ADVERTISEMENT

ADVERTISEMENT

സഹൃദയ -ഇൻക്ലൂസിസ് 3 ഡി പ്രിന്‍റിംഗ് പരിശീലനം

തുറവൂർ: എറണാകുളം-അങ്കമാലി അതിരൂപതാ സാമൂഹ്യ പ്രവർത്തന വിഭാഗമായ സഹൃദയയുടെ ആഭിമുഖ്യത്തില്‍ ന്യൂറോ ഡൈവർജന്‍റായ വ്യക്തികൾക്ക് ഐടി പരിശീലനം നൽകി തൊഴിൽ ലഭ്യമാക്കുന്ന ഇന്‍ക്ലൂസിവ് ഓർഗ് ഫൗണ്ടേഷൻ പദ്ധതിയുടെ ഭാഗമായി സംഘടിപ്പിക്കുന്ന 3ഡി പ്രിന്‍റിംഗ് പരിശീലനത്തിനു തുടക്കമായി.

തുറവൂർ സാൻജോ സദൻ ഇന്‍ക്ലൂസിസ് ഐടി സ്‌കില്ലിംഗ് സെന്‍ററിൽ സഹൃദയ എക്സിക്യൂട്ടീവ് ഡയറക്ടർ ഫാ. ജോസഫ് കൊളുത്തുവെള്ളിലിന്‍റെ അധ്യക്ഷതയിൽ ചേർന്ന യോഗത്തിൽ ദലീമ ജോജോ എംഎൽഎ പദ്ധതിയുടെ ഉദ്ഘാടനം നിർവഹിച്ചു.

കെ-ഡിസ്ക് എക്സിക്യൂട്ടീവ് ഡയറക്ടർ റോബിൻ ടോമി മുഖ്യപ്രഭാഷണം നടത്തി. തുറവൂർ പഞ്ചായത്തംഗം കെ.എസ്. ശശികല, മദർ സുപ്പീരിയർ സിസ്റ്റർ റോസ് മേരി, സ്പെഷൽ സ്കൂൾ പ്രിൻസിപ്പൽ സിസ്റ്റർ ലിസ ജോർജ്, സിസ്റ്റർ സ്റ്റാർലി, പിടിഎ പ്രസിഡന്‍റ് അനു ജയചന്ദ്രൻ എന്നിവർ പ്രസംഗിച്ചു.

പദ്ധതിയുടെ ഭാഗമായി ന്യൂറോ ഡൈവർജന്‍റായ 250 ലേറെ വ്യക്തികൾക്ക് ഇതുവരെ പരിശീലനം നൽകാനും വിവിധ ഐടി കമ്പനികളിൽ തൊഴിൽ ഉറപ്പുവരുത്താനും കഴിഞ്ഞിട്ടുണ്ടെന്ന് സഹൃദയ ഡയറക്ടർ ഫാ. ജോസ് കൊളുത്തുവള്ളിൽ പറഞ്ഞു.

ADVERTISEMENT

ബിന്ദു പത്മനാഭൻ തിരോധാന കേസ്: മൃതദേഹാവശിഷ്ടം ജൈനമ്മയുടേതോ ബിന്ദുവിന്‍റേതോ?

ചേര്‍ത്തല: ചേര്‍ത്തല കടക്കരപ്പള്ളിയില്‍നിന്നു ബിന്ദു പദ്മനാഭന്‍, കോട്ടയം ഏറ്റുമാനൂരില്‍നിന്നു ജൈനമ്മ എന്നിവരെ കാണാതായ കേസുകളില്‍ ആരോപണ വിധേയനായ സെബാസ്റ്റ്യന്‍റെ വീട്ടുവളപ്പില്‍നിന്ന് അവശിഷ്ടങ്ങള്‍ കണ്ടെത്തി. തിരോധാനക്കേസില്‍ ക്രൈംബ്രാഞ്ച് അന്വേഷണം നടത്തിവരുന്നതിനിടെയാണ് ആള്‍ത്താമസമില്ലാത്ത വീടിന്‍റെ സമീപത്തുനിന്നു മൃതദേഹാവശിഷ്ടങ്ങള്‍ കണ്ടെത്തുന്നത്.ജൈനമ്മയുടെ തിരോധാനം അന്വേഷിക്കുന്നതിനിടെയാണ് പോലീസ് സെബാസ്റ്റ്യന്‍റെ ആളൊഴിഞ്ഞ വീട്ടില്‍ പരിശോധന നടത്തിയതെങ്കിലും കിട്ടിയ അവശിഷ്ടങ്ങളുടെ പഴക്കം ബിന്ദുവിന്‍റെ തിരോധാനത്തിലേക്കും സംശയം നീളാന്‍ ഇടയാക്കുന്നു. മാത്രവുമല്ല, കടക്കരപ്പള്ളി ആലുങ്കല്‍ പത്മാനിവാസില്‍ പരേതനായ പത്മനാഭപിള്ളയുടെ മകള്‍ ബിന്ദു പത്മനാഭന്‍ (52) തിരോധാന കേസിലും അമ്മാവന്‍ എന്നു വിളിക്കുന്ന സെബാസ്റ്റ്യന്‍ പ്രതിയാണ്. ലഭിച്ച അവശിഷ്ടങ്ങള്‍ ആരുടേതാണെന്ന് സ്ഥിരീകരിച്ചിട്ടില്ല. ഫോറന്‍സിക് പരിശോധനാ ഫലങ്ങള്‍ക്കുശേഷമേ ഇതുസംബന്ധിച്ച് വ്യക്തത വരുകയുള്ളൂ. അവശിഷ്ടങ്ങള്‍ക്ക് വര്‍ഷങ്ങള്‍ പഴക്കമുണ്ടെന്നാണ് പ്രാഥമിക വിവരം. കോട്ടയം ക്രൈംബ്രാഞ്ച് എസ്പി ഗിരീഷ് പി. സാരഥിയുടെ നേതൃത്വത്തിലാണ് അന്വേഷണം നടക്കുന്നത്. ബിന്ദുവിനെ കാണാതാവുന്നത് 2006ല്‍ 2006 മുതല്‍ ബിന്ദു പത്മനാഭനെ കാണാനില്ലായിരുന്നു. എന്നാല്‍, താന്‍ 2007ല്‍ ബിന്ദുവിനെ കാറിലും ഓട്ടോറിക്ഷയിലും ചേര്‍ത്തല കെഎസ്ആര്‍ടിസി ബസ് സ്റ്റാൻഡില്‍ കൊണ്ടുവന്നുവിട്ടു എന്നു പറയുന്നതിലെ വിരുദ്ധതമൂലമാണ് ക്രൈംബ്രാഞ്ച് സെബാസ്റ്റ്യനെ നുണപരിശോധനയ്ക്ക് വിധേയമാക്കുന്നത്. ബിന്ദു പത്മനാഭനെ കാണാതായ 2006 മുതല്‍ അവരുടെ ബാങ്ക് അക്കൗണ്ട് ഇതുവരെ പ്രവര്‍ത്തിച്ചിട്ടില്ലെന്ന് അന്വഷണ ഉദ്യോഗസ്ഥര്‍ പറയുന്നു. 2017 ലാണ് വിദേശത്തുള്ള സഹോദരന്‍ പ്രവീണ്‍ ചേര്‍ത്തല പോലീസില്‍ പരാതി നല്‍കുന്നത്. ആദ്യഘട്ടത്തില്‍ പട്ടണക്കാട് പോലീസും പിന്നീട് കുത്തിയതോട് പോലീസും തുടര്‍ന്ന് ജില്ലാ നര്‍കോട്ടിക് സെല്‍ ഡിവൈഎസ്പിയും അന്വേഷണം നടത്തി. കേസ് ക്രൈംബ്രാഞ്ചിനു കൈമാറിയതോടെ എട്ടോളം ഉദ്യോഗസ്ഥരാണ് കേസ് അന്വേഷണം നടത്തിയത്. ഇതിനോടകം 80 പേരുടെ മൊഴികളാണ് രേഖപ്പെടുത്തിയിട്ടുള്ളത്. സംഭവത്തില്‍ മൂന്ന് കേസുകള്‍ രജിസ്റ്റര്‍ ചെയ്ത് വിവിധ ഘട്ടങ്ങളില്‍ 11 പ്രതികളെ പോലീസ് അറസ്റ്റ് ചെയ്തിരുന്നു. തുടര്‍ അന്വേഷണം നടത്തിയിട്ടും ബിന്ദുവിനെക്കുറിച്ച് കാര്യമായ വിവരമൊന്നും ലഭിച്ചില്ല. ജീവിച്ചിരിപ്പുണ്ടോയെന്നുപോലും പോലീസിനും നാട്ടുകാര്‍ക്കും വ്യക്തതയുണ്ടായില്ല. പോലീസിന്‍റെയും ക്രൈംബ്രാഞ്ചിന്‍റെയും അന്വേഷണത്തില്‍ ബിന്ദു പത്മനാഭന്‍ 2003 മുതല്‍ സെബാസ്റ്റ്യനുമായി അടുത്തബന്ധം പുലര്‍ത്തിയിരുന്നതായും പലതവണ സെബാസ്റ്റ്യന്‍റെ പള്ളിപ്പുറത്തെ വീട്ടില്‍ ബിന്ദു ചെന്നതായും മൊഴി ലഭിച്ചിരുന്നു. ബിന്ദു പത്മനാഭന്‍റെ മാതാപിതാക്കളുടെ മരണശേഷം ഏറ്റവും കൂടുതല്‍ അടുപ്പമുണ്ടായിരുന്നത് സെബാസ്റ്റ്യന്‍ മാത്രമായിരുന്നെന്നും കണ്ടെത്തിയിരുന്നു. ബിന്ദുവിന്‍റെ എസ്എസ്എല്‍സി ബുക്ക്, ഡ്രൈവിംഗ് ലൈസന്‍സ് എന്നിവ കൃത്രിമമായി തയാറാക്കിയതിലും 2013ല്‍ ബിന്ദുവിന്‍റെ പേരില്‍ ഇടപ്പള്ളിയിലെ ഭൂമി വ്യാജപ്രമാണം ഉണ്ടാക്കി കൈമാറ്റം നടത്തിയ കേസിലുമാണ് സെബാസ്റ്റ്യനെ പ്രധാന പ്രതിയാക്കി പോലീസ് കേസെടുത്തത്. സെബാസ്റ്റ്യന്‍റെ പ്രധാന സഹായിയും ഓട്ടോറിക്ഷാ തൊഴിലാളിയുമായിരുന്ന പള്ളിപ്പുറം സ്വദേശിയുടെ മരണത്തിലും ദുരൂഹത ഉണ്ടായിരുന്നു. സെബാസ്റ്റ്യന്‍റെ ജീവിത പശ്ചാത്തലവും നാട്ടുകാരില്‍ സംശയം ഉണ്ടാക്കിയിരുന്നു. നാട്ടുകാരില്‍ പലര്‍ക്കും സംശയം സെബാസ്റ്റ്യനെ സംഭവത്തില്‍ സെബാസ്റ്റ്യനെയായിരുന്നു നാട്ടുകാരില്‍ പലര്‍ക്കും സംശയം. പണത്തിനുവേണ്ടി ഇയാള്‍ കൊലനടത്തിയതായിരിക്കുമെന്ന് നാട്ടുകാരില്‍ പലരും രഹസ്യമായി പറയുകയും ചെയ്തിട്ടുണ്ട്. ഇയാളുടെ വീട്ടിലെ ഒഴിഞ്ഞുകിടക്കുന്ന ു പുരയിടത്തിലായിരിക്കും ബിന്ദു പത്മനാഭനെ കുഴിച്ചുമൂടിയിരിക്കുന്നതെന്നായിരുന്നു നാട്ടുകാരുടെ സംശയം. അന്വേഷണ ഉദ്യോഗസ്ഥര്‍ക്കും ഇയാളെ സംശയം ഉണ്ടായിരുന്നു. കേസില്‍ ആദ്യ ഘട്ടത്തില്‍ പോലീസിന്‍റെയും പിന്നീട് ക്രൈംബ്രാഞ്ചിന്‍റെയും അന്വേഷണങ്ങളെല്ലാം ചെന്നെത്തിയിരിക്കുന്നത് സെബാസ്റ്റ്യനിലാണെങ്കിലും വ്യക്തമായ തെളിവുകളുടെ അഭാവമാണ് അന്വേഷണ സംഘത്തിനു വെല്ലുവിളിയായത്. സെബാസ്റ്റ്യന്‍റെ വീടിന്‍റെ പരിസരം കേന്ദ്രീകരിച്ചും അന്വേഷണ ഉദ്യോഗസ്ഥര്‍ ഇതിനുമുമ്പും അന്വേഷണം നടത്തിയെങ്കിലും ഒന്നും കണ്ടെത്താനായില്ല. അന്വേഷണത്തിന്‍റെ പുറകേ സഹോദരന്‍ 2017 ലാണ് വിദേശത്തുള്ള സഹോദരന്‍ പ്രവീണ്‍കുമാര്‍ ചേര്‍ത്തല പോലീസില്‍ പരാതി നല്‍കുന്നത്. സഹോദരന്‍ നല്‍കിയ പരാതിയെത്തുടര്‍ന്നായിരുന്നു പോലീസ് കേസ് എടുത്ത് അന്വേഷണം ആരംഭിക്കുന്നത്. അച്ഛനമ്മമാരുടെ മരണത്തിനുശേഷം വീടുമായും സഹോദരനുമായും ബന്ധമില്ലാതെ ജീവിച്ചിരുന്നതിനിടെയായിരുന്നു ബിന്ദുവിനെ കാണാതായത്. ആദ്യമായി പരാതി നല്‍കാന്‍ പോലീസ് സ്റ്റേഷനില്‍പോകുമ്പോള്‍ സെബാസ്റ്റ്യനുമായി പ്രവീണ്‍ സംസാരിച്ചിരുന്നു. എന്നാല്‍, ബിന്ദുവിനെക്കുറിച്ച് ഒന്നും അറിയില്ലെന്നും ഫോണ്‍ നമ്പര്‍ പോലുമില്ലെന്നണ് സെബാസ്റ്റ്യന്‍ അന്ന് പ്രവീണിനോട് പറഞ്ഞത്. ബിന്ദുവിന്‍റെ പേരിലുള്ള ഇടപ്പള്ളിയിലെ സ്ഥലം വിറ്റുകിട്ടിയതിലെ 25 ലക്ഷം രൂപ ചേര്‍ത്തലയിലെ ഒരു ബാങ്കില്‍ നിക്ഷേപിച്ചിട്ടുണ്ടെന്നും സെബാസ്റ്റ്യന്‍റെ പിന്നില്‍ ആരെക്കെയോ ഉണ്ടെന്നും പ്രവീണ്‍ സംശയം പ്രകടിപ്പിച്ചിരുന്നു. നുണപരിശോധനയും കോടതി തള്ളി പ്രതി സെബാസ്റ്റ്യന്‍ ആണെന്ന് ഏറെക്കുറേ അന്വേഷണ ഉദ്യോഗസ്ഥര്‍ ഉറപ്പിച്ചെങ്കിലും അസാമാന്യരീതിയില്‍ സെബാസ്റ്റ്യന്‍ ആര്‍ക്കും പിടികൊടുക്കാതെ രക്ഷപ്പെടുകയായിരുന്നു. അവസാനത്തെ പിടിവള്ളിയായിട്ടാണ് സെബാസ്റ്റ്യന് നുണപരിശോധന നടത്തണമെന്നാവശ്യപ്പെട്ടുള്ള ക്രൈംബ്രാഞ്ചിന്‍റെ അപേഷ കഴിഞ്ഞ ഏപ്രിലില്‍ ചേര്‍ത്തല ജൂഡീഷ്യല്‍ ഒന്നാംക്ലാസ് മജിസ്‌ട്രേറ്റ് കോടതി തള്ളിയിരുന്നു. ജില്ലാ ക്രൈംബ്രാഞ്ച് ഡിറ്റക്ടീവ് ഇന്‍സ്പക്ടര്‍ സി.ആര്‍. പ്രമോദാണ് നുണപരിശോധനക്ക് അനുമതിതേടികോടതിയില്‍ അപേക്ഷ നല്‍കിയത്. എന്നാല്‍, അന്വേഷണ ഉദ്യോഗസ്ഥരുടെ ആവശ്യം കോടതി അംഗീകരിച്ചില്ല.

ഗവ. എൽപി സ്കൂളിന്‍റെ മതിൽ ഇടിഞ്ഞുവീണു

മാന്നാർ: കനത്ത മഴയിൽ സ്കൂളിന്‍റെ ചുറ്റുമതിൽ ഇടിഞ്ഞുവീണു. ചെന്നിത്തല വെട്ടത്തുവിള ഗവ. എൽപി സ്കൂളിന്‍റെ ചുറ്റുമതിലാണ് ഇടിഞ്ഞു വീണത്. 30 വർഷത്തിനു മുകളിൽ പഴക്കമുള്ള മതിൽ പൂർണമായും റോഡിലേക്ക് നിലംപതിച്ചു. കാലപ്പഴക്കം ചെന്ന മതിലിന്‍റെ അടിത്തറയ്ക്ക് കാര്യമായ ബലമുണ്ടായിരുന്നില്ല. സ്കൂൾ അവധി ദിവസങ്ങളിൽ പുറത്തുനിന്നു ള്ളവർ അനധികൃതമായി മതിൽചാടി സ്കൂൾ പരിസരത്ത് കയറുന്നത് തടയുന്നതിനായി നാലു വർഷം മുൻപ് പഴയ മതിലിന് മുകളിൽ നാലുവരിയിൽ പുതിയ സിമന്‍റ് ഇഷ്ടിക ഉപയോഗിച്ച് ഉയരം കൂട്ടിയിരുന്നു. ഭാരമുള്ള ഇഷ്ടിക ഉപയോഗിച്ച് ഉയരം കൂട്ടിയതും മതിൽ ഇടിഞ്ഞുവീഴാൻ കാരണമായതായി കണക്കാക്കുന്നു. സ്കൂൾ അവധി ആയതിനാലും ഈ സമയം റോഡിൽ യാത്രക്കാർ ഇല്ലാതിരുന്നതുകൊണ്ടും വലിയ അപകടം ഒഴിവാക്കി. സ്കൂളിന്‍റെ സുരക്ഷയ്ക്കാവശ്യമായ നടപടികൾ കൈ ക്കൊളുന്നതിന് പഞ്ചായത്തിൽ ഇന്ന് അടിയന്തര യോഗം ചേരുമെന്ന് വാർഡ് മെംബർ ജി. ജയദേവ് പറഞ്ഞു.

മൊബൈല്‍ നല്‍കിയില്ല; വിദ്യാര്‍ഥി തൂങ്ങിമരിച്ചു

എടത്വ: ഗെയിം കളിക്കാന്‍ മൊബൈല്‍ നല്‍കാത്തതിനെത്തുടര്‍ന്ന് എട്ടാം ക്ലാസ് വിദ്യാര്‍ഥി തൂങ്ങിമരിച്ചു. തലവടി പഞ്ചായത്ത് എട്ടാം വാര്‍ഡ് മാണത്താറ ഇല്ലത്തുപറമ്പ് മോഹന്‍ലാല്‍-അനിത ദമ്പതികളുടെ മൂത്തമകന്‍ ആദിത്യന്‍ (13) ആണ് തൂങ്ങി മരിച്ചത്. ഇന്നലെ രാവിലെ എട്ടോടെ ഗെയിം കളിക്കുന്നതിനായി അമ്മയോട് മൊബൈല്‍ ആവശ്യപ്പെട്ടിരുന്നെങ്കിലും ലഭിക്കാത്തതിനെത്തുടര്‍ന്ന് പിണങ്ങി വീട്ടിലെ മുറിയില്‍ കയറി തൂങ്ങി മരിക്കുകയായിരുന്നു. കൂലിപ്പണിക്കാരനായ പിതാവ് രാവിലെ പണിക്കു പോയിരുന്നു. സംഭവം നടക്കുമ്പോള്‍ മാതാവ് അനിതയും സഹോദരന്‍ മൂന്നാം ക്ലാസ് വിദ്യാര്‍ഥി ആദിഷ്യനുമാണ് വീട്ടിലുണ്ടായിരുന്നത്. ഏറെ നേരമായിട്ടും മകനെ കാണാത്തതിനെത്തുടര്‍ന്ന് വാതിലില്‍ മുട്ടിവിളിച്ചിട്ടും തുറന്നില്ല. മാതാവിന്‍റെ അലര്‍ച്ച കേട്ട് ഓടിയെത്തിയ നാട്ടുകാര്‍ വാതില്‍ ചവിട്ടിപ്പൊളിച്ച് അകത്തു കടന്നപ്പോള്‍ ആദിത്യന്‍ ഷാള്‍ കഴുത്തില്‍ കെട്ടി ഫാനില്‍ തൂങ്ങിയ നിലയിലായിരുന്നു. മൃതദേഹം പോസ്റ്റ്മോര്‍ട്ടത്തിനുശേഷം ബന്ധുക്കള്‍ക്ക് വിട്ടുനല്‍കി. മാന്നാര്‍ നായര്‍ സമാജം സ്‌കൂളിലെ എട്ടാം ക്ലാസ് വിദ്യാര്‍ഥിയാണ് മരിച്ച ആദിത്യന്‍. സംസ്‌കാരം ഇന്ന് രാവിലെ 11ന് വീട്ടുവളപ്പില്‍.

അരുമനാടിനായി ഒരുമയോടെ എന്ന മുദ്രാവാക്യവുമായി കുട്ടനാടൻ ജനത ഒത്തുകൂടി

മുട്ടാർ: അരുമനാടിനായി ഒരുമയോടെ എന്ന മുദ്രാവാക്യവുമായി കട്ടുനാടൻ ജനത മുട്ടാറ്റിൽ എല്ലാ ജനവിഭാഗങ്ങളെയും ഉൾപ്പെടുത്തി ആലോചനാ യോഗം നടത്തി. ജനപ്രതിനിധികൾ, സാമൂദായിക നേതാക്കൻമാർ, രാഷ്ട്രീയനേതാക്കൻമാർ, സ്ഥാപന മേധാവികൾ, ക്ലബ് ഭാരവാഹികൾ, പൊതുജനങ്ങൾ എന്നിവർ ചേർന്നായിരുന്നു ആലോചനാ യോഗം. മുട്ടാർ സെന്‍റ് ജോർജ് പാരീഷ് ഹാളിൽ നടന്ന യോഗത്തിൽ വികാരി ഫാ. ജോൺ വി. തടത്തിൽ അധ്യക്ഷത വഹിച്ചു. അടുത്തടുത്തുണ്ടായ നാലു വെള്ളപ്പൊക്കം മൂലം കുട്ടനാട്ടുകാർ നരകയാതന അനുഭവിക്കുന്നതായി അദ്ദേഹം പറഞ്ഞു. മുട്ടാർ ഒറ്റപ്പെടുന്ന അവസ്ഥ മാറ്റാൻ അടിയന്തരമായി മുട്ടാർ സെൻട്രൽ റോഡിലെ സൗഹ്യദയ ജംഗ്ഷൻ മുതൽ കൈതത്തോടുവരെയുള്ള ഭാഗം ഉയർത്തി പണിയുക, മുട്ടാർ മിത്രക്കരി ജീമംഗലം റോഡ് ഉയർത്തി ജീമംഗലം പാലം പണിയുക, മണിമലയാറ്റിലെയും ചെറുതോടുകളുടെയും ഇരുവശത്തുമുള്ള കാട് വെട്ടിത്തെളിച്ച്, മണൽ നീക്കം ചെയ്ത് ആഴം കൂട്ടുക തുടങ്ങിയ ആവശ്യങ്ങൾ സാധിക്കാൻ ഒന്നാം ഘട്ടമായി ഭീമ ഹർജി മുഖ്യമന്ത്രി, വകുപ്പ് മന്ത്രിമാർ, എംഎൽഎ, എംപി, ജില്ലാ കളക്ടർ എന്നിവർക്കു നൽകാൻ തീരുമാനിച്ചു. രണ്ടാം ഘട്ടത്തിൽ ജനകീയ സമരങ്ങൾ സംഘടിപ്പിക്കാൻ തീരുമാനിച്ചു. അടുത്തവർഷത്തെ വെള്ളപ്പൊക്കത്തിൽ മുട്ടാർ ഒറ്റപ്പെടാതെയും കുട്ടനാട്ടുകാർക്ക് വെള്ളപ്പൊക്ക ദുരിതത്തിൽനിന്നു രക്ഷ ലഭിക്കാനുള്ള നടപടികളുമായി ആക്ഷൻ കൗൺസിൽ മുന്നോട്ടുപോകും. വിഷയാവതരണം തോമസ്കുട്ടി മാത്യു ചീരംവേലിൽ നിർവഹിച്ചു. ഫാ. ടോണി പുതുവീട്ടികളം, ഫാ. ജോസഫ് കട്ടപ്പുറം, ഫാ. ജോജിൻ ഇലഞ്ഞിക്കൽ, ഫാ. ജോൺ സി. മോളിപ്പാവിൽ, സി.കെ. വേണുഗോപാൽ, ഫാ. മനു, കെ.പി. കുഞ്ഞുമോൻ, പി.കെ. സദാനന്ദൻ, പി.ജെ. പ്രസന്നകുമാർ തുടങ്ങിയവർ അടങ്ങിയ ആക്ഷൻ കൗൺസിൽ കമ്മിറ്റിയെ തെരഞ്ഞെടുത്തു.

കക്കൂസ് മാലിന്യപ്ലാന്‍റ്: കോണ്‍ഗ്രസിന്‍റെ പ്രതിഷേധ സമരം നാളെ

ചേര്‍ത്തല: നഗരസഭ അനതറവെളിയില്‍ സ്ഥാപിച്ചിരിക്കുന്ന കക്കൂസ് മാലിന്യപ്ലാന്‍റ് പ്രദേശവാസികള്‍ക്ക് തലവേദനയാകുന്നു. 7.7 കോടി മുടക്കി കെഎല്‍ഡി ഫീക്കല്‍ സ്ലെഡ്ജ് ട്രീറ്റ്‌മെന്‍റ് പ്ലാന്‍റ് ജില്ലയിലെ ആദ്യത്തെ കക്കൂസ് മാലിന്യ സംസ്‌കരണ പ്ലാന്‍റാണ്. നാലുമാസം മുമ്പാണ് പ്രവര്‍ത്തനം ആരംഭിച്ചത്. മൂന്നുമാസം കൊണ്ട് 700 ഓളം ലോഡ് ടാങ്കര്‍ കക്കൂസ് മാലിന്യം സംസ്കരിച്ചതായി അധികൃതര്‍ പറയുന്നു. 50 സെന്‍റില്‍ സ്ഥിതി ചെയ്യുന്ന പ്ലാന്‍റില്‍നിന്നും വരുന്ന സ്ലറിയും വേസ്റ്റ് വെള്ളവും ശാസ്ത്രീയമായി സംസ്കരിക്കാന്‍ യാതൊരു നടപടിയും സ്വീകരിക്കാതെയാണ് പ്രവര്‍ത്തനം തുടങ്ങിയതെന്ന് നാട്ടുകാര്‍ ആരോപിക്കുന്നു. പ്ലാന്‍റില്‍നിന്നും വരുന്ന സ്ലറിയും വേസ്റ്റ് ജലവും സംസ്കരിക്കാതെ അവിടെതന്നെ കുഴിച്ചുമൂടുകയാണ് ചെയ്യുന്നത്. മഴക്കാലമായതോടെ ഈ മാലിന്യമെല്ലാം പ്രദേശത്ത് ഒഴുകി വ്യാപിക്കുകയും പ്രദേശത്ത് ജനങ്ങളുടെ ആരോഗ്യത്തെ ഗുരുതരമായി ബാധിക്കുകയും ചെയ്യുകയാണ്. പ്രദേശത്തെ കുടിവെള്ളത്തിനായി ഉപയോഗിക്കുന്ന കിണറുകളിലെയും കുഴല്‍ക്കിണറുകളിലെയും ജലം മലീമസമായതായി ജനങ്ങള്‍ ആരോപിക്കുന്നു. സമീപമുള്ള നിരവധി സ്ഥാപനങ്ങളിലെ ജനങ്ങളുടെ ജീവന് ഇത് ഭീഷണിയായിരിക്കുകയാണ്. പ്രദേശത്ത് തൊട്ടടുത്ത് സ്ഥിതിചെയ്യുന്ന പ്രത്യാശ കാന്‍സര്‍ സെന്‍റര്‍, ഗ്രീന്‍ഗാര്‍ഡന്‍സ് ഹോസ്പിറ്റല്‍, കെവിഎം ആശുപത്രി, കെവിഎം ട്രസ്റ്റ് കോളജ്, മരുത്തോര്‍വട്ടം ക്ഷേത്രം, മരുത്തോര്‍വട്ടം പള്ളി, സ്കൂള്‍ തുടങ്ങി തണ്ണീര്‍മുക്കം പഞ്ചായത്തിലെ 18,20,19 വാര്‍ഡുകളിലെയും ചേര്‍ത്തല നഗരസഭയിലെ മൂന്നുവാര്‍ഡുകളിലെയും ജനങ്ങളുടെ ആരോഗ്യത്തിന് ഭീഷണിയായിരിക്കുകയാണ്. പരാതിയെത്തുടര്‍ന്ന് കക്കൂസ് മാലിന്യ പ്ലാന്‍റിലെ നിലവിലെ പ്രവര്‍ത്തനം ജില്ലാ കളക്ടര്‍ ഇടപെട്ട് തത്കാലം മരവിപ്പിച്ചിരിക്കുകയാണ്. കക്കൂസ് മാലിന്യപ്ലാന്‍റിലെ മാലിന്യസംസ്കരണം കാര്യക്ഷമമാക്കണമെന്നാവശ്യപ്പെട്ട് 30ന് കോണ്‍ഗ്രസിന്‍റെ നേതൃത്വത്തില്‍ മാര്‍ച്ച് നടത്തുമെന്ന് ഡിസിസി ജനറല്‍ സെക്രട്ടറി സജി കുര്യാക്കോസ്, പഞ്ചായത്തംഗം ടി.ടി. സാജു, ‍ജി. ജയകൃഷ്ണന്‍, ജെ. സെബാസ്റ്റ്യന്‍ എന്നിവര്‍ പത്രസമ്മേളനത്തില്‍ അറിയിച്ചു. 30ന് രാവിലെ 10നു നടക്കുന്ന പ്രതിഷേധ സമരം കെപിസിസി ജനറല്‍ സെക്രട്ടറി എ.എ. ഷുക്കൂര്‍ ഉദ്ഘാടനം ചെയ്യും. കെ.എസ്. മനോജ് മുഖ്യപ്രഭാഷണം നടത്തും.

കന്യാസ്ത്രീകളുടെ അറസ്റ്റില്‍ വ്യാപക പ്രതിഷേധം

ആലപ്പുഴ: ഛത്തീസ്ഗഡില്‍ രണ്ടു മലയാളി കന്യാസ്ത്രീകളെ അറസ്റ്റ് ചെയ്തതില്‍ മാതൃവേദി-പിതൃവേദി ഫൊറോനസമിതി പ്രതിഷേധിച്ചു. ഫൊറോന പിതൃവേദി പ്രസിഡന്‍റ് ജിമ്മിച്ചന്‍ യോഗത്തില്‍ അധ്യക്ഷത വഹിച്ചു. ഫൊറോന ഡയറക്ടര്‍ ഫാ. നവീന്‍ മാമ്മൂട്ടില്‍ പ്രതിഷേധ പ്രമേയം അവതരിപ്പിച്ചു. ഇരുവര്‍ക്കും പ്രാര്‍ഥനാപൂര്‍ണമായ ഐക്യദാര്‍ഢ്യം യോഗം പ്രഖ്യാപിച്ചു. ഫൊറോന വികാരി ഫാ. മാത്യു നടമുഖത്ത്, ഫൊറോന അനിമേറ്റര്‍ സിസ്റ്റര്‍ ഡാലിയ, സോബിന്‍, സണ്ണി ഫിലിപ്പോസ്, സെലിന്‍സ്‌കറിയ, മോളമ്മ, നിഷ ജോയല്‍, ജിജി, റീനി, സാജന്‍, ജിതിന്‍, പിതൃവേദി ഫൊറോന സെക്രട്ടറി ഷിബു ജോര്‍ജ്, മാതൃവേദി സെക്രട്ടറി ലീജ സാജു എന്നിവര്‍ പ്രസംഗിച്ചു. കത്തോലിക്ക കോണ്‍ഗ്രസ് പ്രതിഷേധ ധര്‍ണ ഇന്ന് ആലപ്പുഴ: കന്യാസ്ത്രീകളെ അന്യായമായി അറസ്റ്റ് ചെയ്തതില്‍ പ്രതിഷേധിച്ച് ആലപ്പുഴ ഫൊറോന കത്തോലിക്കാ കോണ്‍ഗ്രസിന്‍റെ നേതൃത്വത്തില്‍ പ്രതിഷേധ ധര്‍ണ നടത്തും. ധര്‍ണയും റാലിയും ഇന്നു രാവിലെ 10.30ന് ക്വിറ്റ് ഇന്ത്യ സ്റ്റാച്ചു ജംഗ്ഷനില്‍നിന്ന് ആരംഭിച്ച് ഇരുമ്പുപാലം ബിഎസ്എന്‍എല്‍ ഓഫീസിനു മുന്‍വശം സമാപിക്കും. കേരള കാത്തലിക്ക് ടീച്ചേഴ്സ് ഗിൽഡ് പ്രതിഷേധിച്ചു കറ്റാനം: ചത്തീസ്ഗഡിൽ ഹിന്ദുത്വ വർഗീയ വാദികളുടെ ആൾക്കൂട്ട വിചാരണക്കൊടുവിൽ രണ്ട് കന്യാസ്ത്രീകളെ അറസ്റ്റ് ചെയ്തതിൽ കേരള കാത്തലിക് ടീച്ചേഴ്സ് ഗിൽഡ് മാവേലിക്കര രൂപത സമിതി പ്രതിഷേധിച്ചു. പൗരന്മാരുടെ സഞ്ചാരസ്വാതന്ത്ര്യം പോലും നിഷേധിക്കുന്ന ജനാധിപത്യ ഇന്ത്യയ്ക്ക് അപമാനകരമായ ഈ പ്രവൃത്തി പ്രതിഷേധാർഹമാണ്. എത്രയും വേഗം ഇവരെ മോചിതരാക്കണമെന്ന് ടീച്ചേഴ്സ് ഗിൽഡ് ആവശ്യപ്പെട്ടു. മാവേലിക്കര രൂപത കറസ്‌പോണ്ടന്‍റ് ഫാ. ഡാനിയേൽ തെക്കേടത്ത് പ്രതിഷേധ ധർണ ഉദ്ഘാടനം ചെയ്തു. രൂപത പ്രസിഡന്‍റ് സാൻ ബേബി അധ്യക്ഷത വഹിച്ചു. സി.റ്റി. വർഗീസ്, രൂപത സെക്രട്ടറി വിപിൻ വൈദ്യൻ, നീതു യോഹന്നാൻ എന്നിവർ പ്രസംഗിച്ചു. മന്ത്രി പി. പ്രസാദ് പ്രധാനമന്ത്രിക്ക് കത്തയച്ചു ചേർത്തല: ചേർത്തല അസീസി സിസ്റ്റേഴ്സ് ഓഫ് മേരി ഇമ്മാക്കുലേറ്റ് (ഗ്രീൻ ഗാർഡൻസ്) സന്യാസ സഭയിലെ സിസ്റ്റര്‍ വന്ദന ഫ്രാൻസിസ്, സിസ്റ്റര്‍ പ്രീതി മേരി എന്നിവരുടെ അറസ്റ്റിൽ മന്ത്രി പി. പ്രസാദ് പ്രതിഷേധിച്ചു. ഇവരെ ചത്തീസ്ഗഢിലെ ദുർഗ് റെയിൽവേ സ്റ്റേഷനിൽ നിന്നും അറസ്റ്റ് ചെയ്ത് തടവിൽ പാർപ്പിച്ചത് അങ്ങേയറ്റം ജനാധിപത്യവിരുദ്ധവും പ്രതിഷേധാർഹവുമാണ്. മതപരിവർത്തനം, മനുഷ്യക്കടത്ത് തുടങ്ങിയ ആരോപണങ്ങളുടെ പേരിൽ അറസ്റ്റ് ചെയ്തത് ഭാരതത്തിന്‍റെ ഭരണഘടന ഉറപ്പു നൽകുന്ന മൗലിക അവകാശങ്ങളെ കാറ്റിൽപ്പറത്തിയാണ്. അറസ്റ്റിലായ ഈ രണ്ടു സിസ്റ്റർമാരും മുമ്പ് ചേർത്തലയിൽ സേവന പ്രവർത്തനങ്ങളിൽ ഏർപ്പെട്ടിരുന്നവരാണ്. സംഘപരിവാർ സംഘടനയായ ബജ്റംഗ് ദൾ ഇവരെ ആശക്കൂട്ട വിചാരണ നടത്തി, പോലീസിന്‍റെ സഹായത്തോടെ കേസിൽ കുടുക്കിയത് ഞെട്ടിക്കുന്നതാണ്. നമ്മുടെ സ്വാതന്ത്ര്യം ഭീഷണമായ സാഹചര്യത്തിലൂടെ കടന്നുപോകുന്നു എന്നതിൻ്റെ ഉദാഹരണമായി ഇതിനെ കാണുന്നു. ആൾക്കൂട്ടം കാര്യങ്ങൾ തീരുമാനിക്കുന്ന രീതി അരാജകത്വത്തിലേക്ക് നയിക്കും. ഫാസിസ്റ്റ് ഭരണ സംവിധാനം നാട്ടിൽ പ്രവർത്തിക്കുന്നതിന്‍റെ ഏറ്റവും നല്ല ഉദാഹരണമാണിത്. ഇന്ത്യൻ ഭരണകൂടം ഇക്കാര്യത്തിൽ ഇടപെട്ട് സേവന പ്രവർത്തനങ്ങളിൽ ഏർപ്പെട്ടിരുന്ന ഈ കന്യാസ്ത്രീകളുടെ മോചനം സാധ്യമാക്കണമെന്ന് പ്രധാനമന്ത്രി നരേന്ദ്ര മോദിയോടും കേന്ദ്ര ആഭ്യന്തരമന്ത്രി അമിത്ഷായോടും കത്തിലൂടെ ആവശ്യപ്പെട്ടിട്ടുണ്ട്. നീതിയുക്തമായ ഇടപെടലുകൾ രണ്ടു പേരുടെയും ഭാഗത്തുനിന്നും ഉണ്ടാകും എന്ന് പ്രതീക്ഷിക്കുന്നതായി മന്ത്രി പി. പ്രസാദ് പറഞ്ഞു. മങ്കൊമ്പ്: കന്യാസ്ത്രീകളെ മനുഷ്യക്കടത്ത് ആരോപിച്ച് അറസ്റ്റ് ചെയ്ത സംഭവത്തിൽ യുവദീപ്തി എസ്എംവൈഎം വെളിയനാട് യൂണിറ്റ് പ്രതിഷേധിച്ചു. ഛത്തീസ്ഗഡ് പോലീസ് തീവ്രവാദ രാഷ്ട്രീയത്തിന്‍റെ അടിമകളായി മാറിയതിന്‍റെ തെളിവാണ് സംഭവം. ഇത് മൗലിക അവകാശലംഘനവും മനുഷ്യാവകാശ നിഷേധവുമാണ്. മതപരിവർത്തന നിയമത്തിന്‍റെ മറവിൽ ഭരണഘടന ഉറപ്പുനൽകുന്ന മതസ്വാതന്ത്ര്യത്തെ നിഷേധിക്കുന്ന അവസ്ഥയാണ്. ഇന്ത്യയിൽ പല ഭാഗത്തും നടക്കുന്ന സംഭവങ്ങൾ അത്യന്തം അപകടകരമാണ്. കന്യാസ്ത്രീകൾ സന്യാസ വസ്ത്രം അണിഞ്ഞ് പൊതുസമൂഹത്തിലിറങ്ങിയാൽ കേസെടുക്കുന്ന അവസ്ഥ ഇന്ത്യയെ ഇരുണ്ട കാലങ്ങളിലേക്ക് നയിക്കുമെന്നും യോഗം മുന്നറിയിപ്പു നൽകി. യൂണിറ്റ് ഡയറക്ടർ ഫാ. ജോസഫ് കുറിയന്നൂർപറമ്പിൽ യോഗം ഉദ്ഘാടനം ചെയ്തു. യൂണിറ്റ് പ്രസിഡന്‍റ് ബിനോയ് ബാബു അധ്യക്ഷത വഹിച്ചു. മങ്കൊമ്പ്: ഛത്തീസ്ഗഡിലെ ദുർഗിൽ, കന്യാസ്ത്രീകളെ അറസ്റ്റ് ചെയ്ത നടപടി ക്രൈസ്തവ സമൂഹത്തോടുള്ള വെല്ലുവിളിയാണെന്നും ഭരണഘടനയോടുള്ള നിഷേധമാണെന്നും കുട്ടനാട് എക്യുമെനിക്കൽ ഫോറം ഡയറക്ടർ ഫാ. ജോസഫ് കട്ടപ്പുറം ആരോപിച്ചു. ഇന്ത്യയിലെ വിവിധ സംസ്ഥാനങ്ങളിൽ പ്രേഷിതപ്രവർത്തനം നടത്തുന്ന മിഷനറിമാർക്ക് സംരക്ഷണം നൽകാൻ കേന്ദ്രസർക്കാർ അടിയന്തര നടപടി സ്വീകരിക്കണം. കുട്ടനാട് എക്യുമെനിക്കൽ ഫോറം സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്യുകയായിരുന്നു അദ്ദേഹം. പ്രസിഡന്‍റ് ജോസി ഡൊമിനിക് ആധ്യക്ഷത വഹിച്ച യോഗത്തിൽ രക്ഷാധികാരി ഫാ. ജോസ് തറപ്പുതൊട്ടിയിൽ പ്രതിഷേധ പ്രമേയം അവതരിപ്പിച്ചു. ഷിബു ലുക്കോസ്, സാബു തോട്ടുകൽ, ജോജി ചേപ്പില, ആന്‍റപ്പൻ ചുങ്കപ്പുര, ടോമിച്ചൻ ഏബ്രഹാം, സന്തോഷ് കട്ടപ്പുറം, ജിനേഷ് മെതിക്കളം തുടങ്ങിയവർ പ്രസംഗിച്ചു. രാജ്യത്ത് കാവിനീതി നടപ്പാക്കുന്നു കുട്ടനാട്: മാനവ സേവയ്ക്കും സാമൂഹിക സേവനത്തിനും സ്വയം സമര്‍പ്പിച്ച മലയാളികളായ സിസ്റ്റര്‍ വന്ദന ഫ്രാന്‍സിസ്, സിസ്റ്റര്‍ പ്രീതി മേരി എന്നീ കന്യാസ്ത്രീകളെ ഛത്തീസ്ഗഡില്‍ അകാരണമായി അറസ്റ്റ് ചെയ്തു ജുഡിഷല്‍ റിമാന്‍ഡില്‍ ആക്കിയ സംഭവത്തില്‍ അടിയന്തര ഇടപെടല്‍ നടത്തണമെന്നും അവരുടെ മോചനത്തിന് നിയമപരമായ എല്ലാ സാഹചര്യങ്ങളും പ്രധാനമന്ത്രി നരേന്ദ്രമോഡി സര്‍ക്കാര്‍ ചെയ്യണമെന്ന് മാതൃവേദി-പിതൃവേദി പുളിങ്കുന്ന് ഫൊറോന സമിതി യോഗം ആവശ്യപ്പെട്ടു. ഫൊറോന ഡയറക്ടര്‍ ഫാ. സിറിയക് പഴയമഠം, സിസ്റ്റര്‍ ലിയോ ക്ലയര്‍ സിഎംസി, ഗ്രേസി സക്കറിയ നെല്ലുവേലി, ജോര്‍ജ് തോമസ്, സണ്ണി അഞ്ചില്‍, ബീന ജോസഫ് എന്നിവര്‍ പ്രസംഗിച്ചു. എംസിഎ പ്രതിഷേധിച്ചു ചേപ്പാട്: ഛത്തീസ്ഗഡിൽ മലയാളി കന്യാസ്ത്രീകളെ അറസ്റ്റ് ചെയ്ത് ജയിലിൽ അടച്ച സംഭവത്തിൽ എംസിഎ മാവേലിക്കര വൈദിക ജില്ല പ്രതിഷേധിച്ചു. രൂപത വികാരി ജനറാൾ ഫാ. ജോബ് കല്ലുവിളയിൽ പ്രതിഷേധ യോഗം ഉദ്‌ഘാടനം ചെയ്തു. പ്രസിഡന്‍റ് ലാലൻ സാമുവൽ അധ്യക്ഷത വഹിച്ചു. ഫാ. റോബർട്ട് പാലവിള, ഫാ. കാലേബ് ചെറുവള്ളിൽ, അഡ്വ. അനിൽ ബാബു, വില്യംസ് മത്തായി, ഡോ. ഷാജി എം. സ്റ്റാൻലി എന്നിവർ പ്രസംഗിച്ചു. ഓള്‍ ഇന്ത്യ കാത്തലിക് യൂണിയന്‍ അപലപിച്ചു ആലപ്പുഴ: വടക്കേ ഇന്ത്യയില്‍ തുടരെത്തുടരെ ക്രൈസ്തവരുടെ നേരെയുള്ള ആക്രമണം സഹിക്കാനാവുന്നതല്ലെന്ന് ഓള്‍ ഇന്ത്യ കാത്തലിക് യൂണിയന്‍. ഭരണഘടനാ അനുശാസിക്കുന്ന മതസ്വാതന്ത്ര്യവും സഞ്ചാരസ്വാതന്ത്ര്യവും തടസപ്പെടുത്താന്‍ ആര്‍ക്കും അധികാരമില്ലെന്നും ഇങ്ങനെ തുടര്‍ന്നാല്‍ പ്രത്യക്ഷ സമരത്തിലേക്ക് നീങ്ങേണ്ടിവരുമെന്നും ഓള്‍ ഇന്ത്യ കാത്തലിക് യൂണിയന്‍ അറിയിച്ചു. അല്‍ഫോണ്‍സ് പെരേര, ബാബു അത്തിപ്പൊഴിയില്‍, ദേവസഹായം, ആന്‍റണി തൊമ്മാന, സിജെ. ജയിംസ്, ഫ്രാന്‍സി ആന്‍റണി, ജോസ് ആന്‍റണി, സൈബി അക്കര, തോമസ് തേവരത്, ജോസ് കുരിശിങ്കല്‍ എന്നിവര്‍ പ്രതിഷേധത്തില്‍ പങ്കെടുത്തു. വേട്ടയാടിയവർക്കെതിരേ നടപടിയെടുക്കണം: ബിഷപ് ജയിംസ് ആനാപറമ്പില്‍ ആലപ്പുഴ: നിരാലംബരും നിരാശ്രയരുമായ മനുഷ്യര്‍ക്കഭയമാകാന്‍ വീടും നാടും വിട്ടിറങ്ങിയ കന്യാസ്ത്രീകളെയും അവരെ അനുഗമിച്ചവരെയും ഛത്തീസ്ഗഡിലെ റെയില്‍വേസ്റ്റേഷനില്‍ അകാരണമായി തടഞ്ഞുവയ്ക്കുകയും കേസെടുക്കുകയും ചെയ്ത നടപടി നിയമ വിരുദ്ധവും ഭരണഘടനാ വിരുദ്ധവുമാണെന്ന് ആലപ്പുഴ രൂപതാധ്യക്ഷന്‍ ബിഷപ് ഡോ. ജയിംസ് ആനാപറമ്പില്‍ പറഞ്ഞു. ബജ്റംഗ്ദള്‍ പ്രവര്‍ത്തകരെ വിളിച്ചുവരുത്തിയ റെയില്‍വേ ജീവനക്കാര്‍ക്കെതിരേ നടപടിയെടുക്കേണ്ടതാണ്. എന്തു കുറ്റത്തിന്‍റെ പേരിലാണ് പോലീസ് കേസെടുത്തിരിക്കുന്നത് എന്നു വ്യക്തമല്ല. കന്യാസ്ത്രീകള്‍ കൂടെക്കൊണ്ടുപോയ പെണ്‍കുട്ടികള്‍ സിഎസ്ഐ സഭാ സമൂഹത്തില്‍ പെടുന്നവരാകയാല്‍ മതപരിവര്‍ത്തനം എന്ന വിഷയമേ ഇല്ല. സിസ്റ്റേഴ്‌സ് പാവപ്പെട്ട മൂന്നു പെണ്‍കുട്ടികള്‍ക്കു ജോലി കൊടുക്കാന്‍ കൊണ്ടുപോയതാകയാല്‍ മനുഷ്യക്കടത്തിന്‍റെ പ്രശ്‌നവുമില്ല. മാത്രമല്ല അവരുടെ മാതാപിതാക്കളുടെ അനുവാദത്തോടെയാണ് അവര്‍ സിസ്റ്റേഴ്‌സിന്‍റെ കൂടെ പോയതും. അവരുടെ കൈയില്‍ ആധാര്‍ കാര്‍ഡുകളും തിരിച്ചറിയല്‍ കാര്‍ഡുകളുമുണ്ട്. അവരെ പരസ്യമായി ചോദ്യം ചെയ്യാന്‍ ബജ്‌റംഗ്ദള്‍ പ്രവര്‍ത്തകര്‍ക്ക് ആര് അനുവാദം കൊടുത്തു. അതിനാല്‍ ചത്തീസ്ഗഡില്‍ നടന്ന മുഴുവന്‍ കാര്യങ്ങളെക്കുറിച്ചും ശരിയായ അന്വേഷണം നടത്തി കുറ്റക്കാര്‍ക്കെതിരേ നടപടിയെടുക്കണമെന്നും ബിഷപ് ആവശ്യപ്പെട്ടു.

ജനങ്ങൾക്ക് ഭീഷണിയായി ട്രാൻസ്ഫോർമർ

അമ്പലപ്പുഴ: അപകടകരമായി റോഡരികിൽ നിൽക്കുന്ന ട്രാൻസ്ഫോർമർ ജനങ്ങൾക്കു ഭീഷണിയാകുന്നു. വണ്ടാനം മുക്കയിൽ ആറ്റുതീരം റോഡിനരികിലാണ് അപകടഭീഷണിയിൽ ട്രാൻസ്ഫോർമർ സ്ഥിതി ചെയ്യുന്നത്. നാലുപാടം പാടശേഖരത്തിന്‍റെ മോട്ടോർ തറയ്ക്കു സമീപമാണ് ട്രാൻസ്ഫോർമർ നിൽക്കുന്നത്. വീതികൂട്ടി റോഡ് പുനർനിർമിച്ചതോടെയാണ് ട്രാൻസ്ഫോർമർ റോഡിനരികിലായത്. ഇപ്പോൾ റോഡിനോട് ചേർന്നാണ് ട്രാൻസ്ഫോർമർ നിൽക്കുന്നത്. സ്കൂൾ വാഹനങ്ങളടക്കം നിരവധി വാഹനങ്ങളും യാത്രക്കാരുമാണ് ഇതിലൂടെ യാത്ര ചെയ്യുന്നത്. എന്നിട്ടും ട്രാൻസ്ഫോർമർ മാറ്റിസ്ഥാപിക്കാൻ അധികൃതർ തയാറായിട്ടില്ല. റോഡു നിർമാണമേറ്റെടുത്ത കരാറുകാരനാണ് ട്രാൻസ്ഫോർമർ മാറ്റിസ്ഥാപിക്കേണ്ടിയിരുന്നതെന്ന് നാട്ടുകാർ പറയുന്നു. റോഡിനോട് ചേർന്ന് നിൽക്കുന്ന ഈ ട്രാൻസ് ഫോർമറിന് യാതൊരു സുരക്ഷാ സംവിധാനമൊരുക്കാത്തതും യാത്രക്കാരുടെ ജീവന് ഭീഷണിയായിരിക്കുകയാണ്. എന്നാൽ, റോഡ് നിർമാണം പൂർത്തിയായിട്ടും ട്രാൻസ്ഫോർമർ മാറ്റി സ്ഥാപിക്കാതെ വന്നതോടെ ഇതിലൂടെ ജീവൻ പണയം വച്ചാണ് നാട്ടുകാർ യാത്ര ചെയ്യുന്നത്.

ജില്ലാക്കോടതി പാലം: മത്സ്യകന്യക ശില്പം മാറ്റണം

ആലപ്പുഴ: ജില്ലാക്കോടതി പാലം പുനര്‍നിര്‍മിക്കണമെങ്കില്‍ മത്സ്യകന്യക ശില്പം മാറ്റണം. നാല് ദശാബ്ദമായി കനാല്‍ തീരത്തെ കാഴ്ചയായിരുന്ന മത്സ്യകന്യകയുടെ ഭാവി അനിശ്ചിതത്വത്തില്‍. പുനര്‍നിര്‍മാണ നടപടികള്‍ തുടങ്ങിയപ്പോള്‍ മുതല്‍ ശില്പം അവിടെനിന്നു മാറ്റിസ്ഥാപിക്കാന്‍ ആലോചന തുടങ്ങിയതാണ്. കളക്ടറുടെ തീരുമാന പ്രകാരം വിദഗ്ധരുടെ സംഘം റിപ്പോര്‍ട്ട് തയാറാക്കി. കരാര്‍ ഏറ്റെടുത്ത് ശില്പം മാറ്റിവയ്ക്കാന്‍ ഖലാസികള്‍ വന്നു. അന്‍പത് ടണ്‍ ഭാരമുള്ള ശില്പവും അത്രയും ഭാരമുള്ള അടിത്തറയും ഇളക്കി ഉയര്‍ത്തുന്നത് ശ്രമകരമാണെന്നു പറഞ്ഞ് എല്ലാവരും പിന്മാറി. ഇതിനിടെ പാലം നിര്‍മാണത്തിന്‍റെ ഭാഗമായി വടക്കേക്കരയില്‍ പൈലിംഗ് 56 എണ്ണം പൂര്‍ത്തിയായി. ഇനി രണ്ടെണ്ണം ചെയ്താല്‍ മതി. അതിലൊരെണ്ണം ശില്പം സ്ഥിതിചെയ്യുന്ന സ്ഥലത്താണ്. പൈലിംഗ് ചെയ്യാന്‍ ശില്പം മാറ്റാതെ പറ്റില്ലെന്നും നിര്‍മാണച്ചുമതലയുള്ള കെആര്‍എഫ്ബി അധികൃതര്‍ ചൂണ്ടിക്കാണിച്ചു. അടുത്തദിവസങ്ങളില്‍ അതിനുള്ള നടപടി ഉണ്ടാകുന്നില്ലെങ്കില്‍ ശില്പം നീക്കം ചെയ്യാനാണ് തീരുമാനം. പക്ഷേ എങ്ങനെയാണെന്നു വ്യക്തമാക്കിയിട്ടില്ല. മത്സ്യകന്യക ശില്പം മാറ്റി സ്ഥാപിക്കുക, പുതുക്കി പണിയുക, ഇതില്‍ ഏതാണ് അനുയോജ്യമെന്നു തീരുമാനമെടുക്കാന്‍ കളക്ടറുടെ അധ്യക്ഷതയില്‍ പ്രത്യേക യോഗം ചേരാന്‍ ജില്ലാ വികസനസമിതി യോഗം നിര്‍ദേശിച്ചു. അതേസമയം, പാലത്തിന്‍റെ നിര്‍മാണം വേഗം വേണമെന്നു വികസനസമിതി യോഗത്തില്‍ എംഎല്‍എമാരായ പി.പി. ചിത്തരഞ്ജനും എച്ച്. സലാമും ആവശ്യപ്പെട്ടു.‌‌

സഹൃദയ നാരീശക്തി പദ്ധതിക്ക് ചേര്‍ത്തലയില്‍ തുടക്കം

ചേർത്തല: എറണാകുളം- അങ്കമാലി അതിരൂപത സാമൂഹ്യപ്രവർത്തന വിഭാഗമായ സഹൃദയ വി-ഗാര്‍ഡ് ഫൗണ്ടേഷനുമായി സഹകരിച്ച് വിധവകൾ, അവിവാഹിത അമ്മമാർ എന്നിവർക്കായി സംഘടിപ്പിക്കുന്ന സൗജന്യ നൈപുണ്യ വികസന പരിശീലന പദ്ധതിയായ നാരീശക്തിയുടെ തയ്യൽ പരിശീലനത്തിനു തുടക്കമായി. സഹൃദയ മേഖലാ ഓഫീസിൽ ചേർത്തല നഗരസഭ കൗൺസിലർ എസ്. സനീഷ് ഉദ്ഘാടനം നിര്‍വഹിച്ചു. സഹൃദയ അസി. എക്സിക്യൂട്ടീവ് ഡയറക്ടർ ഫാ. സിബിൻ തോമസ് മനയംപിള്ളി അധ്യക്ഷത വഹിച്ചു. സഹൃദയ പ്രോഗ്രാം ഓഫീസർ കെ.ഒ. മാത്യൂസ്, പ്രൊജക്റ്റ് കോ-ഓര്‍ഡിനേറ്റർ സെബിൻ ജോസഫ്, വി-ഗാർഡ് ഇൻഡസ്ട്രീസ് പ്രൊജക്റ്റ് കോ-ഓർഡിനേറ്റർ എയ്ഞ്ചൽ റോസ്, സഹൃദയ റീജണൽ കോ-ഓര്‍ഡിനേറ്റർ റാണി ചാക്കോ തുടങ്ങിയവർ പ്രസംഗിച്ചു. 20നും 50നും മധ്യേ പ്രായമുള്ള നൂറ് വനിതകള്‍ക്ക് തയ്യല്‍, ബ്യൂട്ടിഷന്‍ കോഴ്സുകളിലായി നൽകുന്ന 150 മണിക്കൂര്‍ ദൈര്‍ഘ്യമുള്ള പരിശീലനത്തിൽ ബുക്ക് കീപ്പിംഗ്, ബാങ്ക് ലോണ്‍ ഇടപാടുകള്‍, മറ്റ് ഔദ്യോഗിക നടപടിക്രമങ്ങള്‍ തുടങ്ങിയ അടിസ്ഥാന സംരംഭകത്വ മൊഡ്യൂളുകളും ഉള്‍പ്പെടുത്തിയിട്ടുണ്ട്. പരിശീലനം വിജയകരമായി പൂര്‍ത്തിയാക്കി മികവ് പുലര്‍ത്തുന്ന 50 പേര്‍ക്ക് സ്വയംതൊഴില്‍ സംരംഭം തുടങ്ങുവാനാവശ്യമായ മൂലധന പിന്തുണയും നല്‍കും.

അർത്തുങ്കൽ മത്സ്യബന്ധന തുറുഖ നിർമാണം: ടെട്രാപോഡുകളുടെ നിർമാണം ആരംഭിച്ചു

ചേർത്തല: അർത്തുങ്കൽ മത്സ്യബന്ധന തുറമുഖ നിർമാണത്തിന്‍റെ ഭാഗമായുള്ള ടെട്രാപോഡ് നിർമാണം ആരംഭിച്ചു. മന്ത്രി പി. പ്രസാദ് ഉദ്ഘാടനം ചെയ്തു. പുലിമുട്ടിന്‍റെ വശങ്ങളിൽ സ്ഥാപിക്കുന്ന ടെട്രാപോഡുകളുടെ നിർമാണമാണ് ആരംഭിച്ചിട്ടുള്ളത്. 8200 ടെട്രാപോഡുകളാണ് തുറമുഖത്തിനായി നിർമിക്കേണ്ടത്. സെപ്റ്റംബർ മാസം പകുതിയോടെ ബ്രേക്ക് വാട്ടർ പുലിമുട്ടിന്‍റെ അവശേഷിക്കുന്ന നിർമാണം ആരംഭിക്കാനാകുമെന്ന് മന്ത്രി പറഞ്ഞു. 4,90,000 ടണ്ണോളം കരിങ്കല്ലാണ് തുടർ നിർമാണത്തിനു വേണ്ടത്. കല്ലിന്‍റെ ഭാരം അളക്കുന്നതിനുള്ള വേയ് ബ്രിഡ്ജ് നിർമാണം ആരംഭിച്ചിട്ടുണ്ട്. തുറമുഖ നിർമാണത്തിന്‍റെ അവസാനഘട്ടം തടസരഹിതമായി പൂർത്തിയാക്കുന്നതിന് നിരന്തര അവലോകനം ഉണ്ടാകുമെന്ന് മന്ത്രി പറഞ്ഞു. ചേർത്തല തെക്ക് പഞ്ചായത്ത് വൈസ് പ്രസിഡന്‍റ് നിബു എസ്. പത്മം, തുറമുഖ എന്‍ജിനിയറിംഗ് വകുപ്പ് ആലപ്പുഴ എക്സിക്യൂട്ടീവ് എന്‍ജിനിയർ എം.പി. സുനിൽകുമാർ, അസി. എക്സിക്യൂട്ടീവ് എന്‍ജിനിയർ ടി.എസ്. ശ്രീകൃഷ്ണ, അസി. എന്‍ജിനിയർമാരായ ബി.ജി. രാജേഷ്, ബിന്ദു ബാലകൃഷ്ണൻ, പി.ജെ. മാത്യു, ടി.എസ്. രാജേഷ്, നെൽസൺ പീറ്റർ, കെ.പി. മോഹനൻ തുടങ്ങിയവർ പങ്കെടുത്തു.

മാലിന്യം പാടത്ത് തള്ളിയ നിലയില്‍

എടത്വ: ഇരുളിന്‍റെ മറവില്‍ ചാക്കുകളില്‍ നിറച്ച് മാലിന്യം പാടത്ത് തള്ളി. എടത്വ-തകഴി സംസ്ഥാന പാതയില്‍ കേളമംഗലം നന്ത്യാട്ടുകരി പാടത്താണ് ചാക്കില്‍ നിറച്ച് മാലിന്യം തള്ളിയത്. പാടത്തിന്‍റെ ഒരു സ്ഥലത്തായി കുട്ടിയിടാതെ 50 മീറ്റര്‍ ദൂരത്തില്‍ നിരയായാണ് ഇട്ടിരിക്കുന്നത്. രാത്രിയില്‍ വാഹനത്തില്‍ എത്തിയശേഷം വലിച്ചെറിഞ്ഞതാകാമെന്നാണ് നാട്ടുകാര്‍ പറയുന്നത്. പൊട്ടിയ ചാക്കില്‍നിന്ന് സ്ഥാപനത്തിന്‍റെ ബില്ലുകളും കണ്ടിരുന്നു. കൃഷി ആരംഭിക്കുന്നതോടെ മാലിന്യം കര്‍ഷകര്‍ക്കു ഭീഷണിയാകും. ഒട്ടുമിക്ക ചാക്കുകളും വെള്ളത്തില്‍ മുങ്ങിയ നിലയിലാണ്. ആഴ്ചകള്‍ക്കു മുന്‍പ് ഇതേ സ്ഥലത്ത് ശുചിമുറി മാലിന്യവും ഒഴുക്കിയിരുന്നു. ദുര്‍ഗന്ധം പരക്കുന്നതു കണ്ടാണ് പ്രദേശവാസികളുടെ ശ്രദ്ധയില്‍പ്പെട്ടത്. ജലജന്യരോഗങ്ങള്‍ക്കെതിരേ കര്‍ശന നിര്‍ദേശവുമായി ആരോഗ്യവകുപ്പ് മുന്നിട്ടിറങ്ങുമ്പോഴും ശുചിമുറി മാലിന്യങ്ങള്‍ ഉള്‍പ്പെടെ പാടത്തേക്ക് തള്ളുകയാണ്. പ്രദേശത്ത് വൈദ്യുതിവിളക്കുണ്ടെങ്കിലും രാത്രികാലങ്ങളില്‍ പ്രകാശിക്കാറില്ല. ടൈമര്‍ ഘടിപ്പിച്ച വഴിവിളക്ക് രാത്രി 8ന് അണയുകയും രാവിലെ 5ന് തെളിയുകയുമാണ് ചെയ്യുന്നതെന്ന് നാട്ടുകാര്‍ പറയുന്നു. മുന്‍പ് രാത്രികാലങ്ങളില്‍ തെളിഞ്ഞിരുന്ന വൈദ്യുതിവിളക്കാണ് പിന്നീട് പകല്‍ തെളിയാന്‍ തുടങ്ങിയത്. നാട്ടുകാരുടെ പരാതിയെത്തുടര്‍ന്ന് ടൈമര്‍ വിളക്ക് ശരിയാക്കിയെങ്കിലും ഒരാഴ്ച കഴിഞ്ഞതോടെ വീണ്ടും പഴയ അവസ്ഥയിലെത്തി. പോലീസ് രാത്രികാല പട്രോളിംഗ് ശക്തമാക്കണമെന്നും ആരോഗ്യവകുപ്പ് അടിയന്തര നടപടി സ്വീകരിക്കണമെന്നും നാട്ടുകാര്‍ ആവശ്യപ്പെടുന്നു.

അറിവു പകരുന്നതിനൊപ്പം മണ്ണിൽ പൊന്നുവിളയിച്ച്‌ അധ്യാപകൻ

നൗഷാദ് മാങ്കാംകുഴി ചാരുംമൂട്: സ്‌കൂളില്‍ വിദ്യാര്‍ഥികള്‍ക്ക് അറിവ് പകര്‍ന്ന് വീട്ടിലെത്തിയാല്‍ അധ്യാപകന്‍ നേരേ പോകുന്നത് കൃഷിയിടത്തിലേക്ക്. അധ്യാപനം മാത്രമല്ല കൃഷിയെന്ന തപസ്യയെ നെഞ്ചോടുചേര്‍ത്തുപിടിച്ച് മണ്ണില്‍ പൊന്നുവിളയിക്കുകയാണ് വിനോദ്കുമാര്‍ എന്ന അധ്യാപകന്‍. താമരക്കുളം വിവിഎച്ച്എസ്എസിലെ ഹിന്ദി അധ്യാപകനായ വിനോദ്കുമാര്‍ തന്‍റെ 80 സെന്‍റ് സ്ഥലത്ത് കൃഷി നടത്തിയാണ് പുതുതലമുറയ്ക്ക് മാതൃകയാവുന്നത്. ഏത്തവാഴ, ഞാലിപ്പൂവന്‍, പാളയം കോടന്‍, ചാരപ്പൂവന്‍ എന്നീ ഇനങ്ങളില്‍ എഴുന്നൂറോളം വാഴകളും, കപ്പ, ചേന, ചേമ്പ്, കാച്ചില്‍, മത്തന്‍, ഇഞ്ചി, മഞ്ഞള്‍ തുടങ്ങി വൈവിധ്യമാര്‍ന്ന കാര്‍ഷിക വിളകളും ഇദ്ദേഹത്തിന്‍റെ കൃഷിത്തോട്ടത്തിലുണ്ട്. വഴുതന, വെണ്ട, കോവല്‍, തക്കാളി, കറിവേപ്പ്, വിവിധയിനം പച്ചമുളക്, ചീര, പടവല്‍, പാവല്‍, കുരുമുളക് തുടങ്ങി പച്ചക്കറി ഇനങ്ങളും മാത്രമല്ല പപ്പായ തോട്ടവും കൂണ്‍ കൃഷിയും ബന്ദിയും കൃഷിത്തോട്ടത്തില്‍ നന്നായി പരിപാലിക്കുന്നു. കൂടാതെ പത്തുവര്‍ഷമായി ആട് കൃഷിയും ചെയ്തുവരുന്നു. ആട്ടിന്‍ കാഷ്ഠവും കോഴിക്കാഷ്ടവും വളമായും ജൈവകീടനാശിനിയായുമാണ് കൃഷിക്കായി ഉപയോഗിക്കുന്നത്. എഴുപതോളം തെങ്ങും, മാവ്, അഗത്തിചീര, അടയ്ക്കാമരം എന്നിവയും ഈ അധ്യാപ കന്‍റെ കൃഷിസ്ഥലത്തുണ്ട്. കഴിഞ്ഞവര്‍ഷം മുന്നൂറോളം നേന്ത്രക്കുലകളും പച്ചക്കറികളും തന്‍റെ കൃഷിത്തോട്ടത്തില്‍ ഉത്പാദിപ്പിച്ചതായി വിനോദ് കുമാര്‍ പറയുന്നു. കരിമുളയ്ക്കല്‍ പ്രവര്‍ത്തിക്കുന്ന കാര്‍ഷിക വിപണിയിലൂടെയാണ് പ്രധാനമായും ഉത്പന്നങ്ങള്‍ വിറ്റഴിക്കുന്നത്. മണ്ണിനോടും കാര്‍ഷിക സംസ്‌കൃതിയോടുമുള്ള സ്‌നേഹവും പ്രവര്‍ത്തനവുമാണ്, കാല്‍നൂറ്റാണ്ടായി അധ്യാപനരംഗത്ത് പ്രവര്‍ത്തിക്കുന്ന വിനോദ് മാഷിനെ കാര്‍ഷികരംഗത്തേക്ക് നയിച്ചത്. ചുനക്കര പഞ്ചായത്ത് ഏഴാം വാര്‍ഡില്‍ കോമല്ലൂര്‍ മെഴുവേലില്‍ വിനോദ് കുമാര്‍ കഴിഞ്ഞ രണ്ടുവര്‍ഷമായിട്ടാണ് കാര്‍ഷികരംഗത്ത് സജീവമായത്. നിര്‍ദേശവും സാങ്കേതികമായ ഉപദേശങ്ങളും നല്‍കി ചുനക്കര കൃഷി ഓഫീസറും മുന്‍ കൃഷി ഓഫീസറും ചുനക്കര കൃഷിഭവന്‍ ഉദ്യോഗസ്ഥരും ഇദ്ദേഹത്തിനൊപ്പമുണ്ട്. മക്കളായ വിനായക് വിനോദ്, വൈഷ്ണവി വിനോദ്, ജിഎസ്ടി വകുപ്പില്‍ സീനിയര്‍ ക്ലാര്‍ക്ക് ആയ ഭാര്യ പി.ആര്‍. രശ്മി, ഭാര്യയുടെ മാതാപിതാക്കളായ രാധാകൃഷ്ണന്‍ നായര്‍, രമാദേവി എന്നിവര്‍ അടങ്ങുന്ന കുടുംബം നല്‍കുന്ന പരിപൂര്‍ണ പിന്തുണയാണ് കൃഷിയടെ വിജയരഹസ്യമെന്ന് വിനോദ് കുമാര്‍ പറയുന്നു.

യാത്രാദുരിതം തുടരുന്നു, ദേശീയപാതയിൽ മഴക്കുഴികൾ

ആലപ്പുഴ: ദേശീയപാതയില്‍ മഴയെ അവഗണിച്ചും പാറപ്പൊടിയും ടാര്‍ മിശ്രിതവും ഉപയോഗിച്ചു കുഴി മൂടിയിട്ടും മഴയും ഭാരവാഹനങ്ങളും കാരണം ഈ മിശ്രിതം ഇളകി മാറുന്നതോടെ കൂടുതല്‍ വലിപ്പമുള്ള കുഴി രൂപപ്പെടുന്നു. ഇരുചക്രവാഹനങ്ങള്‍ തെന്നി വീഴാനും കാരണമാകുന്നു. പരാതിപ്പെട്ടിട്ടും പ്രതിഷേധിച്ചിട്ടും ശാസ്ത്രീയ നടപടിക്കു ദേശീയപാത കരാര്‍ കമ്പനികള്‍ നടപടിയെടുക്കുന്നുമില്ല. മഴ വന്നാല്‍ കുഴി എന്നതു പൊതുതത്വമാണ്; അതില്‍ ദേശീയപാതയെന്ന ഇളവൊന്നുമില്ല, മറ്റു റോഡുകളുടെ സ്ഥിതിയും ദയനീയമാണ്. രാജ്യാന്തര നിലവാരത്തില്‍ നിര്‍മാണം പുരോഗമിക്കുന്ന ദേശീയപാതയില്‍ പണി പൂര്‍ത്തിയാകുന്നതിനു മുന്‍പേ കുഴികളായി. കോരിച്ചൊരിയുന്ന മഴയത്തു ദൂരെക്കാഴ്ച കുറവാണെന്നതിനാലും വെള്ളം നിറഞ്ഞുകിടക്കുമ്പോള്‍ ആഴം തിരിച്ചറിയാനാകാതെയും വാഹനങ്ങള്‍ കുഴിയില്‍ ചാടി അപകടങ്ങള്‍ ഉണ്ടാകുന്നുണ്ട്. ജില്ലയില്‍ കൂടുതല്‍ കുഴികളുള്ളത് ദേശീയപാത 66ലാണ്. തിരുവനന്തപുരം കൊച്ചി നഗരങ്ങളെ ബന്ധിപ്പിക്കുന്ന പ്രധാനപാതയാണ് കുഴികളായി അപകടപാതയാകുന്നത്. പുന്നപ്ര കളിത്തട്ട്, പായല്‍ക്കുളങ്ങര, അയ്യന്‍കോയിക്കല്‍ എന്നിവിടങ്ങളില്‍ നിര്‍മാണം പൂര്‍ത്തിയായ ഭാഗത്തു വലിയ കുഴികള്‍ രൂപപ്പെട്ടു. പായല്‍ക്കുളങ്ങരയിലെ കുഴിയില്‍ വീണു സ്‌കൂട്ടര്‍ യാത്രികര്‍ക്കു പരിക്കേറ്റു. കരൂര്‍ അയ്യന്‍കോയിക്കലിനു സമീപം ജല അഥോറിറ്റി പൈപ്പ് ചോര്‍ന്ന് പാത കുളമായി. കുഴിയില്‍ വെള്ളം ഇത് അറിയാതിരിക്കാനും അപകടം ഒഴിവാക്കാനും ഗതാഗതം പൂര്‍ണമായും സര്‍വീസ് റോഡ് വഴിയാക്കി. പുന്നപ്ര കളിത്തട്ട് ഭാഗത്തെ കുഴികള്‍ താത്കാലികമായി അടച്ചെങ്കിലും രണ്ടു ദിവസം കഴിഞ്ഞു മുന്‍പ് ഉണ്ടായതിനെക്കാള്‍ വലിയ കുഴികളായി മാറി. തങ്കി, എക്‌സ്‌റേ ജംഗ്ഷന്‍, വയലാര്‍ കവലയ്ക്കു സമീപം, 11-ാം മൈല്‍, കണിച്ചുകുളങ്ങര ജംഗ്ഷനു സമീപം, ഒറ്റപ്പുന്ന, അര്‍ത്തുങ്കല്‍ ബൈപാസ് തുടങ്ങിയ സ്ഥലങ്ങളില്‍ കുഴിയാണ്. ഡിവൈഡര്‍ നിര്‍മിച്ചതിനാല്‍ മഴവെള്ളം ഒഴുകിപ്പോകാന്‍ മാര്‍ഗമില്ലാതെ കുഴിയില്‍ വെള്ളം നിറഞ്ഞുകിടക്കുന്നു. അടിപ്പാത നിര്‍മാണം നടക്കുന്ന എസ്എല്‍ പുരം, വളവനാട്, കലവൂര്‍, പാതിരപ്പള്ളി, പൂങ്കാവ് ഭാഗത്തു ചെറുതും വലുതുമായ ഒട്ടേറെ കുഴികള്‍ രൂപപ്പെട്ടിട്ടുണ്ട്. വളവനാട് അടിപ്പാതയ്ക്കു സമീപത്തു രൂപപ്പെട്ട വലിയ കുഴിയില്‍ ഇരുചക്ര വാഹനം വീണു കഴിഞ്ഞദിവസം യാത്രക്കാരനു കാലിനും കൈക്കും പരിക്കേറ്റിരുന്നു. അടുത്തദിവസം കുഴി പാറപ്പൊടി ഉപയോഗിച്ച് അടച്ചെങ്കിലും മഴ പെയ്തതോടെ വീണ്ടും കുഴി രൂപപ്പെട്ടു. കായംകുളത്തു പഴയാറ്റ് കാവിനു സമീപം സ്ഥിരമായി അപകടമുണ്ടാക്കുന്ന കുഴി ഇപ്പോഴും നികത്തിയിട്ടില്ല. ഒരു മാസം മുന്‍പ് ഈ കുഴിയില്‍ വീണ് ഐക്യ ജംഗ്ഷൻ‍ സ്വദേശിയായ യുവാവിനു ഗുരുതരമായി പരിക്കേറ്റിരുന്നു. ഹരിപ്പാട് കെഎസ്ആര്‍ടിസി ബസ് സ്റ്റാന്‍ഡിനു സമീപം ദേശീയപാതയില്‍ നിറയെ കുഴികളാണ്. വെള്ളക്കെട്ടും കുഴിയും ചില സ്ഥലങ്ങളില്‍ വാഹനങ്ങള്‍ക്കു കടന്നുപോകാന്‍ സര്‍വീസ് റോഡ് നിര്‍മിച്ചിട്ടുണ്ടെങ്കിലും സര്‍വീസ് റോഡിലേക്കു പ്രവേശിക്കുന്നയിടങ്ങളില്‍ കുഴികള്‍ രൂപപ്പെട്ടതിനാല്‍ ഇരുചക്രവാഹനങ്ങള്‍ ഉള്‍പ്പെടെ അപകടത്തില്‍പ്പെടാന്‍ സാധ്യതയേറെയാണ്. ആലപ്പുഴ ബൈപാസ് മേല്‍പാലത്തിലും കുഴികള്‍ രൂപപ്പെട്ടു. പാലത്തിന്‍റെ കളര്‍കോട് ഭാഗത്താണ് കൂടുതല്‍ കുഴികളുള്ളത്. വടക്കുനിന്നെത്തുന്ന വാഹനങ്ങള്‍ ഇറക്കം ഇറങ്ങിച്ചെല്ലുമ്പോഴാണു കുഴികളില്‍ ചാടുന്നത്. ഗതാഗതനിയന്ത്രണം കാരണം കൊച്ചിയില്‍നിന്ന് ആലപ്പുഴ ഭാഗത്തേക്കു പോകുന്ന വാഹനങ്ങള്‍ അരൂര്‍ ബൈപാസ് കവല മുതല്‍ ഇഴഞ്ഞു നീങ്ങിയാണു ക്ഷേത്രം കവല വരെയെത്തുന്നത്. കുഴിയില്‍ ചാടാതെ വെട്ടിക്കുമ്പോള്‍ ഇരുചക്രവാഹനങ്ങള്‍ മറിഞ്ഞും അപകടമുണ്ടാകുന്നുണ്ട്. വാഹനങ്ങള്‍ വേഗം കുറയ്ക്കുമ്പോള്‍ പിന്നിലെ വാഹനം ഇടിച്ച സംഭവങ്ങളുമുണ്ട്. വെള്ളക്കെട്ടും കുഴിയും നിറഞ്ഞ് ഉയരപ്പാത നിര്‍മാണമേഖല ഉയരപ്പാത നിര്‍മാണം നടക്കുന്ന അരൂര്‍ മുതല്‍ തുറവൂര്‍ വരെയുള്ള പാതയില്‍ അരൂര്‍ ക്ഷേത്രം കവല, ചന്തിരൂര്‍ സ്‌കൂളിനു മുന്‍വശം, അരൂര്‍ സെന്‍റ് മേരീസ് പള്ളിക്കു മുന്നില്‍, എരമല്ലൂര്‍, കോടംതുരുത്ത് എന്നിവിടങ്ങളില്‍ കുഴികള്‍ നിറഞ്ഞു. അരൂര്‍ ക്ഷേത്രം കവലയില്‍ സ്ഥിരമായി വെള്ളക്കെട്ടുള്ള ഭാഗത്തു വന്‍കുഴിയാണ്.

മഴയ്ക്ക് ശമനം; ജലനിരപ്പ് ഉയര്‍ന്നുതന്നെ

എടത്വ: മഴയ്ക്ക് ശമനം വന്നെങ്കിലും അപ്പര്‍ കുട്ടനാട്ടില്‍ ജലനിരപ്പുയര്‍ന്നുതന്നെ. തലവടി, വീയപുരം, മുട്ടാര്‍, എടത്വ, തകഴി പഞ്ചായത്തുകളില്‍ ജലനിരപ്പിന് കാര്യമായ മാറ്റം സംഭവിച്ചിട്ടില്ല. ഇന്നലെ ഉച്ചവരെ ജലനിരപ്പ് കാര്യമായി ഉയര്‍ന്നില്ലെങ്കിലും വൈകിട്ടോടെ ജലനിരപ്പ് അല്പം ഉയര്‍ന്നിട്ടുണ്ട്. ഒട്ടുമിക്ക വീടുകളിലും വെള്ളം കയറി തുടങ്ങിയിട്ടുണ്ട്. തലവടി, വീയപുരം, മുട്ടാര്‍ പ്രദേശങ്ങളിലെ വീടുകളാണ് അധികവും വെള്ളത്തില്‍ മുങ്ങിയത്. കിഴക്കന്‍ വെള്ളത്തിന്‍റെ ശക്തിയെ ആശ്രയിച്ചാണ് അപ്പര്‍ കുട്ടനാട്ടില്‍ ജലനിരപ്പുയരുന്നത്. ഇന്നലെ ഉച്ചയോടെ കിഴക്കന്‍ വെള്ളത്തിന്‍റെ വരവ് നിലച്ചു തുടങ്ങിയിട്ടുണ്ട്. കലങ്ങി മറിഞ്ഞുള്ള പ്രധാന നദികള്‍ ഇന്നലെ ഉച്ചമുതല്‍ തെളിഞ്ഞുതുടങ്ങി. കിഴക്കന്‍ മേഖലയില്‍ വെള്ളം കുറയുന്നതനുസരിച്ച് അപ്പര്‍ കുട്ടനാട്ടിലെ ജലനിരപ്പ് ഉയരാറുണ്ട്. മഴ തുടര്‍ച്ചയായി പെയ്യുന്നില്ലെങ്കിലും കാറ്റിനൊപ്പം ഒറ്റപ്പെട്ട ശക്തമായ മഴ ഇന്നലെ വൈകിട്ടും പെയ്തിരുന്നു. വരും ദിവസങ്ങളില്‍ മഴ മാറിനിന്നാല്‍ മാത്രമേ കുട്ടനാട്ടില്‍നിന്ന് വെള്ളം ഒഴിഞ്ഞുപോകാന്‍ സാധ്യതയുള്ളൂ. ഒരാഴ്ചയായി പെയ്യുന്ന മഴയില്‍ ജനജീവിതം കടുത്ത ദുരിതത്തിലാണ്. ഉള്‍പ്രദേശങ്ങളിലെ ഗതാഗതം പൂര്‍ണമായി നിലച്ച മട്ടിലാണ്. മാന്നാറിന്‍റെ പടിഞ്ഞാറൻ പ്രദേശങ്ങൾ വെള്ളത്തിൽ മാന്നാര്‍: പെയ്‌തൊഴിയാത്ത മഴയും കിഴക്കന്‍ വെള്ളത്തിന്‍റെ വരവും പമ്പ, അച്ചന്‍കോവില്‍ ആറുകളില്‍ ജലനിരപ്പ് വീണ്ടും വര്‍ധിക്കുന്നു. ഇതോടെ മാന്നാര്‍, ബുധനൂര്‍ പഞ്ചായത്തിന്‍റെ താഴ്ന്ന പ്രദേശങ്ങള്‍ വീണ്ടും വെള്ളപ്പൊക്ക ഭീഷണിയിലായി. ബുധനൂര്‍, മാന്നാര്‍ പഞ്ചായത്തുകളില്‍ ഒരോ ദുരിതാശ്വാസ ക്യാമ്പ് തുറന്നു. മാന്നാര്‍ പഞ്ചായത്തിലെ താഴ്ന്ന പ്രദേശങ്ങളായ വള്ളക്കാലി വാലേല്‍, ചെറ്റാള പറമ്പ്, അങ്കമാലി ഭാഗം, മാന്തറ, വൈദ്യന്‍ നഗര്‍, ഇടത്തേ ഭാഗം, ഇരമത്തൂര്‍, പൊതുവൂര്‍, കൊച്ചുതറ ഭാഗം, മണപ്പുറം ഭാഗം എന്നിവിടങ്ങള്‍ വെള്ളപ്പൊക്ക ഭീഷണിയിലാണ്. പാവുക്കര, വള്ളക്കാലി ഭാഗങ്ങളിലെ ചില ഇടറോഡുകളില്‍ ഇന്നലെ വൈകിട്ടോടെ വെള്ളം കയറിത്തുടങ്ങി. പല കുടുംബങ്ങളും വെള്ളപ്പൊക്ക ഭീഷണിയിലാണ്. മൂര്‍ത്തിട്ട മുക്കാത്താരി റോഡില്‍ കൊച്ചുവീട്ടില്‍പടി ഭാഗത്ത് വെള്ളം കയറിയതോടെ ഇതുവഴിയുള്ള യാത്ര ദുരിതത്തിലായി. പമ്പാ നദിയില്‍ ജലനിരപ്പുയര്‍ന്നതോടെ മാന്നാര്‍ കുരട്ടിക്കാട് ആംബുലന്‍സ് പാലത്തിന്‍റെ പരുമല ഭാഗത്തെ അപ്രോച്ച് റോഡില്‍ വെള്ളം നിറഞ്ഞു. ബുധനൂര്‍ പഞ്ചായത്ത് പതിമൂന്നാം വാര്‍ഡ് പ്ലാക്കാത്തറ ഭാഗത്ത് നിരവധി വീടുകള്‍ വെള്ളപ്പൊക്ക ഭീഷണിയിലാണ്. ബുധനൂര്‍ തയ്യൂര്‍ പകല്‍ വീട്ടില്‍ ഇന്നലെ വൈകിട്ടോടെ ഒരുക്കിയ ദുരിതാശ്വാസ ക്യാമ്പില്‍ മൂന്നു കുടുംബങ്ങളാണുള്ളത്. ജില്ലയില്‍ ഒമ്പതു ദുരിതാശ്വാസ ക്യാമ്പുകള്‍ ആലപ്പുഴ: കാലവര്‍ഷത്തില്‍ ജില്ലയില്‍ ചേര്‍ത്തല, കുട്ടനാട്, കാര്‍ത്തികപ്പള്ളി, ചെങ്ങന്നൂര്‍ മാവേലിക്കര എന്നീ താലൂക്കുകളിലായി ഒമ്പത് ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്നുണ്ട്. ഈ ക്യാമ്പുകളിലായി ആകെ 32 കുടുംബങ്ങളാണ് കഴിയുന്നത്. ചേര്‍ത്തല താലൂക്കിലെ ഒരു ദുരിതാശ്വാസ ക്യാമ്പില്‍ നാല് കുടുംബങ്ങളെയും കുട്ടനാട് താലൂക്കില്‍ രണ്ട് ക്യാമ്പുകളിലായി ഒമ്പതു കുടുംബങ്ങളെയും ചെങ്ങന്നൂര്‍ താലൂക്കില്‍ മൂന്ന് ക്യാമ്പുകളിലായി 10 കുടുംബങ്ങളെയും മാവേലിക്കര താലൂക്കില്‍ രണ്ട് ക്യാമ്പുകളിലായി നാലു കുടുംബങ്ങളെയും കാര്‍ത്തികപ്പള്ളി താലൂക്കിലെ ഒരു ക്യാമ്പില്‍ അഞ്ചു കുടുംബങ്ങളെയും പാര്‍പ്പിച്ചിട്ടുണ്ട്.

അറിവുപകരുന്നതിനൊപ്പം മണ്ണിൽ പൊന്നുവിളയിച്ച്‌ അധ്യാപകൻ

നൗഷാദ് മാങ്കാംകുഴി ചാരുംമൂട്: സ്‌കൂളില്‍ വിദ്യാര്‍ഥികള്‍ക്ക് അറിവ് പകര്‍ന്ന് വീട്ടിലെത്തിയാല്‍ അധ്യാപകന്‍ നേരേ പോകുന്നത് കൃഷിയിടത്തിലേക്ക്. അധ്യാപനം മാത്രമല്ല കൃഷിയെന്ന തപസ്യയെ നെഞ്ചോടുചേര്‍ത്തുപിടിച്ച് മണ്ണില്‍ പൊന്നുവിളയിക്കുകയാണ് വിനോദ്കുമാര്‍ എന്ന അധ്യാപകന്‍. താമരക്കുളം വിവിഎച്ച്എസ്എസിലെ ഹിന്ദി അധ്യാപകനായ വിനോദ്കുമാര്‍ തന്‍റെ 80 സെന്‍റ് സ്ഥലത്ത് കൃഷി നടത്തിയാണ് പുതുതലമുറയ്ക്ക് മാതൃകയാവുന്നത്. ഏത്തവാഴ, ഞാലിപ്പൂവന്‍, പാളയം കോടന്‍, ചാരപ്പൂവന്‍ എന്നീ ഇനങ്ങളില്‍ എഴുന്നൂറോളം വാഴകളും, കപ്പ, ചേന, ചേമ്പ്, കാച്ചില്‍, മത്തന്‍, ഇഞ്ചി, മഞ്ഞള്‍ തുടങ്ങി വൈവിധ്യമാര്‍ന്ന കാര്‍ഷിക വിളകളും ഇദ്ദേഹത്തിന്‍റെ കൃഷിത്തോട്ടത്തിലുണ്ട്. വഴുതന, വെണ്ട, കോവല്‍, തക്കാളി, കറിവേപ്പ്, വിവിധയിനം പച്ചമുളക്, ചീര, പടവല്‍, പാവല്‍, കുരുമുളക് തുടങ്ങി പച്ചക്കറി ഇനങ്ങളും മാത്രമല്ല പപ്പായ തോട്ടവും കൂണ്‍ കൃഷിയും ബന്ദിയും കൃഷിത്തോട്ടത്തില്‍ നന്നായി പരിപാലിക്കുന്നു. കൂടാതെ പത്തുവര്‍ഷമായി ആട് കൃഷിയും ചെയ്തുവരുന്നു. ആട്ടിന്‍ കാഷ്ഠവും കോഴിക്കാഷ്ടവും വളമായും ജൈവകീടനാശിനിയായുമാണ് കൃഷിക്കായി ഉപയോഗിക്കുന്നത്. എഴുപതോളം തെങ്ങും, മാവ്, അഗത്തിചീര, അടയ്ക്കാമരം എന്നിവയും ഈ അധ്യാപ കന്‍റെ കൃഷിസ്ഥലത്തുണ്ട്. കഴിഞ്ഞവര്‍ഷം മുന്നൂറോളം നേന്ത്രക്കുലകളും പച്ചക്കറികളും തന്‍റെ കൃഷിത്തോട്ടത്തില്‍ ഉത്പാദിപ്പിച്ചതായി വിനോദ് കുമാര്‍ പറയുന്നു. കരിമുളയ്ക്കല്‍ പ്രവര്‍ത്തിക്കുന്ന കാര്‍ഷിക വിപണിയിലൂടെയാണ് പ്രധാനമായും ഉത്പന്നങ്ങള്‍ വിറ്റഴിക്കുന്നത്. മണ്ണിനോടും കാര്‍ഷിക സംസ്‌കൃതിയോടുമുള്ള സ്‌നേഹവും പ്രവര്‍ത്തനവുമാണ്, കാല്‍നൂറ്റാണ്ടായി അധ്യാപനരംഗത്ത് പ്രവര്‍ത്തിക്കുന്ന വിനോദ് മാഷിനെ കാര്‍ഷികരംഗത്തേക്ക് നയിച്ചത്. ചുനക്കര പഞ്ചായത്ത് ഏഴാം വാര്‍ഡില്‍ കോമല്ലൂര്‍ മെഴുവേലില്‍ വിനോദ് കുമാര്‍ കഴിഞ്ഞ രണ്ടുവര്‍ഷമായിട്ടാണ് കാര്‍ഷികരംഗത്ത് സജീവമായത്. നിര്‍ദേശവും സാങ്കേതികമായ ഉപദേശങ്ങളും നല്‍കി ചുനക്കര കൃഷി ഓഫീസറും മുന്‍ കൃഷി ഓഫീസറും ചുനക്കര കൃഷിഭവന്‍ ഉദ്യോഗസ്ഥരും ഇദ്ദേഹത്തിനൊപ്പമുണ്ട്. മക്കളായ വിനായക് വിനോദ്, വൈഷ്ണവി വിനോദ്, ജിഎസ്ടി വകുപ്പില്‍ സീനിയര്‍ ക്ലാര്‍ക്ക് ആയ ഭാര്യ പി.ആര്‍. രശ്മി, ഭാര്യയുടെ മാതാപിതാക്കളായ രാധാകൃഷ്ണന്‍ നായര്‍, രമാദേവി എന്നിവര്‍ അടങ്ങുന്ന കുടുംബം നല്‍കുന്ന പരിപൂര്‍ണ പിന്തുണയാണ് കൃഷിയടെ വിജയരഹസ്യമെന്ന് വിനോദ് കുമാര്‍ പറയുന്നു.

സംസ്ഥാനപാതയിലെ വെള്ളക്കെട്ടില്‍ നില്പുസമരവുമായി കോണ്‍ഗ്രസ്

എടത്വ: കോടികള്‍ ചെലവഴിച്ചു നിര്‍മിച്ച അമ്പലപ്പുഴ-തിരുവല്ല സംസ്ഥാനപാതയില്‍ നെടുമ്പ്രം ഭാഗത്തു വെള്ളം കയറുന്നതു കാരണം ഒരുപ്രദേശം തന്നെ ഒറ്റപ്പെടുകയാണ്. രണ്ടു മാസത്തിനിടയില്‍ നാലാം തവണയാണ് ഇവിടെ വെള്ളം കയറുന്നത്. കുട്ടനാട്ടിലെ എടത്വ, തകഴി, തലവടി, മുട്ടാര്‍ തുടങ്ങിയ പ്രദേശങ്ങളെ ആകെ ബാധിക്കുന്ന ഒരു പ്രശ്‌നമാണ് ഈ അടിക്കടി ഉണ്ടാകുന്ന വെള്ളക്കെട്ട്. രണ്ട് മെഡിക്കല്‍ കോളജ് സ്ഥിതി ചെയ്യുന്ന തിരുവല്ലയിലേക്ക് കുട്ടനാടന്‍ പ്രദേശങ്ങളില്‍നിന്നുള്ള രോഗികള്‍ക്ക് എത്തിച്ചേരാന്‍ ബുദ്ധിമുട്ട് ഉണ്ടാക്കുന്നു. അതുപോലെ തന്നെ ചക്കുളത്തുക്കാവ് ദേവീക്ഷേത്രം, എടത്വ പള്ളി, അമ്പലപ്പുഴ ശ്രീ കൃഷ്ണസ്വാമി ക്ഷേത്രം തുടങ്ങിയ ആരാധനാലയങ്ങളിലേക്ക് എത്തുന്ന തീര്‍ഥാടകാരെയും സാരമായി ഇത് ബാധിക്കുന്നു. ഉടന്‍തന്നെ സര്‍ക്കാര്‍ ഈ വിഷയത്തില്‍ ഇടപെടണമെന്നും വേണ്ടിവന്നാല്‍ ഒരു എലിവേറ്റഡ് ഹൈവേ വെള്ളക്കെട്ട് ഉണ്ടാകുന്ന ഭാഗങ്ങളില്‍ പണിയാനും നടപടി സ്വീകരിക്കണമെന്നും ഡിസിസി വൈസ് പ്രസിഡന്‍റ് സജി ജോസഫ് പറഞ്ഞു. നെടുമ്പ്രം ഭാഗത്തെ വെള്ളക്കെട്ടില്‍ നടത്തിയ നില്‍പുസമരം ഉദ്ഘാടനം ചെയ്യുകയായിരുന്നു സജി ജോസഫ്. തലവടി നോര്‍ത്ത് കോണ്‍ഗ്രസ് മണ്ഡലം പ്രസിഡന്‍റ് വര്‍ഗീസ് കോലത്തുപറമ്പില്‍, വിജയകുമാര്‍ കരീശേരില്‍, നിബിന്‍ കെ. തോമസ്, നിസാര്‍ വെള്ളാപ്പള്ളി, സ്റ്റീഫന്‍ പാറപ്പള്ളി, ജിക്കു ജയിംസ്, സുബിന്‍ മാത്യു, സുജീന്‍ എന്നിവര്‍ പ്രസംഗിച്ചു.

ഗ്രാന്‍ഡ് പേരന്‍റ്സിന് ആദരവുമായി എടത്വ പള്ളി

എടത്വ: സെന്‍റ് ജോര്‍ജ് ഫൊറോന പള്ളിയില്‍ ഗ്രാന്‍ഡ് പേരന്‍റ്സ് ഡേ ആഘോഷം നടത്തി. 70 വയസ് പൂര്‍ത്തിയായ ഗ്രാന്‍ഡ് പേരന്‍റ്സിനും 85 വയസിനു മുകളില്‍ പ്രായമുള്ള മാതാപിതാക്കള്‍ക്കും പ്രത്യേക ആദരമാണ് നല്‍കിയത്. അഞ്ഞൂറിലധികം ഗ്രാന്‍ഡ് പേരന്‍റ്സ് ആദരവ് ഏറ്റുവാങ്ങാനായി പള്ളിയിലേക്കെത്തി. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണവും ഗ്രാന്‍റ് പേരന്‍റ്സിനെ ആദരിക്കലും നടത്തി. വികാരി ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. ഫാ. ഏലിയാസ് കരിങ്കണ്ടത്തില്‍, ഫാ. കുര്യന്‍ പുത്തന്‍പുര, ഫാ. തോമസ് കാരക്കാട്, ഫാ. തോമസ് കുളത്തുങ്കല്‍, കൈക്കാരന്‍മാരായ ടോമിച്ചന്‍ പറപ്പള്ളി, വിന്‍സന്‍റ് പഴയറ്റില്‍, ജയിംസ് കളത്തൂര്‍, പ്രോഗ്രാം ജനറല്‍ കണ്‍വീനര്‍ ജോസി പറത്തറ, കൗണ്‍സില്‍ സെക്രട്ടറി ആന്‍സി മുണ്ടകം എന്നിവര്‍ പ്രസംഗിച്ചു.

നിയന്ത്രണംവിട്ട കാർ തലകീഴായി മറിഞ്ഞു; രണ്ടു പേർക്കു പരിക്ക്

മാന്നാർ: നിയന്ത്രണം വിട്ട കാർ കടയ്ക്കു മുന്നിലേക്ക് ഇടിച്ചുകയറി തലകീഴായി മറിഞ്ഞു. വഴിയരികിൽനിന്ന വയോധികനുൾപ്പെടെ രണ്ടു പേർക്ക് പരിക്കേറ്റു. മദ്യലഹരിയിലായിരുന്ന കാർ യാത്രക്കാർ പോലീസുമായി വാക്കേറ്റം നടത്തിയതിനെത്തുടർന്ന് പോലീസിന്‍റെ കൃത്യനിർവഹണം തടസപ്പെടുത്തിയതിനും മദ്യപിച്ച് അപകടകരമായ നിലയിൽ വാഹനമോടിച്ചതിനും കാർ യാത്രക്കാരായ മൂന്നു പേർക്കെതിരേ മാന്നാർ പോലീസ് കേസേടുത്തു. ബുധനൂർ തോപ്പിൽ ചന്ത ജംഗ്ഷനിലായിരുന്നു സംഭവം. ബുധനൂർ കാവിൽ ബേക്കറിക്കു മുന്നിലേക്കായിരുന്നു കാർ നിയന്ത്രണം വിട്ട് ഇടിച്ചുകയറിയത്. അമിത വേഗതയിൽ കാർ വരുന്നത് കണ്ട് ഓടിമാറിയ ബുധനൂർ തുള്ളൽ കളത്തിൽ സനൽ കുമാർ (60), കാർ യാത്രികനായ തിരുവനന്തപുരം സ്വദേശി സുരാഗ് (26) എന്നിവർക്കാണ് പരിക്കേറ്റത്. പരിക്കേറ്റവരെ പരുമല ആശുപത്രിയിൽ ചികിത്സ നൽകി വിട്ടയച്ചു. പരിക്കേറ്റ സുരാഗ്, മറ്റ് കാർ യാത്രികരായ മാന്നാർ കുട്ടമ്പേരൂർ സ്വദേശികളായ അഭിജിത്ത് കൃഷ്ണൻ, അഭിജിത്ത് ആർ. നായർ എന്നിവർക്കെതിരെയാണ് മാന്നാർ പോലീസ് കേസെടുത്തത്.

ജില്ലാക്കോടതിപ്പാലം പുനര്‍നിര്‍മാണം; മാറ്റിവച്ച ട്രയല്‍ റണ്‍ 29നും 30നും

ആലപ്പുഴ: ജില്ലാക്കോടതിപ്പാലത്തിന്‍റെ പുനര്‍നിര്‍മാണവുമായി ബന്ധപ്പെട്ട് മാറ്റിവച്ച ട്രയല്‍ റണ്‍ നാളെ മുതല്‍ ആരംഭിക്കുമെന്ന് കെആര്‍എഫ്ബി എക്സിക്യൂട്ടീവ് എന്‍ജിനിയര്‍ അറിയിച്ചു. ഗതാഗതനിയന്ത്രണങ്ങള്‍ ഏര്‍പ്പെടുത്തിയുള്ള ട്രയല്‍ റണ്‍ നാളെ യും 30നും നടക്കും. തണ്ണീര്‍മുക്കത്തുനിന്ന് വരുന്ന വാഹനങ്ങള്‍ ആലപ്പുഴ തണ്ണീര്‍മുക്കം റോഡില്‍ തണ്ണീര്‍മുക്കം ഭാഗത്തുനിന്നു വരുന്ന വാഹനങ്ങള്‍ ടൗണില്‍ പ്രവേശിക്കുന്നതിന് കെഎസ്ആര്‍ടിസി ബസുകളും സ്വകാര്യബസുകളും കൈചൂണ്ടി മുക്കില്‍നിന്നു വലതു തിരിഞ്ഞ് കൊമ്മാടി പാലത്തിന്‍റെ കിഴക്കേക്കരയില്‍ എഎസ് കനാല്‍ ഈസ്റ്റ് ബാങ്ക് റോഡില്‍ കൂടി വഴിച്ചേരി പാലം കയറി വഴിച്ചേരി മാര്‍ക്കറ്റ് ജംഗ്ഷനില്‍നിന്നു ഇടത് തിരിഞ്ഞ് പിച്ചുഅയ്യര്‍ എവിജെ ജംഗ്ഷന്‍ വഴി പഴവങ്ങാടി ജംഗ്ഷനില്‍നിന്നും ഇടതുതിരിഞ്ഞ് ഔട്ട് പോസ്റ്റ് വഴി ബസ് സ്റ്റാൻഡിലേക്കു പോകാവുന്നതാണ്. തണ്ണീര്‍മുക്കത്തേക്കു പോകുന്ന വാഹനങ്ങള്‍ ആലപ്പുഴനിന്നു തണ്ണീര്‍മുക്കം ഭാഗത്തേക്കു പോകുന്ന കെഎസ്ആര്‍ടിസി, സ്വകാര്യബസുകള്‍ ചുങ്കം, കല്ലുപാലം റോഡിന്‍റെ വടക്കേ അപ്രോച്ച് വഴി കൊമേഴ്സ്യല്‍ കനാല്‍ നോര്‍ത്ത് ബാങ്ക് റോഡില്‍ കൂടി ഇരുമ്പു പാലത്തില്‍നിന്നു വലതുതിരിഞ്ഞ് വൈഎംസിഎ പാലം വഴി എഎസ് കനാല്‍ ഈസ്റ്റ് ബാങ്ക് റോഡ് വഴി കൈചൂണ്ടി മുക്കിലെത്തി ഇടതുതിരിഞ്ഞു പോകേണ്ടതാണ്. തെക്കുനിന്നു വരുന്ന പ്രൈവറ്റ് ബസുകള്‍ ഇരുമ്പുപാലം വഴി വൈഎംസിഎ വഴി സ്വകാര്യ ബസ് സ്റ്റാന്‍ഡില്‍ എത്തി പോകേണ്ടതാണ്. എറണാകുളം ഭാഗത്തുനിന്നു വരുന്ന കെഎസ്ആര്‍ടിസി, പ്രൈവറ്റ് ബസുകള്‍ ടൗണില്‍ പ്രവേശിക്കുന്നതിന് വഴിച്ചേരി പാലം കയറി വഴിച്ചേരി മാര്‍ക്കറ്റ് ജംഗ്ഷനില്‍നിന്ന് ഇടതു തിരിഞ്ഞ് പിച്ചു അയ്യര്‍ എ.വി.ജെ ജംഗ്ഷന്‍വഴി പഴവങ്ങാടി ജംഗ്ഷനില്‍നിന്ന് ഇടതുതിരിഞ്ഞ് ഔട്ട് പോസ്റ്റ് വഴി കെഎസ്ആര്‍ടിസി ബസ് സ്റ്റാന്‍ഡിലേക്കു പോകാവുന്നതാണ്. ആലപ്പുഴനിന്ന് എറണാകുളം ഭാഗത്തേക്കു പോകുന്ന വാഹനങ്ങള്‍ ചുങ്കം കല്ലുപാലം റോഡിന്‍റെ വടക്കേ അപ്രോച്ച് വഴി കൊമേഴ്സ്യല്‍ കനാല്‍ നോര്‍ത്ത് ബാങ്ക് റോഡില്‍ കൂടി ഇരുമ്പു പാലത്തില്‍നിന്ന് വലതു തിരിഞ്ഞ് വൈഎംസിഎ ജംഗ്ഷനില്‍നിന്ന് ഇടതുതിരിഞ്ഞ് പോകേണ്ടതാണ്. പുന്നമട ഭാഗത്തേക്കു പോകുന്ന/വരുന്ന വാഹനങ്ങള്‍ പോലീസ് ഔട്ട്പോസ്റ്റിനു കിഴക്കു ഭാഗത്തുള്ള ഡീവിയേഷന്‍ റോഡ് വഴി പുന്നമട ഭാഗത്തേക്കും പുന്നമടയില്‍നിന്നു തിരിച്ചുവരുന്ന വാഹനങ്ങള്‍ ഡീവിയേഷന്‍ റോഡ് വഴി കെഎസ്ആര്‍ടിസി സ്റ്റാന്‍ഡ് വഴി ചുങ്കം, കല്ലുപാലം റോഡിന്‍റെ വടക്കേ അപ്രോച്ച് വഴി കല്ലുപാലം വഴി പോകാവുന്നതാണ്. ഭാരം കുറഞ്ഞ വാഹനങ്ങള്‍ക്ക് നഗരചത്വരം വഴി മിനി സിവില്‍ സ്റ്റേഷന്‍ ഭാഗത്തേക്കും കോടതി ഭാഗത്തേക്കും പോകാവുന്നതാണ്.

ഗാന്ധിവിചാരോത്സവം പഠനക്യാമ്പ്

ചേർത്തല: ഗാന്ധിദർശസമിതി ആലപ്പുഴ ജില്ലാ കമ്മിറ്റിയുടെ നേതൃത്വത്തിൽ നടത്തിയ ഗാന്ധിവിചാരോത്സവം ഏകദിന പഠന ക്യാമ്പ് കെപിസിസി ജനറൽ സെക്രട്ടറി എം. ലിജു ഉദ്ഘാടനം ചെയ്തു. എസ്എൽ പുരം ഗാന്ധിസ്മാരക ഗ്രാമസേവാ കേന്ദ്രത്തിൽ നടന്ന സമ്മേളനത്തിൽ ജില്ലാ പ്രസിഡന്‍റ് സി.കെ. വിജയകുമാർ അധ്യക്ഷത വഹിച്ചു. പതാക ഉയർത്തലും തുടർന്ന് ഗാന്ധി പ്രതിമയിൽ പുഷ്പാർച്ചനയും ദണ്ഡി കടപ്പുറത്തുനിന്നും ശേഖരിച്ച മണൽ സമർപ്പണവും നടത്തി. യുഡിഎഫ് ജില്ലാ ചെയർമാൻ സി.കെ. ഷാജിമോഹന്‍ മുഖ്യപ്രഭാഷണം നടത്തി. ഗാന്ധിദർശൻ സമിതി സംസ്ഥാനപ്രസിഡന്‍റ് വി.സി. കബീർ മാസ്റ്റർ, ജില്ലാ പ്രസിഡന്‍റ് സി.എ. ജയശ്രീ, ഡി. സുഗതൻ, കെ. സാദിഖ്, പി. ഹരിഗോവിന്ദൻ മാഷ്, പ്രശാന്ത് എരുവ എന്നിവർ പ്രസംഗിച്ചു. കെപിസിസി പബ്ലിക് പോളിസി ഗവേഷണ വിഭാഗം ചേയർമാൻ എസ്. അടൂർ, എസ്. രാജേഷ്, പരശുവക്കൽ രാധാകൃഷ്ണൻ എന്നിവര്‍ ക്ലാസ് എടുത്തു. വൈകിട്ട് നടന്ന സമാപന സമ്മേളനം കെപിസിസി രാഷ്ട്രീയകാര്യ സമിതി അംഗം ഷാനിമോൾ ഉസ്മാൻ ഉദ്ഘാടനം ചെയ്തു. കമ്പറ നാരായണൻ, റഷീദ് നൈനാരേത്ത്, കെപിസിസി സെക്രട്ടറിമാരായ എസ്. ശരത്, ബി. ബൈജു, എം.എസ്. ചന്ദ്രബോസ്, എം.പി. ജോയ് എന്നിവർ പ്രസംഗിച്ചു.

ലയണ്‍സ് ക്ലബ് ഓഫ് എടത്വ സ്ഥാനാരോഹണവും ചാരിറ്റി പ്രവര്‍ത്തന ഉദ്ഘാടനവും

എടത്വ: ലയണ്‍സ് ക്ലബ് ഓഫ് എടത്വ 2025-26 വര്‍ഷത്തെ ഭാരവാഹി സ്ഥാനാരോഹണവും ചാരിറ്റി പ്രവര്‍ത്തന ഉദ്ഘാടനവും നടന്നു. ഈപ്പന്‍ കെ. ഈപ്പന്‍ അധ്യക്ഷത വഹിച്ചു. എജെഎഫ് സുരേഷ് ജോസഫ് സ്ഥാനാരോഹണച്ചടങ്ങ് നടത്തി. ചാരിറ്റി പ്രവര്‍ത്തന ഉദ്ഘാടനം ആര്‍സി ചാരിറ്റബിള്‍ ട്രസ്റ്റ് ചെയര്‍മാന്‍ റെജി ചെറിയാന്‍ ഉദ്ഘാടനം ചെയ്തു. എംജെഎഫ് ബിന്നി പി. ജോര്‍ജ്, ബിമല്‍ സി. ശേഖര്‍, ആര്‍. രാജേഷ്, വിജയകുമാര്‍, ശങ്കരപിള്ള, ബെന്നി ഫിലിപ്പ് എന്നിവര്‍ പ്രസംഗിച്ചു. മുന്‍ പ്രസിഡന്‍റ് ബേബിച്ചന്‍ നന്നാട്ടുമാലിന്‍റെ നിര്യാണത്തില്‍ അനുശോചനം അര്‍പ്പിക്കുകയും ചെയ്തു. ഭാരവാഹികള്‍: മാത്യു സക്കറിയാസ് (പ്രസിഡന്‍റ്), ജോര്‍ജുകുട്ടി ചെത്തിപ്പുരയ്ക്കല്‍ (സെക്രട്ടറി), മാത്യു തോമസ് (ട്രഷറര്‍), പി.ആര്‍. വിശ്വനാഥന്‍ നായര്‍ (അഡ്മിനിസ്‌ട്രേറ്റര്‍).

ലഹരിക്കെതിരേ പോസ്റ്റർ പ്രദർശനം

കറ്റാനം: ലഹരിക്കെതിരേ പോസ്റ്റർ പ്രദർശനവുമായി സ്‌കൗട്ട് വിദ്യാർഥികൾ. കറ്റാനം പോപ്പ് പയസ് ഹയർ സെക്കൻഡറി സ്കൂളിലെ സ്‌കൗട്ട് യൂണിറ്റാണ് ലഹരിക്കെതിരേ വിദ്യാലയത്തിൽ പോസ്റ്റർ പ്രദർശനം സംഘടിപ്പിച്ചത്. ലഹരിക്കെതിരെയുള്ള സന്ദേശങ്ങളും ചിത്രങ്ങളും അടങ്ങിയ പ്ലക്കാർഡ് വിദ്യാർഥികൾ പ്രദർശിപ്പിച്ചു. മാനേജ്മെന്‍റ് പ്രതിനിധി ഫാ. സിൽവസ്റ്റർ തെക്കേടത്ത് ഉദ്ഘാടനം ചെയ്തു. അഡ്വ. എൻ.എം. നസീർ അധ്യക്ഷത വഹിച്ചു. സ്കൗട്ട് മാസ്റ്റർ സി.ടി. വർഗീസ്, എം. ജേക്കബ്, മുകിൽ കൃഷ്ണ, അഭിനവ് ശ്രീകുമാർ എന്നിവർ പ്രസംഗിച്ചു.

മുതിർന്നവരുടെ ആരോഗ്യസംരക്ഷണത്തിലും വികസനത്തിലും ജനകീയ പങ്കാളിത്തം അനിവാര്യം: സ്പീക്കർ ഷംസീർ

ഹരിപ്പാട്: മുതിർന്നവരുടെ ആരോഗ്യസംരക്ഷണത്തിലും വികസനത്തിലും ജനകീയ പങ്കാളിത്തം അനിവാര്യമായ കാലമാണിതെന്ന് കേരള നിയമസഭ സ്പീക്കർ എ.എം. ഷംസീർ. മുട്ടം സാന്ത്വനം ചാരിറ്റബിൾ സൊസൈറ്റിയും ആയുർവേദ മെഡിക്കൽ അസോസിയേഷൻ ഓഫ് ഇന്ത്യ ഹരിപ്പാട് ഏരിയ കമ്മിറ്റിയും ചേർന്ന് നടത്തിവരുന്ന സൗജന്യ ആയുർവേദ മെഡിക്കൽ ക്യാമ്പുകളുടെ 101 -ാമത് മാസത്തെ ക്യാമ്പ് ഉദ്ഘാടനം ചെയ്തു പ്രസംഗിക്കുകയാ യിരുന്നു അദ്ദേഹം. രമേശ് ചെന്നിത്തല എംഎൽഎ അധ്യക്ഷത വഹിച്ചു. ആയുർവേദ അസോസിയേഷൻ സംസ്ഥാന പ്രസിഡന്‍റ് വിഷ്ണു നമ്പൂതിരി മുഖ്യപ്രസംഗം നടത്തി. സാന്ത്വനം പ്രസിഡന്‍റ് ജോൺ തോമസ്, ചേപ്പാട് പഞ്ചായത്ത് പ്രസിഡന്‍റ് എം.കെ. വേണുകുമാർ, ജില്ലാ പഞ്ചായത്തംഗം ശോഭ, മുതുകുളം ബ്ലോക്ക് പഞ്ചായത്ത് വൈസ് പ്രസിഡന്‍റ് ജി. ഉണ്ണികൃഷ്ണൻ, ഹരിപ്പാട് നഗരസഭ ആരോഗ്യകാര്യ സ്ഥിരം സമിതി അധ്യക്ഷൻ എസ്. നാഗദാസ്, കെ. വിശ്വപ്രസാദ്, ഡോ.എസ്. പ്രസന്നൻ, ഡോ.കെ.എ. സൽമാൻ എന്നിവർ പ്രസംഗിച്ചു.

അമ്പലപ്പുഴ പാൽപ്പായസം: വിലവർധിപ്പിക്കാനുള്ള തീരുമാനത്തിനെതിരേ പ്രതിഷേധം

അന്പലപ്പുഴ: ചരിത്രപ്രസിദ്ധമായ അമ്പലപ്പുഴ പാൽപ്പായസത്തിന്‍റെ വില വർധിപ്പിക്കാനുള്ള ദേവസ്വം ബോർഡിന്‍റെ തീരുമാനത്തിനെതിരേ നടന്ന ഭക്തരുടെ പ്രതിഷേധം പോലീസ് തടഞ്ഞത് സംഘർഷത്തിനിടയാക്കി. ഭക്തജനക്കൂട്ടായ്മയായ വാസുദേവസഭയുടെ നേതൃത്വത്തിലാണ് അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിൽ പ്രതിഷേധം നടന്നത്. നിലവിൽ ഒരു ലിറ്ററിന് 160 രൂപയാണ് പാൽപ്പായസത്തിന്‍റെ വില. ഇത് 100 രൂപ വർധിപ്പിച്ച് 260 രൂപയാക്കാനാണ് ദേവസ്വം ബോർഡ് തീരുമാനം. കൂടാതെ ക്ഷേത്രത്തിൽ നടന്നുവന്ന നിത്യ അന്നദാനവും മുന്നറിയിപ്പില്ലാതെ നിർത്തിവച്ചു. മൂന്നുതവണ ക്ഷേത്രത്തിൽ നാമജപം ചൊല്ലി വലംവച്ച് ആനക്കൊട്ടിലിൽ പ്രതിഷേധ യോഗം സംഘടിപ്പിക്കാനായിരുന്നു തീരുമാനം. എന്നാൽ, ക്ഷേത്രത്തിനുള്ളിൽ പ്രതിഷേധം അനുവദിക്കില്ലെന്ന് പോലീസ് നിലപാട് സ്വീകരിച്ചതാണ് വാസുദേവ സഭ പ്രവർത്തകരും പോലീസും തമ്മിൽ സംഘർഷമുണ്ടാകാൻ കാരണമായത്. പ്രതിഷേധം ശക്തമായതോടെ ഇതിനു നേതൃത്വം നൽകിയ ചിലരെ പോലീസ് നീക്കം ചെയ്തു. തുടർന്ന് പ്രവർത്തകർ ആനക്കൊട്ടിലിന് വെളിയിൽ പ്രതിഷേധം സംഘടിപ്പിച്ചു. വിശ്വഹിന്ദു പരിഷത്ത് അമ്പലപ്പുഴ വിഭാഗ് സെക്രട്ടറി ജയകൃഷ്ണൻ പ്രതിഷേധ യോഗം ഉദ്ഘാടനം ചെയ്തു.

കന്യാസ്ത്രീമാരെ അറസ്റ്റ് ചെയ്തത് അപലപനീയം: മാർ തോമസ് തറയിൽ

മുഹമ്മ: വടക്കേ ഇന്ത്യയിൽ രണ്ടു കന്യാസ്ത്രീമാരെ അറസ്റ്റ് ചെയ്ത സംഭവം അപലപനീയമാണെന്ന് ചങ്ങനാശേരി അതിരുപത ബിഷപ്‌ മാർ തോമസ് തറയിൽ. ദൈവം കൂടെയുള്ളവരെ തകർക്കാൻ ആർക്കും കഴിയില്ല. 2.3 ശതമാനം മാത്രം വരുന്ന ക്രൈസ്തവസമൂഹത്തെ ഭയപ്പെടുന്നതിനാലാണ് ഇങ്ങനെ സംഭവിക്കുന്നത്. ദൈവിക പിന്തുണ ഉള്ളതിനാലാണ് സഭയ്ക്ക് ഭൗതി കമായും ആത്മീയമായും ഉയരാൻ കഴിയുന്നത്.- മാർ തോമസ് തറയിൽ കൂട്ടിച്ചേർത്തു. വേദനകളിലും യാതനകളിലും തളരാതെ ദൈവത്തെ മുറുകെപിടിക്കുക. പ്രശ്നങ്ങൾ വിശ്വാസിയാകാനുള്ള അവസരമാണ്. അനന്തമായ സ്നേഹത്തിന്‍റെ ചരിത്രമാണ് കർത്താവിന്‍റെ മനുഷ്യാവതാരം. ദൈവത്തിൽ വിശ്വാസമർപ്പിക്കുന്നവർക്കു മുന്നിൽ തുറക്കാത്ത വാതിലുകൾ ഉണ്ടാകില്ല. വേദനകളം ദുഃഖങ്ങളും ദൈവീക പരിരക്ഷയുള്ള വിശ്വാസികളെ സ്പർശിക്കില്ല. ഓരോ മനുഷ്യനും രക്ഷിക്കപ്പെടുന്നതിനായി പിന്നാലെ നിൽക്കുന്നതാണ് കർത്താവിന്‍റെ മനുഷ്യാവതാരം. മിശിഹായുടെ ശരീരമാണ് സഭ എന്നാണ് പൗലോസ് ശ്ലീഹാ പറഞ്ഞത്. കൂദാശ സ്വീകരിക്കുന്നവരിൽ ദൈവത്തിന്‍റെ അനുഗ്രഹമുണ്ടാകും. മുഹമ്മ സെന്‍റ് ജോർജ് ഫൊറോനാ പള്ളിയിൽ നടന്ന കാർപ്പ് ഹെൽപ്പ് ഡെസ്ക്കിന്‍റെ അതിരൂപതാ തല ഉദ്ഘാടനം നിർവഹിക്കുകയായിരുന്നു അദ്ദേഹം. സംവരണം ഉൾപ്പെടെ കേന്ദ്ര- സംസ്ഥാന സർക്കാരുകൾ നൽകുന്ന ആനുകൂല്യങ്ങൾ വിശ്വാസീ സമൂഹത്തിൽ എത്തിക്കാൻ ഹെൽപ്പ് ഡെസ്ക്കുകൾ പ്രയോജനപ്പെടുമെന്ന് മെത്രാപ്പോലീത്ത പറഞ്ഞു. ഫൊറോനാ വികാരി ഫാ.ആന്‍റണി കാട്ടൂപ്പാറ, കൈക്കാരന്മാരായ ടി.ജി. പോൾ പട്ടാറ, രാജുമോൻ ജോസഫ് കരിപ്പുറത്ത്, കാർപ്പ് കോ-ഓർഡിനേറ്റർ ടോംസ് ചമ്പക്കുളം, ബേബി പട്ടക്കര, പാരീഷ് കൗൺസിൽ സെക്രട്ടറി എ.ടി. വർഗീസ്, ഔസേപ്പച്ചൻ കുറ്റാലത്തുചിറ എന്നിവർ പ്രസംഗിച്ചു.

നേര്‍ച്ചപ്പെട്ടി കുത്തിത്തുറക്കാന്‍ ശ്രമം; ഒടുവില്‍ കള്ളന്‍ കുടുങ്ങി

എടത്വ: പച്ച-ചെക്കിടിക്കാട് ലൂര്‍ദ് മാതാ പള്ളിയുടെ കുരിശടിയിലെ നേര്‍ച്ചപ്പെട്ടി കുത്തിത്തുറന്ന് മോഷണശ്രമം നടത്തിയ പ്രതി മണിക്കൂറുകള്‍ക്കുള്ളില്‍ പോലീസിന്‍റെ പിടിയില്‍. തകഴി കുന്നുമ്മ കാട്ടില്‍ചിറ കെ.പി. പ്രകാശാണ് പിടിയിലായത്. ഇന്നലെ പുലര്‍ച്ചെ 1.30ന് പച്ച-ചെക്കിടിക്കാട് ലൂര്‍ദ് മാതാ പള്ളി കുരിശടിയിലെ നേര്‍ച്ചപ്പെട്ടി കുത്തിത്തുറക്കാന്‍ ശ്രമിക്കുന്നതിനിടെ ഫെഡറല്‍ ബാങ്കിലെ സെക്യൂരിറ്റി ഗോവിന്ദരാജ് ഓടി എത്തിയപ്പോഴേക്കും കള്ളന്‍ ശ്രമം ഉപേക്ഷിച്ച് കടന്നിരുന്നു. മോഷണശ്രമം നടത്തിയ സ്ഥലത്തിനു സമീപം വച്ചിരുന്ന സ്‌കൂട്ടറില്‍ കയറി കള്ളന്‍ എടത്വ ഭാഗത്തേക്ക് രക്ഷപ്പെട്ടു. സെക്യൂരിറ്റി ഉടന്‍തന്നെ എടത്വ പോലീസില്‍ വിവരം ധരിപ്പിച്ചു. മോഷ്ടാവ് ധരിച്ചിരുന്ന വസ്ത്രത്തിന്‍റെയും സ്‌കൂട്ടറിന്‍റെ യും രൂപം മനസിലാക്കിയ പോലീസ് നടത്തിയ അന്വഷണത്തില്‍ ഒരു സ്‌കൂട്ടര്‍ അമിതവേഗതയില്‍ യാത്ര ചെയ്യുന്നതായി കണ്ടു. പോലീസ് സ്‌കൂട്ടറിനെ പിന്‍തുടരുന്നതു ശ്രദ്ധയില്‍പ്പെട്ട കള്ളന്‍ എടത്വ കോളജിനു മുന്‍പിലുള്ള ആലംതുരുത്തി റോഡിലേക്കു തിരിച്ചു. അമിതവേഗതയിലായിരുന്ന സ്‌കൂട്ടര്‍ റോഡിന് സൈഡില്‍ കൂട്ടിയിട്ട തടിയില്‍ ഇടിച്ചുമറിഞ്ഞു. പോലീസ് സ്ഥലത്തെത്തി പരിക്കുപറ്റി കിടക്കുന്ന പ്രകാശിനെ എടത്വയിലെ സ്വകാര്യ ആശുപത്രിയില്‍ എത്തിച്ചു. ആശുപത്രി അധികൃതരുടെ നിര്‍ദേശപ്രകാരം പ്രകാശിനെ 108 ബുലന്‍സ് വരുത്തി വണ്ടാനം മെഡിക്കല്‍ കോളജ് ആശുപത്രിയില്‍ എത്തിച്ചു. പരിക്കു പറ്റിയ പ്രകാശിന്‍റെ നില അറിയാന്‍ പോലീസ് ആശുപത്രിയിലേക്ക് വിളിച്ചപ്പോളാണ് ഇയാള്‍ അവിടെനിന്ന് മുങ്ങിയ വിവരം അറിയുന്നത്. സംശയം തോന്നിയ പോലീസ് അപകടം നടന്ന സ്ഥലത്ത് എത്തിയപ്പോള്‍ ബൈക്ക് തള്ളി ക്കൊണ്ടുപോകുന്ന പ്രകാശനെയാണ് കണ്ടത്. പോലീസ് ഉടന്‍ ഇയാളെ കസ്റ്റഡിയിലെടുത്തു. തുടര്‍ന്ന് നടത്തിയ ചോദ്യം ചെയ്യലിലാണ് നേര്‍ച്ചപ്പെട്ടി കുത്തി ത്തുറന്ന് മോഷണശ്രമം നടത്തിയ സംഭവം പ്രതി സമ്മതിച്ചത്. നിരവധി മോഷണക്കേസില്‍ പ്രതിയായ പ്രകാശ് അമ്പലപ്പുഴ സ്റ്റേഷനില്‍ പോസ്‌കോ കേസിലും പ്രതിയായിട്ടുണ്ട്. എറണാകുളം കടവന്ത്ര ഭാഗത്തുനിന്ന് ബൈക്ക് മോഷ്ടിച്ച കേസിലും പ്രതിയാണ്. തകഴിയില്‍നിന്ന് മോഷ്ടിച്ച ബൈക്കിലാണ് പച്ചയില്‍ മോഷണത്തിനായി എത്തിയത്. കോടതിയില്‍ ഹാജരാക്കിയ പ്രകാശിനെ റിമാൻഡ് ചെയ്തു. പ്രതിയെ തെളിവെടുപ്പിന് എത്തിക്കുമ്പോള്‍ മറ്റ് മോഷണങ്ങളെക്കുറിച്ച് വ്യക്തതവരുത്താനാണ് പോലീസിന്‍റെ തീരുമാനം. വെള്ളിയാഴ്ച രാത്രിയില്‍ കേളമംഗലം ജംഗ്ഷനില്‍ ശ്രീധര്‍മ ശാസ്താ ക്ഷേത്രത്തിന്‍റെ കാണിക്കവഞ്ചി, കുരിശടിയിലെ നേര്‍ച്ചപ്പെട്ടി എന്നിവ കുത്തിത്തുറക്കാന്‍ ശ്രമം നടത്തിയിരുന്നു. ചങ്ങങ്കരി ചിറയ്ക്കകം ഭാഗത്ത് ദിവസങ്ങളായി മോഷണ ശ്രമം നടന്നുകൊണ്ടിരിക്കുകയാണ്. ദിവസങ്ങള്‍ക്കു മുന്‍പാണ് ഫെഡറല്‍ ബാങ്ക് പച്ച ശാഖയുടെ എടിഎം കുത്തിത്തുറക്കാന്‍ ശ്രമം നടത്തിയത്. സിസിടിവി ദൃശ്യങ്ങള്‍ ലഭിച്ചെങ്കിലും പ്രതിയെക്കുറിച്ച് ഇതുവരെ സൂചന ലഭിച്ചിട്ടില്ല. എടത്വ സിഐ അന്‍വര്‍, എസ്‌ഐ രാജേഷ്, എഎസ്‌ഐമാരായ പ്രിയ കുമാരി, പ്രതീപ് കുമാര്‍, ഹെഡ് കോണ്‍സ്റ്റബിള്‍ മുഹമ്മദ്, സീനിയര്‍ സിപിഒ ബിനു, സിപിഒ ബിലാല്‍ ഹാഷിഫ് എന്നിവര്‍ അന്വേഷണത്തിനു നേതൃത്വം നല്‍കി.

തിരുവൻവണ്ടൂരിൽ ചുഴലിക്കാറ്റ് നാശം വിതച്ചു; വീടുകൾ തകർന്നു, വ്യാപക വൈദ്യുതി മുടക്കം

ചെങ്ങന്നൂർ: ശക്തമായ ചുഴലിക്കാറ്റിൽ തിരുവൻവണ്ടൂർ പഞ്ചായത്തിൽ രണ്ടു വീടുകൾക്ക് ഭാഗികമായി നാശനഷ്ടങ്ങൾ സംഭവിക്കുകയും പ്രദേശത്തെ വൈദ്യുതി ബന്ധം പൂർണമായി തകരുകയും ചെയ്തു. വെള്ളിയാഴ്ച ഉച്ചയ്ക്ക് മൂന്നോടെ വീശിയടിച്ച ചുഴലിക്കാറ്റിൽ തിരുവൻവണ്ടൂർ പഞ്ചായത്തിലെ നാലാം വാർഡിൽ തുണ്ടിയിൽ വീട്ടിൽ ടി.വി. മുരളിയുടെ വീടിന് സമീപത്തെ കൂറ്റൻമാവ് കടപുഴകി വീണ് വൻ നാശനഷ്ടങ്ങളുണ്ടായി. അടുക്കള, ചിമ്മിനി, ശുചിമുറി, വാട്ടർ ടാങ്ക്, ഷീറ്റ്, ഓട് എന്നിവ പൂർണമായി തകർന്നു. അപകടം സംഭവിക്കുമ്പോൾ മുരളിയുടെ ഭാര്യ അമ്പിളി, മകൾ അനഘ, ജ്യേഷ്ഠസഹോദരൻ സുകുമാരൻ, ഭാര്യ രത്നമ്മ എന്നിവർ അടുക്കളയിൽ ഭക്ഷണം കഴിക്കാനുള്ള ഒരുക്കത്തിലായിരുന്നു. ഉഗ്രശബ്ദം കേട്ട് ഉടൻതന്നെ വീട്ടംഗങ്ങൾ പുറത്തേക്ക് ഓടിമാറിയതുകൊണ്ട് വലിയൊരു ദുരന്തം ഒഴിവായി. വീടിനോട് ചേർന്ന് തടിപ്പണിക്കാരനായ മുരളി താൻ നിർമിച്ച ഫർണിച്ചറുകളും മറ്റും സൂക്ഷിച്ചിരുന്ന ഷെഡും വ്യാഴാഴ്ച പുലർച്ചെയുണ്ടായ കാറ്റിൽ സമീപത്തെ പുളിമരം വീണ് പൂർണമായി നശിച്ചു. നിർമിക്കാൻ വച്ചിരുന്ന തടികൾ അടക്കം ഉപയോഗശൂന്യമായി. ഏകദേശം മൂന്നുലക്ഷം രൂപയുടെ നഷ്ടം കണക്കാക്കുന്നതായി മുരളി അറിയിച്ചു. വീണ രണ്ടു വൃക്ഷങ്ങളും ഒരേ പുരയിടത്തിൽനിന്നുള്ളതാണ്. സണ്ണിയുടെ വീടിന്‍റെ അടുക്കള പൂർണമായും തകർന്നു. അഞ്ചാം വാർഡിൽ പടിഞ്ഞാറേപ്പറമ്പിൽ സണ്ണിയുടെ വീടിന്‍റെ മുകളിലേക്ക് പുളിമരം കടപുഴകി വീണ് അടുക്കള പൂർണമായും തകർന്നു. മുൻവശത്തെ ഹാളിന്‍റെ ഷീറ്റും സമീപത്തെ ഷെഡും നശിച്ചു. അപകടസമയത്ത് സണ്ണിയുടെ ഭാര്യ റീന അടുക്കളയിൽ പാചകം ചെയ്യുകയായിരുന്നു. ശബ്ദം കേട്ട് പുറത്തേക്ക് ഓടിയതുകൊണ്ട് പരിക്കേൽക്കാതെ രക്ഷപ്പെട്ടു. പ്രദേശത്തെ വൈദ്യുതി ബന്ധം താറുമാറായി. കല്ലിശേരി സെക‌്ഷന്‍റെ പരിധിയിൽ ഏകദേശം 45 ഓളം സ്ഥലങ്ങളിൽ വൈദ്യുതി ലൈനുകളിലേക്ക് മരങ്ങൾ കടപുഴകി വീഴുകയും 15 വൈദ്യുതി പോസ്റ്റുകൾ തകരുകയും ചെയ്തു. ഇപ്പോഴും പല ഭാഗങ്ങളിലും വൈദ്യുതി ബന്ധം പുനഃസ്ഥാപിച്ചിട്ടില്ല. വൈദ്യുതി എത്രയും പെട്ടെന്ന് പുനഃസ്ഥാപിക്കാുള്ള യുദ്ധകാലാടിസ്ഥാനത്തിലുള്ള ക്രമീകരണങ്ങൾ പുരോഗമിക്കുന്നതായി കെഎസ്ഇബി അറിയിച്ചു. കാറ്റിൽ വീണ മരങ്ങൾ മുറിച്ചു മാറ്റുന്നതിനായി എത്തുന്ന സംഘങ്ങൾ വീട്ടുടമസ്ഥരിൽനിന്ന് 8,000 രൂപ മുതൽ 10,000 രൂപ വരെ ഈടാക്കുന്നതായി വ്യാപകമായ പരാതി ഉയർന്നിട്ടുണ്ട്. ദുരന്തം മുതലെടുത്ത് ഇവർ പണം കൊയ്യുകയാണെന്നും സാധാരണക്കാർക്ക് ഇത് താങ്ങാവുന്നതിലും അപ്പുറമാണെന്നും നാട്ടുകാർ പറയുന്നു. മരം മുറിക്കൽ കെഎസ്ഇബിയുടെ നിയന്ത്രണത്തിൽ നടത്തണമെന്ന് നാട്ടുകാർ ആവശ്യപ്പെട്ടു.

മാവേലിക്കരയിലെ കുട്ടികളുടെ മുനിസിപ്പൽ പാര്‍ക്ക് മാലിന്യക്കൂമ്പാരം

മാവേലിക്കര: ഏറ്റവും ശുചിത്വമുള്ളതായി സൂക്ഷിക്കേണ്ടുന്ന കുട്ടികളുടെ പാര്‍ക്കു പോലും മാലിന്യക്കൂമ്പാരമാകുന്ന കാഴ്ച മാവേലിക്കരയില്‍ മാത്രമാകും കാണാനാകുക. ദേശാഭിമാനി ടി.കെ. മാധവന്‍റെ പേരിലുള്ളതാണ് നഗരസഭയുടെ ഈ കളിസ്ഥലം. അവധിദിവസങ്ങളില്‍ നഗരത്തിലെയും സമീപ പഞ്ചായത്തുകളിലേയും നൂറുകണക്കിന് കുട്ടികളാണ് ഉല്ലാസത്തിനായി എത്തിച്ചേരുക.

എന്നാല്‍, ഇന്ന് പാര്‍ക്ക് കവാടത്തിനരികില്‍ എത്തുമ്പോഴേക്കും മൂക്കുപൊത്തി അകത്തേക്ക് പ്രവേശിക്കേണ്ട അവസ്ഥയാണ് സംജാതമായിരിക്കുന്നത്. കഴിഞ്ഞ നഗരസഭ ഭരണസമിതിയുടെ നേതൃത്വത്തില്‍ ലക്ഷങ്ങള്‍ ചെലവഴിച്ച് നവീകരിച്ച പാര്‍ക്കില്‍ കുട്ടികളുടെ കളികോപ്പുകള്‍ക്കു പുറമേ മാവേലിക്കരയിലെ മണ്‍മറഞ്ഞ പ്രശസ്തരുടെ സ്മാരകങ്ങളും സ്ഥിതി ചെയ്യുന്നുണ്ട്. കൂടാതെ ഇവിടെ പൊതു പരിപാടികള്‍ നടത്താനുള്ള ഒരു ഓപ്പണ്‍ എയര്‍ ഓഡിറ്റോറിയവുമുണ്ട്. മാലിന്യങ്ങളുടെ നിക്ഷേപ കേന്ദ്രം നിലവില്‍ പാര്‍ക്കിലെ കളിയുപകരണങ്ങള്‍ സ്ഥാപിച്ചിരിക്കുന്നതിന് പതിനഞ്ച് മീറ്ററിനുള്ളില്‍വരെ മാലിന്യക്കൂമ്പാരമാണ്. നഗരസഭയിലെ ശുചീകരണ വിഭാഗം ജീവനക്കാര്‍ പൊതു സ്ഥലങ്ങളില്‍നിന്ന് ശേഖരിക്കുന്ന മാലിന്യമാണ് മുനിസിപ്പല്‍ പാര്‍ക്കിനുള്ളില്‍ നിക്ഷേപിച്ചുകൊണ്ടിരിക്കുന്നത്. പാര്‍ക്കില്‍ പകല്‍പോലും കൊതുകുശല്യം രൂക്ഷമാണെന്നും പരാതിയുണ്ട്. കൂടാതെ മാലിന്യങ്ങള്‍ ചീഞ്ഞനാറ്റവും സഹിച്ചുവേണം പാര്‍ക്കിലിരിക്കാന്‍. ഇഴജന്തുക്കളുടെ വിഹാരം മുനിസിപ്പാലിറ്റിയുടെ പാര്‍ക്കിനുള്ളിലായി സ്ഥിതി ചെയ്യുന്ന പോസ്റ്റ് ഓഫീസ് പ്രവര്‍ത്തിച്ചുവന്ന കെട്ടിടവും കാടുകയറിയ നിലയി ലാണ്. മാലിന്യശേഖരണത്തിനായി മുന്‍പ് നഗരസഭ ഉപയോഗിച്ചിരുന്ന വാഹനങ്ങളും കുന്നുകൂടി കിടക്കുന്നു. ഇവിടെ ഇഴജന്തുക്കളുടെ ശല്യവും രൂക്ഷമാണെന്ന് ആക്ഷേപമുണ്ട്. കുട്ടികള്‍ കളിക്കുന്ന ഇടമായതിനാല്‍ തന്നെ വലിയ ആശങ്കയാണ് ഇതുയര്‍ത്തുന്നത്. നിരവധി പദ്ധതികള്‍, ഒന്നും വിജയിച്ചില്ല മുന്‍ ഭരണസമിതികളുടെ കാലഘട്ടത്തില്‍ മാലിന്യം ഒഴിഞ്ഞ സ്വകാര്യ പറമ്പുകളിലും മറ്റും നിക്ഷേപിച്ചിരുന്നു. അതു നടക്കാതെയായതോടെ പുതിയകാവ് ചന്തയുടെ പിന്‍ഭാഗം മാലിന്യ ഡമ്പിംഗ് യാര്‍ഡാക്കുകയായിരുന്നു നഗരസഭ. അവിടെ മാലിന്യപ്രശ്‌നം രൂക്ഷമായതോടെ ജനങ്ങള്‍ തെരുവിലിറങ്ങിയതിനെത്തുടര്‍ന്ന് കഴിഞ്ഞ എല്‍ഡിഎഫ് ഭരണസമിതിയുടെ കാലഘട്ടത്തില്‍ തുംകൂര്‍മോഴി പദ്ധതി ഉള്‍പ്പടെയുള്ളവ നടപ്പാക്കുകയും ഒരു പരിധിവരെ മാലിന്യസംസ്‌കരണം നടന്നിരുന്നു. ഇത് പൂര്‍ണമായും നിലച്ചതോടെയാണ് മുനിസിപ്പല്‍ പാര്‍ക്കിന് ഈ ദുര്‍വിധി ഉണ്ടായത്. വിനോദത്തിനായി മറ്റൊരു സംവിധാനവും നിലവിലില്ലാത്ത നഗരസഭയില്‍ സാധാരണ ജനങ്ങള്‍ക്ക് കുടുംബമായി ഒഴിവുസമയങ്ങള്‍ ചെലവഴിക്കാനുള്ള ഏക സ്ഥലമാണ് ടി.കെ. മാധവന്‍ സ്മാരക മുനിസിപ്പല്‍ പാര്‍ക്ക്. പരിമിതമായ സൗകര്യങ്ങളെ പാര്‍ക്കിലുള്ളു വെങ്കില്‍ പോലും അവധി സമയങ്ങളിൽ വലിയ തിരക്കായിരുന്നു. ഇതിലൂടെ നഗരസഭയ്ക്ക് ടിക്കറ്റ് ഇനത്തില്‍ ചെറിയൊരു വരുമാനവും ലഭിച്ചിരുന്നു. എന്നാല്‍, ദുരിതം പേറി മാത്രമേ ഇന്നു പാര്‍ക്കിലേക്ക് സമയം ചെലവഴിക്കാനായി പോകാന്‍ സാധിക്കു എന്ന അവസ്ഥയിലാണ് മാവേലിക്കര നിവാസികൾക്ക്.

ആറാട്ടുപുഴയിൽ കടലാക്രമണം രൂക്ഷം; പെരുമ്പള്ളിയിൽ വീട് തകർന്നു

ഹരിപ്പാട്: കടലാക്രമണം രൂക്ഷമായതോടെ തീരവാസികളുടെ ജീവിതം വീണ്ടും ദുഃസഹമായി. കടലാക്രമണത്തിൽ പെരുമ്പള്ളിയിൽ വീട് തകർന്നു. തീരസംരക്ഷണം ആവശ്യപ്പെട്ട് പ്രദേശവാസികൾ നാലു മണിക്കൂറോളം റോഡ് ഉപരോധിച്ചു. പ്രക്ഷുബ്ധമായ കടൽ ഭീതിവിതയ്ക്കുകയാണ്. ആറാട്ടുപുഴ പഞ്ചായത്തിലെ വലിയഴീക്കൽ പെരുമ്പള്ളി, കാർത്തിക ജംഗ്ഷൻ എന്നിവിടങ്ങളിൽ കടലാക്രമണം ദുരിതംവിതച്ചു. പെരുമ്പള്ളി പറത്തറയിൽ കുഞ്ഞുമോന്‍റെ വീട് തകർന്നു. പിൻഭാഗത്തെ ഭിത്തി ഭാഗികമായി കടലെടുത്തു. അടിത്തറയുടെ അടിയിൽനിന്നും മണ്ണ് നഷ്ടപ്പെട്ടു. ഏതു നിമിഷവും വീട് നിലം പതിക്കാവുന്ന അവസ്ഥയിലാണ്. വീട്ടിലെ സാധനസാമഗ്രികൾ തൊട്ടടുത്ത വീടുകളിലേക്ക് നീക്കി. ഭീഷണി ശക്തമായ സാഹചര്യത്തിൽ പതിനായിരങ്ങൾ മുടക്കി മണൽ ചാക്ക് അടുക്കിവച്ച് വീട് സംരക്ഷിക്കാനുള്ള അവസാന ശ്രമം ഫലം കണ്ടില്ല. ഇവിടെ കൊച്ചുവീട്ടിൽ രതീഷിന്‍റെ വീട് അപകടഭീഷണിയിലാണ്. തീരസംരക്ഷണം ആവശ്യപ്പെട്ട് പ്രദേശവാസികൾ തൃക്കുന്നപ്പുഴ-വലിയഴിക്കൽ തീരദേശ റോഡ് ഉപരോധിച്ചു. സ്ത്രീകളും കുട്ടികളുമടക്കം നൂറിലധികം പേർ പ്രതിഷേധത്തിൽ പങ്കെടുത്തു. തൃക്കുന്നപ്പുഴ പോലീസ് എത്തിയെങ്കിലും സമരക്കാർ പിന്മാറിയില്ല. കാർത്തികപ്പള്ളി താലൂക്ക് ഡെപ്യൂട്ടി താഹസിൽദാർമാരായ ടി. സിന്ധുമോൾ, അമോദ് എം. ദാസ്, അസി. വില്ലേജ് ഓഫീസർ ബി. ഗിരീഷ് കുമാർ എന്നിവർ സംഭവസ്ഥലത്ത് എത്തി സമരക്കാരുമായി ചർച്ച നടത്തി. അപകടഭീഷണിയുള്ള വീടുകൾ ജിയോ ബാഗ് അടുക്കി താത്കാലിക സംരക്ഷണം ഏർപ്പെടുത്തുന്നതിന് 20 ലോഡ് മണൽ എത്തിക്കുമെന്ന് ഉറപ്പുനൽകി. തിങ്കളാഴ്ച ഉച്ചയ്ക്ക് കളക്ടറേറ്റിൽ ഇറിഗേഷൻ വകുപ്പ് ഇദ്യോഗസ്ഥരും നാട്ടുകാരുടെ പ്രതിനിധിയുമായി ചർച്ച നടത്തുമെന്നും റവന്യു അധികൃതർ സമരക്കാർക്ക് ഉറപ്പുനൽകി. തുടർന്ന് ഏഴരയോടെ റോഡ് ഉപരോധം അവസാനിപ്പിച്ചു. ബസുകൾ അടക്കം നിരവധി വാഹനങ്ങൾ ഉപരോധം മൂലം റോഡിൽ കുടുങ്ങിയത് യാത്രക്കാരെ ദുരിതത്തിലാക്കി.

കുട്ടനാട്ടിൽ ജലനിരപ്പ് അപകടനിലയില്‍

എടത്വ: കുട്ടനാട്ടിലെ ജലനിരപ്പ് അപകടനിലയിലേക്ക്. ഇടറോഡുകളില്‍ വെള്ളം ഉയര്‍ന്നതിനാല്‍ കെഎസ്ആര്‍ടിസി സര്‍വീസ് നിര്‍ത്തി. അമ്പലപ്പുഴ-തിരുവല്ല സംസ്ഥാനപാതയിലും വെള്ളം കയറി. സംസ്ഥാനപാതയില്‍ നെടുമ്പ്രം ഭാഗത്താണ് വെള്ളം കയറിയത്. ഈ റൂട്ടിലൂടെയുള്ള കെഎസ്ആര്‍ടിസി സര്‍വീസ് നിര്‍ത്തിവച്ചിട്ടില്ല. നീരേറ്റുപുറം-മുട്ടാര്‍-കിടങ്ങറ, മിത്രക്കരി-മുട്ടാര്‍, എടത്വ-കളങ്ങര-വേഴപ്ര, എടത്വ-തായങ്കരി-കൊടുപ്പുന്ന, കിടങ്ങ റ-കണ്ണാടി എന്നീ റോഡുകളിലെ കെഎസ്ആര്‍ടിസി സര്‍വീസ് നിര്‍ത്തിവച്ചു. പെരുമഴ പെയ്ത്തിന് ശമനമില്ലാത്തതിനെത്തുടര്‍ന്ന് കുട്ടനാട്-അപ്പര്‍കുട്ടനാട് മേഖലകള്‍ വെള്ളത്തില്‍ മുങ്ങുകയാണ്. പ്രധാന നദികളിലെ ജലനിരപ്പ് അപകടനിലയില്‍ എത്തിയതോടെ അലര്‍ട്ട് പ്രഖ്യാപിച്ചിട്ടുണ്ട്. ബംഗാള്‍ ഉള്‍ക്കടലില്‍ രൂപംകൊണ്ട ന്യൂനമര്‍ദത്തിന്‍റെ സ്വാധീനത്തില്‍ സംസ്ഥാനത്ത് ഒട്ടാകെ പെയ്യുന്ന മഴയും ശക്തമായ കാറ്റും കുട്ടനാട് -അപ്പര്‍കുട്ടനാട് മേഖലയിലെ താമസക്കാരെ ഏറെ ദുരിതത്തിലാക്കിയിട്ടുണ്ട്. ഒരുമാസത്തിനുള്ളില്‍ നാലു തവണയാണ് കുട്ടനാട്ടില്‍ ജലനിരപ്പുയര്‍ന്നത്. ദിവസങ്ങളായി പെയ്യുന്ന മഴയും കിഴക്കന്‍വെള്ളത്തിന്‍റെ വരവും വര്‍ധിച്ചതോടെ വീണ്ടും പ്രതിസന്ധി നേരിടുകയാണ്. കുട്ടനാട്ടിലെ ഒട്ടുമിക്ക പ്രദേശങ്ങളും ഇതിനോടകം മുങ്ങി. ജില്ലയുടെ കിഴക്കന്‍ മേഖലയില്‍ മഴ തുടരുന്നതിനാല്‍ വെള്ളത്തിന്‍റെ വരവും നിലച്ചിട്ടില്ല. സംഭരണശേഷിക്ക് അതീതമായി ഒഴുകിയെത്തുന്ന ജലവും മഴവെള്ളവും കെട്ടിക്കിടന്ന് ജലനിരപ്പ് അടിക്കടി ഉയര്‍ന്നുകൊണ്ടിരിക്കുകയാണ്. മുട്ടാര്‍, തലവടി, നിരണം, വീയപുരം, എടത്വ, തകഴി, ചെറുതന, പള്ളിപ്പാട്, ചന്പക്കുളം, പുളി ങ്കുന്ന്, കാവാലം, നീലം പേരൂർ പഞ്ചായത്തുകളിലെ താഴ്ന്ന പ്രദേശങ്ങള്‍ വെള്ളത്തില്‍ മുങ്ങി. തലവടി, മുട്ടാര്‍ പഞ്ചായത്തില്‍ ജനജീവിതം കടുത്ത ദുരിതത്തില്‍ എത്തിയിട്ടുണ്ട്. തലവടിയില്‍ നിരവധി വീടുകള്‍ ഇതിനോടകം വെള്ളത്തില്‍ മുങ്ങുകയും വീട്ടുകാര്‍ താമസം മാറുകയും ചെയ്തിട്ടുണ്ട്. ക്ഷീരകര്‍ഷകരാണ് കടുത്ത യാതന അനുഭവിക്കുന്നത്. തൊഴുത്തുകളില്‍ വെള്ളം കയറാന്‍ തുടങ്ങിയതോടെ പൊക്കപ്രദേശങ്ങളിലേക്ക് പശുക്കളെ മാറ്റിയിട്ടുണ്ട്. മറ്റ് വളര്‍ത്തു മൃഗങ്ങളുടെ അവസ്ഥയും വ്യത്യസ്തമല്ല. തലവടി കുതിരച്ചാല്‍ -കുന്നുമ്മാടി പ്രദേശങ്ങളില്‍ 50 ഓളം താമസക്കാര്‍ പ്രതിസന്ധിയിലാണ്. പമ്പയും അച്ചന്‍കോവിലും കരകവിഞ്ഞാല്‍ ആദ്യം വെള്ളം എത്തുന്ന പ്രദേശമായി മാറിയിട്ടുണ്ട്. മുട്ടാര്‍ പഞ്ചാത്തിലും സമാനഅവസ്ഥയാണ് നിലനില്‍ക്കുന്നത്. കുട്ടനാട്ടിലെ സര്‍വീസ് റോഡുകളില്‍ ആദ്യം മുങ്ങുന്ന മുട്ടാര്‍ പ്രദേശത്തെ ജനജീവിതം കടുത്ത ദുരിതത്തില്‍ എത്തിയിട്ടുണ്ട്. വെള്ളം ഉയരുന്നതോടെ എസി റോഡിലോ അമ്പലപ്പുഴ-തിരുവല്ല സംസ്ഥാന പാതയിലോ എത്താന്‍ കഴിയാത്ത അവസ്ഥയാണ്. റോഡില്‍ വെള്ളം ഉയരുന്നതോടെ നിത്യോപയോഗ സാധനങ്ങളും പ്രദേശത്ത് എത്തുകയില്ല. മഴ ശക്തി പ്രാപിച്ചാല്‍ വെള്ളപ്പൊക്കത്തിന് മുന്‍പേ മുട്ടാറ്റിലെ താമസക്കാര്‍ വീടുവിട്ടു പോകുന്ന കാഴ്ചയാണ്. മറ്റ് പഞ്ചായത്തിലും സമാന അവസ്ഥ നിലനില്‍ക്കുന്നുണ്ട്. ഉള്‍പ്രദേശങ്ങളിലെ താമസക്കാരും നദീതീരങ്ങളിലെയും പാടശേഖര പുറംബണ്ടുകളിലെ താമസക്കാരും കടുത്ത ദുരിതം അനുഭവിക്കുകയാണ്.

കലാ കൊലപാതകം: എങ്ങുമെത്താതെ അന്വേഷണം

മാന്നാർ: 15 വർഷം മുൻപ് കാണാതായ കല കൊല്ലപ്പെട്ടതാണെന്ന് തെളിഞ്ഞത് കഴിഞ്ഞവർഷം ജൂലൈയിലാണ്. കൊലപാതകം സംബന്ധിച്ച അന്വേഷണത്തിൽ പോലീസ് ഇരുട്ടിൽ തപ്പുകയാണ്. കഴിഞ്ഞവർഷം ജൂലൈയിലെ ഒരു പ്രഭാതത്തിൽ ചെന്നിത്തല ഗ്രാമം ഉണർന്നത് ഞെട്ടിക്കുന്ന കൊലപാതകവാർത്ത കേട്ടാണ്. എങ്ങും പോലീസിന്‍റെ സന്നാഹങ്ങൾ. 15 വർഷം മുൻപ് ചെന്നിത്തലയിൽ ഒരു യുവതിയുടെ തിരോധാനം നടന്നിരുന്നു. ഇത് കൊലപാതകമായിരുന്നുവെന്ന വാർത്തയാണ് ഗ്രാമത്തെ വിളിച്ചുണർത്തിയത്. ചെന്നിത്തല ഇരമത്തൂർ പായിക്കാട്ട് മീനത്തേതിൽ കലയെ ഭർത്താവ് ചെന്നിത്തല കണ്ണംപള്ളിൽ അനിൽകുമാർ കൊലപ്പെടുത്തി സെപ്റ്റിക് ടാങ്കിൽ മൂടിയെന്ന വാർത്തയാണ് പരന്നത്. അനിൽകുമാർ വിദേശത്തായിരുന്ന സമയത്ത് കല മറ്റൊരാളുമായി അടുപ്പത്തിലാകുകയും ഇവർ അയാളോടൊപ്പം നാടുവിട്ടു പോയതായിട്ടുമാണ് അന്ന് നാട്ടിൽ പരന്ന കഥ. നാട്ടുകാർ അത് വിശ്വസിക്കുകയും അനിൽ പിന്നീട് വേറെ വിവാഹം കഴിക്കുകയും ചെയ്തു. തുടർന്ന് വിദേശത്ത് ജോലിക്കായി പോയി. കലയെ എല്ലാവരും മറക്കുകയും ചെയ്തു. ഈ അവസരത്തിലാണ് കഴിഞ്ഞ വർഷം ജൂലൈയിൽ പോലീസ് പുതിയ അന്വേഷണവുമായി എത്തിയത്. കാണാതായ കലയെ 15 വർഷത്തിനു മുമ്പ് കൊലപ്പെടുത്തി സെപ്റ്റിക് ടാങ്കിൽ തള്ളിയിട്ടതായിട്ടാണ് പോലീസ് കണ്ടെത്തിയത്. സംഭവറിഞ്ഞ് നൂറുകണക്കിന് നാട്ടുകാർ അനിലിന്‍റെ വീട്ടിലേക്ക് ഒഴുകിയെത്തി. ഉയർന്ന പോലീസ് ഉദ്യോഗസ്ഥരുടെ സാന്നിധ്യത്തിൽ ടാങ്ക് പൊളിച്ച് മൃതദേഹാവശിഷ്ടങ്ങൾ കണ്ടെത്താൻ പരിശോധന നടത്തി. തെളിവുകൾ തേടി പോലീസ് മാന്നാറിലെ കൊലപാതകത്തിൽ തെളിവുകൾ ശേഖരിക്കുന്നതിന് പോലീസിന് ഏറെ വെല്ലുവിളി നേരിടേണ്ടിവന്നു. 15 വർഷം മുമ്പ് കാണാതായ കലയെ കൊലപ്പെടുത്തി സെപ്റ്റിക് ടാങ്കിൽ കുഴിച്ചുമൂടി എന്ന പ്രതികളുടെ മൊഴിയുടെ അടിസ്ഥാനത്തിൽ നടത്തിയ പരിശോധനയിൽ സെപ്റ്റിക് ടാങ്കിൽനിന്ന് ഒരു ലോക്കറ്റും അസ്ഥിഎന്നു കരുതാവുന്ന ചെറിയ കഷണങ്ങളും മുടിനാരിഴയും തലയിലിടുന്ന ക്ലിപ്പും അടിവസ്ത്രത്തിന്‍റെ ഇലാസ്റ്റിക്കുമാണ് ലഭിച്ചത്. ഇവയുടെ ശാസ്ത്രീയ പരിശോധനയ്ക്കായി തിരുവനന്തപുരത്തെ ഫോറൻസിക് ലാബിന് കൈമാറി. മനുഷ്യശരീരത്തിന്‍റെ ഏതെങ്കിലും ഭാഗമോ മറ്റോ ആണോയെന്നത് മാത്രമായിരുന്നു പോലീസിനുവേണ്ടിയിരുന്നത്. അസ്ഥിക്കഷണങ്ങളെന്ന് സംശയിക്കുന്നവയിൽനിന്നോ മുടിനാരിഴയിൽനിന്നോ ഡിഎൻഎ സാമ്പിളുകൾ ലഭിച്ചാൽ മാത്രമേ മൃതദേഹാവശിഷ്ടം കലയുടേതാണെന്ന് തിരിച്ചറിയാൻ സാധിക്കുകയുള്ളൂ. അസ്ഥികളിൽ മജ്ജയുടെ അംശം ഒട്ടുമില്ലെങ്കിൽ ഡിഎൻഎ ശേഖരണം ബുദ്ധിമുട്ടാകുമെന്നും തലയോട്ടിയുൾപ്പെടെ കിട്ടാത്തതിനാൽ മരണകാരണമായ പരിക്കുകളോ ആഘാതമോ തിരിച്ചറിയാനും പ്രയാസമാണന്നും അന്നേ പറഞ്ഞിരുന്നു. സെപ്റ്റിക് ടാങ്കിൽ അമിത അളവിൽ വീര്യം കൂടിയ രാസവസ്തു ഉപയോഗിച്ചതിന്‍റെ ലക്ഷണങ്ങൾ ഉണ്ടായിരുന്നുവെന്ന് ടാങ്ക് തുറന്നു പരിശോധിക്കാൻ പോലീസിനെ സഹായിച്ച തിരുവല്ല സ്വദേശിയായ സോമൻ പറഞ്ഞിരുന്നു. എന്നാൽ, ഫോറൻസിക് ലാബ് പരിശോധനാ ഫലത്തിൽ ഒന്നും കണ്ടത്താൻ കഴിഞ്ഞില്ല. കേസിൽ സാഹചര്യത്തെളിവുകളാണ് പോലീസിന് ആകെയുണ്ടായിരുന്ന പിടിവള്ളി. ഭർത്താവ് അനിലിന്‍റെ മൊഴിയും നിർണായകമാണ്. ഇയാൾ കുറ്റസമ്മതം നടത്തിയാൽ കാര്യങ്ങൾ എളുപ്പമാകും. അനിലിനെ ഇന്‍റർപോളിന്‍റെ സഹായത്തോടെ നാട്ടിലെത്തിച്ചാൽ മാത്രമേ ഇത് സാധ്യമാകൂകയുള്ളു. ഒരുവർഷം കഴിഞ്ഞിട്ടും നാട്ടിൽ കൊണ്ടുവരാൻ സാധിച്ചുമില്ല. 2008-2009 കാലയളവിലാണ് ഇവരെ കാണാതായതായി പ്രചരിച്ചത്. ഊമക്കത്തിൽ അന്വേഷണം 15 വർഷം മുൻപ് യുവതിയെ കൊന്ന് സെപ്റ്റിക് ടാങ്കിൽ മൂടിയ സംഭവത്തിന് വഴിത്തിരിവായത് ഒരു ഊമക്കത്ത്. അമ്പലപ്പുഴ പോലീസിനാണ് ഊമക്കത്ത് ലഭിക്കുന്നത്. 15 വർഷം മുൻപ് ചെന്നിത്തലയിൽനിന്നു മുങ്ങിയതായി പറയപ്പെടുന്ന കലയെ കൊലപ്പെടുത്തിയതാണന്നും മൃതദേഹം ഭർത്താവിന്‍റെ വീടിനോട് ചേർന്നുള്ള സെപ്റ്റിക് ടാങ്കിൽ കുഴിച്ചിട്ടെന്നുമായിരുന്നു ഊമക്കത്തിന്‍റെ ഉള്ളടക്കം. കൂടാതെ കത്തിൽ ഒരു കാര്യം കൂടി സൂചിപ്പിച്ചിരുന്നു. മറ്റൊരു കേസിൽ അമ്പലപ്പുഴ പോലീസ് കസ്റ്റഡിയിലെടുത്ത് റിമാൻഡിലുള്ള ചെന്നിത്തല ഇരമത്തൂർ കണ്ണമ്പള്ളി ഭാഗം പ്രമോദിന് സംഭവത്തിൽ പങ്കുണ്ടെന്നും സൂചിപ്പിച്ചിരുന്നു. ഈ ഊമക്കത്ത് ആലപ്പുഴ പോലീസ് മേധാവിക്ക് കൈമാറുകയും തുടർന്ന് അന്വേഷത്തിന് അമ്പലപ്പുഴ പോലീസിന് നിർദേശം നൽകുകയുമായിരുന്നു. പ്രമോദിനെ അമ്പലപ്പുഴ പോലീസ് കസ്റ്റഡിയിൽ വാങ്ങി ചോദ്യം ചെയ്തപ്പോഴാണ് ഊമക്കത്തിലെ വിവരങ്ങൾ ശരിയാണെന്ന് പോലീസിനു മനസിലായത്. തുടർന്ന് അമ്പലപ്പുഴ സ്റ്റേഷനിൽ കേസ് രജിസ്റ്റർ ചെയ്ത് അന്വേഷണം നടത്തുകയായിരുന്നു. ഓരാഴ്ചയോളം ഇരമത്തൂരിലും പരിസര പ്രദേശങ്ങളിലും അമ്പലപ്പുഴ പോലീസ് രഹസ്യമായ അന്വേഷണം നടത്തി. പ്രദേശത്തെ ജനപ്രതിനിധികളുമായും മറ്റും വിവരങ്ങൾ ചോദിച്ചറിയകയും ചെയ്തിരുന്നു. മാന്നാർ പോലീസിനെ പോലും അറിയിക്കാതെയായിരുന്നു രഹസ്യ അന്വേഷണം. ഇതിനൊടുവിലാണ് മറ്റ്പ്രതികളെ കൂടി വലയിലാക്കി അറസ്റ്റ് ചെയ്തത്. നാലുപേർ അറസ്റ്റിൽ ഊമക്കത്തിന്‍റെ അടിസ്ഥാനത്തിൽ അന്വേഷണം നടത്തിയ പോലീസ് നിരവധി പേരെ കസ്റ്റഡിയിലെടുത്തു. ഇതിൽ കൊലപാതകത്തിൽ പങ്കുണ്ടെന്നു കരുതുന്ന കലയുടെ ഭർത്താവ് അനിലിന്‍റെ ബന്ധുക്കളും സുഹൃത്തുക്കളുമായ ചെന്നിത്തല ഇരമത്തൂർ കണ്ണമ്പള്ളിൽ ജിനു ഗോപി (48), കണ്ണമ്പള്ളിൽ സോമരാജൻ (55), കണ്ണമ്പള്ളിൽ പ്രമോദ് (45), സുരേഷ് എന്നിവരെ ചോദ്യം ചെയ്തതിലാണ് മൃതദേഹം സെപ്റ്റിക് ടാങ്കിൽ കുഴിച്ചുമൂടിയതായി പറഞ്ഞത്. ഇതിൽ സുരേഷിനെ മാപ്പ് സാക്ഷിയാക്കുകയും മറ്റ് മൂന്നു പേരെ അറസ്റ്റ് ചെയ്ത് റിമാൻഡിൽ വിടുകയും ചെയ്തു. ഇവർ ഇപ്പോൾ ജാമ്യത്തിലാണ്. കേസിൽ കലയുടെ ഭർത്താവ് അനിലാണ് ഒന്നാം പ്രതി. ജിനു, സോമൻ, പ്രമോദ് എന്നിവരാണ് യഥാക്രമം രണ്ട്, മൂന്ന്, നാല് പ്രതികൾ. കലയെ കൊലപ്പെടുത്തിയതായി അനില്‍കുമാര്‍ അറിയിച്ചതായി മുഖ്യസാക്ഷി സുരേഷ് പറഞ്ഞിരുന്നു. അനില്‍ വിളിച്ചതനുസരിച്ചു വലിയപെരുമ്പഴ പാലത്തില്‍ എത്തിയെന്നും പാലത്തില്‍ പാര്‍ക്ക് ചെയ്തിരുന്ന കാറില്‍ കലയുടെ മൃതദേഹം കണ്ടുവെന്നും ഇവർ പറഞ്ഞിരുന്നു. അബദ്ധം പറ്റിയതായും കല കൊല്ലപ്പെട്ടതായും മറവുചെയ്യാന്‍ സഹയിക്കണമെന്നും അനിൽ പറഞ്ഞുവത്രേ. അന്നത്തെ ജില്ലാ പോലീസ് മേധാവി ചൈത്ര തെരേസ ജോൺ നേരിട്ടാണ് കേസ് അന്വേഷിച്ചത്. കേസന്വേഷണത്തിനായി 21 അംഗ പോലീസ് സംഘത്തെ നിയോഗിക്കുകയും ചെയ്തു. മൃതദേഹം കണ്ടതായി പറയപ്പെടുന്ന മാരുതി കാർ പോലീസ് കസ്റ്റഡിയിൽ എടുത്തിരുന്നു. സംഭവം നടക്കുമ്പോൾ അനിൽ വാടകയ്ക്കെടുത്തതായിരുന്നു കാർ. കൊല്ലത്തുനിന്നാണ് കാർ കസ്റ്റഡിയിലെടുത്തത്. കലയും അനിലും എവിടെ? കൊന്നു കുഴിച്ചുമൂടിയെന്ന് കരുതുന്ന കലയുടെ മൃതദേഹാവശിഷ്ടം കണ്ടെത്താനാകാഞ്ഞത് തുടരന്വേഷണത്തെ ബാധിച്ചു. സെപ്റ്റിക് ടാങ്കിൽനിന്ന് മൃതദേഹം അനിൽ മറ്റെവിടെയെങ്കിലും മാറ്റിക്കാണുമെന്നാണ് പോലീസ് നിഗമനം. അതേക്കുറിച്ച് പോലീസ് അറസ്റ്റ് ചെയ്ത പ്രതികൾക്ക് അറിവില്ല. കൊലപാതകം സംബന്ധിച്ചും മറവ് ചെയ്തതും അറിയാവുന്നത് ഭർത്താവ് അനിലിനാണ്. അനിൽ ഇസ്രയേലിലാണ് ജോലി ചെയ്യുന്നത്. ഇയാളെ നാട്ടിൽ വരുത്താൻ പോലീസ് ശ്രമങ്ങൾ നടത്തിയിരുന്നുവെങ്കിലും ഒരു വർഷമായിട്ടും നടന്നില്ല. ഇപ്പോൾ പോലീസ് കല കൊലപാതകം മറന്നമട്ടാണ്. ഡൊമിനിക് ജോസഫ്

കിണർ ഇടിഞ്ഞുതാഴ്ന്നു

ചാരുംമൂട്: കഴിഞ്ഞദിവസത്തെ ശക്തമായ മഴയിൽ കിണർ ഇടിഞ്ഞുതാഴ്ന്നു. വള്ളികുന്നം ഏഴാം വാർഡിൽ കാഞ്ഞിരത്തുംമൂട് ശ്രീവത്സത്തിൽ ഷൺമുഖന്‍റെ വീട്ടിലെ കിണറാണ് വലിയ ശബ്ദത്തോടെ ഇടിഞ്ഞുതാഴ്ന്നത്. കഴിഞ്ഞദിവസം പുലർച്ചെ നാലോടെയായിരുന്നു സംഭവം. ശബ്ദം കേട്ട് വീട്ടുകാർ പുറത്തിറങ്ങിയപ്പോഴാണ് കിണർ സമനിരപ്പിൽനിന്നു പത്തടിയോളം താഴ്ച്ചയിലേക്ക് ഇടിഞ്ഞു താഴ്ന്നതായി കണ്ടത്. വെള്ളം എടുക്കാൻ ഉപയോഗിക്കുന്ന മോട്ടോർ സഹിതമാണ് താഴ്ന്നുപോയത്. കിണറിന് മുപ്പതുവർഷത്തോളം പഴക്കമുണ്ട്.

റെയിൽവേ സ്റ്റേഷനിൽ യാത്രക്കാരന് പാമ്പുകടിയേറ്റു

ചേർത്തല: യാത്രക്കാരനായ യുവാവിന് ചേർത്തല റെയിൽവേസ്റ്റേഷനിൽനിന്ന് പാമ്പു കടിയേറ്റു. ഇന്നലെ പുലർച്ചെ മൂന്നോടെ ഗുരുവായൂർ എക്സപ്രസിൽ കയറുന്നതിനിടെയാണ് സംഭവം. നഗരസഭ 23-ാം വാർഡ് ഉത്രാടം ഹൗസിൽ ജയകുമാറിന്‍റെ മകൻ ജയരാജ് (26)നാണ് കടിയേറ്റത്. ഉടൻതന്നെ യാത്ര ഒഴിവാക്കി ഒപ്പമുണ്ടായിരുന്ന സുഹൃത്തുക്കൾ ചേര്‍ത്തല താലൂക്ക് ആശുപത്രിയിലും തുടർന്ന് ആലപ്പുഴ മെഡിക്കൽ കോളജ് ആശുപത്രിയിലും എത്തിച്ചു. ഇപ്പോള്‍ തീവ്രപരിചരണ വിഭാഗത്തിൽ ചികിത്സയിലാണ്. ജയരാജ് ഐഎസ്ആർഒയിൽ പരിശീലനം പൂർത്തിയാക്കിയിരുന്നു. പരിശീലനത്തിന് ഒപ്പമുണ്ടായിരുന്ന കൂട്ടുകാരന്‍റെ വിവാഹച്ചടങ്ങിൽ പങ്കെടുക്കാൻ സുഹൃത്തുക്കൾക്കൊപ്പം കണ്ണൂരിലേക്കു പോകാനായി എത്തിയതായിരുന്നു ജയരാജ്.

തറവാട് കുടുംബക്കൂട്ടായ്മയുടെ ഇടപെടൽ; ആവണിക്ക് വീടായി

ഹരിപ്പാട്: ചെറിയൊരു ഷെഡിനുള്ളിൽ ദുരിത ജീവിതം നയിച്ച ആവണിക്കും പിതാവ് ശാന്തനും സ്വന്തമായി വീടായി. സൗദി അറേബ്യയിലെ റിയാദിൽ പ്രവർത്തിക്കുന്ന കുടുംബകൂട്ടായ്മയായ തറവാട് തങ്ങളുടെ ഒരു വീട് ഭവന പദ്ധതിയുടെ ഭാഗമായാണ് ഈ കുടുംബത്തിന് വീട് ഒരുക്കിയത്. ജോലി സ്ഥലത്തുണ്ടായ അപകടത്തിൽ പരിക്കേറ്റ് നിത്യവൃത്തിക്ക് പോലും വകയില്ലാതെ വിഷമിച്ച ശാന്തന് ഇത് സന്തോഷത്തിന്‍റെ നിമിഷം. കൂട്ടായ്മയുടെ മൂന്നാമത്തെ വീടാണിത്. താക്കോൽദാനച്ചടങ്ങ് നഗരസഭാ ചെയർമാൻ കെ.കെ. രാമകൃഷ്ണൻ ഉദ്ഘാടനം ചെയ്തു. തറവാടിന്‍റെ രക്ഷാധികാരി രമേശ് മാലി വീടിന്‍റെ താക്കോൽ ആവണിക്ക് കൈമാറി. വാർഡ് കൗൺസിലർ സജിനി സുരേന്ദ്രൻ, തറവാടിന്‍റെ ചാരിറ്റി കമ്മിറ്റി അംഗങ്ങളായ എം.പി. ഷിജു, മഹേഷ് പിള്ള, ശ്രീകാന്ത് ശിവൻ, സന്തോഷ് കൃഷ്ണ എന്നിവർ പങ്കെടുത്തു.

ക്ലാസ് മുറിയുടെ മേൽക്കൂരയിലെ സിമന്‍റ്പാളി അടർന്നുവീണു

കായംകുളം: സ്‌കൂളിൽ ക്ലാസ് മുറിയുടെ മേൽക്കൂരയിലെ സിമന്‍റ് പാളി അടർന്നുവീണു. അപകടം ഒഴിവായി. കായംകുളം ഗവൺമെന്‍റ് ഗേൾസ് ഹയർസെക്കൻഡറി സ്‌കൂളിലെ ക്ലാസ് മുറിയിലെ മേൽക്കൂരയുടെ അടിഭാഗത്തുനിന്നുമാണ് സിമന്‍റ് പാളി ക്ലാസ്മുറിയുടെ മുന്നിലെ വരാന്തയിൽ വീണത്. കഴിഞ്ഞദിവസം രാവിലെ ഹൈസകൂൾ വിഭാഗം പ്രവർത്തിക്കുന്ന കെട്ടിടത്തിലാണ് സംഭവം നടന്നത്. ഈ കെട്ടിടം 1959ൽ നിർമിച്ചതാണെന്ന് പ്രദേശവാസികൾ പറഞ്ഞു. ഇരുനില കെട്ടിടത്തിലാണ് ഹൈസ്‌കൂൾ പ്രവർത്തിക്കുന്നത്. ഇതിന്‍റെ മുകളിൽ പകുതി ഭാഗത്ത് റൂഫിംഗും ചെയ്തിട്ടുണ്ട്. എന്നാലും കെട്ടിടത്തിൽ നനവ് പിടിക്കുന്നതായി സംശയമുണ്ട്. ഭിത്തികളിൽ ചിലയിടത്ത് വിള്ളലുകളും മേൽക്കൂരയിൽ സിമന്‍റ് പാളികൾ ചിലയിടത്ത് അടർന്നും ഇരിപ്പുണ്ടെന്നു കുട്ടികളും പറയുന്നു. അടുത്തിടെ കെട്ടിടത്തിൽ അറ്റകുറ്റപ്പണികൾ നടത്തിയിരുന്നു. സ്‌കൂൾ അധികൃതർ പറഞ്ഞതിനെത്തുടർന്ന് നഗരസഭ എൻജിനിയറിംഗ് വിഭാഗത്തിലെ ഉദ്യോഗസ്ഥർ എത്തി കെട്ടിടം പരിശോധിച്ചു. കെട്ടിടത്തിന് ബലക്ഷയമുണ്ടോ എന്നറിയാൻ കൂടുതൽ പരിശോധന നടത്തും. അതിനുശേഷമേ കുട്ടികളെ ഇവിടെ ഇരുത്തുകയുള്ളുവെന്ന് സ്‌കൂൾ അധികൃതർ പറഞ്ഞു. കെട്ടിടത്തിന് ബലക്ഷയമുണ്ടെങ്കിൽ ഇവിടത്തെ ക്ലാസുകൾ സമീപത്തെ മറ്റ് സ്‌കൂളിലെ ഒഴിഞ്ഞ മുറിയിലേക്കു മാറ്റും.

എ.എൻ. ഷംസീർ വി.എസിന്‍റെ വസതിയിലെത്തി

അമ്പലപ്പുഴ: നിയമസഭാ സ്പീക്കർ എ.എൻ. ഷംസീർ വി.എസ്. അച്യുതാനന്ദന്‍റെ വസതിയിലെത്തി. ഇന്നലെ രാവിലെയാണ് പറവൂരിലെ വേലിക്കകത്ത് വീട്ടിൽ സ്പീക്കറെത്തിയത്. വീട്ടിലെത്തിയ സ്പീക്കർ വി.എസിന്‍റെ മകൻ അരുൺകുമാറിനെയും മറ്റ് ബന്ധുക്കളെയും കണ്ട് അനുശോചനമറിയിച്ചു. എച്ച്. സലാം എംഎൽഎയും ഒപ്പമുണ്ടായിരുന്നു. നേരത്തേ സംസ്കാരദിവസം വസതിയിലും വലിയ ചുടുകാട്ടിലും സ്പീക്കർ എത്തിയിരുന്നു.

കാറ്റിൽ വൻ നാശനഷ്ടം

തുറവൂർ: ഇന്നല ഉച്ചയ്ക്കുണ്ടായ ശക്തമായ കാറ്റിൽ തീരപ്രദേശങ്ങളിൽ വൻ നാശനഷ്ടം. നിരവധി വീടുകളുടെ മേൽക്കൂര തകർന്നു. പള്ളിത്തോട്, ചേരുങ്കൽ, പൊഴിച്ചിറ ഭാഗങ്ങളിൽ വീടുകൾ ഭാഗികമായി തകർന്നു. പൊഴിച്ചിറയിൽ പുത്തൻകരി രാധ വിശ്വംഭരന്‍റെ വീടിന്‍റെ മേൽക്കൂര തകർന്നു. മരം വീണു പുത്തൻകരി ദാസന്‍റെ വിടിനും നാശനഷ്ടമുണ്ടായി. പള്ളിത്തോട് പൊഴിച്ചാലുകളിൽ നിന്നിരുന്ന പല ചീനവലകളും കാറ്റിൽ തകർന്നു. പള്ളിത്തോട് മുതൽ തെക്കേ ചെല്ലാനംവരെയുള്ള തീരപ്രദേശങ്ങളിൽ കടൽഭിത്തിക്കു സമീപം നിന്നിരുന്ന പല വീടുകളും ഭാഗികമായി തകർന്നിട്ടുണ്ട്. പല സ്ഥലങ്ങളിലും മരങ്ങളും തെങ്ങുകളും കടപുഴകി വീണു. അരമണിക്കൂറോളം നീണ്ടുനിന്ന കാറ്റ് ഏറെ നാശമാണ് സൃഷ്ടിച്ചത്. പോലീസ് ക്വാർട്ടേഴ്‌സുകളുടെ മുകളിൽ ആഞ്ഞിലിമരം കടപുഴകി വീണു തുറവൂര്‍: കഴിഞ്ഞ ദിവസമുണ്ടായ ശക്തമായ കാറ്റില്‍ പോലീസ് ക്വാര്‍ട്ടേഴ്സുകളുടെ മുകളില്‍ ആഞ്ഞിലിമരം കടപുഴകിവീണു. കുത്തിയതോട് പഞ്ചായത്ത് ഏഴാം വാര്‍ഡിലെ പോലീസ് ക്വാര്‍ട്ടേഴ്സുകളുടെ മുകളിലാണ് ആഞ്ഞിലിമരം കടപുഴകി വീണത്. ക്വാർട്ടേഴ്‌സിലുണ്ടായിരുന്ന കുട്ടികള്‍ ഉള്‍പ്പെടെയുള്ളവര്‍ അത്ഭുതകരമായി രക്ഷപ്പെട്ടു. ഉടന്‍ കുത്തിയതോട് പോലീസ് സ്ഥലത്തെത്തുകയും കുട്ടികളെയും മറ്റുള്ളവരെയും മറ്റൊരിടത്തേക്ക് മാറ്റുകയും ചെയ്തു. വര്‍ഷങ്ങളുടെ പഴക്കമുള്ള പോലീസ്‌ ക്വാര്‍ട്ടേഴ്സുകളാണ് ഇവിടെയുള്ളത്. 20 പോലീസ് ഉദ്യോഗസ്ഥര്‍ താമസിച്ചിരുന്ന ക്വാര്‍ട്ടേഴ്സുകള്‍ പലതും ഇടിഞ്ഞുവീഴുകയും കാടുകയറി നശിച്ച അവസ്ഥയാണ്.

യുവാവിനെ പാടശേഖരത്തിൽ മരിച്ച നിലയില്‍ കണ്ടെത്തി

ഹരിപ്പാട്: കാണാതായ യുവാവിനെ പാടശേഖരത്തിൽ മരിച്ച നിലയില്‍ കണ്ടെത്തി. നിരണം വെട്ടിത്തുരുത്തിയില്‍ വിമല്‍കുമാര്‍ (38) ആണ് മരണപ്പെട്ടത്. ടൈല്‍ പണിക്കാരനായ വിമല്‍കുമാര്‍ ഭാര്യവീടായ മുട്ടം മേടച്ചിറയില്‍ വീട്ടില്‍നിന്നാണ് വ്യഴാഴ്ച ജോലിക്കായി പോയത്. വൈകിയും വരാതിരുന്നതിനെത്തുടര്‍ന്ന് വീട്ടുകാര്‍ പോലീസില്‍ പരാതി നല്‍കിയിരുന്നു. തുടര്‍ന്ന് നടത്തിയ തെരച്ചിലില്‍ ഇയാള്‍ വ്യാഴാഴ്ച വൈകിട്ട് വീട്ടിലേക്ക് പോകുന്നതായി ശ്രദ്ധയില്‍പ്പെട്ടതായി സമീപവാസികളില്‍ ചിലര്‍ അറിയിച്ചിരുന്നു. ഇതേത്തുടര്‍ന്ന് ഫയര്‍ഫോഴ്‌സിന്‍റെ സഹകരണത്തോടെ നടന്ന അന്വേഷണത്തിലാണ് വെള്ളിയാഴ്ച വൈകുന്നേരം ഭാര്യവീട്ടിലേക്ക് പോകുന്ന വഴിയിലെ മൂടാംപാടി പാടശേഖരത്തില്‍ ഇയാളെ മരിച്ചനിലയില്‍ കണ്ടെത്തിയത്. മൃതദേഹം ഹരിപ്പാട് താലൂക്ക് ആശുപത്രി മോര്‍ച്ചറിയില്‍. ഭാര്യ: സൂര്യ. മകന്‍: ആര്യന്‍.

സമഗ്ര പാലിയേറ്റീവ് കെയര്‍ ക്ലിനിക്ക് ഉദ്ഘാടനത്തിനൊരുങ്ങി

ആലപ്പുഴ: ഭാവിയില്‍ നിങ്ങളുടെ ചികിത്സ എങ്ങനെയായിരിക്കണം, മരണശേഷം അവയവങ്ങള്‍ ദാനം ചെയ്യണോ, സംസ്‌കാരച്ചടങ്ങുകള്‍ എങ്ങനെ വേണം... ഇത്തരം കാര്യങ്ങളില്‍ അഭിപ്രായങ്ങളും തീരുമാനങ്ങളും ഉള്ളയാളാണോ നിങ്ങള്‍. എങ്കില്‍ ആലപ്പുഴ മെഡിക്കല്‍ കോളജില്‍ ആരംഭിക്കാന്‍ പോകുന്ന സമഗ്ര പാലിയേറ്റീവ് കെയര്‍ ക്ലിനിക്കിലെ ലിവിംഗ് വില്‍ ഇന്‍ഫര്‍മേഷന്‍ ഡെസ്‌ക്കിന് നിങ്ങളെ സഹായിക്കാനാകും. ആലപ്പുഴ ഗവ. ടിഡി മെഡിക്കല്‍ കോളേജില്‍ അനസ്‌തേഷ്യ വിഭാഗത്തിനു കീഴില്‍ ഒരുങ്ങിയ സമഗ്ര പാലിയേറ്റീവ് കെയര്‍ ക്ലിനിക്കും ലിവിംഗ് വിൽ ഡെസ്കും ഉദ്ഘാടനത്തിന് സജ്ജമായി. പാലിയേറ്റീവ് കെയര്‍ ആവശ്യമുള്ള രോഗികള്‍ക്കായി എല്ലാ ശനിയാഴ്ചകളിലും രാവിലെ 9.30 മുതല്‍ ഇവിടെ ഒപി സേവനം ലഭ്യമാകും. 10 ബെഡുകള്‍ ഉള്‍പ്പെടുത്തി സജ്ജീകരിച്ച വാര്‍ഡില്‍ മറ്റു വകുപ്പുകളിലെ ഡോക്ടര്‍മാരുടെ സേവനങ്ങളും ഉറപ്പാക്കുന്നുണ്ട്. ഫാര്‍മസി, ലിവിംഗ് വില്‍ ഇന്‍ഫര്‍മേഷന്‍ ഡെസ്‌ക്, സ്റ്റോര്‍ എന്നീ സൗകര്യങ്ങളും ഇതിന്‍റെ ഭാഗമായി സജ്ജീകരിക്കുന്നുണ്ട്. പുതുതായി ആരംഭിക്കുന്ന സമഗ്ര പാലിയേറ്റീവ് കെയര്‍ ക്ലിനിക്കിന് കീഴിലാണു ലിവിംഗ് വില്‍ ഇന്‍ഫര്‍മേഷന്‍ ഡെസ്‌ക്കിന്‍റെ സേവനവും ലഭ്യമാകുന്നത്. ലിവിംഗ് വില്‍ പൂരിപ്പിക്കുന്നതിനുള്ള ഫോമും നിര്‍ദേശങ്ങളും ഇവിടെനിന്നു ലഭിക്കും. തിങ്കള്‍ മുതല്‍ വെള്ളി വരെയായിരിക്കും ഡെസ്‌ക് പ്രവര്‍ത്തനം. ഒരു വ്യക്തിയുടെ ജീവിതാവസാന സമയത്തോ രോഗാവസ്ഥയിലോ ചികിത്സാ തീരുമാനങ്ങള്‍ എടുക്കാനാകാത്ത ഘട്ടത്തില്‍ ലഭിക്കേണ്ട ചികിത്സ സംബന്ധിച്ച ആഗ്രഹങ്ങള്‍ മുന്‍കൂട്ടി രേഖപ്പെടുത്തി വെക്കുന്നതാണ് ലിവിംഗ് വില്‍. ജീവിതാവസാന സാഹചര്യങ്ങളിലെ ചികിത്സാരീതികളെക്കുറിച്ചുള്ള വ്യക്തിയുടെ നിര്‍ദേശങ്ങളാണ് രേഖപ്പെടുത്തുക. വെന്‍റിലേഷന്‍, ഡയാലിസിസ് പോലെ ജീവന്‍ നിലനിര്‍ത്തുന്ന ചികിത്സകള്‍ സ്വീകരിക്കണോ വേണ്ടയോ, മരണശേഷമുള്ള അവയവദാനം, സംസ്‌കാരച്ചടങ്ങുകള്‍ തുടങ്ങിയ കാര്യങ്ങള്‍ ഇതിലൂടെ മുന്‍കൂട്ടി തീരുമാനിക്കാം. 18 വയസ് തികഞ്ഞ ആര്‍ക്കും ലിവിംഗ് വില്‍ ഒപ്പുവയ്ക്കാം. ബന്ധുക്കളുമായി ആലോചിച്ചതിനുശേഷം ഒപ്പുവെച്ച ഈ രേഖകള്‍ ഗസറ്റഡ് റാങ്കിലുള്ള ഉദ്യോഗസ്ഥന്‍ ഒപ്പുവയ്ക്കും. ശേഷം തദ്ദേശ സ്വയംഭരണ സ്ഥാപനത്തിന് കീഴില്‍ സൂക്ഷിക്കുന്നതാണ് രീതി. മെഡിക്കല്‍ കോളജിലെ പാലിയേറ്റീവ് കെയര്‍ പ്രവര്‍ത്തനങ്ങളുടെ ഭാഗമായ കാരുണ്യ എന്ന പേരില്‍ വിദ്യാര്‍ഥികളുടെ നേതൃത്വത്തില്‍ പാലിയേറ്റീവ് കെയര്‍ പ്രവര്‍ത്തനങ്ങളും നടന്നുവരുന്നുണ്ട്. അരയ്ക്കു താഴെ തളര്‍ന്നവരെ ഒരുമിച്ചുകൂട്ടി എല്ലാ വര്‍ഷവും പാരാപ്ലീജിയ മീറ്റും മറ്റു മെഡിക്കല്‍ ക്യാമ്പുകളും സംഘടിപ്പിക്കുന്നുണ്ട്. കിടപ്പുരോഗികള്‍ക്ക് മാനസികവും ശാരീരികവുമായി പിന്തുണ നല്‍കുകയാണ് ഇത്തരം പ്രവര്‍ത്തനങ്ങളിലൂടെ ലക്ഷ്യംവയ്ക്കുന്നത്. കൂടാതെ ഹൗസ് സര്‍ജന്മാര്‍ക്കുള്ള കരിക്കുലത്തിലും പാലിയേറ്റീവ് കെയര്‍ ഇടം പിടിച്ചിട്ടുണ്ട്. ഇതിന്‍റെ ഭാഗമായി ആലപ്പുഴയിലെയും സമീപ പ്രദേശങ്ങളിലെയും കിടപ്പുരോഗികളെ ഡോക്ടര്‍മാര്‍ നേരിട്ട് വീടുകളിലെത്തി പരിശോധിക്കുന്നുണ്ട്. ഈ മാസം അവസാനത്തോടെ സമഗ്ര പാലിയേറ്റീവ് കെയര്‍ ക്ലിനിക്ക് പ്രവര്‍ത്തനം ആരംഭിക്കുമെന്ന് ആശുപത്രി അധികൃതര്‍ അറിയിച്ചു.

വേമ്പനാട് കായല്‍ : ജലവാഹകശേഷി വര്‍ധിപ്പിക്കണം: ഡോ. കെ.സി. ജോസഫ്

കുട്ടനാട്: വേമ്പനാട് കായലിന്‍റെയും ഇതര ജലാശയങ്ങളുടെയും ജലവാഹകശേഷി നഷ്ടപ്പെട്ടതിനാല്‍ ജലാശയങ്ങളുടെ ആഴം വര്‍ധിപ്പിക്കുന്നതിന് അടിയന്തര നടപടി വേണമെന്ന് ജനാധിപത്യ കേരള കോണ്‍ഗ്രസ് ചെയര്‍മാന്‍ ഡോ. കെ.സി. ജോസഫ്. വേനല്‍ക്കാലത്ത് വേലിയേറ്റംമൂലം കുട്ടനാട്ടിലെ വീടുകളില്‍ വെള്ളം കയറുന്നത് പതിവായിരിക്കുകയാണ്. പമ്പ, അച്ചന്‍കോവില്‍, മണിമല ആറുകളില്‍നിന്നുള്ള ജലത്തിന്‍റെ വരവ്, അണക്കെട്ടുകള്‍ തുറക്കുമ്പോഴുണ്ടാകുന്ന പ്രളയജലം വരവ് എന്നിവ കാരണം ഏറെക്കുറെ 9 മാസക്കാലം കുട്ടനാട് വെള്ളക്കെട്ടിലാകുന്ന സ്ഥിതിയാണുള്ളത്. ഈ സാഹചര്യത്തില്‍ 1924 ലെയും 2018 ലെയും മഹാപ്രളയത്തില്‍നിന്നു പാഠം ഉള്‍ക്കൊണ്ട് വേമ്പനാട് കായലിന്‍റെ വാഹകശേഷി വര്‍ധിപ്പിക്കുകയും മറ്റു ജലാശയങ്ങളുടെ ആഴം കൂട്ടുകയും ചെയ്യുന്നതിന് സമഗ്ര പദ്ധതി തയാറാക്കാന്‍ കേന്ദ്ര - സംസ്ഥാന സര്‍ക്കാരുകള്‍ തയാറാകണമെന്നും അദ്ദേഹം ആവശ്യപ്പെട്ടു. തോട്ടപ്പള്ളി സ്പില്‍വേ സംബന്ധിച്ച് ചെന്നൈ ഐഐടി സമര്‍പ്പിച്ച റിപ്പോര്‍ട്ട് ചര്‍ച്ച ചെയ്യാന്‍ സര്‍വ കക്ഷി യോഗം വിളിക്കണമെന്ന് മുഖ്യമന്ത്രിയോട് ആവശ്യപ്പെടുമെന്നും അദ്ദേഹം അറിയിച്ചു. ജനാധിപത്യ കേരള കോണ്‍ഗ്രസ് സംഘടിപ്പിച്ച "കുട്ടനാട് - വികസന പ്രതിസന്ധി' എന്ന വിഷയത്തില്‍ നടന്ന ചര്‍ച്ചാ ക്ലാസ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നിയോജക മണ്ഡലം പ്രസിഡന്‍റ് ജേക്കബ് അധ്യക്ഷനായി. തോമസ് ജോസഫ് ഇല്ലിക്കല്‍, സാജന്‍ സെബാസ്റ്റ്യന്‍, തോമസ് കോര, ഷിബു മണല, ബേബി ചെറിയാന്‍, ബാബു മണ്ണാംതുരുത്തി, ബോബന്‍ ചൂരക്കുറ്റി, മണിദാസ് വാസു, റോജി മണല, തോമസുകുട്ടി മുക്കം എന്നിവര്‍ പ്രസംഗിച്ചു.

കാർലോ ടർഫിന്‍റെ ഉദ്‌ഘാടനം നടത്തി

ഹരിപ്പാട്: വിദ്യാർഥികൾക്ക് പഠനത്തോടൊപ്പം കായികരംഗത്തും മുന്നേറാനും മാനസിക സന്തോഷം നൽകുന്നതിനുമായി ഹരിപ്പാട് നങ്ങ്യാർകുളങ്ങര ബഥനി സെൻട്രൽ സ്കൂളിൽ പുതിയ കളിക്കളം നിർമിച്ചു. പുതുതായി നിർമിച്ച കാർലോ ടർഫിന്‍റെ ഉദ്‌ഘാടനം അന്തർദേശീയ പഞ്ചഗുസ്തി സ്വർണമെഡൽ ജേതാവ് ജോബി മാത്യു നിർവഹിച്ചു. സ്‌കൂൾ പ്രിൻസിപ്പൽ സിസ്റ്റർ ആഗ്നറ്റ് അധ്യക്ഷയായി. മദർ പ്രൊവിൻഷ്യൽ സിസ്റ്റർ തമീം മുഖ്യസന്ദേശം നൽകി, പിടിഎ പ്രസിഡന്‍റ് അബ്ദുൾ സത്താർ, വൈസ് പ്രസിഡന്‍റ് രമ്യ, അധ്യാപകരായ സുഭാഷ്, സുചിത്ര, ജ്യോതി, ബിൻസി, ഷീജ, ശരണ്യ, നീത, സ്കൂൾ ലീഡർമാരായ ബിജിത്, ഗൗരി പ്രസാദ് എന്നിവർ പ്രസംഗിച്ചു.

പിഐപി കനാലിന് സമീപത്തെ വെള്ളക്കെട്ട്: 50 കുടുബങ്ങൾ ദുരിതത്തിൽ

കായംകുളം: പമ്പ ഇറിഗേഷന്‍ പ്രോജക്ടായ പിഐപി കനാലിന് സമീപത്തെ വെള്ളക്കെട്ട് ജനങ്ങളെ ദുരിതത്തിലാക്കുന്നു. കായംകുളം നഗരസഭ ആറാം വാര്‍ഡില്‍ പെരൂത്തറ വാഴപ്പള്ളി ഭാഗത്ത് കനാലിന്‍റെ ഇരുവശവുമുള്ള രൂക്ഷമായ വെള്ളക്കെട്ടാണ് ജനങ്ങളെ ദുരിതത്തിലാക്കുന്നത്. ഇതുമൂലം അമ്പതോളം വരുന്ന കുടുബങ്ങള്‍ക്ക് വീടിന് പുറത്തിറങ്ങാന്‍ കഴിയാത്ത സാഹചര്യമാണുള്ളത്. വെള്ളം ഒഴുകാത്ത പിഐപി കനാല്‍ കഴിഞ്ഞ മുപ്പത് വര്‍ഷത്തിലേറെയായി ഉപയോഗശൂന്യമായി നിലനില്‍ക്കുകയാണെന്ന് നാട്ടുകാര്‍ പറഞ്ഞു. കനാല്‍, ഭൂനിരപ്പില്‍നിന്നു ഉയര്‍ന്ന് നില്‍ക്കുന്നതിനാല്‍ മലിനജലം കെട്ടിക്കിടന്ന് ജലജന്യ രോഗങ്ങളും ഇഴജന്തുക്കളുടെ ശല്യവും രൂക്ഷമാവുകയാണ്. മലിനജലം ഒഴുകി പ്പോകാന്‍ സംവിധാനമില്ല. ഉപയോഗശൂന്യമായ കനാല്‍ പൊളിച്ചുമാറ്റുകയോ പുനര്‍നിര്‍മിക്കുകയോ വേണമെന്നാണ് നാട്ടുകാരുടെ ആവശ്യം. മുഖ്യമന്ത്രി, പൊതുമരാമത്ത്, ജലസേചന വകുപ്പ് മന്ത്രിമാര്‍ കായംകുളം നഗരസഭ, ജില്ലാ കളക്ടര്‍, മനുഷ്യാവകാശ സംഘടനകള്‍ എന്നിവര്‍ക്ക് പരാതികള്‍ നല്‍കിയെങ്കിലും യാതൊരു നടപടിയും ഉണ്ടായില്ലന്നും നാട്ടുകാര്‍ പറഞ്ഞു.

പ്രാര്‍ഥനാ-പഠന പരിശീലന ക്യാമ്പ് നടത്തി

ആലപ്പുഴ: യുവദീപ്തി-എസ്എംവൈഎം പുത്തനങ്ങാടി യൂണിറ്റിന്‍റെ നേതൃത്വത്തില്‍ പ്രാര്‍ഥനാ-പഠന പരിശീലന ക്യാമ്പ് നടത്തി. യുവദീപ്തി-എസ്എംവൈഎം ആലപ്പുഴ ഫൊറോന ഡയറക്ടര്‍ ഫാ. സോണി പള്ളിച്ചിറയില്‍ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോയല്‍ റോയ് അധ്യക്ഷനായി. ഫാ. ഐബിന്‍ പകലോമറ്റം( യൂത്ത് സൈക്കോളജിസ്റ്റ്), ഫാ. സാവിയോ മാനാട്ട് (യുവദീപ്തി-എസ്എംവൈഎം അതിരൂപതാ ഡയറക്ടര്‍) ക്ലാസുകള്‍ക്ക് നേതൃത്വം നല്‍കി. അതിരൂപതാ റിസോഴ്‌സ് ടീമിന്‍റെയും യൂണിറ്റ് എക്‌സിക്യൂട്ടീവ്സിന്‍റെയും നേതൃത്വത്തിലാണ് ക്യാമ്പ് നടന്നത്. യൂണിറ്റ് ഡയറക്ടര്‍ ഫാ. ജോബിന്‍ തൈപ്പറമ്പില്‍ മുഖ്യപ്രഭാഷണം നടത്തി. അനിമേറ്റര്‍ സിസ്റ്റര്‍ അനറ്റ്, ബ്രദര്‍ ഡിക്കന്‍ പോള്‍, കൈക്കാരന്‍ റോയ് വേലിക്കെട്ടില്‍ എന്നിവര്‍ പ്രസംഗിച്ചു.

കടലാക്രമണം തടയാൻ പിടിപ്പിച്ച നിരവധി കാറ്റാടി മരങ്ങൾ കനത്ത മഴയിലും ശക്തമായ തിരമാലയിലും നിലംപൊത്തി

അമ്പലപ്പുഴ: കടലാക്രമണം തടയാൻ പിടിപ്പിച്ച നിരവധി കാറ്റാടി മരങ്ങൾ കനത്ത മഴയിലും ശക്തമായ തിരമാലയിലും നിലംപൊത്തി. പുന്നപ്ര വിയാനി, ചള്ളി, നർബോന, പറവൂർ ഗലീലിയ, വാടക്കൽ അറപ്പപൊഴി, വട്ടയാൽ ഇഎസ്ഐ, വാടപ്പൊഴി ഭാഗങ്ങളിലാണ് കടലാക്രമണം ശക്തമായി തുടരുന്നത്. തീരങ്ങളിലെ നൂറുകണക്കിനു മരങ്ങളാണ് അടിവേരിളകി നിലംപൊത്തിയത്. ഇവ വെട്ടി മാറ്റാൻ അധികൃതർ ശ്രമിക്കാത്തതുമൂലം പൊന്തുവലക്കാർ ഉൾപ്പെടെയുള്ള ചെറിയ മത്സ്യബന്ധന യാനങ്ങൾക്കു കടലിൽ ഇറക്കാൻ പറ്റാത്ത സ്ഥിതിയാണ്. കൂറ്റൻ മരങ്ങൾ കടലിലേക്ക് ഒഴുകുന്ന പൊഴിമുഖത്തിന് തടസമായാണ് കിടക്കുന്നത്. അതേസമയം, കാലാവസ്ഥാ ഗവേഷണ കേന്ദ്രത്തിന്‍റെ ആവർത്തിച്ചുള്ള മുന്നറിയിപ്പുള്ളതിനാൽ ചാകര ഉറച്ച തോട്ടപ്പള്ളി ഹാർബറിൽനിന്നു ഭൂരിഭാഗം വള്ളങ്ങളും കടലിൽ ഇറക്കിയില്ല. വളർച്ചയെത്താത്ത ചെറിയ അയല പിടിക്കുന്നതിനും നിരോധനമേർപ്പെടുത്തിയിട്ടുണ്ട്. നിരോധനം ലംഘിച്ച് മീൻ പിടിച്ച വള്ളങ്ങൾക്കെതിരേ കഴിഞ്ഞ ദിവസം ഫിഷറീസ് വകുപ്പ് പിഴ ചുമത്തിയിരുന്നു.

നെടുമുടി കരീപ്പാടത്തു മടവീഴ്ച

മങ്കൊമ്പ്: കനത്ത മഴയെത്തുടർന്ന് ജലനിരപ്പുയർന്നതോടെ കുട്ടനാട്ടിൽ വീണ്ടും മടവീഴ്ച. നെടുമുടി കൃഷിഭവൻ പരിധിയിൽ വരുന്ന കരീപ്പാടം പാടശേഖരത്തിലാണ് ഇന്നലെ മടവീണത്. 130 ഓളം ഏക്കർ വരുന്ന പാടശേഖരത്തിൽ വിതകഴിഞ്ഞു 15 ദിവസം പിന്നിട്ടിരുന്നു. പാടശേഖരത്തിന്‍റെ പയ്യനാട് പുറംബണ്ടിലാണ് ഇന്നലെ പുലർച്ചയോടെ മടവീണത്. പുറംബണ്ടിൽ രൂപപ്പെട്ട അള്ള് വലുതായി മടവീഴ്ചയിലേക്കു നീങ്ങുകയായിരുന്നു. മടവീഴ്ചയിൽ നാലു മീറ്ററോളം പുറംബണ്ട് തകർന്നു. കർഷകരുടെ അവസരോചിതമായ ഇടപെടലിനെത്തുടർന്ന് മട തടയുകയും പുറംബംണ്ട് താത്കാലികമായി ബലപ്പെടുത്തുകയുമായിരുന്നു.

ജലനിരപ്പ് ഉയരുന്നു; 2 മാസത്തിനിടെ നാലാമത്തെ വെള്ളപ്പൊക്കം

എടത്വ: മഴയ്ക്ക് ശമനമില്ല, ജലനിരപ്പ് നന്നേ ഉയരുന്നു. ആശങ്കയിലായി കുട്ടനാട്ടുകാര്‍. രണ്ടു മാസത്തിനിടയിലെ നാലാമത്തെ വെള്ളപ്പൊക്കമാണ് ഇപ്പോള്‍ ഉണ്ടായിരിക്കുന്നത്. റോഡുകള്‍ ഉള്‍പ്പെടെ ഒട്ടുമിക്ക പ്രദേശങ്ങളും വെള്ളത്തില്‍ മുങ്ങി. തലവടിയില്‍ വീടുകളില്‍ വെള്ളം കയറിത്തുടങ്ങി. കാലവര്‍ഷം തുടങ്ങിയ ശേഷമുള്ള മൂന്നു വെള്ളപ്പൊക്കവും കുട്ടനാട്ടുകാര്‍ അതിജീവിച്ചിരുന്നു. തുടര്‍ച്ചയായി ചെയ്യുന്ന മഴയും വെള്ളപ്പൊക്കവും വീണ്ടും ആശങ്ക സൃഷ്ടിക്കുകയാണ്. മഴയ്‌ക്കൊപ്പം വീശിയടിക്കുന്ന ശക്തമായ കാറ്റും ജനജീവിതത്തെ സാരമായി ബാധിക്കുന്നുണ്ട്. താമസസ്ഥലത്തിന് സമീപത്ത് നില്‍ക്കുന്ന മരങ്ങളും പഴയ വീടുകളും നിലംപതിക്കുമോയെന്ന ആശങ്കയാണ് കുട്ടനാട്ടുകാര്‍ പങ്കുവയ്ക്കുന്നത്. കിഴക്കന്‍ വെള്ളത്തിന്‍റെ ശക്തി വര്‍ധിച്ചതോടെ പ്രധാന നദികളില്‍ വ്യാഴാഴ്ച മുതല്‍ ജലനിരപ്പ് ഉയര്‍ന്നിരുന്നു. ഇന്നലെ ഉച്ചയോടെ വെള്ളത്തിന്‍റെ വരവ് അല്പം നിലച്ചെങ്കിലും ഉച്ചയ്ക്കുശേഷമുള്ള കനത്ത മഴയില്‍ ജലനിരപ്പ് വീണ്ടും ഉയരാന്‍ തുടങ്ങി. നീരേറ്റുപുറം-മുട്ടാര്‍ റോഡുകളില്‍ വെള്ളം കയറിയതിനെത്തുടര്‍ന്ന് ബസ് സര്‍വീസ് ഇന്നലെ നിര്‍ത്തിവച്ചിരുന്നു. സര്‍വീസ് റോഡുകള്‍ മാത്രമല്ല ഇടറോഡുകളും പൊതുവഴികളും വെള്ളത്തില്‍ മുങ്ങിയിട്ടുണ്ട്. തലവടി പ്രദേശങ്ങളിലെ ചില വീടുകളില്‍ വെള്ളം കയറി. മിക്ക വീട്ടുമുറ്റവും വെള്ളത്തില്‍ മുങ്ങിയ നിലയിലാണ്. ചക്കുളത്തുകാവ് ക്ഷേത്രപരിസരവും വെള്ളത്തില്‍ മുങ്ങി. മഴ നീണ്ടുനിന്നാല്‍ മുന്‍പുണ്ടായ മൂന്നു വെള്ളപ്പൊക്കത്തേക്കാള്‍ ശക്തമാകാനാണ് സാധ്യത. മുട്ടാര്‍, തലവടി, വീയപുരം, എടത്വ, തകഴി പഞ്ചായത്തിലെ താഴ്ന്ന പ്രദേശങ്ങള്‍ വെള്ളത്തില്‍ മുങ്ങിയിട്ടുണ്ട്. തോട്ടപ്പള്ളി പൊഴിവഴി കടലിലേയ്ക്ക് ജലം ഒഴുക്കിവിടുന്നുണ്ടെങ്കിലും മഴയുടെ ശക്തിമൂലം ജലനിരപ്പ് ഉയരുകയാണ്. വെള്ളപ്പൊക്കം വിദ്യാര്‍ഥികളെ ഏറെ ബാധിക്കുന്നുണ്ട്. ഉള്‍പ്രദേശങ്ങളിലെ നഴ്‌സറി സ്‌കൂള്‍ വിദ്യാര്‍ഥികള്‍ ഉള്‍പ്പെടെ വെള്ളത്തില്‍ നീന്തിവേണം സ്‌കൂളുകളില്‍ എത്തിച്ചേരാന്‍. ഇക്കുറി നിരവധി അധ്യയന ദിനങ്ങളാണ് കുട്ടികള്‍ക്ക് നഷ്ടമായത്. ജലനിരപ്പ് അപകടനിലയില്‍ എത്തിയാല്‍ മാത്രമേ സ്‌കൂളുകള്‍ക്ക് അവധി നല്‍കാന്‍ സാധ്യതയുള്ളൂ. വെള്ളം ഉയരുന്ന സാഹചര്യത്തില്‍ റവന്യു വകുപ്പ് ജാഗ്രതാ നിര്‍ദേശം നല്‍കിയിട്ടുണ്ട്.

ചെങ്ങന്നൂരിൽ തെരുവുനായശല്യം രൂക്ഷം; ജനജീവിതം ദുഃസഹം

ചെങ്ങന്നൂര്‍: ചെങ്ങന്നൂരിലും സമീപപ്രദേശങ്ങളിലും തെരുവുനായശല്യം രൂക്ഷമായി. വഴിയാത്രക്കാര്‍ക്കും ഇരുചക്രവാഹനങ്ങളില്‍ സഞ്ചരിക്കുന്നവര്‍ക്കും ഭീഷണിയുയര്‍ത്തി നായ്ക്കളുടെ എണ്ണം ക്രമാതീതമായി വര്‍ധിച്ചതോടെ ജനജീവിതം ദുഃസഹമായി. മാലിന്യം അശാസ്ത്രീയമായി തള്ളുന്നതാണ് തെരുവുനായ്ക്കളുടെ വര്‍ധനവിന് പ്രധാന കാരണമെന്നു നാട്ടുകാര്‍ പരാതിപ്പെടുന്നു. ഹോട്ടലുകളില്‍നിന്നു പുറന്തള്ളുന്ന ഭക്ഷണാവശിഷ്ടങ്ങളും മത്സ്യ-മാംസ വ്യാപാരികള്‍ വലിച്ചെറിയുന്ന മാലിന്യങ്ങളും തെരുവുനായ്ക്കള്‍ പെരുകാന്‍ പ്രധാന കാരണമായി ചൂണ്ടിക്കാണിക്കപ്പെടുന്നു. ഭക്ഷണം ലഭിക്കാതെ വരുമ്പോള്‍ നായ്ക്കള്‍ ആളുകളെ ആക്രമിക്കുന്ന സ്ഥിതിയാണ്. നഗരത്തിലെ ഇടറോഡുകളിലും ആളൊഴിഞ്ഞ പുരയിടങ്ങളിലും അടഞ്ഞുകിടക്കുന്ന വ്യാപാര സ്ഥാപനങ്ങള്‍ക്കു മുന്നിലും നായ്ക്കള്‍ കൂട്ടമായി തമ്പടിക്കുന്നത് ഭീതിയുണ്ടാക്കുന്നു. പ്രഭാത സവാരിക്കാരും വിശ്വാസികളും പത്ര-പാല്‍ വിതരണക്കാര്‍ എന്നിവരെല്ലാം തെരുവുനായ്ക്കളുടെ ആക്രമണ ഭീഷണിയിലാണ്. ഫെഡറല്‍ ബാങ്കിന്‍റെ പരിസരം, ചെങ്ങന്നൂര്‍ സ്മാര്‍ട്ട് ബസാര്‍, ഇരുപത്തിയേഴാം വാര്‍ഡ് വലിയപള്ളിയുടെ സമീപ പ്രദേശങ്ങള്‍, സപ്ലൈകോയുടെ സമീപം, മാര്‍ക്കറ്റ്, ബഥേല്‍ ജംഗ്ഷന്‍ എന്നിവിടങ്ങളില്‍ തെരുവുനായ്ക്കളുടെ ശല്യം അതിരൂക്ഷമാണ്. വളര്‍ത്തുമൃഗങ്ങളെയും തെരുവുനായ്ക്കള്‍ ആക്രമിക്കുന്ന സംഭവങ്ങളുണ്ടായിട്ടുണ്ട്. വീടുകളില്‍ വളര്‍ത്തുന്ന നായ്ക്കളെ രാത്രിയില്‍ അഴിച്ചുവിടാന്‍ പോലും കഴിയാത്ത അവസ്ഥയാണെന്നു നാട്ടുകാര്‍ പറയുന്നു. അധികൃതര്‍ക്കെതിരേ പ്രതിഷേധം ഇരുചക്രവാഹനങ്ങള്‍ക്ക് കുറുകെ ചാടി നായ്ക്കള്‍ അപകടങ്ങള്‍ സൃഷ്ടിക്കുന്നത് പതിവാണ്. തെരുവുനായ്ക്കളുടെ ശല്യം ഗുരുതര പ്രശ്‌നങ്ങള്‍ ഉണ്ടാക്കിയിട്ടും ഉത്തരവാദിത്വപ്പെട്ടവര്‍ മൗനം പാലിക്കുന്നത് വലിയ പ്രതിഷേധത്തിന് ഇടയാക്കിയിട്ടുണ്ട്. തെരുവുനായ്ക്കളുടെ എണ്ണം നിയന്ത്രിക്കുന്നതിനായി നഗരസഭ ആവിഷ്‌കരിച്ച എബിസി (ആനിമല്‍ ബര്‍ത്ത് കണ്‍ട്രോള്‍) പദ്ധതിക്ക് കാര്യമായ ഫലമുണ്ടാകുന്നില്ലെന്നും ആക്ഷേപമുണ്ട്. നഗരത്തിലെ തെരുവുനായ്ക്കളെ കൊണ്ടുപോയി വന്ധ്യംകരണം നടത്തി അതേസ്ഥലത്തുതന്നെ തിരികെ വിടുന്നതാണ് ഈ പദ്ധതി. നാട്ടുകാര്‍ക്ക് ഭീഷണിയാകുന്ന തെരുവുനായ്ക്കളെ തുരത്താന്‍ അടിയന്തര നടപടി സ്വീകരിക്കണമെന്ന ആവശ്യം ശക്തമായിരിക്കുകയാണ്. റോയി ചെങ്ങന്നൂര്‍ (പത്രഏജന്‍റ്) മുനിസിപ്പാലിറ്റിയിലെ 27-ാം വാര്‍ഡില്‍, വലിയ പള്ളിയുടെ സമീപപ്രദേശങ്ങളില്‍ തെരുവുനായ്ക്കളുടെ ശല്യം രൂക്ഷമാണ്. പുലര്‍ച്ചെ സൈക്കിളില്‍ വീട്ടില്‍നിന്നു ചെങ്ങന്നൂര്‍ ടൗണിലേക്ക് പത്രം എടുക്കാന്‍ പോകുമ്പോള്‍ ഇത് വലിയ ഭീഷണിയുയര്‍ത്തുന്നു. ചിലപ്പോള്‍ നായ്ക്കള്‍ പിന്നാലെ കൂടുകയും ചെയ്യുന്നു. കൂടാതെ, കരുവേലിപ്പടിക്കല്‍നിന്നും പേരിശേരിക്കു പോകുന്ന റോഡില്‍ വഴിയരുകുകള്‍ കാടുപിടിച്ച് കിടക്കുന്നതിനാല്‍ ഇഴജന്തുക്കളുടെ ശല്യവും ഈ പ്രദേശത്ത് രൂക്ഷമാണ്. ഇതിന് അടിയന്തരമായി നഗരസഭ മുന്‍കൈയെടുത്ത് പരിഹാരം കാണുകയും ജനങ്ങളുടെ സുരക്ഷിതമായ സഞ്ചാരം ഉറപ്പാക്കുകയും വേണം.

തഴക്കര പഞ്ചായത്തിൽ സാംസ്കാരികകേന്ദ്രം നിർമിക്കുന്നു

മാങ്കാംകുഴി: കലാ സാഹിത്യ രംഗങ്ങളില്‍ സമഗ്ര സംഭാവനകള്‍ നല്‍കി പ്രശസ്തരാവുകയും നാടിനെ അടയാളപ്പെടുത്തി മണ്‍മറഞ്ഞുപോയ ഓണാട്ടുകരയുടെ സാഹിത്യകാരന്‍ പാറപ്പുറത്ത്, നാടന്‍പാട്ട് കലാകാരന്‍ വെട്ടിയാര്‍ പ്രേംനാഥ്, കാഥികന്‍ പി.കെ. വെട്ടിയാര്‍ എന്നീ മൂന്ന് മഹാരഥന്മാരുടെ സ്മരണയ്ക്കായി തഴക്കര പഞ്ചായത്തില്‍ സാംസ്‌കാരികകേന്ദ്രം നിര്‍മിക്കുന്നു. നിലവിലെ പഞ്ചായത്ത് ലൈബ്രറി ഹാളിന്‍റെ മുകളിലത്തെ നിലയിലാണ് സാംസ്‌കാരികകേന്ദ്രം നിര്‍മിക്കുന്നത്. നിര്‍മാണ പ്രവര്‍ത്തനങ്ങള്‍ കഴിഞ്ഞ ദിവസം ആരംഭിച്ചു. പഞ്ചായത്തിന്‍റെ തനത് ഫണ്ടില്‍നിന്ന് അഞ്ച് ലക്ഷം രൂപ വിനിയോഗിച്ചാണ് സാംസ്‌കാരികകേന്ദ്രം നിര്‍മിക്കുന്നത്. ഓണാട്ടുകരയുടെ സ്പന്ദനങ്ങള്‍ എഴുത്തിലൂടെ സന്നിവേശിപ്പിച്ച സാഹിത്യകാരന്‍ പാറപ്പുറത്തിന്‍റെ പേരില്‍ ജന്മനാട്ടില്‍ സ്മാരകം നിര്‍മിക്കണമെന്നുള്ളത് വര്‍ഷങ്ങളായുള്ള ആവശ്യമാണ്. പാറപ്പുറത്തിന്‍റെ പേരില്‍ ജനകീയമായി നിര്‍മിച്ച പഠനകേന്ദ്രവും വായനശാലയും കുന്നം ഗ്രാമത്തിലുണ്ട്. എന്നാല്‍, ഇതുവരെ സ്മാരകം നിര്‍മിച്ചിട്ടില്ല. കിഴക്കേ പൈനുംമൂട്ടില്‍ കുഞ്ഞുനൈനാൻ ഈശോയുടെയും ശോശാമ്മയുടെയും മകനായി 1924 നവംബര്‍ 14-ന് തഴക്കര പഞ്ചായത്തിലെ കുന്നം ഗ്രാമത്തിലാണ് കെ. ഈശോ മത്തായി എന്ന പാറപ്പുറത്തിന്‍റെ ജനനം. തഴക്കര പഞ്ചായത്തിലെ വെട്ടിയാര്‍ ഗ്രാമത്തില്‍ ജനിച്ചവരാണ് വെട്ടിയാര്‍ പ്രേംനാഥും പി.കെ. വെട്ടിയാറും. നാടന്‍ കലാകാരനും ഗവേഷകനുമായി പ്രശസ്തനായ വെട്ടിയാര്‍ പ്രേംനാഥ് മധ്യകേരളത്തിലെ കീഴാള സമൂഹത്തിനിടയിലെ പാട്ടുകളും പുരാവൃത്തങ്ങളും സമാഹരിക്കുക എന്ന ക്ലേശകരമായ പ്രവര്‍ത്തനത്തിനായി ജീവിതം ഉഴിഞ്ഞുവച്ച ഗവേഷകനായിരുന്നു. ഇദ്ദേഹത്തിന്‍റെ സ്മരണാര്‍ഥം ഗ്രന്ഥശാല വെട്ടിയാറില്‍ പ്രവര്‍ത്തിക്കുന്നുണ്ട്. 1923 ലാണ് കാഥികന്‍ പി.കെ. വെട്ടിയാര്‍ ജനിച്ചത്. വെട്ടിയാര്‍ പഴയകോയിക്കല്‍ നാരായണപിള്ള എന്നാണ് പൂര്‍ണനാമം. നാടകാഭിനയവുമായാണ് കലാരംഗത്തേക്കുള്ള പ്രവേശനം. സാമ്പത്തിക പരാജയം കാരണം നാടകരംഗത്തോട് വിടപറഞ്ഞു. കഥാപ്രസംഗം തുടങ്ങി. കഥാപ്രസംഗ കലയില്‍ ജനസഹസ്രങ്ങളെ ഇളക്കിമറിച്ച കാഥികനായി പി.കെ. വെട്ടിയാര്‍ മാറി.

പ്രഥമ പഞ്ചാമൃതം പുരസ്കാരം ശ്രീകുമാരൻ തമ്പിക്ക്

മാവേലിക്കര: തഴക്കര ശ്രീ സുബ്രഹ്‌മണ്യ ഹൈന്ദവ സേവാസമിതിയുടെ പ്രഥമ പഞ്ചാമൃതം പുരസ്‌കാരം കവിയും ഗാനരചയിതാവുമായ ശ്രീകുമാരന്‍ തമ്പിക്ക്. ഓഗസ്റ്റ് പത്തിന് രാവിലെ 10 ന് നടക്കുന്ന ചടങ്ങില്‍ പോത്തന്‍കോട് ശാന്തിഗിരി ആശ്രമം ജനറല്‍ സെക്രട്ടറി ഗുരുരത്നം ജ്ഞാനതപസ്വി പുരസ്‌കാരം സമ്മാനിക്കും. 25,000 രൂപയും പ്രശസ്തിപത്രവും ഫലകവും ഉള്‍പ്പെടുന്നതാണ് പുരസ്‌കാരം. സമ്മേളനം എം.എസ്. അരുണ്‍കുമാര്‍ എംഎല്‍എ ഉദ്ഘാടനം ചെയ്യും. ഡോ. എഴുമറ്റൂര്‍ രാജരാജവര്‍മ മുഖ്യപ്രഭാഷണം നടത്തും. കല, സംസ്‌കാരം, സാമൂഹികം, വിദ്യാഭ്യാസം, സാഹിത്യം, കായികം, ആരോഗ്യം, മാധ്യമപ്രവര്‍ത്തനം തുടങ്ങിയ മേഖലകളില്‍നിന്ന് തെരഞ്ഞെടുക്കപ്പെടുന്നവര്‍ക്കാണ് പുരസ്‌കാരം. തുടര്‍ന്നുള്ള എല്ലാ വര്‍ഷവും പുരസ്‌കാരം വിതരണം ചെയ്യുമെന്നു ഭാരവാഹികളായ പ്രസിഡന്‍റ് ഡി. ജയപ്രകാശ്, വൈസ് പ്രസിഡന്‍റ് പി.എം. സുഭാഷ്, സെക്രട്ടറി ആര്‍. മനോജ്, ജോയിന്‍റ് സെക്രട്ടറി സി.എസ്. പ്രശാന്ത്, ട്രഷറര്‍ ടി.ആര്‍. രാജേന്ദ്രന്‍, പ്രവര്‍ത്തകസമിതി അംഗങ്ങളായ സുരേഷ് നെടുമ്പുറത്ത്, കെ.ജി. മഹാദേവന്‍ എന്നിവര്‍ അറിയിച്ചു.

അധികൃതരുടെ നിർദേശം കാറ്റിൽപ്പറത്തി ബസുകൾ നിർത്തുന്നത് നടുറോഡിൽ

ചാരുംമൂട്: മോട്ടോർ വാഹനവകുപ്പ് ഉദ്യോഗസ്ഥർ കർശന നിർദേശം നൽകിയിട്ടും ചാരുംമൂട് ജംഗ്‌ഷനിൽ സ്വകാര്യബസുകൾ ഉൾപ്പെടെ നടുറോഡിൽ നിർത്തി യാത്രക്കാരെ കയറ്റുന്നത് അപകടസാധ്യത വർധിപ്പിക്കുന്നു. ബസുകൾ റോഡിൽ നിർത്തി യാത്രക്കാരെ ഇറക്കുകയും കയറ്റുകയും ചെയ്യുന്നതു മൂലം ജംഗ്‌ഷനിൽ ഗതാഗതക്കുരുക്കും രൂക്ഷമാകുകയാണ്. ചാരുംമൂട് ജംഗ്‌ഷനിൽ ബസുകൾക്ക് നിർത്താൻ പ്രത്യേകം സ്റ്റോപ്പുകൾ അനുവദിച്ചു നൽകിയിട്ടും ബസുകൾ സ്റ്റോപ്പുകളിൽ നിർത്താതെ തോന്നുന്നിടത്ത് നിർത്തി യാത്രക്കാരെ കയറ്റുകയാണ്. കായംകുളം-പുനലൂർ റോഡിൽ മിനിറ്റുകളുടെ വ്യാത്യാസത്തിലാണ് ബസുകൾ സർവീസ് നടത്തുനത്. കെ.പി. റോഡിലൂടെ സർവീസ് നടത്തുന്ന ബസുകൾ മറ്റ് വാഹനങ്ങൾക്ക് കടന്നുപോകാൻ പോലും കഴിയാത്തതരത്തിൽ റോഡിൽ നിർത്തുന്നുവെന്നാണ് പരാതി. പിന്നാലെ എത്തുന്ന വലിയ വാഹനങ്ങൾ ഉൾപ്പെടെ കടന്നുപോകാൻ ഏറെ പ്രയാസപ്പെടുന്ന കാഴ്ചയാണ് നിത്യവും കാണാൻ കഴിയുന്നത്. കൊല്ലം-തേനി ദേശീയപാതയുടെയും കായംകുളം - പുനലൂർ കെപി റോഡിന്‍റെയും സംഗമ ജംഗ്‌ഷനായ ചാരുംമൂട് ജംഗ്‌ഷനിലെ നാല് ഭാഗത്തും ബസ് സ്റ്റോപ്പുകളും ബസ് കാത്തിരിപ്പ് കേന്ദ്രവും ഉണ്ടായിട്ടും ബസുകൾ നിർത്തുന്നത് റോഡിന്‍റെ മധ്യത്തിലാണ്. എന്നാൽ, ചില സ്വകാര്യബസുകൾ നിയമം കൃത്യമായി പാലിക്കുന്നുണ്ട്. നിർദിഷ്ട ബസ് സ്റ്റോപ്പിൽ അല്ലാതെ തോന്നുംപടി നിർത്തി യാത്രക്കാരെ കയറ്റുകയും ഇറക്കുകയും ചെയ്യുന്ന സ്വകാര്യബസുകൾക്കെതിരേ രണ്ടുമാസം മുമ്പ് മോട്ടോർ വാഹനവകുപ്പ് കർശന നടപടി സ്വീകരിച്ചിരുന്നു. മാവേലിക്കര ജോയിന്‍റ് ആർടിഒ എം.ജി. മനോജിന്‍റെ നിർദേശപ്രകാരം മോട്ടോർ വാഹനവകുപ്പ് ഉദ്യോഗസ്ഥർ ബസുകളുടെ അനധികൃത പാർക്കിംഗ് നിരീക്ഷിക്കാനായി മഫ്തിയിലാണ് പരിശോധന നടത്തിയത്. പരിശോധനയെത്തുടർന്ന് നിർദിഷ്ട ബസ് സ്റ്റോപ്പിൽ അല്ലാതെ യാത്രക്കാരെ കയറ്റുകയും ഇറക്കുകയും ചെയ്ത ബസുകൾക്കെതിരേ അന്ന് നടപടിയെടുത്തിരുന്നു. എന്നിട്ടും ഉദ്യോഗസ്ഥരുടെ നിർദേശങ്ങൾ കാറ്റിൽപ്പറത്തി ബസുകൾ നിയമ ലംഘനം തുടരുകയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]