ADVERTISEMENT

ADVERTISEMENT

കാർലോ ടർഫിന്‍റെ ഉദ്‌ഘാടനം നടത്തി

ഹരിപ്പാട്: വിദ്യാർഥികൾക്ക് പഠനത്തോടൊപ്പം കായികരംഗത്തും മുന്നേറാനും മാനസിക സന്തോഷം നൽകുന്നതിനുമായി ഹരിപ്പാട് നങ്ങ്യാർകുളങ്ങര ബഥനി സെൻട്രൽ സ്കൂളിൽ പുതിയ കളിക്കളം നിർമിച്ചു. പുതുതായി നിർമിച്ച കാർലോ ടർഫിന്‍റെ ഉദ്‌ഘാടനം അന്തർദേശീയ പഞ്ചഗുസ്തി സ്വർണമെഡൽ ജേതാവ് ജോബി മാത്യു നിർവഹിച്ചു.

സ്‌കൂൾ പ്രിൻസിപ്പൽ സിസ്റ്റർ ആഗ്നറ്റ് അധ്യക്ഷയായി. മദർ പ്രൊവിൻഷ്യൽ സിസ്റ്റർ തമീം മുഖ്യസന്ദേശം നൽകി, പിടിഎ പ്രസിഡന്‍റ് അബ്ദുൾ സത്താർ, വൈസ് പ്രസിഡന്‍റ് രമ്യ, അധ്യാപകരായ സുഭാഷ്, സുചിത്ര, ജ്യോതി, ബിൻസി, ഷീജ, ശരണ്യ, നീത, സ്കൂൾ ലീഡർമാരായ ബിജിത്, ഗൗരി പ്രസാദ് എന്നിവർ പ്രസംഗിച്ചു.

ADVERTISEMENT

കാറ്റിൽ വൻ നാശനഷ്ടം

തുറവൂർ: ഇന്നല ഉച്ചയ്ക്കുണ്ടായ ശക്തമായ കാറ്റിൽ തീരപ്രദേശങ്ങളിൽ വൻ നാശനഷ്ടം. നിരവധി വീടുകളുടെ മേൽക്കൂര തകർന്നു. പള്ളിത്തോട്, ചേരുങ്കൽ, പൊഴിച്ചിറ ഭാഗങ്ങളിൽ വീടുകൾ ഭാഗികമായി തകർന്നു. പൊഴിച്ചിറയിൽ പുത്തൻകരി രാധ വിശ്വംഭരന്‍റെ വീടിന്‍റെ മേൽക്കൂര തകർന്നു. മരം വീണു പുത്തൻകരി ദാസന്‍റെ വിടിനും നാശനഷ്ടമുണ്ടായി. പള്ളിത്തോട് പൊഴിച്ചാലുകളിൽ നിന്നിരുന്ന പല ചീനവലകളും കാറ്റിൽ തകർന്നു. പള്ളിത്തോട് മുതൽ തെക്കേ ചെല്ലാനംവരെയുള്ള തീരപ്രദേശങ്ങളിൽ കടൽഭിത്തിക്കു സമീപം നിന്നിരുന്ന പല വീടുകളും ഭാഗികമായി തകർന്നിട്ടുണ്ട്. പല സ്ഥലങ്ങളിലും മരങ്ങളും തെങ്ങുകളും കടപുഴകി വീണു. അരമണിക്കൂറോളം നീണ്ടുനിന്ന കാറ്റ് ഏറെ നാശമാണ് സൃഷ്ടിച്ചത്. പോലീസ് ക്വാർട്ടേഴ്‌സുകളുടെ മുകളിൽ ആഞ്ഞിലിമരം കടപുഴകി വീണു തുറവൂര്‍: കഴിഞ്ഞ ദിവസമുണ്ടായ ശക്തമായ കാറ്റില്‍ പോലീസ് ക്വാര്‍ട്ടേഴ്സുകളുടെ മുകളില്‍ ആഞ്ഞിലിമരം കടപുഴകിവീണു. കുത്തിയതോട് പഞ്ചായത്ത് ഏഴാം വാര്‍ഡിലെ പോലീസ് ക്വാര്‍ട്ടേഴ്സുകളുടെ മുകളിലാണ് ആഞ്ഞിലിമരം കടപുഴകി വീണത്. ക്വാർട്ടേഴ്‌സിലുണ്ടായിരുന്ന കുട്ടികള്‍ ഉള്‍പ്പെടെയുള്ളവര്‍ അത്ഭുതകരമായി രക്ഷപ്പെട്ടു. ഉടന്‍ കുത്തിയതോട് പോലീസ് സ്ഥലത്തെത്തുകയും കുട്ടികളെയും മറ്റുള്ളവരെയും മറ്റൊരിടത്തേക്ക് മാറ്റുകയും ചെയ്തു. വര്‍ഷങ്ങളുടെ പഴക്കമുള്ള പോലീസ്‌ ക്വാര്‍ട്ടേഴ്സുകളാണ് ഇവിടെയുള്ളത്. 20 പോലീസ് ഉദ്യോഗസ്ഥര്‍ താമസിച്ചിരുന്ന ക്വാര്‍ട്ടേഴ്സുകള്‍ പലതും ഇടിഞ്ഞുവീഴുകയും കാടുകയറി നശിച്ച അവസ്ഥയാണ്.

യുവാവിനെ പാടശേഖരത്തിൽ മരിച്ച നിലയില്‍ കണ്ടെത്തി

ഹരിപ്പാട്: കാണാതായ യുവാവിനെ പാടശേഖരത്തിൽ മരിച്ച നിലയില്‍ കണ്ടെത്തി. നിരണം വെട്ടിത്തുരുത്തിയില്‍ വിമല്‍കുമാര്‍ (38) ആണ് മരണപ്പെട്ടത്. ടൈല്‍ പണിക്കാരനായ വിമല്‍കുമാര്‍ ഭാര്യവീടായ മുട്ടം മേടച്ചിറയില്‍ വീട്ടില്‍നിന്നാണ് വ്യഴാഴ്ച ജോലിക്കായി പോയത്. വൈകിയും വരാതിരുന്നതിനെത്തുടര്‍ന്ന് വീട്ടുകാര്‍ പോലീസില്‍ പരാതി നല്‍കിയിരുന്നു. തുടര്‍ന്ന് നടത്തിയ തെരച്ചിലില്‍ ഇയാള്‍ വ്യാഴാഴ്ച വൈകിട്ട് വീട്ടിലേക്ക് പോകുന്നതായി ശ്രദ്ധയില്‍പ്പെട്ടതായി സമീപവാസികളില്‍ ചിലര്‍ അറിയിച്ചിരുന്നു. ഇതേത്തുടര്‍ന്ന് ഫയര്‍ഫോഴ്‌സിന്‍റെ സഹകരണത്തോടെ നടന്ന അന്വേഷണത്തിലാണ് വെള്ളിയാഴ്ച വൈകുന്നേരം ഭാര്യവീട്ടിലേക്ക് പോകുന്ന വഴിയിലെ മൂടാംപാടി പാടശേഖരത്തില്‍ ഇയാളെ മരിച്ചനിലയില്‍ കണ്ടെത്തിയത്. മൃതദേഹം ഹരിപ്പാട് താലൂക്ക് ആശുപത്രി മോര്‍ച്ചറിയില്‍. ഭാര്യ: സൂര്യ. മകന്‍: ആര്യന്‍.

സമഗ്ര പാലിയേറ്റീവ് കെയര്‍ ക്ലിനിക്ക് ഉദ്ഘാടനത്തിനൊരുങ്ങി

ആലപ്പുഴ: ഭാവിയില്‍ നിങ്ങളുടെ ചികിത്സ എങ്ങനെയായിരിക്കണം, മരണശേഷം അവയവങ്ങള്‍ ദാനം ചെയ്യണോ, സംസ്‌കാരച്ചടങ്ങുകള്‍ എങ്ങനെ വേണം... ഇത്തരം കാര്യങ്ങളില്‍ അഭിപ്രായങ്ങളും തീരുമാനങ്ങളും ഉള്ളയാളാണോ നിങ്ങള്‍. എങ്കില്‍ ആലപ്പുഴ മെഡിക്കല്‍ കോളജില്‍ ആരംഭിക്കാന്‍ പോകുന്ന സമഗ്ര പാലിയേറ്റീവ് കെയര്‍ ക്ലിനിക്കിലെ ലിവിംഗ് വില്‍ ഇന്‍ഫര്‍മേഷന്‍ ഡെസ്‌ക്കിന് നിങ്ങളെ സഹായിക്കാനാകും. ആലപ്പുഴ ഗവ. ടിഡി മെഡിക്കല്‍ കോളേജില്‍ അനസ്‌തേഷ്യ വിഭാഗത്തിനു കീഴില്‍ ഒരുങ്ങിയ സമഗ്ര പാലിയേറ്റീവ് കെയര്‍ ക്ലിനിക്കും ലിവിംഗ് വിൽ ഡെസ്കും ഉദ്ഘാടനത്തിന് സജ്ജമായി. പാലിയേറ്റീവ് കെയര്‍ ആവശ്യമുള്ള രോഗികള്‍ക്കായി എല്ലാ ശനിയാഴ്ചകളിലും രാവിലെ 9.30 മുതല്‍ ഇവിടെ ഒപി സേവനം ലഭ്യമാകും. 10 ബെഡുകള്‍ ഉള്‍പ്പെടുത്തി സജ്ജീകരിച്ച വാര്‍ഡില്‍ മറ്റു വകുപ്പുകളിലെ ഡോക്ടര്‍മാരുടെ സേവനങ്ങളും ഉറപ്പാക്കുന്നുണ്ട്. ഫാര്‍മസി, ലിവിംഗ് വില്‍ ഇന്‍ഫര്‍മേഷന്‍ ഡെസ്‌ക്, സ്റ്റോര്‍ എന്നീ സൗകര്യങ്ങളും ഇതിന്‍റെ ഭാഗമായി സജ്ജീകരിക്കുന്നുണ്ട്. പുതുതായി ആരംഭിക്കുന്ന സമഗ്ര പാലിയേറ്റീവ് കെയര്‍ ക്ലിനിക്കിന് കീഴിലാണു ലിവിംഗ് വില്‍ ഇന്‍ഫര്‍മേഷന്‍ ഡെസ്‌ക്കിന്‍റെ സേവനവും ലഭ്യമാകുന്നത്. ലിവിംഗ് വില്‍ പൂരിപ്പിക്കുന്നതിനുള്ള ഫോമും നിര്‍ദേശങ്ങളും ഇവിടെനിന്നു ലഭിക്കും. തിങ്കള്‍ മുതല്‍ വെള്ളി വരെയായിരിക്കും ഡെസ്‌ക് പ്രവര്‍ത്തനം. ഒരു വ്യക്തിയുടെ ജീവിതാവസാന സമയത്തോ രോഗാവസ്ഥയിലോ ചികിത്സാ തീരുമാനങ്ങള്‍ എടുക്കാനാകാത്ത ഘട്ടത്തില്‍ ലഭിക്കേണ്ട ചികിത്സ സംബന്ധിച്ച ആഗ്രഹങ്ങള്‍ മുന്‍കൂട്ടി രേഖപ്പെടുത്തി വെക്കുന്നതാണ് ലിവിംഗ് വില്‍. ജീവിതാവസാന സാഹചര്യങ്ങളിലെ ചികിത്സാരീതികളെക്കുറിച്ചുള്ള വ്യക്തിയുടെ നിര്‍ദേശങ്ങളാണ് രേഖപ്പെടുത്തുക. വെന്‍റിലേഷന്‍, ഡയാലിസിസ് പോലെ ജീവന്‍ നിലനിര്‍ത്തുന്ന ചികിത്സകള്‍ സ്വീകരിക്കണോ വേണ്ടയോ, മരണശേഷമുള്ള അവയവദാനം, സംസ്‌കാരച്ചടങ്ങുകള്‍ തുടങ്ങിയ കാര്യങ്ങള്‍ ഇതിലൂടെ മുന്‍കൂട്ടി തീരുമാനിക്കാം. 18 വയസ് തികഞ്ഞ ആര്‍ക്കും ലിവിംഗ് വില്‍ ഒപ്പുവയ്ക്കാം. ബന്ധുക്കളുമായി ആലോചിച്ചതിനുശേഷം ഒപ്പുവെച്ച ഈ രേഖകള്‍ ഗസറ്റഡ് റാങ്കിലുള്ള ഉദ്യോഗസ്ഥന്‍ ഒപ്പുവയ്ക്കും. ശേഷം തദ്ദേശ സ്വയംഭരണ സ്ഥാപനത്തിന് കീഴില്‍ സൂക്ഷിക്കുന്നതാണ് രീതി. മെഡിക്കല്‍ കോളജിലെ പാലിയേറ്റീവ് കെയര്‍ പ്രവര്‍ത്തനങ്ങളുടെ ഭാഗമായ കാരുണ്യ എന്ന പേരില്‍ വിദ്യാര്‍ഥികളുടെ നേതൃത്വത്തില്‍ പാലിയേറ്റീവ് കെയര്‍ പ്രവര്‍ത്തനങ്ങളും നടന്നുവരുന്നുണ്ട്. അരയ്ക്കു താഴെ തളര്‍ന്നവരെ ഒരുമിച്ചുകൂട്ടി എല്ലാ വര്‍ഷവും പാരാപ്ലീജിയ മീറ്റും മറ്റു മെഡിക്കല്‍ ക്യാമ്പുകളും സംഘടിപ്പിക്കുന്നുണ്ട്. കിടപ്പുരോഗികള്‍ക്ക് മാനസികവും ശാരീരികവുമായി പിന്തുണ നല്‍കുകയാണ് ഇത്തരം പ്രവര്‍ത്തനങ്ങളിലൂടെ ലക്ഷ്യംവയ്ക്കുന്നത്. കൂടാതെ ഹൗസ് സര്‍ജന്മാര്‍ക്കുള്ള കരിക്കുലത്തിലും പാലിയേറ്റീവ് കെയര്‍ ഇടം പിടിച്ചിട്ടുണ്ട്. ഇതിന്‍റെ ഭാഗമായി ആലപ്പുഴയിലെയും സമീപ പ്രദേശങ്ങളിലെയും കിടപ്പുരോഗികളെ ഡോക്ടര്‍മാര്‍ നേരിട്ട് വീടുകളിലെത്തി പരിശോധിക്കുന്നുണ്ട്. ഈ മാസം അവസാനത്തോടെ സമഗ്ര പാലിയേറ്റീവ് കെയര്‍ ക്ലിനിക്ക് പ്രവര്‍ത്തനം ആരംഭിക്കുമെന്ന് ആശുപത്രി അധികൃതര്‍ അറിയിച്ചു.

വേമ്പനാട് കായല്‍ : ജലവാഹകശേഷി വര്‍ധിപ്പിക്കണം: ഡോ. കെ.സി. ജോസഫ്

കുട്ടനാട്: വേമ്പനാട് കായലിന്‍റെയും ഇതര ജലാശയങ്ങളുടെയും ജലവാഹകശേഷി നഷ്ടപ്പെട്ടതിനാല്‍ ജലാശയങ്ങളുടെ ആഴം വര്‍ധിപ്പിക്കുന്നതിന് അടിയന്തര നടപടി വേണമെന്ന് ജനാധിപത്യ കേരള കോണ്‍ഗ്രസ് ചെയര്‍മാന്‍ ഡോ. കെ.സി. ജോസഫ്. വേനല്‍ക്കാലത്ത് വേലിയേറ്റംമൂലം കുട്ടനാട്ടിലെ വീടുകളില്‍ വെള്ളം കയറുന്നത് പതിവായിരിക്കുകയാണ്. പമ്പ, അച്ചന്‍കോവില്‍, മണിമല ആറുകളില്‍നിന്നുള്ള ജലത്തിന്‍റെ വരവ്, അണക്കെട്ടുകള്‍ തുറക്കുമ്പോഴുണ്ടാകുന്ന പ്രളയജലം വരവ് എന്നിവ കാരണം ഏറെക്കുറെ 9 മാസക്കാലം കുട്ടനാട് വെള്ളക്കെട്ടിലാകുന്ന സ്ഥിതിയാണുള്ളത്. ഈ സാഹചര്യത്തില്‍ 1924 ലെയും 2018 ലെയും മഹാപ്രളയത്തില്‍നിന്നു പാഠം ഉള്‍ക്കൊണ്ട് വേമ്പനാട് കായലിന്‍റെ വാഹകശേഷി വര്‍ധിപ്പിക്കുകയും മറ്റു ജലാശയങ്ങളുടെ ആഴം കൂട്ടുകയും ചെയ്യുന്നതിന് സമഗ്ര പദ്ധതി തയാറാക്കാന്‍ കേന്ദ്ര - സംസ്ഥാന സര്‍ക്കാരുകള്‍ തയാറാകണമെന്നും അദ്ദേഹം ആവശ്യപ്പെട്ടു. തോട്ടപ്പള്ളി സ്പില്‍വേ സംബന്ധിച്ച് ചെന്നൈ ഐഐടി സമര്‍പ്പിച്ച റിപ്പോര്‍ട്ട് ചര്‍ച്ച ചെയ്യാന്‍ സര്‍വ കക്ഷി യോഗം വിളിക്കണമെന്ന് മുഖ്യമന്ത്രിയോട് ആവശ്യപ്പെടുമെന്നും അദ്ദേഹം അറിയിച്ചു. ജനാധിപത്യ കേരള കോണ്‍ഗ്രസ് സംഘടിപ്പിച്ച "കുട്ടനാട് - വികസന പ്രതിസന്ധി' എന്ന വിഷയത്തില്‍ നടന്ന ചര്‍ച്ചാ ക്ലാസ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നിയോജക മണ്ഡലം പ്രസിഡന്‍റ് ജേക്കബ് അധ്യക്ഷനായി. തോമസ് ജോസഫ് ഇല്ലിക്കല്‍, സാജന്‍ സെബാസ്റ്റ്യന്‍, തോമസ് കോര, ഷിബു മണല, ബേബി ചെറിയാന്‍, ബാബു മണ്ണാംതുരുത്തി, ബോബന്‍ ചൂരക്കുറ്റി, മണിദാസ് വാസു, റോജി മണല, തോമസുകുട്ടി മുക്കം എന്നിവര്‍ പ്രസംഗിച്ചു.

പിഐപി കനാലിന് സമീപത്തെ വെള്ളക്കെട്ട്: 50 കുടുബങ്ങൾ ദുരിതത്തിൽ

കായംകുളം: പമ്പ ഇറിഗേഷന്‍ പ്രോജക്ടായ പിഐപി കനാലിന് സമീപത്തെ വെള്ളക്കെട്ട് ജനങ്ങളെ ദുരിതത്തിലാക്കുന്നു. കായംകുളം നഗരസഭ ആറാം വാര്‍ഡില്‍ പെരൂത്തറ വാഴപ്പള്ളി ഭാഗത്ത് കനാലിന്‍റെ ഇരുവശവുമുള്ള രൂക്ഷമായ വെള്ളക്കെട്ടാണ് ജനങ്ങളെ ദുരിതത്തിലാക്കുന്നത്. ഇതുമൂലം അമ്പതോളം വരുന്ന കുടുബങ്ങള്‍ക്ക് വീടിന് പുറത്തിറങ്ങാന്‍ കഴിയാത്ത സാഹചര്യമാണുള്ളത്. വെള്ളം ഒഴുകാത്ത പിഐപി കനാല്‍ കഴിഞ്ഞ മുപ്പത് വര്‍ഷത്തിലേറെയായി ഉപയോഗശൂന്യമായി നിലനില്‍ക്കുകയാണെന്ന് നാട്ടുകാര്‍ പറഞ്ഞു. കനാല്‍, ഭൂനിരപ്പില്‍നിന്നു ഉയര്‍ന്ന് നില്‍ക്കുന്നതിനാല്‍ മലിനജലം കെട്ടിക്കിടന്ന് ജലജന്യ രോഗങ്ങളും ഇഴജന്തുക്കളുടെ ശല്യവും രൂക്ഷമാവുകയാണ്. മലിനജലം ഒഴുകി പ്പോകാന്‍ സംവിധാനമില്ല. ഉപയോഗശൂന്യമായ കനാല്‍ പൊളിച്ചുമാറ്റുകയോ പുനര്‍നിര്‍മിക്കുകയോ വേണമെന്നാണ് നാട്ടുകാരുടെ ആവശ്യം. മുഖ്യമന്ത്രി, പൊതുമരാമത്ത്, ജലസേചന വകുപ്പ് മന്ത്രിമാര്‍ കായംകുളം നഗരസഭ, ജില്ലാ കളക്ടര്‍, മനുഷ്യാവകാശ സംഘടനകള്‍ എന്നിവര്‍ക്ക് പരാതികള്‍ നല്‍കിയെങ്കിലും യാതൊരു നടപടിയും ഉണ്ടായില്ലന്നും നാട്ടുകാര്‍ പറഞ്ഞു.

പ്രാര്‍ഥനാ-പഠന പരിശീലന ക്യാമ്പ് നടത്തി

ആലപ്പുഴ: യുവദീപ്തി-എസ്എംവൈഎം പുത്തനങ്ങാടി യൂണിറ്റിന്‍റെ നേതൃത്വത്തില്‍ പ്രാര്‍ഥനാ-പഠന പരിശീലന ക്യാമ്പ് നടത്തി. യുവദീപ്തി-എസ്എംവൈഎം ആലപ്പുഴ ഫൊറോന ഡയറക്ടര്‍ ഫാ. സോണി പള്ളിച്ചിറയില്‍ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോയല്‍ റോയ് അധ്യക്ഷനായി. ഫാ. ഐബിന്‍ പകലോമറ്റം( യൂത്ത് സൈക്കോളജിസ്റ്റ്), ഫാ. സാവിയോ മാനാട്ട് (യുവദീപ്തി-എസ്എംവൈഎം അതിരൂപതാ ഡയറക്ടര്‍) ക്ലാസുകള്‍ക്ക് നേതൃത്വം നല്‍കി. അതിരൂപതാ റിസോഴ്‌സ് ടീമിന്‍റെയും യൂണിറ്റ് എക്‌സിക്യൂട്ടീവ്സിന്‍റെയും നേതൃത്വത്തിലാണ് ക്യാമ്പ് നടന്നത്. യൂണിറ്റ് ഡയറക്ടര്‍ ഫാ. ജോബിന്‍ തൈപ്പറമ്പില്‍ മുഖ്യപ്രഭാഷണം നടത്തി. അനിമേറ്റര്‍ സിസ്റ്റര്‍ അനറ്റ്, ബ്രദര്‍ ഡിക്കന്‍ പോള്‍, കൈക്കാരന്‍ റോയ് വേലിക്കെട്ടില്‍ എന്നിവര്‍ പ്രസംഗിച്ചു.

കടലാക്രമണം തടയാൻ പിടിപ്പിച്ച നിരവധി കാറ്റാടി മരങ്ങൾ കനത്ത മഴയിലും ശക്തമായ തിരമാലയിലും നിലംപൊത്തി

അമ്പലപ്പുഴ: കടലാക്രമണം തടയാൻ പിടിപ്പിച്ച നിരവധി കാറ്റാടി മരങ്ങൾ കനത്ത മഴയിലും ശക്തമായ തിരമാലയിലും നിലംപൊത്തി. പുന്നപ്ര വിയാനി, ചള്ളി, നർബോന, പറവൂർ ഗലീലിയ, വാടക്കൽ അറപ്പപൊഴി, വട്ടയാൽ ഇഎസ്ഐ, വാടപ്പൊഴി ഭാഗങ്ങളിലാണ് കടലാക്രമണം ശക്തമായി തുടരുന്നത്. തീരങ്ങളിലെ നൂറുകണക്കിനു മരങ്ങളാണ് അടിവേരിളകി നിലംപൊത്തിയത്. ഇവ വെട്ടി മാറ്റാൻ അധികൃതർ ശ്രമിക്കാത്തതുമൂലം പൊന്തുവലക്കാർ ഉൾപ്പെടെയുള്ള ചെറിയ മത്സ്യബന്ധന യാനങ്ങൾക്കു കടലിൽ ഇറക്കാൻ പറ്റാത്ത സ്ഥിതിയാണ്. കൂറ്റൻ മരങ്ങൾ കടലിലേക്ക് ഒഴുകുന്ന പൊഴിമുഖത്തിന് തടസമായാണ് കിടക്കുന്നത്. അതേസമയം, കാലാവസ്ഥാ ഗവേഷണ കേന്ദ്രത്തിന്‍റെ ആവർത്തിച്ചുള്ള മുന്നറിയിപ്പുള്ളതിനാൽ ചാകര ഉറച്ച തോട്ടപ്പള്ളി ഹാർബറിൽനിന്നു ഭൂരിഭാഗം വള്ളങ്ങളും കടലിൽ ഇറക്കിയില്ല. വളർച്ചയെത്താത്ത ചെറിയ അയല പിടിക്കുന്നതിനും നിരോധനമേർപ്പെടുത്തിയിട്ടുണ്ട്. നിരോധനം ലംഘിച്ച് മീൻ പിടിച്ച വള്ളങ്ങൾക്കെതിരേ കഴിഞ്ഞ ദിവസം ഫിഷറീസ് വകുപ്പ് പിഴ ചുമത്തിയിരുന്നു.

നെടുമുടി കരീപ്പാടത്തു മടവീഴ്ച

മങ്കൊമ്പ്: കനത്ത മഴയെത്തുടർന്ന് ജലനിരപ്പുയർന്നതോടെ കുട്ടനാട്ടിൽ വീണ്ടും മടവീഴ്ച. നെടുമുടി കൃഷിഭവൻ പരിധിയിൽ വരുന്ന കരീപ്പാടം പാടശേഖരത്തിലാണ് ഇന്നലെ മടവീണത്. 130 ഓളം ഏക്കർ വരുന്ന പാടശേഖരത്തിൽ വിതകഴിഞ്ഞു 15 ദിവസം പിന്നിട്ടിരുന്നു. പാടശേഖരത്തിന്‍റെ പയ്യനാട് പുറംബണ്ടിലാണ് ഇന്നലെ പുലർച്ചയോടെ മടവീണത്. പുറംബണ്ടിൽ രൂപപ്പെട്ട അള്ള് വലുതായി മടവീഴ്ചയിലേക്കു നീങ്ങുകയായിരുന്നു. മടവീഴ്ചയിൽ നാലു മീറ്ററോളം പുറംബണ്ട് തകർന്നു. കർഷകരുടെ അവസരോചിതമായ ഇടപെടലിനെത്തുടർന്ന് മട തടയുകയും പുറംബംണ്ട് താത്കാലികമായി ബലപ്പെടുത്തുകയുമായിരുന്നു.

ജലനിരപ്പ് ഉയരുന്നു; 2 മാസത്തിനിടെ നാലാമത്തെ വെള്ളപ്പൊക്കം

എടത്വ: മഴയ്ക്ക് ശമനമില്ല, ജലനിരപ്പ് നന്നേ ഉയരുന്നു. ആശങ്കയിലായി കുട്ടനാട്ടുകാര്‍. രണ്ടു മാസത്തിനിടയിലെ നാലാമത്തെ വെള്ളപ്പൊക്കമാണ് ഇപ്പോള്‍ ഉണ്ടായിരിക്കുന്നത്. റോഡുകള്‍ ഉള്‍പ്പെടെ ഒട്ടുമിക്ക പ്രദേശങ്ങളും വെള്ളത്തില്‍ മുങ്ങി. തലവടിയില്‍ വീടുകളില്‍ വെള്ളം കയറിത്തുടങ്ങി. കാലവര്‍ഷം തുടങ്ങിയ ശേഷമുള്ള മൂന്നു വെള്ളപ്പൊക്കവും കുട്ടനാട്ടുകാര്‍ അതിജീവിച്ചിരുന്നു. തുടര്‍ച്ചയായി ചെയ്യുന്ന മഴയും വെള്ളപ്പൊക്കവും വീണ്ടും ആശങ്ക സൃഷ്ടിക്കുകയാണ്. മഴയ്‌ക്കൊപ്പം വീശിയടിക്കുന്ന ശക്തമായ കാറ്റും ജനജീവിതത്തെ സാരമായി ബാധിക്കുന്നുണ്ട്. താമസസ്ഥലത്തിന് സമീപത്ത് നില്‍ക്കുന്ന മരങ്ങളും പഴയ വീടുകളും നിലംപതിക്കുമോയെന്ന ആശങ്കയാണ് കുട്ടനാട്ടുകാര്‍ പങ്കുവയ്ക്കുന്നത്. കിഴക്കന്‍ വെള്ളത്തിന്‍റെ ശക്തി വര്‍ധിച്ചതോടെ പ്രധാന നദികളില്‍ വ്യാഴാഴ്ച മുതല്‍ ജലനിരപ്പ് ഉയര്‍ന്നിരുന്നു. ഇന്നലെ ഉച്ചയോടെ വെള്ളത്തിന്‍റെ വരവ് അല്പം നിലച്ചെങ്കിലും ഉച്ചയ്ക്കുശേഷമുള്ള കനത്ത മഴയില്‍ ജലനിരപ്പ് വീണ്ടും ഉയരാന്‍ തുടങ്ങി. നീരേറ്റുപുറം-മുട്ടാര്‍ റോഡുകളില്‍ വെള്ളം കയറിയതിനെത്തുടര്‍ന്ന് ബസ് സര്‍വീസ് ഇന്നലെ നിര്‍ത്തിവച്ചിരുന്നു. സര്‍വീസ് റോഡുകള്‍ മാത്രമല്ല ഇടറോഡുകളും പൊതുവഴികളും വെള്ളത്തില്‍ മുങ്ങിയിട്ടുണ്ട്. തലവടി പ്രദേശങ്ങളിലെ ചില വീടുകളില്‍ വെള്ളം കയറി. മിക്ക വീട്ടുമുറ്റവും വെള്ളത്തില്‍ മുങ്ങിയ നിലയിലാണ്. ചക്കുളത്തുകാവ് ക്ഷേത്രപരിസരവും വെള്ളത്തില്‍ മുങ്ങി. മഴ നീണ്ടുനിന്നാല്‍ മുന്‍പുണ്ടായ മൂന്നു വെള്ളപ്പൊക്കത്തേക്കാള്‍ ശക്തമാകാനാണ് സാധ്യത. മുട്ടാര്‍, തലവടി, വീയപുരം, എടത്വ, തകഴി പഞ്ചായത്തിലെ താഴ്ന്ന പ്രദേശങ്ങള്‍ വെള്ളത്തില്‍ മുങ്ങിയിട്ടുണ്ട്. തോട്ടപ്പള്ളി പൊഴിവഴി കടലിലേയ്ക്ക് ജലം ഒഴുക്കിവിടുന്നുണ്ടെങ്കിലും മഴയുടെ ശക്തിമൂലം ജലനിരപ്പ് ഉയരുകയാണ്. വെള്ളപ്പൊക്കം വിദ്യാര്‍ഥികളെ ഏറെ ബാധിക്കുന്നുണ്ട്. ഉള്‍പ്രദേശങ്ങളിലെ നഴ്‌സറി സ്‌കൂള്‍ വിദ്യാര്‍ഥികള്‍ ഉള്‍പ്പെടെ വെള്ളത്തില്‍ നീന്തിവേണം സ്‌കൂളുകളില്‍ എത്തിച്ചേരാന്‍. ഇക്കുറി നിരവധി അധ്യയന ദിനങ്ങളാണ് കുട്ടികള്‍ക്ക് നഷ്ടമായത്. ജലനിരപ്പ് അപകടനിലയില്‍ എത്തിയാല്‍ മാത്രമേ സ്‌കൂളുകള്‍ക്ക് അവധി നല്‍കാന്‍ സാധ്യതയുള്ളൂ. വെള്ളം ഉയരുന്ന സാഹചര്യത്തില്‍ റവന്യു വകുപ്പ് ജാഗ്രതാ നിര്‍ദേശം നല്‍കിയിട്ടുണ്ട്.

ചെങ്ങന്നൂരിൽ തെരുവുനായശല്യം രൂക്ഷം; ജനജീവിതം ദുഃസഹം

ചെങ്ങന്നൂര്‍: ചെങ്ങന്നൂരിലും സമീപപ്രദേശങ്ങളിലും തെരുവുനായശല്യം രൂക്ഷമായി. വഴിയാത്രക്കാര്‍ക്കും ഇരുചക്രവാഹനങ്ങളില്‍ സഞ്ചരിക്കുന്നവര്‍ക്കും ഭീഷണിയുയര്‍ത്തി നായ്ക്കളുടെ എണ്ണം ക്രമാതീതമായി വര്‍ധിച്ചതോടെ ജനജീവിതം ദുഃസഹമായി. മാലിന്യം അശാസ്ത്രീയമായി തള്ളുന്നതാണ് തെരുവുനായ്ക്കളുടെ വര്‍ധനവിന് പ്രധാന കാരണമെന്നു നാട്ടുകാര്‍ പരാതിപ്പെടുന്നു. ഹോട്ടലുകളില്‍നിന്നു പുറന്തള്ളുന്ന ഭക്ഷണാവശിഷ്ടങ്ങളും മത്സ്യ-മാംസ വ്യാപാരികള്‍ വലിച്ചെറിയുന്ന മാലിന്യങ്ങളും തെരുവുനായ്ക്കള്‍ പെരുകാന്‍ പ്രധാന കാരണമായി ചൂണ്ടിക്കാണിക്കപ്പെടുന്നു. ഭക്ഷണം ലഭിക്കാതെ വരുമ്പോള്‍ നായ്ക്കള്‍ ആളുകളെ ആക്രമിക്കുന്ന സ്ഥിതിയാണ്. നഗരത്തിലെ ഇടറോഡുകളിലും ആളൊഴിഞ്ഞ പുരയിടങ്ങളിലും അടഞ്ഞുകിടക്കുന്ന വ്യാപാര സ്ഥാപനങ്ങള്‍ക്കു മുന്നിലും നായ്ക്കള്‍ കൂട്ടമായി തമ്പടിക്കുന്നത് ഭീതിയുണ്ടാക്കുന്നു. പ്രഭാത സവാരിക്കാരും വിശ്വാസികളും പത്ര-പാല്‍ വിതരണക്കാര്‍ എന്നിവരെല്ലാം തെരുവുനായ്ക്കളുടെ ആക്രമണ ഭീഷണിയിലാണ്. ഫെഡറല്‍ ബാങ്കിന്‍റെ പരിസരം, ചെങ്ങന്നൂര്‍ സ്മാര്‍ട്ട് ബസാര്‍, ഇരുപത്തിയേഴാം വാര്‍ഡ് വലിയപള്ളിയുടെ സമീപ പ്രദേശങ്ങള്‍, സപ്ലൈകോയുടെ സമീപം, മാര്‍ക്കറ്റ്, ബഥേല്‍ ജംഗ്ഷന്‍ എന്നിവിടങ്ങളില്‍ തെരുവുനായ്ക്കളുടെ ശല്യം അതിരൂക്ഷമാണ്. വളര്‍ത്തുമൃഗങ്ങളെയും തെരുവുനായ്ക്കള്‍ ആക്രമിക്കുന്ന സംഭവങ്ങളുണ്ടായിട്ടുണ്ട്. വീടുകളില്‍ വളര്‍ത്തുന്ന നായ്ക്കളെ രാത്രിയില്‍ അഴിച്ചുവിടാന്‍ പോലും കഴിയാത്ത അവസ്ഥയാണെന്നു നാട്ടുകാര്‍ പറയുന്നു. അധികൃതര്‍ക്കെതിരേ പ്രതിഷേധം ഇരുചക്രവാഹനങ്ങള്‍ക്ക് കുറുകെ ചാടി നായ്ക്കള്‍ അപകടങ്ങള്‍ സൃഷ്ടിക്കുന്നത് പതിവാണ്. തെരുവുനായ്ക്കളുടെ ശല്യം ഗുരുതര പ്രശ്‌നങ്ങള്‍ ഉണ്ടാക്കിയിട്ടും ഉത്തരവാദിത്വപ്പെട്ടവര്‍ മൗനം പാലിക്കുന്നത് വലിയ പ്രതിഷേധത്തിന് ഇടയാക്കിയിട്ടുണ്ട്. തെരുവുനായ്ക്കളുടെ എണ്ണം നിയന്ത്രിക്കുന്നതിനായി നഗരസഭ ആവിഷ്‌കരിച്ച എബിസി (ആനിമല്‍ ബര്‍ത്ത് കണ്‍ട്രോള്‍) പദ്ധതിക്ക് കാര്യമായ ഫലമുണ്ടാകുന്നില്ലെന്നും ആക്ഷേപമുണ്ട്. നഗരത്തിലെ തെരുവുനായ്ക്കളെ കൊണ്ടുപോയി വന്ധ്യംകരണം നടത്തി അതേസ്ഥലത്തുതന്നെ തിരികെ വിടുന്നതാണ് ഈ പദ്ധതി. നാട്ടുകാര്‍ക്ക് ഭീഷണിയാകുന്ന തെരുവുനായ്ക്കളെ തുരത്താന്‍ അടിയന്തര നടപടി സ്വീകരിക്കണമെന്ന ആവശ്യം ശക്തമായിരിക്കുകയാണ്. റോയി ചെങ്ങന്നൂര്‍ (പത്രഏജന്‍റ്) മുനിസിപ്പാലിറ്റിയിലെ 27-ാം വാര്‍ഡില്‍, വലിയ പള്ളിയുടെ സമീപപ്രദേശങ്ങളില്‍ തെരുവുനായ്ക്കളുടെ ശല്യം രൂക്ഷമാണ്. പുലര്‍ച്ചെ സൈക്കിളില്‍ വീട്ടില്‍നിന്നു ചെങ്ങന്നൂര്‍ ടൗണിലേക്ക് പത്രം എടുക്കാന്‍ പോകുമ്പോള്‍ ഇത് വലിയ ഭീഷണിയുയര്‍ത്തുന്നു. ചിലപ്പോള്‍ നായ്ക്കള്‍ പിന്നാലെ കൂടുകയും ചെയ്യുന്നു. കൂടാതെ, കരുവേലിപ്പടിക്കല്‍നിന്നും പേരിശേരിക്കു പോകുന്ന റോഡില്‍ വഴിയരുകുകള്‍ കാടുപിടിച്ച് കിടക്കുന്നതിനാല്‍ ഇഴജന്തുക്കളുടെ ശല്യവും ഈ പ്രദേശത്ത് രൂക്ഷമാണ്. ഇതിന് അടിയന്തരമായി നഗരസഭ മുന്‍കൈയെടുത്ത് പരിഹാരം കാണുകയും ജനങ്ങളുടെ സുരക്ഷിതമായ സഞ്ചാരം ഉറപ്പാക്കുകയും വേണം.

തഴക്കര പഞ്ചായത്തിൽ സാംസ്കാരികകേന്ദ്രം നിർമിക്കുന്നു

മാങ്കാംകുഴി: കലാ സാഹിത്യ രംഗങ്ങളില്‍ സമഗ്ര സംഭാവനകള്‍ നല്‍കി പ്രശസ്തരാവുകയും നാടിനെ അടയാളപ്പെടുത്തി മണ്‍മറഞ്ഞുപോയ ഓണാട്ടുകരയുടെ സാഹിത്യകാരന്‍ പാറപ്പുറത്ത്, നാടന്‍പാട്ട് കലാകാരന്‍ വെട്ടിയാര്‍ പ്രേംനാഥ്, കാഥികന്‍ പി.കെ. വെട്ടിയാര്‍ എന്നീ മൂന്ന് മഹാരഥന്മാരുടെ സ്മരണയ്ക്കായി തഴക്കര പഞ്ചായത്തില്‍ സാംസ്‌കാരികകേന്ദ്രം നിര്‍മിക്കുന്നു. നിലവിലെ പഞ്ചായത്ത് ലൈബ്രറി ഹാളിന്‍റെ മുകളിലത്തെ നിലയിലാണ് സാംസ്‌കാരികകേന്ദ്രം നിര്‍മിക്കുന്നത്. നിര്‍മാണ പ്രവര്‍ത്തനങ്ങള്‍ കഴിഞ്ഞ ദിവസം ആരംഭിച്ചു. പഞ്ചായത്തിന്‍റെ തനത് ഫണ്ടില്‍നിന്ന് അഞ്ച് ലക്ഷം രൂപ വിനിയോഗിച്ചാണ് സാംസ്‌കാരികകേന്ദ്രം നിര്‍മിക്കുന്നത്. ഓണാട്ടുകരയുടെ സ്പന്ദനങ്ങള്‍ എഴുത്തിലൂടെ സന്നിവേശിപ്പിച്ച സാഹിത്യകാരന്‍ പാറപ്പുറത്തിന്‍റെ പേരില്‍ ജന്മനാട്ടില്‍ സ്മാരകം നിര്‍മിക്കണമെന്നുള്ളത് വര്‍ഷങ്ങളായുള്ള ആവശ്യമാണ്. പാറപ്പുറത്തിന്‍റെ പേരില്‍ ജനകീയമായി നിര്‍മിച്ച പഠനകേന്ദ്രവും വായനശാലയും കുന്നം ഗ്രാമത്തിലുണ്ട്. എന്നാല്‍, ഇതുവരെ സ്മാരകം നിര്‍മിച്ചിട്ടില്ല. കിഴക്കേ പൈനുംമൂട്ടില്‍ കുഞ്ഞുനൈനാൻ ഈശോയുടെയും ശോശാമ്മയുടെയും മകനായി 1924 നവംബര്‍ 14-ന് തഴക്കര പഞ്ചായത്തിലെ കുന്നം ഗ്രാമത്തിലാണ് കെ. ഈശോ മത്തായി എന്ന പാറപ്പുറത്തിന്‍റെ ജനനം. തഴക്കര പഞ്ചായത്തിലെ വെട്ടിയാര്‍ ഗ്രാമത്തില്‍ ജനിച്ചവരാണ് വെട്ടിയാര്‍ പ്രേംനാഥും പി.കെ. വെട്ടിയാറും. നാടന്‍ കലാകാരനും ഗവേഷകനുമായി പ്രശസ്തനായ വെട്ടിയാര്‍ പ്രേംനാഥ് മധ്യകേരളത്തിലെ കീഴാള സമൂഹത്തിനിടയിലെ പാട്ടുകളും പുരാവൃത്തങ്ങളും സമാഹരിക്കുക എന്ന ക്ലേശകരമായ പ്രവര്‍ത്തനത്തിനായി ജീവിതം ഉഴിഞ്ഞുവച്ച ഗവേഷകനായിരുന്നു. ഇദ്ദേഹത്തിന്‍റെ സ്മരണാര്‍ഥം ഗ്രന്ഥശാല വെട്ടിയാറില്‍ പ്രവര്‍ത്തിക്കുന്നുണ്ട്. 1923 ലാണ് കാഥികന്‍ പി.കെ. വെട്ടിയാര്‍ ജനിച്ചത്. വെട്ടിയാര്‍ പഴയകോയിക്കല്‍ നാരായണപിള്ള എന്നാണ് പൂര്‍ണനാമം. നാടകാഭിനയവുമായാണ് കലാരംഗത്തേക്കുള്ള പ്രവേശനം. സാമ്പത്തിക പരാജയം കാരണം നാടകരംഗത്തോട് വിടപറഞ്ഞു. കഥാപ്രസംഗം തുടങ്ങി. കഥാപ്രസംഗ കലയില്‍ ജനസഹസ്രങ്ങളെ ഇളക്കിമറിച്ച കാഥികനായി പി.കെ. വെട്ടിയാര്‍ മാറി.

പ്രഥമ പഞ്ചാമൃതം പുരസ്കാരം ശ്രീകുമാരൻ തമ്പിക്ക്

മാവേലിക്കര: തഴക്കര ശ്രീ സുബ്രഹ്‌മണ്യ ഹൈന്ദവ സേവാസമിതിയുടെ പ്രഥമ പഞ്ചാമൃതം പുരസ്‌കാരം കവിയും ഗാനരചയിതാവുമായ ശ്രീകുമാരന്‍ തമ്പിക്ക്. ഓഗസ്റ്റ് പത്തിന് രാവിലെ 10 ന് നടക്കുന്ന ചടങ്ങില്‍ പോത്തന്‍കോട് ശാന്തിഗിരി ആശ്രമം ജനറല്‍ സെക്രട്ടറി ഗുരുരത്നം ജ്ഞാനതപസ്വി പുരസ്‌കാരം സമ്മാനിക്കും. 25,000 രൂപയും പ്രശസ്തിപത്രവും ഫലകവും ഉള്‍പ്പെടുന്നതാണ് പുരസ്‌കാരം. സമ്മേളനം എം.എസ്. അരുണ്‍കുമാര്‍ എംഎല്‍എ ഉദ്ഘാടനം ചെയ്യും. ഡോ. എഴുമറ്റൂര്‍ രാജരാജവര്‍മ മുഖ്യപ്രഭാഷണം നടത്തും. കല, സംസ്‌കാരം, സാമൂഹികം, വിദ്യാഭ്യാസം, സാഹിത്യം, കായികം, ആരോഗ്യം, മാധ്യമപ്രവര്‍ത്തനം തുടങ്ങിയ മേഖലകളില്‍നിന്ന് തെരഞ്ഞെടുക്കപ്പെടുന്നവര്‍ക്കാണ് പുരസ്‌കാരം. തുടര്‍ന്നുള്ള എല്ലാ വര്‍ഷവും പുരസ്‌കാരം വിതരണം ചെയ്യുമെന്നു ഭാരവാഹികളായ പ്രസിഡന്‍റ് ഡി. ജയപ്രകാശ്, വൈസ് പ്രസിഡന്‍റ് പി.എം. സുഭാഷ്, സെക്രട്ടറി ആര്‍. മനോജ്, ജോയിന്‍റ് സെക്രട്ടറി സി.എസ്. പ്രശാന്ത്, ട്രഷറര്‍ ടി.ആര്‍. രാജേന്ദ്രന്‍, പ്രവര്‍ത്തകസമിതി അംഗങ്ങളായ സുരേഷ് നെടുമ്പുറത്ത്, കെ.ജി. മഹാദേവന്‍ എന്നിവര്‍ അറിയിച്ചു.

അധികൃതരുടെ നിർദേശം കാറ്റിൽപ്പറത്തി ബസുകൾ നിർത്തുന്നത് നടുറോഡിൽ

ചാരുംമൂട്: മോട്ടോർ വാഹനവകുപ്പ് ഉദ്യോഗസ്ഥർ കർശന നിർദേശം നൽകിയിട്ടും ചാരുംമൂട് ജംഗ്‌ഷനിൽ സ്വകാര്യബസുകൾ ഉൾപ്പെടെ നടുറോഡിൽ നിർത്തി യാത്രക്കാരെ കയറ്റുന്നത് അപകടസാധ്യത വർധിപ്പിക്കുന്നു. ബസുകൾ റോഡിൽ നിർത്തി യാത്രക്കാരെ ഇറക്കുകയും കയറ്റുകയും ചെയ്യുന്നതു മൂലം ജംഗ്‌ഷനിൽ ഗതാഗതക്കുരുക്കും രൂക്ഷമാകുകയാണ്. ചാരുംമൂട് ജംഗ്‌ഷനിൽ ബസുകൾക്ക് നിർത്താൻ പ്രത്യേകം സ്റ്റോപ്പുകൾ അനുവദിച്ചു നൽകിയിട്ടും ബസുകൾ സ്റ്റോപ്പുകളിൽ നിർത്താതെ തോന്നുന്നിടത്ത് നിർത്തി യാത്രക്കാരെ കയറ്റുകയാണ്. കായംകുളം-പുനലൂർ റോഡിൽ മിനിറ്റുകളുടെ വ്യാത്യാസത്തിലാണ് ബസുകൾ സർവീസ് നടത്തുനത്. കെ.പി. റോഡിലൂടെ സർവീസ് നടത്തുന്ന ബസുകൾ മറ്റ് വാഹനങ്ങൾക്ക് കടന്നുപോകാൻ പോലും കഴിയാത്തതരത്തിൽ റോഡിൽ നിർത്തുന്നുവെന്നാണ് പരാതി. പിന്നാലെ എത്തുന്ന വലിയ വാഹനങ്ങൾ ഉൾപ്പെടെ കടന്നുപോകാൻ ഏറെ പ്രയാസപ്പെടുന്ന കാഴ്ചയാണ് നിത്യവും കാണാൻ കഴിയുന്നത്. കൊല്ലം-തേനി ദേശീയപാതയുടെയും കായംകുളം - പുനലൂർ കെപി റോഡിന്‍റെയും സംഗമ ജംഗ്‌ഷനായ ചാരുംമൂട് ജംഗ്‌ഷനിലെ നാല് ഭാഗത്തും ബസ് സ്റ്റോപ്പുകളും ബസ് കാത്തിരിപ്പ് കേന്ദ്രവും ഉണ്ടായിട്ടും ബസുകൾ നിർത്തുന്നത് റോഡിന്‍റെ മധ്യത്തിലാണ്. എന്നാൽ, ചില സ്വകാര്യബസുകൾ നിയമം കൃത്യമായി പാലിക്കുന്നുണ്ട്. നിർദിഷ്ട ബസ് സ്റ്റോപ്പിൽ അല്ലാതെ തോന്നുംപടി നിർത്തി യാത്രക്കാരെ കയറ്റുകയും ഇറക്കുകയും ചെയ്യുന്ന സ്വകാര്യബസുകൾക്കെതിരേ രണ്ടുമാസം മുമ്പ് മോട്ടോർ വാഹനവകുപ്പ് കർശന നടപടി സ്വീകരിച്ചിരുന്നു. മാവേലിക്കര ജോയിന്‍റ് ആർടിഒ എം.ജി. മനോജിന്‍റെ നിർദേശപ്രകാരം മോട്ടോർ വാഹനവകുപ്പ് ഉദ്യോഗസ്ഥർ ബസുകളുടെ അനധികൃത പാർക്കിംഗ് നിരീക്ഷിക്കാനായി മഫ്തിയിലാണ് പരിശോധന നടത്തിയത്. പരിശോധനയെത്തുടർന്ന് നിർദിഷ്ട ബസ് സ്റ്റോപ്പിൽ അല്ലാതെ യാത്രക്കാരെ കയറ്റുകയും ഇറക്കുകയും ചെയ്ത ബസുകൾക്കെതിരേ അന്ന് നടപടിയെടുത്തിരുന്നു. എന്നിട്ടും ഉദ്യോഗസ്ഥരുടെ നിർദേശങ്ങൾ കാറ്റിൽപ്പറത്തി ബസുകൾ നിയമ ലംഘനം തുടരുകയാണ്.

രാത്രികാല ബസ് സർവീസുകൾ കാര്യക്ഷമമാക്കണം

അന്പലപ്പുഴ: ഗ്രാമീണ സർവീസുകളും രാത്രികാല സർവീസുകളും കാര്യക്ഷമമാക്കണമെന്ന് കെഎസ്ആർ ടിസി പെൻഷനേഴ്സ് ഓർഗനൈസേഷൻ. കോവിഡ് കാലഘട്ടത്തിൽ താത്കാലികമായി നിർത്തിവച്ചിരുന്ന ഗ്രാമപ്രദേശങ്ങളിലേക്കുള്ള ബസ് സർവീസുകളും സ്റ്റേ ഉൾപ്പെടെയുള്ള രാത്രികാല സർവീസുകളൂം പുനരാരംഭിക്കണം എന്ന് കെഎസ്ആർടിസി പെൻഷനേഴ്സ് ഓർഗനൈസേഷൻ അഭ്യർഥിച്ചു. യൂണിറ്റ് പ്രസിഡന്‍റ് ബേബി പാറക്കാടൻ അധ്യക്ഷത വഹിച്ചു. ജില്ലാ സെക്രട്ടറി എ.പി. ജയപ്രകാശ് യോഗം ഉദ്ഘാടനം ചെയ്തു. യൂണിറ്റ് സെക്രട്ടറി വി. രാധാകൃഷ്ണൻ അവതരിപ്പിച്ച സംഘടന പ്രവർത്തന റിപ്പോർട്ടും യൂണിറ്റ് ട്രഷറർ എം. പി. പ്രസന്നൻ അവതരിപ്പിച്ച ആറുമാസത്തെ വരവുചെലവ് കണക്കുകളും യോഗം അംഗീകരിച്ചു. കേന്ദ്രകമ്മിറ്റി തീരുമാനങ്ങൾ വിശദീകരിച്ചുകൊണ്ട് കേന്ദ്രകമ്മിറ്റി അംഗം ജി. തങ്കമണി പ്രസംഗിച്ചു. പെൻഷനേഴ്സ് ഓർഗനൈസേഷൻ അംഗങ്ങൾക്കായി ഏർപ്പെടുത്തിയിരിക്കുന്ന മരണാനന്തര ക്ഷേമനിധി തുകയും അംഗങ്ങൾക്കുള്ള ചികിത്സാ സഹായ ധനവും വിതരണം ചെയ്തു.

ഹരിത ചട്ടത്തിന്‍റെ നിറവിൽ തൃക്കുന്നപ്പുഴയിൽ പിതൃബലിതർപ്പണം

ഹരിപ്പാട്: ലക്ഷക്കണക്കിന് ആളുകൾ കർക്കടക വാവ് ദിനത്തിൽ പിതൃക്കൾക്ക് ബലിയർപ്പിക്കാനെത്തുന്ന തൃക്കുന്നപ്പുഴയിൽ ഹരിത ചട്ടം പാലിച്ചു ബലിതർപ്പണ ചടങ്ങുകൾ ക്രമീകരിക്കാൻ പഞ്ചായത്തും ഹരിതകർമ സേനയും നടത്തിയത് മാതൃകാപരമായ പ്രവർത്തനം. പഞ്ചായത്തിലെ ഹരിതകർമ സേനാംഗങ്ങൾ ഓലകൊണ്ടുള്ള വട്ടികളും കമാനങ്ങളുമായാണ് ബലിതർപ്പണത്തിനെത്തിയവരെ വരവേറ്റത്. ക്ഷേത്രം മുതൽ ബലിതർപ്പണ ചടങ്ങുകൾ നടക്കുന്ന കടൽത്തീരം വരെയുള്ള ഭാഗങ്ങളിൽ കുപ്പികളുൾപ്പെടെയുള്ള പ്ലാസ്റ്റിക് മാലിന്യങ്ങൾ ഹരിത കർമ സേനാംഗങ്ങൾ ശേഖരിച്ചു. ബലിതർപ്പണ ചടങ്ങുകൾക്കുശേഷം തൃക്കുന്നപ്പുഴ കടൽത്തീരത്തെ മാലിന്യങ്ങൾ ഹരിതകർമ സേനാംഗങ്ങളുടെ നേതൃത്വത്തിൽ വൃത്തിയാക്കുകയും ചെയ്തു.

ആയുർവേദ മെഡിക്കൽ ക്യാമ്പ്

ചേർത്തല: മുട്ടം വിൻസന്‍റ് ഡി പോൾ വനിതാ വിഭാഗം പുനർജിത് ആയുർവേദ ആശുപതിയുമായി സഹകരിച്ച് മില്ലേനിയം ഹാളിൽ സൗജന്യ ആയുർവേദ മെഡിക്കൽ ക്യാമ്പ് നടത്തി. മുട്ടം സെന്‍റ് മേരീസ് ഫൊറോന സഹവികാരി ഫാ. ബോണി കട്ടയ്ക്കകത്തൂട്ട് ഉദ്ഘാടനം ചെയ്തു. ഏരിയ കൗൺസിൽ പ്രസിഡന്‍റ് സിമില ജോസ് അധ്യക്ഷത വഹിച്ചു. സീനിയർ വൈസ് പ്രസിഡന്‍റ് ബേബി ജോൺ, യൂത്ത് വിഭാഗം പ്രസിഡന്‍റ് ബോണി കുരുവിള, ബിന്ദു തോമസ്, സോണിയ ജോഫി, ഡോ. അനുജ, ഡോ. ബിജു സ്കറിയ, ആലീസ് ഐസക്, ജാൻസി ഡൊമിനിക് എന്നിവർ പ്രസംഗിച്ചു.

ന്യൂനപക്ഷങ്ങളോടുള്ള അവഗണനയിൽ പ്രതിഷേധിച്ചു

ആലപ്പുഴ: വർഷങ്ങളായി ന്യൂനപക്ഷ കമ്മീഷനിൽ കമ്മീഷൻ മെംബർമാരും മറ്റു ഭാരവാഹികളും ഇല്ലാതെ പ്രവർത്തനം മന്ദീഭവിച്ച് കിടക്കുകയാണ് . ഇത് തീർച്ചയായും ന്യൂനപക്ഷങ്ങളോടുള്ള കടുത്ത അവഗണനയാണ്. ന്യൂനപക്ഷങ്ങൾക്ക് താങ്ങായി പ്രവർത്തിക്കാൻ വിഭാവനം ചെയ്ത ഈ സംവിധാനം ഇത്തരത്തിൽ അനാഥമാക്കി അതിന്‍റെ പ്രയോജനം ന്യൂനപക്ഷങ്ങൾക്ക് ലഭിക്കാത്തതിൽ പ്രസിഡന്‍റ് ജിമ്മിച്ചൻ നടിച്ചിറയുടെ അധ്യക്ഷതയിൽ ചേർന്ന എക്യുമെനിക്കൽ ആക‌്ഷൻ ഫോറം യോഗം പ്രതിഷേധിച്ചു. എല്ലാ ന്യൂനപക്ഷ വിഭാഗങ്ങളുടെയും സാന്നിധ്യം ഉറപ്പുവരുത്തിക്കൊണ്ട് അടിയന്തരമായി കമ്മീഷന്‍റെ പ്രവർത്തനം സുഗമമാക്കത്തക്കരീതിയിൽ ക്രമീകരിക്കണമെന്ന് യോഗം ആവശ്യപ്പെട്ടു. വൈസ് പ്രസിഡന്‍റ് ചാക്കപ്പൻ ആന്‍റണി വിഷയം അവതരിപ്പിച്ചു. അലക്സാണ്ടർ പുത്തൻപുര, എബി കിടങ്ങറ, ജയിംസ് കോയിപ്പള്ളി, തോമസുകുട്ടി ചമ്പക്കുളം, പ്രമോദ് നെടുമുടി, മാത്തുക്കുട്ടി കരിവേലിത്തറ, പ്രഫ. ഡാർലി മിത്രക്കരി, ആന്‍റണി നെല്ലുവേലി എന്നിവർ പ്രസംഗിച്ചു.

ന്യൂനപക്ഷങ്ങളുടെ കാവൽപ്പുരകൾ കേന്ദ്രസർക്കാർ ഇല്ലാതാക്കുന്നു

കിടങ്ങറ: യുപിഎ സർക്കാർ പതിറ്റാണ്ടുകൾക്കു മുമ്പേ ആരംഭിച്ച ന്യൂനപക്ഷ സംരക്ഷണ കാവൽപ്പുരകൾ കേന്ദ്ര സർക്കാർ ഓരോന്നായി പൊളിച്ചുനീക്കുകയാണെന്നും ഇത് നൂനപക്ഷങ്ങളുടെ അവകാശങ്ങളുടെ മേലുള്ള കടന്നുകയറ്റമാണെന്നും കത്തോലിക്ക കോൺഗ്രസ് ചങ്ങനാശേരി ഫൊറോന സമിതി. കേന്ദ്ര നൂനപക്ഷ കമ്മീഷനിൽ ക്രൈസ്തവ പ്രാതിനിധ്യം ഉറപ്പാക്കാൻ കേന്ദ്ര ന്യൂനപക്ഷ കാര്യ സഹമന്ത്രി ജോർജ് കുര്യൻ തയാറാകണമെന്നും കത്തോലിക്ക കോൺഗ്രസ് ആവശ്യപ്പെട്ടു. പ്രസിഡന്‍റ് കുഞ്ഞുമോൻ തുമ്പൂങ്കൽ അധ്യക്ഷത വഹിച്ചു. ഡയറക്ടർ ഫാ. ലിബിൻ തുണ്ടുകളം ഉദ്ഘാടനം ചെയ്തു. ഗ്ലോബൽ സെക്രട്ടറി ടോമിച്ചൻ അയ്യരുകുളങ്ങര, അതിരൂപത സെക്രട്ടറി സൈബി അക്കര, ഭാരവാഹികളായ ഔസേപ്പച്ചൻ ചെറുകാട്, കെ.പി. മാത്യൂ കടന്തോട് തുടങ്ങിയവർ പ്രസംഗിച്ചു.

ഹരിപ്പാട് വ്യാപാരഭവൻ ഉദ്ഘാടനം 27ന്

ഹരിപ്പാട്: കേരള വ്യാപാരി വ്യവസായി ഏകോപനസമിതി ഹരിപ്പാട് യൂണിറ്റ് പുതിയതായി പണികഴിപ്പിച്ച വ്യാപാരഭവന്‍റെ ഉദ്ഘാടനം 27ന് വൈകിട്ട് മൂന്നിന് മന്ത്രി പി. പ്രസാദ് നിർവഹിക്കും. കോൺഫറൻസ് ഹാൾ ഉദ്ഘാടനം രമേശ് ചെന്നിത്തല എംഎൽഎയും ഷോപ്പിംഗ് കോംപ്ലക്സ് ഉദ്ഘാടനം സംസ്ഥാന പ്രസിഡന്‍റ് രാജു അപ്സരയും ഓഫീസ് ഉദ്ഘാടനം സംസ്ഥാന വൈസ് പ്രസിഡന്‍റ് പി.സി. ജേക്കബും നിർവഹിക്കും. സംസ്ഥാന സെക്രട്ടറി വി. സബിൻ രാജ് ശിലാഫലകം അനാച്ഛാദനം ചെയ്യും. യൂണിറ്റ് പ്രസിഡന്‍റ് വി.സി. ഉദയകുമാർ അധ്യക്ഷനാകും. മുനിസിപ്പൽ ചെയർമാൻ കെ.കെ.രാമകൃഷ്ണൻ വിദ്യാഭ്യാസ അവാർഡ്ദാനം നടത്തും. കയർഫെഡ് ചെയർമാൻ ടി.കെ. ദേവകുമാർ മുതിർന്ന വ്യാപാരികളെ ആദരിക്കും. സംസ്ഥാന ട്രഷറർ ഡി. ദേവരാജൻ ചികിത്സാധനസഹായം വിതരണം ചെയ്യും. അപകട ഇൻഷ്വറൻസ് സർട്ടിഫിക്കറ്റ് വിതരണം സംസ്ഥാന വൈസ് പ്രസിഡന്‍റ് എ.ജെ. ഷാജഹാൻ നിർവഹിക്കും. സംസ്ഥാന സെക്രട്ടറി അഡ്വ. എ.ജെ. റിയാസ് വ്യാപാരികളും ജിഎസ്ടിയുടെ നിയമവശങ്ങളും എന്ന വിഷയത്തിൽ സംവദിക്കും. യൂണിറ്റ് വർക്കിംഗ്‌ പ്രസിഡന്‍റ് വി. മുരളീധരൻ അനുസ്മരണ പ്രസംഗം നടത്തും. യൂണിറ്റ് ജനറൽ സെക്രട്ടറി ഐ. ഹലീൽ സ്വാഗതവും ട്രഷറർ സുരേഷ് ഭവാനി നന്ദിയും പറയും. തുടർന്ന് സംഗീത വിരുന്ന്.

ബോര്‍ഡ് നശിപ്പിച്ചു

ഹരിപ്പാട്: വീയപുരം പഞ്ചായത്തിന്‍റെ മാലിന്യങ്ങള്‍ നിക്ഷേപിക്കരുതെന്ന് എഴുതി സ്ഥാപിച്ച ബോര്‍ഡ് നശിപ്പിച്ചു. രണ്ടാം വാര്‍ഡില്‍ ആറാട്ടുകടവ്, മുസ്‌ലിം പള്ളി റോഡില്‍ ഇരതോട് പാലത്തിനുതാഴെ കോണ്‍ക്രീറ്റ് ചെയ്ത് സ്ഥാപിച്ച ബോര്‍ഡാണ് കോണ്‍ക്രീറ്റ് തകര്‍ത്ത് ബോര്‍ഡ് നിലത്തിട്ടത്. തോട്ടില്‍ മത്സ്യാവിശിഷ്ടങ്ങളും മറ്റ് മാലിന്യങ്ങളും നിക്ഷേപിക്കുന്നതും പതിവായിരുന്നു. അതുപോലെ ആടുമാടുകളെ കുളിപ്പിക്കുന്നതിനും ഈ തോടാണ് ഉപയോഗിച്ചിരുന്നത്. മാലിന്യങ്ങള്‍ നിക്ഷേപിച്ചതോടെ ഇവിടെ ബോര്‍ഡ് സ്ഥാപിക്കുകയായിരുന്നു. ബോര്‍ഡ് നശിപ്പിച്ചവര്‍ക്ക് എതിരേ നിയമനടപടി സ്വീകരിക്കുമെന്ന് വാര്‍ഡ് മെംബര്‍ പി.എ. ഷാനവാസ് പറഞ്ഞു.

വേലിക്കകത്ത് വീടും പരിസരവും ശോകമൂകം

അന്പലപ്പുഴ: പുന്നപ്ര വയലാറിന്‍റെ വിപ്ലവ സൂര്യൻ വി.എസ്. അച്യുതാനന്ദൻ വലിയ ചുടുകാട്ടിൽ അന്ത്യവിശ്രമം കൊള്ളുമ്പോൾ കുടുബവീടായ പറവൂർ വേലിക്കകത്ത് വീടും പരിസരവും ശോകമൂകം. അഴിമതിക്കെത്തിരേ എന്നും ഉറച്ച നിലപാട് എടുത്തതിനന്‍റെ പേരിൽ ഒരു വിഭാഗത്തിന്‍റെ ശത്രുവായി വി.എസ് മാറിയെങ്കിലും അദ്ദേഹത്തിന് എന്തുമാത്രം ജനപിന്തുണയുണ്ടെന്ന് തെളിയിക്കുന്നതായിരുന്നു പുന്നപ്ര പറവൂരിലെ കുടുബവീട്ടിൽ പൊതുദർശനത്തിനു വച്ചപ്പോൾ കണ്ടകാഴ്ച. മലവെള്ളപ്പാച്ചിൽ പോലെ ഒഴുകിയെത്തിയ ജനക്കൂട്ടം മഹാസമുദ്രമായി. ധാർഷ്ട്യവും ധിക്കാരവുമില്ലാത്ത തങ്ങളുടെ നേതാവിനെ അവസാനമായി ഒരുനോക്കു കാണാൻ കേരളത്തിന്‍റെ നാനാഭാഗത്തുനിന്നു ഏറെ ത്യാഗം സഹിച്ചു എത്തിയിട്ടും തിരക്കുകാരണം വിങ്ങലോടെ മടങ്ങേണ്ടി വന്നവരുടെ കാഴ്ചയും വേലിക്കകത്തെ വീടിനു മുന്നിലെ നൊമ്പരക്കാഴ്ചയായിരുന്നു. മനുഷ്യനും മണ്ണിനും പ്രകൃതിക്കും നീതിക്കുമായി എന്നും നിലകൊണ്ടതായിരുന്നു അദ്ദേഹത്തെ വേറിട്ട മനുഷ്യനാക്കിയത്. മുഖ്യമന്ത്രിയും പ്രതിപക്ഷ നേതാവുമൊക്കെ ആയിരുന്ന സമയത്ത് പുന്നപ്ര വയലാർ രക്തസാക്ഷി വാരാചരണത്തിനും തിരുവോണ സദ്യ ഉണ്ണുന്നതിനും കൃത്യമായി അദ്ദേഹം പറവൂരിലെ കുടുബവീട്ടിൽ എത്തുമായിരുന്നു. വി.എസ് ഇല്ലെങ്കിലും അദ്ദേഹത്തിന്‍റെ ഭാര്യ വസുമതിയും മകൻ ഡോ. അരുൺകുമാറും മകൾ ആശയും അടങ്ങുന്ന കുടുംബം മരിക്കാത്ത ഓർമകളുമായി വീട്ടിൽ തന്നെയുണ്ട്. വിഎസിന്‍റെ ഭൗതീകശരീരം അടക്കം ചെയ്ത വലിയ ചുടുകാട് പുന്നപ്ര വയലാർ സ്മാരകത്തിൽ ഇന്നലെ വൈകിട്ടും നിരവധിപ്പേർ പുഷ്പാർച്ചന നടത്തി.

പായൽക്കുളങ്ങരയിലെ വെള്ളക്കെട്ടിനു പരിഹാരം

അമ്പലപ്പുഴ: അശാസ്ത്രീയമായ രീതിയിലുള്ള ദേശീയപാത നിർമാണം മൂലമുണ്ടായ വെള്ളക്കെട്ടിനു പരിഹാരം. പരിഹാരമുണ്ടായത് ദീപിക വാർത്തയെത്തുടർന്ന്. പായൽക്കുളങ്ങര ക്ഷേത്രത്തിന് വടക്കുഭാഗത്തുള്ള 40 ഓളം വീടുകളാണ് കനത്തമഴയിൽ മുങ്ങിയിരുന്നത്. പ്രളയകാലത്തുപോലും ഒരുതുള്ളി വെള്ളം കയറാതിരുന്ന ഈ പ്രദേശം അധികൃതരുടെ അനാസ്ഥയെത്തുടർന്നാണ് കടലിന് സമാനമായത്. പായൽക്കുളങ്ങര ജംഗ്ഷനിലെ ദേശീയപാത നിർമാണത്തിലെ അശാസ്ത്രീയത മൂലമാണ് ഈ കുടുംബങ്ങൾക്ക് പുറത്തിറങ്ങാൻ കഴിയാതെ വന്നിരുന്നത്. നേരത്തേ മഴവെള്ളം റോഡിന് കുറുകെയുള്ള ചാലിലൂടെ കിഴക്കു ഭാഗത്തുള്ള വെള്ളാഞ്ഞിലിത്തോട്ടിലേക്ക് ഒഴുകുമായിരുന്നു. ഇപ്പോൾ ദേശീയപാതാ വികസനത്തിന്‍റെ ഭാഗമായി ഇത് അടഞ്ഞതോടെ മഴവെള്ളം കുത്തനെ റോഡിന് പടിഞ്ഞാറ് ഭാഗത്തേക്ക് ഒഴുകുകയായിരുന്നു. ഇതോടെ കഴിഞ്ഞ ഏതാനും ദിവസമായി തോരാതെ പെയ്ത മഴയിൽ പ്രദേശമാകെ പ്രളയത്തിന് തുല്യമായി. പ്രാഥമികാവശ്യങ്ങൾ പോലും നിർവഹിക്കാൻ കഴിയാതെ ദുരിതമനുഭവിക്കുകയായിരുന്നു കുടുംബങ്ങൾ. ഇത് ദീപിക റിപ്പോർട്ട് ചെയ്തതോടെയാണ് അധികൃതർ ജെസിബി ഉപയോഗിച്ച് വെള്ളക്കെട്ട് നീക്കം ചെയ്തത്.

ആലപ്പുഴ മെഡിക്കൽ കോളജ് ആശുപത്രിയിൽ തീപിടിത്തം

അമ്പലപ്പുഴ: ആലപ്പുഴ മെഡിക്കൽ കോളജ് ആശുപത്രിയിൽ തീപിടിത്തം. ഒന്നാം നിലയിലെ ബ്ലഡ് ബാങ്കിന് എതിർവശത്തെ മൈക്രോബയോളജി ലാബിലാണ് തീപിടിത്തമുണ്ടായത്. രാത്രി 9.30 ഓടെയായിരുന്നു സംഭവം. ലാബിനുള്ളിൽനിന്ന് വർധിച്ച തോതിൽ പുക ഉയരുന്നത് ശ്രദ്ധയിൽപ്പെട്ടതോടെയാണ് തീപിടിത്തമാണന്ന് സ്ഥിരീകരിച്ചത്. ഷോർട്ട് സർക്യൂട്ടാണ് തീപിടിത്തത്തിനു കാരണമെന്നായിരുന്നു പ്രാധമിക നിഗമനം. തീപിടിത്തത്തെത്തുടർന്ന് ആശുപത്രിയിലെ മൈക്രോ ബയോളജി ലാബ് ഉൾപ്പെടെ സമീപത്തെ വിവിധ വിഭാഗങ്ങളിൽ വ്യാപകമായി പുക നിറഞ്ഞു. വിവരമറിയിച്ചതിനെ ത്തുടർന്ന് അഗ്നിരക്ഷാസേനയെത്തി പുക നീക്കം ചെയ്ത ശേഷമുള്ള പരിശോധനയിൽ ലാബിലുണ്ടായിരുന്ന ഫ്രിഡ്ജിന് തീപിടിച്ചതാണെന്ന് തിരിച്ചറിയുകയായിരുന്നു. പിന്നീട് തീ കെടുത്തി ആശുപത്രിയുടെ പ്രവർത്തനം സാധാരണ നിലയിലായി. മറ്റുനാശനഷ്ടങ്ങൾ റിപ്പോർട്ടു ചെയ്തിട്ടില്ല. രക്ഷാപ്രവർത്തനം നടത്തുന്നതിനിടെ പരിക്കേറ്റ മൂന്നു ജീവനക്കാർ ചികിത്സയിലാണ്.

കിഴക്കൻ വെള്ളത്തിന്‍റെ വരവ്; വീയപുരത്ത് വെള്ളപ്പൊക്കം

ഹരിപ്പാട്: കിഴക്കന്‍ വെള്ളത്തിന്‍റെ വരവും ശക്തമായ മഴയും കാരണം വീയപുരത്ത് വെള്ളപ്പൊക്കം. തൊട്ടടുത്തമാസങ്ങളിലായി നാലാമത്തെ വെള്ളപ്പൊക്കമാണ് ജനം നേരിടുന്നത്. കിഴക്കന്‍ വെള്ളത്തിന്‍റെ വരവ് ശക്തമായതോടെ ആറിന്‍റെ തീരങ്ങളിലുള്ളവരുടെ വീടുകള്‍ മിക്കതും വെള്ളത്തിലായി. അതുപോലെ പെയ്ത്തുവെള്ളം ഒഴുകിപ്പോകാത്ത ഇടങ്ങളില്‍ വെള്ളകെട്ടും രൂപപ്പെട്ടിട്ടുണ്ട്. ഒരാഴ്ചകൂടി മഴ തുടരുമെന്ന കാലാവസ്ഥ നിരീക്ഷണ കേന്ദ്രത്തിന്‍റെ മുന്നറിപ്പ് ജനങ്ങളില്‍ ഭീതിപരത്തിയിട്ടുണ്ട്. തുടരെയുണ്ടായ മൂന്നുദിവസത്തെ അവധി ബന്ധപ്പെട്ട ഉദ്യോഗസ്ഥര്‍ക്ക് ദുരിതപ്രദേശങ്ങള്‍ സന്ദര്‍ശിക്കാന്‍ കഴിഞ്ഞിട്ടില്ല. മേല്പാടം, തുരുത്തേല്‍, പാറേച്ചിറ, മങ്കോട്ട കണ്ണന്‍മാലില്‍, വെങ്കിട്ടച്ചിറ, കണത്താരം, കല്ലേലിപത്ത് എന്നിവിടങ്ങള്‍ വെള്ളത്തിനടിയിലാണ്. ഇക്കഴിഞ്ഞ വെള്ളപ്പൊക്കങ്ങളില്‍ നിരവധി വീടുകളുടെ മുകളില്‍ മരങ്ങള്‍ വീണ് നാശനഷ്ടമുണ്ടായി. സര്‍ക്കാര്‍ ധനസഹായം ഒന്നുംതന്നെ ലഭിച്ചിട്ടില്ലെന്ന് വീട്ടുകാര്‍ പറയുന്നു. മഴമൂലം ഈ മേഖലയിൽ വൈദ്യുതിയും ശുദ്ധജല വിതരണവും തടസപ്പെട്ടു. നദികളിലെ ജലനിരപ്പ് ക്രമാതീതമായി ഉയരുന്നതിനാൽ നൂറോളം വീടുകൾ വെള്ളപ്പൊക്ക ഭീഷണിയിലാണ്. ക്ഷീരകര്‍ഷകര്‍ മാടുകളുമായി മറ്റൊരിടത്തേക്ക് പോകാന്‍ കഴിയാത്ത അവസ്ഥയാണ്. മൃഗസംരക്ഷണവകുപ്പ് മൃഗാശുപത്രി മുഖേന ക്യാമ്പില്‍ കഴിഞ്ഞ ക്ഷീരകര്‍ഷകരുടെ മാടുകള്‍ക്ക് കാലിത്തീറ്റ സൗജന്യമായി കഴിഞ്ഞ വെള്ളപ്പൊക്കത്ത് കൊടുത്തത് ഏറെ വിവാദത്തിനു കാരണമായി. മാടുകളെ സുരക്ഷിതസ്ഥാനത്ത് എത്തിക്കാന്‍ കഴിയാത്തവര്‍ക്കു കൂടി കാലിത്തീറ്റ സൗജന്യമായി വിതരണം ചെയ്യണമെന്നാണ് ഇക്കൂട്ടരുടെ ആവശ്യം. തുടർച്ചയായ മഴയ്ക്കൊപ്പം കിഴക്കൻ വെള്ളത്തിന്‍റെ വരവ് ശക്തമാകുകയും ചെയ്തതോടെയാണ് താഴ്ന്ന പ്രദേശങ്ങൾ വെള്ളത്തിനടിയിലായി. സമീപ പഞ്ചായത്തുകളായ പള്ളിപ്പാട്, ചേപ്പാട്, ചെറുതന, കരുവാറ്റ, കുമാരപുരം എന്നിവിടങ്ങളിലും സ്ഥിതിവിഭിന്നമല്ല.

അപ്പര്‍കുട്ടനാട്ടില്‍ വീണ്ടും ജലനിരപ്പുയരുന്നു

എടത്വ: മഴ കനത്തതോടെ കുട്ടനാട്, അപ്പര്‍ കുട്ടനാട് മേഖലയില്‍ ജലനിരപ്പ് വീണ്ടും ഉയരുന്നു. താഴ്ന്ന പ്രദേശങ്ങള്‍ വെള്ളക്കെട്ടില്‍ മുങ്ങി. നദികളിലും ജലനിരപ്പുയര്‍ന്നു. വള്ളപ്പൊക്കം മൂലം മിത്രക്കരി-മുട്ടാര്‍-എടത്വ കെഎസ്ആര്‍ടിസി ബസ് സര്‍വീസ് ഇന്നുമുതല്‍ നിര്‍ത്തിവയ്ക്കുമെന്ന് എടത്വ ഡിപ്പോയില്‍നിന്ന് അറിയിച്ചു. ഒരാഴ്ചയില്‍ ഏറെയായി ഒറ്റപ്പെട്ട മഴ പെയ്യുന്നുണ്ടെങ്കിലും മൂന്നു ദിവസമായി പ്രദേശത്ത് ശക്തമായ മഴയാണ് അനുഭവപ്പെടുന്നത്. കാലവര്‍ഷം ആരംഭിച്ച് നാലാം വട്ടമാണ് ജലനിരപ്പുയരുന്നത്. മഴക്കെടുതിയില്‍ ഏറെ ദുരിതം അനുഭവിച്ച അപ്പര്‍ കുട്ടനാട്ടുകാര്‍ക്ക് വീണ്ടുമൊരു വെള്ളപ്പൊക്കം കടുത്ത യാതനകള്‍ സൃഷ്ടിക്കും. പമ്പാ, അച്ചന്‍കോവില്‍, മണിമലയാറുകളില്‍ ജലനിരപ്പ് ഉയര്‍ന്ന് വരുകയാണ്. താഴ്ന്ന പ്രദേശങ്ങള്‍ വെള്ളത്തില്‍ മുങ്ങി. ഗ്രാമീണ റോഡുകളും വെള്ളത്തില്‍ മുങ്ങിയിട്ടുണ്ട്. ശക്തമായ മഴയ്‌ക്കൊപ്പം ഉണ്ടാകുന്ന കാറ്റും ആശങ്ക വര്‍ധിപ്പിക്കുന്നുണ്ട്. മഴ ഒരാഴ്ച നീണ്ടുനില്‍ക്കുമെന്ന് കേന്ദ്ര കാലാവസ്ഥ വകുപ്പിന്‍റെ മുന്നറിയിപ്പുള്ളതിനാല്‍ കുട്ടനാട്ടുകാര്‍ ആശങ്കയിലാണ്.

എംഡിഎംഎയും കഞ്ചാവുമായി യുവാക്കൾ പിടിയിൽ

കായംകുളം: എംഡിഎംഎയും കഞ്ചാവുമായി രണ്ടു യുവാക്കൾ പിടിയിലായി. കായംകുളം പത്തിയൂർ എരുവ തെക്ക് കളീക്കൽ പടീറ്റതിൽ അദ്വൈത് (അക്കു-18), കായംകുളം പത്തിയൂർ എരുവ തെക്ക് തട്ടശേരിൽ ആദിത്യൻ (20) എന്നിവരാണ് പിടിയിലായത്. കായംകുളം റേഞ്ച് എക്സൈസ് ഇൻസ്പെക്ടർ മുഹമ്മദ് മുസ്തഫയുടെ നേതൃത്വത്തിലുള്ള സംഘം കായംകുളം കെഎസ്ആർടിസി ബസ് സ്റ്റാൻ ഡിനു സമീപത്തെ കനിസ കടവ് പാലത്തിൽ നടത്തിയ പരിശോധനയിലാണ് ഇവർ പിടിയിലായത്. എറണാകുളത്തുനിന്ന് എംഡിഎംഎ ഇറക്കുമതി ചെയ്ത് കായംകുളം കേന്ദ്രീകരിച്ച് വിൽപ്പന നടത്തുന്ന ആളാണ് പിടിയിലായ അക്കു എന്നും ഇയാളുടെ ഇടനിലക്കാരെയും ഉപഭോക്താക്കളെയും പറ്റി വിവരങ്ങൾ ലഭിച്ചിട്ടുണ്ടെന്നും എക്സൈസ് ഇൻസ്‌പെക്ടർ പറഞ്ഞു. അസി. എക്സൈസ് ഇൻസ്പെക്ടർ (ഗ്രേഡ്) ഷുക്കൂർ, സിവിൽ എക്സൈസ് ഓഫീസർ മുഹ്സിൻ, നന്ദഗോപാൽ, രാഹുൽകൃഷ്ണൻ, ദീപു, രഞ്ജിത്, ഷഫീക്ക്, വനിതാ സിവിൽ എക്സൈസ് ഓഫീസർ നിമ്മി കൃഷ്ണൻ എന്നിവർ റെയ്ഡിൽ പങ്കെടുത്തു. സൈബർ സെല്ലിന്‍റെ സഹായത്തോടെയാണ് പ്രതികളെ അറസ്റ്റ് ചെയ്തത്.

റോഡ് തോട്; കണ്ണടച്ച് അധികൃതർ

തുറവൂർ: പ്രധാന റോഡ് കുഴികൾ നിറഞ്ഞ് തോടായിട്ടും നടപടിയെടുക്കാതെ അധികൃതർ. കുഴികളും വെള്ളക്കെട്ടും നിറഞ്ഞ തുറവൂർ -കുമ്പളങ്ങി റോഡിൽ യാത്രക്കാരുടെ നടുവൊടിയുമ്പോഴും പരിഹാരത്തിന് നടപടിയില്ല. നിരവധി കെഎസ്ആർടിസി, സ്വകാര്യ ബസുകൾ സർവീസ് നടത്തുന്ന റോഡിന്‍റെ ശോച്യാവസ്ഥ പരിഹരിക്കുന്നതിന് കുഴികളടച്ച് പൂർണമായി റോഡ് ടാറിംഗ് നടത്തുകയാണ് ഏകപരിഹാരം. എ.എം. ആരിഫ് എംഎൽഎ ആയിരിക്കെ 9 വർഷം മുമ്പാണ് അവസാനമായി റോഡ് ടാർ ചെയ്തത്. തുടർന്ന് കുറച്ചുകാലങ്ങൾക്കു ശേഷം തകർന്നു തുടങ്ങിയ റോഡിൽ ലക്ഷങ്ങൾ ചെലവഴിച്ച് ഇടയ്ക്കിടെ അറ്റകുറ്റപ്പണി നടത്തിയെങ്കിലും യാതൊരു പ്രയോജനവുമുണ്ടായില്ല. ചിലയിടങ്ങളിൽ റോഡിന്‍റെ ഭാഗം ഇടിഞ്ഞുതാഴുന്നുണ്ട്. വെള്ളക്കെട്ടും വ്യാപകം. കുഴികളിൽ വീഴാതിരിക്കാൻ വെട്ടിച്ചുമാറ്റുമ്പോൾ ഇരുചക്ര വാഹന യാത്രക്കാർ അപകടത്തിൽപ്പെടുന്നത് പതിവായി. മഴക്കാലത്ത് കുഴികളിലാകെ വെള്ളം കെട്ടിനിൽക്കുകയാണ്. കഴിഞ്ഞദിവസം വൈകിട്ട് എഴുപുന്ന പി.എസ്. കവലയ്ക്ക് സമീപം ബൈക്കിൽ സഞ്ചരിക്കുകയായിരുന്ന ദമ്പതികൾക്കു പരിക്കേറ്റതാണ് അവസാന സംഭവം. റോഡിൽ തെറിച്ചുവീണ ഇവർ പിന്നാലെയെത്തിയ കാറിനടിയിൽപ്പെടാതെ തലനാരിഴയ്ക്കാണ് രക്ഷപ്പെട്ടത്. എലിവേറ്റഡ് ഹൈവേ നിർമാണം നടക്കുന്ന തുറവൂർ -അരൂർ മേഖലയിൽ ദേശീയപാതയുടെ സമാന്തര റോഡുകളായ തുറവൂർ -കുമ്പളങ്ങി റോഡ്, തുറവൂർ-മാക്കേക്കടവ് റോഡ് എന്നിവയുടെ നവീകരണത്തിനായി കഴിഞ്ഞ മാർച്ചിൽ 8.5 കോടി രൂപ ദേശീയപാത അഥോറിട്ടി പൊതുമരാമത്ത് വകുപ്പിന് കൈമാറിയിരുന്നു. കാലവർഷം ആരംഭിക്കുന്നതിന് മുമ്പ് പ്രവൃത്തികൾ പൂർത്തീകരിക്കേണ്ടിയിരുന്നെങ്കിലും നടപടികൾ ഒച്ചിഴയും വേഗത്തിലാണെന്ന് മാത്രം. ദേശീയപാതയിൽ തുറവൂർ -അരൂർ എലിവേറ്റഡ് ഹൈവേ നിർമാണത്തെ തുടർന്ന് ഗതാഗതക്കുരുക്കിൽപ്പെടുന്ന വാഹനങ്ങൾ ഈ റോഡിനെയാണ് ആശ്രയിക്കുന്നത്. വലിയ കുഴികൾ രൂപപ്പെട്ടിരിക്കുന്നതിനാൽ സ്കൂൾ ബസ് അടക്കമുള്ള വാഹനങ്ങൾ നിരങ്ങിയാണ് ഇതുവഴി കടന്നുപോകുന്നത്. ദേശതോടിന് കിഴക്കുഭാഗത്തെ വളവിൽ മാടംഭാഗത്ത് ഒരു മഴപെയ്താൽ കുഴികളിൽ വെള്ളക്കെട്ടാകുന്നത് വാഹനങ്ങൾക്കും കാൽനടയാത്രക്കാർക്കും ഭീഷണിയാണ്. റോഡിൽ കാനയില്ലാത്തതാണ് വെള്ളക്കെട്ടിന് കാരണം. റോഡ് തകർന്നതോടെ വാഹനങ്ങൾക്ക് കേടുപാടുകൾ സംഭവിക്കുന്നത് ദിനംപ്രതി വർധിച്ചു. പൂർണമായി തകർന്ന റോഡിൽ കാൽനടയാത്ര പോലും അസാധ്യമാണ്. യാത്രക്കാർ വളരെയധികം ക്ലേശിച്ചാണ് ഇതുവഴി കടന്നുപോകുന്നത്. വർഷങ്ങളായി കുഴിയടയ്ക്കൽ നാടകം മാത്രമാണ് നടക്കുന്നത്. തകർച്ചയിലായ റോഡിലുണ്ടായിരുന്ന കുഴികൾ കാലവർഷം ആരംഭിച്ചതോടെ ഇരട്ടിയിലധികമായി.

അല്‍ഫോന്‍സാമ്മയുടെ മുറിയില്‍ പ്രാര്‍ഥിക്കാന്‍ വിശ്വാസികളുടെ തിരക്ക്

ഭരണങ്ങാനം: ഭാരതസഭയുടെ അനുഗ്രഹമായ വിശുദ്ധ അൽഫോൻസാമ്മയുടെ മാധ്യസ്ഥ്യം തേടി വിശ്വാസികള്‍ ഭരണങ്ങാനത്തേക്ക് ഒഴുകുന്നു. അല്‍ഫോന്‍സാമ്മയുടെ കബറിടത്തിലെത്തി പ്രാർഥിക്കാനും തങ്ങളുടെ യാചനകളും അർഥനകളും അൽഫോൻസാമ്മ വഴി ദൈവത്തിലേക്ക് അർപ്പിക്കാനുമായി നാടിന്‍റെ നാനാഭാഗത്തു നിന്നും തീർഥാടകപ്രവാഹമാണ്. അൽഫോൻസാമ്മ ജീവിച്ച് മരിച്ച മഠവും സന്ദർശിച്ചാണ് ആളുകൾ മടങ്ങുന്നത്. അല്‍ഫോന്‍സാമ്മയുടെ മുറിയില്‍, കട്ടിലിനരികേ ജീവിതദുഃഖങ്ങള്‍ പങ്കുവയ്ക്കുന്നു. നിയോഗങ്ങള്‍ എഴുതി സമര്‍പ്പിക്കുന്നു. നിറമിഴികളോടെ വരുന്നവര്‍ നിറമനസോടെയാണ് തിരികെ പോകുന്നത്. വിശുദ്ധയുടെ ജീവിതം കണ്ടു മനസിലാക്കാന്‍, അല്‍ഫോന്‍സാമ്മ ഉപയോഗിച്ച മേശ, കസേര, കുട, ചെരുപ്പ്, പേന തുടങ്ങിയവയെല്ലാം ഉള്‍പ്പെടുത്തിയ മ്യൂസിയം ഏറ്റവും മികച്ച രീതിയില്‍ ക്രമപ്പെടുത്തിയിരിക്കുന്നു. ക്ലാരമഠത്തില്‍ 1936 മുതല്‍ 1946 വരെ ജീവിച്ച അല്‍ഫോന്‍സാമ്മ ദൈവകരങ്ങളിലേക്ക് തന്‍റെ ആത്മാവിനെ സമര്‍പ്പിച്ചിട്ട് ഇത് എഴുപത്തിയൊമ്പതാമത്തെ വര്‍ഷം. വിശുദ്ധയെന്ന് ബനഡിക്ട് പതിനാറാമന്‍ പാപ്പ പ്രഖ്യാപിച്ചിട്ട് 17 വര്‍ഷം. ഇന്നും അല്‍ഫോന്‍സാ എന്ന നാമം ലോകമെമ്പാടും മാറ്റൊലികൊള്ളുന്നു. അല്‍ഫോന്‍സാമ്മ പ്രാര്‍ഥിച്ചിരുന്ന മഠം കപ്പേളയില്‍ പ്രാര്‍ഥിക്കുവാനുള്ള അവസരവും തീര്‍ഥാടകര്‍ക്ക് നല്‍കുന്നുണ്ട്. കൂടാതെ, അവരുടെ നിയോഗങ്ങള്‍ സമര്‍പ്പിച്ച് സിസ്റ്റർമാരും പ്രാര്‍ഥിക്കുന്നു. നിരവധി അത്ഭുത സാക്ഷ്യങ്ങളുമായിട്ടാണ് തീർഥാടകരുടെ മടക്കം.

കഞ്ചാവ് വില്പനയ്ക്കിടെ യുവാവ് പിടിയിൽ

തുറവൂർ: കഞ്ചാവ് വില്പനയ്ക്കിടെ യുവാവ് പോലീസിന്‍റെ പിടിയിലായി. ചന്തിരൂർ കണ്ണോത്ത് പറമ്പിൽ ഇസ്മയിലി(23)നെയാണ് അരൂർ എസ്ഐ എസ്. ഗീതുമോളുടെ നേതൃത്വത്തിൽ അറസ്റ്റ് ചെയ്തത്. അരൂർ പഞ്ചായത്ത് 10-ാം വാർഡിൽ പ്രായപൂർത്തിയാകാത്ത കുട്ടികൾ കഞ്ചാവ് വലിക്കുന്നത് കണ്ട് നടത്തിയ അന്വേഷണത്തിലാണ് പ്രതി കുടുങ്ങിയത്. കഞ്ചാവ് എത്തിച്ചു നൽകിയത് ഇസ്മയിലാണെന്ന് പോലീസിനു ലഭിച്ച രഹസ്യവിവരത്തെത്തുടർന്ന് നടത്തിയ പരിശോധനയിൽ ഇയാളിൽനിന്ന് 300 ഗ്രാം കഞ്ചാവിന്‍റെ പൊതി കണ്ടെടുത്തു. നെടൂർ സ്വദേശിയായ ഇയാൾ കുടുംബത്തോടൊപ്പം ചന്തിരൂരിലെ വാടകവീട്ടിലാണ് താമസം. സ്‌കൂൾ വിദ്യാർഥികളടക്കം നിരവധി പേർക്ക് ഇസ്മയിൽ കഞ്ചാവ് വില്പന നടത്തിവരികയായിരുന്നുവെന്ന് പോലീസ് പറഞ്ഞു. കൊച്ചി പനങ്ങാട് പോലീസ് സ്റ്റേഷനിലെ കഞ്ചാവ് കേസിൽ ഇയാൾ പ്രതിയുമാണ്. പ്രതിയെ ഇന്നു കോടതിയിൽ ഹാജരാക്കി.

കെഎസ്ഇബി കരാർ തൊഴിലാളി പോസ്റ്റ്‌ വീണ് മരിച്ചു

ഹരിപ്പാട്: ശക്തമായ കാറ്റിൽ ഒടിഞ്ഞുവീണ വൈദ്യുതി പോസ്റ്റ് മാറ്റിസ്ഥാപിക്കുന്നതിനിടെ ‌പോസ്റ്റ് മറിഞ്ഞു വീണ് കെഎസ്ഇബി കരാർ തൊഴിലാളി മരിച്ചു. ചങ്ങനാശേരി കോട്ടമുറി തൃക്കൊടിത്താനം പുതുപറമ്പിൽ ഭാസ്കരന്‍റെയും ജഗദമ്മയുടെയും മകൻ അനിൽ കുമാർ(45)ആണ് മരിച്ചത്. കെഎസ്ഇബി കരുവാറ്റ സെക്ഷൻ പരിധിയിലെ ആനാരി വടക്ക് പ്രതിഭ ജംഗ്ഷന് പടിഞ്ഞാറ് ഇന്നലെ രാവിലെ പത്തിനായായിരുന്നു അപകടം. കഴിഞ്ഞദിവസം ഉണ്ടായ ശക്തമായ മഴയിലും കാറ്റിലും ഒടിഞ്ഞുവീണ വൈദ്യുതി പോസ്റ്റ്‌ മാറ്റി സ്ഥാപിക്കാനായി പോസ്റ്റിനു സമീപം കുഴി എടുത്തു. ഇതോടെ പോസ്റ്റ്‌ അനിൽകുമാറിന്‍റെ ദേഹത്തേക്ക് വീഴുകയായിരുന്നു. ഉടൻതന്നെ ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. യാതൊരു സുരക്ഷാമാനദണ്ഡങ്ങളും പാലിക്കാതെയാണ് കരാർ തൊഴിലാളികളെ കൊണ്ട് ജോലി ചെയ്യിപ്പിച്ചത് എന്ന ആക്ഷേപമുണ്ട്. മൃതദേഹം ഹരിപ്പാട് താലൂക്ക് ആശുപത്രി മോർച്ചറിയിൽ. ഭാര്യ: ദീപ. മക്കൾ: ശ്രീലക്ഷ്മി, ശ്രീദേവ്. മരുമകൻ: ബിനു ദാസ്.

പ്ലസ് വൺ വിദ്യാർഥി മുങ്ങിമരിച്ചു

ഹരിപ്പാട്: കൂട്ടുകാരോടൊപ്പം കുളിക്കാനിറങ്ങിയ പ്ലസ് വൺ വിദ്യാർഥി മുങ്ങി മരിച്ചു. കരുവാറ്റ രണ്ടാം വാർഡ് പുത്തൻപറമ്പിൽ (കൊച്ചിത്തറയിൽ) ഷമീറിന്‍റെ മകൻ മുഹമ്മദ് സുഹൈൽ (17) ആണ് മരിച്ചത്. ഇന്നലെ വൈകുന്നേരം മൂന്നിന് കരുവാറ്റ നൂറുൽ ഇസ്ലാം സംഘം പള്ളിക്കു സമീപമുള്ള കുളത്തിൽ കൂട്ടുകാരോടൊപ്പം കുളിക്കുമ്പോൾ മുങ്ങി താഴുകയായിരുന്നു. കുട്ടികൾ ബഹളം വച്ചതിനെത്തുടർന്ന് എത്തിയ പ്രദേശവാസികൾ കരുവാറ്റയിലെ സ്വകാര്യ ആശുപത്രിയിലും പിന്നീട് ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ജീവിക്കാൻ രക്ഷിക്കാനായില്ല. മൃതദേഹം ഹരിപ്പാട് താലൂക്ക് ആശുപത്രി മോർച്ചറിയിൽ. വിയപുരം ഹയർ സെക്കൻഡറി സ്കൂൾ പ്ലസ് വൺ വിദ്യാർഥിയാണ്. മാതാവ് സുലേഖ ബീവി. സഹോദരി: സന ഫാത്തിമ.

കഞ്ചാവുവേട്ട: ഇതര സംസ്ഥാനക്കാർ പിടിയിൽ

അമ്പലപ്പുഴ: ആറു കിലോ കഞ്ചാവുമായി രണ്ട് ഇതരസംസ്ഥാനക്കാർ പിടിയിൽ. ജാർഖണ്ഡ് ദൻബാദ് ബാങ്ക് കോളനി റോഡിൽ മുർഷിദ് (35), ബിഹാർ പ്രയയുഷ്ഗിയപരിയ മറപ്പുരിൽ രാജീവ്കുമാർ (36) എന്നിവരെയാണ് ആലപ്പുഴ ജില്ലാ ലഹരിവിരുദ്ധ സ്ക്വാഡും ആലപ്പുഴ സൗത്ത് പോലീസും ചേർന്ന് കഞ്ചാവുമായി പിടികുടിയത്. ലോ ആൻഡ് ഓർഡർ എഡിജിപിയുടെ ഓപ്പറേഷൻ ഡി. ഹണ്ടിന്‍റെ ഭാഗമായി റെയിൽവേ സ്റ്റേഷൻ, കെഎസ്ആർടിസി സ്റ്റാൻഡ്, പ്രധാനപ്പെട്ട പ്രദേശങ്ങൾ എന്നിവ കേന്ദ്രീകരിച്ച് നടത്തിയ അന്വേഷണത്തിലാണ് ഇവരെ പിടിക്കുടാനായത്. വിൽപ്പനയ്ക്കായി ലഹരിവസ്തുക്കൾ ട്രെയിൻ വഴി കൊണ്ടുവരുന്നതായി രഹസ്യവിവരം ലഭിച്ചതിനെത്തുടർന്ന് നടത്തിയ പരിശോധനയിലാണ് ആലപ്പുഴ ബീച്ച് പത്താം പിയുസ് പള്ളിക്കു സമീപം ബീച്ച് റോഡിൽ കഞ്ചാവ് കൈമാറ്റം ചെയ്യാൻ എത്തിയ പ്രതികൾ പിടിയിലായത്. റെയിൽവേ താത്കാലിക ജീവനക്കാരാണ് പിടിയിലായ പ്രതികൾ. ഒരോ പ്രാവശ്യവും വൻതോതിൽ കഞ്ചാവാണ് ഇവർ ആലപ്പുഴ റെയിൽവേ സ്റ്റേഷനിൽ കൊണ്ടുവന്ന് കൈമാറ്റം ചെയ്തുപോന്നത്. കഴിഞ്ഞ കുറെ മാസങ്ങളായി ജില്ലാ ലഹരിവിരുദ്ധ സ്ക്വാഡ് ദൻബാദ് ട്രെയിനിലെ ജീവനക്കാരെ നിരീക്ഷിച്ചു വരികയായിരുന്നു. ട്രെയിനിൽ എത്തിക്കുന്ന കഞ്ചാവ് താൽകാലിക ജീവനക്കാരായ ഇവർ വെയ്സ്റ്റ് കളയാൻ എന്ന വ്യാജേന ട്രെയിൽവേ സ്റ്റേഷനു പുറത്ത് എത്തിച്ച് ആവശ്യക്കാർക്ക് കൈമാറുകയാണ് ചെയ്തുവന്നത്. നാലു മാസം മുൻപ് 10 കിലോ കഞ്ചാവ് ഉപേക്ഷിച്ച നിലയിൽ കണ്ടെത്തിയിരുന്നു. അതിന്‍റെ അന്വേഷണത്തിന്‍റെ ഭാഗമായി ജില്ലാ ലഹരി വിരുദ്ധ സ്ക്വാഡ് നിരന്തരം റെയിൽവേ സ്റ്റേഷനും പരിസരവും നിരീക്ഷിച്ചുവരികയായിരുന്നു. ഇവർ കഞ്ചാവ് കൈമാറാൻ കൊണ്ടുവന്നവരെക്കുറിച്ച് വിവരം ലഭിച്ചിട്ടുണ്ട്. ഉടൻതന്നെ അവരെ പിടികൂടാൻ ആകുമെന്ന് പോലീസ് അറിയിച്ചു. നർക്കോട്ടിക് സെൽ ഡിവൈഎസ്പി ബി. പങ്കജാക്ഷന്‍റെ നേതൃത്യത്തിലുള്ള ജില്ലാ ലഹരി വിരുദ്ധ സ്ക്വാഡും ആലപ്പുഴ ഡിവൈഎസ്പി മധു ബാബുവിന്‍റെ നേതൃത്വത്തിൽ എസ്ഐ ഉണ്ണികൃഷ്ണൻ നായർ, എഎസ്ഐ വിജു, പ്രൊബേഷൻ എസ്ഐ കണ്ണൻ എസ്. നായർ, സിപിഒമാരായ സജീഷ്, മാർട്ടിൻ, ശ്ര്യം എന്നിവരാണ് പ്രതികളെ പിടികുടിയത്.

വാടകവീട്ടിൽനിന്ന് വയോധിക ദമ്പതികളെ മർദിച്ച് ഇറക്കിവിട്ടെന്ന്

തുറവൂർ: അഞ്ചുമാസത്തെ വീട്ടുവാടക കൊടുക്കാത്തതിനാൽ വയോധിക ദമ്പതികളേയും അവിവാഹിതരായ പെൺമക്കളെയും ഉടമ മർദിച്ച് ഇറക്കിവിട്ടതായി പരാതി. കോടംതുരുത്ത് പഞ്ചായത്ത് ഏഴാം വാർഡിൽ ശ്യാം നിവാസിൽ മനോജിന്‍റെ വീട്ടിൽ വാടകയ്ക്കു താമസിക്കുന്ന തോട്ടത്തിൽ നികർത്ത് വാസു (78), ഭാര്യ ജാനകി (61), മക്കളായ ശാലിനി (45), രേഖ (40) എന്നിവരെയാണ് വീട്ടുടമസ്ഥൻ മനോജും ഇയാളുടെ മകനും ചേർന്നു മർദിച്ചതെന്നു ഇവർ കുത്തിയതോട് പോലീസിൽ നൽകിയ പരാതിയിൽ പറയുന്നു. കഴിഞ്ഞ ചൊവ്വാഴ്ച ഉച്ചയ്ക്കു രണ്ടോടെയാണ് സംഭവമുണ്ടായതെന്ന് ഇവർ പറഞ്ഞു. മനോജും മകനുമായെത്തി ഇവരെ ബലം പ്രയോഗിച്ച് വീട്ടിൽനിന്നു ഇറക്കിവിടാൻ ശ്രമിച്ചു. ഹൃദ്രോഗിയായ വാസുവിനെയും ഇയാളുടെ ഭാര്യ ജാനകിയെയും രണ്ടു പെൺ മക്കളെയും മർദിക്കുകയും വീട്ടിൽനിന്ന് പുറത്താക്കുകയും ചെയ്ത് വാതിൽ അടച്ചുപൂട്ടി. വീട്ടിലെ വൈദ്യതി ബന്ധം വിചേദിച്ചു മടങ്ങിപ്പോയി. പിന്നീട് കുറേ കഴിഞ്ഞ് വീണ്ടുമെത്തിയ ഇവർ വാടകക്കാർ ഒഴിഞ്ഞുപോകില്ലെന്നു കണ്ട് രോഷാകുലരായി വീണ്ടും മർദിച്ചു. ഇവർ ഉച്ചത്തിൽ കരഞ്ഞ് നാട്ടുകാരെ അറിയിച്ചു. വിവരമറിഞ്ഞെത്തിയ കുത്തിയതോട് പോലീസ് കാര്യങ്ങൾ ബോധ്യപ്പെട്ടെങ്കിലും നിങ്ങൾ തത്കാലം രാത്രി ഇവിടെ തന്നെ കഴിച്ചുകൂട്ടാനാണ് ഇവരോട് പറഞ്ഞത്. പ്രമേഹ രോഗം മൂലം വലതു കാലിന്‍റെ വിരലുകൾ മുറിച്ചുമാറ്റപ്പെട്ട ജാനകി നീരുവന്നു പഴുത്ത ഇടതു കാലുമായാണ് ജീവിക്കുന്നത്. ഹൃദ്രോഗിയും വാഹനാപകടത്തെ തുടർന്ന് ഒരു കാലിന് സ്വാധീനമില്ലാത്ത അവസ്ഥയാണ് വാസുവിന്‍റേത്. ഒടുവിൽ രാത്രി രണ്ടു മണിയോടെ ശാലിനിയും രേഖയും ഉമാ തോമസ് എംഎൽഎയെ തങ്ങളുടെ ദുർസ്ഥിതി ഫോണിൽ വിളിച്ചറിയിച്ചു. വിവരം ചോദിച്ചറിഞ്ഞ ഇവർ ദലീമ എംഎൽഎയെ ഈ വിവരം ബോധ്യപ്പെടുത്തി. വിവരമറിഞ്ഞ ദലീമ എംഎൽഎ വാസുവിന്‍റെ മക്കളുമായി ഫോണിൽ സംസാരിച്ചു. തുടർന്ന് രാത്രി രണ്ടോടെ ദലീമ ജോജോ ഇവരെ ഓട്ടോ റിക്ഷയിൽ വീട്ടിലേക്ക് കൊണ്ടുവന്നു. വിവരങ്ങൾ നേരിട്ടു മനസിലാക്കിയ ശേഷം ഇവർക്ക് ഭക്ഷണവും കിടന്നുറങ്ങാനുള്ള സൗകര്യവും തന്‍റെ വീട്ടിൽതന്നെ ചെയ്തു കൊടുത്തു. തുടർന്ന് ഇവർക്ക് താത്കാലിക താമസസൗകര്യവും പരിരക്ഷയും ഉറപ്പുവരുത്താൻ ശ്രമിക്കുകയാണ്. ഇതേത്തുടർന്ന് സാമൂഹ്യ പ്രവർത്തകനായ തെരുവോരം മുരുകനെ വിളിച്ചുവരുത്തി കുത്തിയതോട് പോലീസിന്‍റെ സഹകരണത്തോടെ കുടുംബത്തിന്‍റെ പരിരക്ഷയ്ക്കുവേണ്ട നടപടിൾ സ്വീകരിച്ചു. പട്ടണക്കാട് ബ്ലോക്ക് പഞ്ചായത്തിനിന്ന് ഇവർക്ക് വീട് അനുവദിച്ചിട്ടുണ്ട്. എന്നാൽ, രോഗദുരിതം പേറുന്ന മാതാപിതാക്കളുടെ ചികിത്സയും വീട്ടുവാടകയും ഇവരെ സങ്കടകടലിലാഴ്ത്തുകയാണ്.

സമ്മർദങ്ങളിൽ കീഴടങ്ങാത്ത വി.എസിന്‍റെ സമര ഓർമകളുമായി ഓണാട്ടുകര

കായംകുളം: കെട്ടിയടച്ച പൊതുവഴിക്കു മുന്നിൽ നിസഹായരായവർക്ക് ആശ്വാസം പകരാൻ ഓടിയെത്തിയ വി.എസ്. അച്ചുതാനന്ദന്‍റെ ഓർമകൾ ഇന്നും ഓണാട്ടുകരക്കാർക്ക് ആവേശം. കറ്റാനം കട്ടച്ചിറയിലെ എൻജിനിയറിംഗ് കോളജിന്‍റെ മറവിലെ കൈയേറ്റത്തിന് എതിരെയാണ് ഉറച്ച നിലപാടുമായി പ്രതിപക്ഷ നേതാവായ വി.എസ് അന്ന് എത്തിയത്. എസ്എൻഡിപിയുടെ പിൻബലമായിരുന്നു കോളജിന്‍റെ കരുത്ത്. ഒരു പതിറ്റാണ്ട് മുമ്പായിരുന്നു സംഭവം. വഴിക്കായി സിപിഎമ്മും കോളജിനായി എസ്എൻഡിപിയും ഇരുഭാഗത്തായി നിലയുറപ്പിച്ചതോടെ വിഷയം ചൂടുപിടിച്ചു. കോളജിനോട് ചേർന്ന് തെക്കുവശത്തുണ്ടായിരുന്ന പൊതുവഴിയാണ് കെട്ടിയടച്ചത്. കട്ടച്ചിറ പാടശേഖരത്തിന്‍റെ കിഴക്കേ അതിരിലെ താമസക്കാർക്ക് റോഡിലേക്ക് വേഗത്തിൽ എത്താനുള്ള മാർഗമാണ് ഇതിലൂടെ ഇല്ലാതായത്. അന്നത്തെ യുഡിഎഫ് സർക്കാരിന്‍റെ പിടിപ്പുകേടാണ് ഇതിനു കാരണമെന്നായിരുന്നു സിപിഎം ആക്ഷേപം. തുടർന്ന് റവന്യു രേഖകൾ ഉയർത്തി വില്ലേജ് -താലൂക്ക് ഓഫീസുകൾ ഉപരോധിച്ചും കളക്ടറേറ്റിലേക്ക് മാർച്ച് നടത്തിയും സമരം ശക്തമായി. അന്ന് പ്രതിപക്ഷ നേതാവായിരുന്ന വി.എസ്. അച്യുതാനന്ദൻ കട്ടച്ചിറയിലെത്തി ഐക്യദാർഢ്യം പ്രകടിപ്പിച്ചതോടെ സമരക്കാർ ആവേശത്തിലായി. പൊതുവഴി തുറക്കുന്നതുവരെ സമരരംഗത്ത് ഉറച്ചുനിൽക്കണമെന്ന് അദ്ദേഹം ആഹ്വാനം ചെയ്തു. സമുദായ സമ്മർദങ്ങളിൽ പാവപ്പെട്ടവന്‍റെ അവകാശം നിഷേധിക്കപ്പെടരുതെന്നായിരുന്നു നിലപാട്. അന്നത്തെ പാർട്ടി സെക്രട്ടറി പിണറായി വിജയനും കട്ടച്ചിറയിലെത്തി സമരത്തിന് ഐക്യദാർഢ്യം പ്രകടിപ്പിച്ചിരുന്നു. എന്നാൽ, പിന്നീട് പ്രതിപക്ഷ നേതൃസ്ഥാനത്തുനിന്ന് മാറിയ വി.എസിന് വിഷയത്തിൽ കൂടുതൽ ഇടപെടനായില്ല. പാർട്ടി സെക്രട്ടറിയായിരുന്ന പിണറായി വിജയൻ മുഖ്യമന്ത്രിയായപ്പോഴും പ്രദേശവാസികൾ വഴിയിൽ പ്രതീക്ഷ പുലർത്തിയിരുന്നു. പിന്നീട് വഴി കെട്ടിടയടക്കാൻ നിന്നവർ കോളജ് ഭരണസമിതിയിൽനിന്ന് ഓരോരുത്തരായി ഒഴിവാക്കപ്പെട്ടു. എസ്എൻഡിപി പിൻബലക്കാരിൽനിന്നു കോളജ് ഗോകുലം ഗ്രൂപ്പിന്‍റേതായി മാറി. വഴി പിന്നീട് തുറക്കാനുമായില്ല.

അന്ത്യവിശ്രമം പ്രത്യേകമൊരുക്കിയ സ്ഥലത്ത്

ആലപ്പുഴ: കമ്യൂണിസ്റ്റ് നേതാക്കളായ ടി.വി. തോമസും പി.ടി.പുന്നൂസും അന്ത്യവിശ്രമം കൊള്ളുന്നതിന് ചാരെ വി.എസിന് അന്ത്യവിശ്രമഭൂമി. പുന്നപ്ര സമരനായകന്‍റെ ജ്വലിക്കുന്ന സമരാവേശം അനേകർക്ക് പകർന്ന് ഇനി വലിയ ചുടുകാട്ടില്‍ പ്രത്യേകം സ്ഥലത്ത്. പുന്നപ്ര സമരനായകര്‍ അന്ത്യവിശ്രമം കൊള്ളുന്ന വലിയ ചുടുകാട് ശ്മശാനം വി.എസിന്‍റെ പേരിലാണെന്ന പ്രത്യേകതയുണ്ട്. പ്രമുഖ കമ്യൂണിസ്റ്റ് പാര്‍ട്ടി നേതാക്കളുടെ സംസ്‌കാരച്ചടങ്ങുകളാണ് ഇവിടെ നടക്കുക. സ്മാരകത്തില്‍ സംസ്‌കാരച്ചടങ്ങുകള്‍ക്കായി പ്രത്യേകം വേര്‍തിരിച്ച ഭൂമിയുണ്ട്. പുന്നപ്ര സമര നേതാവായിരുന്ന പി.കെ. ചന്ദ്രാനന്ദന്‍, കെ.ആര്‍. ഗൗരിയമ്മ തുടങ്ങിയ പ്രമുഖ നേതാക്കള്‍ ഇവിടെയാണ് അന്ത്യവിശ്രമം കൊള്ളുന്നത്. എന്നാല്‍, സമരനായകനും സ്ഥാപക നേതാക്കളില്‍ പ്രമുഖനുമായ വി.എസിനായി പ്രത്യേകം സ്ഥലം പാര്‍ട്ടി തയാറാക്കുകായിരുന്നു. വലിയ ചുടുകാട്ടില്‍ പ്രവേശന ഗേറ്റിന്‍റെ ഇടതുഭാഗത്താണ് വിഎസിന്‍റെ സംസ്‌കാരം നിശ്ചയിച്ചിരിക്കുന്നത്. ഇവിടെ പ്രത്യേകം സ്മാരകം തയാറാക്കുന്നുണ്ടോ എന്നു തീരുമാനിച്ചിട്ടില്ല. വലിയ ചുടുകാട്ടില്‍ സംസ്‌കാരച്ചടങ്ങുകള്‍ക്കായുള്ള ഒരുക്കങ്ങള്‍ പൂര്‍ത്തിയാക്കിയത് പ്രത്യേക പരിഗണനകളോടെ. സിപിഎം ഏരിയ സെന്‍ററിന്‍റെ നേതൃത്വത്തിലാണ് ക്രമീകരണങ്ങള്‍ നടന്നത്. രാമച്ചവും വിറകും കൊതുമ്പും മാത്രമാണ് ചിതയ്ക്ക് ഉപയോഗിച്ചതെന്ന് സെന്‍റര്‍ അംഗം പറഞ്ഞു. പാര്‍ട്ടി പ്രവര്‍ത്തകര്‍ മുദ്രാവാക്യം വിളിച്ച് അഭിവാദ്യം അര്‍പ്പിച്ചതിനുശേഷം വിഎസിന്‍റെ മകന്‍ അരുണ്‍കുമാര്‍ ചിതയില്‍ തീ പടർത്തി. മറ്റു ചടങ്ങുകള്‍ ഇവിടെ ഇല്ല. മുഖ്യമന്ത്രി പിണറായി വിജയന്‍ അടക്കമുള്ള പ്രമുഖ നേതാക്കള്‍ക്ക് നില്‍ക്കാനായി പ്രത്യേകം പന്തലും ഒരുക്കിയിരുന്നു.

വി.എസിന്‍റെ ഓർമകളിൽ കെ. നാരായണൻ

കായംകുളം: അവിഭക്ത കമ്യുണിസ്റ്റ് പാർട്ടിയുടെ ആലപ്പുഴ ജില്ലയിലെ ആദ്യത്തെ ജില്ലാ കമ്മിറ്റി അംഗങ്ങളിൽ ഒരാളായി വി.എസിനൊപ്പം പ്രവർത്തിച്ച ഓർമകളിൽ കഴിയുകയാണ് കെ. നാരായണൻ (96). അന്നത്തെ ജില്ലാ കമ്മിറ്റി അംഗമെന്ന നിലയിൽ കായംകുളത്തുനിന്നു ജീവിച്ചിരിക്കുന്നവരിൽ കെ. നാരായണൻ മാത്രമാണുള്ളത്. 1957 ഓഗസ്റ്റ് 17ന് ആലപ്പുഴ ജില്ല നിലവിൽ വന്നെങ്കിലും പാർട്ടിയുടെ ജില്ലാ കമ്മിറ്റി 1956ൽ തന്നെ രൂപീകരിച്ചിരുന്നു. അതിനുവേണ്ടി പ്രത്യേക ജില്ലാ സമ്മേളനം നടത്തിയത് കായംകുളത്തായിരുന്നു. 21 പേരുള്ള ജില്ലാ കമ്മിറ്റിയാണ് തെരഞ്ഞെടുത്തത്. ടി.വി. തോമസ്, വി.എസ്. അച്യുതാനന്ദൻ, എം.ടി. ചന്ദ്രസേനൻ, കെ. കെ. കുഞ്ഞൻ, പി.ജി. പത്മനാഭൻ, ടി.കെ. വർഗീസ് വൈദ്യൻ, എസ്.കെ. ദാസ്, കെ.ആർ. ഗൗരിയമ്മ, സി.ജി. സദാശിവൻ, സി.എസ്. രാമകൃഷ്ണൻ, സി.കെ. കുമാരൻ വക്കീൽ, സി.കെ. ഭാസ്കരൻ, കെ. ദാസ്, പി.കെ. ചന്ദ്രാനന്ദൻ, ആർ. രാജശേഖരൻ തമ്പി, എസ്. ഗോവിന്ദകുറുപ്പ്, പി.ആർ. ജനാർദനൻ, പുതുപ്പള്ളി രാഘവൻ, എൻ. ശ്രീധരൻ, കെ. നാരായണൻ എന്നിവരാണ് അന്ന് ജില്ലാ കമ്മിറ്റിയിൽ തെരഞ്ഞെടുക്കപ്പെട്ടത്. അന്ന് കെ. നാരായണന് 22 വയസായിരുന്നു. ആദ്യ ജില്ലാ കമ്മിറ്റിയിൽ വി.എസ്. സെക്രട്ടറിയും എൻ.എസ് അസി. സെക്രട്ടറിയും ഓഫീസ് സെക്രട്ടറി പള്ളിക്കൽ കെ. കുഞ്ഞുപിള്ളയുമായിരുന്നു. ഈ ജില്ലാ കമ്മിറ്റി പ്രവർത്തിക്കുന്ന അവസരത്തിലാണ് കേരളനിയമസഭയിലേക്കുള്ള ആദ്യ പൊതുതെരഞ്ഞെടുപ്പു നടന്നത്. ജില്ലയിൽ 14ൽ 10 സീറ്റ് പാർട്ടി നേടി. ആദ്യ കമ്യൂണിസ്റ്റ് സർക്കാർ അധികാരത്തിൽ വന്നു. ആദ്യ നിയമസഭാ സ്പീക്കറായി ചെങ്ങന്നൂർ സ്വദേശി കെ. ശങ്കരനാരായണൻ തമ്പി, ഡെപ്യുട്ടി സ്പീക്കറായി കായംകുളം സ്വദേശിനി അഡ്വ. കെ.ഒ. ഐഷാബായിയും കൂടാതെ മൂന്നു മന്ത്രിമാരെയും ആലപ്പുഴ ജില്ല നൽകി.

മഴയിലും തോരാത്ത ആവേശം; കായംകുളത്ത് ജനം ഒഴുകിയെത്തി

കായംകുളം: വിപ്ലവ സൂര്യൻ വി.എസ്. അച്യുതാന്ദന് കായംകുളത്തിന്‍റെ മണ്ണിൽ ആയിരങ്ങളുടെ അന്ത്യാഞ്ജലി. കോരി ച്ചൊരിയുന്ന മഴയിലും തോരാത്ത വിപ്ലവ ആവേശം നെഞ്ചേറ്റി കണ്ണേ കരളേ വി.എസേ എന്ന മുദ്രാവാക്യവുമായി സ്ത്രീകളും കുട്ടികളും പാർട്ടി പ്രവർത്തകരും ഉൾപ്പെടെ വൻ ജനാവലി ഇന്നലെ രാവിലെ മുതലേ കായംകുളത്തേക്ക് ഒഴുകിയെത്തി. ‌ രാവിലെ ഏഴരയോടെ വിലാപയാത്ര ജില്ലാ അതിർത്തിയായ ഓച്ചിറയിൽ എത്തി. ആലപ്പുഴ ജില്ലാ കളക്ടർ അലക്സ് വർഗീസ് പുഷ്പചക്രം അർപ്പിച്ച് അന്ത്യോപചാരം അർപ്പിച്ചു. വി.എസിന്‍റെ ജീവിതവും സമര പോരാട്ടങ്ങളുടെ ചരിത്രവും ഇടപഴകിയ ആലപ്പുഴ ജില്ലയുടെ മണ്ണിലേക്ക് വിലാപയാത്ര പ്രവേശിച്ചപ്പോൾ പാതയോരം ജനസാഗരമായി തീർന്നു. കെപിഎസി നാടകവേദി, കായംകുളം ജിഡിഎം, കരീലക്കുളങ്ങര എന്നിവിടങ്ങളിൽ ജനങ്ങൾക്കും പാർട്ടി പ്രവർത്തകർക്കും അന്ത്യോപചാരം അർപ്പിക്കാൻ അവസരം നൽകി. രാവിലെ എട്ടരയോടെ കായംകുളത്തുനിന്നു വിലാപയാത്ര ഹരിപ്പാട് മണ്ഡലത്തിലേക്ക് കടന്നു. തിരുവനന്തപുരം, കൊല്ലം ജില്ലകൾ കടന്ന് 16 മണിക്കൂർ പിന്നിട്ടാണ് വിലാപയാത്ര ആലപ്പുഴ ജില്ലയുടെ മണ്ണിലേക്ക് പ്രവേശിച്ചത്. എന്നിട്ടും വി.എസിനെ കാത്തുനിന്നവർക്ക് പകലും രാത്രിയും ഒരുപോലെ ആയിരുന്നു. അനേകായിരങ്ങളുടെ സ്നേഹവായ്പുകൾ ഏറ്റുവാങ്ങിയാണ് ജില്ലയുടെ വിപ്ലവമണ്ണിലൂടെ വി.എസിന്‍റെ അവസാന യാത്ര കടന്നുപോയത്.

കണ്ണീർമഴയായി...V.S

മഴയത്തും വരിതെറ്റാതെ പ്രിയ സഖാവിനെ കാണാന്‍ ആരാധകര്‍ അമ്പലപ്പുഴ: മഴയത്തും വരിതെറ്റാതെ തങ്ങളുടെ പ്രിയ സഖാവിനെ കാണാന്‍ ആരാധകര്‍ കാത്തുനിന്നു. മുന്‍മുഖ്യമന്ത്രി വി.എസ്. അച്യുതാനന്ദന്‍റെ മൃതദേഹം വഹിച്ചുകൊണ്ടുള്ള വാഹനം പകല്‍ 12.30 ഓടെ പുന്നപ്രയിലെ വേലിക്കകത്ത് വീട്ടില്‍ എത്തിച്ചു. വീടിന്‍റെ മുമ്പിലും പരിസരങ്ങളിലും തങ്ങളുടെ പ്രിയനേതാവിനെ കണ്ട് അഭിവാദ്യം അര്‍പ്പിക്കാന്‍ ആയിരങ്ങളാണ് കാത്തുനിന്നത്. വാഹനത്തില്‍നിന്നും മൃതദേഹം പുറത്തെടുക്കാനായി അണികളെ നിയന്ത്രിക്കാന്‍ പോലീസ് നന്നേ പാടുപെടേണ്ടിവന്നു. രണ്ടു വരികളായാണ് അണികളെ കടത്തിവിട്ടത്. നിരയില്‍ കൊച്ചുകുട്ടികളും യുവാക്കളുമായിരുന്നു അധികവും ഉണ്ടായിരുന്നത്. ഇതിനിടെ പകല്‍ 2.30 ഓടെ പെയ്ത മഴയിലും പതറാതെ ആരാധകര്‍ നിരയില്‍ തന്നെനിന്നു. പലരും കുടചൂടിയും പത്രങ്ങളും പ്ലാസ്റ്റിക് ഷീറ്റ് നിവര്‍ത്തുപിടിച്ചും കണ്ണേ...കരളേ...വി.എസേ... എന്ന മുദ്രാവാക്യം വിളിച്ച് മഴ വകവയ്ക്കാതെ നടന്നുനീങ്ങി. അണികളെ തടഞ്ഞ് റിക്രിയേഷന്‍ ഗ്രൗണ്ടില്‍ സൗകര്യം ഒരുക്കാമെന്ന നിര്‍ദേശം നല്‍കി അണികളെ സംയമനപ്പെടുത്തിയതോടെയാണ് മൂന്നുമണിയോടെ മൃതദേഹം ജില്ലാ കമ്മിറ്റി ഓഫീസില്‍ പൊതുദര്‍ശനത്തിന് കൊണ്ടുപോകാനായത്. രാവിലെ 9.30 ഓടെയാണ് മൃതദേഹം വഹിച്ചുകൊണ്ടുള്ള വാഹനം അമ്പലപ്പുഴ മണ്ഡലത്തിലെ തോട്ടപ്പള്ളിയില്‍ പ്രവേശിക്കുന്നത്. തോട്ടപ്പള്ളിക്കു പുറമേ പുറക്കാട്, അമ്പലപ്പുഴ കച്ചേരിമുക്ക് വണ്ടാനം മെഡിക്കല്‍ കോളജ് ജംഗ്ഷന്‍ എന്നിവിടങ്ങളിലും ആരാധകര്‍ തടിച്ചുകൂടിയിരുന്നു. തോട്ടപ്പള്ളിയില്‍നിന്നു മൃതദേഹം വീട്ടുവളപ്പില്‍ എത്തിക്കാന്‍ മൂന്നു മണിക്കൂറോളം വേണ്ടിവന്നു.

ഗതാഗതനിയന്ത്രണം ഏര്‍പ്പെടുത്തി

ആലപ്പുഴ: മുന്‍ മുഖ്യമന്ത്രി വി.എസ്. അച്യുതാനന്ദന്‍റെ സംസ്‌കാരച്ചടങ്ങുമായി ബന്ധപ്പെട്ട് നഗരത്തില്‍ പോലീസ് ഗതാഗതനിയന്ത്രണം ഏര്‍പ്പെടുത്തി. 1. എറണാകുളം തണ്ണീര്‍മുക്കം ഭാഗങ്ങളില്‍നിന്നും വരുന്ന വാഹനങ്ങള്‍ പവര്‍ ഹൗസ് ജംഗ്ഷന്‍, കോണ്‍വന്‍റ് സ്‌ക്വയര്‍ കണ്ണന്‍വര്‍ക്കി പാലം, കളക്‌ടറേറ്റ് ജംഗ്ഷന്‍ വഴി പടിഞ്ഞാറോട്ട് വന്നു ഡബ്ല്യു ആന്‍ഡ് സി വഴി ബീച്ച് റോഡില്‍വന്ന് പോലീസ് പരേഡ് ഗ്രൗണ്ടിന് പടിഞ്ഞാറുവശം ആളെ ഇറക്കിയതിനുശേഷം വാഹനം വിജയ പാര്‍ക്ക് വഴി വന്നു കനാല്‍ സൈഡില്‍ പാര്‍ക്ക് ചെയുക. 2. എസി റോഡ് വഴി വരുന്ന വാഹനങ്ങള്‍ ജിഎച്ച് ജംഗ്ഷന്‍ വഴി പടിഞ്ഞാറോട്ടു വന്നു ഡബ്ല്യു ആന്‍ഡ് സി വഴി ബീച്ച് റോഡില്‍വന്നു പോലീസ് പരേഡ് ഗ്രൗണ്ടിന് പടിഞ്ഞാറുവശം ആളെ ഇറക്കിയതിനുശേഷം വാഹനം വിജയ പാര്‍ക്ക് വഴി വന്നു കനാല്‍ സൈഡില്‍ പാര്‍ക്ക് ചെയ്യുക. കൂടാതെ വസതിയില്‍നിന്നു വിലാപയാത്ര പുറപ്പെട്ടതിനു ശേഷം എസി റോഡ് വഴി വരുന്ന വാഹനങ്ങള്‍ മങ്കൊമ്പ് പൂപ്പള്ളിയില്‍നിന്നു ഇടത്തോട്ട് കയറി അമ്പലപ്പുഴ വഴി ഹൈവേയില്‍ പ്രവേശിച്ചു പോകേണ്ടതാണ്. കൂടാതെ വാഹനങ്ങള്‍ പാര്‍ക്ക് ചെയ്യുന്നതിനായി എസ്ഡി കോളജ് ഗ്രൗണ്ട്, ചിന്മയ വിദ്യാലയം എന്നിവ പ്രയോജനപ്പെടുത്തേണ്ടതാണ്. 3. കായംകുളം ഭാഗത്തുനിന്നു വരുന്ന വാഹനങ്ങള്‍ ജിഎച്ച് ജംഗ്ഷന്‍ വഴി പടിഞ്ഞാറോട്ട് വന്നു ഡബ്ല്യു ആന്‍ഡ് സി വഴി ബീച്ച് റോഡില്‍ വന്നു പോലീസ് പരേഡ് ഗ്രൗണ്ടിന് പടിഞ്ഞാറുവശം ആളെ ഇറക്കിയതിനുശേഷം വാഹനം വിജയ പാര്‍ക്ക് വഴിവന്ന് കനാല്‍ സൈഡില്‍ പാര്‍ക്ക് ചെയ്യുക. ചെറിയ വാഹനങ്ങള്‍ ബീച്ച് റോഡില്‍ പാര്‍ക്ക് ചെയ്യുക. 4. വസതിയിലെ പൊതുദര്‍ശനവുമായി ബന്ധപ്പെട്ട് പഴയനടക്കാവ് റോഡിലെ വാഹനഗതാഗതം 22 രാത്രി 11 മുതല്‍ ഇന്നു രാവിലെ 11 വരെപൂര്‍ണമായും നിരോധിച്ചിട്ടുള്ളതാണെന്ന് ജില്ലാ പോലീസ് മേധാവി അറിയിച്ചു. കെഎസ്ആര്‍ടിസി ദീര്‍ഘദൂര സര്‍വീസുകള്‍ക്ക് നിയന്ത്രണം ആലപ്പുഴ: അന്തരിച്ച മുന്‍ മുഖ്യമന്ത്രി വി.എസ്. അച്യുതാനന്ദന്‍റെ സംസ്‌കാരം നടക്കുന്നതിന്‍റെ ഭാഗമായി നഗരത്തില്‍ ഏര്‍പ്പെടുത്തിയിരിക്കുന്ന നിയന്ത്രണങ്ങളുടെ ഭാഗമായി ചേര്‍ത്തല ഭാഗത്തുനിന്നുവരുന്ന ദീര്‍ഘദൂര സര്‍വീസുകള്‍ രാവിലെ ഒമ്പതു മുതല്‍ വൈകിട്ട് അഞ്ചു വരെ കൊമ്മാടി ബൈപാസ് കയറി കളര്‍കോട് വഴി അമ്പലപ്പുഴ ഭാഗത്തേക്കു പോകും. അമ്പലപ്പുഴ ഭാഗത്തുനിന്ന് വരുന്ന ദീര്‍ഘദൂര സര്‍വീസുകള്‍ കളര്‍കോട് ബൈപാസ് കയറി ചേര്‍ത്തല ഭാഗത്തേക്കും പോകും.

വിപ്ലവസൂര്യൻ അസ്തമിക്കുമ്പോൾ...

ആലപ്പുഴ: സമരജീവിതത്തിന്‍റെ പോരാട്ടങ്ങള്‍ തന്നെയായിരുന്ന യാത്രകള്‍. ആ യാത്രകൾക്ക് വിരാമമിട്ട് വി.എസ് ഇന്ന് സ്വന്തം മണ്ണിലേക്കു തിരിച്ചെത്തുന്നു അന്തിയുറങ്ങാൻ... നാലു വയസുകാരനായിരുന്നപ്പോള്‍ അമ്മ വിടപറഞ്ഞ നാളില്‍ തുടങ്ങിയതാവും നൂറ്റാണ്ടോളം നീണ്ട ആ പോരാട്ടം. ഒടുവില്‍, കേരളം കണ്ട ഏറ്റവും വലിയ പോരാട്ടങ്ങളിലൊന്നില്‍ ചോരചിന്തി മരിച്ച സഖാക്കള്‍ക്കു നടുവിലാണ് ഒടുങ്ങാത്ത സ്മരണകള്‍ക്കു തുടക്കമിട്ട് ആ സൂര്യൻ അസ്തമിക്കുന്നത്. രാഷ്ട്രീയ പോരാട്ടങ്ങളുടെ കടുപ്പമെല്ലാം മാറ്റിവച്ച് ഓണമുണ്ണാനെത്തിയിരുന്ന പറവൂര്‍ വേലിക്കകത്തു വീട്ടില്‍ വി.എസ് അവസാനമായെത്തും. അവിടെയാണ് പൊതുദര്‍ശനം. തുടര്‍ന്ന്, തൊഴിലാളിശക്തിയില്‍നിന്നു വി.എസ് പടുത്ത പാര്‍ട്ടിയുടെ ജില്ലാ കമ്മിറ്റി ഓഫിസില്‍. ബീച്ചിനു സമീപം റിക്രിയേഷന്‍ ഗ്രൗണ്ടില്‍ സജ്ജമാക്കുന്ന വേദിയില്‍. തുടര്‍ന്ന് മൂന്നുവരെ ആലപ്പുഴയിലെ പൗരാവലിക്ക് പ്രിയപ്പെട്ട സഖാവിന് ആദരമര്‍പ്പിക്കാം. അവിടെനിന്ന് അന്ത്യയാത്ര. എല്ലാ പോരാട്ടങ്ങളുടെയും അങ്കത്തട്ടായിരുന്ന ആലപ്പുഴയില്‍ ആ നീണ്ട യാത്ര അവസാനിക്കുകയാണ്. പുന്നപ്രയിലെ വെന്തലത്തറ വീട്ടില്‍നിന്നു പ്രൈമറി സ്‌കൂളിലേക്കു പോയ നാളുകളില്‍ത്തന്നെ വിവേചനങ്ങളോടു പടവെട്ടിയതാണു വിഎസ്. പാടത്തു വിയര്‍ത്തിട്ടു കൂലി ചോദിക്കാന്‍ പോലും ഭയന്ന കുട്ടനാട്ടിലെ കര്‍ഷകത്തൊഴിലാളികളെ പോരാടാന്‍ പഠിപ്പിച്ചാണ് അദ്ദേഹം രാഷ്ട്രീയദൗത്യം തുടങ്ങിയത്. പുന്നപ്ര വയലാര്‍ പോരാട്ടത്തിനു സഖാക്കളെ സംഘടിപ്പിക്കുമ്പോഴാണ് അദ്ദേഹത്തിന് പാര്‍ട്ടിയുടെ നിര്‍ദേശപ്രകാരം ഒളിവില്‍ പോകേണ്ടിവന്നത്. ചില വലിയ തിരിച്ചടികള്‍ അദ്ദേഹം നേരിട്ടതും ആലപ്പുഴയില്‍ തന്നെയാണ്. മാരാരിക്കുളം നിയമസഭാ മണ്ഡലത്തില്‍ 1996ലെ പരാജയവും 2015ല്‍ ജന്മനാട്ടില്‍ നടന്ന സിപിഎം സംസ്ഥാന സമ്മേളനത്തില്‍നിന്നു വിമര്‍ശനങ്ങളുടെ കൂരമ്പുകള്‍ക്കിടയിലൂടെയുള്ള ഇറങ്ങിപ്പോക്കും കേരള രാഷ്ട്രീയ ചരിത്രത്തില്‍ ഇന്നും ചര്‍ച്ച ചെയ്യപ്പെടുന്ന സംഭവങ്ങളാണ്. ഏതു പ്രതിസന്ധികള്‍ക്കിടയിലും അദ്ദേഹം മുടക്കാത്ത രണ്ട് ആലപ്പുഴപ്പതിവുകള്‍ ഉണ്ടായിരുന്നു. പുന്നപ്ര വയലാര്‍ രക്തസാക്ഷി അനുസ്മരണവും വേലിക്കകത്തു വീട്ടിലെ ഓണസദ്യയും. രണ്ടും അവസാനം നടന്നതു 2019ലാണ്. ഓണത്തിനു വന്നു മടങ്ങിയ വി.എസ് ഒക്ടോബറില്‍ പുന്നപ്ര വയലാര്‍ രക്തസാക്ഷിത്വ വാര്‍ഷികത്തിനും എത്തി. അപ്പോഴേക്കും അദ്ദേഹം ക്ഷീണിതനായിരുന്നു. പിന്നെ ആലപ്പുഴ യാത്രകള്‍ നടന്നില്ല. ഇന്ന് അവസാന യാത്ര ചേതനയറ്റാണെങ്കിലും ജനങ്ങളുടെ മനസില്‍ ആ ചിത്രം സജീവമായിരിക്കും. മുട്ടുവരെ ജൂബ തെറുത്തുവച്ച് ഉയര്‍ത്തിപ്പിടിച്ച മുഷ്ടി, അനീതിയോടു വിട്ടുവീഴ്ചയില്ലായ്മയുടെ ഗൗരവമുള്ള മുഖം. ആരെക്കൊണ്ടും ഇങ്ക്വിലാബ് വിളിപ്പിക്കാന്‍ പോന്ന കാഴ്ച. വിപ്ലവതാഴ‌്‌വരയിൽ പറന്നുയർന്ന് വിഎസ് എന്ന വിപ്ലവസൂര്യൻ ആലപ്പുഴ ചുടുകാടിൽ അസ്തമിച്ച് ഇന്ന് അന്തിയുറങ്ങും.

കാർത്തികപ്പള്ളിയിലെ സംഘർഷം; സിപിഎമ്മും പോലീസും നടത്തിയ ഒത്തുകളിയെന്ന് കോൺഗ്രസ്

ഹരിപ്പാട്: കാർത്തികപ്പള്ളിയിൽ സ്‌കൂൾ കെട്ടിടം തകർന്നു വീണതിനെത്തുടർന്ന് യൂത്ത് കോൺഗ്രസ്, കെഎസ്‌യു പ്രവർത്തകർ നടത്തിയ മാർച്ചിൽ സംഘർഷമുണ്ടാക്കാൻ പോലീസും സിപിഎമ്മും ചേർന്ന് ഒത്തുകളി നടത്തുകയായിരുന്നുവെന്ന് കോൺഗ്രസ് കാർത്തികപ്പള്ളി, ഹരിപ്പാട് ബ്ലോക്ക് കമ്മിറ്റികൾ അരോപിച്ചു. നൂറ്റിയൻപതോളം പ്രവർത്തകർ പങ്കെടുക്കുമെന്ന് അറിയിച്ചിട്ടും പോലീസ് ബാരിക്കേഡ് സ്ഥാപിക്കുകയോ മറ്റു സുരക്ഷാ മുൻകരുതലുകൾ സ്വീകരിക്കുകയോ ചെയ്യാതെ സിപിഎം പഞ്ചായത്ത് അംഗത്തിന്‍റെ നേതൃത്വത്തിലുള്ള സംഘത്തിനു സമരക്കാർക്കു നേരെ അക്രമം നടത്താൻ വഴിയൊരുക്കുകയായിരുന്നു. വകുപ്പുതല അന്വേഷണം പ്രഖ്യാപിച്ച് കുറ്റകാർക്കെതിരേ നടപടി സ്വീകരിക്കാത്തപക്ഷം അനിശ്ചിതകാല സമരപരിപാടികളുമായി മുന്നോട്ടുപോകുമെന്ന് ബ്ലോക്ക് കമ്മിറ്റി പ്രസിഡന്‍റുമാരായ ഷംസുദീൻ കായിപ്പുറം, കെ.കെ. സുരേന്ദ്രനാഥ് എന്നിവർ അറിയിച്ചു.

വെളിച്ചെണ്ണ അഞ്ഞൂറിനു മുകളിലെത്തി

കോട്ടയം: ഓണത്തിനു മുന്‍പേ വെളിച്ചെണ്ണ വില തിളച്ചുമറിയുകയാണ്. കേരഫെഡിന്‍റെ കേര ബ്രാന്‍ഡ് വെളിച്ചെണ്ണ ലിറ്ററിന് 529 രൂപയായി ഉയര്‍ത്തി. അതായത് ഒറ്റയടിക്ക് 110 രൂപയുടെ വര്‍ധന. ഇക്കൊല്ലം ജനുവരിക്കു ശേഷം ഒരു ലിറ്ററിനുണ്ടായ വര്‍ധന 329 രൂപ. ഓണത്തിന് എണ്ണവില 600 കടന്നാല്‍ അതിശയം വേണ്ട. മറ്റു മുന്‍നിര ബ്രാന്‍ഡുകളുടെ വെളിച്ചെണ്ണ ലിറ്ററിന് 550 കടന്നു. കൊപ്ര വില വര്‍ധിച്ചതോടെ പിടിച്ചുനില്‍ക്കാന്‍ കഴിയാത്തതിനാലാണ് വെളിച്ചെണ്ണയ്ക്ക് വില കൂട്ടേണ്ടിവന്നതെന്ന് കേരഫെഡ് പറയുന്നു. ഈ വര്‍ഷം ആദ്യം ഒരു ലിറ്റര്‍ വെളിച്ചെണ്ണ വില 200 രൂപയില്‍ താഴെയായിരുന്നു. ഇത്തരത്തില്‍ വെളിച്ചെണ്ണ വില ഉയരുന്നത് നിരവധി സാധനങ്ങളുടെ വില വര്‍ധിക്കുന്നതിനും കാരണമായിട്ടുണ്ട്. കേരളം, തമിഴ്നാട് ഉള്‍പ്പെടെ സംസ്ഥാനങ്ങളില്‍ തേങ്ങ ഉത്പാദനം കുറഞ്ഞതും കേരളത്തില്‍ നാളികേര ഇറക്കുമതിയിലുണ്ടായ ഇടിവും വില വര്‍ധിക്കാന്‍ കാരണമായി. ഈ വര്‍ഷത്തിന്‍റെ തുടക്കത്തില്‍ ഒരു കിലോ തേങ്ങയ്ക്ക് 33 രൂപയായിരുന്നു വില. നിലവില്‍ കിലോയ്ക്ക് വില 90 രൂപ കടന്നു. ഉപ്പേരി വിലയിലും വലിയ വര്‍ധനവാണ് പ്രതീക്ഷിക്കുന്നത്.

മുക്കുപണ്ടം പണയം വച്ച് പണം തട്ടിയെടുത്തയാൾ പിടിയിൽ

അടൂർ: സ്വകാര്യ ധനകാര്യ സ്ഥാപനത്തിൽ മുക്കുപണ്ടം പണയം വച്ച് 18.56 ലക്ഷം രൂപ തട്ടിയെടുത്ത സംഭവത്തിൽ ഒരാൾ അറസ്റ്റിൽ. ഏഴംകുളം പ്ലാന്‍റേഷൻ മുക്കിൽ വാടകയ്ക്ക് താമസിക്കുന്ന കരുനാഗപ്പള്ളി കല്ലേലിഭാഗം പുത്തൻപുരയിൽ വീട്ടിൽ ബിപിന‌െയാണ് (47) അടൂർ പോലീസ് അറസ്റ്റ് ചെയ്തത്. അടൂർ നഗരത്തിലുള്ള സ്വകാര്യ ധനകാര്യ സ്ഥാപനത്തിൽ നിന്നാണ് ബിപിൻ 2024-25 കാലഘട്ടത്തിൽ പലപ്പോഴായിട്ടാണ് മുക്കുപണ്ടം പണയം വച്ച് പണം തട്ടിയെടുത്തത്. ഓഡിറ്റിംഗിനിടെയാണ് സ്വർണം മുക്കുപണ്ടമാണെന്ന് ധനകാര്യ സ്ഥാപന അധികൃതർ തിരിച്ചറിഞ്ഞു. തുടർന്ന് പണയം വച്ച രേഖകളിൽ നിന്നും ബിപിന്‍റേതാണ് ഉരുപ്പടികളെന്നു തെളിഞ്ഞു. അടൂർ പോലീസിൽ നൽകിയ പരാതിയേ തുടർന്ന് എസ്എച്ച്ഒ ശ്യാം മുരളി,എസ്ഐ നകുലരാജൻ, എഎസ്ഐ കെ.എസ്.മഞ്ജുമോൾ, സിപിഒമാരായ രാജഗോപാൽ, ഡി.ജിനു, എസ്.സുനിത എന്നിവരുടെ നേതൃത്വത്തിൽ നടന്ന അന്വേഷണത്തിലാണ് ബിപിനെ അറസ്റ്റു ചെയ്തത്.

കേന്ദ്ര നിര്‍ദേശം ജിലേബിയുടെ മധുരം കുറയ്ക്കുമോ ?

കോട്ടയം: ജിലേബിയുടെയും സമൂസയുടെയും ദോഷവശങ്ങള്‍ വ്യക്തമാക്കുന്ന മുന്നറിയിപ്പ് നല്‍കണമെന്ന കേന്ദ്ര നിര്‍ദേശം ബേക്കറികൾക്കു തിരിച്ചടിയാകുമോ. ഇത്തരം ഭക്ഷ്യവസ്തുക്കളില്‍ അടങ്ങിയിരിക്കുന്ന കൊഴുപ്പ്, മധുരം എന്നിവയുടെ അളവ് രേഖപ്പെടുത്തണമെന്നാണു നിര്‍ദേശം. ആദ്യഘട്ടത്തില്‍ കേന്ദ്രസര്‍ക്കാര്‍ സ്ഥാപനങ്ങളെയാണ് ഉള്‍പ്പെടുത്തിയിരിക്കുന്നതെങ്കിലും രണ്ടാഘട്ടത്തില്‍ നിര്‍ദേശം നിയമമായി എല്ലാ സ്ഥലങ്ങളിലേക്കും വരുമെന്നാണ് ബേക്കറി വ്യാപാരികള്‍ ഉള്‍പ്പെടെയുള്ളവര്‍ കരുതുന്നത്. വടക്കന്‍ ജില്ലകളിലേതുപോലെ ഇല്ലെങ്കിലും ജില്ലയിലെ ബേക്കറികളിലെല്ലാം ജിലേബി വില്‍പ്പന പൊടിപൊടിക്കാറുണ്ട്. പലചരക്ക് കടകളില്‍ ഉള്‍പ്പെടെ പായ്ക്കറ്റ് ജിലേബി വില്‍പ്പനയും നടക്കുന്നുണ്ട്. പത്തിലൊന്നു ബേക്കറികള്‍ പോലും ജിലേബി ഉള്‍പ്പെടെയുള്ള മധുര പലഹാരങ്ങള്‍ സ്വന്തമായി ഉത്പാദിപ്പിക്കുന്നില്ല. വിതരണക്കാരില്‍ നിന്നോ ബോര്‍മയുള്ള ബേക്കറികളില്‍ നിന്നോ വാങ്ങുകയാണ് പതിവ്. ഇവയുടെ ഉത്പാദനം സംബന്ധിച്ചോ, അടങ്ങിയിരിക്കുന്ന മധുരം സംബന്ധിച്ചോ യാതൊരു വിവരവും വില്‍പ്പനക്കാര്‍ക്കില്ലെന്നതാണു വസ്തുത. ജില്ലയില്‍ മിക്കയിടങ്ങളിലും വില്‍ക്കുന്ന ജിലേബി ഉള്‍പ്പെടെയുള്ള മധുര പലഹാരങ്ങള്‍ യാതൊരു മാനദണ്ഡവും പാലിക്കാതെയാണ് ഉത്പാദിപ്പിക്കുന്നതും വിറ്റഴിക്കുന്നതും. ഉഴുന്ന് ഉള്‍പ്പെടെയുള്ള ചേരുവകളാണ് ഉപയോഗിക്കേണ്ടതെങ്കിലും അമിതമായി മൈദാ മാവും പഞ്ചസാരയും കൃത്രിമ നിറവും ചേര്‍ത്തുണ്ടാക്കി വില്‍പ്പന നടത്തുന്നതായാണ് ആക്ഷേപം. സമൂസയുടെ കാര്യവും വ്യത്യസ്തമല്ല. മുമ്പ് ഉരുളക്കിഴങ്ങ് അടങ്ങിയ വെജ് സമൂസ മാത്രമുണ്ടായിരുന്നതെങ്കില്‍ ഇപ്പോള്‍ മീറ്റ്, ചിക്കന്‍, മുട്ട, പനീര്‍ ഉള്‍പ്പെടെയുള്ളവ ഉപയോഗിച്ചുള്ള സമൂസകള്‍ വിപണിയില്‍ ലഭ്യമാണ്. മൈദ കൊണ്ടുണ്ടാക്കിയ ഷീറ്റില്‍ മസാല ചേര്‍ത്തു വേവിച്ച പച്ചക്കറിയോ ഇറച്ചിയോ നിറച്ച് എണ്ണയില്‍ വറുത്താണ് സമൂസയുണ്ടാക്കുന്നത്. രുചികരണമാണെങ്കിലും എണ്ണയുടെ അളവ് ഗുരുതര ആരോഗ്യ പ്രശ്നങ്ങള്‍ക്കു കാരണമാകുമെന്നാണു വിലയിരുത്തല്‍. വില്ലനാകുന്നത് എണ്ണ; നിറം കറുപ്പായാലും മാറില്ല കോട്ടയം: സമൂസയും ജിലേബിയുമൊക്കെ വറുത്തുകോരുന്ന എണ്ണയാണു പ്രധാന വില്ലനെന്നു ഡോക്ടര്‍മാര്‍ ഉള്‍പ്പെടെയുള്ളവര്‍ പറയുന്നു. ചുരുക്കം ചിലയിടങ്ങള്‍ ഒഴിച്ചാല്‍ ഒരേ ചട്ടിയില്‍ ആവര്‍ത്തിച്ച് ഉപയോഗിക്കുന്ന എണ്ണയിലാണ് ഇത്തരം പലഹാരങ്ങള്‍ ഏറെയും ഉത്പാദിപ്പിക്കുന്നത്. പല ബോര്‍മകളിലും അടുക്കളകളിലും എണ്ണപ്പലഹാരമുണ്ടാകുന്ന വലിയ ചീനച്ചട്ടികള്‍ കഴുകാറേയില്ല. എണ്ണയുടെ അളവ് കുറയുന്നതനുസരിച്ച് വീണ്ടും വീണ്ടും ഒഴിച്ചു കൊടുക്കുക മാത്രമാണ് ചെയ്യുക. പലയിടങ്ങളിലെയും എണ്ണ ആവര്‍ത്തിച്ച് ഉപയോഗിച്ച് കരിനിറത്തിലായിരിക്കും. ആവര്‍ത്തിച്ച് ഉപയോഗിക്കുന്ന എണ്ണ കാന്‍സര്‍ ഉള്‍പ്പെടെയുള്ള രോഗങ്ങളിലേക്കു വഴി തുറക്കുമെന്ന് ആരോഗ്യ വിദഗ്ധര്‍ പറയുന്നു. പല തരത്തിലുള്ള പലഹാരമുണ്ടാക്കി ബേക്കറികളിലേക്കും ഹോട്ടലുകളിലേക്കും കൊടുക്കുന്ന അടുക്കളകളില്‍ പലതിലും ഒരേ എണ്ണയിലാണ് വിവിധ തരം പലഹാരങ്ങളുണ്ടാക്കുന്നത്. ഓരോ പലഹാരത്തിന്‍റെയും പൊട്ടും പൊടിയുമെല്ലാം എണ്ണയില്‍ കിടന്നു കരിഞ്ഞ് അടുത്ത ഇനത്തിനൊപ്പം ചേരും. പലഹാര നിര്‍മാണത്തിനായി ഉപയോഗിക്കുന്ന എണ്ണ സംബന്ധിച്ചും ആക്ഷേപങ്ങളേറെ. വെളിച്ചെണ്ണ വില അഞ്ഞൂറിലേക്ക് അടുത്തതോടെ മിക്കയിടങ്ങളിലും പാം ഓയിലും സൂര്യകാന്തി എണ്ണയുമാണ് ഉപയോഗിക്കുന്നത്. മാര്‍ക്കറ്റ് വിലയേക്കാള്‍ താഴ്ന്ന നിരക്കില്‍ ഇത്തരം എണ്ണ വില്‍ക്കുന്ന സ്ഥലങ്ങളില്‍ നിന്നാണ് തട്ടുകടകളില്‍ ഉള്‍പ്പെടെ എണ്ണ വാങ്ങുന്നത്. ഗുണമേന്മ കുറഞ്ഞ മായം കലര്‍ത്തിയ എണ്ണയാണ് ഇത്തരത്തില്‍ കുറഞ്ഞ വിലയ്ക്കു വില്‍ക്കുന്നത്. മുന്നറിയിപ്പ് നിര്‍ദേശം നല്‍കുന്നതിനേക്കാള്‍ ഉത്പാദനത്തിലെ അപാകത പരിഹരിക്കുകയാണ് വേണ്ടതെന്ന് ഒരു വിഭാഗം ബേക്കറി ഉടമകള്‍ പറയുന്നു. ഒരേ സ്ഥലത്തു നിന്നാകും പല ബേക്കറികളിലേക്കും സമൂസയും ജിലേബിയും ഉള്‍പ്പെടെയുള്ള പലഹാരങ്ങള്‍ എത്തുക. ഇവ എങ്ങനെ, എവിടെയുണ്ടാക്കുന്നുവെന്ന് പല ബേക്കറി ഉടമകള്‍ക്കും അറിയില്ല. ഭക്ഷ്യ സുരക്ഷാ വകുപ്പിന്‍റേതുള്‍പ്പെടെയുള്ള പരിശോധനകളുമില്ല. ഉപയോഗിക്കുന്ന മൈദ, ഇറച്ചി, പച്ചക്കറികള്‍, നിറം, പഞ്ചസാര എന്നിവയുടെ ഗുണനിലവാരം സംബന്ധിച്ചും ആര്‍ക്കും വ്യക്തതയില്ല.

ശബരി റെയില്‍വേ: പാര്‍ലമെന്‍റില്‍ എംപിമാര്‍ ചോദ്യങ്ങള്‍ ഉന്നയിക്കും

കോട്ടയം: നിര്‍ദിഷ്ട ശബരി റെയില്‍വേ പദ്ധതിയിലേക്ക് സ്ഥലം ഏറ്റെടുക്കലും നിര്‍മാണ ജോലികളും അനിശ്ചിതമായി നീളുന്ന സാഹചര്യത്തില്‍ കേന്ദ്രസര്‍ക്കാരിന്‍റെ നിലപാടറിയാന്‍ കേരളത്തില്‍ നിന്നുള്ള എംപിമാര്‍ പാര്‍ലമെന്‍റില്‍ റെയില്‍വേ മന്ത്രിയോട് ചോദ്യങ്ങള്‍ ഉന്നയിക്കും. ശബരി പദ്ധതിക്ക് നിര്‍ദേശം നല്‍കാന്‍ റെയില്‍വേ സംഘം നടത്താനിരുന്ന സന്ദര്‍ശനം അനിശ്ചിതമായി നീളുന്ന സാഹചര്യത്തിലാണ് എംപിമാര്‍ ഇടപെടുന്നത്. പദ്ധതിയുടെ ചെലവ് പൂര്‍ണമായി കേന്ദ്രം വഹിക്കുമോ അതല്ലെങ്കില്‍ എത്ര തുക മുടക്കും എന്നതാണ് ഒരു ചോദ്യം. സംസ്ഥാന സര്‍ക്കാരും എംപിമാരും ആവശ്യപ്പെട്ടതനുസരിച്ചാണ് മുന്‍പ് കേന്ദ്രം മരവിപ്പിച്ച അങ്കമാലി-എരുമേലി ശബരി പദ്ധതി നടപ്പാക്കാന്‍ അടുത്തയിടെ തീരുമാനമായത്. ഇതിനുശേഷം നടപടികള്‍ എത്ര മുന്നോട്ടു നീങ്ങി എന്നതാണ് മറ്റൊരു ചോദ്യം. പദ്ധതിയിലേക്ക് 70 കിലോമീറ്റര്‍ ദൂരം സ്ഥലം 2025ല്‍ ഏറ്റെടുത്തിരുന്നു. ഇവിടെ സ്ഥലം ഉടമകള്‍ക്ക് നഷ്ടപരിഹാരം നല്‍കാന്‍ എന്തു നടപടിയെടുക്കും എന്നതാണ് മൂന്നാമത്തെ ചോദ്യം. ബെന്നി ബഹനാന്‍, ഡീന്‍ കുര്യാക്കോസ്, അടൂര്‍ പ്രകാശ്, ആന്‍റോ ആന്‍റണി എന്നിവരാണ് ലോക്‌സഭയില്‍ നാളെ ചോദ്യങ്ങള്‍ ഉന്നയിക്കുക. പെരുമ്പാവൂര്‍, തൊടുപുഴ, പാലാ, എരുമേലി എന്നിവിടങ്ങളിലാണ് അടിയന്തരമായി ഓഫീസുകള്‍ തുറക്കേണ്ടത്.

ജില്ലാക്കോടതി പാലം: സമീപ ഇടവഴികൾ അടക്കം സഞ്ചാരയോഗ്യമാക്കണം

ആലപ്പുഴ: നിലവിലുള്ള ജില്ലാ ക്കോടതി പാലം പുനർനിർമിക്കുന്നതിനായി പൊളിക്കുന്നതിനു മുൻപുതന്നെ വാഹനഗതാഗതം തിരിച്ചുവിടുന്നതിന്‍റെ ഭാഗമായി സമീപ ഇടവഴികൾ അടക്കമുള്ള തകർന്ന റോഡുകൾ അറ്റകുറ്റപ്പണികൾ നടത്തിയും വൃക്ഷ ശിഖരങ്ങൾ വെട്ടിനീക്കിയും സഞ്ചാരം സുഗമമാക്കണം. മാസങ്ങൾക്കു മുൻപേ അധികൃതർക്ക് നിവേദനം നൽകിയിട്ടും നടപടി സ്വീകരിക്കാത്തത് ഖേദകരമാണെന്ന് തത്തംപള്ളി റസിഡന്‍റ്സ് അസോസിയേഷൻ (ടിആർഎ) ചൂണ്ടിക്കാട്ടി. എല്ലാ സമീപ വഴികളിലും തിരക്ക് ക്രമാതീതമായി ഉയരുമെന്നുള്ളത് സ്പഷ്ടമാണെങ്കിലും നിസംഗതയാണ് അധികാരികളെ നയിക്കുന്നത്. പാലം പൊളിക്കൽ തീയതി മാറ്റിവച്ചുകൊണ്ടിരുന്നിട്ടും ഇതുവരെ മുന്നൊരുക്കങ്ങളില്ല. യാത്രക്കാർ ഇനി കൂടുതലായി ഉപയോഗിക്കേണ്ടിവരുന്നതും വാഹനങ്ങൾ അങ്ങോട്ടുമിങ്ങോട്ടും ഒരുമിച്ച് പോകാൻതക്ക ഇടമില്ലാത്തതുമായ ഇടവഴികൾ പൊട്ടിപ്പൊളിഞ്ഞും കുണ്ടുംകുഴിയുമായി കിടക്കുന്നു. ഗതാഗതം ആകെ ക്ലേശകരമാണെന്ന് ടിആർഎ പ്രസിഡന്‍റ് തോമസ് മത്തായി കരിക്കംപള്ളിൽ എടുത്തുകാട്ടി. ഇപ്പോൾ തന്നെ അപകടങ്ങൾക്ക്‌ സാധ്യതയേറി. വർഷങ്ങൾ നീണ്ടേക്കാവുന്ന സ്ഥിരം ഗതാഗതക്കുരുക്കുകൾ മുൻകൂട്ടി ഒഴിവാക്കാൻ ഏർപ്പാടുകൾ സ്വീകരിക്കാത്തത് ജനാധിപത്യവിരുദ്ധമാണ്. അതിനായി സൂചനാ ബോർഡുകൾ സ്ഥാപിക്കുകയും റോഡിലുള്ള പാർക്കിംഗ് നിയന്ത്രിക്കുകയും ചെയ്യേണ്ടതുണ്ട്. ട്രാഫിക് പോലീസിന്‍റെ കൃത്യമായ ഗതാഗതനിയന്ത്രണത്തോടൊപ്പം പെറ്റികേസ് വേട്ട കഴിവതും ഒഴിവാക്കണം. അനധികൃത വഴി വാണിഭവും മാർഗതടസം സൃഷ്ടിക്കുന്ന ഏച്ചുകെട്ടലുകളും തൂണുകളും മറ്റും നിശ്ചയമായും നീക്കം ചെയ്യണം. ജില്ലാക്കോടതി - കിടങ്ങാംപറമ്പ് - കോർത്തശേരി - ഫിനിഷിംഗ് പോയിന്‍റ് റോഡിന്‍റെയും അതിലേക്ക് എത്തിച്ചേരുന്ന കിടങ്ങാംപറമ്പ് - ബോട്ട് ജെട്ടി ഇടറോഡ് അടക്കമുള്ള വഴികളിലെയും വിവിധ തടസങ്ങളാണ് ഉടനടി ഒഴിവാക്കേണ്ടതെന്ന് ടിആർഎ സൂചിപ്പിച്ചു. അടിയന്തരമായി ടാറിംഗ് നടത്തുകയും തടസമായ മരച്ചില്ലകൾ ഒഴിവാക്കുകയും വേണം.

റവ.ഡോ. സേവ്യര്‍ ജെ. പുത്തന്‍കളം പൗരോഹിത്യസുവര്‍ണ ജൂബിലി നിറവില്‍

ചങ്ങനാശേരി: റവ.ഡോ. സേവ്യര്‍ ജെ. പുത്തന്‍കളം പൗരോഹിത്യസുവര്‍ണ ജൂബിലി നിറവില്‍. പുത്തന്‍കളം കുടുംസംഗമവും പൗരോഹിത്യ സുവര്‍ണജൂബിലി ആഘോഷവും നാളെ ചങ്ങനാശേരി സെന്‍റ് മേരീസ് മെത്രാപ്പോലീത്തന്‍പള്ളിയില്‍ നടക്കും. രാവിലെ 9.15ന് ജുബിലേറിയന്‍റെ മുഖ്യകാര്‍മികത്വത്തില്‍ വിശുദ്ധകുര്‍ബാന. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം സന്ദേശം നല്‍കും. 11ന് പാരിഷ്ഹാളില്‍ നടക്കുന്ന സമ്മേളനം കര്‍ദിനാള്‍ മാര്‍ ജോര്‍ജ് ആലഞ്ചേരി ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, ജോബ് മൈക്കിള്‍ എംഎല്‍എ, കുടുംബയോഗം പ്രസിഡന്‍റ് റവ.ഡോ. ടോം പുത്തന്‍കളം, സുപ്പീരിയര്‍ ജനറാള്‍ സിസ്റ്റര്‍ ലിറ്റി എഫ്‌സിസി, മുന്‍പ്രൊവിന്‍ഷ്യാള്‍ ഡോ. സിസ്റ്റര്‍ പ്രസന്ന സിഎംസി, എന്‍.സി. തോമസ് എന്നിവര്‍ പ്രസംഗിക്കും. 1949 ഓഗസ്റ്റ് 26ന് പുളിങ്കുന്ന് കണ്ണാടി പുത്തന്‍കളം ജോസഫ്-ഏലിയാമ്മ ദമ്പതികളുടെ മകനായാണ് റവ.ഡോ. സേവ്യര്‍ ജെ. പുത്തന്‍കളത്തിന്‍റെ ജനനം. 1975 ഡിസംബര്‍ 17ന് പൗരോഹിത്യം സ്വീകരിച്ചും. ബംഗളൂരു ധര്‍മരാം, ബെല്‍ജിയം ലുവൈന്‍ കാത്തലിക് സര്‍വകലാശാല എന്നിവിടങ്ങളിലാണ് ഉപരിപഠനം. സീറോമലബാര്‍ എക്യുമെനിക്കല്‍ കമ്മീഷന്‍ സെക്രട്ടറി, തിയോളജി പ്രഫസര്‍ എന്നീ നിലകളിലും വിവിധ ഇടവകകളില്‍ വികാരിയായും സേവനം അനുഷ്ഠിച്ചു. വിവിധ പുസ്തകങ്ങളുടെ രചയിതാവുമാണ്. ഇത്തിത്താനം സെന്‍റ് ജോസഫ്‌സ് പ്രീസ്റ്റ് ഹോമില്‍ വിശ്രമജീവിതം നയിച്ചുവരികയാണ്.

അശാസ്ത്രീയമായ ദേശീയപാതാ നിർമാണം; ഒരു പ്രദേശമാകെ വെള്ളക്കെട്ടിൽ

അന്പലപ്പുഴ: അശാസ്ത്രീയമായ ദേശീയപാതാ നിർമാണത്താൽ ഒരു പ്രദേശമാകെ വെള്ളക്കെട്ടിൽ. പായൽക്കുളങ്ങര ക്ഷേത്രത്തിന് വടക്കു ഭാഗത്തുള്ള 40 വീടുകളാണ് കനത്ത മഴയിൽ മുങ്ങിയിരിക്കുന്നത്. പ്രളയകാലത്തു പോലും ഒരുതുള്ളി വെള്ളം കയറാതിരുന്ന ഈ പ്രദേശം ഇപ്പോൾ അധികൃതരുടെ അനാസ്ഥയെത്തുടർന്ന് കടലിന് സമാനമായിരിക്കുകയാണ്. പായൽക്കുളങ്ങര ജംഗ്ഷനിലെ ദേശീയപാതാ നിർമാണത്തിലെ അശാസ്ത്രീയത മൂലമാണ് ഈ കുടുംബങ്ങൾക്ക് പുറത്തിറങ്ങാൻ കഴിയാതെ വന്നിരിക്കുന്നത്. നേരത്തെ മഴ വെള്ളം റോഡിന് കുറുകെയുള്ള ചാലിലൂടെ കിഴക്കു ഭാഗത്തുള്ള വെള്ളാഞ്ഞിലിത്തോട്ടിലേക്ക് ഒഴുകുമായിരുന്നു. ഇപ്പോൾ ദേശീയപാതാ വികസനത്തിന്‍റെ ഭാഗമായി ഇത് അടഞ്ഞതോടെ മഴവെള്ളം കുത്തനെ റോഡിന് പടിഞ്ഞാറ് ഭാഗത്തേക്ക് ഒഴുകുകയാണ്. ഇതോടെ കഴിഞ്ഞ ഏതാനും ദിവസമായി തോരാതെ പെയ്ത മഴയിൽ പ്രദേശമാകെ പ്രളയത്തിന് തുല്യമായി. പ്രാഥമികാവശ്യങ്ങൾ പോലും നിർവഹിക്കാൻ കഴിയാതെ ദുരിതമനുഭവിക്കുകയാണ് ഈ കുടുംബങ്ങൾ. മഴ മാറാതെ നിൽക്കുന്നതിനാൽ ഓരോ ദിവസം കഴിയും തോറും ജലനിരപ്പ് ഉയരുകയാണ്. സമീപത്തെ ഏതാനും വീട്ടുകാർ വാടകവീടുകളിലേക്കും മറ്റ് ബന്ധു വീടുകളിലേക്കും താമസം മാറിക്കഴിഞ്ഞു. അധികൃതരുടെ അനാസ്ഥമൂലം സംഭവിച്ച ഈ ദുരിതത്തിന് അടിയന്തര പരിഹാരം കാണണമെന്നാണ് ഇവരുടെ ആവശ്യം.

അനുശോചന പ്രവാഹം

ആലപ്പുഴ: സമരരംഗത്തും ഭരണമേഖലയിലും കേരള രാഷ്ട്രീയത്തിന് ഉജ്വലമായ സംഭാവനകൾ നൽകിയ മുൻ മുഖ്യമന്ത്രി വി.എസ്. അച്ചുതാനന്ദന്‍റെ നിര്യാണത്തിൽ കേരള കോൺഗ്രസ് -എം ജില്ലാ സെക്രട്ടേറിയറ്റ് യോഗം അനുശോചനം രേഖപ്പെടുത്തി. ജില്ലാ പ്രസിഡന്‍റ് വി.സി. ഫ്രാൻസിസ് അധ്യക്ഷത വഹിച്ചു. വി.ടി. ജോസഫ്, ജേക്കബ് തോമസ് അരികുപുറം, ജന്നിംഗ്സ് ജേക്കബ്, ജോസഫ് കെ. നെല്ലുവേലി, അഡ്വ. പ്രദീപ്‌ കൂട്ടാല, ടി. കുര്യൻ, എം.എസ്. നൗഷാദ് അലി, ജോസ് കൊണ്ടോടിക്കരി, ബിനു ഐസക് രാജു, കെ.പി. കുഞ്ഞുമോൻ, ടി.പി. ജോൺ താമരവേലി, ഷിബു ലൂക്കോസ്, തോമസ് ഫിലിപ്പോസ്, ഷീൻ സോളമൻ എന്നിവർ പ്രസംഗിച്ചു. ആലപ്പുഴ: കേരളത്തിൻെ മുന്‍ മുഖ്യമന്ത്രിയും മുന്‍ പ്രതിപക്ഷ നേതാവും സിപിഎമ്മിന്‍റെ സമരപോരാളിയുമായിരുന്ന വി.എസ്. അച്യുതാനന്ദന്‍റെ വേര്‍പാടില്‍ കേരള കോണ്‍ഗ്രസ്-എം ആലപ്പുഴ ജില്ലാ പ്രസിഡന്‍റ് വി.സി. ഫ്രാന്‍സിസ്, ജില്ലാ ജനറല്‍ സെക്രട്ടറി ടി, കുര്യന്‍ എന്നിവര്‍ അഗാധമായ ദുഃഖവും അനുശോചനവും രേഖപ്പെടുത്തി. ആലപ്പുഴ: കേരള ബസ് ട്രാന്‍സ്‌പോര്‍ട്ട് അസോസിയേഷന്‍ (കെബിടിഎ) ആലപ്പുഴ ജില്ലാ കമ്മിറ്റി അനുശോചിച്ചു. ഒരു യഥാര്‍ഥ കമ്യുണിസ്റ്റ് എങ്ങനെ ആയിരിക്കണമെന്ന് വാക്കിലും പ്രവൃത്തിയിലും ജീവിതത്തിലൂടെയും പ്രകടമാക്കി ജനങ്ങളെ കമ്യൂണിസ്റ്റ് ആശയങ്ങളിലേക്ക് ആകര്‍ഷിച്ച അഴിമതിരഹിതനായ ജനസേവകനായിരുന്നു വി.എസ്. അച്ചുതാനന്ദനെന്ന് യോഗം അനുസ്മരിച്ചു. യോഗത്തില്‍ ജില്ലാപ്രസിഡന്‍റ് പി.ജെ. കുര്യന്‍ അധ്യക്ഷനായിരുന്നു. സെക്രട്ടറി എസ്.എം. നാസര്‍, ടി.പി. ഷാജിലാല്‍, എന്‍. സലിം, ബാബു നൗഷാദ്, റിനു സഞ്ചാരി, ബിജു ജേവിക, സുനീര്‍ ഫിര്‍ദോസ്, സനല്‍ സലിം എന്നിവർ പ്രസംഗിച്ചു. ആലപ്പുഴ: മുൻ മുഖ്യമന്ത്രിയും ജനകീയ നേതാവുമായിരുന്ന വി.എസ്. അച്യുതാനന്ദന്‍റെ ദേഹവിയോഗത്തിൽ സോഷ്യലിസ്റ്റ് പാർട്ടി (ഇന്ത്യ) സംസ്ഥാന സെക്രട്ടേറിയറ്റ് യോഗം അനുശോചനം രേഖപെടുത്തി. നിലപാടുകളിൽ ഉറച്ചുനിന്ന നിശ്ചയ ദാർഢ്യമുള്ള നേതാവും ഭരണാധികാരിയുമായിരുന്നു സഖാവ് വി.എസ് എന്ന് യോഗം വിലയിരുത്തി. പ്രസിഡന്‍റ് കായിക്കര ബാബു അധ്യക്ഷത വഹിച്ചു. മനോജ്‌ ടി. സാരംഗ്, സി.പി. ജോൺ, ടോണി മാത്യു, കാട്ടുകുളം ബഷീർ, വർഗീസ് തോമസ് തുടങ്ങിയവർ പ്രസംഗിച്ചു. ആലപ്പുഴ: നീതിക്കും സമത്വത്തിനും വേണ്ടിയുള്ള ഉജ്വലമായ പോരാട്ടത്തെ നയിച്ച വി.എസിന്‍റെ വേര്‍പാടില്‍ കേരള കയര്‍ വര്‍ക്കേഴ്‌സ് സെന്‍റര്‍ (സിഐടിയു) അത്യഗാധമായ ദുഃഖവും അനുശോചനവും രേഖപ്പെടുത്തി. ജീവിത പ്രാരാബ്ദം വളരെ ചെറിയ പ്രായത്തില്‍ തന്നെ വി.എസിനെ ഒരു കയര്‍ ഫാക്ടറി തൊഴിലാളിയാക്കി മാറ്റിയിരുന്നു. കയര്‍ ഫാക്ടറിയിലെ തൊഴിലാളി ജീവിതം, സാധാരണ ജനങ്ങളുടെ ദുരിതജീവിതത്തിനു പരിഹാരം കാണുന്നതിനുള്ള പോരാട്ടത്തിലേക്കാണ് അദ്ദേഹത്തെ എത്തിച്ചത്. ആലപ്പുഴ കയര്‍ ഫാക്ടറി തൊഴിലാളി യൂണിയന്‍റെ പ്രഥമ പ്രസിഡന്‍റായിരുന്നു. സമരനേതാവെന്ന നിലയിലും ഭരണാധികാരിയെന്ന നിലയിലും കയര്‍ത്തൊഴിലാളി ജനവിഭാഗത്തിന്‍റെ ജീവിതത്തിന് ആശ്വാസം നല്‍കുന്നതില്‍ വി.എസ് അസാമാന്യമായ പങ്കുവഹിച്ചു. അമ്പലപ്പുഴ: വിഎസിന്‍റെ മരണത്തിൽ പിന്നാക്ക വിഭാഗത്തിന് തീരാനഷ്ടമെന്ന് ഭാരതീയ വേലൻ സൊസൈറ്റി. ആദരാഞ്ജലികൾ അർപ്പിക്കുകയും കുടുംബത്തിന്‍റെ ദുഃഖത്തിൽ പങ്കുചേരുകയും ചെയ്യുന്നുവെന്ന് ഭാരതീയ വേലൻ സൊസൈറ്റി ജില്ലാ പ്രസിഡന്‍റ് സി. ഹരിദാസ്, സെക്രട്ടറി സി.കെ. സുകുമാരപ്പണികർ എന്നിവർ അനുശോചന സന്ദേശത്തിൽ പറഞ്ഞു.

ആലപ്പുഴയുടെ വിപ്ലവമണ്ണിന് തീരാനഷ്ടം: സിപിഐ

ആലപ്പുഴ: വി.എസ്. അച്യുതാനന്ദന്‍റെ വിയോഗം വിപ്ലവ ഭൂമിയായ ആലപ്പുഴയ്ക്ക് തീരാനഷ്ടമാണെന്ന് സിപിഐ ജില്ലാ കൗൺസിൽ അനുശോചന സന്ദേശത്തിലൂടെ അറിയിച്ചു. തൊഴിലാളി സമരങ്ങളുടെ ഈറ്റില്ലമായ ആലപ്പുഴയിലെ ഒരു സാധാരണ കർഷകത്തൊഴിലാളി കുടുംബത്തിൽ ജനിച്ച വി.എസ് പിന്നീട് പുന്നപ്ര-വയലാർ അടക്കമുള്ള പോരാട്ടങ്ങളുടെ മുന്നണി പോരാളിയായി. സിപിഎമ്മിനും ഇടതുപക്ഷത്തിനും ഒപ്പം കേരളത്തിന്‍റെ പൊതു സമൂഹത്തിനൊന്നാകെ പകരം വെക്കാനാവാത്ത സംഭാവനകളാണ് വി.എസ് നൽകിയത്. മുഖ്യമന്ത്രി, പ്രതിപക്ഷ നേതാവ്, സിപിഎം പൊളിറ്റ് ബ്യുറോ അംഗം, കേന്ദ്ര കമ്മിറ്റി അംഗം, എൽഡിഎഫ് കൺവീനർ എന്നീ നിലകളിലെല്ലാം പ്രവർത്തിക്കുമ്പോഴും ജില്ലയിലെ വിവിധ വിഷയങ്ങളിൽ നിതാന്ത ശ്രദ്ധ ചെലുത്താൻ അദ്ദേഹത്തിന് കഴിഞ്ഞിരുന്നു. രാഷ്ട്രീയത്തിന് അതീതമായി നീതി നിഷേധങ്ങൾക്കെതിരേ എന്നും ശക്തവും യുക്തവുമായ പ്രതിരോധമുയർത്തിയ നേതാവായിരുന്നു വി.എസ്. സാധാരണക്കാരന്‍റെ ഭാഷയിൽ തന്നെ അവരോട് സംവദിച്ച് ഒട്ടനവധി വിഷയങ്ങൾക്ക് പരിഹാരം കാണാൻ ശ്രമിക്കുന്ന സഖാവിന്‍റെ ശൈലി ഏറെ സ്വീകാര്യത പൊതുസമൂഹത്തിൽ ഉണ്ടാക്കി. ഒരു ഭരണാധികാരി എന്ന നിലയിൽ ജില്ലയുടെ സമഗ്ര വികസനത്തിന് വി.എസ് നൽകിയ സംഭാവനകൾ ചെറുതല്ല. ജീവിതകാലത്തിനുടനീളം ആദർശ വിശുദ്ധിയും കമ്മ്യുണിസ്റ്റ് ശൈലിയും കാത്ത് സൂക്ഷിച്ച വി എസിന്‍റെ വിയോഗം പുരോഗമന വിപ്ലവ പ്രസ്ഥാനങ്ങൾക്ക് എന്നും ഒരു തീരാനഷ്ടമായി നിലനിൽക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]