്യം ഏറ്റത്. കൈയ്ക്കു ഗുരുതരമായി പരിക്കേറ്റ കുട്ടിയെ ആശുപത്രിയിൽ പ്രവേശിപ്പിച്ചു. കണ്ടു വന്ന വഴിയാത്രക്കാരനാണ് നായയെ വിരട്ടി ഓടിച്ചത്. പിന്നിട് കവല ഭാഗത്തേക്ക് ഓടിയ നായ വ്യാപാരിയായ വെച്ചൂച്ചിറ മോളോപറമ്പിൽ ജോജി ജോർജ്, കണ്ണംകേരിൽ ആലിയ, നിതീഷ് എന്നിവർ അടക്കം അഞ്ചു പേരെ കടിച്ചു. ഇതിനിടയിൽ ഈ ഭാഗത്ത് എട്ടോളം തെരുവുനായ്ക്കൾക്കും കടിയേറ്റതായി പറയുന്നു. കടിയേറ്റവരെ റാന്നി, കാഞ്ഞിരപ്പള്ളി താലൂക്കാശുപത്രികളിലും രണ്ടു പേരെ പിന്നീട് കോട്ടയം മെഡിക്കൽ കോളജ് ആശുപത്രിയിലും പ്രവേശിപ്പിച്ചു. നായയെ കണ്ടെത്താനാകാത്തതിനാൽ ഇതിനു പേ വിഷബാധ സ്ഥിരീകരിക്കാനുമായിട്ടില്ല.

വിവാദങ്ങളിലൂടെ വിദ്യാഭ്യാസ മേഖലയെ തകർക്കാൻ ശ്രമമെന്ന് കെപിഎസ്ടിഎ

പത്തനംതിട്ട: ഒന്നിനു പിറകെ ഒന്നായി വിവാദ പ്രസ്താവനകളുമായി വിദ്യാഭ്യാസ മന്ത്രി മുന്നോട്ടു പോകുമ്പോൾ തകരുന്നത് കേരളത്തിലെ മാതൃകാ വിദ്യാഭ്യാസ പദ്ധതിയാണെന്ന് കെപിഎസ്ടിഎ. പതിറ്റാണ്ടുകളായി നിലനിന്നു വരുന്ന മുഴുവൻ കീഴ് വഴക്കങ്ങളും ലംഘിച്ചുകൊണ്ട് യാതൊരു മുന്നൊരുക്കവുമില്ലാതെ മന്ത്രിക്ക് മനസിൽ തോന്നുന്നതു വിളിച്ചു പറയുന്ന ശൈലി ജനാധിപത്യ കേരളത്തിന് ഭൂഷണമല്ലെന്ന് കെപിഎസ്ടിഎ ജില്ലാ സമിതി കുറ്റപ്പെടുത്തി. കേരളത്തിന്‍റെ ഭൂപ്രകൃതിയും കാലാവസ്ഥാ വ്യതിയാനങ്ങളും കണക്കിലെടുത്ത് രൂപപ്പെടുത്തിയ അക്കാദമിക് കലണ്ടർ അട്ടിമറിക്കാനുള്ള ബോധപൂർവമായ ശ്രമം ചെറുക്കപ്പെടേണ്ടതാണ്. ജൂൺ, ജൂലൈ മാസങ്ങളിൽ മഴയായതിനാൽ അവധി നൽകുകയും ഏപ്രിൽ, മേയ് മാസങ്ങൾ പ്രവൃത്തി ദിനങ്ങളും ആക്കാമെന്ന മന്ത്രിയുടെ പ്രസ്താവന ചെരുപ്പിനനുസരിച്ച് കാലു മുറിക്കുന്നതു പോലെ ശുദ്ധ വിഡ്ഢിത്തരമാണ്. പൊതുവിദ്യാഭ്യാസ വകുപ്പ് തന്നെ മധ്യവേനൽ അവധിക്കാലത്ത് വിദ്യാർഥികളുടെ സർഗവാസനകളെ പോഷിപ്പിക്കുന്ന ക്യാമ്പുകൾ അടക്കം യാതൊരു പ്രവർത്തനങ്ങളും നടത്തരുതെന്ന ഉത്തരവിറക്കിയിട്ടുള്ള കാര്യം മന്ത്രി വിസ്മരിക്കരുത്. ബാലാവകാശ കമ്മീഷനും ഇതേ തരത്തിൽ ഉത്തരവിറക്കിയിട്ടുള്ളതാണ് സ്വന്തം ഇഷ്ടത്തിനനുസരിച്ച് ഉത്തരവുകളെ മാറ്റിമറിക്കുകയും വളച്ചൊടിക്കുകയും ചെയ്യുന്ന മന്ത്രി, മുന്നൊരുക്കങ്ങളില്ലാതെ, ഏകപക്ഷീയമായി പ്രഖ്യാപിച്ച 220 ദിന അക്കാദമിക് കലണ്ടറിൽ കോടതിയിൽ പോയി പരാജയം ഏറ്റുവാങ്ങിയിരിക്കുകയാണെന്നും കെപിഎസ്ടിഎ ചൂണ്ടിക്കാട്ടി. പൊതു വിദ്യാഭ്യാസത്തിന്‍റെ നന്മയെ കരുതി വിവാദ തീരുമാനങ്ങൾ എടുക്കുന്നതിൽ നിന്ന് മന്ത്രി പിന്തിരിയണമെന്നും യാഥാർഥ്യങ്ങൾ ഉൾക്കൊണ്ട് മുന്നോട്ടുപോകാൻ തയാറാകണമെന്നും ജില്ലാ പ്രസിഡന്‍റ് ഫിലിപ്പ് ജോർജ്, സെക്രട്ടറി വി.ജി കിഷോർ എന്നിവർ ആവശ്യപ്പെട്ടു.

പത്തനംതിട്ടയിൽ കോൺഗ്രസ് പ്രതിഷേധം

പത്തനംതിട്ട: ചത്തീസ്ഗഡിൽ മനുഷ്യക്കടത്ത്, മത പരിവർത്തന കുറ്റങ്ങൾ ചുമത്തി മലയാളികളായ രണ്ട് കന്യാസ്ത്രീമാരെ അറസ്റ്റ് ചെയ്തതു ഭരണകൂട ഭീകരതയാണെന്ന് ഡോ. ഗീവർഗീസ് മാർ കൂറിലോസ് മെത്രാപ്പോലീത്ത. ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ പത്തനംതിട്ടയിൽ സംഘടിപ്പിച്ച പ്രകടനവും പ്രതിഷേധ കൂട്ടായ്മയും ഉദ്ഘാടനം ചെയ്യുകയായിരുന്നു അദ്ദേഹം. രാജ്യത്തൊട്ടാകെ ന്യൂനപക്ഷ വേട്ടയും ആൾക്കൂട്ട വിചാരണയും നടത്തുന്നതിനെതിരേ മതേതര സമൂഹം സ്വരം ഉയർത്തണമെന്നും മെത്രാപ്പോലീത്ത പറഞ്ഞു.ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ അധ്യക്ഷത വഹിച്ചു. കെപിസിസി ജനറൽ സെക്രട്ടറി പഴകുളം മധു മുഖ്യപ്രഭാഷണം നടത്തി. മുൻ എംഎൽഎ മാലേത്ത് സരളാദേവി, കെപിസിസി നിർവാഹകസമിതി അംഗം ജോർജ് മാമ്മൻ കൊണ്ടൂർ, യുഡിഎഫ് ജില്ലാ കൺവീനർ എ. ഷംസുദീൻ, ഫാ. ഡാനിയേൽ പുല്ലേലിൽ, നേതാക്കളായ സാമുവൽ കിഴക്കുപുറം, റോജി പോൾ, വെട്ടൂർ ജ്യോതിപ്രസാദ്, അനിൽ തോമസ്, കെ. ജാസിം കുട്ടി, സജി കൊട്ടക്കാട്, ജോൺസൺ വിളവിനാൽ, കാട്ടൂർ അബ്ദുൾ സലാം, സിന്ധു അനിൽ, എസ്.വി. പ്രസന്നകുമാർ, ബിജിലി ജോസഫ്, രജനി പ്രദീപ് തുടങ്ങിയവർ പ്രസംഗിച്ചു.

ഓൺലൈൻ പണം തട്ടിപ്പുകൾ തടയാൻ ബാങ്കുകളുടെ പിന്തുണ തേടും: ജില്ലാ പോലീസ് മേധാവി

പത്തനംതിട്ട: ഓൺലൈൻ പണമിടപാടുകളിലെ തട്ടിപ്പുകൾ തടയാൻ ബാങ്ക് അധികൃതരുടെ സഹായത്തോടെ നടപടികൾ സ്വീകരിക്കുമെന്ന് ജില്ലാ പോലീസ് മേധാവി ആർ. ആനന്ദ്. എല്ലാ പ്രായക്കാരും ഇത്തരം സൈബർ തട്ടിപ്പുകളിൽ ഉൾപ്പെടുന്നുണ്ട്. ബോധവത്കരണത്തോടൊപ്പം തട്ടിപ്പുകൾ തടയാൻ ആവശ്യമായ നടപടികൾ ബാങ്കുകളുമായി ബന്ധപ്പെട്ടും ഏർപ്പെടുത്തുമെന്ന് എസ്പി പറഞ്ഞു. സ്ത്രീകളുടെയും കുട്ടികളുടെയും സുരക്ഷ ഉറപ്പാക്കാനാവശ്യമായ നടപടികൾക്കായിരിക്കും ജില്ലയിൽ പ്രാധാന്യം നൽകുകയെന്നും അദ്ദേഹം അറിയിച്ചു. പത്തനംതിട്ട മുനിസിപ്പൽ ബസ് സ്റ്റാൻഡിൽ കുട്ടികൾ ഉൾപ്പെട്ട ആക്രമണങ്ങൾ ഉൾപ്പെടെയുള്ളവ തടയാൻ നടപടി ഉണ്ടാകും. ലഹരിക്കെതിരെ ശക്തമായ നിലപാടുകൾ സ്വീകരിക്കുമെന്നും എസ്പി പറഞ്ഞു. പോക്സോ കുറ്റകൃത്യങ്ങൾ ജില്ലയിൽ വർധിച്ചുവരുന്നത് ശ്രദ്ധയിൽപെട്ടിട്ടുണ്ട്. നീതിയുക്തമായ അന്വേഷണം ഉറപ്പാക്കുകയാണ് ഇക്കാര്യത്തിൽ ചെയ്യുകയെന്നും ആക്ഷേപങ്ങൾ പരിശോധിക്കുമെന്നും ജില്ലാ പോലീസ് മേധാവി അറിയിച്ചു.

കന്യാസ്ത്രീമാരുടെ അറസ്റ്റ്: തിരുവല്ലയിൽ പ്രതിഷേധം ഇരന്പി

തിരുവല്ല: ഛത്തീസ്ഗഡിൽ മലയാളി സന്യാസിനിമാരെ വ്യാജകുറ്റം ചുമത്തി അറസ്റ്റ് ചെയ്തതിൽ പ്രതിഷേധിച്ച് മലങ്കര സുറിയാനി കത്തോലിക്കാ സഭ തിരുവല്ല അതിരൂപതയുടെ നേതൃത്വത്തിൽ ഉപവാസ പ്രാർഥനായഞ്ജം നടത്തി. തിരുവല്ല കെഎസ്ആർടിസി ബസ് സ്റ്റാൻഡിന് എതിർവശത്തു നടന്ന സമ്മേളനത്തിൽ തിരുവല്ല അതിഭദ്രാസന അധ്യക്ഷൻ ഡോ. തോമസ് മാർ കൂറിലോസ് മെത്രാപ്പോലീത്ത അധ്യക്ഷത വഹിച്ചു. മാർത്തോമ്മ സഭ സഫ്രഗൻ മെത്രാപ്പോലീത്ത ഡോ. ജോസഫ് മാർ ബർണബാസ് ഉദ്ഘാടനം ചെയ്തു. സാധാരണക്കാർക്കു വിദ്യാഭ്യാസവും അടിസ്ഥാന സൗകര്യങ്ങളും നൽകി സ്നേഹം എന്ന മതമാണ് രാജ്യത്തു മിഷനറിമാർ പ്രചരിപ്പിക്കുന്നതെന്നും നിർബന്ധപൂർവം ആരെയും മതപരിവർത്തനം നടത്തിയിട്ടില്ലെന്നും സഫ്രഗൻ മെത്രാപ്പോലീത്ത ചൂണ്ടിക്കാട്ടി. തിരുവല്ല അതിഭദ്രാസന മുഖ്യ വികാരി ജനറാൾ ഫാ. ഐസക് പറപ്പള്ളിൽ, യാക്കോബായ സഭ നിരണം ഭദ്രാസനാധിപൻ ഡോ. ഗീവർഗീസ് മാർ കൂറിലോസ് മെത്രാപ്പോലീത്ത, സിഎസ്ഐ സഭ മധ്യകേരള മഹാ ഇടവക മുൻ അധ്യക്ഷൻ ബിഷപ് തോമസ് സാമുവേൽ, ക്നാനായ കത്തോലിക്ക കോട്ടയം അതിരൂപത സഹായ മെത്രാൻ ഗീവർഗീസ് മാർ അപ്രം, മലങ്കര ഓർത്തഡോക്സ് സഭ അസോസിയേഷൻ സെക്രട്ടറി ബിജു ഉമ്മൻ, മാർത്തോമ്മ സഭ വൈദിക ട്രസ്റ്റി റവ. എബി മാമ്മൻ, അല്മായ ട്രസ്റ്റി അൻസിൽ കോമാട്ട് , മാത്യു ടി.തോമസ് എംഎൽഎ തുടങ്ങിയവർ പ്രസംഗിച്ചു. വൈകുന്നേരം അഞ്ചുവരെ ഉപവാസ യജ്ഞം തുടർന്നു. ഉപവാസ യജ്ഞത്തിനു സമാപനം കുറിച്ച് തിരുവല്ല പ്രൈവറ്റ് ബസ് സ്റ്റാൻഡിലേക്കു നടന്ന മൗന ജാഥയിൽ വിവിധ സഭകളിലെ അനേകം വൈദികരും സന്യാസിനികളും നൂറുകണക്കിന് വിശ്വാസികളും വിവിധ ഭക്ത സംഘടനകളുടെ പ്രതിനിധീകരിച്ചുള്ള സംഘടന ഭാരവാഹികളും പങ്കെടുത്തു. വായ് മൂടിക്കെട്ടി, കൈകൾ ചങ്ങല ഉപയോഗിച്ചു ബന്ധിച്ചാണ് വൈദികരും സന്യാസിനികളും വിശ്വാസികളും ജാഥയിൽ പങ്കെടുത്തത്. പ്രൈവറ്റ് ബസ് സ്റ്റാൻഡ് ഓപ്പൺ സ്റ്റേജിലെ സമാപന യോഗത്തിൽ ബിഷപ് ഡോ. ഏബ്രഹാം മാർ യൂലിയോസ്, ചാണ്ടി ഉമ്മൻ എംൽഎ, മുൻ എംഎൽഎ ജോസഫ് എം. പുതുശേരി, വർഗീസ് മാമ്മൻ, വൈദിക ഉപദേഷ്ടാവ് ഫാ. മത്തായി മണ്ണൂർ വടക്കേതിൽ, എംസിവൈഎം ഡയറക്ടർ ഫാ. ചെറിയാൻ കുരിശുംമൂട്ടിൽ, എംസിഎംഎഫ് ഡയറക്ടർ ഫാ. ഫിലിപ്പ് തായില്യം, എംസിസി എൽ ഡയറക്ടർ ഫാ. സന്തോഷ് അഴകത്ത് തുടങ്ങിയവർ പ്രസംഗിച്ചു.

ചെന്പടയ്ക്കെതിരേ സനൽ കുമാറിന്‍റെ പരാതി : സൈബർ പോരിൽ കുരുങ്ങി സിപിഎം

പത്തനംതിട്ട: സിപിഎമ്മിൽ വീണ്ടും സൈബർ പോര് രൂക്ഷമായി. ജില്ലാ സെക്രട്ടേറിയറ്റംഗം ആർ. സനൽകുമാറിനെതിരേയുണ്ടായ ഫേസ്ബുക്ക് പോസ്റ്റാണ് വിവാദമായിരിക്കുന്നത്. മന്ത്രി വീണാ ജോർജിനെ അനുകൂലിക്കുന്ന ‘ആറന്മുളയുടെ ചെമ്പട’ എന്ന അക്കൗണ്ടിലൂടെയാണ് വിമർശനം. ‘കപ്പൽ മുങ്ങിയാലും കപ്പിത്താൻ ചത്താൽ മതി’ എന്നാണ് പോസ്റ്റ്. സംഭവത്തില്‍ സനൽകുമാർ തിരുവല്ല ഡിവൈഎസ്പിക്കു പരാതി നൽകി. അപകീർത്തിപ്പെടുത്തുന്ന പരാമർശങ്ങൾ നടത്തുന്ന ‘ആറന്മുളയുടെ ചെമ്പട’ എന്ന ഫേസ്ബുക്ക് അക്കൗണ്ടിനെതിരേ നടപടി വേണമെന്നാണ് ആവശ്യം. ഡിവൈഎസ്പിക്കു ലഭിച്ച പരാതി സൈബർ സെല്ലിനു കൈമാറി.ചെന്പട ഗ്രൂപ്പ് വീണാ ജോർജിന് അടുത്ത തെരഞ്ഞെടുപ്പിൽ സീറ്റ് ഉണ്ടാകില്ലെന്നുള്ള നിഗമനത്തിൽ ആറന്മുളയിൽ സനൽ കുമാർ കയറിക്കൂടാൻ ശ്രമിക്കുന്നുവെന്ന തരത്തിൽ നേരത്തേ ചെന്പടയുടെ ഗ്രൂപ്പിൽ വന്ന പോസ്റ്റ് വിവാദമായിരുന്നു. കോട്ടയം മെഡിക്കൽ കോളജിൽ കെട്ടിടം ഇടിഞ്ഞുവീണ സംഭവത്തിൽ മന്ത്രി വീണാ ജോർജിനെ സമൂഹ മാധ്യമത്തിലൂടെ വിമർശിച്ച നേതാക്കൾക്കെതിരേ നടപടിയുണ്ടാകാത്തതിനു പിന്നിൽ സനൽ കുമാറെന്ന് ഇവർ ആരോപണം ഉയർത്തിയിരുന്നു. കോട്ടയം സംഭവത്തിൽ വീണയുടെ നിലപാടുകളെ വിമർശിച്ചു പാർട്ടി പ്രാദേശിക നേതാക്കളടക്കം രംഗത്തുവന്നത് ജില്ലാ കമ്മിറ്റിയും സെക്രട്ടേറിയറ്റും ചർച്ച ചെയ്തു നടപടിക്കു ശിപാർശ ചെയ്തിരുന്നു. പാർട്ടിക്കു തലവേദനജില്ല സെക്രട്ടറിയാകാനുള്ള ആഗ്രഹം നടത്താതെ പോയതിന്‍റെ വൈരാഗ്യത്തിലാണ് ആർ. സനൽ കുമാർ പാർട്ടിയെയും സർക്കാരിനെയും താറടിക്കാൻ ശ്രമിക്കുന്നുതെന്നും ചെന്പട ആരോപിച്ചിരുന്നു. സനൽ കുമാറിന്‍റെ ബിജെപി ബന്ധങ്ങളുടെ ആഴം എത്രയെന്ന ചോദ്യവും ഇവർ ഉയർത്തിയിരുന്നു.വീണാ ജോർജിനെ അനുകൂലിച്ചും സനൽ കുമാറിനെ വിമർശിച്ചും ആറന്മുളയുടെ ചെമ്പട എന്ന അക്കൗണ്ടിലൂടെ തുടർച്ചയായി പോസ്റ്റുകൾ വരുന്നത് പാർട്ടിക്കും തലവേദയായിരിക്കുകയാണ്.

പഠനമുറി ഉദ്ഘാടനം

ഇലന്തൂർ: ബ്ലോക്ക് പഞ്ചായത്തിലെ പട്ടികജാതി വിദ്യാര്‍ഥികള്‍ക്കുള്ള പഠനമുറി ഉദ്ഘാടനവും താക്കോല്‍ കൈമാറ്റവും പ്രസിഡന്‍റ് ജെ. ഇന്ദിരാദേവി നിര്‍വഹിച്ചു. പ്രക്കാനം ആത്രപ്പാട്ടെ ചടങ്ങില്‍ ബ്ലോക്ക് പഞ്ചായത്തംഗം സജി അലക്‌സ് അധ്യക്ഷത വഹിച്ചു. ക്ഷേമകാര്യ സ്ഥിരം സമിതി അധ്യക്ഷന്‍ സാം പി. തോമസ് മുഖ്യപ്രഭാഷണം നടത്തി. ബ്ലോക്കിലെ 17 വിദ്യാര്‍ഥികള്‍ക്കാണ് പഠനമുറി നല്‍കിയത്. വൈസ് പ്രസിഡന്‍റ് കെ. ആര്‍. അനീഷ, അംഗങ്ങളായ കലാ അജിത്ത്, അഭിലാഷ് വിശ്വനാഥ്, ജിജി ചെറിയാന്‍ മാത്യു, ചെന്നീര്‍ക്കര ഗ്രാമപഞ്ചായത്ത് അംഗം കെ. കെ. ശശി, പട്ടികജാതി വികസന ഓഫീസര്‍ ആനന്ദ് എസ്. വിജയ് എന്നിവര്‍ പ്രസംഗിച്ചു.

അപകടകരമായ മരങ്ങള്‍ മുറിച്ചു മാറ്റണം

പത്തനംതിട്ട: പൊതുമരാമത്ത് വകുപ്പ് നിരത്ത് വിഭാഗത്തിന്‍റെ പരിധിയിലുള്ള റോഡുകളുടെ വശങ്ങളില്‍ നില്‍ക്കുന്ന അപകടകരമായ മരങ്ങള്‍ മുറിച്ചു മാറ്റണമെന്ന് അസിസ്റ്റന്‍റ് എൻജിനിയര്‍ അറിയിച്ചു. റോഡിലേക്ക് ചാഞ്ഞു നില്‍ക്കുന്ന മരങ്ങൾ കാല്‍നടയാത്രക്കാര്‍ക്കും വാഹനയാത്രക്കാര്‍ക്കും അപകടമുണ്ടാക്കാന്‍ സാധ്യതയുണ്ട്. മരങ്ങളും ശിഖരങ്ങളും അടിയന്തരമായി മുറിച്ച് മാറ്റിയില്ലെങ്കില്‍ അപകടങ്ങള്‍ക്കും നാശനഷ്ടങ്ങള്‍ക്കും വസ്തു ഉടമ മാത്രമായിരിക്കും ഉത്തരവാദിയെന്നും അസിസ്റ്റന്‌റ് എൻജിനിയര്‍ അറിയിച്ചു. photo: കാവുംഭാഗം നിരണശേരിൽ രവികുമാറിന്‍റെ വീടിനു മുകളിലേക്ക് കഴിഞ്ഞ ദിവസമുണ്ടായ കാറ്റിൽ പനമരം വീണപ്പോൾ.

ധർണ നടത്തി

പ്രമാടം: ഗ്രാമപഞ്ചായത്തിലെ വോട്ടർപട്ടികയിലെ വ്യാപക ക്രമക്കേടുകൾ ആരോപിച്ച് കോൺഗ്രസ് പ്രമാടം, വി. കോട്ടയം മണ്ഡലം കമ്മിറ്റികളുടെ ആഭിമുഖ്യത്തിൽ പ്രമാടം ഗ്രാമപഞ്ചായത്ത് ഓഫീസിന് നടത്തിയ ധർണ നടത്തി. ഡിസിസി വൈസ് പ്രസിഡന്‍റ് റോബിൻ പീറ്റർ ഉദ്ഘാടനം ചെയ്തു. വി -കോട്ടയം മണ്ഡലം പ്രസിഡന്‍റ് നിഖിൽ ചെറിയൻ അധ്യക്ഷത വഹിച്ചു. പ്രമാടം മണ്ഡലംപ്രസിഡന്‍റ് റോബിൻ മോൻസി, ഡിസിസി ജനറൽ സെക്രട്ടറി എം.വി. ഫിലിപ്പ്. ‌യുഡിഎഫ് പഞ്ചായത്ത് കൺവീനർ ജോസ് പനച്ചിക്കൽ, ബ്ലോക്ക് പഞ്ചായത്ത് അംഗങ്ങളായ ശ്രീകലാ നായർ, ജി .പ്രമോദ് ഗ്രാമപഞ്ചായത്ത് അംഗങ്ങളായ പ്രസീത രഘു , എം.കെ. മനോജ്, രാഗിസനൂപ് , കുഞ്ഞന്നാമ്മ, ബ്ലോക്ക് കോൺഗ്രസ് ജനറൽ സെക്രട്ടറിമാരായ കെ. ആർ. മനോഹരൻ ,ബിജു വട്ടക്കുളഞ്ഞി ,രാജു കണ്ണങ്കര തുടങ്ങിയവർ പ്രസംഗിച്ചു.

അടൂർ നഗരത്തിൽ ഗതാഗത പരിഷ്കരണം

അടൂർ: നഗരത്തിൽ ഫീസ് സ്വീകരിച്ച് പാർക്കിംഗ് സംവിധാനം വിപുലപ്പെടുത്താൻ നഗരസഭ ചെയർമാൻ കെ. മഹേഷ് കുമാറിന്‍റെ അധ്യക്ഷതയിൽ ചേർന്ന ഗതാഗത ഉപദേശക സമിതി തീരുമാനിച്ചു. ‌ആദ്യഘട്ടത്തിൽ അടൂർ പാർഥസാരഥി ക്ഷേത്രത്തിന് എതിർവശം മുതൽ ഇന്ദ്രപ്രസ്ഥ ഹോട്ടലിന്‍റെ പ്രധാന കവാടം വരെ ഇടതു വശത്തുവരെ നാലു ചക്രവാഹനങ്ങൾക്ക് ഫീസ് ഈടാക്കിയുള്ള പാർക്കിംഗ് അനുവദിക്കും. കെഎസ്ആർടിസി ജംഗ്ഷൻ മുതൽ കാരുണ്യ വരെ ഇടതു ഭാഗം ഇരുചക്രവാഹന പാർക്കിംഗ് ഫീസോടുകൂടി അനുവദനീയമാകും. നഗരസഭാ ഓഫീസിന് എതിർവശം മുതൽ ആർഡിഒ ഓഫീസിനു സമീപം വരെ ഇടതു വശംവരെയും പാർക്കിംഗ് മേഖലയുണ്ടാകും. കോടതിയുടെ എതിർവശം ഡിക്സൺ ലോഡ്ജിനു സമീപത്തെ റോഡിൽ ഇരുവശവും എംഎൻ ഓഫ്സെറ്റിന് എതിർവശത്തും ഫീസോടുകൂടി പാർക്കിംഗ് അനുവദിക്കും. എംസി റോഡിലെ അമിതവേഗം കാരണമുണ്ടാകുന്ന അപകടങ്ങൾ ഒഴിവാക്കാൻ സ്പീഡ് ബ്രേക്കറുകളും ഡിവൈഡറുകളും സ്ഥാപിക്കും. നെല്ലിമൂട്ടിൽപ്പടി,ബൈപാസ് വട്ടത്തറപ്പടി, മുന്നാളം റോഡ് എന്നിവിടങ്ങളിൽ സ്പീഡ് ബ്രേക്കറുകൾ സ്ഥാപിക്കും. യോഗത്തിൽ ട്രാഫിക് എസ്ഐ ജി.സുരേഷ് കുമാർ,അസി.മോട്ടോർ വെഹിക്കിൾ ഇൻസ്പെക്ടർ ബി.എസ്.ലൈജു, ആർഡി ഓഫീസ് സീനിയർ സൂപ്രണ്ട് ഷൈനി ബേബി, കെഎസ്ടിപി എഇ ജയറാണി, നഗരസഭ സെക്രട്ടറി ഇൻ ചാർജ് സി.പ്രസാദ് എന്നിവർ പങ്കെടുത്തു.

ദുരിതം പേറി പടിഞ്ഞാറൻ മേഖല; വെള്ളക്കെട്ട് ഒഴിവാക്കാൻ ജനകീയ ഇടപെടൽ

തിരുവല്ല: രണ്ടുമാസത്തിനിടെ ആറ് പ്രളയം നേരിട്ട പടിഞ്ഞാറൻ മേഖലയുടെ ദുരിതം അകറ്റാനായി പ്രദേശവാസികൾ ഒന്നിക്കുന്നു. മഴ ആരംഭിക്കുന്നതോടെ വെള്ളക്കെട്ടിൽ മുങ്ങുന്ന പ്രദേശങ്ങളെ രക്ഷിക്കാനായുള്ള ശ്രമത്തിന്‍റെ ഭാഗമായി കോലറയാർ നവീകരണം നാട്ടുകാർ ഏറ്റെടുത്തു. പായലും പോളയും നിറഞ്ഞു നീരൊഴുക്ക് നിലച്ച കോലറയാറിനെ പുനരുജ്ജീവിപ്പിക്കുകയാണ് ലക്ഷ്യം. കടപ്ര, നിരണം ഗ്രാമപഞ്ചായത്തുകളിലൂടെ കടന്നുപോകുന്ന കോലറയാറിന്‍റെ നീളം എട്ട് കിലോമീറ്ററാണ്. കടപ്ര പഞ്ചായത്തിലെ അരയ്ക്കൽ മുയപ്പിൽ നിന്നാരംഭിച്ച് അരീത്തോട്ടിലെത്തുന്നതാണ് കോലറയാർ. ആറിന്‍റെ അരീത്തോട്ടിൽ സംഗമിക്കുന്ന പൂവൻമേലി ഭാഗം മുതൽ ഇലഞ്ഞിക്കൽപാലം വരെയുള്ള ഭാഗത്തെ പോളകളും പായലുമാണ് ആദ്യം നീക്കിയത്. സർക്കാരിന്‍റെ ഒരു സഹായവുമില്ലാതെ നാട്ടുകാർ പദ്ധതി സ്വയം ഏറ്റെടുക്കുകയായിരുന്നു. കാലവർഷം ആരംഭിച്ചശേഷമുള്ള തുടർ‌ച്ചയായുള്ള പ്രളയവും വെള്ളക്കെട്ടുകളുമാണ് ഇത്തരത്തിൽ ഒരു നീക്കത്തിനു നാട്ടുകാരെ പ്രേരിപ്പിച്ചത്. പോള നിറഞ്ഞ് ഏറെക്കാലമായി കോലറയാർ ഉൾപ്പെടെ പ്രദേശത്തെ ജലനിർഗമന മാർഗങ്ങൾ അടഞ്ഞു പോയതിനാൽ മഴ ശക്തമാകുന്നതോടെ പടിഞ്ഞാറൻ മേഖല വെള്ളക്കെട്ടു മൂലം ദുരിതം അനുഭവിക്കുകയാണ്. പ്രദേശവാസികൾ അനുഭവിക്കുന്ന ദുരിതം അധികൃതരുടെ ശ്രദ്ധയിൽപ്പെടുത്തിയിട്ടും നടപടി ഉണ്ടാകാത്തതിനേത്തുടർന്നാണ് ജനകീയ ഇടപെടൽ. പരമാവധി പ്രദേശങ്ങളിൽ വെള്ളക്കെട്ട് ഒഴിവാക്കുകയാണ് ലക്ഷ്യം. കുടിവെള്ളം ഇല്ല മഴക്കാലം ആരംഭിച്ചതോടെ രൂക്ഷമായ കുടിവെള്ള പ്രതിസന്ധിയിലാണ് പടിഞ്ഞാറൻ മേഖല. മഴയിൽ വെള്ളം ഉ‍യർന്ന് കുടിവെള്ള സ്രോതസുകൾ അപ്പാടെ മലിനപ്പെടുകയാണ്. കിണർ ജലം ഉപയോഗിക്കാനാകാത്ത സ്ഥിതിയുണ്ട്. കിണറുകളിലേക്ക് മലിനജല പ്രവാഹമാണ്. കുടിവെള്ള സ്രോതസുകൾ മലിനപ്പെട്ടതോടെ നാട്ടുകാർ പ്രതിസന്ധിയിലായി. വല്ലപ്പോഴുമെത്തുന്ന പൈപ്പ് വെള്ളം മാത്രമാണ് അപ്പർകുട്ടനാട് പഞ്ചായത്തുകൾക്ക് ആശ്രയം. കിണറുകളിലേക്ക് സമീപ പ്രദേശങ്ങളിൽ കെട്ടിക്കിടക്കുന്ന മലിനജലം ഒഴുകിയെത്തുന്നതിനാൽ മഴ മാറിയാലും കുടിവെള്ളം കിട്ടാത്ത സാഹചര്യമാണ്.

പ്രതീക്ഷ ഡയാലിസിസ് സഹായ പദ്ധതി

അടൂർ: പറക്കോട് വൈഎംസിഎ പ്ലാറ്റിനം ജൂബിലിയോടനുബ ന്ധിച്ച് അടൂർ ജനറൽ ആശുപത്രിയുമായി സഹകരിച്ച് നിർധനരായ വൃക്ക രോഗികൾക്ക് സൗജന്യമായി ഒരുക്കുന്ന പ്രതീക്ഷ ഡയാലിസിസ് സഹായപദ്ധതിയുടെ ഉദ്ഘാടനം ആന്‍റോ ആന്‍റണി എംപി നിർവഹിച്ചു. പ്രസിഡന്‍റ് തോമസ് മാത്യു അധ്യക്ഷത വഹിച്ചു. അടൂർ ഗവൺമെന്‍റ് ജനറൽ ആശുപത്രി മെഡിക്കൽ സൂപ്രണ്ട് ഡോ. ജെ. മണികണ്ഠൻ പദ്ധതി വിശദീകരിച്ചു. ബിജു എം. തങ്കച്ചൻ, സുധാ പത്മകുമാർ, സെക്രട്ടറി പി. കെ. രാജൻ , ജേക്കബ് ജോൺ എന്നിവർ പ്രസംഗിച്ചു.

കോഴിഫാമിനെതിരേ പ്രതിഷേധം ശക്തം

വായ്പൂര് : കോട്ടാങ്ങൽ ഗ്രാമപഞ്ചായത്തിന്‍റ നിയമാനുസരണ ലൈസൻസ് ഇല്ലാതെ പ്രവർത്തിക്കുന്ന വായ്പൂരിലെ കോഴി ഫാമിനെതിരേ ജനരോഷം ശക്തമാകുന്നു. ജനങ്ങൾ തിങ്ങിപ്പാർക്കുന്ന സ്ഥലത്തെ കോഴിഫാമിന്‍റെ പ്രവർത്തനം മൂലം പ്രദേശവാസികൾക്ക് ഗുരുതര ആരോഗ്യപ്രശ്നങ്ങൾ ഉണ്ടായതിനേത്തുടർന്ന് നാട്ടുകാർ കോട്ടാങ്ങൽ പഞ്ചായത്തിന് മുമ്പിൽ ബഹുജന പ്രക്ഷോഭം സംഘടിപ്പിച്ചിരുന്നു. തുടർന്ന് ഗ്രാമപഞ്ചായത്ത് അധികൃതർ സ്ഥലം സന്ദർശിച്ച് ഫാം നിർത്തിവയ്ക്കണമെന്ന് ആവശ്യപ്പെട്ട് ഉടമയ്ക്ക്സ്റ്റോപ്പ് മെമ്മോ നൽകുകയും ചെയ്തിരുന്നു. എന്നാൽ ഉത്തരവ് ലംഘിച്ച് ഇന്നലെ രാവിലെ കോഴിയുമായി വന്ന വാഹനം ഫാമിന് സമീപം ഗ്രാമപഞ്ചായത്തംഗം ദീപ്തി ദാമോദരന്‍റെ നേതൃത്വത്തിൽ പ്രദേശവാസികൾ തടഞ്ഞു. സ്ഥലത്ത് ഏറെ നേരം സംഘർഷാവസ്ഥ നിലനിന്നു. പ്രദേശവാസികളുടെ എതിർപ്പിനെത്തുടർന്ന് വാഹനം തിരികെ വിട്ടു.

നവകേരള സദസ്: ജില്ലയില്‍ 35 കോടി രൂപയുടെ പദ്ധതികള്‍ : ജില്ലാകളക്ടര്‍ പുരോഗതി വിലയിരുത്തി

പത്തനംതിട്ട: മുഖ്യമന്ത്രിയുടെ നേതൃത്വത്തില്‍ നടന്ന നവകേരള സദസില്‍ ഉയര്‍ന്നുവന്ന നിര്‍ദേശത്തിന്‍റെ അടിസ്ഥാനത്തില്‍ നടപ്പാക്കുന്ന പദ്ധതികളുടെ പുരോഗതി ജില്ലാ കളക്ടര്‍ എസ്. പ്രേം കൃഷ്ണന്‍ വിലയിരുത്തി. ജില്ലയിലെ അഞ്ച് നിയോജക മണ്ഡലങ്ങളിലായി ആറ് പദ്ധതികള്‍ക്ക് 35 കോടി രൂപയാണ് അനുവദിച്ചത്. വികസന പദ്ധതികളുടെ അന്തിമപട്ടിക ഭേദഗതി വരുത്തി സര്‍ക്കാര്‍ അംഗീകരിച്ചിരുന്ന പദ്ധതികളുടെ എസ്റ്റിമേറ്റ് ഒരാഴ്ചയ്ക്കുള്ളില്‍ പൂര്‍ത്തിയാകും. സമയബന്ധിതമായി പദ്ധതികള്‍ പൂര്‍ത്തിയാക്കണമെന്ന് കളക്ടർ നിർദേശിച്ചു. തിരുവല്ലയില്‍ പന്നായി തേവേരി റോഡ് വികസനത്തിന് ഏഴ് കോടി രൂപ ചെലവഴിക്കും. വെള്ളം കയറുന്ന ഭാഗങ്ങള്‍ ഉയര്‍ത്തി ഉന്നത നിലവാരത്തിലാക്കും. പൊതുമരാമത്ത് വകുപ്പിനാണ് നിര്‍മാണച്ചുമതല. അടൂരിലെ മാങ്കൂട്ടം - കൈതപ്പറമ്പ് - സിഗപ്പൂര്‍ മുക്ക് റോഡിന് അഞ്ച് കോടിയും തടത്തില്‍ - മണക്കാല ലിങ്ക് റോഡിനു രണ്ടു കോടി രൂപയും അനുവദിച്ചു. റാന്നി, ആറന്മുള, കോന്നി മണ്ഡലങ്ങില്‍ ടൂറിസം വകുപ്പിന്‍റെ കീഴില്‍ വിവിധ പദ്ധതികള്‍ നടപ്പാക്കും. റാന്നി പെരുന്തേനരുവിയില്‍ ഏഴു കോടി രൂപയുടെ അടിസ്ഥാന വികസനത്തിനാണ് അംഗീകാരം. ആറന്മുള പില്‍ഗ്രിം ആന്‍റ് ഹെറിറ്റേജ് ടൂറിസ് പദ്ധതിക്ക് ഏഴു കോടി രൂപ അനുവദിച്ചു. കോന്നിയില്‍ ഏഴു കോടി രൂപ ചെലവില്‍ ഗുരു നിത്യ ചെതന്യയതി സ്മാരകവും അന്താരാഷ്ട്ര പഠന കേന്ദ്രവും നിര്‍മിക്കും. അരുവാപ്പുലം ഗ്രാമപഞ്ചായത്തിലെ 97 സെന്‍റിലാണ് നിര്‍മാണം. സ്ഥലം രണ്ടാഴ്ചയ്ക്കുളളില്‍ ഏറ്റെടുക്കും.

കുടുംബശ്രീയിലൂടെ സാമ്പത്തിക ഭദ്രത: ഡെപ്യൂട്ടി സ്പീക്കർ

പത്തനംതിട്ട: കുടുംബശ്രീ 27 വര്‍ഷം പിന്നിടുമ്പോള്‍ ജില്ലയില്‍ ഒന്നര ലക്ഷം അംഗങ്ങളുള്ള വലിയ കൂട്ടായ്മയായി മാറിയെന്നും കുടുംബങ്ങളില്‍ സാമ്പത്തിക ഭദ്രത ഉറപ്പാക്കാനായെന്നും നിയമസഭ ഡെപ്യൂട്ടി സ്പീക്കര്‍ ചിറ്റയം ഗോപകുമാർ. പന്തളം കുളനട പ്രീമിയം കഫേയില്‍ കുടുംബശ്രീ ജില്ലാ മിഷന്‍ സംഘടിപ്പിച്ച മാധ്യമ ശില്‍പശാല ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സംസ്ഥാനത്തെ പ്രധാന ധനകാര്യ സ്ഥാപനങ്ങളില്‍ ഒന്നായി കുടുംബശ്രീ ഉയര്‍ന്നു. സംരംഭങ്ങള്‍ ആരംഭിക്കുന്നതിന് വനിതാ വികസന കോര്‍പറേഷന്‍, പിന്നാക്ക വികസന കോര്‍പറേഷന്‍, മറ്റ് ധനകാര്യ സ്ഥാപനങ്ങള്‍ എന്നിവയിലൂടെ കുറഞ്ഞ പലിശയ്ക്ക് വായ്പ നല്‍കുന്നു. കൃഷി, ക്ഷീരവികസനം, ചെറുകിട വ്യവസായം, ടൂറിസം തുടങ്ങി എല്ലാ മേഖലയിലും സമഗ്ര വികസനം കുടുംബശ്രീയിലൂടെ സാധ്യമായി. കുടുംബശ്രീ പ്രവര്‍ത്തനങ്ങളെ കൂടുതല്‍ ജനകീയമാക്കുന്നതില്‍ മാധ്യമങ്ങളുടെ പങ്ക് വലുതാണെന്നും ഡെപ്യൂട്ടി സ്പീക്കര്‍ പറഞ്ഞു. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം അധ്യക്ഷത വഹിച്ചു. പ്രീമിയം കഫെയില്‍ ഒരുക്കിയ കര്‍ക്കടകക്കഞ്ഞി ഫെസ്റ്റിന്‍റെ ഉദ്ഘാടനവും ഡെപ്യൂട്ടി സ്പീക്കര്‍ നിര്‍വഹിച്ചു. പഞ്ചായത്ത് പ്രസിഡന്‍റ്സ് അസോസിയേഷന്‍ അധ്യക്ഷന്‍ പി.എസ്. മോഹനന്‍ മുഖ്യ പ്രഭാഷണം നടത്തി. കുടുംബശ്രീ ജില്ലാ മിഷന്‍ കോഓര്‍ഡിനേറ്റര്‍ എസ്. ആദില, അസിസ്റ്റന്‍റ് കോഓര്‍ഡിനേറ്റര്‍ കെ. ബിന്ദുരേഖ, ജില്ലാ ഇന്‍ഫര്‍മേഷന്‍ ഓഫീസ് അസിസ്റ്റന്‍റ് എഡിറ്റര്‍ രാഹുല്‍ പ്രസാദ്, പ്രസ് ക്ലബ് പ്രസിഡന്‍റ് ബിജു കുര്യന്‍, സെക്രട്ടറി ജി വിശാഖൻ‌, കുടുംബശ്രീ സിഡിഎസ് ചെയര്‍പേഴ്സണ്‍മാര്‍ തുടങ്ങിയവർ പ്രസംഗിച്ചു.

പിഎം റോഡ് നിർമാണ ക്രമക്കേട്: വിജിലൻസ് അന്വേഷണം വഴിമുട്ടി

ഉയർന്നത് വൻ ആരോപണങ്ങൾ, ഇന്നും കെഎസ്ടിപിക്കു കൈമാറാതെ റോഡ് പത്തനംതിട്ട: പുനലൂർ - മൂവാറ്റുപുഴ സംസ്ഥാന പാതയുടെ പുനർ നിർമാണത്തിൽ പ്ലാച്ചേരി - കോന്നി റീച്ചിൽക്രമക്കേട് നടന്നെന്ന ആരോപണം അന്വേഷിച്ചിറങ്ങിയ വിജിലൻസ് സംഘം പാതിവഴിയിൽ മടങ്ങി. വർഷങ്ങൾ പിന്നിട്ടിട്ടും നിർമാണം തീർത്തു കരാറുകാരൻ റോഡ് കെഎസ്ടിപിയെ ഏല്പിച്ചിട്ടില്ല. നിർമാണത്തിലെ അശാസ്ത്രീയതയും കരാർ വ്യവസ്ഥകളുടെ ലംഘനവും ചൂണ്ടിക്കാട്ടിയാണ് പരാതികൾ ഉണ്ടായത്. റാന്നി സ്വദേശി അനിൽ കാറ്റാടിക്കൽ 2021ൽ വിജിലൻസിനു നൽകിയ പരാതിയിൽ പ്രത്യേക അന്വേഷണം സംഘം നടത്തിയ പ്രാഥമിക പരിശോധനയിൽ അഴിമതി നടന്നതായ വിലയിരുത്തലുണ്ടായി. ലോക ബാങ്കിന്‍റെ സഹായത്തോടെ കെഎസ്ടിപിയാണ് പാതയുടെ നിർമാണം നടത്തിയത്. ആദ്യഘട്ടത്തിൽ മൂവാറ്റുപുഴ- പൊൻകുന്നം ഭാഗം പൂർത്തീകരിച്ചിരുന്നു. പിന്നീടുള്ള പൊൻകുന്നം - പുനലൂർ റോഡ് മൂന്ന് റീച്ചുകളായി കരാർ നൽകി. വീതി കുറച്ചു പൊന്നുംവലയ്ക്ക് ഏറ്റെടുത്ത സ്ഥലത്തു റോഡ് പുനർ നിർമാണത്തിൽ നിർദേശിക്കപ്പെട്ട വീതി ഉണ്ടായില്ല. 11.5 മീറ്റർ മുതൽ 23 മീറ്റർ വരെ വീതിയിലാണ് സ്വകാര്യ വ്യക്തികളിൽനിന്നു സർക്കാർ ഭൂമി ഏറ്റെടുത്തത്. ഈ സ്ഥലം റോഡിനുവേണ്ടി പൂർണമായി ഉപയോഗിക്കാൻ കഴിഞ്ഞിട്ടില്ല. പല സ്ഥലത്തും വീതി 10 മീറ്ററിൽ താഴെയാണ്. ബിഎം ബിസി നിലവാരത്തിൽ എട്ടു മീറ്റർ വീതിയിൽ റോഡ് നിർമിക്കാൻ കിലോമീറ്ററിന് ഒരു കോടി രൂപയാണ് നിർമാണ വേളയിൽ ചെലവ് കണക്കാക്കിയിരുന്നത്. എന്നാൽ, പിഎം റോഡ് നിർമാണത്തിൽ ഒരു കിലോമീറ്ററിനു 15 കോടി വരെ ചെലവായിട്ടുണ്ടെന്നു പരാതിയിൽ പറയുന്നു. പൊൻകുന്നം പ്ലാച്ചേരി റീച്ചിൽ എസ്റ്റിമേറ്റ് തുകയേക്കാൾ 9.10 കോടി രൂപ അധികം നൽകി. പ്ലാച്ചേരി മുതൽ കോന്നി വരെയുള്ള 30 കിലോമീറ്റർ ഭാഗത്ത് സർക്കാർ ഭൂമിയിൽനിന്നു ലക്ഷക്കണക്കിന് രൂപയുടെ പാറയും മണ്ണും കരാറുകാരൻ സൗജന്യമായി റോഡുനിർമാണത്തിന് ഉപയോഗിച്ചു. ഇവ ഉപയോഗിച്ച് നിർമിച്ച പാർശ്വഭിത്തികൾക്ക് 45.6 കോടിയാണ് കരാറുകാരൻ ഈടാക്കിയത്. കൂടാതെ കല്ലും മണ്ണും നീക്കിയ ഇനത്തിൽ 7.5 കോടി വേറെയും വാങ്ങിയതായി പരാതിയിൽ പറയുന്നു. അപകടങ്ങളുടെ പെരുമഴ നിർമാണം പൂർത്തിയാകാതെ കിടക്കുന്ന റോഡിൽ അപകടങ്ങൾ പതിവാണ്. മണ്ണാരക്കുളഞ്ഞിക്കും കുന്പഴ വടക്കിനും മധ്യേയാണ് പ്ലാച്ചേരി- കോന്നി റീച്ചിലെ പ്രധാന അപകട കേന്ദ്രങ്ങൾ. മൈലപ്ര രണ്ടാം കലുങ്കിന് സമീപമുള്ള സ്ഥലത്ത് റോഡിന്‍റെ സംരക്ഷണ ഭിത്തി നിർമാണം, മൈലപ്ര തയ്യിൽപ്പടിക്കു സമീപമുള്ള ഒന്നാം കലുങ്ക്, ഗ്രാമപഞ്ചായത്ത് ഓഫീസിനും പോസ്റ്റ്‌ ഓഫീസിനും ഇടയ്ക്കുള്ള സ്ഥലം, മൈലപ്രാ തടിമില്ലിന് സമീപത്തുള്ള സ്ഥലത്തെ കലുങ്കിനോട് ചേർന്നുള്ള കോൺക്രീറ്റ് കാന നിർമാണവും റോഡിന്‍റെ വശത്തെ സംരക്ഷണ ഭിത്തി നിർമ്മാണം എന്നിവയും മൈലപ്രാ പള്ളിപ്പടിക്കൽ, പത്തനംതിട്ടയ്ക്ക് തിരിയുന്ന ഭാഗത്തു റോഡിന്‍റെ ഒരു വശത്തെ പണികളും ഇനിയും പൂർത്തീകരിക്കാനുണ്ട്. മൈലപ്രാ പള്ളിപ്പടിക്കൽനിന്നു പത്തനംതിട്ട ഭാഗത്തേക്കു തിരിയുന്ന റോഡിന്‍റെ മധ്യ ഭാഗത്തായി ഡിവൈഡറുകളോ സിഗ്നൽ ലൈറ്റുകളോ സ്ഥാപിച്ചിട്ടില്ല. മൈലപ്ര വില്ലേജിൽ സ്ഥലമേറ്റെടുക്കലുമായി ബന്ധപ്പെട്ട തർക്കങ്ങൾ കോടതി കയറിയതാണ് നിർമാണം പൂർത്തീകരിക്കുന്നതിൽ തടസമായതെന്നു പറയുന്നു.മണ്ണാറക്കുളഞ്ഞി ആശുപത്രിപ്പടിക്കൽനിന്നു ശബരിമല റോഡിലേക്കു പ്രവേശിക്കുന്ന ഭാഗത്ത് റാന്നി റോഡിനു വീതി കുറഞ്ഞു. റോഡിന്‍റെ മധ്യഭാഗത്തു വച്ചിട്ടുള്ള ഡിവൈഡറുകൾ അശാസ്ത്രീയമാണ്. തിരക്കേറിയ ഭാഗത്ത് ഇരു ദിശയിൽനിന്നു വരുന്ന വാഹനങ്ങൾ തമ്മിൽ ഇടിച്ച് അപകടമുണ്ടാകാനുള്ള സാധ്യതയും ഏറെയാണ്. ഇവിടെയും അധികൃതർ സിഗ്നൽ ലൈറ്റുകൾ സ്ഥാപിച്ചിട്ടില്ല. ആക്ഷേപങ്ങൾ ഇങ്ങനെ റോഡു നിർമാണത്തിന്‍റെ ഭാഗമായി ഏറ്റെടുത്ത ഭൂമിയിൽ ഉണ്ടായിരുന്ന കല്ലും മണ്ണും സൗജന്യമായി ലഭിച്ചത് മറച്ചുവച്ച് അവ ദൂരസ്ഥലങ്ങളിൽനിന്നു വില കൊടുത്തു വാങ്ങിയതായി രേഖകൾ ഉണ്ടാക്കി. പാതയ്ക്കു വീതി കൂട്ടാനായി കുന്ന് ഇടിച്ചതിലൂടെ ലോഡുകണക്കിനു മണ്ണാണ് അധികം വന്നത്. ഈ മണ്ണ് ഉപയോഗിച്ചു നിർമാണക്കമ്പനി ഏക്കറു കണക്കിനു വയലുകൾ നികത്തി. പഴവങ്ങാടി വില്ലേജിൽ മാത്രം മൂന്നേക്കർ വയൽ ഇങ്ങനെ നികത്തി. പല സ്ഥലങ്ങളിലും കലുങ്കുകൾ നിർമിക്കുന്നതിനു പകരം ഓടകൾ മണ്ണിട്ടു നികത്തി, കലുങ്ക് നിർമാണത്തിനെന്ന പേരിൽ ലക്ഷങ്ങൾ നേടി. ചെത്തോങ്കര ഭാഗത്തെ അപാകത മൂലം പുനർനിർമാണം നടത്തേണ്ടിവന്നു, റാന്നി ഉതിമൂട്ടിൽ കനാൽ പാലമുള്ള ഭാഗം റോഡ് ഉയർന്നതോടെ ലോഡ് വാഹനങ്ങൾക്കു കടന്നുപോകാൻ ബുദ്ധിമുട്ടായി. തർക്കങ്ങളുടെ പേരിൽ പലേടത്തും നിർമാണം നിലച്ചു, ഇത് അപകടങ്ങൾക്കു കാരണമാകുന്നു, ബസ്ബേ, ജംഗ്ഷനുകളുടെ നവീകരണം, ട്രാഫിക് ലൈറ്റുകൾ, സ്ട്രീറ്റ് ലൈറ്റുകൾ, വെയ്റ്റിംഗ് ഷെഡുകൾ എന്നിവയും പൂർത്തീകരിച്ചിട്ടില്ല. - ഇതൊക്കെയാണ് പരാതിയിൽ പറയുന്നത്.

വിരമിച്ചാലും കാടിന്‍റെ മക്കളെ ശുശ്രൂഷിക്കാൻ സന്നദ്ധനായി മക്കാ ഡോക്ടർ

സീതത്തോട്: കാടിന്‍റെ സ്വന്തം ഡോക്ടർക്ക് ഇന്ന് പടിയിറക്കം. വനവാസികളുടെ മക്കാ ഡോക്ടർ എന്ന് അറിയപ്പെടുന്ന സീതത്തോട് കുടുംബാരോഗ്യ കേന്ദ്രത്തിലെ മെഡിക്കല്‍ ഓഫീസര്‍ ഡോ.ജെ. വിന്‍സന്‍റ് സേവ്യറിന്‍റെ സേവനം ഇന്ന് അവസാനിക്കുകയാണ്. 22 വർഷം കിഴക്കൻ മലയോര മേഖലയിൽ ആദിവാസികളുടേതടക്കം സ്വന്തം ഡോക്ടറായി സേവനം ചെയ്ത ഡോ. വിൻസന്‍റ് ആതുരശുശ്രൂഷാ രംഗത്ത് ഈ നാട്ടിൽ തുടരാനുള്ള താത്പര്യം അറിയിച്ചു കഴിഞ്ഞു. തമിഴ്‌നാട്ടില്‍നിന്നു 1992ല്‍ പഠിച്ചിറങ്ങിയ ഡോക്ടര്‍ 10 വര്‍ഷം കന്യാകുമാരിയിലുള്ള മിഷന്‍ ആശുപത്രിയില്‍ ജോലി ചെയ്തു. 2003 ഫെബ്രുവരി 15നാണ് കേരള സര്‍ക്കാര്‍ സര്‍വീസില്‍ പ്രവേശിക്കുന്നത്. തുടര്‍ന്ന് സീതത്തോട് പ്രാഥമിക ആരോഗ്യ കേന്ദ്രത്തില്‍ മെഡിക്കല്‍ ഓഫീസറുടെ ചുമതലയിലായി. ആദിവാസികളുടെയും ഗവിയിലെ ശ്രീലങ്കന്‍ വംശജരായ തമിഴരുടെയും സ്വന്തം ഡോക്ടറായി മാറിയ ഇദ്ദേഹത്തെ അവര്‍ സ്‌നേഹപൂര്‍വം വിളിക്കുന്നത് മക്കാ ഡോക്ടര്‍ എന്നാണ്. പ്രിയമുള്ള മകനെന്ന അർഥമുള്ള തമിഴ്പദമാണ് മക്കാൻ. അങ്ങനെ മക്കാ ഡോക്ടറെന്ന വിളിപ്പേര് ഡോ. വിൻസന്‍റിനു നന്നായി ചേർന്നു. സീതത്തോട്ടിലെ ആളുകളുടെ ഏക അഭയകേന്ദ്രവും ഡോ. വിൻസന്‍റായിരുന്നു. പഞ്ചായത്തിലെ പ്രാഥമികാരോഗ്യ കേന്ദ്രത്തിന്‍റെ ചുമതലക്കാരനെന്ന നിലയിൽ തന്‍റെ പ്രവർത്തന പരിധിയിലുള്ള ആദിവാസി കുടിലുകളില്‍ പകലെന്നോ രാത്രിയെന്നോ ഇല്ലാതെ ഡോക്ടര്‍ കടന്നുചെന്നു. കാടിന്‍റെ മക്കള്‍ക്കരികിലേക്കു ഡോക്ടര്‍ എത്തിയതോടെയാണ് ആദിവാസി കുടുംബങ്ങള്‍ പുറംലോകവുമായി അടുക്കുന്നതും ഇവരിലെ ഭയവും പരിഭ്രമവും വിട്ടൊഴിയുന്നതും. കുടിലുകള്‍ക്കു സമീപം ചെന്ന് ഡോക്ടര്‍ മക്കാനെയെന്നു നീട്ടിവിളിക്കുമ്പോള്‍ അവര്‍ ഓടിയെത്തും. ആഴ്ചയില്‍ ഒന്നിലധികം മെഡിക്കല്‍ ക്യാന്പുകള്‍ ആദിവാസി ഉന്നതികളില്‍ നടത്തിയതോടെ ആരോഗ്യ പ്രശ്‌നങ്ങള്‍ കുറഞ്ഞു. ആദിവാസി സ്ത്രീകളുടെ പ്രസവം അടിയന്തര ഘട്ടത്തിൽ വനത്തിനുള്ളിൽ പോയി എടുത്ത് അമ്മയെയും കുഞ്ഞിനെയും രക്ഷിച്ച കഥകളും ഡോക്ടർക്കു പറയാനുണ്ട്. ശബരിമല കാടുകള്‍ക്കു പുറമേ മൂഴിയാർ, വേലുത്തോട്, സായിപ്പിൻകുഴി, കൊച്ചുപന്പ, ഗവി, ചിപ്പന്‍കുഴി തുടങ്ങിയ വനമേഖലകള്‍ കേന്ദ്രീകരിച്ച് നൂറിലധികം ആദിവാസി കുടുംബങ്ങള്‍ രണ്ടര പതിറ്റാണ്ടായി ഡോക്ടറുടെ കരുതലിലായിരുന്നു. സര്‍ക്കാര്‍ വാഹനം ലഭ്യമല്ലാത്തപ്പോള്‍ സ്വന്തം വാഹനത്തില്‍ ഡോക്ടര്‍ പാഞ്ഞെത്തി. ക്യാന്പുകള്‍ക്കിടെ കാട്ടാനയടകകമനുള്ള വന്യമൃഗങ്ങളുടെ മുന്നില്‍ മണിക്കൂറുകള്‍ കുടുങ്ങിയ സംഭവങ്ങള്‍ നിരവധിയാണ്. ആദിവാസി കുട്ടികളുടെ ആരോഗ്യ പ്രശ്നങ്ങളെ ഡോക്ടർ ഗൗരവത്തിലെടുത്തു. ഇവർക്കു കൃത്യമായി പോഷകമൂല്യങ്ങൾ എത്തിക്കുന്നതിൽ ശ്രദ്ധ കേന്ദ്രീകരിച്ചു. പല സന്നദ്ധസംഘടനകളെയും ഉപയോഗപ്പെടുത്തി ഭക്ഷണവും വസ്ത്രവും കൃത്യമായി എത്തിച്ചു. സീതത്തോട് പബ്ലിക് ഹെല്‍ത്ത് സെന്‍ററിലെ ഔട്ട് പേഷ്യന്‍റ് സൗകര്യത്തിലാണ് ഡോക്ടറുടെ പതിവ് ദിവസം ആരംഭിക്കുന്നത്. പക്ഷേ, ആഴ്ചയില്‍ ഒരിക്കലെങ്കിലും അദ്ദേഹം 70 കിലോമീറ്റര്‍ അകലെയുള്ള ഗവിയിലേക്ക് പോകാറുണ്ട്. യാത്രയ്ക്കിടെയിൽ ആദിവാസികളെയും തോട്ടം തൊഴിലാളികളെയും വഴിയിൽ കാണും. ക്ഷേമം അന്വേഷിച്ച് ആരോഗ്യനില പരിശോധിച്ചായിരിക്കും യാത്ര. അത്യാവശ്യ മരുന്നുകളും കുത്തിവയ്പുമൊക്കെ ഡോക്ടർ കൈയിൽ കരുതിയിട്ടുണ്ടാകും. സീതത്തോട്ടിൽ മുന്പ് സ്ഥിരമായി ഒരു ഡോക്ടറുടെ സേവനം ലഭിച്ചിരുന്നില്ല. വിശാലമായ വനമേഖല കൂടി ഉൾപ്പെടുന്ന പഞ്ചായത്തിലെ പ്രാഥമികാരോഗ്യ കേന്ദ്രത്തിൽ ജോലി ചെയ്യാൻ പലരും താത്പര്യം കാട്ടിയില്ല. ഇതുകൊണ്ടു നത്നെയാണ് ഡോ. വിൻസെന്‍റ് സേവ്യർ ഈ നാട്ടിൽ തന്‍റെ ദൗത്യം പൂർത്തീകരിക്കാമെന്നുറച്ചത്. അടിയന്തര സാഹചര്യങ്ങളിൽ,സമയം നോക്കാതെ ഡോക്ടര്‍മാര്‍ ആദിവാസി ഊരുകളിലേക്ക് ഓടിയെത്തിയിട്ടുണ്ട്. അദ്ദേഹത്തിന്‍റെ മാര്‍ഗനിര്‍ദേശപ്രകാരം സീതത്തോട് പഞ്ചായത്ത് പകര്‍ച്ചവ്യാധിയെ ഫലപ്രദമായി കൈകാര്യം ചെയ്തതും ഡോക്ടറുടെ നാള്‍വഴിയിലെ കുറിപ്പുകളില്‍പ്പെടുന്നു. സീതത്തോട് പ്രാഥമികാരോഗ്യ കേന്ദ്രം ഡോ. വിന്‍സെന്റ് സേവ്യറിന്റെ ജീവിതവും പ്രവര്‍ത്തനവുമാണ്. സര്‍വീസില്‍നിന്നു വിരമിച്ച ശേഷവും സീതത്തോട്ടില്‍ തന്നെ സേവനം തുടരുമെന്ന് ഡോക്ടർ പ്രഖ്യാപിച്ചു കഴിഞ്ഞു. ഇതിനായി അമ്മ എന്ന പേരില്‍ സീതത്തോട് ജംഗ്ഷനില്‍ ആശുപത്രി തുറന്നു. ഇനി 24 മണിക്കൂറും ഇവിടെത്തന്നെ ഉണ്ടാകുമെന്ന് ഡോക്ടർ പറയുന്നു. സർക്കാർ സേവനത്തിന്‍റെ അതിർ വരന്പുകൾ ഇല്ലാതെ തുടർന്നും വനവാസികൾക്കു ചികിത്സ ലഭ്യമാക്കുന്നതിന് അദ്ദേഹത്തിനു മടിയില്ല. ഭാര്യ: മിനി. മകള്‍ അഷ്‌കേനാ, തിരുവനന്തപുരം മാര്‍ ഇവാനിയോസ് കോളജില്‍ എല്‍ എല്‍ ബി മൂന്നാംവര്‍ഷ വിദ്യാര്‍ഥിനിയാണ്.

തദ്ദേശ തെരഞ്ഞെടുപ്പ് : വോട്ടിംഗ് മെഷീനുകളുടെ ആദ്യഘട്ട പരിശോധന നാളെ മുതല്‍

പത്തനംതിട്ട: തദ്ദേശസ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പിനുള്ള ഇലക്‌ട്രോണിക് വോട്ടിംഗ് മെഷീനുകളുടെ ഫസ്റ്റ് ലെവല്‍ ചെക്കിംഗ് (എഫ്എല്‍സി) നാളെ മുതല്‍ 20 വരെ ഇലക്‌ഷന്‍ വെയര്‍ ഹൗസിനു സമീപമുള്ള ഹാളില്‍ നടക്കുമെന്ന് ജില്ലാ കളക്ടര്‍ എസ്. പ്രേം കൃഷ്ണന്‍ അറിയിച്ചു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന ഉദ്യോഗസ്ഥര്‍ക്കുള്ള പരിശീലന പരിപാടിയില്‍ സംസാരിക്കുകയായിരുന്നു അദ്ദേഹം. എഫ്എല്‍സി പ്രവര്‍ത്തനം വളരെ കൃത്യതയോടും കാര്യക്ഷതയോടും ഏറ്റെടുക്കേണ്ട ഒന്നാണെന്നും വോട്ടിംഗ് മെഷീനുകളുടെ സാങ്കേതികവും ഭൗതികവുമായ പരിശോധനയാണ് നടത്തുന്നതെന്നും കളക്ടർ പറഞ്ഞു. ജില്ലാ ഇലക്‌ഷന്‍ ഓഫീസറുടെ ചുമതലയില്‍ നടക്കുന്ന എഫ്എല്‍സി പ്രവര്‍ത്തനം ഏകോപിപ്പിക്കുന്നതിന് ചാര്‍ജ് ഓഫീസറായി കോന്നി ഭൂരേഖ തഹസില്‍ദാര്‍ പി. സുദീപിനെ നിയോഗിച്ചു. ഹൈദരാബാദ് ഇലക്‌ട്രോണിക് കോര്‍പറേഷന്‍ ഓഫ് ഇന്ത്യ ലിമിറ്റഡിലെ എൻജിനിയര്‍മാരും എഫ്എല്‍സി പ്രവര്‍ത്തനങ്ങളില്‍ പങ്കെടുക്കും. അംഗീകൃത രാഷ്‌ട്രീയ പാര്‍ട്ടി പ്രതിനിധികളുടെ സാന്നിധ്യത്തിലാണ് നടപടികളെന്നും കളക്ടർ അറിയിച്ചു. എഫ്എല്‍സി ഹാളിലേക്കുള്ള പ്രവേശനം മെറ്റല്‍ ഡിറ്റക്ടര്‍ വഴി ആയിരിക്കും. തെരഞ്ഞെടുപ്പ് ഡെപ്യൂട്ടി കളക്ടര്‍ ബീന എസ് ഹനീഫ്, മാസ്റ്റര്‍ ട്രെയിനര്‍മാരായ രജീഷ് ആർ. നാഥ്, വി. ഷാജു എന്നിവര്‍ പരിശീലനത്തിന് നേതൃത്വം നല്‍കി.

വാഹനം കത്തിനശിച്ചു

പത്തനംതിട്ട: ശബരിമല ദര്‍ശനത്തിനു പോയ തീർഥാടകരുടെ വാഹനം കത്തിനശിച്ചു. ആര്‍ക്കും പരിക്കില്ല. പാലക്കാടു നിന്നുമുള്ള അഞ്ചംഗ സംഘം സഞ്ചരിച്ചിരുന്ന കാറാണ് കത്തിയത്. പമ്പ പാതയില്‍ അട്ടത്തോടിനും നിലയ്ക്കലിനും മധ്യേ പ്ലാന്തോടിനു സമീപം ഇന്നലെ പുലര്‍ച്ചെ മൂന്നോടെ ആയിരുന്നു അപകടം. ചെറിയ തീപ്പൊരി കണ്ടപ്പോള്‍ തന്നെ യാത്രക്കാര്‍ മുഴുവന്‍ പുറത്തിറങ്ങിയതിനാല്‍ കൂടുതല്‍ അപകടങ്ങള്‍ ഒഴിവായി. തുടര്‍ന്ന് വാഹനത്തില്‍ തീ ആളിപ്പടരുകയായിരുന്നു. റെനോ എന്‍ജോയ് ടാക്‌സി കാറാണ് പൂര്‍ണമായും കത്തിനശിച്ചത്. വിവരമറിഞ്ഞ് പമ്പ സ്റ്റേഷന്‍ ഓഫീസര്‍ കെ. കലേഷ് കുമാറിന്‍റെ നേതൃത്വത്തില്‍ അഗ്നിരക്ഷാ സേനയെത്തി തീയണച്ചെങ്കിലും വാഹനം കത്തിയമര്‍ന്നിരുന്നു. ദീര്‍ഘദൂരം ഓടിയതിനാല്‍ വാഹനം ചൂടായി തീപിടിച്ചതാകാമെന്നാണ് പ്രാഥമിക നിഗമനം. ഷോര്‍ട്ട് സര്‍ക്യൂട്ടിനുള്ള സാധ്യതയും തള്ളിക്കളയാകില്ലെന്ന് ഫയർഫോഴ്സ് അധികൃതർ പറഞ്ഞു.

ശബരിമലയിൽ നിറപുത്തരി പൂജ നടന്നു

ശബരിമല: ശ്രീധർമ ശാസ്താ ക്ഷേത്രത്തിൽ നിറപുത്തരി പൂജകള്‍ നടന്നു. ഇന്നലെ പുലര്‍ച്ചെ 5.30നും 6.30നും ഇടയിലുള്ള മുഹൂര്‍ത്തത്തിലായിരുന്നു നിറപുത്തരി പൂജകള്‍. തന്ത്രി കണ്ഠര് ബ്രഹ്‌മദത്തന്‍, മേല്‍ശാന്തി അരുണ്‍കുമാര്‍ നമ്പൂതിരി എന്നിവര്‍ ചേര്‍ന്ന് നെല്‍ക്കതിര്‍ കറ്റകള്‍ കൊടിമരത്തിനു സമീപത്തു നിന്ന് കിഴക്കേ മണ്ഡപത്തിലേക്ക് എത്തിച്ചു. പ്രത്യേക പൂജകള്‍ക്ക് ശേഷം ശ്രീകോവിലിന് ഉള്ളിലേക്ക് ആനയിച്ചു, തുടര്‍ന്നാണ് നിറപുത്തരി പൂജകള്‍ നടന്നത്. പൂജകള്‍ക്ക് ശേഷം നെൽക്കതിരുകള്‍ ശ്രീകോവിലില്‍ ചാര്‍ത്തി. തുടര്‍ന്ന് തന്ത്രിയും മേല്‍ശാന്തിയും നെല്‍ക്കതിരുകള്‍ പ്രസാദമായി ഭക്തര്‍ക്ക് വിതരണം ചെയ്തു. പൂജകള്‍ കണ്ടു തൊഴാനും പ്രസാദം സ്വീകരിക്കാനുമായി നൂറുകണക്കിന് ഭക്തരാണ് രാവിലെ മുതല്‍ കാത്തുനിന്നത്. പൂജകള്‍ പൂര്‍ത്തിയാക്കി രാത്രി 10 ന് നട അടച്ചു.

ബൈക്ക് മോഷണക്കേസിൽ അറസ്റ്റ് ചെയ്തു

തിരുവല്ല: നിരവധി മോഷണക്കേസുകളില്‍ പ്രതിയെ ബൈക്ക് മോഷണത്തിനു തിരുവല്ല പോലീസ് പിടികൂടി. തൊടുപുഴ തൃക്കൊടിത്താനം കാരിക്കോട് താഴെതോട്ടില്‍ ടി. ടി. ബിജുവാണ് (50) തൊടുപുഴ ടൗണിലുള്ള ബിവറേജസിന് മുമ്പില്‍ നിന്നും അറസ്റ്റിലായത്. തിരുവല്ല വൈഎംസിഎ ജംഗ്ഷന് സമീപമുള്ള ഫ്ലാറ്റിനു മുന്നില്‍ നിന്നും കറുത്ത യുണികോണ്‍ മോട്ടോര്‍ സൈക്കിളാണ് മോഷ്ടിക്കപ്പെട്ടത്. കോട്ടയം പായിപ്പാട് നാലുകോടി കല്ലുപറമ്പില്‍ വീട്ടില്‍ സുധീഷിന്‍റേതാണ് ബൈക്ക്. സുധീഷ് ഈ കെട്ടിടത്തില്‍ മേസ്തിരിപ്പണി ചെയ്യുകയാണ്. 22 ഓളം ക്രിമിനല്‍ കേസുകളില്‍ പ്രതിയാണ് ബിജുവെന്ന് പോലീസ് പറഞ്ഞു. തിരുവല്ല ഡിവൈഎസ്പി എസ്. നന്ദകുമാറിന്‍റെ മേല്‍നോട്ടത്തിലുള്ള പ്രത്യേക പോലീസ് സംഘത്തില്‍ ഇന്‍സ്പെക്ടര്‍ എസ്. സന്തോഷ്, എസ്ഐ ഡൊമിനിക് മാത്യു തുടങ്ങിയവരുടെ നേതൃത്വത്തിലാണ് അറസ്റ്റ്.

സ്‌കൂളുകള്‍ക്ക് അവധി

പത്തനംതിട്ട: ജില്ലയില്‍ ദുരിതാശ്വാസ ക്യാമ്പായി പ്രവര്‍ത്തിക്കുന്ന പെരിങ്ങര വില്ലേജിലെ മേപ്രാല്‍ സെന്‍റ് ജോണ്‍സ് എല്‍പിഎസ്, കവിയൂര്‍ വില്ലേജ് പടിഞ്ഞാറ്റുംചേരി ഗവണ്‍മെന്‍റ് എല്‍പിഎസ്, പന്തളം വില്ലേജ് മുടിയൂര്‍ക്കോണം എംടി എല്‍പി സ്‌കൂള്‍ എന്നിവയ്ക്ക് ജില്ലാ കളക്ടർ ഇന്ന് അവധി പ്രഖ്യാപിച്ചു.

കന്യാസ്ത്രീകൾക്കെതിരേ കള്ളക്കേസ്; പ്രതിഷേധം അലയടിക്കുന്നു

തിരുവല്ലയിൽ ഇന്ന് ഉപവാസ പ്രാർഥനാ യജ്ഞം തിരുവല്ല: ഛത്തീസ്ഗഢിൽ മലയാളി ക്രൈസ്തവ സന്യാസിനിമാരെ മതപരിവർത്തനം, മനുഷ്യക്കടത്ത് എന്നീ കുറ്റങ്ങൾ ആരോപിച്ച് ജയിലിൽ അടച്ചതിൽ പ്രതിഷേധിച്ച് മലങ്കര കത്തോലിക്കാ സഭ തിരുവല്ല അതിഭദ്രാസനത്തിന്‍റെ നേതൃത്വത്തിലുള്ള ഉപവാസ പ്രാർഥനായഞ്ജം ഇന്നു തിരുവല്ലയിൽ നടക്കും. രാവിലെ ഒന്പതിന് തിരുവല്ല കെഎസ്ആർടിസി ബസ് സ്റ്റാൻഡിന് എതിർവശത്തു തിരുവല്ല ആർച്ച്ബിഷപ് ഡോ. തോമസ് മാർ കൂറിലോസിന്‍റെ അധ്യക്ഷതയിൽ ചേരുന്ന പൊതുസമ്മേളനത്തിൽ മുഖ്യ വികാരി ജനറാൾ ഫാ.ഡോ. ഐസക് പറപ്പള്ളിൽ, മാർത്തോമ്മ സഭ സഫ്രഗൻ മെത്രാപ്പോലീത്ത ജോസഫ് മാർ ബർണബാസ്, യാക്കോബായ സുറിയാനി നിരണം ഭദ്രാസനാധിപൻ ഡോ.ഗീവർഗീസ് മാർ കൂറിലോസ് മെത്രാപ്പോലീത്ത, കോട്ടയം അതിരൂപത സഹായ മെത്രാൻ ഗീവർഗീസ് മാർ അപ്രേം, സിഎസ്ഐ സഭ മധ്യകേരള മഹാഇടവക മുൻ അധ്യക്ഷൻ ബിഷപ് തോമസ് സാമുവേൽ, മാത്യു ടി. തോമസ് എംഎൽഎ, ഓർത്തഡോക്സ് സഭ അസോസിയേഷൻ സെക്രട്ടറി ബിജു ഉമ്മൻ, മാർത്തോമ്മ സഭ അല്മായ ട്രസ്റ്റി അൻസിൽ കോമാട്ട് , തിരുവല്ല ശ്രീരാമകൃഷ്ണ ആശ്രമ മഠാധിപതി സ്വാമി നിർവിണാനന്ദ തുടങ്ങിയവർ പ്രസംഗിക്കും. വൈദികർ, സിസ്റ്റേഴ്സ്, എംസിവൈഎം, എംസിഎ, എംസിസിഎൽ, എംസിഎംഎഫ് സംഘടനാ ഭാരവാഹികൾ നേതൃത്വം നൽകും. വൈകുന്നേരം അഞ്ചിന് തിരുവല്ല പ്രൈവറ്റ് ബസ് സ്റ്റാൻഡിലേക്കു മൗനജാഥയോടെ പ്രാർഥനായജ്ഞം സമാപിക്കും. അടൂരിൽ പ്രതിഷേധറാലിയും സമ്മേളനവും അടൂർ: ഛത്തീസ്ഗഡിൽ കന്യാസ്ത്രീകളെ ജയിലിലടച്ചതിൽ പ്രതിഷേധിച്ച് മലങ്കര കത്തോലിക്കാ സഭ അടൂർ വൈദികജില്ല എംസിഎ നേതൃത്വം നൽകിയ പ്രതിഷേധ മൗന റാലിയും സമ്മേളനവും നടത്തി. അടൂർ തിരുഹൃദയ പള്ളി അങ്കണത്തിൽ നിന്നാരംഭിച്ച റാലിക്ക് അടൂർ വൈദിക ജില്ലാവികാരി ഫാ.ശാന്തൻ ചരുവിൽ, ഫാ.ജിനോയ് ചരുവിളയിൽ, ഫാ.അജോ കളപ്പുരക്കൽ, ഫാ.ഡോമിനിക് സാവിയോ, ഫാ.തോമസ് കൊച്ചുവട്ടോത്തറ, ഫാ.ക്ലിം പരിക്കൂർ, ഫാ.തോമസ് കുറ്റിയിൽ, ബിജു ഫിലിപ്പ്, ബെന്നി ചാവടിയിൽ മുരുപ്പേൽ, ഡോ.എബി എബ്രഹാം, ജോർജ് മുരുക്കൽ എന്നിവർ നേതൃത്വം നൽകി. ബിജെപിയുടെ തനിനിറം പുറത്തുവന്നു: വർഗീസ് മാമ്മൻ പത്തനംതിട്ട: ഛത്തീസ്ഗഡിൽ പ്രേഷിത ശുശ്രൂഷയിലും ആതുര സേവന രംഗത്തും സജീവമായ കന്യാസ്ത്രീകൾക്ക് നേരെയുണ്ടായ അറസ്റ്റും കേസും ബിജെപിയുടെ യഥാർഥ സംഘപരിവാർ മുഖംപുറത്തു കൊണ്ടുവന്നിരിക്കുകയാണെന്ന് യുഡിഎഫ് ജില്ലാ ചെയർമാനും കേരള കോൺഗ്രസ് ജില്ലാ പ്രസിഡന്‍റുമായ വർഗീസ് മാമ്മൻ. പോലീസിന്‍റെ അധികാരം ബജരംഗ്ദൾ പ്രവർത്തകർ ഏറ്റെടുത്തു. കന്യാസ്ത്രീ മഠങ്ങൾക്കും കന്യാസ്ത്രീമാർക്കും നേരെ നടക്കുന്ന ആക്രമണം ബിജെപി അധികാരത്തിൽ വന്നകാലം മുതൽ തുടന്നു വരുന്നവയാണെന്ന് അദ്ദേഹം പറഞ്ഞു. കേരളത്തിൽ ബിജെപി നേതാക്കൾ ക്രൈസ്തവ അരമനകളും ആരാധനാലയങ്ങളും കയറിയിറങ്ങുകയും വടക്കേ ഇന്ത്യയിൽ ക്രൈസ്തവർ പീഡിപ്പിക്കപ്പെടുകയും അക്രമിക്കപ്പെടുകയും കള്ളക്കേസിൽ പ്രതിയാക്കപ്പെടുകയും ചെയ്യുന്ന സ്ഥിതിയാണ് ഉള്ളത്. ബിജെപിയുടെ പൊയ്മുഖം ഇതോടെ അഴിയപ്പെടുകയാണെന്നും വർഗീസ് മാമ്മൻ അഭിപ്രായപ്പെട്ടു. കോൺഗ്രസ് പ്രതിഷേധം ഇന്ന് പത്തനംതിട്ട: ഛത്തീസ്ഗഡിൽ കന്യാസ്ത്രീകളെ ജയിലിൽ അടച്ച ബിജെപി സർക്കാരിന്‍റെ ജനാധിപത്യ വിരുദ്ധ നടപടിയിൽ പ്രതിഷേധിച്ച് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ ഇന്നു പത്തനംതിട്ടയിൽ പ്രകടനവും യോഗവും സംഘടിപ്പിക്കുമെന്ന് ജനറൽ സെക്രട്ടറി സാമുവൽ കിഴക്കുപുറം അറിയിച്ചു. വൈകുന്നേരം 4.30ന് അബാൻ ജംഗ്ഷനിൽനിന്ന് ആരംഭിക്കുന്ന പ്രകടനം ഗാന്ധി സ്‌ക്വയറിൽ സമാപിക്കും. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിലിന്‍റെ അധ്യക്ഷതയിൽ ചേരുന്ന പ്രതിഷേധ സമ്മേളനം ചേരും. റാന്നി എക്യുമെനിക്കൽ ഫെലോഷിപ്പ് പ്രതിഷേധിച്ചു റാന്നി: ഛത്തീസ്ഗഡിയിൽ മലയാളി കന്യാസ്ത്രീകൾക്കു നേരെ നടന്ന ആക്രമണങ്ങളിലും നിരപരാധികളെ ജയിലിൽ അടച്ചതിലും റാന്നി എക്യുമെനിക്കൽ ഫെലോഷിപ്പ് പ്രതിഷേധിച്ചു. ക്രൈസ്തവർക്കെതിരേയുള്ള ആക്രമണങ്ങൾക്കെതിരേ ഒന്നിച്ചു പോരാടാൻ മതേതരബോധമുള്ള സമൂഹം തയാറാകണമെന്നും ഫെലോഷിപ്പ് രക്ഷാധികാരിമാരായ ജോസഫ് മാർ ബർണബാസ് സഫ്രഗൻ മെത്രാപ്പോലീത്ത, ജോഷ്വാ മാർ നിക്കോദിമോസ് മെത്രാപ്പോലീത്ത, കുര്യാക്കോസ് മാർ ഈവാനിയോസ് മെത്രാപ്പോലീത്ത എന്നിവർ സംയുക്ത പ്രസ്താവനയിൽ ആഹ്വാനം ചെയ്തു. കന്യാസ്ത്രീകളെ മോചിപ്പിക്കണം: ജമാഅത്ത് ഫെഡറേഷൻ പത്തനംതിട്ട: ഛത്തീസ്ഗഡിൽ ജയിലിലടച്ച കന്യാസ്ത്രീകളെ നിരുപാധികം വിട്ടയക്കണമെന്ന് കേരള മുസ് ലിം ജമാഅത്ത് ഫെഡറേഷൻ ജില്ലാ കമ്മിറ്റി ആവശ്യപ്പെട്ടു.ജില്ലാ പ്രസിഡന്‍റ് യൂസഫ് മോളൂട്ടി അധ്യക്ഷത വഹിച്ചു. വൈസ് പ്രസിഡന്‍റ് അൻസാരി ഏനാത്ത് ഉദ്ഘാടനം ചെയ്തു. സംസ്ഥാന സെക്രട്ടറി അഫ്സൽ പത്തനംതിട്ട, ജില്ലാ ജനറൽ സെക്രട്ടറി റസാക്ക്, ഓർഗനൈസിംഗ് സെക്രട്ടറി അബ്ദുൽ റഹിം മൗലവി, വർക്കിംഗ് പ്രസിഡന്‍റ് സാലി നാരങ്ങാനം, ഉമ്മർ കുട്ടി കുമ്മണ്ണൂർ, സുബൈർ കുട്ടി കാട്ടൂർ കാസിം, അബ്ദുൾ ലത്തീഫ് മൗലവി, അബ്ദുറഹീം കുമ്മണ്ണൂർ, റഹീംകുട്ടി പെരുനാട്, അബ്ദുൽ അസീസ് കോന്നി, ഷംസുദ്ദീൻ മുളന്തറ എന്നിവർ പ്രസംഗിച്ചു. പത്തനംതിട്ടയിൽ സംയുക്ത പ്രതിഷേധം മൂന്നിന് പത്തനംതിട്ട: ഉത്തരേന്ത്യയിൽ ഭരണകൂട ഭീരതയ്ക്ക് ഇരയായി ജാമ്യം പോലും നിഷേധിക്കപ്പെട്ട് ജയിലിൽ അടയ്ക്കപ്പെട്ട് ദാരുണാവസ്ഥയിലായിരിക്കുന്ന കന്യാസ്ത്രീകൾക്ക് ഐക്യദാർഢ്യം പ്രഖ്യാപിച്ചുകൊണ്ട് പത്തനംതിട്ട പ്രദേശത്തെ ക്രൈസ്തവ വിഭാഗങ്ങൾ സംയുക്ത പ്രതിഷേധ പരിപാടികൾ നടത്തും. ഉത്തരേന്ത്യയിൽ നിരന്തരം നടക്കുന്ന ക്രൈസ്തവ പീഡനങ്ങളിൽ വിവിധ എപ്പിസ്കോപ്പൽ സഭാ പ്രതിനിധികളുടെ യോഗം ഉത്ക്കണ്ഠ രേഖപ്പെടുത്തി. മലങ്കര കത്തോലിക്കാ സഭ പത്തനംതിട്ട ഭദ്രാസനാധ്യക്ഷൻ ബിഷപ് ഡോ.സാമുവേൽ മാർ ഐറേനിയോസ് ഉദ്ഘാടനം ചെയ്തു. ഓർത്തഡോക്സ് സഭ തുമ്പമൺ ഭദ്രാസന സെക്രട്ടറി ജോൺസൺ കല്ലിട്ടതിൽ കോർ എപ്പിസ്കോപ്പ വിഷയാവതരണം നടത്തി. ക്രൈസ്തവർക്കു നേരെ സർക്കാരുകളുടെ ഒത്താശയോടെ നടത്തുന്ന അതിക്രമങ്ങളെ തുറന്നുകാട്ടുന്നതിനും പ്രതിഷേധം അറിയിക്കുന്നതിനുമായി ഓഗസ്റ്റ് മൂന്നിന് ഉച്ചകഴിഞ്ഞ് മൂന്നിന് പത്തനംതിട്ട സെന്‍റ് പീറ്റേഴ്സ് കത്തീഡ്രലിൽ നിന്നും മൗനജാഥ ആരംഭിക്കും. പത്തനംതിട്ട ടൗണിലെ ഗാന്ധി സ്ക്വയറിലെത്തിയശേഷം ജാഥ സെന്‍റ് സ്റ്റീഫൻസ് കത്തീഡ്രലിൽ സമാപിക്കും. കോഴഞ്ചേരിയിൽ മൗനജാഥയും സമ്മേളനവും കോഴഞ്ചേരി: ഛത്തീസ്ഗഡ് സംഭവത്തിൽ പ്രതിഷേധിച്ചും രാജ്യത്തു ന്യൂനപക്ഷങ്ങൾക്കെതിരേ നടക്കുന്ന ആക്രമണങ്ങൾക്കെതിരേയും മാരാമൺ ക്രൈസ്തവ കൂട്ടായ്മയുടെ നേതൃത്വത്തിൽ ഇന്ന് മൗനജാഥയും സമ്മേളനവും നടത്തും. മാരാമൺ സെന്‍റ് ജോസഫ് റോമൻ കത്തോലിക്കാ ദേവാലയത്തിൽനിന്ന് വായമൂടി കെട്ടിയ പ്രതിഷേധ റാലി വൈകുന്നേരം അഞ്ചിന് തുടങ്ങും. കോഴഞ്ചേരിയിൽ അവകാശ സംരക്ഷണ സമ്മേളനം നടക്കും. വിവിധ ക്രൈസ്തവ സഭാ വിശ്വാസികൾ റാലിയും സമ്മേളനത്തിലും പങ്കെടുക്കും. സംസ്ഥാന ആസൂത്രണ ബോർഡംഗം ഡോ. വർഗീസ് ജോർജ് സമ്മേളനത്തിൽ മുഖ്യപ്രഭാഷണം നടത്തും. കാത്തലിക് ടീച്ചേഴ്സ് ഗിൽഡ് തിരുവല്ല: ഛത്തീസ്ഗഡിൽ കന്യാസ്ത്രീകളെ അനധികൃതമായി തടങ്കലിൽവച്ച സർക്കാർ നടപടിക്ക് എതിരേ തിരുവല്ല ടീച്ചേഴ്സ് ഗിൽഡിന്‍റെ ഭിമുഖ്യത്തിൽ പ്രതിഷേധ സമ്മേളനം നടന്നു. കോർപറേറ്റ് മാനേജർ ഫാ. മാത്യു പുനക്കുളം, ഗിൽഡ് സംസ്ഥാന ട്രഷറർ റോബിൻ മാത്യു, പ്രസിഡന്‍റ് മാത്യൂസ് ഡാനിയേൽ, വൈസ് പ്രസിഡന്‍റ് ജിൻസി പി. വർ‌ഗീസ്, ജനറൽ സെക്രട്ടറി റോബിൻ കെ. മത്തായി, മേഖല പ്രതിനിധി ജോസഫ് ചിറയിൽ, സിനു ചെറിയാൻ, മഞ്ജു വർക്കി, ജോയിന്‍റ് സെക്രട്ടറി ലൈജു കോശി മാത്യു, ട്രഷറർ പ്രമോദ് പി. മാർക്കോസ് എന്നിവർ പ്രസംഗിച്ചു. പ്രധാനമന്ത്രി ഇടപെടണം : കാഞ്ഞിരപ്പള്ളി രൂപത പാസ്റ്ററല്‍ കൗണ്‍സില്‍ കാഞ്ഞിരപ്പള്ളി: ഛത്തീസ്ഗഡില്‍ മലയാളികളായ കന്യാസ്ത്രീകളെ അവര്‍ നല്‍കിയ വിശദീകരണം പരിഗണിക്കാന്‍ പോലും തയ്യാറാകാതെ പോലീസ് അറസ്റ്റ് ചെയ്ത നടപടി അപലപനീയമാണെന്നു കാഞ്ഞിരപ്പള്ളി രൂപത പാസ്റ്ററല്‍ കൗണ്‍സിൽ. ന്യൂനപക്ഷാവകാശങ്ങളിന്മേലും ഭരണഘടന അനുവദിച്ചു നല്‍കുന്ന മൗലികാവകാശങ്ങളിന്മേലുമുള്ള കടന്നുകയറ്റങ്ങളെ എതിര്‍ത്തു തോല്‍പ്പിക്കുക തന്നെ വേണം. കന്യാസ്ത്രീകള്‍ക്ക് സഭാവസ്ത്രം ധരിച്ച് പുറത്തിറങ്ങാന്‍ പറ്റാത്ത നിലയിലേക്ക് ഉത്തരേന്ത്യയില്‍ ക്രൈസ്തവ സമുദായം അടിച്ചമര്‍ത്തപ്പെടുന്നു. മത പരിവര്‍ത്തനത്തിനു വേണ്ടിയല്ല സാമൂഹിക പുരോഗതിക്കും മനുഷ്യന്‍റെ സമഗ്ര വളര്‍ച്ചയ്ക്കും വേണ്ടിയാണ് സഭ പ്രവര്‍ത്തിക്കുന്നത്യ ഛത്തിസ്ഗഡില്‍ നടന്നത് മനുഷ്യാവകാശ ലംഘനവും ആള്‍ക്കൂട്ട വിചരണയുമാണ്. വ്യാജ ആരോപണങ്ങള്‍ ഉന്നയിച്ചവര്‍ക്കും ഏകപക്ഷീയമായി അറസ്റ്റ് ചെയ്തവര്‍ക്കുമെതിരേ നടപടി സ്വീകരിക്കണമെന്നും പ്രധാനമന്ത്രിയും കേന്ദ്ര ആഭ്യന്തര മന്ത്രിയും ന്യൂനപക്ഷ മന്ത്രിയും ഇടപെടണമെന്നും രൂപത പാസ്റ്ററല്‍ കൗണ്‍സില്‍ ആവശ്യപ്പെട്ടു. കുന്നന്താനത്ത് പ്രതിഷേധം മല്ലപ്പള്ളി: ഛത്തീസ്ഗഡ് സംഭവത്തിൽ പ്രതിഷേധിച്ച് കോൺഗ്രസ് കുന്നന്താനം മണ്ഡലം കമ്മിറ്റി പ്രകടനവും യോഗവും നടത്തി. മണ്ഡലം പ്രസിഡന്‍റ് മാന്താനം ലാലന്‍റെ അധ്യക്ഷതയിൽ കൂടിയ യോഗം ബ്ലോക്ക് കോൺഗ്രസ് പ്രസിഡന്‍റ് എബി മേക്കരിങ്ങാട്ട് ഉദ്ഘാടനം ചെയ്തു. യൂത്ത് കോൺഗ്രസ് സംസ്ഥാന സെക്രട്ടറി അഖിൽ ഓമനക്കുട്ടൻ, സി. പി. ഓമനകുമാരി, വി.ടി. ഷാജി, റിദേഷ് ആൻറണി, രാമചന്ദ്രൻ കാലായിൽ, ബാബു കുറുമ്പേശ്വരം, ഗ്രേസി മാത്യു, ധന്യ മോൾ ലാലി, രാധാമണിയമ്മ, മറിയാമ്മ കോശി, ഏബ്രഹാം വർഗീസ് പല്ലാട്ട്, പുരുഷോത്തവൻ പിള്ള പാറക്കൽ, അലക്സ് പള്ളിക്കപറമ്പിൽ, വിഷ്ണു എസ്. നാഥ് തുടങ്ങിയവർ പ്രസംഗിച്ചു. പ്രതിഷേധാർഹം: എസ്‌വൈഎസ് പത്തനംതിട്ട: ന്യൂനപക്ഷങ്ങൾക്കു നേരെ രാജ്യത്തു നടക്കുന്ന അതിക്രമങ്ങൾക്കെതിരേ ജനാധിപത്യ സമൂഹം ഒന്നിച്ചു പ്രതികരിക്കണമെന്നു എസ്‌വൈഎസ് ജില്ലാ കമ്മിറ്റി. രാജ്യത്തിന്‍റെ അഖണ്ഡതയ്ക്കു കോട്ടം വരാതിരിക്കാൻ കേന്ദ്ര, സംസ്ഥാന സർക്കാരുകളും പാർട്ടികളും ജാഗ്രത കാണിക്കണം.

വന്യമൃഗ ആക്രമണം: മലയോര മേഖലയുടെ സുരക്ഷ ഉറപ്പാക്കണം: ബിജു ഉമ്മൻ

തിരുവല്ല: സംസ്ഥാനത്ത് വന്യമൃഗ ആക്രമണങ്ങൾ നിത്യസംഭവമായി മാറിയെന്നും അധികാരികൾ നിസംഗത വെടിയണമെന്നും മലങ്കര ഓർത്തഡോക്സ് സഭ അസോസിയേഷൻ സെക്രട്ടറി ബിജു ഉമ്മൻ. പെരുവന്താനം പഞ്ചായത്തിലെ ഒരു വാർഡിൽ തന്നെയാണ് ചുരുങ്ങിയ നാളുകൾക്കുള്ളിൽ രണ്ട് ജീവനുകൾ കാട്ടാന ആക്രമണത്തിൽ പൊലിഞ്ഞത്. മലയോരമേഖലയിൽ എപ്പോൾ വേണമെങ്കിലും വന്യമൃഗത്തിന്റെ രൂപത്തിൽ മരണമെത്താം എന്നതാണ് സ്ഥിതി. സ്വന്തം വീടിനുള്ളിൽപ്പോലും മലയോരജനത സുരക്ഷിതരല്ല. 2015 മുതൽ സംസ്ഥാനത്ത് വന്യമൃഗ ആക്രമണത്തിൽ ആയിരത്തിലധികം പേർക്കാണ് ജീവൻ നഷ്ടമായത്. മനുഷ്യ ജീവൻ പൊലിയുമ്പോൾ നടത്തുന്ന പ്രസ്താവനകൾക്കപ്പുറം കേന്ദ്ര- സംസ്ഥാന സർക്കാരുകൾ ആത്മാർഥവും സത്വരവുമായ നടപടികൾ മനുഷ്യപക്ഷത്തുനിന്ന് ഇതുവരെ സ്വീകരിച്ചിട്ടില്ലെന്നും അദ്ദേഹം കുറ്റപ്പെടുത്തി. കൊല്ലപ്പെടുന്നവരുടെ ബന്ധുക്കൾക്ക് നഷ്ടപരിഹാരം നൽകി തലയൂരുന്ന സമീപനം അവസാനിപ്പിക്കണമെന്നും ബിജു ഉമ്മൻ ആവശ്യപ്പെട്ടു.

രണ്ട് വിദ്യാർഥികൾക്കടക്കം നാലുപേർക്ക് തെരുവുനായയുടെ കടിയേറ്റു

നായയെ കൊല്ലാനുള്ള ശ്രമം മൃഗസ്നേഹി തടഞ്ഞു വെച്ചൂച്ചിറ: വെച്ചൂച്ചിറ ടൗൺ പ്രദേശത്തും തെരുവുനായ രണ്ട് വിദ്യാർഥികളടക്കം നാലുപേരെ കടിച്ചു. ഇന്നലെ വൈകുന്നേരം വെച്ചൂച്ചിറ ചന്തയ്ക്കു സമീപം ട്യൂഷൻ സെന്‍ററിനു മുന്പിൽ ബസ് കാത്തു നിന്ന പത്താംക്ലാസ് വിദ്യാർഥിയെയാണ് തെരുവുനായ ആദ്യം കടിച്ചത്. മുന്നോട്ടോടിയ നായ മറ്റൊരു വിദ്യാർഥിനിയെ കടിച്ചു. ആക്രമണമകാരിയായി വരുന്ന നായയെ ഇടിച്ചു കൊല്ലാൻ ഇതിനിടെ പിക്കപ്പ് വാൻ ഡ്രൈവർ ശ്രമിച്ചെങ്കിലും സ്ഥലത്തെ ഒരു ഓട്ടോറിക്ഷ ഡ്രൈവർ ഇതു തടഞ്ഞു. ഇതിനിടെ മുന്നോട്ടോടിയ നായ രണ്ടുപേരെ കൂടി കടിച്ചു. നായയുടെ കടിയേറ്റവർ വിവിധ ആശുപത്രികളിൽ ചികിത്സ തേടി. നായയ്ക്കു പേവിഷ ബാധ സംശയിക്കുന്നതിനാൽ കടിയേറ്റവർ വാക്സീനേഷൻ ഉറപ്പാക്കണമെന്ന് ആരോഗ്യവകുപ്പ് അധികൃതർ നിർദേശിച്ചു. വെച്ചൂച്ചിറ കവല ഭാഗത്തും മാർക്കറ്റിലും തെരുവുനായ്ക്കളുടെ ശല്യം രൂക്ഷമാണ്. വെച്ചൂച്ചിറയിൽ നിന്ന് നാറാണംമൂഴി പഞ്ചായത്തിലേക്ക് വരുന്ന വഴി മടന്തമൺ ജംഗ്ഷനിൽ നടുറോഡിലും വെയ്റ്റിംഗ് ഷെഡിലുമായി തമ്പടിച്ചിരിക്കുന്ന നായ്ക്കൾ വഴിയാത്രക്കാർക്കും സ്കൂൾ കുട്ടികൾക്കും ഒരേപോലെ ഭീഷണിയാണ്. മടന്തമണ്ണിൽ ബസിറങ്ങി വീട്ടുകളിലേക്കു കുട്ടികൾ നടന്നു പോകുന്ന റോഡിലാണ് തെരുവുനായ്ക്കൾ താവളം ഉറപ്പിച്ചിരിക്കുന്നത്. ഇരുചക്ര വാഹന യാത്രക്കാരെയും നായ്ക്കൾ ആക്രമിക്കാറുണ്ട്.

സ്കൂളുകളിൽ 50 ഇനം വിവരങ്ങൾ തേടി സുരക്ഷാഓഡിറ്റിംഗ്

പരിശോധന വിദ്യാർഥി ഷോക്കേറ്റ് മരിച്ച പശ്ചാത്തലത്തിൽ പത്തനംതിട്ട: സ്കൂളുകളിൽ നിശ്ചിത സമയ പരിധിയിൽ തിരക്കിട്ട സുരക്ഷ ഓഡിറ്റിംഗ്. ആദ്യഘട്ടം ഇന്ന് അവസാനിക്കുമെന്നിരിക്കേ വിദ്യാഭ്യാസ വകുപ്പ് ഉദ്യോഗസ്ഥർ പരിശോധനകൾ നടത്തിവരികയാണ്. 50 ഇനം വിവരങ്ങളാണ് സ്കൂൾ അധികൃതരിൽനിന്നു തേടിയിരിക്കുന്നത്. പ്രഥമാധ്യാപകർ ചോദ്യാവലി പൂരിപ്പിച്ചു നൽകണം. പ്രധാന ചോദ്യങ്ങൾസുരക്ഷയുമായി ബന്ധപ്പെട്ട ചോദ്യങ്ങളിൽ കെട്ടിടങ്ങളുടെ സുരക്ഷ, സമീപ പുരയിടങ്ങളിലെ കാട്, മരങ്ങൾ, വൈദ്യുത കന്പികളുടെ സ്ഥാനം, സുരക്ഷാ മതിൽ തുടങ്ങി പാന്പുകൾക്ക് മാളങ്ങളുണ്ടോയെന്നതുവരെ ചോദ്യങ്ങളുണ്ട്. പരിശോധനയ്ക്കു വരുന്ന ഉദ്യോഗസ്ഥന് സ്കൂൾ പരിസരത്തെ മറ്റ് എന്തെങ്കിലും കുട്ടികൾക്കു ഭീഷണിയാണെന്നു തോന്നിയാൽ അതും മാറ്റണം. വിദ്യാഭ്യാസ ഓഫീസർമാർക്കു പിന്നാലെ വിവിധ വകുപ്പുദ്യോഗസ്ഥരുടെ പരിശോധന വരുന്നുണ്ട്. ഇതിൽ തദ്ദേശസ്ഥാപനം, വൈദ്യുതി, പോലീസ്, മോട്ടോർ വാഹനവകുപ്പ്, എക്സൈസ്, ആരോഗ്യ തുടങ്ങിയവരുണ്ട്. ഇവരെല്ലാം ചേർന്നു പരിശോധന നടത്തുകയും സ്കൂൾ സുരക്ഷാ രജിസ്റ്ററിൽ ഒപ്പുവയ്ക്കുകയും വേണം. പിന്നീട് ജില്ലാതല ഉദ്യോഗസ്ഥരടങ്ങുന്ന ടീമിന്‍റെ പരിശോധനയും ഉണ്ടാകും. പ്രത്യേക സംഘങ്ങളെ ഓരോ സ്കൂളിലേക്കും നിയോഗിച്ചിരിക്കുകയാണ്. സുരക്ഷാ ഓഡിറ്റിന്‍റെ ഭാഗമായി പുതിയ രജിസ്റ്റർ തുറന്നു. ഇതിൽ ഓരോ ദിവസവും ഓരോ അധ്യാപകൻ സുരക്ഷാ ചുമതല വഹിച്ച് ഒപ്പുവയ്ക്കണം. കുട്ടി സ്കൂൾ പരിസരത്ത് മറിഞ്ഞുവീണാൽപോലും അധ്യാപകൻ മറുപടി പറയേണ്ടി വന്നേക്കാം. തേവലക്കരയിൽ സ്കൂൾ മുറ്റത്തുണ്ടായ അപകടത്തെത്തുടർന്നാണ് സുരക്ഷ ഓഡിറ്റിംഗ് പ്രഖ്യാപിച്ചത്. അധ്യയന വർഷം ആരംഭിക്കുന്നിനോടനുബന്ധിച്ച് ഫിറ്റ്നസ് വാങ്ങിയ എല്ലാ കെട്ടിടങ്ങളും വീണ്ടും പരിശോധിച്ച് സുരക്ഷ ഉറപ്പാക്കാൻ തദ്ദേശ സ്ഥാപന എൻജിനിയർമാർക്കും നിർദേശമുണ്ട്. നായ്ക്കൾ ഞങ്ങളുടെ സിസ്റ്റത്തിന്‍റെ ഭാഗമല്ല സാർ സുരക്ഷാപരിശോധനയുടെ ഭാഗമായി ഇഴജന്തുക്കളുടെയും വന്യമൃഗങ്ങളുടെയും വിവരങ്ങൾ തേടുന്ന ഉദ്യോഗസ്ഥ സംഘത്തിനു മുന്നിൽ തെരുവുനായ ശല്യത്തിന്‍റെ പരാതി പലേടത്തും സ്കൂൾ അധികൃതർ ഉന്നയിച്ചു. എന്നാൽ, നായ്ക്കൾ തങ്ങളുടെ സുരക്ഷാ പരിധിയിൽ വരില്ലെന്നാണ് മറുപടി. വിദ്യാഭ്യാസ വകുപ്പ് തയാറാക്കിയ ചോദ്യാവലിയിലും നായ ശല്യം നേരിടുന്നുണ്ടോയെന്ന ചോദ്യമില്ല. ജില്ലയിൽ ഒട്ടുമിക്ക സ്കൂളുകളുടെയും പരിസരത്ത് തെരുവുനായ്ക്കളുടെ ശല്യമുണ്ട്. കുട്ടികൾ വരുന്ന വഴിയിലും ഇവയുണ്ട്. ഇവയുടെ ശല്യം ഒഴിവാക്കേണ്ടത് ബന്ധപ്പെട്ട തദ്ദേശ സ്ഥാപനമാണെന്നാണ് വായ്പെങ്കിലും നടപടികളില്ല. നിരവധി കുട്ടികൾക്കു സ്കൂൾ പരിസരത്ത് നായ്ക്കളുടെ കടിയേറ്റ സംഭവങ്ങളുണ്ടായിട്ടുണ്ട്. ബസ് കാത്തുനിന്ന വിദ്യാർഥിയെ നായ ആക്രമിച്ചതിനെത്തുടർന്നു പേ വിഷബാധയേറ്റ് മരിച്ച സംഭവവും സമീപകാലത്ത് പത്തനംതിട്ട നാരങ്ങാനത്തുണ്ടായി. പക്ഷേ, സുരക്ഷാ ഓഡിറ്റിംഗിൽ നായ്ക്കൾക്കു ഇടമില്ല.

എൻബിഎസ് പുസ്തകോത്സവം പത്തനംതിട്ടയിൽ

പത്തനംതിട്ട: സാഹിത്യപ്രവർത്തക സഹകരണ സംഘത്തിന്‍റെ പുസ്തക വില്പന വിഭാഗമായ നാഷണൽ ബുക്ക് സ്റ്റാളിന്‍റെ നേതൃത്വത്തിൽ ഓഗസ്റ്റ് ഒന്നു മുതൽ ഒന്പതുവരെ പത്തനംതിട്ട വൈഎംസിഎ ഹാളിൽ പുസ്‌തകോത്സവം സംഘടിപ്പിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. കേരളത്തിലെ പ്രമുഖ പ്രസാധകരുടെ പുസ്‌തകങ്ങളും ഇംഗ്ലീഷ് പുസ്‌തകങ്ങളും വില്പ‌നയ്ക്കുണ്ടാകും. ഒന്നിനു രാവിലെ 10ന് സാഹിത്യ പ്രവർത്തക സഹകരണസംഘം പ്രസിഡന്‍റ് പി.കെ. ഹരികുമാറിന്‍റെ അധ്യക്ഷതയിൽ കൂടുന്ന യോഗത്തിൽ കെ.യു. ജനീഷ്‌കുമാർ എംഎൽഎ പുസ്തകോത്സവം ഉദ്ഘാടനം ചെയ്യും. നഗരസഭ ചെയർമാൻ ടി. സക്കീർ ഹുസൈൻ മുഖ്യപ്രഭാഷണം നടത്തും. കേരള ഗ്രാമീൺ ബാങ്ക് സ്കൂൾ‌ കുട്ടികൾക്കു നൽകുന്ന സൗജന്യ പുസ്ത‌കങ്ങളുടെ വതരണം ബാങ്ക് ജനറൽ മാനേജർ പ്രദീപ് പത്മൻ, പത്തനംതിട്ട എഇഒ അമ്പിളി ഭാസ്‌കറിന് നൽകി നിർവഹിക്കും. തുടർന്നുള്ള ദിവസങ്ങളിൽ നോവൽ ചർച്ച, കവിയാരങ്ങ്, കഥയരങ്ങ്, പുസ്‌തകപ്രകാശനം തുടങ്ങിയവ ഉണ്ടാകും. എൻബിഎസ് മാർക്കറ്റിംഗ് മാനേജർ ജി. ബിപിൻ, വിനോദ് ഇളകൊള്ളൂർ, കാശിനാഥൻ, ലിപിൻ കെ. സോമൻ, എന്നിവർ പത്രസമ്മേളനത്തിൽ പങ്കെടുത്തു.

നടപടി സ്വീകരിക്കണം

മല്ലപ്പള്ളി: പന്നിശല്യം അമർച്ച ചെയ്യാൻ നടപടി സ്വീകരിക്കണമെന്ന് കോൺഗ്രസ് കുന്നന്താനം മണ്ഡലം കമ്മിറ്റി ആവശ്യപ്പെട്ടു. കുന്നന്താനം പഞ്ചായത്തിന്‍റെ ഭൂരിപക്ഷം വാർഡുകളിലും പന്നികൾ കൂട്ടത്തോടെ ഇറങ്ങി കർഷകരുടെ കപ്പ, വാഴ, മറ്റ് കൃഷികൾ വ്യാപകമായി നശിപ്പിക്കുകയാണ്. കർഷകർ കൃഷി ഉപേക്ഷിച്ച് കൃഷിസ്ഥലം തരിശിടുന്ന സാഹചര്യം ഉണ്ടായിത്തുടങ്ങി. കൃഷിനാശം നേരിടുന്ന കർഷകർ പഞ്ചായത്തിലും കൃഷിഭവനിലും പല പ്രാവശ്യം പരാതിപ്പെട്ടിട്ടും പന്നികളെ വെടിവച്ച് കൊല്ലാൻ നിയമം ഉണ്ടായിട്ടും കുന്നന്താനം പഞ്ചായത്ത് അനങ്ങാപ്പാറ സമീപനം സ്വീകരിക്കുന്നതായും ഇതിനെതിരേ കർഷകരെ അണിനിരത്തി ശക്തമായ സമരപരിപാടികൾ ആരംഭിക്കാനും കുന്നന്താനം മണ്ഡലം കമ്മിറ്റി തീരുമാനിച്ചു. യോഗത്തിൽ മണ്ഡലം പ്രസിഡന്‍റ് മാന്താനം ലാലൻ അധ്യക്ഷത വഹിച്ചു. യൂത്ത് കോൺഗ്രസ് സംസ്ഥാന സെക്രട്ടറി അഖിൽ ഓമനക്കുട്ടൻ, കോൺഗ്രസ് ബ്ലോക്ക് ഭാരവാഹികളായ മാലതി സുരേന്ദ്രൻ, രാമചന്ദ്രൻ നായർ കാലായിൽ, ഗ്രാമ പഞ്ചായത്തംഗങ്ങളായ ബാബു കുറുമ്പേശ്വരം, ഗ്രേസി മാത്യു, രാധാമണിയമ്മ എന്നിവർ പ്രസംഗിച്ചു.

ബോധിഗ്രാം അടൂർ സെന്‍ററിൽ പുസ്തകോത്സവം ഒന്നു മുത‌ൽ

പത്തനംതിട്ട: അടൂർ ബോധിഗ്രാമും രചന ഫൗണ്ടേഷനും ചേർന്ന് ഓഗസ്റ്റ് ഒന്നു മുതൽ ഏഴുവരെ ബോധിഗ്രാം അടൂർ സെന്‍ററിൽ പുസ്തകോത്സവം സംഘടിപ്പിക്കും. ഒന്നിനു വൈകുന്നേരം അഞ്ചിന് കേരള കാർഷിക സർവകലാശാല വൈസ് ചാൻസലർ ഡോ. ബി. അശോക് പുസ്തകോത്സവം ഉദ്ഘാടനം ചെയ്യും. ചെയർപേഴ്സൺ ജെ . എസ്. അടൂർ അധ്യക്ഷത വഹിക്കും. എംജി സർവകലാശാല വൈസ് ചാൻസലർ ഡോ. സി.ടി. അരവിന്ദകുമാർ മുഖ്യപ്രഭാഷണം നടത്തും. ശ്രീനാരായണഗുരു ഓപ്പൺ സർവകലാശാല വൈസ് ചാൻസലർ ഡോ. ജഗതി രാജ് ഹോം ലൈബ്രറി സ്കീം ഉദ്ഘാടനം ചെയ്യും. തുടർന്നുള്ള ദിവസങ്ങളിൽ പുസ്തക പ്രകാശനം, കവിയരങ്ങ്, കഥയരങ്ങ് , വിവിധ കലാ സാംസ്കാരിക പരിപാടികൾ, എഴുത്തുകാരുടെ സംഗമം, വായനക്കാരുടെ സംഗമം, സ്കൂൾ കോളജ് വിദ്യാർഥികൾക്ക് രചനാ മത്സരം തുടങ്ങിയവ ഉണ്ടാകും. പുസ്തകപ്രേമിസംഘത്തിന്‍റെ പത്തനംതിട്ട ചാപ്റ്റർ ഉദ്ഘാടനവും ഒന്നിനു നടക്കും. കൊല്ലംചന്ദനത്തോപ്പിൽ 21000പുസ്തകങ്ങളുമായി ഹോം ലൈബ്രറി തയാറാക്കിയിട്ടുള്ള ഇ.കെ. മുരളി മോഹനെ ഓഗസ്റ്റ് മൂന്നിന് ആദരിക്കും. നാലിന് ‘മാധ്യമങ്ങളും പുസ്തക ലോകവും’ സംവാദം പി.സി. വിഷ്ണുനാഥ് എംഎൽഎയും അഞ്ചിന് വൈകുന്നേരം വൈജ്ഞാനിക സാഹിത്യ സംവാദം മുൻ എംഎൽഎ രാജു ഏബ്രഹാമും ഉദ്ഘാടനം ചെയ്യും. ആറിനു വൈകുന്നേരം അഞ്ചിന് സമാപന സമ്മേളനം ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്യും. സംസ്ഥാന ലൈബ്രറി കൗൺസിൽ വൈസ് പ്രസിഡന്‍റ് എ.പി. ജയൻ സമ്മാനദാനം നിർവഹിക്കും. ബോധിഗ്രാം ചെയർപേഴ്സൺ ജെ.എസ്. അടൂർ, വർക്കിംഗ് ചെയർപേഴ്സൺ കെ. ഭാസ്കരൻ, സുമ രാജശേഖരൻ എന്നിവർ പത്രസമ്മേളനത്തിൽ പങ്കെടുത്തു.

പെരുനാട് ബഥനി ആശ്രമത്തിൽ ഓർമപ്പെരുന്നാൾ

പത്തനംതിട്ട: മലങ്കര ഓർത്തഡോക്സ് സഭയുടെ റാന്നി പെരുനാട് ബഥനി ആശ്രമത്തിൽ കബറടങ്ങിയിരിക്കുന്ന അലക്സിയോസ് മാർ തേവോദോസിയോസ്‌, യൂഹാനോൻ മാർ അത്താനാസിയോസ്, പൗലോസ് മാർ പക്കോമിയോസ് മെത്രാപ്പോലീത്തമാരുടെ സംയുക്ത ഓർമപ്പെരുന്നാളും ബഥനി തീർഥാടന പദയാത്രയും നാളെ മുതൽ ഓഗസ്റ്റ് ആറുവരെ വിവിധ പരിപാടികളോടെ നടക്കും. ‌ നാളെ വൈകുന്നേരം 5.30ന് തീർഥാടകർക്ക് സ്വീകരണം, ആറിന് തീർഥാടനവാര ഉദ്ഘാടനം, ഓഗസ്റ്റ് ഒന്നിനു രാവിലെ 7.15ന് ഡോ.യാക്കോബ് മാർ ഐറേനിയോസ് മെത്രാപ്പോലീത്ത കുർബാന അർപ്പിക്കും. 9.30ന് മർത്തമറിയം സമാജം സംഗമം, മൂന്നിനു രാവിലെ 7.15ന് കുർബാന, ഉച്ചകഴിഞ്ഞ് രണ്ടിന് ഓർത്തഡോക്സ് ക്രൈസ്തവ യുവജന പ്രസ്ഥാനം തുമ്പമൺ, അടൂർ- കടമ്പനാട്, നിലയ്ക്കൽ ഭദ്രാസനം റീജണൽ നേതൃസംഗമം. ഫൈസൽ ചീരൻ ക്ലാസ് നയിക്കും. അഞ്ചിനു രാവിെ ല 7.15ന് കുർബാന, 4.30ന് ഛായാചിത്ര ഘോഷയാത്രയ്ക്ക് സ്വീകരണം. വൈകുന്നേരം അഞ്ചിന് പൊതുസമ്മേളനം ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്ക ബാവ ഉദ്ഘാടനം ചെയ്യും. കുര്യാക്കോസ് മാർ ക്ലീമിസ് വലിയ മെത്രാപ്പോലീത്ത അധ്യക്ഷത വഹിക്കും. ഡോ. എബ്രഹാം മാർ സെറാഫീം മെത്രാപ്പോലീത്ത, ജോഷ്വാ മാർ നിക്കോദിമോസ് മെത്രാപ്പോലീത്ത, പ്രമോദ് നാരായൺ എംഎൽഎ, ഗ്രാമപഞ്ചായത്ത് പ്രസിഡന്‍റ് പി.എസ്. മോഹനൻ, രാജു ഏബ്രഹാം തുടങ്ങിയവർ പ്രസംഗിക്കും. ആറിനു രാവിലെ എട്ടിന് ഓർമപ്പെരുന്നാളിനോടനുബന്ധിച്ച കുർബാനയ്ക്ക് കാതോലിക്ക ബാവ പ്രധാന കാർമികനാകും. ആശ്രമം സുപ്പീരിയർ തോമസ് റന്പാൻ ഒഐസി, ഫാ. മത്തായി ഒഐസി എന്നിവർ പത്രസമ്മേളനത്തിൽ പങ്കെടുത്തു.

മങ്ങാരം യുപി സ്കൂളിൽ ഇംഗ്ലീഷ് എന്‍‌റിച്ച്മെന്‍റ് പ്രോഗ്രാമിനു തുടക്കമായി

പന്തളം: വിദ്യാർഥികളിൽ ഇംഗ്ലീഷ് ഭാഷാ പരിജ്ഞാനം മെച്ചപ്പെടുത്തുക എന്ന ലക്ഷ്യത്തോടെ പൊതു വിദ്യാഭ്യാസ വകുപ്പ് നടപ്പാക്കുന്ന ഇംഗ്ലീഷ് എന്‍‌റിച്ച്മെന്‍റ് പ്രോഗ്രാമിന് മങ്ങാരം ഗവ. യുപി സ്കൂളിൽ തുടക്കമായി. ഇംഗ്ലീഷ് ഭാഷ ആത്മവിശ്വാസത്തോടെയും ലളിതമായും കൈകാര്യം ചെയ്യാന്‍ കുട്ടികളെ പ്രാപ്തരാക്കുകയാണ് ലക്ഷ്യം. പന്തളം നഗരസഭ വിദ്യാഭ്യാസ സ്ഥിരം സമിതി അധ്യക്ഷ സൗമ്യ സന്തോഷ് പദ്ധതിയുടെ ഉദ്ഘാടനം നിർവഹിച്ചു. എസ്എംസി ചെയർമാൻ കെ.എച്ച്. ഷിജു അധ്യക്ഷത വഹിച്ചു.പന്തളം നഗരസഭ കൗൺസിലർ സുനിത വേണു മുഖ്യപ്രഭാഷണം നടത്തി. റിസോഴ്സ് അധ്യാപിക ആതിര രവീന്ദ്രൻ പദ്ധതി വിശദീകരിച്ചു. സ്കൂൾ പ്രഥമാധ്യാപിക ജിജി റാണി, പിടിഎ വൈസ് പ്രസിഡന്‍റ് സംജാ സുധീർ, എസ്എംസി വൈസ് ചെയർമാൻ കെ.ജി. ശശിധരൻ, സ്കൂൾ ഇംഗ്ലീഷ് ക്ലബ് കോഓർഡിനേറ്റർ ലക്ഷമി ചന്ദ്രൻ എന്നിവർ പ്രസംഗിച്ചു. ഇംഗ്ലീഷ് എന്‍‌റിച്ച്മെന്‍റ് പ്രോഗ്രാമിലൂടെ ഇംഗ്ലീഷ് ഭാഷയെ അടുത്തറിയാനും കുട്ടികൾക്ക് ഇംഗ്ലീഷ് ഭാഷയിൽ മികവ് പുലർത്താനുമാണ് പദ്ധതി നടപ്പിലാക്കുന്നത്. അഞ്ച്, ആറ് ക്ലാസുകളിലെ വിദ്യാർഥികളാണ് പദ്ധതിയുടെ ഭാഗമാകുന്നത്. നടത്തിപ്പിനായി ഓരോ സ്കൂളിലേക്കും ഒരു റിസോഴ്സ് അധ്യാപകനെ നിയമിച്ചിട്ടുണ്ട്.

ഇലക്‌ട്രിക് ട്രോളി നിർമിച്ച് വിദ്യാർഥികൾ

മല്ലപ്പള്ളി: അന്തരീക്ഷ മലിനീകരണം ഇല്ലാതെ ഏതുസാഹചര്യത്തിലും ഉപയോഗിക്കാവുന്ന ഇലക്ട്രിക് ട്രോളി ശ്രദ്ധേയമാകുന്നു. മല്ലപ്പള്ളി സെൻട്രൽ എൻജിനിയറിംഗ് ഇൻസ്റ്റിറ്റ്യൂട്ടിലെ കെജിസിഇ എൻജിനിയറിംഗ് അവസാന വർഷ വിദ്യാർഥികളാണ് നൂതന സാങ്കേതികവിദ്യകൾ ഉപയോഗിച്ച് ഇലക്‌ട്രിക് ട്രോളി നിർമിച്ചത്. നിർമാണ മേഖലകൾക്കും കൃഷി ആവശ്യങ്ങൾക്കും ഉൾപ്പെടെ ഉപയോഗിക്കാനാവുന്ന ട്രോളിക്ക് 200 കിലോ ഭാരം വഹിക്കാനും നിശ്ചയിച്ച സ്ഥലത്ത് ഇറക്കാനുമാകും. ഏതുതരം റോഡിലും കയറ്റത്തിലും ഉപയോഗിക്കാനാകുമെന്ന് വിദ്യാർഥികൾ പറഞ്ഞു. ഓട്ടോമൊബൈൽ വിഭാഗം അധ്യാപകരായ രവികുമാർ, സി.ഡി. വർഗീസ്, സോണി ഐസക്ക്, വിനു ഗോപാൽ എന്നിവരുടെ മേൽനോട്ടത്തിൽ നിർമിച്ച ട്രോളിക്ക് 32,000 രൂപയാണ് നിർമാണച്ചെലവ്.

ഫാ. ഗബ്രിയേൽ ജോസഫിന് തേവോദോസിയോസ് അവാർഡ്

പത്തനംതിട്ട: അലക്സിയോസ് മാർ തേവോദോസിയോസ് മെത്രാപ്പോലീത്തയുടെ സ്മരണയ്ക്കായി ഏർപ്പെടുത്തിയിട്ടുള്ള എക്സലൻസി അവാർഡ് ഫാ. ഗബ്രിയേൽ ജോസഫിന്. പത്തനംതിട്ട ഫിലിപ്പോസ് മാർ യൗസേബിയോസ് പാലിയേറ്റീവ് കെയർ ഡയറക്ടർ കൂടിയാണ് ഫാ. ഗബ്രിയേൽ ജോസഫ്. പാലിയേറ്റീവ് കെയർ രംഗത്തു നൽകുന്ന സേവനങ്ങൾ മാനിച്ചാണ് അദ്ദേഹത്തിനു പുരസ്കാരം സമ്മാനിക്കുന്നതെന്ന് ബഥനി ആശ്രമം സുപ്പീരിയർ തോമസ് റന്പാൻ ഒഐസി പറഞ്ഞു. 50,000 രൂപയും പ്രശംസാ പത്രവും അടങ്ങുന്ന അവാർഡ് ഓഗസ്റ്റ് അഞ്ചിന് വൈകുന്നേരം പെരുനാട് ബഥനി ആശ്രമത്തിൽ നടക്കുന്ന സമ്മേളനത്തിൽ ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്കാ ബാവ സമ്മാനിക്കും.

ഇ-സമൃദ്ധ പദ്ധതി സംസ്ഥാനത്തുടനീളം നടപ്പിലാക്കും: മന്ത്രി ജെ. ചിഞ്ചുറാണി

തിരുവല്ല: പത്തനംതിട്ട ജില്ലയില്‍ ആരംഭിച്ച പൈലറ്റ് പ്രോജക്ട് ഇ സമൃദ്ധ പദ്ധതി സംസ്ഥാനത്തുടനീളം നടപ്പിലാക്കുമെന്ന് മന്ത്രി ജെ. ചിഞ്ചുറാണി. തിരുവല്ല ബ്ലോക്ക് ക്ഷീരസംഗമം ഉദ്ഘാടനം വേങ്ങല്‍ ദേവമാതാ ഓഡിറ്റോറിയത്തില്‍ നിര്‍വഹിച്ചു പ്രസംഗിക്കുകയായിരുന്നു മന്ത്രി. വിവര സാങ്കേതിക വിദ്യയുടെ സഹായത്തോടെ കന്നുകാലികളുടെ പൂര്‍ണ വിവരം ലഭ്യമാകുന്ന ഇ സമൃദ്ധ പദ്ധതി ഏഴരക്കോടി രൂപ ചെലവിലാണ് ആരംഭിച്ചത്. പശുക്കളുടെ ചെവിയില്‍ ഘടിപ്പിച്ച ചിപ്പ് അധിഷ്ഠിത ടാഗ് വഴി ഉടമ, നല്‍കിയ വാക്‌സിനേഷന്‍ വിവരം തുടങ്ങിയവ ലഭ്യമാകും. തെരുവുനായ്ക്കളെ വന്ധ്യംകരിക്കുന്നതിനു പോര്‍ട്ടബിള്‍ എബിസി കേന്ദ്രങ്ങള്‍ അടുത്ത മാസം ആരംഭിക്കുമെന്നും മന്ത്രി പറഞ്ഞു. ഇവ പ്രവര്‍ത്തിപ്പിക്കാനുള്ള ഒഴിഞ്ഞ സ്ഥലം തദ്ദേശസ്ഥാപനങ്ങള്‍ ഒരുക്കും. വെറ്ററിനറി സര്‍ജനും വാക്സിന്‍ ഉള്‍പ്പെടെയുള്ള സൗകര്യങ്ങളും മൃഗസംരക്ഷണ വകുപ്പ് ഒരുക്കും. സാധാരണക്കാരായ ക്ഷീരകര്‍ഷകരെ സഹായിക്കാന്‍ ഇന്‍ഷ്വറന്‍സ്, പലിശരഹിത വായ്പാ, ധനസഹായം, കിടാരി പാര്‍ക്ക്, ക്ഷീരഗ്രാമം പദ്ധതി, കര്‍ഷകര്‍ക്ക് പെന്‍ഷൻ, മക്കള്‍ക്ക് സ്‌കോളര്‍ഷിപ്പ്, വിവാഹ ധനസഹായം തുടങ്ങി നിരവധി പ്രവര്‍ത്തനം മൃഗസംരക്ഷണ വകുപ്പ് നടപ്പാക്കുന്നുണ്ട്. ക്ഷീരകര്‍ഷകര്‍ക്ക് വീട്ടുമുറ്റത്ത് മൃഗചികിത്സാസേവനം ലഭ്യമാക്കുന്നതിന് ആംബുലന്‍സുകള്‍ സജ്ജമാണെന്നും മന്ത്രി പറഞ്ഞു. മാത്യു ടി. തോമസ് എംഎല്‍എ അധ്യക്ഷത വഹിച്ചു. മികച്ച ക്ഷീരകര്‍ഷകരെ ആദരിക്കലും ബ്ലോക്കിലെ മികച്ച ക്ഷീര സംഘത്തിനുള്ള അവാര്‍ഡ് ദാനവും മന്ത്രി നിര്‍വഹിച്ചു. ക്ഷീരവികസന വകുപ്പ് ഡെപ്യൂട്ടി ഡയറക്ടര്‍ പി. അനിത റിപ്പോര്‍ട്ട് അവതരിപ്പിച്ചു. പുളിക്കീഴ് ബ്ലോക്ക് പഞ്ചായത്ത് പ്രസിഡന്‍റ് സി. കെ. അനു, ത്രിതല പഞ്ചായത്ത് പ്രതിനിധികള്‍ തുടങ്ങിയവർ പ്രസംഗിച്ചു.

മഴക്കെടുതിയിൽ ഒരു കോടിയിലധികം രൂപയുടെ കാർഷിക നഷ്ടം

പത്തനംതിട്ട: കാലവർഷത്തിൽ കർഷകർക്ക് ഒരു കോടിയിലധികം രൂപയുടെ നഷ്ടം. ഓണം വിപണി ലക്ഷ്യമിട്ട് ചെയ്ത കൃഷികളെല്ലാം വെള്ളത്തിൽ മുങ്ങി നശിച്ചു. 1.9 കോടി രൂപയുടെ നഷ്ടമാണ് ജില്ലയിൽ കൃഷിക്കു മാത്രം സംഭവിച്ചിരിക്കുന്നത്. ജില്ലയിൽ 62.07 ഹെക്ടറിൽ 1245 കർഷകർക്കാണ് കാലവർഷത്തിൽ നഷ്ടമുണ്ടായതെന്നാണ് പ്രാഥമിക കണക്ക്. കൃഷിനാശത്തിന്‍റെ കണക്ക് അന്തമമായിട്ടില്ല. പടിഞ്ഞാറൻ മേഖലയിലെ പല വില്ലേജുകളിലും വെള്ളം കയറിക്കിടക്കുന്നതിനാൽ കണക്കെടുപ്പ് നടത്തിയിട്ടില്ല. നിലവിൽ ലഭ്യമായ വിവരങ്ങളനുസരിച്ച് പത്തനംതിട്ട, റാന്നി മേഖലകളിലാണ് ഏറ്റവും കൂടുതൽ കൃഷിനാശം. പത്തനംതിട്ടയിൽ 39 ഹെക്ടറുകളിലായി 428 കർഷകർക്ക് 32.68 ലക്ഷം രൂപയുടെ നഷ്ടം സംഭവിച്ചു. റാന്നിയിൽ 12.33 ഹെക്ടറിൽ 277 കർഷകർക്ക് 72.08 ലക്ഷം രൂപയുടെ കൃഷിനാശവും രേഖപ്പെടുത്തി. കനത്ത നഷ്ടം വാഴ കർഷകർക്ക് കാലവർഷം കൂടുതൽ ബാധിച്ചത് ഏത്തവാഴ കർഷകരെയാണ്. ജില്ലയിൽ 14,480 ഏത്തവാഴകൾ കാറ്റിലും മഴയിലും വീണുപോയി. 18,890 കുലച്ച ഏത്തവാഴകൾ 7.56 ഹെക്ടറിൽ നശിച്ചു. ഏത്തവാഴകൾക്ക് മാത്രം 1.13 കോടി രൂപയുടെ നഷ്ടമാണ് ഉണ്ടായത്. ഓണക്കാല വിപണി ലക്ഷ്യമിട്ട് കൃഷി ചെയ്ത ഏത്തവാഴകളാണ് നശിച്ചത്. കാട്ടുപന്നിയുടെ ശല്യത്തിൽനിന്നു സംരക്ഷിച്ചു നിർത്തിയിരുന്ന വാഴകളാണ് കാറ്റിൽ ഒടിഞ്ഞുവീണത്. കഴിഞ്ഞ വ്യാഴം, വെള്ളി ദിനങ്ങളിലുണ്ടായ കാറ്റാണ് ഏത്തവാഴകൾക്കു വിനയായത്. ഓണക്കാല വിപണിയിൽ നാടൻ ഏത്തക്കുലകൾക്ക് ക്ഷാമം നേരിടും. വയനാട്, മേട്ടുപ്പാളയം എന്നിവിടങ്ങളിൽനിന്ന് ജില്ലയിലേക്ക് വാഴക്കുലകൾ എത്തിക്കേണ്ടിവരും. നഷ്ടം നേരിട്ട കർഷകരിൽ നല്ലൊരു പങ്കും ഇൻഷ്വറൻസ് പരിധിയിൽ വരാത്തവരാണ്. പാട്ടത്തിനെടുത്ത് വാഴക്കൃഷി നടത്തിയവരാണ് ഇവരിൽ നല്ലൊരു പങ്കും. പച്ചക്കറികളും നശിച്ചു ഏത്തവാഴ കഴിഞ്ഞാൽ ഏറ്റവും കൂടുതൽ നഷ്ടം പച്ചക്കറികൾക്കാണ്. പച്ചക്കറികളും ഓണത്തോടനുബന്ധിച്ച വിളവെടുപ്പ് ലക്ഷ്യമിട്ടാണ് നട്ടിരുന്നത്. എന്നാൽ തുടർച്ചയായ മഴ ഇവയുടെ വളർച്ചയെ സാരമായി ബാധിച്ചു. ഓണത്തിന് ഒരു മുറം പച്ചക്കറി അടക്കം കൃഷിവകുപ്പ് വിഭാവനം ചെയ്ത എല്ലാ പദ്ധതികളും വെള്ളത്തിലായി. പടിഞ്ഞാറൻ മേഖലയിൽ പച്ചക്കറി കൃഷി പൂർണമായി നശിച്ചു. പയർ, ചീര, വെണ്ട, വെള്ളരി, മത്തൻ, പടവലം തുടങ്ങിയ കൃഷികൾ വൻതോതിൽ നശിച്ചു. കൃഷിവകുപ്പിന്‍റെ കണക്കിൽ 5.6 ഹെക്ടറിലെ പന്തൽ പച്ചക്കറികളും 5.4 ഹെക്ടറിൽ മറ്റു പച്ചക്കറികളും വെള്ളം കയറി നശിച്ചു. 1.6 ഹെക്ടറില മരച്ചീനി കഷിയും വെള്ളമെടുത്തു. കാറ്റിൽ റബർ മരങ്ങൾക്കും വ്യാപക നഷ്ടം നേരിട്ടു. ടാപ്പ് ചെയ്യുന്ന 230 റബർ മരങ്ങളും ടാപ്പ് ചെയ്യാത്ത 110 എണ്ണവും കടപുഴകിയും ഒടിഞ്ഞുവീണും നശിച്ചു. ഒരു മുറം പച്ചക്കറി ഒരു മുറം പച്ചക്കറി പദ്ധതിയിൽ ജില്ലയിൽ കൂടുതലായി കൃഷി നടന്നത് പന്തളം തെക്കേക്കര, വള്ളിക്കോട്, പ്രമാടം, കുറ്റൂർ പഞ്ചായത്തുകളിലാണ്. പച്ചക്കറി ഉത്പാദനത്തിൽ സ്വയംപര്യാപ്തത കൈവരിക്കുക, സുരക്ഷിത പച്ചക്കറി ഉത്പാദനം പ്രോത്സാഹിപ്പിക്കുക എന്നിവയാണ് ഒരു മുറം പച്ചക്കറിയുടെ ലക്ഷ്യങ്ങൾ. വിഷരഹിതമായ പച്ചക്കറിഉത്പാദനമായിരുന്നു ലക്ഷ്യം. 500 ഹെക്ടറിലാണ് പച്ചക്കറി കൃഷി ലക്ഷ്യമിട്ടിരുന്നത്. അത്യുത്പാദനശേഷിയുള്ള 5000 വിത്തുകളും ആറ് ലക്ഷം തൈകളുമാണ് ഇതിനായി എത്തിച്ചത്. കൃഷി ആരംഭിച്ചതിനു പിന്നാലെയാണ് മഴ ശക്തമായത്. പൂവ് കൃഷിയെയും മഴ ബാധിച്ചു തുടർച്ചയായ മഴ പൂവ് കൃഷിയെ സാരമായി ബാധിച്ചു. ഓണത്തിന് നാടൻ പൂക്കൾ എത്തിക്കുകയെന്ന ലക്ഷ്യത്തോടെയാണ് പൂവ് കൃഷിയുമായി കർഷകരും കുടുംബശ്രീ സംരംഭകരും രംഗത്തിറങ്ങിയത്. വിത്തു പാകിയതിനു പിന്നാലെ മഴ ശക്തമായി. നട്ട തൈകൾ അഴുകി. ബന്ദിത്തൈകളാണ് ഏറെപ്പേരും കൃഷി ചെയ്തത്. വിത്തുപാകി തൈ മുളച്ചു തുടങ്ങിയ തടങ്ങളിൽ വെള്ളംകെട്ടി നിന്നതോടെ ഇവയുടെ വളർച്ച മുരടിക്കുകയും തണ്ട് അഴുകുകയും ചെയ്തു. പാടങ്ങളിൽ പണ കെട്ടിയാണ് പലരും കൃഷി ആരംഭിച്ചത്. പണയുടെ ഇടത്തോടുകളിൽ വെള്ളം നിറഞ്ഞനിലയിലാണ്. തടങ്ങളിൽനിന്ന് വെള്ളം ഒഴുകിപ്പോകാൻ ഇടമില്ല. നല്ല വെയിൽ ലഭിച്ചു വെള്ളം വലിഞ്ഞാൽ മാത്രമേ പ്രതീക്ഷയുള്ളൂവെന്ന് കർഷകർ പറയുന്നു. കാട്ടുപന്നികൾ കുത്തിമറിക്കാതെ കൃഷി ഒരുവിധം സംരക്ഷിച്ചു പോരുന്നതിനിടെയാണ് മഴ തിരിച്ചടിയായത്. കഴിഞ്ഞവർഷം പൂക്കൃഷി കർഷകർക്കു മെച്ചപ്പെട്ട ലാഭം നേടിക്കൊടുത്തിരുന്നു. തമിഴ്നാട്ടിൽ നിന്നുള്ള പൂക്കളുടെ വില്പനയെയും ഇതു സാരമായി ബാധിക്കുകയും ചെയ്തിരുന്നു.

ഹോക്കി സ്റ്റിക്ക് വിതരണം ചെയ്തു

പത്തനംതിട്ട: പത്തനംതിട്ട ഹോക്കി സംഘടിപ്പിക്കുന്ന നമുക്ക് വേണ്ട ലഹരി നമുക്ക് വേണം ഹോക്കി എന്ന ആശയം മുൻനിർത്തി ജില്ലയിലെ തെരഞ്ഞെടുക്കപ്പെട്ട സ്കൂളുകളിൽ സൗജന്യ ഹോക്കി സ്റ്റിക് വിതരണം നടന്നു. മന്ത്രി വീണാ ജോർജ് ഉദ്ഘാടനം ചെയ്തു പത്തനംതിട്ട ഹോക്കി പ്രസിഡന്‍റ് കെ. അനിൽകുമാർ അധ്യക്ഷത വഹിച്ചു. പത്തനംതിട്ട ഹോക്കി സെക്രട്ടറി അമൃത് സോമരാജൻ, പ്രമോദ് താന്നിമൂട്ടിൽ, കെ.എ. രഞ്ജു, ആർ. പ്രസന്നകുമാർ, മഞ്ചേഷ് വടക്കിനേത്ത് എന്നിവർ പ്രസംഗിച്ചു.

ചങ്ങനാശേരി അതിരൂപത ചെറുപുഷ്പ മിഷന്‍ലീഗ് അല്‍ഫോന്‍സാ തീര്‍ഥാടനം ഓഗസ്റ്റ് രണ്ടിന്

ചങ്ങനാശേരി: വിശുദ്ധ അല്‍ഫോന്‍സാമ്മയുടെ ജന്മഗൃഹത്തിലേക്കും കുടമാളൂര്‍ മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന കേന്ദ്രത്തിലേക്കും ചങ്ങനാശേരി അതിരൂപത ചെറുപുഷ്പമിഷന്‍ലീഗിന്‍റെ ആഭിമുഖ്യത്തിലുള്ള 37-ാമത് അല്‍ഫോന്‍സാ തീര്‍ഥാടനം ഓഗസ്റ്റ് രണ്ടിന് നടത്തുമെന്നും ഇതിനുള്ള ഒരുക്കങ്ങള്‍ പൂര്‍ത്തിയായതായും ചെറുപുഷ്പ മിഷന്‍ലീഗ് അതിരൂപത ഡയറക്ടര്‍ റവ. ഡോ. വര്‍ഗീസ് പുത്തന്‍പുരയ്ക്കല്‍, അസിസ്റ്റന്‍റ് ഡയറക്ടര്‍ ഫാ. സെബാസ്റ്റ്യന്‍ മാമ്പറ, തീര്‍ഥാടന കണ്‍വീനര്‍ ജോണ്‍സണ്‍ കാഞ്ഞിരക്കാട്ട് എന്നിവര്‍ പത്രസമ്മേളനത്തില്‍ അറിയിച്ചു. “പ്രത്യാശയോടെ കുഞ്ഞുമിഷനറിമാര്‍’’ എന്ന ആപ്തവാക്യവുമായി മിഷന്‍ലീഗ് അംഗങ്ങളുടെ നേതൃത്വത്തില്‍ നടത്തുന്ന തീര്‍ഥാടനത്തില്‍ പ്രായഭേദമെന്യേ പതിനായിരങ്ങള്‍ പങ്കെടുക്കും. രാവിലെ 5.30ന് അതിരമ്പുഴ, വെട്ടിമുകള്‍, ചെറുവാണ്ടൂര്‍, കോട്ടയ്ക്കപ്പുറം എന്നിവിടങ്ങളിൽനിന്ന് അതിരമ്പുഴ മേഖലയുടെ തീര്‍ഥാടനവും രാവിലെ 5.45ന് പാറേല്‍ മരിയന്‍ തീര്‍ഥാടനകേന്ദ്രത്തില്‍നിന്ന് ചങ്ങനാശേരി, തുരുത്തി മേഖലകളുടെ തീര്‍ഥാടനവും ആരംഭിക്കും. കുടമാളൂര്‍ മേഖലയിലെ വിവിധ ശാഖകളില്‍ നിന്നുള്ള തീര്‍ഥാടകര്‍ 6.45ന് പനമ്പാലം സെന്‍റ് മൈക്കിള്‍സ് ചാപ്പലില്‍ എത്തും. കോട്ടയം സിഎംഎസ് ഹൈസ്‌കൂള്‍ ഗ്രൗണ്ടില്‍നിന്ന് രാവിലെ 8.45ന് കോട്ടയം, നെടുങ്കുന്നം, മണിമല, തൃക്കൊടിത്താനം ചെങ്ങന്നൂര്‍ മേഖലകളുടെ തീര്‍ഥാടനങ്ങളും 10.30ന് കുറുമ്പനാടം മേഖലയുടെ തീര്‍ഥാടനവും ആരംഭിക്കും. 33കിലോമീറ്റര്‍ കാല്‍നടയായി സഞ്ചരിക്കുന്ന ചങ്ങനാശേരി, തുരുത്തി മേഖലകളുടെ തീര്‍ഥാടനം ഉച്ചകഴിഞ്ഞ് രണ്ടിന് അല്‍ഫോന്‍സാ ജന്മഗ്യഹത്തില്‍ എത്തിച്ചേരും. ആലപ്പുഴ, എടത്വാ, പുളിങ്കുന്ന്, ചമ്പക്കുളം, മുഹമ്മ മേഖലകളിലെ തീര്‍ഥാടകര്‍ വിശുദ്ധ ചാവറയച്ചന്‍റെ കബറിടം സ്ഥിതി ചെയ്യുന്ന മാന്നാനം ആശ്രമദേവാലയത്തില്‍ അന്നേ ദിവസം രാവിലെ 9.45ന് എത്തിച്ചേര്‍ന്ന് മധ്യസ്ഥപ്രാര്‍ഥനയില്‍ പങ്കെടുക്കും. തുടര്‍ന്ന് തീര്‍ഥാടകര്‍ കുടമാളൂരിലേക്ക് പദയാത്രയായി നീങ്ങും. അമ്പൂരി, തിരുവനന്തപുരം, കൊല്ലം-ആയൂര്‍ മേഖലകളില്‍ നിന്നുള്ള തീര്‍ഥാടകരും വിവിധസമയങ്ങളില്‍ എത്തിച്ചേരും. തീര്‍ഥാടകര്‍ക്കുള്ള നേര്‍ച്ച ഭക്ഷണം കുടമാളൂര്‍ ഫൊറോന പള്ളിയില്‍ രാവില ഒമ്പതുമുതല്‍ വൈകുന്നേരം നാലുവരെ ക്രമീകരിച്ചിട്ടുണ്ട്. ബോബി തോമസ്, ടിന്‍റെ സെബാസ്റ്റ‍്യന്‍, എബിന്‍ ജോസഫ് എന്നിവരും പത്സമ്മേളനത്തില്‍ പങ്കെടുത്തു.

നെല്‍ക്കതിര്‍ ആറന്മുള ക്ഷേത്രത്തിന് സമര്‍പ്പിച്ചു

ആറന്മുള: ശബരിമല നിറപുത്തരിക്കായി കൊയ്തെടുത്ത കറ്റകളുമായുള്ള ഘോഷയാത്ര ഇടയാറന്മുള ചെറുപ്പുഴക്കാട്ട് ദേവീക്ഷേത്ര സന്നിധിയില്‍ തിരുവിതാംകൂര്‍ ദേവസ്വം ബോര്‍ഡ് മെംബര്‍ പി. ഡി. സന്തോഷ്‌കുമാര്‍ കറ്റ കൈമാറി ഉദ്ഘാടനം ചെയ്തു. ആറന്മുള പാര്‍ഥസാരഥി ക്ഷേത്രം, മൂര്‍ത്തിട്ട ഗണപതി ക്ഷേത്രം, കാട്ടൂര്‍ മഹാ വിഷ്ണു ക്ഷേത്രം, പെരുനാട് അയ്യപ്പ ക്ഷേത്രം എന്നി ക്ഷേത്രങ്ങളില്‍ കറ്റ സമർപ്പിച്ചാണ് സംഘം ശബരിമലയിലെത്തിയത്. നെല്‍കൃഷി ചെയ്ത പ്രമുഖ കര്‍ഷകനായ ഉത്തമനും ആറന്മുള വികസന സമിതി ഭാരവാഹികളും ചേര്‍ന്ന് ആറന്മുള ക്ഷേത്രത്തില്‍ കറ്റകള്‍ സമര്‍പ്പിച്ചു. ദേവസ്വം ബോര്‍ഡ് അസിസ്റ്റന്‍റ് കമ്മീഷണര്‍ ആര്‍. രേവതി, ക്ഷേത്രോപദേശക സമിതി പ്രസിഡന്‍റ് വിജയന്‍ നടമംഗലം, സെക്രട്ടറി ശശി കണ്ണങ്കേരില്‍ ഉപദേശകസമിതി അംഗം ശ്രീജിത്ത്, പള്ളിയോട സേവാസമിതി എകിസ്‌ക്യൂട്ടീവ് കമ്മിറ്റിയംഗം വിജയന്‍ നായര്‍ ചുങ്കത്തില്‍, ആറന്മുള വികസന സമിതി ഭാരവാഹികളായ അശോകന്‍ മാവുനില്‍ക്കുന്നതില്‍, സന്തോഷ് കുമാര്‍ പുളിയേലില്‍, ഫാക്ട് മോഹനന്‍ എന്നിവര്‍ പങ്കെടുത്തു. ആന്ധ്ര, തെലുങ്കാന, തമിഴ്‌നാട് എന്നിവിടങ്ങളില്‍നിന്നുളള ഗുരുസ്വാമിമാര്‍, അയ്യപ്പ ഭക്തര്‍ എന്നിവര്‍ ഘോഷയാത്രയെ അനുഗമിച്ചു.

സന്യാസിനികളുടെ അറസ്റ്റ് ഭരണഘടനാവകാശ ലംഘനം: രൂപത സിആര്‍ഐയും അല്മായ സംഘടനകളും

കാഞ്ഞിരപ്പള്ളി: ഛത്തീസ്ഗഡിൽ ക്രൈസ്തവ സന്യാസിനിമാരെ വ്യാജ ആരോപണമുയർത്തി അറസ്റ്റ് ചെയ്തതിൽ കാഞ്ഞിരപ്പള്ളി രൂപത സന്യാസിനീ സമൂഹങ്ങളുടെ കൂട്ടായ്മയായ കോണ്‍ഫറൻസ് ഓഫ് റിലീജിയസ് ഇന്ത്യ (സിആര്‍ഐ) കാഞ്ഞിരപ്പള്ളിയും രൂപതയിലെ അല്മായ സംഘടനകളും ഉത്കണ്ഠ രേഖപ്പെടുത്തി. നിർബന്ധിത മതപരിവർത്തനം, മനുഷ്യക്കടത്ത് തുടങ്ങിയ വ്യാജ ആരോപണങ്ങളുന്നയിച്ചാണ് സന്യാസിനികളുടെ നേർക്ക് ആൾക്കൂട്ട വിചാരണയും അറസ്റ്റുമുണ്ടായത്. സന്യാസിനിമാര്‍ക്കുണ്ടായ ദുരനുഭവം മതസ്വാതന്ത്ര്യത്തിനും മതവിശ്വാസത്തിനും ഇന്ത്യന്‍ ഭരണഘടന നല്‍കുന്ന ഉറപ്പിന്മേല്‍ വർഗീയവാദികൾ നടത്തിയ ആക്രമണമാണ്. മതംമാറ്റ നിരോധനനിയമം ദുരുപയോഗം ചെയ്ത് സന്യാസിനിമാരെ കള്ളക്കേസില്‍ കുടുക്കാന്‍ ശ്രമിക്കുകയും പോലീസിന്‍റെ സാന്നിധ്യത്തിൽ പോലും ആൾക്കൂട്ട വിചാരണയ്ക്ക് വിധേയരാക്കുകയും ചെയ്തത് ന്യായീകരിക്കാനാവുന്നതല്ല. തീവ്രവാദികളുടെ ഇഷ്ടാനിഷ്ടങ്ങള്‍ക്കനുസരിച്ച് പ്രവര്‍ത്തിക്കുന്ന ചട്ടുകങ്ങളായി ഉത്തരവാദിത്വപ്പെട്ട നിയമപാലനസംവിധാനങ്ങള്‍ മാറരുതെന്നും പ്രതിഷേധക്കുറിപ്പില്‍ ഓര്‍മിപ്പിച്ചു. കാഞ്ഞിരപ്പള്ളി രൂപതയിലെ സന്യാസിനീസമൂഹങ്ങളുടെ കൂട്ടായ്മയായ സിആര്‍ഐയും കാഞ്ഞിരപ്പള്ളി രൂപത അല്മായ സംഘടന ഏകോപനവേദിയും സന്യാസിനിമാര്‍ക്ക് നേരേയുണ്ടായ ആക്രമണത്തില്‍ ശക്തമായ പ്രതിഷേധം രേഖപ്പെടുത്തുകയും ഇത്തരത്തിലുള്ള സംഭവങ്ങള്‍ ആവര്‍ത്തിക്കപ്പെടാതെ ഭരണഘടന നൽകുന്ന പരിരക്ഷ ലഭ്യമാക്കുവാൻ ഉത്തരവാദിത്വപ്പെട്ടവര്‍ ശ്രദ്ധിക്കണമെന്നും ആവശ്യപ്പെട്ടു. നീതിനിഷേധം: എംസിഎ പത്തനംതിട്ട: ഛത്തീസ്ഗഡിൽ മലയാളി കന്യാസ്ത്രീകളെ ജാമ്യമില്ലാ വകുപ്പുകൾ ചേർത്തു തുറുങ്കിലടച്ച പോലീസ് നടപടി നീതിനിഷേധമെന്ന് മലങ്കര കാത്തലിക് അസോസിയേഷൻ പത്തനംതിട്ട ഭദ്രാസന സമിതി. സഞ്ചാര സ്വാതന്ത്ര്യവും മതേതരത്വവും ലംഘിക്കുന്ന നടപടിയാണിത്. ഛത്തീസ്ഗഡ് മുഖ്യമന്ത്രിയുടെ പ്രസ്താവന തെറ്റിനെ ന്യായീകരിക്കുന്നതാണ്. കന്യാസ്ത്രീകളുടെ കേന്ദ്രസർക്കാർ ഇടപെടണമെന്നും എംസിഎ രൂപത സമിതി ആവശ്യപ്പെട്ടു. നിയമലംഘനം: മദേഴ്സ് ഫോറം പത്തനംതിട്ട: സിസ്റ്റർ വന്ദന ഫ്രാൻസിസ്, സിസ്റ്റർ പ്രീതി മേരി എന്നിവരുടെ അറസ്റ്റ് മതസ്വാതന്ത്ര്യത്തിനും സഞ്ചാര സ്വാതന്ത്ര്യത്തിനും ജീവിതക്രമത്തിനും നേരേയുള്ള പ്രത്യക്ഷമായ നിയമലംഘനമാണെന്ന് മലങ്കര കത്തോലിക്കാ സഭ പത്തനംതിട്ട രൂപത മലങ്കര കാത്തലിക് മദേഴ്സ് ഫോറം. മത ന്യൂനപക്ഷങ്ങൾക്കു ഭയമില്ലാതെ പ്രവർത്തിക്കാൻ സംരക്ഷണം നൽകാൻ പ്രധാനമന്ത്രിയും കേന്ദ്രസർക്കാരും നടപടിയെടുക്കണം. രൂപത പ്രസിഡന്‍റ് ഷീജ ഏബ്രഹാം അധ്യക്ഷത വഹിച്ച യോഗത്തിൽ രൂപത ഡയറക്ടർ ഫാ. വർഗീസ് വിളയിൽ, അനിമേറ്റർ സിസ്റ്റർ അനന്ത എസ്ഐസി, അന്നമ്മ ചാക്കോ, ഡയാന സിനു, മേഴ്സി, ജെയ്‌സമ്മ ജോസഫ്, സുജ ബാബു, മേരിക്കുട്ടി ജോർജ് എന്നിവർ പ്രസംഗിച്ചു. നടപടി പ്രാകൃതം: എൻസിഎംജെ പത്തനംതിട്ട: കന്യാസ്ത്രീകളെ മനുഷ്യക്കടത്ത് ആരോപിച്ച് ദുർഗ് റെയിൽവേ സ്റ്റേഷനിൽ തടഞ്ഞുവച്ചതും അറസ്റ്റ് ചെയ്തതും ഞെട്ടിക്കുന്നുവെന്ന് നാഷണൽ ക്രിസ്ത്യൻ മൂവ്മെന്‍റ് ഫോർ പത്തനംതിട്ട ജില്ലാ കമ്മിറ്റി. നാഷണൽ ഹ്യൂമൺ റൈറ്റസ് കമ്മീഷനും ന്യൂനപക്ഷ കമ്മീഷനും ഇടപെടൽ നടത്തണമെന്നും ജില്ലാ പ്രസിഡന്‍റ് ഫാ. ബെന്യാമിൻ ശങ്കരത്തിൽ, സെക്രട്ടറി അനീഷ് തോമസ് എന്നിവർ ആവശ്യപ്പെട്ടു. മൗനം വെടിയണം: ഡി.കെ. ജോൺ പത്തനംതിട്ട: ഭരണഘടനയെയും നിയമങ്ങളെയും വെല്ലുവിളിക്കുന്ന അക്രമികൾക്കെതിരേ അധികാരികൾ മൗനം പാലിക്കുന്നത് മതേതര രാജ്യത്തിനു ഭൂഷണമല്ലെന്നു കേരള കോൺഗ്രസ് സംസ്ഥാന വൈസ് ചെയർമാൻ പ്രഫ.ഡി. കെ. ജോൺ. സഞ്ചാര സ്വാതന്ത്ര്യം പോലും നിഷേധിക്കപ്പെടുന്പോൾ അതിനെ ന്യായീകരിക്കുന്ന പ്രസ്താവനകളാണ് ഭരണകർത്താക്കൾ നടത്തുന്നതെന്നും ജോൺ അഭിപ്രായപ്പെട്ടു. തിരുവല്ലയിൽ പ്രതിഷേധം തിരുവല്ല: ഛത്തീസ്‍ഗഡിൽ മനുഷ്യക്കടത്തും മതപരിവർത്തനവും ആരോപിച്ച് കന്യാസ്ത്രീകളെ അറസ്റ്റ് ചെയ്തതിനെതിരേ തിരുവല്ലയിൽ പ്രതിഷേധ കൂട്ടായ്മ. തിരുവല്ല അതിഭദ്രാസനത്തിലെ എംസിവൈഎം, എംസിഎ സംഘടനകൾ സംയുക്തമായി തിരുവല്ല കെഎസ്ആർടിസി ബസ് സ്റ്റാൻഡ് ടെർമിനലിലാണ് ഇന്നലെ വൈകുന്നേരം പ്രതിഷേധ കൂട്ടായ്മ സംഘടിപ്പിച്ചത്. പ്രതിഷേധ കൂട്ടായ്മയുടെ ഉദ്‌ഘാടനം തിരുവല്ല അതിഭദ്രാസന മുഖ്യ വികാരി ജനറാൾ മോൺ. ഡോ. ഐസക് പറപ്പള്ളിൽ നിർവഹിച്ചു. കെസിബിസി മുൻ മീഡിയ കമ്മീഷൻ സെക്രട്ടറി ഫാ. ഏബ്രഹാം ഇരുമ്പിനിക്കൽ മുഖ്യപ്രഭാഷണം നടത്തി. കെസിസി സംസ്ഥാന ജനറൽ സെക്രട്ടറി പ്രകാശ് പി.തോമസ്, എംസിഎ അതിഭദ്രാസന പ്രസിഡന്‍റ് . ബിജു പാലത്തിങ്കൽ, തിരുവല്ല മേഖല പ്രസിഡന്‍റ് ബിജു ജോർജ്, നിരണം മേഖല പ്രസിഡന്‍റ് ബെന്നി സ്കറിയ, വെണ്ണിക്കുളം മേഖല പ്രസിഡന്‍റ് ഷാജി പൂച്ചേരിൽ, എംസിവൈഎം അതിഭദ്രാസന പ്രസിഡന്‍റ് സിറിയക് വി. ജോൺ, തിരുവല്ല മേഖല പ്രസിഡന്‍റ് അഹിയ മേരി ബാബു, ബഥനി സന്യാസിനി സമൂഹ പ്രതിനിധി സിസ്റ്റർ സാഫല്യ, എജി പറപ്പാട്ട് തുടങ്ങിയവർ പ്രസംഗിച്ചു. ബിജെപി നിലപാട് ഇരട്ടത്താപ്പെന്ന് തിരുവല്ല: ഛത്തീസ്ഗഡിൽ മലയാളികളായ കന്യാസ്ത്രീകളെ ജയിലിൽ അടച്ചതുമായി ബന്ധപ്പെട്ട് എന്തു ന്യായീകരണമാണ് ഭരണകക്ഷിയായ ബിജെപിക്കു നൽകാനുള്ളതെന്ന് വ്യക്തമാക്കണമെന്ന് ജനാധിപത്യ കേരള കോൺഗ്രസ് നിയോജക മണ്ഡലം കമ്മിറ്റി ആവശ്യപ്പെട്ടു. മതേതരത്വത്തെ ഇല്ലാതാക്കി സഞ്ചാര സ്വാതന്ത്ര്യത്തെ അടിച്ചമർത്തുകയാണ് ഛത്തീസ്ഗഡ് സർക്കാരെന്നും യോഗം ചൂണ്ടിക്കാട്ടി. പ്രസിഡന്‍റ് ജേക്കബ് മദിനഞ്ചേരി അധ്യക്ഷത വഹിച്ച യോഗം സംസ്ഥാന ജനറൽ സെക്രട്ടറി ജേക്കബ് എം. ഏബ്രഹാം ഉദ്ഘാടനം ചെയ്തു. ബെന്നി പാറേൽ, പി.സി. രാജു , മാമ്മൻ ശക്തിമംഗലം, മാത്യു ജോൺ, രാജൻ ജേക്കബ്, കെ.കെ.തോമസ് എന്നിവർ പ്രസംഗിച്ചു.

ശബരിമല നട തുറന്നു, നിറപുത്തരി പൂജ ഇന്ന്

പത്തനംതിട്ട: നിറപുത്തരി പൂജകള്‍ക്കായി ശബരിമല ശ്രീധർമശാസ്താ ക്ഷേത്ര നട തുറന്നു. ഇന്നലെ വൈകുന്നേരം തന്ത്രി കണ്ഠര് ബ്രഹ്മദത്തന്‍റെ സാന്നിധ്യത്തില്‍ മേല്‍ശാന്തി അരുണ്‍കുമാര്‍ നമ്പൂതിരി നടതുറന്ന് ദീപം തെളിച്ചു. ഇന്ന് പുലര്‍ച്ചെ 5.30നും 6.30നും ഇടയിലുള്ള മുഹൂര്‍ത്തത്തില്‍ നിറപുത്തരി പൂജകള്‍ നടക്കും. സന്നിധാനത്ത് സമര്‍പ്പിക്കുന്ന നെല്‍ക്കതിരുകള്‍ തന്ത്രിയുടെ കാർമിക്തവത്തിൽ പൂജിച്ച് ശുദ്ധിവരുത്തും. തുടര്‍ന്ന് ശ്രീകോവിലിനുള്ളിൽ പ്രത്യേക പൂജകളുണ്ടാകും. നടതുറന്ന് പൂജിച്ച നെല്‍ക്കതിരുകള്‍ ശ്രൂകോവിലില്‍ ചാര്‍ത്തിയ ശേഷം ഭക്തര്‍ക്ക് പ്രസാദമായി നല്‍കും. പൂജകള്‍ പൂര്‍ത്തിയാക്കി രാത്രി 10ന് നട അടയ്ക്കും. നിറപുത്തരിക്കായുള്ള നെല്‍ക്കതിരുകളുമായി അച്ചന്‍കോവില്‍ ശ്രീധര്‍മശാസ്താ ക്ഷേത്രത്തില്‍ നിന്നും ഉപദേശക സമിതിയുടെ നേതൃത്വത്തില്‍ ആരംഭിച്ച ഘോഷയാത്ര ഇന്നലെ വൈകുന്നേരം സന്നിധാനത്തെത്തി.

കരുണയുടെ മുഖത്തെ അധര്‍മംകൊണ്ട് നേരിടരുത്: മോണ്‍. ആന്‍റണി എത്തയ്ക്കാട്ട്

കോട്ടയം: ഛത്തീസ്ഗഡില്‍ മിഷനറി പ്രവര്‍ത്തനരംഗത്ത് സജീവമായി നിലകൊള്ളുന്ന രണ്ടു സന്യസ്തരെ കള്ളക്കേസില്‍ കുടുക്കി അറസ്റ്റ് ചെയ്ത പോലീസ് നടപടി ഹീനവും കരുണയുടെ മുഖത്തെ അധര്‍മംകൊണ്ട് വികൃതമാക്കുന്നതിനു തുല്യവുമാണെന്ന് ചങ്ങനാശേരി അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്. കന്യാസ്ത്രീകളുടെ അറസ്റ്റില്‍ പ്രതിഷേധിച്ച് കത്തോലിക്കാ കോണ്‍ഗ്രസ് ചങ്ങനാശേരി അതിരൂപത സമിതി കോട്ടയം ഗാന്ധി സ്‌ക്വയറില്‍ നടത്തിയ സായാഹ്ന പ്രതിഷേധ സംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭരണഘടന പൗരനു നല്‍കുന്ന ഉറപ്പ് ലംഘിക്കരുതെന്നും ആര്‍ട്ടിക്കിള്‍ 19ലും 25ലും സൂചിപ്പിക്കുന്ന പൗരസ്വാതന്ത്ര്യവും, ഇഷ്ടമുള്ള മതത്തില്‍ വിശ്വസിക്കാനുള്ള അവകാശവും രാജ്യത്ത് ഒരു പൗരനും നിഷേധിക്കപ്പെടരുതെന്നും അദ്ദേഹം കൂട്ടിച്ചേര്‍ത്തു. മതപരിവര്‍ത്തനം അല്ല ക്രൈസ്തവ മിഷനറിമാരുടെ ദൗത്യമെന്നു പറഞ്ഞ അദ്ദേഹം മനസുകളുടെ പരിവര്‍ത്തനമാണ് ദൗത്യമെന്നും കൂട്ടിച്ചേര്‍ത്തു. അതിരൂപത പ്രസിഡന്‍റ് ബിജു സെബാസ്റ്റ്യന്‍ പടിഞ്ഞാറേവീട്ടില്‍ അധ്യക്ഷത വഹിച്ചു. പ്രതിഷേധ സംഗമത്തോടനുബന്ധിച്ച് നടന്ന പ്രതിഷേധ റാലി യുവദീപ്തി എസ്എംവൈഎം ഡയറക്ടര്‍ ഫാ. സാവിയോ മാനാട്ട് ഫ്ലാഗ് ഓഫ് ചെയ്തു. അതിരൂപത ജനറല്‍ സെക്രട്ടറി ബിനു ഡൊമിനിക്ക് നടുവിലേഴം, ട്രഷറര്‍ ജോസ് ജോണ്‍ വെങ്ങാന്തറ, കുടുംബകൂട്ടായ്മ ഡയറക്ടര്‍ ഫാ. ജോര്‍ജ് മാന്തുരുത്തില്‍, കത്തോലിക്ക കോണ്‍ഗ്രസ് കോട്ടയം ഫൊറോന ഡയറക്ടര്‍ ഫാ. റ്റോം കുന്നുംപുറം, ഫാ. തോമസ് കുത്തുകല്ലുങ്കല്‍, ഫാ. ആന്‍റണി കിഴക്കേവീട്ടില്‍, ഫാ. സുനില്‍ ആന്‍റണി, ഫാ. റ്റോജോ പുളിക്കപ്പടവില്‍, സിസ്റ്റര്‍ ഫ്ലവറിറ്റ് എസ്എബിഎസ്, കത്തോലിക്ക കോണ്‍ഗ്രസ് ഭാരവാഹികളായ സി.ടി. തോമസ്, ജോര്‍ജുകുട്ടി മുക്കത്ത്, റോസിലിന്‍ കുരുവിള, രാജേഷ് ജോണ്‍, റ്റോമിച്ചന്‍ അയ്യരുകുളങ്ങര തുടങ്ങിയവര്‍ പ്രസംഗിച്ചു.

പെരുമ്പെട്ടിയിൽ വീണ്ടും അട്ടിമറിനീക്കം; പട്ടയം നിയമക്കുരുക്കിലേക്ക്

പട്ടയം തടയാൻ ഗൂഢശ്രമം, വനഭൂമിക്കുമേൽ അവകാശവാദവുമായി സ്വകാര്യ വ്യക്തി പത്തനംതിട്ട: പൊന്തൻപുഴ, വലിയകാവ് വനഭൂമിക്കുമേൽ അവകാശവാദം ഉന്നയിച്ച് ഗൂഢ നീക്കം. പെരുന്പെട്ടി പട്ടയവുമായി ബന്ധപ്പെട്ട് പതിറ്റാണ്ടുകളായി തുടരുന്ന പ്രശ്നങ്ങൾ പരിഹരിക്കപ്പെടുന്ന ഘട്ടത്തിലെത്തിയപ്പോൾ ഈ ഗൂഢസംഘം നടത്തിയ രംഗപ്രവേശം നാട്ടുകാ രിൽ ആശങ്ക വിതച്ചിരിക്കുകയാണ്. പുതിയ നീക്കം പൊന്തൻപുഴ വനം ഉൾപ്പെടുന്ന പെരുമ്പെട്ടി, വലിയകാവ് റിസർവ് മേഖലയിൽ 432.50 ഏക്കർ സ്ഥലത്താണ് ഭൂമാഫിയ അവകാശം ഉന്നയിച്ചിട്ടുള്ളത്. വനത്തിനു പുറത്ത് 250.46 ഏക്കർ വരുന്ന റവന്യു ഭൂമിയിലാണ് 747 കുടുംബങ്ങൾ കാലങ്ങളായി കൃഷി ചെയ്തു ജീവിക്കുന്നത്. പട്ടയത്തിനു വേണ്ടിയുള്ള ഇവരുടെ അവകാശവാദത്തെ തടയിടുകയെന്ന ലക്ഷ്യത്തോടെയാണ് വനഭൂമിക്കുമേൽ അവകാശവാദം ഉന്നയിച്ച് ഇപ്പോൾ ഒരുവിഭാഗം രംഗത്തെത്തിയിരിക്കുന്നത്. 7,000 ഏക്കർ വരുന്ന പൊന്തൻപുഴ വനത്തിന്‍റെ തെക്കുകിഴക്കു വരുന്ന ഭാഗമാണ് പെരുമ്പെട്ടി - വലിയകാവ് മേഖല. വനത്തിൽ ഉൾപ്പെട്ട സ്ഥലമാണ് വനംമാഫിയ ലക്ഷ്യമിടുന്നത്. ജണ്ടയ്ക്കുള്ളിലെ സ്ഥലം പെരുമ്പെട്ടി വില്ലേജിലെ റീസർവേ നമ്പർ 193ൽപെട്ട 432.5 ഏക്കർഭൂമിയിലാണ് ഗൂഢ ലക്ഷ്യമ ുള്ളവരെന്നു നാട്ടുകാർ ആരോപി ക്കുന്ന ചിലർ അവകാശം ഉന്നയിച്ചിട്ടുള്ളത്. നെയ്തല്ലൂർ കോവിലകം ഇരവിപേരൂർ സ്വദേശിക്കു കൈമാറിയ സ്ഥലം വില കൊടുത്തു വാങ്ങിയതാണെന്നാണ് അവകാശം ഉന്നയിച്ച വരുടെ വാദം. ഇത് അളന്നുതിരിച്ചു തരണമെന്ന ആവശ്യമാണ് കേരള ഹൈക്കോടതിയിൽ സമർപ്പിച്ച സിവിൽ റിട്ട് പെറ്റീഷനിലെ ആവശ്യം. എന്നാൽ, സ്ഥലം പൂർണമായി വനംവകുപ്പിന്‍റെ ജണ്ടയ്ക്കുള്ളിലാണ്. എന്നാൽ, തന്‍റെ ഭൂമി വനം നോട്ടിഫിക്കേഷന്‍റെ പരിധിക്കു പുറത്താണെന്ന വാദം ഉന്നയിച്ചാണ് പരാതി ക്കാരൻകോടതിയെ സമീപിച്ചത്. കഴിഞ്ഞ ജൂൺ ഒന്പതിനു ഹൈക്കോടതി ഡിവിഷൻ ബെഞ്ച് നൽകിയ വിധിന്യായത്തിൽ സ്ഥലം അളന്നു തിട്ടപ്പെടുത്താൻ നിർദേശമുണ്ട്. ഉദ്യോഗസ്ഥർക്കു മൗനം കോടതിയിൽ ഇതുമായി ബന്ധപ്പെട്ട കേസ് വന്നപ്പോൾ റവന്യു വകുപ്പ് ഉദ്യോഗസ്ഥർ മൗനം അവലംബിച്ചത് നാട്ടുകാരുടെ ആശങ്കയ്ക്കു കാരണമായിട്ടുണ്ട്. വനഭൂമിയെ സംബന്ധിച്ച സുപ്രീംകോടതി വിധി നിലനിൽക്കേ ഒരു വ്യക്തിയുടെ അവകാശവാദത്തെ അംഗീകരിച്ച് റവന്യു ഉദ്യോഗസ്ഥർ സ്വീകരിച്ച നിലപാട് പട്ടയവിഷയത്തെ അട്ടിമറിക്കാനാണെന്നാണ് ആരോപണം. വനഭൂമി സ്വകാര്യ വ്യക്തിക്ക് അളന്നുതിരിച്ചു നൽകുകയും പകരം പട്ടയം ലഭിക്കേണ്ടതായ ഭൂമി വനത്തിന്‍റെ ഭാഗമായി ഉൾപ്പെടുത്തുകയുമാണ് ലക്ഷ്യമെന്ന് പൊന്തൻപുഴ, പെരുന്പെട്ടി സമരസമിതി ആരോപിച്ചു. അധിക വനഭൂമിക്കുമേൽ അവകാശവാദം പെരുമ്പെട്ടി വില്ലേജിൽ നടന്ന ഡിജിറ്റൽ സർവേ പ്രകാരം അധികമായി കണ്ടെത്തിയ സ്ഥലം തന്‍റേതാണെന്ന അവകാശവാദമാണ് സ്വകാര്യ വ്യക്തി ഉന്നയിക്കുന്നത്. വനം നോട്ടിഫിക്കേഷൻ പ്രകാരം പെരുമ്പട്ടിയിൽ 1,771 ഏക്കർ വനമേഖലയാണ് രേഖപ്പെടുത്തിയിരുന്നത്. എന്നാൽ, ഡിജിറ്റൽ സർവേ അനുസരിച്ച് വനഭൂമിയുടെ വിസ്തൃതി 1,889 ഏക്കറായി വർധിച്ചിട്ടുണ്ട്. നോട്ടിഫിക്കേഷനേക്കാൾ 118 ഏക്കർ അധികം കണ്ടെത്തുകയും ചെയ്തു. ഇതു സ്വകാര്യ വ്യക്തിയുടെ കേസിനെ സാധൂകരിക്കുന്നതായി. വനാതിർത്തി അടയാളപ്പെടുത്തിയ സ്കെച്ചിനു വെളിയിൽ ഒരു സെന്‍റ് ഭൂമി പോലും കണ്ടെത്താൻ കഴിയാത്ത സാഹചര്യത്തിൽ അളവിലെ പിശകായി മാത്രമേ ഇതിനെ കാണാൻ കഴിയൂവെങ്കിലും അധിക ഭൂമി മാഫിയയ്ക്കു കൈമാറാനുള്ള രഹസ്യ നീക്കമാണ് ഇപ്പോൾ നടക്കുന്നതെന്നാണ് ആക്ഷേപം. എതിർപ്പുമായി സമരസമിതി ഡിജിറ്റൽ സർവേ പ്രകാരം വനഭൂമിയുടെ വിസ്തൃതി വർധിച്ചതിനെത്തുടർന്ന് അധികഭൂമി മാഫിയയ്ക്കു കൈമാറിയാൽ ശക്തമായ പ്രക്ഷോഭം നടത്തുമെന്ന് പൊന്തൻപുഴ സമരസമിതി മുന്നറിയിപ്പു നൽകി. ഡിജിറ്റൽ സർവേ പ്രകാരം പെരുമ്പെട്ടി വില്ലേജിൽ 1335 ഏക്കറും ചേത്തക്കൽ വില്ലേജിൽ 25.17 ഏക്കറും റാന്നി അങ്ങാടി വില്ലേജിൽ 528 ഏക്കറും ഉൾപ്പെടുന്നതാണ് വനഭൂമിയെന്നു കർഷകർ തെളിവു സഹിതം ചൂണ്ടിക്കാട്ടുന്നു. മൊത്തം 1889.31 ഏക്കറാണ് ഇത്തരത്തിൽ വനഭൂമിയുടെ വിസ്തൃതി. നോട്ടിഫിക്കേഷനേക്കാൾ 118 ഏക്കർ ഭൂമി അധികമായി കണ്ടെത്തിയതിനാൽ ഈ അധിക ഭൂമികൂടി ഉൾപ്പെടുത്തി പുതിയ വിജ്ഞാപനം ഇറക്കാൻ സർക്കാർ തയാറാകണമെന്നാണ് കർഷകരുടെ ആവശ്യം. കർഷകഭൂമി വനമാണെന്ന തരത്തിൽ നേരത്തേ പുറപ്പെടുവിച്ച വിജ്ഞാപനം സർക്കാർ റദ്ദ് ചെയ്തിരുന്നു.

വെള്ളക്കെട്ട്: തിരുവല്ലയിലെ റെയിൽവേ അടിപ്പാതകൾ അടഞ്ഞുതന്നെ

തിരുവല്ല: ഇരട്ടപ്പാത നിർമാണത്തിൽ ലെവൽ ക്രോസുകൾ ഒഴിവാക്കുന്നതിന്‍റെ ഭാഗമായി റെയിൽവേ നിർമിച്ച അടിപ്പാതകൾ നാട്ടുകാർക്കും യാത്രക്കാർക്കും തലവേദനായി. മഴക്കാലം ആരംഭിച്ചതിനുശേഷം അടിപ്പാതയിലൂടെ യാത്ര സാധ്യമായത് വിരലിൽ എണ്ണാവുന്ന ദിനങ്ങൾ മാത്രം. തിരുവല്ലയ്ക്കും ചെങ്ങന്നൂരിനും മധ്യേ ഇരുവെള്ളിപ്ര, കുറ്റൂർ, തൈമറവുംകര അടിപ്പാതകളാണ് വെള്ളം നിറഞ്ഞുകിടക്കുന്നത്. അടിപ്പാതകളിലെ വെള്ളക്കെട്ട് ഒഴിവാക്കാൻ ഇതിനോടകം റെയിൽവേ ലക്ഷണക്കണക്കിനു രൂപ ചെലവഴിച്ചു. എന്നാൽ, റെയിൽവേയുടെ എൻജിനിയറിംഗ് വൈദഗ്ധ്യം വെള്ളക്കെട്ട് ഒഴിവാക്കുന്നതിൽ ഇനിയും വിജയിച്ചിട്ടില്ല. മുന്പുണ്ടായിരുന്ന ലെവൽക്രോസ് ആയിരുന്നു ഇതിലും ഭേദമെന്നാണ് ഇപ്പോൾ നാട്ടുകാർ പറയുന്നത്. ട്രെയിൻ കടന്നുപോകുന്ന സമയത്ത് കാത്തുകിടക്കണമെന്നതൊഴിച്ചാൽ മറ്റു പ്രശ്നങ്ങളുണ്ടായിരുന്നില്ല. സാങ്കേതിക പരിശോധനകൾ പരാജയം റെയിൽവേ അടിപ്പാതകൾ നിർമിച്ച സ്ഥലങ്ങളെല്ലാം വെള്ളക്കെട്ടുകളും നീരൊഴുക്ക് കൂടുതലുള്ള പ്രദേശങ്ങളാണ്. മണിമലയാറിന്‍റെ തീരത്തുള്ള പ്രദേശങ്ങളായതിനാൽ മഴക്കാലത്ത് പ്രശ്നങ്ങൾ രൂക്ഷമാകും. ഇതു മുന്നിൽക്കണ്ടുള്ള നിർമാണവൈദഗ്‍്ധ്യം തുടക്കത്തിലേ ഉണ്ടായില്ല. റെയിൽവേ ലൈൻ മുകളിലുള്ളതിനാൽ അടിപ്പാതയ്ക്കായി റോഡ് താഴ്ത്തേണ്ടിവന്നു. ഇതോടെ വെള്ളവും ഈ പ്രദേശത്ത് ഒഴുകാൻ തുടങ്ങി. വെള്ളം വരുന്നത് ഒഴിവാക്കാനും ഒഴുക്കിക്കളയാനും നിരവധി പരീക്ഷണങ്ങൾ നടത്തി. വിജയിക്കാതെവന്നപ്പോൾ കാൽനടക്കാർക്കും ഇരുചക്ര വാഹനയാത്രികർക്കുമായി പാത ഉയർത്തി നിർമിച്ചുനൽകി. വെള്ളക്കെട്ട് അപകടങ്ങൾക്കു കാരണമാകുന്നതു കണ്ടതോടെ മഴക്കാലത്ത് പാത ഗേറ്റുപയോഗിച്ച് അടച്ചിടുകയാണ് ഇപ്പോൾ. ജൂണിൽ മൂന്നുതവണ വെള്ളപ്പൊക്കക്കെടുതികൾ കാരണം പാത അടച്ചിട്ടും. നിലവിൽ ഒരാഴ്ചയായി ഗതാഗതം നടക്കുന്നില്ല. ആദ്യ വെള്ളപ്പൊക്കത്തിൽ റെയിൽവേ നേരിട്ട് കാവൽക്കാരെ ഏർപ്പെടുത്തിയിരുന്നുവെങ്കിൽ രണ്ടാം തവണ വെള്ളപ്പൊക്കത്തിൽ റെയിൽവേയുടെ പട്രോളിംഗ് സംഘമാണ് നിരീക്ഷിച്ചിരുന്നത്. ഇപ്പോൾ ഉണ്ടായിരിക്കുന്ന വെള്ളപ്പൊക്കത്തിന് കരാർ തൊഴിലാളികളെയാണ് കാവൽ ജോലിക്കു നിയോഗിച്ചിരിക്കുന്നത്. അടിപ്പാതയിൽ വെള്ളം കയറാതിരിക്കാനായി അലൂമിനിയം റൂഫിംഗ്, ഓടകൾ, വൺസൈഡ് വാൽവുകൾ, റോഡിനു കുറുകെ ഇരുമ്പു കവേർഡ് ഡ്രെയിനേജ്, വെള്ളം വറ്റിക്കുന്നതിനൂള്ള മോട്ടോർ പമ്പ് സ്ഥാപിക്കൽ തുടങ്ങിയ പരീക്ഷണങ്ങൾ റെയിൽവേ നടത്തിയതാണ്. ഏറ്റവും ഒടുവിലായി രണ്ടു മാസം മുമ്പ് കുറ്റൂർ അടിപ്പാതയുടെ തറയുടെ കോൺക്രീറ്റുകൾ ഇളക്കി കമ്പികൾ നിരത്തി വാട്ടർപ്രൂഫ് കോൺക്രീറ്റ് ചെയ്യുകയും കാറുകൾ ഉൾപ്പെടെ കടന്നുപോകുന്നതിനായി അടിപ്പാതയുടെ വശത്തുള്ള ഫുട്പാത്തിന്‍റെ വീതി കൂട്ടുകയും ചെയ്തിരുന്നു. ഇരുവെള്ളിപ്രയിലും തൈമറവുംകരയിലും ഫുട്പാത്തുകൾ നിർമിച്ചെങ്കിലും കഴിഞ്ഞ മഴയിൽ ഇതും മുങ്ങി. തുടർച്ചയായി ഉണ്ടാകുന്നവെള്ളപ്പൊക്കത്തിൽ പരീക്ഷണങ്ങൾ ഒന്നും ഫലപ്രദമാകുന്നില്ല. അടിപ്പാതയ്ക്കു പുറത്തായി വലിയ കിണറുകൾ സ്ഥാപിച്ച് ഉള്ളിലെ വെള്ളം ഓടവഴി ഈ കിണറുകളിലേക്ക് എത്തിക്കുകയും ഈ കിണറ്റിൽനിന്നു വെള്ളം പുറത്തേക്ക് അടിച്ചുകളയുന്ന സംവിധാനം കുറ്റൂരിൽ പരീക്ഷിച്ചിരുന്നു. ഗതാഗതം താറുമാറായി ഇരുവെള്ളിപ്ര, കുറ്റൂർ അടിപ്പാതകൾ അടച്ചതോടെ ഗതാഗതം താറുമാറായിരിക്കുകയാണ്. തിരക്കേറിയ റോഡുകളിലാണ് തടസമുണ്ടായിരിക്കുന്നത്. വെള്ളപ്പൊക്കക്കാലത്ത് പഴയ ലെവൽ ക്രോസുകൾ പുനഃസ്ഥാപിച്ച് ഗതാഗതം അനുവദിക്കണമെന്ന് യൂത്ത്ഫ്രണ്ട് സംസ്ഥാന ജനറൽ സെക്രട്ടറി വി.ആർ. രാജേഷ് അഭിപ്രായപ്പെട്ടു സ്കൂൾ ബസുകളടക്കം കിലോമീറ്ററുകൾ അധികം താണ്ടിയാണ് ഓടുന്നത്. എംസി റോഡും ടികെ റോഡുമായി ബന്ധിപ്പിക്കുന്ന പാതയിലാണ് ഇരുവെള്ളിപ്ര അടിപ്പാത. കുറ്റൂർ അടിപ്പാത ഉപയോഗപ്പെടുത്തി നിരവധി ദീർഘദൂര യാത്രാവാഹനങ്ങളും കടന്നുപോകുന്നുണ്ട്. രണ്ടുമാസത്തിനിടെ പത്തുദിവസം മാത്രമാണ് പാത തുറന്നുനൽകിയത്. ഫുട്പാത്തുകളിലൂടെ ചെറുവാഹനങ്ങൾ കടത്തിവിടുന്നുണ്ടെങ്കിലും ഗതാഗതക്കുരുക്ക് രൂക്ഷമാണ്. അടിപ്പാതകളിലെ തടസം പ്രാദേശികമായ യാത്രാപ്രശ്നങ്ങളും ഉണ്ടാക്കുന്നു. അടിയന്തരഘട്ടങ്ങളിൽ ഒരു വാഹനം പോലും ഓടിക്കാനാകാത്ത സ്ഥിതിയാണ് ഉണ്ടായിരിക്കുന്നതെന്ന് നാട്ടുകാർ ചൂണ്ടിക്കാട്ടി. നാടിന്‍റെ ദൈനംദിന പ്രവർത്തനങ്ങളെയും ഇതു ബാധിച്ചിട്ടുണ്ട്. പടിഞ്ഞാറൻ മേഖലയിൽ പ്രളയക്കെടുതികൾ തുടരുന്നു തിരുവല്ല: തിരുവല്ലയുടെ പടിഞ്ഞാറൻ മേഖലയിൽ പ്രളയക്കെടുതികൾ തുടരുന്നു. മഴയ്ക്കു ശമനമുണ്ടായെങ്കിലും വെള്ളം ഒഴിഞ്ഞു വരുന്നതേയുള്ളൂ. പെരിങ്ങര, നെടുന്പ്രം, നിരണം, കടപ്ര ഗ്രാമപഞ്ചായത്ത് പരദേശങ്ങളെയാണ് വെള്ളക്കെട്ട് പ്രശ്നങ്ങൾ രൂക്ഷമായി ബാധിച്ചിരിക്കുന്നത്. വീടുകളിലും മറ്റും കയറിയ വെള്ളം പൂർണമായി ഇറങ്ങിയിട്ടില്ല. ഗ്രാമീണ റോഡുകളും പൂർണമായി ഗതാഗതയോഗ്യമായിട്ടില്ല. തുടർച്ചയായ വെള്ളപ്പൊക്കക്കെടുതികൾ പ്രദേശത്തെ സാധാരണ ജനജീവിതത്തെ സാരമായി ബാധിച്ചിരിക്കുകയാണ്. ദുരിതാശ്വാസ ക്യാന്പുകളിൽ 312 പേർ പത്തനംതിട്ട: മഴക്കെടുതികളെത്തുടർന്ന് ജില്ലയിൽ തുടരുന്ന ഒന്പതു ദുരിതാശ്വാസ ക്യാന്പുകളിലായുള്ളത് 312 പേർ. തിരുവല്ല താലൂക്കില്‍ ഏഴും അടൂരില്‍ രണ്ടും ക്യാമ്പുകളാണ് പ്രവര്‍ത്തിക്കുന്നത്. 81 കുടുംബങ്ങളിലായി 114 പുരുഷന്‍മാരും 130 സ്ത്രീകളും 68 കുട്ടികളും ക്യാമ്പിലുണ്ട്. തിരുമൂലപുരം എസ്എന്‍വിഎസ്, കവിയൂര്‍ പടിഞ്ഞാറ്റുംശേരി സര്‍ക്കാര്‍ എല്‍പിഎസ്, മുത്തൂര്‍ സര്‍ക്കാര്‍ എല്‍പിഎസ്, ആലംതുരുത്തി സര്‍ക്കാര്‍ എല്‍പിഎസ്, മാരാമണ്‍ എംഎംഎഎച്ച്എസ്, മേപ്രാല്‍ സെന്റ് ജോണ്‍സ് എല്‍പിഎസ്, തുകലശേരി സിഎംഎസ്എച്ച്എസ്എസ്, പന്തളം മുടിയൂര്‍ക്കോണം എംടിഎല്‍പിഎസ്, ചേരിക്കല്‍ എസ്എന്‍എല്‍പിഎസ് എന്നിവിടങ്ങളിലാണ് ക്യാമ്പ്. ‌കക്കി സംഭരണിയിൽ ഓറഞ്ച് അലർട്ട് പത്തനംതിട്ട: ജലനിരപ്പ് 974.36 മീറ്റററിലെത്തിയതോടെ ശബരിഗിരി ജലവൈദ്യുത പദ്ധതിയുടെ കക്കി - ആനത്തോട് ജലസംഭരണിയിൽ ഓറഞ്ച് അലർട്ട് പ്രഖ്യാപിച്ചു. ഡാമിലെ ജലനിരപ്പ് 974.86 മീറ്ററിൽ എത്തിയാൽ ചുവപ്പ് അലർട്ട് പ്രഖ്യാപിച്ച് നിശ്ചിത അളവിൽ വെള്ളം പുറത്തേക്ക് ഒഴുക്കേണ്ടിവരുമെന്ന് ജില്ലാ കളക്ടർ അറിയിച്ചു. മഴ കുറഞ്ഞതോടെ മൂഴിയാർ സംഭരണിയുടെ ഷട്ടറുകൾ ഇന്നലെ അടച്ചു. കിഴക്കൻ മേഖലയിലും മഴയ്ക്കു ശമനമുണ്ടായിട്ടുണ്ട്. ഇതോടെ നീരൊഴുക്കിൽ കുറവുണ്ട്. സ്കൂൾ അവധി പത്തനംതിട്ട: ജില്ലയിൽ ദുരിതാശ്വാസ ക്യാമ്പായി പ്രവർത്തിക്കുന്ന സ്കൂളുകൾക്കും സുരക്ഷ മുൻനിർത്തി മറ്റ് 15 സ്കൂളുകൾക്കും ജില്ലാ ദുരന്തനിവാരണ അഥോറിറ്റി ചെയർപേഴ്സൺ കൂടിയായ ജില്ലാ കളക്ടർ എസ്.പ്രേംകൃഷ്ണൻ ഇന്ന് അവധി പ്രഖ്യാപിച്ചു. വെള്ളപ്പൊക്ക ഭീഷണി നേരിടുന്ന തിരുവല്ല താലൂക്കിലെ പടിഞ്ഞാറൻ മേഖലയിലെ സ്കൂളുകൾക്കാണ് സുരക്ഷ ഭീഷണി മുൻനിർത്തി അവധി നൽകിയത്.

കോയിപ്രം പുഞ്ചയിൽ നഷ്ടമായത് മൂന്നു ജീവന്‍

കോഴഞ്ചേരി: കോയിപ്രം ഗവൺമെന്‍റ് ഹൈസ്കൂളിനു സമീപമുള്ള തൃക്കണ്ണപുരം പുഞ്ചയിൽ പൊലിഞ്ഞത് മൂന്നു ജീവനുകൾ. കഴിഞ്ഞ ഞായറാഴ്ച വൈകുന്നേരം ഉണ്ടായ അപകടത്തിൽപ്പെട്ട കോയിപ്രം മാരൂപ്പറമ്പില്‍ മിഥുന്‍ (30), കിടങ്ങന്നൂര്‍ മണപ്പള്ളി ചാങ്ങച്ചേത്ത് മുകളിൽ രാഹുല്‍ സി. നാരായണ്‍ (28) എന്നിവരുടെ മൃതദേഹങ്ങൾ അന്നുതന്നെ കണ്ടെടുത്തിരുന്നു. അപകടത്തിൽപ്പെട്ട മാരൂപ്പറന്പിൽ ദേവശങ്കറിന്‍റെ (ദേവൻ - 35) മൃതദേഹം കൂടി ഇന്നലെ ഫയർഫോഴ്സ് സംഘം കണ്ടെടുത്തതോടെ അപ്രതീക്ഷിതമായ ദുരന്തത്തിന്‍റെ വേദന ഏറി. ഫൈബർ വള്ളത്തിൽ മീൻ പിടിക്കുന്നതിനിടെയാണ് അപകടമുണ്ടായത്. വള്ളം മറിഞ്ഞു മൂവരും വെള്ളത്തിൽ അകപ്പെടുകയായിരുന്നു. നീന്തൽ വശമുണ്ടായിരുന്നെങ്കിലും പുഞ്ചയിലെ പുല്ലും വള്ളിപ്പടർ‌പ്പുകളും രക്ഷപ്പെടൽ അസാധ്യമാക്കി. ശക്തമായ മഴയിൽ പുഞ്ച നിറയെ വെള്ളവും നിറഞ്ഞിരുന്നു. കരയ്ക്കു നിന്നിരുന്നവർ നീന്തി അപകടസ്ഥലത്ത് എത്തിയപ്പോഴേക്കും മൂവരും മുങ്ങിത്താഴ്ന്നു. നീന്തലി‌ൽ വൈദഗ്ധ്യമുണ്ടായിരുന്ന മിഥുൻ മറ്റുള്ളവരെ രക്ഷിച്ചു താനും രക്ഷപ്പെടാൻ ഏറെ ശ്രമിച്ചുനോക്കിയെങ്കിലും കുഴഞ്ഞുപോകുകയായിരുന്നു. സംഭവസ്ഥലത്തുനിന്നു പ്രദേശവാസികൾ രണ്ടു മൃതദേഹങ്ങൾ കണ്ടെടുത്തുവെങ്കിലും ഫ‍യർഫോഴ്സ് സംഘം മണിക്കൂറുകൾ നീണ്ട ശ്രമത്തിനൊടുവിലാണ് ദേവന്‍റെ മൃതദേഹം ഇന്നലെ ഉച്ചകഴിഞ്ഞ് കണ്ടെടുത്തത്. പത്തനംതിട്ട, ചെങ്ങന്നൂർ, തിരുവല്ല എന്നിവിടങ്ങളിൽനിന്നുള്ള ഫയർഫോഴ്സ് ടീം ഇന്നലെ രാവിലെ തന്നെ സ്ഥലത്തെത്തി തെരച്ചിൽ പുനരാരംഭിച്ചിരുന്നു. എന്നാൽ, പുല്ല് നിറഞ്ഞുനിൽക്കുന്ന പുഞ്ചയിൽ തെരച്ചിൽ ശ്രമകരമായിരുന്നു. ഫയർഫോഴ്സിനൊപ്പം പോലീസും നാട്ടുകാരും രക്ഷാപ്രവർത്തനങ്ങളിൽ സഹായികളായി. സ്‌കൂബ അംഗങ്ങൾക്കു പുല്ലിനിടയിലേക്കു കയറി തെരച്ചിൽ നടത്താൻ കഴിയുന്നില്ല. കാറ്റാടി കഴകളുമായി നാട്ടുകാരുടെ സഹായത്തോടെ കുത്തിനോക്കിയെങ്കിലും ഫലമുണ്ടായില്ല. മുങ്ങൽ വിദഗ്ധർ അടക്കമാണ് മണിക്കൂറുകൾ ശ്രമകരമായ ജോലി നടത്തിയത്. ഒടുവിൽ ഉച്ചകഴിഞ്ഞ് 2.50 ഓടെ മൃതദേഹം പുല്ലുകൾക്കിടയിൽ കുടുങ്ങിക്കിടക്കുന്ന നിലയിൽ കണ്ടെത്തുകയായിരുന്നു. പത്തനംതിട്ട ഫയർ സ്റ്റേഷൻ ഓഫീസർ വി. വിനോദ് കുമാറിന്‍റ നേതൃത്വത്തിൽ സീനിയർ ഫയർ ആൻഡ് റെസ്ക്യൂ ഓഫീസർമാരായ എ.പി. ദില്ലു, കെ.പി. പ്രദീപ്, സുജിത് നായർ, കെ.കെ. ശ്രീനിവാസ് എന്നിവരും ഫയർ ആൻഡ് റെസ്ക്യൂ ഓഫീസർമാരായ ശ്രീകുമാർ, അജിലേഷ്, ജി.കെ. ഷിജു, പി. സണ്ണി, സി. ശ്രീദാസ്, എസ്. സുനിൽശങ്കർ, സി. ശരത്ചന്ദ്രൻ, പ്രദീപ്കുമാർ എന്നിവരുമാണ് തെരച്ചിലിൽ പങ്കെടുത്തത്. ലഹരി വില്ലൻ വെള്ളവുമായി ബന്ധപ്പെട്ട മരണങ്ങളിൽ പലപ്പോഴും വില്ലനാകുന്നത് ലഹരി ഉ‍യർത്തുന്ന ആവേശമാണ്. മദ്യവും മയക്കുമരുന്നും ഉപയോഗിച്ചശേഷം ജലാശയങ്ങളിൽ ഇറങ്ങുന്നത് കൂടുതൽ അപകടകരമാകും. നീന്തൽ അറിയാവുന്നവർക്കു പോലും വേഗത്തിൽ കൈ കുഴയാൻ ഇതു കാരണമാകുന്നുണ്ട്. ശരിയായി നീന്തലറിയാത്തവർ സുഹൃത്തുക്കളുടെ പിൻബലത്തിൽ വെള്ളത്തിൽ ഇറങ്ങുന്നത് കൂടുതൽ അപകടകരമാണ്. നീന്തൽ അറിയാവുന്നവർക്കു പോലും വെള്ളത്തിന്‍റെ ഗതിയും ചുഴികളും കാരണം രക്ഷാപ്രവർത്തനം സാധ്യമാകാതെ വരികയും തങ്ങൾകൂടി അപകടത്തിൽപെടുന്നതിനു കാരണമാകുകയും ചെയ്യും. നദികളുടെ കടവുകളിലെ സ്ഥിതി പലപ്പോഴും മുൻകൂട്ടി കാണാനാകില്ല. 2018ലെ പ്രളയശേഷം ജില്ലയിലെ നദികളിൽ അടിഞ്ഞുകൂടിയിട്ടുള്ള ചെളിയും രൂപപ്പെട്ടിട്ടുള്ള കയങ്ങളും അപകടകാരികളാണ്. ആഴം കുറവെന്ന ധാരണയിൽ വെള്ളത്തിലേക്ക് ഇറങ്ങുന്നവർ പലരും അപകടത്തിൽപ്പെടുന്നതു പതിവായിട്ടുണ്ട്. പ്രളയകാലങ്ങളിൽ പമ്പാ തടത്തിലെ നെൽപാടങ്ങളിൽ കയറി ഒതുങ്ങുന്ന നദീജലത്തിൽ ഇറങ്ങുന്നത് വൻ അപകടങ്ങൾക്ക് വഴിയൊരുക്കുന്നു. കഴിഞ്ഞ ദിവസം കോയിപ്രം പഞ്ചായത്തിലെ നെല്ലിക്കൽ തൃക്കണ്ണപുരം വയൽ മേഖലയിൽ ഫൈബർ ബോട്ടിൽ തുഴഞ്ഞുനീങ്ങിയ മൂന്നു യുവാക്കളാണ് വള്ളം മറിഞ്ഞ് മരണമടഞ്ഞത്. ഇതിൽ രണ്ടു പേർക്കു നീന്തൽ നന്നായി അറിയാമായിരുന്നിട്ടും രക്ഷപ്പെടാൻ കഴിഞ്ഞില്ല. വിശാലമായ വയൽ പരപ്പി‌ന്‍റെ ഒരു കോണിൽനിന്നു നീന്തി കരയ്ക്കെത്തണമെങ്കിൽ അതിനുള്ള ശാരീരിക ക്ഷമത ഉണ്ടാകണം. കരയിൽ രക്ഷാപ്രവർത്തനത്തിനു വേണ്ട ക്രമീകരണങ്ങൾ ഇല്ലെങ്കിൽ സംഭവിക്കുക വൻ ദുരന്തമായിരിക്കും. നാടിനു നൊന്പരമായി നാട്ടിൽ സജീവമായി ഇടപെട്ടിരുന്ന മൂന്ന് യുവാക്കളുടെ മരണം നാടിനു നൊന്പരമായി. മരിച്ച മിഥുൻ കോയിപ്രം പള്ളിയോടത്തിലെ സജീവ സാന്നിധ്യമായിരുന്നു. നാട്ടിലെ പൊതുപരിപാടികളിൽ ഇവരുടെ പങ്കാളിത്തം ഉണ്ടായിരുന്നു. കോയിപ്രം തൃക്കണ്ണപുരം പുഞ്ചയിൽ ചെറുവള്ളങ്ങളിൽ മീൻപിടിക്കാനെത്തുന്നവരേറെയാണ്. എല്ലാദിവസവും ഇത്തരക്കാരെ കാണാനാകും. എന്നാൽ ഇ്തരത്തിലൊരു ദുരന്തം ഇതാദ്യമാണെന്ന് നാട്ടുകാർ പറഞ്ഞു. പുഞ്ചയിലെ വെള്ളക്കൂടുതലാണ് അപകടത്തിനു കാരണമായത്. മരിച്ച മിഥുന്‍റെയും ദേവന്‍റെയുംനെല്ലിക്കല്‍ ഉള്ള വീടുകളിലും കിടങ്ങന്നൂര്‍ രാഹുല്‍ സി. നായരുടെ വീട്ടിലും മുന്‍ മിസോറാം ഗവര്‍ണര്‍ കുമ്മനം രാജശേഖരന്‍ എത്തി അനുശോചനം അറിയിച്ചു. എഴുമറ്റൂര്‍ അമൃതധാര ഗോശാല ട്രസ്റ്റ് ചെയര്‍മാന്‍ അജയകുമാര്‍ വല്യുഴത്തിലും ഒപ്പമുണ്ടായിരുന്നു. ഏഴു മാസത്തിനിടെ 28 പേർ മുങ്ങിമരിച്ചു; ഏറെയും കൗമാരക്കാരും യുവാക്കളും ഇക്കൊല്ലം ഏഴുമാസത്തിനിടെ ജില്ലയിൽ മുങ്ങിമരിച്ചത് 28 പേർ. ഞായറാഴ്ച വൈകുന്നേരം കോയിപ്രം തൃക്കണ്ണപുരം പുഞ്ചയിൽ ഫൈബർ വള്ളം മറിഞ്ഞു മരിച്ചത് മൂന്നു പേരാണ്. ഇതോടെ ഫയർഫോഴ്സ് പത്തനംതിട്ട സ്റ്റേഷൻ പരിധിയിൽ 12 പേരാണ് ഇക്കൊല്ലം മരിച്ചത്. പന്തളത്ത് പുഞ്ചയിൽ ഒരു ഇതര സംസ്ഥാന തൊഴിലാളി ഇന്നലെ മുങ്ങിമരിച്ചതോടെ കഴിഞ്ഞ രണ്ടുദിവസങ്ങൾക്കുള്ളിൽ നാല് മുങ്ങിമരണമാണ് ജില്ലയിലുണ്ടായത്. മുങ്ങിമരണങ്ങളുമായി ബന്ധപ്പെട്ട കേസുകൾ കൈകാര്യം ചെയ്യുന്നത് ഫയർഫോഴ്സാണ്.തിരുവല്ല സ്റ്റേഷൻ പരിധിയിൽ ഒന്പത്, അടൂരിൽ മൂന്ന്, റാന്നി, കോന്നി ഒന്നുവീതം എന്നിങ്ങനെയാണ് മറ്റു സ്റ്റേഷനുകളുടെ പരിധിയിൽ മരിച്ചവരുടെ എണ്ണം. ഏറെപ്പേരും നദികളുമായി ബന്ധപ്പെട്ട കയങ്ങളിലാണ് മുങ്ങിമരിച്ചത്. കാലവർഷക്കെടുതിയിൽ വെള്ളക്കെട്ടിൽ അകപ്പെട്ടു മരിച്ചവരുമുണ്ട്. മരിച്ചവരിൽ നല്ലൊരു പങ്കും നീന്തൽ വശില്ലാത്തവരാണെന്നാണ് അഗ്നിരക്ഷാസേനയുടെ വിലയിരുത്തൽ. നീന്തലറിയാത്ത ആരോഗ്യമുള്ള ഒരാൾ വെള്ളക്കെട്ടിൽ അകപ്പെട്ടാൽ മൂന്നു മിനിട്ടിനുള്ളിൽ രക്ഷകരെത്തിയില്ലെങ്കിൽ ജീവൻ നഷ്ടമാകാനാണ് സാധ്യത. മഴക്കാലത്ത് പാടശേഖരങ്ങളും പുഞ്ചകളും അപകട മുനന്പുകളാകാറുണ്ട്. വെള്ളം കൂടുതലായി ഉയരുകയും ഒഴുക്കു കൂടുകയും ചെയ്യുന്നതിനാൽ ഇത്തരം സ്ഥലങ്ങളിൽ വീണാലും രക്ഷാപ്രവർത്തനം ദുഷ്കരമാകും.

എട്ടുവർഷം കഴിഞ്ഞിട്ടും അമിനിറ്റി സെന്‍റർ തുറന്നില്ല; കോൺഗ്രസ് ധർണ നടത്തി

റാന്നി: റാന്നി ഇട്ടിയപ്പാറയിൽ എത്തുന്ന നൂറുകണക്കിന് യാത്രക്കാർക്ക് ആശ്രയമാകേണ്ട അമിനിറ്റി സെന്‍റർ നിർമാണം പൂർത്തീകരിച്ചിട്ടും തുറന്നുകൊടുക്കാത്തതിൽ പ്രതിഷേധവുമായി കോൺഗ്രസ്. ജനങ്ങളുടെ നികുതിപ്പണത്തിൽനിന്ന് 35 ലക്ഷം രൂപ മുടക്കി 2016 - 17 ൽ നിർമിച്ച അമിനിറ്റി സെന്‍റർ എട്ടു വർഷം പിന്നിട്ടിട്ടും തുറന്നുകൊടുക്കാത്തത് ഏതു സിസ്റ്റത്തിന്‍റെ പ്രശ്നമാണെന്ന് അധികൃതർ വ്യക്തമാക്കണമെന്ന് ധർണ ഉദ്ഘാടനം ചെയ്ത ഡിസിസി പ്രസിഡന്‍റ് പ്രഫ. സതീഷ് കൊച്ചുപറന്പിൽ ആവശ്യപ്പെട്ടു. ജനങ്ങളുടെ പ്രാഥമിക ആവശ്യങ്ങൾ നിർവഹിക്കാൻ പഴവങ്ങാടി ഗ്രാമപഞ്ചായത്ത് വിട്ടുനൽകിയ സ്ഥലത്ത് നിർമിച്ച ഈ കെട്ടിടം തുറന്നുനൽകാതെ സാമൂഹ്യവിരുദ്ധ താവളമാക്കി മാറ്റാനാണ് ശ്രമമെന്നും അഞ്ചു മുറികൾ ഉൾപ്പെടെ എല്ലാ സംവിധാനത്തോടും കൂടി നിർമിച്ച കെട്ടിടം നശിച്ചുപോകാതെ ജനങ്ങൾക്ക് ഉപകാരപ്രദമാക്കാൻ തിരികെ ഗ്രാമപഞ്ചായത്തിനു കൈമാറണമെന്നും സതീഷ് കൊച്ചുപറന്പിൽ ആവശ്യപ്പെട്ടു. കോൺഗ്രസ് പഴവങ്ങാടി ടൗൺ വെസ്റ്റ് മണ്ഡലം കമ്മിറ്റികളുടെ നേതൃത്വത്തിൽ അമിനിറ്റി സെന്‍റർ ജനങ്ങൾക്ക് തുറന്നു നൽകണമെന്നാവശ്യപ്പെട്ടു നടന്ന ധർണയിൽ മണ്ഡലം പ്രസിഡന്‍റ് പ്രമോദ് മന്ദമരുതി ‌അധ്യക്ഷത വഹിച്ചു. കെപിസിസി സെക്രട്ടറി റിങ്കു ചെറിയാൻ, സിബി താഴത്തില്ലത്ത്, സി. കെ. ബാലൻ, തോമസ് അലക്സ്‌, തോമസ് ഫിലിപ്പ്, സാംജി ഇടമുറി, ആരോൺ ബിജിലി പനവേലിൽ, റൂബി കോശി, അനിത അനിൽകുമാർ, റിജോ തോപ്പിൽ, ബാബു മാമ്പറ്റ, എബി അത്തിക്കയം, സുനിൽകുമാർ യമുന, ബെന്നി മാടത്തുംപടി, ചാക്കോ വളയനാട്ട്, ബിനോജ് ചിറക്കൽ, ജോൺ എബ്രഹാം എന്നിവർ പ്രസംഗിച്ചു.

പന്തളത്ത് ഇതരസംസ്ഥാന തൊഴിലാളി മുങ്ങിമരിച്ചു

പന്തളം: പുഞ്ചയിൽ കുളിക്കുന്നതിനിടയിൽ ഇതരസംസ്ഥാന തൊഴിലാളി മുങ്ങിമരിച്ചു. മഹാരാഷ്ട്ര സ്വദേശി റാത്തിമാൻ തിരുവായാണ് (29) മരിച്ചത്. ഇന്നലെ ഉച്ചകഴിഞ്ഞ് 2.30 ഓടെ തുമ്പമൺ കട്ടകുള പുഞ്ചയിലെ കുളത്തിൽ കുളിക്കാൻ ഇറങ്ങിയപ്പോഴാണ് അപകടം. തുമ്പമൺ മുട്ടം സ്വദേശി ബിജു ശാമുവലിന്‍റെ ഉടമസ്ഥതയിലുള്ള പശുഫാമിലെ ജീവനക്കാരനായിരുന്നു റാത്തിമാൻ. പന്തളം പോലീസ് ഇൻക്വസ്റ്റ് തയാറാക്കി മൃതദേഹം ആശുപത്രിയിലേക്കു മാറ്റി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]