ADVERTISEMENT

ADVERTISEMENT

എസ്പിസി പ്രവേശനോത്സവം

പത്തനംതിട്ട: പത്തനംതിട്ട ഗവൺമെന്‍റ് ഹയർ സെക്കൻഡറി സ്കൂളിലെ സ്റ്റുഡന്‍റ് പോലീസ് കേഡറ്റുകളുടെ പതിനാറാമത് ബാച്ചിന്‍റെ പ്രവേശനോൽസവം നഗരസഭ ചെയർമാൻ ടി. സക്കീർ ഹുസൈൻ ഉദ്ഘാടനം ചെയ്തു.

2010 മുതൽ സ്കൂളിൽ എസ്പിസി പ്രോജക്ട് നടപ്പാക്കിവരികയാണ്. പിടിഎ പ്രസിഡന്‍റ് ഡി. ശിവദാസ് അധ്യക്ഷത വഹിച്ചു. എസ്പിസി അഡീഷനൽ ജില്ലാ നോഡൽ ഓഫീസർ ജി. സുരേഷ് കുമാർ, പ്രിൻസിപ്പൽ എസ്. ബീന,

എൻഎസ്എസ് പ്രോഗ്രാം ഓഫീസർ ജാസർ ജമീൽ, സീനിയർ അസസ്റ്റന്‍റ് ബിന്ദു ചന്ദ്രൻ, സ്റ്റാഫ് സെക്രട്ടറി ജി. മിനി, കമ്യൂണിറ്റി പോലീസ് ഓഫീസർമാരായ അനില അന്ന തോമസ്, തോമസ് ചാക്കോ എന്നിവർ പ്രസംഗിച്ചു.

ADVERTISEMENT

അടൂർ ഗോപാലകൃഷ്ണൻ‌ പ്രസ്താവന തിരുത്തണം: സി.ആർ. മഹേഷ്

പത്തനംതിട്ട: അടൂർ ഗോപാലകൃഷ്ണന്‌ എല്ലാവരും ബഹുമാനിച്ചിരുന്ന വ്യക്തിത്വമായിരുന്നുവെങ്കിലും പല സ്വർണനാണയങ്ങളും ഉരച്ചു നോക്കുമ്പോൾ ചെമ്പ് തെളിയുന്നതു പോലെയായി കഴിഞ്ഞദിവസം അദ്ദേഹം നടത്തിയ പ്രസ്താവനെയന്നും സി. ആർ. മഹേഷ് എംഎൽഎ. ബഹുഭൂരിപക്ഷം ആളുകളിലും മനോവേദന ഉളവാക്കിയ പ്രസ്താവന തിരുത്താൻ അദ്ദേഹം തയാറാകുകയാണ് വേണ്ടതെന്ന് മഹേഷ് പറഞ്ഞു. കലാകാരൻമാർക്ക് ഇടത് സർക്കാർ യാതൊരു സഹായങ്ങളും നൽകുന്നില്ലെന്നും അദ്ദേഹം പറഞ്ഞു. അവശത അനുഭവിക്കുന്ന നിരവധി പേരുണ്ട്. ആദ്യകാലത്ത് കെപിഎസി പോലുള്ള നാടക സമിതികൾ നാട്ടിൻ പുറങ്ങളിൽ നാടകം അവതരിപ്പിച്ചാണ് ഇടതുപക്ഷം അധികാരത്തിൽ വന്നത്. എന്നാൽ നാടക സമിതികളെയും കലാകാരൻമാരെയും ഇടതുപക്ഷം വഴിയിൽ ഉപേക്ഷിച്ചു. രാത്രിയിൽ കലാപരിപാടികൾ അവതരിപ്പിക്കുന്ന കലാകാരൻമാരുടെ പേരിൽപോലും പോലീസ് കേസുകൾ എടുത്തു കൊണ്ടിരിക്കുകയാണ്. സംസ്കാര സഹിതി അവതരിപ്പിച്ചു വരുന്ന മുച്ചീട്ടുകളിക്കാരന്‍റെ മകൾ എന്ന നാടകത്തിന് രാഷ്‌ട്രീയ കാരണത്താൽ അവാർഡ് തരാൻ സർക്കാർ തയാറായില്ലെന്നും അദ്ദേഹം പറഞ്ഞു. കോൺഗ്രസിന് സംസ്കാരിക മുഖം നൽകുകയെന്നതാണ് സംസ്കാര സാഹിതിയുടെ ലക്ഷ്യമെന്നും അദ്ദേഹം പറഞ്ഞു.

ക്യാപ്റ്റൻ രാജു സ്മാരക പ്രേക്ഷക കൂട്ടായ്മാ പുരസ്കാരം മണിയൻപിള്ള രാജുവിന്

പത്തനംതിട്ട: നടൻ ക്യാപ്റ്റൻ രാജുവിന്‍റെ പേരിൽ സിനിമ പ്രേക്ഷക കൂട്ടായ്മ ഏർപ്പെടുത്തിയ ആറാമത് പുരസ്കാരം നടനും നിർമാതാവുമായ മണിയൻപിള്ള രാജുവിന് നൽകുമെന്ന് സിനിമ പ്രേക്ഷക കൂട്ടായ്മ ക്യാപ്റ്റൻ രാജു പുരസ്കാര സമിതി സെക്രട്ടറി സലിം പി. ചാക്കോയും സിനിമ പ്രേക്ഷക കൂട്ടായ്മ ജില്ലാ കൺവീനർ പി. സക്കീർ ശാന്തിയും പത്രസമ്മേളനത്തിൽ അറിയിച്ചു. സിനിമയുടെ വിവിധ മേഖലകളിൽ നൽകിയ മികച്ച സാന്നിധ്യമാണ് മണിയൻപിള്ള രാജുവിനെ അവാർഡിനായി പരിഗണിച്ചത്. മെമന്‍റോയും അനുമോദന പത്രവും നൽകും. സെപ്റ്റംബർ 17നു വൈകുന്നേരം നാലിന് തിരുവനന്തപുരത്ത് ചേരുന്ന ചടങ്ങിൽ പുരസ്കാരം വിതരണം ചെയ്യുമെന്ന് ഭാരവാഹികൾ പറഞ്ഞു.

ഡിആർസി ടെസ്റ്റിംഗ് ലാബ് ഉദ്ഘാടനം

കോന്നി : റബർ ബോർഡ് ട്രേഡിംഗ് കമ്പനിയായ പമ്പാ റബേഴ്സ് ലിമിറ്റഡ് കോന്നിയിൽ ലാറ്റക്സ് ഡിആർസി നിർണയ ലബോറട്ടറി തുറന്നു. റബർ ബോർഡ് ജോയിന്‍റ് പ്രൊഡക്ഷൻ കമ്മീഷണർ കെ. ഷൈലജ ലാബ് ഉദ്ഘാടനം ചെയ്തു. യോഗത്തിൽ കമ്പനി സ്ഥാപക ഡയറക്ടർ സുരേഷ് കോശി അധ്യക്ഷത വഹിച്ചു. പമ്പാ റബേഴ്സ് മാനേജിംഗ് ഡയറക്ടർ എ.ആർ. ദിവാകരൻ സ്വാഗതവും കമ്പനി ഡയറക്ടർ പി.എസ്. ജോൺ കോന്നി നന്ദിയും പറഞ്ഞു. തെങ്ങുംകാവ് റബർ ഉത്പാദക സംഘം പ്രസിഡന്‍റ് ബാബു വർഗീസ്, പത്തനംതിട്ട റീജണൽ ഓഫീസിലെ അസിസ്റ്റന്‌ഖ് ഡെവലപ്മെന്‍റ് ഓഫീസർ സി.വി. ദീപ്തി എന്നിവർ പ്രസംഗിച്ചു. റബർകറ വിപണനത്തിൽ കർഷകർക്ക് ഉണ്ടാകാവുന്ന ഉണക്കത്തൂക്ക നിർണയത്തിലുള്ള നഷ്ടം പരിഹരിക്കാൻ ഈ ലാബ് ഉപകിക്കും. ശാസ്ത്രീയമായി ശേഖരിച്ച കറയുടെ സാംപിൾ ഈ ലാബിൽ കർഷകർക്ക് മിതമായ നിരക്കിൽ പരിശോധിക്കാനാകും. കോന്നി ആനക്കൂട് റോഡിൽ ഉള്ള പിസി കോപ്ലക്സ് കെട്ടിടത്തിലാണ് പമ്പാ റബേഴ്സ് ഓഫീസും ലാബും പ്രവർത്തിക്കുന്നത്. ഫോൺ: 8330083840.

സ്പെഷൽ സ്കൂൾ കായികമേള: കടമാൻകുളം സ്കൂളിന് ചാന്പ്യൻഷിപ്പ്

കൊടുമൺ: മണക്കാല ദീപ്തി സ്പെഷൽ സ്കൂൾ ആ‌ൻഡ് റിഹാബിലിറ്റേഷൻ സെന്‍ററിന്‍റെ വാർഷിക ദിനത്തോടനുബന്ധിച്ച് പത്തനംതിട്ട, കൊല്ലം, ആലപ്പുഴ ജില്ലകളിലെ എ- സോൺ സ്പെഷൽ സ്കൂളുകളെ പങ്കെടുപ്പിച്ചുകൊണ്ട് റവ. ഡോ. ടി .ജി കോശി മെമ്മോറിയൽ അത്‌ലറ്റിക് ചാമ്പ്യൻഷിപ്പ് കൊടുമൺ ഇഎംഎസ് പഞ്ചായത്ത് സ്റ്റേഡിയത്തിൽ നടന്നു. ജില്ലാ സാമൂഹികനീതി വകുപ്പ്‌ ഓഫീസർ ഷംല ബീഗം ഉദ്ഘാടനം നിർവഹിച്ചു. റവ. മാത്യു സി. വർഗീസ് അധ്യക്ഷത വഹിച്ചു. ചാന്പ്യൻഷിപ്പിൽ കടമാൻകുളം എംജിഎം ബഥനി സ്പെഷൽ സ്കൂൾ ജേതാക്കളായി. മണക്കാല ദീപ്തി സ്പെഷൽ സ്കൂൾ രണ്ടാം സ്ഥാനവും തെള്ളിയൂർ എംസിആർഡി സ്പെഷൽ സ്കൂൾ മൂന്നാം സ്ഥാനവും നേടി. ഏറത്ത് പഞ്ചായത്ത് സ്ഥിം സമിതി അധ്യക്ഷ മറിയാമ്മ തരകൻ സമാപന സമ്മേളനം ഉദ്ഘാടനം ചെയ്തു. റവ.ഡോ. പി. സണ്ണി അധ്യക്ഷത വഹിച്ചു. സമാപന സമ്മേളനത്തിൽ ജേതാക്കൾക്കുള്ള സമ്മാനദാനങ്ങൾ ഏലിയാമ്മ കോശി, ജോർജ് ബേബി തുടങ്ങിയവർ വിതരണം ചെയ്തു.

കേരളത്തിൽ നടക്കുന്നത് മേനിനടിക്കൽ മാത്രമെന്ന് ഗവർണർ രാധാകൃഷ്ണൻ

പത്തനംതിട്ട: കേരളം നമ്പര്‍ വണ്‍ സംസ്ഥാനമെന്നു മേനി നടിക്കുമ്പോഴും വിദ്യാഭ്യാസ, ആരോഗ്യ മേഖലകളില്‍ വിദേശ രാജ്യങ്ങളെയാണ് ആശ്രയിക്കുന്നതെന്ന് മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍. എന്‍ജിഒ സംഘിന്‍റെ 46-ാമത് സംസ്ഥാന സമ്മേളനത്തിന്‍റെ പ്രതിനിധി സമ്മേളനം പത്തനംതിട്ടയില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വിദ്യാഭ്യാസരംഗത്ത് മുന്നിലാണെന്നുപറയുമ്പോഴും യുവജനങ്ങള്‍ക്ക് തുടര്‍ വിദ്യാഭ്യാസത്തിനായി വിദേശരാജ്യങ്ങളിലേക്ക് പോകാനാണ് താത്പര്യം. ചികിത്സക്കായി വിദേശരാജ്യങ്ങളെ ആശ്രയിക്കുന്നവരും നിരവധിയാണ്. കേരളത്തില്‍ സര്‍ക്കാര്‍ ജീവനക്കാരും പലമേഖലയിലും തഴയപ്പെടുന്നു. സര്‍ക്കാര്‍ നടപ്പാക്കുന്ന പങ്കാളിത്ത പെന്‍ഷന്‍ ജീവനക്കാരന് സാമ്പത്തിക സുരക്ഷ നല്‍കുന്നില്ല. മറ്റു പല സംസ്ഥാനങ്ങളും പെൻഷന്‍ സമ്പ്രദായം പരിഷ്‌ക്കരിച്ചു നടപ്പാക്കുമ്പോഴും കേരളം അതിനു തയാറായിട്ടില്ലെന്ന് സി.പി. രാധാകൃഷ്ണൻ ചൂണ്ടിക്കാട്ടി. സംസ്ഥാന പ്രസിഡന്‍റ് ടി. ദേവാനന്ദന്‍ അധ്യക്ഷത വഹിച്ചു. സ്വാഗത സംഘം ചെയര്‍മാനും മുന്‍ ജില്ലാ കളക്ടറുമായ ടി.ടി.ആന്‍റണി മുഖ്യപ്രഭാഷണം നടത്തി. സംസ്ഥാന ജനറല്‍ സെക്രട്ടറി എസ്. രാജേഷ് സ്വാഗതവും സ്വാഗത സംഘം ജോയിന്‍റ് കണ്‍വീനര്‍ എസ്. ഗിരീഷ് നന്ദിയും പറഞ്ഞു. സാംസ്കാരിക സമ്മേളനം കുമ്മനം രാജശേഖരനും സെമിനാർ കെ. രാമൻപിള്ളയും ഉദ്ഘാടനം ചെയ്തു. വൈകുന്നേരം ജീവനക്കാരുടെ പ്രകടനവും നടന്നു. സമ്മേളനം ഇന്നു സമാപിക്കും.

കോഴ്സ് പൂർത്തിയായതിനു പിന്നാലെ ചെന്നീർക്കര ഐടിഐ വിദ്യാർഥികൾക്ക് നിയമന ഉത്തരവ്

പത്തനംതിട്ട: കോഴ്സ് പൂർത്തിയാക്കി തൊട്ടടുത്ത ദിവസം മുഴുവൻ വിദ്യാർഥികൾക്കും ജോലിക്കുള്ള നിയമന ഉത്തരവ് ലഭിച്ചതിന്‍റെ സന്തോഷത്തിലാണ് ചെന്നീർക്കര ഗവൺമെന്‍റ് ഐടിഐയിലെ ജീവനക്കാരും വിദ്യാർഥികളും. ഫുഡ് പ്രൊഡക് ക്ഷൻ ജനറൽ ട്രേഡിൽ, കോഴ്സ് പൂർത്തിയാക്കിയ 40 വദ്യാർഥികളെയാണ്, സംസ്ഥാനത്തിനകത്തും പുറത്തുംനിന്നുള്ള വിവിധ സ്റ്റാർ ഹോട്ടലുകളിലേക്ക് ഷെഫ് ജോലിക്കായി ക്ഷണിച്ചിട്ടുള്ളത്. തുടർച്ചയായ നാലാം തവണയാണ് ഫുഡ് പ്രൊഡക്ഷൻ ജനറൽ (എഫ്പിജി) ട്രേഡിൽ കോഴ്സ് പൂർത്തിയാക്കിയ ഉടൻ മുഴുവൻ വിദ്യാർഥികൾക്കും ജോലിക്കായി വിവിധ സ്ഥാപനങ്ങൾ ഓഫർ ലെറ്റർ നൽകുന്നത്. സാമ്പത്തികമായി ഏറെ പിന്നാക്കം നിൽക്കുന്ന കുടുംബങ്ങളിൽനിന്നടക്കമുള്ള വിദ്യാർഥികൾക്കാണ് പ്ലേസ്മെന്‍റ് ലഭിച്ചതെന്നും ചെങ്ങന്നൂർ ഐടിഐയുടെ നേട്ടത്തിൽ അഭിമാനമുണ്ടെന്നും പ്രിൻസിപ്പൽ ആർ. സ്നേഹലത പറഞ്ഞു. ചെന്നീർക്കര ഐടിഐ ഹാളിൽ നടന്ന യോഗം പിടിഎ പ്രസിഡന്‍റ് കെ.സുരേഷ്കുമാർ ഉദ്ഘാടനം ചെയ്തു. ഗ്രാമപഞ്ചായത്തംഗം കെ. സുരേഷ്കുമാറിന്‍റെ അധ്യക്ഷതയിൽ പ്രിൻസിപ്പൽ ആർ. സ്നേഹതേ നിയമന ഉത്തരവുകൾ കൈമാറി. ചടങ്ങിൽ ഗ്രൂപ്പ് ഇൻസ്ട്രക്ടർമാരായ കെ. അശോക് കുമാർ, ആർ. ഷൈലജ, ആർ. വിനോദ് , തിൽഷത്ത് ബീഗം, ബിപിൻ വി. നാഥ്, സി.കെ. ശ്രീജിത്ത്, രഞ്ജിനി റാം, അരുൺ ഷാജി, ന്യുവിൻ ഫ്രാൻസിസ് തുടങ്ങിയവർ പ്രസംഗിച്ചു.

ജില്ലാതല ശാസ്ത്ര പ്രശ്നോത്തരി

പത്തനംതിട്ട: സംസ്ഥാന യുവജന ക്ഷേമബോര്‍ഡിന്റെ ആഭിമുഖ്യത്തില്‍ സംഘടിപ്പിച്ച ജില്ലാതല ശാസ്ത്ര പ്രശ്നോത്തരിയുടെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം നിര്‍വഹിച്ചു. ജില്ലാ പഞ്ചായത്ത് ഹാളില്‍ നടന്ന മത്സരത്തില്‍ ഒന്നാംസ്ഥാനം അടൂര്‍ തോട്ടക്കോണം ജിഎച്ച്എസ്എസ് വിദ്യാര്‍ഥികളായ ഷിഹാദ് ഷിജുവും ആര്‍. കൃഷ്ണപ്രിയയും രണ്ടാംസ്ഥാനം തിരുവല്ല എസ്എന്‍വിഎസ്എച്ച്എസ് വിദ്യാര്‍ഥികളായ അയന മേരി ഏബ്രഹാമും രാധാ സരോജ് പ്രസാദും കരസ്ഥമാക്കി. ഒന്നാം സ്ഥാനത്തെത്തിയ ടീം സംസ്ഥാനതല മത്സരത്തില്‍ പങ്കെടുക്കും. വിജയികള്‍ക്ക് യഥാക്രമം 10,000, 5000 രൂപ, ട്രോഫി, സര്‍ട്ടിഫിക്കറ്റ് എന്നിവ പത്തനംതിട്ട നഗരസഭാ കൗണ്‍സിലര്‍ പി. കെ. അനീഷ് വിതരണം ചെയ്തു. ജില്ലയിലെ നിയോജകമണ്ഡലങ്ങളില്‍നിന്നു വിജയിച്ചവരാണ് മത്സരത്തില്‍ പങ്കെടുത്തത്. കുട്ടികളിലെ ശാസ്ത്ര ചരിത്രബോധവും യുക്തിചിന്തയും വര്‍ധിപ്പിക്കുന്നതിനും അന്ധവിശ്വാസങ്ങള്‍ക്കും അനാചാരങ്ങള്‍ക്കും എതിരേ ശാസ്ത്രാവബോധം വളര്‍ത്തുന്നതിനുമാണ് പ്രശ്നോത്തരി സംഘടിപ്പിച്ചത്. ജില്ലാ കോര്‍ഡിനേറ്റര്‍ ബിബിന്‍ ഏബ്രഹാം അധ്യക്ഷത വഹിച്ചു. ജില്ലാ യൂത്ത് പ്രോഗ്രാം ഓഫീസര്‍ ആര്‍. എസ്. ചന്്രികാദേവി, പത്തനംതിട്ട നഗരസഭാ കോ-ഓര്‍ഡിനേറ്റര്‍ അജിന്‍ വര്‍ഗീസ്, ക്വിസ് മാസ്റ്റര്‍ അഞ്ചു രാധ്, ബോര്‍ഡംഗങ്ങള്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു.

വീട്ടിൽ കയറി ദമ്പതികളെ ആക്രമിച്ചയാൾ അറസ്റ്റിൽ

വെച്ചൂച്ചിറ: വീട്ടിൽ അതിക്രമിച്ചുകയറി ദമ്പതികൾക്കുമേൽ പെട്രോൾ ഒഴിക്കുകയും ഹെൽമെറ്റ്‌ കൊണ്ട് ആക്രമിക്കുകയും ചെയ്ത കേസിൽ ഒരാളെ വെച്ചൂച്ചിറ പോലീസ് അറസ്റ്റ് ചെയ്തു. കൊല്ലമുള ചാത്തൻതറ പത്തായപ്പാറ പി.വി. മണി (50) യാണ് പിടിയിലായത്. കഴിഞ്ഞമാസം 20ന് രാത്രി 8.45നാണ് കൊല്ലമുള ചാത്തൻതറ കാഞ്ഞിരപ്പാറ വീട്ടിൽ ബിജിൻ കെ. ബിജുവിന്‍റെ വീട്ടിൽ അതിക്രമിച്ചുകയറിയ ഇയാൾ ദന്പതികളെ ആക്രമിക്കുകയായിരുന്നു. മുമ്പ് വീട്ടിൽ കയറി അതിക്രമം കാട്ടിയത് ചോദ്യം ചെയ്തതിന്‍റെ വിരോധം കാരണമാണ് വീട്ടിൽ കടന്ന് ബിജിന്‍റെയും ഭാര്യയുടെയും ദേഹത്ത് പെട്രോൾ ഒഴിച്ചത്. ഹെൽമറ്റ് ധരിച്ച് എത്തിയ ഇയാൾ ഇരുവരുടേയും ദേഹത്ത് പെട്രോൾ വീശി ഒഴിച്ചശേഷം, കൊല്ലുമെന്ന് ഭീഷണിപ്പെടുത്തി ഹെൽമറ്റ് കൊണ്ട് ബിജിന്‍റെ വലതുകൈക്ക് അടിച്ചു. പിടിച്ചുമാറ്റാൻ ശ്രമിച്ച ഭാര്യയെയും ആക്രമിച്ചു. എസ്ഐ വി. പി. സുഭാഷിന്‍റെ നേതൃത്വത്തിൽ നടന്ന അന്വേഷണത്തിലാണ് മണിയെ പിടികൂടിയത്.

പോലീസ് സ്റ്റേഷനുകളിലെത്തുന്നവർക്കായി പ്രത്യേക ഫീഡ് ബാക്ക് നന്പർ

പത്തനംതിട്ട: ആവലാതികൾക്കും ആവശ്യങ്ങൾക്കും അതിവേഗം പരിഹാരം ലഭിക്കുന്ന ഇടങ്ങളായി പോലീസ് സ്റ്റേഷനുകൾ മാറുകയാണെന്ന് ജില്ലാ പോലീസ് മേധാവി ആർ. ആനന്ദ്. സ്റ്റേഷനുകളിൽ വിവിധ ആവശ്യങ്ങൾക്കെത്തുന്നവരുടെ അവയുമായി ബന്ധപ്പെട്ട പ്രതികരണങ്ങൾ അറിയിക്കാൻ പുതുതായി ഏർപ്പെടുത്തിയ ഫോൺ നമ്പരിന്‍റെ ജില്ലാതല ഉദ്ഘാടനം പത്തനംതിട്ട പോലീസ് സ്റ്റേഷനിൽ നിർവഹിച്ചു പ്രസംഗി‌ക്കുകയായിരുന്നു ജില്ലാ പോലീസ് മേധാവി. 94979 08554 എന്ന പുതിയ മൊബൈൽ നമ്പർ പബ്ലിക് ഫീഡ്ബാക്ക് നമ്പർ ആയി ആരംഭിച്ചിരിക്കുന്നത്. പരാതിയുമായി സ്റ്റേഷനിൽ എത്തുന്നവർക്ക് പോലീസിൽനിന്നുള്ള അനുഭവവും പരാതികളിൽ എടുത്ത നടപടികളും മറ്റും അറിയിക്കാനുള്ള ക്യൂ ആർ കോഡ് സംവിധാനം ജില്ലയിലെ എല്ലാ സ്റ്റേഷനുകളിലും നിലവിലുണ്ട്. ഇതിന്‍റെ സ്വീകാര്യത ഉയർത്തുന്നതിനാണ് പുതിയ സംവിധാനം ഏർപ്പെടുത്തുന്നത്. സ്റ്റേഷനിൽ നിലവിലുള്ള ക്യൂ ആർ കോഡ് വിവിധ ആവശ്യങ്ങൾക്കായി എത്തുന്നവർക്ക് സ്കാൻ ചെയ്ത് സ്റ്റേഷനിലുണ്ടായ അനുഭവങ്ങൾ, നടപടികൾ സംബന്ധിച്ച അഭിപ്രായങ്ങൾ അതിൽ ലഭ്യമാക്കിയിട്ടുള്ള ഗൂഗ്‌ൾ ഷീറ്റിൽ രേഖപ്പെടുത്താൻ സാധിക്കും. വാട്സാപ്പ് സൗകര്യം ഉപയോഗിച്ചും സന്ദേശങ്ങൾ അയയ്ക്കാം. ജില്ലയിലെ എല്ലാ പോലീസ് സ്റ്റേഷനുകളിലും ക്യൂ ആർ കോഡിനോട് ചേർന്ന് പുതിയ നമ്പർ ഇന്ന് പതിപ്പിച്ചതായി ജില്ലാ പോലീസ് മേധാവി പറഞ്ഞു. പൊതുജനങ്ങൾക്കുള്ള സേവനം കൂടുതൽ വേഗത്തിൽ ലഭ്യമാക്കാനും ആധുനിക കാലത്തെ മാറ്റങ്ങൾ ഉൾക്കൊണ്ട് കൂടുതൽ കാര്യക്ഷമമായി പോലീസിന് പ്രവർത്തിക്കാനും, ജനങ്ങൾക്ക് സേവനങ്ങൾ ഉറപ്പാക്കാനും ഇതുപോലെയുള്ള നടപടികൾ ഉപകരിക്കുമെന്നും ജില്ലാ പോലീസ് മേധാവി ചൂണ്ടിക്കാട്ടി. പരിപാടിയിൽ അഡീഷണൽ എസ്പി പി. വി. ബേബി, പത്തനംതിട്ട ഡിവൈഎസ്പി എസ്. ന്യൂമാൻ, പോലീസ് ഇൻസ്‌പെക്ടർ കെ. സുനു കുമാർ തുടങ്ങിയവർ പങ്കെടുത്തു.

അധ്യാപികയുടെ ഭർത്താവിന്‍റെ ദാരുണാന്ത്യം: മാനേജർമാർ ധർണ നടത്തി

പത്തനംതിട്ട: ജില്ലയിലെ നാറാണംമൂഴി സെന്റ് ജോസഫ് സ്കൂളിലെ അധ്യാപികയുടെ ഭർത്താവിന്‍റെ ദാരുണാന്ത്യത്തിനു കാരണക്കാരായ ഉദ്യോഗസ്ഥരെ മാതൃകപരമായി ശിക്ഷിക്കണമെന്നും എയ്ഡഡ് സ്കൂൾ അധ്യാപക നിയമനങ്ങൾ അംഗീകരിക്കുന്നതിൽ പുലർത്തുന്ന അനാസ്ഥ അവസാനിപ്പിക്കണമെന്നും ആവശ്യപ്പെട്ടു കേരള പ്രൈവറ്റ് സ്കൂൾ മാനേജഴ്സ് അസോസിയേഷൻ ജില്ലാ കമ്മിറ്റിയുടെ പത്തനംതിട്ട വിദ്യാഭ്യാസ ജില്ലാ ഓഫീസ് പടിക്കൽ ധർണ നടത്തി. ഹൈക്കോടതി വിധിയും വിദ്യാഭ്യാസ മന്ത്രിയുടെ ഉത്തരവും നിർദ്ദേശങ്ങളും പൊതു വിദ്യാഭ്യാസ ഡയറക്ടറുടെ ഉത്തരവുകളും അവഗണിച്ചാണ് ഉദ്യോഗസ്ഥർ ഫയലുകൾ മാറ്റിവച്ച് അധ്യാപികയുടെ ശന്പള കുടിശിക വൈകിപ്പിച്ചെന്നും അക്കാരണത്താൽ ഒരു കുടുംബത്തിനുണ്ടായ നഷ്ടം നികത്താനാകാത്തതാണെന്നും ധർണ ഉദ്ഘാടനം ചെയ്ത സംസ്ഥാന ജനറൽ സെക്രട്ടറി മണി കൊല്ലം പറഞ്ഞു. പത്തനംതിട്ട ജില്ലാ പ്രസിഡന്‍റ് തോമസ് കോശി അധ്യക്ഷത വഹിച്ച ധർണയിൽ നാറാണംമൂഴി സെന്റ് ജോസഫ് സ്കൂൾ മാനേജർ ജോർജ് ജോസഫ് മുഖ്യപ്രഭാഷണം നടത്തി. ജില്ലാ സെക്രട്ടറി രാജേഷ് ആക്ലേത്ത്, ജില്ലാ ട്രഷറാർ എസ്.കെ. അനിൽകുമാർ, ഫാ. പി.വൈ. ജസൺ, വൈസ് പ്രസിഡന്‍റ് ദീപു ഉമ്മൻ, രക്ഷാധികാരി രാധാകൃഷ്ണൻ, ജോയിന്‍റ് സെക്രട്ടറി കെ.സി. ജേക്കബ് തുടങ്ങിയവർ പ്രസംഗിച്ചു. ധർണയെത്തുടർന്ന് മാനേജഴ്സ് അസോസിയേഷൻ ഭാരവാഹികൾ പത്തനംതിട്ട ഡിഇഒയെ സന്ദർശിച്ചു. സംഭവത്തിനു കാരണക്കാരായ എല്ലാ ജീവനക്കാരെയും മാതൃകാപരമായി ശിക്ഷിക്കാൻ നടപടിയുണ്ടാകണമെന്ന് അസോസിയേഷൻ ആവശ്യപ്പെട്ടു.

എൻഎസ്എസ് വോളണ്ടിയർമാർ കൃഷിമന്ത്രിയെ വസതിയിൽ സന്ദർശിച്ചു

പന്തളം: ഹരിത വിപ്ലവത്തിന്റെ പിതാവ് എം. എസ്. സ്വാമിനാഥന്‍റെ ജന്മശതാബ്ദി ദിനത്തിൽ തോട്ടക്കോണം ഗവ. ഹയർ സെക്കൻഡറി സ്കൂളിലെ എൻഎസ്എസ് വോളണ്ടിയർമാർ മന്ത്രി പി. പ്രസാദിനെ വസതിയില്‍ സന്ദര്‍ശിച്ചു. ജപ്പാനിലെ വ്യത്യസ്ത കൃഷിരീതിയിലുള്ള കൊക്കെഡാമ വിദ്യാർഥികൾ മന്ത്രിക്കു സമ്മാനിച്ചു. മണ്ണ്, ചാണകപ്പൊടി, ചകിരിച്ചോറ് എന്നിവ കുഴച്ച് പന്ത് രൂപത്തിലാക്കി അതിൽ ചെടി നട്ടതിനു ശേഷം ചുറ്റും പായൽ പൊതിഞ്ഞുവയ്ക്കുന്നതാണ് കൊക്കെഡാമ അഥവാ പായൽ പന്ത്. കൊക്കെഡാമ നിർമാണത്തെക്കുറിച്ചു ചോദിച്ചു മനസിലാക്കിയ മന്ത്രി കൃഷിരീതികളെക്കുറിച്ച് വളരെ വിശദമായി വോളണ്ടിയർമാരോട് സംസാരിച്ചു. സ്കൂളിലെ ഓഫീസ്, സ്റ്റാഫ് റൂം, ക്ലാസ് മുറികൾ എന്നിടങ്ങളിൽ അലങ്കാര സസ്യമായി കൊക്കെഡാമ വളർത്താനാണ് തീരുമാനം. എൻഎസ്എസ് പ്രോഗ്രാം ഓഫീസർ എം.എ. ജയദീപ്, അധ്യാപിക അഞ്ജു എസ്. ആനന്ദ്, വോളണ്ടിയർ ലീഡർമാരായ അലീന ജോൺ, അൽഫവാസ്, അനന്യ ഗോകുൽ, ബിസ്മി, ഹുസ്ന ജലീൽ, അബിൻ, അലൻ മോൻ, മിസാറ ഫാത്തിമ, ദീപക്, ആദിത്യൻ തുടങ്ങിയവർ പങ്കെടുത്തു.

വോട്ടര്‍പട്ടിക പുതുക്കല്‍: 57,057 അപേക്ഷകള്‍

പത്തനംതിട്ട: തദ്ദേശ തെരഞ്ഞെടുപ്പ് കരട് വോട്ടര്‍ പട്ടിക പ്രസിദ്ധീകരിച്ചതിനു ശേഷം പത്തനംതിട്ട ജില്ലയില്‍ പുതിയതായി വോട്ടര്‍ പട്ടികയില്‍ പേരു ചേര്‍ക്കാന്‍ 57,057 പേര്‍ ഓണ്‍ലൈനായി അപേക്ഷ സമര്‍പ്പിച്ചു. നിലവിലുള്ള പട്ടികയിലെ വിവരങ്ങള്‍ തിരുത്തുന്നതിന് 550 അപേക്ഷകളും ഒരിടത്തുനിന്ന് മറ്റൊരിടത്തേക്ക് പേരുമാറ്റത്തിന് 3944 അപേക്ഷകളുമാണ് ഇന്നലെ വൈകുന്നേരം വരെ ലഭിച്ചത്. 12 വരെ അപേക്ഷകൾ നൽകാനാകും.

കെപിസിസി സംസ്കാര സാഹിതി ക്യാന്പ് ഇന്നുമുതൽ

പത്തനംതിട്ട: കെപിസിസി കലാ സാംസ്‌കാരിക വിഭാഗമായ സംസ്‌കാര സാഹിതിയുടെ സംസ്ഥാന ക്യാമ്പിന് ഇന്നു ചരൽക്കുന്നിൽ തുടക്കം. "അ.. ആ... അറിവ്, ആനന്ദം' എന്ന പേരിൽ സംഘടിപ്പിക്കുന്ന വിചാരസദസ് ക്യാമ്പിന്‍റെ ഉദ്ഘാടനം രാവിലെ പത്തിന് കോൺഗ്രസ് പ്രവർത്തക സമിതിയംഗം രമേശ് ചെന്നിത്തല നിർവഹിക്കും. സംസ്കാര സാഹിതി ചെയർമാൻ സി.ആർ. മഹേഷ് എംഎൽഎ അധ്യക്ഷത വഹിക്കും. തുടർന്ന് സംഘടനാ ചർച്ചയിൽ ജനറൽ സെക്രട്ടറി ഷിജു സ്‌കറിയ സംഘടനാ റിപ്പോർട്ട് അവതരിപ്പിക്കും. വൈകുന്നേരം ആറിന് എഴുത്തുകാരൻ വിനോയ് മോമസ് വർത്തമാനകാലം എഴുത്തും ജീവിതവും എന്ന വിഷയത്തിൽ സെക്ഷനു നേതൃത്വം നൽകും. ഏഴിന് കെപിസിസി പ്രസിഡന്‍റ് സണ്ണി ജോസഫ് എംഎൽഎ പ്രസംഗിക്കും. സംസ്‌കാരിക സാഹിത മുൻ ചെയർമാൻ ആര്യാടൻ ഷൗക്കത്ത് എംഎൽഎയെ അനുമോദിക്കും. തുടർന്ന് കലാസന്ധ്യ അരങ്ങേറും. നാളെ രാവിലെ പത്തിന് പ്രതിപക്ഷ നേതാവ് വി.ഡി. സതീശൻ ക്യാന്പിൽ പ്രസംഗിക്കും. മഹാത്മാഗാന്ധി യൂണിവേഴ്‌സിറ്റി മുൻ വൈസ് ചാൻസലർ ഡോ. സിറിയക് തോമസ് സ്റ്റഡി ക്ലാസിന് നേതൃത്വം നൽകും. 11ന് യുഡിഎഫ് കൺവീനർ അടൂർ പ്രകാശ് എംപി, ആന്‍റോ ആന്‍റണി എംപി എന്നിവർ പ്രസംഗിക്കും.

പോക്സോ കേസ് പ്രതിക്ക് 34 വർഷം കഠിനതടവും പിഴയും

പത്തനംതിട്ട: പ്രായപൂർത്തിയാകാത്ത പെൺകുട്ടിയെ വീട്ടിൽ അതിക്രമിച്ചുകയറി പലതവണ ബലാത്സംഗം ചെയ്ത കേസിൽ പ്രതിക്ക് 34 വർഷം കഠിന തടവും 1,65,000 രൂപ പിഴയും വിധിച്ച് പോക്സോ കോടതി. കോട്ടാങ്ങൽ വയ്പൂര് കൊടുമുടിശേരിപ്പടിയിൽ ബിജു കെ. ആന്‍റണി (59) യെയാണ് ശിക്ഷിച്ചത്. സ്പെഷൽ ജഡ്ജി ടി. മഞ്ചിത്തിന്‍റേതാണ് വിധി. പെരുമ്പെട്ടി പോലീസ് 2023 രജിസ്റ്റർ ചെയ്ത കേസിലാണ് വിധി പുറപ്പെടുവിച്ചത്. 2022 ജൂണിലാണ് കേസിനാസ്പദമായ സംഭവങ്ങളുടെ തുടക്കം. പിന്നീടു പലതവണ ഇയാൾ വീട്ടിൽ അതിക്രമിച്ചു കടന്ന് കുട്ടിയെ ബലാത്സംഗത്തിനിരയാക്കുകയും ഭീഷണിപ്പെടുത്തുകയും ചെയ്തു. പോലീസ് ഇൻസ്പെക്ടർ എം. ആർ. സുരേഷാണ് കേസ് രജിസ്റ്റർ ചെയ്ത് അന്വേഷണം നടത്തി പ്രതിയെ അറസ്റ്റ് ചെയ്തതും കോടതിയിൽ കുറ്റപത്രം സമർപ്പിച്ചതും. പിഴ അടക്കാതിരുന്നാൽ ഒമ്പതര മാസത്തെ അധികകഠിന തടവ് അനുഭവിക്കണമെന്നും വിധിയിൽ പറയുന്നു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ റോഷൻ തോമസ് ഹാജരായി. കോടതി നടപടികളിൽ എഎസ്ഐ ഹസീന പങ്കാളിയായി.

ആറന്മുളയിൽ വഞ്ചിപ്പാട്ട് മത്സരം നാളെ മുതൽ

പത്തനംതിട്ട: ആറന്മുള പാർഥസാരഥി ക്ഷേത്രത്തിൽ വള്ളസദ്യക്കാലത്ത് തിരുവിതാംകൂർ ദേവസ്വം ബോർഡും ആറന്മുള പള്ളിയോടസേവാസംഘവും സംയുക്തമായി സംഘടിപ്പിക്കുന്ന ദേവസങ്കീർത്തന സോപാനം (വഞ്ചിപ്പാട്ട് മത്സരം) നാളെ ആരംഭിക്കുമെന്ന് ഭാരവാഹികൾ പത്ര സമ്മേളനത്തിൽപറഞ്ഞു. രാവിലെ 10.30 ന് സിനിമ പിന്നണി ഗായകൻ കാവാലം ശ്രീകുമാർ ഉദ്ഘാടനം ചെയ്യും. പള്ളിയോട സേവാസംഘം പ്രസിഡൻറ് കെ. വി. സാംബദേവൻ അധ്യക്ഷത വഹിക്കും. വ്യവസായി മഠത്തിൽ രഘു മുഖ്യാതിഥിയായിരിക്കും. 26 വരെ വഞ്ചിപ്പാട്ട് സോപാനം പ്രാഥമിക അവതരണം രാവിലെ 10 മുതൽ 1.30 വരെ ക്ഷേത്ര സന്നിധിയിൽ നടക്കും. വഞ്ചിപ്പാട്ട് സോപാനത്തിൽ വഞ്ചിപ്പാട്ട് അവതരിപ്പിക്കുന്നതിന് എല്ലാ പള്ളിയോട കരകൾക്കും അവസരമുണ്ട്. പ്രാഥമികമായി വഞ്ചിപ്പാട്ട് അവതരിപ്പിച്ച പള്ളിയോടക്കരകളെ ഉൾപ്പെടുത്തി മേഖലാ മേഖലാ മത്സരം നടത്തും. വിജയികൾക്ക് വ്യവസായി മഠത്തിൽ രഘു സമർപ്പിച്ച 52 പവൻ സ്വർണത്തിൽ നിർമിച്ച വഞ്ചിപ്പാട്ട് സോപാനം എവറോളിംഗ് സുവർണ ട്രോഫിയും 25000 രൂപ സമ്മാനവും നൽകും. രണ്ടാം സ്ഥാനത്തിന് 15000 രൂപയും മൂന്നാം സ്ഥാനത്തിന് 10,000 രൂപയും നൽകും. 27ന് കിഴക്കൻ മേഖലയുടെയും 28 ന് മധ്യമേഖലയുടെയും 29 ന് പടിഞ്ഞാറൻ മേഖലയുടെയും പ്രാഥമിക മത്സരം ദിവസം രാവിലെ 10 മുതൽ 11.30 വരെ നടക്കും. വിവിധ സെമിനാറുകളും സംഘടിപ്പിക്കും. 30 ന് രാവിലെ 10.30 ന് ഫൈനൽ മത്സരം നടക്കും. തുടർന്ന് സമാപന സദസ് സംവിധായകൻ വിനയൻ ഉദ്ഘാടനം ചെയ്യും. പ്രാഥമിക അവതരണത്തിൽ പങ്കെടുക്കുന്ന കരകളുടെ ടീമിന് 1000 രൂപ പ്രോത്സാഹനമായി നൽകും.ആറന്മുള ശൈലിയിലുള്ള വഞ്ചിപ്പാട്ടാണ് പാടേണ്ടത്. പ്രസിഡന്‍റ് കെ.വി. സാംബദേവൻ, ജനറൽ കൺവീനർ കെ. എസ്. സുരേഷ് മല്ലപ്പുഴശേരി, ജോ. കൺവീനർ ഡോ. സുരേഷ് ബാബു എന്നിവർ പത്രസമ്മേളനത്തിൽ പങ്കെടുത്തു.

മുന്പ് ഫിറ്റ്; വിവാദം മൂത്തപ്പോൾ അൺഫിറ്റ് : സർട്ടിഫിക്കറ്റ് കൊടുത്തവർതന്നെ തിരുത്തുന്നു

പത്തനംതിട്ട: ഫിറ്റ്നസ് സർട്ടിഫിക്കറ്റുകൾ നൽകിയ സ്കൂൾ, ആശുപത്രി കെട്ടിടങ്ങൾ പലതും അൺഫിറ്റെന്ന് രണ്ടു മാസത്തിനുള്ളിൽ തിരുത്തിയെഴുതുന്ന തിരക്കിലാണ് എൻജിനിയർമാർ. ജില്ലയിലെ തദ്ദേശ സ്ഥാപന, പൊതുമരാമത്ത് എൻജിനിയർമാരാണ് മുന്പെഴുതിയ റിപ്പോർട്ടുകൾ പലേടത്തും തിരുത്തുന്നത്. അധ്യയനവർഷം തുടങ്ങുന്നതിനു മുന്നോടിയായി പൊതുവിദ്യാലയങ്ങളിൽ ബന്ധപ്പെട്ട തദ്ദേശ സ്ഥാപന എൻജിനിയർമാർ പരിശോധന നടത്തി ഫിറ്റനസ് സർട്ടിഫിക്കറ്റ് നൽകിയ ശേഷമാണ് ജൂണിൽ ക്ലാസുകൾ ആരംഭിച്ചത്. ഇതേ കെട്ടിടങ്ങൾ പലതും ഇപ്പോൾ അൺഫിറ്റാണെന്ന സർട്ടിഫിക്കറ്റുകൾ നൽകിവരികയാണ്. തേവലക്കരയിലും സംസ്ഥാനത്തെ മറ്റു ചില സ്ഥലങ്ങളിലും സ്കൂളുകളുമായി ബന്ധപ്പെട്ടുണ്ടായ അപകടങ്ങളുടെ പശ്ചാത്തലത്തിൽ സർക്കാർ പ്രഖ്യാപിച്ച സുരക്ഷ ഓഡിറ്റിംഗിന്‍റെ ചുവടു പിടിച്ചാണ് ഇപ്പോഴത്തെ പരിശോധനയും ഫിറ്റനസ് റദ്ദാക്കലും നടക്കുന്നത്. 56 ഫിറ്റ്നസ് റദ്ദാകും പ്രാഥമിക പരിശോധനയിൽ ജില്ലയിൽ 56 സ്കൂൾ കെട്ടിടങ്ങളുടെ ഫിറ്റ്നസ് റദ്ദാകും. ഇതിൽ കാലപ്പഴക്കം മൂലം മാറ്റിയിട്ട കെട്ടിടങ്ങളും ഉൾപ്പെടുന്നു. സ്കൂൾ വളപ്പുകളിൽ പൊളിച്ചുനീക്കാതെ കിടക്കുന്ന ഇത്തരം കെട്ടിടങ്ങൾ അടിയന്തരമായി പൊളിക്കാനുള്ള നടപടി സ്വീകരിക്കണമെന്ന് കഴിഞ്ഞ ദിവസം ദുരന്ത നിവാരണ അഥോറിറ്റിയും ഉത്തരവിട്ടിരുന്നു. അടിയന്തരമായി പൊളിച്ചു നീക്കേണ്ട 17 സ്കൂൾ കെട്ടിടങ്ങളുടെ പട്ടിക വിദ്യാഭ്യാസ വകുപ്പ് പൊതുമരാമത്ത് വകുപ്പിനു കൈമാറിയിട്ടുണ്ട്. ഇവയിൽ ക്ലാസുകൾ നടക്കുന്നില്ലെന്ന് ഉറപ്പാക്കിയാണ് പട്ടിക നൽകിയിരിക്കുന്നത്. ജില്ലയിലെ 37 ആശുപത്രി കെട്ടിടങ്ങൾക്കും സുരക്ഷാ ഭീഷണിയുണ്ടെന്നാണ് റിപ്പോർട്ട്. പൊതു സ്ഥാപനങ്ങളുടെ കെട്ടിടങ്ങളുടെ സ്ഥിതി സംബന്ധിച്ചു പൊതുമരാമത്ത് വകുപ്പ് ഒരു പരിശോധനകൂടി നടത്തും. തദ്ദേശ സ്ഥാപന വകുപ്പും ദുരന്ത നിവാരണ അഥോറിറ്റിയും പരിശോധന നടത്തിവരികയാണ്. തെറ്റിദ്ധരിപ്പിച്ചു ജില്ലയിലെ സ്കൂൾ കെട്ടിടങ്ങളുടെ ഫിറ്റ്നസ് സംബന്ധിച്ചു കഴിഞ്ഞ മാസം അവസാനം കൂടിയ ജില്ലാ വികസന സമിതിയോഗത്തിൽ എംഎൽഎമാർ അടക്കം ചോദ്യം ഉന്നയിച്ചപ്പോൾ ജില്ലയിൽ ഫിറ്റ്നസ് ഇല്ലാതെ പ്രവർത്തിക്കുന്ന ഒരു സ്കൂൾ കെട്ടിടവും ഇല്ലെന്നായിരുന്നു മറുപടി. വിദ്യാഭ്യാസ വകുപ്പിൽ നിന്നും ലഭിച്ച മറുപടി ജില്ലാ കളക്ടർ ആവർത്തിക്കുകയും ചെയ്തു. പിന്നാലെ സുരക്ഷ ഓഡിറ്റിംഗിന് സർക്കാർ നിർദേശം ലഭിച്ചതിനു പിന്നാലെ നടന്ന പിശോധനയിലാണ് വ്യാപകമായി കെട്ടിടങ്ങളുടെ പിഴവുകൾ ശ്രദ്ധിക്കപ്പെട്ടത്. മേയ് അവസാനവാരം തദ്ദേശ സ്ഥാപന എൻജിനിയർമാർ പരിശോധന നടത്തി ഫിറ്റ്നസ് സർട്ടിഫിക്കറ്റ് നൽകിയതായി പറയുന്ന കെട്ടിടങ്ങൾ രണ്ടു മാസത്തിനുശേഷം എങ്ങനെ അൺഫിറ്റായെന്നതു സംബന്ധിച്ചു വിശദീകരണമില്ല. സ്കൂളുകളിൽ കെട്ടിടക്ഷാമം സർക്കാർ സ്കൂളുകളുടേതടക്കം പല കെട്ടിടങ്ങൾക്കും ഫിറ്റ്നസ് നഷ്ടമായതോടെ ക്ലാസുകൾ നടത്താൻ സ്ഥലമില്ലാത്ത അവസ്ഥയാണ് പലേടത്തും. ആറന്മുള ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിന്‍റെ പ്രധാന കെട്ടിടം കഴിഞ്ഞദിവസം അടച്ചിരുന്നു. കെട്ടിടത്തിലെ ക്ലാസുകൾ മുഴുവനായി ഓഡിറ്റോറിയത്തിലേക്കു പുനഃക്രമീകരിക്കുകയായിരുന്നു. എന്നാൽ, ഇതു കുട്ടികളുടെ പഠനത്തെ സാരമായി ബാധിക്കുന്നുണ്ട്. നിർമാണത്തിലിരിക്കുന്ന കെട്ടിടം പൂർത്തിയാക്കാൻ നടപടികളുണ്ടായാൽ ആറന്മുളയിലെ പ്രശ്നം തീരും. കെട്ടിടം പണി പൂർത്തിയായിട്ടും ഫിറ്റ്നസ് ലഭിക്കാത്തതിനാൽ തുറന്നു കൊടുക്കാനാകാത്ത കെട്ടിടങ്ങളും പല സ്കൂളുകൾക്കുമുണ്ട്. നൂറുവർഷത്തിലേറെ പഴക്കമുള്ളതാണ് ജില്ലയിലെ ഒട്ടുമിക്ക പ്രൈമറി സ്കൂളുകളുടെയും കെട്ടിടങ്ങൾ. ചുരുക്കം ചില സ്കൂളുകൾക്കു മാത്രമേ പുതിയ കെട്ടിടങ്ങളുണ്ടായിട്ടുള്ളൂ. ഒാടിട്ട പല കെട്ടിടങ്ങൾക്കും ഓരോ അവധിക്കാലത്തും അറ്റകുറ്റപ്പണി നടത്തിയാണ് പുതിയ അധ്യയന വർഷം ആരംഭിക്കുന്നത്. പൊതുവിദ്യാലയങ്ങളിലെ കുട്ടികളുടെ കുറവു കാരണം എയ്ഡഡ് സ്കൂൾ മാനേജർമാർ പലേടത്തും പുതിയ കെട്ടിടങ്ങൾ പണിയാൻ താത്പര്യം കാട്ടുന്നതുമില്ല.

ദീപികയുടേത് സാമൂഹിക പ്രതിബദ്ധതയുടെ മാധ്യമശൈലി: ഡിഎഫ്ഒ

ആവേശം വിതറി കളർ ഇന്ത്യ സീസൺ 4 റാന്നി: മലയാളത്തിലെ ആദ്യ ദിനപത്രമായ ദീപിക സ്വാതന്ത്ര്യദിനത്തിനു മുന്നോടിയായി കുട്ടികളെ അണിനിരത്തിയുള്ള കളർ ഇന്ത്യ മത്സരം സംഘടിപ്പിച്ചതിലൂടെ പത്രത്തിന്‍റെ സാമൂഹിക പ്രതിബദ്ധതയാണ് ഉയർത്തിക്കാട്ടിയിരിക്കുന്നതെന്ന് റാന്നി ഡിഎഫ്ഒ എൻ. രാജേഷ്. ദീപിക കളർ ഇന്ത്യ മത്സരത്തിന്‍റെ പത്തനംതിട്ട ജില്ലാതല ഉദ്ഘാടനം റാന്നി സെന്‍റ് മേരീസ് സെൻട്രൽ സ്കൂളിൽ നിർവഹിച്ചു പ്രസംഗിക്കുകയായിരുന്നു അദ്ദേഹം. കുട്ടികളിൽ ദേശീയബോധവും പൗരബോധവും ഉയർത്തിക്കൊണ്ടുവരുന്നതിനൊപ്പം ലഹരി പോലെയുള്ള സാമൂഹിക വെല്ലുവിളികൾക്കെതിരേയുള്ള പോരാട്ടം കൂടിയായി ഇത്തരം വേദികൾ ദീപിക ഉപയോഗിക്കുന്നതിനെയും ഡിഎഫ്ഒ അഭിനന്ദിച്ചു. കാലഘട്ടമേതായാലും പത്രവാർത്തകൾക്കും ദിനപത്രങ്ങൾ നൽകുന്ന സാമൂഹിക സന്ദേശങ്ങൾക്കും പ്രസക്തി നഷ്ടപ്പെടില്ലെന്നും അദ്ദേഹം ചൂണ്ടിക്കാട്ടി. ദീപിക ജനറൽ മാനേജർ (അഡ്മിനിസ്ട്രേഷൻ) ഫാ. രഞ്ജിത് ആലുങ്കൽ അധ്യക്ഷത വഹിച്ചു. സ്കൂൾ മാനേജർ ഫാ. കോശി മണ്ണിൽ, പ്രിൻസിപ്പൽ ഡോ. സില്ല ഏബ്രഹാം, ഫാ. വർഗീസ് കോശി തെക്കേമണ്ണിൽ, ദീപിക പത്തനംതിട്ട ബ്യൂറോ ചീഫ് ബിജു കുര്യൻ എന്നിവർ പ്രസംഗിച്ചു. സിറ്റഡൽ സ്കൂളിലെ കുട്ടികൾ ദേശഭക്തി ഗാനത്തോടൊപ്പം അവതരിപ്പിച്ച നൃത്തച്ചുവടുകളും ഏറെ മനോഹരമായി. പത്തനംതിട്ട ജില്ലയിലെ വിവിധ സ്കൂളുകളിലായി ആ‍യിരക്കണക്കിനു കുട്ടികളാണ് ഇന്നലെ കളർ ഇന്ത്യ മത്സരത്തിൽ പങ്കെടുത്തത്. എൽകെജി മുതൽ ഹയർ സെക്കൻഡറിതലം വരെയുള്ള വിദ്യാർഥികളെ പങ്കെടുപ്പിച്ചുകൊണ്ടുള്ള കളർ ഇന്ത്യ സീസൺ ഫോർ മത്സരം ഭാരതത്തിന്‍റെ 79 ാമത് സ്വാതന്ത്ര്യദിനത്തിനു മുന്നോടിയായാണ് ക്രമീകരിച്ചത്.

വയോജന സംരക്ഷണത്തിൽ പുതിയ പദ്ധതികൾ: കാതോലിക്കാ ബാവ

അടൂർ: സമൂഹത്തിനു ഗുണകരമായ നിലയിൽ ആതുര ശുശ്രൂഷാ സേവനമേഖലകളിലും വയോജനങ്ങളെ സംരക്ഷിക്കുന്നതിലും ഓർത്തഡോക്സ് സഭ കൂടുതൽ പ്രവർത്തനങ്ങൾ നടപ്പിലാക്കുമെന്ന് ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്കാ ബാവ. അടൂർ കടമ്പനാട് ഭദ്രാസനത്തിലെ ഇടവക പ്രതിനിധികളുടെ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഡോ. സഖറിയാസ് മാർ അപ്രേമിന്‍റെ അധ്യക്ഷതയിൽ യൂഹാനോൻ മാർ പോളിക്കാർപ്പോസ്, വൈദിക ട്രസ്റ്റി ഫാ.ഡോ. തോമസ് വർഗീസ് അമയിൽ, അല്മായ ട്രസ്റ്റി റോണി വർഗീസ്, അസോസിയേഷൻ സെക്രട്ടറി ബിജു ഉമ്മൻ, ഭദ്രാസന സെക്രട്ടറി ഫാ. കെ. പി. മാത്യൂസ് പ്ലാവിളയിൽ, ഇടവക വികാരി ഫാ. ജേക്കബ് കോശി,സഭമാനേജിംഗ് കമ്മിറ്റിയംഗം എ. കുഞ്ഞുമോൻ എന്നിവർ പ്രസംഗിച്ചു.

കുട്ടി ഗവേഷകനുള്ള പുരസ്‌കാരം സമ്മാനിച്ചു

പ്രമാടം: നേതാജി ഹയര്‍സെക്കന്‍ഡറി സ്‌കൂളിന്‍റെ ആദ്യ കുട്ടിഗവേഷക അവാര്‍ഡ് പ്ലസ് വണ്‍ സയന്‍സ് വിദ്യാര്‍ഥി അഭിഷേക് പി. നായര്‍ക്ക് സമ്മാനിച്ചു. സെന്‍റര്‍ ഓഫ് എക്‌സലന്‍സ് ഇന്‍ മൈക്രോബയോം ഡയറക്ടര്‍ ഡോ. സാബു തോമസ് ഫലകവും കാഷ് അവാര്‍ഡും സമ്മാനിച്ചു. കേരള സ്റ്റേറ്റ് ബയോഡൈവേഴ്‌സിറ്റി ബോര്‍ഡ് സംസ്ഥാനതലത്തില്‍ സംഘടിപ്പിച്ച പതിനേഴാമത് ചില്‍ഡ്രന്‍സ് ബയോഡൈവേഴ്‌സിറ്റി കോണ്‍ഗ്രസില്‍ റിസേര്‍ച്ച് പ്രോജക്ട് ഇനത്തില്‍ ഒന്നാം സ്ഥാനവും ശാസ്ത്രമേളയില്‍ സംസ്ഥാനതലത്തില്‍ എ - ഗ്രേഡ് നേടിയതും ശാസ്ത്ര ഗവേഷണ മേഖലയിലെ മികവുമാണ് അഭിഷേകിനെ അവാര്‍ഡിന് അര്‍ഹമാക്കിയത്. സംസ്ഥാന ചില്‍ഡ്രന്‍സ് ബയോഡൈവേഴ്‌സിറ്റി കോണ്‍ഗ്രസ് വിജയിയായ അക്ഷര വിനേഷിനേയും പരിപാടിയില്‍ അനുമോദിച്ചു.നേതാജി സോഷ്യോ ഇക്കോളജിക്കല്‍സ്റ്റഡി സെന്‍ററിന്‍റെ ആഭിമുഖ്യത്തില്‍ നടന്ന ചടങ്ങിന്‍റെ ഉദ്ഘാടനം ഡോ. സാബു തോമസ് നിര്‍വഹിച്ചു. നേതാജി സ്‌കൂള്‍ മാനേജര്‍ ബി. രവീന്ദ്രന്‍ പിള്ള അധ്യക്ഷത വഹിച്ചു. സ്കൂള്‍ അഡ്മിനിസ്‌ട്രേറ്റര്‍ ഡോ. ആര്‍. സുനില്‍കുമാര്‍, പ്രിന്‍സിപ്പല്‍ ബി. ആശ, പ്രധാനാധ്യാപിക സി. ശ്രീലത, അധ്യാപകരായ യമുന എസ്. നായര്‍, പി.എം. അമ്പിളി, അജി ഡാനിയേല്‍ തുടങ്ങിയവര്‍ പ്രസംഗിച്ചു.

ബിലീവേഴ്സ് ആശുപത്രിയിൽ മുലയൂട്ടൽ വാരാചരണം

തിരുവല്ല : നവജാത ശിശുക്കളുടെയും അമ്മയുടെയും ആരോഗ്യത്തിൽ മുലയൂട്ടലിനുള്ള പ്രാധാന്യത്തെക്കുറിച്ച് ബോധവത്കരണം നടത്തുന്നതിനായി ബിലീവേഴ്സ് ചർച്ച് മെഡിക്കൽ കോളജ് ആശുപത്രിയിലെ നിയോനേറ്റോളജി വിഭാഗത്തിന്‍റെ ആഭിമുഖ്യത്തിൽ ലോക മുലയൂട്ടൽ വാരാചരണം നടന്നു. പത്തനംതിട്ട ഡിഎംഒ ഡോ.എൽ. അനിതാകുമാരി വാരാചരണം ഉദ്ഘാടനം ചെയ്തു. ബിലീവേഴ്സ് ആശുപത്രി അസോസിയേറ്റ് ഡയറക്ടർ ഡോ. ജോൺ വല്യത്ത് അധ്യക്ഷത വഹിച്ചു. നിയോനേറ്റോളജി വിഭാഗം മേധാവി ഡോ. സുമിത അരുൺ , ബിലീവേഴ്സ് ആശുപത്രി മെഡിക്കൽ സൂപ്രണ്ട് ഡോ. ജോംസി ജോർജ്, ഒബ്സ്റ്റട്രിക്സ് ആൻഡ് ഗൈനക്കോളജി വിഭാഗം മേധാവി ഡോ. പാറ്റ്‌സി വർഗീസ്, ചീഫ് നഴ്സിംഗ് ഓഫീസർ മിനി സാറാ തോമസ് എന്നിവർ പ്രസംഗിച്ചു. ഡോ. ജൂലിയറ്റ് ജോൺസ് ക്ലാസ് നയിച്ചു.

കോന്നിയിൽ തെരുവുനായ്ക്കൾക്ക് പ്രതിരോധ കുത്തിവയ്പ്

കോന്നി: ഗ്രാമപഞ്ചായത്ത് പരിധിയിലെ തെരുവുനായ്ക്കൾക്ക് പേവിഷ പ്രതിരോധ കുത്തിവയ്പ് ആരംഭിച്ചു. 2025-26 ജനകീയാസൂത്രണ പദ്ധതിയുടെ ഭാഗമായാണ് കുത്തിവയ്പ്. പഞ്ചായത്തും മൃഗസംരക്ഷണവകുപ്പും ചേര്‍ന്നാണ് പ്രവര്‍ത്തനം ആരംഭിച്ചത്. കോന്നി മൃഗാശുപത്രിയില്‍ മൃഗസംരക്ഷണവകുപ്പ് ഉദ്യോഗസ്ഥര്‍ക്ക് വാക്‌സിനേഷന്‍ കിറ്റ് നല്‍കി ഗ്രാമപഞ്ചയാത്ത് പ്രസിഡന്‍റ് ആനി സാബു തോമസ് പദ്ധതി ഉദ്ഘാടനം ചെയ്തു. വികസനകാര്യ സ്ഥിരം സമിതി ചെയര്‍പേഴ്‌സണ്‍ സി. ടി. ലതിക കുമാരി അധ്യക്ഷത വഹിച്ചു. 10 വരെ കുത്തിവയ്പ് നടക്കും. ആദ്യദിനം 60 തെരുവുനായ്ക്കള്‍ക്ക് കുത്തിവയ്പ് എടുത്തതായി അധികൃതര്‍ അറിയിച്ചു.

ചാവറ ക്വിസ് മത്സരം: ബിലീവേഴ്സ് സ്കൂൾ ജേതാക്കൾ

തിരുവല്ല: 33-ാ മത് അഖില കേരള ചാവറ ക്വിസ് മത്സരം തിരുവല്ല ക്രൈസ്റ്റ് സെൻട്രൽ സ്‌കൂളിൽ നടന്നു. 46 ടീമുകൾ പങ്കെടുത്ത മത്സരത്തിൽ തിരുവല്ല ബിലീവേഴ്സ് റസിഡൻഷൽ സ്‌കൂൾ, വിജയികളായി. ചെത്തിപ്പുഴ പ്ലാസിഡ് വിദ്യാ വിഹാർ, തുമ്പമൺ സെന്‍റ് ജോൺസ് സ്‌കൂൾ എന്നിവർ രണ്ടും മൂന്നും സ്ഥാനങ്ങൾ കരസ്ഥമാക്കി. വിജയികൾക്ക് പ്രിൻസിപ്പൽ ഫാ. തോമസ് ചെമ്പിൽപറമ്പിൽ സിഎംഐ ,വൈസ് പ്രിൻസിപ്പൽ ഫാ. റോജിൻ തുണ്ടിപ്പറമ്പിൽ സിഎംഐ, പുന്നപ്ര കാർമൽ കോളജ് ഓഫ് എൻജിനിയറിംഗ് ആൻഡ് ടെക്നോളജി. ഡയറക്ടറും ക്വിസ് മാസ്റ്ററുമായ ഫാ. ജസ്റ്റിൻ ആലുക്കൽ എന്നിവർ ചേർന്ന് എവറോളിംഗ് ട്രോഫിയും കാഷ് അവാർഡും സമ്മാനിച്ചു.

നിരണം ചുണ്ടൻ നീരണിഞ്ഞു

തിരുവല്ല: 71-ാമത് നെഹ്റു ട്രോഫി മത്സരത്തിൽ പങ്കെടുക്കുന്നതിനു വേണ്ടിയുള്ള പരിശീലനത്തിനായി നിരണം ചുണ്ടൻ പന്പാനദിയിൽ നീരണിഞ്ഞു. ആധുനിക സൗകര്യങ്ങളോടെ പണി കഴിപ്പിച്ച ഡോക്കിൽ നിന്നും വള്ളസമിതി ഭാരവാഹികളായ റെജി അടിവാക്കൽ, ബിജു പറമ്പിൽ, രാജൻ കടപ്പിലാരിൽ, കെ.ജി ഗീവർഗീസ്, സാജൻ തോമസ്, ബോസ്, അഭിലാഷ് ആശാരി, തുടങ്ങിയവരും നിരണം ജലോത്സവ പ്രേമികളും ചേർന്ന് നിരണം ചുണ്ടന്‍റെ നീറ്റിലിറക്കൽ നിർവഹിച്ചു. വൈകുന്നേരം പ്രദർശനതുഴച്ചിൽ നടത്തി. 83 തുഴച്ചിൽക്കാരും അഞ്ച് അമരക്കാരും രണ്ട് ഇടിയനും അഞ്ച് താളക്കാരുമായി ഏറെ പുതുമകളോടെ 30 ന് നടക്കുന്ന നെഹ്റു ട്രോഫിയിൽ മത്സരിക്കും. സുനിൽ കൈനകരി, രാഹുൽ പ്രകാശ് എന്നീ പരീശീലകരുടെ നേതൃത്വത്തിലാണ് ടീമിനെ ഒരുക്കിയിരിക്കുന്നത്. ക്രൗൺ പ്ലാസ കൊച്ചിയുടെ ചെയർമാൻ കാട്ടുനിലത്ത് പുത്തൻപുരയിൽ കെ.ജി. ഏബ്രഹാം നിരണം ചുണ്ടന്‍റെ ക്യാപ്റ്റനായി ടീമിനെ നയിക്കും. പരിശീലനം കരുമാടിതോട്ടിൽ നടന്നുവരികയാണ്.

പുലി, കടുവ, കാട്ടാന... ഭീതി തുടരുന്നു

കൂടൽ പാക്കണ്ടത്തും പുലിക്കെണി സ്ഥാപിച്ചു കലഞ്ഞൂർ: ഗ്രാമപഞ്ചായത്തിൽ പുലിഭീതി നിലനിൽക്കുന്ന കൂടൽ പാക്കണ്ടത്തും കൂട് സ്ഥാപിച്ചു. പുലിയെ കുടുക്കാൻ കൂട് സ്ഥാപിക്കണമെന്ന ആവശ്യം പരിഗണിച്ച് വനംവകുപ്പ് ഉന്നത ഉദ്യോഗസ്ഥരുടെ നിർദേശപ്രകാരമാണ് കൂട് സ്ഥാപിച്ചത്. നേരത്തേ കലഞ്ഞൂർ പൂമരുതിക്കുഴിയിൽ കൂട് സ്ഥാപിച്ചിരുന്നു. രണ്ടിടത്തും കഴിഞ്ഞ ദിവസങ്ങളിൽ പുലിയെ കണ്ടിരുന്നു. രണ്ട് പുലികളാണ് ഇതെന്ന നിഗമനത്തിലാണ് കൂടുകൾ സ്ഥാപിച്ചിരുന്നതെന്നു വനപാലകർ പറഞ്ഞു. പാടം ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫീസർ അനിൽ കുമാറിന്‍റെ നേതൃത്വത്തിലുള്ള സംഘവും വനം വകുപ്പ് ദ്രുതകർമ സേനയും നാട്ടുകാരും ചേർന്നാണ് കൂട് സ്ഥാപിച്ചത്. കഴിഞ്ഞ ദിവസമാണ് പാക്കണ്ടം സ്വദേശി ബാബുവിന്‍റെ വീട്ടിലെ കോഴിക്കൂട്ടിൽ കയറിയ പുലി കോഴിയെ പിടിച്ചത്. ഇതിന്‍റെ സിസിടിവി ദൃശ്യം പുറത്തുവന്നതോടെ പുലിയാണെന്ന സ്ഥിരീകരണവുമുണ്ടായി. കഴിഞ്ഞ ഞായറാഴ്ച പട്ടാപ്പകൽ കലഞ്ഞൂർ പൂമരുതിക്കുഴിയിൽ വളർത്തു നായയെ ഓടിച്ച് പുലി വീടിനുള്ളിലേക്ക് കയറിയതിനു പിന്നാലെ ഭീതിജനകമാണ് പ്രദേശത്തെ അവസ്ഥ. ജനങ്ങളുടെ ഭീതി അകറ്റാൻ കൂട് സ്ഥാപിച്ചു പുലിയെ പിടിക്കാനാണ് വനംവകുപ്പ് ലക്ഷ്യമിടുന്നത്. ജനവാസ മേഖലയിൽ കലഞ്ഞൂർ മേഖലയിൽ വന്യമൃഗങ്ങളുടെ ആക്രമണം സ്ഥിരമായിരിക്കുകയാണ്. പുലി ഭീതി നിലനിൽക്കുന്നതിനിടെയാണ് കാട്ടാനയും കഴിഞ്ഞദിവസം ഇറങ്ങിയത്. പൂമരുതിക്കുഴിയിലാണ് കാട്ടാന വീടിന്‍റെ ജനൽ തകർത്തത്. കൂടൽ ഇഞ്ചപ്പാറയിൽ മുന്പ് വനംവകുപ്പ് സ്ഥാപിച്ച കെണിയിൽ രണ്ടുതവണ പുലി കുടുങ്ങിയിരുന്നു. അരുവാപ്പുലം, കലഞ്ഞൂർ ഗ്രാമപഞ്ചായത്തുകളിലെ വിവിധ പ്രദേശങ്ങളിൽ 2022 മുതൽ 2024 വരെയുള്ള കാലഘട്ടങ്ങളിൽ നിരവധി തവണയാണ് വളർത്തുമൃഗങ്ങൾക്കു നേരേ പുലിയുടെ ആക്രമണം ഉണ്ടായിരുന്നു. നിർബാധം പുലി പുലിശല്യം രൂക്ഷമായ സാഹചര്യത്തിൽ കൂടൽ ഇഞ്ചപ്പാറയിൽ 2023 സെപ്റ്റംബർ 21 നാണ് വനം വകുപ്പ് സ്ഥാപിച്ച കെണിയിൽ പുലി ആദ്യം കുടുങ്ങിയത്. 2022 നവംബർ 21 നാണ് കലഞ്ഞൂർ കുടപ്പാറയിൽ പുലി ആടിനെ പിടികൂടിയത്. തുടർന്ന് പഞ്ചായത്തിന്‍റെ വിവിധ പ്രദേശങ്ങളിൽ പുലിയെ കണ്ടതായി നാട്ടുകാർ അറിയിച്ചതിനെത്തുടർന്ന് ആധുനിക നിരീക്ഷണ കാമറകൾ ഉപയോഗിച്ചു പല സ്ഥലങ്ങളിലും തെരച്ചിൽ നടത്തിയിരുന്നു. ഇതിനു തൊട്ടുപിന്നാലെയാണ് പൂച്ചക്കുളത്ത് പുലി വളർത്തുനായയെ പിടിച്ചത്. പിന്നീട് കൂടൽ ഇഞ്ചപ്പാറയിൽ പുലി ആടിനെ കടിച്ചു കൊന്നു. ഇതിനു തൊട്ടുപിന്നാലെയാണ് മുറിഞ്ഞകല്ലിലെ വീട്ടിൽ നിന്നും പുലിയുടെതെന്ന് കരുതുന്ന സിസിടിവി ദൃശ്യങ്ങൾ ലഭിച്ചത്. ഒന്നിൽ കൂടുതൽ അതിരുങ്കൽ, പോത്തുപാറ, ഇഞ്ചപ്പാറ, പൂമരുതിക്കുഴി തുടങ്ങിയ നിരവധി സ്ഥലങ്ങളിൽ പിന്നീട് പുലിയുടെ സാന്നിധ്യം സ്ഥിരീകരിച്ചു. 2023 സെപ്റ്റംബർ 21 ന് കൂടൽ ഇഞ്ചപ്പാറയിൽ വനം വകുപ്പ് സ്ഥാപിച്ച കൂട്ടിൽ പുലി കുടുങ്ങി. പുലി കുടുങ്ങി എന്ന ആശ്വാസത്തിൽ ജനങ്ങൾ കഴിയുന്നതിനിടെ പിന്നീട് പല സ്ഥലങ്ങളിലും പുലിയുടെ സാന്നിധ്യം സ്ഥിരീകരിച്ചത്. ഒരു മാസംമുന്പ് കൂടൽ ഇഞ്ചപ്പാറയിൽ പാറപ്പുറത്ത് കയറി നിൽക്കുന്ന പുലിയുടെ ദൃശ്യങ്ങൾ നാട്ടുകാർ മൊബൈൽ കാമറയിൽ പകർത്തി. ഇതിനു മുന്പ് സംസ്ഥാന പാത മുറിച്ചു കടക്കുന്ന പുലിയെ കണ്ടതായും പറയുന്നു. രണ്ട് പഞ്ചായത്തുകളിലുമായി ഏകദേശം ഇരുപതിൽ അധികം ആടുകളെയാണ് പുലി അകത്താക്കിയത്. വർഷങ്ങളായി പുലിയുടെ ആക്രമണത്തിൽ വളർത്തുമൃഗങ്ങൾ നഷ്‌ട്ടപ്പെട്ടവരും അനവധിയാണ്. തണ്ണിത്തോട് പൂച്ചക്കുളത്തും പുലിയുടെ ആക്രമണത്തിൽ വളർത്തുമൃഗങ്ങൾ നഷ്ടപ്പെട്ടിട്ടുണ്ട്. ഡ്രോൺ പരിശോധന നടത്തും പുലി സാന്നിധ്യമുള്ള കൂടൽ, കലഞ്ഞൂർ മേഖലകളിൽ ഡ്രോൺ നിരീക്ഷണം നടത്താൻ സ്ഥലം സന്ദർശിച്ച കെയു. ജനീഷ് കുമാർ എംഎൽഎ നിർദേശം നൽകി. ഇന്നലെത്തന്നെ നിരീക്ഷണം നടത്താനായിരുന്നു നിർദേശം. കാട്ടാന സ്ഥിരമായിറങ്ങുന്ന മേഖലകളിൽ വനം, പോലീസ് സേനാംഗങ്ങളും നാട്ടുകാരും ചേർന്നു സംയുക്ത പരിശോധന നടത്തണം. കാട്ടാനയെ കാട്ടിലേക്കു തുരത്താൻ കഴിയുന്ന തരത്തിലാകണം പരിശോധനകളെന്ന് എംഎൽഎ നിർദേശിച്ചു. മുന്പ് കോന്നിയുടെ വിവിധ ഭാഗങ്ങളിൽ ഇത്തരത്തിൽ കാട്ടാനയെ തുരത്താൻ നീക്കങ്ങളുണ്ടായതാണ്. കാടിറങ്ങുന്ന വന്യമൃഗങ്ങൾക്കു ജനവാസ മേഖലയോടു ചേർന്ന പ്രദേശങ്ങളിൽ താവളം ഉറപ്പിക്കാൻ കഴിയുന്ന വിധത്തിൽ വളർന്നു നിൽക്കുന്ന കാടും പടർപ്പുകളും അടിയന്തരമായി നീക്കം ചെയ്യാനും നിർദേശം നൽകിയിട്ടുണ്ട്. വന്യമൃഗങ്ങളെ കാടിനുള്ളിലേക്കുതന്നെ തിരികെ കയറ്റിയെങ്കിൽ മാത്രമേ ജനങ്ങളുടെ ഭീതി ഒഴിയുകയുള്ളൂവെന്ന് എംഎൽഎ ചൂണ്ടിക്കാട്ടി. കല്ലേലി റോഡിൽ വീണ്ടും കാട്ടാന കോന്നിയിൽനിന്നു കൊക്കാത്തോട്, അച്ചൻകോവിൽ ഭാഗത്തേക്കള്ള യാത്രയിൽ വന്യമൃഗങ്ങളുടെ സാന്നിധ്യം പതിവായതോടെ ആളുകൾ ഭീതിയിലായി. കഴിഞ്ഞ ദിവസം കല്ലേലി വനം ചെക്ക് പോസ്റ്റ് കഴിഞ്ഞുള്ള ഭാഗത്ത് വൈകുന്നേരം കാട്ടാനക്കൂട്ടം ഇറങ്ങിയതോടെ യാത്രക്കാർ വഴിയിൽ കുടുങ്ങി. കാട്ടാനകളുടെ മുന്പിൽനിന്നു തലനാരിഴയ്ക്കാണ് കഴിഞ്ഞയിടെ ഇരുചക്രവാഹന യാത്രക്കാർ അടക്കം ഈ റൂട്ടിൽ രക്ഷപ്പെട്ടത്. കൊക്കാത്തോട്ടിൽ കടുവ കൊക്കാത്തോട് വന മേഖലയിൽ പുലിയും ആനയും മാത്രമല്ല കടുവയുടെ സ്ഥിരമായ ഭീഷണിയുമുണ്ട്. പശു, ആട് എന്നിവയെ ലക്ഷ്യമിട്ടാണ് കടുവ എത്തുന്നത്. വനത്തോടു ചേർന്ന പ്രദേശമായതിനാൽ ഇവ കാടു കയറാതെ ജനവാസ മേഖലയോടു ചേർന്ന സ്ഥലങ്ങളിൽ തങ്ങുകയാണ്. കഴിഞ്ഞ രണ്ടാഴ്ചക്കിടെ കൊക്കാത്തോട് ഭാഗത്തു നിരവധി പശുക്കളും വളർത്തുനായ്ക്കളും വന്യമൃഗങ്ങൾക്ക് ഇരകളായെന്നു ജോർജ് വർഗീസ് പറഞ്ഞു. കൃഷിയിടങ്ങൾക്കു സംരക്ഷണം ഒരുക്കി സ്ഥാപിച്ചിട്ടുള്ള സോളാർ വേലികൾ കാട്ടാന വ്യാപകമായി നശിപ്പിച്ചിട്ടുണ്ട്. ഞങ്ങൾ രാത്രി ഉറങ്ങാറില്ല...... ഞങ്ങൾ രാത്രി ഉറങ്ങാറില്ല, ചെറിയ ശബ്ദം പോലും പേടിപ്പെടുത്തുന്നു. മക്കളെ സ്കൂളിലേക്ക് അയയ്ക്കാൻ പോലും ഭയമാണ്. രാത്രി ലൈറ്റുകളും അലാറങ്ങളും വച്ചിട്ടും കാട്ടാനകൾ പിന്തിരിയുന്നില്ല. കലഞ്ഞൂർ പൂമരുതിക്കുഴിയിലെത്തിയ കെ.യു. ജനീഷ് കുമാർ എംഎൽഎയ്ക്കും വനപാലകർക്കും മുന്പിൽ പ്രദേശവാസികൾ ദുരിതം വിവരിച്ചു. വന്യമൃഗങ്ങൾ ജീവനുതന്നെ ഭീഷണിയായി മാറിയിരിക്കുകയാണ്. പുലി വീടിനുള്ളിൽ കയറുന്നത് ചിന്തിക്കാൻ പോലുമാകാത്ത കാര്യമാണ്. എന്നാൽ, കലഞ്ഞൂരിൽ അതുമുണ്ടായെന്നു നാട്ടുകാർ ചൂണ്ടിക്കാട്ടി. കൃഷിനാശവും ആയിരക്കണക്കിനു രൂപയുടെ നഷ്ടവും ജനങ്ങളെ സാമ്പത്തികമായി തളർത്തിയിരിക്കുകയാണ്. നിലവിൽ വന്യജീവി നിയന്ത്രണത്തിനായി വനം വകുപ്പ് ചില അടിയന്തര നടപടി സ്വീകരിച്ചിട്ടുണ്ടെങ്കിലും ഇതു മതിയായതല്ലെന്ന് നാട്ടുകാരുടെ പ്രതികരണം. ജനപ്രതിനിധികളും പ്രശ്നം സർക്കാർ തലത്തിൽ ഉയർത്തിയിട്ടുണ്ട്. വനം വകുപ്പ് കാര്യക്ഷമമായി ഇടപെടണമെന്നാണ് ആവശ്യം. കാട്ടാന ഇറങ്ങുന്നതു തടയാൻ സൗരോർജ വേലികൾ, ട്രഞ്ചുകൾ ഇവ സ്ഥാപിക്കുക, പുലി, കടുവ തുടങ്ങിയവയുടെ സാന്നിധ്യം സ്ഥിരമായി നിരീക്ഷിക്കാൻ ഡ്രോൺ സംവിധാനത്തോടെ വനംവകുപ്പ് പട്രോളിംഗ് സ്ഥിരമാക്കുക, വന്യമൃഗങ്ങൾ കാടിറങ്ങുന്നതു തടയാൻ സ്ഥിരമായ സംവിധാനമുണ്ടാക്കുക തുടങ്ങിയ ആവശ്യങ്ങളാണ് പ്രദേശവാസികൾ ഉന്നയിച്ചത്. കാട്ടാനയും കാട്ടുപന്നിയും വരുത്തുന്ന നാശനഷ്ടങ്ങൾക്കു പ്രത്യേക നഷ്ടപരിഹാര പാക്കേജ് വേണമെന്നാവശ്യവുമുണ്ടായി.

ബൈക്കിലെത്തി വയോധികയുടെ മാല അപഹരിച്ചയാൾ അറസ്റ്റിൽ

ആറന്മുള: കോഴഞ്ചേരിയിൽ കഴിഞ്ഞ ഞായറാഴ്ച പള്ളിയില്‍ പോയശേഷം തിരികെ വീട്ടിലേക്ക് നടന്നുപോയ വയോധികയെ ആക്രമിച്ച് മാല കവര്‍ന്ന കേസില്‍ ഒരാളെ ആറന്മുള പോലീസ് അറസ്റ്റ് ചെയ്തു. റാന്നി പഴവങ്ങാടി കള്ളിക്കാട്ടില്‍ വീട്ടില്‍ ബിനു തോമസാണ് (34) അറസ്റ്റിലായത്. പത്തനംതിട്ട, ആലപ്പുഴ ജില്ലകളിലായി നിരവധി മോഷണക്കേസുകളിൽ പ്രതിയാണ് ബിനുവെന്ന് പോലീസ് പറഞ്ഞു. കോഴഞ്ചേരി മേലെപ്പീടികയില്‍ ഉഷാ ജോര്‍ജി(72)ന്‍റെ കഴുത്തില്‍ നിന്നു മൂന്നു പാവനോളം തൂക്കം വരുന്ന മാല പൊട്ടിച്ചുകടന്ന ഇയാളെ പത്തനംതിട്ട അമല ബാറിനു സമീപമുള്ള ലോഡ്ജില്‍ നിന്നു കഴിഞ്ഞ ദിവസമാണ് കസ്റ്റഡിയിലെടുത്തത്. മൂന്നിന് രാവിലെ 7.30നാണ് സംഭവം. ബൈക്കിലെത്തിയ ഇയാൾക്കൊപ്പം ഉണ്ടായിരുന്ന രണ്ടാമനെ പിടികൂടാനുണ്ട്. എസ്ഐ വിഷ്ണു, സിപിഒ മനുകുമാര്‍ എന്നിവർ അന്വേഷണത്തിന് നേതൃത്വം നല്‍കുന്നു.

മോട്ടോര്‍ പമ്പും വയറും മോഷ്ടിച്ചയാള്‍ പിടിയില്‍

പത്തനംതിട്ട: വള്ളിക്കോട് ഞക്കുനിലം കൊച്ചാലുമ്മൂടിലുള്ള റിംഗ് സൈറ്റിലെ റൂമില്‍ സൂക്ഷിച്ച മോട്ടോര്‍ പമ്പും വയറും മോഷ്ടിച്ച കേസിൽ കോന്നി പൂവന്‍പാറ പുതുവല്‍ പുത്തന്‍ വീട്ടില്‍ ഷംനാസ് സലിം (38) അറസ്റ്റിൽ. കഴിഞ്ഞ ജൂലൈ 19 നു ഉച്ചയ്ക്കാണ് മോഷണം നടന്നത്. തെളിവെടുപ്പില്‍ ഓമല്ലൂര്‍ കുളം ജംഗ്ഷനിലെ ആക്രിക്കടയില്‍ നിന്നു മോട്ടോര്‍ കണ്ടെടുത്തു.ഇയാള്‍ സഞ്ചരിച്ച സ്‌കൂട്ടറും പിടിച്ചെടുത്തു. മോട്ടോറിന്‍റെ വയറും മറ്റും കണ്ടെടുക്കേണ്ടതുണ്ട്. 2022 ല്‍ കോവളം പോലീസ് രജിസ്റ്റര്‍ ചെയ്ത രണ്ട് പോക്‌സോ കേസുകളില്‍ പ്രതിയാണ് ഇയാളെന്നു പോലീസ് പറഞ്ഞു. റിമാൻഡിലായ ഇയാളെ കസ്റ്റഡിയില്‍ വാങ്ങി കൂടുതല്‍ ചോദ്യം ചെയ്യും. പത്തനംതിട്ട ഡിവൈഎസ്പി എസ്.ന്യൂമാന്‍റെ മേല്‍നോട്ടത്തിലാണ് അന്വേഷണം നടന്നത്. പോലീസ് ഇന്‍സ്പെക്ടര്‍ കെ.സുനുമോന്‍റെ നേതൃത്വത്തിലായിരുന്നു ഷംനാസിന്‍റെ അറസ്റ്റ് രേഖപ്പെടുത്തിയത്.

കോടതിയില്‍നിന്നു രക്ഷപ്പെട്ട പോക്‌സോ പ്രതി പിടിയില്‍

പത്തനംതിട്ട: കോടതിയില്‍നിന്നു ഓടിരക്ഷപ്പെട്ട പോക്സോ കേസിലെ പ്രതിയായ യുവാവ് അറസ്റ്റിൽ. മെഴുവേലി ആയത്തില്‍ സനു നിവാസില്‍ സുനു സജീവനാണ് (28) പത്തനംതിട്ട പോലീസിന്‍റെ പിടിയിലായത്. പത്തനംതിട്ട പോക്സോ കോടതിയില്‍ നിന്നും കഴിഞ്ഞമാസം 27ന് ഇയാള്‍ക്കെതിരേ വാറണ്ട് ഉത്തരവായിരുന്നു. തുടര്‍ന്ന്, ഇയാള്‍ കോടതിയില്‍ ഹാജരായി. കോടതി റിമാന്‍ഡ് ചെയ്തതറിഞ്ഞു ഓടി രക്ഷപ്പെടുകയായിരുന്നു. ഇലവുംതിട്ട പോലീസ് സ്റ്റേഷനില്‍ 2022ല്‍ രജിസ്റ്റര്‍ ചെയ്ത് അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ച പോക്സോ കേസിലെ പ്രതിയാണ് സുനു.

അടൂർ ജനറൽ ആശുപത്രിയിൽ വനിതാ ഡോക്ടറെ ഭീഷണിപ്പെടുത്തിയെന്നു പരാതി

അടൂർ: ജനറൽ ആശുപത്രിയിൽ വനിതാ ഡോക്ടർക്കു നേരേ രോഗിക്കൊപ്പം വന്നവരുടെ അസഭ്യവർഷവും കൈയേറ്റ ശ്രമവും. പരാതിയുടെ അടിസ്ഥാനത്തിൽ പോലീസ് അന്വേഷണം തുടങ്ങി. കഴിഞ്ഞ അഞ്ചിന് രാത്രിയിലാണ് സംഭവം. കഴിഞ്ഞ അഞ്ചിനു വൈകുന്നേരം അപകടത്തിൽ പരിക്കേറ്റ് ഗുരുതരാവസ്ഥയിൽ ആശുപത്രിയിൽ കൊണ്ടുവന്ന രോഗിയെ പ്രാഥമിക ചികിത്സ നൽകി റഫർ ചെയ്ത ശേഷമാണ് ഡോക്ടർക്കു നേരെ കൈയേറ്റ ശ്രമമുണ്ടായത്. എന്നാൽ രോഗിയെ കൊണ്ടുപോകാൻ 108 ആംബുലൻസ് ലഭിക്കാത്തതിനാൽ ഒപ്പം ഉണ്ടായിരുന്നവർ ഡോക്ടറോട് ആക്രോശിക്കുകയും കൈയേറ്റശ്രമം നടത്തുകയും ചെയ്തതെന്നാണ് പരാതി. അത്യാഹിത വിഭാഗത്തിൽ ഡ്യൂട്ടിയിലായിരുന്ന ഡോ. അഖിലയ്ക്കുനേരേയാണ് കൈയേറ്റശ്രമമുണ്ടായത്. കെജിഎംഒഎ പ്രതിഷേധിച്ചു അടൂർ ജനറൽ ആശുപത്രി ഡ്യൂട്ടിയിലുണ്ടായിരുന്ന വനിതാ ഡോക്ടറെ കൈയേറ്റശ്രമം നടത്തിയതിൽ കേരള ഗവൺമെന്‍റ് മെഡിക്കൽ ഓഫീസേഴ്സ് അസോസിയേഷൻ പ്രതിഷേധിച്ചു. തിരക്കിനിടയിലും തന്‍റെ ഡ്യൂട്ടി കൃത്യമായി നിർവഹിച്ച ഒരു വനിതാ ഡോക്ടർക്കെതിരേ ആക്രമണം ഉണ്ടാകുകയായിരുന്നു. സംഭവത്തിൽ സംഘടന പോലീസിൽ പരാതി നൽകി. ആശുപത്രി സംരക്ഷണ നിയമപ്രകാരം കുറ്റം ചെയ്തവർക്കെതിരേ എത്രയും വേഗം നടപടിയെടുക്കണമെന്ന് കെജിഎംഒഎ ആവശ്യപ്പെട്ടു.

ഭാര്യയെ മർദിച്ച ഭര്‍ത്താവ് അറസ്റ്റില്‍

പത്തനംതിട്ട: മദ്യപിച്ചെത്തി ഭാര്യയെ ശാരീരികമായും മാനസികമായും നിരന്തരം പീഡിപ്പിച്ച ഭര്‍ത്താവിനെ കൂടല്‍ പോലീസ് അറസ്റ്റ് ചെയ്തു. കൂടല്‍ കടുവണ്ണൂര്‍ നിരവത്ത് വീട്ടില്‍ ജോര്‍ജ് മൈക്കിളാണ് (50) പിടിയിലായത്. 2009 ലായിരുന്നു വിവാഹം നടന്നത്. 2011 മേയ് മുതല്‍ സംശയത്തിന്‍റെ പേരില്‍ നിരന്തരം മദ്യപിച്ചുവന്ന് ദേഹോപദ്രവം ഏല്പിച്ചിരുന്നതായി പറയുന്നു. നാലിന് വൈകുന്നേരം മകളെയും കൊണ്ട് പത്തനാപുരത്തെ സ്വകാര്യ ആശുപത്രിയില്‍ പോയശേഷം തിരിച്ചെത്തിയപ്പോൾ ഇയാൾ അസഭ്യം വിളിച്ചുകൊണ്ടു മുഖത്ത് അടിക്കുകയും വിറകു കൊണ്ട് ഇരു തോളിലും വയറിനു ചവിട്ടുകയും താഴെ വീണപ്പോള്‍ നിലത്തിട്ട് ചവിട്ടുകയും ചെയ്തതായും ഭാര്യയുടെ പരാതിയിൽ പറയുന്നു. ഇന്‍സ്പെക്ടര്‍ സി. എല്‍. സുധീർ, എസ്ഐ ആര്‍. അനില്‍ കുമാര്‍ എന്നിവരുടെ നേതൃത്വത്തിലായിരുന്നു അറസ്റ്റ്.

ദീപിക കളർ ഇന്ത്യ സീസൺ 4 ഇന്ന് : ജില്ലാതല ഉദ്ഘാടനം റാന്നി സെന്‍റ് മേരീസ് സ്കൂളിൽ

പത്തനംതിട്ട: ദീപിക കളർ ഇന്ത്യ സീസൺ 4 ഇന്ന് തുടക്കമാകും. ഇന്ത്യയുടെ 79 ാമത് സ്വാതന്ത്ര്യദിനാഘോഷത്തിന്‍റെ ഭാഗമായി നടത്തുന്ന ദീപിക കളർ ഇന്ത്യ മത്സരത്തിൽ എൽകെജി മുതൽ പ്ലസ്ടുതലംവരെയുള്ള കുട്ടികൾ പങ്കെടുക്കും. പത്തനംതിട്ട ജില്ലയിലെ വിവിധ സ്കൂളുകളിലായി ഇന്നും അടുത്ത ദിവസങ്ങളിലുമായി മത്സരങ്ങൾ ക്രമീകരിക്കും. ദീപിക കളർ ഇന്ത്യ ജില്ലാതല ഉദ്ഘാടനം ഇന്ന് രാവിലെ പത്തിന് റാന്നി സെന്‍റ് മേരീസ് സെൻട്രൽ സ്കൂളിൽ നടക്കും. റാന്നി ഡിഎഫ്ഒ എൻ. രാജേഷ് മത്സരത്തിന്‍റെ ഉദ്ഘാടനം നിർവഹിക്കും. ദീപിക ജനറൽ മാനേജർ (അഡ്മിനിസ്ട്രേഷൻ) ഫാ. രഞ്ജിത് ആലുങ്കൽ അധ്യക്ഷത വഹിക്കും. സെന്‍റ് മേരീസ് സ്കൂൾ മാനേജർ ഫാ.കോശി മണ്ണിൽ, പ്രിൻസിപ്പൽ ഡോ. സില്ല ഏബ്രഹാം തുടങ്ങിയവർ പ്രസംഗിക്കും. ലഹരിക്കെതിരേയുള്ള പോരാട്ടവും ഭാരതത്തിന്‍റെ ഐക്യവും അഖണ്ഡതയും ഊട്ടിയുറപ്പിക്കാനുള്ള സന്ദേശവും കുട്ടികൾക്കു പകർന്നു നൽകുകയെന്ന ലക്ഷ്യത്തോടെയാണ് അഖിലേന്ത്യ തലത്തിൽ ദീപിക കളർ ഇന്ത്യ മത്സരം നടത്തുന്നത്.

കാതോലിക്കേറ്റ് സ്കൂളിൽ കുടുംബശ്രീ മാ കെയർ സെന്‍റർ

പത്തനംതിട്ട: ജില്ലാ കുടുംബശ്രീ മിഷന്‍റെ നേതൃത്വത്തില്‍ പത്തനംതിട്ട കാതോലിക്കേറ്റ് ഹയര്‍ സെക്കന്‍ഡറി സ്‌കൂളില്‍ മാ കെയര്‍ സെന്‍റര്‍ പ്രവര്‍ത്തനമാരംഭിച്ചു. സ്‌കൂള്‍ പ്രിന്‍സിപ്പല്‍ ജേക്കബ് ജോര്‍ജിന്‍റെ അധ്യക്ഷതയില്‍ കുര്യാക്കോസ് മാര്‍ ക്ലീമിസ് വലിയ മെത്രാപ്പോലീത്ത ഉദ്ഘാടനം നിർവഹിച്ചു. വിദ്യാര്‍ഥികള്‍ക്ക് ആരോഗ്യകരമായ ലഘുഭക്ഷണങ്ങൾ, പാനീയങ്ങള്‍, സ്‌കൂള്‍ സ്റ്റേഷനറി, സാനിട്ടറി നാപ്കിന്‍ എന്നിവ ലഭ്യമാക്കുന്നതിന് സ്‌കൂള്‍ കോമ്പൗണ്ടില്‍ കിയോസ്‌കുകള്‍ സ്ഥാപിക്കുന്ന പദ്ധതിയാണിത്. അസിസ്റ്റന്‍റ് ജില്ലാ മിഷന്‍ കോഓര്‍ഡിനേറ്റര്‍ കെ. ബിന്ദുരേഖ പദ്ധതി വിശദീകരണം നടത്തി. പിടിഎ പ്രസിഡന്‍റ് മനാഫ്, സ്‌കൂള്‍ ഗവേണിംഗ് ബോര്‍ഡ് അംഗം ഫാ. ജിജി സാമുവൽ, സ്‌കൂള്‍ കോഓര്‍ഡിനേറ്റര്‍ ഫാ. ബിജു മാത്യു, ഫാ. പി എസ് ജോര്‍ജ്, പ്രിൻസിപ്പൽ ജേക്കബ് ജോർജ് കുറ്റിയിൽ, ഹെഡ്മിസ്ട്രസ് പി. എം. ജയമോൾ‌, കാർട്ടൂണിസ്റ്റ് ജിതേഷ് , ബ്ലോക്ക് കോഓര്‍ഡിനേറ്റര്‍ സിന്ധു, സിഡിഎസ് ചെയര്‍പേഴ്‌സണ്‍ പൊന്നമ്മ ശശി, മൈക്രോ എന്‍റര്‍പ്രൈസ് കണ്‍സള്‍ട്ടന്‍റ് ഹിദായത്ത് എന്നിവര്‍ പ്രസംഗിച്ചു.

സ്മാര്‍ട്ട് റവന്യു കാര്‍ഡ് പൈലറ്റ് പ്രോജക്ട് നവംബറില്‍: മന്ത്രി കെ. രാജന്‍

കൊടുമൺ: പൊതുജനങ്ങള്‍ക്ക് ഏറ്റവും വേഗത്തിലും സുതാര്യവുമായി സേവനം ലഭ്യമാക്കാന്‍ ഡിജിറ്റല്‍ റീ സര്‍വേ പൂര്‍ത്തിയായ വില്ലേജുകളില്‍ ഡിജിറ്റല്‍ റവന്യു കാര്‍ഡ് പൈലറ്റ് പ്രോജക്ട് നവംബറില്‍ ആരംഭിക്കുമെന്ന് മന്ത്രി കെ.രാജന്‍. അങ്ങാടിക്കല്‍ സ്മാര്‍ട്ട് വില്ലേജ് ഓഫീസ് പുതിയ കെട്ടിടത്തിന്‍റെ ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. പൊതുജനത്തിന് വ്യക്തിപരമായ റവന്യു വിവരങ്ങള്‍ ചിപ്പ് പതിപ്പിച്ച ഒറ്റ കാര്‍ഡില്‍ ലഭ്യമാക്കുകയാണ് ലക്ഷ്യം. എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്‍ട്ട് എന്ന മുഖമുദ്രവാക്യത്തോടുകൂടി സംസ്ഥാനത്ത് റവന്യു വകുപ്പ് നടപ്പാക്കുന്ന പ്രവര്‍ത്തനം ശ്രദ്ധേയമാണ്. അതിവേഗവും സുതാര്യവുമായ റവന്യൂ നടപടിക്രമങ്ങളിലേക്ക് കടക്കാന്‍ ഉതകുന്ന ഡിജിറ്റല്‍ റീസർവേ രണ്ടുവര്‍ഷം പൂര്‍ത്തിയാകുമ്പോള്‍ എട്ട് ലക്ഷം ഹെക്ടര്‍ ഭൂമി, 60 ലക്ഷം ലാന്‍ഡ് പാഴ്‌സലുകള്‍ എന്നിവ അളന്നു തിട്ടപ്പെടുത്തി. കഴിഞ്ഞ ഒമ്പത് വര്‍ഷത്തിനുള്ളില്‍ നാലു ലക്ഷത്തിലേറെ പേര്‍ക്ക് പട്ടയം വിതരണം ചെയ്തെന്ന് മന്ത്രി പറഞ്ഞു. ഡെപ്യൂട്ടി സ്പീക്കർ ചിറ്റയം ഗോപകുമാർ അധ്യക്ഷത വഹിച്ചു. പൊതുമരാമത്ത് കെട്ടിടം വിഭാഗം എക്സിക്യൂട്ടീവ് എന്‍ജിനിയര്‍ ബിജി തോമസ് റിപ്പോര്‍ട്ട് അവതരിപ്പിച്ചു. 2020-21 പദ്ധതി വിഹിതത്തില്‍ നിന്ന് 44 ലക്ഷം രൂപ ചെലവഴിച്ചാണ് സ്മാര്‍ട്ട് വില്ലേജ് നിര്‍മിച്ചത്. വില്ലേജ് ഓഫീസര്‍ മുറി, ഓഫീസ്, ഡോക്യുമെന്‍റ് മുറി, വെയിറ്റിംഗ് ഏരിയ, ഡൈനിംഗ് മുറി, ടോയ്‌ലെറ്റുകള്‍ എന്നിവ ഉള്‍പ്പെടുത്തിയിട്ടുണ്ട്. ജില്ലാ പഞ്ചായത്ത് വൈസ് പ്രസിഡന്‍റ് ബീന പ്രഭ, എഡിഎം ബി. ജ്യോതി, പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം. പി. മണിയമ്മ, കൊടുമണ്‍ ഗ്രാമപഞ്ചായത്ത് പ്രസിഡന്‍റ് കെ. കെ. ശ്രീധരൻ, വൈസ് പ്രസിഡന്‍റ് ധന്യാ ദേവി, അംഗം സൂര്യകലാദേവി, പറക്കോട് ബ്ലോക്ക് പഞ്ചായത്ത് അംഗം രാജീവ്, അടൂര്‍ ആര്‍ഡിഒ എം. ബിപിന്‍കുമാർ, അടൂര്‍ തഹസില്‍ദാര്‍ ജോണ്‍ സാം, ആസൂത്രണ സമിതി വൈസ് ചെയര്‍മാന്‍ കെ. കെ. അശോക് കുമാർ, രാഷ്‌ട്രീയകക്ഷി പ്രതിനിധികളായ എ. എൻ. സലിം, ഡി. സജി, ഡോ.ജോർജ് വർഗീസ് കൊപ്പാറ തുടങ്ങിയവർ പ്രസംഗിച്ചു.

ജില്ലാ സീനിയർ നെറ്റ് ബോൾ ചാമ്പ്യൻഷിപ്പ്: ഇരവിപേരൂർ ഡിഎസ്എ ജേതാക്കൾ

‌പുറമറ്റം : പത്തനംതിട്ട ജില്ലാ സീനിയർ മിക്സഡ് ചാമ്പ്യൻഷിപ്പ് പുറമറ്റം ഗവ. വി എച്ച് എസ് എസ് ഗ്രൗണ്ടിൽ ജില്ലാ പഞ്ചായത്ത് സ്റ്റാന്ഡിംഗ് കമ്മിറ്റി ചെയർമാൻ ജിജി മാത്യു ഉദ്ഘാടനം ചെയ്തു. ഗ്രാമപഞ്ചായത്തംഗം ഷിജു പി. കുരുവിള അധ്യക്ഷത വഹിച്ചു. ബ്ലോക്ക് പഞ്ചായത്തംഗം ശോശാമ്മ ജോസഫ്, നാഷനൽ സിൽവർ മെഡൽ നേടിയ എം.എസ്. സുധൻ, സുജു മോൾ എന്നിവർക്ക് പുരസ്കാരം നൽകി. ജില്ലാ നെറ്റ് ബോൾ അസോസിയേറ്റ് സെക്രട്ടറി സാബു ജോസഫ് സമ്മാദാനം നിർവഹിച്ചു. റ്റി.റ്റി. തോമസ്, ജയശ്രീ രവീന്ദ്രൻ എന്നിവർ പ്രസംഗിച്ചു. ഇരവിപേരുർ ഡിഎസ്എ ടീം ജേതാക്കളായി. പുറമറ്റം ജിഎച്ച്എസ്എസ് രണ്ടാം സ്ഥാനം നേടി.

ശാരിമോൾ കൊലക്കേസിൽ ഭർത്താവിനെ തെളിവെടുപ്പിനെത്തിച്ചു

കോഴഞ്ചേരി : ഭാര്യ കുത്തേറ്റു മരിച്ച കേസില്‍ പോലീസ് അറസ്റ്റ് ചെയ്ത ഭര്‍ത്താവ് കവിയൂര്‍ കോട്ടൂര്‍ മുട്ടത്തുപാറയില്‍ അജികുമാറിനെ (42) തെളിവെടുപ്പിനെത്തിച്ചു. കുത്തേറ്റു മരിച്ച ഭാര്യ ശാരിമോളുടെ കുടുംബവീടായ പുല്ലാട് - കാഞ്ഞിരപ്പാറ ആലുംതറ ആഞ്ഞാലിക്കല്‍ വീട്ടില്‍ ഇന്നലെ ഉച്ചയോടെയാണ് അജികുമാറിനെ എത്തിച്ചത്. കനത്ത പോലീസ് ബന്തവസിലായിരുന്നു ഇയാളെ കൊണ്ടുവന്നതെങ്കിലും രോഷാകുലരായ നാട്ടുകാരും ബന്ധുക്കളും ബഹളം കൂട്ടുകയും കൂക്കി വിളിക്കുകയും ചെയ്തു. ഇയാൾക്കുനേരേ സ്ത്രീകളടക്കമുള്ളവർ പാഞ്ഞടുത്തുവെങ്കിലും പോലീസ് ഇടപെട്ട് അനിഷ്ടസംഭവങ്ങൾ ഒഴിവാക്കി. കഴിഞ്ഞ ശനിയാഴ്ച രാത്രിയാണ് അജികുമാർ ഇതേവീട്ടിൽ ഭാര്യ ശാരിമോളെ കുത്തിവീഴ്ത്തിയത്. തടസം പിടിക്കാനെത്തിയ ഭാര്യാപിതാവ് ശശിയെയും ശാരിയുടെ സഹോദരി രാധാമണിയെയും ആക്രമിച്ചു. പരിക്കേറ്റ ശാരിമോൾ ഞായറാഴ്ച പുലർച്ചെ മരിച്ചു. ‌ ബുധനാഴ്ചയാണ് അജികുമാറിനെ പിടികൂടാനായത്. കുത്താന്‍ ഉപയോഗിച്ച ആയുധം കണ്ടെത്തുകയെന്ന ലക്ഷ്യത്തോടെയാണ് ഇന്നലെ തെളിവെടുപ്പിനു കൊണ്ടുവന്നതെങ്കിലും ഇതു സാധ്യമായില്ല. ആയുധം ഉപേക്ഷിച്ച സ്ഥലത്തെപ്പറ്റി പരസ്പരവിരുദ്ധമായ മൊഴികളാണ് ഇയാള്‍ പോലീസിനുനല്കുന്നത്. സംഭവം സംബന്ധിച്ചു പോലീസിനു വിശദീകരണം നൽകി. കുറച്ചുസമയം മാത്രമേ തെളിവെടുക്കുന്നതിനായി വീട്ടില്‍ വിനിയോഗിച്ചുള്ളൂ. അറസ്റ്റിനേ തുടർന്ന് ഇന്നലെ കോടതിയിൽ ഹാജരാക്കിയശേഷം കസ്റ്റഡിയിൽ വാങ്ങുമെന്നായിരുന്ന പോലീസ് പറഞ്ഞിരുന്നത്. എന്നാൽ തെളിവെടുപ്പിനുശേഷം കോടതിയിൽ ഹാജരാക്കുന്നതിനായി തീരുമാനം മാറ്റുകയായിരുന്നു. കസ്റ്റഡി അപേക്ഷയും നൽകുമെന്ന് കോയിപ്രം പോലീസ് അറിയിച്ചു. ബുധനാഴ്ച ഉച്ചയ്ക്ക് തിരുവല്ല വൈഎംസിഎ ജംഗ്ഷനുസമീപമുള്ള സ്വകാര്യബാറിനടുത്ത് മീന്‍ചന്തയില്‍നിന്ന് സ്‌പെഷല്‍ ബ്രാഞ്ച് പോലീസിന്‍റെ സഹായത്തോടെ തിരുവല്ല പോലീസ് അജികുമാറിനെ പിടികൂടുകയായിരുന്നു. തിരുവല്ല പോലീസ് ഡിവൈഎസ്പി നന്ദകുമാറിന്‌റെ നേതൃത്വത്തിലാണ് നടപടിക്രമങ്ങൾ പൂർത്തീകരിച്ചത്.

“ചികിത്സ അവിടെയല്ല, ഇവിടെ’’ : രോഗിയെ തട്ടിക്കളിച്ച് ആശുപത്രികൾ

പത്തനംതിട്ട: അപകടത്തിൽ പരിക്കേറ്റ് എത്തിയ യുവാവിന് കോന്നി മെഡിക്കൽ കോളജിൽ ചികിത്സ നിഷേധിച്ചതായി പരാതി. വാഴമുട്ടം സ്വദേശി അനന്തു ഭവനിൽ അനന്തുവിനാണ് (21) ചികിത്സ നിഷേധിച്ചത്. കഴിഞ്ഞ ദിവസം മുള്ളനിക്കാടുണ്ടായ ബൈക്ക് അപകടത്തേ തുടർന്ന് അനന്തുവിനെ പത്തനംതിട്ട ജനറൽ ആശുപത്രിയിൽ പ്രവേശിപ്പിച്ചിരുന്നു. എന്നാൽ പത്തനംതിട്ട ജനറൽ ആശുപത്രിയിൽ അറ്റകുറ്റപ്പണികൾ നടക്കുന്നതിനാൽ അനന്തുവിനെ കോട്ടയം മെഡിക്കൽ കോളജിലേക്ക് അയക്കുകയും കാലിലെ ഒരു വിരൽ മുറിച്ചുമാറ്റുകയും ചെയ്തിരുന്നു. പിന്നീട് അനന്തുവിനെ വീണ്ടും പത്തനംതിട്ട ജനറൽ ആശുപത്രിയിലേക്ക് റഫർ ചെയ്തുവെങ്കിലും അസൗകര്യങ്ങൾ കാരണം ചികിത്സ ലഭിക്കാതെ വന്നതോടെ കോന്നി മെഡിക്കൽ കോളജിലേക്ക് മാറ്റുകയായിരുന്നു. എന്നാൽ കോന്നി മെഡിക്കൽ കോളജിൽ സൗകര്യങ്ങൾ ഇല്ലാത്തതിനാൽ കൊണ്ടുപോകണം എന്നായിരുന്നു അധികൃതർ പറഞ്ഞതെന്നും അനന്തു പറഞ്ഞു. പിന്നീട് മാധ്യമങ്ങൾ ഇടപെട്ടതിനേതുടർന്ന് അനന്തുവിനെ കോന്നി മെഡിക്കൽ കോളജിൽ അഡ്മിറ്റ്‌ ചെയ്യുകയായിരുന്നു.

ടോറസ് ലോറിയിൽനിന്ന് ഡീസൽ ചോർന്നു; അത്തിക്കയം പാതയിൽ ഗതാഗതം തടസപ്പെട്ടു

റാന്നി: ടോറസ് ലോറിയിൽനിന്നും ഇന്ധനം ചോർന്നതോടെ റോഡിലൂടെയുള്ള യാത്ര തടസപ്പെട്ടു. ചെത്തോങ്കര - അത്തിക്കയം റോഡിൽ ഇന്നലെ വൈകുന്നേരം ആറോടെയാണ് റാന്നിയിൽ നിന്നും പെരുനാട്ടിലേക്കു പോയ ലോറിയിൽ നിന്നും കരികുളം മുതൽ അത്തിക്കയം ടൗൺ വരെ ഡീസൽ ചോർന്നത്. ആദ്യം ബൈക്ക് യാത്രക്കാർ അപകടത്തിൽ പെടുകയായിരുന്നു. പിന്നീടാണ് ടിപ്പർ പോയ വഴിയിൽ റോഡു നീളെ ഡീസൽ വീണതാണെന്ന് കണ്ടെത്തിയത്. ഇതിനിടെ ഡീസൽ ചോർച്ചയുണ്ടായ വാഹനം രണ്ടു തവണ റോഡിൽ കിടന്നു. പിന്നീട് ഒരു വിധത്തിൽ അത്തിക്കയം ഭാഗത്തെത്തിയ ടൊറസ് ഫെഡറൽ ബാങ്കിനു സമീപം മുന്നോട്ടു പോകുന്നതിനു പകരം നിയന്ത്രണം വിട്ട് റോഡിനുകുറുകെയായി. ഇതേത്തുടർന്ന് മറ്റു വാഹനങ്ങളുടെ യാത്രയും തടസപ്പെട്ടു. നാട്ടുകാർ അറിയിച്ചതനുസരിച്ച് പോലീസും പിന്നീട് ഫയർ ഫോഴ്സും സ്ഥലത്തെത്തിയാണ് വാഹനഗതാഗതം പുനഃസ്ഥാപിച്ചത്.

സ്കൂൾ പരിസരത്തെ സുരക്ഷ; ദുരന്തനിവാരണ നിയമം ബാധകം

വീഴ്ച വരുത്തിയാൽ കർശന നടപടി പത്തനംതിട്ട: സര്‍ക്കാര്‍ ഉടമസ്ഥതയില്‍ ഉള്ള സ്‌കൂളുകളില്‍ സുരക്ഷ ഉറപ്പാക്കാന്‍ ഉപയോഗപ്രദമല്ലാത്തതും അപകടകരവുമായ കെട്ടിടങ്ങൾ, മതിലുകള്‍, മറ്റ് നിര്‍മാണങ്ങള്‍ എന്നിവ പൊളിച്ചു മാറ്റാന്‍ ജില്ലാ ദുരന്തനിവാരണ അഥോറിറ്റി ചെയര്‍പേഴ്സൺ കൂടിയായ ജില്ലാ കളക്ടര്‍ എസ്. പ്രേംകൃഷ്ണന്‍റെ നിര്‍ദേശം. അപകടകരമായ കെട്ടിടം യുദ്ധകാലാടിസ്ഥാനത്തില്‍ പൊളിച്ചു നീക്കാനുള്ള ഉത്തരവാദിത്വം ബന്ധപ്പെട്ട തദ്ദേശസ്വയം ഭരണ സ്ഥാപന സെക്രട്ടറിമാര്‍ക്കായിരിക്കുമെന്നു കളക്ടർ പറഞ്ഞു. സ്‌കൂള്‍ വളപ്പിലും പരിസരങ്ങളിലും ഉള്ള വൈദ്യുതി ലൈനുകളുടെയും അനുബന്ധനിര്‍മിതികളുടെയും സുരക്ഷിതത്വം ഉറപ്പുവരുത്തും. പരിസരത്തെ അപകടകരമായ മരങ്ങള്‍ മുറിച്ചു മാറ്റും. സുരക്ഷാവേലി നിർമിക്കണം വിദ്യാലയങ്ങളിലെ ഉപയോഗ പ്രദമല്ലാത്തതും പൊളിച്ചു മാറ്റേണ്ടതുമായ കെട്ടിടങ്ങൾ, സുരക്ഷിതമല്ലാത്ത മതിലുകള്‍, ജലസംഭരണികൾ, വൈദ്യുത ഇൻ‍സ്റ്റലേഷനുകള്‍, താത്കാലിക ഷെഡുകൾ, കമാനങ്ങള്‍ തുടങ്ങിയവയുടെ സമീപത്തേക്ക് കുട്ടികള്‍ വരാത്ത തരത്തില്‍ സുരക്ഷാവേലി നിര്‍മിക്കും. അപകട സൂചന സംബന്ധിച്ച ബോര്‍ഡുകള്‍ സ്ഥാപിക്കേണ്ട ചുമതല ബന്ധപ്പെട്ട തദ്ദേശ സ്വയം ഭരണ സ്ഥാപന സെക്രട്ടറിമാര്‍ക്കാണ്. ജില്ലയിലെ എല്ലാ സ്‌കൂള്‍ വളപ്പിലും പരിസരങ്ങളിലും ഉള്ള വൈദ്യുത ലൈനുകളുടെയും അനുബന്ധ നിര്‍മിതികളുടെയും സുരക്ഷ സംബന്ധിച്ച് സംസ്ഥാന വൈദ്യുതി ബോര്‍ഡ് ഉദ്യോഗസ്ഥര്‍ പരിശോധന നടത്തും. ഓരോ ഇലക്‌ട്രിക്കല്‍ സബ് ഡിവിഷനു കീഴിലുമുള്ള ബന്ധപ്പെട്ട അസിസ്റ്റന്‍റ് എക്സിക്യൂട്ടിവ് എൻ‌ജിനിയർക്കാണ് ചുമതല. സ്ഥാപന മേധാവി ബന്ധപ്പെട്ട തദ്ദേശ സ്ഥാപനത്തിന്‍റെ സെക്രട്ടറിയെ രേഖാമൂലം അറിയിക്കണം. കുട്ടികൾക്കു ബോധവത്കരണം സ്‌കൂള്‍ അംസംബ്ലികളില്‍ സുരക്ഷാ മുന്‍കരുതലുകള്‍ സംബന്ധിച്ചു കുട്ടികള്‍ക്കു ബോധവത്കരണം നൽകണം. സംസ്ഥാന ദുരന്ത നിവാരണ അഥോറിറ്റി പുറപ്പെടുവിച്ചിട്ടുള്ള സ്‌കൂള്‍ സുരക്ഷ സംബന്ധിച്ച മാര്‍നനിര്‍ദേശങ്ങള്‍ ജില്ലയിലെ എല്ലാ സ്‌കൂളുകളിലും ഉറപ്പാക്കും. നിര്‍ദേശിക്കപ്പെട്ട ഘടനയില്‍ സ്‌കൂള്‍തല ദുരന്തനിവാരണ രേഖ തയാറാക്കും. ബന്ധപ്പെട്ട പ്രധാനാധ്യാപര്‍ക്കാണ് ചുമതല. (മാര്‍ഗ നിര്‍ദേശങ്ങള്‍ക്കായി https://dma. kerala.gov.in/school-safety-guidelines/). നിര്‍ദേശങ്ങളില്‍ വീഴ്ചയോ അലംഭാവമോ വരുത്തിയാല്‍ ദുരന്ത നിവാരണ നിയമം വകുപ്പ് 51 പ്രകാരം കര്‍ശന നിയമ നടപടി സ്വീകരിക്കുമെന്നു ജില്ലാ കളക്ടര്‍ അറിയിച്ചു. ദുരന്തനിവാരണ നിയമം 2005 ദുരന്തനിവാരണ നിയമത്തിലെ വകുപ്പ് 26,30,33,34 (എച്ച്) എന്നീ വകുപ്പുകള്‍ പ്രകാരമാണ് നടപടി. കെട്ടിടങ്ങളുടെ വാലുവേഷന്‍ റിപ്പോര്‍ട്ട് അനുവദിക്കാനുള്ള ആവശ്യം ഉന്നയിച്ചാല്‍ നിര്‍മാണത്തിന്‍റെ ചുമതലയുള്ള ബന്ധപ്പെട്ട തദ്ദേശ സ്ഥാപന എൻജിനിയർ റിപ്പോര്‍ട്ട് തയാറാക്കി സമര്‍പ്പിക്കണമെന്ന് കളക്ടർ നിർദേശിച്ചു. ലേലം ഉറപ്പിക്കാനായില്ലെങ്കില്‍ അതേദിവസംതന്നെ നിയമപരമായ തുടര്‍ നടപടി സ്വീകരിച്ച് സുരക്ഷയ്ക്കു മുന്‍ഗണന നല്‍കണം. സ്‌കൂള്‍ പരിസരത്തെ അപകടകരമായ വൃക്ഷങ്ങള്‍ മുറിച്ച് നീക്കാനുള്ള നടപടി ബന്ധപ്പെട്ട തദ്ദേശ സ്ഥാപന സെക്രട്ടറിമാര്‍ സ്വീകരിക്കും. എയ്ഡഡ്, സ്വകാര്യ സ്കൂൾ പരിസരങ്ങളിലുള്ള മരങ്ങൾ മുറിച്ചു മാറ്റാനുള്ള ഉത്തരവാദിത്വം ബന്ധപ്പെട്ട സ്‌കൂള്‍ മാനേജരും പ്രധാന അധ്യാപകരും നിര്‍വഹിക്കണം. സ്വകാര്യ വ്യക്തികളുടെ ഉടമസ്ഥതയിലുള്ള വൃക്ഷങ്ങള്‍ എയ്ഡഡ്, സ്വകാര്യ സ്‌കൂളുകള്‍ക്കു സുരക്ഷാ ഭീഷണി സൃഷ്ടിക്കുന്നുവെങ്കില്‍ ബന്ധപ്പെട്ട തദ്ദേശ സ്ഥാപന സെക്രട്ടറിമാര്‍ നടപടി സ്വീകരിക്കണം. മുറിച്ച ശേഷം തടി എത്രയും വേഗത്തില്‍ സ്‌കൂള്‍ പരിസരത്തുനിന്നു നീക്കം ചെയ്യണം.

നവോദയ വിദ്യാലയ മാഗസിൻ പ്രകാശനം ചെയ്തു

വെച്ചൂച്ചിറ: ജവഹർ നവോദയ വിദ്യാലയത്തിൽ വിദ്യാർഥി പ്രതിനിധികളുടെ സ്ഥാനമേൽക്കൽ ചടങ്ങിനോടനുബന്ധിച്ച യോഗം ജില്ലാ കളക്ടർ എസ്. പ്രേംകൃഷ്ണൻ ഉദ്ഘാടനം ചെയ്തു. വിദ്യാലയ മാസികയുടെ പ്രകാശനം കളക്ടർ നിർവഹിച്ചു. കുട്ടികളുമായി കളക്ടർ സംവദിച്ചു. നവോദയ പ്രിൻസിപ്പൽ വി. സുധീർ, വെച്ചൂച്ചിറ കോളനി ആശുപത്രി സീനിയർ മെഡിക്കൽ ഓഫീസർ ലേഖ തോബിയാസ്, കോളനി ജിഎച്ച്എസ് പ്രിൻസിപ്പൽ ജി. ബീന, അധ്യാപികമാരായ എം. തങ്കമണി, കെ.എൽ. രശ്മി, രക്ഷാകർതൃ പ്രതിനിധികളായ രമ്യ സന്തോഷ്, പ്രദീപ്കുമാർ തുടങ്ങിയവർ പ്രസംഗിച്ചു.

മോഷണക്കേസില്‍ യുവാവ് അറസ്റ്റില്‍

പത്തനംതിട്ട: മോഷണ വസ്തുക്കളുമായി നാട്ടുകാര്‍ തടഞ്ഞുവച്ച് പത്തനംതിട്ട പോലീസിന് കൈമാറിയയാളെ അറസ്റ്റ് ചെയ്തു. കോന്നി അതിരുങ്കല്‍ കളഗിരി കിഴക്കേതില്‍ വീട്ടില്‍ എസ്. രാഹുലാണ് (26) സഞ്ചരിച്ച മോട്ടോര്‍സൈക്കിള്‍ ഉള്‍പ്പെടെ പിടിയിലായത്. വാഴമുട്ടത്തു പ്രവര്‍ത്തിക്കുന്ന വൃന്ദ സ്റ്റോഴ്‌സില്‍നിന്ന് രണ്ട് ദിവസങ്ങളിലായി പ്ലംബിംഗ് ഇലക്‌ട്രിക് സാധനങ്ങള്‍ മോഷണം പോയിരുന്നു. വിവരമറിഞ്ഞ നാട്ടുകാര്‍ സംശയകരമായ സാഹചര്യത്തില്‍ കല്ലറക്കടവില്‍ യുവാവിനെ തടഞ്ഞുവച്ച് പോലീസിനു കൈമാറുകയായിരുന്നു. എസ്ഐ ഷിജു പി. സാമിന്‍റെ നേതൃത്വത്തിലാണ് അന്വേഷണം നടക്കുന്നത്.

മണിയാർ ടൂറിസം വികസന പദ്ധതികൾക്ക് അംഗീകാരം; നിർമാണോദ്ഘാടനം 11ന്

റാന്നി: പമ്പ റിവർ വാലി ടൂറിസം പദ്ധതിയുടെ ഭാഗമായി മണിയാറിൽ നടപ്പിലാക്കുന്ന ടൂറിസം പദ്ധതികളുടെ പ്രാരംഭ നിർമാണ പ്രവർത്തനങ്ങൾക്കു തുടക്കമായി. നിർമാണോദ്ഘാടനം 11ന് വൈകുന്നേരം അഞ്ചിന് മന്ത്രി പി.എ. മുഹമ്മദ് റിയാസ് നിർവഹിക്കും. വടശേരിക്കര മണിയാറിൽ ജലസേചനത്തിനായി പമ്പ ഇറിഗേഷൻ വകുപ്പ് നിർമിച്ചിട്ടുള്ള ഡാമിന്‍റെ പരിസരത്ത് 12 ഏക്കർ ഭൂമിയിലാണ് പദ്ധതി നടപ്പാക്കുന്നത്.15 കോടി രൂപയാണ് മൂന്നുഘട്ടമായി നടപ്പാക്കുന്ന പദ്ധതിക്ക് ചെലവഴിക്കുന്നത്. ആദ്യഘട്ടമായ അഞ്ചു കോടി രൂപയുടെ നിർമാണ പ്രവർത്തനങ്ങളാണ് ആരംഭിക്കുന്നത്. പമ്പ ഇറിഗേഷൻ വകുപ്പിന്‍റെ അധീനതയിലുള്ള ഡാമിനോടു ചേർന്നുള്ള ഭൂമിയിൽ നിർമാണ പ്രവർത്തനങ്ങൾക്ക് അനുമതി ലഭിക്കുന്നതിലുണ്ടായ കാലതാമസമാണ് നിർമാണം വൈകാൻ ഇടയാക്കിയതെന്ന് പ്രമോദ് നാരായൺ എംഎൽഎ പറഞ്ഞു. നേരത്തേ തയാറാക്കിയ ഡിപിആറിൽ മാറ്റം വരുത്തി നിർമാണ പ്രവർത്തനങ്ങൾക്കുള്ള എൻഒസി നേടുകയായിരുന്നു. ടൂറിസം വകുപ്പിന്‍റെ നേരിട്ടുള്ള നിയന്ത്രണത്തിൽ സർക്കാർ പൊതുമേഖലാ സ്ഥാപനമായ കെല്ലിനാണ് പദ്ധതിയുടെ നിർവഹണച്ചുമതല. ഉയർന്ന നടപ്പാത, പൂന്തോട്ടം, കുട്ടികൾക്കായുള്ള കളി സ്ഥലങ്ങൾ, ഫിറ്റ്നസ് സെന്‍റർ, സൈക്കിൾ ട്രാക്ക്, ഭക്ഷണ കുടിവെള്ള കിയോസ്ക്കുകൾ, ഇരിപ്പിടങ്ങൾ, ഇലക്‌ട്രിഫിക്കേഷൻ, പാർക്കിംഗ് ഏരിയ, ശുചിമുറി സൗകര്യങ്ങൾ എന്നിവയെല്ലാം ആദ്യഘട്ടത്തിൽ ഉൾപ്പെടുത്തിയിട്ടുണ്ട്. കിഴക്കൻ മലയോര പ്രദേശമായ മണിയാറിന്‍റെയും വടശേരിക്കരയുടെയും സമഗ്രവികസനത്തിന് ഉപകരിക്കുന്നതാണ് പദ്ധതി. ഗവിയിലേക്കുള്ള പാതയോരത്താണ് മണിയാർ ടൂറിസം പദ്ധതി യാഥാർഥ്യമാകുന്നത്. ഗവിയും സമീപ പ്രദേശമായ പെരുന്തേനരുവിയും കൂട്ടിയോജിപ്പിച്ച് ബൃഹത്തായ ഒരു ടൂറിസം പദ്ധതി തന്നെ ഭാവിയിൽ പ്രതീക്ഷിക്കാവുന്നതാണെന്ന് എംഎൽഎ ചൂണ്ടിക്കാട്ടി.

ഭാര്യയെയും മക്കളെയും ഉപദ്രവിച്ച കേസില്‍ യുവാവ് അറസ്റ്റിൽ

തിരുവല്ല: വീട്ടിലെത്തി ഭാര്യയെയും മക്കളെയും അമ്മയെയും ഉപദ്രവിക്കുന്ന യുവാവിനെ തിരുവല്ല പോലീസ് അറസ്റ്റ് ചെയ്തു. ചിറ്റാര്‍ സീതത്തോട് സ്വദേശി തുളസീരാജാണ് (38) പിടിയിലായത്. ഡ്രൈവര്‍ജോലി ചെയ്യുകയാണ് ഇയാള്‍. കഴിഞ്ഞ 30ന് രാത്രിയാണ് ഇയാള്‍ വാടകയ്ക്ക് താമസിക്കുന്ന ഇരവിപേരൂര്‍ വാരാമണ്ണില്‍ വീട്ടില്‍കുടുംബാംഗങ്ങളെ ദേഹോപദ്രവം ഏല്പിക്കുകയും കത്തി കൊണ്ട് ആക്രമിക്കുകയും ചെയ്തത്. കോടതിയില്‍ ഹാജരാക്കിയ തുളസീരാജിനെ റിമാന്‍ഡ് ചെയ്തു. എസ് ഐമാരായ കെ. രവിചന്ദ്രന്‍, ടി. ഉണ്ണികൃഷ്ണന്‍, എഎസ്ഐ രാജു എന്നിവരുടെ നേതൃത്വത്തിലായിരുന്നു അന്വേഷണം.

പുല്ലാട്ടെ ശാരിമോളുടെ കൊലപാതകം; ഒളിവിലായിരുന്ന ഭർത്താവ് അറസ്റ്റിൽ

കോഴഞ്ചേരി: ഭാര്യ കുത്തേറ്റു മരിച്ച കേസിൽ ഒളിവിലായിരുന്ന ഭര്‍ത്താവിനെ പോലീസ് അറസ്റ്റ് ചെയ്തു. പുല്ലാട് കാഞ്ഞിരപ്പാറ ആലുംതറ ആഞ്ഞാലിക്കല്‍ ശാരിമോളെ (ശ്യാമ - 38) കുത്തിക്കൊലപ്പെടുത്തിയ കേസിലാണ് ഭർത്താവ് കവിയൂര്‍ കോട്ടൂര്‍ മുട്ടത്തുപാറയില്‍ അജികുമാറിനെ (42) ഇന്നലെ ഉച്ചയ്ക്ക് 1.15ന് തിരുവല്ല വൈഎംസിഎ ജംഗ്ഷനുസമീപമുള്ള സ്വകാര്യബാറിനടുത്ത് മീന്‍ചന്തയില്‍നിന്ന് പോലീസ് നാടകീയമായി കസ്റ്റഡിയിലെടുത്തത്. മുഖത്ത് രൂപവ്യത്യാസം വരുത്തി ക്ലീന്‍ ഷേവ് ചെയ്ത് മീന്‍ വില്‍പ്പന നടത്തുന്ന സ്ഥലത്ത് കിടക്കുന്നത് അജികുമാറാണ് എന്ന് ആദ്യം കണ്ടെത്തിയത് സ്‌പെഷൽ ബ്രാഞ്ച് ഉദ്യോഗസ്ഥരാണ്. തുടര്‍ന്ന് ഇവരുടെ സന്ദര്‍ഭോചിതമായ ഇടപെടല്‍മൂലം തിരുവല്ല പോലീസ് എത്തി കസ്റ്റഡിയിലെത്ത് കോയിപ്രം പോലീസ് സ്‌റ്റേഷനില്‍ എത്തിക്കുകയായിരുന്നു. കഴിഞ്ഞ ശനിയാഴ്ചയാണ് ശാരിമോൾക്ക് കുത്തേറ്റത്. ഗുരുതരാവസ്ഥയിൽ കോട്ടയം മെഡിക്കൽ കോളജിലെത്തിച്ചെങ്കിലും ഞായറാഴ്ച പുലർച്ചെ മരിച്ചു. ശാരിമോളുടെ അച്ഛൻ ശശിക്കും സഹോദരി രാധാമണിക്കും കുത്തേറ്റിരുന്നു. ഇതിൽ ശശി ഗുരുതരാവസ്ഥയിൽ മെഡിക്കൽ കോളജിൽ കഴിയുകയാണ്. അറസ്റ്റിലായ അജികുമാറിനെ പോലീസ് സ്‌റ്റേഷനു സമീപമുള്ള ക്വാര്‍ട്ടേഴ്‌സില്‍ കൊണ്ടുവന്ന് മണിക്കൂറുകളോളം ചോദ്യം ചെയ്തു. മെഡിക്കല്‍ പരിശോധനയ്ക്കുവിധേയനാക്കിയതിനുശേഷം ഇന്ന് പത്തനംതിട്ട കോടതിയില്‍ ഹാജരാക്കും. തെളിവെടുപ്പുകൾക്കായി കസ്റ്റഡി അപേക്ഷ നൽകുമെന്നും പോലീസ് പറഞ്ഞു. സംഭവത്തേത്തുടർന്ന് ഒളിവിൽ പോയ ഇയാൾക്കായി കഴിഞ്ഞ മൂന്നു ദിവസങ്ങളിലായി പോലീസും നാട്ടുകാരും തെരച്ചില്‍ നടത്തുകയായിരുന്നു. ഡ്രോണിന്‍റെ സഹായവും തെരച്ചിലിനായി ഉപയോഗിച്ചിരുന്നു. അജികുമാറിനെ പിടികൂടാന്‍ ജില്ലാ പോലീസ് മേധാവിയുടെ നേതൃത്വത്തില്‍ തിരുവല്ല ഡിവൈഎസ്പി അടക്കമുള്ള പ്രത്യേക സംഘത്തെ നിയമിച്ചിരുന്നുവെങ്കിലും സ്‌പെഷല്‍ ബ്രാഞ്ചിലെ ഉദ്യോഗസ്ഥരുടെ ജാഗ്രത മൂലമാണ് അജികുമാറിനെ പിടികൂടാന്‍ കഴിഞ്ഞതെന്ന് പോലീസ് ഉദ്യോഗസ്ഥര്‍തന്നെ പറഞ്ഞു. ശാരിമോളുടെ സംസ്കാരം നടന്നു കൊല്ലപ്പെട്ട ശാരിമോളുടെ സംസ്‌കാരം ഇന്നലെ ഉച്ചകഴിഞ്ഞ് വീട്ടുവളപ്പില്‍ നടന്നു. ശാരിയുടെ സഹോദരന്‍ ശരത്താണ് ചിതയ്ക്ക് തീകൊളുത്തിയത്. സംസ്‌കാരം നടക്കുന്നതിന് നിമിഷങ്ങള്‍ക്കുമുന്‍പാണ് ഭര്‍ത്താവിനെ കസ്റ്റഡിയിലെടുത്തതായി പോലീസിന്‍റെ ഔദ്യോഗിക സ്ഥിരീകരണം ഉണ്ടായത്. കുടുംബശ്രീ എഡിഎസ് സെക്രട്ടറികൂടിയായിരുന്ന ശാരിമോളുടെ സംസ്‌കാരച്ചടങ്ങില്‍ ത്രിതല ജനപ്രതിനിധികളും വിവിധ രാഷ്‌ട്രീയ സംഘടനാ നേതാക്കളും കുടുംബശ്രീ മിഷനുമായി ബന്ധപ്പെട്ടവരും നാട്ടുകാരും പങ്കെടുത്തു. കാഞ്ഞിരപ്പാറ കമ്യൂണിറ്റി ഹാളിൽ മൃതദേഹം പൊതുദർശനത്തിനു വച്ചിരുന്നു. ശാരിമോളുടെ മരണവും അച്ഛൻ അജികുമാർ ജയിലിലുമായതോടെ മൂന്ന് പിഞ്ചു കുഞ്ഞുങ്ങൾ അനാഥരായി. പ്രൈമറി ക്ലാസുകളിൽ പഠിക്കുന്ന കുട്ടികൾ ഇപ്പോൾ ബന്ധുക്കളുടെ സംരക്ഷണയിലാണ്.

പുലിഭീതിയിൽ വിറച്ച് കലഞ്ഞൂർ : പാറമടകളും പൊന്തക്കാടുകളും വന്യമൃഗങ്ങളുടെ താവളം

കലഞ്ഞൂർ: പട്ടാപ്പകലും പുലിയുടെ സാന്നിധ്യം കണ്ടുതുടങ്ങിയ കലഞ്ഞൂർ പൂമരുതിക്കുഴി, പാക്കണ്ടം മേഖലകളിൽ ജനങ്ങളാകെ ഭീതിയിൽ. പുലിയെ പിടികൂടാൻ കൂട് സ്ഥാപിച്ച് റോന്ത് ചുറ്റുന്ന വനംവകുപ്പിനു കൂടുതൽ നടപടികളുമെടുക്കാനാകുന്നില്ല. പുലിയുടെ സാന്നിധ്യം കണ്ട പൂമരുതിക്കുഴിയിലാണ് വനംവകുപ്പ് കൂട് സ്ഥാപിച്ചത്. പാക്കണ്ടത്ത് അനുമതി തേടിയെങ്കിലും ലഭിച്ചില്ല. ഞായറാഴ്ച പട്ടാപ്പകൽ വളർത്തു നായയെ ഓടിച്ചുകൊണ്ട് പൂമരുതിക്കുഴിയിലെ ഒരു വീട്ടിൽ പുലി കയറിയത് പ്രദേശവാസികളിൽ ഭീതി വർധിപ്പിച്ചു. വീടിന്‍റെ അടുക്കള ഭാഗത്തുകൂടി പുലി അകത്തു കയറുന്പോൾ വീട്ടമ്മയും കുഞ്ഞും മാത്രമാണ് വീട്ടിലുണ്ടായിരുന്നത്. അപ്രതീക്ഷിതമായി വന്യമൃഗത്തെ കൺമുന്പിൽ കണ്ട ഞെട്ടൽ ഇപ്പോഴും ഇവർക്കു മാറിയിട്ടില്ല. പാക്കണ്ടത്ത് കോഴിക്കൂട്ടിൽ കയറിയ പുലി കോഴികളെ പിടിച്ചതും കഴിഞ്ഞ ദിവസമാണ്. മൂന്നാം ദിവസവും പുലി തുടർച്ചയായ മൂന്നു ദിവസവും കലഞ്ഞൂർ, കൂടൽ പ്രദേശത്തു പുലി ഇറങ്ങിയതോടെ പ്രദേശവാസികൾക്ക് ഉറക്കം നഷ്ടപ്പെട്ടിരിക്കുകയാണ്. പ്രദേശത്തു മുൻപ് മൂന്നുതവണ വനംവകുപ്പ് സ്ഥാപിച്ച കൂടുകളിൽ പുലി വീണിരുന്നു. പാക്കണ്ടം, ഇഞ്ചപ്പാറ മേഖലകളിലാണ് പുലി കുടുങ്ങിയത്.പുലികളുടെ സാന്നിധ്യം വർധിച്ചതോടെ മുൻപ് വനം വകുപ്പ് ഡ്രോൺ സഹായത്തോടെ തെരച്ചിലും ന‌ടത്തിയിരുന്നു. പൂമരുതിക്കുഴിയിലും പാക്കണ്ടത്തും കണ്ട പുലി ഒന്നുതന്നെയാണോയെന്നു സ്ഥിരീകരിക്കാൻ കഴിഞ്ഞിട്ടില്ല. മലയോരത്തെ റബർ തോട്ടങ്ങളുടെ പാറമടകളുടെയും സമീപത്തെ പൊന്തക്കാടുകൾ വന്യമൃഗങ്ങളുടെ താവളമാണ്. പാറക്കൂട്ടങ്ങളുടെ മുകളിൽ പുലി ഇരിക്കുന്ന ദൃശ്യങ്ങൾ കഴിഞ്ഞയിടെ പുറത്തുവന്നിരുന്നു. കാട്ടാനകളുടെയും കാട്ടുപന്നികളുടെയും ശല്യത്തിൽ പൊറുതിമുട്ടിയവരുടെ ഇടയിലേക്കാണ് പുലിയും ഇറങ്ങിയിരിക്കുന്നത്. വളർത്തു നായ്ക്കളെയും കോഴികളെയും കാണാനില്ല കലഞ്ഞൂർ: കലഞ്ഞൂരിലെ ഇഞ്ചപ്പാറ, പൂമരുതിക്കുഴി, പാക്കണ്ടം മേഖലകളിൽ വളർത്തു നായ്ക്കളെയും കോഴികളെയും കാണാതാകുന്നതു സ്ഥിരം സംഭവമായി മാറിയിരുന്നു. വന്യമൃഗ ഭീഷണിയുള്ള പ്രദേശങ്ങളാണെങ്കിലും പുലി ജനവാസ മേഖലയിൽ സ്ഥിരമായി എത്തുമെന്നു പ്രദേശവാസികൾ കരുതിയിരുന്നില്ല. പാക്കണ്ടം പാറമടയ്ക്കു സമീപം ആര്യഭവൻ ബാബുവിന്‍റെ വീട്ടിലെ കോഴിക്കൂട്ടിൽനിന്ന് ‌അഞ്ച് കോഴികളെയാണ് കഴിഞ്ഞ ദിവസം നഷ്ടപ്പെട്ടത്. പരിസരത്തെ സിസിടിവിയിൽ പുലിയുടെ ദൃശ്യം വ്യക്തമായിട്ടുണ്ട്. ബാബുവിന്‍റെ വീട്ടിലെ കോഴിക്കൂട്ടിൽനിന്ന് മുന്പും കോഴികളെ നഷ്ടപ്പെട്ടിരുന്നു. പ്രദേശത്തു 25ലധികം കോഴികളെയാണ് കഴിഞ്ഞയിടെ നഷ്ടപ്പെട്ടത്. ആട്ടിൻകുട്ടികളെയടക്കം പലർക്കും നഷ്ടമായിട്ടുണ്ട്. സൗരോർജവേലി എവിടെ? കലഞ്ഞൂർ പൂമരുതിക്കുഴിയിൽ വന്യമൃഗ ആക്രമണം പ്രതിരോധിക്കാൻ സൗരോർജവേലി സ്ഥാപിക്കുമെന്നു വനംമന്ത്രി എ.കെ. ശശീന്ദ്രൻ പ്രഖ്യാപനം നടത്തിയിട്ട് ഒരു വർഷമായി. നിർമാണോദ്ഘാടനവും മന്ത്രി നടത്തിയിരുന്നു. മൂന്നു മാസത്തിനകം വേലി സ്ഥാപിക്കാനാകുമെന്നായിരുന്നു പ്രഖ്യാപനം. എന്നാൽ, സൗരോർജ വേലിയുടെ പ്രവർത്തനം ഇതേവരെ പൂർത്തിയായിട്ടില്ല. പണികൾ പലയിടത്തും തുടങ്ങിവച്ചെങ്കിലും പൂർത്തീകരിച്ചിട്ടില്ല. വന്യമൃഗ ശല്യം രൂക്ഷമാകുന്ന പ്രദേശങ്ങളിലുള്ളവരുടെ ആവശ്യം പരിഗണിച്ച് അത്തരം സ്ഥലങ്ങളിലേക്കു നിർമാണം ദീർഘിപ്പിച്ചെങ്കിലും അതും പൂർത്തീകരിക്കാനായില്ല. തൊഴിൽ മേഖല സ്തംഭിച്ചു; സ്കൂൾ കുട്ടികളും ഭയപ്പാടിൽ പുലിയുടെ സാന്നിധ്യം കൂടുതൽ പ്രദേശങ്ങളിലുണ്ടെന്നതായതോടെ കലഞ്ഞൂർ, കൂടൽ മേഖലയിലെ തൊഴിൽമേഖലകൾ സ്തംഭനത്തിലാണ്. ആളുകൾ പുറത്തിറങ്ങാൻ മടിക്കുകയാണ്. പുലർച്ചെ റോഡുകളിലൂടെ സഞ്ചരിക്കേണ്ടിവരുന്ന ടാപ്പിംഗ് തൊഴിലാളികൾ, പത്രവിതരണക്കാർ, ക്ഷീരകർഷകർ തുടങ്ങിയവർ ഭയപ്പാടിലാണ്. റബർ‌ ടാപ്പിംഗ് നിലച്ച മട്ടാണ്. റബർ തോട്ടങ്ങളോടു ചേർന്നാണ് പുലിയെ പലേടത്തും കണ്ടിരുന്നതെന്നതിനാൽ ടാപ്പിംഗ് തൊഴിലാളികൾക്കിടയിൽ ഭീതി വർധിച്ചു. സ്കൂൾ കുട്ടികളും ഭയപ്പാടിലാണ്. വാഹനങ്ങളിൽ എത്തുന്ന കുട്ടികളെ മാതാപിതാക്കൾ സ്റ്റോപ്പുകളിലെത്തി കൂട്ടിക്കൊണ്ടുപോവുകയാണ്. നേരത്തേ കാട്ടാനയുടെ ശല്യം അതിരൂക്ഷമായിരുന്ന പ്രദേശങ്ങളാണിത്. ആനയെ ഭയന്ന് ആളുകൾ സന്ധ്യയ്ക്കു മുന്പു വീടുകളിൽ അഭയം തേടിവന്നിരുന്നു. പുലിക്കുപിന്നാലെ കാട്ടാനയും; വീടിനു നേരേ ആക്രമണം കലഞ്ഞൂർ: പൂമരുതിക്കുഴിയിൽ വീടിനു നേരേ കാട്ടാന ആക്രമണം. ഇന്നലെ പുലർച്ചെ മൂന്നോടെയാണ് പൂമരുതിക്കുഴി ഷൈജു ഭവനത്തിൽ പ്രഭുരാജിന്‍റെ വീടിനു നേരേ കാട്ടാനയുടെ ആക്രമണം ഉണ്ടായത്. വീടിന് അടുത്ത് എത്തിയ കാട്ടാന പറമ്പിൽനിന്നിരുന്ന തെങ്ങ് കുത്തി മറിച്ചിടാൻ ശ്രമിച്ചു. ഇതിനുശേഷം പ്രഭുരാജിന്‍റെ വീടിന്‍റെ ജനൽ കതകിൽ ഇടിക്കുകയും ഗ്ലാസ് തകർക്കുകയുമായിരുന്നു. ശബ്ദം കേട്ട് ഉണർന്ന വീട്ടുകാർ പാടം ഫോറസ്റ്റ് സ്റ്റേഷനിൽ വിവരം അറിയിച്ചു. ഇതോടെ വനപാലകരുടെ രാത്രികാല പട്രോളിംഗ് സംഘം സ്ഥലത്ത് എത്തി. വനപാലകർ എത്തിയപ്പോഴേക്കും കാട്ടാന കാട് കയറിയിരുന്നു. കെ.യു. ജനീഷ് കുമാർ എംഎൽഎ, കോന്നി ഡിഎഫ്ഒ ആയുഷ് കുമാർ കോറി എന്നിവരും വനം വകുപ്പ് മറ്റ് ഉദ്യോഗസ്ഥരും ഇന്നലെ സ്ഥലം സന്ദർശിച്ചു. പ്രദേശത്തു കാട്ടാന ശല്യം രൂക്ഷമാണെന്നും പ്രദേശവാസികൾ പറയുന്നു. തുടർച്ചയായ ദിവസങ്ങളിൽ പുലി ഇറങ്ങിയതോടെ ഭീതിയിലായ പ്രദേശത്താണ് കാട്ടാനയും വീണ്ടും എത്തിയിരിക്കുന്നത്.

ഓണം ഖാദിമേള കളക്ടറേറ്റില്‍

പത്തനംതിട്ട: ജില്ലാ ഖാദി ഗ്രാമ വ്യവസായത്തിന്‍റെ ആഭിമുഖ്യത്തില്‍ കളക്ടറേറ്റില്‍ ഓണം ഖാദി മേള സംഘടിപ്പിച്ചു. ഖാദി ഉത്പന്നങ്ങളായ കോട്ടണ്‍, സില്‍ക്ക് സാരികള്‍, ഷര്‍ട്ടുകള്‍, കലങ്കാരി സാരികള്‍, ഷര്‍ട്ടിംഗ്, ഷാളുകള്‍, തോര്‍ത്തുകള്‍, കാവിമുണ്ട്, ടവ്വലുകള്‍, നറുതേന്‍, എള്ളെണ്ണ, ഖാദിര്‍ ബാര്‍ സോപ്പ് തുടങ്ങിയവ ഒരുക്കിയിരുന്നു. സംസ്ഥാന ഖാദി ഗ്രാമവ്യവസായ ബോര്‍ഡിന്‍റെ നേതൃത്വത്തില്‍ "എനിക്കും വേണം ഖാദി' സന്ദേശത്തിന്‍റെ ഭാഗമായാണ് മേള സംഘടിപ്പിച്ചത്. 30 ശതമാനം ഇളവിലാണ് ഖാദി വസ്ത്രങ്ങള്‍ വിറ്റത്. ഇലന്തൂര്‍, അടൂര്‍, പത്തനംതിട്ട, റാന്നി ചേത്തോങ്കര എന്നിവിടങ്ങളിലും ഓണം ഖാദി മേള നടക്കുന്നുണ്ട്. സര്‍ക്കാര്‍, അര്‍ധസര്‍ക്കാര്‍, ബാങ്ക്, പൊതുമേഖല സ്ഥാപനങ്ങളിലെ ജീവനക്കാര്‍ക്ക് ഒരു ലക്ഷം രൂപയുടെ വാങ്ങലിന് പലിശരഹിത ക്രെഡിറ്റ് സൗകര്യമുണ്ട്. 1,000 രൂപയ്ക്ക് സാധനം വാങ്ങിയാല്‍ സമ്മാന കൂപ്പണുണ്ട്. ആഴ്ചതോറും നറുക്കെടുപ്പിലൂടെ 3,000 രൂപയുടെ ഗിഫ്റ്റ് വൗച്ചറുകളും നല്‍കും. സെപറ്റംബര്‍ നാലിന് മേള അവസാനിക്കും.

അപകടഭീഷണിയുമായി മൂടിയില്ലാത്ത ഓടകൾ

അടൂർ: അടൂർ തിരക്കേറിയ വൺവേ റോഡിൽ ഓടകൾക്ക് മൂടിയില്ലാത്തത് അപകട ഭീഷണി ഉയർത്തുന്നു. നഗരസഭാ കാര്യാലയത്തിനു മുന്നിലായി പോലീസ് സ്റ്റേഷനിലേക്കുള്ള വഴിയിലേക്ക് തിരിയുന്ന ഭാഗത്തെ ഓടകളാണ് മൂടിയില്ലാതെയും ചെളി നിറഞ്ഞും കിടക്കുന്നത്. ഓടയ്ക്ക് ആറ് അടിയിലേറെ താഴ്ചയുണ്ട്. റോഡിലൂടെ പോകുന്ന വലിയവാഹനങ്ങൾക്ക് സൈഡ് കൊടുക്കുമ്പോൾ ഇരു ചക്രവാഹനങ്ങൾ തെന്നിമാറി ഓടയിൽ പതിച്ച് അപകടം സംഭവിക്കാനുള്ള സാധ്യതയും ഏറെയാണ്. കഴിഞ്ഞദിവസം ഓടയ്ക്ക് സമീപം സ്ഥാപിച്ചിരിക്കുന്ന നോ പാർക്കിംഗ് ബോർഡ് വാഹനം ഇടിച്ച് തകർത്തിരുന്നു. പോലീസ് സ്റ്റേഷൻ, നിരവധി സർക്കാർ സ്ഥാപനങ്ങൾ പ്രവർത്തിക്കുന്ന റവന്യു ടവർ, കോടതി, നഗരസഭാ കാര്യാലയം, ശ്രീമൂലം മാർക്കറ്റ് തുടങ്ങിയ സ്ഥാപനങ്ങളിലേക്കു പോകുന്ന കാൽനട യാത്രക്കാരും വാഹന യാത്രക്കാരും സഞ്ചരിക്കുന്ന നഗരത്തിലെ ഏറ്റവും തിരക്കുള്ള റോഡാണിത്. കൂടാതെ ധാരാളം സ്കൂൾ വിദ്യാർഥികളും കടന്നുപോകുന്ന ഈ റോഡിൽ കാൽവഴുതി ഓടയിൽ വീണ് അപകടം സംഭവിക്കാനുള്ള സാധ്യതയും കൂടുതലാണ്. മൂടിയില്ലാത്ത ഓടയ്ക്കു മുകളിൽ എത്രയും പെട്ടെന്ന് സ്ലാബിട്ട് അപകട ഭീഷണി ഒഴിവാക്കണമെന്ന് നാട്ടുകാരും വ്യാപാരികളും ആവശ്യപ്പെട്ടു.

കോലറയാർ നവീകരണം പുരോഗമിക്കുന്നു

തിരുവല്ല : ജനകീയ കൂട്ടായ്മയുടെ നേതൃത്വത്തിൽ കോലറയാർ നവീകരണം പുരോഗമിക്കുന്നു. മാലിന്യം മൂടി നീരൊഴുക്ക് നിലച്ചുനാശത്തിന്‍റെ വക്കിലായ കോലയാറിനെ വീണ്ടെടുക്കാനുള്ള നടപടിക്കു കോലറയാർ സംരക്ഷണസമിതിയാണ് തുടക്കം കുറിച്ചത്. പമ്പയുടെ കൈവഴിയായി കടപ്ര പഞ്ചായത്തിലെ അറയ്ക്കൽ മുയപ്പിൽ നിന്ന് ആരംഭിച്ച് 11.5 കിലോമീറ്റർ ദൂരത്തിൽ ഒഴുകുന്ന കോലറയാർ പമ്പയുടെതന്നെ കൈവഴിയായ നിരണം അരീത്തോട്ടിൽ പതിക്കും. വാഹന ഗതാഗത സൗകര്യം ഇല്ലാതിരുന്ന കാലത്ത് ജലഗതാഗത വകുപ്പിന്‍റെ ബോട്ട് സർവീസുകളും ചരക്ക് നീക്കത്തിനായി കെട്ടുവള്ളങ്ങളും കടന്നു പോയിരുന്ന തോടാണ് ഇത്. കാലം പുരോഗമിച്ചതോടെ ജലഗതാഗത്തിനു പ്രസക്തി കുറഞ്ഞു. ഇതിനുപിന്നാലെ നിരവധി ഭാഗങ്ങളിൽ സ്വകാര്യ വ്യക്തികൾ തോട് കൈയേറി. കാലക്രമേണ മണ്ണും മാലിന്യവും അടിഞ്ഞുകൂടി നീരൊഴുക്ക് നിലച്ചു. മാത്യു ടി. തോമസ് എംഎൽഎയുടെ ഇടപെടലിന്‍റെ ഫലമായി എട്ടുവർഷം മുമ്പ് ജലസേചന വകുപ്പിൽനിന്ന് അനുവദിച്ച നാലരക്കോടി രൂപ ചെലവഴിച്ച് തോട് ആഴംകൂട്ടി നവീകരിച്ചിരുന്നു. ആഴം കൂട്ടലടക്കമുള്ള പദ്ധതികൾ ഒന്നുംതന്നെ നടക്കാതെ വന്നതോടെ വീണ്ടും പോളയും പായലും മാലിന്യങ്ങളും അടിഞ്ഞു. മഴക്കാലം ആകുന്പോൾ വെള്ളക്കെട്ടു കാരണം പ്രളയദുരിതവും ഏറി. പത്തനംതിട്ട ജില്ലയിൽ ഏറ്റവും അധികം നെല്ല് ഉത്പാദനം നടക്കുന്ന പഞ്ചായത്തായ നിരണത്തെ പാടശേഖരങ്ങളിലേക്ക് കൃഷിക്ക് ആവശ്യമായ വെള്ളം എത്തിക്കുന്നതിനുള്ള മാർഗംകൂടിയാണ് കോലറയാർ. നവീകരണത്തിന്‍റെ ഭാഗമായി നിരണം പഞ്ചായത്തിലെ പൂവമ്മേലി മുതൽ ഇലഞ്ഞിക്കൽ പാലം വരെയുള്ള ഭാഗത്തെ പോളയും പായലും കഴിഞ്ഞ ദിവസങ്ങളിലായി നീക്കം ചെയ്തിട്ടുണ്ട്. വരും ദിവസങ്ങളിൽ നിരണം പഞ്ചായത്തിലൂടെ കടന്നുപോകുന്ന ഭാഗത്തെ നവീകരണം പൂർത്തിയാക്കുക എന്നതാണ് സമിതി ലക്ഷ്യമിടുന്നത്. രണ്ടാഴ്ചകൊണ്ട് കടപ്ര പഞ്ചായത്തിലെ ഭാഗങ്ങൾകൂടി വൃത്തിയാക്കി കോലറയാറിനെ വീണ്ടെടുക്കാനാണ് സംരക്ഷണസമിതിയുടെ ശ്രമം. ഏബ്രഹാം മത്തായി, റോബി തോമസ്, പി.ഒ. മാത്യു, വി.ടി. ബിനീഷ് കുമാർ, ദാനിയേൽ തോമസ്, രതീഷ് കുമാർ, റിജോ, റെന്നി തേവേരിൽ, അജിൽ പുരയ്ക്കൽ, മോനിച്ചൻ മാന്ത്രയിൽ, രതീഷ് തരിശിൽ, പ്രസാദ് പനയ്ക്കാമറ്റം തുടങ്ങിയവരുടെ നേതൃത്വത്തിലാണ് നവീകരണ പ്രവർത്തനങ്ങൾ പുരോഗമിക്കുന്നത്.

ഓണം ഖാദി മേളയ്ക്കു തുടക്കമായി

റാന്നി: ഓണം ഖാദിമേള പത്തനംതിട്ട ജില്ലാതല ഉദ്ഘാടനം റാന്നി ചെത്തോങ്കര ഖാദി ഗ്രാമസൗഭാഗ്യയില്‍ പ്രമോദ് നാരായണ്‍ എംഎല്‍എ നിര്‍വഹിച്ചു. ഖാദി ബോര്‍ഡിന്‍റെ ജില്ലയ്ക്കുള്ള ഓണസമ്മാനമാണ് മേളയെന്ന് എംഎല്‍എ പറഞ്ഞു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിച്ചു. സംസ്ഥാന ഖാദി ഗ്രാമവ്യവസായ ബോര്‍ഡിന്‍റെ നേതൃത്വത്തില്‍ എനിക്കും വേണം ഖാദി സന്ദേശത്തോടെ സംഘടിപ്പിക്കുന്ന മേള സെപ്റ്റംബര്‍ നാലു വരെയാണ്. ജില്ലാ പഞ്ചായത്തംഗം ജെസി അലക്‌സ് വസ്ത്രത്തിന്‍റെയും പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശി ഖാദി ഗ്രാമവ്യവസായ ഉത്പന്നത്തിന്‍റെയും ആദ്യ വില്‍പന നടത്തി. മുന്‍ എംഎല്‍എ രാജു ഏബ്രഹാം കൂപ്പണ്‍ പ്രകാശനം ചെയ്തു. ഖാദി ബോര്‍ഡ് അംഗം സാജന്‍ തൊടുക, റാന്നി ബ്ലോക്ക് പഞ്ചായത്തംഗം അന്നമ്മ തോമസ്, പഴവങ്ങാടി പഞ്ചായത്തംഗം വി. സി. ചാക്കോ, ജില്ലാ ഇന്‍ഫര്‍മേഷന്‍ ഓഫീസര്‍ സി. ടി. ജോണ്‍, ജില്ലാ ഖാദി ഗ്രാമവ്യവസായ പ്രോജക്ട് ഓഫീസര്‍ വി. ഹരികുമാര്‍, അജിന്‍ ഐപ്പ് ജോര്‍ജ് എന്നിവര്‍ പ്രസംഗിച്ചു.

കന്യാസ്ത്രീമാർക്കെതിരേയുള്ള കേസ് പിൻവലിക്കണം: ക്രിസ്ത്യൻ മൂവ്മെന്‍റ്

പത്തനംതിട്ട: ഛത്തീസ്ഗഡിൽ നിരപരാധികളായ കന്യാസ്ത്രീമാരെ ബജ്റംഗ്ദൾ പ്രവർത്തകർ അകാരണമായി തടഞ്ഞുവച്ച് ആൾക്കൂട്ട വിചാരണ ചെയ്തും മതപരിവർത്തനവും മനുഷ്യക്കടത്തും ആരോപിച്ച് എടുത്തിട്ടുള്ളതുമായ കേസുകൾ അടിയന്തരമായി പിൻവലിക്കണമെന്ന് ക്രിസ്ത്യൻ മൂവ്മെന്‍റ് ഓഫ് ഇന്ത്യ ജില്ലാ ഘടകം ആവശ്യപ്പെട്ടു. രാജ്യത്തു വർധിച്ചുവരുന്ന ഇത്തരം സംഭവങ്ങൾ ഇന്ത്യയുടെ മതേതരത്വത്തെയും സമൂഹ മന‌ഃസാക്ഷിയെയും ആഴത്തിൽ മുറിപ്പെടുത്തുന്നതും രാജ്യത്തെ ക്രൈസ്തവ സമൂഹത്തെ മുഴുവൻ ദുഃഖത്തിലാഴ്ത്തുന്നതാണെന്നും ക്രിസ്ത്യൻ മൂവ്മെന്‍റ് അഭിപ്രായപ്പെട്ടു. ജാതി-വർണ-വർഗ ശക്തികൾ ഇന്ത്യയിൽ ശക്തി പ്രാപിക്കുന്ന സ്ഥിതിവിശേഷം കേന്ദ്ര സംസ്ഥാന സർക്കാരുകളുടെ ശ്രദ്ധയിൽപ്പെടുത്തി ഇത്തരക്കാർക്കെതിരേശക്തമായ നടപടി കൈക്കൊളളണമെന്ന് യോഗം ആവശ്യപ്പെട്ടു. പ്രസിഡന്‍റ് അലക്സ് മാമ്മന്‍റെ അധ്യക്ഷതയിൽ ജേക്കബ് തോമസ് തെക്കേപ്പുരയ്ക്കൽ, ഫിലിപ്പോസ് വർഗീസ്, സി.എസ്. ചാക്കോ, പ്രഭാ ഐപ്പ് , ജാക്സൺ ജോസഫ്, ജെറി കുളക്കാടൻ, ജോർജ് ഉമ്മൻ, വിൻസി സഖറിയ എന്നിവർ പ്രസംഗിച്ചു.

വോട്ടര്‍ പട്ടികയിലെ ക്രമക്കേട് സര്‍ക്കാരിന്‍റെ ഒത്താശയോടെ: ഷാനിമോള്‍ ഉസ്മാന്‍

പത്തനംതിട്ട: തദ്ദേശ സ്ഥാപന തെരഞ്ഞെടുപ്പിൽ സിപിഎം നേതാക്കളുടെ ഇംഗിതമനുസരിച്ച് സര്‍ക്കാരിന്‍റെയും ഉദ്യോഗസ്ഥരുടെയും ഒത്താശയോടെ വ്യാപകമായ ക്രമക്കേടാണ് നടത്തിയിട്ടുള്ളതെന്ന് കെപിസിസി രാഷ്‌ട്രീയകാര്യസമിതി അംഗം ഷാനിമോള്‍ ഉസ്മാന്‍. ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ തദ്ദേശ സ്ഥാപന തെരഞ്ഞെടുപ്പ് മുന്നൊരുക്കങ്ങള്‍ വിലയിരുത്തുവാന്‍ നടത്തിയ ബ്ലോക്ക് കോണ്‍ഗ്രസ് പ്രസിഡന്‍റുമാര്‍, തെരഞ്ഞെടുപ്പ് കോ-ഓർ‌ഡിനേറ്റര്‍മാര്‍ എന്നിവരുടെ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു ഷാനിമോൾ. വോട്ടര്‍പട്ടിക പ്രസിദ്ധീകരിക്കുന്നതിന് മുമ്പുതന്നെ സിപിഎം നേതാക്കള്‍ക്ക് പട്ടിക ചോര്‍ത്തി നല്‍കുകയും നിശ്ചയിച്ച തീയതിയില്‍ പട്ടിക പ്രസിദ്ധീകരിക്കാതിരിക്കുകയും സ്വാഭാവിക അതിര്‍ത്തികള്‍ മാറ്റിമറിച്ച് ഗ്രാമപഞ്ചായത്ത് മുതല്‍ ജില്ലാ പഞ്ചായത്ത് വരെയും മുനിസിപ്പാലിറ്റികളിലും വാര്‍ഡ് വിഭജനം ക്രമരഹിതമായാണ് നടത്തിയതെന്നും ഇതിനെതിരേ നിയമപരവും അല്ലാത്തതുമായ നടപടികള്‍ സ്വീകരിക്കുമെന്നും ഷാനിമോള്‍ ഉസ്മാന്‍ പറഞ്ഞു. ഡിസിസി പ്രസിഡന്‍റ് സതീഷ് കൊച്ചുപറമ്പില്‍ അധ്യക്ഷത വഹിച്ചു. ജനറല്‍ സെക്രട്ടറിമാരായ എം.എം. നസീര്‍, പഴകുളം മധു തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]